CLOSE WINDOW

D3998
བོད་ཡིག

@##/ /rgya gar skad du/ da sha b+hU mi byA khya na byA khya na/ bod skad du/ sa bcu'i rnam par bshad pa'i rnam par bshad pa/ 'jam dpal gzhon nur gyur pa la phyag 'tshal lo/ / mdo sde'i tshul gyis don gyi yang dag 'di/ /sangs rgyas nyid skyes 'phags pa thogs med brnyes/ /de las 'gro gnyen gcig pus gsan nas ni/ /'di yi rnam bshad dbyig gi gnyen gyis mdzad/ / da ni rnam par bshad pa mdzad pas/ chos kyi rnam grangs 'di ni sus bshad dang / zhes bya ba la stsogs pas/ dkon mchog gsum la phyag bya dang / /mdo bshad pa dang dgos pa dang / /yang dag sbyin rgyun ma chad brjod//tshigs su bcad pa'i don ni sus bshad dang / /zhes bya ba ni rdo rje'i snying pos so/ /gang dag rnams kyis 'chad du bcug rnams dang / /zhes bya ba ni/ sangs rgyas bcom ldan 'das dang /rnam par grol ba'i zla ba la stsogs pa yin te/ de'i byin rlabs dang bskul ba dag gis de bshad pa'i phyir ro/ /gang gis 'di yi don bstan dang / /zhes bya ba ni 'phags pa byams pas so//de las ni/ gang gis blangs nas bdag la rnam phye ba/ /zhes bya ba ni 'phags pa thogs med kyis so/ /de dag rnams dang zhes bya ba ni/ 'phags pa rdo rje'i snying po la stsogs pa ji skad smos pa rnams so//chos mchog 'di la yang zhes bya ba ni sa bcu pa'i mdo chen po la ste/ 'di'i mchog nyid 'di ni thog mar spyad pa ste/ zhes bya ba la stsogs pa'i yi ge'i phyi mo'i dpes ston to/ /spyi bo sa la gtugs te zhes bya ba ni spyi bo thur du phab nas zhes bya ba'i tha tshig go//'di dag la ci zhig bya zhe na/ phyag 'tshal nas mchod pa byas nas zhes bya ba'i tha tshig go/ /dkon mchog gsum la phyag 'tshal ba ston pa na chos gtso bo nyid du bstan pa'i phyir chos smra ba rdo rje'i snying por smos te sangs rgyas bcom ldan 'das rnams kyang chos bla mar mdzad pa yin no//ci zhig bya zhe na/ de'i don/ gnas par bya phyir bshad sbyar bya bar 'bad/ /ces bya ba smras te/ gong du bshad pa'i chos kyi rnam grangs de'i don gang yin pa'o//bshad sbyar ni tshig mang pos rnam par bshad pa'o/ /bdag dang gzhan don sgrub phyir zhes bya ba ni de'i dgos pa yin no zhes bya ba yin no/ /sa'i bsdus pa ni mdor bsdus te bsnyad pa ste/ bde blag tu go bar bya ba'i phyir sa dang pos don ji snyed cig ston pa de dag btus nas thog mar bstan pa'o/ /gleng gzhi ni gang du gang dag la ston pa ste/ gnas dang gdul ba rnams dang go rims bzhin no/ /'dir ram 'di dag la gleng bas na gleng gzhi ste ston zhes bya ba'i tha tshig go/ / de yang 'di skad bdag gis thos pa'i dus gcig na/ zhes bya ba nas snyoms par 'jug pa'i bar gyis bstan to/ /snyoms par 'jug pa ni mnyam par 'jog pa ste/ dmigs pa la sems phyin ci ma log par gtod ces bya ba'i tha tshig go/ /de yang de nas byang chub sems dpa' rdo rje'i snying po zhes bya ba nas byin gyi rlabs kyi bar gyis bstan to//byin gyi rlabs ni byin gyis rlob pa ste/ mngon par 'dod pa'i don grub par bya ba'i phyir lus dang sems la mthu nye bar sgrub pa ste/ mthu lhag par bskyed ces bya ba'i tha tshig go/ /de yang rnams pa gsum gyis bstan te/gsung dang thugs dang skus so/ /de la gsung gi ni rigs kyi bu khyod kyis chos rnams kyi sgo rab tu dbye ba la mkhas par 'gyur ba'i chos kyi rnam grangs zhes bya ba la sogs pa'i bcu tshan gyis bstan to/ /thugs kyi ni de nas sangs rgyas bcom ldan 'das de dag gis byang chub sems dpa' rdo rje'i snying po la zil gyis mi non pa'i lus nyid nye bar sgrub pa mdzad de/zhes bya ba la sogs pa'i bcu tshan gyis bstan to/ /sku'i ni de nas sangs rgyas bcom ldan 'das de rnams de dag na bzhugs bzhin du rdzu 'phrul gyi mthus phyag g.yas pa zhes bya ba la sogs pas bstan to//ldang ba ni rnam par ldang ba ste/ snyoms par 'jug pa'i bya ba byas nas des bskyed pa'i sems nus pa can dmigs pa dang 'bral ba zhes bya ba'i tha tshig go/ /de yang sangs rgyas bcom ldan 'das de dag gis byang chub sems dpa' rdo rje'i snying po la reg ma thag tu zhes bya ba nas/byang chub sems dpa' de dag la smas pa zhes bya ba'i bar gyis bstan to/ /bstan pa ni mdor bstan pa steng 'og nas 'byung ba'i don rnams ming tsam gyis bsnyad pa ste/ kye rgyal ba'i sras dag byang chub sems dpa'i smon lam 'di ni shin tu rnam par nges pa ste/zhes bya ba nas bskul ba'i bar gyis bstan to/ /bskul ba ni 'chol ba ste ji ltar 'dod pa'i don mnyam pa'i phyir lhag par don du gnyer zhes bya ba'i tha tshig go/ /de yang de nas byang chub sems dpa' rnam par grol ba'i zla bas tshigs su bcad pa'i dbyangs kyis zhes bya ba nas bshad pa'i bar gyis bstan to//de yang yang dag par 'dzin pa ni rgyal ba'i sras po rnam par grol ba'i zla ba la sogs pa yin no/ /rgyal ba rnams ni bskul ba yin par shes par bya ste/ de yang 'od zer stug por reg pa de las tshig 'thon po de dag gis bcol to//bshad pa ni nges par bstan pa ste/ sa ming tsam bstan pa rnams gtan la phab ste bshad pa'o/ /de yang rnam pa gsum ste/ gnas pa dang ni nges tshig dang / /de bzhin rab tu gnas pa nyid/ /sa bshad pa la mdor na ni//'di ni nges par bstan bya yin/ /de la gnas pa ni ci 'dra ba dag cig /gang gi phyir gzhi gang gis gang zhig bskyed pas gnas pa ste/ smras pa/ gnas dang gang gi phyir dang ni/ /gzhi ni gang zhig yin pa dang / /ci 'dra yang dag bskyed pa yis/ /gnas 'gyur de ni gnas pa yin//dge ba'i rtsa ba shin tu bstsags pa zhes bya ba nas bzung ste/ grangs bzhin du bcu tshan bzhi po 'di dag bsdus so/ /de la ci 'dra ba dag ni dge ba'i rtsa ba shin tu bstsags pa zhes bya ba la sogs pas bstan to/ /gang gi phyir ni sangs rgyas kyi ye shes la mngon par 'dod par bya ba zhes bya ba la sogs pas bstan to//gzhi gang gis ni snying rje chen po sngon du 'gro ba zhes bya ba la sogs pas bstan to/ /gang zhig bskyed pas ni sems skye ba de skyes ma thag tu zhes bya ba la sogs pas bstan to/ /nges pa'i tshig ni gtan la phab pa'i tshig ste/ don dang mthun pa zhes bya ba'i tha tshig go//mchog dga' mang phyir rgyal rnams kyis/ /sa ni rab tu dga' bshad pa/ /ci 'dra ba yis dmigs gang la/ /de ni nges pa'i tshig tu 'dod/ /kye rgyal ba'i sras dag de la byang chub sems dpa'i sa rab tu dga' ba la gnas pa'i byang chub sems dpa' ni mchog tu dga' ba mang ba yin zhes bya ba nas bzung ste/bcu tshan gsum po 'di dag dang / 'jig pa lnga las yang dag par 'das pa yang bsdus par shes par bya ste/ bdag ni 'jig pa dang sdang ba dang / bag tsha ba dang bral lo zhes mchog tu dga' ba bskyed do zhes bya ba'i bar yin no/ / rab tu gnas pa ni mchog tu gnas pa ste/ gang dag dang ldan na sa 'di la rab tu gnas pa yin no/ /de yang sa'i mthar phyin par 'gro ba'i phyir te/ gnas pa ni sa thob pa tsam yin pas gnas pa bas rab tu gnas par khyad zhugs par shes par bya'o/ /rgyal ba rnams kyi sa dang po'i/ /rab gnas dad dbang la sogs pa//bcu tshan gsum gyis rab bshad pas/ /de ni de bzhin nges par gzung / /de dad pa'i dbang dang zhes bya ba nas bzung ste/ bcu tshan gsum po 'di dag bsdus par shes par bya'o/ /'phags pa rdo rje'i snying pos ma bshad pa'i sngon rol du tshigs su bcad pa bcu tshan gsungs pa ni 'khor dad par bya ba'i phyir te/bshad pa rtsom pa yin pa'i phyir bshad pa dang shes par bya'o/ /khyad par ni bye brag ste/ yon tan lhag par gsal ba'am/ gang gis na nyan thos la sogs pa las khyad 'jug pa'o/ /de yang rnam pa gsum ste 'dun pa'i khyad par dang / sgrub pa'i khyad par dang /'bras bu'i phan yon gyi khyad par ro/ /de de la 'dun pa ni don du gnyer ba dang / mngon par 'dod pa dang / smon pa ste/ smon lam bcu mngon par sgrub pa'o/ /sgrub pa ni rnam pa bcu ste/ sa bcu yongs su sbyong bar byed pa'i chos kyi mtshan nyid do/ / de yang dad pa dang snying rje dang zhes bya ba la sogs pas bstan to/ /'bras bu'i phan yon ni rnam pa bzhi ste/ las su rung ba nyid dang / 'jug pa dang / rnam par smin pa yongs su 'dzin pa dang / smon pa shes pa'o/ /de la las su rung ba nyid ni gser gyi sa le sbram gyi dpes bstan to/ / 'jug pa ni ded dpon gyi dpes bstan to/ /rnam par smin pa yongs su 'dzin pa ni/ 'dzam bu'i gling gi dbang po zhes bya ba la sogs pas bstan to/ /smon pa shes pa ni de yan chad byang chub sems dpa' smon lam gyi stobs can rnams zhes bya ba la sogs pas bstan to/ /'di'i bsdus pa ni 'di yin te/mdor bsdu na ni bdun pa dang / /sgrub pa dang ni rnam smin gyi/ /nyan thos dang ni rang rgyal las/ /rnam pa gsum gyis bsngags par bshad/ /de la 'dun pa ji skad du/ /bshad pa'i smon lam yin zhes bya/ /sgrub pa'i khyad par dad la sogs/ / bcu po dag gis bshad pa yin/ /rgyu bzhi dag gis 'bras bu yi/ /phan yon khyad par dag tu 'dod/ /las rung nyid dang 'jug pa dang / /rnam smin yongs su 'dzin pa dang / /bzhi pa smon lam nyid kyi phyir/ /rnam pa bzhir ni shes par bya/ /sa le sbram dang chos mthun phyir/ /rgyal ba rnams kyis las rung bshad//ded dpon dang ni chos mthun phyir/ /de dag gis ni 'jug pa gsungs/ /mkhas pa rnam smin yongs 'dzin pa/ /rnam pa gnyis su shes bya ste/ /bdag nyid chen po nyid kyi phyir/ /'dzam gling dbang phyug la sogs dang / /gnyis pa rgyu mthun rgya che ba//ser sna 'dul la sogs pa gang / /ting 'dzin rab sgom bcas shes bya/ /ting nge 'dzin sgom pa dang lhan cig pa zhes bya ba'i tha tshig go/ /smon pa shes zhes bya ba ni/ /smon lam stobs can yin pas na/ /de yi khyad par rnam 'phrul phyir/ /chos ni brgyad po 'di dag gis/ /sa yi dang po yang dag gsungs//'di man chad du 'di dag rgyas par bshad dgos pas de brtsam par bya'o/ /'di skad ces bya ba'i tshig gi phrad 'di dpe la yang 'byung ste/ dper na rnam thos ltar phyug pa zhes bya ba lta bu'o/ /lung 'bogs pa la yang 'byung ste/ 'di skad du thon cig ces bya ba lta bu'o//dris pa nges par bya ba la yang 'byung ste/ 'di skad bdag gis thos so/ /'di skad du 'chad do zhes bya ba lta bu'o/ /tshig gi lan la yang 'byung ste/ de ni de lta yin no zhes bya ba lta bu'o/ /'di ni dam 'cha' ba yin par blta bar bya ste/ yang dag par sdud par byed pa'i byang chub sems dpa' rnams kyis khyod kyis ji skad thos pa de bzhin du bshad du gsol zhes gsol ba btab pa dang /byang chub sems dpas de bzhin du 'chad do zhes khas 'ches pa ste/ rnam par bcad nas sbyar ro/ /dam bcas nas bdag gis thos pa zhes bya ba la sogs pas smras so//yang na dris pa nges par bya ba yin te/ dris pa nges par bya ba'i phyir/ 'di skad bdag gis thos pa zhes smos so/ /bdag gis zhes bya ba ni/ bdag nyid kyi yin gyis gzhan las ma yin pa'o/ /thos pa ni rna ba'i dbang pos bzung ba'o/ /dus gcig na zhes bya ba ni dus gcig na rgyun chags par ro//bcom ldan 'das zhes bya ba ni 'di la skal ba yod pas na bcom ldan 'das te/ nyon mongs pa'i gzhan gyi dbang du ma gyur pa'i phyir rang dbang nyid dang / ye shes kyi mes legs par yongs su sbyangs pa'i phyir shin tu sbyangs pa nyid dang / skyes bu chen po'i mtshan sum cu rtsa gnyis dang ldan pa'i phyir gzugs bzang ba nyid dang /yon tan thams cad phun sum tshogs pa'i phyir grags pa dang / 'gro ba thams cad kyi gtso bo yin pa'i phyir dpal dang / sems can la phan 'dogs pa'i phrin las nyams pa mi mnga' ba'i phyir bdag nyid chen po tshogs pa ste/de dag 'di la mnga' bas na bcom ldan 'das so/ /ci'i phyir zhe na/ skal ba zhes bya ba ni yon tan drug po ji skad bshad pa rnams kyi rnam grangs kyi tshig yin pa'i phyir ro/ /smras pa/ rang dbang shin tu sbyangs pa dang / /gzugs bzang ba dang grags pa dang / /dpal dang bdag nyid che tshogs pa//drug la skal ba zhes bshad do/ /mngon par rdzogs par sangs rgyas nas ring po ma lon te zhes bya ba ni mngon par rdzogs par sangs rgyas nas yun ring po ma lon zhes bya ba'i tha tshig go/ /'di nyid bye brag tu dbye ba'i phyir zhag bdun pa gnyis pa'i tshe zhes bya ba gsungs te/zhag bdun pa gnyis pa srid pa ni gdul ba'i dbang du rdzu 'phrul gyis byin gyis brlabs pa'i phyir ro/ /de lta ma yin na ni rgya cher rol pa'i mdo chen po las/ bcom ldan 'das zhag bdun pa dang po'i tshe ni byang chub kyi snying po la bzhugs bzhin du dga' ba'i zas bkod pa zhes bya ba'i ting nge 'dzin gyis gnas so//gnyis pa'i tshe ni spyan gnyis mi 'dzums par byang chub kyi shing la gzigs so/ /gsum pa'i tshe ni stong gsum gyi stong chen po'i 'jig rten gyi khams nas bzung ste/ 'chag pa rgyang ring du bcags so/ /bzhi pa'i tshe ni shar gyi rgya mtsho dang / nub kyi rgya mtsho nas bzung ste/'chag pa rgyang thung ngur bcags so/ /lnga pa'i tshe ni btang bzung gi gnas na bzhugs so/ /drug pa'i tshe ni ri rdzi shing n+ya gro d+ha'i nang na bzhugs so/ /bdun pa'i tshe ni shing rgyal po'i zas zhes bya ba'i drung na bzhugs so zhes 'byung ba gang yin pa dang //'dul ba 'dzin pa kha cig bcom ldan 'das dang po mngon par rdzogs par sangs rgyas nas zhag bzhi bcu rtsa dgu'i bar du byang chub kyi snying po dang nye ba na bzhugs so zhes 'dod pa gang yin pa 'di gnyi ga dang yang 'gal bar 'gyur ro/ /gdul ba'i bye brag gis ni de dag gnyi ga nas yang snang bas mi 'gal te/de ltar na zhag bdun pa gnyis pa srid do/ /'di dag la 'dod pa na spyod pa'i las dge ba'i rab kyi phul du phyin pa thob pa dang sprul pa'i bde ba la dbang byed pa yod pas gzhan 'phrul dbang byed rnams so/ /lha de rnams kyi nang na zhes bya ba ni dga' ba dang gsal bar byed pas lha rnams te/dga' ba dang yid bde ba mang ba'i phyir dga' bar byed la/ 'od dang ldan pa'i phyir gsal bar byed do/ /lha de dag rdzu 'phrul dang ldan pa'i phyir mi rnams kyis bstod pa byed pa yin no/ /bzhugs te zhes bya ba ni bzhugs shing bzhugs pa'o/ / dbang bsgyur zhes bya ba ni 'dod pa na spyod pa'i lha thams cad dang bde ba'i longs spyod rnams la dbang bsgyur bas na dbang bsgyur te de'i 'o/ /lha rnams kyi'am lha rnams nang na rgyal po yin pas lha'i rgyal po ste rje bo yin no/ /de'i gzhal med khang zhes bya ba ni de la lha rnams kyi dngos po sna tshogs dang mdzes par byed pa dag gcod par byed pas na gzhal med khang ste ngo bo sna tshogs su shes zhes bya ba'i tha tshig go//nor bu rin po che'i snying po can gyi khang bzangs de na zhes bya ba ni 'di ni snying por nor bu rin po che dag yod pas nor bu rin po che'i snying po can te/ 'di na nor bu rin po che dag yod ces bya ba'i tha tshig go//yang na gzhal med khang de'i nang dang / gces dgu nor bu rin po che dag las byas pa'i phyir ro/ /khang bzangs de na zhes bya ba ni de mthong bas lha rnams dang bar 'gyur bas khang bzangs so/ /yongs su dga' bar 'gyur zhes bya ba'i tha tshig go/ /khang bzangs de na'o/ / dang por zhes bya ba ni gnas de nas dang por zhes bya ba'i tha tshig go/ /de lta ma yin na rol pa bsgrags pa'i ting nge 'dzin las de bzhin gshegs pa dang po mngon par rdzogs par sangs rgyas nas byang chub kyi snying po mchog dam pa la bzhugs shing skyil mo krung ma bshig par phyogs bcu'i 'jig rten gyi khams nas 'dus pa'i byang chub sems dpa' rnams dang /gnas gtsang ma'i lha'i bu rnams kyis gsol ba btab ste/ rol pa bsgrags pa'i ting nge 'dzin bshad nas nang du yang dag 'jog gces su 'dzin pa rnams gdul ba'i don du nang du yang dag gzhag pa'i phyir/ dbang po'i brag phug tu gshegs so zhes 'byung ba gang yin pa de dang 'gal bar 'gyur ro//gnas kyi sgo nas ni dang po nyid la 'gal ba med do/ /rgya cher rol pa'i gzhung yang rdzu 'phrul gyi byin gyi rlabs kyis gnyi gar snang bas mi 'gal te/ 'di ni dang por zhes bya ba 'di'i lan yang yin no/ /yul de ni zhes bya ba la sogs pa ni lha'i gnas yin pa'i phyir dang /dbang bsgyur gyi khang pa yin pa'i phyir dang / khang bzangs yin pa'i phyir mchog nyid do/ /de'i 'bras bu 'dir mngon par grub pa'i phyir zhes bya ba ni/ rgyu dang rgyu can gnyis yul so so ma yin par bstan pa'i phyir te/ sa bon dang myu gu bzhin no//de la mdo 'di mnyan pa la sogs pa'i rim gyis 'bras bu sangs rgyas nyid gang yin pa de rdo rje'i gdan du thob pa mthong ba'i phyir ro/ /rten cing 'brel par 'byung ba'i gnas pas gnas pa'i phyir ro zhes bya ba rgya cher rol pa'i mdo las bcom ldan 'das zhag bdun pa dang po'i tshe/ byang chub kyi snying po la bzhugs bzhin du dga' ba'i zas bkod pa'i ting nge 'dzin gyis gnas so zhes 'byung ba'i mdo dang ji ltar mi 'gal zhe na/ 'gal ba med de rten cing 'brel par 'byung bas gnas pa ni dga' ba'i zas bkod pa'i ting nge 'dzin gyi rnam grangs yin pa'i phyir ro/ /yang na rnam grangs nyid ma yin yang gdul ba'i bye brag gis rdzu 'phrul gyis de ltar snang ba la nyes pa med do//der kun dga' bas na chos nyid kun dga' yin te/ shing a mra'i kun dga'i ra ba bzhin no/ /dgyes zhes bya ba ni 'dir zag pa med pa'i dgyes pa ste/ rnam par grol ba'i dga' ba dang bde ba yang dag par bstar ba'o//sems can gyi don du mngon par rdzogs par sangs rgyas kyang de gzhag ste de gnas so zhes de'i che ba nyid brjod pa yin no/ /byang chub sems dpa'i tshogs chen po zhes bya ba ni grangs mang ba dang / yon tan che ba'i phyir chen po ste de dang ngo / /byang chub ces bya ba nyon mongs pa dang shes bya'i sgrib pa bag chags dang bcas par spangs pa dang /de spangs pas ye shes rnam par dag pa dang / thogs pa med pa ste/ spangs pa dang / ye shes 'di ni byang chub ces bya'o/ /de la mos pa dang zhugs pa'i sems dpa' ni byang chub sems dpa'o/ /de dag gi tshogs ni dge 'dun te/de na byang chub sems dpa'i tshogs pa de dang thabs cig ces bya ba'i tha tshig go/ /de dag smos pa ni theg pa chen po bstan pa de dag gi ched yin pa'i phyir dang / de'i tshe 'di na nyan thos rnams mi srid pa'i phyir dang / sems can gyi don la mngon par mi brtson pas 'jig rten gyi khams gzhan dag nas kyang ma 'ongs pa'i phyir ro//de na byang chub sems dpa' gang dag lha'i bu'i gzugs su 'dug pa de dag kyang byang chub sems dpa' smos pa kho nas bsdus so/ /gzhan dag kyang yod mod kyi gtso bo ma yin pa'i phyir ma smos so/ /sangs rgyas kyi zhing nas 'dus pa zhes bya ba ni sangs rgyas kyi zhing nas yang dag par lhags zhes bya ba'i tha tshig go//gang gi tshe sangs rgyas kyi zhing de dag na yang sangs rgyas bcom ldan 'das ye shes thogs pa mi mnga' ba thugs rje chen po can sems can thams cad la phan pa dang brtson pa dag chos ston par mdzad na ci'i phyir de dag bor nas chos mnyan pa'i phyir sangs rgyas zhing 'dir 'ong zhe na/smras pa sems can sngon smin par byas pa 'dir skyes pa chos nyan par 'os pa rnams gdul ba'i phyir dang / 'di la 'khod pa gus pa dang mi ldan pa rnams gang 'jig rten gyi khams gzhan dag nas kyang chos nyan pa'i phyir 'dir 'ong na/ci'i phyir bdag cag 'di na 'khod pa rnams kyis chos mnyan pa'i phyir gus par mi 'dong zhes gus pa bskyed pa'i phyir ro/ /byang chub sems dpa' rdo rje'i snying po la sogs pa zhes bya ba ni de gtso bo yin zhes bya ba'i tha tshig go/ /de dag gang zhe na/ 'di lta ste zhes bya ba la sogs pa gsungs te/rdo rje'i snying po ni chos kyi rnam grangs 'chad pa'i phyir gtso bo nyid yin no/ /ci'i phyir byang chub sems dpa' bshad ce na/ spro ba bskyed pa'i phyir te byang chub sems dpa' rnams kyang / sangs rgyas kyi byin gyi rlabs kyis chos nyid zab mo 'di 'chad do snyam du skal ba mnyam pa'i sgrub pas gnas skabs de 'thob par spro ba skyed par byed pa 'am/bdag cag ni sangs rgyas rnams kyis kyang sangs rgyas kyi phrin las su bskos so snyam du sems pa'o/ /nyon mongs pa thams cad kyis mi choms pa dang 'joms par byed pa nyid kyi phyir zhes bya ba ni chos kyi rnam grangs ni nyon mongs pa thams cad kyis mi choms pa dang /de dag 'joms par byed pas na de skad ces bya'o/ /gzhan dag kyang de lta bu yin mod kyi de dag kyang 'di kho na'i nang du 'dus pas na 'di 'ba' zhig brjod de/ nang du 'dus par ni yi ge phyi mo'i dpes kyang 'chad do/ /snying po rdo rje dang 'dra bas zhes bya ba ni dge ba'i rtsa ba rnams ni snying po'i sgrar brjod do//de dag kyang 'di thos pa las nges par skyes pa kho na yin te/ de'i phyir 'di'i snying po dge ba'i rtsa ba rnams rdo rje dang 'dra bas zhes tshig rnam par sbyar ba yin no/ /de las gzhan pa'i skye ba'i rgyus mi shigs pa'i phyir ro zhes bya ba ni ngan song du nges pa'i las ngag gis mi shigs pa'i phyir zhes bya ba'i tha tshig ste/ming 'di ni chos nyid kyis rab tu phye ba yin gyi 'dod rgyal ba ma yin no zhes bshad pa yin no/ /gzhan dag kyang de lta bu yin mod kyi 'on kyang thun mong ma yin pa brjod par 'dod dang de 'di kho na rnam par gnas te/dper na 'gro ba na ba las nga'o zhes bya ba lta bu'o/ /de nas yang zhes bya ba la de nas zhes bya ba'i tshig gi phrad 'di ni bkra shis pa la sogs pa'i don la 'byung ste/ re zhig bkra shis pa la 'byung ba ni de nas rigs pa'i lam dang mthun pa la 'jug par bya'o zhes bya ba lta bu'o//da dri ba la ni khyod kyis byas sam 'on te byed ces bya ba lta bu'o/ /skabs la ni da ni sgra rjes su bstan pa zhes bya ba lta bu'o/ /mjug thogs la ni khrus byas te de nas bza'o zhes bya ba lta bu'o/ /dam 'cha' ba la ni khyod nga'i slob ma yin nam zhes dris na legs so zhes khas 'che ba lta bu'o//bsdu ba la ni sangs rgyas dang chos dang dge 'dun zhes bya ba lta bu'o/ /'dir ni mjug thogs la blta bar bya ste/ byang chub sems dpa' rdo rje'i snying po sangs rgyas kyi zhing sna tshogs nas 'dus pa'i byang chub sems dpa' rnams dang lhan cig tu 'dir lhags te/de nas mjug thogs su ting nge 'dzin la snyoms par zhugs so zhes bya ba yin no/ /'di zhes bya ba dang / yang zhes bya ba dang nyid ces bya ba 'di dag ni tshig kha bskang ba'i phrad du byas pa ste/ dper na gang zhig thams cad mkhyen pa de bzang po 'di spyod do zhes bya ba dang / gang tshul khrims bsrung ba de yang mkhas pa'o zhes bya ba dang /de nyid ni thams cad du mchod do zhes bya ba lta bu'o/ /'di yang tshig gi kha bskang ba kho na la blta bar bya ste/ don gzhan med pa'i phyir ro/ /de'i tshe zhes bya ba ni dus de nas zhes bya ba'i tha tshig go/ /sangs rgyas kyi mthus zhes bya ba ni sangs rgyas kyi byin gyi rlabs kyis zhes bya ba'i tha tshig go//theg pa chen po rab tu snang ba zhes bya ba ni theg pa chen pos rab tu snang bas na theg pa chen po rab tu snang ba ste/ theg pa chen po la brten nas mchog dang / bsngags par snang zhes bya ba'i tha tshig gam/ yang na 'dis theg pa chen po rab tu snang ba'i phyir te/'dis theg pa chen po mchog dang bsngags par snang zhes bya ba'i tha tshig go zhes bya ba 'di ni smad pa la sogs pa la 'byung ste/ re zhig smad pa la ni blun po yang smra'am zhes bya ba lta bu'o/ /dri ba la ni de su yin zhes bya ba lta bu'o/ /mi shi ba la ni 'chi bar 'gyur ro zhes bya ba lta bu'o//mi bzod pa la ni nga la sngo 'am zhes bya ba lta bu'o/ /ming la ni nag pa zhes bya ba 'am zhes pa lta bu'o/ /grangs la ni stong zhes bya ba'am zhes bya ba lta bu'o/ /mi rtag pa ston pa la ni ngu'o zhes bya ba lta bu'o/ /'dir ni ming la blta bar bya ste/ theg pa chen po snang ba zhes bya ba yin no//ting nge 'dzin ni mnyam par 'jog pa ste/ dmigs pa la sems phyin ci ma log pa'i rim gyis 'dzin to zhes bya ba'i tha tshig go/ /byang chub sems dpa' rnams kyi ting nge 'dzin de la snyoms par zhugs pa ni snyoms par zhugs zin zhes bya ba'i don te phyin ci ma log pa'i rim gyis ting nge 'dzin gyi rjes su song zhes bshad pa yin no//rtog ge'i spyod yul ma yin pa nyid du bstan pa'i phyir zhes bya ba ji lta zhe na/ snyoms par 'jug pa'i byin gyi rlabs kyi mthus chos kyi rnam grangs 'di bshad pas de'i phyir 'di ni de'i yul ma yin no zhes bya ba ste/ 'di ltar nyan thos rnams kyang dbang po'i yul ma yin pa'i dngos po zhig shes par 'dod na de smon nas snyoms par zhugs pa dang /smon pa'i shes pas de bzhin du shes na 'di lta smos kyang ci dgos zhes snyoms par 'jug pa bstan to/ /de bzhin gshegs pa sangs rgyas kyi zhing phrag bcu'i rdul phra rab kyi rdul snyed dag gis zhal bstan te zhes bya ba ni phyogs bcu'i sangs rgyas kyi zhing bye ba phrag bcu'i rdul phra rab kyi rdul dang grangs mnyam pa'i 'jig rten gyi khams kyi pha rol nas de dang grangs mnyam pa'i de bzhin gshegs pa rnams kyis zhal bstan to zhes bya ba'i tha tshig go//sangs rgyas kyi smon lam gyi phyir zhes bya ba ni de byin gyis brlabs pa'i phyir byin gyi rlabs kyi sngon rol du shAkya thub pa rnam par snang mdzad kyi mtshan 'di zhes bya ba sha stag gis byin gyis rlob par gyur cig ces smon lam btab ste/thugs bskyed pa gang yin pa'i thugs mngon par 'du byed pa de'i phyir zhes bya ba'i tha tshig go//sangs rgyas mang ba nyid du bstan pa'i phyir zhes bya ba ni gang na re zhig mtshan mthun pa kho na yang 'di ltar tshad med na mtshan gzhan du gsol ba shin tu tshad med par lta ji ste mi 'gyur snyam pa'o/ /sangs rgyas mang ba nyid du bstan pa'i dgos pa yang snang ste de la brten nas byang chub sems dpa' rnams byang chub kyi tshogs tshad med pa yongs su skong bas sangs rgyas nyid du nye bar 'gyur ro//ji lta zhe na/ sangs rgyas bcom ldan 'das gang dag 'jig rten gyi khams gzhan na bzhugs pa de dag kyang grangs dang yon tan gyis tshad med pa yin pas gnyi ga ltar tshad med pa de dag la byang chub sems dpa' gang dag phyag byed pa de dag bsod nams nye bar stsogs pa tshad med pa kho na dang ldan par 'gyur ro//de bzhin du gal te res 'ga' zhig bag med pa byed na de'i 'og tu de dag rjes su dran par byas shing de dag nyid mngon sum du gyur pa dang 'dra bar byas nas gus par phyir 'chags par byed cing phyis sdom pa byed na/des na shes rab dang thugs brtse ba nyid kyis tshad med pa la de ltar byas pas bsod nams tshad med pa nye bar stsogs par 'gyur ro/ /sangs rgyas bcom ldan 'das tshad med pa sku dang shes rab kyang tshad med thugs brtse ba nam mkha' dang mnyam pa de dag gi sku dang shes rab dang /thugs brtse ba sems can thams cad kyi rjes su song ba'i phyir dang / sems can gyi khams kyang nam mkha' dang mnyam pa nyid kyis tshad med pa'i phyir/ bsod nams thams cad kyi rjes su yi rang bar byed de/ des na yang bsod nams tshad med pa nye bar stsogs par 'gyur ro//de'i phyir sangs rgyas gang dag dang po mngon par rdzogs par sangs rgyas pa de dag ji srid du chos kyi 'khor lo bskor bar ma bskul ba de srid du chos kyi 'khor lo mi bskor te/ des kyang bsod nams dpag tu med pa nye bar stsogs par 'gyur ro//de'i phyir gang dag mya ngan las 'da' bar bzhed pa de dag sems can la phan par bya ba'i don du bzhugs par gsol ba 'debs te/ 'di las kyang bsod nams dpag tu med pa nye bar stsogs par 'gyur ro/ /de ltar tshad med pa rnam pa lnga nye bar stsogs pa'i bsod nams sems can tshad med pa dag la yongs su sngo bar byed de des kyang tshad med par 'gyur ro//de yang de dag gis tshad med pa'i yon tan thob par bya ba 'di lta ste/ sangs rgyas nyid thob par bya ba'i phyir yongs su sngo bar byed de/ de las kyang bsod nams tshad med par 'gyur ro/ /de ltar na 'jig rten gyi khams gzhan gyi sangs rgyas rnams la brten nas byang chub sems dpa' rnams rnam pa bdun gyis byang chub kyi tshogs tshad med pa yongs su skong bar 'gyur la/des kyang de dag sangs rgyas nyid du nye bar 'gyur ba yin te/ de'i phyir sangs rgyas nyid du nye bar 'gyur ba dgos par 'thad do//de dag dang mtshan mthun pa'i phyir dga' ba'i khyad par du 'gyur ro zhes bya ba ni bdag dang mtshan mthun pa'i sangs rgyas bcom ldan 'das rnams kyang bzhugs pa lta zhes 'jig rten gyi tha snyad kyi rjes su 'brang bas yang dag par dga' bar 'gyur ro/ /yang sangs rgyas mang po nyid du bstan pa ni 'di ltar khong du chud par bya ste/mtshan mthun pa kho na yang mang rab na mtshan tha dad pa lta smos kyang ci dgos zhes bstan pas nyan pa po rnams chos dang chos smra ba la gus pa bskyed pa'i phyir te/ de yang la la dus gcig tu sangs rgyas mang po mi 'byung ngo snyam du sems pa dgag pa'i phyir dang /de ltar sangs rgyas bcom ldan 'das mtha' med par bzhugs na/ bdag kyang ci'i phyir mi 'gyur zhes brtson 'grus mchog la spro ba bskyed pa'i phyir ro/ /ci'i phyir sangs rgyas kyi zhing bye ba phrag bcur nges she na/ grangs de yod pa'i phyir dang / sa bcu'i skabs yin pa'i phyir ro//ci'i phyir 'jig rten gyi khams sangs rgyas kyi zhing bye ba phrag bcu'i rdul phra rab kyi rdul dang mnyam pa'i pha rol na bzhugs pa rnams kyis byin gyis brlabs la tshun chad nas bzhugs pa rnams kyis ni ma yin zhe na/ de dag dang 'di spyod pa mthun pa'i phyir te/ de yang byang chub sems dpa' de dag gi mtshan rdo rje'i snying po zhes bya ba nyid kyis shes par bya'o//legs so legs so zhes bya ba la legs so zhes bya ba'i sgra ni bsngags pa dang bskul ba dag la 'byung ste/ re zhig bsngags pa la ni ston pa legs so zhes bya ba lta bu'o/ /bskul ba la ni rtses nas ring zhig lon gyis 'don pa gyis shig ces bya ba lta bu'o//'dir ni bsngags pa kho na la blta bar bya'o/ /yang legs so zhes smos pa ni khyad par du bsngags pa'i phyir ro/ /rigs kyi bu zhes bya ba ni sangs rgyas kyi rigs la rigs bzang po rnams kyi nang du bur gtogs pa'i phyir rigs kyi bu'o/ /bcom ldan 'das rnam par snang mdzad 'di nyid kyi sngon gyi smon lam dang byin gyi rlabs kyis zhes bya ba ni/bcom ldan 'das shAkya thub pa rnam par snang mdzad ces bya ba'i 'o/ /ci'i phyir mtshan 'di skad ces bya zhe na/ smras pa/ gdul bar bya ba rnams la dam pa'i chos sna tshogs snang ba mdzad pas rnam par snang bar mdzad pa'o//de nyid rnam par snang mdzad de dka' thub can bzhin no/ /rnam pa gcig tu na sna tshogs su snang ba dang / dgyes par byed pas rnam par snang ba'o/ /yon tan rnam pa mang po snang ba dang / mkhas pa rnams kyis mngon du dgyes par byed ces bya ba'i tha tshig ste/de nyid rnam par snang mdzad do/ /rnam pa gcig tu na/ rnam par snang byed ni nyi ma ste/ skar ma dang zla ba la sogs pa zil gyis mnan nas khyad par du snang ba'i phyir ro/ /rnam par snang mdzad 'di ni de'i yin te/ de'i rgyud las skyes zhes bya ba'i tha tshig go/ / de skad du/ ngang pa phye rlab skyed byed 'od zer stong / /ri sha ka pi 'od phreng nyi ma gsal/ /nor can gso byed de bzhin sku dang ldan/ /rnam snang bshes gnyen gzer tshad mun pa sel/ /zhes 'byung ngo / /bcom ldan 'das kyis sngon zhes bya ba'i don ni 'di yin te/ bcom ldan 'das shAkya thub pas byin gyi rlabs kyi sngon rol du byang chub sems dpa' la mtshan 'di zhes bya ba sha stag gis byin gyis rlob par gyur cig ces byin gyis rlob pa po de dag gis byin gyis brlab par smon lam btab cing don du gnyer ba yin te/smon lam ni byin gyi rlabs kyi yul can kho na yin no/ /shAkya thub pas de ltar smon lam btab nas rang gis kyang byin gyis brlabs pa dang /de nas gzhan dag gis kyang byin gyis brlabs te/ de ltar na shAkya thub pa la sogs pas byin gyis brlabs so/ /'di ni sngon gyi smon lam dang / sngon gyi smon lam can gyi byin gyi rlabs kyis zhes bya ba'i don to/ / sngon gyi sgra gcig lus par byas pa'i phyir ro/ /ci'i phyir chos kyi rnam grangs 'di bshad pa'i byin gyis brlabs she na/ 'di ltar 'di ni dang por spyad pa yin pa dang / sangs rgyas kyi chos rnams yang dag par 'grub pa yin pa'i phyir ro/ /ci'i phyir na byin gyis brlabs zhes bya ba la ci'i phyir bya ba gang dag gi don gyi phyir ro//bshad par zhes bya ba ni bshad pa'i phyir ro/ /byin gyis rlob pa'i dgos pa ni shes te khong du chud na bshad pa de nyid gang gi don du snyam nas ci'i phyir na byin gyis brlabs zhes bshad pa'i dgongs pa 'dri'o/ /ji ltar byin gyis brlabs pa ni rnam pa gang gis so/ / dgos pa smras pa/ rang gi don dang gzhan gyi don zhes bya ba'o/ /ji ltar zhes bya ba ni gsung dang thugs dang skus zhes 'chad par 'gyur ro/ /mos pas spyod pa'i sa la gnas pa ni gang dag sar ma chud pa ste so so'i skye bo rnams so/ /stsogs pa'i sgras ni sar chud pa rnams bsdu ste dang po pa rnams kyis ni chos kyi rnam grangs 'di mnyan pa la sogs pas rim gyis rang gi don 'grub par rig par bya'o//gzhan dag gis ni chos kyi rnam grangs 'di'i don dang yi ge rnams yang dag par rtogs nas 'di rab tu bsnyad pa la sogs pas gzhan gyi don 'grub par khong du chud par bya'o/ / 'di gnyi ga yang rdo rje'i snying po'i byin gyi rlabs dang gdod 'grub bo/ /gzhan la byin gyis rlob pa'i gtan tshigs ni bshad zin to/ /'di ni chos nyid 'di ltar mtshan de ma yin pa de dang 'dra ba rnams kyis kyang mi ston to/ /kha cig na re thams cad ces bya ba'i sgra kho nas thams cad bsdus na de la byang chub sems dpa' thams cad ni mos pas spyod pa'i sa la sogs pa la gnas pa'o zhes bya ba'i 'grel pas ci zhig bya/de lta bas na stsogs pa zhes bya ba'i sgra ni mi 'don pa nyid do/ /ma bton dang thams cad ces bya ba'i sgra ma lus pa bsdu bar go bar 'gyur du 'ong zhes bya ba yin pas 'grel pa don ldan no//byang chub sems dpa' sa thob pa rnams kyis ni 'khor de na 'khod pa'am/ gzhan dag kyang rung ste/ 'di bstan pa'i rgyus ji skad bshad pa lta bu'i gzhan gyi don 'grub pa med de/ 'di bstan pa med par yang de srid pa'i phyir la bcu tshan gnyis pa la yang mos pas spyod pa'i gnas skabs brjod pa'i phyir ro zhes zer ro//gzhan dag na re ni stsogs pa'i sgra la yang nyes pa med do/ /ji lta zhe na/ thams cad kyi bye brag du ma phye ba kho nar bcu tshan gnyis dang sbyar ba'i phyir te/ mos pas spyod pa la gnas pa gang gi rang gi don 'grub pa'i gnas skabs gang yin pa de nyid du bstan la/sa dang po la gnas pa'i ni 'og ma ste sa bcu pa la gnas pa sangs rgyas kyi mthar thug par byed pa'i 'jug pa'i bar du yang de dang 'dra bas/ de ltar na rang gi don gyi skabs kyis bcu tshan dang po thams cad kyi yin pa nyid do/ /de dag gis rang gi don de lta bu khong du chud nas gzhan dag la yang don de lta bu kho na sgrub par byed pas na gzhan gyi don gyi skabs kyis ni bcu tshan gnyis pa dang /don tha dad pa ma yin pa nyid do/ /'grel pa ni thams cad la bya ba nyid kyi/ 'khor de na 'khod pa 'ba' zhig ni ma yin no/ /zhes bstan pa'i phyir ro//de la kha cig stsogs pa zhes bya ba'i sgra 'don pa dmigs nas byang chub sems dpa' rnams de ltar tshogs gnyis su rnam par phye nas rang gi don dang gzhan gyi don bcu tshan gnyis su rnam par 'chad do/ /de ni mi 'thad de 'di ltar bcu tshan dang po la yang sangs rgyas kyi mthar thug par byed pa'i 'jug pa'i bar sa bcu smos la de dag kyang mos pas spyod pa'i gnas skabs pa rnams la mi rung ngo //ji ste re zhig par gsungs pa ma yin te 'on kyang de bstan pa'i rgyus 'byung ba gang yin pa de dag de la skye bar 'gyur ba yin na zhes zer na gal te de lta de dag ni bcu tshan gnyis pa la yang rung ba nyid do//de lta bas na bye brag tu ma phye bar sbyar ba nyid bzang ste/ de dag gis bdag nyid kyis rtogs nas gzhan dag la khong du chud par byed pas de ni de bzhin du rig par bya'o/ /de lta ma yin na rnam par bcad pa med pa'i phyir/ slob dpon gyi 'grel pa chen po mi dgos par 'gyur ro zhes zer ro//da ni bcu tshan dang po'i tshig rnam par dbye ba'i skabs dbye ste de la brtag par bya ba ma yin pa'i phyir dang / nyan thos la sogs pa'i yul ma yin pa'i phyir sangs rgyas kyi chos bsam gyis mi khyab pa rnams ni zag pa med pa'i byang chub kyi phyogs pa'i rang bzhin dag yin no//snang ba ni 'jig rten las 'das pa'i lam gyis mngon sum du byed pa ste 'di skad du zag pa med pa'i byang chub kyi phyogs pa de dag nyid kyi rang rig pas nyams su myong ba ni snang ba yin no zhes bshad pa yin no/ /de nyid kyi phyir de dag rtogs pa ste/'thob pa dang mngon sum du byed pa'o zhes bshad do/ /de brjod pa ni zhes bya ba de dag gang zhe na/ bstan pa yin par ston to/ /ji lta zhe na snang ba de 'dis rjod par byed/ gsal bar byed pa'i phyir te/ de yang bstan pa'i bdag nyid kyis rnams so/ /de dag gis snang ba zhes bya ba gzhir gyur pa'i ye shes yongs su dag par 'gyur te/gser gyi sa le sbram gyi dpes ston par 'gyur ro/ /de dag la 'jug pa ni dad pa dang mos pa dang rab tu dad pa thob pa gang yin pa'o zhes bya ba la dad pa ni mos pas spyod pa'i sa la gnas pas de dag thos nas 'di dag ni 'di lta bu yin no zhes yid ches pa dang bdag gis 'di dag nam zhig na thob par 'gyur snyam du 'dod pa'i mtshan nyid gang yin pa'o//mos pa ni de dag la gtan la phab ste nges par 'dzin pa'i mtshan nyid gang yin pa'o/ /rab tu dang ba ni de gnyis sngon du 'gro ba can gang yin pa ste/ de thob pa'o/ /'jug pa zhes spyir bshad pa kho na yin pas 'dir ni 'jug pa'i thabs dang 'jug pa dang mthar thug pa gang yin pa 'di thams cad 'jug pa zhes bshad do//ci'i phyir zhe na/ mos pas spyod pa dang mthong ba'i lam dang / bsgom pa'i lam gyi rgyu'i dngos por rnam par gnas pa'i phyir de dag yod na de rnams yod pa'i phyir ro//'di ltar de dag ni thos pa las byung ba la sogs pas bsdus pa yin la/ sa de dag la dad pa dang mos pa dang / rab tu dang ba med na re zhig de ston par byed pa'i dge ba'i bshes gnyen tshol ba la sogs pas de dag gi don dang / tshig gi sgo nas nyan par yang mi 'jug na bsam pa dang bsgom pa lta ga la 'jug /'di nyid thams cad kyi rten te/ rtsa bar gyur pa yin pas na rtsa ba'i 'jug pa'o/ /de la gzhan de dag kyang gang zhe na/ bsdus pa'i 'jug pa la sogs pa sangs rgyas kyi mthar thug par byed pa la thug pa rnams so/ /'di dag kyang mdo las/dge ba'i rtsa ba thams cad yang dag par bsdu ba'i phyir zhes bya ba la sogs pa tshig dgus ji skad bshad pa de bzhin du rnam par dbye ba'i phyir thos pa 'dzin pa zhes bya ba la sogs pa smras so/ /bcu tshan gyi tshig dang po ni sngar rnam par phye zin pa nyid do/ /de la thos par bya ba yin pas na thos pa ste chos kyi rnam grangs 'di nyid do//de 'dzin pas grangs nas der gtogs pa'i dge ba'i rtsa ba thams cad yang dag par bsdus par 'gyur bas sdud pa ni thos pa las byung ba'i shes rab ste/ 'dis sdud pa'i phyir ro/ /de nyid 'jug pa yin te rim gyis sa la 'jug pa'i thabs yin pa'i phyir ro//de yang mdo las/ dge ba'i rtsa ba thams cad yang dag par bsdu ba'i phyir zhes rang gi tshig kho nas bstan pa yin no/ /'di ltar des de ltar dge ba'i bshes gnyen las sa rnams kyi ming tsam thos nas dad pa dang mos pa dang rab tu dang ba skyes te/ rtsa ba'i 'jug pa la gnas pa ni de dag tshig re re nas nyan bar byed pas de'i phyir thos pa las byung ba'i shes pa ni bsdus pa'i 'jug pa zhes bshad do//des de ltar de dag thos nas de dag gis brjod par bya ba'i phyir byang chub kyi phyogs dang mthun pa la sogs pa phyin ci ma log par rigs pas rnam par 'byed par byed la/rnam par 'byed pa ni de dag la mkhas par skye bas bsam pa las byung ba'i shes pa ni don rtogs par byed pa'i 'jug pa zhes bya ste 'dis don mtshon par byed pa'i phyir ro/ /de yang mdo las/ sangs rgyas kyi chos thams cad rab tu dbye ba la mkhas par bya ba'i phyir zhes bstan pa yin te/bsam pa las byung ba'i shes pa ni sa rnams kyis brjod par bya ba byang chub kyi phyogs pa'i chos rnams rab tu rnam par dbye ba la mkhas pa'i bdag nyid yin pa'i phyir ro/ /de de ltar don de dag rnam par 'byed par byed pa na don de dag rnam grangs brjod pa du mas gzhan dag la ston par byed pa'i rnam grangs de dag rang gi mtshan nyid 'dzin pa'i don gyis chos kyi sgrar bstan pa rnams rtogs par byed rab tu shes par byed pas bsam pa las byung ba'i shes pa de nyid shin tu mchog tu gyur pa ni chos rtogs par byed pa'i 'jug pa yin te 'dis chos kyi rnam grangs dag rtogs par byed pa'i phyir ro//de yang mdo las/ chos la ye shes shin tu rgyas par bya ba'i phyir zhes bstan pa yin no/ /chos la ye shes ni chos rnams shes pa ste de rgyas par bya ba ji lta bu zhe na/ rnam grangs rgya che zhing du ma yod pa'i chos kyi yul can de nyid de rgya bskyed pa'i phyir ro//des de ltar bsam pa las byung ba'i shes pas chos kyi rnam grangs 'di'i don rnam pa du ma dang / de rjod par byed pa'i rnam grangs rnams khong du chud nas sems can rnams la de gnyi ga phun sum tshogs par ston pas yongs su smin par byed pa'i phyir bsam pa las byung ba'i shes pa de nyid shin tu mchog tu gyur pa ni/sems can yongs su smin par byed pa'i 'jug pa'o/ /de yang mdo las/ legs par gnas pa'i chos bstan par bya ba'i phyir zhes bstan pa yin te/ 'dis shin tu legs par gnas pa'i chos tshig 'bru dang don phun sum tshogs pas ston par byed pa'i phyir ro//des de ltar sngar dad pa dang mos pa dang / rab tu dang ba skyes nas/ de'i 'og tu thos pa dang bsam pa las byung ba gnyis kyis don rtogs pa dang / rnam grangs du ma rig pa/ don bzang po dang / tshig bzang pos sems can rnams yongs su smin par byed pa na mthong ba'i lam la 'jug pas na mthong ba'i lam mngon par rtogs pa ni 'thob par byed pa'i 'jug pa'o//bshad pa las chos thams cad mnyam pa nyid du shes pa yongs su sbyong ba zhes 'byung ba ji lta bu zhe na/ 'di'i lugs ltar na bdag med pa'i rnam pa kho nas mthong bas spang bar bya ba rnams kyang spong bas bdag med pa nyid chos thams cad mnyam pa nyid yin te ro gcig pa nyid kyis tha dad pa ma yin pa'i phyir ro//de yang mdo las/ ye shes tha mi dad pa rnam par byang bar bya ba'i phyir zhes bya bas bstan to/ /ye shes tha mi dad pa gang yin pa de'i rnam par byang ba ni rnam par dag pa ste/ mthong bas spang bar bya ba'i dri ma dang bral ba'i phyir ro/ /ye shes tha mi dad pa yang yul tha dad pa ma yin pa'i sgo nas yin gyi/ ye shes mang po rnams tha mi dad cing gcig tu 'gyur ba ni ma yin no/ /yul tha dad pa ma yin pa ni stong pa nyid gang yin pa ste/ der chos thams cad mtshan nyid gcig pa'i phyir ro//de nyid bshad pa las mnyam pa nyid du shes pa yongs su sbyong bas zhes rnam grangs gzhan gyis mnyam pa nyid du bstan to/ /rang gi don gyi bcu tshan rnam par dbye bar sems can yongs su smin par byed pa zhes bya ba skabs ma yin pa'i gtan tshigs ni bshad pa nyid las bstan pas ma bshad do//sngar bstan to zhes bya ba ni rtogs pa'i sngon rol du zhes bya bar rig par bya'o/ /des de ltar mthong bas spang bar bya ba spangs nas/ bsgom pa'i lam la rnyed pa dang ma rnyed pa'i mtshan nyid kun nas nyon mongs par byed pa'i chos thams cad kyis mi mthos mi dmas pa nyid du dge ba'i chos rnams sgom par byed pa na bag yod par gnas pas de'i 'og tu bag yod pa'i 'jug pa ste/de yang mdo las/ 'jig rten gyi chos thams cad kyis mi gos par bya ba'i phyir zhes bstan pa yin no/ /bsgom pas spong bar bya ba'i nyon mongs pa 'dod chags dang khong khro ba dang /nga rgyal dang ma rig pa dag yod pa dang / rnyed pa la ni chags shing des kyang mthos par 'gyur la/ ma rnyed na ni gnod par 'gyur ro/ /ma rig pa ni sngon du 'gro ba yin pas 'jig rten gyi chos dag gis gos par 'gyur ro//de spangs pa'i phyir mi gos te rtogs par sla'o/ /de dag rnam pa thams cad du spangs par ni khong du chud par mi bya ste/ rnam par mnan pas rang gi mthu'i dpung byed mi nus pa yin no/ /rim gyis yongs su sbyong ba'i phyir sa dang po kho nar rnam pa thams cad du ma lus par spong bar ni mi 'dod de/sa bcu pa la rnam pa thams cad du yongs su dag pa yin no/ /de bsgom pa'i lam la zhugs pa dang 'jig rten las 'das pa zag pa med pa'i byang chub kyi phyogs pa sum cu rtsa bdun gang yin pa de dag nyid la ma chags pa la sogs pa dge ba'i rtsa ba dag yin te/ de dag yongs su sbyangs pa'i 'og tu sa nas sar 'phar bar 'gyur bas sar 'phar ba'i 'jug pa brjod do/ /'di ltar de dag nyid gnas skabs snga ma dag pas gnas skabs phyi ma thob ste khyad par can du gyur nas gong ma zhes bya'o/ /yang de dag nyid kyis dge ba'i rtsa ba zhes bya ba ni yang na zhes bya ba'i tha tshig ste/rnam par bshad pa gzhan ston par byed pa'o/ /sngar ni bye brag tu ma phye bar byang chub kyi phyogs pa nyid ma chags pa la sogs pa dge ba'i rtsa ba yin no zhes gzhi mthun par bsdus pa yin no/ /da ni de dag gi rgyur gyur pa'i dge ba'i rtsa ba gang dag yin pa zhes bsdu ba bstan te/'di skad du ma chags pa la sogs pa dge ba'i rtsa ba sngar skyes pa rnams yongs su sbyangs na byang chub kyi phyogs pa phyi ma mchog tu gyur pa 'dren pas sa snga ma las phyi mar 'phar bar 'gyur ro zhes bshad pa yin no/ /de yang mdo las/ 'jig rten las 'das pa'i dge ba'i rtsa ba yongs su dag par bya ba'i phyir zhes bstan pa yin no//spyir bstan pas 'jig rten las 'das pa nyid dge ba'i rtsa ba dag yin no/ /de dag gi dge ba'i rtsa ba ste rgyur gyur pa yin pas zhes tshig rnam par sbyar ba tha dad par smos so/ /de ltar bsgom pa'i gnas skabs mchog thob pa de bzhin gshegs pa thams cad kyi gsang ba la sogs pa shes par byed nus sam byang chub sems dpa'i mthar phyin par byed pa'i 'jug pa brjod do//de bzhin gshegs pa thams cad kyi gsang ba la sogs pa shes pa zhes bya ba la gsang ba ni sku dang gsung dang thugs kyi gsang ba'o//stsogs pa'i sgras ni sa bcu pa las phra ba la 'jug pa'i ye shes dang / bskal pa la 'jug pa'i ye shes dang / 'jug pa'i ye shes rgyas par bshad pa gang yin pa de bsdu bar bya ste/ 'dis der de dag rnam pa thams cad du rab tu shes pas na byang chub sems dpa'i mthar phyin par byed pa'i 'jug pa zhes bya'o//de yang mdo las/ ye shes bsam gyis mi khyab pa'i yul khong du chud par bya ba'i phyir zhes bstan pa yin no/ /ji lta zhe na gsang ba la sogs pa de dag nyid nyan thos dang rang sangs rgyas rnams dang / byang chub sems dpa' phal ba dag gis bsam par mi nus pas na bsam gyis mi khyab pa ste/de'i yul can yin pas ye shes bsam gyis mi khyab pa'o/ /de'i yul zhes bya ba de nyid la bya'o/ /de khong du chud pa ni mngon du bya ba ste de'i phyir ro/ /khong du chud par bya ba khong du chud pa'i byang chub sems dpa' des shes bya thams cad la sgrib pa med pa sgrib pa spangs pa'i shes pas chags pa med pa dang thogs pa med par shes pas na sangs rgyas kyi mthar thug par byed pa'i 'jug pa brjod de/de yang mdo las/ thams cad mkhyen pa'i ye shes kyi yul gyi bar du khong du chud par bya ba'i phyir zhes bstan pa yin no/ / thams cad mkhyen pa'i ye shes kyi yul ni chos kyi dbyings te de yang bshad pa las shes bya thams cad ces bya ba'i sgras bstan to/ /chos kyi dbyings ni ma gtogs par/ /'di ltar chos yod ma yin te/ /zhes bya ba de'i sgo nas chos thams cad yongs su shes pa'i phyir ro/ /'jug pa 'di rnams ni zhes bya ba la sogs pa ni ming gzhan brjod pa bye brag khyad par shes par byed pa'o//de lta ma yin te/ don la khyad par med na ming tha dad par yang mi 'gyur ba nyid do/ /dang po ni ming gzhan la smos pa'i phyir dang / gzhan dag gi yang rgyu'i dngos po yin pa'i phyir shugs kyis na spyir ming rtsa ba'i 'jug pa zhes bshad do//dngos po nye bar 'god pa ni ma gtogs te zhes bya ba ni gang du'am mdo gzhan las phung po la sogs pa'i dngos po tsam nye bar 'god pa gang yin pa de ma gtogs so zhes bya ba'i tha tshig go/ /yang na sa bcu pa 'di nyid las smon lam chen po dag gi nang na smon lam bzhi pa bstan pa lta bu ste/yan lag dang nye ba'i yan lag la sogs pa'i mtshan nyid bshad pa'i rigs pa'i thabs kyi dngos po nye bar bkod cing smos pa'i phyir ro/ /'du ba ni sdud pa ste gos blta ba lta bu'am/ 'jig rten gyi khams 'jig pa ltar bsdus pa'o//'jig pa'i sgo nas 'byung mod kyi bsdus pa las mi 'da'o/ /ji ltar na gsum par 'don pa rnams kyi de nyid kyi phyir yin zhe na/ rgyu nyid du brjod pa'i phyir yin te gsum pa yang rgyu ni de nyid kyi phyir las mi 'da'o/ /de nyid kyi phyir gsum pa yang de nyid kyi phyir yin no zhes bshad do//de la rtsom pa ni zhes bya ba la sogs pa la des sa 'di dag gi ming thos nas bdag gis 'di dag nam zhig thob par 'gyur zhes dad pa dang 'dun par byed do/ /de gnyis kyis bskul ba na de dag skul bar byed pa'i dge ba'i bshes gnyen rnams kyi thad du nye bar 'gro'o/ / stsogs pa'i sgras ni bsnyen bkur byed pa dang / bshad pa don du gnyer ba zhes bya ba la sogs pa bsdu'o/ /'di nyid tshol ba yin te/ ji srid ma thos kyi bar du'o/ /'thob pa ni 'di dag thos nas don dang tshig gi sgo nas 'dzin pa'o/ /'dir ni rnam grangs dang po nyid ces bya ba ni rtsom zhing 'thob pa dag gi mjug thogs su gtogs pa rnam par 'jog pa'i phyir bshad pa gnyis pa mi 'thad do zhes ston par byed do//'di ni rang gis rtogs nas sems can rnams la de bzhin byed pas sems can rnams kyis rtsom zhing thob par bya ba'i phyir zhes bya bar rig par bya ste/ de ltar bcu tshan 'di gzhan gyi don [(]kyi [,]gyi [)]dbang du byas par rung ngo //tshig dang po ni rtsom zhing 'thob pa'i rtsa bas bshad zin to/ /rtsom zhing 'thob pa gzhan bcu tshig gzhan bcus ji skad du bshad pa de bzhin du rnam par dbye bar bya ste/ ji ltar thos pa zhes bya ba la sogs pa la/ ji lta ba bzhin du phyin ci ma log par thos par bya ba yin pa'i phyir thos pa ni chos kyi rnam grangs 'di nyid yin no//de yang byang chub sems dpa'i sa bcu po bstan pa'i chos kyi ngo bo nyid 'di dag nyid yin no/ /de'i don ni ye shes kyi bdag nyid de dag kho na yin no/ /de legs par 'dzin pa ni yang dag par 'dzin pa'o//de nyid khyad par du bkod pa yin pas rnam par bkod pa ste/ bsam pa las byung ba'i shes pa mchog gis gtan la phab pa yin no/ /de ltar bdag nyid kyis bzung nas 'dzin du 'jug pas shes par bya ba ni gdul ba rnams la ston pas zhes bya ba yin pas yang dag par 'dzin pa rtsom zhing 'thob pa'o//'di yang mdo las/ byang chub sems dpa'i sa ji lta ba bzhin du rnam par bkod pa la mkhas par bya ba'i phyir zhes bya ba 'dis bstan te/ ji skad du bstan pa de bzhin du bshad pa'i tshig gi don rnam par dbye ba nyid kyis bshad do/ /des de ltar sa 'di dag bzung ste/ don dang tshig gi sgo nas rab tu bstan nas ye shes kyi bdag nyid 'di dag kho na mngon sum du bya bas thob par 'dun pa dang /'dod pa bskyed pa'i phyir 'dun pa rtsom zhing 'thob pa ste/ 'di yang mdo las/ sangs rgyas kyi chos thams cad la lhag par dmigs par bya ba'i zhes bstan pa yin no/ / ji lta zhe na/ sangs rgyas kyi chos thams cad de zag pa med pa'i sa thams cad la lhag par dmigs pa ni mngon par 'dod pa ste/ lhag pa'i bsam pas dmigs pa'i phyir ro/ /bshad pa'i don ni de de ltar 'dun pa drag po skyes nas/ zag pa med pa'i chos byang chub kyi phyogs pa gang dag yin pa de dag gi bye brag snang ba thob pa la sogs pa mdo sde'i rgyan las bshad pa des bsgom pa'o//de nyid rnam pa yin te/ des rtogs pa'i phyir ro zhes bya ba yin no/ /de'i tshe de dag rnam pa des sgom par byed kyi/ snga ma bzhin du sems pa tsam gyis ma yin pa'i phyir mnyam par gzhag pa'i gnas skabs ston par byed pas sbyor ba rtsom zhing 'thob pa yin te/gnas skabs de ni rtogs pa'i 'phen par byed pa yin pas sbyor ba'o/ /'di yang mdo las/ zag pa med pa'i chos bye brag gis bsgom par bya ba'i phyir bstan pa yin te/ zag pa med pa'i chos rnams bsams pa las byung ba las khyad par du 'phags pa mnyam par gzhag pa'i shes pa bye brag gis bsgom pa'i phyir ro//rtogs par byed pa rtsom zhing 'thob pa ni rnam par phye zin pa nyid du zad do/ /shes rab chen po yang yin zhes bya ba la sogs pa rnam grangs bstan pas/ mdo las yon tan rjod par byed de/ mthong ba'i lam 'di nyid dngos po'i mtha' shes pa yin pa'i phyir/ don dam pa pa'i byang chub kyi sems bskyed pa yin te/ 'di yod na dri ma gnyis dang 'bral bar 'gyur gyi/ nyan thos la sogs pa'i ni don chen po ma yin pa nyid do zhes gdul ba rnams theg pa chen po la spro ba bskyed pa'i ched yin par rig par bya'o//des de ltar rtogs nas bsgom pa'i lam la gnas pa ni/ dag pa 'jig rten pa'i ye shes kyi sa bcu la sogs pa chos kyi rnam grangs rnams kyi don du brjod par bya ba byang chub kyi phyogs pa la sogs pa gang dag yin pa de dag rtogs par byed rab tu shes par byed pas na bsgom pa'i lam rtsom zhing 'thob pa zhes bya'o//ji ltar de dag rtogs par byed ce na de des rang gi rtogs pas yongs su gcod pa na/ de dag kyang des rtogs te/ de dag 'jig rten las 'das pa'i ye shes kyi khongs su gtogs pa'i phyir ro//rnam pa gcig tu na de'i bya ba rang gis rtogs pa yongs su gcod pa 'ba' zhig tu ma zad pas/ de'i phyir de dag kyang rab tu shes so/ /'di yang mdo las/ shin tu brtags pa'i ye shes kyi sgo la 'jug par bya ba'i phyir zhes bstan pa yin no/ /ji lta zhe na/ shin tu brtags pa'i ye shes ni/ rjes la thob pa kho na yin te/ de ni zag pa med pa'i stobs kyis skyes pa'i phyir/ zag pa dang bcas pa yin yang de skad ces bya'o/ /des sgo rnams la 'jug pa ni rtogs pa'o/ /sgo ni 'dir chos kyi rnam grangs kyi don yin te/ de'i sgo nas de dag la 'jug pa'i phyir ro//res 'ga' don yang sgra yongs su shes par bya ba la sgo zhes bya'o/ /rang gi phyogs kyi khyad par ci rigs par yongs su bstan pa la zhes bya ba la ci rigs su zhes bya ba 'di'i bshad pa ni ci rigs par zhes bya ba yin te/ lugs gzhan gyi rjes su 'brang bas gang la gang rigs par zhes bya ba'i tha tshig go//gnas gzhan zhes bya ba 'di'i bshad pa ni rang gi phyogs kyi khyad par zhes bya ba yin no/ /rang gi phyogs nyid de las gzhan pa la ltos na khyad par can yin la/ de nyid gnas gzhan yang yin te/ pha rol smra ba'i phyogs gzhan la ltos na gzhan yin pa'i phyir ro//rab tu brjod pa zhes bya ba 'di'i rnam par 'grel pa ni yongs su bstan pa zhes bya ba yin te/ rab tu brjod pa ni rab tu bstan pa'o/ /de nyid yongs su bstan pa yin te 'thad pa sgrub pa'i rigs pas rang gi phyogs bsgrub par bya ba sgrub pa zhes bya ba'i tha tshig go/ /de la bag tsha ba med pa ni mi 'jigs pa dang ldan pa'i phyir yul yul por ma gyur pa'o//mi shes pas yul yul por gyur pa dang 'dra bas na bag tsha ba zhes bya ba'o/ /spobs pa zhes bya ba'i sgra lan 'debs pa'i spobs pa zhes bya bas rnam par 'grel te/ lan ni tshig lan no/ /de gdab par nus pa ni spobs pa'o//gzhan gyi phyogs sun 'byung ba'i phyir lan 'debs nus pa ni dri ma med pa'o/ /des sun 'byung ba'i rnam pa thams cad rab tu gsal bar byed pa nyid de/ de lta bur mun pa med pa ni snang ba yin pas phas kyi rgol ba tshar gcod nus pa rtsom zhing 'thob pa zhes bya'o/ /'di yang mdo las/gnas gzhan ci rigs su rab tu brjod pa la bag 'chums pa med pa'i spobs pas snang bar bya ba'i phyir zhes bstan pa yin no/ /ji lta zhe na/ gnas gzhan ci rigs su rab tu bstan par bya ba la bag tsha ba med pa'i phyir te/ spobs pas snang bar bya ba gang yin pa de'i phyir ro//so so yang dag par rig pa chen po'i sa ni spyod yul dang yul lo/ /de shes pas mngon sum du byed pa ni khong du chud pa dang dpyod pa'o/ /de dang ldan pas gzhan dag gis dri ba rnam pa du ma smras pa rnams kyi lan 'debs par nus pas de'i 'og tu dris pa lan 'debs nus pa rtsom zhing 'thob pa zhes bya'o//'di yang mdo las/ so so yang dag par rig pa chen po'i sa shin tu rtogs par bya ba'i phyir zhes bstan pa yin no/ /ji lta zhe na go rims bzhin du so so yang dag par rig pa chen po chos dang don dang nges pa'i tshig dang spobs pa so so yang dag par rig pa rnams kyis ming dang don dang tshig dang /shes pa la sogs pa'i mtshan nyid shin tu rtogs par bya ba'i phyir te/ rab tu rnam par dbye ba'i phyir ro/ /byang chub sems dpa' ni byang chub kyi sems yin pas byang chub don du gnyer ba ste/ byang chub tu smon lam btab pa zhes bya ba'i sgras ston par byed do/ /des na dran pa mi brjed pas chud mi gson pa yin no//de yang byang chub dran pa chud mi gson pa yod na yod pas/ la la las bar du byang chub ces bya ba'i sgra 'byung ngo / /la la las ni byang chub kyi sems zhes bya ba'i sgra kho na zhig 'byung ste/ de'i tshe ni byang chub tu smon lam btab pa nyid byang chub kyi sems yin no zhes bstan pa'i ched yin par khong du chud par bya'o//des na 'di theg pa dman pa la dga' ba skyed par mi byed pas/ de'i nyes pa'i gnyen por theg pa dman par 'gro ba'i gnyen por rtsam zhing 'thob pa zhes bya'o/ /'di yang mdo las/ byang chub kyi sems kyis dran pa brjed pa med par bya ba'i phyir zhes bstan pa yin no//sems can gyi don bya ba la le lo byed pa'i gnyen po rtsom zhing 'thob pa ni rtogs par sla'o/ /thams cad du zhes bya ba'i 'grel pa ni rig pa'i gnas lnga dag tu zhes bya ba yin no/ /zhugs pa ni rnam par zhugs pa ste gtan la 'bebs pa gang yin pa'o//de thob pa ni rtogs pa ste ldan pa yin no/ /des na 'di sems can gyi don gyi thabs su rig pa'i gnas de dag la mkhas shing sems can bag la nyal tha dad pa rnams yongs su smin par byed nus pas thabs mi shes pa'i gnyen po rtsom zhing 'thob pa zhes bya ste/ 'di yang mdo las thams cad du zhugs pa'i rnam par gtan la 'bebs pa thob par bya ba'i phyir zhes bstan pa yin no/ /rig pa'i gnas lnga ni/ sgra dang gtan tshigs de bzhin bzo/ /gso ba dang ni de bzhin du/ /nang ni so sor brtag bya ba/ /shes pa mkhas pas rig par 'dod/ /de ltar na gzhan gyi don las brtsams nas bcu tshe na gnyis pa yin no//don du brjod par bya ba byang chub kyi phyogs pa la sogs pa chos kyi sgo mo rnams ni 'phags pa dkon mchog brtsegs pa la sogs pa'i tshig gi bdag nyid kyi chos kyi rnam grangs rnams te/ de dag gis don gyi rjes su 'jug pa'i phyir ro//de dag gis rab tu dbye ba ni mang po nyid de/ /sgo rab tu dbye ba de la'o/ ji ltar na 'dis mkhas par 'gyur zhe na/ thams cad 'di'i nang du 'dus pa'i phyir te/ 'di dang 'dir don dam pa'i byang chub kyi sems nas bzung ste/ zag pa med pa'i ye shes kyi rgyun gang gis na byang chub sems dpa' rnams dang /de bzhin gshegs pa rnams rab tu phye ba rgyu dang 'bras bur bcas pa'i ngo bo gang yin pa de gnas skabs gang nas gang ma thob pa la rnam par phye nas sa bcu nyid du brjod do/ /mdo thams cad las ni 'bras bu'i gnas skabs sam rgyu'i gnas skabs zhig 'byung la/ 'di las ni gnyis ka 'byung ba de'i phyir 'dis thams cad la mkhas par gyur par rig par bya'o/ /gzhan dag na re dang po nyid du bshad pa'i phyir ro zhes zer ro/ /spobs par gyis shig ces bya ba 'dis ni spobs pa spyir gsungs te/ de nyid rang gi mthu dang gzhan gyi mthu'i spobs pa zhes rnam par phye nas brjod do//de ltar na spobs pa'i rtsa ba ni yan lag kyang yin la/ cig shos ni de'i dbye ba yin pa'i phyir nye ba'i yan lag yin te/ 'dir nye ba'i yan lag gi rang gi mthu'i spobs pa yin no/ /yan lag tu 'gyur ba gang yin pa de ni dbye ba'i ngo bo spobs pa gzhan rnam pa bzhi'i rten yin pa'i phyir ro//de la gzhan gyi mthu byin gyi rlabs kyis 'char bar nus te/ de nyid sangs rgyas kyi mthus zhes bya bas bstan to/ /sangs rgyas kyi mthus de ni mdo nyid las de bzhin gshegs pa'i ye shes snang ba'i byin gyi rlabs zhes tshig gzhan gyis rnam par phye ba mdzad pa yin te/de bzhin gshegs pa'i byin rlabs kyis/ rdo rje snying po snang zhing mun pa med pa dang / rab tu mngon zhing don thams cad gsal bar gyur nas ji ltar bstan par bya ba'i don byang chub kyi phyogs la sogs pa sangs rgyas bzhin du phyin ci ma log par ston pa de ltar byin gyis brlabs pa'i phyir ro//'dus byas ni zag pa med pa'i byang chub kyi phyogs pa la sogs pa'o/ /de nyid ma chags pa la sogs pa'i rang bzhin yin pa'i phyir dge ba'i rtsa ba'i chos zhes bya ste/ rdo rje'i snying po'i rgyud du gtogs pa de dag yongs su dag cing rnam par byang bas spobs pas na de skad ces bya'o/ / de la sangs rgyas kyi byin gyi rlabs kyi skabs su gzhan gyi mthu'i spobs pa kho na brjod par rung ste/ 'dus byas kyi chos de dag spobs pa 'byin nus pa dang / de bzhin gshegs pa nyid kyis gsung gis rdo rje'i snying po la bskul ba dang / brtas shing kha 'bye la rgyas par 'gyur mod kyi/ 'on kyang rang gi rgyud du gtogs pa rnams kyi mthu brtas pas der spobs pa skye ba'i phyir rang gi mthu'i spobs pa zhes bya'o/ /gzhan yang yod dgu de bzhin gshegs pa'i byin gyi rlabs 'ba' zhig 'chad pa ni ma yin gyi/ 'di'i rang gi nus pa'i mthu yang 'di 'dra'o zhes bstan pa'i phyir ro/ /'di yang mdo las/rang gi dge ba'i rtsa ba yongs su dag pa'i phyir zhes bstan pa yin no/ /'dus ma byas kyi chos ni de bzhin nyid dang / chos kyi dbyings so/ /de yongs su dag pa ni rnam par byang ba ste/ de'i stobs kyi spobs pa gang yin pa de 'dus ma byas kyi chos yongs su dag par spobs pa zhes bya'o//de yang mdo las chos kyi dbyings yongs su sbyangs pa'i phyir zhes rnam grangs gzhan gyis bstan to/ /sems can yongs su smin par byed pa'i phan 'dogs pa de'i rgyu las byung ba yongs su dag pa ste/ des spobs pa'o/ /de yang mdo las sems can gyi khams la phan 'dogs pa'i phyir zhes rang gi tshig gis bstan to//chos kyi sku ni chos kyi dbyings te/ sems dang yid dang rnam par shes pa spangs zhes bya ba ni de bye brag tu byed pa yin no/ /de la kun gzhi'i rnam par shes pa ni kun nas nyon mongs pa'i chos thams cad kyi bag chags sa bon rnams kyis bstsags shing bsgos pa yin pa'i phyir sems zhes bya'o//nyon mongs pa can gyi yid ni rtag tu bdag tu rmongs pa la sogs pa nyon mongs pa bzhis rlom pa'i bdag nyid yin pa'i phyir yid yin no/ /mig la sogs pa'i rnam par rig pa ni gzugs la sogs pa gsal bar snang ba yin pa'i phyir rnam pa drug car yang rnam par shes pa yin te de dag spangs pa'o//ji lta zhe na/ bshad pa/ rdo rje'i snying po la mthar phyin pa rnam pa 'di gsum char yod de/ mthar phyin pa ni byang chub sems dpa'i mchog nyid yin no/ /de la sa bcu pa la de'i de bzhin nyid yongs su gyur pa na/ de'i tshe shes pa de dag sems zhes bya ba la sogs pa'i sgra 'jug pa'i rgyu mtshan med pa'i phyir de dag tu mi brjod kyi/'on kyang me long lta