CLOSE WINDOW

D3999
བོད་ཡིག

/[ ]@//'phags pa sa bcu'i mdo sde'i gleng gzhi bzhugs/ @##/ /'phags pa sa bcu'i mdo sde'i gleng gzhi bshad pa/ 'jam dpal gzhon nur gyur pa la phyag 'tshal lo//byang chub sems dpa'i tshogs chen po zhes bya ba la/ chen po ni yon tan dang grangs kyis so/ /de la thams cad kyang phyir mi ldog pa zhes bya ba nas bzung ste/ byang chub sems dpa' thams cad kyi sde snod kyi yon tan sgrub pa shin tu yongs su rdzogs pa bskal pa brjod du med pa rgyun mi 'chad par rab tu bstan pas yon tan bsngags pa'i bstan pa zad mi shes pa sha stag ces bya ba'i bar 'dis ni yon tan gyi che ba bstan to//'dir byang chub sems dpa' rnams kyi yon tan gyi khyad par ni rnam pa lngar brjod de/ mngon sum du lung bstan pa thob pa dang / sangs rgyas nyid du nye ba dang /yid kyi cho 'phrul dang / lus kyi cho 'phrul dang / ngag gi cho 'phrul lo/ /de la phyir mi ldog pa zhes bya ba 'dis mngon sum du lung bstan pa thob par bstan te/ /'di ltar sa brgyad pa la mi skye ba'i chos la bzod pa thob pas phyir mi ldog pa'i byang chub sems dpa' dag sangs rgyas nyid du sangs rgyas rnams kyis mngon sum du lung ston te/'di nyid kyi bshad pa ni/ thams cad kyang byang chub sems dpa' thams cad kyi ye shes kyi spyod yul rab tu thob pa'i gnas pas gnas pa zhes bya ba'o/ /byang chub sems dpa' thams cad kyi ye shes ni de bzhin nyid la dmigs pa'o//de'i spyod yul ni kun brtags pa'i chos thams cad kyi skye ba med pa ste/ de la rnam par rtog pa thams cad kyi gnyen pos rnyed pa ni rab tu thob pa'o/ /de gang yin zhe na/ mi skye ba'i chos la bzod pa'i mtshan nyid kyi gnas pa ste/ des sa brgyad pa la gnas pa'i ngang tshul can gang yin pa de dag la de skad ces bya ste/des ni phyir mi ldog pa'i sa la lung bstan pa thob pas mngon sum du lung bstan pa zhes ston to/ /skye ba gcig gis thogs pa zhes bya ba 'dis sangs rgyas nyid du nye bar bstan te/ de dag ni ma 'ongs pa'i dus na sangs rgyas nyid du skye ba gcig kho nas thogs pa'i phyir ro//'di'i bshad pa ni/ de bzhin gshegs pa thams cad kyi ye shes kyi yul rtogs pa la 'jug pa rgyun mi gcod pa'i spyod yul pa zhes bya ste/ de bzhin gshegs pa thams cad kyi ye shes kyi yul ni nyon mongs pa dang shes bya'i sgrib pa las rnam par dben pa'i de bzhin nyid de/de nyid sangs rgyas nyid do/ /de rtogs pa ni khong du chud pa ste/ de nyid 'jug pa'o/ /de la rgyun mi gcod pa thogs pa med par nus pa'i spyod yul pa ste/ mthu can gang yin pa de dag la de skad ces bya'o/ /'jug pa ni rnam pa gsum ste/mos pas spyod pa'i sa la mos pas 'jug pa dang / rab tu dga' ba la sogs pa sa bcu rnams la de kho na rtogs pas 'jug pa dang / sangs rgyas kyi sa la rtogs pas 'jug ste/ de la 'jug pa gong ma gnyis las bzlog pa'i phyir rtogs pa smos so/ /yid kyi cho 'phrul la rnam pa lnga ste/sems can yongs su smin par bya ba la mkhas pa dang / smon lam mngon par sgrub pa la mkhas pa dang / yid bzhin gyi nor bu ltar 'gro ba thams cad nye bar 'gro ba la mkhas pa dang / 'khor ba dang mya ngan las 'das pa la mi gnas par mkhas pa dang / bsam gtan la sogs pa mngon par sgrub pa la mkhas pa'o//de la sems can yongs su smin par bya ba la mkhas pa'i dbang du byas nas/ 'gro ba thams cad yongs su smin par bya ba dang / gdul bar bya ba'i dus bzhin du chad pa'i byin rlabs can gyi bya ba thams cad yang dag par ston pa la