CLOSE WINDOW

D3907
བོད་ཡིག

/'di don myur du rtogs gyur cig /sems brtag pa slob dpon tshul khrims 'phags pas mdzad pa rdzogs so// //paN+Di ta ka na ka dang / lo tsA ba chos 'bar gyis zhus te gtan la phab pa//[ ]@##/ /rgya gar skad du/ sarba yA na A lo ka bi she Sha b+hA Sh+yaM nA ma/bod skad du/ theg pa thams cad snang bar byed pa'i bye brag tu bshad pa zhes bya ba/ 'phags pa 'jam dpal la phyag 'tshal lo/ /skye med rtogs la gus btud nas/ /bdag med gnyis dang ldan pa yi/ /bden pa gnyis po rtogs bya'i phyir/ /lta ba'i bye brag bshad par bya/ /phyi pa dang ni rang gi sde/ / lta ba rnam pa gnyis su bstan/ /bdag med pa gnyis ni dkyil lam snying po ste/ /de las phyi rol du gyur pa ni mu stegs pa'o/ /don ma nor bar lta ba ni rang gi sde pa'o/ /de gnyis su yang dag par rdzogs pa'i sangs rgyas kyis bshad do/ /dpyod pa pa dang bye brag pa/ /gcer bu pa dang grangs can dang / /rigs pa can rnams 'dod pa'o//de yang 'di skad ston te/ dpyod pa pa ni 'jig rten rgyang phan pa ste/ de kho na nyid bzhir 'dod de/ sa dang / chu dang / me dang / rlung dang ngo / /gnyis pa ni de kho na nyid drug tu 'dod de/ rdzas dang / yon tan dang / las dang / spyi dang / bye brag dang / 'du ba'o/ /rdzas ni dgu ste/ sa dang / chu dang / me dang / rlung dang / bdag dang / dus dang / phyogs dang / yid dang / nam mkha'o/ /yon tan ni nyi shu rtsa bzhi ste/ gzugs dang / sgra dang / dri dang / ro dang / reg bya dang / mig gi blo dang / rna ba'i blo dang / sna'i blo dang / lce'i blo dang / lus kyi blo dang / grangs dang / bong tshod dang / so so ba dang / phrad pa dang / dbye ba dang / gzhan ma yin pa dang / bde ba dang / sdug bsngal dang / 'dod pa dang / sdang ba dang / chos dang / chos ma yin pa dang / 'dus byas pa'i shugs dang / 'bad pa'o/ /las ni lnga ste/ 'degs pa dang / 'jog pa dang / brkyang ba dang / bskum pa dang / 'gro ba'o/ /'du ba ni/ de dang der 'du ba dang /de'i bdag nyid du 'du ba'o/ /spyi ni spyi chen po dang / spyi nyi tshe ba'o/ /bye brag ni rtag pa la brten pa dang / mi rtag pa la brten pa'o/ /gcer bu pa'i tshig don dgur 'dod pa ni/ srog dang / gang zag dang / sdom pa dang / nges par dag pa dang / 'ching ba dang / las dang / sdig pa dang / bsod nams dang /thar pa zhes bya ba dag go/ /grangs can ni/ de kho na nyid nyi shu rtsa lnga 'dod pa ni/ snying stobs dang / rdul dang / mun pa gsum cha mnyam par gyur pa las gtso bo zhes bya ba'o/ /gtso bo rtag pa/ med pa mi gsal ba de las chen po cung zad tsam skye'o/ /chen po las nga rgyal cung zad tsam shin tu gsal bar skye'o//nga rgyal gsum skye ste/ rnam par 'gyur ba las gyur pa dang / rdul las gyur pa dang / 'byung ba las gyur pa'o/ /rnam par 'gyur ba las gyur pa'i nga rgyal snying stobs shas che ba las ni dbang po bcu gcig ste/ mig dang / rna ba dang / sna dang / lce dang / lus dang / ngag dang / yid dang / rkang pa dang /lag pa dang / rkub dang / mdoms dang ngo / /'byung ba las gyur pa'i nga rgyal shas che las ni de tsam lnga ste/ sgra de tsam/ reg de tsam/ ro de tsam/ gzugs de tsam/ dri de tsam mo/ /snying stobs las gyur pa'i nga rgyal shas che ba las ni gnyis ka skye ba'i bdag nyid yin no/ /sgra de tsam las nam mkha' skye/reg de tsam las rlung skye/ ro de tsam las chu skye/ gzugs de tsam las me skye/ dri de tsam las sa skye'o/ /gtso bo ni rang bzhin kho na las gyur pa ma yin te/ gtso bo gang las kyang mi skye bas so/ /che ba dang / nga rgyal dang / de tsam rnams ni rang bzhin yang yin la gyur pa yang yin no/ /skyes bu ni rang bzhin ma yin pa las gyur pa yang yin no//'byung ba lnga dang dbang po bcu gcig ni 'gyur ba kho na yin no/ /de ltar gtso bo dang / chen po dang / nga rgyal dang / dbang po bcu gcig dang / de tsam lnga dang / 'byung ba lnga dang / skyes bu dang bcas pa ni de kho na nyid nyi shu rtsa lnga yin no/ / rigs pa can ni tshig don bcu drug ste/ tshad ma dang / gzhal bya dang / the tshom dang / dgos pa dang / dpe dang / grub pa'i mtha' dang / cha shas dang / rtog ge dang / gtan la dbab pa dang / rtsod pa dang / brjod pa dang / sun 'byin du rgol ba dang / rgyu ltar snang ba dang / tshig dor dang / ltag chod dang / chad pa'i gnas so/ /de yang yod par mi rung ste/ rigs pa'i ngo bo thams cad la/ ji lta bu yang mi snang ste/ rtag pas don byed nyams phyir ro/ /'di skad ston te/ rtog ge ngan pas brtags pa'i 'dod pa ni yod pa ma yin te/ mngon sum dang rjes su dpag pa la mi snang ste/ med pa'i phyir ro/ /gal te yod par 'dod ni mi rung ste/rtag na 'chi 'pho dang skye ba med par 'gyur/ khyab na kun kyang bde sdug mtshungs par 'gyur la/ rtag pas don byed pa yang mi 'thad de/ dus gcig gi byed na dus gsum med do/ /gal te yon tan rim pa can du thal lo/ /rim par byed na rtag pa nyams pa kho na'o/ / bar skabs kyi tshigs su bcad pa'o/ /de ltar phyi pa sun phyung nas rang gi sde pa'i dbye ba bstan pa'i phyir/ bye brag smra dang mdo sde pa/ /yang na sde pa bco brgyad de/ /so so rang rang grub mtha' 'dzin/ /bye brag smra bas ni 'joms pas 'jig pa dang / blos 'jig pa ni kun rdzob kyi bden par byed de gnyis kyis gzhig tu mi btub pa ni cig shos so//gzhi thams cad yod par smra bas ni gzhi lnga rdzas su yod par 'dod de/ gzugs dang sems dang sems las byung ba dang / mi ldan pa'i 'du byed dang 'dus ma byas so/ /gzugs ni rdul phra rab 'dus pa rdzas su 'dod/ rdul yang bskor ba bar dang bcas pa 'dus pa la sogs par grub pa'o//de bsags pa'i gzugs ni yang gi skye mched kyi gzugs rig pa ma yin pa la sogs pa la rdzas su grub pa'o/ /sems ni tshogs drug tha dad pa'o/ /sems las byung ba yang tha dad pa'o/ /sems dang sems las byung ba bde ba dang yul gyi rnam pa med par yul dngos su 'dzin pa'o//mi ldan pa'i 'du byed ni gzugs dang sems dang sems las byung ba las rdzas logs su grub par 'dod do/ /'dus ma byas ni nam mkha' dang / so sor brtags pa'i 'gog pa dang / brtags min gsum rtag pa'i rdzas su grub pa'o/ /de las gzhan pa'i 'dod pa'i gang zag gi bdag kun rdzob kyi bden pa la/gzung ba dang 'dzin pa don dam pa'o/ /de la gzung ba gzugs kyi bzhi kun rdzob la/ rdul phra rab don dam par 'dod cing 'byar la ma reg par 'dod do/ /chos kyi skye mched kyi gzugs rig byed ma yin pa la sogs pa brtags par 'dod kyi gzugs su ma grub pa'o//sems tshogs drug go/ /sems las byung ba rnams rdzas tha dad pa'o/ /sems dang sems las byung bas yul gyi rnam pa dang bcas pa yin gyi dngos su yul 'dzin par ni mi 'dod do/ /thob pa la sogs pa'i ming rnams ni rdzas su grub pa ma yin gyi/ btags pa tsam du grub pa'o/ / 'dus ma byas rdzas su ni ma grub la med pa dgag pa tsam du 'dod do/ /mdo sde pa'i skabs so/ /yang na sde pa bco brgyad du gyes pa ni/ de la rtsa ba'i sde bzhi ni/ dge 'dun phal chen dang / thams cad yod par smra ba dang / gnas brtan pa dang / legs dpon pa'i sde'o/ /phal chen pa lnga/ shar gyi ri bo sde dang / nub kyi ri bo sde dang / gangs kyi ri bo sde dang / 'jig rten smra ba'i sde dang / rtag par smra ba'i sde zhes bya'o/ /thams cad yod par smra ba la drug /'od srungs pa dang / mang po ston pa'i sde dang / chos srung sde dang / mang du thos pa'i sde dang / gos dmar can gyi sde dang / rnam par phye ste smra ba'i sde'o/ /gnas brtan pa la gsum ste/rgyal byed tshal gnas sde dang / 'jigs med rir gnas sde dang / gtsug lag khang chen sde'o/ /legs dpon la gsum du gyes pa las/ sa srog rigs kyi sde dang / sa srung rigs kyi sde dang / gnas ma bu'i sde'o/ /grub par 'gyur ba ma yin te/ /gzung ba dngos po med pa dang / /'dzin pa rang bzhin med pa'i phyir//rang gis brtags bzhin kho nar zad/ /don du 'gyur ba ma yin pas gzung ba'i yul ni shes pa las tha dad pa yang med do/ /gal te tha dad na snang du yang mi rung ste/ 'brel pa med pa'i phyir ro/ /dper na rna ba la gzugs mi snang ba bzhin no/ /dmigs pa'i rkyen du yang mi rung ste/ 'das pa dang / 'bras bu yang 'gag /ma 'ongs pa rgyu yang med pas so/ /da ltar ba dus gcig pa la phan gdags pa med pas rkyen du mi rung ngo / /gzhan yang gcig dang du mas kyang gnod la/ rang snang dang skyed byed gnyis 'gal ba'i phyir ro/ /shes pa yang yod du mi rung