bu'i ye shes zhes bya ba la sogs pa'i sgrar brjod do/ /de nyid kyi phyir sems dang yid dang rnam par shes pa spangs pa zhes bshad do/ /ye shes 'ba' zhig gi gnas zhes bya ba ji lta bu zhe na/'dzin pa gnyis kyi dri ma dang bral ba'i phyir ye shes dag pa 'ba' zhig gi gnas yin pas so/ /'di go chos nyid ma yin nam/ 'di ltar 'di dag gi gnas yin zhe na/ de dag des rab tu phye ba'i phyir te/ 'di ltar gzhan nas dang po ni gnyis kyi gnas yin no zhes de bzhin nyid yongs su dag pa'i mtshan nyid 'di longs spyod rdzogs pa dang /sprul pa gnyis kyi gnas yin par bshad do/ /de nyid kyi phyir zag pa med pa'i chos rnams kyi rgyu yin pas chos kyi dbyings zhes bya'o/ /byang chub sems dpa'i mthar phyin pa 'di yang mdo las/ chos kyi sku ye shes kyi sku'i phyir zhes gsungs pa yin no//'di ni chos kyi sku yang yin la ye shes kyi sku yang yin pas zhes tshig rnam par sbyar te/ sku ni gnas kho na yin no/ /yang na ye shes rnams nyid sku'i gnas yin te/ de ni chos kyi ngo bo yin pa'i phyir ye shes 'ba' zhig gi gnas zhes bya ba 'dir yang me long lta bu la sogs pa'i ye shes 'ba' zhig rten yin pas ye shes de skad tshig rnam par sbyar ro//mthar phyin gnyis pa ni zhes bya ba la sogs pa la/ da gzod kho na dbang phyug chen po'i gnas su skye zhes bshad pa ma yin nam/ de ni 'og min gyi gnas su skye ba yin pas/ de yang mdo las/'jig rten thams cad las mngon par 'phags pa'i lus 'byung ba'i phyir zhes bstan pa yin na/ ji ltar de'i lus khog pa 'jig rten thams cad las khyad par du 'phags pa dpag tshad khri drug stong gi tshad du 'byung ba rnyed pa dang / de bzhin du sems can gyi don la 'gro ba gzhan du yang skye ba nyid na/de ji ltar 'gro ba lnga las yang dag par 'da' ba zhes bya ba na/ dbang thob pas nyon mongs pa'i gzhan gyi dbang gis de dag tu mi skye ba'i phyir ro/ /nyan thos rnams ni gtan du mi skye ste/ de'i phyir yang dag par 'das pa ni thun mong ba'i mthar phyin pa zhes bya'o/ /de yang mdo las 'jig rten gyi 'gro ba thams cad las yang dag par 'das pa'i phyir zhes rang gi tshig gis bstan to//mya ngan las 'das pa'i lam yongs su dag pa ni mdo las 'jig rten las 'das pa'i chos kyi 'gro ba yongs su dag par bya ba'i phyir zhes gsungs pa yin te/'jig rten las 'das pa'i chos kyi [(]'gre [,]'gro [)]ba yongs su dag pa zhes bya bar bsdus so/ /de la mya ngan las 'das pa ni don dam pa'i chos yin pa'i phyir chos so/ /de thob par byed pa'i lam ni 'gro ba yin te/ de nas der 'gro ba'i phyir 'gro ba ni lam yin no/ /'jig rten pa yang yod de/des kyang 'bral ba 'thob pa'i phyir 'jig rten las 'das pa zhes bya ba'i sgras khyad par du byas so/ /thugs kyis byin gyis brlabs pa ji lta bu zhe na zhes bya ba la sogs pa la/ lus de yang phung po lnga pa yin pas/ de'i phyir de dag zil gyis mi non pa nyid du rnam par phye nas brjod do//bla na med pa'i dpal gyi gzi brjid dang ldan zhes bya ba la/ gzi brjid ni gzi byin te gzugs mdzes pa'i khyad par ro/ /de yang sman bcud kyis len la sogs pas kyang 'gyur ba de'i phyir bla na med pa'i dpal gyis zhes smos pas khyad par du byas te/ dpal gyis mdzes pa dang ldan no zhes bya ba'i tha tshig go//de yang dpes ston par [(]byad [,]byed [)]de/ de ni mdog mdzes pa dang ldan pa'i phyir rgyal po'i 'khor rnams zil gyis mnan nas 'dug go/ /bstan bcos kyi don rnam par gtan la dbab par bya ba la/ mi shes pa dang ldan pa dang 'jig par 'gyur bas gzugs dang ming gi bye brag gis so zhes bya ba smos te/ming ni gzugs can ma yin pa'i phung po rnams so/ /de lta bas na 'dis ni gzugs kyi sku la mdzes pa dang ldan pa'i phyir dang / tshor ba la sogs pa mi shes pa dang bral ba'i phyir phung po lnga po thams cad zil gyis mi non par bstan to/ /de yang rnam pa dgu ste zhes bya ba la/zil gyis mi non pa'i lus rnam pa gnyis su phye ba gang yin pa de la dang po ni yan lag kho na yin no/ /gnyis pa tshor ba la sogs pa mdzes par bshad pa ni de'i nye ba'i yan lag yin te tshig dgus bshad do/ /gzugs kyi sku mdzes pa ni tshig gzhan gyis rnam par phye ba'i phyir yan lag kho nar gnas te/thams cad du yang yan lag dang nye ba'i yan lag bshad pa'i sgo nas sbyar bar bya'o/ /de la rgyun chags su thogs pa med pa zhes bya ba ni bstan pa dang bshad pa dag gis so/ /rigs pa rnam pa bzhi shes pa shin tu rnam par byang bar byas shin tu rnam par dag par byas pas te/rigs pa rnam pa bzhi ni/ ltos pa dang ni chos nyid dang / /rgyu dang 'bras bu nyid dang ni/ /'thad pas sgrub pa gang yin pa/ /'di dag rigs pa bzhi yin no/ /de la dang po ni chos thams cad rgyu la ltos pa yin pas/ thams cad 'bras bu'i don du byung / /de phyir rtag pa yod ma yin//zhes bya ba ste chos thams cad ni mi rtag pa'i phyir la/ mi rtag pa yang rgyu la ltos pa yin no/ /rgyu dang 'bras bu'i rigs pa ni/ /'bras bu khyad par can skye bar nges pa ste/ de yang mig kho nas mig gi rnam par shes pa skyed kyi gzhan ni ma yin no zhes bya ba lta bu'o/ / snga ma ni 'bras bu'i bdag nyid rnams kyi rigs pa yin la/ 'di ni rgyu'i bdag nyid rnams kyi yin pas khyad par yod do/ /'thad pa sgrub pa'i rigs pa ni mtshan nyid gsum pa'i gtan tshigs kyis bsgrub par bya ba'i don sgrub pa'o/ /'di ni shes par byed pa'i yul can yin la/ dang po gnyis ni skyed pa'i yul can yin no//chos nyid kyi rigs pa ni rang dang spyi'i mtshan nyid du gnas pa'i chos rnams kyi rang bzhin gang yin pa ste/ me kho na tsha la chu kho na gsher gyi gzhan ni ma yin no zhes bya ba lta bu gang yin pa'o/ /de dag shes pa ste mthar phyin pa des so/ /gang gis gang rigs zhes bya ba ni thams cad kyis thams cad rtogs pa ma yin pa'o//ma rig pa zhes bya ba ni/ 'di ltar sangs rgyas kyi chos bsam gyis mi khyab pa dag la 'thad pa sgrub pa'i rigs pa'i go skabs med pa lta bu ste/ de dag ni rtog ge'i yul ma yin pa'i phyir sangs rgyas kyi chos dag la 'thad pas sgrub pa'i rigs pa'i go skabs med do//de khong du chud pa'i phyir zhes bya ba ni/ de rtogs pa'i phyir te de lta bas na rigs pa bzhis/ chos thams cad klan ka dang lan du bcas pa'i sgo nas gdul ba rnams la ston par nus pa'i phyir rigs pa'i spobs pa zhes bya'o/ /de yang mdo las shin tu rnam par sbyangs pa'i ye shes kyis rnam par phye ba la 'jug pa zhes bya ba 'dis bstan to//ji lta zhe na/ shin tu rnam par sbyangs pa ni shin tu rnam par byang bar byas pa'i ye shes ni rigs pa rnam pa bzhi shes pa kho na yin no/ /rnam par phye ba ni bye brag tu phye ba ste/ de yang bshad pa las gang gis gang rigs pa zhes bstan pa yin no/ /'dis chos rnams la 'jug pas na 'jug pa ni khong du chud pa kho na yin te/ de yang de khong du chud pa'i phyir zhes bstan pa yin no/ /go rims la mi ltos par zhes bya ba ni dper na phung po la sogs pa bstan pa'i skabs lta bu dag la ni gzugs kyi phung po rnam par dbye ba'i 'og tu/tshor ba'i phung po rnam par dbye ba yin no snyam nas go rims kyi stobs kyis de la ltos nas ston nus pa nyid bas go rims la mi ltos par zhes bya ba la sogs pa smos so/ /de la ma ltos kyang g.yengs pa med pa'i phyir ston nus pa nyid pas gtam gyi bar du bcad kyang zhes bya ba smos te/gdul ba bsam pa sna tshogs pa rnams kyis dris te/ g.yengs pa'i rgyud yod du zin kyang thang chad pa med par ji ltar 'dod pa ji ltar bsams pa bzhin du de dang de gang yang rung ba nas bstan par bya ba'i tshig 'bru rnams dang / rnam grangs rnams dang / don rnam pa du ma lag mthil du gzhag pa bzhin du rjes su dran rab tu shes pas na grol ba'i spobs pa yin no/ /de yang mdo las/ dran pa brjed pa med pa'i byin gyi rlabs zhes bstan pa yin te/ tshig 'bru dang don thams cad dran pa nyams pa ni brjed pa med pa'o/ / de'i byin gyis brlabs zhes bya ba ni gang gis de la byin gyis rlob pa ste/ brjed pa med pa'i rgyu'i spobs pa nye bar sgrub pas na grol ba'i spobs pa zhes bshad kyi skabs ma yin pa'i byin gyi rlabs ma yin no zhes bstan pa'i phyir ro/ /gdul bar bya ba ji lta ba bzhin du zhes bya ba ni gang zhig rnam pa gang gis gdul bar bya ba de bzhin du rnam grangs skad du mas brjod pa'i rnam pa dag dang dpe ste rtogs par bya ba'i thabs dpe sna tshogs kyis sems can rnams kyi the tshom yid gnyis gcod par byed sel bar byed cing yang dag par nges par bskyed pas na go bar byed pa'i spobs pa zhes bya'o//'di yang mdo las shin tu rnam par nges pa'i blo gros la mkhas pa zhes bstan pa yin no/ /ji lta zhe na/ mi mthun pa'i phyogs rnam par bcad pas gdul ba rnams kyi shin tu rnam par nges pa'i blo gros blo gang yin pa de bskyed pa la mkhas pa ste de dag nye bar sgrub par mdzad do zhes 'byung ba'i phyir de bskyed par nus pa yin no//spyi'i mtshan nyid gsum ni zag pa dang bcas pa thams cad sdug bsngal ba nyid dang / 'dus byas thams cad mi rtag pa nyid dang / chos thams cad bdag med pa nyid de/ de'i rnam par shes pa rgyun mi 'chad par yang dang yang du mngon du byed pa kun du spyod pas so//mthun pa rnams la ni rjes su chags pas ji lta ba bzhin ston par byed mi mthun pa rnams la ni gzhan du ston par byed pa med pas kun nas nyon mongs pa can ma yin pa'i spobs pa zhes bya'o/ /mdo las ni thams cad kyi rjes su song ba'i blo mi 'dor ba zhes gsungs pa yin te/ji lta zhe na/ chos thams cad kyi rjes su mtshan nyid gsum gyi rnam pas song zhing zhugs pa'i blo gros gang yin pa de mi 'dor bas yongs su mi 'dor ba yin no/ /mtshan nyid rnam pa gsum ni kun brtags pa'i mtshan nyid dang / gzhan gyi dbang gi mtshan nyid dang /yongs su grub pa'i mtshan nyid do/ /spyi'i mtshan nyid ni 'dus byas dang / zag pa dang bcas pa dang / chos kyi rjes su 'jug pa'i phyir mi rtag pa dang / sdug bsngal ba dang / bdag med pa dang stong pa yin te/ 'dus byas thams cad ni mi rtag pa nyid do/ / zag pa dang bcas pa thams cad ni sdug bsngal ba nyid do/ /chos thams cad ni stong pa dang bdag med pa dag yin par yang dang yang mngon sum du byed pa kho na'o/ /gdams ngag ni lung 'bogs pa'o/ /de yang rnam pa du ma yod pas nges par 'byin pa'i zhes bya ba smos te/ dgos pa nges par 'byung ba can yin no/ /nges par 'byung ba ni 'dir sangs rgyas su nges par 'byung ba yin par rig par bya'o/ /ci'i phyir zhe na/ de las gzhan pa'i gdams ngag sbyin pa'i mthu ni 'di la yod pa nyid las nye bar sgrub pa mdzad ci dgos/ de sbyin nus pa ni der spobs pa nyid do//de ji lta bu zhe na/ stobs bcu po thogs pa med pas zhes bya ba smos te/ de yang bcom ldan 'das kyis stobs bcu po byin gyis brlabs pas de dag sangs rgyas kyi mthus yin pa'i phyir/ sangs rgyas dang ldan pa dag yin no/ /de dag gis sems de dag la thogs pa med thags thogs med pas gdul ba rnams kyi nyon mongs pa drungs nas 'byin par byed pa'i phyir nges par 'byin pa'i gdams ngag gi spobs pa yin te/mdo las yang dag par rdzogs pa'i sangs rgyas kyi stobs brdzi ba med pa nyid ces gsungs pa nyid do/ /ji lta zhe na/bcom ldan 'das kyis nye bar sgrub pa mdzad pa yang dag par rdzogs pa'i sangs rgyas kyi stobs dag gis rdo rje'i snying po brdzi ba med pa'i mthu rnyed pas sangs rgyas kho na bzhin du thogs pa med pa'i phyir te/ de yang thar pa pa'i lam gyis lung phog pas gdul ba rnams kyi nyon mongs pa gcod pa las khong du chud par bya'o//de lta na mi 'jigs pa la sogs pas zhum pa med cing mi 'gong ba nyid yin te/ mi shes pa'i phyir phas kyi rgol ba dang nye bar gnas na 'gong bar 'gyur gyi/ mi 'jigs pa nye bar sgrub pa mdzad pas na bag tsha ba med par ston par byed do//de yang mdo las de bzhin gshegs pa'i stobs dang mi 'jigs pas zhum pa med pa nyid ces gsungs pa yin no/ /sangs rgyas kyi ye shes su gtogs pa zhes bya ba ni rnam grangs gzhan gyis thams cad mkhyen pa'i ye shes kho na bstan pa yin/ so so yang dag par rig pa'i rab tu dbye ba ni bye brag yin te des so//mdo'i sde la sogs pa zhes bya ba la sogs pa zhes bya ba'i sgras ni dbyangs kyis bsnyad pa dang / lung bstan pa la sogs pa bsdu'o/ /tshul drug po de dag la rtog pa ni dpyod pa ste des chos de dag gi rnam grangs du ma mos pa tha dad pa rnams la ston pas na mi zad pa'i spobs pa zhes bya'o//de yang mdo las thams cad mkhyen pa'i ye shes kyi so so yang dag par rig pa'i bye brag gis chos kyi tshul la rtogs pa zhes smos pa yin no/ /ji lta zhe na/ thams cad mkhyen pa'i ye shes kyi so so yang dag par rig pa'i bye brag ni rab tu dbye ba ste/ yul gyi bye brag gis rnam pa du mar sa bcu pa las bshad do//des na chos rnams kyi tshul la rtog par byed de/ /de la tshul dag ni drug go/ /de dag la rtog pa ni dpyod pa dang rtog pa nyid do/ /de la tshul drug ni de kho na nyid kyi don gyi tshul dang / thos pa'i tshul dang / ston pa'i tshul dang / mtha' gnyis spong ba'i tshul dang /bsam gyis mi khyab pa nyid kyi tshul dang / dgongs pa'i tshul lo/ /de la phyi ma rnams kyis dang po gsum rtogs par bya ste/ ji lta zhe na/ dper na dge slong dag /gzugs la ro myang ba yang yod/ nyes dmigs dang nges par 'byung ba yang yod do/ /tshor ba nas rnam par shes pa'i bar du yang de dang de 'dra'o zhes rgyas par gsungs pa/phung po lnga po kho na la kun nas nyon mongs pa dang / rnam par byang ba bstan te/ ro myang ba dang nyes dmigs ni kun nas nyon mongs pa yin no/ /nges par 'byung ba ni rnam par byang ba yin no/ /de gnyi ga yang 'di nyid la yod na bdag gis ci zhig bya zhes sgro 'dogs pa mtha' bstsal to//bdag med na yang de dag mi rung ngo zhes de gnyis la skur pa 'debs pa yang 'di nyid kyis bstsal to/ /de lta bas na 'di las mtha' gnyis spang ba'i tshul gyis de kho na nyid kyi don gyi tshul bstan pa lta bu dang / dper na mdo nyid las dge slong dag ngas ji srid du gzugs la ro myang ba dang /nyes dmigs dang / nges par 'byung ba shes par ma gyur/ de bzhin du tshor ba la sogs pa la shes par ma gyur pa de srid du ngas bdag ni bla na med pa yang dag par rdzogs pa'i byang chub mngon par rdzogs par sangs rgyas so snyam du shes par ma gyur gyi/gang gi phyir ngas 'di dag la ro myang ba la sogs par shes pa'i phyir/ ngas bdag ni bla na med pa yang dag par rdzogs pa'i byang chub mngon par rdzogs par sangs rgyas so snyam du shes so zhes gsungs pa/ mdo de nyid las rtogs par bya ste/ 'dis ni thob pa'i tshul bla na med pa yang dag par rdzogs pa'i byang chub thob pa'i ngo bo bsam gyis mi khyab pa nyid kyi tshul gyis bshad pa lta bu dang /de bzhin du mdo de nyid las dgongs pa 'di nyid kyis 'di lta bu dang 'di lta bur ston pas dgongs pa'i tshul gyis ston pa'i tshul bshad pa lta bu'o/ /mjug tu zil gyis mi non pa'i lus nyid smos pa 'di ni de'i dbye ba yin no zhes ston par byed pa ste/bar du chod pa'i phyir ro/ /gdul ba tha dad pas tha dad pa zhes bya ba ni gang dag lus gang la mos pa bzhin du gdul ba rnams la nyan thos la sogs pa'i lus de ston pa'i phyir ro/ /sku la sogs pa'i cho 'phrul sku la sogs pa'i ngo mtshar rnams mngon du mdzad pa ni kun du spyod pa dang /dbang ba nyid de ji ltar bzhed pa bzhin ston pa'i phyir cho 'phrul dang bcas pa'i spobs pa zhes bya'o/ /mdo las ni/ de bzhin gshegs pa'i sku dang gsung dang thugs kyi rgyan shin tu rnam par phye ba thams cad mngon par sgrub pa nyid nye bar sgrub pa mdzad do zhes bstan pa yin te/ji lta zhe na/ de bzhin gshegs pa rnams kyi sku la sogs pa'i rgyan cho 'phrul gang dag 'gro ba thams cad dga' bar bya ba'i phyir shin tu rnam par phye ba tha dad du gyur pa de dag mngon par sgrub pa ni mngon par sgrub pa'o//de'i dngos po ni mngon par sgrub pa nyid do/ /gang dang ldan na mngon par 'grub pa de yang ye shes yin te/ de mngon par sgrub pa mdzad do/ /ci'i phyir byang chub sems dpa' du ma zhig 'dus na de kho na la byin gyis brlabs she na/ smras pa ting nge 'dzin gyi mthus so/ /de yang de dang 'dra ba'i sangs gzhan dag la ci'i phyir med ce na 'di la yang /ting nge 'dzin gyi mthu de ni gzhan dag la med do zhes gtan tshigs ston par byed do/ /'di ltar gzhan dag las kyang sring mo yid gnyis sel ba zhes bya ba'i ting nge 'dzin gang gi mthus 'phags pa 'jam dpal la sogs pa byang chub sems dpa' sems dpa' chen po rnams kyis kyang bslang bar ma nus na gzhan dag gis lta smos kyang ci dgos pa'i ting nge 'dzin de lta bu la snyoms par zhugs so zhes grag go//yang ji ltar na mthu de 'di kho na la yod kyi gzhan dag la ma yin zhe na/ sngon gyi mngon par 'du byed pas 'phangs pa zhes bya ba la sogs pa smras so//sngon gyi mngon par 'du byed pas 'phangs pa de la yang mdo las/ sngon gyi smon lam gyis mngon par bsgrubs zhes bstan pa yin te/ des sngon gang gis na bdag kho na la ting nge 'dzin 'di yod kyi gzhan dag la ma yin pa de lta bu'i smon lam mngon par bsgrubs so/ / ting nge 'dzin gyi rten ni de skye ba'i rgyu rnams te yon tan 'og nas gzhi dag pa la sogs pa nyid du 'byung ba gang dag yin pa de dag yongs su 'dzin pa ni yang dag par sgrub pa dang / 'thob pa'o/ /de dad pa dang ldan pas mngon par yid ches par gyur la 'dun pa dang ldan pas don du gnyer bar gyur nas dge ba'i chos thams cad sgrub par byed pa'i phyir 'di gnyi ga dge ba'i rtsa ba thams cad skye ba la sngon du 'gro ba yin pas sa bzhi'o//de nyid kyi phyir brtson 'grus rtsom pa'i rgyu zhes 'og nas 'byung ngo / /de rnam par dag pa ni gzhi rnam par dag pa'o/ /de yang sa dang po la gnas pa la yang dri ma dang bral ba shas kyis yod pas khyad par du bya ba'i phyir mdo las lhag pa'i bsam pa shin tu yongs su sbyang ba'i phyir zhes shin tu zhes bya ba'i sgra smos la/bshad pa las kyang byang chub sems dpa'i mthar phyin pa zhes smos so/ /rgyud yongs su smin pas rnam par dag pa yin te/ 'dir tshogs ni bsod nams kyi tshogs so//ye shes kyi tshogs ni shes rab rnam par dag pas bshad zin pa'i phyir ro/ /de nyid kyi phyir de ni chud mi za ba'i rgyu yin no/ /'di ni 'byor pa rgya chen po 'thob pa'i rgyu yin no zhes 'chad par 'gyur te/ shes rab chos kyi dbyings kyi yul can gyis/ de dang tha mi dad pa'i phyir thams cad mngon sum du byed pas chud mi za la/ bsod nams kyis nyan thos la sogs pa dang thun mong ma yin pa nyid kyis 'byor pa mchog rnams 'thob pa'i phyir ro/ /de bzhin gshegs pa'i gsang ba'i chos rnams thams cad bstan pa ste gsang ba dag kho na chos rnams yin no//de yang yul tshad med pa nyid kyis tshad med do/ /de dran pa mi brjed pa ni 'dzin pa ste/ 'di dran pa de'i snod dang gzhi la rten yin pa'o/ /gsang ba smos pa ni dpe tsam du zad de 'di skad du sangs rgyas rnams las chos bstan pa tshad med pa dag thos nas dran zhing 'dzin par phod nus so zhes bstan pa yin pas thos pa yongs su 'dzin pa rnam par dag pa zhes bya'o//mngon par shes pa 'od gsal ba zhes bya ba ji ltar na mngon par shes pa dag mos pa rnams zhes bya zhe na/ smras pa/ des rab tu phye ba'i phyir ro/ /'di yang phal cher dpe'i dbang du byas nas bshad par zad de/'di ltar rdzu 'phrul gyi mngon par shes pa ni yang ba nyid du mos pas rab tu phye ba yin no/ /lha'i rna ba dang lha'i mig dag ni sgra dang snang ba la mos pas rab tu phye ba yin no/ /shin tu rtogs pa'i phyir legs par rtogs pa'i phyir ro/ /gzungs rnams kyi sgo ni yi ge rnams te/de dag la 'jug pa'i thabs yin pa'i phyir ro/ /yi ge de de dag tha dad pa med pa ni snga phyi mi 'gal ba'o/ /don dam pa shes par bya ba'i phyir gdams ngag gang yin pa de bslu ba med pa ste/ de rtogs par 'gyur ba'i phyir ro/ /de nyid kyi phyir de rtogs pas nga rgyal thams cad spangs pa'i phyir mngon pa'i nga rgyal med pa rnam par dag pa zhes bya'o//mdo las ni/ chos kyi dbyings zhes bya ba'i phyag rgyas legs par btab pa'i phyir ro zhes bstan pa yin te/ ji lta zhe na/ chos thams cad kyi mchog yin pa'i phyir don dam pa ni chos kyi dbyings yin no//de'i yul can gyi shes pa don dam pa shes pa dang / chos kyi dbyings shes pa ste/ de'i ched kyi phyag rgya ni mtshan nyid gsum gang yin pa ste/ spyi'i mtshan nyid gsum mo/ /yang 'dul ba dang chos mngon pa dang mdo sde la 'jug pa'i mtshan nyid de des legs par btab pa'o//de yang gang zhe na/ gdams ngag go zhes tshig khong nas drang ste/ de nyid kyi phyir slu bar mi byed pa yin no/ /yang na gdams ngag de nyid phyag rgya yin te/ rang la nges pa bzhin 'doms pa'i phyir ro/ /bslu ba med pa nyid ni gang dag la 'doms pa de dag gis de rtogs par 'gyur ba nyid kyis rig par bya'o//ting nge 'dzin gyi mthu yang yod la rdzu 'phrul gyi mthu yang yod pas rdzu 'phrul gyi mthus zhes khyad par du byed do/ /mthong ba'i lam gyi gnas skabs na don dam pa pa'i byang chub kyi sems bskyed pa gang yin pa de ni don dam pa shes pa la gnas pa'i phyir the tshom med pas shin tu rnam par nges pa'o//gnas pa nyid ni lhan cig 'byung ba dang / mtshungs pa dang ldan pa dag gis so/ /sems bskyed pa de ni sa dang por chud pa yin no/ /sangs rgyas kyi chos chen po rnams skye ba'i rgyur gyur pa'i sa bon du gyur pa'i phyir rgyu'i don gyi dbyings yin no/ /de nyid kyi phyir rgyas pa'o//yang zhes bya ba ni bshad pa gzhan yin no/ /chos kyi dbyings la che ba zhes bya ba la/ la zhes bya bas ni yul dang yul can gyi dngos por ston par byed pa'o/ /sngar ni bye brag bsdu ba ste/ sems bskyed pa nyid zag pa dang bcas pa dang zag pa med pa rnams skye ba'i rgyu mtshan yin pas/chos kyi dbyings su bshad pa yin no/ /da ni khyad par du brjod par 'dod pa'i dbang gis zag pa med pa dag kho na sangs rgyas kyi chos rnams yin te/ dper na srid sgrub gzhu thogs pa yin no zhes bya ba lta bu'o/ /de dag gi rgyu zhes bya ba ni chos dbyings bdag med pa gnyis te/ / de'i yul can la yang de skad ces bya'o/ /rgyas pa nyid kyi rgyu ston par byed de so so'i skye bo la sogs pa de bzhin nyid la dmigs pa'i shes pa gzhan gang dag yin pa ste/ so so'i skye bo'i ni thos pa'i gnas skabs na kun rdzogs pa'o/ /nyan thos la sogs pa'i ni de bzhin nyid la dmigs pa yin par rig par bya'o//de rnams pas shin tu mchog tu gyur pa ni/ sgrib pa gnyis kyi gnyen po zhes bya ba la sogs pa'i phyir ro/ /rnam par dag pa dang mthun pa'i chos zhes bya bar khong du chud par bya ba'i rnam par dag pa nyid chos zhes bya bar ni ma yin no/ /de ni theg pa chen po'i gsung rab nyid bshad pa'i ngo bo yin pa'i phyir chos so//de nyid rigs kyi don gyis na dbyings te gang zhig gang las skye ba de ni de'i rigs dang dbyings yin no/ /de nyid kyi phyir de'i don mnyan pa dang / bsam pa la sogs pa'i rim gyis chos des yongs su sbyangs pa'i phyir sems bskyed pa de'i yongs su sbyang bar bya ba'i sa zhes bya'o//'di la rgyal ba yod pas zhes tshig rnam par sbyar te/ rgyas pa ni mdo la sogs pa mtha' yas pa'i bye brag gis mtha' thug pa med pa'i phyir ro/ /yang dge ba'i don gyis bsod nams kyi rnam grangs nyid du ston par byed do//'dir dbyings kyi don ni rgyu'i don to/ /tshig rnam par sbyar ba ni bshad ma thag pa kho nar zad do/ /rgyas pa ni bskal pa du mar bsgrubs pa'i phyir ro/ /'dis ni 'di bskal pa du mas bsgrubs pa'i bsod nams kyis bskyed pa nyid du bstan to/ /mi rtag pa 'dus byas sdug bsngal yid du 'ong ba/'grub pa skye ba nyid kyi rgyu'o/ /der shin tu rnam par nges pa ste/ mdo las nam mkha'i khams kyi mthas gtugs pa zhes bya ba'i tshig gis bstan to/ /ji lta zhe na/ de nyid slob dpon gyis nam mkha' lta bu ste/ zhes bstan te 'di skad du ji ltar nam mkha' go phye ba'i sgo nas des bskyed pa'i gzugs rnam pa sna tshogs mang po dag gis kyang zad par mi 'gyur ba ltar sems bskyed pa 'di yang de dang 'dra'o//ji lta zhe na/ de ni zag pa med pa me long lta bu'i ye shes la sogs pa 'phen par byed pa yin pa'i phyir rgyu mthun pa'i rgyu nyid du rnam par gnas la/de dag kyang sems can mthar thug par yongs su bsngos pa'i dbang gis 'khor ba ji srid par rjes su 'jug go/ /de nyid kyi phyir de bzhin gshegs pa de ni rgyu mthun pa zhes bya'o/ /rnam par smin pa'i rgyu ni 'bras bu bskyed nas ldog gi rgyu mthun pa'i rgyu ni 'bras bu dag skyes na ches shin tu rgyas par 'gyur bas de ltar na 'di 'bras bu mi zad pa nyid kyi phyir nam mkha'i mthas gtugs pa'o zhes bshad pa yin no//phyi ma'i mtha' ni ma 'ongs pa'i dus so/ /de'i mu ni mthas gtugs pa ste de rnam par 'chad pa'i phyir mya ngan las 'das pa yin no/ /de'i thug pa ni gzhol ba ste/de thob par byed pa yin pa'i phyir sems bskyed pa de la de skad ces bya'o/ /de nyid kyi phyir slob dpon gyis 'dir sdug pa smos pa dang 'grub pa smos pa ma mdzad de/ rtag pa mya ngan las 'das pa la mi sdug pa dang ldan pas rnam par gcad par bya ba med pa'i phyir dang /de thob pas 'di rgyu'i dngos po yin gyi skyed par byed pa ni ma yin pa'i phyir ro/ /shin tu rnam par nges pa 'di gnyis kyis ni rim bzhin du bcom ldan 'das kyi ye shes dang spangs pa phun sum tshogs pa brjod par blta bar bya'o/ /ji lta zhe na/ go rims bzhin du 'dus byas kyi rang bzhin gyi yon tan rnams dang /'dus ma byas mya ngan las 'das pa smos pa'i phyir te/ rtag pa'i rgyu nyid shin tu rnam par nges par brjod ma thag pas ni mya ngan las 'das pa tsam zhig thob par bshad kyi mya ngan las 'das pa'i khyad par ni ma yin no/ /'dis ni gcig kho nar mya ngan las 'da' ba bkag ste/sems can gyi don du 'khor bar skye ba yongs su 'dzin pa'i phyir ro/ /'das pa dang ma 'ongs pa dang da ltar byung ba rnams kyi ye shes kyi sa la 'jug pas 'di brtson 'grus chen po rtsom pa'i rgyu nyid du bstan pa'i phyir zhum pa med pa nyid ces bya'o/ /yang dag par 'grub pa ni 'bras bu'o//'jig rten na yang gang las 'bru rnams skye ba de zhing zhes bya bas de bzhin du 'dir yang 'di dag la 'bras bu de bzhin gshegs pa'i ye shes kyi 'bru 'bras bur gnas pas na ye shes kyis 'di dag nyid yin no/ /lhag ma ni don go bar zad do/ /so so skye bo'i mtshan nyid ni 'phags pa'i chos ma thob pa yin pa'i phyir la/sa dang po la mthong ba'i lam skyes nas/ de dang bral bas mi mthun pa'i phyogs nyid yin te/ 'di skad du byis pa so so'i skye bo'i sa las 'das pa yin zhes bya ba la sogs pa 'chad par 'gyur ro/ /gnyis pa la ni dge ba bcu bsten pa'i phyir yang dag par zhugs pa yin pa de las bzlog pa log par sgrub pa mi mthun pa'i phyogs yin no//gsum pa la ni de ches phyug pa yin zhes bya ba la sogs pas thos pa la sogs pa'i don snang ba brjod pa'i phyir de las bzlog pa brjed pa zhes bya ba mun pa'i tshul can nyid mi mthun pa'i phyogs yin no//bzhi pa la ni gang 'di 'jig tshogs la lta ba sngon du 'gro ba'i lhag par g.yo ba dang bral bas g.yo ba dang bral ba zhes bya ba la sogs pas/ de dang bral bar brjod pa'i phyir de nyid mi mthun pa'i phyogs yin no/ /kun tu brtags pa ni dang po kho na la spangs so zhes bstan pa'i phyir lhan cig skyes pa zhes smos te/de skad du gsum pa las rnam par brtags pa'i lta ba'i dbang du byas nas 'di lta bas byas pa'i 'ching ba rnams ni snga nas spangs pa kho na'o zhes bshad do/ /de la phra ba'i rnam pa ni dge ba la sogs pa'i sems la yang de dang mi 'gal bar dus thams cad du gnas pas brtag dka' ba'i phyir te/'di ltar dge ba la sogs pa skye ba'i dus na yang de dang mtshungs par ldan pa'i phyir bdag la chags pa dang / bdag tu nga rgyal ba la sogs pa yod pa kho na'o/ /rnam par brtags pa ni de lta ma yin pas rags pa yin te/ nyon mongs pa can gyi yid du byed cing de skye ba'i sa bon 'jog pa'i phyir skyed par byed pa yin no//rang gi yid la byed pa ni kun gzhi rnam par shes pa yin te/ 'di ltar gzhan ni de nyid kyi dbang du byas nas de'i brjod pas bsgos pa'i brjod pa'i yid la byed pa zhes gsungs so/ /de yang dmigs pa dang rnam pa yongs su ma chad pa nyid kyis brtag dka' ba nyid de/de la dmigs pas kyang phra ba yin no/ /ring du song ba nyid ni bzhi pa'i bar du rjes su 'brel ba'i phyir ro/ /'di ltar rgyu gsum gyis phra bar rig par bya'o/ /lnga pa la ni yongs su mya ngan las 'da' bar nus kyang thabs mkhas pas sems can gyi don bya bar gnas pa'i phyir theg pa dman pas yongs su mya ngan las 'da' ba mi mthun pa'i phyogs yin no//drug pa la ni snying rje chen po mngon par sgrub pa dang / sems can gyi bya ba mi 'dor ba'i phyir chags pa med pa'i ye shes la mngon du phyogs pa zhes bya ba'i shes rab kyi pha rol tu phyin pa la gnas pa mngon du 'gyur ro zhes bya ba la sogs pa phal cher mtshan ma kun du 'byung ba nyung bar bstan pa'i phyir mtshan ma rags pa kun du 'byung ba de'i mi mthun pa'i phyogs yin no//bdun pa la ni de ma spangs par lus dang ngag dang yid kyi las mtshan ma dang bral ba la 'jug go zhes bya ba la sogs pa 'byung bas mtshan ma med pa la spyod pa bstan pa'i phyir ro//mtshan ma chung ngu kun du 'byung ba mi mthun pa'i phyogs yin no/ /brgyad pa la ni rgya mtshor 'gro ba'i gru bo che zhes bya ba la sogs pas mtshan ma med par spyod pa la yang rtsol ba thams cad dang bral bar brjod pa'i phyir mngon par 'du byed pa mi mthun pa'i phyogs yin no//dgu pa la ni so so yang dag par rig pa thob pa yin pas sems can gyi don la mngon par 'du mi byed pa de'i mi mthun pa'i phyogs yin no/ /bcu pa la ni gsang ba la sogs pa'i chos thams cad snang bas chos thams cad la dbang thob pa brjod pa'i phyir/de la dbang ma thob pa mi mthun pa'i phyogs yin no/ /sa 'di rnams kyi nges pa'i tshig dang / byed pa dang mi mthun pa'i phyogs dang gnyen po'i phyogs dag ni 'phags pa dgongs pa nges par 'grel ba'i mdo las shes par bya'o//de la mngal na gnas pa'i gnas skabs bcu ni zhes bya ba la sogs pa la/ phyi rol spris mar chags la/ nang rlan te mar 'dug pa ni nur nur po yin no/ /phyi nang gnyis ka khad de chags la sha'i dngos por ma red pa ni mer mer po yin no/ /rnyol rnyol por 'dug pa ni nyol nyol po yin no//shar gyur cing mnan bzod pa ni sha mkhrang ba yin no/ /sha skyes pa dang ldan pas yan lag gi mtshan ma dod pa ni lugs dang mthun pa yin no/ /de nas mngal na gnas pa de phyis mi'am/ dud 'gro la sogs pa ci zhig tu 'gyur ba'i sngon rol srid pa'i gzugs nyid du 'gyur ba gang yin pa de ni rang bzhin dang mthun pa yin no//de nyid 'gyur zhing ldog pas 'gul ba ni las dang bcas pa'i lus kyi gnas skabs yin no/ /yongs su rdzogs pa'i lus kyi gnas skabs ni rnam par phye ba kho nar zad do/ /chen po gsum zhes bya ba la sogs pa ni rgyu dang 'bras bu dang ngo bo nyid de go rims bzhin no//kye rgyal ba'i sras dag ces bya ba la sogs pa la ma mthong ngo zhes bya ba'i dgag pa 'di gang yin zhe na/ sangs rgyas thams cad byang chub sems dpa'i sa bcu po 'di dag mi gsung ba'i sangs rgyas kyi zhing rab 'byam zhes bya ba'i yin no//rgyal ba'i sras dag ces bya ba ni sdig pa thams cad las byang ba ni sangs rgyas bcom ldan 'das rnams te/ de skad du/ bcom ldan 'das kyis/ 'tshe byed nye bar 'gro ba la/ /gang dag zag zad thob pa dag /rgyal ba nga 'drar shes par bya/ /sdig pa'i chos las nga rgyal bas//de bas nyer 'gro nga rgyal ba'o/ /zhes gsungs so/ /rgyas par byed pas na sras te/ smras pa/ bu yis 'jig rten las rgyal byed/ /tsha bo yis ni kun dga' 'thob/ /yang tsha yis ni mtho ris kyi/ /'jig rten du ni mchod par 'gyur/ /'di gang zhig gang las skye ba de ni de'i rigs yin pa'i phyir te/'di ltar rgyal ba rnams lam las skye bas lam ni rgyal ba rnams kyi rigs zhes bya'o/ /byang chub sems dpa' brtson 'grus shin tu brtsams pa lam de 'dod pa rnams kyis kyang de'i mi mthun pa'i phyogs las rgyal nas sangs rgyas kyi rigs de rgyas par byed/skyon med par byed pas na rgyal ba rnams kyi chos las skyes pa'i sras dag ces bya'o/ /de zhes bya ba ni bstan pa'o/ /gang na zhes bya ba ni bshad pa'o/ /de la zhal nas gsungs pa'i tshigs su bcad pa'i gzhung zhes bya ba la sogs pa ni 'di skad du ston par byed pa yin te/tshigs su bcad pa 'di rnams la las 'di lta ma yin par yang 'byung ba snang ste/ don dang tshig 'bru phun sum tshogs pa ma yin pa nyid nas gsungs pa ma yin par blta bar bya'o/ /bdag gis ni zhal nas gsungs pa'i gzhung ma nyams pa yid ches pa'i lung las 'ongs pa gang yin pa de'i don rnam par phye ba yin gyi/de lta bas na la la las 'di lta ma yin par 'byung ba mthong nas ji ltar 'byung ba de bzhin du rnam par phye'o zhes de snyam du bsam par mi bya ste/ gzhung de ni nyams pas yin gyi 'di kho na yang dag pa yin no zhes cha gcod par byed pa'o//zhal nas gsungs pa'i gzhung ma nyams pa gang gis shes pa zhal nas gsungs pa'i don dang tshig 'bru shes pa bdag gi bla ma rnams kyis don de dmigs pa de nyid gzhung yin no zhes bya ba'o/ /de bzhin nyid la dmigs pa'i ye shes ni mtshan ma med pa'i phyir rnam par rtog pa nyon mongs pa can rnams kyi gzhi de las byung zhing skyes pa'i 'du shes kyi gnyen po ste/de ni dran pa dang ye shes ldan zhes bya ba 'di las ye shes smos pas ston to/ /'jigs pa med pa zhes bya ba 'dis ni rtogs pa la rnam par nges pa nyid yin pa dang / lkog tu gyur la don du gnyer ba nyid bstan to//ji lta zhe na/ chos mthong ba dang lkog tu ma gyur la don du gnyer ba ni mi 'jigs pa yin no zhes bya ba 'dis 'jigs pa med pa'i rgyu rtogs pa ston pas 'di dag gi rtogs pa la rnam par nges pa nyid kyang bshad pa yin la/ lkog tu ma gyur la don du gnyer ba gang yin pa de ni mi 'jigs pa yin pa'i phyir 'jigs pa med pa zhes bya ba 'di nyid kyis lkog tu ma gyur la don du gnyer ba yang bshad pa yin no//de la rtogs pa la rnam par nges pa nyid dang / lkog tu ma gyur la don du gnyer ba nyid gnyis la tha dad du bya ba ci yod ce na/ rtogs pa cung zad tsam thob pa'i phyir/bden pa mthong ba ni rtogs pa la rnam par nges pa nyid yin no/ /rtogs pa thob pa dag gis kyang bstan par bya ba'i don mngon sum du ma byas shing de dag de la don du gnyer ba yin na bstan par bya ba'i don ma rtogs pa de lta bu dag la yang bshad pa 'bras bu med pa nyid pas de bstsal ba'i phyir 'jig pa med pa zhes bya ba gsungs te/lkog tu ma gyur la don du gnyer ba dag ni bstan pa 'di'i don mngon sum du byas pa rnams yin na/ gzhan ci zhig gi phyir mi bshad ces bya'o/ /lhag ma rnams ni slob dpon nyid kyis rnam par phye bar zad do/ /spang bar bya min zhes bya ba'i gnod par mi byed pas spang bar bya min te zos na gnod par mi byed cing legs par 'jug go zhes bya ba'i tha tshig go//rnam pa gcig tu na dor bar bya ba ma yin pas na spang bar bya min te/ za ba na 'bad de mi dgos kyi shin tu 'jam pa'i phyir rang ltor 'gro'o zhes bya ba'i tha tshig go//'dis na mi 'chi ba 'am 'di yod na mi 'chi bas na bdud rtsi yin la 'dis kyang dam pa'i chos kyi srog 'dor bar mi byed la 'di yod na yang dam pa'i chos kyi srog 'dor bar mi byed de/ gnas yongs su gyur pas chos kyi sku 'thob po zhes bya ba'i tha tshig go/ /dka' ba zhes bya ba la sogs pa la shin tu dka' ba nyid ni rang bzhin gyis rtogs par dka' ba'i phyir ro//ma 'dris pas dka' ba nyid ni zag pa med pa yin pas ma goms pa'i phyir te goms pa ni 'dris pa zhes bya'o/ /sa dag nyid rgyu yin te thos pa la sogs pa'i rim gyis byang chub sems dpa'i rtogs pa'i rgyu mtshan yin pa'i phyir ro//de dag bshad pa'i ngo bo yin pa'i phyir bstan pa'i rang bzhin ma yin ji ltar na rnam par dbye ba la de rnams bstan pa zhes bya zhe na/ tha dad par brjod par 'dod pa'i phyir te/ mdo ston pa zhes bya ba dang 'dra bas nyes pa med do/ /bsgoms pa las byung ba'i shes pa ni rnal 'byor pa'i mngon sum yin pa'i phyir rnam par mi rtog par 'dod na/de ji ltar rnam par rtog pa'i sgrar brjod ce na de'i phyir khams gsum pa'i zhes bya ba smras te/ don dam pa'i dngos po mngon sum du mi byed pa'i phyir zag pa dang bcas pa thams cad rnam par rtog pa dag yin no zhes ston par byed do//rnam par smin pa las byung ba'i sems kyi bye brag gang gi yang zhes bya ba ni rnam par smin pa dge ba dang mi dge ba dang lung du ma bstan pa yang yongs su ma spangs par kun tu 'byung bas kyang rtogs par dka' ba'i phyir phra bas na/ gang gi yang zhes bya ba smras so//de ltar don zab pa de ji ltar kun rdzob tu brjod nus pa de bzhin du bshad kyang dka' zhes bya bar sbyar ro/ /ji ltar de bzhin du bshad kyang dka' zhe na/ 'gro bas thos na der ni rmongs par 'gyur/ zhes bya ba gsungs te/ gzhung 'di ni tshigs su bcad pa'i tshig 'di kho na la 'jug pa'i ched yin par rig par bya'o//brjod pa'i kun rdzob kyis ba men ri mor bris pa bzhin du/ don dam pa'i dngos por brjod par zad na byis pa rnams ni de kho na ma rtogs pa'i phyir sgra tsam la so sor 'brang zhing sgras brjod par bya ba kun tu brtags pa'i dngos po la mngon par zhen pas na don la sgra ji bzhin du 'dzin pa zhes bya'o//gang du sems rnam par smin pa zhes bya ba ni sems kyi 'bru skye ba'i gnas yin pa nyid kyi phyir nang gi phung po rnams ni sa yin te/ 'bru'i sa bzhin no/ /gang du de rgyu ba zhes bya ba ni sems zin pa dang / ma zin pa dag la dmigs pa nyid kyi phyir thogs pa med par rgyu bas chos thams cad sa yin te/rgyal po'i sa bzhin no/ /yang na 'dis ni sngar bshad pa bas mchog yin pa kho nar ston te/ 'di ltar [(]shas [,]shes [)]rab kyi pha rol tu phyin pa la mos pas spyod pa'i skabs nas skyes nas thob pas kyang rnam par 'phrul pa chen por 'byung ngo //lo ma ltar zhes bya ba la sogs pa la tshig zur gyis na lo ma la rlung snang ngo zhes bshad pa ma yin nam zhe na/ de ni mi rung ste rlung ni rtag tu rjes su dpag pa yin pa'i phyir mig gi spyod yul ma yin pas g.yo ba'i las kyis zhes bya ba smras so/ /'di skad du kho bo cag gis lo ma la mig gis dmigs par bshad pa ni ma yin gyi 'gul ba la sogs pa'i rtags kyis yang dag par mthong ste yod par rtogs par nus so//nam mkha' 'ba' zhig la ni de lta ma yin no zhes bshad pa yin no/ /bshad pa ni brtags pa'i ngo bo nyid kyis bsdus pa'i phyir la/brjod du med pa ni yongs su grub pa yin pa'i phyir de'i rang bzhin ma yin pa nyid dang glo bur ba nyid yin no/ /gal te ji ltar yang mnyan par nus na de ltar zhes bya ba la sogs pa ni 'di skad du ye mnyen par mi nus pa ni ma yin gyi 'on kyang sra ba rnam pa gnyis kyis sems brten por gzhag par byas shing chos ngo bo nyid med par yang shes par byas nas mnyan par nus so zhes 'byung ba'i phyir mnyan par srid do zhes bshad pa yin no//'dun pa yongs su dag pa zhes bya ba la sogs pa 'dod pa'i lung thos pa thob par byed pa'i thabs gang yin pa de la kun tu rtogs pa ste rtogs pa don du gnyer ba nyid kyis yin gyi/thos pa mang po rnyed par 'dod pa'i phyir ni ma yin pas 'dun pa yongs su dag pa'o/ /de yang mdo las/ kun du rtog pa shin tu yongs su sbyangs pa zhes bstan pa yin te/ 'di dag la kun du rtog pa phyin ci ma log pa'i thos pa 'thob pa'i thabs 'dod pa'i mtshan nyid shin tu yongs su sbyangs pa yod pas so//de de ltar phyin ci ma log pa'i thos pa don du gnyer ba ni de ston par byed pa'i dge ba'i bshes gnyen rnams dang mthun pa'i lus dang ngag gi kun du spyod pa mnyes par byed pas na kun du tshol ba yongs su dag pa'o//de yang mdo las spyad par bya ba shin tu spyad pa zhes gsungs pa yin te/ 'di dag la spyad par bya ba ste de ston par byed pa'i dge ba'i bshes gnyen la brten pa la sogs pa'i mtshan nyid shin tu spyad pa yod pas so/ /de de ltar mnyes par byed pa lhur len pa na dge ba'i bshes gnyen de dag las thos pa phyin ci ma log cing ma nyams la de yang mang po yin gyi nyung ngu ma yin pa de yun ring por te lo 'ga' yang ma yin la tshe 'ga' yang ma yin par 'dzin pas na thos pa 'dzin pa yongs su dag pa'o//de yang 'ga' las ma yin gyi tshad med pa dag las 'ongs pas na mang po yin la yun ring por yang yin no zhes bya bar rig par bya'o//des de ltar phyin ci ma log pa'i thos pa bzung nas smon lam gyi khyad par gyis skye ba khyad par du 'phags pa thob pa'i phyir/ yang dag pa'i thos pa ma lus pa yang dag par gzung ba'i dran pa'i khyad par 'thob pas na skye bas 'thob pa yongs su dag pas kyang lung yongs su dag pa zhes bya'o//de yang mdo las tshogs shin tu bstsags pa zhes gsungs pa yin te/ snga ma ni thos pa 'dzin pa'i phyir ye shes kyi tshogs su bshad do/ /'dis ni bsod nams kyi tshogs so/ /de de ltar thos pa yongs su rdzogs shing nges par 'byed pa'i cha dang mthun pa'i gnas skabs na rtogs pa'i sbyor ba'i lam la gnas pa ni lus dang sems dben pa'i phyir 'dod pa chung ba la sogs pa'i yon tan du ma dang ldan pa yin zhing lung rnam pa thams cad du yongs su dag pa'i phyir sbyor ba yongs su dag pa zhes bya'o//de yang mdo las yon tan dpag tu med pa dang ldan pa zhes gsungs pa yin no/ /de mthong ba'i lam la zhugs na the tshom spong ba'i phyir yid gnyis dang nem nur dang bral ba zhes bya ba 'dis ni rtogs pa yongs su dag pa brjod do/ /de'i 'og tu bsgom pa'i lam la nyon mongs pa dang / nye ba'i nyon mongs pa'i mtshan nyid kyi nyon mongs pa thams cad spangs pas nyon mongs pa med pa'i phyir nyon mongs pas rab tu mi rgyu ba yongs su dag pa zhes bya'o/ /de'i 'og tu 'dis nyon mongs pa thams cad spang bar byas nas/ mya ngan las 'das par nus kyang snying rje dang shes rab dang ldan pa'i phyir theg pa dman pa las 'das te byang chub sems dpa'i thob pa khyad par can 'dod pas na chog par 'dzin pa yongs su dag pa zhes bya'o//de yang mdo las/ lhag pa'i bsam pa dang mos pa la rab tu gnas pa zhes gsungs pa yin te/ 'di la theg pa chen po la rab tu gnas pa'i bsam pa dang mos pa yod pas so/ /de lta bu de dag rang gi shes pa'i stobs kho nas rang byung gi ye shes kyi phyir gdams ngag sbyin par byed pas na gdams ngag rjes su bstan pa la gzhan la rag ma lus pa yongs su dag pa zhes bya'o/ /snod du mi 'gyur ba skal ba dang mi ldan pa'i rna lam du grag na gzhan la mi mdzes par spong ba la sogs pa'i nyes pa ston to//rab mchog ces bya ba ni yan lag ste bod pa'i tshig logs shig yin no/ /dam pa dri ma med pa'i blo nyid ni slob dpon gyis rnam par dbye ba mdzad de/ de la nyan thos la sogs pa las khyad par du 'phags pa dam pa nyid do//nyon mongs pa'i dri ma thams cad dang bral ba'i phyir dri ma med pa nyid de/ zag pa med pa nyid du ston par byed do/ /brjod na legs brjod spobs pa mtha' yas pa/ /zhes bya ba 'di'i 'grel pa ni dris pa lung bstan pa la rigs pa'i spobs pa nyid zad mi shes pa zhes bya ba yin no//ji lta zhe na/ legs brjod ni 'grel pa yin pa'i phyir rigs pa'o/ /mtha' yas pa ni zad mi shes pa ste mtha' thug pa med pa'o/ /brjod na zhes bya ba ni bskyod na ste/ gzhan dag gis glengs shing dris na zhes bya ba'i tha tshig go/ / 'di yang dris pa lung bstan pa la zhes bya bas 'grel to/ /snyan zhing mchog tu byung ba zhes bya ba 'dis yi ge phun sum tshogs pa nyid ji ltar bstan zhe na/ smras pa/ snyan pa dang rgya che ba nyid gnyis te de la snyan pa nyid kyi phyir snyan pa'o/ /rgya che ba nyid kyi phyir mchog tu byung ba'o/ /dam pa'i don dang ldan pa zhes bya ba ni don phun sum tshogs pa nyid yin par go sla bas ma bshad do//dran pa kho na la 'dir gnas kyi bye brag gis dran pa dang 'dzin pa gnyis kyis zhes rnam pa gnyis su bstan te stobs bzhin no/ /'di ltar dad pa'i dbang po de nyid mi mthun pa'i phyogs las nges par rgyal te/mchog gi gnas skabs su gyur pa la stobs zhes bya ba de bzhin du 'dir yang dran pa de nyid nyan pa'i gnas skabs na ni len pa yin la/ dus phyis mchog tu gyur pa ni 'dzin pa yin no/ /rnam pa gcig tu na yul gyi bye brag gis de skad bshad de/ sgra mi brjed pa ni len pa yin la/don mi brjed pa ni 'dzin pa yin pas thos pa dang bsam pa'i gnas skabs dag dang go rims bzhin no/ /stobs bcu dang ldan pa'i sangs rgyas bcom ldan 'das rnams kyi stobs gang dag yin pa de dag 'thob pa ni rtogs pa dang rnyed pa'o/ /bsam pa rnam dag pa zhes bya ba ni sa la 'jug pa ston par byed pa ste/de nyid rtogs pa yin no/ /'di dag gis sam 'di dag tu don rnam par brjod pas ni rnam 'byed ni bstan pa'i bdag nyid dag kho na yin te/ de so so yang dag par rig pas bshad pa mdzod ces bya bar sbyar ro/ /rgyags pas na cho rigs dang gzugs la sogs pa rang gi chos rnams kho na la sems kun du chags shing chos la nan tan mi byed pas na chos la gus par mi 'gyur bar rig par bya'o//nga rgyal gyis ni de ston par byed pa'i dge ba'i bshes gnyen la bsnyen bkur mi byed pa'i phyir chos smra ba la gus par mi 'gyur ro//lta bas ni bdag dang bdag gi ba la sogs par log par rtog pas yang dag pa'i lam las nyams par 'gyur ro/ /the tshom ni 'di ci lta yin nam ma yin zhes the tshom za bas sangs rgyas kyi chos bsam gyis mi khyab pa rnams la yon tan gyi sgo nas mi mos te tshigs su bcad pa 'dis ni go rims bzhin du 'di dag gi gnyen po spyod pa dang /spangs pa dag bstan to/ /lhag ma ni go sla'o/ /bde gshegs rnams kyi bgrod pa ni byang chub ste/ 'gro bar bya ba'i don gyis bgrod par bya ba yin pa'i phyir ro/ /de ni de'i rgyur gyur pa'i sa rnams bshad pa dang bstan par 'gyur bas de'i phyir de rab tu bstan pa'i phyir/sa'i khyad par ma lus pa thams cad bshad par mdzod/ /ces bya bar sbyar ro/ /de la byin rlabs mdzad ces bya ba ni yan lag go/ /tshig gzhan dag gis byin gyi rlabs bye brag tu 'byed pas na nye ba'i yan lag go//sangs rgyas rnams kyis de la byin gyis brlabs pa mdzad pas na gzhi phun sum tshogs pa yin la/ 'bras bu chos smra ba yin pas na 'bras bu phun sum tshogs pa yin no/ /lha dang mi'i nang na mchog rnams kyis/ /zhes bya ba ni gzhi phun sum tshogs pa yang dag par bstan pa'i phyir khyad par du bya bar smos pas nye ba'i yan lag kyang yin la mi mnyam mnyam pa zhes bya ba la sogs pa rang gi khyad par la ltos nas/khyad par gyi gzhi nyid du gtso bo yin pa'i phyir yan lag kyang yin no/ /mi mnyam mnyam pa zhes bya ba la sogs pa lhag ma ni de'i nye ba'i yan lag kho na yin te/tshig gzhan gyis bstan pa nyid kyis rtag tu khyad par gyi ngo bo yin pa'i phyir ro/ /tshogs rab mtha' yas pa zhes bya ba 'di'i 'grel pa ni ris bdun zhes bya ba yin te/ bsnyen gnas pa'i sdom pa ma gtogs so sor thar pa'i sdom pa rnam pa bdun no/ /rgya mtsho'i chu nang gnas gyur tam//zhes bya ba ni ngan 'gro'i mi khom par skyes pa de ston par byed pa'o/ /bde 'gro'i mi khom par skyes pa ni 'od gsal ba la sogs pa rnams te mes 'jig pa'i rtse mo yin pa'i phyir ro/ /de nyid kyi phyir/ bsregs pa'i bskal tshe 'phos na yang / zhes gsungs so/ /tshigs su bcad pa lnga pa ni go sla bas ma bshad do//de la don ni 'di yin te/ chos 'di thos pa las skyes pa'i dad pa la sogs pa'i bsod nams med pa'i phyir dang / spong ba'i phyir bsod nams ma yin pa skye bas de dag gis 'di thos kyang ma thos pa kho na yin no snyam du dgongs pa'o/ /phyogs bcur rnam par bltas nas zhes bya ba la phyogs bcur rnam par blta bas ni phyogs thams cad na bzhugs pa'i sangs rgyas rnams rjes su dran par byas nas de dag gi mthus bshad par bya'i rang gi mthus ni ma yin no zhes nga rgyal med pa nyid du bstan to//'khor gyi dkyil 'khor thams cad la rnam par blta bas ni nye 'khon med pa nyid du thams cad la sems snyoms par bshad par bya'i gcig gi ngor bltas na ni ma yin no zhes ston par byed do//de ltar tshigs su bcad pa 'di'i zhes bya ba la sogs pa la phra ba nyid rnam pa gnyis ni gong du shes dka' zhes bya ba la sogs pas bshad pa'i dus na phra ba nyid dang /thob pa'i dus na phra ba nyid bshad pa gang yin pa'o/ /tshig gis brjod du med pa la dmigs pa'i phyir de la yang de skad ces bya ste/ 'di ltar de la dmigs pa de la yin la de yang brjod pa'i yul thams cad las 'das pa yin no/ /ci de zhes bya ba ni 'jug pa la brten pa nyid gcig gam zhes bya ba ste/'jug pa ni 'khor bar 'gyur bas 'khor ba yin no/ /smras pa ma yin te dus gsum rnams las grol ba yin no/ /ye shes 'dus byas skad cig ma ste rten cing 'brel bar 'byung ba ma yin nam/ de ji ltar dus gsum rnams las grol zhes bya zhe na/de'i phyir gnas gyur pa rtag pa la gnas pa'i phyir zhes bya ba smras te gnas gyur pa rtag pa de bzhin nyid kyi mtshan nyid de 'di'i gnas yin pas na de skad ces bya'o/ /de la don ni dus gsum las grol ba'i gnas can la dus gsum las grol ba zhes bya ba 'di yin no//de ni bsam dang zhes bya ba ni bsam pa las byung ba'o/ /sems kyi lam zhes smos pas ni skyes nas thob pa ston par byed de/ de ni skye ba dang dus mnyam pa kho nar 'thob pa'i phyir sbyor ba las byung ba thams cad kyi sngon du 'gro bas lam du gyur pa'i phyir de sems kyang yin la gzhan dag gi lam yang yin pas sems kyi lam mo//yang na sems rnams kyi lam yin pas so/ /sems kyis mi shes zhes bya ba ni rna ba'i rnam par shes pa'i yul ma yin pa nyid du gsungs pa'o/ /yid kyi bsam pa ma yin zhes bya ba ni yid kyi rnam par shes pa'i yul ma yin pa nyid du gsungs pa'o//nyes dmigs rnam pa lnga yod de zhes bya ba la sogs pa ni gal te chos thams cad gzod ma nas zhi ba ma skyes pa rang bzhin gyis yongs su mya ngan las 'das pa'o zhes sgra ji bzhin kho nar bzung na de'i tshe theg pa chen po'i chos la dad pa dang /dang po dang mos pa chen po gang yin pa de med par 'gyur ba'i phyir mos pa'i gnas ma yin pa nyid kyi nyes pa yin no/ /des na de thob par bya ba'i brtson 'grus rtsom pa rtsol ba gang yin pa de yang nyams par 'gyur bas rtsol ba nyams par 'gyur ba'i nyes pa yin no/ / de'i phyir sgra ji bzhin kho nar bzung na gzhan la yang bslus par 'gyur zhing ston pa la yang skur pa 'debs pa dang / chos kyang spong bar byed do/ /lhag ma ni go sla'o/ /sems kyi spyod yul zhes bya ba'i sgras ni thos pa las byung ba la sogs pa'i shes pa dag ston par byed de/ de dag ni sems kyang yin la gzhan gyi spyod yul yang yin pa'i phyir de dag gis rdzogs par mi byed kyi/bsam pa dag pa'i ye shes kyis rdzogs par byed do zhes gdams ngag gis rdzogs par gsungs so/ /gdams ngag ni chos kyi rnam grangs 'di nyid yin no/ /de'i spyod yul ni yul te/des brjod par bya ba'i don rtogs pa'i ye shes zhes bya'o/ /de ni rang gis rig kyang brjod par mi nus pas dmigs pa zhes bya'o/ /tshogs bstsags pa zhes bya ba la sogs pa la tshul khrims ni yon tan thams cad kyi sngon du 'gro ba nyid kyi gzhir gyur pa'i phyir tshogs pa yin te/tshul khrims kyang legs par byas tshogs kyang legs par byas pa zhes tshig rnam par sbyar ro/ /'khor ni de nyid kyi yin par bzung ste/ de yang tshul khrims kyi rgyu yang dag pa'i rtog pa la sogs pa dang de bzhin du shes bzhin dang / gzhan yang de'i rgyu gang yin pa'o//'di skad du tshul khrims dang tshul khrims kyi 'khor legs par byas shing dag pas na tshogs bstsags pa yin no zhes bshad pa yin no/ /mdo las ni tshogs shin tu bstsags pa zhes bstan pa yin no/ /ting nge 'dzin kyang legs par byas 'khor kyang legs par byas pa zhes 'dir yang gong ma bzhin du tshig rnam par sbyar ro//de'i 'khor ni lus dben pa dang sems dben pa dang / 'dod pa chung ba nyid dang / chog shes pa dang / 'tsho ba dag pa zhes bya ba la sogs pa mdor na yan lag ji snyed kyis ting nge 'dzin skye ba des thams cad 'khor yin no//ting nge 'dzin la ji ltar spyod pa zhes bya zhe na/ dmigs pa la spyod pa'i skabs yin pas zhes gtan tshigs ston par byed de/ dmigs pa yul la spyod cing rgyu la 'jug pas de'i skabs yin pas de la ltos nas de rgyu mtshan du byas nas zhes bya ba'i tha tshig ste/ 'di ltar de'i dbang gis na sems dmigs pa gzhan dag bor nas gcig kho na la spyod cing rgyu'o//mdo las ni/ spyod pa shin tu spyad pa zhes bya ba yin te/ spyod pa zhes bya ba'i sgra dang / gong ma'i tshogs zhes bya ba'i sgra ni 'khor la yang blta bar bya ste/ grong gi nye 'khor la grong gi sgrar brjod pa bzhin du rig par bya'o//de dag gis sangs rgyas rnams la yun ring mo zhig nas chos kyi rnam grangs du ma mnyen pa'i phyir bsnyen bkur byas pa yin pas bstsags pa ste mdo las sangs rgyas byung ba rnams shin tu bsnyen bkur byas pa zhes bstan pa yin no/ /des de dag las thos nas/bsam pa las byung bas pha rol tu phyin pa la sogs pa'i chos rnams legs par rtog par byed dpyod par byed pas na yongs su bsdus pa bstsal ba yin te/ mdo las ni chos dkar po shin tu bsdus pa zhes gsungs pa yin no/ /ji lta zhe na/ gang dag gis bsam pa las byung ba shin tu mchog tu gyur pas pha rol tu phyin pa la stsogs pa'i mtshan gyi chos dkar po shin tu yongs su bsdus pa zhes tshig rnam par sbyar ro//de de ltar tshul khrims dang ting nge 'dzin kyang yongs su dag/ sangs rgyas rnams las chos kyi rnam grangs du ma yang thos/rang gi chos dkar po yang bsdus te bdag nyid rtogs pa'i 'os su rung ba khong du chud pa dang / sangs rgyas dang byang chub sems dpa' rnams las sa la 'jug par bya ba'i phyir phyin ci ma log pa'i gdams ngag yongs su mnos nas nges par 'byed pa'i cha dang mthun pas bsdus pa sbyor ba'i sgom pa la sbyor bas yongs su bzung ba bstsags pa zhes bya ste/mdo las/ dge ba'i bshes gnyen du bzung ba zhes gsungs pa yin no/ /gang dag gis dge ba'i bshes gnyen rnams shin tu bzung ba'am/ dge ba'i bshes gnyen rnams kyis shin tu bzung ba zhes tshig rnam par sbyar te/de dag gi lung nan tan du bsgrubs pas de dag bzung ba yin la/ de nyid kyis de dag gis kyang bzung ba yin no/ /de de ltar de dag gis yang dag pa'i gdams ngag byin te/ nges par 'byed pa'i cha dang mthun pa las 'das nas sa dang po la 'jug pas na/bsam pa rnam par dag pa bstsags pa yin no/ /mdo las ni/ bsam pa shin tu rnam par dag pa zhes bstan pa yin no/ /de ltar na dang po gnyis kyis ni byang chub sems dpa' rnams kyi lhag pa'i tshul khrims dang / lhag pa'i sems kyi bslab pa yongs su dag pa nyid bstan to//'og ma bzhis ni lhag pa'i shes rab kyi bslab pa yongs su dag pa nyid bstan to/ /de ni nyan thos la sogs pa dang yang thun mong yin pas khyad par du bya ba'i phyir bshad pa sems can thams cad kyi don bya ba'i don byed pa ste/ bde ba dang yid bde ba dang /de dag gi rgyu nye bar sgrub pa dang / sdug bsngal dang / yid mi bde ba dang de dag gi rgyu yongs su spong ba'o/ /de la 'di dag kho na la lhag pa'i bsam pa yod kyi nyan thos la sogs pa la med pas na shin tu rgyas pa bstsags pa ste/ mdo las ni/ lhag pa'i bsam pa rgya chen po dang ldan pa zhes gsungs pa yin no//de sems can gyi don gyi thabs su gyur pa thams cad mkhyen pa nyid 'dod pas na mos pa bstsags pa ste/ gzhan las ni nges pa'i dngos po la yon tan gyi sgo nas nges par 'dzin pa mos pa yin no zhes 'byung mod kyi/ 'dir ni 'dod pa kho na mos pa yin no/ /mdo las ni/ mos pa rgya chen po dang ldan pa yin no zhes bstan pa yin te/ thams cad mkhyen pa nyid ni dngos po thams cad kyi mchog yin pa'i phyir rgya chen po yin la/ de la 'dod pa ni mos pa ste de dang ldan pa zhes tshig rnam par sbyar ro//de de ltar sems can gyi don bya ba'i phyir thams cad mkhyen pa nyid 'dod pa na rtag tu snying brtse ba dang / snying rje dag mngon du byas nas mang du gnas pa'i phyir mngon du gyur pa bstsags pa ste/ de gnyis kyis na sems can rnams la lta zhing yongs su mya ngan las mi 'da'o/ / mdo las ni/ snying brtse ba dang snying rje mngon du gyur pa zhes bstan pa yin no/ /da ni gang gi phyir sems skyes pa zhes bya ba la sogs pa la/ de la sangs rgyas kyi ye shes ni sangs rgyas bcom ldan 'das kyi ye shes zad pa dang mi skye ba'i rang bzhin gang yin pa'o/ /de nyid gang la zhes bya ba la sogs pas bshad de/de la yongs su shes pa ni sdug bsngal gyi bden pa'o/ /spong ba kun 'byung gi bden pa'o/ /bla na med pa zhes bya ba'i sgra ni thams cad dang sbyar ro/ /mngon sum du byed pa ni 'gog pa'i bden pa'o/ /bsgom pa ni lam gyi bden pa'o/ /de la sangs rgyas kyi rgyud du gtogs pa ye shes kyi rang bzhin gyis yon tan thams cad bye brag med par sangs rgyas kyi ye shes zhes bshad do//da ni phrin las kyi bye brag gis rnam pa dgur phye nas tshig dgus bshad par bya'o/ /de la stobs bcu'i stobs thob par bya ba'i phyir zhes bya ba ni stobs kyi rang bzhin gyi sangs rgyas kyi ye shes te gang gis na gzhan dag gis dri ba dris pa rnams de bzhin gshegs pas thogs pa med par lung ston par mdzad pa'o//mi 'jigs pa chen po thob par bya ba'i phyir zhes bya ba ni mi 'jigs pa'i rang bzhin gyi sangs rgyas kyi ye shes te gang gis na phas kyi rgol ba tshar gcod par mdzad pa'o//sangs rgyas kyi chos mnyam pa nyid thob par bya ba'i phyir zhes bya ba ni sangs rgyas kyi mnyam pa nyid kyi ye shes te/ des na sangs rgyas bcom ldan 'das chos dang gang zag la bdag med pa rtogs par bya ba'i gdams ngag stsol bar mdzad do//'gro ba thams cad yongs su bskyab par bya ba'i phyir zhes bya ba ni sangs rgyas kyis yongs su skyob pa'i ye shes yin te/ gang gis na bsdu ba'i dngos po de dag gis sems can rnams yongs su smin par mdzad pa'o/ /snying brtse ba dang snying rje chen po rnam par dag par bya ba'i phyir zhes bya ba ni sangs rgyas kyi rnam par sbyong ba'i ye shes yin te/gang gis na de'i gzhi ste/ sems can yongs su smin pa'i gzhi/ snying brtse ba dang snying rje dag sbyor bar mdzad pa'o/ /phyogs bcu ma lus par shes pa thob par bya ba'i phyir zhes bya ba ni sangs rgyas kyis ma lus par mkhyen pa'i ye shes te/des na phyogs bcu na gnas pa'i sems can rnams mkhyen to/ /sangs rgyas kyi zhing thams cad thogs pa med pas yongs su sbyar bar bya ba'i phyir zhes bya ba ni sangs rgyas kyis yongs su sbyong ba'i ye shes so//de la yongs su sbyong ba ni sems can thams cad kyi sems yongs su sbyong ba yin gyi/ sdong dum dang tsher ma la sogs pa bstsal bas ni ma yin te/ sems can rnams kyi sems yongs su ma dag pa kho nas tsher ma la sogs pas gang bar snang la sems yongs su dag pas [(]be [,]bai [)]DUr+ya la sogs pa'i rang bzhin du snang ba'i phyir ro//de nyid ston par byed de/ ye shes thogs pa med pa'i phyir zhing thams cad du thogs pa med la sems thogs pa med pa'i phyir nyon mongs pa can ma yin pa'i sprul pa dag gis sems can rnams 'jug par mdzad do/ /nyon mongs pa can ma yin pa'i bu dang chung ma la sogs pa mthong na yang mi gos pa nyid du rig par bya'o//dus gsum skad cig gcig gis khong du chud par bya ba'i phyir zhes bya ba ni sangs rgyas kyi thugs su chud pa'i ye shes gang gi dus na dus gsum pa'i bsam pa ste/ sems rnams dang / bag la nyal te nyon mongs pa'i sa bon rnams skad cig gcig la mkhyen pa'o//chos kyi 'khor lo chen po rab tu bskor ba la 'jigs pa med par bya ba'i phyir zhes bya ba ni sangs rgyas kyi chos kyi 'khor lo rab tu bskor ba'i ye shes te gang gis na sems can rnam par thar par bya ba'i phyir thabs mkhas pas cig car zhing thams cad du chos kyi 'khor lo bskor ba'o//da ni gzhi gang las zhes bya ba la sogs pa la/ gang la snying rje chen po sngon du 'gro ba yod pa de ni snying rje chen po sngon du 'gro ba ste/ snying rje chen pos ni sems can sdug bsngal ba rnams dmigs nas de dag rnam par thar bar bya ba'i phyir byang chub kyi sems skyed par byed pas de'i gzhi yin te/de'i chen po nyid kyang tshig dgus bshad do/ /phra ba'i sdug bsngal nyid ni 'du byed gyi sdug bsngal nyid de/ de'i rnam par 'gro ba thams cad sdug bsngal bar mthong nas snying rje skye ste de'i phyir de'i dbang gis byang chub kyi sems skye bar ni shes rab dang ye shes kyi dbang du gyur pa zhes bya'o//thabs mkhas pas yongs su bzung ba zhes bya ba ni yongs su 'dzin pa chen po nyid yin no/ /bsam pa dang lhag pa'i bsam pa rab tu bstan pa zhes bya ba 'di dgrol na de'i dus su sems can gyi don byed par khas len pa ni bsam pa'o//'khor ba ji srid par khas len pa ni lhag pa'i bsam pa ste/ bsam pa lhag pa ni lhag pa'i bsam pa yin pa'i phyir ro/ /de nyid rab tu brtan pa yin te/ des shin tu gsos shing 'phel ba'i phyir ro/ /de bzhin gshegs pa'i stobs dpag tu med pa dang ldan pa zhes bya ba 'di dgrol na byang chub kyi sems bskyed par bya ba sangs rgyas kyi chos thams cad kyi sa bon du gyur pa des de bzhin gshegs pa'i stobs dpag tu med pa 'bras bu'i ngo bo nyid yongs su 'dzin pas na 'bras bu dpag tu med pa nyid kyi phyir de la de skad ces bya'o//snying stobs kyi stobs dang blo'i stobs kyis shin tu rnam par phye ba'i rnam par 'byed pa zhes bya ba 'di dgrol na snying stobs rgya chen po la mos pa ste/ de bzhin gshegs pa'i mthu rgya chen po la mos pa ste/ blo'i stobs zab mo shes pa nyid dag gis shin tu rnam par phye zhing sbyangs pa'i rnam par 'byed par shes pa zhes bya ba gang la yod pa'o//ji lta zhe na/ mi mthun pa'i phyogs las rgyal ba nyid kyi phyir zhes bya ba smras te/ mi mthun pa'i phyogs spangs pas sbyangs pa yin pa'i phyir ro/ /rang byung gi ye shes dang mthun pa zhes bya ba 'di dgrol na gzhan gyis ma bstan pa bdag nyid kyis mngon par rdzogs par sangs rgyas pa ni rang byung gi ye shes te de la skye ba dang mthun par gnas pa'i phyir de dang mthun pa yin no//sangs rgyas kyi chos thams cad shes rab dang ye shes kyi gdams ngag yang dag par tshol ba zhes bya ba 'di dgrol na/shes rab dang ye shes dag gi khyad par ni bshad zin par zad do/ /sangs rgyas kyi chos thams cad la shes rab dang ye shes gang dag yin pa de'i don du gdams ngag tshol ba ste/ de nyid khyad par du 'gro bar bya ba'i phyir gdams ngag lung tshol ba zhes bya bas bshad do//'di la dam pa'i chos kyi dbyings gyur pa yod pa'i phyir te/ de nyid yon tan yongs su 'dzin pa'i gtso bo yin pa'i phyir zhes bya bas bstan to/ /chos kyi dbyings de ni sangs rgyas dang byang chub sems dpa'i yon tan thams cad kyi rgyu nyid du gnas pa'i