CLOSE WINDOW

D3931
བོད་ཡིག

dge slong tshul khrims rgyal bas bsgyur cing zhus te gtan la phab pa //[ ]@##/ /rgya gar skad du/ ma d+h+ya ma u pa de sha br-it+ti/ bod skad du/ dbu ma'i man ngag ces bya ba'i 'grel pa/ 'phags pa 'jig rten dbang phyug la phyag 'tshal lo/ / 'gro ba'i sdug bsngal sel mdzad cing / /dkar po rnam par 'phel ba'i rgyu/ /byang chub sems la phyag 'tshal nas/ /dbu ma'i man ngag gsal bar bya/ /phyin ci log gi rnam rtog gis/ /'khor ba'i 'dam du bying ba rnams/ /man ngag lam la rab brten nas//yang dag byang chub bsgrub pa'i phyir/ /man ngag don tsam bshad par bya/ /de la/ gang gi gsung gi 'od zer gyis/ /zhes bya ba la sogs pas ni yul yon tan dang ldan pa la phyag 'tshal ba rtsom par byed do/ /de slob dpon de dag nyid ya rabs dam pa nyid du shes par bya ba'i phyir ram/bar chad kyi bgegs zhi bar bya ba'i phyir ram/ bshad par dam bca' ba'i phyir dgongs pa yin no/ /tshigs su bcad pa 'dis ni bsdus pa'i don gnyis bstan te/ yon tan brjod pas mchod pa dang phyag 'tshal bas mchod pa dang / yon tan yang gzhan gyi don phun sum tshogs pa dang /rang gi don du 'du shes par bya'o/ /gzhan gyi don la yang rgyu dang 'bras bu ste/ de la/ gang gi gsung gi 'od zer gyis/ /zhes bya bas ni rgyu phun sum tshogs pa bstan to/ /bdag sogs rmongs pa ma lus pa'i/ /snying gi pad+ma kha 'byed pa/ / zhes bya bas ni 'bras bu phun sum tshogs pa bstan to/ /dam pa'i skyes mchog ces bya bas ni rang gi don mthar thug pa ston par byed do/ /rnams zhes bya ba ni du ma'o/ /'dud ces bya ba ni phyag 'tshal ba'i tshig go/ /yan lag gi don bshad par bya ste/ gang gi zhes bya ba ni byed pa po'i tshig gam/spyi'i sgra yin yang yul gzhan rnam par spangs nas rten sangs rgyas kho na la 'jug par gsal te/ sangs rgyas kyi yon tan brjod pas mchod pa dang / phyag 'tshal bas mchod pa'i skabs yin te/ khra mo bos zhes bya ba dang 'dra ste/ spyi sgra yin yang 'o ma dgos pa'i skabs su ba khra mo la 'jug go//gsung gi 'od zer zhes smos pas ni sku gsung thugs kyi 'od zer yang bstan no/ /dkar po dang / dmar po dang / sngon po dang / nyi zla'i 'od dang 'dra ste/ nyi ma shar bas 'od kyis mun nag chen po sel bar byed pa dang / me tog la sogs pa kha 'byed par byed pa dang /sman dang 'bras bu sna tshogs smin par byed pa dang / ba mo la sogs pa grang ba'i rig pa'i gdug pa zhi bar byed pa dang / dro ba'i rag pas sems can bde bar byed pa dang / lam dang lam ma yin pa dang / dngos po mi gsal ba gsal bar byed pa dang /skar ma la sogs pa'i 'od gzhan dag zil gyis gnon par byed do/ /de bzhin du bcom ldan 'das kyi sku gsung thugs kyi sgo nas rnam thar bsam gyis mi khyab pa'i chos bstan pa'i 'od zer gyis 'gro ba rnams kyi ma rig pa'i mun pa sel bar byed pa dang /blo'i pad+ma kha 'byed par byed pa dang / rgyud ma smin pa kun smin par byed pa dang / bdud la sogs pa'i gnod pa zhi bar byed pa dang / sems can thams cad kyi sdug bsngal zhi bar byed pa dang / bla na med pa'i bde ba la 'god par byed pa dang / lta ba ngan pa sel bar byed spong bar byed pa dang /lha la sogs pa'i rnam par smin pa'i 'od zil gyis gnon par yang mdzad do/ /de yang mog mog por mdzad dang zhes pas kyang bstan to/ /'od zer gyis zhes bya ba ni byed pa po'i bya ba ston par byed do/ /'byed