CLOSE WINDOW

D3896
བོད་ཡིག

/[ ]@##/ /rgya gar skad du/ A lo ka mA la hr-i dA nan+da dza na nI TI ka nA ma/ bod skad du/ snang ba'i phreng ba'i 'grel pa yid dga' ba bskyed pa zhes bya ba/ 'jam dpal gzhon nur gyur pa la phyag 'tshal lo/ /gsung gi mchog tu sad mdzad pa//gzigs dbang mgon la phyag 'tshal nas/ /snang ba'i phreng ba gsal ba yi/ /don ni rnam par nges par bya/ /mi shes gsum ni spang ba'i phyir/ /zhes bya ba la sogs pas ni rab tu byed pa 'di'i 'brel pa dang / brjod par bya ba dang / dgos pa dang / dgos pa'i dgos pa rnams bstan te/ gang gi phyir 'brel pa la sogs pa ma bstan na rtog pa sngon du gtong ba rnams thos pa la sogs pa la mi 'jug pa'i phyir ro/ /'dir sems tsam nyid du rab tu byed pa 'dis bsgrub par bya ba yin pa'i phyir de ni brjod par bya ba yin no/ /mi shes pa gsum spangs pa ni dgos pa yin no//mi shes pa gsum spangs nas gdul bya rnams sangs rgyas nyid thob pa ni dgos pa'i dgos pa yin no/ /sems tsam nyid ni bsgrub par bya ba yin la/ rab tu byed pa ni thabs yin pa'i phyir rab tu byed pa dang brjod par bya ba thabs dang thabs las byung ba'i mtshan nyid ni 'brel ba yin no zhes bya bar gnas so//de dag ni re zhig bsdus pa'i don to/ /yan lag gi don brjod par bya ste/ gang gis sems tsam du gsungs pa/ /thub dbang de la phyag 'tshal lo/ /zhes bya ba ni thugs su chud pas na thub pa ste/ nyan thos dang rang sangs rgyas dang byang chub sems dpa' la sogs pa ste/ de rnams kyi dbang po ni thub dbang ste/ thub pa'i mchog rje btsun sangs rgyas bcom ldan 'das zhes bya ba'i don to/ /sems tsam ji lta bur gyur pa zhig ce na/ smras pa/ rang bzhin gsum ni bsgoms pa yis/ / zhes bya ba smos te/ kun brtags dang / gzhan dbang dang / yongs su grub pa'i rang bzhin ni rang bzhin gsum mo/ /rang bzhin gsum gyi ngo bo gang bsgoms pa de gsum gyi rang bzhin gyi ngo bo ni sems tsam yin no zhes bya ba'i don to/ /ci'i phyir/ rang bzhin gsum gyi ngo bo sgom zhe na/ / mi shes gsum ni spang ba'i phyir/ /zhes bya ba smos te/ kun brtags dang / gzhan dbang dang / yongs su grub pa'i yul la gang mi shes pa byis pa rnams la yod pa de spang ba'i phyir zhes bya ba'i don to/ /'di ltar gang dag kun brtags pa'i rang bzhin gzugs la sogs pa rnams la de kho na nyid du mngon par zhen pa de dag ni kun brtags pa'i yul mi shes pa yin no//de bzhin du gang dag 'du byed kyi bag chags kyi rgyu las skye ba'i sems la yang rgyu med pa nyid du 'dod pa de dag ni gzhan gyi dbang gi yul mi shes pa yin no/ /de bzhin du gzung ba dang 'dzin pa'i ngo bo med pa la gang gzung ba dang 'dzin pa'i ngo bor sgro 'dogs par byed pa de dag ni yongs su grub pa'i yul mi shes pa yin no//mi shes pa gsum po de yang mdo gzhan dag las bcom ldan 'das kyis dgag pa mdzad do/ /de ltar yang / blo yis rnam par gzhig na ni/ /gzhan dbang med cing kun brtags med//yongs su grub pa'ang yod min ni/ /ji ltar blo yis rnam par brtag /ces gsungs so/ /chos can bkag pa nyid kyis chos rnams bkag pa yin te/ de yang slob dpon gyis yang gzhung de'i rjes su 'brang nas don de nyid rab tu byed pa 'dis gtan la phab ste/'di ltar/ ming dang rigs stsogs yon tan no/ /chos rnams brdzun pa gang mthong ba/ /mkha' la ri mo 'dri ba ltar/ /phyin ci log gis dub pa yin/ /zhes bya ba des ni kun brtags pa'i yul mi shes pa spong ba yin no/ /'di skad du/kha las sgra ni ci phyir dang / /rdza rnga las ni yang 'byung ba/ /tha dad pa yi rgyu 'di las/ /dngos po dngos po med par snang / /zhes bya ba 'dis ni gzhan dbang gi yul la mi shes pa spong ba yin no/ /'di ltar/ 'dir ni phyi nang cung zad med/ /phan tshun ltos pas grub pa'i phyir//bar na ma yin med min te/ /sems tsam du ni gnas phyir ro/ /zhes bya ba 'dis yongs su grub pa'i yul mi shes pa spong ba yin no/ /de bas na 'di ltar sems tsam du gsungs pa'i bcom ldan 'das nyi ma lta bus mun pa'i tshogs lta bu'i mi shes pa gsum ma lus pa ring du spangs pas 'gro ba rnams nges par legs pa thob par mdzad par gyur pa yin no zhes bya ba'i don to//sems tsam nyid gcig pu yin na ji ltar rang bzhin gsum gyi ngo bo'i tha snyad du mi 'gyur ba ma yin nam zhes zer na/ de ltar yang ma yin te/ gang gi phyir bum pa gcig rim pa bzhin ldog pa'i dbye bas yod pa dang /mi rtag pa dang / byas pa zhes bya bar bstan to/ /de bzhin du sems tsam la ngo bo gsum yin te/ 'di ltar sems gnyis su med pa las ldog pa yang 'khrul pa'i bag chags rjes su 'brel ba'i kun brtags bum pa dang snam bu la sogs pa phyi'i don nyid du snang ngo //gzhan yang ma yin pa'i don las ldog pa las gzhan dbang gi ngo bo nyid de bzhin no/ /gzung ba dang 'dzin pa'i ngo bo yongs su ma grub pa las ldog pa de kho na nyid khong du chud pas yongs su grub pa'i ngo bo nyid gsal ba yin no zhes bya ba'i don to/ /mi shes pa gsum spangs pas kun brtags la sogs pa med par shes pa ni ma yin te/gos kyi dri ma bkrus pa ni dri ma med pas gos med par rtogs pa yin pa ma yin nam/ de'i phyir yang kun brtags pa'i ngo bo yod par 'gyur ro zhe na/ de snyam du dgongs nas slob dpon gyis/ srid gsum mtha' ru zhes bya ba la sogs pa gsungs te/'di ltar kun brtags la sogs pa gang yin pa de dag ni spros pa'o/ /srid gsum mtha' ru byon ni 'dod pa dang / /gzugs dang gzugs med pa'i srid pa gsum po de dag mthar mdzad pas na srid gsum mtha' ru byon no/ /srid pa gsum gyi mtha' ru byon pa des na sangs rgyas bcom ldan 'das zhes brjod do//de la bsdus nas te/ rnam par dpyad pa'i rjes su 'brangs na sems kyi rnam par rtog pa tsam nyid du rtogs pa'i dngos po'i ngo bo nyid du ni ma yin no/ /gal te de dag sems las ma lus spangs/ /zhes bya ba ni gal te ni brgya la'o//de dag ni rnam par rtog pa tsam mchog tu 'dzin pa'o/ /gal te de dag sems las ni shes pa las so/ /ma lus pa ni thams cad de bag chags dang bcas pa'o/ /spangs pa ni bsal bar gyur pa ste/ de'i tshe de/ yang srid 'ching ba'i skye ba yod ma yin/ /zhes smos te/skye ba la sogs pa yod pa ma yin pa'i dngos po la mngon par zhen pa med pa'i phyir/ yang srid par 'ching bar mi 'gyur ro/ /de ltar na yang / rnam par rtog pa ma gtogs par/ /'khor ba zhes bya yod ma yin/ /des na rnam par mi rtog pas/ /rtag tu khyod ni mya ngan 'das/ / zhes gsungs pa yin no/ /da ni srid pa thar pa dag ji lta ba bzhin du yang dag par 'byung ba de ltar bstan pa'i phyir gsungs pa ni/ srid dang thar pa yongs shes pas/ /zhes bya ba la sogs pa smos te/ srid dang thar pa ni srid pa dang thar pa'o/ /de dag yongs su shes pa ni srid pa dang thar pa yongs su shes pa'o//de'i phyir srid pa dang thar pa yongs su shes pa'i rgyu las 'bras bu 'byung bar 'gyur ba yin no/ /'bras bu ji lta bu zhig 'byung bar 'gyur zhe na/ de spangs thob pa'i 'bras bu 'byung / /zhes bya ba smos te/ de zhes bya bas ni srid pa dang thar pa bzung ngo //de ltar na don ni 'di yin te/ srid pa ni dor bar bya ba nyid yin pa'i phyir spangs pa'i mtshan nyid kyi 'bras bu 'byung la/ thar pa ni blang bar bya ba nyid yin pa'i phyir thob pa'i mtshan nyid kyi 'bras bu 'byung ba zhes bya'o/ /yongs su shes pa de yang ji srid 'bad pa mchog gis rig pa rtogs par byas na/de srid srid pa dang thar pa yongs su shes pa mi 'byung ngo / /yongs su shes pa med pas de spangs pa 'thob pa'i 'bras bu 'byung bar mi 'gyur ro/ /de nyid kyi phyir/ blo gros bzang po thams cad ni/ /nang sems pa la brtson pa yin/zhes bya ba smos te/ blo gros bzang po gang la yod pa de ni blo gros bzang po'o/ /blo gros bzang po de dag thams cad nang gi bdag nyid sems la brtson pa yin no/ /nang gi sgra ni nang rig pa la bya'o/ /de thos pa dang bsam pa dang bsgom pa ni sems pa'o/ /brtson pa ni de'i don du brtson pa ste/gang goms pa yin no zhes bya ba'i don to/ /de ltar byas na srid pa dang thar pa yongs su shes pa phyin ci ma log par de dag 'gyur ro zhes bya ba'i don to/ /da ni 'khor ba dang thar pa dag lung gi rjes su 'brangs te bsdus nas mdo'i gnas kyi mtshan nyid/ 'dod chags la sogs drir bcas sems/ /zhes bya ba la sogs pa smos te/ 'dod chags dang por gang dag la yod pa de ni 'dod chags so/ /stsogs pa smos pas zhe sdang dang gti mug la sogs pa rnams bzung ngo / /bag chags kyi dbang gis de dang de dag gi 'dod chags la sogs pa'i dri mas bsgos pa'i sems la 'khor ba zhes bya bar brjod do//sems de nyid las lam bsgoms pas 'dod chags la sogs pas dben pa nyid de dag mdor bsdus pa ni rgya che ba ma yin par thar pa yin par gsungs so/ /gang gis gsungs she na/ sgrib pa spangs pa'i rgyal ba yis//zhes bya ba smos te/ nyon mongs pa dang shes bya'i sgrib pa gang dag la spangs pa mnga' ba de dag ni sgrib pa spangs pa'o/ /de lta bu des gsungs zhes bya ba'i don to/ /'dod chags la sogs pa rnams don dam par yod pa yin no zhes 'ba' zhig nges par 'gyur bas de ldog pa'i phyir/'dod chags zhe sdang gti mug ni/ /zhes bya ba la sogs pa smos te/ lus can ni lus dang ldan pa rnams te/ 'dod chags dang zhe sdang dang gti mug gang yin pa de dag ni sems kyi kun tu rtog pa tsam gyi ngo bor rtogs par bya'o/ /de bas na de dag don dam par yod pa ni ma yin no//gal te gang dag 'dod chags la sogs pa rnams kyi yul du gyur pa gzugs la sogs pa'i chos de dag kyang tha dad pas don dam par yod pa'i phyir sems tsam nyid du mi 'grub bo zhe na/ gang gis chos ni gzhan dag kyang / /zhes bya ba la sogs pa smos te/ kyang gi sgra ni bsdu ba'o//'dod chags pa 'ba' zhig sems kyi kun tu rtog pa tsam gyi ngo bo ma yin gyi/ gzugs la sogs pa'i chos gang ci srid pa'o/ /byis pa ni mi mkhas pa'o/ /brdzun bdag nyid ni