CLOSE WINDOW

D3961
བོད་ཡིག

@##/ /rgya gar skad du/ ma hA sU tra sa muts+tsha ya nA ma/ bod skad du/ mdo kun las btus pa chen po zhes bya ba/ thams cad mkhyen pa la phyag 'tshal lo/ /sangs rgyas dang byang chub sems dpa' thams cad la phyag 'tshal lo//gzhi chen po'i mdo las/ yang ji ltar dge slong dag gis mdo sde dag las don phyung nas gtam du bya ba sbyor bar 'tshal bar 'gyur zhing chos bstan pa mthar gyis yang dag par gnas par 'tshal bar 'gyur/ji ltar na 'gyod par mi 'gyur zhing mdo sde nyams par mi 'gyur ba nyid lags zhes dge slong dag gis bcom ldan 'das la gsol ba dang / bcom ldan 'das kyis bka' stsal pa/ ngas gnang bar bya yis/ mdo sde dag las don phyung nas gtam du bya ba sbyar bar bya'o/ /chos ston pa'i rim pa mthar gyis yang dag par gnas par bya/ mdo sde dag kyang de kho na ltar gzhag par bya'o/ /skye dgu'i bdag mo chen mos khyod kyi bu 'di cho 'phrul ya ma zung mdzad de sku'i smad nas me 'bar/ sku'i stod nas chu'i rgyun bsil ba 'bab/ sku'i stod nas me 'bar/sku'i smad nas chu'i rgyun bsil ba 'bab po zhes thos so/ /thos nas kyang dga' mgu yi rangs mchog tu dga' zhing dga' ba dang yid bde ba skyes te/ bcom ldan 'das ga la ba der bdag nyid dong ngo //dong nas kyang / dga' ba dang / gus pas chu'i rgyun de dag las chu blangs te/ /bdag nyid la mngon par gtor zhing gdong yang 'khru bar byed do/ /bcom ldan 'das kyis kyang skye dgu'i bdag mo go ta mI la byams pa'i thugs kyis khyab par mdzad do//de chu'i rgyun de dag gis reg pas de'i lus bde bar gsal bar gyur to/ /rab rib de dag bral zhing mig kyang snga ma bzhin du rnam par dag par gyur cing de nas ches mchog tu gyur to/ / de bzhin gshegs pa chos ston pa la gsang ba mi mnga'o/ /snod du ma gyur pa ni ma gtogs te/ sems can dman pa dag la ji lta ba bzhin du rtogs pa med pa'i phyir ro/ /sha ra dwa ti'i bu de'i phyir de bzhin gshegs pas gsungs pa'i mdo sde 'di lta bu'i ngo bo 'di 'khor bzhi la rgyas par ston cing yang dag par rab tu gsal bar gyis shig /sha ra dwa ti'i bu gang dag chos kyi rnam grangs 'di thos nas dga' ba dang mchog tu dga' ba thob pa de dag ni bsod nams kyi phung po gzhal du med pa dang ldan par 'gyur ro//gang dag de bzhin gshegs pas legs par gsungs pa 'di lta bu'i ngo bo 'di thos nas dga' ba dang mchog tu dga' ba mi 'thob cing / phyi nas ma dang bar nye bar ston pa de dag ni 'dir tshul khrims nyams pa'am/ lhag par rlom pa'am/chos yongs su ma dag pa ston par 'gyur ro/ /gleng gzhi ni mnyan yod du ste/ yang de'i tshe dge slong rnams kyis khyim pa'i drung du 'dul ba bshad pa dang / khyim pa rnams kyis gang la slob par 'gyur ba'i don 'di dge sbyong gau ta mas nyan thos rnams la bslab pa bcas mod kyi/de dag ni phyi nas bslab pa dag la mi slob cing / de bzhin du kho bo cag gi drung du 'dul ba 'chad do/ /zhes smod par byed gzhogs 'phyas byed kha zer bar byed do/ /dge slong rnams kyis smod par byed pa dang / gzhogs 'phyas byed pa dang / kha zer bar byed pa'i mi rnams la thos par byas pa nas/bcom ldan 'das la gsol pa'i bar dang / der bcom ldan 'das kyis dge slong rnams la bka' stsal pa/ dge slong dag khyim pa rnams kyi drung du 'dul ba bshad par mi bya'o/ /gang 'chad pa la ni ltung ba nyes byas su 'gyur ro/ / de nas yul ko sa la'i rgyal po gsal rgyal gus pa dang bcas zhe sa dang bcas pas dge slong rnams ga la ba der dong bar gyur to/ /dong nas kyang 'di skad du 'phags pa rnams kyi chos zab mo gang yin zhes smras pa dang / gang 'dul ba zhes bya'o/ /'phags pa rnams legs so//kho bo cag gi mdun du shod cig /dge slong rnams kyis smras pa/ ci ltar bcom ldan 'das kyis bkag pa ltar khyim pa rnams kyi drung du 'dul ba bshad par mi bya'o zhes bya ba nas der bcom ldan 'das kyis dge slong rnams la bka' stsal pa/ ngas gnang bar bya yis de lta bu'i rang bzhin can gyi rgyal rigs rnams kyi mdun du bshad par bya'o//ji ltar dge slong rnams la gzhogs 'phyas su mi 'gyur ba de ltar bshad par bya'o zhes bya ba'i bar du gsungs so/ /drag shul can gyis zhus pa'i mdo las kyang / byang chub sems dpa' khyim pa 'dul ba 'dzin pa la brten te/ltung ba 'dul ba dang nyon mongs pa 'dul ba la brtson par bya'o/ /ma mo 'dzin pa la brten te/ lus dang ngag dang yid sdom pa la brtson par bya'o zhes gsungs so/ /yongs su mya ngan las 'das pa chen po'i mdo las kyang /'dus ma byas pa'i dge 'dun ni de bzhin gshegs pa ste/ de bzhin gshegs pa la gsang ba'i chos bstan pa ga la yod/ gsang ba gang yin pa de ni yongs su bsags pa'o/ /de bzhin gshegs pa'i dge 'dun 'dus ma byas pa'i de bzhin gshegs pa 'di ga las 'gyur zhe na/gsang ba'i chos bstan pa las te/ 'da' bar bya ba ma yin pa gang gsang ba ni dam tshig dang bsags pa'o zhes gsungs so/ /rab tu byung bar gyur pa'i sbyin pa bstan pa la/ nyan thos kyi theg pa pa'am/ byang chub sems dpa'i theg pa ba ji ltar dad pas sbyin par bya ba za bar 'gyur/gang chud za bar mi 'gyur bar ro/ /ji ltar yongs su gtong / de yang gang chud za bar mi 'gyur bar ro/ /byang chub sems dpa'i rnal 'byor spyod pa'i sa las kyang / sangs rgyas bcom ldan 'das rnams kyi bstan pa la gnas pa'i byang chub sems dpa' rnams ni bslab pa las 'das na ji ltar yang sbyin pa mi gtong ngo zhes gsungs so//byams pa seng ge sgra'i mdo las kyang / de nas 'jam dpal gzhon nur gyur pas bcom ldan 'das la 'di skad ces gsol to/ /bcom ldan 'das ji ltar dad pas sbyin pa gnang /bcom ldan 'das kyis bka' stsal pa/ 'jam dpal sbyor ba dang grol ba la ngas dad pas sbyin pa gnang ngo zhes gsungs so/ /tshangs pas byin gyis zhus pa'i mdo las kyang / mi sbyor ba la'ang rtag tu 'gal 'gyur te/ /ji ltar rgya mtsho che dang ro bzhin no//ji ltar skye bo bya dang 'phrad pa bzhin/ /de ni mkhas pa rnams dang shin tu ring / /dad med de ni 'khrul pa tshol bar byed/ /bre mo gtam smra'i spyod yul tshogs la dga'/ /rgyal ba rnams kyi bstan la ma gus 'gyur/ /'di nas shi 'phos myur du ngan 'gror 'gro/ / mi sbyor ba la dran med shes rab med/ /mya ngan mi 'da' mi 'grol tshul khrims med/ /de ni dmus long lam dang ring ba bzhin/ /'phags pa'i lam dang shin tu ring bas ring / /gang zag mi sbyor de ni smra ba mang / /rgod la dga' zhing rtag tu dbang po g.yengs/ /de ni bstan la chu ra'i chu bos min//de ni grong zas lcags kyi thu lum za/ /sbyin pa po yis dad pas byin pa ni/ /sbyor dang grol la nga yis gnang ba yin/ /mi sbyor bas ni kham gcig zos na yang / /ngo lon ri rab tsam yang bya ba yin/ /sbyor ba gang yin rnams kyang 'di la 'dzem/ / mi sbyor de yis rgod cing zos na ni/ /glang chen ba lang rta bong mngal du skye/ /de dag de zos brnyas pa'i gzugs su 'gyur/ /de dag mdog ngan nyam chung smad par 'gyur/ /zas blangs zos pa mi gtsang dri ngar 'gyur/ /de dag dbyug pas bsnun pas sbyong bar 'gyur/ /sems kyang g.yeng zhing dran pa rnam par nyams//slong mo byed cing smyon pa dag tu 'gyur/ /bstan pa bsod nams stegs 'di thob nas kyang / /bag med gyur te ngan 'gror lhung bar 'gyur/ /lo ni bye ba khrag khrig mtha' yas par/ /ngan song sdug bsngal mang po des myong nas/ /mi khom mi yi 'jig rten slar thob nas//sdig byas phyir yang ngan 'gror ltung bar 'gyur/ /lcags kyi thu lum rgya mtsho chen po yi/ /nang du ltung bar gyur na gnas med de/ /lo ni bye ba phrag stong snyed du yang / /rgya mtsho che las slar yang dbyung mi nus/ /de bzhin byis pa ngan 'gror ltung ba yang //bskal pa bye ba khrag khrig brgya snyed du/ /de dag mir skye ba yang the tshom za/ /de dag mtho ris byang chub ga la thob/ /bsam pa dag cing byang chub brtson pa dang / /legs par bsdams shing g.yo sgyu med pa dang / /mnyam pa'i sems kyis byang chub thob 'gyur te//de dag thams cad mkhyen nyid dka' ba med/ /ces gsungs so/ /zas kyi phung po spyod pa'i tshul las kyang / khyod kyi zas gtong ba la bslab par bya'o/ /dge slong gis bza' ba lnga blangs nas ma 'bags par sbyin par bya sbyin par byed pas 'ga' zhig la sbyin par bya ste/pha dang ma la sbyin par bya/ khyim pa nad pa skyed mos tshal na 'dug pa la sbyin par bya/ las byed pa la sbyin par bya/ phan 'dogs pa la sbyin par bya/ 'ching bas bcings pa la sbyin par bya/ bud med sbrum ma 'ongs pa gal te re ba na dran pa nye bar gzhag ste sbyin par bya/rab tu 'byung bar 'dod pa la sbyin par bya'o/ /ster ba na dad pas sbyin pa la chud zos pa yod pa ma yin no/ /ji skad du dad pas byin pa chud za ba las/ yang de dag du zhig ce na/ tshul khrims dang ldan pa la byin pa tshul khrims 'chal pa la sbyin na dad pas sbyin pa chud za bar brjod par bya'o//yang dag par lta ba la byin pa log par lta ba la sbyin na dad pas sbyin par bya ba chud za bar 'gyur ro/ /yang dag par zhugs pa la byin pa log par zhugs pa la sbyin na dad pas sbyin par bya ba chud za bar 'gyur ro zhes gsungs pa lta bu'o/ / bcom ldan 'das kyis dad pas sbyin pa pha dang ma la sbyin par bya'o/ /gang dag 'byor pa dang ldan par 'gyur ba de dag la ni chos kyi sbyin pa sbyin par bya/ gang dag sdug bsngal ba nyid du 'gyur ba de dag la ni sbyin par bya zhing gsum la skyabs su 'gro ba dang bslab pa'i gnas dag la yang dag par gzhug par bya'o//tshul khrims dang thos pa dang bsam gtan te/ gnas gsum po dag la mngon par mi brtson par za na dad pas sbyin pa chud za bar 'gyur ro/ /bram ze dang khyim bdag dad pa can rnams kyi thad nas dad pas sbyin pa blangs te zang zing cung zad kyi phyir gzhan dag la rjes su byin na/dad pas sbyin pa chud za bar 'gyur ro/ /mi bkres par za na dad pas sbyin pa chud za bar 'gyur ro/ /tshod shes pa med par za na dad pas sbyin pa chud za bar 'gyur ro/ /de ji tsam gyis chog par 'gyur bzhin du de las lhag par kham gcig kyang za na dad pas sbyin pa chud za bar 'gyur te/de'i phyir khyod kyis chud mi za bar bya'o zhes gsungs so/ /rnal 'byor spyod pa byang chub sems dpa'i sa las kyang / byang chub sems dpa'i yang dag par slong ba po gang zhe na/ sdug bsngal can nyid dang mgon med pa dang 'jungs pa dang /rten med pa rnams ni/ gang la sbyin pa btang ba byang chub sems dpa'i zhing ngo zhes gsungs so/ /dkon mchog sprin las kyang / bsod snyoms pa'i dbang du byas nas/ cha gcig tshangs pa mtshungs par spyod pa rnams la gzhag par bya'o/ /gnyis pa ni sems can sdug bsngal bar gyur pa rnams la'o//gsum pa ni sems can log par ltung ba rnams la'o/ /bzhi pa ni bdag nyid kyis bza' bar bya'o zhes gsungs so/ /'od srungs kyis zhus pa las kyang / dge slong dgon pa pa'i dbang du byas te/ cha gcig grong khyer thams cad kyi dbul po la sbyin par bya'o//gnyis pa ni dgon pa na gnas pa'i dud 'gro'i skye gnas su gtogs pa rnams la sbyin par bya'o zhes gsungs so/ /bden pa'i rnam pa'i mdo las kyang / gang yang shA ri'i bu byang chub sems dpa' khyim gyi gnas nas mngon par byung ba/ byang chub kyi yan lag la mngon par brtson pa des ji ltar sbyin pa sbyin par bya/ ci zhig sbyin pa sbyin par bya/ sbyin pa'i ngo bo ji tsam zhig sbyin par bya zhe na/ shA ri'i bu byang chub sems dpa' gang khyim gyi gnas nas mngon par byung ba/ byang chub kyi yan lag la mngon par brtson pa des so sor thar pa'i sdom pas yang dag par bsdam par bya'o//cho ga dang spyod yul phun sum tshogs par bya/ kha na ma tho ba rdul phran tsam la yang 'jigs par lta ba dang / lus dang ngag dang yid kyi las kyi mtha' yongs su dag pa dang / 'tsho ba yongs su dag pa dang /yang dag par blangs nas bslab pa la bslab par bya'o/ /des bstan pa la bla mar bya/ kha ton la bla mar bya/ tshul khrims la bla mar bya/ dgon par gnas pa la bla mar bya'o/ /chos ji skad thos pa dang ji ltar khong du chud pa rnams rgyas par gzhan dag la bstan par bya/chos sbyin pa por 'gyur bar bya/ chos kyi sbyin bdag tu bya'o/ /shA ri'i bu byang chub sems dpa' khyim pa gang zhig sangs rgyas kyi zhing gang gA'i klung gi bye ma snyed dag rin po che sna bdun gyis yongs su bkang ste/ de bzhin gshegs pa dgra bcom pa yang dag par rdzogs pa'i sangs rgyas rnams la sbyin pa sbyin par byed la/rab tu byung ba'i byang chub sems dpa' gang zhig tshig bzhi pa'i tshigs su bcad pa gcig ston par byed na/ 'di nyid de bas ches bsod nams mang du bskyed do/ /shA ri'i bu de bzhin gshegs pas/rab tu byung ba la ni zang zing gi sbyin pa ma gnang ngo / /de ci'i phyir zhe na/ shA ri'i bu rab tu byung bar gyur pas rim gro dang bcas pas bskal pa bsam gyis mi khyab cing gzhal du med par khyim pa'am/ rab tu byung ba la chos gos dang bsod snyoms kyis mgron du gnyer pa ma gnang ste/chos nyid la gus pa dang bla ma dang ri mor byas nas nye bar bsten te gnas pa ma gtogs so/ /de ci'i phyir zhe na/ shA ri'i bu nga'i nyan thos rnams ni chos kyi sbyin pa sbyin par byed kyi/ zang zing gi sbyin pa sbyin pa ni ma yin no/ /shA ri'i bu gang gi rnyed pa lhung bzed du lhung zhing lhung bzed du chud pa chos dang ldan pa chos kyis rnyed pa/des tshangs pa mtshungs par spyod pa rnams dang lhan cig thun mong du bza' bar bya'o zhes gsungs so/ /nyi ma'i snying po'i mdo las kyang / de la bcom ldan 'das kyis tshe dang ldan pa cang shes koM N+Din+ya la bka' stsal pa/kauN+Di n+ya sems can rnams kyis rang slu ba la ltos/ sems can dbul ba'i 'jigs pas 'jigs pa rnams kyis/ chos la gnas pa'i dge slong rnams la phan gdags par bya ba'i phyir/ rang gi yo byad kyi dngos po sna tshogs pa gang dag phul ba las/la la ni rang nyid kyis yongs su spyad/ la la ni yongs su longs spyad pa'i phyir gzhan dag la byin/ la la ni nan gyis phrogs shing yongs su spyad la/ de ltar ngan song gsum du sdug bsngal bsten to/ /yang sems can dbul ba'i 'jigs pas 'jigs pa gang dag 'khor ba'i btson ra thams cad las yongs su thar bar bya ba'i phyir/sngon gyi sangs rgyas bcom ldan 'das rnams kyi bstan pa la rab tu byung ste/ de ltar rab tu byung ma thag tu/ rnal 'byor yid la byed pa dor zhing chos dang ldan pa'i kha ton dor nas/ chos la gnas pa'i dge slong rnams la dngos po sna tshogs pa phul ba de dag /kha cig gis ni rang gis yongs su spyad/ kha cig gis ni khyim na gnas pa rnams la byin te/ de gnyis ka ngan song gi sdug bsngal gyis bcom par gyur to/ /nyes dmigs 'di gzigs pas na bdag gis nyan thos rnams la dran pa bskyed pa'i phyir rab tu bstan par bya'o//nga'i nyan thos sus kyang dge slong la phul ba dang / dge slong gi dge 'dun la phul ba'i me tog dang 'bras bu dang / lo ma dang bcud khyim na gnas pa rnams la sbyin par mi bya zhing / yang gang zag gi 'du shes kyis kyang yongs su spyad par mi bya'o//dge slong gzhan la nyo tshong mi bya'o/ /sems can gyis zang zing yongs su bzung ba'i rkyen bsgyur bzlog dang gser sgrub pas ngan song gi sdug bsngal du ltung bar mi bya'i chos kyi bsdu bas sems can rnams bsdu par bya / mi phyed pa'i dad pa bzhi dang theg pa gsum dang rnam par thar pa'i sgo gsum po dag la rnam par gnas par bya'o zhes gsungs so//drag shul can gyis zhus pa'i mdo las kyang / khyim bdag de ltar byang chub sems dpa' khyim pa rab tu byung ba la gzhol bar bya'o/ /des 'di ltar sems bskyed par bya ste/ gal te bdag gis nyi ma gcig la mchod sbyin gang gA'i klung gi bye ma snyed kyang sbyin par byed/bdog pa thams cad yongs su gtong bar byed na/ bdog pa thams cad yongs su gtong ba ni/ legs par gsungs pa'i chos 'dul ba las rab tu byung ba'i sems kyi zil gyis gnon to//bdag gis sbyin pa la snying por dga' bar rig par mi bya'o/ /de ci'i phyir zhe na/ khyim bdag sbyin pa ni dman te/ ci dad pa med pa dang byas pa mi shes pa dang / chom rkun pa dang gdol pa dang / rgyal pos bkrabs pa dang / blon po rnams kyang sbyin pa sbyin par mi byed dam/khyim bdag yang bdag gis sbyin pa la snying por dga' bar rig par mi bya'i bdag gis tshul khrims dang thos pa la snying po can du 'gyur bar bya'o zhes gsungs so/ /byams pa seng ge sgra'i mdo las kyang / byams pa yang phyi ma'i tshe phyi ma'i dus lnga brgya pa tha ma la/dge slong lus ma bsgoms pa/ sems ma bsgoms pa/ tshul khrims ma bsgoms pa/ shes rab ma bsgoms pa kha cig 'byung bar 'gyur te/ de dag ni chos gos dang bsod snyoms kyi ched du/ me tog gi skyes dag dang / 'bras bu'i skyes dag dang /lo ma'i skyes dag dang / yo byad kyi skyes dag dang / byas pa la lan du byas pa'i skyes dag gis khyim rnams su 'gro bar 'gyur bas/ byams pa dge slong gis ni me tog phreng brgyud lta bu mi bya zhing / bran dang las mi lta bur yang mi bya'o/ /byams pa dge slong khyim rnams su 'gro bar 'dod pas ni/chos kyi skyes kyis 'gro bar bya ba ma gtogs par/ skyes gzhan bskur bar mi bya ste/ des ni mang du thos pa dang / gzhung la shin tu zhugs pa dang / 'jigs pa med pa dang / brkam chags med pa dang / tshul 'chos pa med pa dang /kha gsag med pa dang / bdag gir bya ba med par bya zhing / chos la dga' ba bskyed nas/ khyim rnams su 'gro bar bya'o/ /khyim rnams su song nas kyang / sangs rgyas dang / chos dang / dge 'dun gyi bsngags pa brjod par bya ba dang / sbyin pa dang / tshul khrims dang /bzod pa dang / brtson 'grus dang / bsam gtan dang / shes rab kyi bsngags pa brjod par bya zhing / chos kyi gtam bya ba'i skyes ma gtogs par khang khyim gyi ched dam/ zhing las kyi ched dam/ rnyed pa'i ched dam/ rig pa bde ba'i ched dam/ rgyal po'i gtam mam/chom rkun gyi gtam mam/ grong gi gtam mam/ grong khyer gyi gtam mam/ ljongs kyi gtam mam/ bu pho'i gtam mam/ bu mo'i gtam mam/ gtam gzhan gyi skyes dag mi bya'o/ /byams pa gang gis stong gsum gyi stong chen po'i 'jig rten gyi khams 'di rin po che sna bdun gyis yongs su bkang ste/rigs kyi bu'am rigs kyi bu mo de la byin par gyur pa dang / stong gsum gyi stong chen po'i 'jig rten gyi khams na gang yang bde ba'i yo byad yod pa de dag thams cad nye bar bsdus nas/ rigs kyi bu'am rigs kyi bu mo de la byin na / nor gyi phung po de tsam dang / bde ba'i yo byad de tsam gyis ni/ des rigs kyi bu'am rigs kyi bu mo de la/ snying brtse ba'am/ phan btags par mi 'gyur gyi/ des tshig bzhi pa'i tshigs su bshad pa gcig tsam zhig nyan du bcug ste/ de yang de'i rna ba'i rnam par rig par drangs shing / thos pa tsam kho nar zad kyi re zhig dad pa thob par ma gyur du zin kyang / de ni rigs kyi bu'am rigs kyi bu mo de la rgyas pa dang phan 'dogs pa dang / snying brtse ba ches shin tu mang du byed pa yin no zhes gsungs so/ /sangs rgyas kyi sde snod kyi mdo las kyang / shA ri'i bu bkres pas rang gi brla'i sha'am/dpung pa'i sha zos pa ni bla'i/ nyes dmigs su mi lta ba dang / 'byung bar mi shes pas/ dad pas sbyin pa la longs spyod par byed pa ni de lta ma yin no/ /de ci'i phyir zhe na/ shA ri'i bu ngas sbyor ba rnams dang grol ba rnams la dad pas byin pa rjes su gnang ste/de dag las gzhan pa la ni ma yin no/ /shA ri'i bu ji tsam zhig gis sbyor ba yin/ ji tsam zhig gis grol ba yin zhe na/ gang mthong ba'i chos 'di nyid la len pa med par yongs su mya ngan las 'da' bar bya'o snyam na/ de lta bu ni sbyor ba yin no/ /mi dge ba'i chos spang ba'i phyir dang /dge ba'i chos mngon sum du bya ba'i phyir spong ba dang / 'phags pa'i lam goms par bya ba la mgo'am/ gos la me 'bar ba lta bur byed pa de lta bu ni sbyor ba yin no/ /chos thams cad stong pa'o snyam du mos nas/ rnam par thar pa'i sgo stong pa nyid dang /mtshan ma med pa dang / smon pa med pas rnam par thar pa'i sgo gsum la lhag par mos par gyur pa de lta bu ni sbyor ba yin no/ /dge ba ci yin zhes tshol zhing 'dri ba'i rang bzhin can/ go cha chen po bgos nas bla na med pa yang dag par rdzogs pa'i byang chub don du gnyer ba ni/yang dag pa'i byang chub kyi yan lag rnams la mngon par brtson pa yin te/ gang dag lam la zhugs pa de dag 'di snyam du rgyun du zhugs pa'i 'bras bu thob par bya'o zhes bya ba nas/ de bzhin du sbyar te/ dgra bcom pa nyid kyi bar du thob par bya'o snyam du/de'i bya ba la gnas pa yin te/ dge ba'i chos rnams la gong dag khong du chud par bya ba'i phyir/ lhag pa'i bsam pas gnas pa 'di tsam zhig gis ni sbyor ba yin no/ /ngan song gsum las grol ba rgyun du zhugs pa dang lan cig phyir 'ong ba dang /phyir mi 'ong ba dang / dgra bcom pa bya ba byas pa dag ni grol ba zhes brjod do/ /shA ri'i bu gang dag yang bslab pa gsum po dag la bslab pa de dag ni grol ba zhes bya ste/ de dag kyang dad pas byin pa 'thob pa yin no/ /shA ri'i bu 'di dge tsam gyis sbyor ba yin zhing / 'di dag tsam gyis grol ba yin te/ de lta bu'i sbyor ba dang / de lta bu'i grol ba gang yin pa de dag la ngas dad pas byin pa rjes su gnang ngo / /de dag gis legs par yongs su spyad par 'gyur ro zhes gsungs so/ /tshangs pas byin gyis zhus pa'i mdo las kyang / de skad ces gsol pa dang /bcom ldan 'das kyis rgyal po tshangs pas byin la bka' stsal pa/ rgyal po chen po bzhi po 'di dag ni bstan pa 'di la zhugs pa'i rab tu byung ba'i g.yang sa dag ste/ bzhi po gang zhe na/ sangs rgyas la ma gus pa nyid dang / dam pa'i chos spong ba dang / chos ston pa la rnam par sdang ba dang / mngon par mi brtson pas dad pas byin pa len pa dang / bzhi po 'di dag go zhes gsungs so/ /nye ba 'khor gyis zhus pa'i mdo las kyang / shA ri'i bu gzhan yang byang chub sems dpa' sems dpa' chen po khyim pa khyim na gnas pas ni/sbyin pa gnyis la gnas par bya'o/ /gnyis gang zhe na/ 'di lta ste/ chos kyi sbyin pa dang / zang zing gi sbyin pa la ste/ shA ri'i bu byang chub sems dpa' sems dpa' chen po khyim pa khyim na gnas pas ni rjes su chags pa med pa dang / khong khro ba med pas sbyin pa de gnyis la gnas par bya'o//shA ri'i bu byang chub sems dpa' sems dpa' chen po rab tu byung bar gtogs pas ni/ sbyin pa rgya chen po bzhi la gnas par bya'o/ /bzhi gang zhe na/ 'di lta ste/ smyu gu sbyin pa dang / snag tsha sbyin pa dang / glegs bam sbyin pa dang /chos sbyin pa la ste / shA ri'i bu byang chub sems dpa' sems dpa' chen po rab tu byung bar gtogs pas ni/ sbyin pa bzhi po de dag la gnas par bya'o/ /shA ri'i bu byang chub sems dpa' sems dpa' chen po mi skye ba'i chos la bzod pa thob pas ni/ gtong ba gsum la gnas par bya'o//gsum gang zhe na/ 'di lta ste gtong ba dang / gtong ba chen po dang / shin tu gtong ba'o / /de la gtong ba ni rgyal srid yongs su gtong ba'o/ /gtong ba chen po ni chung ma dang bu dang bu mo yongs su gtong ba'o/ /shin tu gtong ba ni mgo dang / lag pa dang / rkang pa dang / mig dang / pags pa dang / rus pa dang / rkang yongs su gtong ba ste/ shA ri'i bu byang chub sems dpa' sems dpa' chen po mi skye ba'i chos la bzod pa thob pas ni/ yongs su gtong ba gsum po de dag la gnas par bya'o zhes gsungs so//rin po che'i phung po'i mdo las kyang / de ci'i phyir zhe na/ shA ri'i bu byang chub sems dpa' rab tu byung bar gtogs pa rnams ni/ chos sbyin par byed pas gnas par 'gyur la/ byang chub sems dpa' khyim pa rnams ni/ zang zing thams cad yongs su gtong ba dag la ser sna med pas gnas par 'gyur ro//shA ri'i bu de'i phyir chos kyi sbyin pa dag gis bla na med pa yang dag par rdzogs pa'i byang chub tu mngon par sangs rgyas par nus kyi/ de ltar zang zing gi sbyin pa dag gis ni ma yin no zhes gsungs so/ /khyim la ser sna byed pa la dgongs pa bstan pa la/byang chub sems dpa'i sde snod kyi mdo las kyang / shA ri'i bu rab tu byung ba'i byang chub sems dpa' chos lnga dang ldan na/ sangs rgyas 'byung ba mnyes par mi byed/ dge ba'i bshes gnyen la yang mi brten/ dal ba phun sum tshogs pa'ang mi 'thob/ ji ltar bsgrubs pa'i dge ba'i rtsa ba rnams kyang chud za bar byed/ sdom pa la gnas pa'i byang chub sems dpa' sems dpa' chen po'i yang rjes su slob par mi 'gyur te/ bla na med pa yang dag par rdzogs pa'i byang chub kyang myur du mngon par rdzogs par 'tshang mi rgya'o/ /lnga gang zhe na/'chal ba'i tshul khrims spyod pa dang / dam pa'i chos la smod pa dang / rnyed pa dang bkur sti dang / tshigs su bcad pa la chags pa dang / bdag tu lta ba'i thibs po dang / gzhan gyi khyim la phrag dog dang ser sna skye ba ste/ shA ri'i bu rab tu byung ba'i byang chub sems dpa' sems dpa' chen po chos lnga po de dang ldan na/sangs rgyas 'byung ba mnyes par mi byed pa dang / dge ba'i bshes gnyen la mi brten pa nas de bzhin du sbyar te/ bla na med pa yang dag par rdzogs pa'i byang chub kyi bar du'ang myur du mngon par rdzogs par 'tshang mi rgya'o zhes bya ba'i bar du'o//shA ri'i bu 'di lta ste/ khyi ltogs pas keng rus sha med pa/ khrag gis 'bags pa blangs nas/ de srang gi sgo na gnas te/ kha chus gos pa de 'cha' ba las/ de nas rgyal rigs shing sA la chen po lta bu dang / bram ze shing sA la chen po lta bu dang /khyim bdag shing sA la chen po lta bu dag /khyi ltogs pa'i phyogs su 'ong ba/ khyi des rgyang ma nas 'ong ba mthong nas/ de 'di snyam du sems te/ 'di ni bdag gi kha zas ro zhim po 'di 'phrog pa zhig go snyam nas/ de shin tu zugs shing mig tshugs su blta la/ mche ba bsnyer te/ skad cher zugs na/ shA ri'i bu de ji snyam du sems/ skyes bu de keng rus sha med par khrag gis 'bags pa de 'dod pa yin nam/ gsol ba/ bcom ldan 'das de lta ma lags so/ /bde bar gshegs pa de ma lags so/ /bcom ldan 'das kyis bka' stsal pa/khyi de ci'i phyir shin tu zugs shing / mig tshugs su blta la mche ba bsnyer te/ skad cher zugs/ gsol pa/ de 'di snyam du sems te/ bdag gi kha zas ro zhim po 'di 'phrog pa zhig go snyam ste/ shin tu zugs shing mig tshugs su blta la / mche ba bsnyer te skad cher zugs so//bka' stsal pa/ shA ri'i bu de bzhin du gang khyim gyi ser sna la brtson pa dang / bshang ba dang gci bas kun tu bskor ba la chags pa'i dge slong dag 'byung bar 'gyur te/ gang 'di lta bu'i ngo bo dal ba phun sum tshogs pa 'di rnyed nas/ chud zos par byed pa de dag ni/ngas khyi dang 'dra'o zhes brjod de/ de dag gi phyir de bzhin gshegs pa 'di lta bu'i ngo bo brjod pa'i gnas byed pa 'ba' zhig ma yin gyi/ yang shA ri'i bu byang chub sems dpa' sems dpa' chen po gang dag skye bo mang po la phan pa dang / skye bo mang po la bde ba'i phyir/sangs rgyas kyi ye shes tshol ba de dag ni bdag gi sha yang yongs su gtong na/ gzhan gyi khyim dag la rtog cing bsnyen pa'i phyir phrag dog dang ser sna byed par mi 'gyur ba lta ci smos/ yang shA ri'i bu skyes bu gti mug pa 'tsho ba don du gnyer ba/ zang zing gi bran/ 'jig rten gyi zang zing lhur byed cing zas dang gos la lhur byed pa de dag /rtog cing bsnyen pa'i phyir/ gzhan gyi khyim la phrag dog dang ser sna bskyed par 'gyur te/ shA ri'i bu gang dge slong mthong nas bdag gis sngon chad 'dir bshes na / phyi ma 'di ga las 'ongs pa zhig 'di ni sngon bdag dang gdams pa yin na/phyi ma 'di ga las 'ongs pa zhig snyam du phrag dog dang ser sna skyed par byed pa 'di lta bu ni mi rigs so/ /gal te de la khyim bdag de dag gis lhung bzed dang / chos gos dang / bsod snyoms dam bcas par gyur pa dang / mal stan dang /na ba'i gsos kyi sman dang / yo byad khas blangs par gyur pa na/ de sngon dam bcas par gyur pa/ phyis 'ongs pa la ster gyi bdag la ni ma yin no snyam nas/ de la nyes pa gsum bskyed de/ gsum gang zhe na/ gnas 'di nas 'gro bar bya'o snyam du gnas la nyes pa skyed par byed pa dang /shes par bya ba ma yin pa shes shing shes par bya ba mi shes pa dang / gang ci yang rung ba bstan pa mi brtan pa de/ khyim pa rnams kyi drung du nyes pa sgrog par byed pa'o/ /dge slong de la gnas gsum rjod par byed de/ gsum gang zhe na/ khyim gyi nyes pa rjod par byed de/nyams mi dga' bar rig par byed cing / khyim la sgro 'dogs par byed pa dang / mi bden pa'i gtam zer bar byed pa ste/ skyes bu dam pa ma yin pa 'di dag yid brtan pa'i sbyor bas spyo bar bya ba'i chos gsal bar byed do/ /shA ri'i bu de ltar khyim la ser sna byed pa ni chos dkar po yongs su nyams par byed par gnas so//yang shA ri'i bu khyim la ser sna byed pa la gnas pa skyes bu dam pa ma yin pa de dag gis sdom pa la gnas pa'i byang chub sems dpa' yongs su gtang bar 'gyur te/ sdom pa la gnas pa'i byang chub sems dpa' sems dpa' chen po'i rjes su slob par mi 'gyur ro/ /shA ri'i bu de lta bas na khyod kyis rnam grangs 'dis de ltar rig par bya'o zhes gsungs so/ /shes rab kyi pha rol tu phyin pa'i mdo las kyang / de la byang chub sems dpa' sems dpa' chen pos ji ltar khyim la ser sna byed pa spang bar bgyi/rab 'byor 'di la byang chub sems dpa' sems dpa' chen pos 'di ltar sems bskyed par bya ste/ gang bdag gis sems can thams cad la bde ba'i yo byad thams cad sbyin par bya'o/ /'di dag ni rang gi bsod nams kho nas bde ba yin pas/de la bdag gis ser sna'i sems bskyed bar mi bya'o zhes gsungs so/ /chos thams cad kyi rang bzhin mnyam pa nyid rnam par spros pa'i ting nge 'dzin las kyang / bdag ni dus rtag phrag dog med 'gyur zhing / /bdag gis khyim la brten mi 'gyur bar bya//khyim la chags pa phrag dog 'byung 'gyur te/ /phrag dog med pa na gas su dga' ba myong / /zhes gsungs so/ /lhag pa'i bsam pa bskul ba'i mdo las kyang de skad ces gsol pa dang / bcom ldan 'das kyis gang zag byang chub sems dpa'i theg pa pa drug cu po de dag la 'di skad ces bka' stsal to//rigs kyi bu dag sngon byung ba 'das pa'i dus na/ bskal pa bzang po 'di nyid la/ de bzhin gshegs pa log par dad sel gyi gsung rab la rab tu byung ste 'khod pa/ tshul khrims kyi rgyags pas myos pa/mang du thos pa'i rgyags pas myos pa/ sbyangs pa'i yon tan dang yo byad bsnyungs pa la mngon par zhen pa khyed kyis/ dge slong chos smra ba gnyis la 'di ltar rnyed pa dang bkur sti'i rgyu dang / mdza' bshes kyi khyim dang slong mo ster ba'i khyim gyi gzhi las phrag dog dang ser sna dang ldan pas/zhe sdang ba'i sems kyis 'khrig pa'i skur pas bskur te/ chos smra ba'i dge slong de gnyis kyis mdza' bshes kyi khyim dang / slong mo ster ba'i khyim du gyur pa gang yin pa de rnams kyang khyed kyis phye ste/ the tshom bskyed cing ma dad par byas la/ dge slong chos smra ba de gnyis la mi snyan pa mang po dag kyang smras/bsngags pa ma yin pa'i skur pa des kyang sems can de rnams kyi dge ba'i rtsa ba yang bcad cing dge ba'i rtsa ba la sgrib par byas te/ mi dge ba'i las kyi sgrib pa des khyed lo drug khrir sems can dmyal ba chen po mnar med par skyes so//lo bzhi khrir ni sems can dmyal ba chen po yang sos su skyes so/ /lo nyi khrir ni sems can dmyal ba chen po thig nag tu skyes so/ /lo brgya stong du ni sems can dmyal ba chen po tsha bar skyes so/ /des khyed de nas shi 'phos nas/ mi'i lus rnyed pa rnyed pa nas/tshe rabs lnga brgyar mig med de dmus long du gyur to/ /khyed las kyi sgrib pa de nyid kyi lhag mas/ gang dang gang du skyes pa de dang de dag thams cad du sems rtul ba dang / brjed ngas par gyur to/ /mi dge ba'i rtsa ba'i sgrib pas bsgribs shing dbang chung bar grags par gyur to//mi sdug pa'i skyon gyis zil gyis non pa dang / smad pa dang / bshung ba dang / skur ba mang ba dang / yul ngan pa dang / yul 'khor ngan pa dang / ljongs ngan pa dag tu rigs ngan pa dang / dbul po'i rigs dag tu skyes so/ /rnyed pa chung ba dang / bkur sti chung ba dang /mi bkur ba dang / mi mchod par gyur to/ /des khyed 'di nas shi 'phos nas/ lnga brgya pa tha ma la/ dam pa'i chos nub pa'i dus kyi tshe/ yul ngan pa dang /[ (]ljangs [,]ljongs [)]ngan pa dag tu rigs dma' ba dang / dbul po dag tu skye bar 'gyur te/ skur pa mang ba dang /brjed ngas pa dang / dge ba'i rtsa ba spong ba dang / brtson pa byas kyang bar chad 'byung ba dang / khyed la snang ba byung yang phyir nub par 'gyur ro/ /khyed la lnga brgya pa tha ma la/ las kyi sgrib pa thams cad zad par 'gyur te/ zad par byas nas/ de bzhin gshegs pa 'od dpag med kyi sangs rgyas kyi zhing 'jig rten gyi khams bde ba can du skye bar 'gyur te/de bzhin gshegs pa 'od dpag med de yang / khyed bla na med pa yang dag par rdzogs pa'i byang chub tu lung ston par 'gyur ro/ /zhes gsungs so/ /byams pa seng ge sgra'i mdo las kyang /byams pa de la phyi ma'i tshe phyi ma'i dus lnga brgya pa tha ma la/ byang chub sems dpar khas 'che ba mang po 'byung ba gang yin pa de dag gi sdig pa 'dod pa gang dag yin pa de dag bshad par bya'o/ /byams pa byang chub sems dpa' chos bzhi dang ldan na/ byang chub sems dpar khas 'che ba yin par rig par bya ste/bzhi gang zhe na/ rnyed pa 'dod pa dang / bkur sti 'dod pa dang / g.yo byed pa dang / ya nga ba'i 'tsho bas 'tsho bar byed pa yin te/ byams pa byang chub sems dpa' chos bzhi po de dag dang ldan na/ byang chub sems dpar khas 'che ba yin par rig par bya'o//byams pa de la phyi ma'i tshe phyi ma'i dus lnga brgya pa tha ma la/ byang chub sems dpar khas 'che ba/ khyi'i chos kun du spyod pa mang po dag 'byung bar 'gyur te/ byams pa 'di lta ste/ dper na khyi ni khyim 'ga' zhig tu sngar phyin par gyur la/ da khyi gzhan zhig rgyang ring po nas 'ong ba mthong na/de la zugs par byed/ 'khren skad 'byin/ khro bas lta bar byed gnod sems kyis nyes pa skyed par byed de/ gzhan gyi khyim la bdag gir byed cing / khyim 'di ni bdag gi yin no snyam nas/ bdag gi bar 'du shes skyed par byed do/ / byams pa de bzhin du phyi ma'i tshe phyi ma'i dus lnga brgya pa tha ma la/ byang chub sems dpar khas 'che ba/ khyi'i chos kun du spyod pa mang po 'byung bar 'gyur ba gang dag yin pa de dag kyang gzhan gyi khyim dag dang gzhan gyi grong dag la bdag nyid kyi yin par 'du shes skyed par byed cing /bdag nyid kyi yin par 'du shes bskyed nas/ yongs su 'dzin par byed de/ dge slong des sngon phyin pa'i khyim der/ dge slong gzhan zhig 'ong ba mthong nas/ khyim 'di ni bdag gi yin no snyam nas/ khro bas lta bar byed gnod sems skyed par byed/ 'thab mo dang /'thab pa dang / rtsod pa dang / 'gyed pa skyed par byed/ phan tshun dbyen gyi tshig smra bar byed/ tshig rtsub mo rjod par byed/ gcig la gcig dge slong che ge mo zhes bya ba la/ nyes pa 'di lta bu yod do/ /dge slong mang ge mo zhes bya ba la/ nyes pa 'di lta bu yod do zhes mi snyan pa rjod par byed cing /khyim bdag la yang dge slong che ge mo bsten par mi bya'o/ /gal te khyod kho bo bsten par 'dod na/ dge slong mang ge mo la ma bsten cig ces zer te/ de dag ni skyugs pa'i rgyur gyur pa/ ring du mi gnas pa/ smad par bya ba'i kha zas tsam gyi phyir bsod nams ma yin pa mang po skyed pa yin no//de dag ni yi dags la brten pa'i chos kun tu spyod cing / dbul ba dang / sems dman pa dang / ser sna dang ldan pa dang / bdag nyid gso bar byed pa yin te/ byang chub sems dpa'i ming gis byang chub sems dpa' yin par khas 'che bar byed cing /bdag nyid tshul khrims 'chal ba dang / sdig pa can gyi 'dod pa dang ldan pa dang / sdig pa kun tu spyod pa yin bzhin du/ sangs rgyas kyi bsngags pa brjod / sangs rgyas kyi ye shes kyi bsngags pa brjod cing / byang chub sems dpa' bsam pa phun sum tshogs pa/gzhan dag gi bsngags pa yang brjod nas/ zas dang gos sgrub par byed do/ /byams pa sgrub par byed do/ / byams pa de dag ji tsam du mi bzad par 'gyur ba la ltos/ seng ge'i sgra bsgrag cing / seng ge'i las rnams bya bar rigs pa gang du/ wa'i sgra sgrogs shing / wa'i las rnams byed pa dang / bdog pa thams cad yongs su gtong ba'i bsngags pa rjod par byed cing / 'jig rten gyi zang zing yun mi ring ba yongs su gtong bar mi byed la/ ser snas zil gyis non zhing / yo byad kyi dri mas sbags pa dang / gtong ba phyi rol du byas pa de dag gis/phan pa'i dngos po'i bsngags pa rjod par byed cing / gnod sems dang tha ba dang / khong khro ba'i nyes pa mang po byed pa dang / bzod pa'i bsngags pa rjod par byed cing / gcig tu gnod sems kyi sems su byed pa dang / bsdu ba'i dngos po bzhi po de dag gi bsngags pa rjod par byed cing /sems can dga' ba yang sbyin pa'am/ snyan par smra ba'am/ don spyod pa'am/ don mthun pas sdud par mi byed pa nas/ de dag ni tshig tsam gyi dngos po'i bar du 'gyur ba de dag /byang chub sems dpa' brtson 'grus la mos pa'i yon tan yang dag par blang ba dang /'brel ba'i spyod pa la rjes su slob par byed pa ni ma yin no zhes gsungs so/ /blo gros rgya mtsho'i mdo las kyang / blo gros rgya mtsho chos bzhi po 'di dag ni theg pa chen po'i bar chad du 'gyur ba'o/ /bzhi po gang zhe na/ pha rol gyi rnyed pa rnams la phrag dog byed pa dang / chos ston pa rnams la g.yos bstan pa dang / rnyed pa dang bkur sti la chags pas gzings pa'i blos sgyus nye bar spyod pa dang / slu bas sems mi brtan pa nyid de / blo gros rgya mtsho chos bzhi po 'di dag ni/ theg pa chen po la bar du gcod par byed par 'gyur ro zhes gsungs so//tshangs byin gyis zhus pa'i mdo las kyang / rgyal po ngas ni 'das pa'i dus dran te/ /sangs rgyas ye shes 'od ces bya ba byung / /lo ni brgyad khri tham pa'i bar dag tu/ /chos rnams bstan nas rgyal ba mya ngan 'das/ /rgyal ba de ni 'das pa'i dus kyi 'og /dam pa'i chos ni nyams shing thug pa na/ /dge slong dran pa'i blo can zhes bya byung / /gzungs thob ma yin spobs pa thob par gyur / /mdzes shing des la legs par smra ba dang / /rtag tu ngan ngon tsam gyis chog shes pa/ /skye dgu sprin gyi chus ni tshim byed ltar//lhar bcas 'gro ba chos kyis tshim par byed/ /de yi dus kyi tshe na sa steng du/ /bkod pa'i rgyal po zhes bya'i grong khyer byung / /kho ra khor yug dpag tshad brgyad du gyur/ /bde zhing lo legs mi de rnams blo ldan/ /chos smra dran pa'i blo can de 'ongs nas/ / srog chags rnams la phan phyir chos kyang ston/ /srog chags bye ba stong phrag nyi shu gsum/ /bla med byang chub la ni bkod par gyur/ /me tog rnams dang spos dang gos rnams dang / /bca' ba btung ba ji ltar 'tsham pa yi/ /glu dbyangs rol mo'i sgra rnams rab mchog gis/ /de dag de la sangs rgyas bzhin du mchod//dge slong lnga brgya shin tu mi mthun gyur/ /grong khyer du ni de yi bsngags min sgrogs/ /tshul khrims ldan de'i nyes pa nges shes zhes/ /re re nas ni khyim pa'i mdun du brjod/ /zla ba nya yi gso sbyong bab pa na/ /sdig pa'i dge slong ltung bcas langs nas ni//gal te do nub myur du ma song na/ /gnad rnams gtub cing srog kyang bcad do zhes/ /smra ba'i dge slong de dag nyid la snying rje nas/ /sems can dag pa de ni ma zhum song / /sangs rgyas sras ci phyir na brnyas byed ces/ /lha rnams stong dag mi dga' ngu bar byed//de nas dge slong lnga brgya de dag kun/ /dgod cing mgu bas mtshan mo 'da' bar byed/ /kye ma bdag cag de las legs par thar/ /khur ci bor ba snyam du nyams la sems/ /dge slong lnga brgya dus las 'das gyur nas/ /bskal pa brgyad cur dmyal bar gnas par gyur//bskal pa bye stong bdun cu rtsa drug tu/ /yi dags 'jig rten der ni dag slong gnas/ /sems can de dag tshe rabs rtag tu ldongs/ /de dag sbrul gdug skyes te sa rdul za/ /byis pa rnams kyis mthong nas bong bas brgyab/ /skyabs kyang med de dpung gnyen med par gyur//tshe rabs bye ba stong phrag bco brgyad du/ /mi yi nang du skyes nas dbul por gyur/ /smyo zhing ldongs la rtag tu lus kyang rul/ /mdog ngan smad par gyur te mthu yang chung / /de ltar byed pa nga rgyal zil gyis non/ /bdag nyid rtag tu mi sdug mang po byed/ /gzhan gyi sbyin pa la ni skyon yang 'dogs//g.yang sa chen por bdag nyid 'dor bar byed/ /ma 'ongs dus na bskal pa drug cu pa/ /grags chen zhes bya'i bskal pa 'byung bar 'gyur/ /der ni skyob pa 'jig rten don mdzad pa/ /bde gshegs stong phrag bcu dag 'byung bar 'gyur/ / de dag rnams ni sangs rgyas tha ma'i tshe/ /der ni de dag mi lus thob 'gyur te/ /sangs rgyas de mthong nas ni bzod pa thob/ /sangs rgyas gang gA'i bye snyed mthong bar 'gyur/ /sngon ni lhan cig de dag thams cad kyis/ /thams cad mkhyen pa'i sems su smon lam btab/ /der ni de dag byang chub sems ma nyams//bsam pa'i bye brag gis ni ngan 'gror lhung / /nga ni de tshe chos smra rgyal ba'i bu/ /dran pa'i blo can zhes bya der yang gyur/ /gang de sun 'byin ston la sun 'byin 'gyur/ /de phyir nga rgyal spangs shing bor nas ni/ /tshul min spangs te ye shes sbyor gyis shig /gang zhig bdag nyid bslab par mi 'dod pa/ /des ni mi shes tshig rnams spangs nas kyang / /me yi phung po bzhin du phrag dog spongs / /mthong dang ma mthong thos dang ma thos dang / /bden dang mi bden pas ni gzhan mi gleng / /byang chub mchog tu 'tshang rgya 'dod pa yi //dge slong des ni bdag gi nyes pa bsal / /des pa rnams ni nang dang de bzhin phyi'i/ /dngos po de kun byang chub phyir gtong byed/ /gang zhig nga yi byang chub mchog la 'dun/ /de dag ci phyir gzhan la khro ba skyed/ /phyi ma'i dus na nga yi bstan pa la/ / dmu rgod mang po byang chub sun yang 'byin/ /de dag gcong rong g.yang sa chen por 'gro/ /bsam pa nyams la byang chub ci byar yod/ /nga yi byang chub mchog 'dod gang yin pas/ /rigs ngan bu 'drar nga rgyal spangs byas la/ /sems can kun la byams pa'i sems bskyed nas/ / thob dang ma thob mi dgar yong mi bya/ /rgyal po chen po gzhan yang gang na gus pa med pa dang / ma dad pa dang / gzhan dag la sdang ba dang / glags lta ba dag yod pa der ni/ de bzhin gshegs pa rnams dang / de bzhin gshegs pa'i nyan thos rnams yun ring du mngon par dga' bar mi 'gyur te/myur ba kho nar 'dor bar 'gyur zhes gsungs so/ /tshul 'chos pa'i skyon brjod pa la dgongs pa bstan pa la/ gzi brjid can gyi mdo las kyang / tshul 'chos pa can bcu gang zhe na/ nags spangs pa'i tshul 'chos pa can ni/ gang gi tshe/ bdag gzhan gyis ji ltar shes par 'gyur snyam rgyu mtshan du byas nas nags kyi nang ring por 'gro ba'o//gcom bskyungs pa'i tshul 'chos pa can ni/ gang gi tshe/ rgyu mtshan du byas nas tshig zhan pa zhan par smra bar byed pa'o/ /ma la stan ring du spong ba'i tshul 'chos pa can ni/ gang gi tshe/ bdag gis dge 'dun gyi mdun gyi mal stan longs mi spyod pa de'i tshe/bdag la mchod par 'gyur ro snyam pa'o/ /sgra sgrogs pa'i tshul 'chos pa can ni/ gang gi tshe bdag tshul khrims dang ldan pa/ mang du thos pa/ bsam gtan pa'o zhes/ bdag nyid sgrogs shing sgrogs su 'jug pa'o/ / sngon du 'gro ba'i tshul 'chos pa can ni/ gang gi tshe dge slong 'di rdzu 'phrul dang ldan par ji ltar gzhan gyis shes par 'gyur zhes phyi na 'dug nas sngon du rgyug pa'o/ /'dod pa chung ba smra ba'i tshul 'chos pa can ni/ gang gi tshe 'dod pa chung bar smra zhing sems kyis rnyed pa 'dod pa ste/yo byad bsnyungs par ston pa'o/ /sa la 'dug pa'i tshul 'chos pa can ni/ gang gi tshe rgyu mtshan du byas pa'i rgyus sa la nyal ba'o/ /tshogs su bsgrags pa'i tshul 'chos pa can ni/ gang gi tshe/ bdag ni tshogs ga ge mo zhig tu yongs su shes so zhes de lta bu rgyu mtshan du byed pa'o//ri gzhan du ston pa'i tshul 'chos pa can ni/ gang gi tshe/ skad cig gcig la ni ri gzhan dang gzhan la bdag nyid ston pa'o zhes gsungs so/ /blo gros rgya mtsho'i mdo las kyang / blo gros rgya mtsho bzhi po 'di dag ni theg pa chen po'i chos la bar du gcod pa'i chos su 'gyur te/bzhi po gang zhe na/ lus kyi tshul 'chos pa ni spyod lam gyis so/ /ngag gi tshul 'chos pa ni log par smra ba nyid kyis so/ /sems kyi tshul 'chos pa ni sdig pa 'dod pa nyid kyis so/ /thams cad nas tshul 'chos pa ni 'tsho ba yongs su ma dag pa nyid kyis so//blo gros rgya mtsho bzhi po 'di dag ni theg pa chen po'i chos la bar du gcod pa'i chos su 'gyur ro zhes gsungs so/ /yul 'khor skyong gi mdo las kyang / yul 'khor skyong bzhi po 'di dag ni/ byang chub sems dpa' rnams kyi g.yang sa'o/ /bzhi po gang zhe na/yul 'khor skyong ma gus pa nyid ni byang chub sems dpa' rnams kyi g.yang sa'o/ /yul 'khor skyong byas pa mi shes pa dag g.yos brten pa ni/ byang chub sems dpa' rnams kyi g.yang sa'o/ /yul 'khor skyong rnyed pa dang bkur sti la lhag par chags pa ni/ byang chub sems dpa' rnams kyi g.yang sa'o//yul 'khor skyong tshul 'chos dang kha gsag nyid kyis rnyed pa dang bkur sti sgrub pa ni/ byang chub sems dpa' rnams kyi g.yang sa ste/ yul 'khor skyong 'di dag ni/ byang chub sems dpa' rnams kyi g.yang sa rnams so zhes gsungs so//byams pa seng ge sgra'i mdo las kyang / 'od srungs de la dge slong gi chom rkun gang zhe na/ bzhi po 'di dag ni dge slong gi chom rkun yin te/ bzhi gang zhe na/ 'od srungs 'di la dge slong dge sbyong gi kha dog dang / rtags dang dbyibs la gnas shing /de yang tshul khrims 'chal ba dang / sdig pa'i chos can yin par gyur na/ de ni dge slong gi chom rkun dang po yin no/ /dben pa'i gnas su song ste/ gnas pa na mi dge ba'i rnam par rtog pa dag la rnam par rtog par byed na/ de ni dge slong gi chom rkun gnyis pa yin no//bdag nyid 'bras bu ma thob cing / so so skye bo yin par shes bzhin du rnyed pa dang / bkur sti dang / tshigs su bcad pa 'dod pas zil gyis non pas/ gzhan dag gi mdun du bdag nyid dgra bcom pa yin par khas 'che bar byed na/ de ni dge sbyong gi chom rkun gsum pa yin no//bdag la bstod cing gzhan la smod par byed na/ de ni dge sbyong gi chom rkun bzhi pa yin te/ 'od srungs bzhi po de dag ni dge sbyong gi chom rkun yin no/ /'od srungs skyes bu gtum pa/ brlang ba/ drag shul gyi las dang ldan pa/ nyams stobs dang ldan pa stobs po che'i shugs dang ldan pa/gang la la zhig byung bar gyur la/ 'od srungs skyes bu des 'dzam bu'i gling pa'i mi gang ji snyed pa rnams dbyug pas brdegs sam/ mtshon gyis btab bam/ khu tshur gyis bsnun te/ pham par byas nas/ nye bar spyad pa'i longs spyod dbyig dang /gser dang / nor bu dang / mu tig dang / bai DUr+ya dang / dung dang / man shel dang / byi ru dang / sa le sbram dang / dngul dang / rin po che sna tshogs dang / khang khyim dang / bzhon pa dang / gos dang / bza' ba dang / btung ba dang / mal cha dang / stan gyi nye bar spyad pa dang /yongs su spyad pa dang / dga' ba dang / rtse ba'i longs spyod ji snyed pa de dag thams cad bcom zhing phrogs te/ khyer bar gyur na/ 'od srungs 'di ji snyam du sems/ gzhi de las mi de bsod nams ma yin pa mang du bskyed snyam mam/ 'od srungs kyis gsol pa/bcom ldan 'das mang du bskyed lags so/ /bde bar gshegs pa mang du bskyed lags so/ /bcom ldan 'das kyis bka' stsal pa/ 'od srungs khyod mos par bya/ khyod kyis khong du chud par bya ste/ gang zhig bdag nyid 'bras bu ma thob cing / so so'i skye bo yin par shes bzhin du/de rnyed pa dang / bkur sti dang / tshigs su bcad pa 'dod pas zil gyis non pas/ gzhan dag gi mdun du bdag nyid rgyun du zhugs pa yin par khas 'che bar byed cing / tha na bsod snyoms cig tsam yongs su longs spyod par byed na/ de ni de bas ches bsod nams ma yin pa'i phung po mang du bskyed de/de ni de bas ches bsod nams ma yin pa'i phung po mi bzad pa bskyed pa yin no/ /de nas bcom ldan 'das la gnas brtan 'od srungs chen pos 'di skad ces gsol to/ /bcom ldan 'das ji tsam du de bzhin gshegs pas dpe bstan pas/sdom pa'i gnas bka' stsal pa de ni ngo mtshar lags te/ bcom ldan 'das dpe rin po che de lta bu thos nas/ su zhig 'bras bu ma thob par tha na dad pas stsal pa/ chab snod gang tsam yang len par 'gyur lags/ bcom ldan 'das kyis bka' stsal pa/'od srungs de de bzhin no/ /ji skad smras pa de bzhin te/ mgo dang gos la me 'bar ba lta bus gnas par bya zhing / 'bras bu ma thob par tha na dad pas sbyin pa chu snod gang tsam yang blang bar mi bya'o/ /'od srungs mi gnyis pa ches gtum pa/ ches brlang ba/ ches drag shul gyi las dang ldan pa/ ches nyams stobs dang ldan pa/ ches stobs chen po'i shugs dang ldan pa/ gang la la zhig byung bar gyur la/ 'od srungs mi des gling bzhi pa'i 'jig rten gyi khams na/ mi gang ji snyed pa rnams dbyug pas brdegs sam/ mtshon gyis btab bam/khu tshur gyis bsnun te/ pham par byas nas nye bar spyod pa'i longs spyod dbyig dang / gser dang / nor bu dang / mu tig dang / bai DUr+ya dang / dung dang / man shel dang / byi ru dang / sa le sbram dang / dngul dang / rin po che sna tshogs dang /khang khyim dang / bzhon pa dang / gos dang / bza' ba dang / btung ba dang / mal cha dang / stan gyi nye bar spyad pa dang / yongs su spyad pa dang / dga' ba dang / rtse ba'i longs spyod ji snyed pa de dag thams cad bcom zhing phrogs te/ khyer bar gyur na/ 'od srungs 'di ji snyam du sems/gzhi de las mi de bsod nams ma yin pa mang du bskyed snyam mam/ 'od srungs kyis gsol pa/ bcom ldan 'das mang du bskyed lags so/ /bde bar gshegs pa mang du bskyed lags so/ /bcom ldan 'das kyis bka' stsal pa/ 'od srungs khyod mos par bya/khyod kyis khong du chud par bya ste/ gang zhig bdag nyid 'bras bu ma thob cing / so so'i skye bo yin par shes bzhin du/ de rnyed pa dang / bkur sti dang / tshigs su bcad pa 'dod pas zil gyis non pas/ gzhan dag gi mdun du bdag nyid lan cig phyir 'ong ba yin par khas 'che bar byed cing /tha na bsod snyoms cig tsam yongs su longs spyod par byed na/ de ni de bas ches bsod nams ma yin pa'i phung po mang du bskyed de/ de ni de bas ches bsod nams ma yin pa'i phung po mi bzad pa bskyed pa yin no/ /'od srungs gling bzhi ba'i 'jig rten gyi khams na mi gang ji snyed pa de dag thams cad kyi nye bar spyad pa'i longs spyod rnams lta zhog go/'od srungs mi gsum pa ches shin tu gtum pa/ ches shin tu brlang ba/ ches shin tu drag shul gyi las dang ldan pa/ ches shin tu nyams stobs dang ldan pa/ches shin tu stobs chen po'i shugs dang ldan pa gang la la zhig byung bar gyur la/ 'od srungs mi des stong chung ngu'i 'jig rten gyi khams na/ mi gang ji snyed cig skyes pa de dag thams cad dbyug pas brdegs sam/ mtshon gyis btab bam/ khu tshur gyis bsnun te/ pham par byas nas nye bar spyad pa'i longs spyod dbyig dang / gser dang / nor bu dang / mu tig dang / bai DUr+ya dang / dung dang / man shel dang / byi ru dang / se le sbram dang / dngul dang / rin po che sna tshogs dang / khang khyim dang / bzhon pa dang / gos dang /bza' ba dang / btung ba dang / mal cha dang / stan gyi nye bar spyad pa dang / yongs su spyad pa dang / dga' ba dang / rtse ba'i longs spyod ji snyed pa de dag thams cad bcom zhing phrogs te khyer bar gyur na/ 'od srungs 'di ji snyam du sems/ gzhi de las mi de bsod nams ma yin pa mang du bskyed snyam mam/'od srungs kyis gsol ba/ bcom ldan 'das mang du bskyed lags so/ /bde bar gshegs pa mang du bskyed lags so/ /bcom ldan 'das kyis bka' stsal pa/ 'od srungs khyod mos par bya/ khyod kyis khong du chud par bya ste/ gang zhig bdag nyid 'bras bu ma thob cing /so so'i skye bo yin par shes bzhin du/ de rnyed pa dang / bkur sti dang / tshigs su bcad pa 'dod pas zil gyis non pas/ gzhan dag gi mdun du bdag nyid phyir mi 'ong ba yin par khas 'che bar byed cing / tha na bsod snyoms cig tsam yongs su longs spyod par byed na/'di ni de bas ches bsod nams ma yin pa'i phung po mang du bskyed de/ de ni de bas ches bsod nams ma yin pa'i phung po mi bzad pa bskyed pa yin no/ /'od srungs stong chung ngu phra mo'i 'jig rten gyi khams na/ mi gang ji snyed pa de dag thams cad kyi nye bar longs spyod pa'i longs spyod rnams lta zhog gi/'od srungs mi bzhi pa ches shin tu rab tu gtum pa/ ches shin tu rab tu brlang ba/ ches shin tu rab tu drag shul gyi las dang ldan pa/ ches shin tu rab tu nyams stobs dang ldan pa/ ches shin tu rab tu stobs chen po'i shugs dang ldan pa gang la la zhig byung bar gyur la/'od srungs mi des stong gi 'jig rten gyi khams dang / lha dang / klu dang / gnod sbyin dang / dri za dang / lha ma yin dang / nam mkha' lding dang / mi'am ci dang / lto 'phye chen po dang / mi dang mi ma yin pa'i sems can gang ji snyed pa de dag thams cad dbyug pas brdegs sam/mtshon gyis btab bam/ khu tshur gyis bsnun te/ pham par byas nas nye bar spyad pa'i longs spyod dbyig dang / gser dang / nor bu dang / mu tig dang / bai DUr+ya dang / dung dang / man shel dang /byi ru dang / sa le sbram dang / dngul dang / rin po che sna tshogs dang / khang khyim dang / bzhon pa dang / gos dang / bza' ba dang / btung ba dang / mal cha dang / stan gyi nye bar spyad pa dang / yongs su spyod pa dang / dga' ba dang / rtse ba'i bde ba'i yo byad ji snyed pa de dag thams cad bcom zhing phrogs te khyer bar gyur na/'od srungs 'di ji snyam du sems/ gzhi de las mi de bsod nams ma yin pa mang du bskyed snyam mam/ 'od srungs kyis gsol pa/ bcom ldan 'das mang du bskyed lags so/ /bde bar gshegs pa mang du bskyed lags so//bcom ldan 'das kyis bka' stsal pa/ 'od srungs khyod mos par bya/ khyod kyis khong du chud par bya ste/ gang zhig bdag nyid 'bras bu ma thob cing / so so'i skye bo yin par shes bzhin du/ de rnyed pa dang bkur sti dang / tshigs su bcad pa 'dod pas zil gyis non pas/gzhan dag gi mdun du bdag nyid dgra bcom pa yin par khas 'che bar byed cing / ci nas kyang gzhan dag gis dgra bcom pa yin par shes par bya'o snyam nas/ dgra bcom pa steng du 'byung ba ltar steng du 'byung ba ltar yang byed/ dgra bcom pa dpe ston pa ltar dpe ston par yang byed la/de ltar sdig pa can gyi 'dod pa de lta bu dang ldan pas/ tha na gzhan gyis byin pa'i dad pas byin pa bsod snyoms cig tsam yongs su longs spyod par byed na/ de ni de bas ches bsod nams ma yin pa'i phung po mang du bskyed de/ de ni de bas ches bsod nams ma yin pa'i phung po mi bzad pa bskyed pa yin no//'od srungs de lta bas na gang stong gi 'jig rten gyi khams kyi sems can thams cad kyi bde ba'i yo byad thams cad 'phrog par spro ba de ni sdig pa can gyi 'dod pa de lta bu des dad pas byin pa yongs su longs spyod par byed do/ /'od srungs ngas ni sdig pa can gyi 'dod pa de las gzhan pa/rab tu byung ba'i chos shin tu tha chad/ cig shos gzhan ma mthong ngo / /'od srungs bzhi po 'di dag ni nyan thos kyi theg pa ba rab tu byung ba'i sdig pa 'dod pa yin te/ bzhi gang zhe na/ ma 'ongs pa'i sangs rgyas mthong bar 'dod pa dang /'khor los sgyur ba'i rgyal srid 'dod pa dang / gzhan yang rgyal rigs kyi rigs dag 'dod pa dang / bram ze'i rigs dag 'dod pa ste / bzhi po 'di dag ni nyan thos kyi theg pa ba rab tu byung ba'i sdig pa 'dod pa yin no/ /gang du 'ga' zhig la smon par byed na/ cher na mya ngan las 'das pa la smon par byed na yang /de yang de'i sdig pa 'dod pa nyid yin te/ de bzhin gshegs pas de las dgongs nas/ dge slong dag nga ni cher na/ phung po'i lhag ma dang bcas pa'i mya ngan las 'das pa yang rung ste/ skad cig tsam skye ba la yang bsngags pa mi brjod do zhes ston to//'od srungs bzhi po 'di dag ni dge slong gi dri ma ste/ rab tu byung bas de dag thams cad kyi thams cad du mi bya'o/ /bzhi gang zhe na/ 'jig tshogs la mngon par zhen pa dang / gang zag tu 'dzin pa dang / bslab pa las 'da' ba dang / ma 'ongs pa'i sangs rgyas mthong bar 'dod pa ste/bzhi po de dag ni dge slong gi dri ma yin te/ rab tu byung bas de dag thams cad kyi thams cad du mi bya'o/ /'od srungs dge sbyong dang / bram ze 'tsho ba yongs su dag pa/ sdig pa 'dod pa med pa/ tshul khrims dang ldan pa/ drang po'i rang bzhin can g.yo med pa/ sgyu can ma yin pa/ khengs pa ma yin pa yongs su mya ngan las 'da' ba 'dod pa rnams kyi ched du/ bla na med pa yang dag par rdzogs pa'i byang chub mngon par rdzogs par sangs rgyas pas na/ 'od srungs de dag dbugs 'byin par byed pa brjod par bya ste/de thos nas rnal 'byor pa/ rnal 'byor spyod pa dag dga' ba dang mgu bar 'gyur ro/ /'od srungs rigs kyi bu'am/ rigs kyi bu mo gang la la zhig gis gling chen po bzhi pa'i 'jig rten gyi khams na/ sems can gang ji snyed pa de dag thams cad la bskal pa'am/ bskal pa las lhag par bde ba'i yo byad thams cad kyis bkur stir byas/ bla mar byas/ ri mor byas/ mchod par byas pa bas ni/ yang dag par zhugs pa/ tshul khrims yongs su dag pa/ 'tsho ba yongs su dag pa zhig gis/ sbyin pa po gang gis dad pas byin pa/tha na chu snod gang tsam zhig bdag gir byas par gyur na/ de nyid de la bsod nams kyi phung po ches rgya cher 'gyur gyi/ gling chen po bzhi pa'i 'jig rten gyi khams kyi sems can thams cad la bskal pa'am/ bskal pa las lhag par bde ba'i yo byad thams cad kyis bkur stir byas/bla mar byas/ ri mor byas/ mchod par byas pa de la ni de lta ma yin no/ /'od srungs ji ltar mi blun po sdig pa 'dod pa dang ldan pa des gang gi drung nas chos gos sam/ bsod snyoms yongs su longs spyad pa de'i don de yongs su nyams par byed pa de ltar na /dgra bo dang / gshed ma dang / phyir rgol ba dang / phas kyi dgras kyang yongs su nyams par byed mi nus so zhes gsungs so/ /nyi ma'i snying po'i mdo las kyang / de'i nang na klu gzhan mig med pa long ba 'bras bu nyam chung ba zhes bya ba zhig yod do/ /de gsang bstod nas 'o dod bos te gsol ba/sems can rnams la thugs brtse bdag cag bskyab par gsol/ /yun ring bdag gi lus la sdug bsngal tshor ba rab mi bzad/ /srin bu sbal pa skye bo srog chags sna tshogs 'tshal bar bgyid/ /bza' ba btung ba ma mchis chab tshan nang na bdag gnas lags//bcom ldan 'das kyis bka' stsal pa/ /'khor ba 'jig rgyal bstan pa la/ /sngon gyi dge sbyong khyod gyur te/ /mkhas shing gtsang sbra spyod lam ldan/ /dben pa dag tu'ang sdig pa byed / /lhan cig gnas pa dag kyang med/ /khyod bdag ston pa 'dra bar gyur //dgra bcom rdzu 'phrul chen po yang / /khyod la slob ma rnams kyis brjod/ /rnyed dang bkur sti byung ba ni/ /khyod gcig pu yis longs spyad cing / /khyod kyis dge slong des pa mthong / /de dag la ni mi snyan brjod/ /lhan cig gnas der mi dgar gnas//khyod ni tshe rabs stong dag tu/ /nged kyi zas su gyur cig ces/ /de lta bu yi sems bskyed do/ /las kyi rnam par smin pa des/ /'dir yang khyod ni lag 'gror skyes/ /khyod rang gi yang lhan cig gnas/ /phyi phyir za bar byed pa yin/ /chu tshan nang na gnas pa dang / / long bar de yis gyur pa yin/ /kun tu 'bar ba'i lcags dang zangs/ /phyis kyang dmyal bar za bar 'gyur/ /stobs med yid ni mi dga' bas/ /klu dbang kun gyi nang na du/ /nyes pa so sor bshags byas na/ /sdug bsngal rnams las yongs su grol/ /zhes gsungs so//'od srungs kyis zhus pa'i mdo las kyang / 'od srungs chos bzhi dang ldan na/ sdig pa'i dge sbyong du rig par bya ste/ bzhi po gang dag zhe na/ lus kyi tshul 'chos par 'gyur ba dang / ngag gi tshul 'chos par 'gyur ba dang / sems kyi tshul 'chos par 'gyur ba dang /spyod lam gyis tshul 'tshos par 'gyur ba ste/ bzhi po 'di dag go/ /de la lus kyi tshul 'chos pa gang zhe na/ dal gyis 'gro ba'i tshul 'chos par 'gyur ba dang / mgo smad pa'i tshul 'chos par 'gyur ba dang / gnya' shing gang tsam du blta ba'i tshul 'chos par 'gyur ba dang /ched du byas nas chos gos 'chang ba dang / len pa'i tshul 'chos par 'gyur ba dang / dgon par gnas pa'i yon tan mi tshol zhing dgon par gnas pa'i tshul 'chos par 'gyur ba dang / bsod snyoms kyi 'du shes mi spong zhing bsod snyoms la rgyu ba'i tshul 'chos par 'gyur ba dang /ngo tsha shes pa dang khrel yod pa'i rjes su mi 'jug cing / phyag dar khrod kyi gos 'chang ba'i tshul 'chos par 'gyur ba dang / rten cing 'brel bar 'byung ba la mi 'jug cing 'bras bu dang / rtswa dang shing drung na gnas pa'i tshul 'chos par 'gyur ba dang / chos kyi bdud rtsi'i sman mi tshol zhing bkus te bor ba'i sman gyi tshul 'chos par 'gyur ba ste/'od srungs 'di dag ni lus kyi tshul 'chos par brjod do/ /bdag che ge mos yongs su shes/ bdag che ge mos mgron du gnyer/ bdag gis ni ji tsam 'dod pa rnyed do/ /bdag gis rnyed pa gus par byas te rnyed do//bdag gis gya nom pa rnyed do/ /bdag gis mang du rnyed do/ /bdag gis mang du thos so/ /bdag ni tshul khrims dang ldan zhing dge ba'i chos can no/ /bdag ni mgron du gnyer bar 'os pa'o/ /bdag ni lan du mar mgron du gnyer 'os pa'o//bdag ni nus pa skal pa dang ldan pa shin tu stobs dang ldan pa'o/ /bdag ni don dang don rnam par nges pa la mkhas pa'o/ /che ge mo zhig gis bdag la 'di skad du smras te/ bdag gis tshar bcad cing spobs pa med par byas so/ /bdag gis 'khor mngon par mgu bar byas so//bdag gis legs so zhes bya ba rnyed do/ /bdag gis de las gos rnyed do/ /bdag ni yang nas yang du 'ong bar bya ba'i phyir mgron du gnyer to/ /'od srungs de ltar rnam par ma dpyad pa'i sems dang ldan pa'i ngag gis brjod pa gang ci yang rung ba de dag thams cad ni mngon par mi brtson pa rnams kyi ngag gi tshul 'chos pa yin gyi /mngon par brtson pa rnams kyi ni ma yin te/ 'di ni ngag gi tshul 'chos pa'o/ /'od srungs de la sems kyi tshul 'chos pa gang zhe na/ chos gos dang / bsod snyoms dang / mal stan dang / nad kyi rkyen sman dang / yo byad rnams rnyed par gyur cig snyam du gang sems kyis rtog cing / tshig tu nga la cung zad kyang mi dgos so zhes smra ba ste/ gang sems kyis rnyed pa 'dod cing / tshig gis 'dod pa chung bar smra ba 'di ni sems kyi tshul 'chos pa zhes brjod do/ /de la 'di skad du bka' stsal te /rnyed ldan gyur cig snyam du sems kyis sems byed cing / /tshig gis bdag la 'gas kyang dgos pa med par smra/ /'di na 'gas kyang bdag la don med ces smra ba/ /yang dag min pa'i ngo bo'i rgyags pas chags par 'gyur/ /de ni nam yang bde ba rnyed ldan 'gyur ma yin//lha dang klu rnams lha min ldan pa dag kyang ni/ /sems dang bsam pa tshul 'chos can gyis slu bar byed/ /nyams pa'i sems kyis nams kyang dag par 'gyur ba min/ /'di ni de bzhin gshegs pa kun gyis mkhyen par 'gyur/ /'od srungs de ltar na tshul ma yin pa spyad pa'i spyod pa ya nga ba de lta bu'i ngo bo 'dis chos dang mi ldan pa/sdig pa'i dge sbyong dmyal ba dang / dud 'gro dang / gshin rje'i 'jig rten du 'gro bar byed par 'gyur ro zhes gsungs so/ /klu'i rgyal po rgya mtshos zhus pa'i mdo las kyang / zas bzhi po 'di dag ni dmyal ba dang /dud 'gro dang / gshin rje'i 'jig rten du 'gro bar byed par 'gyur te/ bzhi po gang zhe na/ grogs po dag zas gang srog gcod pa dang / srog la 'tshe ba dang / srog 'joms pas longs spyod par byed de grogs po dag zas dang po 'dis ni dmyal ba dang / dud 'gro dang /gshin rje'i 'jig rten du 'gro bar byed par 'gyur ro/ /grogs po dag gzhan yang zas gang ma byin par len pa nyid dang / gzhan gyi longs spyod rnam par bcom pa nyid dang / dbyug pa dang / ral gri dang / mtshon gyis btab pa nyid kyis longs spyod pa ste/ gnyis pa 'di dang /grogs po dag gzhan yang zas gang tshul 'chos pa dang / kha gsag nyid dang / gzhan ches gzir ba nyid dang / spyod lam dag par nye bar ston pa nyid dang / tshul khrims nyams pa nyid dang / spyod pa nyams pa nyid dang / lta ba nyams pa nyid dang / yang dag pa ma yin pa'i yon tan gyis longs spyod pa ste/gsum pa 'di dang / grogs po dag gzhan yang gang ston pa ma yin par ston par khas 'che ba nyid dang / yang dag pa ma rtogs par yang dag par rtogs par khas 'che ba nyid dang / dge sbyong ma yin par dge sbyong du khas 'che ba nyid kyis longs spyod par byed pa ste/zas bzhi po 'dis ni/ dmyal ba dang / dud 'gro dang / gshin rje'i 'jig rten du 'gro bar byed par 'gyur ro/ /grogs po dag ngas zas bzhi po 'di dag gcad par bya ba'i phyir chos bstan par bya ste / grogs po dag lus gso bar bya ba'i phyir srog gcad par mi bya'o//de ci'i phyir zhe na/ srog ni sems can thams cad la phangs pa dang / yid du 'ong ba'o/ /grogs po dag de'i phyir bdag bsrung bar bya ba'i phyir dang / 'jig rten pha rol bsrung bar bya ba'i phyir dang / sems can thams cad kyi bde ba bsrung bar bya ba'i phyir mkhas pas srog gi phyir yang sdig pa mi bya zhing bya ba ma yin pa mi bya'o zhes gsungs so//chos smra ba po la skyon 'dogs pa'i dgongs pa bstan pa la/ yid gnyis yang dag par 'joms pa'i mdo las kyang / de la bcom ldan 'das kyis tshe dang ldan pa 'od srungs chen po la bka' stsal pa/'od srungs gang du 'di lta bu'i dge slong dag gis byang chub don du gnyer ba/ skye bo mang po la brtse ba can rnams la gshe bar byed/ spyo bar byed/ tshangs par spyod pa ma yin pa 'khrig pa'i chos kyis skur bar byed/ de lta bu'i rang bzhin can gyi dge slong gi drung nas skye bo mang po 'byed par byed pa skyes bu dam pa ma yin pa de dag gi spyod pa dag la ltos/'od srungs sngon byung ba 'das pa'i dus na bskal pa grangs med pa'i yang ches grangs med pa/ yangs pa tshad med pa/ bsam gyis mi khyab pa dag na/ de'i tshe de'i dus na/gang khyab 'jug gling 'gro zhes bya ba'i de bzhin gshegs pa dgra bcom pa yang dag par rdzogs pa'i sangs rgyas zhes bya ba nas/ sangs rgyas bcom ldan 'das zhes bya ba'i bar du gyur pa 'jig rten du byung bar gyur to/ /'od srungs de bzhin gshegs pa de 'tsho zhing gzhes pa na/rnam par sgrogs pa'i rgyal po zhes bya ba'i dge slong mang du thos pa/ sna tshogs pa gtam par byed pa spobs pa bzang ba/ de grong dang / grong khyer dang / grong rdal dang / yul 'khor dang / rgyal po'i pho brang dag tu chos ston par gyur cing / chos ston pa la snyom las med par gyur to//chos gos dang / bsod snyoms dang / ma la stan dang / 'tsho ba'i rkyen sman dang / yo byad rnams rnyed par yang gyur to/ /yang de'i tshe legs thob ces bya ba'i dge slong zhig byung bar gyur to/ /de rnam par sgrogs pa'i rgyal po la gshe bar byed/ spyod par byed/ tshangs par spyod pa ma yin pa 'khrig pa'i chos kyis skur bar byed/ phyogs dang phyogs mtshams su mi snyan pa dang / bsngags pa yang ma yin pa rgyas par byed par gyur to/ /yang de'i tshe/ byang chub sems dpa' brtson 'grus chen po zhes bya ba byung bar gyur to/ /des mi snyan pa dang /bsngags pa ma yin pa de thos nas sems ma rangs pas/ chos nyan pa'i phyir dong bar ma gyur/ gzhan srog chags stong phrag brgya tshang ba yang ma song ngo / /de dag kyang ma song bas mtho ris su skye ba dang / dal ba rnyed pa dang / 'bras bu thob pa las yongs su nyams par gyur to//byang chub sems dpa' brtson 'grus chen po ni bzod pa las yongs su nyams par gyur cing / lus zhig nas shi ba'i 'og rol du ngan 'gro ngan song log par ltung ba dmyal ba du 'bod chen por skyes te/ de dang de dag der lo bye ba phrag drug tu 'tshed par gyur to/ / byang chub sems dpa' brtson 'grus chen po ni dmyal ba chen po tsha bar skyes shing / der yun ring por mi gnas te/ de thang cig gis ldang bar gyur to/ /'od srungs yang dge slong legs thob byang chub sems dpa' de la skur pa btab nas/ sems can dmyal ba chen po mnar med par skyes so//gang yang 'dis srog chags stong phrag de dag phye zhing / mi dge ba'i rtsa ba des sems can re re'i rgyus lo bye ba tshang bar gan rkyal du thur ma brgya phrag mang pos phug cing / sdug bsngal gyi tshor ba nyams su myong bar gyur to/ /lo bye ba yongs su tshang bar kha sbub tu dang /lo bye ba yongs su tshang bar g.yas logs su dang / lo bye ba yongs su tshang bar g.yon logs su dang / lo bye ba yongs su tshang bar 'greng ba nyid dang / lo bye ba yongs su tshang bar spyi'u tshugs nyid du thur ma brgya phrag mang pos phug cing sdug bsngal gyi tshor ba nyams su myong bar gyur te/gang yang byang chub sems dpa' de la skur pa btab pa dang / byang chub sems dpa' de phye zhing / mi dge ba'i rtsa ba des de bskal pa bye ba brgya stong du dmyal ba nas shi 'phos te dmyal ba rnams su skyes so/ /de ci'i phyir zhe na/ gang chos smra ba po'i dge slong rnams kyi bsngags pa ma yin pa rgyas par bya ba'i phyir/mngon par brtson pa de ni 'od srungs de bzhin gshegs pa'i bstan pa nub par bya ba'i phyir zhugs pa yin no/ /'od srungs chos smra ba po'i dge slong la re zhig bden pa'i bsngags pa ma yin pa yang rgyas par mi bya na yang dag pa ma yin pa ma rtogs pa bzhin du sbyar nas lta ci smos/de ci'i phyir zhe na/ 'od srungs de lta bu'i ngo bo'i dge slong rnams ni nyams pa gsum dang lhan cig mi gnas so/ /'od srungs de'i tshe de'i dus na dge slong rnam par sgrogs pa'i rgyal po chos smra bar gyur pa de khyod de ltar gzhan zhig yin snyam du sems na/'od srungs khyod kyis de ltar ni blta bar mi bya'o/ /de ci'i phyir zhe na/ nga nyid de'i tshe de'i dus na/ dge slong rnam par sgrogs pa'i rgyal po chos smra bar gyur pa der gyur to/ /'od srungs khyod de'i tshe de'i dus na/gang dag dge slong legs rnyed kyis spyo ba byang chub sems dpa' brtson 'grus chen por gyur pa de ni gzhan yin snyam du sems na/ 'od srungs khyod kyis de ni de ltar blta bar mi bya'o/ /de ci'i phyir zhe na/ byang chub sems dpa' byams pa 'di nyid de'i tshe de'i dus na/ byang chub sems dpa' brtson 'grus chen por gyur to//'od srungs de'i tshe de'i dus na dge slong legs rnyed du gyur pa de ni/ khyod de ltar gzhan zhig yin snyam du sems na/ 'od srungs khyod kyis de ltar blta bar mi bya'o/ /de ci'i phyir zhe na/ lha sbyin 'di nyid de'i tshe de'i dus na legs rnyed ces bya ba sdig pa'i dge slong du gyur to//'od srungs de'i phyir khyod mos par bya khyod kyis khong du chud par bya ste/ ji ltar yang de don du gnyer ba dang / phan pa 'dod pa ni/ dper na dge slong legs rnyed ltar dge ba'i bshes gnyen snying brtse ba can la phyir phyogs par mi 'gyur ro zhes gsungs so//chos thams cad 'byung ba med par bstan pa'i mdo las kyang / rigs kyi bu lha sbyin dge ba'i rtsa ba de lta bu dang ldan pa la ltos/ rigs kyi bu lha sbyin ni mi chen po'i mtshan sum cu dang ldan par gyur to/ /de lta bu'i dge ba'i rtsa ba dang ldan pa de yang chos kyi tshul 'di mi shes pas/dge ba'i rtsa ba de dag thams cad yongs su chad nas/ mnar med pa'i sems can dmyal ba chen por skyes te/ rigs kyi bu rnam grangs des kyang / ji ltar chos kyi tshul 'di khong du ma chud pa rnams kyi dge ba'i rtsa ba chad par 'gyur bar rig par bya'o/ / rigs kyi bu sngon 'das pa'i dus bskal pa grangs med pa shin tu bgrang ba las 'das pa/ tshad med pa/ yangs pa/ gzhal du med pa de'i pha rol/ de'i yang pha rol gyi ches pha rol zhig gi dus na/ de bzhin gshegs pa dgra bcom pa yang dag par rdzogs pa'i sangs rgyas ri rab ltar mngon par 'phags pa'i rgyal po zhes bya ba rig pa dang rkang par ldan pa/bde bar gshegs pa/ 'jig rten mkhyen pa/ bla na med pa/ skyes bu 'dul ba'i kha lo sgyur ba/ lha dang mi rnams kyi ston pa/ sangs rgyas bcom ldan 'das 'jig rten du byung ste/ de bzhin gshegs pa de'i sku tshe'i tshad ni lo bye ba khrag khrig brgya stong dgu bcu rtsa dgur gyur to/ /'jig rten gyi khams de'i ming ni gser mdog 'od 'phro ba zhes bya bar gyur te / sangs rgyas kyi zhing de ni gser gyi rgyu las grub par gyur to/ /sems can rnams kyang gang 'di nyan thos kyi theg pa dang /rang sangs rgyas kyi theg pa dang / byang chub sems dpa'i theg pa dang / theg pa gsum po nyid kyis mya ngan las 'da' bar gyur te/ de bzhin gshegs pa de'i nyan thos kyi tshogs dang po ni/ dge slong bye ba khrag khrig brgya stong phrag brgyad cu thams cad kyang dgra bcom pa/zag pa zad pa/ khur bor ba/ rang gi don rjes su thob pa/ srid par kun tu sbyor ba/ yongs su zad pa/ bka' yang dag pas sems shin tu rnam par grol ba/ sha stag gi tshogs su gyur to/ /tshogs gnyis pa ni/ dge slong bye ba khrag khrig brgya stong bdun cu'i tshogs su gyur to//tshogs gsum pa ni/ dge slong bye ba khrag khrig drug cu'i tshogs su gyur to/ /tshogs bzhi pa ni/ dge slong bye ba khrag khrig brgya stong phrag lnga bcu thams cad kyang dgra bcom pa/ zag pa zad pa/ khur bor ba/ rang gi don rjes su thob pa/ srid par kun tu sbyor ba/yongs su zad pa/ bka' yang dag pas sems shin tu rnam par grol ba sha stag gi tshogs su gyur to/ /dge slong ma'i tshogs ni de'i nyis 'gyur du gyur to/ /dge bsnyen gyi tshogs dang / dge bsnyen ma'i tshogs kyang de'i nyis 'gyur nyis 'gyur du gyur to/ / byang chub sems dpa'i tshogs kyang de'i nyis 'gyur du gyur to/ /thams cad kyang phyir mi ldog pa/ mi skye ba'i chos kyi bzod pa dang ldan pa/ ting nge 'dzin gyi tshul mngon par sgrub pa la mkhas pa/ sgo mtha' yas pa'i gzungs rab tu thob pa phyir mi ldog pa'i chos kyi 'khor lo bskor ba sha stag gi tshogs su gyur na/byang chub sems dpa'i theg pa la gsar du zhugs pa rnams kyi tshogs lta smos kyang ci dgos te/ der ni rang sangs rgyas kyi theg pa pa yang tshad med par gyur to/ /rigs kyi bu de ltar de'i tshe bcom ldan 'das de'i 'khor gyi tshogs ni tshad med par 'dus par gyur to//'jig rten gyi khams gser gyi mdog 'od 'phro ba de na shing ngam/ ldum bu gang ci yod pa thams cad kyang rin po che'i rgyu las grub par gyur te / shing de dag las kyang 'di lta bu'i sgra gang 'di stong pa nyid kyi sgra dang / mtshan ma med pa'i sgra dang /smon pa med pa'i sgra dang / skye ba med pa'i sgra dang / 'gag pa med pa'i sgra dang / dngos po med pa'i sgra dang / mtshan ma med pa'i sgra dang / de lta bu'i sgra dag 'byung bar 'gyur te/ sgra de dag byung bas sems can de dag gi sems rnam par grol bar gyur to//de bzhin gshegs pa de yongs su mya ngan las 'das nas lo stong du dam pa'i chos gnas par gyur te/ de phyin chad sgra de dag kyang shing de dag las 'byung ba med par gyur to / /rigs kyi bu de bzhin gshegs pa dgra bcom pa yang dag par rdzogs pa'i sangs rgyas ri rab ltar mngon par 'phags pa'i rgyal po des yang dge slong chos smra ba spyod pa rnam par dag pa zhes bya ba dam pa'i chos yongs su 'dzin par bskos nas/yongs su mya ngan las 'das par gyur to/ /de'i tshe dge slong spyod pa'i blo gros zhes bya ba zhig byung ste / de ni tshul khrims kyi phung po shin tu rnam par dag pa dang ldan zhing /'jig rten pa'i mngon par shes pa lnga thob par gyur te/ 'dul ba'i sde snod la'ang mngon du byang bar gyur to/ /dge slong de ni dka' thub kyi mchog dang ldan/ ngan ngon la mos pa 'khor gyi nang na spyod pa ste/ des gtsug lag khang cig brtsigs nas de na gnas shing de'i 'khor du gyur pa rnams kyang /tshul khrims kyi phung po shin tu dag pa la bkod par gyur te/ sbyangs pa'i yon tan gyi sdom pa la mos par gyur to/ /dge slong de ni brtson 'grus brtsams shing rtag par byang chub kyi sems la gnas par gyur to//byang chub sems dpa' gzhan dag kyang / spyod lam de nyid la yang dag par bskul te/ dmigs pa can gyi lta ba la yang dag par bskul lo/ /de'i 'du byed thams cad mi rtag pa zhes bya bar 'dzin du bcug go/ /'du byed thams cad sdug bsngal zhes bya bar 'dzin du bcug go//'du byed thams cad bdag med ces bya bar 'dzin du bcug go/ /dge slong de ni ting nge 'dzin la mkhas par gyur to/ /byang chub sems dpa'i spyod pa la mkhas pa ma yin zhing dge ba'i rtsa ba dang ldan par gyur to/ /dge slong chos smra ba spyod pa rnam par dag pa de ni/ sems can rnams kyi dbang po mchog dang tha ma shes pa la mkhas par gyur te /de'i 'khor du gyur pa ji snyed pa de dag kyang / sbyangs pa'i yon tan gyi sdom pa lhur len par gyur te/ mi dmigs pa'i bzod pa can thabs la mkhas pa dag tu gyur to/ /rigs kyi bu de nas chos smra ba spyod pa rnam par dag pa 'khor dang bcas te/dge slong spyod pa'i blo gros gang na gnas pa'i gtsug lag khang der phyin nas de na gnas par gyur te/ de gtsug lag khang de nas yang dang yang sems can rnams la snying brtse ba'i phyir/ grong du 'gro zhing de dag tu zas kyi bya ba byas nas phyir 'ong bar gyur to//des de dag tu rigs brgya stong du ma dad par byas par gyur to/ /de'i 'khor ji snyed pa de dag kyang tshul la mkhas par gyur to/ /de dag kyang de dag tu dong zhing sems can rnams la chos ston te/ de dag gis kyang srog chags brgya stong mang po bla na med pa yang dag par rdzogs pa'i byang chub tu bkod par gyur to//dge slong spyod pa'i blo gros kyi 'khor de dag ni bsam gtan lhur len cing grong dag tu yang 'khor bar mi 'dong ngo / /de nas dge slong spyod pa'i blo gros kyis byang chub sems dpa' gzhan dag la ma dad pa'i sems bskyed nas/ de dag ni grong du yang dang yang 'jug go zhes des gaN+DI brdungs te/dge slong gi dge 'dun bsdus nas bca' ba byas pa / bdag cag gi nang nas sus kyang grong du 'jug par mi bya'o/ /khyod ni shes bzhin med par spyod pa yin te/ nyung ngu smra ba ma yin gyis khyod grong du 'gro bas kyang ci zhig bya ste/dgon pa la gnas pa ni/ bcom ldan 'das kyis gnang zhing bsngags pa yin gyi khyod grong du ma 'dong bar bsam gtan gyi bde bas rnam par spyod cig ces bsgo'o/ /rigs kyi bu de nas spyod pa rnam par dag pas de'i 'khor gyis de zer ba ltar ma mnyan te / yang dang yang grong dag tu 'dong bar gyur to//rigs kyi bu de nas dge slong de dag nam grong nas phyir 'ongs par gyur pa de'i tshe/ dge slong spyod pa'i blo gros kyis yang gaN+DI brdungs nas/ dge slong gi dge 'dun bsdus te/ 'di skad du gal te da phyin chad khyod grong du 'dong dang / khyod gtsug lag khang 'di na ma gnas zhes bsgo'o//rigs kyi bu de nas dge slong chos smra ba spyod pa rnam par dag pas/ dge slong de'i sems bsrung ba'i phyir rang gi 'khor rnams bos te 'di skad du/ khyed grong du su yang ma 'dod cig ces smras so/ /de nas de'i tshe dge slong de dag gis sems can gang ji snyed cig smin par byas pa de dag dge slong de dag dang ma phrad pas/shin tu mi dga' bar yang gyur/ dge ba'i rtsa ba yang yongs su 'gribs par gyur to/ /rigs kyi bu de nas dge slong chos smra ba spyod pa rnam par dag pa zla ba gsum po de dag 'das nas/ gtsug lag khang de nas gtsug lag khang gzhan du 'phos nas/grong dang / grong khyer dang / ljongs dang / yul dang / rgyal po'i pho brang 'khor dag tu 'gro zhing / sems can dag la chos ston par gyur to / /rigs kyi bu de nas dge slong spyod pa'i blo gros kyis chos smra ba spyod pa rnam par dag pa yang dang yang du 'gro ba yang mthong /de'i 'khor rnams kyang spyod lam tha mal pa can du mthong nas des kyang de la ma dad pa'i sems bskyed par gyur te/ dge slong 'di ni tshul khrims 'chal pa can/ tshul khrims log pa can te/ 'dis byang chub ga la 'thob / dge slong 'di'i byang chub ni rgyang ring ngo //dge slong 'di ni 'du 'dzir gnas pa'o zhes 'gro ba mang po dag la de skad ces brjod do/ /rigs kyi bu de nas dus gzhan zhig na dge slong spyod pa'i blo gros de 'chi ba'i dus byas par gyur nas/ de de ltar 'chi ba'i dus byas pa dang / las de'i rnam par smin pas mnar med pa'i sems can dmyal ba chen por lhung ngo //de bskal pa bye ba khrag khrig dgu bcu rtsa dgur sems can dmyal ba chen por sdug bsngal gyi tshor ba myong bar gyur nas/ tshe rabs drug cur mi snyan par brjod pa thob par gyur to/ /tshe rabs stong phrag sum cu rtsa gnyis su rab tu byung ba las phyir babs par gyur to//las kyi sgrib pa de nyid kyi lhag mas/ de bzhin gshegs pa dgra bcom pa yang dag par rdzogs pa'i sangs rgyas 'od 'phro dri ma med pa'i gsung rab la rab tu byung bar gyur to/ /de rab tu byung nas lo bye ba brgya stong phrag drug tu mgo'i thod la me 'bar ba ltar rnam par spyad kyang /mthun pa'i bzod pa tsam yang ma thob ste/ tshe rabs brgya stong mang por dbang po rtul por gyur to/ /rigs kyi bu de'i tshe de'i dus na/ dge slong chos smra ba spyod pa rnam par dag pa zhes bya ba de gzhan yin par sems na de ltar mi blta ste/de ci'i phyir zhe na/ de bzhin gshegs pa mi sgul ba ni/ de'i tshe de'i dus na dge slong chos smra ba spyod pa rnam par dag pa zhes bya bar gyur to/ /rigs kyi bu de'i tshe de'i dus na/ dge slong chos smra ba spyod pa'i blo gros zhes bya ba de gzhan zhig yin pa snyam du sems na de snyam du mi blta ste/de ci'i phyir zhe na/ nga ni dge slong chos smra ba spyod pa'i blo gros zhes bya bar gyur te/ nga yang de lta bu'i thabs phra mos de la ma dad pa'i sems bskyed de/ las kyi sgrib pa mngon par 'du byas pas sems can dmyal ba dag tu lhung bar gyur te/ rigs kyi bu de ltar phra ba ni las kyi sgrib pa yin gyi /rigs kyi bu las kyi sgrib pa de lta bu mi 'dod pa de dag gis gzhan gyi spyod pa la khong khro bar mi bya'o/ /de'i spyod pa thams cad la yid ches par bya'o/ /'di snyam du pha rol gyi sems ni bdag gis mi shes te/ sems can gyi spyod pa ni shes par dka'o//de snyam du sems bskyed par bya'o/ /don gyi dbang de gzigs nas de bzhin gshegs pas 'di skad du chos bstan te/ gang zag gis gang zag gi tshod gzung bar mi bya'o/ / gang zag gis gang zag la tshod bzung na/ rma 'byung bar 'gyur te/nga'am gzhan yang nga dang 'dra ba dag gis gang zag la tshod bzung ba'o/ /rigs kyi bu su bdag bsrung bar 'dod pa des gzhan su'i spyod pa la yang brtag par mi bya'o/ /de dag la 'di ni 'di 'dra'o / /'di ni 'di 'dra'o zhes dpya bar mi bya'o/ /nyin mtshan du sangs rgyas kyi chos la brtson par bya'o//rigs kyi bu chos la bsgom pa'i yid kyis bsam pa thag pa nas yang dag par zhugs pa'i phyir/ byang chub sems dpa' ni gzhan la dpya bar brtson par mi gnas so/ /rigs kyi bu gal te stong gsum gyi stong chen po'i 'jig rten gyi khams na/sems can gang ji snyed cig yod pa de dag thams cad byang chub sems dpa' la la zhig gis dge ba bcu'i las kyi lam la bkod pa bas/ byang chub sems dpa' gang gcig pu dben par 'dug ste/ chung ngu na se gol gtogs pa tsam du'ang chos thams cad tshul gcig par yid ches shing /tha na chung ngu na 'dri ba'am/ dpyad pa'am/ lung 'bogs pa'am/ kha ton bya ba'i phyir gnas na 'di ni de bas ches bsod nams mang du 'phel lo/ /de ci'i phyir zhe na/ rigs kyi bu tshul 'di khong du chud pas/ byang chub sems dpa' rnams las kyi sgrib pa thams cad rnam par dag pa 'thob bo//sems can thams cad la chags pa dang / khong khro ba dang bral bar gyur to/ /rnam pa thams cad mkhyen pa yang myur du 'thob par 'gyur ro zhes gsungs so/ /sangs rgyas spong ba'i mdo las kyang / de nas bcom ldan 'das kyis/byang chub sems dpa' sems dpa' chen po bag tshab med pa la gnas pa la 'di skad ces bka' stsal to/ /rigs kyi bu byang chub sems dpa' sems dpa' chen po bcu po 'di dag thams cad kyis ni sangs rgyas spong bar byas so/ /gsol pa/ bcom ldan 'das sangs rgyas spong pa zhes bgyi ba de gang lags/bka' stsal pa/ rigs kyi bu sngon byung ba 'das pa'i dus na bskal pa sum cu 'das pa de'i tshe de'i dus na/ 'jig rten gyi khams smig rgyu can du de bzhin gshegs pa rnam par gzigs pa'i nga ro can zhes bya ba byung bar gyur pa de'i tshe/ de bzhin gshegs pa de yongs su mya ngan las 'das pa'i phyi ma'i dus phyi ma'i tshe na/rigs kyi bu bcu po 'di dag shing sA la chen po lta bu'i gzhon nur gyur to/ /de'i tshe rigs kyi bu bcu po 'di dag thams cad kyis gtsug lag khang lnga brgya byed du bcug go/ /gtsug lag khang re rer yang dge slong stong stong gnas par gyur to//rigs kyi bu de'i tshe chos smra ba spobs pa brtsegs pa zhes bya ba gzungs thob pa zhig chos ston no/ /rigs kyi bu chos smra ba spobs pa brtsegs pa de chos kyi stan la 'dug pa la sangs rgyas lnga stong spobs pa grub par mdzad de/ lha dung phyur phrag brgyad kyang /lus yongs su sbyang ba'i phyir brtson par gyur to/ /de'i chos bshad pa gcig gis srog chags bdun khri bla na med pa yang dag par rdzogs pa'i byang chub las phyir mi ldog par gyur to/ /srog chags khri ni rgyun du zhugs pa'i 'bras bu thob bo/ /rigs kyi bu de'i tshe rgyal po zla bas byin pa zhes bya ba zhig byung ngo //des chos la gus pas chos smra ba de la mchod pa'i phyir bud med lnga brgya dang / glu dbyangs dang rol mo byas so/ /dge slong de la rin po che'i me tog sna tshogs kyis kyang mngon par gtor te/ tsan+dan gyi byug pas kyang byugs so//ras bcos bu lnga brgyas kyang bkab bo/ /bde ba'i rim gro thams cad kyis mchod pa 'di lta ste/ chos smra ba la mchod pa'i mchog gis zhag bdun du rim gro byas so/ /de nas dge slong de la khyim bdag gi bu de dag gis 'chal ba'i tshul khrims kyis glengs so/ / las de'i rnam par smin pas de dag lo dgu khrir sems can dmyal ba rnams su skyes so/ /tshe rabs lnga brgyar ni mi rnams kyi nang du za ma dang kla klo dang / log par lta ba'i khyim rnams su skyes so/ /tshe rabs drug brgyar ni dmus long dang / lce med par gyur to/ /tshe rabs bdun brgyar ni rab tu byung nas/ji srid 'tsho'i mthar thug gi bar du gzungs ma thob par 'chi ba'i dus byas te/ las kyi sgrib pa de nyid kyis rigs kyi bu de dag bsgribs so/ /rigs kyi bu de lta bas na khyod mos par bya'o/ /khyod kyis khong du chud par bya'o/ chos kyi rnam grangs 'di thos nas/ chos smra ba la mngon sum du mthong yang 'chal ba'i tshul khrims kyis brjod par mi bya na thos pas lta ci smos/ rigs kyi bu gang zhig sems can thams cad kyi mig 'byin par byed pa bas ni/ gang zhig chos smra ba la gshe ba'i bsam pas lta bar byed na/de ni de bas ches kha na ma tho ba'i las che ba yin no/ /gang zhig sems can thams cad 'ching bar byed la/ gang zhig chos smra ba mthong na rgyab kyis phyogs te/ 'dug par byed na bsod nams ma yin pa 'di la bsod nams ma yin pa snga ma des brgya'i char yang nye bar mi 'gro/stong gi cha dang / 'bum gyi cha dang / grangs dang / bgrang ba dang / dpe dang / rgyur yang nye bar mi 'gro'o/ /de ci'i phyir zhe na/ gang chos smra ba la skur pa 'debs pa des ni sangs rgyas la skur pa btab par 'gyur ba'i phyir ro/ /sangs rgyas la bsnyen bkur bya bar 'dod pas chos smra ba la bsnyen bkur bya'o//sangs rgyas la mchod par 'dod pas/ chos smra ba la mchod par bya'o/ /sangs rgyas la phyag 'tshal bar 'dod pas chos smra ba la phyag bya'o/ /de ci'i phyir zhe na/ thams cad mkhyen pa nyid ni byang chub sems dpa' las byung ba'i phyir dang /sangs rgyas bcom ldan 'das rnams ni byang chub sems dpa' las byung ba'i phyir ro/ /gang la brten te byang chub sems dpa'i byang chub tu sems bskyed pa de la brten nas/ de ni nyon mongs pa rnams kyis 'dod pa'i longs spyod la gnas par brjod par mi bya/de ni nam du yang tshangs par spyod pa la gnas par brjod par mi bya/ de ni gzugs med pa'i ting nge 'dzin la snyoms par zhugs kyang gzugs med par nye bar 'gro bar brjod par mi bya'o/ /de ci'i phyir zhe na/ byang chub sems dpa' de ni nyon mongs pa'i dbang gis mi skye ste/ byang chub sems dpa' ni smon lam gyi dbang gis skye ba'i phyir ro/ /de ni byis pa'i spyod pa thams cad las grol ba'i phyir/ gang byang chub sems dpa'i nyon mongs pa rnams ston par 'dod pa des ni/ nam mkha'i khams kyi gzugs bstan par 'dod du zad do/ /rigs kyi bu 'di lta ste/dper na klu thams cad klu nyid du spyir song ba yin pas klu'i rgyal po ma dros pa ni klu'i bgrang bar yang 'gro la/ klu'i nyes pa gsum gyis kyang gos par mi 'gyur ro/ /gsum gang zhe na/ mgo la bye tshan mi 'bab pa dang / skye ba po'i lus dang lhan cig tu kun tu mi gnas pa dang /de la nam mkha' lding gi 'jigs pa mi 'byung ba ste/ rigs kyi bu klu'i skyon gsum po 'di dag gis gos par mi 'gyur ro/ /rigs kyi bu de bzhin du byang chub sems dpa' sems dpa' chen po rtsed mo dang / dga' ba thams cad nyams su myong bar byed kyang srid pa gsum du 'dod pa dang /nyon mongs pa dang / sdug bsngal rnams kyis zil gyis mi non par brjod par bya'o/ /rigs kyi bu 'di lta ste dper na/ sems can gyi rigs nya zhes bya ba yod de/ de ni chu la spyod chu la lta yang / der 'chi ba'i dus byed par mi 'gyur ro//rigs kyi bu de bzhin du byang chub sems dpa' sems dpa' chen po 'khor ba na spyod kyang / de nyid du byis pa'i spyod pa la gnas kyang / ye shes kyi spyod pa 'tshol lo/ /chos yang dag par blangs pas kyang rmongs par mi 'gyur ro/ /byis pa dang lhan cig tu gnas pas/srid pa gsum gyi sdug bsngal nyams su myong bar yang mi 'gyur te/ de bas na byang chub sems dpa' sems dpa' chen po bdag bsrung bar bya'o zhes gsungs so/ /rnam par 'thag pa thams cad bsdus pa'i mdo las kyang / mi pham pa sngon byung ba 'das pa'i dus bskal pa grangs med pa'i yang ches grangs med pa de'i tshe de'i dus na/de bzhin gshegs pa dgra bcom pa yang dag par rdzogs pa'i sangs rgyas dri ma med pa'i 'od 'phro las byung ba'i grags pa zhes bya ba 'jig rten du byung ste/ des lo khrag khrig brgyad cur sems can rnams la chos bstan to//de'i gsung rab la dge slong 'tsho ba yongs su dag pa zhes bya ba chos smra ba/ gtam sna tshogs smra ba/ skye bo mang po la yang dag par bstan pa/ skye bo mang po la yang dag par 'dzin du 'jug pa/ skye bo mang po la yang dag par gzengs bstod pa/skye bo mang po la yang dag par dga' bar byed pa byung nas/ de la de bzhin gshegs pa dri ma med pa'i 'od 'phro las byung ba'i grags pa des/ phyi ma'i tshe phyi ma'i dus na/ dam pa'i chos bsdu bar bcol te/ des de bzhin gshegs pa de yongs su mya ngan las 'das pa'i 'og tu lo bye bar dam bcas pa'i chos kyi tshul bzung ste/de rnam par 'thag pa thams cad bsdus pa'i chos kyi rnam grangs 'di la zhugs nas chos ston te/ mos pa ji lta ba bzhin du sems can rnams la chos ston to/ /des grong khyer stong phrag brgyad cur smon lam ji lta ba bzhin du/sems can rnams rab tu dga' bar byas nas/ de grong khyer chen po bzang po zhes bya bar song ste/ khyim pa bye ba phrag brgyad cu la mos pa ji lta ba bzhin du chos bstan nas/ grong khyer de nas srog chags bye ba phrag brgyad cu rab tu dad par byas so//de'i nang nas bye ba phrag gcig ni byang chub la rab tu bkod do/ /sems can bye ba phrag bdun cu rtsa dgu ni nyan thos kyi theg pa la rab tu bkod de btul lo / /de nas dge slong 'tsho ba yongs su dag pa de dge slong khri dang lhan cig tu byang chub kyi snying po ga la ba der yul rgyu zhing song ngo //mi pham pa dge slong 'tsho ba yongs su dag pa song nas ring po ma lon par grong khyer chen po bzang po der/ dge slong chos zhes bya ba phyin te/ des rnam par 'thag pa'i mdo stong bzung ngo / / bsam gtan bzhi yang thob par gyur to/ / dge slong 'tsho ba yongs su dag pas ni mdo sde bye ba phrag bcu dang / rnam par 'thag pa'i mdo drug khri bzung bar gyur to/ /de nas dge slong chos des grong khyer chen po bzang po der tshul gcig gi chos bstan pas/ skye bo mang po rab tu dga' bar byas kyang / de mos pa ji lta ba bzhin du chos bstan pa la mkhas pa ma yin te/skye bo de dag la chos thams cad ni stong pa'o zhes stong pa nyid kyis 'doms shing stong pa nyid kyis rjes su ston te/ gang ngas chos thams cad stong pa'o zhes bstan pa 'di ni de bzhin gshegs pa'i bka' kho na yin no/ /gang 'tsho ba yongs su dag pa des bshad pa/de ni skyon chags pa ste/ dge slong de 'tsho ba yongs su dag pa ma yin na/ ci'i phyir dge slong de'i ming 'tsho ba yongs su dag pa zhes bya/ de ni 'tsho ba yongs su dag pa ma yin te/ de ci'i phyir zhe na/ me tog yongs su len cing blangs nas yongs su spyod do//spos dang byug pa yongs su len cing blangs nas yongs su spyod do/ /de ni shes pa ma yin te byis pa'o/ /nga ni tshangs par spyad nas yun ring ba yin gyi de ni gsar bu ste/ bsnyen par rdzogs nas ring por ma lon pa yin gyis/ de ltar yid ches par ma byed cig ces zer ro//dge slong de ni bag yod pa yin te/ dge slong 'tsho ba yongs su dag pa de la skye bo de dag rab tu dad pas de ltar des skye bo de dag la dbye na byas kyang dbye bar ma nus so/ /de nas dge slong chos de 'chi ba'i dus byed par gyur te/ 'chi ba'i dus byas nas/ 'di ltar de bzhin gshegs pa la skur ba btab pa dang /'di ltar chos spangs pas/ bskal pa bdun cur sems can dmyal bar skyes so/ /de bskal pa bdun cu po de dag 'das nas/ bskal pa drug cur byang chub kyi sems brjod de/ bskal pa drug cu po de dag 'das nas/ de bzhin gshegs pa kun nas spos rin po che'i 'od kyi gsung rab la/de bzhin gshegs pa des byang chub kyi sems bskyed du bcug nas/ des byang chub tu sems bskyed do/ /tshe rabs dgu khrir dud 'gro'i skye gnas su skyes so/ /tshe rabs drug khrir mi dbul po rnams kyi nang du skyes te/thams cad du yang lce med par gyur to/ /de sangs rgyas khrag khrig phrag lnga'i gan na chos smra bar gyur te/ thams cad du yang mngon par shes pa lnga dang ldan par gyur to/ /sangs rgyas bcom ldan 'das de dag gis bod par 'os par gyur to/ /chos thams cad la yongs su dag par chos ston par yang gyur to//mi pham pa de'i tshe de'i dus na/ dge slong 'tsho ba yongs su dag pa zhes bya bar gyur pa de gzhan yin pa snyam du khyod sems na/ khyod kyis de ltar mi blta ste/ de bzhin gshegs pa 'od dpag med ces bya ba de'i tshe de'i dus na/dge slong chos smra ba 'tsho ba yongs su dag pa zhes bya bar gyur to/ /mi pham pa de'i tshe de'i dus na/ dge slong chos zhes bya ba de gzhan zhig yin snyam du khyod sems na/ khyod kyis de ltar mi blta ste/ nga de'i tshe de'i dus na/ dge slong chos zhes bya bar gyur te/nga nyid las de lta bu'i mi 'tshal ba byung ngo / /mi pham pa chos kyis phongs par 'gyur ba'i las kyi sgrib pa ni de ltar shes par dka' ste/ las de'i rnam par smin pas nga snyigs ma lnga'i dus na/ byang chub tu mngon par rdzogs par sangs rgyas so/ /mi pham pa byang chub sems dpa' gang dag gnyis su 'byed cing chos ston pa de dag ni/las de'i rnam par smin pas dus kyi snyigs ma'i tshe/ byang chub mngon par rdzogs par 'tshang rgya bar 'gyur te/ de dag gi sangs rgyas kyi zhing der byang chub par bya ba dang / chos bstan pa la bdud dang bar chad mang po 'byung bar 'gyur ro//de nas thams cad dang ldan pa'i 'khor de mchi ma blags te dus nas/ tshig 'di skad ces deng phan chad dge slong chos kyis ji skad smras pa ltar su yang chos ston par ma gyur cig ces 'dzer to/ /de'i tshe byang chub sems dpa' sems dpa' chen po 'khor der 'dus pa dag kyang stan las langs te/sa la 'khod do/ /sa la 'khod nas ngus so/ /de nas bcom ldan 'das kyis mkhyen bzhin du/ byang chub sems dpa' de dag la 'di skad ces smras so/ /rigs kyi bu dag khyed ci'i phyir sa la 'khod cing ngu / de dag gis gsol pa/bcom ldan 'das bdag cag ni las kyi sgrib pa de dang ldan par bdag cag nyid kyis mthong lags so/ /bcom ldan 'das kyis bka' stsal pa/ rigs kyi bu dag de de bzhin te/ de bzhin gshegs pa mar me mdzad yongs su mya ngan las 'das nas/ de'i gsung rab la shes rab brtsegs zhes bya ba chos smra ba zhig byung ba la khyed kyis smad de/de phyin chad khyed kyis nam yang sangs rgyas ma mthong ngo / /nam yang byang chub kyi sems ma rnyed do/ /gzungs dang ting nge 'dzin ma rnyed do/ /rigs kyi bu dag khyed nga'i byang chub la yang dag par zhugs kyang /bskal pa bzang po 'di la de bzhin gshegs pa gang dag 'byung ba tha ma'i tshe/ khyed kyis mi skye ba'i chos la bzod pa thob par 'gyur ro/ /de phyin chad bskal pa grangs med pa gsum gyis bla na med pa yang dag par rdzogs pa'i byang chub mngon par rdzogs par 'tshang rgya bar 'gyur ro//rigs kyi bu dag de bas na/ byang chub sems dpa' dag gis byang chub sems dpa' mthong na/ sems kyis gzhan bsam par mi bya ste/ bdag cag gis mchod rten nam/ de bzhin gshegs pa mthong ngo / /bdag cag gi mdun na sangs rgyas bzhugs so snyam du bsam mo//rigs kyi bu dag gal te byang chub sems dpas/ byang chub sems dpa' mthong na mchod rten gyi 'du shes sam/ de bzhin gshegs pa'i 'du shes bskyed pa ma gtogs par 'du shes gzhan bskyed par mi bya'o/ /gzhan du gyur na byang chub sems dpas bdag nyid la rma phyung bar 'gyur ro//de la dgongs te de bzhin gshegs pa mi 'khrugs pas thugs dam bzhes pa/ gal te bdag gis sems dang po bskyed pa'i byang chub sems dpa' mthong ste/ sangs rgyas kyi 'du shes ma bskyed na/ ngas 'jig rten gyi khams dpag tu med pa rnams na/gang dag bzhugs pa'i sangs rgyas bcom ldan 'das thams cad la bslus par gyur cig ces bya ba yin no/ /rigs kyi bu dag phyi ma'i tshe phyi ma'i dus lnga brgya pa tha ma la gang su dag gzungs thob pa'am/ ting nge 'dzin thob par 'gyur ba de dag thams cad ni de bzhin gshegs pa'i mthus thob par gyur te/rigs kyi bu de lta bas na 'di la su yang chos smra ba la mi snyan par brjod pa des ni/ de bzhin gshegs pa spangs par 'gyur ro/ /rigs kyi bu dag gang su zhig sems can dag ji ltar mos pa'i mos pa bzhin du/ chos ston pa de thams cad ni de bzhin gshegs pa'i mthu yin no//'khor gang du byang chub sems dpa'i theg pa pa dag lan 'ga' zhig spu zing zhes byed dam/ mchi ma lan 'ga' zhig klog pa de thams cad kyang / de bzhin gshegs pa'i mthur shes par bya ba yin na/ de la mi blun po byang chub sems dpa' ma yin par byang chub sems dpar khas 'che ba/byang chub sems dpa' sun 'byin par gyur pa / chos rku ba/ tshul 'chos pa/ cho ga ngan pa la spyod pa de dag kha cig 'di skad ces 'di lta zhig ci shes zhes zer ro/ /byams pa ngas byang chub kyi phyir spyod pa na/bdag nyid kyis gang tshigs su bcad pa nyos pa ni rang gi lus yongs su btang ba dang / chung ma yongs su btang ba dang / bu dang bu mo yongs su btang ba dang / rgyal srid yongs su btang bas nyos shing / byams pa legs par bshad pa'i tshigs su bcad pa gcig gi phyir 'dzam bu'i gling byin te/nyos par ngas mngon par dran na/ de dag ni rnyed pa dang / bkur sti bsrung zhing sangs rgyas dang 'dra ba'i gnas su 'gro bar mi sems so/ /mi pham pa dam pa'i chos kyi tshul 'di bzung ba yang 'byor pa dang ldan pas nus kyi mi ldan pas ma yin no//mi pham pa ngas mngon par rdzogs par sangs rgyas nas/ sangs rgyas kyi ye shes kyis chos gang bstan pa de la de dag 'di skad du/ de ni lung ma nod par bya ba ma yin no zhes zer te/ sems can de dag 'byung ba ma yin te nyes pa chen po ji tsam dang ldan pa la ltos/mi pham pa dge slong chos des rnam par 'thag pa'i mdo stong bstan te/ bsam gtan bzhi bskyed kyang de lta bu'i gnas su gyur na/ gang phyogs tsam mam cha tsam la reg pa rnam par 'thag pa 'dzin pa'i dge slong rnams la mngon par mi dga' zhing / rnam par 'thag pa la skyon 'dogs pa lta ci smos te/de dag ni chos smra ba'i dge slong la skur pa 'debs pa yin/ sangs rgyas kyi chos spong ba yin/ rlom sems chen pos skur pa 'debs pa yin te/ sems can dmyal bar skye ba de dag la ni legs par byas zhes nga mi smra'o/ / de ci'i phyir zhe na/ gang dag chos smra ba la rnam par smod pa de dag ni/ sangs rgyas la rnam par smod pa yin/ chos la rnam par smod pa yin no/ /gang dag chos smra ba la rim gro med pa de dag ni sangs rgyas la rim gro med pa yin no/ /gang dag chos smra ba la mi snyan par brjod pa de dag ni/sangs rgyas mthong bar mi 'dod pa yin/ sangs rgyas la mi snyan par brjod pa yin no/ /gang dag sems dang po bskyed pa'i byang chub sems dpa' la khong khro ba'i sems bskyed pa de dag gis ni/ sangs rgyas yongs su btang ba yin te/ ji snyed du khong khro ba'i sems skyed par byed pa de snyed kyi bskal par sems can dmyal bar gnas par go cha bgos so//ji tsam du khong khro ba'i mig gis lta ba de srid du long ba'i skye mched thob par 'gyur ro/ /ji tsam du mi snyan par brjod pa de srid du lce'i skye mched med pa thob par 'gyur ro/ /mi pham pa ji ltar byang chub sems dpa' rnams la gnod pa'i sems bskyed pas/byang chub sems dpa' ngan song du log par lhung bar 'gyur ba'i chos de lta bu gzhan ni ngas ma mthong ngo / /mi pham pa sems can gyi 'du shes dang / chos kyi 'du shes la gnas pa rnams la ni/ las mngon par 'du byas pa yod de/mi dmigs pa la ni med do/ /byang chub sems dpa' gang dag chos tha dad du 'byed cing ston pa de dag ni spros pa la gnas pa yin no/ /mi pham pa byang chub sems dpa' rnams kyi pha rol tu phyin pa drug yang dag par grub pa ni/ byang chub kyi phyir yin na/ de la yang mi blun po de dag 'di skad du/shes rab kyi pha rol tu phyin pa kho na la byang chub sems dpas bslab par bya'o zhes zer zhing pha rol tu phyin pa lhag ma rnams sun 'byin to/ /mi pham pa 'di ji snyam du sems/ ka shi ka'i rgyal po gang yin pas mgo byin par gyur pa de 'chal ba'i shes rab yin nam/gsol pa bcom ldan 'das de ni ma yin no zhes gsungs so/ /chos thams cad 'byung ba med par bstan pa'i mdo las kyang / byang chub sems dpa' rgyal ba'i blo gros kyang 'chi ba'i dus bgyis nas/ dog sa'i sgo phye ste/ sems can dmyal ba chen por ltung ngo //de sug las kyi sgrib pa des/ bskal pa bye ba khrag khrig brgya phrag stong du sems can dmyal ba chen po dag tu sdug bsngal tsha zhing rtsub la yid du mi 'ong ba'i tshor ba mi bzad pa myong bar gyur to/ /tshe rabs brgya stong phrag bdun cu rtsa bzhir mi snyan par brjod pa thob par gyur to//bskal pa brgya stong mang por de bzhin gshegs pa'i mtshan tsam yang ma thos par gyur to/ /de de nas slad kyi de bzhin gshegs pa gzhan dang gzhan dag mjal te/ de dag gi bstan pa la rab tu byung nas mngon par mos par ma gyur te/ tshe rabs stong phrag bdun cu rtsa drug tu rab tu byung ba las slar babs par gyur to//sug las kyi sgrib pa de nyid kyi lhag mas/ tshe rabs stong phrag mang por