mkhas pa zhes bya ba gsungs te/'gro ba thams cad kyi dge ba'i rtsa ba yongs su smin par bya ba dang / yongs su smin pa'i 'dul bar bya ba ste/ de'i don du'o/ /dus ji lta ba bzhin du gang gis yongs su smin par bya ba dang / 'dul bar bya ba'i dus gang yin pa'o/ /phyad pa'i byin gyi rlabs 'bras bu yod pa'i mthu can gyi bya ba gang yin pa de thams cad yang dag par ston pa de la mkhas pa dag go//smon lam mngon par sgrub pa la mkhas pa'i dbang du byas nas/ byang chub sems dpa' thams cad kyi smon lam la mngon par sgrub pa bskal pa dang / dus dang / zhing dang / spyod pa la rgyun mi gcod pas gnas pa zhes bya ba gsungs so/ /byang chub sems dpa' thams cad kyi smon lam rnams ni 'di kho na las 'og nas ji skad 'byung ba rnams te/ de dag mngon par sgrub pa ni grub par byed pa'o/ /de rgyun mi gcod pa ni bzang po dang / skar ma lta bu la sogs bskal pa gang rnams dang / ma 'ongs pa'i skye ba'i rgyun gyi dus rnams dang / de bzhin gshegs pa 'byung ba yang dag par ston pa sangs rgyas kyi zhing rnams dang / spyod pa la rgyun chad par mi byed pa ste/ de dag gis gnas pa'i ngang tshul can gang yin pa de dag la de skad ces bya'o//de ni smon lam mngon par sgrub pa goms pas dus thams cad dang / yul thams cad dang / gnas thams cad du de dag gi smon lam dag 'byung ngo zhes bstan pa yin no/ /yid bzhin gyi nor bu ltar 'gro ba thams cad nye bar 'tsho ba la mkhas pa'i dbang du byas nas/byang chub sems dpa' thams cad kyi 'byor ba'i tshogs bsod nams dang ye shes shin tu yongs su rdzogs pa mi zad pa 'gro ba thams cad nye bar 'tsho ba la zhugs pa zhes bya ba gsungs so/ byang chub sems dpa' thams cad kyi bsod nams dang ye shes ni don thams cad kyi 'byor par gyur pa'i tshogs 'grub par 'gyur ba'i tshogs nyid yin pas byang chub sems dpa' thams cad kyi 'byor ba'i tshogs bsod nams dang ye shes te/des gzhan gyi don rnam pa thams cad du yang dag par sgrub pa'i phyir shin tu yongs su rdzogs pa'o//dus thams cad du rgyun mi 'chad pa'i phyir mi zad pa ste/ 'gro ba thams cad nye bar 'tsho ba gang yin pa de la zhugs pa dag go/ /bsdus pa'i don ni byang chub sems dpa' rnams kyis bsod nams dang ye shes kyi tshogs bsags pa'i phyir gang gis na de dag yid bzhin gyi nor bu ltar dus rtag tu sems can thams cad nye bar 'tsho bar 'gyur ba de ltar byas so zhes bya ba yin no//'khor ba dang mya ngan las 'das pa la mi gnas par mkhas pa'i dbang du byas nas/ byang chub sems dpa' thams cad kyi shes rab dang thabs dam pa mchog thob pa zhes bya ba gsungs te/shes rab ni de bzhin nyid la dmigs pa'i ye shes so/ /thabs ni 'dir snying rje chen por 'dod do/ /mchog ni rab po/ /de ni dam pa yang yin la mchog kyang yin no zhes bya bar tshig rnam par sbyar te/shes rab dang thabs gnyis kyi dam pa mchog de thob pa dag go/ /de la shes rab kyis ni 'khor ba la mi gnas so/ /snying rjes ni mya ngan las 'das pa la mi gnas so/ /'khor ba dang mya ngan las 'das pa'i sgo yang dag par ston pa'i byang chub sems dpa'i spyod pa'i rgyun mi gcod pa zhes bya bas ni shes rab dang thabs 'di gnyis kyi 'bras bu bstan to//rgyun mi gcod pa zhes bya ba'i sgra ni re re dang sbyar te/ 'khor ba'i sgo yang dag par ston pa'i byang chub sems dpa'i spyod pa rgyun mi gcod pa zhes bya ba dang / mya ngan las 'das pa'i sgo yang dag par ston pa'i byang chub sems dpa'i spyod pa