CLOSE WINDOW

D3922
བོད་ཡིག

@##/ /pha rol tu phyin pa'i theg pa'i bsgom pa'i rim pa'i man ngag sangs rgyas dang byang chub sems dpa' thams cad la phyag 'tshal lo/ /gang zhig bsgoms stobs kyis yongs rdzogs/ /tshogs gnyis kyi ni rgyur gyur pa/ /sangs rgyas nyid la yang dag brtan/ /bsgom pa'i skal dang mi ldan pa//de'i phyir 'gro ba'i mgon po yis/ /shes rab zhi gnas bsgom pa gsungs/ /de ni brtse chen rdzogs byang chub/ /'gro ba'i rgyud la skyed byed yin/ /gang yang bsgoms pa'i stobs las nges par 'byung ba'i bsod nams dang ye shes gnyis kyi rgyu/ kun tu bzang po nyid la rgyun mi 'chad par mngon par brtson pa'i rnal 'byor pas dus yun ring po mi thogs par rdzogs pa mngon sum du byed la/ de byed pa'i skal ba med pa de rnams kyi phyir thugs rje chen po dang ldan pa'i mgon pos zhi gnas dang lhag mthong zung du 'jug pa'i lam nye bar bstan pa mdzad pa yin te/de ltar na de bsgoms pas bcom ldan 'das yum shes rab mngon sum du byas nas/ de'i rang bzhin gyi sbyin pa la sogs pa'i bya ba'i dngos po'i thabs la bslabs pa las sangs rgyas nyid du mngon par 'grub par 'gyur ro zhes dgongs pa yin no//de yang snying rje chen po skyes nas byang chub kyi sems bskyed la/ de nyid gong nas gong du rnam par rtog pa spangs pa'i tshul gyis rnam par rtog pa spongs pas yongs su dag pa bskyed par bya ba'i phyir sgom par byed do/ /snying rje chen po dang ldan pas ni gzhan gyi sdug bsngal gyis sdug bsngal ba nyid kyis 'di dag thams cad nyid sdug bsngal rnams las bton la/sangs rgyas nyid la nges par sbyar bar bya'o zhes byang chub kyi sems skyed par byed cing 'di rnams kyang dam bcas pa'i gnyis su med pa'i ye shes kyi ngo bo dang / sbyin pa la sogs pa'i bya ba'i dngos po'i thabs la bslab pa med par de gong nas gong du yongs su dag pa med par rdzogs par mi 'gyur ro snyam du dgongs nas/gnyis su med pa'i ye shes rdzogs par bya ba'i phyir zhi gnas dang lhag mthong zung du 'jug pa'i lam yang sgom par mdzad do zhes bya ba ni mdor bsdus te bstan pa yin no//byang chub kyi sems de yang rnam pa du zhig ce na/ smras pa/ byang chub sems gang gzhan don du/ /yang dag byang chub 'dod pa yin/ /de ni dbye ba gnyis kyis gnyis/ /de dag nyi shu gnyis su 'ang 'gyur/ /byang chub kyi sems ni smon pa'i sems dang 'jug pa'i sems so//de yang sdong po bkod pa las/ rigs kyi bu sems can gyi tshogs ni gang bla na med pa yang dag par rdzogs pa'i byang chub kyi sems rnyed par dka' ba'o/ /de bas kyang sems can bla na med pa yang dag par rdzogs pa'i byang chub la mngon par zhugs pa de ni ches rnyed par dka'o zhes gsungs pa yin no//gnyis po de dag kyang rnam pa nyi shu rtsa gnyis su dbye ba bya ste/ de yang 'phags pa byams pas/ de yang sa gser zla ba me/ /gter dang rin chen 'byung gnas mtsho/ /rdo rje ri sman bshes gnyen dang / /yid bzhin nor bu nyi ma glu/ /rgyal po mdzod dang lam po che//bzhon pa bkod ma'i chu dang ni/ /sgra snyan chu bo sprin rnams kyis/ /rnam pa nyi shu rtsa gnyis so/ /zhes bshad pa yin no/ /de la yang 'di ltar blta bar bya ste/ 'dun pa'i gnas skabs stsogs dbye bas/ /smon pa'i sems ni rnam pa gsum/ / 'jug pa zhes ni bya ba'i sems/ /rnam pa bcu dgu dag tu 'dod/ /de la smon pa'i sems rnam pa gsum du dbye ste/ 'dun pa dang lhan