CLOSE WINDOW

D3948
བོད་ཡིག

zhu chen gyi lo tsA ba dge ba'i blo gros kyis bsgyur zhing gtan la phab pa/ chos 'di ni zhang zhung gi tho ling gtsug lag khang du mdzad pa'o //[ @##/ /rgya gar skad du/ bo d+hi mArga dI paM pany+tsi ka nA ma/ bod skad du/ byang chub lam gyi sgron ma'i dka' 'grel zhes bya ba/'phags ma rje btsun sgrol ma la phyag 'tshal lo/ /'jam dpal gzhon nur gyur pa la phyag 'tshal lo/ /bde mchog 'khor lo dam tshig gsum rgyal po/ /'jig rten dbang phyug sgrol ma phyag 'tshal 'dud/ /byams pa thogs med bla ma gser gling pa/ / 'jam dbyangs zhi ba'i lha dang byang chub bzang / /bla ma rnams la dang bas phyag byas nas/ /nyi zer lta bu'i dka' 'grel bri bar bya/ /byang chub snying por bgrod pa'i lam bzang po/ /zla zer lta bu'i lam sgron 'di yin te/ /'di na cung zad mi gsal gang yin pa/ /nyi zer lta bu'i 'grel pas lam gsal bya//bstan bcos rtsom pa'i tshad dang mi ldan yang / /'dun cing gus pa'i slob mas bskul ba dang / /sangs rgyas bstan pa rab tu 'phel bya dang / /gzhung rnams mi mthun rtsod pa zhi bya'i phyir/ /nyi zer lta bu'i 'grel pa bri bar bya/ /mkhas rnams ngo mtshar bskyed pa dang //mnyam rnams go bar sla ba dang / /dman rnams bag chags gzhag pa'i phyir/ /dka' 'grel 'di ni bri bar bya/ /gzhung nyung ba la don mang ba'i/ /bstan bcos 'di ni rtogs par dka'/ /dam pa rnams dang bral bas na/ /thams cad du ni rnam par 'khor/ /de bas skyes bu blo ldan pas//bla ma yongs su mnyes byas la/ /bla ma brgyud rim las 'ongs pa'i/ /yang dag man ngag zhu bar bya/ /'dir bla ma dam pa gser gling pa dang bla ma dam pa rje btsun dpal byang chub bzang po'i zhal rin po che bum pa lta bu nas/ bdud rtsi lta bu dang / sbrang rtsi lta bu'i man ngag gi thigs pa rgyal rigs kyi slob ma byang chub 'od dang /dus yun ring por nye bar bstan pa'i slob ma dge slong tshul khrims rgyal ba gnyis kyis yang dang yang du gsol ba btab pa'i ngor man ngag gi thigs pa 'thor ba rnams 'dir bla ma'i zhal snga nas dang / mdo sde la sogs pa'i rjes su 'brangs nas bsdu bar bya'o/ /byang chub 'od kyis dus rtag tu/ /bdag la tshig ni bdun dris pas/ /rtsa bar don de ma gsal zhes/ /bskul ba'i don du bri bar bya/ /sngon gyi slob dpon mkhas pa chen po nor gyi rtsa lag gi zhal nas/ mdo don smra ba rnams la ni//man ngag cung zad sbyin par bya/ /dgos pa bcas dang bsdus don bcas/ /tshig don bcas dang mtshams sbyor bcas/ /brgal lan bcas pas bsnyad par bya/ /zhes bshad pas 'dir yang shes rab dang ldan pa dang / bla ma mkhas pa la brten pa dag gis tshul ji lta ba bzhin du sbyar ba byas na theg pa chen po'i lam bzang po skye bo chen po'i chos lugs shing rta chen po'i lam chen po 'di myur du rtogs par 'gyur ro//mdo sogs lung dang bstan bcos dang / /bla ma rnams kyi gsung bzhin du/ /byang chub sems dpa' rnams kyi lam/ /bdag gis nges par bshad par bya//de gang yin zhe na/ dus gsum rgyal ba thams cad dag dang de'i chos dang / /dge 'dun rnams la gus pa chen pos phyag bya ste/ /slob ma bzang po byang chub 'od kyis bskul gyur pas/ /byang chub lam gyi sgron ma rab tu gsal bar bya/ /zhes bya ba la sogs pa'i gzhung 'di yin no//gzhung de dag gang yin zhe na/ dus gsum zhes bya ba la sogs pa smos te/ dus gsum zhes bya ba la sogs pa'i tshig rkang pa gcig ni rtogs par sla'o/ /slob ma bzang po zhes bya ba ni theg pa chen po'i chos kyi snod yin pas so//de gang yin zhe na/ byang chub 'od ces bya ba 'di yin no/ /bskul gyur pas zhes bya ba ni des bdag la 'di skad du/ bod kyi yul 'di na sangs rgyas kyi bstan pa theg pa chen po'i lam 'di la log par rtog pa'i gang zag bla ma dge ba'i bshes gnyen gyis yongs su ma zin pa dag phan tshun rtsod cing rang rang gi rtog ges zab pa dang rgya chen po'i don la rang gi rtog pa dpyod cing so so nas mi mthun pa dag mang du mchis pas de dag the tshom bsal du gsol zhes bdag la yang dang yang du bskul bar gyur pas/de'i don du bdag gis mdo la sogs pa'i rjes su 'brangs nas byang chub lam gyi sgron ma rab tu gsal bar bya'o//byang chub lam gyi sgron ma de gang yin zhe na/ sems can dam pa byang chub mchog /ces bya ba nas/ de nyid rig la nyes pa med/ /ces pa'i bar gyi gzhung 'di yin no/ /de la chung dang zhes pa nas mchog yin no zhes pa'i gzhung gis theg pa chen po'i snod dang snod ma yin pa bstan te/skyes bu tha ma dang / skyes bu 'bring ni zhar la bshad pa yin no/ /tshig don rnams ni rtogs par sla'o/ /rang rgyud gtogs pa'i sdug bsngal gyis/ /gang zhig gzhan gyi sdug bsngal kun/ /yang dag zad par kun nas 'dod//skyes bu de ni mchog yin no/ /zhes pas ni theg pa chen po'i snod bstan pa yin no/ /don 'di la dgongs nas ji skad du/ byang chub sems dpa' sems can la/ /bu gcig pa la bya ba bzhin/ /rkang gi gting nas byams pa ste/ /de ltar rtag tu byed par 'dod//yang ji ltar phug ron rang gi bu mchog byams/ /rang gi bu de pang na 'khyud nas 'dug /de 'dra ba la khong khro 'gal ba ltar/ /brtser bcas lus can bu la 'ang de dang 'dra/ /zhes gsungs pa dang / slob dpon mkhas pa chen po nor gyi rtsa lag gis kyang ji skad du/ dman pa de dang de'i thabs kyis rang gi rgyud du gtogs pa'i bde ba don du gnyer//'bring po sdug bsngal ldog pa kho na'o bde min gang phyir de ni sdug bsngal gnas yin phyir/ /dam pa rang gi rgyud la yod pa'i sdug bsngal rnams kyis gzhan dag la ni bde ba dang / /sdug bsngal gtan ldog kho na don gnyer gang phyir de yi sdug bsngal gyis de sdug bsngal phyir//zhes gsungs pa dang / yang gang gzhan gyi sdug bsngal gyis sdug bsngal bar 'gyur zhing / gzhan gyi bde bas yid bde zhing dga' bar 'gyur gyi/ bdag gi ni ma yin pa de lta bu'i rigs can la yin te/de dag ni rang gi bde ba la mi lta ba dang / de dag ni gzhan dag sdug bsngal gyi chu bo chen po las yongs su bskyab par nus so snyam du 'bad pa byed do/ /rang bzhin gyis snying rje che ba dag ni snying rje la goms pa'i stobs kyis rang sdug bsngal yang gzhan bde ba la mngon par dga' ba yin no zhes gsungs so//de bas na skyes bu gang zhig rang bzhin gyis pha rol po nyam thag pa dag mthong na mi bzod cing bdag dang gzhan brje bar sems shing bu gcig pa g.yang sar lhung ba dang / chu bo chen pos khyer ba dang /me 'bar ba'i nang du 'dug pa mthong ba na de mi bzod pa bzhin du/ 'gro ba mtha' dag la bu gcig pa ltar lta ba de ni 'dir theg pa chen po'i snod du bsngags so/ /de lta bu'i sems can chen po de la ji ltar bya snyam pa la/ bla ma rnams kyis bstan pa yis/ /yang dag thabs ni bstan par bya//zhes bya ba ni 'di yin no/ /de la bla ma rnams ni rje btsun dpal byang chub bzang po dang / rje btsun su war+N+Na dwI pa la sogs pa'o/ /yang dag thabs zhes bya ba ni/ gsum la skyabs su 'gro ba dang / byang chub kyi sems rnam pa gnyis dang / mngon par shes pa bskyed nas gzhan don khyad par can bya ba'i thabs dang /thabs dang shes rab zung du 'brel ba'i tshogs gnyis bsag pa'i thabs dang / bdag dang gzhan don myur du rdzogs par 'gyur ba'i theg pa chen po'i chen po gsang sngags kyi lugs kyi thun mong ma yin pa'i tshogs gnyis bsags pa'i thabs rnams so//de lta bu'i thabs de dag rgyas par bshad par 'dod nas/ rdzogs sangs bris sku la sogs dang / /zhes pa nas/ de nyid rig la nyes pa med pa'i bar ro/ /gsum la skyabs su 'gro ba ni thar pa'i grong khyer chen por 'jug pa'i sgo lta bur gyur pa dang /byang chub kyi sems kyi gzhi lta bur gyur pas de bstan par 'dod nas/ rdzogs sangs bris sku la sogs dang / /mchod rten dam chos mngon phyogs nas/ /zhes bya ba la sogs pa tshig rkang bcu gnyis kyis bstan te/ mngon phyogs nas zhes pa ni de bzhin gshegs pa'i sku mngon du phyogs par byas shing mthong ba las byang chub kyi sems skye'o zhes theg pa chen po'i mdo rgyal po la gdams pa'i sngon gyi rtogs pa brjod pa las kyang mthong ba dang /dge ba'i bshes gnyen dag kyang gsung ngo / /cho ga rgyas pa ni 'og nas ston par 'gyur ro/ /'di ltar byug ris kyi dkyil 'khor nyi shu rtsa bdun du dkon mchog gsum gyi gzugs brnyan so sor bzhugs su gsol la/phyogs bcu'i 'jig rten gyi khams na bzhugs pa'i rnam par dag pa'i dkon mchog gsum yang gnas so so de dag tu spyan drang ba'am/ yang na zhing khams de dag nyid du bdag nyid 'dug par mos te lus kyi rnam par 'phrul pa'i bkod pas sangs rgyas dang byang chub sems dpa' re re'i mdun du bdag nyid 'dug par bsam la pug pug por ram sor mo bsnol la spyi bor thal mo sbyar nas mchod pa'i bya ba rdzogs pa dang /phung po gsum pa byas la bla ma la yon phul te skyabs su 'gro ba bya'o//de yang dkon mchog gsum ni 'di lta bu yin te/ de kho na nyid kyi dkon mchog gsum dang / mdun du bzhugs pa'i dkon mchog gsum ste/ de lta bu shes pa sngon du 'gro bar bya'o/ /me tog bdug spos dngos po dag /ces pa ni zang zing gi mchod pa mtshon pa'o//mchod pa rnam pa bdun dag kyang / /zhes pa ni sgrub pa'i mchod pa mtshon pa'o/ /'dir byang chub sems dpa' tshogs kyi lam pa slob dpon du gyur pa des bsod nams kyi tshogs bsag pa'i phyir/ mchod pa la mkhas par bya ba yin te/ de smra ba 'dod nas/ kun bzang spyod las gsungs pa yi //mchod pa rnam pa bdun dag kyang / /zhes bya ba 'di yin te/ kun bzang spyod ces bya ba ni 'phags pa sdong po bkod pa las 'byung ba'i 'phags pa bzang po spyod pa'i smon lam gyi rgyal po yin te/ 'di ni phyogs bcu 'jig rten gyi khams kyi byang chub sems dpa' chen pos chen po la bzhugs pa kun du bzang po'i spyod pa dang /smon lam gyi rgya mtsho mi zad pa'i brnyes pa rnams kyi kun du bzang po'i spyod pa dang / kun du bzang po'i smon lam yin pas 'di ni pha rol tu phyin pa'i theg pa pa'i byang chub sems dpa' rnams kyi sde snod kyi mar me lta bu yin no zhes bla ma dam pa mkhas pa chen po dag gsungs pa yin no//gsungs pa'i mchod pa rnam pa bdun/ /zhes bya ba ni bla ma kha cig gi zhal nas 'phags pa bzang po spyod pa'i smon lam las mchod pa bdun gsungs te/ ji snyed su dag phyogs bcu'i zhes pa sh+lo kas ni lus dang ngag dang yid kyis phyag 'tshal ba'i mchod pa bstan to//bzang por spyod la dad pa'i zhes pa la sogs pa'i sh+lo kas ni lus dbul ba'i mchod pa bstan to/ /rdul gcig steng na zhes pa'i sh+lo kas ni de dag yul du byas te dang ba'i mchod pa bstan to/ /de dag bsngags pa mi zad rgya mtsho rnams/ /zhes pa la sogs pas ni bstod pa'i mchod pa bstan to//me tog dam pa zhes pa la sogs pas ni bla na yod pa'i mchod pa bstan to/ /mchod pa gang rnams bla med rgya che ba/ /zhes pas ni bla na med pa'i mchod pa bstan to/ /'dod chags zhe sdang gti mug ces pas ni phung po gsum pa'i mchod pa bstan to/ / gzhung gzhan gyis mi mchod pa de dag gi bsngo ba bstan pa yin no zhes gsungs so / /yang bla ma dam pa kha cig gi zhal nas/ 'phags pa bzang po spyod pa'i smon lam las mchod pa bdun gsungs te/ 'di ltar me tog dam pa dang / phreng ba dam pa dang / sil snyan dam pa dang / byug pa dam pa dang /mar me dam pa dang / bdug spos dam pa dang / na bza' dam pa rnams so/ /dri mchog dam pa dang / phyi ma'i phur ma gnyis ni byug pa dam pa dang / bdug pa gnyis kyi nang du 'dus pa nyid yin la bkod pa'i khyad par zhes pa ni snga ma de dag re re zhing yang brjod du med pa'i bkod pa bya'o zhes gsung ngo //bla ma mkhas pa gzhan dag ni 'phags pa bzang po spyod pa'i smon lam las mchod pa bdun du gsungs pa ni 'di ltar yan lag bdun par 'dus te/ sgrub pa'i mchod pa yin no zhes gsungs te/ de nyid las bdun po de dag rdzogs pa'i rjes la 'di skad du/'das pa'i sangs rgyas rnams dang da ltar gyi/ /phyogs bcu dag na gang bzhugs mchod par gyur/ /zhes mchod pa nyid yin par gsal bar gsungs so zhes gsung ngo / /de dag ni gar yang 'gal ba med pa de rang nyid gang la mos pa de gzung bar bya'o/ /'di ltar mchod pa ni rnam pa gnyis te/zang zing gi mchod pa dang / sgrub pa'i mchod pa'o/ /zang zing gi mchod pa ni gnyis te/ mngon sum pa nyid dang / yid kyis byas pa'o/ /mngon sum pa ni gnyis te/ me tog la sogs pa dang / bdug pa la sogs pa dang / rol mo la sogs pa dang / rgyal srid dang /nor bu rin po che la sogs pa bdag nyid la yod pa'o/ /gnyis pa ni sems rten dang bcas pa dang / bu dang bu mo dang / chung ma dang bran la sogs pa'o/ /yid kyis byas pa la gnyis te/ dang po ni phyogs bcu'i 'jig rten khams kyi bdag po med cing / gzhan gyis yongs su ma bzung ba'i rdzas phul du byung ba ma lus pa ste/ji ltar 'phags pa dkon mchog sprin dang / 'phags pa dgongs pa rgyud kyi phreng ba dang / ting nge 'dzin gyi 'khor lo'i mchod pa'i phyag rgya'i mdo dang / dkon mchog ta la la'i mdo dang / spyod pa la 'jug pa las gsungs pa lta bu'o//gnyis pa ni yid kyi rnam par 'phrul pa las byung ba'i bkod pa nam mkha'i mdzod las byung ba ste/ 'di ltar 'khor los sgyur ba'i rgyal srid rin po che bdun dang / nor bu rin po che gser dang / dngul dang / dung dang / man shel dang / chu shel dang / spug dang / rdo'i snying po dang /mu tig dang / mu tig dmar po dang / man shel dang / pad+ma rA ga dang / asma gar+b+ha dang / mu sa la gal pa dang / dun las dang / in+d+ra nI la dang / mar ka ta dang / bai DUr+ya dang / shaM ka shi la dang / byi ru dang / ke ke ru dang / ke ke ru chen po la sogs pa'i nor bu de dag gi char pa 'bab pa dang /de dag gi gdugs dang / rgyal mtshan dang / ba dan dang / gzhal yas khang dang / dra ba'i tshogs brjod du med pa dag gzhan yang dkon mchog ta la la'i gzungs las 'byung ba lta bu ste/ me tog phal cher me tog bla re dang / /me tog bkod pa'i 'od zer rab 'gyed cing / / me tog sna tshogs kun du bkram byas te/ /bdag nyid chen po de dag rgyal bas mchod/ /ces gsungs te/ de bzhin du bdug pa dang / spos dang / phreng ba dang / phye ma dang / na bza' dang / rin po che dang / pad+ma dang / rgyan phreng dang / rgyal mtshan te/ de dag kyang kha dog sna tshogs pa'o//sngar gyi tshigs su bcad pas kun la sbyar bar bya'o/ /de bzhin du gdugs bzo legs pa yu ba rin po che las grub pa kha dog sna tshogs pa sangs rgyas kyi zhing ma lus pa khebs pa brjod du med pa dang / de bzhin du rgyal mtshan yang de bzhin te/ thams cad gdugs bzhin no//ba dan dang rnam par rgyal ba'i ba dan yang tshad dang rgyu dang grangs snga ma bzhin no/ /gzhan yang me tog kha dog dang dbyibs dang dri phun sum tshogs pa'i char dang / de'i phreng ba dang / de'i gdugs dang / de'i rgyal mtshan dang / de'i ba dan dang / rnam par rgyal ba'i ba dan dang /gzhal med khang bkod pa sna tshogs pa du ma brjod du med pa dang / mar me yang tshul de bzhin pa dang / spos kyi char la sogs pa yang snga ma'i tshul dang ldan pa dang / zhal zas bza' ba dang / btung ba kha dog dang dri dang ro phun sum tshogs pa dang / na bza' dri zhim pos bsgos pa dang /rol mo'i sgra dbyangs snyan cing yid 'phrog par byed pa'i pi wang dang / gling bu dang / rnga dang / rnga pa Ta ha dang / rnga bo che dang / rnga zlum dang / rdza rnga dang / dung dang / zangs dung dang / cha lang dang / ting ting shag dang / Da ma ru dang / lha dang / mi'i glu snyan pa yid 'phrog par byed pa dang / dkon mchog gsum gyi bstod pa'i sgra dbyangs snyan cing don dang ldan pa dang phye ma'i phur ma ri rab bye ba phrag brgya gcig tu bsdoms pa tsam la sogs pa'o/ /de yang 'phags pa dkon mchog sprin las 'byung ba bzhin no/ /sgrub pa'i mchod pa ni gnyis te/ sgrub pa'i mchod pa nyid dang /bla na med pa'i mchod pa'o/ /dang po la bdun te/ phyag 'tshal ba'i mchod pa dang / zang zing gi mchod pa'i mchod pa dang / sdig pa bshags pa'i mchod pa dang / rjes su yi rang pa'i mchod pa dang / de bzhin du bskul ba dang / gsol ba gdab pa dang / yongs su bsngo ba'i mchod pa zhes bya ba dag go//de la phyag 'tshal ba'i mchod pa la yang gnyis te/ lus kyi mchod pa dang / ngag gi mchod pa'o/ /lus kyi mchod pa ni 'phags pa bzang po spyod pa las/ ji snyed su dag ces pa la sogs pa dang / bzang po'i spyod la dad pa'i stobs dag gis//zhes pa la sogs pa dang / rdul gcig steng na rdul snyed ces pa la sogs pa'o/ /de dag gis ni dmigs pa'i yul du bya ba dang / lus dbul ba dang / phyag bya ba de gsungs so/ /don de nyid 'phags pa phung po gsum pa'i mdo las gsungs te/ de pus mo g.yas pa sa la 'dzugs pa na zhes pa dang /de pus mo g.yon pa sa la 'dzugs pa na zhes pa dang / de lag pa g.yas pas la 'dzugs pa na sems can thams cad g.yas phyogs kyi lam la gnas par gyur cig snyam du sems bskyed do zhes pa dang / de bzhin du lag pa g.yon pa dang mgo sa la gtugs pa na zhes pa'i tshul de bzhin du shes par bya/de'i bsngo ba de nyid las 'di skad du bdag gi yan lag lngas phyag btsal ba 'dis sems can thams cad kyi sgrib pa lnga sel bar gyur cig /mig lnga yongs su dag par gyur cig /dbang po lnga yongs su rdzogs par gyur cig /lam lnga la gnas par gyur cig /mngon par shes pa nyams pa med pa lnga thob par gyur cig /sems can 'gro ba lngar skyes pa dag 'gro ba lnga las khyad par du 'phags pa dang / tshul khrims khyad par du 'phags pa dang / ting nge 'dzin khyad par du 'phags pa dang / shes rab khyad par du 'phags pa dang / rnam par grol ba khyad par du 'phags pa dang /rnam par grol ba'i ye shes mthong ba khyad par du 'phags pa thob par gyur cig /sangs rgyas la lta ba dang / chos nyan pa dag dge 'dun dang 'grogs pa thob par gyur cig ces gsungs pa lta bu'o/ /ngag gis mchod pa yang lus kyis phyag byed pa'i dus de nyid kyi cho ga rtogs pa ci yod pas dkon mchog gsum gyi bstod pa glu dbyangs kyis tshig tu 'don cing phyag byed pa'o//zang zing gi mchod pa ni sngar brjod zin to// // sdig pa bshags pa'i mchod pa ni gser 'od dam pa'am/ ltung ba bshags pa'am/ phung po gsum pa'i mdo'am/las kyi sgrib pa rgyun gcod pa la sogs pa'o/ /sdig pa bshags pa de yang mchod pa nyid yin te/ ji skad du 'phags pa blo gros mi zad pas bstan pa'i mdo las/ bdag dang gzhan gyi sdig pa bshags pa yang bsod nams su 'gyur ro zhes gsungs so/ / rjes su yi rang ba'i mchod pa yang 'phags pa zla ba sgron ma'i mdo las 'byung ba bzhin te mchod pa nyid yin no/ /bskul ba dang / gsol ba gdab pa'i mchod pa dang / yongs su bsngo ba'i mchod par 'gyur ba'i tshul yang mdo nyid du blta bar bya'o/ /bla na med pa'i mchod pa la gnyis te/dmigs pa dang bcas pa dang dmigs pa med pa'o/ /de la dmigs pa dang bcas pa ni 'phags pa blo gros rgya mtsho'i mdo las/ blo gros rgya mtsho gsum po 'di dag ni de bzhin gshegs pa la mchod pa dang rim gro byed pa bla na med pa ste/ gsum gang zhe na/ byang chub tu sems bskyed pa dang /dam pa'i chos yongs su 'dzin pa dang / sems can rnams la snying rje chen po bskyed pa'o zhes gsungs so/ /de bzhin du 'phags pa mthar gyis yang dag 'phags pa'i mdo las/ bzang po phan yon bzhi po 'di dag mthong ba'i byang chub sems dpa' ni de bzhin gshegs pa la mchod pa yin te/bzhi gang zhe na/ sbyin gnas mchog la dad par 'gyur ba dang / bdag la bzlas bltas te sems can gzhan yang mchod pa byed par 'gyur ba dang / de bzhin gshegs pa la mchod nas byang chub kyi sems brtan par 'gyur ba dang / skyes bu chen po'i mtshan sum cu rtsa gnyis mthong nas dge ba'i rtsa ba bsdus par 'gyur ba ste bzhi po 'di dag go zhes gsungs so//sems can mgu bar byed pa yang de bzhin gshegs pa la mchod pa bla na med pa yin te/ bcom ldan 'das kyis ba tsha'i chu klung gi mdo las ji skad gsungs pa dang / slob dpon zhi ba lhas kyang / gang dag bde na thub dbang rnams dgyes shing / /gang la gnod na thub dbang mi dgyes pa/ /de dag mgu bas thub dbang thams cad dgyes / /de la gnod byas thub la gnod byas 'gyur/ /zhes pa dang / yang de nyid las/ de bzhin gshegs rnams mnyes par bgyi slad du//'jig rten bran du deng nas mchi bar bgyi/ /skye bo'i tshogs kyis bdag mgo rkang bcad dam/ /gsod kyang rung ste 'jig rten mgon dgyes mdzod/ /thugs rje ldan pa dag gis 'gro 'di kun/ /bdag gir mdzad pa 'di la dogs ma mchis/ /sems can gzugs su snang ba 'di dag kun//mgon po min nam ci na 'dir mi gus/ /de bzhin gshegs pa mnyes bya'ang de nyid yin/ /zhes pa dang / yang de nyid las/ byams pa'i bsam ldan mchod pa gang / /de ni sems can che ba nyid/ /sangs rgyas dad pa'i bsod nams gang / /de ni sangs rgyas che ba nyid//ces bslab pa kun las btus pa las gsungs so/ /spyod 'jug las kyang / sems can mgu bya ma gtogs pa/ /rgyal ba mnyes pa'i thabs gzhan med/ /ces gsungs pa dang / yang de nyid las don 'di rgyas par bshad de de nyid du blta bar bya'o/ /gzhan yang mdo nyid na rgyas pas mdo nyid du blta bar bya'o//de la dmigs pa med pa'i mchod pa ni shes rab kyi pha rol tu phyin pa bsgom pa yin te/ de la ni mchod par bya ba dang / mchod par byed pa dang / mchod pa'i rdzas med de/ de yang shes rab kyi pha rol tu phyin pa'i mdo las/ gang gis nga la gzugs su mthong / /gang gis nga la sgrar shes pa//de dag log par mthong pa ste/ /skye bo 'di yis nga mi mthong / /sangs rgyas rnams ni chos kyi sku/ /'dren pa rnams ni chos nyid blta/ /chos nyid mthong bar bya min pas/ /de ni rnam par shes mi nus/ /zhes gsungs so/ /don 'di ni 'phags pa rtag tu ngu'i le'u las gsal bar gsungs pas der blta bar bya'o//de bas na 'phags pa seng ge sgra'i mdo las/ sangs rgyas su 'du shes pa la sangs rgyas mthong ba med na/ sangs rgyas la mchod par 'gyur ba lta ci smos de ni gnas med do/ /de la sangs rgyas la mchod pa gang zhe na/ gang 'du shes kyi mtshan ma mi skyed pa'o//gang la sems med pa dang / sems las byung ba med pa dang / sangs rgyas su 'du shes pa med pa dang / chos su 'du shes pa med pa dang / dge 'dun du 'du shes pa med pa dang / gang zag dang / bdag dang / pha rol por 'du shes pa med pa ni de bzhin gshegs pa la mchod pa yin no zhes gsungs te/'di'i don rgyas par mdo nyid du blta bar bya'o/ /de bas na 'phags pa thogs med kyi zhal snga nas/ sangs rgyas bcom ldan 'das de ni sgrub pa'i mchod pas mnyes par 'gyur gyi/ zang zing gi mchod pas ni de mnyes par mi 'gyur ro zhes gsungs pa yang legs par drangs par 'gyur ro//de bas na sangs rgyas ni chos kyi skus gnas pa yin te/ sangs rgyas phal po che'i le'u las/ sangs rgyas rnams ni chos kyi sku/ /de bzhin gshegs pa skye ba med/ /rnam dag nam mkha' lta bu ste/ /zhes gsungs pa dang /'phags pa nam mkha' mdzod kyi mdo las kyang / sangs rgyas bcom ldan 'das ni chos nyid du yang mi dmigs na/ gzugs dang mtshan nyid du lta dmigs par ga la 'gyur zhes gsungs so/ /slob dpon 'phags pa klu sgrub kyi zhal nas kyang / chos rnams thams cad stong pa la//gang la bstod cing gang gis bstod/ /skye dang 'jig pa rnam spangs shing / /gang la mtha' dang dbus med pa/ /gzung dang 'dzin pa mi mnga' ba'i/ /'dir ni khyed bstod nus pa gang / /zhes gsungs so/ /de lta bu'i mchod pa'i bye brag ni byang chub sems dpa' dbang po rtul po dang rnon po'i bye brag gis de dang de shes par bya'o//rtsa ba nyid la 'jug par bya ste/ byang chub snying po'i mthar thug par/ /mi ldog pa yi sems kyis su/ /zhes bya ba la sogs pa la/ byang chub snying po ni drang ba'i don du dpal rdo rje'i gdan byang chub chen po'i gnas dang / 'og min gyi gnas dpal stug po bkod pa'i zhing ngo / /de dag tu rdo rje lta bu'i ting nge 'dzin brnyes pas na snying po'o/ /nges pa'i don du ting nge 'dzin de brnyes pa'i gnas 'di yin bya ba med de/ don dam par chos thams cad kyi dbyings nyid yin pas so/ /'phags pa nam mkha' mdzod kyi mdo las/byang chub snying po nam mkha' ste/ /byang chub nam mkha'i mtshan nyid yin / /zhes gsungs so/ /mi ldog pa yi sems kyis su/ /zhes bya ba ni 'dir phyir mi ldog pa'i byang chub sems dpa' ni rnam pa gsum ste/ sbyor ba'i lam nas mi ldog pa dang / bden pa mthong ba nas mi ldog pa dang /sa brgyad pa nas mi ldog pa'o/ /'di'i don ni 'phags pa shes rab kyi pha rol tu phyin pa'i man ngag gi bstan bcos mngon par rtogs pa'i rgyan las rgyas par blta bar bya'o/ /gzhan yang so so'i skye bo nyid nas phyir mi ldog pa dang / bden pa mthong ba nas phyir mi ldog pa dang /sa bdun pa nas phyir mi ldog pa'o/ /'di'i don slob dpon dpal ye shes grags pas mdzad pa'i de kho na nyid la 'jug pa'i bstan bcos chen por gsal bar mdzad pa der blta bar bya'o/ /yang na phyir mi ldog pa ni bzhi ste/ sems bskyed pa nas phyir mi ldog pa dang gsang ste phyir mi ldog pa dang /bzod pa thob nas phyir mi ldog pa'o/ /dang por skyabs 'gro lan gsum bya zhes bya ba ni dkon mchog gsum re re la lan gsum gsum bya ba'o / /skyabs su 'gro ba'i don bsdus nas smras pa/ gnas dang rten dang bsam pa dus//bslab pa rang bzhin tshad dang tshul/ /bya ba dbye ba nges tshig dbye/ /nyes dmigs dgos pa phan yon yin/ /'dir skyabs su 'gro ba'i tshul brjod par bya ste/ skyes bu 'ga' zhig 'khor ba'i sdug bsngal las yid nges par byung ba/ rtag tu 'chi ba rjes su dran pa/ rang bzhin gyis snying rje dang shes rab che ba/ so sor thar pa'i ris bdun po las gang yang rung ba'i tshul khrims la skyon med par gnas pa de gal te khyim pa zhig yin na ni dge bsnyen gyi bslab par gyur pa bslab pa'i gzhi lnga dang / de'i phyogs su gtogs pa bslab pa bzhi bcu rtsa lnga dang ldan pa dang /de rab tu byung ba zhig yin na ni rang gi bslab pa'i tshul dang / ji ltar nyan thos kyi sar bshad pa'i dge sbyong gi rgyan dang / sbyangs pa'i yon tan dang / gzhan yang rten bzhi dang / tshul bzhi la sogs pa dang / gzhan yang cho ga dang / spyod lam dang / 'tsho ba dang / tshul khrims dang / lta ba phun sum tshogs pa dang ldan pa dang / gzhan yang nam gyi cha stod dang cha smad la mi nyal bar rnal 'byor la brtson pa dang / zas kyi tshod rig pa dang / dbang po rnams kyi sgo bsdams pa dang / kha na ma tho ba phra rab tsam la yang 'jigs par lta ba'i skyes bu de 'di snyam du ma la so sor thar pa'i tshul khrims 'di tsam gyis