ste/ yul med pa'i phyir ro/ /dper na sgra med na rna ba'i rnam shes mi skye ba bzhin no//de bas na mu stegs kyis brtags pa'i bdag bzhin du med kyang blos bzhag par zad do/ /bar skabs kyi don to/ /rnam pa bden brdzun la sogs pa dngos por smra ba'i 'dod pa bstan pa'i phyir/ rnam bden sna tshogs gnyis med de/ /shes pa gcig gi ngo bor bden/ /don ni 'di yin te/rgyu gcig la 'du ba gcig tu snang ba sna tshogs gsal ba 'di shes pa gcig gi bdag nyid du don dam par grub la shes pa'i rang bzhin du 'dod de/ de ni 'thad pa ma yin te/ gcig dang du ma 'gal sogs kyis/ /shes pa gcig dang med na rnam pa mang po yang gcig nyid du 'gyur/ rnam pa du ma dang gcig pas shes pa yang de nyid du thal lo//gal te du ma dngos su ma grub pas shes pa du mar thal ba'o/ /gtan tshigs ma grub po zhe na/ ma yin te/ du ma ma 'grub pa la snang na dngos por 'gyur la/ yang bden pa mthong bar yang 'gyur ro/ /'on te 'khrul pa la snang bar khas len na ni rnam par bden pa nyams pa kho na'o/ /sna tshogs pa'i snang ba gcig pu bden pa na/de nyid du mar 'gyur la/ brdzun na stong par 'gyur ro/ /gzhan yang rnam pa dkar dmar gcig na/ tshor ba bde sdug kyang gcig tu 'gyur ro/ /bde sdug dkar dmar tha dad pa yin pas gcig ma yin no zhe na/ 'o na ni dkar dmar tha dad pa ma yin gcig ma yin no/ /dkar dmar tha dad lta bu yin pas mi 'gal lo zhe na bde sdug kyang tha dad pa lta bu yin pas mi 'gal lo//bde sdug lta bur mi 'grub ste nyams su myong ba'i phyir ro zhe na/ dkar dmar nyams su myong ba'i phyir lta bu mi 'grub pa'o/ /myong ba'i dkar dmar lta bu ma yin yang nyan thos kyi dkar dmar gyi phyi rol du brtags pa mi 'thad pa lta bu yin no zhe na/'o na myong ba yang bde sdug lta bu ma yin yang mu stegs kyi bde sdug phyi rol du brtags pa mi 'thad pa lta bu yin no/ /de ltar bsgre ba'i tshul gyis tha dad par snang ba la don dam par gcig ma grub/ de ma grub pas du ma yang mi 'grub pa'o/ /gzhan yang gcig dang du ma dngos po 'gal lam mi 'gal zhe na/ des ci zhig bya/'gal na phyogs chos mi 'grub la/ mi 'gal na khyab pa ma grub ste/ dngos po la gcig dang du ma gnyis ma khyab pa'i phyir ro zhe na/ ma yin te dngos po la gcig dang du mas khyab ste/ dngos po la gcig dang du ma dngos 'gal yin pa'i phyir ro/ /spyir gcig dang du ma dngos 'gal yin pas phyogs chos grub po//dngos po ma grub pa la gcig dang du ma'i brtag pa mi 'jug pa'i phyir ro/ /gzhan yang gcig dang du ma dngos po la khyab pa tshad mas grub bam ma grub ce na/ des ci zhig bya grub na dngos po yang dag par 'gyur la/ ma grub na khyab pa ma grub po zhe na/ snang ba la brten nas spyir dngos po tsam gcig dang du ma tsam khyab pa grub pa'i nyes pa yang med la/yang dag pa'i gcig dang du ma yang dag pa'i dngos po khyab pa tshad mas grub pas yang dag tshad mas grub par yang mi 'gyur ro/ /'o na spyir gcig ni khyab pa grub pa yod la/ phyogs chos med la/ bye brag tu yang dag gi gcig dang du ma dang bral ba'i phyogs chos grub pa la khyab pa grub pa med ce na/ma yin te/ spyir gang zhig gang du yod pa de la de'i gcig dang du mas khyab pa grub la/ rigs pas gcig dang du ma tsam po spyir ma dmigs pas khyab pa grub pa la phyogs grub po/ /shes pa rnam pa'i grangs bzhin yin/ rnam pa du mar snang ba bzhin du shes pa yang de bzhin du skye ste/ shes pa nyid yin pa'i phyir ro/ /dper na chu bur la dmigs pa'i shes pa bzhin no//de ni 'thad pa ma yin te/ /gcig snang 'on te rgyu med 'gyur/ /de yang rung ba ma yin te/ /dngos po gcig kho na snang bar 'gyur te/ de ni rgyun skad cig tu gnas pa'i phyir/ gzhan snang bar mi 'gyur ro/ /gal te gzhan snang ba de med par 'gyur te de'i rgyun 'chad pa'i phyir ro/ / de lta na dngos po gcig kho na snang bar 'gyur ro/ /dus gcig la rnam pa'i grangs bzhin skye na ni gang zag gi rgyud kyang tha dad par 'gyur te/ de mi rigs so/ /rnam pa shes pa 'gran thub ste/ /sems dang rnam pa lhan cig dmigs/ /rnam pa med pa'i shes pa mi skye ba dang / shes pa med pa'i rnam pa mi snang ba'i phyir mtshungs pa'o//gzung cha dang 'dzin cha lta bu snang ba'o/ /de yang rung ba ma yin te/ /bems rig so so yin phyir ro/ /rig pa bems po la ltos pa dang / /bems po rig pa la snang ba la 'brel pa yang med la/ gzung 'dzin dang bcas par yang thal lo/ /'on te rnam pa nyid shes pa'i ngo bo yin na bems po yang rig pa dang bcas par 'gyur ro//'on te shes pa nyid snang ngo zhe na/ 'o na lhan cig dmigs pa yang nyams la 'gran thub pa yang med de shin tu bdag nyid gcig pa'i phyir ro/ /de ltar rnam pa dang bcas pa bstan nas/ rnam pa brdzun pa bstan pa'i phyir/ rnam pa yod pa ma yin te/ rgyu 'bras don du ma grub phyir//myong ba mngon sum gyis grub la/ tshad mas grub la gnod pa gzhan med pa'i phyir zhes pa ni bden no/ /rnam pa ni gzugs can la brtag pa byas pa dang / mtshungs pas dpyad na ma grub la/ rgyu dang 'bras bu la yang sgrub byed med pa'i phyir ro/ /de ni mi rigs te/ rnam pa nyams su myong phyir ro/ /rgyu 'bras don du med na myong ba yang med par thal ba'i phyir ro//myong ba mngon sum du grub pas med pa ma yin no zhe na/ 'o na rgyu 'bras kyang mngon sum du grub pas yod par 'gyur ro/ /rgyu 'bras dus gsum du skye ba mi 'thad pas med do zhe na/ myong ba yang dus gsum du myong ba med pas 'thad pa yin no/ /dus gsum med pas myong ba med par mi 'gyur te khyab pa ma grub pa'i phyir ro zhe na/'o na dus gsum ma grub pas skye ba med ces bya ba yang khyab pa ma grub po/ /skye ba'i mtshan nyid snga ma la ltos pa la brjod la snga phyi'i dus ma grub pa la mi 'grub pas khyab pa grub po zhe na/ myong ba'i mtshan nyid ni bems po las log pa yin la/ de yang snga phyi'i dngos po yin pas de snga phyi'i ma grub par mi 'grub pas khyab pa grub pa yin no//med pa ma yin yang the tshom za'o zhe na/ de ni mi 'thad de/ nges dang ma nges gnyis med pa/ /dngos po gcig la mi srid do/ /dngos po snang ba la sogs pa las yang na nges pa yin la yang na ma nges pa las myong ba gzhan mi srid pa'o/ /gzhan yang myong ba mngon sum rgyu 'bras dmigs na bden par 'grub la/ma dmigs pa snang du rung na/ 'o na mthar thug gi myong ba la gtad nas dris pas na snang du rung ba mi dmigs pa yin no/ /rgyu 'bras khas mi len no zhes zer ba 'gal ba 'du ba khas len pa 'thad dam zhes spyod cig/ de ltar ma yin na tha snyad du bum pa phyogs na snang du ma dmigs pa yin/med pa ni ma yin zhes bya bar yang 'gyur ro/ /rgyu 'bras khas len pa yang mi rigs par bstan pa'i phyir dang rang dang gzhan dang gnyis ka dang / rgyu med pa las mi skye phyir/ /rang ma grub na rgyu yang med la/ grub na skyes zin pa'i phyir ro/ /gzhan la yang rtag pa dang mi rtag pas dpyad na skye ba mi 'thad do//gnyis pa las ni 'gal ba 'du ba'o/ /rgyu med pa ni yod pa dang med pa zhes rtag tu bar 'gyur ro/ /gal te phyogs gzhan mi 'thad kyang rgyu yod pa gzhan mi rtag pa bar ma chod pa las 'bras bu skye'o zhe na/ phyogs thams cad kyis ma chod na dus mnyam par 'gyur te/ ba lang gi rwa g.yas pa dang g.yon pa bzhin no//gal te rang dus kyis bar ma chod pa'i phyir zer ba ni gtan tshigs ma grub la/ gzhan dus kyis bar ma chod zer na khyab pa ma grub po zhe na/ 'o na ni dbus na gnas pa'i rdul yul mtha' dag gis bar ma chod pa'i phyir yul gcig tu 'gyur ro zhes bya ba la yang mtshungs te rang yul gyis bar ma chod pa'i phyir zhe na/gtan tshigs ma grub la/ /gzhan gyi yul gyis bar ma chod pa'i phyir zhe na khyab pa grub po/ /gal te sbyar bya gcig las med na sbyor byed lhag ma rnams kyang dus gcig par 'gyur la/ sbyor byed yul tha dad na sbyor bya dbus kyi rdul kyang tha dad par 'gyur ro/ /'o na sbyar bya dus gcig las med na sbyor byed dus lhag ma rnams dus gcig par 'gyur la sbyor byed dus tha dad na sbyar bya dbus kyi dus tha dad par 'gyur ro//rgyu ma 'gags pa'i dus su 'bras bu med la/ 'bras bu skyes pa'i dus su rgyu 'gags pas/ phyogs gcig dang mtha' dag gi brtag pa mi 'jug go zhe na/ 'o na dbus rdul gyi yul la med pa dang gcig ce na/'o na rdza mkhan gyi khyim gyi bum pa phyogs 'dir med ces bkag pas kyang rdza mkhan gyi bum pa dgag byar thal lo/ /gal te phyogs 'di na bum pa med pa dang / rdza mkhan gyi bum pa