CLOSE WINDOW

D3992
བོད་ཡིག

@##/ /'phags pa ga ya mgo'i ri mdo dang spel mar bshad pa/ bam po dang po/ 'jam dpal gzhon nur gyur pa la phyag 'tshal lo/ /bdag med ye shes rdo rje bzang / /sgrib pa'i ri bo bcom pa la/ /phyag 'tshal mdo dang bshad pa gnyis/ /spel mar rab tu bshad par bya/ /ga ya mgo'i ri'i mdo bshad par 'dod pas slob dpon dbyig gnyen gyis mdo'i lus rnam par gzhag pa'i phyir thog mar mdor bsdus pa zhes bya ba la sogs pa smos te/mdor bsdus pa'i don bzlum pa gang yin pa de mdor bsdus pa'o/ /de yang gleng gzhi la sogs pa tha dad pas rnam pa dgu'o/ /de la gleng gzhi ni mdo 'byung ba'i rgyu yin no//de yang dag par sdud par byed pa dang / ston pa po dang / gnas dang / nyan pa po'i dbye bas rnam pa bzhir 'gyur te/ gang gis/ gang na/ gang dag la bshad cing / gang gis phyis yang dag par bsdu ba byas pa'o/ /de yang 'di skad bdag gis zhes bya ba nas bzung ste/dge slong gi dge 'dun chen po zhes bya ba'i bar 'dis brjod do/ /nyan pa la zhugs pa dag ni nyan pa po rnams so/ /de dag gi mthun pa'i yon tan 'byor pa ste/ mthun pa'i nyan pa po phun sum tshogs pa'o/ /de bzhin nyid la dmigs pa'i sems rtse gcig pa ni ting nge 'dzin to//rtogs pa po ni ston pa ste/ de'i rnam par dag pa ni thun mong ma yin pa'i yon tan phun sum tshogs pa'o/ /gang gis rtogs pa dang / gang rtogs pa dang / ji ltar rtogs par bya ba de ni brtag par bya ba'i dngos po'o/ /bzhengs pa ni ting nge 'dzin las bzhengs pa'o/ /bstan pa ni gdags pa'i don brjod pa kun rdzob rab tu bshad pa'o//byang chub sems dpa'i yon tan gyi mthu dang / spyod pa rnam par dbye ba dang rnam pa dgu yin no/ /da ni mdo'i tshig rnam par bshad par bya'o/ /'di skad ces bya ba'i sgra ni dam bcas pa la bya ste/ kho bo cag la chos ston cig ces 'khor gyis yang dag par sdud par byed pa la gsol ba btab pa dang /de nas de bzhin no zhes dam bcas pa ste/ khyed cag gis ji skad smras pa de bzhin du bya'o zhes bya ba'i tha tshig go/ /de yang 'dod pas byas pa ma yin te/ gang gi phyir zhe na/ bdag gis thos zhes bya ba la sogs pas so/ /yang na 'di skad ces bya ba'i sgra ni dris pa'i don dag gzhan du mi 'gyur ba la bya ste/khyod kyis ji skad thos pa de bzhin du smros shig ces byas pa dang / 'di skad bdag gis thos zhes bya ba la sogs pa smras te/ bdag gis 'di skad thos kyi gzhan du ma yin no/ /bdag gis zhes bya ba ni mngon sum du thos par ston to//thos pa zhes bya ba ni rna ba'i rnam par shes pas bzung ba'o/ /dus gcig ni dus gcig gi tshe'o/ /bcom ldan 'das ni bdud bzhi bcom pa'i phyir ro/ /yang na/ rang dbang dang ni rab sbyangs dang / /gzugs bzang ba dang grags pa dang / /dpal dang bdag nyid che tshogs pa//drug po rnams la legs zhes bya/ /don drug gi mtshan nyid kyi legs pa de la mnga' bas bcom ldan 'das te/ 'di ltar bcom ldan 'das rang dbang tshogs pa ni nyon mongs pa'i 'ching ba bag chags dang bcas pa bcad pa'i phyir ro/ /rab tu sbyangs pa tshogs pa ni ye shes kyi mes shes bya'i sgrib pa'i mun pa bsal ba'i phyir ro//gzugs tshogs pa ni skyes bu chen po'i mtshan sum cu rtsa gnyis dang ldan pa'i phyir ro/ /grags pa tshogs pa ni 'gro ba thams cad la khyab pa'i phyir ro/ /dpal tshogs pa ni 'gro ba thams cad kyi nye bar 'tsho bar gyur pa'i phyir ro/ / bdag nyid chen po'i tshogs pa ni sems can thams cad la phan pa mdzad pa'i phyir ro/ /bzhugs pa ni 'dul ba ji lta ba bzhin du spyod lam bzhi po dag gis gnas pa kun tu bstan pa'o/ /te zhes bya ba ni gyur zin pa ste/ ga ya na bzhugs par gyur zin to zhes pa'i tha tshig go/ /'dis ni ga ya zhes bya ba'i yul spyir mchod rten du gyur pa bstan to//mdo 'di yul khyad par du 'phags pa nyid du bstan par brjod pa'i phyir/ ga ya mgo'i mchod rten na zhes bya ba gsungs te/ mgo'i sgra ni rtse mo'i sgra'i rnam grangs su gtogs pa ste/ rang bzhin gzhan no/ /gtso bo ni ri de la ga ya'i mgo zhes bya'o//gtso bo ni de bzhin gshegs pa'i gnas kyi phyir ro/ /de bzhin gshegs pa bzhugs par brjod pa de nyid kyi mchod rten du gyur te/ mchod rten smos pa gang yin pa de/ sangs rgyas du ma bzhugs bzhugs pas gnas khyad zhugs pa bsnyad pa'i phyir ro/ /de bsnyad pa yang chos kyi rnam grangs 'di sangs rgyas du mas byin gyis brlabs par thabs kyis bsnyad pa'i phyir ro//de bas na slob dpon gyis de la gleng gzhi ni zhes bya ba la sogs pa smos so/ /gleng gzhi'i phyogs gcig la yang gleng gzhi zhes bya bar blta bar bya'o/ /mi slob pa dang / slob pas bsdus zhes bya ba ni dge slong gi dge 'dun chen po zhes 'byung ba'i phyir ro//'dir bsnyen par rdzogs pa'i dge slong smos pa'i phyir gnyis smos so/ /dge slong stong du tshang ba zhes 'byung ba ni mi slob pa rnams kun tu bstan pa'i phyir ro/ /nyon mongs pa bcom pas dge slong zhes bya ba'i phyir ro/ /bya ba byas pa zhes bya ba la sogs pa ni de dag gi bye brag go//de la tshig dang po'i bshad pa ni lhag mthong gi bya ba shin tu rdzogs pa'i phyir bya ba rdzogs pa zhes bya ba ste/ lhag mthong ni shes rab kyi rnam grangs su gtogs par blta'o/ /byed pa byas pa ni ting nge 'dzin gyi bya ba yongs su rdzogs pa'i phyir te/ de ni bya ba zin pa zhes bya ba bshad do//lhag mthong gi bya ba ni kun nas nyon mongs pa rnam pa gsum spangs pa ste/ de ni khur bor ba zhes bya ba la sogs pa tshig gsum gyis ston to/ /bor ba zhes bya ba ni gang dag gis phung po lnga'i khur bor ba ste/ ma 'ongs pa'i dus na skye ba med pas de dag la de skad ces bya'o//de'i bshad pa ni khur blangs pa bor ba ste khur de yang nye bar len pa'i phung po lnga po dag go zhes bya ba ste/ 'dis ni tshe'i kun nas nyon mongs pa spangs par bstan to/ /bdag gi don rjes su thob pa zhes bya ba ni nyon mongs pa'i kun nas nyon mongs pa spangs pa ste/ de'i bshad pa ni mya ngan las 'das pa mngon sum du byed pa zhes bya ba'o//srid pa kun tu sbyor ba yongs su zad pa zhes bya ba ni gang dag gis las gang dag yin pa de dag yongs su zad par zhes bya bar tshig rnam par sbyor ro/ /de'i bshad pa ni khams gsum nas 'byung ba zhes bya ba ste/ 'dis ni las kyi kun nas nyon mongs pa spangs par bstan to//yang dag pa'i shes pas sems shin tu rnam par grol ba ni rnam pa gang gis shes rab kun nas nyon mongs pa rnam pa gsum zad pa'i rgyur gyur pa ste/ de dag gis de bstan to/ /yang dag pa'i shes pa ni yang dag pa'i gdams ngag bsgoms pa ste/ des nyon mongs pa dang /las dang / tshe dag las gang dag gis sems shin tu rnam par grol ba de dag la de skad ces bya'o/ /de'i bshad pa ni ma nor ba'i gdams ngag bsgoms te de la gnas nas nyon mongs pa shin tu spangs pa zhes bya ba'o/ /nyon mongs pa zhes bya ba ni 'dir nyon mongs pa dang /las dang / tshe la bya bar 'dod de/ 'dis nyon mongs par byed pa dang / 'dir nyon mongs par byed pa ste sgrub pa gnyis so/ /sems kyi dbang thams cad kyi dam pa'i pha rol tu son pa zhes bya bas ni ting nge 'dzin gyi bya ba rab tu ston te/ sems rtse gcig tu gyur pas dbang sgyur ba ni sems la dbang ba dag ste/ting nge 'dzin rnams so/ /sems kyi dbang thams cad kyi dam pa'i pha rol tu phyin pa gang yin pa de ni mchog ste/ de thob pa dag go/ /de'i bshad pa ni rdzu 'phrul gyi rkang pa shin tu bsgoms pa zhes bya ba ste/ rdzu 'phrul gyi rkang pa dag ni ting nge 'dzin rnams so//de dag shin tu bsgoms pas dad pas byin pa yongs su spyod pa'i 'os su gyur pa'i phyir dgra bcom pa rnams so/ /de ni dad pas byin pa yongs su spyod pa'i 'os su gyur pas zhes bya bas bshad do/ /slob pa rnams kyi tshad ni mdo las mi 'byung ste/ bshad pa byed pas bslab pa'i sgra don gyi sgo nas rnam pa gnyis kyis zhes bya ba la sogs pa smos te/bslab pa ma rdzogs pa zhes bya bas ni rgyu yongs su ma rdzogs pa bstan to/ /ji ltar 'dod pa'i don yongs su ma rdzogs pas zhes bya ba ni 'bras bu yongs su ma rdzogs pa'o/ /byang chub sems dpa' sems dpa' chen po rab tu mang po zhes bya ba ni de dag pas grangs mang ba'o//byang chub tu smon lam btab pa'i phyir na byang chub sems dpa' dag go/ /sems can thams cad kyi don bsgrub pa'i phyir sems dpa' chen po dag go/ /de nas zhes bya ba la sogs pas ni ting nge 'dzin yongs su brjod do/ /de la de nas zhes bya ba ni bar ma chad pa'o/ /gcig pu ni sku dben pa'o//dben par gshegs pa ni thugs dben pa'o/ /nang du yang dag gzhag pa ni ting nge 'dzin la snyoms par zhugs pa'o/ /ting nge 'dzin de ni de bzhin nyid la dmigs pa ste/ chos kyi dbyings nyid la btags te zhes bya bas bstan to/ /spros pa thams cad dang bral ba'i ye shes rang gis rig pa nyid chos kyi dbyings la rtog pa ste/de nyid dmigs pa med pa'i ting nge 'dzin to/ /ci'i phyir ting nge 'dzin yongs su brjod ce na/ bshad pa byed pas de la ting nge 'dzin ni zhes bya ba la sogs pa 'dir dgos pa bstan to/ /brtag par bya ba'i dngos po ste zhes bya ba ni chos kyi dbyings te/ de ni ting nge 'dzin so so rang gis rig pa nyid de/chos kyi dbyings ni rtog ge'i yul ma yin zhes de skad smos pa'i phyir ro/ /don 'di zhes bya ba ni stong pa nyid ces bya ba don gyi skabs 'dir zhes bya ba ni de bzhin nyid la bya ste/ de bzhin nyid ni chos thams cad bdag med pa'i rnam pas nyan thos la sogs pa'i yul ma yin pa'i phyir ro//'dis ni zhes bya bas ni stong pa nyid kun tu brjod pas so/ /don 'di zhes bya ba ni stong pa nyid ces bya ba'o/ /de dag gi zhes bya ba ni nyan thos la sogs pa de dag gi'o/ /stong pa nyid ma mthong bar nyon mongs pa spong ba med de/ gang zag la bdag med pa'i rnam pas stong pa nyid ni de dag gi yul yang yin te/chos la bdag med pa'i rnam pas ni ma yin no/ /bdag gis byang chub ni thob ces bya ba nas bzung ste rtog pa po rnam par dag pa ston to/ /de bzhin nyid la dmigs pa'i ting nge 'dzin la gnas pa la 'di mi srid kyi/ de las bzhengs pa la 'di rigs te 'og tu bsgrub par bya'o//gal te bcom ldan 'das ni rtag tu gnyis su med pa'i ye shes kyi bdag nyid yin na ji ltar mnyam par 'jog pa dang / ji ltar bzhengs she na/ de'ang 'og tu brjod par bya'o/ /byang chub brnyes par bstan pa zhes bya ba ni bdag gis byang chub ni thob ces mdo las 'byung ba'i phyir ro/ /ye shes thugs su chud pas zhes bya ba ni bdag gis ye shes ni khong du chud ces 'byung ba'i phyir ro//spros pa thams cad dang bral ba'i ye shes nyid byang chub ste/ de'i phyir de ltar gyur pa'i ye shes khong du chud pa nyid byang chub brnyes par rig par bya'o/ /de'i phyir dmigs par bya ba dang dmigs par byed pa'i dngos po mtshungs mnyam pas thub pa'i byang chub brnyes pa khyad par du 'phags te/de ni ye shes thugs su chud pas bye brag tu gyur to zhes bya bas bshad do/ /bdag gi don dang gzhan gyi don thabs dang bcas pa bsgrub pa'i phyir bya ba ni byas pa'o/ /de'i bshad pa ni dam bcas pa nyams su len zhes bya ba la sogs pa'o//bya ba ni byas zhes pa'i tshig gis ni de'i bstan pa'o/ /mdo'i tshig lhag ma rnams ni de'i bshad pa'o/ /spangs pa dang ye shes phun sum tshogs pas bsdus pa ni bdag gi don phun sum tshogs pa ste/ de la spangs pa phun sum tshogs pa ni bdag gis khur ni bor zhes bya ba la sogs pa tshig gsum gyis bsnyad de nyon mongs pa dang shes bya'i sgrib pa gnas dang bcas pa spangs pa bstan pa'i phyir ro//khams gsum du skye bas bsdus pa'i rnam par smin pa'i bdag nyid yang dag pa ma yin pa kun brtags pa'i mtshan nyid phung po dag ni khur blangs pa ste/de dag spangs pa'i phyir khur bor ba'o/ /'dis ni nyon mongs pa dang shes bya'i sgrib pa'i gnas skye ba spangs par bstan to/ /de'i bshad pa ni khur blangs pa bor zhes pa'o/ /khur gyi don ni snga ma bzhin zhes bya ba ni khur de yang nye bar len pa'i phung po lnga po dag go zhes bshad pa'i phyir ro//bdag gis na 'khor ba'i 'brog dgon pa las ni brgal zhes bya ba ni nyon mongs pa'i sgrib pa spangs par bstan to/ /'dis 'khor bar byed pas 'khor ba ste/ 'dod chags la sogs pa nyon mongs pa'i tshogs so/ /de nyid 'brog dgon pa ste/ de'i bshad pa ni nyon mongs pa'i sgrib pa shin tu spangs pa zhes bya'o//bdag gis ma rig pa ni nyon mongs pa can ma yin pa'i mi shes pa ste/ de bsal ba ni spangs pa'o/ /'dis ni shes bya'i sgrib pa spangs pa bstan te/ de'i bshad pa ni shes bya'i sgrib pa shin tu spangs pa zhes bya'o/ /bdag gis rig pa ni bsgrubs zhes bya ba 'dis ni ye shes phun sum tshogs pa bstan te/shes bya thams cad la dmigs pa'i ye shes ni rig pa'o/ /de'i bshad pa ni chos thams cad yang dag pa ji lta ba bzhin du mngon sum du byas pa zhes bya'o/ /bdag gis zug rngu ni phyung zhes bya ba 'di'i bshad pa ni lta ba thams cad kyi zug rngu bton pa zhes bya'o/ /bdag gis srid pa ni zad ces bya ba 'di'i bshad pa ni/smon lam dang bral ba zhes bya ba ste/ sred pa'i don du tshol ba'i smon lam mo/ /nyon mongs pa'i sgrib pa spangs pa nyid lta ba dang sred pa spangs par grub mod kyi so sor smos pa ni rgyun mi 'chad par kun tu 'byung bas lta ba dang sred pa gnyis gtso bor gyur pa'i phyir ro//'dis ni bdag gi don phun sum tshogs pa bstan to/ /bdag gis chos kyi gru ni sbyar zhes bya ba ni chos thams cad bdag med pa la dmigs pa zag pa med pa'i shes rab ni chos kyi gru'o/ /de'i bshad pa ni 'jig rten las 'das pa'i shes rab yang dag par bsgrubs zhes bya ba'o//bdag gis chos kyi rnga ni brdungs zhes bya ba la sogs pa'i tshig rnams kyis ni gzhan gyi don phun sum tshogs pa thabs dang bcas pa bstan to/ /de la thabs ni chos kyi 'khor lo rab tu bskor ba'o/ /de yang bdag gis chos kyi rnga ni brdungs zhes bya ba 'dis bstan to/ /de'i bshad pa ni chos kyi 'khor lo rab tu bskor ba zhes bya ba ste/nges par legs pa dang / mngon par mtho ba'i rgyu rab tu bshad pas gsung rab kyi chos ni rnam pa gnyis so/ /de la nges par legs pa'i rgyu ni stong pa nyid bshad pa'o/ /de yang bdag gis chos kyi dung ni bus zhes bya ba 'dis bstan to/ /de'i bshad pa ni bdag med pa'i sgra bsgrags pa zhes bya'o//stong pa nyid du lta ba ni dngos po stobs kyis byung ba'i tshad mas grogs su gyur pa'i phyir phas kyi rgol ba thams cad zil gyis gnon pa yin pas bdag gis chos kyi rgyal mtshan ni bsgreng zhes bya ba gsungs te/ mu stegs thams cad las rnam par rgyal bas rgyal mtshan nyid de/bdag med pa'i sgra gsang bstod pa'i phyir ro/ /de'i bshad pa ni phyir rgol ba shin tu tshar bcad pa