par byed ces bya ba ni las su bya ba ston par byed do//bdag sogs zhes smos pas ni slob dpon bdag la sogs pa ste go sla'o/ /rmongs pa zhes bya ba ni de kho na nyid kyi don mngon du ma gyur pa'i phyir ro/ /ma lus pa zhes bya bas ni bcom ldan 'das kyi thugs rje nyi tshe ba ma yin pa dang / kun la khyab pa dang thams cad kyi don mdzad par zhugs pa'i phyir ro//snying gi pad+ma kha 'byed pa/ /zhes pa ni sems kyi rten du gyur pa'i snying ste/ rten gyi ming brtan pa la brtags pa ste/ de'i phyir/ sems kyi pad+ma kha 'byed pa/ /zhes bya ba'o/ /de yang pad+ma dang 'dra ste/ pad+ma ni mthong na dga' ba bskyed pa dang dri dang kha dog sna tshogs pa dang /sbrang rtsi la sogs pa'i 'byung gnas yin pa dang / 'dam nas skyes kyang 'dam gyis ma gos shing khyad par du 'phags pa'o/ /de bzhin du sems kyang dga' gdung sna tshogs kyi gnas yin pa dang / lhan cig skyes pa'i bdud rtsi'i ro myong bar byed pa dang /byang chub rin po che'i 'byung gnas su gyur pa dang / glo bur ba'i dri ma dang bcas kyang rang bzhin gyis 'od gsal zhing rnam par dag pa ste/ de yang / chu khams gser dang nam mkha' rnams/ /dag pa bzhin du dag par 'dod/ /ces bya ba dang /sems kyi rang bzhin sangs rgyas te/ /sangs rgyas gzhan du ma tshol cig /ces bya bas kyang bstan to/ /kha 'byed pa zhes bya ba ni pad+ma kha 'byed pa dang 'dra ste/ rig pa'i gnas rnam pa lnga la blo rgyas par byed do/ /de yang / gang zhig 'dzin dang 'don dang spyod pa dang / / gzhan la 'dri zhing thos pa 'dzin byed dang / /de yi blo ni nyi ma'i 'od zer gyis/ /pad+ma bzhin du rnam par kha 'byed do/ /zhes bya ba dang / yang / rig pa'i gnas lnga dag la mkhas par ma byas na/ /'phags mchog cis kyang thams cad mkhyen nyid 'grub mi 'gyur/ /de phyir gzhan dag tshar gcad rjes su gzung phyir ram//bdag nyid goms par bya phyir de la de brtson byed/ /ces bya bas kyang bstan to/ /dam pa'i skyes mchog ces bya bas ni spangs pa dang ye shes phun sum tshogs pa'i bdag nyid la bya ste/ sku gsum gyi ngo bo nyid do/ /de la 'dud ces bya ba ni phyag 'tshal bar byed pa ste lus ngag yid gsum gyi las dge ba'o//da ni man ngag dngos su bstan par bya ste/ de la theg pa chen po dbu ma'i man ngag ni 'di yin te zhes bya ba la sogs pas ni rgyu thos bsam bsgom gsum gyi shes pas mdor bsdus te ston par byed pa yin te/ de la theg pa ni rgyu'i theg pa dang 'bras bu'i theg pa ste/rgyu ni byang chub sems dpa' rnams kyi lam ste 'di nas 'gro ba'i phyir ro/ /de yang sngags kyi theg pa'i tshul du bshad pa dang / pha rol tu phyin pa'i theg pa'i tshul du bshad pa ste/ gzhan nas bshad pa bzhin no/ /'bras bu'i theg pa ni sku gsum gyi bdag nyid de/bgrod par bya ba yin pa'i phyir ro/ /chen po ni shes rab dang snying rje la sogs pas che ba ste/ de yang / gtong ba che dang blo che ba dang mthu che ba/ /zhes bya bas kyang bstan to/ /de la shes rab chen pos ni chos thams cad sgyu ma lta bur shes shing ci la yang ma chags pa'o//snying rje chen pos ni sems can gyi don rgyun mi gcod pas thabs dang shes rab 'brel pa zhes bya ste/ byang chub sems dpa' rnams kyi lam yin no/ /shes rab dang snying rje la sogs pa chung ba ni theg pa chung ngu zhes bya ste/ de yang / thabs med shes rab bral ba nyan thos nyid du ltung //zhes bya bas