yod pa mi 'gal bas de dgag bya ma yin no zhe na/ de bzhin du rig pa'i ngo bo na snang ba med pa dang / tha snyad pa'i ngo bo la snang ba mi 'gal lo//tha snyad pa'i snang ba rig pa'i ngo bor med pas bkag pas tha snyad pa'i snang ba bkag pa ma yin no/ /'o na gang rnam par gcod ce na/ rig ngor tha snyad shes mi gnas/ /yod na de ni dgag bya yin/ /yod do zhe na rig ngo na/ /gnas pa dgag bya yin no/ /de med pas dgag tu med kyi/ mi mkhas pa'i rig pa'i don gnas par zhen pas de'i yul bzlog go//de rgyal ba byams pas/ 'di la dgag pa ci yang med/ /bsnan par bya ba ci zhig med/ /yang dag nyid la yang dag lta/ /yang dag mthong bas rnam par grol/ /zhes bshad do/ /de ltar rnam grol ba'am don dam par 'gyur te/ rigs pas grub pa'i phyir ro zhe na/ ma yin te/ rigs pas grub pa'i rnam bcad tsam ma grub pa'i phyir ro/ /'o na ci zhig tsam/ dngos po bkag pa du zad kyi/ /bkag pa ci zhig khas mi len pa'i phyir ro/ /bkag pa ma grub na dngos po rnam par gcad pa mi 'thad do zhe na/ ma yin te/ 'gags pa rig pa'i don yod pas dngos po rnams rnam par bcad pa la ma khyab pa'i phyir ro//'o na ci zhe na/ dngos po la gnas pa'i tshad ma thengs pa tsam du zad do/ /gnod pa'i tshad ma ni khyab byed mi dmigs pas khyab bya bkag pa tsam du zad kyi grub pa la mi ltos so/ /rnam par gcad pa la gzhi dngos por gyur pa la mi ltos par ni sngon gyi slob dpon gyis gtan la phab zin to//'o na rig pa'i shes pa la chos can snang ngam mi snang zhe na des ci zhig bya/ snang na don dam par 'gyur la/ mi snang na spros pa chod de/ mig gi rnam shes kyis sgra la spros pa mi chod pa bzhin no zhe na/ rig par 'gro ba'i sgo nas snang ste/ khyab byed du mi rtogs pa las khyab byar rtogs pa'i rig pa skye ba ma yin no/ /de lta bu sngon du song ba med pas mig gi rnam shes kyis sgra la spros pa mi chod do//de ltar de lta bus spros pa chod par the tshom med par byas la bsgom pa ni sems gnas pa'i man ngag blo la shes par byas la/ the tshom med par rig pas ngo bo rtogs pa dang / mi g.yeng mi 'bying ba zhi gnas kyi stobs kyis 'byung ste/ de ltar rtsol ba klod la mnyam par gzhag go//mnyam par gzhag pa na yul snang ngam mi snang zhe na/ phyogs gcig dang mtha' dag gi brtag pa mi 'jug par 'gyur ro/ /gal te yul de med kyang spyir med pa ma yin pas rdul la yang brtag pa 'jug go/ /'o na dus der med kyang spyir med pa ma yin pas dus la yang brtag pa 'jug go//gal te skad cig ma cha med pa la dus kyi cha'i brtag pa mi 'jug go zhe na/ 'o na rdul phra rab cha med pa la yul gyi cha'i brtag pa yang mi 'jug go/ /gal te cha med na gzugs can nyams par 'gyur bas rdul la brtag pa 'jug go zhe na/ skad cig ma la yang dus kyi cha med na dus nyams par 'gyur bas dus kyi mtha'i skad cig ma la yang brtag pa 'jug pa kho na'o//des na brtag pa 'jug pa la phyogs kyi chos grub pa yin no/ /gal te grib ma dang nyi ma gnyis su 'gyur bas brtag pa 'jug go zhe na/ 'bab chu'i rgyun dang / sngon med pa dang / zhi gnas med pa la sogs pas bar ma chod kyang yul dus gcig pa med pas khyab pa med pas khyab pa ma grub po zhe na/ma yin te don dam par 'dod na brtag pa mtshungs pa'i phyir ro/ /de'i phyir slob dpon klu sgrub kyis/ ji ltar skad cig mtha' yod ltar/ /thog ma dbus mtha' brtag par gyis/ /skad cig gsum pa'i mtha' yod la/ /'jig rten gsum pa la mi gnas/ /zhes bshad do//rgyu 'bras 'dod dang mi 'dod la/ /spros dang bcas pa'i sems tsam dang / /spros med sems tsam zhes kyang zer/ /rnam brdzun la yang gnyis su 'dod/ /dag pa dang ni dri mar byas/ /rnam brdzun dag pa ni rnam pa dkar dmar la sogs pa 'di sangs rgyas pa'i gnas skabs na med la/ ma dag pa la snang ngo zhes zer ba'o//dri ma dang bcas pa ni rnam pa'i 'khor lo 'di sangs rgyas pa'i dus na yang yod la/ 'khrul par shes pas phyin ci log dang ldan pa'i nyes pa yang med do zhes pa mjug bsdus pa'o// //de ltar bstan nas dbu ma rnam pa gnyis kyi don bstan par bya ba'i phyir sgyu ma lta bu snang ba la/ yang dag bkag nas brdzun par 'dod//snang ba la bden pa'i spros pa thams cad rnam par bcad nas/ yongs