68b7 /[ @##/ /rgya gar skad du/ b+hA ba na yo ga a ba tA ra/ bod skad du/ rnal 'byor bsgom pa la 'jug pa/ 'jam dpal gzhon nur gyur pa la phyag 'tshal
69a1 lo//gang gis sgrib pa mtha' dag ma lus par bsal te/ chos kyi sku thob par 'dod pa des 'di ltar byang chub tu sems bskyed pa dang / zhi gnas dang lhag mthong bsgom pa la 'bad de/ de lta ma yin na rgyu med pa la sogs pa las 'bras bu
69a2 chos kyi sku mi thob ste/de'i phyir de rnams la 'bad par bya'o/ /de la sangs rgyas kyi chos thams cad thob pa'i gzhi ni byang chub tu sems bskyed pa yin te/ de bsod nams che bar/ byang chub sems kyi bsod nams gang / /de la gal te gzugs mchis na/ /nam
69a3 mkha'i khams ni kun gang ste//de ni de bas lhag par 'gyur/ /zhes gsungs so/ /de bas na byang chub tu sems bskyed dgos te/ de la yang gnyis te/ kun rdzob dang / don dam pa'o/ /de la kun rdzob ni tshad med pas sems can sdug bsngal las dgrol bar dam bcas
69a4 te/de dag la phan pa'i phyir bdag sangs rgyas su gyur cig snyam du dang po sems bskyed pa'o/ /de yang cho ga bzhin du gzhan las nod par bya'o/ /don dam pa byang chub kyi sems ni brjod du med pa/ dri ma med pa/ mtha' med pa/ spros pa med pa/ g.yo ba med pa/
69a5 snang ba dang mi snang ba thams cad dang bral ba'o/ /de nas ting nge 'dzin mtha' dag gi ngo bo nyid zhi gnas bsgrub par bya ste/ ji skad du/ gser gyi kha dog lta bu'i sku lus kyis / /'jig rten mgon po kun tu mdzes pa ste/ dmigs pa de la gang gi sems 'jog pa/ /byang chub sems dpa' de mnyam gzhag ces
69a6 bya//zhes gsungs pa lta bu ste/ sangs rgyas kyi sku de ni gser btso ma dang 'dra bar ser ba/ mtshan dang dpe byad kyis brgyan pa/ 'od zer dang bcas pa de la 'dod pa bskyed de/ 'dun pa dang sems kyi gnod pa spangs te/ lus drang por bsrangs la/ sku de lta bu lugs ma'am ri
69a7 mor bris pa mdun du bzhugs te/rgyun du yid la byas la/ de nyid dam gzhan yan lag la sogs pa nas/ rdzogs par mngon sum du mthong bar 'gyur ro/ /gang gi tshe dmigs par gyur pa de'i tshe nyin mtshan phyed par ma yengs par brtan par bya'o/ /sems bying ba'am
69b1 rgod pa la sogs par gyur pa'am/dogs na sangs rgyas kyi yon tan la 'dod pas spro bar bya ste/ de bzhin du brtan par bya'o/ /des 'grub par 'gyur ro/ /de nas shes rab mtha' dag gi ngo bo lhag mthong bsgrub par bya ste/ de yang thos pa mang du bya ste / ji ltar zhe
69b2 na/lhag mthong ni thos pa dang bsam pa las byung ba'i lta ba rnam par dag pa'i rgyu las byung ba yin no zhes gsungs pa de lta bas na/ sangs rgyas kyi chos nges pa'i don dang / drang ba'i don la gus pas mang du mnyan te/ bsams pas nges par yid ches pas the tshom med par bya'o/ /
69b3 de lta ma yin na the tshom gyi dra bas bcings pas de ni lam kha brag gi mdor phyin pa'i 'gron po ltar gang du yang nges pa mi shes te/ de bas na mang du thos par bya'o/ /de nas mchog tu bsngags par bya ba ci yod pa thams cad byas la/ zas tshod zin pa dang rigs par zos nas/ bshang
69b4 gci dor zhing mchil snabs dor la/snying rje chen pos sems can ma lus pa byang chub la dgod do snyam du bsams la/ phyogs bcu dus gsum gyi sangs rgyas dang byang chub sems dpa' rnams la sgo gsum gyis phyag bya ste / bde ba'i stan la klod la 'dug nas/ dbugs rngam
69b5 pa med par byas la/gos ran par bya ste/ lus mi dgye mi sgu ba dang / mig zam zim du byas nas/ so dang mchu dang lce yang tha mal par byas pa 'am/ yang na spyod lam ji ltar gnas kyang rung ste/ sangs rgyas dang byang chub sems dpa' rnams mdun du bzhugs par