cig 'dres pa'i chos thams cad mngon par byang chub par 'dod pa'i mtshan nyid can ni sa lta bu yin no/ /bsam pa dang lhan cig 'dres pa ni pha rol tu phyin pa drug gi mtshan nyid de/phyis 'byung ba dang da ltar gyi 'gyur ba med pa'i phyir gser bzang po lta bu yin no/ /lhag pa'i sems dang 'dres pa ni byang chub kyi phyogs kyi chos sum cu rtsa bdun bsgom par 'dod pa'i mtshan nyid can des dkar po'i phyogs thams cad 'phel bar 'dod pa'i tshul gyis zla ba tshes pa lta bu yin no//'jug pa'i sems kyi dbye ba ni rnam pa bcu dgu ste/ sbyor ba dang 'dres pa gcig dang / sbyin pa la sogs pa pha rol tu phyin pa bcu dang / mngon par shes pa dang ldan pa dang / bsod nams dang ye shes dang ldan pa dang / byang chub kyi phyogs dang ldan pa dang / zhi gnas dang lhag mthong dang ldan pa dang / gzungs dang spobs pa dang ldan pa dang / chos kyi skyed mos tshal dang ldan pa dang / bgrod pa gcig pa'i lam dang ldan pa dang / chos kyi sku dang ldan pa'o/ /'di yis de dag ma lus khyab/ /de bas gnas skabs rnam bzhi ste/ /'bras bu rgyu dang sbyor sogs dang //lam gyi gnas skabs dbye bas so/ /de la gsum ni las dang po pa'i gnas skabs so/ /bzhi pa ni nges par 'byed pa'i cha'i gnas skabs so/ /sbyin pa la sogs pa'i pha rol tu phyin pa'i sems kyis ni rgyu'i gnas skabs so/ /mngon par shes pa la sogs pa'i gnas skabs dang lhan cig gnas pa brgyad kyis ni 'bras bu'i gnas skabs khyab pa yin no//de la dang po mgon po yis/ /gsol ba'i rnam pa yang dag bshad/ /gnyis pa sbyin sogs la 'jug pa/ /'jug pa'i rnam pa rab tu bsgrags/ /gsol ba'i sems kyi rnam pa ni gsum ste de yang sngar bshad pa yin no//'jug pa'i rnam pa ni gang nas brtsams te/ sdom pa 'dzin pa sngon du 'gro bas sbyin pa la sogs pa'i tshogs la 'jug pa ni 'jug pa'i sems so/ /sdom pa yang bla ma sdom pa la gnas shing mkhas pa nus pa dang ldan pa las blang bar bya'o/ /de med na sangs rgyas dang byang chub sems dpa' rnams mdun du bzhugs par yid la byas la blang bar bya'o//de yang / sbyin sogs shes rab dang bral ba/ /thabs ma yin zhing sa ma yin/ /de bas shes rab bskyed bya zhing / /zhi gnas kyang ni bskyed par bya/ /shes rab med pa ni sbyin pa la sogs pa pha rol tu phyin pa'i ming mi thob cing thabs kyang ma yin no//de bas na shes rab skyed pa'i phyir dang zhi gnas bskyed par bya ba'i phyir 'bad par bya'o/ /de la/ gang zhig khrims ldan sdug bsngal bzod nus dang / /gang la brtson dang bag yod brtan pa 'chang / /gang tshe yang dag dang yang ldan gyur te/ /de yi ting 'dzin myur du yongs su rdzogs par 'gyur//zhi gnas kyi tshogs tshul khrims la sogs pa gsum la gnas pas yid dang rjes su mthun pa'i phyogs su stan bde ba la 'dug ste lus drang por bzhag la/ snying rje chen po mngon sum du byas te/ sems can ma lus pa gdon par 'dod pa'i bsam pas sems rtse gcig pa'i mtshan nyid can gyi ting nge 'dzin bskyed par bya'o//de la man ngag ni 'di yin te/ khams sogs dbye ba dngos po thams cad la/ /yang dag dmigs de ji srid mnyam gzhag thob/ /de srid yid ni skad cig re re gzhug /dang por re zhig rnal 'byor pas khams la sogs pa'i rnam pa'i dbye bas dngos po ma lus pa rgya cher rnam par dpyad la/chos thams cad ni 'di tsam du zad do zhes de ltar nges par bya ste/ yang sems kyi rgyun gyi skad