ni bdag dang gzhan gyi don mthar phyin par mi 'gyur na/ji ltar na bdag dang gzhan gyi don mthar phyin par 'gyur zhig gu/ 'di ltar theg pa chen po zhes bya ba bdag dang gzhan gyi don mthar phyin par byed pa zhig yod ces grag gi / dge ba'i bshes gnyen dam pa cig las btsal bar bya'o zhes bsams nas bla mar 'os pa'i dam pa de yun ring du yongs su mnyes par byas te/ de mnyes par gyur nas de'i zhabs gnyis la mgo bos gtugs te 'di skad du skyes bu dam pa khyod bdag la thugs brtse bar mdzad du gsol/bdag la bdag dang gzhan gyi don mthar phyin par byed pa'i thabs theg pa chen po'i lam de stsal du gsol zhes g.yo sgyu dang bral ba'i sems kyis zhu bar bya'o/ /de nas dge ba'i bshes gnyen des slob ma de brtag pa gsum gyis brtags te / 'di ltar spyod lam dang / rmi lam dang / 'jig rten pa dang 'jig rten las 'das pa'i lha'i pra dbab pas brtags la de snod du 'dug par shes nas bla ma de yid dga' ba dang / bzhin 'dzum pa dang / zang zing dang / rnyed pa dang / bkur sti dang bral ba'i sems dang slob ma de la snying brtse ba'i sems kyis sdig pa can gyi skye bos dben pa'i sa phyogs su sa gzhi legs par 'thas par byas la gtsang ba der ba'i rnam lngas skyang nul dang byug pa byas la/tsan+dan la sogs pa'i dri phul du byung bas kyang byugs shing der dri zhim po'i me tog sil mas gtor bar bya'o/ /der dkon mchog gsum gyi gzugs brnyan lugs ma la sogs pa dang /po ti la sogs pa dang / byang chub sems dpa' rnams khri'am stegs bu la bzhugs par bya'o/ /der bla re la sogs pa dang / me tog la sogs pa'i mchod pa'i yo byad ji ltar 'byor pa dang / rol mo'i bye brag dang / zhal zas dang / rgyan cha la sogs pa sta gon byed du bcug la/de nas slob ma des gdan khri me tog gis brgyan pa'i steng du dge ba'i bshes gnyen bzhugs su gsol la/ 'di snyam du 'di ni 'gro ba ma lus pa'i skyabs dang dpung gnyen yin no snyam du bla ma la ston pa'i 'du shes bskyed la/khrus byas te gos gtsang ma bgos la bsam pa bzang po dang ldan pas 'di skad du rigs kyi bu khyod mkhyen par mdzad du gsol/ bdag 'khor ba'i gnas 'dir thog ma med pa'i dus nas sdug bsngal du mas gtses shing shin tu nyam thag par gyur te/ mgon ma mchis pa/ skyabs ma mchis pa/ dpung gnyen ma mchis pa/ bdag gi mgon dang skyabs dang dpung gnyen mdzad du gsol zhes lan gsum du bya'o/ /de nas bla ma des 'di skad du skyes bu khyod 'khor ba las skyo zhing yid byung bas shing rta chen po'i lam la 'jug par 'dod pa shin tu legs so/ /'di ltar shes par gyis shig /dkon mchog gsum zhes bya ba mgon med pa dang / skyabs med pa dang / dpung gnyen med pa dag gi mgon dang / skyabs dang dpung gnyen du gyur pa yod kyi / khyod dang ba'i yid dang / shin tu spro ba'i yid kyis 'gro ba mtha' dag yul du byas te/ de las skyabs su 'gro ba gyis shig /de la sri zhu dang / bsnyen bkur tshul bzhin du bya ba'i phyir mchod pa'i yo byad 'byor pa ci yod pas tshogs par gyis shig ces brjod par bya'o/ /de nas slob ma des pus mo gnyis sa la btsugs shing thal mo sbyar nas me tog phul te/ /'di skad du/ skyes bu gtso bo dgongs su gsol//thog ma med nas 'di bar du/ /bdag ni 'khor bar 'khor gyur te/ /sdug bsngal rnams kyis shin tu dub/ /gang gis sdug bsngal mthar 'byin pa'i/ /lam de khyod kyis bstan du gsol/ /zhes lan gsum du brjod par bya'o/ /de nas bla ma des phyogs bcu'i 'jig rten gyi khams kyi dkon mchog thams cad yul du byas la/lus kyi bkod pa brjod du med par mos la/ lus re re la mgo brjod du med pa dang / mgo re re la lce brjod du med par mos te/ sngar brjod pa'i lus dang ngag gi mchod pa dang / zang zing gi mchod pa rgya che ba dang /sdig pa bshags pa dang / rjes su yi rang ba dang / bskul ba dang / gsol ba gdab pa dang / yongs su bsngo ba dag ni mchod pa rnam pa bdun zhes bya ba yin la/ mchod pa rnam pa bdun po de'i rjes la skyabs su 'gro ba bya'o/ /de ltar skyabs su song ba des skyabs su 'gro ba'i bslab pa bsrung bar bya ste/lha gzhan la phyag mi btsal ba dang / gzhan la gnod pa dang 'tshe ba spang ba dang / mu stegs can dang mi 'grogs shing de dag la bsnyen bkur mi bya ba dang / dkon mchog gsum gyi khyad par dang / yon tan rjes su dran pas yang dang yang du skyabs su 'gro ba dang /bka' drin chen po rjes su dran pas dus rtag tu mchod pa la brtson zhing bza' ba dang btung ba'i phud kyang dbul ba dang / snying rje rjes su dran pas 'gro ba gzhan yang tshul 'di lta bu la nye bar dgod pa dang / bya ba gang byed pa dang / dgos pa ci yod pa na dkon mchog gsum la mchod nas gsol ba 'debs shing 'jig rten pa'i thabs gzhan spang ba'o //phan yon ni gsum 'thob ste/ 'di ltar rgyu'i dus dang / lam gyi dus dang / 'bras bu'i dus so/ /dang po ni tshe rabs 'di dang gzhan gyi phan yon te bla ma las shes par bya'o/ /de ltar skyabs su song ba'i phan yon shes pa des nyin lan gsum dang mtshan lan gsum du skyabs su 'gro bar bya zhing /dkon mchog gsum tha na bzhad gad kyi phyir ram/ srog gi phyir gtang bar mi bya zhing bsrung bar bya'o/ /de ltar skyabs su 'gro ba khyad par can bstan nas/ da ni byang chub tu sems bskyed pa bstan pa'i phyir/de nas sems can thams cad la zhes pa la sogs pa tshig rkang sum cu rtsa bzhis bstan te/ de nas zhes pa ni skyabs su 'gro ba byas nas zhes bya'o/ /sems can thams cad ces pas ni sems bskyed pa'i dmigs pa bstan te/ de yang sems can ni 'di tsam du zad do zhes tshad gzung bar mi nus te/mdo las gal te phyogs bcu'i 'jig rten gyi khams thams cad chu'i dkyil 'khor du gyur la/ skyes bu zhig gis lo brgya phrag stong stong na spu'i rtse mo zhig gis chu de las 'thor bar byed na chu'i dkyil 'khor ni zad par 'gyur gyi /sems can gyi khams ni zad par 'gyur ba med do zhes gsungs pa dang / 'phags pa kun du bzang po'i spyod pa'i smon lam gyi rgyal po las kyang / nam mkha'i mthar thug gyur pa ji tsam par/ /sems can ma lus mtha' yang de tsam mo/ /zhes gsungs so//de lta bu'i sems can yul du byas nas sems bskyed par bya'o/ /byams pa'i sems ni sngon 'gro bas/ /zhes pa ni mar 'du shes pa las drin du gzo ba'i sems 'byung ba ni byams pa'o/ /byams pa'i sems las snying rje'i sems 'byung la snying rje'i sems las byang chub kyi sems 'byung bas na bdag gis 'dir/byams pa'i sems ni sngon 'gro bas/ /zhes smras so/ /tshig rkang pa bdun ni dkyus ji lta ba nyid do/ /byang chub sems ni bskyed par bya/ /zhes bya ba ni gsum la skyabs su 'gro ba byas pa'i rjes la yang bdag la 'byor pa ci yod pas dkon mchog gsum dang bla ma dge ba'i bshes gnyen la mchod pa dbul ba tshul bzhin du byas la/bla ma'i spyan sngar maN+Dal byas te/ bsam pa bzang po g.yo sgyu dang bral bas bla ma 'di ni sangs rgyas mngon sum na bzhugs pa nyid yin no snyam du bsams la/ dus gsum gyi sangs rgyas thams cad kyis mdzad pa de dag ma lus par bdag gis rdzogs par bya'o zhes bsams la/pus mo gnyis sa la btsugs pas me tog phul la/ thal mo legs par sbyar la 'di skad du/ kun mkhyen ye shes phung po can/ /srid pa'i 'khor lo rnam sbyong ba//khyod zhabs pad+ma spangs nas ni/ /gtso bo gzhan la skyabs ma mchis/ /'gro ba'i dpa' bo thub chen gyis/ /bdag la bka' drin stsal du gsol/ /byang chub sems mchog bla med pa/ /dam pa de ni bdag la stsol/ /zhes lan gsum du brjod par bya'o/ /de nas bla ma dge ba'i bshes gnyen des phyogs bcu'i 'jig rten gyi khams kyi sangs rgyas bcom ldan 'das dang /byang chub sems dpa' sems dpa' chen po sa chen po la bzhugs pa thams cad dang / sngon dang da ltar gyi bla ma dge ba'i bshes gnyen dag spyan drangs te/ de dag gi spyan sngar 'phags pa bzang po spyod pa dang /byang chub sems dpa'i spyod pa la 'jug pa'i cho gas rgyud legs par dag par bya'o/ /de ltar snod shin tu sbyangs nas bla ma la slob ma des yang lag pa me tog dang bcas pas gsol ba gdab par bya'o/ /bla ma des rnyed pa dang / bkur sti dang /grags pa dang / sgra dang / tshigs su bcad pa dang / zang zing dang bcas pa'i sems med pas 'di snyam du/ e ma ngo mtshar ro/ /'jigs pa chen po'i dus 'dir 'di lta bu'i sems can dam pa 'byung ba ni ngo mtshar ro zhes bsam pa dang / lhag pa'i bsam pa bzang pos cho ga bya'o//de yang 'dzam bu'i gling ni sngon gyi slob dpon rnams kyi dgongs pa tha dad par gyur te/ slob dpon rgyal po in+d+ra b+hU ti dang / slob dpon 'phags pa klu sgrub dang / slob dpon 'phags pa shAn ta de ba dang / slob dpon 'phags pa tsan+d+ra go mi dang / slob dpon daMSh+T+ra se na dang /slob dpon dpa' bo dang / slob dpon shAn ta ra te la sogs pa mkhas pa chen po de dag gi dgongs pa ni 'di ltar tha dad par 'gyur te/ dang por ni byang chub kyi sems de nyid la tha dad par gyur to/ /gnyis par ni byang chub kyi sems de'i cho ga la tha dad par gyur to/ /gsum par ni byang chub kyi sems de skye ba'i tshul la'o//bzhi par ni sems de'i bslab bya'i tshul la tha dad par gyur te/ don dang po de la slob dpon kha cig gi zhal nas mos pas spyod pa pa 'jig rten pa'i lam gyis bsdus pa'i sems de ni smon pa'i sems yin no zhes gsungs so/ /la la'i zhal nas ni ji srid dmigs pa dang bcas pa'i sems de ni kun rdzob kyi rnam pa ste/smon pa'i sems so zhes bzhed do/ /gzhan ni tshogs kyi lam pa thar pa'i cha dang mthun pa'i dge ba'i rtsa ba bskyed pa'i sems de ni smon pa'i sems yin no zhes bzhed do/ /kha cig ni bsod nams mngon par 'du bya ba dang mi ldan pa'i sems ni smon pa'i sems yin no zhes bzhed do//la la ni/ 'gro bar 'dod dang 'gro ba yi/ /zhes pas rdzogs pa'i byang chub yul du byed pa tsam de ni smon pa'i sems yin no zhes bzhed do/ /de ma yin pa gzhan yang yod de gzhung mangs par 'gyur ro//gnyis pa'i don la yang tha dad par gyur te/ de dag nyid kyis mdzad pa'i gzhung de dang der blta bar bya'o/ /gsum pa'i don la yang kha cig ni gang zag gi drung du byang chub kyi sems bskyed pas kyang de skye bar bzhed do/ /la la ni sangs rgyas kyi spyan sngar ma yin par sems bskyed par mi bya'o zhes bshad do//gzhan dag ni 'di skad du/ /byang chub kyi sems skye ba ni rnam pa bzhi'i tshul gyis skye bar 'gyur ro zhes bzhed do/ /don 'di bzhi pa la yang tha dad par gyur te/ kha cig gi zhal nas byang chub sems dpa' ni lnga ste/ sems dang po bskyed pa dang /spyod pa la 'jug pa dang / phyir mi ldog pa dang / mi skye ba'i chos la bzod pa thob pa dang / skye ba gcig gis thogs pa'o/ /de la snga ma gnyis kyi bslab pa ji snyed pa'i zhes bzhed do/ /la las ni mdo las gsungs pa thams cad bsrung bar bya ba yin no zhes bzhad do//la la ni tshogs kyi lam pa'i bslab pa ji snyed pa bsrung bar bya'o zhes bzhad do/ /gzhan dag ni bslab pa 'di dang 'di lta bu zhes mi bzhed do/ /kha cig ni skyabs su 'gro ba'i bslab pa'i thog tu sdong po bkod pa dang / dge ba'i rtsa ba yongs su 'dzin pa'i mdo dang / dad pa'i stobs bskyed pa'i mdo la sogs par yang bshad mod kyi/re zhig 'phags pa 'od srungs kyis zhus pa'i mdo las byang chub kyi sems brjed par 'gyur ba dang / brjed par mi 'gyur ba'i chos brgyad bsrung bar bya'o zhes bzhed do/ /de dag ni mtshon pa tsam dang / 'di ltar sngon gyi mkhas pa chen po de dag gi lugs thams cad 'dir bkod par gyur na ni gzhung shin tu mangs par 'gyur ro//slob dpon chen po de rnams ni theg pa chen po'i lam la tshad ma'i skyes bur gyur pa/ byams pa chen po dang snying rje chen po la goms pa/ byang chub kyi sems rnam pa gnyis la thugs brtan pa'o//de la slob dpon kha cig gis phyag rgya chen po'i dngos grub brnyes pa'o/ /la las ni bden pa gzigs pa'o/ /la las ni 'jig rten chos mchog chen po brnyes nas sprul pa'i sku las gdams ngag thob pa dag yin pa dang / mdo nyid na yang de dag ji ltar bzhed pa bzhin du bcom ldan 'das kyis gsungs pas/de dag ni lam chen po nyid yin no zhes khong du chud par bya'o/ /'on kyang rang rang gi bla ma dag gis ji ltar gnang ba'i lugs de gzung bar bya'o zhes bdag gi bla ma dag gsung ngo / /de la 'dir re zhig slob dpon 'phags pa klu sgrub dang / slob dpon 'phags pa thogs med dang /slob dpon 'phags pa shAn ta de ba dag smon pa byang chub kyi sems bskyed pa'i cho ga'i tshul 'di la tha dad pa med cing mthun pa dang / da ltar bdag gi bla ma rje btsun dpal byang chub bzang po dang / bla ma rje btsun su wa r+N+Na dwI pa dag kyang 'phags pa de dag gi rjes su 'brang ba dang /bdag kyang bla ma rje btsun de dag gi rjes su 'brang ba yin pas bdag la slob ma'i tshogs kyis gsol ba btab nas byas pa'i cho ga'i thabs cung zhig bdag gis bkod pa ni 'phags pa klu sgrub dang / 'phags pa thogs med dang / 'phags pa shAn ta de ba dag gi lugs yin no zhes khong du chud par bya'o//de dag ni zhar la bshad pa'o/ /de la byang chub kyi sems kyi ljon shing skye ba la chu'i rlan lta bu'i chos gnyis sngon du 'gro ba yin te/ 'di ltar sems sbyang ba dang / bla ma la yon dbul ba'o/ /bla ma la yon dbul ba yang 'phags pa bskal pa bzang po'i mdo dang /snying rje chen po las ji ltar 'byung ba lta bu'o/ /sems sbyang ba ni 'phags pa kun du bzang po'i smon lam sngar ji skad brjod pa dang / yang byang chub sems dpa'i spyod pa la 'jug pa'i tshul gyis bya ba yin no/ /de nas skye bo chen po'i chos lugs shing rta chen po'i lam bla ma gcig nas gcig tu brgyud pa slob dpon chen po shAn ta de ba'i cho ga'am/slob dpon chen po thogs med kyi cho gas tshad med pa bzhi po bsgom pa sngon du song bas bla na med pa'i byang chub tu sems bskyed par bya'o/ /de ltar byang chub tu sems bskyed pa'i slob ma'i rgyud de las/sems kyi khyad par ji lta bu zhig skye zhe na/ don 'di la dgongs nas bcom ldan 'das kyis 'phags pa blo gros mi zad pas bstan pa'i mdo las gsungs te/ ji skad du/ blo gros mi zad pas smras pa/ btsun pa shA ra dwa ti'i bu byang chub sems dpa' rnams kyi sems dang po bskyed pa de ni mi zad pa'o//de ci'i phyir zhe na/ ma 'dres pa'i phyir ro/ /sems de ni nyon mongs pa thams cad dang ma 'dres par skyes so/ /theg pa gzhan la 'dod pa med pas sems de ni ma 'brel bar skyes so/ /phas kyi rgol ba thams cad kyis mi 'phrogs pas sems de ni sra bar skyes so//sems de ni bdud thams cad kyis mi phyed par skyes so/ /dge ba'i rtsa ba thams cad yang dag par sgrub pas sems de brtan par skyes so/ /'dus byas thams cad mi rtag par shin tu rig pas sems de ni rtag par skyes so//sangs rgyas kyi chos thams cad yang dag par sdud pas sems de ni mi g.yo bar skyes so/ /log par sgrub pa thams cad dang bral bas sems de ni mi brdzi bar skyes so/ /mi bskyed pas sems de ni rtag par skyes so/ /gnyen po med pas sems de ni dpe med par skyes so//chos thams cad 'bigs pas sems de ni rdo rje lta bur skyes so/ /bsod nams kyi tshogs tshad med pa bsags pas sems de ni mu med par skyes so/ /sems can thams cad la sems de ni mnyam par skyes so/ /rang bzhin gyis kun nas nyon mongs pa med pas sems de ni rnam par dag par skyes so//shes rab kyi 'od gsal ba'i phyir sems de ni dri ma med par skyes so/ /lhag pa'i bsam pa ma bor bar sems de ni shin tu nges par skyes so/ /byams pa nam mkha' dang mnyam zhing mtshungs pas na sems de ni yangs par skyes so/ / sems can thams cad go 'byed pas sems de ni rgya che bar skyes so/ /sems chags pa med pa'i ye shes la btang bas sems de ni sgrib pa med par skyes so/ /snying rje chen po rgyun ma chad pas na sems de ni thams cad kyi rjes su song bar skyes so/ /yongs su bsngo ba'i cho ga shes pas na sems de ni rgyun ma chad par skyes so//thams cad mkhyen pas rab tu ston pas na sems de ni sngon du 'gro bar skyes so/ /theg pa gzhan la ma zhugs pas na sems de ni blta bar 'os pa'o/ /de ni sems can thams cad kyis bltar mi mthong bar skyes so/ /de ni bsod nams kyi tshogs kyis brgyan par skyes so//de ni ye shes kyi tshogs kyis rab tu rtogs te skyes so/ /de ni sangs rgyas kyi chos thams cad kyi sa bon du skyes so/ /de ni chos thams cad kyis mi shigs par skyes so/ /de ni bde ba'i dngos po thams cad kyi gnas su skyes so/ /de ni sbyin pa'i tshogs kyis bsags te skyes so//de ni tshul khrims kyi tshogs kyis smon lam gyi 'phags par skyes so/ /de ni bzod pa'i tshogs kyis bsnyen bkur bar skyes so/ /de ni brtson 'grus kyi tshogs kyis rgyal bar dka' bar skyes so/ /de ni bsam gtan gyi tshogs kyis zhi pa'i mtshan nyid du skyes so//de ni shes rab kyi tshogs kyis thogs pa med par skyes so/ /byams pa chen po bsags pas de ni gnod pa med par skyes so/ /snying rje chen po bsags pas de ni rtsa ba brtan par skyes so/ /de ni dga' ba chen po bsags te mgu ba dang mos pa dang mchog tu dga' ba la gnas par skyes so//de ni btang snyoms chen po gnas pa ste bde ba dang sdug bsngal gyis mi bsgul bar skyes so/ /de ni sangs rgyas kyi byin gyi rlabs kyis brlab par skyes so/ /dkon mchog gsum gyi rigs rgyun mi bcad pa'i phyir tshul rgyun mi 'chad par skyes so/ /de ni phyogs bcu'i sangs rgyas kyi zhing thams cad kyi 'khor du rab tu grags par skyes so//btsun pa sha ra dwa ti'i bu thams cad mkhyen pa'i sems 'di 'dra ba la/ zad pa gang yang yod dam/ smras pa/ rigs kyi bu de ni ma yin te/ gang thams cad mkhyen pa'i sems 'di lta bu zad par 'dod pa ni nam mkha' zad par 'dod do//blo gros mi zad pas smras pa/ btsun pa sha ra dwa ti'i bu de bzhin du thams cad mkhyen pa'i sems de ni mi zad pa ste/ byang chub kyi sems de ni de'i rtsa bar skyes pas na de'i phyir de ni mi zad pa'o zhes bya ba la sogs pa gsungs so/ /yang mdo de nyid las bsam pa de ni ma byas pas na bcos ma ma yin pa'o//g.yo ba med pas na ma byas pa'o/ /rab tu rtogs pas g.yo ba med pa'o/ /sgyu med pas rab tu rtogs pa'o/ /sgyu med pas rab tu drang ba'o/ /dag pas sgyu med pa'o/ /gsal bas gya gyu med pa'o zhes bya ba la sogs pa rgyas par gsungs te/mdo de nyid du blta bar bya'o/ /de lta bu'i thun mong ma yin pa'i sems/ 'jig rten thams cad las mngon par 'phags pa'i sems/ sems can thams cad ma btang ba'i sems de ni sa chen po la rab tu zhugs pa'i byang chub sems dpa' chen po rnams kyis de nyid sbyangs shing dag par byas/de ma nyams par byas shing bsrungs/ de sa nas sar spel te/ de ni sangs rgyas thams cad kyi thugs yin pas de bskyed phan chad byang chub sems dpa' de la bstan pa la dga' ba'i lhas bsrung ba dang / 'chi ba'i dus su yid dga' bar 'chi ba dang /bar ma do dang ma'i mngal dang bu chung gi dus su yang lha dag gis bsrung ba dang / dge ba'i rtsa ba thams cad chud mi za ba dang / sems bsod nams kyi rgyun dang ldan pa yin te/ slob dpon zhi ba'i lhas spyod 'jug las/ dge ba gzhan kun chu shing bzhin du ni//'bras bu smin nas zad par 'gyur ba nyid/ /byang chub sems kyi ljon shing rtag par yang / /'bras bu mi zad rab tu 'phel bar 'gyur/ /zhes gsungs so/ /de bas na byang chub kyi sems de mi zad pas 'jig rten dang 'jig rten las 'das pa'i lam gyi chos thams cad dang / 'bras bu sangs rgyas kyi sa'i chos thams cad mi zad pa yin no/ /de bas na dus der sems de lta bu skyes pas na/ de ltar smos pa'i sems dag ni/ /bskyed pa'i yon tan gang yin pa/ /zhes bya ba smras te/ de lta bu'i sems de'i phan yon smra bar 'dod nas/ de ni sdong po bkod pa'i mdo las 'phags pa byams pas nor bzangs la 'di skad du bshad de/rigs kyi bu byang chub kyi sems ni sangs rgyas kyi chos thams cad kyi sa bon lta bu'o/ /'gro ba thams cad kyi chos dkar po rnam par 'phel bar byed pas zhing lta bu'o/ /'jig rten pa thams cad rten pas sa lta bu'o//dbul ba thams cad yang dag par 'joms pas rnam thos kyi bu lta bu'o/ /byang chub sems dpa' thams cad yongs su bsrung bas pha lta bu'o/ /don thams cad yang dag par sgrub pas yid bzhin gyi nor bu'i rgyal po lta bu'o/ /bsam pa thams cad yongs su rdzogs par byed pas bum pa bzang po lta bu'o//nyon mongs pa'i dgra thams cad pham par byed pas mdung thung lta bu'o/ /tshul bzhin ma yin pa'i yid la byed pa rab tu 'gebs pas go cha lta bu'o/ /nyon mongs pa'i mgo ltung bar byed pas ral gri lta bu'o/ /nyon mongs pa'i shing gcod par byed pas sta re lta bu'o//'tshe ba thams cad las skyob pas mtshon cha lta bu'o/ /'khor ba'i chu bo'i nang nas steng du 'byin pas mchil pa lta bu'o/ /sgrib pas khebs pa thams cad 'thor bar byed pas rlung gi dkyil 'khor lta bu'o/ /byang chub sems dpa'i spyod pa dang smon lam thams cad mdor bsdus pas mdor bstan pa lta bu'o//lha dang mi dang lha ma yin dang bcas pa'i 'jig rten thams cad la mchod rten lta bu ste/ rigs kyi bu de ltar byang chub kyi sems ni yon tan de dang yon tan gyi bye brag tshad med pa gzhan dang yang ldan no zhes gsungs te/ de bzhin du rab tu bshad do/ /de bzhin du khyim bdag dpa' sbyin gyis zhus pa'i mdo'i tshig 'og na bkod pa yang 'dir drang bar bya'o/ /gzhan mdo du ma dang / 'phags pa klu sgrub dang / slob dpon zhi ba'i lha la sogs pas kyang phan yon mang du gsungs pa yod kyang 'dir yi ge mangs pa'i 'jigs pas ma bkod do//yang de nyid bstan pa'i phyir/ de yis mdo bklag pa'am bla ma las mnyan te/ /rdzogs pa'i byang chub sems kyi yon tan tshad med pa/ /rnam par shes par byas la de gnas rgyu mtshan du/ /yang dang yang du sems ni bskyed par bya/ /zhes bya ba smras te/ mdo bklag pa'am zhes bya ba ni bslab pa kun las btus pa las/ byang chub sems dpa'i bslab pa'i gzhi rnams ni phal cher mdo sde dag las snang ste/ mdo sde de dang de dag las byang chub sems dpa'i kun du spyod pa dang / byang chub sems dpa'i bslab pa'i gzhi rnams bcas pa'o/ / de lta bas na de ma bltas na ltung ba byung na yang mi shes na spong bar 'gyur du 'ong bas rtag tu mdo sde lta ba la gus par bya'o zhes gsungs pa dang / yang de nyid kyi rtsa ba las/ dge ba'i bshes gnyen mi gtang zhing / /mdo sde dag la rtag blta bas/ /zhes pa dang / slob dpon zhi ba'i lhas 'di skad du/mdo sde dag ni blta bar bya/ /nam mkha'i snying po'i mdo sde ni/ /thog ma nyid du blta bar bya/ /'phags pa klu sgrub kyis mdzad pa'i/ /mdo rnams kun las btus pa yang / /de yi 'og tu blta bar bya/ /zhes gsungs pas thog mar mdo sde blta ba la goms par bya'o//bla ma las mnyan te zhes bya ba ni bla ma ni sems skyed par byed pa de nyid de/ de yang 'di ltar 'phags pa thogs med nas brgyud pa dang / slob dpon zhi ba'i lha nas brgyud pa'i bla ma'o/ /de yang bla ma bsten pa la dgos pa ci yod snyam pa la yod par mthong ste/ji skad du/ 'phags pa sdong po bkod pa las/ dpal 'byung ba 'di skad du rigs kyi bu dge ba'i bshes gnyen gyis yang dag par zin pa'i byang chub sems dpa' ni ngan 'gror mi 'gro'o/ /dge ba'i bshes gnyen gyis bskyangs pa'i byang chub sems dpa' ni bslab pa 'gal bar mi byed do//dge ba'i bshes gnyen gyis bsams pa'i byang chub sems dpa' ni 'jig rten pa las mngon par 'phags so/ /dge ba'i bshes gnyen la bsnyen bkur byas pa'i byang chub sems dpa' ni spyod pa thams cad la ma brjed par gnas so/ / dge ba'i bshes gnyen gyis yongs su bzung ba'i byang chub sems dpa' ni las dang nyon mongs pa thams cad kyis thub par dka'o/ /dge ba'i bshes gnyen ni bya ba ma yin pa rnams khong du chud par byed do/ /bag med pa'i gnas las bzlog pa'o/ /'khor ba'i grong khyer nas 'don pa'o//rigs kyi bu de bas na de ltar yin la rgyun ma chad par dge ba'i bshes gnyen rnams kyi drung du 'gro bar bya'o/ /khur thams cad khur bas yongs su mi skyo ba'i phyir sa lta bu'i sems dang / mi phyed pa'i phyir rdo rje lta bu'i sems dang / mi khro bas khyi lta bu'i sems dang / sdug bsngal thams cad kyis mi bsgul ba'i phyir khor yug lta bu'i sems dang / las thams cad la mi smod pas bran lta bu'i sems dang / nga rgyal dang che ba'i nga rgyal rnam par spong bas phyag dar ba lta bu'i sems dang / khur lci ba khur bas theg pa lta bu'i sems dang / 'gro zhing 'ong bas mi skyo bas gru lta bu'i sems dang /dge ba'i bshes gnyen gyi ngor blta bas bu mdzangs pa lta bu'i sems kyis dge ba'i bshes gnyen la bsnyen bskur bya'o/ /rigs kyi bu khyod kyis bdag la ni nad pa'i 'du shes bskyed par bya'o / /dge ba'i bshes gnyen la sman pa'i 'du shes dang /rjes su bstan pa la ni sman gyi 'du shes dang / nan tan nyams su len pa la ni nad 'tsho ba'i 'du shes dag bskyed par bya'o zhes gsungs pa dang / gzhan yang 'phags pa nor bzangs kyis dge slong rgya mtsho'i sprin gyi skabs nas 'byung ba dang / 'phags pa drag shul can gyis zhus pa las kyang khyim bdag gal te byang chub sems dpa' lung nod pa'am/kha ton bya ba'am/ sbyin pa dang ldan pa'am/ tshul khrims dang ldan pa'am/ bzod pa dang ldan pa'am/ brtson 'grus dang ldan pa'am/ bsam gtan dang ldan pa'am/ shes rab dang ldan pa'am/ byang chub sems dpa'i lam gyi tshogs sogs pa dang ldan pa'i tshig bzhi pa'i tshigs su bcad pa su las mnyan tam/lung nos sam blangs pa'i slob dpon de la de chos kyis gus par bya'o/ /ming dang tshig dang yi ge ji snyed pa de snyed kyis bskal par gal te slob dpon la g.yo med par rnyed pa dang / bkur stis rim gro dang / bkur sti byas kyang khyim bdag da dung du slob dpon de la gus par bya ba yongs su rdzogs pa ma yin na/ chos ma yin pa gus par bya ba lta ci smos zhes gsungs pa dang / de bzhin du lag na rdo rje dbang bskur ba'i rgyud dang / shes rab kyi pha rol tu phyin pa 'phags pa rtag tu ngu'i le'u dang /'phags pa legs par sbyin pas ji ltar bla ma bsten pa rnams ni de dang der blta bar bya'o/ /'phags pa thogs med kyis kyang bla ma bsten pa gsungs te/ ji skad du byang chub sems dpa'i sa las/ de la rnam pa du dang ldan na byang chub sems dpa' dge ba'i bshes gnyen du rig par bya/rnam pa du zhig gis ni dge ba'i bshes gnyen don yod pa yin/ rnam pa du zhig dang ldan na dge ba'i bshes gnyen dad pa'i gzhi la gnas pa yin/ byang chub sems dpa' dge ba'i bshes gnyen du gyur pa'i 'dul ba rnams dge ba'i bshes gnyen gyi bya ba ni du zhig yod/byang chub sems dpa' dge ba'i bshes gnyen la bsten pa