69b6 dmigs te/de dag la mchod pa dang bstod pa la sogs pa ci nus su bya'o/ /de nas gong gi sku de nyid shin tu gsal bar dran pa nang du bzhag nas dmigs so/ /de gsal bar gyur pa dang / sku de gang nas byon/ gang du bzhud/ gang gis bzhugs/ ji ltar bzhugs pa
69b7 brtag go//de nas gang nas kyang ma byon pa la sogs par shes par bya'o/ /sku de ni rang bzhin stong pa/ yod med las 'das pa/ spros pa rnams dang bral bar 'dug ste/ de bzhin du chos thams cad rang gi ngang gi blos brtags pa las gud na med par khong du chud par bya'o/ /
70a1 de'i phyir chos thams cad don dam par rang bzhin med par bsam mo/ rang bzhin gang yang med do snyam pa de yang yang dag pa'i shes rab kyis spangs te/ yod med las 'das pa'i yul de lta bu la shes pa yang yod med dang bral ba de lta bus dmigs
70a2 pa med par bsgom par bya'o//de lta bas na bar bar du sems kyis sems la brtags te dmigs pa la sems 'jug na yang de bzhin du ngang gis 'jug pa mngon par 'du bya ba med pa de kho na nyid la shin tu gsal bar gnas par bya'o/ /des sems kyi rgyud mi g.yeng bar
70a3 bya'o//ci ste sems g.yeng bar gyur na/ 'di ltar dngos po kun ni gzung ba 'dzin pa ste/ gzung ba'i dngos po rdul phra rab tu blos bshig ste/ de nyid kyang so sor phye na dngos po med do/ /'dzin pa yang de las gud na med do / /de'i rnam par snang ba'i phyir ro/ /des g.yeng
70a4 ba zhi bar byas la gong ma nyid la gnas par bya'o//yang sems mi dga' bar mthong na ting nge 'dzin gyi yon tan dran par byas nas/ de la dga' ba bsgom par bya/ g.yeng ba la nyes par bsams la mi dga' ba zhi bar bya'o/ /yang rmugs pa dang gnyid kyis bying ba 'am rgod
70a5 par dogs na dga' ba'i dngos po sangs rgyas kyi sku'am/mdzad pa bcu gnyis la sogs pa bsams la bying ba zhi bar bya'o/ /yang sngon myong ba'i yul la sems rgod pa'am dogs na 'du byed thams cad mi rtag pa la sogs pa dang / rang la mi gtsang ba la sogs pa dang / gzhan
70a6 la myur du bral ba la sogs pa bsams la rgod pa zhi bar byas la gong ma nyid la btang snyoms su bya'o//de lta bus gnas pa las shin tu skyo bar gyur na/ de las langs la skyil mo krung ma bshig par 'di ltar bsams te/ chos thams cad don dam par ji lta ba yang mi dmigs na/
70a7 kun rdzob tu rgyu rkyen las skye ba sgyu ma la sogs pa snang ba yod do snyam du bsams la skyil mo krung bshig ste/ phyogs bcu'i sangs rgyas dang byang chub sems dpa' mdun du byas te/ bdun shin tu rnam par dag par bya'o/ /de'i rim pas rtag par dus drug tu bya'o/ /de nas
70b1 sems mnyam par 'gyur te/de gyur na gnas yid du 'ong ba brgyan te shin tu dga' bar byas la/ pha rol tu phyin pa drug dag gis sems de shin tu 'phel bar bya'o/ /spyod lam gyi snang ba kun sgyu ma la sogs pa las mi nyams par gnas par bya'o/ /de dag gi thabs dang
70b2 yid ches pa yod de/mangs kyis dogs nas ma bris te gzhan du blta'o / /bde bar gshegs pa'i thugs kyi yang snying 'di/ /brjod du med kyang bdag gzhan don du brjod/ /de yi dge ba cung zad ci yod pas/ /'gro ba thams cad bde gshegs 'dra bar shog /chos don
70b3 zab cing bdag blo dman//de phyir shin tu rtogs dka' yang / /thos nyung blo dman dga' phyir byas/ /de la mkhas mang bzod pa mdzod/ /mi rtog ye shes mi bsgrubs na/ /tshig gis sangs rgyas grub pa med/ /'on kyang 'gro ba 'don pas na/ /mkhas pa rnams kyis bshad
70b4 par rigs//rnal 'byor bsgom pa la 'jug pa slob dpon chen po ka ma la shI la'i zhal snga nas mdzad pa rdzogs so// //rgya gar gyi mkhan po chen po pradz+nya warma dang / zhu chen gyi lo tsA ba ban+de ye shes sdes bsgyur cing zhus te gtan la phab pa / /