kyang gsungs so/ /de'i phyir nyan thos ni mya ngan las 'das pa'i mthar ltung ste/ phung po lhag ma dang bcas pa dang lhag ma med pa'i mya ngan las 'das pa mngon sum du byas nas sems can gyi don yal bar dor ro/ /so so'i skye bo rnams ni 'khor ba'i mthar ltung ste sdug bsngal sna tshogs nyams su myong ngo //byang chub sems dpa' ni mtha' de dag spangs te/ shes rab chen pos ni 'khor ba'i mtha' la mi gnas/ thugs rje chen pos ni mya ngan las 'das pa'i mtha' la mi gnas pas de ni mtha' gnyis la mi gnas pa'i mya ngan las 'das pa zhes bya'o//de yang mi gnas pa'i mya ngan las 'das pa zhes bya ba dang / stong pa snying rje dbyer med pa/ /rgyud gang la ni rab brten pa/ /'jig rten mgon gyi sgrub thabs te/ /'di ni sangs rgyas kun gyis bshad/ /ces bya bas gsungs so//de'i phyir theg pa chen po ni shes rab dang snying rje yin no/ /dbu ma ni mtha' thams cad dang bral ba dang / snying po'i don gyi dbu ma ste/ de yang sgra dang don to/ /don gyi dbu ma ni bden pa gnyis te 'og nas bshad do/ /sgra'i dbu ma ni dbu ma brjod pa'i sgra ste/ mtha' gnyis spong ba'i tshig gdags pa tsam mo/de'i man ngag ni gces spras su bya ba ste/ tshegs chung ngus don chen po rtogs pas na man ngag ste/ de bsgom zhes bya bar sbyar te 'og nas 'chad do/ /thog ma med pa nas zhes bya ba ni 'khor ba thog ma tha ma med pa'o/ /dngos por zhen pa ni bden par zhen pa'o//gzung 'dzin la sogs par ro/ /bden pa gnyis su bzhag go zhes bya ba ni yang dag par na gcig dang tha mi dad par bstan te/ gcig na ni kun rdzob spong ba bzhin du don dam pa yang spong ba nyid du 'gyur la/ kun rdzob tha dad pa bzhin du don dam pa yang tha dad par 'gyur ro//kun rdzob dri ma dang bcas pa bzhin du don dam pa yang dri ma dang bcas par 'gyur ro/ /tha dad na ni chos can dang chos nyid du yang mi 'gyur la/ 'dus byas kyi mtshan ma zil gyis gnon par yang mi 'gyur te/ lam sgom pa yang don med par 'gyur ro//de bas na de nyid dang gzhan du brjod du med do/ /rgyas par ni gzhan nas bshad pa bzhin no/ /de yang ji skad du zhe na/ 'du byed khams dang don dam mtshan nyid ni/ /gcig dang tha dad nyid las rnam par grol/ /gcig dang tha dad nyid du gang rtog pa//de ni tshul bzhin ma yin log zhugs yin/ /zhes gsungs pa dang / yang dung la sogs pa'i dkar po nyid bzhin du de nyid dang gzhan pa las grol bar bstan te mdor bsdus pa'i don to/ /yan lag rgyas par bshad de kun rdzob tu chos thams cad ces bya ba la sogs pa ni thos bsam las byung ba'i shes pas chos thams cad bden pa gnyis kyi tshul du slob pa zhes bya bar ston to//de la kun rdzob ni 'khrul pa'i shes pa ste/ de kho na nyid kyi don la sgrib pa ni gzhan du ji ltar bshad pa bzhin no/ /chos thams cad ni ma lus pa'i don te go sla'o//tshu rol mthong ba ni bden pa ma mthong ba rnams so/ /ngor byas pa ni zhen pa'i bsam pa dang sbyar ba'o/ /rgyu 'bras la sogs pa ni phung po dang khams dang skye mched la sogs pa rnams so/ /ji ltar snang ba ni ma brtags na nyams dga' ba ste/ snang la rang bzhin med pa'i don te/de yang / gang dag rten nas dngos po rnams/ /chu yi zla ba lta bur ni/ /yang dag ma yin log min pa/ /'dod pa de dag ltas mi 'phrogs/ /zhes bya bas kyang bstan te/ bden pa ni don byed nus pa nyid du bden pa dang / snang ba tsam du bden pa