phyir 'bras bu nyid du yongs su 'dzin par byed pas na gtso bo la dam pa zhes bya'o//gnas pa dang mthar phyin pa'i chen po nyid ni tshig tha ma gnyis po ye shes dang spangs pa phun sum tshogs pa rjod par byed pa dag gis bstan te sngar ji skad bshad pa bzhin no/ /de nyid brjod par bya ste/byang chub kyi sems 'di ni ye shes kyi rang bzhin gyi yon tan yid du 'ong ba rnams skye ba'i rgyu yin skyed par byed pa yin pa'i phyir 'khor ba ji srid par zad par mi 'gyur te/ gzugs la sogs pa skye ba la gnas nam mkha' bzhin pas ye shes phun sum tshogs pa'i rgyu'i dngos po yin no//phyi ma ma 'ongs pa'i mtha' ni mya ngan las 'das pa ste/ der 'bab der gzhol de'i mur thug pa yin pas na spangs pa phun sum tshogs pa'i rgyu'i dngos por brjod pa yin no/ /dper na bud med 'ga' zhig la/ dang por bu yan lag rdzogs pa skye ba'i rgyu mtshan du gyur pa mngal du zhugs te bu chags pa de dang chos mthun par 'di la yang sangs rgyas kyi sku yon tan gyi yan lag rdzogs pa skye bar bya ba'i phyir 'jig rten las 'das pa'i sems dang por skye'o//dper na bu de nyid rgyal po'i rgyal rigs chen por skyes shing de las gzhan pa'i rigs dman pa rnams las 'da' ba de bzhin du byang chub sems dpa' yang sems de bzhin gshegs pa'i rigs su skyes pa'i phyir de las gzhan pa so so'i skye bo'i rigs rnams las 'da'o//dper na bu de rgyal pos bskyed kyang mi 'dra ba bran mo las skyes na gnad kyi skyon las ni mi 'da'i rigs kyi tha snyad ni pha las 'byung ba'i phyir de rigs las 'das pa zhes ni brjod pa nyid do//nam zhig 'di rgyal po'i btsun mo dam pa thabs rir bab pa las bskyed pa de'i tshe gnad las gyur pa'i skyon smad pa'i ngo bo de las kyang 'da'o/ /de bzhin du byang chub sems dpa' yang sems de skyed pa'i phyir/chos kyi rgyal po sangs rgyas kyis thabs rir bab pa'i btsun mo dam pa shes rab kyi pha rol tu phyin pa'i spyod pa las bskyed kyi/ theg pa dman pa'i bran mo las ma yin pas gnad kyi skyon thams cad las 'da'o/ /dper na bu de 'gro ba gang du skyes pa des bsdus pa gang nas shi 'phos pa de las 'da' ba de bzhin du byang chub sems dpa' yang don dam pa'i sems bskyed pa 'jig rten pa'i 'gro ba las ni 'das la/'jig rten las 'das pa'i 'gro ba ston pa zhes bya ba ni bsdus so/ /dper na bu de lus rdzogs pa rnyed pa de bzhin du/'di yang byang chub sems dpa'i chos nyid thob pa'i phyir snying rje'i bdag nyid kyi lus thob bo/ /de ji lta zhe na/ gzhan gyi dgos pa bdag gi dgos pa yin pa nyid kyi phyir zhes bya ba smos te/ bdag dang gzhan mnyam pa nyid thob pa'i phyir gzhan gyi dgos pa nyid de'i rang gi dgos pa yin no//dper na bu de skyes na gdon mi za bar gnas 'ga' zhig tu gnas par 'gyur ba de bzhin du 'di yang snying rje dang ldan pa'i phyir mya ngan las 'das pa'i lam mthong yang 'khor ba yongs su mi 'dor ba thabs mkhas pa gnas pa'i phyir de ni yang kun nas nyon mongs par mi 'gyur ro//dper na bu de btsas nas 'tsho ba 'ga' zhig gis 'tsho bar byed pa de bzhin du 'di yang dus gsum mnyam pa nyid du lta zhing stong pa nyid dang ldan pa'i shes rab kyis 'tsho bar byed do/ /dper na bu skyes na rigs dang 'tsham pa'i phun sum tshogs pa 'ga' zhig gdon mi za bar yod pa de bzhin du/'di'i phun sum tshogs pa yang sangs rgyas kyi rigs su nges shing yongs su mi nyams pa la/ mya ngan las 'das pa ni rdzogs pa'i byang chub ste/ de la gzhol ba ni 'di kho na yin no/ /de ltar zhes bya ba ni/ ji skad bshad pa'i tshul gyis de 'dra ba nyid du bstan pa 'ba' zhig tu ma zad kyi mi 'dra ba nyid du yang bstan to//ji lta zhe na/ thun mong dang thun mong ma yin pa nyid kyi phyir zhes bya ba smras te/ ji skad du bshad pa yin zhe na/ so so'i skye bo rnams kyi ma'i mngal du bu chags pa khu chu dang khrag 'dres pa zhes bya ba gang yin pa de byang chub sems dpa' rnams la yang yod pas thun mong ste spyi yin no//'di dag gi mngal du 'jug pa dang po kho nar 'jig rten las 'das pa'i sems bskyed pa'i mtshan nyid gang yin pa de dag la med pas thun mong ma yin te spyi ma yin no/ /de bzhin du rigs las 'das pa la sogs pa la yang thun mong dang thun mong ma yin par khong du chud par bya'o//de yang rnam pa dgur rig par bya ste zhes bya ba la sogs pa ni mchog tu dga' ba kho na rang gi ngo bo dang gnas skabs dang byed pa'i bye brag gis rnam pa dgur gzhag ste/ de la bden pa bzhi mngon par rtogs te/dkon mchog gsum la shes nas dad pa ni de'i rang gi ngo bo ste/ dang ba'i mchog tu dga' ba'o/ /dga' ba nyid mchog tu dga' ba yin te/ dmigs pa chos kyi dbyings la dga' zhing de kho na la gnas pa ste/ des na dga' ba'i phyir ro/ /de 'phel bas dga' ba de nyid gong ma gong ma'i gnas skabs dang byed pa'i bye brag gis mchog tu dga' ba lhag ma rnams rig par bya ste/de ltar na bcu tshan 'dis mchog tu dga' ba ci 'dra ba de bshad do/ /da ni de'i dmigs pa de bcu tshan gnyis kyis ston par byed de/ de la rjes su dran pa dang po dang zhes bya ba la sogs pa la/dang po sangs rgyas ni rten gzugs kyi sku dang brten pa yon tan rnams rjes su dran no/ /gnyis pa ni rnam par phye ste brten pa yon tan rnams 'ba' zhig rjes su dran no/ /gnyis pa ni de dag gi rigs la ste zhes bya ba ni byang chub sems dpa' dang de'i spyod pa rjes su dran pa ste/de gnyis ci'i yul can zhe na/ de dag gi rigs la zhes de gnyis kyi yul ston par byed do/ /de dag ces bya ba'i sgras ni skabs su bab pa sangs rgyas dang chos dag ston par byed do/ /go rims bzhin no zhes bya ba ni/ 'di skad du sangs rgyas kyi rigs la rjes su dran pa ni dang po'o//chos kyi rigs la rjes su dran pa ni gnyis pa'o/ /ji ltar sangs rgyas rnams ni de las skyes pa'i phyir byang chub sems dpa' la sangs rgyas kyi rigs zhes bya ba de bzhin du chos kyi rigs kyang de dang 'dra ste sangs rgyas kyi chos rnams ni byang chub sems dpa'i spyod pa las skyes pa'i phyir ro//dngos su tha dad pa ma yin yang tha dad pa brjod par bzhed pa rten dang brten pa tha dad par bstan te/ dper na sangs rgyas dang chos rjes su dran pa dag bshad pa ltar 'di dag kyang de dang 'dra'o/ /de la spyod pa las sangs rgyas rjes su dran pa nyid yan lag kyang yin te sangs rgyas rjes su dran pa spyir bshad pa dag bye brag gi ngo bor brten pa'i phyir ro//nye ba'i yan lag kyang yin te/ rnam par dag pa las sangs rgyas rjes su dran pa la sogs pa rnam par dbye bar bya ba yin pa'i phyir ro/ /byang chub sems dpa' dang /de'i spyod pa la sogs pa las sangs rgyas rjes su dran pa nyid ni sangs rgyas kho na'i rgyu'i gnas skabs rjes su dran pa las rig par bya'o/ /byang chub sems dpa' dang de'i spyod pa la sogs pa 'di dag ni ma 'ongs pa yin par rig par bya'o/ /de ni da ltar byung ba'i dmigs pa'i dbang du byas nas/so so'i skye bo'i longs spyod las phyir log pa'i phyir ro zhes bya ba la sogs pa smos so/ /spyad par bya ba yin pas na longs spyod ni yul yin te/ 'dod pa'i yon tan lnga dag go/ /de dag ji ltar so so'i skye bo rnams lhag par chags shing longs spyod pa ltar byang chub sems dpa' rnams de lta ma yin pas so so'i skye bo'i longs spyod las phyir log pa zhes bya'o//sangs rgyas kyi sa dang nye ba la zhugs pa'i phyir so so'i skye bo bzhin du yul rnams la mi spyod pa na longs spyod mi 'dra ba nyid do//byis pa'i sa dang ye shes kyi sa dang ring bar gyur pa dang nye ba dag gis skye bo thams cad las khyad par du 'phags pa 'dzam bu'i gling gi dbang phyug la sogs pa'i lus 'thob pas na lus 'dra ba nyid do/ /lhag ma zhes bya ba la sogs pa la/ sgrub pa ni lus dang ngag dang yid kyi spyod pa ste/de yang so so'i skye bo rnams kyi ni phal che'i/ dge ba bcu'i las kyi rang bzhin dag yin la/ don dam pa'i byang chub kyi sems skyes pa'i ni de las bzlog pa yang dag pa'i sgrub pa yin pas sgrub pa mi 'dra ba nyid do/ /'di ltar bu'i grogs ni pha byed/ pha'i grogs ni bu byed/ rgyal po ni 'bangs rnams kyi grogs byed/ 'bangs rnams kyang rgyal po'i grogs byed kyi/ 'di ni sems can thams cad kyi grogs byed kyang / de dag ni de bzhin grogs mi byed pas grogs su gyur pa mi 'dra ba nyid do/ /de dag ni sred pa'i bran du gyur pa'i phyir nor bdag gi gzhan gyi dbang du gyur pa yin gyi/'di ni chos kyi rje'i gzhan gyi dbang du gyur pa'i phyir gzhan gyi dbang du gyur pa mi 'dra ba nyid do/ /de dag ni sdong dum tsher ma la sogs pas yongs su ma dag pa'i yul du skyes pa yin gyi/ 'di ni sangs rgyas kyi zhing yongs su dag par skye bas na yul mi 'dra ba nyid do//de dag ni log pa'i 'tsho ba la dga' ba yin gyi/ 'di ni yang dag pa'i las kyi mtha'i 'tsho ba la dga' ba yin pas 'tsho ba mi 'dra ba nyid do/ /de dag ni phun sum tshogs pa dang 'byor pa ni 'tshe ba mang po dang 'brel ba yin gyi/'di'i 'byor pa ni 'jigs pa thams cad dang bral zhing rgya che ba yin pas phun sum tshogs pa mi 'dra ba nyid do/ /'jig pa 'di dag las zhes bya ba la sogs pa la gsum zhes bya ba ni 'tsho ba med pas 'jig pa dang tshigs su bcad pa med pa dang / 'khor gyi nang du bag tshab ste go rims bzhin du lus dang ngag dang sems kyis myong ba'i rten can yin no//de la dang po ni chos gos dang bsod snyoms dang mal cha dang / stan la sogs pa lus kyi yo byad kyi sgo nas 'ongs pa'i phyir lus kyis myong ba'i rten can yin no/ /gnyis pa ni pha rol po rnams kyi tshig gis log par sun 'byin pa'i phyir dang /mi snyan pa brjod cing kun nas bslang ba'i phyir ngag gis myong ba'i rten can yin no/ /gsum pa ni nang gi kun du rmongs pas kun nas bslang ba'i phyir sems kyis myong ba'i rten can yin no/ /gsum pa dang bzhi pa ni 'chi bas 'jigs pa dang /ngan 'gros 'jigs pa dag ste/ lus kyi rten can yin no/ /lus ni dbang po dang bcas pa'i lus te/ rten dang brten pa tha dad pa'i ngo bor lus thams cad lus yin no/ /de yang bde 'gro dang ngan 'gro'i bye brag gis 'dod pa dang mi 'dod pa yin te/ de dag dang 'bral ba dang phrad pa la ltos nas bsod nams ma byas pa las 'jigs pa 'di gnyis 'byung ngo / /log pa'i shes bya zhes bya ba ni shes bya log pa bdag la sogs pa ste/ der 'du shes pa la sogs pa la mngon par zhen pa'i mtshan nyid do/ /de la 'tsho ba med pas 'jigs pa'i gzhi yang bdag tu 'du shes pa la sogs pa yin no//'chi bas 'jigs pa'i gzhi yang kyi hud bdag ni med par 'gyur ro snyam pa'o/ /de bzhin du tshigs su bcad pa med pas 'jigs pa med pa'i rgyu yang bdag tu 'du shes pa la sogs pa kho na yin te/'di gsum 'di dag gi rgyu mtshan nyid yin pa ni/ mdo nyid las khong du chud par bya'o/ /dge ba'i rtsa ba chung ba nyid ni ngan 'gros 'jigs pa dang / 'khor gyi nang du bag tsha bas 'jigs pa dag gi gzhi yin te/ mdo las ji skad 'byung ba bzhin no/ /lus 'gyur ba'i bye brag can zhes bya ba ni spu zing zhes byed pa lus 'gyur ba yin par bstan to zhes bstod par bya'o//lhag ma ni go sla'o/ /bsnyen bkur byed pa la sogs pa la dge ba'i bshes gnyen rnams la bsnyen bkur byed na yang dag pa'i lam thos pa'i phyir sgro 'dogs pa dang skur pa 'debs pa'i mtha' gnyis su mi ltung bas na chud mi za ba zhes bshad de/mthar ltung ba ni chud zos pa yin pa'i phyir ro/ /gnas pa med pa ni 'dir bsam gtan gyi ro myang ba med pa yin te/ 'jig rten na yang gnas pa dang / zhen pa dang thogs pa ni/ chags pa kho na yin la/ thogs pa med par spyod pa ni gnas pa med par spyod pa zhes bya'o/ /chags pa med pa stsogs pa dang mngon par dga' ba med pa stsogs pa ni thob pa dang ma thob pa zhes bya ba dang go rims bzhin te/ mdo las ni tshig gnyis kyis rnyed pa la sogs pa da ltar byung ba la chags pa med pa dang /ma 'ongs pa la mngon par dga' ba med pas gsungs so/ /gang mngon par 'dod pa zhes bya ba la sogs pa la/ gang zhes bya ba ni thams cad mkhyen pa nyid de/ tshig dang pos bstan to/ /ci 'dra ba zhes bya ba ni stobs bcu la sogs pa nyid du rnam par phye ba'i ngo bo'o//ji ltar mngon par 'dod pa ni pha rol tu phyin pa rnam par dag pa'i mtshan nyid kyi thabs gang gis thams cad mkhyen pa nyid de/ 'thob pa ste tshig gsum pas ston to/ /pha rol tu phyin pa rnams chags pa med pa tshol ba ste/ chags pa ni mi mthun pa'i phyogs kyis zil gyis non pa'i phyir ma dag pa yin no//gang dang ci 'dra ba dang / ji ltar zhes bya ba de dag la brten nas go rims bzhin du thams cad mkhyen pa'i sa 'dod pa la sogs pa gsum yin no/ /gsum pa ste/ pha rol tu phyin pa rnam par dag pas thams cad mkhyen pa nyid mngon par 'dod pa gang yin pa de nyid mi mthun pa'i phyogs spangs pa brjod pa'i phyir/tshig lhag ma rnams kyis rnam par 'byed do/ /gnyen po kun du spyod pa ni don gyis go bar zad do/ /des ni zlog par byed cing zhes bya ba ni rgyu ston par byed pa'o/ /khas mi len zhes bya ba ni g.yo yin te/'di gnyis ni dri ma gcig yin no/ /ji skad smras pa bzhin mi byed pa ni dri ma gnyis te/ dri ma 'di gnyis ni mdo'i tshig gnyis kyis bstan te/ /lhag ma ni go sla'o/ /sems rnam par g.yeng ba'i rgyu dag ni brjed ngas pa dang / shes bzhin ma yin par gnas pa dang / 'du 'dzi la dga' ba zhes bya ba la sogs pa de lta bu dag yin par rig par bya'o/ /'di ni sa bshad pa 'di la zhes bya ba la sogs pa ni bsam pa dang / sbyor ba dang yongs su bsngo ba phun sum tshogs pa bshad pa gang yin pa de ni rab tu gnas pa zhes bya'o/ /sngar ni dang po don dam pa pa'i sems skyes pa tsam gyis gnas pa bshad do//da ni bsgom pa'i lam na gnas skabs mchog tu gyur pas/ mthong ba'i lam na phun sum tshogs pa gsum dang ldan pa'i phyir shin tu zhugs pas na rab tu gnas pa zhes bya'o/ /yang dag par tshol bas rim gro bya ba ni dge ba'i bshes gnyen rnams tshol ba gus par smra ba la sogs pa 'dud par byed pa yin te/bsnyen bkur bya bas rim gro bya ba'i snga ltas yin no/ /sgrub pas rim gro bya ba ni sdom pa blangs pa'i yin te/ de bsrung ba'i phyir ro/ /sgrub pa'i mchod pa ni dad pa dang / skyabs su 'gro ba la sogs pa sdom pa kho na yin pas tha dad pa yin no/ /de la gnas pa nyid ni sangs rgyas thams cad yul yin pa'i phyir ro/ /dngos po chen po nyid ni sna tshogs mang zhing rgya che ba'i phyir ro/ /bsam pa chen po nyid ni rgya che zhing rnam par dag pa la mos pa'i bsam pa yin pa'i phyir ro//bsod nams yongs su 'dzin pa chen po nyid ni chos kyi dbyings ltar rgya che ba'i phyir ro/ /rgyu'i dngos po chen po nyid ni 'khor ba ji srid pa dang 'bras bu rtag pa'i rgyun yin pa'i phyir ro/ /tshig gnyis kyis ni dus chen po nyid bstan te/ bskal pa dang sangs rgyas 'byung ba thams cad du rgyun mi 'chad pa'i phyir ro//smon lam chen po gsum pa ni zhes bya ba la sogs pa la/ zad par khyab pas zhes bya ba ni ma lus pa'i zhes bya ba'i sgra'i don ston par byed pa'o/ /thams cad ces bya ba'i sgra ni 'jig rten gyi khams rab 'byam khyad par du byed pa yin no//de la 'jig rten gyi khams 'ba' zhig smos na ni 'jig rten gyi khams su zhes bya ba 'di tsam du go bar 'gyur gyi/ 'dzam bu'i gling thams cad du zhes bya bar ni ma yin no/ /zad par khyab pa ma lus pa smos pas ni 'jig rten gyi khams gcig na yang 'dzam bu'i gling ji snyed yod pa de dag thams cad du yin zhes bshad pa yin no//smon lam gsum pa 'dis ni rten cing 'dra bas sems can rnams yongs su smin par byed pa de bstan te/ dga' ldan gyi gnas nas gshegs pa la sogs pas rten sangs rgyas kyi sprul pa'i sku brjod pa'i phyir ro//sngon du btang bas zhes bya ba ni ci nas kyang sems can rnams kyi bsod nams dang ye shes kyi tshogs stsogs par 'gyur bar bya'o zhes de snyam du dang por sems la bzhag nas phyis dga' ldan gyi gnas nas gshegs pa la sogs pa ston par mdzad do zhes bya ba'i tha tshig go//bzhi pa zhes bya ba la sogs pa ni/ da ni sems can 'dra bas sems can rnams yongs su smin par byed pa de ston to/ /byang chub sems dpa'i spyod pa'i gdams ngag rjes su bstan pa rab tu sbyin pa brtan pa'i sems kyis te/ tshig dang po dang /tha ma gnyis dang / tshig bar ma rnams kyis spyod pa de nyid kyi rnam pa dang / rang bzhin dang / las dang / thabs tha dad pa ston par byed do/ /rnam pa la sogs pa bshad pa nyid las legs par rnam par phye bar zad do/ /sa dag las 'jig rten pa ji ltar yod pa ma yin nam zhe na/de'i rjes la thob pa yin gyi/ sas bsdus pa ni ma yin no zhes bya bar khong du chud par bya'o/ /thabs bstan pa las spyod pa lta bu zhes bya ba ni de dang 'dra ba'i sa bcu pa'i chos kyi rnam grangs 'di nyid la bya ste/ pha lta bu zhes bya ba bzhin no/ /sa'i lam ji lta ba bzhin du ston pa yang 'di nyid yin no//lnga pa zhes bya ba la sogs pa ni da ni sems can gang dag yongs su smin par bya ba de dag yongs su ston te/ de dag kyang rnam pa drug tu tha dad pa rnams so/ /rnam pa drug po de dag kyang bshad pa nyid las bshad par zad do/ /drug pa zhes bya ba la sogs pa ni da ni sems can de dag gang na gnas pa de brjod de/snod kyi 'jig rten gyi khams yin no/ /de la shin tu rgya che ba zhes bya ba la sogs pa la rnam par dbye ba mig 'phrul lta bu ni dper na sgyu ma'i gsang sngags kyi mthus mig 'phrul glang po che dang rta la sogs pa'i mtshan nyid kyi rnam par dbye ba ngo bo sna tshogs brdzun yang snang ba de bzhin du las sgyu ma'i mthus 'jig rten gyi khams rnam pa du mar tha dad pas tha dad pa 'di dag kyang brdzun bzhin du snang ste/bdag nyid kyis de ltar don dam pa'i mtshan nyid kyi ye shes kyis khong du chud par byas nas/ sems can rnams kyang khong du chud par bya'o zhes smon lam 'debs so//'di snyed du yongs su chud pa ni tshad do/ /de med pa'i phyir tshad med pa ste/ de ltar tshad med pa de dag gi rnam par dbye ba rnam pa du ma gang yin pa de la 'jug pa mngon sum du bya ba'i phyir smon lam 'debs so/ / bdun pa zhes bya ba la sogs pa ni da ni gang la gnas te yongs su smin par bya ba de ston te/ de la zhing thams cad zhing gcig dang zhes bya ba ni zhing thams cad rang gi zhing dang 'dra ba nyid du bsgrub pa'i phyir zhes bya ba'i tha tshig go/ /zhing thams cad du thogs pa med par 'gro ba'i phyir mnyam par rgyu ba ste des yongs su sbyong ba'o//'od kyi rgyan gyis ni kha dog phun sum tshogs pa ston te/ rin po che mchog tu 'bar bas brgyan pa'i phyir ro/ /rnam par bkod pa'i rgyan gyis ni dbyibs phun sum tshogs pa ston te/ dbyibs sna tshogs pa du ma bkod pa'i phyir ro/ /nyon mongs pa thams cad dang bral ba'i phyir yongs su dag pa'i lam 'jig rten las 'das pa'i lam de dang ldan pas zag pa med pa'i dga' ba dang bde ba la yongs su longs spyod cing de la gnas pa rnams nye bar brtan par 'gyur bar smon lam 'debs so//ye shes tshad med pa'i 'byung gnas ni sangs rgyas dang byang chub sems dpa' rnams te gnas pa po de dag gis gang ba nyid don du gnyer ba'o//zhing de lta bu de 'grub pa'i rgyu ni sangs rgyas kyi yul rgya chen po la yang dag par gzhol ba yin te/ sangs rgyas kyi yul rgya chen po ni sangs rgyas kyi chos thams cad do//de dag la yang dag par gzhol ba ni mngon par bsgrub pa'o/ /sems can rnams kyi bsam pa ji lta ba bzhin du mos pa dang 'tsham par ye shes kyis zhing de lta bu dag ston cing yang dag par bstan nas kyang mthus tshim par byed do/ /brgyad pa'o zhes bya ba la sogs pa la/da ni smon lam lhag ma gsum ni bdag nyid kyi sa'i khyad par rtogs par bya ba dang / byang chub sems dpa'i sa'i khyad par rtogs par bya ba dang / byang chub sems dpa'i sa'i mthar thug pa rtogs par bya ba dang thams cad kyi mthar thug pa rtogs par bya ba dang go rims bzhin te/de la byang chub sems dpa' thams cad dang bdag tu bsam pa sems mngon par 'du byed pa dang sbyor ba lus dang ngag gi las gcig par 'dra bar mtshungs par 'gyur bar smon lam 'debs pa/ byang chub sems dpa' rnams kyi bsam pa ni thams cad mkhyen pa nyid la sems shing theg pa dman pa las shin tu rgyab kyis phyogs pa yin la/sbyor ba yang 'di nyid la sbyor ba yin pas bdag kyang de dang 'dra bar theg pa chen po kho na la 'jug cing theg pa dman pa la dga' bar yang mi 'gyur bar de dag dang bsam pa dang sbyor ba gcig par don du gnyer ba'o//de yang spyod pa rnam pa bcus rab tu phye ba'o zhes bya ba ni de la sbyin pa'i pha rol tu phyin pa la sogs pa dge ba'i rtsa ba rnams kyi 'gran zla ni dgra ste/ ser sna la sogs pa mi mthun pa'i phyogs so/ /de spangs pa'i phyir zil gyis mi non pas na/ 'gran zla med pa dag go/ / de dag sogs pa ni yongs su rdzogs pa ste/ 'di ni theg pa chen po la 'jug pa'i tshogs yin no/ /nang du yang dag 'jog pa ni tshul bzhin du yid la byed pa bsgom pa ste/ des chos thams cad bdag med pa'i rnam pa kho na dmigs pa'i phyir mthun par dmigs pa ste/ des rnam pa gnyis rab tu phye ba'o zhes bya bar sbyar ro//rtag tu byang chub sems dpa' rnams dang 'grogs pas 'bel ba'i gtam gtan la 'bebs par 'gyur ro/ /de bzhin gshegs pa rab tu 'byed pa ni chos kyi dbyings so/ /de ye shes kyis khong du chud pa ni rjes su dran pa'o//ma nyams pa ni yongs su ma nyams pa ste de las nam yang nyams par mi 'gyur ba'i phyir ro/ /de nyid kyi phyir rjes su 'gro ba ste/ rtag tu kun tu 'byung ba'i phyir nam yang rjes su mi 'gro ba ma yin no/ /de nyid gtan du ba'i mngon par shes pa thob pas so zhes bya bas bstan to//dgu pa zhes bya ba la sogs pa la brtson 'grus ni brtson 'grus rtsom pa'o/ /de'i don yod pa ni 'bras bu med pa ma yin pa nyid do/ /lus dang ngag dang yid kyi las don yod pa zhes bya ba'i mdo'i tshig ni mdo nyid las tshig gzhan gsum gyis bshad de/ de la sems can rnams kyis bdag mthong ma thag tu sangs rgyas kyi sa bon du btab pas sangs rgyas kyi chos rnams la nges par 'gyur bar smon lam 'debs pa ni/lus kyi las don yod pa nyid do/ /tshig brjod ma thag tu ye shes khong du chud par bya ba zhes bya ba ni ngag gi las don yod pa nyid do//de'i yid kyi dbang gis sems can rnams dad pa skyes ma thag tu nyon mongs pa rnams ldog pa ni yid kyi las don yod pa nyid do/ /don sgrub pa ni don byed pa don bya ba yin te des don yod pa nyid de/ de la sman gyi rgyal po chen po lta bu'i lus yang dag par bstan pas ni sems can rnams kyis sha zos pa la sogs pas rang bzhin gyi sdug bsngal nad sel bar byed de 'di ltar srog chags kyi rigs nges pa zhes bya ba'i sha zos pas sems can gyi tshogs chen po'i nad kyi sdug bsngal nye bar zhi'o zhes grag go//phongs pa las byung ba'i sdug bsngal ni/dbul ba la sogs pa de'i gnyen por yid bzhin gyi nor bu rin po che lta bu'i lus thob pa'o/ /bcu pa'o zhes bya ba la sogs pa la las lnga pa ni mya ngan las 'das pa bstan nas yang sems can gyi don du 'khor bar skye ba la brten nas byang chub sems dpa'i spyod pa sgrub pa'i phyir spyod pa'i stobs rgyun mi 'chad pa yin no//drug pa ni sangs rgyas kyi ye shes kyis las yang zhes bya ba la sogs pa ni 'di skad du thams cad mkhyen pa nyid thob nas sangs rgyas kyi sa la brten nas sangs rgyas kyi zhing gzhan dag tu chos kyi tshul nub na mdo la sogs pa'i chos rnams rab tu ston par byed do zhes bshad pa yin no//de nyid kyi phyir yang zhes bya ba'i sgra smos te/ nub pa la yang 'byin par bstan pa'i phyir ro/ /las bdun pa ni zhes bya ba la chos rnams shes pa ni/ chos shes pa ste me long lta bu'i ye shes la sogs pa'o//de nyid mngon par shes pa yin te/ 'dis mngon par shes pa'i phyir ro/ /des stong pa nyid du rtogs pa'i phyir chos thams cad snang ba med par byed do/ /de nyid kyi phyir 'khor ba la mi gnas so/ /rdzu 'phrul gyi mngon par shes pas ni sems can gyi mos pa'i dbang gis brgya byin la sogs pa'i lus kyis bdag nyid len cing de bzhin du tshe zad na yang ci dgar 'dug la/yod na yang yongs su mya ngan las 'da'o/ /de la 'dod pa'i don sangs rgyas mchod pa la sogs pa la sems mngon par 'du byed cing 'du mngon par byed pa ni smon lam mo//smon lam de 'grub par bya ba'i thabs gang yin pa brtson 'grus kyi mtshan nyid de ni brtson pa'o/ /brtson 'grus kyi thabs de sgrub pa shas che ba ni mngon par sgrub pa'o/ /de zhes bya ba'i sgra smon lam dang 'brel ba yin pa dang de 'grub pa ni smon lam 'grub pa zhes bya ba'i don 'dir 'gyur ro//de 'grub pa yang smon pa'i don 'grub pa yin la/ 'dod pa'i don yang sems can gyi mthar thug pa'i bar yin pas/ de'i phyir 'di la 'di gsum rim gyis mngon par bsgrub pa'i phyir gzhung 'di mi 'gal lo//de la sems can gyi khams kyi mthar thug pa ni yan lag go zhes bya ba la sogs pa la/ sems can gyi khams gang yin pa zhes bya ba ni sems can gyi khams kyi mthar thug pa zhes bya ba yin no/ /gang du gnas pa zhes bya ba ni 'jig rten gyi khams mthar thug pa zhes bya ba yin no//ji snyed pa zhes bya ba ni nam mkha'i khams kyi mthar thug pa zhes bya ba ste/ nam mkha'i khams bzhin du tshad med pa zhes bya ba yin no/ /gang gis gdul bar bya ba zhes bya ba ni chos kyi khams kyi mthar thug pa zhes bya ba yin te/ sangs rgyas kyi sprul pa la sogs pa'i thabs kyis 'dul ba'i phyir ro//gdams ngag gang la brten nas zhes bya ba ni de bzhin gshegs pa'i ye shes kyi khams kyi mthar thug pa zhes bya ba yin te/ de bzhin gshegs pa'i ye shes la brten nas gdams ngag sbyin par byed pa'i phyir ro/ /dmigs pa gang gis zhes bya ba ni sems kyi dmigs pa'i khams kyi mthar thug pa zhes bya ba yin te/bdag med pa gnyis la dmigs pa'i phyir ro/ /mngon par rtogs pa gang gis zhes bya ba ni sangs rgyas kyi ye shes mngon par sgrub pa'i mthar thug pa zhes bya ba yin te/ sangs rgyas kyi ye shes mngon par rtogs pa'i phyir ro//'di dag rgyun gyi mthar thug pa yin pa ni/ 'khor ba ji srid par yongs su mi zad pa'i phyir zhes bstan pa'i phyir ro/ /mthar thug pa dgu po 'di dag nyid rgyud kyi mthar thug pa rnams kyis bstan te/ de la 'jig rten gyi rgyud kyis ni dang po gsum mo//chos kyi rgyud kyis ni bar ma rnams so/ /ye shes kyi rgyud kyis ni tha ma rnams so/ /rgyud ni rgyun chags pa ste rgyun dang lam zhes bya ba'i tha tshig go/ /sgrub pa'i khyad par gyis khyad par du 'phags pa ji lta bu zhe na zhes bya ba ni dad pa la sogs pa 'og nas 'byung ba'i don bcu dag gis sgrub par byed pa'i phyir ro//nyan thos la sogs pa rnams la yang 'di dag shas 'ga' zhig yod mod kyi/ 'on kyang 'di las 'og nas 'byung ba ci 'dra ba de lta bu dag ni/ byang chub sems dpa' rnams kho na'i yin pas khyad par dag ces bya'o/ /dge ba'i rtsa ba de dag la zhes bya ba ni smon lam chen pos kun nas bslang ba dag la'o//dbang gi khyad par thob pa ni ji srid 'dod par yang dang yang du mngon sum du bya ba la thogs pa med pa'i phyir ro/ /bde bar gnas pa'i khyad par thob pas zhes bya ba ni chos kyi dga' bas lus dang sems dag shin tu sbyangs pa dang ldan pas gnyen por 'gyur ba'i phyir ro//da ni yul gyi bye brag rab tu brjod pa'i sgo nas dad pa la sogs pa ston to/ /de la sngon gyi mtha' ni byang chub sems dpa'i gnas skabs te/ thams cad mkhyen pa nyid kyi phyi ma'i mtha' la ltos pa'i phyir ro/ / der spyod pa ni sngon gyi mtha'i spyod pa'o/ /de nyid 'jug pa yin te/ 'dis thams cad mkhyen pa nyid kyi grong khyer du 'jug pa'i phyir ro/ /de ltar na khyad par bsdus pa'i byang chub sems dpa'i spyod pa nyid sngon gyi mtha'i spyod pa la 'jug pa yin no/ /rnam pa gcig tu na 'di la 'jug pa 'di yod pas sam 'di la 'dis 'jug pa yod pas zhes bya ba ste/tshig gnyis kyis ni 'bru mang po dag la yang de nyid la bya'o/ /ji lta zhe na bshad pa/ de ni sa bcus yang dag par bsdus pa'i phyir ro/ /de la tshig gnyis ka la yang byang chub sems dpa'i spyod pa snga ma ni sa phyi ma'i 'jug pa yin pa'am/snga mas phyi ma la 'jug pa yin pas rnam pa 'dis de nyid sngon gyi mtha'i spyod pa la 'jug pa yin par yang ma zad kyi/ snga ma dang phyi ma zhes bye brag tu ma [(]phyi [,]phye [)]bar thams cad mkhyen pa nyid la 'jug pa de thams cad yod pa'am/'di la des 'jug pa yod pas zhes tshig tha dad pa'i 'bru mang po'i bsdu ba kho nas thams cad mkhyen pa nyid kyang yin no/ /de ltar na sngon gyi mtha'i spyod pa la 'jug pa ni ngo bo gnyis te/ spyod pa dang byang chub kyi rang bzhin yin pa'i phyir ro//de nyid kyi spyod pa nas bzung ste byang chub mngon par rdzogs par byang chub pa'i bar du'o zhes bshad pa yin te/ de la dang po ni rnam pa nyid kyis mngon par yid ches so/ /byang chub sems dpa'i spyod pa de gang yin pa zhes bya ba ni rang bzhin gang yin pa ste/ pha rol tu phyin pa la yang dag par 'grub pa zhes bya ba'i sgras bstan/ pha rol tu phyin pa rnams yang dag par 'grub pa ni yongs su 'grub pa ste/ mi mthun pa'i phyogs spangs pas yongs su dag pa yin pas de'i rang bzhin gyi byang chub sems dpa'i spyod pa'o/ /rim pa gang gis zhes bya ba ni/sa yang dag par 'grub pa zhes bya ba'i sgras bstan to/ /sa dang po la sogs pa yongs su dag pa'i rim gyis de dag 'grub pa'i phyir ro/ /'di ltar sa dang po la ni sbyin pa'i pha rol tu phyin pa'o/ /gong ma dag la ni gzhan dag 'grub par rig par bya'o//byang chub kyis bsdus pa'i khyad par rnam pa drug gi dbang du byas nas smras pa/ mu stegs can phyir rgol ba'i gnyen po'i khyad par dang / bdud phyir rgol ba'i gnyen po'i khyad par te mi 'jigs pa yongs su rdzogs pa dang stobs dang sangs rgyas kyi chos ma 'dres pa mi 'phrogs pa nyid ces bya ba la mi 'jigs pa rnams dang /stobs la sogs pas rim bzhin du mu stegs can dang / bdud dag las rgyal ba'i phyir ro/ /mthu bsam gyis mi khyab pa rgya che ba ni/ sangs rgyas kyi chos bsam gyis mi khyab pa nyid ces bya ba ste/ nyan thos la sogs pa'i sems kyi spyod yul las kyang 'das pa'i phyir ro/ /ye shes tha mi dad cing zab pa nyid kyi khyad par ni de bzhin gshegs pa'i yul mtha' dbus med par mngon par sgrub pa zhes bya ba yin no/ /ji lta zhe na skye ba dang gnas pa dang 'jig pa ni dang po dang dbus dang mtha' dag yin no//mtha' smos pas ni 'dir mtha' ma yang brjod pa yin te/ phyi ma'i mtha' yin pa'i phyir ro/ /de rnams med pa'i phyir mtha' dang dbus med pa ste/ chos kyi dbyings so/ /de'i yul can gyi ye shes kyang yul gyi sgo nas mtha' dang dbus med pa zhes bya'o//de nyid ye shes tha mi dad pa yin te/ stong pa nyid du ro gcig pa nyid kyis de las gzhan pa'i dmigs pas tha dad du mi phyed pa'i phyir ro/ /de nyid rang rig pa nyid kyis de bzhin gshegs pa'i yul yin te/ de mngon par sgrub pa ni yang dang yang mngon sum du byed pa'o//de'i zag pa nyid kyi khyad par ni shes bya thams cad kyi rjes su yang zhugs la de'i rnam pa snang bas bsgyur ba yang ma yin zhing yang dag pa'i ngo bo yin pa'i phyir shes pa yang yin la zhes bya ba ma grub pa'i phyir shes bya dang 'brel pa can ma yin zhes bya'o/ /rnam pa thams cad mkhyen pa'i khyad par ni de bzhin gshegs pa'i spyod yul tshad med pa dang ldan pa la 'jug pa zhes bya ba yin te/de bzhin gshegs pa'i spyod yul tshad med pa ni chos thams cad de de'i mngon sum yin pa'i phyir ro/ /de la 'jug pa ni me long lta bu'i ye shes la sogs pa ste/'dis shes pa'i dngos po thams cad la 'jug par byed rab tu shes par byed pa'i phyir ro/ /de nyid rnam pa thams cad mkhyen pa yin no/ /'bras bu yongs su grub pas zhes bya ba ni sangs rgyas kyi lam gyi 'bras bu ni sgrib pa thams cad dang bral ba yin pa'i phyir bral ba'i khyad par ni 'bras bu yin te/de la snga ma rnams kyis ni ye shes phun sum tshogs pa bstan to/ /'dis ni spangs pa phun sum tshogs pa bstan to/ /da ni rdo rje'i snying po nyid kyis sngon gyi mtha'i spyod pa la 'jug pa spyod pa dang byang chub kyi rang bzhin rnam pa gnyis po de mdor bsdus nas tshig tha ma gnyis kyis ston par byed do//de la dben pa ni zhes bya ba la sogs pa la sgro 'dogs pa'i zhes bya ba ni yang dag pa ma yin pa gzung ba dang 'dzin pa gnyis su sgro 'dogs pa'i phyir ro/ /sgro 'dogs par byed pas na sgro 'dogs pa ste rnam par rtog pa'o//sgro btags pa ni de nyid kyis sgro btags pa ste rnam par brtag par bya ba bdag dang chos rnams so/ /sangs rgyas kyi chos chos kyi dbyings rnam par dag pa'i mtshan nyid de dag ni de gnyi gas dben te rtog pa dang brtag par bya ba dang bral ba'i phyir de dag kyang rtog par mi byed pa la brtag par bya ba yang ma yin no zhes bya ba'i tha tshig go//zhi ba ni don gyi chos nyid kyis so zhes bya ba'i don rnams kyi chos nyid ni stong pa nyid de rang bzhin gyis yongs su mya ngan las 'das pa'i phyir zhi ba dag go/ /de lta bas na 'dis ni ngo bo nyid gsum yongs su bstan te sgro 'dogs pa'i don zhes bya bas ni rnam par rtog par byed pa'i sems dang sems las byung ba brjod pa'i phyir gzhan gyi dbang yin no//sgro btags pa'i don zhes bya bas ni sgro btags pa rnam par brtag par bya ba'i dngos po brjod pa'i phyir kun brtags pa yin no//don gyi chos nyid kyis ni yongs su grub pa bstan pa yin no/ /de la rnam par rtog par byed pas na rnam par rtog pa ste gzhan gyi dbang gi ngo bo nyid do/ /de ni stong pa nyid kyi rnam par thar pa'i sgo mi mthun pa'i phyogs te/ gnyis su rnam par rtog pa yod na de mi skye ba'i phyir ro//mtshan ma ni skyes pa dang bud med la sogs par sgro btags pa kun tu brtags pa'i ngo bo nyid de/ mtshan ma med pa'i mi mthun pa'i phyogs yin no/ /ldan pa dang bral ba ni theg pa dman pas yongs su mya ngan las 'da' ba ste khams gsum pa dang ldan pa dang bral ba yin pa'i phyir ro//de la smon pa ni smon pa med pa'i mi mthun pa'i phyogs yin no/ /nyon mongs pa can gyi chos spong ba ni zag pa med pa'i lam ste/ 'dis nyon mongs pa can gyi chos rnams spong bar byed pa'i phyir ro/ /de'i dmigs pa yin pa nyid kyi phyir gos pa med pa ste/de dag la dmigs nas nyon mongs pa thams cad kyis mi gos pa'i phyir ro/ /grangs med pa dang brtag mi nus pa dge ba'i rtsa ba rnams bskyed par bya ba'i dmigs pa nyid yin pas tshad med pa dag go/ /yang na 'dis skye bar byed pas na skye ba'i lam kho na yin te/de'i dmigs pa yin pa'i phyir ro/ /gzhan gyi don sgrub par byed pa'i ye shes ni byang chub sems dpa'i lam ste de'i dmigs pa yin pa'i phyir rgya che ba dag go/ /bskal pa grangs med pa gsum gyis thob par bya ba'i sangs rgyas kyi ye shes gang yin pa de'i dmigs pa yin pa'i phyir sgrub dka' ba dag ste/sgrub par dka' thob par dka' zhes bya ba'i tha tshig go/ /ngo bo nyid gsum las brtsams nas lta ba ngan pa gsum ste/ de la ma rig pa'i mun pas bsgribs pa'i mig can gyi lta ba dang po ni yongs su grub pa'i ngo bo nyid stong pa nyid las 'byung ngo //gnyis pa ni bdag ni 'di lta bu'o zhes bya ba la sogs pa'i nga rgyal gyis rnam par rtog par byed pa'i sems dang sems las byung ba rnams la'o/ /gsum pa ni phyi'i dngos po gser la sogs pa sgro btags pa las te/ lta ba gsum pa ni sred pa rnam pa dum 'byung ba las yin no//gnyis ni yongs su tshol ba'i dus na zhes bya ba ni kun du tshol ba ste/ sgrub pa'i dus so/ /de la dang po ni bsam pa'i nyes pa ste/ sgyu dang g.yo'i bsam pa dag gis sgrub pa'i phyir ro/ /gnyis pa ni sbyor ba'i nyes pa'o/ /phrag dog dang ser sna dag kyang sems las byung ba yin pa'i phyir bsam pa'i nyes pa kho na yin nam ma yin snyam pa'i dogs pa bsu bar bye brag tu bshad de/'gro ba gzhan dag tu lus dang longs spyod ngan pa mngon par 'grub pa'i phyir don gyis na 'di gnyis kyis lus dang longs spyod dag la log par sbyar ba yin pas 'di gnyis sbyor ba nyid yin par rig par bya'o//lta ba drug pa ni yul sdug pa la 'dod chags pa dang / mi sdug pa la zhe sdang ba dang / gnyi ga las bzlog pa la gti mug pa'o/ /bdun pa ni phan tshun gnod pa byed pa'i dus na ni khro ba'o//mdud par 'dzin pa'i dus na ni khon du 'dzin pa'o/ /brgyad pa ni phan tshun gnod pa byed pa'i dus nyid na ste/ phyin ci log bzhi la mngon par zhen pa kho na gnod par byed pa'i phyir ro/ /dgu pa ni sbyin pa la sogs pa byed pa'i dus na ste/ 'dod pa'i zag pa la sogs pa kun tu 'byung ba'i phyir/'dir kun gzhi'i rnam par shes pa dang de dang mtshungs par ldan pa'i tshor ba btang snyoms kho na don dam par rnam par smin par 'dod kyi/ de las gzhan pa'i rnam par shes pa'i tshogs rnams dang / tshor ba la sogs pa ni rnam par smin pa las skyes pa yin pa'i phyir nye bar brtags nas rnam par smin pa dag ces bya'o//ji ltar na kun gzhi'i rnam par shes pa nying mtshams sbyor ba'i skad cig ma la byung ba gcig pa kho na la ming dang gzugs dang lhan cig 'byung ba zhes bya zhe na/ smras pa/ ming dang gzugs de lhan cig 'byung ba'i phyir ro zhes bya ba 'dis khyad par gyi tshig bsdu ba ston te/lhan cig cig car byung ba'i gzhan dang lhan cig 'brel ba ni de'i rang gi ngo bo ma yin pa ming dang gzugs la ltos par bya ba yin no/ /da ni rnam par smin pa'i kun gzhi'i rnam par shes pa'i rgyu nyid kyi mtshan nyid yin par brjod de/de ni nying mtshams sbyor ba'i dus kho na na/ de dang dus mnyam pa'i ming dang gzugs 'jug pa'i rnam par shes pa bsdus pa skyed par byed pa yin pa'i phyir rgyu yin no/ /ji lta zhe na/ ming dang gzugs dang de mi 'bral bar gyur pa'i phyir zhes bya ba smras so//de lta ma yin na go/ /'dir ni mi 'bral bar gyur pa ming dang gzugs yin par bshad pa/ mdo las ni ming dang gzugs dang lhan cig 'byung ba dang mi 'bral bar gyur pa zhes bya ba tshig gnyi gas kyang kun gzhi rnam par shes pa kho na yin par bshad pa ma yin nam zhe na/'di ni nyes pa med de/ mi 'bral bar gyur pa ni gnyi ga la bstan pa'i phyir gnyi ga yang mi 'bral bar gyur pa zhes bshad do/ /gso ba nyid kyis ni gsog nyid du ston par byed do/ /g.yo ba med pa nyid kyis ni rang gis bdag ma yin pa ste/ ji lta zhe na/ bdag ni byed pa po dang /bya ba dang bcas pa dang / rtag par 'dod la/ phung po rnams ni/ skad cig las phan chad du mi gnas pa'i phyir bya ba'i dus su mi gnas pas de lta bu ma yin pa dag tu brjod pa'i phyir ro/ /'di ltar khong du mi chud do zhes bya ba ni sems can dang sems can du bgrang ba ma yin pa'i dngos po dag dang /skye ba la sogs pa sdug bsngal ba dang / mya ngan las 'das pa bde ba dag ste/ de gnyi ga las phyin ci log tu gyur pa'i phyir ro zhes bya ba'i tha tshig go/ /des sems can rnams sdug bsngal gyi phung po las mthar ba de lta bu dag mthong nas de'i phyir de'i snying rje chen po rgyas par 'byung ngo zhes bya ba'o//zong du bya ba zhes bya ba ni sna sprad pa'i dong rtse dang / dngul gyi dong rtse la sogs pa'i nor dag go/ /yongs su spyad par bya ba zhes bya ba ni yongs su longs spyad par bya ba zas dang skom la sogs pa gang yin pa'o/ /gzhag par bya ba ni/btsong bar mi bya ba gang yin pa ste/ gser la sogs pa ma nyams pa'o/ /'di gsum car yang tshig dang po gcig kho nas bstan to/ /rnam pa brgyad gang yin pa dang / nang gi ni tshig lhag ma dgus bshad do/ /gtong ba'i spyi ni rtogs par sla ba'i phyir/thams cad la ltos nas yan lag yin no zhes de skad du ma bshad do/ /phyi'i dngos po gtong ba rnam pa brgyad kyi yan lag ni gtong ba dang po yin te/ gtong ba rnam pa brgyad ni de'i dbye ba'i ngo bo yin pa'i phyir ro/ /gzhi yongs su 'dzin pas dga' ba ni bde ba'i rgyud yongs su 'dzin pas dga' ba zhes bya ba'i tha tshig go//gzhi ni gser dang dngul la sogs pa ste/ de ni phan 'dogs pa'i rgyu yin pa'i phyir ro/ /phan 'dogs pas dga' ba ni rnam pa brgyad du shes par bya'o/ /de dag kyang mdzes pa'i phan 'dogs pas dga' ba la sogs pa ste/rin po che'i rgyan zhes bya ba la sogs pa'i tshig gis bshad do/ /de bzhin nyid du zhes bya ba ni tha ma dang 'bring dang mchog la ji ltar gang la gang rigs pa de ltar de bzhin sgrub po zhes bya ba'i tha tshig go/ /byang chub sems dpa' ji ltar sgrub ce na/ smras pa/ bstan bcos mdo sde'i rgyan bshad pa las/'jig rten shes pa nyid rnam par dbye ba'i nang nas/ dpa' bo rtag tu 'dzum pa'i bzhin zhes bya ba la sogs pa 'byung ba bzhin no/ /ci nus su zhes bya ba ni bdag gis so zhes bya ba ni bdag nyid ldan pa nyid ston par byed de/ rang gi zho sha la ltos nas nus pa la ni 'jug gi/ mi nus pa la ni ma yin pa'o//ci rigs su zhes bya ba ni gzhan dag la'o zhes bya ba ni gang dag ji ltar gang gis skal ba dang ldan pa de dag ni de kho na bzhin du de la brten to zhes bya ba de ltar khong du chud par byas nas de nyid la 'dzud par byed kyi gzhan du ni ma yin no zhes bya ba'i tha tshig go/ /yid la bya ba ni rnal 'byor te/de dang mthun pa'i dus su ni 'di yin no zhes bya bar rtogs nas/ bdag nyid kyang rnal 'byor la 'jug la/ gzhan rnal 'byor dang ldan pas yang de'i dus su slong bar mi byed do/ /de bzhin du nyin par dang mtshan mo yang gang gi tshe gang la 'jug par bya ba de yang shes dus gang gi tshe bya ba 'bras bu yod cing 'bras bu dang bcas par 'gyur ba de yang shes so//mngon par 'byung ba ni nges par 'byung ba ste/ dge ba'i sbyor ba snga ma de las ma nyams par khyad par phyi ma thob par bya ba'i phyir brtson 'grus mchog byed pa'o/ /de nyid rnam pa gnyis kyis zhes bya bas bstan te/'bri bar mi 'gyur ba zhes bya ba ni thob pa las yongs su mi nyams pa'o/ /rgyun mi gcod pa zhes bya ba ni ma thob pas yongs su mi nyams pa'o/ /sgrub pa bcu pa kho na la mchod pa gnyis smos pa'i phyir tshig gnyis kyis bshad par rig par bya'o//yod pa nyid du ni yid ches la nus pa nyid du ni 'dod pa ste/ byang chub sems dpa'i spyod pa dang / sangs rgyas kyi chos rnams la so sor 'di gnyi ga sbyar ro/ /lhag ma gsum ni ngo tsha shes pa dang khrel yod pa dang / brtan pa'i stobs bskyed pa dang / sangs rgyas la mchod pa dang rim gro byed pa ste/de la dang pos ni dad pa la sogs pa'i mi mthun pa'i phyogs rnams dang du mi len te bdag gir mi byed cing de dag gis ngo tsha bar byed do/ /gnyis pas ni gang gis na de dag las mu stegs can la sogs pa phyir rgol ba rnams kyis bskyod par mi nus te mi g.yos shing mi bzlogs so//gsum pas ni tshe phyi ma la dad pa la sogs pa de dag gi rtsa ba zhes bya ba skye ba dang mthun pa'i gnas lus yongs su 'dzin to/ /de nyid sangs rgyas la mchod pa dang rim gro byed pa rgya chen pos zhes bya bas bstan te/ de'i rnam par smin par gyur pa yin no//sgrub pa'i mchod pas ni sems las su rung ba yin te/ de'i rgyu mthun par gyur pa sngon goms pa'i stobs kyis dge ba'i bya ba kho na la 'jug go/ /sum cu lnga po snga ma ni rgya cher bstan pa yin no/ /'di dag ni mdor bsdus nas bshad pa yin no//yon tan gyi zhing la dgod pa ni sangs rgyas dang dge 'dun la mchod par byed pa ste/ byang chub sems dpa'i sa rab tu dga' ba 'di la gnas pa de la zhes bya ba nas bzung ste/ dge 'dun la yang tshogs pa'i yang dag pa'i ri mo byed do zhes bya ba'i bar yin no//bla na med pa'i 'bras bur dgod pa ni dge ba'i rtsa ba de dag kyang bla na med pa yang dag par rdzogs pa'i byang chub tu yongs su sngo bar byed do zhes bya ba yin no/ /snying rje'i zhing du dgod pa ni de sangs rgyas bcom ldan 'das de dag la mchod pas sems can yongs su smin par bya ba kun du skyes pa yin zhes bya ba nas bzung ste/las su rung bar 'gyur ro zhes bya ba'i bar yin te/ /'di ni dgod pa rnam pa gsum yin no/ /mang po zhes bya ba'i grangs smos pa ni de rtogs nas dad pa rab yang dag par bskyed pa'i phyir ro/ /gzugs kyi sku ni sha'i mig gis mthong ngo //chos kyi sku ni shes rab kyi mig gis mthong ngo / /lhag pa'i bsam pa rgya chen pos zhes bya ba ni sems can thams cad yongs su bskyab pa'i lhag pa'i bsam pas so/ /bsti stang byed ces bya ba 'di nyid tshig gsum gyis rnam par 'byed de/ bstod pas zhes bya ba ni tshigs su bcad pas tshigs bcad du bsdebs pas te/rdul med rdul dang bral ba zhes bya ba la sogs pa'o/ /bsngags pas zhes bya ba ni rkyang par bsdebs pa ste/ de bzhin gshegs pa de ni rgyu mthun pa zhes bya ba la sogs pa'o/ /na bza' dang zhal zas dang gzims cha dang /gdan dang / snyun gsos sman dang yo byad dag kyang 'bul zhing zhes bya ba ni des nye bar ston pas bdag nyid kyi ye shes kyi tshogs bstsags par bya ba'i phyir ro/ /ji lta zhe na/ 'phags pa blo gros mi zad pa'i mdo las/ nye bar ston pa bzhi ni/ye shes kyi tshogs stsogs par 'gyur ba yin te/ bzhi gang zhe na/ chos smra ba rnams la zang zing gis nye bar ston pa dang / ye shes kyis nye bar ston pa dang / chos kyis nye bar ston pa dang / shes rab kyis nye bar ston pa'o zhes 'byung ba'i phyir ro//'god pa ni 'jog pa ste/ zhing gnyis la ni de'i yul nyid yin pa'i phyir ro/ /bla na med pa la ni 'bras bur yongs su bsngo bas so/ /tshogs pa'i yang dag pa'i ri mo byed ces bya ba ni gtso bo ji lta ba gdams nas gang zag rnams la ri mo byed pa yang ma yin la/ dge 'dun gyis bskos pa'i ngo bor yang ma yin gyi/ 'byor pa chen po dang ldan pa'i phyir tshogs pa'i ngo bor dge 'dun ma lus pa la bya ba byed do zhes ston par byed do/ /sems can yongs su smin par bya ba kun tu skyes pa yin zhes bya ba ni de yongs su smin pa'i mthu rnyed pas so//ma lus par rtogs pa ni ma yin no zhes bya ba ni/ ji ltar sbyin pa dang / snyan par smra ba dag kun tu skyes pa ltar zhes bya ba'i tha tshig go/ /lhag ma rnams ni ci nus ci 'os su yang dag par mi sgrub pa ni ma yin no zhes bya ba ni 'di la lhag ma rnams kyi sbyor ba srid pa'i phyir te/sa bdun pa las de'i sems bskyed pa dang / sems bskyed pa la byang chub sems dpa'i pha rol tu phyin pa bcu po dag yang dag par 'grub pa/ yang dag par 'grub par 'gyur ro zhes 'byung ba'i phyir ro/ /ci nus zhes bya ba ni/ rang gi zho sha dang 'tsham pa'o//ci 'os su zhes bya ba ni gzhan gyi rten dang 'tsham pa'o/ /lhag ma ni sngar ji skad bshad pa bzhin no/ /shas cher yongs su byang ba dang zhes bya ba ni sbyor ba brling po shas che ba'i phyir ro/ /yongs su dag pa dang zhes bya ba ni/ le lo la sogs pa'i dri ma spang ba'i phyir ro//las su rung bar 'gyur zhes bya ba ni sems can la phan 'dogs pa'i mthu rnyed pa'i phyir ro/ /de'i rjes las thob pa 'jig rten pa dang 'jig rten las 'das pa'i ye shes so zhes bya ba de ni zag pa dang bcas pa'i phyir 'jig rten pa yang yin la/ de gzhan dag la med pa'i phyir 'jig rten las 'das pa yang yin no//yang na 'di ni sa gnyis pa yin pas 'jig rten par bshad de/ 'jig rten las 'das pa ni sa gnyis pa la sogs pa'i rang bzhin no/ /de la brtag pa la mkhas pa ni mi mthun pa'i phyogs dang / gnyen po 'jig pa dang 'grub pa la mkhas pa yin te/ji lta zhe na/ des mi mthun pa'i phyogs dang gnyen po la mkhas par bya ste/ sa'i 'jig pa dang 'grub pa la mkhas pa zhes 'byung ba'i phyir ro/ /'thob pa la mkhas pa ni 'jug pa'i thabs la zhugs pa dang / de'i khyad par la mkhas pa dag ste/sa'i rnam pa dang rgyu mthun pa la mkhas pa dang / sa thob pa rnam par dpyod pa la mkhas pa dang / sa'i yan lag yongs su sbyangs pa la mkhas pa zhes 'byung ba'i phyir go rims bzhin no/ /'phel ba la mkhas pa ni sa gzhan du 'pho ba dang /gnas pa dang 'phel ba la mkhas pa dag ste/ sa nas sar 'phar ba la mkhas pa dang / sa dang sa la gnas pa la mkhas pa dang / sa dang sa'i khyad par shes pa la mkhas pa zhes 'byung ba'i phyir go rims bzhin no/ /yongs su mi nyams pa la mkhas pa ni phyir mi ldog pa la mkhas pa ste/sa thob nas phyir mi ldog pa la mkhas pa zhes 'byung ba'i phyir ro/ /mthar thug par 'gro ba la mkhas pa ni byang chub sems dpa'i sa'i mthar phyin nas de bzhin gshegs pa'i sa la 'jug pa la mkhas pa ste/ byang chub sems dpa'i sa thams cad yongs su sbyangs pas de bzhin gshegs pa'i ye shes kyi sa mnan pa la mkhas par bya'o zhes 'byung ba'i phyir ro//de ltar byang chub sems dpa'i sa'i rnam pa mngon par sgrub pa la mkhas pa zhes bya ba ni ji skad bshad pa'i rnam pas sngar rnam pa dang bcas pa bshad pa rnams kyis sa sgrub pa dang /mkhas pa rnam pa lnga po bshad ma thag pas dad pa la sogs pas yan lag rnams sgrub pa la mkhas pa zhes bya ba'i tha tshig go/ /lhag ma dpes bstan pa ni mdo nyid las rnam par 'chad de/ kye rgyal ba'i sras dag 'di lta ste/dper na zhes bya ba nas bzung ste/ lam gyi bar gnas dang po nas gyen du ma bskyod par zhes bya ba'i bar 'di ni mi nor ba'i mkhas pa yin no/ /de de ltar shes par rnam par brtags pa'i blo dang zhes bya ba nas bzung ste/ grong khyer chen por phyin zhes bya ba'i bar 'di ni nye bar ston pa la mkhas pa yin no//'brog dgon pa'i nyes pa rnams kyis bdag dang 'dron pa rnams la gnod par mi 'gyur zhes bya ba 'di ni mkhas pa gnyi ga'i 'bras bu yin no/ /thog ma nyid nas sa'i lam gyi yon tan zhes bya ba nas bzung ste/ de lam gyi bar gnas dang po nas ma bskyod par zhes bya ba 'di ni byang chub sems dpa'i mi nor ba'i mkhas pa yin no//de de ltar ye shes kyis rnam par brtags pa'i blo dang zhes bya ba nas bzung ste/ bsgral te zhes bya ba'i bar dang / thams cad mkhyen pa nyid kyi grong khyer chen po'i bar du phyin par byed ces bya ba'i bar 'di ni nye bar ston pa la mkhas pa yin no//'khor ba'i 'brog dgon pa rnams kyi nyes pas sems can gyi 'dron pa 'am bdag la gnod par 'gyur bar yang mi byed do zhes bya ba 'di na mkhas pa de gnyi ga'i 'bras bu yin no/ /kye rgyal ba'i sras dag de lta bas na byang chub sems dpas yongs su mi skyo bar sa yongs su sbyang bar bya ba'i khyad par la brtson par bya'o zhes bya ba 'di ni 'bras bu de'i rgyu la sbyor ba yin par shes par bya'o//byang chub sems dpa'i spyod pa rang bzhin dang bcas pa'i rim pa ni pha rol tu phyin pa rnams yin par shes par bya ste/de dag tu mngon par 'grub pa'i phyir ro/ /pha rol tu phyin pa rnams kyi rim gyis sa la sogs pa don du gnyer ba'i phyir de yid la byed pa ni 'dod pa'i don yid la byed pa dag yin no/ /chos nyid ni de bzhin nyid de/ de la bdag gis sbyin no snyam pa la sogs pa'i rnam pa rnams med pa'i phyir ro//skad cig thang cig yud tsam zhes bya ba ni dus thung ngu shes par bya ba'i phyir rnam pa gsum gsungs pa yin no/ /yang na nyan pa po rnams kyi dbang du dbang po rnon po dang 'bring dang rtul pos go bar bya ba'i phyir ro/ /sdig pa dang bral ba'i dbang du byas te zhes bya ba ni sdig pa dang 'bral bar bya ba'i phyir zhes bya ba'i tha tshig go//spyan lnga ni/ de na 'phags dang shes rab spyan/ /lha dang de bzhin sha yi spyan/ /byang chub kyang ni 'thob 'gyur zhing / /sangs rgyas rnams dang mtshungs par 'gyur/ /zhes bya ba ste 'di'i don ni sa bcu pa las 'chad par 'gyur ro//rgyu'i lus dang 'bras bu'i mtshan nyid ces bya ba'i rgyu dang 'bras bu'i rang bzhin zhes bya ba'i tha tshig ste/ lus dang mtshan nyid dag ni rang bzhin brjod pa yin pa'i phyir ro/ /ji ltar mos pas spyod pa'i sa pa'i 'bras bu sa dang po yin la/ sa dang po'i 'bras bu sa gnyis pa yin pa de bzhin du sa bcu pa'i 'bras bu sangs rgyas kyi sa yin te/rgyu de las grub pa'i phyir ro/ /'phags pa 'jam dpal gyis kyang mgo ri'i rtse mo'i mdo las sems dang po bskyed pa ni spyod pa dang 'brel ba'i rgyu yin par blta bar bya'o/ /spyod pa dang 'brel ba ni phyir mi ldog pa'i rgyu yin par rig par bya'o//phyir mi ldog pa ni skye ba gcig gis thogs pa'i rgyu yin par blta bar bya'o/ /skye ba gcig gis thogs pa ni thams cad mkhyen pa'i rgyu yin par blta bar bya'o zhes gsungs so/ /yang na rgyu'i lus ni 'bras bus rtogs pas na rgyu'i lus dang 'bras bu'i mtshan nyid ces bya ba ni/rgyu'i rang bzhin 'bras bus shes par byed do zhes bya ba'i tha tshig go/ /sangs rgyas kyis ni 'bras bu kho na yin gyi rgyu ni ma yin te/ de las lhag pa'i sa gzhan med pa'i phyir dang / sangs rgyas kyi sa la gong nas gong du mchog tu 'gyur ba med pa'i phyir ro//dang po'i sa la sbyang byas nas/ /rnam par dag pa mthong ba ni/ /sa gnyis don du gnyer byed de/ /de thob bya phyir rab tu sbyor/ /bsam pa shin tu rnam dag pa/ /de ltar rab tu sbyor ba na/ /de tshe 'chal pa'i tshul khrims kyi//dri spangs pa ni rgya chen 'thob/ /dri ma med pa'i bsam pa yis/ /sa gnyis rgya chen 'thob pa ni/ /yon tan rnam pa bzhi brten nas/ /rang bzhin tshul khrims 'thob par 'gyur/ /tshul khrims yongs su dag bya'i phyir/ /yon tan dag ni bzhir 'dod de/ /gzhan las yang dag gnod pa dang //bsam pa rnam par dag nyid dang / /'das nas sor chud byed pa dang / /ma 'das pa la gus pa'o/ /mkhas pas yon tan 'di rnams kyi/ /bya ba dag ni bzhir bshad de/ /gzhan la ltos nas khrel yod dang / /bdag la ltos nas ngo tshar 'dod/ /sems la 'gyod pa med pa dang //tshul khrims gsum ni mi 'dra' ba'o/ /sa dang po'i gleng gzhi dang / snyoms par 'jug pa dang / byin gyi rlabs dang / ldang ba dang / bstan pa dang / bskul ba zhes bya ba gang yin pa de nyid sa gnyis pa la sogs pa 'di dag gi yang yin par shes par bya ste/ 'di ltar gleng gzhi ni gnas dang gdul ba rnams yin la/ 'di dag bshad pa'i phyir gnas gzhan dang / gdul ba gzhan dag kyang ma yin no/ /'di dag bshad pa'i phyir rdo rje'i snying po snyoms par 'jug pa gzhan la snyoms par 'jug pa yang ma yin no/ /sangs rgyas bcom ldan 'das rnams kyis kyang byin gyis rlob par mdzad pa yang ma yin no//snyoms par ma zhugs pas ldang ba yang ga la yod/ 'di dag gi bstan pa yang ming tsam gyis don bshad pa byas pa nyid de/ /sa 'di dag bshad pa'i phyir rnam par grol ba'i zla ba la sogs pas yang skul bar yang mi byed do//sa gnyis pa'i bshad pa dang khyad par zhes bya ba 'di gnyis brjod par bya ste/ bshad pa'i dbang du byas nas/ mngon par rtogs pa dang ldan pa zhes bya ba la sogs pa gsungs so/ /de la 'byung bar byed pa rnam par dag pa ni rgyu rnam par dag pa ste/de dag kyang sems kyi bsam pa bcu po dag go/ /so sor brtags pa'i bya ba med pa zhes bya ba ni tshul khrims la sogs pa ji ltar 'gro bar bya ba ji ltar bsgrub par bya ba de bzhin du 'gro ba'i phyir de bzhin du bsgrub pa'i phyir bstan pa'i phyir/ tshul khrims la sogs pa de sgrub na/'dod chags la sogs pas gnod pa na so sor brtags pa shes rab kyi stobs kyis de dag zil gyis mnan nas bstan pa ma yin pa'i phyir so sor brtags pa'i bya ba med pa zhes bya ste/ rang bzhin gyi tshul khrims la rang gi tshul khrims 'jug go zhes bya ba'i tha tshig go//ci'i phyir byang chub sems dpa' rnams kyi tshul khrims rnam pa gsum zhes bya zhe na/ nyan thos dang rang sangs rgyas kyi tshul khrims las byang chub sems dpa'i tshul khrims khyad zhugs par shes par bya ba'i phyir tshul khrims rnam pa gsum po 'di mdor bsdus nas bshad de/tshul khrims kyi pha rol tu phyin pa ni/ byang chub sems dpa'i snying rje yis/ /byang chub lam ni khyad par byed/ /dang po spong ba'i tshul khrims te/ /gnyis pa dge ba sdud pa yin/ /gsum pa sems can bya ba'i ste/ /don rnam gsum ni bsgrub pa yin/'di la/ dang po yang dag len pa'i rgyu/ /gnyis pa dge ba'i pha rol byed/ /gsum pa sems can rnams kyi rgyud/ /pha rol byed par yang dag bshad/ /ji lta zhe na/ sbyor dang bsam pa phun tshogs dang / /mi mthun phyogs rnams nyams pa'i phyir/ /rang bzhin tshul khrims gang yin pa//da ni las lam mtshan nyid yin/ /de la dge ba bcu'i las kyi lam dag gis mdor bsdu na rnam pa bzhi dang ldan pa'i phun sum tshogs pa gnyis shig bstan te/ sbyor ba phun sum tshogs pa dang / bsam pa phun sum tshogs pa'o//de la sbyor ba phun sum tshogs pa ni rnam pa gnyis te/ bde bar sbyor ba dang / phan par sbyor ba'o/ /de la srog gcod pa spong ba nas bzung ste/ tshig rtsub po spong ba'i bar ni/ bde bar sbyor ba yin par shes par bya'o/ /tshig 'khyal pa spong ba ni phan par sbyor ba'o//bsam pa phun sum tshogs pa yang rnam pa gnyis te/ bde ba'i bsam pa dang phan pa'i bsam pa'o/ /de la brnab sems med pa dang / gnod sems med pa dag ni bde ba'i bsam pa'o/ /yang dag pa'i lta ba ni phan pa'i bsam pa'o/ /'di'i don bsdus pa ni/gang da ltar byung ba na phan 'dogs par byed pa ni bde ba yin la/ gang tshe phyi ma la phan 'dogs par byed pa de ni phan pa yin pas 'di lta ste/ bde bar sbyor ba dang / phan par sbyor ba dang / bde ba'i bsam pa dang / phan pa'i bsam pa 'di tsam du zad do//de lta bas na sbyor ba dang / bsam pa phun sum tshogs pa rab tu dbye ba dang bcas pa las brtsams nas dge ba bcu'i las kyi lam rnams rnam par gzhag par shes par bya'o/ /mi mthun pa'i phyogs rnams nyams pa'i phyir zhes bya ba ji lta bu zhe na/ sems can gyi don bya bar khas blangs pa'i byang chub sems dpas chos gnyis yongs su shes par byas nas spang bar bya dgos te/sems can rnams la gnod par byed pa gang yin pa dang / sems can rnams phan pa'i bgegs byed pa gang yin pa'o/ /de la gnod pa ni rnam pa bdun te/srog la gnod pa dang / longs spyod la gnod pa dang / chung ma la gnod pa dang / yang dag pa'i don la gnod pa dang / mdza' bshes la gnod pa dang / snyan pa la gnod pa dang / bya ba la gnod pa'o/ /de la srog gcod pa ni/ srog la gnod par byed pa yin pa nas tshig 'khyal pa ni bya ba la gnod pa byed pa'i bar du yin no//phan pa ni byang chub sems dpa'i sbyin par byed do/ /sbyin pa de yang rnam par gsum ste/ zang zing gi sbyin pa dang / mi 'jigs pa'i sbyin pa dang / chos kyi sbyin pa'o de la brnab sems ni/zang zing gi sbyin pa'i bgegs byed pa yin no/ /gnod sems ni mi 'jig pa sbyin pa'i bgegs byed pa yin no/ /log par lta ba ni chos kyi sbyin pa'i bgegs byed pa yin no/ /mi mthun pa 'di dag gi gnyen por dge ba bcu'i las kyi lam rnams rnam par gzhag ste/ji lta zhe na/ kye rgyal ba'i sras dag ces bya ba nas bzung ste/ sangs rgyas dang chos dang dge 'dun la bsam pa nges pa yin zhes bya ba'o/ /spong ba khyad par can yang 'thob par bstan pa'i phyir zhes bya ba ni sa snga ma'i spong ba bas spong ba khyad chen 'thob par yongs su bstan pa'i phyir ro zhes bya ba'i tha tshig go//gnod par byed pa'i dngos po ni dbyug pa ste/ dbyig pa spangs pa zhes bya ba gang yin pa'o/ /dbyug pa smos pa ni nye bar mtshon pa'i phyir yin te/ tho ba la sogs pa yang gnod pa byed pa'i dngos po yin no/ /gcod pa'i dngos po ni mtshon cha ste/mtshon cha spangs pa zhes bya ba gang yin pa ste des gcod par byed pa'i phyir ro/ /'dir yang mtshon cha ni nye bar mtshon pa yin gyi/ dgra sta la sogs pa yang gcod pa'i dngos po yin no/ /'byung bar byed pa'i rgyu'i dbang du byas nas khon du 'dzin pa spangs zhes bya ba gsungs te/de nyid tshig gnyis kyis rnam par 'byed do/ /longs spyod 'dod pa ni gang gis na g.yul ngor 'jug pa ste/ der zhugs na phyi ma la tshe rabs gzhan du dmyal ba la sogs pa'i sdug bsngal khas blangs pa'i phyir bdag yongs su 'dor ba yin pas/'dzem pa dang ldan zhes gsungs pa gang yin pa'o/ /srog chags kyi yan lag pags pa la sogs pa 'dod pa dang / dper na de ched mi che yang lings tsam 'debs pa don du gnyer ba rnams kyis de bsad par mngon par dga' ba'i 'dod pa ste/ snying rje la zhugs pa zhes gsungs pa gang yin pa'o/ /phan pa dang snying brtse ba'i dus re zhig pa dang / yun du bde bar byed pa ste mtho ris dang thar pa'i rgyud yang dag par len du 'jug pa'i phyir ro/ /byams pa'i sems ni sems can de dag gi rgyu bde 'gro dang mya ngan las 'das pa'i rgyu de gnyis kyi 'bras bu gang yin pa de thob par smon pa'i phyir ro//srog chags 'byung po thams cad la zhes bya ba la/ 'dir srog chags smos pas ni sems can rnams ther zug pa ma yin pa nyid du ston par byed do/ /srog gi dbang po dang ldan pas tshe ji srid kyi bar du gnas pa'i phyir ro//'byung po smos pas ni chad pa ma yin pa nyid ston par byed de shi ba rnams kyang las dang nyon mongs pa'i dbang gis yang 'byung ba'i phyir ro/ /chung ba ni kun tu rtog pa tsam gyis kyang zhes bya ba 'dis ston to/ /che ba ni lus kyis rnam par tho 'tshams pa zhes bya ba 'dis ston to//thun mong rnams la zhes bya ba ni gzhan gyis yongs su bzung ba rnams la'o/ /thun mong ma yin pa dag la zhes bya ba ni gzhan gyi chung ma zhes bya ba 'dis ston to/ /pha ma dang 'brel ba zhes bya ba ni/ rigs shes pas smos pas ston to/ / gzhan sbyin par byas pa zhes bya ba ni mtshan smos pas ston to/ /nges pa la gnas pa zhes bya ba ni chos smos pas ston to/ /rab tu byung ba dag dang / bu khul zho na 'dug pa dag dang / bu chags pa dag ces bya ba 'di dag kyang chos kyis bsrungs pa'i nang du 'dus te/ sems can la gnod pa byed pa'i phyir ro//gnas ma yin par 'gro ba ni mchod rten dang bla ma'i gnas dag dang / yan lag ma yin pa'i rnam par rig byed de/ smras pa/ gang zhig rang gi chung ma yin yang nges bcas bu chags mi 'gro zhing / /bu la nu zho [(]lhud [,]ldud [)]tshe ma yin yan lag ma yin mi 'gro ba//bud med 'grogs na'ang chags dang rmongs par gzhan gyis yongs bzung mi bstan pa/ /smos ci dgos pa dbang po legs bsdams rgyags pa dbang gyur shes par bya/ /gzhi dang khyad par med pa'i phyir zhes bya ba la gzhi ni rgyu yin no/ /brdzun du smra ba'i gzhi ni gzhan bslu ba'i bsam pa'o//de spang ba ni gzhi spong ba ste de yang bden par smra bas 'gyur ro/ /bden par smra ba de nyid ni gzhan bslu ba'i bsam pa'i gnyen po yin no/ /de yang de'i rgyu yin te/ de la brten nas de 'byung ba'i phyir ro/ /de'i phyir gzhi dang khyad par med pa'i phyir ro zhes bya ba smras te/de ltar na gnyen pos spong ba nyid kyis rgyu spong bar bshad pa yin no/ /dbyen mi byed pa nyid rnam par tho mi 'tshams pa ste/ gang gis na gzhan dag la phan pa ma yin pa'i dbyen mi byed pa'o/ /dbyen byas na tho 'tshams par 'gyur ro/ /len pa zhes bya ba ni thos nas zhes bya ba 'dis ston to//brjod pa ni rab tu ston pa ste/ snyod pa zhes bya ba 'dis ston to/ /de la sngon ma bye ba zhes bya ba ni 'dum pa rnams mi 'byed ces bya ba 'dis bstan to/ /sngon bye ba la zhes bya ba ni bye ba rnams la mi snon te zhes bya ba 'dis bstan to/ /'dum pa la mi dga' ba ni mi 'dum pa la mi dga' zhes 'byung ba'i phyir ro//mi 