gcod la brdzun pa sgyu ma lta bu/ spros pa gcod pa'i rjes su dpog pa'i rigs pa dang rnam par mi rtog pa'i ye shes kyi ngo bo snang bar 'dod la dgag bya yang ma yin te don dam par grub pa'o/ /de ni rigs pa ma yin te/ bkag dang ma bkag mtshungs phyir ro//brtags pa'i snang ba la brtags pa bkag pa dang / brdzun pa rigs pas grub pa de la yang dag par brtags na mtshungs te/ dgag bya'i yang dag nyid ci yin/ /rigs pas grub la mi gnod pa'o/ /'o na mi snang ba yang rigs pas grub la mi gnod pas yang dag tu 'gyur ro/ /ma yin te yang dag par rigs pas grub pa la mi gnod pas yang dag pa yin la/snang ba'i brdzun par grub pa yin no zhe na/ ma yin te/ rigs pas grub la mi gnod pa'i thog tu yang dag pa zhes bsnan pa'i khyad par ci zhig yin/ gal te bden par grub pa'i dngos por skyon med par grub pa'o/ /dpyad na nyes pa rnam par sems na/ci ming tha dad pa tsam gyis don tha dad par 'gyur ram/ yang dag pa dang / dngos po la sogs pa ni rnam grangs yin te/ mthar thug gi rigs pas grub pa'i don las gzhan ni ci yang med do/ /des snang bas rigs pas grub na yang dag tu 'gyur ba'am/ yang dag ma yin pas grub pa ma yin par 'gyur ro/ / gzhan yang rig pa'i ngo bo la/ brdzun pa grub par khas len na/ kun rdzob don dam mtshungs par 'gyur te/ rig pas dpyad pa la brdzun par grub par 'dod na/ 'o na yang dag kyang rigs pas grub po/ /yang dag skyes nas grub pa ma skyes kyang grub ste ma dmigs so zhe na/ brdzun pa yang de dang 'dra ste ma grub pa'o//dpyad na ma grub pas na brdzun no zhe na/ dpyad na ma grub pas na yang dag ces bya bar 'gyur ro/ /ma grub pas yang dag nyams so zhe na/ dpyad na ma grub pas brdzun pa rig ngo na gnas pa yang nyams par 'gyur ro/ /brdzun pa la brtag pa mi 'jug go zhe na/ yang dag la yang mtshungs pa nyid de/gnyis pa rig pa'i don khas blangs pa'i phyir ro/ /de bzhin du 'gal ba 'du ba don dam par 'dod pa dang / spros pa dang bral ba don dam par grub par 'dod pa mi rigs te brtags pa mtshungs pa'i phyir dang / 'gal ba dang 'du ba gnyis 'gal ba'i phyir ro/ /'gal ba 'du ba la 'gag pa yang mi 'thad de/'gal du 'gegs na thabs bkag pa yin pa'i phyir ro/ /thabs bkag na 'bras bu med do/ /spros pa dang bral zhes bya ba yang spros pa la gnod pa tsam rtogs pas grub par 'dod na brtag pa mtshungs pa'i phyir ro/ /gnas skabs su bya ba dag go/ /snang ba sel ba gnyis bstan te/ /chos can dgag bya ldog byas kyi//tha dad med par grub pa dang / /tha dad yod kyang rig ngo la/ /dgag bya nyid du grub pa'o/ /chos can dgag byar 'dod pa tshul gsum ni/ dgag par bya ba'i chos can la khyab byed bkag pa nyid du nges pa ni phyogs chos so/ /khyab byed bkag pa ni khyab bya bkag pa kho na la nges pa ni rjes 'gro'o//mi mthun phyogs dngos po la med pas ldog pa shin tu nges so/ /rjes 'gro'i khyab pa tshad ma'i stobs kyis ji ltar nges par nus te/ mthun dpe gzugs brnyan la sogs pa ni ma yin par dgag pa'i dpe'i phyir dang / nam mkha'i pad+ma la sogs pa med par dgag pa'i dpe la 'brel pa med pa'i phyir ro zhe na/ma yin te/ chos la rnam dpyad tsam gyis ni/ /ldog khyab yongs gcod mngon sum gyis/ /rtogs pas rnam par bcad tsam gyis/ /rjes 'gro shugs la rtogs pa'o/ /'di ltar skyes bu rnams kyis dngos por tha snyad du bya ba la gcig dang du mar rtogs te/ bum pa la sogs par gcig gi dngos pos yongs su gcod pa la/du mar rnam par gcod pa'i phyir dang / /bum pa'i dngos po du ma yongs su gcod pa la yang gcig rnam par gcod pa'i phyir ro/ /de ltar dngos po gcig dang du ma kho nar yod par yongs gcod nges pas na/ rnam bcad la gcig dang du ma rnam par bcad pa kho na la nges so//phyogs chos nges pa la ni skye bo rnams kyis spyir gcig ni rgyu yin la du ma 'bras bur nges so/ /bum pa gcig med na de bsags pa'i phyir/ /de bzhin du spyir du ma ni rgyu yin la gcig ni 'bras bur nges te/ ras dang snum la sogs pa du ma med na mar gcig med pa'i phyir ro//de ltar rgyu 'bras nges pa la bum pa gcig dmigs pas zla dang bcas pa'i du ma dang bral bar mngon sum gyis grub po/ /gcig dang bral ba ni rjes su dpag pas grub ste/ du