dbang po rtul bar gyur to/ /bcom ldan 'das de'i tshe byang chub sems dpa' dge slong chos smra ba rab tu dga' ba'i dbang po zhes bgyi ba byung bas ni/bla na med pa yang dag par rdzogs pa'i byang chub tu mngon par rdzogs par sangs rgyas te/ da ltar bzhugs shing 'tsho gzhes chos kyang ston to/ /shar phyogs kyi 'jig rten gyi khams bye ba brgya stong 'das pa na/ sangs rgyas kyi zhing rin po che sna tshogs kyi 'jig rten gyi khams na/de bzhin gshegs pa dgra bcom pa yang dag par rdzogs pa'i sangs rgyas gzi brjid sdug cing dri ma med la nyi zla zil gyis gnon pa bzhugs shing / 'tsho gzhes chos kyang ston te/ bcom ldan 'das dge slong rgyal ba'i blo gros zhes bgyi bar gang gyur pa de ni/ bdag nyid de'i tshe de'i dus na/dge slong rgyal ba'i blo gros zhes bgyi bar gyur te/ bcom ldan 'das bdag gis de lta bu'i tshul 'di ma 'tshal bas/ de lta bu'i sdug bsngal myong bar gyur to/ /bcom ldan 'das bdag ni de 'dra ba'i gnas su gyur te/ de lta bu'i sdug bsngal ma mchis pa'i sdug bsngal/yongs su brtags pa'i sdug bsngal/ phyin ci log gi sdug bsngal rnam pa de lta bu myong bar gyur to/ /bcom ldan 'das de lta lags pas/ byang chub sems dpa'i theg pa la zhugs pa'am/ nyan thos kyi theg pa la zhugs pa gang yang rung ste/ de lta bu'i sug las kyi sgrib pa mi 'tshal zhing /de lta bu'i sdug bsngal mi 'tshal na/ des dam pa'i chos spang bar mi bgyi'o/ /dam pa'i chos la dpya bar mi bgyi'o/ /chos gang la yang khong khro bar mi bgyi'o zhes gsungs so/ /chos spong ba la dgongs pa bstan pa snying rje chen po la 'jug pa'i mdo las kyang /'jig rten 'bras bu'i 'du shes can/ /phyi ma'i dus na 'byung 'gyur te/ /de dag dgra bcom pa yi zas/ /zos nas sangs rgyas spong bar byed/ /gang gis 'dzam bu'i gling 'dir ni/ / mchod rten thams cad bshig byed pas/ /gang zhig mdo sde spong byed pa'i//sdig pa 'di ni ches khyad 'phags/ /gang gis gang gA'i bye snyed kyi/ /dgra bcom bsad par gyur pa bas/ /gang zhig mdo sde spong byed pa'i/ /sdig pa 'di ni ches khyad 'phags/ /zhes gsungs so/ / rnam par 'thag pa thams cad bsdus pa'i mdo las kyang /'jam dpal dam pa'i chos spong ba'i las kyi sgrib pa ni phra'o/ /'jam dpal gang de bzhin gshegs pas gsungs pa'i bka' la la ni bzang bar 'du shes la/ la la ni ngan par 'du shes pa de ni chos spong ba'o/ /gang chos spong ba des chos spangs pas/ de bzhin gshegs pa la skur pa 'debs pa yin/dge 'dun la ngan du brjod pa yin no/ /'di ni rigs pa'o / /'di ni mi rigs pa'o zhes zer na chos spong ba yin no/ /'di ni byang chub sems dpa' rnams kyi ched du gsungs pa'o/ /'di ni nyan thos rnams kyi ched du gsungs pa'o zhes zer na chos spong ba yin no//'di ni rang sangs rgyas kyi ched du gsungs pa'o zhes zer na chos spong ba yin no/ /'di ni byang chub sems dpa'i bslab pa'o/ /'di ni byang chub sems dpa'i bslab pa ma yin no zhes zer na dam pa'i chos spong ba yin no/ /chos smra ba spobs pa yod do zhe'am/spobs pa med do zhes zer na chos spong ba yin no/ /chos ni chos ma yin par ston to zhes zer na chos spong ba yin no/ /sangs rgyas 'byung ba med par yang gzungs thob ces zer na chos spong ba yin no/ /gzungs thob pa ni yongs su dag pa ma yin zhes zer na chos spong ba yin no//chos smra ba'i spyod pa nyes par byas pa dang ldan no zhes zer na chos spong ba yin no/ /chos smra ba sgrub pa phun sum tshogs pa ma yin no zhes zer na chos spong ba yin no/ /spyod lam gyi bag med pas gleng na chos spong ba yin no/ /spyod lam gyis gleng na chos spong ba yin no//spyod pa dang tshul khrims nyams pas gleng na chos spong ba yin no/ /spobs pa go bar mi byed do zhes zer na chos spong ba yin no/ /snang ba legs par ma bshad do zhes zer na chos spong ba yin no/ /khong du ma chud pas tshig dang tshig tu 'gal bar byas so zhes zer na chos spong ba yin no//yi ge'i ming gis de bzhin gshegs pa'i bka' la 'jug go zhes zer na chos spong ba yin no/ /mdo sde dang mdo sder 'gal bar byas so zhes zer na chos spong ba yin no/ /tshigs su bcad pa dang tshigs su bcad par 'gal bar byas so zhes zer na chos spong ba yin no//don la la la mos shing don la la la mi mos na chos spong ba yin no/ /chos 'chad pa'i tshe gtam gzhan du bsgyur na chos spong ba yin no/ /dkrugs ma byed na chos spong ba yin no/ /kun du rtog pas smra na chos spong ba yin no//'di la spyad 'di la mi spyad ces zer na chos spong ba yin no/ /'di ni legs par smras pa 'di ni legs par ma smras zhes zer na chos spong ba yin no/ /'di ni sangs rgyas kyi bka'i dam tshig go/ /'di ni sangs rgyas kyi bka'i dam tshig ma yin no zhes zer na chos spong ba yin no//de ci'i phyir zhe na/ 'jam dpal nyan thos rnams kyi spobs pa gang ji snyed pa dang / byang chub sems dpa' rnams kyi spobs pa gang ji snyed pa de dag thams cad ni/ de bzhin gshegs pa'i mthu yin no/ /'jam dpal ngas ni nyan thos rnams kyi spobs pa gang ji snyed pa dang / byang chub sems dpa' rnams kyi spobs pa gang ji snyed pa de dag thams cad/de bzhin gshegs pa'i mthu las byung bar smon lam legs par btab pa yin/ 'jam dpal ngas ni byang chub tu yang smon lam legs par btab pa yin na/ 'di ltar mi blun po de dag ngan song du 'gro bar bdud kyis byin gyis brlabs pa'i phyir/de la yang skyon 'dogs par sems so zhes bya ba nas / de nas bcom ldan 'das la 'jam dpal gzhon nur gyur pas 'di skad ces gsol to/ /bcom ldan 'das gal te la la zhig sdig pa'i grogs po'i dbang gis chos spong ba 'di lta bu 'di bgyis par gyur na/bcom ldan 'das de'i tshe 'di nyid la ji ltar thar bar 'gyur/ de skad ces gsol ba dang / bcom ldan 'das kyis 'jam dpal gzhon nur gyur pa la 'di skad ces bka' stsal to/ /'jam dpal gal te lo bdun gyi bar du nyin gcig cing / dus gsum du nyes pa la nyes par bshags na/ de'i 'og tu byang bar 'gyur te/ de phyin chad nyung na bskal pa bcus bzod pa thob par 'gyur ro/ /'jam dpal gal te byang chub sems dpa'i theg pa pa'i rigs kyi bu'am/ rigs kyi bu mo zhig chos kyi rnam grangs 'di ma bzung / ma bklags par smra na/chos kyis phongs par 'gyur ba las ma smas par shin tu thar bar dka'o/ /de lta bas na byang chub sems dpa' 'di la bslabs nas/ phyis chos ston par bya ste/ de ltar na de smos par mi 'gyur ro zhes bya ba'i bar du gsungs so/ /rab tu rnam par 'byed pa'i mdo las kyang /sha ra dwa ti'i bu lcags kyi rang bzhin mtshon rnon pos lce bcad pa ni bla'i/ 'khor gyi nang na 'dug gam/ dben pa na 'dug gam/ bdag nyid zla dang bcas par 'dug kyang rung ste/ yongs su ma dag pa'i chos ston pa ni ma yin pa nyid do/ /sha ra dwa ti'i bu de'i phyir rnam grangs 'dis de ltar rig par bya ste/sha ra dwa ti'i bu sngon byung ba 'das pa'i dus bskal pa grangs med pa na / de bzhin gshegs pa dgra bcom pa yang dag par rdzogs pa'i sangs rgyas bkod pa chen po zhes bya ba nas/ sangs rgyas bcom ldan 'das so zhes bya ba'i bar dang / bkod pa chen po zhes bya ba de'i tshe tshad ni lo bye ba stong phrag drug cu rtsa brgyad du gyur to zhes bya ba nas/sha ra dwa ti'i bu bcom ldan 'das de yongs su mya ngan las 'das nas lo brgya lon pa na/ chos 'dul ba rnam pa lngar gyur te/ 'di ltar kun du dngos po zhes bya ba dang / brtson 'grus len zhes bya ba dang /thams cad kyi gsong por smra ba zhes bya ba dang / ngag shes pa zhes bya ba dang / nye bar bcings pa zhes bya bar gyur to/ /sha ra dwa ti'i bu de la de'i tshe na/ kun du zhes bya ba dang / brtson len zhes bya ba dang /gsong por smra ba zhes bya ba dang / ngag shes zhes bya ba dang / nye bar bcings pa zhes bya ba dang / dge slong lnga po de dag 'khor dang ldan par gyur to/ /sha ra dwa ti'i bu de la gang kun dngos ldan zhes bya bar gyur pa de dag ni/ sangs rgyas kyi gsung 'di kun nas shes shing / stong pa nyid smra ba dang / dmigs pa med par gyur to//yang dge slong bzhi po 'khor dang bcas pa gang zag tu smra ba de dag ni phal cher lam gol ba 'dzin par gyur to/ /sha ra dwa ti'i bu de la gang dag kun dngos po ldan zhes bya ba'i dge slong du gyur pa de ni/ bzhi po de dag gis zil gyis mnan par gyur cing ldang par ma nus so//bzhi po de dag kyang skye bo mang pos bkur bar bya bar gyur to/ /sha ra dwa ti'i bu de ltar sdig pa'i dge slong de dag gis skye bo'i tshogs chen po log par lta ba yang dag par len du bcug par gyur to/ /de ltar bcom ldan 'das de'i gsung rab de/ gzhan dang gzhan gyis ma gus pa dang /gzhan dang gzhan gyis spangs pa nyid kyis bsnubs par gyur to/ /sha ra dwa ti'i bu gang dag kun du dngos po zhes bya ba'i chos bstan pa kun du shes shing khong du chud la/ lhag par mos pa bye ba khrag khrig drug cu rtsa brgyad po de dag ni/ sangs rgyas lnga stong dag gi nyan thos su gyur cing /de nyid du mya ngan las 'das pa ngas shes so/ /de ci'i phyir zhe na/ sha ra dwa ti'i bu de ltar 'gyur te/ dmigs pa med par spyod pa dang / sngon gyi rgyal ba la lhag par bya ba byas pa rnams yongs su mya ngan las 'das par gyur to/ /sha ra dwa ti'i bu de la gang brtson len zhes bya ba'i dge slong dang /kun shes zhes bya ba dang / ngag shes zhes bya ba dang / nye bar bcings pa zhes bya ba 'khor dang bcas pa de dag thams cad dmigs pa can du gyur/ bdag tu smra ba la brten pa dang / gang zag tu smra bar gyur / gang zag tu smra ba la mngon par zhen pa dang / skye bo mang po'i 'khor dang ldan par gyur to//sha ra dwa ti'i bu de ltar dam pa ma yin pa de dag gis/ khyim pa dang rab tu byung ba'i skye bo'i tshogs chen po rnams log par lta ba la bkod par gyur to/ /don dam pa spangs par gyur/ stong pa nyid dang / mtshan ma med pa dang / dmigs pa med pa dang / smon pa med pa'i chos rnams dang /sangs rgyas kyi byang chub la gcer bu pa'i tshig tu 'du shes par gyur to/ /de dag gi log par lta ba yongs su 'dzin par gyur to/ /sha ra dwa ti'i bu de la gang dge slong bzhi po 'khor dang bcas pa dang / skyes bu dam pa ma yin pa bzhi po de dag gi rjes su 'brang ba/de'i smra ba smra ba/ de dag gi smra ba la gus par nyan par gyur pa de rnams kyis/ de med pas gsung rab bsnubs par gyur to/ /sha ra dwa ti'i bu de la gang dag dam pa'i chos ma yin no zhes bzung nas/ sbyor zhing 'bad la rnal 'byor du byed pa de dag gis ni nam yang zas yongs su sbyor ba'i las byas pa ma yin no//de dag gis nam du yang rjes su mthun pa'i bzod pa yang ma skyed na/ 'bras bu 'thob pa lta ga la yod de/ de ni gnas med do/ /sha ra dwa ti'i bu de ltar na khyim par gyur pa dang / khyim pa rab tu byung bar gyur pa gang dag yin pa de dag ces bya ba nas/ dam pa'i chos thams cad nas thams cad du dam pa'i chos nub pa'i rgyus slar yang ngan song du 'gro bar 'gyur gyi/ bde 'gror 'gro ba ni ma yin no zhes bya ba'i bar dang / sha ra dwa ti'i bu de ltar skyes bu dam pa ma yin pa de dag gis sangs rgyas kyi byang chub de dag kyang bsnubs shing sems can rnams la don ma yin pa chen po byas so//skyes bu dam pa ma yin pa de dag kyang dus byas nas mnar med pa'i sems can dmyal bar ltung ngo / /de la lo bye ba brgya stong phrag dgu bcur gan rkyal dang kha sbub tu btsos so/ /lo bye ba brgya stong phrag dgu bcur ngos g.yas g.yon du phab ste btsos so//de dag de nas shi 'phos te/ sems can dmyal ba chen po rab tu tsha ba dang / tsha ba dang / ngu 'bod dang / ngu 'bod chen po dang / bsdus 'joms dang / thig nag dang / yang sos rnams su rab tu ltung ngo / /sems can dmyal ba chen po re rer de snyed cig dus de snyed du btsos so//de dag slar yang sems can dmyal ba chen po yang sos las thig nag dang / bsdus 'joms dang / ngu 'bod dang / ngu 'bod chen po dang / tsha ba dang / rab tu tsha ba dang / mnar med pa'i sems can dmyal ba chen por rab tu lhung ngo //sha ra dwa ti'i bu rnam grangs 'dis/ de dag dang 'brel pa khyim pa dang / rab tu byung ba grogs po'i tshogs dang / slong mo ster ba'i tshogs su gyur pa de dag kyang / de dag dang lhan cig tu sems can dmyal ba chen po rnams su shi 'phos shing skyes nas/ tshor ba yid du mi 'ong ba'ang myong bar gyur to / /gang dag de dag gi yin par gyur pa srog chags bye ba brgya stong phrag drug cu rtsa bzhi po sngon med cing phyis byung ba de dag kyang sems can dmyal ba chen po de dag tu shi 'phos shing skyes so/ /sha ra dwa ti'i bu gang dag gis yin par gyur pa grogs po'i tshogs dang /slong mo ster ba'i tshogs dang / nye gnas kyi tshogs dang / dge slong dang / slob dpon dang / de'i slob dpon dang / thad na 'khod pa dang / nye bar 'khod pa ji snyed pa dang / de dag gi rjes su 'brang bar gyur pa'i sems can ji snyed pa gang dag 'dzin pa des log par 'gro bar gyur pa sdig pa'i dge slong de dag dang lhan cig sems can dmyal ba chen po de dag tu shi 'phos shing skyes pa de rnams bgrang bar yang ji ltar de bzhin gshegs pas rab tu shes pa ltar khyed kyis shes par mi nus so//sha ra dwa ti'i bu rnam grangs 'dis srog chags bye ba brgya stong phrag drug cu rtsa bzhi po de rnams bskal pa tshang bar ngan song du skyes par gyur to//sha ra dwa ti'i bu gzhan yang gang gi tshe bskal pa bsregs par gyur pa de'i tshe mi blun po de dag de bzhin du rab tu ltung bar gyur to/ /de ci'i phyir zhe na/ sha ra dwa ti'i bu gang sangs rgyas bcom ldan 'das rnams kyi bstan pa la rab tu spong ba'i las de ni mi bzad pa'o zhes gsungs so// shes rab kyi pha rol tu phyin pa'i mdo las kyang / shes rab kyi pha rol tu phyin pa zab mo 'di bstan pa'i tshe 'khor de nas gud du 'dod bar 'gyur te/ lus dang sems kyis mthun par spyod par mi 'gyur ro//de dag ni shes rab 'chal par 'gyur ba'i las sogs pa yin te/ de dag shes rab 'chal par 'gyur ba'i las byas shing bsags pa des shes rab kyi pha rol tu phyin pa 'di bstan pa'i tshe spong bar 'gyur te/ de dag gis shes rab kyi pha rol tu phyin pa 'di spangs pas 'das pa dang /ma byon pa dang / da ltar byung ba'i sangs rgyas bcom ldan 'das rnams kyi rnam pa thams cad mkhyen pa nyid spangs par 'gyur te/ de dag rnam pa thams cad mkhyen pa nyid spangs pa las byung ba'i las mngon par 'du byas shing bsags pa dang /chos kyis phongs par 'gyur ba'i las byas shing bsags pa des lo mang po dang / lo brgya phrag mang po dang / lo stong phrag mang po dang / lo bye ba khrag khrig brgya stong phrag mang po'i bar du sems can dmyal bar sreg par 'gyur ro/ /de dag sems can dmyal ba chen po nas sems can dmyal ba chen por 'dong bar 'gyur te /de dag sems can dmyal ba chen po nas sems can dmyal ba chen por 'dod pa'i tshe mes yongs su 'jig pa'am/ chus yongs su 'jig pa'am/ rlung gis yongs su 'jig pa 'byung bar 'gyur te/ de dag de ltar mes yongs su 'jig pa'am/ chus yongs su 'jig pa'am/ rlung gis yongs su 'jig pa 'byung ba'i tshe yang 'jig rten gyi khams gzhan dag gi sems can dmyal ba chen po dag tu 'phangs par 'gyur te/ de dag tu skye bar 'gyur/ de dag tu bsreg par 'gyur ro//der 'phangs te/ der skyes nas kyang / sems can dmyal ba chen po nas sems can dmyal ba chen por 'dong bar 'gyur te/ de dag thams cad sems can dmyal ba chen po nas sems can dmyal ba chen por 'dong ba'i tshe/ mes yongs su 'jig pa'am / chus yongs su 'jig pa'am/rlung gis yongs su 'jig pa 'byung ste/ de dag de ltar mes yongs su 'jig pa'am/ chus yongs su 'jig pa'am/ rlung gis yongs su 'jig pa 'byung ba'i tshe yang / shar phyogs kyi sems can dmyal ba chen po dag tu 'phangs par 'gyur/ lho dang /nub dang / byang dang / byang shar dang / shar lho dang / lho nub dang / nub byang dang / 'og dang / steng gi phyogs kyi sems can dmyal ba chen po dag tu 'phangs par 'gyur ro/ /de dag tu yang sems can dmyal ba chen po nas sems can dmyal ba chen por 'dong bar 'gyur te/der yang mes yongs su 'jig pa'am/ chus yongs su 'jig pa'am/ rlung gis yongs su 'jig pa 'byung ste/ de dag de ltar mes yongs su 'jig pa'am/ chus yongs su 'jig pa'am/ rlung gis yongs su 'jig pa 'byung ba'i tshe/de nas shi 'phos nas chos 'jig par 'byung ba'i las de ma zad pas yang 'dir skyes te / de dag yang sems can dmyal ba chen po nas sems can dmyal ba chen por 'dong bar 'gyur ro/ /de dag der skyes nas kyang sems can dmyal ba chen po de dag tu sems can dmyal ba'i sdug bsngal nyams su 'bab par 'gyur ro//de dag tu yang mes yongs su 'jig pa'am/ chus yongs su 'jig pa'am/ rlung gis yongs su 'jig pa ma byung gi bar du sems can dmyal ba'i sdug bsngal de dag myong bar 'gyur ro/ /de dag mes yongs su 'jig pa'am/chus yongs su 'jig pa'am/ rlung gis yongs su 'jig pa byung nas kyang / de dag de nas shi 'phos nas shar phyogs kyi 'jig rten gyi khams dag tu byol song gi skye gnas rnams dang skal ba mnyam par skye bar 'gyur ro/ /lho dang / nub dang /byang dang / byang shar dang / shar lho dang / lho nub dang / nub byang dang / 'og dang / steng gi phyogs kyi 'jig rten gyi khams dag tu byol song gi skye gnas pa rnams dang skal ba mnyam par skye bar 'gyur ro/ /de dag tu yang phyogs bcu kun gyi 'jig rten gyi khams kyi bar du gshin rje'i 'jig rten du skye bar 'gyur ro//de dag der skyes nas sdug bsngal mang po nyams su myong bar 'gyur ba'i las zad nas/ ji ste brgya la mir skye ba thob na yang chos 'jig par 'gyur ba'i las byas pa dang bsags pa dang / bsgrubs pa dang / tshang ba dang / rdzogs pa'i rnam par smin pa des de dag la gang dang gang du skye ba de dang der dmus long gi rigs su skye bar 'gyur/phyag dar ba'i rigs su skye bar 'gyur/ gdol pa'i rigs su skye bar 'gyur/ smyig ma mkhan gyi rigs su skye bar 'gyur/ de dag der skyes nas kyang dmus long du skye bar 'gyur ba yin/zhar bar 'gyur ba yin/ sna med par 'gyur ba yin/ lce med par 'gyur ba yin/ lag pa med par 'gyur ba yin/ rkang pa med par 'gyur ba yin/ mdze can du 'gyur ba yin/ sha bkra can du 'gyur ba yin/ sgur por 'gyur ba yin/ gang na sangs rgyas kyi sgra med pa dang /chos kyi sgra med pa dang / dge 'dun gyi sgra med pa de dag tu skye bar 'gyur ba yin no zhes bya ba nas/ rab 'byor skyes bu glen pa de dag rnam pa bzhis shes rab kyi pha rol tu phyin pa phyir spong bar 'gyur ro/ /gsol ba/ bzhi gang dang gang zhig lags/ bcom ldan 'das kyis bka' stsal pa/skyes bu glen pa gang shes rab kyi pha rol tu phyin pa zab mo 'di spong ba de dag ni bdud kyis byin gyis brlabs pa yin te/ rab 'byor rgyu dang po des na/ shes rab kyi pha rol tu phyin pa zab mo 'di la phyir spong bar 'gyur ro/ /chos zab mo rnams la yid ches pa dang dad cing mos pa med pa yin te/rgyu gnyis pa des na shes rab kyi pha rol tu phyin pa zab mo 'di la phyir spong bar 'gyur ro/ /rab 'byor skyes bu glen pa de dag ni brtson 'grus med cing / phung po lnga la mngon par zhen pas/ rgyu gsum pa des na shes rab kyi pha rol tu phyin pa zab mo 'di la phyir spong bar 'gyur ro/ /rab 'byor skyes bu glen pa de dag ni sdig pa'i grogs po'i lag tu song bas zhe sdang gi spyod pa can yin te/de dag bdag la bstod cing gzhan smod par gyur pas/ rgyu bzhi pa des na shes rab kyi pha rol tu phyin pa zab mo 'di phyir spong bar 'gyur te/ rab 'byor rnam pa bzhi po de dag gis skyes bu glen pa de dag shes rab kyi pha rol tu phyin pa zab mo 'di la phyir spong bar 'gyur ro zhes bya ba'i bar du gsungs so// rgya cher rol pa'i mdo las kyang / kun dga' bo da ltar skyes bu glen pa rnyed pa dang / bkur sti dang / tshigs su bcad pa'i zil gyis non pa/ mi gtsang par bying pa/ rim gro'i zil gyis non pa/ma rabs kyi ngang tshul can dag sangs rgyas kyi tshul spong zhing bsod nams ma yin pa mngon par 'du bya ba mang po ji snyed cig mngon par 'du byed pa la ltos/ kun dga' bos gsol pa/ bcom ldan 'das ma byung ba'i dus na/ de lta bu'i mdo sde bzang po la yang spong zhing mi snyan par brjod pa de lta bu'i dge slong dag 'byung lags pa ste/bcom ldan 'das kyis bka' stsal pa/ kun dga' bo de dag ni mdo sde 'di lta bu spong zhing mi snyan par brjod par ma zad de/ sdig pa rnam pa du ma mngon par 'du bya ba mngon par 'du byed cing / dge sbyong gi dngos po don du mi gnyer ba dag kyang 'byung bar 'gyur ro/ /gsol pa/ bcom ldan 'das 'o na skyes bu dam pa ma lags pa de 'dra ba de dag gi 'gro ba ni ci 'dra ba zhig tu 'gyur/ tshe rabs 'phos nas ji lta bu zhig tu mchi/ bcom ldan 'das kyis bka' stsal pa/ de dag ni sangs rgyas kyi byang chub med par byas te/'das pa dang / ma 'ongs pa dang / da ltar byung ba'i sangs rgyas bcom ldan 'das rnams la mi snyan pas skur ba btab pa'i 'gro ba gang yin pa'i 'gro ba der 'gro bar 'gyur ro/ /de nas tshe dang ldan pa kun dga' bo spu g.yos nas sangs rgyas la phyag 'tshal lo zhes brjod de bcom ldan 'das la 'di skad ces gsol to//bcom ldan 'das skyes bu dam pa ma lags pa de dag gi spyod pa 'di thos nas bdag ni brgyal ba dang 'dra bar gyur to/ /bcom ldan 'das kyis bka' stsal pa/ kun dga' bo de dag gi spyod pa ni mnyam par mi 'gyur zhing /sems can de dag ni mi mnyam pa'i spyod pa can du 'gyur ro/ /kun dga' bo de dag ni tshul dang mi 'dra ba'i spyod pa des/ mnar med pa'i sems can dmyal ba chen por ltung bar 'gyur ro/ /de ci'i phyir zhe na/ kun dga' bo dge slong ngam/ dge slong ma'am/dge bsnyen nam/ dge bsnyen ma gang la la zhig mdo sde 'di lta bu 'di dag thos nas ma mos shing yid mi ches pa dang / spong ba de dag ni shi 'phos ma thag tu mnar med pa'i sems can dmyal ba chen por ltung bar 'gyur ro/ /kun dga' bo de bzhin gshegs pa la ni tshad du ma byed cig ces gsungs so//sangs rgyas kyi sde snod kyi mdo las kyang / shA ri'i bu dge slong ji snyed pa sangs rgyas kyi byang chub/ don zab mo/ dmigs pa med pa/ don dam pa/ stong pa nyid khong du ma chud par/ de bzhin gshegs pas gsungs pa'i mdo sde de lta bu'i ngo bo 'di thos nas//de dag ni sangs rgyas kyis gsungs pa ma yin no zhes spong zhing / skye bo rnams de ltar shes par byed par 'gyur ro/ /sha ra dwa ti'i bu gang chos spangs nas/ dge sbyong du mi 'gyur/ shAkya'i sras por mi 'gyur ba 'di ni/de bzhin gshegs pas chos spong bar gsungs so/ /skyes bu blun po de ni srid pa na bye ba phrag brgya stong rnams la brlag par 'os pa'i rma chen po 'byin par byed do/ /don ma yin pa byed par 'gyur ro/ /sha ra dwa ti'i bu de lta bu'i rang bzhin can gyi dge slong rnams la/ gal te sangs rgyas stong phrag gam/ sangs rgyas bye ba phrag brgya stong gis cho 'phrul gsum gyis chos ston par byed kyang / de dag gis chos ma shes shing / de dag gis 'bras bu thob par mi nus pa nyid do/ /de ci'i phyir zhe na/ skyes bu dam pa ma yin pa de dag ni lam 'gog pa/dad pa dang bral ba/ zas dang gos lhur len pa/ 'jig rten gyi zang zing la brkam pa/ sems can dmyal ba chen por 'gro ba yin no zhes nga smra'o/ /sha ra dwa ti'i bu khyod mos par bya/ khyod kyis khong du chud par bya ste/ chos dkon mchog 'di spangs nas bde 'grol re bar 'gyur bar mi bya'i/'on kyang ngan 'gro la re bar 'gyur bar bya'o/ /dmus long du re bar 'gyur bar bya'o zhes gsungs so/ /byang chub sems dpa'i sde snod las kyang / shA ri'i bu sngon byung ba 'das pa'i dus na/ bskal pa dgu bcu rtsa gcig tu gyur pa de'i tshe de'i dus na/ de bzhin gshegs pa dgra bcom pa yang dag par rdzogs pa'i sangs rgyas rnam par gzigs zhes bya ba/rig pa dang zhabs su ldan pa/ bde bar gshegs pa/ 'jig rten mkhyen pa/ skyes bu 'dul ba'i kha lo sgyur ba/ bla na med pa/ lha dang mi rnams kyi ston pa/ sangs rgyas bcom ldan 'das 'jig rten du byung ba de'i gsung rab la sdig pa'i dge slong drug 'di lta ste/shin tu mthong ba zhes bya ba dang / rnyed sla dang / dga' byed dang / dge byed dang / grags pa dang / mes byin zhes bya ba rnams byung ste/ bdag tu smra ba/ gang zag tu smra ba/ chad par smra ba/ rtag par smra ba rnams 'grogs ldang zhing phan tshun du yid rton cing gnas pa de dag gis/ khrims 'di lta bu zhig byas te/ bdag cag re res kyang khyim lnga brgya lnga brgya gzung bar bya'o/ /khyim brgya yongs su rdzogs pa na der 'ongs te gcig la gcig bsnyad par bya'o/ / khyim nyi shu dang / sum cu dang / bzhi bcu dang / lnga bcu dang / brgyar ma grub pa la bsnyad par bya'o zhes de lta bu'i khrims byas nas/ grong dang / grong khyer dang / grong rdal dang / ljongs dang / yul dang / pho brang 'khor du dong nas/ de dag thams cad khyim gcig tu dong ngo //khyim du dong nas gcig la gcig thog ma nyid du sangs rgyas la mi snyan pa zer ro/ /sangs rgyas la mi snyan pa ji skad ces zer zhe na/ khyim der phyin nas 'di skad ces smras te/ bdag yod do/ /sems can yod do/ /srog yod do/ /gang zag yod do/ /gal te bdag med du zin na 'ong ba su/'gro ba su/ 'greng ba su/ 'dug pa su/ nyal ba su/ smra ba su/ mi smra bar 'gyur ba su/ sbyin pa sbyin par byed pa su/ len pa su/ za ba su/ bde ba dang sdug bsngal gyi tshor ba so sor yang dag par myong ba su/ gang khyed la 'di skad du/ bdag med/ sems can med/srog med/ gang zag med ces smra ba de ni khyed kyi mi dge ba'i bshes gnyen te/ dge ba'i bshes gnyen ma yin no zhes zer ba dang / de la shA ri'i bu bud med dang / skyes pa dang / khye'u dang / bu mo dag na re gang dge ba'i bshes gnyen ma yin pa de ni sdig pa'o/ /de'i phyir sdig pa'i grogs por gyur pa de dge ba'i bshes gnyen ma yin no zhes de skad smras pa dang /de dag gis de dag la/ khyed de ltar shes pa ni mkhas pa yin te/ sdig pa'i grogs po gang yin pa de ni dge ba'i bshes gnyen ma yin no/ /de'i phyir gang khyed la 'di skad du/ bdag med/ sems can med/ srog med/ gang zag med ces zer ba la brten par mi bya/ 'grogs par mi bya/ bsnyen bkur bar mi bya'o zhes smras te/ dge slong de dag re res kyang zla ba phyed kyis khyim lnga brgya lnga brgya log par 'dzin du bcug go/ /shA ri'i bu de nas bcom ldan 'das de bzhin gshegs pa dgra bcom pa yang dag par rdzogs pa'i sangs rgyas rnam par gzigs kyi nyan thos dge slong dgra bcom pa dri ma dang nyon mongs pa bsal ba dag grong du dong ste phyin pa dang /bud med dang / skyes pa dang / khye'u dang / bu mo dag gshe zhing mi snyan pa zer/ tshig ngan pa rtsub pos spyo ste/tshigs su bcad pa 'di skad zer ro/ /khyed ni lam la rmongs pa ste/ /chos shes pa ni khyed ma yin/ /khyed ni chos las nyams pas na/ /thams cad sems can dmyal bar 'gro/ /de ltar dge slong de dag la tshigs su bcad pa'i dbyangs kyis gshe zhing mi snyan par smras pa dang /sangs rgyas nyid kyi bsngags pa brjod cing slar tshigs su bcad de smras pa/ 'dus byas thams cad mi rtag cing / /chos kun la ni bdag med de/ /rtag med ther zug med do zhes/ /sangs rgyas kyis na chos bshad do/ /gsob dang gsog dang stong pa ste/ / 'dus byas thams cad snying po med/ /brdzun pa slu ba'i chos can te/ /byis pa rtag tu 'drid pa'o/ /de bzhin gshegs pas bdag med sems can med/ /srog med gang zag med par chos bstan to/ /tshigs su bcad de smras pa/ bdag med gang yin de dag ni/ /sbyin dang za dang len pa dang //tshor ba rgya cher myong 'gyur dang / /smra dang ngan 'gror 'gro bar 'gyur/ /de la sha ra dwa ti'i bu gang skyes pa dang / bud med dang / khye'u dang / bu mo skyes bu dam pa ma yin pa'i tshig bzhin du byed pa de dag las/ srog chags drug khri brgya stong de nas shi 'phos nas mnar med pa'i sems can dmyal ba chen por skyes so//de na de dag gi lus gzugs 'di lta ste/ nya lta bu mngon par grub bo/ /mgo ni 'di lta bu 'di lta ste/ mi'i lta bur gyur to/ /'di lta bu'i lce mngon par grub pa ni/ 'di lta ste/ dper na chang tshong gi re sde chen po lta bu ste/ de dag gi lce de la lcags kyi gshol mang pos rab tu rmos so//de dag gi lus re re la yang mdud thung brgya brgyas dmyal to/ /steng gi bar snang las kyang lcags kyi thu lum kun du 'bar ba/ rab tu 'bar ba/ kun du rab tu mched cing 'bar ba/ 'bar ba dang bcas par gyur pa/'bar ba gcig tu gyur pa lus kyi steng du 'bab po/ /de nas bcom ldan 'das kyis tshigs su bcad pa 'di dag gsungs so/ /glog lce rab tu 'bar ba'i mda'/ /brgya phrag mang po stong rnams ni/ /rtag tu lus la rab 'bar te/ /de dag na tsha myong bar byed/ /thams cad lus ni kun du 'bar//me lce 'bar ba bsnyen par dka'/ /dpag tshad brgya snyed gang ba yi/ /lus la me lce rab tu 'byung / /re re dag gi lce la yang / /de snyed gshol gyis rmo bar byed/ /kun gyi lce ni dral bas na/ /sdug bsngal tshor ba myong bar 'gyur/ /sdig pa'i grogs po bsten byas pas//de dag phyi phyir 'byung bar 'gyur/ /tshul khrims ldan pa rnam spangs pas/ /myur du ngan 'gror 'gro bar 'gyur/ /yang shA ri'i bu skyes bu dam pa ma yin pa drug po de dag de nas shi 'phos te mnar med pa'i sems can dmyal ba chen por skyes nas/ de dag re re'i lus kyang dpag tshad brgya brgya par mngon par grub par gyur te/ lus re re la yang kha stong stong mngon par grub par gyur to/ /kha re re la yang lce gnyis gnyis chu zheng du dpag tshad bzhi bzhi tsam yod pa mngon par grub par gyur te/ lce re re la yang gshol lnga brgya lnga brgya mngon par grub par gyur te/de la lcags kyi thu lum dang / lcags kyi gshol gyis rmos nas/ de dag gi lce gshegs nas / a na zhes zer kyang mi nus so/ /de dag re re'i mgo la yang sems can dmyal ba'i srung ma bye ba phrag stong gnas shing ma gul pa gcod par byed do//de nas de dag gcig gi tshe'i tshad kyang lo bye ba phrag stong du gyur to/ /de bzhin du sems can dmyal ba chen po gzhan dang gzhan dag tu tshor ba rnam pa mang po yang myong bar gyur to/ / de ci'i phyir zhe na/ de ltar sangs rgyas kyi bstan pa la mi bsngags pa brjod par byas pa'i phyir ro zhes gsungs so// byang chub sems dpa' la rma 'byin pa spang ba dang de'i gnyen po dgongs pa bstan pa/ tshangs pas zhus pa'i mdo las kyang / lhag pa'i bsam pa bcus sangs rgyas kyi zhing der gnas par bya ste/ bcu po gang dag ce na/ 'di lta ste/ legs par smras pa dang nyes par smras pa dag la khong khro ba med pa'i sems nyid dang /legs par thos pa dang nyes par thos pa dag la byams pa'i sems nyid dang / dus thams cad du snying brtse ba nyid dang / sems can dman pa dang 'bring dang mchog rnams la yang dag par rab tu sbyor ba dang / rim gro dang brnyas pa la rab tu mnyam pa'i sems nyid dang /gzhan gyi nyes pa dang ltung ba thams cad skyon du mi lta ba nyid dang / theg pa sna tshogs pa la ro gcig pa dang / ngan song gi sdug bsngal thams cad kyi sgra dag la mi skrag pa nyid dang / byang chub sems dpa' thams cad la ston pa'i 'du shes dang /snyigs ma lnga'i sangs rgyas kyi zhing la ngo mtshar ba'i 'du shes te/ tshangs pa lhag pa'i bsam pa bcu po 'di dag gis sangs rgyas kyi zhing der gnas par bya'o zhes gsungs so/ / byams pa seng ge sgra'i mdo las kyang / byams pa byang chub sems dpa' chos bzhi po 'di dag las dpag tshad lnga brgyar 'byor bar bya ste/bzhi gang zhe na/ rnyed pa dang / bkur sti dang / tshigs su bcad pa dang / sdig pa'i grogs po dang / 'du 'dzi'i gnas dang / gnas gang na gnas pa na byang chub sems dpa'i theg pa pa'i gang zag gzhan zhig kyang 'dug par gyur la/gal te de dang lhan cig tu mgu ba dang / dga' ba dang / mchog tu dga' ba skyes la/ 'thab pa med pa dang ldan pa dang / rtsod pa med par ldan par gnas pa ni/ des der gnas par bya'i/ gal te de la tha na tha ba dang / zhe sdang gi sems gcig tsam zhig skyed par byed na yang /de nas dpag tshad lnga brgyar 'byol bar bya ste/ byang chub sems dpas ni/ byang chub sems dpa' la tha ba dang / zhe sdang gi sems bskyed par mi bya'o/ /byams pa byang chub sems dpas stong gsum gyi stong chen po'i 'jig rten gyi khams na/ sems can du bsdu bas bsdus pa'i sems can gang ji snyed pa de dag thams cad spyos sam/brgyad dam/ dbyig pas brdegs sam/ mtshon gyis btab par gyur na/ byams pa 'di ji snyam du sems/ byang chub sems dpa' des sems can ji snyed cig la spyos pa 'am/brgyad pa'am/ dbyig pas brdegs pa'am/ mtshon gyis btab pa'i gzhi de las sdig pa'am/ smas pa dang nyams pa mang po bskyed par 'gyur snyam mam/ byams pas gsol ba/ bcom ldan 'das sems can gcig la gcig spyos sam/ brgyad dam/ dbyig pas brdegs sam/ mtshon gyis btab na yang bsod nams ma lags pa mang du bskyed lags na/ stong gsum gyi stong chen po'i 'jig rten gyi khams kyi sems can gang ji snyed pa thams cad lta smos kyang ci 'tshal/ de ci'i slad du zhe na/ bcom ldan 'das byang chub sems dpas ni sems can 'ga' tsam la yang tha ba dang /zhe sdang dang / gnod sems bskyed par mi bgyi ba'i slad du'o/ /de skad ces gsol pa dang / bcom ldan 'das kyis byang chub sems dpa' sems dpa' chen po byams pa la 'di skad ces bka' stsal to/ /byams pa byang chub sems dpa' gang zhig gis stong gsum gyi stong chen po'i 'jig rten gyi khams su gtogs pa'i sems can de dag thams cad spyos sam/brgyad dam/ dbyig pas brdegs sam/ mtshon gyis btab pa gang yin pa des ni/ byang chub sems dpa' gzhan zhig la/ tha na tha ba dang zhe sdang gi sems gcig tsam zhig bskyed par 'gyur ba de tsam du/byang chub sems dpa' de smas pa dang / nyams par mi 'gyur te/ byams pa byang chub sems dpas byang chub sems dpa' cig shos de la tha ba dang / zhe sdang gi sems skyed par byed na/ gal te byang chub sems dpa' de byang chub yongs su mi gtong ba zhig yin na/sems ji snyed bskyed pa de snyed kho na'i bskal par byang chub kyi phyir yang go cha bgo bar bya dgos so/ /byams pa 'di lta ste dper na/ lcags ni lcags nyid kyis gcod par byed pa ma gtogs par/ bong ba'am/shing ngam/ rtswas gcod par mi nus pa de bzhin du/ byams pa byang chub sems dpa'i dge ba'i rtsa ba yang / byang chub sems dpa' cig shos la tha ba dang / zhe sdang gi sems bskyed pas zad par byed pa ma gtogs par gzhan gyis zad par mi 'gyur te / byams pa de lta bas na/khyed cag gis gcig la gcig zhes dang bcas pa dang / gcig la gcig gus pa dang bcas pas gnas par bya'o zhes de ltar bslab par bya zhing / sems dang po bskyed pa'i byang chub sems dpa' la yang ston pa'i 'du shes bskyed par bya'o zhes gsungs so/ shes rab kyi pha rol tu phyin pa'i mdo las kyang / kun dga' bo gzhan yang gal te gang zag byang chub sems dpa'i theg pa pa gang zag nyan thos kyi theg pa pa dang / rtsod cing nga ni mchog tu gyur pa yin gyi khyed ni ma yin no zhes zer na/ de la bdud sdig to can 'di snyam du sems te/kye rigs kyi bu 'di ni rnam pa thams cad mkhyen pa nyid dang ring du byed pa ste/ 'di ni rnam pa thams cad mkhyen pa nyid dang nye bar gyur pa ma yin no/ /de ci'i phyir zhe na/ 'thab mo dang / 'khrug pa dang rtsod pa dang mtshang 'dru ba ste / 'di dag ni rnam pa thams cad mkhyen pa nyid kyi lam ma yin te/de ni sems can dmyal ba'i lam mo/ /de ni byol song gi skye gnas kyi lam mo/ /de ni gshin rje'i 'jig rten gyi lam mo/ /de ni rnam pa thams cad mkhyen pa'i lam ma yin no snyam du sems par 'gyur ro/ /kun dga' bo gzhan yang gang zag byang chub sems dpa'i theg pa pa dang /gang zag byang chub sems dpa'i theg pa can gzhan du 'thab cing rtsod la 'khrug cing mtshang 'dru na/ de la bdud sdig to can 'di snyam du sems te/ 'di gnyis ka yang rnam pa thams cad mkhyen pa nyid ring du byed pa'o/ / 'di gnyis ka yang bla na med pa yang dag par rdzogs pa'i byang chub tu mngon par rdzogs par 'tshang mi rgya'o/ /de ci'i phyir zhe na/ rigs kyi bu 'di gnyis kyis gang brtsams pa de ni rnam par thams cad mkhyen pa nyid kyi lam ma yin/ rigs kyi bu 'di gnyis kyis ni sems can dmyal ba dang /byol song gi skye gnas dang / gshin rje'i 'jig rten gyi lam la brtsams so zhes nas / dga' zhing spro ba dang / tshim zhing yid bde ba skye bar 'gyur ro/ /kun dga' bo gzhan yang gal te/ byang chub sems dpa' lung ma bstan pas /byang chub sems dpa' lung bstan pa la gnod par sems shing 'thab cing rtsod la 'khrug cing mtshang 'dru na/ gal te de rnam pa thams cad mkhyen pa nyid yongs su mi gtong zhe na/ ji tsam du sdig pa'i sems bskyed pa skyes pa dang / 'thab cing rtsod pa dang 'khrug cing mtshang 'dru bar 'gyur ba de srid kyi bskal par go cha bgo bar bya'o//kun dga' bos gsol pa/ bcom ldan 'das de dag gi sems bskyed pa de dag la 'byung ba gzhan mchis sam/ 'on te ma lags kyi bskal pa de snyed kho nar go cha bgo bar 'tshal / bcom ldan 'das kyis bka' stsal pa/kun dga' bo gang zag nyan thos kyi theg pa dang / rang sangs rgyas kyi theg pa pa rnams dang / byang chub sems dpa'i theg pa pa rnams la ngas 'byung ba dang bcas pa'i chos bstan te/ kun dga' bo de la gang zag de byang chub sems dpa'i theg pa pa byang chub sems dpa'i theg pa pa'i gang zag dang 'thab cing rtsod la gshe zhing mi snyan par brjod pa dang /'thab cing rtsod de gshe ba dang / mi snyan par brjod par byas nas phyir mi 'chags par mdud par 'dzin 'khon du bzung ste gnas na kun dga' bo gang zag de ni nges par 'byung ba rang mi smra ste/ gang zag des gal te rnam pa thams cad mkhyen pa nyid yongs su mi gtang zhe na/ gdon mi za bar bskal pa de snyed du go cha bgo bar bya'o/ /kun dga' bo byang chub sems dpa' sems dpa' chen po gang 'thab cing rtsod de gshe ba dang / mi snyan par brjod par 'gyur na yang mdud par mi 'dzin la phyin chad sdom pa 'dzin cing bdag gis ni thob par bya ba nyes par thob ste/bdag gis sems can thams cad kyi sdug bsngal bsal dgos na de ltar bdag smras pa la phyir smra ba dang / bdag gis sems can thams cad kyi zam par gyur par bya dgos na de ltar bdag gzhan la mi snyan par smra zhing phyir bzlog pa ni mi tshul gyis bdag gis de ltar mi bya'o//bdag gis glen pa dang lkugs pa bzhin du bya'o/ /bdag gis bsam pa la 'khrug pa med par bya'o/ /sems can de dag ni bdag gis bla na med pa yang dag par rdzogs pa'i byang chub tu mngon par rdzogs par sangs rgyas te/yongs su mya ngan las bzla bar bya dgos na/ de dag nyid la bdag ngan sems su byed pa dang / de dag nyid la bdag 'khrug pa ni tshul ma yin gyis/ bdag gis de dag la gnod sems su mi bya'o/ /bdag gis de dag la 'khrug par mi bya'o snyam na/kun dga' bo byang chub sems dpa' sems dpa' chen po ni nges par 'byung ba yod par ngas bshad de / de la bdud sdig to can glags lta zhing glags tshol bas kyang glags mi rnyed do/ /kun dga' bo gzhan yang byang chub sems dpa' sems dpa' chen pos gang zag nyan thos kyi theg pa pa dag dang 'grogs par mi bya'o//de dag dang lhan cig tu gnas par mi bya'o/ /'dug par mi bya'o/ /gal te 'dug na yang des su la yang gnod sems su mi bya/ 'khrug par mi bya'o/ /de ci'i phyir zhe na/ gang bdag gis de dag la gnod sems su bya ba dang /'khrug par bya ba de ni bdag la mi tshul lo/ /de ci'i phyir zhe na/ 'di ltar de dag ni bdag gis bla na med pa yang dag par rdzogs pa'i byang chub tu mngon par rdzogs par sangs rgyas te/ sdug bsngal thams cad las yongs su grol bar bya ba dag go snyam du bya'o/ /kun dga' bos gsol pa/bcom ldan 'das ji ltar byang chub sems dpa' sems dpa' chen pos gang zag byang chub sems dpa'i theg pa pa dag dang gnas par bgyi/ bcom ldan 'das kyis bka' stsal pa/ kun dga' bo 'di lta ste dper na/ ston pa dang ji ltar gnas pa de bzhin du/ byang chub sems dpa' sems dpa' chen pos gang zag byang chub sems dpa'i theg pa pa dang gnas par bya ste/ de ci'i phyir zhe na/ 'di ni bdag gi grogs te gru gcig tu zhugs pa'o/ /'dis ji ltar bslab par bya ba de bzhin du bdag gis kyang bslab par bya'o/ /'dis sbyin pa'i pha rol tu phyin pa dang zhes bya ba nas/rnam pa thams cad mkhyen pa nyid kyi bar du zhes bya ba'i bar du gsungs so/ /dad pa'i stobs bskyed pa'i mdo las kyang / 'jam dpal rigs kyi bu'am rigs kyi bu mo gang la la zhig gang gA'i klung gi bye ma snyed kyi rang rgyal ba rnams la/bskal pa gang gA'i klung gi bye ma snyed du gshe bar byed/ mi snyan par brjod/ rnyog par byed la/ 'gran par byed/ rigs kyi bu'am rigs kyi bu mo gzhan gang zhig theg pa chen po la mos pa'i byang chub sems dpa' la yud tsam zhig kyang gshe bar byed/ mi snyan par brjod/rnyog par byed na/ 'di ni de bas ches sdig pa ches grangs med par skyed par byed de / 'di'i tshad ni brjod par sla ba ma yin no/ /'jam dpal gal te 'jig rten gyi khams thams cad zla ba gcig dang nyi ma gcig par gyur cing / de dag kyang rang rgyal bas yongs su gang bar gyur la/rang rgyal ba re re la yang sbyin bdag lha'i gos dang / zas dang / mal stan dang / na ba'i rkyen sman gyi yo byad la sogs pa'i sbyin bdag chen po gzhal du med cing grangs med par gyur to/ /rang rgyal ba de dag gi sbyin bdag de dag thams cad kyang rgyun du zhugs par gyur pa dang /lan cig phyir 'ong ba dang / phyir mi 'ong ba gyur la/ de nas gdug pa'i sems dang ldan pa/ drag shul gyi sems dang ldan pa gang la la zhig byung bas/ rang rgyal ba de dag dang / rgyun du zhugs pa dang / lan cig phyir 'ong ba dang / phyir mi 'ong ba de dag gi bdog pa thams cad 'phrog par byed/yo byad thams cad rgyun gcad par bya ba'i phyir/ nyi ma dang zla ba snub par byed la/ rigs kyi bu'am rigs kyi bu mo gzhan gang zhig gis theg pa chen po la mos pa'i byang chub sems dpa' la khros par gyur te/ zas gcod par byed / zas gcod du 'jug par byed/ yo byad thams cad rgyun du gcad par bya ba'i phyir/ de la bsngags pa ma yin pa smra na/ 'di ni de bas ches sdig pa grangs med par skyed do/ /'jam dpal gal te sems can thams cad 'khor los sgyur ba'i bde ba dang / brgya byin gyi bde ba dang ldan par gyur cing /de nas rigs kyi bu'am rigs kyi bu mo la la zhig gis/ de dag thams cad 'khor los sgyur ba'i bde ba las nyams pas ches sdig pa grangs med par skyed do/ /dmyal ba dang dud 'gro dang gshin rje'i 'jig rten du skyed du 'jug la/ gzhan gang zhig khros pas byang chub sems dpa' rab tu byung ba/theg pa chen po la lhag par mos pa'i dge ba'i rtsa ba gcig gcod par byed na/ 'di ni de bas ches sdig pa ches grangs med par rab tu skyed do/ /'jam dpal gal te sems can thams cad rang rgyal bar gyur cing / de nas rigs kyi bu'am rigs kyi bu mo 'ga' zhig gis yongs su brtag pa bzung ste/rang rgyal ba de dag thams cad tshul khrims las nyams par byas nas dmyal ba dang dud 'gro dang gshin rje'i 'jig rten du bskyed du bcug la/ rigs kyi bu'am rigs kyi bu mo gzhan zhig gis byang chub sems dpa' rab tu byung ba/theg pa chen po la mos pa shes rab kyi rtsa ba dang / shes rab kyi las gcig la yang slob pa zhig /gdug pa'i sems dang / drag shul gyi sems kyis tshangs par spyod pa las nyams par byed na 'di ni de bas ches sdig pa grangs med par skyed do//'jam dpal gal te theg pa chen po la mos pa zhig gis/ gang gA'i klung gi bye ma snyed kyi sems can rnams rang rgyal ba la dgod par byed cing / de la rang rgyal ba de dag la bskal pa gang gA'i klung gi bye ma snyed du/ lha'i gos dang / zas dang / mal stan dang / na ba'i rkyen sman gyi yo byad sbyin pa byin par 'gyur la/ theg pa chen po la mos pa'i byang chub sems dpa' gzhan gang zhig gis/ theg pa chen po la mos pa'i byang chub sems dpa' zhig/ /sangs rgyas bcom ldan 'das la thal mo sbyar ba gcig byed du bcug na/ 'di ni de bas tshes bsod nams grangs med pa bskyed na/mar me'am/ bdug pa'am/ me tog sbyin par byed cing / sangs rgyas su bskrun pa'i dge ba'i rtsa ba gzhan dang gzhan la 'god pa lta ci smos te/ 'di ni de bas ches bsod nams grangs med par skyed de / de'i tshad ni bskal pa'am/bskal pa brgya'am/ bskal pa stong phrag gis kyang brjod par sla ba ma yin no zhes gsungs so/ / nam mkha' can gyi mdo las kyang / rigs kyi bu de la chos gang la gnas pa'i byang chub sems dpa' sems dpa' chen po myur du pha rol tu phyin pa drug yongs su rdzogs par 'dod pa/snying rje chen po la gnas par 'dod pa sa bcu yongs su rdzogs par 'dod pa/ myur du bla na med pa yang dag par rdzogs pa'i byang chub tu mngon par byang chub par 'dod pa/ chos kyi 'khor lo bskor bar 'dod pa/ sems can thams cad srid pa'i chu bo las bsgral bar 'dod pa/bdud bzhi 'dul bar 'dod pa/ phung po'i lhag ma med pa'i mya ngan las 'das pa'i dbyings su/ 'khor grangs med pa gzung bar 'dod pa'i byang chub sems dpa' sems dpa' chen po des/ mthar gyis sa'i rim gyis tshangs pa'i gnas bzhi la rnal 'byor du bya'o//rigs kyi bu ji ltar las dang po pa'i byang chub sems dpa' sems dpa' chen pos/ shar gyi phyogs nas steng gi phyogs kyi bar du sems can rnams la byams pas khyab par byed pa yin zhe na/ sems can rnams bde bar gyur cig ces yid la byed/bde bar gyur cig ces yang dag par shes/ bde bar gyur cig ces rab tu sbyor/ bde bar gyur cig ces byin gyis rlob par byed do/ /pha'am ma'am ji srid du rang sangs rgyas sam/ de bzhin gshegs pa'i bar du bde ba nyid du yid la byed pas na/ bde bar gyur cig ces byin gyis rlob pa'i bar du byed do//gang gi tshe sems can gang yang rung bas 'di la sngar don ma yin pa byas par gyur pa'i dus yod la/ de la 'di'i sems sdang zhing mi dad/ yang dag par mi gnas/ khro ba mi 'dor ro/ /de ltar yin dang las dang po pa'i byang chub sems dpa' sems dpa' chen pos 'di ltar rab tu bslab par bya ste/sems can 'dis sngon don ma yin pa 'di byas mod kyi/ gal te bdag gis 'di la kun nas mnar sems par byed cing / yid ma rangs par byed na/ de ltar na bdag nyid la don ma yin pa byed par 'gyur ro/ / phyogs bcu thams cad na bzhugs pa'i sangs rgyas bcom ldan 'das thams cad bdag la sangs rgyas kyi spyan gyis gzigs par mdzad cing / 'di ltar smod par mdzad par 'gyur te/ sems can 'di ni sems can rnams la sdang zhing / rgyal ba nyan thos dang rang sangs rgyas rnams dang thun mong ma yin pa/bla na med pa'i ye shes tshol bar 'dod pa la ltos/ 'di lta ste dper na/ mi grum po rkang pa gnyis dang bral ba 'di nas byang gi gling du 'gro bar 'dod pa'am/ mig nyams pa yi ge bri bar 'dod pa'am/ lag pa nyams pa g.yul sprod par 'dod pa'am/ me dang bral ba ri'i rgyal po ri rab sreg par 'dod pa'am/ chu dang bral ba sems can bkru bar 'dod pa de bzhin du skyes bu blun po de yang khro ba'i stobs kyis bla na med pa'i ye shes tshol bar 'dod do/ /gang sems can thams cad la khro ba mi spong ba des ni/ nyan thos kyi theg pa'ang bsgrub par mi nus na/theg pa chen po lta smos kyang ci dgos/ de ltar sangs rgyas bcom ldan 'das thams cad bdag la smod par mdzad do/ /byang chub sems dpa' sems dpa' chen po rnams dang / rang rgyal ba rnams dang / nyan thos chen po rnams dang / drang srong lha'i mig dang ldan pa rnams dang /lha rnams kyis kyang smod par byed do/ /bdag spyod pa ngan pa spyod par 'gyur ro/ /mnar med pa la gzhol ba dang / bdag bla na med pa yang dag par rdzogs pa'i byang chub la reg par mi 'gyur ro/ /de ltar bdag ni bdag la mthong ba'i chos dang phyi ma la don ma yin pa chen po byed par 'gyur ro//de ltar de la las dang po pa'i byang chub sems dpa' sems dpa' chen po gnod sems rab tu spong bar byed do/ /sems can rnams bde bar gyur cig snyam du yid la byed do zhes bya ba nas/ byin gyis rlob par byed do zhes bya ba'i bar du byed do//gang gi tshe sems can gang yang rung bas sngon don ma yin pa byas shing don ma yin pa byed pa'i dus yod la/ de la sems spang zhing mi dad/ yang dag par mi gnas/ khro ba mi 'dor ro/ /de ltar yin kyang 'di la las dang po pa'i byang chub sems dpa' sems dpa' chen pos 'di ltar rab tu bslab par bya ste zhes bya ba nas/ji skad sngar bshad pa mnar sems pa rab tu 'dor ro zhes bya ba dang / ji srid du sems can rnams bde bar gyur cig ces byin gyis rlob par byed pa zhes bya ba'i bar du'o/ /gang gi tshe sems can gang yang rung bas sngar don ma yin pa byas shing don ma yin pa byed mod kyi/don ma yin pa byed par 'dod pa'i dus de ni yod pa zhes bya ba dang / ji srid du gang bdag gi mdza' bo yid du 'ong ba de la sngon don ma yin pa byas so zhes bya ba'i bar dang / ji srid du don ma yin pa byed do zhes bya ba'i bar dang /ji srid du don ma yin pa byed par 'dod do zhes bya ba'i bar dang / ji srid du gang bdag dang mi mdza' zhing yid du mi 'ong ba de'i don byas so zhes bya ba'i bar dang / don byed do zhes bya ba'i bar dang / 'di'i don byed par 'dod do zhes bya ba'i bar dang / sems can rnams bde bar gyur cig ces yid la byed do//bde bar gyur cig ces rab tu shes/ bde bar gyur cig ces rab tu sbyor/ bde bar gyur cig ces byin gyis rlob par byed do/ /pha'am ma'am zhes bya ba'i bar dang / rang sangs rgyas sam/ de bzhin gshegs pa'i bde bar gyur cig ces byin gyis rlob par byed cing /de la chags pa dang ldan par mi 'gyur ro zhes bya ba'i bar dang / gnas ma yin par yongs su rtogs pas/ sems can gang yang rung ba la sems rab tu sdang zhing ma dad pa/ yang dag par mi gnas/ khro ba mi 'dor ba'i dus yod la/ de ltar yin dang las dang po pa'i byang chub sems dpa' sems dpa' chen pos 'di ltar bslab par bya ste/sems can 'dis bdag la don ma yin pa byas so zhes bya ba nas/ bdag gi mi mdza' zhing yid du mi 'ong ba zhes bya ba'i bar dang / 'di la don byed par 'dod do zhes bya ba'i bar dang /gang bdag gis de la rkyen med par mnar sems bskyed par byed/ rab tu sdang ba'i sems kyis gnas par byed na/ de lta na ni bdag nyid la bdag nyid don ma yin pa chen po skyed par byed par 'gyur ro/ /phyogs bcu thams cad na bzhugs pa'i sangs rgyas bcom ldan 'das thams cad bdag la sangs rgyas kyi spyan gyis gzigs par mdzad cing zhes bya ba nas bla na med pa yang dag par rdzogs pa'i byang chub la reg par mi 'gyur ro//de ltar na bdag ni bdag nyid la mthong ba'i chos dang phyi ma la don ma yin pa chen po byed par 'gyur ro/ /de ltar de la las dang po pa'i byang chub sems dpa' sems dpa' chen po mnar sems pa spong bar byed do//de ltar de la las dang po pa'i byang chub sems dpa' sems dpa' chen po byams pa dang ldan pa'i sems/ 'khon med pa/ 'gran zla med pa/ gnod pa med pa/ spangs pa chen por gyur pa/tshad med pa la legs par bsgoms pas phyogs gcig tu mos par byas te rdzogs par byas nas gnas so zhes bya ba'i bar dang / 'og dang steng du byams pa dang ldan pa'i zhes bya ba'i bar dang / legs par bsgoms pas mos par byas te rdzogs par byas nas gnas kyi chags pa dang ldan pas ma yin no zhes bya ba'i bar dang /rigs kyi bu 'di ni las dang po pa'i byang chub sems dpa' sems dpa' chen po'i sems can la dmigs pa'i byams pa/ nyan thos dang rang rgyal ba thams cad dang thun mong ma yin pa'o zhes bya ba gsungs so/ / rin po che'i phung po'i mdo las kyang / gang byang chub sems dpa' gang zhig byang chub sems dpa' la mnar sems pa'i sems bskyed pa de ni/ de bzhin gshegs pa la mnar sems pa'i sems bskyed par 'gyur ro/ /sha ra dwa ti'i bu mtshams med pa lnga po las mtshams med pa gang yang rung ba zhig byas pa ni bla'i /byang chub sems dpa' la mnar sems pa'i sems bskyed pa ni ma yin pa nyid do/ /de ci'i phyir zhe na/ shA ri'i bu 'di ltar rnam pa thams cad mkhyen pa nyid ni byang chub sems dpa' las nges par byung ngo / /gal te byang chub sems dpa' sems can rnams la mnar sems pa'i sems bskyed na thams cad mkhyen pa nyid du mi 'gyur ro//de ltar na byang chub kyi sems las byang chub sems dpa' byung zhing / byang chub sems dpa' las de bzhin gshegs pa byung ngo / /shA ri'i bu de'i phyir byang chub sems dpas /byang chub sems dpa' la mnar sems pa'i sems bskyed par mi bya zhing / byang chub sems dpas byang chub sems dpa' la brnyas par mi bya'o zhes gsungs so/ / snying rje chen po la 'jug pa'i mdo las kyang / dge slong mkhas pas tshul khrims ldan mthong nas//g.yo med par ni rtag tu bsnyen par bya/ /zhe sdang tha ba dag kyang rnam spangs te/ /dge slong chos smra rtag tu bsnyen par gyis/ /gnod sems khro ba dag kyang rnam spongs la/ /nga yi sras po chos skyong mchod par gyis/ /bskal pa bye ba mang por long ba dang / / log par ltung zhing sdug bsngal gyur ta re/ /gcig la gcig kyang gnod sems byas na ni/ /de la tshul khrims thos pas skyob mi nus/ /bsam gtan mi skyob dgon gnas skyob mi nus/ /sbyin pas mi skyob sangs rgyas mchod pas min/ /zhes gsungs so/ / nges pa dang ma nges pa la 'jug pa rtogs pa phyag rgya'i mdo las kyang /'jam dpal rigs kyi bu'am rigs kyi bu mo gang la la zhig gis/ sdang ba'i sems kyis nyan thos dang rang sangs rgyas dpag tu med pa dag gi zas dang gos bcad la/ rigs kyi bu'am rigs kyi bu mo gzhan zhig gis ni/ khros te sdang ba'i sems kyis theg pa chen po la mos pa'i byang chub sems dpa'i zan gcig phrogs sam/ zan gcod du bcug na/ 'di ni de bas ches sdig pa grangs med par bskyed do/ /de ci'i phyir zhe na/ 'jam dpal 'das pa dang / ma 'ongs pa dang / da ltar byung ba'i nyan thos dang rang sangs rgyas thams cad kyi sbyin pa dang /tshul khrims dang / bzod pa dang / brtson 'grus dang / bsam gtan dang / shes rab la sogs pa bskal pa bye ba grangs med pa nas/ yang dag par bsgrubs pa gang yin pa de dag thams cad ni rang gi sems kyi rgyud las skyes pa'i nyon mongs pa rnams 'joms par byed par zad kyi/byang chub sems dpa' ni tha na dud 'gro'i skye gnas su skyes pa'i sems can la/ kham gcig tsam yongs su btang ba yang / dkon mchog gsum gyi gdung mi 'chad par 'gyur bar byed pa'i phyir ro/ /'jam dpal yongs su brtag pa bzung ste rigs kyi bu'am rigs kyi bu mo gang la la zhig gis khros te sdang ba'i sems kyis/nyan thos dang rang sangs rgyas dpag tu med grangs med pa dag gi tshul khrims kyi phung po dang / ting nge 'dzin gyi phung po dang / shes rab kyi phung po dang / rnam par grol ba'i phung po dang /rnam par grol ba'i ye shes mthong ba'i phung po med par byas la/ rigs kyi bu'am rigs kyi bu mo gzhan zhig gis ni/ sdang ba'i sems kyis theg pa chen po la mos pa'i byang chub sems dpa'i tshul khrims tha na bslab pa gcig blangs pa tsam yang med par byas na/ 'di ni de bas ches sdig pa grangs med pa bskyed do/ /de ci'i phyir zhe na/ nyan thos dang rang sangs rgyas thams cad kyi tshul khrims kyi phung po dang / ting nge 'dzin gyi phung po dang / shes rab kyi phung po dang / rnam par grol ba'i phung po dang / rnam par grol ba'i ye shes mthong ba'i phung po ni/rang gi sems kyi rgyud las skyes pa'i nyon mongs pa rnams 'joms par byed par zad kyi/ 'jam dpal byang chub sems dpa' ni/ tha na nyi ma gcig gi bslab pa gcig las byung ba'i tshul khrims kyi phung po dang / ting nge 'dzin gyi phung po dang / shes rab kyi phung po dang /rnam par grol ba'i phung po dang / rnam par grol ba'i ye shes mthong ba'i phung po thams cad ni/ sems can thams cad kyi nyon mongs pa thams cad 'joms par byed pa nas/ thams cad mkhyen pa'i ye shes kyi bar du thob par 'gyur ba'i phyir ro/ /'jam dpal rigs kyi bu'am rigs kyi bu mo gang la la zhig gis khros te gnod sems kyi sems kyis/phyogs bcu'i 'jig rten gyi khams thams cad kyi sems can thams cad btson rar bcug la/ rigs kyi bu'am rigs kyi bu mo gzhan zhig gis ni/ byang chub sems dpa' la khros te gnod sems kyi sems kyis 'di dang phrad par ma gyur cig ces rgyab kyis phyogs te 'dug na/'di ni de bas ches sdig pa grangs med pa skyed do / /'jam dpal rigs kyi bu'am rigs kyi bu mo gang la la zhig gis/ phyogs bcu'i 'jig rten gyi khams thams cad kyi sems can thams cad kyi mig phyung la/rigs kyi bu'am rigs kyi bu mo gzhan zhig gis ni/ khros te gnod sems kyi sems kyis byang chub sems dpa' la bltas na/ 'di ni de bas ches sdig pa grangs med pa skyed do/ /'jam dpal yongs su brtag pa bzung ste nan gyis dper byas na/gal te phyogs bcu'i 'jig rten gyi khams thams cad kyi sems can thams cad kyi mig phyung bar gyur la/ de nas rigs kyi bu'am rigs kyi bu mo gang la la zhig gis/ byams pa'i sems kyis mig bskyed la/ rigs kyi bu'am rigs kyi bu mo gzhan zhig gis ni theg pa chen po la mos pa'i byang chub sems dpa' la dga' ba'i sems kyis bltas na/'di ni de bas ches bsod nams grangs med pa bskyed do zhes gsungs pa dang / yang mdo de nyid las kyang 'jam dpal theg pa chen po la mos pa'i byang chub sems dpa' gang la la zhig gis/ phyogs bcu'i 'jig rten gyi khams thams cad kyi sems can thams cad byang chub kyi sems la bkod la/ theg pa chen po la mos pa'i byang chub sems dpa' gzhan zhig gis ni/ theg pa chen po la mos pa'i byang chub sems dpa' rdzas med par tshigs su bcad pa gcig tsam 'don du bcug na/'di ni de bas ches bsod nams grangs med pa skyed do/ /'jam dpal yongs su brtag pa bzung ste nan gyis dper byas na/ rigs kyi bu'am rigs kyi bu mo gang la la zhig gis phyogs bcu'i 'jig rten gyi khams thams cad kyi rdul phra rab kyi rdul snyed kyi sems can rnams/sems can dmyal ba dang / dud 'gro dang / yi dags rnams su skyes par byas la/ rigs kyi bu'am rigs kyi bu mo gang la la zhig gis ni/ byang chub sems dpa' gcig byang chub kyi sems las mos pa bzlog na/ 'di ni de bas ches sdig pa grangs med pa skyed do zhes gsungs so// dad pa'i stobs bskyed pa la 'jug pa'i mdo las kyang / 'jam dpal rigs kyi bu'am rigs kyi bu mo gang la la zhig gis/ bskal pa rgya mtsho gang gA'i klung gi bye ma snyed du 'jig rten gyi khams thams cad kyi rdul snyed kyi sems can dag la nyin gcig bzhin du lha'i zas ro brgya dang ldan pa byin pa dang /de bzhin du lha'i gos rnams sbyin pa byin pa bas/ rigs kyi bu'am rigs kyi bu mo gzhan gang zhig gis/ dge bsnyen ston pa gzhan la mi brten pa/ dge ba bcu'i las kyi lam dang ldan pa gcig la/ 'di ni sangs rgyas bcom ldan 'das kyi bslab pa la bslabs pa yin no snyam nas/nyin gcig zan gcig byin na 'di ni de bas ches bsod nams grangs med pa skyed do/ /'jam dpal rigs kyi bu'am rigs kyi bu mo gang la la zhig gis/ bskal pa gang gA'i klung gi bye ma snyed du dge bsnyen ston pa gzhan la mi brten pa dge ba bcu'i las kyi lam dang ldan pa 'jig rten gyi khams thams cad kyi rdul snyed dag la nyin gcig bzhin du lha'i zas ro brgya dang ldan pa byin pa dang /de bzhin du lha'i gos rnams sbyin pa byin pa bas/ rigs kyi bu'am rigs kyi bu mo gzhan zhig gis/ dge slong gcig la nyin gcig zan gcig byin na/'di ni de bas ches bsod nams grangs med pa skyed do/ /'jam dpal rigs kyi bu'am rigs kyi bu mo gang la la zhig gis/ bskal pa rgya mtsho gang gA'i klung gi bye ma snyed du/ 'jig rten gyi khams thams cad kyi rdul snyed kyi dge slong dag la nyin gcig bzhin du lha'i zas ro brgya dang ldan pa byin pa dang /de bzhin du lha'i gos rnams sbyin pa byin pa bas/ rigs kyi bu'am rigs kyi bu mo gzhan gang zhig gis/ dad pas rjes su 'brang ba gcig la nyin gcig zan gcig byin na/ 'di ni de bas ches bsod nams grangs med pa skyed do//'jam dpal rigs kyi bu'am rigs kyi bu mo gang la la zhig gis/ bskal pa gang gA'i klung gi bye ma snyed du 'jig rten gyi khams thams cad kyi rdul snyed kyi dad pas rjes su 'brang ba dag la/ nyin gcig bzhin du lha'i zas ro brgya dang ldan pa byin pa dang / de bzhin du lha'i gos rnams sbyin pa byin pa bas/rigs kyi bu'am rigs kyi bu mo gzhan zhig gis/ chos kyis rjes su 'brang ba gcig la nyin gcig zan gcig byin na/ 'di ni de bas ches bsod nams grangs med pa skyed do/ /'jam dpal rigs kyi bu'am rigs kyi bu mo gang la la zhig gis/bskal pa gang gA'i klung gi bye ma snyed du 'jig rten gyi khams thams cad kyi rdul snyed kyi chos kyis rjes su 'brang ba dag la/ nyin gcig bzhin du lha'i zas ro brgya dang ldan pa byin pa dang / de bzhin du lha'i gos rnams sbyin pa byin pa bas/ 'jam dpal rigs kyi bu'am rigs kyi bu mo gzhan gang zhig gis brgyad pa gcig la nyin gcig zan gcig byin na/de ni de bas ches bsod nams grangs med pa skyed do/ /'jam dpal rigs kyi bu'am rigs kyi bu mo gang la la zhig gis/ bskal pa gang gA'i klung gi bye ma snyed du 'jig rten gyi khams thams cad kyi rdul snyed kyi brgyad pa la nyin gcig bzhin du lha'i zas ro brgya dang ldan pa byin pa dang /de bzhin du lha'i gos rnams sbyin pa byin pa bas/ 'jam dpal rigs kyi bu'am rigs kyi bu mo gzhan gang zhig gis/ rgyun du zhugs pa gcig la nyin gcig zan gcig byin na/ 'di ni de bas ches bsod nams grangs med pa skyed do//'jam dpal rigs kyi bu'am rigs kyi bu mo gang la la zhig gis/ bskal pa gang gA'i klung gi bye ma snyed du 'jig rten gyi khams thams cad kyi rdul snyed kyi rgyun du zhugs pa dag la/ nyin gcig bzhin du lha'i zas ro brgya dang ldan pa byin pa dang /de bzhin du lha'i gos rnams sbyin pa byin pa bas/ 'jam dpal rigs kyi bu'am rigs kyi bu mo gzhan gang zhig gis/ lan cig phyir 'ong ba gcig la nyin gcig zan gcig byin na/ de ni de bas ches bsod nams grangs med pa skyed do/ /'jam dpal rigs kyi bu'am rigs kyi bu mo gang la la zhig gis/bskal pa gang gA'i klung gi bye ma snyed du 'jig rten gyi khams thams cad kyi rdul snyed kyi lan cig phyir 'ong ba dag la nyin gcig bzhin du lha'i zas ro brgya dang ldan pa byin pa dang / de bzhin du lha'i gos rnams sbyin pa byin pa bas/ 'jam dpal rigs kyi bu'am rigs kyi bu mo gzhan gang zhig gis/ phyir mi 'ong ba gcig la nyin gcig zan gcig byin na/ 'di ni de bas ches bsod nams grangs med pa skyed do/ /'jam dpal rigs kyi bu'am rigs kyi bu mo gang la la zhig gis/ bskal pa gang gA'i klung gi bye ma snyed du 'jig rten gyi khams thams cad kyi rdul snyed kyi phyir mi 'ong ba dag la nyin gcig bzhin du lha'i zas ro brgya dang ldan pa byin pa dang /de bzhin du lha'i gos rnams sbyin pa byin pa bas/ 'jam dpal rigs kyi bu'am rigs kyi bu mo gzhan gang zhig gis/ dgra bcom pa gcig la nyin gcig zan gcig byin na/de ni de bas ches bsod nams grangs med pa skyed do/ /'jam dpal rigs kyi bu'am rigs kyi bu mo gang la la zhig gis/ bskal pa gang gA'i klung gi bye ma snyed du 'jig rten gyi khams thams cad kyi rdul snyed kyi dgra bcom pa dag la nyin gcig bzhin du lha'i zas ro brgya dang ldan pa byin pa dang /de bzhin du lha'i gos rnams sbyin pa byin pa bas/ 'jam dpal rigs kyi bu'am rigs kyi bu mo gzhan gang zhig gis/ rang sangs rgyas gcig la nyin gcig zan gcig byin na/ 'di ni de bas ches bsod nams grangs med pa skyed do//'jam dpal rigs kyi bu'am rigs kyi bu mo gang la la zhig gis/ bskal pa gang gA'i klung gi bye ma snyed du 'jig rten gyi khams thams cad kyi rdul snyed kyi rang sangs rgyas dag la nyin gcig bzhin du lha'i zas ro brgya dang ldan pa byin pa dang / de bzhin du lha'i gos rnams sbyin pa byin pa bas/ 'jam dpal rigs kyi bu'am rigs kyi bu mo gzhan gang zhig gis/ sangs rgyas ri mor bris pa'am gzugs su byas pa mthong na/ 'di ni de bas ches bsod nams grangs med pa skyed de / thal mo sbyar ba'am/ me tog gam/bdug pa'am/ spos sam/ mar me 'bul ba lta ci smos te/ 'di ni de bas ches bsod nams grangs med pa skyed do/ /'jam dpal rigs kyi bu'am rigs kyi bu mo gang la la zhig gis/ bskal pa gang gA'i klung gi bye ma snyed du/ sangs rgyas bcom ldan 'das nyan thos kyi dge 'dun dang bcas pa gang gA'i klung gi bye ma snyed dag la/nyin gcig bzhin du lha'i zas ro brgya dang ldan pa phul ba dang / de bzhin du lha'i na bza' rnams phul ba bas rigs kyi bu'am rigs kyi bu mo gzhan gang zhig gis/ tha na phyugs kyi shing rta lta bus 'gro ba'i byang chub sems dpa' bsam pa phun sum tshogs pa gcig la/sangs rgyas la skyed pa'i dge ba'i rtsa ba ci yang rung ba yongs su 'dzin te/ tha na nyin gcig zan gcig byin na yang / 'di ni de bas ches bsod nams grangs med pa skyed do/ /'jam dpal rigs kyi bu'am rigs kyi bu mo gang la la zhig gis/bskal pa gang gA'i klung gi bye ma snyed du/ ra'i shing rta lta bus 'gro ba'i byang chub sems dpa' 'jig rten gyi khams thams cad kyi rdul snyed dag la/ nyin gcig bzhin du lha'i zas ro brgya dang ldan pa byin pa dang / de bzhin du lha'i gos rnams sbyin pa byin pa bas/rigs kyi bu'am rigs kyi bu mo gang la la zhig gis/ glang po che'i shing rta lta bus 'gro ba'i byang chub sems dpa' gcig la/ sangs rgyas la skyed pa'i dge ba'i rtsa ba ci yang rung ba yongs su 'dzin te/ tha na nyin gcig za na gcig byin na yang / 'di ni de bas ches bsod nams grangs med pa skyed do/ /'jam dpal rigs kyi bu'am rigs kyi bu mo gang la la zhig gis/ bskal pa gang gA'i klung gi bye ma snyed du/ glang po che'i shing rta lta bus 'gro ba'i byang chub sems dpa' 'jig rten gyi khams thams cad kyi rdul snyed dag la/nyin gcig bzhin du lha'i zas ro brgya dang ldan pa byin pa dang / de bzhin du lha'i gos rnams sbyin pa byin pa bas/ 'jam dpal rigs kyi bu'am rigs kyi bu mo gzhan gang zhig gis/ zla ba dang nyi ma'i shing rta lta bus 'gro ba'i byang chub sems dpa' gcig la/ sangs rgyas la skyed pa'i dge ba'i rtsa ba ci yang rung ba yongs su 'dzin te/tha na nyin gcig zan gcig byin na yang / 'di ni de bas ches bsod nams grangs med pa skyed do/ /'jam dpal rigs kyi bu'am rigs kyi bu mo gang la la zhig gis/ bskal pa gang gA'i klung gi bye ma snyed du/zla ba dang nyi ma'i shing rta lta bus 'gro ba'i byang chub sems dpa' 'jig rten gyi khams thams cad kyi rdul snyed dag la/ nyin gcig bzhin du lha'i zas ro brgya dang ldan pa byin pa dang / de bzhin du lha'i gos rnams sbyin pa byin pa bas/ 'jam dpal rigs kyi bu'am rigs kyi bu mo gang la la zhig gis/nyan thos kyi rdzu 'phrul gyis 'gro ba'i byang chub sems dpa' gcig la nyin gcig zan gcig byin na/ 'di ni de bas ches bsod nams grangs med pa skyed do/ /'jam dpal rigs kyi bu'am rigs kyi bu mo gang la la zhig gis/ bskal pa gang gA'i klung gi bye ma snyed du/nyan thos kyi rdzu 'phrul gyis 'gro ba'i byang chub sems dpa' 'jig rten gyi khams thams cad kyi rdul snyed dag la/ nyin gcig bzhin du lha'i zas ro brgya dang ldan pa byin pa dang / de bzhin du lha'i gos rnams sbyin pa byin pa bas/ 'jam dpal rigs kyi bu'am rigs kyi bu mo gzhan gang zhig gis/de bzhin gshegs pa'i rdzu 'phrul gyis 'gro ba'i byang chub sems dpa' gcig la/ nyin gcig zan gcig byin na/ 'di ni de bas ches bsod nams grangs med pa skyed do/ /'jam dpal rigs kyi bu'am rigs kyi bu mo gang la la zhig gis/bskal pa gang gA'i klung gi bye ma snyed du/ de bzhin gshegs pa'i rdzu 'phrul gyis 'gro ba'i byang chub sems dpa' 'jig rten gyi khams thams cad kyi rdul snyed dag la/ nyin gcig bzhin du lha'i zas ro brgya dang ldan pa byin pa dang / de bzhin du lha'i gos rnams sbyin pa byin pa bas/'jam dpal rigs kyi bu'am rigs kyi bu mo gzhan gang zhig gis/ chos kyi rnam grangs 'di yi ger 'dri ba dang / yi ger 'drir 'jug pa dang / klog pa 'di ni de bas ches bsod nams grangs med pa skyed do/ /bzlog ste/ bsti stang ma byas pa'i mi dge ba'i las kyang de bzhin du brjod par bya'o//phyugs kyi shing rta lta bus 'gro ba dang / ra'i shing rta lta bus 'gro ba dang / glang po che'i shing rta lta bus 'gro ba dang / nyi ma dang zla ba'i shing rta lta bus 'gro ba dang / nyan thos kyi rdzu 'phrul gyis 'gro ba'ang de bzhin te/ 'jam dpal rigs kyi bu'am rigs kyi bu mo gang la la zhig gis/'jig rten gyi khams thams cad kyi rdul snyed kyi/ nyan thos kyi rdzu 'phrul gyis 'gro ba'i byang chub sems dpa' rnams kyi dge ba'i rtsa ba rnams kyi bar chad byas pa bas/ 'jam dpal rigs kyi bu'am rigs kyi bu mo gzhan gang zhig gis/ de bzhin gshegs pa'i rdzu 'phrul gyis 'gro ba'i byang chub sems dpa' gcig la/tha na dud 'gro'i skye gnas su gtogs pa'i dge ba'i rtsa ba'i bar chad byed cing / khro ba dang brnyas pa'i sems skyed na/ 'di ni de bas ches bsod nams ma yin pa grangs med pa skyed do/ /'jam dpal rigs kyi bu'am rigs kyi bu mo gang la la zhig gis/phyogs bcu'i 'jig rten gyi khams thams cad kyi rdul snyed kyi sems can thams cad kyi mig phyung nas bdog pa thams cad phrogs pa bas/ rigs kyi bu'am rigs kyi bu mo gzhan gang zhig gis/ byang chub sems dpa' la rkyen ci yang rung bas brnyas pa'i sems skyed de/gshe ba dang / mi snyan par smra ba dang / rnyog par byed pa na/ de bas ches sdig pa mang du skyed do/ /'jam dpal rigs kyi bu'am rigs kyi bu mo gang la la zhig gis/ byang chub sems dpa' la rkyen ci yang rung bas brnyas pa skyed de spyos na / de mi dge ba'i las des sems can dmyal ba ngu 'bod chen por lus dpag tshad lnga brgya par skye bar 'gyur te/de la mgo lnga brgya yod par 'gyur ro/ /de'i mgo re re la yang kha lnga brgya lnga brgya yod par 'gyur/ de'i kha re re la yang lce lnga brgya lnga brgya yod par 'gyur te/ lce re re la yang gshol lnga brgya lnga brgyas rmo bar 'gyur ro//'jam dpal rigs kyi bu'am rigs kyi bu mo gang la la zhig gis/ stong gsum gyi stong chen po'i 'jig rten gyi khams su skyes pa'i sems can thams cad la dbyig pa dang mtshon gyis bsnun te bdog pa thams cad phrogs pa bas/ rigs kyi bu'am rigs kyi bu mo gzhan gang zhig gis/byang chub sems dpa' la brnyas pa'i sems bskyed nas / khro ba dang / gnod sems dang / tha ba dang khros pa'i sems skyed na/ 'di ni de bas ches sdig pa grangs med pa skyed do/ /'jam dpal rigs kyi bu'am rigs kyi bu mo gang la la zhig gis/sdang ba'i sems kyis sems can rnams la gnod par 'dod cing / 'jig rten gyi khams gang gA'i klung gi bye ma snyed dag la/ 'jig rten gyi khams re re dang / gling re re na / dgra bcom pa gang gA'i klung gi bye ma snyed dag gi srog gcad pa dang / rin po che'i mchod rten rin po che'i stegs bus yongs su bskor cing /gdugs dang / rgyal mtshan dang / lha'i ba dan btsugs pa gang gA'i klung gi bye ma snyed bshig pa bas/ 'jam dpal rigs kyi bu'am rigs kyi bu mo gzhan zhig gis/ theg pa chen po la mos pa'i byang chub sems dpa'i theg pa chen po nyid la sgro btags te/brnyas pa'i sems bskyed nas/ rkyen cis kyang rung bas/ khro ba dang / gshe ba dang / mi snyan par zer ba dang / khyad du gsod par byed na/ 'di ni de bas ches sdig pa grangs med pa skyed do/ /de ci'i phyir zhe na/ byang chub sems dpa' las de bzhin gshegs pa nges par 'byung ba'i phyir te/de ni sangs rgyas kyi rigs gcod pa'i phyir zhugs pa yin no/ /gang byang chub sems dpa' la skur pa des chos spangs pa yin no/ /chos kyang gzhan la/ chos yongs su 'dzin pa'i byang chub sems dpa' yang gzhan ma yin te/ byang chub sems dpa' nyid chos so//'jam dpal rigs kyi bu'am rigs kyi bu mo gang la la zhig khros nas/ phyogs bcu'i 'jig rten gyi khams thams cad kyi sems can thams cad btson ra mun nag dag tu btsud pa bas/ rigs kyi bu'am rigs kyi bu mo gang la la khros te/ byang chub sems dpa' la rgyab kyis phyogs shing 'dug nas/ma rungs pa 'di ni mi blta'o zhes zer na/ 'di ni de bas ches sdig pa grangs med pa skyed do/ /'jam dpal rigs kyi bu'am rigs kyi bu mo gang la la zhig gis/ 'dzam bu'i gling gi sems can thams cad kyi bdog pa thams cad phrogs pa bas/gzhan gang zhig gis byang chub sems dpa' ji lta bu yang rung ba la smad na/ 'di ni de bas ches sdig pa grangs med pa skyed do zhes gsungs so/ / zhal ta byed pa la dgongs pa bstan pa/ nyi ma'i snying po'i mdo las kyang / de nas bcom ldan 'das la rgyal po gzugs can snying pos 'di skad ces gsol to//btsun pa bcom ldan 'das zhal ta ba zhes bgyi ba lags na/ bcom ldan 'das ji tsam gyis na zhal ta bar gdags par mdzad pa lags / bcom ldan 'das kyis bka' stsal pa/ rgyal po chen po dge slong gnyis zhal ta bar ngas gnang ngo //gnyis gang zhe na/ gang yang rnam par thar pa brgyad la bsgom pa'i dgra bcom pa dang / gang yang dge slong slob pa rgyun du zhugs pa yin te/ rgyal po chen po dge slong 'di gnyis zhal ta byed pa'i las byed par ngas gnang ngo zhes gsungs so// 'od srungs kyis zhus pa'i mdo las kyang / de nas bcom ldan 'das la/ tshe dang ldan pa 'od srungs kyis 'di skad ces gsol to/ /bcom ldan 'das dge slong ji lta bus zhal ta bgyi ba lags/ bcom ldan 'das kyis bka' stsal pa/ 'od srungs ngas zhal ta bya bar gnang ba'i dge slong gnyis te/gnyis gang zhe na/ dge slong yongs su dag pa 'jig rten gyi khams pha rol du kha na ma tho bas 'jigs par lta ba las kyi rnam par smin pa la rton pas/ 'dzem pa dang ldan zhing 'gyod pa dang ldan pa dang / gang yang zag pa zad pa/ dgra bcom par gyur pa ste/'od srungs dge slong ma nyams pa 'di gnyis zhal ta byed par ngas gnang ngo / /de ci'i phyir zhe na/ 'od srungs legs par gsungs pa'i chos 'dul ba 'di la/ rigs sna tshogs las rab tu byung ba/ sems kyi mos pa sna tshogs dang ldan pa spong pa'i phyir rnal 'byor sna tshogs la gnas pa/kha cig ni dgon pa bas mtha'i mal stan la mngon par dga' ba/ kha cig ni bsod snyoms pa/ kha cig ni grong 'dab na gnas pa/ kha cig ni 'tsho ba yongs su dag pa/ kha cig ni mang du thos pa la mngon par brtson pa/ kha cig ni chos smra ba/ kha cig ni 'dul ba 'dzin pa/kha cig ni ma mo 'dzin pa/ kha cig ni grong dang / grong khyer dang / grong rdal dang / yul 'khor dang / pho brang 'khor dag tu zhugs nas chos ston pa ste/ sems can gzhan dag gi sems kyi spyod pa rnams bsrung dka' ba'i phyir ro/ /'od srungs de la dge slong zhal ta byed pas/dge slong gi dge 'dun thams cad kyi sems mgu bar bya'o/ /'od srungs de la dge slong dgon pa bas mtha'i mal stan gang yin pa de dag ni dge slong zhal ta byed pas las su bsgo bar mi bya'o/ /zhal ta byed pas dge slong dgon pa pa de dag bsrung bar bya ste/ dus ma yin par gsol bar mi bya/ dus ma yin par gtang bar mi bya'o/ /'od srungs gal te dge slong dgon pa pa la dge 'dun gyi bya bar gtogs pa slob pa'i las res bab na/ dge slong zhal ta byed pa des las bdag nyid kyis bya'o/ /yang na dge slong gzhan zhig bskos pa la las de byed du gzhug ste/dge slong dgon pa pa la gnod par mi bya'o/ /'od srungs de la dge slong bsod snyoms spyod pa gang yin pa de la/ dge slong zhal ta byed pa des kha zas bsod pa bgo bsha' bya'o/ /'od srungs de la dge slong rnal 'byor spyod pa gang yin pa de dag la dge slong zhal ta byed pas mthun pa'i 'tshog chas dang /na ba'i gsos sman dang / yo byad rnams sbyin par bya'o/ /dge slong rnal 'byor spyod pa de sa phyogs gang la gnas pa'i sa phyogs der/ dge slong zhal ta byed pa des sgra chen po dang skad drag po mi dbyung zhing byed du yang mi gzhug go//dge slong zhal ta byed pas dge slong rnal 'byor spyod pa de bsrung zhing mal cha yang sbyar bar bya'o/ /kha zas bsod pa dang / yi gar 'ong ba dang / rnal 'byor spyod pa'i sa dang mthun pa'i bza' ba dang / bca' ba rnams sbyin par bya'o/ /dge slong de la dge slong 'di ni de bzhin gshegs pa'i bstan pa ston pa'i phyir gnas pa yin te/de la bdag gis rjes su mthun pa'i yo byad thams cad mang du sbyar bar bya'o snyam du shin tu phangs pa'i 'du shes bskyed par bya'o/ /'od srungs de la dge slong mang du thos pa la mngon par brtson pa gang yin pa de dag la dge slong zhal ta byed pas lung nos shig /lhogs shig /kha ton gyis shig /kho bo ni khyod kyi rim gro byed pa yin gyis/ khyod ji lta ji lta bur mang du thos par gyur pa de lta de lta bur/ dge slong gi dge 'dun mdzes par 'gyur bar gyis shig /'dul ba brjod pas mdzes par gyis shig /bdag nyid kyi shes rab kyang mchog tu 'gyur bar gyis shig ces spro ba bskyed par bya'o/ /'od srungs de la dge slong zhal ta byed pas de dag dus ma yin par btang bar mi bya/ las su bsgo bar mi bya'o/ /dge slong zhal ta byed pa des dge slong mang du thos pa de dag bsrung bar bya'o//'od srungs de la chos smra ba'i dge slong gang yin pa de dag dge slong zhal ta byed pas las su bsgo bar mi bya'o/ /grong dang grong khyer dang / grong rdal dang yul 'khor dang / rgyal po'i pho brang 'khor dag tu 'jug tu bcug la chos 'chad du gzhug go//chos nyan pa dag bsgo bar bya'o/ /'khor gyi dkyil 'khor rnam par dag par bya'o/ /'bel ba'i chos kyi gtam gyi phyir dkyil 'khor du gzhug par bya'o/ /chos smra ba'i dge slong la dge slong gang dag gnod par byed pa'i dge slong de dag dge slong zhal ta byed pas bzlog par bya'o//dge slong zhal ta byed pas chos smra ba'i dge slong la rtag tu bsu bar bya / legs so zhes bya ba mang du bya'o/ /'od srungs de la dge slong gang dag 'dul ba 'dzin pa dang / ma mo 'dzin par gyur pa de dag gi gan du dge slong zhal ta byed pa de song la/ ji ltar na bdag rma med cing ma nyams pa dang /ji ltar na bdag ltung ba med pa'i chos kyi zhal ta bya zhes yongs su dri bar bya'o/ /de nas 'dul ba 'dzin pa dang / ma mo 'dzin pa'i dge slong de dag gis dge slong zhal ta byed pa'i bsam pa rig nas de'i bya ba dang / 'byung ba gang yin pa dang / byed pa gang yin pa de bstan par bya'o//dge slong zhal ta byed pas/ 'dul ba 'dzin pa dang / ma mo 'dzin pa'i dge slong de dag la phangs par bya ba dang / dad pa dang gus pa dang / zhes rab tu bskyed par bya'o/ /dge 'dun gyi rnyed pa gang yin pa de dag dge slong zhal ta byed pas/ dus dus su dge slong gi dge 'dun la 'bul bar bya'i/dge 'dun gyi rnyed pa bsags shing sba bar mi bya ste/ ji ltar rnyed pa bzhin du sbyin par bya/ ma bskul bar sbyin par bya/ gnod pa med par sbyin par bya'o/ /des 'dun pa dang / zhe sdang dang / gti mug dang / 'jigs pas 'gro bar mi bya'o//dge slong gi dge 'dun la rton par bya'i / khyim pa'i phyogs la rton par mi bya'o/ /dge 'dun gyi bya ba la rton par bya'i/ bdag dga' bar bya ba la rton par mi bya'o/ /dngos po gang la yang dbang bya ba'i 'du shes bskyed par mi bya'i/ bya ba ji tsam du chung ba yang dge 'dun gyi gros bzhin du bya zhing /rang dgar mi bya'o/ /dge 'dun gyi'am/ phyogs bzhi'i dge 'dun gyi'am/ mchod rten gyi yo byad gang ci yang rung ste/ ji lta ba bzhin du gzhag par bya ste/ dge 'dun gyi dang / phyogs bzhi'i dge 'dun gyi dang bsre bar mi bya'o/ / phyogs bzhi'i dge 'dun gyi rnyed pa yang dge 'dun gyi dang bsre bar mi bya'o/ /dge 'dun gyi dang / phyogs bzhi'i dge 'dun gyi rnyed pa mchod rten gyi dang bsre bar mi bya'o/ /mchod rten gyi rnyed pa yang dge 'dun gyi dang / phyogs bzhi'i dge 'dun gyi rnyed pa bsre bar mi bya'o/ /gal te phyogs bzhi'i dge 'dun la brel phongs su gyur la/dge 'dun gyi rnyed pa che bar gyur na/ dge slong zhal ta byed pas dge slong gi dge 'dun bsdus la gros mthun par bgyis te/ dge 'dun gyi rnyed pa las/ phyogs bzhi'i dge 'dun la bshug par bya'o/ /gal te de bzhin gshegs pa'i mchod rten zhig ral du gyur la/dge 'dun gyi dang / phyogs bzhi'i dge 'dun gyi rnyed pa che bar gyur na/ dge slong zhal ta byed pas/ dge slong gi dge 'dun thams cad bsdus la/ gros mthun par bgyis te/ 'di skad ces de bzhin gshegs pa'i mchod rten 'di ni zhig ral du gyur la/dge 'dun gyi dang / phyogs bzhi'i dge 'dun gyi rnyed pa ni che bar gyur na/ gal te tshe dang ldan pa rnams gnod pa med cing dad pa dang ldan la bzod cing gnang na/ bdag gis dge 'dun gyi dang phyogs bzhi'i dge 'dun gyi rnyed pa 'di las dngos po cung zad cig khyer te/de bzhin gshegs pa'i mchod rten bcos par bya'o zhes brjod par bya'o/ /gal te dge 'dun gyis gnang na/ dge slong zhal ta byed pa des de bzhin du bya'o/ /ji ste dge 'dun gyis ma gnang na/ dge slong zhal ta byed pa des sbyin pa po dang /sbyin bdag la gsol ba thob la/ de bzhin gshegs pa'i mchod rten gso bar bya'o/ /'od srungs gal te mchod rten gyi rnyed pa ji ltar mang du gyur du zin kyang dge slong zhal ta byed pas dge 'dun dang / phyogs bzhi'i dge 'dun la bshug par mi bya'o/ /de ci'i phyir zhe na/dad cing dang ba mang po dag gis mchod rten la phul ba ni/ tha na ras kyi kha tshar gcig tsam gang yin pa de yang lha dang bcas pa'i 'jig rten gyi mchod rten yin na/ rin po che'am/ rin po cher smos pa dag lta smos kyang ci dgos/ mchod rten la gos phul ba gang yin pa de ni/de bzhin gshegs pa'i mchod rten de nyid du rlung dang / nyi ma dang / char pas dengs kyang bla'i / mchod rten la phul ba'i gos dbyig gam/ dbyig gi rin du bsgyur bar mi bya'o/ /de ci'i phyir zhe na/ mchod rten gyi ni rin thang du cung zad kyang med la/ mchod rten ni cis kyang brel ba med pa'i phyir ro//'od srungs dge slong zhal ta byed pas de ltar yongs su dag par bya ste/ des dkon mchog gsum gyi dang ma 'bags par bya'o/ /bdag gi rnyed pas chog shes par bya'o/ /dkon mchog gsum gyi byin gyis brlabs pa'i dngos po rnams la bdag gir 'du shes mi bya'o//'od srungs dge slong zhal ta byed pa rab tu sdang ba'i sems dang ldan pa gang la la zhig gis tshul khrims dang ldan pa/ yon tan dang ldan pa/ sbyin gnas rnams la sems khros sam/ dbang byed cing bsgo blag byed na/ de mi dge ba'i las des sems can dmyal bar 'gro bar 'gyur ro//gal te mi'i 'jig rten du 'ongs na yang bran dang gzhan gyi las byed par 'gyur ba dang / khu tshur dang / thal lcag dang / lag cha bsnyems pas brdegs pa dang phrad par 'gyur ro/ /'od srungs gzhan yang gal te dge slong zhal ta byed pa dge 'dun gyi bya ba las 'das te/rang dgar dge slong rnams la dbang byed cing bsgo ba dang / chad pas gcod pa dang / 'jigs par byed pa dang / bsdigs pa dang / dus ma yin par brdeg pa dang / dus ma yin par bsgo bar byed na/ de mi dge ba'i las des nyi tshe ba'i sems can dmyal ba phur pa mang po zhes bya ba der skye bar 'gyur te/der skyes nas lus la lcags phur brgya stong zug cing de dag 'bar/ rab tu 'bar la/ kun du rab tu 'bar ba mched cing 'bar bar 'gyur ro/ /des tshul khrims dang ldan pa/ yon tan dang ldan pa/ sbyin pa'i gnas rnams la bsdigs shing /ngag gi las gdug pa smras par gyur pa gang yin pa des der skyes nas/ lce'i dbang po'i khyon dpag tshad brgya par 'gyur zhing / de'i lce'i dbang po de la lcags phur brgya stong rab tu 'bab cing / de dag kyang 'bar rab tu 'bar kun tu rab tu 'bar la/ kun du rab tu mched cing 'bar te/mer 'gyur ro/ /de ci'i phyir zhe na/ 'di ltar des bsdigs shing ngag gi las gdug par smra bar gyur pa'i phyir ro/ /'od srungs dge slong zhal ta byed pa gang la las dge 'dun gyi rnyed pa 'dus shing 'dus pa gzhag ste/ dus dus su mi sbyin zhing / mtho btsams la gtses nas sbyin pa dang /kha cig byin / kha cig ma byin/ kha cig la byin la / kha cig la ma byin na/ de mi dge ba'i las nges yi dags kyi skye gnas rkyag 'jim byin pa nub ces bya ba der skye bar 'gyur ro/ /de der skyes nas yi dags gzhan gyi kha zas blangs te/ de la bstan na de bstan pa'i tshe mig mi 'dzums par zas de blta zhing bkres pa dang /skom pas nyen pa'i sdug bsngal gyi tshor ba myong gi /lo brgya stong du yang zas de thob par mi 'gyur ro/ /ji ste brgyal brgya lam na zas de thob kyang / ngan skyugs dang rnag khrag tu 'gyur ro/ /de ci'i phyir zhe na/ 'di ltar des tshul khrims dang ldan pa/ yon tan dang ldan pa/ sbyin gnas rnams mgu bar ma byas shing / rang gi rnyed pas chog mi shes par gyur pa'i phyir ro/ /'od srungs dge slong zhal ta byed pa gang la las dge 'dun gyi'am/ phyogs bzhi'i dge 'dun gyi'am/ mchod rten gyi 'tshol bar byas na/de'i rnam par smin pa ni ngas bskal par bgrangs pas kyang brjod kyis mi lang ngo / /'od srungs dge slong zhal ta byed pa gang la las nyes dmigs kyi gnas 'di lta bu 'di dag thos nas/ khro ba'am/ gshe ba'am / gnod par sems shing / khong khro ba skyed na/de ni gsor mi rung ngo zhes ngas bshad do/ /'od srungs de lta bas na dam pa'i chos 'di lta bu thos nas/ dge slong zhal ta byed pas lus dang ngag dang / yid yongs su dag par bya'o/ /bdag dang gzhan bsrung bar bya'o/ /'od srungs dge slong zhal ta byed pa rang gi sha la za yang bla'i/dkon mchog gsum gyi byin gyis brlabs pa'i lhung bzed dam/ chos gos sam/ na ba'i gsos sman nam/ yo byad yongs su spyad par ni mi bya'o/ /de nas bcom ldan 'das la tshe dang ldan pa 'od srungs chen pos 'di skad ces gsol to//bcom ldan 'das kyis lhod pa rnams kyi lhod pa'i chos dang / 'dzem dog mchis pa rnams kyi 'dzem dog gi chos rnams bka' stsal to zhes gsungs so/ /lhag pa'i bsam pa bskul ba'i mdo las kyang / de nas bcom ldan 'das la byang chub sems dpa' sems dpa' chen po byams pas 'di skad ces gsol to//bcom ldan 'das byang chub sems dpa' gang dag chos kyi mchog yongs su spangs nas/ las ngan pa rtsom pa de dag ni shes rab shin tu chung zhing / shes rab kyis dman par 'gyur ba lags so/ /de skad ces gsol ba dang / bcom ldan 'das kyis byang chub sems dpa' sems dpa' chen po byams pa la 'di skad ces bka' stsal to/ /byams pa de de bzhin te/ de de bzhin no/ /ji skad smras pa de bzhin te/ byang chub sems dpa' gang dag gis chos kyi mchog yongs su spangs nas las ngan pa rtsom pa/ de dag ni/ shes rab shin tu chung zhing shes rab kyis dman par 'gyur ba yin no/ /byams pa gzhan yang khyod mos par bya'o/ /khyod kyis khong du chud par bya'o/ /byang chub sems dpa' gang dag la sbyor ba med cing / bsam gtan med la spong ba med cing 'don pa med pa dang /mang du thos pa yongs su tshol ba med pa de dag ni/ de bzhin gshegs pa'i bstan pa la rab tu byung ba ma yin no/ /byams pa de bzhin gshegs pa'i bstan pa ni bsam gtan dang spong bas phye ba dang / ye shes kyis 'dus byas pa dang / ye shes kyis mnyam par gzhag pa dang / brtson pas phye ba yin gyis/ khyim pa'i las dang zhal ta byed pas phye ba ni ma yin te/ 'di ltar zhal ta byed pa'i las de ni mi rigs pa la sbyor ba rnams dang / 'du byed la mngon par dga' ba rnams dang / 'jig rten pa'i bya bas spags pa ste/ byang chub sems dpas de la 'dod pa bskyed par mi bya'o//byams pa gal te byang chub sems dpa' zhal ta byed pa la brtson pas/ rin po che sna bdun gyi mchod rten dag gis/ stong gsum gyi stong chen po'i 'jig rten gyi khams 'di bkang na des ni nga mnyes par byas pa ma yin/ ri mor byas pa ma yin/ bkur stir byas pa ma yin gyi /byams pa gal te byang chub sems dpa' tha na pha rol tu phyin pa drug dang ldan pa'i tshig bzhi pa'i tshigs su bcad pa gcig tsam 'dzin tam/ 'chang ngam/ klog gam/ kun chub par byed dam 'chad pa de ni nga la bkur stir byas/ bla mar byas/ ri mor byas/mchod par byas par 'gyur ro/ /de ci'i phyir zhe na/ byams pa de bzhin gshegs pa rnams kyi byang chub ni mang du thos pa las byung ba yin gyi / dngos po yongs su 'dzin pa las byung ba ni ma yin pa'i phyir ro/ /byams pa gal te byang chub sems dpa' zhal ta byed pa la brtson pas/byang chub sems dpa' lung nod pa dang / kha ton byed pa la brtson pa zhal ta byed pa'i sbags pas sbags par byed na/ bsod nams 'dod pa des ni / bsod nams ma yin pa'i phung po chen po bskyed par 'gyur te/ las kyi sgrib pa yang yongs su 'dzin par 'gyur ro//de ci'i phyir zhe na/ bsod nams bya ba'i gzhi gsum po gang yin pa de dag ni shes rab las byung ba'i phyir ro/ /byams pa de lta bas na/ byang chub sems dpa' zhal ta byed pa la brtson pas/ byang chub sems dpa' lung nod pa dang / kha ton byed pa la brtson pa'i bar chad mi bya'o//'dzam bu'i gling 'di zhal ta byed pas yongs su gang bar gyur pa'i zhal ta byed pa de dag thams cad ni byang chub sems dpa' lung nod pa dang / kha ton byed pa la brtson pa gcig la/ rim gro dang bsnyen bkur bya'o zhes gsungs so/ /bden pa'i rnam pa'i mdo las kyang //de la byang chub sems dpa'i zhal ta gang zhe na/ de bzhin gshegs pa'i mchod rten dang / chos nyan pa dang / mkhan po dang / slob dpon rnams la snyom las med pa dang / ltos pa med pas zhal ta byed pa'i bya ba la bya'o/ /shA ri'i bu byang chub sems dpa' gang la las tha na legs so zhes bya ba yang re bas zhal ta de mi bya/de lta bu'i ngo bos zhal ta mi bya ste/ 'di ni zhal ta shes pa zhes bya'o zhes gsungs so/ /yongs su 'dzin pa la dgongs pa bstan pa/ ji lta bu zhig gi mdo las kyang / maud gal gyi bus gsol pa/ btsun pa dge slong gang la la zhig skyes bu gang zag brgyad kyi zhing la phul ba dang /phyogs bzhi'i dge 'dun chen po'i dkor gyis dor ba dang / rgyal po'i khol po dang / sna chen po la gtogs pa dang / mdun na 'don dang / blon po dang / smad 'tshong ma mchog dang / rgyal po dang / btsun mo dam pa la brten nas/bsod nams brgya phrag stong la dbang byed pa dang 'dra ba'i las gsar pa rtsom pa chen pos byed pa dang / thabs log pa de nyid kyis phyis ltung ba dang bcas par 'gyur ba des / bsod nams ma yin pa ci 'dra ba zhig bskyed par bgyi / bcom ldan 'das kyis bka' stsal pa/ dge sbyong dor ba/gdug pa la brten pa srid pa'i khol po/ /'khor ba rgyas par byed pa/ nyon mongs pa dang nye ba'i nyon mongs pa'i dri mas sbags pa / slob dpon ltar snang bas dbang bskur ba/ byis pa mchil snabs 'phyag cing kha 'phro za ba rnams kyis bskor ba de ni/ rma bya'i 'bag lta bus srin bu'i ras kha bsgyur ba'i gos dang /rams kyis kha bsgyur ba'i sha 'gag dang / bkra ba dang nye bar bkra ba'i lham gyon nas/ bal mchog gi 'bol stan la gnas gnas te/ dge slong des pa la smod cing 'dri/ gshe ba dang / spyo ba dang sdigs mdzub dag gis gnas nas 'byin par byed/de dag la sngon du 'ong ba dang / rjes su 'brang ba dang / ldang ba dang / thal mo sbyar ba'i las 'dud pa'i phyag gis bka' bsgo zhing / chu mchog dang zas mchog dang / mal stan mchog yongs su longs spyod pas/ mtshams med pa dang nye bar 'dra ba'i sdig pa ches shin tu sogs par 'gyur ro//ji ltar gtsang sbra 'dod pa rnams kyis bdag gi lus dang / gos brlag par ma gyur cig snyam nas/ bshang gci ring du spong bar byed la/ de bzhin du sangs rgyas kyi sras po zag pa med pa'i tshul khrims kyi gtsang sbra 'dod pa rnams kyis kyang / de lta bu'i gang zag mthong nas/lung dang rtogs pa'i chos kyi longs spyod gnyis las ring du byed par 'gyur ro/ /rgyud ma lta bur gyur pa rtag par mi dge ba byed pa/ shing dang lteng ka bskams pa dang 'dra ba/ dam pa'i chos kyi ljon shing gi bcud zag pa med pa'i tshul khrims 'joms pa/ lus zangs kyi gos kyis g.yogs pa/lcags kyi gong bu 'bar ba za ba/ bdag nyid kyi khrag khol ma 'thung ba/ mi ma rabs lo ma rul ba lta bu sgra snyan pa nyams pa'i dung gi skad ltar kun du spyod pa/ bdag dang gzhan rnam par 'joms pa ni/ mthar gnas ltar rnal 'byor pas yongs su spong bar byed do/ /maud gal gyi bus gsol pa/bcom ldan 'das des bskal pa brgyad cur mnar med pa'i sdug bsngal myong bar bya dgos so/ /bcom ldan 'das kyis bka' stsal pa/ maud gal gyi bu de de bzhin te/ bar gyi bskal pa brgyad cur bsdams pa bskal pa chen po der dge 'dun 'du ba'i sgo 'phrogs pa des der sdug bsngal nyams su myong bar 'gyur ro//las kyi zas can du 'gyur zhing / de'i lus bcu 'gyur dang / de gzhon sha chags pas mar sar dang ras bal gyi 'da' ba lta bu dang / tshor ba bcu 'gyur du rnam par chad pa med par gnad thams cad gcod pa'i sdug bsngal myong bar 'gyur ro//las byas shing bsags pa de zhig cing bsal ba nyams par gyur pa/ yongs su zad par gyur gyi bar du kun nas 'bar ba rab tu 'bar ba/ yang dag par rab tu 'bar ba/ rgya skyegs kyi kha dog lta bur 'bar ba gcig tu gyur par 'tshed do/ /de nas shi 'phos te sdig pa'i bag chags kyi rgyu mthun pa'i 'bras bus/gung dang / byi la dang / seng ge dang / stag dang / spyang ki'i mngal du sdig to can 'tshed par skye bar 'gyur ro/ /der yang sngar sdig pa spyod cing des mun pa nas mun par 'gro bar 'gyur ro zhes gsungs so/ /nyi ma'i snying po'i mdo las kyang /da ltar dang ma 'ongs pa'i dus na/ nga'i bstan pa 'di dang / dam pa'i chos sam/ dam pa'i chos kyi gzugs brnyan yun ji srid gnas par/ chos kyis gnas pa'i dge slong rnams la khyim dang kun dga' ra ba dang / zhing dang bran dang / bran mo'i bar gang su dag gis de ltar bsngos pa de la/sdig pa spyod pa'i dge slong tshul khrims 'chal pa gang dag tha na 'dab ma gcig dang / 'bras bu gcig dang / me tog gcig cig yongs su spyod pa dag tu byed na/ de ni mi blun po de la don ma yin pa dang / phan pa ma yin par 'gyur te/ de la gnod pa bzhi yang 'byung bar 'gyur ro//bzhi gang zhe na/ phyogs thams cad du mi snyan pa chen por 'gro ba yin/ mdza' bo dang / nye du dang / snag gi gnyen mtshams dang / mkhan po dang / slob dpon dang / rim gro pa dang sdug cing yid du 'ong ba dang myur du 'bral bar 'gyur ba yin/ nad tshabs chen po yun ring ba dag gis thebs par 'gyur ba yin /de'i chos gos dang / lhung bzed gang yod pa de yang 'jigs pa chen po lngas phrogs par 'gyur ba yin no/ /lnga gang dag gis she na/ 'di lta ste/ rgyal po dang / chom rkun dang / me dang chu dang / bgo skal la spyod pa'i mi mdza' ba dang lnga po de dag gis so//de'i 'jig rten pha rol gyi 'dod pa ma yin pa'i 'bras bu bzhi myur du 'grub par 'gyur ba yin te/ bzhi gang dag yin zhe na/ lus zhig nas sems can dmyal ba chen po mi bzad par skye bar 'gyur ba yin te / gal te brgyal res 'ga' zhig dus ring zhig 'das nas/ sems can dmyal ba chen po de nas shi 'phos nas/ 'brog dgon pa ro skam gyi nang du/ dud 'gro dang / yi dags kyi rigs su long ba dang / rkang lag med pa dag tu skye bar 'gyur zhing / de lo brgya stong mang po dag tu bkres pa dang / skom pas yongs su gdung ba chen po'i sdug bsngal nyams su myong bar 'gyur ba yin/gal te brgya la res 'ga' zhig dus ring zhig 'das nas/ de nas shi 'phos nas/ lo brgya stong mang po dag tu sbrul gdug pa/ long ba rdul za ba dag gi nang du skye bar 'gyur ba yin/ de brgyal res 'ga' zhig de nas shi 'phos nas/ gal te mi rnams kyi nang du skyes na /'on kyang sangs rgyas kyi zhing snyigs ma lnga dang ldan pa stong pa dag tu/ mi nyid 'thob pa rnyed par 'gyur zhing / mong rtul ba dang tshul 'di mi shes par 'gyur ba dang / mig ma tshang ba dang / lag pa ma tshang ba dang / rkang pa ma tshang ba dang / khyi'i longs spyod kyi kha zas la gdu zhing /rkyag khung pa'i kha zas la za ba dang / 'dam rdzab dang / phyag dar khrod na gnas pa dang / 'brog dgon pa dang / lam po che rnams na 'tsho bar 'gyur la/ de de nas shi 'phos nas kyang yang sems can dmyal ba rnams kyi nang du skye bar 'gyur ro/ /de ci'i phyir zhe na/ de'i 'bras bu 'dod pa ma yin te/de ltar lci bar 'byung zhe na/ 'di ltar sdig pa spyod pa'i dge slong de ni/ 'di ltar chos kyis gnas pa rnams la khyim dang zhing dang / kun dga' ra ba dang / bran dang bran mo dang / phyugs dag gi bar dag phrogs nas/ gang zag rang gi yongs su spyod pa la longs spyod par byed pa'i phyir te/sdig pa spyod pa'i dge slong de lta bu de ni/ de ltar ngo mtshar rmad du byung ba'i sangs rgyas 'byung ba thams cad kyi chos kyi tshul med par bya ba dang / rnam par gzhig pa dang / rgyun gcad pa dang / nub par bya ba'i phyir brtson pa yin no/ /de bzhin du dkon mchog gsum gyi gdung med par bya ba nas/nub par bya ba'i bar du brtson pa yin no/ /de ci'i phyir zhe na/ 'di ltar dge ba'i phyogs ni tshogs pa dang ldan pa yin la/ chos kyi tshul dang / dkon mchog gsum gyi gdung yang dge ba'i phyogs kyis rab tu phye ba yin te/ de'i phyir nyid kyi mi 'dod pa'i 'bras bu rnam par smin pa lci ba mngon par 'grub pa yin no//de nas gnas brtan ga ya 'od srungs kyis mchi ma blags nas 'di skad ces gsol to/ /btsun pa bcom ldan 'das mi nyid rnyed pa ni ma thob kyang bla'i/ rab tu byung nas bza' ba dang btung ba'i slad du log par sgrub pa ni de lta ma lags so//bcom ldan 'das kyis bka' stsal pa/ ga ya 'od srungs chen po de de bzhin no/ /ji skad smras pa de bzhin te/ gong du de'i sngon gyi las rnams zad pa dag tu 'gyur ba'i sems can dmyal bar gnas pa ni bla'i/ 'di na gang gzhan du spyod pa ni de lta ma yin no/ /'on kyang skyes bu blun po kha cig mi nyid 'thob par dka' ba rnyed de/legs par gsungs pa'i chos 'dul ba gang la sdug bsngal thams cad zad pa dang / zag pa thams cad mthar thug par 'gyur ba'i ngo mtshar rmad du byung ba'i rab tu byung ba rnyed par dka' ba dang / bsnyen par rdzogs pa dge slong gi dngos po thob nas/'on kyang skyes bu blun po gang gis mchod par mi 'gyur ba dang / bza' btung dang bral bar 'gyur la/ mi dge ba'i phyogs rnal 'byor yid la byed pa yongs su bsal nas rgyal rigs dang / bram ze'i rigs dang / rje'u rigs dang / dmangs rigs dad pa can dag gis khyim dang zhing dang /kun dga' ra ba dang / skyed mos tshal dang / bran dang bran mo dang rkang bzhi pa dag gi bar dge slong chos kyis gnas pa/ yon tan gyis phug pa dag longs spyad par bya ba'i phyir dang / dge ba'i phyogs dang mthun par bya ba'i phyir de ltar bsngos pa la/ sdig pa spyod pa'i dge slong de mang du thos pa'i mthu'am/khyim na gnas pa'i mthus de dag la bsngos pa'i longs spyod dang nye bar spyod pa phrogs nas/ bdag nyid kyis gang zag gi 'du shes kyis yongs su spyod par byed de/ skyes bu blun po de'i log par sgrub pa de ni de lta bur 'gyur ro zhes gsungs so/ /yang mdo de nyid las/bcom ldan 'das kyis bka' stsal pa/ rgyal po chen po legs so legs so/ /khyod kyis spobs pa legs so/ /rgyal po chen po ma 'ongs pa'i dus na/ gang dag rgyal rigs dang / bram ze dang / rje'u rigs dang / dmangs rigs dag chos kyis gnas pa rnams la/ khyim gyi gzhi dang / zhing gi gzhi dang / kun dga' ra ba'i gzhi dang / skyed mos tshal dang / bran dang bran mo dang / mal cha dang stan dang / na ba'i gso sman dang / yo byad dag de lta de ltar bsngos pa dang / rkang bzhi pa'i bar bsngos pa yang / 'phrog par byed pa'am/ rku bar byed pa dag 'byung bar 'gyur te/rgyal rigs nas dmangs rigs kyi bar de dag thams cad ni mthong ba'i chos la 'byung bar 'dod pa ma yin pa'i chos nyi shu dang myur du ldan par 'gyur ro/ /nyi shu gang dag ce na/ lha rnams kyis yongs su btang ba yin/ phyogs dang phyogs mtshams dag tu yang de'i mi snyan pa grags par 'gyur ba yin/mdza' bshes dang / snag gi gnyen mtshams dag gis kyang de yongs su gtong bar 'gyur ba yin/ de'i dgra bo dag kyang mang bar 'gyur ba yin/ nor dang nor gyi yo byad dag kyang yongs su nyams par 'gyur ba yin/ rnam par g.yeng ba mang ba yang yin/ yan lag ma tshang bar 'gyur ba yang yin/de gnyid med par 'gyur ba yin/ rtag tu sred pas gnod par 'gyur ba yang yin/ de'i bza' ba dang btung ba yang dug gi bya ba byed pa yin/ sdug pa dang yid du 'ong ba dag dang myur du 'bral ba 'thob pa yin/ rtag tu gzhan dag dang 'thab mo 'byung ba yin/ pha dang ma dang spun dang / chung ma dang bu dang bu mo dang / bran dang bran mo dag kyang bsgo ba bzhin mi byed pa yin/ de'i gsang sngags gsang ba dag dang / nor gsang ba dang / slas gsang ba dang / de'i dngos po gsang ba rnams kyang thams cad gsang shor ba dag tu 'gyur ba yin/ bgo skal la spyod pa mi mdza' ba la sogs pa lngas longs spyod dag chud za bar 'gyur ba yin/nad tshabs chen po dag gis kyang myur du thebs par 'gyur ba yin/ sman dang rim gro ba dag dang 'bral ba yin/ sha dang khrag bskams nas/ sdug bsngal nyams su myongs ba yin/ rang gi bshang gci dag gi nang du 'chi ba'i dus byed par 'gyur ba yin te/rgyal po chen po 'dod pa ma yin pa'i chos nyi shu po de dag dang myur du ldan par 'gyur ro/ /gang dge slong chos kyis gnas pa rnams la bsngos pa'i longs spyod dang / nye bar spyod pa dang / nor gyi yo byad 'phrog par byed cing / bdag nyid kyang yongs su longs spyod par byed pa de 'chi ba'i dus byas nas/sems can dmyal ba chen po mnar med par skye bar 'gyur ro/ /de der yang tshe bskal par lcags dang zangs bzhun 'thung bar 'gyur zhing / lcags kyi thu lum za bar 'gyur la/ me'i gos dang / longs spyod dang / nye bar spyod par byed cing / gnod pa mi bzad pa chen po rnam pa sna tshogs nyams su myong bar 'gyur ro/ /tshe bskal pa zad pa nas de nas shi 'phos nas kyang / 'brog dgon pa ro skam dag gi nang du lam du skyes pa'i yi dags rnams dang skal ba mnyam par/ rkang pa dang lag pa dang / mig ma tshang bar skye bar 'gyur ro//der yang phyogs bzhi nas langs pa'i rlung kun du tsha ba dag gis kun du gdung bar byed do / /sa spu gri dang 'dra ba'i steng du bsnyal bar byed/ yongs su bsnyal bar byed de zhes gsungs pa dang / yang mdo de nyid las/ rgyal po gzugs can snying pos 'di skad ces gsol to/ / btsun pa bcom ldan 'das spyod pa'i mtshan nyid kyi mtshan ma gang dag gis/ dge slong tshul khrims 'chal pa sdig pa'i chos kun du spyod pa/ dge slong chos kyis gnas pa rnams kyi nang du slan chad kyang gnas pa dang / longs spyod dang nye bar spyod par bgyi bar mi 'os pa 'tshal ba lags/bcom ldan 'das kyis bka' stsal pa/ rgyal po chen po rnam pa 'di lta bus tshul khrims 'chal pa'i mgo 'byung bar 'gyur ro zhes gang gis kyang myur du rnam par shes par mi nus te/ rgyal po chen po 'di ni nang gi dang por sangs rgyas la ma gus pa yin no/ /chos dang dge 'dun dang /mkhan po dang slob dpon dang / bla ma'i gnas lta bu rnams la ma gus pa yin/ 'phags pa'i rigs btang ba yin/ rnal 'byor yid la byed pa la kun dga' ba ma yin no/ /ngo tsha shes pa dang khrel yod pa rnam par spangs pa yin/ khyim na gnas pa dang 'dres pa yin/ tshig 'khyal pa smra ba yin/bdag la bstod pa yin/ gzhan la smod pa yin/ de lta bu dag la kun dga' ba yin/ sdig pa'i rnyi la chags pa yin/ lam ngan par zhugs pa yin/ khengs pa yin/ kha drag pa yin/ 'phral g.yar can yin/ 'phyar po yin/ kha shing can