ni rnam pa du zhig yod/ 'du shes dus ni byang chub sems dpa' dge ba'i bshes gnyen la chos mnyan par bya/ byang chub sems dpa' dge ba'i bshes gnyen la chos nyan pa na gang zag chos smra ba de la gnas du zhig ni yid la mi byed par bya zhe na/de la rnam pa brgyad dang ldan na byang chub sems dpa'i dge ba'i bshes gnyen rnams rnam pa thams cad rdzogs pa yin par rig par bya ste/ byang chub sems dpa'i sdom pa'i tshul khrims rnams la gnas shing ma nyams pa dang skyon med par byed pas tshul khrims la gnas pa yin/blo ma byang ba ma yin pas mang du thos pa yin/ bsgoms pa las byung ba'i dge ba gang yang rung ba thob cing rtogs pa dang ldan pa yin/ snying rje ldan pas snying brtse ba can yin/de tshe 'di la rang gi bde ba bor nas gzhan gyi don la sbyor ba yin/ de gzhan la chos ston pa na bag tsha ba'i 'jigs pas dran pa dang spobs pa nyams pa med pas 'jigs pa med pa yin/ gzhan dag gis brnyas pa dang 'phya ba dang bsting ba dang ngan du brjod pa mi 'dod pa'i tshig rnams dang sems can log par zhugs pa rnam pa sna tshogs pa rnams bzod pa yin/'khor bzhi po dag chos bstan pa la stobs dang ldan zhing ngal ba med pas yid yongs su mi skyo ba yin/ tshig chos nyid las ma nyams shing gsal la tshig bya ba dang ldan pa yin no//de la byang chub sems dpa' dge ba'i bshes gnyen de lta bu'i yon tan gyi rnam pa thams cad ldan pa ni rnam pa lnga lngas dge ba'i bshes gnyen gyi bya ba don yod pa yin te/ de ni snga nas kyang gzhan dag la phan pa dang bde bar 'dod pa yin te/ phan pa dang bde ba de ji lta bar shes pa yin/de blo phyin ci ma log pa yin/ thabs gang dang chos bstan pa'i tshul gang gis sems can gang 'dul nus pa de la nus shing mthu yod pa dang / yid yongs su mi skyo ba yin/ sems can tha ma dang 'bring po dang / khyad par du 'phags pa la phyogs 'dzin pa med par snying rje snyoms pa yin no//de la dge ba'i bshes gnyen de ni rnam pa lngas dad pa'i gzhi la gnas pa yin te/ gang gi phyir gtam thos pas kyang shin tu dang bar byed na mngon sum du mthong na lta ci smos te/ spyod lam rab tu zhi ba dang / spyod lam dang ldan pa dang / yan lag dang / nying lag mi 'gyur bas spyod lam phun sum tshogs pa dang / lus dang ngag dang yid kyi las kyi mtha' la god pa med cing 'gyur ba med pas brtan pa yin/ gzhan dag la tshul 'chos pa'i phyir spyod lam brtan pa ltar mi 'chos pas tshul 'chos pa med pa yin/ gzhan gyi chos kyi gtam mam/rnyed pa dang bkur sti la bdag dga' ba dang / rang gi rnyed pa dang bkur sti yang gzhan la stobs par byed pas phrag dog med pa yin/ yo byad bsnyungs shing yo byad bsnyungs pas 'tshog chas rnyed do cog thams cad la gtod pas yo byad bsnyungs pa yin no//de la byang chub sems dpa' dge ba'i bshes gnyen du gyur pa de ni rnam pa lngas gdul ba gzhan dag la dge ba'i bshes gnyen gyi bya ba byed de/ gleng bar byed pa yin/ dran par byed pa yin/ 'doms par byed pa yin/ rjes su ston par byed pa yin/ chos ston par byed pa yin/tshig 'di dag gi dbye ba ni nyan thos kyi sar rig par bya'o/ /gdams ngag dang rjes su bstan pa ni stobs kyi le'u las rig par bya'o/ /de la byang chub sems dpa' dge ba'i bshes gnyen la brten pa ni rnam pa bzhis yongs su rdzogs te/ dus dus su nad g.yog dang / tha mal pa'i g.yog byas pa dang / gus pa dang / dga' ba dang / dus dus su gus par smra ba dang / phyag bya ba dang / mngon du ldang ba dang / thal mo sbyar ba dang / 'dud par bya ba dang / mchod par bya ba dang / chos dang mthun pa'i gos dang / zas dang / mal cha dang / stan dang / nad pa'i gsos sman dang /yo byad sbyin pas mchod pa dang / gnas bcas nas gzud pa dang / nyes pa dag 'chags pa dang / drung du 'gro ba dang / dri ba dang nyan pa'o/ /de la byang chub sems dpa' dge ba'i bshes gnyen las chos nyan par 'dod pas 'du shes rnam pa lngas chos mnyan par bya ste/dkon pa'i don gyis rin po che'i 'du shes dang / shes rab rgya chen po 'thob pa'i rgyu'i don gyis mig gi 'du shes dang / chos thams cad yang dag par ston pas snang ba'i 'du shes dang / bla na med pa'i byang chub 'thob pa'i rgyu'i don gyis phan yon che ba'i 'du shes dang /tshe 'di la mya ngan las 'da' ba dang / rdzogs pa'i byang chub thob par byed pa zhi gnas dang lhag mthong gi dga' ba kha na ma tho ba med pa'i rgyu'i don gyis kha na ma tho ba med pa'i 'du shes so/ /de la byang chub sems dpa' dge ba'i bshes gnyen la chos nyan pa na/ de la gnas lngar yid la mi byed de/ de tshul khrims nyams pa nyams so snyam du yid la mi byed de/ 'di ni tshul khrims nyams shing sdom pa la mi gnas pas bdag gis 'di las chos mnyan par mi bya'o snyam du yid la mi bya'o/ /rigs dma' ba la yang 'di la bdag gis chos mnyan par mi bya'o snyam du yid la mi bya'o//chos la rton pas bya'i gang zag la rton par mi bya'o/ /don la rton par bya'i tshig 'bru la rton par mi bya'o/ /byad dang gzugs ngan pa dang / tshig 'bru ngan pa la yang yid la mi bya ste/ gus pa dang bcas pas chos mnyan par bya'o//chos ni nams kyang gang zag gi skyon gyis mi gos shing skyon can du mi 'gyur ba'i phyir ro/ /de la byang chub sems dpa' dbang po rtul po gang / gang zag gi skyon rnams la sems mngon par ldang zhing / chos nyan par mi 'dod pa de ni bdag nyid kho na la gnod cing shes rab yongs su nyams par gyur par rig par bya'o zhes gsungs so// de bas na sangs rgyas kyi chos thams cad bla ma la rag las pas na byang chub sems dpa' las dang po pas bla ma dge ba'i bshes gnyen mkhas pa rtag tu bsten par bya'o/ /phan yon gzhan yang bshad de/byang chub sems dpa' khyim gyi nang na gnas pa dbang po rtul po kha cig la ni smon pa'i sems 'di nyid la brten nas rdzogs pa'i byang chub thob par 'gyur bar gsungs te/ ji skad du bcom ldan 'das kyis rgyal po la gdams pa'i mdo las/ rgyal po chen po khyod ni 'di ltar bya ba mang ba byed pa mang ba ste thams cad kyi thams cad rnam pa thams cad kyi thams cad du sbyin pa la bslab pa nas/shes rab kyi pha rol tu phyin pa'i bar la bslab par mi nus kyi / de bas na rgyal po chen po khyod yang dag par rdzogs pa'i byang chub la 'dun pa dang / dad pa dang / don du gnyer ba dang / smon pas 'gro yang rung / 'greng yang rung / 'dug kyang rung / nyal yang rung / sad kyang rung / za yang rung / 'thung yang rung / rtag par rgyun du dran par gyis la yid la zung ste sgoms shig /sangs rgyas dang po so so'i skye bo thams cad dang / bdag gi 'das pa dang /ma 'ongs pa dang / da ltar byung ba'i dge ba'i rtsa ba thams cad bsdus shing gzhol te rjes su yi rang bar gyis shig /rjes su yi rang ba mchog dang / nam mkha' dang 'dra ba dang / mya ngan las 'das pa dang mtshungs pas rjes su yi rang bar gyis shig /rjes su yi rangs nas sangs rgyas dang byang chub sems dpa' dang /'phags pa nyan thos dang rang sangs rgyas thams cad la mchod par bya ba phul cig /phul nas sems can thams cad dang thun mong du gyis shig /de nas sems can thams cad thams cad mkhyen pa'i bar du thob par 'gyur ba dang /sangs rgyas kyi chos thams cad yongs su rdzogs par 'gyur bar nyin gcig bzhin du dus gsum du bla na med pa yang dag par rdzogs pa'i byang chub tu sngos shig /rgyal po chen po khyod de ltar zhugs nas rgyal po yang byed la rgyal po'i bya ba yang nyams par mi 'gyur zhing /byang chub kyi tshogs kyang yongs su rdzogs par 'gyur ro zhes gsungs so/ /slob dpon zhi ba'i lha'i zhal nas bslab pa kun las btus pa las don 'di gsungs te/ 'di skad du spyod pa dang mi ldan pa yang byang chub kyi sems ni 'khor ba'i bde ba mtha' yas pa bskyed pa'i phyir de la brnyas par mi bya'o zhes gsungs so//de'i nus pa yang mdo las gsungs te/ byams pa'i rnam par thar pa'i sdong po bkod pa las/ rigs kyi bu 'di lta ste dper na rdo rje rin po che ni chag kyang gser gyi rgyan khyad par du 'phags pa thams cad zil gyis gnon cing rdo rje rin po che'i ming yang mi 'dor la dbul ba thams cad kyang rnam par bzlog go//rigs kyi bu de bzhin du thams cad mkhyen par sems bskyed pa'i rdo rje rin po che nan tan dang bral yang / nyan thos dang rang sangs rgyas kyi yon tan gyi gser gyi rgyan thams cad zil gyis gnon cing /byang chub sems dpa'i ming yang mi 'dor la/ 'khor ba'i dbul ba thams cad kyang rnam par bzlog go zhes 'byung ngo / /rgyal po la gdams pa'i mdo las kyang don de nyid gsungs te/ rgyal po chen po khyod yang dag par rdzogs pa'i byang chub kyi sems kyi dge ba'i rtsa ba'i las kyi rnam par smin pa des/lan du mar lha'i nang du skyes pa nas gang de ltar mang du bya ba byed pa lta ci smos zhes 'byung ste mdo de nyid du blta bar bya'o/ /rtsa ba nyid la 'jug par bya ste/ byang chub smon pa'i sems ni bskyed nas ni/ /'bad pa mang pos kun tu spel bya zhing //'di ni skye ba gzhan du'ang dran don du/ /ji skad bshad pa'i bslab pa yongs su bsrung / /zhes smras te/ de ltar sems bskyed cing de'i phan yon shes pa des de spel bar bya ba'i phyir/ 'bad pa mang pos kun du spel bya zhing / /zhes smras te/ 'di'i don ni bdag gis byas pa'i sems bskyed pa'i cho gar gsal bar byas te/'di skad du de ltar sems bskyed pa'i gang zag gis byang chub kyi sems spel bar bya ba'i phyir/ tha na nyin lan gsum mtshan lan gsum du/ sangs rgyas chos dang tshogs kyi mchog rnams la/ /byang chub bar du bdag ni skyabs su mchi//bdag gis sbyin sogs byas pa 'di dag gis/ /'gro la phan phyir sangs rgyas 'grub par shog /ces byang chub tu sems bskyed par bya'o zhes pa'o/ /'di ni skye ba gzhan du'ang dran don du/ /ji skad bshad pa'i bslab pa yongs su bsrung / /zhes pa 'di'i don yang bdag gis 'od srungs kyis zhus pa'i mdo las blangs nas cho ga de nyid du bkod de 'di ltar byang chub kyi sems nyams par byed pa'i chos bzhi las ldog par bya ste/bzhi gang zhe na/ mkhan po dang / slob dpon dang / bla ma dang / sbyin gnas la bslu ba dang / gzhan 'gyod pa med pa la 'gyod pa nye bar bsgrub pa dang /theg pa chen po la yang dag par zhugs pa'i gang zag la bsngags pa ma yin pa dang / mi snyan pa dang brjod pa ma yin pa'i sgra tshigs su bcad pa 'byin pa dang / g.yo dang sgyu gzhan la nye bar spyod kyi lhag pa'i bsam pas ma yin pa'o/ / byang chub kyi sems nyams par mi byed pa'i chos bzhi la bslab par bya ste/ bzhi gang zhe na/ srog gi phyir ram tha na bzhad gad kyi phyir yang brdzun gyi tshig mi smra ba dang / g.yo dang sgyu med par sems can thams cad kyi drung na lhag pa'i bsam pas gnas pa dang / byang chub sems dpa' thams cad la ston par 'du shes bskyed cing de dag gi yang dag pa'i bsngags pa phyogs bzhir brjod pa dang /nyi tshe ba'i theg pa mi 'dod pa'i phyir sems can gang yongs su smin par byed pa de dag thams cad bla na med pa yang dag par rdzogs pa'i byang chub yang dag par 'dzin du 'jug pa'o//khyad par du mngon par shes pa myur du thob par 'dod pa'i byang chub sems dpa' spyan ras gzigs dbang phyug gis zhus pa'i chos bdun pa zhes bya ba'i theg pa chen po'i mdo la bslab par bya'o/ /sngar bstan pa'i/ 'bad pa mang pos kun du spel bya zhing //zhes bya ba'i tshig gi don 'di yin te/ rje btsun dag gi zhal nas spel ba rnam pa gsum las rgyas par spel ba ni/ 'jug sems bdag nyid sdom pa ma gtogs pa/ /yang dag smon pa 'phel bar 'gyur ma yin/ /rdzogs pa'i byang chub sdom pas spel 'dod pas/ /de phyir 'bad pas 'di ni nges par blang //zhes smras te/ 'jug sems bdag nyid ces bya ba ni lhag pa'i bsam pa rnam par dag pa yin te/ de yang 'phags pa nam mkha' mdzod kyi mdo las ji skad du/ rigs kyi bu byang chub kyi sems byang chub kyi sems zhes bya ba'i byang chub kyi sems de chos gang gis bsdus/ji ltar phyir mi ldog par kun du gnas/ /nam mkha' mdzod kyis smras pa/ rigs kyi bu byang chub kyi sems ni chos rnam pa gnyis kyis bsdus pas phyir mi ldog par gnas so/ /gnyis gang zhe na/ bsam pa dang lhag pa'i bsam pa'o/ /bsam pa dang lhag pa'i bsam pa gang gis bsdus/bsam pa ni g.yo med pa dang sgyu med pas bsdus pa'o/ /lhag pa'i bsam pa ni de la ma chags pa dang khyad par du 'gro bas bsdus so/ /bzhi po de dag gang gis bsdus / chos brgyad kyis bsdus te/ g.yo med pa ni drang po dang gsal bas bsdus pa'o//sgyu med pa ni bcos ma ma yin pa dang bsam pa dag pas bsdus so/ /de la ma chags pa ni sems ma gong ba dang brtson 'grus ma gong bas bsdus so/ /khyad par du 'gro ba ni bsod nams kyi tshogs dang ye shes kyi tshogs kyis bsdus so zhes bya ba la sogs pa chos brgya nyi shu rtsa brgyad kyis bsdus te rgyas par mdo nyid du blta bar bya'o//gzhan yang 'phags pa chos yang dag par sdud pa'i mdo las kyang 'di skad du/ yon tan khyad par can 'dod pa ni lhag pa'i bsam pa'o/ /lhag pa'i bsam pa ni srog chags 'byung po rnams la des pa'o//sems can thams cad la byams pa'o/ /'phags pa thams cad la gus pa'o/ /'jig rten pa rnams la snying brtse ba'o/ /bla ma la rim gro byed pa'o/ /skyabs dang dpung gnyen dang gling med pa dang mgon med pa'i mgon dang skyabs dang dpung gnyen dang gling ngo zhes bya ba la sogs pa gsungs te/rgya cher de nyid du blta bar bya'o/ /gzhan yang mdo de las byang chub sems dpa' bsam pa dag pa la ni nam mkha' dang rtsig pa dang shing dang chu bo dang nags tshal la sogs pa dag las kyang chos 'byung la/ rang nyid kyi spyod pa nyid las kyang gdams ngag dang rjes su bstan pa 'byung ngo zhes gsungs so//gzhan yang 'phags pa blo gros mi zad pa'i mdo las kyang / btsun pa sha ra dwa ti'i bu gzhan yang byang chub sems dpa' rnams kyi lhag pa'i bsam pa mi zad pa yin te/ de ci'i phyir zhe na/ dge ba'i rtsa ba thams cad lhag par dmigs pa'i phyir ro//tha na gang byang chub sems dpa' gang ci sems pa de thams cad dge ba'i bsam pa las lhag pa'i bsam pas dmigs par 'gyur te/ sa nas sar bzhag pa'i phyir 'pho ba ni lhag pa'i bsam pa'o zhes bya ba la sogs pa dang / yang btsun pa sha ra dwa ti'i bu 'di ni byang chub sems dpa' rnams kyi lhag pa'i bsam pa mi zad pa'o zhes gsungs so//'di skad du bstan par 'gyur te/ 'di ltar sa gzhi bzang po las nags tshal dang lo tog phun sum tshogs pa skye ba bzhin du/ tshul khrims bzang po'i sa gzhi las sangs rgyas kyi chos thams cad skye zhing 'phel bar 'gyur ro zhes shes par 'gyur ro//'dir 'di dpyad do/ /smon pa byang chub kyi sems dang 'jug pa byang chub kyi sems de gnyis kyi don la/ sngon gyi mkhas pa chen po rnams dang / da ltar gyi mkhas pa chen po dag rnam pa du mar 'chad de/de dag gi 'dod pa de dag la bdag gi blo 'phro bar nus mod kyi yi ge mangs par 'gyur bas gzhag go/ /'di gnyis kyi don mdo nyid na gsal bar gsungs te/ sdong po bkod pa'i mdo las/ rigs kyi bu sems can gang bla na med pa yang dag par rdzogs pa'i byang chub tu sems bskyed pa de dag kyang dkon no//de bas kyang gang bla na med pa yang dag par rdzogs pa'i byang chub tu chas pa'i sems can de dag ni shin tu dkon no zhes gsungs so/ /slob dpon zhi ba lha'i zhal nas kyang / byang chub kyi sems de ni rnam pa gnyis te/ byang chub tu smon pa'i sems dang /byang chub tu 'jug pa'i sems so zhes bslab pa kun las btus pa las gsungs pa dang / spyod 'jug las kyang / 'gro bar 'dod dang 'gro ba yi/ /bye brag ji ltar shes pa ltar/ /de bzhin mkhas pas 'di nyid kyi/ /bye brag rim bzhin shes par bya/ /zhes gsungs so/ yang slob dpon gyi zhal nas/ de la smon pa'i sems ni ngas sangs rgyas su 'gyur bar bya'o zhes smon pa las skyes pa'o zhes bslab pa kun las btus pa las gsungs so/ /de bas na 'bras bu rdzogs pa'i byang chub yul du byed cing dmigs pa ni smon pa'i sems yin te/ ji skad du mgon po byams pas kyang /sems bskyed pa ni gzhan don phyir/ /yang dag rdzogs pa'i byang chub 'dod/ /ces mngon par rtogs pa'i rgyan las gsungs so/ /lam gyi chos yul du byed cing dmigs pa ni 'jug pa'i sems yin te/ mgon po byams pa'i zhal nas/ rang gzhan don dang de nyid don //mthu dang rang gi sangs rgyas kyi/ /zhing dang sems can yongs smin dang / /bdun pa byang chub mchog yin no/ /zhes mdo sde rgyan las gsungs so/ /de bas na byang chub kyi sems de nyid rgyu'i dus dang / 'bras bu'i dus thams cad du de nyid yin te/gnas skabs kyi bye brag gis de ltar 'gyur ro/ /de yang mgon po byams pa'i zhal nas rgyas par bshad de/ ji skad du/ de yang sa gser zla ba me / /gter dang rin chen 'byung gnas mtsho/ /rdo rje ri sman bshes gnyen dang / /yid bzhin nor bu nyi ma klu / /rgyal po mdzod dang lam po che//bzhon pa bkod ma'i chu dang ni/ /sgra snyan chu bo sprin rnams kyis/ /rnam pa nyi shu rtsa gnyis so/ /zhes gsungs so/ /de la gnyis ni rgyu'i byang chub kyi sems so/ /bcu bdun ni lam gyi byang chub kyi sems so/ /gsum ni 'bras bu'i byang chub kyi sems so/ / gnyis ni smon pa'i sems so/ /nyi shu ni 'jug pa'i sems so/ /rnam grangs gzhan yang gsum ni rgyu'i dus kyi sems so/ /bcu drug ni lam gyi dus kyi sems so/ /tha ma gsum ni 'bras bu'i dus kyi sems so/ /de dag gi don rgyas pa ni mngon par rtogs pa'i rgyan de nyid du blta bar bya'o//de ltar byang chub kyi sems rin po che de khyad par du spel bar bya ba'i phyir/ tshul khrims kyi sdom pa nges par blang bar bya'o zhes bstan nas/ da ni tshul khrims kyi sdom pa'i rten khyad par can bstan par 'dod nas/ so sor thar ba ris bdun gyi/ /rtag tu sdom gzhan ldan pa dag /byang chub sems dpa'i sdom pa yi/ /skal ba yod kyi gzhan du min/ /zhes smras te/ 'dir smras pa/ khyod kyis dang por/ de ni skyes bu mchog yin no/ /sems can dam pa byang chub mchog /'dod par gyur pa de dag la/ /zhes ma smras sam/ yang 'dir 'di skad du brjod pa de ji lta bu smras pa bden te/snga ma ni ma dag pa'i rten du bzhag la 'di ni dag pa'i rten du 'dod pa yin no/ /'di'i don bla ma rje btsun dpal byang chub bzang pos sdom pa nyi shu pa'i 'grel par gsungs te/ 'di skad du so sor thar pa'i sdom pa ni byang chub sems dpa' sdom pa'i yan lag tu gyur pa yin te/phyogs gcig nyid du shes par bya'o/ /de'i phyir so sor thar pa'i sdom pa gzhan dang ldan pa 'dis byang chub sems dpa'i sdom pa yang dag par len pa'i snod du gyur pa la/ bslab pa'i tshig 'di yang sbyin par bya zhes pa'i don to/ /'di la srog gcod pa la sogs pa las ldog pa'i cho ga gzhan pa nyid ma yin zhing de rnams las kyang ldog pa yin pa la ni byang chub sems dpa'i sdom pa len pa'i snod du gyur pa yang yod pa ma yin no zhes gsungs so//re zhig theg pa chen po'i bag chags med pa de'i rigs med pa so sor thar pa'i gtan gyi bar chad can nam/ byang chub sems dpa'i sdom pa med pa'i gong du de la pham pa byung ba'am bslab pa phul ba'am dge ba'i rtsa ba chad pa'am/sdom pa de ma blangs pa ni so sor thar pa'i sdom pa yang med na/ cig shos lta ga la yod du rung / 'dir smras pa/ srog gcod pa la sogs pa las ma log pa'i byang chub sems dpa' yod par 'gyur ram/smras pa de ni med de de dag ni byang chub sems dpa' la rtsa ba'i ltung ba yin par mdo las gsungs pa'i phyir ro/ /de lta bas na so sor thar pa'i sdom pa de dang por dgos shing sngon du 'gro ba nyid do/ /yang na rigs la gnas pa dar skye ba gzhan du theg pa chen po la goms par byas pa ni de rang bzhin gyis sdig pa mi spyod pas byang chub sems dpa'i sdom pa de nyid dang po nyid du blangs kyang nyes pa med do//yang na theg pa chen po dbu ma chen po'i grub mtha' brtsan par byas na ni/ 'di ltar theg pa chen po'i snod du ma gyur pa 'ga' yang med do//sems can thams cad rigs gcig nyid yin te/ de bzhin gshegs pa'i snying po can no zhes bya ba dang / sa stengs skal med yod min te/ /thams cad sangs rgyas 'gyur ba yin/ /de'i phyir rdzogs sangs sgrub pa la/ /sgyid lug par ni mi bya'o/ /zhes gsungs pa'o//de kho na nyid bsdus pa'i rgyud chen po las kyang / kye bcom ldan 'das kyi dkyil 'khor chen po 'dir 'jug pa la snod dang snod ma yin pa brtag mi 'tshal lo/ /de ci'i phyir zhe na zhes bya ba la sogs pa gsungs so/ /slob dpon 'phags pa lha'i zhal nas/ dang por gang dang gang 'dod pa//de la de dang de nyid sbyin/ /dam pa'i chos la snod min pa/ /'ga' yang yod pa ma yin no/ /zhes gsungs so/ /de bas sems can thams cad rigs gcig nyid yin pas/ mgon po mi pham pa'i zhal nas/ chos kyi dbyings la dbyer med phyir//rigs ni tha dad rung ma yin/ /zhes gsungs pa dang / 'phags pa klu sgrub kyi zhal nas kyang / chos kyi dbyings la dbyer med phyir/ /gtso bo theg dbyer ma mchis na/ /khyod kyis theg pa gsum bstan pa/ /sems can 'jug par bya phyir yin/ /zhes gsungs so/ /'o na mdo las kyang sems can gyi tshogs gsum du gsungs shing /rdo'i rigs la dper mdzad pa de ji lta bu/ sems can gyi rigs kyang rnam pa lngar bshad pa de ji lta bu/ smras pa de ni re zhig pa la dgongs pa yin te/ rje btsun gser gling pa'i zhal snga nas/ rigs ni rnam pa gnyis te/ chos nyid kyi rigs can dang /sgrub pa'i rigs can no zhes gsungs pas sgrub pa'i rigs can la ni re zhig de ltar gnas so/ /chos nyid kyi rigs can gyi dbang du byas na ni dbye ba gang yang med do/ /'di ltar mkhas pa dag gis ni so so thar pa'i sdom pa de nges par gtso bor bya dgos pa yin te/ de yang 'di ltar chos kyi sku ni dus thams cad dang /dngos po thams cad la khyab pa yin pa dang / yang longs spyod rdzogs pa'i sku de yang 'khor lor bzhugs la/ de yang sa bcu'i dbang phyug chen po rnams kho na'i spyod yul yin zhing de yang theg pa chen po'i chos zab pa dang / rgya che ba 'ba' zhig gsungs pa yin no//sprul pa'i sku ni 'di ltar u dum bA ra'i me tog dang 'dra bas dus res 'ga' ba yin te/ mdo las bskal pa de'i rjes la sangs rgyas mi 'byung ba'i bskal pa drug cu 'byung bar 'gyur ro zhes gsungs so/ /de bas na des gsungs pa'i so sor thar pa'i sdom pa 'di yang dus res 'ga' ba yin pas dkon pa'i phyir dang /bde 'gror bgrod pa'i rgyu'i gtso bo yin pa dang / sangs rgyas kyi bstan pa ni srog gcod pa la sogs pa sdig pa las log pa yin pa dang / sangs rgyas kyi bstan pa ni ji srid so sor thar pa'i sdom pa gnas pa de srid du gnas shing de la rag lus pa yin pas so sor thar pa'i sdom pa de dang po kho nar bstan to//'di ltar 'jug pa'i go rims su byas na yang / sngon chad theg pa chen po'i bag chags med pa dag la ni so sor thar pa ris bdun gang yang rung ba'i sdom pa de sngon du 'gro ba yin no/ /sngon chad theg pa chen po'i bag chags med pa'i gang zag dag la ni sdom pa de mi skye ba nyid kyang yin no//de bas rtsa ba las skal ba yod kyi gzhan du min zhes pa yang legs par smras par 'gyur ro/ /dkyus nyid la 'jug par bya ste/ so sor thar pa'i ris bdun du/ /de bzhin gshegs pas gsungs pa la//tshangs spyod dpal ni mchog yin te/ /dge slong sdom pa dag tu bzhed/ /ces smras te ris bdun las dge slong gi sdom pa ni thun mong ma yin no zhes bdag gis bsams so/ /smras pa 'dul ba'i gzhung thams cad dang 'phags pa dgra bcom pa rnams kyis mdzad pa ye shes la 'jug pa la sogs pa dang /gzhan de dag gis mdzad pa'i bye brag tu bshad mdzod chen po dang / de'i don gces spras su bya ba mdor bsdus pa mngon pa mdzod dag tu ris brgyad du bkod la 'dir bdun du bshad pa de ji lta bu smras pa bden te/ gzhung der de ltar bshad mod kyi 'on kyang 'phags pa thogs med kyis rnal 'byor spyod pa'i sa'i gzhung thams cad dang /tshul khrims kyi le'u las ris bdun du bkod de/ 'phags pa thogs med ni chos kyi rgyun gyi ting nge 'dzin thob cing sa gsum pa'i byang chub sems dpa' yin pa dang / 'phags pa 'jam dpal gyi rtsa ba'i rgyud chen po las lung bstan pas ji skad du/thogs med skyes bu dam pa des/ /bstan bcos kyi ni de nyid rig /ces pa dang / yang mgon po mi pham pa la mngon sum du sde snod ma lus pa gsan pa yin pa 'di la su zhig the tshom za/ de lta bu'i sems can chen po de la yid sdang zhing the tshom za na rang nyid phung bar zad do//rje btsun bla ma dpal byang chub bzang pos kyang sdom pa nyi shu pa'i 'grel pa las/ ji skad du/ de la sdom pa'i tshul khrims ni so sor thar pa'i ris bdun gyi sdom pa blangs pa'o/ /de la dge slong dang dge tshul dang / dge slong ma'i rab tu dbye bas rab tu byung ba'i phyogs ni rnam pa lnga'o//khyim pa'i phyogs gnyis te/ dge bsnyen dang / dge bsnyen ma'i dbye bas so/ /nyin zhag gi bslab pa ni dka' ba spyod pa ma yin pa dang / 'dod pa las g.yem pa ma yin pa'i phyir dang / yun ring por rjes su 'brel pa'i phyir 'di ni so sor thar pa'i ris su mi 'os pas ma bstan to zhes gsungs te/bla ma de ni byang chub sems dpa'i sde snod kyi 'dul ba 'dzin pa chen po yin pa dang / 'phags pa klu sgrub dang slob dpon shAn ta de ba'i gcig nas gcig tu brgyud pa'i bka'i gdams pa yod pa'i phyir mkhas pa chen po de'i rjes su 'brang bar bya'o//so sor thar pa ris bdun po de dag 'dir cung zhig brjod par bya ste/ dge bsnyen ni rnam pa gnyis te 'dod pas log par g.yem pa spangs pa dang / rang gi chung ma yang spangs pa'o/ /de gnyis ka'i thun mong gi bslab pa ni 'di lta ste/rtsa ba'i ltung bar gyur pa bzhi dang chang spangs pa'o/ /kha cig na re log par lta ba spangs pa'o zhes zer ro/ /de la chang ni 'dul ba 'dzin pa dag rang bzhin gyi kha na ma tho ba yin no zhes 'dod la/ mngon pa bdag ni bcas pa'i kha na ma tho ba zhes zer ro/ /de dag gi gzhung rgyas pa ni 'dir gzhag go//de lta bu'i bslab pa'i gzhi lnga dang / de dag gi phyogs su gtogs pa'i bslab pa'i gzhi bzhi bcu rtsa lnga ste/ bslab pa lnga bcu dang ldan pa'i dge bsnyen skyon med pa dang / de bzhin du dge tshul sdom par gyur pa 'di lta ste/ bshags par bya ba dang bsdam par bya ba dang nyes pa med pa'o//dge slong gi bslab pa ni nyis brgya lnga bcu rtsa gsum las/ nyi shu rtsa bdun ni bshags par bya bar 'gyur ro/ /nyis brgya bcu gsum ni bsdam par bya bar 'gyur ro/ /bcu gsum ni nyes pa med par 'gyur ro/ /bcu gsum ma gtogs pa lhag pa nyis brgya bzhi bcu bsrung ba'i kha na ma tho ba med pa'i dge tshul tshul dang ldan zhing