rgyun gcod pa zhes bya bar sbyar ro//snying brtse bas ni 'khor ba'i sgo yang dag par ston pa'i byang chub sems dpa'i spyod pa bltams pa dang / gzhon nu dang / btsun mo'i 'khor gyi nang na bzhugs pa yang dag par ston pa la sogs pa'i mtshan nyid rgyun mi gcod do//shes rab kyis ni mya ngan las 'das pa'i sgo yang dag par ston pa'i byang chub sems dpa'i spyod pa mngon par 'byung ba la sogs pa'i mtshan nyid rgyun mi gcod do/ /bsam gtan la sogs pa mngon par sgrub pa la mkhas pa'i dbang du byas nas/ byang chub sems dpa' thams cad kyi bsam gtan dang / rnam par thar pa dang / ting nge 'dzin dang / snyoms par 'jug pa dang / mngon par shes pa dang / ye shes kyi mngon par rol pa'i bya ba thams cad yang dag par ston pa la mkhas pa zhes bya ba gsungs so/ /bsam gtan rnams ni dang po la sogs pa'o//rnam par thar pa ni brgyad do/ /ting nge 'dzin rnams ni nam mkha' mdzod la sogs pa'o/ /snyoms par 'jug pa ni mthar gyis gnas pa'i snyoms par 'jug pa dgu po dag go/ /mngon par shes pa rnams ni lha'i mig la sogs pa'o//ye shes ni de bzhin nyid la dmigs pa'o/ /de dag gi rnam par rol pa'i phyir de dag nyid mngon par rol pa'o/ /de dag nyid bya ba thams cad de/ yid kyi spyod pa'i mtshan nyid de/ /de ston pa la mkhas pa dag go/ /lus kyi cho 'phrul ni rnam pa gnyis te/ de bzhin gshegs pa thams cad kyi 'khor gyi dkyil 'khor du cig car du 'gro bar yang dag par ston pa dang / 'dul ba dang mthun pa'i lus rab tu snang ba yang dag par ston pa'o/ /de bzhin gshegs pa'i 'khor gyi dkyil 'khor du 'gro ba yang dag par ston pa yang dam pa'i chos kyi gtam 'byung bar bya ba'i don dang /chos kyi 'khor lo yang dag par gzung ba'i don dang / de bzhin gshegs pa la mchod pa dang / rim gro bya ba'i don du'o/ /de la dam pa'i chos kyi gtam 'byung bar bya ba'i dbang du byas nas/ byang chub sems dpa' thams cad kyi rdzu 'phrul gyi stobs la dbang thob pas mngon par 'du bya ba med par sems kyi skad cig gis de bzhin gshegs pa thams cad kyi 'khor gyi dkyil 'khor du 'gro ba la sngon du 'dren pa'i gtam gyi skyes bur gyur pa zhes bya ba gsungs te/rdzu 'phrul ni 'gro ba'o/ /de'i stobs ni mthu'o//de la dbang ba ste de thob pa'o/ /de nyid kyi phyir de dag mngon par 'du bya ba med pas/ lhun gyis grub par sems kyi skad cig kho nas de bzhin gshegs pa thams cad kyi 'khor gyi dkyil 'khor du cig car du 'gro ba yang dag par ston to//des na de dag sngon du 'dren pa'i gtam gyi skyes bu ste/ de dag ni theg pa chen po'i gtam la gtso bo yin pa'i phyir ro/ /de dag ni byang chub sems dpa' thams cad kyi rdzu 'phrul gyi stobs la dbang thob pa yang yin la/ mngon par 'du bya ba med par sems kyi skad cig gis de bzhin gshegs pa thams cad kyi 'khor gyi dkyil 'khor du 'gro ba'i sngon du 'dren pa'i gtam gyi skyes bu 'ang yin no zhes bye brag gi bsdu ba'o//chos kyi 'khor lo yang dag par gzung ba dang / de bzhin gshegs pa la mchod pa dang / rim gro bya ba'i dbang du byas nas/ de bzhin gshegs pa thams cad kyi chos kyi 'khor lo yang dag par gzung ba dang /sangs rgyas la mchod pa dang / rim gro rgya chen po bya ba la mngon par brtson zhes bya ba gsungs te/ de bzhin gshegs pa thams cad kyi chos kyi 'khor lo yang dag par gzung ba dang / rim gro rgya chen po bya ba la mngon par brtson pa zhes bya ba'i tha tshig go//mchod pa ni gdugs la sogs pas so/ /rim gro bya