zhes bya ba'o/ /bdag gi 'khor ba'i lugs ni bzlog ces bya ba la sogs pas ni gdul ba tha dad pa gzhan gyi don phun sum tshogs pa tha dad par bstan to/ / gdul ba ni rnam pa gnyis te/ don grub pa dang / de las bzlog pa'o/ /don grub pa ni kun tu sbyor ba thams cad spangs pa ste/ de'i ched du bdag gi 'khor ba'i zhes bya ba la sogs pa gsungs te/ 'khor bar 'dren pa dang / thob par byed pas 'khor ba'i lugs so/ /kun tu sbyor ba ni 'brel pa ste/de bdag gis bzlog go zhes bya ba'i tha tshig go/ /de'i bshad pa ni rkyen kun tu sbyor ba mi 'byung ba zhes bya ba'o/ /kun tu sbyor ba nyid skye ba'i rkyen dag ste/ de dag mi 'byung ngo zhes bya ba'i tha tshig go/ /don ma grub pa ni kun tu sbyor ba ma lus par ma spangs pa'o/ /de yang rnam pa gnyis te/so so'i skye bo lung gi stobs can dang / khong du chud pa'i stobs can de kho na mthong ba'o/ /dang po'i ched du bdag gis chos kyi lugs ni bsnyad ces bya ba gsungs te/ nga'i chos kyi lugs ni mang du thos pa rnams kyis bshad do zhes bya ba'i tha tshig go/ / chos rnams kyi lugs ni tshul lo/ /zag pa dang bcas pa dang / zag pa med pa'i chos rnams ni drug dang ji ltar mthun par gzhag ste/ tshul drug ni/ de kho na don gyi tshul dang / thob pa'i tshul dang / bstan pa'i tshul dang / mtha' gnyis spangs pa'i tshul dang / bsam gyis mi khyab pa'i tshul dang /dgongs pa'i tshul lo/ /de'i bshad pa ni 'jig rten pa dang / 'jig rten las 'das pa'i chos yang dag par bshad pa zhes bya'o/ /khong du chud pa'i stobs can gyi ched du bdag gis lam ngan pa ni bcad ces bya ba la sogs pa'i tshig gnyis gsungs te/ phyin ci log la mngon par zhen pa dag ni lam ngan pa dag go//'dul ba rnams kyis de dag ni ngas bcad de/ sems can la bstan pas so zhes bya bar dgongs pa'o/ /de bas na bdag gis lam ni kun tu bstan zhes bya ba gsungs so/ /tshig 'di gnyis kyi bshad pa ni phyin ci log la mngon par zhen pa spangs pa dang / 'phags pa'i lam yan lag brgyad pa'i rjes su mthun pa zhes bya ba ste/ go rims bzhin no/ /de dag ni skye bo nges par legs pa'i snod kyi ched du gzhan gyi don phun sum tshogs pa bstan pa'o/ /mngon par mtho ba'i snod kyi ched du bdag gis zhing ngan pa dag ni rnam par bzlog ces bya ba la sogs pa gsungs te/zhing dang zhing ma yin pa rnam par dbye ba yongs su shes par gyur na zhing ma yin pa 'dor te/ zhing la mngon par mtho ba'i sa bon 'debs pas mngon par mtho ba'i 'bras bu khyad par du 'phags pa 'thob bo /tshig 'di gnyis kyi bshad pa ni mu stegs can zhing ngan pa rnam par bzlog pa dang / bsod nams kyi zhing dkon mchog gsum kun tu bstan pas na zhes bya ba ste/ go rims bzhin no/ /chos de la zhes bya ba ni byang chub la'o/ /ji ltar zhes bya ba ni rnam pa zhes bya ba'o/ /gang gis zhes bya ba ni byed pa'o/ /sus zhes bya ba ni byed pa po'o/ /de'i bshad pa ni de la brtag par bya ba'i dngos po ni gang gis gang zhig ji ltar khong du chud pa zhes bya ba'o//de la gang gis zhes bya bas ni byed pa dang byed pa po ston to/ /gang zhig ces bya ba ni khong du chud par bya ba ste/ byang chub ces bya ba'o/ /ji ltar zhes bya ba ni rnam pa ste/ sus byang chub la byed pa po dang / byed pa la sogs pa kun brtags nas byang chub khong du chud pa ston to//'di ni de'i kun brtags pa'i rang bzhin te/ de dag ni kun tu brtags pa yin pas dus gsum du yang rang bzhin med par rig par bya'o zhes bya bas bstan to/ /ci'i phyir zhe na/ lus dang sems kyis ni khong du chud par mi rigs so zhes mdo las gsungs pas/bdag la sogs pas kyang ma yin te/ de bas na lus dang sems kyis zhes bya ba la sogs pa gsungs te/ bdag la sogs pa mu stegs can gyis kun brtags pa rnams shin tu mi dmigs pa'i phyir ma bzhag go zhes bya ba'i tha tshig go/ /lus ni rdul phra rab kyi bdag nyid du med du zin kyang de ltar gyur pa rnam par shes pa snang ba'i dbang gis rnam par gzhag go//bems po g.yo ba med pa zhes bya ba ni don gcig go/ /de'i bshad pa ni spyod pa med pa zhes bya ba ste/ yul khong du chud pa'i mtshan nyid kyi spyod pa med pa'i phyir ro/ /rtswa dang zhes bya ba la sogs pa'i bshad pa ni kun tu brtags pa las byung ba zhes bya ba la sogs pa ste/dper na rtswa la sogs pa phyi rol na med kyang rnam par shes pas yongs su brtags pa tsam gyis rnam par gzhag pa ltar lus kyang de bzhin no/ /sems med pa zhes bya ba 'di'i bshad pa ni 'du shes med pa zhes bya ba ste/ 'di yang g.yo ba med pa sgrub pa'o//rkyen rnams tshogs pa las byung ba zhes bya ba de ni 'dir 'byung ba chen po bzhi las gyur pa zhes bya ba 'di'i bshad pa ste/ de'i rnam par 'khrul pa'i dbang gis 'byung ba chen po bzhi po dag las byung ba'i lus zhes rnam par gzhag par zad la/ 'byung ba chen po la sogs pa 'khrul pa yang rnam par rtog pa thams cad dang bral ba'i byang chub kyi gnas skabs na med na lus lta byang chub khong du chud pa'i byed pa por ga la 'gyur zhes dgongs pa'o//pha ma'i mi gtsang ba las byung ba zhes bya ba 'di'i bshad pa ni mi gtsang ba zhes bya ba ste/ 'dir yang gong du bshad ma thag pa nyid dgongs pa'o//mi rtag pa zhes bya ba'i bshad pa ni ther zug ma yin pa zhes bya ba'o/ /dgongs pa ni 'di yin te/ gnyis las rnam par dben pa'i de bzhin nyid do/ /de ni 'gyur ba med pa ste/ de yang 'gyur ba med pa nyid kyi ye shes kyis 'dzin te/ de de'i bdag nyid yin pa'i phyir ro//de bzhin gshegs pa'i ye shes mtshan nyid kyis skad cig pa yin du zin kyang de rtag tu 'dra ba'i phyir 'gyur ba med pa nyid du rnam par gzhag ste/ las dang nyon mongs pas mngon par 'dus byas pa'i lus ni de lta ma yin no/ /rtag tu bsku ba dang / bkru ba dang / mnye dgos pa dang zhes bya ba de'i bshad pa ni rang bzhin gyis bsgrims te yongs su bskyang dgos pa zhes bya'o//'jig pa zhes bya ba la sogs pa'i bshad pa ni 'jig pa'i ngang tshul can gyis zhes bya ba ste/ mi rtag pa nyid ni skad cig pa dang sbyar te bstan to/ /'jig pa'i ngang tshul can ni rgyu dang sbyar te bstan to//log par snang bas gnyis su med pa la gnyis su snang ba'i phyir rnam pa de'i byis pa rnams rmongs par byed de/ sems ni sgyu ma dang mtshungs pa zhes bya ba de'i bshad pa'o/ /bsod nams dang bsod nams ma yin pa'i las kyis bskyed pa'i phyir ro/ /rten cing 'brel par 'byung ba ste/de ni dge ba dang mi dge ba'i rkyen las byung ba zhes bya bas bshad do/ /gcig la dmigs pa'i gzhi ni gnas te/ de med pa'i phyir gnas med pa'o/ /de ni mi gnas pa zhes bya bas bshad do/ /de ni gzhan gyi dbang gis bdag nyid kyi sems kyi dbang du byas nas tshig gsum gsungs so//byang chub kyi gnas skabs na ni de lta bur gyur pa'i sems med na gang gis de de'i khong du chud par bya bar 'gyur ro/ /brtags pa'i dbang du byas nas mtshan nyid med pa zhes bya ba gsungs so/ /mtshan nyid yod pa ma yin pa ni mtshan nyid med pa ste/ med par dgag pa rtsom mo/ /de'i brtag pa ni kun brtags pa'i mtshan nyid mi dmigs pa zhes bya ba'o//yongs su grub pa'i phyir yul ma yin zhe na/ dngos po med pa/ bla gab med pa zhes bya ba gsungs te/ 'di la kun brtags pa'i dngos po med pas dngos po med pa'o/ /yongs su grub pa yang de yin te/ 'dir bla gab med pa dang mtshungs pa'i phyir ro//'di ni 'di skad du gzung ba dang / 'dzin pa gnyis las dben pa'i ye shes ni nam mkha' dang mtshungs pa ste/ byang chub kyang ye shes de nyid yin no/ /de bas na tha dad pa med pa'i phyir khong du chud pa dang / khong du chud par bya ba'i dngos po med do zhes bstan par 'gyur ro//de'i bshad pa ni rang bzhin gyis stong pa zhes bya ba dang / ring du song bas zhes bya ba'o/ /rang bzhin gyi ngo bo nyid kyis yongs su grub pa la sgro btags pa'i ngo bo stong pa nyid do/ /'dis ni dngos po med pa'i don bstan to/ /ring du song bas zhes bya bas ni sems nam mkha'i ngo bo nyid bstan te/dper na nam mkha' chod pa med par thams cad du song ba ltar sems kyang de bzhin te/ de bzhin nyid kyi ngo bo nyid yin pa'i phyir ro/ /'dis ni bla gab med pa'i don bstan to/ /byang chub ces bya ba la sogs pa la/ byang chub ni rnam pa gnyis te/ so so rang gis rig pa dang /sgras brjod par bya ba'o/ /de la sgras brjod par bya ba ni tha snyad tsam ma gtogs par ci yang med na de khong du chud par bya bar ji ltar 'gyur/ so so rang gis rig pa gang yin pa de ni ye shes kyi bdag nyid du gyur pa ste/ de la yang khong du chud par bya ba dang / khong du chud pa yod par ga la 'gyur/ming tsam tha snyad tsam zhes bya ba ni byang chub rnam pa gnyis po de ston te/ ming 'di gzugs med pa'i phung po rnams so zhes 'byung ba'i phyir gnyis su med pa'i ye shes nyid ming gi sgrar bstan to/ /gnyis su med pa'i ye shes tsam nyid byang chub ste/ de las gud na med do/ /'dis ni so so rang gis rig pa bstan to//tha snyad tsam zhes bya ba ni sgras brjod par bya ba'o/ /de'i bshad pa ni de la khong du chud par bya ba'i don ni ming dang tha snyad tsam du zad pas kun brtags pa'i rang bzhin med par rig par bya'o zhes bya ba'o/ /ming dang tha snyad tsam zhes bya ba ni ming tsam tha snyad tsam zhes bya ba'i tha tshig go//nam ming tsam du gyur ba de'i tshe 'di skad du 'di la ni kun brtags pa'i rang bzhin 'gyur pa med do zhes bshad par bya'o/ /kun brtags pa'i rang bzhin mi 'byung ba ni gang gi tshe tha snyad tsam du zad pas de'i tshe 'byung ba med pa tsam ni 'byung ba med pa'o/ /gcig nas gcig tu brgyud de sgra skad kyi gnas su gyur pa log pa'i dngos po de la sgra skad med pas sgra skad med pa'o//de yang tha snyad tsam la brten nas bstan te/ de'i bshad pa ni dngos po med pa zhes bya ba'o/ /dpyad pa ni rtog pa ste/ de'i yul ma yin pas dpyad du med pa ste/ de ni rtog ge'i yul las shin tu 'das pa zhes bya bas bshad do/ /chos rang bzhin gyis stong pa zhes bya ba ni kun brtags pa'i rang bzhin las dben pa'i phyir te/ de ni grub pa zhes bya ba de'i bshad pa ste/ de la gzung ba'am 'dzin pa grub pa med pa'i phyir ro/ /rgyu ba med pa ni mtshan ma med pa'i phyir ro//'jug pa med pa ni byis pa'i yul las shin tu 'das pa'i phyir ro/ /'phags pa rnams kyis shes pa rnam pa dang bcas pa gang yin pa 'di yul las kyang shin tu 'das pa'i phyir/ rnam par rig pa med pa'o/ /gdags pa'i gnas gzung ba dang 'dzin par sgro btags pa med pa'i phyir gdags par bya ba ma yin pa'o//de'i phyir gnas med pa zhes bshad do/ /'ong ba ni 'byung ba'o/ /'gro ba ni 'gag pa ste/ de dag kun brtags pa'i ngo bos gang la chad pa de la de skad ces bya'o/ /de'i bshad pa ni ma skyes ma 'gags zhes bya'o/ /gdags pa las yang dag par 'das pa zhes bya ba de'i bshad pa ni tha snyad thams cad las shin tu 'das pa zhes bya'o//khams gsum las yang dag par 'das pa zhes bya ba de'i bshad pa ni dge ba dang mi dge ba mngon par 'du byed pa'i las mi dmigs pa zhes bya ba'o/ /las kyi sgra ni byed pa la bya ste/ dge ba dang mi dge ba mngon par 'du byed pa gang yin pa des las gang byed pa de ni skyed byed ces bya ba'i tha tshig ste/de mi dmigs pa'i phyir ro/ /ma mthong ba zhes bya ba de'i bshad pa ni lta ba po dang bral ba zhes bya ba ste/ byang chub las gud na lta ba po med pa'i phyir ro/ /ma thos pa zhes bya ba de'i bshad pa ni rna ba'i rnam par shes pa'i spyod yul las yang dag par 'das pa zhes bya ba'o//bye brag ma phyed pa zhes bya ba de'i bshad pa ni/ yid kyi rnam par shes pa'i spyod yul las yang dag par 'das pa zhes bya ba ste/ gang yid kyi rnam par shes pas gzung ba byang chub ces bya ba gzung bar bya ba gang yang med de/ spros pa thams cad dang bral ba'i ye shes nyid byang chub bo//de la gzung ba dang 'dzin pa'i dngos po ga la yod/ bag chags thams cad kyi gnas rnam par smin pa'i rnam par shes pa byang chub kyi gnas skabs na log pa'i phyir gzhi med pa'o/ /de'i bshad pa ni rten med pa zhes bya ba ste/ 'khor ba'i sa bon rnams kyi gnas su gyur pa'i dngos po med pa'i phyir ro//dmigs pa med pa zhes bya ba'i de'i bshad pa ni nam mkha' lta bu zhes bya ba'o/ /dper na thogs pa dang bcas pa'i dngos po med pa tsam gyis mtshan nyid nam mkha' la dmigs pa med pa ltar byang chub la yang de bzhin te/ de la dmigs par byed pa med pa'i phyir ro//rnam par smin pa dang rgyu mthun pa'i bag chags gnyis las skyes pa'i rgyu ba dang / spros pa de dag med pa'i phyir/ rgyu ba med pa dang / spros pa med pa ste/ go rims bzhin no/ /tshig de gnyis kyi bshad pa ni 'dus ma byas pa zhes bya ba ste/ rnam par smin pa dang / rgyu mthun pa'i bag chags gnyis kyis 'dus ma byas pa'i phyir ro//'dis rgol ba ngan pa 'jug par byed pas 'jug pa ste/ skabs su gyur pa'i nyes pa'o/ /de med pa'i phyir/ 'jug pa med pa ste/ de'i phyir de ni skabs med pa zhes bya bas bshad do/ /nyi tshe ba'i shes pa zhes pa ni shes bya'i sgrib pa ma spangs pa ste de'i las shin tu 'das so//de ni rtag tu med pa zhes bya ba de'i bshad pa'o/ /dpag pa ni 'di tsam mo zhes yongs su bcad pa ste/ de med pa'i phyir dpag tu med pa'o/ /de'i bshad pa ni tshad med pa zhes bya ba'o/ /bstan du med pa zhes bya ba de'i bshad pa ni gzhan dag la bstan du med pa zhes bya ba ste/de ni sngon po la sogs pa de bzhin du bstan par mi nus so/ /sgra'i rgyu yin pa'i phyir rnam par rtog pa la sgra zhes brjod de/ de med pa'i phyir sgra med pa ste/ gnyis su med pa'i ye shes kyis rang gis rig pa'i de bzhin nyid do/ /rang gis rig pa'i dngos po la ni rnam par rtog pa med de/de'i phyir so so rang gis rig pa zhes bshad do/ /yi ge med pa zhes bya ba la/ yi ge 'di dbang pos 'dzin cing len pa dang de las snang bar 'gyur ba'o/ /de med pa ni yi ge med pa ste/ de ni snang ba med pa zhes bya bas bshad do/ /tshig gi lam ni spyi'i rnam par sgro btags pa ste/ de gang la med pa de la de skad ces bya'o//sgra med pa zhes bya ba des ni rnam par rtog pa'i yul ma yin pa bstan to/ /'dis ni ngag gi yul ma yin pa bstan to/ /'di thams cad kyis ni sgro btags pa'i rnam pa'i dbang gis gzung ba rnam par gzhag pa ston te/ rnam pa de yang chos kyi dbyings la med pa'i phyir ro//de ltar re zhig byed pa po dang / byed pa dang las so sor brtags pa'i ngo bor med pa bstan to/ /de ni de ltar na su zhes bya ba la sogs pas spyir med pa bstan to/ /su mngon par rdzogs par 'tshang rgya zhes bya ba ni lus so/ /gang gis zhes bya ba ni byed par 'gyur ba