ste/brtags shing dpyad na bden par ma grub ces bya ba'i don to/ /de yang / rigs pas brtags na bden ma yin/ /de las gzhan du bden pa ste/ /des na dngos po gcig nyid la/ /bden dang mi bden ji ltar 'gal/ /zhes bya bas kyang bstan to/ /don dam par zhes bya ba ni yang dag pa'i shes rab ste/yang dag pa'i don la mi slu bas sam 'bras bu dam pa 'byin pas ni don du gnyer ba byas pas dam pa ste/ des brtags na 'ga' yang grub pa med do/ /kun rdzob tu ji ltar snang ba ni phyi dang nang gi dngos po rnams so/ /gtan tshigs chen po zhes bya ba ni gtan tshigs ni bsgrub bya sgrub pa la mi slu bas na gtan tshigs te/tha snyad kyi tshad ma las rang bzhin 'brel pa yod na don gyis go /zhes bya bas kyang bstan to/ /chen po ni du ba la sogs pa'i tha snyad kyi gtan tshigs la ltos te chen po yin la/ de dag ni tha snyad kyi don la mi slu ba yin no//'dir ni yang dag pa'i don la mi slu ba dang / dngos po'i bye brag thams cad 'joms par byed pa dang / lta ba ngan pa'i gdon thams cad zhi bar byed pa dang / spros pa'i mtha' thams cad 'gog par byed pas na chen po'o/ /de bas na/ rgyal ba kun gyi stong nyid ni//lta kun nges par sel ba yin/ /zhes bya bas kyang gsungs so/ /rnams kyis ni rnam pa bzhi ste/ de yang / gang gi rten cing 'brel par 'byung / /'gag pa med pa skye med pa/ /zhes bya ba dang / rang las ma yin gzhan las min/ /gnyis las ma yin rgyu med min//dngos po gang dag gang na yang / /skye ba nam yang yod ma yin/ /zhes bya ba dang / du mas dngos po gcig mi byed/ /du mas du ma byed ma yin/ /gcig gis du ma'i dngos mi byed/ /gcig gis gcig byed pa yang min/ /zhes bya ba dang / bdag dang gzhan smras dngos 'di dag /yang dag tu ni gcig pa dang / /du ma'i rang bzhin bral ba'i phyir/ /rang bzhin med de gzugs brnyan bzhin/ /zhes bya ste/ sbyor ba'i cha gcig tsam mo/ /rgyas par ni gzhan du bshad pa bzhin no/ /gshegs shing bsal ba ni phyogs cha'i dbye bas te/cha bcu drug gam bcu la sogs pa'i brtags pas so/ /skra'i rtse mo brgyar gshags pa'i tshad ni shin tu yang phra ba'i tshad do/ /khong du chud pa ni thos bsam gyi shes pas chos thams cad bden pa gnyis kyi tshul du bslab par bya'o zhes bya bar ston to/ /de yang slob pa'i sngon du 'gro ba ni thos bsam gyi shes pa ste/thos bsam byas nas sgom pa ni/ de yang / mang du thos pa nags kyi nang dag tu/ /lang tsho yol ba rnams kyi gnas pa bde/ zhes bya ba dang / yang dag shes tshol sngon btang ste/ /zhes bya bas kyang bstan pa'o//da ni man ngag bsgom pa'i rim pa bstan par bya ste/ man ngag ni gong du bshad la/ bsgom pa ni sbyor ba dang / dngos gzhi dang / rjes rnam pa gsum mo/ /stan bde ba la skyil mo krung gis 'dug ste zhes bya bas ni ting nge 'dzin gyi sbyor ba bstan te/ sems can thams cad mi spong ba'i bsam pa dang /brtson 'grus chen po tshad med pas byang chub chen po bsgrub pa'i sems pa'o/ /re zhig dngos po ni gnyis te zhes bya bas ni brtag pa'o/ /gzugs can dang gzugs can ma yin pa ni phan tshun spangs te gnas pa'i mtshan nyid kyi 'gal ba yin pas dngos po kun la khyab ste phung po gsum pa sel bar byed do//de la gzugs can nam zhes bya bas ni gzugs ma grub par ston te/ de yang rgyu dang 'bras bur 'dod do/ /de la rgyu ni 'byung ba bzhi po rdul phra rab yin la/ de yang cha du mar dmigs pas