yin/ g.yo sgyu can yin/sgyu byed pa yin/ dge sbyong g.yon po yin/ dge sbyong g.yon can yin/ dge sbyong snyi long lta bu yin/ dge slong gi dge 'dun mi mthun par 'dod par smra ba yin/ rnyed pa dang bkur sti dang / tshigs su bcad pa la mngon par dga' ba yin/ 'du 'dzi kun la dga' ba yin/ sdig pa can gyi dge slong tshul khrims 'chal ba de ni ji srid du de'i tshul khrims 'chal pa'i mgo byung bar ma gyur gyi bar du gang gis kyang mtshan ma de dag gis myur du shes par mi nus so/ /sdig pa can gyi dge slong de gang gi tshe/ khyim gyi gzhi dang / zhing gi gzhi dang / kun dga' ra ba'i gzhi dang /bran dang bran mo dang / glang po che dang / rta dang / rnga mo dang / bong bu dang / lug dag gang zag gis srel bar byed na/ de ni de'i tshul khrims 'chal pa'i mgo byung ba yin te/ tshul khrims 'chal pa'i mgo des na sdig pa can gyi dge slong de / dge slong gi dge 'dun gyi nang nas dor ba yin/gnas par bya ba ma yin/ longs spyod par bya ba ma yin/ dge slong gi dngos po las lhung ba yin/ pham par gyur pa yin te/ dge sbyong gi tshul las kyang phyis bslad du med par 'gyur ba yin no/ /rgyal po chen po mi gdol pa gnas na gnas par byed pa ni bla'i/ dge slong gdol pa yongs su 'dzin pa dang bcas pa/rgyud tshig pa don la mi lta ba/ 'jig rten pha rol btang ba / snying rje'i bsam pa med pa/ phyi sa khung chen po dang 'dra ba/ bdud kyi lam du zhugs pa/ lha dang mi rnams la gnod par byed pa/ dus gsum thams cad kyi drang srong thub pa rnams la slu bar byed pa/ dkon mchog gsum gyi gdung chos kyi mar me med par byed pa/ chos kyi rgya mtsho skems par byed pa/ chos smra ba'i dbyen byed pa/ sbyin pa po dang / sbyin bdag rnams la 'drid par byed pa dge slong chos kyis gnas pa rnams la tho 'tsham par byed pa/ dge 'dun mthun par byed pa'i rgyun gcod par byed pa ni de lta ma yin no//sdig pa can gyi dge slong de ni/ yongs su 'dzin pa'i rkyen gyis mtho ris kyi lam las rgyal po ldog par byed pa yin no/ /rgyal rigs dang / bram ze dang / rje'u rigs dang / dmangs rigs dang / skyes pa dang / bud med dang / khye'u dang bu mo ldog par byed pa yin no/ /ngan song gi lam gsum la rab tu gzhog par byed pa yin no//rgyal po chen po sdig pa can gyi dge slong de yongs su 'dzin pa'i khyad par gyi rgyu mtshan gyis lha dang mi ji snyed cig mi skyed par byed pa la ltos/ rgyal po chen po de lta bas na/ yongs su 'dzin pa dang bcas pa'i dge slong dang dge slong chos kyis gnas pa yon tan gyis phyug pa dag dang lhan cig tu kun dga' ra ba gcig dang /gtsug lag khang gcig tu gnas par mi bya'o/ /gal te sdig pa can gyi dge slong de kha drag cing ngo tsha shes pa dang / khrel yod pa rnam par spangs te/ dge slong de dag dang lhan cig gnas par byed na/ de'i phyir dge slong chos kyis gnas pa de dag gis byams pa dang ldan zhing chos dang mthun pas dran par byas te/gal te sdig pa can gyi dge slong de gnas de nas 'gro ba lta na ni legs/ gal te 'gro bar mi byed na ni/ der dge slong chos kyis gnas pa de dag dong la/ grong khyer dang / grong rdal dang / grong dang ljongs dang ri 'or de dag na/rgyal rigs sam/ bram ze'am/ rje'u rigs sam/ dmangs rigs gang dbang byed du 'jug pa de la sbran par bya'o/ /gal te rgyal rigs dang / bram ze dang / rje'u rigs dang / dmangs rigs des sdig pa can gyi dge slong yongs su 'dzin pa dang bcas pa/gnas de nas zlog par byed na/ der ni dge slong chos kyis gnas pa de dag gnas par bya'o/ /ji ste rgyal rigs dang / bram ze dang / rje'u rigs dang / dmangs rigs de dag bza' ba dang btung ba dang rnyed pa'i rgyus/ sdig pa can gyi dge slong yongs su 'dzin pa dang bcas pa'i phyogs byed pa lta na/de'i phyir dge slong chos kyis gnas pa de dag gis khro ba bstan par mi bya'o/ /chags pa ma yin/ nga rgyal ma yin te/ 'on kyang cang mi smra bar gnas de nas 'gro bar bya zhing / dgon pa'i gnas sam/ nags khrod dam/ ri'am/ ri 'or gzhan gang na sgra gcom chung ba dang /nang du yang dag 'jog dang 'tsham pa dang / tshul bzhin du yid la byed pa dang mthun pa der gnas par bya'o/ /yang rgyal po gzugs can snying pos mchi ma dag phyung nas 'di skad ces gsol to/ /btsun pa bcom ldan 'das gang bza' ba dang / btung ba dang / rnyed pa'i slad du sdig pa can gyi dge slong yongs su 'dzin pa dang bcas pa'i phyogs bgyid cing /dge slong chos kyis gnas pa/ yon tan gyis phyug pa rnams kyang gnas nas mchi bar 'gyur ba'i rgyal rigs dang / bram ze dang / rje'u rigs dang / dmangs rigs de dag ni nyams pa lags so/ / btsun pa bde bar gshegs pa mchog tu nyams pa lags so/ /de mi nyid rnyed pa ni rnyed par dka' lags te/ 'khor ba na 'khor bar bgyid pa de mi nyid rnyed pa'i tha ma ni de lags so/ /sangs rgyas bcom ldan 'das thugs rje chen po dang ldan pa grangs ma mchis/ dpag tu ma mchis pa gang gA'i klung gi bye ma snyed 'jig rten du 'byung bar 'gyur bas kyang /gang dge slong chos kyis gnas pa rnams kyi tshig gus par mi nyan pa'i sems can de ni ngan song rnams las yongs su thar bar bgyi ba'am/ mtho ris su gzhag par mi spyod de/ de ni sdig pa'i las de lta bu dang ldan par 'gyur lags so//bcom ldan 'das kyis bka' stsal pa/ rgyal po chen po ma 'ongs pa'i dus na/ la lar gang dge slong chos kyis gnas pa rnams la shin tu dad pa'i rgyal rigs dang / bram ze dang / rje'u rigs dang / dmangs rigs dag 'byung bar 'gyur te/ de dag gi don du dgon pa'i gnas dag byed par 'gyur ro//gtsug lag khang dang / dgon pa'i gnas der yang khyim gyi gzhi nas/ zhing gi gzhi dang / bran dang bran mo dang / kun dga' ra ba'i bar de dag gi longs spyod dang / nye bar spyod pa'i phyir yongs su gtong bar 'gyur ro/ /de dag 'chi ba'i dus byas nas kyang rgyal rigs shing sA la chen po lta bu dag tu skye bar 'gyur ba nas/'du shes med 'du shes med min skye mched kyi lha rnams kyi nang du skye bar 'gyur ro/ /sangs rgyas kyi zhing yongs su dag pa dag tu yang skye bar 'gyur ro/ /sangs rgyas bcom ldan 'das rnams dang phrad par 'gyur ba nas/ring po mi thogs par sbyin pa po dang / sbyin bdag de dag bla na med pa yang dag par rdzogs pa'i byang chub tu mngon par sangs rgyas pa'i bar du 'gyur te/ de dag ni nga'i bstan pa la dge slong chos kyis gnas pa rnams yang dag par 'dzin par byed par 'gyur ba yin no/ /rgyal po chen po 'di lta ste/gang khyod kyi bu'am spun nam/ bkrabs pa'am/ sna chen po la gtogs pa gang yang rung ba zhig nyes pa dang bcas pa yin na/ gang dang gang du rgyal po chen po'i dus ston nam/ dga' ston 'byung ba der/ rgyal po chen po dga' ba dang / bde ba rnam pa sna tshogs nyams su myong bar byed na/rgyal po chen po de ji snyam du sems/ skyes bu de khyod kyi mdun du 'dug cing / skyid pa dang rtse ba myong bar byed pa'am/ dga' ba dang bde ba rnam pa sna tshogs kyis gnas par byed nus sam/ rgyal pos gsol pa/ btsun pa bcom ldan 'das ma lags te/ skyes bu de bdag gi mdun na mchis par yang rngo mi thogs lags na/ skyid pa dang rtse ba myong bar bgyid pa lta smos kyang ci 'tshal/ bcom ldan 'das kyis bka' stsal pa/ rgyal po chen po de bzhin du gang zag gang zhig gang zag gir bran dang bran mo srel bar byed cing / khyim gyi gzhi'am/ zhing gi gzhi nas/ lug dag gi bar srel bar byed na/ nga yang de'i ston pa ma yin la/ de yang nga'i nyan thos ma yin no/ /dus gsum du gshegs pa'i sangs rgyas thams cad la yang gnod par byed pa dang bcas pa yin te/ de ni chos kyis gnas pa rnams kyi gnas de ltar bsngos pa dag tu/chos dang mthun pas gnas par 'os pa ma yin no/ /rgyal rigs dang / bram ze dang / rje'u rigs dang / dmangs rigs gang yang sdig pa can gyi dge slong yongs su 'dzin pa dang bcas pa'i don byed pa dang / de nas 'gror mi ster ba'i rgyal rigs nas/dmangs rigs kyi bar de ni dus gsum du gshegs pa'i sangs rgyas bcom ldan 'das thams cad la yang gnod pa byed pa dang bcas pa chen po yin no/ /sbyin pa mang po sbyin par byed du zin kyang de 'chi ba'i dus byas nas/ mnar med pa'i sems can dmyal ba chen po rnams kyi nang du skye bar 'gyur ro//rgyal po chen po de lta bas na/ bdag la phan par yang dag par rjes su lta bas/ sdig pa can gyi dge slong yongs su 'dzin pa dang bcas pa'i phyogs su gnas par mi bya'o/ /de ci'i phyir zhe na/ 'di ltar de ni lha dang mi thams cad la yang gnod pa dang / phan pa ma yin pa dang /log par lhung bar bya ba'i phyir zhugs pa dang / dkon mchog gsum gyi gdung med par bya ba'i phyir zhugs pa yin pa'i phyir ro/ /rgyal po chen po rgyal rigs sam/ bram ze'am/ rje'u rigs sam/ dmangs rigs gang zhig dge slong chos kyis gnas pa rnams kyi phyogs la yang dag par gnas par byed cing /sdig pa can gyi dge slong rnams kyi phyogs la ma yin na/ de sbyin pa ma byin du zin kyang / 'on kyang de ni chos kyi phyogs kyi rgyu'i phyir dus gsum du gshegs pa'i sangs rgyas bcom ldan 'das thams cad kyi sbyin bdag dam pa yin no/ /de ni dam pa'i chos rjes su bsrung bar bya ba'i phyir dam pa'i chos 'dzin pa dam pa yin par blta'o //'chi ba'i dus byas nas kyang sangs rgyas kyi zhing yongs su dag pa dag tu skye bar 'gyur ba nas/ ring po mi thogs par bla na med pa yang dag par rdzogs pa'i byang chub mngon par rdzogs par 'tshang rgya ba'i bar du 'gyur ro//rgyal po chen po de lta bas na/ rgyal rigs 'tsham pa khyed kyi lag tu chos kyis gnas pa dang / bstan pa ngas yongs su gtad kyis/ lnga brgya pa tha ma la gnas pa'i bar du khyed kyis nga'i chos kyis gnas pa yang dag par zung shig dang / de'i rkyen gyis nga'i chos kyi tshul 'di dang /dkon mchog gsum gyi gdung yun ring du gnas par 'gyur zhing / lha dang mi rnams la phan pa dang bde bar 'gyur ro zhes bya ba'i bar dang / yang mdo sde de nyid las/ de nas klu'i rgyal po rgya mtsho'i bu pad+ma'i gdong zhes bya bas 'di skad ces gsol to/ /bdag sug las gang gis klu'i rigs su skyes nas/gzugs mchog tu lham me zhing lus kyi reg pa gang cung zad ci reg kyang kun du tshig cing 'bar ba lags/ bdag dus thams cad du mchil lham bor nas gcer bur rgyu bar bgyid lags/ bdag gi pha de ni dpal phun sum tshogs pa ches khyad par du 'phags pa myong ste/dper na gling bzhi pa'i 'khor los sgyur ba'i rgyal po bzhin lags/ bcom ldan 'das kyis bka' stsal pa/ kye lag 'gro sngon byung ba 'das pa'i dus bskal pa sum cu rtsa gcig 'das pa de'i tshe de'i dus na/ de bzhin gshegs pa zhes bya ba nas/ sangs rgyas bcom ldan 'das zhes bya ba'i bar du gtsug tor can zhes bya ba 'jig rten du byung ngo //de'i tshe rgyal po me tog bral zhes bya ba zhig byung ste/ rgyal po me tog bral des kyang / de bzhin gshegs pa gtsug tor can nyan thos dang / byang chub sems dpa'i dge 'dun brgya stong phrag mang po'i 'khor dang ldan pa de la/zla ba gsum yo byad thams cad phul nas/ rtag tu chos mnyan te/ bla na med pa yang dag par rdzogs pa'i byang chub tu smon lam btab bo/ /bcom ldan 'das de'i gtsug lag khang yo byad thams cad dang ldan pa zhig kyang brtsigs so/ /rgyal po me tog bral de'i bu srid sgrub bcas zhes bya ba zhig yod de /de shin tu 'khor bas skrag nas/ bcom ldan 'das kyi thad du rab tu byung ste/ pha'i dge 'dun gyi kun dga' ra ba de rjes su skyong zhing 'dug go/ /de nas bcom ldan 'das kyi nyan thos kyi dge slong gang dag gnas pa dang / de nas gang dag bza' ba dang /btung ba dang / mal cha la longs spyod par byed pa thams cad la me tog bral gyi bu dge slong srid sgrub bcas de phrag dog byed do/ /bcom ldan 'das kyi nyan thos kyi dge slong de dag kyang gnas de nas dong ngo / /de yang yid mchog tu dga' nas bdag nyid kyis kyang longs spyad par mi byed/gzhan la yang mi ster ro zhes bya ba nas/ dge slong de yang 'chi ba'i dus byas nas/ sems can dmyal ba chen po rnams kyi nang du skyes so zhes bya ba'i bar du'o/ /de lo khrag khrig brgya stong phrag mang por sems can dmyal ba chen po'i nang du skyes nas bcos so//de nas shi 'phos nas yi dags rnams kyi nang du skyes te/ lo brgya stong phrag mang por der sdug bsngal myong ngo / /phyis yang sems can dmyal ba dang / yi dags rnams kyi nang du sdug bsngal myong ngo / /lag 'gro 'khor bas skrag pa'i sems dang ldan pa srid sgrub bcas zhes bya ba rab tu byung ste/de nas shi 'phos nas de ltar yun ring por ngan song du sdug bsngal myong ba de gzhan zhig yin par khyod sems na gzhan yin par yang blta bar mi bya ste/ de ltar las kyi sgrib pa dam pos zin pa yang khyod yin no/ /'di phan chad bskal pa sum cu rtsa gcig tu khyod rtag par ngan song gsum gyi nang du skyes so//de'i las kyi sgrib pa lhag ma lus pa des 'dir klu rnams kyi nang du skyes pa ni gzhan ma yin gyi khyod yin te/ sdug bsngal gyi tshor ba de lta bu myong ngo / /gang khyod 'di nas shi 'phos nas phyis kyang sems can dmyal ba dang / dud 'gro dang / yi dags rnams kyi nang du rtag tu sdug bsngal gyis gzir bar 'gyur ba 'di ni gnas yod do//klu'i bu de mchog tu yid mi dga' nas rab tu ngu zhing bcom ldan 'das kyi zhabs gnyis la phyag 'tshal nas 'di skad ces gsol to/ /btsun pa bcom ldan 'das byis pa ji lta ba dang / myos pa ji lta bu dang /mi gsal ba dang / mi mkhas pa ji lta ba bzhin du nongs pa so sor 'chags lags so/ /nongs pa so sor 'chags lags so/ / btsun pa bcom ldan 'das bdag gi bsam pas sdom pa gzung bar bgyi'o/ /bdag de bzhin gshegs pa'i dge bsnyen lags te/ ji srid 'tsho'i bar du srog gcod pa spang bar bgyi lags so//bdag bcom ldan 'das la skyabs su mchis pa lags so/ /bcom ldan 'das kyis bka' stsal pa/ rigs kyi bu legs so legs so/ /khyod lhag pa'i bsam pas nga la skyabs su song bas khyod kyi ngan 'gro thams cad yongs su zad do//'di nas shi 'phos nas khyod kyis byams pa'i tshe na mi'i rnyed pa thob par 'gyur te/ byams pa'i thad du rab tu 'byung bar 'gyur zhing dgra bcom pa nyid kyi bar du mngon sum du byed par 'gyur ro/ /de'i tshe de'i dus na gang gis gtsug tor can 'khor dang bcas pa la zla ba gsum du yo byad thams cad kyis rim gro byas pa dang /de'i phyir dge 'dun gyi kun dga' ra ba yo byad thams cad phun sum tshogs par byas pa'i rgyal po me tog bral zhes bya ba gzhan zhig yin par khyod sems na de gzhan du yin par mi blta ste/ de ni klu'i rgyal po rgya mtsho 'di yin no/ /'di ni bskal pa sum cu rtsa gcig tu nam yang ngan 'gror ma skyes so//lha'i dpal dang skal ba bzang po phun sum tshogs pa shin tu rgya chen po myong ngo / /'di ni bla na med pa'i theg pa'i phyir smon lam gyi dbang gis 'dir klu rnams kyi nang du skyes te/ 'dir dpal dang skal ba bzang po de lta bu myong ngo / /de skad ces thos nas klu thams cad skyo zhing mchog tu yid mi dga' nas/bcom ldan 'das la mchog tu gus pa skyes shing nye bar rtogs pas gces par byed par gyur to zhes gsungs pa dang / yang mdo de nyid las/ bcom ldan 'das kyis bka' stsal pa/ spu gri rnon po dag gis su/ /rang gi yan lag gtubs pa bla'i//bsngos zin pa yi dngos po ni/ /khyim pa rnams la sbyin mi bya/ /me lce 'bar ba lta bu yi/ /lcags kyi thu lum zos pa bla'i/ /dge 'dun dag las gar de ni/ /dge 'dun gyi la longs mi spyad/ /lhun po dang mi 'dra ba'i me/ /blang bar byas te zos pa bla'i//khyim par gyur pas dge 'dun gyi/ /longs spyad par ni mi bya'o/ /thams cad 'byung bar byas pa dang / /gsal shing steng du bteg pa bla'i/ /khyim par gyur pas dge 'dun gyi/ /longs spyad par ni mi bya'o/ /me ma dag gis ni gang ba yi/ /gnas khang der ni zhugs pa bla'i//khyim pas dge 'dun gnas khang du/ /mtshan mo gnas par mi bya'o/ /me lce 'bar ba lta bu yi/ /lcags kyi thu lum blangs pa bla'i/ /rab tu byung bas khyim pa yi/ /dbyig ni blang bar mi bya'o/ /'khor lo rnon pos bdag gi lus/ /kun du gtub par byas pa bla'i//legs par gsungs pa'i chos rnams la/ /rgyags dang gshe ba bskyed mi bya/ /legs par gsungs pa'i chos can gyis/ /mig ni rang gis phyung ba bla'i/ /sems can du ni bgrangs pa la/ /khros pas skye dgu mi mngag go/ /legs par gsungs pa'i chos can gyis / / me yi gos ni gon pa bla'i/ /tshul 'chos pa dang mthu yis su/ /khyim pa las ni gos mi blang / /me 'dra bar ni bskol ba yi / /rtsub 'gyur chu ni 'thungs pa bla'i/ /rab tu byung bas g.yo sgyu yis/ /bza' btung blang bar mi bya'o/ /zhes gsungs so/ / nam mkha'i spyan gyi mdo las kyang / yang de'i tshe lha'i dbang po dang / klu'i dbang po dang / gnod sbyin gyi dbang po dang / lha ma yin gyi dbang po dang / nam mkha' lding gi dbang po dang / mi'am ci'i dbang po dang / lto 'phye chen po'i dbang po dang / grul bum gyi dbang po dang / yi dags kyi dbang po dang / sha za'i dbang po dang / sa la rgyu ba dang nam mkha' la rgyu ba khyed rnams kyi lag tu chos kyi rnam grangs 'di ngas yongs su gtad par bya'o//da lta dang ma 'ongs pa'i dus su gang zag don yid la byed pa/ chos la gnas pa/ chos kyi rjes su mthun pa'i chos sgrub pa/ chos dang mthun pa'i chos spyod pa/ dben pa la mngon par dga' ba rnams srungs shig /yongs su skyongs shig /de'i sbyin pa po dang / sbyin bdag de dag kyang srungs shig /yongs su skyongs shig /gang dag de rnams kyi yo byad 'dzin pa dang / yongs su skyong ba de dag kyang srungs shig /yongs su skyongs shig /de ni khyed cag la yun ring por phan pa dang bde ba byed par 'gyur ro//de nas lha'i dbang po de snyad thams cad nas/ sha za'i dbang po dang / nam mkha' la rgyu ba dang sa la rgyu ba'i par thams cad kyis mgrin gcig gis 'di skad ces gsol to/ /btsun pa bcom ldan 'das de ltar lags so/ /btsun pa bde bar gshegs pa de ltar lags so//ma 'ongs pa'i dus na ji srid du de bzhin gshegs pas byin gyis brlabs pa'i chos kyi tshul 'bar ba de srid du kho bo cag gis rang gi sug las dor nas de bzhin gshegs pas bstan pa'i chos 'dul ba bsrung bar bgyi'o/ /yongs su bskyang bar bgyi'o/ /chos pa gnas pa tshul khrims kyis phyug pa/yon tan dang ldan pa/ yongs su 'dzin pa med pa/ dben pa la mngon par dga' ba/ chos kyi rjes su mthun par chos la zhugs pa'i gang zag rnams chos gos dang / zas dang / mal stan dang / na ba'i rkyen sman gyi yo byad rnams kyis bsrung bar bgyi/yongs su bskyang bar bgyi'o/ /nad med pa dang stobs dang bde ba la reg par gnas pa nyid kyis/ dge ba'i phyogs dang rjes su mthun pa nyid bsgrub par bgyi'o/ /ji srid du de dag sangs rgyas kyis bcas pa'i bslab pa la yongs su rdzogs par spyod pa brtson 'grus brtsams pa/rab tu rnam par dben pa/ dran pa nye bar gzhag pas gnas shing / yongs su 'dzin pa thams cad dang / kun dga' ra ba dang / khyim dang zhing dang / bran pho dang / bran mo dang / nor dang / 'bru dang / grags pa dang / rnyed pa dang / bkur sti dang / tshigs su bcad pa mchog dang /tshul 'chos dang / kha gsag dang / gzhogs slong rnams dang thams cad du ma 'dres par gnas pa de srid du/ kho bo cag gis gnod sbyin gdug pa nas/ lus srul po gdug pa'i bar du bzlog par bgyi'o/ /bde bar gshegs pas rab tu bstan pa'i bstan pa la de dag dad pa bskyed par bgyi'o//ji srid du de dag zla ba dang nyi ma dang gza' dang rgyu skar dang nyin mo dang mtshan mo dang / lo dang dus tshigs yang dag par 'da' ba de srid du/ kho bo cag gis 'thab pa dang rtsod pa dang g.yul ngo dang nad dang pha rol gyi dmag tshogs dang mu ge dang g.yo dang slu ba dang brdzun du smra ba dang /dus ma yin pa'i rlung dang char 'bab pa dag rab tu zhi bar bgyi'o/ /bdag cag gis rgyal rigs dang / bram ze dang / rje'u rigs dang / dmangs rigs dang / skyes pa dang / bud med dang / khye'u dang bu mo ji snyed pa'i bar rnams mi dge ba'i chos rnams las bzlog par bgyi'o/ / dge ba'i spyod pa thams cad la sbyar bar bya'o / /gang zag chos la gnas pa sbyin pa dang dul ba dang yang dag par bsdams pa dang / tshul khrims dang ldan pa dang / yon tan gyis phyug pa rnams kyis spyad pa'i spyod pa la gzud par bgyi'o/ /ji srid du bcom ldan 'das kyi nyan thos re ba thams cad yongs su mi 'dzin cing chos kyi 'du shes kyis mngon par dga' bar 'gyur ba de srid du/bdag cag gis grong khyer dang / grong rdal dang / ri sul dang yul 'khor dang ljongs de dag dang / sbyin pa po dang sbyin bdag de dag kyang bsrung bar bgyi'o/ /yongs su bskyang bar bgyi'o//nor dang / 'bru dang / dga' ba dang / rtse ba dang / nad med pa dang / phan tshun du rab tu dga' bas tshogs pa dang / tshe ring ba nyid ma tshang ba med par bsgrub par bgyi'o/ /de ci'i slad du zhe na/ ji srid du bcom ldan 'das kyi nyan thos re ba thams cad mi 'dzin cing / chos la gnas pa chos kyi rjes su mthun pas chos bsgrub par gnas par 'gyur ba de srid du 'di na yun ring por sa'i bcud dang sems can gyi gzi mdangs dang /chos kyi gzi mdangs mi nub par gnas par 'gyur ro/ /ji srid du yun ring por lha dang klu dang gnod sbyin dang mi'i 'jig rten na mngon par dga' bar gyur pa de srid du yun ring por sems can rnams tshe'i dus byas nas lha dang mi rnams kyi nang du sems can dbang che bar grags pa dbang che bar grags pa de dag tu skye bar 'gyur/de srid du yun ring por lha dang mi rnams kyi nang du sems can dbang che bar grags pa rnams kyis yongs su gang bar 'gyur/de srid du yun ring por chos la gnas pa'i byang chub sems dpa' rnams gnas par 'gyur/ de srid du 'di ltar chos ma yin pa'i phyogs tshar gcad pa'i phyir bdag cag stobs dang brtson 'grus dang pha rol gnon pas gnas par 'gyur/ de srid du yun ring por bdag cag bcom ldan 'das kyi bstan pa la ma dad pa'i sems can rnams dad par bya ba'i phyir nus par 'gyur/btsun pa bcom ldan 'das gang gi phyir 'dir ma 'ongs pa'i dus na bcom ldan 'das kyi nyan thos yongs su 'dzin pa dang bcas par 'gyur bas/ rnal 'byor yid la byed pa dang / chos la gnas pa dang / dgon pa dang / nags khrod na gnas pa dang / bas mtha'i gnas mal spong bar 'gyur/ phrag dog gi ngang tshul can dang bsags pa mang bas gnas par 'gyur/ bslab pa dang ngo tsha shes pa dang khrel yod pa spong bar 'gyur/ khyim na gnas pa dang 'dre ba dang / rnyed pa dang bkur sti la dga' bar 'gyur/de dag khyim pa'i stobs dang nor gyi phung po'i stobs kyis phan tshun 'dzoms par byed/ 'thab pa la dga' zhing khyim pa'i mdun du rtsod par byed/ brdzun dang tshig rtsub mo smra ba mi srung bas/ khyim pa rnams bcom ldan 'das kyi bstan pa theg pa chen po la dad pa skyed par mi 'gyur/rgyal rigs dang / bram ze dang / grong rdal dang / ljongs pa de dag bcom ldan 'das kyi bstan pa la dad pa rgyun gcod par 'gyur ro zhes gsungs pa dang / yang mdo de nyid las/ da ltar dang ma 'ongs pa'i dus na/ rgyal rigs khyed cag thams cad kyi lag tu nyan thos kyi bslab pa khrims su bca' ba gtad par bya'o//de ci'i phyir zhe na/ da ltar dang ma 'ongs pa'i dus na nga'i bstan pa la gang zag lam ngan pa gdul dka' ba ngo tsha ba dang khrel spangs pa spyod pa legs par ma byas pa rnams gnas par 'gyur/ gang dag gnyen bshes kyi stobs sam khyim pa'i stobs sam/ mang du thos pa'i stobs sam/ 'khor gyi stobs kyis bslab pa dag la smas par spyod cing / khyim pa'i rtags dang khyim pa'i longs spyod dag la lta bar byed/ yongs su 'dzin pa yang len par byed/ dge slong nyung bar gnas pa rnams kyis myur bar dge 'dun gyi nang nas dbyung ba dang / ji ltar bslab pa bcas pa bzhin chad pa gcad par mi nus pa de'i phyir bslab pa bca' ba'i bya ba rgyal rigs rnams kyi lag tu gtad par bya'o//rgyal rigs de dag de lta bu'i ngo bo'i gang zag rnams la ji ltar bcas pa bzhin chad pa gcod du 'jug par byed do/ /rgyal rigs gang dag da ltar dang ma 'ongs pa'i dus lnga brgya pa tha ma'i bar du de ltar brtson pa dang pha rol gnon pas nga'i bstan pa srung bar byed/yongs su skyong bar byed/ chos kyi tshul yang dag par 'bar bar byed par 'gyur ba'i rgyal rigs de dag ni/ dkon mchog gsum gyi gdung mi gcad par bya ba'i phyir zhugs pa yin no/ /sangs rgyas kyi bstan pa yongs su skyong ba'i lha rnams kyis srung bar 'gyur/yongs su skyong bar 'gyur ro/ /rgyal rigs de dag yun ring por rgyal po nyid byed par 'gyur/ gang las bskal pa brgyar byang chub kyi phyir spyod par 'gyur ba bsod nams ches mang po bskyed par 'gyur ro/ / yang gang dag da ltar dang ma 'ongs pa'i dus na/ nga'i bstan pa la btang snyoms par gnas par 'gyur ba'i rgyal rigs de dag ni/ lha thams cad kyis yongs su spong bar 'gyur/ nyan thos dang rang rgyal ba thams cad kyis spong bar 'gyur/ gang nga'i bstan pa la btang snyoms pa'i rgyal rigs de ni 'jig rten pha rol tu lha dang mir skye bar mi 'gyur/dkon mchog gsum gyi gdung rnam par bcad pa'i phyir zhugs pa yin/ chos kyis sgron ma yongs su bsnub pa'i phyir zhugs pa yin/ chos kyi bcud bskam pa'i phyir zhugs pa yin/ sems can thams cad kyi chos kyi mig dbyung ba'i phyir zhugs pa yin no//rgyal po chen po 'di ji snyam du sems/ gang zag gang sems can thams cad kyi mig 'byin par byed pa des/ bsod nams ma yin pa ji tsam zhig dang ldan par 'gyur/ rgyal po gzugs can snying pos mchi ma blags te 'di skad ces gsol to/ /btsun pa bcom ldan 'das mang lags so//gang zag des bsod nams ma yin pa gzhal du med grangs med pa rab tu bskyed pa lags so/ /bcom ldan 'das kyis bka' stsal pa/ rgyal rigs gang zhig da ltar dang ma 'ongs pa'i dus na bdag gi bstan pa de bzhin gshegs pas byin gyis brlabs pa 'bar gyi bar du/chos la gnas pa'i gang zag bsrung bar mi 'gyur/ gang zag lam ngan pa pa rnams chos ji lta ba bzhin du slob par mi byed pa'i rgyal rigs de bsod nams ma yin pa ches mang du bskyed do/ /gang rgyal rigs de sngon bskal pa brgyar sbyin pa btang bar gyur/tshul khrims bsrungs pa nas shes rab bsgoms pa'i bar du gyur pa dang / theg pa gsum po gang yang rung ba'i theg pas yang dag par rab tu gnas par gyur pa de/ dam pa'i chos spangs pa dang rab tu brlag pa'i rgyus/ de'i sngon bsags pa'i dge ba'i rtsa ba de thams cad yongs su zad pa dang yongs su gtugs par 'gyur ro//de'i yul du chos ma yin pa gsum po mu ge dang 'thab mo dang g.yul 'gyed pa 'byung bar 'gyur ro/ /de la lhas btang snyoms su byed/ lha rnams kyis 'dor/ de'i yul du bka' lung mi 'jug go / /de'i yul du g.yo dang slu ba dang brdzun smra ba sna tshogs 'byung bar 'gyur ro //pha rol gyi dmag tshogs kyis chos kyi phung po 'phrog par 'gyur/ mes 'tshig pa'am chus 'khyer bar 'gyur/ rgyal rigs de yun ring por mi thogs par nad mi bzad pas thebs par 'gyur/ myur du mdza' bo dang yid du 'ong ba rnams dang 'bral bar 'gyur/ che'i dus byas nas sems can dmyal ba rnams su skye bar 'gyur ro/ /gal te brgya lam na shin tu yun ring po nas yun ring po zhig na mi nyid du skyes pa na / myur du mig nyams par 'gyur/ nye bar longs spyod pa dang / yongs su longs spyod pa thams cad dang bral zhing / ljan ljin na gnas par 'gyur/yun ring por 'tsho zhing 'chi ba'i dus byas nas/ des sems can dmyal ba rnams su skye bar 'gyur/ gnas ma yin pa yongs su rtog par byed par 'gyur/ de sangs rgyas 'byung ba med par mi'i thob pa rnyed par 'gyur ro/ /rgyal rigs ji lta ba de bzhin du bram ze dang / rje'u rigs dang /dmangs rigs la sogs pa grong khyer gyi gtso bo rnams la yang 'gyur ro/ /yul gyi gtso bo dang / grong gi gtso bo dang / ri brags ba'i gtso bo dang / grong rdal gyi gtso bo rnams la yang 'gyur ro/ /gang zhig bag med pa'i rgyu'am/ nor gyi rgyus nga'i bstan pa la chos la gnas pa'i gang zag rnams ci nus par mi srung zhing /gang zag las ngan pa pa ji lta bu'i chos kyis mi 'dzin pa thams cad ni/ de lta bu'i ngo bo'i las kyi sgrib pa dang ldan par 'gyur ro/ /rgyal po gzugs can snying pos 'di skad ces gsol to/ /btsun pa bcom ldan 'das da ltar dang ma 'ongs pa'i dus na/rgyal rigs rnams kyis mi'i thob pa ni rnyed par dka'o/ /gang dag kun nas bag med pas mang du gnas shing / tshul khrims dang ldan pa/ yon tan gyis phyug pa chos la gnas pa rnams la mchod pa dang rim gro byed la/ dam pa'i chos yun ring du gnas pa'i phyir dang / dkon mchog gsum gyi gdung mi gcad par bya ba'i phyir/gang zag lam ngan pa pa ngo tsha ba dang khrel spangs pa chos kyis tshar gcod par mi byed pa de ni/ shin tu brlag pa dang / rtag tu ngan song du 'gro bar 'gyur ro zhes gsungs so/ /yul 'khor skyong gi mdo las kyang / bsam gtan dang ni kha ton btang nas su//rtag tu gtsug lag khang gi las la brtson/ /gnas la brkam zhing khro gnyer 'byin par byed/ /de dag slob ma 'khor kyang ma dul ba/ /nga ni gtsug lag khang gi lag gi bla'i / /bdag gi ched du 'di ni ngas byas te/ /dge slong gang dag nga yi rjes mthun pa/ / gtsug lag khang 'dir de dag gnas yod do/ /gang dag tshul khrims ldan zhing yon tan ldan/ /chos 'dzin skye bo'i don la mngon brtson pa/ /dul zhing yang dag sdom la rtag brtson pa/ /de dag gnas ni sdud par mi byed do/ /'di ni nga yi gnas su bskos pa ste/ /'di ni nga dang lhan cig gnas pa yin/ / 'di ni nga yi dga' bar byed pa yin/ /khyed kyi gnas 'di gang yang med kyis so / /'dir ni dge slong dag kyang mang bkod de/ /mal cha rnams kyang ma lus bgos zin la/ /'di ni rnyed pa 'byung ba yod ma yin/ /'dir ni ci zhig spyad kyis dge slong song / /de dag la ni mal stan bgo bya ba/ /nam du srid par 'gyur ba ma yin te //de dag khyim pa lta bur sogs 'gyur zhing / /'tshog chas rnams dang g.yog 'khor mang bar 'gyur/ /zhes gsungs so/ /dkon mchog sprin gyi mdo las kyang / rigs kyi bu chos bcu dang ldan na/ byang chub sems dpa' khyim gyi gnas nas mngon par byung ba rnams yin no//bcu gang zhe na/ 'di lta ste/ nye bar len pa med pa rnams yin/ 'du 'dzi med par spyod pa rnams yin/ yul la rgyab kyis phyogs pa rnams yin/ yul la sred pa dang bral ba rnams yin/ yul gyi nyes pas mi gos pa rnams yin/ de bzhin gshegs pas tshul khrims bcas pa la rim gro byed cing brtson pa shin tu bslabs pa rnams yin/gos dang bsod snyoms dang mal cha ngan ngon dang nad kyi rkyen rtsi dang yo byad ngan ngon dag gis chog shes pa rnams yin/ lhung bzed dang chos gos dang yo byad sogs pa dang bral ba rnams yin/ rtag par 'jigs pa'i yid dang ldan zhing yul rnams la skyo ba rnams yin/dben pa la dga' zhing rtag tu bsgom pa la brtson pa rnams yin no/ /rigs kyi bu chos bcu po de dag dang ldan na/ byang chub sems dpa' khyim gyi gnas nas mngon par byung ba rnams yin no zhes gsungs so/ /mya ngan las 'das pa chen po'i mdo las kyang /rigs kyi bu gzhan yang dper na/ zhing ngam khyim du dug shing ngam/ snyi long skyes na/ rtsad nas dbyung dgos pa de bzhin du/ tshul khrims 'chal ba rnams dang / dam pa'i chos sun 'byin pa rnams bran bzhin du tshar gcad par ngas gnang ngo //gang dag de rnams tshar gcod par mi byed pa de dag ni/ nga'i bstan pa las shin tu ring pa yin no/ /gang dag de rnams tshar gcod par byed pa de dag ni/ nga'i slob ma dang nga'i nyan thos yin no/ /'od srungs chen po dang rus gcig pas gsol ba/ gal te de bzhin gshegs pas de skad gsungs na ni/sems can thams cad la sgra gcan zin bzhin du gzigs pa'ang ma lags/ ste'u dang tsan+dan lta bu zhes bgyi ba'i ming yang brlag par 'gyur na/ dam pa'i chos sun 'byin pa rnams ji ltar tshar gcad pa'i rigs lags/ de bzhin gshegs pas de ltar bgyid du stsal ba'i mi rigs lags so//bcom ldan 'das kyis bka' stsal pa/ 'od srungs chen po dang rus gcig pa / dper na khyim bdag gam/ tshong dpon nam/ ded dpon nam/ blon po'am / rgyal po yang rung ba zhig gis rang gi bu sdug cing phangs la/ mchog tu mdzes shing byad gzugs phun sum tshogs pa rnams/slob dpon gyi lag tu gtad nas/ slob dpon de la 'di skad ces smras te/ bdag gi bu 'di rnams 'dul ba dang cho ga dang spyod yul dang / rig pa rnams bslab pa'i phyir khyod la gtad kyis/ 'di rnams khyod kyis 'dul ba dang / cho ga dang / spyod yul dang / rig pa rnams slobs shig /chos shig /gal te bdag gi bu 'di bzhi las gsum ni brdeg pa dang bsdigs pa dang / tshar gcad pa rnams kyis shi bar gyur la/ gcig ni gson por 'dug ste/ gcig lobs par gyur na/ gsum shi yang bla ste/ gsum ni shi gcig ni lobs pa de la ci slob dpon gyis sdig pa'i las byas zhes bya'am/bcom ldan 'das de ni ma lags te / de la ni gnyi ga la yang sdig pa'i las su mi 'gyur lags so/ /de ci'i slad du zhe na/ de la ni khon gyi bsam pa ma mchis te/ de ltar bgyis na bsod nams mang du 'phel bar 'gyur lags so//bcom ldan 'das kyis bka' stsal pa/ rigs kyi bu de bzhin du/ de bzhin gshegs pa ni dam pa'i chos sun 'byin pa'i sems can rnams la sgra gcan zin bzhin du gzigs te/ bu rnams slob dpon gyi lag tu gtod pa bzhin du/ rgyal po dang / blon po dang / dge bsnyen rnams kyi lag tu gtod par mdzad do/ /de nas rgyal po dang / blon po dang / dge bsnyen de dag gis byis pa g.yel ba de dag tshar gcod par byed na/ ci de la de bzhin gshegs pa la sdig pa'i las su 'gyur zhes bya'am / bcom ldan 'das de ni ma lags te/ rgyal po dang / blon po dang / dge bsnyen rnams la yang sdig pa'i las su mi 'gyur na/ de bzhin gshegs pa gos pa mi mnga' bar lta la gos par ga la 'gyur/ de dag nyid kyi yon tan dang spyod pa bsrung ba'i slad du mi 'dod bzhin du tshar gcod par bas so/ /bcom ldan 'das kyis bka' stsal pa/de ltar na bu gcig pa'i 'du shes bsgom pa yin te/ gang dag de ltar sgom pa de dag gis ni bu gcig pa'i 'du shes bsgom par 'gyur ro/ /de ltar byang chub sems dpa' sems dpa' chen pos sems can thams cad la bu gcig pa'i 'du shes bsgom par bya'o/ /de ltar byas nas sems can thams cad la ting nge 'dzin sgom pa bsgom par 'gyur ro//de nas mchog tu 'tshe ba med pa dag par 'gyur te/ des na byang chub sems dpa' tshe ring ba dang / mchog tu tshe ring ba dang / tshe rabs dran par 'gyur ro/ /'od srungs chen po dang rus gcig pas gsol pa/ sems can thams cad la bu gcig pa'i 'du shes bsgoms na/ byang chub sems dpa' sems dpa' chen po rnams tshe ring bar 'gyur lags sam/ bcom ldan 'das kyis bka' stsal pa/ de lta los kyang med do / /'od srungs chen po dang rus gcig pas gsol pa/ bcom ldan 'das dper gsol na/gtam rgyud mkhan zhig gis ltad mo ba'i 'khor gyi nang du/ ma la phu dud bya ba'i rigs pa'i gtam sna tshogs bgyis la/ rang gi khyim du mchis nas/ mchog tu dga' ba bgyid bgyid pa'i ma la/ dbyug pa dang / phag dum dang / bong ba dang / rdo dag gis gnod pa bgyid pa de bzhin du/bcom ldan 'das nyid kyis bka' stsal pa/ sems can thams cad la bu gcig pa'i 'du shes bsgoms na/ byang chub sems dpa' sems dpa' chen po rnams tshe ring ba dang / mchog tu tshe ring ba dang / tshe rabs dran pa dang / mi 'chi ba dang / ther zug pa dang / brtan par 'gyur ro zhes gsungs na/ ci'i slad du bcom ldan 'das nyid sku tshe thung lags ci slu ba mdzad dam/ 'on te bcom ldan 'das nyid kyis sems can thams cad la sgra gcan zin bzhin du gzigs sam/ kye ma bcom ldan 'das/ bcom ldan 'das kyis ni dka' ba mdzad mdzad do//mi'i ltar brtsi na lo brgya yang mi thub ste/ de bzhin gshegs pa 'di kho na ltar sku tshe thung ba lags na/ bcom ldan 'das kyis sngon byang chub sems dpa' mdzad pa'i tshe/ re snyed kyi srog cig bcad lags/ 'di kho na ltar tshe thung ba las/ de bzhin gshegs pa nyid kyis mchog tu mi bzad pa'i las mdzad lags grang /bcom ldan 'das kyis bka' stsal pa/ 'od srungs chen po dang rus gcig pa/ de bzhin gshegs pa dgra bcom pa yang dag par rdzogs pa'i sangs rgyas la/ 'di kho na ltar ma brgyad shig ma brgyad shig/ /de bzhin gshegs pa dgra bcom pa yang dag par rdzogs pa'i sangs rgyas ni mchog tu sku tshe ring ngo //de bzhin gshegs pa dgra bcom pa yang dag par rdzogs pa'i sangs rgyas ni mchog tu brtan pa'o/ /mchog tu zhi pa'o/ mchog tu ther zug pa'o/ /mchog tu rtag pa'o/ /'od srungs chen po dang rus gcig pas gsol pa/bcom ldan 'das ji ltar na de bzhin gshegs pa mchog tu sku tshe ring lags/ bcom ldan 'das kyis bka' stsal pa/ 'od srungs chen po dang rus gcig pa/ dper na chu klung gang gA dang / ya mu na dang / sa ra yu dang / hing ku la sogs pa chu klung chen po rnams dang / chu bran gzhan rnams rgya mtsho chen po kho na'i nang du 'bab pa de bzhin du/'od srungs chen po dang rus gcig pa lha yul dang sa'i steng gi tshe'i chu klung yod do cog thams cad ni/ de bzhin gshegs pa'i sku tshe'i rgya mtsho kho nar 'bab pa ste/ de ltar na de bzhin gshegs pa mchog tu sku tshe ring ngo zhes gsungs pa dang /yang mdo de nyid las/ rdo rje lta bur mi shigs pa'i sku 'di ji ltar 'grub par 'gyur lags/ sku 'di lta bu rgyu cis 'grub lags/ bcom ldan 'das kyis bka' stsal pa/ nga'i sku 'di lta bu ni dam pa'i chos bsrungs pa'i bsod nams kyi rgyus 'grub pa yin no//rigs kyi bu dam pa'i chos bsrung ba'i dge bsnyen gyis ni bslab pa'i gzhi lnga blang bar mi bya'o/ /dge bsnyen gyi 'dul ba yang spyad par mi bya'o/ /tshul khrims dang / cho ga dang / yon tan dang ldan pa'i dge slong rnams bsrung ba'i phyir/ mda' gzhu dang / ral gri dang / mdung thung kha leb lag tu thogs par bya'o/ /gsol pa/ dge slong dag las srung ma dang lhan cig mi 'khod par gcig pu shing drung du stan bting ba la mchis pa gang lags pa de dag ni dge slong zhes bgyi ba lags so/ /srung ma dang lhan cig 'khod pa gang lags pa de dag ni khyim bdag mgo reg ces bgyi ba lags so//bcom ldan 'das kyis bka' stsal pa/ rigs kyi bu khyim bdag mgo reg ces de skad ma zer cig /'di ni dge slong la la mal stan sar pa la 'dug cing de zan zos nas gcig pu phyogs gcig na mi smra bar 'dug ste/ bsam gtan byed la lus kyi rang bzhin la yang lta bar byed do//sems can 'ongs pa rnams la sbyin pa'i gtam dang / tshul khrims kyi gtam dang / bsod nams kyi gtam dang / bsod nams rnam par smin pa'i gtam dang / chog shes pa dang / smyung ba'i chos la seng ge'i sgra sgrogs par mi byed / seng ge lta bu'i 'khor yang mi 'chang / rtags can 'chal ba tshar bcad pa'i phyir yang ston par mi byed pa'i dge slong de ni skye bo thams cad la phan pa'i phyir zhugs pa yang ma yin/ bdag la phan pa'i phyir zhugs pa yang ma yin te/ nyon mongs pa zhan pa yin pas tshul khrims dang ldan pa tshangs par spyod pa tsam du yang zad do//dge slong tshul khrims dang ldan pa/ dge ba'i chos can gzhan zhig gnas gzhan zhig na mal stan sar pa la 'dug cing seng ge'i sgra sgrogs te/ sems can thams cad la phan pa dang bde ba'i phyir gsung rab yan lag dgu/ mdo'i sde dang / dbyangs kyis bsnyad pa'i sde dang /lung bstan pa'i sde dang / tshigs su bcad pa'i sde dang / ched du brjod pa'i sde dang / de lta bu byung ba'i sde dang / skyes pa'i rabs kyi sde dang / shin tu rgyas pa'i sde dang / rmad du byung ba'i chos kyi sde rnams ston te/ mdo sde 'a di la dge slong bran dang bran mo dang / ba lang dang ma he la sogs pa rdzas ngan pa 'chang ba rnams chad pas bcad par bshad pa ni/bdag cag gi rkyen du 'tsham pa yin te/ mdo che ge mo zhig las kyang rab tu byung ba/ rdzas ngan 'chang ba rnams/ bcom ldan 'das kyis rgyal po che ge mo zhig la chad pas gcod du bcug ste/ tshul khrims 'chal pa rnams ni gos skye bo gyon du bcug go zhes ston cing /de de ltar seng ge'i sgra sgrogs pa la/ tshul khrims 'chal pa rnams kyis dkrugs pa ma byas te/ srog bcad du zin kyang dge slong de la ni tshul khrims dang ldan pa/ bdag la phan pa dang / gzhan la phan pa la zhugs pa zhes nga zer ro/ / rgyu des na rgyal po dang blon po dang / dge bsnyen rnams la dam pa'i chos bsrung ba'i phyir/ ngas dge slong rnams bsrung bar yang gnang khyim bdag mgo reg rnams chad pas gcod du yang gnang ngo / /de la tshul khrims 'chal pa gang yin pa de dag ni khyim bdag mgo reg ces bya ste/ de ni tshul khrims dang ldan pa'i tshig bla dgas ma yin no/ /rigs kyi bu sngon byung ba 'das pa'i dus na bskal pa grangs med pa'i snga rol du grong khyer ku shI 'di nyid du/ de bzhin gshegs pa dgra bcom pa yang dag par rdzogs pa'i sangs rgyas dga' skyed ces bya ba 'jig rten du byung ste/ de'i tshe 'jig rten gyi khams 'di bde ba can bzhin du yangs par gyur te/de'i tshe sems can dag bde ba can gyi byang chub sems dpa' rnams bzhin du/ bru bas nyam chung ba med do/ /de nas de bzhin gshegs pa de lo bye ba phrag du ma bzhugs bzhugs nas grong khyer 'di nyid dang / gnas 'di nyid du mya ngan las 'das so//de nas de'i bstan pa lo bye ba phrag du ma'i bar du gnas nas/ gang gi tshe bstan pa gnas pa de'i lhag ma lo bzhi bcu lus pa de'i tshe dam pa'i chos nub tu cha ba'i dus na/ dge slong sangs rgyas byin zhes bya ba g.yog 'khor mang po dang ldan pa/ seng ge'i sgra sgrogs pa/gsung rab yan lag dgu'i chos ston pa zhig byung ste/ de bran dang bran mo dang / ba lang dang ma he la sogs pa rdzas ngan pa 'chang ba log pa'i chos ston pa/ tshul khrims 'chal pa sdang ba'i sems dang ldan pa rnams kyis thos nas bsad pa'i sems skyed de/ tshul khrims 'chal ba'i phyogs rnams gcig tu bsdongs nas/mtshon cha sna tshogs lag na thogs te/ dge slong de'i thad du dong ngo / /nga yang de'i tshe rgyal po srid sbyin zhes bya bar gyur te/ rgyal po des gtam de thos nas/ dam pa'i chos bsrung ba'i phyir/ dge slong de'i thad du song ste/ de dag dang g.yul bkye'o/ /de nas chos smra ba de de dag gis ma tshugs so/ /rgyal po de ni ral gri dang / mdung thung kha leb dang / rdo rje rtse gcig pa dang / mda' rnams kyis lus la ma gtsags pa'i sa mtshams yungs 'bru tsam yang med par gyur to / /de nas dge slong des rgyal po de de ltar gyur pa mthong nas/legs so zhes smras te/ dam pa'i chos bsrung bas de ni de ltar bya dgos so/ /khyod ni chos dpag tu med pa'i skal ba can du 'gyur ro zhes byas so/ /de nas rgyal po des dge slong de'i tshig thos nas shi ba'i 'og tu de bzhin gshegs pa mi 'khrugs pa'i 'jig rten gyi khams su skyes so//der sems can gang rjes su yi rang bar gyur pa rnams dang / g.yul 'gyed pa gang yin pa de dag thams cad kyis kyang byang chub thob par gyur to / /de bzhin gshegs pa mi 'khrugs pa'i 'jig rten gyi khams mngon par dga' ba zhes bya ba'i 'jig rten gyi khams su/de bzhin gshegs pa mi 'khrugs pa'i rnam pa zhes bya ba zhig kyang byung ngo / /dge slong sangs rgyas byin yang rgyal po de shi ba'i rjes la shi nas/ de bzhin gshegs pa mi 'khrugs pa'i bstan pa la/ nyan thos kyi mchog tu gyur to/ / rgyal po de yang nyan thos gnyis par gyur to/ /de ltar na dam pa'i chos nub pa'i tshe dam pa'i chos dbyung bar bya'o/ /de'i tshe rgyal por gyur pa de ni nga yin no/ /dge slong de ni sangs rgyas 'od srungs yin te/ de ni yongs su mya ngan las 'das so/ /de ltar na dam pa'i chos bsrungs pa'i 'bras bu ni dpag tu med de/'bras bu rnam par dag pa des na/ nga yang rma bya mdongs ri mo can mang pos brgyan pa lta bur gyur te/ mi shigs pa'i sku dang / chos kyi sku brnyes par gyur to/ /'od srungs chen po dang rus gcig pas gsol pa/ de bzhin gshegs pa ni rdol la brkos pa'i yi ge bzhin du rtag pa'i sku dang ldan lags so//bka' stsal pa/ rigs kyi bu de bas na/ dam pa'i chos bsrung bar 'dod pas ni/ dge slong ngam/ dge slong ma'am/ dge bsnyen nam/ dge bsnyen ma gang na yod pa der bsrung bar bya'o/ /dge bsnyen dam pa'i chos bsrung ba'i 'bras bu ni rgya che'o//rigs kyi bu de bas na dge slong rnams mtshon cha lag na thogs pa'i dge bsnyen dag gis mdun du bdar te rgyu bar bya'o/ /theg pa chen po 'di la ni dge bsnyen gyi bslab pa'i gzhi lnga blang bar mi bya ste/ dam pa'i chos bsrung ba'i phyir lag na mtshon cha thogs shing / dge slong rnams bsrung bar bya'o//gsol pa/ ci lags dge slong gang dag de lta bu'i dge bsnyen lag na mtshon cha thogs pa dang lhan cig 'grogs shing rgyu ba de dag slob dpon lags sam/ 'on te slob dpon ma lags/ tshul khrims 'chal pa zhes bgyi'am/ 'on te mi bgyi lags/ bcom ldan 'das kyis bka' stsal pa/rigs kyi bu de bzhin gshegs pa yongs su mya ngan las 'das pa'i 'og tu nang 'khrug 'byung ba dang / yul bcom pa dag 'byung bar 'gyur te/ dus ngan par gyur pa de'i tshe/ mu ge'i nyes pas phal cher rab tu 'byung zhing / mgo reg tu 'gyur te de dag gis dge slong tshul khrims dang /cho ga dang yon tan dang / spyod pa phun sum tshogs pa dang ldan pa dag skrod par 'gyur / gsod par 'gyur te/ der dge slong tshul khrims dang ldan pa rnams kyis grong dang / grong khyer dang / ri khrod kyi grong dag tu ji ltar rgyu bar bya ste/ de lta bu dag gi dus na dge slong tshul khrims dang ldan pa slob dpon du gyur pa rnams lam du 'gro ba dang /rang gi srog bsrung ba'i phyir mtshon cha lag na thogs pa dag dang 'gro bar ngas gnang ngo / /dge bsnyen rnams dang / khyim bdag dang / rgyal po dang blon po rnams kyis/ dge slong tshul khrims dang ldan pa bsrung ba'i phyir/mtshon cha 'chang ba de yang tshul khrims yin zhes nga zer te/ 'on kyang gsad par ni mi bya'o/ /bzlog pa'i phyir mtshon cha bcang bar bya ste/ de ni mchog tu mkhas pa'i tshul khrims yin no/ /slob dpon ni theg pa chen po'i gdams ngag ston pa dang / yang dag par lta ba dang / rung ba ma yin pa'i gdugs dang / 'bru mar gyi snod dang / 'bras bu'i rnam grangs rnams spangs pa dang / rgyal po dang blon po rnams la mi brten pa dang / rnyed pa'i phyir sbyin pa po rnams la dga' ba dang / snyan par smra ba ma yin pa dang / spyod lam phun sum tshogs pa dang /tshul 'chos med pa'i dge sbyong gi dngos po sel ba dang / tshul khrims dang ldan pa dang / dge ba'i chos can dang / rgyal po dang 'dra ba'i blo gros 'chang ba dang / byad gzugs dang / cha byad dang / rnyed pa dang / bkur sti gzhan mi 'dod pa dang / chog shes shing yo byad bsnyungs pa ston pa gang yin pa ste/de ni slob dpon zhes bya'o/ /de'i 'khor rnyed pa dang / bkur sti 'dod pa'i rang gi 'khor gyi dge 'dun gang yin pa de dag ni zlog par byed do/ /de la dge 'dun yang rnam pa gsum ste/ tshul khrims 'chal pa dang 'dres pa dang / byis pa'i dge 'dun dang / rang bzhin gyi dge 'dun no//de la tshul khrims 'chal pa dang 'dres pa'i dge 'dun ni des zlog par byed de/ tshul khrims 'chal pa dang 'dres pa'i dge 'dun zhes bya ba ni/ tshul khrims 'chal pa rnams 'ba' zhig dang mthun par byed de/ de dag tshar gcod par mi byed cing / zang zing gi phyir de dag dang lhan cig tu spyod pa mthun par byed pa gang yin pa ste/tshul khrims dang ldan du zin kyang de dag dang lhan cig gnas pas/ tshul khrims 'chal pa kho na yin pa'i grangs su 'gro bar 'gyur ro/ /'di ni tshul khrims 'chal pa dang 'dres pa zhes bya ste/ de'i tshul med pa zlog par byed pa'i phyir slob dpon zhes bya'o//byis pa'i dge 'dun zhes bya ba ni dgon pa pa dang / bsod snyoms pa zhan pa dang / rmugs pa rnams yin te/ dgag dbye dang / gso sbyong rnams kyi dus su/ rang gi 'khor nyi tshe dag par byed kyi/ tshul khrims 'chal pa rnams dag par mi byed par/de dag dang lhan cig tu 'dre bar gnas pa de ni byis pa'i dge 'dun zhes bya ste/ rmugs pa de dag ni tshul ma yin pa sel bar byed pa'i phyir slob dpon zhes bya'o/ /rang bzhin gyi dge 'dun ni/ bdud bye ba snyed kyis kyang mi shigs pa yin te/ de ni byang chub sems dpa'i dge 'dun rang bzhin gyis rnam par dag pa'o//tshul khrims 'chal pa'i dge 'dun rnam pa gnyis zlog par byed pa gang yin pa de dag ni/ slob dpon zhes bya'o zhes gsungs pa dang / yang mdo de nyid las/ de bzhin du deng ngas yongs su mya ngan las 'das pa chen po gsang chen ma lus par bstan kyang /sems can snod du ma gyur pa gang yin pa de dag gis mi thos so/ /yang bka' stsal pa/ gang dag la ni yongs bsags med/ /gang dag gis ni zas mi rtogs/ /mkha' la bya rnams rjes 'dra bar/ /de dag rjes bcad dka' ba yin/ /bstan pa 'di'i don ji lta bu zhe na/su dag la ni yongs bsags med/ /su dag gis ni zas mi rtogs/ /gang dag gis ni rjes bcad dka'/ /su song gang du song ba na/ /de dag rjes bcad dka' ba yin/ /de la rin po che la sogs pa bsags pa'o/ /yongs zhes bya ba ni phrad de bye brag gi tshig go/ / yongs zhes bya ba ni bsdus pa'i don te/ 'dir rdzas bzang po sgrub pa'i tha tshig go/ /bsags pa zhes bya ba dang / nor zhes bya ba ni don gcig go/ /gang dag nor yongs su bsags par byed pa de ni/ de dag gi yongs su bsags pa zhes bya'o/ /de la yongs su bsags pa zhes bya ba de ni rnam pa gnyis te/'dus byas yongs su bsags pa dang / 'dus ma byas yongs su bsags pa'o/ /de la nyan thos ni 'dus byas yongs su bsags pa'i rnam pa'o/ /de bzhin gshegs pa ni 'dus ma byas yongs su bsags pa'i rnam pa'o/ /dge 'dun ni rnam pa gnyis te/ 'dus byas kyi dge 'dun dang /'dus ma byas kyi dge 'dun no/ /de la 'dus byas kyi dge 'dun zhes bya ba ni/ nyan thos kyi dge 'dun yin no / /nyan thos kyi dge 'dun la ni yongs su bsags pa yang med na/ bran dang bran mo rnams la sogs pa rdzas ngan pa rnams dang / mdzod dang bang ba yongs su 'dzin pa lta ga la yod de/'ongs pa yin pas na de dag ni lan tshwa dang / til tsam yang yongs su bsags par mi byed do/ /gang dag bcom ldan 'das kyis/ bdag cag la bran dang bran mo la sogs pa 'chang du gnang ngo zhes zer ba de dag gi lce ni lkugs par 'gyur srid do/ / nyan thos de dag ni yongs su bsags pa med pa'i rnam pa yin te/ de dag ni zas yongs su shes pa'o/ /gang zag zas la zhen pa med pa de dag ni zas yongs su shes pa yin te / de dag ni 'gro ba'i lam du rjes bcad par dka'o/ /de dag ni myur ba kho nar sangs rgyas nyid du nye bar gnas so/ / de dag gi 'gro ba ni rjes bcad dka'o zhes de bzhin gshegs pas gsung ngo / /yang bka' stsal pa/ gal te 'dus byas kyi dge 'dun la yang bsags pa med na/ 'dus ma byas pa'i dge 'dun la lta ga la yod de/ 'dus ma byas pa'i dge 'dun ni de bzhin gshegs pa ste/ de bzhin gshegs pa la gsang ba'i chos bstan pa ga la yod/gsang ba gang yin pa de yongs su bsags pa'o/ /rjes bcad du med pa ni mi g.yo ba'i bde ba ste/ mya ngan las 'das pa'i don ston to zhes gsungs pa dang / yang mdo de nyid las/ rigs kyi bu dge 'dun gang dag gzhi chen po brgyad shes bzhin du spyod par byed pa der/gal te tshul khrims dang ldan pa'i dge slong dag 'khod na/ de dag ni ji ltar ka ra ka'i tshal na/ tin tu ka'i shing 'dug pa de bzhin du de dag ma mthong na/ tshul khrims dang ldan pa yin du zin kyang / dge bsnyen shes rab can gyis de la phyag mi bya zhing /mchod pa'i gnas su mi bya'o/ /gal te de dag la phyag bya bar 'dod na/ ci khyed gzhi chen po brgyad len par byed dam/ 'on te len par mi byed ces dris nas/ gdod phyag bya ste zhes gsungs pa dang / yang mdo de nyid las/ yi ge ma yin no zhes bya ba ni chog mi shes pa dang /yo byad ma bsnyungs pa dang / 'dod chen dang / tshul 'chos pa dang / kha gsag byed par 'gyur ba'i rang bzo'i yi ge dang / tshig sna tshogs sangs rgyas kyis gsungs pa ma yin pa'i mdo sde rnams yin te/ bcom ldan 'das kyis bdag cag la thugs brtse bas mu ge byung ba'i tshe/nyid kyi sras rnams nyon mongs par mi 'gyur bar mdzad pa'i phyir/ bran dang bran mo la sogs pa dang / g.yos su byas pa rnam pa du ma gnang ba'i bslab pa'i gzhi gsungs te/ bran dang bran mo la sogs pa dang / gser dang dngul la sogs pa dang / ba lang dang / ma he dang / 'bru rnams bsdu ba dang / nyo tshong dang / zhing rmo ba la sogs pa ngas gnang ngo zhes gsungs so zhes bya ba la sogs pa ngas gnang ngo zhes bya ba de dag ni yi ge zhes bya ste/ de lta bu'i mdo sde dang 'dul ba ni tshad ma ma yin no/ /de bas yi ge 'don pa'i gang zag de dag kyang tshad ma ma yin te/ de'i phyir dge slong dag khyed kyi rten ni don yin no zhes gsungs so//snying rje chen po la 'jug pa'i mdo las kyang / dung dang gser dang nor bu nor mang dang / /khyim dang gnyen bshes rnams spangs rab byung ste/ /sangs rgyas bstan pa 'di la rab byung nas/ /sdig pa'i las rnams shin tu spyod par byed//nor dang 'bru la snying por 'du shes shing / /bzhon pa bong bu shing rta rnams la chags/ /gang la bslab pa'i nan tan med pa rnams/ /de dag gis kyang ci phyir mgo bo bregs/ /zhes gsungs pa dang / yang mdo de nyid las/ bkur sti rnyed la brten nas ni/ /shes kyi khe rnams tshol ba dag /gtsug lag khang dang mchod rten byed/ /khyim mi mo la chags shing myos/ /dmigs pa dag la rten byed cing / /'dod pa'i sred la shin tu gnas/ /bdud kyi yul du gnas nas ni/ /khyim pa dag gi las byed 'gyur/ /zhes gsungs so/ /las rab tu 'byed pa'i mdo las kyang /de la mi dge ba bcu'i las kyi lam 'di yang dag par blangs pa'i rgyus phyi rol gyi dngos po rnams rgyud par mngon pa gang zhe na/ srog gcod pa'i rnam par smin pas ni gzi mdangs nub par 'gyur ro/ /ma byin par len pa'i rnam par smin pas ni thog dang phye ma leb dang lo tog rnams te srin bu can dag 'byung bar 'gyur ro//'dod pas logs par g.yem pa'i rnam par smin pas ni ljan ljin dang rdul dang tshub ma dang ma rung ba'i rlung dang char 'byung bar 'gyur ro/ /brdzun du smra ba'i rnam par smin pas ni kha dring ba 'byung bar 'gyur ro//phra ma'i rnam par smin pas ni rtswa tshang tshing dang nags thibs po 'byung bar 'gyur ro/ /tshig rtsub po'i rnam par smin pas ni gseg ma dang gyo mo dang reg na mi bde zhing rtsub pa'i dngos po rnams 'byung bar 'gyur ro/ /ngag kyal pa'i rnam par smin pas ni mtho dman gyi gnas dang tsher ma dang ngam grog dang g.yang sa dang tshan can dang byis sa khyab par 'gyur ro//brnab sems kyi rnam par smin pas ni lo tog rnams 'bras bu chung bar 'gyur ro/ /gnod sems kyi rnam par smin pas ni lo tog 'bras bu med pa 'byung bar 'gyur ro/ /log par lta ba'i rnam par smin pas ni lo tog rnams 'bras bu kha ba dang tsha ba 'byung bar 'gyur ro//mi dge ba bcu'i las kyi lam bcu po de dag yang dag par blangs pa'i rgyus phyi rol gyi dngos po rnams rgud par mngon no zhes gsungs so/ /sangs rgyas kyi gsung gi mdo las kyang / gzhan yang de'i tshe de'i dus na dge slong de dag bdag tu smra bar 'gyur ro//sems can du smra ba dang / srog tu smra ba dang / gang zag tu smra ba dang / chad par smra ba dang / rtag par smra ba dang / tshangs par spyod pa ma yin par tshangs par spyod par khas 'che ba dang / gzhan la gnod pa dang 'tshe ba tshol ba dang / tshul khrims chad pa dang /rgyal mtshan gyis rku ba dang / de dag pi wang dang / rdza rnga dang / rnga rigs kyi sgra dag la dga' bar 'gyur ro/ /bro gar dang gar mkhan la lta ba dag las ldog par mi 'gyur/ rnyed pa 'dod pa dang sa le sbram dang dngul yongs su 'dzin pa las ldog par mi 'gyur/ de bzhin du zhing gi dngos po yongs su 'dzin pa las dang / tshong dus kyi dngos po yongs su 'dzin pa las dang / khyim gyi dngos po yongs su 'dzin pa las ldog par mi 'gyur/ 'bru rjen yongs su 'dzin pa las ldog par mi 'gyur ro/ /de bzhin du khyim bya dang phag dang bong bu dang lug yongs su 'dzin pa las ldog par mi 'gyur ro//gshol dang rmon lcags dang / shing rta'i las kyi mtha' byed pa las ldog par mi 'gyur / skyes bu dam pa ma yin pa de lta bu'i dam pa ma yin pa'i chos dang ldan pa 'di la 'jigs par mi lta ba de rnams la/ stong pa nyid dang / mtshan ma med pa dang / smon pa med pa dang / dmigs pa med pa'i chos dag gis ci zhig bya zhes gsungs so/ /'tsho ba ya nga ba la dgongs pa bstan pa/ 'dul ba las kyang / 'di na kha cig tshul 'chos sam/ kha gsag gam/ gzhogs slong ngam / thob kyis 'jal ba'am/ rnyed pas rnyed pa tshol ba'am/shing sbyin pa'am/ 'o ma sbyin pa'am/ lo ma sbyin pa'am / me tog sbyin pa'am/ 'bras bu sbyin pa'am/ phyi ma sbyin pa'am/ tshwa sbyin pa'am/ khrus spyad sbyin pa'am/ so shing sbyin pa'am/ 'phrod pa'i chu sbyin pa'am/ ngor dga' ba'am/ yongs su gso ba'am/rdzas brtag pa'am/ dud 'gro brtag pa'am/ yan lag rig pa'am/ rgyu skar rig pa'am/ pho nyar 'gro ba'am/ mngag gzhug tu 'gro ba'am/ rtog pas mngag pa'am/ dman pa'i las sam/ skyed gtong len nam/ sbyin pa'am lan du sbyin pa'am/ sangs rgyas kyis smad pa gzhan gang yang rung ba'i 'tsho bas 'tsho bar rtog par byed do zhes gsungs so//'od srungs kyis zhus pa'i mdo las kyang / 'od srungs de la dge sbyong gdol pa lta bu gang zhe na/ 'od srungs 'di lta ste dper na/ gdol pa ni rtag tu dur khrod spyod yul ba yin te/ shi ba la re ba dang /byams pa med pa'i mig gis 'gro ba la blta ba dang / shi ba la dga' ba yin no/ /'od srungs de bzhin du dge sbyong gdol pa lta bu yang rtag tu mdza' bshes kyi khyim dang / slong ba ster ba'i khyim la gdu ba yin te/ de nas rnyed pa dang bkur stis nye bar 'tsho zhing / khyim pa de dag chos sam 'dul ba yang dag par 'dzin du mi 'jug pa dang /de rnyed pa'i ched du 'dris par byed kyi/ chos kyi ched du ma yin pa dang mdza' ba'i sems med cing rtag tu rnyed pa la re ba yin te/ 'od srungs 'di ni dge sbyong gdol pa lta bu zhes bya'o/ /'od srungs 'di lta ste dper na/ gdol pa ni tshong dpon dang /khyim bdag dang / blon po dang / khams kyi rgyal po dag dang / bram ze dang / rgyal rigs dang / grong rdal gyi mi dang / yul gyi mi rnams kyis rtag tu yongs su spang bar bya ba'i 'os yin te/ gdol pa rig nas thag ring po bas kyang ring por yongs su spong ngo / / 'od srungs de bzhin du dge sbyong gdol pa lta bu yang dge slong ma dang / dge bsnyen dang / dge bsnyen ma tshul khrims dang ldan pa dang / yon tan dang ldan pa rnams kyis yongs su spang bar bya ba'i 'os yin te/ dge sbyong gdol pa lta bu sdig pa'i chos kun du spyod cing / tshul khrims 'chal pa rig nas/thag ring po nas kyang ring por yongs su spong ngo / /'od srungs 'di lta ste dper na/ gdol pa'i kha phyis sam/ gos sam/ yongs su spyad pa de thams cad la ni skye bo ya rabs rnams mi reg cing / yongs su mi spyod do/ /'od srungs de bzhin du dge sbyong gdol pa lta bu'i lhung bzed dam/ chos gos sam/ yongs su spyad pa de thams cad ni mi mthun pa'i 'tsho bas yongs su btsal ba/ lus dang sems smas pas yongs su btsal ba yin pas/ tshul khrims dang ldan pa yon tan dang ldan pa dag de la mi reg cing mi spyod do/ /'od srungs 'di lta ste dper na/ gdol pa ni kha phyis thogs te/zhum zhum por byas nas gzhan gyi khyim du 'gro'o/ /'od srungs de bzhin du dge sbyong gdol pa lta bu yang zhum zhum por byas nas de bzhin gshegs pa'i mchod rten la phyag 'tshal lo/ /zhum zhum por byas nas 'khor gyi nang du 'gro'o/ /zhum zhum por byas nas gtsug lag khang dang /gnas khang dang gzhan gyi khyim du 'gro'o/ /zhum zhum por byas te 'gro ba dang / 'dug pa dang / nyal bar byed do/ /'od srungs de ltar na zhum zhum por byas pas/ sdig pa 'chab pa de'i spyod yul gang yin pa de dag thams cad ni rung ba ma yin pa la yongs su brtag pa'o//'od srungs 'di lta ste dper na/ gdol pa'i sems ni bde 'gro'i skye ba la mi gnas so/ /de ci'i phyir zhe na/ 'di ltar de rang gi las kyis nyes pa'i phyir ro/ /'od srungs de bzhin du dge sbyong gdol pa lta bu'i sems kyang bde 'gror 'gro bar bya ba'i phyir mi gnas shing de'i 'jig rten pha rol rnam par zhig la/de ngan 'gro gsum du gnas par sgrib pa med de/ 'od srungs 'di ni dge sbyong gdol pa lta bu zhes bya'o zhes gsungs so/ /snying rje chen po'i mdo las kyang / de'i phyir kun dga' bo khyod mya ngan ma byed smre sngags ma 'don cig /kun dga' bo mya ngan las 'das pa na byang phyogs kyi rgyud du rgyas ldan zhes bya ba'i rgyal po'i pho brang 'byor pa rgyas pa/bde ba lo legs pa/ mi'i skye bo mang pos gang ba 'byung bar 'gyur ro/ /der bram ze dang khyim bdag rnams ni nga'i bstan pa 'di la dad cing dang bar 'gyur ro/ /de rnams ni nga'i sku dang nyan thos rnams la bla mar bya ba dang /rim gror bya ba dang mchod par bya ba dang rjed par bya ba'i phyir spro bar 'gyur ro/ /der nga'i nyan thos rdzu 'phrul che zhing gzi brjid che ba rnams kyang kun nas mang du 'du bar 'gyur ro/ /kun dga' bo der khyim pa mkhas pa/ shes rab che ba/ gsal ba/ dul ba 'jigs pa med pa/mang du thos shing thos pa bsags pa mang po dag kyang rgyas par 'byung bar 'gyur ro/ /kun dga' bo yang rgyal po'i pho brang rgyas ldan der/ gang dag khyim pa 'chi ba'i dus byed par 'gyur ba de dag ni/ 'chi ba'i dus byas ma thag tu dga' ldan gyi lha'i lus dag tu skye bar 'gyur ro/ /gang dag rab tu byung ba 'chi ba'i dus byed par 'gyur ba de dag ni/phal cher ngan song du 'gro bar 'gyur ro/ /de ci'i phyir zhe na/ de dag ni yo byad bsnyungs pa la mi gnas shing / sdom pa la mi gnas par 'gyur ro/ /kun dga' bo rgyal po'i pho brang rgyas ldan du dam pa'i chos ni gnas par 'gyur ro/ / bram ze dang khyim bdag de dag 'di snyam du/ bcom ldan 'das shAkya thub pa'i dam pa'i chos nub par 'gyur ro zhes sems par 'gyur ro/ /de ci'i phyir zhe na/ 'di ltar kun dga' bo de'i tshe na dge slong mang po 'byung bar 'gyur te/ g.yel ba/ bsags pa mang ba/ spong ba las nyams pa bsu ba'i phyir sngar 'gro ba/rab tu dben pa la brtson pa dor ba / 'khor bzhi dang 'dres pa dang / spyod tshul dang bral ba/ tshul khrims 'chal pa dang / bram ze dang khyim bdag rnams dang lhan cig spyod tshul nyams pa/ lugs dang bral ba/ phan tshun du mi gus pa/ me tog gam/ bza' ba'am/ bca' ba'am/ ster ba'am/ lan du sbyin pa bsten pa la dga' ba dang / ma bsdams par 'gyur ro/ /de dag bu smad la spyod par 'gyur/ de dag mthong ba dang thos nas bcom ldan 'das shAkya thub pa'i dam pa'i chos nub par gyur ta re snyam pas 'jigs pa chen po dang /skrag pa dang / skyo bar 'gyur ro zhes gsungs so/ /'od srungs kyis zhus pa'i mdo las kyang / 'od srungs de la chom rkun lta bu'i dge sbyong gang zhe na/ 'od srungs 'di lta ste dper na/ mi g.yon can gyi rang bzhin can/ rtag tu brkam pa/ chags pa'i zil gyis non pa bdag gi rnyed pas chog par mi 'dzin pa/gzhan gyi nor la re ba/ drag shul can/ dbyug pa dang / mtshon cha dang / dgra cha thogs pa/ ngo tsha med pa/ snying rje med pa/ rtag tu gdug cing / rab tu gdug pa'i sems dang ldan pa ni/ de gang gi tshe grong bar ram grong ngam/ grong khyer ram/ grong rdal lam/ yul du 'jug pa de'i tshe/ de 'di snyam du gzhan dag gi nor gyi phung po gang yin pa de bdag gir gyur na re stes snyam du sems shing / de zin du 'ong zhes mkhyun bu mkhyun bur rgyu ba yin no/ /'od srungs de bzhin du chom rkun lta bu'i dge sbyong yang rtag tu brkam pa /chags pa'i zil gyis non pa/ bdag gi rnyed pas chog mi shes pa/ gzhan gyi rnyed pa la re ba yin te/ de gang gi tshe grong bar ram/ grong ngam/ grong khyer ram/ grong rdal lam/ yul du 'jug pa de'i tshe/ de rnyed pa'i phyir 'jug gi/ chos kyi phyir ma yin te/ spyod lam thams cad kyang chom rkun lta bur ston pa yin/'chab cing sped pa lta bu yin te/ bdag dge slong gzhan gyis tshul khrims 'chal par shes na mi rung ste/ shes par gyur na so sor thar pa'i mdo 'don pa las bskrad par 'gyur ro snyam nas/ rtag tu skrag cing rtag tu 'jigs te/ spyod lam thams cad kyang g.yos spyod pas/lha dang / klu dang / gnod sbyin dang / dri za dag gis chom rkun 'ong ngo / /chom rkun 'gro'o/ /chom rkun 'greng ngo / /chom rkun 'chag go/ /chom rkun 'dug go/ /nyal lo/ /chos gos len to/ /chom rkun grong du 'gro'o/ /grong nas 'byung ngo / / chom rkun za'o/ /chom rkun 'thung ngo / /chom rkun skra 'dreg go zhes rig par 'gyur ro/ /'od srungs de ltar na/ lha dang / klu dang / gnod sbyin dang / dri za rnams kyis de'i spyod lam gang yin pa de thams cad rung ba ma yin la/ yongs su brtags pa yin par rig par 'gyur te/ rig nas kyang de la snying rje chen po bskyed cing /kye ma 'di re mtshar cig /sdig pa can gyi dge slong 'di lta bu dag gis/ bcom ldan 'das shAkya thub pa'i bstan pa nub par byed par 'gyur ro zhes 'phya zhing mi snyan pa zer ro/ /tshul khrims dang ldan pa/ yon tan dang ldan pa rnams la ni/ lha dang / klu dang / gnod sbyin dang /dri za rnams kyang / 'di dag ni bstan pa yongs su 'dzin pa'o zhes gus pa cher skyed do/ /'od srungs chom rkun pa lta bu'i dge sbyong bstan pa 'di la rab tu byung ba ni/ skyo ba dang / 'dod chags dang bral ba'i sems gcig kyang mi bskyed na/ 'bras bu thob pa lta ci smos kyi/ de ni gnas med de/'od srungs 'di ni chom rkun lta bu'i dge slong zhes bya'o zhes gsungs so// // 'tsho ba yongs su dag pa la dgongs pa bstan pa/ byams pa seng ge'i sgra'i mdo las kyang / 'od srungs de dag dbugs 'byin pa brjod par bya ste/ de thos nas rnal 'byor pa/ rnal 'byor spyod pa dag dga' ba dang mgu bar 'gyur ro//'od srungs rigs kyi bu'am/ rigs kyi bu mo gang la la zhig gis/ gling chen po bzhi po'i 'jig rten gyi khams na/ sems can gang ji snyed pa de dag thams cad la bskal pa'am bskal pa las lhag par bde ba'i yo byad thams cad kyis bkur stir byas/bla mar byas/ ri mor byas/ mchod par byas pa bas ni/ yang dag par zhugs pa/ tshul khrims yongs su dag pa/ 'tsho ba yongs su dag pa zhig gis/ sbyin pa po gang gi dad pas byin pa/ tha na chu snod gang tsam zhig bdag gir byas par gyur na/ de nyid de las bsod nams kyi phung po ches rgya cher 'gyur kyi/gling chen po bzhi pa'i 'jig rten gyi khams kyi sems can thams cad la bskal pa'am bskal pa las lhag par bde ba'i yo byad thams cad kyis bkur stir byas/ bla mar byas/ ri mor byas/ mchod par byas pa de la ni de lta ma yin no zhes gsungs so/ /dkon mchog sprin gyi mdo las kyang /rigs kyi bu chos bcu dang ldan na/ byang chub sems dpa' 'tsho ba yongs su dag pa rnams yin no/ /bcu gang zhe na/ 'di lta ste/ tshul 'chos pa dang / kha gsag gi rnyed pa dang bral ba rnams yin/ brda'i rnyed pa dang bral ba rnams yin/gzhogs slong gi rnyed pa dang bral ba rnams yin/ mi rigs par btsal ba'i rnyed pa dang bral ba rnams yin/ chos ma yin pa'i rnyed pa dang bral ba rnams yin/ yongs su ma dag pa'i rnyed pa dang bral ba rnams yin/ rnyed pa la zhen pa med pa rnams yin/ rnyed pa la ma chags pa rnams yin/yongs su mi chad pa'i rang bzhin med pa rnams yin/ chos nyid rnyed pas chog shes pa rnams yin no/ /rigs kyi bu de la ji ltar na/ byang chub sems dpa' tshul 'chos pa dang / kha gsag gi rnyed pa dang bral ba yin zhe na/ rigs kyi bu 'di la byang chub sems dpa' rnyed pa'i rgyu rnyed pa'i phyir lus kyis tshul 'chos pa mi byed/ngag gis tshul 'chos pa mi byed/ sems kyis tshul 'chos pa mi byed do/ /ji ltar na lus kyis tshul 'chos pa mi byed pa yin zhe na/ byang chub sems dpa' sbyin pa byed pa dang / sbyin pa'i bdag po mthong na/ spyod lam mi 'chos so//ji ltar spyod lam mi 'chos she na/ gnya' shing gang tsam du blta ba dang / skyo bar blta ba dang / sgrib pa med par blta bas/ gom pa bags kyis dal ba dal bas 'dor zhing / 'degs pa ma yin te/ de ltar na lus kyis tshul 'chos pa mi byed do/ /ji ltar na ngag gis tshul 'chos pa mi byed ce na/byang chub sems dpa' ni rnyed pa'i rgyu rnyed pa'i phyir gcom bskyungs shing smra ba ma yin te/ 'jam por smra ba ma yin/ dga' bar smra ba ma yin/ rjes su 'brang ba'i tshig brjod pa ma yin te/ de ltar na ngag gis tshul 'chos pa mi byed do/ /ji ltar na sems kyis tshul 'chos pa mi byed ce na/byang chub sems dpa' ni sbyin pa byed pa'am/ sbyin pa'i bdag pos rnyed pa bstabs na/ tshig gis 'dod pa chung bar ston cing / sems kyis 'dod pa skyed pa ma yin no/ /rigs kyi bu 'di lta ste/ tshig gis 'dod pa chung la/ sems kyis rnyed pa 'dod pa ni/nang gi gdung ba yin te / de ltar na sems kyis tshul 'chos par mi byed do/ /de ltar na byang chub sems dpa' tshul 'chos pa dang / kha gsag gi rnyed pa dang bral ba rnams yin no/ /ji ltar na byang chub sems dpa' brda'i rnyed pa dang bral ba yin zhe na/ byang chub sems dpa' sbyin pa byed pa'am/sbyin bdag mthong na/ bdag chos gos kyis phongs so/ /bdag lhung bzed kyis phongs so/ /bdag nad kyi rkyen rtsis phongs so zhes brda mi byed cing / sbyin pa byed pa'am / sbyin bdag la mi slong zhing tshig tu mi brjod do/ /de ltar na byang chub sems dpa' brda'i rnyed pa dang bral ba yin no//ji ltar na byang chub sems dpa' gzhogs slong gi rnyed pa dang bral ba yin zhe na/ byang chub sems dpa' ni sbyin pa byed pa dang / sbyin bdag mthong na/ bdag la sbyin pa'i bdag po che ge mo zhig gis/ dngos po che ge mo zhig byin te/ de la bdag gis kyang phan pa che ge mo zhig byas so//des kyang bdag la 'di ni tshul khrims dang ldan par rig ste mang du thos pa'o/ /'dod pa chung ba'o zhes 'di dang 'di byin no/ /bdag gis kyang de la snying rje ba'i sems nye bar gzhag ste/ blangs so zhes de skad kyi tshig mi brjod do/ /de ltar byang chub sems dpa' gzhogs slong gi rnyed pa dang bral ba yin no//ji ltar na byang chub sems dpa' mi rigs par btsal ba'i rnyed pa dang bral ba yin zhe na/ rigs kyi bu byang chub sems dpa' ni lus la rma byung ba dang / sems la rma byung bas rnyed pa tshol ba ma yin te/ de la lus kyi rma ni 'di lta ste/ rnyed pa'i rgyu rnyed pa'i phyir rgyug pa dang / kun du rgyug pa dang / tshul khrims 'chal pa la spyod pa'o/ /de la sems kyi rma ni 'di lta ste/ rnyed pa la smon pa dang / tshangs pa mtshungs par spyod pa gzhan gyi rnyed pa la gnod sems mang ba ste/ de ltar na byang chub sems dpa' mi rigs par btsal ba'i rnyed pa dang bral ba yin no//ji ltar na byang chub sems dpa' chos ma yin pa'i rnyed pa dang bral ba yin zhe na/ rigs kyi bu 'di la byang chub sems dpa' srang la sgyu byed pa dang / gzhal ba la sgyu byed pa dang / yid brtan pa la gnod par byed pa dang / g.yos rnyed pa mi sku ba ste/ de ltar na byang chub sems dpa' chos ma yin pa'i rnyed pa dang bral ba yin no//ji ltar na byang chub sems dpa' yongs su ma dag pa'i rnyed pa dang bral ba yin zhe na/ 'di la byang chub sems dpa' gang mchod rten gyi dang 'dres pa'am/ chos kyi dang 'dres pa'am/ dge 'dun gyi dang 'dres pa'am/ma byin pa'am/ ma gnang ba de dag mi len cing bdag gir mi byed/ /chags pa'i sems mi skyed de/ de ltar na byang chub sems dpa' ma dag pa'i rnyed pa dang bral ba yin no/ /ji ltar na byang chub sems dpa' rnyed pa la zhen pa med pa yin zhe na/ rigs kyi bu 'di la byang chub sems dpa' rnyed pa rnyed kyang /bdag gir mi byed/ nor mi brtsi/ tshogs su mi byed cing / dus dus su dge sbyong dang / bram ze dang / pha ma dang / mdza' bo dang / blon po dang / gnyen bshes dang / snag gi gnyen mtshams dag la gtong zhing / dus dus su bdag kyang yongs su spyod la/yongs su spyod pa'i tshe/ chags pa med pa dang / zhen pa med par yongs su spyod do/ /rnyed pa ma rnyed na yang / skyo ba'i sems kyang mi skyed cing / yongs su yi mi 'chad de/ sbyin pa byed pa dang / sbyin bdag rnams la ma dad par mi 'dzin pa yin te/ de chos dang mthun par rnyed pa/dge 'dun gyi ma gtogs pa/ de bzhin gshegs pas bsngags pa/ byang chub sems dpas ma smad pa/ lhas bstod pa tshangs pa mtshungs par spyod pas mi 'phya bas chog shes pa rnams yin no/ /rigs kyi bu chos bcu po 'di dag dang ldan na byang chub sems dpa' 'tsho ba yongs su dag pa rnams yin no zhes gsungs so//tshangs pas zhus pa'i mdo las kyang / longs spyod rung ba dag la 'dod pa chung ba'i phyir tshig tu smra ba des na seng ge'i sgra zhes bya'o zhes gsungs so/ /blo gros mi zad pa la bstan pa'i mdo las kyang / de la yang dag pa'i 'tsho ba gang zhe na/ gang 'phags pa'i rigs dang / sbyangs pa'i yon tan mi 'dor ba nyid dang / tshul 'chos pa ma yin pa nyid dang / kha gsag ma yin pa nyid dang / gzhogs slong ma yin pa nyid dang / dgang sla ba nyid dang / gso sla ba nyid dang / cho ga dang tshul khrims mdzes pa nyid dang / gzhan gyi rnyed pa la phrag mi dog pa nyid dang /rang gi rnyed pas chog shes pa nyid dang / kha na ma tho ba med pa nyid dang / 'phags pas rjes su gnang ba'i 'tsho ba ste/ 'di ni yang dag pa'i 'tsho ba zhes bya'o zhes gsungs so/ /rnal 'byor spyod pa byang chub sems dpa'i sa las kyang / byang chub sems dpa' sdom pa'i tshul khrims la gnas pa ni/dge ba mi spyoms pa yin/ sdig pa mthol ba yin/ 'dod pa chung ba dang / chog shes pa dang / sdug bsngal bzod pa dang / yongs su gdung ba med pa'i rang bzhin can dang / ma khengs pa dang / mi brtan pa ma yin pa dang / spyod lam rab tu zhi ba dang / tshul khrims 'chos pa la sogs pa log pa'i 'tsho ba thams cad byed pa'i chos spangs pa yin no zhes gsungs so// // gang gis bstan pa nub par 'gyur ba rnyed pa dang bkur sti la dgongs pa bstan pa/ sangs rgyas kyi sde snod kyi mdo las kyang / shA ri'i bu de lta mod kyi bcom ldan 'das 'od srungs kyis de bzhin gshegs pa shAkya thub pa'i gsung rab de ni lhag par rnyed pa dang bkur sti byed pas nub par 'gyur ro zhes lung bstan te/shA ri'i bu 'di ltar chos 'dul ba 'di ni rnyed pa dang bkur stis myur du nub par 'gyur ro/ /shA ri'i bu dper na mi dbul po zhig gis gter chen po rnyed nas gzhi de las bde ba dang yid bde ba nyams su myong ngo //shA ri'i bu de bzhin du ma 'ongs pa'i dus na/ dge slong dag 'di ltar khyim pa la brten pa dang / phu dud byed pa dang / bkur sti byed pa dag 'byung bar 'gyur ro/ /shA ri'i bu de la khyim pa gang dag gis dge slong gang dag kyang 'jig rten gyi zang zing gis zang zing la mgron du 'bod par 'gyur zhing /mi dbul po gter la chags pa bzhin du/ dge ba ma mthong ba de dag 'jig rten gyi zang zing gis yid bde bar bya ba'i phyir/ de dag gi las kyi mtha' rim bzhin du byed par 'gyur ro/ /de ltar na dge slong de dag kyang 'jig rten gyi zang zing lhur len par 'gyur te/'jig rten gyi zang zing gis 'khol bas chog mi shes pa dang / nye du la 'dod par 'gyur ro/ /bdag nyid shes bzhin du khyim pas shes par bya ba'i phyir bdag nyid dgra bcom pa yin par sgrogs par byed do/ /de dag de ltar shes par byed pa yongs su tshol ba na/sangs rgyas kyi byang chub 'dor bar 'gyur ro zhes gsungs so/ /gzi brjid can gyi mdo las kyang / rnyed pa dang bkur sti la brten pa'i dge slong gi kun nas nyon mongs pa bye ba phrag dgu bcu rtsa dgur 'gyur te/ de dag gis mtshams med pa'i sa thob par 'gyur ro zhes gsungs so//lhag pa'i bsam pa bskul ba'i mdo las kyang / de nas bcom ldan 'das la/ byang chub sems dpa' sems dpa' chen po byams pas 'di skad ces gsol to/ /bcom ldan 'das byang chub sems dpas rnyed pa dang bkur sti'i skyon ji ltar mthong bar bgyi/ rnyed pa dang bkur sti'i nongs dmigs ni gang lags/byang chub sems dpa' gang dag la brtags na/ 'dod pa chung ngu la dga' zhing / yongs su mi gdung bar 'gyur ba lags/ bka' stsal pa/ byams pa byang chub sems dpa' sems dpa' chen pos rnyed pa dang bkur sti ni 'dod chags bskyed pa yin par brtag par bya'o//rnyed pa dang bskur sti ni dran pa 'joms par brtag par bya'o/ /rnyed pa dang bkur sti ni rnyed pa dang ma rnyed pas khengs pa dang dud par brtag par bya'o/ /rnyed pa dang bkur sti ni gti mug skyed par brtag par bya'o/ /rnyed pa dang bkur sti ni bdag gi don sgrub pas khyim la ser sna byed pa dang /chags par byed par brtag par bya'o/ /rnyed pa dang bkur sti ni g.yo byed par brtag par bya'o/ /rnyed pa dang bkur sti ni 'phags pa'i rigs bzhi yongs su spongs bas / ngo tsha med pa dang khrel med pa skyed par brtag par bya'o/ /rnyed pa dang bkur sti ni sangs rgyas thams cad kyis ma gnang bar brtag par bya'o//rnyed pa dang bkur sti ni nga rgyal dang / rgyags pa dang / dregs pa skyed par brtag par bya'o/ /rnyed pa dang bkur sti ni bla ma rnams la khyad du gsod par brtag par bya'o/ /rnyed pa dang bkur sti ni bdud kyi phyogs su brtag par bya'o/ /rnyed pa dang bkur sti ni gcig tu bag med pa'i rtsa ba yin par brtag par bya'o//rnyed pa dang bkur sti ni dge ba'i rtsa ba 'phrog par brtag par bya'o/ /rnyed pa dang bkur sti ni glog dang 'khor lo dang lce 'bab pa lta bur brtag par bya'o/ /rnyed pa dang bkur sti ni sbags pa mang por sbags par brtag par bya'o/ /rnyed pa dang bkur sti ni mdza' bshes kyi khyim dang slong mo ster ba'i khyim la brtag par bya'o//rnyed pa dang bkur sti ni blo rnam par 'khrul pa byed par brtag par bya'o/ /rnyed pa dang bkur sti ni sdug pa'i dngos po 'gyur bar byed pa'i phyir mya ngan skyed par brtag par bya'o/ /rnyed pa dang bkur sti ni dran pa nye bar gzhag pa gzhi rjed par byed par brtag par bya'o//rnyed pa dang bkur sti ni dkar po'i chos nyam chung bar byed par brtag par bya'o/ /rnyed pa dang bkur sti yang dag par spong ba bzhi yongs su nyams par byed par brtag par bya'o/ /rnyed pa dang bkur sti ni pha rol gyi dad pa'i bar chad byed par brtag par bya'o//rnyed pa dang bkur sti ni rdzu 'phrul dang mngon par shes pa nyams par byed par brtag par bya'o/ /rnyed pa dang bkur sti ni sngar bkur sti byed la/ phyis bkur sti ni byed par brtag par bya'o/ /rnyed pa dang bkur sti ni mi mdza' ba dang gnas par byed par brtag par bya'o/ / rnyed pa dang bkur sti ni mdza' bo spong bar brtag par bya'o/ /rnyed pa dang bkur sti ni pha rol 'drid pa'i phyir smad 'tshong ma dang 'dra bar brtag par bya'o/ /rnyed pa dang bkur sti ni bsam gtan dang tshad med pa yongs su spong bar brtag par bya'o/ /rnyed pa dang bkur sti ni sems can dmyal ba dang / dud 'gro'i skye gnas dang gshin rje'i 'jig rten du lhung bar byed par brtag par bya'o/ /rnyed pa dang bkur sti ni lha sbyin dang lhag spyod kyi cho ga dang mthun par brtag par bya'o/ /byams pa byang chub sems dpas rnyed pa dang bkur sti la nyes dmigs gang dag brtag par bya ba ni 'di lta bu 'di dag go/ / brtags nas kyang 'dod pa chung bar bya'i yongs su gdung bar ni mi bya'o/ /de ci'i phyir zhe na/ byams pa byang chub sems dpa' 'dod pa chud pa la ni skyon 'di lta bu 'di dag med pa'i phyir te/ de'i sangs rgyas kyi chos rnams la bar chad med pa yin/ khyim pa dang rab tu byung ba dag yid 'byung bar mi 'gyur ba yin/lha dang mi rnams yongs su dag par bya ba'i phyir gnas pas rjes su bsrung bar 'os pa yin/ ngan 'gro log par lhung ba thams cad kyis skrag pa med pa yin/ sdig pa dang bral bas zil gyis mi non pa yin/ bdud kyi yul las yongs su grol bas mi 'phrogs pa yin/ sdug bsngal thams cad kyis mi tshugs pa yin/ lha dang mi rnams kyis mngon par 'dod par bya ba yin/ bsam gtan la goms par byed par gnas pas gsal ba yin/ g.yo dang sgyu spangs pa dang / 'dod pa'i yon tan lnga la skyon du lta bas bag yod pa yin/ 'phags pa'i rigs la gnas pas ji skad smras pa de bzhin byed pa yin/ mkhas pa rnams dang tshangs pa mtshungs par spyod pa rnams kyis 'dod pa yin te/ byams pa phan yon 'di lta bu 'di dag shes na/ byang chub sems dpa' sems dpa' chen po mkhas pa rnyed pa dang bkur sti yongs su spangs pas/rnyed pa dang bkur sti thams cad spang ba'i phyir/ lhag pa'i bsam pas 'dod pa chung ba la gnas par bya zhing / 'dod pa chung ba la kun du bsten par bya'o zhes gsungs so/ /yul 'khor skyong gi mdo las kyang / yang dag ma bsdams rgod cing khengs pa can/ /ma gus nga rgyal ldan zhing chags shas che//nyon mongs zil non tha ba nyon mongs can/ /de 'dra dag la byang chub mchog rab ring / /chags pas zil gyis non na le lo 'phel/ /le los zil gyis non na dad pa nyams/ /dad pa nyams na tshul khrims rab tu nyams/ /tshul khrims 'chal par gyur na bzang 'gro nyams//dbul por gyur pas rab tu byung gyur te/ /mchod pa rnyed nas dbul las grol bar 'gyur / /de dag gser gyi khur ni bor nas su/ /gso ma'i khur ni len par byed dang mtshungs/ /rnyed pa don du gnyer bas dgon par 'gro/ /der song nas ni gos dang nye du tshol/ /mngon shes rig dang spobs pa phun sum tshogs//bor nas de ni phyir yang nye du 'dzin/ /rmongs nas nga rgyal dbang gis ngan song sa/ /mi khom 'gro ba rnams dang dbul po dang / /dma' ba'i rigs su skye dang long ba dang / /mdog ngan pa dang mthu chung de dag 'dzin/ /de dag tshul dang spyod pa yongs nyams dngos//bag med rnyed nas dran pa rab tu nyams/ /g.yang sa chen po mi bzad ltung bar 'gyur/ /de nas bskal pa bye bar thar pa med/ /gal te 'dir ni 'thob par byang chub na/ /de'i phyir lha sbyin gyis kyang byang chub 'thob/ /rnam par 'thor rlung gis ni bya lhung ltar/ /chags pas kyang ni de ltar mi rigs so//bsod nams nyams shing gzhan gyi chung ma chags/ /tshul khrims ma dag dge ba rnams las nyams/ /byang chub sems kyi ye shes gang ma thob/ /de dag bstan la mi dgos dur shing bzhin/ /byang chub don gnyer sangs rgyas chos 'tshol ba/ /ji ltar thar pa de bzhin mi gnas so//de ni rnyong gis spre'u la dam byas ltar/ /nga rgyal zil non byang chub de 'dra'o/ /byang chub don du gnyer ba chos tshig phyir/ /nga yis rang gi srog ni phangs pa'ang btang / /chos de btang nas brtson dang mi ldan pa/ /don med gyur nas bstan las lhung bar 'gyur/ /nga ni sngon chad legs par bshad don phyir//g.yang sa chen po me lce 'bar bar mchongs / /de thos nas ni sdug dang mi sdug pa/ /thams cad rnam par spangs te nan tan gnas/ /bstan pa sna tshogs yon tan 'byor thos la/ /de dag nam yang 'dod pa mi skyo na/ /chos min 'dod la byang chub ga la yod/ / dper na long ba lam gsal med dang mtshungs/ /zhes gsungs so/ /chos thams cad mnyam pa nyid rnam par spros pa'i ting nge 'dzin gyi rgyal po las kyang / shes kyi khe yis bslus pa dag /nga yi bstan las shin tu 'khyams/ /'bras bur 'du shes gnas pa la/ /dge sbyong nor ni gsog tu gyur//brtson 'grus nyams pa'i le lo can/ /tshul khrims phung por mi gnas pa/ /kun nas langs pas smra ba ni/ /'di ni sangs rgyas bshad ma yin/ /la la dag ni 'di skad du/ /bdag cag byang chub zhugs zhes zer/ /ma dul zhing ni ma byang ba / /gcig la gcig ni ri mo byed//chos dag la yang mi gnas shing / /sgra 'dod pa ni 'byung bar 'gyur/ /de lta bur ni de mos te/ /shes kyi khe ni tshol ba'i phyir/ /'dus pa dag la sems byed cing / /rnyed pa 'dod pa 'byung bar 'gyur/ /rgyags dang bag med zil non pas/ /rnyed dang bkur sti don du gnyer/ / zhes gsungs pa dang / yang mdo de nyid las/ nga ni mya ngan 'das gyur phyi ma'i tshe/ /dam pa'i chos ni rnam par 'jig pa na/ /dge slong mu stegs blo la brtson pa dag /de dag nga yi zhi ba'i chos la spong / /khangs shing rgod la gtum zhing spyi brtol che/ /sdig pa'i grogs po zas la chags pa dag /chos gos lhung bzed dag la chags shing brkam/ /rnyed la gnas shing de dag chos la spong / /de dag yid gtum zhe sdang byas mi gzo/ /dma' ba'i rigs dang dbul ba'i rigs las ni/ /nga yi bstan pa 'di la rab byung nas/ /de dag zhi ba'i chos 'di spong bar byed//bdud kyi blo yis sems can mun pas gtibs/ /'dod chags dbang du song bas mngon par chags/ /gti mug dbang gis byis pa rmongs pas na/ /de dag stong pa zhi ba'i chos mi 'dod/ /dge slong dge slong ma dang khyim pa rnams/ /sdig pa'i blo yis 'dzin bcug rmongs byas te//de dag dbang du rtag par song gyur pas/ /phyi ma'i dus la byang chub spong bar byed/ /ces gsungs so/ /byams pa seng ge sgra'i mdo las kyang / byams pa byang chub sems dpa' chos bzhi po 'di dag las dpag tshad lnga brgyar 'byol bar bya ste/ bzhi gang zhe na/ rnyed pa dang / bkur sti dang / tshigs su bcad pa dang / sdig pa'i grogs po dang / 'du 'dzi'i gnas dang / gnas gang na gnas pa na byang chub sems dpa'i theg pa pa'i gang zag gzhan zhig kyang 'dug par gyur la/ gal te de dang lhan cig tu mgu ba dang / dga' ba dang mchog tu dga' ba skyes la/ 'thab pa med pa dang ldan pa dang / rtsod pa med pa dang ldan par gnas pa ni / des der gnas par bya'i/ gal te de de la tha na tha ba dang zhe sdang gi sems gcig tsam zhig skyed par byed na yang / des de nas dpag tshad lnga brgyar 'byol bar bya ste zhes gsungs so/ /bdud kyi 'gying bag gi mdo las kyang /'phags pa'i rigs chog shes shing rung ba dag la tshod shes pa ni legs pa'o/ /chog mi shes shing 'dod pa che ba ni mi legs pa'o/ /tshul khrims 'chal pa dang dad pas sbyin pa yongs su longs spyod pa ni mi legs so/ /tshul khrims dang ldan pa'i rnyed pa dang bkur sti dang tshigs su bcad pa thams cad ni legs pa'o//byang chub sems dpa' rnams kyi ngor bstod kyi tshig gi rnyed pas nye bar 'tsho ba nyid ni mi legs pa'o/ /yang dag pa la gnas pa'i chos dang ldan pa'i chos kyi rnyed pa ni legs pa'o zhes gsungs so/ /shA ri'i bu'i gzungs kyi mdo las kyang /rnyed la chags la dran med shes rab med/ /dad dang tshul khrims chos sems pa yang med/ /de ni byang chub las ring gnam sa bzhin/ /de phyir rnyed pa yongs su spang bar bya/ /zhes gsungs so/ /dkon mchog brtsegs pa'i mdo las kyang / 'od srungs 'di gnyis ni rab tu byung ba'i nam mkha' la yongs su chags pa ste/gnyis gang zhe na/ 'jig rten rgyang 'phen pa'i gsang tshig yongs su tshol ba dang / lhung bzed dang chos gos lhag par 'chang ba ste/ 'di gnyis so/ /de la 'di skad ces bya ste/ 'jig rten rgyang 'phen goms byed brtson pa dang / lhung bzed chos gos lhag par 'chang byed pa//'di gnyis nam mkha' la ni chags pa ste/ /de dag byang chub sems dpas spang bar bya/ /'od srungs 'di gnyis ni rab tu byung ba'i 'ching ba dam po ste/ gnyis gang zhe na/ lta bar 'gyur ba'i 'ching ba dang / rnyed pa dang / bkur sti dang / tshigs su bcad pa'i 'ching ba ste/'di gnyis gang zhe na/ /de la 'di skad ces bya ste/ lta gyur 'ching dang rnyed dang bkur sti dang / /grags pa'i 'ching ba rab tu byung ba'i tshe/ /'ching ba dam zhes 'phags pa rnams kyis gsungs/ /de dag rtag tu rab tu byung bas spang / /'od srungs 'di gnyis ni rab tu byung ba'i bar du gcod pa'i chos te/gnyis gang zhe na/ khyim pa'i phyogs la brten pa dang / /'phags pa'i phyogs la gnod par sems pa ste/ /'di gnyis so/ /de la 'di skad ces bya ste/ khyim pa'i phyogs la brten par byed pa dang / /'phags pa'i phyogs la rnam par smod byed pa/ /'di gnyis rab byung bar chad gegs byed yin//byang chub sems dpas de dag rnam par spang / /'od srungs 'di gnyis ni rab tu byung ba'i dri ma ste/ gnyis gang zhe na/ nyon mongs pa la mi mjed pa dang / mdza' bo'i khyim dang zas ster ba'i khyim yongs su 'dzin pa ste/ 'di gnyis so/ / de la 'di skad ces bya ste/ rab tu byung ba nyon mongs mi mjed dang / /mdza' bo'i khyim dang zas ster khyim brten pa/ /de gnyis dri mar rgyal ba'i dbang pos gsungs/ /byang chub sems dpas de dag rnam par spang / /zhes gsungs so/ /zla ba'i snying po'i mdo las kyang / ji ltar chu shing 'od ma dang //'dam bu 'bras bus 'joms byed cing / /dre'u mo mngal gyis 'joms pa ltar/ /rnyed dang bkur sti mi ngan 'joms/ /ji ltar ser ba bab pa yis/ /lo tog thams cad rnam 'joms pa/ /de ltar rnyed dang bkur sti yis/ /byang chub lam ni 'joms byed do//ji ltar me tog mes bsregs ltar/ /de bzhin rnyed dang bkur sti yis/ /byang chub lam dag 'joms byed do/ /dge slong gang gis rnyed pa dang / /bkur sti chen po rnyed 'gyur ba/ /bdud kyis nyams par shes bya ste/ /mkhas pas de nas 'gro bar bya/ / ji ltar rnyed dang bkur sti ni / /thob nas lam ni 'joms byed pa/ /thar pa'i lam 'joms byed pa yi / /sdig pa de 'dra yod ma yin/ /zhes gsungs so/ /byang chub sems dpa'i sde snod kyi mdo las kyang / shA ri'i bu gzhan yang rnam pa gzhan bcu yis/ byang chub sems dpa' tshul khrims yongs su dag par rig par bya'o//bcu po gang dag yin zhe na/ rung ba dag la tshod shes pa nyid kyis 'dod pa chung ba'i tshul khrims yin/ 'dod pa rab tu spangs pa nyid kyis yang dag par rab tu dga' ba'i tshul khrims yin/ lus dang sems rnam par dben pa nyid kyis sgrub pa'i tshul khrims yin/'du 'dzi la smod pa nyid kyis dgon par gnas pa'i tshul khrims yin/ dge ba'i rtsa ba rang dbang du sgrub pa nyid kyis sbyangs pa'i yon tan gyi yo byad bsnyungs pa'i tshul khrims yin/ gzhan gyi ngor lta ba nyid kyis 'phags pa'i rigs la dga' ba'i tshul khrims yin/lha dang mi rnams mi slu ba nyid kyis ji skad smras pa de bzhin byed pa'i tshul khrims yin/ rang gi sems la nges par dpyad pa nyid kyis bdag nyid kyi skyon la so sor rtog pa'i tshul khrims yin/ gzhan gyi sems rjes su srung ba nyid kyis gzhan gyi nyes pa la skyon mi 'dogs pa'i tshul khrims yin/bsdu ba'i dngos po mi 'dor ba nyid kyis sems can yongs su smin pa'i tshul khrims yin te/ shA ri'i bu rnam pa bcu po 'di dag gis byang chub sems dpa'i tshul khrims yongs su dag par rig par bya'o zhes gsungs so/ /chos smra ba po'i le'u'i mdo las kyang / shA ri'i bu gzhan yang /nyan thos dang rang sangs rgyas yid la byed pa dang bral ba/ thams cad mkhyen pa nyid dang yang dag par ldan pa'i chos ston par byed pa rnams kyi sgo nas/ byang chub sems dpa' rnams la tshar bcad de ngas smra bar mi nus te/ theg pa la gsar du zhugs pa'i byang chub sems dpa' rnyed pa dang bkur sti la chags shing /rnyed pa dang bkur sti la brten pa rnams/ 'di skad du bdag cag la de bzhin gshegs pas dgag pa mdzad do zhes smra bar ma gyur cig snyam pas so/ /de rnams thams cad mkhyen pa nyid kyi smon lam las ldog par 'gyur te/ de ltar na rigs kyi bu'am/ rigs kyi bu mo de dag ngas bsrung bar bya/ji ltar myur du bla na med pa yang dag par rdzogs pa'i byang chub tu mngon par 'tshang rgya bar 'gyur snyam pas/ gdon mi za bar de dag la tshar bcad nas chos ston par bya dgos na/ shA ri'i bu bar 'dir de bzhin gshegs pa rnams nges par bzhugs par gzigs shing /ngas ji ltar bya snyam du dbugs ring du nang du rngub cing brngub par bya'o zhes gsungs so/ /dkon mchog za ma tog gi mdo las kyang / kun dga' bo bdud kyi sprul pa'i dge slong 'di dag khyod kyis mthong ngam/ bcom ldan 'das la kun dga' bos 'di skad ces gsol to/ /bcom ldan 'das mthong ngo //bde bar gshegs pa mthong ngo / /bcom ldan 'das kyis kun dga' bo la 'di skad ces bka' stsal to/ /kun dga' bo phyi ma'i dus phyi ma'i tshe lnga brgya pa tha ma la dam pa'i chos 'jig pa'i tshe/ nga'i bstan pa la dge slong dag phal cher 'di bzhin du sham thabs legs par ma gyon pa/ bla gos legs par ma bgos pa/ gos hrul po gyon pa/ lhung bzed chag pa/ shes bzhin med pa/ spyod lam mi sdug pa/ lag na 'khar ba thogs pa/ sna leb leb po dang / zhar ba dang / 'theng po dang / zha bo dang / lus kyi sha tshugs ma legs pa dang / nad sna tshogs kyis btab pa dag 'byung bar 'gyur ro//de ci'i phyir zhe na/ kun dga' bo 'di ltar de'i tshe dge slong dag phal cher bsnyen bkur la ched che bar byed pa dang / rnyed pa dang bkur sti la brten pa dang / bya ba sna tshogs kyi mi khom pas brel ba dang / 'dul ba bor ba dang / so sor thar pa 'dral ba dang / mtshams las 'da' ba dang /tshe 'di ched che bar byed pa dang / tshe rabs gzhan ched mi che bar byed par 'gyur te/ de dag 'di lta ste chos kyi phyir ma yin gyi/ bsnyen bkur gyi phyir/ zhar ba dang / 'theng bo dang / zha bo dang / lus kyi sha tshugs ma legs pa dang / nad sna tshogs kyis btab pa 'ongs shing lhags pa rnams rab tu 'byin par byed de/bsnyen par rdzogs par byed do/ /kun dga' bo de ltar de'i tshe nga'i bstan pa 'di ba ltar mi rung ba dang / mnyan du mi rung bar 'gyur ro/ /lha rnams kyang yid mi dga' bar 'gyur ro/ /bdud rnams ni yi rang zhing dga' ba dang btang snyoms su 'gyur ro zhes gsungs so// // bdud kyis smras pa la dgongs pa bstan pa/ gzi brjid can gyi mdo las kyang / de nas bdud sdig can bcom ldan 'das ga la ba der dong ngo / /dong nas kyang bcom ldan 'das kyi zhabs la mgo bos phyag 'tshal nas phyogs gcig tu 'khod do//bdud sdig can gyis bcom ldan 'das la 'di skad ces gsol to/ /de bzhin gshegs pa ni bzhad gad du 'os par 'dod par bdag la gnong ngo / /de ci'i phyir zhe na/ bcom ldan 'das de bzhin gshegs pa yongs su mya ngan las 'das pa na/ bdag cag gis de lta bu'i ngo bo'i mdo sde/'di dag skye bo mang pos spong bar 'gyur bar bya'o/ /skye bo mang pos yongs su 'dor bar 'gyur bar bya'o/ /gang dag de bzhin gshegs pa'i bstan pa la nye bar sgrub pa de dag /bdag cag gis ji ltar de lta bu'i mdo sde smod par 'gyur ba dang / rab tu spong bar 'gyur ba dang /mi 'dzin par 'gyur ba de ltar rab tu sbyar bar bya'o/ /de ltar de bzhin gshegs pa ri rab lta bus/ bdag cag yungs 'bru lta bu shin tu tshar bcad de gnas mod kyi/ de bzhin gshegs pa yongs su mya ngan las 'das pa'i tshe/ bdag cag gso sbyong gi las la 'jug pa na/ dge 'dun gyi nang du dge sbyong gi gzugs kyis 'dug ste/'dzin du 'jug par bya'o/ /de ci'i phyir zhe na/ bcom ldan 'das bdag cag ni de dag dang lhan cig mnyam la/ de rnams kyang bdag cag dang lhan cig mnyam mo/ /bcom ldan 'das dus der bdag dge sbyong gi gzugs su sprul nas/'khor dbye bar bya'o snyam mo/ /de nas de lta bu'i mdo sde dri mas ma gos pa 'di dag mi len par 'gyur ro/ /de skad ces smras pa dang / bcom ldan 'das kyis bdud sdig can la 'di skad ces bka' stsal to/ /gang gi phyir khyod sangs rgyas kyi byang chub nub par bya ba'i phyir brtson par 'gyur ba/sdig pa can khyod kyis bsod nams ma yin pa'i phung po mang du thob par 'gyur ro/ /smras pa de dag gi 'gro ba gang yin pa de nyid bdag gi 'gro ba yang yin par 'gyur ro/ /bka' stsal pa/ sdig can khyod gnas de la brtson par ma byed cig/ /sdig can gang khyod 'dzin par 'gyur ba'i lam 'di ni ngan song gi lam mo//smras pa/ bcom ldan 'das bdag ngan song nyid du 'gyur mod/ bdag cag gi lus ngan song dang ldan par 'gyur mod/ de nas bcom ldan 'das kyi gdan yang dag par g.yos par gyur to / /de nas bdud sdig can 'di snyam du/ dge sbyong gau ta ma nga la 'khrugs so//dge sbyong gau ta ma nga la khros so zhes sems te/ 'jigs pa dang skrag pa dang bcas shing mi bgyi'o mi bgyi'o zhes zer nas/ de nyid du mi snang bar gyur to/ /de nas bcom ldan 'das kyis tshe dang ldan pa kun dga' bo la 'di skad ces bka' stsal to/ /kun dga' bo bdud kyi las 'di dag 'khor bzhi po rnams la yang dang yang du shod cig /de ci'i phyir zhe na/ 'di de ltar sems can mang po'i don 'dren par 'gyur ro/ /gang dag bdud kyi las rnams yang dag pa ji lta bu bzhin du shes pa de dag /de lta bu'i ngo bo'i sangs rgyas kyi chos rnams dang / de lta bu'i ngo bo'i sangs rgyas kyi byang chub la yongs su slu bar mi 'gyur ro//kun dga' bo dge slong gang dag mdo'i tshig 'di la mngon par brtson pa de la/ bdud sdig can gsum gyis bar chad byed do/ /gsum gang zhe na/ lugs gzhan mang po nyid kyis the tshom skye ba nyid dang / bdud kyi las kyis kun nas dkris pas tshig rtsub mor 'gyur ba'am/slob dpon smod par 'gyur ba ste/ gnas gsum po 'di dag gis/ bdud sdig can bar chad byed par 'gyur ro/ /gang dag sngon gyi rgyal ba la bya ba byas pa/ dge ba'i rtsa ba bskrun pa'i sems can de dag ni/ de lta bu'i ngo bo'i mdo sde 'di dag ston par 'gyur/gzhan yang dngos pos phongs pa yongs su rtog par yang 'gyur ro/ /de lta na yang 'di la mthar thug par 'gyur ba de dag ni/ shes rab 'phel ba rjes su 'thob par 'gyur/ dran pa 'phel ba rjes su 'thob par 'gyur/ mi 'jigs pa 'phel ba rjes su 'thob par 'gyur/lus kyi nges par 'byung ba 'phel ba rjes su 'thob par 'gyur/ gtam 'dzin pa 'phel ba rjes su 'thob par 'gyur/ lung bstan pa 'phel ba rjes su 'thob par 'gyur/ thos pa'i mthu rjes su 'thob par 'gyur ro zhes gsungs so/ /mya ngan las 'das pa chen po'i mdo las kyang /bcom ldan 'das kyis bka' stsal pa/ rigs kyi bu bdud sdig can gyis ni/ nga 'das pa'i 'og lo bdun brgya lon pa na/ nga'i bstan pa phye zhing phye zhing 'jig par 'gyur te/ dam pa'i chos nub pa'i tshe/ bdud sdig can zag pa can gyis zag pa med pa lta bur bsgyur te/bya ba'i rtags kyi tshul sbed pa bzhin du/ dge slong gi gzugs dang / dge slong ma'i gzugs dang / dge bsnyen gyi gzugs dang / dge bsnyen ma'i gzugs dang / rgyun du zhugs pa dang / lan cig phyir 'ong ba dang / phyir mi 'ong ba dang / dgra bcom pa dang / rang sangs rgyas kyi gzugs dang /sangs rgyas kyi gzugs kyis 'jig par 'gyur te/ 'di skad ces zer zhing sangs rgyas ni dga' ldan gyi gnas nas shi 'phos te/ rgyal po zas gtsang ma dang / btsun mo sgyu 'phrul phrad na/ zla mtshan gyi bye brag gis 'khrig pa'i chos las skyes so zhes zer ba/ de bzhin gshegs pa ni 'khrig pa las skye mi srid do//de la ming tsam du skyes pa las/ sngon dka' thub spyad pa'i yon tan gyis lha dang / mi dang / lha ma yin dang bcas pa'i 'jig rten gyis mchod cing rjed par 'gyur te/ bdag gi chung ma dang 'dod pa rnam pa sna tshogs kyi sbyin pa byin pas ni / sangs rgyas su 'gyur ro zhes zer ba de lta bu ni/bdud kyis smras pa'i mdo sde dang / 'dul ba yin par rig par bya'o/ /de bzhin gshegs pa dgra bcom pa yang dag par rdzogs pa'i sangs rgyas kyis ni gdul bar bya ba'i dbang gis skyes pa lta bur bdag nyid kyis ston mod kyi/ 'khrig pa las skyes pa ma yin no//de bzhin gshegs pas yab yum gnyis yod pa lta bur bstan pa 'di ni/ 'jig rten dang mthun par mdzad pa yin no zhes zer ba de lta bu ni/ de bzhin gshegs pas gsungs pa'i mdo sde dang / 'dul ba yin par rig par bya'o/ /bdud kyis smras pa'i mdo sde dang / 'dul ba tshad mar byed pa'i sems can gang yin pa de dag ni/ bdud dang mthun par byed pa yin par rig par bya'o/ /sangs rgyas kyis gsungs pa'i mdo sde dang / 'dul ba tshad mar byed pa gang yin pa de dag ni/ byang chub sems dpa' yin par rig par bya'o/ /de bzhin gshegs pa 'jig rten du byung nas/phyogs dang phyogs mtshams rnams su gom pa bdun bdun gshegs par bstan to zhes bya ba 'di ni yid ches par byar mi rung ste/ de lta bu'i mdo sde dang / 'dul ba ni bdud kyis smras pa yin par rig par bya'o/ /de bzhin gshegs pa byung nas/ phyogs dang phyogs mtshams rnams su gom pa bdun bdun gshegs par bstan pa ni/de bzhin gshegs pa'i thabs kyi sku 'dzin pa yin no zhes zer ba lta bu ni/ sangs rgyas kyis gsungs pa'i mdo sde dang 'dul ba yin par rig par bya'o/ /bdud kyis smras pa'i mdo sde dang 'dul ba tshad mar byed pa'i sems can gang yin pa de dag ni/bdud dang mthun par byed pa yin par rig par bya'o/ /sangs rgyas kyis gsungs pa'i mdo sde dang 'dul ba tshad mar byed pa gang yin pa de dag ni/ byang chub sems dpa' yin par rig par bya'o/ /de bzhin gshegs pa lha khang du gshegs te byon nas/lha rnams kyi zhabs la phyag bzhes te/ lha rnams ni de bzhin gshegs pa'i zhabs la mgo bos phyag mi 'tshal lo/ /lha rnams la mchod pa mdzad pa'i 'og tu de bzhin gshegs par gyur nas mngon par sangs rgyas te/ lha rnams ni snga/ 'di ni 'phyi bas na/ de'i phyir mngon par rdzogs par sangs rgyas pa zhes bya'o zhes bya ba la sogs pa ni bdud kyis smras pa yin par rig par bya'o//de bzhin gshegs pa lha gang du gshegs te byon nas dbang phyug dang / dbang phyug chen po dang / tshangs pa dang / brgya byin la sogs pa lha thams cad kyis thal mo legs par sbyar te/zhabs la spyi bos gtugs so zhes zer ba de lta bu ni/ de bzhin gshegs pas gsungs pa'i mdo sde dang 'dul ba yin par rig par bya'o/ /bdud kyis smras pa'i mdo sde dang 'dul ba tshad mar byed pa'i sems can gang yin pa de dag ni/ bdud dang mthun par byed pa yin par rig par bya'o/ /sangs rgyas kyis gsungs pa'i mdo sde dang 'dul ba tshad mar byed pa gang yin pa de dag ni/ byang chub sems dpa' yin par rig par bya'o/ /de bzhin gshegs pa rgyal tshab tu gyur te/ nye 'dab kyi rgyal po'i bu mo dag dang lhan cig tu 'dod pa shin tu bsten no zhes zer ba la sogs pa ni/bdud kyis smras pa'i mdo sde dang 'dul ba yin par rig par bya'o/ /de bzhin gshegs pa ni lha'i bu mo dam pa lta bu'i bud med dag kyang mchil ma bzhin du bor nas/ khyim nas khyim med par rab tu byung ngo zhes zer ba de lta bu'i mdo sde dang 'dul ba ni sangs rgyas kyis gsungs pa yin par blta bar bya'o//bdud kyis smras pa'i mdo sde dang 'dul ba tshad mar byed pa'i sems can gang yin pa de dag ni bdud dang mthun par byed pa yin par rig par bya'o/ /sangs rgyas kyis gsungs pa'i mdo sde dang 'dul ba tshad mar byed pa gang yin pa de dag ni/ byang chub sems dpa' yin par rig par bya'o//de bzhin gshegs pa dgra bcom pa yang dag par rdzogs pa'i sangs rgyas kyis 'jig rten thams cad la thugs brtse ba'i phyir/ rgyal bu rgyal byed kyi tshal mgon med zas sbyin gyi kun dga' bar/ dbyig dang / gser dang / bran dang / bran mo dang / ba lang dang /ma he dang / ra dang / lug dang / bya gag dang / phag dang / khyi dang / byi la dang / zangs dang / lcags zangs dang / nor bu dang / mu tig dang / dung dang / man shel dang / byi ru dang / sa le sbram dang / dngul dang / 'tshog chas rnam pa sna tshogs dang / zhing sa dang / tshong dus dang / srang dang nyo tshong byed pa dang / khye'u dang / bu mo dang / mdzod dang / bang ba rnams bzhes so zhes zer ba de lta bu ni/ bdud kyis smras pa'i mdo sde dang 'dul ba yin par rig par bya'o/ /rgyal bu rgyal byed kyi tshal na 'dam bu dang / e raN+Da'i tshal dang / shing pi tshu marda'i drung na bzhugs pa'i tshe/ bram ze lug dpal dang ko sa la'i rgyal po gsal rgyal las brtsams te/ bka' stsal pa/ dbyig dang / gser dang / bran dang / bran mo dang / ba lang dang / ma he dang / ra dang / lug dang / bya gag dang / phag dang / khyi dang / byi la dang / sbrul dang / ne'u le dang / zangs dang / lcags zangs dang /nor bu dang / mu tig dang / dung dang / man shel