ste sems so//gang yin zhes bya ba ni byang chub ces bya ba'o/ /gang gsungs pa de yang khong du chud ce na/ rnam pa'i reg pas de la rtog pa ste/ byed pa po dang / las dang byed pa 'dus pa rtogs pas khong du chud pa rnam par gzhag pa nyid rnam pa'o/ /'di dag ni byed pa po la sogs pas khong du chud pa'i dus na yongs su rtog pa'i rgyu rnams so//bdag nyid khong na brjod pa'i dus na ming tsam dag go/ /bdag nyid kha ton byed pa la sogs pa'i dus na btags pa tsam dag go/ /gzhan dag khong du chud par bya ba'i phyir brdar 'dogs pa'i dus na brda tsam dag go//gzhan dag la tha snyad btags pas brjod pa na tha snyad tsam dag ste/ 'di dag kyang da ni ji ltar khong du chud pa de yang ming dang / btags pa dang / brda dang / tha snyad tsam du zad pas kun brtags pa'i rang bzhin med par rig par bya'o zhes bya bas bshad de/ kun brtags pa'i ngo bo nyid kyis med do zhes bya ba'i tha tshig go//tshig bzhi po 'di dag kyang brtags pa zhes bya ba la sogs pa mdo'i tshig rnams kyis rab tu phye'o/ /de'i bshad pa ni rnam pa drug gis zhes bya ba la sogs pa'o/ /brtags pa/ yongs su brtags pa zhes bya ba yang don gcig ste/ de'i bshad pa ni yang dag pa ma yin pa kun brtags pa zhes bya ba'o//spros pa thams cad dang bral ba'i ye shes nyid byang chub bo/ /de las gud na gzung ba yod par yongs su rtog pa ni yang dag pa ma yin pa kun tu rtog pa ste/ ye shes kyang khong du chud par bya ba las gud na byed pa'i ngo bor med pa'i phyir ro/ /ma byung ba byung ba med pa yang don gcig ste/de'i bshad pa ni gsog ces bya ba'o/ /khong du chud par byed pa po yang bdag la sogs pa byed pa po med pa'i phyir/ rdzas ma yin pa/ rdzas med pa ste/ de yang don gcig go/ /de'i bshad pa ni bdag mi dmigs pa zhes bya ba'o/ /yongs su dag pa'i ye shes gnyis su med pa nyid khong du chud par byed pa po yin no//de nyid khong du chud par bya ba yin no/ /de la byed pa po la sogs pa tha dad par sgro 'dogs pas shes pa 'byung ba gang yin pa de ni 'khrul pa ste/ shes pa des gnyis su med pa'i ye shes kyi gnas skabs blang bar mi nus pas len pa med pa'o//de bas na 'jig rten pa'i shes rab las shin tu 'das pa zhes bya bas bstan to/ /bstan du med pa zhes bya ba de'i bshad pa ni yi ge'i lam las yang dag par 'das pa zhes bya ba'o/ /mngon par chags pa med pa zhes bya ba de'i bshad pa ni ngar 'dzin pa dang nga yir 'dzin pa dang bral ba zhes bya ba'o//ngar 'dzin pa dang nga yir 'dzin pa nyid mngon par chags pa'i rgyu yin pa'i phyir mngon par chags pa zhes bya bar dgongs so/ /de ltar re zhig byed pa po dang / las dang / bya bar sgro btags pas byang chub khong du chud pa bkag pa la kha cig skur pa 'debs par 'gyur te/de bas na de bsal ba'i phyir 'di la gang de ltar zhes bya ba la sogs pa gsungs te/ byed pa po dang / byed pa la sogs par sgro btags pa dang bral ba gnyis su med pa'i ye shes rang gis rig pa zhes bya ba mdo'i don to/ /'di ni su mngon par rdzogs par 'tshang rgya zhes bya ba la sogs pa'i bshad pa'o//yang dag pa ji lta ba bzhin du mthong ba zhes bya ba ni byed pa po la sogs pa kun brtags pa de dag las dben pa gnyis su med pa'i ye shes rang gis rig pa zhes bya ba'i tha tshig go/ /gzung ba dang 'dzin par mngon par zhen pa dang bral ba'i ye shes de nyid sgrib pa spangs pas thams cad nas shes pa'i phyir yongs su shes pa'o//so so rang gis rig pa'i phyir mngon sum du byas pa'o/ /phyin ci log dang bral ba'i phyir/ 'gyur ba med pa'o/ /rang bzhin gyis gzung ba dang 'dzin pa dang bral ba'i phyir mi 'gyur ba ste/ de gnyis kyis rab tu dang ba dang / rab tu zhi bar zhes bya ba go rims bzhin du bstan te/phyin ci ma log par yongs su grub pa dang / 'gyur ba med par yongs su grub par bstan zhes bya ba'i tha tshig go/ /mtshan nyid med pa'i don ni snga ma bzhin no zhes bya ba ni sems kyi skabs su mtshan nyid yod pa ma yin pa ni mtshan nyid med pa zhes bstan pa ste/der mtshan nyid med pa'i sgra'i don brjod pa gang yin pa de 'dir yang zhes bya ba'i tha tshig go/ /mngon par zhen pa thams cad dang bral ba'i de kho na nyid khong du chud pa ni ting nge 'dzin gyi bya ba'o/ /khong du chud pa brjod pa kun rdzob tu spyi'i rnam pas nyan pa po'i rgyud la skyed pa ni bstan pa'i bya ba'o//'dir bzhengs par bstan du zin kyang 'di ni nang du yang dag bzhag nas chos kyi dbyings nyid la rtog ste zhes bya ba'i 'og tu blta bar bya'o/ /'di man chad du ni ting nge 'dzin myong ba'i don 'phags pa 'jam dpal las brtsams nas bstan pa ste/ 'di ltar bdag gis byang chub de ji ltar khong du chud ces bya ba nas bzung ste/byang chub ni mtshan nyid med pa zhes bya ba'i bar du'o/ /'di man chad ni 'phags pa 'jam dpal gyis zhus pa gtan la dbab pa las brtsams nas bstan pa ste/ de bas na bstan pa ni rnam pa gnyis te zhes bya ba la sogs pa smos so/ /gzhan du na gal te byang chub ni 'gyur ba med pa/mi 'gyur ba/ mtshan nyid med pa zhes bya ba de'i 'og tu bzhengs par 'gyur na/ 'phags pa 'jam dpal las brtsams te thog mar bstan par ji ltar 'gyur/ ma bstan pa'i don la rje btsun 'phags pa 'jam dpal gyis bcom ldan 'das gal te byang chub kyi mtshan nyid de lta bu lags na zhes bya ba la sogs pa zhus par ji ltar 'gyur/gal te sangs rgyas rnams ni rtag tu mnyam par gzhag pa'i phyir ji ltar mnyam par gzhag/ji ltar bzhengs she na/ mnyam par gzhag pa dang / bzhengs pa bstan pa ni 'dul ba'i don du bstan pas nyes pa med do//ci'i phyir 'phags pa 'jam dpal kho na la bka' stsal zhe na/ 'jam dpal byang chub de ji lta ba zhes bya ba la sogs pa ste/ de nyid kyis zhus pa'i phyir de nyid la bka' stsal par rigs par nges te/ klan kar mi rung ba ma yin nam/ bka' stsal pas des kyang zhus par ni rig ste nyes pa med do//ci'i phyir 'phags pa 'jam dpal gyis zhus she na zhes bya ba ni dri ba gnyis pa bzung ste gleng ba'o/ /de nyid la bka' stsal zhes bya ba ni de'i 'og tu bka' stsal pa'i phyir ro/ /byang chub de ji lta ba zhes bya ba la sogs pa ni mngon par zhen pa thams cad dang bral ba'i phyir yang byang chub ste/mngon par zhen pa thams cad dang bral bas der 'jug par bya'o zhes bya ba'i tha tshig go/ /bcom ldan 'das ji ltar rab tu 'tshal bar 'gyur zhes bya ba ni/ bstan pa na zhes bya ba khong nas 'byung ste/ bstan kyang mi shes na ji ltar thos pa dang / sems pa la sogs pa'i rim gyis bsgom pa'i lam la 'jug ces bya bar dgongs pa'o//'jam dpal byang chub ni khams gsum pa las yang dag par 'das pa zhes bya ba 'dis ni rnam par rtog pa las shin tu 'das par bstan to/ /de bas na gnyis las dben pa'i ye shes kyi bdag nyid kyi byang chub so so rang gis rig pa bstan pa'i yul du ga la 'gyur te/de bas na tha snyad ces bya ba la sogs pa gsungs so/ /tha snyad las yang dag par 'das pa/ yi ge'i sgra skad las yang dag par 'das pa zhes bya ba'i tshig gnyis po de la tshig dang po ni gong du bstan du med pa zhes gang smos pa de dang don gcig ste/sngon po la sogs pa ltar bstan pa'i tha snyad las shin tu 'das pa'i phyir ro/ /yi ge brjod pa'i sgras gsal bar [(]byad [,]byed [)]pa ni yi ge'i sgra skad de/ de las shin tu 'das pa'o/ /de yang tshig gi lam zhes gong du bshad pa'i tshig dang don mthun no/ /sgra las yang dag par 'das pa zhes bya ba ni sgra med pa zhes gang bstan pa de dang don mthun no//de bas na 'og nas khams gsum pa las yang dag par 'das pa la sogs pa bzhi'i don ni snga ma bzhin no zhes 'chad do/ /tha snyad rab tu brtags te rnam par gzhag pa nyid 'jug pa ste/ de med pa'i phyir 'jug pa med pa'o/ /ci'i phyir byang chub khong du chud pa'i dus nyid ni byang chub 'jug pa med snyam pa la de'i phyir/gdod ma nyid nas 'jug pa med pa zhes bya ba gsungs te/ stong pa nyid ni dus thams cad du tha snyad las shin tu 'das so zhes bya ba'i tha tshig go/ /de lta bas na zhes bya ba la sogs pas ni tha snyad du rab tu btags nas gang stong pa nyid rnam par gzhag pa de las shin tu 'das so zhes bya ba'i tha tshig ste/de ni 'di skad du ji ltar stong pa nyid bshad pa de ltar de ni ma yin te/ rang gi ngo bo las spyi'i rnam par sgro btags nas bshad pa 'byung ba'i phyir ro zhes bstan par 'gyur ro//bstan pa 'bras bu med pa yang ma yin te/ kun rdzob tu brjod pas de nyid la 'jug pa'i phyir ro/ /de bas na thos pa dang sems pa la sogs pa'i rim gyis bsgom pa yang 'bras bu med pa ma yin na/ gzhan du gal te bshad pas de kho na mngon sum du 'gyur bar brjod na ni thos pa'i dus nyid na de kho na khong du chud pas de khong du chud par bya ba'i phyir 'jug pa don med par 'gyur te/de ltar yang ma yin no/ /de bas na byang chub kyi phyir 'jug pa'o zhes gsungs so/ /de ni zhus pa de yang 'jug pa rnam par dag par rig par bya'o zhes bya bas bstan to/ /'jug pa rnam par dag pa zhes bya ba ni mngon par zhen pa thams cad dang bral bas byang chub la sbyor ba ni 'jug pa rnam par dag pa'o//spros par byed pas spros pa ste/ byang chub ni khong du chud par bya ba nyid kyi ngo bor sgro 'dogs pa ste/ de bor ba'i phyir ro/ /de ni 'jug pa med pa'i 'jug pa zhes bya ba tshig 'di'i bshad pa'o//rab tu brtags nas rnam par gzhag pa med pa ni 'jug pa med pa ste/ des 'jug pa ni byang chub la 'jug pa'o/ /sgom par byed/ byang chub 'dzin par byed pas dngos po ste 'dzin pa'o/ /de med pa'i phyir/ dngos po med pa la 'jug pa'o/ /tshig snga mas ni gzung ba dngos po med par bstan gyi/'dzin pa dngos po med par ni ma yin te/ de ltar bye brag yod de/ de'i bshad pa ni chos su 'dzin pa bor ba zhes bya ba'o/ /chos su 'dzin pas chos su 'dzin pa'i bdag nyid do/ /bla gab med pa'i don ni snga ma bzhin zhes bya ba la/ sems kyi skabs su dngos po med pa/bla gab med pa zhes der gang gsungs pa'i bla gab med pa'i don gang yin pa de 'dir yang zhes bya'o/ /der ring du song ba zhes pa ni byang chub de bzhin nyid kyi ngo bo thams cad du song ba'i phyir ring du song ba nyid do/ /chos kyi dbyings kyi rang bzhin ni ngo bo nyid kyis zhi ba ste/ rang bzhin gyis 'od gsal ba'i phyir ro//de'i bshad pa ni zhi ba zhes bya ba'o/ /chos thams cad la mngon par zhen pa ni rtag pa nyid du 'am chad pa nyid du ste/ de med pa'i phyir mngon par zhen pa med pa'o/ /de ni rtag pa dang mi rtag par 'dzin pa bor ba zhes bya bas bshad do/ /yang dag pa'i mtha' dmigs par gyur pa de ni yang dag pa'i mtha' ste/de bzhin nyid la dmigs pa'i lam mo/ /de'i dbyer med pa ni dor ba med pa'o/ /de bas na lam la skur pa 'debs pa bor ba zhes bshad do/ /yang dag pa'i mtha' dmigs par gyur pa de bor ba ni gzhan gyi dbang la skur pa 'debs pa'o/ / gzhag pa ni byis pas yongs su brtags te yod par sgro btags pa'o/ /de med pa'i phyir/ dor ba med pa dang / gzhag pa med pa'o/ /tha dad pa ma yin pa ni gang zag la bdag med pa'o/ /tha dad pa med pa ni chos la bdag med pa'o/ /'jug pa zhes bya ba'i sgra ni dor ba med pa dang / gzhag pa med pa la 'jug pa tha dad pa ma yin pa dang / tha dad pa med pa la 'jug pa zhes re re dang sbyar ro/ /dang po'i bshad pa ni skur pa dang sgro btags pa rnam par spangs pa zhes bya ba'o/ /gnyis pa'i bshad pa ni chos thams cad la tshul gcig tu 'jug pa zhes bya ba'o/ /tshul gcig pa ni bdag med pa'o//so so yang dag par rig pa'i mig yor la/ mig yor ni 'khrul pa'i shes pa'i rnam pa mgal me bskor ba la sogs pa ste/ dngos po rnams so so yang dag par rig pa'i mig yor la sogs pa 'di dag dang mtshungs par de ltar 'jug pa'o zhes mdo'i tshig gi don to//de'i bshad pa ni shes rab kyi pha rol tu phyin pa bsgom pa zhes bya'o/ /de lta bu'i rnam par zhugs pa'i sgom pa ni shes rab kyi pha rol tu phyin pa bsgom pa'o/ /khams gsum pa las yang dag par 'das pa zhes bya ba la sogs pa'i tshig bzhi'i don rnam par dbye ba ni zhes bya ba ni 'jam dpal byang chub ni khams gsum pa las yang dag par 'das pa/tha snyad las yang dag par 'das pa/ yi ge'i sgra las yang dag par 'das pa/ sgra las yang dag par 'das pa zhes bya ba de dag gi don to/ /snga ma bzhin zhes bya ba ni 'di sngar sbyar zin pas yang ma brjod do/ / de ltar gleng gzhi la sogs pa tshig gi don dgu'i nang nas gleng gzhi nas bzung ste bstan pa zhes bya ba'i bar du tshig bdun gyi don ni bshad zin to// //da ni byang chub sems dpa'i yon tan gyi mthu ste/ tshig gi don rgyas par bshad par 'dod nas de la byang chub sems dpa'i yon tan gyi mthu ni rnam pa gnyis kyis rig par bya ste/ji ltar 'dod pa'i don yongs su rdzogs pa dang / spobs pa thogs pa med pa'o/ /ji ltar 'dod pa'i don yongs su rdzogs pa de yang gong nas gong du rnam pa bcu bzhis mngon par sgrub par rig par bya ste/ bcu bzhi po gang zhe na/ gdams ngag mi brjed pa dang zhes bya ba la sogs pa smos te/ de yang de nas lha'i bu zla ba dri ma med pa'i gzi brjid 'od zer gyi 'od ces bya ba la sogs pa mdo'i dum bu'i bshad pa'o/ /rtsom pa ni nang gi rgyu ste/ rtsa bar gyur pa'o/ /gnas ni phyi'i ste dmigs par gyur pa'o//de bas na rtsom pa ni snying rje chen po'o/ /gnas ni sems can no zhes gsungs so/ /gong nas gong du mngon par sgrub ces bya ba ni snying rje la sogs pa snga ma snga mas g.yo med pa la sogs pa phyi ma phyi ma sgrub pa'o/ /cis bsdus zhes bya ba ni 'bras bu gang gis bsdus pa'i snying rje chen po'i 'bras bu gang zhes dri ba'i don to//'og ma dag la yang de bzhin du sbyar bar bya'o/ /g.yo med pas bsdus zhes bya ba ni snying rje dang ldan na g.yo med par 'gyur ro/ /de'i bshad pa ni gdams ngag mi brjed pa zhes bya ba'o/ /gdams ngag ni yang dag pa'i man ngag go/ /g.yo med par sems can gyi don du yang dag pa'i gdams ngag 'dzin na de'i phyir mi brjed par 'gyur ro//sems can thams cad la snyoms pa'i sems zhes bya ba ni g.yo med na sems can thams cad la snyoms pa'i sems las byung ba'i phyir te/ sems snyoms pa yang thams cad 'du byed du mnyam pas rjes su chags pa dang khong khro ba dang bral bas 'dzin to//de'i bshad pa ni legs par bzung ba'i gdams ngag 'dus byas la nye bar rtog pa zhes bya ba'o/ /g.yo med pa'i stobs kyis gdams ngag legs par gzung ba 'dus byas la nye bar rtog ste/ sems can rnams la chos la bdag med pa dang /gang zag la bdag med par mnyam par rtog cing / 'dus byas thams cad la chos la bdag med pa dang / gang zag la bdag med par mnyam