rnam par dag pa dang /dge slong ma ni chos drug dang rjes su mthun pa'i chos drug legs par bsrung ba ste dge slong ma rnam par dag pa dang / de bzhin du dge slong yang ji ltar dam pa'i chos 'dul ba'i gzhung las ji skad bshad pa'i bslab pa shin tu rdzogs par bya ba dang dge slong rnam par dag pa dang /de bzhin du dge slong ma yang bslab pa'i gzhi lnga brgya dang ldan zhing rnam par dag pa'o/ /de dag kyang sde pa tha dad de/ 'di ltar phal chen pa'i sde pa dang / thams cad yod par smra ba'i sde pa dang / gnas brtan pa'i sde pa dang /mang pos bkur ba'i sde pa'o/ /de dag kyang bco brgyad du gnas te/ 'di ltar/ shar dang nub dang gangs ri dang / /'jig rten 'das par smra ba'i sde/ /btags par yod par smra ba'i sde/ /lnga tshan dge 'dun phal chen pa/ /bzhi pa dag ni 'od srungs pa/ /chos srung sde dang sa ston sde//rnam par phye ste smra ba'i sde/ /mang thos dge 'dun gos dmar po/ /gtsug lag khang chen la gnas dang / /rgyal byed tshal na gnas pa dang / /'jigs med ri la gnas pa yi/ /gnas brtan pa yi sde pa gsum/ /sar sgrogs ris pa'i sde pa dang / /srung ba pa yi sde pa dang //gnas ma'i bu yi sde pa ste/ /mang pos bkur ba'i sde pa gsum/ /yang gzhung kha cig las ni tshul de nyid las btags pa yod par smra ba'i sde pa de thams cad yod par sbyar la/ mang pos bkur ba'i sde pa la ni gnas ma'i bu'i sde pa dang / ku ru ku la'i sde pa dang /sa sgrogs pa'i sde pa yin no zhes zer ro/ /yang gzhung kha cig las/ 'od srungs zhes bya chos srung ba / /sa srung ba dang gzhi kun yod/ /shar nub gangs ri btags par smra/ /rnam par phye smra 'jig rten 'das/ /gos dmar thos mang srung ba pa/ /ku ru ku la gnas ma'i bu//rgyal byed pa dang 'jigs med pa/ /gtsug lag khang pa chen po pa'o/ /bzhi dang drug dang lnga dang gsum/ /tha dad rnam pa bco brgyad 'dod/ /de ltar sde pa bco brgyad do / /shAkya seng ge'i bstan pa ni/ /gnas so 'gro ba'i bla ma de'i/ /sngon gyi phrin las dbang gis yin/ /yul don slob dpon bye brag dang //lta ba'i bye brag tha dad kyi/ /rgyu yis de dag tha dad byas/ /ston pa tha dad yod pa min/ /'di dag gi lta ba dang / tshul khrims kyi rnam par gzhag pa ni gzhung chen po de dang der blta bar bya'o/ /rtsa ba nyid bshad par bya ste/ tshangs spyod ces bya ba ni chang dang bud med kyi yul spangs pa'o//'di ltar chang gi nyes dmigs kyang lung de dang de dag dang / mdo sde de dang der blta bar bya'o/ /bud med kyi nyes dmigs kyang theg pa chen po dang theg pa chung ba'i mdo dang lung rnams su blta bar bya ste/ ji skad du bcom ldan 'das kyis 'khrig pa bdun bstan pa zhes bya ba theg pa chung ba'i mdo las/bram ze 'di na kha cig bdag tshangs par spyod par khas 'che zhing / bud med dang gnyis kyis gnyis sprod pa med kyang bud med kyi lus la mig gis bltas te de'i cha byad la zhen pa dang / bud med dang lhan cig rtsa ba dang /ca co 'don pa nyams su len pa dang / bud med kyi bsnyen bkur byed pa nyams su len pa dang / rtsig pas chod pa dang / yol bas chod pa'i bud med kyi rgyan dang / glu dang gar dang rol mo'i sgra nyams su len pa dang / pha rol po 'dod pa'i yon tan lnga dang ldan pa la bltas nas nyams su len pa dang /lha la sogs pa'i gnas su tshangs par spyod pa yongs su bsngo ba yang de bzhin te/ tshangs par spyod pa yongs su ma dag pa'o zhes gsungs pa dang / theg pa chen po'i mdo chos bdun pa las kyang / rnam par rtog pas kyang 'dod pa la brten par mi bya na/gang dbang po gnyis kyis sbyor ba lta ci smos zhes gsungs so/ /spyir 'dod pa'i nyes dmigs ni rgyal po shar ba'i bus zhus pa dang / 'dod pa la gdams pa'i mdo las shes par bya'o/ /de bas na tshangs par spyod pa ma yin par tshangs par spyod pa lta bur ston pa/dge sbyong gi rtags dang mtshan mas nga rgyal du byed pas byang chub sems dpa' khyim na gnas pa chos dang mthun pa'i sgrub pa dag la rab tu byung ba'o snyam du brnyas par byed pa/ tshul 'chos pa chom rkun lta bu ste/ mdo las chom rkun za'o/ /chom rkun 'thung ngo zhes bya ba la sogs pa gsungs pa yin no//de lta bu'i sdig pa can dge slong dang / dge tshul gyis lha dang mi'i mchod rten du gyur pa'i ngur smrig gi gos de gzung bar mi bya ste/ chos gos 'bar ba dang lhung bzed 'bar ba zhes bshad do/ /ji skad du tshul khrims 'chal pa tshar gcod pa'i mdo las/tshul khrims 'chal pa'i dge slong gis ston pa'i ngur smrig gi rgyal mtshan se gol gtogs pa tsam du yang bcad bar mi bya'o zhes gsungs pa dang / 'di'i nyes dmigs ni 'phags pa 'od srungs kyis zhus pa'i mdo la sogs pa de dang der blta bar bya'o/ /de 'dra ba'i sdig pa can gyi dge sbyong la theg pa chen po'i bstan pa dang /lam chen po de la gzhug par mi bya'o snyam mo/ /de lta bu'i nyes pas ma phog cing rnam par dag pa ni tshangs spyod ces bya'o/ /dge bsnyen dang dge tshul dang dge slob ma las kyang phul du byung bas na dge slong sdom pa dag tu bzhed ces smras te/dge slong gi sdom pa rnam par dag pa ni theg pa chen po'i gzhi phul du byung zhing khyad par 'phags pa yin no zhes bcom ldan 'das de ltar bzhed do/ /dge slong zhes bya ba ni gsol ba dang bzhi'i las kyis bsnyen par rdzogs pa'o/ /de yang 'di ltar las ni bzhi ste/gsol ba'i las dang / gsol ba dang / gnyis kyi las dang / gsol ba dang / bzhi'i las dang / las gsum brjod pa'i las so/ /las bzhi po de dag kyang gzhi gnyis la brten te sems can du bgrang ba dang / sems can ma yin par bgrang ba'o/ /de la sems can du bgrang ba'i las ni rab tu dbyung ba dang /bsnyan par rdzogs pa dang / gang zag yid mthun par bya ba dang / ltung ba las bslang ba dang / dgar ba dang / bskrad pa dang / dbyar gnas par khas blangs pa dang / zhag bdun dang / nyi shu dang / bzhi bcur byin gyis brlab pa dang / sems can la phan gdags pa dang / chad pas gcad pa'i las gang yin pa de ni sems can du bgrang ba gzhi'i las zhes bya'o/ /sems can du bgrang ba ma yin pa'i las ni chos gos dang lhung bzed byin gyis brlab pa dang / sra brkyang byin gyis brlab pa dang / chos gos rnams kyang mi dbul bar gzung ba dang /mtshams gcad pa dang / khyim rung bar yid mthun par bya ba dang / de lta bu dang gzhi'i las gang yin pa de ni sems can bgrang ba ma yin pa'i las so/ /las de dag kyang tshogs gnyis kyis bya ba dang / bzhis bya ba dang / lngas bya ba dang / bcus bya ba dang / nyi shus bya ba dang /tshogs bzhi bcus bya ba dang / dge 'dun mthun pas bya ba'o/ /de la tshogs gnyis kyis bya ba'i las ni dge slong gi dge 'dun gyi mdun du lan gsum brjod pa'i bshags pa'i las kyis ltung byed dam/ nyes byas kyi nyes pa 'chags par byed do//bzhis bya ba ni nyes pa sbom po bzhi'i mdun du bshags pa'o/ /bcus bya ba ni yul dbus su bsnyen par rdzogs pa'i las so/ /tshogs lngas bya ba ni mtha' 'khob tu bsnyen par rdzogs pa'i las so/ /tshogs nyi shus byas pa'i las ni dge 'dun lhag ma las dbyung ba'i las so//bzhi bcus bya ba'i las ni dge slong ma bsnyen par rdzogs par bya ba'i las so/ /dge 'dun mthun pas byas pa'i las ni mtshams kyi las dang / gso sbyong gi las dang / dgag dbye dang gzhan de lta bu dang mthun pa'i las so/ /thams cad yod par smra ba'i sde ba'i 'dul ba 'dzin pa btsun pa chos skyob dang /btsun pa dbyangs sgrogs dang / btsun pa dbyig bshes dang / btsun pa sangs rgyas lha dang / btsun pa bsam rdzogs dang / mkhas pa chen po nor gyi rtsa lag dang / gnas brtan yon tan 'od dang / btsun pa shAkya 'od la sogs pa dag na re/ rnam pa bcus bsnyen par rdzogs te/rang byung bas ni sangs rgyas dang rang sangs rgyas so/ /nges par 'jug pa ni rten lnga pa'o/ /dge slong tshur shog ces pas ni grags pa la sogs pa'o/ /ston par khas blangs pas ni 'od srungs chen po la sogs pa'o/ /dri bas mnyes pa ni legs sbyin la sogs pa'o//bla ma'i chos khas blangs pa ni skye dgu'i bdag mo chen mo'o/ /pho nyas ni chos sbyin no/ /'dul ba 'dzin pa ma gtogs pa lngas ni mtha' 'khob pa'o/ /bcu'i tshogs kyis ni dbus kyi mi rnams te skyabs su 'gro ba lan gsum bzlas pas ni sde bzang drug cu'i tshogs bsnyen par rdzogs par byas so zhes zer ro//dge slong ni bzhi ste/ ming gi dge slong dang / khas 'che ba'i dge slong dang / slong bas na dge slong dang / nyon mongs pa 'joms pa'i dge slong ngo / /ding sang gi dus na tshul khrims rnam par dag pa'i dge slong ni shin tu dkon te/ slob dpon zhi ba lha'i zhal nas/bstan rtsa dge slong nyid yin te/ /dge slong nyid kyang dka' bar gnas/ /zhes gsungs pas/ dge slong bslab pa la rma byung ba/ nyams pa ral ba nag nog can du gyur pa dang / zhig pa dang ma tshang bar gyur pa'i dge slong bas ni dge bsnyen rnam par dag pa theg pa chen po'i snod du bsngags so zhes bla ma dag ched cher gsung ngo //yang bshad par bya ste/ sdom pa zhes bya ba ni 'chal pa'i tshul khrims kyi rgyun 'gog cing sdom pa'o/ /de yang 'di ltar gang las 'thob pa dang / ji ltar 'thob pa dang / sdom pa blang ba'i dus dang / ji ltar blang ba dang /ji ltar gtong pa dang / de'i rang bzhin dang / ltung ba 'byung ba'i rgyu dang / ltung ba mi 'byung ba'i rgyu dang / ltung ba las ldang ba'o / /gang las 'thob ces pa la sogs pa'i don ni 'dul ba 'dzin pa la dri ba dang / gzhung dag blta bar bya'o/ /ji ltar gtong zhe na/ so sor thar pa'i sdom pa gtong ba'i rgyu ni mang ste/mi brda phrad pa'i drung du bslab pa'i gzhi rnams bsam pa thag pa nas phul ba dang / ris mthun pa btang ba dang / pham pa'i nyes pa byung ba dang / mtshan gnyis dus gcig tu byung ba dang / dge ba'i rtsa ba chad pa'o/ /ci'i phyir sdom pa de gtong ba'i rgyu yin zhe na/yang dag par gtang ba'i sems skyes pa dang / rten bor ba dang / ltung ba'i rgyu gang yang rung ba skyes pa dang / rten nyams pa dang / gzhi chad pa'o/ /yang 'dul ba 'dzin pa la la na re/ ltung ba gcig byung bas thams cad gtong bar 'gyur ro zhes zer ro/ / kha cig dam pa'i chos nub pa'i dus su gtong ngo zhes so/ /thams cad yod par smra ba'i 'dul ba 'dzin pa dag ni 'di skad du ltung ba gcig byung bas lhag ma mi gtong ste/ de la sdom pa dang sdom pa ma yin pa gnyis ka yod de/ mi zhig la nor yang yod la bu lon yang chags pa bzhin no/ / ltung ba de bshags na de tshul khrims dang ldan pa yin gyi/ sdom pa med pa ni ma yin no zhes zer ro/ /mtshan gyur pa sngon med pa'i sdom pa yang mi gtong la/ thob zin pa yang gtong bar mi 'gyur ro/ /dam pa'i chos nub pa na yang de bzhin no/ /tshe 'phos pas gtong ba yang 'di ltar lus mi 'dra ba dang der sbyor ba ma byas pa dang /sdom pa mi dran pa'i phyir ro/ /de dag ni slob dpon nor gyi rtsa lag gi rjes su 'brangs nas bshad pa'o/ /gzhung de ma yin pa'i lugs mang du yod mod kyi 'dir gzhag go/ /rang bzhin yang 'dul ba'i gzhung dag dang / rang rang sde pa'i 'dul ba 'dzin pa la dri bar bya'o//ltung ba 'byung ba'i rgyu ni gnyis te/ bya ba mi byed pa dang / mi bya ba byed pa'o/ /yang bzhi ste/ mi shes pa dang / ma gus pa dang / bag med pa dang / nyon mongs pa che ba'o/ /ltung ba mi 'byung ba'i rgyu ni lnga ste/ dbang po rnams kyi sgo bsdams te/ 'dug pa dang / zas kyi tshod rig pa dang / nam gyi cha stod dang cha smad la mi nyal ba rnal 'byor la brtson pa dang / shes bzhin du spyod pa dang / dran pa dang ldan pa dang / bag yod pa dang / kha na ma tho ba chung ngu la'ang 'jigs par blta ba dang / tshul bzhin du sems pa ni rgyu dang po'o/ / dge sbyong gi tshul shas cher lta ba dang / ston pa dang / tshangs pa mtshungs par spyod pa dang / bstan pa la dga' ba'i lha dag dang / skye bo mkhas pa dang / 'jig rten pa dag gis smad par 'gyur ro snyam pa dang / bdag nyid la dpyas nas ngo tsha ba dang / khrel yod pa ni rgyu gnyis pa'o/ /don nyung ba bya ba nyung ba/las kyi mtha' nyung ba ni rgyu gsum pa'o/ /khyim pa dang rab tu byung ba dang mi 'dre bar gnas pa dang ltung ba dang ltung ba ma yin pa la mkhas pa dang dge ba'i phyogs la brtson pa ni rgyu bzhi pa'o/ /las dang po pa dang smyos pa dang gnyid log pa dang / sems 'khrugs pa dang / tshor bas nyen pa ni rgyu lnga pa'o/ /ltung ba las ldang ba ni gsum ste/ 'gyod pa lnga bskyed pa dang / yan lag lngas bsdus pa'i bag yod pa dang / rnam pa lngas 'gyod pa bsal ba'o/ /yan lag lngas bsdus pa ni nyan thos kyis rab lta bar bya'o/ /'gyod pa lngas bskyed pa ni 'di na la la dag la ltung ba byung ba na 'di snyam du bdag nyid la gzhi 'dis tshul khrims nyams par 'gyur ro snyam pa dang /ston pa dang tshangs pa mtshungs par spyod pa mkhas pa dag gis smad par 'gyur ro snyam pa dang / lha dag gis smad par 'gyur ro snyam pa dang / phyogs dang phyogs mtshams dag tu sdig pa can gyi skye bos grags pa dang sgra dang tshigs su bcad pa ma yin pa brjod par 'gyur ro snyam pa dang /mi dge ba'i gzhi 'dis bdag lus zhig nas ngan song dag tu skyes na mi rung ngo snyam 'gyod pa skyes pa'o/ /rnam pa lngas 'gyod pa bsal ba ni bcom ldan 'das kyis gzhi dang bcas/nges par 'byung ba dang bcas pa'i chos bstan pas ltung ba las ldang ba'i thabs yod do snyam pa dang / mi shes pa dang bag med pa dang mgus pa dang nyon mongs pa che ba dag gis ltung ba byung ba mi shes pa nas bzhi po de dag skyes so snyam pa dang / ltung ba la ltung ba mi 'byung bar bya ba'i phyir lhag pa'i bsam pa thag pa nas sems bskyed do snyam pa dang /tshangs pa mtshungs par spyod pa mkhas pa dag gi mdun du legs par bshags pa zin to snyam pa dang / bdag legs par gsungs pa'i chos 'dul ba las rab tu byung nas bslab pa dang 'gal na 'gyod pa byed pa de ni yang dag pa dang legs pa ma yin gyi /bdag bcom ldan 'das kyis 'gyod pa'i rgyun sgrib pa'i gnas rnam grangs du mar smad pa/ bar du gcod pa'i chos gang yin pa des mang du gnas shing dang du len par byed la/ sel bar mi byed la mi sel ba gang yin pa de ni bdag dge ba dang legs pa ma yin no snyam nas 'gyod pa sel ba'o//yang na sde pa so so'i rang rang gi 'dul ba las 'byung ba'i thabs kyis bshags par bya'o/ /yang na bdag gis byas pa'i ltung ba bshags pa'i cho ga rgyas pa'i thabs des bshags par bya'o/ /zla ba phyed phyed cing so sor thar pa'i mdo gdon zhing gso sbyong la rab tu brtson par bya'o//dge slong 'dul ba'i bslab pa la de ltar brtson pa ni ltung ba la mkhas pa yin/ ltung ba las nges par 'byung ba la mkhas pa yin/ bdag nyid dag pa dang / gtsang ba dang / dri ma med pa dang / kha na ma tho ba med pas 'gyod pa med de de khyim nas khyim med par rab tu byung nas legs par gsungs pa'i chos 'dul ba'i tshul khrims nyams pa dang zhig pa dang ral ba dang /nag nog can dang mi gtsang ba med cing legs par bsrung ba dang / sbyangs pa'i yon tan bcu gnyis dang / dge sbyong gi rgyan bcu bdun gyis brgyan nas gnas pa ni dge slong yang dag pa yin no snyam du bsams nas/tshangs spyod dpal dang ldan pa yi/ /dge slong sdom pa dag tu bzhed/ /ces smras so/ /des na mgon po mi pham pa'i zhal nas/ ltung ba 'byung dang ldan pa dang / /nges par 'byung dang gang zag dang / /bcas pa dang ni rab dbye bas//rnam par nges phyir 'dul ba'i chos/ /zhes mdo sde rgyan las gsungs so/ /nyan thos kyi theg pa'i skabs rdzogs so/ /'di ltar so sor thar pa'i sdom pa tsam/ smon pa'i sems bskyed pa tsam gyis cho ga cing de tsam la ltos par mi bya ste/ 'phags pa dkon mchog sprin las rigs kyi bu ji ltar na byang chub sems dpa' bslab pa'i sdom pas bsdams pa yin zhe na/'di la byang chub sems dpa' 'di ltar spyod de/ so sor thar pa'i sdom pa tsam gyis bdag bla na med pa yang dag par rdzogs pa'i byang chub tu mngon par rdzogs par 'tshang rgya bar mi nus kyi /de bzhin gshegs pas gang 'di mdo sde de dang de dag las byang chub sems dpa'i spyod pa dang / byang chub sems dpa'i bslab pa'i gnas bcas pa de dag la bdag gis bslab par bya'o zhes gsungs pas na / 'dir yang byang chub sems dpa'i bslab pa rgya chen po la bslab par bya ba'i phyir bdag gis bla ma'i rjes su bstan pa dang /theg pa chen po'i mdo sde'i rjes su 'brangs nas bshad par bya'o/ /de ltar theg pa chen po'i thun mong ma yin pa'i rten bstan nas/ da ni shing rta chen po'i lam bstan pa'i phyir/ byang chub sems dpa'i sa dag gi /tshul khrims le'u gsungs cho ga yis/ /zhes bya ba la byang chub sems dpa'i sa ni 'phags pa thogs med kyis mdzad pa'i pha rol tu phyin pa drug bkod pa'i bstan bcos so/ /de las kyang tshul khrims kyi pha rol tu phyin pa'i le'u las so/ /de yang dgu yin te/ngo bo nyid dang thams cad dang / /dka' ba dang ni sgo kun dang / /skyes bu dam pa nyid dang ni/ /rnam kun dang ni phongs shing 'dod/ 'di dang gzhan du bde 'gyur dang / /rnam par dag pa'i tshul khrims so/ /de dag gi nang nas kyang ngo bo nyid thams cad kyi tshul khrims las gsungs so zhes bya'o//ji ltar gsungs she na/ tshul khrims kyi le'u las gsungs pa'i cho gas bya'o/ /cho ga de yang ji lta zhe na/ yang dag mtshan nyid ldan pa yi / /bla ma bzang las sdom pa blang / /zhes smras so/ /yang dag pa'i mtshan nyid bzang po de dang ldan pa'i bla ma bzang po de yang gang zhe na/sdom pa'i cho ga la mkhas dang / /bdag nyid gang zhig sdom la gnas/ /sdom pa 'bogs bzod snying rje ldan/ /bla ma bzang por shes par bya/ /zhes bya ba de yin no/ /de la sdom pa'i cho ga la mkhas ba zhes pa ni de la mkhas shing byang ba'o/ /sdom la gnas zhes pa ni bla ma'i tshul khrims nyams pa dang zhig pa med cing gtsang ba'o//bzod ces pa ni nus pa dang ldan pa ste sdom pa 'bogs pa la rag ma las par chas pa'o/ /snying rje ldan zhes pa ni slob ma la bu'i 'du shes dang / gzhan gyi sdug bsngal la sems mi bzod pa'o/ /bla ma zhes bya ba ni bla mar bya ba'i gnas su gyur pa nyid la nod par bya'i gzhan las ni ma yin te/gus pas bla mar 'dzin pa dang / de'i rjes su slob ma'i ngang tshul can dang / des bstan pa'i don la gus pa chen po byed pa'i phyir ro/ /yang bla ma de phun sum tshogs pa bzhi dang ldan pa yin te/tshul khrims phun sum tshogs pa dang / yon tan phun sum tshogs pa dang / bsam pa phun sum tshogs pa dang / sbyor ba phun sum tshogs pa'o/ /de la bdag nyid gang zhig sdom pa gang la gnas zhes pas ni tshul khrims phun sum tshogs pa bstan to/ /sdom pa'i cho ga la mkhas dang //sdom pa 'bogs pa bzod ces pas ni yon tan phun sum tshogs pa bstan to/ /yang bshad pa/ sdom la gnas zhes pa ni bla ma des sdom pa btang ba dang / tshul khrims 'chal pa dang / chos mthun pa ma yin pa las sdom pa mi 'thob bo/ /cho ga la mkhas zhes pa ni cho ga la mkhas pa las gnod par bya'i cho ga mi shes pa las ni de nyid cho ga nyams pas sdom pa mi 'thob po//'bogs bzod ces pa ni rab tu dga' ba'i yid kyis tshul 'di lta bu la 'jug pa ni legs so/ /bdag gis the tshom med par sdom pa sbyin par bya'o snyam du sdom pa ster bar nus pa'o //snying rjer ldan zhes pas ni bsam pa phun sum tshogs pa dang / sbyor ba phun sum tshogs pa bstan te/ de la bsam pa phun sum tshogs pa ni dad pa nyid/ bsam pa thag pa nas byed pa nyid dang / ma chags pa dang snying rje dang ldan pa nyid de/ bla ma la gus pa dang /'dod pa chung ba dang / chog shes pa dang / zang zing lhur mi len pa dang / skyo ba med pa dang / pha rol gyi nyes pa bzod pa dang / khro ba dang khon du 'dzin pa med pa'o/ /sbyor ba phun sum tshogs pa ni dge ba'i chos phyir zhing spel ba dang / gus shing 'jug pa dang / bslab pa'i gzhi rnams la ma rmongs par byed pa dang /spro ba dang le lo mi byed pa dang / 'dod pa'i bde ba dang / 'du 'dzi dag la mi dga' ba dang / sems rnam par ma g.yengs pa'o / /de lta bu'i bla ma las sdom pa blangs na tshul khrims kyi bslab pa 'phel bar 'gyur ro/ /de lta bu ni/ yang dag mtshan nyid ldan pa yi/ /bla ma bzang las sdom pa blang / /zhes bdag gis bsams so/ /de yang / sdom pa len pa'i cho ga dang / /grangs dang sdom pa gtong ba'i rgyu/ /mi gtong rgyu dang ldan pa dang / /tshul khrims kyi ni phan yon yin/ /zhes pa ni bsdus pa'o/ / 'dir sngon gyi mkhas pa chen po du ma'i lugs yod mod kyi 'on kyang skye bo chen po'i chos lugs shing rta chen po'i lam chen po yin pas/ slob dpon thogs med kyi lugs dang / rje btsun zhi ba lha'i lugs gnyis bshad par bya'o/ /sdom pa len pa'i cho ga ni slob dpon thogs med kyis tshul khrims kyi le'ur rgyas par mdzad pa dang /yang na bdag gis byas pa'i cho gar blta bar bya'o/ /slob dpon med pa'i cho ga yang tshul khrims kyi le'u de nyid na rgyas so/ /bdag gis byas pa'i cho ga de ni 'phags pa thogs med kyi rjes su 'brangs ba'i yin no/ / slob dpon zhi ba'i lhas ni cho ga 'di spyod pa la 'jug par yang mdzad mod kyi/ bslab pa kun las btus par rgyas par mdzad do/ /slob dpon med pa'i cho ga yang de nyid du gsal bar mdzad do/ /'dir bdag gis/ de la 'bad pa 'di 'dra ba'i/ /bla ma gal te ma rnyed na/ /gzhan la sdom pa nod pa yi//cho ga yang dag bshad par bya/ /de la sngon tshe 'jam pa'i dbyangs/ /zhes bya ba nas/ mi dge ba'i las rnams mi bya'o/ /zhes pa'i bar 'dir bla ma med pa'i cho gar bkod de/ aM ba rA dza'i cho ga 'di ni bla ma yod pa dang / bla ma med pa gnyis ka'i cho ga'i tshig yin no zhes bla ma dag gsung bas 'dir bla ma med pa'i cho gar bkod do//bslab pa kun las btus par ni 'dis bla ma las blangs pa'i cho gar gsungs mod kyi/ 'on kyang bdag ni lugs de gnyis ka'i rjes su 'brang bas na bla ma las blangs pa'i cho ga tshul khrims kyi le'u la brten zhing bkod la/bla na med pa'i cho ga ni bslab pa kun las btus pa la brten zhing bkod pa yin no/ /tshul khrims kyi rnam grangs ni 'phags pa thogs med kyis mdo sde ma lus pa ngo bo nyid la sogs pa'i tshul khrims dgur bsdus te/ tshul khrims kyi le'u de nyid las byang chub sems dpa' rnams kyi tshul khrims ni de tsam du zad do//tshul khrims kyi bya ba yang de tsam du zad do/ /tshul khrims kyi phan yon yang de tsam du zad do/ /de las gong na yang med do/ /de las lhag pa yang med do zhes gsungs so/ /slob dpon zhi ba'i lhas ni mdo sde ma lus pa gang zag gsum gyi bslab pa mdzad de/'di ltar theg pa chen po la goms pa che ba dang / goms pa 'bring dang / goms pa chung ba'o/ /goms pa che ba'i dbang du mdzad nas bslab pa kun las btus pa nas/ byang chub sems dpa'i sdom pa ni/ /rgyas par theg pa che las 'byung //zhes 'byung ba dang / spyod 'jug las kyang / rgyal sras rnams kyis mi bslab pa/ /'ga' yang yod pa ma yin no/ /zhes gsungs so/ /bla ma dpal byang chub bzang po'i zhal nas kyang / 'di ltar byang chub sems dpa' rnams kyi bslab pa'i gzhi rnams dngos su byung ba 'di dag ni mdor bsdus pa ste/gzhan yang byang chub sems dpa' dag gi bslab pa ni dpag tu med cing mthar thug pa med pa'i phyir/ de dang de dag tu bstan pa'i rjes su 'brangs nas nyes par 'gyur ba dang / nyes par mi 'gyur ba dag rig par bya'o zhes gsungs so//de la goms pa 'bring po'i dbang du mdzad nas yang bslab pa kun las btus pa nas gang gis ltung bar mi 'gyur ba'i/ gnad kyi gnas rnams 'dis rig bya/ /bdag gi lus dang longs spyod dang / /dus gsum skyes pa'i dge ba rnams/ / sems can kun la btang ba dang / /de bsrung dag pa spel ba'o/ /zhes gsungs so/ /goms pa chung ba'i dbang du mdzad na yang de nyid las de bas na byang chub sems dpa' sangs rgyas kyi spyan sngar bslab pa rnams kyi nang nas bslab pa gang yang rung bsrung bar 'dod nas yi dam bca' bar byed do//dge ba'i bshes gnyen med na sangs rgyas dang byang chub sems dpa'i spyan sngar rang gi nus pa dang sbyar nas sdom pa 'dzin no/ /de bas na rang gi nus pa dang sbyar nas bslab pa gcig tsam yang yang dag par blangs la bsrung bar bya'o zhes gsungs so/ /de la sdom pa gtong ba'i rgyu ni 'phags pa thogs med kyi lugs kyis ni 'di ltar byang chub chen por smon lam btab pa btang ba dang /kun nas dkris pa chen pos pham pa byung ba'o/ /de la snga ma ni sems can gyi don la skyo ba dang / byang chub thag ring bar sems pa dang / nyan thos dang rang sangs rgyas dang phyir rol par smon pa skyes pa'o//de la phyi ma yang ngo tsha ba dang khrel yod par gyur cing de la 'gyod pa med par sems kyis btang ba dang / mi brda phrad pa'i drung du bslab pa'i gzhi phul ba'o/ /slob dpon zhi ba lha'i lugs ni bslab pa kun las btus pa'i bdud kyi las gnod pa dang /dam pa'i chos mi 'dzin pa'i gnod pa la sogs pa bcu bzhi po rnams mi spong ba dang / yang na dran pa nyams pa dang le lo dang bag med pa dang ltung ba la mi mkhas pa dang ngo tsha med pa dang khrel med pa'o/ /bla ma'i zhal nas ni bslab pa'i gzhi rnams la mi mkhas pa dang / dran pa med pa dang 'khrul pa dang ma gus pa'o zhes sdom pa nyi shu pa'i 'grel pa las gsungs so/ /de la ltung ba mi 'byung ba'i rgyu ni/ 'phags pa thogs med kyi lugs ni 'di ltar shes bzhin dang dran pa dang / brtson 'grus dang / bag yod pa dang / nyes pa dang nyes pa med pa shes pa dang /ngo tsha ba dang khrel yod pa'o/ /slob dpon zhi ba'i lha'i yang de dag thun mong ba nyid las gnod pa bcu bzhis sel zhing spong ba'o/ /slar gso ba dang / thog ma nyid nas 'gal bar mi byed pa ni 'gyod pa med pa yin no/ /nyes pa la nyes par mthong na srab par byed la/ de nyid mthol zhing bshags na byang bar 'gyur ro zhes kyang bla ma dag gsung ngo //'phags pa thogs med kyi lugs kyis ni 'di ltar/ ltung ba las ldang ba ni tshul khrims kyi le'u las gal te slob dpon du rung ba'i gang zag med na zhes bya ba la sogs pa dang / yang kun nas dkris pa chen po'i pham pa byung na/des dge 'dun gyi mdun du bshags la sdom pa slar mnod par bya'o/ /nyes byas ni nyan thos sam/ theg pa chen po gang yang rung ba la bshags so/ /slob dpon zhi ba'i lhas ni bslab pa kun las btus par/ rdzogs sangs rgyas kyis gsungs tshul du//'bad pa med na ngan song 'gro/ /zhes pa'i skabs su/ 'phags pa chos bzhi pa'i mdo'i don bshad pa'i skabs na gsal bar bkod do/ /tshul khrims kyi phan yon ni ji skad du tshul khrims kyi le'u las de