dang / byi ru dang / sa le sbram dang / dngul dang / nor dang / 'tshog chas rnam pa sna tshogs 'chang ba dang / zhing sa dang / tshong dus dang / srang dang nyo tshong byed pa dang / khye'u dang / bu mo dang / mdzod dang / bang ba 'chang ba dang / rang lag dar te g.yos byed pa dang / 'tshed pa dang / 'tshed du 'jug pa dang / ltas dang / yan lag gi rig pa dang / mo yig dang kha ton 'don pa dang / bya ltas shes pa dang / sgra gcan dang / nyi ma dang / zla ba dang / pa ba sangs dang / gza' lhag rgyu ba dang / me tog gi shing rta dang / lag srubs lta ba dang / rmi ltas dang / skyes pa dang / bud med dang / ma ning gi mtshan lta ba dang / sgyu rtsal drug cu rtsa bzhi dang / rig pa'i gnas bco brgyad dang / mkhan bzo ba dang / bzo'i las thams cad ston pa dang / srung gtam byed pa dang / spos kyi phye ma 'debs pa dang / me tog dang /bdug pa dang / spos dang / me tog dang / phreng ba dang / byug pa 'chang ba dang mgo la 'o byed pa dang / tshul 'chos pa dang / kha gsag byed pa dang / chog mi shes pa dang / 'dod chen can dang / 'du 'dzi la dga' ba dang / smra 'dod pa dang / nor dang 'bru dang / sha dang nya sha dang / dug sbyar ba dang /spos kyi til mar dang / sman gyi sbu gu dang / gdugs dang / lham dang / ta la'i lo ma'i bsil yab dang / chu snod dang / bu don dang / beng bung bya/ beng bud 'chang ba dang / shing thog sdud pa dang / so rtsi dang / sman mar dang / btso ba'i phye ma bzang po dang / ka ko la dang / 'bras bu tsha ba bsten pa dang /rgyal po la brtan pa dang / gzhan la brten pa dang / drod mi thub pa dang / mi smra ba dang / bud med lhar rtog pa shas che ba dang / mang du smra ba dang / ngu ba dang / bzang ngan spyod pa dang / sun 'byin pa dang / 'gros 'chos pa dang / gos dkar po dang / ar mo ni ga dang / khang bzangs dang / gtsang khang phyur bu'i las la sogs pa byed pa dang / rung ba ma yin pa dang / rdzas ngan pa yongs su 'dzin pa dang / sbyin pa po'i bsngags pa brjod pa dang / chang bsten pa dang / smad 'tshong ma'i khyim du 'gro ba rnams dang / de lta bu byed pa dam pa ma yin pa/ tshul ngan pa dang ldan pa de dag la ni gos dkar po dag sbyin la/'jig rten pa'i las rnams byed du 'jug par ngas gnang ngo / /yang na 'bras sA lu'i zhing gi ngo bsal ba bzhin du/ yul phyogs nas bskrad par ngas gnang ngo zhes zer ba de lta bu'i mdo sde dang 'dul ba ni/ sangs rgyas kyis gsungs pa yin par rig par bya'o//bdud kyis smras pa'i mdo sde dang 'dul ba tshad mar byed pa'i sems can gang yin pa de dag ni/ bdud dang mthun par byed pa yin par rig par bya'o/ /sangs rgyas kyis gsungs pa'i mdo sde dang 'dul ba tshad mar byed pa gang yin pa de dag ni/ byang chub sems dpa' yin par rig par bya'o zhes gsungs so//dam pa'i chos dran pa nye bar gzhag pa'i mdo las kyang / 'di lta ste/ rtsod byed ces bya ba'i bdud dang / gnyis pa g.yeng byed ces bya ba'i bdud kyi ris ni/ gang sems can chos la spyod pa rnams sems rnam par g.yeng bar byed/ dam pa'i chos nyan pa na gnyid bro bar byed do//'dod pa lhag par rmongs byed ces bya ba ni gsum pa ste/ gang sbyin pa dag gtong ba ni sbyin pa po'i sbyin bdag rnams kyi sems la/ gal te bdag gis dge sbyong dang / bram ze dang / rje'u rigs su gyur pa rnams la byin pa na/ nga'i bu dang bu mo ci zhig za ci zhig gyon snyam du chags pa skyed par byed do //'jig rten skyong ba bdud kyi rigs gsum po de ni/ sems can rnams rmongs par byed cing 'jig rten du rgyu'o / /bzhi pa rnam pa sna tshogs 'du shes zhes bya ba bdud kyi rigs 'jig rten skyong ba 'jig rten na spyod de/ de rab tu byung ba rnams kyi rab tu byung ba'i sems gzhan du byed de/thog mar chags pa dang sbyor ba dang grong du 'jug pa dang / zong gi nyo tshong dang bud med la blta ba dang chang 'tshong ma'i khyim du 'jug pa dang / 'thab mo dang / slu ba dang / dge 'dun 'byed pa dang sems la gnod pa'i rmi lam skyed par byed do/ /bdud kyi ris 'jig rten skyong ba bzhi po de dag ni/gang gi tshe 'dzam bu'i gling na chos ma yin pa smra ba'i skye bo yod pa'i tshe nus par 'gyur ro zhes gsungs so/ /bdud kyi 'gying bag gi mdo las kyang / nyi shu po 'di dag ni byang chub sems dpa' rnams kyi bdud kyi las lhag par gyur pa yin te/ nyi shu dag gang zhe na/'di lta ste/ rnam par grol ba 'dod pa nyid kyis 'khor bas skrag pa rnal 'byor spyod pa rnams la bsnyen pa dang / bsten pa dang bsnyen bkur byed pa ni bdud kyi las so/ /stong pa nyid la so sor rtog cing sems can rnams yal bar 'dor ba ni bdud kyi las so/ /'dus ma byas la so sor rtog cing /'dus byas kyi dge ba'i rtsa ba la skyo ba ni bdud kyi las so/ /bsam gtan skyed par byed cing bsam gtan gyis 'tsho ba yongs su tshol ba ni bdud kyi las so/ /chos ston par byed cing chos nyan pa rnams la snying rje mi 'jug pa ni bdud kyi las so/ /tshul khrims dang yon tan tshol bar byed cing tshul khrims 'chal pa rnams la khro ba ni bdud kyi las so//nyan thos dang rang sangs rgyas kyi gtam rjod par byed cing / theg pa chen po'i gtam 'chab par byed pa ni bdud kyi las so/ /zab mo'i gtam 'chab par byed cing / sna tshogs pa'i gtam rjod par byed pa ni bdud kyi las so/ / byang chub sems dpa'i lam la dam 'cha' zhing / pha rol tu phyin pa'i lam mi tshol ba ni bdud kyi las so/ /mngon par brtson pa'i bsngags pa smra bar 'gyur zhing / mngon par mi brtson pa'i sems can rnams mngon par sbyor bar mi byed pa ni bdud kyi las so/ /dge ba'i rtsa ba nye bar gsog cing /byang chub sems dpa' la rgyab kyis phyogs pa ni bdud kyi las so/ /lhag mthong gi rnal 'byor la rjes su brtson par gnas shing / sems can la lhag mthong yang dag par 'dzin du mi 'jug pa ni bdud kyi las so/ /ma lus par zad par mi tshol zhing / 'khor ba'i nyon mongs pa'i rgyun dag la mi spyod pa ni bdud kyi las so//shes rab la rnam par spyod cing / snying rje chen po'i dmigs pa mi 'dzin pa ni bdud kyi las so/ /mkhan po dang mi ldan pa'i dge ba'i spyod pa thams cad ni bdud kyi las so/ /byang chub sems dpa'i sde snod don du mi gnyer zhing /rgyang 'phen pa'i gsang tshig 'dzin pa ni bdud kyi las so/ /mang du thos pa'i chos kyi dpe mkhyud gzhan gyis shes pa re snyam pa ni bdud kyi las so/ /'jig rten pa'i bya bas g.yengs shing / mang du thos pa don du mi gnyer ba ni bdud kyi las so/ /byang chub sems dpa' chos smra ba po theg pa chen po la yang dag par gnas pa mi bsten mi bsnyen mi bkur cing /nyan thos dang rang sangs rgyas kyi theg pa la yang dag par gnas pa skal pa mi mnyam pa rnams dang lhan cig dga' ba ni bdud kyi las so/ /gang gi tshe brgya byin nam/ tshangs pa'am/ 'jig rten skyong ba'am/ rgyal po'am/ tshong dpon nam/ khyim bdag gi longs spyod dam/ nor dang rin po che dang / dbang phyug gis che ba nyid du gyur pa/ de'i tshe chos kyis che ba nyid dang ldan pa rnams la mi bsten / mi bsnyen bsnyen bkur mi byed pa ste/ lha'i bu nyi shu po 'di dag ni/ byang chub sems dpa' rnams kyi bdud kyi las lhag pa yin no zhes gsungs so// // nyo tshong la dgongs pa bstan pa/ dgag dbye'i mdo las kyang / tshong pa'i sbyor ba la dga' ba la dgag dbye yod pa ma yin no zhes gsungs so/ /yul 'khor skyong gi mdo las kyang / /'phags pa bla ma rnams dang pha ma la//de dag rtag tu gus pa med par 'gyur/ /de dag byas pa mi gzo g.yo can te/ /rtag tu kun du ma bsdams spyod cing rmongs/ /rnyed la rtag tu chags shing zhen pa ste/ /de dag tshul 'chos pa dang g.yo sbyor dga'/ /kha cig tshul khrims brtul zhugs ci ltas kyang //'di na bdag dang mtshungs pa med ces smra/ /de dag phan tshun sdang bar sems pa ste/ /glags tshol bya la rtag tu brtson pa yin/ /de dag zhing gi las dang tshong la dga'/ /de dag dge sbyong dga' bstan shin tu ring / /phyi ma'i dus na 'di ltar ma bsdams pa'i/ /dge slong tshul khrims yon tan rab ring ba//de dag mtshang 'dru ba dang 'thab pa dang / /phrag dog dbang gis da'i chos nub par byed/ /byang chub lam las rtag par shin tu ring / /'phags pa'i nor bu dag las shin tu ring / /'phags lam gya nom rnam par spangs nas na/ /de dag 'gro ba ldar ni 'khyam par 'gyur//zhes gsungs so/ /snying rje chen po la 'jug pa'i mdo las kyang / rnal 'byor mi brtson mtshan nyid 'di yin te/ /gzhan gyi bud med rnams la rtag tu chags/ /gzugs kyis rgyags shing bcings pa med par 'gyur/ /grong dang grong rdal yul 'khor dag tu 'khyam / / de dag bza' dang btung la rtag tu brtson/ /gar dang glu dang de bzhin rol mo dang / /nyo dang tshong la rtag tu spro bar 'gyur/ /btung ba la yang chags shing ngo tsha nyams/ /tshul khrims de bzhin spyod lam dor nas ni/ /rnal 'byor mi brtson phrin yig 'khyer bar byed/ /khyim pa dang ni lhan cig lugs bcom nas//tshul nyams de dag yang dag min la gnas/ /las gang rtag tu sangs rgyas kyis smad pa/ /srang dang 'jal ba'i zol la rtag tu brtson/ /nyon mongs sdig pa'i las de dag byas nas/ /las nyams nas ni ngan song 'gro bar 'gyur/ /zhes gsungs so/ /spyod yul yongs su dag pa'i mdo las kyang /'jig rten pa'i gtam la mi blta bar bya/ nyo tshong gi tha snyad las ldog par bya/ sman dpyad dang snyan dngags dang gtam rgyud la mngon par dga' ba dang / rgyal po la mngon par dga' ba dang / khyim gyi las kyi mtha' la yang dag par brtson par mi bya/'dug pa dang ldang pa dang / 'chag pa dang nyal ba la mkhas par bya'o zhes gsungs so/ /tshul khrims 'chal pa'i mtshan ma la dgongs pa bstan pa/ dkon mchog brtsegs pa'i mdo las kyang / 'od srungs bzhi po 'di dag ni dge sbyong ste/ bzhi gang zhe na/ 'di lta ste/kha dog dang rtags dang dbyibs kyi dge sbyong dang / cho ga srung zhing tshul 'chos pa'i dge sbyong dang / brjod pa'i sgra tshigs su bcad pa'i dge sbyong dang / yang dag par sgrub pa'i dge sbyong ngo / /'od srungs de la kha dog dang rtags dang dbyibs kyi dge sbyong gang zhe na/ 'od srungs 'di la dge sbyong kha cig kha dog dang /rtags dang dbyibs dang ldan par gyur te/ chos gos snam sbyar gyon cing / mgo bregs te lhung bzed thogs mod kyi/ de lus kyi las yongs su ma dag par spyod/ ngag gi las yongs su ma dag par spyod/ yid kyi las yongs su ma dag par spyod cing / ma dul ba ma zhi ba/ ma bsrungs pa ma byung ba/ 'tsho ba yongs su ma dag par brkam pa/ le lo can tshul khrims 'chal ba/ sdig pa'i chos can yin te/ 'od srungs de ni kha dog dang / rtags dang dbyibs kyi dge sbyor zhes bya'o/ /'od srungs 'di la cho ga srung zhing tshul 'chos pa'i dge sbyong gang zhe na/'od srungs 'di la dge sbyong kha cig cho ga dang / spyod yul dang / spyod pa phun sum tshogs shing / spyod lam bzhir shes bzhin du spyod la zas dang skom ngan pa za zhing 'thung / 'phags pa'i rigs bzhi po dag gis chog par 'dzin pa bas mtha'i gnas mal la mngon par dga' zhing /khyim pa dang rab tu byung ba rnams dang mi 'dre la/ tshig nyung zhing smra ba nyung mod kyi/ de'i spyod lam de dag kyang tshul 'chos pa dang / kha gsag gis yongs su brtag pa yin te/ sems yongs su dag par bya ba'i phyir ma yin/ dul bar bya ba'i phyir ma yin/ nye bar zhi bar bya ba'i tshul ma yin gyi dmigs par lta ba yin te/ngar 'dzin pa dang / nga yir 'dzin pa la gnas shing / stong pa nyid kyis mi dmigs pa'i chos rnams la g.yang sar yang 'du shes pa yin/ stong pa nyid smra ba'i dge slong rnams la yang dgrar 'du shes pa yin te/ 'od srungs de ni cho ga srung zhing tshul 'chos pa'i dge sbyong zhes bya'o//'od srungs de la brjod pa'i sgra tshigs su bcad pa'i dge sbyong gang zhe na/ 'od srungs 'di la dge sbyong kha cig ji ltar bdag tshul khrims dang ldan par gzhan gyis shes par 'gyur snyam du so sor brtags nas tshul khrims srung / ji ltar mang du thos par gzhan gyis shes par 'gyur snyam du so sor brtags nas thos pa 'dzin/ji ltar bdag dgon pa par gzhan gyis shes par 'gyur snyam du so sor brtags nas 'dod pa nyung la chog shes pa dang / rab tu dben par 'gyur te/ 'di ltar gzhan la bstan pa'i phyir yin gyi/ skyo bar bya ba'i phyir ma yin/ 'dod chags dang bral ba'i phyir ma yin/'gog par bya ba'i phyir ma yin/ nye bar zhi bar bya ba'i phyir ma yin/ rdzogs par byang chub par bya ba'i phyir ma yin/ dge sbyong gi phyir ma yin/ tshangs pa'i phyir ma yin/ mya ngan las 'das pa'i phyir ma yin/ 'od srungs de ni brjod pa'i sgra tshigs su bcad pa'i dge sbyong zhes bya'o//'od srungs de la yang dag par sgrub pa'i dge sbyong gang zhe na/ 'od srungs gang lus dang srog la yang mi lta ba yin na / rnyed pa dang bkur sti dang / tshigs su bcad pa la lta ci smos/ stong pa nyid dang / mtshan ma med pa dang / smon pa med pa'i chos rnams thos nas/ dga' zhing de bzhin du zhugs pa yin/mya ngan las 'das pa la yang 'dod pa med par spyad pa spyod na/ khams gsum la mngon par dga' ba lta ci smos/ stong pa nyid du lta ba yang mi 'dod pa yin na/ bdag dang sems can dang / srog dang skye ba po dang / gso ba dang skyes bu dang / gang zag tu lta ba lta ci smos/don la rton gyi tshig 'bru la rton pa ma yin/ nyon mongs pa rnams las rnam par thar pa nang du tshol gyi/ phyi rol du rgyug pa ma yin/ chos thams cad shin tu yongs su dag cing / rang bzhin gyis kun nas nyon mongs pa med par mthong bas bdag nyid skyabs yin te/ gzhan skyabs ma yin/de de bzhin gshegs pa la chos nyid du yang mi lta na/ gzugs kyi skur lta ci smos/ chos la 'dod chags dang bral bar yang mi lta na/ smra ba'i tshig gi lam nas brjod par lta ci smos/ 'phags pa 'dus ma byas pa'i dge 'dun la yang rnam par mi rtog na/ mang po 'dus par lta ci smos/chos gang spang bar bya ba'i phyir brtson pa ma yin/ bsgom par bya ba'i phyir ma yin/ mngon sum du bya ba'i phyir ma yin/ 'khor bar yang mi skye/ mya ngan las 'das par yang mngon par dga' ba ma yin/ thar pa yang mi dmigs/ bcings pa la yang ma yin la/ chos thams cad rang bzhin gyis yongs su mya ngan las 'das par rig nas/kun du mi 'khor/ yongs su mya ngan las mi 'da' ba yin te/ 'od srungs de ni yang dag par sgrub pa'i dge sbyong zhes bya'o/ /'od srungs yang dag par sgrub pa'i dge sbyong du 'gyur bar brtson par bya'i/ ming gis gnod par mi bya ste/ 'od srungs dge sbyong ni bzhi po 'di dag go zhes gsungs so//tshul khrims 'chal pa tshar bcad pa'i mdo las kyang / shA ri'i bu tshul khrims kyi spyod pa 'chal bas/ tshul khrims 'chal ba rnams zhes bya ste/ ngan pa'i tshig spyod pa dang / mkhas pa ma yin pa'i tshig spyod pa dang / kun nas nyon mongs pa'i tshig spyod pa dang /mi mthun par spyod pa dang / chags par spyod pa dang / kun du chags par spyod pa dang / /'dod chags la spyod pa dang / kun nas 'dod chags la spyod pa dang / zhe sdang la spyod pa dang / rab tu zhe sdang la spyod pa dang / gti mug la spyod pa dang / kun nas gti mug la spyod pa dang / las kyi mtha' mang ba dang / smra ba la dga' ba dang / gnyid la dga' ba dang / gdu ba la dga' ba dang / 'du 'dzi la dga' ba dang / spros pa la dga' ba dang / rigs pa med pa'i gtam dang / ma dag pa'i gtam dang / bdag tu 'dzin pa dang / sems can du 'dzin pa dang /srog tu 'dzin pa dang / gang zag tu 'dzin pa dang / mar mi 'dzin pa dang / phar mi 'dzin pa dang / dge sbyong du mi 'dzin pa dang / bram zer mi 'dzin pa dang / sman pa'i tha snyad dang khyim sun 'byin pa la dga' ba dang / pho nyar 'gro ba dang / khyim pa'i las kyi mtha' byed du 'jug pa dang / khyim pa'i 'du 'dzi byed pa dang / khyim pa'i go re long byed pa dang / lo ma dang me tog dang 'bras bu 'byin pas khyim 'jig pa dang / gcer bu pa'i sdom pa bdag gir byed pa dang / gcer bu pa srel pa dang / 'jig rten las 'das pa'i ye shes spong ba dang / lo nyi shu ma tshang bar bsnyen par rdzogs pa dang /yan lag ma tshang bar bsnyen par rdzogs pa dang / 'bru ma btsos pa byin len byed pa dang / sha ma btsos pa byin len byed pa dang / gser dang dngul len pa dang / bdag tu smra ba la mi smod pa dang / bdag shes pa ma yin pa dang / gang zag gzhan dang gzhan shes par byed pa dang / brdzun du smra ba dang / sdom pa lhod pa dang / gya gyu byed pa dang / dad pa med pa dang / sran chung ba dang / byas pa mi shes pa dang / ma rig pa dang / le lo dang / gnyid dang rgod pa dang / 'gyod pa dang / khro ba dang khon du 'dzin pa dang / 'chab pa dang / chags pa dang / sgyu dang g.yo dang phrag dog dang /ser sna dang / khrel med pa dang / ngo tsha med pa dang / rgyags pa dang / bag med pa dang / khengs pa dang / kun nas rtsom pa dang / dga' ba med pa dang / sgyid lug pa dang / glal ba dang / zas kyis dregs pa dang / sems zhum pa dang / nga rgyal dang mngon pa'i nga rgyal dang /nga rgyal las kyang nga rgyal dang / nga'o snyam pa'i nga rgyal dang / chung zad snyam pa'i nga rgyal dang / tshul 'chos dang kha gsag dang gzhogs slong dang / thob kyis 'jal ba dang / chos dang mi mthun pa dang / rnyed pas rnyed pa sgrub pa dang / tshul khrims kyi phung po nyams pa dang / ting nge 'dzin gyi phung po nyams pa dang /shes rab kyi phung po nyams pa dang / rnam par grol ba'i phung po nyams pa dang / rnam par grol ba'i ye shes mthong ba'i phung po nyams pa dang / sangs rgyas la ma dad pa dang / chos la ma dad pa dang / dge 'dun la ma dad pa dang / las kyi rnam par smin pa la yid mi ches pa dang /tshe 'di la gtso bor byed pa dang / tshe phyi ma'i chos la gces par mi byed pa dang / som nyi dang / yid gnyis dang / the tshom dang / pho theg che ba dang / 'jigs su rung ba'i rang bzhin can yin te/ shA ri'i bu gang zag 'di dag ni chos 'dul ba 'di la ngan skyugs dang 'dra bar rig par bya'o/ / mi gtsang ba'i lus kyi las dang ldan pa dang / mi gtsang ba'i ngag gi las dang ldan pa dang / mi gtsang ba'i yid kyi las dang ldan pa dang / 'tsho ba ma dag pa gang yin pa de dag ni lus zhig nas shi ba'i 'og tu sems can dmyal bar ltung bar 'gyur ro/ /de dag ni sangs rgyas rnams dang / sangs rgyas kyi nyan thos rnams dang /de bzhin du gzhan yang dge ba don du gnyer ba rnams dang / yongs su mya ngan las 'da' bar 'dod pa rnams kyis yongs su spong ba'i 'os yin no/ /shA ri'i bu dper na tsan+dan dmar po de ngan skyugs blugs pa'i snod der bcug na/ de yang mi gtsang bar 'gyur zhing smad par 'gyur ro zhes gsungs pa dang /yang mdo sde de nyid las/ shA ri'i bu gzhan yang tshul khrims 'chal ba'i dge slong gis de bzhin gshegs pas gsungs pa'i yang dag pa'i mdo sde 'di lta bu 'di dag shes nas/ dga' ba'am mgu ba mi 'thob cing / bdag nyid la lhag par yang gnod par byed de/rang gi spod lam ngan pa la kun du bltas nas/ rang nyid yid gnyis za bar 'gyur zhing / mdo sde 'di lta bu 'di dag ni bdag kho na'i ched du gsungs kyi/ gzhan la ma yin no/ /de ci'i phyir zhe na/ 'di ltar bdag kho na'i kun du snang ngo snyam mo/ /shA ri'i bu 'di ni dge slong tshul khrims ral pa rnams kyi ma 'dres pa'i chos yin te/des de thos nas thog ma kho nar khro ba bskyed par 'gyur ro/ /de khro ba'i zil gyis non nas dge slong chos smra ba la ma dad pa skyed par byed de/ de bzhin gshegs pas gsungs pa'i mdo sde 'di lta bu 'di la 'di ni sangs rgyas kyis gsungs pa ma yin no zhes smod cing /skye bo la 'du shes su byed do zhes gsungs pa dang / yang mdo de nyid las/ shA ri'i bu khyod la go bar bya'o/ /khong du chud par bya'o/ /gang yang mi dge ba bcu'i las kyi lam de lta bu dang ldan pa'i mi de dag rtag par rgyun du bar chad med pa lo brgya'i bar du bsod nams ma yin pa'i phung po bsags pa bas/dge slong tshul khrims ral pa gang zhig bstan pa 'di la drang srong gi rgyal mtshan gyis g.yogs nas/ dad pas byin pa la zhag gcig longs spyod par byed na/ de bas ni ches mang du 'di mi dge ba'i rtsa ba mngon par 'du byed par 'gyur ro//gang tshul khrims ral pa'i dge slong 'di ni nyin zhag gcig dad pas byin pa la longs spyod na/ de nyid de dag las mi dge ba'i rtsa ba ches mang du mngon par 'du byed pa yin no zhes gsungs pa dang / yang mdo de nyid las/ shA ri'i bu gzhan yang tshul khrims 'chal ba'i dge slong ni bre mo'i gtam la dga' ba dang /bre mo'i gtam la mngon par dga' ba phrag dog can yin no/ /tshul khrims 'chal pa'i 'khor can yin no/ /tshul khrims 'chal pa bsten pa dang / tshul khrims kyi gtam la mi dga' ba yin no/ /mdo sde zab mo 'di lta bu dag dang mi mthun par byed pa yin no//mdo sde 'di lta bu 'di dag smra ba la mi mthun par byed cing rtsod pa dang / bstan pa la mngon par mi dga' ba dang / phyogs dang phyogs mtshams su lta bar byed pa dang / lag pas gdong 'gebs pa dang / bar snang la lta bar byed pa dang / stan las langs te 'gro ba dang / de bzhin gshegs pa'i gsung la smod pa dang /chos smra ba la khro bar byed pa yin no/ /de mi dge ba dang ldan zhing lus dang ngag dang yid kyi nyes par spyod pas ngan song du 'gro bar 'gyur ro/ /shA ri'i bu 'di yang dge slong tshul khrims 'chal pa'i 'chal pa'i tshul khrims kyi skyon brgyad pa yin te/ ngan song rab tu rdzogs par bya ba'i phyir kun du zhugs pa yin no//shA ri'i bu gzhan yang dge slong tshul khrims 'chal pa ni yon tan sgrogs pas slob dpon gtso bor byed pa yin/ grags pa dang sgra dang tshigs su bcad pa mngon par bstod pas mkhan po gtso bor byed pa yin no/ /tshul khrims dang ldan pa'i ming yongs su bsgrags pas 'tsho ba yongs su sgrub pa dang grims pa dang gtogs 'dod che ba yin no//dper na bya rog bzhin du dge 'dun gyi ming gis bdag nyid kyi chos gos dang / bsod snyoms dang / gnas mal dang / nad kyi rkyen sman dang / yo byad rnams yongs su sgrub par byed pa yin no//mthu dang ldan pa dang lus kyi 'jo sgeg la brtson pa yin no/ /ngo tsha med pa dang 'dzem pa med pa yin no/ /tshig thun tshags su smra ba dang / lag pa dang / rkang pa rgod pa yin no/ /rigs nyams pa yin no/ /bud med la brten pa yin no/ /skyes pa la mi brten pa yin no/ / shin tu yongs su 'dris par byed pas gus pa med pa yin no/ /de'i bsngags pa lha dang klu dang gnod sbyin yang mi smra'o/ /de'i bsngags pa sangs rgyas bcom ldan 'das rnams kyang gsung bar mi 'gyur ro/ /'tshe ba la dpa' ba dang dge 'dun gyi tha snyad dang ldan pa kun byed pa yin no/ /shA ri'i bu gang zag de lta bu ni dge 'dun gyi dbang phyug 'dod pa yin no//gang ci la bsngags kyang ma dris par smra ba yin no/ /chos gos tshol ba yin no/ /gzhan tshul khrims dang ldan pa rnams la glags lta ba la brtson pa yin no/ /mtshungs par byed pa yin no/ /dam pa ma yin pa'i chos 'dzin pa dang /dam pa ma yin pa'i chos len pa yin no/ /tshogs la dga' ba yin no/ /rtsod pa 'bar bar byed pa yin no/ /shA ri'i bu 'di yang dge slong tshul khrims 'chal pa'i 'chal pa'i tshul khrims kyi skyon dgu pa yin te/ ngan song rab tu rdzogs par bya bar kun du zhugs pa yin no/ / shA ri'i bu gzhan yang dge slong tshul khrims 'chal pa ni rtsod pa len pa yin no/ /'thab mos dga' ba 'thob pa dang / chos gos la zhen pa yin no/ /'gro ba ngan par 'gro ba dang nyal ba'i bde ba la gzhol ba yin no/ /bsngags pa rnyed na dga' ba dang bshes pa'i khyim dang slong mo ster pa'i khyim la 'chums pa yin no//khyim la phrag dog byed pa dang gnas la phrag dog byed pa yin no/ /de ci'i phyir zhe na/ kye ma bdag gi 'di dge slong de dag gis ma shes kyang ci ma rung snyam pa sems pa'i phyir ro/ /tshul khrims la sdang ba yin no/ /'chal pa'i tshul khrims la kun du dga' ba dang /sbyin pa'i bsngags pa 'ba' zhig lhag par smra ba yin te/ tshul khrims dang / bzod pa dang / brtson 'grus dang / bsam gtan dang / shes rab dang / nye bar zhi ba rnams kyi ma yin no/ /dgon pa'i gnas dben pa chung zad don gyi sgo nas sam chung zad yi ge'i sgo nas ni ma yin te/dge slong ngo tsha shes pa rnams la bsngags pa ma yin pa spyod pas mngon par brtson par byed pa yin no/ /de dge slong sbyangs pa'i yon tan dang ldan pa rnams la chung zad don gyi sgo nas sam/ chung zad yi ge'i sgo nas kyang bsngags pa ma yin pa smra zhing / ci nas kyang skyon 'dogs pa yin no/ /rigs rgyud smra ba la zhugs pa yin no/ /sngon gyi nye du la smos pa dang / ci'i rgyus chos ston kyang 'di ltar bkren pa'i phyir yin pa dang / bag tsha ba'i lce gnyis su smra ba dang / rang gi skye bo mi spong ba dang / skye bo mang pos myur du zil gyis mnan pa 'thob pa dang yid du mi 'thad pa yin no//tshul khrims dang ldan pa rnams la kha zer ba dang / gdams ngag smra ba'i skyes pa dang / bud med rnams la mi bsten pa dang / de mdo sde 'di lta bu 'di dang / mdo sde 'di lta bu 'chang ba dang / ston pa gang yin pa de dag yid la mi 'thad pa dang / mdo sde 'di lta bu 'di ston pa rnams la dga' ba dang mgu bar byed pa gang yin pa de dag la yang sdang zhing yid du mi 'ong bas/tshul khrims kyi bsngags pa mi brjod pa yin no/ /'di lta bu'i mdo sde ston pa rnams kyi drung du nye bar mi 'gro'o/ /nye bar song na yang slar myur du ldog pa dang / ltos pa med par ston pa yin no//byung rgyal du smra ba dang khyim pa nye du ma yin pa la nye dur smos pa yin no/ /dbang phyug gi phyir dbye bar byed pa dang / tshul khrims dang ldan pa'i phyogs la smod par byed pa yin no/ /shA ri'i bu 'di yang dge slong tshul khrims 'chal pa'i 'chal pa'i tshul khrims kyi skyon bcu pa yin te/ngan song yongs su rdzogs par bya ba'i phyir kun du zhugs pa yin no zhes gsungs pa dang / yang mdo de nyid las/ shA ri'i bu de lta bas na/ de bzhin gshegs pa skyes bu blun po de dag gi don du 'di lta bu'i mdo sde 'di rab tu ston par mi mdzad do/ /de ci'i phyir zhe na/shA ri'i bu tshul khrims ral pa'i dge slong 'byung ba gang yin pa de dag de bzhin gshegs pas gsungs pa'i mdo sde 'di lta bu 'di thos nas nyams par bya ba'i phyir 'jug par 'gyur ba'i phyir ro/ /shA ri'i bu de la dad pas byin pa rnams la longs spyod par byed pa dag ni chom rkun chen po yin no//shA ri'i bu chos 'dul ba 'di thos nas/ dga' la rangs par mi 'gyur ba gang yin pa de ni lhag par dge slong sdig can yin par shes par bya'o/ /de ci'i phyir zhe na/ shA ri'i bu 'di ltar dge slong tshul khrims dang ldan pa dag la ni/ yang na tshul khrims kyi gtam mam/ yang na ting nge 'dzin gyi gtam mam/yang na shes rab kyi gtam mam/ yang na kun du skyo bar 'gyur ba'i chos kyi gtam de lta bu gang yang yid du mi 'ong bar mi 'gyur ba'i phyir ro/ /shA ri'i bu 'di lta bu'i mdo sde 'di thos na gsum yid mi bde bar 'gyur te/ gsum po de dag gang zhe na/ tshul khrims ral pa'i dge slong gang yin pa dang /mngon pa'i nga rgyal can gyi dge slong gang yin pa dang / chos ma yin pa'i gtam chos kyi gtam ltar bcos pas yongs su ma dag pa ston pa'i dge slong gang yin pa'o/ /gzhan yang gsum yid mi bde bar 'gyur te/ gsum po de dag gang zhe na/ bdag tu lta ba dang srog tu lta ba dang gang zag tu lta ba'o/ /gzhan yang gsum yid mi bde bar 'gyur te/ gsum po de dag gang zhe na/ phung por lta ba dang / khams su lta ba dang / skye mched du lta ba'o zhes gsungs pa dang / mdo de nyid las/ shA ri'i bu 'di ltar mdo sde de ni/ de bzhin gshegs pa yongs su mya ngan las 'das pa na/ dge slong tshul khrims dang ldan pa rnams dga' ba dang mgu bar byed par 'gyur ro/ /shA ri'i bu mdo sde 'di ni tshul khrims dang ldan pa rnams kyis kun du bzung zhing tshul khrims 'chal pas yongs su spang bar 'gyur ro/ / de ci'i phyir zhe na/ shA ri'i bu 'di ltar yang dag pa ji lta ba bzhin du bstan na/ byis pa rnams sdug bsngal bar 'gyur te/ shA ri'i bu gang dag gi yan lag dang / gang dag gi rnam pa dang / gang dag gi rtags dang / gang dag gi mtshan mas tshul khrims 'chal pa dang ldan par 'gyur ba'i rnam pa dang /rtags dang mtshan ma de dag de bzhin gshegs pas mdo sde 'di las gsungs te/ tshul khrims 'chal pa ni tshul khrims kyi gtam la dga' bar mi 'gyur/ mnyam par ma bzhag pa ni mnyam par gzhag pa'i gtam la dga' bar mi 'gyur/ ser sna can ni gtong ba'i gtam la dga' bar mi 'gyur/mngon pa'i nga rgyal can gyi lhag par nga rgyal med pa sangs rgyas kyi gsung thos nas/ g.yang sa chen por ltung bar 'gyur zhing skrag pa chen po skye bar 'gyur ro/ /'jig rten gyi zang zing dang kha zas lhur len pa ni yo byad bsnyungs pa'i bsngags pa smras na yid mi bde ba chen po skye bar 'gyur ro zhes gsungs so//chos kyi phung po'i mdo las kyang / shA ri'i bu bcu po 'di dag ni tshul khrims 'chal pa'i 'chal pa'i tshul khrims kyi skyon rnams te/ bcu gang zhe na/ tshul khrims 'chal pa 'chi ba'i tshe gdung bar 'gyur/ mnar med par 'gyur ro snyam du tshul khrims 'chal pa'i dge slong phyir 'gyod par 'gyur/ 'khor gyi nang du skrag par 'gyur/ tshul khrims dang ldan pa la bdag nyid smra bar 'gyur/ bdag sangs rgyas rnams kyis spangs so/ /bdag nyan thos rnams kyis spangs so/ /bdag lha rnams kyis spangs so zhes smra bar 'gyur/de 'jigs pa dang bcas pas 'chi ba'i dus byed pa dang / ngan song du 'gro ba dang / mi'i 'thob pa rnyed pa dka' bar 'gyur te/ shA ri'i bu bcu po 'di dag ni tshul khrims 'chal pa'i dge slong gi 'chal pa'i tshul khrims kyi skyon dag go zhes gsungs so// // tshul khrims dang ldan pa brnyas pa la dgongs pa bstan pa/ yul 'khor skyong gi mdo las kyang / phyi ma'i dus na nga yi bu de dag /kun du smad par gyur pa mthong nas ni/ /de dag nga yi tshig ni dran 'gyur te/ /bas mtha' dag dang nags su de tshe gnas/ /kyi hud rnyed pas zil non yon tan sdang //dge slong mang po gang du byung gyur pa/ /rgyal ba dam pa yi ni bstan pa dag /ring por mi thogs par yang 'jig par 'gyur/ /phyi dus tshul khrims yon tan ldan pa dag /rtag par yongs su brnyas par 'gyur ba ste/ /de dag grong dang yul 'khor grong khyer rnams//spangs nas dgon pa nags su gnas par 'gyur/ /'byed dang zug gzer 'thab mo dga' ba dang / /yon tan nyams la rtag tu bsti stang byed/ /de dag skye bo'i ston par grags 'gyur te/ /de dag nga rgyal rgyags pas tshig par 'gyur/ /'dir ni nga yi bstan pa yon tan gter//yon tan kun gyi 'byung gnas mchog dga' ba/ /'di ni tshul khrims nyams dang phrag dog dang / /rgyags pa'i skyon rnams kyis ni 'jig par 'gyur/ /ji ltar rin chen 'byung gnas brus pa dang / /pad+ma'i rdzing bu yongs su bskams pa dang / /rin chen mchod sdong chag par gnas pa ltar//phyi ma'i dus na bstan pa 'jig par 'gyur/ /phyi ma'i dus kyi tshe na dam pa'i chos/ /rnam par 'jig 'gyur shin tu mi bzad tshe/ /dge slong dul ba ma yin de 'dra ba/ /de dag nga yi bstan 'di 'jig pa yin/ /spyod pa 'di la brten par dga' ba rnams/ /de dag bzang 'gro ga la yod de ring //'di nas shi 'phos yi dags 'gro ba dang / /dud 'gro'i 'gro dang sems can dmyal bar gnas/ /lo brgya du mar sdug bsngal mtha' yas pa/ /mi bzang drag po nyams su myong bar 'gyur/ /ci ste de yis mi yi lus rnyed kyang / /rtag tu sdug bsngal mya ngan ldan par 'gyur//sdig pa'i spyod pa 'di la rtag brten pa/ /long ba'am 'on pa'am zhar bar skye bar 'gyur/ /lus la rtag tu sha bkra 'byung bar 'gyur/ /'jigs pa'i gzugs can mthong na 'jigs par 'gyur/ /gang zhig ya nga'i spyod pa bsten pa ni/ /de la su yang yid rton mi 'gyur te//de yi tshig la yid ches mi 'gyur zhing / /de ni rtag tu sma 'bab par yang 'gyur/ /de dag nad dang sdug bsngal brgya yis gdungs/ /mtshon dang shing dang bong ba rnams kyis bsnun/ /bkres dang skom pa'i 'jigs pas yongs su gdungs/ yang na de ni rtag par rab tu brnyas/sdug bsngal mtha' yas pa dag thos nas ni/ /nges pa rnams kyis sdig pa'i spyod bor la/ /legs pa'i spyod la rtag tu brten par gyis/ /'di nas phyin chad 'gyod par gyur ta re/ /gang zhig sangs rgyas dang ni 'phags tshogs dang / /bslab dang sbyangs pa'i chos la dga' gyur pa//gnyen dang rnyed dang grags brjod spang byos la / /de dag rtag tu mngon par brtson par gyis/ /'dus byas 'di ni sgyu ma lta bu dang / /'jig par gyur dang rmi lam lta bu dang / /sdug pa kun dang mi ring 'bral gyur zhing / /'di la rtag par gang yang med rtogs la//pha rol phyin dang sa dang stobs rnams la/ /rtag tu rab tu sbyor zhing 'bad par gyis/ /ji srid byang chub mchog sangs ma rgyas pa/ /de srid brtson 'grus nam yang nyams ma byas/ /zhes gsungs so/ /'od srungs kyis zhus pa'i mdo las kyang / ngas 'khor los sgyur ba'i rgyal srid spangs nas rab tu byung ste/ka shi ba phra mo dang / du gu la'i ras dang / ko tam pa'i ras dang / ngang ris can gyi gos rnams spangs nas/ 'phags pa'i rigs la dga' ba'i phyir sha na'i ras kyi gos rnams lus la bgos so/ /'od srungs ngas khyod las dar gos ngan pa blangs te/ngas khyod la sha na'i ras byin pa gang yin pa de thams cad kyang khyod nyid la snying brtse ba'i phyir yin gyi chags pa'i phyir ma yin la lus brgyan pa'i phyir ma yin no/ /'od srungs 'di la mi gti mug pa kha cig khyod dang nga'i rjes su mi slob cing brkam pa chags pa'i zil gyis non pa chos gos sogs par byed pa/lhung bzed sogs par byed pa / 'jig rten pa'i zang zing sogs par byed pa/ 'gron bu dang / gser dang / nor bu dang / 'bru sogs par byed pa/ ba lang dang / lug dang / bya gag dang / phag dang / bong bu dang / rta dang / thong gshol dang / shing rta 'dren pa dag nye bar 'jog par byed pa/khyim pa'i las kyi mtha' spyod pa dag pas ni/ 'od srungs khyim pa dag la khyad par du 'gyur ba yod kyi/ mi blun po rab tu byung ba'i mtshams las 'das pa de dag la ni khyad par du 'gyur ba gang yang med do/ /'od srungs khyim pa rnams khyad par du 'gyur ba ni dge sbyong ma yin pa la de dge sbyong du khas 'che ba/tshangs par spyod pa ma yin pa la tshangs par spyod par khas 'che ba/ gos ngur smrig bgos shing bya ba mang ba/ sbags pa sna tshogs kyis sbags pa/ zas dang gos lhur len pa de dag khyim pa dag gis gos ngur smrig gyon par rig nas/ zhe sa dang gus pa bskyed pa dang chos gos dang bsod snyoms kyis sdud par byed pa dang / gus par smra zhing / phyag 'tshal ba dang ldang bar byed pa ste/ 'od srungs 'di ni khyim bdag gi khyad par du gyur pa'i chos yin gyi/ de dag rab tu byung ba de dag ni med pa'o/ /de ci'i phyir zhe na/ 'di ltar de dag ni yongs su len pa la brtson pa ma yin zhing /ci yang mi sogs pa'i phyir ro/ /'od srungs de'i tshe de'i dus na/ dge slong phal cher lhung bzed dang / chos gos mang zhing snod spyad mang ba dang / rnyed pa mang bar 'gyur te/ de dag la bsti stang byed par 'gyur/ btsun par byed par 'gyur/ ri mo byed cing mchod pa byed par 'gyur ro/ /de ci'i phyir zhe na/ 'di ltar de sbyin pa dang / phyir sbyin pa dus dus su byed cing / bya ba ji lta ba bzhin du yongs su 'dzin pa'i phyir ro/ /dge slong gang dag tshul khrims dang ldan pa/ dge ba'i chos can zag pa rnams zad par byed pa la mngon par brtson pa/yid byung ba mgo dang gos la me 'bar ba bzhin du brtson pa/ don nyung ba byed pa nyung ba/ rang gi don la brtson pa/ 'dris par byed pa yongs su spangs pa dag 'byung ba de dag gi gan du ni/ de'i tshe de'i dus na su yang mi 'gro mi bsten cing bsnyen bkur mi byed par 'gyur ro/ /de ci'i phyir zhe na/'di ltar khyim pa dag ni chags pa'i rang bzhin can tshe 'di lhur len gyi tshe rabs phyi ma lhur len pa ma yin pas de dag 'di snyam du/ dge slong de dag la ni bdag cag gi 'tshe ba med na/ bdag gis ci'i phyir bsten / ci'i phyir phyag bya ci'i phyir mchong / ci'i phyir bsnyen bkur bya snyam du sems pa'i phyir ro//gzhan du na gang dag dge ba'i rtsa ba bskyed pa/ sngon gyi sbyor ba phun sum tshogs pa dag 'byung zhing tshul khrims dang ldan pa/ dge ba'i chos can de lta bu de dag la bsten par byed/ bsnyen par byed cing bsnyen bkur byed pa ni ma gtogs te nyung ngo / /'od srungs chos 'di lta bu'i tshul dang mthun pa 'di lta bu 'di dag ni/gang zag gnyis kyi yid du 'ong bar 'gyur te/ gnyis gang zhe na/ bden pa mthong zhing 'khor ba la 'jigs par lta ba dang / rnal 'byor spyod pa la brtson zhing 'bras bu thob par 'dod pa/ las kyi rnam par smin pa la rton pa chos don du gnyer zhing chos 'dod pa'o//'od srungs mngon par mi brtson pa chos ma yin pa la lta ba/ las kyi rnam par smin pa dang 'gal ba/ 'jig rten pha rol du kha na ma tho bas 'jigs par mi lta ba/ tshe 'di lhur len pa/ tshe rabs phyi ma lhur mi len pa thams cad kyi sgo ngas bshad par bya'o//'od srungs gang dag tha na thar pa dang ldan pa'i sems gcig tsam yang mi bskyed pa'i gti mug pa de dag la ni/ ngas 'di lta bu'i chos 'dir skabs mi 'byed kyi/ steng du 'di lta bu'i chos 'di dag thos nas/ bdag sgrub pa las nyams par rig nas/ smad par bya bar sems te/'di dag ni sangs rgyas kyis gsungs pa ma yin gyi/ 'di dag ni rang bzor sbyar ba'am/ bdud kyis mtho btsams nas byas pa'o zhes smra zhing / de dag 'di ltar skye bo mang po dag log par 'dzin du 'jug par 'gyur ro/ /de dag ni bdag kyang phung la/ gzhan dag kyang phung bar byed par 'gyur/bdag kyang nyon mongs pa can du 'gyur la/ gzhan yang nyon mongs pa can du byed par 'gyur te/ de ltar mi gti mug pa de dag ni bdag la phan pa dang / gzhan la phan pa'i phyir zhugs pa ma yin no zhes gsungs so/ /rab tu rnam par 'byed pa'i mdo las kyang / shA ri'i bu de la dge slong sngon gyi rgyal ba la bya ba byas pa/ dge ba'i rtsa ba rgyas pa gang dag 'byung ba de dag ni/ phung por 'du shes pa/ khams su 'du shes pa/ skye mched du 'du shes pa/ gang zag tu lta ba/ rgan pas gnas brtan du gyur pa/ gti mug gis rnyogs pa/ lam gol ba nas dong ba/lhag par nga rgyal ba/ log par lta ba de dag gis smras pa/ de la mngon par mi dga' zhing rjes su yi mi rang nas stan las langs te 'dong bar 'gyur ro/ /shA ri'i bu de'i tshe lha'i tshogs chen po yid rab tu dga' ba rnams/ da dung yang shAkya thub pa'i nyan thos rnams gnas so zhes phyogs bzhir sgra shin tu sgrogs par 'gyur ro//de ci'i phyir zhe na/ rigs kyi bu gang dag 'di ni/ gang zag tu lta ba'o zhes yongs su ma dag pa'i bzod pa 'di dag mi 'dod pa de dag ni dge ba'i rtsa ba nyang nyung dang ldan pa ma lags so/ /de dag gi bsam pa rig nas lha'i tshogs chen po dga' ba dang yid bde ba skyes pa/yid cher rangs pa de dag ched du brjod pa cher ched du brjod par 'gyur ro/ /shA ri'i bu yang dge slong de dag sangs rgyas kyi sras yongs su 'dri ba'i rang bzhin can/ mi dmigs pa'i bzod pa can rnams la mi dga' bar 'gyur/ de dag der tshul gcig tu sgrogs par 'gyur ro//shA ri'i bu 'di ltar de'i tshe tshogs nas bsdus te tshogs kyi slob dpon du 'gyur ro/ /de ci'i phyir zhe na/ shin tu zil gyis mnan pa nyid kyis so/ /shA ri'i bu de ltar de'i tshe nga'i sras nga'i nyan thos rnams kyis yab kyi gnas dang yab kyi spyod yul la snyan par smra ba yang rnyed par mi 'gyur na/gtsug lag khang du gnas pa dang bkur sti lta ci smos te/ de ni gnas med do/ /shA ri'i bu de'i tshe 'di ltar de bzhin gshegs pa zil gyis gnon par 'gyur ba la ltos/ gang nga yongs su mya ngan las 'das pa na/ de bzhin gshegs pa'i sras gang dag /legs par thub pa legs par zhi ba/legs par dul zhing mi dmigs pa'i bzod pa can dag de'i shin tu zil gyis gnon cing yongs su spangs par 'gyur ro/ /nga'i sras dag yab kyi spyod yul gang la bde ba la reg par gnas par 'gyur snyam du gang ngas de dag gi don gyi phyir bskal pa grangs med par nye bar blangs nas/g.yul chen po pham par byas pa dang / rgyal srid bskyangs so/ /shA ri'i bu de la chos 'dul ba de ltar dang zhing de ltar rgya che ba 'di la chom rkun pa'i tshogs chen po dang dmu rgod kyi tshogs chen pos bsnub par 'gyur ro/ /shA ri'i bu de la ji ltar ngas chos kyis bla na med pa yang dag par rdzogs pa'i byang chub tu mngon par rdzogs par sangs rgyas pa dang /bla na med pa'i chos kyi 'khor lo dge sbyong ngam bram ze'am lha'am bdud dam tshangs pa'am sus kyang 'jig rten du chos dang mthun par ma bskor ba rab tu bskor ba/ chos ma yin pas ma yin pa nga'i gnas 'di la/lha dang bcas pa'i 'jig rten mngon sum du dbang du 'gyur ro/ /shA ri'i bu gang na de ltar mngon sum du gyur pa'i rgyu yod bzhin du de bzhin gshegs pa yongs su mya ngan las 'das pa na/ bla na med pa yang dag par rdzogs pa'i byang chub 'di rgyas par byed pa rnams kyis chos dang mthun par dbang po'ang dris pa na lan gdab pa'i phyir mi smra'o//de'i tshe nga'i sras de dag la yang mi 'jigs pa yang mi ster ro/ /shA ri'i bu 'di lta ste dper na skyes bu 'ga' zhig lam gyi bzhi mdo chen por sbrang rtsi'i bum pa nye bar bzhag nas/ 'di skad du sbrang rtsi'i bum pa rnam pa brgyar chag pa 'di las tha na skra'i rtse mo tsam zhig kyang yongs su zos na/de rga ba dang 'chi bar mi 'gyur ro zhes smra bar 'gyur zhing / sbrang rtsi'i bum pa de la lag na mtshon cha thogs pa mang po ral gri dag gis bsrung bar 'gyur la/ shA ri'i bu de'i tshe srung ma rnams rtag tu rgyun mi 'chad par 'di snyam du/gang sbrang rtsi'i bum pa rnam pa brgyar chag pa 'di las tha na skra'i rtse mo tsam zhig kyang za na / de'i srog kyang med do zhes sems par 'gyur ro/ /shA ri'i bu de la 'ga' zhig 'di snyam du gang zhig sbrang rtsi'i bum pa rnam pa brgyar chag pa 'di las tha na skra'i rtse mo tsam zhig kyang zos na bdag la rga ba dang 'chi bar mi 'gyur/gang bdag gi srog kyang yongs su btang nas sbrang rtsi'i bum pa 'di las bza' bar bya'o/ /gal te mtshon rnams bab par ma gyur pa na sbrang rtsi'i bum pa 'di las bza' bar nus na/ phyi nas mtshon gyis kyang 'jigs par mi 'gyur/ rga ba dang 'chi ba med pa'i gnas 'thob par 'gyur ro zhes sems par 'gyur ro//de srog yongs su btang nas srog la ltos pa med par 'gyur te sbrang rtsi'i bum pa de las len par byed pa de la lag na mtshon cha thogs pa'i srog chags brgya stong phrag mang po lhags par 'gyur ro/ /gal te mtshon cha ma lhung ba na sbrang rtsi'i bum pa de las bza' bar nus na/de de nas sdug bsngal chen po las grol bar 'gyur/ rga ba dang 'chi ba las yongs su thar bar 'gyur ro/ /shA ri'i bu de ltar dkar po'i chos mang po rnams bsnub pa'i phyir du bdud sdig can dang bdud kyi ris kyi lha rnams dang / gang bdud kyis mngags pa'i dge slong dang /dge slong ma dang / dge bsnyen dang / dge bsnyen ma rnams 'jug par 'gyur ro zhes gsungs so/ /snying rje chen po la 'jug pa'i mdo las kyang / gang zhig tshul khrims ldan zhing yon tan ldan/ /byams la gnas shing rtag tu bzod la mkhas/ /legs bsdams 'jam zhing des pa 'byung 'gyur ba//de ni de yi dus na zil non 'gyur / /gang zhig slar yang gdug pa'i sems ldan zhing / /shin tu ma rungs drag cing las nyams la/ /chos ma yin spyod rtsod la dga' 'byung ba/ /de ni de yi dus na mchod par 'gyur/ /zhes gsungs so/ / zla ba'i snying po'i mdo las kyang / gzhan yang chags pa de dag ni/ /sdig pa'i dge slong sten par byed/ /dge slong de dag mchod rten dang / /dge 'dun zas skom 'bras bu'i ro/ /khyim pa rnams la sbyin byed cing / /slar yang mchod pa nyid du 'gyur/ /de dag la ni yongs 'dzin pa/ /bran dang bran mo khyim ster 'gyur//dge slong las gsum dang bral ba/ /thos pas rlom zhing lhung dang bcas/ /bsam gtan tshul khrims mi mthun pa/ /tshogs kyi nang du gtso bor 'gyur/ /tshul khrims ldan rnams dong ba na/ /nor gyi rgyu yis 'thab par 'gyur/ /zhes gsungs pa dang / /yang mdo de nyid las/dge slong 'di ni tshul 'chos can/ /rkun po mchog tu ma rungs pa/ /gang zhig de la mchod byed pa/ /grags pa ma yin mang du 'thob/ /de la bsod nams 'thob mi 'gyur/ /de yis bshad pa ma nyan zhes/ /khyim pa rnams la smra bar byed/ /ces gsungs so/ / gser 'od dam pa'i mdo las kyang / yul 'khor du ni gdon 'jug cing / /mi bzang pa yi nad kyang 'byung / /de yi 'og tu sbyin gnas kyang / /chos dang ldan pa ma yin 'gyur/ /de yi 'khor dang blon po yang / /chos dang ldan pa ma yin 'gyur/ /chos dang mi ldan skye bo la/ /de yi 'og tu mchod byed 'gyur//chos dang ldan pa'i sems can la/ /rtag tu chad pas gcod par 'gyur/ /chos dang mi ldan skye bo bkur/ /chos ldan chad pas bcad pas na/ /der ni chu dang rgyu skar rlung / /rnam gsum rnam par 'khrug par 'gyur/ /chos min skye bo bzung bas na/ /dam chos ro yi snying po mdangs//sems can mdangs dang sa yi bcud/ /dngos po rnam gsum rnam par 'jig /skye bo ngan pa rab bkur zhing / /skye bo dam pa smad pas na/ /'chi dang lce 'bab mu ge dang / /rnam pa gsum ni der 'byung 'gyur/ /zhes gsungs so/ /sa'i snying po'i mdo las kyang /bcom ldan 'das kyis byang chub sems dpa' sems dpa' chen po sa'i snying po la 'di skad ces bka' stsal to / /rigs kyi bu khyod phyi ma ma 'ongs pa'i dus na/ sangs rgyas kyi zhing 'dir sems can dag nyon mongs pas yongs su gdungs nas sdig pa spyod cing / byis pa gti mug can gdul dka' bar gyur pa gang /rgyal rigs gdol pa can dang / blon po gdol pa can dang / khyim bdag gdol pa can dang / tshong dpon gdol pa can dang / dge sbyong gdol pa can dang / bram ze gdol pa can la sogs pa dge ba'i rtsa ba chung ba dang / dad pa'i sems med pa/ g.yo dang sgyus 'tsho ba/gti mug dang / shes pa snyems pa can/ dge ba'i bshes gnyen spong ba/ smra ba'i tshig bden pa med pa/ dge ba'i bshes gnyen gyis bstan pa la mi 'jug pa dang / brnyas shing dbang za ba/ tshig ngan pas rnam par 'thing ba/ dam pa'i chos la the tshom za zhing log par lta ba/'jig rten phyi ma'i sdug bsngal gyi 'bras bus mi 'jigs pa/ rtag tu ngang tshul ngan pa can dag dang bsten par dga' ba/ srog gcod pa nas legs par lta ba'i bar du spyod pa la dga' zhing g.yo dang sgyus 'jig rten pa slu ba dang / bdag dang gzhan la gnod pa byed pa'i rgyal rigs gdol pa can nas bram ze gdol pa can gyi bar du/nga'i chos 'jig par byed pa/ nga'i bstan pa la rab tu byung na yang tshul khrims nyams shing 'jig rten gyi 'du 'dzi'i las byed par spro ba la/ rgyal rigs dang bram ze la sogs pas bsti stang dang bcas pas mchod pa dang / khe la brkam pas nor gyi phyir tshig tsam du smra zhing spyod pa dang mi ldan pa/phan tshun du 'phrin gyi yi ge skyel ba la dga' ba dang / tshong dang khe spogs byed cing / 'jig rten rgyang 'phen pa'i gtsug lag slob pa dang / zhing rmo ba'i las la dga' ba dang / nor rin po che sogs shing sbed pa dang / khang khyim dang chung ma dang /bu smad srung ba dang / 'jig rten gyi sngags dang / phyag rgyas 'byung po 'khol ba dang / ltas bzang ngan lta ba dang / sman sbyar cing nad gso ba'i nor gyis 'tsho ba dang / bza' ba dang / btung ba dang / bgo ba dang / rin po che'i rgyan la chags shing / khyim pa'i las byed pa la dga' ba dang / tshul khrims 'dral zhing sdig pa spyod pa dang / dung gi sgra la khyi'i spyod pa dang ldan pa/ dge sbyong ma yin par dge sbyong du khas 'che ba dang / tshangs par spyod pa ma yin par tshangs par spyod par khas 'che ba yod de/ rgyal rigs gdol pa can nas / bram ze gdol pa can gyi bar du/ de dag la bsnyen bkur byed cing /bsti stang dang bcas pas mchod pa byed de/ de dag gi ngag kyang nyan to / /tshul khrims nyams pa de dag kyang / rgyal rigs gdol pa can nas bram ze gdol pa can gyi bar du/ de dag la brten par dga' zhing / bkur sti dang / rim gro byed de de'i ngag nyan to/ /gal te gang zag 'ga' zhig nga'i bstan pa la rab tu byung nas tshul khrims dang yon tan dang ldan pa dang /slob pa dang mi slob pa nan tan byed pa nas/ 'bras bu'i mthar phyin gyi bar du gyur pa la/ rgyal rigs gdol pa can nas bram ze gdol pa can gyi bar du/ de dag gis de la phrag dog byed de/ bsnyen bkur dang / bsti stang dang / rim gro dang / mchod pa mi byed cing / slar ngag nyan par yang mi byed do/ /rigs kyi bu 'di lta ste mi la la zhig rin po che'i gling du phyin pa las/ rin po che in+d+ra nI la dang / ma hA nI la dang / gser dang / dngul dang / mu tig dang / pad+ma rA ga dang / bai DUr+ya dang / rin thang med pa'i rin po che rnam pa sna tshogs bor nas/nor bu mching bu len pa ltar/ de bzhin du ma 'ongs pa'i dus na/ sangs rgyas kyi zhing 'dir rgyal rigs gdol pa can nas bram ze gdol pa can gyi bar du yang de dang 'dra ste/ ngas bstan pa'i dam pa'i chos kyi rin po che'i gling du phyin nas/ tshul khrims dang /yon tan gyis phyug pa/ don dam pa'i bden pa la dga' ba dang / 'dzem pa dang / ngo tsha bar ldan pa/ slob pa dang / mi slob pa'i gang zag dang / pha rol tu phyin pa drug nan tan byed pa la brtson pa'i so so'i skye bo dge ba'i yon tan dang ldan pa/ 'phags pa'i 'khor spangs nas/ tshul khrims nyams pa/sdig pa mang po spyod pa/ ngo tsha ba med pa/ 'dzem pa med pa/ tshig brlang zhing rtsub pa/ lus dang sems nga rgyal gyis dregs pa/ rnam par dkar ba'i chos dang bral ba/ byams pa'i sems med pa/ snying rje med pa/ sdig pa'i dge slong dag la bsod nams kyi zhing du 'dzin cing /bkur sti dang / rim gro dang / mchod pa byed de de'i ngag nyan to/ /de ltar sdig pa can de dag ni slob dpon dang / slob mar bcas te gdon mi za bar mtshams med pa'i sems can dmyal bar ltung bar 'gyur ro zhes gsungs so// // rab tu byung ba'i bsngags pa la dgongs pa bstan pa/blo gros rgya mtsho'i mdo las kyang / blo gros rgya mtsho de nas/ bcom ldan 'das de bzhin gshegs pa 'od zer snang ba mtha' yas des/ rgyal po yul shin tu rnam par dag pa la 'di skad ces bka' stsal to/ /rgyal po chen po khyod kyis yongs su spyad pa'i phyir/rgyal srid thams cad de bzhin gshegs pa la phul zin na/ rgyal po chen po khyod dad pas legs par gsungs pa'i chos 'dul ba la/ khyim nas khyim med par rab tu byung shig /de ci'i phyir zhe na/ rgyal po chen po legs par gsungs pa'i chos 'dul ba la rab tu byung ba ni/ don che ba/ phan yon che ba/ rgya che ba'o/ /rgyal po chen po rab tu byung bar gtogs pa'i byang chub sems dpa'i 'thob pa chen po ni nyi shu po 'di dag ste/ thams cad mkhyen pa bla na med pa'i 'thob pa yongs su rdzogs par 'gyur ba dag go/ /nyi shu po gang zhe na/ 'di lta ste/ rgyal srid dang / longs spyod dang /g.yog 'khor dang / dbang phyug dag 'dor bas nga yi ba med cing yongs su 'dzin pa med pa 'thob pa dang / khyim nas 'byung ba la gzhol bas nyon mongs pa las 'byung ba 'thob pa dang / ngur smrig 'dzin pas rnyog pa med pa'i sems 'thob pa dang / 'phags pa'i rigs kyi chog shes pas dgong sla ba dang /gso sla ba 'thob pa dang / sbyangs pa'i yon tan yo byad bsnyungs pa yang dag par len pas/ 'dod pa che ba dang / sdig pa 'dod pa spong ba 'thob pa dang / tshul khrims kyi phung po yongs su dag pas/ lha dang mir skye ba 'thob pa dang / byang chub kyi sems mi 'dor bas/pha rol tu phyin pa drug 'thob pa dang / dgon pa dben pa na gnas pas/ 'du 'dzi dang mi 'dre ba 'thob pa dang / gnod pa med pas chos sems pa'i bde ba 'thob pa dang / bsam gtan gyi yan lag yang dag par bsgrubs pas sems las su rung ba 'thob pa dang / thos pa yongs su tshol bas shes rab chen po 'thob pa dang /nga rgyal med pas ye shes chen po 'thob pa dang / don nyung zhing byed pa nyung bas chos rab tu rnam par 'byed pa 'thob pa dang / sems can thams cad la sems mnyam pa nyid pas byams pa chen po 'thob pa dang / sems can thams cad rab tu thar par bya ba'i sems kyis snying rje chen po 'thob pa dang /lus dang srog la mi lta bas dam pa'i chos yongs su 'dzin pa 'thob pa dang / sems rab tu sbyangs pas mngon par shes pa chen po 'thob pa dang / sangs rgyas rjes su dran pas sangs rgyas mthong ba 'thob pa dang / tshul bzhin gyi chos la so sor rtog pas mi skye ba'i chos la bzod pa thob pa 'thob pa dang / yon tan thams cad yang dag par 'dzin pa'i spyod pas myur du thams cad mkhyen pa 'thob pa ste/ rgyal po chen po rab tu byung bar gtogs pa'i byang chub sems dpa' la 'thob pa chen po nyi shu po 'di dag rnyed par dka' bar mi 'gyur ro//rgyal po chen po de lta bas na khyod legs par gsungs pa'i chos 'dul ba la rab tu byung shig ces gsungs so/ /rab tu byung ba la bar chad byed pa'i mdo las kyang / bdud kyi 'ching ba bcom byas nas / /byang chub snying po'i lam dag dang / /kun mkhyen ye shes tshol ba yis//rab tu byung phyir myur du dong / /so sor thar pa'i sdom pa dang / /tshul khrims ma nyams bsrung bar gyis/ /sems can rnams ni thams cad la/ /byams sems rnam par bsgom par gyis/ /tshangs par spyod pa spyad nas ni/ /mtho ris dag tu 'gro bar 'gyur/ / mi khom pa dag spong 'gyur zhing / /de dag dal ba rnyed dka' min/ /tshangs par spyod pa spyad nas ni/ /sangs rgyas myur du mthong ba dang / /sangs rgyas rnams kyi bshes 'gyur te/ /de phyir 'dod pa bsten mi bya/ /'di yang nga yi lam min zhing / /'di ni sangs rgyas kyis gsungs lam/ / drang po des ni sdug bsngal dag /kun las sgrol zhing mya ngan 'da'/ /gang dag shes rab 'chal rang bzhin/ /khyim du 'dod pa nges bsten pa/ /bde bar gshegs pa'i lam spangs nas/ /de ni ngan song 'gro bar 'gyur/ /de phyir 'dod pa rnam spangs nas/ / myur du rab tu 'byung bar dong / /lam 'di drang po rnams kyi phyir/ /sangs rgyas kun gyis mngon par gsungs/ /gang zhig 'di 'dra'i mdo sde ni/ /thos nas log par rtogs 'gyur ba/ /sangs rgyas bstan pa spangs nas su/ /myur du ngan 'gror 'gro bar 'gyur/ /de ni pha dang ma yis kyang //sdug bsngal ba las sgrol mi nus/ /de phyir tshul bzhin bsams nas ni/ /myur du rab tu byung bar dong / /dri med tshul khrims bsrung byas na/ /nor 'dzin 'di dag g.yo 'gyur zhing / /dpung bcas bdud ni brdzi bar 'gyur/ /de phyir rab tu byung bar dong / /de la lha dbang brgya byin dang //gang dag lha gzhan chen po rnams/ /de kun de la phyag byed cing / /dge slong rdzu 'phrul chen por 'gyur/ /gang la so so'i skye chags pa/ /zol gyi las rnams btang byas nas/ /byang chub dam pa 'dod pa na/ /myur du rab tu byung bar dong / /dmyal bar 'bar ba'i lus kyi ni/ / sdug bsngal tshor ba de shes nas / /thar pa'i sgo dag tshol ba na/ /myur du rab tu byung bar dong / /mi gtsang khron pa'i tshogs nang du/ /shin tu gnod par byed sgo can/ /'jig rten gsum po 'phyan mthong nas/ /myur du rab tu byung bar dong / / 'jig rten zang zing tshol ba dang / /bu ni ngan song 'khrid par 'gyur//dri nga'i chung ma bsten pa yi / /rkang pa lag pa gcod par 'gyur/ /bud med dag ni rnam spang phyir/ /myur du rab tu byung bar dong / /zag dang bcas pa'i las byas nas/ /rgan po rnams la zas byin byed/ /de dag bdag la smod byed cing / /bu ni ngan song 'gro bar 'gyur//'di ni ngan 'gror 'gro 'gyur zhing / /bdag gis don min byas par 'gyur/ /rdzas ngan dag la gang brten pa/ /de dag sdig pa'i grogs zhes brjod/ /chos las log par byed gyur pa/ /de ni pha dang ma min no/ /gang dag chos mchod rjod byed cing / /sangs rgyas chos la dga' byed pa//myur du rab tu byung smra ba/ /pha ma de dag bde ba can/ /dal ba thob nas kun mkhyen gyi/ /chos ni 'di 'dra thob 'gyur te/ /las rnams thams cad btang byas te/ /myur du rab tu byung bar dong / /ji ltar ston pa thams cad mkhyen/ /'di 'dra'i zhing gzhan yod min cing / /'di 'dra'i bde ba gzhan yod min//myur du rab tu byung bar dong / /gling bzhi po dag spang byas nas/ /tshogs ni rnyed par dka' ma yin/ /nga ni myur du rab byung na/ /ji ltar gzhan lta rab mi 'byung / /sems can bsod nams byas gang la/ /'di rnyed smra bar nus par 'gyur/ /de ltar de phyir tshul bzhin du//brtags nas myur du rab byung dong / /bskal pa bye ba mang por ni/ /'di 'dra'i chos ni mi thos so/ /de phyir skyo ba drag po ni/ /skyed pas rab tu byung bar dong / /zhes gsungs so/ /drag shul can gyis zhus pa'i mdo las kyang / byang chub sems dpa' khyim na gnas te/ bla na med pa yang dag par rdzogs pa'i byang chub mngon par rdzogs par sangs rgyas pa ni/ gang yang med de/ de dag thams cad kyang khyim gyi gnas nas mngon par byung nas dgon pa la sems/ dgon pa la gzhol/ dgon par song nas/ bla na med pa yang dag par rdzogs pa'i byang chub mngon par rdzogs par sangs rgyas so//tshogs de yang dag par bsgrubs so/ /khyim na gnas pa ni kun du gnod pa ste/ rdul 'bab pa'o/ /rab tu byung ba ni sangs rgyas dang de'i nyan thos rnams kyis bsngags pa'o/ /khyim na gnas pa ni nyes pa'i skyon chags pa mang ba'o/ /rab tu byung ba ni yon tan phun sum tshogs pa mang ba'o//khyim na gnas pa ni nyam nga ba'o/ /rab tu byung ba ni bag yangs pa'o/ /khyim na gnas pa ni yongs su 'dzin pa'i dri ma can no/ /rab tu byung ba ni yongs su 'dzin pa las rnam par grol ba'o/ /khyim na gnas pa ni nyes par spyod pa'i gzhi'o/ /rab tu byung ba ni legs par spyod pa'i gzhi'o//khyim na gnas pa ni rdul gyi nang na gnas pa'o/ /rab tu byung ba ni rdul gyi nang na mi gnas pa'o/ /khyim na gnas pa ni 'dod pa'i 'dam du bying ba'o/ /rab tu byung ba ni 'dod pa'i 'dam nas 'byin pa'o/ /khyim na gnas pa ni byis pa'i skye bo'i zhugs pa'o//rab tu byung ba ni skye bo mkhas pa'i zhugs pa'o/ /khyim na gnas pa ni 'tsho ba sbyang bar dka' ba'o/ /rab tu byung ba ni 'tsho ba sbyang bar sla ba'o/ /khyim na gnas pa ni 'gran zla mang ba'o/ /rab tu byung ba ni 'gran zla med pa'o/ /khyim na gnas pa ni phongs pa mang ba'o/ /rab tu byung ba ni phongs pa med pa'o//khyim na gnas pa ni mya ngan gyi gnas so/ /rab tu byung ba ni mya ngan dang bral ba'o/ /khyim na gnas pa ni ngan song gi them skas so/ /rab tu byung ba ni mngon par mtho ba'i them skas so/ /khyim na gnas pa ni bcings pa'o/ /rab tu byung ba ni thar pa'o/ /khyim na gnas pa ni 'jigs pa dang bcas pa'o//rab tu byung ba ni 'jigs pa med pa'o/ /khyim na gnas pa ni chad pa dang bcas par spyod pa'o/ /rab tu byung ba ni chad pa med par spyod pa'o/ /khyim na gnas pa ni mtshon cha'i spyod pa dang bcas pa'o/ /rab tu byung ba ni mtshon cha mi spyod pa'o/ /khyim na gnas pa ni yongs su gdung ba dang bcas pa'o//rab tu byung ba ni yongs su gdung ba med pa'o/ /khyim na gnas pa ni kun du tshor bas sdug bsngal ba'o/ /rab tu byung ba ni kun du tshor ba med pas bde ba'o/ /khyim na gnas pa ni rgod pa'o/ /rab tu byung ba ni nye bar zhi ba'o/ /khyim na gnas pa ni 'jungs pa'o//rab tu byung ba ni ma 'jungs pa'o/ /khyim na gnas pa ni zhan pa'o/ /rab tu byung ba ni mi zhan pa'o/ /khyim na gnas pa ni ma rabs so/ /rab tu byung ba ni ya rabs so/ /khyim na gnas pa ni kun du 'bar ba'o/ /rab tu byung ba ni 'bar ba zhi ba'o/ /khyim na gnas pa ni rang gi don to//rab tu byung ba ni gnyis ka'i don to/ /khyim na gnas pa ni don chung ba'o/ /rab tu byung ba ni don che ba'o/ /khyim na gnas pa ni gzi chung ba'o/ /rab tu byung ba ni gzi che ba'o/ /khyim na gnas pa ni kun nas nyon mongs pas sdug bsngal ba'o/ /rab tu byung ba ni mngon par byung bas bde ba'o//khyim na gnas pa ni tshor ma bskyed pa'o/ /rab tu byung ba ni tshor ma bsal ba'o/ /khyim na gnas pa ni chos chung ngu dang ldan pa'o/ /rab tu byung ba ni chos chen po dang ldan pa'o/ /khyim na gnas pa ni 'dul ba ma yin pa byed pa'o/ /rab tu byung ba ni 'dul ba byed pa'o/ /khyim na gnas pa ni 'gyod pa'o//rab tu byung ba ni mi 'gyod pa'o/ /khyim na gnas pa ni mchi ma dang nu zho dang khrag gi rgya mtsho 'phel ba'o/ /rab tu byung ba ni mchi ma dang nu zho dang khrag gi rgya mtsho skem pa'o/ /khyim na gnas pa ni sangs rgyas dang rang sangs rgyas dang nyan thos kyis smad pa'o/ /rab tu byung ba ni sangs rgyas dang rang sangs rgyas dang nyan thos kyis bsngags pa'o/khyim na gnas pa ni chog mi shes pa'o/ /rab tu byung ba ni chog shes pa'o/ /khyim na gnas pa ni bdud dga' ba'o/ /rab tu byung ba ni bdud mya ngan byed pa'o/ /khyim na gnas pa ni rnyog pa chen po'i mthar thug par 'gyur ba'o/ / rab tu byung ba ni rnyog pa thams cad nye bar zhi ba'i mthar thug pa'o/ /khyim na gnas pa ni brdzi bar bya ba'o/ /rab tu byung ba ni brdzi bar mi bya'o / /khyim na gnas pa ni bran gyi las byed pa'o/ /rab tu byung ba ni rje bo byed pa'o/ /khyim na gnas pa ni 'khor ba'i mthar 'gyur ba'o/ /rab tu byung ba ni mya ngan las 'das pa'i mthar 'gyur ba'o//khyim na gnas pa ni g.yang sa'o/ /rab tu byung ba ni g.yang sa las 'das pa'o/ /khyim na gnas pa ni mun nag go/ /rab tu byung ba ni snang ba'o/ /khyim na gnas pa ni dbang po la dbang mi byed pa'o/ /rab tu byung ba ni dbang po la dbang byed pa'o/ / khyim na gnas pa ni dregs pa bskyed pa'o/ /rab tu byung ba ni dregs pa 'dul ba'o/ /khyim na gnas pa ni dam pa ma yin pa bskyed pa'o/ /rab tu byung ba ni bde 'gro bskyed pa'o/ /khyim na gnas pa ni blta bar mi 'os pa'o/ /rab tu byung ba ni blta bar 'os pa'o/ /khyim na gnas pa ni brtson pa chung pa'o//rab tu byung ba ni brtson pa che ba 'o/ /khyim na gnas pa ni 'bras bu chung ba'o/ /rab tu byung ba ni 'bras bu che ba'o/ /khyim na gnas pa ni gya gyu can no/ /rab tu byung ba ni drang ba'o/ /khyim na gnas pa ni yid mi bde ba mang ba'o/ /rab tu byung ba ni yid bde ba mang ba'o/ /khyim na gnas pa ni zug rngu dang bcas pa'o//rab tu byung ba ni zug rngu byung ba'o/ /khyim na gnas pa ni na ba'o/ /rab tu byung ba ni nad med pa'o/ /khyim na gnas pa ni chos rgas par byed pa'o/ /rab tu byung ba ni chos dar bar byed pa'o/ /khyim na gnas pa ni bag med par byed pa'o/ /rab tu byung ba ni bag yod par byed pa'o//khyim na gnas pa ni 'chal ba'i shes rab kyi 'byung gnas pa'o/ /rab tu byung ba ni shes rab 'phel ba'o/ /khyim na gnas pa ni shes rab kyi bar chad byed pa'o/ /rab tu byung ba ni shes rab kyi srog byed pa'o/ /khyim na gnas pa ni slu bar so sor nye bar gnas pa'o//rab tu byung ba ni mi slu bar so sor nye bar gnas pa'o/ /khyim na gnas pa ni byed pa mang ba'o/ /rab tu byung ba ni byed pa nyung ba'o/ /khyim na gnas pa ni dug dang bcas pa'i btung ba lta bu'o/ /rab tu byung ba ni bdud rtsi dang bcas pa'i btung ba lta bu'o/ /khyim na gnas pa ni gnod pa can no/ / rab tu byung ba ni gnod pa med pa'o/ /khyim na gnas pa ni 'dres pa'o/ /rab tu byung ba ni ma 'dres pa'o/ /khyim na gnas pa ni kim pa ka'i 'bras bu lta bu'o/ /rab tu byung ba ni bdud rtsi'i 'bras bu lta bu'o/ /khyim na gnas pa ni mi sdug pa dang phrad par byed pa'o/ /rab tu byung ba ni mi sdug pa dang bral bar byed pa'o//khyim na gnas pa ni sdug pa dang phrad par byed pa'o/ /rab tu byung ba ni sdug pa dang bral bar byed pa'o/ /khyim na gnas pa ni gti mug gis lci ba'o/ /rab tu byung ba ni ye shes kyis yang ba'o/ /khyim na gnas pa ni sbyor ba rnam par 'jig pa'o/ /rab tu byung ba ni sbyor ba rnam par sbyong ba'o//khyim na gnas pa ni bsam pa rnam par 'jig pa'o/ /rab tu byung ba ni bsam pa rnam par sbyong ba'o/ /khyim na gnas pa ni lhag pa'i bsam pa rnam par 'jog pa'o/ /rab tu byung ba ni lhag pa'i bsam pa rnam par sbyong ba'o/ /khyim na gnas pa ni dpung gnyen med par byed pa'o//rab tu byung ba ni dpung gnyen byed pa'o/ /khyim na gnas pa ni mgon med par byed pa'o/ /rab tu byung ba ni mgon byed pa'o/ /khyim na gnas pa ni gnas med par byed pa'o/ /rab tu byung ba ni gnas byed pa'o/ /khyim na gnas pa ni skyabs med par byed pa'o/ / rab tu byung ba ni skyabs byed pa'o/ /khyim na gnas pa ni gnod sems mang ba'o/ /rab tu byung ba ni byams pa mang ba'o/ /khyim na gnas pa ni khur khyer ba'o/ /rab tu byung ba ni khur bor ba'o/ /khyim na gnas pa ni thug pa med par spyod pa'o/ /rab tu byung ba ni spyod pa thams cad mthar 'byin pa'o//khyim na gnas pa ni kha na ma tho ba dang bcas pa'o/ /rab tu byung ba ni kha na ma tho ba med pa'o/ /khyim na gnas pa ni gdung bar 'gyur ba'o/ /rab tu byung ba ni gdung bar mi 'gyur ba'o/ /khyim na gnas pa ni nyon mongs pa dang bcas pa'o/ /rab tu byung ba ni nyon mongs pa med pa'o/ / khyim na gnas pa ni zang zing dang bcas pa'o/ /rab tu byung ba ni zang zing med pa'o/ /khyim na gnas pa ni mngon pa'i nga rgyal dang bcas pa'o/ /rab tu byung ba ni mngon pa'i nga rgyal med pa'o/ /khyim na gnas pa ni nor snying por byed pa'o/ /rab tu byung ba ni yon tan snying por byed pa'o/ /khyim na gnas pa ni yams kyi nad do//rab tu byung ba ni yams kyi nad zhi bar byed pa'o/ /khyim na gnas pa ni 'bri ba'o/ /rab tu byung ba ni 'phel ba'o/ /khyim na gnas pa ni rnyed par sla ba'o/ /rab tu byung ba ni bskal ba brgya stong du yang rnyed par dka' ba'o/ /khyim na gnas pa ni bya sla ba'o/ /rab tu byung ba ni bya dka' ba'o//khyim na gnas pa ni rgyun phyogs su 'gro ba'o/ /rab tu byung ba ni rgyun las bzlog ste 'gro ba'o/ /khyim na gnas pa ni chu bo'o/ /rab tu byung ba ni gzings so/ /khyim na gnas pa ni nyon mongs pa'i chu bo'o/ /rab tu byung ba ni zam pa'o/ /khyim na gnas pa ni tshu rol gyi ngogs so//rab tu byung ba ni pha rol gyi ngogs so/ /khyim na gnas pa ni glags pa'o/ /rab tu byung ba ni ma glags pa'o/ /khyim na gnas pa ni khon du 'dzin pa'o/ /rab tu byung ba ni khon du 'dzin pa zhi ba'o/ /khyim na gnas pa ni rgyal po'i nan tur bzhin byed pa'o/ /rab tu byung ba ni sangs rgyas kyi bstan pa bzhin byed pa'o//khyim na gnas pa ni nyam thag pa'o/ /rab tu byung ba ni nyam thag pa med pa'o/ /khyim na gnas pa ni sdug bsngal 'byung ba'o/ /rab tu byung ba ni bde ba 'byung ba'o/ /khyim na gnas pa ni sgang bu'o/ /rab tu byung ba ni zab pa'o/ /khyim na gnas pa ni grogs mang ba'o//rab tu byung ba ni grogs dkon pa'o/ /khyim na gnas pa ni chung ma dang 'grogs pa'o/ /rab tu byung ba ni mos pa dang 'grogs pa'o/ /khyim na gnas pa ni rgya dang 'dra ba'o/ /rab tu byung ba ni rgya bral ba'o/ /khyim na gnas pa ni gzhan la gnod pa byed pa gces su rtsi ba'o/ /rab tu byung ba ni gzhan la phan 'dogs pa gces su rtsi ba'o//khyim na gnas pa ni zang zing gi sbyin pa ched cher 'dzin pa'o/ /rab tu byung ba ni chos kyi sbyin pa ched cher 'dzin pa'o/ /khyim na gnas pa ni bdud kyi rgyal mtshan 'dzin pa'o/ /rab tu byung ba ni sangs rgyas kyi rgyal mtshan 'dzin pa'o//khyim na gnas pa ni sdug bsngal gyi gzhi'o/ /rab tu byung ba ni sdug bsngal gyi gzhi yang dag par 'joms pa'o/ /khyim na gnas pa ni phung po 'phel ba'o/ /rab tu byung ba ni phung po thams cad nges par 'dor ba'o/ /khyim na gnas pa ni thibs po'o / /rab tu byung ba ni thibs po las thar pa yin te/khyim bdag de ltar byang chub sems dpa' khyim pas rab tu byung ba la gzhol bar bya'o zhes gsungs so/ /rin po che'i tog las kyang / 'jig rten rga bas gzir gyur cing / /'chi bdag gis ni yongs bskor ba/ /de phyir gnyi ga spang ba'i phyir/ /rab tu byung ba legs par gzung / / zhes gsungs so/ /dri ma med par grags pas zhus pa'i mdo las kyang / thams cad nas kha na ma tho ba med pa 'di ni rab tu byung ba zhes bya'o zhes gsungs so/ /sbyangs pa'i yon tan gyi yo byad bsnyungs pa la dgongs pa bstan pa/ chos yang dag par sdud pa'i mdo las kyang / kha na ma tho ba med par bya ba'i phyir bsod snyoms spyod pa la 'jug go zhes gsungs so//bzhi pa brjod pa'i mdo las kyang / lha'i bu bzhi po 'di dag ni byang chub sems dpa' rnams kyi spyod tshul yin no/ /bzhi gang zhe na/ gang 'di lta ste/ khyim pa'i longs spyod dor nas rang gi longs spyod kyis chog shes pa dang /gzhan gyi nor mngon par mi 'dod pa nyid dang / rab tu byung nas 'phags pa'i rigs la dga' ba dang / sbyangs pa'i yon tan gyi yo byad bsnyungs pa nyid de/ bzhi po 'di dag go zhes gsungs so/ /sa'i snying po'i mdo las kyang / gdul bar dka' ba'i sems sreg cing / /dge slong rnams pa rtsol mi byed//'phags pa'i rigs la dag 'gyur na/ /rkang gnyis rnams kyi mchog tu 'gyur/ /sdig pa'i dge slong spong byed cing / /'phags la gus pas sten par byed/ /dge 'dun rdzas dag mi za na/ /myur du byang chub reg par 'gyur/ /zhes gsungs so/ /byang chub sems dpa'i lam gyi mdo las kyang /byang chub sems dpas bran ma yin pa dang / 'tsho ba gzhan la rag ma las pas 'tsho bar bya'o zhes gsungs so/ /rnal 'byor spyod pa nyan thos kyi sa las kyang / ji ltar na sbyangs pa'i yon tan dang ldan pa yin zhe na/ rnyed pas chog pa'i bsod snyoms pa dang /mthar gyis slong ba'i bsod snyoms pa dang / stan gcig pa dang / zas phyis mi len pa dang / chos gos gsum pa dang / phying pa pa dang / phyag dar khrod pa dang / dgon pa pa dang / shing drung pa dang / bla gab med pa dang / dur khrod pa dang / cog pu pa dang / gzhi ji bzhin pa ste/ de dag kyang bsod snyoms pa dang /chos gos dang / gnas mal las brtsams nas/ sbyangs pa'i yon tan bcu gnyis sam bcu gsum du 'gyur ro/ /de la bsod snyoms pa nyid las dbye na rnam pa gnyis te/ rnyed pas chog pa'i bsod snyoms pa dang / mthar gyis slong ba'i bsod snyoms pa'o//de la rnyed pas chog pa'i bsod snyoms pa gang zhe na/ 'di lta ste/ 'dris pa'i khyim dag nas ci thob pa dang / ci snyed pa tsam za bar byed pa'o/ /mthar gyis slong ba'i bsod snyoms pa gang zhe na/ khyim rnams su khang khyim nas khang khyim du bslangs shing brgyus te/ bsod snyoms ci thob pa dang /ci snyed pa za bar byed kyi/ bdag gis 'di nas bza' ba dang / bca' ba bzang po ci tsam 'dod pa thob par 'gyur ro snyam nas mgo 'phang bstod de/ khyim rnams su mi 'gro ba gang yin pa'o/ /de la bsod snyoms pa nyid bye brag tu ma phye ba las brtsams nas ni sbyangs pa'i yon tan bcu gnyis su 'gyur la/bye brag tu phye ba las brtsams na ni bcu gsum mo/ /de la stan gcig pa nyid gang zhe na/ stan gcig la 'dug nas ji tsam za bar byed pa de tsam za bar byed kyi/ stan de las langs nas za bar mi byed pa ste/ de ni stan gcig pa nyid ces bya'o/ / zas phyis mi len pa nyid gang zhe na/ zas kyi phyir 'dug nas ji srid du ji tsam gyis bdag 'tsho bar shes pa'i zas thams cad ma mnos pa de srid za bar mi byed cing / gang las bdag gi zas kyi bya ba de las lhag pa med do snyam du shes par gyur pa/ de'i 'og tu thams cad blangs nas za bar rtsom pa ste/de ltar na zas phyis mi len pa yin no/ /ji ltar na chos gos gsum pa yin zhe na/ chos gos gsum po snam sbyar dang / bla gos dang mthang gos kyis 'tsho bar byed cing chos gos gsum las lhag pa'i gos gzhan mi 'chang ba yin te/ de ltar na chos gos gsum pa yin no//ji ltar na phying ba pa yin zhe na/ chos gos gsum pa'am/ gos lhag pa gang cung zad cig 'chang ba de dag thams cad bal las byas pa sha stag 'chang gi gzhan ma yin pa ste/ de ltar na phying pa pa yin no/ /ji ltar na phyag dar khrod pa yin zhe na/gzhan dag gis lam po che'am/ lam srang ngam/ bzhi mdo'am/ sum mdo'am/ lam ka'am/ lam gol bar bor ba dang / spangs pa dang / btang ba'i gos bshang bas reg pa'am/ gci bas reg pa'am/ bshang gci dang / rnag dang / khrag dang / mchil mas reg pa gang yin pa de las mi gtsang ba gang yin pa de bor la/tha gi ba blangs te bkrus la/ drubs te kha dog bsgyur cing 'chang ba yin te/ de ltar na phyag dar khrod pa yin no/ /ji ltar na dgon pa pa yin zhe na/ grong dang grong rdal las dben pa'i gnas mal dgon pa dang / nags 'dab dang /bas mtha' gang dag yin pa dag tu gnas par byed pa yin te/ de ltar na dgon pa pa yin no/ /ji ltar na shing drung pa yin zhe na/ shing drung du gnas 'cha' zhing / shing drung la brten pa yin te/ de ltar na shing drung pa yin no/ /ji ltar na bla gab med pa yin zhe na/ ma bkab pa dang ma g.yogs pa'i phyogs bla gab med par gnas 'cha' bar byed pa yin te/de ltar na bla gab med pa yin no/ /ji ltar na dur khrod pa yin zhe na/ gang du skye bo'i tshogs shi'o cog 'dor ba'i dur khrod du gnas 'cha' bar byed pa yin te/ de ltar na dur khrod pa yin no/ /ji ltar na cog pu pa yin zhe na/khri'am/ khri'u'am/ rtswa bting ba'i steng du cog pur 'dug ste/ dus yol bar byed cing / khri 'am/ khri'u 'am/ rtsig pa 'am/ shing ngam/ rtswa bting ba la rgyab bam / glos mi brten pa yin te/ de ltar na cog pu pa yin no/ /ji ltar na gzhi ji bzhin pa yin zhe na/ gang du rtswa bting ba'am/ lo ma bting ba'i steng du/ mal 'cha' bar byed cing / rtswa bting ba'am/ lo ma bting ba de yang lan cig ji ltar bting ba de kho na'i steng du mal 'cha' bar byed kyi/ yang dang yang du mi rje mi 'chos pa yin te/ de ltar na gzhi ji bzhin pa yin no/ /de ci'i phyir de dag la sbyangs pa'i yon tan zhes bya zhe na/'di lta ste dper na bal lam/ shing bal ni gang gi tshe ma bstsal ma bshig ma rmel ba de'i tshe na/ 'dzings shing mi 'jam / mi yang la 'di lta ste/ skud par bkal ba'am/ 'da' bar bya ba'i las su mi rung ngo / /de bzhin du 'di na la la bsod snyoms la chags pas bsod snyoms la sems zhen cing kun du zhen pa dang /chos gos la chags pas chos gos la sems zhen cing / kun du zhen pa dang / mal stan la chags pas mal stan la sems zhen cing kun du zhen pa de sbyangs pa'i yon tan de dag gis 'di lta ste/ tshangs par spyod pa la gnas par bya ba'i phyir/sems rnam par spyod bar byed/ drang por byed/ mnyen par byed/ las su rung bar byed/ rnal bar byed/ btub par byed/ rung bar byed pas na/ de'i phyir sbyangs pa'i yon tan zhes bya'o/ /de la bsod snyoms la chags pa ni bar chad rnam pa gnyis yin te/ zas bzang po la chags pa dang /zas mang po la chags pa'o/ /de'i phyir zas bzang po la chags pa spang ba'i phyir bsod snyoms pa yin no/ /zas mang po la chags pa spang ba'i phyir stan gcig pa dang / zas phyis mi len pa yin no/ /de la chos gos la chags pa ni bar chad rnam pa gsum yin te/ chos gos mang po la chags pa dang /'jam zhing reg na bde ba la chags pa dang / bzang po la chags pa'o/ /de la chos gos mang po la chags pa spang ba'i phyir chos gos gsum pa yin no/ /chos gos 'jam zhing reg na bde ba la chags pa spang ba'i phyir phying ba pa yin no/ /chos gos bzang po la chags pa spang ba'i phyir/phyag dar khrod pa yin no/ /mal stan la chags pa ni bar chad rnam pa bzhi yin te/ 'di lta ste/ 'du 'dzi la chags pa dang / gnas la chags pa dang / glos 'bebs pa'i bde ba dang / nyal ba'i bde ba la chags pa dang / stan dang / gding ba dang / dgab pa la chags pa'o/de la 'du 'dzi la chags pa spang ba'i phyir dgon pa pa yin no/ /gnas la chags pa spang ba'i phyir/ shing drung pa dang / bla gab med pa dang / dur khrod pa yin no/ /dur khrod pa ni 'khrig pa la chags pa spang ba'i phyir yang yin no/ /glos 'bebs pa'i bde ba dang /gnyid kyi bde ba la chags pa spang ba'i phyir cog bu pa yin no/ /stan dang / gding ba dang / dgab pa la chags pa spang ba'i phyir gzhi ji bzhin pa yin te/ de ltar na sbyangs pa'i yon tan dang ldan pa yin no zhes gsungs so/ /rab tu rnam par 'byed pa'i mdo las kyang / sha ra dwa ti'i bu khyod mos par bya/khyod kyis khong du chud par bya'o/ /dgos pa don du gnyer ba'i rigs kyi bu rnams kyis tshogs gnas pa de'i nang du 'jug par mi bya ste/ dgra bcom pa nyon mongs pa med pa'am/ nad pa'am/ mkhan po'am/ slob dpon gyi rjes su 'jug pa ni ma gtogs so zhes gsungs so//rab tu zhi ba rnam par nges pa cho 'phrul gyi ting nge 'dzin las kyang / bzang skyong 'di lta ste/ skyes pa'am/ bud med dam/ srog chags kyi rigs gzhan gang yang rung ba 'ga' zhig mes tshig par gyur cing / 'chi ba'i dus byas par ma gyur la/ tshig bzhin pa'am tshig par gyur pa zhig bsil ba nyid tshol bar 'gyur ro//tshol ba na so sor bsten pa ma gtogs par sgras bsel bar mi 'gyur ro/ /bzang skyong de bzhin du byang chub sems dpa' 'jig rten la sdug bsngal gyis skyo ba yang dben pa nyid yongs su tshol la/ de der gnas pa des bde ba nyid du 'gyur ro/ /de bzhin du dgon par gnas pa la dga' bar 'gyur ro//de ltar 'dod pa med pa na chos gos 'tshol ba'i rgyus/ grong ngam grong khyer ram/ ljongs sam gang yang rung bar zhugs nas skyes pa'am/ bud med la chos gos ci'i don du gsol ba 'debs par 'gyur te/ de ni gnas med de / de chos dang po 'di dang ldan zhing tshul khrims srung bar byed do/ /bzang skyong gzhan yang byang chub sems dpa' bsod snyoms spyod par 'gyur/ chos gos gsum 'chang ba sbyangs pa'i yon tan thams cad dang ldan zhing / sbyangs ba'i yon tan bcu gnyis yang dag par spyod par 'gyur ro//de chos 'di gnyis dang ldan zhing tshul khrims yongs su sbyong bar byed do zhes gsungs so/ /drag shul can gyis zhus pa'i mdo las kyang / khyim bdag 'di la byang chub sems dpa' rab tu byung bas/ 'di ltar bdag su'i ched la/ khyim nas khyim ma yin par rab tu gyur snyam du gzhal bar bya ste/des mgo dang gos la me 'bar ba bzhin du/ ye shes yongs su btsal ba la brtson 'grus brtsam par bya'o/ /de lta de ltar yongs su 'jal bas / thog ma nyid du 'phags pa'i rigs bzhi po dag la rab tu gnas shing / sbyangs pa'i yon tan dang / yo byad bsnyungs pa la mngon par dga' bar bya'o//khyim bdag ji ltar na/ byang chub sems dpa' rab tu byung ba 'phags pa'i rigs bzhi po dag la rab tu gnas pa yin zhe na/ khyim bdag 'di la byang chub sems dpa' rab tu byung ba ni/ chos gos ngan ngon gyis chog par 'dzin pa yin chos gos ngan ngon gyis chog par 'dzin pa'i bsngags pa yang rjod pa yin te/de chos gos kyi phyir tshul dang mi 'dra bas tshol bar mi byed do/ /chos gos ma rnyed na yang / yi mi 'chad cing yongs su gdung ba med do/ /chos gos rnyed na yang chags pa med/ rmongs pa med/ dga' ba med/ zhen pa med cing / zhen par mi 'gyur te/nyes dmigs mthong la 'byung ba rab tu shes nas/ chags pa med par spyod de/ chos gos ngan ngon gyis chog par 'dzin pa de bdag la mi stong cing gzhan la mi smod do/ /khyim bdag gzhan yang byang chub sems dpa' rab tu byung ba ni bsod snyoms ngan ngon gyis chog par 'dzin pa yin/bsod snyoms ngan ngon gyis chog par 'dzin pa'i bsngags pa yang rjod pa yin te/ de bsod snyoms kyi phyir tshul dang mi 'dra bas tshol bar mi byed do/ /bsod snyoms ma rnyed na yang yi mi 'chad cing / yongs su gdung ba med do/ /bsod snyoms rnyed na yang chags pa med/ rmongs pa med/ dga' ba med/ zhen pa med cing / zhen par mi 'gyur te/ nyes dmigs mthong la 'byung ba rab tu shes nas/ chags pa med par spyod de/ bsod snyoms ngan ngon gyis chog par 'dzin pa de/ bdag la mi stod cing gzhan la mi smod do/ /khyim bdag gzhan yang byang chub sems dpa' rab tu byung ba ni mal cha ngan ngon gyis chog par 'dzin pa yin/mal cha ngan ngon gyis chog par 'dzin pa'i bsngags pa yang rjod pa yin te/ de mal cha'i phyir tshul dang mi 'dra bas tshol bar mi byed do/ /mal cha ma rnyed na yang yi mi 'chad cing / yongs su gdung ba med do//mal cha rnyed na yang chags pa med/ rmongs pa med/ dga' ba med/ zhen pa med cing zhen par mi 'gyur te/ nyes dmigs mthong la/ 'byung ba rab tu shes nas chags pa med par spyod de/ mal cha ngan ngon gyis chog par 'dzin pa de bdag la mi stod cing gzhan la mi smod do//khyim bdag gzhan yang byang chub sems dpa' rab tu byung ba ni na ba'i gsos sman dang / yo byad ngan ngon gyis chog par 'dzin pa yin/ na ba'i gsos sman dang / yo byad ngan ngon gyis chog par 'dzin pa'i bsngags pa yang rjod pa yin te/ de na pa'i gsos sman dang / yo byad kyi phyir tshul dang mi 'dra bas tshol bar mi byed do//na ba'i gsos sman dang / yo byad ma rnyed na yang yi mi 'chad cing yongs su gdung ba med do/ /na ba'i gsos sman dang / yo byad rnyed na yang chags pa med/ rmongs pa med/ dga' ba med/ zhen pa med cing zhen par mi 'gyur te/ nyes dmigs mthong la/'byung ba rab tu shes nas chags pa med par spyod de/ na ba'i gsos sman dang / yo byad ngan ngon gyis chog par 'dzin pa de bdag la mi stod cing gzhan la mi smod do/ /spong ba la dga' ba yin te/ spong ba la mos shing / spong ba la dga' ba'i sbyor ba la brtson no/ /de sdig pa mi dge ba'i chos rnams spangs pas/dga' bar 'gyur te/ ma spangs pas ni ma yin no/ /de sgom pa la dga' ba yin te/ sgom pa la dga' ba'i sbyor ba la brtson no/ /dge ba'i chos bsgoms pas dga' bar 'gyur te/ ma bsgoms pas ni ma yin no/ /spong ba la dga' ba/ spong ba la mos pa/ spong ba la dga' ba'i sbyor ba la brtson pa/ sgom pa la dga' ba/ sgom pa la mos pa/ sgom pa la dga' ba'i sbyor ba la brtson pa de/ bdag la mi stod cing gzhan la mi smod do/ /khyim bdag de ltar na byang chub sems dpa' rab tu byung ba 'phags pa'i rigs bzhi po dag la gnas pa yin no zhes gsungs so//snying rje chen po la 'jug pa'i mdo las kyang / gzhon nu byang chub sems dpa' sems dpa' chen po bsod snyoms spyod pa sbyangs ba'i yon tan yo byad bsnyungs pa la gnas pa'i phan yon ni 'di bcu ste/ bcu gang zhe na/ 'di lta ste/ de shes kyi khe 'dod pa ma yin pa dang / de snyan pa 'dod pa ma yin pa dang / de rnyed pa dang bkur sti 'dod pa ma yin pa dang / de 'phags pa'i rigs bzhi la gnas pa dang / de tshul 'chos pa dang / /kha gsag med par 'gyur ba dang / bdag la mi stod gzhan la mi smod pa dang / de rjes su chags pa dang / de khong khro ba spangs pas gzhan gyi khyim du spyod pa dang /zang zing med par chos kyi sbyin pa sbyin par byed pa dang / de sbyangs pa'i yon tan yo byad bsnyungs pa la gnas shing chos bstan pa gzung bar 'gyur ba yin te/ gzhon nu bcu po 'di dag ni byang chub sems dpa' sems dpa' chen po bsod snyoms spyod pa sbyangs pa'i yon tan yo byad bsnyungs pa la gnas pa'i phan yon no zhes gsungs so//yang mdo de nyid las/ byams pa la yang gnas pa bde ba yin/ /snyan pa'i phreng ba phyogs bzhir rab tu mchod/ /rtag tu chog shes 'dod pa nyung bar 'gyur/ /dgon par gnas shing sbyangs pa'i yon tan brtson/ / bsod snyoms len pa dag kyang mi gtong ste/ sbyangs pa la yang yi dam brtan par 'gyur/ /rtag tu dang bar bcas shing dad par 'gyur/ /khor mor sangs rgyas bstan la dad pa mang / /dad pa mang ba'i phan yon 'di lags te/ /byad bzhin bzang zhing dbang po ma nyams 'gyur/ /yang dag 'chad pa de la bdag gnas te//bdag ni rtag tu nan tan snying por bgyid/ /nan tan snying por bgyid pa lha klu yang / /rab tu dang ba'i sems kyis ri mo bgyid/ /ces gsungs so/ /gcig las 'phros pa'i mdo las kyang / bsod snyoms pa lnga ste/ lnga gang zhe na/ bsod snyoms pa smyon pa dang /bsod snyoms pa g.yengs pa dang / bsod snyoms pa 'dod chen po dang / bsod snyoms pa mngon pa'i nga rgyal can dang / yang dag pa'i bsod snyoms pa ste/ 'di dag ni bsod snyoms pa lnga'o/ /gzhan yang bsod snyoms pa bdun dag ste/ mthar phyin pa'i bsod snyoms pa dang /mthar phyin pa'i rjes su 'gro ba'i bsod snyoms pa dang / nges pa'i bsod snyoms pa dang / ma nges pa'i bsod snyoms pa dang / dus ma yin par spyod pa'i bsod snyoms pa dang / mgo mnyam pa'i bsod snyoms pa dang / ya ba nar btags pa'i bsod snyoms pa'o zhes gsungs so//'dul ba las kyang / ci zhig bkag pa las sbyangs pa'i yon tan dgon pa pa nyid yang dag par len par 'gyur zhe na/ bshad pa/ grong gi mtha' dgag pa'i phyir dgon pa pa nyid yang dag par len pa yin no/ /de la dgon pa pa nyid ni rnam pa gsum ste/chen po dang 'bring dang chung ngu'o/ /dgon pa pa chen po nyid gang zhe na/ rdul phra rab bdun la rdul lo/ /rdul bdun la sro ma'o/ /sro ma bdun la shig go/ /shig bdun la nas so/ /nas bdun la sor tshigs so/ /sor tshigs bcu gnyis la mtho'o/ /mtho gnyis la khru'o//khru bzhi la gzhu 'dom mo/ /gzhu 'dom lnga la srog shing ngo / /srog shing nyi shu la ngal so'o/ /ngal so brgyad cu la rgyang grags so/ /gzhu 'dom stong phrag brgyad po de na gnas pa ni dgon pa pa chen po'o/ /dgon pa pa 'bring ni gang zhe na/ bshad pa/ gzhu 'dom stong phrag ste khru bzhi stong na gnas pa'o//dgon pa pa chung ngu gang zhe na/ gzhu 'dom lnga brgyar bgrangs pa ste/ khru stong phrag gnyis su 'gyur ba na gnas pa'o/ /rgyu cis dgon pa pa yin na lam gyi tshad kyis sam rnam pas yin zhe na/ bshad pa/ lam gyi tshad kyis dgon pa par rab tu shes kyi/ rnam pas ni ma yin no//grong mtha' pa yin la dgon pa pa ma yin pa yang yod/ dgon pa pa yin la grong mtha' pa ma yin pa yang yod/ dgon pa pa yin la grong mtha' pa yin pa yang yod/ dgon pa pa ma yin la grong mtha' pa ma yin pa yang yod do/ /de la grong mtha' pa ma yin la dgon pa pa ma yin pa gang zhe na/dgon pa na yang gnas la grong la rtog pa rnam par rtog par byed cing / nges par 'byung ba la rtog par mi byed pa ste/ 'di ni grong mtha' ba yin la dgon pa pa ma yin pa zhes bya'o/ /dgon pa pa yin la grong mtha' pa ma yin pa gang zhe na/ grong mthar yang gnas la/ sems kyis dben pa la gzhol/ dben pa la 'bab/ dben pa la bab pa/ bsrings pa/ nges par 'byung ba la dga' ba ste/ 'di ni dgon pa yin la grong mtha' pa ma yin pa zhes bya'o/ /dgon pa pa yang yin la grong mtha' yang yin pa gang zhe na/ nyon mongs pa rnams dang ma 'dres pa ste/ 'di ni dgon pa pa yang yin la grong mtha' pa yang yin pa zhes bya'o/ /dgon pa pa yang ma yin la grong mtha' pa yang ma yin pa gang zhe na/ bzlog pa ste/ 'di ni dgon pa pa yang ma yin la grong mtha' pa yang ma yin pa zhes bya'o/ /dgon pa na gnas shing / gzhan yang dge 'dun gyi bya ba dag dang /nad pa'i bya ba dag gi ched dam/ chos nyan pa'i dbang du byas nas grong mthar 'jug par 'gyur ba na / 'di ltar gdon mi za bar dgon par 'gro bar bya'o snyam du sems skyed par byed cing / der gnas pa la skya rengs shar ba na yang sbyangs pa'i yan lag 'khrug par mi 'gyur ro/ /ci ste yang dgon par 'gro bar mi bya'o snyam du sems skyed par byed na/skya rengs shar ba dang lhan cig sbyangs pa'i yan lag 'khrug par 'gyur ro/ /ci zhig bkag pa las sbyangs pa'i yan lag bsod snyoms pa nyid yang dag par len pa yin zhe na/ bshad pa dge 'dun gyi rnyed pa dgag pa'i phyir sbyangs pa'i yon tan bsod snyoms pa nyid yang dag par len pa yin no de la bsod snyoms pa nyid ni rnam pa gsum ste/chung ngu dang 'bring dang chen po'o/ /bsod snyoms ba chung ngu gang zhe na/ zas lnga po rnams las/ gang yang rung ba mgron du gnyer ba'i zas mi len pa ste/ 'di ni bsod snyoms pa chung ngu'o//bsod snyoms pa 'di nyid gang zhe na/ zas lnga po dag las mgron du gnyer ba mi len cing / slong mos mgron du gnyer ba yang mi len la/ sa phyogs ga ge mo zhes bya ba dang grong ga ge mo zhes bya bar shog shig ces brda byed pa ste/ 'di ni bsod snyoms pa 'bring nyid do/ /bsod snyoms pa chen po gang zhe na/zas lnga po dag las gang yang rung ba la mgron du gnyer ba'i zas mi len/ slong mos mgron du gnyer ba yang mi len/ brda byas par yang mi 'gro zhing / khyim gyi sgor gnas pa nyid kyis bsod snyoms len pa ste/ 'di ni bsod snyoms pa chen po'o/ /ci zhig bkag pa las sbyangs pa'i yan lag phyag dar khrod pa nyid yang dag par len pa yin zhe na/khyim bdag gi gos dgag pa'i phyir sbyangs pa'i yan lag phyag dar khrod pa nyid yang dag par len pa yin no/ /de la phyag dar khrod pa ni rnam pa gsum ste/ chung ngu dang 'bring dang chen po'o//phyag dar khrod pa chung ngu gang zhe na/ byi bas zos pa dang grog mas zos pa dang rnam par tshig pa dang / dum bur bcad nas hral te ched du byas nas bor ba de len pa ste 'di ni phyag dar khrod pa chung ngu'o/ /phyag dar khrod pa 'bring nyid gang zhe na/ ched du byas nas bor ba mi len cing / gang sngar byas pa ma nges par bor ba de len pa ste/'di ni phyag dar khrod pa 'bring nyid do/ /phyag dar khrod pa chen po gang zhe na/ byi bas zos pa la hral te ched du byas nas bor ba'i bar du len cing / dur khrod dang phyag dar khrod dang lam du lhung ba rnyed nas len pa ste/ 'di ni phyag dar khrod pa chen po'o/ / ci zhig bkag pa las sbyangs pa'i yan lag zas phyis mi len pa nyid yang dag par len pa yin zhe na/ bshad pa/ zas lhag pa dgag pa'i phyir sbyangs pa'i yan lag zas phyis mi len pa nyid yang dag par len pa yin no/ /de la zas phyis mi len pa ni rnam pa gsum ste/ chung ngu dang 'bring dang chen po'o//zas phyis mi len pa chung ngu gang zhe na/ stan ma bor ba bzhin du zos nas kyang ma bkrus par za ba ste/ 'di ni zas phyis mi len pa chung ngu'o/ /zas phyis mi len pa 'bring nyid gang zhe na/ gang zhig za bzhin du bstabs pa lhag ma med par za ba de ni zas phyis mi len pa 'bring po nyid do//zas phyis mi len pa chen po gang zhe na/ za bzhin du mi len cing / zos nas kyang mi len pa ste / 'di ni zas phyis mi len pa chen po'o/ /ci zhig bkag pa las sbyangs pa'i yan lag stan gcig pa nyid yang dag par len pa yin zhe na/ bshad pa/ stan tha dad la za ba dgag pa'i phyir/sbyangs pa'i yan lag stan gcig pa nyid yang dag par len pa yin no/ /de la stan gcig pa ni rnam pa gsum ste/ chung ngu dang 'bring dang chen po'o/ /stan gcig pa chung ngu gang zhe na/ stan ma spangs par dus ji srid kyi bar du za ba ste/ 'di ni stan gcig pa chung ngu'o/ stan gcig pa 'bring nyid gang zhe na/ zos nas kyang zas bsod pa rnyed pa len pa ste/ 'di ni stan gcig pa 'bring nyid do/ /stan gcig pa chen po gang zhe na/ gang zhig za bzhin pa dang zos nas zas rnyed kyang mi za bar sngar bslangs ba zos nas 'gro ba ste/ 'di ni stan gcig pa chen po'o/ / ci zhig bkag pa las sbyangs pa'i yan lag lhung bzed kyi bsod snyoms pa nyid yang dag par len pa yin zhe na/ bshad pa/ snod gzhan dgag pa'i phyir sbyangs pa'i yan lag lhung bzed kyi bsod snyoms pa nyid yang dag par len pa yin no/ /de la lhung bzed kyi bsod snyoms pa nyid ni rnam pa gsum ste/chung ngu dang 'bring dang chen po'o/ /lhung bzed kyi bsod snyoms pa chung ngu gang zhe na/ gang zhig lag pa gnyis kyis bcad nas bza' bar nus pa ste/ 'di ni lhung bzed kyi bsod snyoms pa chung ngu'o/ /lhung bzed kyi bsod snyoms pa 'bring nyid gang zhe na/ gang zhig lag pa gcig gis bcad nas za bar nus pa ste/'di ni lhung bzed kyi bsod snyoms pa 'bring du 'dod do/ /lhung bzed kyi bsod snyoms pa chen po gang zhe na/ lag pa gcig gis bcad nas ma yin/ khas bcad nas ma yin/ 'jig par mi byed 'jig tu 'jug par mi byed cing / gang bshig nas rnyed pa za ba ste/'di ni lhung bzed kyi bsod snyoms pa chen po'o/ /ci zhig bkag pa las sbyangs pa'i yan lag mthar gyis slong ba'i bsod snyoms pa yang dag par len pa yin zhe na/ bshad pa/ mthon po'i khyim dgag pa'i phyir sbyangs pa'i yan lag mthar gyis slong ba'i bsod snyoms pa yang dag par len pa yin no//de la mthar gyis slong ba'i bsod snyoms pa ni rnam pa gsum ste/ chung ngu dang 'bring dang chen po'o/ /mthar gyis slong ba'i bsod snyoms pa chung ngu gang zhe na/ gang zhig grong du bsod snyoms la phyin pa na kun dga' bar gnas pas rnyed pa ste/ 'di ni mthar gyis slong ba'i bsod snyoms pa chung ngu'o//mthar gyis slong ba'i bsod snyoms pa 'bring nyid gang zhe na/ bsod snyoms la 'gro ba na kun dga' ra ba na gnas pas mi len cing bar gyi lam du rnyed pa len pa ste/ 'di ni mthar gyis slong ba'i bsod snyoms pa 'bring nyid do/ /mthar gyis slong ba'i bsod snyoms pa chen po gang zhe na/kun dga' ra bar gnas nas kyang mi len cing bar gyi lam du yang mi len pa/ grong ngam grong gi nye 'khor du rnyed pa len pa ste/ 'di ni mthar gyis slong ba'i bsod snyoms pa chen po'o/ /ci zhig bkag pa las sbyangs pa'i yan lag dur khrod pa nyid yang dag par len pa yin zhe na/bshad pa/ dge 'dun gyi kun dga' ra ba dgag pa'i phyir/ sbyangs pa'i yan lag dur khrod pa nyid yang dag par len pa yin no/ /de la dur khrod pa rnam pa gsum ste/ chung ngu dang 'bring dang chen po'o/ /dur khrod pa chung ngu gang zhe na/ gang sngon dur khrod du gyur nas phyis dur khrod ma yin par gyur pa der gnas pa ste/'di ni dur khrod pa chung ngu'o/ /dur khrod pa 'bring nyid gang zhe na/ gang du ro nyung ba bskyal bar gyur pa der gnas pa ste/ de ni dur khrod pa 'bring nyid do/ /dur khrod pa chen po gang zhe na/ gang dur khrod chen por gnas pa 'di ni dur khrod pa chen po ste/dper na btsun pa gzhon nu'i rtogs pa brjod pa bzhin no/ /sing g+ha la'i gling du lo drug cu dur khrod na gnas pa na/ btsun pa 'di ni dur khrod pa zhig go zhes sus kyang ma shes so/ /lo drug cu 'das pa na dur khrod chen po der gnod sbyin chen po mdangs 'phrog pa rnams 'dus par gyur la/ btsun pa de yang dur khrod du dong bar gyur to/ /gang dur khrod de na dur khrod na rgyun du gnas pa'i gnod sbyin de mi'i cha byad kyis lam gyi dbus na btsun pa'i mdun du 'dug ste 'di skad ces smras so/ /btsun pa gang du 'gro/ /des smras pa/ gcig pu dur khrod du 'gro'o/ /des 'di skad du smras pa/ btsun pa ma 'gro shig /des smras pa/ gdon mi za bar 'gro'o/ /des smras pa/ btsun pa ma 'gro shig /dur khrod der 'byung po chen po rnams 'dus par gyur la/ btsun pa la rnam par 'tshe ba skyed par 'gyur ro/ /des smras pa/ ci nas kyang 'gro bar bya'o/ /des smras pa/ nga su yin pa ma shes sam/ smras pa ma shes so/ /smras pa/ nga ni dur khrod na rgyun du gnas pa'i gnod sbyin no/ /gal te slar log par mi byed na ni grong khyer 'di'i mi rnams la gzhon nu lo drug cu dur khrod du gnas pa na khyed 'gas kyang ma shes zhes bya bar smra'o/ /des smras pa/ gnod sbyin sdig pa khyod mi rnams la ma smra shig /nga phyir mi ldog par bya'o zhes gnas brtan gzhon nu lo drug cu lon pa na sbyangs pa'i yan lag 'khrug par mi byed cing 'dod pa chung bar gyur to/ /ci zhig bkag pa las sbyangs pa'i yan lag bla gab med pa nyid yang dag par len pa yin zhe na/ bshad pa/ g.yogs pa spangs pa'i phyir sbyangs pa'i yan lag bla gab med pa nyid yang dag par len pa yin no//de la bla gab med pa ni rnam pa gsum ste/ chung ngu dang 'bring dang chen po'o/ /bla gab med pa chung ngu gang zhe na/ ngos gsum g.yogs la ngos gcig ma g.yogs pa ste/ 'di ni bla gab med pa chung ngu'o/ /bla gab med pa 'bring nyid gang zhe na/ngos gcig g.yogs la ngos gsum ma g.yogs pa ste/ 'di ni bla gab med pa 'bring nyid do/ /bla gab med pa chen po gang zhe na/ ngos bzhi po thams cad ma g.yogs pa ste/ 'di ni bla gab med pa chen po'o/ /ci zhig bkag pa las sbyangs pa'i yan lag shing drung pa nyid yang dag par len pa yin zhe na/bshad pa/ gtsug lag khang spang ba'i phyir sbyangs pa'i yan lag shing drung pa nyid yang dag par len pa yin no/ /de la shing drung pa ni rnam pa gsum ste/ chung ngu dang 'bring dang chen po'o/ /shing drung pa chung ngu gang zhe na/ gang ngos bzhi po thams cad nas bsgribs pa ste/'di ni shing drung pa chung ngu'o/ /shing drung pa 'bring nyid gang zhe na/ cung zad kyang mi sgrib par sbyong ba dang / 'chag pa dang / rab tu 'dus byas pa ste 'di ni shing drung pa 'bring nyid do/ /shing drung pa chen po gang zhe na/ mi sgrib la rab tu 'dus mi byed cing mngon par ma zhen pas gnas pa ste/'di ni shing drung pa chen po'o/ /ci zhig bkag pa las sbyangs pa'i yan lag cog pu pa nyid yan dag par len pa yin zhe na/ bshad pa/ ma la cha dang stan la 'dug pa spang ba'i phyir/ sbyangs pa'i yan lag cog pu pa nyid yang dag par len pa yin no//de la cog pu pa nyid ni rnam pa gsum ste/ chung ngu dang 'bring dang chen po'o/ /cog pu pa chung ngu ni ngos gnyis su snyes par byed pa ste/ 'di ni cog pu pa chung ngu'o/ /cog pu pa 'bring nyid gang zhe na/ ngos gcig tu snyes par byed pa ste/ 'di ni cog pu pa 'bring nyid do//cog pu pa chen po gang zhe na/ ngos thams cad du mi snyes pa ste/ 'di ni cog pu pa chen po'o/ /ci zhig bkag pa las sbyangs pa'i yan lag gzhi ji bzhin pa nyid yang dag par len pa yin zhe na/ bshad pa/ gnas mal la brkam pa spang ba'i phyir sbyangs pa'i yan lag gzhi ji bzhin pa nyid yang dag par len pa yin no//de la gzhi ji bzhin pa ni rnam pa gsum ste/ chung ngu dang 'bring dang chen po'o/ /gzhi ji bzhin pa chung ngu gang zhe na/ gang zhig mal cha lan gsum gyi bar du yang len cing / lan bzhir mi len pa ste/ 'di ni gzhi ji bzhin pa chung ngu'o//gzhi ji bzhin pa 'bring nyid gang zhe na/ lan gcig la mi len pa / lan gnyis la mi len pa ste/ 'di ni gzhi ji bzhin pa 'bring nyid do/ /gzhi ji bzhin pa chen po gang zhe na/ gang zhig ji ltar bstan pa bzhin len par byed cing mi khyer ba ste/ 'di ni gzhi ji bzhin pa chen po'o/ /ci zhig bkag pa las sbyangs pa'i yan lag chos gos gsum pa nyid yang dag par len pa yin zhe na//bshad pa/ chos gos lhag pa spang pa'i phyir sbyangs pa'i yan lag chos gos gsum pa yang dag par len pa yin no/ /de la chos gos gsum pa ni rnam pa gsum ste/chung ngu dang 'bring dang chen po'o/ /chos gos gsum pa chung ngu gang zhe na/ chos gos gsum las lhag pa/ dbyar gyi gos ras chen dang g.yan pa dgab pa dang mchis stan dang gding ba 'chang ba ste/ 'di ni chos gos gsum pa chung ngu'o/ /chos gos gsum pa 'bring nyid gang zhe na/chos gos gsum 'chang bar byed cing dbyar gyi gos ras chen nas gding ba'i bar bdag nyid kyis 'chang bar mi byed la gzhan gyis longs spyod pa 'chang ba ste/ 'di ni chos gos gsum pa 'bring nyid do/ /chos gos gsum pa chen po gang zhe na/ chos gos gsum pa las phyi rol du gyur pa mi 'chang ba ste/'di ni chos gos gsum pa chen po'o/ /sbyangs pa'i yan lag bcu gsum bstan pa rdzogs so// // phyag dar khrod dang cog pu pa/ /phyis mi len dang phying pa pa/ /chos gos gsum pa shing drung pa/ /stan gcig pa dang ji bzhin pa / /dur khrod pa dang bla gab med//dgon pa pa dang bsod snyoms te/ /thub pa zhi ba'i thugs mnga' bas/ /sbyangs pa bcu gnyis 'di dag gsungs/ /de la phyag dar khrod pa nyid ni yang dag par blangs pa sngon du 'gro bas/ ras ma bor ba 'chang ba'o/ /cog pu pa nyid gang zhe na/ yang dag par blangs pa sngon du 'gro bas/glos mi 'bebs par cog pus mtshan mo 'da' bar byed pa'o/ /zas phyis mi len pa nyid ni/ yang dag par blangs pa sngon du 'gro bas/ zos pa bstabs kyang mi za zhing / dus ma yin pa'i btung ba mi 'thung ba'o/ /phying pa pa nyid ni yang dag par blangs pa sngon du 'gro bas phying pa'i gos 'chang ba'o//chos gos gsum pa nyid ni/ yang dag par blangs pa sngon du 'gro bas/ chos gos gsum tsam 'chang gi lhag pa mi 'chang ba'o/ /shing drung pa nyid ni/ shing drung la dga' bas yang dag par blangs pa sngon du 'gro bas shing drung du gnas kyi/ bskyor bar mi 'jug pa'o/ / stan gcig pa nyid ni/ yang dag par blangs pa sngon du 'gro bas/ stan gnyis pa la mi za ba'o / /gzhi ji bzhin pa nyid ni/ yang dag par blangs pa sngon du 'gro bas/ ji ltar thob pa'i gnas mal la sogs pa longs spyod pa'o/ /dur khrod pa nyid ni/ yang dag par blangs pa sngon du 'gro bas/ dur khrod nyid du gnas pa'o/ /bla gab med pa nyid ni/ yang dag par blangs pa sngon du 'gro bas/ g.yogs pa'am shing drung du mi 'jug pa'o/ /dgon pa pa nyid ni/ yang dag par blangs pa sngon du 'gro bas/ mi mi rgyu ba'i yul du ri dgas dang bya bzhin gnas pa ste/ gang yang rung bar nyal ba'o/ / bsod snyoms pa nyid ni/ yang dag par blangs pa sngon du 'gro bas/ bsod snyoms mang ba'am nyung ba len pa dang / mnyam pa'i sems nyid kyis dge 'dun gyi zas la mi ltos pa'o/ /phyag dar khrod pa nyid la yon tan bcu ste/ chos gos kyi don du khyim pa rnams dang mi 'dris pa dang / mi slong ba dang /gos kyi rgyus yongs su mi gtam pa dang / kun nas yongs su mi tshol ba dang / ma rnyed pas mi khro ba dang / rnyed pas dga' ba med pa dang / nyung ba dang rnyed sla ba dang / kha na ma tho ba med pa khas len pa dang / gnas na rjes su mthun par 'jug par 'gyur ba dang / chos gos rtsub par bgo ba dang /gzhan gyis glags mi tshol ba'o/ /stan gcig pa nyid la yon tan bcu ste/ zas gnyis pa tshol bas mi gnod pa dang / byin len gyis mi gnod pa dang / yongs su longs spyod pas mi gnod pa dang / snga dro'i dus shes pa dang / zas bsnyungs pa dang /zos pa 'ju ba dang / gnod pa chung ba dang / zo mdog bde ba dang / ldang ba yang ba dang / bde bar gnas pa'o/ /cog bu pa nyid la yon tan bcu ste/ lus kyi bde ba la chags pa med pa dang / gnyid kyi bde ba la chags pa med pa dang / ngos su mi ltung ba dang / lus la ser sna med pa dang /bde bar sems pa dang / rmi lam nyung ba nyid dang / ldang ba yang ba nyid dang / mal stan 'chos pa dang / gyon pa dang / mal stan tshol ba nyung ba'o/ /zas phyis mi len pa nyid la yon tan bcu ste/ zas ran pa dang / zas lhag pa ma yin pa dang / mi brkam pa dang / tshol ba nyung ba dang / dgang sla ba dang / gso sla ba dang / chog shes pa dang / bsam gtan dang / klog pa la mi gnod pa'o/ /chos gos gsum pa nyid la yon tan bcu ste/ chos gos gsum las lhag pa tshol ba dang / 'dzin pa dang / 'bad pa la mi spro ba dang / yongs su bsrung ba la spro ba med pa dang /yo byad nyung ba nyid dang / lus dgab pa tsam gyi gos kyis chog shes pa dang / yo byad bsnyungs pas 'tsho ba dang / ldang ba yang ba nyid dang / lus yang ba nyid dang / dgon par gnas pa la rjes su mthun par 'gyur ba dang / gang yang rung bar gnas pa dang / ltos pa med pas rnal 'byor gyi rjes su mthun par 'jug pa'o//phying ba pa nyid la yon tan bcu ste/ chos gos rtsub par bgo ba dang / tshol ba nyung ba dang / gang yang rung bar gnas pa dang / 'khru ba na gnod pa nyung ba dang / kha bsgyur ba na gnod pa nyung ba dang / srog chags nyung ba dang / yun ring po na 'dzad pa dang / chos gos gzhan mi 'dzin pa dang / rnal 'byor brtson pa la gegs med pa'o/ /gzhi ji bzhin pa nyid la yon tan bcu ste/ gtsug lag khang gi longs spyod mchog la mngon par mi brtson pa dang / mal stan mchog 'dzin pa dang longs spyod pa la mi brtson pa