log par lta bas yongs su bzung ba rnams te/ 'dod chags dang zhe sdang dang gti mug gis brtags pa de dag kyang sems kyi kun rtog pa tsam gyi ngo bor blta bar bya'o//gang gi phyir gcig dang du ma'i rang bzhin gyis rnam par dpyad na dri za'i grong khyer lta bur don dam pa'i ngo bor mi rung ba'i phyir/ de bzhin so so'i bdag nyid yod pa rnyed par mi 'gyur te/ de bas na kun brtags pa'i rang bzhin yin no//kun brtags pa de yang rtag tu med pa'i phyir de dag tha dad pa dang tha dad pa ma yin par don dam par gang zhig las 'gyur/ de bzhin du 'dod chags la sogs pa rnams dang / gzugs la sogs pa'i chos rnams kyang rnam par rtog pa'i ngo bo yin par rnam par dpyad pa'i sgo nas med par bstan nas/don dam pa'i bden pa rnam par rtog pa thams cad dang 'brel ba med pas gcig tu rnam par dag pa nyid du bstan pa'i phyir/ 'di skad du/ dam pa'i don gyi rtog pa la'ang / /zhes bya ba la sogs pa smos te/ 'dir yang 'ang gi sgra ni bsdus pa yin/'dod chags la sogs pa dang gzugs la sogs pa don dam par med pas rnam par rtog pa thams cad slob dpon gyis bkag gi 'ba' zhig ni ma yin no/ /ji srid don dam pa la'ang thob pa dang dpyod pa la sogs pa'i mtshan nyid kyi rnam par rtog pa thams cad shin tu med pa'i phyir dgag pa nyid brjod par bzhed pa yin te/don dam pa bdag gis rtogs zin to/ /bdag gis rtogs so/ /bdag gis rtogs par 'gyur ro zhes bya ba ste/ 'di ltar rtogs par bya ba dang / rig pa dang / rig par byed pa la sogs pa mtha' yas pa rnam par rtog pa'i zhen pa ni don dam pa rig pa'i mkhas pas mtha' yas pa'i chags pa'i rgyu yin pa'i phyir 'khor ba'i rgyur yang rtogs so//gang gi phyir de lta bas na don dam pa rig pas gnas par mi bya chags par mi bya'o zhes bya ba'i don to/ /gang gi phyir dge ba'i don la yang rtogs pa'i don gyis 'khor ba'i rgyur 'gyur la/mi dge ba yang rnam pa de bzhin du yin no/ /rtog la bye brag ci zhig yod/ /ces bya ba ni don dam pa'i yul lam don dam pa ma yin pa'i yul du rtog pa de la'o/ /gnyi ga la yang lam mthun pa yin te/ brtags pa nyid yin pa'i phyir ro//da ni sngar gsungs pa'i don dpes bstan pa'i phyir/ rten gyi dbye ba la brten pa'i/ /zhes bya ba la sogs pa smos te/ me'i bsreg pa'i mtshan nyid ni bud shing yin mod kyi/ rtsa ba dang lo ma'i dbye bas de'i sreg pa nyid du ni bye brag med do/ /bsil ba'i ngo bo tsan dan gyi me 'dis kyang reg pa tsam gyis te/reg pa'i spyod yul du gyur pas sreg pa nyid yin no/ /de bzhin du don dam pa'i yul gyi rtog pa la yang shes par bya'o/ /yang ci'i phyir don dam pa'i rnam par rtog pa la yang zhen par mi bya zhe na/ thams cad nyid du spang bar bya/ /zhes bya ba la sogs pa smos te/thams cad ni ma lus pa'o/ /'di ltar 'khor ba'i rnam par rtog pa rags pa 'ba' zhig ni ma yin gyi/ don dam pa'i ngo bo la mngon par zhen pa'i rnam par rtog pa thob pa'am/ mi 'thob pa'i rgyu mtshan phra mo ji snyed pa'ang spang bar bya'o zhes bya ba'i don to//rtog pa ji lta bur gyur pa zhig ce na/ 'khrul pa'i ngo bo zhes bya ba ste/ sgyu ma'i rang bzhin zhes bya ba'i don to/ /gang gi phyir/ sems ni mngon par bslad pa yin/ /zhes pa ni de kho na nyid la gegs byed par 'gyur zhes bya ba'i don to/ /gal te de lta yin na 'khrul pa'i ngo bo ji lta bu yin/gang gi phyir de rtog pa dang mtshungs pa de'i phyir dgag pa'i dpes de'i ngo bo bstan pa'i phyir/ 'khrul pa yang zhes bya ba la sogs pa smos te/ yang gi sgra ni bsdu ba'i don to/ /des na 'khrul pa ma dag pa'i phyir/ mig 'phrul gyi ni rnam 'phrul yin/ /zhes bya ba ni mig 'phrul gyi spros pa lta bur snang ba yin no//rnam 'phrul ni yang dag par byung ba'o/ /ji ltar mig 'phrul mkhan gyis de'i ngo bo ma yin pa'i sa la sogs pa'i dngos po glang po la sogs pa'i dngos por snang ba de bzhin du gnyis su med pa'i rang bzhin gyi sems kyang 'khrul pa'i dbang gis gnyis kyi ngo bor snang ba 'byung ngo zhes bya ba'i don to//da ni mig 'phrul gyi ngo bo de shin tu yod pa ma yin par bstan pa'i phyir/ mig 'phrul yang zhes bya ba smos te/ mig 'phrul yang sems 'khrul pa tsam du shes par bya ste khong du chud par bya'o/ /yang mig 'phrul zhes bya ba dngos po chung zad kyang med de gang gi phyir de'i ngo bo rnam pa dpyad pa'i sgo nas shin tu yod pa ma yin pa'i phyir ro//da ni 'khrul pa bkag nas sems kyi yongs su grub pa'i ngo bo bstan pa'i phyir/ de phyir sems kyi zhes bya ba la sogs pa smos te/ de'i phyir ni bstan ma thag pa'i rnam pas so/ /rang bzhin med pa'i 'khrul pa dang sems kyi rang rig tsam lhan cig gnyis su med par blta'o//ji ltar 'khrul pa shin tu yod pa ma yin pa'i phyir dngos po med pa de bas na sems kyi de dang de gnyis su mi rigs pa'i phyir gnyis su med par blta'o/ /'khrul pa mi dmigs pa'i phyir sems nyid gcig tu grub bo/ /'di ltar mo gsham gyi bu dang ri bong gi rwa gnyis las mo gsham gyi bu mi dmigs pa'i phyir mo gsham rang nyid gcig pu kho na grub po//de ltar ri bong gi rwa mi dmigs pa nyid kyi phyir rwa dang 'brel pa med pa'i ngo bo rwas dben pa rang nyid gcig pu grub po/ /de bzhin du 'khrul pa mi dmigs pa'i phyir shes pa gcig pu nyid grub po//gnyis su med pa ni de'i ngang tshul du lta'o zhes bya ba'i don to/ /de ltar 'khrul pa dgag par byas nas sems kyi yongs su grub pa'i ngo bo bstan pa'i phyir/ dbu ma'i zhes bya ba smos te/ de nyid du gnyis su med par bstan te/ sgro 'dogs pa dang skur pa 'debs pa spangs pa ni dbu ma'i lam du shes par bya'o//'di ltar yod pa ma yin pa'i bdag nyid yang phyi'i don gzung ba dang 'dzin pa nyid du lhag par sgro 'dogs pa ni sgro btags pa'o/ /gnyis su med pa'i shes pa khas mi len pa ni skur pa 'debs pa yin no/ /gang gnyis po de dag dang bral ba ni dbu ma'i lam zhes bya'o//de nyid gnyis su med par lta ba sems kyi gnyis su med pa'i ngo bo mthong ba ni chos nyid de chos kyi bdag nyid med pa phung po dang / skye mched dang / khams la sogs pa'i chos rnams bdag med pa zhes bya ba'i don to/ /de ltar yang dag tu 'dzin pa bzlog pa'i phyir/phung po khams la sogs pa bstan/ /de yang bzlog nas skal ldan la/ /sems tsam du ni rnam par gzhag /ces gsungs pa yin no/ /yang dag pa dang bden pa'i mtha' ni mthar thug pa'o/ /de bas na de la yang dag pa'i mthar zhes bstan to//de nyid las gzhan med pa'i phyir de bzhin nyid do/ /de nyid gnyis kyis stong pas na stong pa nyid do/ /de bzhin du chos rnams mnyam pa nyid kyi phyir mnyam pa nyid do/ /rnal 'byor pa rnams zhi gnas dang lhag mthong dang ldan pas nges par grol ba ni grol ba yin no/ /de nyid rnam par rig tsam nyid ni/phyi rol gyi don bkag pa yin no/ /de bzhin nyid yang dag pa ji lta ba bzhin ring ba dang nye ba bkag pa'i sgo nas thob pa dang mthong ba bstan pa'i phyir/ chos kun nang du chud pa'i phyir/ /zhes bya ba la sogs pa smos te/ gnyis su med pa'i sems nyid de bzhin nyid kyi sgrar brjod do//de gnyis kyis dben pa nyid kyis chos thams cad nang du chud pa'i phyir de'i nang du chud pa yin no/ /de'i phyir ring ba ma yin te/ ring ba na gnas par gyur pa ma yin no/ /'on kyang rnal 'byor pa ma yin pa'i skye bo rnams kyis yongs su ma shes pa phyir thob par mi 'gyur ro/ /gang gi tshe dga' ba chen pos de'i zag pa rnams zad pas sangs rgyas par gyur pa de'i tshe nye ba ma yin pas nye ba'ang min no//'di ltar gnyis su med pa'i ngo bo de nyid la gnyis kyi rnam par byis pa rnams 'khrul pas ngo bo dpyad par mi nus te/ nges pa nyid du mi nus zhes bya ba'i don to/ / de'i phyir 'di byis pa rnams kyis thob par mi 'gyur zhes bya ba'i don to/ /'o na su zhig gis de rang gis rig ce na/ rang rig ces bya ba la sogs pa smos te/ phra ba gzigs pa ni thogs pa med pa'i ye shes kyi spyan gyis dngos po phra ba rnams gzugs te/ de dag gis de rang gis rig pa yin no//rang la gnas pa ni yang rang gi sems la gnas pa'o/ /bdag 'dra ba shes rab rtsings pas mthong ba med ces bya ba'i don to/ /yang ji ltar sangs rgyas de rnams kyis rang gis rig ce na/ phra ba'i phyir zhes bya ba smos te/ ji ltar sangs rgyas de dag gi rang bzhin phra ba yin te/ de lta bas na phra ba nyid rang gis rig par rigs so zhes bya ba'i don to//zag pa rnams zad pas gnyis su med pa de bzhin nyid shin tu phra ba nyid sangs rgyas rnams kyi yul du gyur pas dbang po las 'das pa gzigs kyi/ phyi rol gzigs pa med ces bya ba'i don to/ /rnal 'byor pa rnams thar pa thob pa dka'o snyam du brgya la sogs pa de bsal ba'i phyir nam yang zhes bya ba la sogs pa smos te/rnal 'byor rig pas na rnal 'byor rig pa'o/ /des nam yang rnam pa 'ga' zhig tu yang thar pa ring po na gnas par 'gyur snyam mi bsam mo/ /'di ltar sems de nyid kun tu brtags pa'i chos kyis dben pa ma yin pa ni 'khor ba nyid du shes la/chos de dag nyid kyis stong pa ni mya ngan las 'das par shes pa'o/ /gang gi phyir rang dngos nyid des mthong ba ni mya ngan las 'das pa'o/ /'di skad du bstan par 'gyur te/ sems de nyid dri ma dang bcas pa dang / dri ma med pa'i bye brag gis 'khor ba dang mya ngan las 'das par bzhag gi /de las ma gtogs par 'khor ba dang mya ngan las 'das pa 'ga' yang mi dmigs so zhes bya ba yin no/ /'khrul pa tha dad pa kun tu brtags pa ji srid rigs pa dang lung gis dgag par ma byas pa de srid du/sems gnyis su med pa'i ngo bo ji ltar 'grub/ de lta bas na dang por rgya cher de dgag pa'i phyir/ nyi chu rab rib ces bya ba la sogs pa smos te/ nyi chu'i sgra ni smig rgyu'i chu la bya'o/ /lhag ma ni khong du chud par sla'o/ /nyi chu rab rib la sogs pa'i 'khrul pa'i dpe 'di dag gis 'khrul pa tha dad pa kun brtags pa dgag pa'i phyir gnyis su med