cha med pa'i gcig pu mi 'grub bo//gcig pu ma grub na du ma nyid kyang mi 'grub ste/ du ma ni gcig la sogs pa'i ngo bo yin no/ /de ltar gcig dang du ma ma gtogs par phung po gzhan yang mi 'grub ste/ gcig dang du ma ma gtogs par/ /rnam pa gzhan dang ldan pa yi/ / dngos po mi rung 'di gnyis ni/ /phan tshun spangs te gnas phyir ro/ /zhes ji skad bshad pa lta bu'o/ /de ltar yang rdul phra rab ma grub na 'bras bu'i gzugs kyang mi 'grub ste/ sa bon med na myu gu 'gags pa bzhin no/ /de yang / de ltar rtsom byed med pa'i phyir/ / rdzas la sogs pa gsal zhes bya bas bstan to/ /shin tu snang ba yang med do/ /zhes bya ba dang / snang ba ni mtshan ma ste/ 'ching ba'i rgyu yin pas na mtshan ma mi 'byung ngo zhes bya ba'i don to/ /da ni sems kyi mtshan ma ma dmigs pa nyid du ston pas gzugs can ma yin pa zhes bya ba smos so//de la don byed nus pa ni skad cig ma yin pas skad cig gi cha dbye bar bya ste/ de yang 'das pa ni dngos po zhig pas med do/ /yod na ni da lta nyid du 'gyur ro/ /ma 'ongs pa ni dngos po ma skyes pas med do/ /yod na ni da lta ba bzhin du ma 'ongs pa nyid du mi 'gyur ro//de'i phyir da lta ba'i sems shin tu brtag dka' ste zhes bya ba smos so/ /brtag dka' ba ni brtsal na dmigs su med pas so/ kha dog dang dbyibs dang bral ba ni sngon po dang ser po la sogs pa dang / ring po dang thung ngu la sogs pa dang bral bas so/ / gcig dang du ma dang bral bas ni gcig dang du mas brtag mi bzod de gzhan du bshad pa bzhin no/ /ma skyes pa ni yod pa dang med pa ma skyes pas so/ /rang bzhin gyis 'od gsal ba ni rang la mi rtog pa dang / dri ma dang bral bas ni rang bzhin gyis 'od gsal ba'o/ /stsogs pa smos pa ni mu bzhi skye ba dang bral bas sam/rang dang gzhan dang gnyis ka dang / rgyu med pa la sogs pa skye ba dang bral ba dang / yang dag par na yod med kyi mtha' las 'das te sgyu ma lta bu'o/ /rigs pa'i mtshon gyis zhes pa ni rigs pa nyid mtshon dang 'dra ste gcod par byed cing 'jig par byed pas so//ye shes snang ba'i rgyan las kyang / sangs rgyas rnams kyis nam yang ni/ /gtan du chos rnams thams cad dag /sems ma rnyed cing chos mkhyen pa/ /dmigs mi mnga' la phyag 'tshal bstod/ /ces gsungs so//ma grub par rtogs pas ni sbyor ba'i shes pas so/ /de ltar gnyis po ci'i ngo bor yang ma grub ces bya ba ni ting nge 'dzin gyis ston par byed do/ /gnyis po ni gzugs can dang gzugs can ma yin pa'o/ /ma grub pa ni don dam par ma grub pa ste/ gzhan gyi rtog pa bkag pa'o//so sor rtog pa'i shes rab de nyid kyang mi 'grub ste zhes bya bas ni bdag nyid kyi rtog pa 'gog par byed do/ /shes rab ni dngos po'i bye brag yin pas dngos po ma grub na shes rab de nyid kyang mi 'grub ste/ shing ma grub na sha pa la sogs pa bkag pa bzhin no/ / de yang bsreg bya tshig pa'i me/ /bsreg bya tshig nas mi gnas ltar/ /zhes pa dang / yang gong du bsdus pa'i tshul gyis sems ma grub na sems las byung ba yang mi 'grub ste/ nyi ma dang 'od zer bzhin no/ /sems ni de ltar bkag pa'i phyir//sems las byung ba rnams kyang bsal/ /zhes pa'o/ /dper na shing gnyis drud pa las/ me 'byung ba'i rkyen gyis zhes bya ba la sogs pa ni lung gi sgo nas 'chad par byed de/ so sor rtog pa'i shes rab ni me dang 'dra la/ rtog pa thams cad ni bud shing dang 'dra bar