ltar byang chub sems dpa'i tshul khrims kyi phung po chen po 'di ni byang chub chen po'i 'bras bu bskyed pa ste/'di la brten nas tshul khrims kyi pha rol tu phyin pa yongs su rdzogs par byas nas mngon par 'tshang rgya'o/ /ji srid sangs ma rgyas kyi bar du yang phan yon lnga thob par 'gyur te sangs rgyas kyis dgongs par 'gyur ba dang / mchog tu dga' ba chen po la gnas bzhin du 'chi ba'i dus byed pa dang /tshe phyi ma la yang chos mthun pa'i dge ba'i bshes gnyen gnas pa der skye ba dang / tshe 'di la tshul khrims kyi pha rol tu phyin pa rdzogs par byed pa'i bsod nams kyi phung po tshad med pa dang ldan par 'gyur ba dang / tshe phyi ma yang rang 'khrungs kyi tshul khrims de dang de nyid 'thob par 'gyur ro zhes gsungs so/ /bslab pa kun las btus pa nas kyang 'di skad du/ deng sang gi dus na bslab pa bsrung ba ni shin tu phan yon che bas de la brtson par rigs so zhes gsungs te/ de yang 'phags pa lhag pa'i bsam pa bskul ba dang /rab tu zhi ba cho 'phrul dang / zla ba sgron ma dang / dkon mchog sprin gyi mdo rnams der bkod pa yin no/ /bla ma'i zhes nas kyang de ltar na 'di ni de'i mod la ngan song du 'gro ba rnam bcad cing skye bar 'gyur ba ma yin no zhes pa dang / yang de ni ngan song du skye ba ma yin la/ brgyal skyes na yang sdug bsngal drag po mi myong ba dang / myur du thar ba dang / der gnas pa na yang gzhan yongs su smin par byed do zhes sdom pa nyi shu pa'i 'grel pa las gsungs so/ /sdom pa yang dag par blangs pa de la phan yon gzhan yod de/'phags pa tsan dra go mi'i zhal nas/ de tshe de la dge ba'i phyir / /sangs rgyas sras dang bcas rnams kyis/ /dge ba'i thugs kyis rtag par yang / /bu sdug 'dra bar dgongs par 'gyur/ /zhes gsungs pa dang / yang slob dpon zhi ba lha'i zhal nas kyang / de ring sangs rgyas rigs su skyes//sangs rgyas sras su bdag gyur to/ /rigs dang mthun pa'i las brtsams te / /skyon med btsun pa'i rigs 'di la/ /rnyog par mi 'gyur de ltar bya/ /zhes gsungs pas/ sdom pa blangs pa'i byang chub sems dpa' des tshul khrims bsrung zhing spel dgos pas/rang gi lus ngag sems ni rnam dag rgyu/ /'jug pa'i sems kyis bdag nyid sdom gnas pas / /zhes smras te/ rang gi lus ngag sems ni rnam dag rgyu med de / /zhes bya ba ni ji skad du de bzhin gshegs pa'i snying rje'i mdo las/ lus gtsang byed dang / ngag gtsang byed dang /yid gtsang byed do zhes gsungs pas sdom pa'i tshul khrims kyis lus dang ngag gnyis dag par byed la/ dge ba'i chos sdud pa'i tshul khrims dang sems can don byed pa'i tshul khrims kyis sems dag par byed do/ /yang na tshul khrims re res kyang lus la sogs pa gsum ka dag par byed do//yang na srog gcod pa la sogs pa bdun spangs pas ni lus dang ngag dag par byed la/ brnab sems la sogs pa gsum spangs pas ni sems dag par byed do/ /gzhan yang don 'di la dgongs nas mi'am ci'i rgyal po ljon pas zhus pa'i mdo las/ chags pa dang zhe sdang dang gti mug dang bral bas lus yongs su dag pa'i tshul khrims dang /bdag gi lha dkon mchog gsum la mi slu ba'i mtshan nyid kyis ngag yongs su dag pa'i tshul khrims dang / brnab sems dang gnod sems dang log par lta ba med pas sems yongs su dag pa'i tshul khrims dang zhes gsungs so//de lta bu yin pas na tshul khrims kyi bslab pa la legs par slob par yang 'gyur zhing / de la goms pa'i stobs kyis tshul khrims de la dga' ba dang spro ba dang 'dod pa dang de la brtson pa dang gus pa cher 'gyur ro zhes bsams nas smra ba ni/ tshul khrims bslab pa gsum la legs bslabs nas//tshul khrims bslab pa gsum la gus cher 'gyur/ /zhes bya ba yin no/ /tshul khrims kyi bslab pa gsum ni sdom pa'i tshul khrims dang / dge ba'i chos sdud pa'i tshul khrims dang / sems can gyi don byed pa'i tshul khrims so/ / de la sdom pa'i tshul khrims ni bcas pa'i kha na ma tho ba srung ba'i so sor thar pa'i ris bdun gyi sdom pa dang / rang bzhin gyi kha na ma tho ba srung ba'i mi dge ba bcu bsrung ba'o/ /de la dge ba'i chos sdud pa'i tshul khrims ni sdom pa yang dag par blangs pa'i 'og tu gang cung zad lus dang ngag dang yid kyis byang chub kyi phyir dge ba bsags pa ste/de yang khyad par du thos pa dang bsam pa dang bsgom pa rnams la gcig tu dga' bas mngon par sbyor ba'o / /de bzhin du dus su bla ma rnams la gsong por smra ba dang / phyag bya ba dang / ldang ba dang / thal mo sbyor ba dang zhe sa dang bcas pas kun du spyod pa dang /bsnyen bkur byed pa dang / yon tan dang ldan pa'i bsngags pa brjod pa dang / bsod nams thams cad la rjes su yi rang ba dang / gzhan gyis brnyas pa la bzod pa dang / dge ba thams cad byang chub tu bsngo ba dang / dus dus su yang dag pa'i smon lam dag sna tshogs pa 'debs pa dang /mchod pa'i rnam pa rgya chen pos dkon mchog gsum la mchod par byed pa dang / dge ba la brtson 'grus byed pa dang / bag med pa spangs pa dang / dran pa dang shes bzhin dang ldan pas bslab pa'i gzhi rnams bsrung ba dang / dbang po'i sgo bsdams pa dang /zas kyi tshod rig pa dang / nam gyi cha stod dang cha smad la mi nyal bar rjes su brtson pa dang / skyes bu dam pa la brten pa dang / nyes pa dag shes shing mthong nas spang ba dang / nyes pa chos bzhin du 'chags pa dang / de lta bu'i phyogs dang mthun pa'i dge ba'i chos rnams srung ba dang spel ba ste/de ltar na dge ba'i chos sdud pa'i tshul khrims la gnas na dge ba'i chos kyi tshul shin tu bsdus par 'gyur te/ 'di 'dod pa'i longs spyod la lta ba cung zad tsam yang dang du len par mi byed na mang po lta ci smos/ pha rol tu phyin pa bcu dang / bsdu pa'i dngos po bzhi dang / tshad med pa bzhi ste/ byang chub kyi sems bcu'i bdag nyid yin no/ /sems can don byed pa'i tshul khrims ni 'di la sems can gyi don bya ba yin te/ nad la sogs pa'i sdug bsngal can rnams la nad g.yog la sogs pa'i grogs byed pa yin no//long ba dag gi long khrid dang / 'on pa dag la lag brdas ston pa dang / rkang lag med pa dag khur ba dang / 'dod pa'i 'dun pa can dag gi de sel ba dang / gzhan gyis sma phab cing pham pa rnams de dag gi sdug bsngal sel ba dang / lam gyis ngal ba dag la bza' ba dang /btung ba dang / gos dang / khang pa dag gis phan 'dogs so/ /gso ba'i rig pas nad pa dag la zang zing med pa'i sems kyis mi skyo bar phan 'dogs so/ /mdor na sems can gyi sdug bsngal thams cad sel ba dang / de bsal bar sems bskyed pa dang /dge ba thams cad gzhan gyi don du bsngo ba'o/ /'di dag gi don rgyas par tshul khrims kyi le'u ru blta bar bya'o/ /de lta bu tshul khrims kyi sdom pa rnam pa gsum ni bsod nams kyi tshogs yin pas tshogs de rdzogs par bya'o snyam du bsams nas/ de bas rnam dag rdzogs byang chub//sems dpa'i sdom pa'i sdom dag ni/ /'bad pa byas pas rdzogs byang chub/ /tshogs ni yongs su rdzogs par 'gyur/ /zhes bya ba 'di yin no/ /de bas na rdzogs pa'i byang chub thob par 'dod cing de'i rgyu bsod nams rdzogs par 'dod na byang chub sems dpa'i sdom pa 'bad pa dang rtsol ba byas pas bsod nams kyi tshogs rdzogs par 'gyur ro zhes shes par bya'o//sdom pa'i sdom dag ni zhes pa ni 'phags pa thogs med kyi lugs la gnas pa'i byang chub sems dpa'i sdom pa dang / slob dpon zhi ba'i lha'i lugs la gnas pa'i byang chub sems dpa'i sdom pa'o//de lta bu'i shing rta chen po'i lam gnyis la gnas nas 'bad pa dang / brtson par byas na bsod nams dang ye shes kyi tshogs gnyis rdzogs par byas te/ mngon par rdzogs par byang chub par 'gyur ro zhes bla ma dag gsungs pa yin no/ /bla ma'i zhal nas de lta bu'i tshul khrims kyi bslab pa gsum ni yang dag par blangs pa dang /rjes su bsrungs pas bdag dang gzhan gyi don dang / phan pa dang bde bar 'gyur ba'i phyir dge ba'o/ /byang chub sems dpa'i bslab pa dpag tu med pa bsdus pa'i phyir dpag tu med pa'o/ / sems can thams cad la phan pa dang bde ba mngon par bsgrub pa'i phyir phan 'dogs pa'o/ /bla na med pa yang dag par rdzogs pa'i byang chub kyi 'bras bu len par byed pa'i phyir 'bras bu che bar rig par bya'o zhes sdom pa nyi shu pa'i 'grel pa las gsungs so/ /de ltar bla ma dam pa las bslab pa de lta bu legs par bslangs shing /chos dang mthun par bsrung ba'i byang chub sems dpa'i tshogs kyi lam thar pa'i cha dang mthun pa'i dge ba'i rtsa ba bskyed par 'dod pa de ni/ tshe rabs snga ma'i bag chags bzang po yod pa yin te/ mgon po byams pas dbus dang mtha' rnam par 'byed pa las/snod gyur rnam par smin brjod dang / /de yi dbang gis stobs dang ni/ /'dod dang 'phel dang rnam dag ste/ /'bras bu rnams ni go rims bzhin/ /zhes gsungs te/ byang chub sems dpa' rnams sngon gyi skye ba dag tu dge ba la goms par bslabs pas tshe 'dir de'i snod du gyur pa ni rnam par smin pa'i 'bras bu'o//de rnams 'dir byas pa'i stobs can du gyur pa ni bdag po'i 'bras bu'o/ /de nyid la phyir zhing 'dun pa ni rgyu mthun pa'i 'bras bu'o/ /'dir bslab pa dag mngon par 'phel ba ni skyes bu byed pa'i 'bras bu'o//de'i sgrib pa'i dri ma rnams dang bral ba ni bral ba'i 'bras bu'o/ /'dir bdag po'i 'bras bu ma gtogs pa bzhi ni ris mthun pa'i 'bras bur bgrang gi 'di nyid la rdzogs pa ni ma yin no zhes bla ma mkhas pa chen po shAn ti pas gsungs so//slob dpon mkhas pa chen po nor gyi rtsa lag gi zhal nas kyang byang chub sems dpas byang chub tu sems bskyed phan chad tshe rabs tshe rabs su/ bde 'gro rigs mtho skye dbang tshang / /phor gyur tshe rabs dran mi ldog /byang chub sems dpa' sems can la phan pa'i don du sdug bsngal la mi skyo ba'o//'jig rten na zong gis ma nyos pa'i bran ni byang chub sems dpa' de yin pas/ bdag nyid chen po de la 'byor pa'i mchog khyad par can yod kyang des nga rgyal dang khengs par mi 'gyur bar snying rjes gzhan gyi dbang du gyur pas bdag nyid sems can thams cad kyi drung na khyi lta bu dang /bran lta bu dang / gdol pa lta bur nga rgyal bcag nas gnas pa ste/ gzhan gyis brnyas pa dang gnod par byas kyang bzod cing / ngal ba dang brnags pa thams cad nyams su len pa yin no zhes gsungs so/ / de lta bu'i gang zag ni theg pa chen po pa yin par shes so/ /gzhan yang tshe rabs tshe rabs su byang chub kyi sems ma nyams pa'i rtags ni mdo las ji skad du de ngan song gsum spangs pa yin/ /yul mtha' 'khob spangs pa yin/ skyes bu dam pa yod pa'i sa phyogs su skye ba dang /rigs mthon por skye ba yin/ gzugs bzang ba yin/ shes rab che ba yin/ nad med pa yin/ snying rje dang ldan pa yin no zhes gsungs so/ /gzhan yang de mi khom pa brgyad spangs shing / khom pa'i yon tan bcu dang ldan pa yin no/ /gzhan yang rtags ni de rang bzhin gyis pha rol tu phyin pa drug dang ldan pa yin te/mdo las de ma bstan pa'i sbyin pa can yin zhes pa nas/ de ma bstan pa'i shes rab can yin zhes pa'i bar dang ldan pa yin no zhes gsungs so/ /gzhan yang slob dpon zla grags kyi zhal nas/ so so skye bo'i dus na stong nyid thos//nang gi dga' ba yang dang yang du 'byung / /dga' ba las byung mig ni mchi mas gang / /lus kyi spu ldang ba yang skye bar 'gyur/ /gang yin de la byang chub sa bon yod/ /don dam bden pa de la bstan par bya/ /der rtogs pa yi yon tan de las 'byung / /zhes bya ba la sogs pa gsungs so//slob dpon nor gyi rtsa lag gi zhal nas kyang bshad de/ thar pa'i cha dang mthun pa ni/ gang la bdag med pa'i gtam dang 'khor ba'i nyes dmigs dang / mya ngan las 'das pa'i yon tan gyi gtam brjod pa thos na mchi ma 'khrug pa dang / spu zing byed pa de la thar pa'i cha dang mthun pa'i dge ba'i rtsa ba yod par shes par bya ste/ dbyar myu gu skye ba las na sa gzhi'i gseb na de'i sa bon yod par shes pa bzhin no zhes gsungs so/ /de ltar na 'phags pa lang kar gshegs pa las/ du ba las ni mer shes shing //chu skyar las ni chu bzhin du/ /blo ldan byang chub sems dpa' yi/ /rigs ni mtshan ma rnams las shes/ /zhes gsungs so/ /de ltar sdom pa srung ba'i byang chub sems dpa' las dang po pa des dus thams cad du lus dang gnas dang longs spyod thams cad dang 'khor ba dang mya ngan las 'das pa'i chos thams cad rmi lam lta bur shes par bya ste/rmi lam lta bu'i dkon mchog gsum la rmi lam lta bu'i sri zhu bya ba dang / rmi lam lta bu'i 'khor ba la skyo bar bya ba dang / rmi lam lta bu'i sems can la rmi lam lta bu'i sems kyis snying rje bya ba dang /rmi lam lta bu'i sems can mgu bar bya ba'o/ /sems can thams cad jo bor yid la bya ba dang / skye ba med pa yid la bya ba dang / byang chub kyi sems yid la bya ba dang / 'chi ba yid la bya ba dang / tshul khrims yid la bya ba dang / dngos po thams cad la ma chags pa'i yid la bya ba dang /dran pa dang / shes bzhin dang / bag yod pa dang / tshul bzhin du sems pa yid la bya'o/ /gzhan yang las dang po pa des dus thams cad du thabs la mkhas par bya'o/ /'di ltar bdag gi sdig pa gzhan gyi sdig phar byas te 'chags pa dang /gzhan gyi sdig pa bdag gi sdig par byas te 'chags pa dang / bdag gi dge ba'i rtsa ba gzhan gyi dge ba'i rtsa bar byed pa dang gzhan gyi dge ba'i rtsa ba bdag gir byed pa dang / bdag gi bde ba gzhan gyi bde bar byed pa dang / gzhan gyi sdug bsngal bdag gir byed pa dang /bdag gi sdug bsngal gyis gzhan gyi sdug bsngal bsal ba dang / gzhan dag bde ba mthong ba dang thos pa na de la yid dga' ba dang / gzhan dag sdug bsngal la thos sam mthong na/ ma la bdag gis nam zhig na 'di dag sdug bsngal las thar bar bya snyam du yid gdung ba dang /'jig rten gyi chos la sems btang ba dang / gzhan gyi rnyed pa dang bkur sti dang / grags pa snyan pa la phrag dog mi bya ba dang / bdag ni 'di ltar rigs dang / gzugs dang / 'khor dang yo byad dang / rig pa'i gnas lnga dang / rnyed pa dang /bkur sti dang / grags pa snyan pa dang ldan pa yin no zhes nga rgyal dang khengs pa med cing gzhan dman pa dag la brnyas par mi bya ba dang / bdag gi dge ba'i rtsa ba de gzhan dang thun mong du byas nas byang chub chen por yongs su bsngo ba dang / gzhan gyi dge ba'i rtsa ba de yang bdag dang thun mong du byas nas byang chub chen por yongs su bsngo ba dang /bdag gi sdig pa yang gzhan gyi sdig pa dang thun mong du byas nas so sor bshags pa dang / gzhan gyi sdig pa yang bdag dang thun mong du byas nas so sor bshags pa'o/ /gzhan yang de kun du spyod pa phyin ci ma log pa yin te/'phags pa dkon mchog sprin las/ de za na/ de 'thung na/ de 'gro na/ de nyal na/ de glo g.yas pas nyal na zhes bya ba la sogs pa ste mdo de nyid du blta bar bya'o/ /gzhan yang de dam bca' ba phyin ci ma log pa yin te/ sngon gyi rgyal po nam mkhas 'di skad du/di ring phan chad nam du yang / /bdag la 'dod chags sems byung na/ /phyogs bcu dag na bzhugs pa yi/ /sangs rgyas thams cad bslus par 'gyur/ /tha ba'i sems dang gnod sems dang / /phrag dog dang ni ser sna dang / /di ring phan chad mi bya'o//tshangs par spyod la gnas bgyi zhing / /sdig pa 'dod pa yongs su spang / /tshul khrims sdom dang des pa la/ /sangs rgyas rjes su bslab par bya/ /zhes gsungs pa dang / 'phags pa lhag pa'i bsam pa bskul ba'i mdo las/ bcom ldan 'das bdag cag deng slan chad de bzhin gshegs pa'i spyan sngar yi dam 'di lta bu bca' bar bya'o//bcom ldan 'das gal te bdag gis deng slan chad byang chub sems dpa'i theg pa'i gang zag gi ltung ba med pa yang rung ste/ glengs na bdag cag gis de bzhin gshegs pa dgra bcom pa yang dag par rdzogs pa'i sangs rgyas la bslus par 'gyur ro zhes bya ba la sogs pa gsungs te mdo nyid du blta bar bya'o//gzhan yang de bsngo ba phyin ci ma log pa yin te/ gser 'od dam pa'i bsngo ba dang / byang chub sems dpa' rdo rje rgyal mtshan gyi yongs su bsngo ba chen po bcu dang /gzhan yang 'phags pa klu sgrub kyi bsod nams kyi tshogs nyi shu pa dang / spyod pa la 'jug pa'i bsngo ba'i le'u la sogs pa'o/ /gzhan yang de smon lam phyin ci ma log pa yin te/ 'phags pa bzang po spyod pa dang / 'phags pa sa bcu pa'i smon lam chen po bcu dang /bcom ldan 'das sman gyi bla bai DUr+ya 'od kyi rgyal po'i smon lam chen po bcu gnyis dang / slob dpon rta dbyangs kyis mdzad pa'i smon lam bdun cu pa la sogs pa'o/ /gzhan yang bla ma'i zhal nas byung ba'i mdo sde ma lus pa'i don bsdus pa pha dang ma lta bu dang / bu dang bu mo lta bu'i chos lnga bcu po rnams kyang skad cig skad cig la dran par bya'o//gzhan yang byang chub sems dpa' des dus gcig la rtag tu mdo sde ma lus pa bklag par yang bya'o/ /de ci'i phyir zhe na/ las dang po pa gnyen po shas chung zhing rkyen la ltos pa yin pas mdo sde blta ba la brtson par bya'o//gzhan yang mdo sde'i don ma lus par bsdus pa yin pas mdo kun las btus pa dang / bslab pa kun las btus pa dang / byang chub sems dpa'i spyod pa la 'jug pa dang / tshul khrims kyi le'u dang / sdom pa nyi shu pa rnams kyang dus dus su blta ba dang /mnyan pa dang / bri bar bya'o/ /gzhan yang theg pa chen po'i mdo sde'i don dang / sngon gyi slob dpon chen po rnams dang / da ltar gyi bla ma mkhas pa chen po rnams kyi dgongs pa yin pas bstan bcos 'di nyid kyang blta ba dang / mnyan pa dang / bri bar bya'o/ /gzhan yang nyin lan gsum mtshan lan gsum phung po gsum pa gdon par bya ste/ 'phags pa drag shul can gyis zhus pa las/ des nyin lan gsum mtshan lan gsum du khrus byas te/ gos gtsang ma bgos nas phung po gsum pa gdon par bya'o zhes gsungs pa dang /'phags pa chos thams cad 'byung ba med par bstan pa'i mdo las kyang / nyin dang de bzhin mtshan mo lan gsum du/ /byang chub sems dpa' rnams la mgos phyag 'tshal/ /zhes gsungs pa dang / 'phags pa dkon mchog sprin las kyang / de ltar sangs rgyas dang byang chub sems dpa' thams cad la nyin lan gsum mtshan lan gsum du mchod par byed do zhes gsungs pa dang / 'phags pa nye ba 'khor gyis zhus pa las kyang / des nyin mtshan du bshags pa byed do zhes gsungs pa dang / 'phags pa thogs med kyi zhal nas kyang /byang chub sems dpa' myur du mngon par rdzogs par 'tshang rgya bar 'dod pas nyin lan gsum mtshan lan gsum du phyag 'tshal ba dang / mchod pa dang sdig pa so sor bshags pa dang / rjes su yi rang ba dang / bskul ba dang / gsol ba gdab pa dang /yongs su bsngo ba rnams kyang bya'o zhes gsungs so/ /de dag gi phan yon yang 'phags pa spyan ras gzigs kyi mdo dang chos bshad pa brgya pa/ slob dpon dpa' bo'i rin po che phreng ba lta bu'i gtam dag tu blta bar bya'o/ /de yang 'phags pa bzang po spyod pa'i gzhung gis kyang bya'o//yang na phung po gsum pa'i mdo nyid gdon par bya'o/ /yang na byang chub sems dpa' mkhas pa blo dang ldan pa thos pas brgyan pa des ni 'phags pa bzang po spyod pa 'di nyid la gnas nas bla ma'i zhal las 'byung ba'i gdams ngag gi cho ga rgyas par bya'o/ /de bas na slob dpon zhi ba'i lha'i zhal nas/nyin dang mtshan mo lan gsum du/ /phung po gsum pa gdon par bya/ /rgyal dang byang chub sems brten pas/ /ltung ba'i lhag ma des zhi bya/ /zhes spyod pa la 'jug pa las gsungs so/ /de lta bu'i cho ga de'i rjes la gsum la skyabs su 'gro ba dang /ltung ba'i nyes pa so sor bshags la/ byang chub kyi sems rnam pa gnyis bskyed nas/ bdag gis theg pa chen po'i mdo sde nas gsungs pa'i byang chub sems dpa'i bslab pa ma lus pa thams cad la bslab par bya'o zhes mos par bya'o/ / de bas na de lta bu'i nyin dang mtshan du don med par mi gnas pa'i rnal 'byor ba de ni phun sum tshogs pa gsum dang ldan te/bla ma'i zhal nas 'di skad du phun sum tshogs pa gsum gyis bde ba la reg par 'gyur te/ 'di ltar sbyor ba dang / bsam pa dang / sngon gyi rgyu phun sum tshogs pa'o//de la sbyor ba phun sum tshogs pa ni lus dang ngag dang yid kyi nyes pa rgyun du mi byed la sdig pa 'chags pa'o/ /bsam pa phun sum tshogs pa ni 'di ltar bdag chos kyi bsam pas yin gyi log par 'tsho ba la sogs pa chos ma yin pas ni ma yin no/ /bdag kyang byang chub chen po don du gnyer ba yin gyi/'jig rten pa'i bde ba don du gnyer ba ma yin/ de la sngon gyi rgyu phun sum tshogs pa ni des sngon gyi dus su bsod nams byas shing / dge ba byas pas da ltar gos dang zas dang yo byad rnams kyis phongs par ma gyur pa yin zhing gzhan la yang bgo bsha' byed pa'i ngang tshul can yin no zhes gsungs so//'di ltar las dang po pa'i slob ma blo chung ba de dang po nyid nas lam la 'jug pa mi bya ste/ de la thog mar byang chub sems dpa'i bslab pa rgya chen po bkod pa'i mdo sde dang / bstan bcos thams cad bshad par bya zhing tshul de mkhas par byas nas/gzod gang zag lam la 'jug pa'i cho ga bya'o zhes bla ma dag gsung ba yin no/ /'dir smras pa/ dkon mchog gsum gus yul la zhen pa spangs/ /'chi ba rjes dran tshul khrims gtso bor byed/ /bla ma la gus dad ldan g.yo sgyu med//sdig pa'i grogs spangs thun tshigs sbyor bar ldan/ /thun tshigs brug ba dum bu bco brgyad 'gyur/ /snga dro'i thun la dum bu gsum yod pa'i/ /dum bu dang po dum bu bar pa la/ /nyes pa byung ba dum bu tha ma der/ /byang chub sems brjed sems dpa' nyams par 'gyur//phyi ma lnga yang de yis bsgre bar bya/ /dum bu dum bur legs par gso byed pa/ /skyes bu rab yin 'bring ni gnyis lags so / /dum bu tha mar gso ba tha ma ste/ /rab kyi rab ni skad cig dang por gso/ /rab kyi 'bring ni skad cig gnyis par gso//rab kyi tha ma skad cig tha mar gso/ /de ltar gyur pas skyes bu rab 'bring rgyu / /phyi ma kun yang de yis bsgre bar bya/ /bla ma mkhas pa chen po kha cig ni 'di skad du gsung ste / nyes ba byung ba nyid kyi rjes la gso byed pa/ /skyes bu rab yin skad cig gnyis pa sogs//de yi rjes la gso ba 'bring po ste/ /skyes bu tha mas dus tshigs drug por gso/ /zhes gsungs so/ /lhag pa'i tshul khrims kyi bslab pa bstan zin to// // 'di ltar tshul khrims 'ba' zhig tsam gyis ni chog par ni mi bzung ste/ ting nge 'dzin dang / shes rab dag kyang bskyed dgos pa yin no//'on kyang tshul khrims la brten nas ting nge 'dzin skye bar 'gyur te/ 'phags pa zla ba sgron ma'i mdo las/ nyon mongs med pa'i ting 'dzin myur thob ste/ /'di ni tshul khrims rnam dag phan yon yin/ /zhes gsungs so/ /slob dpon zhi ba'i lha'i zhal nas tshul khrims ni ting nge 'dzin 'grub pa yin te zhes pa dang /yang de bas na ting nge 'dzin gyi rgyu'i sbyor ba gang ci yang rung ba de dag ni tshul khrims kyi nang du 'dus par shes par bya'o/ /de bas na ting nge 'dzin don du gnyer bas dran pa dang shes bzhin gyi ngang tshul can du bya'o zhes gsungs so//yang tshul khrims don du gnyer bas kyang ting nge 'dzin la 'bad par bya ste zhes pa dang / yang tshul khrims don du gnyer ba gnyis gcig gis gcig 'phel bar byed pa 'di gnyis kyis sems yongs su sbyang ba yongs su grub po zhes gsungs pas tshul khrims med pa'i ting nge 'dzin skye bar mi 'gyur bas na/de'i phyir tshul khrims la 'bad par bya dgos so/ /de bas tshul khrims phun sum tshogs pa'i ting nge 'dzin gyis mngon par shes pa bskyed nas gzhan gyi don bya ba dang / tshogs rnam pa gnyis bsags pa'i thabs ni mngon par shes pa yin pas de bstan pa'i phyir/ bsod nams ye shes rang bzhin gyi/ /tshogs ni yongs su rdzogs pa yi/ /rgyu ni sangs rgyas thams cad dag /mngon shes bskyed pa nyid du bzhed/ /ces bya ba de yin no/ / tshogs gnyis bsag par 'dod pa dang / /rtag tu gzhan don byed 'dod pas/ /mngon par shes pa ma bskyed na/ /dmus long gi ni spyod pa dang / /smyon pa'i spyod pa nyid dang ni/ /ji ltar byol song spyod pa bzhin/ /rang gi don yang mi grub na/ /gzhan don 'grub par ji ltar rung //zhes pa ni bsdus nas bstan pa'o/ /ji ltar 'dab gshog ma skyes pa'i/ /bya ni mkha' la 'phur mi nus/ /de bzhin mngon shes thob bral bas/ /sems can don byed nus ma yin/ /mngon par shes pa yang ma thob cing bsgoms pa'i shes rab kyang ma skyes par thos pa'i shes rab tsam la brten nas chos bshad cing slob ma sdud pa de ni smyon pa yin te/ji skad du/ rang gi tshod kyang mi shes par/ /smra ba ji ltar smyon pa min/ /zhes so/ /'phags pa lhag pa'i bsam pa bskul ba'i mdo las/ smra ba la dga' ba dang / smra ba la dga' ba'i nyes pa mthong bar bya'o zhes pa dang /yang de nyid las smra ba la dga' ba'i nyes pa gsungs pa/ thos pas rgyags nas gus par mi 'gyur te/ /rnam par 'gyid pa'i smra ba rnams la chags/ /brjed par 'gyur zhing shes bzhin med par 'gyur/ /smra la dga' ba'i nyes pa 'di dag go//nang gi sems las shin tu ring bar 'gyur/ /lus dang sems kyang rab sbyangs ma yin 'gyur/ /khengs pa dang ni dud pa mang por 'gyur/ /smra la dga' ba'i nyes pa 'di dag go/ /byis pa dam pa'i chos bsam rab tu nyams/ /sems ni mi mnyen shin tu rtsub par 'gyur//zhi gnas lhag mthong dag dang rab tu ring / /smra la dga' ba'i nyis pa 'di dag go/ /rtag tu bla ma dag la gus pa med/ /sbags pa'i gtam dag la ni dga' ba skyed/ /snying po med la gnas shing shes rab nyams/ /smra la dga' ba'i nyes pa 'di dag go//de bzhin du yang gsungs pa/ bdag ni sgrub nyams da ni ci bya zhes/ /'chi ba'i dus tshe byis pa mya ngan byed/ /gting rnyed ma gyur shin tu sdug bsngal gyur / /smra la dga' ba'i nyes pa 'di dag go/ /rtswa bskyod bzhin du 'gyur zhing g.yo ba ste//de ni de ltar the tshom 'gyur du nges/ /de ni nam yang blo brtan mi 'gyur te/ /smra la dga' ba'i nyes pa 'di dag go/ /gar la lta ba'i khrod na 'dug pa zhig /dpa' bo gzhan gyi yon tan brjod pa bzhin/ /bdag nyid nan tan nyams par 'gyur bas te/ /smra la dga' ba'i nyes pa 'di dag go//de ni g.yo ldan yang zhing re chad 'gyur/ /phyir zhing phyir zhing rnam par 'gyid par 'gyur/ /'phags pa'i dam pa'i chos las rab tu ring / /smra la dga' ba'i nyes pa 'di dag go/ /mthu chung bsti stang dag gis dgar 'gyur te/ / mi shes ldan pa g.yo zhing 'gyur ba yin/ /spre'u ltar de yi sems ni g.yo bar 'gyur/ /smra la dga' ba'i nyes pa 'di dag go/ /zhes 'byung ste/ de bzhin du yang / yun ring dus nas smra la dga' bas na/ /des ni bdag nyid dga' ba mi 