pa sems tsam du smra ba rnams la dgos par 'gyur ba yin no//'di ltar de'i rigs pa brjod par bya ste/ snang ba tsam nyid du brtags pa'i don 'grub par ni mi rigs te/ gzhan du na nyi chu rab rib la sogs pa'i 'khrul pa rnams yod pa nyid du thal bar 'gyur te/'di ltar snang ba'i rgyu mtshan mtshungs pa'i phyir ro/ /rgyu mtshan mtshungs pa'i rgyu mtshan can la bye brag cung zad mi dmigs so/ /'di ltar rmi lam la sogs pa la yang don du snang mod kyi de la don yod pa ni ma yin no/ /de lta bas na snang ba tsam gyi phyi'i don yod par mi 'grub bo//'khrul pa gzhan kun brtags dang 'khrul pa rnams khyad par med pa'i phyir de dag gis 'khrul pa gzhan kun brtags pa ji ltar dgag par rigs pa ma yin nam/ mo gsham gyi bus ri bong gi rwa dgag par bya bar mi nus so/ /de ltar ni ma yin te phyi'i don du mngon par zhen pa'i dug gis sems bslad pas khyad par med pa'i ngo bo mi snang gi 'on kyang dngos po dang dngos po med pa'i khyad par du'o//de'i phyir byis pa de rnams kyi dngos por 'dzin pa de dag gis sel bar byed pa yin no/ /gal te de lta yin na des kyang sel bar mi rigs te/'khrul pa ni dngos po med pa'i phyir dang / med pa bya ba byed pa mi snang ba'i phyir ro/ /de ltar ni ma yin te/ 'di ni mthong ba kho na ste/ 'di ltar pha med pas bu shi'o zhes bya ba dang / char med pas 'bru nyams zhes bya ba lta bu'o/ /don rnams brdzun pa yin na byis pa rnams la ci'i phyir phyi'i don snang zhe na/yul du kun brtags de dang des/ /zhes bya ba la sogs pa smos te/ de dang des ni rnam pa du ma thog ma med pa'i dus su goms pa'i yul du kun tu rtog pas gzugs la sogs pa'i kun brtags pas sems 'khrugs pas da ltar yang de'i bag chags kyi shugs te bag chags kyis 'byung ba'o//rmi lam gtan pa med pa la don du snang ba de dag la skye'o/ /yang ci nyin par sad pa'i gnas skabs na skye ba lta ci smos/ de lta bas na de nyid kyi phyir/ mi bzad pa yi bag chags dug /ces bya ba smos te/ 'di ltar dug zin pa 'ga' zhig la ser po'i dngos po med kyang ser po'i dngos por snang ba skye'o//de bzhin du bag chags kyi dug gis zin pas phyi'i don med kyang der snang ba skye ba nyid do/ /'on kyang 'di tsam gyi khyad par yod de/ dug gis zin pa ni sngags la sogs pas dug zhig par nus kyi/ lam sgom pa la mi phyogs pas ni bag chags kyi dug zhi bar mi nus so/ /de lta bas na dug snga ma las dug 'di ni mi bzad pa yin no/ /da ni phyi'i don du mngon par zhen pa rnams ni shes par bstan pa'i phyir/ e ma'o brdzun pa'i rnam rtog gi/ /zhes bya ba la sogs pa smos te/ e ma'o zhes bya ba ni ngo mtshar to//brdzun ni gzugs la sogs pa'i rnam par rtog pa'i snang ba'o/ /rgyun ni 'jug pa'o/ /stug po ni mthug po nyid do/ /gang gi phyir de'i dbang du gyur pa'i sems can rnams la/ rmi lam las kyang rmi lam gzhan gyi rtog pa ste/ mi shes pa gnyid kyis log pa'i 'jig rten rnams la med pa'i don snang ba nyid ni rmi lam yin par grag go//rmi lam gyi gnas pa de la yang rmi lam gzhan gyi rtog pa gang brten pa de rnams ni shin tu mi brtan pa nyid do/ /'dir dpe bstan pa'i phyir/ chu bur zhes bya ba smos te/ 'di ltar chu bur gyi steng du chu bur gnyis pas gnod pa'i bdag nyid can de bzhin du rmi lam gzhan zhes bya ba'i don to//rmi lam snga ma med na rmi lam phyi ma ji ltar 'grub par 'gyur zhe na/ gang gi phyir rmi lam lta bu'i rmi lam mo/ /ji ltar zhe na/ don med pa snang ba dang 'dra ba'i phyir ro/ /'dra ba yang gnyis la gnas par 'gyur ba yin te/ba lang dang ba med pa bzhin no/ /des kyang rmi lam gzhan med pas 'dra ba med pa'i phyir 'dod pa'i dngos po mi 'grub po/ /de ltar yang bcom ldan 'das kyis/ chos thams cad rmi lam lta bu yin gyi rmi lam ni ma yin no zhes gsungs so/ /de bas na dgongs pa ni 'dir 'di yin te/gang gis dpe nyid du rmi lam bstan pa de dag gi gzhung mi 'dod pa 'grub pa med do/ /yang gang dag phyi'i don bzhin du rmi lam du mthong ba'i don yang yod pa nyid du 'dod pa de dag la rmi lam gzhan gyis gnod pa yin te/ chu bur gyi steng du chu bur bzhin no//de ltar yang slob dpon gyis/ /rmi lam du mthong yod yin la/ /dngos po bzung ba'i stobs yin na/ /gzhon nu ma sbrum bu thob pa/ /snang phyir 'di ni mi rigs so/ /zhes phyis 'chad par 'gyur ro/ /byis pa rnams la med bzhin du snang ba skye ba ci'i phyir zhe na/ yang dag ma yin zhes bya ba la sogs pa smos te/ma rig pa'i dbang gis de dag la med pa snang bar 'gyur ro/ /yang dag pa ni yang gnyis med pa'i don dam pa bsgribs nas gnas te/ de 'gebs par byed pa yin no/ /'di ltar ma rig pa yang dag pa ma yin pa'i don bskyed pa nyid ni brdzun pa nyid de snang bar byed pa yin no//ji lta bu zhig ce na/ mig ser zhes bya ba smos te/ dper na mig ser gyi nad kyis btab pas dung dkar po la yang dag pa ma yin pa'i don ser po'i dngos po nyid du snang ngo / /de bzhin du ma rig pa'i rgyus 'di yin gyi phyi'i don ni med do//phyi'i don tha dad pa med kyi bag chags kyi dbang gis sems nyid don gyi rnam par snang ba zhes rnal 'byor spyod pa pa smra bas/ de bas na de'i gzhung gis dogs pa bsdu ba'i phyir/ tha dad min pa'ang zhes bya ba la sogs pa smos te/ tha dad min pa'ang ni gnyis med pa'i ngo bo'i yang sems bag chags kyi dbang gis tha dad de/gzung ba dang 'dzin pa'i bye brag tu gsal bar snang ngo / /de bzhin du phyi rol min pa'ang phyi'i dngos po nyid rnam pa du ma sngon po'i ngo bo la sogs pa'i rnam pa'i dri mas bsgribs par snang zhes bya ba'i don to/ /'di skad du bstan par 'gyur te/ gzung ba dang 'dzin pa'i dbye bas sems gnyis kyi ngo bo nyid yin zhes bya ba'i don to/phyi'i don mngon sum du dmigs pa ji ltar med pa bzhin du gnas ma yin nam/ gang gi phyir nyi ma la sogs pa phyi'i dngos po nyid mngon sum du dmigs pa 'di ji ltar de dag med pa yin snyam pa la/ nyi ma zla ba zhes bya ba la sogs pa smos te/nyi ma la sogs pa phyi'i dngos po ni ma yin te/ 'on kyang 'di dag sems kyi sprul pa'o zhes bya ba ni sems nyid de'i rnam par snang gi phyi'i don ni ma yin no/ /nyi ma la sogs pa 'ba' zhig ni ma yin gyi/ khams gsum po 'di dag par ni 'dod pa dang gzugs dang /gzugs med pa'i khams gsum ni khams gsum po'o/ /de dag gi tshad ni ji tsam zhe na/ srid pa'i rtse mos zhes bya ba smos te/ srid pa'i rtse mos yongs su gcad pa'i bar du'o/ /'di skad du/ 'du shes yod min med min gyi bar 'di dag thams cad sems can dang sems can ma yin pa'i grangs ji ltar snang ba ste/dmigs pa 'di thams cad/ rnam shes dug gi thig le yin/ /thig le dang 'dra bar khyab ces bya ba'i don te/ dug gi sgra smos pa ni slob dpon rnal 'byor spyod pa'i gzhung mi bzhed par zur gyis ston pa'i don to/ /da ni rnal 'byor spyod pa pa la spyi'i don du smra bas/gal te snang na zhes bya ba la sogs pa smras te/ gal te rnam par shes pa nyid la don gyi rnam pa snang bar khas len na/ phyi'i don med do zhes de ji ltar rtogs/ ji srid phyi'i don gyi rnam par shes pa la rnam pa ma bskyed pa de srid de'i rnam pa ji ltar snang /rnam pa ma bskyed par de'i rnam pa nyid mi rigs kyi gang gi tshe yang don nye ba na gnas pa de'i rnam pa nyid rnam par shes pa la 'byung ba de'i tshe/ phyi'i don yod pa nyid du grub bo zhes zer zhes grag go/ /gzhan du don la ltos pa med par gal te don gyi rnam pa 'byung ba'am/ 'byung bar mi 'gyur ro/ /de lta bu sems la bsdogs nas gal te phyi'i don snang na ji ltar med de/ ci ltar med pa nyid de rtogs par 'gyur te/ ri bong gi rwa la sogs pa med pa mi snang ba'i phyir ro/ /snang ba yang yod pas khyab pa yin la/ med pa'i bdag nyid snang bar mi rigs so//de ltar phyi'i don du smra ba rgol ba la rnal 'byor spyod pa la lan 'debs te/ snang ba'i phyir don yod pa nyid snang ba ni ma yin te/ de ni ma nges pa nyid yin pa'i phyir ro/ /'di ltar/ ci ga rmi lam mi snang ngam/ /don du snang mod kyi de las yang don yod pa ma yin te/med ces bya ba'i don to/ /don nye bar gnas pas don gyi rnam pa rnam par shes pa 'byung ba ni ma yin te/ 'di ltar rab rib dang ldan pas don med kyang skra shad kyi rnam pa rnam par shes pa la 'byung ba bzhin no/ /de lta bas na bag chags kyi mthus rnam par shes pa la don gyi rnam pa snang gi phyi'i don yod pas ni ma yin no//yang ji ltar sems gzhan gyi ngo bor snang zhe na/ lhag pa'i dri ma zhes bya ba la sogs pa smos te/ gang gi phyir bag chags kyi mthus lhag pa'i dri mas blo rtogs pa'i rang gi bdag nyid bsgribs par gyur pas de'i phyir blo gzhan gyi ngo bor snang ba yin no//blo'i sgra ni rnam par shes pa'i rnam grangs yin no/ /de lta bas na rnam par shes pa nyid snang ba zhes bya ba'i don to/ /ji ltar zhe na/ shel dang 'dra ba yin zhes bya ba smos te/ ji ltar na nor bu shel lhag pa'i dri mas rang gi ngo bo bsgribs gzhan gyi ngo bor snang ngo //rnam par shes pa yang de bzhin no zhes bya ba'i don to/ /lhag pa'i rgyu mtshan gyis nor bu shel gzhan gyi dngos por snang ba mngon sum gyis dmigs na yang rnam par shes pa'i rgyu mtshan ma dmigs pa'i phyir ji ltar/ gzhan gyi dngos por snang zhes bya//rang bzhin nyid ni mi snang ba/ /zhes bya ba la sogs pa smos te/ gal te yang gzugs la sogs pa'i rnam par rtog pa spyi nyid kyi phyir rang bzhin nyid ni mi snang ba'ang de dag kyang bsod nams dang bsod nams ma yin pa dang / mi g.yo ba'i bag chags bsgos pa dang 'dra bas bstsags thob pa'i rang gi mtshan nyid kyi ngo bo lta bu thob cing de rnam par rtog pa la snang bar 'gyur te/mthong ba'i spyod yul nyid thob pa lta bu mtshan nyid do/ /de bas na sems gzhan gyi ngo bo thob pa ni bag chags kyi rgyu mtshan yin zhes bya ba'i don to/ /sems gcig ji ltar gnyis