CLOSE WINDOW

D3945
བོད་ཡིག

@##/ /rgya gar skad du/ ya ti karmi b+hU mi ka ri pa ri/ bod skad du/ las dang po pa'i sa sbyang ba/ /sangs rgyas la phyag 'tshal lo/ /nyi ma lta bur gzi ldan sku/ /sangs rgyas zhabs la phyag 'tshal te/ /las ni dang po pa yi sa/ /sbyang ba 'dir ni bshad par bya/ /lam ma sbyangs pa'i nyes pa dang //lam gyi sbyang ba gang zhe na/ /lam ma sbyangs pa'i skye bo dag /byes bgrod ngal dub tsha grang dang / /lci dang rtsub dang skyo ba dang / /bkres skom gdung shing brnyas pa dang / /'jig dang yi mug nyams su myong / /mya ngan 'tshor 'grib bcas pa dang / /kha cig spyi'u tshugs dmyal ba dang //dud 'gro yi dags rnams su bsten/ /nor dang bza' btung grags pa dang / /'dod pas byes 'grod sdug bsngal can/ /re ba 'bras bu med pa dang / /sdug dang bral dang mi sdug phrad/ /mi bzad na rgas 'dzoms bzhin du/ /'chi bdag drung du myur 'gro ba/ /ma tshor ga zhar bcas shing brtse//tshe 'di don med myur du 'da'/ /yang dang yang du skye ba yi/ /'khor ba'i nyes pa grangs med bsten/ /kyi hud lam las nyams pa yi/ /skye bo dag ni nyam ngar gnas/ /mi bzad mya ngan 'brog dgon du/ /lam gol gyur pa dag dang mtshungs/ /mig ldan lam log 'gro ba ltar//lam las nyams pa'i skye bo smad/ /de la lam sbyangs pa gang zhe na/ 'dir las dang po pa'i sa ni lam gyi dang po ste/ de sbyang ba ni dbye ba rnam pa du ma dang ldan pa'i dkon mchog gsum legs par shes nas phyag 'tshal ba dang / rgya cher mchod pa dang /yon tan brjod pas bstod pa dang / snying thag pa nas skyabs su 'gro ba dang / rjes su dran pa bsgoms pas bslab pa la slob pas skyabs phun sum tshogs pa yin/ mi dge ba bcu'i nyes pa shes pa dang / dge ba bcu'i yon tan shes pa dang / dge ba bcu'i sdom pa len pa dang /blangs pa slar mi gtong ba dang / lan 'ga' nyams na yang chos bzhin du slar 'chos pas sdom pa la gnas pa yin/ byang chub sems kyi phan yon legs par shes pa dang / de skye ba'i rgyu la gnas pa dang / sems de yang dag par bskyed pa dang / bskyed pa'i mi mthun pa'i phyogs ring du spong ba dang /sems de 'phel zhing mi brjed pa'i chos la gnas pas byang chub kyi sems la gnas pa yin pas/ de ltar chos rnam pa gsum la rnam pa bco lngar phye ba 'di ni 'dir sa sbyang ba'i gzhi dang / rten dang / gnas zhes bya'o/ /de gzhi de lta bu la brten nas/lam gyi dngos gzhi gang / ji ltar sbyang zhe na/ gzhi de dag la legs par gnas pas 'jug pa byang chub kyi sems blang ba byas nas/ ji ltar blangs pa'i sdom pa las mi 'da' bar byams pa tshad med pa bsgom pa dang / dran pa nye bar gzhag pa bzhi bsgom zhing / yang dag par spong ba bzhi la gnas par bya ste/ 'di ni las dang po pa'i sa'i dngos gzhi yid la bya bas/ rim gyis 'phags pa'i bden pa la 'jug par bya'o/ /de yang dran pa nye bar gzhag pa dang / yang dag par spong ba bzhi grub nas/ ting nge 'dzin gyi ngo bo rdzu 'phrul gyi rkang pa bzhi la gnas pa na/sa de nyid kyi khyad par thar pa'i cha dang mthun pa'i dge ba'i rtsa ba bskyed pa yin te/ bdag dang gzhan gyi 'byor pa dang / /'dun dang tshul khrims dbang po dang / /de bzhin zas dang mi nyal dang / /shes bzhin du ni mi spyod dang / /de bzhin dge ba'i bshes gnyen dang //dam chos nyan dang sems pa dang / /bar chad med dang gtong ba dang / /dge sbyong brgya ni tha ma yin/ /dad ldan g.yo med nad nyung dang / /brtson 'grus shes rab 'dod chung dang / /chog shes gso sla dgang sla dang / /sbyangs dang mdzes dang drod rig dang / /skyes bu dam chos mkhas rtags dang //bzod dang des dang gya nom pa'o/ /zhes bya ba'i yon tan dang ldan la/ de