cig mas de nyid du gtad par bya'o/ /gal te yid ni chags sogs kyis g.yengs gyur/ /mi gtsang la sogs gnyen por bsgom pa yis//ji srid de ni brtan pa ma thob pa/ /de srid blo dang ldan pas de zhi bya/ /yang gang gi tshe bar skabs su 'dod chags la sogs pas sems g.yengs par gyur pa de'i tshe mi gtsang ba bsgom pa la sogs pas rnam par g.yengs pa zhi bar byas la sems yang nas yang du de la gong nas gong du gtad par bya'o//de nas yang bcom ldan 'das kyis yum shes rab kyi pha rol tu phyin pa chen po las 'dod chags rnam pa dgu ni chen po nyid du bstan te/ 'di lta ste/ dbyibs la chags pa dang / reg pa la chags pa dang / tsan+dan la sogs pas bskus pa las byung ba'i lus kyi dri la chags pa dang /rgyan gyis brgyan pa las byung ba'i lus mdzes pa la chags pa dang / lus kyi kha dog la chags pa dang / sha rgyas pa la chags pa dang / lus dang yan lag gi rtse 'jo la chags pa dang / so mdzes pa las byung ba'i chags pa dang /kha dog dang dbyibs la chags pa'o/ /de'i gnyen por gyur pa'i mi gtsang ba yang rnam pa dgu ste/ de ni 'di lta ste/ dbyibs la chags pa rnams kyi gnyen por ni rnam par bam pa'i 'du shes so/ /lus kyi reg pa la chags pa'i ni 'bus gzhig pa'i 'du shes so/ / lus kyi dri la chags pa'i ni rnam par rul pa'i 'du shes so/ /lus mdzes pa la chags pa'i ni rnam par dmar ba'i 'du shes so/ /lus kyi kha dog la chags pa'i ni rnam par bsngos pa'i 'du shes so/ /sha rgyas pa la chags pa'i ni rnam par zos pa'i 'du shes so/ /lus dang yan lag gi rtse 'jo la chags pa'i ni rnam par 'thor ba'i 'du shes so//so mdzes pa la chags pa'i ni rus gong gi 'du shes so/ /kha dog dang dbyibs la chags pa'i ni rnam par tshig pa'i 'du shes so/ /zhe sdang las byung ba'i rnam par g.yeng ba'i gnyen por ni byams pa bsgom pa'o/ /gti mug las byung ba'i rnam par g.yeng ba'i gnyen por ni rten cing 'brel par 'byung ba bsgom pa'o//gang gi sems de mngon par mi dga' bar mthong ba de'i tshe ting nge 'dzin gyi yon tan la bsam pa dang mi dge ba'i skyon la bsam pa de yang zhi bar bya'o/ /yang gang gi gnyid dang mun pa las sems zhum par mthong ba de'i tshe snang ba'i 'du shes bsgom pa dang rab tu dga' ba yid la byed pas sangs rgyas la sogs pa'i yon tan yid la byed pas zhum pa de yang zhi bar bya'o//yang gang gi tshe sngon dgod pa dang rtse zhing dga' ba rjes su dran pas sems par skabs su rgod par mthong ba de'i tshe/ mi rtag pa yid la byed pas de yang zhi bar bya'o//yang gang gi tshe zhum pa dang rgod pa dag dang bral ba nyid kyis cha mnyam par 'jug cing sems rang gi mtshan nyid kyis gnas par mthong ba de'i tshe/ bsgrims pa dang klod pa btang snyoms su byas te/ gal te sems mnyam par 'jug tu bsgrims pa byas na/de'i tshe sems rnam par g.yeng bar 'gyur ro/ /le lo dang ni dmigs pa brjed pa dang / /de bzhin zhum rgod mi rtsol ba dang rtsol/ /ting nge 'dzin la thams cad nyes par 'gyur/ /dad sogs sems nyid de yi gnyen po yin/ /mdor na ting nge 'dzin thams cad kyi nyes pa nyid ni rnam pa drug yod de/'di lta ste/ le lo dang / dmigs pa brjed pa dang / zhum pa dang / rgod pa dang / bsgrims pa dang / ma bsgrims pa'o/ /de rnams kyi gnyen por spong ba'i 'du byed brgyad bsgom par bya'o zhes bcom ldan 'das kyis gsungs te/'di lta ste/ dad pa dang / 'dun