gsungs te/ji skad du/ 'gro ba'i chos kun rnam shes kyi/ /me yi bud shing yin par 'dod/ /de dag ji bzhin rnam 'byed pa'i/ /me yis bsregs na nye zhir 'gyur/ /zhes bya ba dang / so sor rtog pa'i me dag tu/ /mi dge'i rtog pa kun bsreg pas/ /zhes gsungs so//rang dang spyi'i mtshan nyid ces pa ni spyi'i mtshan nyid ni stong pa dang bdag med pa la sogs pa'o/ /rang gi mtshan nyid dga' ba dang gdung ba la sogs pa'o/ /shes rab de nyid ni mnyam par gzhag pa'i shes pa de nyid do/ /snang ba med pa ni bdag dang gzhan gyi rtog pa dang bral ba'o/ /de yang /gang tshe shes dang shes bya dag /bdag nyid rjes su mi mthong bas/ /de tshe mtshan ma mi 'byung phyir/ /gnas pa brten phyir mi bzhengs so/ /zhes bya bas kyang bstan to/ /'od gsal ba ni rang bzhin gyis rnam par dag pas so/ /mtha' dang bral ba ni rtag chad la sogs pa dang bral ba'o//cir yang ma grub pa ni gcig pa dang du ma la sogs pa gang du yang ma grub pas so/ /bying ba dang rgod pa la sogs pa thams cad ni ting nge 'dzin gyi skyon te/ de yang bying ba ni nang du rmugs pa'o/ /rgod pa ni sems rnam par g.yengs pa'o/ /stsogs pas ni mtshan ma gzhan dag kyang ngo //gnas skabs der ni mnyam par gzhag pa'i gnas skabs der ro/ /cir yang mi 'dzin pa ni gzung ba dang 'dzin pa'i rtog pa dang bral bas so/ /dran pa dang yid la byed pa thams cad spangs pa ni 'das pa dang ma 'ongs pa la dmigs pa'i rtog pa spangs pa'o/gzugs sdu gu la sogs pa spangs pa'o/ /rnam par rtog pa'i dgra'am chom rkun gyi dgra'am chom rkun dang 'dra ste/ ting nge 'dzin gyi nor 'phrogs pas dgra ste/ de'i phyir shes bzhin gyi bya ra bas de dag spang ba'o/ /de yang ji skad du/ sems kyi glang po log 'gro ba/ / dmigs pa'i ka ba brtan po la/ /dran pa'i thag pas nges bcings nas/ /shes rab lcags kyus rim dbang bya/ /zhes gsungs so/ /tha snyad du ni ma chen po dmigs na spu langs pa'i bye brag bkag pa bzhin no/ /de'i phyir tshogs gnyis bsags pas gnyis su snang ba bskyed par mi rigs so//gal te bcom ldan 'das ni sgyu ma'i mkhan po bzhin du sgyu ma la sgyu ma nyid du mkhyen cing bden pa nyid du zhen pa mi 'byung bas de nyid ma 'khrul ba yin no zhe na/ de lta na ni bdag tu smra ba rnams kyis kyang bdag la bdag rtag pa nyid du shes pa dang / nyan thos kyis kyang dngos po la dngos po nyid du shes pa dang /sems tsam du smra bas kyang rang rig la don dam nyid du shes pa de nyid ma 'khrul pa yin no zhes brjod na ji skad du smra bar bya/ gal te bdag la sogs pa ni dngos po ni shes bya la mi gnas te/ tshad mas gnod cing tshad mas ma grub pas na sgro btags pa tsam du zad pas der 'dzin pa ni 'khrul pa nyid du 'gyur gyi/sgyu ma tsam du ni tshad mas grub cing tshad mas mi gnod pa de ji lta ba bzhin du shes pa ni 'khrul par mi 'gyur ro zhe na de ni mi rigs te/ phyin ci ma log pa'i ye shes kyi shes bya la sgyu ma lta bur gnas pa ni gang du yang ma grub ste/ shes pa ma 'khrul ba'i shes bya la rab rib la sogs pa mi gnas pa bzhin no/ /gal te kun rdzob ji ltar snang ba bzhin du ma mkhyen na thams cad mkhyen pa'i ye shes su mi 'gyur ro zhe na/ de ltar na ni dbang po skyon med kyi mngon sum la sgyu ma'i rta dang rab rib la sogs pa mi snang bas mngon sum ma yin pa nyid du 'gyur ro//de'i phyir 'khrul pa spangs pa'i ye shes la brdzun