par gzhag pa nyid du zhugs nas/ nyon mongs pa'i sgrib pa dang / shes bya'i sgrib pa'i yul ci rigs par mi mthong ba ste/ de bas na tha dad pa ma yin pa dang / tha dad pa med pa'i spyod pa dang go rims bzhin du blta bar bya'o/ /de ltar dngos po 'di dag chos dang gang zag gnyis kyis stong yang de kho na ma mthong ba dag chos dang gang zag gi rnam pas bslus so zhes 'dus byas rnams la nyes par lta ba yin te/ de ni de la yang nyes par lta ba zhes bya bas bshad do//de la zhes bya ba ni 'dus byas la'o/ /tha dad pa med pa'i spyod pa la zhugs pa nyon mongs pa'i sgrib pa dang / shes bya'i sgrib pa de gnyis spangs pa'i bsam pa dang / lhag pa'i bsam pa dang go rims bzhin no/ /de bas na nyes pa de dag dang mi bsten pa zhes bshad do//bsam pa dang lhag pa'i bsam pa ci'i phyir byung zhes bya ba ni bsam pa dang / lhag pa'i bsam pa gnyis ci zhig gi phyir byung zhes bya ba'i tha tshig go/ /tshig gong ma rnams la yang de bzhin du phyir zhes bya ba blta'o/ /byang chub kyi sems kyi phyir byung ngo zhes bya ba ni nyon mongs pa dang /shes bya'i sgrib pa 'khrul pa rnams kyis sems can 'di dag shin tu sdug bsngal ba'i gnas su khrid de/ de bas na bdag gis bdag bzhin du gzhan dag kyang nyes pa thams cad spangs te byang chub thob par bya'o zhes byang chub tu sems bskyed do//de'i bshad pa ni dge ba'i las yang dag par 'dzin pa zhes bya ba'o/ /'dis dge ba'i las yang dag par 'dzin pas dge ba'i las yang dag par 'dzin pa ste byang chub kyi sems so/ /byang chub kyi sems kyi don du byung ba ni byang chub kyi sems kyi phyir byung ba'o zhes bsdu bar blta'o/ / 'og ma rnams la yang de bzhin no/ /pha rol tu phyin pa drug gi phyir byung ngo zhes bya ba ni byang chub tu sems bskyed nas pha rol tu phyin pa drug po dag la 'jug go/ /de bas na pha rol tu phyin pa drug ni byang chub kyi sems kyi 'bras bu'o/ /lus dang ngag dang yid kyi las rnam par dag pa'i bdag nyid pha rol tu phyin pa ste/de bas na lus dang ngag dang yid kyi las rnam par dag pa zhes bshad do/ /thabs dang shes rab gnyis kyi phyir zhes bya ba ni pha rol tu phyin pa drug po dag la 'jug pa na thabs dang shes rab la 'jug ste/ de la thabs kyis ni 'khor ba mi gtong la/shes rab kyis ni de'i nyes pa rnams kyis mi gos te/ shes rab dang thabs gnyis kun nas nyon mongs pa med par 'khor ba ji srid par sems can gyi don byed pa'i phyir sems can gyi don bya ba'i tshul khrims rnam par dag go/ /de bas na tshul khrims yongs su dag ces bshad de//bag yod pa'i phyir byung ngo zhes bya ba ni shes rab dang thabs dang ldan pa ni thams cad du bag yod par gnas pa'i phyir ro/ /bag yod par gnas pa yang spyod lam thams cad du sems can rnams kyi dang ba bskyed pas sems can gyi don dang mthun pa yin te/ de bas na sems can gyi don dang mthun pa zhes bshad do//legs par spyod pa rnam pa gsum gyi phyir byung ngo zhes bya ba ni bag yod pa la gnas pa dag lus dang / ngag dang / yid kyi legs par spyod pa dag la 'jug pa'i tshul khrims kyi bdag nyid sgrub bo/ /de bas na legs par spyod pa rnam pa gsum ni bag yod pa'i 'bras bu'o//legs par spyod pa rnam pa gsum dang ldan na tshogs yongs su rdzogs par 'gyur te/ de bas na tshogs yongs su rdzogs pa zhes bshad do/ /dge ba bcu'i las kyi lam gyi phyir byung ngo zhes bya ba ni lus dang / ngag dang / yid kyi legs par spyod pa dag la 'jug pa'i tshul khrims kyi bdag nyid la brtson pa ni de dang mi mthun pa srog gcod pa la sogs pa dag la mi 'jug go//de'i phyir de srog gcod pa spong ba la sogs pa ldog pa'i tshul khrims kyi bdag nyid sgrub bo/ /ldog pa'i tshul khrims kyi bdag nyid dge ba bcu'i las kyi lam ni 'jug pa'i tshul khrims kyi bdag nyid legs par spyod pa rnam pa gsum gyi 'bras bu yin no//de ltar 'jug pa dang ldog pa'i tshul khrims tha dad du phye ste/ legs par spyod pa rnam pa gsum dang / dge ba bcu'i las kyi lam rnams rgyu dang 'bras bu dngos por bstan pa khong du chud par bya'o/ /gzhan du na legs par spyod pa rnam pa gsum dang /dge ba bcu'i las kyi lam rnams tha dad pa ci zhig yod par 'gyur/ srog gcod pa spong ba la sogs pa la bsam pa brtan pa dag sems can log par zhugs pa rnams kyis mi skyo bas de ni yongs su mi skyo ba zhes bya bas bshad do/ /'jug pa dang ldog pa'i tshul khrims bstan pa 'dis sdom pa'i tshul khrims bstan to//sdom pa'i phyir byung ngo zhes bya ba ni 'bras bu yang dag pa/ rab/ gtso bo/ /sangs rgyas nyid 'di las byung bas sdom pa'o/ /thos pa dang / sems pa la sogs pa'i rim gyis bdag med pa gnyi ga la brten pa ni byang chub kyi phyogs la rab tu sbyor te/de'i don du byung ngo / /dge ba bcu'i las kyi lam gyi sdom pa la gnas pa ni thos pa dang / sems pa la sogs pa'i rim gyis byang chub kyi phyogs rnams la 'jug pa'i phyir 'dis ni dge ba'i chos sdud pa'i tshul khrims bstan to/ /gong du bshad ma thag pa byang chub kyi phyogs bsgom pa'i mtshan nyid kyi lam rnam par dag pas ni 'bras bu rnam par dag pa sangs rgyas nyid 'grub bo//de bas na las kyi 'bras bu rnam par dag pa zhes bshad do/ /tshul bzhin yid la bya ba'i phyir byung ngo zhes bya ba ni dge ba'i chos sdud pa'i tshul khrims dang ldan na rtag tu bdag med pa gnyi ga la brten pa'i yid la bya ba la 'jug ste/de nyid 'dir tshul bzhin yid la byed pa'o/ /tshul bzhin yid la byed pa shes rab kyi pha rol tu phyin pa la gnas pa'i bdag nyid des byang chub kyi phyogs la sbyor ba de rnam par dag go/ /de bas na sbyor ba rnam par dag pa zhes bshad do//so sor rtog pa'i phyir byung ngo zhes bya ba ni sems can so so la skal ba ji ltar gyi pha rol tu phyin pa la sgrub pa so sor rtog pa'o/ /tshul bzhin yid la byed pas ni srid pa sgyu ma lta bur mthong ngo / /de bas na 'khor ba ji srid par sems can gyi don la shin tu 'jug go/ /de lta bas na sems can gyi don rnam par dag pa zhes bshad do//dran pa'i phyir byung ngo zhes bya ba ni sems can thams cad kyi don bya ba la brtson par bya ba dang / mi bya ba dag la rtag tu dran pa 'jug pa'i phyir ro/ /dran pa dang ldan na mu stegs can dang bdud la sogs pas mi 'phrogs pa'o/ /de bas na gzhan gyis mi bkri ba rnam par dag pa zhes bshad do//gzhan ni gzhan du ste/ snying rje chen po cis bsdus zhes bya ba ni 'dir rgyu gang gis zhes rgyu 'dri ba nyid de/ 'di ni g.yo med pas bsdus te/ g.yo med pas bskyed ces bya ba'i tha tshig go/ /g.yo med pa ni sems can thams cad la snyoms pa'i sems kyis bsdus te/sems can thams cad la snyoms pa ma yin pa'i sems gang yin pa de g.yo yin par nges so/ /snyoms pa'i sems kyi rgyu ni tha dad pa ma yin pa dang / tha dad pa med pa'i spyod pa zhes bya ba'o/ /de bzhin du gzhan du yang ci'i phyir byung nas 'dri ba der yang rgyu gang las byung zhes zer ro//de dag ni bshad pa'i tshig dang mi mthun te/ 'di ltar gdams ngag mi brjed pa zhes bya ba'i tshig des g.yo med pa bstan nas/ phyis gdams ngag legs par bzung ba 'dus byas la nye bar rtog pa zhes bya ba 'dis ni sems can thams cad la sems snyoms pa zhes bya ba'i tshig 'di bshad do//'dir gdams ngag legs par bzung ba nyid 'dus byas la rtog pa'i rgyur bshad na sems can thams cad la snyoms pa'i sems ni g.yo med pa'i rgyu nyid du bstan par 'gyur te/ de lta na ni snying rje chen po byang chub kyi rtsa ba'i rgyu ma yin par 'gyur ro//rgyur bsdu ba dang / 'bras bur bsdu ba zhes bya ba la snga ma snga ma ni sems bskyed pa'i rgyu yin no/ /phyi ma phyi ma ni 'bras bu ste/ de bas na rgyu dang 'bras bur bsdu ba zhes bya'o/ /sa bcus bsdus pa'i sems bskyed pa rnam pa bzhi zhes bya ba de la/ sems bskyed pa dang po ni sa rab tu dga' bas bsdus so//spyod pa dang 'brel pa ni dri ma med pa la sogs pa drug po rnams su'o/ /phyir mi ldog pa ni mi g.yo ba la sogs par ro/ /skye ba gcig gis thogs pa ni sa bcu pa nyid la'o/ /bzhi pa rnam pa bcu gnyis kyis zhes bya ba ni de la sems bskyed pa dang po ni spyod pa dang 'brel pa'i rgyur blta'o zhes bya ba la sogs pa'o//skye ba gcig gis thogs pa ni 'bras bu dang 'brel pa'i rgyur blta'o zhes bya ba la/ rgyu ni bsod nams dang ye shes kyi tshogs kyi bdag nyid do/ /'bras bu ni sangs rgyas nyid do/ /'brel pa ni de las byung bar blta ste/sangs rgyas nyid kyi rgyu zhes bya ba'i tha tshig go/ /bzhi pa 'di'i bshad pa ni gong nas gong du rgyu chud mi za ba zhes bya ba ste/ sems skyes pa phyi ma phyi ma'i rgyu ni snga ma snga ma ste/ de'i rgyur de rtag tu gnas pas rgyu chud mi za ba'o/ /de ni 'di skad du sems dang po bskyed pa dang 'brel pa nyid kyi rgyu'o//gzhan gnyis las spyod pa dang 'brel pa phyir log pa nyid kyis zhes bya ba la sogs pa'i rgyu'i nus pa ste/ de bzhin du gyur pa'i phyir ro zhes bstan par 'gyur ro/ /de ltar 'bras bu dang mthun pa'i bzhi pa dang pos rgyu'i gnas bstan to/ /lha'i bu gzhan yang dper na sa bon btab pa zhes bya ba la sogs pa rgyur 'os pa bzhi pa gnyis pas ni/'bras bu yang gnas so zhes de ston to/ /btab pa ni bskrun pa ste/ sems bskyed pa dang po'i dge ba'i chos thams cad kyi dge ba'i sa bon bskyed pa'i phyir ro/ /sa bon gyi tshul du gnas pa sems bskyed pa dang po gang yin pa de las de dang mthun pa'i myu gu mngon par 'grub bo//chos de ni sems bskyed pa gnyis po ste/ de las bsdus pa mngon par 'du byed pa dang bcas par 'jug pa'i shes rab kyi rgyu ba las dge ba'i chos thams cad kyi myu gu rnams 'byung ba'i phyir ro/ /sems bskyed pa gnyis pa myu gu'i tshul du gnas pa gang yin pa de las de dang mthun pa sems bskyed pa gsum pa sdong bu la sogs pa lta bu'i chos nyid 'byung ste/de la mi g.yo ba la sogs pa gsum gyis bsdus pa mngon par 'du byed pa med par 'jug pa'i shes rab kyi rgyu bas bsgrim mi dgos par sangs rgyas kyi chos rnams yongs su rdzogs par 'gyur ba'i phyir ro//de bas na sems bskyed pa bzhi pa ni sems bskyed pa gsum pa'i 'bras bur gyur te/ 'bras bu yongs su smin pa'i chos yin no/ /de las yon tan thams cad yongs su rdzogs pa sangs rgyas su grub pa'i mtshan nyid kyi 'bras bu 'grub par 'gyur ro//bzhi pa gnyis pa 'di'i bshad pa ni rgyu'i rim gyis zhes bya ba la sogs pa ste/ rim pa gang gis rgyur gnas pa de nyid kyis 'bras bu ma tshang ba med par 'grub pa yongs su dag go/ /dper na shing rta mkhan zhes bya ba la sogs pa ni bzhi pa gsum pa'o/ /shing bsdu ba zhes bya ba ni shing ji ltar gyur pa ji snyed kyis shing rta 'grub pa de lta bur gyur pa de snyed shes te bsdu ba shes pa'o//de bzhin du sems bskyed pa dang po zhes bya ba ni sa dang po la smon lam chen po bcu po dag ni sangs rgyas kyi chos thams cad bsdu ba shes pa'o/ /de bas na yang smon lam la brten te/sangs rgyas kyi chos thams cad 'dzin pa zhes bya bas bshad do/ /de bzhin du spyod pa dang 'brel pa zhes bya ba ni dri ma med pa la sogs pas drug po drug ni sangs rgyas nyid kyi yan lag tu gyur pa'i chos bzod pa dang / brtson 'grus dang / bsam gtan dang /shes rab dang / thabs rnams rim bzhin du sbyong ba'i phyir ro/ /de'i bshad pa ni tshul khrims dang sdom pa rnam par dag pa zhes bya ste/ tshul khrims ni/ tshul khrims kyi pha rol tu phyin pa'o/ /'dis mi mthun pa'i phyogs kyi sems bzlog pas sdom pa'o/ /dper na shing rta'i yan lag ces bya ba la sogs pa 'di'i bshad pa ni bsgom pa'i lam na shes rab dang thabs kyi chos thams cad la sbyor ba zhes bya ba'o//mngon par 'du bya ba med par 'jug pa ni bsgom pa'i lam na shes rab dang thabs de gnyis kyis sangs rgyas nyid kyi rgyu'i chos bsod nams dang ye shes kyi tshogs kyi bdag nyid thams cad yan lag dang /yan lag can gyi dngos por phan tshun sbyor ba'i phyir te/ 'di ltar bsod nams kyi tshogs kyis bsdus pa'i ye shes mya ngan las 'das pa 'bras bu yang 'khor ba dang mi mthun pa ste/ ye shes kyi grogs bsod nams kyi tshogs 'byung ba mngon par 'grub par 'bad kyang mya ngan las 'das pa dang /mi mthun pa med de/ de ltar 'di gnyis yan lag dang yan lag can gyi dngos po yin pa'i phyir 'bras bu mi gnas pa'i mya ngan las 'das pa 'grub bo/ /dper na khal dgal ba zhes bya ba ni shing rta yongs su grub nas rdzas la sogs pa khal dgal ba shes pa'o//de bzhin du skye ba gcig gis thogs pa'i sems bskyed pa zhes bya ba ni tshogs yongs su rdzogs pa des bdag dang gzhan gyi don gyi khur shin tu sgrub pa'i phyir ro/ /de'i bshad pa ni khur blangs pa mi 'dor ba zhes bya ba'o/ / khur blangs pa ni bdag dang gzhan gyi don yang dag par sgrub pa'o/ /dper na zla ba tshes pa zhes bya ba la sogs pa ni bzhi pa'o/ /de'i bshad pa ni gong nas gong du mthu rnam par dag pa zhes bya ba'o/ /zla ba'i dkyil 'khor ni gong nas gong du snang ba'i bye brag gi mthu rnam par dag go/ / sems kyi ni nus pa'i bye brag go/ /tshes bcu bzhi'i nub mo zla ba'i dkyil 'khor shar ba'i dpes ni skye ba gcig gis thogs pa'i sems bskyed pa cung zad cig gis yongs su ma rdzogs par bstan to/ /tshes bco lnga'i nub mo'i dpes ni de bzhin gshegs pa'i mkhyen pa rnam pa thams cad du yongs su rdzogs par bstan to//nyan thos rnams kyis ni gang zag la bdag med pa tsam gyis mthong ba'i lam la bden pa khong du chud pa'o/ /de las shin tu 'das pa ni sa dang po la mthong ba'i lam na chos thams cad bdag med pa'i mtshan nyid chos kyi dbyings thams cad du song ba'i rnam par khong du chud pa'i phyir ro//de'i bshad pa ni yang dbang po rno ba'i phyir byang chub kyi phyogs kyi chos la lhag par dmigs pa zhes bya ba ste/ sangs rgyas nyid kyi phyogs su gyur pa'i rgyur gyur pa'i chos ni byang chub kyi phyogs kyi chos te de bzhin nyid do/ /de ni sa dang po la mthong ba'i lam na nyan thos thams cad pas lhag par chos thams cad la bdag med pa'i rnam par dmigs pas na byang chub kyi phyogs kyi chos la lhag par dmigs pa'o//rang sangs rgyas rnams kyis ni gzung ba dang 'dzin pa la mngon par zhen nas rten cing 'brel par 'byung ba la bden pa nyid du khong du chud pa'o/ /de bas na de dag gis 'khor ba sgyu ma lta bur khong du ma chud de/des skrag nas bdag gcig pu thar bar bya ba'i phyir 'bad do/ /sems bskyed pa gnyis pa ni de las shin tu 'das te/ de las gzung ba dang 'dzin par mngon par zhen pa dang bral bas yang dag pa ma yin pa yongs su brtag pa'i bdag nyid sgyu ma lta bu'i rten cing 'brel par 'byung ba khong du chud pa'i