'dum pa la mngon par dga' ba ni 'dum pa la mos pa zhes 'byung ba'i phyir ro/ /de la dbyen gyi tshig chung ba ni bden nam zhes 'byung ba'i phyir ro/ /che ba ni brdzun gyis dbyen gyi tshig smra ba ste/ brdzun yang rung zhes 'byung ba'i phyir ro//brjod pa'i mtshams sbyar ba zhes bya ba ni tshig snga ma'i don tshig phyi mas ston to zhes bya ba'i tha tshig go/ /ha cang gnod par byed pas na zher 'debs pa ste/ shin tu sdug bsngal skyed par byed pa zhes bya ba'i tha tshig go/ /ngor brjod pa zhes bya ba ni/ mngon sum du mi 'dod pa smra ba zhes bya ba'i tha tshig go/ /ngor mi brjod pa zhes bya ba ni lkog na mi 'dod pa'i tshig gi rnam pa rgyun mi gcod pa zhes bya ba'i tha tshig go/ /grong mi'i tshig ces bya ba ni skye bo ma rabs kyi rkyen nyid yin pas tshogs pas dbyung mi bzod pa zhes bya ba'i tha tshig go//skye bo pa zhes bya ba ni nyon mongs pa'i dbang du gyur nas rtag tu 'jug pa zhes bya ba'i tha tshig go/ /brdzun pa ni skye re zhes bya ba'i tha tshig go/ /khro zhing rngam pa zhes byung ba ni khro ba nyid rngam pa yin no/ /rnam pa gcig tu na khro ba las byung ba dang / khro ba dang 'brel pa'i rngam pa de las byung ba'o//yang na gnod pa byed pa'i rgyu mtshan ni khro ba yin la/ phrag dog ni rngam pa ste/ 'dis ni tshul khrims 'dral ba'i rgyu mtshan brjod pa'i phyir brdzun pa nyid rnam par bkrol ba yin no/ /rnar mi snyan pa nyid kyang tshig gnyis kyis bshad de/ khon ma byung ba 'byin pas thos pa'i dus na/snying snad pa'i phyir snying na ba dang dran pa'i dus na sems snad pa'i phyir yid gdung bar byed pa'o/ /de yang ci'i phyir de lta bu yin zhe na/ 'di ltar mi snyan pa dang / yid du mi 'ong bas te/ tshig 'di gnyis ni dus 'di gnyis kho nan rgyu'i ngo bor gnas pa yin no//dga' ba skyes pa med par byed pa'i phyir rang gi sems kyi rgyud dang gzhan gyi sems kyi rgyud ma rung bar byed pa yin no/ /'jam pa zhes bya ba ni/ bshad par bya ba yin no/ /ji ltar 'jam zhe na/ 'di ltar mnyan pa ste/ gya tshom ma yin pa'o/ / yid du 'ong ba ni mngon par 'dod par bya'o/ /mnyen pa tshig gzhan gyis brjod par bya ste/ brdzun ma yin pa zhes bya ba ni tshul khrims kyi yan lag tu gtogs pa ste/ de la dmigs pa nyid kyis sdom pa'i rgyun mi 'chad pa'i phyir ro/ /yid du 'ong ba ni mngon par 'dod par bya'o//zhes bshad pa gang yin pa de yang rnar snyan pa dang / snying la 'bab pa zhes bya ba ni gnyis kyis bshad de/ bde ba dang phan pa yid du 'ong ba dag gi phyir ro/ /de nyid kyi phyir mngon par mtho ba'i bde ba dang / mya ngan las 'das pa'i grong khyer dang mthun pas na grong khyer ba'o//mdza' ba la sogs pa tha dad pas tha dad pa'i skye bo thams cad kyis thos pa dang dran pa'i dus na 'dod pa'i phyir skye bo mang po la dga' ba dang / skye bo mang po'i yid du 'ong ba ste go rims bzhin no/ /de ltar gyur pa de ni khon ma byung ba mi 'byin pa'i don du mchog tu dga' ba bskyed pa'i phyir yid dga' bar byed pa'o//ting nge 'dzin 'grub pa'i phyir zhes bya ba ni de thos ma thag tu sems can rnams kyi nang gi reg bya'i khyad par gyis ting nge 'dzin skye ba dang mthun pa'i rten du byed pa'i phyir ro/ /yid tshim par byed pa ste/ dga' ba sngon ma skyes pa skyed pa bdag dang gzhan yang mngon du phyogs par byed pa'i phyir na rang gi sems kyi rgyud dang gzhan gyi sems kyi rgyud dang bar byed pa'o//bstan bcos 'di las phan tshun smrar dbang zhes te/ dus ma yin pa nyid du [(]gling [,]gleng [)]bar mi byed kyi 'on kyang gang gi tshe mi dge ba rnams las bzlog ste/dge ba la sbyor bar nus pa de'i tshe smra ba'i phyir dus su smra ba'o/ /der phyin ci ma log pa ste mngon par zhen pa'am/ khros na gzhan du smra bas na yang dag par smra ba'o/ /gdams ngag la sbyor ba'i tshe brjod par bya ba dang / tshig gnyi ga brjod pas don smra ba dang chos smra ba'o//rigs pa smra ba ni rigs pas smra ba'o/ /lung smra ba ni 'dul ba smra ba'o/ /sdud par 'gyur ba zhes bya ba ni gzob pa zhes 'byung ba'i phyir te/ gzob par byed gtod par byed ces bya ba'i tha tshig go/ /kha cig ni zhig ldan bcas zhes 'don te/ de dag gi ltar na don ni 'di yin te/zhig ldan zhes bya ba ni/ mya ngan las 'das pa dang ldan pa zhes bya ba'i tha tshig ste/ zhig pa ni mya ngan las 'das pa'i rnam grangs yin pa'i phyir ro/ /yang na 'di'i 'di la rdzas med pas na rdzas med de 'di'i 'di la yongs su 'dzin pa thams cad ces bya ba'i tha tshig go//mnyan par 'os pa'i spyod lam gyis gnas pa rnams la zhes bya ba ni mdo las dus su zhes 'byung ba'i phyir ro/ /gleng bslang ba dang bcas pa zhes bya ba ni mdo las rmeng dang bcas pa zhes 'byung ba'i phyir dang / byung ba dang bcas gleng gzhi dang bcas zhes 'byung ba'i phyir ro//chung ba zhes bya ba ni bzhad gad du bya ba zhes 'byung ba'i phyir ro/ /che ba ni tshig gis rnam par g.yeng ba zhes bya ba yin no/ /bdag gir byas pas yongs su gzung ba'i dngos po ni gzhan gyi nor zhes 'byung ba'i phyir ro/ /spyod pas yongs su gzung ba'i dngos po ni gzhan gyi 'dod pa zhes 'byung ba'i phyir ro//dngos po de yang rang bzhin ci zhe na/ go rims bzhin du zong dang / yongs su spyad pa ste gzhan gyi rdzas dang yo byad ces 'byung ba'i phyir ro/ /brnab sems med pa'i rang bzhin ni mdo las brnab sems mi skyed ces 'byung ba'i phyir ro//brnab sems rnam pa gsum gyi gnyen po zhes bya ba de la kha cig dngos po gya nom pa 'ga' yang mthong nas sgo gsum nas brnab sems bskyed de de bslangs te blang ngo snyam pa dang / gzhan dag mi slong ste 'on kyang kye ma de nam zhig bdag gir 'gyur snyam du de thob par smon pa dang /gzhan dag 'di phrogs te blang snyam du sems pa'o/ /'di gsum sel bar rim bzhin du 'dod par mi byed mi smon chags pa'i sems mi skyed do zhes gsungs so/ /gnod sems med pa yang yin te zhes bya ba ni sems can thams cad la byams pa'i sems zhes bya ba yin no//gnod sems med pa ni mi mthun pa'i phyogs kyi gnyen pos sems can rnam pa lnga la yongs su bstan to/ /ji lta zhe na/ gnod pa byed pa rnams la ni phan pa'i sems zhes 'byung ba'i phyir ro//nyes par spyad pa spyod pa rnams la ni snying rje ba'i sems zhes 'byung ba'i phyir ro/ /sdug bsngal zhing slong ba rnams la ni bde ba'i sems zhes 'byung ba'i phyir ro/ /bde ba la phrag dog byed pa'i dngos po rnams la ni 'jam pa'i sems 'byung ba'i phyir ro/ /byang chub kyi sems yongs su gzung ba rnams la ni skye bo thams cad la phan 'dogs pa'i sems zhes 'byung ba'i phyir ro//ci'i phyir de dag phan 'dogs pa'i sems bskyed ce na/ rtsol ba shin tu mang pos sgyid lug pa'i dngos po rnams la zhes bya ba smos te/ de dag gis byang chub kyi sems bskyed pa des sems can rnams bdag gir byas pa yin te/de nyid kyi phyir sems can de dag gi don du dka' ba spyad pa mang po yun ring por khas blangs pas rtsol ba shin tu mang pos sgyid lug pa'i phyir ro/ /mi mthun pa'i phyogs rnam pa drug ni khro ba la sogs pa'o//de la byams pa'i sems la sogs pa'i mi mthun pa'i phyogs su grangs bzhin du yang ma yin la tshol ba yang ma yin no zhes bstan pa'i phyir bye brag med par shes par bya ba'i zhes bya ba smras te/ 'di skad du sems re re la mi mthun pa'i phyogs drug drug go zhes bshad pa yin no//gang gis khon ma byung ba 'byin pa zhes bya bas ni khro bas so/ /gang gis 'byung ba'i rjes su 'brang ba'am/ 'phel bar byed pa ni khon du 'dzin pas so/ /gang gis dge ba'i lo tog ces bya ba ni phyi'i zhing tsha sgo can dang chos mthun par thabs so/ / gang gis mi dge ba ma skyes pa skyed cing skyes pa yang 'phel bar byed ces bya ba ni dri mas so/ /gang gis mi sdug pa mi dga' ba mi mthun pa skyed cing skyes pa 'phel bar byed pa ni gnod sems kyis so/ /gang gis sdug pa ma skyes pa mi skyed cing skyes pa yang 'phel bar byed pa ni khong khro bas so//de dag ni mi dge ba rab 'byam gyis 'jug par byed pa yin pa'i phyir sngon du 'gro ba dag yin no zhes rjod par byed pa'o/ /de la theg pa gzhan la lta ba'i gnyen por yang dag pa'i lam la gnas zhes bya ba yin no/ /gnyis pa dang gsum pa ni bshad zin pa nyid do//bdag gi mchog tu 'dzin pa'i gnyen por lta ba drang zhes bya ba yin no/ /ji lta zhe na/ glang po 'tsho bzhin du rang gi shes rab kyi stobs kyis bdag la btsan du byas na snyems par byed/ tshig gi don rnam par 'god par byed pa ni ma yin gyi/ 'on kyang bla mas lung ji ltar byin pa de bzhin du lam drang pos don gyi rjes su 'brang ba'i phyir ro//'chab pa'i lta ba ni gnyen po med ces bya ba yin te/ g.yos rang gi nyes pa 'chab pa'i phyir ro/ /brdzun du brjod par lta ba'i gnyen por sgyu med pa zhes bya ba yin te/ sgyus spyod lam la sogs pas sbyin bdag la sogs pa la yang dag pa ma yin pa'i yon tan rab tu ston pa'i phyir ro//'jig rten pa'i lta ba'i gnyen por sangs rgyas la sogs pa la bsam pa nges pa zhes bya ba yin te/ 'di ltar mu stegs dang bram ze la sogs pa dag la rten gyi sangs rgyas la sogs pa dag la gcig kho nar dad pa ma rnyed pas de dag la mi 'jug pa'i phyir ro//'di lta ste rnam pa thams cad dang skyon med pas ni de ltar mchog tu byung ba'i tshul khrims dang rang bzhin gyi tshul khrims yongs su bstan pa yin te go rims bzhin no//yang na tshul khrims gnyis ka gnyi gar yongs su bstan par shes par bya'o/ /sangs rgyas nyid ni 'thob pa'i rgyu/ /dge ba'i chos dag ji snyed pa/ /de dag kun tu sdud pa'i phyir/ /tshul khrims gnyis pa yang dag bshad/ /nyes par spyad pa 'gro ba'i don gyis ngan song gdags te dge ba med par byed pa'i phyir ro//sdug bsngal gyi gnas lus mngon par 'grub pa'i don gyis ngan 'gro gdags te 'gro ba ngan pa'i phyir ro/ /sdug bsngal sna tshogs su rtag tu ltung ba'i don gyis rnam par ltung ba gdags te/ sdug bsngal sna tshogs su rgyun mi 'chad par ltung ba'i phyir ro//grangs su ni bcu zhes bya ba'o/ /kha na ma tho ba ni mi dge ba zhes smos pas ston to/ /'bras bu thob par byed pa ni las kyi lam nyid kyis ston to/ /de dag ni las kyang yin la/ ngan 'gro 'bras bur gyur pa rnams kyi lam yang yin pas so//yang dag par blangs pa'i rgyu las byung zhes bya ba'i tshig 'di la bslab pa len pa lta bu'i yang dag par len pa ma yin no zhes bya ba ni kun tu spyod pa'o zhes bya ba smras te/ yang dag par blang ba ni byed pa zhes bya ba'i tha tshig go/ /rgyu med par smra ba ni 'jig rten rgyang 'phen pa'o//mi 'dra ba'i rgyur smra ba ni dbang phyug la sogs par smra ba ste/ 'bras bu mi rtag pa'i rgyu rtag pa ni mi mtshungs pa'i phyir mi 'dra ba yin no/ /rnam pa 'di gnyi ga yang las kyi lam rnams rgyu'i dngos por brjod pas bstsal to/ /log par sgrub pa la gnas pa rnams bdag nyid de 'dra bas zhes bya ba ni log par sgrub pa la gnas pa kho nas dbral ba de dang 'bral ba log par sgrub pa dang dbral ba ste/mi dge ba rnams las bzlog nas dge ba la sbyor bar mi nus so zhes bya ba'i tha tshig go/ /mi mthun pa'i phyogs dang gnyen por gyur pa zhes bya ba la/mi mthun pa'i phyogs ni mi dge ba'i las kyi lam rnams so/ /gnyen po ni dge ba rnams te/ de dag 'bras bu ngan 'gro dang bde 'gro dang bcas pa'o/ /'dis ni mdo'i tshig de 'di ltar rnam par dpyod de zhes bya ba la sogs pa bstan to/ /las kyi lam gong nas gong du rnam par dag pa zhes bya ba 'dis kyang de'i gong du dge ba bcu'i las kyi lam zhes bya ba la sogs pa mdo'i dum bu theg pa gsum rjod par byed pa bstan pa yin no//shes rab kyi rnam pa zhes bya ba la sogs pa la 'phags pa'i bden pa'i skabs kyis 'dir mi dge ba ltos nas bden pa rnam par bshad pa yin par rig par bya'o//mdo las de dag shes rab kyi bden pa'i rnam par bsgoms na nyan thos kyi theg pa 'grub par byed do zhes gsungs pa ni ma yin no/ /mi dge ba rnams ni rang gi ngo bo spong gi dge ba rnams ni de lta ma yin no zhes bstan pa'i phyir/bag la nyal spangs pa ni/ de 'gog pa zhes bya ba smos te dge ba rnams kyis ni de la dmigs pa'i 'dun pa'i 'dod chags spong ba yin no/ /sdug bsngal gyi rgyu la gnas pa'i sems can rnams la snying brtse bar shes par bya ste/ ma 'ongs pa'i sdug bsngal la brtags nas snying brtse ba zhes bya ba'i tha tshig go//sdug bsngal bar gyur pa rnams la ni snying rje bar shes par bya'o/ /sems can gyi sdug bsngal dag gis gnod par 'gyur bas na snying rje ste/ sems can gyi sdug bsngal skyes pa sems can bzhin du mi bde bar 'gyur zhes bya ba'i tha tshig go /smras pa/ snying rje'i gangs ni gcer ba la/ /gzhan gyi sdug bsngal nyi tshogs kyis/ /gdungs te snying la bzhu ba na/ /mkhas mig gnyis nas 'dzag pa 'dra/ /de'i gang du zhes bya ba la sogs pa la spong ba zhes bya ba ni rnam pa thams cad ces yongs su sbyangs pas zhes bya ba 'dis ston te/ 'di nyid shes bya thams cad shes pa la dbang bas rnam pa thams cad yongs su sbyangs par rig par bya bas rnam par phye ba yin no//dbang byed pa ni stobs bcu'i stobs zhes bya ba 'dis ston te/ de nyid bdud phyir rgol ba sel ba'i skabs yin pa stobs smon pa zhes bya bas bstan to/ /theg pa gnyis yongs su spong ba dang mkhas pa 'di gnyi ga yang theg pa dman pa dag sel bar byed pa'i skabs yin pas sangs rgyas kyi chos smos zhes bya bas bstan to//chog mi shes pa ni byang chub sems dpa'i theg pa ste/ de lta bas na bdag gis zhes bya ba 'dis bstan to/ /sdug bsngal ma lus zhi bya'i phyir//sems can bya ba ji snyed pa/ /byang chub sems dpa' de yi ni/ /ngang tshul yin phyir gsum pa brjod/ /de'i 'og tu zhes bya ba la sogs pa'o/ /de la yongs su shes pa ni rnam pa gsum gyis yongs su bstan to zhes bya ba la sogs pa ni/gnas skabs kyi bye brag la sogs pas mi dge ba'i las kyi lam de dag yongs su shes pas na yongs su shes pa'o/ /mi dge ba rnams kyi chen po la sogs pa'i gnas skabs tha dad pas 'bras bu yang de bzhin du tha dad pa'i phyir gnas skabs kyi bye brag yin no/ /de ltar na sdug bsngal gyi phung po chen po tshad med pa zhes bya ba 'di'i rnam par bshad pa ni re re dang zhes bya ba la sogs pa yin te/re re zhes bya ba ni las kyi lam re re yin pa'o/ /mtha' dag gi zhes bya ba ni thams cad kyi 'bras bu sdug bsngal gang yin pa'o/ /gang du zhe na/ ngan song rnams su ste che ba dang tshad med pa zhes bya ba dang go rims bzhin no/ /de ltar na las kyi lam la ltos nas re re dang mtha' dag ces bya ba smos kyi/ /ngan song gi khyad par du bya ba'i phyir ni ma yin te/ 'di ltar la la ni 'ga' zhig byed/ la la ni thams cad byed pa'i phyir ro//de ltar na gzhung 'di tsam gyis ni sdug bsngal yongs su shes pa'i phyir yongs su shes par bshad pa yin no/ /tshe thung ba dang nad mang ba zhes bya ba ni/ rten cing 'brel bar 'byung ba la de dang 'dra ba rjes su rgyun chad pa'i phyir te/ srog gcod pas tshe thung bar 'gyur la/ de dang bral bas sdug bsngal bskyed pa'i phyir nad mang bar 'gyur ro/ /de bzhin du 'og ma rnams kyi yang shes par bya'o/ /de nas gal te zhes smos pa ni mjug thogs kyi rgyu yin pas khyad par bya ba'i phyir ro/ /ji lta zhe na/ de nas zhes bya ba'i tshig gi phrad 'di ni mjug thogs la 'byung bas gang gi tshe ngan song rnams kyi mjug thogs su mi dag gi nang du skyes na zhes bya ba 'di shes par byed pa yin no//de'i phyir zhes bya ba dang / gal te zhes bya ba dang / brgya la zhes bya ba dang / ni zhes bya ba ni rgyur ston pa ste/ dper na gang gi phyir blon po rnams kyis kyang mchod pa de'i phyir mthu dang ldan no zhes bya ba dang /gal te bcos la/ brgya la kun nas byas nas kho bo'i bya ba yin no zhes bya ba dang / de ni skyes bu dam pa zhes bya ba lta bu'o/ /'di yang gal te zhes bya ba'i tshig gi phrad ni rgyu'i don du shes par bya ste/ ji lta zhe na gang gi phyir sems can dag mi dge ba'i las kyi lam bcu po 'di dag gis srog chags rnams la shin tu gnod par byed pa de'i phyir 'di dag mi rnams kyi nang du skyes na yang rnam par smin pa mi 'dod pa gnyis gnyis mngon par 'grub par 'gyur ro zhes bya'o//smon lam ni 'dod pa ste/ chos kyi kun dga' ba la dga' bas dga' bar gnas par bya'o zhes bya ba 'dis ston to//sgrub pa ni byed pa ste/ dge ba'i las kyi lam rnams la bdag nyid kyang gnas la gzhan dag kyang 'jog pa'o/ /sems bskyed pa tha ma gnyis ni slob dpon gyi sems nyid dang / ston pa'i sems nyid do/ / sems snga ma rnams ni yul so sor nges pa can yin la/ 'di gnyis ni sems can thams cad la yin pas de dag nyid la zhes bya ba smos so/ /de la ltos nas theg pa chen po'i lam du zhugs pa zhes bya ba ni 'di skad du sems can rnams la ltos nas/ brten nas/ dmigs nas/ bdag gis bla na med pa'i byang chub rtogs te/ de'i phyir sems 'di dag ni bla na med pa'i lam ston par byed pa yin pas slob dpon du gyur pa'o zhes de dag sems skyed par byed do zhes bshad pa yin no/ /de bzhin du bsod nams dang ye shes kyi tshogs sogs pa rgyu yin pa'i phyir de dag la ston pa'i sems nyid skyed par byed do//phyin ci log gi dbang du byas nas zhes bya ba ni bdag la sogs par phyin ci log pa'i dbang gis de'i stobs kyis sems can de dag 'dod pa dang srid pa dang tshangs par spyod pa tshol bar gyur pa yin zhes bya ba'i tha tshig go//de la 'dod pa tshol bar gyur pa dag kho na thun mong ma yin pa dang / chog mi shes pa dang stsog 'jog byed pa'i yongs su spyod pa'i bye brag gis rnam pa gsum dang / nyes par spyod pa dang legs par spyod pa dag gis tshe 'di dang / tshe rabs gzhan kun tu tshol ba'i bye brag gis rnam pa gnyis te rnam pa lnga'o//srid pa tshol bar gyur pa dag kyang 'gro ba dang khams kyi bye brag gis rnam pa gsum mo/ /tshangs par spyod pa tshol bar gyur pa dag kyang log pa dang yang dag pa'i bye brag gis rnam pa gnyis so/ /sems can rnam pa dgu po 'di dag ni go rims bzhin du tshig dang po ma gtogs pa dgus ston to//tshig dang pos ni phyin ci log bshad do/ /de nyid kye ma sems can 'di dag ni lta ba ngan par ltung ba zhes bya bas ston to/ /phyin ci log bzhi char bstan pa yin no/ /de dag kyang rab tu phye nas tshig gnyis kyis bshad de/blo gros mi mnyam pa zhes bya bas ni gnyis so/ /ji lta zhe na de la 'jig tshogs la lta ba dang / mthar 'dzin pa'i lta ba ni blo gros mi mnyam par bshad de/ de gnyis kyis bdag dang rtag par phyin ci log pa dag rab tu phye zhing bsdus so//bsam pa mi mnyam pa ni tshul khrims dang brtul zhugs mchog tu 'dzin pas bsdus pa yin no/ /'dis ni bde ba dang gtsang bar phyin ci log pa gzhan gnyis rab tu phye ba ste/ bsam pa mi mnyam pa zhes bya ba 'dis ston to/ /de dag dang mthun pa'i gnyen por dam pa'i chos ni ma nor ba'i lam zhes bya ba ston to//gzhan dag na re rtag par 'du shes pa dang / bde bar 'du shes pa gnyis ni nges par sems pa las byung ba'i phyir blo gros mi mnyam pas rab tu phye ba'o/ /bdag tu 'du shes pa dang / gtsang bar 'du shes pa nyid ni nges par sems pa med par yang 'byung ba'i phyir bsam pa mi mnyam pas rab tu phye ba'o zhes zer ro//tshul bzhin yid la byed pa ni yang dag pa'i lta ba'i lam zhes bya ba 'dis ston to/ /yang dag pa'i lta ba 'jig rten las 'das pa ji lta ba de bzhin nyid la zhes bya ba 'dis ston to/ /da ni sems can rnam pa dgu po de dag tshig dgu dang thun mong ma yin pa'i yongs su spyod pa las brtsams te zhes bya ba la sogs pa sbyor bar byed de/de la mi 'phrod pa smos pa ni mi mthun pa khyad par med par bstan pa de sems dang ngag gi bye brag gis mi mthun par 'dzin pa dang rtsod pa dag gis bstan to//rtsod pa ni mi mthun par smra ba ste 'thob pa'o/ /gnod par bya ba mngon par 'du byed pas zhes bya ba ni khro ba dang khon du 'dzin pa dag gis so/ /de dag dang mthun pa'i gnyen po ni byams pa nye bar sgrub pa'o/ /chog mi shes pas yongs su spyod pa las brtsams te zhes bya ba la sogs pa la gzhan gyi nor la mngon par 'dod pa can zhes bya ba ni brnab sems kyis so//ya nga ba'i 'tsho bas rjes su spyod pa yin zhes bya ba ni lus dang ngag gnyis kyis te/ de lus kyis ni rku ba dang gzhal lugs la g.yo byed pa dag gis so/ /ngag gis ni brdzun du smra ba la sogs pas so//de dag dang mthun pa'i gnyen po ni 'tsho ba yongs su dag pa nyid do/ /sog 'jog byed pas yongs su spyod pa las brtsams te zhes bya ba la sogs pa la sog 'jog byed pa ni stsogs pa ste/ de ni 'dod chags la sogs pa'i rkyen yin no/ /de nyid bshad pa la/de la mngon par chags pa zhes bya ba ni 'dod chags kyis so/ /de'i dgra bo de la 'dod pa rnams zhe sdang gis sdang ngo / /de la yon tan du 'dzin pa ni gti mug gis te/ mthong ba dang ma mthong ba'i nyes dmigs ma mthong ba'i phyir ro/ /'di yang gsum gyi gzhi dang ldan pa zhes bya ba 'di'i rnam par bshad pa yin no//sog 'jog de nyid yongs su spyod pa'i tshe yul la nyon mongs pa rnam pa sna tshogs sgo mang po sgo sna tshogs nas kun nas bslang bas rgyun mi 'chad par dus thams cad du lus dang sems yongs su gdung ba kun nas gdung ba ni nyes pa gnyis pa ste/nyon mongs pa sna tshogs kyi me lce rtag tu rgyun mi 'chad pa kun du 'bar bar gyur zhes gang gsungs pa'o/ /tshe 'di dang phyi ma la sogs pa de nyid kyi nyes dmigs de ma mthong ba rnams nges par 'byung ba mi tshol ba ni nyes pa gsum pa'o//ji skad bshad pa'i nyes pa gsum po yongs su spong ba'i phyir de dag dang mthun pa'i gnyen po nyon mongs pa thams cad rab tu zhi ba 'tshe ba med pa'i mya ngan las 'das pa la zhes bya ba ni tshig gsum gyis bstan to/ /'dod pa tshol bar gyur pa rnams kyis yongs su spyod pas byas pa'i bye brag rnam pa gsum brjod nas/da ni gnyis pa kun du tshol bas byas pa'i bye brag rnam pa gnyis po gzhan gang yin pa de bshad pa la 'jug ste/ gti mug gi mun pa zhes bya ba la sogs pa smos so/ /gti mug nyid mun pa ste/ de yang rab rib la sogs pa nyid kyis khyad par byed do//rab rib la sogs pa dang 'dra ba nyid du bstan pa'i phyir bshad pa nyid las rgyu gsum bshad do/ /de nyid las rab rib la sogs pa'i khyad par rtogs par bya'o/ /'di yang gti mug gi mun pa'i rab rib dang ling tog dang mun gnag ces bya ba 'di'i rnam par bshad pa yin no//ji skad bshad pa de'i rgyu brtas pa ni 'jug pa shas che ba ste bag la nyal ni sa bon no/ /der gyur pa gti mug de'i rgyu bag la nyal brtas par gyur pa yang nyes pa ste/ gti mug mun pa'i thibs por zhugs pa zhes gsungs pa ste/bag la nyal sa bon de nyid thibs po yin par bshad do/ /zag pa med pa'i shes rab las ring du gyur pa yang nyes pa'o zhes bya bar snyegs te/ nyes pa snga ma gnyis la ltos nas 'dir yang zhes bya ba'i sgra smos so/ /ji ltar ring bar gyur zhe na/de'i tshogs legs par spyad pa'i mi mthun pa'i phyogs la brten pas zhes bya ba smos te/ mdo las ni/ shes rab kyi snang ba dang ring du gyur pa zhes bya ba yin no/ /gnod pa chen po'i gnas ngan song du 'gro ba mun nag chen po'i nang du 'jug pa zhes gang gsungs pa'o//sdig pa byas pa rnams kyi mtshan ma mi bzad pa gang dag yin pa de 'chi ba'i tshe 'byung ste/ de mthong bas 'gyod pa dang bcas yid mi bde ba dang bcas pa'i mthong bas 'chi ste ya nga ba mthong bar spags pa zhes gang gsungs pa'o/ /nyes pa bzhi po 'di dag ni nyes par spyod pas tshe 'di la tshol ba rnams kyi yin par bshad de/de dag dang mthun pa'i gnyen po ni shes rab kyi mig rnam par sbyong ba'o/ /legs par spyod pas tshe rabs gzhan kun tu tshol ba rnams kyi dbang du byas nas smras pa/ lam yang bar zhugs pa nyid nyes pa yin no//de ni rang bzhin dang zhes bya ba la sogs pa la de la rang bzhin ni 'dir 'khor ba 'brog ya nga ba'i lam yin par brjod par bzhed pa de tshig dang po nyid kyis bstan to/ /bgegs ni rnam pa brgyad de g.yang sa la mngon du phyogs pa ni sems can dmyal ba la sogs pa'i g.yang sa la mngon du phyogs pa zhes gsungs pa'o//rgyu'i nang du zhugs pa ni/ sdug bsngal la bde bar phyin ci log pa'i lta ba la gnas pa'i phyir te/ lta ba ngan pa'i rgyu nyam nga bar zhugs pa zhes gsungs pa'o/ /thibs pos kun nas g.yogs pa ni de'i rgyu ste/bde bar lta ba phyin ci log gi mtshan nyid de'i rgyu gti mug gi bag la nyal gang yin pa'o/ /des 'gebs pa'i phyir de nyid gti mug thibs po yin te/ gti mug thibs pos kun nas g.yogs pa ni zhes gang gsungs pa'o/ /gti mug thibs po gang dang ldan pa rnams brjod du zin kyang gang la phyin ci log tu gyur pa'i phyir bde bar lta bar bshad pa'i sdug bsngal de'i sdug bsngal nyid kyi rang gi ngo bo mi rtogs te de nyid kyi phyir gti mug gi bag la nyal 'di ni de'i rgyu yin no//log pa'i lam du zhugs pa ni don dam pa'i bde ba thar pa'i phyir gdung ba lnga la sogs pa lam log par zhugs pa'i phyir te/ lam log par gol ba'i lam du zhugs pa zhes gang gsungs pa'o//ldongs par gyur pa ni 'dod chags kyi chags pa des ldongs par gyur pa'i phyir te/ ldongs par gyur pa zhes gang gsungs pa'o/ /ston pa dang bral ba ni mi khom par skyes pa dang / khom du zin kyang bag med pa'i nyes pas sangs rgyas 'byung ba mnyes par mi byed pa'i phyir ro//de'i bstan pa'i rjes su byed pas bslab pa bsrung ba'i phyir sangs rgyas mnyes pa yin na de gnyis kyis bslab pa'i skal ba dang mi ldan pa'i phyir dang mi 'dra ba'i phyir mnyes par mi 'gyur ro/ /de nyid kyi phyir de dag dge ba la sbyar ba'i 'os su gyur pa ma yin pas ston pa bcom ldan 'das de dang bral ba yin no//yongs su 'dren pa med pa zhes gang gsungs pa'o/ /gang du 'gro ba zhes bya ba ni mya ngan las 'das par ro/ /tshangs pa'i 'jig rten la sogs pa ni 'khor ba kho na yin no/ /de nyid nges par 'byung ba ma yin pa la nges par 'byung bar lta ba zhes gsungs pa yin no/ / chom pos zin pa yang zhes bya ba ni bgegs brgyad pa ste/ bgegs snga ma la ltos nas yang zhes bya ba'i sgra smos so/ /bdud kyi yul 'dod pa rnams la kun du chags pa'i bsod nams bdag pa yang zad par 'gyur la/ ma byas pa yang mi stsogs so/ /de'i phyir bcom pa yin te/ bdud kyi lam gyi chom pos zin pa zhes gang gsungs pa'o//'dod pa rnams nyid bdud kyi lam yin la/ dge ba'i nor 'phrog pa'i phyir chom po yin no/ /de ltar rang bzhin dang bgegs kyi sgo nas ya nga ba bstan nas/ chud za ba'i sgo nas ston te/ chud za ba rnam pa gsum zhes bya ba la sogs pa rgyas par smos so//sa ngan pa la gnas pa'i phyir ni yongs su 'dren pa mkhas pa dang bral ba zhes gsungs pa'o/ /dgra'i sa na gnas pa ni bdud kyi bsam pa thibs por zhugs zhes gang gsungs pa'o/ /zin gyi sa las ring du gyur pa ni sangs rgyas la sems pa las ring du gyur pa zhes gang gsungs pa'o//de ltar na phyi rol gyi rnam pa dang chos mthun par rang bzhin dang / bgegs dang chud za ba'i sgo nas 'khor ba ya nga ba nyid du bstan to/ /de dag dang mthun pa'i gnyen po ni bsgral nas thams cad mkhyen pa nyid kyi grong khyer 'jigs pa med pa la dgod do//de ltar thun mong ma yin pa dang / chog mi shes pa dang / sog 'jog byed pa'i yongs su spyod pa'i sgo dang / yang dag pa dang log pa'i tshangs par spyod pa gnyis kyi bye brag gis 'dod pa tshol ba rnam pa lngar bstan nas/ 'gro ba'i sgo nas srid pa tshol ba bshad pa la 'jug ste/ 'gro ba'i sgo nas zhes bya ba la sogs pa smos so/ /klung chen por bying ba nyid kyi nyes pa ste klung de'i rnam pa lngar bshad de/ zab pa ni 'dod pa la sogs pa'i chu bor zhugs pa zhes gang gsungs pa'o/ /'das pa ni 'khor ba rgyun gyis 'das pa zhes gang gsungs pa'o/ /ming ni srid pa chu klung du zhugs pa zhes gang gsungs pa'o//shugs drag pa ni shugs drag pos bdas te bya ba dang / blta ba'i mthu med ces gang gsungs pa tshig gnyis kyis bstan to/ /snga ma 'das zhes bya ba ni 'jug pa tsam brjod pa bzhed pa yin gyi/ shugs drag pas ni bdas pa shin tu drag par ston to//rgyas pa nyid ni 'dod pa la sogs pa'i rnam par rtog pa mang po'i rjes su rgyu ba zhes gang gsungs pa'o/ /klung de lta bu'i rang bzhin yin yang gal te gnod pa zhig med na dbugs phyin par 'gyur srid na/ de yang med de/ gnod pa 'byung bar byed pa yang rnam pa bzhi ste zhes bshad pa gang yin pa'o//de la chu srin gyis zin pa ni 'jig tshogs la lta ba'i chu srin gyis zin pa zhes gang gsungs pa'o/ /glong du chud pa ni 'dod pa thibs po'i klong du zhugs pa zhes gang gsungs pa'o/ /dkyil du thogs pa ni dga' ba can dang 'dod chags kyi dkyil du thogs pa zhes gang gsungs pa'o//dga' ba can ni 'dir yid bde ba nyon mongs pa can yin gyi/ yongs su spyod pa'i dus su brjod par bzhed pa'i phyir ma 'ongs pa don du gnyer ba ni ma yin no/ /gling gi thang la 'thon pa ni pha bong la bab pa bzhin du nga rgyal gyi pha bong gis khengs pa'i phyir nga'o snyam pa'i nga rgyal gyi thang la 'thon pa zhes gsungs pa'o//de ltar gnod du zin kyang / gal te gson na tha gi na/ de yang med pas chud za ba yang rnam pa gsum ste zhes bya ba smras so/ /de la dang po ni dpung gnyen med pa zhes bya ba'o/ /gnyis pa ni skye mched kyi grong nas ma 'phags pa zhes bya ba'o//gsum pa ni sgrol ba mkhas pa dang bral ba zhes bya ba'o/ /khams kyi sgo nas srid pa tshol ba'i dbang du byas nas smras pa/ btson rar bcug pa'i nyes pa ni kye ma sems can 'di dag ni 'khor ba'i btson rar bcug pa zhes bya ba 'dis bstan to/ /bcug pa de ni rnam pa lngar bshad de/de la nad med pas phongs pa ni/ sdug bsngal ba dang yid mi bde ba dang / 'khrugs pa mang po zhes bya ba'o/ /longs spyod kyis phongs pa ni/ sdug pa dang mi sdug par 'brel ba zhes bya ba ste/ phun sum tshogs pa la rgud pas bgegs byed pa'i phyir sdug pa dang mi sdug pa 'brel ba zhes bya bar rig par bya'o//nye dus phongs pa ni mya ngan dang smre sngags 'don pa'i rjes su rgyu ba zhes bya ba'o/ /tshul khrims kyis phongs pa ni sred pa'i sgrog tu bcug pa zhes bya ba'o/ /lta ba'i phongs pa ni ma rig sa'i thibs pos kun nas khebs pa zhes bya ba'o/ /de dag dang mthun pa'i gnyen po ni khams gsum pas dben pa la dgod pa'o//log pa'i tshangs par spyod pa tshol ba'i dbang du byas nas smras pa/ bdag tu mngon par zhen pa nyid nyes pa yin te/ bdag tu mngon par zhen pa zhes bya ba 'dis bstan to/ /de la phung po'i rten las mi 'phags pa zhes bya ba ni phung po'i gzhi las mi 'phags pa'o//lam bzang po ma yin par 'gro bas na phyin ci log bzhis 'gro ba zhes bya'o/ /bdag tu dmigs nas zhes bya ba ni bdag sems la bzhag nas zhes bya ba'i tha tshig go/ /de yongs su mya ngan las 'da' bar bya ba'i phyir zhes bya ba ni/bdag de nyid 'ba' zhig tu bya ba'i phyir zhes bya ba'i tha tshig go/ /'gro 'dod pa rnams zhes bya ba ni thar pa'i lam du zhugs pa rnams zhes bya ba'i tha tshig ste/ skye mched drug gi grong stong pa na gnas pa zhes gang gsungs pa'o/ /na ba dang rga ba de gnyis kyi rgyu mtshan nam gnas ni 'di lta ste/'byung ba mi mnyam pa ste de dang rjes su 'brel ba'i phyir te/ 'byung ba chen po bzhi'i sbrul gyis gtses pa zhes gang gsungs pa'o/ /phung po'i gshed ma rjes su 'brang bas 'chi ba'i phyir phung po'i gshed ma'i chom pos bcom pa zhes bya'o/ /sdug bsngal sna tshogs rjes su 'brel ba zhes bya ba ni de las byung ba'i sdug bsngal zhes bya ba de'i bshad pa yin te/de las byung ba zhes bya ba ni/ na ba dang rga ba dang 'chi ba las byung ba zhes bya ba'i tha tshig go/ /de las yongs su mi 'grol ba ste/ sdug bsngal dpag tu med pa myong bar gyur pa yin zhes gang gsungs pa'o//de ltar na bdag tu mngon par zhen pas bsam pa ma rungs par byas pa'i phyir nyes pa 'di dag las yongs su mi 'grol bas 'di dag tshangs par spyod pa log pa yin no/ /yang dag pa'i tshangs par spyod pa tshol ba'i dbang du byas nas theg pa dman pa la mos pa'i nyes pa'o zhes bya ba la sogs pa rgyas par smos so//dman pa nyid ni zhum pa dang zhan pa nyid dag gis rab tu phye ba yin no/ /de la brten nas smon lam gyi nyes pa zhes bya ba ni byang chub kyi sems dang bral ba'i phyir te/ thams cad mkhyen pa'i ye shes mchog gi sems mi bdog pa zhes gang gsungs pa'o//sgrub pa'i nyes pa ni thams cad mkhyen pa nyid kyi don du byang chub sems dpa'i spyod pa sgrub pa mi byed pa'i phyir te/ theg pa mchog gis nges par 'byung ba yod bzhin du nyan thos dang rang sangs rgyas kyi theg par ltung ba zhes gang gsungs pa'o/ /ci'i phyir zhes bya ba ci ste shas che bar gsungs zhes bya ba ste/'di snyed cig ni brtsad pa yin no/ /de ma yin pa dag la shas chung ba'i phyir zhes bya ba ni lan yin te/ 'di skad du dang po la tshul khrims ma dag pas sbyin pa ma dag mod kyi/ 'on kyang phyi dang nang btang ba'i phyir sbyin pa rnam pa thams cad gtong ba la 'jug pas lhag pa yin no//tshul khrims ni sa dang po la rnam pa thams cad kyi bye brag gis 'jug pa ma yin pas shas chung ba nyid du rig par bya'o/ /'dir ni zhes bya ba la sogs pa ni rang bzhin gyis tshul khrims rnam par dag pa yongs su bstan pa'i phyir te/ ci zhe na/ gser gyi sa le sbram gyi dpes bstan zhes bya bar sbyar ro//'dod chags mun pa'i gnyen por gyur pa yi/ /chags bral 'od byed sa ni rab thob nas/ /chags dang bcas pa rnams kyi 'dod chags mun/ /rab zhi bya phyir mthu rnams zhi 'thob bo/ /bsam pa drang ba nyid la sogs pa'o/ /rnam dag thabs ni sna tshogs rnam mang gis//gnyis pa/ sbyang ba'i sa la tshul khrims rnams sbyangs nas/ /'dod chags bral ba thob par bya phyir de/ /rgyu rnams bcu la yang dag brten nas brtson/ /'dod chags dang bral bar sbyor ba 'byung bar byed pa rgyu rnam pa bcu la yang dag par brten te/ sems kyi bsam pa yid la byed pa bcu po zhes gang gsungs pa'o//'dod chags dang bral ba'i sems kyi bsam pa ni sems kyi bsam pa gang gis 'dod chags dang bral bar 'gyur ba'o/ /de'i rgyu yid la byed pa ni gang dag mngon du byas na 'dod chags dang bral ba'i sems kyi bsam pa 'thob par 'gyur ba de dag yid la byed pa'o//bsam gtan bzlog nus pa zhes bya ba ni bsam gtan gyi mthu'i 'bras bu de bzlog nus pa nyid du rig par bya ba'i bsam gtan nyid bzlog pa ste/ 'dor ba dang 'bral ba ni ma yin no/ /ci'i phyir zhe na/ 'di ltar mjug thogs su 'og mar skye ba dang yongs su mi nyams pa gnyis kyis zhes 'byung ba'i phyir te/bsam gtan rnam pa thams cad du bor ram bral na ni yongs su nyams par mi rung ngo / /de lta bas na 'dir bsam gtan gyi mthu bzlog par rig par bya'o/ /gal te 'di yang ji ltar rung zhe na/ 'di ni bsam gyis mi khyab pa nyid de/de skad du/ /thabs chen dang ni ldan rnams la/ /nyon mongs byang chub yan lag gyur/ /'khor ba dang zhi ba'i bdag nyid de/ /de phyir bya dka' chung zad med/ /ces gsungs so/ /de nyid kyi phyir der yang skye la kun nas nyon mongs pa yang med pa nyid du brjod par bya'o//sa 'di la ni 'dod chags dang bral ba kho na 'jug pa yang ma yin la/ zhugs ma thag tu 'dod chags dang bral ba yang ma yin te/ 'di nyid la 'dod chags dang bral bar sbyor ba 'byung bar byed pa dang / 'dod chags dang bral bar sbyor ba rnam par gzhag pa'i phyir/sa 'di la gnas pa 'dod chags dang bral bar 'gyur ro zhes bya ba khong du chud par bya'o/ /chags bral sbyor ba nas bzung ste/ /chags bral thob pa yan chad du/ /'dod chags bral ba thob bya'i phyir/ /sbyor ba'i sa rnams gsum du bshad/ /'du byed du gyur pa thams cad la mi rtag par so sor rtog ces bya ba nas bzung ste tshig gi las yongs su dag pa 'ba' zhig gis ni ma yin no zhes bya ba'i bar yin no//theg pa dman pa las kun tu srung bar sbyor ba zhes bya ba la sogs pa rgyas par 'byung ba de la gang la brten nas zhes bya ba ni de bzhin gshegs pa'i ye shes la'o/ /de bzhin gshegs pa'i ye shes sa bcu pa la yang mi 'thob pa ma yin nam/de ji ltar sa gsum pa'i rten zhes bya zhe na/ ma thob kyang dmigs pa'i ngo bor brten nas zhes bya ba yin pas nyes pa med do/ /gang gi phyir zhes bya ba ni sems can gyi phyir ro/ /ji ltar rab tu sbyor bar byed pa ni brtson 'grus kyis te/'di dag ni bdag gis yongs su bskyab par bya ba la sogs pas bstan to/ /mthu nyid yon tan te/ de yongs su 'dzin pa ni bsam gyis mi khyab pa nyid ces bya ba yin te/ sangs rgyas kyi rnam par 'phrul pa la sogs pa mthu bsam gyis mi khyab pa dang ldan pa'i phyir ro/ / mngon par rdzogs par byang chub pa'i yon tan yongs su 'dzin pa ni mtshungs pa med pa zhes bya ba ste thun mong ma yin par mngon par rdzogs par byang chub pas zla med pa'i phyir ro/ /don chen po nyid kyi yon tan yongs su 'dzin pa ni dpag tu med pa nyid ces bya ba yin no/ /tshad bzung du med pa'i yon tan yongs su 'dzin pa ni rnyed dka' ba nyid ces bya ba yin te/mgo dang lag pa dang rkang pa la sogs pa sbyin pa'i sdug bsngal khas blangs pas thob par bya ba'i phyir ro/ /thun mong ma yin pa'i yon tan yongs su 'dzin pa ni ma 'dres pa nyid ces bya ba yin no/ /sngar ni khyad par med par mi mtshungs pa nyid du mngon par rdzogs par byang chub pas bshad kyi/da ni de'i yon tan dang 'dra ba'i tshul gyis cha tsam gyi sgo nas kyang bcom ldan 'das dang 'dra ba med do zhes bya ba yin pas khyad par yod do/ /rnam par dag pa ni zhes bya ba la sogs pa la de la sdug bsngal dang bral ba ni gnod pa med pa nyid ces bya ba yin no//sdug bsngal dang bral ba ni 'khrug pa med pa nyid ces bya ba yin no/ /mya ngan las 'das pa thob pa ni 'jigs pa med pa'i grong khyer du 'gro ba nyid ces bya ba ste tshig 'og ma gnyis ni de khyad par du byed pa yin no/ /de la yongs su bskyab par bya zhes bya ba ni gtso bo'i tshig yin no//gang las yongs su bskyab par bya ba ni gang las te/ las kyi kun nas nyon mongs pa las ni dgrol bar bya zhing / nyon mongs pa'i kun nas nyon mongs pa las ni yongs su sbyang bar bya la/ skye ba'i kun nas nyon mongs pa las ni gdon par bya'o/ /ji ltar yongs su bskyab par bya ba ni ji ltar gzhag par bya ba ste/tshul khrims la gzhag pa dang lhag pa'i sems dang lhag pa'i shes rab la ltos nas dgod pa zhes bya ba yin no/ /tshig 'di gnyis ni yan lag yin te/ tshig gzhan gyis bshad do/ /de la tshul khrims la gzhag pa'i phyir yongs su tshim par bya ba dang / yang dag par gzhag par bya ba zhes bya ba tshig gnyis bstan to//ting nge 'dzin dang shes rab la ltos te gdul bar bya ba yin no/ /yongs su mya ngan las 'da' bar bya ba yin zhes bya ba 'dis ni ji ltar yongs su skyob pa por 'gyur ba de bshad do/ /de'i lam sgom par byed ces bya ba ni/ thams cad mkhyen pa'i ye shes kyi ste de bzhin gshegs pa'i ye shes la ston pa zhes bya ba 'dis bstan to//yongs su smin par byed ces bya ba ni sems can rnams te/ sems can thams cad yongs su bskyab par byas la brtson zhes bya ba 'dis bstan to/ /mthar phyin pa rtogs pa dang zhes bya ba la sogs pa la/ mthar phyin pa ni sangs rgyas nyid do/ /de nyid rnam par thar pa la gnas pa yin te/ chos kyi sku'i mtshan nyid do/ /de la ma gtogs par gzhan sems can gyi don gyi thabs med do snyam du de ltar nges pa ni mthar phyin par rtogs pa'o/ /sangs rgyas mthar phyin pa de yang byang chub sems dpa'i mthar phyin pa thams cad rtogs pa'i mtshan nyid med na mi 'byung ba yin pas de ltar na mthar phyin pa sgrub pa rtogs pa yin no//mthar phyin pa sgrub pa sa bcu pa'i ngo bo nyid de yang sa 'og mas bsdus pa rnam par mi rtog pa'i ye shes med na mi 'byung bas de ltar na mthar phyin pa sgrub pa'i gong nas gong ma rtogs pa yin no//rang dang spyi'i mtshan nyid la rnam par rtog pa gnyi ga dang bral ba la ltos nas rgyu ba med cing skye ba med pa zhes bya ba smos so/ /sa'i ye shes don dam pa pa de lta bu de yang bsam gtan la mkhas pa med na med pas de ltar na mthar phyin pa sgrub pa'i gong ma gong ma rtogs pa yin no//yang zhes bya ba ni bsdu ba gzhan ston par byed pa ste/ snga ma ni gzhi tha dad pa yin no/ /da ni bsam gtan la mkhas pa nyid rnam par nges pa yin la so sor rtog pa yang yin pas zhes gzhi mthun par bsdu ba yin no/ /mkhas pa de yang thos pa la mkhas pa med pas de ltar na de sgrub pa'i gnas la sbyor ba yin te/de sgrub pa ni bsam gtan la mkhas pa'o/ /de'i gnas ni thos pa la mkhas pa'o/ /la la las rtogs pa zhes bya ba'i sgra yang 'byung ba nyid do/ /der ni gnas kyi phyir sbyor ba zhes bya bar sbyar bar bya'i rtogs pa'i phyir zhes bya ba ni ma yin no//gang yongs su spang ba'i phyir zhes bya ba ni 'jig rten pa rnams lus kyi gnod pa yongs su spang ba'i phyir nor gtong ste/ lus kyi gnod pa de dag kyang nyams su len to/ /ji ltar rgyal srid pas kyang rim gro cher byed ce na/ 'khor los sgyur ba'i rgyal srid thob pa pas zhes 'byung ba'i phyir ro//ji ltar mtho ris su skye ba dang / 'jig rten pa'i rnam par dag pa pas kyang rim gro cher byed pa yin zhe na/ brgya byin nyid dang tshangs pa nyid dag dang go rims pa bzhin no/ /ji ltar lus pas kyang rim gro cher byed ce na/ stong gsum gyi stong chen po zhes bya ba la sogs pa gsungs pa'o//dga' ba dang btang snyoms ni grol ba rnams kyi dbang du byas pa ste/ 'di dag gi sdug bsngal log pa dran pas mgu ba skye ba'i phyir dga' ba la snyoms par 'jug la/ de dag gi sdug bsngal logs pa zin pa la brtson pa med pa'i phyir btang snyoms la snyoms par 'jug go//sa snga ma gnyis la yang bsam gtan la sogs pa'i snyoms par 'jug pa de med pa ni ma yin te yod pa kho na'o zhes bya ba'i tha tshig go/ /dgag pa gnyis ni mi dgag pa'i don yin pa'i phyir te/ dper na mi bya ba ma yin pa ni/ bya ba nyid do zhes bya ba'i tha tshig dang 'dra'o/ / de la bsam gtan dang po la 'dod pa rnams las dben pa zhes bya ba ni/ 'dod chags dang zhe sdang dang gti mug dang / rgyags pa'i gnas su gyur pa yongs su gzung ba dang gzugs dang sgra dang dri dang ro dang reg dag yal bar btang ba nyid bshad pa yin no/ /sdig pa mi dge ba'i chos rnams las dben pa zhes bya ba gzugs la sogs pa ni yal bar bor ba tsam ma yin gyi de dag dang phrad pa'i rgyus lus dang ngag dang yid kyi nyes par spyod pa la 'jug pa gang dag yin pa de dag spangs par bshad pa yin no//de ltar na bsam gtan dang po la 'dod pa dang sdig pa mi dge ba'i chos las dben pa nyid kyis ni mi mthun pa'i phyogs nyams pa yongs su bstan to//de'i 'og tu rtog pa dang bcas pa dpyod pa dang bcas pa zhes bya ba ni 'dod pa'i khams pa'i rtog pa dang dpyod pa rab tu zhi ba dang / gzugs kyi khams pa'i rtog pa dang dpyod pa rgyun chags par bshad pa yin no//de ltar na rtog pa dang bcas pa dang dpyod pa dang bcas pa nyid kyis ni gnyen po bsgom par bshad do/ /de'i 'og tu dben pa las skyes pa zhes bya ba ni mi dge ba las dben pa las skyes pa'i phan yon bshad do/ /phan yon de yang gang zhe na/ de'i 'og tu dga' ba dang bde ba can zhes gsungs te/de la dga' ba ni snyoms par 'jug pa'i sems rab tu dga' ba'o/ /bde ba ni lus dang sems kyi gnas ngan len dang bral ba'i phyir las su rung ba'i tshul gyis rgyud nyams bde ba'o/ /dga' ba dang bde ba ni/ dga' ba dang bde ba ste/ dga' ba dang /yid bde bas ni bsgoms pa'i phan yon bshad do/ /de'i 'og tu bsam gtan dang po bsgrubs te gnas so zhes bya ba ni bsam gtan gyis de gnyi ga'i gnas ting nge 'dzin bshad de/ gnyen po sgom pa'i gnas dang / bsgoms pa'i phan yon gyi gnas zhes bya ba'i tha tshig go/ /de'i 'og tu de rtog pa dang dpyod pa dang bral zhing zhes bya ba ni bsam gtan dang po'i sa la sems 'khrug par byed pa rtog pa dang dpyod pa gang dag yin pa de dag spangs par bshad pa de/de ltar na bsam gtan gnyis pa la mi mthun pa'i phyogs nyams pa'i bshad pa yin no/ /de'i 'og tu nang yongs su dang ste zhes bya ba ni bsam gtan dang po la bsam gtan pas phyi rol gyi gnod pa rnams dang bral ba gnod pa med pa'i gnas bsgrubs te dga' bas snying yi za lang ba na dga' ba'i dgod pas bskyod pa'i rtog pa dang dpyod pa dag gis nang yongs su ma dang ba yin no//des rtog pa dang dpyod pa spangs te sems kyi rgyud 'khrug pa med pa na nang dang ba yin pas de'i phyir rtog pa dang dpyod pa rnams dang bral bas nang yongs su dang ste zhes gsungs so//de'i 'og tu sems kyi rgyud gcig tu gyur pa zhes bya ba ni sems dmigs pa la don gcig tu rgyu ba'i phyir zhes bya ba'i tha tshig ste/ gyur pa'i sgra ni rgyu ba'i don yin pa'i phyir ro//de ltar na nang yongs su dang ste sems kyi rgyud gcig tu gyur pa'i phyir bsam gtan gnyis pa la yang gnyen po sgom par bshad pa yin no/ /rtog pa med pa'i dpyod pa med pa zhes bya ba ni bsam gtan gnyis pa la rtog pa dang dpyod pa rnams mi srid par bshad pa yin no//rtog pa dang dpyod pa dang bral ba zhes bshad zin na yang rtog pa med pa dpyod pa med pa zhes bya ci dgos she na/ bsam gtan dang po 'di la bsam gtan la 'dod pa'i khams kyi rtog pa dang dpyod pa dag las grol yang bsam gtan dang po'i sa pa'i rtog pa dang dpyod pa'i khyad par dag dang rjes su 'brel bar 'gyur te/de'i phyir la la 'di snyam du ji ltar bsam gtan dang po la 'dod pa na spyod pa rnams ldog la/ bsam gtan dang po'i sa pa skye ba de bzhin du bsam gtan gnyis po la yang bsam gtan dang po'i sa pa rnams ni bzlog la/ bsam gtan gnyis pa'i sa gzhan skye'o snyam du sems srid pas/de'i phyir bsam gtan gnyis pa la rtog pa dang dpyod pa rnams mi srid par bstan pa'i phyir rtog pa med pa dpyod pa med pa zhes gsungs so/ /yang ji ltar bsam gtan gnyis pa'i sa la bsam gtan dang po'i sa pa'i dga' ba dang bde ba ni ldog la bsam gtan gnyis pa'i sa pa'i dga' ba dang bde ba'i khyad par gzhan 'byung ba ltar rtog pa dang dpyod pa rnams kyang de dang 'dra'o snyam du sems pa'i the tshom 'di bstsal ba'i phyir yang rtog pa med pa'i dpyod pa zhes gsungs so//de'i 'og tu ting nge 'dzin las skyes pa'i dga' ba dang bde ba zhes bya ba ni bsam gtan dang po'i sa pa'i dga' ba dang bde ba'i khyad par du bya ba'i phyir bshad pa yin no//ji lta zhe na bsam gtan dang po'i sa la ni gnod pa las dben pa'i dga' ba dang bde ba skye ste chom rkun gyis gtses pa'i mi bde bar yul du phyin pa dang 'dra la/ bsam gtan gnyis pa'i sa la ni rtog pa dang dpyod pa dag gis ma dkrugs pa'i sems mnyam par gzhag pa las dga' ba dang bde ba skye'o//de nyid kyi phyir bsam gtan dang po la ni dben pa las skyes pa'i dga' ba dang bde ba zhes bshad la/ gnyis pa la ni ting nge 'dzin las skyes pa'i dga' ba dang bde ba zhes bshad de/'dis ni bsgoms pa'i phan yon bshad do/ /bsam gtan gnyis pa bsgrubs te gnas so zhes bya ba ni bsam gtan gyis de gnyi ga'i gnas bstan to/ /de'i 'og tu dga' ba'i 'dod chags dang bral bas zhes bya ba ni rtog pa dang dpyod pa ni spangs zin pa'i phyir gnod pa byed pa gang yin pa de dang bral bar bshad pa yin no//btang snyoms la gnas shing zhes bya ba ni nye ba'i nyon mongs pa cha phra ba'i phyir yid 'byung bar mi 'gyur ro zhes bstan pa yin no/ /dga' ba'i 'dod chags dang bral bas btang snyoms la gnas zhes bya ba 'dis ni/bsam gtan gsum pa la mi mthun pa'i phyogs nyams pa bshad pa yin no/ /de'i 'og tu dran pa dang shes bzhin can zhes bya ba ni gnyen po yod pa'i phyir btsal bar nus so zhes shes par byas pa yin te/ 'dis ni gnyen po bsgoms pa'i phan yon bshad do/ /de'i 'og tu bde ba yang lus kyis myong la zhes bya ba ni yid kyi lus kyis yin gyi gzugs kyi lus kyis ni ma yin te/de ni bsam gtan gnyis pa'i sa pa yin pas spangs pa'i phyir ro/ /'dis ni bsgoms pa'i phan yon bshad do/ /'phags pa rnams kyis brjod ces bya ba ni gnyen po srid pa'i phyir ro//ci'i phyir bsam gtan dang po dang gnyis pa las 'phags pa rnams kyis brjod ces ma bshad ce na/ de dag ga gnod pa rnams rags pa'i phyir gzhan gyis bstan pas go bar bya ba ma yin no/ /bsam gtan gsum pa la ni 'di ni bde ba'o snyam pa'i sems kyi rtsol ba gang yin pa de nye ba'i nyon mongs pa yin par bshad cing nye ba'i nyon mongs pa 'di yang cha phra ba la bsam gtan gsum pa'i sa pa'i bde ba yang mchog yin pas bsam gtan pa 'di bde ba mchog gi chang 'thungs pas ra ro ste bdag nyid kyis rjes su rtogs par mi nus par mkhyen nas de khong du chud par bya ba'i phyir 'phags pa rnams brjod do//ji skad du brjod ce na/ dran pa dang ldan pa dang bde ba la gnas pa btang snyoms so zhes de skad du brjod do zhes bya ba'i tha tshig go/ /de'i 'og tu bsam gtan gsum po bsgrubs te gnas so zhes bya ba ni de gnyi ga'i gnas ting nge 'dzin bshad pa yin no//bde ba yang spangs sdug bsngal yang spangs shing zhes bya ba ni bsam gtan gsum pa'i bde ba gang yin pa dang / de nyid na dbugs rngub pa dang / dbugs 'byung ba las skyes pa'i sdug bsngal gang yin pa de gnyis spangs shing ngo / /gzhan dag na re bsam gtan gsum pa'i bde ba nyid 'gyur ba'i sdug bsngal gyis sdug bsngal ba nyid de/de nyid kyi phyir bde ba spangs pa'i mjug thogs su sdug bsngal spangs pa la gsungs pa yin no zhes zer ro/ /snga nas yid bde ba dang mi bde ba yang nub pas zhes bya ba ni yid bde ba'i sgras dga' ba snga nas nub pa bstan pa yin no//dga' ba yang yongs su gyur nas yid mi bde bar 'gyur bas de'i phyir bde ba nub pa'i mjug thogs su yid mi bde ba nub pa gsungs so/ /yid kyi sa pa spangs pa'i phyir sngar thams cad spangs par bshad pa ni ma yin no/ /gnyi ga spangs pa 'dis ni mi mthun pa'i phyogs nyams pa bshad do//sdug bsngal yang ma yin bde ba yang ma yin zhes bya ba ni bsam gtan bzhi pa'i sems ston pa ste 'dis ni gnyen po sgom pa bshad pa yin no/ /btang snyoms kyi dran pas yongs su dag pa zhes bya ba ni g.yo ba med pa'i phyir btang snyoms su 'jug pa'i dran pa yongs su dag pa yin te/'dis ni bsgoms pa'i phan yon bshad do/ /bsam gtan bzhi pa bsgrubs te gnas so zhes bya ba ni de gnyi ga'i gnas ting nge 'dzin bshad do/ /de rnam pa thams cad du gzugs kyi 'du shes rnams las yang dag par 'das te zhes bya ba ni mig gi rnam par shes pa dang mtshungs par ldan pa'i 'du shes rnams las yang dag par 'das pa'o//thogs pa'i 'du shes rnams nub par gyur cing zhes bya ba ni rna ba dang sna dang lce dang lus dang mtshungs par ldan pa'i 'du shes rnams nub par gyur pa'o/ /sna tshogs kyi 'du shes rnams yid la mi byed pas zhes bya ba ni yid kyi rnam par shes pa dang mtshungs par ldan pa'i 'du shes rnams yid la mi byed pa yid kyi rnam par shes pa ni rnam par rtog par byed pa yin pa'i phyir ro//'dis ni mi mthun pa'i phyogs nyams par bstan to/ /rnam par gzhig pa'i tshul gyis gzugs la sogs pa'i yul la bdag med par mthong ba'i phyir gnyen po gang gis gzugs la sogs pa'i yul gyi 'du shes las yang dag par 'das pa de ni gnyen po sgom pa yin par shes par bya'o//nam mkha' mtha' yas so snyam nas zhes bya ba ni bsgoms pa'i phan yon yin no/ /gzhan dag na re 'di nyid gnyen po sgom pa yin par rigs so zhes zer ro//nam mkha' mtha' yas skye mched bsgrubs te gnas so zhes bya ba ni de gnyi ga'i gnas ting nge 'dzin bshad pa yin no/ /gzhan dag na re 'di nyid bsgoms pa'i phan yon yang yin la gnas kyang yin no zhes zer ro/ /gzhan dag la yang de bzhin du ci rigs par khong du chud par bya'o//byams pa dang ldan pa'i sems yangs pa zhes bya ba ni 'dod pa na spyod pa'i bde ba nye bar sgrub pa'i phyir ro/ /chen por gyur pa zhes bya ba ni bsam gtan dang po dang gnyis pa'i sa pa dga' ba dang bcas pa nye bar sgrub pa'i phyir zhes bya ba'i tha tshig ste/de gnyis na dga' ba yod pa'i phyir ro/ /mi gnyis pa bsam gtan gsum pa'i sa pa dga' ba med pa nye bar sgrub pa'i phyir zhes bya ba'i tha tshig go/ /mi mthun pa'i phyogs kyi gnyen po ji lta bu zhe na/ khon med pa zhes bya ba yin no/ /rnam par dag pa ji lta bu zhe na/ 'gran zla med pa'i sgrib pa med pa zhes bya ba yin no/ /'bras bu yongs su 'dzin pa ji lta bu zhe na/ gnod pa med pa zhes bya ba yin no/ /rang gi mtshan nyid la dmigs pa ni 'jig rten chos kyi dbyings dam pa zhes 'byung ba'i phyir ro/ /mtha' yongs su ma chad pa ni nam mkha'i khams kyi mthas gtugs pa zhes bya ba yin no//'chi 'pho dang skye ba mngon par shes pa las rnam par dag pa zhes bya ba ni gsal bar rab tu mthong ba'i phyir ro/ /mi las 'das pa zhes bya ba ni rgyang ring po mthong ba'i phyir te/ yul gzhan dang / 'jig rten gzhan na yod pa yang mthong ba'i phyir ro//re zhig gang gis mthong ba ni de lta bu yin no/ /gang mthong ba la 'chi 'pho ba la sogs pa ni 'chi 'pho ba dang skye ba'i bye brag gis so/ /mdog sdug pa dang mdog mi sdug pa zhes bya ba ni yid du 'ong ba dang yid du mi 'ong ba'i bye brag gis so/ /bde bar song ba dang ngan par song ba zhes bya ba ni dbang phyug dang bkren pa'i bye brag gis so//bzang po dang ngan pa zhes bya ba ni rgya che ba dang rgya mi che ba'i bye brag gis so/ /las ji lta ba bzhin nye bar 'gro ba'i sems can rnams zhes bya ba ni las kyi bye brag gis so/ /lus kyi nyes par spyod pa dang ldan pa zhes bya ba ni srog gcod pa la sogs pa rnam pa gsum dang ngo //ngag gi nyes par spyod pa dang ldan pa zhes bya ba ni brdzun du smra ba la sogs pa rnam pa bzhi dang ngo / /yid kyi nyes par spyod pa dang ldan pa zhes bya ba ni brnab sems la sogs pa rnam pa gsum dang ngo / /'phags pa rnams la skur pa 'debs pa zhes bya ba ni 'phags pa rnams med do zhes 'phags pa rnams la skur pa dang /'phags pa rnams la mi snyan par brjod pa dag go/ /log par lta ba can zhes bya ba ni nyes pa bshad ma thag pa dang / dkon mchog dag la ma dad pas so/ /log par lta ba'i las yang dag par blangs pa'i rgyus zhes bya ba ni log par lta ba'i las len pa dang byed pa'i rgyus zhes bya ba'i tha tshig go//lus zhig nas zhes bya ba ni shi nas zhes bya ba'i tha tshig go/ /shi ba'i 'og tu shi ma thag tu zhes bya ba'i tha tshig go/ /ci zhe na/ smras pa/ ngan song ngan 'gro rnam par lhung ba'i phyir sems can rnams su skye'o//cig shos la ni bzlog ste sbyar bar bya'o/ /bde 'gro mtho ris kyi 'jig rten du zhes bya ba la 'gro ba bsngags pa ni bde 'gro'o/ /yon tan bsngags pa sgrub pa la mtho ris te mtho ris ni 'jig rten yin no/ /sa 'og ma la dbang byed pa'i dbang byed pa yongs su mi 'dor ba nyams pa med par yongs su ston par byed do zhes bya ba'i tha tshig go//gnod pa byed du dogs pa la ni bshes pa nyid du snyan pa'i tshig gis sbyor te bshes shing 'jam pa'i bsam pa nyid ces 'byung ba'i phyir ro/ /gnod pa byed pa la mi 'khrugs pa ni mi g.yos pa'i bsam pa zhes bya ba yin no/ /phyir mi gshe ba la sogs pa ni mi 'khrugs pa'i bsam pa zhes bya ba yin no//yid mi bde ba mi skyed pa ni g.yo ba med pa'i bsam pa nyid ces bya ba yin te de ltar na gnod pa byed pa la bzod pa rnam pa gsum yin no/ /'das pa la nga rgyal med pas ni mtho dman med pa'i bsam pa nyid ces bya ba yin no/ /gzhan las 'dud pa'i bya ba la mi smon pa ni sems can gyis byas pa la 'dod pa med pa'i bsam pa nyid ces bya ba yin no//lan du phan 'dogs par byed par smon pa med pa ni byas pa la phyir byed par re ba med pa'i bsam pa nyid ces bya ba yin no/ /bcos pa ma yin par phan gdags par sbyor ba ni g.yo ba med pa yin no//nye mgon med de mnyam par phan 'dogs par 'jug pa ni rgyu med pa'i bsam pa nyid ces bya ba yin no/ /mi dga' ba chung ngu dang yang 'bral ba med pa ni mdo las thibs po med pa'i bsam pa nyid yongs su dag par 'gyur ro zhes 'byung ba'i phyir ro/ /de ni bslab pa'i rim pas bsam gtan gyi//yon tan ldan pa 'od byed thob nas ni/ /gti mug mun pa legs par rnam bcom ste/ /'od 'phro can gyi sa don gnyer bar byed/ /bsam gtan rten dang sa yi yon tan gzhi/ /rgya che sna tshogs mthu ldan thob 'gyur zhing / /chos la snang bar gyur pa rnams thob nas//bzhi pa 'od 'phro can ni gnod par byed/ /sa bzhi pa 'di ni sa gsum pa la thos pa bzung ba gang yin pa de yang dag pa ji lta ba bzhin du shes pa de ting nge 'dzin rnam par dag pa la brten nas rnam par dag pa gang yin pa des rab tu phye ba yin gyi/ ting nge 'dzin rnam par dag pa la brten nas thos pa bzung ba gang yin pa zhes de ltar khong du chud par bya ba ni ma yin te/de ni thos pa'i rten thos pa yin gyi/ 'on kyang de'i rten thob pa yin no/ /yang dag pa ji lta ba bzhin du shes pa rnam par dag pa ni de la brten nas zhes bya bar rig par bya'o/ /khams bcu rnam par dpyad pa las//chos la snang ba bcur zhes bya/ /sems can khams ni ma lus pa'i/ /rnam 'phel skyed par byed pa'ang de/ /'phel ba la ni rnam pa gnyis te/ rnam par dag pa 'phel ba dang / gnyen po sgom pa 'phel ba'o/ /de la gnyen po sgom pa 'phel ba ni/ 'bras bu de bzhin gzhan rnam drug /'og nas rab tu 'byed par 'gyur ba gang yin pa ste/ 'di'i 'bras bu ni nyon mongs pa dang / las kyi kun nas nyon mongs pa spangs pa'i mtshan nyid/ 'bras bu rnam pa gnyis su bshad/ /gzhan rnam pa bzhi ste/ de ltar na mdor na sa 'od 'phro ba can ni rnam pa bzhis rnam par gzhag par shes par bya'o//chos la snang bas 'jug pa bcus gnon te zhes 'byung ba de la snang ba 'di rtogs pa'i ye shes te/ des sar gtogs pa de bzhin gshegs pas bstan pa'i chos rnams snang bar byed pa'i phyir ro/ /snang ba des chos rnams la 'jug pas na chos la snang bas 'jug pa'i ye shes zhes bya ba'i ming 'thob bo//der gtogs pa rtogs pa'i ye shes de'i dbang du byas nas/ mdo sde'i chos kyi rnam grangs bshad pa gang dag yin pa de dag la 'jug pa'o/ /ji lta zhe na/ de dag dang de mtshungs par rtogs pa'i phyir ro/ /'di'i don ni 'di yin te/ des sngon chos kyi rnam grangs de dag gi don lung gi sgo nas rtogs pa'i phyir/ des de rtogs pa thob pa dang / de bzhin gshegs pas gsungs pa'i don rnams la nges pa'i dad pa ches brtan po lhag par skyes nas/ ji ltar bdag gi rtogs pas don 'di dag yang dag par rtogs pa de bzhin du bcom ldan 'das kyis kyang bshad de/de nyid kyi phyir dngos po ji lta ba bzhin gsung bas na de bzhin gshegs pa zhes bshad do zhes lung dang rtogs pa gnyis don dam pa'i dngos po phyin ci ma log par ston par byed pa nyid du mtshungs par rtogs par byed do/ /de'i phyir lung gi chos rnams dang rtogs pa gnyi ga shes bya ji lta ba bzhin du 'jug pa'i phyir ro zhes bya ba smos so//khyad par ni 'di yod de/ lung ni don dam pa'i dngos po de la smos pa'i rnam par brjod pa nyid kyis 'jug la/ rtogs pa ni mngon sum gyi rnam par dmigs pas 'jug pa zhes bya ba yin no/ /gnyi ga yang ston par byed pa nyid du mtshungs so zhes bya bar rig par bya'o//rnam par dpyad pa'i bye brag ces bya ba la sogs pa ni rnam par dpyad pa'i bye brag gis de tha dad pa ste rnam par dpyad par bya ba dag ni sems can gyi khams la sogs pa'o/ /de la sems can rnams ni zan pa'i phung po rnams la gdags pas de nyid kyi phyir sems can gyi khams so//gnas ni snod kyi 'jig rten no/ /rang bzhin ni chos kyi dbyings te/ chos thams cad stong pa nyid du ro gcig pa'i phyir ro/ /mtha' ni nam mkha'i khams te/ sems can gyi khams tshad med pa'i phyir ro/ /kun nas nyon mongs pa dang rnam par byang ba'i gnas ni rnam par shes pa yin te/de skad du/ de yod na ni 'gro kun dang / /mya ngan 'das pa'ang thob par 'gyur/ /zhes gsungs te/ de kun nas nyon mongs pa dang / rnam par byang bar 'gyur ba'i phyir ro/ /kun nas nyon mongs pa ni khams gsum yin te/ 'dir kun nas nyon mongs par 'gyur ba'i phyir ro//rnam par byang ba ni gnyis te zhes bya ba ni rlabs po che dang che ba nyid kyi bsam pa la mos pa'i khams rnam par dpyad pa la snang bas 'jug ste/ go rims bzhin du kun nas nyon mongs pa med pa dang sems can yongs su mi gtong ba'i dbang du byas par rig par bya'o//de la mya ngan las 'das pa la gzhol ba nyid kyis srid pa dang longs spyod la chags pa las rnam par grol ba'i phyir rlabs po che'i bsam pa'o/ /de nyid kyi phyir 'di nyan thos la sogs pa dang thun mong ma yin pa yin no/ /snying rje chen po dang / thabs mkhas pa sngon du 'gro ba'i phyir sems can la lta bas theg pa chen po'i chos la dmigs pa'i phyir chen po'i bsam pa ste/de nyid kyi phyir thun mong ma yin pa'o/ /de bzhin gshegs pa'i rigs skyes pa/ /rnam dag rnam 'phel yin zhes bya/ /ye shes khyad zhugs gyur pa ni/ /shes bya'i sgrib pa 'joms pa'i phyir//de bzhin gshegs pa'i rigs zhes bya/ /de nyid phyir na de'i bdag nyid/ /de bzhin gshegs pa'i bdag nyid chos/ /gang gis de bzhin gshegs par shes/ /ye shes smin par byed pa bcus/ /yongs su smin par byed shes pa/ /ye shes rnam pa bzhi yongs su smin par byed pa'i phyir te//theg pa che dang dkon mchog dang / /de bzhin de bzhin nyid dang ni/ /rnam par gzhag pa'i bden tshul la/ /ye shes rnam pa bzhir bshad do/ /de la chos dang po gnyis po zhes bya ba ni 'di lta ste/ phyir mi ldog pa'i bsam pa nyid ni rang gi gnas la gnas pa/yongs su smin par byed pa'o/ /dkon mchog gsum la dad pa mi phyed pa mthar thug 'gro ba ni dkon mchog gsum la dad pa dang ldan pa yongs su smin par byed pa'o/ /chos gnyis po zhes bya ba ni/ de bzhin nyid shes pa yongs su smin par byed pa zhes bya bar sbyar te/ 'du byed kyi skye ba dang 'jig pa la rnam par 'jig pa ni gang zag la bdag med pa la dmigs pa yongs su smin par byed pa'o/ /rang bzhin gyis ma skyes pa rnam par 'jig pa ni chos la bdag med pa la dmigs pa yongs su smin par byed pa'o/ /lhag ma 'jig rten 'byung ba la rnam par 'jig pa la sogs pa drug ni rnam par gzhag pa'i shes pa yongs su smin par byed pa'o//ji lta zhe na/ ji ltar kun nas nyon mongs pa dang zhes bya ba la sogs pa smras te/ 'jig rten 'byung ba rnam par 'jig pa zhes bya ba ni/ snod kyi 'jig rten 'byung ba'i phyir ro/ /las kyi srid pa skye ba la rnam par 'jig pa zhes bya ba ni sems can gyi 'jig rten 'byung ba'i phyir te/rgyu dang bcas pa'i skye ba smos pa'i phyir ro/ /skye ba'i rgyu gang zhe na/ las kyi srid pa sde snod kyi 'jig rten la ni skye ba med pa'i phyir ro/ /'di ni re zhig kun 'byung yin no/ /kun nas nyon mongs pa ni gang yin rnam par byang ba ni gang yin zhe na/'khor ba dang mya ngan las 'das pa rnam par 'jig pa zhes bya ba'o/ /'dir 'khor ba la rnam par 'jig pas ni kun