pa dang / rtsol ba dang / shin tu sbyangs pa dang / dran pa dang / shes bzhin dang / btang snyoms dang / sems pa'o/ /de la dang po bzhi ni le lo'i gnyen po yin te/ de yang ting nge 'dzin gyi yon tan rnams la yid ches pa'i mtshan nyid kyi dad pas rnal 'byor pa rnams de la mngon par 'dod pa'i sems skye bar 'gyur la/mngon par 'dod pa las rtsol ba rtsom par 'gyur ro/ /de las kyang lus dang sems las su rung ba nyid thob par 'gyur ro/ /shin tu sbyangs pa de las lus dang sems le lo las ldog par 'gyur ro//de bas na dad pa la sogs pa ni le lo spang ba'i phyir bsgom par bya'o/ /dran pa ni dmigs pa brjed pa'i gnyen po'o/ /shes bzhin ni zhum pa dang rgod pa'i gnyen po yin te/ des zhum pa dang rgod pa dag nye bar shes pa yin pa'i phyir ro/ /zhum pa dang rgod pa ma zhi ba'i dus su ni mi rtsol ba nyes pa yin te/de'i gnyen por ni sems bsgom par bya'o/ /zhum pa dang rgod pa de dag nye bar zhi bar gyur nas/ gang gi tshe sems rang gi rgyun gyis 'jug pa de'i tshe ni rtsol ba nyes pa yin pas de'i gnyen por btang snyoms bsgom par bya'o/ /spong ba'i 'du byed brgyad po de yang dag par ldan pa'i ting nge 'dzin ni gang gi rdzu 'phrul la sogs pa'i yon tan rdzogs par byed par mchog tu las su rung bar 'gyur ro//de bas na mdo las spang ba'i 'du byed brgyad dang ldan pa'i rdzu 'phrul gyi rkang pa sgom par byed do zhes gsungs pa yin no/ /bsgom pa'i rim pa 'di nyid la dgongs nas bcom ldan 'das yum de nyid las de la sems mnyam par gzhag par bya/yang dag par 'jog par byed/ rnam par 'jog par byed/ nye bar 'jog par byed/ dul bar byed/ zhi bar byed/ nye bar zhi bar byed/ gcig pa nyid du byed/ ting nge 'dzin du byed do zhes gsungs pa yin no//yang dag par 'jog par byed pa ni dmigs pa de nyid la rgyun gyis 'jug par byed pa'o/ /rnam par 'jog pa ni rnam par g.yeng bar shes par bya ste/ de nye bar zhi bar byed pa'o/ /nye bar 'jog par byed pa ni rnam par g.yeng ba nye bar zhi bar byas nas de nyid la gong nas gong du gtod par byed pa'o//dul bar byed pa ni dga' ba skyed par byed pa'o/ /zhi bar byed pa ni mi dga' ba zhi bar byed pa'o/ /nye bar zhi bar byed pa ni gnyid dang rmugs pa la sogs pa byung ba sel bar byed pa'o/ /gcig pa nyid du byed pa ni dmigs pa la mngon par 'du byed pa med par 'jug pa la 'bad par byed pa'o//ting nge 'dzin du mnyam par 'jog pa ni sems mnyam pa nyid thob pa la btang snyoms su byed pas yang dag par 'dzin par byed do zhes bya ba'i don to/ /tshig dgu po 'di dag gi bshad pa ni slob dpon thogs med kyis mdzad pa las bris pa yin no//yang rim pa 'dis ting nge 'dzin rdzogs par gang gi tshe 'gyur zhe na/ de'i tshe smras pa/ gang gi sems ni rtsol ba med pas ni/ /rang gi ngang gis 'jug par 'gyur ba na/ /de'i tshe sangs rgyas mnyam 'jog la brten te/ /'di ni ting nge 'dzin gyi tshul yin no/ /gang gi tshe dmigs pa de la mngon par 'du byed pa med par 'jug pas sems gnas par gyur pa de'i tshe zhi gnas rdzogs pa yin par shes par bya'o//de ltar mnyam 'jog shes nas ni/ /de nas shes par bskyed bya ste/ /gzugs dang gzugs med dbye ba yi/ /don de nyid ni rnam dpyad bya/ /de bas na rnam par dpyad pa 'dis spros pa med pa nyid yin pa'i phyir 'gro ba rnams chos sku'i bdag nyid du shes par byas la sems tsam las yongs su