su snang ba ma yin zhe na/sems ni zhes bya ba la sogs pa smos te/ gal te yang sems gcig nyid de bzhin du yang rnam par bslang ba'i phyir te/ rnam par 'khrul pas so/ /yang bag chags dang thabs la mkhas pa 'ga' zhig gis gzung ba'i cha dang 'dzin pa'i cha'i dbye bas gnyis su snang ba ni gnyis su dmigs zhes bya ba'i don to//gzung ba dang 'dzin pa'i ngo bo mi shes pa de bas na de gnyis kyi mtshan nyid bstan pa'i phyir/ gzung ba'i rnam pa zhes bya ba la sogs pa smos te/ gzung ba'i rnam pa mi g.yo ba'i phyir ni 'gul ba med pa'i phyir te/phyi rol lta bu nyid du gnas pa ni phyi rol lta bur snang ba'o/ 'dzin pa'ang srog dang bcas pa'i phyir ni g.yo ba dang bcas pa'i phyir nang ni de bya ba dang bcas pa lta bur mtshon zhes bya ba'i don to/ /'di skad du bstan par 'gyur te/ don ni gzung ba'i rnam par shes pa ni 'dzin pa yin no/ /da ni slob dpon gyis gzung ba dang 'dzin pa'i ngo bo dgag pa sngon du 'gro bas phyi'i don du smra ba'i gzhung dgag pa'i phyir/ 'dir ni phyi nang cung zad med/ /ces bya ba la sogs pa smos te/ 'dir ni cung zad de phyi'i gzung ba'i ngo bo mi dmigs pa dang /nang gi 'dzin pa'i ngo bo yang ma yin no/ /rig pa po ma gtogs par gzung ba dang 'dzin pa'i ngo bo gzhan ni med do/ /de yang gnyi ga skad cig gcig la skye ba ni mi rigs so/ /de'i bdag nyid dang / de las byung ba'i 'brel pa med na gzhan gyis/ / gtogs pa ni ma yin no/ /'dzin pa ni gzung ba'i rang bzhin ma yin te/ tha dad par khas len pa'i phyir ro/ /de las byung ba yang ma yin te/ lhan cig skyes pa'i phyir ro/ /gang gi phyir de'i bdag nyid de las byung ba nyid yin na gzung ba dang 'dzin pa'i ngo bor 'grub bo/ / gcig la gcig ltos pas grub pa'i phyir gzung ba dang 'dzin pa'i ngo bo ma yin no/ /gang gi phyir gzung ba ni kun brtags pa yin pa'i phyir brtag tu med pa'i ngo bo nyid de/ de bas na ci zhig la ltos nas rnam par shes pa la 'dzin pa zhes bya/ bar na ma yin zhes bya ba smos te/ dbang po dang yul gyi bar na gzung ba dang 'dzin pa'i ngo bo cung zad kyang med do/ /gzung ba log na de'i rang bzhin ma yin pa dang / de'i 'bras bu ma yin pa'i 'dzin pa nges par mi ldog go/ /de nyid kyi phyir med min zhes gsungs te/ dgag pa gnyis kyis rnal ma'i don rtogs par byed pa yin no//des na gzung ba dang 'dzin pa'i ngo bo las 'dzin pa med pa ni ma yin te/ 'on kyang yod pa nyid do/ /ma rig pa'i dbang gis sems la rnam pa'i ngo bo nyid snang bar rnal 'byor spyod pa pa gang smra ba de yang mi rigs te/ gang gi phyir rnam pa med pa ni rnam par shes pa'i de kho na nyid yin pas de dang 'brel pa med pa'i brdzun pa'i rang bzhin du gyur pa de la ji ltar snang bar 'gyur/rnam pa dang rnam par shes pa lhan cig 'brel pa med na gang zhig de'i stobs kyis rnam pa nyams su myong bar 'grub par 'gyur ba/ 'di ltar rnam pa ni shes pa'i rang bzhin ma yin te/shes pa bzhin du yod par thal bar 'gyur ba'i phyir ro/ /'on te shes pa'i rnam par rig pa'i rang bzhin yin par 'dod na de'i tshe rnam pa bzhin du shes pa yang med par thal bar 'gyur ro/ /shes pas rnam pa bskyed pa ni ma yin te/gzugs med pas gzugs can bskyed pa mi srid pa'i phyir ro/ /rnam pa las shes pa 'byung ba yang ma yin te/ rnam pa brdzun pa nyid kyis don byed pa'i nus pa dang bral ba'i phyir ro/ /de'i bdag nyid dang de las byung ba'i 'brel pa ma gtogs pas 'brel pa gzhan med do//yang de lta bas na gang zhig gang dang 'brel pa med pa de yang dag par rig de nges par mi rtogs te/ 'di ltar shes pa'i bdag nyid rig pa na mo gsham gyi bu bzhin no/ /de'i bdag nyid dang de las byung ba'i mtshan nyid kyi 'brel pa rnam pa gnyis po rnam par shes pa dang /mngon par 'dod pa'i rnam par bcas pa yang med pa ni khyab par byed pa mi dmigs pa ma yin no/ /de lta bas na kun brtags pa spangs pa'i phyir sems gnyis su med par grub pa yin no/ /de nyid bstan pa'i phyir/ sems tsam du ni gnas phyir ro/ /zhes bya ba smos so/ /rtog pa'i dra bas thams cad spangs pa'i gnyis su med pa'i shes pa rnam par gzhag pa de nyid kyi phyir gnyis su med pa shes pa nyid thar pa yin no//'phags pa'i bden pa bzhi bsgoms pas 'dod chags la sogs pa spangs pa thar pa ma yin nam/ kun tu brtags pa'i 'khrul pa dang bral ba'i sems nyid ji ltar thar pa yin/'di ni nyan thos kyi gzhung gi dogs pa bsdu ba'i phyir/ 'dod chags zhes bya ba la sogs pa smos te/ la'i sgra ni gang gi phyir zhes bya ba'i don to/ /grong gi sgra ni tshogs kyi rnam grangs so/ /de la dbang po'i tshogs ni 'dod chags kyi gnas ma yin te/de bas na dbang po rnams la mi gnas so/ /don rnams la min te/ gzugs la sogs pa la ma yin no/ /sems la min te/ rnam par shes pa'i tshogs drug la yang ma yin no/ /bdag la gnas min gzhan gnas min/ /zhes bya ba ni/ bdag tshad mas ma grub pa'i phyir bdag la mi gnas so//bdag yod na ni gzhan du shes la/ gang gi tshe bdag ma grub pa de'i tshe gzhan med pa'i phyir gzhan la mi gnas so/ /de ni yod pa ma yin te yod pa mi dmigs so/ /gzhan du na gzugs la sogs pa bzhin du mngon sum gyis yongs su gcod par 'gyur ro//med pa'ang min ni sems las byung ba'i ngo bor kha cig gis brtags pa'i phyir ro/ /'o na sems can rnams la rgyu med par ji ltar skye zhe na/ ma brtags 'brel ba'i zhes bya ba la sogs pa smos te/ phyi rol med pa'i phyir yul rnams sgyu ma yin te/ de bas na de'i dag las skye ba ma yin no/ /kha cig sems 'khrul pa las yin no zhe'o/ /de ni dngos po med pa'i phyir ma yin no/ /de bas na ma brtags pa'i 'brel pa'i rgyu las 'dod chags 'byung ngo / /ga la yi yang ni bstan du med cing mi snang ba'i sprin gyi nang nas gnam lcags bzhin ni thog 'byung ba lta bu'o/ /de bas na de brtags pa nyid do//de bzhin du nyon mongs pa gzhan yang dngos po med par bstan pa'i phyir/ de bzhin zhe sdang zhes bya ba la sogs pa smos te/ ji ltar 'dod chags dngos po med pa nyid du bstan pa de bzhin du zhe sdang dang gti mug gnyis kyang dngos po med pa nyid du rtogs par bya'o/ / de ltar 'dod chags zhe sdang gti mug 'ba' zhig ma yin gyi/ nyon mongs pa'i rigs gzhan gang yin pa yang ste/ nga rgyal dang lta ba dang the tshom la sogs pa'o/ /khams gsum du ni khyab byed pa ni/ 'dod pa dang / gzugs dang gzugs med pa'i khams su khyab pa'i ngang tshul can no//de dag ni rtog pa'i dug las byung bar rtogs par bya'o/ /dngos po'i ngo bo la ni ma yin no/ /yang nyan thos pa 'di skad du smra ste/ rtog pa yang ni zhe sdang la sogs pa smos te/ gal te 'dod chags la sogs pa rtog pa las byung ba yin na/ de lta na yang rtog pa ni de kho na nyid du gzhi med par mi srid de/me lce 'bar ba ni bud shing med par 'ga' zhig gis nam mkha' la mched par mthong ba med do/ /de'i gzhi ni sems nyid do/ /de lta bas na yang de sems dang 'brel ba nyid kyi phyir 'dod chags la sogs pa sems las kun tu 'byung ba yin te/ de dag ji ltar rgyu med par 'byung ba yin/gal te rgyu las skye ba nyid kyang dngos po med pa yin na/ rgyu dang bcas pa de dag thams cad dngos po med par 'gyur ro/ /de'i phyir 'dod chags la sogs pa dngos po nyid du grub bo/ /yang dngos po nyid yin pa'i phyir de spangs pas thar pa yang grub bo//don de lta bu ni yang dag pa nyid ma yin te/ gang gi phyir dngos po yod pa gnyis la rten dang brtan pa'i ngo bor rigs so/ /gzhan du na ri bong yang rwa'i rten du 'gyur ro/ /me lce dang bud shing gnyi ga yang dngos po yin pa'i phyir ro/ /de bas na 'dod chags la sogs pa rnams dngos po nyid ma yin no//yang de dag 'di skad du smra ste/ gal te 'dod chags la sogs pa dngos po med par gyur pa yin na/ ji ltar bcom ldan 'das kyis de dag gi gnyen po ston par mdzad ce na/ mi sdug pa la sogs pa smos te/ thub pa'i dbang po sangs rgyas bcom ldan 'das kyis mi sdug pa sgom pa la sogs pa 'dod chags pa'i gnyen por gyur pa gang gsungs pa de dag tu zin dogs pa zhi ba'i phyir yin gyi/yang dngos po la gnas pa nyid ni ma yin no/ /'di ltar dper 'ga' zhig dug gis zin pa'i dogs pa'i dug gis khyab pa dogs pa'i dug la mkhas pa 'ga' zhig gis brdzun gyi sngags bzlas pas dogs pa'i dug zhi bar 'gyur ro//de bzhin du bud med nyid 'dod chags kyi rgyu mtshan du gyur pa de lta bu'i dug gis yongs su zin pa'i byis pa gang yin pa de dag la mi sdug pa'i sgom pa gnyen por bstan pa yin no/ /yang bud med rnams 'dod chags kyi rgyu mtshan nyid ni ma yin te/gzhan du na bud med mthong ba de dag thams cad 'dod chags skye bar 'gyur ro/ /de lta bas na 'ga' yang 'dod chags dang bral bar mi 'gyur ro/ /de ltar yang / kun rgyu 'dod can khyi rnams ni/ /zhes gsungs pa yin no//'di nyid la rig pa gzhan bstan pa'i phyir kun da zhes bya ba la sogs pa smos te/ gang dngos po med pa'i rang bzhin de'i dpe ni kun da dang / zla ba dang / pad+ma la sogs pa med pa la gang gis 'dod chags bskyed pa'i phyir so dang / bzhin dang / mig gi dper sbyar ro/ /'dod chags dang bral ba bskyed pa'i phyir/bshang ba la sogs pa'i dpe sbyar ba lus kyi dper mi rung ste/ gang gi phyir sad pa'i skabs kyi bud med kyi lus rmi lam gyi gnas skabs bzhin du khong du chud par bya'o/ /'di ltar rmi lam gyi skabs brdzun pa de ltar sad pa'i skabs kyang brdzun par 'gyur zhes bya ba'i don to//'di ltar 'dod chags dang / 'dod chags dang bral ba rgyu mtshan med par mthong bas rnal 'byor pas yul 'ga' la yang chags par mi bya'o zhes bstan pa'i phyir/ 'dod chags dang ni zhes bya ba la sogs pa smos te/ de ltar ni bstan ma thag pa'i rnam pas so/ /rmi lam gyi gnas skabs na bud med shes na 'dod chags dang 'dod chags bral ba gnyi ga brdzun zhing med ces bya ba'i don to//gang gi phyir