nas nyon mongs pa 'khor ba bstan te/ de yang sdug bsngal yin no/ /mya ngan las 'das pa la rnam par 'jig pas ni rnam par byang ba bstan to/ /ji ltar rnam par byang zhe na/zhing du las kyi sems can la rnam par 'jig pa zhes bya ba yin no/ /kun nas nyon mongs pa dang rnam par byang ba ni snga phyi ste/ sngon gyi mtha' dang phyi ma'i mtha' la rnam par 'jig pa zhes bya ba yin no/ /dngos po med pa dang zad pa med par rnam par 'jig pa zhes bya ba ni/ gzhag pa med pa dang dor ba med pa yin no//de ltar rnam par byang ba yin te/ de yang lam yin no/ /de ltar na kun 'byung ba dang / sdug bsngal ba dang / 'gog pa dang / lam shes pa ni rnam par gzhag pa'i bden pa'i tshul shes pa yin par rig par bya'o/ /gnyen po sgom pa rnam 'phel ba/ /thabs dang bcas par 'dod pa dang //byang chub phyogs ni dben la sogs/ /yon tan bzhi dang yang dag ldan/ /nang gi lus la lus kyi rjes su lta zhing zhes bya ba rgyas par 'byung ba la/ bdag gi ched ni nang ste bdag gi dbang du byas nas zhes bya ba'i tha tshig go/ /'di 'byung ba chen po rnams kyis bsags pas na lus te lus de la'o//mthun par lta ba ni rjes su lta ba ste/ 'tsham par rtog ces bya ba'i tha tshig ste/ rjes zhes bya ba 'di'i don ni 'tsham pa yin pa'i phyir la/ lta ba'i skad kyi dbyings kyi don yang rtog pa yin pa'i phyir ro/ /'di la lus ni/ phyin ci log las byung ba rgyu dang rkyen las grub pa g.yo ba med pa/byed pa med pa/ bdag po med pa yongs su 'dzin pa med pa ste/ dper na phyi'i rtswa dang shing gel pa dang sman dang / nags tshal dag dang 'dra'o zhes bya ba la sogs pa lus dang 'tsham par shes rab kyi lta ba yod pas na lus kyi rjes su lta ba can zhes bya'o/ /rnam pa gcig tu na/de'i ngang tshul can nyid du lus la rjes su lta bas rjes su lta ba'o/ /gnas so zhes bya ba ni ji skad bshad pa yon tan dang 'tsham pa'i gnas na 'dug go zhes bya ba'i tha tshig go/ /ji lta bur gyur nas she na brtun pa zhes bya ba gsungs te/ ye shes kyi mes gdung bar byed pa dang /brtson 'grus kyi stobs kyis le lo zad par byed pa'i yon tan dang ldan pa dang nye bar gnas par byed pa'i phyir shin tu sdug bsngal zhes bya ba'i tha tshig go/ /'di la de dang ldan pa yod pas na brtun pa can yin no/ /shes bzhin zhes bya ba ni yang dag pa dang / rab tu shes pa zhes bya ba'i tha tshig go//dran pa ni dran pa ste sems pa zhes bya ba'i tha tshig go/ /'di la thos pa gzung ba'i gzhung rnams mi brjed pa yod pas na dran pa dang ldan pa'o/ /rnam par spangs te zhes bya ba ni rnam par bzlog ste zhes bya ba'i tha tshig go/ /mngon du 'brel ba ni brnab sems te/lus la nga'o bdag gi'o snyam du shin tu sems pa zhes bya ba'i tha tshig go/ /yid mi bde ba'i dngos po ni yid mi bde ba nyid de/ rnam par spangs te zhes bya ba'i tha tshig go/ /ji lta zhe na/ lus kyi rjes su lta ba nyid kyis ni 'di la nga'o bdag gi'o snyam pa mi 'byung ngo / /de med pa'i phyir lus zhig na yang yid mi bde bar mi 'gyur ro//de ltar lus kyi rjes su lta ba nyid kyis brnab sems dang yid mi bde ba dag spangs te nang gi lus la lus kyi rjes su lta zhing gnas so zhes bya ba ni nang dang 'brel ba'i nyon mongs pa rnams kyi go skabs dbye ba dgag pa'i phyir ro/ /phyi'i zhes bya ba ni phyi dang 'brel ba'i nyon mongs pa rnams dang lhan cig mi 'grogs par bya ba'i phyir ro//lhag ma ni snga ma bzhin du shes par bya'o/ /nang dang phyi'i zhes bya ba ni cig car du go skabs dbye ba dgag pa'i phyir dang / mi 'grogs par bya ba'i phyir ro/ /de bzhin du nang gi tshor ba rnams zhes bya ba la tshor bas na tshor ba ste/'dod pa dang mi 'dod pa gnyi ga ma yin pa nyams su myong ba nyid ces bya ba'i tha tshig go/ /de yang nyams su myong ba'i bye brag kho na rnam pa gsum yin te/ bde ba dang sdug bsngal ba dang / sdug bsngal yang ma yin pa dang go rims bzhin no/ /tshor ba'i rjes su lta zhing gnas so zhes bya ba snga ma bzhin no//de ci zhe na/ sdug bsngal du lta ba'o/ /ji lta zhe na/ 'di la byang chub sems dpa' ni 'di snyam du gang ci tshor yang rung ste de thams cad sdug bsngal lo snyam du sems so/ /ci'i phyir zhe na/ sdug bsngal nyid gsum dang rjes su 'brel ba'i phyir ro/ /ji lta zhe na/sdug bsngal gyi sdug bsngal nyid ni 'bras kyi thog tu phol mig dang 'dra ste/ de ni skye bas rab tu phye ba yin no/ /'gyur ba'i sdug bsngal nyid ni sdug bsngal nyid du mi 'bral bar srid pa dang rjes su 'brel ba'i phyir de ni 'jigs pas rab tu phye ba yin no/ /'du byed kyi sdug bsngal nyid ni mdor na nye bar len pa'i phung po lnga ni sdug bsngal ba'o zhes 'byung ba'i phyir ro//'du byed dang 'brel bas rab tu phye ba yin no/ /de yang khyad par du bsam gtan dang gzugs med pa bzhi dag tu bde ba yang ma yin sdug bsngal ba yang ma yin par rnam par gzhag ste/ de dag ni de srid pa kho na'i phyir ro/ /'gro ba sdug bsngal nyid gsum po 'di dag dang rjes su 'brel ba'i phyir shes rab kyis tshor ba dang 'tsham par sdug bsngal du lta zhing rtog pa yod pas na tshor ba'i rjes su lta ba can zhes bya'o//'dir brnab sems ni bde ba'i tshor ba dang / de'i rgyu gzugs la sogs pa yul rnams dang / de gnyi ga'i rten lus la mngon par chags pa'o//tshor ba'i rjes su lta ba nyid kyis ni 'di la bde ba'i tshor ba dang / de'i rgyu dang de gnyi ga'i rten lus la mngon par chags pa mi 'byung ngo / /de med pa'i phyir bde ba'i tshor ba yongs su gyur pa dang / de'i rgyu rnams dang de gnyi ga'i rten lus yongs su gyur na yid mi bde bar mi 'gyur ro//lhag ma ni snga ma bzhin no/ /nang gi sems zhes bya ba la sems par byed pas na sems so/ /rig pa ste shes par byed ces bya ba'i tha tshig go/ /rnam pa gcig tu na dge ba dang mi dge ba dang / mi g.yo ba'i 'du byed rnams stsogs par byed pas na sems so/ /lhag ma ni snga ma bzhin no//nang gi chos rnams zhes bya ba ni/ rang gi mtshan nyid 'dzin par byed pa dang / gzhan gyi rkyen gyi dngos po yang yin pas chos dag ste/ yongs su mi 'dor ba zhes bya ba'i tha tshig go/ /chos de dag las yin gyi bdag la sogs pa la ni ma yin no/ /lhag ma ni snga ma bzhin no/ /de'i sdig pa mi dge ba'i chos ma skyes pa rnams zhes bya ba rgyas par 'byung la/'dun pa skyed do zhes bya ba 'di ni tshul bzhin yid la byed pa'i tshig bla dgas yin no/ /'bad do brtson 'grus rtsom mo zhes bya ba 'di ni tshul bzhin yid la byed pa mi 'dor ba yin no/ /sems rab tu 'dzin to yang dag par rab tu 'jog go zhes bya ba 'di ni tshul bzhin du so sor rtog pa'i tshig bla dgas so//de ci'i phyir zhe na/ tshul bzhin la rab tu brtson pa ni sdig pa mi dge ba'i chos rnams kun tu mi spyod pa'i phyir ro/ /sdig pa de dag kyang tshul khrims kyi mi mthun pa'i phyogs dang / ting nge 'dzin gyi mi mthun pa'i phyogs dang / shes rab kyi mi mthun pa'i phyogs te/tshul khrims kyi mi mthun pa'i phyogs ni gang 'di'i tshul khrims nyams pa dang / tshul khrims nyams pa'i rgyu gang dag yin pa tshul khrims kyi phung po'i mi mthun pa'i phyogs su gyur pa gzhan dang gzhan dag kyang yin te/ 'di ni tshul khrims kyi mi mthun pa'i phyogs zhes bya'o//ting nge 'dzin gyi mi mthun pa'i phyogs ni/ gang 'di kun tu spyod pa nyams pa dang / sems g.yeng ba'i rgyu gzhan dang gzhan dag kyang yin te/ 'di ni ting nge 'dzin gyi mi mthun pa'i phyogs zhes bya'o/ /shes rab kyi mi mthun pa'i phyogs ni gang 'di lta ba nyams pa dang / lta ba nyams pa'i rgyu gzhan dang /gzhan dag kyang yin te/ 'di ni shes rab kyi mi mthun pa'i phyogs zhes bya'o/ /de dag ni sdig pa mi dge ba'i chos rnams zhes bya'o/ /tshul bzhin yid la byed pa gang gis de lta bu ma skyes pa de dag skye ba'i go skabs mi 'byed pa 'di ni yang dag par spong ba dang po yin no/ /lhag ma ni 'di kho na las rjes su rtogs par bya'o//'dun pa'i ting nge 'dzin spong ba'i 'du byed dang ldan pa zhes bya ba la sogs pa la 'dun pa ni byed par 'dod pa nyid do/ /ting nge 'dzin ni sems rtse gcig pa nyid do/ /'dun pa'i dbang grub pa'i ting nge 'dzin ni/ 'dun pa'i ting nge 'dzin to/ /des nyon mongs pa spangs pa'i phyir 'du byed pa de dang ldan pa'o//rdzu 'phrul gyi rkang pa zhes bya ba 'di ci zhe na/ rdzu 'phrul gyi rkang pa ste/ yan lag ces bya ba'i tha tshig go/ /de sgom mo zhes bya ba ni goms par byed do zhes bya ba'i tha tshig go/ /dben pa la gnas pa zhes bya ba ni bsam gtan dang po dang ldan pa'i phyir te/ 'dod pa dang sdig pa mi dge ba las dben pa'i phyir ro//'dod chags dang bral ba la gnas pa ni bsam gtan gnyis pa dang ldan pa'i phyir ro/ /rtog pa dang dpyod pa dang bral ba'i phyir te/ gnyis pa ni 'dod chags dang bral ba gang yin pa de la bral ba zhes bya ba'i phyir ro/ /'gog pa la gnas pa ni bsam gtan gsum pa dang ldan pa'i phyir ro//de dga' ba'i 'dod chags dang bral ba'i phyir te/ de ni 'dod chags dang bral ba gang yin pa de la 'gog pa zhes bya ba'i phyir ro/ /bsam gtan bzhi pa la sogs pa dang ldan pa'i phyir/ spangs zin pa la ye shes sngon du 'gro bas spong ba'o/ /spangs zin pa la ye shes sngon du 'gro bas spong zhes bya ba'i tha tshig ste/bsam gtan bzhi pa la bde ba dang / sdug bsngal dang / yid mi bde ba spangs pa la/ spangs pa de yang de dang mi ldan pa'i phyir ro/ /gzhan dag la yang de bzhin du ci rigs par brjod par bya'o/ /dad pa ni sems dang ba gang yin pa'o/ /dbang byed pas na dbang ngo / /yang na dbang yod pas na dbang ngo / / dbang nyid dbang po yin te/ dbang phyug dang ldan pa dang / dbang phyug thob pa zhes bya ba'i tha tshig go/ /de la dad pas ni sangs rgyas kyi chos thams cad la dad par byed/ brtson 'grus kyis ni sgrub par byed/ dran pas ni chud mi za bar byed/ ting nge 'dzin gyis ni rtse gcig tu byed/ shes rab kyis ni so sor rtog par byed de/de ltar na 'di dag rang gi bya ba byed nus pa'i phyir dbang po nyid yin no/ /de dag nyid dbang po rnon po rgyud la yod pa rnams bdud dang rab tu rgol ba thams cad kyis mi rdzi ba'i phyir stobs rnams zhes bya ste/ de lta bas na dad pa'i stobs sgom mo zhes bya ba la sogs pa gsungs so//dag pas na lam mo/ /yang na 'dis sam 'di yod na dag par 'gyur ba'i lam ste/ sems rnam par dag pa'i thabs yin pa'i phyir ro/ /de yang bsgom pa'i lam la yan lag brgyad pa yin pas de'i phyir yang dag pa'i lta ba sgom mo zhes bya ba la sogs pa 'di gsungs so/ / 'phags pa'i lam yan lag brgyad pa 'di nyid dge ba gsum dang phung po gsum gyis bsdus te/ dge ba gsum ni ma chags pa la sogs pa dge ba'i rtsa ba rnams so/ /phung po gsum ni ting nge 'dzin la sogs pa'o/ /de la ma chags pa ni khams gsum pa la sems mngon par chags pa gang yin pa'o//'di gang gi rtsa ba yin zhe na/ de las skyes pa lus dang ngag dang yid kyi las dge ba rnams dang / lam gyi yan lag gsum po yang dag pa'i rtog pa dang / yang dag pa'i rtsol ba dang / yang dag pa'i ting nge 'dzin gyi rtsa ba yin te/ 'di rnams ni ting nge 'dzin gyi phung po zhes bya ba dag go/ / zhe sdang med pa ni sems can rnams dang 'du byed rnams la gnod pa med pa gang yin pa'o/ /gang gi rtsa ba yin zhe na/ lus dang ngag dang yid kyi las dge ba yang dag pa'i ngag dang / yang dag pa'i las kyi mtha' dang / yang dag pa'i 'tsho ba'i rtsa ba yin te/ 'di rnams ni tshul khrims kyi phung po zhes bya ba dag go//gti mug med pa ni 'phags pa'i bden pa bzhi dag la yang dag pa ji lta ba bzhin shes pa mthong ba ste/ gti mug med pa las skyes pa lus dang ngag dang yid kyi las dge ba dang / lam gyi yan lag gnyis po yang dag pa'i lta ba dang / yang dag pa'i dran pa'i rtsa ba yin no//'phags pa'i lam yan lag brgyad pa sgom pa na/ lus yongs su sgom pa yin te/ yan lag gnyis po yang dag pa'i las kyi mtha' dang / yang dag pa'i rtsol ba bsgoms pa'i phyir ro/ /tshul khrims bsgoms pa zhes bya ba ni/ yang dag pa'i ngag dang / yang dag pa'i 'tsho ba bsgoms pa'i phyir ro//sems bsgoms pa zhes bya ba ni/ yang dag pa'i rtog pa dang / yang dag pa'i ting nge 'dzin bsgoms pa'i phyir ro/ /shes rab bsgoms pa zhes bya ba ni yang dag pa'i lta ba dang / yang dag pa'i dran pa bsgoms pa'i phyir ro/ /de la tshul khrims kyi phung po dang / ting nge 'dzin gyi phung pos ni rtogs pa myur ba dang / rtogs pa dag par 'gyur ro/ /shes rab kyi phung pos ni rtogs pa chen po dang / rtogs pa rgya che ba dang / ma lus pa rtogs par 'gyur te/ de ltar na 'phags pa'i lam yan lag brgyad pa sgom pa na/ rtogs pa rnam pa lnga thob par 'gyur ro//de ltar na byang chub kyi phyogs dang mthun pa sgom pa dben pa la sogs pa yon tan bzhi dang ldan par shes par bya'o/ /'bras bu ni rnam pa gnyis su brjod de/ nyon mongs pa'i kun nas nyon mongs pa spangs pa'i mtshan nyid dang / las kyi kun nas nyon mongs pa spangs pa'i mtshan nyid do//de'i thabs kyi dbang du byas nas zhes bya ba ni zhing yongs su dag par byed pa dang / sangs rgyas kyi chos mngon par sgrub pa de nyid kyi thabs gang yin pa de'i dbang du byas nas so/ /sa la chog par mi 'dzin par sgrub pa zhes bya ba 'dis ni sa bdun pa'i bar bsdus te/ gong nas gong du khyad par can gyi chos yongs su tshol ba nyid kyis bstan to//phyir mi ldog pa'i sa ni brgyad pa ste/ /der sangs rgyas kyi chos zab mo'i rnam par thar pa thob pa'i phyir ro/ /sems can yongs su smin par byed pa'i sgrub pas ni sa dgu pa dang bcu pa bstan te/ de gnyis ni thabs la mkhas pa chen pos rnam par dpyod pa so so yang dag par rig pa dang thams cad kyi gsang ba rtogs pa thob pa'i phyir ro//yongs su 'dzin pa ni gsum dang sbyar te/ ji lta zhe na/ de'i phyir smras pa/ so sor rtog pa'i phyir na rtag par 'dzin pa rnams so/ /bdag nyid du khas len pa'i phyir na bdag gir 'dzin pa rnams so/ /nor bzhin du 'dzin pa'i phyir na nor du 'dzin pa rnams so//nyes dmigs ni rten gyi gnas so/ /ston pa la gus pa ni bcas pa'i kha na ma tho ba rnams sangs rgyas kyis smad pa nyid kyi phyir ro/ /kha na ma tho bas 'jigs pa ni rang bzhin gyis kha na ma tho ba rnams kun nas nyon mongs pa dang ldan pa nyid kyi phyir ro//'di gnyis kyis ni bya ba'i cha ma yin pa nyid kho nar bstan to/ /bya bar 'os pa nyid kyang rgyu gnyis kyis bstan te/ ston pas bsngags pa dang / tshogs dang mthun pas so/ /'jam pa'i sems nyid de yang rgyu gsum gyis zhes bya ba la sogs pa la/ bde bar gnas pa'i khyad par ni/mnyen pa'i sems zhes gang gsungs pa'o/ /ting nge 'dzin la dbang ba'i khyad par ni las su rung ba'i sems gang gsungs pa'o/ /nyes pa rnam par 'bri ba'i gnyen po'i khyad par ni phan pa dang bde ba bskyed pa'i sems zhes bya ba'o/ /nyes pa rnam par 'bri ba yang tshig 'dis sbyor ba bstan pa yin pas tshig 'dis ni yan lag yin no//tshig lhag ma rnams kyis ni nyes pa rnams rnam pa drug tu phye nas 'di nyid rnam par 'byed par byed do/ /de la chos ston pa'i dus na zang zing dang bcas pa la nyon mongs pa'am klan ka tshol ba la nyon mongs pa ste/ 'am zhes bya ba ni bsdu ba yin no//nyes pa 'di gnyis kyi gnyen por yongs su nyon mongs pa can ma yin pa'i sems zhes gsungs te/ zang zing rab tu sbyin pa dag dang / klan ka tshol ba'i bsam pa dag la rjes su chags pa dang khong khro ba med pas yongs su nyon mongs pa can ma yin pa'i phyir ro/ /sbyin pa la sogs pa dang /'dod pa chung ba la sogs pa'i yon tan rnams dang / ye shes kyis chog par 'dzin pa ni nyes pa ste/ de'i gnyen por tshig gnyis te/ gong nas gong du khyad par yongs su tshol ba'i sems dang ldan pa yin/ ye shes kyi khyad par mngon par 'dod pa'i sems dang ldan pa yin zhes gsungs pa'o//skyo ba ni nyes pa ste de'i gnyen por 'gro ba thams cad yongs su skyob pa'i sems zhes gsungs te/ sems can gyi don du yun ring por dka' ba mang po khas blangs pa'i phyir ro/ /rang gi lta ba mchog tu 'dzin pa ni nyes pa ste de'i gnyen por bla ma la gus pa dang mthun pa'i sems zhes gsungs te/chos dang mthun pa'i chos spyad pa'i don du brtson 'grus rtsom par byed pa'i phyir ro/ /byas pa gzo ba zhes bya ba ni yan lag ste/ de la phan gdags par yid la byed pa'i phyir ro/ /byas pa shes pa'i phyir byas pa tshor ba'o/ /sems rjes su srung ba'i phyir nges pa'o//ji skad rjes su bstan pa sgrub pa'i phyir 'grogs na bde ba'o/ /nyes pa gling ba bzod pa'i phyir drang ba'o/ /dris pas 'khrug pa bzod pa ni mnyen pa'o/ /rang gi nyes pa mi 'chab pas ni thibs po med par spyod pa'o/ /yang dag pa ma yin pa'i yon tan mi brjod pas na sgyu med pa'o//khengs par mi 'gyur bas na nga rgyal med pa'o/ /tshig bzod pas na bka' blo bde ba'o/ /ma nor bar 'dzin pas na mthun par 'dzin pa'o/ /de'i 'bras bu gong ma dang zhes bya ba ni nyon mongs pa'i kun nas nyon mongs pa spangs pa'i mtshan nyid dang ngo / /de'i 'bras bu 'og ma rnams dang zhes bya ba ni las kyi kun nas nyon mongs pa spangs pa'i mtshan nyid la sogs pa dang ste/de dag ni dul ba dang zhi bas rab tu phye ba'i phyir ro/ /mdor na 'di'i 'bras bu ni de sngon 'gro ba'i khams brtas pa/ bsam pa'i khams ni 'di byang chub kyi sems so/ /byang chub de'i lam gang yin pa de sgrub pa'i phyir thob pa'i phyir mngon par rtogs pa'i phyir lhag pa'i bsam pa'i khams so//nges pa skye ba ni mos pa ste nges pa shin tu gsal ba'i rgyu las byung ba'i gnyen po 'phel ba yin no/ /dge ba'i rtsa ba thams cad kyi mi mthun pa'i phyogs nyams pa dang / 'jig rten pa ni dri ma'i nag nog dang bral ba yin no//sa de'i gsang ba la the tshom za ba ldog pa ni 'di'i the tshom dang yid gnyis dang nem nur yang rgyun chad par 'gyur ro zhes bya ba yin no/ /de log na ste the tshom gyi gnas gzhan dag la yang mos te/ nges pa 'thob pa ni som nyi med pa mngon du 'gyur ba yang yongs su rdzogs par 'gyur zhes bya ba yin no//bde bar gnas pa'i khyad par ni dga' ba dang shin tu sbyangs pa yang yang dag par 'grub bo zhes bya ba yin no/ /sems can yongs su smin par byed nus pa ni de bzhin gshegs pa'i byin gyi rlabs zhes bya ba'o/ /ting nge 'dzin dpag tu med pa mngon par sgrub pa ni sems kyi bsam pa tshad med pa zhes bya ba yin te/sems zhes bya ba'i sgras ni lhag pa'i sems kyi bslab pa ting nge 'dzin rnams bstan to/ /de ltar na gnyen po sgom pa 'phel ba 'di'i 'bras bu bcu tshan bzhis rnam pa bzhi bstan pa yongs su bstan pa dang / sngar nyon mongs pa dang las kyi kun nas nyon mongs pa bzlog pa'i mtshan nyid rnam pa gnyis bshad pa dang /spyir na de'i 'bras bu/ 'bras bu rnam pa drug gis rnam par gzhag par shes par bya'o/ /mchod pa la sogs lhag ma kun/ /'od byed ji ltar de bzhin du/ /'od 'phro can la'ang shes par bya/ / khyad par du na yon tan lhag /yongs su dag pa de'i sa pa de las gzhan pa'i byang chub sems dpa' rnams dang mtshungs pa nyid kyi phyir ro/ /thos stsogs shes pa rab brten nas/ /'od byed pa la snang byas te/ /gti mug mun pa rnam mnan nas/ /de 'og 'od 'phro can rnam sbyong / /ye shes me ni rab 'bar ba//nyon mongs bud shing rnam 'joms pa/ /chos kyi dbyings ni snang byed pa/ /thabs dang ye shes ldan pa yis/ /'bras bu rnam pa drug thob nas/ /rnam dag shin tu rnam dag mthong / /don sgrub par ni dka' ba yi/ /sa ni shin tu sbyang dka' thob/ /sngar ni zhes bya ba la sogs pa ni gsum pa la de nor che bar 'dzin gyi zhes bya ba la sogs pas chos rtogs pa'i mngon pa'i nga rgyal gang yin pa de'i gnyen por bzhi po las lhag par g.yo ba la sogs pa spangs pa gsungs pa/da ni rnam par dag pa la sangs rgyas la sogs pa'i rgyu tha dad pa'i mngon pa'i nga rgyal gyi gnyen por bshad pa yin no//de la rnam par dag pa la/ /sems kyi bsam pa mnyam pa nyid/ /ces bya ba ni byang chub sems dpa'i sems kyi bsam pa gang dag yin pa de dag mnyam pa nyid do/ /gang la zhe na rnam par dag pa la'o/ /'di skad du sa 'di la byang chub sems dpa' rnam par dag pa la sangs rgyas kyi chos rnam par dag pa dang ldan pa rnams la sems kyi bsam pa mnyam pa nyid do zhes bshad par 'gyur ro//tshig mang por bstan pa ni yul tha dad pa'i phyir ro/ /rnam par dag pa'i bye brag gis zhes bya ba la rnam par dag pa ni sangs rgyas kyi chos rnams so//de dag kyang rgyu dang 'bras bu'i bye brag gis rab tu phye nas 'dir rnam pa bcur bstan la de dag la mnyam pa nyid 'thob pas de yang rnam pa bcu yin no/ /rnam par dag pa'i chos rnams kyang rgyur gyur pa dang / 'bras bur gyur pa dag go/ /rnam par dag pa gang dag yin pa zhes bya ba ni 'bras bur gyur pa rnams ston te/mdo'i tshig gsum po 'das pa la sogs pa'i bye brag gis bstan to/ /'das pa dang ma 'ongs pa dang da ltar byung ba rnams kyi chos rnam par dag pa ni stobs dang mi 'jigs pa la sogs pa'i mtshan nyid do/ /chos rnam par dag pa de la byang chub sems dpa'i sa lnga pa la 'jug pa'i byang chub sems dpa' 'di'i bsam pa mnyam pa nyid de bsam pa mtshungs pa yin no//bsam pa gang zhe na/ dad pa dang / 'dun pa dang / brtson 'grus dang / thabs kyi mtshan nyid do/ /dad pa la sogs pa'i chos bzhi po de dag ni dge ba'i chos thams cad kyi gzhi yin pa'i phyir bsam pa zhes bya ba ste chu'i gzhi bzhin no//bsam pa de mnyam pa nyid de/ ji ltar byang chub sems dpa' 'di 'das pa'i sangs rgyas kyi chos rnam par dag pa la bsam pa 'jug pa de bzhin du ma 'ongs pa dang da ltar byung ba'i bcom ldan 'das rnams kyi chos rnam par dag pa la bsam pa ni mnyam pa nyid 'dis 'jug ste/de dag gi rgyud tha dad pa med par rtogs so/ /ji ltar zhes bya ba 'di tshul khrims la sogs pa ste/ 'das pa dang ma 'ongs pa dang / da ltar byung ba'i sangs rgyas kyi chos rnam par dag pa thob par bya ba gang yin pa de/ byang chub sems dpa' rnams kyi tshul khrims rnam par dag pa la sogs pa'i lam gyis 'thob bo/ /de'i phyir tshul khrims rnam par dag pa de la/ lam la gnas pa'i byang chub sems dpa' lam de la gnas pa'i byang chub sems dpa' gzhan rnams dang lhan cig bsam pa nyid do/ /ji ltar tshul khrims rnam par dag pa la bsam pa mnyam pa nyid ltar sems rnam par dag pa la yang de dang 'dra ste/rnam par dag pa bdun po'i bar thams cad la bsam pa mnyam pa nyid do/ /de la tshul khrims rnam par dag pa ni byang chub sems dpa' rnams kyi sdom pa la sogs pa'i tshul khrims rnam par dag pa gang yin pa'o//sems rnam par dag pa ni byang chub sems dpa'i ting nge 'dzin rnam par dag pa ste/ /lhag pa'i tshul khrims dang / lhag pa'i sems kyi bslab pa gnyis tshig gnyis kyis bstan pa yin no/ /lhag pa'i shes rab kyi bslab pa ni tshig bzhis bstan te/ lta bar gyur pa rnams sel ba dang /som nyi dang yid gnyis rnams sel ba dang / 'gyod pa sel bas rnam par dag pa zhes bya ba'o/ /lta bar gyur pa rnams sel ba ni lta ba thams cad spangs pa'i phyir ro/ /ji ltar yin snyam pa ni som nyi'o/ /blo sna tshogs pa ni yid gnyis te ji 'di ltar yin nam 'on te de lta ma yin snyam pa'o//ngan par byas pa dang / yid la gcags pa dang / snying la gcags pa ni 'gyod pa zhes bya'o/ /lta ba dang som nyi dang / yid gnyis dang 'gyod pa 'di dag sel ba ni rnam par dag pa ste/ rnam par dag pa de la byang chub sems dpa'i bsam pa mnyam pa nyid do//lam dang lam ma yin pa shes pa rnam par dag pa la bsam pa rnam par dag pa nyid la/ lam dang lam ma yin pa shes zhes bya ba ni shes pa gang gis shes rab dang thabs kyis yongs su zin pa'i lam dang / lam ma yin pa de dang bral ba'am/ 'jig rten pa'am theg pa dman par lhung ba shes pa'o//de ni lam dang lam ma yin pa shes pa rnam par dag pa yin te/ de la byang chub sems dpa'i bsam pa mnyam pa nyid do/ /lam shes pa rnam par dag pa la bsam pa mnyam pa nyid ces bya ba ni tshul khrims rnam par dag pa nas lam dang lam ma yin pa shes pa rnam par dag pa'i bar sngar bshad pa rnams lam bzhi'i nang du bsdoms nas shes pa ni lam shes pa'o//lam bzhi ni lam dka' la mngon par shes pa bul ba dang / lam dka' la mngon par shes pa myur ba dang / lam sla la mngon par shes pa bul ba dang / lam sla la mngon par shes pa myur ba'o//lam shes pa 'di bzhi rnam par dag pa ni lam shes pa rnam par dag pa ste/ lam shes pa rnam par dag pa 'di la byang chub sems dpa'i bsam pa mnyam pa nyid do/ /sems can rnams yongs su smin par byed pa ni/ thabs de dag gis sems can khams dang mos pa dang /dbang po tha dad pa/ thabs sna tshogs pas sgrub par byed pa rnams yongs su smin par byed pa'o/ /de rnam par dag pa ni/ sems can thams cad yongs su smin par byed pa rnam par dag pa ste/ de la byang chub sems dpa' sa mtshungs pa la gnas pa'i byang chub sems dpa'i sa gzhan dag dang /lhan cig bsam pa/ bsam pa sna tshogs pa ma yin pa nyid ces bya ba'i tha tshig ste/ tha ma 'dis ni sems can yongs su smin par byed pa bshad do/ /byang chub sems dpa' rnam par dag pa la sems kyi bsam pa mnyam pa nyid bcu po 'di dag gis rgyud tha dad pa ma yin pa'i don du sgrub ste/sa lnga pas rgyud mnyam pa nyid du rtogs par byed pa'i tha tshig go/ /lam gyis spong ba ste/ lam gyis spong bar shes pa ni/ lam ni spong bar shes pa zhes bya'o/ /'og ma rnam par 'jig pa nyid kyis yid tsam spong ba'i don du bstan to/ /ji lta zhe na/rnam par 'jig pa de la dman pa nyid du rtogs pas/ gong ma gong ma gya nom pa don du gnyer ba chog mi shes pa des yid tsam spong ba'i don du bstan to/ /cung zad spong ba ni yid tsam spong ba ste dper na cung zad sgyur ba la yid tsam sgyur ba zhes bya ba bzhin no/ /cung zad spong ba ni gong ma ma yin pa spong ba zhes bya ba'i tha tshig ste/zag pa med pa yin pa'i phyir ro/ /cung zad spong ba yang de la mngon par mi brtson pa las shes par bya ste gong ma don du gnyer bas so/ /yid tsam spong ba nyid don yin pas yid tsam spong ba'i don to/ /de'i nga rgyal kun tu gzhom pa'i phyir zhes bya ba ni rnam par dag pa la rgyud tha dad pa'i mngon pa'i nga rgyal kun tu gzhom pa'i phyir ro//rgyu brgyad kyis zhes bya ba la sogs pa la/ de la byang chub kyi sems goms par byas pa ni smon lam gyi stobs bskyed pa'i phyir zhes gsungs pa yin no/ /theg pa las mi g.yo ba ni snying rje dang byams pas sems can thams cad yongs su mi gtong ba'i phyir zhes bya ba yin no//dge ba'i rtsa ba'i stobs bskyed pa ni bsod nams kyi tshogs bstsags pa'i phyir zhes bya ba yin no/ /brtson pa ma bor ba ni rgyun ma bcad pa'i phyir zhes bya ba yin no/ /yang dag par sbyor ba ni thabs la mkhas pa mngon par bsgrub pa'i phyir zhes bya ba yin no//chog par mi 'dzin pa ni sa gong ma gong ma'i snang ba la lta ba'i phyir zhes bya ba yin no/ /mthu'i khyad par bla thabs thob pa ni de bzhin gshegs pa'i byin gyi rlabs yang dag par blangs pa'i phyir zhes bya ba yin no/ /so sor rang gi mthu'i khyad par thob pa ni dran pa la sogs pas khyad par du byas pa'i shes rab kyis so//de ltar re zhig nga rgyal gyi khyad par gyi gnyen po rnam par gzhag par shes par bya'o/ /bden pa'i chos nyid rnam par gzhag pa ji lta bu zhe na/ 'di ni sdug bsngal 'phags pa'i bden pa'o zhes bya bar yang dag pa ji lta ba bzhin du rab tu shes so zhes bya ba nas/'di ni sdug bsngal 'gog par 'gro ba'i lam 'phags pa'i bden pa'o zhes bya ba'i bar yin no/ /gnyis gnyis kyis kun nas nyon mongs pa dang / rnam par byang ba nyid dag 'jug pa 'di ni bden pa rnams kyi chos nyid yin no/ /'di dag byed pa po la mi ltos par ji skad bshad pa'i chos nyid yongs su mi 'dor bas na bden pa nyid do//gdul bya rnams ni rnam grol ba'i/ /thabs kyi cho ga mdor bsdu na/ /theg dman theg pa mchog dag gis/ /bstan pa rnam pa gnyis kho na/ /theg pa dman la gdul bya ba/ /yongs smin bya stsogs mtshan nyid drug /theg pa che la gdul bya ba//bdun pa yin par yongs su bsgrags/ /de la gdul bar bya drug ni/ /yongs smin bya dang de bzhin smin/ /chos nyid dang ni dgongs pa ste/ /de gnyis la ni kun rmongs dang / /de bzhin gzhan yang yang dag pa'i/ /yid byed lta dang mi ldan pa/ /'di drug nyan thos dag tu bshad//lnga yi bya ba bden pa la/ /mkhas pa lnga po dag gis bsgrub/ /sdug bsngal bden stsogs bsdus pa'i phyir/ /drug pa'i don du bzhi yin no/ /bdun pa'i don du mkhas pa ni/ /bcu pa yang dag bshad pa yin/ /ji lta zhe na/ yongs su ma smin pa'i don du sems can gzhan dag gi bsam pa ji lta ba bzhin tshim par byed pas kun rdzob kyi bden pa rab tu shes so//yongs su smin pa'i don du bgrod pa gcig pu la yang dag par gzhol bas don dam pa'i bden pa rab tu shes so/ /chos nyid zab mo nyid la kun tu rmongs pa'i don dang rang dang spyi'i mtshan nyid kyi bden pa rab tu shes so//dgongs pa zab mo nyid la kun tu rmongs pa'i don du chos rnam par dbye ba rnam par gzhag pa rtogs pas rnam par dbye ba'i bden pa rab tu shes so/ /tshul bzhin yid la byed pa dang mi ldan pa'i don du phung po dang khams dang skye mched rnam par gzhag pa rtogs pas phye ste/rtog pa'i bden pa rab tu shes so/ /de ltar na snga ma rnams kyi dbye ba mkhas pa lnga po dag gis bsgrub par shes par bya'o/ /drug pa'i don du dngos po'i bden pa la sogs pa la mkhas pa bzhi zhes bya ba ni drug pa'i don du lus dang sems la gnod pa rab tu 'bab pas dngos po'i bden pa rab tu shes so zhes bya ba ste 'di ni sdug bsngal gyi bden pa'o//de nyid kyi don du 'gro bar mtshams sbyor ba rtogs pas rab tu skye ba'i bden pa rab tu shes so zhes bya ba ste/ 'di ni kun 'byung gi bden pa'o/ /de nyid kyi don du rims nad kyis yongs su gdung ba thams cad shin tu zhi bas zad pa dang mi skye ba shes pa'i bden pa rab tu shes so zhes bya ba ste 'di ni 'gog pa'i bden pa'o//drug pa nyid kyi don du mi gnyis pa mngon par sgrub pas lam shes pa la 'jug pa'i bden pa rab tu shes so zhes bya ba ste 'di ni lam gyi bden pa'o/ /lam gcig tu bgrod pa yin pa'i phyir zhes bya ba ni gcig tu 'gro ba'i phyir te mya ngan las 'das par 'gro ba'i phyir zhes bya ba'i tha tshig go//yang byang chub sems dpa'i gcig tu bgrod pa'i lam ni 'phags pa blo gros mi zad pa las byang chub sems dpa' gcig tu zla med/ grogs med par rang gi brtson 'grus dang mthu dang / stobs kyis yongs su zin pa'i lhag pa'i bsam pas bla na med pa yang dag par rdzogs pa'i byang chub tu go cha gyon la/rang nyid byed cing gzhan la glags mi tshol ba rang gi mthu'i stobs kyis 'phags pa yin no zhes bya ba la sogs pa'i gzhung gis bshad pa yin no/ /bdun pa'i don du bcu pa ni rnam pa thams cad mngon par rdzogs par khong du chud pas byang chub sems dpa'i sa thams cad kyi go rims mtshams sbyar ba bsgrub pa nas/de bzhin gshegs pa'i ye shes yang dag par 'byung ba'i bar gyi bden pa rab tu shes te zhes bya ba yin te/ mkhas pa bcu pa 'di ni byang chub sems dpa'i don du yang dag par bshad pa yin no//rig pa'i gnas lnga la mkhas pa'i phyir zhes bya ba ni/ gtan tshigs mtshan nyid bzo dang ni/ /de bzhin du ni gso ba dang / /nang rig pa dang bcas rnams la/ /mkhas pas rig pa lngar shes so/ /byang chub sems dpa'i sa thams cad kyi go rims kyi mtshams sbyor bas sgrub pa zhes bya ba ni byang chub sems dpa' thams cad kyi sa rnams rim gyis thob pa sgrub pa zhes bya ba'i tha tshig go//bar zhes bya ba nges par gzung ba'o/ /nges par gzung ba yang nges pa ste/ de'i phyir de bzhin gshegs pa'i ye shes kyi bar gyi bden pa gang yin pa de thams cad yang dag par shes so zhes nges par bshad pa yin no//de ltar na bdun pa'i don du mkhas pa bcu pa yang dag par bshad pa yin no/ /mos pas shes pa'i stobs bskyed pas zhes bya ba ni gzugs brnyan shes pa'i stobs bskyed pas yin gyi/ dgos pa yongs su grub pa la dmigs pas ni ma yin pa'o//'di'i don bstan bcos gzhan la/ rnam par rtog pa dang bcas pa'i gzugs brnyan dang / rnam par rtog pa med pa'i gzugs brnyan no/ /de la rnam par rtog pa dang bcas pa gang zhe na/ mos pa yid la byed pas zhi gnas dang lhag mthong gis dmigs pa gang yin pa'o//rnam par rtog pa med pa'i gzugs brnyan ni de kho na yid la byed pas zhi gnas dang lhag mthong gis dmigs pa'o/ /dgos pa yongs su grub pa zhes bya ba ni gnas gyur pa'o/ /chos kyi sku shin tu yongs su dag pa nyid de/ gnas gyur pa'i shes pa ni phyin ci ma log pa'i de bzhin nyid la dmigs pa can yin pa'i phyir ro zhes bya ba 'di bshad do//de lta bas na 'dir mos pa'i skabs yin pa'i phyir rnam par rtog pa dang bcas pa nyid du khong du chud par 'gyur ba nyid pas rnam par rtog pa dang bcas pa nyid smos te ma gsungs so/ /de tshe phung bas mngon gtses shing / /sdug bsngal gyis ni nyam thag pa'i//'jig rten bltas na phyir zhing ni/ /'di yi snying rje rab tu 'jug /byis pa ni mi shes pa'i phyir de la mngon par zhen pa'i gnas yin gyi/ 'phags pa ni shes pa'i phyir ma yin no/ /rten cing 'brel bar 'byung ba la so sor rtog pas sdug bsngal la yang dag pa ji lta ba bzhin du dmigs pa sngon gyi mtha'i ma rig pa dang sred pa las byung ba'i sems can 'khor ba'i rgyun gyi rjes su zhugs pa phung po'i gnas las ma bskyod pa rnams kyi zhes 'byung ba'i phyir ro//de lta ni thabs mkhas pa las byung ba'i phyir ro zhes bya ba ni sems can gdul ba'i don du yin gyi ma rig pa dang sred pa las byung ba ni ma yin pa'o//srid pa'i yan lag gi rtsa ba yin pa'i phyir ro zhes bya ba ni rten cing 'brel bar 'byung ba cha gnyis la/ 'phen par byed pa'i yan lag rnams kyi nang na ma rig pa'i rtsa ba yin la/ mngon par 'grub par byed pa'i yan lag rnams kyi nang na sred pa rtsa ba yin par rig par bya'o//bdag dang bdag gi bral ba zhes bya ba ni za ba po dang za bar 'dogs pa la mngon par zhen pa spangs pa'i phyir ro/ /yang rnam pa gzhan gyis sems can sdug bsngal bar so sor rtog pa'i khams kyi sbrul dag gis skye bar mi 'gyur ba zhes bya ba la sogs pa yin te/khams kyi sbrul dag gis ni na ba dang rga ba dang 'chi ba'i sdug bsngal bstan to/ /nga rgyal dang lta ba'i zug rngu mi 'byin pa zhes bya ba ni log pa'i tshangs par spyod pa tshol bar gyur pa rnams so/ /'dod chags dang zhe sdang dang / gti mug gi me lce 'bar ba zhi bar mi byed pa zhes bya ba ni/ 'dod pa tshol bar gyur pa 'dod pa la nye bar spyod pa rnams so//ma rig pa'i mun pa mi sel zhes bya ba ni 'dod pa tshol bar gyur pa nyes par spyad pa spyod pa rnams so/ /sred pa'i rgya mtsho mi skems pa zhes bya ba ni srid pa tshol bar gyur pa rnams te nga rgyal dang lta ba'i zug rngu mi 'byin pa zhes bya ba la sogs pa'i tshig gis ni na ba dang rga ba dang 'chi ba'i sdug bsngal gyi kun 'byung yongs su bstan to//dpung gnyen med pa zhes bya ba ni sdug bsngal bar gyur na'o/ /skyabs med pa zhes bya ba ni ma gyur na'o/ /gnas med pa zhes bya ba ni skyes bu dam pa dang brten pa dang bral ba'o/ /gling med pa zhes bya ba ni dam pa'i chos mnyan pa dang bral ba'o//rten med pa zhes bya ba ni tshul bzhin yid la byed pa dang bral ba'o/ /long bar gyur pa zhes bya ba ni yang dag pa'i lta ba dang bral bar gyur pa'o/ /ma rig pa'i sgo nga dang sbubs dang phris yog pa zhes bya ba ni tshul bzhin yid la byed pa'i mi mthun pa'i phyogs gnyug ma ste tshul bzhin ma yin pa yid la byed pa dang ldan pa rnams so//mun pas zil gyis gnon pa de dag gi don du zhes bya ba ni yang dag pa'i lta ba'i mi mthun pa'i phyogs glo bur ba dam pa'i chos ma yin pa nyan pa dang ldan pa rnams so/ /lhag ma ni khong du chud par sla'o/ /thos pa yongs su 'dzin pa'i khyad par ni tshig gsum gyis dran pa dang ldan pa dang /blo gros dang ldan pa dang rtogs pa dang ldan pa zhes bya ba shes rab gsum bsdus pa'i phyir ro/ /rnam grangs gzhan du na zhes bya ba ni tshig gsum po 'di nyid rnam par bshad pa gzhan gyis don tha dad par ston pa'o/ /de la thos pa 'dzin pa ni dran pa dang ldan pa zhes bya'o//stong pa nyid du ro gcig kyang rang dang spyi'i mtshan nyid la sogs pa tha dad pa ni chos nyid zab mo ste/ de shes pa ni blo gros dang ldan pa zhes bya'o/ /dgongs pa zab mo shes pa ni rtogs pa dang ldan pa zhes bya ba ste/ /mdo rnams kyi tshul ni lugs te/ de'i dgongs pa mngon du rtogs pa'i phyir ro/ /dang pos ni mdo la sogs pa'i chos la mkhas pa'o/ /lhag ma rnams kyis ni don la mkhas pa'o/ /ngo tsha dang ldan pa nyid kyis ni sdom pa blangs pa bsrungs pas bzod pa dang nges pa dang ldan pa'i phyir tshul khrims mnos pa 'dral bar mi byed do//brten pa dang ldan pa nyid kyis ni thams cad kyi thams cad du yongs su mi 'dor te/ de ltar na tshul khrims mnyam pa dang / skyon med pa yongs su bstan pa yin no/ /blo dang ldan pa nyid kyis ni rten cing 'brel bar 'byung ba shes so/ /'di yod na 'di 'byung zhes bya ba ni rgyu med par lta ba'i gnyen po yin no//'di skyes pas 'di skye zhes bya ba ni mi 'dra ba rgyur lta ba'i gnyen po ste/ mi rtag pa'i rgyu rtag pa ni rgyu mi 'dra ba yin no/ /de nyid kyi phyir gnas dang gnas ma yin pa zhes pa gsungs te/ rgyu dang rgyu ma yin pa shes pa'i phyir ro/ /rtogs pa'i shes pa dang ldan pa nyid kyis ni bdud phyir rgol ba la sogs pa gzhan dag gis mi bkri zhing mi 'phrogs pa yin te/lam mthong ba'i phyir ro/ /shes rab dang ldan pa nyid kyis ni lhad bcug pa shes so/ /lhad bcug pa ni dam pa'i chos 'jig par byed pa'i tshig lhad bcug pa gang yin pa'o/ /de la nag po bstan pa'i gnyen por 'di ni mdo la sogs pa la 'jug pa la sogs pa'i yang dag par rdzogs pa'i sangs rgyas kyis bshad pa yin pa'i phyir don gyi tshig yin no//'di'i chos nyid dang 'gal ba nyid kyis bdud la sogs pas smras pa yin pa'i phyir don ma yin pa'i tshig yin no zhes bya ba dang / 'dres pa'i tshig yin no zhes bya bar shes so/ /mngon par shes pa rnams kyis ni skyabs ngan par zhugs pa rnams dad par byas nas bstan pa la 'dzud par byed do/ /thabs mkhas pa nyid kyis ni sems can rnams yongs su smin par byed de/ de ltar na dran pa la sogs pa'i yon tan yongs su 'dzin pa'i khyad par rnam par gzhag pa yin no//sgrub pa'i khyad par rnam par gzhag pa ni bcu gnyis pas bstan to/ /ji lta zhe na/ ngoms mi shes pa yin zhes bya ba la sogs pas bstan to/ /sems can yongs su smin par byed pa rnam par gzhag pa ni bcu gsum pas bstan to/ /ji lta zhe na/de de ltar mngon par brtson pas sbyin pas kyang sems can yongs su smin par byed do zhes bya ba la sogs pas te bsdu ba'i dngos po bzhis tshig bzhi bstan pa'o/ /gzugs kyi lus kun tu bstan pa ni rang gi ris la chags pa rnams la'o/ /chos bshad pa ni the tshom za ba rnams la'o/ / byang chub sems dpa'i spyod pa brjod pa ni thabs 'khrul pa rnams la'o/ /de bzhin gshegs pa'i che ba nyid smos pa ni yongs su skyo ba rnams la'o/ /'khor ba'i nyes pa bstan pa ni de la mngon par dga' ba rnams la'o/ /sangs rgyas kyi ye shes kyi phan yon yongs su bstan pa ni mi 'jug pa rnams la'o//blo chung ba rnams la ni tshig tha mas yongs su smin par byed pas bstan to/ /de la don brjed pa'i gnod pa dang / bya ba brjed pa'i gnod pa'i rnam pa gnyis gcig tu byas nas gzhag ste/ 'di yang tshig gnyis kyis rnam par phye ba yin no/ /'di'i gnyen po ni yi ge ste/yi ge'i 'bru rnams kyis byin pa la sogs pa'i don dang / byas pa la sogs pa'i bya ba rnams mi brjed par bya ba'i phyir bris nas 'jog par byed do/ /gtan tshigs kyi bstan bcos kyis ni lta ba ngan pa sel bar byed do/ /sgra'i bstan bcos kyis ni blo chung ba sel bar byed do/ / yongs su blangs pa'i nor ma sbas pa'i gnyen por brgya ste des sbed pa'i phyir ro/ /'du ba dang 'god pa la rmongs pa'i gnyen por rtsis dang sho thabs te/ de gnyis kyi 'du 'god shes pa'i phyir ro/ /khams mi mnyam pa ni skems pa dang brjed byed do/ /sems can gnod pa ni 'byung po'i gdon to//rgyu las byung ba'i nad kyi gnod pa ni ro langs kyi sbyor ba ste/ gshed byed sgrub pa la sogs pas rims la sogs pa 'byung ba'o/ /zla ba la sogs pa log par mthong ba dang / mtshan ngan pa la sogs pa yan lag gi skyon rnam par smin pa kho nas thob pa des byas pa'i rnam par 'tshe ba'i gnod pa'i ngo lon yang shes so//de la sdom pa'i cho ga ni sdom pa'i tshul khrims te/ 'chal pa'i tshul khrims kyi gnyen po'o/ /bsam gtan ni 'dod pa la 'dod chags pa'i gnyen po'o/ /mngon par shes pa rnams ni skyabs ngan pa'i gnyen po'o/ /tshad med pa rnams ni log pa'i bsod nams kyi gnyen po'o//gzugs med pa rnams ni log pa'i thar pa'i gnyen po'o/ /rgyu bzhi dang ldan par zhes bya ba la gnod pa gzhan gyis gnod par bya ba med pa ni tho 'tshams pa med pa zhes bya'o/ /kha na ma tho ba med pa'i bde ba skyes pa ni sems can thams cad la phan pa dang /bde bar 'gyur ba zhes bya ba'o/ /'byung bar byed pa rnam par dag pa ni snying rje dang ldan pas zhes bya ba'o/ /dgos pa rnam par dag pa ni mthar gyis sangs rgyas kyi chos la dgod pa'i phyir zhes bya ba'o/ /shin tu sbyang dka' la ni 'khor ba dang / /mya ngan 'das lam mi gnas lam thob nas//shes rab snying rjes yongs sbyangs bsam pa can/ /sa 'bras rnam pa bzhi la rab gnas pa/ /blo yis 'khor ba'i skyon rnams rab dpyad de/ /zhi ba'i dbyings ni sems la rab smon nas/ /mtshan ma med la mang du gnas ldan pa'i/ /sa drug mtshan ma med par thob par 'gyur//sa drug pa'i 'grel pa ni/ rgyu ni gsum po gang dag gis/ /lnga pa rnam par gzhag 'dod pa'i/ /rgyu de nyid ni khyad 'phags pas/ /drug pa rab tu bstan pa yin/ /sa bzhi pa dang zhes bya ba la sogs pa ni sa 'di'i 'brel pa ston par byed pa ste/sa dang po la chos kyi dbyings mthong ba'i phyir/ gang zag tu mngon par zhen pa spangs pa yin no/ /de'i 'phen pa las gyur pa chos rtogs pa'i nga rgyal ni sa bzhi pa las spangs pa yin no/ /lnga pa ni rnam par dag pa la rgyud tha dad pa'i mngon pa'i nga rgyal spangs pa yin pas de dag tu de dag gi gnyen por bshad do//kun nas nyon mongs pa dang / rnam par byang ba'i chos la tha dad pa'i mngon pa'i nga rgyal gang yin pa de'i gnyen po ni 'di las bstan par bya ba yin pas na/ sa'i 'brel pa yin te/ lam shin tu yongs su rdzogs pa'i byang chub sems dpa' de byang chub sems dpa'i sa drug pa la 'jug ste zhes gang gsungs pa'o//chos la tha dad nga rgyal ni/ /chos mngon zhen las skyes gang yin/ /de yi gnyen po rnam pa bcu/ /drug pa las ni rab tu bstan/ /de la chos thams cad de/ skye mched bcu gnyis po rnams ni kun brtags pa'i ngo bo nyid med pas mnyam pa nyid do//skye ba dang 'chi 'pho'i mtshan ma zhes bya ba ni chos thams cad blang ba med pa dang / dor ba med pa mnyam pa nyid ces gang gsungs pa ste/ blang ba ni skye ba yin la/ dor ba ni 'jig pa yin pa'i phyir ro/ /gang zag la mngon par zhen pa'i mtshan ma ni phung po lnga po dag ste/de skad du/ mdo las/ dge slong dag 'di na gang la la zhes bya ba la sogs pa gsungs so/ /kun brtags pa'i gzugs la sogs pa med na gang zag tu mngon par zhen pa la sogs pa med pa'i phyir de'i gnyen por sgyu ma la sogs pa dang mnyam pa nyid de/ nyon mongs pa glo bur ba dang 'khor ba'i dri ma bstsal bas gnyen po yin no//byi dor byas pa yin te/ gnas byi dor byed pa bzhin no/ /mnyam pa nyid du mos pa'i phyir zhes bya ba ni gnyen po mnyam pa nyid du mos pa'i phyir ro/ /de ltar na rjes su mthun par byas pa yin te/ de bzhin nyid kyis rang gi ngo bo yongs su shes pa'i phyir ro//rnam par mi rtog pa'i phyir zhes bya ba ni gnyen po 'di lta bu ni kun nas nyon mongs pa zlog par byed pa yin no snyam du rnam par mi rtog pa'i phyir ro/ /bzod pa zhes bya ba ni bzod pa dang rjes su mthun pa'i phyir ro/ /de ma thob po zhes bya ba'i tshig gis na zhes bya ba ni de tsam gyis mi skye ba'i chos la bzod pa'i sgo rjes su thob pa ni ma yin no zhes gang gsungs pa'o//'di yan chad ni zhes bya ba ni ji skad du bshad zin pa la snyegs so/ /khyad par du 'gro ba zhes bya ba ni nga rgyal cha phra ba'i gnyen por rnam par gzhag pa'i phyir ro/ / 'di nas bzung ste zhes bya ba ni chos thams cad kyi rang bzhin de ltar rtogs pa nas zhes bya ba nas bzung ste/ stong pa nyid kyi rnam par thar pa'i sgo kun du skyes pa yin no zhes bya ba'i bar gyi gzhung 'dis mi gnas pa'i mya ngan las 'das pa'i lam sgrub pa'i khyad par bshad pa yin no/ /sems can la lta ba dang bcas pa zhes bya ba la sogs pa ni mi gnas pa'i mya ngan las 'das pa'i lam sgrub pa'i khyad par ston par byed pa'o//rgyu gnyis kyis ni mi gnas pa'i mya ngan las 'das pa'i lam nyid du mi 'gyur te/ nyan thos bzhin du snying rje dang bral ba dang / 'khor ba pa bzhin du shes rab dang bral bas so//snying rje dang shes rab gnyis kyis ni 'gyur bas de'i phyir de dag dang ldan pa ston par byed do/ /snying rje'i khyad par yongs su 'dzin pa ni sla bas sgo gsum nas zhes bya ba la sogs pas rten cing 'brel bar 'byung ba la yongs su rtog pa bstan to/ /sgrub pa dang brgal ba'i lam yin pas brgal ba'i lam dang mtshan nyid de dag rnam par gzhag pa'o//'dis rten cing 'brel par 'byung ba la yongs su rtog ces bya bar sbyar te/ thams cad ni bdag tu mngon par zhen pa las 'byung ba zhes bya ba 'di nas bzung ste/ byed pa po med do zhes bya ba'i bar gyis bstan to/ / don dam pa'i bden pa rnam par gzhag pas yongs su rtog pa ni de 'di snyam du sems te/ 'di ltar khams gsum zhes bya ba la sogs pa'o/ /kun rdzob kyi bden pa rnam par gzhag pa ni srid pa'i yan lag bcu gnyis po gang dag ces bya ba bzung ste/ de de ltar rten cing 'brel bar 'byung ba la rnam pa bcur zhes bya ba'i bar yin no//de ltar mdo rnam par phye nas sgrub pa rnam par gzhag pa ji lta bu zhe na zhes bya ba la sogs pas yan lag gi don bshad par bya ste/ de ni zhes bya ba ni bdag med pa de sgrub par byed pa'o/ /rigs pa gang gis she na/ 'jig rten 'byung ba thams cad ces bya ba la sogs pa smos so//de dang bral na zhes bya ba la sogs pas ni rjes su 'gro ba dang ldog pa dag ston par byed do/ /bdag don dam par yod du zin na ni zhes bya ba la sogs pas ni rjes su 'gro ba dang ldog pa bdag nyid sbyor bar byed pa'o/ /de la sbyor ba ni 'jig rten 'byung ba thams cad kyi rgyu ni bdag tu lta ba yin te nyon mongs pa'i kun nas nyon mongs pa yin pa'i phyir/ma rig pa la sogs pa'i kun nas nyon mongs pa bzhin no/ /chos mi mthun pa ni lam bzhin no/ /gal te nyon mongs pa'i kun nas nyon mongs pa nyid kyang ma grub po zhe na/de ni ma yin te/ phyin ci log gi rnam par zhugs pa'i phyir 'dod chags la sogs pa bzhin du nyon mongs pa nyid yin no/ /phyin ci log gi rnam par zhugs pa nyid ni gzugs la sogs pa bdag med pa rnams la bdag tu mngon par zhen pa'i phyir te/ don dam par na bdag med pa'i phyir ro//'di ni rang gi sde pa rnams kyis srol btod zin pas 'phan mi skyed do/ /de las brgal ba rnam par gzhag pa ste gang zhig bdag med na rigs pa gang gis der 'dzin pa 'jug pa 'di smros shig ces zer na/ 'di'i lan rnam par gzhag pa ni byis pa'i blo nyid dang mi shes pa la sogs pa rgyu lhag ma rnams kyis bdag med pa la kun tu rmongs nas bdag tu 'dzin pa yin no//byis pa'i blo can du gyur pas zhes bya ba ni blo chung ba'i phyir ro/ /de'i 'og tu bdag med du zin kyang zhes bya ba la sogs pas ni gzhung mtha' dag 'phen to/ / nyon mongs pa gzhan yang yod bzhin du ci'i phyir mi shes pa dang / ser sna dag kho na smos zhes rgol ba 'di'i lan gdab pa'i phyir srid pa'i yan lag gi rtsa ba yin pa'i phyir ro zhes bya ba smras so/ /srid pa'i yan lag 'di ni gtso bo yin te/ de nyid kyi phyir gzhan las skye ba rnams kyi rgyu ni sred pa yin no zhes gsungs so//bdag med bzhin du yang ji lta ba bzhin du yang ji ltar 'jig rten skye ba dag srid pa de ltar mdo nyid las rigs pa dag rab tu bstan to/ /ji lta zhe na/ bsod nams dang bsod nams ma yin pa dang mi g.yo ba'i 'du byed rnams kyang stsogs zhes bya ba rgyas par gsungs so//de la yongs su ma btang ba zhes bya ba ni yongs su ma spangs pa'o/ /gang dag gis she na 'du byed dag gis so/ /de ci zhig ce na/ sems kyi sa bon no/ /ci 'dra ba zhig ce na/ zag pa dang bcas pa nye bar len pa dang bcas pa'o/ /gang gi tshe na zhe na/ phyi ma la'o//ci zhe na/ skye ba rga shi'i rang bzhin zhes bya ba la sogs pa ste/ sems nyid yang srid pa dang srid pa bar ma gnyis kyi rgyu yin pa'i phyir sa bon yin no/ /de nyid skye ba dang rga ba dang zhes bya ba la sogs pas ston par byed do/ /mdo las mngon par 'grub pa zhes 'byung ba ni bar ma do'i srid pa yin no//yang srid pa zhes 'byung ba ni skye ba'i srid pa yin no/ /de dag gis bsdus pa la nye bar 'gro ba'i phyir na nye bar song ba yin no/ /bsod nams la sogs pa zhes bya ba la sogs pas ni phyi'i myu gu skye ba dang chos mthun pa nyid du ston par byed do//de la 'di ni chos mthun pa nyid yin te/ myu gu skyed par byed pa la dang por zhing dang / lud kyis dgab pa dang / chu'i khams kyis brlan pa dang / phyi'i gnod pa 'byung du 'ong bas rgya la sogs pas bskor dgos pa de thams cad nang gi dag la yang sbyar bar bya'o zhes ston par byed do//bdag nyid dang zhes bya ba ni gzhan gyis ma yin pa'o/ /rang gis 'jig pa'i blo sngon du gtong ba med ces bya ba ni bdag gis 'di ltar gzhig par bya'o snyam pa'o/ /bsdus pa'i don ni 'di yin te/ /las la brten nas rnam par shes/ /ming dang gzugs su myong bar 'gyur//nur nur po la sogs rim gyis/ /skye mched drug po kun du 'byung / /skye mched dod par gyur nas ni/ /yul rnams la ni mngon par dga'/ /yul rnams don du gnyer ba na/ /phyir zhing rang gi las la 'jug /las gang dag gis 'di zil non/ /phyi mar skye rgyu las byung ba'i//rga dang 'chi dang mya ngan sogs/ /sdug bsngal nyams su myong 'gyur zhing / /brgal ba'i lan rnam par gzhag pa ni de lta bu yin no/ /mtshan nyid rnam par gzhag pa ji lta bu zhe na/ brgal dang sgrub pa'i skabs kyis ni/ rkyen las byung ba'i rnam pa ni//bdag med nyid du bsgrubs nas su/ /de yi 'og tu brtag par bya/ /ji ltar brtag par bya zhe na/ /rnal gnas mtshan nyid gang gis na/ /'di ni rab tu 'byung ba'o/ /ji lta zhe na de 'di snyam du sems te/ bden pa rnams mi shes pa ni/ don dam par ma rig pa'o zhes bya ba rgyas par smos so//ming dang gzugs su ston to zhes bya ba la ci zhig ston par byed ce na/ rten cing 'brel par 'byung ba brten pa 'di la cha gsum du rnam par gzhag par bstan par dgongs pa ni ma yin no/ /'on kyang yan lag rnams kyi 'brel pa tsam zhig brjod par bzhed pa zad de/ 'di ltar ma rig pas byas pa'i las kyi rnam par smin pa ni 'du byed rnams so zhes gsungs pa la/ 'du byed ces bya ba'i sgra ni 'dir 'dus byas kyi chos kyi rnam grangs yin te/ dper na gzhan las 'du byed thams cad ni mi rtag go zhes 'byung ba lta bu yin gyi/ ji ltar gzhan las 'du byed ni gsum ste zhes 'byung ba lta bu bsod nams stsogs pa'i chos kyi rnam grangs ni ma yin te/bsod nams la sogs pa'i 'du byed de dag ni 'dir ma rig pas byas pa nyid kyis yongs su bsdus pa dag yin no/ /'du byed de dag kyang rnam par smin pa'i gnas skabs yin pas ming dang gzugs su ston to zhes bya ba smras so//de la kun gzhi'i rnam par shes pa brten pa ste/ ming dang gzugs dang rnam par shes pa lhan cig pa ste/ kun gzhi'i rnam par shes pa dang lhan cig pa nyid do/ /de lta bas na 'dir kun gzhi'i rnam par shes pa dang ming dang gzugs gcig la gcig brten pa nyid du bshad pa yin te/'du byed dang rnam par shes pa dang / ming dang gzugs kyi yan lag rnams dus gcig tu 'byung bar rnam par gzhag par mngon no/ /gzhan dag na re rten cing 'brel bar 'byung ba bstan pa 'dir/ sngon gyi mtha' dang mtha'i bar dang phyi ma'i mtha' dang cha gsum du rnam par gzhag pas bstan pa yin la/'dir khyad par du na sngon gyi mtha' ni ma rig pa kho na rnam par gzhag la/ 'du byed rnams ni mtha'i bar kho nar rnam par gzhag go/ /ming dang gzugs rnam par smin par 'gyur ba de yang kun gzhi'i rnam par shes pa dang lhan cig par bstan la/de las kun gzhi'i rnam par shes pa phyung nas/ yang rnam par shes pa'i yan lag nyid du bstan to/ /de ci'i phyir zhe na/ ming dang gzugs la brten pa nyid yin par shes par bya ba'i phyir dang / ming dang gzugs kyang kun gzhi'i rnam par shes pa la brten pa nyid yin par shes par bya ba'i phyir te/'di ltar rnam par shes pa dang ming dang gzugs gcig la gcig brten pa nyid du bstan to zhes smra ba'i phyir ro/ /'di la 'du byed rnam par smin pa zhes pa yang ma rig pa kho na las skye ba ma yin te/ ma rig pa las dang lhan cig pa rgyu'i dngos por smos pa'i phyir 'di ltar ma rig pas byas pa'i las kyi zhes gsungs so zhes zer ro//'di ni srid pa'i yan lag rjes su 'brel pas zhes bya ba la sogs pa ni 'og nas de 'di ltar/ rten cing 'brel bar 'byung ba la lugs dang mthun pa dang lugs dang mthun pa ma yin par so sor rtog ste/'di lta ste/ srid pa'i yan lag rjes su 'brel ba dang zhes bya ba la sogs pa 'byung ba'i rnam pa bcu po de dag tshig mang po yongs su spang ba'i phyir 'di nyid du sbyor bar byed pa/ srid pa'i yan lag rjes 'brel ba/ /ma rig pa las 'du byed rnams/ /zhes bya ba la sogs pas/ / rgyu dang 'bras bu rgyud pa yin/ /sems gyur pa tsam du zad pa'i phyir ro zhes bya ba ni sems de lta de ltar yongs su gyur pas khams gsum pa rnam par gzhag pa'i phyir ro/ /bdag dang bral ba nyid kyis sems tsam la brten pas na sems gcig la brten pa'o/ /rnam pa gcig tu na 'dir yan lag rnams dang lhan cig 'byung ba brjod par bzhed pa yin pas sems gcig la brten pa'i phyir te 'di ltar gzhi gang la zhes bya ba la sogs pa gsungs pa yin no//gzhi gang la zhes bya ba ni bsod nams la sogs pa la'o/ /'dod chags dang ldan pa zhes bya ba ni/ kye ma bdag gis bsod nams la sogs pa'i 'du byed rnams kyi tshogs bsags nas/lha la sogs pa'i nang du skye bar bya'o snyam pa'o/ /ji ltar na de dag gzhi zhes bya zhe na/ 'di la 'bras bu rnams gnas pa'i phyir te/ de'i phyir gzhi ni 'du byed rnams so zhes bya ba gsungs so/ / kun rdzob kyi bden pa rnam par gzhag pa ji lta bu zhe na/ don dam pa'i bden pa la 'jug par 'gyur ba'i rgyu ni kun rdzob ces bya'o/ /brtag pa rnam pa drug po des/ /rnam drug yongs su rtog phyir ro/ /ji lta zhe na/ kun nas nyon mongs rten dang ni/ /rgyu dang de bzhin nyes dmigs bsdus/ / nyes pa spangs pa'i rnam pa dang / /yid mi 'byung dang yid 'byung dang / /de bzhin zab pa nyid mthong las/ /brtag pa rnam pa drug tu bshad/ /'di ni bden pa gnyis zhes bya ba la sogs pa ni rnam pa bcu'i nang nas rnam pa gnyis pa ste/ sems gcig tu yang dag par 'du ba zhes bya ba sbyor bar byed pa'o//sems ni rnam pa gnyis te sems tsam dang sems gcig la brten pa'o/ /rgyur brtag pa ni rnam pa gnyis te/ gzhan gyi rgyu nyid du brtag pa ni/ de la ma rig pa ni bya ba gnyis su nye bar gnas pa yin te zhes bya ba la sogs pa nas/ 'chi ba yang bya ba gnyis su nye bar gnas pa yin te zhes bya ba'i bar gyis bstan to//rang gi bya ba byed pas zhes bya ba ni bdag nyid kyi bya ba ni rang gi bya ba'o/ /de byed cing sgrub pa ni byed pa ste/ des na yan lag gzhan rnams kyi rgyu yin no/ /de la 'du byed 'jig par yang byed do zhes bya ba la sogs pas ni gzhung 'phen par byed do//tshe rabs gzhan gyi rgyu yin pa'i phyir ro zhes bya ba ji ltar na tshe rabs gzhan gyi rgyu yin zhe na/ gal te shi ba de yang dag par yongs su ma shes par gyur te/ gang dag gis bdag gi skye ba zad do/ /tshangs par spyad pa bsten to/ /bya ba byas so/ /'di las srid pa gzhan mi shes so zhes 'chi ba yang dag par yongs su shes pa de dag gi 'chi ba de ni tshe rabs gzhan gyi rgyu ma yin no//rang gi rgyu nyid du yongs su brtag pa ni de la ma rig pa'i rkyen gyis 'du byed rnams zhes bya ba ni ma rig pa'i rkyen gyis 'du byed rnams rgyun mi 'chad pa dang ston pa'o zhes bya ba la sogs pa nas/skye ba'i rkyen med pas na rga shi nye bar zhi zhing ston pa med pa'o zhes bya ba'i bar gyis bstan te/ rang gi rigs rgyu'i dngos por rkyen du yongs su brtag pa'i phyir ro/ /'du byed rnams ji ltar zhes bya ba la sogs pas ni ma rig pa la sogs pa rang gi rigs rgyu nyid du yongs su ston par byed do/ / 'dir ma rig pa ni rgyur gyur pa dang / 'bras bur gyur pa dang rnam pa gnyis su bstan te/ 'du byed rnams ji ltar ma rig pa'i rkyen can nyid yin zhe na/ rgyun mi 'chad pa dang rton pa zhes smras pa gang yin pa'o/ /de'i phyir ma rig pa'i sa bon yod pas rgyun mi 'chad de/ 'di ltar yang srid pa mngon par 'du byed pas na 'du byed rnams zhes bya la/de dag kyang ma rig pa'i sa bon yod pa'i phyir 'du byed dag yin te/ ma rig pa'i sa bon rnams dpyis phyung ba ni yang srid pa mngon par 'du mi byed pa'i phyir ro/ /rton pa ni 'bras bur gyur pa de skyes pas de dag rton cing skye ba ste/ /ma rmongs cig shos skye ba med//ces 'byung ba'i phyir ro/ /de la sa bon du gyur pa gang yin pa de ni bskyed par bya ba la rgyu yin no zhes bya'o/ /ma rig pa la sogs pa rang gi rigs rgyu'i dngos por rkyen nyid du yongs su brtag pa bshad zin te/ rgyun mi 'chad dang rton rnam gnyis/ / mi shes rgyu las byung ba ste/ /ma rig sa bon gyur gang dang / /'bras bur gyur par brjod pa yin/ /sa bon dus na rgyun mi 'chad/ /'bras bu skye ba'i tshe na rton/ /'di ltar de ni skyes pa las/ /'du byed rnams ni skye bar 'dod/ /'di gnyis kyis ni 'di yod pas 'di 'byung 'di skyes pas 'di skye zhes bya ba 'byung ba dang /skye bar bshad pa gang yin pa de rab tu 'grub po/ /rang gi rigs rgyu nyid du don rnam pa gnyis kyis zhes bya ba ni rton pa dang / rgyun mi 'chad pa'i don gyis so/ /tha dad pa ma yin pas zhes bya ba ni rnam pa bzhi pa ston par byed pa'o//rnam pa bcu'i nang nas rnam pa gsum pa ste/ rang gi las ma 'dres pa zhes bya ba ni re zhig mi sbyor te/ 'di snyam du sbyar sla'o snyam du sems so/ /'di ltar gzhan gyi rgyu nyid du brtag par las rang gi las ma 'dres pa zhal nyid nas gsungs te/ de skad du rang gi bya ba byed pas yan lag gzhan gyi rgyu nyid yongs su brtag pa zhes kyang smras so//de lta bas na rtogs dga' ba'i rnam pa kho na bstan pa'i phyir tha dad pa ma yin pa'i phyir zhes bya ba smras so/ /da ni tha dad pa ma yin pa'i don de yan lag snga ma med na yan lag phyi ma mi 'byung bar yongs su brtag pa zhes bya ba la sogs pa rnam pa gnyis kyis bshad do//yan lag snga ma med par yan lag phyi ma mi 'byung ste/ tha dad pa ma yin pa'i don ni med na mi 'byung ba'i don te/ 'di ltar rgyu med par 'bras bu med pas rgyu med par 'bras bu mi 'byung zhes bya'o/ /de skad du/ gang zhig gang gi rgyur mthong ba//de ni de las skye ba yin/ /rgyu yod ma yin 'bras bu ni/ /ji lta bu yang mi rung ngo / /zhes gsungs te/ de lta bas na ston pa'i don 'di gsal bar byas pa yin no/ /rang gi rigs su 'dus pa zhes bya ba ni rnam pa gnyis pas tha dad pa ma yin pa'i don 'chad pa'o/ /'dir yang tha dad pa ma yin pa'i don ni so so pa ma yin pa'i don yin te/rang gi rigs su 'dus pa'i rkyen yongs su brtag pa zhes gang smras pa'o/ /de lta bas na rgyun mi 'chad pa'i don rab tu gsal bar byas pa yin no/ /nyes dmigs bsdus par yongs su brtag pa zhes bya ba ni nyes dmigs bsdus pa ste/de yongs su brtag pa'o/ /lam gsum gyis zhes bya ba ni nyon mongs pa dang / las dang skye ba'i lam gyis te/ 'di ltar ma rig pa dang sred pa dang len pa ni zhes gsungs pa la sogs pa'i mdos lam gsum po dag bshad do/ /gang gis bsdus she na/ sdug bsngal gyi rgyu dang zhes bya ba la sogs pa smos te/ sdug bsngal gyi rgyu ni nyon mongs pa dang las kyi lam dag go/ /sdug bsngal ni skye ba'i lam zhes bya ba'o/ /rnam pa lhag ma rnams ni sla ba'i phyir sbyor ba mi byed de/ 'di ltar lam gsum gyi rgyud du 'brang ba zhes rang gi sgras bshad pa ltar lhag ma rnams kyang da dang 'dra bar blta bar bya'o//de lta bu'i nyes dmigs bsdus pa yongs su brtag pa yin par shes par bya'o/ /yongs su spangs par yongs brtag pa'ang / /nyes pa rnams ni yongs spang yin/ /rten cing 'brel 'byung smra ba la/ /nyes rnam gsum du yongs brtags te//rgyu la bye brag med pa'i phyir/ /lus kun cig car 'grub pa dang / /byed po med phyir lam bdag gir/ /bya ba med par thal bar 'gyur/ /'bras bu med phyir las rnams ni/ /chud za bar yang thal 'gyur te/ /las de 'bras bu ma chung ba/ / gang phyir 'gag par 'gyur phyir ro/ /de la nyes pa yongs su spang bar brtag pa zhes bya ba ni gzhan gyis bsgrubs pa'i nyes pa yongs su brtag pa'o/ /de la gzhan dag gis nyes pa 'di/ rnam pa gsum ni yongs su brtags/ /'dir gzhan dag gis bdag med par smra ba rnams la/rgyu la bye brag med pa'i phyir thams cad kyi lus cig car mngon par 'grub pa'i nyes pa zhes bya ba la sogs pa nyes pa rnam pa gsum sgrub par byed do/ /cig car zhes bya ba ni lan cig tu ste/ thams cad kyi lus mngon par grub pa de nyid nyes pa yin no/ /'dir 'thad pa rgyu bye brag med pa'i phyir zhes bya ba smras te/rgyu la bye brag med pa'i phyir ro/ /'di ltar ma 'ongs pa'i lus su gtogs pa'i lus ji snyed pa de dag thams cad ni ma rig pa dang / 'du byed tsam gyi rgyu las 'byung ba yin gyi/ gzhan gyi rgyu las 'byung bar mi 'dod la/ ma rig pa dang 'du byed rnams kyang sngon gyi mtha' na nye ba yin te/rgyu nye ba'i phyir 'bras bu yang cig car 'byung ba kho nar 'gyur ro/ /gang la bdag yod pa de la ni nyes pa 'dir mi 'gyur te/ de ni longs spyod kyi rten yongs su gzung bar bya ba la dbang bsgyur ba yin pas de'i phyir ha cang thal bar mi 'gyur ro//de bzhin du las bdag gir bya ba med pa ni nyes pa gnyis pa yin te las bdag gir bya ba la las rnams bdag gir bya ba nyid ni bdag nyid kyi yin pa'o/ /las rnams bdag gi yin te/ de'i phyir bdag kho nas 'bras bu spyad kyi gzhan gyis ni ma yin no zhes bya ba 'di med pa de nyid nyes pa yin no//'dir 'thad par byed pa po med pas zhes bya ba smras te/ byed pa po yod na ni bdag gi las rnams zhes bya bar 'gyur gyi/ med na ni mi 'gyur ro/ /las rnams chud za ba'i nyes pa ni gsum pa'o/ /chud za ba ni 'jig