phyir ro//sa dang po la thams cad du 'gro ba'i rnam par de bzhin nyid khong du chud pas nyan thos kyi sa bzhin du rang sangs rgyas kyi sa las kyang shin tu 'das su zin kyang rten cing 'brel par 'byung ba gong ma la khong du chud pa'i phyir de skad ces gsungs so//de'i bshad pa ni shes rab kyi khyad par gyis spyod pa mtha' yas pa yang dag par bsgrub pa zhes bya ba ste/ shes rab kyi khyad par gyis 'khor ba sgyu ma lta bur khong du chud pas de'i phyir 'jigs pa med de/ sems can gyi don du spyod pa mtha' yas pa yang dag par sgrub bo//sems bskyed pa gsum pa zhes bya ba la sogs pa ni mngon par 'du byed cing 'jug pa'i sa'o/ /sa bdun pa'i bar du ma nges pa ste/ de la rtsol ba dang bcas pa'i phyir ro/ /rnam par mi rtog par rgyu ba ni nges pa'i phyir ro/ /de bas na rtsol ba'i rnam par rtog pas skyod par mi nus pa'i phyir sa de mi g.yo ba zhes bya'o//rtsol bar ldog pa med pa'i phyir phyir mi ldog pa'i sa zhes bya ba'o/ /de bas na rtsol ba'i yongs su g.yo ba thams cad las shin tu 'das pa zhes bshad do/ /nges pa'i phung po ni dbang bskur ba thob pa'i byang chub sems dpa' rnams te/ de bas na rgyal tshab tu rab tu gnas pa de zhes bshad do// //'phags pa ga ya mgo'i ri mdo dang spel mar bshad pa/ bam po gnyis pa ste tha ma'o/ /yi ge'i phyi mo 'dzin pa ni 'bru thams cad der 'dus pa'i phyir ro/ /tshul zhes bya ba ni 'dra ba ste/ 'di ltar sems bskyed pa dang po ni sangs rgyas nyid kyi rgyu'i chos rnams smon lam chen po bcu po dag gis kun tu bya ba tsam du yi ge'i phyi mo lta bur 'dzin par byed pa'o//de bas na gzhi la lhag par dmigs pa zhes bshad do/ kun tu bya ba tsam du sangs rgyas kyi chos thams cad kyi gzhir gyur pa smon lam chen po rnams lhag par dmigs pa'i phyir ro//rnam par dbye ba rab tu rnam par 'byed pa shes pa zhes bya ba ni 'di'i rnam par dbye ba'o/ /'di ni legs par rnam par 'byed pa'o/ /de lta bur ni spyod pa dang 'brel pa'i sems bskyed pa zhes bya ba ni de la mngon par 'du byed pa dang bcas par 'jug pa'i shes rab kyi rgyu ba dri ma med pa la sogs pa sa drug gis bsdus pa la bsod nams dang ye shes kyi tshogs kyi mtshan nyid kyi chos rnams rnam par dbye ba rab tu shes pa'i phyir ro//de'i bshad pa ni blos rab tu rnam par 'byed pa zhes bya ba ste/ bsgom pa'i lam gyis bsdus pa sa drug po dag gi blos chos rab tu rnam par 'byed ces bya ba'i tha tshig go//grangs dang rtsis gzhan du don gcig tu zin kyang 'dir so sor smos pa'i phyir rtsis dang tha dad de/ grangs ni gcig la sogs pa'o/ /gzhal ba la sogs pas yongs su bcad pa ni rtsis su blta'o/ /shod dgod pa ni 'jog pa ste/ de shes pas 'du ba dang 'god pa thams cad la rtag tu ma rmongs na nor 'phel bar 'gyur ro//de lta bur ni phyir mi ldog pa'i sems bskyed pa zhes bya ba ni sa brgyad pa la mi skye ba'i chos la bzod pa thob pas bdag dang gzhan mtshungs par khong du chud pa'i phyir gzhan gyi sbyin pa bdag gis kyang pha rol tu phyin pa yongs su rdzogs par 'gyur ba'i phyir ro//de ni thabs mkhas pas chos thams cad la 'jal ba zhes bya bas bshad do/ ji skad du bshad pa'i bdag dang gzhan mtshungs pa'i mtshan nyid thabs mkhas pas gzhan gyi sbyin pa la sogs pa yang bdag gir 'dzin pa'i phyir ro zhes bya ba'i tha tshig go//de lta bur ni skye ba gcig gis thogs pa zhes bya ba ni sa bcu pa la bsgom pa khyad zhugs pas mthar phyin pa'i chos rnams khong du chud pa'i phyir te/ de ni ye shes khong du chud pa zhes bya bas bshad do/ /rgyur 'brel pa zhes bya ba la/ rgyu ni len pa'i rgyu ste/ rgyu nyid ni 'brel pa ste/bdag nyid zag pa med pa'i phyir zag pa med pa'i chos rnams kyi len pa'i dngos por gnas zhes bya ba'i tha tshig go/ /'di'i bshad pa ni rang bzhin gyis rus phun sum tshogs pa zhes bya ba ste/ rang bzhin zhes bya ba ni rigs 'dra ba'o/ /rus zhes bya ba ni rgyu ste/ rigs 'dra ba'i rgyu phun sum tshogs pa zhes bya ba'i tha tshig go/ /ye shes dang 'brel pa zhes bya ba ni shes pa nyid dang 'brel pa ste/ nges par 'byed pa nyid du gnas pa ste/ de ni 'jig rten pa dang 'jig rten las 'das pa'i thos pa 'dzin pa zhes bya bas bshad do/ /gtong bas spong ba ste/ spros pa dang bral ba ste/ de'i ngo bo dang 'brel par rnam par gnas pa'o/ /de ni spros pa las dben pa zhes bya bas bshad do/ /'bras bu dang 'brel pa zhes bya ba ni 'bras bu'i dngos por gnas pa'o/ /'bras bu ni 'dir lhun gyis grub par sems can gyi don byed pa ste de ni lhun gyis grub par sems can gyi don byed pa zhes bya bas bshad do//rgyur 'brel pa'i tshig gis ni rgyu nyid du gnas so zhes bya bas don 'di bstan to/ /rgyus bsdus pa zhes bya ba 'dis ni rgyus bsdus shing rgyus bskyed ces bya ba'i don 'di ston te/ bye brag ni de yod do/ /de bas na mos pas spyod pa na mngon par 'du byed pa yongs su smin pas sa dang po la lhag par dmigs pa zhes bya bas bshad do//mos pas spyod pa'i sa na mngon par 'du byed pa de yongs su smin pa ni sa rab tu dga' ba la 'jug par gegs med par nus pa nyid de/ des sa dang po la lhag par dmigs pa'i phyir ro//ye shes kyis bsdus pa zhes bya ba ni sa rab tu dga' bas bsdus pa gang mthar phyin pa'i ye shes des bsdus pa ste bskyed pa'o/ /khams rnams kyi don ni du ma yod pa'i phyir ro/ /de ni ye shes yongs su smin pas sbyor ba las byung ba'i spyod pa las lhag par dmigs pa zhes bya bas bshad do//sa rab tu dga' bas bsdus pa'i ye shes yongs su smin pa ni sa gnyis pa bskyed par gegs med par nus pa nyid de/ rgyu des sbyor ba las byung ba'i spyod pa dri ma med pa la sogs pas bsdus pa la lhag par dmigs pa'i phyir ro/ /spong bas bsdus pa zhes bya ba ni 'dis spong bas na spong ba ste/sa bdun pas bsdus pa'i lam ste/ gang de ma thag tu sa mi g.yo ba la sogs pa la 'jug pa'o/ /des bsdus pa ni bskyed pa'o/ /de ni bsgom pa yongs su smin pas sangs rgyas kyi chos ma thob pa rnams la lhag par dmigs pa zhes bya bas bshad do/ / mngon par 'du byed pa dang bcas par 'jug pa'i bsgom pa yongs su smin par mthar phyin pa ste/ des mi skye ba'i chos la bzod pa la sogs pa ma thob pa'i chos rnams la lhag par dmigs pa'i phyir ro/ /mi skye ba'i chos la bzod pa la sogs pa de nyid byang chub sems dpa'i phyir mi 'ong ba'i 'bras bu ste/yang mngon par 'du byed par 'ong ba med pa'i phyir ro/ /'bras bu de ltar gyur pa nyid kyis bsdus pa ni sems bskyed pa bzhi pa'o/ /de ni 'bras bu yongs su smin pas ji ltar 'dod pa bzhin du mngon par rdzogs par rtogs pa zhes bya bas bshad do/ /sa mi g.yo ba la sogs pas bsdus pa bshad ma thag pa'i mtshan nyid kyis 'bras bu yongs su smin pa ste/rgyu des sa bcu la de'i sgrib pa spangs nas chos kyi dbyings ji ltar 'dod pa bzhin du mngon par rdzogs par rtogs pa'i phyir ro/ /rgyu las yang dag par byung ba zhes bya ba ni rgyu las yang dag par byung ba gang yin pa de rgyu las yang dag par byung ba ste/phyin ci ma log pa'i rgyu zhes bya ba'i tha tshig go/ /de ni ma nor bar dge ba bsgom pa'i gnas zhes bya bas bshad do/ /mos pas spyod pa'i sas bsdus pas ma nor ba'i dge ba'i chos bsgom pa'i gnas sems bskyed pa gang yin pa de la de skad ces bya'o//bzhi po gong ma nyid kyi rgyus bsdus pa'i tshig gis ni gegs med par nus pa rgyu gang gis bskyed pa de bstan to/ /des ni de'i rgyu phyin ci ma log pa bstan te/ 'di ni bye brag go/ /ye shes las yang dag par byung ba zhes bya ba ni sa rab tu dga' bas bsdus pa'i ye shes las yang dag par byung ba phyin ci ma log pa rgyur gyur pa las byung ba sems bskyed pa gnyis pa gang yin pa de ye shes las byung ba'o//de ni ma nor ba'i chos la nges par rtog pa'i skye gnas zhes bya bas bshad do/ /ma nor ba'i sa rab tu dga' bas bsdus pa'o/ /chos la nges par rtog pa'i skye gnas ni rgyu ste gang yin pa de la de skad ces bya ste/spong ba las yang dag par byung ba zhes pa 'dis spong bas na spong ba ste/ sa bdun pas bsdus pa'i ye shes de las yang dag par byung ba phyin ci ma log pa sems bskyed pa gsum pa gang yin pa de spong ba las yang dag par byung ba'o/ / de ni ma nor bar bsgom pa'i gnas zhes bya bas bshad do/ ma nor bar bsgom pas sa bdun pas bsdus pa'i gnas las byung ba sems bskyed pa gsum pa gang yin pa de la de skad ces bya'o/ /'bras bu rang gi sems la dbang sgyur ba las yang dag par byung ba gang yin pa de 'bras bu las yang dag par byung ba de ni rang gi sems la dbang sgyur ba zhes bya bas bshad do//sems bskyed pa dang po ni rgyu rab tu dbye ba'i yan lag go zhes bya ba ni sa gnyis pa la sogs pa'i rgyur gyur pas sa rab tu dga' bas bsdus pa'i chos rnams kyis rab tu dbye ba yang yin pa de dag gi yan lag ste/ sems bskyed pa dang po de nyid la brten nas byang chub kyi rgyur rnam par gnas pa'i chos rnams rnam pa mang por 'phel ba'i phyir ro//de ni yang dge ba'i rtsa ba mtha' yas pa 'dzin pa zhes bya bas bshad do/ /ye shes rab tu dbye ba'i yan lag ces bya ba ni dri ma med pa la sogs pa sa drug po rnams ni sems bskyed pa gnyis pa la gnas pa'i ye shes chos sna tshogs la rtogs pas du mar tha dad pa'i phyir ro//de ni chos mtha' yas pa la nges par rtog pa zhes bya bas bshad do/ /mngon par 'du byed pa thams cad spong ba thob pa'i phyir lhun gyis grub par 'jug pas ting nge 'dzin rnams nyid spong ba'o//de dag gi rab tu dbye ba sna tshogs kyi yan lag ste/ sa brgyad pa la mi skye ba'i chos la bzod pa'i stobs kyis ting nge 'dzin mtha' yas pa thob pa'i phyir de ni ting nge 'dzin gyi sgo mtha' yas pa'i rjes su 'jug pa zhes bya bas bshad do/ /ting nge 'dzin rnams nyid sgo ste/ de dang 'brel pa'i don rnams kyi sgor gyur pa'i phyir ro//'bras bu ni ting nge 'dzin gyis rnam par rol pa mtha' yas pa myong ba'o/ /des rab tu dbye ba'i yan lag ni sems bskyed pa bzhi pa ste/ sa bcu pa la ting nge 'dzin gyi sgyu ma mtha' yas pa rnam par grol ba'i phyir ro/ /de ni rnam par rol pa mtha' yas pa myong ba zhes bya bas bshad do//sman bsdu ba'i tshul zhes bya ba ni de dang 'dra zhes bya ba'i tha tshig go/ /de'i bshad pa ni yang nyon mongs pa'i nad kyi gnyen po'i gnas zhes bya ba ste/ nyon mongs pa'i nad kyi gnyen po ni zag pa med pa'i ye shes kyi sman no/ /de'i gnas ni sems bskyed pa dang po ste/sa rab tu dga' ba la thog mar zag pa med pa'i ye shes thob pa'i phyir ro/ /sman rab tu dbye ba zhes bya ba la sogs pa'i bshad pa ni nyon mongs pa'i nad dang mthun pa'i sman rab tu shes pa zhes bya ba'o/ /shes nas kyang mthun pa'i sman ni thabs te snying rje'o/ /des 'khor ba mi gtong ste/de ni sman sbyor ba la mkhas pa zhes bya ba la sogs pa'i mdo'i tshig bshad pa'o/ /nad gso ba zhes bya ba la sogs pa ni sman rab tu sa bcu pas bsdus pa bar chad med pa'i lam rab kyi mchog gis nyon mongs pa dang shes bya'i sgrib pa bag chags dang bcas pa spang ba'i phyir sems bskyed pa bzhi pa ni nad pa gso ba zhes bya bas bshad do//de'i bshad pa ni nyon mongs pa'i nad las gso ba zhes bya ba'o/ /chos kyi rgyal po zhes bya ba'i dpe ni 'khor los sgyur ba'i rgyal po'o/ /dngos ni sangs rgyas bcom ldan 'das rnams so/ /de dag gi rigs ni skye ba'i gnas te byang chub sems dpa' de kho na mthong ba dag go//de mtshan nyid gcig pa ni rgyud de der 'byung ba'i tshul du sa dang po la de bzhin gshegs pa'i rigs su skyes pa'i phyir ro/ /der skyes nas nyan thos dang rang sangs rgyas rnams zil gyis non te/ de ni nyan thos dang rang sangs rgyas thams cad zil gyis non pa zhes bya bas bshad do//dpe ni rig pa rnams dang sgyu rtsal rnams la mkhas pa'i bslab pa yang dag pa 'dzin pa'o/ /dngos po ni dmigs pa med pa dang ldan pa'i sdom pa'i tshul khrims bla na med pa la sogs pa ste/ 'di'i bshad pa ni de yang bslab pa'i gnas thams cad las khyad par du 'phags pa zhes bya'o//de yang zhes bya ba ni nyan thos la sogs pa zil gyis non pa ste/ nyan thos la sogs pa'i bslab pa'i rnam pa dag las khyad par du 'phags pa zhes bya ba'i tha tshig go/ /bslab pa tshar phyin pa ni khams gsum pa la bslab pa rdzogs pa ste/sa brgyad pa la mngon par 'du byed pa dang bcas pas 'jug pa'i bslab pa rdzogs pa'i phyir ro/ /de'i bshad pa ni sgom pa khyad par du 'phags pa zhes bya ba'o/ /sgom pa khyad par du 'phags pa ni mngon par 'du bya ba med par dge ba thams cad la 'jug pa'i phyir ro//sems can gyi don du lhun gyis grub par bslab pa rnams la 'jug pa la dbang sgyur te/ de ni bsgoms pa'i 'bras bu khyad par du 'phags pa zhes bya ba'o/ /bsgoms pa'i 'bras bu ni sems can gyi don no/ /de'i khyad par du 'phags pa ni lhun gyis grub par thams cad du cig car yang dag par sgrub pa'o//chos kyi mnga' bdag ni sangs rgyas bcom ldan 'das so/ /'phags pa 'jam dpal la yongs su dris pa gang yin pa zhes bya ba ni dang por zla ba dri ma med pa'i gzi brjid 'od zer gyi 'od kyis dris pa gang yin pa dang / bar du 'od rnam par nges pa'i 'od zer gyi 'od dang /'og tu ye shes sgrub pa dpa' bos dris pa gang yin pa de thams cad bsdus te brgal ba'o/ /byang chub sems dpa' rnams la dang ba bskyed pa'i phyir ro zhes bya ba ni chos kyi mnga' bdag bzhin du byang chub sems dpa' rnams la yang zab mo dris pa rnams la lan 'debs pa'o zhes de dag la lan 'debs pa'o//de ltar re zhig byang chub sems dpa'i yon tan gyi mthu de brgyad pa'i don bshad do/ /da ni spyod pa rnam par dbye ba bshad par bya'o/ /de yang rnam pa gnyis su bshad do/ rgyus bsdus pa dang / 'bras bus bsdus pa'o zhes bya ba de la dang po'i dbang du byas nas rgyus bsdus pa'o zhes bya ba la sogs pa smos so//tshogs dang zhes bya ba la sogs pas ni tshogs kyi lam bstan pa dang rnam par rig pa'i lam bstan pa'o/ /yang dag pa'i mtha' zhes bya ba la sogs pa ni yang dag pa'i mtha' bstan pa dang /yang dag pa'i mtha' de khong du chud par bya ba'i thabs bstan pa zhes bya ba'i tha tshig go/ /de yang mdo las/ thabs dang shes rab bo zhes bya ba la/ de la thabs ni tshogs kyi lam mo/ /shes rab ni rnam par dag pa'i lam mo/ /'di gnyis ni mdo'i tshig thabs ni bsdu ba shes pa'o zhes bya ba la sogs pa bcu drug gis bshad do//de la brgyad pa phyed phyed bkod pas ni thabs bstan to/ /de bas na tshogs kyi lam bstan pa ni rnam pa brgyad kyis zhes bya ba la sogs pa smos so/ /shes rab kyang brgyad po de nyid kyi tshogs phyed phyed bkod pas bstan to/ /de bas