las gzhan pa theg pa chen po'i tshogs lam gyi khyad par lus la dbang ba la sogs pa dang / snying rje chen po'i sgo sngon du gyur pas sdug bsngal ba mthong ba na rang dbang med par mchi ma'i rgyun 'bab pa la sogs pa 'byung ngo //de ltar byang chub sems dpa'i sdom pa dang / byams pa'i ting nge 'dzin dang / dran pa nye bar gzhag pa dang / yang dag par spong ba dang / rdzu 'phrul gyi rkang pa bzhi po snga ma'i rten dang bcas pa 'di ni/ tshogs kyi lam dang / las dang po pa'i sa dang / dad pa'i sa zhes bya'o/ /da ni 'dir nyin mtshan gyi cha las yang dag par spong ba bzhi la gnas pas lam sbyang ba brjod pa/ tho rangs mal nas langs nas ni/ /bzhi gsum dran pas brtul zhugs mchog /bdag gzhan brje dang 'jig rten gyi/ /chos brgyad mnyam par mos pa bskyed//de nas yid ni bsdus pa yi/ /kye ma sems can bde 'gyur bsam/ /de nas lus dang tshor ba dang / /sems dang chos ni mi gtsang dang / /sdug bsngal mi rtag bdag med ces/ /phyin ci log bzhi'i gnyen po bsgom/ /re re'am yang na rim gyis kyang / /nam langs bar du 'bad pas bsgom//gang zhig lus can grol 'gyur ba'i/ /lam gyi dang po 'di nyid yin/ /de nas nam ni langs pa dang / /ci rigs gtsang sbra byas nas ni/ /mchod rten phyag 'tshal maN+Dal bya/ /sdig bshags la sogs rgyas byas te/ /lhag par skyabs su 'gro ba dang //byang chub sems ni brtan po bskyed/ /ci rigs bskor ba byas nas ni/ /bla ma dang ni rgan po dang / /chos smra ba la'ang phyag byas te/ /'dzum zhing snyan par smra ba dang / /de dag dgos pa 'bad de bsgrub/ /bar der dus ni nyer gnas na/ /chos bshad la sogs sems can don//rang bde btang la 'bad pas bsgrub/ /khye'u sus la sogs zas la spyod/ /dkon mchog sprin las gsungs pa bzhin/ /cha bzhir bgos te bza' bar bya/ /lhag par phongs la bza' btung bgo /snga dro yi ni dus dag tu/ /bri dang klog pa la sogs pa'i/ / chos spyod bcu la 'bad pa'am/ /tsha tsha bya'am 'gro phan gdags/ /dus kyi dam pa snga dro ni/ /don med 'da' bar mi bya'o/ /nyi ma'i gung la byams pa dang / /dran pa nyer gzhag cung zad bsgom/ /de nas yang ni phyag 'tshal sogs/ /snga ma bzhin du rgyas par bya/ / phyi dro skye bo dam pa dang / /'grogs shing ngal so bden don la/ /'gro zhing srid las yid 'byung ba'i/ /legs bshad ro ni myang bar bya/ /phyi 'phred slar yang snga ma bzhin/ /zhi gnas lhag mthong bsgom pa dang / /mchod rten phyag 'tshal la sogs bya/ /dmar thag chad nas mtshan mo ni//bla ma'i bsnyen bkur tshul bzhin bya/ /rang gi rkang pa bkrus nas ni/ /zhi gnas lhag mthong bsgom pa'am/ /don chen ldan pa'i kha ton bya/ /nam gyi cha stod 'das pa dang / /tshul bzhin yid la byed pa yis/ /rigs pa bzhin du nyal bar bya/ /nyin par dang ni mtshan mo yang //lag bzangs kyis ni zhus pa dang / /rin chen phreng ba las bshad ltar/ /sna tshogs dge ba'i phyogs la 'bad/ /de nas tshe 'di nyid la yang / /drod la sogs pa thob par 'gyur/ /de ltar thos pa dang bsam pa la gnas pas tshogs kyi lam phal pa dang khyad par can sbyang ngo //de las gong du bsgom pa la byang bas mos pas spyod pa'i sa dag la dbang po dang stobs kyi bden pa dag bsgoms pa'i sa sbyang ba ni dkon mchog sprin la sogs par blta zhing / rab tu dga' ba la sogs pa'i sa sbyang ba ni sa bcu'i le'u las bstan to//rgyal ba'i sras kyi sa yi dang po pa/ /tshogs kyi sa ste de sbyangs mdor bsdus pa/ /cung zad bshad las dge ba gang thob pa/ /des ni 'gro rnams dag pa'i sa thob shog /las dang po pa'i sa sbyang ba zhes bya ba slob dpon mkhas pa chen po byang chub sems dpa' dgra las rgyal gsang ba'i zhal snga nas mdzad pa rdzogs so/