'thob bo/ /tshig gang dga' ba mtha' yas 'thob 'gyur ba//tshig gcig tsam zhig bsams kyang mchog yin no/ /bu ram shing shun snying po ci yang med/ /dga' bar bya ba'i ro ni nang na 'dug /shun pa zos pas mis ni bu ram ro/ /zhim po rnyed par nus pa ma yin no/ /shing gi shun pa de bzhin smra ba ste//ro lta bu ni 'di ni don sems yin/ /de lta bas na smra la dga' spangs te/ /rtag tu bag yod byos la don soms shig /ces gsungs te/ de bzhin du yang gsungs pa/ de nas bcom ldan 'das la byang chub sems dpa' sems dpa' chen po byams pas 'di skad ces gsol to//gang dag mchog gi chos yongs su spangs nas las ngan pa rnams rtsom pa'i byang chub sems dpa' de ni shes rab shin tu chung zhing shes rab rnam par nyams par 'gyur ba lags so/ /de skad ces gsol pa dang / bcom ldan 'das kyis byang chub sems dpa' sems dpa' chen po byams pa la 'di skad ces bka' stsal to//byams pa de de bzhin no/ /ji skad smras pa de bzhin te/ gang dag mchog gi chos yongs su spangs nas las ngan pa rtsom pa'i byang chub sems dpa' de dag ni shes rab shin tu chung bar 'gyur ro//byams pa khyod la bstan to/ /khyod kyis khong du chud par bya'o/ /gang dag la brtson pa med pa dang / bsam gtan med pa dang / spong ba med pa dang / kha ton bya ba med pa dang / mang du thos pa yongs su tshol ba med pa'i byang chub sems dpa' de dag ni de bzhin gshegs pa'i bstan pa la rab tu byung ba ma yin no//byams pa de bzhin gshegs pa'i bstan pa ni bsam gtan dang / spong bas rab tu phye ba/ ye shes kyis 'dus byas pa/ ye shes kyis mnyam par bzhag pa/ mngon par brtson pas rab tu phye ba yin gyi/ khyim pa'i las kyi mtha' dang / zhal ta byed pas rab tu phye ba ni ma yin no/ /mi rigs pa brtson pa dang / 'khor ba la mngon par dga' ba rnams kyi las ni 'di yin te 'di ltar zhal ta byed pa dang / 'jig rten pa'i bya bas gzings pa ste/ de la byang chub sems dpa' rnams kyis 'dod pa bskyed par mi bya'o zhes gsungs so//bla ma'i zhal nas kyang / de ltar thos pa dang ldan pa'i byang chub sems dpas chos smra ba las ldog bar bya ste/ mngon par shes pa ma thob bar du thos pa tsam gyis gzhan la phan gdags par ma gsungs te zhes pa dang /yang gsungs pa/ de bas na mang du thos pa tsam gyis chos smra bar ni mi bya ste/ mngon par shes pa thob nas gzod gzhan gyi don bya ste zhes pa dang / yang de nyid las/ mngon par shes pa ma thob par slob ma yongs su smin par mi nus kyi rang nyid 'chi bar zad de/slob dpon zhi ba'i lha'i zhal nas/ sems can mos pa sna tshogs pa/ /rgyal bas kyang ni mi mgu na/ /bdag 'dra ngan pas smos ci dgos/ /de bas 'jig rten bsam pa btang / /zhes khungs dang bcas nas ting nge 'dzin gyi tshogs kyi le'u las gsungs so//de bas don 'di la dgongs nas/ slob dpon 'phags pa klu sgrub kyi zhal nas/ skye ba kun du rjes 'brang ba'i/ /mngon par shes pa lnga thob nas/ /rtag tu sems can thams cad la/ /kun du phan dang bde ba bya/ /zhes gsungs so//bla ma'i gdams ngag med par gzhung thos pa tsam la brten nas sgom par byed pa de yang 'dir zhar la bkag ste/ de lta bu'i rnal 'byor la brtson par byas kyang mngon par shes pa yang skye bar mi 'gyur zhing / rdzogs pa'i byang chub chen po yang mi 'thob pa'i phyir ro//don 'di la dgongs nas/ bram ze sa ra ha pa chen pos don dam pa'i rigs pa las/ bla ma'i man ngag ces bya bdud rtsi'i ro/ /gang gis ngoms par 'thungs par ma gyur pa/ /de ni bstan bcos mang po'i mya ngam thang dkyil du/ /skom bzhin du ni nges par 'chi bar 'gyur//zhes gsungs pa dang / 'phags pa klu sgrub kyi zhal nas kyang / rgyud mang rab tu thos shing lung la legs sbyangs kyang / /bla ma'i bsnyen bkur dman phyir de nyid lung thob ma gyur pa/ /de ni bdag phan tsam la'ang dbang med bstan bcos mchu/ /de ni bstan bcos skyo ba'i rgyu tsam 'ba' zhig yin//zhes gsungs so/ /mngon shes med pa ldan pa'i nyin mtshan gyi / /zhes pa la sogs pa'i sh+lo ka gnyis ni dkyus ji lta ba nyid do/ /'di ltar rdzogs pa'i byang chub chen po ni tshogs rnam pa gnyis la rag las/ tshogs rnam pa gnyis kyang gzhan gyi don la rag las/de yang mngon par shes pa yang zhi gnas la rag las/ zhi gnas kyang tshul khrims la rag las pas/ dang po tshul khrims bstan pa yin no/ /de bas na tshul khrims las zhi gnas 'byung la/ zhi gnas las mngon par shes pa 'byung bas/mngon shes 'byung bar mi 'gyur la/ /de phyir zhi gnas bsgrub pa'i phyir/ /yang dang yang du 'bad par bya/ /zhes smras so/ /mngon par shes pa ni 'di ltar lha'i mig gi mngon par shes pa dang / lha'i rna ba'i mngon par shes pa dang / gzhan gyi sems shes pa'i mngon par shes pa dang /sngon gyi gnas rjes su dran pa dang / rdzu 'phrul gyi mngon par shes pa dang / zag pa zad pa'i mngon par shes pa'o / /de lta bu'i mngon par shes pa de dag zhi gnas las 'byung ba yin pas zhi gnas bsgrub par bya ste/ zhi gnas yan lag rnams nyams pas//rab tu 'bad de bsgom byas shing / /lo ni stong phrag dag gis kyang / /ting 'dzin 'grub par mi 'gyur ro/ /zhi gnas yan lag ces pa ni bla mas mdzad pa'i ting nge 'dzin tshogs kyi le'u'i spang bar bya ba la sogs pa dgu'o/ /gzhan ni go sla'o / /de bas na yan lag nyams na zhi gnas mi 'grub pa de'i phyir bdag gi bla ma rje btsun dpal byang chub bzang pos ting nge 'dzin gyi tshogs kyi le'u las yan lag dgu gsungs pa ni/'di ltar spang bar bya ba dang / sngon du 'gro ba dang / ldog par bya ba dang / gdung ba gcad pa dang /yid 'byung bar bya ba dang / yon tan rjes su dran par bya ba dang / brtson par bya ba dang / 'brel bar bya ba dang / gnas pa'i thabs zhes bya'o/ /de lta bu'i yan lag rnams shes par byas la de la legs par gnas par bya'o zhes bla ma gsung ba yin no/ /de rnams kyi don ni ting nge 'dzin gyi tshogs kyi le'u de nyid du blta bar bya'o//'dir yan lag tha ma'i don cung zhig bri bar bya'o ste/ bla ma'i zhal nas ting nge 'dzin gyi tshogs kyi le'u las 'di skad du/ de ltar yan lag brgyad dang ldan pa des/ gnas rjes su mthun par kha zas dang spyod lam rjes su mthun pa dang gos dang grogs rjes su mthun pa dang ldan par byas la/sems mnyam par gzhag par bya'o zhes pa dang / yang gsungs pa des mnyam par ma bzhag pa na yang shes rab kyi pha rol tu phyin pa bklag pa dang / tsha tsha dang / bskor ba la sogs pa bsod nams kyi tshogs la 'bad par bya'o zhes pa dang /yang gsungs pa sems mnyam par 'jog 'dod pa des spong ba'i 'du byed brgyad bsgom par bya ste/ de'i mi mthun pa'i chos ni 'di dag go/ /nyes pa lnga ni le lo dang / /gdams ngag brjed dang bying dang rgod//'du mi byed dang 'du byed dang / /'di dag nyes pa lngar 'dod do/ /de dag gi gnyen po spong ba'i 'du byed brgyad dag kyang / gnas dang de la gnas pa dang / /rgyu dang 'bras bu nyid du'o/ /dmigs pa brjed par ma gyur dang / /bying dang rgod pa rtogs pa dang / / de spong mngon par 'du byed dang / /zhi tshe rnal du 'jug pa'o/ /zhes gsungs so/ /mdo sde rgyan las kyang / gcig ni 'bad par byed pa ste/ /gnyis pa phan 'dogs bdag nyid yin/ /gsum pa gtong bar byed pa ste/ /bzhi pa gnyen po nyid yin no/ /zhes gsungs so//yang bshad pa/ 'dod pa la 'dun pa dang / gnod sems dang / rmugs pa dang / gnyid dang / rgod pa dang / 'gyod pa dang / the tshom mo/ /de la rmugs pa dang gnyid kyi 'khor ni/ rmya ba dang / mi dga' ba dang / bya rmyangs dang / zas kyi tshod ma zin pa dang /sems zhum pa la sogs pa'o/ /las ni sems zhum par byed pa'o/ /gnyen po ni snang ba'i 'du shes so/ /rgod pa dang / 'gyod pa'i 'khor ni nye du'i rtog pa dang / sngon dgod pa dang / dga' ba dang / rtses pa dag rjes su dran pa'o/ /las ni sems ma zhi bar byed pa'o//gnyen po ni zhi gnas so/ /dmigs pa gang rung cig dag la/ /yid ni dge la gzhag par bya/ /dmigs pa ni sems kyi yul yin te/ ji skad du/ dbu ma rtog ge 'bar ba las/ /yid kyi glang po log g.yo ba/ /dmigs pa'i ka ba brtan po la/ / dran pa'i thag pas nges bcings te/ /sems ni zhi la gzhag par bya/ /zhes 'byung ngo / /gang rung cig dag la zhes pa ni/ mtshan ma dang bcas pa'i zhi gnas dang / mtshan ma med pa'i zhi gnas so/ /de yang bla ma'i zhal snga nas ting nge 'dzin gyi tshogs kyi le'u las 'di skad du 'dir zhi gnas ni gnyis te/mtshan ma dang bcas pa dang / mtshan ma med pa'o/ /mtshan ma dang bcas pa la gnyis te/ kha nang du bltas pa dang / kha phyir bltas pa'o/ /nang du bltas pa la gnyis te/ lus la dmigs pa dang / lus la brten pa la dmigs pa'o//lus la dmigs pa la gsum ste/ lus nyid lha'i rnam par dmigs pa dang / keng rus la sogs pa la mi sdug pa'i rnam par dmigs pa dang / kha T+wAM ga la sogs pa mtshan ma khyad par can la dmigs pa'o/ /lus la brten pa la lnga ste/ dbugs la dmigs pa dang /mtshan ma phra mo la dmigs pa dang / thig le la dmigs pa dang / 'od zer gyi yan lag la dmigs pa dang / dga' ba dang bde ba la dmigs pa'o/ /kha phyir bltas pa la gnyis te/ khyad par can dang / phal pa'o/ /khyad par can la gnyis te/sku la dmigs pa dang / gsung la dmigs pa'o/ /'di dag ni zhi gnas la 'jug pa'i yan lag go zhes pa dang / mtshan ma med pa'i zhi gnas ni/ yang de nyid las mtshan ma med pa'i zhi gnas so sor rtog pa'i shes rab nyid las/ mtshan ma med pa'i lhag mthong rnam par mi rtog pa'i ye shes 'byung zhes te zhes pa dang /yang de nyid las mtshan ma dang bcas pa'i zhi gnas la brten pa pas ni mtshan ma med pa'i zhi gnas la dmigs nas lhag mthong skyed pa'i phyogs 'di bsngags te/ de la gnas pa brtan pa dang / zhi gnas 'ba' zhig gis nyon mongs pa sel ba dang /rab tu gnon par 'gyur bas de ni 'bras bu dang rjes su mthun pa'i rgyu yin pa'i phyir ro zhes gsungs so/ /yang de nyid las ji ltar bsgom pa ni 'dir mi brjod de gzhung mangs pa'i 'jigs pa dang / bla ma dam pas nyams su myong ba'i man ngag la brten par rigs kyi/bsgom pa'i man ngag ni yi ger gnas pas shes par dka' ba'i phyir dang / zhib tu ni zhi gnas dang lhag mthong bstan pa las bshad pa'i phyir ro zhes gsungs so/ /de lta bu'i rnal 'byor pas zhi gnas grub par gyur nas/ sngar bshad pa'i mngon par shes pa lnga po dag 'grub par 'gyur ba la the tshom med do zhes bla ma gsung ngo / /gzhan yang mngon par shes pa bskyed pa'i thabs su gyur ba 'phags pa spyan ras gzigs kyis zhus pa'i chos bdun pa'i mdo las 'byung ba'i bslab pa'i gzhi de dag kyang nyams su blang bar bya ba dang /mdo de nyid kyang dus dus su kha ton du gdon par yang bya'o/ /'phags pa thogs med kyis kyang byang chub sems dpa' mngon par shes pa myur du thob par 'dod pas nyin lan gsum mtshan lan gsum du phyag 'tshal ba dang /mchod pa dang sdig pa bshags pa dang / rjes su yi rang ba dang / bskul ba dang / gsol ba gdab pa dang / yongs su bsngo ba la brtson par bya'o zhes gsungs so/ /gzhan yang 'dod pa chung ba dang chog shes pa dang / gso sla ba dang rab tu dben pa la sogs pa zhi gnas kyi tshogs thams cad dang ldan pa'o//de lta bu'i rnal 'byor pa zhi gnas la legs par gnas pa ni 'dod pa chung zhing chog shes par 'gyur te/ 'phags pa shes rab kyi pha rol tu phyin pa stong phrag brgya ba las/ dge slong bsam gtan la sems cung zhig blan pa rnams ni gos kyi 'du shes chung ba yin/zas kyi 'du shes chung ba dang / pags pa'i mdog snum pa yin zhes gsungs te/ de lta bu'i byang chub sems dpa'i rnal 'byor pa de ni 'jig rten pa'i nor la zhen pa spangs nas 'phags pa'i nor bdun la 'bad par byed do//de rjes su dran pa drug yid la byed do/ /drug las kyang re zhig sangs rgyas dang chos dang dge 'dun rjes su dran par byed do / /dbang po rnon po dang / dbang po rtul po'i dbye bas so/ /dbang po rnon pos rjes su dran par bya ba ni 'phags pa shes rab kyi pha rol tu phyin pa'i mdo dang /'phags pa sangs rgyas rjes su dran pa'i mdo dang / 'phags pa nam mkha' mdzod kyi mdo dang / 'phags pa blo gros mi zad pa'i mdo la sogs par blta bar bya'o/ /de la dbang po rtul pos rjes su dran par bya ba ni 'phags pa dad pa'i stobs bskyed pa'i mdo dang /'phags pa sangs rgyas bgro ba dang / chos bgro ba dang / dge 'dun bgro ba'i mdo dang / 'phags pa sangs rgyas rjes su dran pa'i mdo de nyid dang / sangs rgyas rjes su dran pa'i mdo chung ba dang / theg pa chen po'i mdo sde gzhan du yang blta bar bya'o//gzhan yang mdo'i dgongs pa 'chad pa yin pas/ bslab pa kun las btus pa'i dkon mchog gsum rjes su dran pa'i skabs su yang blta bar bya'o/ /de lta bu'i rnal 'byor pa de la lhag mthong yang skye par 'gyur te 'di'i don 'og nas 'chad par 'gyur ro//de bas zhi gnas dang lhag mthong la rnal 'byor du byed pa ni lam la gnas pa zhes bya ba yin pas/ dran pa nye bar gzhag pa bzhi dang / yang dag par spong ba bzhi dang / rdzu 'phrul gyi rkang ba bzhi dang / dbang po dang / stobs dang / byang chub kyi yan lag dang /'phags pa'i lam yan lag brgyad pa rnams la rim gyis gnas par 'gyur ro/ /lhag pa'i sems kyi bslab pa bstan zin to/ / da ni thabs dang shes rab zung du 'brel par shes pa'i shes rab kyis bsod nams kyi tshogs dang ye shes kyi tshogs gnyis zung du 'brel bar rdzogs par bya'o snyam du bsams nas/shes rab pha rol phyin sbyor dang / /bral bas sgrib pa zad mi 'gyur/ /zhes pa la sogs pa smras te/ zhi gnas kyis ni las dang nyon mongs pa dang / rnam par smin pa dang / chos kyi sgrib pa la sogs pa spong par mi nus te/lhag mthong gis de dag spangs nas zad par 'gyur bas lhag mthong brten par bya'o zhes bya ba ni tshig gi lhag ma'o/ /da ni thabs dang shes rab rgyas par bshad par bya ste/ gang phyir bcings pa zhes gsungs pas zhes pa ni 'phags pa ga ya mgo'i ri'i mdo dang / 'phags pa dri ma med par grags pa'i mdo las thabs dang bral ba'i shes rab ni 'ching ba'o/ /shes rab dang bral ba'i thabs kyang 'ching ba'o zhes gsungs so/ / de bas gnyis ka spang mi bya/ /zhes pa ni/ dpal ye shes grags pa'i zhal nas 'di skad du/ shes rab kyi pha rol tu phyin pa'i ngo bo nyid dang /sbyin pa la sogs pa'i thabs la rab tu 'jug go/ /de yang 'phags pa ga ya mgo'i ri las gnyis po 'di dag ni byang chub sems dpa'i lam mdor bsdus pa ste/ 'di lta ste/ thabs dang shes rab po zhes gsungs pa ste/thabs ni sbyin pa la sogs pa'i pha rol tu phyin pa dang / tshad med pa dang / bsdu ba'i dngos po dang de la sogs pa'i dbye bas phye ba ste/ de nyid kyang 'phags pa blo gros mi zad pa dang / dkon mchog sprin la sogs pa'i mdo las gsungs pa'o/ /shes rab ni thabs de phyin ci ma log par yongs su gcod pa'i rgyu'o//des kyang thabs yang dag par brtags nas/ phyin ci ma log pas/ bdag dang gzhan gyi don ji lta ba bzhin du nyams su len pas sngags kyis zin pa'i dug dang 'dra bas kun nas nyon mongs par mi 'gyur ro/ /de yang mdo sde de nyid las thabs ni bsdu ba shes pa'o//shes rab ni yongs su gcod pa shes pa'o zhes gsungs pa dang / 'phags pa dad pa'i stobs bskyed pa'i mdo las kyang / thabs la mkhas pa gang zhe na/ gang chos thams cad kyi bsdu ba shes pa'o/ /shes rab gang zhe na/ gang chos thams cad dbyer med par shes pa la mkhas pa'o zhes gsungs pa yin no//'di dag ni sa la gnas pas kyang brten par bya ba yin pas/ shes par bya ba tsam 'ba' zhig ni ma yin no/ /gang gi phyir sa bcu la sogs pa'i mdo las/ pha rol tu phyin pa lhag ma rnams la yang mi spyod pa ma yin no zhes gsungs pas/byang chub sems dpa' sa bcu thams cad du yang pha rol tu phyin pa thams cad la kun du spyad par bya'o zhes gsungs so/ /de yang shes rab kyi pha rol tu phyin pa la gcig tu dga' ba'i byang chub sems dpa'i dbang du byas nas/ 'phags pa yongs su rgyas pa'i mdo chos thams cad bsdus pa las/ byams pa gang yang byang chub sems dpa' rnams kyi byang chub kyi phyir pha rol tu phyin pa drug yang dag par gzung bar bya ba de la/ skyes bu blun po rnams 'di ltar byang chub sems dpa' shes rab kyi pha rol tu phyin pa 'ba' zhig la bslab par bya ste/pha rol tu phyin pa lhag ma rnams kyis ci zhig dgos zhes zer zhing / des pha rol tu phyin pa lhag ma gzhan smod par sems par 'gyur ro zhes bya ba rgya cher gsungs pa dang / 'phags pa rnam par snang mdzad mngon par byang chub pa las kyang thams cad mkhyen pa'i ye shes 'di ni snying rje chen po'i rtsa ba can/byang chub kyi sems kyi rgyu can/ thabs kyi mthar phyin pa'o zhes gsungs pa yin no/ /de bas na gnyis ka yang dus thams cad du brten par bya'o/ /de ltar na bcom ldan 'das mi gnas pa'i mya ngan las 'das pa grub pa yin no//de yang sbyin pa la sogs pa'i thabs kyis ni gzugs kyi sku dang / zhing dang / 'khor la sogs pa'i longs spyod chen po'i 'bras bu phun sum tshogs pa yongs su 'dzin par mdzad pas/ bcom ldan 'das mya ngan las 'das pa la gnas par mi mdzad do//shes rab kyi pha rol tu phyin pa ni phyin ci log spangs pas 'khor bar gnas par mi mdzad do/ /'khor ba ni phyin ci log gi bdag nyid yin pa'i phyir ro/ /gang yang chos kyi rnam grangs gzings lta bur shes pas chos rnams kyang spang bar bya bas na/ chos ma yin pa lta ci smos zhes gsungs pa ni/de la phyin ci log tu mngon par zhen pa spang bar bya'o zhes gsungs kyi/ dgos pa'i don rdzogs pa'i don du yang gnas par mi bya'o zhes gsungs pa ni ma yin no/ /de yang chos yongs su gzung bar bya ste/ log pa ni gzung bar mi bya'o zhes bya ba'i don to//de bas na/ dus kun du ni thabs dang ni/ /shes rab pha rol bdag can ni/ /brten bya gang phyir de las ni/ /mi gnas mya ngan 'das par 'gyur/ /zhes khungs dang bcas par gsungs so/ /bla ma'i zhal nas kyang de lta bas na dus thams cad du thabs dang shes rab gnyis ka dang ldan par bya zhing /bsod nams dang ye shes kyi tshogs zung du 'brel par bsag par bya'o zhes gsungs so/ /de ltar thabs dang shes rab gnyis zung du 'brel ba 'jug pa de gnyis ka dang ldan par bya'o zhes bya ba de bstan nas/ da ni thabs zhes bya ba dang shes rab ces bya ba de gnyis nyid ji lta bu yin pa bshad pa'i phyir/shes rab gang dang thabs gang zhes/ /the tshom dag ni spang ba'i phyir/ /thabs de dang ni shes rab kyi/ /yang dag dbye ba gsal bar bya/ /zhes bya ba de smras te/ the tshom dag ni spang ba'i phyir//zhes pa ni sngon gyi slob dpon chen po dag 'di gnyis la tha dad par gsungs so/ /de bas na thabs dang shes rab kyi dbye ba 'di lta bu yin te/ gzhung kha cig las/ thabs ni byang chub sems dpa' yid / /'gro la snying rje chen po ste/ /de yang dmigs pa'i dbye ba yis//rnam pa gsum du 'gyur ba yin/ /zhes bya ba 'byung ba dang / yang gzhan dag ni kun rdzob kyi rnam pa'i byang chub kyi sems de ni thabs yin zhes 'byung ngo / /bla ma dpal byang chub bzang po'i zhal nas 'di skad du/ shes rab pha rol phyin spangs pa'i/ /sbyin pa'i pha rol phyin la sogs//dge ba'i tshogs rnams thams cad dag /rgyal ba rnams kyis thabs su bshad/ /ces gsungs pa de bdag gi rtsa bar bkod pa yin no/ /sbyin pa'i pha rol phyin la sogs/ /zhes bya ba ni/ 'dir sbyin pa ni rnam pa gsum ste/ sbyin bdag dang / rdzas dang / zhing gi dbye bas so/ /sbyin bdag ni rnyed pa dang bkur sti'am/ grags pa dang snyan pa'i phyir ram/ gzhan gyis bskul ba'i phyir ram/ snying rje'i phyir ram sri zhu'i phyir la sogs pa'o/ /rdzas ni 'di ltar chos dang zang zing dang mi 'jigs pa dang / byams pa la sogs pa'o//zhing ni 'di ltar dkon mchog gsum dang bla ma'i gnas dang / 'gro ba lnga'i sems can thams cad do/ /de yang rdo rje gdan bzhi pa'i rgyud las/ dmangs rigs stong phrag drug cu ni/ /bram ze gtsang ma gcig la sbyar/ /zhes bya ba la sogs pa rgyas par gsungs pa dang / yang mdo las/ dge bsnyen ston pa gzhan la mi brten pa/ /zhes bya ba la sogs pa rgyas par gsungs pa dang / chos bshad pa brgya pa las kyang rgyas par gsungs so/ /gzhan yang bcom ldan 'das kyis 'jig rten gsum las rnam par rgyal ba zhes bya ba rnal 'byor gyi rgyud las/ 'di skad du/ dbang bskur pa'i sbyin pa dang / chos kyi sbyin pa dang / nor gyi sbyin pa dang / zas kyi sbyin pa dang / mi 'jigs pa'i sbyin pa dang / byams pa'i sbyin pa'o/ /de dag slob ma dang mi snang ba'i sems dang / dge sbyong dang bram ze dang phongs pa dang dud 'gro dang gyod krin can dang / 'gro ba mtha' dag go rims bzhin no/ /sogs zhes bya ba ni pha rol tu phyin pa gzhan yang bshad pa yin te/ tshul khrims ni 'di ltar sems dang po bskyed pa'i byang chub sems dpa' dang / spyod pa la zhugs pa dang / phyir mi ldog pa dang / mi skye ba'i chos la bzod pa thob pa dang /skye ba gcig gis thogs pa dang / srid pa tha ma'i byang chub sems dpa'i tshul khrims dag go/ /pha rol tu phyin pa gzhan ni mdo las 'byung ba bzhin/ dge ba'i chos rnams thams cad dag /ces pa ni 'og nas 'chad par 'gyur ro/ /gzhan yang 'di dag gi don rgyas pa ni mdo sde dang gzhan yang mdo sde'i don gsal bar byed pa mdo kun las btus pa dang /byang chub sems dpa'i sa dang / spyod 'jug dang / bslab pa kun las btus pa dang / slob dpon dpa' bo'i pha rol tu phyin pa'i gtam dag tu blta bar bya'o/ /thabs goms dbang gis zhes pa'i sh+lo ka ni dkyus ji lta ba bzhin no //shes rab gang yin zhe na/ 'di ltar lhan cig skyes pa'am/ thos pa las byung ba'am/ bsams pa las byung ba'am/ bsgoms pa las byung ba'am/ yang gzhung dag las/ gang zhig spros pa thams cad kyi/ / gnas dang tshig tu ma gyur pa/ /'jug de thugs kyi rdo rje yis/ /shes rab ces ni bya bar bsgrags/ /zhes gsungs te de nyid do/ /de bzhin du rtsa ba las kyang / phung po khams dang skye mched rnams/ /skye ba med par rtogs gyur pa'i/ /rang bzhin stong pa nyid shes pa/ / shes rab ces ni yongs su bshad/ /ces smras te/ phung po dang khams dang skye mched du phyi nang gi chos thams cad 'dus pa yin te/ bcom ldan 'das kyi zhal nas/ bram ze thams cad thams cad ces bya ba ni phung po dang khams dang skye mched rnams so zhes gsungs so/ / skye ba med pa ni 'og nas 'chad par 'gyur ro/ /bshad ces pa ni sangs rgyas dang bla mas gsungs zhes pa'o/ /'dir smras pa/ pha rol phyin dang bsdu ba'i dngos po dang / /tshad med bzhi dang yan lag bdun pa dang / /chos spyod bcu dang dge ba'i las rnams gzhan//'phags pa'i nor bdun rjes dran drug la sogs/ /maN+Dal tsha tsha skor ba la sogs pa/ /thabs yin longs spyod rdzogs dang sprul pa'i sku/ /shes rab pha rol phyin pa gcig pu nyid/ /shes rab yin te chos kyi sku yi rgyu/ /smras pa rigs kyi bu de lta bu'i shes rab ces bya ba de tshul ji lta ba zhig gis mngon sum du byed par 'gyur zhe na/smras pa gtan tshigs chen po bzhis shes par 'gyur ro/ /bzhi gang zhe na/ mu bzhi skye ba 'gog pa'i gtan tshigs dang / rdo rje gzegs ma'i gtan tshigs dang / gcig dang du ma bral ba'i gtan tshigs dang /rten cing 'brel bar 'byung ba'i gtan tshigs so/ /de dag kyang gang yin zhe na/ yod pa skye ba rigs min te/ /zhes pa la sogs pa sh+lo ka bzhis bstan to/ /de la yod pa skye ba rigs min te/ /med pa nam mkha'i me tog bzhin/ /nyes pa gnyis kar thal 'gyur phyir/gnyis ka dag kyang 'byung ba min/ /zhes pas mu bzhi skye ba 'gog pa'i gtan tshigs bstan te/ 'di na chos gang dag yod pa dag ni skye bar mi 'gyur te/ skyes zin pa'i phyir ro/ /med pa'i chos kyang skye bar mi 'gyur te/ de dag rang nyid kyis ma grub cing skye ba'i rgyu med pa'i phyir ro//gnyis ka zhes pa'i phung po gsum pa ni 'ga' yang 'di na med do/ /'di'i don slob dpon zhi ba'i lhas kyang gsungs te/ 'di skad du/ dngos po yod par gyur ba la/ /rgyu rnams kyis ni ci zhig bya/ /'on te de ni med na yang / /rgyu rnams kyis ni ci zhig dgos/bye ba brgya phrag rgyu yis kyang / /dngos po med las bsgyur du med/ /gnas skabs de dngos ji lta bu/ /dngos las gzhan pa'ang gang zhig yin/ /med pa'i tshe na dngos med na/ /nam zhig dngos po 'byung bar 'gyur/ /dngos po skye ba med pa yis/ /dngos po med ni bral mi 'gyur//dngos po med dang ma bral na/ /dngos po yod pa'i skabs mi 'byung / /rang bzhin gnyis su thal 'gyur phyir/ /dngos po dngos med yod mi 'gyur/ /de bzhin chad pa yod min zhing / /rtag par yang ni mi dmigs so/ /de bas skye bo 'di dag ni/ /skye ba med cing 'gag pa med//ces rgyas par gsungs so/ /dngos po rang las mi skye zhing / /gzhan dang gnyis ka las kyang min/ /rgyu med las min de yi phyir/ /ngo bo nyid kyis rang bzhin med/ /ces bya ba 'dis ni rdo rje gzegs ma bstan te/ 'di ltar bdag dang / phyag dang / dbang phyug dang / skyes bu dang / las dang / rang bzhin dang / yon tan dang / tshangs pa dang / khyab 'jug dang / lha chen po la sogs pa phyi dang nang gi byed pa'i skyes bu dang / gzhan yang rang gi sde pa dag kyang rgyu drug dang / rkyen bzhis dngos po skye bar khas len pa de dag ni log par rtogs pa yin te/de dag dgag pa'i phyir 'phags pa klu sgrub kyi zhal nas/ bdag las ma yin gzhan las min/ /gnyis las ma yin rgyu med min/ /dngos po gang dag gang na yang / /skye ba nam yang yod ma yin/ /zhes dbu ma'i rtsa ba shes rab las gsungs so//don 'di rgyas par de nyid dang de'i 'grel pa chen po drug dang / TI ka chen po gnyis dang / dbu ma rnam par 'thag pa dang / tshig don gsal ba dang / rtog ge 'bar ba dang / dbu ma la 'jug pa dag tu blta bar bya'o/ /yang na chos rnams thams cad dag /gcig dang du mas rnam dpyad na/ /ngo bo nyid kyis mi dmigs pas/ /rang bzhin med pa nyid du nges/ /zhes bya ba 'dis ni gcig dang du ma dang bral ba'i gtan tshigs bstan te/ yang na zhes bya ba 'di'i don ni bstan pa'o/ /gcig dang du mas rnam dpyad na/ /zhes pa'i don ni slob dpon zhi ba 'tshos bshad de/bdag dang gzhan smras dngos 'di dag /yang dag don du rang bzhin med/ /gcig dang du mar bral ba'i phyir/ /rang bzhin med de gzugs brnyan bzhin/ /zhes gsungs pa dang / slob dpon dpal sbas kyis kyang / phyi dang nang na gnas 'di kun//yang dag don du rang bzhin med/ /gcig pa nyid dang du ma dang / /bral pa'i phyir na gzugs brnyan bzhin/ /zhes gsungs so/ /de dag gi don rgyas par gzhung de dag nyid du blta bar bya'o/ /stong