bzlas la gcig dang du ma nyid la sogs pa'i tshul gyis de kho na nyid kyang snang ba med pa'i tshul gyis bzla bar bya'o//de kho na nyid mthong ba 'di nyid ni gang shes rab kyis rnam par brtags na yang dag pa'i ye shes mthong bas chos thams cad mi mthong ba yin no//de yang bcom ldan 'das kyi yum bar ma las/ sangs rgyas bcom ldan 'das rnams kyi ye shes kyi spyan gang zhe na/ gang gis ci yang ma gzigs pa'i don de gzigs pa'o zhes bya ba dang /de bzhin du don dam par mthong ba gang zhe na/ gang chos thams cad mthong ba med pa'o zhes ji skad du gsungs pa yin no/ /de bas na de kho na nyid kyi rnal 'byor pa rnams kyang spyod lam thams cad la gnas pa na/ chos thams cad mthong du zin kyang ma mthong ba len no//de lta bu nyid mthong ba med pa zhes bya bar mngon par 'dod kyi gnyid log pa'am/ mig btsums pa dang 'dra bar gang yid la mi byed pa ni ma yin no/ /de lta na ni bag chags ma spangs pas 'du shes med pa'i snyoms par 'jug pa la sogs pa las ldang ba bzhin du slar yang gzugs la sogs pa la mngon par zhen pa'i bag chags kyi rtsa ba can gyi 'dod chags la sogs pa skye ba nyid kyis rnal 'byor par mi 'gyur te/thog ma med pa'i dus can gyi gzugs la sogs par mngon par zhen pa yid la mi byed pa tsam gyis yongs su spangs par mi 'gyur te/ 'du shes med pa'i snyoms par 'jug pa la sogs pas kyang de spangs par 'gyur ro//gang gzugs la sogs pa'i yul rnams kyi the tshom spangs pa de yid la byed pa yongs su spangs par yang nus pa ma yin te/ me yongs su spangs pas tsha ba spong mi nus pa dang 'dra'o/ /de bas na the tshom gyi sa bon dang bral ba nyid kyis gzugs la sogs pa la mngon par zhen pa bsal bar bya'i/tsher ma 'byin pa lta bur bya ba ma yin no zhes bya bar nges so/ /the tshom gyi sa bon dang bral bar bya ba yang zhi gnas dang lhag mthong phan tshun rjes su mthun par 'jug par bya'o/ /de yang sems rtse gcig pa'i mtshan nyid can gyis zhi gnas skye bar gyur na shes rab kyi mig gis rnam par dpyod pa'i rnal 'byor pa'i the tshom dang bral bar 'gyur ro//de dang bral bas gzugs la sogs pa la mngon par zhen pa dang bral lo/ /de dang bral nas kyang chos thams cad dngos po med par rtogs te de nyid ni shes rab kyi pha rol tu phyin pa'o//yang de'i tshe zhi gnas dang lhag mthong dag de'i bdag nyid can yin te/ de nyid ni mchog tu rnam par mi rtog pa'i rnal 'byor ro/ /de yang / kun rtog thams cad spangs pa ste/ /'di ni rnal 'byor dam pa yin/ /rnal 'byor pa gang mngon sum du/ /gnas pa kun mkhyen bcom ldan 'gyur//de ltar rim pa 'dis zhi gnas dang lhag mthong bdag gis sam/ bla ma'i man ngag gis bcom ldan 'das yum shes rab bskyed la/ byang chub sems dpa' dbang po rab dang ldan pa yin na de nges pa'i rgyud nyid kyis phyir mi ldog pa nyid yin par rtogs par byas la/shes rab kyi pha rol tu phyin pa'i ngo bo nyid dang / sbyin pa la sogs pa'i thabs la rab tu 'jug go/ /de yang 'phags pa ga ya ma go'i ri las gnyis po 'di dag ni byang chub sems dpa' rnams kyi lam gyis bsdus pa ste/ 'di lta ste thabs dang / shes rab bo zhes gsungs pa yin te/thabs ni sbyin pa la sogs pa'i pha rol tu phyin pa dang / tshad med pa dang / bsdu ba'i dngos po la sogs pa'i dbye bas phye ba ste/ de nyid kyang 'phags pa blo gros mi zad pa dang / dkon mchog