pa ste/ de nyid nyes pa yin no/ /'dir 'thad pa 'bras bu ma skyes par 'gags pas zhes bya ba smras so//ji lta zhe na/ bdag med na lus dang ngag dang yid ces bsgrags pa'i las gang dag yin pa de dag skyes ma thag kho nar zhig pas 'bras bu skye ba'i dus na mi gnas so/ /gang la bdag yod pa de la ni nyes pa 'dir mi 'gyur te/'di ltar dge ba 'am mi dge ba 'gag tu zin kyang bdag la chos dang chos ma yin pas gnod par bya ba'i phyir nyes par mi 'gyur ro/ /de lta bas na 'di dag gis ni ma byas pa dang phrad pa'i nyes pa dang / byas pa chud za ba'i nyes pa smras pa yin no/ /nyes pa rnam pa de gsum char yang yongs su spangs pa brjod par 'dod nas/re zhig sngon gyi mtha' la sogs pa zhes bya ba la sogs pas gzhi 'dre bar byed de/ stsogs pa zhes bya ba'i sgras ni mtha'i bar dang / phyi ma'i mtha' dag yongs su bsdu'o/ /skyes nas myong bar 'gyur ba la sogs pa zhes bya ba'i sgras ni myong bar mi 'gyur ba la sogs pa yongs su bsdu'o//tshe 'di'i phyir sngar byas pa'i phyir ro zhes bya ba ni sngon gyi mtha' pa'i ltos pa zhes bya ba yin no/ /tshe 'di'i phyir byas pa gang yin pa de ji ltar sngon gyi mtha' yin zhes bya ba'i klan ka 'di yongs su spang ba'i phyir da ltar byung ba ni zhes bya ba la sogs pa smos te/don ni sngon zhes bya ba'am/ bar zhes bya ba 'am phyi ma zhes bya ba ni ltos nas bstan pa yin no zhes bya ba 'di yin no/ /'di skad du tshe 'di nyid kyi phyir ma rig pa dang 'du byed dag yongs su brtag pa na/ sngon gyi mtha' pa yongs su brtag pa yin na zhes bshad pa yin no//gzhan dag ni gang la dgos pa sngon gyi mtha' yod pa'am/ gang zhig de'i rgyu mtshan gyi dngos por rnam par gnas pa de ni sngon gyi mtha' pa'i ltos pa zhes bya ste/ mtha'i bar gyi rgyu mtshan yin no/ /ci'i phyir de skad bstan ce na/ de'i phyir da ltar byung ba ni ma 'ongs pa'i sngon gyi mtha'o zhes bya ba smras so//tshe 'di'i phyir zhes bya ba ni rgyu mtshan gyi bdun par byas pa'i phyir te/ de'i phyir ltos pa'i don ni rgyu'i don du rig par bya'o zhes smras so snyam du sems so/ /don gang la zhes bya ba ni don gang la brten nas da ltar byung ba'i ltos pa yin pa de 'dri ba'o//cig shos kyis kyang bstan pa'i phyir/ tshe rabs snga ma'i las gang yin pa zhes bya ba la sogs pa smras so/ /ci zhig ston par byed ce na/ 'di'i rnam par shes pa la sogs pa ni sngon gyi las kyi 'bras bu yin pa'i phyir las de yang 'bras bu mi 'byin to zhes bya ba'i don 'di la da ltar byung ba'i ltos pa yin te/'bras bu rgyu dang bcas pa yongs su brtags pa'i phyir ro/ /yang srid pa mngon par 'grub par gcig tu nges par byed pa'i phyir ro zhes bya ba ni sngon gyi mtha' pa'i ltos pa'i yul du byas pa ma rig pa'i rkyen gyis 'du byed gang dag yin pa de dag gis 'phangs su zin kyang ji srid du srid pa la sogs pa nye bar zin pa ma yin pa de srid du yang srid pa mngon par 'grub par mi byed kyi/nye bar zin pa dag ni yang srid pa mngon par 'grub par gcig tu nges pa yin pa'o/ /de phan chad du yang zhes bya ba la sogs pas ni gzhung 'phen par byed do/ /sngon gyi mtha' pa la sogs pa'i ltos pa ji snyed gleng bslang ba 'dis ci zhig yongs su ston ce na/ma byas par gyur pa dang zhes bya ba ni ma grub pa'i phyir ro/ /byas su zin kyang 'bras bu bskyed zin pa dang / byas la 'bras bu ma bskyed kyang gal te gnyen po rnyed pas spangs zin pa yin na'o/ /byas pa nyid dang 'bras bu ma bskyed pa nyid du ston to zhes bya ba ni mngon par 'du byed pas na 'du byed rnams zhes bye brag tu bshad pa'i phyir ro//sred pa la sogs pas zhes bya ba la sogs pa zhes bya ba na sgras ni len pa yongs su bsdu'o/ /ma spangs pa zhes bya ba ji ltar na sred pa la sogs pas ma spangs pa nyid ces bya zhe na/de'i phyir sred pa dang len pa zad na zhes bya ba smras te/ sred pa la sogs pa zad pas las rnams zad pa yin gyi rang gi ngo bos ni ma yin no zhes ston par byed do/ /de ltar gzhi kun du bres nas nyes pa rnam pa gsum yongs su spong ba sbyor bar byed de/ 'di ltar gang gi phyir zhes bya ba ni gang gi phyir ji skad bshad pa'i tshul gyis na las la la ni byas la la ni ma byas/byas pa yang rnam pa gnyis te 'bras bu bskyed zin pa dang / 'bras bu ma skyes pa yang spangs pa dang / ma spangs pa'i bye brag gis rnam pa gnyis te/ las rnams kyi bye brag ni rnam pa drug yin pa de'i phyir klan ka dang po yongs su spang ba'i phyir thams cad kyis lus cig car zhes bya ba la sogs pa smos so//'di ltar las la la ni byas pa yin la/ byas pa yang thams cad skyes nas myong bar 'gyur ba yang ma yin pa'i phyir ro/ /de skyes nas myong bar mi 'gyur ba'am/nams kyang myong bar mi 'gyur ba nyid kho na yang ma yin pas 'di ltar myong bar mi 'gyur bar cig car du yang mi 'gyur zhes bya ba smras te/ 'dis ni rgyu bye brag med pa'i phyir zhes bya ba'i gtan tshigs 'di ma grub pa nyid du yongs su ston to/ /gang gi phyir ma byas pa ni rnam par smin par mi 'gyur zhes bya ba la sogs pas ni nyes pa gnyis pa yongs su spong ba ston par byed de/gang gi phyir las ma byas pa ni rnam par smin par mi 'gyur gyi/ 'o na ci zhe na/ byas pa kho nar 'gyur ba de'i phyir gzhan gyi rgyud la las de ma byas pa'i phyir gzhan gyi rgyud la rnam par smin pa med kyi/byas pa'i phyir rang gi rgyud la rnam par smin pa yod do/ /des yongs su bsgos pa'i lus dang sems kyi rgyud las de nyid las 'bras bu 'byung bas de kho na la byed pa por nye bar 'dogs te/ 'dis ni byed pa po med pa'i phyir zhes bya ba'i gtan tshigs 'di ma grub pa nyid du yongs su ston to/ /nyes pa gsum po yongs su spang ba bstan pa'i phyir rgyu gsum med na zhes bya ba smras so//rgyu rnam pa gsum ni ma byas pa'am/ 'bras bu bskyed zin pa'am/ gnyen po rnyed pas spangs zin par gyur pa ste/ de dag med na gdon mi za bar 'bras bu bskyed pa'i phyir ro/ /las rnams chud za ba'i nyes pa yang med de zhes bya ba ni ji skad du/sems gang las ni las skyes pa/ /de rgyud las kyis bsgos pa la/ /de 'bras skye phyir byas chud za/ /ma byas phrad pa yod ma yin/ /zhes bshad pa lta bu'o/ /'dir yang sngon gyi mtha' dang da ltar byung ba dang / phyi ma'i mtha' la so sor rtog pa zhes bya ba'i rnam pa bzhi sbyar bar bya'o//de la yid mi 'byung ba dang yid 'byung ba'i rgyur yongs su brtag pa zhes bya ba ni yid mi 'byung ba'i rgyur yongs su brtag pa dang / yid 'byung ba'i rgyur yongs su brtag pa ste/ yid mi 'byung ba'i rgyu ni sdug bsngal cha phra ba nyid do/ /de yang 'du byed kyi sdug bsngal nyid de/de la ma rig pa'i rkyen gyis 'du byed rnams zhes bya ba nas/ skye mched drug ces bya ba'i bar de ni 'du byed kyi sdug bsngal nyid do zhes gang gsungs pa'o/ /de dag ni byis pa rnams kyis legs par mi rtogs pas na yid mi 'byung ba'i rgyu yin no/ /tshor ba gang ci yang rung de ni 'dir sdug bsngal ba'o zhes bya ba srid pa'i yan lag 'di dag la 'du byed kyi sdug bsngal ba nyid 'jug pa'i rgyu mtshan ston par byed pa'o//tshor ba dang mthun pa'i tshor ba yin pa'i phyir te/ 'di ltar gang las tshor ba dang / tshor ba ma yin pa de thams cad tshor ba zhes bya ba'i phyir ro/ /sdug bsngal nyid rags pa'i rnam pa ni/sdug bsngal gyi sdug bsngal nyid dang 'gyur ba'i sdug bsngal nyid de/ byis pa rnams kyis kyang bde blag tu rtogs par bya ba yin pa'i phyir ro/ /yongs su gdung ba'i ngo bo nyid kyis sdug bsngal gyi sdug bsngal nyid dang / 'gyur ba'i sdug bsngal nyid yin pas/ de lta bas na sdug bsngal nyid rnam pa gnyis ni sdug bsngal nyid rags pa zhes bya ba ste reg pa dang tshor ba zhes bya ba de ni sdug bsngal gyi sdug bsngal nyid do/ /srid pa'i yan lag lhag ma de dag ni 'gyur ba'i sdug bsngal nyid do zhes gang gsungs pa'o/ /sdug bsngal gsum kun du 'byung ba zhes bya ba'i rnam pa yang de bzhin du sbyar bar bya'o//rang gi rgyu las byung ba'i phyir srid pa'i yan lag rnams gzhan gyis ma byas pa zhes bya ba la rang gi rgyu las byung ba'i phyir zhes bya ba ni 'dir rang gi rgyu ni rigs mthun pa'i sa bon yin no/ /'o na ni rang kho nas byas pa dag yin no zhes bya ba'i klan ka 'di yongs su spang ba'i phyir bdag nyid kyis ma byas pa zhes smras te/bdag nyid kyis byas pa dag ma yin no/ /de ci'i phyir zhe na/ rkyen las byung ba'i phyir te/ rkyen ni 'dir lhan cig byed pa'i rkyen yin par 'dod do/ /'di gnyi ga bstan pa'i phyir/ ma rig pa'i rkyen gyis 'du byed rnams zhes bya ba ni 'du byed rnams rgyu dang rkyen las byung ba zhes gsungs so//rgyu ni 'dir rigs mthun pa'i rgyu'o/ /rkyen ni lhan cig byed pa'o/ /'o na ni rgyu dang rkyen lhan cig pas bskyed pa yin no zhes bya ba'i klan ka 'di dgag pa'i phyir gnyi gas ma byas pa zhes bya ba smras te/ skye ba tsam dang 'brel pa'i phyir ro/ /gal te chos 'ga' zhig 'ga' la byed na ni de lta na des bskyed pa dag tu 'gyur ro/ /brgya la ci'i phyir mi byed snyam na de'i phyir bya ba'i dus na mi gnas pas zhes bya ba smras te/ skyes ma thag tu 'jig pa'i phyir/ /zhes bya ba'i tha tshig go//de lta bas na ma rig pa'i rkyen gyis 'du byed rnams zhes bya ba de ni skye ba dang 'brel ba ste zhes bya ba gsungs te/ skye ba dang 'brel pa ni skye ba dang 'brel pa'o/ /gal te de lta yin te bdag las ma yin gzhan las ma yin gnyi ga las ma yin na/ 'o na ni rgyu med pa dag las skye bar 'gyur ro zhes bya ba'i klan ka 'di yongs su spong ba'i phyir/srid pa'i lugs dang mthun pa'i phyir rgyu med pa las 'byung ba ma yin zhes bya ba smras te/ srid pa ni 'khor ba'o/ /de'i lugs dang mthun pas de'i phyir rgyu med pa pa dag yin no/ /rgyu med pa pa yin du zin na ni zhes bya ba la sogs pa ni de nyid rnam par 'byed pa'o//ci zhig ston par byed ce na/ rgyu med pa pa nyid yin na ni srid pa'i yan lag rnams 'byung ba'i mtshan nyid du 'gyur gyi/ mi 'byung ba ni ma yin no zhes bya ba'i skye ba dang mi skye ba 'di dag ci las gyur/ de'i phyir srid pa'i lugs dang mthun pa nyid du mi 'gyur gyi chad pa kho nar 'gyur ba zhig na/srid pa'i lugs dang mthun pa srid pa dang mthun pa nyid kyang yod de/ ma rig pa'i rkyen gyis 'du byed rnams zhes bya ba de ni srid pa'i lugs su 'byung bar yongs su brtag pa ste zhes gang gsungs pa'o/ / yan lag lhag ma rnams kyang sbyar bar bya ste/ ji lta zhe na/ rgyu dang rkyen las 'byung ba zhes bya ba ni gzhan gyis ma byas pa dang / rang gis ma byas par yongs su brtag par ro/ /skye ba dang 'brel ba zhes bya ba ni gnyi gas ma byas par yongs su brtag par ro/ /med pas zad par so sor rtog pa zhes bya ba ni rgyu med pa nyid so sor brtag pa ste/rgyu med pa nyid yin na ni srid pa med do/ /rgyu yod pa nyid yin na ni srid pa yod do/ /srid pa yod pa de zad pa ste de la so sor rtog pa'o/ /rten cing 'brel bar 'byung ba la rnam pa bcur so sor rtog pa 'di ni zhes bya ba ni rnam pa bcu po ji skad du sbyar ba ston par byed do//mtshan nyid dang bden pa rnam par gzhag pas yongs su brtag pa bstan te zhes bya ba ni mtshan nyid dang bden pa ste/ de gnyis rnam par gzhag pas yongs su brtag pa ni mtshan nyid dang bden pa rnam par gzhag pas yongs su brtag pa'o/ /sgrub pa dang brgal ba'i mtshan nyid dang /bden pa rnam par gzhag pa'i sgo nas de yongs su brtag pa bstan na/ ci ga 'di skad du sgrub pa dang / brgal ba'i lan dang mtshan nyid dang / bden pa rnam par gzhag pa'i sgo nas zhes brjod par bya ba ma yin nam/ 'di ltar der rten cing 'brel bar 'byung ba de yang sgo gsum nas yongs su brtag par rig par bya'o zhes bshad do zhe na/'di ni nyes pa med de/ 'dir rten cing 'brel bar 'byung ba rnam pa bcur yongs su brtag pa'i skabs yin pa'i phyir la/ rnam pa de dag gi nang nas rnam pa dang po sbyar ba'i phyir/ 'di skad du sgrub pa la sogs pa rnam par gzhag pa'i sgo nas zhes ma bshad do//bden pa rnam par gzhag pa yongs su brtag pa ni don dam pa dang kun rdzob kyi bden pa yongs su brtag pa yin par rig par bya ste/ rnam pa dgu po 'di de dang der sbyar ba'i phyir ro/ /yang zhes bya ba 'di rnam pa gzhan gnyis kyis rten cing 'brel bar 'byung ba rnam pa bcu 'chad pa ste/snying rje dang mthun pa rjes su mthun pa ste/ ji ltar snying rje 'jug pa zhes bya ba'i don dang / rnam pa thams cad yongs su rtog pa zhes bya ba'o/ /de la snying rje dang mthun par yongs su brtag pa yang rnam pa bzhi po kun du rmongs pa dang phyin ci log ni kun du rmongs pa dang phyin ci log ste/rnam pa 'di gnyis ni yongs su rtog pa gcig yin no/ /ji ltar gang la kun du rmongs pa dang phyin ci log ces bya ba kun du rmongs pa ni mi gsal ba'o/ /phyin ci log ni log par rtog pa'o/ /bdag tu mngon par zhen pa zhes bya ba la sogs pas ni ji ltar kun tu rmongs pa de ston par byed do//byis pa'i blo can zhes bya ba ni ji ltar phyin ci log pa de ston par byed pa ste/ bdag tu phyin ci log pas blo chung ba'i phyir ro/ /srid pa'i yan lag gi mtshan nyid la zhes bya ba ni gang la kun du rmongs pa de ston par byed pa ste/ de 'di snyam du sems te byis pa'i blo can bdag tu mngon par zhen pa zhes bya ba nas bzung ste/'jig par byed pa su yang med do zhes de ltar byang chub sems dpa' lugs su 'byung ba'i rnam par rten cing 'brel bar 'byung ba la rab tu rtog go zhes bya ba'i bar gsungs pa gang yin pa'o//srid pa'i yan lag gi mtshan nyid la zhes bya ba ni gang la phyin ci log pa de ston par byed pa yang yin te/ de 'di snyam du sems te bden pa rnams mi shes pa ni don dam par ma rig pa'o zhes bya ba nas bzung ste/ byed pa po la mngon par zhen pas las rnams yod par gyur to zhes bya ba'i bar gsungs pa gang yin pa'o//de ltar na phyin ci log yin te/ ji lta zhe na/ ma rig pa'i dbang gis 'du byed rnams 'byung ba ma yin gyi/ 'o na ci zhe na/ bdag gi dbang gis zhes bya ba ste/ de ni las rnams kyi byed pa po dang / chos dang chos ma yin pa'i gzhi yang yin no snyam du sems pa'i phyir ro//de de ltar rmongs shing zhes bya ba ni/ ji skad du bshad pa'i rnam pa ltar ro/ /kun gzhi dang / 'jug pa'i rnam par shes pa dag las/ thar pa yongs su btsal bar bya ba'i rigs te/ 'di ltar 'di gnyis kho na nyon mongs pa dang /las dang skye ba'i kun nas nyon mongs pa dag gis kun nas nyon mongs par 'gyur la/ gang kun nas nyon mongs par 'gyur ba de nyid ji skad du bshad pa'i kun nas nyon mongs pa gsum las rnam par byang bar 'gyur/ dag par 'gyur ba yin na/ de ltar so sor rtog pa las gzhan du bdag las yongs su tshol te/de nyid 'ching bar 'gyur ro/ /grol bar 'gyur ro zhes so sor rtog pa'i phyir ro/ /de lta bu ni/ gzhan las thar pa yongs su tshol ba ste/ de 'di snyam du sems te 'di ltar khams gsum pa 'di ni sems tsam ste zhes gsungs pa gang yin pa'o//rnam pa gzhan gyis yongs su tshol ba ji lta bu zhe na zhes bya ba rnam pa gzhan gyis ni gzhan gyi rnam pas so/ /de yang gang zhe na/ mi 'dra ba'i rgyu zhes bya ba smras te/ de lta bu ni rnam pa gzhan gyis tshol ba yin no/ /rgyu mi 'dra ba rnams bstan pa'i phyir rnam pa gsum zhes bya ba smras so/ / rang bzhin dang dbang phyug dang brtul zhugs drag po'i rgyu zhes bya ba ni rnam pa gsum po de ston par byed pa'o/ /rang bzhin dang dbang phyug dang brtul zhugs drag po zhes bya bar tshig rnam par sbyar te/ de dag kho na thar pa'i rgyu yin gyi gzhan ni ma yin no snyam pa'o/ /de la rang bzhin ni yon tan gsum gyi bdag nyid de/snying stobs dang rdul dang mun pa'i rang bzhin no/ /de nyid thar pa'i rgyu yin no snyam pa ste/ de skad du rang bzhin dang skyes bu'i khyad par shes pas grol bar 'gyur ro zhes bshad de/ rang bzhin ni rang bzhin gyi bdag nyid du gnas la/ skyes bu ni skyes bu'i bdag nyid du gnas te/de gnyis gcig pa nyid ma yin par shes pas grol bar 'gyur ro snyam mo/ /de'i gnyen por srid pa'i yan lag rnams las rnam pa gnyis su nye bar rab tu skye zhing 'byung ngo zhes thar pa 'di 'dra bar rtog par byed do/ /'di 'dra ba yang thar pa'i mtshan nyid ma yin no//'di ltar thar pa ni rgyu dang rkyen rnams kyis mngon par 'dus ma byas pa'i phyir 'dus ma byas pa'i mtshan nyid de ma rig pa'i rkyen gyis 'du byed rnams zhes bya ba ni 'du byed rnams rgyu dang rkyen las byung ba nyid yin gyi thar pa ni ma yin no zhes bya ba'i tha tshig go/ /yang kun nas nyon mongs pa 'byung ba dang 'brel ba kun nas 'brel ba ste/'di ltar 'du shes med pa pa nas shi 'phos nas 'dir nyon mongs pa kun du spyod pa'i sgo nas yang 'byung ngo / /de'i gnyen por kun nas nyon mongs pa dang bral ba'i mtshan nyid ces bshad de/ ma rig pa'i rkyen gyis 'du byed rnams zhes bya ba de ni skye ba dang 'brel ba ste zhes gang gsungs pa'o//srid pa'i lugs dang mthun pa gzugs med pa'i srid pa zhes bya ba ni de dag 'byung ba dang / 'byung ba las gyur pa'i gzugs thams cad nye bar zhi ba'i phyir gzugs med pa la thar par 'dod pas so/ /de'i gnyen por 'jig rten las 'das pa'i mtshan nyid ces bshad de/gzugs med pa'i srid pa ni 'jig rten pa kho na yin pas ma rig pa'i rkyen gyis 'du byed rnams zhes bya ba de ni srid pa'i lugs su 'byung bar yongs su brtag pa ste zhes gang gsungs pa'o/ /de la rnam pa thams cad yongs su brtag pa ni rnam pa dgu ste/rnam pa dgu ji lta bu zhe na/ srid pa'i yan lag rjes su 'brel ba'i sgo nas kun nas nyon mongs pa dang rnam par byang ba rab tu dbye bar yongs su brtag pa ni 'di ltar 'jig rten du 'dogs pa 'byung ba ji snyed pa de dag thams cad ni bdag tu mngon par zhen pa las 'byung ste zhes bya ba la sogs pa 'byung ba'i phyir ro//sems gcig tu yang dag par 'du ba'i sgo nas rten yongs su brtag pa ni de 'di snyam du sems te khams gsum pa 'di ni sems tsam ste/ srid pa'i yan lag gang dag de bzhin gshegs pas rab tu phye ste bka' stsal pa de dag thams cad kyang sems gcig la gnas pa dag go snyam mo zhes bya ba la sogs pa gsungs pa gang yin pa'o//rang gi las ma 'dres pa'i sgo nas thabs yongs su brtag pa ni de la ma rig pa ni bya ba gnyis su nye bar gnas pa yin te zhes bya ba la sogs pa gang yin pa'o/ /tha dad pa ma yin pa'i sgo nas rkyen gyi mtshan nyid du yongs su brtag pa ni de la ma rig pa'i rkyen gyis 'du byed rnams so zhes bya ba ni ma rig pa'i rkyen gyis 'du byed rnams rgyun mi 'chad pa dang rton pa'o zhes bya ba la sogs pa gsungs pa gang yin pa'o//g.yo med pa'i phyir zhes bya ba ni srid pa'i yan lag rnams rkyen la rag las te skye ba'i phyir ro//lan gsum gyi rgyud du 'brang ba'i sgo nas bden pa la 'jug par yongs su brtag pa ni de la ma rig pa dang sred pa dang len pa ni nyon mongs pa'i lam gyi rgyun mi 'chad pa'o zhes bya ba la sogs pa gsungs pa gang yin pa ste/ lam gsum po 'di dag gi nang nas 'bras bur gyur pa gang dag yin pa de dag ni sdug bsngal gyi bden pa nyid do//rgyur gyur pa gang dag yin pa de dag ni kun 'byung gi bden pa nyid do/ /rnam pa gcig tu na nyon mongs pa dang las kyi lam dag ni kun 'byung gi bden pa nyid do/ /sdug bsngal gyi lam ni sdug bsngal gyi bden pa nyid do//sngon gyi mtha' la sogs par yongs su brtag pa'i sgo nas nus pa dang mi nus pa'i gnas la 'jug par yongs su brtag pa ni ma rig pa'i rkyen gyis 'du byed rnams zhes bya ba ni sngon gyi mtha' ba'i ltos pa'o zhes bya ba la sogs pa gsungs pa gang yin pa'o//sdug bsngal kun du 'byung ba'i sgo nas mngon pa'i nga rgyal can mngon pa'i nga rgyal med pa la 'jug pa yongs su brtag pa ni sdug bsngal nyid cha phra ba yongs su mi shes pa dang / yongs su shes pa mngon pa'i nga rgyal byed pa'i phyir te/ yang srid pa'i yan lag bcu gnyis po de dag gi rgyus sdug bsngal nyid gsum 'byung ste zhes bya ba la sogs pa gsungs pa gang yin pa'o//'du byed kyi sdug bsngal gang yin pa de ni cha phra ba yin te/ yongs su mi shes pa la yongs su shes so snyam du mngon pa'i nga rgyal byed pa'am/ yongs su shes pa la yongs su mi shes so snyam du mngon pa'i nga rgyal byed ces bya ba'i tha tshig go//rgyu dang rkyen las 'byung ba dang / skye ba dang 'jig pa dang 'brel zhes bya ba rnam pa gnyis kyis thog ma med pa nyid gnas pa'i phyir zhes bya ba smras so/ /ci zhig ston par byed ce na/ ma rig pa ni sems can rnams dmigs pa la kun du rmongs par byed pa dang /'du byed mngon par 'grub pa'i rgyu yang 'byin to/ /gal te 'di lta ste/ las dang nyon mongs pa dag gi rnam pa 'dis 'khor bar 'jug pa yin na/ de lta na ni 'o na de nyid las grol ba yongs su btsal bar bya ba'i gtso bo las ni ma yin te/ ma rig pa ni bya ba gnyis su nye bar gnas te zhes bya ba la sogs pa nas 'chi ba yang bya ba gnyis su nye bar gnas pa yin te zhes bya ba'i bar gsungs pa gang yin pa'o//de las gzhan pa dbang phyug tu smra ba rnams ni dbang phyug las thar pa rtogs par byed de/ de mnyes par byas pas sems can rnams 'khor ba'i thibs po las grol bar 'gyur ro snyam mo//de'i gnyen por rang gi rigs kyi rgyu las byung ba zhes bya ba smos te/ ci zhig ston par byed ce na/ ma rig pa la sogs pa de dag ni rang gi rigs dang mthun pa'i rgyu las byung ba yin gyi/ gang gis na de rab tu mnyes par byas pas ma rig pa la sogs pa'i srid pa'i yan lag rnams mi 'byung bar 'gyur ba dbang phyug rab tu 'khrugs pa las byung ba ni ma yin no zhes bya ba ste/de la ma rig pa'i rkyen gyis 'du byed rnams so zhes bya ba ni ma rig pa'i rkyen gyis 'du byed rnams rgyun mi 'chad pa dang rton pa'o zhes bya ba nas skye ba'i rkyen med pas rga shi nye bar zhi zhing rton pa med do zhes bya ba'i bar gsungs pa gang yin pa'o//de las gzhan pa gcer bu pa rnams ni dka' thub drag pos thar pa yongs su tshol bar byed de/ de'i gnyen por nyon mongs pa dang las kyi kun nas nyon mongs pa'i rgyu las byung ba'i phyir bde ba'i rgyu las byung ba ma yin pa zhes smras so//ci zhig ston par byed ce na/ 'di ltar dka' thub ni skra 'bal ba dang / gcer bur 'dug pa dang / khrus mi byed pa la sogs pa drag po'i sdug bsngal zhes bya'o/ / de lta bas na gal te bde bar 'khor ba'i gzeb tu nges par 'ongs pa zhig yin na ni/ dka' thub drag po'i rgyu des 'khor ba'i gzeb las thar bar 'gyur ba zhig na/ gang gi phyir las dang nyon mongs pa dag gis 'khor bar 'khyams pa de'i phyir dka' thub drag pos thar ba ma yin te/ de la ma rig pa dang sred pa dang /len pa ni nyon mongs pa'i lam gyis rgyun mi 'chad pa'o/ /'du byed dang srid pa ni las kyi lam gyis rgyun mi 'chad pa'o/ /lhag ma rnams ni sdug bsngal gyi lam gyis rgyun mi 'chad pa'o zhes gang gsungs pa'o/ /de las gzhan pa 'jig rten rgyang pan pa rnams ni rgyu med pas thar pa tshol lo//'di lta ste dngos po rnams ni rang gi ngang kho nas 'jig pas 'di dag gi zhig pa mya ngan las 'das pa la rgyu 'ga' yang med de/ de skad du srog ni 'di kho nar 'tsho bar zad kyi tshe phyi ma med do zhes 'dzer to/ /de'i gnyen por sngon dang mtha'i bar zhes bya ba la sogs pa smras te/mtha'i bar ni sngon gyi mtha'i rgyu las byung ba'i phyir la/ phyi ma'i mtha' ni mtha'i bar gyi rgyu las byung ba'i phyir ro/ /'dir 'thad pa smras pa/ gzhan du na ni sems can sna tshogs su mi 'gyur ro/ /sems can rnams sna tshogs pa ni ngo bo nyid sna tshogs pa'o//rgyu med pa nyid yin na der mi 'gyur ro snyam du bsams pa ste/ ma rig pa'i rkyen gyis 'du byed rnams zhes bya ba gang yin pa de ni sngon gyi mtha' la ltos pa'o zhes bya ba nas de bzhin du ma rig pa 'gags pas 'du byed rnams 'gag ces bya ba de ni 'gag pa rgyun 'chad pa ste zhes bya ba'i bar gsungs pa gang yin pa'o//thar pa gzhan yongs su tshol ba zhes bya ba ni thar pa gzhan kho na yongs su tshol ba'o/ /thar pa de yang rnam pa bzhir yongs su rtog par byed de/ thar pa ni zhes bya ba la sogs pa ni thar pa rnam pa bzhi po de bye brag tu ston par byed pa'o/ /de dag ni 'di 'du byed kyi sdug bsngal nyid dang rjes su 'brel ba'i phyir 'du byed kyi sdug bsngal nyid dang rjes su 'brel pa la thar par rtog par byed de/'di ltar 'du shes med pa la thar par mngon pa'i nga rgyal byed do/ /de la 'du byed kyi sdug bsngal nyid dang rjes su 'brel ba'i phyir thar pa'i mtshan nyid du rnam par mi bzhag ste/thar pa ni sdug bsngal thams cad nye bar zhi ba'i mtshan nyid dang zhes gang smra ba ste/ ma rig pa'i rkyen gyis 'du byed rnams zhes bya ba nas skye mched drug ces bya ba'i bar de ni 'du byed kyi sdug bsngal nyid do zhes bya ba la sogs pa gsungs pa gang yin pa'o/ /rgyu dang rkyen dag las yongs su brtag par bshad de/mtha'i bar yang rgyu dang rkyen las byung ba'i phyir zhes bya ba ni ma rig pa'i rkyen gyis 'du byed rnams zhes bya ba ni 'du byed rnams rgyu dang rkyen las 'byung ba ste/ lhag ma rnams kyang de bzhin no zhes 'byung ba'i phyir ro/ /phyi ma'i mtha' yang skye ba dang 'brel ba'i phyir zhes bya ba ni ma rig pa'i rkyen gyis 'du byed rnams zhes bya ba de ni skye ba dang 'brel ba ste/lhag ma rnams kyang de bzhin no zhes 'byung ba'i phyir ro/ /ji lta zhe na/ rnam par shes pa nas tshor ba zhes bya ba'i bar de ni da ltar byung ba'i ltos pa'o zhes gsungs pa'i phyir te/ da ltar byung ba gang yin pa de ni mtha'i bar yin te/mtha' gnyis kyi bar gang yin pa de mtha'i bar yin pa'i phyir ro/ /de rgyu dang rkyen las byung ba'i phyir zhes bya ba ni ma rig pa dang / 'du byed las byung ba'i phyir zhes bya ba'i tha tshig ste/ skye ba ni nyon mongs pa dang las kyi rgyu las byung ba'i phyir ro/ /de ltar na ma rig pa dang 'du byed dag ni sngon gyi mtha'i dang po nyid du rab tu 'gyur ro//yang srid pa nas srid pa zhes bya ba'i bar de ni phyi ma'i mtha' ba'i ltos pa ste zhes gang gsungs pa ste/ phyi ma'i mtha' gang yin pa de ni ma 'ongs pa zhes bya la/ de skye ba dang 'brel ba'i phyir ro/ /da ltar byung ba'i ming dang gzugs zhes bya ba ni mtha'i bar nyid du rab tu 'gyur te/de la sred pa dang len pa tshor ba la sogs pa dang mtshungs par ldan pa gnas rnam par shes pa dang lhan cig pa ni ming nyid yin no/ /srid pa ni las yin pa'i phyir la las ni rgyur byas pa'i gzugs yin pa'i phyir skye mched lnga po dag gzugs nyid yin no//'gag pa'i chos can yin pa'i phyir 'gags pa ni dang po nyid du rab tu 'gyur te/ 'di ltar sred pa dang len pa nyid 'gags pa ni ma rig pa zhes bya ba la/ srid pa las 'gags na 'du byed rnams zhes bya'o/ /de ltar na ma rig pa dang 'du byed dag kyang bar dang phyi ma'i mtha' nyid du rab tu 'gyur la/phyi ma'i mtha' sred pa dang len pa rnam shes dang po dang bar ma nyid du rab tu 'gyur te/ dngos po khyad par med pa'i phyir dang / gnas skabs kyi dbang gis ming gzhan du btags pa'i phyir ro/ /de ltar na dang po nyid ma nges pa'i phyir zo chun gyi 'khrul 'khor bzhin te/ rnam pa gnyis kyis thog ma med pa nyid du yongs su brtag pa bshad pa yin no//de nyid kyi phyir rnam pa thams cad yongs su brtag pa ni rnam pa dgu ste zhes bshad de/ rnam pa gnyis kyis thog ma med pa nyid du yongs su brtag par 'byung ba'i phyir ro/ /byis pa rnams srid pa'i lugs su 'byung ba'i phyir sna tshogs nyid du yongs su brtag pa ste/ji lta zhe na/ 'di ltar ma rig pa'i rkyen gyis 'du byed rnams zhes bya ba de ni srid pa'i lugs su 'byung bar yongs su brtag pa ste lhag ma rnams kyang de bzhin no zhes 'byung ba'i phyir ro/ /'dod pa dang gzugs med pa'i sred pa rnams kyis zhes bya ba ni rgyu sna tshogs pas 'bras bu sna tshogs pa nyid du shes par byas pa yin te/de'i phyir sna tshogs pa nyid du yongs su brtag pa zhes bshad do/ /sred pa smos pa ni srid pa yongs su gzung bar bya ba la de'i nus pa lhag par shes par bya ba'i phyir ro/ /rnam pa thams cad yongs su brtag pa rnam pa dag ni de lta bu yin par shes par bya ste/rnam pa thams cad kyis rten cing 'brel bar 'byung ba so sor brtag pa zhes bya ba'i tha tshig go/ /de dag thams cad kyang ji skad bshad pa'i rnam pa dgur zad de de las lhag pa'i rnam pa med pa'i phyir ro/ /de lta bu ni mi gnas pa'i lam sgrub pa'i khyad par rnam par gzhag pa yin no//mi gnas pa'i lam sgrub pa'i khyad par bstan nas/ de'i 'bras bu ni rnam pa bdun du bstan te/ ji lta zhe na/ gnyen po dang ni mi mthun pa'i/ /phyogs nyams pa dang sgrub pa dang / /gnas pa dang ni ting 'dzin dang / /bsam pa dag ni thob pa dang //nus pa'i sgo nas 'bras bu 'di/ /rnam pa bdun du rnams shes bya/ /gnyen po'i khyad par thob pa dang / /mi mthun pa yi phyogs nyams pa/ /zhes bya ba rnam pa gnyis su bya ba'i phyir dang / sgrub pa'i khyad par thob pa dang / gnas pa'i khyad par thob pa zhes bya ba rnam pa gnyis su byas pa'i phyir/'bras bu rnam pa bdun du 'gyur ro/ /rgyu yi rjes su byed pa'i phyir/ /de yang khyad par 'phags par bshad/ /sa drug pa la mi gnas pa'i lam gyi khyad par thob pa gang yin pa de sa lnga pas chos khyad du 'phags pa'i phyir 'bras bu gang yin pa de yang ches khyad par du 'phags par 'gyur ro//ci'i phyir zhe na/ rgyu yi rjes su byed pa'i phyir/ /rten cing 'brel bar 'byung ba yi/ /zhes bya ba'i tha tshig go/ /gnyen po ji ltar rigs par ni/ /rnam par thar pa'i sgo sgom pa'o/ /ji lta bu zhe na/ de la rnam par thar pa'i sgo stong pa nyid ni rnam pa gsum gyis zhes bya ba ste/de la gang zag la bdag med pa rnam par gzhag pa dang / chos la bdag med pa rnam par gzhag pa dang / de gnyi ga'i bya ba med pas byed pa po med par mthong bas so/ /de de ltar rten cing 'brel bar 'byung ba la rnam pa bcur so sor rtog cing zhes gang gsungs pa ni ji skad bshad pa'i rnam par ro//ji lta zhe na/ bdag med pa dang / srog med pa dang gang zag med par gang zag la bdag med par mthong zhes bya ba'i tha tshig ste/ /gsum bshad pa ni gdul ba'i dbang gis gang zag gi rnam grangs shes par bya ba'i phyir ro/ /gang zag de ni rtag pa dang mi rtag pa nyid kyi nyes par 'gyur ba'i phyir bdag med pa nyid yin no//ngo bo nyid kyis stong pa zhes bya ba ni chos la bdag med par mthong ba zhes bya ba'i tha tshig go/ /chos rnams ni ngo bo nyid kyis stong pa nyid yin te/ rten cing 'brel bar 'byung ba yin pa'i phyir dang / kun brtags pa'i ngo bo nyid med pa'i phyir ro//de nyid kyi phyir bdag med pa yin te/ bdag kyang ngo bo nyid kyi rnam grangs yin pa'i phyir la/ ngo bo nyid kyang bdag gi rnam grangs yin pa'i phyir brgya byin dang dbang po bzhin no/ /byed pa po med pa dang / tshor ba po med par so sor rtog pa'i tshe zhes bya ba ni de gnyi ga'i bya ba med pas te/gang zag la brten pa'am chos la brten pa'o/ /byed pa po la brten pa dang / las la brten pa de nyid bya ba yin te/ de yang de gnyis med pa'i phyir med do/ /byed pa po med pa zhes bya ba ni gang zag med pa'i phyir dang / chos rnams kyang g.yo ba med pa'i phyir bya ba med pa ste/g.yo ba med pa nyid ni skad cig ma yin pas skye ba'i dus ma gtogs par bya ba'i dus na med pa'i phyir ro/ /stong pa nyid kyi rnam par thar pa'i sgo skyes pa yin no zhes bya ba ni ji skad bshad pa'i rnam pa gsum po so sor rtog nus pa'i phyir zhes bya ba'i tha tshig go/ / mtshan ma med pa ni rnam pa gsum gyis yongs su ston to/ /ji lta zhe na/ de srid pa'i yan lag de dag gi rang bzhin 'gags shing zhes bya ba ni mi mthun pa'i phyogs yid tsam nyams pa'o/ /mi mthun pa'i phyogs yid tsam nyams pa ni srid pa'i yan lag rnams kyi rang bzhin 'gags pa yin par shes par bya'o//ji lta zhe na/ mtshan ma med pa'i rnam par thar pa ni rgyu mtshan yin la de cung zad nyams pa ni yid tsam nyams pa ste/ yid tsam skyur ba bzhin no/ /sems can gyi don du mtshan ma kun du spyod pa'i phyir gtan du spangs pa ma yin no zhes bya ba'i tha tshig go/ /mi mthun pa'i phyogs de yid tsam nyams pa ni kun nas nyon mongs par mi byed pa'i phyir/srid pa'i yan lag rnams kyi nyon mongs pa'i rang bzhin gang yin pa de 'gags pa yin gyi/ sems can gyi don du srid pa'i yan lag rnams kun du ston pa'i phyir srid pa'i yan lag rnams nyid 'gag par 'gyur ba ni ma yin te/de ltar na mi mthun pa'i phyogs yid tsam nyams pa ni srid pa'i yan lag rnams kyi rang bzhin 'gags pa yin par shes par bya'o/ /rnam par thar pa shin tu nye bar gnas pa zhes bya ba ni gnyen po rnyed pa ste/ sangs rgyas kyi bar du mtshan ma med pa'i rnam par thar pa'i sgo'i rjes su 'jug pa'i phyir mtshan ma med pa'i gnyen po thob pa yin te/de lta bas na gnyen po rnyed pa yin no/ /chos kyi mtshan ma gang yang mi skye ba ste zhes bya ba ni mtshan ma kun du mi 'byung ba'o/ /de'i phyir mtshan ma med pa'i rnam par thar pa'i sgo skyes pa yin no zhes bya ba ni srid pa'i yan lag gi rang bzhin 'gags pa la sogs pa ji skad bshad pa'i rnam pa 'di dag gi phyir zhes bya ba'i tha tshig go//smon pa med pa yang rnam pa gsum gyis yongs su ston to/ /ji lta zhe na/ de de ltar stong pa nyid mtshan ma med pa la zhugs pa zhes bya ba ni gnas te stong pa nyid dang mtshan ma med pa la brten nas smon pa med pa 'grub pa'i phyir ro//'dod pa gang yang mi skye zhes bya ba ni rang bzhin te/ smon pa med pa ni 'dod pa med pa'i rang bzhin yin pa'i phyir ro/ /snying rje chen po sngon du gtong zhing sems can yongs su smin par bya ba ma gtogs par zhes bya ba ni khyad par te/ nyan thos kyi smon pa med pa'i rang bzhin yang mngon par 'dod pa med pa yin mod kyi de ni sems can smin par bya ba'i mngon par 'dod pa spangs pa'o//de lta bas na byang chub sems dpa'i smon pa med pa ni sems can yongs su smin par bya bar mngon par 'dod pas khyad du 'phags pa yin no/ /de ltar de'i smon pa med pa'i rnam par thar pa'i sgo skyes pa yin no zhes bya ba ni gnas la sogs pa ji skad bshad pa'i rnam pa gsum dag gis zhes bya ba'i tha tshig go//re zhig gnyen po'i khyad par thob pa'i sgo nas mi gnas pa'i lam sgrub pa'i khyad par gyi 'bras bu'i khyad par ni de ltar shes par bya'o/ /de la/ mi mthun phyogs nyams 'du shes gsum//rnam par bshig pa yin zhes bya/ /gang du zhe na/ sa ni lnga pa bzhi pa dang / /de bzhin du ni sa drug par/ /'du shes gsum po rim gyis ni/ /spangs rnam gsum du shes par bya/ /ji lta zhe na/ de rnam par thar pa'i sgo gsum po 'di dag sgom pa nas lnga pa la sems kyi bsam pa mnyam pa nyid dag gis bdag dang gzhan gyi 'du shes dang bral ba'o//bzhi pa la lhag par g.yo ba la sogs pa dang bral bar byed pa po dang tshor ba po'i 'du shes dang bral lo/ /drug pa 'di la ni mnyam pa nyid rnams kyis yod pa dang med pa'i 'du shes dang bral te/ de lta bu ni mi mthun pa'i phyogs nyams pa'i khyad par yin no//sgrub pa'i khyad par go cha dang / /skyes bu'i byed pa'i sgo dag nas/ /rnam gnyis yan lag rab tu bstan/ /sbyor ba snying rje lhag pa yin/ /snying rje lhag pa nyid ji lta bu zhe na/ 'di ltar de byang chub kyi yan lag yongs su ma grub pa rnams yongs su grub par bya ba'i phyir snying rje chen po sngon du btang ste de bas kyang shas cher shin tu brtson par byed do zhes 'byung ba'i phyir ro//sems can rnams ni nyon mongs las/ /thar bya'i phyir dang de bzhin du/ /skye tshogs gtan du spang bya'i phyir/ /go cha'i sgrub pa nyid yin no/ /nyon mongs pa'i 'ching ba kun nas sbyor ba dang /tshogs rnams rnam par gcod pa ni spong ba'o/ /de sems can gyi don byed pas khyad par can nyid de/ mi gnas pa'i mya ngan las 'das pa nyid de la sbyor ba'o/ /ji lta zhe na/ de 'di snyam du sems te/ kun du sbyor ba las ni 'dus byas 'byung ngo / /bral ba las ni 'dus byas mi 'byung ngo zhes bya ba nas de bzhin du 'du byed rnams shin tu zhi ba 'thob pa yang mi bya'o snyam mo zhes bya ba'i bar 'byung ba'i phyir ro//skyes bu byed pa'i sgrub pa ni rnam pa gnyis te/ rnam par sun 'byin pa sbyor ba'i lam dang / spong ba'i lam mo/ /nyes pa mang po'i rkyen chags par so sor rtog pa ni kye rgyal ba'i sras dag de de ltar 'du byed du gyur pa nyes pa mang po'i skyon chags shing zhes gsungs pa gang yin pa'o//rang dang spyi'i mtshan nyid rang bzhin gyis med par so sor rtog pa ni mdo las rang bzhin gyis ngo bo nyid med pa dang ma skyes pa dang ma 'gags par so sor rtog pa na zhes gsungs pa gang yin pa de/ngo bo nyid med pa nyid kyis ni rang dang spyi'i mtshan nyid med par ston par byed do/ /de la gnas pa'i khyad par ni ye shes dang snying rje'i khyad par dang ldan pas mi gnas pa'i lam nyid yin no/ /gnas pa/ de yi khyad par mdor bsdu na/ /rnam pa gnyis su shes par bya//shes rab nyid du snang ba'i phyir/ /chags pa med pa'i ye shes sgo/ /ji lta zhe na/ mdo las snying rje chen por mngon par bsgrub pa dang / sems can gyi tshogs yongs su mi gtong bas chags pa med pa'i ye shes la mngon par phyogs pa zhes bya ba shes rab kyi pha rol tu phyin pas gnas pas snang ba'i tshul gyis mngon sum du 'gyur ro zhes 'byung ba'i phyir ro//de la de bzhin gshegs pa yi/ /ye shes chags pa med ces brjod/ /shes rab grub pa med pa'i phyir/ /snang ba'i tshul shes yongs su bsgrags/ /gzhan yang / 'khor ba dang ni mya ngan 'das/ /mnyam pa nyid du rtogs pa'i phyir//mi 'grogs shing ni mi gnas te/ /de'i tshogs ni yongs su ma rdzogs pa'i phyir/ tshogs yongs su ma rdzogs pa ni/ byang chub kyi yan lag gi tshogs yongs su ma rdzogs pa'i phyir ro/ /de ji lta bu zhe na/ de ye shes de lta bu dang ldan zhing zhes bya ba nas/ de bzhin du byang chub kyi yan lag yongs su ma rdzogs pa'i phyir de la yang mi gnas te zhes bya ba'i bar 'byung ba'i phyir ro/ /bcu tshan lhag ma gsum dag gi/ /ting 'dzin bsam par nus pa dag /grangs bzhin du ni shes bya ste/ /mdor na 'di ni bsdus pa yin/ /de'i 'khor ting nge 'dzin rnams dang bcas pa zhes bya ba'i tha tshig go//de yang rgyu bzhis zhes bya ba la sogs pa ji lta bu zhe na/ gang zag la bdag med pa la dmigs pa ni 'jug pa stong pa nyid ces bya ba'i ting nge 'dzin skye bar 'gyur ro zhes gsungs pa gang yin pa'o/ /chos la bdag med pa la dmigs pa la ni ngo bo nyid ces gsungs pa gang yin pa'o//de la 'dzin pa stong pa nyid la dmigs pa ni don dam pa stong pa nyid ces gsungs pa gang yin pa'o/ /de'i gnas kun gzhi rnam par shes pa la dmigs pa ni chen po stong pa nyid ces gsungs pa gang yin pa'o/ /'jug pa'i rnam par shes pa la dmigs pa ni mtshungs par ldan pa stong pa nyid ces gsungs pa gang yin pa ste rgyu dang po'o//bag yod pa yongs su 'dzin pas gzhi rnam par gzhag ste/ rnam pa stong pa nyid ces gsungs pa gang yin pas so/ /ji lta zhe na/ shin tu bsgoms pa'i phyir bsgom pa chog mi shes pas na bag med par mi 'gyur ba'i phyir te rgyu gnyis pa yin no//khyad zhugs pa thob pas ni bdun pa rnam par gzhag ste mngon par sgrub pa stong pa nyid ces gsungs pa gang yin pa'o/ /ji lta zhe na/ yon tan rnams khyad zhugs pa thob par sgrub pas so/ /rgyu nyid kyis ni lhag ma rnams te ji lta zhe na/ shes bya'i sgrib pa rnam par dag pa'i rgyur gyur pas ni ji lta ba bzhin du rnam par mi rtog pa stong pa nyid ces gsungs pa gang yin pa'o//ji lta zhe na/ rnam par rtog pa ni sgrib pa yin pas rnam par mi rtog pa'i sgo nas kun brtags pa'i chos kyi stong pa nyid rtogs pa'i phyir sgrib pa dang bral bar 'gyur bas so/ /sems can yongs su smin par byed pa'i rgyur gyur pas ni lta ba dang bcas pa stong pa nyid ces gsungs pa gang yin pa'o//ji lta zhe na/ stong pa nyid bsgoms pa na snying rje dang bral ba'i phyir nyan thos bzhin du sems can la mi lta bar bsgom pa ma yin gyi/ 'o na ci zhe na/ sems can gyi don gyi bsam pa kho nas bsgom mo//bsams bzhin du srid pa yongs su 'dzin pa'i rgyur gyur pas ni bral ba dang ma bral ba stong pa nyid ces bya ba'i ting nge 'dzin skye bar 'gyur te zhes gsungs pa gang yin pa'o/ /ji lta zhe na/ nyon mongs pa rnams dang bral ba ni bral ba ste/ slob dpon gyis kun nas nyon mongs pa dang mi ldan pa zhes smras pa gang yin pa'o//srid pa dang ma bral ba ni ma bral ba ste/ srid pa'i mtshan nyid dang mi ldan pa ma yin pa zhes smras pa gang yin pa'o/ /'di ni rgyu bzhi pa yin te/ 'di dag gis ting nge 'dzin gyi khyad par rnam par gzhag par shes par bya'o/ / de la mi phyed pa'i bsam pa nyid ji lta zhe na/ brtan pa'i phyir te/ brtan pa nyid ni 'jigs pa med pa'i phyir ro/ /de yang don dgur rig par bya ste/ ji lta zhe na/ dmigs pa la mos pas nges pa'i bsam pa nyid ces gsungs pa gang yin pa'o/ /ji lta zhe na/ dmigs pa ni de bzhin nyid kho na yin gyi gzhan ni ma yin no zhes/de ltar lhag par mos pas nges pa'i phyir nges pa'i bsam pa nyid yin no/ /'khrul pa la mi mjed pa ni/ dge ba'i bsam pa nyid ces gsungs pa gang yin pa ste/ gser bzang po bzhin te/ don zab cing rgya che ba la nges pa dag dang / sems can log par sgrub pa dag gis 'gyur ba med do//gsang ba'i gnas la mi skrag pa zab pa'i bsam pa nyid ces bya ba ste/ de bzhin gshegs pa'i gsang ba la sogs pa zab mo dag mthong na skrag par mi 'gyur ba'o/ /theg pa las mi g.yo ba ni phyir mi ldog pa'i bsam pa nyid ces bya ba ste/ de byang chub chen po la sems pas mi dge ba'i grogs po dag gis mi bzlogs pas na theg pa las mi g.yo ba yin no//brtson 'grus rtsom pa ni rgyun mi gcod pa'i bsam pa nyid ces bya ba ste/ sems can yongs su smin par bya ba la 'jug cing sangs rgyas kyi chos rnams yang dag par sgrub pa ni bar skabs su brtson 'grus lhod pa dang 'dor bar mi 'gyur ba'o//ser sna dang 'chal ba'i tshul khrims kyi dri ma dang bral ba ni dri ma med pa'i bsam pa nyid ces bya ba ste/ dri ma gnyis dang bral bas bsam pa dri ma med pa nyid yin no/ /sems can gyi don byed pa ni mtha' yas pa'i bsam pa zhes bya ba ste/bsam pa mtha' yas pa nyid ni sems can gyi khams sgo nga dang mngal nas skye ba la sogs pa'i bye brag gis tha dad pa ji snyed pa thams cad theg pa gsum la dgod par bya'o snyam pa'o/ /rnam par thar pa mchog 'dod pa ni ye shes la mngon par 'dod pa'i bsam pa nyid ces bya ba ste/thams cad mkhyen pa'i ye shes mngon par 'dod na thar pa mchog don du gnyer ba'i phyir ro/ /sems can yongs su smin par byed pa'i sbyor ba ni thabs dang shes rab dang ldan pa'i bsam pa nyid ces bya'o/ /rgyu gnyis kyis na sems can rnams yongs su smin par bya bar brtson par mi 'gyur te/snying rje ni sems can gyi don bya ba'i thabs yin na snying rje chen po dang bral ba dang / shes rab kyi khams dang dbang po dang / bag la nyal ba la sogs pa ji lta ba bzhin yongs su shes nas sems can gyi don la rab tu brtson pa yin na/ shes rab dang bral ba'o/ /de gnyis dang mtshungs par ldan pa ni rgyun mi 'chad par sems can yongs su smin par byed do//de'i byang chub sems dpa'i bsam pa de dag ni de bzhin gshegs pa'i byang chub la shin tu song ba yin no zhes bya ba ni byang chub sems dpa' sa 'di la shes rab kyi pha rol tu phyin pa phul du phyin pa thob pas gnas pa ni sangs rgyas kyi byang chub la ring du zhugs pa yin pa'i phyir ro//phas kyi rgol ba tshar bcod pa'i nus pa ni phas kyi rgol ba mu stegs can thams cad kyi brtson 'grus phyir mi ldog pa ste/ 'di ltar byang chub sems dpas de dag nyid tshar gcod nus pa'i phyir ro/ /the tshom gcod pa'i nus pa'i ye shes kyi/sa yul gang yang rung ba de la yang dag par zhugs pa ni the tshom thams cad gcod pas so/ /theg pa las mi g.yo ba'i nus pa ji lta bu zhe na/ skyon du mthong bas nyan thos dang rang sangs rgyas kyi theg pa dag las log pa'i phyir theg pa chen po las mi g.yo ba ste/theg pa chen po ni yon tan thams cad kyi gzhi yin pa'i phyir ro/ /gsang ba'i gnas la mos pa'i nus pa ni sangs rgyas bcom ldan 'das kyi sku la sogs pa gsang ba'i bye brag gis shes par bya bar mngon du phyogs pa na gcig tu nges pa yin te/ gsang ba'i gnas dag yin no zhes mos pa'i phyir ro//rnam par mi 'thor ba'i nus pa ci'i phyir zhe na/ bdud phyir rgol ba thams cad dang / nyon mongs pa kun du 'byung ba rnams kyis dbrog par mi nus pas na de dag gis rnam par mi 'thor ba'i phyir ro/ /nyon mongs pa'i sgrib pa rnam par dag pa'i dbang du byas nas gnyen po brtan pa'i nus pa ji lta bu zhe na/byang chub sems dpa' byang chub sems dpa'i ye shes kyi snang ba'i de bzhin nyid la shin tu rnam par gnas pa na kun brtags pa'i chos la mngon par zhen pa'i nyon mongs pa rnams kyis gnod par mi 'gyur ba gnyen po brtan pa yin no//gnyen po shin tu rgyas pa'i nus pa ji lta bu zhe na/ stong pa nyid la sogs pa'i chos rnams mngon du byed pa na de dag yongs su bsgom pa'i phyir gnyen po shin tu rgyas shing chen po nyid du 'gyur ro/ /sems can yongs su smin par byed pa'i nus pa ci'i phyir zhe na/ sems can gyi don thabs snying rje chen po dang shes rab kyis rnam par dpyad pa rnam par brtags pa dag dang mtshungs par ldan pa ni sems can yongs su smin par byed nus pa yin no//shes bya'i sgrib pa rnam par dag pa'i nus pa ji lta bu zhe na/ byang chub kyi phyogs dang mthun pa'i chos stobs dang mi 'jigs pa la sogs pa gang dag yin pa de dag mngon par sgrub cing de dag dang 'brel ba na sems can yongs su smin par bya bar nus pa yin no//nus pa'i khyad par gyis yongs su bsdus pa'i chos de dag la mthun pa ni de dag dang mthun par gnas pa'o/ /don gyi gzungs thob par yongs su ston to zhes bya ba ni yi ge'i gzungs ma yin pa'o//lhag mthong dang zhi gnas kyi snang ba ni rgyu mtshan yin te/ de la rab tu brtson pa des 'thob bo/ /de'i sgrib pa las rnam par grol nas zhes bya ba ni sgrub pa'i sgrib pa las rnam par grol nas te/ sgrub pa'i don la rig pa'i phyir/ zhes bya ba'i tha tshig go/ /chos kyi mdzod thob pa yin no zhes bya ba ni rten cing 'brel bar 'byung ba la rnam pa bcur so sor rtog pa la sogs pa'i yon tan dang ldan pa'i phyir ro zhes bya ba'i tha tshig go//thabs dang shes rab dag nyid mi gnas pa'i mya ngan las 'das pa yin pa'i phyir te/ thabs snying rjes ni mya ngan las 'das pa la mi gnas la shes rab kyis ni 'khor ba la mi gnas pas so//yul gyi cha dpag tu yod pa ni 'od kyi dkyil 'khor ro/ /yul gyi cha dpag tu med pa'i 'od yin pa'i phyir ro/ /kun du 'dzin pa dang / yongs su skems pa dang / yongs su 'jog pa dang / g.yo bar byed pa dag gis zhes bya ba'i tha tshig ste/rlung gi dkyil 'khor bzhis zhes gsungs pa gang yin pa'o/ /bdud kyi lam rnams kyi spyod pa ni 'jug pa dag ste/ bshad pa la/ bdud bzhi'i lam gyi spyod pa ngan pa dag gis zhes bya ba ni zhes bshad pa gang yin pa'o/ /snga ma'i tshul gyis zhes bya ba ni sa dang por bstan pa zhes bya ba'i tha tshig go//sa bdun pa yi 'brel pa ni/ /sa bdun pa ni rgyu lnga yis/ /rnam par gzhag par 'dod pa ste/ /'du mi byed la dga' ba yi/ /gnyen po rnam gzhag dang po yin/ /de yi rnam g.yeng spong ba yis/ /gzhag pa gnyis par 'dod pa yin/ /zung du 'brel ba'i lam thob nas/ / gsum pa mngon par brjod pa yin/ /snga phyi yi ni khyad par gyis/ /gzhag pa bzhi par 'dod pa yin/ /de yi 'bras bu rnam gzhag pas/ /gzhag pa lnga par brjod pa yin/ /dang po 'du byed med dga' ba'i/ /gnyen po thabs dang shes pa las/ /yang dag 'byung ba'i lam gzhan rtsom/ / khyad par ldan pa bcu po yin/ /ci'i phyir zhe na/ gang phyir byang chub sems dpa' 'di/ /mtshan med pa yi yul can gyi/ /shes rab phal cher mngon byed pas/ /'jug phyir mngon du mi byed la/ /phyir zhing blo dga' 'jug pa la/ /ji ltar yang ni ma yin pa/ /de'i phyir de yi gnyen por ni//lam sgom rnam pa bcu yin no/ /ji lta zhe na/ chags pa med pa'i ye shes la mngon par phyogs pa'i shes rab kyi pha rol tu phyin pa la gnas pa gang yin pa de mngon du gyur pas mngon par 'du byed pa med pa nyid la rtsom pa med pa nyid la sems dga' ba yin gyi mngon par mtho ba'i lam mngon par 'du byed pa la ni ma yin te/de'i phyir mngon par 'du byed pa med pa la mngon par dga' ba'i gnyen po zhes bya bar rnam par gnas so/ /de ltar na byang chub sems dpa' la mngon par 'du mi byed pa las bslang ste/ /mngon par 'du byed cing 'byung ba'i lam mngon par mtho ba zhes bya ba la 'jug par ston pa yin no//thabs ni snying rje ste/ des sems can rnams la lta'o/ /de'i phyir chos la bdag med pa'i ye shes sems can la lta ba dang bcas pa'o/ /thabs dang shes rab kyis yongs su zin pa'i phyir mngon par mtho ba'i lam gnyen pos yongs su zin pa ste/de nyid lam gzhan yin no/ /de 'jig rten pa dang / 'jig rten las 'das pa gzhan las khyad par du 'phags zhes bya ba ni dang po ni gnyen po med pa'i phyir la/ cig shos ni srid pa la gcig tu rgyab kyis phyogs pa'i phyir ro/ /'di ni yon tan rnam pa bzhis khyad par du 'phags pa ste/longs spyod dang lus kyi khyad par gyi rgyu nyid la ji ltar 'dod pa zhes bya ba ni bsam pa'i dbang gis so/ /ji srid 'dod pa zhes bya ba ni dus la ltos pa ste/ 'khor ba ji srid kyi bar du gnas par lus dang longs spyod kyi khyad par ngo bo sna tshogs thob pa'i rgyu yang dag par sgrub pa'i phyir rgyu dang po yin te/bsod nams kyi tshogs chen po stsogs pa yang stsogs pa yin zhes gang gsungs pa'o/ /bdag la sogs pa la mngon par zhen nas tshad med pa sgom pa ni nyes par sbyong ba'o/ /de las kun du bsrung ba'i rgyu ni chos bdag med pa la 'jug pa rtogs pa'o/ / des na de ltar khyad par thob pa tshad med pa bsgoms pas sems can rnams la log pa mi sgrub ste/ tshad med pa bzhi mngon par sgrub pa yang mi gtong ba yin zhes gsungs pa gang yin pa ste rgyu gnyis pa'o/ /dge ba'i rtsa ba rnams kun du bsrung ba'i rgyu ni chos rnams la mngon par zhen pa med pa yin te/des na dge ba'i rtsa ba rnams khyad par du 'gyur ba'i rgyu gang dag yin pa de dag legs par 'phel bar byed do/ /ji lta zhe na/ bsod nams kyi ngo bo nyid kyi chos kyi tshogs gang dag yin pa de dag mngon par 'du byed pa ni gang dag gis de dag mngon par 'du byed pa'o/ /de dag kyang pha rol tu phyin pa rnams te/de dag legs par byed pas yongs su rdzogs par byed pas so/ /de'i khyad par 'thob pa'i rgyu 'phel ba'i phyir zhes bya ba la de'i zhes bya ba'i sgra ni 'dir longs spyod dang lus kyi khyad par dang sbyar te/ de thob par bya ba'i rgyu'o/ /de 'phel ba'i phyir te chos gang la yang mngon par zhen pa med pa yin zhes gang gsungs pa ste gsum pa'o//rgyu rnam bdun po gang yin pa/ /rgyu bzhi par ni 'dod pa yin/ /sems can rnams la phan 'dogs rgyu/ /sgo bdun dag nas brjod pa yin/ /ji lta zhe na/ gtso dang rjes mthun byed pa yis/ /bsam bzhin srid pa 'dzin pa yin//gtso bo dang mthun par byed pas/ gtso bo dam pas sems can gzhan gdul ba'i phyir gtso bor gyur cing de byed do zhes bya ste/ khams gsum pa'i rgyan rnam par sgrub pa yang mngon par sgrub pa yin no zhes gsungs pa gang yin pa'o/ /rgyan zhes bya ba'i sgra 'di ni/khams gsum pa'i rgyan zhes bya bar rim pa bzhin du sbyar bar bya ba yin no/ /nyon mongs rnams ni spong ba'i phyir/ /gnyen po nye bar ston pa'o/ /de ni nyon mongs pa spang ba'i phyir gnyen po nye bar ston te/ 'di ltar bdag nyid kun nas dkris pa dang / bag la nyal 'gags pas shin tu zhi zhing nye bar zhi bas so//kun nas dkris pa ni nyon mongs pa kun du 'byung ba ste/ de med pas zhi ba'o/ /bag la nyal ni/ nyon mongs pa'i sa bon te/ de med pas nye bar zhi ba'o/ /'di gnyi ga yang nyon mongs pa dang 'bar ba thams cad dang 'brel bas zhes bya bas bstan te/ 'bar ba ni nyon mongs pa'i bag la nyal yin no//'di ltar sems can thams cad kyi 'dod chags dang zhe sdang dang gti mug gi nyon mongs pa dang 'bar ba rab tu zhi bar bya ba mngon par sgrub pa yang mngon par sgrub pa yin zhes 'byung ba la rab tu zhi bar bya ba ni chos bstan pa yin te/ 'dis nyon mongs pa rnams rab tu zhi bar 'gyur bas so//gnod pa rab tu zhi bar byed pa ni sa lnga pa las gnod pa rnam pa bzhi po don dang bya ba brjed pa'i gnod pa dang / lta ba ngan pa dang / blo chung ba'i gnod pa dang / yongs su blangs pa'i nor ma sbas pa'i gnod pa dang / 'du ba dang 'god pa la rmongs pa'i gnod pa bshad pa gang yin pa ste/las bya ba rnam par phye ba tshad med pa'i bsam pa yang mngon par sgrub pa yin zhes gang gsungs pa'o/ /las bya ba ni byed pa'o/ /rnam par phye ba ni tha dad pa'o/ /de la byang chub sems dpa' rnams kyi bsam pa tshad med de thabs du ma mngon par bsgrub pa'i phyir ro//yang na de nyid tshad med pa yin te rnam pa mang ba'i phyir ro/ /de la bsam pa ni de sgrub par sems pa ste/ de'i phyir las bya ba las su bya ba de mngon par sgrub bo/ /chos mnyan pa'i phyir 'khor gyi dkyil 'khor rnams su sangs rgyas kyi zhing rnams su sems can rnams 'du ba nye bar sgrub pa ni sangs rgyas kyi zhing gi rgyan rnams sgrub pa yang mngon par sgrub pa yin zhes gang gsungs pa ste/'dir yang rgyan zhes bya ba'i sgra ni rim pa gzhan du sbyar ba yin no/ /bsod nams 'phel bar byed pa ji lta bu zhe na/ dad pa dang lhan cig pas gzugs kyi sku lta ba dang /chos mnyan pa dang / gus par smra ba dang / phyag 'tshal ba la sogs pa'i bsnyen pas bsnyen bkur bya ba dang / gdugs dang rgyal mtshan dang / ba dan la sogs pa rab tu dbul ba mchod pa sbyar ba rnams kyis te/ gzugs dang mtshan dang dpe byad bzang po'i rgyan rnam par sgrub ces gsungs pa gang yin pa'o//chos kyi 'khor lo rab tu bskor ba ji lta bu zhe na/ dbyangs dang yan lag thams cad rnam par phye bas rnam par dag pa'i rgyan mngon par sgrub pa yang mngon par sgrub po zhes gsungs pa gang yin pa ste/ dbyangs rnams dang / de bzhin gshegs pa'i gsang ba las bstan pa lta bu yan lag thams cad rnam par phye ba ni rnam pa tha dad pa ste/des rnam par dag pa'i phyir ro/ /byang chub gsum gyi rgyan ni de dang mthun par ston pa ste/ 'di dag gis byang chub gsum po brgyan par 'gyur ba'i phyir ro/ /de'i phyir de dag mngon par sgrub po/ / dris pa lung ston pa ji lta bu zhe na/ 'di ltar sems can gyi bsam pa brjod pa'i phyir/ bskal pa bgrangs pa'i mtshan nyid tha dad pa shes pa la yang 'jug pa yin zhes 'byung ba'i phyir te/ bskal pa bgrangs pa rnams kyi chos kyi mtshan nyid tha dad pa gang gis shes par 'gyur ba de dag la yang 'jug cing rtog par byed do//ji lta zhe na/ sems can gyi bsam pa brjod pa'i phyir te/ rab tu brjod pa'i phyir zhes bya ba'i tha tshig go/ /de ltar na sems can la phan 'dogs pa'i rgyu rnam pa bdun po 'di ni rgyu bzhi pa yin no/ /de dag gnyen po dang bcas pa/ /lam ni bcu po rnams yin te//stong pa nyid bsgom la sogs pa/ /gnyen po yin par shes par bya/ /stong pa nyid kyi ting nge 'dzin la sogs pa shin tu bsgoms pa'i yid dang yang ldan la/ bsod nams kyi tshogs chen po yang stsogs par byed pa 'di ni shin tu ya mtshan che ste/ ji lta zhe na/ stong pa nyid kyis ni chos kyi yang mi dmigs/mtshan ma med pa ni mtshan ma med/ smon pa med pas ni mi smon pa yin na/ tshogs stsogs par byed ces bya ba ngo mtshar che'o/ /de bzhin du gzhan la yang shes par bya'o/ /de yongs su 'dzin pa ni mngon par 'du byed pa la dga' ba bzlog pa'i phyir te/mngon par 'du byed pa med pa la dga' ba bzlog pa bzhin du shes par bya'o/ /ji lta zhe na/ ji ltar byang chub sems dpa' chags pa med pa'i ye shes la mngon par phyogs pa'i shes rab kyi pha rol tu phyin pa la gnas pa mngon du gyur pas mngon par 'du byed pa med pa nyid la sems dga' ba yin gyi/mngon par mtho ba'i lam mngon par 'du byed pa la ni ma yin pa mkhyen nas/ de la dga' ba bzlog pa'i phyir mngon par mtho ba'i lam bstan pa de bzhin du byang chub sems dpa' mngon par mtho ba'i lam mngon par 'du byed pa la brtson pas de mngon par 'du byed pa la dga' bar gyur na mi rung zhes mngon par mtho ba'i lam mngon par 'du byed pa la dga' ba bzlog pa'i phyir gnyen po yongs su 'dzin pa rnam pa bcu bstan pa mdzad do//snang bar gyur pa de dag mngon par bsgrubs pas zhes bya ba ni shes rab kyi yul du gyur pa rnams yang dang yang mngon sum du byed pas zhes bya ba'i tha tshig go//de yi mi mthun phyogs kyi ni/ /gnyen po gzhan rnams gnyis su brjod/ /tshad med rnam pa dag gis ni/ /gnyen po sgom pa gang yin dang / /'du byed med cing brtsal med par/ /'byung ba'i lam la sbyor ba'o//de yi rnam par g.yeng ba ni/ /de yi rnam par g.yeng ba ste/ /lam gzhan rtsom pa'i khyad par gyi/ /zhes bya ba'i tha tshig go/ /de la sgom rnam 'di dag ste/ gang dag gi don byed pa dang / /gnas gang yin dang gang gis dang / /ji ltar gang du'i bye brag gis/ /mdor na sgom pa'i rnam pa ni//bcu po 'di dag rab tu bsgrags/ /gang dag gi don byed pa dang zhes bya ba ni sems can rnams kyi ste/ sems can gyi khams tshad med pa la yang 'jug la zhes gsungs pa gang yin pa'o/ /sangs rgyas bcom ldan 'das rnams kyis sems can yongs su smin par mdzad pa dang /'dul ba'i phrin las tshad med pa la yang 'jug go zhes bya ba ni brtson pa mi gtang bar bya ba'i phyir thabs gang gis bya ba de tshig gnyis pas bstan te/ gnyi ga bya ba gcig pa'i phyir rnam pa gcig nyid yin no/ /'og ma rnams kyang de bzhin du shes par bya'o//gnas gang yin pa zhes bya ba ni/ 'jig rten gyi khams mang po tshad med pa la yang 'jug la zhes bya ba yin te des 'jig rten gyi khams mang po tshad med pa rnam par dag par byed pa yid ches par bya ba'i phyir ro/ /gang gis zhes bya ba ni rnam pa gnyis kyis so/ /ji lta zhe na/ chos tha dad pa tshad med pa la yang 'jug pa ni sems can gyi bsam pa dang bag la nyal tha dad pas chos bstan pa la tha dad pa nyid thabs yin pa'o//ye shes mngon par rdzogs par thugs su chud pa tshad med pa la yang 'jug go zhes bya ba ni sems can rnams kyi nyon mongs pa dang las sna tshogs pa shes par nus pa nyid do//bskal pa bgrangs pa tshad med pa rtogs pa la 'jug la zhes bya ba ni rnam pa gnyis te/ sems can rnams kyi dus kyi tshad nyid shes par nus par bya ba'i phyir ro/ /ji lta bu zhes bya ba ni rnam pa gsum gyis so/ /ji lta zhe na sems 'dra bar 'jug pa ni ji ltar dkon mchog brtsegs pa las dge slong lnga brgya'i sems dang mthun par dge slong gnyis sprul par 'byung ba lta bu'o//lus 'dra bar 'jug pa ni bram ze la sogs pas gdul bar bya ba de lta bu'i lus kun du ston pa'i phyir ro/ /de dag la mos pa bzlog pa ni de gnyi ga mthun par 'jug pas lha la mos pa gang yin pa de dag zlog par byed cing sel bar byed pa'o//sngon gyi bsam pa las byung ba ni sngon gyi tshe rabs gzhan na goms pa de'i rgyus dbang po rtul po dang 'bring dang rnon po rnams su 'gyur ro/ /de dag la ci rigs pa ni gang la chos gang zhig 'tsham pa de ston pa ste/ sems can gyi bsam pas dbang po tshad med pa la 'ang 'jug ces gang gsungs pa ste/ bsam pas dang po tha dad pa nyid ces bya bar tshig rnam par sbyar ro/ /gsung brjod pas sems can gzhan tshim par mdzad pa tshad med pa la yang 'jug go zhes bya ba ni rim pa 'dis sems can rnams la phan gdags pa'i phyir ro//sems can rnams kyi spyod pa ji lta ba bzhin du gnyen po'i gdams ngag rjes su ston pa ni sems can rnams kyi sems kyi spyod pa tha dad pa tshad med pa la yang 'jug la zhes gsungs pa gang yin pa ste/ de dang mthun pa'i gnyen po rnam par sbyar ba'i phyir ro//ye shes rab 'byam tshad med pa rjes su rtogs pa la yang 'jug go zhes bya ba ni des gnyen po yang dag par bstan par bya ba'i phyir ro/ /gang du zhes bya ba ni theg pa gsum la ste rnam pa gsum gyis lam bstan pa la 'jug pa la mos pa yin pas sems can tshad med pa dag ni nyan thos kyi theg pa la gzung ba'i phyir ro//rang sangs rgyas kyi theg pa yang dag par sgrub pa 'grub pa la yang 'jug la zhes bya ba ni der tshogs bstsags pa rnams zhes bya ba'i tha tshig go/ /ye shes zab mo'i sgor 'jug pa bstan pa tshad med pa la yang 'jug go zhes bya ba ni des de dag gi rang sangs rgyas kyi theg pa bsgrubs pa'i phyir ro//byang chub sems dpa'i spyod pa la sbyor ba tshad med pa la yang 'jug go zhes bya ba ni des de dag khyad par du gzung nus pa nyid du shes par bya ba'i phyir ro/ /theg pa chen po yang dag par sgrub pa la 'jug pa bstan pa tshad med pa la yang 'jug go zhes bya ba ni des spyod pa la zhugs pa'i byang chub sems dpa' rnams theg pa chen po yang dag par 'byung ba la gzud pa'i phyir ro//lhun grub rtog pa med pa yis/ /lam ni yongs su rdzogs 'gyur ba/ /mngon par 'du byed med lam gyi//sbyor ba yin par yongs su bstan/ /ngo bo nyid dang bye brag la rnam par rtog pa med par zhes bya ba ni/ rang dang spyi'i mtshan nyid la rnam par rtog pa med par zhes bya ba'i tha tshig go/ /de ltar rnam par dpyod ldan pa/ /de yi rnam g.yeng spang ba'i phyir/ /lam gzhan dag la mi g.yo ba'i//rab tu gnas pa thob par 'gyur/ /de'i rnam par g.yeng ba'i gnyen po yin pa'i phyir ro zhes bya ba ni lam gzhan rtsom pa'i rnam par g.yeng ba'i gnyen po yin pa'i phyir zhes bya ba'i tha tshig ste/ mi g.yo ba'i tshul gyis shin tu gnas pa yin no zhes gang gsungs pa'o/ /zung du 'brel ba rgyu bzhi yis//rnam par gzhag par 'dod pa ste/ /lam ni cig car 'byung 'gyur zhing / /de yang rgyun chags 'byung ba dang / /mos pa rnam par dag pa dang / /don chen byed pa gang yin gyi/ /byang chub phyogs ni rab dbye ba/ /rgyu bzhi pa ni yin par 'dod/ /de la skad cig gcig 'byung ba//cig car 'byung ba yin par 'dod/ /zhi gnas dang lhag mthong gi lam mngon sum du byed pa'i phyir te/ de skad cig gcig la yang mngon par sgrub cing mi ldang ste zhes gsungs pa gang yin pa'o/ /spyod lam kun du 'byung ba'i phyir/ /bar chad med par 'byung bar bshad/ /de 'gro'am zhes bya ba la sogs pa gsungs pa gang yin pa'o//sgrib pa yang dag spang ba'i phyir/ /mos pa rnam par dag 'gyur te/ /gang phyir sgrib las rnam dag pas/ /sgrib pa med par bshad pa yin/ /sgrib pa med pas spyod lam thams cad la gnas shing zhes gsungs pa gang yin pa'o/ / ye shes tshad med de dag la/ /bkra bar byed pa rnam gnas pa/ /'du shes sems 'dun byed pa'i phyir/ /de ni yid la byed pa yin/ /'du shes yid la byed pa de lta bu dag dang mi 'bral ba yin zhes gsungs