ma ma grub pa'i phyir gcig ma grub po zhes rnam bcad rtags su sbyor ro/ /du ma ma grub kyang gcig grub pa ci ste zhe na/sngar mngon sum gyi du ma rgyu yin la gcig 'bras bur grub pas gsal lo/ /du ma rgyu dang gcig 'bras bu yang de bzhin du mngon sum dang rjes su dpag pas nges so/ /cha med pa'i gcig dang du ma dang bral ba ni mngon sum gyis nges te/ cha med las bzlog pa'i rnam pa cha dang bcas pa'i rnam par snang ba'i phyir ro//'o na rnam par bcad pa tsam gyi phyogs chos chos can la nges na rnam par bcad pa tsam gyis ldog pa'i khyab byed ji ltar nges she na/ tshad ma tha snyad shes pa yi/ /ngo la ltos pas mi 'gal lo/ /chos can gcig yin yang rigs pas gcig dang du ma'i spros pa chod la/ tha snyad kyi shes pa'i ngo bo la gcig dang du mar snang ngo //yang na chos can tha dad la brten pas mi 'gal te/ kun rdzob kyi bden pa'i chos can la brten nas/ dngos po la gcig dang du ma khyab bya khyab byed du 'jog la/ don dam pa'i chos can la brten nas gcig dang du ma log pas dngos po ldog par byed do/ /nags tshal la sha pa dang shing khyab bya khyab byed du grub nas/brag rdzong la khyab byed log pa bzhin no/ /gcig dang du ma'i rnam par rtog pas kun rdzob kyi dngos po la yang bkag pa mtshungs pas grub po zhe na/ don dam gtan la 'bebs pa'i dus sam 'on te kun rdzob kyi dus shes pas dris so/ /'o na bum pa'i gcig dang du ma'i brtags pas kun rdzob gtan la 'bebs sam/don dam gtan la 'bebs pa'i skabs su yin zhe na/ yu bu cag don dam pa la rtsod pa'i sgra yin pas/ don dam pa gtan la 'bebs pa'i skabs su yin no/ /gal te kun rdzob pa'i dngos po yang don dam gtan la 'bebs pa'i skabs su 'gegs pa yin no zhe na/dbu ma pa'i 'dod rtog yin no/ /'o na dngos por snang ba ci zhig yin zhe na/ de ni 'khrul ba'i snang ba'o/ /gal te 'khrul ba la snang ba'i skye ba yod par 'gyur ro zhe na/ 'dod rtog yin no/ /'o na kun rdzob bkag pa 'gal lo zhe na/ tshad ma'i ngo bor bkag pa yin no/ /kun rdzob gtan la 'bebs pa'i skabs su 'gegs so zhe na/ma yin te/ khyab pa ma grub pa'i phyir dang / 'khrul pa'i don snang ba la/ /tshad ma'i khyab pa med phyir dang / /de ltar min na bden mthong 'gyur/ /de ltar snang ba chos nyid dgag byar 'dod do/ /de ni rigs pa ma yin te/ /chos can la rtags grub na de nyid dgag bya yin pas mi mthun phyogs la zhugs pa'i phyir khyab pa med do//mi mthun pa'i phyogs chos ma grub par 'gyur zhe na/ ma yin te/ 'khrul pa'i bsam ngo la yod/ sha pa med pas mi mthun phyogs la zhugs pa yang med do/ /'o na de bzhin du snang ba 'khrul ngo la yod kyang dngos po la med pas mi mthun phyogs la zhugs pa med do zhe na/'o na brag rdzong 'khrul pa'i bsam pa la sha pa yod par snang ba yang dngos po'i sha pa med pas mi mthun phyogs la ma zhugs pa bzhin du/ snang ba 'khrul pa dngos por snang yang dngos po med pas mi mthun phyogs ma yin pas snang ba dgag bya ma yin no/ /de lta ma yin na/ de don gnyis kar mi mthun phyogs yin na de la zhugs pas khyab pa ma grub pas snga so nyid na 'dug pa yin no//de ltar ma yin na gzhan yang khyab pa ma grub par mi 'gyur ro/ /de las gzhan pa bstan pa'i phyir chos can dgag bya ldog byas kyi/ tha dad la brten 'jog pa ni/ /tshad ma gzhan du bshad zin to/ /des na chos can dang dgag bya ldog byas tha dad med pa yang ma yin no//ldog byas tha dad pa ni snang ba rig ngor bkag pas snang ba dgag byar 'dod pa nyid yin no zhe na/ rig ngo na med pa dang snang ba'i rang bzhin gyis 'gal bas dgag bya ma yin no zhes bshad zin to/ /'gal la rnam par bcad pa tsam gyis rtags mthun thug dgos pas/ rang gi khyab bya khyab byed 'gegs par 'gyur ro/ /mi mthun phyogs kyi bdag chos can la gtan tshigs grub pas khyab pa yang ma grub par 'gyur ro zhe na/ mi 'gyur te/ nam mkha' la sogs pa 'gegs pa'i dus su chos can la gtan tshigs grub kyang / khyab pa ma grub par mi 'gyur ba bzhin no zhe na/ de'i skabs su yang chos can ni dgag bya ma yin la/dgag bya ni chos can du mi 'jog ste/ yin na skyon mtshungs pa'i phyir ro/ /'di'i 'dod pa rtog pa'i shes pa la chos can snang la/ tshad mas 'gro