dang / rgan po rnams la gnod pa med pa dang /gzhon nu rnams la khro bar byed pa med pa dang / don nyung ba dang / bya ba nyung ba dang / ji ltar thob pa bzhin yongs su longs spyod pa nyid dang / dgos pa nyung ba la chags pa chung ba dang / rtsod pa'i gzhi mi ldang ba nyid dang / gzhan gyi longs spyod la 'dod pa med pa'o/ /shing drung pa nyid la yon tan bcu ste/gnas gtsug lag khang yongs su tshol ba med pa dang / mal stan yongs su tshol ba med pa dang / rab tu 'dzin pa la mi 'bad pa dang / longs spyod la mi 'bad pa dang / de'i ched kyi rgyu mtshan mi byed pa dang / rtsod pa'i gzhi mi byed pa dang / gnas rjes su mthun par 'gyur ba dang / nyung ba dang rnyed sla ba dang / kha na ma tho ba med pas dga' ba dang / sbyor ba'i rjes su mthun par gnas pa dang / ma 'dres par gnas pa nyid do/ /dur khrod pa nyid la yon tan bcu ste/ mi rtag pa'i 'du shes nye bar 'jog pa dang / 'chi ba'i 'du shes nye bar 'jog pa dang / mi gtsang ba'i 'du shes nye bar 'jog pa dang /'jig rten thams cad la mngon par mi dga' ba'i 'du shes nye bar 'jog pa dang / mdza' bo thams cad med par 'byung ba dang 'bral ba'i 'du shes nye bar 'jog pa dang / snying rje'i 'du shes nye bar 'jog pa dang / rgod pa spong ba dang / skyo ba dang / 'jigs pa spong ba'o//bla gab med pa nyid la yon tan bcu ste/ shing drung tshol ba med pa dang / rtsod pa'i gzhi med pa dang / 'gro ba na ltos pa med pa dang / khengs pa chung ba dang / grang ba dang / dro ba dang / sha sbrang dang / sbrang bu dang / rlung dang / nyi ma dang / sdig sbrul dag la bzod pa dang / dgra'i tsher ma med pa dang /gzhan la gnod pa mi byed pa dang / rang la gnod pa mi 'thob pa dang / 'dres pa med pa nyid do/ /dgon pa pa nyid la yon tan bcu ste/ 'dris pa med pa'i phyir res 'ga' rgyu ba rnams 'dul ba la mkhas pa dang / dbang po dul ba nyid dang / thos pa mang ba nyid dang /stobs che ba nyid dang / bdag tu 'dzin pa dang / 'jigs pa dang bral ba nyid dang / ri dgas dang 'dra ba nyid dang / lus ring du gnas pa nyid dang / dben pa la dga' ba dang 'dres pa med pa'o/ /bsod snyoms pa nyid la yon tan bcu ste/ sems can rjes su 'dzin par byed pa dang /gzhan la gnod pa med pa nyid dang / chog shes pa dang / yang dag par bgo bsha' byed pa dang / lhag par ma chags pa dang / chod shes pa nyid dang / dge ba'i phyogs la mngon par chags pa dang / dge ba sdud pa nyid dang / zas la mi brkam pa dang / 'gyod pa med par 'gyur ba'o / /sngon gyi sangs rgyas rnams ni bsod snyoms pa dag ste bsdus pa'i phyir ro/ /chos 'di dag la gnas pas/ bdag la stod par mi 'gyur bar bya/ gzhan la smod par mi 'gyur bar bya/ tshul khrims la brtson par byed pa dang / yang dag par blangs pa la brtan pa dang /ji ltar thos pa'i chos bsgrub par 'gyur bar bya/ bdag gi ba med pa dang / nga rgyal ba med pa dang / ma chags pa dang / mi brkam pa dang / dran pa nye bar gzhag pa nyid dang / nyon mongs pa thams cad dug dang sbrul bzhin du spang ba dang / ma 'dres pa nyid dang / skyes pa dang bud med dang khye'u dang bu mo dang /dge slong dang / dge slong ma dang / mu stegs pa spangs par 'gyur bar bya/ de la yon tan du blta bar 'gyur bar bya/ spyod tshul bco brgyad kyi tshogs la sun 'byin pa can du mi 'gyur bar bya/ theg pa chen po dang sbyangs pa'i yan lag la shin tu bsngags pa brjod par 'gyur bar bya'o//dge slong gis gang la 'jug par mi bya ba dang 'dris par mi bya ba spyod yul ma yin pa la dgongs pa bstan pa/ rnal 'byor spyod pa nyan thos kyis las kyang / dge slong gi spyod yul ma yin pa ni lnga'o/ /lnga po gang zhe na/ 'di lta ste/ shan pa dang / smad 'tshong ma dang /chang 'tshong ma'i khyim dang / rgyal po'i khyim dang / lnga pa gdol ba'i khyim mo zhes gsungs so/ /'dul ba phran tshegs las kyang / spyod yul ma yin pa lnga ste/ smad 'tshong ma dang / yugs sa mo dang / go rgas ma dang / za ma dang / sdig pa'i dge slong ma'o zhes gsungs pa dang /yang 'dul ba de nyid las ches rgan yang chos ma yin par smra ba la phyag mi bya'o zhes gsungs so/ /dkon mchog sprin gyi mdo las kyang / gzhan du na gnas gang na khyi za ba'am/ ba drus ma'am/ byol song gi skye gnas su gtogs pa rang bzhin gyis ngang tshul ngan pa'i srog chags sam/bud med dang skyes pa dang khye'u dang bu mo kyal ka bya ba'i bsam pa can dag yod pa 'am/ smad pa'i gnas thams cad du thams cad yongs su spong ste zhes gsungs so/ /byang chub kun du rgyu'i mdo las kyang / rgyal po chen po rab tu byung bas khyim yan lag dgu dang ldan par 'gro bar mi bya'o//yan lag dgu po gang dang ldan pa yin zhe na/ mthong nas ngo 'byol ba dang / stan 'dor du 'jug pa dang / de'i smra ba la mi dad pa dang / de la ma gus pa nye bar 'jog pa dang / gang na khyim nas 'byung ba na khyi gtum po rgyab nas rmugs pa yod pa dang /gang na sgo srung sdig pa can yod pa dang / khyim gyi khyim bdag dag kyang de la dad pa dang bral bar gyur pa dang / gang na bud med dang tshul ngan pa dang sdig pa'i chos can dang 'jungs pa dang / brgyad par byed pa yod pa dang / khyim gang na g.yog rang dbang can yod pa ste/ rgyal po chen po da ltar khyim yan lag dgu dang ldan par rab tu byung bas 'gro bar mi bya'o zhes gsungs so//dkon mchog sprin gyi mdo las kyang / ji ltar na byang chub sems dpa' grong dang grong khyer dang grong rdal dang ljongs dang yul 'khor dang / rgyal po'i pho brang 'khor rnams la dran pa shin tu nye bar gzhag cing gnas she na/'di la byang chub sems dpa' grong dang grong khyer dang grong rdal dang ljongs dang yul 'khor dang / rgyal po'i pho brang 'khor dag na byang chub sems dpa'i spyad pa spyod pa na/ gnas gang na tshul dang mi 'dra zhing yongs su spang bar bya ba rab tu byung ba'i tshul dang mi mthun pa de dag yongs su spong ngo //de dag kyang gang zhe na/ 'di lta ste/ chang 'tshong gi khyim mam/ smad 'tshong ma'i khyim mam/ rgyal po'i pho brang ngam/ rgyal po'i gnas sam/ ra ro'i 'khor gyi tshogs sam/ gar mkhan nam/ glu gar gyi gnas dang de ma yin pa'i gnas gzhan yang rung ste/rab tu byung ba'i tshul dang mi 'dra ba de dag yongs su spong zhing de dag la dran pa shin tu nye bar gzhag cing gnas te/ de ltar na byang chub sems dpa' grong dang grong khyer dang grong rdal dang ljongs dang yul 'khor dang / rgyal po'i pho brang 'khor de dag la dran pa shin tu nye bar gzhag cing gnas so zhes gsungs so//dam pa'i chos pad+ma dkar po'i mdo las kyang / phyi dus shin tu 'jigs pa la/ /zhum pa med cing mi 'jigs par/ /mdo sde 'di ni bstan pa yang / /byang chub sems dpa' gang 'dod pa/ /cho ga spyod yul bsrung bya zhing //'du 'dzi med la gtsang bar bya/ /rgyal po dang ni rgyal bu dang / /'dres byed rtag tu spang bar bya/ /rgyal po'i zham 'bring gang yin dang / /gdol pa dang ni zol pa dang / /mu stegs can ni de dag dang / /rnam pa kun du 'dris mi bya/ /dge slong 'dul dang lung gnas pa//dgra bcom snyam du sems byed cing / /nga rgyal can rnams bsnyen mi bya/ /tshul khrims 'chal rnams rnam par spang / /rgod cing smra ba'i spyod yul can/ /dge slong ma rnams rtag tu spang / /mi brtan par ni mngon pa yi/ /dge bsnyen rnams kyang spang bar bya/ /dge bsnyen ma gang tshe 'di la//bde ba yang dag tshol byed pa/ /de dag dang ni 'dris byed spang / /'di ni cho ga yin zhes bya/ /gang zhig de yi thad 'ongs nas/ /byang chub mchog phyir chos 'di na/ /gnas pa med cing mi zhan par/ /dpa' bo rtag tu de la shod/ /bud med ma ning sems can gang //de dang 'dris byed rnam par spang / /khyim rnams su ni mna' ma dang / /gzhon nu ma rnams rnam par spang / /bde la reg par 'dri ba yis/ /de la nam du 'ang dga' mi byed/ /phag 'tshong ba dang shan pa dang / /'dris par byed pa rnam par spang / /gang dag srog chags rnam mang dag /longs spyod phyir ni gsod pa dang / /bsha' sar sha rnams tshong byed pa/ /de dang 'dris byed rnam par spang / /gang dag bud med gso byed dang / /gar mkhan gyad dang sil khrol ba/ /gang gzhan de dang 'dra ba yang / /de dag rnams dang 'dris byed spang / /smad 'tshong gtso mo bsten mi bya//ji snyed longs spyod 'tsho ba gzhan/ /shin tu dga' ba de dag kyang / /rnam pa kun du yongs su spang / /mkhas pas bud med rnams la yang / /gang gi dus na chos 'chad pa/ /der ni gcig pu mi 'gro ste/ /dgod cing 'dug par mi bya'o/ /gang tshe zas phyir yang nas yang //grong du 'jug par byed pa na/ /dge slong gnyis pa btsal bar bya/ /yang na sangs rgyas dran par bya/ /gang gis shes rab ldan pa dag /mdo sde 'di 'dra 'dzin pa yi / /cho ga dang ni spyod yul dag/ /thog mar ngas bshad 'di yin no/ /gang gis 'dus byas 'dus ma byas//yang dag yang dag ma yin dang / /rab 'bring tha ma'i chos rnams la/ /rnam pa kun du spyod pa med/ /brtan pa bud med ces mi spyod/ /skyes pa zhes kyang mi rtog ste/ /chos so cog ni ma skyes shing / /btsal bar byas kyang mi mthong ba/ /'di ni byang chub sems dpa' yi/ /cho gar rnam pa kun du bstan//zhes gsungs so/ /dam pa'i chos dran pa nye bar gzhag pa las kyang / 'di lta ste/ brtan pa dang / brtson pa dang / rab tu zhi ba dang / bla ma la bsnyen bkur ba dang / sdig pa'i grogs po spangs pa dang / sangs rgyas kyi gsung la goms pa dang / tshul bzhin yid la byed pa la goms pa dang /khengs pa spangs pa dang / las rgyu 'bras la dad pa bskyed pa dang / sngon gyi 'dod pa mi dran pa dang / bud med la blta ba spang ba dang / gnyen bshes la blta ba'i don du shin tu mi rgyu ba dang / yul thams cad la rgyug pa dang / 'chi ba dang 'chi 'pho ba dang skye ba la 'jigs pas de ltar grong du 'jug par bya'o zhes gsungs so//blo gros rgya mtsho'i mdo las kyang / blo gros rgya mtsho gzhan yang theg pa chen po'i bar chad du 'gyur ba'i chos bzhi ste/ bzhi gang zhe na/ thos pa nyung ngus grong dang grong khyer dang grong rdal du 'jug pa dang / tshul khrims kyi phung po la mi gnas par rnyed pa dang bkur sti dang tshigs su bcad pa 'dod pa dang /dbang po rnams kyi sgo ma bsrungs par bud med la blta ba dang / mnyam par ma bzhag pa'i sems kyis sems can gyi dbang po la 'jug pa'o zhes gsungs so/ /dam pa'i chos dran pa nye bar gzhag pa'i mdo las kyang /le lo can dang lhan cig gnas par mi bya'o/ /tshul 'chos can rnams dang 'grogs par mi bya'o/ /zhim lto can dang lhan cig gnas par mi bya'o/ /tshong pa dang lhan cig 'dri rmed kyang mi bya'o/ /zol gyis 'tsho ba rnams dang ma yin/ rang bzhin gyis dri ma can dang ma yin/lta ba log pa can dang ma yin/ 'gyur bag can dang ma yin/ nga rgyal can dang ma yin/ khengs pa dang ma yin/ ltung bar gyur nas langs pa dang ma yin/ rgyan pos 'tsho ba dang ma yin/ chang khang pa dang ma yin/ chang 'tshong ma dang ma yin/ 'thab krol can dang ma yin/bud med la dad che ba dang ma yin/ zong tshong gis nye bar 'tsho ba dang ma yin/ sdang mig can dang ma yin/ skyes bu bya ma rta dang ma yin/ bya ba dang ma yin/ spros pa can rnams dang ma yin/ mu stegs can zhugs pa dang ma yin/ skye bo thams cad dang zhe 'gras pa rnams dang ma yin te/lhan cig tu 'grogs pa dang ngag brjod pa'am lam du 'grogs pa yang dge slong gis mi bya'o zhes gsungs so/ /sdig pa'i grogs po spang ba la dgongs pa bstan pa/ shes rab kyi pha rol tu phyin pa'i mdo las kyang / rab 'byor gzhan yang gang zhig de la bdud kyi las nye bar mi ston pa dang /bdud kyi skyon nye bar mi ston pa ni/ byang chub sems dpa' sems dpa' chen po'i sdig pa'i grogs po'o/ /bdud sdig to can sangs rgyas kyi cha byad kyis 'ongs nas 'di skad du/ khyod la shes rab kyi pha rol tu phyin pa bsgoms pas ci zhig bya/ bsam gtan gyi pha rol tu phyin pa dang / brtson 'grus kyi pha rol tu phyin pa dang / bzod pa'i pha rol tu phyin pa dang / tshul khrims kyi pha rol tu phyin pa dang / sbyin pa'i pha rol tu phyin pa bsgoms pas ci zhig bya zhes byang chub sems dpa' sems dpa' chen po pha rol tu phyin pa drug las rnam par 'byed pa ste/rab 'byor 'di ni byang chub sems dpa' sems dpa' chen po'i sdig pa'i grogs por rig par bya'o zhes gsungs so/ /dkon mchog sprin gyi mdo las kyang / rigs kyi bu chos bcu dang ldan na byang chub sems dpa' sdig pa'i grogs po yongs su spangs pa rnams yin no//bcu gang zhe na/ 'di lta ste/ tshul khrims nyams pa'i gang zag rnam par spangs pas sdig pa'i grogs po yongs su spangs bar rig par bya'o/ /lta ba nyams pa'i gang zag rnam par spangs pa dang / cho ga nyams pa'i gang zag rnam par spangs pa dang / 'tsho ba nyams pa'i gang zag rnam par spangs pa dang /'du 'dzi la dga' ba'i gang zag rnam par spangs pa dang / le lo can gyi gang zag rnam par spangs pa dang / 'khor ba la dga' ba'i gang zag rnam par spangs pa dang / byang chub la rgyab kyis phyogs pa'i gang zag rnam par spangs pa dang / khyim pa dang bsten pa rnam par spangs pa dang /nyon mongs pa thams cad rnam par spangs pas na/ sdig pa'i grogs po rnam par spangs par rig par bya ste/ rigs kyi bu byang chub sems dpa' ngas gnas 'di dag rnam par spong ba'i tshe/ gang zag de dag la zhe sdang ba'i sems bskyed par mi bya'o/ /khong khro ba'i sems dang brnyas pa'i sems bskyed par mi bya'o//des 'di ltar bcom ldan 'das kyis kyang sems can rnams kyi khams so sor bsten te/ bsten par ma gyur na / chud za bar 'gyur ro zhes bka' stsal gyis/ de bas na bdag gis bsten pa yongs su spangs par sems nye bar gzhag par bya'o//rigs kyi bu chos bcu po de dag dang ldan na/ byang chub sems dpa' sdig pa'i grogs po yongs su spangs pa rnams yin no zhes gsungs so/ /tshul khrims 'chal ba tshar bcad pa'i mdo las kyang / shA ri'i bu dper na sa las byas pa'i snod sar pa zhig yod la de skyes pa gang zhig gis ngan skyugs blugs nas/de pho ste tsan+dan dmar pos slar bkang nas/ tsan+dan dmar po de yang pho na/ shA ri'i bu 'di ji snyam du sems/ sa las byas pa'i snod sar pa de la 'di ltar tsan+dan gyi dri'am/ 'on te ngan skyugs kyi dri 'am/ dri'i rang bzhin gang gi mthu yod par 'gyur/bcom ldan 'das dog pa'i snod de/ ngan skyugs kyi dri gang lags pa de kho nas/ thog mar bsgos pas dri de'i rang bzhin kho nar 'gyur lags te/ 'di lta ste ngan skyugs kyi dri lags so/ /tsan+dan gyi dri ni ma lags te/ des ni tsan+dan dmar po bgyi ba dang sgrub pa rngo mi thogs lags so//shA ri'i bu de bzhin du 'di na sems can kha cig dbang po yongs su rdzogs shing yongs su dag ste/ dge ba'i chos rnams dang ldan zhing / de dad pas khyim nas khyim med par rab tu 'byung ste/ de dag khyim nas khyim med par rab tu byung nas sdig pa'i grogs po'i lag du 'dod pa dang /dbang du 'dod pa dang / nye bar 'dod par 'gyur ro/ /shA ri'i bu sdig pa'i grogs po zhes bya ba de dag gang zhe na/ shA ri'i bu sdig pa'i grogs po ni 'di lta ste/ rgod pa dang / pho theg che ba dang / mi brtan pa dang / mu cor smra ba dang /thug thub can dang / tshig zlos bu can dang / le lo can dang / brtson 'grus zhan pa dang / brjed ngas pa dang / sems mnyam par ma bzhag pa dang / sems 'khrugs pa dang / mdzes pa ma yin pa dang / shes bzhin ma yin pa dang / shes rab 'chal pa dang / lug ltar lkugs pa dang /phal pa'i dbang po can gyi dge slong rnams yin no/ /de dag dge slong de lta bu dag la nye bar brten cing bkur sti dang / bsnyen bkur byed na/ rgyun du zhugs pa'i 'bras bu las yongs su nyams par 'gyur ro/ /lan cig phyir 'ong ba'i 'bras bu dang / phyir mi 'ong ba'i 'bras bu dang /dgra bcom pa nyid las yongs su nyams par 'gyur ro/ /tha na mtho ris su skye ba las kyang yongs su nyams par 'gyur ro/ /chos kyis phongs par 'gyur ba'i las mngon par 'du byed par 'gyur ro/ /chos kyis phongs par 'gyur ba dang ldan pa dag dang lhan cig gnas pa dang / kun du gzhol bar 'gyur ro/ /yongs su ma dag pa'i lus kyi las dang ldan par 'gyur ro/ /yongs su ma dag pa'i ngag gi las dang / yid kyi las dang ldan par 'gyur ro/ /dge slong 'tsho ba yongs su ma dag pa de lta bu dag la brten cing / bkur sti dang bsnyen bkur byas nas lus zhig pa las shi ba'i 'og tu ngan 'gror 'gro bar 'gyur ro//ngan 'gro zhes bya ba gang zhe na/ shA ri'i bu ngan 'gro zhes bya ba ni 'di lta ste/ sems can dmyal ba dang / dud 'gro'i skye gnas dang / yi dags kyi yul dang / lha ma yin gyi ris so/ /sha ra dwa ti'i bu srog chags kyi rigs rnyed dgu za zhes pa yod pa dang /shA ri'i bu srog chags kyi rigs mchus rko zhes bya ba zhig yod pa dang / shA ri'i bu srog chags kyi rigs khab kyi kha zhes bya ba zhig yod pa dang / shA ri'i bu srog chags kyi rigs sa bstsog ces bya ba zhig yod pa dang / der sdig pa'i grogs po skyes bu blun po de dag skye bar 'gyur ro//shA ri'i bu sdig pa'i grogs po de dag gi lag tu song ba dang / dbang du song ba dang / nye bar song ba gang yin pa de dag kyang lus zhig nas shi ba'i 'og tu ngan 'gror 'gro bar 'gyur ro/ /shA ri'i bu ngan 'gro zhes bya ba gang zhe na/ shA ri'i bu ngan 'gro zhes bya ba ni/'di lta ste/ sems can dmyal ba dang / dud 'gro'i skye gnas dang / yi dags kyi yul dang / lha ma yin gyi ris so/ /gal te sems can dmyal ba nas shi 'phos te/ mi rnams su slar skye bar 'gyur/ de dag mi rnams su slar skyes na ma dang yang 'bral bar 'gyur zhing pha dang yang 'bral ba dang /spun dang yang 'bral ba dang / sring mo dang yang 'bral ba dang / bu dang yang 'bral ba dang / bu mo dang yang 'bral ba dang / bran g.yog dang yang 'bral ba dang / grogs po dang yang 'bral ba dang / nye du dang yang 'bral ba dang / nad kyis kyang nyam thag pa dang / longs spyod dang yang 'bral ba dang / yul dang yang 'bral ba dang / yul phyogs dang yang 'bral bar 'gyur ro/ /mi khom pa brgyad dang yang ldan par 'gyur ro/ /dal ba phun sum tshogs pa dang yang 'bral bar 'gyur ro/ /'dod chags bdo ba dang /zhe sdang bdo ba dang / gti mug bdo bar yang 'gyur ro/ /rgod pa dang / pho theg che ba dang / mi brtan pa dang / mu cor smra ba dang / thug thub can dang / tshig zlos bu can dang / le lo can dang / brtson 'grus zhan pa dang / ma bsdams pa dang / shes bzhin ma yin pa dang / mnyam par ma bzhag pa dang / brjed ngas pa dang / shes rab 'chal pa dang / lug ltar lkugs pa dang / sems 'khrugs pa dang phal pa'i dbang po can rnams su 'gyur ro/ /'dod chags kyis kyang bcom par 'gyur te/ zhe sdang gis bcom pa dang / gti mug gis bcom pa dang /nga rgyal gyis bcom par yang 'gyur ro/ /long ba dang / zhar ba dang / sgur po dang / 'gram pa zhom pa dang / 'on pa dang / rna ba ya gcig 'on pa dang / lhag par 'on pa dang / rkyen gyis 'on pa dang / glen pa dang / dig pa dang / lug ltar lkugs pa rnams su 'gyur ro zhes gsungs so//gzi brjid can gyi mdo las kyang / dge 'dun gyi dbyen brjod par bya ste/ gang zhig bslab pa'i gnas mngon par bcom nas/ sangs rgyas kyis bcas pa'i bslab pa'i gnas la smod pa de ni dge 'dun gyi dbyen zhes bya'o/ /dge 'dun ni yang dag par sgrogs pa las brjod de/gang gis tshul khrims dang ldan pa de dag smin par 'gyur ba de/ de dag gis yang dag par sgrogs par 'gyur ro/ /yang dag par mi sgrogs pa su zhig yin zhe na/ gang dag ltung ba dang ltung ba ma yin pa mi shes pa'o/ /nga ni dge sbyong du gnas so snyam du bdag nyid la sems pa de dag mgo bcad par 'gyur zhing /yang dag par rjes su lta bar mi 'gyur ro/ /de nas gang gi tshe mang du thos pa mnyes par byed pa de'i tshe/ 'dul ba la mkhas pa yongs su dris pa dag gis bdag nyid mgo bcad de gnas par yang dag par shes par 'gyur ro//de dag dben pa'i gnas su song nas/ kye ma'o 'di ni ngo mtshar to/ /kye ma'o slob dpon ngan pa dang mkhan po ngan pa dag gis bslus pa 'di ni ngo mtshar to/ /kye ma'o chos kyi rgyal po'i bstan pa 'di ni ngo mtshar to/ /gang du 'doms par 'gyur/ su zhig smra bar 'gyur/su zhig mnyes par bya/ bdag ni deng 'chi bar 'gyur ro/ /rnam par 'jigs pa dang / bdag ni deng dpung gnyen med par 'gyur/ gang du song zhing gnas nas mya ngan gyi zug rngu 'byin par 'gyur ba/ phyogs gang zhig tu rgyug par bya zhes bdag nyid la bshung bar byed do//kye ma'o shin tu gsal bar gsungs pa'i sangs rgyas 'di ni ngo mtshar to/ /kye ma'o 'dod chags dang bral ba'i chos 'di ni ngo mtshar to/ /kye ma'o dge 'dun gyis legs par rab tu brjod pa 'di ni ngo mtshar to/ /deng bdag ni tshul khrims las rab tu nyams so/ /ting nge 'dzin dang /shes rab dang / rnam par grol ba dang / deng bdag ni rnam par grol ba'i ye shes mthong ba las rab tu nyams so/ /ngan song du 'gro ba la phyogs par 'gyur ro/ /bde 'gro'i 'gro ba bkag bzhin du 'chi bar 'gyur ro/ /bdag gis chu bo las brgal bar mi 'gyur ro//mi snyan pa'i sgra thos par 'gyur ro/ /sems can dmyal bar rab tu ltung bar 'gyur ro/ /lus kun nas 'bar bar 'gyur ro/ /dmyal ba'i srung mas gzir bar 'gyur bzhin du phyogs gang du rgyug par 'gyur ro / /su zhig gis mi 'jigs pa ster bar 'gyur/ gang dag gis dad pas byin pa yongs su longs spyad par gyur pa/ de dag lag na dbyug pa thogs te mdun na nye bar gnas par 'gyur ro/ /su zhig sbran par bya/ 'on te dmyal ba'i srung ma dag la'am/ 'on te khyi dag la'am/ 'on te lcags kyi mchu can gyi bya rog dag la'am/yang na slong mo ba dag la'ang rung ste su zhig la bskyab par bya/ 'on te bros par bya/ bdag ni mi bde ba'i phyogs su 'gro bar 'gyur ro zhes de skad du tshig smra bar 'gyur ro/ /dge slong dgon pa pa dag mthong nas 'di skad du/ kye ma'o 'phags pa 'di ni bde ba ste / gang gi phyir dge slong dgon pa dang shin tu dgon pa dag tu ltos pa med par gnas pa/sems kyi nad med pa/ lus kyi sdug bsngal dang sems kyi sdug bsngal med pa'o/ /bdag cag ni deng phun sum tshogs pa med pa bdag cag ni deng bsod nams med pa gang bdag cag ni sangs rgyas kyi ched du rab tu byung nas khyim pa rnams dang lhan cig mnyam pa'i longs spyod tsam gyis 'tsho ba'o//tshul khrims 'chal pa'i gang zag bsten pa dag gis dge sbyong gi chos la ngo tsha bar 'gyur du 'ong ngo zhes smra bar 'gyur ro/ /gal te yang bdag cag tshul khrims dang ldan pa la brten pa na/de'i tshe smad par 'gyur du 'ong / ngo tsha bar 'gyur du 'ong / dge slong des pa dag gis lta bar 'gyur du 'ong / de'i tshe mthong ba tsam dang lhan cig 'di ni su'i yin/ gang nas yin/ su zhig yin/ 'on te tshul khrims dang ldan pa zhig gam/ 'on te tshul khrims 'chal ba yin zhes/bdag cag la nges par rtog par 'gyur du 'ong / zhum pa dang / yongs su zhum pa dang / rnam par zhum pa dang / sdug bsngal bar 'gyur/ mdun na mi dga' bar 'gyur/ kha phyir phyogs te ldog par 'gyur du 'ong ngo / /dper na 'ug pa ni nyi ma ma shar ba'i tshe tshang nas kha gdangs te/mtshan mo der bya rog dag mthong nas bdag cag mthong ngam mi mthong snyam du phyogs bzhir rjes su lta bar byed/ gzhan na ri chen po gang dag yod pa de dag mthong nas der 'gro bar 'gyur te/ 'di ltar de las mtshan mo 'gro ba dang 'ong ba dang rtog par 'gyur ro snyam mo//blo gros med pa des tshang rnyed par mi 'gyur ro/ /bya rog dang 'khor los brgyan pa dag kyang de'i rjes su 'phur bar byed cing rjes su 'gro bar 'gyur ro/ /de 'jigs pas de ma thag tu mun pa tshol zhing / kun du lta bar 'gyur/de 'jigs te bya rog gi tshogs la lta bar byed do/ /de bzhin du tshul khrims 'chal pa'i dge slong dag kyang 'ug pa 'dra bar brjod do/ /gang gi tshe gang du dge slong 'dus pa dang gso sbyong gi las dang chos nyan pa'i las dang sgrogs pa'i las byed pa de'i tshe/ kha cig bdag la rtog par 'gyur kha cig bdag la smra bar 'gyur ro snyam du tshul khrims 'chal pa 'jigs par 'gyur/skrag par 'gyur/ dge slong gi dbus su song ba bsgribs par song ba de dge slong gi dge 'dun gyis rig nas/ gzhan gyis kyang lo mi 'dri zhing bdag nyid kyang mi smra'o//ngo mi lta zhing sems sa phyogs la gtad de 'dug par 'gyur/ 'di dag smra ba na bdag gis ci zhig smra bar bya/ ji ltar bya snyam du sems par 'gyur/ dge slong gi dge 'dun langs pa'i tshe bdag 'gro ba na kha cig 'ga' zhig smra bar 'gyur snyam nas phyi nas 'gro bar 'gyur ro//'di ltar yang tshul khrims 'chal pa'i dge slong de'i tshe khyim nas 'thon te 'ug pa tshang nas 'byung ba bzhin du phyogs bzhir lta bar byed do/ /gal te dge slong des pa dag gis mthong ba las 'di skad du/ dge slong 'di ni 'di skad du smra ba las na/ tshe dang ldan pa dag de la yid brtan par ma byed cig ces smra bar 'gyur ro//dge slong gi dge 'dun mthun par shes pa de dag/ /gang la 'di na 'dug pa 'di lta bu su zhig de la rjes su lta bar 'gyur/ gal te dge slong rnams kyis gtses pa na de ma thag tu/ gang na rtsod pa smra ba med pa'i lam gol ba nyid bsten par 'gyur te/kun dga' bo tshul khrims 'chal pa'i dge slong rnam pa de lta bu ni 'ug pa dang 'dra bar brjod do/ /gsad pa'i phyir gtad pa lta bu ste/ de ci'i phyir zhe na/ dper na gsod par gtad pa dang nges par gtad pa ni/ zas kyi tha ma za ba yin/ btung ba'i tha ma 'thung ba yin/phreng ba'i tha ma 'ching ba yin/ tshig gi tha ma smra bar byed pa yin no/ /de bzhin du tshul khrims 'chal pa'i dge slong ji lta ji ltar dad pas byin pa za ba/ de lta de ltar mi'i zas tha ma za ba yin/ sangs rgyas mthong ba tha ma yin / chos thos pa tha ma yin/'phags pa'i dge 'dun mthong ba tha ma yin/ mir skye ba'i gnas tha ma yin no/ /de nas lus zhig pa na mnar med par ltung bar 'gyur ro/ /kun dga' bo de'i phyir na/ khyod mos par bya/ khyod kyis khong du chud par bya'o/ /bya ba 'di dang ldan pa'i dge slong grol bar mi 'gyur ro//kun dga' bo zas ni rab tu byung bar 'gyur ba'i dmyal ba 'thob par byed par 'gyur ro zhes gsungs so/ /chos thams cad kyi rang bzhin mnyam pa nyid rnam par spros pa'i ting nge 'dzin las kyang / ltos shig sdig pa'i grogs kyi tshig gis ni/ /de tshe ma rungs rgyal po 'chi dus byas//chos smra dag la khro ba byas pas na/ /der ni tshe rabs drug cur mnar med song / /rgyal rigs rgyal po gang zhig rbad pa yi / /dge slong dmigs lta mang po de dag kyang / /tshe rabs bye ba brgya phrag bsam yas su/ /sems can dmyal ba'i sdug bsngal myong bar gyur//zhes gsungs so/ /gzi brjid can gyi mdo las kyang / de la klong 'khor dang / srin po lnga gang zhe na/ ma rig pa'i klong 'khor dang / gnyid dang rmugs pa'i klong 'khor dang / 'khor ba'i klong 'khor dang / mi shes pa'i klong 'khor dang / srid pa'i klong 'khor te/'di dag ni klong 'khor lnga'o/ /de la gcig ni klong 'khor chen po ste/ gang gis khams gsum du yongs su skor bar byed pa dang / khams gsum las ldog par mi 'gyur ba'o/ /de la klong 'khor lnga po de dag ni srin po lnga gang zhe na/ sdig pa'i grogs po'i srin po dang /mi khom par skye ba'i srin po dang / bud med bsten pa'i srin po dang / tshul bzhin ma yin pa yid la byed pa'i srin po dang / bdag tu 'du shes pa'i srin po ste/ 'di dag ni srin po lnga'o/ /de la srin po lnga po de dag las gang zhig bud med bsten pa 'di ni gtso bo klong 'khor gyi srin po yin te/'di dag ni klong 'khor dang srin po lnga'o zhes gsungs so/ /dam pa'i chos dran pa nye bar gzhag pa'i mdo las kyang / sdig pa'i grogs po thang cig kyang bsten par mi 'gyur/ tshig gis mdangs gsol bar mi byed/de dang lhan cig lam du'ang 'gro bar mi byed de/ gang gi phyir gang 'di lta ste sdig pa'i grogs po dang 'grogs pa'am/ de bskyang ba'am/ de dang lhan cig 'gro ba dang 'ong bar byed pa'am/ de'i grib ma la reg pa 'di ni dge ba'i chos thams cad kyi bar du gcod pa'i gtso bo yin pa'i phyir ro//de ci'i phyir zhe na/ sdig pa'i grogs po lam ka'i shing ltar/ 'dod chags dang zhe sdang dang gti mug gi gnas su gyur pa'o zhes gsungs so// // dge ba'i bshes gnyen la dgongs pa bstan pa/ bu mo yon tan gyis brgyan pa mngon par shes pa rgyas pa'i le'u'i mdo las kyang /'di skad ces bka' stsal pa dang / bcom ldan 'das la bu mo yon tan gyis brgyan pa mngon par shes pa rgyas pas 'di skad ces gsol to/ /bcom ldan 'das byang chub sems dpa'i dge ba'i bshes gnyen gang lags/ bcom ldan 'das kyis bka' stsal pa/bu mo gang byang chub sems dpa'i dge ba'i bshes gnyen ni lha dang bcas pa'i 'jig rten dang / bdud dang bcas pa'i 'jig rten dang / tshangs pa dang bcas pa'i 'jig rten dang / dge sbyong dang bram ze dang bcas pa'i skye dgu la ngas ma mthong ste/ mang du thos pa'i byang chub sems dpa' ni ma gtogs so zhes gsungs so//rnal 'byor spyod pa byang chub sems dpa'i sa las kyang / de la rnam pa du dang ldan na byang chub sems dpa'i dge ba'i bshes gnyen du rig par bya/ rnam pa du zhig gis ni dge ba'i bshes gnyen nyid don yod pa yin/rnam pa du zhig dang ldan na dge ba'i bshes gnyen dad pa'i gzhi'i gnas la gnas pa yin/ byang chub sems dpa'i dge ba'i bshes gnyen du gyur pa'i 'dul ba rnams la dge ba'i bshes gnyen gyi bya ba ni du zhig yod/ byang chub sems dpa' dge ba'i bshes gnyen la brten pa ni rnam pa du zhig yod/'du shes rnam pa dus ni byang chub sems dpa' dge ba'i bshes gnyen las chos mnyan par bya/ byang chub sems dpa' dge ba'i bshes gnyen la chos nyan pa na / gang zag chos smra ba de la gnas du zhig la ni yid la mi byed pa bya zhe na/ de la rnam pa brgyad dang ldan na/byang chub sems dpa'i dge ba'i bshes gnyen rnam pa thams cad rdzogs pa yin par rig par bya ste/ byang chub sems dpa'i sdom pa'i tshul khrims rnams la gnas shing ma nyams pa dang / skyon med par byed pas tshul khrims la gnas pa yin/ blo ma byang ba ma yin pas mang du thos pa yin/ bsgoms pa las byung ba'i dge ba gang yang rung ba thob cing zhi gnas dang lhag mthong thob pas rtogs pa dang ldan pa yin/ snying rje dang ldan pas snying brtse ba can yin te/ de tshe 'di la rang gi bde bar gnas pa yal bar bor nas/ gzhan dag gi don la sbyor ba yin/ de gzhan dag la chos ston pa na bag tsha ba'i 'jigs pas dran pa dang spobs pa nyams pa med pas 'jigs pa med pa yin/ gzhan dag gis brnyas pa rnams dang / 'phya ba dang / bsting ba dang ngan du brjod pa dang / ngan du smra ba la sogs pa mi snyan pa'i tshig gi lam rnams dang /sems can gyi log par zhugs pa rnam pa sna tshogs rnams bzod pa yin/ 'khor bzhi po dag la chos bstan pa na/ stobs dang ldan zhing / dal ba med pas yid yongs su mi skyo ba yin/ tshig chos nyid las mi nyams shing gsal la tshig gi bya ba dang ldan pas dge ba'i tshig dang ldan pa yin no//de la byang chub sems dpa'i dge ba'i bshes gnyen de lta bu'i yon tan gyi rnam pa thams cad dang ldan pa ni/ rnam pa lngas dge ba'i bshes gnyen gyi bya ba don yod pa yin te/ de ni snga nas kyang gzhan dag la phan pa dang bde bar 'dod pa yin/phan pa dang bde ba de yang yang dag pa ji lta ba bzhin du rab tu shes pa yin/ de la blo phyin ci log tu mi 'gyur ba yin/ thabs gang dang chos bstan pa'i tshul gang gis sems can gang 'dul nus pa de la nus shing mthu yod pa dang /yid yongs su mi skyo ba yin/ sems can tha ma dang / 'bring dang / khyad par du 'phags pa thams cad la phyogs 'dzin pa med de/ snying rje snyoms pa yin no/ /de la dge ba'i bshes gnyen de ni rnam pa lngas dad pa'i gzhi la gnas pa yin te/ gang gi phyir gtam thos pas kyang de la gzhan dag shin tu dang bar byed na/mngon sum du mthong bas lta smos kyang ci dgos te/ spyod lam rab tu zhi ba dang / spyod lam dang ldan pa dang / yan lag dang nying lag thams cad mi 'gyur bas spyod lam phun sum tshogs pa yin/ lus dang ngag dang yid kyi las kyi mtha' rgyu ba la rgod pa med cing 'gyur ba med pas brtan pa yin/gzhan dag la tshul 'chos pa med pa'i phyir so sor brtags nas spyod lam dang brtan pa ltar mi 'chos pas tshul 'chos pa med pa yin/ gzhan dag gi chos kyi gtam mam/ rnyed pa dang bkur sti las brtsams te/phrag dog skyed par mi byed kyi gzhan dag gis chos kyi gtam bya bar bdag la gsol ba btab pa dang / rnyed pa dang bkur sti rgya chen po rnyed na yang g.yo ba med cing dga' ba'i sems kyis gzhan la gsol ba 'debs su 'jug la/ chos kyi gtam de dang rnyed pa dang bkur sti de yang gzhan dag la stobs par byed de/ji ltar bdag gi rnyed pa dang bkur stis mgu bar 'gyur ba de bzhin du gzhan gyi rnyed pa dang / gzhan gyi bkur stis ches shin tu mgu bar 'gyur bas phrag dog med pa yin/ snod spyad bsnyungs shing yo byad bsnyungs la/ 'tshog chas rnyed do cog thams cad yongs su gtong bas yo byad bsnyungs pa yin no//de la byang chub sems dpa' dge ba'i bshes gnyen du gyur pa de ni rnam pa lngas 'dul ba gzhan dag la dge ba'i bshes gnyen gyi bya ba byed de/ glang bar byed pa yin/ dran par byed pa yin/ 'dom par byed pa yin/rjes su ston par byed pa yin/ chos ston par byed pa yin te/ tshig de dag gis rgyas par dbye ba ni 'di lta ste/ nyan thos kyi sa las rig par bya'o/ /gdams ngag dang rjes su bstan pa ni de bas kyang lhag par 'di lta ste/ stobs kyi rigs kyi le'u las rig par bya'o//de la byang chub sems dpa' dge ba'i bshes gnyen la brten pa ni rnam pa bzhis yongs su rdzogs par rig par bya ste/ dus dus su nad g.yog dang / tha mal pa'i g.yog byed cing / byams pa dang gus pa dang / dga' ba dang ldan pa dang / dus dus su gus par smra ba dang /phyag bya ba dang / mngon du ldang ba dang / thal mo sbyar ba dang / gdud par bya ba dang / mchod par bya ba dang / chos dang mthun pa'i gos dang / zas dang / mal cha dang / stan dang / na ba'i gsos sman dang / yo byad sbyin pas mchod pa dang / gnas bcas nas yang dag par gzud pa dang /rnam par gzud pas chos dang mthun pa'i don rnams la dbang byed la/ rnam par mi g.yo zhing / yang dag pa ji lta ba bzhin du 'chags pa dang / dus dus su shes par bya ba'i bsam pa'i drung du 'gro ba dang / bsnyen bkur byed pa dang 'dri ba dang nyan pa'o//de la byang chub sems dpa' dge ba'i bshes gnyen las chos nyan par 'dod pas ni/ 'du shes rnam pa lngas chos nyan par bya ste/ dkon pa'i don gyis rin po che'i 'du shes dang / lhan cig skyes pa'i shes rab rgya chen po 'thob pa'i rgyu'i rang bzhin gyi don gyis mig gi 'du shes dang /lhan cig skyes pa'i ye shes kyi mig thob nas kyang shes bya yang dag pa ji lta ba bzhin du rnam pa thams cad yang dag par ston pa'i don gyis snang ba'i 'du shes dang / mya ngan las 'das pa dang rdzogs pa'i byang chub bla na med pa'i go 'phang 'thob pa'i rgyu'i dngos po'i don gyis 'bras bu dang phan yon che ba'i 'du shes dang /tshe 'di la mya ngan las 'das pa dang rdzogs pa'i byang chub kyi chos ma thob pa yang dag pa ji lta ba bzhin du rab tu rnam par 'byed pa'i zhi gnas dang / lhag mthong gi dga' ba chen po kha na ma tho ba med pa'i rgyu'i dngos pa'i don gyis dga' ba kha na ma tho ba med pa'i 'du shes so//de la byang chub sems dpa' dge ba'i bshes gnyen las chos nyan pa dang / gang zag chos smra ba de la gnas lngar yid la byed pa mi bya bar rna blags te/ dang ba'i yid kyis chos mnyan par bya'o/ /tshul khrims nyams pa yid la byed par mi bya ste/'di ltar 'di ni tshul khrims nyams shing sdom pa la gnas pa ma yin gyi/ bdag gis 'di las mnyan par mi bya'o snyam du sems mngon par 'du mi bya'o/ /rigs dma' ba la yang yid la byed par mi bya ste/ 'di ltar 'di ni rigs dma' ba yin gyi/bdag gis 'di las mnyan par mi bya'o snyam du sems mngon par 'du mi bya'o / /byad ngan pa la yang yid la byed par mi bya ste/ 'di ltar 'di ni byad ngan yin gyi / bdag gis 'di las mnyan par mi bya'o snyam du sems mngon par 'du mi bya'o/ /tshig 'bru ngan pa la yang yid la byed par mi bya ste/'di ltar 'di ni tshig legs par sbyar ba ma yin gyi / bdag gis 'di las mnyan par mi bya'o snyam du sems mngon par 'du mi bya ste/ don la rton par bya'i tshig 'bru la rton par mi bya'o/ /snyan pa med pa yang yid la byed par mi bya ste/'di ltar de ni tshig rtsub cing khro la snyan par chos smra ba yang ma yin gyi / bdag gis 'di las mnyan par mi bya'o snyam du sems mngon par 'du mi bya'o/ /gnas lnga po 'di dag la yid la byed par mi bya bar byang chub sems dpas gus pa dang bcas pas dam pa'i chos yongs su gzung bar bya ste/chos ni nams kyang gang zag gi skyon gyis skyon can du mi 'gyur ba'i phyir ro/ /de la byang chub sems dpa' shes rab rtul po gang zag gi skyon rnams la sems sdang zhing chos nyan par mi 'dod pa de ni bdag nyid kho na la gnod cing shes rab yongs su nyams par 'gyur bar zhugs pa yin par rig par bya'o zhes gsungs so//sdong po bkod pa'i mdo las kyang / rigs kyi bu dge ba'i bshes gnyen ni sgrib par 'gyur ba'i chos thams cad la rnam par sbyong ba'o/ /dge ba'i bshes gnyen ni sdig to las rnam par zlog pa'o/ /dge ba'i bshes gnyen ni mi bya ba rnams khong du chud par byed pa'o//bag med pa'i gnas las yang dag par zlog pa'o/ /ma rig pa'i mun pa rnam par sel ba'o/ /lta ba'i 'ching ba gtub pa'o / /'khor ba'i grong khyer nas 'don pa'o/ /'jig rten gyi gnas 'dor bar byed pa'o//bdud kyi zhags pa las thar bar byed pa'o/ /sdug bsngal gyi zug rngu 'byin pa'o/ /mi shes pa'i thibs po las thar bar byed pa'o/ /lta ba'i mya ngan las yongs su zlog pa'o/ /srid pa'i chu bo las sgrol ba'o/ /'dod pa'i 'dam nas 'byin pa'o/ /lam mi bde ba nas rnam par zlog pa'o//byang chub sems dpa'i lam yang dag par ston pa'o/ /byang chub sems dpa'i yi dam la gzhog pa'o/ /nan tan la rab tu dgod pa'o/ /thams cad mkhyen pa nyid du 'gro ba'i phyogs rab tu ston pa'o/ /shes rab kyi mig rnam par sbyong ba'o/ / byang chub kyi sems rnam par 'phel bar byed pa'o/ /snying rje chen po yang dag par bskyed pa'o/ /spyod pa yongs su ston pa'o/ /pha rol tu phyin pa'i gdams ngag rab tu ston pa'o/ /sa la rab tu 'god pa'o/ /bzod pa rnam par 'byed pa'o/ /dge ba'i rtsa ba thams cad yongs su 'grub par byed pa'o//tshogs thams cad skyed par byed pa'o/ /byang chub sems dpa'i yon tan thams cad stobs pa'o/ /sangs rgyas thams cad kyi zhabs kyi drung du phyin par byed pa'o/ /yon tan thams cad yongs su ston pa'o/ /don thams cad yang dag par len du 'jug pa'o//nan tan la gzengs bstod pa'o/ /'byung ba'i sgo ston pa'o/ /lam gol ba las yongs su bsrung ba'o/ /chos snang ba'i sgo snang bar byed pa'o/ /chos kyi sgo mngon par rlan par byed pa'o/ /chos thos par bya ba'i sprin gyi char 'bebs pa'o/ /nyon mongs pa thams cad zhi bar byed pa'o//lta ba'i rnam pa thams cad las rnam par zlog pa'o/ /sangs rgyas kyi chos thams cad la gnas par byed pa'o/ /'di ltar yang rigs kyi bu dge ba'i bshes gnyen ni sangs rgyas kyi rigs bskyed pas ma lta bu'o/ /dge ba'i bshes gnyen ni phan yon rgya chen po sgrub pas pha lta bu'o//dge ba'i bshes gnyen ni sdig pa thams cad las bsrung bas ma ma lta bu'o/ /dge ba'i bshes gnyen ni byang chub sems dpa'i bslab pa khong du chud par byed pas slob dpon lta bu'o/ /dge ba'i bshes gnyen ni pha rol tu phyin pa'i lam du 'dzud pas lam mkhan lta bu'o//dge ba'i bshes gnyen ni nyon mongs pa'i nad las thar bar byed pas sman pa lta bu'o/ /dge ba'i bshes gnyen ni ye shes kyi sman rnam par 'phel bar byed pas gangs kyi ri lta bu'o/ / dge ba'i bshes gnyen ni 'jigs pa thams cad las bsrung bas dpa' bo lta bu'o/ /dge ba'i bshes gnyen ni 'khor ba'i chu bo chen po las sgrol bas gnyen pa lta bu'o/ /dge ba'i bshes gnyen ni thams cad mkhyen pa'i ye shes rin po che'i gling du phyin par byed pas skya ba 'dzin pa lta bu'o//rigs kyi bu de lta bas na de ltar yid la byed pa rgyun ma chad pas khyod kyis dge ba'i bshes gnyen bsnyen par gyis shig/ /khur thams cad bskur bas yongs su mi skyo ba'i phyir sa lta bu'i sems dang mi phyed pa'i phyir rdo rje lta bu'i sems dang /sdug bsngal thams cad kyis mi bsgul ba'i phyir khor yug lta bu'i sems dang / ci dga' bar bka' nyan pas bran lta bu'i sems dang / dag thams cad mi gcog pas slob ma lta bu'i sems dang / las thams cad nyams su blang ba la mi smad pas 'jig rten gyi bran lta bu'i sems dang /nyon mongs thams cad kyis mi skyo ba'i phyir ma ma lta bu'i sems dang / bya'o cog la mthun par bzung bas g.yog lta bu'i sems dang / nga rgyal dang mtho ba'i nga rgyal spang bas phyag dar ba lta bu'i sems dang / dus dang dus ma yin par mtho dman du 'gyur bas zla ba nya ba lta bu'i sems dang /mi srun pa thams cad rnam par spang bas rta cang shes lta bu'i sems dang / khur lci ba bskur bas theg pa lta bu'i sems dang / dul ba dang cang shes kyi bsam pas glang po lta bu'i sems dang / mi 'gul mi bskyod pas ri lta bu'i sems dang /mi khro bas khyi lta bu'i sems dang / rlom pa dang nga rgyal med pas gdol pa lta bu'i sems dang / dregs pa thams cad med pas rwa bcad pa'i khyu mchog lta bu'i sems dang / rlom sems med pas mchan bu lta bu'i sems dang / 'gro zhing 'ong bas mi skyo bas gru lta bu'i sems dang /dge ba'i bshes gnyen gyi ngag gi mthar phyin par byed pas zam pa lta bu'i sems dang / dge ba'i bshes gnyen gyi ngor lta bas bu mdzangs pa lta bu'i sems dang / chos kyi rgyal po'i bka' las mi 'da' bar bya bas/ rgyal po gzhon nu lta bu'i sems kyis dge ba'i bshes gnyen la bsnyen bkur bar bya'o//rigs kyi bu khyod kyis bdag la ni nad par 'du shes bskyed par bya'o/ /dge ba'i bshes gnyen la ni sman pa'i 'du shes dang / gdams ngag la ni sman gyi 'du shes dang / nan tan nyams su blang ba la ni nad 'tsho ba'i 'du shes bskyed par bya'o//rigs kyi bu khyod kyis bdag la ni 'gron po'i 'du shes bskyed par bya'o/ /dge ba'i bshes gnyen la ni lam mtshon pa'i 'du shes dang / gdams ngag la ni lam gyi 'du shes dang / nan tan la ni phyogs bde bar 'gro ba'i 'du shes bskyed par bya'o//rigs kyi bu khyod kyis bdag la ni pha rol tu 'gro ba'i 'du shes bskyed par bya'o/ /dge ba'i bshes gnyen la ni gnyen pa'i 'du shes dang / rjes su bstan pa la ni mu stegs kyi 'du shes dang / nan tan la ni gru'i 'du shes bskyed par bya'o//rigs kyi bu khyod kyis bdag la ni zhing ba'i 'du shes bskyed par bya'o/ /dge ba'i bshes gnyen la ni klu'i dbang po'i 'du shes dang / gdams ngag la ni char pa'i 'du shes dang / nan tan la ni lo tog 'grub pa'i 'du shes bskyed par bya'o//rigs kyi bu khyod kyis bdag la ni dbul po'i 'du shes bskyed par bya'o/ /dge ba'i bshes gnyen la ni ngal bso ba'i 'du shes dang / gdams ngag la ni nor dang don gyi 'du shes dang / nan tan la ni dbul ba sel ba'i 'du shes bskyed par bya'o//rigs kyi bu khyod kyis bdag la ni slob ma'i 'du shes bskyed par bya'o/ /dge ba'i bshes gnyen la ni slob dpon gyi 'du shes dang / gdams ngag la ni bzo'i 'du shes dang / nan tan la ni bzo khong du chud pa'i 'du shes bskyed par bya'o//rigs kyi bu khyod kyis bdag la ni 'jigs pa'i 'du shes bskyed par bya'o/ /dge ba'i bshes gnyen la ni dpa' bo'i 'du shes dang / gdams ngag la ni mtshon cha'i 'du shes dang / nan tan la ni dgra sel ba'i 'du shes bskyed par bya'o/ /rigs kyi bu khyod kyis bdag la ni tshong pa'i 'du shes bskyed par bya'o//dge ba'i bshes gnyen la ni skya ba 'dzin pa'i 'du shes bskyed pa dang / gdams ngag la ni rin po che'i 'du shes dang / nan tan la ni rin po che sdud pa'i 'du shes bskyed par bya'o/ /rigs kyi bu khyod kyis bdag la ni bu dam pa'i 'du shes bskyed par bya'o//dge ba'i bshes gnyen la ni pha ma'i 'du shes dang / rjes su bstan pa la ni rigs kyi tshul gyi 'du shes dang / nan tan la ni tshul ma nyams pa'i 'du shes bskyed par bya'o/ /rigs kyi bu khyod kyis bdag la ni rgyal po gzhon nu'i 'du shes bskyed par bya'o//dge ba'i bshes gnyen la ni chos kyi rgyal po dang / blon po dam pa'i 'du shes dang / gdams ngag la ni rgyal po'i khrims kyi 'du shes dang / nan tan la ni ye shes kyi rgyal po'i cod pan dang / rgyan dang chos kyi thabs mgo la 'ching ba dang /chos kyi rgyal po'i grong khyer la rnam par blta ba'i 'du shes bskyed par bya ste/ rigs kyi bu khyod kyis de lta bu'i 'du shes yid la bya ba yongs su bsgoms te/ dge ba'i bshes gnyen rnams la nye bar bsnyen par gyis shig ces gsungs so//byang chub kun tu rgyu'i mdo las kyang / rgyal po chen po gnas bcu yis/ grogs pos bshes pa la rjes su brtse ba dang / don 'dod pa dang / phan pa 'dod pa dang / bde ba 'dod par rig par bya ste/ bcu gang zhe na/ de ring du gnas pa dran par 'gyur ba dang /de 'ong ba na dga' bar 'gyur ba dang / legs par 'ongs pa'i phyir mdun bsu bar 'gyur ba dang / de la shis pa'i gtam brjod pa dang / de la gsang ba brjod par 'gyur ba dang / de'i gsang ba sbed par 'gyur ba dang / de'i gsang ba srung bar 'gyur ba dang /de'i mi mdza' ba spong bar 'gyur ba dang / de'i mdza' bo bsten par 'gyur ba ste/ rgyal po chen po gnas bcu po ni sdig pa las bzlog pa'i phyir mdun du 'gro ba nyid do/ /rgyal po chen po gzhan yang gnas bcus grogs pos bshes pa la rjes su brtse ba dang / don 'dod pa dang /phan pa 'dod pa dang / bde ba 'dod par rig par bya ste/ bcu gang zhe na/ lus dang ngag dang yid sdom pa yang dag par len du 'jug/ /'god rab tu 'jog pa dang / gtang bar bya ba gtong ba pa yang dag par 'dzud par byed pa dang / pha dang ma la rim gros gnas pa dang /gus par nyan pa dang / zhe sa dang / ri mor byed pa la yang dag par 'dzud par byed pa dang / dge sbyong dang bram ze tshul khrims dang ldan pa rnams la mnar sems pa med pa dang / mdun du 'gro ba yang dag par len du 'jug pa dang / de dag gi yon tan gyi rjes su bsngags pa brjod pa la yang dag par sbyor ba dang /de dag la mgron du gnyer ba dang / gos dang zas dang mal stan dang / na ba'i rkyen sman dang yo byad sgrub pa la yang dag par len du 'jug pa dang / 'dod pa rnams la smod pa dang mi mthun pa rnams la yang dag par 'dzud par byed pa dang /mdza' ba dang mi mdza' ba spong zhing rab tu 'byung ba'i bsngags pa brjod pa la yang dag par len du 'jug pa dang / chos nyan pa'i 'bel ba'i gtam gyi phyir mngon par 'gro bar bya ba mchog nyid la yang dag par len du 'jug pa dang / rgyal po chen po gnas bcu po ni 'jig rten pha rol la 'jigs pa nyid la yang dag par sbyor ba'o zhes gsungs so//shes rab kyi pha rol tu phyin pa tshigs su bcad pa las kyang / dge ba'i bshes dang ldan zhing lhag mthong ldan gyur pa/ /rgyal po rnams kyi yum thos skrag par yang mi 'gyur/ /gang zhig sdig pa'i grogs ldan gzhan gyi dring 'jog pa//de ni snod so ma btang chus reg zhig pa bzhin/ /zhes gsungs so/ /shes rab kyi pha rol tu phyin pa'i mdo las kyang / de la byang chub sems dpa' sems dpa' chen po'i dge ba'i bshes gnyen bsten pa'i phrin las gang zhe na/dge ba'i bshes gnyen gang dag byang chub sems dpa' sems dpa' chen po dag gang la thams cad mkhyen pa nyid kyi ched du yang dag par len du 'jug /'jog rab tu 'god pa'i grogs po de dag /bsten cing bsnyen par byed/ bsti stang du byed/ gus pas nyan par byed pa gang yin pa ste/'di ni byang chub sems dpa' sems dpa' chen po dag gi dge ba'i bshes gnyen bsten pa'i phrin las su brjod par bya'o zhes gsungs so// // de bzhin gshegs pa la mchod pa dang rim gror bya ba la dgongs pa bstan pa/ ji ltar na de bzhin gshegs pa la mchod par 'gyur zhe na/dkon mchog sprin gyi mdo las kyang / rigs kyi bu chos bcu dang ldan na byang chub sems dpa' de bzhin gshegs pa la mchod pa dang / rim gro bya ba la mkhas pa rnams yin no/ /bcu gang zhe na/ 'di lta ste/ chos la mchod pas de bzhin gshegs pa la mchod pa dang / bsnyen bkur byas pa yin gyi/ zang zing gi mchod pas ni ma yin no/ /nan tan gyi mchod pa dang / sems can rnams la phan zhing bde ba dang / sems can rnams la phan 'dogs par byed pa dang / sems can gyi don la zhugs pa dang /yi dam mi gtong ba dang / byang chub sems dpa'i las mi gtong ba dang / ji ltar smras pa bzhin du byed pa dang / yid yongs su mi skyo ba dang / byang chub kyi sems mi gtong bas/ rigs kyi bu de bzhin gshegs pa rnams la mchod pa dang / bsnyen bkur byas pa yin gyi/ zang zing gi mchod pas ni ma yin no zhes gsungs so/ /snying rje chen po la 'jug pa'i mdo las kyang / de dag rnga dung rdza rnga yis/ /nga la mchod par byed 'gyur te/ /mchod pa'i dam pa gang yin pa/ /nan tan 'di ni med par 'gyur/ /de dag bdag nyid tshul khrims 'chal//tshul khrims gnas pa mthong nas ni/ /phan tshun du yang 'di skad du/ /'di dag nged dang 'dra zhes smra/ /sdig pa'i spyod yul tshul khrims 'chal/ /de dag tshul khrims bsngags thos nas/ /kun nas langs pa 'di skad du/ /sangs rgyas mkhyen pa 'di min smra//de dag la ni ngo tsha med/ /dge sbyong gi ni nor stor te/ /mi bden tshig gis rtsod byed cing / /sangs rgyas byang chub rab tu spong / /ngan sems ldan pa de dag ni/ /sangs rgyas bstan pa 'di bor te/ /chos rnams rab tu spangs nas ni/ /mnar med par yang gnas par 'gyur//zhes gsungs pa dang / yang mdo de nyid las/ mdo sde 'di ni rab ston na/ /sangs rgyas rnams kyi mdzod bsrungs te/ /'di ni sangs rgyas kun mchod pa/ /chos kyi mchod pa bsam mi khyab/ /ma rungs zad pa'i dus la ni/ /mdo sde 'di dag gang 'dzin pa//de dag ye shes rnyed mi dka'/ /sangs rgyas ye shes bsam mi khyab/ /ces gsungs pa dang / yang mdo de nyid las/ byang chub sems dpa' tshul khrims tshogs gnas pa/ /des ni nga la mchod pa rab mchog byas/ /zad dus tha mar byang chub sems gnas pa/ / des ni sangs rgyas thams cad rtag tu mchod/ /zad dus mi bzad pa la byang chub sems dpa' dag /bde bar gshegs pas bstan pa'i chos mchog 'di srung ba/ /de dag nga yi sras te phyi dus chos skyong ba/ /de dag sangs rgyas bye ba stong gis yongs su gtad/ /ces gsungs so//byams pa seng ge sgra'i mdo las kyang / de nas bcom ldan 'das la gnas brtan 'od srungs chen pos 'di skad ces gsol to/ /bcom ldan 'das skye bo mang po la sman pa dang / skye bo mang po la bde ba'i slad du gnas gang dag dang / spyod pa gang dag gis/ byang chub sems dpa' lhag pa'i bsam pa nyam chung ba dang /tshul 'chos pa lags par 'tshal bar 'gyur ba'i gnas de dag legs par bshad du gsol/ de ci'i phyir zhe na/ bcom ldan 'das 'di ltar gnas de dag thos na / byang chub sems dpa' lhag pa'i bsam pa phun sum tshogs pa gang dag lags pa de dag kyang bdag nyid bsrung bar bgyi ba'i slad du'o//de skad ces gsol pa dang / bcom ldan 'das kyis gnas brtan 'od srungs chen po la 'di skad ces bka' stsal to/ /'od srungs phyi ma'i tshe phyi ma'i dus lnga brgya pa tha ma la byang chub sems dpa' gang dag sdig pa'i grogs pos yongs su zin cing /lhag pa'i bsam pa nyam chung ba de dag ni/ de bzhin gshegs pa'i sku gdung rnams la/ me tog dang / bdug pa dang / phye ma dang / spos dang / me tog phreng ba dang / byug pa dang / gdugs dang / rgyal mtshan dang / ba dan dang / sil snyan dang /mar me sbyin pa dag gis mchod pa'i las la brtson par 'gyur ro/ /'od srungs ngas ni shes pa dang mi ldan pa rnams kyi dge ba'i rtsa ba yang dag par sgrub pa'i phyir mchod pa bshad pa yin na/ mi blun po de dag ni de la brtson par 'gyur / 'od srungs ngas lha dang bcas pa'i 'jig rten gyi mdun du/dge slong dag khyed cag ni bdag nyid dul ba dang / zhi bar sbyor ba'i rjes su brtson pas gnas par gyis shig /bram ze dang khyim bdag dad pa dang ldan pa dag yod na de dag ni nga'i sku gdung rnams la sku gdung gi mchod pa byed par 'gyur ro zhes de skad gsungs na/ 'od srungs mi blun po de dag rnal 'byor yang spangs/spong ba yang spangs/ lung nod pa yang spangs/ kha ton byed pa yang spangs nas de bzhin gshegs pa'i sku gdung gi mchod pa'i las la brtson par 'gyur zhing / de dag la brten nas 'tsho bar sems par byed pa de dag la ltos/ 'od srungs byang chub sems dpa' gang gis stong gsum gyi stong chen po'i 'jig rten gyi khams 'di chu'i phung po nas bzung ste/ tshangs pa'i 'jig rten gyi mthar thug pa'i bar du/ 'bru mar gyis yongs su bkang ste/ mar me'i snying po ri rab tsam btsugs nas/ de bzhin gshegs pa la mchod pa'i las kyi phyir mar me bus pa bas ni/byang chub sems dpa' lhag pa'i bsam pa phun sum tshogs pa/ tshul khrims kyi phung po la gnas pa cig shos kyis mkhan po 'am slob dpon gyi drung nas tshig bzhi pa'i tshigs su bcad pa gcig lung mnos te/ kha ton byad cing /gom pa bdun 'dor bar byed pa gang yin pa de de bas ches bsod nams mang du bskyed par 'gyur ro/ /'od srungs byang chub sems dpa' gang gis stong gsum gyi stong chen po'i 'jig rten gyi khams 'di me tog dang / bdug pa dang / phye ma dang / spos kyis rab tu bkang ste/de bzhin gshegs pa la mchod pa'i las kyi phyir lo 'bum gyi bar du nyin lan gsum mtshan lan gsum phul ba bas ni byang chub sems dpa' 'du 'dzi'i gtam gyis 'jigs shing skrag pa gzhan zhig khams gsum thams cad kyis 'jigs shing / sems can gyi don mngon par bsgrub pa na dgon pa la mngon par phyogs te/gom pa bdun 'dor bar byed pa gang yin pa de de bas ches bsod nams mang du bskyed par 'gyur ro zhes gsungs pa dang / yang mdo de nyid las/ rigs kyi bu dag byang chub sems dpa' chos bzhi dang ldan na/ sbyin pa la yang dga' bar mi byed/ ser sna can du yang mi 'gyur ba dang / kun 'dzin pa'i sems med pa dang / gzhan 'jig rten gyi zang zing sbyin par byed pa mthong na yang de la dga' ba skyed par mi byed pa dang / gang du yang 'di lta ste sangs rgyas kyi gnas pa bla na med pa gnas pa 'thob par 'gyur ba dang /zab mo la bzod pa dang ldan par 'gyur ba dang / bla na med pa'i ye shes kyang yongs su rdzogs par byed par 'gyur ro/ /bzhi gang zhe na/ rigs kyi bu dag 'di la byang chub sems dpa' mang du thos pa yongs su tshol bar byed pa dang / de mang du thos par gyur nas grong dang / grong khyer dang / grong rdal dang / rgyal po'i pho brang dang / yul 'khor dag tu zhugs te chos kyi sbyin pa sbyin par byed pa dang / gang las kyang tha na legs so zhes bya ba tsam cung zad re ba med cing / de gos pa med pa'i sems kyis gzhan dag la chos ston par byed pa dang de gos pa med pa'i sems dang ldan pas 'di lta ste chos kyi sbyin pa'i sbyin pa 'di ni sangs rgyas bcom ldan 'das rnams kyis bsngags shing bstod pa yin pas na/mchog yin no zhes dga' ba nyams su myong bar byed pa ste/ de bdag ni sbyin pa dam pa sbyin pa'i gtso bo 'di la gnas pa yin no zhes yang dag par mthong ba na dga' ba nyams su myong bar byed cing sems can 'jig rten gyi zang zing yongs su gtong ba la mngon par brtson pa gzhan dag la ni dga' bar mi byed do//de ci'i phyir zhe na/ rigs kyi bu dag byang chub sems dpa' gang gis phyogs bcu'i 'jig rten gyi khams tshad med/grangs med/ dpag tu med pa dag na/ de bzhin gshegs pa dge slong gi dge 'dun gyis yongs su bskor ba ji snyed cig bzhugs te/ 'tsho zhing gzhes pa de dag thams cad la tshe'i mtha' ji srid par ma tshang ba med pa'i sbyin pa phul bar gyur pa gang yin pa dang /byang chub sems dpa' lhag pa'i bsam pa phun sum tshogs pa/ tshul khrims dang ldan pa/ dge ba'i chos dang ldan pa gzhan zhig gis snying rje chen po kun du bskyed de/ sangs rgyas bcom ldan 'das rjes su dran par byed pa na/gos pa med pa'i sems kyis rnyed pa dang / bkur sti dang / grags pa mi 'dod par sems can gcig cig la/ tshig bzhi pa'i tshigs su bcad pa gcig tsam zhig sgrogs par byed cing / des tshigs su bcad pa de bshad nas kyang /yi ge mnyam pa nyid kyis 'di lta ste/ dper na yi ge 'di dag rang bzhin gyis stong pa de bzhin du chos thams cad kyang rang bzhin gyis stong pa yin no zhes rab tu rtog par byed na/ rigs kyi bu dag bsod nams kyi phung po de la/ bsod nams kyi phung po snga ma des brgya'i char yang nye bar mi 'gro//stong gi cha dang / 'bum gyi cha dang / bye ba'i cha dang / bye ba phrag brgya'i cha dang / bye ba phrag stong gi cha dang / bye ba phrag 'bum gyi cha dang / bye ba khrag khrig phrag 'bum gyi bar gyi cha dang / grangs dang / bgrang ba dang / dpe dang nye bar 'jal ba dang /rgyu'i bar du yang nye bar mi 'gro ba'i phyir ro zhes gsungs pa na/ dge slong chos dang chos bzangs gnyis kyis 'di skad ces smras so/ /grogs po dag de lta bas na khyed kyang bdag tu mngon par 'du ma byed cig dang des ni mchod pa byas par 'gyur ro//sangs rgyas su 'du shes pa la ni sangs rgyas mthong ba yang med na/ mchod pa'i las lta smos kyang ci dgos te/ de ni gnas med do/ /gzhan yang de bzhin gshegs pa mchod par 'dod pas ni bdag nyid mchod par bya'o/ /dge slong dang lha de dag gis 'di skad ces smras so//ji ltar na de bzhin gshegs pa mchod par 'dod pas bdag nyid mchod par bya/ dge slong chos dang chos bzangs gnyis kyis smras pa/ grogs po dag ji ltar de bzhin gshegs pa dgra bcom pa yang dag par rdzogs pa'i sangs rgyas kyi mchod pa gang gis bdag nyid sems can thams cad kyis mchod pa'i gnas su 'os par mchod pa de ltar bdag nyid mchod par bya'o//ji ltar de bzhin gshegs pas bslabs pa de ltar bslab par bya zhing bslab pas rlom sems su yang mi bya'o/ /chos rab tu dbye bar bya zhing rab tu phye nas kyang chos 'ga' yang bsam par mi bya ste/gang gi tshe khyed cag de ltar bdag nyid mchod par byed pa de'i tshe na/ de bzhin gshegs pa yang mchod par 'gyur la/ khyed cag nyid kyang mchod par 'os par 'gyur ro/ /de bzhin gshegs pa'i sku gdung rnams la mchod par 'dod pas ni bdag nyid mchod par bya ste/ji ltar de bzhin gshegs pas bdag nyid mchod par mdzad pa de ltar mchod par bya zhing / de bzhin gshegs pa'i sku gdung yon tan gang dag dang ldan pas mchod pa mnyes par 'gyur ba'i yon tan de dag bdag nyid kyis bsgrub par bya ste/de ltar na de bzhin gshegs pa mchod par 'gyur ro/ /gang 'du shes dang mtshan ma skyed par mi byed pa de ni de bzhin gshegs pa mchod pa yin no/ /gang bdag tu rtog par mi byed pa dang / rnam par rtog par mi byed pa de ni de bzhin gshegs pa mchod pa yin no/ / gang 'jig rten pha rol tu mi 'gro ba dang / 'jig rten 'dir mi 'ong ba dang / gang tshu rol la yang mi gnas/ pha rol la yang mi gnas pa de ni de bzhin gshegs pa mchod pa yin no/ /gang la chags pa med pa dang / rtag pa med pa dang / gang la 'dzin pa med pa dang / spong ba med pa de ni de bzhin gshegs pa mchod pa yin no/ /gang la bri ba med pa dang / 'phel ba med pa dang / gang la skye ba med pa dang / 'gag pa med pa dang / gang la zad pa med pa dang / mi zad pa med pa de ni de bzhin gshegs pa mchod pa yin no//gang la sems med pa dang / sems las byung ba'i chos rnams med pa dang / yid la byed pa rnams med pa dang / bdag gi med pa dang / yongs su 'dzin pa med pa dang / 'tshe ba med pa dang / 'thab pa med pa dang / rtsod pa med pa dang / 'gal ba med pa dang / blang ba med pa dang /dor ba med pa dang / gnyis su med par 'jug pa de ni de bzhin gshegs pa mchod pa yin no/ /gang la 'dus byas med pa dang / grangs med pa dang / bgrang du med pa de ni de bzhin gshegs pa mchod pa yin no/ /gang la lus dang ngag dang yid kyis mngon par 'du byed pa'i bya ba med pa dang /lus dang ngag dang yid kyis mi dmigs pa de ni de bzhin gshegs pa mchod pa yin no/ /gang la 'das pa'i 'du shes mi 'jug pa dang / da ltar dang ma 'ongs pa'i 'du shes mi 'jug pa dang / gang rten par mi byed pa dang / mngon par zhen par mi byed pa dang /mtshan mar mi byed pa de ni de bzhin gshegs pa mchod pa yin no/ /gang la sangs rgyas su 'du shes mi 'jug pa dang / chos su ma yin/ dge 'dun du ma yin/ gang zag tu ma yin/ bdag tu ma yin/ gzhan du ma yin pa de ni de bzhin gshegs pa mchod pa yin no//grogs po dag de bzhin gshegs pa'i sku ni mi skye ba'i mtshan nyid yin pas de ni skye bas mchod par sla ba ma yin no zhes bya ba'i bar du gsungs pa dang / 'od srungs de ltar skyes bu dam pa de gnyis kyis dge slong dang / lha de dag zab mo'i bzod pa yang dag par 'dzin du bcug pas/de phyin chad de dag thams cad bdag gi don la sbyor ba'i rjes su brtson pa dang / bya ba nyung ngur gnas pas gnas par gyur cing / phyin chad de bzhin gshegs pa'i mchod rten rnams kyi drung du yang mi 'gro/ /de bzhin gshegs pa'i sku gdung rnams la mchod pa'i las kyi phyir brtson par yang mi byed do//de ci'i phyir zhe na/ 'di ltar de dag gi sems chos zab mo bla na med pa dag nyid la zhugs par gyur pa'i phyir ro/ /'od srungs de nas zhag bdun 'das nas de bzhin gshegs pa'i mchod rten de dag thams cad kyang sa la nub par 'gyur/de bzhin gshegs pa'i sku gdung de dag thams cad kyang phrog mar blugs pa bzhin nam/ snod du blugs pa bzhin du de nyid du mi snang bar 'gyur te/ 'od srungs de lta bas na skyes bu dam pa de lta bu dag gi rjes su bslab par bya'o/ /'od srungs yang ma 'ongs pa'i dus na byang chub sems dpa'i theg pa pa dang /nyan thos kyi theg pa pa'i dge slong lus ma bsgoms pa/ sems ma bsgoms pa/ tshul khrims ma bsgoms pa/ shes rab ma bsgoms pa kha cig 'byung bar 'gyur te/ de dag ni de bzhin gshegs pa'i sku gdung gi mchod pas 'tsho bar sems kyi/mya ngan las 'da' ba'i phyir ma yin zhing / 'dod chags dang bral ba'i phyir ni ma yin no zhes gsungs pa'i bar dang / 'od srungs phyi ma'i tshe phyi ma'i dus lnga brgya pa tha ma la/ dge slong lus ma bsgoms pa/ sems ma bsgoms pa/ tshul khrims ma bsgoms pa/shes rab ma bsgoms pa kha cig 'byung bar 'gyur te/ de dag ni ras bcos bu dang / rtsig pa dang / ra ba dag gi ngos la de bzhin gshegs pa'i sku gzugs dag 'dri bar 'gyur zhing / de dag gis 'tsho bar sems par yang 'gyur te/ las des bdag nyid rlom sems su byed stod par byed cing gzhan dag la brnyas pa dang /smod par yang byed do/ /de skad ces bka' stsal pa dang / bcom ldan 'das la tshe dang ldan pa 'od srungs chen pos 'di skad ces gsol to/ /bcom ldan 'das 'o na bcom ldan 'das kyis rgyal po gsal rgyal la/de bzhin gshegs pa'i sku gzugs byas na bsod nams 'di tsam du skye bar 'gyur ro zhes bka' ma stsal lags sam/ bcom ldan 'das kyis bka' stsal pa/ 'od srungs de ni de bzhin te/ rgyal po gsal rgyal ni khyim pa gos dkar po gyon pa yin pas/ de de bzhin gshegs pa'i sku gzugs byed du bcug na/de ni de la mchod pa byed par 'gyur bar zad kyi/ gzhi des chos gos sam/ bsod snyoms sam/ rnyed pa cung zad kyang 'dod par mi byed do/ /'od srungs mi blun po de dag ni gzhi des 'tsho bar 'gyur bar sems te/ de dag ni don bya'o snyam du sems la don med pa kho na byed pa yin no zhes gsungs pa'i bar dang / 'od srungs rigs kyi bu'am rigs kyi bu mo gang gis de bzhin gshegs pa'i sku gzugs rin po che sna bdun las byas pa/ shin tu zin par byas pa/ byi dor legs par byas pa/chu zheng du ri rab tsam yod pa byed du bcug ste/ de bzhin gshegs pa'i sku gzugs de lta bu dag gis/ sangs rgyas kyi zhing gang gA'i klung gi bye ma snyed dag 'di lta ste dper na/ bu ram shing gi tshal lam/ 'dam bu'i tshal lam/ 'bras kyi zhing ngam/ til gyi zhing ltar 'dab chags su yongs su bkang bar gyur na/'od srungs 'di ji snyam du sems/ rigs kyi bu'am rigs kyi bu mo de gzhi de las bsod nams mang du skyed par 'gyur snyam mam/ 'od srungs kyis gsol pa/ bcom ldan 'das de bzhin gshegs pa'i sku gzugs sor mo'i phyogs tsam zhig bgyid du stsal na yang bsod nams mang du bskyed lags na/de bzhin gshegs pa'i sku gzugs ri rab tsam du ma bgyid du stsal ba lta smos kyang ci 'tshal lags/ bcom ldan 'das kyis bka' stsal pa/ 'od srungs khyod mos par bya/ khyod kyis khong du chud par bya ste/de bas kyang byang chub sems dpa' gang zhig de bzhin gshegs pa'i sku gzugs la rab tu rtog par byed pa na/ tha na se gol gtogs pa tsam zhig chos zab mo rnams la bzod pa thob par gyur na/ de ches bsod nams mang du skyed do/ /de bas kyang gang zhig tshul khrims kyi phung po la gnas shing /tshig bzhi pa'i tshigs su bcad pa gcig bzung nas tshigs su bcad pa de'i don gang yin pa de yang rtog par byed la/ sems can gcig tsam la yang ston par byed na/ de ches bsod nams mang du skyed par 'gyur ro zhes gsungs pa'i bar dang / yang mdo de nyid las/'od srungs yang phyi ma'i tshe phyi ma'i dus lnga brgya pa tha ma la/ byang chub sems dpa'i theg pa pa'i rigs kyi bu dang / rigs kyi bu mo thabs la mi mkhas pa/ brkam pa/ 'dod pas zil gyis non pa kha cig 'byung bar 'gyur te/ de dag ni ras bcos bu dang / rtsig ngos la bris pa'am/ de bzhin gshegs pa'i sku gzugs gzhan dag la mchod pa byas pas / dngos grub dang / rdzu 'phrul thob par sems shing / de dag 'di snyam du bdag cag ni de bzhin gshegs pa la mchod pa byed pa yin gyi gzhan mchod pa byed pa ma yin no snyam du rlom sems su yang 'gyur te/de dag dge ba cung zad tsam po des bdag la stod par byed/ gzhan la smod par byed cing / gzhi des 'tsho bar sems par yang 'gyur ro/ /'od srungs de'i tshe na/ gang dag gis de bzhin gshegs pa'i sku gzugs byed du bcug pa dang / 'dus pa dang /gzhan yang de bzhin gshegs pa'i mchod pa rnam pa sna tshogs dag ma gtogs par/ de ltar lung nod pa yongs su tshol bar mi 'gyur ro/ /kha ton mi byed/ bsam gtan mi bsgom/ nang du yang dag 'jog la gces par sems par mi 'gyur te/ de dag de'i tshe na khyim pa dang rab tu byung ba dag gis mchod pa dang /ri mor bya ba dang / shes pa dang / shin tu yongs su shes par yang 'gyur zhing / gzhi des de dag gis chos gos dang / bsod snyoms dang / mal cha dang / stan dang / na ba'i gsos sman dang / yo byad dag kyang rnyed par 'gyur ro//'od srungs ngas ni byang chub sems dpa'i theg pa pa rnams kyi las su 'di lta ste/ tshul khrims kyi phung po la gnas te/ mang du thos pa yongs su btsal bar bya'o zhes bstan na/ de dag ni de'i tshe na tshul khrims 'chal pa kho nar gnas shing / chos yongs su btsal ba spangs nas/de bzhin gshegs pa'i mchod rten dag la mchod pa'i las bya ba'i phyir brtson par 'gyur zhing / gzhi des 'tsho bar 'gyur bar sems pa la ltos zhes gsungs so/ /chos thams cad mngon par 'byung ba'i rgyal po'i mdo las kyang / shA ri'i bu de lta bas na/ rigs kyi bu'am rigs kyi bu mo dgos pa bla na med pa de la lan du bya bar 'dod pas bla na med pa yang dag par rdzogs pa'i byang chub tu sems bskyed par bya'o/ /shA ri'i bu 'di ni lan du bya ba bla na med pa dang / phan gdags pa ci 'dra ba de 'dra ba'i slar phan gdags pa yin par blta bar bya'o//mtshungs pa med pa'i sems can dpe med pa'i sems can la lan du bya bar 'dod pas mtshungs pa med pa'i sems bskyed par bya ste/ gang 'di bla na med pa'i sems bskyed pa'o/ /shA ri'i bu 'das pa'i sangs rgyas bcom ldan 'das rnams la lan du bya bar 'dod pas bla na med pa yang dag par rdzogs pa'i byang chub tu sems bskyed par bya'o//shA ri'i bu ma 'ongs pa'i sangs rgyas bcom ldan 'das rnams la lan du bya bar 'dod pas kyang / bla na med pa yang dag par rdzogs pa'i byang chub tu sems bskyed par bya'o//shA ri'i bu gang yang da ltar phyogs bcu na bzhugs pa'i sangs rgyas bcom ldan 'das 'tsho zhing gzhes pa de dag la drin lan bla na med pa bya bar 'dod pas kyang bla na med pa yang dag par rdzogs pa'i byang chub tu sems bskyed par bya'o/ /shA ri'i bu gang zag gnyis po 'di ni de bzhin gshegs pa bla na med pa'i mchod pa nyid kyis mchod par byed pa yin te/gang zag gnyis po gang zhe na/ gang dag zag pa thams cad zad par byed pa dang / gang dag bla na med pa yang dag par rdzogs pa'i byang chub tu sems skyed par byed pa'o/ /de nas bcom ldan 'das kyis de'i tshe tshigs su bcad pa 'di dag bka' stsal to//bstan pa'i gang zag 'di gnyis kyis / /de bzhin gshegs pa mchod byed de/ /byang chub sems dang dgra bcom pa/ /gang zag gnyis po 'di nyid do/ /gang gis bdag nyid che de la / /bkur sti legs par byas gyur pa'i//zang zing de 'dra 'jig rten gyi/ /srid pa gsum na gnas yod min/ /gang zhig lha dang mi rnams kyi/ /gzugs sgra dri ro reg bya dag/ /bdag nyid chen po de rnams la/ /phul bas cung zad byas mi brjod / /gang gis rgya chen byang chub kyi/ /rgyur gyur sems ni bskyed pa 'di//zang zing med pa'i mchod par ni/ /bla na med mkhas pa rnams kyis brjod/ /lha dang bcas pa'i 'jig rten dang / /de bzhin bdud bcas 'jig rten na/ /yod pa'i 'dod kun de dag la/ /phul bas cung zad byas mi brjod/ /ces gsungs so// // dam pa'i chos yongs su 'dzin pa la dgongs pa bstan pa/ dkon mchog sprin gyi mdo las kyang / rigs kyi bu chos bcu dang ldan na byang chub sems dpa' dam pa'i chos yongs su 'dzin pa rnams yin no/ /bcu gang zhe na/ 'di lta ste/ phyi ma'i dus phyi ma'i tshe na lnga brgya pa tha ma la dam pa'i chos rnam par 'jig cing bstan pa 'khrugs par gyur pa dang /sems can rnams lam ngan par zhugs pa dang / ye shes kyi sgron ma mya ngan las 'das te ston pa med pa'i tshe/ mdo sde rgya chen po don che zhing mthu che ba/ dam pa'i chos thams cad kyi ma mo 'dra ba dag 'dzin cing klog la kha ton du byed cing kun chub par byed pa dang /gzhan la rjod cing ston la yang dag par ston cing gsal bar byed pa dang / de la zhugs pa'i gang zag rnams la dga' ba dang / dad pa dang rangs par byed cing de dag la phan 'dogs pa dang / zang zing med pa'i sems kyis dam pa'i chos nyan pa dang /chos smra ba'i gang zag rnams la ston par 'du shes bskyed pa dang / dam pa'i chos rnams la bdud rtsir 'du shes bskyed pa dang / bcud kyis len gyi 'du shes bskyed pa dang / rtsi'i 'du shes bskyed pa dang / lus dang srog la mi lta bar dam pa'i chos yongs su tshol ba dang /btsal nas kyang nan tan gyis bsgrub pa'o/ /rigs kyi bu chos bcu po de dag dang ldan na/ byang chub sems dpa' dam pa'i chos yongs su 'dzin pa rnams yin no zhes gsungs so/ /blo gros rgya mtshos zhus pa'i mdo las kyang /de nas byang chub sems dpa' sems dpa' chen po yon tan gyi rgyal po snang ba zhes bya ba 'khor de nyid du 'dus par gyur te 'dug pa des bcom ldan 'das la 'di skad ces gsol to/ /bcom ldan 'das kyis ngas chos gang mngon par rdzogs par sangs rgyas pa de brjod du med do zhes gsungs na/bcom ldan 'das chos brjod du ma mchis pa lags na/ dam pa'i chos yongs su gzung ba ji lta bu zhig lags/ bcom ldan 'das kyis bka' stsal pa/ rigs kyi bu de de bzhin no/ /ji skad smras pa de bzhin te/chos gang ngas mngon par rdzogs par sangs rgyas pa de brjod du med do/ /rigs kyi bu 'on kyang yi ge'i nges pa'i tshig gang gis brjod du med pa 'dus ma byas pa'i chos de bsnyad pa'i yi ge'i nges pa'i tshig de dag gang len pa dang / 'dzin pa dang / ston pa dang / rab tu shes par byed pa dang / 'jog pa dang / rnam par 'grel ba dang / rnam par 'byed pa dang / gsal bar byed pa dang / yang dag par rab tu ston par byed pa 'di ni dam pa'i chos yongs su 'dzin pa zhes bya'o/ /rigs kyi bu gzhan yang chos smra ba gang dag mdo sde 'di lta bu 'di dag 'dzin pa dang /ston pa dang / sgrub pa'i chos smra ba de dag la gang bsnyen pa dang / bsten pa dang / bsnyen bkur byed pa dang ldan pa dang / rim gro byed pa dang / gus par byed pa dang / zhes byed pa dang / bsti stang byed pa dang / kun du srung ba dang / sbed pa dang / yongs su 'dzin pa dang / gos dang / zas dang / mal cha dang / na ba'i gsos sman dang / yo byad sbyin pa dang / legs so zhes bya ba sbyin pa dang / jo bo lta bur kun du srung ba dang / dge ba kun du srung ba dang / bsngags pa brjod pa dang / mi snyan pa 'chab pa 'di yang dam pa'i chos yongs su 'dzin pa'o//rigs kyi bu gzhan yang gang stong pa nyid la mos pa dang / mtshan ma med pa la yid ches pa dang / smon pa med pa la som nyi med pa dang / mngon par 'du bya ba med pa la de kho na nyid du nges par sems pa 'di yang dam pa'i chos yongs su 'dzin pa'o/ /rigs kyi bu gzhan yang rtsod pa med pa lhur len pa dang /chos ma yin pas rtsod pa rnams chos dang mthun pas tshar gcod pa 'di yang dam pa'i chos yongs su 'dzin pa'o/ /rigs kyi bu gzhan yang zhe sdang med pa'i rgyud dang / sems can bsdu ba dang / rab tu thar bar bya ba'i blo dang / zang zing med pa'i sems kyis gzhan dag la chos sbyin pa 'di yang dam pa'i chos yongs su 'dzin pa'o/ /rigs kyi bu gzhan yang lus dang srog 'dor zhing / mdo sde 'di lta bu 'di dag kun du srung ba dang / sbed pa dang / sgrub par dgon pa na gnas pa 'di yang dam pa'i chos yongs su 'dzin pa'o//rigs kyi bu gzhan yang gang chos mnyan pa'i rgyu las byung ba 'am/ chos bstan pa'i rgyu las byung bas tha na gom pa gcig 'dor ram/ tha na dbugs 'byin pa 'am/ rngub pa gcig kyang rung ste/ 'di yang dam pa'i chos yongs su 'dzin pa'o/ /rigs kyi bu gzhan yang gang chos thams cad yongs su mi 'dzin zhing /mi len pa 'di yang dam pa'i chos yongs su 'dzin pa zhes bya'o zhes gsungs pa dang / yang mdo de nyid las/ rigs kyi bu kye ma'o sems 'di ni yul la rab tu 'tshor ba ste gang de zlog pa dang / yongs su srung ba dang / rtse gcig tu 'gyur ba dang / dul ba dang /zhi ba dang / nye bar zhi ba dang / 'dul ba 'di ni dam pa'i chos yongs su 'dzin pa'o zhes gsungs so/ /nges pa dang ma nges pa la 'jug pa phyag rgya'i mdo las kyang / 'jam dpal phyogs bcu'i 'jig rten gyi khams thams cad kyi rdul phra rab kyi rdul rnyed kyi rang sangs rgyas rnams kyi rnyed pa dang bkur sti bcad pa'i phyir/rnyed pa dang bkur sti la ser sna'i sems bskyed cing phyogs dang phyogs mtshams rnams su de dag gi grags pa dang sgra dang tshigs su bcad pa ma yin pa bsgrags la/ rigs kyi bu 'am rigs kyi bu mo gzhan zhig gis ni theg pa chen po la mos pa'i byang chub sems dpa' gcig gi rnyed pa dang bkur sti bcad pa'i phyir/rnyed pa dang bkur sti la ser sna'i sems bskyed cing bsngags pa ma yin par bsgrags na yang / 'di ni de bas ches sdig pa grangs med pa bskyed do/ /'jam dpal gang la la zhig dam pa'i chos yongs su gzung ba'i phyir theg pa chen po la mos pa'i byang chub sems dpa' la dga' ba'i sems kyis tha na chu ra'i chu tsam byin na yang las des 'khor los sgyur ba'i rgyal srid du ma myong bar 'gyur na/byang chub sems dpa' klog pa dang / kha ton byed pa la mos pa lta ci smos zhes gsungs so/ / de bzhin gshegs pa'i ye shes kyi phyag rgya'i mdo las kyang / shes 'dod can dang phrag dog can dang ni/ /tsher ma can dang bcos ma ston pa dang / /brjod pa tsam dang spyod yul dman pa yin / /bde gshegs byang chub srung bar nus ma yin/ /bas mtha' dgon pa la dga' dben pa yi//spyod yul can dang zab mo la bzod cing / /tshig tsam smra min ral gri lta bu dang / /bshes dang bde ba las ni ring gyur pa/ /de ni byang chub nyams pa bsrung ba yin/ /tshogs las ring zhing rab tu zhi la mos/ /ri dgas skrag bzhin gnas pa med par spyod//mkha' la rlung bzhin rnyed la chags med pa/ /de 'dra de ni rgyal ba'i chos 'dzin yin/ /lus la mi ltos srog ni don mi gnyer/ /bar dor gnyen la dga' 'gyur smos ci dgos/ /brtson brtsams bdag gi ba med cang mi 'dzin/ /de ni phyi ma'i dus na byang chub snod/ /phyi dus 'dir ni sems can 'byung 'gyur ba//byang chub don du bdag gis spyad smra zhing / /gang dag sems kyis 'chags dang tshul 'chos bcas/ /'dzin bcas de dag chos ni srung mi nus/ /zhes gsungs so/ /bden pa'i rnam pa'i mdo las kyang / shA ri'i bu gzhan yang byang chub sems dpa' bsti stang gis chos 'tshol bar byed cing /bsti stang gis chos yongs su 'dzin par byed la/ bsti stang gis chos kyi sbyin pa sbyin par byed do/ /shA ri'i bu ji ltar na byang chub sems dpas bsti stang gis chos btsal bar bya zhe na/ shA ri'i bu 'di la byang chub sems dpa' chos 'dod pas mkhan po dang /slob dpon la gus pas gang yongs su mi gtong ba'i rin po che de 'jig rten na med do/ /gang lus kyi rim gro mi byed pa de med do/ /gang dka' bas btang ba la mi spro ba de med do/ /gang dag gi las la mi spro ba de med do/ /de ci'i phyir zhe na/ de bzhin du sbyar te/ chos rin po che ni rin po che thams cad las khyad par du gyur pa yin pas bdag gis rin po che thams cad btang nas chos rin po che btsal zhing gzung bar bya'o/ /de ci'i phyir zhe na/ chos 'di ni 'ching ba thams cad gcod par 'gyur pa'o/ /chos 'di ni skye ba dang / rga ba dang / na ba dang / 'chi ba dang / mya ngan dang / smre sngags 'don pa dang / sdug bsngal ba dang / yid mi bde ba gcod par 'gyur ba'o snyam nas/ rin po che'i sems bskyed/ rnyed dka' ba'i sems bskyed / sman gyi sems bskyed de/ chos 'di ni sems can thams cad kyi nad nye bar zhi bar byed par 'gyur bas/bdag gis sems can thams cad kyi nad nye bar zhi bar bya ba'i phyir/ chos 'di lta bu btsal bar bya'o zhes de lta bu'i bsam pas/ shA ri'i bu byang chub sems dpa' chos tshol bar byed do/ /shA ri'i bu ji ltar na byang chub sems dpa' rin thang med pa'i sems bskyed cing /bsti stang gis chos yongs su 'dzin par byed ce na/ de tshig bzhi pa'i tshigs su bcad pa'i ched du ri rab tsam gyi rin po che'i phung po yongs su btang yang de la dka' ba'i 'du shes mi skyed kyi/ ci ste gang tshig bzhi pa'i tshigs su bcad pa 'di 'dzin pa de nyid la ni dka' ba'i 'du shes bskyed do//chos kyi tshig gcig gi ched du stong gsum gyi stong chen po'i 'jig rten gyi khams rin po che sna bdun gyis bkang ba/ srid pa'i rtse mo dang mnyam pa 'di yongs su gtong yang de la ni dka' ba'i 'du shes mi skyed kyi ci ste gang chos kyi tshig gcig po 'di 'dzin pa de nyid la ni dka' ba'i 'du shes bskyed do//shA ri'i bu byang chub sems dpa' de lta bu'i gus pa dang / de lta bu'i ri mor byed pas chos yongs su 'dzin par byed de/ shA ri'i bu 'di yang byang chub sems dpa'i ngo mtshar yin no/ /shA ri'i bu 'di ji snyam du sems/ ci skyes bu srog don du gnyer bas srog gi phyir yang rin po che'i phung po 'di tsam yongs su gtong ba yod dam/gsol ba/ bcom ldan 'das de ni ma lags so/ /bcom ldan 'das kyis bka' stsal pa/ shA ri'i bu byang chub sems dpa' sems dpa' chen po chos 'dod pas chos kyi tshig gcig gi don gyi phyir yang bdag nyid tshangs pa'i 'jig rten nas 'dor ba 'am/yang na stong gsum gyi stong chen po'i 'jig rten gyi khams mes yongs su gang ba 'di la 'jug tu zin kyang dka' ba'i 'du shes skyed par mi byed kyi/ ci ste gang chos kyi tshig 'di 'dzin pa de nyid la dka' ba'i 'du shes skyed par byed de/shA ri'i bu de ltar byang chub sems dpa' bsti stang gis chos yongs su 'dzin par byed do/ /shA ri'i bu ji ltar na byang chub sems dpa' bsti stang du byed pas chos kyi sbyin pa sbyin par byed ce na/ shA ri'i bu 'di la byang chub sems dpa' chos kyi sbyin pa sbyin par byed pa na zang zing gi sems skyed par mi byed de/bdag gis sbyin pa 'di las chos gos dang / bsod snyoms dang / mal stan dang / na ba'i gsos sman dang / yo byad rnams rnyed par 'gyur ba 'am/ tha na bdag gis sbyin pa 'di las legs so zhes bya ba yang rnyed par 'gyur ro zhes skyes bu dam pa de de lta bu'i bsam pas chos kyi sbyin pa sbyin par mi byed do//'on kyang ji ltar sems can 'di dag skye ba dang / rga ba dang / na ba dang / 'chi ba dang / mya ngan dang / smre sngags 'don pa dang / sdug bsngal ba dang / yid mi bde ba dang / 'khrug pa rnams las thar bar bya zhes de ltar na sbyin pa sbyin par byed de/ shA ri'i bu skyes bu dam pa de dag ni de lta bu'i bsam pa dang / de lta bu'i tshul gyis chos kyi sbyin pa sbyin par byed do/ /shA ri'i bu gal te yang byang chub sems dpa' la/ la la zhig 'di skad du/ gal te bdag la khyod kyis lus sbyin pa lta na/bdag khyod la chos kyi sbyin pa 'di len par 'dod do zhes zer na/ shA ri'i bu byang chub sems dpa' gang zhig de lta bu'i phan par 'dod pa yod na/ 'di skad du/ khyod la bdag gi yan lag dang / nying lag las mchog dang mchog tu gyur pa'i sha dag kyang zo shig /'dod chags zad par byed pa'i chos 'di yang zung shig ces smra bar byed do/ /shA ri'i bu byang chub sems dpa' de lta bu byed pa na yang dka' ba'i 'du shes mi skyed kyi/ ci ste gang 'di chos kyi sbyin pa de ston pa de nyid la ni dka' ba'i 'du shes skyed par byed do/ / shA ri'i bu byang chub sems dpa' de lta bu'i bsti stang gis chos kyi sbyin pa sbyin par byed/ de lta bu'i bsti stang gis chos 'dzin par byed/ de lta bu'i bsti stang gis chos tshol bar byed do / /shA ri'i bu de lta bu'i bsti stang gis chos nges par yongs su tshol ba po'i sems can yang rnyed dka' ba yin/shA ri'i bu de lta bu'i bsti stang gis chos yongs su 'dzin pa po'i sems can yang rnyed dka' ba yin/ shA ri'i bu de lta bu'i bsti stang gis chos sbyin pa po'i sems can yang rnyed dka' ba yin te/ gang rnyed dka' ba de ni ngo mtshar du gyur pa yin la/ de dag ni lha dang bcas pa'i 'jig rten gyis kyang bsngags par bya ba yin no//shA ri'i bu chos gsum po 'di dang ldan na byang chub sems dpa' bsngags pa'i bya ba rjes su 'thob par 'gyur ro zhes gsungs so/ /dad pa'i stobs bskyed pa'i mdo las kyang / 'jam dpal gal te byang chub sems dpa' shing rta la zhon nas 'dod pa'i yon tan lnga la rtse zhing dga' ba dang rol bar byed la su zhig de'i shing rta 'dren par mi byed na/'jam dpal ngas de'i shing rta drang bar bya'o/ /de ci'i phyir zhe na/ gang gi tshe byang chub sems dpa' 'dod pa'i yon tan lnga la smod cing nyon mongs thams cad pham par byas nas/de bzhin gshegs pa'i stobs rnams rdzogs par byed/ mi 'jigs pa bzhi dang / so sor yang dag par rig pa bzhi dang / sangs rgyas kyi chos ma 'dres pa bco brgyad rdzogs par byed pa'i dus de ni yod la/ nyan thos ni sangs rgyas kyi chos rnams la mi 'jug cing /sems can gyi khams kyi phyir go cha gyon par mi nus pa des na de bzhin gshegs pas byang chub sems dpa' yongs su gzung bar gsung par mdzad do/ /'jam dpal byang chub sems dpa' sems dpa' chen po 'di yon tan gzhal du med pa yin pas/'jam dpal byang chub sems dpa' sems dpa' chen po dag yongs su gzung bar bya'o/ /byang chub sems dpa' yongs su gzung bas ni dam pa'i chos yongs su gzung bar 'gyur ro/ /dam pa'i chos yongs su gzung bas ni sems can thams cad yongs su gzung ba byas par 'gyur ro//sems can thams cad yongs su bzung bas ni sangs rgyas kyi gdung mi gcad pa byas par 'gyur ro/ /byang chub sems dpa' sangs rgyas kyi gdung mi gcad par 'dod pas/ tha na sems dang po bskyed pa'i byang chub sems dpa' las kyang dam pa'i chos yongs su gzung bar bya'o//sems can thams cad kyi nyon mongs pa thams cad nges par gzhom par 'dod pa dang / ngan 'gro ngan song thams cad du ltung ba'i gnas dgag par 'dod pas/ byang chub sems dpa' rnams cung zad tsam gyis kyang yongs su gzung bar bya'o//de bzhin du 'khor los sgyur ba'i bde ba grangs med pa rjes su myong bar 'dod pa dang / de bzhin du brgya byin dang tshangs pa'i bde bdag rjes su myong bar 'dod pa dang / bdud kyi zhags pa thams cad bcad par 'dod pa nas/ bla na med yang dag par rdzogs pa'i byang chub mngon par rdzogs par 'tshang rgya bar 'dod pa'i bar gyis byang chub sems dpa' yongs su gzung ba la rnal 'byor du bya'o zhes gsungs so//chos thams cad kyi rang bzhin mnyam pa nyid rnam par spros pa'i ting nge 'dzin las kyang / bdag tu 'du shes dbang gyur nam du yang //bstan pa 'di la srung bar byed mi nus/ /bde bar gshegs pa'i byang chub phyir spangs pa/ /rab tu ston pa phyi ma'i dus na dka'/ /gang zhig kun nas bdag gi 'du shes spong / /gang zag smra la brten pa'i sems can dang / /gzugs dang sgra dang dri dang ro dang ni//reg bya spong 'gyur de ni bstan srung yin/ /zhes gsungs so/ /dam pa'i chos yang dag par sdud pa'i mdo las kyang / de nas bcom ldan 'das la tshe dang ldan pa kun dga' bos 'di skad ces gsol to/ /bcom ldan 'das dam pa'i chos yang dag par sdud pa rnams ni byang chub sems dpa' rnams kyi mchog tu gtso bor gyur pa'i phrin las lags so//byang chub sems dpa' dam pa'i chos yang dag par sdud pa la mngon par brtson pa ni sangs rgyas rnams ma nyes par byed par 'gyur lags so/ /de ci'i slad du zhe na/ bcom ldan 'das/sangs rgyas bcom ldan 'das ni chos la bla mar mdzad pa'i slad du'o/ /bcom ldan 'das dam pa'i chos yongs su sdud pa gang lags/ 'di lta ste/ tshig dang don gyi sgo nas sems pa'i byang chub sems dpa' de bzhin gshegs pas gsungs pa'i mdo sde zab mo ston pa dang kha ton byed pa ni dam pa'i chos yang dag par sdud pa yin no zhes gsungs so//tshangs pas zhus pa'i mdo las kyang / tshangs pa chos bzhi dang yang dag par ldan pa'i byang chub sems dpa' sems dpa' chen po chos 'tshol bar 'gyur te/ bzhi gang zhe na/ rnyed dka' ba'i don gyis rin po che'i 'du shes dang /nad thams cad zhi bar byed pa'i don gyis sman gyi 'du shes dang / rnam par 'jig pa med pa'i don gyis nor gyi 'du shes dang / mya ngan las 'da' ba'i don gyis sdug bsngal thams cad nye bar zhi ba'i 'du shes te/ bzhi po 'di dag dang ngo / /tshangs pa chos bzhi dang yang dag par ldan pa'i byang chub sems dpa' sems dpa' chen po dag 'khor gyi nang du nye bar 'gro ba 'am yang dag par 'jug pa'i thabs la mkhas par 'gyur te/bzhi gang zhe na/ khyad du mi gsod pa'i dgongs pa nyid kyis chos don du gnyer ba can nyid dang / khengs shing nga rgyal med pa nyid kyis gus pa dang bcas pa nyid dang / bdag la bstod pa med pa nyid kyis ci zhig ces dge ba tshol ba nyid dang / rnyed pa dang bkur sti'i rgyu ma yin par sems can gzhan dge ba'i rtsa ba la yang dag par sbyar ba nyid de bzhi po 'di dag dang ngo zhes gsungs so//rgyu ci zhig gis bstan pa nub par 'gyur ba dam pa'i chos nub pa la dgongs pa bstan pa/ tshangs pas zhus pa'i mdo las kyang / 'od srungs 'di lta ste/ rgya mtsho chen po na rin po che thams cad bsdus pa zhes bya ba/ rdo rje'i tshogs kyi nor bu rin po che chen po zhig yod la/ de ji srid du nyi ma bdun shar par gyur cing /tshangs pa'i 'jig rten gyi bar du 'gro bar gyur pa'i tshe nor bu rin po che chen po len par mi 'gyur 'jig par mi 'gyur gyi/ gang na 'jig rten gyi khams gzhan gyi sangs rgyas kyi zhing na yod pa'i rgya mtsho chen po der nor bu rin po che chen po de 'pho bar 'gyur ro//'od srungs nor bu rin po che chen po de rgya mtsho chen po gzhan du ma 'phos par 'jig rten gyi khams 'di tshig par 'gyur ba gang yin pa de ni gnas med cing go skabs med de de ni gnas yod pa ma yin pa nyid do/ /'od srungs de bzhin du dam pa'i chos yongs su nyams par 'gyur ba na/de lta bu'i ngo bo'i skyes bu dam pa dag /'jig rten gnas pa 'dir dam pa'i chos ma yin pa bdun 'byung bar 'gyur ba'i tshe/ sangs rgyas kyi zhing gzhan dag tu 'pho bar 'gyur ro/ /dam pa'i chos ma yin pa bdun po gang zhe na/'di lta ste/ mu stegs kyi gnas dang / sdig pa'i grogs pos yongs su 'dzin pa dang / log pa'i sbyor ba dang / phan tshun 'tshe ba'i sbyor ba dang / dge ba'i rtsa ba rnam par 'joms par byed pa'i lta bas byas pa'i thibs po dang / thob pa med pa dang / mngon par rtogs pa med pa'o//dam pa'i chos ma yin pa bdun po de dag byung bar gyur pa na/ skyes bu dam pa dag sems can rnams snod ma yin no snyam du rig nas/ sangs rgyas kyi zhing gzhan du 'pho bar 'gyur te/ de dag de na sangs rgyas blta ba dang / dam pa'i chos mnyan pa dang / sems can yongs su smin pa dang / dge ba'i rtsa ba bsam pa nyid dang mi 'bral bar 'gyur ro zhes gsungs so/ /sangs rgyas kyi sde snod kyi mdo las kyang / shwa ri'i bu mngon pa'i nga rgyal can dang / tshul khrims 'chal pa dang / ma nges pa'i chos ston pa'i dge slong rnams las/ dge slong phal cher 'tsho bas 'jigs pas 'jig rten gyi zang zing la 'chums pa/ zas dang / gos lhur len pa de dag gis nga'i bstan pa 'di nub par 'gyur te/ shwa ri'i bu 'di lta bu'i chos dkon mchog la de ltar smod pa chen po byed pa ni 'os pa ma yin no/ /gang la sangs rgyas bcom ldan 'das thams cad kyis 'di ltar gus pa dang bcas pa/'di ltar zhes dang bcas pa/ rang sangs rgyas thams cad dang / dgra bcom pa thams cad kyis 'di ltar gus pa dang bcas pa/ 'di ltar zhes dang bcas pa/ mngon pa'i nga rgyal can gyi dge slong rnams dang /tshul khrims 'chal pa dang / ma nges pa'i chos ston pa'i dge slong rnams kyis shin tu zil gyis gnon pa dang / shin tu spong bar 'gyur ro/ /de dag ni brkam chags dang sred bas zil gyis non pa dang / 'tsho ba'i 'dam du bying ba dang / zang zing lhur len pa dang / phrag dog dang ser sna'i kun du sbyor ba dang ldan pas phan tshun rtsod pa 'byung bar 'gyur ro//bye nas mi mthun pas phan tshun du gus pa med pa dang / 'khu ba dang phrag dog gi lam gyis 'khu ba dang / slob dpon la khyad du gsod pa dang / spre'u dang 'dra bar spyod pa dang / gdol pa dang / lus ma bsgoms pa dang / sdig pa'i las kyi mtha' 'chab pa dag de dag dge sbyong gi chos rnams las shin tu nyams pa nyid yin no/ /shA ri'i bu de la bdud sdig can gyis skyes bu dam pa ma yin pa/ sdig pa 'dod pa/ 'dod pa che ba/ zang zing lhur len pa/ 'tsho ba'i 'dam du bying ba de lta bu de dag gi bsam pa rig nas/ji ltar nga'i chos 'dul ba 'di rnam pa lngar 'gyur ba de lta bu'i gnas skabs dag byed par 'gyur ro/ /de dag gis rnam pa lngar phye nas rtsod par 'gyur zhing / de dag phan tshun du khyim pa dang rab tu byung ba rnams la mi snyan pa sgrogs par 'gyur ro//'di lta ste/ de ltar gcig la gcig kha zer ba dang / gcig la gcig gus pa med pa dang zhe sa med pa dang / ston pa'i bka' bzhin mi byed pa de'i tshe/ de dag gcig la gcig 'dom par mi 'gyur/ rjes su ston par mi 'gyur zhing / gang dag bya ba ma yin pa'i gnas byed pa dag mthong na/de la cung zad kyang dga' bar mi byed de/ de dag skrag nas gnas gtong ba 'am yul gtong bar byed kyi/ chos dang mthun pas gdams ngag dbog pa'am/ rjes su bstan par mi nus so/ /de dag phyogs su lhung nas gcig la gcig gis byis pa'i nga'o snyam pa'i nga rgyal 'byin par 'gyur zhing phan tshun nas rang gi sde pa'i phyogs spong bar 'gyur ro//shA ri'i bu de dag ni mthong na yang phan tshun du dga' bar mi 'gyur na/ gdams ngag dang rjes su bstan pa len pa lta ci smos te/ de ni gnas yod pa ma yin no/ / shA ri'i bu de bzhin gshegs pa bzhugs pa na sangs rgyas dkon mchog gcig /chos dkon mchog gcig /dge 'dun dkon mchog gcig yin la/ yongs su mya ngan las 'das nas ni bstan pa yang rnam pa lngar 'gyur ro/ /shA ri'i bu bdud sdig can gyis 'dun pa byin pa'i skyes bu gti mug lha sbyin dge 'dun 'byed pa la mngon par brtson par 'gyur te/de la de bzhin gshegs pa thams cad mkhyen pa/ thams cad gzigs pa mngon sum du gyur pa na ni bdud sdig can gyis rmongs par bya mi nus so/ /shA ri'i bu gang yang bstan pa 'di la bdud sdig can dge sbyong gi gzugs su mngon par sprul nas log par 'dzin pa rnam pa du mar rab tu ston cing /de la skye bo mang po rab tu 'god par gyur pa'i dus de dang de dag 'byung bar 'gyur ro/ /de log par 'dzin pa 'di lta bu 'di dag rab tu bstan par 'gyur te/yid kyi khams kyi gzhi 'di lta ste/ cha dang mthun pa'i gzhi dang / zad pa'i gzhi dang mthun pa'i cha dang / thams cad yod par smra ba'i gzhi dang / gang zag gi gzhi dang / dmigs pa'i gzhi'o/ /shA ri'i bu log par 'dzin pa 'di lta bu 'di dag rab tu ston par 'gyur te/de ni sangs rgyas rnams dang nyan thos rnams kyis kyang ma bshad do/ /de'i tshe bdud sdig can gyis de dag mngon par zil gyis mnan rmongs par byas/ rmugs par byas/ lhag par zil gyis mnan/ mthu can du byas/mngon par zhen par byas nas/ rang rang gi lta ba mchog tu 'dzin te/ 'di kho na bden gyi gzhan gyi ni rmongs pa yin no zhes gleng bar byed do/ /shA ri'i bu 'di ltar de bzhin gshegs pas ma 'ongs pa'i chos kyi bar chad la kun du gzigs nas bdud sdig can gyi phyogs tshar gcad pa dang /gzhom pa'i phyir de lta bu'i mdo sde 'di yang dag par ston to/ /shA ri'i bu de'i tshe mngon pa'i nga rgyal can gyis 'dzam bu'i gling ni rab tu gang bar 'gyur ro/ /de dag gnas skabs tsam gyis ma thob par thob po snyam pa'i 'du shes can du 'gyur te/ de dag 'chi ba'i dus kyi tshe phal cher ngan 'gro rnams su rab tu ltung bar 'gyur ro zhes gsungs so//yid gnyis yang dag par 'joms pa'i mdo las kyang / de bzhin gshegs pa yongs su mya ngan las 'das pa na lnga brgya pa tha ma la/ 'jig rten du byung bar gyur pa 'di lta bu'i ngo bo'i mdo sde 'di dag gis rnam pa 'jig pa bzhi 'byung ba'i dus de ni 'byung bar 'gyur ro//bzhi gang zhe na/ dge slong rnam par 'jig pa dang / chos rnam par 'jig pa dang / sems can rnam par 'jig pa dang / rgyal srid rnam par 'jig pa'o/ /'od srungs rnam par 'jig pa bzhi po 'di dag 'jig rten du byung bar gyur pa na/sems can mang po ngan song ngan 'gror 'gro bar 'gyur ro/ /'od srungs 'di lta ste/ dper na ston pa mngon sum du gyur pa dang / bstan pa gtso bo dang / mchog dang snying por gyur pa na sems can mang po bde 'gror 'gro bar 'gyur ro/ /'od srungs de bzhin du de bzhin gshegs pa yongs su mya ngan las 'das pa na sems can mang po ngan song du 'gro bar 'gyur zhing bde 'gror 'gro ba ni nyung ngo //'od srungs 'di lta ste/ dper na da ltar ston pa mngon sum du gyur pa dang / bstan pa gtso bo dang mchog dang snying por gyur pa na sems can mang po bde 'gror 'gro bar 'gyur ro//'od srungs de bzhin du rnam par 'jig pa bzhi po 'di dag 'jig rten du byung bar gyur na/ 'jig rten gnas pa 'di 'phel ba dang 'grib pa thob par 'gyur ro/ /de la kun nas g.yeng ba'i rang bzhin can/ ku la kun dzi ka lta bur gyur pa dang /rtswa mun dza dang bal ba dza lta bur gyur pa dang / 'jig rten gnas pa 'di 'khor lo la zhon pa lta bur 'gyur ro/ /'od srungs de la ji ltar na dge slong rnam par 'jig par 'gyur ba dang / dge slong rnam par 'jig pa'i ngo bo ci zhig yin zhe na/ 'od srungs dge slong rnams la tshul khrims dang bsam gtan dang shes rab dang rnam par grol ba dang /rnam par grol ba'i ye shes mthong ba las rnam par 'jig par 'gyur ro/ /gang da ltar khyim pa gos dkar po can rnams la rgyun du zhugs pa dang lan cig phyir 'ong ba dang phyir mi 'ong ba'i 'bras bu ma bsgribs pa'i sgo de ni/de'i tshe tshul khrims spangs pa/ tshul khrims nyams pa/ dge sbyong gi yon tan dang bral ba skyes bu blun pa/ 'tsho ba lhur len pa nyams pa/ nyams pas rab tu byung ba/ phongs pa/ sangs rgyas kyi bstan pa spangs pa/ dmyal ba dang / dud 'gro dang /gshin rje'i 'jig rten gyi gtso bo/ yongs su zad pa dmu rgod de dag la rjes su mthun pa'i bzod pa yin par yang mi 'gyur na/ rgyun du zhugs pa'i 'bras bu dang / lan cig phyir 'ong ba'i 'bras bu dang / phyir mi 'ong ba'i 'bras bu dang /dgra bcom pa'i 'bras bu lta smos kyang ci dgos/ 'od srungs ming tsam yang thob par mi 'gyur na/ dge sbyong dang 'phags pa'i chos lta smos kyang ci dgos/ zab mo'i chos thos nas ches skrag pa thob par 'gyur ba dang / rab tu spong ba 'thob par 'gyur ba de ni ngan song du 'gro ba'o zhes nga smra'o//'od srungs de ltar na dge slong rnam par 'jig par 'gyur ro/ /de la ji ltar na chos rnam par 'jig par 'gyur/ chos rnam par 'jig pa'i ngo bo ni ci zhig yin zhe na/ 'od srungs chos rnam par 'jig par 'gyur ro/ /ji lta bu'i rnam pas chos rnam par 'jig par 'gyur zhe na/dge slong gang yang rung ba 'ga' zhig dge slong gnyis pa dang lhan cig sangs rgyas kyi gsung sgrogs pa la mi mthun par 'gyur ro/ /de dag lugs gzhan dang gzhan 'dzin par 'gyur te/ dper na gnyen gyi bu mu stegs can gcer bu pa bzhin no/ / 'od srungs 'di na tsam pa kar gnyen gyi bu gcer bu pa 'chi ba'i dus byas par gyur la/ de 'chi ba'i dus byas pa na gcer bu pa rnams so sor gyur te/ nga ni chos 'dul ba 'di shes pa'o/ /khyod ni chos 'dul ba mi shes pa'o/ /sngon du smra bar bya ba phyi nas smros shig /phyi nas smra bar bya ba sngon du smros shig /'dres pa dang / ma 'dres pa dang / sgro gdags par bya ba dang / rtsod pa'i gzhi smros shig /gal te mthu yod na rtsod pa las grol bar bya ba'i phyir nges par gyis shig ces de dag phan tshun 'byed pa dang rtsod pa dang rgol ba thob par 'gyur te/ de dag phan tshun tshig gi mthu dang /tshig rtsub mos skyabs med pa dang / rten med pa dang / mchod rten bshig par 'gyur te/ gang gi phyir de dag rtogs pa med pa'i phyir yang dag par rdzogs pa'i sangs rgyas kyis gsungs pa'i chos 'dul ba las ring du gyur pa'i phyir ro/ /'od srungs khyim pa gos dkar po can dag gcer bu pa rtsod par gyur pa de dag la blta bar yang mi 'dod na/log par bshad pa'i chos 'dul ba nyan pa lta ci smos/ 'od srungs de bzhin du phyi ma'i dus na lnga brgya pa tha mar gyur pa na/ dge slong gang dag chos mi shes pa/ dus mi shes pa/ phar mi shes pa/mar mi shes pa/ chos las nyams pa/ chos kyi chom rkun dag 'byung bar 'gyur ba de dag chos la phyogs par gnas nas/ bskal pa bye ba khrag khrig brgya stong grangs med pas yang dag par byung ba'i byang chub de dag bsnub pa'i phyir rab tu 'bad par 'gyur ro/ /de dag chos la phyogs pa'i khyim du zhugs nas khyim gyi bud med dang khyim gyi gzhon nu ma rnams dang lhan cig lugs nyams par 'gyur ro//chos spangs pa dang tshul khrims spangs pa byas pa/ blta bar mi 'os pa/ gnam lcags 'bar ba lta bu de dag la/ khyim pa gos dkar po can dag yid rton par mi 'gyur zhing /de dag la blta bar mi 'dod na nye bar 'gro ba dang bsnyen bkur byed pa lta smos kyang ci dgos/ 'od srungs de'i tshe lha'i tshogs rnams kyang bstan pa bsnub pa dang dam pa'i chos bsnub par byed do snyam nas yid mi bde bar 'gyur/ kye ma'o shA kya'i bstan pa 'di ni ring por mi gnas so zhes de dag yid mi bde ba nyid kyis 'dong bar 'gyur te/'od srungs de ltar na chos rnam par 'jig par 'gyur ro/ /de la ji ltar na sems can rnam par 'jig par 'gyur/ sems can rnam par 'jig pa'i ngo bo ji lta bu zhig yin zhe na/ sems can rnams 'byed pa dang /'thab pa dang / rtsod pa la zhugs pa dang 'gal ba dang sdang bar 'gyur ro/ /'byed pa dang / 'thab pa dang / rtsod pa la zhugs pa dang / 'gal ba dang sdang ba de dag gis rgyal po chos dang mi ldan par 'gyur/ rgyal po'i tshogs dang blon po chen po dang blon po dang sgo srung dang /'khor rnams dang / grong rdal dang / ljongs dag kyang chos dang mi ldan pa dang / chos ma yin pa dang ldan par 'gyur ro/ /'byed pa dang 'thob pa de dag gis rgyal po ni rtsod pa dang 'dod pas bying ba dang / ya nga ba'i 'dod pas zil gyis gnon pa chos ma yin pa 'dod pa chos ma yin pa dang ldan pa/chos ma yin pa la 'dod chags kyis chags par 'gyur ro/ /chos ma yin pa la 'dod chags kyis chags pa'i bar dang ldan pa de la lha rnams dus su char 'bebs par mi 'gyur/ dus dus su rlung 'byung bar mi 'gyur zhing yang ba'i rlung 'byung bar 'gyur ro//zhing pa dang khyim bdag de dag gis sa la sa bon btab pa de dag dus dus su 'phel ba dang rgyas par mi 'gyur ro/ /der lo tog gang smin par gyur pa de dag kyang mi 'am mi ma yin pa'am/ tha na dud 'gro'i skye gnas su gtogs pa longs spyod pa de dag mdog ngan par 'gyur/blta bar mi 'os pa dang dman par 'gyur/ mdog mi sdug cing lus ring bar 'gyur/ rgyus pa tsam du gnas pa dang / tshe thung zhing yun ring por mi 'tsho bar 'gyur ro/ /de dag las gang cher sdang ba dang sdig pa che bar gyur pa de bkur ba dang rim gro dang mchod par 'gyur te/gang gi phyir dam pa'i chos nub par gyur pa na/ sems can gzi brjid dang ldan pa nyung ba dang nub par 'gyur ro/ /der rgyal po yan lag bzhi'i dpung gi tshogs go gyon nas/ pha rol gyi nor dag dang pha rol gyi yul dag dang pha rol gyi rgyal srid la 'thab par byed par 'gyur ro//der yan lag bzhi'i tshogs dang lhan cig song ba/ de ltar sdang ba'i sems dang / rnam par 'tsho ba'i sems dang ldan pa/ dge ba'i rtsa ba yongs su nyams pa/ bdag dang gzhan la mi phan par zhugs pa de dag glang po'i tshogs dang glang po'i tshogs lhan cig sogs par 'gyur ba dang /rta ba'i tshogs dang rta ba'i tshogs lhan cig sogs par 'gyur ba dang / mi reng gi tshogs dang mi reng gi tshogs lhan cig sogs par 'gyur ro/ /der de dag bsags par gyur pa na/ ji lta ji lta bar tshogs las tshogs lhags par 'gyur ro/ /khrag gi chu klung 'bab par 'gyur ro/ /gang na sems can gson por gyur ba gang yin pa de dag kyang g.yul gyi steng na gnas pa yid dga' ba dang bcas pa/ rab tu mgu ba/ yid bde zhing mgu ba skyes pa/ dmyal ba la gzhol ba/ dmyal ba'i gtso bo des lcags sgrog gis bcings te/ rang gi yul nas pha rol gyi yul du khyer bar 'gyur ro/ /de dag kyang lam kha na gnas pa na 'chi bar 'gyur ba dang / pha rol gyi yul du phyin pa na 'chi bar 'gyur ro/ /chos ma yin pa la spyod pa de dag la char 'bab pa dang lo tog 'byung bar lta ga la 'gyur/de dag sdang sems kyis 'chi ba'i dus byed par 'gyur/ bkres pas nyen bzhin du 'chi ba'i dus byed par 'gyur/ phal cher ngan song gsum du ltung bar 'gyur/ mi'i 'jig rten stongs par 'gyur/ lha'i 'jig rten stongs par 'gyur te /'od srungs de ltar na sems can rnam par 'jig par 'gyur ro/ /de la ji ltar na rgyal srid rnam par 'jig par 'gyur/ rgyal srid rnam par 'jig pa'i ngo bo ni ci zhig yin zhe na/ 'od srungs rgyal po dang chom rkun dang me dang mu ge dang chu dang mi dang mi ma yin pa dag gis rgyal srid rnam par 'jig par 'gyur ro//ri brags dang dgon pa mang du 'byung bar 'gyur/ 'dzam bu'i gling 'dir mtho dman dang sdong dum dang tsher ma'i tshogs dang yang ba dang sems can dmyal ba la gzhol ba dang blta bar mi 'os pa dang / mi rgyu ba'i lam dag 'byung bar 'gyur