nyid bdun cu'i rigs pa dang /dbu ma rtsa ba la sogs las kyang / dngos po rnams kyi rang bzhin ni/ /stong pa nyid du grub bshad pa/ /zhes bya ba 'dis ni rten cing 'brel bar 'byung ba'i gtan tshigs bstan te/ 'di'i don yang gzhung de dag nyid du blta bar bya'o/ /grub bshad pa ni sngon gyi slob dpon chen po rnams kyis dngos po thams cad skye ba med par bsgrubs pa bstan/de lta bu'i gtan tshigs chen po bzhis dngos po ma lus pa skye ba med pa/ rab tu mi gnas pa/ rang bzhin gyis mya ngan las 'das pa/ gdod nas rnam par dag pa/ rtsa ba med pa/ gzhi med pa/ chos gang yang grub pa med par sngon gyi mkhas pa chen po dag gis legs par bsgrubs zin to// // 'dzam bu'i gling na mkhas pa dag ni 'di skad du/ 'phags pa thogs med kyis bstan pa'i rnam grangs bshad pa/ des shes rab kyi pha rol tu phyin pa'i don rnam par rig pa tsam du gsungs shing /da ltar bla ma su war+N+Na dwI pa dang / bla ma shAn ti pa yang de ltar dgongs so/ /slob dpon klu sgrub kyis ni bstan pa'i snying po bshad de/ des shes rab kyi pha rol tu phyin pa'i don yod pa dang med pa las 'das pa'i dbu ma chen po'i don thugs su chud cing /mkhas pa gzhan gyi rgyud la yang de ltar gsungs so/ /de ltar bla ma byang chub bzang po dang / rje btsun ku su lu pa yang de ltar dgongs so/ /'phags pa klu sgrub zhal gyi bdud rtsi des/ /Ar+ya de ba zla grags b+ha bya dang / /zhi ba'i lha dang byang chub bzang po'i bar//tshim par gyur ba bdag la'ang cung zhig 'thor/ /de ltar gtan tshigs chen po bzhi dag gis/ /chos rnams thams cad skye med bsgrub byas te/ /sngon gyi slob dpon rnams kyi rjes 'brangs nas/ /dbu ma chen po'i grub mthar gnas par bya/ yang na 'di lta bu yin te/ deng sang sems can dus dang nyon mongs dang / /lta ba tshe yi snyigs mar gyur pa ste/ /gzhung rnams mnyan par dgos pa med pas na/ /snying po don gyi rnal 'byor bsgom par bya/ /ding sang dus su gzings dang 'dra ba yi/ /gzhung rnams rgya chen mnyan pa'i dus med pas/ /yid 'khrugs byed pa thams cad spangs byas la//dam pa'i nyer bstan 'ba' zhig bsgom par bya/ /tshe ni yun thung shes bya'i rnam pa mang / /tshe yi tshad kyang 'di tsam mi shes pas/ /ngang pas chu las 'o ma len pa ltar/ /'dod pa'i dngos po dang las blang bar bya/ /rtsa ba nyid bshad par bya ste/dbu ma'i rtsa ba zhes bya ba ni dbu ma'i rtsa ba shes rab bo/ /sogs zhes pas ni ga las 'jigs med dang / rigs pa drug cu pa dang / rtsod pa bzlog pa dang / stong pa nyid bdun cu pa dang / rin po che'i phreng ba dang / theg pa chen po nyi shu pa dang / tshig brgya pa dang /sA lu ljang pa'i 'grel pa la sogs pa'o/ /yang na sogs zhes pa ni slob dpon 'phags pa'i dngos kyi slob ma rje btsun Ar+ya de ba dang / slob dpon zla grags dang / slob dpon b+ha bya snang bral dang / slob dpon zhi ba'i lha la sogs pas mdzad pa'i bstan bcos te/de yang rje btsun Ar+ya de bas ni dbu ma rnam par 'thag pa chen po dang / lag pa'i tshad dang / sor mo lta bu'i bshad pa dang / ye shes snying po kun las btus pa la sogs pa mdzad do/ /slob dpon zla grags kyis/ dbu ma la 'jug pa dang / rigs pa drug cu pa'i 'grel pa dang /dbu ma phung po lnga pa dang / tshig don gsal ba la sogs pa mdzad do/ /slob dpon b+ha bya snang bral gyis dbu ma rtog ge 'bar ba dang / shes rab sgron ma la sogs pa mdzad do/ /de la dbu ma'i rtsa ba shes rab la 'grel pa brgyad yod de/ slob dpon nyid kyis mdzad pa'i ga las 'jigs med dang /slob dpon zla grags kyis mdzad pa'i tshig don gsal ba dang / slob dpon b+ha bya snang bral gyis mdzad pa'i shes rab sgron ma dang / gnas brtan bud+d+ha pA li tas mdzad pa'i bud+d+ha pA li ta dang / slob dpon blo brtan gyis mdzad pa dang /slob dpon gu Na ma ti dang / slob dpon gu Na shrI dang / A tsAr+ya gu Na da tas mdzad pa rnams so/ /de la shes rab sgron ma la TI ka chen po gnyis yod de/ A tsAr+ya spyan ras gzigs brtul zhugs kyis mdzad pa dang / A tsAr+ya de ba sharmas mdzad pa'i dbu ma dkar po 'char ba'o//gzhan yang 'dzam bu'i gling na slob dpon 'phags pa klu sgrub kyi dgongs pa 'chad pa mkhas pa chen po bdag dang gzhan gyi grub pa'i mtha' rgya mtsho lta bu thugs su chud pa rnams kyis mdzad pa'i gzhung gi gtan tshigs dag gis/dngos po rnams kyi rang bzhin gyi/ /stong pa nyid ni grub bshad pa/ /zhes te de dang der chos thams cad stong pa nyid du rgyas par bsgrubs zin la/ gal te bdag gis gtan tshigs chen po bzhis gzhan dag gi log par rtogs pa bsal bar gyur na ni gzhung shin tu mangs par 'gyur bas na/de phyir bdag gis 'dir nyung ngun du byas shing ma spros pa yin no/ /'dir bdag cag dbu ma chen po'i grub pa'i mtha' ni 'di ltar yin no zhes smos pa tsam du zad kyi/ grub pa'i mtha' rgyas bar ni ma bris te/ rnal 'byor pa nyams su len 'dod pa dag la nyung ngun du bsdus nas bstan pa yin pas/bsgom pa'i don du rab tu bshad/ /ces bya ba de yin no/ /'dir don dam pa'i byang chub kyi sems bsgom pas/ nyams su blang ba'i thabs ni bdag gis ma bris/ bla ma yongs su mnyes par byas nas bla ma la zhu bar bya'o//de bas chos rnams ma lus pa/ /zhes bya ba la sogs pa la/ de dag ni dkyus ji lta ba bzhin no/ /gang gi rang bzhin ma mthong zhes pa ni chos gang yang mthong ba med pa nyid de kho na nyid mchog mthong ba'o zhes mdo sde du mar gsungs pa yin no/ /'di'i don la slob dpon Ar+ya de bas mdzad pa'i dbu ma 'khrul pa 'joms par blta bar bya'o//rtog ge 'bar ba dang / dbu ma la 'jug pa dang / spyan ras gzigs brtul zhugs dag tu yang blta bar bya'o/ /chos gzhan thams cad lta yongs su grub pa med na rang gi sems 'di yod dam zhe na/shes rab de nyid rigs bshad pa/ /zhes smras te/ so sor rtog pa'i shes rab de nyid ga la yod de med do/ /ji ltar med pa yin zhe na/ rigs bshad pa zhes te/ de nyid kyang gtan tshigs chen po bzhis bshad cing gzhigs na grub par mi 'gyur te/don 'di ni bcom ldan 'das kyis 'phags pa bden pa gnyis bstan pa'i mdo las gsal bar gsungs te/ ji skad du don dam par ni chos thams cad kyi shes rab rnam par dpyad nas btsal yang shin tu med cing mi dmigs pa'o/ /shes rab de yang don dam par ni shin tu med cing mi dmigs pas na kun rdzob tu shes rab can zhes bya ba ste/shes rab de yang don dam par na shin tu ma skyes shing med pa yin no/ /'phags pa klu sgrub kyi zhal nas kyang don 'di la dgongs nas/ sems ni sangs rgyas thams cad kyis/ / ma gzigs gzigs pa ma yin te/ /rang bzhin med pa'i ngo bo la/ /ji lta bu zhig gzigs par 'gyur/ /zhes gsungs so/ /slob dpon 'phags pa lha'i zhal nas kyang / rnam shes de yang don dam par/ /de ni mkhas rnams mi bzhed de/ /gcig dang du ma bral ba'i phyir//nam mkha'i pad+ma nyid dang mtshungs/ /zhes ye shes snying po kun las btus pa las gsungs so/ /'phags pa klu sgrub kyi zhal nas/ bdag tu 'dzin pa bzlog don du/ /phung po khams la sogs pa bstan/ /sems tsam nyid du rnam gnas nas/ /skal chen rnams kyis de dag gzhom//'di dag thams cad sems tsam zhes/ /thub pa yis ni gang gsungs pa/ /byis rnams skrag pa spang phyir te/ /yang dag tu ni de nyid min/ /zhes pa dang / yang de nyid las chos bdag med pa 'di lta bu/ /theg chen dag la dga' rnams kyi/ /rang sems gdod nas ma skyes pa//mdor bsdus nas ni de yin no/ /zhes gsungs so/ /de bas na phyi rol pas brtags pa'i bdag la sogs pa dang / rang gi sde pas brtags pa'i phung po la sogs pa dang / sems dang sgyu ma la sogs pa'i rtog pa bsal bar byas nas de lta bu'i don la dus rtag tu gnas nas rnam par rtog pa spang bar bya'o//de bas na 'phags pa klu sgrub kyi zhal nas/ bdag dang phung po la sogs dang / /rnam shes rtog pas ma bsgribs pa/ /sangs rgyas rnams kyi byang chub sems/ /stong pa'i mtshan nyid dag tu bzhed/ /ces gsungs pa yin no//de lta bu'i rnam par rtog pa spangs pa ni mya ngan las 'das pa'i mchog yin no zhes smras so/ /'phags pa klu sgrub kyi man ngag gis dngos grub brnyes nas 'phags pa 'jam pa'i dbyangs kyi gnang ba thob pa/ mngon par shes pa brnyes pa/ rgyud thams cad dang /mdo sde thams cad dang / 'dul ba'i lung ma lus pa'i dgongs pa dus gcig tu thugs la gsal ba bden pa gzigs pa des na gcig nas gcig tu brgyud pa'i bla ma ni dpal byang chub bzang po 'di yin pas 'da'i rjes su 'brang par bya'o/ /sngar bkod pa'i gzhung de dag gi don ni 'di yin te/yang dag nyid du rnam dpyad na/ /snang ba'i chos can thams cad dang / /grub mtha' sogs kyis brtags pa kun/ /'khrul te brdzun pa yin par 'dod/ /dper na mig nad nad skyon gyis/ /khab 'dzag pa dang skra shad dang / /zla gnyis sbrang ma'i phung po mthong //der 'dzin pa yi shes pa'ang yod/ /dper na gnyid log gnyid dbang gis/ /bag chags kyis ni bde sdug dang / /gzugs la sogs pa nyams su myong / /der 'dzin pa yi shes pa'ang yod/ /de bzhin thog ma med pa nas/ /ma rig mig nad nad skyon gyis//phyi dang nang gi dngos po myong / /der 'dzin pa yi shes pa'ang yod/ /yang na thog ma med pa nas/ /ma rig gnyid mthug chen po log /bag chags bzhi yi rmi lam de/ /der 'dzin nyams su myong pa yod/ /don dam nyid la rnam dpyad na/ /chos rnams kyi ni chos nyid pas//log par rtog pa de dag gis/ /yod dang med par sgrub mi nus/ /dper na mig nad ma rung bar / /skra shad med par bya mi nus/ /gang tshe mig nad rung ba na/ /skra shad yod par bya mi nus/ /dper na ma rig gnyid sangs na/ /rmi lam mthong bar bya mi nus/ / ji srid gnyid ni ma sangs par/ /rmi lam med par bya mi nus/ /gang tshe rab rib nad sangs dang / /gnyid log pa las sad tsa na/ /skra shad sogs dang rmi lam dang / /der 'dzin pa yi shes pa'ang med/ /de bzhin ma rig mig nad dang / /ma rig gnyid mthug sad pa na/ /snang dang brtags pa'i thams cad dang //nyams su myong ba'i shes pa'ang med/ /rgyun chad ma chad ces brjod pa/ /gang zhig yod pa de rgyun chad/ /chos nyid la ni de med de/ /glo bur byis pas brtags par zad/ /de bas slob dpon zhi ba'i lha/ /rgyun chad par ni 'dir mi bzhed/ / de yi gdams ngag med pa dang / /rgyun chad pa yi gzhung yin zer/ /'di la bsal bya ci yang med/ /gzhag par bya ba cung zad med/ /yang dag nyid la yang dag blta/ /yang dag mthong bas rnam grol 'gyur/ /bdag dang gzhan gyi grub pa'i mtha'/ /kha cig chos rnams yod par bsgrub//gzhan dag chos rnams med ces zer/ /yang dag nyid la rnam dpyad na/ /yod ces pa dang med ces pa/ /yang dag mtha' la de dag med/ /de bas gar yang bsgrub mi nus/ /bla ma'i brgyud pa bral ba dag /rjes su dpag pa'i shes rab kyis/ / yod med rtag chad sogs bsgrubs kyang / /ngal 'gyur don la reg mi 'gyur/ /chos grags chos mchog la sogs pas/ /gzhung mang byas pa ji lta bu/ /mu stegs rgol ba bzlog pa'i phyir/ /mkhas pa rnams kyis byas pa yin/ /de bas don dam bsgom pa la/ / tshad mas dgos pa med do zhes/ /bdag gis gzhan du bkod pas na/ /re zhig 'dir ni brjod mi dgos/ /de bas rjes dpag gtsor byed pa'i/ /rtog ge'i gzhung rnams dor byas la/ /'phags pa klu sgrub gzhung lugs kyi / /brgyud pa'i man ngag bsgom par bya/ /yod min med min yod med min//gnyi ga min pa'ang ma yin pa'i/ /mtha' bzhi las ni rnam grol ba'i/ /de nyid dbu ma pa yis rig /rtag min chad min rtag chad min/ /gnyi ga min pa'ang ma yin pa'i/ /mu bzhi las ni rnam grol ba'i/ /de nyid dbu ma pa yis rtogs/ / yod med lta bu las 'das shing / /rtag dang chad pa rnam par spangs/ /shes dang shes bya las rab grol/ /'di ni dbu ma chen po'i gzhung / /rjes su dpag pa gtsor byas nas/ /yod med rtag chad sogs smras kyang / /chos nyid de yi rjes mi 'brang //sgro 'dogs pa dang skur bar zad/ /dper na gser dang nam mkha' dang / /chu sogs rang bzhin dag mod kyi/ /skyon dang 'grogs pa ltar snang yang / /de dag skyon gyi rjes mi 'brang / /sgro 'dogs skur 'debs rnam spangs shing / /sgro btags kun las nges grol ba'i//de nyid kho na bsgom byas la/ /grub pa'i mtha' la gnas mi bya/ /'phags pa klu sgrub 'phags pa'i lha/ /zla grags b+ha bya zhi ba'i lha/ /brgyud pa'i man ngag 'ba' zhig bsgom/ /gal te brgyud pa med gyur na/ /de dag rnams kyis bkod pa yi/ / gzhung rnams yang dang yang du blta/ /chos kun a yi sgo can te/ /gdod nas skye med 'gag pa'ang med/ /ngo bo nyid kyis mya ngan 'das/ /rang bzhin gyis ni rnam par dag /mthong na'ang mthong ba ma yin te/ /mthong bar bya dang mthong byed dang / /mthong ba shes bya gang yang med//thub pa rtag tu mnyam par gzhag /rnam par rtog pa kun spangs shing / /chos kyi dbyings la gnas pa na/ /rnal 'byor chen po'i ye shes la/ /'byung dang 'jug pa de mi 'dod/ /de bas mnyam gzhag rjes thob dag /sangs rgyas pa la nged mi 'dod/ /sa la gnas pa yin par ni//rnam par mi rtog gzungs las bshad/ /'di don 'dir ni rgyas ma byas/ /bdag gi gzhung 'dzin bla ma la/ /bsnyen bkur sogs kyis mchod byas te/ /yang dang yang du zhu bar bya/ /thams cad mkhyen pas lung bstan pa'i/ /'phags pa klu sgrub nas brgyud pa'i//byang chub bzang po'i rjes 'brangs nas/ /grub mtha' gang yang gzung mi bya/ /de ltar rigs pa'i sgo nas chos thams cad skye ba med par bsgrubs nas/ da ni lung gi sgo nas chos thams cad skye ba med par bstan pa ni/ de ltar yang bcom ldan 'das kyis shes pa la sogs pa ste/rtsa ba nyid du brtag par bya'o/ /der ma zad kyi don 'di ni bcom ldan 'das kyis mdo sde gzhan du yang gsungs te/ ji skad du 'phags pa chos thams cad kyi rang bzhin dbyer med par bstan pa'i mdo las/ de la chos kyi dbyings tshad mar byas na don dam pa yang med kun rdzob kyang med do zhes bya ba la sogs pa gsal por gsungs pa dang /'phags pa byang chub sems dpa'i sde snod las kyang bden pa ni gcig ste/ 'di ltar 'gog pa'o zhes bya ba la sogs pas don 'di rgyas par gsungs so/ /'phags pa sangs rgyas kyi yul la 'jug pa ye shes snang ba'i rgyan gyi mdo las kyang ji skad du/de bzhin gshegs pa rtag tu skye med chos/ /chos rnams thams cad de bzhin gshegs dang 'dra/ /byis pa'i blo can log par 'khrul pa rnams/ /'jig rten dag na med pa'i chos la spyod/ / ces gsungs pa dang / 'phags pa zla ba sgron ma las kyang / thams cad stong pa'i rang bzhin don dam ni/ /chos can mi dmigs chos nyid yod pa min/ /zhen pa bzlog phyir rkyen bshad ma rtogs pa/ /chos kyi ngang la tshig med brjod du med/ /ces gsungs so/ / 'phags pa 'dul ba rgya mtsho las kyang / sngon gyi mtha' stong phyi ma'i mtha' yang stong / /srid pa thams cad yong ye stong pa ste/ /phyogs gcig stong pa mu stegs can rnams kyi/ /zhes gsungs so/ /'phags pa lang kar gshegs pa las kyang / kun rdzob tu ni thams cad yod//dam pa'i don du rang bzhin med/ /rang bzhin med la 'khrul pa gang / /de ni yang dag kun rdzob bshad/ /ces gsungs so/ /'phags pa shes rab kyi pha rol tu phyin pa rab kyi rtsal gyis rnam par gnon pa las kyang / de bzhin gshegs pa'i ye shes kyis ni ci yang mi gzigs te/de ci'i phyir zhe na/ 'di ltar ye shes la yul mi mnga' ba'i phyir ro zhes gsungs pa dang / 'phags pa rgyal ba skyed mar mdzad pa chen po las kyang / de bzhin gshegs pa mi 'khrugs pa'i zhing gi khyad par brjod par mdzad pas 'khor rnams kyis bcom ldan 'das la bcom ldan 'das de bzhin gshegs pa mi 'khrugs pa'i zhing de bdag cag la bstan du gsol zhes zhus pa dang /bcom ldan 'das kyis 'jig rten gyi khams de bstan par mdzad nas phyir yang mi snang bar mdzad do/ / bcom ldan 'das kyis bka' stsal pa/ ji ltar de bzhin gshegs pa mi 'khrugs pa'i zhing de mig lam du mi snang ba bzhin du gzugs mig lam du mi snang ba'o/ /tshor ba mig lam du mi snang ba'o zhes bya ba la sogs pa rgyas par gsungs so/ /don 'di 'phags pa rtag tu ngu'i le'u las kyang gsal bar gsungs so//de bzhin du rgyal po ma skyes dgra'i 'gyod pa bsal ba'i mdo las kyang don 'di gsal bar gsungs so/ /gzhan yang 'phags pa yab dang sras mjal ba'i mdo dang / 'phags pa sor mo'i phreng can gyi mdo dang / 'phags pa ye shes kyi phyag rgya'i mdo dang /de bzhin gshegs pa'i gsang ba'i mdo dang / de bzhin gshegs pa 'phags pa dri ma med par grags pa'i mdo dang / 'phags pa sangs rgyas rjes su dran pa'i mdo dang / 'phags pa nam mkha' mdog gis 'dul ba'i mdo dang / 'phags pa de bzhin gshegs pa'i mdzod kyi mdo dang / 'phags pa sum cu rtsa gsum gyi mdo dang / 'phags pa 'od srungs kyis zhus pa'i mdo dang / 'phags pa chos thams cad 'byung ba med pa bstan pa'i mdo dang / 'phags pa de bzhin gshegs pa'i snying po bstan pa'i mdo dang /'phags pa ting nge 'dzin gyi rgyal po'i mdo dang / 'phags pa da ltar gyi sangs rgyas mngon du bzhugs pa'i mdo dang / 'phags pa sku gsum bstan pa'i mdo dang / 'phags pa dri ma med pas byin pas zhus pa'i mdo dang / 'phags pa bu mo blo gros bzang mos zhus pa'i mdo dang /'phags pa bu mo rnam dag dang bas zhus pa'i mdo dang / 'phags pa chos nyid rang gi ngo bo nyid las mi g.yo bas tha dad par bstan pa'i mdo dang / 'phags pa lang kar gshegs pa de nyid dang / 'phags pa bden pa gnyis bstan pa'i mdo dang / 'phags pa nam mkha'i snying po'i mdo dang /'phags pa klu'i rgyal po ma dros pas zhus pa'i mdo dang / 'phags pa klu'i rgyal po rgya mtshos zhus pa'i mdo dang / 'phags pa shes rab kyi pha rol tu phyin pa'i mdo ma lus pa thams cad dang / 'phags pa gsang ba bsam gyis mi khyab pa'i mdo la sogs pa mdo sde thams cad nas don 'di shin tu gsal bar gsungs pas mdo de dang de nyid du blta bar bya'o//'dir de dag gi sh+lo ka bkod na ni gzhung shin tu mangs par 'gyur ro/ /de bas na theg pa chen po'i mdo sde ma lus pa thams cad blta ba la shin tu brtson par bya'o/ /gzhan yang shes rab kyi pha rol tu phyin pa'i snying po'i don phyin ci ma log par ji lta ba bzhin du thugs su chud pa slob dpon 'phags pa klu sgrub dang /slob dpon 'phags pa Ar+ya de ba dang / slob dpon 'phags pa zla grags dang / slob dpon 'phags pa shAn ta de ba dang / slob dpon 'phags pa b+ha bya snang bral dang /slob dpon rta dbyangs dang / slob dpon 'phags pa dge bsnyen zla ba la sogs pas mdzad pa'i gzhung de dag ni mdo'i don gsal bar bkrol ba yin pas de dag kyang legs par blta ba la brtson par bya'o/ /'dir de dag gi gzhung bkod pa na ni yi ge shin tu mangs par 'gyur ro//'di ltar 'phags pa klu sgrub ni mdo sde phal che ba dang / 'dzam bu'i gling na mkhas pa dag kyang 'di skad du sa dang po la gnas pa'i byang chub sems dpa' yin no zhes brjod cing grags mod kyang / bdag gis mdo'i nang nas sa brgyad pa'i byang chub sems dpa' yin par legs par mthong ba yin no//slob dpon Ar+ya de ba yang 'phags pa klu sgrub kyi man ngag gis sa brgyad pa thob pa'i byang chub sems dpa' yin par legs par mthong ngo / /slob dpon zla grags kyang 'phags pa klu sgrub kyi man ngag gis bden pa'i byin gyi rlabs mnga' ba chos thams cad sgyu ma lta bur thugs su chud pa 'dzam bu'i gling du lo bzhi brgyar bzhugs nas gzhan gyi don 'ba' zhig mdzad pa yin no//slob dpon shAn ta de ba yang 'phags pa klu sgrub kyi man ngag gis 'phags pa 'jam pa'i dbyangs kyi gnang ba thob par byas te bden pa gzigs pa yin no//slob dpon b+ha bya yang 'phags pa klu sgrub kyi man ngag gis sku tshe de nyid la rig 'dzin gnas su gshegs pa yin no/ /slob dpon rta dbyangs ni slob dpon Ar+ya de ba'i man ngag gis bden pa gzigs pa yin no/ / 'phags pa dge bsnyen zla ba yang de lta bu'o/ /de bas na de lta bu'i lung dang rigs pa rgya chen po bstan pa de dag shes par byas shing de'i don la nges par byas te/ the tshom med par byas nas lhag mthong zhes bya ba rnam par mi rtog pa de bsgom par bya'o/ /ji ltar bsgom zhe na/ re zhig dngos po ni gnyis te/gzugs can dang gzugs can ma yin pa'o/ /de gnyis ka yang gtan tshigs chen po rnams kyis bsal te bsgom par bya'o/ /de yang ji skad du chos thams cad sems la bsdus shing / sems kyang lus la bsdus la/ lus kyang chos kyi dbyings su gtang ba 'di ni man ngag go zhes bla ma'i zhal nas ting nge 'dzin gyi tshogs kyi le'u las gsungs so//de lta bu la shes pa cir yang mi rtog /cir yang mi 'dzin/ dran pa dang yid la byed pa thams cad spangs te/ ji srid mtshan ma'i dgra ma langs pa'i bar de srid du de lta bu la gnas par bya'o//'phags pa klu sgrub kyi zhal nas/ kun du rtogs pas ma brtags shing / /yid ni rab tu mi gnas la/ /dran med yid la byed pa med/ /dmigs med de la phyag 'tshal lo/ /zhes gsungs so/ / 'phags pa klu sgrub kyi zhal nas/ mkhas pa stong pa nyid la yang //stong pa nyid du blta mi 'gyur/ /zhes gsungs so/ /yang / dmigs pa dang ni bral ba'i sems/ /nam mkha'i mtshan nyid la gnas te/ /nam mkha' sgom par byed pa ni/ /stong pa nyid ni sgom pa'o/ /zhes gsungs so/ /slob dpon zhi ba lha'i zhal nas/ gang tshe yod dang med pa gnyis//blo yi mdun na mi gnas pa/ /de tshe rnam pa gzhan med pas/ /dmigs pa med pas rab tu zhi/ /zhes gsungs so/ /goms na ni de'i stobs su 'gyur te/ slob dpon zhi ba lha'i zhal nas/ stong pa nyid la goms pa yis/ /dngos po'i bag chags spong bar 'gyur/ /zhes gsungs pa dang /slob dpon dpal sbas kyis kyang / 'ga' zhig bsgom pa goms pa yi/ /mthu yis chos kun ngo bo nyid/ /med pa de yi bdag nyid du/ /'gyur te dngos po mthong ba bzhin/ /zhes gsungs so/ /des ni lhag pa'i shes rab kyi bslab pa bstan to/ /de ltar stong nyid bsgom byas nas//rim gyis drod sogs thob byas nas/ /rab dga' la sogs thob 'gyur te/ /sangs rgyas byang chub yun mi ring / /'dir mnyam par gzhag pa'i rnal 'byor dang / spyod lam gyi rnal 'byor la gnas nas gong du ji ltar bshad pa'i theg pa chen po'i mdo sde'i don pha rol tu phyin pa'i lam la legs par gnas pa des/mgon po byams pa'i zhal nas gsungs shing / 'phags pa thogs med kyis 'dzam bu'i gling du rgyas par spel pa'i shes rab kyi pha rol tu phyin pa'i lam mngon par rtogs pa'i rgyan gyi skabs brgyad kyi rim pa 'phags pa rnam par grol ba'i sde dang /slob dpon dpal seng ge bzang pos bkrol zhing bshad pa de shes par byas la gnas par bya'o/ /de lta ma yin na lam 'bras bu dang bcas pa la rmongs par 'gyur ro/ /de bas na rnal 'byor pa de kho na nyid la gnas pas tshogs kyi lam la gnas nas/ thar pa'i cha dang mthun pa'i dge ba'i rtsa ba bskyed nas sbyor ba'i lam la reg par 'gyur te/rim gyis drod sogs zhes pa drod rnam pa gsum dang / rtse mo rnam pa gsum dang / bzod pa rnam pa gsum dang / chos mchog rnam pa gsum la gnas nas nges par 'byed pa'i cha dang mthun pa'i dge ba'i rtsa ba bskyed cing ting nge 'dzin bzhis mthong ba'i lam la sogs pa skye ba ni/rab dga' la sogs thob 'gyur te/ /zhes bya'o/ /sangs rgyas byang chub ces pa ni 'di ltar sa bcu rdzogs par byas nas skad cig ma gcig la mngon par rdzogs par byang chub par gyur nas/sku gsum dang ye shes lnga la sogs pa yun mi ring bar myur du 'thob pa yin no/ /drod nas bzung ste sbyor ba'i lam/ /mthong ba'i lam sogs sa bcu dang / /sku gsum la sogs rnam gzhag ni/ /gzhung mangs 'jigs pas 'dir ma bris/ /mdo dang bstan bcos rnams na gsal//rab tu bsgrims te blta bar bya/ /yang na/ sangs rgyas byang chub yun mi ring / /zhes bya ba la/ 'di ni byang chub sems dpa' le lo can dag spro ba bskyed pa'i don yin no / /gang bskal pa grangs med pa gsum zhes gsungs pa de yang yun mi ring ste/byang chub sems dpa' rnams ni 'gro ba mtha' dag gi don du gnas pa ste/ ji skad du am+ba rA dzas/ bdag ni byang chub ring tshul du/ /'tshang rgyar mos shing spro pa med/ /phyi mthar thug gi bar du ni/ /sems can gcig phyir spyad par bya/ /zhes gsungs so//dpal mchog dang po las kyang / ji srid 'khor ba'i gnas su ni/ /mkhas mchog gnas par gyur pa ni/ de srid mtshungs med sems can don/ /mya ngan mi 'da' byed par nus/ /zhes gsungs so/ /'phags pa klu sgrub kyis kyang smon lam las/ ji srid sems can 'dir 'ga' zhig /sems can gcig grol ma gyur pa/ /bla med byang chub thob gyur kyang / /de srid de don dpyad par bgyi/ /zhes gsungs so/ /de ci'i phyir zhe na/ mdo las/ 'jig rten gyi khams 'di thams cad chu'i dkyil 'khor du gyur la/ de la skyes bu zhig gis lo stong phrag brgya brgya na spu'i rtse mo zhig gis chu de las 'thor bar byas na/chu'i dkyil 'khor de ni zad par 'gyur la/ sems can gyi khams la zad pa med do zhes gsungs so/ /'phags pa bzang po spyod pa las kyang / nam mkha'i mthar thug gyur pa ci tsam par/ /sems can ma lus mtha' yang de tsam mo//zhes gsungs so/ /dper na ri'i rgyal po ri rab rdul phra rab tu bshig pa'i rjes la byang chub thob par bya'o snyam na yang de ni le lo can yin par bshad do/ de bas na am+ba rA dzas kyang / 'khor ba'i thog ma med pa yi/ /skye ba tha ma ji srid du/ /de srid sems can phan don du//spyod pa dpag yas spyad par bgyi/ /zhes gsungs so/ /de bas na sems can gyi khams la zad pa yang med 'phel ba yang med pa'i sdug bsngal can de dag yal bar bor nas/ bdag nyid myur du 'tshang rgya bar ni 'dod par mi bya ste/ byang chub sems dpa' dpa' bo dbang po rnon po brtson 'grus rab dang ldan pa/sems snying rje'i dbang du gyur ba/ sems can ma lus pa la snying rje ba can de lta bu ni mi 'dod du zin kyang myur du mngon par rdzogs par 'tshang rgya bar 'gyur ro zhes bya ba ni zhar la byung ba'o/ /smon lam dang ni 'jug pa dang / /de bzhin zab dang rgya che dang //mi ldog 'bras bu thob pas kyang / /theg pa chen po khyad par 'phags/ /zhes slob dpon tri bi Ta ka ma la'i zhal snga nas tshul gsum pa'i sgron mar gsungs te/ nyan thos kyi theg pa bas pha rol tu phyin pa'i theg pa khyad par du 'phags so zhes khong du chud par bya'o/ / pha rol tu phyin pa'i theg pa rdzogs so// //da ni bla na med pa'i theg pa chen po'i yang theg pa chen po gsang sngags kyi theg pa brjod par bya'o/ /de yang slob dpon chen po rje btsun tre bi Ta ka ma la'i zhal snga nas/ don gcig yin na'ang ma rmongs dang / /thabs mang dka' ba med phyir dang //dbang po rnon po'i dbang byas pas/ /sngags kyi bstan bcos khyad par 'phags/ /zhes shes rab kyi pha rol tu phyin pa'i theg