na 'og nas rnam par dag pa'i lam bstan pa yang rnam pa brgyad kyis zhes 'byung ngo //sems can rnam pa tha dad pa ni kha cig ni brkam chags can te/ /de dag sbyin pas yongs su smin par bya'o/ /zhe sdang can dag ni snyan par smra bas so/ /nga rgyal can dag ni don dpyod pa zhes bya ba la sogs pas so/ / de la thabs ni bsdu ba shes pa'o zhes mdo'i tshig 'di'i bshad pa ste/ brkam chags can la sogs pa dag sbyin pa la sogs pa'i bsdu bas yongs su smin par bya ba shes nas de bzhin du spyod pa'i phyir ro/ /sems can la lta ba zhes bya ba ni de dag gis nyes par spyad kyang de dag mi gtong ba'i phyir ro//de ni de dag gi nyes par spyod pa sna tshogs kyis ji mi snyam pa zhes bya bas bshad do/ /de dag ces bya ba ni sems can rnams so/ /chos ni lha dang mi'i 'gro bas bsdus pa dag go/ /sbyor ba ni dge ba'i mngon par 'du byas pa gang gis chos de la sbyor ba'o/ /des shes pa ni des 'khor ba yongs su mi gtong ba'o//de ni dkar po'i chos thams cad yang dag par sdud par byed pa zhes bya bas bshad do/ /mngon par mtho ba'i mtshan nyid dkar po'i chos thams cad yang dag par sdud par byed pa ni mi zad par yang dag par sgrub par byed pa'o/ /rgyu ni byang chub kyi phyogs kyi chos rnams so//de dag la rnam pa dang bcas pa'i shes pas dmigs pa ni rgyu la dmigs pa'o/ /de ni byang chub kyi phyogs kyi chos la lhag par dmigs pa zhes bya bas bshad do/ /chos ni gzhan gyi dbang gi mtshan nyid rnams te/ ji ltar snang ba bzhin du sems can tha dad par rnam par gzhag pa ni chos tha dad pa shes pa ste/gang gis sems can la dmigs pa'i snying rje rab tu 'byung ba'o/ /de'i bshad pa ni mtshan nyid mi 'dra ba zhes bya ba ste/ gzhan gyi dbang gi dngos po'i sems can so so'i mtshan nyid mi 'dra ba rnam par gzhag pa'i phyir ro/ / smon lam gyi khyad par gyis bsdus pa bsod nams kyi khyad par gang gis sangs rgyas kyi zhing brgyan par byed pa des sangs rgyas kyi zhing gi rgyan te de shes pa'o/ /de bas na smon lam rnam pa sna tshogs zhes bya bas bshad do/ /sems can gyi dbang po ni dad pa la sogs pa'i dbang pos so/ / spyod pa ni 'dod chags la sogs pa tha dad pas spyod pa tha dad pa dag go/ /de dag la 'jug pa shes pa ni gang gis de dag la 'jug pa'o/ /de'i bshad pa ni gdul ba'i sems can ji lta ba bzhin du yongs su shes pa zhes bya'o/ /byang chub brgyan par byed pa'i chos gang dag yin pa de dag byang chub kyi rgyan te/de dag kyang bsod nams dang ye shes kyi tshogs kyi bdag nyid rnams so/ /de dag yang dag par thob par byed pa shes pa ni thabs gang gis rgyun du ste tshegs med par sgrub pa'o/ /de yang thabs mkhas pa'i mdo'i tshul bzhin du rig par bya'o/ /de'i bshad pa ni tshogs rnam pa sna tshogs nye bar sgrub pas zhes bya ba'o//rnam par dag par bya ba'i phyir lam du gyur pa ni rnam par dag pa'i lam ste shes rab bo/ /dge ba dang mi dge ba'i chos la spyod pa ni spang bar bya ba dang blang bar bya ba ji lta ba bzhin du spyod pa'o/ /de yang shes rab ni yongs su gcod pa shes pa'o zhes bya ba 'di'i bshad pa'o//yongs su gcod pa ni dge ba dang mi dge ba'i chos rnam par 'byed pa'o/ /shes rab ni chos thams cad la mi lta ba'o zhes bya ba ni gzhan gyi dbang gi bdag nyid dngos po brgyad kyi chos thams cad la mi lta ba ste/ sems can zhes bya ba de lta bur lta ba med pa'i phyir ro//de dag ni chos zhes bya ba tsam nyid du bzung ngo / /sems can du lta ba gang yin pa de ni 'jig tshogs la lta ba'i rtsa ba'o/ /'jig tshogs la lta ba ni nyes pa thams cad kyi gzhi yin pa'i phyir 'khor ba'i rkyen to/ /de'i bshad pa ni chos thams cad la rkyen gyis mi lta bar sngon du gtong ba zhes bya'o//kun nas nyon mongs pa'i rkyen sems can du lta bas sems can thams cad la lta ba med pa de dag rkyen gyis mi lta ba dag go/ /chos de thams cad de ltar bzung ba'i chos thams cad la rkyen gyis mi lta ba'o/ /de dag gi sngon du gtong ba ni chos tsam du bzung nas sems can thams cad sngon du btang ste/thams cad mkhyen pa nyid la 'jug pa'o zhes bsdus pa'i don to/ /shes rab ni bral bas shes pa'o/ /'di'i bshad pa ni chags pa thams cad las grol ba zhes bya ba'o/ /shes rab ni rgyu zad par 'gro ba'o zhes bya ba ni nying mtshams sbyor ba'i rgyu zad par 'gro ba'i phyir te/de ni nying mtshams sbyor ba gcod pa zhes bya bas bshad do/ /chos kyi dbyings ni de bzhin nyid do/ /de gcig pa nyid du thams cad du shes pa ni dbyer med pa shes pa'o/ /de'i bshad pa ni yang dag pa ji lta ba bzhin du mthong ba zhes bya ba'o/ /rnam par rig pa rnam par dag pa'i mtshan nyid ni sangs rgyas kyi zhing rnams te/sangs rgyas kyi zhing lta bur snang ba'i rnam par rig pa'i rgyu las byung ba'i phyir ro/ /de dag gi mnyam pa nyid ni gnyis las dben pa'o/ /de dbyer med par shes pa ni gcig tu shes pa'o/ /chos kyi dbyings dbyer med pa shes pa'i rab tu dbye ba'ang 'di nyid de/sangs rgyas kyi zhing gi tshul gyis logs shig tu bshad par zad do/ /de'i bshad pa ni tshul gcig tu yang dag par gzhol ba zhes bya ste/ tshul gcig ni stong pa nyid do/ /de yang dag par gzhol ba ni rnam par gzhol ba'o/ /sems can dmigs su med pa ni kun brtags pa'i ngo bor ro//de'i bshad pa ni byis pas kun brtags pa la yang dag pa ji lta ba bzhin du yongs su rtog pa zhes bya ba'o/ /byis pa rnams kyis kun brtags pa ni byis pas kun tu brtags pa ste/ sems can no zhes de ltar sgro btags pa'o/ /de la yang dag pa ji lta ba bzhin du brtags na ngo bor de mi dmigs so//sangs rgyas kyi chos thams cad gang las byung ba de ni sangs rgyas kyi chos thams cad de/ sgrib pa thams cad dang bral ba'i chos kyi dbyings so/ /de mngon par rdzogs par byang chub pa shes pa'o/ /de'i bshad pa ni zhi ba'i dbyings mngon sum du byed pas zhes bya ba ste/chos kyi dbyings nyid zhi ba'i dbyings so/ /lha'i bu gzhan yang zhes bya ba la sogs pa'i nang nas tshogs kyi lam ni pha rol tu phyin pa lnga po dag go zhes bya ba ni sbyin pa la sogs pa bsam gtan gyi pha rol tu phyin pa la thug pa dag ste/ 'di dag gis dge ba sna tshogs sogs pa'i phyir ro//de'i bshad pa ni dge ba'i rtsa ba sna tshogs sgrub pa zhes bya ba'o/ /'dis ni rnam pa gcig bstan to/ /yongs su gcod pa'i lam ni shes rab kyi pha rol tu phyin pa'o zhes bya ba ni de'i chos rnams ji lta ba bzhin du yongs su gcod pa'i phyir te/ de'i bshad pa ni yongs su gcod pa ste de'i don ni snga ma bzhin no zhes bya ba'o//shes rab ni yongs su gcod pa zhes bya ba der yongs su gcod pa'i don gang yin pa 'dir yang de yin te/ 'dis ni rnam pa gnyis pa bstan to/ /yang gnyis te zhes bya ba la sogs pas ni pha rol tu phyin pa drug po de dag nyid rnam par ston to//chags pa dang bcas pa'i lam ni pha rol tu phyin pa lnga po dag go zhes bya ba la/ de dag ni longs spyod chen po la sogs pa'i 'bras bu yin pas 'khor ba'i rgyur gyur pa'i phyir ro/ /de bas na khams gsum na spyod pa zhes bshad do/ /byang chub sems dpa' rnams kyi sbyin pa la sogs pa yongs su bsngo ba'i khyad par gyis zin pa dag thams cad mkhyen pa nyid kyi rgyu yin du zin kyang longs spyod chen po'i 'bras bu sogs pas de skad ces brjod do//chags pa med pa'i lam ni shes rab kyi pha rol tu phyin pa'o zhes bya ba ni khams gsum nas 'byung ba'i phyir ro//'dis ni zag pa dang bcas pa'i lam ni zhes bya ba la sogs pa bshad do/ /mtshan ma'i gnas ni gzung ba dang 'dzin pa la mngon par zhen pa'i gnas te des shes bya'i sgrib pa ma spangs pa'i phyir/ tshad yod par byas pa'i lam ste/ dper na nyan thos la sogs pa lta bu'o//de ni rnam par shes pa yul yin pas mtha' dmigs pa zhes bya bas bshad do/ /gnyis pa la gnas pa'i shes pa ni rnam par shes pa ste/ de'i spyod yul yin pa'i phyir ro/ /rang gis rig pa'i tshul gyis yul du gyur pa'i phyir te/ gnyis pa mngon par zhen pa'i shes pa'i bdag nyid kyi phyir ro zhes bya ba'i tha tshig go//de bas na shes bya thams cad la 'jug pa med pas mtha' dmigs pa'i phyir de ni tshad yod par byas pa zhes bya bar dgongs pa'o/ /bzlog pa ni mtshan ma med pa'i gnas te/ de ni rnam par shes pa'i yul las yang dag par 'das pas mtha' mi dmigs pa zhes bya bas bshad do//gnyis pa mngon par zhen pa'i shes pa'i ngo bo las 'das pa'i phyir shes bya mtha' dag la khyab pas mtha' mi dmigs pa zhes bya ba'i tha tshig go/ /de la shes pa'i lam ni sa dang po nas bzung ste zhes bya ba la sogs pa ni mngon par 'du byed pa dang bcas par 'jug pa'i shes pa'i bdag nyid kyi phyir de skad ces bya ste/de ni 'dus byas kyi dbyings yongs su shes pa zhes bya bas bshad do/ /'dus byas ni mngon par 'du byed pa dang bcas pa'i shes pa ste/ de nyid sangs rgyas kyi chos rnams kyi dbyings so//de yongs su shes pa ni mngon sum du byed pa'o/ /spong ba'i lam ni sa brgyad pa nas bzung ste zhes bya ba ni mngon par 'du byed pa spangs pa'i mtshan nyid kyi phyir 'dus ma byas kyi dbyings yongs su shes pas de nyid du bshad de/ 'dus ma byas ni mngon par 'du byed pa dang bral ba lhun gyis grub par 'jug pa'i ye shes te/de nyid sangs rgyas kyi chos rnams kyi rgyur gyur pa'i phyir dbyings so/ /de yongs su shes pa ni so so rang rig pa'o/ /ji ltar na don gyis rab tu phye ba yin zhes bya ba ni yang dag pa'i mtha' bstan pa'i phyir dris pa'o/ /ji ltar na ye shes kyis rab tu phye ba yin zhes bya ba ni yang dag pa'i mtha' de khong du chud par bya ba'i thabs bstan pa'i phyir ro//don ni 'dir de bzhin nyid la dgongs pa'o/ /don gyis rab tu phye ba ji lta bu zhe na/ stong pa nyid las nges par skyes zhes bya ba'i tha tshig go/ /ye shes kyis rab tu phye ba ji lta bu zhe na/ ye shes kyi stobs kyis sgrib pa spangs par gyur zhes bya ba'i tha tshig go//'phags pa 'jam dpal gyis don dang ye shes kyi dbye ba gsungs pa dang / ldan pa med pa dang / ldan pa ni go rims bzhin du 'og tu rab tu dbye ba nyid thabs sla bas bshad par bya'o/ /de bzhin nyid ni rnam pa gnyis te/ gzung ba dang 'dzin pa med pa tsam gyi mtshan nyid dang /gnyis las dben pa'i ye shes kyi bdag nyid do/ /de la dang pos bsdus pa 'di ni don dang ye shes kyi rnam par dbye bar blta ba'o/ /'di la gnyis pa gang yin pa de ni ye shes kyi bdag nyid kho na'o/ /de la don ldan pa med pa nyid du bstan pa'i phyir/rigs kyi bu don ni 'dus ma byas pa zhes bya ba la sogs pa gsungs te/ rgyu dang rkyen gyis 'du bya ba med pa'i phyir 'dus ma byas pa'o/ /de bas na gang dang yang ldan pa'am mi ldan pa ma yin te/ de dngos po med pa'i phyir ro/ /de bas na mi rtag pa nyid dang phrad pa med pa'i phyir don ni ldan pa med par gsungs so//de'i bshad pa ni mi rtag pa nyid kyi nyes pa yongs su spangs pa zhes bya ba'o/ /'gyur ba med pa'i mtshan nyid ces bya ba ni 'khor ba dang mya ngan las 'das pa'i dus na blo la gnyis shin tu med pa'i phyir te/ de med pa ni 'gyur ba med pa'i mtshan nyid yin no//gal te 'khor ba'i dus na gnyis dang ldan na/ mya ngan las 'das pa'i dus na mi ldan na ni de'i tshe 'gyur ba yin na de yang med de/ 'di ltar stong pa nyid ces brjod pa'i don de ni 'khor ba'i dus na yang gzung ba dang 'dzin pa gang dang yang ldan pa ma yin/ mya ngan las 'das pa na yang mi ldan pa ma yin no//de ni rtag tu gnyis dang bral ba'i rang bzhin yin pa'i phyir te/ de ni rang gi mtshan nyid kyis gnas pa zhes bya bas bshad do/ gnyis dang bral ba tsam du rtag par gnas pa nyid do zhes bya ba'i tha tshig go/ /'di ni de'i rang gi mtshan nyid yin gyi/de'i rang gi mtshan nyid dngos po ltar don bya ba byed pa'i ngo bo ni ma yin no/ /sngar ni 'byung ba dang 'jig pa ldan pa med pas ldan pa med pa nyid du bstan to/ /da ni gnyis dang ldan pa med pa'i phyir ro/ /'di thams cad kyis ni stong pa nyid mi 'gyur bar yongs su grub pa bstan to//don ni gdod ma nas yongs su grub pa med pa'i phyir zhes bya ba ni yongs su rtog pas grub pa ste/ phyin ci log tu sgro btags zhes bya ba'i tha tshig go/ /de med pa'i phyir yongs su grub pa med pa'o/ /gdod ma nas yongs su ma grub pa ni gdod ma nas yongs su grub pa med pa ste/rtag tu phyin ci ma log par yongs su grub ces bya ba'i tha tshig go/ /chos kyi dbyings ni rang bzhin gyis yongs su dag pa'i phyir nam mkha' lta bu ste/ de'i phyir gang dang yang ldan pa'am mi ldan pa ma yin zhes bya ba gsungs te/ sngar nyon mongs pa'i rnam par rtog pa dang ldan pa'am phyis mi ldan pa ma yin pa'o//'dis ni nyon mongs pa dang mi ldan pa'i phyir ldan pa ma yin par bstan te/ 'dis ni rang bzhin gyis kun nas nyon mongs pa can ma yin pa'i phyir stong pa nyid ni phyin ci ma log par yongs su grub par yang bstan to/ /de'i bshad pa ni rtag tu chos kyi dbyings kyi rang bzhin du gnas pa zhes bya ba'o//chos kyi dbyings kyi ngo bo nyid ni rang bzhin gyis sngon nas kun nas nyon mongs pa can ma yin pa nyid do/ /skur pa ni dor ba'o/ /sgro btags pa ni gzhag pa'o/ /de dag med pa dang gzhag pa med pa'i mtshan nyid de skur pa dang / sgro btags pa'i mtha' spangs pa zhes bya ba'i tha tshig go//gang gi phyir kun brtags pa dngos po med pa nyid stong pa nyid yin gyi/ gzhan gyi dbang ni ma yin pa de'i phyir gzhan gyi dbang la skur pa mi 'debs pas skur pa'i mtha' ni ma yin no/ /kun brtags pa med pa'i phyir sgro btags pa'i mtha' ma yin no/ /de'i bshad pa ni dor ba med cing gzhag pa med pa'i don ni snga ma bzhin no zhes bya ba ste/dor ba med pa dang / gzhag pa med pa dang / tha dad pa ma yin pa dang / tha dad pa med pa la 'jug pa ni byang chub la 'jug pa'o zhes gang gsungs pa der dor ba dang gzhag pa med pa'i sgra'i don gang yin pa de 'dir yang sbyar ro//'di thams cad kyis ni ji skad bstan pa'i mtshan nyid stong pa nyid ces bya ba'i don rang bzhin thams cad dang bral bar bstan to/ /de bas na byang chub sems dpas stong pa nyid kyi don de de ltar bsgom mo/ /des na byang chub sems dpas don gyis rab tu phye ba zhes bya ste/ 'di ni don gyis bstan pa yin no//ye shes ni ldan pa'o zhes gang gsungs pa ste bstan pa'i phyir/ ye shes zhes bya ba ni lam ste zhes bya ba la sogs pa gsungs so/ /'dis ni yang dag pa'i mtha' khong du chud par bya ba'i thabs rgya cher bstan to/ /de'i bshad pa ni de khong du chud par bya ba'i thabs zhes bya ba la sogs pa'o//de ma thag tu gsungs pa'i tshig gsum zhes bya ba ni de dag gis don ston pas tshig