pa mi rigs te/ brdzun pa snang na ni ye shes de nyid kyang 'khrul pa nyid du 'gyur te/ smig rgyu la chur shes pa bzhin no/ /de lta ma yin na yul de yang dngos po nyid du 'gyur ba dang / shes pa gang yang 'khrul pa nyid du mi 'gyur ro//de'i phyir mthar thug pa'i ye shes la gnyis su snang ba'i mtshan ma ga la 'byung / gnyis su snang ba dang mtshan ma 'khrul pa ni ming tsam tha dad kyi don tha dad med do/ /mdo las ji skad du/ rab 'byor gzugs ni mtshan ma'o//sgra ni mtshan ma'o zhes bya ba dang / yang / sangs rgyas drang srong chen po dang / /rgyal sras rnams kyi ting nge 'dzin/ /mtshan ma rnam par spangs pa yin/ /'jig rten rnams kyi mtshan par bcas/ /zhes bya ba la sogs pa lta bu'o/ /gal te kun rdzob med par dogs pa'i 'jigs pas skrag nas ye shes la kun rdzob mi snang na snang ba gsal bar 'gyur ro zhe na/de ni mi rigs te/ mi snang ba la gsal bas ma khyab pas ma nges pa nyid du 'gyur ro/ /dbang po skyon med kyi shes pa la zla ba gnyis pa dang / rab rib la sogs pa mi snang ste/ shes pa des de dag gsal ba ma yin pa bzhin no//shes rab dang ye shes kyis brtags na ni bden pa dang brdzun pa dang / yod pa dang med pa dang / chos gang yang gnas pa med pas rab tu mi gnas pa'i dbu ma zhes bya ste/ ji skad du/ gang blo yod dang med pa las/ /rnam par 'das shing mi gnas pa//de dag zab mo dmigs med pa'i/ /rkyen gyi don la rnam par bsgom/ /zhes gsungs so/ /'dis ni thos bsam gyi rim pa yang bshad pa yin no/ /de las gzhan du tha snyad kyi tshad ma'i yul du kun rdzob thams cad gnas pa yin pas bkag pa ni ma yin no//ting nge 'dzin ni dmigs pa la sems rtse gcig pa ste/ de ma thag tu bsam gyis mi khyab pa'i sku gsum 'grub pa'i rgyu nus pa thogs pa med pa yin no/ /mngon sum du byas phan chad ni/ /zhes pa ni yang dag par rdzogs pa'i sangs rgyas kyi sa thob phan chad ni mnyam pa nyid du byang chub pas ye shes kyi bye brag tha dad kyang chos kyi dbyings kyi rang bzhin du gcig ste/gang+gA dang / sin+d+hu dang / pak+Shu la sogs pa chu'i bye brag tha dad kyang rgya mtsho chen po'i rang bzhin du gcig ste/ ji skad du/ chos kyi dbyings la dbyer med phyir/ /rigs ni tha dad rung ma yin/ / zhes pa ste/ rten pa'i chos kyi bye brag gis/ /de yi dbye ba rab tu bshad/ /ces gsungs pas so/ /rjes thob mi mnga' ba ni mtshan ma mi 'byung bas so/ /dus ni snga phyi la sogs pa'o/ /mnyam par gzhag pa ni chos kyi dbyings las ma g.yos pas so/ /ji skad du/ glang chen bzhugs kyang mnyam par bzhugs/ /glang chen bzhengs kyang mnyam par bzhengs/ /zhes gsungs pa lta bu'o/ /de lta ma yin na zhes bya ba ni gnyis su snang ba'i mtshan ma 'byung na'o/ /khyad par med pa ni slob ma'i lam la gnas pa dang / khyad par med pa dang / gzung ba dang 'dzin pa'i 'khrul rtog ma spangs pa ste/mnyam pa nyid du byang chub par mi 'gyur bas gnyis su snang ba'i mtshan ma 'byung bar mi rigs pa'o/ /ji skad du/ byang chub nam mkha'i mtshan nyid de/ /mtshan ma thams cad spangs phyir ro/ /zhes bya ba dang / yang rab 'byor ye shes la yul med do//ye shes la yul yod na ye shes mi shes par 'gyur ro zhes gsungs pas mtshan ma ga la 'byung / gal te gnyis su snang ba mi 'byung na ye shes kyi snang ba rgyun chad par 'gyur ba dang / smon lam btab pa dang / tshogs bsags pa yang don