rgyu mtshan mi dmigs pa'i phyir gzhan yang dngos po med pa nyid du bstan pa'i phyir/ 'ga' zhig ces bya ba smos te/ de la chang bas ni yul thams cad dngos po med pa'i ngo bo nyid do zhes bya ba'i don to//gang gi tshe phyogs gcig bud med rnams dngos po med par bstan pa'i phyir/ de phye bar gyur pa de'i tshe/ chad pa phye ba'i gtan tshigs kyis yul gang dngos po med pa'i phyir/ rnal 'byor pa/ chags pa ma yin chags med min/ /zhes bya ba'i don to/ /don de nyid bstan par bya ba'i phyir/gang zhig chags dang bral zhes bya ba la sogs pa smos te/ gang zhig dmigs pa dang ldan pas mi gtsang ba bsgoms pas yul rnams la 'dod chags dang bral ba skye mod kyi/ des de kho na nyid mthong ba ma yin pas/ 'khor ba las nges par mi grol lo//gang gi phyir chags pa dang / chags pa dang bral ba phan tshun ltos pa'i phyir ting nge 'dzin las langs na chags pa skye bar the tshom med do/ /de'i phyir 'dod spong don gnyer ba ste/ gang yin pa de chags bral la'ang ste/ 'ang gi sgra ni 'dod chags la'ang bsten mi bya ste/ yid la mi bya zhes bya ba'i don to/ /'di ltar 'phags pa'i bden pa bzhi'i lam 'khrul pa nyid du bstan pas chos la bdag med pa'i lam 'di ni ngo mtshar dang bcas pas bsngags pa'i phyir/ e ma'o 'jig rten las 'das pa'i/ /zhes bya ba la sogs pa smos te/ e ma'o zhes bya ba ni ngo mtshar ro//'jig rten las 'das pa ni 'jig rten las 'das pa'i/ lam 'di rnam par dben pa nyid/ /de brtags pa'i chos kyis dben pa nyid do/ /gang gi phyir/ gang zhig gzhan gyi tshig bden na ni/ nyan thos kyi theg par mi gtsang ba sgom pa la sogs pa'i tshig de nyid kho na bden pa theg pa chen po'i tshig 'di brdzun te/bden pa ma yin zhes bya ba'i don to/ /gnyi ga yang bcom ldan 'das kyis gsungs pa ma yin nam/ ji ltar gcig ni brdzun la gzhan ni bden zhe na/ gnod pa byed pa zhes bya ba la sogs pa smos te/gal te yang bden par nyan thos kyi theg pa bcom ldan 'das kyis bden par gsungs te/ rab 'byor la sogs pa lam des mya ngan las 'das pa thob pa'i phyir ro/ /de lta mod kyi sems can thams cad kyi don la mi sbyor ba'i phyir brdzun pa nyid de mi bden par rtogs par bya'o//nyan thos rnams kyang sems can gyi don la 'jug pa ma mthong ste/ de dag rang gi don 'dod pa'i phyir ro/ /de nyid kyi phyir shes rab kyi pha rol tu phyin pa la sogs pa gzhan dag las nyan thos kyi theg pa la dman pa yin no zhes gsungs so/ /gzhan yang theg pa de dag bden pa dang brdzun par brtags pa ci zhig dgos/gang zhig gzhan don byed pa de bden par bdag gis rtogs te/ de yang theg pa chen po yin te/ gang la gnas nas byang chub sems dpa' rnams srog gtong bas kyang sems can gyi don byed do/ /'di ltar sems can gyi don la nye bar sbyor ba nyid kyis nyan thos kyi theg pa las theg pa chen po mchog nyid du bstan nas/da ni ye shes mchog nyid kyis de mchog nyid bstan pa'i phyir/ bden la bden pa'i zhes bya ba la sogs pa smos te/ gang gi phyir gnyis su med pa'i ye shes theg pa chen po bden pa yin te/ de bas na theg pa chen po bden la/bden pa yin par mkhas pa mchog rnams gsungs pa yin no/ /gnyis su med pa'i ye shes de nyid kyis nyan thos kyi theg pa gzung ba dang 'dzin pa'i ngo bor rtog pa'i bdag nyid 'khrul pa brdzun par gzigs te/ de brdzun pa'i phyir nyan thos kyi theg pa bden pa la ni gnas par mi bya'o//mkhas pa bden par gsung ba zhes bya ba dang 'brel to/ /de ltar ye shes mchog nyid kyis theg pa chen po mchog nyid du bstan nas/ da ni nyan thos kyi theg pa la brten pa'i tshig rnams mi bden par bstan pa'i phyir/ byis pa'i 'jig rten zhes bya ba la sogs pa smos te/byis pa'i 'jig rten rnams kyi tshig ste/ ngag rnams kyi nang nas bden pa'i dag las brdzun pa'i ngag mchog ste/ phul du byung ba yin no/ /gang gi phyir gang cung zad de dang 'brel ba'i ngag de dag thams cad mthar ni ste/ de'i bdag nyid brdzun zhes bya ba'i don to//'di ltar de dag gi ngag rnams ni drang ba'i don du bstan pa yin te/ gang zag dang phung po dang / skye mched dang / khams ston pa'i phyir ro/ /gang zag la sogs pa rnams kyang yod pa ni ma yin te/ nyi shu pa las bkag pa'i phyir ro/ /bcom ldan 'das kyis gsungs pa'i dgongs pa yang mi shes te/blo la rnam par dpyod pa'i nus pa med pas sgra ji bzhin du 'dzin pa'i phyir ro/ /de bzhin du ji lta ba bzhin gyi sgra'i don mi shes pas sgra'i shes pa tshad mar ston par byed do/ /sgra'i shes pa las don thob pa ni med de/ gang gi phyir sgra rnams dang ni phyi'i don 'brel pa med pa'i phyir ro//don la mi bslu ba yang tshad mar bstan pa'i phyir/ /thob blo de nyid min pa'i phyir/ /zhes bya ba smos te/ blo'i sgra ni sgra'i shes par bstan to/ /de yang de nyid min te yang dag pa ma yin pa'i phyir ro/ /ci ltar zhe na/ tshad ma med pa'i phyir ro/ /thob par bya ba'i don la des thob med de/ spyi'i yul can yin pa'i phyir ro/ /de bas na yang dag pa ma yin pa brjod pa 'dis rang gi theg pa dman par bstan pa yin no/ /theg pa chen pos bzlog pa'i don gyis mchog tu bstan to/ /don de nyid rnam par spo ba'i phyir/dngos po gang gang zhes bya ba la sogs pa smos te/ de dang de zhes bya bar bstan par rigs te/ sdeb sbyor nyams pas ma brjod kyang rtogs par bya'o/ /rnam brtags pa zhes bya ba ni/ gnyi ga la yang blta'o/ /de la don ni 'di yin te/ sngar bstan pa'i rnam pas nyan thos kyi theg pa'i ye shes rnams blos brtags pa gzung ba dang 'dzin pa dang /kun tu rtog pas rnam par brtags pa/ de dag thams cad brdzun pa yin/ /de bden pa ma yin no/ /sgras sgro btags pa kun tu rtogs pas brtags pa de dag thams cad brdzun zhes bya ba'i don du/de bden zhes bya ba smos te/ 'dir yang gang dang gang brjod pa rig pas snga ma bzhin du sbyar ro/ /gang zhig ma brtags zhes bya ba yang snga ma bzhin no/ /de la don ni 'di yin to/ theg pa chen po gnyis su med pa'i ye shes de kho na nyid blos ma bcos pa rnam par rtog pas gang rnam par ma brtags pa de ni bden pa yin no//yang gang gi sgras sgro btags pas rnam par ma brtags pa de ni yang dag mtha' yin zhes bya ba'i don to/ /de ltar yang / gang zhig blo yi yul min pa/ /de la ngag brjod ga la 'byung //zhes gsungs so/ /da ni rtog ge pa'i dbang du byas nas/ e ma'o skyes bu zhes bya ba la sogs pa smos te/ e ma'o skyes bu'i rang bzhin ni/ e ma'o skyes bu'o/ /de ma dul ba ni 'bar ba'o/ /de nyid phyir ni gnas med pa ste/ 'ga' zhig lam de la gnas pa med pas gang dag de lta bur gyur pa'i byis pa rnams kyis brtags pa'i don to//sgrub pa dang ni sun 'byin pa'i/ /rgyus yod pa ma yin pa yang nga rgyal gyi dbang gis ji ltar mos pa'i don du 'jog ste/ yod pa'i ngo bo nyid du 'jog ces bya ba'i don to/ /da ni theg pa chen po'i phan yon bstan par bzhed nas/theg pa chen po zhes bya ba la sogs pa smos te/ theg pa chen po mi shes pa ni theg pa chen po'i ngo bo mi shes pa rnams las blun pa nyid de/ rmongs pa nyid legs pa yin te/ mchog yin gyi byang chub chen po'i lam las ring bar byed pa'i lam ngan pa la shes rab rno ba ni ma yin no//dper na lam nor ba las 'phye bo nyid ni 'phye bo'i rang bzhin can mchog yin gyi/ mgyogs pa ni mgyogs par 'gro ba ma yin te/ gang gi phyir lam de ni ring ba ni yongs su chad pa med par phyin pas brlag ces bya ba'i don to/ /da ni theg pa chen po la gus pa dang gzhan pa'i phan yon dang smad pa bstan pa'i phyir/gang dag ces bya ba la sogs pa smos te/ gang dag theg pa chen po shes shing theg pa chen po la gus pa de dag nyid don gyis bde bar gshegs pa par rtogs par bya'o/ /rang sde ni gzhan dag bcom ldan 'das kyi slob ma yin pa'i phyir rang gi sde pa'o//lam min ni lam las nyams pa'o/ /de nyid g.yang sa ste lhung ba'i gnas lta bu'o/ /der 'khor ba ni 'khrul pa'i rgyu la zhugs shing thob ces bya ba'i don to/ /da ni 'khor ba rnam par dpyad pa'i phyir/ sems ni yang dag 'jug pa yi//zhes bya ba la sogs pa smos te/ sems ni yang dag par 'jug pa gang yin pa de la mkhas pas rnam par dpyod pa mi 'jug gi/ gang gi phyir dngos po 'di dag la/ 'khor ba rab tu spang ba'i phyir te/ 'khor ba rab tu spang ba la dmigs nas/ thams cad blo ni mtshungs pa yin te/de'i phyir blo tha dad med pa'i rgyus mkhas pa rnam par dpyad par mi rigs so/ /'di skad du bstan par 'gyur te/ theg pa gnyis po la 'khor ba spong bar mi 'dod pa'i blo ni gang yang med do/ /yang 'khor ba rnams skye ba dang 'jig pa la sogs pa rnam par dpyod pa la 'jug pa de nyid bstan pa'i phyir/rgyun zhes bya ba la sogs pa smos te/ rgyun zhes bya ba ni rgyun mi 'chad par skad cig gzhan dang gzhan gyi rgyun 'jug ste/ mi rtag pa zhes bya ba'i don to/ /gzhan yang ji lta bu yin zhe na/ thog mtha' med pa'i bdag nyid can/ /zhes bya ba la sogs pa smos te/thog ma dang bral ba ni thog ma med pa'o/ /gang gi tshe thog ma yod par gyur pa de'i tshe rgyu med par 'gyur ro/ /de yang rgyu med pa nyid yin na rtag tu yod pa'am med par 'gyur ro/ /chos la bdag med par ma bsgoms pa'i tshul gyis mtha' ma med pa'i bdag nyid can no//rang bzhin 'di ci zhes ni ci'i ngo bo nyid yin zhes 'khor ba rnam par dpyod pa la shes rab can te/ theg pa chen po'i rjes su 'brang ba'i mkhas pas blos yongs su tshol te 'jug ces bya ba'i don to/ /da ni skye ba dang 'jig pa dpyad pa'i sgo nas 'khor ba brtag pa'i phyir/sna tshogs zhes bya ba la sogs pa smos te/ sna tshogs kyi sgra ni 'khor ba'i rnam grangs so/ /de lta na sna tshogs 'di dag gang las 'byung zhing gang du yang ni 'jig par 'gyur zhes rnam par dpyod pa la 'ga' zhig 'jug na rang gi bag chags sa bon zhes bya ba smos te/de lta bas na kun gzhi'i rnam par shes pa la gnas pa'i bag