pa bas gsang sngags kyi theg pa khyad par du 'phags so zhes bya ba ni gzhung lugs so/ /'di ltar don dam pa'i byang chub kyi sems dngos phyin ci ma log pa de ni gsang sngags kyi sgo'i spyad pa spyod pa'i byang chub sems dpas bskyed par bya'o//'on kyang 'dir ni de lta bu'i gzhung gi don ni bdag gis ma brjod do/ /'dir ni bskyed pa'i rim pa la gnas pa'i byang chub sems dpa'i tshogs gnyis bsags pa'i thabs cung zhig rtsa bar yang bkod cing 'dir yang rtsa ba la brten pa tsam zhig bri bar bya'o//de lta bu'i gsang sngags kyi lugs kyis thun mong ma yin pa'i tshogs gnyis myur du rdzogs par bya'o snyam du bsams nas/ sngags mthu nyid las byung ba yi/ /zhes bya ba la sogs pa smras te/ sngags mthu zhes pa ni spyir gzungs kyi cho ga thams cad kyang bya ba'i rgyud yin pas gzungs la sogs pa'i sngags rgyud thams cad nas 'byung ba'i sngags kyi bzlas brjod kyi nus pas dngos grub 'byung ste/de gang zhe na/ zhi dang rgyas la sogs pa yi/ /zhes pa dbang dang mngon spyod kyi cho ga rnam pa brgyad do/ / bum pa bzang grub la sogs pa/ /grub chen brgyad ces pa ni 'di ltar bum pa bzang po dang / rkang mgyogs dang / ral gri dang / mngag gzhug pa dang / sa 'og dang / mi snang ba dang / dpag bsam gyi shing dang / rgyal srid rnams so/ /sogs pa zhes pa ni mig sman dang /ri lu dang / nam mkha' la 'phur ba dang / 'bru'i char 'bebs pa dang / yungs kar bsgrubs nas gzugs sna tshogs byed pa dang / pra phab nas mngon par shes pa bskyed pa dang / rdzu 'phrul la sogs pa brgyud nas rjes su gzung ba dang tshar gcad pa'i las kyi dngos grub ji snyed cig 'byung ba de dag ni bzlas brjod dang ting nge 'dzin gyis zhi ba dang rgyas pa dang /dbang dang mngon spyod dang / 'jig rten gyi dngos grub chen po brgyad la sogs pa dag bsgrubs nas 'bad pa med par myur du bsod nams dang ye shes kyi tshogs gnyis rdzogs par byed do//de lta bu'i dngos grub 'bad pa med par myur du 'byung ba'i gsang sngags kyi theg pa zhes pa de gang yin zhe na/ bya ba spyod sogs rgyud ces bya ba dang / bya ba'i rgyud dang / spyod pa'i rgyud dang / rtog pa'i rgyud dang / gnyi ga'i rgyud dang / rnal 'byor gyi rgyud dang / rnal 'byor chen po'i rgyud dang /rnal 'byor bla na med pa'i rgyud rnams so/ /de yang rgyud de dag ni re re zhing yang dpag tu med de / de yang dpal ye shes rdo rje kun las btus pa'i rgyud chen po las bcom ldan 'das kyis 'di skad du rgyud so so'i grangs gsungs te/ bya ba'i rgyud stong phrag bzhi'o/ /spyod pa'i rgyud stong phrag brgyad do//rtog pa'i rgyud stong phrag bzhi'o/ /gnyis ka'i rgyud stong phrag drug go/ /rnal 'byor chen po'i rgyud stong phrag bcu gnyis te/ de dag rgyas par byas na grangs med do zhes gsungs so/ /de la bya ba'i rgyud ni gzungs thams cad dang / rig pa mchog dang / gar mkhan mchog dang /rab tu grub par byed pa dang / dpung bzangs dang / 'jam dpal gyi rtsa ba'i rgyud chen po dang / 'jam dpal gsang ba'i rgyud dang / rdo rje gtsug tor dang / a mo g+ha pA sha dang / rnam par rgyal ba'i rgyud chen po la sogs pa stong phrag bzhi bzhugs so/ /spyod pa'i rgyud ni rnam par snang mdzad mngon par byang chub pa'i rgyud dang /lag na rdo rje dbang bskur ba'i rgyud la sogs pa rgyud sde stong phrag brgyad bzhugs so/ /rtog pa'i rgyud ni sgrol ma 'byung ba'i rgyud dang / dam tshig gsum bkod pa'i rgyal po dang / rtog pa kun las btus pa la sogs pa rgyud sde stong phrag bzhi bzhugs so//gnyis ka'i rgyud ni sgyu 'phrul dra ba dang / pad+ma gar gyi dbang phyug la sogs pa rgyud sde stong phrag drug bzhugs so/ /de la rnal 'byor gyi rgyud ni ta ta twA saM gra ha dang / dpal mchog dang po dang / 'jig rten gsum las rnam par rgyal ba dang / yang yo ga rnam par rgyal ba dang /rdo rje rtse mo la sogs pa grangs med do/ /de la rnal 'byor chen po'i rgyud ni dpal gsang ba 'dus par bshad rgyud dang bcas pa dang / zla gsang thig le dang / gshin rje'i gshed nag po dang / dpal mchog dang po dang / lha thams cad 'dus pa dang / thams cad gsang ba dang /'dul ba don yod pa dang / ye shes rdo rje kun las btus pa dang / rnam par snang mdzad sgyu 'phrul dang / nam mkha' dang mnyam pa chung ngu dang / gnyis su med pa rnam par rgyal ba'i rgyud dang / rdo rje gtsug tor rgyud la sogs pa rgyud sde stong phrag bcu gnyis te rgyas par bya na grangs med do//rnal 'byor bla na med pa'i rgyud ni dpal nam mkha' dang mnyam pa 'bum pa chen po 'khor lo sdom pa dang / rdo rje mkha' 'gro dang / rdo rje gdan bzhi pa dang / ma hA mA yA dang / sangs rgyas mnyam sbyor dang / sangs rgyas thod pa dang / dgyes pa'i rdo rje 'bum phrag lnga pa la sogs pa rgyud sde stong phrag bcu bzhi bzhugs te rgyas par byas na grangs med do/ /de ltar rgyud sde re re zhing yang grangs med pas na gsang sngags kyi theg pa ni shin tu rgyas shing mthar thug pa med pa yin no/ /'di ltar yi dags kha nas me 'bar ba'i gzungs dang /rma bya chen mo'i gzungs la sogs pa gzungs ma lus pa thams cad kyang bya ba'i rgyud yin no zhes bla ma dag gsung ngo / /gsungs pa'i zhes pa ni ji ltar gsungs she na/ 'di skad du/ gal te gsang sngags spyod 'dod pas/ /de tshe slob dpon dbang bskur phyir//zhes gsungs te/ 'di ltar gal te bya ba'i rgyud la sogs pa'i gsang sngags kyi theg pa la spyod par 'dod pa yin na ni slob dpon gyi dbang bskur ba zhes bya ba bum pa'i dbang thob par ma byas par smon pa dang 'jug pa'i sems bskyed pa tsam la ltos par mi bya ste/gsang sngags rang nyid len par 'gyur ba'i phyir ro/ /de yang rgyud las/ slob dpon mnyes par ma byas shing / /dbang rnams thob par ma byas par/ /nyan pa la sogs rtsom pa yang / /'bras bu med pa nyid du 'gyur/ /zhes gsungs pa dang / yang rgyud las/ dbang bskur rjes gnang med par yang / /gsang sngags rang nyid len par byed/ /ces gsungs te/ dkyil 'khor du 'jug pa dang / dbang bskur ba dang / bla ma de nyid kyi rjes su gnang ba ma byas par theg pa chen po'i mdo sde'i don pha rol tu phyin pa'i lam gyi cho ga la brten nas gzungs kyi cho ga byed pa dang /gzhan yang rje btsun sgrol ma la sogs pa'i sgrub thabs dag mnyan nas bsgom pa dang / bzlas pa dang / sbyin sreg dang / gtor ma dang / dkyil 'khor la sogs pa byed pa ni gsang sngags rang nyid lon pa yin te/ dkyil 'khor du 'jug pa dang /dbang bskur ba byas te/ slob dpon gyis 'di skad du khyod kyi lha ni 'di yin no/ /bzlas pa 'di bya dgos so zhes rjes su gnang ba ma thob pa'i phyir ro/ /de bas na rgyud las/ gsang sngags rang nyid len pa ni/ /'gro ba dmyal ba 'ba' zhig ste/ /sngags kyang 'grub par mi 'gyur zhing //lus nyon mongs pa kho nar zad/ /ces gsungs so/ /de dag ni gsungs pa'i tshig gi don yin te/ rgyud thams cad dang / sngon gyi slob dpon thams cad dang / da lta nyid kyi bla ma ma lus pas 'di skad du gsungs zhes pa'o/ /yang na 'jig rten pa dang 'jig rten las 'das pa'i lha'i pra phab pa dang /rmi lam dag tu gang zag 'di ni skye ba snga ma la gsang sngags spyod spyod pa dag yin no zhes zer na/ des bla ma yongs su mnyes par byas la byin gyis brlab pa byas te/ 'di ltar sgrubs shig ces gnang ba byin la/ sgrub pa'i cho ga'i thabs sbyin par bya'o//cho ga de yang 'di yin te/ 'phags pa dam tshig gsum bkod pa'i cho ga dang / bcom ldan 'das nor bu rgyas pa'i gzhal med khang gi cho ga dang / bcom ldan 'das sman gyi bla bai DUr+ya'i 'od kyi rgyal po'i cho gas sdig pa sbyong ba dang / tshogs bsags pa byas la ltas bzang po byung ba na gang zag des gsang sngags kyi theg pa la 'jug par gnang gi 'di ltar skye ba snga ma la gsang sngags spyad pa ma yin pa dang /yang na gsum la skyabs su 'gro ba dang / smon pa byang chub kyi sems bskyed pa dang / 'jug pa byang chub kyi sems bskyed pa byas pa tsam la ni gsang sngags bstan pa dang /des bsgrub pa dang blta ba dang mnyan pa bya bar ma gnang ste/ 'jug pa'i lam so so ba yin pa dang / theg pa dag ni rnam par thar pa bsre bar mi bya ba yin te/ bcom ldan 'das kyis gang zag gi dbang po dang khams dang bag la nyal mkhyen pas theg pa'i lam so sor gsungs pa yin no//de bas na rtsa ba nas smras pa de lta bas na/ gal te gsang sngags spyod 'dod pas/ /de tshe slob dpon dbang bskur phyir/ /zhes smras te/ pha rol tu phyin pa'i lam du 'jug cing spyod 'dod na ni sngar ji ltar brjod pa bzhin du bslab pa rnam pa gsum la bslab par bya ba yin la/gal te gsang sngags spyod cing rje btsun sgrol ma la sogs pa sgrub par 'dod na ni slob dpon gyi dbang zhes pa bum pa'i dbang bskur ba zhu bar bya'o zhes pa ni sh+lo ka'i don yin no/ /'o na dbang bskur ba'i bla ma de la bla chos dang yo byad med par bya ba'am zhe na ma yin te/bsnyen bkur rin chen la sogs zhes so/ /'o na yo byad kyis phongs shing dbul po dag gis ji ltar bya zhe na/ bka' sgrub la sogs zhes pa'o/ /'dir skye bo 'byor pa can dag gis ni rgyal srid rin po che bdun la sogs pa tha na bdag nyid kyi lus kyang dbul bar bya ste/ji ltar slob dpon sangs rgyas ye shes zhabs la rgyal po de ba pA las rgyal srid thams cad phul ba'i rjes su btsun mo dang rang nyid kyang phul nas phyis rgyal po dang btsun mo gnyis gser de gnyis dang mnyam pas bslus pa lta bu'o//dbul po dag gis bka' bsgrub pa dang / lus kyi bsnyen bkur dang / dkyil 'khor dang / me tog yang dang yang du dbul ba la sogs bya'o/ /de lta bu'i tshul gyis bla ma dam pa mnyes par bya'o/ /de ltar bla ma mnyes shing dges par gyur pa dang /dbang bskur ba thob par byas nas lus la sogs pa'i sdig pa thams cad las grol nas/ des sdig pa dag pa'i rgyus 'jig rten dang 'jig rten las 'das pa'i dngos grub thams cad sgrub pa'i skal ba can du 'gyur ro/ /de ltar gsang sngags kyi theg pa la gnas nas 'bad pa med par myur du mngon par rdzogs par sangs rgyas par byas te/gzhan gyi don mthar phyin par bya ba'i thabs bstan nas/ da ni gsang sngags kyi theg pa la log par rtog pa dag dgag pa'i phyir/ dang po sangs rgyas rgyud chen las/ /zhes pa la sogs pa smras te/ 'dir gsang sngags la log par rtog pa ni gnyis te sgro 'dogs par byed pa dang skur pa 'debs par byed pa'o / /snga ma ni tshar gcad par bya'o/ /phyi ma ni rjes su gzung bar bya'o/ /'di ltar 'di na kha cig gsang sngags kyi rgyud chen po mtha' dag gi dgongs pa yang mi shes/ bla ma dam pas kyang ma zin cing / sdig pa'i bshes gnyen la brten pas gsang sngags kyi tshul ji lta bar ma shes pa dgongs pa can gyi bka' la brten nas 'di skad du bdag cag ni gsang sngags pa'o/ /bdag cag ni spyod pa thams cad bag yangs su byed cing phyag rgya chen po'i dngos grub kyang myur du thob par 'gyur ro zhes sgrogs shing gnas pa de dag ni ngan 'gror 'gro bar 'gyur te/de bzhin gshegs pa'i bka' la skur pa btab pa dang / tshangs par spyod pa dag sbags pas sangs rgyas kyi bstan pa nub par byas pa dang / mngon spyod drag po byas pa dang / bud med dag bsten pas pham pa byung ba'i phyir ro/ /dpal ye shes grags pa'i zhal nas 'di skad du bdag cag rnal 'byor pa la bcom ldan 'das kyis gnang ba yin no zhes zer zhing sgra gsang cher sgrogs pa dang / gzhan yang spyod pa thams cad kyang bag yangs su byed pa de dag ni ngan 'gror 'gro bar 'gyur ro zhes gsungs so//bdag gi bla ma dge slong bsod snyoms pa ya ba dI pa'i zhal nas kyang / gal te dbang bskur ba de gnyis 'dzin par byed na/ slob dpon dang slob ma dang bcas pa ngan 'gror 'gro bar 'gyur ro zhes gsungs so/ /bcom ldan 'das kyis dgongs pa lung bstan pa'i rgyud chen po las/rnal 'byor man ngag med pa dag /lcags kyu med pa bzhin du spyod/ /bdag ni rnal 'byor pa zhes zer/ /chos ni g.yo yis byed par 'gyur/ /sngags dang phyag rgya'i sbyor ba yis/ /'tsho ba dag kyang sgrub par byed/ /nyes pa cung zad tsam la yang //mngon spyod drag po byed bar 'gyur/ /'di ltar sgrub pa'i thabs tsam zhig /shes nas rgyud chen 'chad par byed/ /gang du rnyed pa thob 'gyur bar/ /dam pa'i chos ni ston par byed/ /ces bya ba la sogs pa mang du gsungs so/ /de bzhin du dpal pad+ma rdo rjes kyang de lta bu'i nyes dmigs mang du gsungs nas/de lta bu dang de dag nyid/ /kun kyang sdig pa'i las can te/ /dam pa min pa'i lam zhugs nas/ /dmyal ba dag tu 'gro bar 'gyur/ /zhes gsungs so/ /khungs mang du yod mod kyi yi ge mangs par 'gyur ro/ / de lta bu dag ni snying rje'i sems kyis tshar gcad par bya'o/ /yang 'di na la la dag 'di skad du gsang sngags kyi tshul chen po ji lta bar mi shes par gsang sngags kyi theg pas ci zhig bya/ pha rol tu phyin pa dang / nyan thos dang rang sangs rgyas kyi theg pa gtsang ba de nyid la 'jug par bya'o//'di ltar bud med bsten pas ni mi tshangs par spyod pa'i pham pa 'ong la/ mngon spyod drag po byas pas ni srog bcad pa'i pham pa 'ong bas de la 'jug par mi bya'o zhes rgyud kyi dgongs pa mi shes par skur pa 'debs pa de dag ni zab cing rgya che ba dbang po rnon po'i spyod yul sangs rgyas kyi bstan pa'i snying por gyur pa skal pa dang /bag chags dang / las 'phror ldan pa 'ga'i spyod yul du gyur pa yin pas de lta bu la skur pa 'debs pa de ni nges par sems can dmyal bar 'gro bar 'gyur ba 'di la the tshom mi bya ste/ de bzhin gshegs pa'i bka' la skur pa btab ba dang /chos zab mo spangs pa'i phyir ro/ /chos spangs ba'i las kyi rnam par smin pa ni 'phags pa rnam par 'thag pa'i mdo las 'di skad du chos la la ni bzang zhes pa dang / chos la la ngan no zhes zer na chos spangs pa'o zhes pa la sogs pa chos du ma mthong ba'i phyir ro//bla ma dge slong bsod snyoms ba'i zhal nas kyang / de'i phyir gsang sngags theg pa la/ /bdud kyis smras zhes brnyas mi bya/ /theg pa kun la spangs pa yang / /'di gnas phyag rgya chen po thob/ /ces gsungs so/ /de lta bu'i gang zag ni snying rje'i sems kyis rjes su gzung bar bya'o//skur ba 'debs pa de yang gnyis te/ chos la skur pa 'debs pa dang / gang zag la skur pa 'debs pa'o/ /de la chos la skur pa 'debs par mi bya ste/ 'phags pa 'od srungs kyis zhus pa las 'di skad du/ chos zab mo gang dag blos mi rtogs pa de la sangs rgyas kyi byang chub ni mtha' yas shing sems can mos pa tha dad pa rnams la de bzhin gshegs pa rnams kyis chos bstan pa la 'jug ste/ de bzhin gshegs pa nyid kyis mkhyen gyi bdag gis ni mi shes te/ de bzhin gshegs pas mngon sum mo zhes bya ba la sogs pa gsungs te/mdo nyid du blta bar bya'o/ /gzhan yang mdo dang rgyud thams cad du don 'di bdag gis mthong ngo / /gang zag la yang skur pa gdab par mi bya ste/ 'phags pa lhag pa'i bsam pa bskul ba dang / 'phags pa chos thams cad 'byung ba med par bstan pa dag las nga'am nga dang 'dra ba ma gtogs par gang zag gis gang zag gi tshod gzung bar mi bya ste nyams par 'gyur ro zhes gsungs so/ /de'i nyes pa ni mdo las gzhan yang mang du mthong ngo / /dang po'i sangs rgyas rgyud chen las//zhes bya ba la sogs pa'i tshig rkang pa bcu gnyis kyi don bdag gis bdag gi bla mar gyur pa dge slong bsod snyoms pa dang gser gling pa'i gdams ngag la brten pa yin te/ bla ma'i zhal nas dbang bskur ba nges par bstan pa zhes bya ba las 'di skad du/ de la dbang ni rnam pa gnyis te/khyim pa'i phyogs la brten pa dang / tshangs par spyod pa'i phyogs la brten pa'o/ /khyim pa'i phyogs la brten pa gang zhe na/ ji snyed rgyud las gsungs pa thams cad do/ /tshangs par spyod pa'i phyogs la brten pa gang zhe na/ de dag nyid las gsang ba dang / shes rab ye shes spangs pa'o/ /de ci'i phyir de gnyis spangs she na/ 'di ltar sangs rgyas kyi chos la brten nas dge ba ji snyed cig 'byung ba de dag thams cad ni bstan pa gnas pa las 'byung ba yin la/ bstan pa gnas pa yang tshangs par spyod pa kho la ltos shing / dbang bskur ba gnyis ni tshangs par spyod pa'i mi mthun pa'i gnas su mthong ba'i phyir ro//de bas na dbang bskur ba gnyis ni tshangs par spyod pa zad par byed pa yin la/ tshangs par spyod pa zad na sangs rgyas kyi bstan pa nub par 'gyur zhing / de nub pas bsod nams mngon par 'du bya ba rnams rgyun chad par 'gyur la/gzhi de las dge ba ma yin pa dpag tu med pa 'byung ba'i phyir de gnyis tshangs par spyod pa rnams la spangs so zhes gsungs so/ /de ltar yin na tshangs par spyod pa dag gis gsang sngags la 'jug tu mi rung ngo zhe na/ rgyud kun nyan dang 'chad pa dang //sbyin sreg mchod sbyin sogs byed pa/ /slob dpon dbang bskur rnyed gyur pa/ /zhes bya ba 'di smos so/ /gal te tshangs par spyod pa'i sngags pas rgyud la sogs pa nyan pa dang / gzhan la 'chad pa dang / blta ba dang / sbyin sreg dang / gtor ma dang / bzlas brjod dag byed par 'dod na ni slob dpon dbang bskur zhes pa bum pa'i dbang gis rung ba rgyud thams cad dang / dkyil 'khor gyi cho ga thams cad nas gsal bar gsungs so/ /'di'i don bla ma dge slong bsod snyoms pa ya ba dI pas gsungs te/ 'di skad du de lta yin na tshangs par spyod pa rnams ni theg pa chen po'i yang theg pa chen po'i skal ba can ma yin par 'gyur ro zhe na/de ni 'dir nges par 'khrul par spyad par bya ste/ gang gis bum pa dang / slob dpon dang rjes su gnang ba thob pa nyid kyi rgyud la sogs pa bsgrub pa dang / bshad pa dang mnyan pa dang blta ba la dbang bskur ba'i phyir skal ba can yin no//de lta na khyim pa dag la yang gsang ba dang / shes rab kyi dbang dgos pa med par 'gyur ro zhe na/ de mi dgos pa yang yin la/ de las bzlog pa yang yin no zhes bya ba la sogs pa rgyas par gsungs so//de nyid rig la nyes pa med/ /ces pa 'di'i don ni bdag la bla ma dag gis nye bar bstan pa gnang ba mang du yod de/ bla ma dam pa kha cig gi zhal nas snying rjes sems can gyi don rig cing sems snying rje'i dbang du song ba'i byang chub sems dpas ci byas kyang de'i rgyud la nyes pa med cing de'i rjes la yang bsod nams mang du 'phel bar 'gyur ro zhes gsungs so//de ni bzod pa chung ngu thob pa yin no/ /dam pa la la'i zhal nas chos thams cad sgyu mar shes shing de'i de kho na nyid rig pa'i rnal 'byor pa las nyes par 'gyur ba gang yang med de/'di skad du/ chu yi zla ba lta bur ni/ /rnal 'byor pa ni gang gis shes/ /de ni sdig dang bsod nams sogs/ /nam yang gos par mi 'gyur ro/ /nang dang phyi rol gnas 'di kun/ /sems yin sgyu ma lta bu ste/ /de yang rtag min chad pa min//gnyi ga dag tu'ang mi rtog cing / /dngos 'dzin dug gis ma gos pas/ /de lta bu ni sus mthong ba/ /sgyu mar rig la nyes pa med/ /ces gsungs te/ chos kyi mchog chung ngu thob pa la nyes pa med pa'o/ /bla ma dge slong bsod snyoms pa'i nyes par mi 'gyur ba ni bla ma'i zhal snga nas mdzad pa'i gzhung de nyid du blta bar bya'o//'di ni las dang po pa da lta nyid na yang nyes pa med pa'o/ /dam pa gzhan ni 'di skad du 'phags pa 'od srungs kyis zhus pa'i mdo dang / bud med 'gyur ba lung bstan pa'i mdo dang / dpal mchog dang po'i rgyud dang /'dul ba don yod pa'i rgyud dang / rgyud gzhan de ma yin pa dag dang / 'phags pa klu sgrub dang / slob dpon Ar+ya de ba la sogs pa'i gzhung de dag gi tshul gyis nyes par mi 'gyur zhing / don de ni de kho na nyid rig pa la nyes pa med de rtse mo chung ngu thob pa na'o zhes gsung ngo //dam pa gzhan ni 'di skad du chos thams cad kyi skye ba med pa don dam pa byang chub kyi sems bskyed cing / de rgyud la skyes pa la yang nyes pa med de/ chos rnams kyi de kho na nyid rig pa la nyes pa med do zhes gsung ste / 'di ni bden pa mthong ba dag la nyes pa par mi 'gyur ro//de bas na lam la gnas pa'i rnal 'byor pa des nyes pa med pa dang / nyes par 'gyur pa dag shes par bya'o/ /yid bzhin nor bu lta bu'i sprul pa'i sku/ /'das shing 'phags pa klu sgrub la sogs pa'i/ /mkhas pa chen po rnams kyang med pa na/ / thub pa'i dam chos nub tu nye ba yi/ /ding sang dus na smyon pa lta bu yi/ /log par rtogs pa'i gang zag mang po byung / /bla ma brgyud pa'i gdams ngag bral ba yi/ /mdo dang bstan bcos glegs bam mthong ba yis/ /gsung rab rgya mtsho zab mo'i don la spyod/ /de dag long ba lta bur gyur pa ste//theg chen lam mchog de yis shes pa min/ /de bas log rtogs rjes su 'brang mi bya/ /legs pa'i 'byung gnas theg pa chen po'i lam/ /bla ma mig dang 'dra ba med pa yis/ /ma mthong mi mthong mthong bar mi 'gyur ro/ /theg pa chen po rgya mtsho ltar zab cing //nam mkha' lta bur shin tu rgya che ba/ /bla ma dang bral rang dga' smra ba yis / /mdo dang bstan bcos dag gi glegs bam de/ /mthong bas tshim ste bla ma sten mi byed/ /de dag gis ni theg pa chen po yi/ /gtam gyi rim pa tsam yang mi shes na/ /zab dang rgya che'i don lta ga la yod//theg chen bag chags bzang po yod pa yi / /bla ma dam pas zin pa'i skye bo ni/ /mkhas pa su zhig de yi rjes su 'brang / /ding sang bstan pa nub kar gyur pa yi/ /'jigs pa chen po'i dus 'di byung bas na/ /rtogs ldan mkhas pa dag gis bag yod kyis //bla ma bzang po brgyud pa'i gang zag ni/ /yul dang sa phyogs gang na yod pa dri/ /rnyed nas zla ba'am lor yang bsten byas la/ /bsnyen bkur tshul bzhin byas la mnyes par bya/ /skyes bu de yi lus dang ngag dag gi/ /spyod tshul shin tu ngan par spyod na yang / /de la mi blta dam chos blang bar bya//dper na bung bas me tog 'dzin pa'i tshe/ /sbrang rtsi khyer nas me tog lus pa dang / /mkhas pa des kyang de dang 'dra bar spyad / /spyod tshul mi blta de yi gdams ngag mnyan/ /nyer bstan de la sems ni goms pas na/ /tshe 'di nyid la byang chub thob bya'i phyir//'khor lo sdom pa la sogs gsang sngags kyi / /gdams ngag bla ma brgyud pa can la zhu/ /dbang bskur gnyis pa spangs pa yi/ /gsang sngags gzhung lugs mi shes na/ /rnam rtog du mas bcings gyur pas/ /myur du sangs rgyas 'grub mi 'gyur//yang smras pa/ thub pa'i bstan pa mdangs nyams gyur pa yi/ /ston pa'i dam chos rnam par 'jig pa ni / /ding sang dus na bstan pa 'jig pa na / /sangs rgyas nyid kyi slob ma ma gtogs par/ /pha rol pa dang tha mal skye bo yis/ /thub pa'i bstan pa sus kyang 'jig mi nus//khyad par du ni rab tu byung bas 'jig /kha cig gsang sngags rgyud kyi rjes 'brangs nas/ /log par spyod cing gzhan la'ang log par ston/ /kha cig shes rab pha rol phyin pa yi/ /ji bzhin yang dag don ni mi shes par/ /rgyu dang 'bras bu la sogs kun rdzob pa/ / 'gog cing rang bzhin rnam par dag ces smra / /kha cig so sor thar pa 'dul ba yi / /bslab pa ji snyed gsungs pa btang byas nas/ /zhing dang khe sogs khyim pa dang 'dre zhing / /gtsug lag khang na'ang sna tshogs gtam gyis spyod/ /'phags pa lang kar gshegs pa las/nga yi bstan pa sun 'byin pa/ /ngur smrig gi ni gos bgos shing / /'bras bu yod dang med smra ba/ /ma 'ongs pa na 'byung bar 'gyur/ /zhes gsungs so/ /yang de nyid las/ rtsod pa'i dus kyi tha ma la/ /'jig rten dam chos mi bsgom mo/ /zhes gsungs so/ /mkhas pa chen po nor gyi rtsa lag gi zhal nas kyang /ston pa 'jig rten mig ni zum gyur cing / /dbang gyur skye bo phal cher zad pa na/ /de nyid ma mthong rang dgar spyod pa yi/ /ngan rtog rnams kyis bstan pa 'di dkrugs so/ /rang byung rang 'byung bstan pa gces 'dzin rnams/ /mchog tu zhir gshegs 'gro mgon med pa na//'doms med yon tan 'joms par byed pa yi/ /dri mas dga' mgur ding sang 'di na spyod/ /de ltar thub pa'i bstan pa nyams dga' 'di/ /lkog mar srog 'byin 'dra dang dri ma rnams/ /stobs dang ldan pa'i dus su rig nas ni/ /thar pa 'dod pa dag gis bag yod kyis//zhes gsungs so/ /dam pa'i gdams ngag rgyas par bkod pa 'di/ /sangs rgyas bstan pa ji srid gnas kyi bar/ /snying rje byang chub sems dang ldan pa de/ /brtson 'grus kyis ni nyin mtshan spyod gyur cig /byang chub lam gyi sgron ma'i dka' 'grel zhes bya ba b+haM ga la'i rgyal po'i rigs rgyud shAkya'i dge slong mkhas pa chen po byang chub sems dpa'i spyod pa mdzad pa dI paM ka ra shrI dz+nyA nas mdzad pa rdzogs so// //dad pa'i sa gzhi tshul khrims sa bon bsten/ /byams pa'i myu gu ting 'dzin chus brlan pa'i//rtsa ba snying rje chu ba byang chub sems/ /yal ga phar phyin lo ma bsdu ba'i dngos/ /me tog nor bdun 'bras bu rjes dran drug /dge bcu'i dris khyab slob ma'i bya tshogs 'du/ /shing mchog de 'dra'i byang chub sems dpa' ni/ /b+haM ga lar 'khrungs mar me mdzad dpal zhabs//ding sang dus na sangs rgyas gdung 'tshob pa/ /skye bo dbus na nyi ma bzhin du lham / /snyan par rab grags chos lugs bzang po shes/ /sdom pas rab bsdams mkhas dang nus par ldan/ /rigs can rnams kyi bla mar 'os pa ste/ /de ni sangs rgyas rnams kyi sras gcig pu//bsam dang lhag bsam gser dang zla tshes 'dra/ /pha rol 'gro ba dag gi bsam pa dang / /spyod lam mthun zhing chos kyi bshad pa'ang ston/ /nam yang gang zag pha rol mi dad pa/ /dug dang 'dra bar spong byed bsam rjes 'jug /bya ba ngan spangs spyod lam nyams pa med//skad cig skad cig gnyen po'i stobs dang ldan/ /phrin las bzang pos yul phyogs dbus su 'khrungs/ /skye ba bzang po rgyal po'i rigs su 'khrungs/ /rigs brgyud bzang po theg chen rigs su 'khrungs/ /smon lam bzang pos sangs rgyas sras su 'khrungs/ /de 'dra'i bla ma byang chub sems dpa' ni//mar me mdzad dpal ye shes snying rje can/ /skyes mchog de la 'dun pa'i slob ma ni/ /shAkya'i dge slong tshul khrims rgyal ba des / /dad cing gus pas bsnyen bkur tshul bzhin du/ /byas pa nyid kyis thugs dam snying po ni/ / 'khor lo sdom pa rnal 'byor rgyud rgyal po/ /chos kyi phung po brgyad khri bzhi stong las/ /snying po'i snying por gyur pa 'di yin te/ /nyin mtshan kun du yid la 'di bsgom zhes/ /de yis nyer bstan nyams pa med par gnang / /nags tsho bdag nyid gcig pu ma gtogs pa/ /bod kyi slob ma gzhan la yod re skan//bla ma de la dad cing gus pa yis/ /lus ngag yid kyis rtag tu phyag 'tshal lo// // rgya gar gyi mkhas pa chen po bla ma byang chub sems dpa' b+haM ga la pa/ dpal mar me mdzad ye shes zhabs dang / lo tsA ba dge slong tshul khrims rgyal bas bsgyur cing zhus/