ces bya ste/ ye shes zhes bya ba ni lam ste zhes bya ba la sogs pa ni tshig gcig go/ /ye shes ni spong ba dang yang dag par ldan pa yin gyi zhes bya ba la sogs pa ni gnyis pa'o/ /ye shes zhes pa ni phung po la mkhas pa zhes bya ba la sogs pa ni gsum pa'o//bcu pa phrag drug ces bya ba ni rigs kyi bu gzhan yang byang chub sems dpa' sems dpa' chen po rnams kyi ye shes rnam pa bcu ste zhes bya ba la sogs pa bcu pa phrag drug go/ /ci'i phyir 'di snyed cig gis ye shes bstan snyam pa la gang gis zhes bya ba la sogs pa smos te//gang gis zhes bya ba ni ye shes kyis te zhes bya ba la sogs pa bzhi po de khong du chud par bya ba'i thabs su gyur pa de dag ni de snyed kyis bsdus so/ /ye shes de ni gcig pu yin na de ji snyed cig gis bsdus snyam pa la/ de la ye shes 'khor dang bcas pa zhes bya ba la sogs pa smos so//ye shes ni zag pa med pa'o/ /'khor ni rtsom pa dang sbyor ba 'og nas 'byung ba'o/ /rnam pa sum cu rtsa gsum zhes bya ba ni de la de ma thag tu gsungs pa'i tshig gsum dang / bcu pa dang pos ni ye shes bstan to/ /de'i 'khor du gyur pa rtsom pa dang sbyor ba ni go rims bzhin du bcu pa gnyis pa dang gsum pa ste/rnam pa sum cu rtsa gsum gyis ye shes 'khor dang bcas pa bstan pa yin no/ /bcu pa bzhi pas ni ji ltar khong du chud par byed pa'o/ /lnga pas ni gang gi don khong du chud par byed pa'o/ /drug pas ni gang du gnas te khong du chud par byed pa'o//de yang go rims bzhin du yongs su bstan te de ni 'og nas sbyor ro/ /ye shes zhes bya ba ni lam zhes bya bas rab tu dga' bas bsdus pa mthong ba'i lam ste/ de ni sems dang yang dag par ldan pa zhes bya ba la/ sems ni kun gzhi rnam par shes pa'o/ / mos pas spyod pa na mngon par 'du byed pas yongs su bsgos pa de dang ldan pa ste bskyed pa'o/ /de ni sems rnam par dag pas lam rnam par dag pa zhes bya bas bshad do/ /sems ni kun gzhi rnam par shes pa ste/ de la mos pas spyod pa'i sa na bsod nams dang ye shes mngon par 'du byed pa'i bag chags bsgos pa nyid mthong ba'i lam ni rnam par dag pa'i rgyu yin pa'i phyir gdags pas rgyur gyur pa rnam par dag pas lam rnam par dag pa ste/mthong ba'i lam gyi rang bzhin rnam par dag pa 'byung zhes pa'i tha tshig go/ /mdo sde'i tshig 'di nyid kyi don gnyis bsdu na sems dang yang dag par ldan pa ni gang gis bskyed pa ste/de la de skad ces bya ste/ 'di ltar mthong ba'i lam skyes pas kun gzhi la spang bar bya ba'i sa bon gnas pa de spangs nas kun gzhi rnam par shes pa khyad par du 'phags pa 'byung ste/ de ni lam rnam par dag pas sems rnam par dag pa zhes bya bas bshad do//mos pas spyod pa'i sas bsdus pa'i mngon par 'du byed pa ni rnam pa dang bcas pas 'khrul pa yin no/ /de ji ltar ma 'khrul pa mthong ba'i lam gyi rgyu yin snyam pa la/ de'i phyir yang dag pa'i mtha' ni lam dang ye shes kyi dmigs pa nyid gcig pu ste gnas yin zhing gcig la gcig brten pa zhes bya ba smos te/lam zhes bya ba ni mos pas spyod pa'i sas bsdus pa'i lam la bya'o/ /ye shes zhes bya ba ni mthong ba'i lam mo/ /yang dag pa'i mtha' ni de bzhin nyid de/ lam dang ye shes gnyis ka'i dmigs pa yang de gcig pu'o/ / gcig ni mos pa'i stobs kyis so/ /cig shos ni mngon sum du byed pa ste khyad par ni de'o/ /gang gi phyir de ltar gyur pa de'i phyir gnas te/ ye shes kyi rgyu ni mos pas spyod pa'i sas bsdus pa'i lam mo zhes khong nas byung ngo / /de ni 'di skad du lam zag pa dang bcas/ rnam pa dang bcas te 'khrul pa yin du zin kyang stong pa nyid la mos pas tshad ma grogs su gyur pa'i phyir 'khrul pa med pa'i ye shes kyi rgyur gyur te/ 'di ltar stong pa nyid ces bya ba'i don gang la mos pa de ni lam ste/ de ni gzhan gyi dbang gi bdag nyid yin pas don dam par yod do zhes bstan par 'gyur ro//gang gi phyir de ltar ye shes gnas dang / lhan cig phan tshun rgyu dang / 'bras bu'i dngos por gyur pa des ni ye shes ni ldan pa zhes bya ba ste/ mi ldan pa ma yin te/ rgyu dang 'bras bu'i dngos po dang bral ba ma yin no/ /ye shes ni spong ba dang yang dag par ldan pa zhes bya ba la sogs pa mdo'i tshig la/ye shes ni 'dir zag pa med pa'i bsgom pa'i lam gyis bsdus pa la dgongs so/ /'dor bas na spong ba ste kun gzhi zhes bya bas na nyes pa dang bral ba'i mtshan nyid du gyur pa'o/ /'dir yang 'bru mang po dang / de'i skyes bu'i tshul gyis don gnyis te/spong ba dang yang dag par ldan pa ni ye shes gang gis bskyed pa de la de skad ces bya'o/ /de ni yang dag pa'i mtha'i ye shes la gnas te gnas 'gyur ba zhes bya bas bshad do/ /sa bcus bsdus pa yang dag pa'i mtha'i ye shes de nyid ni gzhi ste/ des kun gzhi zhes bya ba gnas gyur nas nyes pa dang bral ba'i phyir ro//nam de'i skyes bu'i tshul du gyur pa de'i tshe ni spong ba dang yang dag par ldan pa ste/ gnas gyur pas bskyed pa'o/ /don ni de'o/ /de ni gnas gyur pas ye shes shin tu rnam par dag par 'gyur ba zhes bya bas bshad do/ /sa bcu par rdo rje lta bu'i ting nge 'dzin gyi dus na kun gzhi rnam par shes pa rnam par dag pa gang yin pa des sangs rgyas kyi sas bsdus pa'i ye shes shin tu rnam par dag pa 'byung ngo //de nyid kyi mjug sdud ni phan tshun bya bas byas par gnas pa zhes bya'o/ /'dir yang dag par ldan pa dang / mi ldan pa'i sgra'i don ni snga ma bzhin no/ /ye shes zhes bya ba ni phung po la mkhas pa zhes bya ba la sogs pa 'dis ni ye shes kyi rang gi ngo bo bstan te/de'i bshad pa ni shes bya'i dngos po yang dag pa ji lta ba bzhin du yongs su shes pa zhes bya ba'o/ /'dir ni shes bya yang dag par khong du chud par bya ba'i phyir rab tu brtson pa ni yang dag par ldan pa zhes bya ba'i don te/bzlog pa ni mi ldan pa'i don to/ /gzhan yang zhes bya ba la sogs pas ni ye shes rab tu dbye ba brjod do/ /rgyu shes pa ni sems can rnams kyi thar pa'i sa bon shes pa'o/ /de ni thog ma med pa'i 'khor ba dang ldan pa'i sems can rnams kyi thar pa'i sa bon dang mthun pa yongs su shes pa zhes bya bas bshad do//las sna tshogs kyi rnam par smin pa de dang mthun par yongs su shes pa 'di ni 'bras bu shes pa zhes bya ba'i tshig 'di'i bshad pa'o/ /don shes pa zhes bya ba la/ don ni phan pa ste de ni shes pa'o/ /de ni bdag la phan pa dang /gzhan la phan pa dang mthun pa yongs su shes pa zhes bya bas bshad do/ /thabs shes pa ni gang gis dge ba chung ngu yang shin tu rgyas par byed pa ste/ 'khor ba ji srid par mi zad par byed pa'o/ /shes rab shes pa ni gang gis dge ba chung ngu yang de ltar stobs dang ldan par byed pa ste/ gang gis 'khor ba'i skyon shin tu chen pos kyang zil gyis mi non par byed pa'o/ /de bas na tshig de gnyis kyis bshad pa ni dge ba'i rtsa ba chung ngu yang tshad med par byed pa zhes bya ba ste/ shin tu rgyas pa dang mi mthun pa'i phyogs rnams kyi zil gyis mi non pa'o/ /de la thabs kyi stobs kyis ni shin tu rgyas pa'o//shes rab kyi stobs kyis ni zil gyis mi non pa'o/ /'di ni chos 'di la skal ba yod pas bsdu bar 'os so/ /'di ni skal ba med pas ma yin pa'o zhes shes pa gang yin pa de ni bsdu ba shes pa'o/ /de ni dge ba dang mi dge ba la rnam par dpyod pa zhes bya bas bshad do/ /pha rol tu phyin pa shes pa ni sbyin pa la sogs pa'i rnam par dbye ba yongs su shes pa ste/de ni rnam pa sna tshogs kyi 'byung ba yang dag pa ji lta ba bzhin du yongs su shes pa zhes bya bas bshad do/ /'byung ba zhes bya ba ni de las sangs rgyas nyid 'byung ba ste/ tshogs zhes bya ba'i tha tshig go/ /sbyin pa la sogs pa yongs su shes pas bsod nams dang ye shes kyi tshogs zang zing dang /mi 'jigs pa dang chos sbyin pa la sogs pa tha dad pas rnam pa sna tshogs shes pa'o/ /snying rje chen po shes pa ni gang gis sems can bsod nams la 'jug pa dang / bsod nams ma yin pa las 'byin pa ste/de ni dge ba dang mi dge ba'i chos la 'dzud pa dang 'byin pa zhes bya bas bshad do/ /gang gi tshe sems can yongs su smin par byed pa ste/ de [(]shas [,]shes [)]pa ni sems can yongs su smin par bya ba shes pa'o/ /de ni dus dang dus ma yin pa la yongs su rtog pa zhes bya bas bshad do/ /chos thams cad la mngon par zhen pa med par shes pa zhes bya ba ni yang dag pa ma yin pa kun brtags pa'i chos rnams la sgro 'dogs pa dang skur pa 'debs par mngon par zhen pa med par shes pa ste/de ni mtha' gnyis spangs nas nang la brten pa zhes bya bas bshad do/ /nang zhes bya ba'i sgras ni rnam par rig pa tsam du ston to//mtha' gnyis yongs su spangs nas rnam par rig pa tsam du bsgom zhes bya ba'i tha tshig go/ /rtsom pa zhes bya ba'i sgra ni go cha'i brtson 'grus nyid la bya'o/ /sbyor ba'i brtson 'grus ni 'og nas sbyor ba zhes 'byung ngo / /bdag dang gzhan rnams kyi lus kyi las yongs su sbyong ba'i phyir rtsom pa ni lus kyi rtsom pa ste/sems can thams cad ces bya ba gsungs so/ /thams cad ces pa'i tshig gis ni bdag kyang bsdus so/ /ngag gi rtsom pa dang / sems kyi rtsom pa yang de bzhin du blta bar bya'o/ /gsum po 'di dag gis bshad pa ni lus dang / ngag dang yid kyi nyes par spyod pa dang bral ba'i phyir brtson 'grus brtsam pa zhes bya'o//gzhan dag kyang zhes bya ba la/ logs shig tu smos pas lus la sogs pa'i nyes par spyod pa dang bral ba'i phyir zhes bya ba ni don gyis bdag la bya bar mngon no/ /brtson 'grus brtsams pa zhes bya ba ni go cha bgos pa'o/ /bslab pa de nyid la zhes bya ba ni lus la sogs pa'i nyes par spyod pa dang bral ba'i mtshan nyid la'o//nang du so sor brtags pa'i phyir rtsom pa ni nang gi rtsom pa ste/ dngos po rnams stong pa nyid du ro gcig par nang las so sor rtog par brtson 'grus rtsom pa'o/ /bsgom pa la brten nas sems can rnams la rjes su chags pa dang khong khro ba spangs pa ni mngon par zhen pa med pa yin te/sems can thams cad ces bya ba la sogs pa gsungs pa'o/ /de'i bshad pa ni bsgom pa la brten nas rjes su chags pa dang khong khro ba bor ba zhes bya ba'o/ /sems can rnams la mthun par chos bstan pa'i phyir rtsom pa ni phyi'i rtsom pa ste/sems can thams cad ces bya ba la sogs pa gang gsungs pa'o/ /'dul ba dang 'tshams par chos ston pa ni mtshungs par sbyor ba'o/ /de'i bshad pa ni 'khor ba ma rungs pa ma yin pa gdams pa zhes bya ba'o/ / phyin ci ma log pa'i thos pa yongs su 'tshal ba'i phyir rtsom pa ni ye shes kyi rtsom pa ste/ phyin ci ma log par theg pa chen po thos pa dang sems pa la sogs pa'i rim gyis sangs rgyas kyi ye shes rnam par dag ste/ sangs rgyas kyi ye shes zhes bya ba la sogs pa gsungs pa'o/ /de'i bshad pa ni ma nor bar thos pa yongs su btsal ba zhes bya ba'o//sangs rgyas kyi zhing yongs su sbyang ba'i phyir rtsom pa ni zhing gi rtsom pa ste/ sangs rgyas kyi zhing rnams kyi yon tan bkod pa sna tshogs su gnas pa de dag kun tu bstan pa'i phyir de'i rnam pa'i rnam par rig par 'gyur ro zhes ston par 'gyur/bskyed par 'gyur ro/ /de ni 'di skad du pha rol na sangs rgyas kyi zhing zhes bya ba ci yang med kyi/ rnam par shes pa yid bzhin gyi nor bu ltar nye bar byas pa thams cad la dbang sgyur bar gyur pa 'ba' zhig rgyud rnam par dag pa dang ma dag pa la ltos nas sna tshogs su snang ba'i rnam par rig pa'i rgyur 'gyur ro zhes ston par 'gyur ro//de bas na de ni chos thams cad la dbang sgyur ba zhes bya bas bshad do/ /sems can rnams kyi bsam pa dang bag la nyal shes par bya ba'i phyir rtsom pa ni sems can yongs su smin par bya ba'i rtsom pa zhes gsungs te/ bsam pa dang bag la nyal shes nas nyon mongs pa'i nad kyi gnyen po 'tsham par chos ston pa ni sman shes shing chos ston pa ste/nyon mongs pa'i nad kyi sman yongs su shes par bya ba'i phyir zhes gsungs pa'o/ /don gyis na bstan par bsdus par blta ste/ yongs su shes pa ni de'i phyed kyi phyir ro/ /de bas na bshad pa las bsam pa dang bag la nyal shes nas ji ltar mthun par chos ston pa zhes bya ba smos so//bsam pa ni sems pa'o/ /bag la nyal ba ni sa bon no/ /de kho na khong du chud par bya ba'i rtsom pa ni de kho na'i rtsom pa ste/ de ni de kho na khong du chud par bya bas bshad do/ /de kho na khong du chud na sangs rgyas nyid du nges pa'i phung po la zhugs pa yin pa'i phung po yongs su rdzogs par bya ba'i phyir zhes bya ba gsungs so//mngon par zhen pa rnams kyis gzhan du mi 'gyur ba gang yin pa de ni 'dus ma byas kyi ye shes te/ de yongs su rdzogs par bya ba'i rtsom pa ni 'dus ma byas kyi ye shes yongs su rdzogs par bya ba'i rtsom pa ste/de'i bshad pa ni sems la yang dag pa dang yang dag pa ma yin par 'dzin pa rnam par spong ba zhes bya ba'o/ /de kho na ma mthong ba rnams ni ji ltar snang ba de kho na bzhin du sems de kho na'o zhes yang dag par 'dzin te/ gnyis las dben pa'i ngo bor ni med do zhes yang dag pa ma yin par 'dzin to//de ltar yang dag pa dang yang dag pa ma yin par 'dzin pa yongs su spangs te/ dbu ma'i lam la gnas na srid pa thams cad la sems mngon par zhen pa dang bral ba yin pa'i phyir/ khams gsum pa thams cad ces bya ba la sogs pa gsungs so/ /pha rol tu phyin pa rnams la'am pha rol tu phyin pa'i sbyor ba ni pha rol tu phyin pa'i sbyor ba'o//de bzhin du 'og ma rnams la'ang sbyar ro/ /de'i bshad pa ni byang chub kyi tshogs yongs su rdzogs pa zhes bya ba'o/ /bsdu ba'i dngos po'i sbyor ba ni sems can yongs su smin par bya ba'i yan lag ste/ de bas na sems can yongs su smin par byed pa zhes bya bas bshad do//shes rab kyi sbyor ba zhes bya ba de'i bshad pa ni chos rnams kyis 'byung ba dang 'jig pa la yongs su rtog pa zhes bya ba'o/ /thabs kyi sbyor ba ni chos thams cad la mkhas par 'gyur bas de chos thams cad la mkhas pa zhes bya bas bshad do/ /snying rje chen po'i sbyor ba zhes bya ba de'i bshad pa ni mya ngan las 'das pa la 'dod pa med pa zhes bya ba'o//snying rje chen pos sems can gyi don la brtson pas nyan thos ltar mya ngan las 'das pa 'dod pa ma yin no/ /bsod nams nyid tshogs te/ sangs rgyas kyi chos rnams kyi rgyu yin pa'i phyir ro/ /bsod nams yongs su tshol ba'i sbyor ba ni bsod nams bsags pa la brten pas mthu che ba'i phyir 'khor los sgyur ba dang gzhan dag gis zil gyis mi non te/thams cad du 'jigs pa med pas 'jigs pa med pa yin te/ de ni mi 'jigs pa bzhi thob pa zhes bya bas bshad do/ / 'jigs pa med pas mi 'jigs pa'o/ /yul tha dad pas rnam pa