pa gang yin pa'o/ /ye shes tshad med pa de dag la zhes bya ba ni sems can gyi khams tshad med pa la yang 'jug pa zhes bya ba la sogs pa sngar bshad pa rnams la'o//bkra bar byed pa'i phyir zhes bya ba ni gsal bar 'dzin pa la sogs pas mtshan ma yang dag par rtogs pa'i phyir 'dus zhes so/ /mngon du nyid 'dun pa ste de byed pa'i phyir yid la byed pa'o/ / sems kun la ni yod pa'i phyir/ /pha rol phyin zhes bya ba yi/ /chos bcu yang dag 'grub pa ni/ /don chen nyid du shes par bya/ /de'i sems bskyed pa re re la yang byang chub sems dpa'i pha rol tu phyin pa bcu yang dag par sgrub pa yang dag par 'grub po zhes bya ba la sogs pa gsungs pa gang yin pa'o//'di ni mdo nyid las legs par bkrol zin pa'i phyir rnam par ma phye ba'o/ /gzhi ni slob dpon nyid kyis rnam par phye bar zad do/ /rgyu bzhi dag gis byang chub kyi/ /phyogs mthun rnam par gzhag par 'dod/ /theg pa chen po'i skabs kyis na/ /pha rol phyin pa bcur gzhag go//sems can smin byed skabs kyis na/ /de sdud byed pa yang dag gzhag/ /nyon mongs sgrib pa dag bya'i phyir/ /gnas la sogs pa yang dag gzhan/ /gang la gnas te gang sgom zhing / /sgo gang dag gis dag 'gyur ba'o/ /gnas dag ni shes rab dang bden pa dang /nyon mongs pa spang ba dang / sdug bsngal nye bar zhi ba'i gnas rnams te/ shes rab kyis bden pa rnams la nyon mongs pa rnams kyang spang la sdug bsngal yang nye bar zhi bar byed do/ /de lta bas na 'dis ni bden pa bzhi bstan pa yin no/ /shes rab kyis ni lam gyi bden pa bstan to//spangs pa dang nye bar zhi ba dag gis ni 'gog pa'o/ /nyon mongs pa dang / sdug bsngal dag ni kun 'byung dang sdug bsngal gyi bden pa ste/ bden pa gnas su gyur pa de dag la gnas te'o/ /gang zhig bsgoms te zhes bya ba ni byang chub kyi phyogs dang mthun pa rnams so/ / sgo gang gis zhes bya ba ni rnam par thar pa'i sgo gsum po dag gis so/ /shes bya'i sgrib pa dag bya'i phyir/ /byang chub yan lag rnam gzhag go/ /rgyu bzhi pa yin te/ kye rgyal ba'i sras dag de ltar zhes bya ba la sogs pa nas/ mdor na byang chub kyi yan lag gi chos thams cad skad cig re re la yongs su rdzogs par 'gyur ro zhes bya ba'i bar gsungs pa gang yin pa'o//snga phyi dag gi sa dag las/ /bdun pa yi ni khyad par gnyis/ /khyad zhugs dman pas sa yi ni/ /ltos pa rnam pa gnyis su gzhag /'di sa 'og ma dag pas ni khyad zhugs pa yin la/gong ma dag pas ni dman pa yin no/ /khyad zhugs pa ji lta bu zhe na/ sbyor ba las byung ba'i spyod pa yongs su rdzogs pa'i phyir te/ sbyor ba las byung ba'i spyod pa ni mngon par 'du byed pa dang bcas pa'i lam mo/ /de ni sa 'di la mngon par mtho ba'i lam gnyen pa dang bcas pa mngon par sgrub pa'i lam yongs su rdzogs pa yin no//ye shes ni ji skad du bstan par rig par bya'o zhes bya ba ni chos thams cad la ji lta ba bzhin du nges par rtog pa nyid gang yin pa'o/ /de nyid kyi phyir 'di la zhes bya ba ni gang gi phyir spyod pa las byung ba'i spyod pa yongs su rdzogs pa dang ye shes dang mngon par shes pa spyod pa gnon pas so//sangs rgyas kyi chos thams cad yang dag par skyed pas byang chub kyi yan lag rnams yongs su rdzogs par byed ces smos pa ni/ sangs rgyas kyi chos thams cad yang dag par skyed par byed mngon par sgrub par byed pa na byang chub kyi yan lag rnams yongs su rdzogs par byed ces bya ba'i tha tshig ste/kye rgyal ba'i sras byang chub sems dpa'i sa dang po la ni smon lam zhes bya ba la sogs pa gsungs pa gang yin pa'o/ /ye shes mngon par sbyor ba rnams/ /'bad dang bcas pas yongs bsags phyir/ /gong ma'i sa las ltos nas ni//dman par rnam par gzhag pa yin/ /gong ma rnams na ni 'bad pa yang med pa'i phyir ro/ /de nyid phyir ni kun nyon mongs/ /gang phyir rtsol bcas 'jug yin gyi/ /'di la nyon mongs spyad byas pa'i/ /kun nas nyon mongs mi 'thad do/ /de nyid kyi phyir rnam par byang ba yin te/ kye rgyal ba'i sras byang chub sems dpa'i sa dang po kho na nas gzung ste zhes bya ba la sogs pa gsungs pa gang yin pa'o/ /de tsam gyis sa bdun po rnams la nyon mongs pa'i spyod pa las shin tu 'das zhes ni mi bya'o zhes bya ba ni mngon par 'du byed pa dang bcas pa'i phyir ro/ /mngon par 'du byed pa ni rnam par rtog pas rab tu bskyed pa yin pa'i phyir la rnam par rtog pa yang byang chub sems dpa' rnams kyi nyon mongs pa yin pas de'i phyir mi brjod do//rnam par smin zhes bya ba yi/ /lam ma thob phyir kun nyon mongs/ /spangs pa'i phyir na dpe dang 'dra/ /'khor los sgyur ba'i lus bzhin no//kye rgyal ba'i sras dag 'di lta ste/ /dper na 'khor los sgyur ba'i rgyal po ni lha'i glang po rin po che la zhon zhing zhes bya ba la sogs pa gsungs pa gang yin pa'o/ /de nyid phyir de nyon mongs med/ /ma yin nyon mongs bcas min te/ /rnam par smin lam ma thob phyir/ /nyon mongs pa ni mi 'byung phyir//gong ma rnams ni rnam par smin pa'i lam thob pa'i phyir nyon mongs pa med pa zhes brjod par bya ste/ lhag par 'dod chags la sogs pa nyon mongs pa'i tshogs thams cad las shin tu 'das te zhes bya ba la sogs pa gsungs pa gang yin pa'o/ /sa snga phyi las khyad par rnam par gzhag pa ni de lta bu yin no//las dag ting 'dzin thob pa dang / /sa las yang dag 'das pa dang / /gnas pa khyad par can gyur pa/ /thob pa'i phyir na rgyu bzhi yis/ /lam ni zung du 'brel ba yi/ /'bras bu rjod par byed pa yin/ /las rnams dag pa gang yin pa//de yang rnam pa bzhir shes bya/ /de la/ dang po lhag bsam rnam dag pas/ /shin tu rnam par dag pa'i phyir/ /tshul khrims rnams ni rnam dag yin/ /'di ltar byang chub sems dpa'i sa bdun pa 'di la gnas pa'i byang chub sems dpa' de ni lhag pa'i bsam pa yongs su dag pas lus kyi las dang zhes bya ba la sogs pa nas/rtag par rgyun du rjes su 'jug pa yin no zhes bya ba'i bar 'byung ba'i phyir ro/ /sa gnyis pa kho na la tshul khrims rnam par dag pa ma yin nam zhe na/ bden gyi sbyor ba'i spyod pa yongs su rdzogs pa'i phyir rnam pa thams cad du ni sa 'di la yongs su dag pa yin no//sa lnga pa las bstan pa yi/ /'jig rten shes pa rnam dag phyir/ /'jig rten pa'i shes pa rnam par dag pa ste/ byang chub sems dpa'i sa lnga pa bzo'i gnas dang las kyi gnas gang dag ces bya ba la sogs pa 'byung ba'i phyir ro/ /bsam dang sbyor ba bstan pa yi//lus ni khyad par 'phags pa'i phyir/ /lus kyi khyad par 'thob pa ste/ /slob dpon nyid du grags pa yin/ /zhes bya ba la sogs pa gang yin pa'o/ /bsam gtan la sogs khyad par gyi/ /mthu stob khyad par 'phags pa'i phyir/ /nus pa'i khyad par 'thob pa yin te/bsam gtan rnams dang ting nge 'dzin rnams dang zhes bya ba la sogs pa nas/ de bas kyang shas cher byang chub kyi yan lag thams cad yongs su rdzogs pa 'thob po zhes bya ba'i bar gsungs pa gang yin pa'o/ /ting nge 'dzin khyad par 'phags pa rnams 'thob pa rnam pa bcur bshad do//rnam par dbye ba shin tu rnam par phye ba zhes bya ba ni rnam par mi rtog pa'i don las brtsams pa'o/ /ting nge 'dzin gang la rnam par dbye ba shin tu rnam par dpyad pa yod pa de la snyoms par 'jug go zhes bya ba'i don te/ chos kyi dbyings dang / de'i rten gang la rnam par rtog pa med pa de dang rnam par rtog pa'i don las brtsams pa'o//tshig gcig la don gyi khyad par du mar 'byed pa rnam par brtags pa ni don du mar mngon par brjod pa nyid de/ khyad par gyi blo gros zhes gang gsungs pa'o/ /khyad par ni bye brag ste/ de la blo gros sems pa yod pas zhes bya ba'i don to//don gcig la rnam grangs du ma dag gis ston pa de las brtsams nas rab tu phye ba'i don gyi mdzod ces gsungs pa gang yin pa ste don gyi mdzod bzhi ni sgra'o/ de las nyan pa po rnams kyis don 'dren cing sgrub par byed pas na 'di'i ngo bo du ma pa yin no zhes ston par byed do/ / rig pa thams cad kyi gnas ni rgyu nyid de de shes pa'o/ /rnam pa gcig tu de nyid shes pa yin te/ don ji lta ba bzhin du rnam par 'byed pa zhes gsungs pa gang yin pa ste/ ting nge 'dzin gang la don ji lta ba bzhin phyin ci ma log par rab tu rnam par 'byed pa yod pa de la snyoms par 'jug go zhes bya ba'i don to//ting nge 'dzin gang rtsa ba shin tu gnas pas brtan pa yod pa ste/ ji lta zhe na/ de bzhin nyid la dmigs pas rtsa ba brtan pa'i phyir ro/ /tshig lhag ma bzhi ni sgrib pa rnam pa bzhi rnam par sbyong ba las rig par bya ste/ ye shes dang mngon par shes pa'i sgo ni rgyu ste sgo zhes bya ba'i don to//ting nge 'dzin de la yang snyoms par 'jug go/ /de nyid kyi phyir ting nge 'dzin 'di ni yon tan khyad par can rnams la sgrib pa gang yin pa de rnam par sbyong bar byed do/ /ting nge 'dzin gang la chos kyi dbyings de bzhin nyid yongs su sbyong bar byed pa yod pa de la yang snyoms par 'jug ste/de nyid kyi phyir chags pa med pa'i ye shes la sgrib pa gang yin pa de rnam par sbyong bar byed do/ /ting nge 'dzin gang la de bzhin gshegs pa la phan yon rab tu brjod pa yod pa de la yang snyoms par 'jug ste/ de nyid kyi phyir sangs rgyas kyi chos zab pa dang / rgya che ba rnams yang dag par sgrub pa la zhum pa med pa yin no//dge ba'i rtsa ba sna tshogs zhes bya ba ni theg pa gsum gyi bdag nyid kyi don sna tshogs kyi mdzod ston par byed pa ste/ de bzhin du 'khor ba dang mya ngan las 'das pa gnyis kyi sgo/ sgo mo gang yin pa'i ting nge 'dzin de la yang snyoms par 'jug go//de nyid kyi phyir thabs dang shes rab bsgoms pa'i stobs kyis mi gnas pa'i lam la sgrib pa gang yin pa de'i gnyen po yang byed de/ thabs dang shes rab kyis yongs su sbyangs pa'i ting nge 'dzin de dag ces gsungs pa gang yin pa'o/ /snying rje'i stobs dang zhes bya ba ni snying brtse ba dang snying rje'i stobs kyis zhes gsungs pa gang yin pa'o//zhi gnas dang lhag mthong gi lam sgrub pa ni rtsol ba med par 'byung ba nyid kyis rnam par smin par gyur pa'i phyir ro/ /mtshan ma med par mtshungs pa la/ /sems can kun gyi dbang gis na/ /las kyi bye brag dag gis yang //khyad par rab tu bstan pa yin/ /sbyor ba yongs su rdzogs pa'i phyir/ /sa bdun pa ni yongs sbyangs dang / /snang ba dag gis snga ma yin/ /sa rnams la ni khyad zhugs te/ /shin tu yongs su sbyangs pa mi skye ba'i chos la bzod par snang bar gyur pa zhes gsungs pa gang yin pa'o//blo ldan sbyor ba mthar thug pa'i/ /yid la byed pa thob pa'i phyir/ /rang gi yul ni shes pa la/ /gnas pa yin zhes mngon par brjod/ /tshad med ces ni rab brjod na/ /mang ba nyid du nges par 'dzin/ /mthu dag gi ni sgo nas kyang / /tshad med ces ni yang dag bstan//ji lta zhe na/ sngon gyi las las khyad par du/ /zab cing rnam par dben pa dang / /rab tu rgyu ba med pa'i las/ /de yis thob pa yin zhes bshad/ /ring du song phyir zab pa yin/ /nyon mongs spangs phyir dben pa yin/ /'og ma'i sa la mi rgyu phyir//rgyu ba med ces bshad pa yin/ /yang dag mtha' la gnas gyur cing / /'gog pa mngon sum mi byed pa/ /gang yin 'di ni gnas pa yi/ /khyad par du ni 'dod pa nyid/ snyoms par 'jug pas gnas pa yi/ /khyad par rab tu bstan nas ni/ /rgyu ba'i sbyor ba'i khyad par ni/ /rnam pa brgyad dag yang bshad do//bsod nams mngon par 'du byed pa'i sbyor ba ni 'khor ba'i sgo yang ston la zhes bya ba yin te/ 'di'i gnyen po ni 'di'i bsam pa mya ngan las 'das pa la gnas pa yang yin zhes bya ba yang yin no/ /de bzhin du 'og ma dag la yang tshig gnyis pa ni gnyen po 'dzin pa yin par shes par bya'o//phung po yongs su 'dzin pa'i sbyor ba ni 'khor mang pos kun nas bskor bar yang snang la zhes bya ba yin te/ phung po ni phung po rnams so/ /de yongs su gzung ba'i sbyor ba ni 'di yin te/ 'di lta ste/ mtshan dang dpe byad bzang po phun sum tshogs pa dang ldan pa'i phyir 'khor mang po nyid do//smon lam gyi stobs kyis khams gsum par kun du skye ste/ de nyid kyi phyir bsams bzhin du srid pa yongs su 'dzin pa'i sbyor ba zhes bya ba'o/ /thabs thabs kyis kyang rab tu 'bar te zhes bya ba ni bu la sogs pa kun du ston pa'i phyir ro/ /de nyid kyi phyir 'di ni rigs kyi rgyud la sbyor ba yin te/sems can rnams theg pa gsum la dgod par bya ba'i phyir ro/ /ma bor ba'i phyir sangs rgyas kyi ye shes la yang 'jug la nyan thos la sogs pa'i sa la brten nas kyang 'grub pa yin no/ /de nyid kyi phyir 'di ni 'jug par byed pa'i sbyor ba yin te/ de dag gis gdul bar bya ba rnams la de ltar kun du bstan pas theg pa gnyis la 'jug pa'i phyir ro//bdud kyi yul ni zas dang nyal ba dag yin te/ de la gnas pa'o/ /de nyid kyi phyir 'di ni ston pa la sbyor ba yin te/ de gnyis ni yul ston par byed pa'i phyir ro/ /bdud kyi spyod yul yang ston pa yin no//de nyid kyi phyir 'di ni 'chi 'pho'i sbyor ba yin te/ na ba dang rga ba dang 'chi ba kun du bstan pas 'chi 'pho ba'i phyir ro/ /mu stegs can gyi gnas thams cad du nye bar 'gro ba na skal ba mnyam par nye bar 'gro bas lta ba ngan pa bzlog pa'i phyir te/ de nyid kyi phyir 'di ni lta ba ngan pa la chags pa las rnam par bzlog pa'i sbyor ba yin no//'jig rten gyi bya ba thams cad dang mthun par 'gro ba ni 'jig rten pa'i bzo'i gnas kyi lam la sogs pa mngon par bsgrub pas/ sngar bshad pa'i gnod pa rnam pa bzhi rab tu zhi bar byed pa'i phyir te/ de nyid kyi phyir 'di ni gnod pa las rnam par bzlog pa'i sbyor ba yin no//lha la sogs pa thams cad kyi lus gang dag yin pa de dag las lhag pa'i lus yongs su 'dzin pas rnam par bzlog pas sems can rnams mi dga' ba dang bral ba'i phyir te/ de nyid kyi phyir 'di ni chags pa rnam par bzlog pa'i sbyor ba yin no//de 'dzin pa'i mchog yin pa'i phyir ro zhes bya ba ni bstan pa yang dag par 'dzin pa'i gtso bo yin pa'i phyir ro/ /sa 'di ni sems can la phan 'dogs pa dang chos kyi bzod pas rab tu phye bar rig par bya zhes bya ba ni mdo las ji skad 'byung ba bzhin no/ /'di yan chad mngon par 'du byed pa'i sbyor ba med pas na sbyor ba'i mthar phyin par 'gro ba'o//de nyid kyi phyir sbyor ba'i lam yongs su rdzogs pas dge ba'i rtsa ba rnams shin tu 'od gsal ba zhes bya ba'o/ /nyi ma'i 'od kyi dpes ni zla ba'i 'od kyi dpes bstan pas snga ma'i ye shes pas 'di rgya che ba'i phyir khyad par bstan pa yin no//ji lta zhe na/ nyi ma'i 'od kyis de'i 'od zil gyis gnon pa mthong ba'i phyir ro/ /lhag ma ni snga ma'i tshul bzhin du sbyar bar bya'o/ /rgyu ni rnam pa bdun dag gis/ /sa brgyad pa ni gzhag par 'dod/ /sa rnams dag ni bsdu ba dang / /rnam dag bzod pa thob pa dang / /rnam dag gnas pa thob pa dang //zhing ni rnam par dag pa dang / /dbang thob pa zhes bya ba dang / /che ba nyid kyi khyad par dang / /nges tshig dbye ba zhes bya ba/ /rgyu ni bdun par 'dod pa ste/ /sa brgyad pa yi bsdu ba'i tshul/ /'di yin par ni rab tu bstan/ /yongs su sbyang bar bya ba'i sa dag ni bdun te/ de dag tu sbyor ba'i spyod pa yongs su sbyang bar bya ba legs par byed pa'i phyir ro/ /de dag bsdu ba ni mdor bsdus te bsnyad pa'o/ /smras pa/ de dag rnams kyi bsdu ba ni/ /rgyu gnyis dag gis brjod bya ste/ /spyir ni bsdu bar bya ba dang / /so so re re nas bsdu ba'o/ /rgyu ni rnam pa gsum dag gis//spyir bsdu bar ni 'dod pa yin/ /so so nas ni rnam bdun te/ /'di ni bsdus par gzhag pa yin/ /rnam par 'byed pa legs par byas/ /zhes bya ba la rnam par 'byed pa ni chos dang gang zag la bdag med par rtogs pa ste/ de 'di dag tu legs par byas pa'i phyir sa bdun po dag yin par ston to//gal te de lta na/ 'o na dang po kho na la de rtogs na gnyis pa la sogs pa la khyad par ci yod ce na/ gong nas gong du rab tu rtogs pa zhes bya ba smras te/ khyad par dang khyad par du rab tu rtogs pa yang dag par rab tu bstan par bya ba'i phyir ro/ / thabs dang shes rab kyis lam shin tu yongs su sbyangs pa zhes bya ba la thabs ni snying rje chen po'o/ /shes rab ni chos la bdag med pa'i yul can te/ de gnyis kyis lam shin tu yongs su sbyangs pa'o/ /de nyid kyi phyir mi gnas pa'i lam yongs su sbyong ba zhes bya ba smras so/ /tshogs shin tu bstsags pa zhes bya ba ni sa bdun po de dag nyid la tshogs shin tu rab tu bstsags pa'i phyir sbyor bas bsdus pa'i tshogs yongs su rdzogs par byed pa zhes smras pa gang yin pa ste/spyir bsdu ba ni de lta bu yin no/ /smon lam shin tu btab pa zhes/ /bya ba la sogs rnams kyi tshig /lhag ma brgya po dag kho nas//so so nas ni bsdu ba yin/ /smon lam chen po shin tu btab pa zhes bya ba ni sa dang po bsdu ba mdzad pa yin no/ /de bzhin gshegs pa'i byin gyi rlabs kyis shin tu byin gyis brlabs pa zhes bya ba ni sa gnyis pa ste/ /de de bzhin gshegs pa rnams kyis theg pa dman pa bor te thams cad mkhyen pa nyid kho na la bsam pa ches brtan par byin gyis rlob par mdzad do//rang gi dge ba'i rtsa ba'i stobs bskyed pa rjes su thob pa zhes bya ba ni sa gsum pa ste/ ji lta zhe na/ 'dod chags dang bral ba las mi nyams pa'i bsam gtan la sogs pa thob pa'i phyir ro/ /de bzhin gshegs pa'i stobs la sogs pa yid la byed pa zhes bya ba ni sa bzhi pa ste/ji lta zhe na/ rnam par gzhag pa'i chos lung gi chos ji ltar rtogs pa bzhin du rnam par 'jog pa'i phyir ro/ /de ni rtogs pa ston par byed de gnyi ga zhes bya ba ji lta ba bzhin du zhugs pa nyid kyis de dang mtshungs par rtogs pa'i phyir ro//de'i phyir shes bya'i sgrib pa rnam par dag pa ni sangs rgyas kyi chos 'thob pa'i rgyu ste/ de thob pa'i phyir de yid la byed pa dang ldan pa yin no/ /lhag pa'i bsam pa'i brnag pa shin tu yongs su sbyangs pa zhes bya ba ni sa lnga pa ste/ ji lta zhe na/ rnam par dag pa la sems kyi bsam pa mnyam pa nyid ji skad bshad pa dag gis lhag pa'i bsam pa'i brnag pa shin tu yongs su sbyangs pa'i phyir ro//bsod nams dang ye shes kyi stobs kyis mngon par 'phags pa zhes bya ba ni sa drug pa ste/ ji lta zhe na/ rim bzhin du snying rje chen pos ni bsod nams kyi stobs kyis mngon par 'phags pa nyid do//rten cing 'brel bar 'byung ba rnam par dpyod pas ni ye shes kyi stobs kyis mngon par 'phags pa nyid do/ /snying rje dang byams pa chen po dag gis sems can thams cad la sbyor ba mi gtong ba ye shes kyi lam tshad med pa dang ldan pa zhes bya ba ni sa bdun pa bsdu ba yin te/ji lta zhe na/ /rim bzhin du lam gzhan rtsom pa'i khyad par rnams kyis ni sems can thams cad la sbyor ba mi gtong ba nyid la/ sems can gyi khams tshad med pa la sogs pa la 'jug pa rnams kyis ni ye shes kyi lam tshad med pa dang ldan pa nyid du rig par bya ste/'dir bsdu ba ni tshig gnyis kyis bstan pa yin no/ /yongs su sbyang ba bya ba'i sa la tshul bzhin du/ rtsol bcas ye shes la brten nas/ /bsdus dang rgyas pa'i sgo nas ni/ /sa bdun rnam par sbyang byas nas/ /mi skye ba yis rab phye ba'i/ /bzod pa rnam par dag pa 'thob/ / de'i rnam par dag pa nyid ni lhun gyis grub pas rab tu phye ba yin no/ /chos rnams gzod ma nas ma skyes pa nyid ni da gzod 'byung ba ma yin gyi/ 'on kyang chos 'di dag ni rnam par gnas pa kho na'o/ /gang la zhe na/ rnam par byang ba'i phyogs la'o/ /de'i phyir 'di ni snga nas yod pa'i gnyen por brjod do//gsar du yod pa de'i gnyen por ma skyes pa nyid ces bya ste/ sngon med pa las dbyung ba ni ma yin gyi/ 'on kyang 'di dag snga nas rnam par gnas pa kho na'o zhes bya ba'i tha tshig go/ /mtshan nyid yod pa de'i gnyen por mtshan nyid med pa nyid ces bya ba ste/gang gis 'di dag mtshon par 'gyur ba'i mtshan nyid de dag med do/ /phyi ma'i mthar yod pa de'i gnyen por byung ba med pa nyid ces bya ba ste/ byung ba ni phyi ma'i mthar yod pa yin gyi ma byung ba ni ma yin pa'i phyir ro/ /rnam par byang ba'i phyogs la ni de lta bu yin no/ / kun nas nyon mongs pa'i phyogs la sngon gyi mtha' na yod pa de'i gnyen por 'jig pa med pa nyid ces bya ba ste/ byung ba ni gdon mi za bar 'jig gi ma byung ba ni ma yin no zhes bya ba'i tha tshig go/ /rdzogs pa yod pa de'i gnyen por thug pa med pa nyid ces bya ba ste/ thug pa ni rdzogs pa yin pa'i phyir ro//rnam par byang ba la kun nas nyon mongs pa nyid yod pa gang yin pa de'i gnyen por 'jug pa med pa nyid ces bya ba ste/ 'jug pa ni kun nas nyon mongs par 'gyur gyi mi 'jug pa ni ma yin pa'i phyir ro/ /rang bzhin kho nas skye ba med/ /chos la bdag med ces bya ba//bdag med ngo bo nyid kyi phyir/ /dngos po med pa zhes bya ba/ /rang bzhin gyis skye ba med pa yin no/ /gnyis med pa'i mtshan nyid yin pa'i phyir ro zhes bya ba ni gnyis po med pa'i phyir ro/ /dngos po'i mtshan nyid kyang ma yin la/ gnyis po med pa yod pa'i phyir dngos po med pa'i mtshan nyid kyang ma yin pa ste/dngos po med pa'i ngo bo nyid ces gsungs pa gang yin pa'o/ /kun nas nyon mongs rnam byang dag /'phel 'bri med pa'i ngo bo yis/ /dus gsum du ni mnyam pa nyid/ /de la grangs kyi bye brag med/ /'di ni grangs kyi bye brag mi skye ba ste/ thog ma dang dbus dang tha ma mnyam pa nyid ces 'byung ba'i phyir ro//las rnams kyi ni bye brag gang / /rnam pa mang por yongs brtags pa/ /de bzhin nyid dang mnyam mthong phyir/ /de yi bye brag ma skyes pa/ /las kyi bye brag mi skye ste/ /de bzhin nyid ltar thams cad mkhyen pa'i ye shes rnam par mi rtog pa rtogs par bya ba nyid las brtsams nas 'jug go zhes gsungs pa gang yin pa'o//de ltar na mi skye ba'i chos la bzod pa ni mi skye ba rnam pa bzhi la 'jug pa yin no/ /bzod pa'i dmigs pa rab brtan nas/ /rnam par rtog pa'i 'du shes dang / /bral bas 'jug par rab tu ston//'dir rnam par smin pa ni sems so/ /rlom sems ni yid do/ /yul rnam par rig pa ni rnam par shes pa ste/ /de dag gis bsdus pa dag go/ /sems dang yid dang rnam par shes pa de dag dang zhes bya ba'i tha tshig ste/ de thams cad du sems dang yid dang rnam par shes pa'i rnam par rtog pa'i 'du shes dang bral ba zhes gsungs pa gang yin pa'o//rnam par rtog pa dang bral ba zhes brjod par bya ba yin pa las 'du shes smos pa ni 'du shes khyad par can shes par bya ba'i phyir te/ 'di la mi mthun pa'i phyogs kyi 'du shes dang bral ba'i phyir gzhan ni yod do zhes 'du shes gzhan brjod pa yin no//thogs pa med pa zhes bya ba la thogs pa ni rtsol ba'o/ /de med pa'i phyir lhun gyis grub par rgyu ba'o/ /nam mkha' 'dra zhes bya ba ni khyab pas so/ /bla gab med pa'i rang bzhin du zhugs pas zhes bya ba ni de bzhin nyid du zhugs pa'i phyir te/ de bzhin nyid ni sgrib pa med pa nyid kyis bla gab med pa yin no//zab mo thob phyir khyad par du/ /'phags pa'i gnas pa thob pa ste/ /byang chub sems dpa'i gnas pa zab mo rjes su thob pa yin no zhes gsungs pa gang yin pa'o/ /de'i zab pa nyid ni mdo las 'byung ba'i sgo nas rnam pa bdun du shes par bya ste//ring ba'i ye shes tha mi dad/ /de bzhin mtshan ma bral ba dang / /tshad med pa dang mi 'phrogs dang / /nyes pa spangs phyir dben pa dang / /gnyen po la ni mngon phyogs phyir/ /dben pa mngon du gyur pa'o/ /ring ba'i ye shes ji lta bu zhe na/ mngon par 'du byed pa dang bcas pa'i sa bzlog pas rtogs par bya ba yin pa'i phyir 'jug pa zab pa nyid kyis ring ba yin no//tha mi dad pa ji lta bu zhe na/ byang chub sems dpa' sa dag pa pa rnams dang / thun mong ba'i zab pa nyid kyi phyir ro/ /yul zab pa nyid ji lta bu zhe na/ gzung ba dang 'dzin par snang ba med par gyur pas de bzhin nyid la bya ste/mtshan ma thams cad dang bral ba zhes gsungs pa gang yin pa'o/ /de nyid 'du shes kyi 'dzin pa ngan pa thams cad las phyir bzlog pa yin te/ mi mthun pa'i phyogs kyi 'du shes dgag pa'i phyir 'dzin pa ngan pa smos so/ /tshad med pa ji lta bu zhe na/ bdag dang gzhan gyi don la zhugs pas sgrub pa zab pa nyid kyi phyir ro//mi 'phrogs pa ji lta bu zhe na/ nyan thos dang rang sangs rgyas thams cad kyis mi 'phrogs pa'i phyir zil gyis mi gnon pa zab pa nyid do/ /dben pa ni mi mthun pa'i phyogs bsrabs pa zab pa nyid kyi phyir ro/ /thams cad las dben pa mngon du gyur pa ni gnyen po la mngon du phyogs pa zab pa nyid kyi phyir ro//ji lta zhe na/ de bzhin nyid ni thams cad las dben pa'i phyir ro/ /de ltar na mdo las ji skad 'byung ba'i sgo nas gnas pa zab mo nyid rnam pa bdun no/ /g.yo ba dang rlom sems thams cad dang bral ba yin no zhes bya ba ni de dag gi gnas sems yid kyi rnam par shes pa med pa'i phyir ro//'bad pa dang bcas pa mngon par 'du byed pa dang bcas pa'i lam las yang dag par 'das pa'i phyir 'bad pa thams cad dang bral te zhes bya ste/ ji skad du mdo las 'byung ba bzhin no/ /lhun gyis grub pa'i chos nyid thob pa ji lta bu zhe na/ rtsol ba de'i gnyen po thob pa'i phyir ro//da ni lhun gyis grub cing rtsol ba med pa nyid kyis lhun gyis grub pa'i chos nyid thob pa de ston par byed do/ /lhun gyis grub pa nyid rtsol ba med pa yin te/ lus dang ngag dang sems kyi rtsol ba dang bral nas zhes 'byung ba'i phyir ro/ /rnam par smin pa la gnas pa nyid kyis ni/mdo las ji skad du 'byung ba bzhin te/ rnam par smin pa kun gzhi rnam par shes pa'i de bzhin nyid gang yin pa de la shin tu gnas pa'i phyir/ rnam par smin pa la gnas pa nyid do/ /dper na gnyid kyis log pa las sad pa la 'du shes yod pa de bzhin du gnas pa de la yang snyoms par 'jug pa las bzlog pa'i 'du shes yod do//bzlog pa 'di gang zhig yin zhe na/ zhi ba nyid la gnas pa la/ /'du shes yod du zin kyang ni/ /yang dag shes pa'i dbang gis na/ /mtshan ma rnams ni 'jig phyir ro/ /kye rgyal ba'i sras dag 'di lta ste/ dper na mi zhig gnyid kyis log pa'i rmi lam na zhes bya ba nas bzung ste/ 'bad pa thams cad dang bral bar 'gyur te zhes bya ba'i bar 'byung ba'i phyir te/ de kho na nyid kyi ye shes khyad par du 'phags pa dang ldan pa'i phyir 'bad pa thams cad dang bral ba yin no/ /rnam par dag pa'i dbang du byas nas/'khor ba dang mya ngan las 'das pa gnyis su kun du spyod pa snang bar mi 'gyur te/ de'i gnyis su kun du spyod pa thams cad kyi thams cad du snang bar mi 'gyur ro zhes gsungs pa gang yin pa'o/ /yul la yongs su spyod pa'i dbang du byas nas mtshan ma kun du spyod pa snang bar mi 'gyur te/mtshan ma kun du spyod pa thams cad du mi snang bar 'gyur ro zhes gsungs pa gang yin pa'o/ /tshangs pa'i 'jig rten skye ba dang / /'dra ba'i dpe ni gang yin pa/ /de ni 'og ma'i sa pa yi/ /kun nas nyon mongs ring gyur 'dod/ /de la 'jug pa'i phyogs la ni/ / sems la sogs pa'i kun du 'byung ba med pa'i phyir te/ sems dang yid dang rnam par shes pa'i kun du 'byung ba yang kun du mi 'byung ste zhes 'byung ba'i phyir ro/ /ldog pa'i phyogs la ni sangs rgyas la sogs pa la kun du 'byung ba med pa ste/ sangs rgyas la kun du 'byung ba'am zhes bya ba nas bzung ste/rgyun du zhugs pa la kun du 'byung ba thams cad kyang kun du mi 'byung na zhes bya ba'i bar 'byung ba'i phyir ro/ /de la theg pa chen po'i bye brag gis ni sangs rgyas dang byang chub sems dpa' dang byang chub kyi yan lag la kun du 'byung ba rnams so/ /nyan thos kyi theg pa'i bye brag gis ni mya ngan las 'das pa dang /nyan thos la sogs pa la kun du 'byung ba'o/ /theg pa chen po la yang gang zag gi bye brag gis ni sangs rgyas dang byang chub sems dpa' la kun du 'byung ba dag go/ /chos kyi bye brag gis ni byang chub la kun du 'byung ba'o/ /nyan thos kyi theg pa la yang mi slob pa dang /smon pa'i bye brag dang chos kyi bye brag gis mya ngan las 'das pa la kun du 'byung ba ste/ mi slob pa'i bye brag gis ni dgra bcom pa la kun du 'byung ba'o/ /slob pa'i bye brag gis ni phyir mi 'ong ba la sogs pa la kun du 'byung ba'o/ /de yi 'og tu gnas skabs der//kun mkhyen thugs rje'i bdag nyid rnams/ /dang por de bzhin gshegs pa yi/ /ye shes nye bar sgrub mdzad nas/ /ci zhig mdzad ce na/ sems can la ni byams mdzad nas/ /gnas pa tsam la mngon dga' ba/ /bzlog par dka' ba bzlog mdzad de/ /'di la byas pa bsngags pa dang //ma byas pa la bskul ba dang / /de la gnas pa mi 'dor bas/ /sangs rgyas chos rnams ma thob pa/ /nus pa nyid kyi dbang mdzad nas/ /yang dang yang rgyu sna tshogs kyis/ /zhi ba'i dbyings ni de dag las/ /rnam par bskyod nas sems can gyi//don spyad dag la sbyor bar mdzad/ /chos kyi sgo'i rgyun de la gnas pas/ mngon par dga' ba gang yin pa de tsam gyis chog par 'dzin pa de bzlog par mdzad do/ /ji lta zhe na/ de bzhin gshegs pa'i ye shes nye bar bsgrubs pas te/ /de bzhin gshegs pa'i ye shes nye bar sgrub pa mdzad de zhes gsungs pa gang yin pa'o//byas pa bsngags pa ni legs so legs so zhes bya ba la sogs pa byas pa bsngags par mdzad pa ste/ yon tan thob pa rnams la yang dag par gzengs bstod pa mdzad ces bya ba'i tha tshig go/ /mi byed pa la bskul ba zhes bya ba la mi byed pa ni yon tan ma thob pa rnams mngon sum du mi byed pa ste/de la gang nged kyi stobs bcu la sogs pa phun sum tshogs pa de khyod la med kyi phun sum tshogs pa de yongs su btsal ba'i phyir brtson 'grus rtsoms shig ces bskul ba mdzad do/ /bzod pa'i sgo 'di nyid kyang ma dor cig ces bya ba 'dis ni mi dor bas de nus pa nyid du ston par byed do//sems can gyi don bya bas don che ba nyid ces bya ba sems can ji lta bu dag cig gi zhe na/ kun nas nyon mongs par gyur pa rnams kyi'o/ /ji lta zhe na/ 'di dag la soms shig ces bya ba la sogs pas bstan te/kun nas dkris par gyur pa rnams ni ma zhi bdag go/ /bag la nyal du gyur pa rnams ni rab tu ma zhi ba dag go/ /khyim pa rnams ni nyon mongs pa sna tshogs kun du 'byung ba dag go/ /rab tu byung ba rnams ni rnam par rtog pa sna tshogs kyis g.yen spyo ba dag go/ /smon lam gyi 'bras bu med pa ni sngon gyi smon lam dran par gyis shig ces gsungs pa gang yin pa'o//sems can yongs su smin par bya ba 'bras bu med pa ni sems can gyi don thob par bya ba zhes gsungs pa gang yin pa'o/ /ye shes kyi tshogs 'bras bu med pa ni ye shes kyi sgo bsam gyis mi khyab pa zhes gsungs pa gang yin pa'o//thun mong ma yin pa'i don du dub pa 'bras bu med pa ni chos kyi dbyings 'di ni gnas pa nyid de/ /'dis ni de bzhin gshegs pa rnams nyi tshe rab tu phye ba ma yin gyi nyan thos dang rang sangs rgyas thams cad kyang rnam par mi rtog pa'i chos nyid 'di 'thob bo zhes 'byung ba'i phyir ro//'di skad du thun mong ma yin pa'i don ni nyan thos la sogs pa'i spyod yul ma yin pa ste/ sangs rgyas kyi yul lo/ /de thob par bya ba'i phyir khyod kyis yun ring po nas dka' ba spyod pa goms pa la sogs pa brtson 'grus brtsams pa gang yin pa de 'bras bu med par 'gyur ro/ / ci'i phyir zhe na/ 'di ltar khyod kyis rnam par mi rtog pa'i chos nyid thob pa gang yin pa de ni nyan thos la sogs pas kyang thob ste/ de lta bas na 'di thob pas chog par 'dzin pa ni rigs pa ma yin no zhes ston par byed do/ 'di thams cad ni yang dag par gzengs bstod pa yin no/ /sems can gyi don mdzad pa'i dbang du byas nas/sangs rgyas rnams kyi phun sum tshogs pa gang yin pa de lus tshad med pa la sogs pas sgrub par nus pa nyid du yongs su ston par byed de/ /gnas gang gis zhes bya ba ni/ lus tshad med pa nyid ces bya ba yin no/ /kun rdzob dang don dam pa'i ye shes gang gis zhes bya ba ni ye shes tshad med pa nyid ces bya ba yin no//zhing yongs su dag pa gang gis zhes bya ba ni sangs rgyas kyi zhing tshad med pa nyid ces bya ba yin no/ /gdul bya'i spyod pa mkhyen pa gang gis zhes bya ba ni ye shes mngon par sgrub pa tshad med pa nyid ces bya ba yin no//gang gis bsdus te zhes bya ba ni 'od kyi dkyil 'khor tshad med pa nyid ces bya ba yin no/ /gzhan dag ni tshig gnyis bzlog ste yang 'don to/ /bshad pa gang gis zhes bya ba ni sgra skad kyi yan lag tshad med pa nyid ces bya ba yin te/ khyod kyis kyang de bzhin du mngon par sgrub pa skyed cig ces 'byung ba'i phyir ro//sgo tha dad pa ni rigs kyi bu de bzhin gshegs pa la ni chos snang ba'i sgo 'di 'dra ba mtha' yas par gyur te zhes bya ba yin no/ /mdzad pa tha dad pa ni mdzad pa mtha' yas shing zhes bya ba yin no/ /gong nas gong du brten pa tha dad pa ni 'brel ba mtha' yas pa zhes bya ba yin te/de dag thob par bya ba'i phyir mngon par sgrub pa skyed ces 'byung ba'i phyir ro/ /tshegs chung ba zhes bya ba ji lta bu zhe na/ khyod kyis nged kyi phyogs bcu'i sangs rgyas kyi zhing tshad med pa nyid la ltos te zhes bya ba ni 'jig rten gyi khams rab tu dbye ba ji ltar mthong ba lta bar sbyor ba'o//sems can tshad med pa nyid ces bya ba ni sems can gyi khams rab tu dbye ba'o/ /chos rnam par dbye ba tshad med pa nyid ces bya ba ni chos rab tu dbye ba ste/ de dag thams cad ji lta ba bzhin du khong du chud par gyis shig ces 'byung ba'i phyir ro/ /ci'i phyir tshegs chung ba nyid ce na/blta ba tsam zhig bya bar zad pa'i phyir ro/ /yang ci'i phyir ye shes nye bar sgrub par mdzad ce na/ /de'i de nyid yongs su mya ngan las 'das par 'gyur te zhes bya ba ni/ de nye bar sgrub pa'i dgos pa yin te/ /ye shes tshad med pa nye bar sgrub pa'i rgyu yin no/ /gnas pa de nyid kyi khyad par yongs su bstan pa yin no//grangs dang cha la sogs pa bshad pa ni mtshams sbyar bar rig par bya'o zhes bya ba ni grangs ci zhe na/ cha gang yin pa'o zhes bya ba la sogs pa'o/ /mtshams sbyar ba ni mthun par sbyar ba ste/ gzhung gi sgo nas tha dad par 'jug pa'i tshig rnams don gyi sgo nas gcig tu byed pa'o//ji skad du 'phags pa blo gros mi zad pas bsam pa mi zad pa nyid las/ ma byas pa'i phyir bcos ma ma yin pa'o zhes gsungs pa lta bu'o/ /sems can yongs su smin par bya ba la lus gang la gnas pa ni/ lus rnam par dbye ba tshad med pas byang chub sems dpa'i spyod pa'i stobs yang dag par 'grub ces bya ba yin no//bshad pa gang gis ni sgra skad mngon par sgrub pa tshad med pa zhes bya ba yin no/ /ye shes la rton pa gang gis ni ye shes mngon par sgrub pa tshad med pa zhes bya ba yin no/ /skye ba yongs su 'dzin pa gang gis ni skye ba mngon par sgrub pa tshad med pa zhes bya ba yin no//zhing gang du ni zhing yongs su dag pa tshad med pa zhes bya ba yin no/ /sems can gang yongs su smin par byed pa ni sems can yongs su smin par bya ba tshad med pa zhes bya ba yin te/ de lta bu ni sems can yongs su smin par bya ba'i dbang du byas pa yin no/ /sangs rgyas la mchod pa dang //rim gro bya ba tshad med pa zhes bya ba ni bsod nams kyi tshogs so/ /chos kyi tshul khong du chud pa bar med pa zhes bya ba ni ye shes kyi tshogs kyi dbang du byas pa ste/ de lta bu ni tshogs bsags pa'i dbang du byas pa yin no/ /mngon par shes pa mngon par sgrub pa'i stobs bskyed pa tshad med pa dang /'khor gyi dkyil 'khor rnam par phye ba tshad med pa zhes bya ba ni mngon par shes pa la sgrib pa dang mngon par rdzogs par byang chub pa la sgrib pa sbyong ba ste/ de lta bu ni sgrib pa rnam par dag pa'i dbang du byas pa yin no/ /bcu tshan 'di thams cad du yang tshad med pa'i skabs kyis na//lus dang ngag dang yid kyi las/ /tshad med pa dang ldan par bshad/ /mi g.yo ba'i tshul gyis zhes bya ba ni rgyun mi 'chad par stsogs pa zhes bya ba'i tha tshig go/ /gru chen dpe dang chos mthun par/ /mngon shes myur ba'i rgyu nyid kyi/ /khyad par yongs su bstan pa'i phyir//lhun gyis grub par 'byung ba nyid/ /gnas pa'i khyad par thob pa ni de lta bu yin no/ /sangs rgyas zhing rnam dag rnams kyi/ /rgyu ni rnam pa gsum du 'dod/ /dbang rnams thob par bya ba'i phyir/ /rnam pa gsum gyi sbyor gang yin/ /ji lta zhe na/ snod rnams la ni dbang ba yi//sbyor ba dang po yin par bshad/ /sems can 'jig rten dbang ba yi/ /gnyis pa yin par mngon par brjod/ /ye shes rdzogs par byang chub la/ /dbang ba'i gsum pa yin par bshad/ /de la snod kyi 'jig rten la/ /dbang ba rnam pa lngar bshad de/ /gang 'dod pa dang ci 'dra dang / / dus ni ji srid 'dod pa yang / /de nyid de 'dra nyid dang ni/ /dus de srid du ston pa dang / /bsdus dang rgyas pa ji lta bur/ /'dod pa bzhin du rab byed dang / /ji snyed 'dod pa de snyed ni/ /blo dang ldan par ston pa'o/ /de la 'jig rten khams rnams kyi/ /'byung ba la sogs mthong ba dang / /de ni rnam pa dang po yi//sbyor ba yin par bshad pa yin/ /de la snod kyi 'jig rten la dbang ba rnam pa lngar bshad pa de'i rnam pa dang po ste/ gang 'dod pa de kun du ston pa'am mi snang bar byed pa zhes bya ba'i rnam pa de'i sbyor ba'o/ /'jig rten gyi khams 'byung ba la yang rnam par dpyod do zhes bya ba la sogs pa gang gsungs pa 'di ni sbyor ba yin te/sbyor ba 'dis gang 'dod pa de kun du ston pa'am mi snang bar byed pa zhes bya ba 'di 'grub po/ /la sogs pa ni rnam shes pa/ /gnyis pa yin zhes brjod pa yin/ /rnam pa gnyis pa ste/ ci 'dra ba 'dod pa de 'dra ba ston pa zhes bya ba 'di'i sbyar ba yin no//ji lta zhe na/ la sogs pa gang gis 'jig rten 'jig pa de yang rab tu shes so/ /la stsogs pa gang gis 'jig rten 'chags pa de yang rab tu shes so zhes 'byung ba'i phyir ro/ /dus ji srid du 'jig la sogs/ /gsum pa'i yin par mngon par brjod//gsum pa ste dus ji srid du 'dod pa de srid du ston pa zhes bya ba de'i 'o/ /ji lta zhe na/ dus ji srid du 'jig rten 'jig pa de yang rab tu shes so zhes bya ba nas/ de bzhin du 'jig rten chags nas dus ji srid cig tu gnas pa yang rab tu shes so zhes bya ba'i bar 'byung ba'i phyir ro//sa la sogs pa chung la sogs/ /yongs shes 'dod pa gang yin nas/ /mi yi lus kyi bar du ni/ /bzhi pa'i sbyor ba yin par 'dod/ /bzhi pa ste/ bsdus dang rgyas pa ji ltar 'dod pa bzhin du byed ces bya ba 'di'o/ /ji lta zhe na/ de sa'i khams chung ba yang rab tu shes so zhes bya ba nas/de bzhin du mi'i lus kyi gnas kyi rdul bye brag gi rdul ji snyed yod pa de dag kyang rab tu shes so zhes bya ba'i bar 'byung ba'i phyir ro/ /'dod pa'i khams la sogs pa la/ /'jig la sogs par mthong ba nas/ /zhing las mi g.yo'i bar gang yin/ /'di ni lnga pa'i sbyor ba yin//rnam pa lnga pa ste/ ji snyed 'dod pa de snyed ston par byed bya ba 'di'i sbyor ba yin no/ /ji lta zhe na/ de ltar rdul phra rab kyi rdul phra rab tu dbye ba shes pa la zhugs pa de 'dod pa'i khams 'jig pa yang rab tu shes so zhes bya ba nas/ sangs rgyas kyi zhing brjod du med pa rnams dang 'khor gyi dkyil 'khor rnams na yang snang bar 'gyur ba yin no/zhes bya ba'i bar 'byung ba'i phyir ro/ /chung ba ni mnyam par ma bzhag pa'i sa pa'i rnam par shes pa'i yul te/ /sa'i khams chung ba yang zhes 'byung ba'i phyir ro/ /chen por gyur pa ni mnyam par gzhag pa'i rnam par smin pa'i rnam par shes pa'i yul te//rgya chen por gyur pa yang zhes gsungs pa gang yin pa'o/ /tshad med pa ni de bzhin gshegs pa'i yul te/ /tshad med pa dang zhes gsungs pa gang yin pa'o/ /lus rags pa dang phra ba ni gzugs can dang gzugs can ma yin pa'i sems can rnams kyi lus te//lus rags pa dang lus phra ba yang rab tu shes so zhes gsungs pa gang yin pa ste/ /go rims bzhin no/ /'di nyid rang dang spyi'i mtshan nyid rnam par dbye ba'i sgo nas lus rnam par phye ba yin par shes par bya ste/ ji ltar na mtshan nyid kyis shes na rang dang spyi'i mtshan nyid rnam par dbye ba'i sgo nas te zhes bya ba yin no//sems can rnams kyi lus rab tu dbye ba shes pa la mkhas pa dang lus rnam par dbye ba shes pa la mkhas pa ni rigs gzhan dang rang gi rigs kyi bye brag gis rig par bya'o/ /'khor gyi dkyil 'khor na sems can ci 'dra ba dag cig 'khod pa de 'dra ba de lta bu'i lus ston pa'o//re zhig snod kyi 'jig rten la dbang ba'i sbyor ba ni de lta bu yin no/ /sems can gyi 'jig rten la dbang ba'i sbyor ba ji lta bu zhe na/ de 'gugs pa la dbang ba ste de'i sbyor ba ni/ de dag dang mthun pa'i lus dang sems ston pa'o/ /ji lta zhe na/ de sems can rnams kyi lus rnam par dbye ba dang zhes bya ba la sogs pa nas/de bzhin gshegs pa'i sku dang kha dog dang gzugs rnam par dbye ba kun du ston to zhes bya ba'i bar 'byung ba'i phyir ro/ /sems can gyi 'jig rten la dbang ba'i sbyor ba ni de lta bu yin no/ /ye shes mngon par rdzogs par byang chub pa la dbang ba'i sbyor ba ji lta bu zhe na/de la don dam ye shes dang / /kun rdzob shes par 'dod pa gang / /ye shes mngon rdzogs byang chub la/ /dbang ba'i sbyor ba nyid yin no/ /don dam ye shes gang yin pa/ /lus su rnam rtog bral ba dang / /mtshan nyid ni gzugs kyi lus kyis mngon par gsal bar byed pa nyid ces bya ba yin no//ji lta zhe na/ gzugs kyi go 'byed pa'i mtshan nyid yin pas gzugs kyis de mngon pa'i phyir ro/ /'di ni sangs rgyas kyi zhing rnam par dag par byed pa ye shes mngon par rdzogs par byang chub pa la dbang ba'i sbyor ba gsum pa ste/sangs rgyas kyi zhing rnam par dag pa ni de lta bu yin no/ /de ltar rab tu sbyor ba na/ /gnod pa rnams kyi gnyen po ni/ /rnam bcu rnam par gnas pa'i phyir/ /dbang ni rnam pa bcu thob po/ /'chi ba'i gnod pa de'i gnyen por 'di ltar tshe la dbang ba 'thob po zhes gsungs so//ji lta zhe na/ dbang de nyid bskal pa brjod du med pa'i yang brjod du med pa zhes bya ba la sogs pa tshig gnyis rab tu rnam par 'byed de/ de bzhin du gzhan la yang gnyis pa ni rab tu rnam par 'byed pa'i yan lag nyid yin par shes par bya'o/ /kun nas nyon mongs pa'i gnod pa'i gnyen por sems la dbang 'thob bo//lhag ma ni sbyar sla ba nyid pas rnam par mi dbye'o/ /ye shes kyis ni che ba nyid/ /'dir ni mi gnas lam nyid yin/ /don rnam gsum ni smos pa'i phyir/ /de nyid ye shes bsam mi khyab/ /ji lta zhe na/ ye shes bsam gyis mi khyab pa dang ldan pa yin zhes bya ba ni dgod pa'i tshig go//ye shes dpag tu med pa zhes bya ba ni bsgom pa khyad zhugs pa bsam gyis mi khyab pa nyid do/ /ye shes shin tu rgyas pa zhes bya ba ni shes bya bsam gyis mi khyab pa nyid do/ /ye shes mi 'phrogs pa zhes bya ba ni mi mthun pa'i phyogs bstsal ba bsam gyis mi khyab pa nyid do//las rnams kha na ma tho med/ /kun du 'byung la sogs mtshan nyid/ /rgyu bzhi dag dang ldan pa'i phyir/ /las kyi che ba nyid du 'dod/ /lus kyi las dang ngag gi las dang yid kyi las kha na ma tho ba shin tu med pa kun du 'byung ba rab tu 'byung zhes bya ba ni las kyi che ba nyid do//kun du 'byung bar byed pa dang / /kun du 'byung ba'i dus na zhes bya ba ni/ /ye shes sngon du 'gro zhing ye shes kyi rjes su 'brang ba zhes 'byung ba'i phyir/ shes rab kyi pha rol tu phyin pas dbang byed pa zhes bya ba ni kun nas nyon mongs pa med pa'i lam gyis so//snying rje chen po sngon du 'gro ba'i thabs la mkhas pas shin tu rnam par phye ba zhes bya ba ni sems can gyi don byed pa'i lam gyis so/ /bdag dang gzhan gyi sbyor ba'i rgyu gnyis kyis zhes bya ba la smon lam gyis shin tu mngon par sgrub pa zhes bya ba ni bdag gi rgyus so/ /de bzhin gshegs pa'i byin gyi rlabs kyis shin tu byin gyis brlabs pa zhes bya ba ni gzhan pa'i sbyor ba'i rgyus so//sems can gyi don dang sangs rgyas kyi zhing yongs su dag par bya ba dang / sangs rgyas kyi chos yang dag par bsgrub pa'i bya bas bya ba sgrub pa ste de ltar na kha na ma tho ba shin tu med pa nyid rgyu bzhis yongs su bstan pa yin no//nyon mongs pa kun du 'byung ba thams cad dang bral ba'i phyir bsam pa'i stobs la shin tu gnas pa yin zhes bya ba ni mi mthun pa'i phyogs rnam par nyams pa'o/ /lam dang mi 'bral ba'i phyir lhag pa'i bsam pa'i stobs la shin tu gnas pa yin zhes bya ba ni gnyen po brtan pa'o//sems can gyi don mi gtong ba'i phyir snying rje chen po'i stobs la shin tu gnas pa yin/ 'gro ba thams cad yongs su skyob pa'i phyir byams pa chen po'i stobs la shin tu gnas pa yin te/ de lta bu ni sems can la lta ba rnam pa gnyis so//brjed pa med pa'i chos dang ldan pa'i phyir gzungs kyi stobs la shin tu gnas pa yin zhes bya ba ni brjed pa med pa nyid kyi yon tan no/ /gzungs ni yi ge'i gzungs dang / don gyi gzungs te de la shin tu gnas pa'o/ /brjed par mi 'gyur bas na brjed pa med pa nyid kyi yon tan no/ /spobs pa'i stobs la shin tu gnas pa yin no//ji lta zhe na/ sangs rgyas kyi chos thams cad rab tu rnam par 'byed pas rnam par dbye ba la mkhas pa'i phyir ro/ /de ltar na chos ston pa la spobs pa mi 'dor ba'i phyir spobs pa'i stobs la shin tu gnas pa yin te/ ngag phun sum tshogs pa'i yon tan no//mngon par shes pa'i stobs la shin tu gnas pa yin no/ /ji lta zhe na/ 'jig rten gyi khams mtha' yas pa'i spyod pa rnams kyi rnam par dbye ba tha dad pa nyid la mkhas pa'i phyir te/ sems phun sum tshogs pa'i yon tan no/ /byang chub sems dpa'i bya ba thams cad mi gtong ba'i phyir smon lam gyi stobs la shin tu gnas pa yin te/rgyu'i yon tan no/ /sangs rgyas kyi chos thams cad yang dag par sgrub pa na pha rol tu phyin pa'i stobs la shin tu gnas pa yin pas sbyor ba'i yon tan no/ /rnam pa thams cad kun du mkhyen pa'i ye shes mngon du gyur pa'i phyir de bzhin gshegs pa rnams kyi byin gyi rlabs kyi stobs gang yin pa de la shin tu gnas pa yin pas nye bar sgrub pa'i yon tan no//bya ba thams cad kyang kun du ston la zhes bya ba ni so so'i skye bo nyon mongs pas theg pa rnams kyi bya ba ji lta bu kun du spyad pa dang /kun du spyod pa ltar byang chub sems dpa' yang de kho na bzhin du kun du ston to zhes bya ba'i don to/ /de las sa 'og ma pa'i mngon par 'du byed pa'i gnyen por mi g.yo ba yin te mi 'phrogs pa'i phyir ro/ /theg pa dman par smon lam 'debs pa dang / bdud kyi las dang nyon mongs pa kun du 'byung ba'i gnyen por mi ldog pa yin te/ye shes mi bzlog pa'i phyir ro/ /de'i phyir nye ba'i nyon mongs pa rnam pa gnyis yin pa'i phyir nye ba'i nyon mongs pa'i gnyen po'o/ /zab pa nyid ni rnyed par dka' ba'o/ /spyod pa rnam par dag pa ni gzhon nu'i sa'o//gnas pa rnam par dag pa ni skye ba'i sa'o/ /'jig rten pa'i 'dus byas rnam par dag pa'i khyad par ni yongs su grub pa'i sa'o/ /'jig rten las 'das pa'i de bzhin mnyam pa nyid thob pa dang / rnam pa gnyis su rab tu bstan/ /'dis ni nyan thos dang rang sangs rgyas rnams dang thun mong ma yin pa'i don dam pa'i ye shes bshad pa yin no//ji lta zhe na/ de lus su rnam par rtog pa thams cad dang bral zhing lus mnyam pa nyid thob pas zhes 'byung ba'i phyir ro/ /sems can lus la sogs shes pa/ /kun rdzob shes par 'dod pa yin/ /ji lta zhe na/de sems can gyi lus kyang rab tu shes so zhes bya ba la sogs pa bcu tshan 'dis bstan to/ /shes bya rnam gsum rnam gzhag pas/ /de ni rnam pa bcur dbye'o/ /sems can gyi lus kyang rab tu shes so/ /zhing gi lus dang zhes bya ba sems can dang snod kyi 'jig rten dang / las rnam par smin pa'i lus dang zhes bya ba de skye ba'i rgyu'i las kyis ni kun nas nyon mongs pa'i phyogs su rig par bya'o/ /nyan thos dang rang sangs rgyas dang byang chub sems dpa' dang / /de bzhin gshegs pa'i sku rnams kyis theg pa gsum rnam par gzhag pa'i phyir/ rnam par byang ba'i phyogs ni tshig bzhis bstan to//theg pa gsum po de yang ye shes kyi lus dang zhes bya ba ye shes gang dang / chos kyi lus dang zhes 'byung ba'i phyir chos gang gis rab tu phye ba'o/ /nam mkha'i lus kyang rab tu shes so zhes bya ba ni gnyi ga ma yin pa'i phyogs so/ /snod kyi 'jig rten la dbang ba nas/ye shes mngon par rdzogs par byang chub pa la dbang ba'i bar gyi dbang de dang / de la bya ba sgrub pa'i sbyor ba mtshungs pa nyid yongs su bstan te/ /'bras bu sgrub pa'i sbyor ba mtshungs pa nyid ces bya ba'i tha tshig go/ /sems can gyi lus rnams la las kyi kun nas nyon mongs pa'i bye brag ni las kyi lus nyid kyang rab tu shes so zhes 'byung ba'i phyir ro//skye ba'i kun nas nyon mongs pa'i bye brag ni rnam par smin pa'i lus zhes bya ba yin no/ /nyon mongs pa'i kun nas nyon mongs pa'i bye brag ni nyon mongs pa'i lus nyid ces bya ba yin zhes bya ba'o//gzugs can dang gzugs can ma yin pa'i bye brag ni gzugs kyi lus nyid kyang rab tu shes so zhes bya ba la sogs pa yin no/ /chung ngu nyid ni stong gi 'jig rten gyi khams kyi bye brag go/ /rgya chen por gyur pa nyid ces bya ba ni stong gnyis pa'i bye brag go/ /tshad med pa nyid ces bya ba ni stong gsum gyi bye brag go//kun nas nyon mongs pa nyid dang rnam par dag pa nyid ces bya ba ni 'jig rten gyi khams kun nas nyon mongs pa can dang / nyon mongs pa can ma yin pa'i bye brag go/ /rnam par dbye ba smos pa ni rang dang spyi'i mtshan nyid rab tu dbye ba bshad pa yin no/ / brda smos pa ni brda tsam nyid de tha snyad tsam nyid ces bya ba'i tha tshig go/ /ci'i phyir zhe na/ gang zag med pas te/ slob dpon gyis kyang las kyi rnam par smin pa dang zhes bya ba la sogs pas de kho na bzhin du rnam par phye ba yin no/ /de bzhin gshegs pa'i sku rnams la ji ltar mngon par rdzogs par byang chub pa ston pa ni mngon par rdzogs par byang chub pa'i sku nyid kyang rab tu shes so zhes 'byung ba'i phyir ro//byang chub tu smon lam btab nas dga' ldan du skyes pa ni smon lam gyi sku nyid ces bya ba yin no/ /sprul pa gang yin pa ni sprul pa'i sku nyid ces bya ba yin no//rang gi sku gdung gi ring bsrel byin gyis brlabs pa gang dag yin pa ni byin gyi rlabs kyi sku nyid ces bya ba yin no/ /rnam par smin pa'i sku gang yin pa ni gzugs dang mtshan dang dpe byad bzang po'i rgyan gyi sku nyid ces bya ba yin no/ /'od zer gang gis ni 'od kyi sku nyid ces bya ba yin no//'jig rten dang 'jig rten las 'das pa'i sems rnam par grol ba thun mong pa gang yin pa ni nyid kyi sku nyid ces bya ba yin no/ /mngon par mtho ba'i rgyu thun mong ma yin pa gang yin pa ni bsod nams kyi sku nyid ces bya ba yin no/ /de bzhin gshegs pa rnams kyi zag pa med pa'i khams gang yin pa ni chos kyi sku nyid ces bya ba yin no//chags pa med pa'i ye shes gang yin pa ni ye shes kyi sku nyid ces bya ba yin no/ /shes pa'i lus rnams la thos pa dang bsams pa las byung ba'i bye brag ni shes pa'i lus rnams kyi shin tu dpyad pa nyid kyang rab tu shes so zhes 'byung ba'i phyir ro//bsgoms pa las byung ba'i shes pa'i bye brag ni ji lte ba bzhin du nges par rtogs pa nyid ces bya ba yin no/ /'bras bu dang zhugs pa'i bye brag ni 'bras bu dang sbyor bas bsdus pa nyid ces bya ba yin no/ /'jig rten pa la sogs pa'i bye brag ni 'jig rten pa dang 'jig rten las 'das pa'i bye brag ni 'jig rten pa dang 'jig rten las 'das pa rnam par dbye ba nyid ces bya ba nas de bzhin du slob pa dang mi slob pa nyid kyang rab tu shes so zhes bya ba'i bar 'byung ba'i phyir ro//chos kyi lus rnams la chos nyid gcig pas brjod pa ni chos kyi lus rnams kyi mnyam pa nyid ces bya ba yin no//ji skad thos pa bzhin du 'dzin pa ni mi 'khrugs pa nyid ces bya ba yin no/ /gdul bya rnams kyi dbang po la sogs pa'i gnas skabs dang mthun pa'i 'du shes dang 'chad pa rnam par gzhag pa'i gnas skabs dang brda kun rdzob tu rnam par gzhag pa nyid ces bya ba yin no//dbang po dang bcas pa dang dbang po med pa'i mtshan nyid rnam par gzhag pa ni sems can dang sems can ma yin pa'i chos rnam par gzhag pa nyid ces bya ba yin no/ /mchog gi mtshan nyid rnam par gzhag pa rab tu shes pa sangs rgyas dang chos dang 'phags pa'i dge 'dun rnam par gzhag pa nyid kyang rab tu shes so zhes 'byung ba'i phyir ro//nam mkha'i lus rnams la mtha' yas pa'i mtshan nyid du rab tu shes so zhes bya ba ni nam mkha'i lus rnams kyi tshad med pa nyid kyang rab tu shes so zhes bya ba yin no//khyab pa'i mtshan nyid ni thams cad du song ba nyid ces bya ba yin no/ /bstan du med cing thogs pa med pa'i mtshan nyid ni lus med pa nyid ces bya ba yin no/ /'dus ma byas pa'i mtshan nyid ni nor pa med pa nyid ces bya ba yin no/ /rang gi 'dus byas rnam par dag pa'i khyad par ni yongs kyi mthar thug pa'i sa'o//de gnyi ga'i zhes bya ba ni 'jig rten pa dang 'jig rten las 'das pa bshad ma thag pa'i 'bras bu 'dus ma byas dang bral ba zhes bya ba gang yin pa de rnam par dag pa'i khyad par te mya ngan las 'das pa'i sa'o/ /khyad par ni mi gnas pa nyid yin pas slob dpon nyid kyis sngon gyi smon lam gyi dbang gis zhes bya ba la sogs pas bstan to//sa drug pa la khyad zhugs pa ni brtan pa'i sa zhes bya ste/ sa drug pa la byang chub sems dpa' 'dis shes rab kyi pha rol tu phyin pa la gnas pa sngon du gyur pas mngon par 'du byed pa med pa la mngon par dga' ba thob pa gang yin pa de sa bdun pa la 'jug pa'i tshe spong bas de 'khrugs pa yin no//'di'i mtshan ma med pa kun du 'byung ba gang yin pa de ni de ltar sa dgu pa la 'jug pas spangs te 'khrugs pa ma yin gyi/ 'on kyang mtshan ma med pa kun du 'byung ba ma spangs pa kho nar sa dgu pa thob pa'i phyir ro//bdun pa yang 'bad pa dang bcas pa yin no/ /'di ni sngon gyi mtha' mngon par bsgrubs pas lhun gyis grub pa'i sa zhes bya ste/ sa 'di la ni sngon mngon par bsgrubs zin pa nyid pas thams cad lhun gyis grub par 'jug go/ /byang chub sems dpa'i sa'i khyad par ni de lta bu yin no//gang zag gis ni byas pa yi/ /nges tshig blo dang ldan pa de/ /don gang gis ni mi g.yo ba'i/ /sa 'thob bstan pas de bshad do/ /gcig tu mi g.yo nyid dang ni/ /gcig tu nyid las mi g.yo dang / /rgyu gnyis dag gis nges pa'i tshig / rnam par gzhag par bshad pa yin/ /mi g.yo ba rnam pa 'di gnyi ga yang sangs rgyas kyi rigs kyi rjes su song ba'i rgyur 'gyur ro/ /ji lta zhe na/ sangs rgyas kyi rigs kyi rjes su song ba zhes 'byung ba'i phyir ro/ /yon tan yongs su 'dzin pa sangs rgyas kyi yon tan shin tu snang bar gyur pa zhes 'byung ba'i phyir ro//sgrub pa ni de bzhin gshegs pa'i spyod lam dang spyod pa'i spyad pa'i rjes su song ba zhes 'byung ba'i phyir ro/ /nye ba ni sangs rgyas kyi yul mngon du gyur pa zhes 'byung ba'i phyir ro/ /de la gcig tu mi g.yo ba/ /rtag tu de bzhin gshegs rnams kyis/ /legs par byin brlabs las shes bya//yon tan lnga po'i dbang du byas/ /rtag par rgyun du de bzhin gshegs pa'i byin gyi rlabs kyis shin tu byin gyis brlabs pa yin zhes 'byung ba'i phyir ro/ /mchod pa'i yon tan ni brgya byin la sogs pas bsdu ba'i phyir ro/ /kun du bsrung ba'i yon tan ni lag na rdo rje rnams phyi bzhin 'brang ba'i phyir ro//rten gyi yon tan ni ting nge 'dzin gyi stobs kyis ma btang ba'i phyir ro/ /zhing yongs su dag pa'i yon tan ni zhing gi lus rnams kyi rnam par dbye ba tshad med pa mngon par bsgrub pa'i phyir ro/ /sems can yongs su smin par byed pa'i yon tan ni de yang rnam pa lngas rab tu dbye ste/bsams bzhin du skye ba yongs su 'dzin pa ni lus thams cad mngon par 'grub pa'i spyod pa'i stobs gang yin pa de dang ldan pa'i phyir ro/ /dbang po dang bsam pa dang bag la nyal shes par nus pa ni mngon par shes pa chen po'i rnam par smin pa yongs su grub pas so//chos kyi tshul la gzud pa'i phyir chos mtha' yas pa rnams 'dzin nus pa ni ting nge 'dzin mtha' yas pa la dbang byed pa'i phyir ro/ /len par nus pa ni lung bstan pa tshad med pa yang dag par nod pa yin zhes 'byung ba'i phyir ro/ /ston pa'i nus pa ni 'gro ba ji ltar smin pa bzhin du mngon par rdzogs par byang chub pa ston par byed pa'i phyir ro//de la theg chen la zhugs pas/ /gcig pa nyid las mi g.yo ba/ /dkyil 'khor don ni mi phyed don/ /rnam pa dgu yis rab tu bstan/ /theg pa chen po'i dkyil 'khor du zhugs pa zhes 'byung ba'i phyir ro//shin tu rnam par dpyad pa'i ye shes kyi mngon par shes pa chen po dang ldan pa zhes bya ba ni ye shes mi phyed pa yin no/ /rtag par rgyun du shes rab kyi snang ba'i 'od zer rab tu gtong ba zhes bya ba ni bshad pa mi phyed pa yin no/ /chos kyi dbyings chags pa med pa'i lam du zhugs pa zhes bya ba ni rnam par grol ba mi phyed pa yin no//'jig rten gyi khams kyi las rnam par dbye ba la mkhas pa zhes bya ba ni zhing yongs su dag pa mi phyed pa yin no/ /yon tan gyi rnam pa thams cad yang dag par ston pa zhes bya ba ni theg pa chen po la 'jug pa mi phyed pa yin no//rang gi sems bskyed pa la dbang byed pa zhes bya ba ni mngon par shes pa mi phyed pa'o/ /sngon gyi mtha' dang phyi ma'i mtha' shin tu rtogs pa'i ye shes can zhes bya ba ni dri ba lan 'debs par nus pa mi phyed pa yin no/ /bdud kyi lam thams cad kyi 'jug pa dang ldog pa shes pa dang ldan pa zhes bya ba ni byang chub kyi snying po la 'dug pa mi phyed pa yin no//de bzhin gshegs pa'i yul dang spyod yul thams cad kyi rjes su zhugs pa zhes bya ba ni/ mngon par rdzogs par byang chub pa mi phyed pa'o/ /de bzhin gshegs pa de dag la bsnyen bkur byed cing zhes bya ba ni lam ches khyad par du 'phags pa ma nyan pa'i phyir ro//'jig rten gyi khams rnam par dbye ba sngon du 'gro ba zhes bya ba ni bsnyen bkur byed pa'i dgos pa bstan pa'o/ /dper na gser gyi sa le sbram zin par byas te/ 'dzam bu gling gi bdag po'i mgul lam mgo la btags na rten khyad par du 'phags pa'i phyir zil gyis mi non par 'gyur ba de bzhin du sa 'di la gnas pa'i byang chub sems dpa'i dge ba'i rtsa ba rnams kyang zil gyis mi non par 'gyur ro//sa 'di rgyu ni bzhi dag gis/ /rnam par gzhag par 'dod pa ste/ /smra ba po yi rtsol ba rnams//phun tshogs gzhag pa dang po yin/ /gnyis pa bshad pa'i dbang byas nas/ /ye shes phun sum tshogs pa yin/ /spyod pa la 'jug gsum pa ste/ /bzhi pa bshad pa rnams kyi phyir/ /brgyad pa la ni ye shes kyi/ /las mngon bsgrubs pas zhing sbyang ba//bsgrubs nas sa ni dgu pa la/ /sems can don bya rnams la sbyong / /gzhan gyi don ni gzugs med pa rnams la thar par 'du shes pa'i gdul bya rnams kyi dbang du byas pa'o/ /ji lta zhe na/ de ltar ye shes tshad med pas rnam par dpyad pa'i blos yang rnam par thar pa zhi ba gong ma rnams shes par byed ces bya ba 'byung ba'i phyir ro//bdag gi don ni sangs rgyas kyi ye shes mthong ba'i dbang du byas pa ste/ yang de bzhin gshegs pa'i ye shes gong ma ma rdzogs pa la rnam par spyod ces 'byung ba'i phyir ro/ /gcig gis na de lta bu yin no//de bzhin gshegs pa'i gsung ba rjes su 'jug par bya ba 'jug ces bya ba ni byang chub sems dpa' yongs su smin pa dag gi dbang du byas pa'o/ /ye shes bsam gyis mi khyab pa'i che ba nyid rab tu rnam par 'byed ces bya ba ni/ tshul bzhin ma yin pa sems pa la sbyor ba'i gdul bya rnams kyi dbang du byas pa'o//gzungs dang ting nge 'dzin rab tu rnam par 'byed pa yongs su sbyong zhes bya ba ni mi shes pa dag chos kyi tshul bstan pas shes par bya ba rnams kyi dbang du byas pa'o/ /mngon par shes pa rgya chen po mngon par sgrub ces bya ba ni/ skyabs ngan par zhugs pa rnams kyi dbang du byas pa ste/mngon par shes pa rnams kyis dad par byas nas/ skyabs ngan pa las zlog par byed do/ /'jig rten gyi khams rnam par dbye ba shes par byed ces bya ba ni/ mtho ris la mos pa rnams kyi dbang du byas pa ste/ zhing kho na la de lta bu'i yongs su dag pa kun du bstan nas mtho ris la mos pa zlog par byed do//lnga pa ni de lta bu yin no/ /de bzhin gshegs pa'i stobs la sogs pa sangs rgyas kyi chos mi 'phrogs pa yongs su sbyor bar byed ces bya ba ni mngon par rdzogs par byang chub pa'o/ /de bzhin gshegs pa'i chos kyi 'khor lo bskor ba khyu mchog tu gyur pa'i rjes su 'jug ces bya ba ni chos kyi 'khor lo bskor ba'o//snying rje chen po'i byin gyi rlabs 'thob pa mi 'dor zhes bya ba ni yongs su mya ngan las 'das pa ste/ sems can la lta ba dang bcas pas snying rje chen po'i byin gyi rlabs 'thob pa dang /mi 'dor bar gnyis kyis yongs su mya ngan las 'das pa kun du ston par byed do/ /gsum gyis ni de lta bu yin no/ /ye shes shes bya rnam byang stsogs/ /gong ma gong ma'i khyad par gyis/ /rnam pa bcur ni rab bstan nas/ /bshad pa yin par rnam shes bya/ /dge ba dang mi dge ba dang lung du mi ston pa'i chos mngon par 'du bya ba yang yang dag pa ji lta ba bzhin du rab tu shes zhes bya ba ni rnam par byang ba dang kun nas nyon mongs pa dang /gnyi ga ma yin pa'i chos rnams rab tu shes so zhes bya ba yin no/ /zag pa dang bcas pa dang zag pa med pa'i chos mngon par 'du bya ba zhes bya ba ni rnam par byang ba'i chos de dag kyang zag pa dang bcas pa dang zag pa med pa dag tu rab tu shes pa'o//'jig rten pa dang 'jig rten las 'das pa'i chos mngon par 'du byed pa'i chos mngon par 'du bya ba zhes bya ba ni zag pa med pa rnams kyang 'jig rten pa dang 'jig rten las 'das pa dag tu rab tu shes so//bsam gyis mi khyab pa dang bsam gyis mi khyab pa'i chos mngon par 'du bya ba zhes bya ba de de rnams kyang bsam du yod pa dang bsam gyis mi lang ba dag tu rab tu shes pa'o/ /nges pa dang ma nges pa'i chos mngon par 'du bya ba zhes bya ba ni bsam du yod pa rnams kyang nges pa dang ma nges pa dag tu rab tu shes pa'o//nges pa dang ma nges pa de rnams kyang theg pa gsum po dag la rab tu shes te/ mdo las ji skad 'byung ba bzhin no/ /'dus byas kyi chos mngon par 'du bya ba dang / 'dus ma byas kyi chos mngon par 'du bya ba yang zhes bya ba ni theg pa gsum pa'i chos de dag kyang lam dang gnas gyur pas rab tu phye ba'i phyir/'dus byas dang 'dus ma byas kyis rab tu phye ba dag tu rab tu shes pa'o/ /sems can gyi sems kyi rgyu ba thibs po yang dag pa ji lta ba bzhin du rab tu shes te zhes bya ba 'dis ni nyon mongs pa dang las kyi kun nas nyon mongs pa'i rten sems bstan to//nyon mongs pa'i rgyu ba thibs po zhes bya ba ni sems la brten pa nyon mongs pa'i kun nas nyon mongs pa bstan to/ /las kyi rgyu ba thibs po zhes bya ba 'dis ni sems la brten pa las kyi kun nas nyon mongs pa bstan to//skye ba'i kun nas nyon mongs las/ /brtsams te dbang sogs rim pa yis/ /kun nas nyon mongs rnam byang bar/ /nges dang ma nges gnas skabs yin/ /mos pa la sogs pa ni dbang po la sogs pa dang mthun pa'i phyir