med do snyam pa la/gzhan gyi don zhes bya ba la sogs pa smos te/ 'dis ni mi rtog pa'i ngang las gzugs sku gnyis 'byung zhing / sems can gyi don bsam gyis mi khyab pa mdzad par gsungs so/ /rnam rtog mi mnga' yang sems can gyi don 'byung ba ni 'gal ba med do/ / rgya mtsho las rlabs 'byung ba dang / nyi ma las 'od 'byung ba dang / yid bzhin gyi nor bu las dgos 'dod 'byung ba lta bu ste/ gzhan las kyang mchod sdong la sogs pa'i dpes rtog pa mi mnga' yang sems can gyi don 'byung bar bstan to/ /rigs pa ni gnod pa can gyi tshad ma'o/ / lung ni sangs rgyas kyi bka'o/ /mi brjod pa ni mangs kyis dogs pa'o/ /gzhan gyi don ni 'jig rten dang 'jig rten las 'das pa'i don no/ /bskal pa grangs med pa ni grangs las 'das pa'o/ /tshogs ni rgyu'i don de bsod nams dang ye shes kyi tshogs so/ /smon lam btab pa ni gzhan gyi don du'o//gdul bya rnams ni mig la sogs pa ste/ rgyud dag pa rnams kyi'o/ /ji ltar 'dod pa ni gang dang gang gis 'dul ba la de dang de'i ngo bor snang ba ste/ rigs sna tshogs pa bzhin du mos pa ji lta ba bzhin du 'gyur ba'o/ /ji skad du/mos pa du ma'i sems can la/ /spyod pa sna tshogs bstan pa yin/ /zab mo'i chos nyid bstan pa las/ /gal te mos par ma gyur kyang / /smad pa dag tu mi bya ste/ /chos nyid bsam mi khyab ldan bya/ /zhes gsungs so/ /dngos su ni bcom ldan 'das la sangs rgyas kyi sku la sogs pa dang /gnyis su snang ba'i mtshan ma mi mnga' ste/ de yang / chos kyi dbyings las ma g.yos shing / /mi rtog ngang la gnas pa'o/ /de yang ji skad du/ gang zhig nga la gzugs su mthong / /zhes gsungs so/ /de'i phyir chos kyi sku nam mkha' lta bu ste/nam mkha' la ni mtha' dang dbus dang kha dog du ma la sogs pa'i tha dad pa gang yang med kyang sems can rnams kyis mtha' dang dbus dang sngon po dang ser po dang tha dad du mar rtog go/ /gal te gzugs kyi sku la sogs pa la rtog pa mi mnga' na sems can gyi don mdzad pa 'di mi rigs so zhe na/de'i don ni gong du bshad zin to/ /nyi ma la rnam rtog mi mnga' yang 'od zer sna tshogs 'byung zhing dngos po gsal bar byed do/ /nyi ma'i dkyil 'khor de nyid 'od zer ma yin no/ /nyi ma'i dkyil 'khor de nyid 'od zer yin na khang pa'i nang la sogs pa dang /yul 'di nyid du gnas par 'gyur la/ dkyil 'khor de nyid kyang tha dad par 'gyur ro/ /'od zer de nyid kyang nyi ma'i dkyil 'khor ma yin te/ de nyid yin na nam mkha' de nyid du gnas par 'gyur la/ dngos po kun gsal bar byed par yang mi 'gyur ro/ / de'i phyir de la de nyid 'od zer ma yin yang de las 'od zer 'byung zhing dngos po kun gsal bar byed do/ /de nyid kyi phyir mdo las sangs rgyas nam mkha' lta bu ste/ sems can rnams ni ri lta bu'o zhes gsungs pas bsam gyis mi khyab bo/ /mar me mdzad kyi dgongs pa dpag dka' zhing //dbu ma'i don chen blo yi yul min yang / /mi shes bshad 'dod ston pa'i don ched du/ /man ngag gsal por pradz+nyA mo k+Shas byas/ /dge ba 'di yi bsod nams gang thob des/ /sa chu me rlung nam mkha' gnas kyi bar/ /bstan pa rin chen 'jig rten gnas gyur nas//'gro ba byang chub go 'phang thob par shog /dbu ma'i man ngag gi 'grel pa paN+Di ta shes rab thar pas mdzad pa rdzogs so// //rgya gar gyi mkhan po shes rab thar pa de nyid dang / dge slong tshul khrims rgyal bas bsgyur cing zhus te gtan la phab pa'o// //