ro/ / dka' bas pha rol gnon pa'i yul 'byung bar 'gyur ro / /dogs pa dang bcas pa dang 'jigs pa dang bcas pa dang / spu ldang ba dang bcas pa dang / sems can rnams kun nas skrag pa thob par 'gyur ro/ /'od srungs de'i dus na 'dzam bu'i gling 'dir/ grong dang grong khyer dang grong rdal dang yul 'khor dang rgyal po'i pho brang rnams su/kun dga' ra ba nyams dga' ba 'am/ chu klung nyams dga' ba 'am/ nags tshal nyams dga' ba 'am/ rdzing bu nyams dga' ba 'am / mi nyams dga' ba nyung zad du 'gyur/ de dag kyang gzi brjid nyams pa dang / gzi mdangs phrogs par 'gyur ro//de dag gzi brjid nyams pa dang / gzi mdangs phrogs pa dang gzi mdangs chung bar gyur pa na/ grong dang grong khyer dang grong rdal dang rgyal po'i pho brang na yod pa'i kun dga' ra ba nyams dga' ba nas/ mi nyams dga' ba'i bar gang dag yin pa de dag kyang mthu chung ba dang gzi brjid chung ba dang gzi mdangs dang bral bar 'gyur ro//de dag gi lus kyi dpal dang gzi mdangs dang bral ba na/ sems can gang dag gnas pa de dag rnams tshul khrims 'chal pa dang / las mi shes pa dang / rtsub pa dang / brtsung pa dang /rnam par g.yengs ba'i tshig dang / dran pa nyams pa dang / shes bzhin med par 'gyur ro/ /byams pa'i sems med pa dang / 'byed pa dang / rtsod pa de dag yun mi ring ba na 'chi ba'i dus byed par 'gyur ro/ /dus byas nas kyang phal cher sems can dmyal ba chen po rnams su lhung bar 'gyur ro//de'i dus na sems can dmyal ba chen po rnams rgyal par 'gyur ro/ /de ci'i phyir zhe na/ gang gi phyir byas pa mi shes pa dang / byas pa la drin lan mi ldon pa dag gis 'jig rten gnas pa yongs su gang bar 'gyur ro/ /de dag las byas shing bsags pa des phal cher sems can dmyal ba chen po rnams su ltung bar 'gyur ro zhes gsungs so//yul 'khor skyong gis zhus pa'i mdo las kyang / bcom ldan 'das de bzhin gshegs pa'i bstan pa 'di nub par bgyid pa'i sems can gang lags pa de dag ji lta bu zhig lags/ de skad ces gsol ba dang /bcom ldan 'das kyis tshe dang ldan pa yul 'khor skyong la 'di skad ces bka' stsal to/ /yul 'khor skyong gnas 'di gnyis ni bcom ldan 'das kyis gsungs te/ gnyis gang zhe na/ dge slong gi gnas dang / lhod pa'i gnas so/ /de la dge slong gi gnas ni tshul khrims dang ldan pa'i phyogs gang yin pa'o//lhod pa'i gnas ni tshul khrims 'chal pa'i phyogs gang yin pa'o zhes bya ba nas/ de la dge slong ltar bcos pa gang yin zhe na/ yul 'khor skyong 'di na dge slong bdag nyid la nga'o snyam du 'dzin te/ de ni tshul khrims kyi phung po yongs su ma rdzogs pa dang ldan pa yin/chos gos gces par 'dzin pa yin/ lhung bzed gces par 'dzin pa yin/ zang zing gces par 'dzin pa yin te/ de ni mi smra ba spangs nas ngan song du 'gyur ba'i mal cha dang / stan dang mgron du gnyer ba chen po rnams bdag gir byed/bud med dang 'dris par byed/ dge slong ma dang 'dris par byed/ rgyal pos bkrabs pa dang 'dris par byed de/ de 'dris par gyur nas/ rgyun mi 'chad par mig gis gzugs rnams nges par sems so/ /des de ltar sems bskyed nas kun nas nyon mongs par 'gyur ro//kun nas nyon mongs pa'i sems dang ldan na gnas 'di lta bu yod de/ nyes pa lci ba de byed pa 'am/ yang na chung ngu byed cing 'dug par 'gyur te/ yul 'khor skyong 'di ni dge slong ltar bcos pa yin no/ /yul 'khor skyong ci'i phyir dge slong ltar bcos pa zhes bya zhe na/ dge slong ltar bcos te de bzhin gshegs pas mal cha dang stan gnang ba tha mal ba gang la dge sbyong gnas pa'i mal cha dang stan gang yin pa mi blun po des spangs nas/ chos gos la zhen cing zang zing la zhen nas/ bud med la 'dris par byed cing khyim pa dang 'dris par byed na/ 'dris par gyur pa'i mi blun po de la dge slong gi tshul lta ga la yod de/de'i steng du chos zab mo rnams la yang sun 'byin cing gshe bar byed la/ de thos su zin kyang bsngags pa ma yin brjod par byed do/ /dgon pa'i bsngags pa ma yin pa yang rjod par byed do/ /gang la de'i sems mngon par dga' ba'i 'dod pa rnams 'ba' zhig gis bsngags pa rjod par byed cing /gang la de'i sems mngon par dga' ba'i bye mo'i gtam 'ba' zhig gis bsngags pa rjod par byed la/ dge sbyong gi gnas gang yang rung ba de dag gi bsngags pa rjod par mi byed do/ /gang las de bzhin gshegs pas mdo'i tshig khyim na gnas pa dang /rab tu byung ba rnams dang 'du 'dzir mi 'gyur bar bya'o zhes gsungs pa'i mdo'i tshig de bor nas/ dge sbyong gi tshul mi 'dod cing / dge sbyong gi dngos po mi 'dod de/ gcig pu 'dug cing bud med la chos 'chad par byed la/ gzhan dag la yang de lta bu'i gzhi rnams su lung 'bogs par byed do//de ci'i phyir zhe na/ de dag ni de bzhin gshegs pas chos kyi rkun por gsungs te/ so sor thar pa spangs nas/ gcig pur 'dug cing bud med la chos 'chad pa'i phyir ro/ /mi blun po de dag ni bcos pa ste/ mgo bregs pas bcos pa dang /gos ngur smrig gyon pas bcos pa'o/ /rgyu gang gis bcos pa yin par shes par bya zhe na/ sangs rgyas bcom ldan 'das kyis smad pa gang yin pa de mi blun po de dag gis gnang bar byed de/ lo nyi shu ma lon par rdzogs par bsnyen par byed/ rang gi lag gis len par byed/ ma brtags pa la longs spyod par byed/ rang nyid g.yos dang mchod pa'i las byed/ gser dngul bdag gir byed/ khre rgod dang 'bru sogs par byed/ khyim gyi gzhi dang / zhing gi gzhi dang / kun dga' ra ba'i gzhi'i nyo tshong byed cing 'tshal za'i 'tsho ba sbyor bar byed/khyim gyi gzhi dang / zhing gi gzhi dang / kun dga' ra ba'i gzhi len par byed de/ las kyi rnam par smin pa la yid mi ches shing so sor thar pa la ma dad nas de la gzhol/ de la 'bab/ de la bab/ de la dben par 'dzin/ der spyod lam byed/ dge slong du 'dra bar 'dzin cing gang na skye bo mang po yod pa der gcer bu pa dang mtshungs par ston par byed/gang zag tu lta ba bsngags par byed/ gang zag tu lta ba dang / gcer bu pa dang / mtshungs par ston pas skye bo mang po 'dzud par byed cing 'god par byed/ sangs rgyas kyi spyod yul de bzhin gshegs pa'i gnas stong pa nyid la dmigs pa sun 'byin par byed/gshe bar byed par shes par bya'o/ /yul 'khor skyong de lta bu'i sems can dag 'byung bar 'gyur te/ de dag ni khyim pa yang ma yin/ dge sbyong yang ma yin te/ de dag gis de bzhin gshegs pa'i bstan pa 'di nub par byed do zhes gsungs so//yid gnyid yang dag par 'dzoms pa'i mdo las kyang / shA ri'i bu rgyu bzhis dam pa'i chos myur du nub par 'gyur ro/ /bzhi gang zhe na/ chos smra ba po la gzir ba dang / chos smra ba po la skur pa 'debs pa dang / phan tshun rnam par sdang ba dang /nad pa khyad du gsod pa nyid de rgyu bzhi po 'di dag gis/ dge slong de dag gi chos myur du nub par 'gyur ro zhes gsungs so/ /zla ba'i snying bo'i mdo las kyang / byang chub sems dpa' sems dpa' chen po zla ba'i sgron mas/ byang chub sems dpa' sems dpa' chen po zla ba'i snying po de nyid la tshigs su bcad de smras pa/'di nas sangs rgyas zla ba nub gyur cing / /'jig rten nyon mongs g.yul gyis ches rmongs tshe/ /dam chos tshul ni yun ring ji srid gnas/ /ji ltar rnam pa sna tshogs 'dul bar 'gyur/ /'dir ni kho bos skyes bu'i byed ci bgyi/ /bde ba'i lam ni ji ltar bstan par bgyi//srog chags bye ba ngan 'gro gsum las bsgral/ /shes rab mtha' yas rgyal la kho bos zhu/ /de'i tshe byang chub sems dpa' sems dpa' chen po thams cad dang ldan pa'i 'khor ji ltar lhags pas legs so zhes bya ba byin no/ /de nas byang chub sems dpa' sems dpa' chen po zla ba'i sgron mas bla gos phrag pa gcig tu gzar nas pus mo g.yas pa'i lha nga sa la btsugs te/bcom ldan 'das ga la bde logs su thal mo sbyar ba btud nas bcom ldan 'das la 'di skad ces gsol to/ /bdag blo ji ltar the tshom skyes pa ltar//shes rab mtha' yas rgyal la kho bos zhu/ /rkyen ci zhig gis chos tshul 'di 'chad 'gyur/ /ji ltar chos sgron slar yang yun ring 'bar/ /'di na chos kyi rnga chen su yis 'joms/ /chos kyi chu bo 'di na sus skems nus/ /ji ltar chos tshul yun ring gnas par 'gyur/ / bdag cag der ni rtag tu grogs su 'gyur/ /tshul khrims chos sam yang na brtson stobs sam/ /bzod pa'am de bzhin shes rab stobs sam ci/ /gang gi stobs kyis chos tshul gnas 'gyur zhing / /ji ltar chos rtag yun ring gnas par 'gyur/ /'di na rgyal la stobs bgyid bye ba mang //ji ltar thabs su 'gyur ba myur du gsungs/ /ji ltar chos kyi rgya mtsho mi skam pa/ /de ltar brtson brtan bdag gis myur spyad bgyi/ /sa yi bcud ni rtag tu 'phel 'gyur zhing / /sems can mdangs dang de bzhin chos kyi mdangs/ /'gro ba'i nyon mongs rgya mtsho skam 'gyur zhing //sems can mang po ngan song gsum mi 'chi/ /der bcom ldan 'das kyis phyag g.yas pa brkyang nas 'di skad ces bka' stsal to/ /nga la lhan cig tshogs nyon sa gsum ni/ /mes sreg mi rtag gang du ri mo yi/ /ltad sar gar mkhan gar byed 'dus byas gang //g.yung drung rtag brtan cung zad kyang yod min/ /ji ltar sgyu ma smig rgyu chu zla dang / /'dra ba'i sems can nyon mongs 'gror 'khyams ltar/ /srid gsum 'di na chos kun de bzhin no/ /chos gang rang nyid kyis dag ngas thugs chud/ /ji ltar sngon rgyal bya ba byas grub bzhin//mngon sum byas nas lha mi mang po'i phyir/ /nga ni deng sang 'di na nye bar gnas/ /'byung tshogs gal te bstan 'di smon lam gyis/ /bsrungs na sdug bsngal kun las grol 'gyur zhing / /'jig rten gsum gyi bla ma sangs rgyas 'gyur/ /de phyir bstan pa srungs shig 'bar bar gyis//lam brgyad ldan pa'i chos ni ngas bshad pa/ /dge sbyong don du rgyal rigs khro byed cing / /rgyal rigs don du dge sbyong khro byed pa'i/ /blo ngan sdig blo can gyis bsnub par 'gyur/ /nga ni myur du mya ngan 'da' 'gyur zhing / /nga yi nyan thos mkhas pa de dag kyang / / ma lus par ni mya ngan 'das par 'gro/ /byang chub sems dpa' rdzu 'phrul che/ /bsod nams byas pa khyed cag rnams/ /zhing 'di nas ni sangs rgyas zhing / /nyams dga' dag tu 'dong bar 'gyur/ /rgyal po bsod nams ldan bdag nyid/ /chen po 'di dag 'chi bar 'gyur/ /lo ni brgya phrag 'das pa'i tshe//bstan pa nyams par gyur pa na/ /skal dang blo gros chung ba rnams/ /nga yi bstan la rab tu 'byung / /theg pa gsum po don mi gnyer/ /'jig rten pha rol yal bar 'dor/ /'tsho ba'i don du rab byung ba/ /tshul 'chos ngo tsha rnam par spangs/ /rnyed pa 'dod cing grags pa 'dod//g.yon can khyim la ser sna byed/ /klog dang bsam gtan dang bral zhing / /chos kyi rtogs pa rnam par spangs/ /nyin par bre mo'i gtam la brtson/ /mtshan mo gnyid kyi dbang du 'gro/ /sangs rgyas gsungs pa spangs nas ni/ /sna tshogs yi ge klog par byed//bud med sbyor ba spyod byed cing / /lus kyi gos la chags par 'gyur/ /rnyed pa'i phyir dang grags pa'i phyir/ /khyim gyi las la dga' bar 'gyur/ /pho nya'i las ni byed 'gyur zhing / /sems bral phrin ni 'khyer bar byed/ /nyo tshong la ni yang dag brtson/ /khyim pa rnams la ston par 'gyur//zhing las khyim gyi las dang ni/ /rtsod pa la ni dga' bar 'gyur/ /tshangs par spyod cing mang thos pa'i/ /dge slong des pa mthong nas ni/ /rdzas 'dod 'gyur zhing de dag ni/ /mal cha de dag la mi ster/ /tshig rtsub kyis ni spyo 'gyur zhing / /skur pa yang ni 'debs par 'gyur//mi snyan de dag la smra zhing / /dge slong 'di ni tshul 'chos can/ /rkun po mchog tu ma rungs pa/ /gang zhig de la mchod byed pa/ /grags pa ma yin mang du 'thob/ /de las bsod nams 'thob mi 'gyur/ /de yis bshad pa ma nyan zhes/ /khyim pa rnams la smra bar byed//tshangs par spyod par gnas nas ni/ /sdig pa'i dge slong gis skrod 'gyur/ /des na sdig pa'i dge slong la/ /rgyal rigs rnams ni khro bar 'gyur/ /yi ge sna tshogs dag brjod pas/ /rgyal rigs rnams ni mgu bar byed/ /ji srid sna tshogs nor gyis ni/ /rgyal rigs rnams ni mgu bar byed//de bzhin bram ze rje'u rigs kyang / /nor gyi rnyed pas mgu bar byed/ /des na de dag mchod 'gyur zhing / /tshul khrims ldan dag mchod bral 'gyur/ /rgyal rigs rje'u rigs bram ze rnams/ /tshul khrims ldan pa smod par 'gyur/ /tshul khrims ldan pa sdang ba yis//lha rnams de dag la smod 'gyur/ /rgyal rigs rje'u rigs bram ze dang / /yul 'khor mtha' dag spong bar 'gyur/ /rin chen gling du 'gro 'gyur zhing / /btang snyoms su ni gnas par 'gyur/ /byang chub sems dpa' 'dong ba dang / /tshul khrims ldan pa brnyas 'gyur zhing //lha rnams thams cad 'dong ba na/ /yul 'khor der ni 'jigs chen 'byung / /sdig pa'i gnod sbyin rnams dang ni/ /klu dang grul bum srin po ni/ /gdug pa'i sems ldan mdangs phrog pa/ /shar bcas khrag 'thung 'jug par 'gyur/ /rgyal po skyong byed gnas nas ni/ / bram ze rje'u rigs dmangs rigs dag /grong khyer bsrung bar 'gyur mod kyi/ /grong khyer ri brags gzhal med khang / /grong dang kun dga' ra ba khyim/ /gnod sbyin sdig pas khyab par 'gyur/ /de dag rtag tu mdangs phrog cing / /rgyal rigs rnams la khro bar 'gyur/ /bram ze rje'u rigs dmangs rigs ni//de dag phan tshun khro bar byed/ /gdug cing gnod pa'i sems ldan pa/ /phan tshun du yang 'thab par 'gyur/ /rtsod par gyur pa de dag gi /sman ni lha ma yin gyis spyod/ /yul 'khor bcud ni skam 'gyur zhing / /dus ma yin par char rlung 'byung //'bras bu lo tog mi 'byung zhing / /sa yi bcud ni nyams par 'gyur/ /sems can mdangs ni rnyed par dka'/ /chos kyi mdangs ni nyams par 'gyur/ /mi bzad mu ge 'byung 'gyur zhing / /mtshon 'byin pa yang 'byung bar 'gyur/ /phongs pa phan tshun phrog par byed/ / yang la chags de dag ni/ /sdig pa'i dge slong sten par byed/ /dge slong de dag mchod rten dang / /dge 'dun zas skom 'bras bu ro/ /khyim pa rnams la sbyin byed cing / /slar yang mchod pa nyid du 'gyur/ /de dag la ni yongs 'dzin pa/ /bran dang bran mo khyim ster 'gyur/ /dge slong lam gsum dang bral ba//thos pas rlom zhing ltung dang bcas/ /bsam gtan tshul khrims mi 'dun pa/ /tshogs kyi nang du gtso bor 'gyur/ /tshul khrims ldan rnams dong ba na/ /nor gyi rgyu yis 'thab par 'gyur/ /thos nas rgyal rigs khro 'gyur zhing / /sdig pa'i dge slong rnams bsnun 'gyur//khyim par yang ni byed 'gyur zhing / /btson rar 'jug par byed par 'gyur/ /des ni lha dbang rnams khro 'gyur/ /yul 'khor 'di la rgyal gtum po/ /rgyal srid byed par mi 'gyur ro/ /'khor gyis sdig pa'i dge slong gi/ /ngur smrig gos ni 'bral bar byed//rang gi yul 'khor 'joms 'gyur zhing / /ring por mi thogs 'chi bar 'gyur/ /mnar med dmyal bar ltung 'gyur zhing / /yun ring sdug bsngal der myong 'gyur/ /de nas bskal pa bzang po la/ /de ni nam yang grol mi 'gyur/ /rgyal rigs gtum po 'di dag ni/ / sems can kun gyis smad par 'gyur/ /sbyin dang tshul khrims thos chos la/ /g.yo ni rnam par ston par byed/ /tshul 'chos g.yon can rgyal po 'di/ /rang gi yul 'khor myur du 'joms/ /char mi 'bab dang char chen dang / /byi ba phye ma leb dang ni/ /glang chen gyis der lo tog 'joms//rang gi dmag dang phas dmag dag/ /der ni rtsod pa 'byung 'gyur zhing / / sa g.yo ba yang 'byung bar 'gyur/ /skar mda' nyi ma gnyis dang ni/ /mi bzad nad ni 'byung bar 'gyur/ /grong dang ri brags 'tshig pa dang / /grong khyer myur du 'jig 'gyur te/ /gang phyir mgo zlum ngur smrig bgos//sngon gyi rgyal bas byin brlabs shing / /mgo zlum ngur smrig bgos gcig kyang / /lha dang mi yis mchod phyir ro/ /de bzhin gshegs pa ma gtogs pa/ /de la nus ldan gzhan yod min/ /rgyal rigs gtum po de dag dang / /sdig pa'i dge slong mgo zlum gyis//dus gsum sangs rgyas thams cad kyi/ /sku gnyis dag ni 'jig par 'gyur/ /nyon mongs kyis ches nyams de dag /sangs rgyas rnams dang phrad mi 'gyur/ /de nas rgyal po gtum po yi / /yul 'khor lha dbang rnams kyis spong / /lha dbang rnams kyis smras pa bzhin//de tshe yul 'khor 'jig par 'gyur/ /de nas yul 'khor 'jig 'gyur zhing / /chos kyi tshul lugs nyams par 'gyur/ /gzi mdangs gsum ni nyams 'gyur zhing / /lha yi gnas rnams 'jig par 'gyur/ /dkar po'i phyogs ni 'dzad 'gyur zhing / / chos ma yin phyogs 'phel 'gyur zhes/ /phan tshun du ni smra bar 'gyur/ /zas dus mkhas pas spangs gyur pa/ /mi bzad de yi tshe na ni/ /chos gnas zhi bas bde 'gyur zhing / /gang dag dgon pa'i nang gnas pa/ /de dag dam pa'i chos 'dzin cing / /skye bo mang po dang bar byed//'khrug pa thams cad sel ba dang / /de dag 'byung po dang bar byed/ /mdangs gsum rnam par 'phel byed cing / /rgyal ba'i bstan pa 'bar bar byed/ /de ni bsam gtan bde ba yis/ /lha yi gnas ni gang bar byed/ /bstan pa kun dang 'byung po'i tshogs/ /nga yis de dag rnams la gtad//nga yi nyan thos mi 'tshe bar/ /rgyal rigs de dag gis 'dzin 'gyur/ /rgyal po rnams ni tshul khrims dang / /ldan pa rtag tu mchod par bya/ /tshul khrims 'chal pa rgyal po las / /ring du ci bder gnas su gzhug / /rgyal pos tshul 'chal khrims ldan pa/ / dam pa 'ga' la'ang 'tshe mi bya/ /rgyal rigs tshul khrims ldan pa dag/ /rtag tu phan tshun dang 'gyur na/ /bram ze rje'u rigs dmangs rigs dang / /lha rnams 'khrug par yong mi 'gyur/ /dam chos yun ring gnas 'gyur zhing / /dkar po'i phyogs ni 'phel bar 'gyur//de bzhin khyed cag zhing 'dir ni/ /ci bde bar ni gnas par gyis/ /khyed cag 'dir ni rtag gnas na/ /chos gang nga yis 'bar byas la/ /'ga' zhig spro bar byed par 'gyur/ /zhing gzhan du ni ma 'gro shig / /sbyin dang tshul khrims spyod pa la/ /skye bo mang po dang bar byed//de tshe mkhas pas skye bo ni/ /smin par byed de ngo mtshar min/ /gang zhig chos ni 'bar byed cing / /rgyal rigs dag ni sdig pa las/ /ldog par byed 'di ngo mtshar 'gyur/ /rtag tu byams pa'i sems 'gyur zhing / /nga yi nyan thos brdeg mi bya/ /de dag la ni chos bstan zhing / / gnyig dmyal ba las grol bya/ /dge slong bslab mi bsrung de la/ /rgyal rigs kyis ni chad mi bcad/ /dge sbyong lhan cig mi 'thab ces/ /rgyal rigs la rtag bsgrag bya ste/ /khyim pa sdig pa byed pa ni/ /myur du sems can dmyal bar 'gro/ /gnyis ka sdig pa'i las las ni/ / 'jam pa'i ngag gis bzlog par bya/ /gzhan la chad pa rtsub mo dang / /bsnun pa nyid du mi bya'o/ /yul 'khor 'jig par mi 'gyur zhing / /mdangs gsum rnam par 'phel bar 'gyur/ /dam chos rtag tu gnas 'gyur zhing / /ston pa'i bstan pa gnas par 'gyur/ /'chad pa po ni mang yod la //ngan song gsum po bkag pa dang / /'jig rten sdig can zhi bar 'gyur/ /lha yi gnas rnams 'phel ba dang / /mya ngan 'das pa'i sgo phye zhing / /zag pa med la 'jug par 'gyur/ /yar ngo'i zla ba ji bzhin du/ /byang chub sems dpa' 'phel bar 'gyur/ /pha rol phyin drug sbyor ba yis//sangs rgyas bstan pa mchod par byed/ /de phyir byang chub sems dpa' gang / /mkhas shing 'ongs pa khyed cag gis/ /zhing 'di la ni gnas par gyis/ / nga yi bstan pa 'bar ba dang / /long ba lam las nyams rnams la / /chos kyi mig ni sbyin par gyis/ / pha rol phyin drug byang chub kyi/ /lam gyis sems can smin par gyis/ /dus gsum sangs rgyas rnams la ni/ /khyed kyis mchod pa byas par 'gyur/ /'dren pa dag pa'i zhing dag tu/ /byang chub myur du 'thob par 'gyur/ /skal bzang po rnams ma gtogs pa/ /'khor kun cang mi smra bar gyur //byams pa la sogs skal ba ni/ /bzang po pa kun langs par gyur / /byams pa 'khor dang thabs cig tu/ /thal sbyar nas ni 'di skad du/ /bdag cag gang du'ang mi 'gro zhing / /rgyal ba'i bstan pa bsrung bar bgyi / /ji ltar stobs dang brtson 'grus kyis / / sems can byang chub phyir smin bgyi/ /ci 'dra ba yi dus gyur pa/ /de 'drar chos ni bstan par bgyi / /kho bo cag gis 'jig dus 'dir/ /'khrug pa bsal bar nus ma yin/ /kho bo cag gis nyams bzhin pa'i / /chos ni gzung mi nus zhes gsol/ /de'i tshe bcom ldan 'das kyis ye shes dri med gzhon nur gyur pa la bka' stsal pa/snang ba 'dzin cing dpal gyur pa/ /dpag tu med dang grangs med pa/ /zhing kun nas ni 'ongs gyur pa/ /dge ba'i rtsa ba sna tshogs kyis/ /sangs rgyas rgya mtsho la brten pa/ /thabs dang snying rje byams pa yis/ /sangs rgyas mchod pas mi g.yo bar//'di na nga yi bstan pa 'di/ /'dzin pa gcig 'ga' 'ang yod ma yin/ /skal bzang po yis ci nus par/ /nga yi bstan pa 'dzin par byed/ /nga 'dir mya ngan 'das pa'i phyir/ /bstan 'di 'jig par 'gyur ba na/ /gang dag 'dir ni rab byung ba/ /ngo tsha ba dang khrel spangs pa//bsod nams ye shes dang bral zhing / /snyom las dman pa la brtson ldan/ /la la 'ga' zhig thos pa 'dzin/ /tshul khrims la kun mi 'dun pa/ /rmongs shing khyim pa la brten pa/ /mchod rten dge 'dun rdzas mi 'dzem / /'tsho ba lhur len chog mi shes//'dod pa'i yon tan lnga la dga'/ /khyim pa lhan cig longs spyod pa/ /don ni rgyu min rgyur smra khro/ /gzhan gyi chung ma la phrag dog /dge slong de dag de 'dra'o/ /rang gi gnas la gus pa med/ /rnyed la dga' zhing 'thab dang ldan/ /las ngan dag la spro bar byed/ / bdag la bstod cing gzhan smod pa/ /bsam gtan dgon pa smod pa'i phyir/ /dgon pa nags dang bas mtha' yi / /sna tshogs skyon ni smra byed pa/ /dge sbyong 'di 'dra 'byung bar 'gyur/ /khyim pa dang ni dge sbyong yang / /brkam chags med min ster po min/ / dge 'dun mchod rten rdzas zos nas/ /sna tshogs nad ni 'byung bar 'gyur/ /brtse med nyam chung gtum po dang / /g.yul 'gyed par yang 'gyur ba yin/ /des ni dbyar dus char mi 'bab/ /chu yang yongs su 'bri bar 'gyur/ /'jig rten mu ge 'byung 'gyur zhing / /bcud dang 'bras bu 'byung mi 'gyur//bza' dang btung ba nyams par 'gyur/ /phan tshun du yang sdang 'gyur zhing / /mi dge'i las bcu rtsom par 'gyur/ /chos kyang nyung zad du 'gyur zhing / /mchod cing sbyong ba nyams par 'gyur/ /bud med longs spyod nor dag ni/ /phan tshun du yang 'phrog par 'gyur//skyes bu thams cad srog gcod cing / /ma rungs par ni 'gyur ba yin/ /phan tshun ri dgas 'du shes dang / /gshed ma brtse ba spongs pa dang / /pha dang mar ni mi shes shing / /bla ma rgan po mchod mi 'gyur/ /phyi rol spyod 'gyur mi brtan phrag dog can/ /phyin ci log gi chos kyis lhag mthong med//chos min chags pas sred la tshim pa med/ /longs spyod la ni tshim med 'khyam par 'gyur/ /blon po mdun na 'don dang de bzhin du / /dge sbyong bram ze rje'u rigs dmangs rigs dag /g.yul 'gyed la dga' tshul khrims smod pa dang / /g.yon can phan tshun smras pa sun 'byin byed //dus gzhan lho yi phyogs su rgyal po ni/ /das+yu zhes bya gang zhig dmag brgya phrag /stong gis yongs su bskor bas skyong bar 'gyur/ /byang du rgyal po brgya byin zhes bya ba/ /dmag ni brgya phrag stong ldan 'bar bar 'gyur/ /blo bzang zhes bya brgya phrag stong gis bskor//dbang chen sde zhes bya ba brgya byin dang / /mnyam pa brgya phrag stong gis yongs bskor 'byung / /sde bcas rgyal po dbang chen sde yi sras/ /bzod dkar ming btags gzhon nu lag pa na/ /ral gri thogs shing khrag gis bsgos gyur pa/ /lus la go gyon pa ni 'byung bar 'gyur//khye'u lnga brgya go gyon lag pa na/ /ral gri thogs shing khrag sbags go gyon pa/ /de la rten byed khrag gi char pa dag /yul 'khor der 'bab khye'u de dag ni/ /lo bdun bzod dkas gso 'gyur bzod dka' ni/ /kau shA m+bIr ni gnas 'gyur rgyal po dag /phan tshun phrag dog byed 'gyur rgyal gdug dag /sngon gyi 'khon gyis phan tshun 'joms par 'gyur/ /mchod rten 'jig cing gtsug lag khang bsreg 'gyur/ /dge slong 'tshog 'gyur dge 'dun rdzas 'phrog 'gyur/ /de tshe byang phyogs rgyud du 'gro bar 'gyur/ /yul 'khor 'jig 'gyur mi rnams snun par byed//bsags pa'i nor 'phrog gtsug lag khang bsreg 'gyur/ /rgyal po das+yu la sogs pa/ /dge slong gang dag nyam chung dang / /nad pa 'bros par mi nus pa/ /'joms shing yul dbus 'gro bar 'gyur/ /stobs can rnams ni 'bros 'gyur zhing / /yul dang yul du 'gro bar 'gyur//gang dag dge slong gsar bu dag /dge slong don gnyer 'dzem bag can/ /zil gnon pa dag gnas dang gnas/ /thams cad du ni 'dug par 'gyur/ /sdug bsngal can 'gyur spyo ba dang / /gshe ba rtag tu 'thob par 'gyur/ /das+yu la sogs rgyal po gsum//sde dpung bzhon par bcas de dag /kau shA m+bIr ni bzod dka' dang / /lhan cig lo ni bcu gnyis 'thab / /rgyal po gsum po 'khor bcas pa/ /bzod dkas gsod par byed par 'gyur/ /sa yi dkyil 'khor mtha' dag par/ /rgyal po gdugs gcig pa gnas 'gyur/ / nga yis sdig las byas snyam du/ /phyi nas gdung ba 'byung bar 'gyur/ /gang la bdag gis slar bshags pa'o/ /dge slong mkhas de gang na yod/ /shiSh+ya ka zhes mkhas gyur pa/ /bram ze me'i bu pA Ta li/ /pu trar gnas grags sde snod ni / /gsum pa yod ces smra bar 'gyur/ / shA kya'i sras po de'i don du/ /myur du gtang bar byed pa nas/ /shi Sh+ya bkug nas rgyal po la/ /chos ston pa yi bar du 'gyur/ /sde snod gsum pas dad byas nas/ /rgyal po sangs rgyas bstan la 'jug /bdag gis bcu gnyis lor 'thabs shing / /bdag gis sdig pa byas par gyur //rgyal po gsum po 'khor bcas shing / /sde dang bcas pa bdag gis bsad/ /bdag gis lo ni bcu gnyis su/ /yo byad lnga dag dbul zhes smras/ /sangs rgyas sras po 'dir shog cig /'dzam bu'i gling na gnas pa yi / /shA kya'i sras po ji snyed pa//de dag thams cad 'dir shog cig / /bdag gis 'dir ni mchod bgyi zhes/ /sgra ni kun du gtong bar 'gyur/ /dge slong thams cad kau shA m+bIr / /yo byad lnga phyir chas par 'gyur/ /kha cig bkres par myur du rgyug /kha cig lam du na bar 'gyur/ /kha cig rkun po ku sha ka'i//cha lugs can dang stag gis gsod/ /dge slong kha cig ri yi rtser/ /lus kyis gtso bar byed par 'gyur/ /dge slong spyod yul tha dad pa/ /kha cig kau shA m+bIr 'jug 'gyur/ /brgya phrag stong ni 'dus pa dang / /yo byad lnga po stobs pa dang / /nyi ma dang por rtsom pa na/ /sprin chen yang dag ldang 'gyur zhing //'dzam bu'i gling 'di thams cad du/ /char ni chen po 'bab par 'gyur/ /dge 'dun g.yo bas 'di byung zhes/ /rgyal po mchog tu mi dgar 'gyur/ /dge slong 'di dag 'dus pa rnams/ /nga yi mkhan po bdag gi ni/ /slob dpon gar song nga yi bshes //zla dang bdag gi mkhan po ni/ /mtshungs pa gang du song gyur zhes/ /phan tshun du ni 'dri bar 'gyur/ /bdag cag de dang lam du 'ongs/ /rtag tu lam du 'chi dus byas/ /'o dod chen pos du byed cing / /snying rje'i smre sngags 'don par 'gyur/ /sde snod gsum pa shi Sh+ya ka / langs nas thang cig cang mi smra/ /dge slong de dag 'o dod cher/ /bos nas cang mi smra mi 'gyur/ /dge slong rgyal po yid mi bdes/ /mthong nas de la bzod med par/ /rgyal pos de ltar ri gnas 'dir/ /dgra bcom 'ga' 'byung 'gyur ram snyam/ /lha yis mtshan gsol rgyal po la/ /pA Ta la ni pu tra der//tshong dpon nor bzangs zhes bya'i bu/ /dgra bcom legs dga' zhes bya ba/ /spos dang ldang na gnas gyur pa'i/ /gsum rig de ring 'ongs gyur nas/ /khyod kyis 'dir ni gnas 'gyur zhes/ /dga' ba'i gtam dag smra bar 'gyur/ /zla ba chen po'i bco lnga la/ /gso sbyong la ni 'jug pa'i tshe//brgya phrag stong dag 'dus pa dang / /sde snod gsum pa gcig 'byung zhing / /gso sbyong don du dge slong ni/ /dgra bcom pa gcig gnas par 'gyur/ /de'i tshe lha ni stong phrag dag /gso sbyong mnyan phyir 'ong bar 'gyur/ /'dus pa tha ma bla med pa/ /de ring nged kyis mthong bar gyur //chos kyi rgyal mtshan de ring 'jig /chos kyi ri bo dengs par 'gyur/ /chos kyi snang ba nub 'gyur zhing / /dge slong sdom pa nyams 'gyur zhing / /yan lag brgyad ldan chu can klung / /tha ma de ring bskam par 'gyur/ /dge slong tshogs sgra cher 'byin tshe/ /sde snod gsum pa langs nas smras//shA kya'i sras po ji snyed dang / /kun nas thos pa'i pha rol phyin/ /bdag kyang de ring 'dir 'dus gyur / /bdag kyang bslab la mi slob la/ /skye bo gzhan dag smos ci dgos/ /gal te dge slong cig kyang ni/ /bslab la bslabs par gyur pa na/ /nga yis bslab la bslabs so zhes/ /de ring tshig tu smra bar byos//'dul dang so sor thar pa la/ /tshul khrims sdom pa ma ral zhes/ /dge slong dge 'dun rgya che ba/ /'di yi mdun du tshig smros shig /bslab pa 'dod pa'i don ched du/ /nga yis de ring gso sbyong bya/ /'dul ba'i don gyur spyod yul ni/ /gcom bskyungs pa kun mnyan par byos//dgra bcom legs dga' langs nas ni/ /mdo sde gang du gang mthong ba'i/ /bslab la nga yis bslabs par gyur / /nga ni gang la'ang dogs med cing / /the tshom yang ni yod ma yin/ /ji skad ston pas gsungs pa yi / /bslab pa dag langs bslabs shes / /seng ge'i sgra ni sgrogs par 'gyur//de tshe sde snod gsum slob ma/ /lus sbyin zhes bya ma rungs pas/ /khyod kyis mdo 'dir ma bslabs shing / /'dul ba la yang bslabs ma yin / /rgan pos smras bzhin pa yi tshig /khyod kyis mi mthun par bstan zhes/ /rtsub dang brlang ba'i tshig dag gis/ /legs dga' la ni bsdigs par 'gyur//lus sbyin drag po lag pa dag /gnyi gas thob bzung byas nas/ /bslab la shin tu gus gyur pa'i/ /dgra bcom legs dga' gsod par 'gyur/ /de ga slong nyung zad nyes ldan rnams/ /'o dod chen pos du bar 'gyur/ /dge slong dag ni phan tshun du//lhung bzed chos gos smod par 'gyur/ /de'i tshe gnod sbyin zho gdong zhes/ /sangs rgyas bstan la rab dang bas/ /ci phyir khyod kyis dgra bcom bsad/ /zhes smras lus sbyin rdo rjes gsod/ /ke ta ra zhes bya ba yi / /dge slong drag gtum ches rtsub pas/ / lag gnyis thob bzung byas nas / /sde snod gsum pa de gsod 'gyur/ /dge slong thams cad langs nas ni/ /de dag phan tshun gsod par 'gyur/ /dge slong 'bum phrag dag nang nas/ /nyung zad gson pa thob par 'gyur/ /de tshe thang cig de la ni/ /sa gzhi mi bzad g.yo bar 'gyur/ / nam mkha' las kyang ches drag cing / /mi bzad sgra ni 'thon par 'gyur/ /phyogs bzhir dud rgyun ches 'jigs rungs / /me stag ches drag 'byin nus pas/ /rim gyis cher mkhas gnas mnan 'gyur/ /skar mda' ltung dang me stag ni/ /phyogs bzhi dag tu ltung bar 'gyur / /lha ni bye ba brgya stong dag /shAkya seng ge'i dam chos de 'ang / /dka' bas bsgrubs pa nub gyur zhes/ /shin tu mi bzad du bar 'gyur/ /'dod na spyod pa'i lha kun dang / /gang dag gzugs na spyod pa'i lha/ /dam chos nub par gyur pa na/ /skad chen po yis du bar 'gyur/ /rdzogs sangs rgyas mthong gnod sbyin dag /deng nas brtsams te 'jig rten du/ /dam chos slar yang 'byung mi 'gyur/ /'dul dang so sor thar pa yang / /kun nas kun du 'byung mi 'gyur/ /mun pas 'jig rten khyab 'gyur zhing / /skyabs dang dpung gnyen med pa dang / /ring por mi thogs mi rnams la/ /ri dgas 'du shes 'byung bar 'gyur//chos kyi chos sdong lhung 'gyur zhing / /chos kyi rnga chen bcom par 'gyur/ /bdud rtsi'i sgo mo bkag par 'gyur/ /chos smra ba dag nyams 'gyur zhing / /chos kyi snang ba nub par 'gyur/ /chos kyi 'khor lo phyir log 'gyur/ /chos kyi rkang pa chag 'gyur zhing / / chos kyi chu bo skam par 'gyur/ /chos kyi rang bzhin stegs zhig 'gyur / /chos kyi chu rgyun phyir log 'gyur/ /chos kyi rgya mtsho skam 'gyur deng / /chos kyi ri bo lhung gyur ces/ /sa gzhi'i steng du lhung bar 'gyur/ /nags kyi gnas dang dgon pa na/ /gnas pa'i lha bu mang po dag / mchog tu drag por du 'gyur zhing / /sa la yang ni lhung bar 'gyur/ /'jigs pa che dus de yi tshe / /nag po'i rtsa lag dga' mgu zhing / /rangs pas gos dag 'thor byed de/ /gang phyir shAkya thub pa yis/ /chos bstan pa dag 'jig par 'gyur/ /dam pa'i chos ni nub 'gyur zhing / /nga yis bstan pa 'bar phyir ro//dam chos nub pa nyid 'gyur bar / /rgyal po bzod dkas shes gyur nas/ /de yi mtshan mo'i thun mtha' la/ /grong khyer nas ni 'byung bar 'gyur/ /gang zhig dge slong ro mthong nas/ /bzung ste 'gyel zhing brgyal bar 'gyur/ /tshegs ches dran pa rnyed gyur nas/ / dgra bcom legs dga' bsad gyur cing / /sde snod gsum pa shi Sh+ya ka /bsad gyur dge slong stong phrag bsad/ /nga yi gson pa mi ring zhes/ /nyon mongs smre sngags 'don par 'gyur/ /thams cad ro dag yongs bsdus nas/ /mchod pa mchog gis bsreg par 'gyur/ /gang dag dge slong der gnas pa//phyogs gcig yang dag 'du bar 'gyur/ /rin chen bye stong rin thang can/ /gtsug lag khang ni lnga brgya dang / /bzhengs shing rab tu gnas gyur pa/ /de dag la ni dbul bar 'gyur/ /de nas dge slong re re zhing / /brgya phrag stong gos bskon par 'gyur/ /khyed cag 'dir ni gnas par byos//nga yis yongs su bskyang bar bya/ /nga la chos kyang smra bar byos/ /nga yis gus pas mnyan par bya/ /thams cad mi smra gyur gnas shing / /'ga' yang chos smra mi 'gyur ro/ /rgyal pos lan gnyis lan gsum du/ /dge slong rnams la gsol btab kyang //cang mi smra gyur 'gyur ba dang / /'ga' yang smra bar mi 'gyur ro/ /chos nyams phyir na ma shes kyis/ /chos nub 'gyur zhing thams cad kyang / /chos gos skya bor gnas 'gyur zhes/ /rgyal pos dge slong la smra 'gyur/ /kye ma sangs rgyas zhes smras nas/ /stan las ltung bar 'gyur ba dang //sa la kun nas 'gro bar 'gyur/ /sangs rgyas bstan pa rab tu nyams/ /thams cad skra dang kha spu dag /ring gyur chos kun rab nyams zhes/ /de tshe bar snang sa steng du/ /sgra chen po dag 'byung bar 'gyur/ /chu dang ri dang de bzhin sa/ /mchog tu ma rungs ltung bar 'gyur//grong khyer dag nas phub ma yi / /tshangs pa dam chos gnas su ltung / /'dod pa'i khams ni thams cad du/ /rtsa ba lo ma shun pa dang / /me tog tshon dag ma lus nyams/ /gtsang ba'i gnas kyang spangs par 'gyur/ /gzi mdangs gsum dang bcud bdun po//ma lus par ni nyams par 'gyur/ /thar dang bstan bcos dge ba yi / /bya ba ma lus nyams par 'gyur/ /me tog 'bras bu bcud skye ba/ /nyung zhing mi zhim par yang 'gyur/ /de tshe chu dang mtsho lteng ka /khron pa chu mig skam par 'gyur/ /sa la 'brog dgon tshan khung dang / dam grog kyang ni 'byung bar 'gyur/ /ri bo thams cad skam 'gyur zhing / /slar yang char 'bab mi 'gyur ro/ /nor gyi 'byung khungs skam par 'gyur/ /bur shing so ba sman dag dang / /sar+b+ha la ljang skam par 'gyur/ /rtswa gzhan skye bar mi 'gyur zhing / /mun pa rdul tshubs rlung drag 'byung / / nyi ma zla ba mthong mi 'gyur/ /skar mda' ltung dang phyogs dmar po/ /rgyun mi 'chad par mthong bar 'gyur/ /mi dge bcu yi chos dang ni/ /nad dag 'phel bar 'gyur ba yin/ /pha ma dag la ri dgas kyi/ /'du shes kun la 'byung bar 'gyur/ /sems can tshe dang mdog dang mdangs/ / stobs dang bde ba nyams par 'gyur/ /thams cad ngan song 'gro 'gyur zhing / /lha mi dag dang bral bar 'gyur/ /rgyal rigs 'di dag sdig byed tshe/ /thams cad ngan song 'gro 'gyur zhing / /lha mi dag dang bral bar 'gyur/ /'di 'dra ba yi rgyal rigs dang / /sdig pa'i dge slong 'byung ba na//dam chos thams cad 'jig 'gyur zhing / /lha dang mi rnams nyams par 'gyur/ /sems can 'di dag la khyed kyi/ /snying rje 'jug par yong mi 'gyur/ /mi bzad dus na zhing 'di nas/ /btang snyoms can dag 'gro bar 'gyur/ /sngon gyi rgyal bas mdzad pa bzhin/ /nga yis phyi dus bgos par bya//don du 'tsho ba btang byas nas/ /gzi mdangs gsum po bsrang bar bya/ /nga yi tshe 'di cha gsum pa/ /sems can rgyur yang gtang bar bya/ /phyi mar dam chos 'bar ba na/ /lha dang mi dag bkru bar bya/ /ji ltar sngon gyi sangs rgyas kun/ /de dag nyi ma bdun pa la//dam chos nub par gyur ba na/ /tshe dang rang srog btang bzhin no/ /nga ni mya ngan 'das 'gyur phyis/ /lo stong nga yi bstan gnas 'gyur/ /nga yi srog chags rnams kyi yang / /nyon mongs zad par 'gyur ba yin/ /byang chub sems dpa' brtson ldan pa/ /pha rol phyin drug rdzogs par 'gyur//zag med zhi ba'i grong khyer du/ /brtson pa'i rnal 'byor pa 'jug 'gyur/ /lo ni stong phrag 'das pa na/ /dam chos gzugs brnyan 'byung 'gyur zhing / /brgya phrag gnyis lo tshang ba na/ /mgo zlum ngur gos gyon pa/ /rtag tu ma tshang med gyur cing / /lha dang mi yis mchod gyur cig /gang de dag la mchod byed na/ /nga mchod byas 'gyur 'ga' zhig gis/ /mgo bregs ngur smrig gos gyon la/ /nga ched byas nas skyabs song na/ /de dag nga yi sras su brjod/ /tshul khrims 'chal par gyur kyang ni/ /phyir mi ldog par gnas pa yin/ /gang su de dag la bsnun pa/ / de ni nga yi sku 'tshig 'gyur/ /spyo dang gshe bar byed pa yang / /nga la spyo bar 'gyur ba yin / /chos kyi tshul rgyun bcad pa'i phyir/ /zhugs dang snub par byed par 'gyur / /de phyir snod min snod 'gyur phyir/ /cha gsum pa yi srog btang byas / /de dag bde bar gyur pa dang / /lha dang mi rnams 'phel gyur cig /sems can don du bdag gis sngon/ /dka' ba gang zhig byas gyur dang / /bdag gi bde ba btang ba yi / /bstan pa yun ring 'bar gyur cig /ngas sngon nad pa'i don ched du/ /rang gi 'tsho ba yongs btang bas/ /sems can phongs pa bskyab pa'i phyir/ /yun ring bdag bstan 'bar gyur cig /bu dang bu mo chung ma dang / /nor dang glang chen shing rta dang / /rin chen byang chub phyir btang bas/ /bstan pa yun ring 'bar gyur cig /bdag gis sangs rgyas rang rgyal dang / /nyan thos pha dang ma dang ni/ /drang srong dag la mchod byas pas/ /bstan pa yun ring 'bar gyur cig /bskal pa bye ba du mar bdag /sdug bsngal sna tshogs myong gyur cing / /byang chub don du thos btsal bas/ /bstan pa yun ring 'bar gyur cig /bdag gis brtul zhugs tshul khrims dang / /dka' thub yun ring byas gyur cing / /phyogs bcu'i sangs rgyas ngas mthong bas/ / yun ring bstan pa 'bar gyur cig /bdag sngon brtson 'grus dang ldan pa/ /rtag tu brtan zhing pha rol gnon/ /sems can thams cad grol don du/ /bdag bstan yun ring 'bar gyur cig /bzod brtul rtag tu gnas gyur cig /sems can nyon mongs snyigs ma yis//sems can ngan byas bzod gyur pas/ /bdag bstan yun ring gnas gyur cig /bsam gtan rnam thar gzugs med dang / /ting 'dzin gang gA'i bye snyed pa/ /bsgoms pas de mthar bdag gi ni/ /bstan pa yun ring 'bar gyur cig /ye shes don du bdag gis sngon/ / dka' thub nags dag bsten byas shing / /bstan bcos du mas nyer bstan pas/ /bdag gi bstan pa 'bar gyur cig /brtse ba'i rgyu yis sha khrag dang / /'tsho ba yongs su btang gyur cing / /yan lag nying lag btang ba yis/ /chos tshul rnam par 'phel gyur cig /bdag sngon sdig pa'i sems can dag /byams pas gsal bar smin byas shing / /theg pa gsum la rab bkod pas/ /chos kyi mchod sbyin rgyas gyur cig /bdag sngon thabs shes gyur pa na/ /sems can lta ngan las grol byas/ /yang dag lta la rab bkod pas/ /chos ni rnam par 'phel gyur cig /bdag gis sems can bsdu dngos bzhis/ /nyon mongs me las thar gyur cing / /bdag gis 'phel sdig pham byas pas/ /bdag 'khor yun ring gnas gyur cig /bdag gis mu stegs can gzhan dag /lta ba'i chu las bsgral byas shing / /yang dag nyid la rab bkod pas//bdag 'khor rtag tu gus gyur cig /snying rjes nga ni sems can dag /bsgral ba'i phyir dang myur ba ru/ /'jig rten mun pa med pa dang / /dpung gnyen med par ma gyur pa/ /don des bdag gi tshe gtang bya/ /phyi ma'i dus 'dir bstan pa dag /zad pa'i rgyu ni 'di 'dra ba//sems can rnams la phan pa'i rgyu/ /tshul 'di de phyir yongs su gtad/ /bdag ni mya ngan 'das gyur phyis/ /byang chub la gzhol dong ba na/ /des ni 'phags pa'i bstan zad pa/ /'di dag thams cad nyams par gyur / /yun ring bstan pa 'bar gyur pa'i/ /sngags ni bdag gis 'dir brjod bya//rdo rje snying po khong stong med/ /rnam par grol ba'i bcud kyi gnas/ /gang dag phyogs bcu'i sangs rgyas rnams/ /bdag gi 'di la 'dun rtsal cing / /gang dag 'dir ni 'ongs gyur pa'i/ /'khor kun 'dun pa sbyin par byos/ /tad+ya thA/ a ba mUke/ /bi mUke/ /bi ra dza mUke/ba ra mUke/ tsa la ba ti/ a hi / ma hi tra ba te/ ma hA tre d+he/ sum b+ha ra bi/ dza ka li madz+dzA le/ u ts+tsha mU She Na ga me/ dz+wa le dz+wa la mA ni ni ba sa swA hA/ bcom ldan 'das kyis rdo rje snying po khong stong med pa rnam par grol ba'i bcud kyi gnas sngags kyi tshig 'di dag gsungs pa na/ /stong chen po'i sangs rgyas kyi zhing 'di thams cad rnam par 'gyur ba drug tu 'dir zhing g.yos par gyur /me tog gi char pa bab pa dang / ma brdungs pa'i rnga dag sgra 'byin par gyur to/ /ji ltar 'dus pa'i 'khor sa gzhi gang ba rab tu mgu ba/ bzhin mchi ma dang bcas pa thams cad kyis legs so zhes bya ba byin te/ tshig 'di skad du/ da ltar de bzhin gshegs pa gang gis sems can yongs su smin pa'i rgyus sems can rnams la ma 'ongs pa'i bstan pa'i tshul ston cing / tshe'i lhag ma cha gsum pa btang ba/ ngo mtshar dang rmad du byung ba chen po dag yang dag par ldan pa'i de bzhin gshegs pa dgra bcom pa yang dag par rdzogs pa'i sangs rgyas shA kya thub pa 'di ni ngo mtshar to zhes gsol to//bstan par byas pa 'di bstan pa na nyon mongs pa'i snyigs mar gyur pa'i tshe/ sems can rnams la sems rab tu dang ba'i rgyus/ der gnas pa'i sems can bgrang ba las shin tu 'das pa rnams kyis/sngon ma bskyed pa'i bla na med pa yang dag par rdzogs pa'i byang chub tu sems bskyed par gyur to/ /de'i tshe sems can khrag khrig dgu bcu rtsa gnyis kyis rjes su mthun pa'i bzod pa thob par gyur to/ /de'i tshe sems can khrag khrig phrag brgyad kyis dpa' bar 'gro ba'i ting nge 'dzin thob par gyur to//gzugs can snying po la sogs pa bcus ni bden pa mthong bar gyur to/ /de'i tshe byang chub sems dpa' nyi shus ting nge 'dzin so sor rig pa mkha' 'gro snang ba 'dul ba'i ting nge 'dzin thob par gyur to/ /de'i tshe lha ma yin 'bum phrag drug cu rtsa bzhis khyad par du 'gro ba'i stobs thob par gyur to//de'i tshe lha khrag khrig 'bum phrag brgyad kyis ni rnam par dag pa'i spyod pa dang ldan pa'i ting nge 'dzin thob par gyur to/ /de'i tshe grul bum 'bum phrag sum cus rgyal mtshan gyi rtse mo'i sgron ma'i ting nge 'dzin thob par gyur to/ /de'i tshe klu 'bum phrag nyi shus mi brdzi ba'i dregs pa sel ba'i ting nge 'dzin thob par gyur to//de'i tshe dge slong stong phrag nyi shu ni len pa med par zag pa las sems rnam par grol lo zhes gsungs so/ /sangs rgyas kyi gsung gi mdo las kyang / srog dang gang zag gzung byas nas/ /bdag tu smra dang chad smra dang / /rtag la rab tu gnas par 'gyur//mu stegs can smra la brten nas/ /dge slong ming ni sgrogs par 'gyur / /yang dag ma yin ming brten nas/ /yul 'khor zas ni za bar 'gyur/ /'khor 'dod par ni 'gyur ba dang / /rnyed la ches mang brten par 'gyur/ /ma dul ba yi 'khor 'gyur zhing / /chad pa'i las ni spangs par 'gyur//g.yengs pa'i smra ba can 'gyur zhing / /so sor sdom pas ma bsdams 'gyur/ /mthar gyis de ltar dam pa yi/ /chos ni nub par 'gyur ba yin / /bden pa smra ba'i dge slong dag /zil gyis gnon par byed 'gyur zhing / /de'i tshe de dag dge 'dun las/ /gnas na 'dug pa'ang rnyed mi 'gyur//de tshe zhar ba 'theng po dang / /zhar sgur yan lag ma tshang dang / /'tsho ba'i don du 'dir 'ongs pa/ /de dag rab tu 'byung bar 'gyur/ /de tshe mang du smra 'gyur nas/ /de dag rtsod pa byed par 'gyur/ /de dag rtsod cing cher 'khon pa/ /phra ma can dang sdig lta ba/ /mu cor bzhin ngan drag po dang //rnyed la brkam zhing mi mkhas pa/ /'du 'dzi dag la dga' ba dang / /le lo shes rab dman par 'gyur/ /zhes gsungs so/ /dam pa'i chos nub par 'gyur ba'i mdo las kyang / kun dga' bo nga yongs su mya ngan las 'das nas lo stong lon pa na bstan pa gtam tsam gyi snying po can du 'gyur ro//de'i tshe nga'i nyan thos dag gtam gzhan gyi sbyor ba la rjes su brtson pas gnas par 'gyur te/ 'di lta ste/ tshigs su bcad pa dang / ched du brjod pa dang / gleng gzhi dang / shin tu rgyas pa dang / rmad du byung ba'i chos dang / gtan la phab pa de dag dor nas/ gtam gzhan gyi sbyor ba la rjes su brtson pas gnas par 'gyur ro//'di lta ste/ bza' ba'i gtam dang / btung ba'i gtam dang / gos kyi gtam dang / lam srang gi gtam dang / smad 'tshang gi gtam dang / 'jig rten la skur ba'i gtam dang ljongs dang blon po chen po'i gtam rgyud kyi gtam dag go/ /nga'i nyan thos dag gzhan mu stegs can ji lta ba de ltar 'gyur te /lus ma bsgoms pa dang / sems ma bsgoms par 'gyur ro/ /'thab pa dang / mtshang 'dru ba dang / g.yul 'gyed pa dang / gnod sems mang bar 'gyur ro/ /lo brgyar bsrungs pa'i tshul khrims cig shos kyis rgud par 'gyur te/ 'di lta ste/ mi dge ba'i bshes gnyen gyis so//lo brgyar bsrungs pa'i grogs po cig shos kyis rgud par 'gyur te/ 'di lta ste/ gnod sems rgyas pa nyid kyis so/ /lhung bzed mdzes pa can dang 'khar gsil mdzes pa can dang / chos gos mdzes pa can du 'gyur ro/ /kun dga' bo 'di ni dam pa'i chos nub pa'i tshig bla dgas so zhes gsungs so// // thos pa'i yon tan bstan pa la dgongs pa bstan pa/ gzi brjid can gyi mdo las kyang / de la 'da' ba'i gnas lnga gang zhe na/ tshul khrims las 'da' ba'i gnas dang / mang du thos pa las 'da' ba'i gnas dang / 'jig rten gyi zang zing spong ba las 'da' ba'i gnas dang /dal ba phun sum tshogs pa las 'da' ba'i gnas dang / dge ba'i bshes gnyen las 'da' ba'i gnas te/ 'di dag ni 'da' ba'i gnas lnga'o/ /de la 'da' ba'i gnas lnga po de dag las/ mang du thos pa las 'da' ba'i gnas ni rgud pa thams cad kyi gnas su 'gyur ro//mang du thos pa'i dge slong gi sgrib pa'i gnas thams cad rgyun chad par 'gyur ro/ /'di'i lam ngan pa thams cad bkag par 'gyur ro/ /'di'i dkar po'i phyogs thams cad nang du 'du bar 'gyur ro/ /mchog tu nye ba nyid kyis sangs rgyas bcom ldan 'das rnams thag mi ring bar bzhugs par 'gyur te/ci 'dra ba nye bar 'gyur zhe na/ 'di la gnas brtan shA ri'i bu dang dge slong maud gal gyi bu dang / gnas brtan rab 'byor dang / dge slong kun dga' bo ji lta ba bzhin no/ /kun dga' bo de ltar na dge slong mang du thos pa dag ni sems can dmyal ba rnams su skye bar mi 'gyur /dud 'gro'i skye gnas su ma yin/ gshin rje'i 'jig rten dag tu skye bar mi 'gyur ro/ /gang dang gang du skye ba thams cad du shes rab chen por 'gyur ro/ /ji ltar shes rab chen por 'gyur zhe na/ shes rab chen po nyid gang gis mtshams med pa lnga mngon par 'du byed par mi 'gyur ro//kun dga' bo dge slong mang du thos pa ni gzhan gyi mya ngan dang zug rngu sel bar byed par 'gyur ro/ /gzhan gyi 'gyod pa sel bar 'gyur ro/ /'di la mthong ba'i chos dang tshe phyi ma'i phun sum tshogs pa gang zhig mang du thos pa de'i nang du mi 'du ba 'ga' yang yod pa ma yin no//kun dga' bo de lta bas na nga'i ba dan gzung bar 'dod pas mang du thos pa la mngon par brtson par bya'o/ /dge slong mang du thos pa tshol bas bya ba gsum byas par 'gyur ro/ /gsum gang zhe na/ dam pa'i chos yongs su gzung bar 'gyur ba dang /gzhan dag gi 'gyod pa skyes shing skyes pa sel bar byed pa dang / de dag gis gdon mi za bar mya ngan las 'da' bar bya ba ste/ 'di ni mang du thos pa'i rgyu mthun pa'o / /dge slong mang du thos pa tshol bas chos bzhi yongs su 'dzin par 'gyur te/ bzhi gang zhe na/ mang du thos pa la 'god par byed cing sna tshogs pa gtam par 'gyur ba dang / 'di lhas kyang mi spong ba dang / srog gcod par mi 'gyur ba dang / las dang rnam par smin pa la mkhas par 'gyur ba ste/ dge slong mang du thos pa tshol bas ni chos bzhi po 'di dag yongs su gzung bar 'gyur ro/ /dge slong mang du thos pa tshol bas ni/gnas lnga 'dzin par 'gyur te/ lnga gang zhe na/ 'chi ba'i dus su 'di'i yid chos kyi nang du chud par 'gyur ba dang / 'di nas shi 'phos ma thag tu bde 'gro mtho ris kyi 'jig rten dag tu skye bar 'gyur zhing / der yang lha dag 'khor byed pa dang / chos dang ldan pa'i gtam gyis lha dag dga' bar byed/yang dag par len du 'jug pa dang / lha dang mi rnams kyis zil gyis non par 'gyur ba dang / de nas shi 'phos ma thag tu mi rnams kyi nang du slar yang skye bar 'gyur ba dang / rgyal srid byed par 'gyur ro/ /de ci'i phyir zhe na/ de bzhin gshegs pas sbyin pa 'di ni mchog tu gsungs te/'di lta ste chos kyi sbyin pa'o/ /de chos kyi sbyin pa des rgyal po longs spyod che ba dang 'khor mang bar 'gyur ro/ /bag yod pa dang shes rab chen por 'gyur ro/ /rgyal srid kyi bya ba dag la spyod pa por 'gyur te/ chos lnga po 'di dag dang ldan pa ni lha dang mi rnams kyis zil gyis mi non pa'i mtshan nyid can du 'gyur ro//kun dga' bo de lta bas na dge slong mkhas pas mang du thos pa la mngon par brtson par bya'o/ /chos lnga po 'di dag ni de bzhin gshegs pas mngon par mkhyen nas gsungs pa'o/ /de la dge slong mkhas pas rgud pa'i gnas lnga po 'di dag spangs nas/ phun sum tshogs pa'i gnas la mngon par brtson par bya'o//de la phun sum tshogs pa'i gnas gang zhe na/ mang du thos pa ste mang du thos pa la shes rab nye bar 'gyur/ gcig tu gnas par 'gyur/ shes rab dang ldan pas nyon mongs pa thams cad kyis mi brdzi ba de ni shes rab dang ldan pa zhes bya'o//de la 'di dag ni mang du thos pa'i stobs dag ste/ 'di la mya ngan 'byung bar mi 'gyur/ khengs par mi 'gyur/ khro bar mi 'gyur/ 'khon du 'dzin par mi 'gyur/ rgod par mi 'gyur/ mtho'o snyam par mi 'gyur/ g.yo bag can du mi 'gyur/ 'khrul par mi 'gyur/ rten med pa la ma rungs par mi 'gyur ro//nga rgyal gyis byas pa'i bya ba byed par mi 'gyur ro / /'jigs par mi 'gyur ro / /gnod zhad can du mi 'gyur ro / /'khor gyi nang na gnas pa na mi 'jigs par 'gyur/ 'khor gyi nang na 'dug pa na 'di dag ni ngar 'dzin pa la gnas pa/ nga rgyal dang bcas pa zhig ste/yongs su bskang par mi nus so snyam du zhum par mi 'gyur/ smad pas gnod zhad can du mi 'gyur/ bstod pas 'phar bar mi 'gyur/ gnas pa dang ldan par 'gyur/ mi 'phrog par 'gyur/ 'di'i lce spangs par 'gyur/ 'di'i lce dag par 'gyur/ 'jam pa dang snyan par smra ba yongs su 'dzin pa nyid du 'gyur/sgra dbyangs dga' ba skyed par 'gyur/ ngag dbyangs snyan par 'gyur/ 'khor gyi tshogs chen por 'jug par 'gyur/ tshogs kyi nang na smra ba por 'gyur/ lha dag rtag tu 'di'i rjes su 'brang bar 'gyur/ shes rab kyi sbyin bdag tu 'gyur/ tshul khrims kyi sbyin bdag tu 'gyur/ gtong ba'i sbyin bdag tu 'gyur/ mtho ris kyi sbyin bdag tu 'gyur/ mya ngan las 'das pa'i sbyin bdag tu 'gyur/ yon tan gyi chos ji snyed bsgrags pa de snyed kho na chos kyi sbyin pa'i sbyin bdag gi 'khor rnams la rab tu gsal bar byed cing / yon tan de dag la 'god par byed do/ / kun dga' bo de lta bas na mang du thos pa'i sbyin bdag mchog tu 'gyur/ bde ba'i sbyin bdag tu 'gyur/ legs par spyod pa'i sbyin bdag tu 'gyur ba nas mya ngan las 'das pa'i sbyin bdag gi bar du 'gyur ro/ /shes rab des sbyin pa nyung zad kyang mang por byed do/ /nyams pa'i sems su mi 'gyur/ zhum pa'i sems su mi 'gyur/ sdug phongs pa'i sems su mi 'gyur ro / /de la gzhan gyis 'gyod pa skyed par mi nus so/ /sdug bsngal ba'i sems yang dag par bsreg par 'gyur ro/ /gdams ngag 'dom pa por 'gyur/ yang dag par len du 'jug pa por 'gyur/ dam pa'i chos yongs su 'dzin pa por 'gyur/skyes bu dam pa de lta bu'i ngo bo can de dag gi don du de bzhin gshegs pa chos kyi 'khor lo bskor bar 'gyur ro/ /kun dga' bo de lta bas na mang du thos pa la de lta bu'i ngo bo'i bsngags pa de dag mthong bas ni/ mang du thos pa la mngon par brtson par bya'o/ /de skad ces bka' stsal pa dang /bcom ldan 'das la tshe dang ldan pa kun dga' bos 'di skad ces gsol to/ /bcom ldan 'das de bzhin gshegs pas mang du thos pa'i bsngags pa de dag gsungs na/ bcom ldan 'das gang zhig gzhan mang du thos pa la 'god par 'gyur ba/ des dge ba'i rtsa ba ji snyed cig skyed par bgyid/de skad ces gsol pa dang / bcom ldan 'das kyis tshe dang ldan pa kun dga' bo la 'di skad ces bka' stsal to/ /kun dga' bo skyes bu mkhas pa 'ga' zhig gis smras pa'i don dpes shes par 'gyur ba des na khyod la dpe brjod par bya ste/ kun dga' bo stong gsum gyi stong chen po'i 'jig rten gyi khams na shing gi rigs sam rtswa'i rigs sam sdong dum sor gcig pa'am sor gnyis pa skyes pa ji snyed pa de dag thams cad lo ma dang me tog dang 'bras bu dang ldan par gyur la/de la gang rtswa sor gcig pa skyes pa de'i 'bras bu gang gA'i klung gi bye ma dang mnyam pa de snyed mngon par 'grub par 'gyur ba dang /de la gang sa las sor gnyis skyes par 'gyur ba de'i 'bras bu gang gA'i klung gnyis kyi bye ma dang mnyam pa de snyed mngon par 'grub par 'gyur ba dang / rnam grangs 'dis sor skye ba ji snyed par 'gyur ro/ /de bzhin du sdong dum sor ji snyed par 'gyur ba ni gang gA'i klung gi bye ma dang mnyam pa de snyed du 'gyur na/kun dga' bo de ji snyam du sems/ 'bras bu dang shing 'di dag ni 'di tsam zhig go zhes 'bras bu dang shing de dag gi tshad gzung bar nus sam/ gsol pa/ bcom ldan 'das de ni ma lags so/ /bka' stsal pa/ kun dga' bo sdong dum sor tshad dang ldan pa de dag gi 'bras bu dang shing de dag gi tshad gzung bar nus kyi/ gang rigs kyi bu 'am rigs kyi bu mo ci nas kyang sems can 'di dag chos kyi sbyin pa 'dis rgyun du zhugs pa'i 'bras bu thob par 'gyur ba nas dgra bcom pa nyid rjes su thob pa'i bar dang / byang chub tu sems bskyed pa'i bar du 'gyur ro snyam du phan pa'i dngos po la gnas nas/ ma chags pa'i sems dang / zang zing med pa'i sems kyis tha na tshig bzhi pa'i tshigs su bcad pa tsam zhig ston du 'jug pa'i bsod nams kyi phung po'i tshad ni gzung bar mi nus so/ /gang zhig de ltar phan pa'i sems bskyed nas gzhan la tha na tshig bzhi pa'i tshigs su bcad pa tsam zhig kyang 'dzin du 'jug pa'am/ston du 'jug pa'am/ kun nas shes su 'jug na dper brjod pa yongs su gzung ba snga mas bsod nams de'i brgya'i char yang nye bar mi 'gro/ /stong gi char yang brgya stong gi char yang grangs sam/char ram/ bgrang bar ram/ dper ram/ rgyur yang mi bzod do/ /gang zhig gzhan yang mang du thos pa dang / tha na tshig bzhi pa'i tshigs su bcad pa tsam la 'god pa de/ de ltar dge ba'i rtsa ba mang po bskyed do zhes gsungs so/ /rab tu zhi ba rnam par nges pa'i cho 'phrul gyi mdo las kyang /dge slong dri ma med pa dga' ba dang mgu ba dang yi rangs pa dang rab tu dga' ba dang yid bde ba skyes pa des lo 'bum phrag de 'das pa na/ tshig bzhi pa'i tshigs su bcad pa de rab tu bton nas de bzhin gshegs pa bzang skyong lhun po chen po ga la ba der dong ste dong nas kyang /bcom ldan 'das de'i zhabs la mgo bos phyag 'tshal te 'di skad ces gsol to/ /kho bos skyes bu dam pa'i las bgyis so/ /kho bos bdud kyi dkyil 'khor pham par bgyis so/ /kho bos nyon mongs pa rnams tshar bcad do/ /kho bos byang chub kyi snying po rnam par sbyangs so//kho bos sangs rgyas kyi zhing rnam par sbyangs so/ /mi nyid don yod pa dang rab tu byung ba la legs par rnyed do/ /kho bos sangs rgyas 'byung ba rab tu kun nas bsrungs so/ /kho bos yul gyi bsod snyoms legs par 'tshal lo/ /kho bos yon rnam par sbyangs so//kho bos yon gnas kyi sa la rab tu gnas so/ /kho bos chos kyi gter bstan to/ /kho bos chos kyi 'khor lo rab tu bskor ba'i sa bon bzung ngo / /kho bos 'phags pa'i nor gyi nor dang bcas so/ /kho bos mi dbul zhing rnyed pa chen po dang ldan no/ /kho bos sems can thams cad chos kyi sbyin pas mgron du gnyer ro //chos kyi sbyin pa sbyin par bgyi'o / /bag la nyal ba gzhom par bgyi'o/ /sgrib pa spang bar bgyi'o/ /'dod chags dang zhe sdang dang gti mug dag rab tu zhi bar bgyi'o / /ma rig pa dang srid pa'i sred pa'i sgo 'phar dbye bar bgyi'o//rnam pa bcu gnyis dang ldan pa'i chos kyi 'khor lo lan gsum du bskor ba yongs su rdzogs par bgyi'o/ /de nas rgyal po gzi brjid dri ma med pas snag gi gnyen mtshams su de'i seng ge'i sgra 'di thos nas/ bcom ldan 'das de bzhin gshegs pa bzang skyong lhun po chen po la 'di skad ces gsol to//bcom ldan 'das bdag gi snag gi gnyen mtshams 'di rnal 'byor gyis spangs pa dang / nang du yang dag par 'jog pa dang / zhal ta dang / mang du thos pa yang rung ste/ gang la mngon par brtson par gyur lags/bcom ldan 'das des bka' stsal pa / rgyal po chen po dge slong 'di mang du thos pa la mngon par brtson par gyur to / /des gsol pa/ bcom ldan 'das gang de skad du seng ge'i sgra sgrogs pa 'dis chos ji snyed cig yongs su thob par gyur lags/ bka' stsal pa/rgyal po chen po dge slong 'dis lo stong du tshig bzhi ba'i tshigs su bcad pa ston par gyur to/ /gsol pa/ bcom ldan 'das tshig bzhi pa'i tshigs su bcad pa gcig bton pas nga'i snag gi gnyen mtshams 'di de skad du seng ge'i sgra sgrogs sam/ bcom ldan 'das gal te seng ge'i sgra bsgrag par bgyi na ni/de bdag gis bsgrag par bya ste/ bdag gis lo stong du de bzhin gshegs pa nyan thos kyi dge 'dun dang byang chub sems dpa'i dge 'dun dang bcas pa la yid du 'ong ba'i chos gos dang bsod snyoms dang / mal stan dang na ba'i rkyen sman dang yo byad phul lo/ /de skad ces gsol ba dang /de bzhin gshegs pa bzang skyong lhun po chen pos rgyal po gzi brjid dri ma med pa la 'di skad ces bka' stsal to/ /rgyal po chen po khyod de skad ma smra shig /de ci'i phyir zhe na/ gang rgyal po chen po lo stong du sbyin par bya ba'i chos yongs su gtong ba bsdoms pa de bzhin gshegs pa la phul na /sbyin par bya ba'i chos yongs su gtong ba 'di thams cad kyis ni byang chub sems dpa' chos yongs su tshol ba la mngon par brtson pa'i dbugs dbyung ba dang rngub pa gcig gi dge ba'i rtsa ba'i brgya'i char yang nye bar mi 'gro ba nas rgyu'i bar du yang nye bar mi 'gro na/ nye bar ston pa dang kha ton tshol ba la mngon par brtson zhing /tshig bzhi pa'i tshigs su bcad pa 'don par byed pa lta smos kyang ci dgos te/ nga ni bsod nams de'i mtha' mi smra'o/ /rgyal po chen po khyed kyis sbyin par bya ba'i chos gtong ba lta zhog /rgyal po chen po 'di ji snyam du sems lo stong phrag 'da' bar de bzhin gshegs pa dge slong gi dge 'dun dang bcas pa la khyod kyis dgos pa phul bar gyur na/de mang ngam/ gsol pa/ bcom ldan 'das de bzhin lags so/ /bka' stsal pa/ rgyal po chen po khyod yongs su gtong ba de thams cad bsdoms nas dge slong gcig la dang /rnam grangs 'dis dge slong gi dge 'dun thams cad la phul na/ sbyin par bya ba'i chos yongs su gtong ba de mang ngam/ gsol pa / bcom ldan 'das mang lags so/ /rgyal po chen po khyod mos par bya/ khyod kyis khong du chud par bya'o/ /rigs kyi bu 'am rigs kyi bu mo nye bar ston pa dang /kha ton la mngon par brtson pa gus pa dang bcas pa/ chos 'dod pa/ 'khor ba'i 'jigs pas 'jigs pa/ mya ngan las 'da' ba la re ba/ nyon mongs pa thams cad spong ba la brtson pa/ chos yongs su tshol ba'i brtson 'grus la rab tu sbyor ba ni de bas ches bsod nams mang du bskyed do//rgyal po chen po bdag nyid kyis dad pas byin pa yongs su blangs nas/ zas 'dis chos tshol ba thob par 'gyur ro snyam du sems skyed par byed na/ rgyal po chen po khyod kyis sbyin par bya ba'i chos yongs su gtong ba 'dis/ /sems bskyed pa'i dge ba'i rtsa ba 'di'i brgya'i char yang nye bar mi 'gro ba nas rgyu'i bar du yang nye bar mi 'gro'o//rgyal po chen po'i de'i phyir rnam grangs 'dis ji ltar byang chub sems dpa' chos la gus pas 'jig rten thams cad kyi zang zing gi sbyin pa zil gyis gnon par 'gyur ba de ltar rig par bya'o zhes gsungs so//bden pa'i rnam pa'i mdo las kyang / shA ri'i bu de la thos pa mang po 'tshol ba'i shes pa gang zhe na/ shA ri'i bu gang sangs rgyas kyi byang chub kyi phyir byang chub kyi sems bskyed pa thob nas / thos pa mang po la mngon par brtson par mi byed pa de ni/ byang chub sems dpa' bden par smra ba ma yin par rig par bya'o//shA ri'i bu ming tsam gyis bla na med pa yang dag par rdzogs pa'i byang chub tu mngon par rdzogs par 'tshangs rgya bar mi nus kyi/ shes rab dang ldan pa nyid kyis ni bla na med pa yang dag par rdzogs pa'i byang chub tu mngon par rdzogs par 'tshang rgya bar nus so//shes rab de yang gang las nges par 'byung ba yin zhe na/ mang du thos pa las shes rab 'byung ba yin te/ shA ri'i bu de lta bas na khyod kyis mngon sum du bya zhing khyod kyis so sor rig par bya'o/ /byang chub sems dpa'i theg pa la yang dag par zhugs pa'i sems can mang du thos pa la de ji ltar the tshom skye bar 'gyur zhes/gang byang chub sems dpa' de sems can rnams la phan 'dogs par byed pa'i byang chub la bdud sdig can bar chad byed par 'gyur te/ shA ri'i bu byang chub sems dpa' sems bskyed nas thos pa mang po la mngon par mi brtson pa gang yin pa de ni/bdud sdig can gyis yongs su byin gyis brlabs pa nyid yin no/ /de lta bas na shA ri'i bu bdud kyi las thams cad yongs su shes par 'dod pas brtson 'grus brtsam par bya/ tshig gtso bor mi bya/ mkhas pa'i bya ba shes par bya zhing / 'jig rten thams cad la grags pa'i bya ba shes par bya'o/ /shA ri'i bu de lta bas na 'jig rten thams cad las mngon par 'phags pa'i thos pa dang / 'jig rten thams cad las mngon par 'phags pa'i brtson 'grus dang / 'jig rten thams cad las mngon par 'phags pa'i tshul khrims kyis bla na med pa yang dag par rdzogs pa'i byang chub tu mngon par rdzogs par 'tshang rgya bar 'gyur ro//shA ri'i bu gnas 'di don du gnyer ba mang yang nan tan gyis yang dag par sgrub par byed pa ni med de/ de dag kyang de bzhin gshegs pa'i stobs bcu dang / 'jig rten thams cad las mngon par 'phags pa'i ye shes dang /smon lam las yongs su nyams par 'gyur ro/ /de lta bas na shA ri'i bu byang chub sems dpa' sems can thams cad gang gis dga' bar 'gyur ba'i tshig des smra bar bya ste/ byang chub sems dpa' bdag gi don du smra bar mi bya/ byang chub sems dpa' brtson 'grus dman par mi bya'o//shA ri'i bu stong du bgrangs pa las gcig 'grub pa'am/ grub pa med cing / shA ri'i bu stong phrag bcu dang / stong phrag nyi shu dang / stong phrag sum cu dang / stong phrag bzhi bcu dang / stong phrag lnga bcu dang / bye ba phrag stong du bgrangs pa las gcig 'grub pa'am/grub pa med do/ /de ci'i phyir zhe na/ shA ri'i bu de ltar gang byang chub sems dpa'i spyod pa 'di la gnas pa de ni mngon par 'byung bar dka' ba yin no/ /shA ri'i bu de lta bas na bla na med pa yang dag par rdzogs pa'i byang chub don du gnyer bas/ 'di ltar sems bskyed par bya ste/bdag gis sems can thams cad kyi brnag dka' ba brnag par bya/ bzod dka' ba bzod par bya zhing / bdag gi chos btsal bar bya ba'i phyir mngon par dga' bas brtson par bya'i/ longs spyod btsal ba'i phyir ni ma yin no/ /de ci'i phyir zhe na/ chos tshol bar byed pa ni ye shes tshol bar byed pa yin te/'dod pa rnyed pas rlom par mi byed/ rab tu rlom bar mi byed do/ /de bas na byang chub sems dpa'i theg pa la yang dag par zhugs pa'i sems can rnams kyis shes rab gtso bor bya'i/ longs spyod gtso bor mi bya'o/ / shA ri'i bu de lta na chos kyi sbyin pa 'di la byang chub sems dpa' mngon par brtson par bya'o zhes gsungs so/ /chos thams cad kyi rang bzhin mnyam pa nyid rnam par spros pa'i ting nge 'dzin las kyang / gzhon nus smras pa/ rgyal po chen po gsan du gsol/ bdag gis bskal pa gcig la sangs rgyas ni/bye ba khrag khrig mthong ste ri mor bgyis/ /ting 'dzin zhi ba 'di yang bdag gis dris / /gzhan yang bskal pa dgu bcu rtsa dgu dang / /bskal pa bye ba khrag khrig phrag stong du/ /de dang der bdag skye ba dran par gyur / /nam yang mngal du skyes par ma gyur to/ /de nas bdag gis ting 'dzin 'di bsgoms te//rgyal ba de dag 'chad pa dag par thos/ /thos nas bshad pa la yang mos bskyed de/ /nem nur med pas byang chub reg par bgyi/ /zhes gsungs pa dang / yang mdo de nyid las/ gzhon nu byang chub sems dpa' sems dpa' chen po mang du thos pa'i phan yon ni 'di bcu ste/bcu gang zhe na/ 'di lta ste/ kun nas nyon mongs par mi byed pa dang / gnod sems mi bskyed pa dang / the tshom rnam par 'byed pa dang / lta ba drang por byed pa dang / lam log pa spong ba dang / lam la gnas pa dang / mi 'chi ba'i sgor gnas pa dang / byang chub tu bsnyen pa dang /sems can thams cad la snang bar 'gyur ba dang / ngan 'gro thams cad kyis mi 'jigs pa ste/ gzhon nu bcu po 'di dag ni byang chub sems dpa' sems dpa' chen po mang du thos pa'i phan yon no zhes gsungs so/ /blo gros rgya mtsho'i mdo las kyang / ji ltar na byang chub sems dpa' ji skad smras pa de bzhin byed pa yin zhe na/blo gros rgya mtsho sangs rgyas su 'gyur bar bya'o zhes bya ba'i tshig 'di ni brjod par bla'i/ dge ba byang chub kyi chos rnams bsgrub pa ni dka'o snyam pa'o/ /blo gros rgya mtsho byang chub sems dpa' gang la las chos kyi sbyin pas sems can thams cad mgron du gnyer te/kho bos sems can khyed chos kyi sbyin pas tshim par bya'o zhes byas la mang du thos pa dang / de las gzhan pa dge ba byang chub kyi phyogs kyi chos rnams la yang brtson par mi byed na/ de sems can de dag la slu ba yin te/ de skad smras pa de bzhin byed pa ma yin no//blo gros rgya mtsho gang gi tshe byang chub sems dpa' chos kyi sbyin pas sems can thams cad mgron du gnyer te/ kho bos sems can khyed chos kyi sbyin pas tshim par bya'o zhes byas la/ mang du thos pa dang / de las gzhan pa dge ba byang chub kyi phyogs kyi chos rnams la yang brtson par byed pa 'di ni byang chub sems dpa' ji skad smras pa de bzhin byed pa yin no zhes gsungs so//bsod nams thams cad bsdus pa'i mdo las kyang / mang du thos pa la mngon par brtson pa'i byang chub sems dpa' sems dpa' chen po ni bdud bzhi pham par byed do//bzhi gang zhe na/ phung po'i bdud dang / nyon mongs pa'i bdud dang / 'chi bdag gi bdud dang / lha'i bu'i bdud de/ bdud bzhi po 'di dag pham par byed do zhes gsungs pa dang / yang mdo de nyid las/ de nas bcom ldan 'das la tshan po che dri ma med pa'i gzi brjid kyis 'di skad ces gsol to//bcom ldan 'das tshogs gsum po sbyin pa'i tshogs dang / tshul khrims kyi tshogs dang / thos pa'i tshogs de dag gi nang na tshogs gang ches mchog dang ches gtso bo lags/ bcom ldan 'das kyis bka' stsal pa/ dri ma med pa'i gzi brjid tshogs gsum po sbyin pa'i tshogs dang /tshul khrims kyi tshogs dang / thos pa'i tshogs de dag gi nang na thos pa'i tshogs 'ba' zhig mchog ces bya/ rab ces bya/ rab mchog ces bya/ gya nom pa zhes bya/ gtso bo zhes bya/ khyad par du 'phags pa zhes bya/ bla ma zhes bya/ bla na med pa zhes bya/gong na med pa zhes bya/ gong ma'i yang gong ma zhes bya'o/ /rigs kyi bu 'di lta ste/ dper na ri'i rgyal po ri rab kyi mdun na yungs 'bru gcig 'dug pa bzhin du sbyin pa'i tshogs dang / tshul khrims kyi tshogs kyang de dang 'dra bar blta bar bya'o/ /ri'i rgyal po ri rab ji lta ba de bzhin du ni thos pa'i tshogs blta bar bya'o//rigs kyi bu 'di lta ste/ dper na nam mkha' la bya'i rjes ji lta ba bzhin du sbyin pa'i tshogs dang / tshul khrims kyi tshogs kyang de dang 'dra bar blta bar bya'o/ /phyogs bcu'i nam mkha' mtha' yas pa ji lta ba de bzhin du thos pa'i tshogs blta bar bya'o//rigs kyi bu sbyin pa'i tshogs ni bya ba gnyis byed de/ gnyis gang zhe na/ 'di lta ste/ dbul ba sel ba dang / longs spyod chen po sgrub pa ste bya ba 'di gnyis byed do/ /tshul khrims kyi tshogs kyang bya ba gnyis byed do / /gnyis gang zhe na/ 'di lta ste/ ngan 'gro sel ba dang /bde 'gro sgrub pa ste/ bya ba 'di gnyis byed do/ /shes rab kyi tshogs kyang bya ba gnyis byed do/ /gnyis gang zhe na/ 'di lta ste/ lta bar gyur pa thams cad sel ba dang / shes rab sgrub pa ste/ bya ba 'di gnyis byed do/ /rigs kyi bu sbyin pa'i tshogs ni zag pa dang bcas pa dang /len pa dang bcas pa dang / phung po rnam par smin pa'o/ /rigs kyi bu tshul khrims kyi tshogs ni zag pa dang bcas pa dang / len pa dang bcas pa dang / phung bo rnam par smin pa'o/ /rigs kyi bu thos pa'i tshogs ni zag pa med pa dang / len pa med pa dang / phung po rnam par smin pa ma yin pa'o//rigs kyi bu de lta bas na byang chub sems dpa' sems dpa' chen po brtson 'grus brtsams pa rnams kyis thos pa'i tshogs la brtson par bya'o zhes gsungs so/ /blo gros mi bzad pa'i mdo las kyang / btsun pa shA ri'i bu byang chub sems dpa' rnams kyi shes rab kyang mi zad pa yin te/shes rab de'i rnam pa ni ji lta bur 'dug ce na/ thos pa ni rnam pa'o/ /tshul bzhin yid la byed pa ni 'jug pa'o/ /thos pa yang rnam pa ji lta bu ji ltar 'dug ce na/ byang chub sems dpa' rnams kyi thos pa'i rnam pa ni brgyad cu rtsa bzhi ste/ 'di lta ste/de ltar mos pa'i rnam pa dang / bsam pa'i rnam pa dang / lhag pa'i bsam pa'i rnam pa dang / sbyor ba'i rnam pa dang / dge ba'i bshes gnyen gyi rnam pa dang / nga rgyal med pa'i rnam pa dang / phyag bya ba'i rnam pa dang / bla ma bkur ba'i rnam pa dang / mthun pa'i rnam pa dang / bcos sla ba'i rnam pa dang / bsnyen bkur ba'i rnam pa dang / rna gtad de nyan pa'i rnam pa dang / yid la bya ba'i rnam pa dang / 'khrug pa med pa'i rnam pa dang / gzhag pa'i rnam pa dang / rin po cher 'du shes pa'i rnam pa dang / sman du 'du shes pa'i rnam pa dang / nyon mongs pa'i nad thams cad gzhil ba'i rnam pa dang /dran pa'i snod kyi rnam pa dang / rtogs pa shes pa'i rnam pa dang / blo gros 'dod pa'i rnam pa dang / blo la 'jug pa'i rnam pa dang / sangs rgyas kyi chos la mi ngoms par nyan pa'i rnam pa dang / gtong ba spel ba'i rnam pa dang / dul zhing cang shes kyi rnam pa dang /mang du thos pa bsten pa'i rnam pa dang / nan tan du byas te dga' ba myong ba'i rnam pa dang / lus bde ba'i rnam pa dang / sems tshim pa'i rnam pa dang / mi sbyor bar mnyan pa'i rnam pa dang / don mnyan pa'i rnam pa dang / chos mnyan pa'i rnam pa dang / nan tan du mnyan pa'i rnam pa dang /gzhan gyis bstan pa mnyan pa'i rnam pa dang / bkur sti bya ba'i rnam pa dang / ma thos pa mnyan pa'i rnam pa dang / mngon par shes pa mnyan pa'i rnam pa dang / theg pa gzhan la 'dod pa med pa'i rnam pa dang / pha rol tu phyin pa mnyan pa'i rnam pa dang / byang chub sems dpa'i sde snod mnyan pa'i rnam pa dang /bsdu ba'i dngos po mnyan pa'i rnam pa dang / thabs mkhas pa mnyan pa'i rnam pa dang / tshangs pa'i gnas mnyan pa'i rnam pa dang / dran pa dang shes bzhin du mnyan pa'i rnam pa dang / skye ba la mkhas pa mnyan pa'i rnam pa dang / mi skye ba la mkhas pa mnyan pa'i rnam pa dang /mi sdug pa'i rnam pa dang / byams pa'i rnam pa dang / rkyen dang 'du ba tshogs te 'byung ba'i rnam pa dang / mi rtag pa'i rnam pa dang / sdug bsngal ba'i rnam pa dang / bdag med pa'i rnam pa dang / zhi ba'i rnam pa dang / stong pa nyid kyi rnam pa dang / mtshan ma med pa'i rnam pa dang /smon pa med pa'i rnam pa dang / mngon par 'dus ma byas pa'i rnam pa dang / dge ba mngon par 'du bya ba'i rnam pa dang / sems can byin gyis brlabs pa'i rnam pa dang / chud mi gsan pa'i rnam pa dang / rang dbang gi rnam pa dang / bdag gi sems bsrung ba'i rnam pa dang /brtson 'grus mi klod pa'i rnam pa dang / chos la brtag pa'i rnam pa dang / nyon mongs pa med pa'i rnam pa dang / bdag gi phyogs bsrung ba'i rnam pa dang / pha rol gyi phyogs dang nyon mongs pa tshar gcod pa'i rnam pa dang / nor bdun la brten pa'i rnam pa dang /dbul ba thams cad gcod pa'i rnam pa dang / mkhas pas bsngags pa'i rnam pa dang / mkhas pa mgu ba'i rnam pa dang / 'phags pa bsam pa'i rnam pa dang / ma 'phags pa dad par 'gyur ba'i rnam pa dang / 'phags pa'i bden pa mthong ba'i rnam pa dang / phung po'i nyes pa spang ba'i rnam pa dang /'dus byas kyi nyes pa gzhil ba'i rnam pa dang / don la brten pa'i rnam pa dang / chos la brten pa'i rnam pa dang / ye shes la brten pa'i rnam pa dang / mdo sde nges pa'i don can la brten pa'i rnam pa dang / sdig pa thams cad mi bya ba'i rnam pa dang / bdag dang gzhan la phan pa'i rnam pa dang / las legs par byas pa'i rnam pa dang / mi 'gyod pa'i rnam pa dang / bye brag tu 'gro ba'i rnam pa dang / sangs rgyas kyi chos thams cad 'thob pa'i rnam pa ste/ 'di dag ni thos pa'i rnam pa brgyad cu rtsa bzhi zhes bya ste zhes gsungs so/ /dam pa'i chos dran pa nye bar gzhag pa las kyang /rab tu dang bas dam pa'i chos ston par byed pa nyan pa'i yon tan gzhan yang yod de/ gang 'ga' zhig chos nyan pa dad pa can rab tu dad pa dang ldan pa/ dbang po 'dud pa dang / blo gtsang ba/ gcig tu dkon mchog gsum la rab tu dad pa'i blo can/ khyim pa'am rab tu byung ba yang rung ste/ dam pa'i chos nyan par 'dod pas khyim nas byung nas lha khang ngam kun dga' ra bar 'gro bar byed pa na/ de gom pa 'dor zhing gom pa 'dor ba la tshangs pa'i bsod nams 'byung bar 'gyur ro/ /yang gang dag chos smra ba la mchod par byed pa des ni don du na dngos su sangs rgyas la mchod par 'gyur ro//gang chos ston pa po mchod par byed pa de ji lta ji ltar mchod pa de dag yongs su bsngo bar byed pa na de lta de ltar yongs su smin par 'gyur te/ de ji srid du bla na med pa yang dag par rdzogs pa'i byang chub kyi bar du 'gyur ba yin no/ / de ci'i phyir zhe na/ chos nyan pa las sems las su rung bar 'gyur/ de las su rung bar byas na/ thog ma med pa'i dus nas zhugs par gyur ba'i mun pa rnams 'joms par 'gyur ro/ /ji ltar chos ston pa pos byed pa ltar gzhan 'ga' zhig gis kyang sems las su rung bar byed pa ma yin no//bzhi po rnams kyi yang phan pa la lan gyis glan par sla ba ma yin no/ /bzhi po gang dag ce na/ 'di lta ste/ pha dang ma dang / sangs rgyas dang chos ston pa po de dag rnams la byin pa ni gzhal du med par 'gyur ro/ /byang chub kyi ched du 'gyur ro/ /'jig rten na bsngags par 'gyur ro//de ci'i phyir zhe na/ gang dag gi sems khengs par gyur pa de chos bstan pas dul ba thob par 'gyur ro/ /chags par gyur pa sbyin pa la mos par 'gyur ro/ /ma rungs pa 'jam par 'gyur ro/ /rmongs pa mkhas par 'gyur ro/ /rgyu dang 'bras bu la kun du rmongs pa rnams ni chos bstan pa thos nas rgyu dang 'bras bu la dad pa dang ldan par 'gyur ro//log pa'i lta ba la sems kun du zhugs pa rnams ni yang dag pa'i lta ba dang ldan par 'gyur ro/ /srog gcod pa dang ma byin par len pa dang mi tshangs par spyod pa la dga' ba rnams ni chos bstan pa dag thos nas de dag las ldog par 'gyur ro//de chos bstan pas las su rung ba byas nas mya ngan las 'das pa'i mthar thug par 'gyur ro/ /de'i phyir rgyu 'dis chos ston par byed pa po la lan glan par sla ba ma yin no zhes gsungs so// // thos pa nyung ba yongs su spang ba la dgongs pa bstan pa/byang chub kun du rgyu'i mdo las kyang / zab cing 'jigs rung sdug bsngal mang mi bzang / /rgya mtshor lhung ba shin tu ba lta dka' la/ /sems brlag ngal ba don med ji bzhin du/ /de bzhin mkhas pa yis kyang bsam bya ste/ /rmongs pa bsten pa byas par gyur kyang ni/ /shes pa khyad 'phags thob par 'gyur ma yin//gang zhig sdig blo de 'dra sten byed pa/ /bsten kyang de yi ngal ba don med 'gyur/ /ji ltar long ba'i mdun na 'dug pa dang / /'on pa'i glu dang rol mo ci 'dra ba/ /de bzhin blun po bsten par byas gyur kyang / /khyad par skra nyag tsam du'ang 'gyur ma yin/ / ji ltar ma ning chung ma gzhon nu dang / /rkang pa bcad pa phrin yig 'khyer ba dang / /sna bcad me long lta bar byed pa dag /'di kun don med 'gyur zhing mi rigs ltar/ /de bzhin rmongs pa rigs dma' bsam min pa/ /sems 'gyur bsten pa byas par gyur kyang ni/ /de las byas pa shes pa'ang 'thob mi 'gyur//de nyid phyir na de ni mkhas pas spong / /cod pan bcings pa'i spre'u dang ko lpags mkhan/ /tsan dan bzang pos mchod pa mdzes ma yin/ /mkhas pas rmongs la bsten pa mdzes min te/ /gnas gsum 'di dag skal ba mnyam ma yin/ /nga ni khyod kyi khyim 'dir mi 'dug ste//gang phyir khyod ni rtag tu skal mi mnyam/ /mi dbang khyod la rnam kun shes yod min/ /de phyir khyod ni rtag tu mgon med par / /rgyal po de phyir nga yis rab bstan pa'i/ /dam chos brten gyis log par ci ste lta/ /shes nas de ni spong gis spangs byas nas / / phyi ma'i tshe la khyod ni bde bar 'gyur/ /zhes gsungs so/ /yid gnyis yang dag par 'joms pa las kyang / 'od srungs dge slong chos bzhi dang yang dag par ldan pa ni de bzhin gshegs pa'i bstan pa spong bar 'gyur zhing de bzhin du dge slong mdo sde 'dzin pa la lus kyis gzir ba dang /tshig gis smod par 'gyur ro/ /bzhi po gang zhe na/ sdig pa'i chos can tshul khrims 'chal par gyur pa dang / thos par khas 'che ba thos pa nyung bar gyur pa dang / 'jig tshogs la zhen pa bdag tu smra bar gyur pa dang / bdud kyis yongs su zin pa lhag pa'i nga rgyal can du gyur pa ste /'od srungs dge slong chos bzhi po 'di dag dang ldan na ni de bzhin gshegs pa'i bstan pa spong bar 'gyur ro zhes gsungs so/ /gzi brjid can gyi mdo las kyang / rmongs pa ni brjed ngas par 'gyur ro/ /gang brjed ngas pa de la dge sbyong gi tshul med do/ /gang dge sbyong gi tshul med pa de la mya ngan las 'da' ba med do//yongs su mya ngan las mi 'da' ba de ni zag pa dang bcas pa'i lus kyi las mngon par 'du byed pa dang / zag pa dang bcas pa'i ngag gi las mngon par 'du byed pa dang / zag pa dang bcas pa'i yid kyi las mngon par 'du byed par 'gyur ro / / gang yang zag pa dang bcas pa'i las mngon par 'du byed pa de dag nyid mngon par 'du byed pa'i zas can du 'gyur ro zhes gsungs so/ /lhag pa'i bsam pa bskul ba'i mdo las kyang / byams pa gzhan yang byang chub sems dpa'i theg pa pa'i gang zag chos bzhi dang ldan pa lnga brgya pa tha ma la/dam pa'i chos rnam par 'jig pa'i tshe ma snad cing ma smas pa la bde bar yongs su thar bar 'gyur te/ bzhi gang zhe na/ thos pa nyung ngu'i sems can yongs su spong ba dang / 'khor mi bsdu ba dang / bas mtha'i gnas mal la la brten pa dang / bdag dul ba dang zhi ba dang zhi gnas kyi sbyor ba la brtson pa ste/byams pa byang chub sems dpa'i theg pa pa'i gang zag chos bzhi po de dag dang ldan na lnga brgya pa tha ma la dam pa'i chos rnam par 'jig pa'i tshe ma snad cing ma smas la bde bar yongs su thar bar 'gyur ro zhes gsungs so/ /snying rje chen po la 'jug pa'i mdo las kyang /mkhas shing rtogs pa blo gros ldan pa dag /byis pa gang nas legs par 'ongs zhes smra / /de bzhin snyan pa'i tshig gis nyer bsdus nas/ /de dag la ni snying rje nye bar 'jog /byis pa la ni gang phan snying brtse ba/ /de la gnod pa byung na byis pa dga'/ /de lta'i nyes phyir byis pa rnams spangs te//ri dgas bzhin du gcig pu dgon par gnas/ /mkhas pas 'di 'dra'i nyes pa rig nas ni/ /shes rab dman bsten bdag gi mtho ris nyams/ /byang chub thob par ga la 'gyur snyam ste/ /zhes gsungs so// // mi 'dri ba'i skyon la dgongs pa bstan pa/dam pa'i chos dran pa nye bar gzhag pa'i mdo las kyang / gzhan yang chos bcu gcig pa ni dge slong bsam gtan dang klog pa'i gegs byed pa dang mchog tu dga' ba byed par 'gyur ro/ /'di gang zhe na/ 'di lta ste/ nga rgyal gyis 'dri bar mi byed pa'o/ /'dir nang du blo dman par 'gyur zhing blo gros rgyas par mi 'gyur ro//ji ltar bdag ni bstan bcos thams cad kyi don dang tshig gi sgo nas 'dzin pa dang / don dang tshig gi sgo nas rjod par byed pa yin no/ /zhes phyi rol du bdag nyid ston par 'gyur ro/ /nga ni ye shes kyi tshogs rnams ma lus par 'dzin par byed pa yin no//bdag gis don brgya stong phrag du ma rnams lhan cig tu gnas pa rnams dang / zham 'bring ba rnams la yang nges par bstan to/ /nga dang mtshungs pa 'ga' yang yod pa ma yin no zhes/ de ltar gzhan dag rnams la yang sgrogs par byed 'god par byed/sems la rab tu 'jog par byed de/ de ni shes pa'i mngon pa'i nga rgyal 'ba' zhig tu zad par gyur pa/ sems can thams cad la rang gi yon tan rig par byed pa/ skye bo thams cad kyis go bar 'gyur ba ste/ ji ltar 'di shes pa thams cad las pha rol tu son pa de dang 'gran par mtshungs pa rnams 'ga' yang yod pa ma yin pa de ltar 'jig rten pa rnams brjod par 'gyur ro //de yang shin tu thos pa chung bar 'gyur ba dang / nang stong par 'gyur ba dang / gsog du 'gyur ba dang / gsob tu 'gyur ba dang / snod stong pa dang mtshungs pa dang / ston ka'i sprin dag dang 'dra ba dang /bsam gtan dang klog pa las phyi rol du byas pa dang / skye bo dman pa thams cad kyis mchod par 'gyur ro/ /de ni gang gi tshe dge sbyong bsam gtan dang klog pa dang / tshul khrims dang / gtong ba dang / brtson 'grus brtsams par gyur pa dang / dmigs pa dang rang bzhin gyis thos pa rgya chen por gyur pa dang /dul ba dang shin tu sbyangs pa'i rgyan gyis brgyan pa/ sangs rgyas kyi bstan pa la shin tu gces par 'dzin pa/ spro ba log pa med par gyur pa/ shes rab chen po'i dris rgyud bsgos par gyur pa rnams kyi nang na gnas pa ni/ de de'i tshe na nang stong pa gsog dang gsob tu gyur pa ni 'di snyam du gal te dge slong de dag gis bdag la ji lta ba bzhin ston cig ces smras par gyur na/de dag gis bdag zil gyis gnon par 'gyur ro/ /gang yang sbyin pa po sbyin bdag de rnams kyis bdag la mchod par byed pa las de dag gi drung nas de dag rnams kyang 'byung bar mi 'gyur ro//bdag sbyin pa po dang sbyin bdag rnams kyis zil gyis gnon par 'gyur ro/ /nga rgyal dang ngar 'dzin pas gzung ba de rang nyid kyi shes rab kyis don rnams go bar mi 'gyur ro/ /zil gyis mnan par gyur pa'i 'jigs pas gzhan la yang 'dri bar mi byed do/ /ci ste gang dag rang nyid kyi blos mi rtogs shing thos kyang rtogs pa'am mi rtogs pa'i don 'ga' zhig yod pa de dag nang stong pa zil gyis gnon pas 'jigs pa des/bdag nyid kyis mi rtogs la zil gyis gnon pa'i 'jigs pas gzhan la yang mi 'dri'o/ /de ltar log par smra ba de ni bslab pa'i gzhi lnga las 'da' bar 'gyur ro//'di lta ste/ brdzun du smra bar 'gyur te/ shes pas rtogs pa med bzhin du 'on kyang smra bar byed pa ni bslab pa'i gzhi las 'da' ba dang po'o/ /bslab pa'i gzhi las 'da' ba gzhan gang zhe na/ 'di lta ste/ mchod pa gang zhig de shes pa dang ldan par bsams nas sbyin pa po dang sbyin bdag gis byed par 'gyur ba de mi 'os bzhin du thos pa gzhan pa des len par byed pa na blo gros gzhan pa de'i ma byin par len pa bar du gcod par byed par 'gyur ba ste/'di ni bslab pa'i gzhi las 'da' ba gzhan yin no/ /yang bslab pa'i gzhi las 'da' ba gzhan gang zhe na/'di lta ste/ gang gi tshe dge slong rab tu byung bar gyur pa de'i tshe/ ji ltar tshul khrims la kun nas brten pa dang / tshul khrims la rab tu gnas pa dang tshul khrims dmigs par byas nas/ ngas khyim gyi gnas yongs su gtang bar bya'o snyam pas bslab pa'i gzhi yongs su 'dzin par byed do//gang zhig thos pa med cing gzhan dag la yang thos pa ston par mi byed pa de'i tshul khrims 'chal pa yin no/ /'di ni bslab pa'i gzhi las 'da' ba gzhan yin no/ /yang bslab pa'i gzhi las 'da' ba gzhan ni 'di lta ste/ gzhan gyis dris pa dang slar dris pa bstan pa na/ zil gyis gnon pa'i 'jigs pas 'jigs par 'gyur te/ chos la skur pa 'debs par 'gyur ro/ /'di ni chos ma yin gyi de ni mchog tu dka' ba mchog tu sdig pa'o zhes chos ma yin par rjod par byed do/ /yang bslab pa'i gzhi las 'da' ba gzhan gang zhe na/'di lta ste/ dam pa'i chos mi shes pa de'i tshe/ tshangs par spyod pa dang bcas pa de dag gis / khyod kyis sangs rgyas kyi gsung yang dag par gyur pa zab mo 'di lta bu ma thos so zhes brjod par 'gyur ro / /ji ltar nga kho nas shes kyi khyed kyis ni ma yin no zhes de dge 'dun la spyo bar 'gyur/zil gyis gnon pa'i 'jigs pas 'jig rten skur bar 'gyur ro/ /ji lta ba bzhin dam pa'i chos kyi yon tan nyams par 'gyur bar chos brjod par 'gyur ro/ /mi 'dri ba nyid kyis mchog tu brdzun du smra ba ni lus zhig nas ngan 'gro log par ltung ba sems can dmyal ba dag tu skye bar 'gyur ro//mi 'dri ba de la skyon chen po gzhan yang yod de/ 'di lta ste/ gal te ci zhig ltar nga rgyal de nyid kyis nags su 'jug par 'gyur ro/ /zil gyis mnan pas na lam bzang po ston pa po la mi 'dri ste/ nga rgyal gyi skyon gyis lam gang zhig yin par 'gyur/ji ltar dmigs pa yid la bya/ rnam pa gang gis lam chud zos par 'gyur ba slar yang yid la gzhag par bya zhes de skad du mi 'dri'o/ /de ltar ma rnyed pa de'i yid skyo bar 'gyur ro/ /yang de'i skyil krung las ma langs par da 'di snyam du rgan rabs de dag 'di la lam dang bsam gtan med snyoms par 'jug pa med/de nga rgyal gyi skyon dang zil gyis gnon pa'i 'jigs pas bsam gtan gyi 'bras bu dang snyoms par 'jug pa'i 'bras bu la skur pa 'debs par 'gyur ro/ /zhes nga la skyo bar 'gyur ro snyam du sems so//log par lta ba de lus zhig nas shi ba'i 'og tu ngan 'gro log par ltung ba sems can dmyal ba dag tu skye bar 'gyur ro/ /de nas de'i tshe bcom ldan 'das 'od srungs des tshigs su bcad de gsungs pa/ dge slong bdag shes nga rgyal nyams/ /de bzhin bla ma la 'dri zhing //brtson 'grus la ni brtson 'gyur pas/ /mya ngan 'das pa thob par 'gyur/ /ji snyed cig ni thos gyur pa / de snyed kho na rab tu 'chad/ /bdag shes lam las ma nyams pa/ /dge slong gis ni de nyid rig /gang zhig rlom dang brnyas pa nyams/ /lam dang lam ma yin la mkhas//rang dang gzhan dag tshul shes shing / /chog shes de ni dge slong brjod/ /rlom zhing ma rungs sems dang ldan/ /spobs pa chung zhing 'gyur bag can/ /rnyed pa dang ni bkur ste la/ /chags pa zhi bar ga la 'gyur/ /de ltar mi 'dri zhing rlom pa ma rungs pa'i sems dang ldan pa de la bsam gtan dang klog pa'i bya ba yod pa ma yin no//gzhan gyi zas za ba de cha lugs 'dzin pa tsam 'ba' zhig gis dge slong gi ming rnyed par 'gyur zhing nga rgyal gyi skyon dang mi 'dri ba nyid kyis lus zhig nas shi ba'i 'og tu ngan 'gro log par ltung ba sems can dmyal ba dag tu skye bar 'gyur ro//de'i phyir dge slong 'dri ba'i rang bzhin can ni ji srid 'tsho'i bar du bde ba dang yid bde bar 'gyur ro/ /lus zhig nas shi ba'i 'og tu bde 'gro ma tho ris lha dag gi nang du skye bar 'gyur ro/ /de'i 'og tu rab tu dang ba dang spangs pa'i yon tan des mya ngan las 'da' bar 'gyur ro zhes de ltar bslab par bya'o zhes gsungs so//blo gros rgya mtshos zhus pa'i mdo las kyang / bcom ldan 'das gzhan yang byang chub sems dpa' nga rgyal gyis khengs shing nga rgyal gyis rengs par gyur te/ de nga rgyal des bla ma rnams dang / sbyin gnas rnams dang / pha ma dang / slob dpon dang / mkhan po rnams dang / de las gzhan pa bla ma lta bu'i gang zag rnams la kun du 'dun pa dang / 'dud pa dang / rab tu 'dud par mi bgyid cing / de la ma gus par gyur pa dang / gang dag byang chub sems dpa'i spyod pa rnams la mkhas pa/ khyad par thob pa/ gzungs dang spobs pa phun sum tshogs pa/ byang chub sems dpa'i bgyi ba thams cad tshar phyin pa de dag gi gan du mi mchi/ mi bsnyen/ mi bsten/ bsnyen bkur mi bgyi/ yongs su mi 'dri/ yongs su 'drir mi 'tshal zhing / de ma thos pa'i chos nyan par mi bgyid/ thos pa'i chos rnams kyang yongs su dkar bar mi bgyid/de las gzhan pa byang chub sems dpa'i theg pa pa'i gang zag gang dag bdud kyi lcags kyus zin pa/ chos dan pa la spyod pa de dag la dga' ba rnyed pa dang / de dag kyang de bzhin du de'i rjes su 'jug par gyur pa dang / de dman pa la brten zhing khyad par dang bral bas 'di lta ste zhan pa'i 'gro ba blun pa/'on pa/ lkugs pa'i 'gro ba dman pa nyid du mchi bar 'gyur ro/ /bcom ldan 'das 'di lta ste dper na skyes bu la la zhig gis gram pa'i sa phyogs su shing tsam pa ka bskrun la/ chab tshol bar mi bgyid kyis gang nas chab mchi bar mthong ba'i phyogs de yang gor ma dang gyo mo dag gis bkum na/bcom ldan 'das de ltar na zhugs shing tsam pa ka chab dang bral ba de la yal ga dang / lo ma dang yal ga phre'u ma chags pa rnams kyang chags par mi 'gyur/ yal ga dang / lo ma dang / yal ga phre'u chags pa rnams kyang bskams te dog sa la ltung bar 'gyur ro//bcom ldan 'das de bzhin du byang chub sems dpa' gang byang chub kyi sems bskyed la/ nga rgyal gyis khengs shing / nga rgyal gyis rengs par gyur na/ de dge ba'i bshes gnyen dang / chos mnyan pa dang bral te ma thos pa'i chos rnams kyang mi nyan /thos pa'i chos rnams kyang yongs su dkar bar mi bgyid do/ /bcom ldan 'das 'di lta ste dper na/ gang gi tshe rgya mtsho chen po mchis par gyur pa de'i tshe/ gzhol ba'i phyogs na mchis par 'gyur ro/ /de gzhol ba'i slad du chu klung thams cad dang /chab mig dang / 'bab chu thams cad tshegs chung ngus der 'bab po/ /bcom ldan 'das de bzhin du byang chub sems dpa' nga rgyal ma mchis pa/ bla ma dang sbyin gnas la gus pa la yang tshegs chung ngus chos zab mo'i sgo nas rna ba'i dbang po la grag par 'gyur ro/ /de dran pa la yang gnas par 'gyur ro//bcom ldan 'das de lta bas na byang chub sems dpa' nga rgyal gyis khengs pa nga rgyal gyis rengs par gyur te/ bla ma dang sbyin gnas rnams la kun du mi 'dud cing 'dud par mi bgyid la rab tu mi 'dud na/ bcom ldan 'das kye ma'o byang chub sems dpa' 'di ni bdud kyi lcags kyus zin par rig par bgyi ste/bcom ldan 'das 'di ni byang chub sems dpa'i nga rgyal dang rab tu ldan pa'i bdud kyi lcags kyu ste bcu gcig pa'o zhes gsungs so// // chos rku ba la dgongs pa bstan pa/ gzi brjid can gyi mdo las kyang / rkun po chen po bzhi po 'di dag ni gso bar nus kyi/ bstan pa 'di la chos rku ba ni ma yin no/ /yang chos rku ba zhes bya ba gang zhig ce na/ gang zhig 'di ni rung ngo 'di ni mi rung ngo zhes cung zad tsam gyis de bzhin gshegs pa'i gsung ma sbas pa dkrugs par byed pa de ni rang gi spobs pa can zhes brjod do//yang gang zhig rang gi spobs pas dkrugs par byed cing de de bzhin gshegs pas gsungs par smra ba de ni de bzhin gshegs pa la skur par 'gyur ro/ /sems can thams cad rang sangs rgyas su 'gyur zhing gang zhig de dag thams cad la yang dag pa ma yin pa'i tshig dag gis gshe bar 'gyur/spyo bar 'gyur/ skur par 'gyur la/ yang dad pa can nam/ dad pa can ma yin pa yang rung ste/ gang zhig slob dpon gyis mdzad pa ma grub pa la/ rang gi spobs pas byas pa'i chos 'jug pa 'di ni de bzhin gshegs pa la skur pa zhes bya'o//gang zhig rang sangs rgyas de dag la skur pa dang / gang zhig de bzhin gshegs pa la skur pa dag las/ de bzhin gshegs pa la skur pa 'di ches lci ba yin no/ /yang gang zhig 'di skad du bslab pa spong / sangs rgyas spong / chos spong / dge 'dun spong ngo zhes smra bar 'gyur ba de dag ni gal te ston pa'i gsung spangs nas rang gi spobs pas byas pa'i tshig la bstod na de ltar na spangs par 'gyur te/kun dga' bo 'di ni chos rku ba zhes bya'o/ /gang zhig rang gi spobs pas tshig gcig nang du bcug nas slob dpon gyis mdzad pa yongs su rdzogs par byas so snyam du sems pa 'di ni don ma yin pa des chos rkun po dang chos kyi chom rkun pa zhes bya ba/chos sun 'byin par byed pa zhes bya'o/ /kun dga' bo 'dzin pa de dag dang ldan pa de gang sangs rgyas la rab tu dang ba bsgom pa dang / chos dang dge 'dun la rab tu dang ba bsgom pa ni gnas med cing go skabs med de 'di ni gnas med do//phyi nas de ni 'di ni rigs so/ /'di ni mi rigs so/ /'di ni 'brel lo/ /'di ni mi 'brel lo zhes mdo sde thos pa tsam du 'gyur ba spong ngo zhes de ltar 'dod par bya'o/ /mi dge ba'i rtsa ba dang ldan pa de mkhas pas lhag par rlom par 'gyur ro//de lus zhig nas shi ba'i 'og tu sems can dmyal bar skye bar 'gyur ro/ /de yang gal te mi rnams kyi nang du skyes na blun por 'gyur/ 'on par 'gyur/ lce med par 'gyur/ lce gnyis par 'gyur/ lce thor pa can du 'gyur/mi 'brel pa smra ba'i lce can du 'gyur/ lce lkugs pa can du 'gyur ro zhes gsungs so// // bdag la bstod pa dang gzhan la smod pa la dgongs pa bstan pa/ brjod du med pa'i mdo las kyang / de nas byang chub sems dpa' rnam par dga' ba dang ldan pa 'khor der 'dus par gyur cing 'dug pa des/byang chub sems dpa' brjod du med pa la 'di skad ces smras so/ /rigs kyi bu gang la slob pa na byang chub sems dpa' de bzhin gshegs pa slu bar byed pa yin/ smras pa/ de gal te bdag ni tshul khrims dang ldan no//gzhan ni tshul khrims 'chal lo zhes de ltar slob na de bzhin gshegs pa slu bar byed do/ /de gal te bdag ni gtong ba dang ldan no/ /gzhan dag ni ser sna can no/ /bdag ni bzod pa dang ldan no/ /gzhan ni gnod sems can no/ /bdag ni brtson 'grus dang ldan no/ /gzhan ni snyom las can no//bdag ni bsam gtan pa'o/ /gzhan ni sems g.yengs pa'o/ /bdag ni shes rab dang ldan pa'o/ /gzhan dag ni shes rab 'chal pa'o zhes de ltar slob na de bzhin gshegs pa slu bar byed do/ /bdag ni 'dod pa chung ba'o/ /chog shes pa'o/ /rab tu rnam par dben pa'o//dgang sla ba/ gso sla ba/ dgon pa pa bsod snyoms la rgyu ba/ phyag dar khrod pa/ sbyangs pa la gnas pa/ ma 'dres pa rnam par dben pa la dga' ba/ brtson pa/ mngon par brtson pa/ mang du thos pa/ blang bar 'os pa'i tshig dang ldan pa/ stan par smra ba/ tshig 'jam pa/dran pa dang ldan pa/ blo gros dang ldan pa/ cho ga dang spyod pa phun sum tshogs pa/ bka' blo bde ba/ mthun par 'dzin pa/ des pa/ gnas bde ba/ yang dag par 'dzin pa la brtson pa/ byams pa la gnas pa/ snying rje dang dga' ba dang btang snyoms thob pa/ bden par smra ba dang / tshig bden pa dang / tshig yang dag pa can/ ji skad smras pa de bzhin byed pa'o/ /bdag gis bdud kyi las rtogs nas kyang spang bar bya'o/ /pha rol tu phyin pa dag la bslab par bya'o/ /bdag ni zab mo la bzod pa can no/ /bdag ni de bzhin gshegs pa'i gsung dang lan gyi gsung rtog pa la gnas pa'o//bdag ni ston pa dang gsol ba 'debs pa dang rjes su yi rangs pa dang yongs su bsngo ba la mkhas pa'o/ /bdag ni sbyin pa dang dul ba dang yang dag par sdom pa dang des pa phun sum tshogs pa'o/ /bdag ni 'dzin pa dang klog pa dang rnam par rig par byed pa la mkhas pa'o//bag yod pas dge ba'i spyod pa thams cad kyi rgyu mngon par sgrub par byed pa'o/ /gzhan dag ni de dag sgrub par byed pa ma yin zhes de gal te de ltar bdag nyid la yongs su 'dzin par byed cing / gzhan la smod na de bzhin gshegs pa slu bar byed do/ /rigs kyi bu gzhan yang de gal te 'di snyam du chos 'di dag kun chub par bya /chos 'di dag spang bar bya / 'di dag 'gog par bya/ 'di dag bsgom par bya snyam na de bzhin gshegs pa slu bar byed do/ /de ci'i phyir zhe na/ de bzhin gshegs pa rnams byung yang rung / de bzhin gshegs pa rnams ma byung yang rung / chos kyi dbyings 'di ni gnas pa nyid de/ chos kyi dbyings 'di ni yongs su shes par bya ba ma yin/ spang bar bya ba ma yin/ mngon sum du bya ba ma yin/ bsgom par bya ba ma yin no/ /bdag ni bden par smra ba'o snyam na de bzhin gshegs pa slu bar byed do//de ci'i phyir zhe na/ bden pa la ni nga'o nga'i 'o snyam du gnyis su 'jug pa med do/ /bdag gis thob bo/ /bdag gis mngon sum du byas so snyam na de bzhin gshegs pa slu bar byed do/ /de ci'i phyir zhe na/ rang gis yongs su dag par bya ba med/ thob par bya ba med/ mngon sum du bya ba med do/ /'di ni sbyor ba'o 'di ni spang ba'o snyam na de bzhin gshegs pa slu bar byed do/ /de ci'i phyir zhe na/ de bzhin gshegs pa ni sbyor ba dang mi sbyor ba med pa'o/ /bdag ni dran pa nye bar gzhag pa la gnas pa'o snyam na de bzhin gshegs pa slu bar byed do/ /de ci'i phyir zhe na/chos thams cad dran pa med pa yid la byed pa med par de bzhin gshegs pa mngon par rdzogs par sangs rgyas so/ /bdag ni yang dag par spong ba la zhugs so snyam na de bzhin gshegs pa slu bar byed do/ /de ci'i phyir zhe na/ chos thams cad ni rang bzhin gyis spangs par de bzhin gshegs pa mngon par rdzogs par sangs rgyas so//bdag gi mngon par shes pa dang / rig pa dang / rdzu 'phrul gyi tshul dag la brtson no snyam na de bzhin gshegs pa slu bar byed do/ /de ci'i phyir zhe na/ yang dag pa'i mtha' ni ma 'dres par de bzhin gshegs pa mngon par rdzogs par sangs rgyas so//bdag gi dbang po dang stobs dang byang chub kyi yan lag dang lam dang ldan no snyam na de bzhin gshegs pa slu bar byed do/ /de ci'i phyir zhe na/ de bzhin gshegs pa rnams kyi byang chub ni 'dus ma byas pa'o/ /'jig tshogs ni gzhan kho na'o//bgrod pa gcig pa'i lam ni gzhan kho na'o zhes de ltar slob na de bzhin gshegs pa slu bar byed do zhes gsungs so/ /de bzhin gshegs pa'i ye shes kyi phyag rgya'i mdo las kyang / gang dag rnyed pa can du gyur pa de dag rnyed pa can ma yin pa la smod par 'gyur/gang dag rab tu dang ba byed par gyur pa de dag rab tu dang bar byed pa ma yin pa la smod par 'gyur/ gang dag lta bar byed par gyur pa de dag lta bar byed pa ma yin pa la smod par 'gyur/ gang dag blta na sdug par 'gyur ba de dag blta na sdug pa ma yin pa la smod par 'gyur gang dag spros pa dang ldan par 'gyur ba de dag spros pa dang mi ldan pa la smod par 'gyur/gang dag gtong ba la mos par gyur pa de dag ser sna can dag la smod par 'gyur/ gang dag tshul khrims dang ldan par gyur pa de dag tshul khrims 'chal pa la smod par 'gyur/ gang dag bzod pa tsam thob par gyur pa de dag gnod sems can la smod par 'gyur/gang dag brtson 'grus dang ldan par gyur pa de dag snyom las dang ldan pa la smod par 'gyur/ gang dag bsam gtan par gyur pa de dag sems rnam par g.yengs pa la smod par 'gyur/ gang dag shes rab dang ldan par gyur pa de dag shes rab 'chal pa la smod par 'gyur/gang dag thabs la mkhas par gyur pa de dag thabs la mi mkhas pa la smod par 'gyur/ gang dag mang du thos pa de dag thos pa nyung ba la smod par 'gyur/ yid du 'ong ba gang dang gang rnyed par gyur pa de dag de nyid kyis gzhan la smod par 'gyur zhes gsungs so//sgrib pa thams cad rnam par sbyong ba'i mdo las kyang / de nas bcom ldan 'das la 'jam dpal gzhon nur gyur pas 'di skad ces gsol to/ /bcom ldan 'das ji ltar na sbyin pa sgrib pa lags/ ji ltar na tshul khrims sgrib pa lags/ji ltar na bzod pa sgrib pa lags/ ji ltar na brtson 'grus sgrib pa lags/ ji ltar na bsam gtan sgrib pa lags/ ji ltar na shes rab sgrib pa lags/ de skad ces gsol pa dang / bcom ldan 'das kyis 'jam dpal gzhon nur gyur pa la 'di skad ces bka' stsal to//'jam dpal chos thams cad sgrib pa med pa yin mod gyi 'on kyang byis pa so so'i skye bo rnams la rang gi rnam par rtog pas sbyin pa sgrib pa'i bya ba byed do/ /de ci'i phyir zhe na/ 'jam dpal byis pa so so'i skye bo ni sbyin pa sbyin pa na/ ser sna can rnams la mi dad pa'i sems skyed par byed do //ma dad pa'i sems des de la tha ba'i skyon 'byung bar 'gyur ro/ /tha ba'i skyon skyes pas sems can dmyal ba chen po rnams su skye bar 'gyur ro/ /de tshul khrims srung ba na tshul khrims 'chal pa rnams la smod cing gshe la/ de dag gi mi snyan pa smra'o//de las de dag gi skyon thos nas skye bo mang po ma dad par byed do/ /de ma dad pa des ngan 'gror 'gro bar 'gyur ro/ /de bzod pa sgom pa na bdag ni bzod pa dang ldan pa yin/ gzhan 'di dag ni gnod sems kyi sems dang ldan pa yin no snyam du bzod pa'i rgyags pas bag med par 'gyur te/bzod pa'i rgyags pas bag med pa'i rtsa ba las byung ba'i sdug bsngal myong bar 'gyur ro/ /de brtson 'grus rtsom pa na dge slong 'di dag ni le lo can du gnas pa/ mngon par mi brtson pa/ dad pas byin pa yongs su spyod pa ste/ 'di dag ni chu phor gang gi'ang 'os kyang ma yin no//de brtson 'grus rtsom pa des bdag la bstod cing gzhan la smod pas de byis pa yin no zhes nga smra'o/ /de bsam gtan la snyoms par 'jug pa na/ bsam gtan dang snyoms par 'jug pa des 'dod pa skyed cing 'di snyam du sems te/ bdag cag ni ting nge 'dzin la gnas pa yin/ dge slong gzhan 'di dag ni sems g.yengs par gnas pa yin/ 'du 'dzi la dga' bas gnas pa ste/ de dag sangs rgyas su ga la 'gyur/ 'di dag ni sangs rgyas kyi byang chub las ring ngo / /de 'du shes yid la byed pa das rlom pa dang bcas pa'i sems bskyed pa ji snyed pa skyed par byed pa de snyed kyi bskal par 'khor ba yongs su 'dzin par 'gyur ro//der de dag gis byang chub kyi phyir spyad par bya dgos so/ /gal te de mang du thos pa zhig yin na/ de yi ge med pa'i chos thams cad la mi bden pa'i rnam par shes par brtags nas shes rab tu dmigs shing rlom par lhur len te de ni mi blun po'o zhes nga smra'o//mi shes pas bcom pa'o zhes nga smra'o/ /skyes bu dam pa ma yin no zhes nga smra'o/ /rtog pas bcom pa'o zhes nga smra'o/ /gal te de theg pa chen po la gnas pa zhig yin na de 'di snyam du 'gyur te/nga ni 'jig rten na rgan pa'o/ /nga ni 'jig rten na gtso bo'o/ /nga ni 'jig rten na mchog tu 'gyur ro snyam mo/ /gal te des gang zag nyan thos kyi theg pa pa dag mthong na/ de dag la ma dad pa'i sems skyed par byed do//smod par byed/ gshe bar byed/ mi snyan pa rjod par byed do/ /de ngan du sems pa de dang dan du brjod pa des ngan song du 'gro ba thob par 'gyur ro zhes gsungs so/ /dkon mchog sprin gyi mdo las kyang / ji ltar na byang chub sems dpa' tshul bzhin ma yin pa yid la byed pa dang bral bar 'gyur zhe na/'di na byang chub sems dpa' gcig pu dben par song ba rab tu dben pa na gnas pa ni/ bdag ni de bzhin gshegs pa'i chos 'dul ba la zhugs pa/ gzhan gang dag dge sbyong ngam bram ze yang rung ste/ de thams cad 'dres par gnas pa/ 'dris pa mang pa/de bzhin gshegs pa'i chos 'dul ba la brtson pa dor ba'o snyam du de ltar sems skyed par mi byed de / de ltar na byang chub sems dpa' tshul bzhin ma yin pa yid la byed pa dang bral ba yin no zhes gsungs so/ /dad pa'i stobs skyed pa la 'jug pa'i phyag rgya'i mdo las kyang /bdag ni bdag la mi bstod pa dang gzhan la mi smod pa la gnas pas/ gzhan dag kyang bdag la mi bstod pa dang gzhan la mi smod pa la dgod