zhes bya ba ni dbang po'i rgyu'i thibs po dang zhes bya ba nas bzung ste/phung po gsum du rnam par gnas pa'i rgyu ba thibs po yang dag pa ji lta ba bzhin du rab tu shes so zhes bya ba'i bar 'byung ba'i phyir ro/ /chung ngu dang / 'bring dang / chen po'i rnam pas dbang po dag ci 'dra bar 'gyur ba/mos pa rnams kyang de kho na 'dra bar 'gyur te/ khams la sogs pa nas/ phung po gsum du rnam par gnas pa la thug pa'i bar du yang de dang 'dra bar brjod do/ /mang po gang yin pa de ni thibs po yin no/ /shes par mi nus pa'i don ni gting dpag dka' ba'i phyir ro//sems can rgyu ba thibs po zhes bya ba ni de sems can rnams kyi sems rnam pa tha dad pa yang dag pa ji lta ba bzhin du rab tu shes so zhes 'byung ba'i phyir ro/ /sems rnam pa sna tshogs pa nyid ces bya ba ni rab tu dbye ba'i mtshan nyid kyis so/ /sems skad cig gcig tu 'gyur ba dang 'jig pa dang mi 'jig pa nyid ces bya ba ni 'gyur ba'i mtshan nyid kyis so//sems lus med pa nyid ces don dam pa'i mtshan nyid kyis so/ /sems mtha' yas shing thams cad du mang ba nyid ces bya ba ni rang gi mtshan nyid kyis so/ /sems 'od gsal ba nyid ces bya ba ni rang bzhin gyis kun nas nyon mongs pa ma yin pa'i mtshan nyid kyis so//sems kun nas nyon mongs pa dang bcas pa dang nyon mongs pa med pa nyid ces bya ba ni kun nas dkris pa dang bcas pa dang kun nas dkris pa med pa'i mtshan nyid kyis so//sems bcings pa dang rnam par thar pa nyid ces bya ba ni bag la nyal dang bcas pa dang / bag la nyal ba med pa'i mtshan nyid kyis so/ /rgyu'i mtshan nyid kyis ni ji ltar byang chub sems dpa' rnams bsams bzhin du skye ba ni sems sgyu ma lta bur rnam par bsgrub pa nyid ces 'byung ba'i phyir ro//de ma yin pa'i sems can rnams rang gi las dag gis skye ba ni sems 'gro ba ji lta ba bzhin du nye bar gnas pa nyid ces 'byung ba'i phyir ro/ /ring du song ba zhes bya ba ni/ nyon mongs pa rnams srid pa'i rtse mo'i bar du rjes su 'brel pa'i phyir te/ nyon mongs pa rnams ring du song ba nyid ces gsungs pa gang yin pa'o//shes par dka' ba zhes bya ba ni dge ba la sogs pa la sbyor ba mtha' yas pa tshad mi rtogs pa rnams mngon du 'gyur ba'i phyir te/ sbyor ba mtha' yas pa nyid ces gsungs pa gang yin pa'o/ /nyon mongs pa dang skye ba dang las kyi kun nas nyon mongs pa rnams kyis nyon mongs par byed pa ji ltar zhes bya ba ni gcig gi grogs su gcig gyur pas gcig gis gcig bskyed pa ni lhan cig skyes shing mi 'bral ba nyid ces 'byung ba'i phyir te/nyon mongs pa dang skye ba dang las kyi kun nas nyon mongs pa rnams gcig gi grogs su gcig gyur par 'jug pa na phan tshun skyed par byed pa dag yin no//de yod na zhes bya ba ni bag la nyal yod na'o/ /de las mi 'grol ba'i phyir zhes bya ba ni kun nas dkris pa las mi 'grol ba'i phyir zhes bya ba'i tha tshig ste/ bag la nyal dang kun nas dkris pa don gcig pa nyid ces gsungs pa gang yin pa'o//gang bcings pa zhes bya ba ni sems te sems mtshungs par ldan pa dang mtshungs par ldan pa ma yin pa nyid ces 'byung ba'i phyir ro/ /gal te sems de bar skabs su nyon mongs pa rnams kyis ma bcings na thar ba'i skabs yod kyi gzhan du ni ma yin no zhes yang dag par bstan pa'i phyir mtshungs par ldan pa ma yin pa smos so//lus kyi 'gro bas ni skye ba'i mtshams sbyor bar 'gro bas ji lta ba bzhin du nye bar gnas pa nyid ces 'byung ba'i phyir ro/ /khams kyi dbye ba ni khams gsum pa rnam par phye ba nyid ces bya ba yin no//sred pa dang ma rig pa dang lta ba'i zug rngu kha na ma tho ba chen po nyid ces bya ba ni rgyus te skye ba'i kun nas nyon mongs pas nyon mongs pa nyid du yongs su bstan to/ /las rnam pa gsum gyi gzhi rgyun mi 'chad pa zhes bya ba la phyogs gsum po 'dod pas longs spyod pa'i phyogs de'i gzhi ni srid pa ste rgyu zhes bya ba'i tha tshig go//sdom pa med pa'i phyogs de'i gzhi ni ma rig pa'o/ /mu stegs can gyi phyogs de'i gzhi ni lta ba dang nga rgyal te gzhi 'di rgyun mi 'chad pa'i phyir ro/ /phyogs gsum po dag la thar pa'i bar du gcod pa'i las kyi rgyu yin pa'i phyir dang lus dang ngag dang yid kyi las 'khor ba dang mthun pa tshad med pa 'byung ba'i rgyu yin pa'i phyir las kyi kun nas nyon mongs pas kun nas nyon mongs par byed pa nyid du yongs su bstan to//'gro ba'i rgyu nyid rab tu dbye bas ni/ de las de dge ba dang mi dge ba dang lung du mi ston pa nyid kyang yang dag pa ji lta ba bzhin rab tu shes te zhes 'byung ba'i phyir te/dge ba dang mi dge ba dag ni bde 'gro dang ngan 'gro'i rgyu nyid yin pa'i phyir 'gro ba'i rgyu nyid yin no/ /bsams pa ni lus ngag gi las dag ste/ de gnyis kyis sems pa rnam par rig par byed pa'i phyir ro//sems pa ni yid kyi las so/ /de yang rnam par rig byed bzhin du rnam par rig par mi byed pas na rnam par rig byed ma yin pa ste/ rnam par rig byed dang rnam par rig byed ma yin pa nyid du gsungs pa gang yin pa'o/ /sems dang sems pa lhan cig skyes nas sems nyid bgos te sems dang tha mi dad par gyur pa'i 'bras bu mngon du 'grub par byed do//de nyid kyi phyir 'di skad du sems dang lhan cig skyes shing tha mi dad pa zhes bya'o/ /rang gi ngang gis rgyu med par skad cig la skyes ma thag tu 'jig cing rnam par 'jig cing 'phel ba dang mngon par 'phel bar 'byung ba dang /mngon par 'dus byas pas 'bad pas bsgrub par bya ba'i las te/ ji lta zhe na/ rgyus rgyu'i dngos pos so/ /de'i phyir 'jig pa dang 'phel ba'i phyir 'bras bu la sogs pa dang mi stsogs pa'i rab tu dbye ba yin te/ rgyu rang gi ngang gis skad cig tu 'jig cing 'phel ba 'bras bu chud mi za zhing mtshams sbyor ba nyid ces 'byung ba'i phyir ro//tshul 'di nyid kyis 'bras bu chud mi za bar 'byin par yang shes par bya'o/ /lan grangs gzhan dang skyes nas myong bar 'gyur ba yang zhes bya ba ni rnam grangs gnyis pa'o/ /'bras bu ma smin pa dang smin zin pas rab tu dbye ba ni rnam par smin pa dang bcas pa dang /rnam par smin pa med pa nyid ces bya ba yin te/ ma smin pa ni rnam par smin pa dang bcas pa'i phyir la smin zin pa ni rnam par smin pa med pa'i phyir ro/ /ming mthun pa'i phyogs dang gnyen po'i rab tu dbye ba ni gnyi ga ma yin pa nag po yang ma yin dkar po yang ma yin pa dang gnyi ga'i cha 'dren pa'i las yang dag par len pa rab tu dbye ba ste nag po zhes bya ba la sogs pa'i tshig gsungs pa gang yin pa'o//las nag po dang dkar po dag ni phyogs du ma las rab tu rnam par phye zin pa'i phyir te/ de gnyi ga yang dag par len pas so//mdo'i don ni tha dad pa zhes bya ba ni bral ba'o/ /sna tshogs ni 'dren ma nyid de/ de gnyis kho na dang zhes bya ba yin no/ /rkyen rab tu dbye ba ni/ las kyi zhing bdag po'i rkyen kho na nyid kyang yin la rgyu'i rkyen nyid kyang yin par shes par bya ba ste/ las kyi zhing tshad med pa nyid ces gsungs pa gang yin pa'o//khor zug tu ma yin pa ni res 'ga' ba'o/ /khor zug ni gnyug ma'o/ /de gnyis rab tu dbye ba ste/ 'phags pa dang 'jig rten par rab tu rnam par phye ba nyid ces gsungs pa gang yin pa'o/ /gnas skabs gsum ni tshe 'di dang skyes pa dang lan grangs gzhan la zhes bya ba'o//der nges pa dang ma nges pa ste/ tshe 'di dang skyes pa dang lan grangs gzhan la myong bar 'gyur ba nyid ces gsungs pa gang yin pa'o/ /theg pa rnam pa gsum la nges pa dang ma nges pa nyid ni theg pa dang theg pa ma yin pa la nges pa dang ma nges pa zhes gsungs pa gang yin pa ste/theg pa ma yin par nges pa ni yongs su mya ngan las mi 'da' ba'i chos can rnams so/ /de ltar na nges pa dang ma nges pa rab tu dbye bas las rnams kyi rgyu ba thibs po yang dag par bstan pa yin te/ smras pa/ tshe 'di'i 'bras bu can dang ni/ /de bzhin tshe rabs gzhan 'bras dang //lan grangs gzhan gyi 'bras tsam las/ /'bras bu gnas skabs nges pa yin/ /bshad pa'i snod rab tu dbye bas ni dbang po tha ma dang 'bring dang rab nyid kyang zhes 'byung ba'i phyir te/ dbang po dang 'tsham par bshad pa 'jug pas so/ /snga ma 'bogs pa nyid ces bya ba ni de la dbang po sbyong ba na dbang po snga ma 'bogs pa nyid khyad par du 'phags pa nyid du 'pho ste/'di ltar dad pas rjes su 'brang ba sbyangs na lam gzhan la mthong bas thob par 'gyur ro zhes 'byung ba lta bu'o/ /de bzhin du dbang po gzhan yang sbyangs na mchog tu 'gyur ba'i phyir snga ma 'bogs pa nyid du rig par bya ste/de ltar na sngon gyi mtha' dang phyi ma'i mtha' zhes bya ba'i sgra rnam par bkrol ba yin no/ /snga ma rnams las phyi ma rnams dma' ba dang khyad par du 'phags pa nyid dang zhes bya ba la de la dma' ba nyid ni dper na chos kyis rjes su 'brang bas dad pas mos pa dang dus kyis rnam par grol ba lta bu'o//khyad par du 'phags pa nyid ni de nyid dang dad pas rjes su 'brang ba bas mthong bas 'thob pa dang / dus dang mi sbyor bas rnam par grol ba dag lta bu ste/ gcig pas ni rtogs pas khyad par du 'phags la cig shos pas ni dbang po dang rtogs pas khyad par du 'phags so//'di ni tha dad pa zhes bya ba'i sgra 'brel ba yin te gcig tu gyur pa ma yin pa'i phyir tha dad pa ni so so ba kho na yin no/ /mtshungs pa nyid ni dad pas rjes su 'brang ba bas dad pas mos pa dang dus kyis rnam par grol ba dag dbang po'i sgo nas mtshungs kyi rtogs pas ma yin pa dang /chos kyis rjes su 'brang ba bas mthong bas thob pa dang dus dang mi sbyor bas rnam par grol ba dag snga ma bzhin pa lta bu ste/ de nyid kyi phyir snga phyi lam tha dad pa ma yin pa kho nas tha dad pa ma yin pa nyid ces bya ba ni sgra rnam par bshad pa yin no/ /theg pa gsum gyi rigs rab tu dbye ba ni/rgya chen po dang 'bring dang tha ma nyid ces bya ba yin no/ /yid dang bde ba la sogs pa'i dbang po rnams kyi nyon mongs pa kun nas dkris pa nyid ni nyon mongs pa mngon du gyur pa nyid do/ /nyon mongs pa bag la nyal ba nyid ni sa bon gyi ngo bor gnas pa nyid de nyon mongs pa dang lhan cig skyes shing tha mi dad pa nyid ces 'byung ba'i phyir ro//theg pa dang theg pa ma yin pa la nges pa dang ma nges pa dang yongs su smin par nges pa dang ma nges pa nyid ces bya ba ni bshad pa nyid las gsal bar zad do/ /rten 'byung ba ni skye mched drug po dag phan tshun 'brel bar rjes su 'brang ba'o//myur du 'jig pa ni skyes ma thag tu 'jig pa'i phyir ro/ /dmigs pa la 'byung ba ni skyes pa dang bud med la sogs pa mtshan mar 'dzin pa ste dbang po'i dra ba'i rjes su 'brang ba dang myur du 'jig pa dang / mtshan mar 'dzin pa nyid ces gsungs pa gang yin pa'o/ /lam gyi dbang gis mi mthun pa'i phyogs las rgyal ba'i don zhes bya ba la lam smos pas ni kun shes pa la sogs pa'i dbang po gsum ston par byed de/dbang po'i dbang gis mi rdzi ba nyid ces gsungs pa gang yin pa'o/ /phyir ldog pa ni sa gang las phyir ldog pa'i srid pa'o/ /phyir mi ldog pa ni gang las 'gal ba'i rkyen rnams kyis kyang mi bzlogs pa ste/dbang po bzlog tu rung ba dang / bzlog tu mi rung ba rab tu rnam par dbye ba nyid ces gsungs pa gang yin pa'o/ /sbyor ba las byung ba ni dad pa la sogs pa'o/ /rnam par smin pa ni mig la sogs pa'o/ /de gnyis smos pa ni ring du song ba dang lhan cig skyes pa rnam pa sna tshogs tha dad pa nyid ces 'byung ba'i phyir ro//bag la nyal ni rjes su 'brang ba'i don du rig par bya zhes bya ba ni rims nyin bzhi pa bzhin te/ bsam pa dang lhan cig skyes pa dang sems dang lhan cig skyes pa nyid kyang yang dag pa ji lta ba bzhin du rab tu shes te zhes gang gsungs pa ste/sbyor ba las byung ba dang / rnam par smin pa las rjes su 'brang ba'i phyir ro/ /gang du rjes su 'brang zhe na/ rnam par smin pa'i sems la ste/ sems dang mtshungs par ldan pa dang mtshungs par ldan pa ma yin par dbye ba zhes gsungs pa gang yin pa'o//bag la nyal rnam par smin pa'i sems gang dang mtshungs par ldan pa de ni bsgo bar bya ba yin pa'i phyir la/ rnam par smin pa'i sems gang dang mtshungs par ldan pa ma yin pa de ni bsgo bar bya ba ma yin pa'i phyir ro/ /'o na go ji ltar de la rjes su 'brang zhe na des byas pa'i las rjes su 'brang ba'i phyir ro//bar chad med par rnam pa sna tshogs yun ring po nas rjes su 'brang ba ni ring nas rjes su zhugs pa zhes 'byung ba'i phyir ro/ /thog ma med pa'i dus nas ma bstsal ba nyid de ma bton pa dang / de la yang rjes su 'brang ba'i phyir bsam gtan la sogs pa thams cad kyis kyang mi mjed pa nyid de 'di gnyis kyis na dbang po nyid du rjes su 'brang ba yin no//khams gsum pa'i mtshams sbyor bas shin tu sbrel bar byed pa nyid dang / thog ma med pa'i dus nas sems bcings par kun du 'byung ba nyid dang skye mched kyi sgo nas rnam par rig pa 'byung ba nyid ces bya ba tshig gsum gyis ni go rims bzhin du khams dang sems dang yul thams cad du song bas rjes su 'brang ba bstan to//gnyen po yod pa'i don yin pa ni gnyen po thob pa rdzas su gyur pa nyid ces gsungs pa gang yin pa ste/ bag la nyal ni rnam par rtog pas kun nas bslang ba'i phyir ro//phra ba rjes su 'brang ba la skye mched drug la zhes bya ba ni de'i 'bras bu rnam par shes pa rnams la bya'o/ /nyon mongs pa'i bdag nyid bag la nyal gyi bdag nyid du mi phrad la kun nas dkris pa'i bdag nyid du ni ma phrad pa ste nyon mongs bag la nyal gyi bdag nyid dang kun nas dkris pa'i bdag nyid du gnas pa'i phyir te/sa dang skye mched dang phrad pa dang ma phrad pa nyid ces gsungs pa gang yin pa'o/ /'jig rten las 'das pa ma yin pa'i lam gyis spangs par bya ba ma yin pa ni gzhan ma yin pa 'phags pa'i lam gyis gsal ba zhes gsungs pa gang yin pa ste/gzhan ma yin pa ni 'phags pa'i lam mo/ /skye ba'i rgyu ba thibs pos rab tu dbye ba ni mdo las ji skad 'byung bar zad pa'i phyir shes par sla'o/ /'bras bu 'byin par nye bar gnas pa dang nye bar mi gnas pa'i bye brag ces bya ba la/ bag chags ni sa bon no//bag chags gang dag 'bras bu 'byin par kun du 'byung ba de dag ni nye bar btags pa ma yin pa'o/ /ji lta zhe na/ 'di ltar de dag ni 'bras bu dngos su mngon par bsgrub pa'i phyir nye bar btags pa ma yin te dngos su sa bon nyid yin zhing bag chags nyid yin no/ /gang dag 'bras bu 'byin par nye bar mi gnas pa de dag ni btags pa'i bag chags nyid yin pas sa bon tshig pa bzhin du nye bar btags pa yin te/bag chags rnams kyi nye bar gtags pa dang nye bar btags pa ma yin pa nyid du gsungs pa gang yin pa'o/ /'gro ba'i bag chags kyi bye brag gis zhes bya ba ni 'gro ba gang dang nyon mongs pa'i bag chags gang du 'brel ba des bsgos pa nyid ces de ston par byed do//sems can dang bstan pa'i bag chags kyi bye brag gis zhes gang smras pa ni sems can ji lta bur gyur pa dag dang 'grogs pa'i rgyus spyod pa spyad pa des bsgos pa nyid ces bya ba yin no//bzo'i las kyi nyon mongs pa'i bag chags kyi bye brag gis zhes bya ba ni 'di skad du/ las ni 'dir bzo'i las yin gyi dge ba la sogs pa ni ma yin no/ /nyon mongs pa yang 'dir de bslab pa'i phyir yongs su dub pa yin gyi 'dod chags la sogs pa ni ma yin no zhes bshad pa yin te/las ji lta ba bzhin du nyon mongs pa goms par byas pas bsgos pa nyid ces gsungs pa gang yin pa'o/ /las ni 'di yin gyi gzhan ni ma yin no zhes bya ba 'di la gtan tshigs ni dge ba la sogs pa'i las mjug thogs su ston pa yin no/ /bar ma do'i srid pa'i bag chags kyi bye brag gis ni bar ma do na yod pa'i srid pa des yang srid par 'gro ba ste/de bzhin du mdo las 'byung bar zad do/ /'bras bu 'byin pa'i rim gyi bye brag gis zhes bya ba ni goms pa gang yin pa dang zhes bya ba la sogs pas khong du chud par bya'o/ /'jig rten pa'i nges par 'byung ba'i bag chags kyi bye brag gis zhes bya ba ni nyon mongs pa'i rgyun mi 'chad pa ste/ji lta zhe na/ bag chags ring du song ba'i phyir ro/ /dus re zhig rnam par mnan pa'i phyir nyon mongs pa 'grib par byed pa ni ma yin te/ de bzhin du mdo las 'byung bar zad do/ /chos 'di pa rnams kyi thar pa'i tshogs [(]gyi [,]kyi [)]bag chags ni rdzas su gyur pa ste/thar pa yang dag pa 'thob pa'i thabs yin pa'i phyir ro/ /gzhan mu stegs can rnams kyi ni de lta ma yin pas rdzas su ma gyur pa zhes bya'o/ /theg pa'i bag chags kyi bye brag gis ni mdo las ji skad 'byung bar zad pa'i phyir gsal lo//yongs su mya ngan las 'das pa'i chos can rnams ni theg pa gsum la gcig tu nges pa ste/ sems can gyi tshogs yang dag pa nyid du nges pa nyid ces gsungs pa gang yin pa'o/ /yongs su mya ngan las mi 'da' ba'i chos can rnams ni/log pa nyid du nges pa'i phyir/ /gcig tu ma nges pa yin te/ /log pa nyid du nges pa nyid/ /ces 'byung ba'i phyir ro/ /de gnyis kar ma nges pa nyid ni gang dag rkyen ji lta ba bzhin du dam pa dang dam pa ma yin pa'i chos mnyan pa'i rgyus theg pa gsum la gcig tu nges pa'am gcig tu ma nges pa gcig tu bsgrub par 'gyur ba ste/gnyi gar ma nges pa nyid ces 'byung ba'i phyir ro/ /legs par spyad pa dang nyes par spyad pa'i rgyu'i bye brag gis ni yang dag pa'i lta bas yang dag pa la nges pa nyid dang zhes bya ba dang log par lta bas log pa la nges pa nyid dang de gnyi ga dang bral bas gnyi gar ma nges pa nyid kyang zhes 'byung ba'i phyir te/yang dag pa'i lta bas ni yang dag pa nyid du nges la/ log par lta bas de dang 'dra'o/ /ngan 'gro'i rgyu'i bye brag gis ni mtshams med pa lnga po dag gang yang rung ba zhig tu log par nges pa ste/ log pa kho na log pa nyid yin la der nges pa'i phyir ro/ /bde 'gro'i rgyu'i bye brag gis ni dad pa la sogs pa dbang po lnga la yang dag par nges pa'i phyir te/'dir yang yang dag pa kho na yang dag pa nyid yin no/ /de gnyi ga dang bral bas nges pa med pa nyid yin no/ /mi dal bar skye ba brgyad du log par nges pa ni mu stegs can rnams so/ /yang dag par mya ngan las 'das pa la yang dag par nges pa nyid ni 'phags pa nyan thos rnams so//yang byar med pa ni log pa nyid dang / yang dag pa nyid dag dang go rims bzhin te spangs zin pa'i phyir dang / thob zin pa'i phyir zhes bya ba'i tha tshig go/ /nges pa med pa ni snga ma bzhin no/ /ser sna ma bzlog pas don du gnyer ba'i sems can rnams yal bar 'dor ro//phrag dog ma bzlog pas sems can gzhan dag 'byor bar mi 'dod do/ /ngan pa nye bar spyod pa ma bzlog pas gzhan dag la sdug bsngal nye bar bsgrub ste/ ngan pa ni smad pa'o/ /de spyod pa ni yul te/ sems can la gnod par zhugs pa'i lus dang ngag gi las dag go//de gnyis ni dam pa rnams kyis smad par bya ba yin pa'i phyir te/ de'i phyir tshul 'dis byang chub sems dpa' log pa nyid du nges pa yin no/ /rgyu gnyis pa bshad pa bsgrub pas ni yang dag pa nyid du nges par 'gyur te/ 'phags pa bla na med pa'i lam sgom pa nye bar sgrub pas yang dag par nges pa nyid ces 'byung ba'i phyir ro//gnyi ga med pas ma nges pa yin te/ de bzhin du mdo las 'byung bar zad do/ /spyod pa la 'jug pa phun sum tshogs pa de lta bu yin no/ /ci zhig shes nas ston zhe na/ /rnam grol snod ces bya ba dang / /rnam par grol ba'i mtshan nyid dang //theg pa gsum po rab ston phyir/ /rnam grol rab tu dbye ba'o/ /yongs su smin par gyur pas zhes bya ba la yongs su smin pa ni mi mthun pa'i phyogs bstsal ba ste/ rma yongs su smin pa bzhin no/ /skal ba dang ldan pa nyid du byed pas gnyen po bskyed pa ste/zas yongs su smin pa bzhin no/ /'dul bas zhes bya ba ni/ sems can rnams 'dul ba'i rgyu nyon mongs pa dang nye ba'i nyon mongs pa dag 'dul bar byed pa ste/ de'i rang bzhin ni de dag nye bar zhi ba yin pa'i phyir ro/ /gdul bya rnams kyi snod brtags nas/ /gnyen po nye bar ston pa'i phyir//dbang du byas nas bshad pa ni/ /tshig bcu dag gis shes par bya/ /rnam par dbye ba ni gnyen po'i bye brag ste/ de yang bsam pa ji lta ba dang / bag la nyal ji lta ba zhes bya ba yin no/ /gnyis kyis ni gnyen po bstan pa'i snod nyid 'os nyid kyi dbang du byas nas zhes bya ba yin no//dbang po dang mos pa dang mthun pa'i dbang du byas nas chos ston pa'i phyir spyir chos bshad pa'i snod nyid yin te de yang tshig gnyis kyis bstan to/ /gang la dpe nye bar bsgrubs pa gang gi don gnyug ma gor btub pa de de la nye bar bsgrub pa ste/ spyod yul ji lta ba rnam par dbye ba shes pa nye bar sgrub pa zhes gsungs pa gang yin pa'o//spyod yul ni yul lo/ de yang grags pa yin gyi ma grags pa ni ma yin pas dpe yin te/ bsgrub par bya ba la de rnam par dbye bas/ shes pa nye bar sgrub pas so/ /rnam grangs gang gis don gang go bar 'gyur ba de'i snod kyi dbang du byas pa ste/spyod yul thams cad shes pa khong du chud par bya ba zhes gsungs pa gang yin pa'o/ /rnam grangs gang gis yul la sogs pas tha dad pa'i sems can thams cad kyi dngos po spyod yul du 'gyur ba de shes pa khong du chud par bya ba'o/ / brjod par 'dod pa'i don ji snyed pa thob pa'i snod du rung ba de'i dbang du byas pa ni khams kyi thibs po ji lta ba bzhin du nye bar dpyod pa dang ldan pa zhes gsungs pa gang yin pa ste/ khams ni rigs yin no/ /shes par dka' ba'i phyir de nyid thibs po yin no/ /de'i nye bar dpyod pa ni rnam par 'byed pa ste/bye brag tu shes pa'o/ /de dang ldan pa ste/ de'i phyir rigs khong du chud pa'i phyir de dang 'tsham pa'i chos bstan pas thob par rung ba nyid do/ /tshig gzung bar 'os pa nyid ces bya ba ni skye bar nyon mongs pa dang las kyi bag chags ji lta ba bzhin rjes su 'jug ces gsungs pa gang yin pa'o//ji lta zhe na/ skye ba de dang der nyon mongs pa dang las kyi bag chags dang mthun par byed pa ste/ mthun pa nyid du sgrub pas ni tshig gzung bar 'os par 'gyur ro/ /de lta ma yin na mi shes pa'i ngo bo chos ston par byed pa 'di su zhig ces zer te/ de ltar mi 'gyur ro/ /nges pa dang ma nges pa'i dbang po rnam par bzlog pa ni tshogs ji lta bu la gnas pa khong du chud par bya ba zhes gsungs pa gang yin pa ste/log pa nyid kyi tshogs la nges pa'i dbang po rnam par bzlog pa ni dper na bcom ldan 'das 'jam pa'i dbyangs kyis ma skyes dgra'i 'gyod pa bsal nas/ las bsrabs pas ngan song rnams las rnam par bzlog pa lta bu'o/ /ma nges pa rnam par bzlog pa ni yang dag pa nyid la 'god pa'i phyir ro/ /theg pa ji lta bus nges par 'byin pa'i snod nyid ces bya ba ni theg pa ji lta bu la mos pas rnam par grol ba thob par byas pas chos ston to zhes gsungs pa gang yin pa'o//rnam pa nyi shus gtam brjod pa/ /ji lta bu zhe na/ /dus dang gus par byed pa dang / /go rims dang / mtshams sbyar ba dang / mthun par ldan pa dang / dga' bar byed pa dang / mos par byed pa dang / tshim par byed pa dang / brtun nges par mi byed pa dang / g.yel bar mi byed pa dang / rigs pa dang / mthun pa dang / ma 'dres pa dang / chos dang ldan pa dang / 'khor ji lta ba dang / byams pa'i sems dang ldan pa dang / phan pa'i sems dang ldan pa dang / snying brtse ba'i sems dang ldan pa dang / rnyed pa dang / bkur sti dang / tshigs su bcad pa rnams la mi gnas pa dang /bdag la mi bstod cing gzhan la mi smod pa'o/ /de la dus ni mi khom pa brgyad dang ma 'brel zhes bya ba'i tha tshig ste/ dper na/ mya ngan gyis gdungs rims btab 'khrugs pa yul la mngon phyogs rnam par nyams par gnas/ /sgo ba med cing srung ma med dang phrad ma zhugs dang sgrub pa med pa yi//rgyal po la ni yul dus shes pa ji ltar rang don brjod par mi 'dod ltar/ /sems kyi rgyal po mi khom brgyad dang 'brel pa yi ni tshul ni de nyid do/ /bshad pa lta bu'o/ /gus par byed ces bya ba ni mthun pa'i spyod lam gyis gnas pa yin gyi/ mi mthun pas gnas pa la ma yin te/ji lta bu zhe na/ min par 'dug pa la 'greng ste chos mi bshad par bslab par bya'o zhes bya ba la sogs pa lta bu'o/ /go rims zhes bya ba ni tshig dang yi ge go rims ji lta ba bzhin du ston pa'o/ /mtshams sbyar ba zhes bya ba ni go rims bzhin kho nar don gyi sgo nas kyang rnam par 'byed pa'o//mthun par ldan zhes bya ba ni don dang ldan par chos ston gyi don dang mi ldan par ma yin pa'o/ /dga' bar byed ces bya ba ni yang dag par bstan par bya ba rnams la yang dag par ston pa'o/ /mos par byed ces bya ba ni yang dag par 'dzin du gzhug par bya ba rnams la yang dag par 'dzin du 'jug pa'o//tshim par byed ces bya ba ni yang dag par gzengs bstod par bya ba rnams la yang dag par gzengs bstod pa'o/ /brtun ngas par mi byed pa dang g.yel bar mi byed ces bya ba rnam pa 'di gnyis kyis ni yang dag par dga' bar bya ba rnams yang dag par dga' bar byed pa'o//rigs pa zhes bya ba ni mngon sum dang rjes su dpag pa dang / yid ches pa'i lung gi tshad ma dang ldan pa'i gtam zer ba'o/ /mthun pa zhes bya ba ni bde 'gror 'gro ba dang rjes su mthun pa'o/ /ma 'dres pa zhes bya ba ni ma 'khrugs pa gzing gzing ba ma yin pa'o//chos dang ldan pa zhes bya ba ni/ 'phags pa'i bden pa bzhi dang ldan pa'o/ /'khor ji lta ba zhes bya ba ni/ 'khor bzhi'am brgyad de/ gang la ji ltar gtam gang 'os pa de la de ltar brjod pa'o/ /re zhig rnam pa bco lnga po 'di dag gis ni byang chub sems dpa'i gzhan gyi don rnam pa thams cad dang ldan pa'i gtam du shes par bya'o//de'i 'og tu byams pa'i sems dang ldan pa zhes bya ba ni gnod pa byed pa'i sems can rnams la'o/ /phan pa'i sems dang ldan pa zhes bya ba ni nyes par spyad pa spyod pa'i sems can rnams la'o/ /snying brtse ba'i sems dang ldan pa zhes bya ba ni bde ba dang sdug bsngal gyis rgyags pa dang /sro shi ba rnams la'o/ /mi gnas pa zhes bya ba ni rnyed pa dang bkur sti dang tshigs su bcad pa thams cad la re ba med pa zang zing med pa'i sems kyis so/ /bdag la mi bstod cing gzhan mi smod ces bya ba ni nga rgyal gyi phrag dog gis kun nas dkris pa dang bral bar sems can rnams la chos ston pa ste/rnam pa lnga po 'di dag gis ni byang chub sems dpa'i rang gi sems yongs su dag pa'i gtam du shes par bya'o/ /so so yang dag rig bsdus phyir/ /ngag ni phun sum tshogs shes bya//sems can don du ngag 'jug ste/ /de yang ma 'dres ston pa yi/ /rtag par zhes bya ba ni rgyun mi 'chad par rgyun du yang dag par 'byung ba zhes bya ba'i tha tshig go/ /ma 'dres pa dag ces bya ba ni nyan thos dang rang sangs rgyas thams cad dang thun mong ma yin pa rnams zhes bya ba'i tha tshig go//bzhi gang zhe na/ 'di lta ste/ chos so so yang dag par rig pa dang / don so so yang dag par rig pa dang / nges pa'i tshig so so yang dag par rig pa dang / spobs pa so so yang dag par rig pa'o/ /so so yang dag par rig pa 'di rnams kyi yul la chos nyid ni/chos kyi ngo bo nyid chos kyi rigs yongs su bsdus pa ste/ gzugs kyi mtshan nyid ni/ gzugs su rung ba'o zhes bshad pa lta bu'o/ /'dis ji ltar mtha' gnyis spangs pa nyid bshad pa yin zhe na/ gzugs la sogs pas ni de lta bu yin no zhes mtshan nyid mi 'dra ba brjod pa kha cig gis gzugs la sogs pa la bdag tu sgro btags pa gang yin pa de bstsal to//med pa la mtshan nyid med pas skur pa 'debs pa'i mtha' yang 'di nyid kyis bstsal to/ /chos nyid spyod yul kho na la ji ltar shes pa'i yul du 'gyur ba'o zhes bya ba 'di'i don ni 'di yin te/gzugs de mtshan nyid kyi sgo nas bstan du zin kyang ji srid du rnam par phye ste ma bstan pa de srid du re zhig shes pas yul du bya bar mi nus pas rnam par phye ste brjod pa ni ji ltar shes pa'i yul du 'gyur ba yin par rtogs par bya'o/ /shes pa ni 'dir yid kyi rnam par shes pa yin gyi mig gi rnam par shes pa ni ma yin te/'di ltar mig dang gzugs rnams zhes bya ba la sogs pas gzugs su rung ba'i rigs kyis bsdus pa'i don thams cad ston to/ /go bar byed pa ni chos nyid spyod yul de nyid rnam grangs gang gis brjod pas gzhan dag gis shes pas khong du chud par byed pa'o//go bar byed pa rnam grangs tshad med pa shes pa dag gis sgo du ma nyid do/ /'di thams cad ni rang gi mtshan nyid la sogs pa bzhi tshan gyi bcu po thams cad la so sor sbyar bar bya'o/ /rigs kyi rang gi mtshan nyid ji lta bu zhe na/ de chos so so yang dag par rig pas chos rnams kyi mtshan nyid rab tu shes so zhes 'byung ba'i phyir te chos nyid yul yin pa'i phyir ro//chos nyid de nyid rigs zhes bya ste/ dngos po du ma nye bar sdud pa yin pa'i phyir ro/ /so so'i rang gi mtshan nyid ni don so so yang dag par rig pas chos rnams kyi rnam par dbye ba rab tu shes so zhes bya ba yin no//rang gi mtshan nyid kho na'i dbang du byas nas chos nyid spyod yul dang yul yin pa'i phyir te/ chos nyid spyod yul ni don yin la de yang rnam pa 'ga' zhig tu nye bar bzung bas yul du 'gyur bas so so'i rang gi mtshan nyid du 'gyur ro/ /sgra ji bzhin du ming du grags pa'i rang gi mtshan nyid ni nges pa'i tshig so so yang dag par rig pas chos rnams ma 'dres par bstan pa rab tu shes so zhes 'byung ba'i phyir ro//rang gi mtshan nyid kho na'i dbang du byas nas go bar byed pa yul ma 'dres par bstan pa nyid kyis mtshan nyid 'di bshad pa yin no/ / ming de'i rab tu dbye ba'i rang gi mtshan nyid ni spobs pa so so yang dag par rig pas chos rnams kyi mthun pa'i rgyun/ rgyun mi 'chad par rab tu shes so zhes 'byung ba'i phyir te/ mtshan nyid 'di yang mthun pa'i rgyun rgyun mi 'chad pa nyid kyis yongs su bstan pa yin no//mtshan nyid gzhan dag la yang de bzhin du sbyar bar bya'o/ /'di dag gi rab tu dbye ba ni bshad pa nyid las gsal bar rab tu phye bar zad do/ /'byung ba'i mtshan nyid la ji ltar rigs kyis bsdu ba'i khongs su bsdu bar bya zhe na/ da ltar byung ba'i rigs su gtogs pa'i phyir zhes bya bas sbyor bar byed do//shes pa'i yul nyid kyang 'das pa dang ma 'ongs pa la ltos nas zhes bya ba la sogs pas sbyar ba nyid do/ /rgyu bzhi dag gis smra ba po'i/ /phun sum tshogs par 'dod pa yin/ /dang po gzugs ni phun sum tshogs/ /gnyis pa ston pas byas pa yin/len 'debs pa ni gsum pa ste/ /bzhi pa 'dzin pa'i phyir yin no/ /de la gzugs phun sum tshogs pa mdo las ji skad 'byung ba bzhin sbyar bar bya ste/ de'i las ni 'bras phrag bcu dang ldan pa'i sgra skad kyi yan lag la mkhas pas zhes bya ba nas bzung ste/bskal pa 'bum du bzung ba'i byin gyi rlabs kyis zhes bya bar 'di ni gzungs kyi las yin par rig par bya'o/ /ston pa phun sum tshogs pa ni de de lta bu'i gzungs thob cing zhes bya ba nas bzung ste rdul phra rab kyi rdul re re las chos kyi sgo brjod du med pa 'byung bar byed do zhes bya ba'i bar 'byung ba'i phyir ro//dris pa len 'debs pa phun sum tshogs pa ni gal te zhes bya ba nas bzung ste/ sangs rgyas kyi mdzad pa mtha' dag gis sems can thams cad la nye bar gnas pa yin no zhes bya ba'i bar 'byung ba'i phyir ro/ /'dzin pa phun sum tshogs pa ni de de bas kyang shas cher zhes bya ba nas bzung ste/de lta bu'i shes rab kyi snang ba rnam par nges pa'i spobs pa bdag gis yongs su spyad par bya'o snyam mo zhes bya ba'i bar 'byung ba'i phyir ro/ /de ltar bshad pa phun sum tshogs pa ni shes pa phun sum tshogs pa dang ngag phun sum tshogs pa dang /smra ba po phun sum tshogs pa dang / rgyu gsum gyis yongs su bstan pa yin no/ /lhag ma ni snga ma bzhin du khong du chud par bya'o/ /bdag dang gzhan don bsgrub phyir thugs rjes 'brel ba'i thugs/ /dang por dge mchog 'bad pa chen po mdzad nas ni/ /blo ldan ye shes yon tan mchog ldan brnyes nas su//sems can bsam pa thibs po rgyu ba mkhyen mdzad de/ /'jig rten sdug bsngal rgya mtshor ltung ba rab gzigs nas/ /don med thibs po de las yongs su dgrol ba'i phyir/ /sems can bsam pa rnam mang legs par rab brtags te//'phags pa'i lam dang mthun pa'i chos ni ston bzhed nas/ /sems can dbang po la sogs mkhas pa mchog thob cing / /phun sum tshogs ngag smra po phun tshogs mchog brnyes te/ /sems brten rgyu ba thibs po sems can gtogs pa dag /rnam pa mang po brtags nas chos rnams ston par mdzad//so so yang dag rig rnams mang thob nas/ /de yis chos rnams tshul bzhin bsam byas te/ /sa dgu don chen rnam par sbyongs nas ni/ /chos kyi sprin ni yang dag gnon par byed/ /sa bcu pa'i 'brel pa bstan pa'i phyir/ 'dir sa dgu pa la zhes bya ba la sogs pa smras so//'di dag ni bshad pa'i mtshams sbyor ba yin par rig par bya'o zhes bya ba ji lta bu zhe na/ tshogs bstsags par bya ba shin tu mtha' yas bstsags pa'i phyir chos dkar po yongs su rdzogs pa yin la/ de yang bsod nams dang ye shes kyi tshogs chen po shin tu yongs su bzung ba'i phyir ro zhes bya ba ste/de ltar na mtshams sbyor ba yin no/ /bdag dang gzhan gyi don la khyab pa'i phyir snying rje chen pos shin tu rgyas pa thob pa ste/ bdag dang gzhan gyi don la zhugs pa'i phyir zhes smras pa gang yin pa'o/ /'jig rten gyi khams rnams rnam par dbye ba ni sna tshogs pa nyid do//de la mkhas pa ni bzo ba'o/ /de'i phyir sangs rgyas kyi zhing yongs su sbyong bar byed pa yin no/ /sems can rnams kyi khams ni rigs so/ /de'i rgyu ba thibs po ji skad du bshad pa la zhugs shing rtogs pa ste/ /de'i phyir sems can yongs su smin par byed pa yin no//de lta ma yin te rigs ma rtogs na yongs su smin par bya ba dka'o/ /de bzhin gshegs pa'i spyod yul ni de bzhin nyid do/ /de la zhugs pas rtogs pas rjes su mthun par gyur pa'i 'du shes yid la byed pa ste/shin tu rnam par phye ba zhes smras pa gang yin pa'o/ /phul du phyin pa thob par 'dod pas stobs la sogs pa la lhag par dmigs pa ste chog par 'dzin pa zhes smras pa gang yin pa'o/ /rnam pa thams cad du thams cad mkhyen pa gang dag yin pa de dag ni rnam pa thams cad dang ldan pa'i thams cad mkhyen pa'o//de dag gi ye shes kyis ni sgrib pa thams cad dang bral ba'i de bzhin nyid dang / bskal pa ji lta bar sems can gyi don byed pa ste/ gcig la dmigs pa'i phyir dang / cig shos ni phrin las kyi yul yin pa'i phyir ro/ /de'i phyir sa'i mthar thug pa thob pas de skad ces bya'o//dri med la sogs ting nge 'dzin/ /bcu tshan so sor thob pa'i phyir/ /thob pa las ni ting nge 'dzin/ /yongs su rdzogs par thob ces brjod/ /nyon mongs pa rnams sngar spangs pa'i phyir nyon mongs pa rgyang sring bar byed pa'i don gyis dri ma med pa ste/ting nge 'dzin dri ma med pa zhes bya ba mngon du 'gyur ro zhes 'byung ba'i phyir ro/ /ldem po dag la 'jug pa dri ma med pa zhes bya ba ldem po dag ni 'dir dgongs pa'i ldem po dag yin par rig par bya'o/ /dgongs pa bzhis thub pa'i gsung rab mtha' dag ji lta ba bzhin du 'gal ba med par khong du chud pa ste/chos kyi dbyings rnam par dbye ba la 'jug pa zhes bya ba gsungs pa gang yin pa'o/ /chos kyi dbyings ni 'dir bshad pa'i chos yin te/ de mdo sde du ma'i rang bzhin gyi chos kyi dbyings 'di la bye brag tu dbye bas rnam par phye nas dgongs pa gang zhig gang la 'jug pa ste/thams cad la dgongs pa rnam pa bzhi char yang 'jug pa ni med do/ /de ltar na ting nge 'dzin gang gis bye brag tu 'jug pa de ni chos kyi dbyings rnam par dbye ba la 'jug pa yin no/ /gzhan na re gcig kho na yin pa las 'jig rten gyi bye brag gis tha dad pa don gyi sgo nas gcig pa nyid du sbyor bar byed pa'i phyir ro zhes zer ro//byang chub mchog tu gyur pa ni byang chub kyi snying po'o/ /de las skye ba'i phyir ting nge 'dzin gang la gang dag gis de brgyan par byed rab tu 'byed par byed pa de dag gi tshogs yod pa de/ de nyid kyi phyir nye ba dri ma med pa zhes bya'o//'di la snying po rgya mtsho lta bu yod pa ste/ 'di ltar nang gi cha rin po che mthu bla na med pa dpag tu med pa dang ldan pas dra bar khebs pa can gyi rgya mtsho chen po shin tu rgya che bar gyur pa de bzhin du ting nge 'dzin kyang yi ge dang don gyi gzungs du ma mnyam par 'jog pa'i lus yin pa'i phyir rgya chen por gyur te gzungs dri ma med pa zhes smras pa gang yin pa'o//rgya mtsho dang 'dra bar 'byor ba ste/ ji ltar rgya mtsho chen po rin po che'i phung po chen po grangs su dgod pa dpag tu med pa dag gis brgyan pa na 'byor pa shin tu rab kyi mthar phyin pa dang 'brel ba nyams su myong ba de bzhin du mngon par shes pa mthu du ma dang ldan par mngon par sgrub pa yang dag par skyes pa dag gis ting nge 'dzin dri ma med par byed pa na 'byor pas mnyam par 'jog pa yin te/mngon par shes pa mngon par bsgrub pa dri ma med pa zhes brjod pa gang yin pa'o/ /mtha' yas pa'i phyir nam mkha'i khams dang 'dra bar rgyas pa dang /de bzhin nyid la dmigs pa'i phyir chos rnams thams cad kyi ngo bo nyid rnam par 'byed pa zhes bya ba 'di gnyis kyis ni ting nge 'dzin thob pa na zhing rnam par dag pa dri ma med par 'gyur ba ston te/ de bzhin du yang bshad pa yin no//tshogs gsum la nges par gnas pa'i sems can thams cad kyi sems kyi spyod pa sbyar ba'i sgo nas rjes su rtogs shing khong du chud na de dang 'tsham par chos ston pas de dag yongs su smin par byed pas ting nge 'dzin la dri ma med pa nyid du byed de/ de skad du sems can yongs su smin par byed pas dri ma med pa nyid ces smras pa yin no//ting nge 'dzin gang la mnyam par gzhag na da ltar byung ba'i sangs rgyas bcom ldan 'das skyes bu chen po'i mtshan sum cu rtsa gnyis mnga' ba/ sku dpe byad bzang po brgyad cus brgyan pa gang dag chos zab mo gting dpag dka' ba ston par mdzad pa thams cad mngon sum du bzhugs pa ste/de'i phyir de dag gzhan mngon par rdzogs par byang chub pa mngon du gyur pa shes pa'i phyir shin tu dri ma med par dmigs pa la de skad du mngon par rdzogs pa rtogs pa dri ma med pa zhes bya'o//ting nge 'dzin rnams kyi bya ba ji snyed pa de nyams su myong ba'i phyir sgrub pas ting nge 'dzin yongs su rdzogs pa zhes bya ste/ ting nge 'dzin yongs su ma rdzogs pa ni de snyed kyi bya ba nyams su myong ba chub par mi 'gyur ro/ /de la dbang bskur thob pa ni/ /bstan la sogs pa'i skabs nas ni//ji lta bur na dbang bskur bar/ /bstan pa las ni rtogs bya ste/ /stan dang lus kyi tshad dang ni/ /'khor dang rgyu ni yod pa dang / /gang gis dbang ni bskur ba dang / /ji zhes bya bar rab ston las/ /mchog gi rang bzhin rin po che chen po rnams kyi rgyal por gyur pa'i tshe/dper na mang dra rnams kyi rgyal po bzhin te/ de dag gi rje bo zhes bya ba'i tha tshig go/ /de ltar na mchog gi rang bzhin gyi rin po che chen po rnams dang rgyal po'i pad+ma ni lhan cig rje khol gyi mtshan nyid kyis 'brel bar shes par bya'o/ /mchog gi rang bzhin pad+ma'i rgyal po chen po rin po che'i rnam pa thams cad kyis spras pa nyid ni khyad par gyi mtshan nyid yin zhes bya ba'i tha tshig go//'jig rten gyi yul thams cad las yang dag par 'das pa'i sa nas de byung ba'i phyir sa'i mtshan nyid yin no/ /sgyu ma'i rang bzhin gyi spyod yul du 'gyur ba gang yin pa ni gzung ba'i rkyen du snang ba'i phyir yul nyid du 'gyur te de de ltar yongs su grub pas grub pa'i mtshan nyid yin no//chos kyi dbyings la shin tu gnas shing bkod par snang bas don dam pa'i mtshan nyid yin no/ /shin tu gnas pa ni legs par gnas pa'o zhes bya ba ni nye bar bsgyur ba rnams ni don du ma yin pa'i phyir te/rab stsogs don ni bsdus pa la/ /bdag gis don gang rgyus shes te/ /mkhas pas 'jig rten rig byed kyi/ /sbyor bas du mar shes par bya/ /zhes bshad do/ /'di las 'jig rten dang 'jig rten las 'das pa'i bde ba'i rgyur gyur pa legs par bshad pa rnams rig par 'gyur ba'i phyir/'di ni rig byed yin no zhes bya ba de bzhin du sangs rgyas kyi bka' yang rig byed yin no/ /lhag ma ni shes par sla ba'i phyir rnam par ma phye ba'o/ /bdag nyid chen po brten pa'i blo/ /snying brtse ba dang nges pa'i rgyud/ / sems can kun gyi gnyen gcig pa/ /go cha chen po bgos pa'o/ /sems can kun la phan bzhed pa/ /sangs rgyas nyid ni 'thob pa'i rgyu/ /dka' ba'i las ni sna tshogs pa/ /mi bzad rtag tu rjes 'brang ba/ /yun ring dus nas bstsags rnams kyis/ /gang gi don du rab sbyar ba//byang chub sems dpa' rnams kyis 'di/ /theg pa chen po'i dbang bskur ba'o/ /de lta bur ni dbang bskur cing / /tshad med yon tan ldan pa ste/ /chos kyi sprin la rab gnas pa'i/ /byang chub sems dpa' zhes bya'o/ /dbang bskur ba thob pa ni de lta bu yin no/ /cho ba nyid kyi mthar phyin pa//shes rab dang ni rnam thar dang / /ting 'dzin gzugs dang mngon par shes/ /don lnga dag la brjod pa yin/ /don lnga dang 'brel par rig par bya ste zhes bya ba ni re re zhing don re re dang 'brel bar shes par bya'o/ /shes bya'i de kho na nyid phyin ci ma log pa'i ngo bo gang yin pa de mngon par rdzogs par byang chub par byed pa ni shes pa'i che ba nyid yin no//de la dang po ni thams cad kyi thams cad mkhyen pa nyid la the tshom za ba gcod pa'i dbang du byas pa ste/ chos kyi khams yang dag par 'grub pa zhes gsungs pa gang yin pa'o/ /chos ni kun nas nyon mongs pa dang rnam par byang ba rnams so//de dag gi khams ni sa bon te yang dag par 'grub pa zhes 'byung ba'i phyir ro/ /de rab tu shes pas de nyid kyi phyir yang dag par 'grub pa shes pa yin no/ /srid pa'i yan lag gang dag gis srog chags rnams kun nas nyon mongs par 'gyur zhing / gang dag 'gags pas rnam par byang bar 'gyur ba de dag shes pa'i phyir ro/ /rten cing 'brel bar 'byung ba shes pa nyid yang dag par 'grub par shes pa yin no zhes bshad pa yin te/ de'i phyir thams cad mkhyen pa nyid rab tu sgrub par byed pa yin no/ /gang du zhes bya ba ni khams gsum du ste/ mdo las ji skad 'byung ba bzhin no//sems can gang dag ni sems can gyi khams yang dag par 'grub pa zhes 'byung ba'i phyir ro/ /sems gang kun nas nyon mongs shing rnam par byang ba ni rnam par shes pa'i khams yang dag par 'grub pa zhes 'byung ba'i phyir ro/ / gang dag mi shes pa dang shes pa ni 'dus byas dang 'dus ma byas kyi khams yang dag par 'grub pa zhes 'byung ba'i phyir ro/ /nam mkha' dang 'dra ba'i yul ji tsam pa ni nam mkha'i khams yang dag par 'grub pa zhes 'byung ba'i phyir ro/ /dam pa dang dam pa ma yin pa'i chos bstan pa gang gis ni yang dag pa dang yang dag pa ma yin pa bstan pa'i khams yang dag par 'grub pa zhes 'byung ba'i phyir ro//mya ngan las 'das pa gang thob pa dang ma thob pa ni mya ngan las 'das pa'i khams yang dag par 'grub pa zhes 'byung ba'i phyir ro/ /lta ba'i nyes pa gang gis mu stegs can rnams kyis de mi thob pa ni lta bar gyur pa'i nyon mongs pa yang dag par 'grub pa zhes 'byung ba'i phyir ro//snod kyi 'jig rten 'byung ba dang ldog pa gang dag ni 'jig rten gyi khams 'jig pa dang 'chags pa yang dag par 'grub pa zhes 'byung ba'i phyir ro/ /theg pa gsum yang dag par 'grub pa gang yin pa ni mdo las ji skad 'byung ba bzhin no//gnyis pa ni de la gnas pas thams cad mkhyen pa nyid la gnas pas sprul pa mngon par bsgrub nus pa'i dbang du byas pa'o/ /sems can du sprul pa la sogs pa'i bye brag las sems can sprul pa'i las yang dag pa ji lta ba bzhin du rab tu shes zhes bya ba ni bskal pa 'dra bar nye bar 'gro bas sems can yongs su smin par bya ba'i phyir ro//nyon mongs par gyur pa'i sprul pa ni sprul pa gang zhig lus dang ngag gi las nyon mongs pas thebs pas bskyod pa lta bur 'dug pa ste lta bar gyur pa'i sprul pa kun du ston pa yang de dang 'dra bar khong du chud par bya'o//'jig rten gyi khams sprul pa zhes bya ba ni gdul ba'i dbang gis 'jig rten gyi khams sprul pa gang yin pa'o/ /rnam par gzhig pa'i chos la 'jug pa ni 'phags pa'i bden pa bzhi la sogs pa la 'jug pa zhes bya ba'i tha tshig go//nyan thos la sogs pa sprul pa ni rnam par grol ba ji lta ba bzhin du 'dul ba'i phyir ro/ /rtog pa med pa nyid du ni yang dag pa ji lta ba bzhin du rab tu shes so zhes bya ba ni chos kyi dbyings mnyam pa nyid kyi phyir ro/ /gsum pa ni sprul pa de nyid de lta de ltar byed nus pa'i dbang du byas pa ste//de yang mdo las ji skad 'byung ba bzhin no/ /bzhi pa de yi byin rlabs dang / /sprul pa la ni 'jug pa ste/ /gnyis min ye shes tshul gyis na/ /dus kun du ni 'jug pa yin/ /mdo las ji skad 'byung ba bzhin no/ /gnyis su med pa'i ye shes ni chos kyi dbyings shes pa ste cha phra ba la zhes bya ba 'jug pa zhes bya ba'i phyir ro//lnga pa ni sems can yongs su ma smin pa skrag pa'i dbang du byas pa ste/ gsang ba'i gnas shes pa dang bskal pa la 'jug pa'i shes pa dag kyang mdo las ji skad 'byung ba bzhin khong du chud par bya'o/ /gsang ba'i gnas shes pa zhes bya ba ni gsang ba'i rgyu shes pa zhes bya ba'i tha tshig go//'di la 'bras bu rnams gnas pas na gnas pa'i rgyu kho nar brjod do/ /gsang ba ni gsang bar bya ba ste/ dbang po dang dge ba'i rtsa ba yongs su ma smin pa rnams la kun du bstan par mi bya ba zhes bya ba'i tha tshig go//ci'i phyir zhe na/ de dag gis ma rtogs te ma mos nas dam pa'i chos spangs pas chos kyis phongs par 'gyur ba'i las bstsags na mi rung ba'i phyir ro/ /tshe la dbang ba nyid kyi phyir/ /byin rlob de bzhin gtong ba dang / /gnyen po nye bar ston pa ni/ /drug pa dang ni bdun par gzhag /yang dag par gzhol ba 'di ci zhig ce na/ mnyam pa nyid du mos pa nyid do/ /de nyid kyi phyir bskal pa la 'jug pa'i shes pa yin te/ bskal pa du mar bskal pa gcig mnyam pa nyid du mos pa'i phyir la/ gcig tu yang bskal pa du ma mnyam pa nyid du med pa'i phyir ro/ /tshe gtang ba'am byin gyis rlob pa la yang dbang 'byor ba nyid yin no//lam la gzud pa shes pa ni/ gnyen po bstan pa'i dbang du byas pa la byis pa'i lam gyis gzud pa mkhyen pa zhes gsungs pa gang yin pa ni so so'i skye bo'i dbang du byas pa ste so so'i skye bo rnams ni byis pa yin pa'i phyir byis pa'i sa'i gnyen po nye bar bstan par bya ba'i phyir ro//rdul phra rab kyi rdul gyis gzung bar mkhyen pa zhes bya ba ni nga rgyal spyod pa rnams kyi dbang du byas pa ste rtsis mkhas pa nyid kyi nga rgyal gyi gnyen po nye bar bstan par bya ba'i phyir ro/ /zhing ni tshogs mngon par rdzogs par rtogs pas gzud pa mkhyen pa zhes bya ba ni mtho ris la mos pa'i gnyen po nye bar bstan par bya ba'i phyir ro//lhag ma gzhan ni rnam par rtog pa spyod pa rnams kyi dbang du byas pa ste/ mdo las ji skad 'byung ba bzhin rig par bya'o/ /rnam par thar dang ting 'dzin dang / gzungs dang mngon par shes rnams kyi/ /rnam pa dbye ba'i bstan tshul yang / /mdo nyid las ni rtogs par bya/ /ji lta zhe na/ re zhig rnam par thar pa rnams la rnam par thar pa bsam gyis mi khyab pa zhes bya ba 'thob bo zhes bya ba ni rdzu 'phrul gyi yul gyi dbang du byas pa ste rdzu 'phrul sna tshogs pa mngon par bsgrub pas byang chub sems dpa'i rnam par thar pa bsam gyis mi khyab pa nyid yin no//sgrib pa med pa zhes bya ba zhes bya ba ni 'jig rten gyi khams dang 'gro ba mtha' yas par smos nas shes pa thogs pa med pa nyid kyi dbang du byas pa'o/ /rnam par dag pa rnam par 'byed pa zhes bya ba zhes bya ba ni 'jig rten pa'i rnam par grol ba dang /'jig rten las 'das pa slob pa dang mi slob pa rnam pa gnyis po gang yin pa de shes pa'i dbang du byas pa'o/ /sgo kun du snang ba zhes bya ba zhes bya ba ni dngos po ci 'dod dgur bsgyur ba'i dbang du byas pa'o//de bzhin gshegs pa'i mdzod ces bya ba zhes bya ba ni chos kyi gzungs kyi dbang du byas pa'o/ /de bzhin gshegs pa rnams kyi mdzod gang yin zhe na/ theg pa chen po'i chos shin tu rgyas pa'i sde'o/ /'khor lo thogs pa med pa dang ldan pa zhes bya ba zhes bya ba ni phas kyi rgol ba tshar gcod pa'i dbang du byas pa ste/phas kyi rgol ba dag tshar gcod na sangs rgyas bcom ldan 'das rnams kyi chos kyi 'khor lo thogs pa med par 'jug par 'gyur ro/ /dus gsum gyi rjes su song ba zhes bya ba zhes bya ba ni dus gsum dag gi bskal pa gang dag yin pa de dag ji ltar 'dod pa bzhin du byin gyis rlob pa ste/'das pa yang da ltar du bya bar 'dren par byed ces bya ba la sogs pa'i dbang du byas pa'o/ /chos kyi dbyings kyi snying po can zhes bya ba zhes bya ba ni chos rnams thams cad kyi rten cing 'brel bar 'byung ba'i rnam pa thams cad shes pa'i dbang du byas pa ste khams ni rigs te rgyu yin pa'i phyir ro//rnam par grol ba'i dkyil 'khor snang ba zhes bya ba zhes bya ba ni lus med cing snang ba tsam gyis rgyas par 'gengs pa'i dbang du byas pa'o/ /yul ma lus pa zhes bya ba zhes bya ba ni 'jig rten gyi khams mtha' yas pa'i sems can gyi sems cig car shes pa'i dbang du byas pa'o//de bzhin du ting nge 'dzin 'bum dag dang / gzungs 'bum dag dang / mngon par shes pa mngon par sgrub pa 'bum dag gi bar du 'thob bo zhes 'byung ba'i phyir ting nge 'dzin la sogs pa'i mthar phyin pa yang mdo kho na las khong du chud par bya'o//sa yi nges tshig sprin dang ni/ /chos mthun rnam pa gsum zhes bya/ /dper na sprin gyis nam mkha' bzhin/ /thos pa'i chos kyis chang gi lus/ /khyab pa'i phyir na de bzhin du/ /khyab par chos mthun dang por bshad/ /khyab pa ni sprin gyis nam mkha' bzhin du thob pa'i chos kyis sa 'di pa'i lus la khyab par byed pa'i phyir ro//ji lta zhe na/ de ye shes de lta bu dang ldan pa'i blo dang ji skad bshad ma thag pa tshad med pa'i rjes su song ba zhes bya ba la sogs pa yin no/ /mang po dang cha phra ba dang myur du 'dzin pa zhes bya ba ji lta bu zhe na/ de phyogs bcu'i zhes bya ba la sogs pa yin no//skad cig thang cig yud tsam smos pa ni dus thung ngu shes par bya ba'i phyir te nyan pa po'i dbang gis rnam pa gsum gsungs so/ /chos kyi snang ba chen po tshad med pa zhes bya ba la sogs pas tshad med pa smos pas ni mang po 'dzin pa'i sgo nas bstan pa tsam gyis 'dzin pa'i nus pa de yongs su bstan pa yin gyi/rgyas par ni 'og nas 'phags pa rdo rje'i snying po nyid kyis rgya mtsho'i dpe gnyis dang / 'on kyang dpe bstan par bya'o zhes bya ba la sogs pa'i gzhung gi dpes 'chad par 'gyur ro/ /de bzhin gshegs pa rnams kyis de bzhin gshegs pa'i gsang ba la 'jug pa gang dag yin pa zhes 'byung ba de la de bzhin gshegs pa smos pa ni myur du 'dzin pa'o//gsang ba smos pa ni phra ba 'dzin pa'o/ /ji ltar rang bzhin gyis she na/ chos kyi snang ba chen po zhes bya bas thos pa dang bsams pa las byung ba'i shes pa smos par 'gyur ba'i phyir ro//ji lta zhe na/ snang bar gyur pas chos so sor snang bar byed pa'i phyir ro/ /gsal bar gyur pa nyid kyis ji lta bu zhe na/ bsgoms pa las byung ba'i shes pa smos par 'gyur ba'i phyir te/ chos kyi gsal ba chen po zhes gsungs pa gang yin pa'o//ji ltar las kyis she na/ dam pa'i chos kyi char 'bebs pa'i phyir ro/ /mos pa'i sgo nas ni bzod do zhes 'byung ba'i phyir ro/ /yang dag par len to zhes bya ba ni tshig 'bru 'dzin pa'i sgo nas so/ /bdag gir byed do zhes bya ba ni don 'dzin pa'i sgo nas so/ /yang dag par 'dzin to zhes bya ba ni/de gnyi ga 'dzin pa'i sgo nas so/ /da ni 'dzin pa'i nus pa de dpe gnyis dang dpes 'chad de/ dang bar 'gyur ba'i dngos po'i sgo nas ni bzod do/ /go skabs 'byed pa'i sgo nas ni yang dag par len to/ /de las gzhan pa'i chu'i grangs 'grib par byed pa'i sgo nas ni bdag gir byed do//spyad pa'i 'os ma yin pa'i sgo nas ni yang dag par 'dzin to zhes bya bar shes par bya'o/ /dus gsum gyi brjod pa'i gzhi zhes bya ba ni 'das pa dang / ma 'ongs pa dang / da ltar gyi brjod pa'i gzhi zhes bya ba'i tha tshig go/ /gong du rgyas par ni 'phags pa rdo rje'i snying pos rgya mtsho'i dpe gnyis dang dpes 'chad par 'gyur ro zhes smras pa gang yin pa ste/re zhig de lta bu ni sprin dang chos mthun pas khyab pa'i sgo nas sa'i nges pa'i tshig dang po yin par shes par bya'o/ /gnyis pa ste/ nyon mongs pa'i rdul rab tu zhi bar byed pa'i sgo nas chos mthun pa ni mdo las ji skad 'byung ba bzhin te/'dir smon lam gyis snying brtse ba dang snying rje chen po sprin chen po kun nas bslang ste zhes bya ba ni sprin dang 'dra ba'o/ /chos kyi snang ba chen po bsgrags pa'i 'brug sgrog pa zhes bya ba ni 'brug sgrog pa dang 'dra'o/ /mngon par shes pa dang rig pa dang mi 'jigs pa'i glog 'gyu ba zhes bya ba ni glog dang 'dra'o//rlung gis shin tu bskyod pa zhes bya ba ni rlung lta bu'o/ /bsod nams ye shes kyi sprin gyi dra ba stug po chen pos kun du khebs pa zhes bya ba ni sprin gyi dra bas 'khrigs pa lta bu'o/ /lus rnam pa sna tshogs kyi sprin 'khyil pa kun du ston pa zhes bya ba ni klong 'khyil pa lta bu'o//chos kyi sgra chen po sgrog pa zhes bya ba ni char 'bab pa'i sgra lta bu'o/ /bdud kyi phyogs shin tu tshar gcod pa zhes bya ba ni chos kyi sgra chen po sgrog pa yang dag par bstan pa shes par bya'o/ /sprin dang chos mthun sgrol sgo nas//sa yi nges tshig shes bya ste/ /sprin gyi char gyis lo tog dag /sgrol ba bzhin du dga' ldan gyi/ /gnas la sogs pa'i rim gyis ni/ /sems can rnams ni sgrol ba yin/ /ji lta zhe na/ 'jig rten gyi khams gcig na yang zhes bya ba la sogs pas bstan to//mthu ni bla na med pa dang / /bla med nyid ni gnas la sogs/ /rab du bstan phyir rgyas bshad pa'i/ /sgo drug dag gis rab tu bstan/ /ji lta zhe na/ gnas dang gzhi dang mtshan nyid dang / /de bzhin du ni bya ba dang / /yongs tshim de bzhin rgya chen te/ /'di skad gcig ni rgyu bsdus pa'o//rnam par thar pa bsam gyis mi khyab pa ni gong nas byang chub sems dpa'i rnam par thar pa bsam gyis mi khyab pa zhes bya ba 'thob po zhes 'byung ba'i phyir ro/ /de bzhin du gzhan la yang gnas 'di snga ma dang mthun par sbyar bar bya ste/ de ltar na/ rnam par thar pa la sogs pas sngar rab tu bstan pa kho na yin no//dog pa dang yangs pa dag tu yongs su bsgyur ba ni dog pa dang yangs par yongs su bsgyur ba ste/ yongs su bsgyur ba ni bzlog pa'i dngos po zhes bya ba'i tha tshig go/ /dog pa yangs par byed pa dang yangs pa dog par byed pa ni mdo las ji skad 'byung ba bzhin khong du chud par bya'o//bya ba mchod pa'i sgo nas ni/ /byang chub tshogs ni stsogs phyir te/ /mdo las ji skad 'byung bzhin no/ /yongs mgu bya ba the tshom du/ /gyur pa rnams la mthu bstan pas/ /mdo dang mthun par khong du chud par bya'o/ / rgya chen mthu dang grangs kyis ni/ /rnam pa gnyis su shes par bya/ /mdo las ji skad 'byung ba bzhin du rig par bya'o/ /da ni grangs rgya che ba de nyid rab tu bsten pa'i phyir/ de bzhin gshegs pa'i sa mtha' dag bstan par mi nus pa nyid du shes par bya ba'i phyir/ byang chub sems dpa' rnam par grol ba'i zla bas kye rgyal ba'i sras byang chub sems dpa' rnams kyi spyod pa'i yul gyi byin gyi rlabs te de ltar tshad med na de bzhin gshegs pa'i spyod yul dang yul la 'jug pa ci 'dra zhes bya ba la sogs pa smras so//de bzhin gshegs pa'i sku dang gsung dang thugs gnyis su med pa zhes bya ba ni/chos kyi dbyings mnyam pa nyid kyi phyir ro/ /byang chub sems dpa'i ting nge 'dzin gyi stobs kyang mi gtong zhes bya ba ni chos kyi dbyings mnyam pa nyid ces bya ba'i tha tshig go/ /sangs rgyas lta ba dang mchod pa dang rim gro yang rab tu byed de zhes bya ba ni mnyam par ma gzhag pa'i gnas skabs ston par byed do//rnam pa thams cad mngon par sgrub pa'i mchod pa zhes bya ba ni yon tan thams cad dang ldan pa zhes bya ba'i tha tshig go/ /rgya chen po dang ldan pa zhes bya ba ni yon tan rgya chen po dang ldan pas shin tu che ba'i phyir dang / grangs rgya chen po dang ldan pa tshad med pa'i phyir ro/ /byin gyi rlabs dang snang ba yang yang dag par len to zhes bya ba ni sangs rgyas kyi byin gyi rlabs dang sangs rgyas kyi ye shes kyi snang ba yang len to zhes bya ba'i tha tshig go//mi 'phrogs pa zhes bya ba ni zil gyis mi non pa ste/ chos kyi dbyings rtogs pa'i mthar phyin pa'i phyir ro/ /lam gsum yang dag par sgrogs te zhes bya ba ni bgrod pa dang lam zhes bya ba don gzhan ma yin pa'i phyir ro//chos kyi dbyings rab tu dbye ba shes pa zhes bya ba ni the tshom gcod pa'i lam ste 'di ltar chos kyi dbyings shes na the tshom 'chad par 'gyur ro/ /'jig rten gyi khams thams cad rgyas par 'gengs pa zhes bya ba ni mngon par shes pa myur ba'i lam mo/ /zhing dang chos thams cad yongs su shes pa ni zhing yongs su dag par byed pa'i mtshungs pa nyid kyi byin gyi rlabs so//sems can yongs su smin par bya ba'i phyir/ chos ston pa'i snang ba mtshungs pa nyid kyi byin gyi rlabs so/ /mdor na thams cad mkhyen pa'i ye shes thob par byed pa'i bar dag yang dag par len to zhes bya ba ni mngon par rdzogs pa'i byang chub pa'i mtshungs pa nyid kyi byin gyi rlabs so/ /yon tan ldan pas 'dra ba'i phyir//rang gi yon tan lhag pa yi/ /mtsho dang ri dang rgya mtsho dang / /nor bus sa yi dpe shes bya/ /sgrub pa'i yon tan mtsho chen po ma dros pa las byung ba'i 'bab chu zhes bya ba la sogs pa nas rnam pa thams cad dang ldan pa'i thams cad mkhyen pa'i ye shes kyi bar gyi rgya mtsho chen po zhen par byed de zhes bya ba'i bar 'byung ba'i phyir ro/ / mchog nyid kyi yon tan ni/ kye rgyal ba'i sras byang chub sems dpa'i sa bcu po de dag ni sangs rgyas kyi ye shes la brten nas yod par 'gyur te zhes bya ba nas bzung ste/ sangs rgyas kyi phrin las yang dag par bstan pa yongs su dris pa bstan pa rnams kyis thug par 'gyur ba med do zhes bya ba'i bar yin no/ /'di la gangs ri dang / spos kyi ngad ldang ba dang rnam par 'dal ba ste gong ma gsum ni grangs bzhin du sems can zhes mi bya ba sman dang dri dang rin po che rnams kyi 'byung gnas yin no//bzhi pa rta rna ri drug pa'i gnas nas 'byung ba ni sems can zhes bya ba 'bras bu thams cad kyi 'byung gnas yin no/ /lhag ma drug po drang srong gi ri dang /gnya' shing 'dzin dang / mu khyud 'dzin dang / khor yug dang / tog can dang / ri rab rnams ni grangs bzhin du sems can zhes bya ba drang srong dang / gnod sbyin dang / klu dang dbang du gyur pa dang / lha ma yin dang / lha rnams kyi 'byung gnas yin no/ /nges par 'byung dka' ba'i nges pa 'byung ba'i 'bras bu che ba'i yon tan ji lta bu zhe na/ri'i rgyal po chen po bcu po ji skad du bshad pa de dag gis kyang rgya mtsho chen po smos pa ni de lta ba'i longs spyod kyi rgyu yin pa'i phyir mngon par 'dod ces bya ba'i tha tshig go/ /rgya mtsho chen pos kyang de dag rab tu phye ba ni de las der 'gro bar nus pa'i phyir dang /de nas 'byung ba'i rdzas rab tu ston pa'i rgyu yin pa'i phyir/ yon tan gyi sgo nas rab tu gsal bar byas zhes bya ba'i tha tshig go/ /thams cad mkhyen pa nyid smos pa ni thams cad mkhyen pa'i rgyu nyid yin pa'i phyir mngon par 'dod ces bya ba'i tha tshig go/ /thams cad mkhyen pa nyid kyis kyang rab tu phye ba ni de dag gis 'bras bu'i dngos po yongs su gzung ba'i phyir rab tu gsal bar byas zhes bya ba'i tha tshig go//bags kyis gzhol zhes bya ba ni 'jug bde ba'i yon tan no/ /shi ba'i ro dang lhan cig mi gnas pa zhes bya ba ni gtsang ma nyid kyi yon tan no/ /chu gzhan gyi grangs spangs pa zhes bya ba ni mi 'dra ba med pa'i yon tan no//ro gcig pa zhes bya ba ni kun du srung ba'i yon tan no/ /rin po che mang zhes bya ba ni phan 'dogs pa'i yon tan no/ /zab cing gting dpag dka' ba zhes bya ba dang / yangs shing tshad med pa zhes bya ba gnyis kyis ni mi skam pa'i yon tan no//'byung po chen po'i gnas su gyur pa zhes bya ba ni gnas kyi yon tan no/ /dus chad pa las mi yol ba dang / sprin chen po'i char thams cad kun du 'dzin pas mi ngoms pa zhes bya ba gnyis kyis ni 'jig rten srung ba'i yon tan bstan to/ /rin po che'i rigs bcu las shin tu 'das pa zhes bya ba la bcu gang zhe na/'di lta ste/ mu tig dang / shang kha shi la dang / byi ru dang / dngul dang / gser dang / rdo'i snying po dang / spug dang / mu tig dmar po dang / dung g.yas su 'khyil ba dang / rin po che dpal gyi ze ba'i snying po can rnams so/ /rin po che'i rigs bcu las shin tu 'das nas/yid bzhin gyi nor bu rin po che'i rigs kyis mngon par spags par gyur pa ni rigs kyis yongs su btags pa'i yon tan te/ 'di ltar rin po che'i rigs bcu las shin tu 'das nas mngon par sbags par gyur zhes 'byung ba'i phyir ro/ /mgar ba mkhas pas legs par bsregs zhes bya ba ni kha dog gi yon tan no//legs par bcos zhes bya ba ni dbyibs kyi yon tan no/ /legs par yongs su sbyangs zhes bya ba ni dri ma med pa'i yon tan no/ /legs par byi dor byas zhes bya ba ni gsal ba'i yon tan no/ /legs par phug cing rin po che'i skud pas legs par btags la nor bu rin po che bai DUr+ya'i rgyal mtshan gyi yu ba mthon po'i rtse mo la btags te zhes bya ba ni mngon par 'du byed pa'i yon tan no//thams cad du 'od zer rab tu 'byung zhes bya ba ni mthu'i yon tan no/ /rgyal pos gnang ba zhes bya ba ni yongs su ma bzung ba'i yon tan no/skad kyi byings rnams ni nye bar bsgyur ba dang / 'brel ba'i tshig g.yos pa zhes bya ba la sogs pa'i tshig rnams kyi ji skad du bshad par 'gyur bar shes par bya ste/ gang phyir skad byings don sbyor ba/ /'dor bar byed pa de yi phyir/ /nye bar sbyar bar rab bshad de/ /phrad du 'jug phyir tshig gi phrad//ces bshad do/ /'jig rten khams ni mtha' yas par/ /chos 'di rab tu ston pa'i phyir/ /sems can don sgo mtha' yas pa'i/ /chos nyid rab tu bstan pa yin/ /lhag pa med pa'i don gyis ni/ /yi ge lhag pa med dag tu/ /zhes bya ba'i tha tshig go/ /lhag ma ni snga ma bzhin du khong du chud par bya'o//dbyig gi gnyen gyi zhal snga nas kyis sa bcu 'di'i/ /'grel pa mdzad pa bdag gis rnam par phye nas 'dir/ /dge bar gyur pa gang des 'gro ba 'di yi blo/ /nyi zer rnams kyis pad+mo'i dpal bzhin snang bar shog /dge bsrungs kyis ni bcos pas na/ /rnam par bshad pa gya tsam byas//don du gnyer na mkhas pa rnams/ /gnas min par yang gom pa 'dor/ /'phags pa sa bcu'i rnam par bshad pa'i rnam par bshad pa slob dpon nyi ma grub kyis mdzad pa rdzogs so// //rgya gar gyi mkhan po pradz+nyA warma dang / zhu chen gyi lo tsA ba dge slong dpal brtsegs rak+shi tas bsgyur cing zhus te gtan la phab pa'o/