bzhi ste/ chos thams cad la mngon par rdzogs par byang chub pa dang / zag pa zad pa dang / bar du gcod pa bstan pa dang / lam bshad pa'o/ /de yang mdo sde las ji ltar 'byung ba bzhin du rnam pa bzhir khong du chud par bya'o/ / mngon par 'du byed pa dang bcas pas 'jug pa'i shes rab sgrub pa'i phyir rtsom pa ni shes rab kyi sbyor bar gsungs so/ /mngon par 'du byed pa med par 'jug pa ni ye shes kyi tshogs yongs su tshol ba'i sbyor ba ste 'di ni bye brag go/ /de bas na chos thams cad la lhun gyis grub pa'i ye shes thob pa zhes bya bas bshad do//bden pa dang dkon mchog la sogs pa la som nyi med par bya ba'i phyir sbyor ba ni bsam pa rnam par sbyor ba'i sbyor ba ste/ de ni chos thams cad la the tshom med pa zhes bya bas bshad do/ /bden pa ni chos thams cad la bdag med pa ste/ de khong du chud par bya ba'i phyir sbyor ba ni bden pa rnam par dpyad pa'i sbyor ba ste/de ltar sbyor na stong pa nyid khong du chud pas sdug pa dang mi sdug pa rnams la rim bzhin du rjes su chags pa dang / khong khro ba dang bral bas mngon par zhen pa med par 'gyur te/ sbyor ba'i don bcu pa gzung bar 'gyur bas sdug pa dang mi sdug pa thams cad la mngon par zhen pa med pa zhes bya ba gsungs te/de bas na tshig gnyis bsdus na don dam pa'i tshul la 'jug pas mngon par zhen pa med pa zhes bya bas bshad do/ /don dam pa ni stong pa nyid do/ de nyid sangs rgyas kyi chos 'dren par byed thob par byed pas tshul lo/ /de la 'jug pa ni khong du chud pa ste/'dis bden pa rnam par dpyad pa'i sbyor ba zhes bya ba'i tshig de bshad do/ /mngon par zhen pa med pa'i don ni snga ma bzhin no zhes bya ba ni gong du bsgom pa la brten nas rjes su chags pa dang khong khro ba bor zhes bshad pa gang yin pa de dang 'di'i don mtshungs so zhes bya ba'i tha tshig go/ /'dis ni sdug pa dang mi sdug pa thams cad la mngon par zhen pa med pa'i sbyor ba zhes bya ba'i tshig bshad do//de ltar re zhig rnam pa sum cu rtsa gsum gyis ye shes 'khor dang bcas pa bshad do/ /ye shes de lta bu la goms pa'i byang chub sems dpa' ni ye shes kyis rab tu phye ba yin te/ de ni don gyis bshad pa yin no//da ni ji ltar khong du chud par byed pa'i don de bstan pa'i phyir/ rigs kyi bu gzhan yang byang chub sems dpa' sems dpa' chen po rnams kyi mi zad pa la rtog pa bcu ste zhes bya ba la sogs pa gsungs so/ /sems can gyi lus ma lus pa la ji lta ba bzhin du rtog pa ni lus mi zad pa la rtog pa ste/de ni 'phags pa dang 'phags pa ma yin pa'i 'dus byas dang 'dus ma byas kyi lus la rtog pa zhes bya bas bshad do/ /bden pa mthong ba dang ma mthong ba rnams dang 'phags pa ma yin pa'i lus go rims bzhin no/ /las kyi rnam par smin pa las byung ba'i lus ni 'dus byas te/las rnams kyis mngon par 'dus byas pa'i phyir ro/ /sangs rgyas dang byang chub sems dpa' rnams kyis gnas gyur pa'i mtshan nyid ni 'dus ma byas pa'o/ /'dis ni lus dran pa nye bar gzhag pa bstan to/ /mi zad pa zhes bya ba'i sgra ni thams cad du yang ma lus par bya ba la lta'o//sems ni dngos po ste/ de tsam du zad pa'i phyir dngos po'o/ /de la rtog pa ni dngos po mi zad pa la rtog pa ste/ de'i bshad pa ni yang dag pa dang yang dag pa ma yin pa'i don la rtog pa zhes bya'o/ /gnyis la mngon par zhen pa las dben pa ni yang dag pa'o/ /sems phyin ci log pa ni yang dag pa ma yin pa'o//'dis ni sems dran pa nye bar gzhag pa bstan to/ /chos dran pa nye bar gzhag pa ni chos mi zad pa la rtog pa ste/ de'i bshad pa ni kun nas nyon mongs pa dang rnam par byang ba chung ngu dang / 'bring dang / chen po la rtog pa zhes bya ba'o/ /tshor ba'i sgo nas sred pa 'byung ba'i phyir tshor ba dran pa nye bar gzhag pa ni sred pa mi zad pa la rtog pa'i sgrar bshad de/de'i bshad pa ni dge ba dang mi dge ba'i sred pa la rtog pa zhes bya ba'o/ /'khor ba'i bde ba la 'dod pa ni mi dge ba'i sred pa'o/ /mya ngan las 'das pa'i bde ba 'dod pa ni dge ba'o/ /lta ba mi zad pa la rtog pa la sogs pa lhag ma rnams ni chos dran pa nye bar gzhag pa rnams kyi rab tu dbye bar blta'o//yang dag pa ma yin pa'i rnam par sgro btags pa'i lta ba ni phyin ci log go/ /bzlog pa ni phyin ci ma log pa'o/ /de ni lta ba mi zad pa la rtog pa zhes bya ba 'di'i bshad pa'o//tshogs mi zad pa la rtog pa zhes bya ba 'di'i bshad pa ni sgo sna tshogs nas bsags pa'i dge ba'i rtsa ba la rtog pa zhes bya ba'o/ /sems can rnams kyi khams kyi nye bar len par gyur pa ni nyon mongs pa dang las te/ de ni sems can rnams kyi khams mtha' yas pa'i phyir mtha' yas pa'o//'di'i bshad pa ni sems can gyi khams mtha' yas pa la rtog pa zhes bya ba'o/ /mngon par zhen pa med pa'i don ni snga ma bzhin no zhes bya ba ni sdug pa dang mi sdug pa thams cad la mngon par zhen pa med pa'i sbyor ba zhes gsungs pa ste/ de'i bshad pa ni don dang don ma yin pa dang ldan pa la rtog pa zhes bya ba'o//byang chub kyi snying po ni byang chub kyi shing ste/ de kun tu ston pa ni shes pa'o/ /sangs rgyas rnams kyi de mi zad pa ni mos pa tha dad pa'i dbang gis sna tshogs su ston pa'i phyir de ltar rtog pa ni byang chub kyi snying po shes pa mi zad pa la rtog pa ste/de ni mos pa tha dad pa'i sems can la byang chub kyi snying po kun tu ston pa la rtog pa zhes bya bas bshad do/ /pha rol tu phyin pa bcu po dag gi rnam par dag pa rnams ni rang gi mi mthun pa'i phyogs ci nas 'dul ba'i phyir dngos po bcu ste/ de dag ni ser sna'i sems 'dul ba zhes bya ba la sogs pas bstan te/de'i bshad pa ni gang gi don du khong du chud par byed pa de yang zhes bya ba la sogs pa'o/ /sbyin pa la sogs pa rnam par dag par bya ba'i phyir khong du chud par byed do/ /byams pa bsgoms pas khong khro ba'i sems 'dul ba zhes bya ba 'dis ni bzod pa'i pha rol tu phyin pa rnam par dag pa bstan to//'khor ba mi gtong yang thabs gang gis lam gyi tshogs pa de lam gyi tshogs de bskyed pa'i thabs de 'khor ba na gnas kyang nyon mongs pa rnams 'dul lo/ /'dis ni thabs kyi pha rol tu phyin pa rnam par dag pa bstan to/ /bden pa rnams ni sdug bsngal la sogs pa ste/de dang de dag shes pa gang gis yang dag par sogs pa yongs su gcod pa de bden pa'i tshogs te/ de sogs pa de nyid gnyen po ste 'dul ba'o/ /de'i dngos po ni de nyid do/ /de yang ji lta bus 'gyur zhe na/ phyin ci ma log pa'i lam bskyed pas zhes bya ba gsungs so//smon lam gyi khyad par gang gis phyin ci ma log pa'i lam 'byung ba dang mthun pa'i skye ba yongs su 'dzin pa'i phyir de la de skad ces bya'o/ /'dis ni smon lam gyi pha rol tu phyin pa rnam par dag par bstan to/ /lhag ma dag ni go sla bas ma sbyar ro/ /rigs kyi bu gzhan yang bcu po 'di dag ni byang chub sems dpa' sems dpa' chen po rnams kyi dul ba'i sa ste zhes bya ba la sogs pa 'di'i bshad pa ni gang du gnas te khong du chud par byed ces bya ba la sogs pa'o//sdom pa rnam pa gsum ni lus dang / ngag dang / yid kyi sdom pa'i phyir te/ de rnam par dag pas so/ / de ni lus dul ba nyid la sogs pa'i tshig gsum gyis bshad do/ /nang dul ba nyid ces bya ba la sogs pa'i mdo'i tshig gi bshad pa ni bdag tu 'dzin pa rnam par spangs pa zhes bya ba'o/ /smad pa dang bsngags pa la sogs pa 'jig rten gyi chos brgyad po dag la mngon par zhen pa med pa ni phyi rol gyi yul dul ba nyid dang de bas na chos thams cad la mngon par zhen pa med pa'i tshul gyis zhes bya ba gsungs so//de'i bshad pa ni smad pa dang ma smad pa yongs su spangs pa zhes bya ba'o/ /smad pa dang ma smad pa smos pa ni mtshon pa'o/ /ye shes kyi tshogs la mngon par zhen pa med pa gang yin pa de nyid dul ba nyid do//ji lta bur 'gyur zhe na/ lam la mngon par zhen pa med pa'i tshul gyis zhes bya ba gsungs te/ de'i bshad pa ni dngos po yod pa dang dngos po med par mngon par zhen pa med pa zhes bya'o/ /kun brtags pa'i ngo bos med pa'i phyir dngos po yod par mngon par zhen pa med do//yongs su grub pa'i ngo bos yod pa'i phyir mngon par zhen pa med do/ /'phags pa ni nyan thos la sogs pa ste/ de dag gis rnams ni zag pa med pa'i ye shes kyi gnas skabs so/ /de dag la rtog pa ni stong pa nyid kyi ngo bo nyid la rtog pa ste/ de ni mi dmigs pa'i tshul gyis nyan thos dang rang sangs rgyas dang byang chub sems dpa'i sa la so sor rtog pa zhes bya bas bshad do//de ltar so sor rtog na bdag la stod par mi byed de/ de bas na de bdag la bstod pa dul ba nyid du 'gyur ro/ /phyi ma'i mtha' ni ma 'ongs pa'i skye ba'i rgyun to//de'i rnam par dag pa ni mya ngan las 'das pa ste/ gnas gyur pa'i mtshan nyid do/ /de yongs su sbyong ba ni rnam par rtog pa thams cad spong ba ste/ rnam par rtog pa ni byang chub sems dpa' rnams kyi nyon mongs pa yin pa'i phyir ro/ /rnam par rtog pa thams cad dang bral bar gnas pa ni shes rab kyi pha rol tu phyin pa la gnas te der 'byung zhing de'i bdag nyid du gnas pa'o//de'i bshad pa ni 'dzin pa thams cad dang bral ba zhes bya ba'o/ /kun rdzob dang don dam pa'i bden pa la brten te bshad pa ni tha snyad do/ /de la shin tu yongs su dul ba nyid de ji lta bur 'gyur zhe na/sems can thams cad la mi bslu ba'i tshul gyis zhes bya ba gsungs pa ste/ skal ba ji lta ba bzhin du kun rdzob dang don dam pa'i bden pa ston pa ni mi bslu ba ste/ de ni kun rdzob dang don dam pa la mkhas pas phyin ci ma log pa'i lam ston pa zhes bya bas bshad do/ / lus dang sems la mi lta ba dul ba nyid ces bya ba'i mdo'i tshig gi bshad pa ni sems can 'dul ba'i phyir skye ba thams cad la mi skyo bas so zhes bya ba'o/ /tshig gi dngos po kho na ni tshig tsam nyid de/ mdo'i cha 'di'i bshad pa ni rjes su mthun pa'i chos grub pa ni mi bslu bas yongs su bstan to zhes bya ba'o//lam sgrub pa ni nyan thos dang rang sangs rgyas kyi lam mngon sum du byed pa ste/ de ni nyan thos dang rang sangs rgyas kyi theg pa mngon sum du byed pa zhes bya bas bshad do/ /spong ba sgrub pa ni nyan thos la sogs pa'i lam mngon sum du byas pa la yang 'dod pa med pa'o/ /de ni de dag la 'dod pa med pa zhes bya bas bshad do//yang bdag nyid lam bzang por zhugs pa dang gzhan dag la yang lam de ston pa zhes bya ba ni bdag 'dul ba'i sgrub pa dang / sems can yongs su smin par bya ba'i sgrub pa zhes bya ba'i bshad pa ste go rims bzhin no/ /rtsol ba dang bcas pa'i shes pas sgrub pa zhes bya ba 'di'i bshad pa ni mos pas spyod pa'i sa la rnam par gnas par mngon par 'du byed pa dang bcas pa'i shes pa zhes bya ba ste/mos pas spyod pa'i sa ni so so'i skye bo'i sa'o/ /spyod pa'i sa ni sa bdun po dag go/ /lhun gyis grub pa'i ye shes kyis grub pa zhes bya ba 'di'i bshad pa ni bsgom pa'i lam la gnas pa mngon par 'du byed pa med pa'i ye shes kyis so zhes bya ba ste/sa brgyad pa la sogs pas bsdus pa ni 'dir bsgom pa'i lam du blta'o/ /sa rnam par gzhag pa la mkhas par sgrub pa zhes bya ba 'di'i bshad pa ni/ shes rab dang thabs la mkhas pa zhes bya ba'o//sa dbyer med pa ni stong pa nyid kyi mtshan nyid du ste/ de'i bshad pa ni mtshan nyid gcig gi rjes su 'jug pa zhes bya ba'o/ /sa'i nyes pa ni gzung ba dang 'dzin pa la mngon par zhen pa ste yongs su spong ba'o/ /de ni gnyis la kun tu spyod pa yongs su spong ba zhes bya bas bshad do//sa nas sar 'phar ba ni sa snga ma las sa phyi mar 'gro ba ste/ de la mkhas pa sgrub pa'o/ /de yang bsgom pa'i lam gyis 'gyur te de ni dge ba'i chos bsgom pa'i brtson 'grus brtsams pas zhes bya bas bshad do/ /nyan thos dang rang sangs rgyas kyi sa bstan pa'i sgrub pa zhes bya ba 'di'i bshad pa ni yang chos thams cad legs par bsgrubs pa zhes bya ba'o//de bzhin nyid dri ma med pa ni sangs rgyas te/ de'i byang chub khong du chud pa de las phyir mi ldog pa'i lam gang yin pa de la mngon par sgrub pa'o/ /de'i bshad pa ni de bzhin nyid khong du chud pa'i bsgom pa la mkhas pas so zhes bya ba'o//de ltar rnam par dag pa khyad par du 'phags pa bzhis rgyus bsdus pa'i spyod pa rnam par dbye ba khyad par du 'phags pa bstan te/ tshogs dang rnam par dag pa'i lam bstan pa dang / bsod nams dang ye shes kyi tshogs bstan pa dang /yang dag pa'i mtha' de khong du chud par bya ba'i thabs bstan pa dang / rjes su mthun pa'i chos sgrub pa bstan pa zhes bya bas rgya cher bstan pa'o/ /rgyu rnam par dag pa bzhi po 'di dag nyid mngon sum du mdzad nas bcom ldan 'das kyis de ltar sgrub pa rnams la zhes bya bas gsungs te/ji skad du gsungs pa'i rgyu rnam par dag pa rnam par sgrub pa'o/ /de'i bshad pa ni rgyu rnam par dag pa khyad par du 'phags pa rnam pa 'di bzhis zhes bya ba'o/ /bla na med pa yang dag par rdzogs pa'i byang chub ni thams cad mkhyen pa'i ye shes te 'bras bus bsdus pa'i spyod pa rnam par dbye ba bstan to//de'i bshad pa ni 'bras bu rnam par dag pa khyad par du 'phags par khong du chud par bya ste/ de ni de bzhin gshegs pa rnams kyi ye shes dus gsum skad cig gcig dang ldan pa zhes bya ba'o/ /'phags pa 'jam dpal gtso bos phyin ci ma log par bstan par mdzad pas na bcom ldan 'das kyis legs so zhes bya ba byin te/de ni ma nor bar bshad de ston pa'i thugs mnyes pas legs par bshad do zhes bya ba'i don du rig par bya'o zhes bya bas bshad do/ /yi rangs zhes bya ba ni 'jam dpal gzhon nur gyur pa zhes bya ba la sogs pa'i tshig dang sbyar gyi gong ma dang ni ma yin no//ston pa po ni ston pa ste de'i rnam par dag pa ni bshad zin to/ /bstan pa rnam par dag pa ni mdo thog thag go/ /bstan pa'i 'bras bu rnam par dag pa ni bla na med pa yang dag par rdzogs pa'i byang chub ste/rnam par dag pa rnam pa 'di gsum gyis 'phags pa 'jam dpal la sogs pa yi rangs so/ /mngon par bstod do zhes bya ba ni de ltar mngon par bstod pa'i don du blta bar bya'o zhes bya ba'i tha tshig go/ /lta ngan kun gyi dra ba rab dral mdo sde 'grel dang bcas pa zur phyin 'di//bshad pas bdag gis bsod nams rnam pa shin tu bstan la tshang ba gang thob des/ /sems can 'dron pa mang po 'di dag sa gsum rgya mtsho'i pha rol myur bsgral te/ /tshangs la sogs pas ma bgrod sangs rgyas gnas mchog dri med gang de myur thob shog///'phags pa ga ya mgo'i ri'i mdo dang spel mar bshad pa/ 'phags pa 'jam dpal gtso bo'i zhabs la brten pa/ mang du thos pa gnas brtan shAkya'i blos mdzad pa rdzogs so// //