chags kyi sa bon las sna tshogs pa 'byung zhing skyes so/ /'jug pa'i rnam par shes pa rang bzhin du kun gzhi'i rnam par shes pa gsal bar rtogs pa med pa ma yin nam/ de ji ltar yod par khong du chud par bya zhe na/gnyid log ces bya ba la sogs pa smos te/ dper na gnyid log pa dang / brgyal ba dang / mi dran pa'i gnas skabs dang / de bzhin du 'du shes med pa dang / 'gog pa'i snyoms par 'jug pa'i gnas skabs na/ 'jug pa'i rnam par shes pa rnams 'gags nas slar yang 'byung bar snang bas sa bon thams cad pa nges par 'grub/sa bon thams cad pa'i sgra ni kun gzhi'i rnam par shes pa la bya ste/ 'di ltar sum cu pa las/ rnam smin sa bon thams cad pa/ /zhes bstan to/ /sa bon thams cad pa nyid du yang de ji ltar khong du chud par bya/ gang gi phyir 'jug pa'i rnam par shes pa thams cad kyi sa bon gyi rang bzhin du gnas pa'i phyir ro/ /de grub pa ni nges par yod par grub ces bya ba'i don to/ /de lta bas na 'jug pa'i rnam par shes pa'i 'bras bu mthong ba las rgyu rjes su dpag pa 'jug pa yin no/ /rgyu med na 'bras bu 'byung ba mi srid pa'i phyir gang rgyu yin pa de nyid kun gzhi'i rnam par shes pa zhes bya'o//rang gang gi nye bar len pa'i rgyu rnam par shes pa spangs nas rigs mi mthun pa las rnam par shes pa gzhan 'byung ba ni mi rigs so/ /dbang po rnams kyang nye bar len pa'i rgyu nyid ni ma yin te/shes pa nyid du thal bar 'gyur ba'i phyir ro/ bdag tu brtags pa las kyang mi rigs te/ de ni rtag pa nyid kyi phyir don gyi bya ba mi byed do/ /de ltar 'khor ba gang las 'byung bar shes par bya ste/ gang du 'gag pa rnam par dpyad pa'i phyir/ dbang don zhes bya ba la sogs pa smos te/dbang po ni rnam par smin pa'i rnam par shes pa nyid yin te/ gzugs la sogs pa so sor nges pa'i yul gyi rnam par shes pa 'bras bu las nus pa'i khyad par 'brel pa dang ldan pa'i mig la sogs pa'i skye mched rjes su dpag par bya'o zhes bstan to/ / de nyid kyi phyir gzhan mthong bas nges te/ rang gi rnam pas dpag pa sngon po la sogs pa'i shes pas nus pa'i bye brag dang ldan pa gzugs kyi skye mched rjes su dpag par bya'o zhes bstan to/ /de lta bur gyur pa'i dbang don gyi ngo bo kun gzhi'i rnam par shes pa las 'byung ba gang yin pa 'jug pa'i rnam par shes pa zhes bya ste/de dag thams cad 'jug pa'i rnam par shes pa zhes bya'o/ /rgyu dang 'bras bu'i ngo bo phan tshun tha mi dad pas na tha dad min no/ /'di skad du bstan par 'gyur te/ 'jug pa'i rnam par shes pa rnams kho na 'khor ba'i sgrar brjod de/gzhan 'ga' zhig 'khor zhes bya ba'i don du gzhag pa ni med do/ /gang gi phyir kun tu 'khor bas na 'khor ba ste/ rnam par shes pa las ma gtogs pa gzhan 'khor ba ni med de phyi'i don dag ni bems po nyid yin pa'i phyir ro/ /de lta bas na rnam par shes pa rnams 'byung ba dang /'gag pa ni 'khor ba 'byung ba dang 'gag pa yin par shes par bya'o/ /da ni sngar bstan pa'i don bstan par byed pa gnyis su med pa'i rang bzhin gyi sems yang rnam pa'i bye brag gis tha dad par ji ltar snang ba yin zhe na/ de ltar ni ma yin te/ de ni rtag tu gnyis su med pa'i rang bzhin yin pa'i phyir ro//'on kyang byis pa rnams la de'i ngo bo bstan pa'i phyir/ chu g.yos pa zhes bya ba la sogs pa smos te/ dper na/ chu g.yos pa las de dang der/ /rlabs ni tha dad dngos 'byung bzhin te/ ngo bor mthong ba nyid skad cig de la yang / phyir yang mi g.yo gnyid log bzhin du 'gyur ro/ /de bzhin du rnam par shes pa kun tu brtags pa'i rnam pa'i bye brag gis bdag nyid du tha dad pa'i ngo bor snang ste/ skad cig de la gnyis su med pa'i ngo bor 'gyur zhes bya ba'i don to/ /dngos po gcig gi rang bzhin gnyis su snang bar ci ltar rigs pa ma yin nam zhe na/de ni gnyis zhes bya ba la sogs pa smos te/ rnam par shes pa de ni gnyis su snang ba gang yin pa ste/ gnyis su mthong ba'o/ /rigs pa'i spyod yul de ma yin te/ /don de ni rigs pa'i spyod yul du gyur pa ma yin te/rigs pas bstan par mi nus zhes bya ba'i don to/ /ji ltar zhe na/ skad cig la ni zhes bya ba smos te/ ci ltar skad cig la ni brjod pa ni skad cig la bton pa'o/ /sgra dang sgra brnyan ni bye brag gnyis su thos pa'i rigs pa ni med de/ de bzhin du 'dir yang zhes bya ba'i don to//kun brtags pa'i ngo bo nyid snang ba'i rang bzhin ni ma yin no zhes bstan pa'i phyir/ sgyu ma mkhan zhes bya ba la sogs pa smos te/ ji ltar sgyu ma mkhan rnam pa sna tshogs pa ste/ rnam pa du ma skad cig la ston pa na 'ga' zhig gsang ba'i gnas shes pa ni sgyu ma dang ldan pa'i skyes bu mthong na/rang bzhin ni rang gi ngo bor rnam par gnas so/ /de bzhin du rnam par shes pa rnams kyi dbang gis byis pa rnams rnam pa'i ngo bo skad cig la snang ngo / /mkhas pa'i rang bzhin can 'ga' zhig gis mthong na rang bzhin gnyis su med ces bya ba'i don to/ /don 'di nyid bstan par bya ba'i phyir/sngo dang dmar po zhes bya ba la sogs pa smos te/ ci ltar rtsangs pa sngo dang dmar por nges par snang ba'i dngos por bdag nyid ston cing yang dngos po gzhan du ston par byed pa de bzhin du rnam par shes pa byis pa rnams la kun tu brtags pa'i dngos po'i bdag nyid du snang zhing /mkhas la ste mkhas pa rnams la ni gzhan yin te/ yongs su grub pa'i rang bzhin snang zhes bya ba'i don to/ /yang u rgyan pa las 'di skad thos te/ 'di ltar bdag cag gi yul gyi rtsangs pa gang ci 'dra ba'i gzugs ston cig byas na de bzhin du de 'dra ba ston ce'o//byis pa rnams la gzhan du snang zhing mkhas pa rnams la gzhan du snang zhes bya ba'i bsam pa ji lta bu yin zhe na/ smras pa 'dir dgongs pa ni 'di yin te/ 'di ltar shes pa ni kun brtags pa'i rang bzhin dang yongs su grub pa'i rang bzhin gnyis su gnas te/de la kun brtags pa'i rang bzhin log pa de ni yongs su grub pa'i rang bzhin nyid yin no/ /de la gal te dus thams cad du kun brtags pa'i ngo bo de yin na de'i tshe 'ga' yang grol bar mi 'gyur ro/ /'on te yongs su grub pa'i rang bzhin yin na de'i tshe sems can rnams thar pa rtsom pa'i don med par 'gyur ro//de lta bas na dri ma dang bcas pa dang dri ma med pa'i dbye bas byis pa dang mkhas pa rnams la de'i bdag nyid snang bar 'gal ba med pa nyid do/ /da ni slob dpon gyi rang bzhin gyi dngos po bstan pa'i phyir/ 'di yi rang bzhin zhes bya ba la sogs pa smos te/ rnam par shes pa 'di ni 'di lta bu'i rang bzhin du bzhed de/ de kho na nyid mthong ba la sgrib par mi byed pas na dri ma med pa'o/ /sngon po dang dmar po la sogs pa'i rnam pa rnams med pa'i phyir rnam pa med cing ngo / /sgra la sogs pas gzhan gyi rgyud la gsal bar byed pa'i rgyu med pa'i phyir brjod du med pa'o//sangs rgyas min pa ste/ sangs rgyas bcom ldan 'das rnams las ma gtogs pas na yang gzhan 'ga' zhig gis don dam pa'i ngo bo shes par mi nus zhes bya ba'i don to/ /yang ci'i phyir sangs rgyas bcom ldan 'das rnams kho nas mkhyen zhe na/ tha mal zhes bya ba la sogs pa smos te/ji ltar skye bo tha mal pas rnam par shes pa gzung ba dang 'dzin pa'i ngo bor brtags pa rigs de dag bzhin du de'i ngo bo sangs rgyas bcom ldan 'das rnams kyis mi mkhyen zhes bya ba'i don to/ /rnam par shes pa de'i rab tu grags pa de nyid ni yongs su grub pa'i ngo bo mkhyen te/de nyid bcom ldan 'das des mkhyen to/ /gang gi phyir rab tu grags pa de nyid ni gzhan dag gi ma yin no/ /ci'i phyir thams cad mkhyen pa sangs rgyas bcom ldan 'das kho nas mkhyen gyi gzhan dag gis ma yin zhe na/ lung dang zhes bya ba la sogs pa smos te/lung dang bstan bcos la dris nas bdag cag smra ba 'ba' zhig tsam yin gyi thams cad rtogs pas ni ma yin no/ /ci ltar zhe na/ mig dang zhes bya ba la sogs pa smos te/ ji ltar mig dang ldan pa'i spyod yul gyi gzugs yul nyid du dmus long rnams kyis brgyud pas thos nas/mig gis gzugs mthong ngo zhes smra ba bzhin no/ /gal te sangs rgyas kyis rnam par shes pa'i ngo bo mkhyen la gzhan dag gis de yongs su mi shes pa de lta yin na de'i don du sems pa ni don med pa yin no zhe na/ ye shes mig sman zhes bya ba la sogs pa smos te/ye shes mig sman khyad par gyis te mig gis so/ /gang gi phyir gnas skabs de ru ma 'ongs 'gyur te/ rab tu dga' ba la sogs pa sa thob pa'i gnas skabs so/ /gang gi gnas skabs la thub pa'i dbang po ste/ sangs rgyas bcom ldan 'das bzhin du bdag cag gi sems kyi de nyid de/yongs su grub pa don dam pa de thams cad mthong bar 'gyur zhes bya ba'i don to/ /sna tshogs pa'i bdag nyid phyi'i 'gro bar rnam par gzhag pa ma yin nam/ ci ltar rnam par shes pa la de gzhag ce na/ byis pa rnams kyis zhes bya ba la sogs pa smos te/lung dang rigs pas [(]len [,]lan [)]'debs te/ de la lung ni/ khams gsum po 'di ni sems tsam mo zhes mdo las gsungs pa'i phyir ro/ /rigs pa brjod par bya ste/ gang dang gang gi ni byis pa rmongs pas yang dang yang du kun brtags pa'i rnam par shes pa bsgoms pas de dang de'i rnam par shes pa bsgoms pa'i stobs las byung ba sgyu ma'i skyes bu bzhin du mdun na snang ste/de'i rigs yin pa'i phyir phyi'i don ni med do/ /ji ltar bsgoms pa'i stobs las 'di dag gi don 'grub ce na/ de'i phyir tshigs su bcad pa gsum gyis dpe bstan pa'i phyir/gos rnams bgos kyang zhes bya ba la sogs pa smos te/ gos rnams bgos kyang yan lag la goms pa ma tshang bas shin tu grang ba'i ba mos gnod par 'gyur la/ mig la mi gnod pa 'di ni ngo mtshar che'o/ de lta bas na 'dir goms pa dang goms pa ma yin pa'i stobs las rjes su dpyad par bya'o//de bzhin du goms pa'i stobs zhes bya ba la sogs pa smos te/ goms pa'i stobs kyis ko pags mkhan la ko pags kyi dri nga bas shin tu gnod pa med kyi/ gzhan dag la gnod pa zhes bya