sprin la sogs pa'i mdo las gsungs so/ /shes rab ni thabs de nyid phyin ci ma log par yongs su gcod pa'i rgyu'o//des kyang thabs yang dag par brtags nas phyin ci ma log pas bdag dang gzhan gyi don ji lta ba bzhin nyams su len pas sngags kyis zin pa'i dug spyod pa dang 'dra bar kun nas nyon mongs par mi 'gyur ro/ /de yang mdo de nyid las thabs ni bsdu ba shes pa'o//shes rab ni yongs su gcod pa shes pa'o zhes gsungs pa dang / 'phags pa dad pa'i stobs bskyed pa las/ thabs la mkhas pa gang zhe na/ gang chos thams cad kyi bsdu ba shes pa la mkhas pa'o/ /shes rab gang zhe na/ gang chos thams cad dbyer med pa shes pa la mkhas pa'o zhes gsungs pa'o//'di dag la ni sa la gnas pas kyang bsten par bya'o/ /shes rab tsam 'ba' zhig ni ma yin no/ /gang gi phyir sa bcu pa la sogs pa'i mdo las pha rol tu phyin pa lhag ma rnams la yang mi spyod pa ma yin no zhes gsungs pas byang chub sems dpa' sa bcu thams cad du pha rol tu phyin pa thams cad la kun tu spyad par bya'o zhes bshad do//de bzhin du yang shes rab kyi pha rol tu phyin pa la gcig tu dga' ba'i byang chub sems dpa' rnams kyi dbang du mdzad nas/ yongs su rgyas pa'i mdo chos thams cad bsdus pa las byams pa gang yang byang chub sems dpa' rnams kyi byang chub kyi phyir pha rol tu phyin pa drug car gzung bar bya ba de la skyes bu blun po rnams ji ltar byang chub sems dpa' rnams shes rab kyi pha rol tu phyin pa 'ba' zhig la bslab par bya'i/pha rol tu phyin pa lhag ma rnams kyis ci zhig bya zhes zer zhing /des pha rol tu phyin pa gzhan dag la smod pa nyid du sems par 'gyur ro zhes bya ba la sogs pa rgya cher gsungs pa dang / 'phags pa rnam par snang mdzad mngon par rdzogs par byang chub pa'i rgyud las kyang / thams cad mkhyen pa'i ye shes 'di ni snying rje chen po'i rtsa ba can/byang chub kyi rgyu dang ldan pa/ thabs kyi mthar phyin pa'o zhes gsungs pa yin no/ /de bas na gnyis ka yang dus thams cad du bsten par bya'o/ /de ltar na bcom ldan 'das mi gnas pa'i mya ngan las 'das pa 'grub pa yin no/ /de yang sbyin pa la sogs pa'i thabs kyis gzugs kyi sku dang zhing dang 'khor la sogs pa longs spyod chen po'i 'bras bu phun sum tshogs pa yongs su 'dzin par mdzad pas/bcom ldan 'das mya ngan las 'das pa la gnas par mi mdzad do/ /shes rab kyis phyin ci log ma lus par spangs pas 'khor bar gnas par mi mdzad de/'khor ba ni phyin ci log gi bdag nyid can yin pa'i phyir ro/ /de yang chos kyi rnam grangs gzings lta bur shes pa rnams kyis ni chos rnams kyang spang bar bya na chos ma yin pa lta ci smos zhes ji skad du gsungs pa lta bu yin/ de la phyin ci log tu mngon par zhen pa spang bar bya'o zhes gsungs kyi/dgos pa'i don rdzogs par bya ba'i don du yang gnas par mi bya'o zhes gsungs pa ma yin no/ /de yang chos su gzung bar bya'i/ mi gzung bar mi bya'o zhes gsungs te/ lam log pas gzung bar mi bya'o zhes bya ba'i don to/ /de bas na dngos po thams cad de ltar gzigs te gsungs pa ni//dus kun du ni thabs dang ni/ /shes rab pha rol phyin bdag can/ /bsten bya gang phyir de las ni/ /mi gnas mya ngan 'das par 'gyur/ /zhes bya ba yin no/ /pha rol tu phyin pa'i theg pa'i bsgom pa'i rim pa'i man ngag slob dpon chen po dpal ye shes grags pa'i zhal snga nas mdzad pa rdzogs so/