par bya'o zhes dbugs 'byin pa thob par 'gyur ro/ /de la bdag la bstod pa nyid ni/ gang bdag nyid la yang dag pa ma yin pa'i yon tan sgro 'dogs pa nyid do//gzhan la smod pa nyid ni gang gzhan gyi yang dag pa'i yon tan 'joms pa nyid do zhes gsungs so// // byang chub kyi sems kyi yon tan brjod pa la dgongs pa bstan pa/ ye shes sgron me'i mdo las kyang / ji ltar na byang chub sems dpa' byang chub sems dpa'i bslab pa'i sdom pas bsdams par 'gyur zhe na/ 'di na byang chub sems dpa' bdag gis so sor thar pa'i sdom pa tsam gyis bla na med pa yang dag par rdzogs pa'i byang chub tu mngon par rdzogs par 'tshang rgya bar mi nus so/ /'o na ci zhe na bdag gis de bzhin gshegs pas mdo sde de dang de dag tu byang chub sems dpa'i spyod pa dang /byang chub sems dpa'i bslab pa'i gnas rab tu brtags pa de dag la rab tu bslab par bya'o zhes de ltar na spyod par byed pa'o zhes gsungs so/ /chos yang dag par sdud pa'i mdo las kyang /bcom ldan 'das de la byang chub sems dpa' sems dpa' chen po'i lhag pa'i tshul khrims kyi bslab pa gang zhe na/ byang chub sems dpa' ni gang so sor thar pa'i sdom pas bsdams pa yang lags la/ so sor thar pa tsam gyis yang dag par mi sems te / byang chub sems dpa'i sdom pa la brten pa yang lags so/ /cho ga dang spyod pa la phun sum tshogs pa yang lags la/ cho ga dang spyod yul tsam gyis dag par mi sems te/ byang chub sems dpa'i cho ga dang spyod yul la brten pa yang lags so/ /kha na ma tho ba phra rab tsam dag la yang 'jigs par lta zhing /byang chub sems dpa'i ye shes la yang brten pa lags so/ /de la byang chub sems dpa'i ye shes gang zhe na/ byang chub sems dpa' rnams chos thams cad kyi de kho na shes pas las dang nyon mongs pas 'jigs shing skrag pa ma mchis pa 'di ni byang chub sems dpa'i ye shes lags so zhes gsungs so//sdong po bkod pa'i mdo las kyang / rigs kyi bu byang chub kyi sems ni sangs rgyas kyi chos thams cad kyi sa bon lta bu'o/ /'gro ba thams cad kyi chos dkar po rnam par 'phel bar byad pas zhing lta bu'o//'jig rten thams cad rab tu bstan pas sa lta bu'o/ /nyon mongs pa'i dri ma thams cad dag par byed pas chu lta bu'o/ /'jig rten thams cad la brten pa med pas rlung lta bu'o/ /lta ba'i nye bar len pa'i rtswa thams cad rab tu sreg pas me lta bu'o//sems can thams cad kyi gnas snang bar byed pas nyi ma lta bu'o/ /chos dkar po'i dkyil 'khor yongs su rgyas par byed pas zla ba lta bu'o/ /chos kyi snang ba byed pas sgron me lta bu'o/ /mnyam pa dang mi mnyam pa yongs su mthong bar byed pas mig lta bu'o/ /thams cad mkhyen pa nyid kyi grong khyer du phyin par byed pas lam lta bu'o//mu stegs ngan pa rnam par spong bas mu stegs lta bu'o/ /byang chub sems dpa' thams cad mngon par gnas pas bzhon pa lta bu'o/ /byang chub sems dpa'i spyod pa thams cad kyi sgor 'jug par byed pas sgo lta bu'o//ting nge 'dzin gyi khang pa na gnas par byed pas gzhal med khang lta bu'o/ /chos kyi dga' ba dang / mos pa nyams su myong bar byed pas bza' shing gi ra ba lta bu'o zhes bya ba nas/ lha dang mi dang lha ma yin du bcas pa'i 'jig rten rnams la mchod rten lta bu'o/ / zhes bya ba'i bar du gsungs pa dang / rigs kyi bu 'di lta ste dper na/ 'jigs pa med pa zhes bya ba'i rtsi yod de/ de 'chad na 'jigs pa lnga mi 'byung ste/ 'di ltar mes mi tshig go/ /dug gis mi tshugs so/ /mtshon gyis mi chod do / /chus mi 'khyer ro/ /du bas mi 'chi'o/ / rigs kyi bu de bzhin du thams cad mkhyen pa'i sems kyi rtsi 'chad pa'i byang chub sems dpa' yang 'dod chags kyi mes mi 'tshig go/ /yul gyi dug gis mi tshugs so/ / nyon mongs pa'i mtshon gyis mi chod do/ /srid pa'i chus mi 'khyer ro/ /yongs su rtog pa'i du bas mi 'chi'o zhes gsungs pa'i bar dang /rigs kyi bu 'di lta ste dper na/ rgya mtsho chen po'i nang na nor bu rin po che'i rgyal po rin po che thams cad yongs su sdud pa zhes bya ba yod de/ de 'jig rten gyi khams gzhan du ma 'phos na/ rgya mtsho chen po la bskal pas 'tshig pa'i me thams cad kyis kyang tal tsam yang bskam par nus pa'i gnas med skabs med do//de bzhin du byang chub sems dpa' thams cad mkhyen pa nyid du sems bskyed pa nor bu rin po che thams cad yongs su sdud pa'i nor bu rin po che'i rgyal po chen po bsam pa dang / sems kyi rgyud la yod pa rnams kyis dge ba'i rtsa ba thams cad mkhyen pa nyid du bsngos pa 'ga' zhig rnam par chud za bar 'gyur ba de lta bu'i gnas med skabs med de/de ni mi srid de/ thams cad mkhyen pa nyid du sems bskyed pa yongs su gtong ba zhig tu gyur na ni dge ba'i rtsa ba thams cad kyang skam par 'gyur ro zhes gsungs pa'i bar dang rigs kyi bu 'di lta ste dper na/ji srid du nyi zla'i dkyil 'khor gyi 'od kyis snang bar byed pa de srid du nor dang / 'bru dang / rin po che'i rnam pa dang / gser dang / dngul dang / me tog dang / spos dang / phreng ba dang / gos dang / longs spyod gang ji snyed pa de dag thams cad kyis nor bu rin po che chen po dbang gi rgyal po'i rin du mi chog go//de bzhin du ji srid du dus gsum la thams cad mkhyen pa'i ye shes chos kyi dbyings kyi yul snang bar mdzad pa de srid du lha dang mi dang / nyan thos dang rang sangs rgyas thams cad kyi dge ba'i rtsa ba zag pa yod pa'am/zag pa med pa gang ji snyed pa de dag thams cad kyis kyang / byang chub tu sems bskyed pa'i nor bu rin po che chen po dbang gi rgyal po'i rin du mi chog go zhes gsungs pa'i bar dang / rigs kyi bu 'di lta ste dper na/ dngul chu'i rigs gser du snang ba zhes bya ba yod de/de ni srang gcig gis kyang lcags srang stong gser du 'gyur ro/ /dngul chu srang gcig po de ni lcags srang stong po des zad par bya ba'am/ lcags su bsgyur bar mi nus so/ /de bzhin du thams cad mkhyen pa nyid du sems bskyed pa'i ro'i khams dge ba'i rtsa ba yongs su bsngos pa'i ye shes kyis bzung ba ni las dang nyon mongs pa'i sgrib pa'i lcags thams cad zad par byas te /chos thams cad thams cad mkhyen pa nyid kyi kha dog tu byed kyang thams cad mkhyen pa nyid du sems bskyed pa'i ro'i khams gcig po de ni las dang / nyon mongs pa'i lcags thams cad kyis kyang kun nas nyon mongs par bya ba'am/zad par mi nus so zhes gsungs pa'i bar dang / rigs kyi bu 'di lta ste dper na/ rdo rje rin po che ni chag kyang thams cad las khyad par 'phags pa'i gser gyi rgyan zil gyis gnon to/ /de bzhin du thams cad mkhyen pa nyid du sems bskyed pa rdo rje rin po che bsam pa log par zhugs pas chag par gyur kyang /nyan thos dang rang sangs rgyas thams cad kyi yon tan gyi gser gyi rgyan zil gyis gnon to/ /rigs kyi bu 'di lta ste dper na/ rdo rje rin po che ni chag kyang phongs pa thams cad rnam par sel lo/ /de bzhin du thams cad mkhyen pa nyid du sems bskyed pa rdo rje rin po che nan tan med pas chag par gyur kyang /'khor ba'i phongs pa thams cad rnam par sel lo zhes bya ba'i bar du gsungs so/ /byams pa 'jug pa'i mdo las kyang / de skad ces gsol pa dang / bcom ldan 'das kyis byang chub sems dpa' sems dpa' chen po rnam par brtse ba la 'di skad ces bka' stsal to//rigs kyi bu byang chub sems dpa' de bzhin gshegs pa'i bslab pa gzhan las 'gal bar byas sam/ ngas ltung bar 'gyur ba'i chos bzhi gang dag gsungs pa de dag gi nyes pa byas sam mi dge ba bcu'i las kyi lam yang dag par blangs te 'dug gam/mtshams med pa lnga byas su zin kyang byang chub sems dpa' de byang chub kyi sems kyang ma btang ma spangs te/ byang chub kyi sems dang ma bral la dmigs pa can gyi sems dang / mngon par zhen pa'i sems kyang mi skyed na/ byang chub sems dpa' de ni tshul khrims dang ldan pa kho na yin pa dang /tshul khrims ma nyams pa dang / tshul khrims ma 'dres pa dang / tshul khrims ma zhig pa dang / tshul khrims ma ral ba dang / tshul khrims nag nog can ma yin par gzung bar bya ste/ byang chub sems dpa'i sgo so so ba la spyod pa dang bslab pa yang yin no/ / de ci'i phyir zhe na/[ (]da [,]de [)]dag ni byang chub sems dpa'i byang chub la bar du gcod par byed pa ma yin pa'i phyir ro/ /byang chub sems dpa' sdig pa'i las byas pas srid par 'gro ba bskyed du zin kyang / 'on kyang byang chub sems dpa' ni ji tsam du srid par 'gro ba bskyed pa de tsam du pha rol tu phyin pa drug yongs su rdzogs par byed do//byang chub sems dpa' de bzhin gshegs pa'i bslab pa ji ltar bcas pa la bslabs su zin kyang / de nyan thos kyi sems sam/ rang sangs rgyas kyi sems sam/ dmigs par lta ba dang lhan cig rten par byed na/ byang chub sems dpa' byang chub sems dpa'i tshul khrims las nyams par 'gyur ro//rigs kyi bu de lta bas na byang chub sems dpa' gang byang chub kyi sems mi gtong la/ dmigs par lta ba'i sems kyang mi skyed pa'i byang chub sems dpa' de ni byang chub sems dpa'i sgo so so ba la spyod pa dang slob pa yin no/ /rigs kyi bu gzhan yang gnod sems kyi tha ba'i nyes pa'i sems ni byang chub sems dpa'i nyes pa'o//sems can rnams la mi snyoms pa'i las byed pa ni byang chub sems dpa'i nyes pa'o/ /sems can rnams dang chos rnams la tha dad par 'du shes pa ni byang chub sems dpa'i nyes pa'o/ /sems can dmigs pa la brten pa'i byams pa phyogs gcig pa ni byang chub sems dpa'i nyes pa'o//stong pa nyid la mi bzod pa ni byang chub sems dpa'i nyes pa'o/ /'di la ni sbyin no 'di la ni mi sbyin no snyam pa de ni byang chub sems dpa'i nyes pa'o/ /'di la ni yon dbul lo 'di la ni mi dbul lo snyam pa de ni byang chub sems dpa'i nyes pa'o//'di la ni chos bshad par bya'o/ /'di la ni chos bshad par mi bya'o snyam pa de ni byang chub sems dpa'i nyes pa'o/ /'di la ni bsnyen bkur bya'o/ /'di la ni bsnyen bkur mi bya'o snyam pa de ni byang chub sems dpa'i nyes pa'o//byang chub sems dpa' ji tsam du so sor 'byed par byed de/ 'di ni tshul khrims dang ldan pa'o/ /'di ni tshul khrims 'chal pa'o snyam du so sor phye nas tshul khrims 'chal pa la brnyas par byed pa de ni byang chub sems dpa'i nyes pa'o/ /de ci'i phyir zhe na/ byang chub sems dpas ni sems can thams cad la sems mnyam pa dang /chos thams cad la sems mnyam par bya dgos shing / nyi ma dang zla ba'i dkyil 'khor dang 'dra ba dang / sa dang / chu dang / me dang / rlung dang / nam mkha' lta bur snyoms pa'i sems dang zhes gsungs pa nas/ dma' ba'i smon lam ma 'debs shig /de ni byis pa'i spyod yul yin/ /shes rab bzang po mkhas par gyis/ /byang chub mchog la 'jug par gyis/ /mya ngan las 'das 'dod pa'i phyir/ /sangs rgyas de bzhin gshegs rnams la/ /gang gis stong gsum thams cad kyang / /rin chen bkang ste phul ba bas//gang gis thal mo sbyar byas nas/ /sems kyis byang chub bsngo byas la/ /tshig tu brjod pa ma byas kyang / /de ni de bas shin tu che/ /gang gis sems can thams cad la/ /bskal pa bye ba brjod med du/ /sems can kun la bsnyen byas kyang / /de yi bcu drug char mi phod/ / gang gis thal sbyar byang chub sems bskyed dang / /phyogs bcu dag na 'jig rten don mdzad pa/ /rnam 'dren sangs rgyas gang dag bzhugs rnams la/ /bsod nams 'dod pa'i mi 'gas sngon chad kyi/ /'khor ba bskal pa bye bar mchod pa bas/ /mi gang mkhas shing mdzangs pa'i rang bzhin can/ / bde bar gshegs pa'i bstan la yid ches shing / /byang chub sems ni brtan po bskyed nas kyang / /bde gshegs mchod rten la ni me tog dbul / /'di ni de bas bsod nams khyad par brjod/ /byang chub sems kyi me tog dbul byed la/ /bsod nams snga ma de ni dper mi rung / /rgya mtsho dang ni chu yi thigs pa bzhin//sangs rgyas zhing 'dir sems can ji snyed pa/ /bskal pa re re la ni sangs rgyas gyur / /bskal pa mang por las gzhan mi byed par/ /bsod nams bshad kyang mtha' ni thug pa med/ /de ni byang chub sems kyi rnam smin bstan / /bskal pa mtha' yas bar du bshad na yang //cung zad tsam yang yongs su brjod mi 'gyur/ /sa gzhi dag las rdul ni langs pa bzhin/ /zhes bya ba'i bar du gsungs so/ /byang chub yang dag sprin gyi mdo las kyang / rnyed chen rab tu bshad bya yis/ /rnyed pa gang dang rkang gnyis kyi/ /dam pa yang dag ldan gyur pa//bstan te bram ze mnyan par gyis/ /bdag ni gling bzhi'i dbang phyug gi /'khor los sgyur bar 'gyur bya bar/ /'dod par gyur pa'i sems can des/ /sems ni byang chub la gzhol bya/ /sum cu rtsa gsum dbang phyug la/ /'dzeg pa byed par 'gyur ba ni//'dod par gyur pa'i sems can des/ /sems ni byang chub la gzhol bya/ /gang zhig 'dod khams gzugs khams dang / /gzugs med bla na med par yang / /'dod par gyur pa'i sems can des/ /sems ni byang chub la gzhol bya/ /sems can rnams kyi yongs 'dren pa//don 'dod 'gyur bar bya ba yang / /'dod par gyur pa'i sems can des/ /sems ni byang chub la gzhol bya/ /nad kun dag las thar byed pa'i/ /sman pa'i rgyal por 'gyur bar bya/ /'dod par gyur pa'i sems can des/ /sems ni byang chub la gzhol bya//mun pa rnam par 'joms byed pa'i/ /snang ba dag ni byed 'gyur bar/ /'dod par gyur pa'i sems can des/ /sems ni byang chub la gzhol bya/ /gang las srid pa gsum 'byung ba'i/ /phyin ci log dag rab 'joms par/ /'dod par gyur pa'i sems can des//sems ni byang chub la gzhol bya/ /kun du sbyor ba rab spong zhing / /bdud dag tshar bcad byed par yang / /'dod par gyur pa'i sems can des/ /sems ni byang chub la gzhol bya/ /ma rig zhi bar bya ba dang / /srid pa'i dra ba gcod 'gyur bar/ /'dod par gyur pa'i sems can des//sems ni byang chub la gzhol bya/ /'dod dang sred pa spangs pa dang / /nga rgyal nga rgyal mi byed par/ /'dod par gyur pa'i sems can des/ /sems ni byang chub la gzhol bya/ /zhes gsungs pa dang / yang mdo de nyid las/ gang zhig sangs rgyas zhing 'dir sems can kun//tshul khrims 'di la bslab phyir rab 'god na'ang / /bsod nams phung po skyes pa de 'dra des/ /byang chub sems kyi bcu drug char mi phod/ /gang zhig sangs rgyas zhing 'dir sems can kun/ /dad pa'i rjes su 'brang la rab 'god na'ang / /bsod nams phung po skyes pa de 'dra des//byang chub sems kyi bcu drug char mi phod/ /gang zhig sangs rgyas zhing 'dir sems can kun/ /chos kyi rjes su 'brang la rab 'god na'ang / /bsod nams phung po skyes pa de 'dra des/ /byang chub sems kyi bcu drug char mi phod/ / gang zhig sangs rgyas zhing 'dir sems can kun/ /rgyun du zhugs pa'i chos 'dir rab 'god na'ang / /bsod nams phung po skyes pa de 'dra des/ /byang chub sems kyi bcu drug char mi phod/ /gang zhig sangs rgyas zhing 'dir sems can kun/ /lan cig phyir 'ong chos 'dir rab 'god na'ang / / bsod nams phung po skyes pa de 'dra des/ /byang chub sems kyi bcu drug char mi phod/ /gang zhig sangs rgyas zhing 'dir sems can kun/ /phyir mi 'ong ba'i chos 'dir rab 'god na'ang / /bsod nams phung po skyes pa de 'dra des/ /byang chub sems kyi bcu drug char mi phod/ /gang zhig sangs rgyas zhing 'dir sems can kun//dgra bcom chos 'dir rab tu 'god byed na'ang / /bsod nams phung po skyes pa de 'dra des/ /byang chub sems kyi bcu drug char mi phod/ /gang zhig sangs rgyas zhing 'dir sems can kun/ /rang sangs rgyas la rab tu 'god byed na'ang / /bsod nams phung po skyes pa de 'dra des//byang chub sems kyi bcu drug char mi phod/ /bsod nams rgyus gang tsan dan mchog rab bzhin/ /sangs rgyas zhing du gtsug lag khang byed 'jug /lhun po'i tshad tsam mchod rten byed 'jug pas/ /byang chub sems kyi bcu drug char mi phod/ /bsod nams don gnyer sems can smin byed pa//gang zhig rgyal ba'i mchod rten 'khor yug dang / /'dra ba 'di na du ma byed pa des/ /byang chub sems kyi bcu drug char mi phod/ /gang 'dir sems can thams cad bde bya'i phyir/ /mgo 'am phrag la bskal par khyer byed na/ /bsod nams phung po skyes pa de 'dra des//byang chub sems kyi bcu drug char mi phod/ /mya ngan med cing byang chub don gnyer gang / /mi de dag gi chos nyid de 'dra zhing / /de dag rtag tu sems can mchog tu 'gyur/ /de dag mtshungs med lhag lta ga la yod/ /de'i phyir de 'dra'i chos ni thos gyur nas//gus par byas nas shes rab la 'dun gyis/ /bsod nams phung po du ma 'byung 'gyur zhing / /bla med byang chub myur du reg par 'gyur/ /zhes gsungs so/ /blo gros rgya mtsho'i mdo las kyang / /sha ra dwa ti'i bu 'di lta ste dper na sbrul gdug pa'i phru gu ni grogs mi dgos par za'o//sha ra dwa ti'i bu de bzhin du byang chub sems dpa' las dang po pa yang grogs mi dgos par byang chub kyi yan lag rnams yang dag par sdud de/ gcig pu gnyis su med par byang chub kyi yan lag rnams yang dag par sdud do/ /sha ra dwa ti'i bu 'di lta ste dper na srin bu me khyer brgya stong gis kyang nyi ma'i 'od zil gyis gnon par mi nus so//sha ra dwa ti'i bu de bzhin du nyon mongs pa thams cad kyis kyang byang chub sems dpa'i shes rab kyi 'od zil gyis gnon mi nus so/ /sha ra dwa ti'i bu 'di lta ste dper na dug gi gnyen po nad med par byed pa chung ngus kyang dug shin tu mang po zhi bar byed do//sha ra dwa ti'i bu de bzhin du byang chub sems dpa'i shes rab kyi nad med pa chung ngus kyang nyon mongs pa'i dug mang po shin tu zhi bar byed do/ /sha ra dwa ti'i bu 'di lta ste dper na bar snang las ro gcig pa'i chu'i rgyun 'bab pa bab nas snod kyi bye brag gis ro bro ba tha dad du 'gyur ro//sha ra dwa ti'i bu de bzhin du byang chub sems dpa' yang rnam par grol ba'i ye shes ro gcig pa yang dag par bsgrub ste/ sems can gyi dbang po tha dad pa rnams la chos bstan pa tha dad pa ston to/ /sha ra dwa ti'i bu 'di lta ste dper na gang du 'dzam bu'i chu bo'i gser byung ba der rin po che thams cad mog mog por 'gyur ro//sha ra dwa ti'i bu de bzhin du gang du byang chub sems dpa'i rin po che byung ba der nyan thos dang rang sangs rgyas thams cad mog mog por 'gyur ro zhes gsungs so/ / nges pa dang ma nges pa la 'jug pa'i phyag rgya'i mdo las kyang / 'jam dpal byang chub sems dpa' gang la la zhig phyogs bcu'i 'jig rten gyi khams thams cad kyi sems can thams cad rang sangs rgyas nyid la rab tu 'god par byed la/ 'jam dpal gzhan zhig theg pa chen po la mos pa'i byang chub sems dpa'i dge ba'i rtsa ba sangs rgyas la bskrun pa cig kyang rgyas par byed na 'di ni de bas ches bsod nams grangs med pa skyed do zhes gsungs so//rin po che'i phung po'i mdo las kyang / kun dga' bo de lta bas na dkon mchog gsum yongs su 'dzin par 'dod pas byang chub sems dpa' rnams yongs su gzung bar bya'o//byang chub sems dpa' rnams yang dag par sdud par bya'o/ /kun dga' bo don gyi dbang 'di gzigs nas de bzhin gshegs pa rnams nyan thos dang rang sangs rgyas dag la bu'i 'du shes yang dag par skyed par mi mdzad do//de ci'i phyir zhe na/ kun dga' bo gal te stong gsum gyi stong chen po 'di nyan thos dang rang sangs rgyas rnams kyis gang bar gyur la/ de dag las gang bdag gis sems can khyed cag rnams mgron du gnyer bar bya'o/ /bdag nyid bla na med pa yang dag par rdzogs pa'i byang chub tu mngon par rdzogs par sangs rgyas nas 'khor ba na spyod pa rnams sdug bsngal thams cad las thar bar bya'o zhes sems can thams cad dbugs 'byin par byed pa 'ga' yang med do//kun dga' bo 'di ji snyam du sems/ lag pa dang rkang pa dag bcad na mi de gson par 'gyur ram/gsol pa/ bcom ldan 'das gson par 'gyur lags so/ /bka' stsal pa/ yang 'ga' zhig snying phyung bar gyur na gson par 'gyur ram/ bcom ldan 'das de ni ma lags so/ /bka' stsal pa/ kun dga' bo lag pa dang rkang pa ji lta ba de bzhin du nga'i shA ri'i bu dang mod gal gyi bu dag yin la/snying ji lta ba de bzhin du nga'i byang chub sems dpa' rnams yin no/ /kun dga' bo gal te byang chub sems dpa' shing rta la zhon nas/ sil snyan yan lag lnga dang ldan pas rtse rol dga' bar byed la/ 'ga' zhig de'i shing rta 'dren par mi byed na/kun dga' bo de bzhin gshegs pa kho nas byang chub sems dpa' de'i shing rta mgo bos 'dren par mdzad do/ /kun dga' bo gal te gnas brtan shA ri'i bu dang maud gal gyi bu gnyis bskal pa'am/ bskal pa las lhag par rnam par thar pa'i sgo gsum la gnas na yang /de la de bzhin gshegs pa rim gro dang bsnyen bkur gyi phyir spro bar mdzad par mi 'gyur ro/ /kun dga' bo gang byang chub sems dpa' 'dod pa'i yon tan lnga la smad de/ nyon mongs pa thams cad pham par byas nas/ de bzhin gshegs pa'i stobs bcu yongs su rdzogs par byed/mi 'jigs pa bzhi dang / sangs rgyas kyi chos ma 'dres pa bco brgyad yongs su rdzogs par byed pa'i dus de ni yod la/ yang nyan thos ni sangs rgyas kyi chos rnams la mi 'jug cing / sems can gyi khams thams cad kyi don du go cha chen po gyon par nus pa'ang ma yin no/ /des na de bzhin gshegs pa ni 'di lta ste sems can thams cad la thugs brtse ba nyid kyis sems can thams cad la phan pa dang bde ba'i phyir byang chub sems dpa' yang dag par gzung ba gsung bar mdzad do//kun dga' bo 'di lta ste/ dper na 'khor los sgyur ba'i rgyal po'i btsun mo dam pa ma yin pa'i bu de bzhin du nga'i shA ri'i bu dang maud gal gyi bu gnyis dang de las gzhan pa'i nyan thos rnams yin par blta bar bya'o//dper na btsun mo dam pa'i bu 'khor los sgyur ba'i mtshan nyid dang ldan pa de bzhin du byang chub sems dpa' yin par blta bar bya'o zhes gsungs so//shes rab kyi pha rol tu phyin pa'i mdo las kyang / kau shi ka rigs kyi bu'am rigs kyi bu mo gang la la zhig /'dzam bu gling pa'i sems can rnams rgyun du zhugs pa'i 'bras bu la 'god par byed pa nas/ rang sangs rgyas kyi bar la rab tu 'god par byed la/ rigs kyi bu'am rigs kyi bu mo 'ga' zhig sems can gcig bla na med pa yang dag par rdzogs pa'i byang chub la rab tu 'god par byed na/de ni de bas ches bsod nams mang du skyed do/ /de ci'i phyir zhe na/ de sangs rgyas kyi tshul rgyun mi 'chad pa'i phyir gnas par 'gyur ro/ /kau shi ka gang rigs kyi bu 'am rigs kyi bu mo bla na med pa yang dag par rdzogs pa'i byang chub la 'god par byed na bsod nams mang du skyed do zhes gsungs so//dkon mchog brtsegs pa'i mdo las kyang / 'od srungs 'di lta ste dper na bya ka la ping ka'i phru gu sgo nga'i sbubs na 'dug pa mig ma bye ba yang /'di lta ste zab cing snyan pa'i sgra skad kyis bya'i tshogs thams cad zil gyis gnon to/ /'od srungs de bzhin du byang chub sems dpa' sems dang po bskyed pa/ ma rig pa'i sgo nga'i sbubs na 'dug pa/ las dang nyon mongs pa'i mun pa dang rab rib kyi ling tog gis mig khebs pa yang 'di lta ste/dge ba'i rtsa ba yongs su bsngo ba'i sbyor ba'i sgra skad kyis nyan thos dang rang sangs rgyas thams cad zil gyis gnon to zhes gsungs pa nas/ 'od srungs 'di lta ste dper na zla ba tshes pa la phyag 'tshal ba ltar zla ba nya ba la ni ma yin no/ /'od srungs de bzhin du gang dag nga la rab tu dad pa de dag gis byang chub sems dpa' rnams la phyag bya'i/de bzhin gshegs pa rnams la ni de lta ma yin no/ /de ci'i phyir zhe na/ byang chub sems dpa' las ni de bzhin gshegs pa rnams 'byung ngo / /de bzhin gshegs pa las ni nyan thos dang rang sangs rgyas thams cad 'byung ngo zhes bya ba'i bar du gsungs so//chos thams cad mngon par 'byung ba'i mdo las kyang / shA ri'i bu gal te byang chub sems dpa' sems dpa' chen po la stong gsum gyi stong chen po'i 'jig rten gyi khams kyi sems can ji snyed pa de dag las sems can re res nyi ma re re zhing gdan rgyar gling bzhi pa'i tshad tsam la 'phang du ri rab lhun po'i tshad tsam rin po che sna bdun gyis spras pa 'cha' bar byed la/seng ge'i gdan de thams cad kyang lha'i gos kyis g.yogs pa zhig go/ /rin po che sna bdun gang zhe na/ gang 'di lta ste/gser dang / dngul dang / bai DUr+ya dang / shel dang / mu tig dmar po dang / asma gar ba dang / bdun pa mu sA ra gal pa'o/ /shA ri'i bu gal te byang chub sems dpa' sems dpa' chen pos nyi ma re re zhing sems can re re las rnyed par gyur la/ de dag kyang ji ltar 'dod pa bzhin yongs su spyod par byed na/shA ri'i bu de ltar byas kyang byang chub sems dpa' yon gnas shin tu yongs su dag pa kho na yin no/ /de ci'i phyir zhe na/ shA ri'i bu byang chub sems dpa' sems dpa' chen po sems dang po bskyed pa nas nye bar bzung ste/ nyan thos dang rang sangs rgyas thams cad dang /sems can thams cad kyi yon gnas yin no zhes gsungs so/ /byams pa seng ge sgra'i mdo las kyang / byams pa 'di lta ste dper na mi 'di tsam du stobs dang ldan pa/ 'di tsam du shugs dang ldan pa/ 'di tsam du mthu dang ldan pa/ 'di tsam du brtson 'grus dang ldan pa la la zhig skyes par gyur la/des rgya mtsho chen po bzhi po dag chu'i phung po gang ji snyed pa de dag thams cad chu klung chen po'i rgyun gang dang gang dag nas/ rgya mtsho chen por zhugs par gyur pa'i chu klung chen po'i rgyun de dag nyid nas chu'i mtha' phyir bzlog nas/rgyun las bzlog thabs kho nar mtsho chen po ma dros pa'i nang du bab par gyur na/ byams pa 'di ji snyam du sems/ mi de dka' ba byed pa dang / ngo mtshar che ba dang / brtson 'grus che ba yin snyam mam/ byams pas gsol pa/ bcom ldan 'das de lta lags so/ /bde bar gshegs pa de lta lags so//bcom ldan 'das kyis bka' stsal pa/ byams pa khyod mos par bya/ khyod kyis khong du chud par bya ste/ de bas kyang gang dag lhag pa'i bsam pas sems can thams cad kyi don du snying rje chen po kun du bskyed nas/ bla na med pa yang dag par rdzogs pa'i byang chub tu sems bskyed do //nan tan gyis mdzes par byed pa de dag ches shin tu dka' ba byed pa dang ngo mtshar che ba yin no zhes gsungs so/ /dpas byen gyis zhus pa'i mdo las kyang / byang chub sems ni dga' ba ste/ /sems can thams cad bde bgyid pa'i/ / sems can 'dir su dga' bskyed pa/ /de dag 'tsho ba legs par 'tsho/ /sems can kun la phan bgyid pa'i/ /sems ni gang dag skyed gyur pa/ /de dag sems can thams cad dga'/ /de dag mthong na dga' bar 'gyur/ /byang chub sems la su dga' ba/ /de dag lus ni gser 'dra zhing //mtshan gyis shin tu spras pa dang / /'jig rten snang bar byed par 'gyur/ /byang chub sems ni sems che ste/ /sems kun nang na dge ba mchog /yon tan thams cad phun sum tshogs/ /nad kun rab tu zhi bar bgyid/ /ces gsungs so/ / gzi brjid can gyi mdo las kyang / /de la tshul khrims kyi stobs gang zhe na/ gang gis so so'i skye bo'i tshul khrims log par lta ba shes pa dang / gang gis so so'i skye bo'i tshul khrims log par lta ba 'dor ba'o/ /de ci'i phyir zhe na/ de bzhin gshegs pa ni gang gis bla na med pa yang dag par rdzogs pa'i byang chub tu sems bskyed pa ma gtogs pa so so'i skye bo'i tshul khrims dang ldan pa 'ga' cam yang tshul khrims dang ldan par ma gsungs so//'di nye bar bzung nas de bzhin gshegs pa mngon par grub par gsung bar mi mdzad do/ /'on kyang so so'i skye bo'i tshul khrims dang ldan pa ni bde 'gro mtho ris su skye bar 'gyur ro zhes gsungs so//sdong po bkod pa'i mdo las kyang / 'phags pa byang chub sems dpa' rnams kyi che'i sa gang lags/ smras pa/ rigs kyi bu bcu pa 'di dag ni byang chub sems dpa' rnams kyi tshe'i sa ste/bcu gang zhe na/ 'di lta ste/ byang chub kyi sems ni byang chub sems dpa'i rigs su skyes pas byang chub sems dpa' rnams kyi che'i sa'o/ /lhag pa'i bsam pa ni dge ba'i bshes gnyen gyi rigs su skyes pas byang chub sems dpa' rnams kyi che'i sa'o/ /sa la gnas pa ni pha rol tu phyin pa'i rigs su skyes pas byang chub sems dpa' rnams kyi tshe'i sa'o//smon lam mngon par bsgrubs pa ni spyod pa'i rigs su skyes pas byang chub sems dpa' rnams kyi tshe'i sa'o/ /snying rje chen po ni bsdu ba'i dngos po thams cad kyi rigs su skyes pas byang chub sems dpa' rnams kyi tshe'i sa'o//yang dag pa ji lta ba bzhin du chos rtogs par bya ba ni shes rab kyi pha rol tu phyin pa'i rigs su skyes pas byang chub sems dpa' rnams kyi tshe'i sa'o/ /theg pa chen po ni thabs mkhas pa'i rigs su skyes pas byang chub sems dpa' rnams kyi tshe'i sa'o//sems can yongs su smin par bya ba ni mngon par rdzogs par 'tshang rgya ba'i rigs su skyes pas/ byang chub sems dpa' rnams kyi tshe'i sa'o/ /thabs dang shes rab gnyis ni mi skye ba'i chos kyi bzod pa'i rigs su skyes pas byang chub sems dpa' rnams kyi tshe'i sa'o//rigs kyi bu chos thams cad kyi nan tan ni 'das pa dang ma byon pa dang da ltar byung ba'i de bzhin gshegs pa thams cad kyi rigs su skyes pas byang chub sems dpa' rnams kyi tshe'i sa ste/ rigs kyi bu bcu po de dag ni byang chub sems dpa' rnams kyi tshe'i sa'o zhes gsungs so// // byang chub kyi sems la 'dun pa bzlog pa la dgongs pa bstan pa/ gzi brjid can gyi mdo las kyang / sdig pa'i dge slong chos drug dang ldan pa ni mnar med pa'i sems can dmyal ba chen por lhung zhing / rtag tu sangs rgyas rnams mnyes par mi byed par 'gyur ro/ / drug gang zhe na/ 'di na sdig pa'i dge slong mu stegs can gzhan gyi ngag khong du chud par byed pa dang / dge slong ma tshul khrims dang ldan pa dag /tshul khrims kyi phung po las nyams su 'jug par byed pa dang / dge slong tshangs par spyod pa dang bcas pa dag /tshangs par spyod pa ma yin pa 'khrig pa'i chos kyis skur pa dang /gang zag byang chub sems dpa'i theg pa pa byang chub kyi sems las rnam par dbye bar byed pa dang / sangs rgyas kyi gsung du gzhan gyis sgro btags pa 'khor gyi nang du 'dug ste smra ba dang / dge bsnyen bslab pa'i gzhi lnga dang ldan pa'i chung ma bgrod par byed pa ste/sdig pa'i dge slong chos drug po 'di dag dang ldan pa ni mnar med pa'i sems can dmyal ba chen por ltung bar 'gyur zhing / rtag tu sangs rgyas rnams mnyes par mi byed par 'gyur ro zhes gsungs so/ /dpas byin gyis zhus pa'i mdo las kyang / sems can bsod nams chung ngu rnams//byang chub sems ni 'dod mi bgyid / /'khor ba la ni mi rtog pa/ /byang chub sems kyis skyo bar 'gyur/ /byang chub sems kyi bsod nams gang / /de la gal te gzugs mchis na / /nam mkha'i khams ni kun gang ste/ /de ni de bas lhag par 'gyur/ /zhes gsungs so/ / dkon mchog sprin gyi mdo las kyang / byang chub la rgyab kyis phyogs pa'i gang zag yongs su spangs pa nyid kyis/ sdig pa'i grogs po yongs su spangs par rig par bya'o zhes gsungs so/ /rin po che'i phung po'i mdo las kyang / de la bcom ldan 'das kyis gnas brtan shA ri'i bu la bka' stsal pa/shA ri'i bu 'di ltar byang chub sems dpa' chos thams cad zil gyis gnon par 'gyur te/ shA ri'i bu rang sangs rgyas de dag gi tshul khrims gang yin pa dang / sems can thams cad de dag gi tshul khrims gang yin pa des ni byang chub sems dpa'i tshul khrims thams cad mkhyen pa nyid kyi sems las byung ba'i brgya'i char yang nye bar mi 'gro ba nas/rgyu'i bar du yang nye bar mi 'gro'o/ /shA ri'i bu de lta bas na byang chub sems dpa'i tshul khrims kyi pha rol tu phyin pa yongs su dag par blta bar bya'o/ /rang sangs rgyas de dag gi bzod pa gang yin pa dang /byang chub sems dpa'i bzod pa gang yin pa las bzod pa snga ma des ni bzod pa 'di'i brgya'i char yang nye bar mi 'gro ba nas/ rgyu'i bar du yang mi 'gro'o zhes de bzhin du sbyar te/ de bzhin du byang chub sems dpa'i brtson 'grus dang / bsam gtan dang / shes rab dang / byams pa dang / snying rje dang / dga' ba dang / btang snyoms dang / byang chub kyi phyogs kyi chos thams cad ni mchog ces bya'o zhes bya ba nas gong na med pa zhes bya'o zhes bya ba'i bar dang / shA ri'i bu de ltar na sems bskyed pa mchog rnams la/ gang zhig bar du gcod par brtson pa de ni bsod nams ma yin pa mang du skyed do//gang zhig rang sangs rgyas de dag gi rang gi byang chub la bar chad bya ba'i phyir brtson pa dang / gang zhig byang chub sems dpa' la bar chad bya ba'i phyir brtson pa de gnyis las/ 'di ni bsod nams ma yin pa'i phung po ches mang du skyed do zhes gsungs so//nges pa dang ma nges pa la 'jug par 'gro ba'i phyag rgya'i mdo las kyang / 'jam dpal gal te rigs kyi bu 'am rigs kyi bu mo zhig 'jig rten gyi khams thams cad kyi sems can rnams byang chub tu sems ma bskyed pa dag 'dun bzlog par byed la/'jam dpal rigs kyi bu 'am rigs kyi bu mo gang zhig tha na theg pa chen po la mos pa'i byang chub sems dpa' gcig kyang theg pa chen po la 'dun pa zlog par byed na/ 'di nyid de bas sdig pa ches grangs med par skyed do zhes gsungs so/ /bu mo yon tan gyis brgyan pas zhus pa'i mdo las kyang /de nas bcom ldan 'das la bu mo yon tan gyis brgyan pa mngon par shes pa rgyas pas 'di skad ces gsol to/ /bcom ldan 'das gang dag dang lhan cig gnas pa gcig gis gnas par mi bgyi ba/ byang chub sems dpa' rnams kyi mi dge ba'i bshes gnyen gang lags/bcom ldan 'das kyis bka' stsal pa/ bu mo theg pa chen por sems dang po bskyed pa'i byang chub sems dpa' las dang po pa ma gtogs pa/ gang dag byang chub sems dpa'i mi dge ba'i bshes gnyen ni lha dang bcas pa'i 'jig rten dang / bdud dang bcas pa dang /tshangs pa dang bcas pa dang / dge sbyong dang / bram ze dang bcas pa dang / lha dang mi dang lha ma yin dang bcas pa'i skye dgu la ngas ma mthong ngo / /bu mo nyan thos dang rang sangs rgyas dag ni byang chub sems dpa'i mi dge ba'i bshes gnyen no/ /de ci'i phyir zhe na/ bdag nyid la phan par zhugs pa'i phyir ro//sems dang po bskyed pa'i byang chub sems dpa' nyan thos dang rang sangs rgyas kyi theg pa pa rnams dang gnas pa gcig gis gnas par mi bya'o/ /gnas khang gcig gam/ stan gcig gam/ 'chags gcig gam/ lam gcig tu 'gro bar mi bya ste/gzhan du na theg pa chen po la bla na med pa yang dag par rdzogs pa'i byang chub tu yongs su smin par bya ba'i phyir/ byang chub sems dpa' mang du thos pa mi phyed pa'i dad pa dang ldan pas de dag dang lhan cig gnas par bya bar ngas rjes su gnang ngo / /dge ba'i rtsa ba ma smin pa dge ba 'di lta bu'i mdo sde bstan par mi bya'o//de ci'i phyir zhe na/ 'di dag ni byang chub kyi sems la bar du gcod par byed pa'o/ /'di dag ni byang chub kyi sems la 'dun pa zlog par byed pa'o/ /'di dag ni byang chub kyi sems la co 'dri bar byed pa'o/ /bu mo byang chub sems dpas srog yongs su gtang bar bya ba ni bla'i /byang chub kyi sems yongs su btang nas nyan thos dang rang sangs rgyas kyi theg pa dang ldan pa'i yid la byed pa ni ma yin no/ /bu mo gal te byang chub sems dpa' sems dpa' chen po byang chub kyi sems yongs su btang zhing / dam pa'i chos yongs su 'dzin pa btang /de bzhin gshes pa la mchod pa dang rim gro byed pa btang / sems can yongs su smin par byed pa btang nas gang 'di lta ste/ nyan thos dang rang sangs rgyas kyi sa la sems skyed par byed pa dang / gang zhig byang chub sems dpa' de byang chub kyi sems la 'dun pa zlog par byed cing co 'dri bar byed na/de gnyi ga yang ngan 'gro sems can dmyal bar 'gro bar 'gyur ro/ /bu mo byang chub sems dpas bsha' sa dang ldan pa'i las lnga byas pa ni bla'i / byang chub kyi sems dang bral bas rgyun du zhugs pa'i 'bras bu bsten pas ni ma yin no//bu mo byang chub sems dpas byang chub kyi sems yongs su bzung bas/ bskal pa'am bskal pa brgya'am bskal pa stong ngam bskal pa brgya stong du sems can dmyal bar gnas pa ni bla'i / byang chub kyi sems dang bral bas lan cig phyir 'ong ba'i 'bras bu bsten pa ni ma yin no/ / bu mo byang chub sems dpa' dud 'gro'i skye gnas dag tu lhung ba ni bla'i / byang chub kyi sems dang bral bas phyir mi 'ong ba'i 'bras bu bsten pa ni ma yin no/ /bu mo byang chub sems dpas srog gcod pa byas nas sems can dmyal bar gnas pa ni bla'i / dgra bcom pa mngon du byas nas rkun po bred sha thon pa bzhin du yongs su mya ngan las 'da' ba ni ma yin no//bu mo byang chub sems dpa' sems can thams cad yongs su 'dzin pa'i bsam pa can me'i 'obs su 'dug pa ni bla'i / byang chub kyi sems dang bral bas nyan thos kyi mya ngan las 'das pa'i dbyings su gnas pa ni ma yin no/ / bu mo sems can thams cad yongs su 'dzin par sems bskyed pa'i byang chub sems dpa' ni lha dang mi dang lha ma yin du bcas pa'i 'jig rten gyis mchod par 'gyur ro/ /nyan thos dang rang sangs rgyas thams cad kyis mchod par 'os par 'gyur ro zhes gsungs so/ /shes rab kyi pha rol tu phyin pa'i mdo las kyang / rab 'byor gal te bdud sdig to can nam/ bdud kyis byin gyis brlabs pa'i skyes bu sangs rgyas kyi cha lugs su 'ongs nas/ byang chub sems dpa' sems dpa' chen po nyan thos kyi sa'am rang sangs rgyas kyi sar lung ston par byed na/ rab 'byor byang chub sems dpa' sems dpa' chen po 'di snyam du 'di ni gdon mi za bar bdud sdig to can nam/bdud kyis byin gyis brlabs pa'i skyes bu sangs rgyas kyi cha byad kyis 'ongs pa yin gyi/ de bzhin gshegs pa dgra bcom pa yang dag par rdzogs pa'i sangs rgyas dag ni byang chub sems dpa' sems dpa' chen po nyan thos kyi sa 'am rang sangs rgyas kyi sa yang dag par 'dzin du 'jug par mdzad pa ni ma yin no zhes sems par 'gyur ro//rab 'byor gal te byang chub sems dpa' sems dpa' chen po shin tu rgyas pa'i mdo klog cing kha ton byed pa la/ bdud sdig to ca na sangs rgyas kyi cha lugs su 'ongs nas 'di skad ces 'di dag ni sangs rgyas kyis gsungs pa ma yin zhing nyan thos kyis kyang ma yin la/gang la khyod spyod pa'i mdo sde 'di dag ni bdud kyis smras pa'o zhes smra bar 'gyur ba na/ rab 'byor byang chub sems dpa' sems dpa' chen pos gang dag bdag bla na med pa yang dag par rdzogs pa'i byang chub las 'byed par byed pa de ni gdon mi za bar bdud sdig to can nam/bdud kyis byin gyis brlabs pa'i skyes bu yin par rig par bya'o zhes gsungs so// // byang chub kyi sems mi brjed pa la dgongs pa bstan pa/ bsod nams thams cad bsdus pa'i ting nge 'dzin las kyang / de skad ces gsol pa dang /bcom ldan 'das kyis byang chub sems dpa' sems dpa' chen po sred med kyi bu la 'di skad ces bka' stsal to/ /sred med kyi bu byang chub sems dpa' chos bzhi dang ldan na byang chub kyi sems brjed par 'gyur te/ /bzhi gang zhe na/ 'di lta ste/ lhag pa'i nga rgyal dang / chos la ma gus pa dang /dge ba'i bshes gnyen la khyad du gsod pa dang / log pa'i tshig smra ba ste/ sred med kyi bu byang chub sems dpa' chos bzhi po de dag dang ldan na byang chub kyi sems brjed par 'gyur ro/ /sred med kyi bu gzhan yang byang chub sems dpa' chos bzhi dang ldan na byang chub kyi sems brjed par 'gyur te/bzhi gang zhe na/ 'di lta ste/ nyan thos dang rang sangs rgyas kyi theg pa pa'i rnal 'byor spyod pa dag dang 'dris par byed pa dang / theg pa dman pa la mos pa dang / byang chub sems dpa' sdang zhing skur pa 'debs pa dang / chos rnams la slob dpon dpe mkhyud byed pa ste/ sred med kyi bu byang chub sems dpa' chos bzhi po de dag dang ldan na byang chub kyi sems brjed par 'gyur ro//sred med kyi bu gzhan yang byang chub sems dpa' chos bzhi dang ldan na byang chub kyi sems brjed par 'gyur te/ bzhi gang zhe na/ 'di lta ste/ sgyu byed pa dang / sems can rnams la g.yos sten par byed pa dang /dge ba'i bshes gnyen rnams la lce gnyis byed pa dang / rnyed pa dang bkur sti la lhag par zhen pa ste / sred med kyi bu byang chub sems dpa' chos bzhi po de dag dang ldan na byang chub kyi sems brjed par 'gyur ro/ /sred med kyi bu gzhan yang byang chub sems dpa' chos bzhi dang ldan na byang chub kyi sems brjed par 'gyur ro //bzhi gang zhe na/ 'di lta ste/ bdud kyi lam la gtogs pa dang / las kyi sgrib pas bsgribs pa dang / lhag pa'i bsam pa stobs chung ba dang / shes rab dang thabs med pa ste/ sred med kyi bu byang chub sems dpa' chos bzhi po de dag dang ldan na byang chub kyi sems brjed par 'gyur ro zhes gsungs so//tshangs pas byin gyis zhus pa'i mdo las kyang / rgyal po chen po bcu drug po 'di dag ni gang zag phrag dog can gyi mtshan ma yin par rig par bya ste/ bcu drug gang zhe na/ kha lug ltar lkugs pa dang / mu cor smra ba dang / legs par ma bsdams pa dang / gzhan gyi bsngags pa ma yin pa bden par 'dzin pa dang / gzhan gyi yon tan dag la yid mi ches pa dang / bsam pa mang ba dang / mya ngan mang ba dang / yid mi bde ba mang ba dang / mig ser ba dang / kha dog dang dbyibs nyams pa dang / nga rgyal gyis non pa dang /dge slong la mi dga' ba dang / glo bur du 'ongs pa la bsting pa'i ngang tshul can dang / brtsad du rung ba'i 'khrul pa tshol ba dang / gnas la ser sna byed pa dang / chos nyan du 'gro ba la rna blags te mi nyan pa dang / sems rnam par g.yengs shing gzhan dang gzhan du gtam rlung la skur bar byed cing chos kyi gtam la mi dga' ste/'di skad du 'di ci zer ba ngas mi shes so/ /'di ni blun po yin te/ 'jig rten gyi tha snyad kyis chos ston to zhes kyang zer te/ gang 'phags pa rnams kyis thugs su chud pa'i chos 'dul ba la ma gus pa 'di nyid mi blun po de dag mi shes pa yin no/ /bdag gis ni byang chub thob nas gdod byang chub kyi shing drung du chos la gus par gnas par bya'o zhes zer zhing /dge slong rnams la chos ston pa na yang phyi sgo nas 'greng zhing 'dug la chos nyan par byed de/ stan la 'dug mi 'dod na yang dge slong dag la 'tshol bar byed de/ brgyad sde'i byang chub kyi yan lag gi gtam ston pa na yan lag bdag gis mnyan par bya'o//de thos na bdag gi nad de 'byang par 'gyur ro snyam mo/ /de bas na mi blun po de dag chos ma yin pa 'dod pas byang chub yongs su btsal bar sems pa dag ni dper na/ mi'i mig gnyis phyung nas blta bar 'dod pa'am/ nor thams cad med par byas nas mgron po mang po dang mi mthun par 'dod pa'am/rkang pa bcad nas lam du 'gro bar 'dod pa dang 'dra ste/ rgyal po chen po de ltar 'dod pa'i mi blun po de dag gi byang chub ni de 'dra ba snyam byed do/ /rgyal po chen po chos nyi shu rtsa lnga dang ldan na gang zag byang chub las nyams par rig par bya ste/nyi shu rtsa lnga gang zhe na/ gnas la ser sna byed pa dang / khyim la ser sna byed pa dang / bsngags pa la ser sna byed pa dang / phrag dog can dang / ma dad pa dang / ngo tsha mi shes pa dang / khrel med pa dang / sdig pa'i bsam pa can dang / g.yo ba'i bsam pa can dang / gzhan la gnod pa can dang / spyod lam khong du chud pa dang / tshul 'chos pa dang / 'khon dam du 'dzin pa dang / gsog 'jog gi shas che ba dang / de bzhin gshegs pas gsungs pa la skrag nas log par brda sprod cing sgro 'dogs te chos spong bar byed pa dang / lhag pa'i nga rgyal can yin te mi 'dri ba'i ngang tshul can dang /chos la slu ba byas kyang mi 'gyod pa dang / snying mi 'bebs shing dgra zla mang ba dang / 'khor gyi nang du song ba dang mthong ma thag tu gzhan gyi mos pa bzlog pa'i phyir gzhan dag gi mtshang 'dru ba dang / gsang ba'i gnas la yid brtan pa las 'khu ba dang / sngon mthong yang rung ma mthong yang rung ba'i dge slong dag la 'di rnams la su yang dga' bar mi 'gyur bar bya'o snyam ste/gnod par bya ba'i phyir bsngags pa ma yin pa brjod pa dang / gzhan gyi bsngags pa ma yin pa brjod par bya ba'i phyir gzhan sbod pa dang / rnyed pa'i bsam pas bdag bsnyen par rdzogs pa de nyams par gyur na mi rung ngo snyam te so sor brtags nas tshul khrims gtsang ba'o//rgyal po chen po gang zag de 'dra ba de dag ni bstan pa las tshabs cher nyams par 'gyur ba'am khyim gyi gnas su 'gro bar 'gyur zhes gsungs so/ /nyi ma'i snying po'i mdo las kyang /de nas bdud kyis bkrabs pa tshul khrims kyi rten sngon gyi tshe rabs dang smon lam dang sangs rgyas rnams la mchod pa dang / dge ba'i rtsa ba thams cad kyis bskul bas/ bcom ldan 'das kyi spyan sngar rtswa bkram pa lta bur 'ongs par gyur te/ gdong mchi ma dang bcas pas thal mo rab tu sbyar nas 'di skad ces gsol to//btsun pa bcom ldan 'das byis pa ji lta ba dang / myos pa ji lta ba dang / sems 'khrugs pa ji lta ba bzhin du nongs pa chags lags so/ /btsun pa bcom ldan 'das nongs pa chags lags so/ /'di ltar bdag gis dran lags te/ grangs ma mchis pa cig rdzogs par bla na ma mchis pa yang dag par rdzogs pa'i byang chub tu brtson pa chen pos pha rol tu phyin pa drug gi spyod pa spyad lags so//dge ba'i rtsa ba yongs su sbyang ba mang du bgyis lags so/ /bcom ldan 'das de bzhin gshegs pa 'das pa rnams bzhugs pa brgya stong phrag bye ba la bdag gis bsnyen bkur dang bkur sti rnam pa sna tshogs bgyis te chos kyang thos lags so//smon lam yang btab lags so/ /de bzhin gshegs pa 'od srungs kyi gsung rab la dge slong la la nyan thos kyi gtam rjes su skul bar bgyid lags te/ de nas bdag gis ma bsams par kye ma dge sbyong gi lus byad kyi gang zag theg pa chen po la yang dag par zhugs pa rnams kyi mdun du nyan thos kyi gtam 'chad pa 'di ni bdud do zhes sdig pa can gyi tshig brjod lags te/der gal te bdag gis sdig pa can gyi tshig de ma smas par gyur na ni der bdag gis bla na ma mchis pa yang dag par rdzogs pa'i byang chub tu lung bstan pa thob par 'gyur lags na/sug las kyi lhag ma des bdag de nas shi 'phos nas bdud kyi gnas su skyes te/ dgung lo bye ba phrag lnga bcu rtsa bdun dang / dgung lo brgya stong dag tu der bla na ma mchis pa yang dag par rdzogs pa'i byang chub tu bdag gi sems bskyed pa gcig kyang ma byung lags na/tshangs pa'i gnas pa rnams lta smos kyang ci 'tshal lags zhes/ de bzhin gshegs pa 'khor dang bcas pa la lan gnyis kyi bar du bzod pa gsol to/ /ji srid du sngon gyi mtha'i 'khor bar 'khor ba de srid du slad kyis phyi ma'i mtha'i mur sems can dmyal bar gnas par spro lags kyi bla na ma mchis pa yang dag par rdzogs pa'i byang chub la sems ldog par ni mi bgyid lags so zhes gsungs so//dkon mchog brtsegs pa'i mdo las kyang / 'od srungs byang chub sems dpa' chos bzhi dang ldan na byang chub kyi sems brjed par 'gyur te/bzhi gang zhe na/ 'di lta ste/ mkhan po dang / slob dpon dang / bla ma dang / sbyin gnas la slu ba dang / gzhan 'gyod pa med pa dag la 'gyod pa nye bar sgrub pa dang / theg pa chen po la yang dag par zhugs pa'i sems can rnams la bsngags pa ma yin pa dang mi snyan pa dang /brjod pa ma yin pa'i sgra tshigs su bcad pa 'byin pa dang / sgyu dang g.yon can la nye bar spyod kyi lhag pa'i bsam pas ma yin pa ste/ 'od srungs byang chub sems dpa' chos bzhi po de dag dang ldan na byang chub kyi sems brjed par 'gyur ro zhes gsungs so//brjod kyis mi lang pa'i mdo las kyang / de nas 'khor de nyid du bu mo rin po che zhes bya ba 'dus par gyur cing 'dug pa des/ byang chub sems dpa' dga' ba dang ldan pa la 'di skad ces smras so/ /snag gi gnyen mtshams sangs rgyas 'byung ba ni rab tu mos par bya'o//sangs rgyas 'byung ba ni rnyed par dka'o/ /sangs rgyas 'byung ba ni brtson 'grus zhan pa dang / bcos ma'i bsam pa can dang / g.yon can dang / sgyu can dang / nga rgyal gyis bcom pa dang / gnod sems can dang / khro ba dang / khong khro ba mang ba dang / ser sna can dang / byas pa mi shes pa dang / bsam pa gsum yongs su ma dag pa dang / khams gsum pa la mngon par zhen pa dang / dri ma gsum dang ldan pa dang / dkon mchog gsum la mi gus pa dang / rnam par thar pa'i sgo gsum la skrag pa dang /rgod pa dang / khengs pa dang / mu cor smra ba dang / ngag g.yengs pa dang / ngo tsha med pa dang / khrel med pa dang / lus dang ngag dang sems tshul 'chos pa dang / ma gus pa dang / khyim gyi gnas na 'dug pa dang / tshul 'chos pa dang / kha gsag can dang /bdag dang gzhan slu ba dang / rnyed pa dang bshes dang bkur sti la lhag par zhen pa dang / sgo ma bsdams pa dang / nyan thos kyi spyod pa lhur len pa dang / rang sangs rgyas kyi theg pa la mos pa dang / ser sna can dang / tshul khrims 'chal pa dang / gnod sems mang ba dang / snyom las can dang /brjed ngas pa dang / shes rab 'chal pa dang / thabs la mi mkhas pa dang / byams pa dang snying rje dang bral ba dang / nyon mongs pa ser sna'i rjes su 'jug pa dang / bdag dang sems can dang srog dang gang zag tu mngon par zhen pa dang / rgyu dang bya ba dang las dang rnam par smin pa dang 'gal ba dang /mi rigs pa dang mngon par mi brtson pa dang / thos pa chung ba dang / thos pa la mkhas pa dang bral ba dang / rgyags pa dang / bag med pa la spyod pa dang / sbyangs pa'i yon tan gyi yo byad bsnyungs pa dang bral ba dang / lugs ma yin pa spyod pa dang / dga' ba dang mi dga' ba la log pa dang bcas pa dang /rjes su chags pa dang khong khro bas bcom pa dang / bdag la bstod pa dang / gzhan la smod pa dang / lus dang srog la lhag par zhen pa dang / gzugs la dga' ba dang / sgra la dga' ba dang / dri la dga' ba dang / ro la dga' ba dang /reg bya la dga' ba dang / smra ba la dga' ba dang / gnyid la dga' ba dang / 'du 'dzi la dga' ba dang / dus mi shes pa dang / tshod mi shes pa dang / sdig pa'i grogs po bsten pa can dang / dge ba'i bshes gnyen dang bral ba dang / bsdu ba'i dngos po spangs pa dang / byang chub kyi phyogs thams cad dang bral bas ni bsnyen par dka'o zhes gsungs so// // dge slong rnams la gso dpyad dgag pa la dgongs pa bstan pa/ gzhi rtsom pa'i mdo las kyang / de la shA ri'i bu dge slong gang dag tshul khrims zhig par gyur pa de dag ni khyim pa'i las kyi mtha' byed par 'gyur/pho nya'i las kyis 'tsho ba rtog par 'gyur/ /gso dpyad kyi 'jug pas kyang 'tsho ba rtog par 'gyur/ /shA ri'i bu nga'i bstan pa la rab tu byung nas sangs rgyas kyi byang chub kyi sgo nas 'tsho bar 'gyur/ de bzhin gshegs pa la dgra zla nyid du kun du spyod pa la ltos/shA ri'i bu de'i tshe rgyal po chen po bzhi dang / lha rnams kyi dbang po brgya byin dang / mi mjed kyi bdag po tshangs pa dang / gzhan yang lha stong phrag mang po de lta bu'i ngo bo'i gsung rab la rnam par 'gyur ba chen po mthong nas smre sngags cher 'don par 'gyur ro//shA ri'i bu gang nga la brten nas khyim pa rnams la rim gro byed pa 'di ni 'os pa ma yin no/ /de ci'i phyir zhe na/ shA ri'i bu shAkya thub pa nga'i nyan thos dag ni lha dang / klu dang / gnod sbyin rnams kyi nye gnas sam rim gro byed par mi 'gyur ro/ /shA ri'i bu gzhan yang skyes bu blun po khyim pa la bsnyen bkur byed pa na/dmigs pa med pa'i chos stong pa nyid bsten par 'gyur ba'am/ gnas par 'gyur ba de ni gnas yod pa ma yin no/ /shA ri'i bu de'i tshe dge slong tshul khrims 'chal pa dag khyim pa rnams la chang phor gang gi phyir sangs rgyas kyi gsung ston par 'gyur ro//shA ri'i bu de ji snyam du sems/ chags pa shas che ba dang / rmongs pa shas che ba dang / 'du 'dzi la dga' ba dang / smra ba la dga' ba dang / lus la chags pa dang / spyod pa yongs su ma dag pa rnams kyis stong pa nyid kyi chos dmigs pa med pa shes pa'am/ gting dpog pa'am/ mos pa'am/ dge sbyong gi chos bstan pa'am/ 'thob par nus sam ste/ de ni gnas yod pa ma yin no zhes gsungs so/ /yul 'khor skyong gi mdo las kyang / 'jig rten rgyang pan pa'i gtam la ltos pa med pa 'gyur bar bya/ nyo tshong gi spyod pa las ldog pa dang /gso dpyad la dga' ba ma yin pa dang / pho nya la dga' ba ma yin pa dang / pho nya'i las kyi mtha' dang ldan pa ma yin par 'gyur bar bya'o zhes gsungs so/ /rgyas pas zhus pa'i mdo las kyang / gang zhig lus na ba'i 'jigs pas sman pa la byin par byed pa de'i sbyin pa yang yongs su ma dag par 'gyur ro zhes gsungs so//dam pa'i chos dran pa nye bar gzhag pa'i mdo las kyang / kha na ma tho ba dang bcas pa srog gcod pa bsdus pa gnyis pa spang bar bya zhing mi bya'o/ /de gang zhe na/ 'di lta ste/ gso dpyad do/ / dge slong gso dpyad byed pa na bsam gtan dang / klog pa la spyod par mi 'gyur ro/ /de gso dpyad byed pa na rnam pa gzhan du byed cing / rnam pa gzhan du smra bar 'gyur ro/ /de nad pa dag la sems gtod cing / blo der son par 'gyur ro/ /de de ltar byed pa la 'dod pa stobs che bar 'gyur ro//'dod pas zil gyis non pa de slar yang ci nas nad tshabs che ba sna tshogs pa 'byung bar 'gyur zhig gu/ des sems can rnams gzir na slar yang rnyed pa dang bkur sti rnam pa du ma 'byung bar 'gyur ro/ /bdag grong nas grong dang / grong khyer nas grong khyer dang / ri brags nas ri brags su ljongs rgyu bas so sor yang dag par rgyu bar bya'o snyam du sems par 'gyur ro//de ltar sems pa brnab sems kyi zil gyis non pa de la yid kyi dri mar 'gyur gyi/ dge ba la spyod par ni mi 'gyur ro/ /gzhan yang gso dpyad byed pa na dge slong ma yin pa dge slong du khas 'che ba la nyes pa chen por 'gyur te/gang gi tshe srog chags rnams rlung la sogs pa nad rnams kyis zil gyis mnan pa de'i tshe/ ji ltar myur bar til mar 'on cig /gal te med na til tshir cig ces rdzas nye bar 'doms so/ /til tshir ba las ni srog gcod pa chen por 'gyur zhing srin bu mang po gsod par 'gyur ro//dge sbyong ngan pa dge sbyong du khas 'che ba la skyon gzhan 'di yang yod de/ nad la ltos nas sha sar pa mtshon gyis gcod pa/ ha cang tshil can ma yin la/ ma shi ba/ nad kyis ma mnar ba gcan gzan gyis ma bsad pa/ mi rid pa 'on cig ces sgo bar byed de/ de ltar sgo bar byed do//gang la bsgo ba dang gang srog gcod pa la sgo bar byed pa yang srog gcod pa dang ldan par 'gyur zhing / las mtshungs pa de gnyi ga sems can dmyal ba yang sos su 'gro bar 'gyur ro/ /de ltar brnab sems dang gnod sems kyi skyon gyis ni gso dpyad mi bya'o/ / sman pa dge sbyong ngan pa dge sbyong du khas 'che ba/ chom rkun po sdig pa'i skyes bu la nyes pa gzhan yang yod de gang gi tshe nad tshabs che bar gyur ba de'i tshe nags kyi sman gyi tshogs gang ljon shing dang lcug ma dang gel pa rnams te/ don gyi rgyus sems can gyi tshogs kyis yongs su bzung ba dang /brten pa dang bcas pa dang / nang srin bu dag gis gang ba de dag rdzas kyi phyir bsgo ba'am gcod par 'gyur ro/ /des brko ba na sa la gnas pa'i srog chags de'i rtsa ba la brten pa rnams gsod par 'gyur tshang 'jig par byed do/ /gcod par byed pa na de'i nang gi srog chags gsod par byed cing de la brten pa'i srog chags rnams kyang gsod par byed do//gso dpyad byed pa na nyes pa gzhan 'di yang yod de/ de ltar 'tsho ba'i chos can rab tu chags pa'i chos can de la bsam gtan dang klog pa la mngon par dga' ba'i sems 'byung bar ga la 'gyur zhing /de la rjes su chags pa'i yid can nyes pa stobs chen po can du 'gyur ro/ /de ltar ngan du sems pa can sdig pa'i chos can des ljongs 'joms pa sems par byed de/ ji ltar gang gi tshe ljongs kyi sems can rnams 'joms par 'gyur ba de'i tshe/ bdag la mchod pa dang rdzas dang bza' btung dang stan dang mal cha dag gi rnyed pa dang bkur sti mang po 'byung bar 'gyur ro snyam du sems par 'gyur/ 'dod pa ma bcom pa'i blo can de dge ba'i chos rnams sems par mi 'gyur/ bsam gtan dang klog pa'i rang bzhin can du mi 'gyur/ bla ma sten par mi byed/dge ba'i bshes gnyen dang phrad pa can du mi 'gyur/ sangs rgyas la phyag 'tshal ba'i rang bzhin can du mi 'gyur ro/ /ngan du byed pa can lus zhig nas ngan 'gro log par ltung ba sems can dmyal bdag tu ltung bar 'gyur ro/ /de de nas shi 'phos te gal te lan grangs gzhan du myong par 'gyur ba'i las byas pas mi'i nang du skye bar 'gyur ba na/de sman pa'i las ngan pa de'i rang bzhin gyis rtag tu nad kyis thebs pa dang phongs pa dang tshe thung bar 'gyur ro/ /gso dpyad byed pa'i nyes pa gzhan yang skyon phal pa rlung dang / mkhris pa dang / bad kan gso bar sla ba/thog ma med pa nas zhugs pa ma yin pa/ de dag gis rigs mthun pa dag ngan song du 'gro ba ma yin pa/ lus zhig pas de dag 'jig par 'gyur ba/ de dag ni so so'i skye bo thos pa dang mi ldan pa/ dge sbyong ngan pa dge sbyong du khas 'che bas gso bar byed kyi /gang gi don du skra dang kha spu bzhar zhing mchog gi don du gos ngur smrig bgos nas rab tu byung ba/ 'dod chags dang zhe sdang dang gti mug thog ma med pa nas zhugs pa lus la gdung ba de dag ni gso bar mi byed do/ /gang dag gis de la gdung bar 'gyur ba de dag lus tshig na tshig par mi 'gyur zhing zhig pa na 'jig par mi 'gyur bar phyi bzhin du rjes su 'brel bas 'gro ba lnga po dag tu 'gro bar 'gyur ba/skyon chen po 'dod chags dang zhe sdang dang gti mug gsum po de dag dor nas/ gzhan dag gnod par byed pa/ skyes bu ngan du sems pa/rang nyid kyis sems yongs su slu ba de'i rab tu byung ba ni don med par 'gyur ro/ /dper na skyes bu blo dman zhing nyam chung ba/ grogs med cing nor med pa 'ga' zhig dgra stobs dang ldan pas non par gyur na dgra de nor gyis bzlog par ram/ dgra shin tu stobs dang ldan pa de stobs kyis bsal bar mi nus te/des zin par 'gyur ro/ /des zin par 'gyur ro/ /byis pa so so'i skye bo blo gros ngan pa/ thos pa dang mi ldan pa/ dgra de'i 'jigs pa la rtsis med par byas nas skyes bu gzhan dman pa'i dgra'i 'jigs pas 'jigs pa'i stobs byed par 'gyur ba na/ de ltar skyes bu blo zhan pa/shes rab 'chal pa bag med pa/ bya ba gzhan la bag med pa de la dgra 'ongs nas 'joms par 'gyur ba de bzhin du dge sbyong ngan pa dge sbyong du khas 'che ba gang zhig /rang gi dgra 'dod chags dang zhe sdang dang gti mug stobs che ba/ brtson pa sna tshogs pa can/ 'jig rten gzhan du 'brang zhing rjes su gnas pa/gti mug pa/ lhan cig gnas pa dang ldan pa 'dris pa/ rnam par rtog pa dang mnyam du 'jug pa/ stobs chen po gzhan gyi rjes su gnas pa ma yin pa bzod par byas nas/ gang dag gi don du rang gi skye bo dang grogs po dang chung ma dag yongs su spangs te rab tu byung ba dor nas/ji ltar bdag gis khyed cag gi rlung dang mkhris pa dang bad kan gang dag yin pa de dag gzhom par bya'o zhes nor gyi rgyus gzhan dag la stongs par byed par 'gyur ba na/ de lta bu'i blo can yid g.yengs pa can de la 'chi bdag gi rgyal po mngon par 'ongs par 'gyur ro//gang dag gis 'dod pa'i thag pas bcings pa/ shin tu bag med pa/ bya ba gzhan la rab tu chags pa/ 'dod pa stobs chen po can/ blo gros g.yengs par gyur pa de 'jig rten pha rol tu 'khrid par byed pa'i dgra stobs che ba 'dod chags dang zhe sdang dang gti mug gsum rjes su 'brang bar 'gyur/ de'i phyir nyes pa 'di dag rig nas gso dpyad mi bya'o/ /gal te byed na'ang gang las phul du byung ba'i bde bar 'gyur ba sems gso ba'i gso dpyad bya'o/ /de nas de'i tshe bcom ldan 'das des tshigs su bcad pa bka' stsal pa/ 'di lta ste/ rlung sogs nyes par mi 'gyur zhing / /'dod chags la sogs skyon du 'dod//rlung la sogs pas mi rnams ni/ /ngan 'gro dag tu ltung mi 'gyur/ /sems skyon nyes pa chen po ste/ /rtag tu ngan 'gro ston par byed/ /de phyir de dag zhi ba dge/ /rlung sogs zhi bas 'dir ma yin/ /rang gi bya ba yongs btang nas/ /gang zhig gzhan gyi bya la 'jug /de ni myur bar 'chi 'gyur zhing / /mkhas pa rnams kyis bsting bar 'gyur/ /lus zhig pa las lus can gyi/ /rlung la sogs pa 'jig 'gyur gyi / /tshe rabs stong phrag dag tu yang / 'dod chags la sogs zhi mi 'gyur/ /de phyir 'dod chags zhi ba dge /rlung sogs zhi bas 'dir ma yin/ /'dod chags yang dag zhi ba las/ /gtan du ba yi dge ba thob/ /gang zhig sems can gso de sman / /yin gyi lus gso sman pa min / /yid gso ba ni shes dka' yis/ /'jig rten pa'i shis de ltar min/ /de ltar na bcom ldan 'das 'od srungs kyis rgyu 'dis rab tu byung bas gso dpyad mi bya'o zhes gsungs so//gso dpyad byed pa ni sems can dmyal ba dang mthun par skyon la 'jug pa/ gso dpyad kyi nyes pa gzhan yang 'di lta ste/ 'dod pas zil gyis non par 'gyur/ blar gyur pa'i sman pa la brten nas nga rgyal byed par 'gyur/zlar gyur pa'i sman pa de la smod par 'gyur zhing / 'tsho ba la 'joms par 'gyur/ de yi dags kyi rgyu la 'jug par 'gyur/ de lta bu'i dri mas zil gyis mnan pa sems stobs dang ldan pa de'i gti mug stobs che bar 'gyur/ gti mug gis zil gyis mnan pa de bud med mngon par mthong nas tshul bzhin ma yin pa yid la byed pas bskul bar 'gyur/blo gros rmongs pa de bud med mngon par mthong nas 'dod chags kyis zil gyis non par 'gyur/ rlung la sogs pa skyon gzhan gso ban de nyid dmyal ba dang yi dags dang dud 'gro'i rgyur gyur pa 'dod chags la sogs pa'i skyon stobs che ba dang ldan par 'gyur ro//de dag gis zil gyis mnan cing lta ba ngan pas zil gyis mnan pa'i sman pa ngan pa de nyes pa chen po des bcings nas sems can dmyal bar 'khrid par 'gyur ro/ /de'i phyir rab tu byung bas rnam pa kun gyis rtag tu 'dod chags la sogs pa zhi ba la rab tu 'bad par bya'i/rlung la sogs pa ni ma yin no/ /gzhan yang bsam gtan dang klog pa la gegs byed pa'i chos gnyis pa 'di ni dge sbyong mya ngan las 'das pa la mngon du phyogs pas mi bya'o zhes gsungs so// // dge sbyong rnams kyis rgyu skar rtog pa spang ba la dgongs pa bstan pa/dam pa'i chos dran pa nye bar gzhag pa'i mdo las kyang / lnga pa 'di dge sbyong gi bsam gtan dang klog pa'i bar chad byed pa yin te/ de gang zhe na/ 'di lta ste/ dge sbyong ngam dge sbyong du khas 'che ba rgyu skar brtsi ba dang sems pa'o/ /gnas skabs thams cad du rgyu skar gyi rtsis dang /sems pa mi bya ste de ni smad pa'o/ /dge sbyong gi chos bsam gtan dang klog pa'i bar chad byed par 'gyur ro/ /de dag sems pa na bsod nams dang tshe'i 'du byed nub par 'gyur ro/ /de dag thob par mi 'gyur ro/ /tshe zad pa bya ba ma byas pa de na ba dang / rga ba dang / mya ngan dang / smre sngags 'don pa dang / sdug bsngal ba dang / yid mi bde ba dang / nye bar 'tshe ba las grol bar mi 'gyur ro/ /de dus ring por 'khor bar yongs su 'khyam par 'gyur ro/ /de la rgyu skar gyis cung zad kyang byed par mi 'gyur zhing / rgyu skar ni bdag dang gzhan la skyob pa por mi 'gyur ro//de ci'i phyir zhe na/ las nyid skyob pa po yin gyi rgyu skar ni skyob pa po ma yin no/ /de ci'i phyir zhe na/ rgyu skar gcig nyid la skyes bu skyid pa dang / sdug pa dang / rigs dang ldan pa dang / rigs ngan pa dang / chos dang ldan pa dang / chos dang mi ldan pa dang /phyug pa dang phongs pa dang / rgyal po dang chom rkun dang / mkhas pa dang rmongs pa dang tshul khrims dang ldan pa dang / tshul khrims 'chal pa dang / brtson 'grus brtsams pa dang snyom las can dang / 'jig rten pa dga' ba dang 'jig rten pa mi dga' ba dang / de la sogs pa gzhan yang skye bar 'gyur ro//gal te rgyu skar gyi rgyu yin par 'gyur na ni/ ji skad bshad pa'i skyes bu de dag thams cad mtshungs par 'gyur te / de dag gi skye ba'i skar ma gcig yin no/ /rang gi yon tan dang skyon mngon par mi shes pa thog mar dge ba dang mi dge ba'i 'bras bu can gyi rgyu skar dag mi rtsi zhing /skar mar gtogs pa'i rgyu skar brtsi bar 'gyur ro/ /gzhan yang rgyu skar brtsi ba dang sems pa dag mdzes pa dang dge bar mi 'gyur te/ 'di lta ste/ rgyu skar gcig nyid la mi dang dud 'gro dang yi dags rnams skye ba dang / rgyu skar gyi mthus mtshungs par mi 'gyur ro/ /rnam pa 'dis rgyu skar sems pa ni mi dge la/las sems pa ni dge zhing de sems pa mya ngan las 'da' bar byed par 'gyur ro/ /gzhan yang rgyu skar sems pa mi dge bar 'gyur ba 'di lta ste/ rgyu skar stobs dang ldan pa phan tshun bzung ba na 'phel bar 'gyur/ zil gyis gnon par 'gyur ro/ / rgyu skar gyis rgyu skar zil gyis gnon par 'gyur zhing / dus gzhan du slar yang rgyu skar de nyid zil gyis gnon par 'gyur ro/ /de'i phyir rgyu skar sems pa ni dge ba dang mdzes par mi 'gyur ro/ /ji ltar gang dag bde ba dang sdug bsngal rgyu skar la rag las par brtsi ba dang / sems pa de dag gi sems pa ni dge ba dang mdzes par mi 'gyur ro //gang dag bdag nyid kyi bde ba dang sdug bsngal ba la nus pa med pa de dag gis ji ltar na gzhan la bde ba dang sdug bsngal ba byed par 'gyur/ de'i phyir dge ba dang mi dge ba'i 'bras bu ni las kho na'i yin gyi rgyu skar rnams kyis ni ma yin no/ /gza' rnams kyang gza' rnams kyis 'khrug par 'gyur ba de'i tshe/de dag kyang gzir bar 'gyur te/ dper na zla ba gza' sgra gcan gyis zung bas gzir bar 'gyur ba bzhin no/ /de bas na gang dag bdag la nus pa med pa de dag ji ltar gzhan la nus par 'gyur/ de'i phyir dge sbyong ngam dge sbyong du khas 'che bas rgyu skar bsam par mi bya'o//gza' ni gsum po 'di dag go/ /'di lta ste/ na ba dang rga ba dang 'chi ba'o/ /gang dag rtag tu gnas pa gsum po 'di dag ni gza' chen po ste/ 'jig rten la sna tshogs par sems par byed do/ /dge sbyong ngan pa dge sbyong du khas 'che ba/blo gros med pa/ thos pa dang mi ldan pa/ byis pa gza' gzhan dag sems par byed cing / rgyu skar nyi shu rtsa brgyad 'jig rten pa/ skyon dang bcas pa sems par byed pa de ni/ gang bsams te yang dag par so sor brtags nas mya ngan las 'das pa'i grong khyer du 'jug par 'gyur ba/'jig rten las 'das pa'i rgyu skar nyi shu rtsa brgyad sems par mi byed do/ /de dag gang zhe na/ 'di lta ste/ phung po lnga dang nye bar len pa'i phung po lnga dang khams bco brgyad dag go/ /de dag 'dod chags dang bral ba dang bsal ba dang / bsdams pa dang dul bas yang dag pa nyid du bsams nas mya ngan las 'da' bar 'gyur gyi/dge slong rgyu skar bsams nas ni mya ngan las 'da' bar mi 'gyur ro/ /gzhan yang dge sbyong ngan pa dge sbyong du khas 'che ba ni gang dag brtsis pas don du mi 'gyur zhing / 'khor ba nas mya ngan las 'da' bar mi 'gyur ba/rim gyis zla ba bcu gnyis rtsi bar byed kyi/ yang dag par sdom pa dang / yang dag pa'i don shes pa dang / 'dod chags dang bral ba gang dag mya ngan las 'da' bar 'gyur ba skye mched bcu gnyis bgrang bar mi byed do/ /dge sbyong ngan pa dge sbyong du khas 'che ba de dag ma brtsis par gzhan gyi bya ba kun nas nyon mongs pa can sems par byed do//gzhan yang dge sbyong ngan pa dge sbyong du khas 'che bas ngan du sems pa ni gang dag bsams pas/ na ba dang rga ba dang 'chi ba dag las grol bar mi 'gyur ba/ 'jig rten pa kun nas nyon mongs pa can/ nye bar 'tshe ba dang bcas pa'i dus drug rim gyis rtsi bar byed kyi/ gang dag bsams te yang dag par so sor brtags nas de dag dang bral ba las mya ngan las 'das pa 'thob par 'gyur ba/ lus la sum cu rtsa drug po sems par mi byed do/ /gzhan yang dge sbyong ngan pa dge sbyong du khas 'che ba dus kyis byas pa'i dus sbyor 'jig rten pa ji ltar dus sbyor che ge mo ni bzang ngo //che ge mo ni mi bzang ngo / /dus 'dir dus sbyor 'di 'byung bar 'gyur ro/ /dus 'dir 'byung bar mi 'gyur ro zhes sems par 'gyur zhing / de lta bu'i ngo bo'i bsam pa gang zhig dge bar byed pa ma yin pa dang / bde bar byed pa ma yin pa dang / mya ngan las 'da' bar byed pa ma yin pa dang /mya ngan las 'da' ba'i mthar thug par byed pa ma yin pa sems par byed kyi/ sems kyi mtshan nyid dmigs pa dge ba dang mi dge ba dang lung du ma bstan pa'i dus sbyor sems pa ji lta ba bzhin du dmigs pa dge ba sems kyi dus sbyor che ge mo skyes pa de ni bzang ba ste/ bdag bde 'gror 'gro bar byed pa'am/ mya ngan las 'da' bar 'gro bar byed par 'gyur ro/ /bdag la dmigs pa mi dge ba'i sems mi dge ba kun nas nyon mongs pa can che ge mo skyes pa de bdag la bde bar byed pa ma yin/ dge bar byed pa ma yin/ bde 'gror 'gro bar byed pa ma yin pa 'byung bar 'gyur ro//dmigs pa lung du ma bstan pa'i sems che ge mo skyes pa de'i rnam par smin pa lung du ma bstan pa kho na'o zhes sems par mi byed do/ /gzhan yang dge sbyong ngan pa dge sbyong du khas 'che ba de 'jig rten pa'i lam gyi dmigs pa dus skad cig dang thang cig dang yud tsam dang nyin mo dang zla ba dang /zla ba phyed dang ldan par sems par byed kyi/ ji ltar bdag gi tshe'i 'du byed skad cig ma/ skad cig dang thang cig dang / yud tsam dang / nyin mo dang / zla ba dang / zla ba phyed du sdod pa 'dzad cing / 'chi ba'i dus stobs che ba/ phyir bcos su med pa 'ong ngo zhes/dge ba dang mi dge ba'i 'bras bu can/ mi dang mi ma yin pa'i tshe'i 'du byed zad pa'i dus ni sems par mi byed do/ /gzhan yang 'jig rten pa'i tshul kun nas nyon mongs pa can gyi rgyu skar sems pa/ bsam gtan dang klog pa la bar du gcod pa sems par byed/ sgom par byed/ lan mang du byed/rab tu sgom par byed/ 'jog par byed/ ji lta ba bzhin rgyu skar che ge mo zhes bya ba/ gza' che ge mo zhes bya bas bzung zhing / 'tshe bar byed do zhes gzhan dag la 'doms par byed do/ /skye bo ngan pa de ltar sems pa'i bsam pa de ni/ na ba dang mya ngan dang smre sngags 'don pa dang sdug bsngal ba dang yid mi bde ba las sgrol bar byed par mi 'gyur ro//'khor ba dang mya ngan las 'das pa ni/ ji lta ba bzhin rgyu skar lta bu'i chos gzhan dag gza' lta bu'i chos rnams kyis zil gyis gnon pa ni 'di lta ste/ skye ba'i rgyu skar ni 'chi ba'i gzas nye bar 'tshe'o/ / lha'i 'jig rten gyi rgyu skar ni 'chi 'pho ba'i gzas nye bar 'tshe'o/ /phun sum tshogs pa'i rgyu skar ni rgud pa'i gzas nye bar 'tshe'o/ /mdza' bo dang 'du ba'i rgyu skar ni mdza' bo dang bral ba'i gzas nye bar 'tshe'o/ /mi skye ba'i rgyu skar ni yongs su tshol ba'i gzas nye bar 'tshe'o/ /tshor ba bde ba'i rgyu skar ni tshor ba sdug bsngal gyi gzas nye bar 'tshe'o//dge ba'i sems skyes pa'i rgyu skar ni mi dge ba'i sems skyes pa'i gzas nye bar 'tshe'o/ /mi sdug pa'i rgyu skar ni 'dod chags kyi gzas nye bar 'tshe'o/ /byams pa'i rgyu skar ni zhe sdang gi gzas nye bar 'tshe'o/ /ye shes kyi rgyu skar ni gti mug gi gzas nye bar 'tshe'o zhes de ltar sems par byed do//dge sbyong ngan pa dge sbyong du khas 'che ba rang gi sems pa 'jig rten las 'das pa sems par mi byed kyi/ gzhan gyi sems pa sems par byed do/ /ji skad bshad pa'i 'jig rten dang 'jig rten las 'das pa bsams te/sngar bzhin yang dag pa nyid du so sor brtags nas dang / tshul bzhin du yid la byed pas yang dag pa ji skad bstan pa'i gza' rnams la snga ma bzhin du gza' bsam pa bsgoms te/ yang dag pa ji lta ba bzhin du zhi ba'i lam yan lag brgyad kyis so sor brtags nas gza' dang rgyu skar sems pa ni/mya ngan las 'da' ba'i phyir dang bde ba'i phyir dang zhi ba'i phyir 'bras bu dang bcas par 'gyur gyi/ gza' tha mal pa 'jig rten pa de dag dang rgyu skar bsams nas ni ma yin no/ /sems pa ni skyes bu brgya phrag stong brlag par gyur cing / sems can dmyal ba dang / yi dags dang / dud 'gror 'gyur te/ gang gi phyir 'jig rten pa 'khor ba 'grub par byed pa/ de dag ni 'dod chags dang zhe sdang dang gti mug skyed par byed par 'gyur ro/ /rnal 'byor spyod pa brgya stong phrag gang dag gis 'jig rten las 'das pa'i lam bsgoms pas/gza' dang rgyu skar de dag bsams te/ yang dag pa ji lta bar so sor brtags nas/ rga ba dang / 'chi ba dang / mya ngan dang / smre sngags 'don pa dang / sdug bsngal ba dang / yid mi bde ba dang bral ba'i go 'phang 'thob par 'gyur ba/ rtag pa rga ba med pa/ 'chi ba med pa/zag pa med pa'i go 'phang mya ngan las 'das pa 'di la dge sbyong ngan pa dge sbyong du khas 'che bas gdon mi za bar bslab par bya'o/ /sdug bsngal mi 'dod pas 'khor ba'i sdug bsngal zad par bya ba'i phyir rgyu skar sems pa dang lus sems pa bsgom par bya'o/ /ji skad bshad pa'i tha mal pa kun nas nyon mongs pa can ni ma yin no//gang zhig shes kyang gtan du ba'i bde ba byed par mi 'gyur/ dge bar mi 'gyur/ mya ngan las 'das pa'i mthar thug par byed par mi 'gyur gyi/ dge slong gi bsam gtan dang klog pa'i gegs byed pa 'ba' zhig tu 'gyur ro/ /de ltar na dge slong rgyu skar sems pa dang brtsi ba ni smad par 'gyur ro zhes gsungs so//nam mkha'i spyan gyi mdo las kyang / bcom ldan 'das kyis bka' stsal pa/ rgyal po chen po cang ma smra shig /rig pa'i gnas bcu gnyis po de ma lus par 'jig rten na dar bar 'gyur ba ni med do/ /de'i tshe gang tshangs pa dang /gang brgya byin dang / gang lha dang drang srong rnams kyis bstan pa de rab tu byung ba rnams la rjes su mthun par bstan par ci'i phyir mi 'gyur zhe na/ gang du 'dus nas gsod pa dang / yan lag dang nying lag gcod pa dang grong khyer 'jig pa dang / nor 'jig pa dang / grogs po 'byed pa dang /g.yog 'khor 'byed pa dang / grong 'jig pa dang / khyim 'jig pa dang / srog gcod pa la brtson pa nas / log par lta ba'i bar la brtson pa yod pa'i gtam ni rab tu byung ba la rjes su mthun par brjod par mi bya'o zhes gsungs so/ /rin po che'i tog gi mdo las kyang /kun du rtog pa'i spyod yul can/ /byis pa gang la chags 'dug pa/ /de ni byis pa'i rmongs pa ste/ /sems la gnas shing rims nad bcas/ /khyi dang sbrul dang rus sbal dang / /srog chags gzhan yang rnam mang po/ /skar ma rgyal la gang skyes pa//de dag bde la brten ma yin/ /ji ltar bsam gtan rdzu 'phrul dang / /thar pa khyod kyis rnyed pa bzhin/ /nga yang thams cad gzigs pa na/ /ci phyir nga la khyod mi 'dri/ /zhes gsungs so/ /stag rna'i mdo las kyang / bram ze bde 'gror 'gro ba ni/ /gal te sngags kyis 'thob 'gyur na//gnag dang dkar ba'i las rnams ni/ /'di ni 'bras bu med par 'gyur/ /gang phyir dkar dang gnag pa dang / /'bras bur bcas pa 'gro ba lngar / /smin par snang ba de yi phyir/ /grags pa chen po tshar gcod min/ /zhes gsungs so// // rgyal po la brten pa smad pa la dgongs pa bstan pa/dam pa'i chos dran pa nye bar gzhag pa'i mdo las kyang / gzhan yang bsam gtan dang klog pa la bar chad byed pa'i chos dgu pa yongs su spang bar bya'o/ /de gang zhe na/ 'di lta ste/ rgyal po la brten pa'o/ /dge sbyong gis rgyal po la brten pa gnas skabs thams cad du mi bya'o//de ci'i phyir zhe na/ rgyal po la brten pa ni yul 'khor ba thams cad kyis mchod par mi 'gyur ro/ /dge slong rgyal po la brten pa dang ldan pa de ni / nor gyi tshogs sam grong khyer ram grong ngam ri brags sam / de lta bu'i rnam pa gzhan ci zhig slong bar byed/ gal te dge slong de slong bar byed na 'dod pa mang bar 'gyur ro//yang na mi slong na de don med pa la nyon mongs pa la spyod par 'gyur ba dang / bsam gtan dang klog pa las nyams par 'gyur ro/ /de thar pa'i lam la gnas pa na 'ching ba'i lam du 'gro bar 'gyur ro/ /de ltar na dge slong gis rgyal po la brten par mi bya'o//de la brten pa ni 'grogs pa'o/ /mi bsten pa ni yongs su spang ba ste/ su zhig la bya/ 'di lta ste/ dper na sdig pa'i grogs po dang / gzugs dang sgra dang dri dang ro dang reg bya 'dod pa'i yon tan lnga po kun nas nyon mongs pa can dang / tshul bzhin ma yin pa yid la byed pa dang /rmugs pa dang gnyid dang / bas mtha'i grong na gnas pa bsten par mi bya'o/ /le lo can dang lhan cig gnas par mi bya'o/ /tshul 'chos can rnams dang 'grogs par mi bya'o/ /zhim lto can dang lhan cig gnas par mi bya'o/ /tshong pa dang lhan cig 'dri rmed kyang mi bya'o/ / zol gyis 'tsho ba rnams dang ma yin/ rang bzhin gyis dri ma can dang ma yin/ lta ba log pa dang ma yin/ 'gyur bag can dang ma yin / nga rgyal can dang ma yin/ khengs pa dang ma yin/ ltung bar gyur nas langs pa dang ma yin/ rgyan pos 'tsho ba dang ma yin/ chang khang ba dang ma yin/ chang tshong dang ma yin/'thab krol can dang ma yin/ bud med la dad che ba dang ma yin/ nyo tshong gis nye bar 'tsho ba dang ma yin/ sdang mig can dang ma yin/ skyes bu bya ma rta dang ma yin/ bya ba dang ma yin/ spros pa can rnams dang ma yin/ mu stegs can zhugs pa dang ma yin/ skye bo thams cad dang zhe 'gras pa rnams dang ma yin te/lhan cig tu 'grogs pa dang ngag brjod pa'am lam du 'grogs pa yang dge slong gis mi bya'o/ /de ci'i phyir zhe na/ gzhan gyi skyon rnam par dag pa'i skyes bu'am rab tu byung ba la skye bo mang po dag ji ltar gang zhig de ltar bsten pa'am 'grogs par byed pa ni/nges par de lta bu'i ngang tshul can du 'gyur ro zhes sems par byed do/ /de gzhan gyi skyon des gos par byed do / /de'i phyir de dag la brten par mi bya'o/ /khyod la rgyal po la brten pas ci zhig bya ste/ de ni rnam pa thams cad du smad pa'o/ /de nas de'i tshe bcom ldan 'das des tshigs su bcad pa bka' stsal pa/'di lta ste/ dge slong nags na gnas pa yis/ /rgyal po bsten pa smad par gyur / /ngur smrig gang na bsten pa 'di'i/ /g.yog bzhin lag gis 'tsho gang na/ /gang zhig lhas kyang bsten bya ba'i/ /dge slong gis bsten 'os min te/ / gtsang sbra sten byed ngang pa ni/ /ro dang 'grogs par 'os ma yin/ /lus ngan nga yir 'dzin med cing / /re ba med par spros med pa/ /'khor ba'i 'jigs pas 'jigs med pas/ /rgyal po bsten pa mdzes ma yin/ /nags dang dgon pa dur khrod dang / /lteng ka ri yis phyogs na//gnas pa'i dge slong rab mdzes kyi / /rgyal po'i khab bsten ma yin no/ /de ltar rgyal po la brten pa thabs du mas smad pa ni tshangs pa mtshungs par spyod pa thams cad kyis smad do/ /gal te dge slong gis bya ba ni ye shes kyi rgyal po bsten par bya'o/ /de ni gtan du ba'i zhi ba bsten par 'gyur ro//gdon mi za bar legs pa 'thob par 'gyur ro/ /de bsten pa'i thabs su gyur pa ni 'di lta ste/ brtson 'grus brten pa nyid dang / las gzhan med pa nyid dang / bla ma bsten pa dang / chog shes pa nyid dang / rab tu bsten pa dang ldan pa dang / rtag tu sems pa dang /mi brkam pa dang / goms pa dang / bla ma la 'dri ba dang / rab tu bsten pa 'dzin pa dang / dge 'dun la 'dud pa nyid dang / snyom las med pa dang / tshangs pa mtshungs par spyod pa bsten pa'o/ /'di dag ni dge slong gis ye shes kyi rgyal po bsten pa'i thabs yin no//de nas de'i tshe bcom ldan 'das 'od srungs des tshigs su bcad pa bka' stsal pa/ 'di lta ste/ goms dang bla ma la gus dang / /de bzhin 'dri ba nyid dang ni/ /sbyin dang de bzhin khrims bsten pa/ /ye shes rgyal po bsten pa'o/ /'di ni lhar bcas 'jig rten gyi/ /rgyal po bde ba sten byed pa//srid pa'i 'ching bas sdug bsngal gang / /khas 'che rgyal po ma yin no/ /gang la sdug bsngal yod min pa / /de ni rgyal por 'gyur ba yin/ /gang dag sdug bsngal gyis dkris te/ /'di ni ji ltar rgyal zhes 'os/ /de ltar na dge slong gis ye shes kyi rgyal po la brten par bya'i/tha mal pa ni ma yin te/ de bsten pa na bsam gtan dang klog pa las nyams par 'gyur ro/ /de nyams na slar yang rgyal po de gang du 'gro ba'i yul/ dmyal ba dang yi dags dang dud 'gror skye bar 'gyur ro / /de'i phyir dge slong gis skyon de dag rig nas rgyal po bsten par mi bya'o// 'di ni nags na gnas pa rnams kyis smad pa ste/ de'i phyir chos dgu pa bsam gtan dang klog pa la bar chad byed pa 'di ni smad par bya ba yin no zhes gsungs so/ /'dul ba las kyang / bcu po 'di dag ni rgyal po'i pho brang 'khor du 'jug pa'i nyes dmigs so/ / bcu gang zhe na/ dge slong dag 'di ni rgyal po btsun mo dam pa dang lhan cig 'dug par gyur la der dge slong 'jug pa na/ btsun mos dge slong mthong nas 'dzum par byed cing / dge slong yang btsun mo mthong nas 'dzum par byed pa de'i tshe rgyal po 'di snyam du 'gyur te/ ma la 'di gnyis ni byas sam byed par 'gyur ro snyam mo//'di ni rgyal po'i pho brang 'khor du 'jug pa'i nyes dmigs dang po'o/ /dge slong dag gzhan yang rgyal po bya ba mang zhing byed pa mang ba/ btsun mo gang yang rung ba la bgrod de brjed pa ni/ des de mngal chags par gyur pa de'i tshe rgyal po 'di snyam du 'gyur te/ 'dir rab tu byung ba ma gtogs pa gzhan 'ga' yang 'jug par mi 'gyur te/ rab tu byung ba'i las su gyur pa snyam mo/ /dge slong dag 'di ni rgyal po'i pho brang 'khor du 'jug pa'i nyes dmigs gnyis pa'o/ /dge slong dag gzhan yang rgyal po'i pho brang 'khor du rin po che gang yang rung ba ma mthong ba de'i tshe rgyal po 'di snyam du 'gyur te/'dir rab tu byung ba ma gtogs par gzhan 'ga' yang 'jug par mi 'gyur te/ rab tu byung ba'i las su gyur pa'o snyam mo/ /dge slong dag 'di ni rgyal po'i pho brang 'khor du 'jug pa'i nyes dmigs gsum pa'o/ /dge slong dag gzhan yang rgyal po'i pho brang 'khor du gsang ba'i gros gang yang rung ba phyi rol du thos pa de'i tshe/rgyal po 'di snyam du 'gyur te/ 'dir rab tu byung ba ma gtogs pa gzhan 'ga' yang 'jug par mi 'gyur te/ rab tu byung ba'i las su gyur pa'o snyam mo/ /dge slong dag 'di ni rgyal po'i pho brang 'khor du 'jug pa'i nyes dmigs bzhi pa'o//dge slong dag gzhan yang rgyal po'i pho brang 'khor na bu pha la gsol ba 'debs pa de'i tshe/ de dag 'di snyam du 'gyur te/ 'dir rab tu byung ba ma gtogs par gzhan 'ga' yang 'jug par mi 'gyur te/ rab tu byung ba'i las su gyur pa'o snyam mo//dge slong dag 'di ni rgyal po'i pho brang 'khor du 'jug pa'i nyes dmigs lnga pa'o/ /dge slong dag gzhan yang rgyal po dma' ba na 'dug pa gnas mthon por 'jog pa de'i tshe/ gang dag de'i yid du mi 'ong ba de dag 'di snyam du 'gyur te/ rgyal po rab tu byung ba dang 'dris pa zhig ste/rab tu byung ba'i las su gyur pa'o snyam mo/ /dge slong dag 'di ni rgyal po'i pho brang 'khor du 'jug pa'i nyes dmigs drug pa'o/ /dge slong dag gzhan yang rgyal po mthon po na gnas pa gnas dma' ba la 'jog pa de'i tshe gang dag de'i yid du mi 'ong ba de dag 'di snyam du 'gyur te/rgyal po rab tu byung ba dang 'dris pa zhig ste rab tu byung ba'i las su gyur pa'o snyam mo/ /dge slong dag 'di ni rgyal po'i pho brang 'khor du 'jug pa'i nyes dmigs bdun pa'o/ /dge slong dag gzhan yang rgyal po dus ma yin par bsten pa la sbyor ba de'i tshe gang dag de'i yid du mi 'ong ba de dag 'di snyam du 'gyur te/rgyal po ni rab tu byung ba dang 'dris pa zhig ste rab tu byung ba'i las su gyur pa'o snyam mo/ /dge slong dag 'di ni rgyal po'i pho brang 'khor du 'jug pa'i nyes dmigs brgyad pa'o/ /dge slong dag gzhan yang rgyal po'i dpung gi sde nye bar sbyar te lam bar nas zlog par byed pa de'i tshe/gang dag de'i yid du mi 'ong ba de dag 'di snyam du 'gyur te/ rgyal po ni rab tu byung ba dang 'dris pa zhig ste/ rab tu byung ba'i las su gyur pa'o snyam mo/ /dge slong dag 'di ni rgyal po'i pho brang 'khor du 'jug pa'i nyes dmigs dgu pa'o/ /dge slong dag gzhan yang rgyal po'i pho brang du glang po che'i tshogs dang /rta'i tshogs dang / shing rta'i tshogs 'tsher zhing / gzugs dang / sgra dang / dri dang / ro dang / reg bya dga' bar bya ba dag yod pa na 'di dag ni rab tu byung ba la legs pa'i ngo bo ma yin pa'o/ /dge slong dag 'di ni rgyal po'i pho brang 'khor du 'jug pa'i nyes dmigs bcu pa'o zhes gsungs so// // khyim pa'i sbyin pa la dgongs pa bstan pa/ nye ba 'khor gyis zhus pa'i mdo las kyang / shA ri'i bu gzhan yang byang chub sems dpa' sems dpa' chen po khyim pa khyim na gnas pa ni sbyin pa gnyis la gnas par bya'o//gnyis gang zhe na/ 'di lta ste/ chos sbyin pa dang / zang zing sbyin pa la ste/ shA ri'i bu byang chub sems dpa' sems dpa' chen po khyim pa khyim na gnas pas ni rjes su chags pa med pa dang / khong khro ba med pas sbyin pa de gnyis la gnas par bya'o/ /shA ri'i bu byang chub sems dpa' sems dpa' chen po rab tu byung bar gtogs pas ni sbyin pa rgya chen po bzhi la gnas par bya'o//bzhi gang zhe na/ 'di lta ste/ smyu gu sbyin pa dang / snag tsha sbyin pa dang / glegs bam sbyin pa dang / chos sbyin pa la ste/ shA ri'i bu byang chub sems dpa' sems dpa' chen po rab tu byung bar gtogs pas ni sbyin pa bzhi po de dag la gnas par bya'o//shA ri'i bu byang chub sems dpa' sems dpa' chen po mi skye ba'i chos la bzod pa thob pas ni gtong ba gsum la gnas par bya'o/ /gsum gang zhe na/ 'di lta ste/ gtong ba dang / gtong ba chen po dang /shin tu gtong ba la'o/ /de la gtong ba ni rgyal srid yongs su gtong ba'o/ /gtong ba chen po ni chung ma dang bu dang bu mo yongs su gtong ba'o/ /shin tu gtong ba ni mgo dang lag pa dang rkang pa dang mig dang / pags pa dang / rus pa dang / rkang yongs su gtong ba ste/ shA ri'i bu byang chub sems dpa' sems dpa' chen po mi skye ba'i chos la bzod pa thob pas ni yongs su gtong ba gsum po de dag la gnas par bya'o zhes gsungs so// // bden pa'i rnam pa'i mdo las kyang / de la sbyin pa gang zhe na/ shA ri'i bu 'di la byang chub sems dpa' la gang yod pa de yongs su gtong bar byed de/de lag pa yongs su gtong ba yin/ rkang pa yongs su gtong ba yin/ lag pa dang rkang pa yongs su gtong ba yin/ sna yongs su gtong ba yin/ mgo yongs su gtong ba yin/ yan lag dang nying lag yongs su gtong ba yin/ bu yongs su gtong ba yin/ bu mo yongs su gtong ba yin/chung ma yongs su gtong ba yin/ srog yongs su gtong ba yin/ nor yongs su gtong ba yin/ bde ba yongs su gtong ba yin/ lus yongs su gtong ba yin/ dngos po yongs su gtong ba yin/ yul yongs su gtong ba yin/ rin po che yongs su gtong ba yin/bdog pa thams cad yongs su gtong ba yin te/ shA ri'i bu byang chub sems dpa' de ltar sbyin pa sbyin pa na bla na med pa yang dag par rdzogs pa'i byang chub la bsnyen pa yin no/ /de la sbyin pa shes pa gang zhe na/ ji ltar lhung bzed du chud pa dus su sbyin pa dang / rung ba sbyin pa dag sbyin par byed de /ji ltar dge slong rnams la chos gos dang / bsod snyoms dang / mal cha dang / na ba'i gso sman dang / yo byad rnams yongs su btang zhing mgron du gnyer bar byed do zhes gsungs so/ /blo gros mi zad pa'i mdo las kyang / btsun pa sha ra dwa ti'i bu byang chub sems dpa' rnams kyi sbyin pa yang mi zad pa yod de/de ci'i phyir zhe na/ tshad med pa'i phyir ro / /btsun pa sha ra dwa ti'i bu byang chub sems dpa' rnams kyi sbyin pa'i las kun tshad med pa ste/ 'di ltar zas kyis brel ba rnams la tshe dang / spobs pa dang / bde ba dang / stobs dang / kha dog brtan pa'i phyir zas sbyin no//btung bas brel ba rnams la nyon mongs pa'i sred pa bsal ba'i phyir btung ba sbyin no/ /bzhon pas brel ba rnams la bde ba dang / rdzu 'phrul gyi dngos po bsdu ba'i phyir bzhon pa sbyin no/ /gos kyis phongs pa rnams la khrel ba dang / ngo tsha ba dang / kha dog mdzes shing dri ma sbyang ba'i phyir gos sbyin no//me mar gyis phongs pa rnams la sangs rgyas kyi mig yongs su dag par bya ba'i phyir me mar sbyin no/ /sil krol gyis brel ba rnams la sangs rgyas kyi rna ba yongs su dag par bya ba'i phyir sil krol sbyin no/ /spos dang byug pas brel ba rnams la tshul khrims dang thos pa dang /ting nge 'dzin gyi sbos dang byug pa'i phyir sbos dang byug pa sbyin no/ /phreng bas phongs pa rnams la gzungs dang spobs pa dang / byang chub kyi yan lag gi me tog 'thob pa'i phyir phreng ba sbyin no/ /phye mas brel ba rnams la mi 'phrogs pa'i gsung rab tu thob pa'i phyir phye ma sbyin no//ros brel ba rnams la mi chen po'i mtshan ro bro ba'i mchog tu 'gyur ba thob pa'i phyir ro thams cad sbyin no/ /khyim gyis bral ba rnams la sems can thams cad kyi gnas dang / dpung gnyen dang rten dang / skyabs dang mgon gyi phyir khyim sbyin no//mal gyis brel ba rnams la sgrib pa thams cad rab tu spang ba dang / rdzu 'phrul gyi tshangs pa'i gnas de bzhin gshegs pa'i gzims sa 'thob pa'i phyir mal sbyin no/ /stan gyis brel ba rnams la stong gsum gyi stong chen po'i sa thams cad snying po byang chub dang rdo rje'i gdan du 'gyur ba'i phyir stan sbyin no//yo byad kyis brel ba rnams la byang chub kyi yan lag gi yo byad thams cad rdzogs par bya ba'i phyir yo byad sbyin no/ /nad kyi rkyen sman gyis brel ba rnams la rga shi med cing 'chi ba med pa'i bde ba 'thob pa'i phyir sman sbyin no//byang chub sems dpa' rnams bdag dbang dang rang dbang dang / rang byung gi ye shes rdzogs par bya ba'i phyir bran pho dang bran mo dang las byed pa'i mi dang / g.yog yongs su btang zhing sbyin no/ /byang chub sems dpa' rnams mi chen po'i mtshan sum cu rtsa gnyis mchog rnams yongs su rdzogs par bya ba'i phyir/gser dang / dngul dang / nor bu dang / mu tig dang / dung dang / byi ru dang / rin po che thams cad yongs su btang zhing sbyin no/ /byang chub sems dpa' rnams dpe byad bzang po brgyad cu yongs su rdzogs par bya ba'i phyir lhab lhub dang / phyang phrul sna tshogs thams cad btang zhing sbyin no/ /byang chub sems dpa' rnams theg pa chen po yongs su rdzogs par bya ba'i phyir/ rta dang / ba lang dang / shing rta dang / rkang thang dang / dgal ba rnams btang zhing sbyin no/ /byang chub sems dpa' rnams bsam gtan gyi yan lag dang tshogs yongs su rdzogs par bya ba'i phyir bza' shing gi ra ba dang /gzhal med khang dang / dka' thub kyi nags tshal dang / khang pa yongs su btang zhing sbyin no/ /byang chub sems dpa' rnams bla na med pa yang dag par rdzogs pa'i byang chub dga' bar 'tshang rgya ba'i phyir bu pho dang /bu mo dang / chung ma sdug pa yongs su btang zhing sbyin no/ /byang chub sems dpa' rnams dam pa'i chos kyi mdzod dang / bang ba kun dgang ba'i phyir nor dang / 'bru dang / mdzod dang / bang ba yongs su btang zhing sbyin no/ /byang chub sems dpa' rnams rnam pa thams cad dang ldan pa'i thams cad mkhyen pa'i ye shes bla na med pa'i chos kyi rgyal po bya zhing /snying po byang chub tu 'gro ba'i phyir/ grong dang / grong khyer dang / grong 'dab dang / yul dang / pho brang dang / rgyal po'i gnas dang / 'dzam bu'i gling dang / gling bzhi'i rgyal po'i dbang yongs su btang zhing sbyin no//byang chub sems dpa' rnams chos kyi dga' ba dang mos pa 'thob pa'i phyir dang / bde ba dang / dga' ba dang / brtse ba kun btang zhing sbyin no/ /byang chub sems dpa' rnams gtsug tor bltar mi mngon pa 'thob par bya ba'i phyir/ gtsug gi nor bu dang cod pan sbyin no/ /byang chub sems dpa' rnams dam pa'i chos kyi rkang pas snying po byang chub tu 'gro ba'i phyir rkang pa sbyin no/ /byang chub sems dpa' rnams sems can thams cad la dam pa'i chos kyi lag pa sbyin pa'i phyir lag mthil sbyin no/ /dbang po ma nyams par rdzogs par bya ba'i phyir/byang chub sems dpa' rnams rna ba dang sna sbyin no/ /sems can thams cad bsgribs pa med pa'i sangs rgyas kyi mig dang / chos kyi mig 'thob pa'i phyir byang chub sems dpa' rnams kyis mig sbyin no/ /byang chub sems dpa' rnams 'jig rten gsum po thams cad las khyad par du 'phags pa thams cad mkhyen pa'i ye shes bla na med pa 'thob par bya ba'i phyir yan lag gi mchog mgo bo btang zhing sbyin no//snying po med pa'i lus las snying po blang zhing btsal pa'i phyir/ byang chub sems dpa' rnams sha dang khrag yongs su btang zhing sbyin no//'jam pa dang / snum pa dang / phra ba dang / mdog gser gyi kha dog lta bur kun sbyang ba'i phyir byang chub sems dpa' rnams pags pa sbyin zhing gtong ngo / /byang chub sems dpa' rnams sangs rgyas kyi sku rdo rje ltar mi chogs shing sra ba dang /skyes bu mthu bo che ltar brtan pa 'thob pa'i phyir rus pa dang rkang sbyin no zhes bya ba nas/ sbyin pa de ni stong pa nyid kyi rnam pas bsgrubs pa skye de'i phyir na de mi zad pa'o/ /sbyin pa de ni mtshan ma med pas bsgoms pa ste/ de'i phyir na de mi zad pa'o/ /sbyin pa de ni smon pa med pas rtogs pa ste/de'i phyir na de mi zad pa'o/ /sbyin pa de ni 'dus ma byas la bsngos pa ste/ de'i phyir na de mi zad pa'o/ /sbyin pa de ni gzung ba shin tu zin pa ste/ de'i phyir na de mi zad pa'o/ /sbyin pa de ni khams gsum pa dang ma 'dres pa ste/ de'i phyir na de mi zad pa'o/ / sbyin pa de ni rnam par grol ba'i 'bras bu'i rgyu mthun pa ste/ de'i phyir na de mi zad pa'o/ /sbyin pa de ni bdud thams cad shin tu char gcod pa ste/ de'i phyir na de mi zad pa'o/ /sbyin pa de ni nyon mongs pa thams cad dang ma 'dres pa ste / de'i phyir na de mi zad pa'o/ /sbyin pa de ni bye brag 'thob par 'gyur ba ste/de'i phyir na de mi zad pa'o/ /sbyin pa de ni legs par byas pa gdon mi za ba ste/ de'i phyir na de mi zad pa'o/ /sbyin pa de ni byang chub kyi lam gyi tshogs su spel ba ste/ de'i phyir na de mi zad pa'o/ /sbyin pa de ni yang dag par bsngos pa ste/ de'i phyir na de ni mi zad pa'o//sbyin pa de ni snying po byang chub kyi rgyan gyi tshogs su dmigs pa ste/ de'i phyir na de mi zad pa'o/ /sbyin pa de ni sems can thams cad 'tsho ba ste/ de'i phyir na de mi zad pa'o/ /sbyin pa de ni thams cad mkhyen pa nyid du bsngos pa ste/ de'i phyir na de ni mi zad pa'o/ / sbyin pa de ni mtha' med pa ste/ de'i phyir na de mi zad pa'o/ /sbyin pa de ni yongs su ma god pa ste/ de'i phyir na de mi zad pa'o/ /sbyin pa de ni kun du ma zhugs pa ste/ de'i phyir na de mi zad pa'o/ /sbyin pa de ni tshad gzung du med pa ste/ de'i phyir na de mi zad pa'o/ /sbyin pa de ni yangs pa ste/de'i phyir na de mi zad pa'o/ /sbyin pa de ni gnas pa ste/ de'i phyir na de mi zad pa'o/ /sbyin pa de ni thug pa med pa ste/ de'i phyir na de mi zad pa'o/ /sbyin pa de ni kha na ma tho ba med pa ste/ de'i phyir na de mi zad pa'o/ /sbyin pa de ni mi dpya ba ste/ de'i phyir na de mi zad pa'o//sbyin pa de ni mi thul ba ste/ de'i phyir na de mi zad pa'o/ /sbyin pa de ni zil gyis ma non pa ste/ de'i phyir na de mi zad pa'o/ /sbyin pa de ni thams cad mkhyen pa'i ye shes la btang ba ste/ de'i phyir na de mi zad pa'o/ /sbyin pa de ni rnam pa thams cad mkhyen pa'i phyir bsgrubs pa ste/de'i phyir na de mi zad pa'o/ /btsun pa shA ri'i bu 'di ni byang chub sems dpa' rnams kyi sbyin pa mi zad pa zhes bya'o zhes bya ba'i bar du gsungs so/ /dkon mchog sprin gyi mdo las kyang / rigs kyi bu chos bcu dang ldan na byang chub sems dpa' sbyin pa phun sum tshogs pa rnams yin no//bcu gang zhe na/ 'di lta ste/ chos kyi sbyin pa phun sum tshogs pa rnams yin/ mi 'jigs pa'i sbyin pa phun sum tshogs pa rnams yin/ zang zing gi sbyin pa phun sum tshogs pa rnams yin/ lan du phan 'dogs pa la mi re ba'i sbyin pa phun sum tshogs pa rnams yin/snying rje'i sbyin pa phun sum tshogs pa rnams yin/ mi brnyas pa'i sbyin pa phun sum tshogs pa rnams yin/ bsti stang gi sbyin pa phun sum tshogs pa rnams yin/ mchod pa dang rim gro'i sbyin pa phun sum tshogs pa rnams yin/mi gnas pa'i sbyin pa phun sum tshogs pa rnams yin/ yongs su dag pa'i sbyin pa phun sum tshogs pa rnams yin no / /rigs kyi bu de la ji ltar na byang chub sems dpa' chos kyi sbyin pa phun sum tshogs pa yin zhe na/ rigs kyi bu 'di la byang chub sems dpa' zang zing med pa'i sems kyis chos rnams 'dzin cing kun chub par byed de/rnyed pa dang bkur sti'i phyir ma yin/ shes kyi khe 'dod pa'i phyir ma yin/ grags pa 'dod pa'i phyir ma yin te/ gzhan du na de 'di ltar sems can dag gi sdug bsngal thams cad ji ltar zad par bya snyam ste/chos de dag kyang zang zing med pa'i sems kyis gnyis su med par gzhan dag la yang dag par ston te / ji ltar na rgyal po'am / blon po chen po la yang dag par ston pa de ltar gdol pa'am/ gdol bu la yang dag par ston na/ de ma yin pa grong ba dang / yul gyi mi gzhan dag la lta ci smos/chos kyi sbyin pa phun sum tshogs pa des khengs par yang mi 'gyur te/ rigs kyi bu de ltar na byang chub sems dpa' chos kyi sbyin pa phun sum tshogs pa yin no/ /ji ltar na byang chub sems dpa' mi 'jigs pa'i sbyin pa phun sum tshogs pa yin zhe na/rigs kyi bu 'di la byang chub sems dpa' bdag gis dbyig pa bor ba dang / mtshon cha bor ba yin te/ gzhan dag kyang bslab pa de nyid la 'jog go/ /de sems can thams cad la phar 'du shes pa yin/ mar 'du shes pa yin/ bur 'du shes pa yin/ gnyen bshes su 'du shes pa yin/ nye du 'am snag gi gnyen mtshams dag kyang rung bar 'du shes pa'ang yin no/ /de ci'i phyir zhe na/ de 'di snyam du sems te/ de bzhin gshegs pas kyang skye ba 'pho ba de dang de dag tu sems can gyi ris su gang khyed kyi pha'am/ ma'am/ bu'am/ gnyen bshes sam/ nye du'am/ snag gi gnyen mtshams gang yang rung ba'i gnas su ma gyur pa'i sems can de lta bu med do zhes gsungs so snyam nas/ de srog chags su gyur pa phra mo'i phyir yang bdag gi sha dag gis kyang phan 'dogs na/ srog chags chen po che ba gzhan dag la lta ci smos te/de ltar na byang chub sems dpa' mi 'jigs pa'i sbyin pa phun sum tshogs pa yin no/ /ji ltar na byang chub sems dpa' zang zing gi sbyin pa phun sum tshogs pa yin zhe na/ rigs kyi bu 'di la byang chub sems dpa' sems can gang dag mi dge ba'i las rab tu byed pa mthong na de dag zang zing gis sdud cing /zang zing gis bsdus nas mi dge ba'i gnas de nas bslang ste/ dge ba'i gnas su 'god do/ /de yang 'di snyam du sems te/ bcom ldan 'das kyis kyang sbyin pa sbyin pa ni byang chub sems dpa'i byang chub bo/ /byang chub sems dpas sbyin pa sbyin na mi dge ba'i chos phrag dog dang /ser sna dang ngan song gsum spangs pa yin no zhes gsungs te/ de bas na bdag gis de bzhin gshegs pa'i rjes su bslab cing sbyin pa sbyin par bya'o snyam ste/ de sbyin pa yang sbyin zhing sbyin pa des khengs par yang mi 'gyur te/ de ltar na byang chub sems dpa' zang zing gi sbyin pa phun sum tshogs pa yin no/ /ji ltar na byang chub sems dpa' lan du phan 'dogs pa la mi re ba'i sbyin pa phun sum tshogs pa yin zhe na/ byang chub sems dpa' sbyin pa sbyin pa yang 'dod pa'i phyir sbyin pa mi sbyin/ phan 'dogs su re ba'i phyir ma yin/don gyi phyir ma yin/ g.yog gi phyir ma yin/ 'jig rten gyi tshul gyi phyir ma yin gyi gzhan du na 'di snyam du sems te/ gang byang chub sems dpa' sbyin pa'i ngang tshul can du 'gyur ba 'di ni chos nyid yin no snyam ste/ de de'i rgyu de de'i rkyen de'i phyir phan btags pa'i lan du phan 'dogs pa thams cad la mi re bar sbyin pa sbyin par byed de/de ltar na byang chub sems dpa' lan du phan 'dogs pa la mi re ba'i sbyin pa phun sum tshogs pa yin no/ /ji ltar na byang chub sems dpa' snying rje ba'i sbyin pa phun sum tshogs pa yin zhe na/'di la byang chub sems dpa' sems can su sdug bsngal ba dang / bkres pa dang / skom pa dang / gcer bu dang / gos ngan pa dang / bgo ba ngan pa dang / mgon med pa dang / dpung gnyen med pa dang / skyabs med pa dang / gnas med pa dang / rten med pa lta bu bsod nams med pa dag mthong na/de dag la snying rje ba'i sems rab tu bskyed cing / de 'di snyam du sems te/ sems can gang dag gi phyir bdag gis bla na med pa yang dag par rdzogs pa'i byang chub tu sems bskyed pa'i sems can de dag ni sdug bsngal ba / mgon med pa/ dbung gnyen med pa /skyabs med pa / gnas med pa/ rten med pa 'di dag yin te/ kun du 'khyam na nam zhig bdag sems can de dag gi mgon dang / dpung gnyen dang / skyabs dang / gnas dang / rten du 'gyur snyam nas de snying rjes rab tu mi bzod do / /bdog cing yod pa'i dngos pos sems can de dag la phan 'dogs so//phan btags pa'i mod las skyes pa'i dge ba'i rtsa ba des kyang khengs par mi 'gyur te/ de ltar na byang chub sems dpa' snying rje ba'i sbyin pa phun sum tshogs pa yin no/ /ji ltar na byang chub sems dpa' mi brnyas pa'i sbyin pa phun sum tshogs pa yin zhe na/byang chub sems dpa' sbyin pa sbyin pa na bor ba'i sbyin pa mi sbyin/ brnyas shing sbyin pa mi sbyin/ gshe zhing sbyin pa mi sbyin/ nyon mongs shing sbyin pa mi sbyin/ phyug pas rgyags shing dregs te sbyin pa mi sbyin/ grags pa 'dod cing sbyin pa mi sbyin/ mang du thos pas rgyags shing dregs pas sbyin pa mi sbyin gyi ci sbyin pa de yang bsti stang du byas shing sbyin pas sbyin par byed do//btsun par byas shing sbyin pa sbyin par byed do/ /ri mor byas te mchod cing rang gi lag nas sbyin pa sbyin par byed de/ de ltar na byang chub sems dpa' mi brnyas pa'i sbyin pa phun sum tshogs pa yin no//ji ltar na byang chub sems dpa' bsti stang gi sbyin pa phun sum tshogs pa yin zhe na/ byang chub sems dpa' slob dpon dang / mkhan po dang / bla ma lta bu dang / tshangs pa mtshungs par spyod pa dag mthong na/ lus kyis gus pa dang bcas pa yin/sems kyis ri mo dang bcas pa yin te/ des gus pa bskyed/ ri mo bskyed nas gus par smra ba dang / phyag 'tshal ba dang / bsu ba dang / thal mo sbyar ba dang / 'dud pa'i las dag byed do/ /de dag gi dge ba dang ldan pa'i bya ba de dang de dag la yang grogs su 'gyur te/de ltar na byang chub sems dpa' bsti stang gi sbyin pa phun sum tshogs pa yin no/ /ji ltar na byang chub sems dpa' mchod pa dang rim gro'i sbyin pa phun sum tshogs pa yin zhe na/ byang chub sems dpa' sangs rgyas dang chos dang dge 'dun la bya ba dag byed de/ji ltar na sangs rgyas la bya ba dag byed ce na/ 'di lta ste/ de bzhin gshegs pa'i mchod rten dag dang / de bzhin gshegs pa'i sku gzugs la spos sam/ me tog gam/ bdug pa'am/ byug pa'am/ phyag pa'am/ skyang nul lam/ de bzhin gshegs pa'i mchod rten zhig pa 'chos pa dag gis te / de ltar na sangs rgyas la bya ba dag byed do / /ji ltar na chos la bya ba dag byed ce na/ de chos nyan to/ /klog go/ /'chang ngo / /yi ger 'dri'o/ /kha ton du byed do/ /kun chub par byed do/ / sems so/ /ma log par bsgom pa'i sbyor bas goms par byed de / de ltar na chos la bya ba dag byed do/ /ji ltar na dge 'dun la bya ba dag byed ce na/ de gos dang / bsod snyoms dang / mal cha dang / na ba'i rkyen sman dang / yo byad rnams dang / chung ngu na chu grang mo phor gang tsam yang dge 'dun la dbul te/de ltar na dge 'dun la bya ba dag byed de/ de ltar na byang chub sems dpa' mchod pa dang rim gro'i sbyin pa phun sum tshogs pa yin no/ /ji ltar na byang chub sems dpa' mi gnas pa'i sbyin pa phun sum tshogs pa yin zhe na/ 'di la byang chub sems dpa' sbyin pa sbyin pa na/ sbyin pa 'dis bdag lha'am/ lha la la zhig tu shog ce'am/ rgyal po'am/ rgyal po la la zhig tu shog ce'am/ de ltar