ba'i don to/ /ji lta bur gyur pa'i pags pa yin zhe na/lag pas nyed pa'i zhes bya ba smos te/ lag pa gnyis kyis nyed pa na de la dri shin tu nga bar snang ngo / /lus dang ldan pas zhes bya ba la sogs pa smos te/ lus dang ldan pa rnams kyis thog mar ni dang por te/ dug zos pas ni 'chi ba nyid du 'gyur ba de nyid goms pa'i stobs kyis zos mthar ni bcud kyis len du 'gyur te/de bzhin du bsgoms pa'i stobs kyis rnam par shes pa nyid mdun na snang gi phyi'i don ni ma yin no/ /da ni sems las phyi rol du gyur pa 'byung ba rnams kyi rgyu brtags nas dgag pa'i phyir/ 'byung ba zhes bya ba la sogs pa smos te/kyang gi sgra ni rnam par rtog pa'o/ /'byung ba rnams kyang gang las 'byung zhes zer na/ phyi rol du gyur pa'i rgyu gang las byung ba med ces bya ba'i don to/ /'di ltar/ las las 'jig rten sna tshogs skyes/ /zhes las rnams las 'byung ba rnams skye bar 'dod do//de yang rigs pa ma yin te/ ci ltar mi rigs she na/ gang gi phyir 'byung ba rnams ni skye ba gzhan gyi lus la gnas pa de'i 'bras bu nyid du 'dod na de dang dge ba dang mi dge ba'i las rnams 'brel ba med pa'i phyir ro/ /gzhan yang las kyi bag chags gang la gnas she na/las kyi bag chags sems gnas phyir/ zhes bya ba smos te/ bag chags ni sems la gnas so/ /gal te sems la gnas pa yin na de'i tshe skye ba gzhan na yod pa'i 'byung ba rnams de'i skye ba'i rgyu ma yin te/ bar du chod pa'i phyir ro/ /gang du bag chags gnas pa der des 'bras bu nyid byed do zhes grag go//zhing la sa bon btab pas ri'i rtse mor 'bras bu skye ba ni med do/ /de lta bas na bag chags kyi mthus rnam par shes pa nyid 'byung ba la sogs pa'i rnam par mdun na snang gi phyi'i don ni ma yin no/ /gzhan yang dmigs pas 'byung ba rnams yod par rjes su rtogs te/dmigs pa yang de'i rnam pa yin te/ shes pa las skyes pa'i phyir ro/ /de lta bas na yang shes pa de nyid gnyi ga las grub pas 'byung ba'i rnam par yongs su gyur pa'i brtags pa yin par rigs kyi/ gnyi ga la ma grub pas phyi rol gyi don yin par mi rigs so//da ni las kyi bag chags kyi rnam pa bstan pa'i phyir/ legs byas zhes bya ba la sogs pa smos te/ legs pa'i las rnams ni skye ba gzhan la las kyi bag chags kyi rnam pa des rnam par rig pa zhi ba'i rnam pa yin te/ gzugs kyi rnam par rig pa sems yid du 'ong ba'i skye bor skye'o//de bzhin du rgyu de nyid kyis skye ba snga ma la gzhan gyi srog la mngon par zhen pa ni stag dang seng ge dom dang sbrul shin tu 'jigs par skye'o zhes bya ba'i don to/ /da ni 'dir de nyid kyi gtan tshigs gzhan bstan pa'i phyir/ gal te zhes bya ba la sogs pa smos te/gal te 'byung ba rnams shes pa'i ngo bo nyid la brtags pa ma yin na de'i tshe de dag bem po'i rang bzhin yin pa'i phyir gar la sogs pa'i bya ba gzhan la/ rkang pa lag pa'i g.yo ba la sogs/ /ji ltar gzhan las byas par 'gyur/ /da ni gzhan gyi dogs pa bsu ba dang de dgag pa'i phyir/rlung zhes bya ba la sogs pa smos te/ gal te rlung las 'byung ba rnams kyis bya ba bskyed do/ /de lta yin na rlung gang las yin 'bad pa las yin no zhe na/ 'bad pa de yang gang las yin/ gal te 'dod pa las yin na/ de nyid ni khyod ni lam du nges par zhugs/nges par ni rnam par rtog pa'o/ /lam de nyid du khyod zhugs te shes pa'i bya ba yin gyi rlung gi ni ma yin no/ /gang gi phyir rnam par shes pa las ma gtogs pa'i 'dod pa ni med pa'i phyir ro/ /de'i yon tan yin pa'i phyir gzhan las de ni 'byung bar mi srid do//re zhig 'byung ba rnams kyi rgyu'i dpyad pa gzhag la/ de dag ni rtag tu rang bzhin 'gyur ba yin te/ grangs can gyi gzhung gi dogs pa bsu ba'i phyir/ pha ma'i khu ba khrag dag las/ /zhes bya ba la sogs pa smos te/ dbyibs dang kha dog la sogs pa gzhan dang ldan pa'i pha ma ste/pha ma gnyis dang 'brel pa'i khu khrag dag las khu chu dang zla mtshan dag las mtshan nyid mi mthun pa'i mgo bo dang / lag pa dang ldan pa'i ngo bo mi rnams 'byung bar 'gyur/ dbyibs dang kha dog gzhan dang ldan pa'i sa bon las mtshan nyid mi mthun pa'i shing rnams dngos po ji ltar skye zhing 'phel bar 'gyur zhe na/rtag pa'i bdag nyid kyi dngos po rnams yongs su 'gyur bar mi rigs so/ /'di ltar khyod 'dod pa'i gtso bo chen po la sogs pa 'bras bu'i ngo bor yongs su 'gyur ba brtags pa'i ngo bor mi rigs te/ de ci bdag nyid thams cad yongs su 'gyur ram/ 'on te phyogs gcig yin/ bdag nyid thams cad yongs su 'gyur na/ 'di ltar chen po la sogs pa mi rtag pa de bzhin du gtso bo yang 'gyur ro/ /'on te phyogs gcig yin na de yang gang gi phyir phyogs gang yongs su gyur pa 'bras bu gsal ba dang ldan pa de bya ba med pa rgyu ma yin pa/phyogs gcig las byas pa dang bcas pa'i rang bzhin gyi dbye bas khyad par du 'gyur te/ de bas na gtso bo de byed pa byed pa med pa gnyid kyis bya ba dang bya ba med pa sna tshogs pa yin la/ sna tshogs pa'i phyir mi rtag pa yin no//rtag pa ni sna tshogs par mi rigs te/ rang bzhin tha dad pa'i nyes par thal par 'gyur ba'i phyir ro/ /nye bar len pa'i rgyu med na sgra 'byung bar mi 'gyur ro zhe na/ kha las sgra ni zhes bya ba la sogs pa smos te/ sgra ni skyes bu'i 'bad pa'i rtsol ba la rag las pa gnas dang byed pa dang /rkan dang mchu sbyar ba la sogs pa tha dad pa'i rgyu 'di las lhan cig byed pa yin te/ dngos dang dngos po med par snang ba na rjes su 'gro ba dang ldog pa mthong ba'i phyir ro/ /'di ltar de dag ni yod na ni 'byung la de med na ni mi 'byung ba de'i phyir gal te nye bar len pa'i rgyu mi 'dod na de'i tshe/kha dang rdza rnga la sogs pa rnams kyi rgyu med pa rnams las sgra 'byung bar mi 'gyur ro/ /de bzhin du dngos po rnams phan tshun 'gal ba'i bya ba byed pa der mi 'gyur ro zhes bstan pa'i phyir/ bya rnams zhes bya ba la sogs pa smos te/ bya rnams ni bya rnams te/ji ltar 'dod pa bzhin du nam mkha' la 'gro'o/ /snang ba'i lhan cig byed pas mig gi rnam par shes pas don mthong bar nus par 'gyur ba yin mod kyi/ de lta yin yang ji ltar 'ug pa rnams snang ba dang bral ba'i smag tu zas la sogs pa'i dngos po rnams ji ltar mthong bar 'gyur/khung na khung bur snang ba med par byi ba rnams kyis de bzhin no/ /bar du ma chod pa'i dngos po mig gis mthong ba yin na/ nya rnams kyis chu nang du ste/ rgya mtsho'i chus chod pa'i dngos po ji ltar mthong bar 'gyur/ dbang po'i rnam par shes pa'i yul so sor nges pa yin na/sbrul rnams ni sbrul rnams te/ mig gnyis kyis ji ltar thos pa dang mthong bar 'gyur/ de lta bu'i 'gal ba gzhan dang gzhan rnams ni/ dngos po rnams de bzhin du rnam pa du mar 'khor bar bstan pa ste/ 'gal bar mthong ngo / /de lta bas na nye bar len pa'i rgyu rjes su dpag go//'di ltar dngos po 'di dag gi dbye ba ni 'gal ba'i chos dang 'brel ba dang rgyu'i dbye ba las yin no/ /gal te yang dngos po rnams kyi nye bar len pa'i rgyu mi 'dod na de'i tshe 'ga' yang bye brag tu mi 'gyur ro/ /bye brag med na yang sna tshogs pa bye brag med par 'gyur ro//rnam pa gzhan gyi rgyur smra bar khas len pa thams cad bde ba'am sdug bsngal bar ci'i phyir mi 'gyur/ de bzhin du 'bras bu dang snang ba dang me long la sogs pa rnams kyis sa bon dang sdong bu dang bud shing gi byed pa rnams med kyang skye bar 'gyur ro/ /'di ltar zhar las byung ba'i rgyur smra ba bkag nas/sngar bstan pa nyid brtan par byed cing / ji ltar rnam par shes pa'i dngos po las ma gtogs pa'i bya ba gzhan med par bstan pa'i phyir/ gnas dang zhes bya ba la sogs pa smos te/ goms pas dgra la phog pa'i skyes bus gnas dang gnas pa ma mthong ba'i 'ben la shes pa'i rtog pa ma rtogs par te/shes pa'i rang bzhin ma rtogs par mi 'chor bar phog pa ni mda' rnams 'bras bu dang bcas par ci ltar 'gyur/ chu yi rgyun ni zhes bya ba la sogs pa smos te/ gal te chu'i rgyun dang 'dra bar 'byung ba rnam par rig pa ma yin par 'gyur na ni/de'i tshe gang cung zad bstan bcos gang gzung ba goms par ma byas kyang mi 'chor te de nyid la gnas pa yin no/ /'di ltar sems las bstan bcos shor ba yang gzhan gyi rgyud las yang ci ltar gzung dgos zhes bya bar rigs/ gang 'gro ba bskyod pa'i rgyu dbang phyug yin par 'dod pa bstan pa'i phyir/ri bo rnams ni zhes bya ba smos te/ gal te bya ba med na de ri bo rnams ni mtho bar 'gyur/ de bzhin du rgya mtsho chen po ste/ rgya mtsho gting dpag dka' ba'o/ /phra rab rnams ni 'dus pa yi ste/ phra rab 'dus pa'i dngos por gyur pa gnyis 'dus pa dang gsum 'dus pa'i rim gyi ji ltar 'bras bur byed/ gang gi phyir de rtag pa'i phyir rim mam cig car gyi don byed par mi rigs so/ /de lta bas na sna tshogs pa skye ba nyid kyi rgyu dbang phyug ma yin pa'i phyir/ 'jig pa'i rgyu yang ma yin par bstan pa'i phyir/ nus dang ldan pas zhes bya ba la sogs pa smos te/ dang gi sgra ni rnam par rtog pa'o/ /nus pa chen po dang ldan par 'bras bu byas na ni/ de nyid smyon pa bzhin du yang ste/ sna tshogs 'gag pa'i dus su bdag nyid kyi 'bad pa ji ltar 'jig par byed ces bya ba'i don to//de lta bas na dbang phyug la sogs pa byed pa po nyid du mi rigs so/ /rnam par rig pa tsam du mi 'dod na ji ltar sngags la nus pa yod ces bstan pa'i phyir/ khab long zhes bya ba la sogs pa smos te/ khab long la sogs pas ni sbur long la sogs pa bsdu'o//'dren pa ni lcags dang rtswa 'dren la de bzhin du sngags kyis dug zhi ba dang / sman gyis rims sel bar su zhig gis byas zhes bya ba'i don to/ /da ni mjug bsdu ba'i phyir/ de phyir ma rig sna tshogs pas/ /zhes bya ba la sogs pa smos te/ de'i phyir de dag thams cad gang cung zad sna tshogs pa'i dngos po phyi rol du snang ba de dag sems kyis sprul par bya'o//sems nyid