CLOSE WINDOW

D3920
བོད་ཡིག

sems can rnams la bdag gsol 'debs/ /shes rab kyi pha rol tu phyin pa'i man ngag rdo rje lta bu zhes bya ba dpal ka ma pa las mdzad pa rdzogs so/ /[ ]@##/ /rgya gar skad du/ kA ya pa ri ka b+hA ba na kra ma/ bod skad du/ lus yongs su dpyad pa'i bsgom pa'i rim pa/sangs rgyas la phyag 'tshal lo/ /'di la slob dpon klu sgrub kyi zhal snga nas/ 'jig rten rnam par rtog las byung / /rnam par rtog pa sems las byung / /sems kyang lus las byung bas na/ /de'i phyir lus la dpyad par bya/ / zhes gsungs te/ des lus la brtag pa ni snying po gsum dang / lus zungs bdun dang / spu'i tshogs brgyad dang / ba spu'i khung bu bye ba phrag brgyad cu dang / so sum cu rtsa gnyis dang / sen mo nyi shu dang / pags pa'i rim pa bdun dang / bu ga dgu dang / 'bur bcu gcig dang / nang gi dngos po nyi shu rtsa gcig dang / sha spar tshad lnga brgya dang / rtsa stong phrag bdun cu rtsa gnyis dang / rgyus pa bdun brgya dang / chu ba bcu drug dang / srin bu'i rigs bye ba phrag brgyad cu dang / nad gzhi rnam pa bzhi dang / mi gtsang ba nyi shu rtsa gnyis dang / 'byung ba chen po bzhi dang /gang nam mkha'i khams dang / rus pa sum brgya drug cu dang / tshigs sum brgya dang / gnad brgya rtsa bdun chas pa dang / yang phung po lnga dang / khams bco brgyad dang / rten cing 'brel par 'byung ba dang / skye mched rnams kyang 'di'i char chos ji lta bar brtag cing dpyad do//de nas yang ji ltar slob dpon phyogs kyi glang po'i zhal snga nas/ /rnam par mi rtog ye shes rdo rje yis/ /lus kyi 'khrul 'khor thams cad gzhig par bya/ /zhes bshad pa'i rim pas sor tshigs dang / nas dang / shig dang / sro ma dang / glang dang / lug dang / ri bong dang /nyi zer dang / lcags dang / chu'i rdul dang / rdul phra mo dang / phra rab dag gong nas 'og tu bdun du bskyungs pas dpyad nas tha mar rdul phra rab de ni ji ltar 'phags pas yang dag par dpyod pa'i tshul du nam mkha'i mdog gis 'dul ba'i bzod pa'i mdo las ji skad du gsungs pa de bzhin du bsgom ste/shin tu phra ba'i rdul gcig po de la ji ltar lhag mthong phra mos brtag ce na/ rdul phra mo gcig po de la ji ltar mtshan nyid med pa nyon mongs pa thams cad dang bral bar gyur par rab tu shes/ bdag med pa dang rnam par bral bar rab tu shes/ dngos po med pa dang don dam pa'i tshig gi lam dang bral bar rab tu shes/dmigs pa med pa dang sgra dbyangs thams cad dang bral bar rab tu shes/ bdag med pa dang bral ba dang / bdud kyi mtshan nyid du rab tu shes/ yi ge med par rgyu rkyen dang bral bar rab tu shes/ dngos po med pa dang rgyu rkyen dang bral bar rab tu shes/mtshan ma med pa las rdul shin tu bral bar rab tu shes te/ ji ltar 'du byed thams cad rab tu zhi ba la rnam pa brgyad po de dag gis shin tu phra mo zhig tu brtag go/ /de bzhin du gnyis pa dang / de bzhin du gsum pa nas nang gi lus thams cad kyi bar du gcig la yang so sor rnam pa brgyad po 'di dag gis rdul phra mo zhig tu brtag go//nang gi lus ji lta ba bzhin du phyi rol gyi lus sa'i khams kyang rnam pa brgyad po 'di dag gis so sor rdul shin tu phra bar brtag go zhes bya ba la sogs pa rgyas par ston te/ de ltar lus la rnam par dpyad na nam mkha' dang 'dra bar bsgom mo//de nas ngag kyang byung ma thag tu zhig cing nam mkhar thim par brag ca dang 'dra bar yul na mi gnas shing / sems kyang kha dog dang dbyibs dang skye gnas dang / snod dang sems can du mi dmigs par gyur gyi bar du blta ste/ de'i tshe thams cad nam mkha'i ngo bor gnas so//'di nyid la goms pas tshul bzhin ma yin pa yid la byed pa dang / yang dag pa ma yin pa rtog pa nas ji srid rga shi'i bar du ji lta bar shes pas bde bar gnas so/ /de nas ni ji ltar dga' ba'i gzugs kyi lus kyis bdag dang gzhan la phan pa dang bde ba sgyu ma ltar spyad do/ /