sems mi bskyed de/ de ltar na byang chub sems dpa' mi gnas pa'i sbyin pa phun sum tshogs pa yin no/ /rigs kyi bu ji ltar na byang chub sems dpa' yongs su dag pa'i sbyin pa phun sum tshogs pa yin zhe na/rigs kyi bu 'di la byang chub sems dpa' sbyin pa 'di dag ji skad du bshad pa la so sor rtog pa'i rang bzhin can yin te/ de sbyin pa ci dang ci sbyin yang sbyin pa de dang de dag la so sor rtog pa'i rang bzhin can yin te/ de ltar so sor rtog pa la gang 'di sbyin pa'i nyes pa dang /sbyin pa'i dri ma dang / sbyin pa'i bar du gcod pa de dag mi 'byung ste/ de ltar na rigs kyi bu byang chub sems dpa' yongs su dag pa'i sbyin pa phun sum tshogs pa yin no/ /rigs kyi bu chos bcu po de dag dang ldan na byang chub sems dpa' sbyin pa phun sum tshogs pa rnams yin no zhes gsungs so// //byang chub sems dpa'i rnal 'byor spyod pa'i sa las kyang / sdom ni/ ngo bo nyid dang thams cad dang / /dka' ba dang ni sgo kun dang / /skyes bu dam pa ldan pa dang / /de bzhin rnam pa thams cad dang / /phongs shing 'dod dang ldan pa dang / /'di dang gzhan du bde 'gyur dang //rnam par dag dang rnam dgu ste/ /mdor na sbyin pa de yin no/ /'di la byang chub sems dpas pha rol tu phyin pa drug rim gyis yongs su rdzogs par byas nas/ bla na med pa yang dag par rdzogs pa'i byang chub tu mngon par rdzogs par 'tshang rgya ste/ sbyin pa'i pha rol tu phyin pa dang /tshul khrims dang / bzod pa dang / brtson 'grus dang / bsam gtan dang / shes rab kyi pha rol tu phyin pa'o/ /de la byang chub sems dpa'i sbyin pa'i pha rol tu phyin pa gang zhe na/ sbyin pa rnam pa dgu ni byang chub sems dpa'i sbyin pa'i pha rol tu phyin pa zhes bya ste/ sbyin pa'i ngo bo nyid dang /thams cad sbyin pa dang / dka' ba'i sbyin pa dang / thams cad kyi sgo nas sbyin pa dang / skyes bu dam pa'i sbyin pa dang / rnam pa thams cad kyi sbyin pa dang / phongs shing 'dod pa la sbyin pa dang / 'di dang gzhan du bde bar 'gyur ba'i sbyin pa dang / rnam par dag pa'i sbyin pa'o//de la sbyin pa'i ngo bo nyid gang zhe na/ yo byad thams cad dang / rang gi lus la mi lta ba'i byang chub sems dpa'i ma chags pa dang lhan cig skyes pa'i sems pa gang yin pa dang / des kun nas bslang ba sbyin par bya ba'i dngos po yongs su gtong ba'i lus dang ngag gi las dang /sbyin par bya ba'i dngos po kha na ma tho ba med pa thams cad yongs su gtong ba dang / sdom pa dag la gnas pa dang / 'ongs pa mthong zhing 'bras bu la lta ba dang / su gang 'dod pa de la dngos po de so sor sbyin par byed pa ni/ byang chub sems dpa'i sbyin pa'i ngo bo nyid yin par rig par bya'o//de la thams cad sbyin pa gang zhe na/ thams cad ces bya ba ni mdor bsdu na/ sbyin par bya ba'i dngos po rnam pa gnyis te/ nang gi dang phyi rol gyi'o/ /de la rkang pa yan chad rang gi lus yongs su gtong ba ni/ byang chub sems dpa'i nang gi dngos po yongs su gtong ba 'ba' zhig pa zhes bya'o//sems can skyugs pa za bas 'tsho ba rnams kyi phyir/ byang chub sems dpa' zas skom zos 'thungs shing skyugs par byed pa gang yin pa de ni byang chub sems dpa'i nang dang phyi rol gyi dngos po 'dres pa'i sbyin pa zhes bya'o/ /ji skad smos pa 'di las ma gtogs pa'i lhag ma sbyin par bya ba'i dngos po yongs su gtong ba ni/phyi rol gyi sbyin par bya ba'i dngos po yongs su gtong ba kho na zhes bya'o/ /de la byang chub sems dpa' ni pha rol lus 'dod pa dag la mdor na rnam pa gnyis kyis rang gi lus sbyin par byed de/ci dga' mgur byed du 'jug pas gzhan la dbang yod pa dang / gzhan la rag las par byed cing bdag nyid gzhan dag la sbyin par byed de/ dper na la la zhig zas dang gos kyi phyir gzhan dag la bran gyi dngos por khas len pa de bzhin du/ byang chub sems dpa' zang zing med pa'i sems dang ldan pa ni byang chub dam pa 'dod/ pha rol dag la phan pa dang bde bar 'dod/ sbyin pa'i pha rol tu phyin pa yongs su rdzogs par byed par 'dod de / ci dga' mgur byed du 'jug cing gzhan dag la dbang yod pa dang rag lus par byed pas bdag nyid sbyin par byed pa dang /lag pa dang rkang pa dang mig dang mgo bo dang / yan lag dang nying lag rnams 'dod pa dag dang / sha dang khrag dang / rgyus pa 'dod pa dang / rkang gi bar du 'dod pa dag la rkang gi bar du sbyin par byed do/ /byang chub sems dpa' rnams ni rnam pa gnyis kyis phyi rol gyi dngos po sems can rnams la yongs su gtong ste ci bder longs spyod du gzhug pa'i phyir brnyan por sbyin pa dang /de dbang bar bya ba'i phyir thams cad kyi thams cad du btang ba'i sems kyis sbyin par byed de/ 'on kyang byang chub sems dpa' ni nang dang phyi rol gyi dngos po thams cad bye brag med par rnam pa thams cad du sems can rnams la sbyin par mi byed do//'o na byang chub sems dpa' nang dang phyi rol gyi dngos po rnam pa gnyis las ci zhig ni sems can rnams la sbyin par byed/ ci zhig ni sbyin par mi byed/ ji ltar ni sbyin par byed/ ji ltar ni sbyin par mi byed ce na/ nang dang phyi rol gyi dngos po de las sbyin pa gang sems can rnams la bde ba kho nar 'gyur gyi/ phan par mi 'gyur ba'am/ yang na bde bar yang mi 'gyur la/ phan par yang mi 'gyur ba de ni byang chub sems dpa' gzhan dag la sbyin par mi byed do/ / sbyin pa gang phan par ni 'gyur la/ bde bar 'gyur ba ni ma nges pa'am/ yang na bde bar yang 'gyur la/ phan par yang 'gyur ba de ni byang chub sems dpa' gzhan dag la sbyin par byed de/ de ltar na 'di ni sbyin pa dang mi sbyin pa'i mdor bstan pa yin no/ /'di man chad ni rgyas pa rnam par dbye ba yin par rig par bya ste/'di la byang chub sems dpa' ni pha rol la gnod par bya ba dang / pha rol la brid pa dang / mi rigs pas bskyed pas byed du bcug na pha rol gyi dbang du byed pa dang / pha rol la rag las par byed par bdag nyid sbyin par mi byed de/byang chub sems dpa' ni gzhan dag la bdag nyid kyi srog lan brgya'am/ lan stong ngam/ lan 'bum du yongs su gtong bar yang khas len med kyi/ 'on kyang pha rol gyi bsgo ba dang / pha rol dga' bar bya ba'i phyir pha rol la gnod pa'am/ pha rol bsad pa'am/pha rol brid par mi byed do/ /gal te byang chub sems dpa'i sbyin pa las brtsams te bsam pa dag pa yin du zin kyang / de yang sems can gyi don bya ba mang po nye bar gnas par gyur na/ rang gi lus dang / yan lag dang nyid lag slong ba byung yang rang gi lus dang yan lag dang nying lag rnams sbyin par mi byed do//de ci'i phyir zhe na/ byang chub sems dpa' sbyin pa las brtsams te bsam pa dag pa de ni rnam grangs gang gis kyang 'di ni sbyin no/ /'di la ni sbyin no snyam du sems zhum pa med pa'i phyir te/ de lta bas na byang chub sems dpa' de ni gang gi tshe bsam pa dag par bya ba'i phyir sems can gyi dgos pa byung ba btang snyoms su byas te sbyin par mi byed na/de ni de'i bsam pa dag pa yin pa'i phyir/ sems can gyi dgos pa byung ba btang snyoms su byas te sbyin par mi byed do/ /bdud kyi ris kyi lha rnam par tho 'tshams pa'i bsam pas slong du 'ongs pa rnams la yang de dag nyid la gnod pa dang /phung po chen por mi 'gyur bar bya ba'i phyir rang gi lus dang yan lag gse zhing sbyin par mi byed do/ /bdud kyi ris kyi lha rnams la ji lta ba de bzhin du/ des bslabs pa'i sems can rnams la yang de dang 'dra bar rig par bya'o//byang chub sems dpa' ni smyon pa dang / sems 'khrugs pa la yang rang gi lus dang / yan lag gse zhing sbyin par mi byed do / /de dag ni rang gi sems la gnas par yang ma yin la/ 'dod pa'i phyir slong ba yang ma yin te/ de ni de dag gi sems la rang dbang med pa'i phyir bla brdol tsam du zad pa de'i phyir sbyin par mi byed do//rnam pa de dag las ma gtogs par de dag las bzlog pa'i 'dod pa rnams la ni byang chub sems dpas rang gi lus pha rol dbang bar bya ba tsam gyi phyir/ yan lag dang nying lag dag gse zhing yongs su gtong bar yang byed de/byang chub sems dpa' ni nang gi dngos po sbyin pa dang mi sbyin pa ni de lta bu yin par rig par bya'o/ /phyi rol gyi dngos po las ni byang chub sems dpas dug dang / me dang / mtshon cha dang / chang sems can rnams la gnod par 'gyur ba gang yin pa de dag ni bdag la gnod par bya ba 'am/pha rol la gnod par bya ba'i phyir 'dod de slong na/ slong ba rnams la ni sbyin par mi byed do/ /dug dang me dang mtshon cha dang / chang sems can rnams la phan par 'gyur ba gang yin pa de dag ni byang chub sems dpas bdag la phan par bya ba'am /pha rol la phan par bya ba'i phyir 'dod de slong na/ slong ba rnams la sbyin par byed do/ /byang chub sems dpa' ni pha rol yid brtan pa ma yin pa'i rdzas kyang gzhan dag la sbyin par mi byed do/ /byang chub sems dpa' ni smyan byed cing pha rol gyi chung ma bkug ste gzhan dag la sbyin par yang mi byed do//bza' ba dang btung ba srog chags dang bcas pa yang sbyin par mi byed do/ /byang chub sems dpa' ni sbyin par bya ba'i dngos po gang dga' ba dang / rtse ba dang ldan pa sems can rnams la gnod pa dang ldan pa de yang byang chub sems dpas slong ba rnams la sbyin par mi byed do//de ci'i phyir zhe na/ de byin na de dag byang chub sems dpa' la sems dga' ba tsam skye bar 'gyur mod kyi/ 'on kyang sbyin pa de ni de la gnod pa ches che bar byed pa yin te/ de'i rgyus de rgyags pa dang / bag med pa dang /nyes par spyod pa la zhugs pas lus zhig nas ngan song dag tu skye bar 'gyur ba'i phyir ro/ /gal te dga' ba dang / rtsed mo la sogs pa'i dngos po yin la/ ngan song du 'gro bar byed pa yang ma yin/ mi dge ba'i rtsa ba sogs par 'gyur ba yang ma yin na ni de lta bu'i dga' ba dang /rtsed mo la sogs pa'i dngos po de sems dga' bar bya ba'i phyir slong ba rnams la sbyin par byed de/ dngos po des kyang sdud pa dang yongs su smin par byed pa'i phyir ro/ /byang chub sems dpa' slong ba rnams la dga' ba dang / rtsed mo'i dngos po ji lta bu ni sbyin par mi byed /ji lta bu ni sbyin par byed ce na/ 'di lta ste/ byang chub sems dpa' ni ri dgas gsad pa'i thabs bslab pa sbyin par mi byed do/ /mchod sbyin ngan pa yo lang chen po gang du srog chags mang po bsogs nas gsod par 'gyur ba de lta bu'i mchod sbyin dag bdag nyid kyang mi byed la/gzhan dag kyang mchod sbyin byed du mi 'jug go/ /lha rten rnams su phyugs gsod pa sbyin par mi byed do/ /srog chags mang po gnas pa'i sa phyogs srog chags chu nas skyes pa'am/ thang las skyes pa rnams gnas pa lta bu/ srog chags de dag la gnod par bya ba'i phyir/slong na sbyin par mi byed do/ /rgya dang rngon gyi 'khrul 'khor dang / rgya dang rngon gyi 'khrul 'khor bslab pa yang srog chags rnams la gnod par bya ba'i phyir slong na sbyin par mi byed do/ /spyo ba dang / gsad pa dang / bcing ba dang / chad pas gcad pa dang / gnod pa byed du gzhug pa'i phyir yang dgra rnams kyi dgra sbyin par mi byed do/ /mdor bsdu na byang chub sems dpa' ni sems can rnams kyi dga' ba dang rtsed mo'i dngos po sems can pha rol la gnod par 'gyur ba dang / sems can pha rol la sdug bsngal bar 'gyur ba gang ci yang rung ba de thams cad slong ba rnams la sbyin par mi byed do//glang po che dang rta dang shing rta dang 'degs pa dang / bzhon pa rnams dang / gos dang / rgyan rnams dang / bza' ba dang / btung ba dang / bsod pa rnams dang / gar dang / glu dang / rol mo'i sgra bslab pa rnams dang / gar dang / glu dang rol mo'i sgra'i cha byad rnams dang / spos dang me tog phreng ba dang / byug pa sna tshogs dang / snod spyad sna tshogs dang / skyed mos tshal dang / khang khyim dang dga' mgur spyad pa'i bud med rnams dang / bzo dang las kyi gnas rnam pa sna tshogs bslab pa gang yin pa de dag dang / de lta bu'i dga' ba dang / rtsed mo'i dngos po gang yin pa rnams ni byang chub sems dpa' sems dga' bar bya ba'i phyir slong ba rnams la sbyin par byed do/ /byang chub sems dpa' ni nad pa slong du zin kyang / kha zas dang btung ba tshod ma zin pa'am/ gnod par 'gyur ba sbyin par yang mi byed do//sems can brkam pa'i rang bzhin can 'grangs pa rnams la bza' ba dang / btung ba bsod pa sbyin par yang mi byed do/ /sems can mya ngan gyis gdungs pa rnams rang 'geg par byed pa'am/ rdeg par byed pa'am/ dug 'thung ba'am/ g.yang du mchong ba la yang dga' mgur byed du mi 'jug go//byang chub sems dpa' ni slong ba rnams la pha ma thams cad kyis thams cad du sbyin par yang mi byed de/ 'di ltar byang chub sems dpa'i pha ma ni bla ma lta bu'i mchog yin te/ nu ma snun pa dang / gso ba dang skyed pa yin pas de'i phyir byang chub sems dpas yun ring por spyi bo la khyer na yang skyo bar mi bya ste/ spu gta' dang gtar gzhug pa dang / gtso bo'i tshul gyis bdag nyid kyang de gnyis la sbyin zhing dbang ba dang / rag lus par bya ba yin na/ byang chub sems dpas gzhan dag la ji ltar sbyin par sems te/sbyin pa lta ga la byed/ byang chub sems dpa' ni rgyal po spyi bo nas dbang bskur ba po'i bdag por gyur na yang / bdag gi ris su gtogs pa'i sems can yongs su 'dzin pa dang bcas pa rnams kyi gzhan gyi bu dang chung ma gzhan dag las phrogs te gzhan dag la sbyin par mi byed kyi nga la ji ltar gyur pa ltar de dag la yang de bzhin du gyur cig snyam nas grong ril po'am/grong gi phyogs 'ga' 'am / phyogs ril po'am/ ljongs kyi phyogs 'ga' longs spyod du bya bar sbyin pa sbyin par zad do/ /byang chub sems dpa' ni bdag gi bu dang chung ma dang /bran dang bran mo dang las byed pa dang / zho shas 'tsho ba dang / yongs su zin pa rnams legs par brda ma sprad pa dang / mi 'dod bzhin pa dang / yid mi dga' bzhin du gzhan 'dod pa rnams la sbyin par yang mi byed do/ /legs par brda sprad de yid dga' zhing 'dun par gyur du zin kyang /mi mdza' ba rnams dang / gnod sbyin rnams dang / srin po rnams dang / brjed ngas pa rnams la sbyin par mi byed do/ /bu dang chung ma dang skyid de bar 'dug pa'i rigs kyi bu mi'i bran du sbyin par mi byed do/ /byang chub sems dpa' ni slong ba po shas cher gzhan la gnod pa byed par zhugs shing brjed ngas pa rnams la rgyal srid sbyin par yang mi byed do//gal te dbyung ba'i mthu yod na de 'dra ba'i gang zag ni rgyal srid las kyang 'byin par byed do/ /byang chub sems dpa' ni pha ma'i longs spyod sogs te slong ba rnams la sbyin par yang mi byed do//pha ma ji lta ba bzhin du bu dang / chung ma dang / bran dang bran mo dang / las byed pa dang / zho shas 'tsho ba rnams kyi yang de dang 'dra'o/ /pha ma la gnod pa byas nas rgyas par las byed pa dang / zho shas 'tsho ba'i bar dag la gnod pa byas nas pha rol slong ba rnams la sbyin par bya ba'i dngos po yongs su gtong bar yang mi byed do//byang chub sems dpa' ni chos kyis bab chol ma yin par longs spyod rnams bsgrubs nas sbyin pa sbyin par byed kyi/ chos ma yin bas ma yin/ bab chol du ma yin/ pha rol la gnod par byas shing nyam nga bar byas pas kyang ma yin no//sangs rgyas bcom ldan 'das rnams kyi bstan pa la gnas pa'i byang chub sems dpa' ni ji lta bur yang bslab pa las 'gal bar byas te sbyin pa sbyin par mi byed do/ /byang chub sems dpa' ni sbyin pa sbyin pa na yang mdza' bshes dang / dgra bo dang / tha mal pa rnams dang /yon tan can rnams dang / skyon can rnams dang / dman pa rnams dang / mtshungs pa rnams dang / khyad du 'phags pa rnams dang / skyid pa rnams dang / sdug pa rnams la yon gnas yin pa'i sems nye bar gzhag ste/ sems can thams cad la snyoms pa'i sems kyis sbyin pa sbyin par byed do//byang chub sems dpa' ni ji skad smras pa dang / ji ltar dam bcas pa las bskyungs te slong ba la sbyin par mi byed kyi/ mtshungs pa'am lhag pa kho nar byed do/ /byang chub sems dpa' ni dngos po bzang po sbyin par dam bcas na ngan pa dang / tha chad sbyin par mi byed kyi/ngan pa dang tha chad sbyin par dam bcas su zin kyang / bzang po yod na bzang po 'ba' zhig sbyin par byed do/ /byang chub sems dpa' ni yid mi dga' ba dang / khros pa dang / yid 'khrugs pas sbyin pa sbyin par yang mi byed do/ /sbyin pa byin nas kyang yang dang yang du brjod cing /khyod ni 'di dang 'di lta bur ngas sbyin pas phan gdags so zhe 'am/ bskyed do zhe 'am/ drangs so zhes smos par yang mi byed do/ /byang chub sems dpa' ni mi ngan pa la sbyin pa sbyin na yang brnyas shing ma gus par sbyin par yang mi byed na/yon tan can la lta ci smos/ byang chub sems dpa' ni slong ba po log par bsgrub pa rnam pa sna tshogs la gnas pa/ rgod pa bdag nyid ma bsdams pa/ gshe ba khro ba/ spyo 'debs pa rnams kyi log par bsgrubs pas skyo ba'i yid kyis sbyin pa mi sbyin par yang mi byed kyi/byang chub sems dpa' ni de dag nyid las shas cher nyon mongs pas brlabs pa'i rang bzhin can yin par rtogs nas/ snying brtse ba'i sems kho na nye bar gzhag ste sbyin pa sbyin par byed do/ /lta ba ngan pa mchog tu 'dzin cing sbyin pa sbyin par yang mi byed de/ 'di lta ste/ gnod pa chen po'i mchod sbyin rnams dang / 'tshe ba'i sbyin pas chos su 'gyur bar mi 'dzin pa dang / dge mtshan dang bkra shis dang sbyar te sbyin pa sbyin par yang mi byed do/ /rnam pa thams cad kyi sbyin pa tsam shin tu rnam par dag pas kyang 'jig rten pa dang / 'jig rten las 'das pa'i 'dod chags dang bral ba rnam par dag par 'gyur bar yang mi 'dzin te/sbyin pa ni rnam par dag par 'gyur ba'i tshogs tsam 'ba' zhig yin par 'dzin to/ /'bras bu la lta zhing sbyin par mi byed de/ sbyin pa thams cad kyang bla na med pa yang dag par rdzogs pa'i byang chub tu yongs su sngo bar byed do/ / sbyin pa rnam pa thams cad kyi 'bras bu rnam pa thams cad rnam par smin pa yang dag pa ji lta ba bzhin du mthong zhing mngon par yid ches pa skyes pa'i byang chub sems dpa' ni gzhan gyi dring mi 'jog cing / gzhan gyis bkri ba med par sbyin pa sbyin par byed de/ dper na/ zas byin pas ni stobs can 'gyur//gos byin pas ni kha dog ldan/ /bzhon pa byin pas bde 'gyur brtan/ /mar me byin pas mig dang ldan/ /zhes bya ba la sogs pa rgyas par rig par bya'o/ /byang chub sems dpa' ni dbul por 'gyur du dogs pa'i 'jigs pas sbyin pa sbyin par yang mi byed do//snying rje'i bsam pa kho na 'ba' zhig gis sbyin par byed do/ /byang chub sems dpa' ni slong ba rnams dang mi mthun pa'i sbyin pa sbyin par yang mi byed de / 'di lta ste/ sdom pa la brtson pa rnams la zas dang skom lhag mar gyur pa'am phyis dang / gcin dang mchil ma dang snabs dang skyugs pa dang rnyang bu dang rnag dang /khrag gis 'bags pa'am/ zhag lon pa'i khongs su ma bsnyad ma sbran 'bras chan dang nas chan dor bar 'os pa'am/ de bzhin du sgog btsong mi za ba dag la sgog btsong gis 'bags pa'am/ de bzhin du sha mi za ba'am/ chang mi 'thung ba dag la chang dang 'dres shing chang dang 'bags pa dang /de bzhin du mi mthun pa'i las byed du 'jug cing / byang chub sems dpa' gzhan dag la sbyin pa sbyin par yang mi byed de/ de lta bu dang mthun pa rkyen du mi 'bab pa'i sbyin pa sbyin par mi byed do/ /byang chub sems dpa' ni slong ba po yang dang yang bslang dgos pa dang /slong zhing phyir 'ong du gzhug pa dang / rnyed pa 'tshol ba'i tshul gyis nyon mongs shing sbyin pa sbyin par yang mi byed de/ bslangs ma thag kho nar sbyin par byed do/ /byang chub sems dpa' ni grags pa dang sgra dang / tshigs su bcad pa la brten cing sbyin pa sbyin par yang mi byed do /pha rol las lan 'ong pa la brten pa dang / brgya byin nyid dang bdud nyid dang / 'khor los sgyur ba nyid dang / dbang phyug la brten cing sbyin pa sbyin par yang mi byed do/ /pha rol rgyal po'am/ zhang blon chen po'am/ grong rdal gyi mi 'am/ ljongs kyi mi rnams dang / bram ze rnams dang / khyim bdag rnams dang / phyug po rnams dang / tshong dpon rnams dang / ded dpon rnams kyis gtod phod pa dang / sbyin bdag yin par shes nas bkur stir byed/ bla mar byed/ rim gror byed/ mchod par byed par gyur kyang ci ma rung snyam ste/gzhan dag la tshul 'chos pa'i phyir sbyin pa sbyin par yang mi byed do/ /bkren pa'i tshul du sbyin pa sbyin par yang mi byed de/ nyung ngu las kyang phal cher sbyin par byed na mang po las lta ci smos/ 'di sbyin pa 'dis brid de yid ches par byas la de'i 'og tu bslu bar bya'o snyam ste/gzhan dag la glags btsal ba'i phyir sbyin pa sbyin par yang mi byed do/ /'di lta ste/ sbyin pas grong ngam/ grong gi phyogs gcig gam/ ljongs sam ljongs kyi phyogs gcig gi dbyen byas te/ bdag po dag las phrogs nas bskur bar bya'o snyam du gzhan dag dang dbye ba'i phyir gzhan dag la sbyin pa sbyin par mi byed do//byang chub sems dpa' ni mkhas pa dang / le lo med pa dang / sgrub phod pa dang ldan zhing bdag nyid kyis sta gon du mngags pa yin te/ sbyin par bya ba'i phyir dngos po yongs su gtong ba'i sngon du 'gro ba rang gis kyang sbyin par byed la/gzhan dag kyang sbyin du 'jug cing bdag nyid snyom las byed par bstan te gzhan dag sbyin du 'jug cing mngag par yang mi byed do/ /slong ba'i tshogs chen po 'dus pa dang / tshul khrims dang ldan pa'am/ tshul khrims 'chal pa rnams 'dus shing 'khod par shes nas/rgan rims nas gzhon rims kyi bar du gral rim bzhin du yang dang yang du 'gro zhing 'ong ste/ sbyin par bya ba'i dngos po thams cad sbyin par byed do/ /byang chub sems dpa' ni longs spyod mang po rgya che zhing rgyas pa yod bzhin du sbyin pa nyung ngu sbyin par mi byed do/ /gzhan dag la 'tshe ba'i phyir gzhan dag la sbyin pa sbyin par mi byed/gshe ba'am/ khro ba'am/ brdeg pa'am/ bsdigs pa'am/ smad pa'am/ gsad pa'am/ bcings pa'am / chad pas bcad pa'am/ go rar gzhug pa'am/ bskrad pa'i phyir sbyin pa sbyin par mi byed do/ /byang chub sems dpa' ni sbyin pa'i snga rol nyid nas kyang yid dga' la/sbyin pa'i tshe yang sems dga' bar byed cing / byin nas kyang 'gyod pa med do/ /nor bu dang / mu tig dang / bai DUr+ya dang / dung dang / man shel dang / byi ru la sogs pa 'dra bar bcos pa rnams kyang / de 'dod pa'i sems can rnams la g.yo sgyu'i sbyin pa sbyin par mi byed do//byang chub sems dpa'i sbyin pa ni sbyin par bya ba'i dngos po nyung du'am mang po ci yang rung ste/ snga nas sems kyis sems can thams cad la ma btang ba med de/ phyis slong ba pos bdag gi nor brnyan por btang ba byang chub sems dpa' las phyir 'gugs pa bzhin no/ / byang chub sems dpa' ni dus su sbyin pa sbyin par byed kyi/ dus ma yin par ni ma yin no/ /bdag dang pha rol la rung ba sbyin par byed kyi mi rung ba ni ma yin no/ /tshul bzhin du byed kyi tshul bzhin ma yin par ni mi byed do/ /sems ma g.yengs pas sbyin par byed kyi sems g.yengs pas ni ma yin no//byang chub sems dpa' ni slong ba la 'phya bar mi byed sting bar mi byed cing / de spa 'gong bar yang mi byed do/ /khro gnyer can du mi byed de/ bzhin gyi mdangs gsal zhing / sngar 'dzum la gsong por smra bar byed do/ /sbyin pa brgyangs te sbyin par mi byed kyi la gor du myur du sbyin par byed do//byang chub sems dpa' ni ma bslangs par bdag nyid kyis skabs phye zhing / gzhan dag la su ci 'dod pa de la de sbyin par byed do/ /rang rang gis bslangs pa de dag la yang rjes su gnang bar byed do/ /byang chub sems dpa' ni 'chal pa'i shes rab kyis sbyin pa sbyin par mi byed de/sbyin pa na shes rab can gyi sbyin pa kho na sbyin par byed do/ /byang chub sems dpa'i shes rab can gyi sbyin pa gang zhe na/ 'di la byang chub sems dpa' ni sbyin par bya ba'i chos dag yod de bdog na slong ba ma 'ongs pa'i sngon rol nyid nas sems 'di snyam du mngon par 'du byed de/ gal te skyid cing bkren pa ma yin la phongs pa ma yin pa mgon dang bcas rten dang bcas pa dang sdug cing bkren phongs pa mgon med pa rten med pa rnam pa gnyis shig bdag la slong du 'ongs na/de la bdag gis gal te gnyi ga yang tshim par bya ba dang / 'dod pa bzhin du yongs su bskang ba'i longs spyod 'byor na ni/de'i tshe bdag gis gnyi ga yang tshim par bya zhing / gnyi ga'i 'dod pa yongs su bskang bar bya'o/ /gal te bdag gis gnyi ga tshim par bya'am/ 'dod pa bzhin du yongs su bskang bar bya ba'i longs spyod ma 'byor na ni/ skyid pa shos btang ste/ sdug pa shos la sbyin pa sbyin par byed do / /bkren pa ma yin zhing phongs pa ma yin la/ mgon dang bcas rten dang bcas pa btang ste/ bkren zhing phongs pa mgon med pa dang rten med pa la sbyin pa sbyin par bya'o snyam mo/ /des de ltar sems mngon par 'du byas nas/ ji ltar mngon par 'du byas pa de kho na bzhin du las su sgrub par byed do//gal te slong ba skyid pa shos kyi 'dod pa bzhin du yongs su bskang ma nus na yang des bdag gi sems mngon par 'du byed pa'i rtog pa snga ma de nyid la brten te/ slong ba de la 'di skad du sdug pa 'di la sbyin par byed pa'i dngos po 'di ngas snga nas btang zin te/snga nas yi dam du bcas pa'i phyir ngas 'di la sbyin pa yin gyi/ khyod la sbyin par mi 'dod pa ni ma yin no/ /de bas na bzhin bzangs khyod ngo bzlog go snyam du nga la ma sems shig ces shad kyis sbyong bar byas te gtong bar byed do/ /gzhan yang byang chub sems dpa' sbyin par bya ba'i chos dag yod de bdog na ser sna can gyi khyim dang /mchog tu ser sna can gyi khyim yo byad rnams kun du 'dzin cing 'jungs la lan 'ga' yang dge sbyong dang bram ze rnams la sbyin par bya ba'i chos rnams gtong ma myong ba'i khyim de dag tu byang chub sems dpa' song nas yang dag par mgu bar bya zhing bag phebs par bya ste/'di skad du/ kye tshur shog /khyed nor 'god pa med par nga la phan gdags pa chen pos nye bar gnas par gyis shig /nga'i khyim na longs spyod rgya chen po dang sbyin par bya ba'i chos rgya chen po dag yod de/nga ni sbyin pa'i pha rol tu phyin pa yongs su rdzogs par bya ba'i phyir slong ba po 'dod kyis/ gal te khyed kyis slong ba dang phrad na bzlog te ma btang bar yang na ni nga'i nor sbyin par bya'i chos las long la / de dag la ci bder byin cig yang na ni slong ba de dag nga'i thad du khrid de shog shig / ngas sbyin pa sbyin pa la rjes su yi rang bar gyis shig ces bsgo'o/ /de dag gis kyang de las thos nas nor mi 'god cing / dga' bar byas nas rigs kyi bu 'di bdag cag la sems dga' bar 'gyur ro snyam ste/ de bzhin du byed par 'gyur ro/ /de ltar byang chub sems dpa' des de dag la phyi ma la ser sna'i dri ma bsal ba'i sa bon btab pa yin te/rim gyis goms par byed pa de dang / shes rab sngon du 'gro ba'i thabs la mkhas pa des na/ rang rang gis kyang nor nyung ngu sbyin par byed cing / ma chags pa chung ngu la brten nas 'bring thob par 'gyur la/ 'bring la brten nas chen po thob par 'gyur ro//gzhan yang byang chub sems dpa' de'i mkhan po dang slob dpon dang / lhan cig gnas pa'i slob ma dang / tshangs pa mtshungs par spyod pa gang dag chags pa'i rang bzhin can dang / brkam pa'i rang bzhin can yin nam/ gang dag brkam pa'i rang bzhin can ma yin yang sbyin par bya ba'i chos med de/'dod pas phongs par 'gyur na de la byang chub sems dpa' sangs rgyas la brten pa'am/ chos dang dge 'dun la brten te/ sbyin pa las byung ba'i bsod nams bya ba'i dngos po byed par 'dod pas/ sbyin par bya ba'i chos de rnams de dag nyid la sbyin zhing /de dag byed du 'jug ste bdag nyid mi byed do/ /de ltar byas pas byang chub sems dpa' des bdag nyid kyis kyang bsod nams shin tu mang du skyed pa yin/ tshangs pa mtshungs par spyod pa de kha cig gi nyon mongs pa yang btul ba yin te/ de kha cig ni chos 'dod pa yang yongs su rdzogs par byas pa yin te/sems can bsdus pa dang / sems can yongs su smin par byas par yang 'gyur ro/ /gzhan yang byang chub sems dpa' ni sbyin par bya ba'i chos dag yod de bdog na/ slong ba po'i bsam pa mtshan ma tsam gyis rtogs na yang / ci 'dod pa sbyin par bya ba'i chos rnams sbyin par byed do//gang zhig 'di sgyu tshong gis brid par bya'o snyam ste/ de'i thad du 'ongs na yang de'i bsam pa rtogs nas/ de'i nyes par spyod pa gzhan dag la yang 'chab par byed na/ de nyid la lta ci smos te/ de'i 'dod pa yongs su rdzogs par byed la/ ci nas kyang de skyengs par mi 'gyur ba dang / mgu zhing 'jigs pa med pa dang / yid dga' bar gyur pas phyir 'gro bar byed do/ /gang gis byang chub sems dpa' g.yo sgyus brid par gyur la/ brid pa de yang des sngar ma rtogs te phyis rtogs par gyur na yang / 'brid pa'i gang zag de la gzhi des gleng ba'am dran par mi byed la de'i sgyu thabs kyis ma byin par len pa de dag thams cad la yang bsam pas rjes su dga' bar byed de/de lta bu dang mthun pa yang byang chub sems dpa'i sbyin par bya ba'i chos yod de bdog pa rnams shes rab can gyi sbyin pa yin par rig par bya'o/ /gzhan yang byang chub sems dpa' ni sbyin par bya ba'i chos dag med de mi bdog na'ang /byang chub sems dpa' bzo dang las kyi gnas de dang de dag la sbyangs pa de bzo dang las kyi gnas de lta bu mngon du byed cing / des tshegs chung ngus nor gyi phung po chen po bsgrubs te gnas so/ /yang na byang chub sems dpa' gtam sna tshogs dang / snyan pa'i gtam dang / spobs pa dge ba dang ldan pa ci nas sems can dbul po rnams kyang sbyin par byed 'dod par gyur na/ phyug po rnams lta smos kyang ci dgos pa dang / ser sna can rnams kyang sbyin par byed 'dod par gyur na/ gtong ba'i rang bzhin can rnams lta smos kyang ci dgos pa de ltar gzhan dag la chos ston par byed do//yang na slong ba po lhags shing lhags pa rnams dad pa dang ldan pa'i khyim gang dag na longs spyod rgya chen po dang ldan pas/ nyin gcig bzhin du sbyin par bya ba'i chos kho na la 'jug pa'i khyim de dag tu gtong bar byed do/ / bdag nyid kyang sbyin pa sbyin zhing bsod nams byed pa dag tu song nas/ mkhas pa dang le lo med pa dang sgrub phod pas sems mngon par dga' bar byas nas lus dang ngag gis ci nus ci lcogs kyis nyams su len par byed la/ sbyin pa de yang slong ba rnams la legs par sbyin par byed do/ / de ltar na ngo ma snyoms pa'am/ tshul ma yin pa'am/ brjed ngas pas zhal ta byed pa dang mi mthun pa'i phyir sbyin pa de nyes bar byin pa gang yin pa de med par 'gyur/ de ltar na byang chub sems dpa' ni ji srid du bsam pa rnam par dag pa ma thob kyi bar du longs spyod dag med de/ mi bdog bzhin du shes rab can gyis sbyin pa sbyin par byed pa yin no//byang chub sems dpa' lhag pa'i bsam pa rnam par dag pa ni ji lta bus ngan song las yang dag par 'das pa thob par 'gyur ba de lta bur tshe rabs thams cad du longs spyod zad mi shes pa thob par 'gyur ro/ /gzhan yang byang chub sems dpa' ni mu stegs can glags tshol ba la chos khas 'chad pa'am/glegs bam du byas pa'ang sbyin par mi byed do/ /chags pa'i rang bzhin can glegs bam 'tshong bar 'dod pa'am sbed par 'dod pa'am/ de shes pas don du gnyer ba ma yin pa la yang sbyin par mi byed do/ /shes par 'dod pa la ni gal te glegs bam bdag la dgos pa'i don byas zin na de la ci bder sbyin par byed do//gal te des gang gi don du glegs bam de bsgrubs pa'i don ma grub na ni 'di ltar byang chub sems dpa' des dpe gzhan ma mthong na sbyin par byed do/ /yang na gzhan bris te sbyin par byed do//gal te dpe gzhan yang ma mthong ngam/ 'dri yang mi nus na ni des thog ma kho nar bdag gi sems la brtag par bya ste/ bdag gi sems chos la ser sna byed pa'i dri mas kun nas dkris par ma gyur grang / bdag chos bris pa snying nas sbyin par mi 'dod pa kho na ma yin grang snyam du brtag par bya'o//gal te des de ltar brtags pa na bdag la chos la ser sna byed pa'i dri ma cung zad kun du spyod pa yang yod do snyam du shes na ni/ byang chub sems dpa' des 'di snyam du gal te bdag chos kyi sbyin pa 'dis tshe 'di la lkugs pa kho nar gyur na yang bdag gis nyon mongs pa dang du blang bar mi bya ste/chos kyi sbyin pa nges par sbyin dgos par 'gyur na ye shes kyi tshogs med par 'gyur ba lta ci smos snyam du sems mngon par 'du byas te/ chos kyi sbyin pa de nges pa kho nar sbyin par bya'o/ /gal te de ltar rtog pa na bdag la ni chos la ser sna byed pa'i dri ma cung zad kun du spyod pa yang med do snyam du shes na ni/byang chub sems dpa' des 'di ltar brtag par bya ste/ bdag gis ni nyon mongs pa gzhom pa'i phyir ram/ ye shes kyi tshogs yongs su rdzogs par bya ba'i phyir ram/ sems can dga' bar bya ba'i phyir chos kyi sbyin pa 'di sbyin par byed pa yin na ngas nyon mongs pa yang ma mthong la/ma byin na tshe 'di dang phyi ma la ye shes kyi tshogs che bas mang du mthong la/ byin na ni rtogs pa chen por mi 'gyur zhing / tshe phyi ma la chos kyi rnyed pa chen por 'gyur gyi chung ba ma yin la/ ma byin na ni ngas sems can thams cad la phan pa dang bde bar bya ba'i phyir ye shes bsgrubs pas/sems can 'di dang sems can gzhan thams cad dga' bar byed par 'gyur gyi/ byin du zin na ni sems can 'di gcig pu dga' bar 'gyur ro snyam ste/ de ltar yang dag pa ji lta ba bzhin du shes nas gal te byang chub sems dpa' ma byin na ni kha na ma tho bar yang mi 'gyur/'gyod par yang mi 'gyur/ byang chub sems dpa'i tshul las kyang 'gal bar mi 'gyur ro/ /ji ltar mi 'gyur zhe na/ byang chub sems dpa' ni slong ba la khyod la mi sbyin no zhes tshig brlang pos phyir zlog par mi byed mod kyi/ 'on kyang thabs mkhas pas de brda sprad de gtong bar byed do//de la thabs mkhas pa ni 'di yin te/ byang chub sems dpa' ni yo byad thams cad dang / sbyin par bya ba'i chos thams cad thog ma nas phyogs bcu'i sangs rgyas dang byang chub sems dpa' rnams la bsam pa rnam par dag pas phul zhing bsngos zin te/dper na dge slong gis slob dpon nam mkhan po la chos gos bsngo ba bzhin no/ /des de ltar bsngos pa'i phyir yo byad dang / sbyin par bya ba'i chos sna tshogs rgya chen po thams cad bsags su zin kyang / 'phags pa'i rigs la gnas pa'i byang chub sems dpa' zhes bya'o//bsod nams dpag tu med pa yang 'phel bar 'gyur ro/ /de'i bsod nams de yang rtag tu de la lan mang du yid la byed pas dus thams cad du ldan par mngon par 'phel bar 'gyur ro/ /des sbyin par bya ba'i chos de dag kyang sangs rgyas dang byang chub sems dpa' rnams kyis gtams te gzhag pa dang 'dra bar 'chang bar byed de/gal te slong ba po mthong ba de la sbyin par bya ba'i chos ci 'dod pa sbyin par 'os pa zhig mthong na ni des sangs rgyas dang byang chub sems dpa' rnams kyis sems can rnams la yongs su ma btang ba gang yang med do snyam du shes par byas nas slong ba po'i 'dod pa yongs su rdzogs par byed do//gal te 'os pa ma yin par mthong na ni des rtog pa de nyid la brten nas bzhin bzangs dag 'di ni gzhan gyi yin te/ khyed la sbyin par gnang ba med do zhes de la tshig 'jam pos go bar byed do//yang na gzhan de'i nyis 'gyur ram sum 'gyur sbyin zhing rim gro dang bkur stir byas nas gtong bar byed de/ ci nas de byang chub sems dpa' 'di ni chags pa'i rang bzhin can du gyur te/ bdag cag la sbyin par mi 'dod pa ma yin gyi/ 'di ni glegs bam gyi chos 'di sbyin pa'i dbang med pa zhig yin gor ma chag ste/de'i phyir sbyin par mi byed do snyam du shes par byed de/ 'di yang byang chub sems dpa'i chos kyi sbyin pa las brtsams te/ shes rab can gyi sbyin pa yin par rig par bya'o/ /gzhan yang byang chub sems dpa' ni chos dang zang zing gi rang bzhin gyi sbyin pa thams cad ni rnam grangs dang /mtshan nyid dang / nges pa'i tshig dang rgyu dang 'bras bu dang rab tu dbye ba las kyang / yang dag pa ji lta ba bzhin du rab tu shes nas sbyin par byed de/ 'di yang byang chub sems dpa' shes rab can gyi sbyin pa yin par rig par bya'o/ /gzhan yang byang chub sems dpa' ni sems can gnod pa byed pa rnams la ni byams pa'i bsam pas sbyin pa sbyin par byed do//sdug bsngal ba rnams la ni snying rje'i bsam pa dang yon tan can rnams la ni dga' ba'i bsam pa dang / phan 'dogs pa rnams la ni mdza' bshes dang / snying du sdug pa rnams la ni btang snyoms kyi bsam pas sbyin pa sbyin par byed de/ 'di yang byang chub sems dpa' shes rab can gyi sbyin pa yin par rig par bya'o/ /gzhan yang byang chub sems dpa' ni sbyin pa'i gegs byed pa dang sbyin pa'i gegs byed pa'i gnyen po yang yang dag pa ji lta ba bzhin du rab tu shes so//de la sbyin pa'i gegs byed pa ni bzhi ste/ sngon ma goms pa dang / sbyin par bya ba'i chos nyung ste mi ldan pa dang / dngos po mchog dang yid du 'ong ba la zhen pa dang / phyi ma la longs spyod phun sum tshogs pa'i 'bras bu la lta zhing mngon par dga' ba'o//gang gi phyir byang chub sems dpa' sbyin par bya ba'i chos dag yod bzhin du slong ba po legs par 'ongs pa na sbyin pa la sems mi 'jug na/ de nyes pa 'di ni bdag ma goms pas lan no snyam du myur ba myur bar shes rab kyis rtogs par 'gyur zhing / 'di ltar yang bdag gis sngon sbyin pa ma byin pa gor ma chag ste/ des na bdag de ltar longs spyod rnams kyang yod la slong pa po yang legs par 'ongs bzhin du sbyin pa la sems mi 'jug go/ /gal te de ltar so sor brtags nas sbyin pa ma byas na phyi ma la yang bdag sbyin pa la zhe sdang bar 'gyur ro snyam du rtogs par 'gyur te/des de ltar rtogs nas kyang sbyin pa'i gegs byed pa'i gnyen po la brten nas so sor rtog ste/ sbyin par byed kyi ma goms pa las gyur pa'i nyes pa'i rjes su 'brang zhing de'i dbang du 'gro ba ma yin no/ /gzhan yang gal te slong ba po legs par 'ongs la longs spyod chung bas sbyin pa la byang chub sems dpa'i sems mi 'jug na/des sbyin pa'i gegs byed pa'i rgyu phongs pa las gyur pa des myur ba myur bar shes rab kyis rtogs nas/ phongs pa las gyur pa'i sdug bsngal de dang du blangs te/ so sor brtags nas snying rjes sbyin pa sbyin par byed de/de 'di snyam du 'khor ba na pha rol la phan ma btags par sngon gyi las kyi nyes pa'am/ gzhan gyis dbang byas pas bdag gis bkres pa dang skom pa la sogs pa'i sdug bsngal mi bzad brlag pa mang du myong bar 'gyur gyis/ gal te tshe 'di'i sdug bsngal gzhan la phan 'dogs pa'i rgyu sbyin pa las byung ba des bdag 'chi zhing dus byed par gyur du zin kyang /bdag la sbyin pa kho na legs par 'gyur gyi/ slong ba po phyir bzlog pa ni de lta ma yin te/ de med du zin kyang kha cig sngo rngad ci yang rung ba tsam gyis 'tsho'o snyam du sems te/ de ltar byang chub sems dpa' phongs pa las gyur pa'i sdug bsngal de dang du blangs nas sbyin pa sbyin par byed do//gzhan yang slong ba po legs par 'ongs pa na/ gal te sbyin par bya ba'i dngos po shas cher yid du 'ong zhing mchog tu gyur pa'i phyir sbyin pa la byang chub sems dpa'i sems mi 'jug na/byang chub sems dpa' zhen pa las gyur pa'i nyes pa de myur ba myur bar shes rab kyis rtogs nas/ bdag sdug bsngal la bde ba'o snyam du bdag gi 'du shes phyin ci log pa 'di ni phyi ma la sdug bsngal ba bskyed pa yin no snyam du phyin ci log tu yongs su shes nas/de spangs te so sor brtags nas dngos po de sbyin par byed do/ /gzhan yang byang chub sems dpa' de sbyin pa byin nas / sbyin pa'i 'bras bu longs spyod chen po'i phan yon la lta bar gyur te/ bla na med pa yang dag par rdzogs pa'i byang chub kyi phan yon la mi lta bar gyur na/ byang chub sems dpas log pa'i 'bras bu la lta ba las gyur pa'i nyes pa de myur ba myur bar shes rab kyis rtogs nas/ 'du byed thams cad snying po med pa nyid du yang dag pa ji lta ba bzhin du so sor brtags te / 'du byed thams cad ni skad cig la 'jig pa'i ngang can no/ /'bras bu longs spyad pa rnams ni yongs su zad nas 'jig pa'i ngang can dang 'bral bas 'jig pa'i ngang can no snyam ste/de de ltar so sor rtog pa na 'bras bu la lta ba spangs nas sbyin pa gang ci sbyin pa yang rung te / de thams cad byang chub chen por yongs su bsngos pa kho nas sbyin par byed de/ 'di ni byang chub sems dpa'i sbyin pa la gegs byed pa rnam pa bzhi dang /sbyin pa la gegs byed pa'i gnyen po rnam pa bzhi shes pa yin par rig par bya ste/ rtogs pa dang / sdug bsngal dang du len pa dang / phyin ci log yongs su shes pa dang / 'du byed la snying po med pa nyid du lta ba'o/ /de la gnyen po shes pa snga ma rnam pa gsum gyis ni byang chub sems dpa' nges par legs par sbyin pa sbyin par byed do//gnyen po shes pa tha ma gcig gis ni yang dag pa'i bsod nams kyi 'bras bu yongs su 'dzin par byed do/ /'di yang byang chub sems dpa'i shes rab can gyi sbyin pa yin par rig par bya'o//gzhan yang byang chub sems dpa' ni dben par song ste/ nang du bsdus nas bsam pa dag cing snying thag pa nas dang bas kun du rtog pa dag gis sbyin par bya ba'i chos rnam pa sna tshogs rgya chen po dpag tu med pa dag mos shing sems can rnams la sbyin pa bstabs par 'dod de/des byang chub sems dpa' tshegs chung ngus bsod nams dpag tu med pa 'phel bar 'gyur ro/ /'di yang byang chub sems dpa' shes rab can gyi sbyin pa yin par rig par 'gyur te / 'di ni byang chub sems dpa' shes rab can shes rab chen po dang ldan pa'i shes rab can gyi sbyin pa yin no//de ltar mdor bsdu na zang zing gi sbyin par gtogs pa'i sbyin par bya ba'i chos bdog pa rnams dang / mi bdog pa rnams dang / de bzhin du chos kyi sbyin pa la brten pa dang / so sor yang dag par rig pa la brten pa dang / lhag pa'i bsam pa rnam par dag pa'i sbyin pa la brten pa dang / sbyin pa la gegs byed pa'i gnyen po shes pa la brten pa dang / lhag pa'i bsam pas mos pa'i sbyin pa la brten pa ni/ byang chub sems dpa' kho na'i ma 'dres pa yin par rig par bya ste/ byang chub sems dpa'i nang dang phyi rol gyi dngos po thams cad sbyin pa'i rab tu dbye ba rgyas pa ni de lta bu yin par rig par bya'o//'di man chad dka' ba'i sbyin pa la sogs pa gzhan thams cad ni thams cad kyang sbyin pa 'di nyid kyi rab tu dbye ba yin par rig par bya'o/ /de la byang chub sems dpa'i dka' ba'i sbyin pa gang zhe na/byang chub sems dpa' sbyin par bya ba'i dngos po chung ngu bdog na bdag nyid la gnod par byas te/ sdug bsngal dang du blangs nas gzhan dag la sbyin par byed pa gang yin pa 'di ni byang chub sems dpa'i dka' ba'i sbyin pa dang po'o/ /byang chub sems dpa' sdug pa'i dngos po rang bzhin gyis byams pa'am/yun ring po nas 'dris pa'am/ shas cher phan pa'am/ sbyin par bya ba'i dngos po mchog dang rab mchog tu gyur pa la zhen pa bsal nas/ gzhan dag la sbyin par byed pa gang yin pa 'di ni byang chub sems dpa'i dka' ba'i sbyin pa gnyis pa'o/ / byang chub sems dpa' sbyin par bya ba'i chos tshegs chen pos bsgrubs pa rnams gzhan dag la sbyin par byed pa gang yin pa 'di ni byang chub sems dpa'i dka' ba'i sbyin pa gsum pa'o/ /de la byang chub sems dpa'i thams cad kyi sgo nas sbyin pa gang zhe na/ byang chub sems dpa' bdag nyid kyi'am yang na gzhan dag la bslangs nas/sbyin par bya ba'i dngos po'am/ bdag gi tshal za ba dang / pha ma dang bu dang chung ma dang / bran dang / bran mo dang / las byed pa dang / zho shas 'tsho ba dang / mdza' bshes dang / gros grogs dang / nye du dang rgan rabs rnams sam/ yang na gzhan 'dod pa rnams la sbyin par byed pa gang yin pa rnam pa bzhi po 'di ni mdor bsdu na/byang chub sems dpa'i thams cad kyi sgo nas sbyin pa zhes bya'o/ /de la byang chub sems dpa'i skyes bu dam pa rnams kyi skyes bu dam pa'i sbyin pa gang zhe na/ byang chub sems dpa' ni dad pa dang / bkur sti dang / rang gi lag dar ba dang / dus la bab pa dang gzhan la mi gnad par sbyin pa sbyin par byed pa gang yin pa 'di ni/ byang chub sems dpa'i skyes bu dam pa rnams kyi skyes bu dam pa'i sbyin pa zhes bya'o/ /de la byang chub sems dpa'i rnam pa thams cad kyi sbyin pa gang zhe na/ mi brten par sbyin pa dang /mi sri bar sbyin pa dang / dga' bas sbyin pa dang / rgyun mi 'chad par sbyin pa dang / snod la sbyin pa dang / snod ma yin pa la sbyin pa dang / thams cad sbyin pa dang / kun la sbyin pa dang / dus thams cad du sbyin pa dang / kha na ma tho ba med pa'i sbyin pa dang / sems can gyi dngos po thams cad sbyin pa dang /yul gyi dngos po sbyin pa dang / nor dang 'bru'i dngos po sbyin pa dang / sbyin pa rnam pa bcu gsum po ni byang chub sems dpa'i rnam pa thams cad kyi sbyin pa zhes bya'o/ /de la byang chub sems dpa'i phongs shing 'dod pa la sbyin pa gang zhe na/ 'di la byang chub sems dpa' zas dang skom gyis phongs shing 'dod pa rnams la ni zas dang skom sbyin par byed pa dang /bzhon pa 'dod pa rnams la ni bzhon pa dang / gos 'dod pa rnams la ni gos dang / rgyan 'dod pa rnams la ni rgyan dang / snod spyad rnam pa sna tshogs 'dod pa rnams la ni snod spyad rnam pa sna tshogs sbyin par byed pa dang /spos dang / me tog dang / phreng ba dang / byug pa 'dod pa rnams la spos dang / me tog dang / phreng ba dang / byug pa dang / gnas 'dod pa rnams la ni gnas dang / snang bas phongs shing 'dod pa rnams la ni snang ba sbyin par byed pa dang / rnam pa brgyad po 'di dag ni byang chub sems dpa'i phongs shing 'dod pa la sbyin pa yin par rig par bya'o//de la byang chub sems dpa'i tshe 'di dang gzhan du bde bar 'gyur ba'i sbyin pa gang zhe na/ zang zing gi sbyin pa dang / chos kyi sbyin pa dang / mi 'jigs pa sbyin pa'i sbyin pa ni mdor bsdu na sems can rnams kyi 'di dang gzhan du bde bar 'gyur ba'i sbyin pa yin par rig par bya'o//zang zing gi sbyin pa de ni ser sna'i dri ma dang / gsog 'jog gi dri ma bsal nas/ bzang po dang / gtsang ma dang / rung ba sbyin par byed pa'o/ /de la ser sna'i dri ma bsal ba ni sems kyis kun du 'dzin pa yongs su gtang ba'i phyir ro/ /gsog 'jog gi dri ma bsal ba ni longs spyod kun du 'dzin pa yongs su btang bas yin par rig par bya'o//mi 'jigs pa'i sbyin pa ni seng ge dang / stag dang / chu srin 'dzin khri dang / rgyal po dang / chom rkun dang / chu la sogs pa'i 'jigs pa las yongs su skyob pa yin par rig par bya'o/ / chos kyi sbyin pa ni phyin ci ma log par chos ston pa dang / rigs par ston pa dang bslab pa'i gzhi yang dag par 'dzin du 'jug pa ste/ byang chub sems dpa'i sbyin pa rnam pa dgu po de dag thams cad gcig tu bsdus pa ni sems can rnams kyi tshe 'di dang gzhan du bde bar 'gyur ba'o//de la zang zing dang mi 'jigs pa'i sbyin pa rab tu dbye ba dang bcas pa ni tshe 'di'i bde ba'o/ /de la chos kyi sbyin pa rab tu dbye ba dang bcas pa ni gzhan na bde ba'o/ /de la byang chub sems dpa'i rnam par dag pa'i sbyin pa gang zhe na/ de ni rnam pa bcur rig par bya ste/ thogs pa med pa dang / mchog tu 'dzin pa med pa dang /bsags pa med pa dang / khengs pa med pa dang / mi brten pa dang / zhum pa med pa dang / ngan pa ma yin pa dang / rgyab kyis phyogs pa med pa dang / lan la mi lta ba dang / rnam par smin pa la mi lta ba'o/ /de la thogs pa med pa'i sbyin pa gang zhe na/ 'di la byang chub sems dpa' ni slong ba po legs par 'ongs na/mi skyo bar la gor du skyen par sbyin par byed de/ byang chub sems dpa' ji ltar sbyin pa las brtsams te/ skyen du byed pa de lta bur ni slong ba po rnyed pa las brtsams te de ltar skyen par mi byed do/ /mchog tu 'dzin pa med pa'i sbyin pa gang zhe na/ byang chub sems dpa' ni 'di ltar sbyin pa 'di'i 'bras bu med do zhe'am/'tshe ba'i sbyin pas chos su 'gyur ro zhe'am/ sbyin pa shin tu rdzogs pa tsam gyis 'jig rten pa dang / 'jig rten las 'das pa'i rnam par dag par 'gyur ro zhes lta bas mchog tu 'dzin par mi byed do/ /bstsags pa med pa'i sbyin pa gang zhe na/ byang chub sems dpa' ni sbyin par bya ba'i chos yun ring por bsags shing tshogs par byas nas/ phyis cig car sbyin pa sbyin par mi byed do/ /de ci'i phyir zhe na/ byang chub sems dpa' ni sbyin par bya ba'i chos dag yod bzhin du slong ba po legs par 'ongs pa phyir zlog par mi byed la/ gang gi phyir bzlog bzlog par bya ba'i 'os kyang mi mthong na stsogs par lta gal byed /byang chub sems dpa' ni bstsags pa'i sbyin pa las bsod nams 'du bya ba'i sgo lhag par 'gyur bar ma mthong ste/ sbyin par bya ba'i dngos po yang mtshungs la slong ba po snga phyi dang / mgo mnyam du 'ongs pa yang mtshungs pa rnams la mthar gyis sbyin pa'am/cig car sbyin pa na ci'i phyir bsod nams khyad par yod par yongs su 'dzin par 'gyur snyam du mthad pa'i phyir ro/ /gzhan yang byang chub sems dpas ni bstsags pa'i sbyin pa kha na ma tho ba dang bcas pa yin la/ longs spyod ji ltar byung ba bzhin du sbyin pa ni kha na ma tho ba med par mthong ngo //de ci'i phyir zhe na/ 'di ltar bsags pa'i sbyin pa byed pas ni slong ba po rnams kyis bslangs na / sngar slong ba po brgya phyir bzlog nas/ de dag gi kun nas mnar sems dang / mi bzod pa dang yid ma ches pa bskyed pa'i 'og tu ma bslangs bar yang kha cig la bstsags pa'i sbyin pa sbyin par byed pa'i phyir te/de lta bas na byang chub sems dpa' ni bsags te sbyin pa sbyin par mi byed do/ /khengs pa med pa'i sbyin pa gang zhe na/ byang chub sems dpa' ni slong ba po la dma' ba'i sems kyis sbyin pa sbyin par mi byed do/ /gzhan la 'gran pa'i phyir yang sbyin par mi byed do//sbyin pa byin nas kyang bdag ni gtong phod cing sbyin pa'i bdag po yin gyi/ gzhan dag ni de lta ma yin no snyam du sbyin pa des rlom sems su mi byed do/ /mi brten pa'i sbyin pa gang zhe na/ byang chub sems dpa' ni grags pa dang sgra dang tshigs su bcad pa la brten cing sbyin pa sbyin par mi byed de/grags pa ni rnam par rtog pa'i yi ge las byung ba dang / sgra tsam du 'brel ba dang / lo ma skam po lta bu yin par 'dzin pa yin pa'i phyir ro/ /zhum pa med pa'i sbyin pa gang zhe na/ 'di la byang chub sems dpa' ni sbyin pa'i snga rol nas yid dga' zhing / sbyin pa'i tshe yang sems dang bar byed la/byin nas kyang 'gyod pa med pa yin no/ /byang chub sems dpa' rnams kyi sbyin pa yangs shing mchog tu rgya che ba dag thos nas yang bdag nyid la khyad du gsod cing zhum par mi byed do/ /ngan pa ma yin pa'i sbyin pa gang zhe na/ byang chub sems dpa' ni sbyin par bya ba'i chos dag las nan tan du gdams shing /zas dang skom dang / bzhon pa dang gos la sogs pa'i mchog dang / rab mchog gang yin pa de dag sbyin par byed do/ /rgyab kyis phyogs pa med pa'i sbyin pa gang zhe na/ byang chub sems dpa' ni snyoms pa'i sems kyis mdza' bo dang dgra dang tha mal pa rnams la phyogs su 'byed pa med pas snyoms pa'i snying rjes sbyin pa sbyin par byed do//lan la mi lta ba'i sbyin pa gang zhe na/ byang chub sems dpa' snying rje'i sems dang / snying brtse ba'i sems dang ldan pa'i sbyin pa sbyin pa na/ pha rol lan du phan 'dogs su re ba med de / skye bo bde ba 'dod pa dang sred pa'i mes tshig pa dang mthu med pa dang /rang bzhin gyis sdug bsngal ba dag mthong ba'i phyir ro/ /rnam par smin pa la mi lta ba'i sbyin pa gang zhe na/ byang chub sems dpa' ni sbyin pa byin nas phyi ma la longs spyod phun sum tshogs pa'am/ lus phun sum tshogs par 'gyur bar sbyin pa'i 'bras bu rnam par smin pa la re ba med de/'du byed thams cad ni snying po med par lta la/ byang chub mchog la phan yon du lta ba'i phyir ro/ /rnam pa bcu po 'di dag gis byang chub sems dpa' rnams kyi sbyin pa ni rnam par dag cing shin tu rnam par dag par 'gyur ro/ /de ltar byang chub sems dpa' rnams sbyin pa rnam pa dgu po 'di dag la brten te/sbyin pa'i pha rol tu phyin pa yongs su rdzogs par byas nas/ bla na med pa yang dag par rdzogs pa'i byang chub tu mngon par rdzogs par 'tshang rgya bar 'gyur ro zhes gsungs so// // drang srong rgyas pas zhus pa'i mdo las kyang / de nas drang srong chen po rgyas pas thal mo sbyar te/bcom ldan 'das la 'di skad ces gsol to/ /bcom ldan 'das kyis thams cad mkhyen pa dang mthun pa'i rnam par smin pa skye dgu rnam la phan pa dang bde ba bgyid pa bstan lags so/ /bcom ldan 'das ji ltar tshul khrims 'chal pa dang / tshul khrims dang ldan pa la stsal na/ sbyin pa'i rnam par smin pa 'chab mi 'tshal ba lags/ bcom ldan 'das kyis bka' stsal pa/ drang srong chen po khyod sbyin pa'i rnam par smin pa la 'jug pa nyon cig /drang srong chen po dang bas gang cung zad ci sbyin pa de dag thams cad sbyin pa zhes bya'o/ /drang srong chen po gang yang 'jig rten pha rol gyis 'jigs pas snod la mi rtog par ma bslangs par yang tshul khrims dang ldan pa'am/ngan pa'i tshul khrims 'chal pa la dad pa bskyed nas mig phye ste/ sems can thams cad la mnyam pa'i sems kyis sbyin pa byin na/ drang srong chen po de ni sbyin bdag yin no/ /drang srong chen po gzhan yang sbyin pa lnga yongs su rdzogs par bya'o//lnga gang zhe na/ 'gron po dang / nad pa dang / nad g.yog dang / chos smra ba dang / yul gzhan du 'gro ba la dus su sbyin pa ste/ lnga po de dag go/ /gzhan yang lnga ste/ chos sbyin pa dang / zang zing sbyin pa dang / gnas sbyin pa dang / mar me sbyin pa dang / spos dang phreng ba sbyin pa'o/ /drang srong chen po rgyas pas gsol pa/ bcom ldan 'das sbyin pa yongs su dag pa gang lags/ bcom ldan 'das kyis bka' stsal pa/ gang dad pa bskyed de sems can thams cad la dmigs shing byams pa dang ldan pa'i sems kyis gus par byas te/dul bas sbyin pa sbyin na de thams cad yongs su dag pa yin no / /thar par bsngos te sbyin pa byin pa ni yongs su dag pa zhes bya'o/ /gzhan yang sbyin pa bla na med par lta ba lnga ste/ lnga gang zhe na/ de bzhin gshegs pa la sbyin pa byin pa ni bla na med pa yin no/ / dge 'dun la sbyin pa byin pa ni bla na med pa yin no/ /chos smra ba la sbyin pa byin pa ni bla na med pa yin no/ /nad pa la sbyin pa byin pa ni bla na med pa yin no/ /pha ma la sbyin pa byin pa ni bla na med pa yin no/ /gzhan yang sbyin pa chen por 'gyur ba ni/ rgyal po rgyal srid kyi dbang phyug las nyams pa la sbyin pa byin na sbyin pa chen po yin no//rgyal pos mnar ba dang / mgon med pa dang / nad pa la byin na sbyin pa chen po yin no/ /rgyal pos spangs nas gzhan na yang nyam nga zhing / srog chad la khad pa 'chi la thug pa las gsos na sbyin pa chen po yin no/ /na ba la sman byin na sbyin pa chen po yin no/ /tshul khrims phun sum tshogs pa'i 'phags pa'i dge 'dun la dus su sbyin pa byin na 'bras bu chen po yin no//ting nge 'dzin la snyoms par zhugs pa dang / shes rab phun sum tshogs pa dang / rnam par grol ba phun sum tshogs pa dang / rnam par grol ba'i ye shes mthong ba phun sum tshogs pa la sbyin pa byin na sbyin pa chen po yin no//dud 'gro'i skye gnas su song ba bya rog dang 'ug pa dang ri dgas la sogs pa la mi 'jigs pa byin na sbyin pa chen po yin no/ /gang la gang dgos pa dang / mi bdog pa de'i bsam pa yongs su rdzogs par byed pa ni sbyin pa chen po yin te/ drang srong chen po de ltar sbyin pa byin na yongs su dag pa dang sbyin pa chen po yin no//sbyin pa yongs su dag pa 'di dag 'dod pas de ltar sbyin pa yongs su dag par bsgom par bya'o/ /sems can gang dag gzhan dag gis de ltar bskul nas dad pa dang dang ba bskyed de/ sbyin pa yongs su dag pa 'di la rjes su yi rang bar 'gyur ba de dag mtshungs par bsod nams skyed pa po dang /sbyin bdag tu 'gyur te/ de ltar na gang rjes su yi rang ba dang / gang bskul ba de dag thams cad bsod nams skyed pa por mtshungs par 'gyur ro zhes gsungs so// // shes rab kyi pha rol tu phyin pa sdud pa tshigs su bcad pa'i mdo las kyang /chos rnams rang bzhin bdag med ya ma brlar shes nas/ /bdag gi sha yang gtong la zhum pa'i sems med na/ /de tshe phyi rol dngos po gtong ba smos ci dgos/ /gal te sar sna byed pa de ni gnas med do/ /bdag tu 'du shes dngos la bdag gir 'dzin pas chags/ /blun po rnams la gtong ba'i blo lta ga la yod//ser sna can ni yi dags gnas su skye bar 'gyur/ /ci ste mir skyes na yang de tshe dbul por 'gyur/ /de tshe byang chub sems dpa' sems can dbul shes nas/ /gtong la mos par 'gyur zhing rtag tu lhug par gtong / /gling bzhi legs par brgyan pa mchil ma'i thal ba 'dra//byin nas dga' bar 'gyur gyi gling thob de lta min/ /byang chub sems dpa' mkhas pa gsal bas srid gsum gyi/ /sems can ji snyed de dag kun la sbyin pa ni / /byin par gyur cig snyam du bsams nas sbyin byin la/ /de yang 'gro ba'i don du byang chub mchog tu bsngo/ /sbyin pa byin nas dngos la gnas par byed pa med//de ni nam du'ang rnam par smin la re ba med/ /de ltar gtong la mkhas pa thams cad gtong ba ste/ /chung ngu btang la mang po dpag tu med par 'gyur/ /srid pa gsum na sems can ma lus ji snyed pa/ /yongs su brtag pa bzung ste de dag thams cad kyis//'jig rten mkhyen pa sangs rgyas dgra bcom rang rgyal la/ /bskal pa mtha' yas sbyin byin nyan thos legs tshol na/ /byang chub sems dpa' mkhas pa thabs mkhas gang zhig gis/ /de dag bsod nams bya ba'i dngos la yi rangs nas/ /sems can don du byang chub mchog rab yongs bsngo na//yongs su bsngo bas 'gro ba thams cad zil gyis gnon/ /nor bu mching bu'i phung po chen por gyur pa yang / /rin chen baiDUr+ya gcig de kun zil gyis gnon/ /de bzhin 'gro kun sbyin pa'i phung po rgya chen kun/ /rjes su yi rang byang chub sems dpas zil gyis gnon//gal te byang chub sems dpas 'gro la sbyin byin nas/ /de la bdag gir mi byed dngos po phangs med na/ /de las dge ba'i rtsa ba mthu chen 'phel 'gyur te/ /sprin med 'od ldan zla dkyil yar gyi ngo bzhin no/ /byang chub sems dpa'i sbyin pas yi dwags 'gro ba gcod/ /dbul ba dang ni de bzhin nyon mongs thams cad gcod//spyod tshe longs spyod mtha' yas rgyas pa thob par 'gyur/ /sbyin pas sdug bsngal gyur pa'i sems can yongs smin byed/ /ces gsungs so/ /sbyin pa nges par bstan pa'i mdo las kyang / mkhas pa dag rnam pa sum cu rtsa bdun gyis sbyin pa sbyin par byed do//sum cu rtsa bdun po gang zhe na/ 'di lta ste/ ser sna spang ba'i phyir dad pas sbyin pa sbyin pa dang / de bzhin gshegs pas rjes su gnang ba'i sbyin pa sbyin pa dang / dngos po gsum yongs su dag par rung ba'i sbyin pa sbyin pa dang / rnam par g.yeng ba thams cad dang bral bas gus pas sbyin pa sbyin pa dang /snying po med pa'i lus las snying po blang ba'i phyir rang gi lag gis sbyin pa sbyin pa dang / rnam par smin pa gtong ba la longs spyod kyi rnyed pa yang dag par 'grub par 'gyur ba rtag tu sbyin pa sbyin pa dang / gzugs bzang ba yang dag par 'grub pa kha dog phun sum tshogs pa'i sbyin pa sbyin pa dang /grags pa phun sum tshogs pa yang dag par 'grub pa dri phun sum tshogs pa'i sbyin pa sbyin pa dang / rnam par smin pa ro bro ba'i mchog mkhyen pa'i dpe byad kyi rnyed pa yang dag par 'grub pa ro phun sum tshogs pa'i sbyin pa sbyin pa dang / rnam par smin pa la longs spyod rgya che ba'i rnyed pa yang dag par 'grub pa rgya che ba'i sbyin pa sbyin pa dang /rnam par smin pa gya nom pa'i longs spyod kyi rnyed pa yang dag par 'grub pa gya nom pa'i sbyin pa sbyin pa dang / rnam par smin pa bkres pa dang skom pa sel ba'i rnyed pa yang dag par 'grub pa bza' ba'i sbyin pa sbyin pa dang /rnam par smin pa srid pa thams cad du skom pa sel ba'i rnyed pa yang dag par 'grub pa skom gyi sbyin pa sbyin pa dang / rnam par smin pa gya nom pa'i gos kyi rnyed pa yang dag par 'grub pa gos kyi sbyin pa sbyin pa dang / rnam par smin pa bsil khang dang /khang pa brtsegs pa dang / khang bzang dang / khang pa dang / gzhal med khang gi rnyed pa yang dag par 'grub pa khyim gyi sbyin pa sbyin pa dang / rnam par smin pa rigs mthon po'i rigs dang ldan pa'i rnyed pa yang dag par 'grub pa mal dang stan gyi sbyin pa sbyin pa dang / mya ngan las 'das pa rga ba med pa 'chi ba med pa mya ngan med pa ma 'dres pa'i rnyed pa yang dag par 'grub pa sman gyi sbyin pa sbyin pa dang /rdzu 'phrul gyi rkang pa bzhi'i rnyed pa yang dag par 'grub pa bzhon pa'i sbyin pa sbyin pa dang / rnam par smin pa skyes bu chen po'i mtshan sum cu rtsa gnyis dang / dpe byad brgyad cu'i rnyed pa yang dag par 'grub pa khrus kyi sbyin pa sbyin pa dang /rnam par smin pa skye ba rjes su dran pa'i rnyed pa yang dag par 'grub pa chos kyi sbyin pa sbyin pa dang / rnam par smin pa lha'i bde ba'i rnyed pa yang dag par 'grub pa tshul khrims phun sum tshogs pa'i sbyin pa sbyin pa dang /gnod sems spangs pa'i rnyed pa yang dag par 'grub pa byams pa la brten pa'i sbyin pa sbyin pa dang / rnam par 'tshe ba spangs pa'i rnyed pa yang dag par 'grub pa snying rje la brten pa'i sbyin pa sbyin pa dang / mi dga' ba spangs ba'i rnyed pa yang dag par 'grub pa dga' ba la brten pa'i sbyin pa sbyin pa dang /rnam par smin pa rjes su chags pa dang khong khro ba spangs pa'i rnyed pa yang dag par 'grub pa btang snyoms la brten pa'i sbyin pa sbyin pa dang / rnam par smin pa byang chub kyi yan lag bdun gyi me tog gi rnyed pa yang dag par 'grub pa me tog gi sbyin pa sbyin pa dang / rnam par smin pa 'gro ba kun du lus dri zhim pa'i rnyed pa yang dag par 'grub pa bdug spos sna tshogs pa'i sbyin pa sbyin pa dang /rnam par smin pa 'dod chags dang zhe sdang dang gti mug gi dri ma rnam par dag pa'i rnyed pa yang dag par 'grub pa phreng ba'i sbyin pa sbyin pa dang / rnam par smin pa gya nom pa'i dri'i lus kyi rnyed pa yang dag par 'grub pa dri'i sbyin pa sbyin pa dang /rnam par smin pa 'gro ba thams cad du dbang bskur ba'i rgyal srid kyi rnyed pa yang dag par 'grub pa dar dang / ba dan gyi sbyin pa sbyin pa dang / rnam par smin pa lha'i mig dang rdzu 'phrul gyi rnyed pa yang dag par 'grub pa mar me'i sbyin pa sbyin pa dang /rnam par smin pa dbyangs snyan pa'i rnyed pa yang dag par 'grub pa dril bu'i sbyin pa sbyin pa dang / rnam par smin pa tshangs pa'i dbyangs kyi sgra'i rnyed pa yang dag par 'grub pa rol mo'i sbyin pa sbyin pa dang / rnam par smin pa 'gro ba thams cad du dbang phyug gi dngos po'i rnyed pa yang dag par 'grub pa gdugs kyi sbyin pa sbyin pa dang /rnam par smin pa bza' ba sna tshogs pa'i rnyed pa yang dag par 'grub pa sna tshogs pa'i sbyin pa sbyin pa dang / rnam par smin pa sangs rgyas kyi byang chub las phyir mi ldog pa'i rnyed pa yang dag par 'grub pa re ba med pa la brten pa'i sbyin pa sbyin pa dang /rnam par smin pa bla na med pa yang dag par rdzogs pa'i byang chub kyi rnyed pa yang dag par 'grub pa bdog pa thams cad yongs su gtong ba'i sbyin pa sbyin pa ste/ dge slong dag mkhas pa rnams rnam pa sum cu rtsa bdun po 'di dag gis sbyin pa sbyin par byed do zhes gsungs so// // sbyin pa'i mi mthun pa'i phyogs la dgongs pa bstan pa/ bden pa'i rnam pa'i mdo las kyang / shA ri'i bu gzhan yang byang chub sems dpa' mkhas pas smad pa'i sbyin pa 'di rnams las rab tu ldog pa yin te/ 'di lta ste/ dus su ma yin pa'i sbyin pa dang / rung ba ma yin pa'i sbyin pa dang / chang gi sbyin pa dang / dug gi sbyin pa dang / gnod pa'i sbyin pa dang / 'gyod pa'i sbyin pa dang / mtshon cha'i sbyin pa dang / phrogs pa'i sbyin pa dang / brnyas pa'i sbyin pa dang / rang gi lag gis ma byin pa'i sbyin pa dang / rgyab kyis phyogs pa'i sbyin pa dang / 'dod pa la brten pa'i sbyin pa dang / mi mthun pa'i sbyin pa dang /dam pa ma yin pa'i sbyin pa dang / smad pa'i sbyin pa dang / dug dang sbyar ba'i sbyin pa dang / so sor gnod pa'i sbyin pa dang / rnyed pa'i sbyin pa dang / rtag tu 'jigs pa skyed pa'i phyir sbyin pa dang / byang chub yongs su nyams par byed pa'i sbyin pa dang / 'chi ba'i zhags pa'i sbyin pa dang / rmongs pa'i sbyin pa dang / bsten pa'i phyir sbyin pa dang / 'jigs pa'i sbyin pa dag las bzlog par 'gyur ro/ /shA ri'i bu 'di la mkhas pas smad pa'i sbyin pa gang yin pa de dag la thams cad kyi thams cad du mi spyod cing lhag par mi spyod de/ byang chub sems dpa' thams cad kyi thams cad du spyod cing / lhag par spyod pa gang yin pa de ni byang chub sems dpa' zhes brjod par mi bya'o/ /byang chub sems dpa' gang la byang chub sems dpa'i yon tan rnams dang ldan par gyur kyang / sbyin pa las nyams pa ni byang chub sems dpa'i yon tan med pa yin no/ /shA ri'i bu byang chub sems dpa' khyim gyi gnas nas mngon par byung ba gang byang chub kyi yan lag la mngon par brtson pa des/ji ltar sbyin pa sbyin par bya zhe na/ ji ltar sngar bstan pa bzhin du'o zhes gsungs so// // blo gros mi bzad pa'i mdo las kyang / gzhan yang btsun pa shA ri'i bu byang chub sems dpa' rnams nyam nga bskyed pa'i longs spyod btsal ba'i sbyin pa med do//sems can la gnod pa'i sbyin pa med do/ /nga rgyal bskyed cing sbyin pa med do/ /'jigs pa dang skrag pa dang ngo tsha bas sbyin pa med do/ /rkun ma btang ba las mgron du bos nas sbyin pa med do/ /ji skad du smras pa las chung ba'i sbyin pa med do/ /mchog la mchog ma yin pa'i sbyin pa med do//snying thag pa nas ma yin pa'i sbyin pa med do/ /g.yo dang sgyus sbyin pa med do/ /bcos pa'i sbyin pa med do/ /las kyi rnam par smin pa la chags pa'i sbyin pa med do/ /log pa'i bsam pas sbyin pa med do/ /gti mug gi bsam pas sbyin pa med do/ /phyin ci log gi bsam pas sbyin pa med do//ma dad par sbyin pa med do/ /mi dga' bar sbyin pa med do/ /'khrugs te sbyin pa med do/ /'khor gyi nyi tshe la sbyin pa med do/ /ngor bltas shing sbyin pa med do/ /sems can sna tshogs su sbyin pa med do/ /sbyin pa'i gnas 'dam zhing sbyin pa med do//sems can thams cad la'ang sbyin pa'i gnas ma yin no zhes te brnyas shing sbyin pa med do/ /tshul khrims dang ldan pa dang / log pa'i tshul khrims can la bstod pa dang smad par sbyin pa med do/ /yang lan gyi phyir sbyin pa med do/ /grags pa dang sgra dang tshigs su bcad pa'i phyir sbyin pa med do//bdag bstod pa dang gzhan smad de sbyin pa med do/ /gzhan sdug bsngal bar bya ba'i sbyin pa med do/ /phyis mi dga' bar sbyin pa med do/ /'gyod pa'i sbyin pa med do/ /gzhan la gnod pa'i sbyin pa med do/ /gzhan gyi re ba la bab pa'i sbyin pa med do/ /smad pa'i sbyin pa med rnam par smin pa la re ba'i sbyin pa med do//dpags te sbyin pa med do/ /khro ba dang gshe ba dang gnod sems bstan cing sbyin pa med do/ /slong ba la gnod pa'i sbyin pa med do/ /rta gad dang brid cing sbyin pa med do/ /phyin phyogs su sbyin pa med do/ /bskyur te sbyin pa med do/ /rko long cing sbyin pa med do//bdag gi lag ma dar ba'i sbyin pa med do/ /mi rtag pa'i sbyin pa med do/ /mthar thug pa'i sbyin pa med do/ /bsngags pa'i phyir sbyin pa med do/ /nyam nga bar sbyin pa med do/ /gzhan sdom pa'i sbyin pa med do/ /gcig tu chad pa'i sbyin pa med do/ /chung ba'i sbyin pa med do/ /mthon dman du sbyin pa med do//ji skad du dam bcas pa las chung ba'i sbyin pa med do/ /mos pa dang ma mos par sbyin pa med do/ /sems can rnams la zhing ma yin snyam ste sbyin pa med do/ /chung ba la bltas shing sbyin pa med do/ /sbyin pa rgya chen po la nga rgyal gyis sbyin pa med do/ /log pa'i nan tan gyis sbyin pa med do//skye bar mos shing sbyin pa med do/ /gzugs dang skyed pa dang dbang du dga' ba'i sbyin pa med do/ /brgya byin dang tshangs pa dang 'jig rten skyong ba dang lha thams cad du skye bar smon cing sbyin pa med do/ /nyan thos dang rang sangs rgyas kyi theg par bsngo zhing sbyin pa med do/ /gzhon nu dang rgyal srid dang dbang phyug thob par bsngo'o zhes sbyin pa med do//tshe gcig tu zad pa'i sbyin pa med do/ /phyin chad chog cing ngoms pa'i sbyin pa med do/ /thams cad mkhyen pa nyid kyi sems su ma bsngos pa'i sbyin pa med do/ /mi rigs pa'i sbyin pa med do/ /dus la ma bab par sbyin pa med do/ /dug dang mtshon gyi sbyin pa med do//sems can la gtse zhing sbyin pa med do/ /byang chub sems dpa' rnams kyi sbyin pa mkhas pa'i 'gro bas smad pa med do zhes gsungs so// // drang srong rgyas pas zhus pa'i mdo las kyang / de nas bcom ldan 'das kyis drang srong chen po rgyas pa la 'di skad ces bka' stsal to//drang srong chen po sbyin pa'i rnam par smin pa dang / sbyin pa'i bya ba dang / sbyin pa'i rnam par dbye ba dang / sbyin pa zhes bya ba'i don gang yin pa dang / sbyin bdag gis yongs su spyod na ji ltar sbyin pa sbyong ba dang / de dag la byin na bsod nams kyi rnam par smin pa ji ltar rab tu 'phel ba de nyon cig /gang gi phyir sbyin pa zhes bya ba dang / sbyin pa zhes bya ba'i don gang yin pa zhes bya ba ni/ drang srong chen po 'di la gtong ba pos sbyin pa'i dngos po yongs su gtong ste/ dad pa bskyed nas gzhan byed du bcug ste/ yul gzhan du song nas byed du bcug pa des kyang /nor rnams rnam par gtong bar byed na/ nor gang gi yin pa de ni sbyin bdag yin no/ /byed du bcug pas sbyin pa ni gtong ba po yin gyi sbyin bdag ma yin no/ /gang rang gi dngos po bdag nyid kyis sbyin pa de ni gtong ba po yang yin la sbyin bdag kyang yin no/ /drang srong chen po rnam pa sum cu rtsa gnyis kyis sbyin pa yongs su ma dag par blta'o//rnam pa sum cu rtsa gnyis gang zhe na/ 'di lta ste/ drang srong chen po 'di la gtong ba po phyin ci log tu lta bar 'gyur zhing / ma dad pa dang / ma dad pa mang la des sbyin pa byin na/ de'i sbyin pa de yongs su ma dag pa yin no/ /drang srong chen po gzhan yang phan gdags pa'i lan du phan 'dogs par bya ba'i phyir sbyin pa byin na de yang yongs su ma dag pa yin no//de dman pa dang 'dod pa'i rgyu'i phyir gang 'di lta bu'i sems kyis me la sbyin pa sbyin no zhe'am/ me lce la sbyin pa byin no zhe'am/ chu la sbyin pa sbyin no zhe'am/ des bdag yongs su shes par bya ba'i phyir rgyal po la sbyin pa sbyin na de yang yongs su ma dag pa yin no//gang 'jigs pa'i phyir chom po la sogs pa la sbyin pa byin te thun mong ma yin pa lnga byin na yongs su ma dag pa yin no/ /dug sbyin pa dang / mtshon cha sbyin pa dang / srog chags bsad de sha sbyin pa dang /bag med pa rnams la chang sbyin pa dang / 'di dag ni bdag gir 'gyur te bdag gi rim gro dang mchod par 'gyur ro snyam nas/ sems can bsdu ba dang / 'thob pa'i phyir bsdu ba sbyin pa dang / gang brjod pa dang sgra dang tshigs su bcad pa'i phyir sbyin pa sbyin pa dang / gang gar dang / glu dang bzhad gad dang /rtsad mo dang gtam dang / dga' bar bya ba'i phyir rol mo mkhan rnams la sbyin pa byin na/ sbyin pa de yang yongs su ma dag pa yin no/ /gang gza'i mtshan ma'i phyir skar mkhan la sbyin pa gtong bar byed pa dang / gang gzhan gyi nor mdza' bo la sbyin pa dang / gang gi khyim mam zhing la gzhan gyi 'bru'i phung po'am/nas dang gro'i phung po la ri dgas dang bya za la/ de de la dga' ba dang mgu ba bskyed na/ de yang sbyin pa yongs su ma dag pa yin no/ /gang bzo'i phyir sbyin pa sbyin pa dang / gang yang lus mi bde bas 'jigs pa'i phyir sman pa la sbyin pa sbyin pa dang / gang yang slong ba rnams la spyos brgyad de/tshig pa za bar byas nas sbyin pa sbyin na/ de yang yongs su ma dag pa yin no/ /gang yang sbyin pa byin na 'di'i rnam par smin pa yod dam med ces the tshom za na/ de yang yongs su ma dag pa yin no/ /gang yang sbyin pa byin nas gdung ba dang 'gyod pas gdungs na / de yang yongs su ma dag pa yin no//gang yang sbyin pa byin nas gang bdag las khyer ba thams cad kyis tshe phyi ma la slar sbyin par 'gyur ro snyam du 'di lta bu'i sems bskyed na/ de yang yongs su ma dag pa yin no/ /gang bsod nams kyi rnam par smin pa 'di ni bdag nyid kyis spyad kyi / sems can gzhan gang la yang ma gyur cig snyam du de ltar sems bskyed na/de yang yongs su ma dag pa yin no/ /gang lang tsho la bab pa na sbyin pa mi sbyin zhing / bar ma'i dus na yang ma yin la/ na bas gzir ba dang / 'chi ba'i dus kyi tshe dang / gnad du phog pa'i sdug bsngal ba dang /snad pa dang 'chi ba'i mya ngan du gyur pa na/ sangs rgyas pa la dga' ba dang / dad pa med pa'i rtsa lag rnams kyis byed du bcug pa'i tshe/ sbyin gnas rnams la sbyin pa byin na/ di yang yongs su ma dag pa yin no/ /gang yul gzhan na gnas na yang / yul dang gnas ga ge mo zhes bya ba na/bdag sbyin bdag tu grags par 'gyur ro snyam ste/ grags pa'i rgyur sbyin pa byin na/ de yang yongs su ma dag pa yin no/ /gang yang kha zas gtong mi phod pa la 'jig rten pa mi dga' bar mthong nas/ sbyin phod pa'i nyes pa ni 'jig rten gyis bzod do snyam ste/ sbyin pa byin na de yang yongs su ma dag pa yin no//gang yang gang bud med snying du sdug ste chung mar blang ba'i 'brel ba dang / phyir byed par bya ba'i don du bud med kyi gzhi las mdza' bshes dang / gnyen 'dab dang 'brel ba'i phyogs la nor bu dang / gser dang dngul dang / rdo rje dang bai DUr+ya dang dar dang /byi ru dang / du gu la'i ras la sogs pas mgu bar byed na/ de yang yongs su ma dag pa yin no/ /gang yang 'di ltar bdag la nor ni mang du yod na bdag la bu med do/ /bdag gis gang rigs pa la gtong bar bya'o snyam ste sbyin pa byin na/ de yang yongs su ma dag pa yin no/ /gang yang tshe 'di la sbyin pas 'jig rten pha rol du rnyed par 'gyur ro snyam pa'i sems kyis sbyin pa byin na/de yang yongs su ma dag pa yin no/ /gang me tog dang / 'bras bu dang / zang zing 'dod pas dbul ba dang / bkren pa dang / sdug phongs pa gos dengs shing dri ma can rnams bkol te bor la/ phyug pa rgya chen po thob pa dag la sbyin pa byin na/ de yang sbyin pa yongs su ma dag pa yin no/ /drang srong chen po rnam pa sum cu rtsa gnyis po 'di dag ni sbyin pa byin pa yongs su dag pa ma yin par blta'o/ /drang srong chen po de dag gi rnam par smin pa ni/ tsha sgo can gyi zhing la sa bon ngan pa btab pa'i myu gu skye ba bzhin du blta ste/sbyin pa de'i rnam par smin pa ni med pa ma yin mod kyi 'on kyang zhing dang sa bon gyi nyes pas me tog dang 'bras bur mi 'gyur ro/ /drang srong chen po 'di lta ste/ dper na skyes bu la la zhig gang 'dod pa'i sa bon khyer te/ ma rmos ma bstsal ba'i zhing la btab na/de'i sa bon sa la gnas pa de la char pa bab nas bangs nas/ gdon mi za bar myu gu skye nus par 'gyur te/ 'on kyang me tog dang 'bras bur ni mi 'gyur ro/ /drang srong chen po de bzhin du sbyin pa de'i rnam par dbye ba de yang bsam pa dang sbyor ba kun nas nyon mongs pa can du gyur pas 'bras bu rnam par smin pa grung por mi 'gyur ro zhes gsungs so//byang chub sems dpa'i spyod pa yongs su dag pa'i mdo las kyang / rigs kyi bu de la byang chub sems dpa' rnams kyi sbyin pa'i pha rol tu phyin pa'i spyod pa yongs su dag pa gang yin zhe na/ 'di lta ste/ ser sna'i dri ma la yongs su gnas pa'i sems spangs pa dang / gtong ba'i rjes su 'jug pa'i sems spel ba ste/ ser sna'i dri ma bsal zhing gtong ba'i sems kyis legs par byin gyis brlabs pa de'i sems bdog pa thams cad yongs su gtong ba la gnas par 'gyur ro/ /de sbyin pa sbyin pa na tha dad pa bzhi byed par mi 'gyur te/bzhi gang zhe na/ 'di lta ste/ sems can tha dad par mi byed pa dang / chos tha dad par mi byed pa dang / yongs su bsngo ba tha dad par mi byed pa dang / bsam pa tha dad par mi byed pa'o/ /de la ji ltar na byang chub sems dpa' sbyin pa sbyin pa na sems can tha dad par mi byed pa yin zhe na/ rigs kyi bu 'di lta ste/ 'di la sbyin par bya'o/ /'di la sbyin par mi bya'o/ /'di la mang du sbyin par bya'o/ /'di la nyung ngu sbyin par bya'o/ /'di la gya nom pa sbyin par bya'o/ /'di la gya nom pa ma yin pa sbyin par bya'o/ /'di la rtag tu sbyin par bya'o/ /'di la rtag tu sbyin par mi bya'o/ /'di la gus par byas te sbyin par bya'o//'di la gus par byas te sbyin par mi bya'o/ /'di la thams cad sbyin par bya'o/ /'di la thams cad sbyin par mi bya'o/ /'di ni tshul khrims dang ldan pa'o/ /'di ni tshul khrims 'chal ba'o/ /'di la yon tan gyi gnas so/ /'di la yon tan gyi gnas ma yin pa'o/ / 'di la byin na yon rnam par dag par 'gyur ro/ /'di ni rnam par dag par mi 'gyur ro/ /'di ni yang dag par rab tu zhugs pa'o/ /'di ni log par zhugs pa'o zhes de ltar de lta bu'i ngo bo'i sems kyi 'jug pa spangs pa/ mnyam pa nyid sna tshogs pa ma yin la/ mtho ba ma yin pa/ dma' ba ma yin pa/sems can thams cad la sems mnyam pa nyid yang dag par rab tu sbyor ba nyid / mtshungs pa'i sbyin pa nyid/ byams pa mnyam pa nyid/ snying brtse ba mnyam pa nyid/ bye brag med pa nyid/ nam mkha'i mnyam pa nyid du rtogs pa nyid de/ rigs kyi bu 'di ni byang chub sems dpa'i sbyin pa sbyin pa na sems can tha dad par mi byed pa yin no//de la ji ltar na chos tha dad par mi byed pa yin zhe na/ gang dag chos smra bar gyur pa de dag la sbyin par bya'o/ /gang dag chos ma yin pa smra bar 'gyur ba de la sbyin par mi bya'o zhes de ltar sems bskyed par mi 'gyur ro/ /de chos thams cad la mnyam pa nyid thob pas sbyin pa sbyin par byed/so so'i skye bo dman par byas nas sbyin pa sbyin par mi byed/ 'phags pa chen por gyur pa nyid kyis sbyin pa sbyin par mi 'gyur ro/ /gzhan yang chos kyi dbyings rang bzhin mnyam pas bye brag med pa nyid kyis sbyin pa sbyin par 'gyur te/'di ni chos tha dad pa nyid du mi byed pa zhes bya'o/ /de la ji ltar na yongs su bsngo ba tha dad pa nyid du mi byed pa yin zhe na/ gang gi tshe sbyin pa sbyin pa na dge ba'i rtsa ba de brgya byin nyid thob par bya ba'i phyir yongs su sngo bar byed par mi 'gyur/ tshangs pa nyid thob par bya ba'i phyir ma yin/ rgyal srid dam / tshong dpon nyid dam / khyim bdag nyid dam/ gzugs sam kha dog nyid dam/ longs spyod dam/ dbang phyug gam/ g.yog 'khor don du gnyer bas ma yin/ dge ba'i rtsa ba de srid pa'i 'gro ba thams cad nas/ 'chi 'pho ba dang skye ba'i gnas su yongs su sngo bar byed pa ma yin pa dang / dge ba'i rtsa ba de bla na med pa yang dag par rdzogs pa'i byang chub tu sngo bar byed pa ma gtogs pa/nyan thos kyi theg par ma yin/ rang sangs rgyas kyi theg par ma yin te/ 'di ni yongs su bsngo ba tha dad pa nyid du mi byed pa zhes bya'o/ /gzhan la bsam pa mnyam pa/ sbyor ba mnyam pa/ rnam par smin pa la re ba med pa/ gzhan gyis byas pa la ltos pa med pa/ lhag pa'i bsam pa yongs su smin pa'i blo can/ 'gyod pa med pa'i blo can/ dus gsum du dad pa thob pas/ g.yo dang sgyu dang mi ldan par sbyin pa sbyin par byed cing byin nas kyang dad pa 'thob par 'gyur te/ 'di ni bsam pa tha dad pa nyid du mi byed pa zhes bya'o/ / rigs kyi bu de ltar sbyin pa sbyin pa na byang chub sems dpa' tha dad pa bzhi po 'di dag mi byed pa yin no/ /'di ni byang chub sems dpa'i sbyin pa'i pha rol tu phyin pa yongs su dag pa'i gnas dang po yin no/ /de lta ba brgyad kyis yongs su dag pa'i sbyin pa sbyin par 'gyur te / lta ba brgyad gang zhe na/ de bdag tu lta ba yongs su dag pa'i sbyin pa sbyin par 'gyur ba dang /de bzhin du sems can dang / srog dang / gang zag dang / chad pa dang / rtag pa dang / skye ba dang 'jig par lta ba yongs su dag pa ste/ lta ba brgyad po de dag gis yongs su dag pa'i sbyin pa sbyin par 'gyur ro/ /'di yang byang chub sems dpa'i sbyin pa'i pha rol tu phyin pa yongs su dag pa'i gnas gnyis pa'o//de la bag la nyal bzhi spangs nas sbyin pa sbyin par 'gyur ro/ /bzhi gang zhe na/ so so'i skye bo'i chos bag la nyal ba dang / nyan thos kyi chos bag la nyal ba dang / rang sangs rgyas kyi chos bag la nyal ba dang / bag chags kyi mtshams sbyor ba bag la nyal te/bag la nyal bzhi po 'di dag spangs nas sbyin pa sbyin par 'gyur ro/ /de 'du shes bzhi yongs su spangs nas sbyin pa sbyin par 'gyur ro / /bzhi gang zhe na/ rtag par 'du shes pa dang / bde bar 'du shes pa dang / gtsang bar 'du shes pa dang / bdag tu 'du shes pa ste bzhi po 'di dag go/ /de rnam pa bzhi yongs su dag pa'i sbyin pa sbyin par 'gyur te/bzhi gang zhe na/ lus yongs su dag pa dang / ngag yongs su dag pa dang / sems yongs su dag pa dang / bsam pa yongs su dag pa ste bzhi po 'di dag go/ /de zhen pa gsum spangs nas sbyin pa sbyin par 'gyur te/ gsum gang zhe na/ rnam par smin pa la re ba la zhen pa dang / 'gyod pa la zhen pa dang / theg pa dman par yongs su bsngo ba la zhen pa ste gsum po 'di dag go/ /'jig pa gsum las 'das nas sbyin pa sbyin par 'gyur te/ gsum gang zhe na/ lhag pa'i nga rgyal gyi 'jigs pa dang / rlom pa'i 'jigs pa dang / bdud kyi las kyi 'jigs pa ste gsum po 'di dag go//de phyag rgya bzhis rgyas btab pa'i sbyin pa sbyin par 'gyur te/ bzhi gang zhe na/ nang stong pa nyid kyi phyag rgyas rgyas btab pa dang / phyi stong pa nyid kyi phyag rgyas rgyas btab pa dang / sems can stong pa nyid kyi phyag rgyas rgyas btab pa dang / byang chub stong pa nyid kyi phyag rgyas rgyas btab pa ste bzhi po 'di dag go//de brtson 'grus bzhi brtsams pa dang ma bral ba'i sbyin pa sbyin par 'gyur te/ bzhi gang zhe na/ sems can thams cad yang dag par tshim pa'i brtson 'grus brtsams pa dang / sangs rgyas kyi chos thams cad 'grub pa'i brtson 'grus brtsams pa dang / mtshan dang dpe byad yongs su rdzogs pa'i brtson 'grus brtsams pa dang /sangs rgyas kyi zhing yongs su sbyong ba'i brtson 'grus brtsams pa ste bzhi po 'di dag go/ /de dran pa bzhi dang ma bral ba'i sbyin pa sbyin par 'gyur te/ bzhi gang zhe na/ byang chub kyi sems rjes su dran pa dang / sangs rgyas lta ba rjes su dran pa dang /byams pa chen po dang snying rje chen po rjes su dran pa dang / sems can thams cad kyi nyon mongs pa spong ba rjes su dran pa ste bzhi po 'di dag go/ /de 'khor gsum yongs su dag pa'i sbyin pa sbyin par 'gyur te/ gsum gang zhe na/ sgyu ma dang mnyam pa nyid kyis bdag nyid kyi 'khor yongs su dag pa dang /rmi lam dang mtshungs pa nyid kyis sems can gyi 'khor yongs su dag pa nyid dang / rnam par smin pa la re ba med pa nyid kyis byang chub kyi 'khor yongs su dag pa ste gsum po 'di dag go/ /de shes pa bzhi yongs su dag pas yongs su dag pa'i sbyin pa sbyin par 'gyur te/bzhi gang zhe na/ sbyin pa'i shes pa yongs su dag pa dang / sems can gyi bsam pa tshim pa'i shes pa yongs su dag pa dang / sgyu ma'i chos so sor rtog pa'i shes pa yongs su dag pa dang / yongs su bsngo ba so sor rtog pa'i shes pa yongs su dag pa ste bzhi po 'di dag gis yongs su dag pa'i sbyin pa sbyin par 'gyur ro//rigs kyi bu byang chub sems dpa' de lta bu'i chos dang ldan pa de'i sbyin pa'i pha rol tu phyin pa'i spyod pa shin tu yongs su dag par 'gyur te/ rigs kyi bu 'di ni byang chub sems dpa'i sbyin pa'i pha rol tu phyin pa'i spyod pa yongs su dag pa yin no zhes gsungs so//blo gros rgya mtsho'i mdo las kyang / bcom ldan 'das 'di la byang chub sems dpa'i sbyin pa'i pha rol tu phyin pa la spyod pa ni mi phongs pa'i dngos po yongs su gtong ba'i sems 'jug gi/ phongs pa'i dngos po yongs su gtong ba'i sems mi 'jug pa dang / sems can gang dag de la dga' bar 'gyur ba de dag la sbyin par bgyid / sems can gang dag dga' bar ma gyur pa de dag la ni sbyin par mi bgyid cing / de dngos po tha dad du bgyid/ sems can tha dad du bgyid na/ bcom ldan 'das 'di ni byang chub sems dpa' sbyin pa dang rab tu ldan pa'i bdud kyi lcags kyu ste dang po'o zhes gsungs so//nam mkha' mdzod kyis zhus pa'i mdo las kyang / rigs kyi bu chos bzhi dang ldan na byang chub sems dpa'i sbyin pa nam mkha' dang mtshungs pa yin te/ bzhi gang zhe na/ 'di lta ste/ bdag rnam par dag pas sems can rnam par dag pa la 'jug pa dang / sems can rnam par dag pas sbyin pa rnam par dag pa la 'jug pa dang / sbyin pa rnam par dag pas bsngo ba rnam par dag pa la 'jug pa dang / bsngo ba rnam par dag pas byang chub rnam par dag pa la 'jug pa ste/ rigs kyi bu chos bzhi po de dag dang ldan na byang chub sems dpa'i sbyin pa nam mkha' dang mtshungs pa yin no//des rnam par thar pa brgyad kyi sgo nas sbyin pa de sbyin te/ brgyad gang zhe na/ 'di lta ste/ ngar 'dzin pa rnam par dag par sbyin pa de sbyin/ nga yir 'dzin pa rnam par dag par sbyin pa de sbyin/ rgyu rnam par dag par sbyin pa de sbyin/ lta ba rnam par dag par sbyin pa de sbyin/ mtshan ma rnam par dag par sbyin pa de sbyin/tha dad par rnam par dag par sbyin pa de sbyin/ rnam par smin pa la mi re ba rnam par dag par sbyin pa de sbyin/ nam mkha' dang mtshungs pa'i sems rnam par dag par sbyin pa de sbyin te/ rnam par dag pa brgyad po 'di dag gi sgo nas sbyin pa de sbyin no zhes gsungs so//mdo sde'i rgyan las kyang / chags pa rnam pa bdun ni sbyin pa'i mi mthun pa'i phyogs te/ longs spyod la chags pa dang / bshol ba la chags pa dang / de tsam gyis chog par 'dzin pa la chags pa dang / lan la re ba la chags pa dang / rnam par smin pa la chags pa dang / de mi mthun pa'i phyogs la chags pa'i bag la nyal yang dag par ma bcom pa'i phyir mi mthun pa'i phyogs la chags pa dang /rnam par g.yeng ba la chags pa'o/ rnam par g.yeng ba de yang rnam pa gnyis te/ yid la byed pa'i rnam par g.yeng ba ni theg pa dman pa la dga' ba'i phyir ro/ /rnam par rtog pa'i rnam par g.yeng ba ni sbyin pa po dang /len pa po dang / sbyin pa rnam par rtog pa'i phyir ro/ /de bas na chags pa rnam pa bdun las grol ba'i phyir ro/ /sbyin pa'i ma chags pa nyid lan bdun bshad do zhes gsungs so/ /dkon mchog sprin gyi mdo las kyang / byang chub sems dpa' sbyin pa gtong ba na sbyin pa'i skyon dang sbyin pa'i dri ma dang /sbyin pa'i bar chad dag yongs su spang bar bya'o zhes gsungs so// // sbyin pa'i phan yon la dgongs pa bstan pa/ snying rje chen po la 'jug pa'i mdo las kyang / gzhon nu byang chub sems dpa' sems dpa' chen po sbyin pa la mos pa'i phan yon ni 'di bcu ste/bcu gang zhe na/ 'di lta ste/ de'i ser sna'i nyon mongs pa tshar bcad pa yin/ de'i sems rtag tu gtong ba'i rjes su spel ba yin/ skye bo mang po dang thun mong ba'i longs spyod las snying po len pa yin/ longs spyod che ba'i rigs su skye zhing skyes ma thag tu de gtong ba'i sems mngon du 'gyur ba yin/'khor bzhi rnams la phangs shing sdug pa yin/ 'jigs pa med cing zhum pa med par 'khor gyi nang du 'gro/ /phyogs dang phyogs mtshams su rgya cher brjod pa'i sgra dang / tshigs su bcad pa mngon par 'byung / rkang lag 'jam zhing gzhon pa yin/rkang mthil mnyam zhing rab tu gnas pa yin/ byang chub kyi snying po la 'dug gi bar du dge ba'i bshes gnyen dang mi 'bral ba yin te/ gzhon nu byang chub sems dpa' sems dpa' chen po sbyin pa la mos pa'i legs pa ni 'di bcu'o zhes gsungs so/ /nam mkha' mdzod kyis zhus pa'i mdo las kyang /stobs bcus sbyin pa rtsa ba yin zhes gsungs/ /de la rab tu gnas nas tshul khrims ldan/ /tshul khrims yon tan gnas nas bsam gtan rnyed/ /bsam gtan ma chags shes rab rdzogs par byed/ /sbyin pa dang ni dul bas sems rab tshim/ /nyon mongs rnams kyang tshig na phyir mi skye//sbyin pa bdag dang gzhan la phan par gsungs/ /phan pa bde ba 'dus byas sbyin pas mgu/ /zhes gsungs so/ /shes rab kyi pha rol tu phyin pa sdud pa tshigs su bcad pa las kyang / byang chub sems dpa'i sbyin pas yi dwags 'gro ba gcod/ /dbul ba dang ni de bzhin nyon mongs thams cad gcod/ /spyod tshe longs spyod mtha' yas rgyas pa thob par 'gyur//sbyin pas sdug bsngal gyur pa'i sems can yongs smin byed/ /ces gsungs so/ /dkon mchog sprin gyi mdo las kyang / bcom ldan 'das kyis kyang sbyin pa byin na byang chub sems dpa'i byang chub bo/ byang chub sems dpa' sbyin pa byin na mi dge ba'i chos phrag dog dang / ser sna dang / ngan song gsum spangs pa yin no zhes gsungs te/ de bas na bdag gis de bzhin gshegs pa'i rjes su bslab cing sbyin pa sbyin par bya'o snyam ste/ de sbyin pa yang sbyin zhing sbyin pa des khengs par mi 'gyur te zhes gsungs so/ /tshangs pas zhus pa'i mdo las kyang / tshangs pa bdag gi sbyin pas mya ngan las 'das pa mtshon par bya na de ni byis pa rnams kyis rtogs par mi 'gyur ro//de la byang chub sems dpa' sems la mkhas pa 'di ltar mos par 'gyur te/ sbyin pa ni pha rol tu longs spyod chen po nyid kyi phyir 'gyur na/ der 'ga' yang 'pho bar mi 'gyur la/ 'pho ba med pa ni mya ngan las 'das pa'o zhes gsungs so//byang chub sems dpa'i sde snod kyi mdo las kyang / shA ri'i bu byang chub sems dpas sbyin pa'i phan yon bcu 'thob par 'gyur ro/ /bcu gang zhe na/ bza' ba byin pas tshe dang / spobs pa dang / bde ba dang / stobs dang / kha dog phun sum tshogs pa rab tu 'thob bo/ /btung ba byin pas nyon mongs pa dang sred pa thams cad bsal ba phun sum tshogs pa rab tu 'thob bo//bzhon pa byin pas bde ba thams cad kyi dngos po phun sum tshogs pa rab tu 'thob bo/ /bgo ba byin pas khrel yod pa dang / ngo tsha shes pa dang / gser ltar kha dog yongs su dag pa phun sum tshogs pa rab tu 'thob bo//spos dang phreng ba byin pas tshul khrims dang / thos pa dang / ting nge 'dzin gyi dri dang / byug pa phun sum tshogs pa rab tu 'thob bo/ /dri rab tu zhim pa'i spos dang phye ma dang byug pa byin pas lus kyi nan tan gyi dri zhim po phun sum tshogs pa rab tu 'thob bo/ /ro byin pas ro bro ba'i nang nas mchog gi ro bro ba skyes bu chen po'i mtshan phun sum tshogs pa rab tu 'thob bo//gnas byin pas sems can thams cad kyi gnas dang / rten dang / gling dang / skyabs dang / dpung gnyen phun sum tshogs pa rab tu 'thob bo/ /nad pa la sman byin pas mi dga' mi 'chi/ 'chi ba med pa'i bde ba yongs su rdzogs pa phun sum tshogs pa rab tu 'thob bo//yo byad sna tshogs byin pas byang chub kyi phyogs kyi chos kyi yo byad yongs su rdzogs pa phun sum tshogs pa rab tu 'thob ste/ shA ri'i bu byang chub sems dpa' byang chub 'dod pas de ltar sbyin pa byin na/ sbyin pa'i phan yon bcu po de dag yongs su gzung bar 'gyur ro//gzhan yang shA ri'i bu byang chub sems dpa' phan yon gzhan bcu rab tu 'thob bo/ /bcu gang zhe na/ 'di lta ste/ mar me byin pas de bzhin gshegs pa'i spyan lnga yongs su dag pa phun sum tshogs pa rab tu 'thob bo/ /sil snyan byin pas lha'i rna ba yongs su dag pa phun sum tshogs pa rab tu 'thob bo//gser dang / dngul dang / nor bu dang / mu tig dang / bai DU r+ya dang / dung dang / man shel dang / byi ru dang / rin po che thams cad byin pas ni skyes bu chen po'i mtshan sum cu rtsa gnyis yongs su rdzogs pa phun sum tshogs pa rab tu 'thob bo/ / rin po che tha dad pa sna tshogs dang / me tog sna tshogs byin pas dpe byad bzang po brgyad cu yongs su rdzogs pa phun sum tshogs pa rab tu 'thob bo/ /rta dang / glang po che dang / shing rta byin pas rgyas pa dang / yangs pa dang che ba phun sum tshogs pa rab tu 'thob bo/ /skyed mos tshal dang / dka' thub kyi nags tshal byin pas/bsam gtan dang / rnam par thar pa dang / ting nge 'dzin dang / snyoms par 'jug pa yongs su rdzogs pa phun sum tshogs pa rab tu 'thob bo/ /nor dang / 'bru dang / mdzod dang bang ba byin pas chos rin po che thams cad kyi mdzod yongs su rdzogs pa phun sum tshogs pa rab tu 'thob bo/ / bran pho dang / bran mo dang / las byed pa'i mi byin pas rang nyams dang / rang dbang dang rang byung gi ye shes yongs su rdzogs pa phun sum tshogs pa rab tu 'thob bo/ /bu pho dang bu mo byin pas mdza' ba dang / sdug pa dang / 'dod pa'i bla na med pa yang dag par rdzogs pa'i byang chub yongs su rdzogs pa phun sum tshogs pa rab tu 'thob bo//gling bzhi'i rgyal po'i longs spyod thams cad byin pas byang chub sems dpas rnam pa'i mchog thams cad dang ldan pa'i thams cad mkhyen pa'i ye shes phun sum tshogs pa rab tu 'thob ste/ shA ri'i bu phan yon bcu po de dag yongs su gzung bar 'gyur ro/ /shA ri'i bu byang chub sems dpa' byang chub 'dod pas/de ltar sbyin pa byin pas ni phan yon gzhan yang bcu 'thob bo/ /bcu gang zhe na/ 'dod pa'i yon tan lnga byin pas tshul khrims dang / ting nge 'dzin dang / shes rab dang / rnam par grol ba dang / rnam par grol ba'i ye shes mthong ba yongs su dag pa phun sum tshogs pa rab tu 'thob bo/ / dga' ba'i rtsed mo thams cad yongs su gtong ba'i sbyin pas dam pa'i chos kyi dga' ba dang rtse ba yongs su dag pa phun sum tshogs pa rab tu 'thob bo/ /rkang pa byin pas chos kyi don gyi rkang pa byang chub kyi snying por 'gro ba yongs su rdzogs pa phun sum tshogs pa rab tu 'thob bo/ /lag pa byin pas sems can thams cad kyi lag pa rab tu byin pa yongs su rdzogs pa phun sum tshogs pa rab tu 'thob bo//rna ba dang sna byin pas dbang po ma tshang ba med cing yongs su rdzogs pa phun sum tshogs pa rab tu 'thob bo/ /yan lag dang [(]nyid[,]nying [)]lag byin pas kha na ma tho ba med cing mdzes pa'i yan lag sangs rgyas kyi sku yongs su rdzogs pa phun sum tshogs pa rab tu 'thob bo//mig byin pas sems can thams cad la chos kyi mig sgrib pa yongs su dag pa phun sum tshogs pa rab tu 'thob bo/ /sha dang khrag byin pas sems can thams cad kyi lus dang srog gi snying po med pa las snying po len pas nye bar 'cho ba la mkhas pa phun sum tshogs pa rab tu 'thob bo//rkang byin pas rdo rje ltar mi shigs pa'i lus 'thob pa phun sum tshogs pa rab tu 'thob bo/ /yan lag gi dam pa mgo byin pas byang chub sems dpa' sems dpa' chen po 'jig rten gsum gyi mchog bla na med cing ltag na med pa'i thams cad mkhyen pa'i ye shes khong du chud pa yongs su rdzogs pa phun sum tshogs pa rab tu 'thob ste/shA ri'i bu byang chub sems dpa' byang chub 'dod pas de ltar sbyin pa byin na/ de lta bu'i sangs rgyas kyi chos yongs su rdzogs pa'i phan yon de dag yongs su gzung bar 'gyur ro/ /shA ri'i bu byang chub sems dpa' mkhas pa zab pa/shes rab kyi snang ba dang ldan pa ni 'jig rten gyi zang zing gis bla na med pa yang dag par rdzogs pa'i byang chub 'dod/ bdud rtsi 'dod/ snying po 'dod/ byang chub 'dod de/ yang shA ri'i bu mya ngan las 'das pa 'dod pa ni bla na med pa yang dag par rdzogs pa'i byang chub la gnas te 'jig rten gyi zang zing sbyin pa ni/'jig rten gyi bde ba thams cad yongs su mi gtong ba gang yang med do/ /'di lta ste/ shA ri'i bu khyim bdag chun pa zhing skam la gnas nas/ ba lang dang gnam sdod ma yin pa'i zhing gi rmo rko rdzogs par byas te/ sa bon btab nas rnam grangs 'dis gshol gyis 'tsho bas gser dang / dngul yang 'grub bo/ /dngos po sna tshogs gzhan yang 'grub bo/ /de ci'i phyir zhe na/ shA ri'i bu 'bru dang mtshungs pa'i nor med do/ /shA ri'i bu de bzhin du byang chub sems dpa' 'di ltar 'jig rten gyi zang zing la gnas nas bla na med pa yang dag par rdzogs pa'i byang chub mngon par rdzogs par 'tshang rgya bar 'gyur ba'i dus dang tshod yod do//'di lta ste/ shA ri'i bu bas rtswa skam po dang / gsher ba zos pa dang / chu grang mo dang / dron mo 'thungs pa de las 'o ma 'grub ste/ zho dang mar sar dang mar gyi snying po yang 'grub bo/ /shA ri'i bu de bzhin du byang chub sems dpa' sems dpa' chen po bla na med pa yang dag par rdzogs pa'i byang chub la gnas te/'jig rten gyi zang zing sbyin pa na de mi 'dod kyang 'khor los sgyur ba'i rgyal po yang yongs su 'grub bo/ /brgya byin dang tshangs pa yang 'grub bo/ /gnas de gsum yongs su grub nas byang chub sems dpa'i sa bcu yongs su 'grub bo/ /de bzhin gshegs pa'i stobs bcu dang /mi 'jigs pa bzhi yang yongs su 'grub po zhes gsungs so/ /bden pa po'i le'u las kyang / yon tan gyi phan yon bcu gnyis yang dag par mthong ba des/ sbyin pa'i pha rol tu phyin pa la sbyar bar bya'o/ /bcu gnyis po dag gang zhe na/ 'di lta ste/ byang chub kyi sems kyi lam ston par yang dag par mthong bas sbyin pa'i pha rol tu phyin pa la sbyar bar bya ba dang /longs spyod chen po yongs su 'grub pa'i lam yin par yang dag par mthong bas sbyin pa'i pha rol tu phyin pa la sbyar bar bya ba dang / 'dod pa'i rigs su skye bar 'gyur ba yang dag par mthong bas sbyin pa'i pha rol tu phyin pa la sbyar bar bya ba dang /dad pa'i rigs su skye bar 'gyur bar yang dag par mthong bas sbyin pa'i pha rol tu phyin pa la sbyar bar bya ba dang / ser sna tshar gcod par 'gyur bar yang dag par mthong bas sbyin pa'i pha rol tu phyin pa la sbyar bar bya ba dang / gtong ba'i rgyun 'phel bar 'gyur bar yang dag par mthong bas sbyin pa'i pha rol tu phyin pa la sbyar bar bya ba dang /yi dags kyi grong khyer gyi sgo gcod par 'gyur bar yang dag par mthong bas sbyin pa'i pha rol tu phyin pa la sbyar bar bya ba dang / skye bo mang po dang thun mong gi longs spyod rnams las snying po len par 'gyur bar yang dag par mthong bas sbyin pa'i pha rol tu phyin pa la sbyar bar bya ba dang /yo byad yongs su rdzogs par 'gyur ba yang dag par mthong bas sbyin pa'i pha rol tu phyin pa la sbyar bar bya ba dang / bdog pa thams cad yongs su gtong ba la goms par byas par 'gyur bar yang dag par mthong bas sbyin pa'i pha rol tu phyin pa la sbyar bar bya ba dang /dngos po thams cad la 'dzin pa'i sems bdag la med par 'gyur ba yang dag par mthong bas sbyin pa'i pha rol tu phyin pa la sbyar bar bya ba dang / bdag gi sbyin pa'i pha rol tu phyin pa yongs su rdzogs par 'gyur bar yang dag par mthong bas sbyin pa'i pha rol tu phyin pa la sbyar bar bya ba dang /de bzhin gshegs pa'i rjes su bstan pa dang mthun par zhugs par 'gyur bar yang dag par mthong bas sbyin pa'i pha rol tu phyin pa la sbyar bar bya ste/ rigs kyi bu yon tan gyi phan yon bcu gnyis po de dag yang dag par mthong ba'i byang chub sems dpa' sems dpa' chen pos sbyin pa'i pha rol tu phyin pa la sbyar bar bya ste/sbyin pa de yang bla na med pa yang dag par rdzogs pa'i byang chub tu yongs su bsngo bar bya'o zhes gsungs so/ /'jam dpal gyi zhing gi bkod pa'i mdo las kyang / shA ri'i bu bzhi po 'di dag ni byang chub sems dpa' phrag dog dang ser sna yongs su spangs pa'i phan yon yin te/ bzhi gang zhe na/ 'di'i gtong ba'i sems brjed par mi 'gyur ba dang / mu ge'i dus na sbyin bdag tu 'gyur ba dang / slong ba po rnams nye bar dong ba na 'di'i khyim ma bsgribs par 'gyur ba dang / ster ba'am len pa na 'di la 'ga' yang phrag dog par mi 'gyur ba ste/ shA ri'i bu 'di dag ni byang chub sems dpa' phrag dog dang ser sna yongs su spangs pa'i phan yon bzhi yin no zhes gsungs so//las rab tu rnam par 'byed pa'i mdo las kyang / de la zas byin pa na chos bcu 'phel bar 'gyur ba gang zhe na/ bza' ba byin pa na kha dog dang ldan par 'gyur ba dang stobs dang ldan par 'gyur ba dang / skyid par 'gyur ba dang /spobs pa dang ldan par 'gyur ba dang / tshe ring zhing yun ring du 'tsho bar 'gyur ba dang / bza' ba dang btung ba mang bar 'gyur ba dang / rigs mtho bar 'gyur ba dang / longs spyod che bar 'gyur ba dang / mtho ris su skye bar 'gyur ba dang / myur du mya ngan las 'da' bar 'gyur te/ bza' ba byin pa na chos bcu po 'di dag 'phel bar 'gyur ro zhes gsungs so//rab tu byung bar gtogs pa'i sbyin pa dang / khyim la ser sna byed pa dang / tshul 'chos pa dang / log par 'tsho ba dang / chos smra ba la skur pa 'debs pa dang / chos spong ba dang / rma 'byin pa dang / zhal ta byed pa dang / yongs su 'dzin pa dang /'tsho ba ya nga ba dang / 'tsho ba yongs su dag pa dang / rnyed pa dang bkur sti dang / bdud kyis smras pa dang / nyo tshong dang / tshul khrims 'chal pa'i mtshan ma dang / tshul khrims dang ldan pa zil gyis gnon pa dang / rab tu byung ba la bsngags pa dang / sbyangs pa'i yon tan dang / spyod yul ma yin pa dang /sdig pa'i grogs po dang / dge ba'i bshes gnyen dang / de bzhin gshegs pa la mchod pa dang rim gro bya ba dang / dam pa'i chos yongs su 'dzin pa dang / dam pa'i chos nub par 'gyur ba dang / thos pa'i yon tan brjod pa dang / thos pa nyung ba spang ba dang / mi 'dri ba'i skyon dang / chos rku ba dang / bdag la bstod cing gzhan la smod pa dang /byang chub kyi sems kyi yon tan brjod pa dang / byang chub kyi sems la 'dun pa bzlog pa dang / byang chub kyi sems brjed pa dang / gso dpyad dgag pa dang / rgyu skar brtag pa spang ba dang / rgyal po la brten pa smad pa dang / khyim pa'i sbyin pa dang / sbyin pa'i mi mthun pa'i phyogs dang / sbyin pa'i yon tan la dgongs pa bstan pa'o/ /mdo sde sna tshogs las btus pa'i gtam rdzogs so// //sbyin par bya ba'i chos 'di ni rab mchog theg pa chen po'i rjes su 'brang ba shAkya'i gnas brtan mkhas pa chen po dpal mar me mdzad ye shes kyi yin no/ /gang 'dir bsod nams su gyur pa de mkhan po dang slob dpon dang pha dang ma sngon du 'gro bar byas te/sems can gyi tshogs mtha' dag bla na med pa'i ye shes kyi 'bras bu thob par bya ba'i ched du gyur cig /thub pa'i gsung rab rgya mtsho'i bdud rtsi'i bcud/ /ltung dang nyon mongs nad gso'i sman chen 'di/ /lnga brgya'i dus na bstan pa'i srog 'dzin pa/ /shAkya'i sras po yon tan grags pa yis//dpe med grong du sku 'khrungs rtsod dus kyi/ /mkhas pa rgyal ba kun dga' la gsol nas/ /ya rabs spyod pa ma nyams dad dang ldan/ /pa tshab ldong gi sa skor zhogs kyi stong / mkhas btsun 'byung gnas dam pas byin brlabs pa/ /dpal ldan ya gad gtsug lag khang chen du/ / skad gnyis smra la seng ge'i sgra sgrogs pa/ /shAkya'i dge slong nyi ma grags pa dang / /khu yi ban de mdo sde 'bar gyis bsgyur/ /des bskyed bsod nams zla ltar bsil ba yis/ /thub pa'i 'khor bzhi dang ni 'gro kun gyi/ /ltung dang nyon mongs gdung ba zhi gyur cig/ //