ba'i cha nas mi snang bar 'dod do/ /de ni mi rigs te tshad ma dang rig pa dang ldog pa'i tha dad med de ming gi rnam grangs yin pa'i phyir ro/ / de lta ma yin na ldog ste rig pa la mi snang la tshad ma la snang bar ci'i phyir mi 'gyur te khyad par med pa'i phyir ro/ /bar du byas pa'i don to// //de ltar snang ba sel ba bstan pa'i rjes la/ rab tu mi gnas pa snang ba mi sel ba bstan te/ snang ba kun rdzob bden pa dang / /rig pa don dam bden pa'o/ /snang ba ji lta ba yul can kun rdzob kyi bden pa yin te/snang ba la rigs pas mi rung ba'i phyir ro/ /de yang rnam pa gnyis te/ yang dag dang ni log pa'o/ /snang la don byed nus pa ni yang dag pa'i kun rdzob kyi mtshan nyid do/ /snang la don byed mi nus pa ni log pa'i kun rdzob kyi mtshan nyid do/ /de la gnyis su yod bstan pa/ /rtog med 'khrul dang kun brtags ni//rtog med lhun gyis 'khrul pa ni dbang po la skyon chags pa la sogs pa'o/ /rtog bcas ni yid kyis de brtags pa'i bdag lta bu'o/ /de las gzhan pa'i don dam pa'i dbye ba bstan par bya ba'i phyir/ rnam grangs kyis dang rnam grangs min/ /don dam pa gnyis su nges pa'o/ /spros pa phyogs gcig 'chad pa dang /rigs pas don dam pa dang mthun pa'i phyir don dam pa yin te/ cha mthun pa dang mi slu ba'i phyir ro/ /rnam grangs ma yin pa'i don dam pa'i bden pa ni/ rigs pas gcad na rnam par bcad pa tsam la tha snyad gdags te/ spros pa thams cad nye bar zhi ba yin no/ /rig pa'i don yongs su dpyad pa mi gnas te/yang dag par gyur pa yin pa'i phyir ro/ /rnam par dpyad pa tsam gyi dgag bya gang yin zhe na/ gang yang 'gog dang sgrub pa med/ /khas blang ba yang ma grub pas chos nyid ngo shes par byed pa'o/ /tha snyad pa'i don yod pa'i snang ba mi dgag ste/ tha snyad pa'i ngo bor dgag par mi nus pa'i phyir ro/ / tha snyad pa'i snang ba ma bkag kyang rigs pas dgag pa la mi 'gal ba'i phyir ro/ /rig pa'i don yod pa bkag pas tha snyad pa'i snang ba bkag par mi 'gyur te/ tha snyad pa'i snang ba la rig pa'i ngo bos ma khyab pa'i phyir ro/ /tha snyad pa'i snang ba rig ngor bkag pa la snang ba tha dad du 'gog go zhe na/ des cir 'gyur zhe na/ snang ba rang rig bsgom par 'gyur la/ mi snang na shes pa med par 'gyur ro zhe na/ shes pa'i dngos gcig rang snang la/ /bsgom pa'i mtshan nyid rang du'ang min/ /bsgom pa la rang du snang ba yang med de/ spros pa bcad pa tsam kho na bsgom pa'i shes pa yin pa'i phyir ro/ /de'i gnas skabs la yang lam lnga yin te/'bras bu mi rtog pa ni snang ba med pa'i ye shes yin la/ rjes la thob pa ni snang ba dang bcas pa yin te/ rnam par mi rtog pa'i ye shes kyis nam mkha'i dkyil ltar rtogs la/ rjes thob kyis sgyu ma ltar rtogs te/ rnam par mi rtog pa la 'jug pa'i gzungs las rnam par mi rtog pas chos thams cad nam mkha'i dkyil ltar rtogs la/rjes la thob pas sgyu ma'i dpe brgyad 'dra bar rtogs so zhes bshad do/ /mi rtog pa'i ye shes la rang rig pa yod na don dam par 'gyur te/ rig pa gzhan gyis mi gnod pa'i phyir ro/ /med na shes pa rgyun chad pas spros pa mi chod do zhe na/ ma yin te/ tha snyad ngo la yod pa dang / /ye shes ngo la mi gnas phyir/ /rang rig tha snyad pa'i ngo la shes pa rgyun ma chad pas spros pa mi chod pa'i nyes pa yang med la/ don dam par yang mi 'gyur te/ mi rtog pa'i ye shes kyi don rang rig tu yang mi gnas pa'i phyir ro/ /kun rdzob tu rang rig pa yod pa'i shes pa'i dngos po gcig nyid mi rtog pa'i ye shes kyi mtshan nyid nas/rang dang gzhan du mi rtog pas tha snyad du spros pa gcod do zhes bya'o/ /bsdu ba'i tshigs su bcad pa'o// //mu stegs la sogs grub mtha' ngan pa sun phyung nas/ /yang dag don rtogs lta ba'i bye brag 'di byas pas/ /rjes 'jug rnams kyis chos nyid don la 'jug 'gyur ba'i/ /dge ba kun 'byung 'gro ba kun la snyoms par shog /theg pa thams cad du snang bar byed pa'i bye brag tu bshad pa zhes bya ba/ bram ze'i btsun pa rab 'byor dbyangs kyis mdzad pa rdzogs so// //rgya gar gyi paN+Di ta rab 'byor dbyangs de nyid dang / bod kyi lo tsA ba dge slong ting nge 'dzin bzang pos bsgyur cing zhus te gtan la phab pa'o// //