ba ni bsnyen bkur bya ba la sogs pas so/ /'dul ba dang mthun pa'i lus rab tu snang bar byed pa yang dag par ston pa'i dbang du byas nas/ byang chub sems dpa' thams cad kyi las yang dag par blang ba can gyi mnyam pa nyid kyi sbyor bas 'jig rten gyi khams thams cad du lus rab tu snang bar byed pa thob pa zhes bya ba gsungs te/byang chub sems dpa' thams cad kyi las ni sems can gyi don sgrub pa'o/ /de yang dag par blang ba ni legs par khas blang ba'o/ /de sngon du 'gro ba can du mnyam pa nyid kyi sbyor ba ni rjes su chags pa dang /khong khro ba med pa dang / 'dul ba dang mthun pa nyid kyis thams cad la sgrub pa'o/ /de'i don du 'jig rten gyi khams thams cad du 'dul ba dang mthun pa'i lus snang bar byed pa gang yin pa lus yang dag par ston pa de thob pa dag go/ /ngag gi cho 'phrul yang rnam pa gnyis te/dbyangs kyis 'jig rten gyi khams mtha' yas pa khyab pa dang / tshig dang yi ge sna tshogs kyis bskal pa mtha' yas pa rnams su theg pa chen po rgyun mi 'chad par rab tu ston pa'o/ /de la dang po'i dbang du byas nas/ chos thams cad kyi dbyings ltar chags pa med pa'i dbyangs sgrogs pas khyab par byed pas dus gsum thams cad la chags pa med pa'i sems kyi ye shes kyis yul rgyas par 'gengs pa zhes bya ba gsungs so//sangs rgyas kyi chos thams cad kyi dbyings ni de bzhin nyid do/ /de ltar chags pa med pa ni thogs pa med pa'o//de gang yin zhe na/ chos kyi dung ngo / /grag par byed pa'i phyir sgrogs pa ste/ /dbyangs kyi sgrogs pa yin pas dbyangs sgrogs pa ste/ dbyangs kyi rgyu ni chos kyi dung zhes bya ba'i tha tshig go/ /des khyab par byed pa ste/ kun du tshig tu snang ba'i rnam par shes pa 'byung ba'i phyir de skad ces bya'i/ngag phyi rol na grub pa ni med do/ /dus gsum thams cad la chags pa med pa'i sems kyi ye shes can gang yin pa'i sangs rgyas bcom ldan 'das de dag la de skad ces bya'o/ /sems smos pa ni phyi rol ma grub pa'i phyir zhes bya ba tsam du zad pa'o/ /de dag gi yul ni 'jig rten gyi khams thams cad de/'jig rten gyi khams thams cad du chags pa med pa'i dbyangs sgrogs pas khyab par byed pas dus thams cad la chags pa med pa'i sems kyi ye shes kyi yul rgyas par 'gengs pa ni khyab par byed pa ste/ de bzhin gshegs pa'i ye shes kyi yul 'jig rten gyi khams rnams cig car du dbyangs kyis khyab par byed ces bya ba'i tha tshig go//theg pa chen po yang dag par rab tu ston pa'i dbang du byas nas/ byang chub sems dpa' thams cad kyi sde snod ces bya ba la sogs pa gsungs so/ /byang chub sems dpa'i sde snod ni theg pa chen po'o//de'i yon tan 'byor pa ni yon tan phun sum tshogs pa'o/ /de shin tu yongs su rdzogs pa bskal pa brjod du med par rgyun mi 'chad par bar chad med par yang dag par rab tu bstan pa ste/ yang dag par rab tu bstan pa/ de lta bus yon tan bsngags pa bstan pa/yon tan bstod pa zad mi shes pa can gang yin pa de dag la de skad ces bya ba ste/ bskal pa dpag tu med par yang theg pa chen po'i yon tan ston pa rnams kyi yon tan bsngags pa'i bstan pa mi zad ces bya ba'i tha tshig go/ /'di ltar rdo rje'i snying po dang zhes bya ba la sogs pa ni grangs phal che ba bstan to//bdag gis byang chub sems dpa'i 'khor gyi nang na gtso bor gyur pas de la sogs pa ste/ so sor bstan par blta'o/ /'phags pa sa bcu'i mdo sde'i gleng gzhi bshad pa/ slob dpon shAkya'i blos mdzad pa rdzogs so// //