goms pa'i stobs kyis kun brtags pa'i ngo bo sna tshogs pa snang ba las phyi'i don ni ma yin no/ /yang gang zhig ma rig pa'i sna tshogs ma rtogs pa de la bdag gis byar ci zhig yod/ci lta bu zhig ce na/ cog chung zhes bya ba la sogs pa smos te/ cog chung ni bya'i khyad par ro/ /de'i sgra ni co ga'i sgra'o/ /de'i sgra brnyan ni cog chung gi sgra brnyan te rgya che ba'o/ /cog chung gi sgra brnyan gyi gzhan cung zad 'di ltar mi shes te/ de bzhin du zhes bya ba'i dod do//sems las phyi'i dod du mi 'dod na lung du 'gal lo zhe na/ zad par zhes bya ba la sogs pa smos te/ phyi'i don med na rnal 'byor pa rnams kyis zad par sgom pa ni sa la sogs pa sgom pa ji ltar rigs/ gang gi phyir brtan pa'i rang bzhin dngos po rnams gzhan dang gzhan du gzhag par mi rigs so//gang gi tshe rang gi gzhung la zad par sgom pa grub pa de ltar bstan pa'i phyir/ des na zhes bya ba la sogs pa smos te/ des na ni rnam pa 'dis rnal 'byor pa rnams kyis zad par sgom par rigs so/ / ci ltar sems 'di nyid shel bzhin du ni nor bu shel dang 'dra'o/ /rnam pa du ma ni sa la sogs pa'i dngos po la khyab pa 'khrul pa goms pa de'i tshe zad par sgom par rigs kyi/ phyi'i don khas len pa'i rgyus ni ma yin no zhes bya ba'i don to/ /ci ltar khyab ce na/ bag chags chu la til mar bzhin//zhes bya ba smos te/ ji ltar chu la til mar phyogs gcig tu btab pas thams cad du khyab pa de bzhin du bag chags kyi chu la sems kyis zhes bya ba'i don to/ de bzhin du sems tsam nyid du mos pa'i rnal 'byor pas ngo mtshar med par bstan pa'i phyir/ 'jig rten pa yi zhes bya ba la sogs pa smos te/ 'jig rten pa'i ngo mtshar rnams ni byis pa rnams kyis phyi rol gyi don la ngo mtshar du byed pa la ngo mtshar du 'gyur ba ma yin/ ngo mtshar nyid du mi byed ces bya ba'i don to/ /sa bon thams cad pa'i sgra ni/ kun gzhi rnam par shes pa la brjod de/'di ltar 'jug pa'i rnam par shes pa rnams kyi sa bon nyid du gnas pa'i phyir ro/ /sa bon thams cad sa de las 'byung ba la sogs pa yod do/ /'di ltar rnal 'byor pas bsams te shes rab kyis rnam par nges par bya'o/ /da ni gzhan gyi phyi rol gyi don mngon sum gyi tshad mas grub par smra ba dgag pa'i phyir dris pa/ji ltar zhes bya ba la sogs pa smos te/ ji ltar snang ba'i bum pa dang snam bu la sogs pa'i ming gis snang ba thob pa gang yin pa de dag re zhig dngos 'di yod yin na ni gnas pa'o/ /de dag yod pa nyid du khyod kyis ji ltar nges par gzung zhes bya ba ni dri ba'o//gzhan gyi dogs pa bsu nas dgag pa'i phyir/ e ma zhes bya ba la sogs pa smos te/ zhe na'i sgra ni gal te'i don to/ /gal te de rnams sems yin par rtogs na de'i tshe e ma ste ngo mtshar ba yin no/ /sems la rgyu med par khyed sdang bar mi rigs so//gang yin sems de nyid kyi rnam pa ci'i phyir mi 'dod dgos pa med pa'i phyi'i don gyis ci zhig bya/ 'di ltar phyi rol gyi don ni bag chags kyi 'bras bu yin pa'i phyir ro/ /gang gi tshe bag chags sems la gnas pa de'i tshe/ de nyid las 'bras bu 'byung ngo //zhing la sa bon btab pas ri'i rtse mor 'bras bu mi 'byung zhes bya ba'i don to/ /gal te sems nyid don gyi rnam par snang na de'i tshe yang 'dzin pa nyid gang zhig yin zhe na/ rnam par shes pa zhes bya ba la sogs pa smos te/ 'di ni rnam par rtog pa'o/ / rnam par shes pa phyir byung nas yul rnams 'gul ba nas drangs nas ci 'dzin pa yin nam/ gang gi phyir ma bzung na 'dzin pa nyid du mi 'gyur ram/ gang gi phyir bag chags kyi mthus de'i rnam pa de yin te/ de bas na de'i rnam pa sems la skye ba nyid 'dzin pa yin gyi gzhan ni ma yin no/ /gzhan yang ci sems de thog ma nas yod dam 'on te med ces bya ba'i phyogs gnyis te/de la gal te thog ma nas yod na de'i rnam pa nyid sems las skyes pa yin na dus phyis 'byung ba'i yul gzung ba la dgos pa ci zhig yod/ gal te thog mar med la phyis byung bas yul 'dzin to zhe na/de ltar ma yin te/ de'i tshe don 'gag pa'i phyir de gang gis 'dzin pa yin/ lhan cig skyes pa yin na phan par bya ba dang phan par byed pa med pas ji ltar gzung ba dang 'dzin pa'i dngos por 'gyur/ de lta bas na mngon sum gyis phyi'i don ma grub bo zhes bstan to/ /gang zhig yang rjes su dpag pas phyi'i don grub par 'dod de/'di ltar ji srid phyi'i don gyis rang dang 'dra bar rnam par shes pa ma bskyed pa de srid du de'i rnam par ji ltar snang / de'i phyir don gyis bskyed pa nyid la don gzung zhes bya'o/ /de ltar yang ma yin te/ rmi lam la sogs pa bzhin du rjes su 'gro ba dang ldog pa med pa'i phyir ro//de lta bas na rjes su dpag pa las kyang ma grub pa ma yin no/ /gal te mngon sum dang rjes su dpag pas ma grub kyang lung gis grub po zhe na/ lung zhes bya ba la sogs pa smos te/ lung ni sangs rgyas bcom ldan 'das kyi gsung tshad mas phyi'i don yang dag par rtogs par grub pa yin te/de ltar yang bcom ldan 'das kyis mig dang gzugs la brten nas mig gi rnam par shes pa 'byung ngo zhes gsungs so/ /'dir lan smras pa/ mngon sum don la lung ci dgos//zhes bya ba smos te/ mngon sum gyi don gang yin pa de la lung gis dgos pa ci zhig yod/ lung gi tshig kyang ga la zhe na/ mi snang zhes bya ba smos te/ gang dbang po las 'das pa'i dngos po 'jig rten pha rol la sogs pa'i don mngon sum gyi yul ma yin pa de la lung gis gsungs pa'i rjes su 'brangs nas rtogs so//'di skad du bstan par 'gyur te/ gal te phyi'i don yod na de mngon sum nyid kyis yongs su bcad pas lung gi tshig gis ci zhig bya/ 'on te med na de yang lung gi tshig gis ma grub po zhes bya ba'i don to/ /de bas na de nyid kyi phyir/drang ba'i don zhes bya ba la sogs pa smos te/ lung gi tshig gis kyang phyi'i don yod par mi 'grub ste/ ci ltar zhe na/ drang ba'i don yin phyir yang ste/ /'di ltar drang ba'i don du bstan pa thams cad ni rnam pa bzhir brjod par bya ste/ de la dgongs pa ni gang la dgongs nas sgra sbyar ba yin no/ /skye bo gdul bya'i yul ni gang dag la bstan pa'o//'bras bu ni gang la bstan pas grub pa'o/ /rgyun ni gang gis mngon par 'dod pa'i don brtags pa zhes bya ba'o/ /yang 'dir ni dgongs pa gsungs pa yin no/ /'dir dgongs pa gang zhig yin zhe na/ smras pa/ kha cig gis bdag mthong ba po nyid dang /za ba po la sogs par 'dod pa de spang ba'i phyir/ gzugs la sogs pa'i skye mched rnams/ /yang bcom ldan 'das kyis bstan pa mdzad de/ 'di ltar yul so sor nges pa la dbang po rnams yid mthong ba po dang yul gang la gzhag par bya zhe na/ bstan pa sems kyi spyod yul lo//zhes bya ba smos te/ sems nyid la yul dang dbang po'i ngo bor rnam par gzhag gi phyi'i don ni ma yin no/ /'o na ci zhe na/ rang gi sa bon zhes bya ba la sogs pa smos te/ gang gi phyir rkyen gzhan gyi bag chags kyi nus pa'i khyad par sad par byas pas/ rang gi sa bon kun gzhi rnam par shes pa las de ma thag tu 'byung ba mig gi rnam par shes pa dang /dbang por brjod do/ /de bas na de nyid kyang sems yin te/ bag chags kyi dbang gis sngon po dang ser po la sogs pa yul gzugs kyi rnam par skyes pa yul du shes par bya ba'i don to/ /rnam par shes pa don dam par tha dad pa med pa'i phyir dbang po dang yul gyi dbye bas ji ltar bye brag tu 'gyur ba ma yin nam zhe na/'di dag blo yi zhes bya ba la sogs pa smos te/ mig dang gzugs la sogs pa rnams phyi'i don nyid kyi dbang po dang yul gyi ngo bor gyur pa med do zhes blos nges par bya'o//don dam par sems la cha shas med mod kyi/ 'jig rten kun rdzob kyi bden pa la brten nas mkhas pas dbang po dang yul gyi sgo nas cha shas su sems la brtags pa yin no zhes bya ba'i don to/ /don dam par ni yang / 'di la zhes bya ba la sogs pa smos te/ 'di la ni sems te/mig ni dbang por brtags pa de med do/ /gzugs min ni yul du brtags pa mi rigs pa'o/ /snang ba med cing yid byed med pa ni lhan cig byed par brtags pa med pa'o/ /gang gi tshe bag chags kyi dbang gis brtags pa'i rnam pa 'khrul pa'i sems las byung ba de'i tshe kun rdzob tu thams cad yod pa yin no//don dam par ni chung zad kyang med pa yin no zhes bya ba'i don to/ /ci ltar zhe na/ rmi lam lta bu zhes bya ba smos te/ 'di ltar rmi lam gyi ngo bo don med pa las don gyi rnam par 'khrul pa'i sems skye ste/ de'i tshe don yod pa'i rnam par snang ngo / / gang gi tshe yang sad pa de'i tshe chung zad kyang med do zhes bya ba'i don to/ /gang gi tshe thams cad rnam par rig pa tsam yin la phyi'i don med na dge ba'i bshes gnyen dang / sdig pa'i grogs po bsten pa las dge ba dang mi dge ba'i bya ba nges par ji ltar grub ce na/ bzang dang ngan pa'i grogs bsten las//zhes bya ba la sogs pa smos te/ bzang dang ngan pa'i grogs bstan pa las te/ bzang po dang bzang po ma yin pa dang 'brel bas sems can gyi rgyud la dge ba dang mi dge ba'i bya ba'i khyad par gang yin pa de gzhan gyi sems kyi dbang gis byung ba yin no//gang gi tshe srog chags rnams dge ba'i bshes gnyen dang sdig pa'i grogs po'i spyod pa bslab par 'dod pa de'i tshe/ dge ba'i bshes gnyen dang / sdig pa'i grogs po'i rnam par shes pa'i dbang gis dge ba dang mi dge ba'i rnam pa skye'o zhes bya ba'i don to/ / ji ltar zhe na/ de yang 'byung pos gzung stsogs bzhin/ /zhes bya ba smos te/ dper na 'byung pos gzung ba rnams sems kyi dbang gis sems can rnams kyi khrag la sogs pa 'dren par 'gyur ba de bzhin du 'di yang de bzhin no zhes bya ba'i don to/ /gang gi tshe thams cad rnam par rig pa tsam yin na/ra lug la sogs pa shan pas gsod ce na/ nye ba'i rim pas zhes bya ba la sogs pa smos te/ ra lug rnams gzhan gyi lus dang nye ba'i rim pas gsad par ni mi 'dod de/ de dag skad cig ma yin pa'i phyir ro/ /gang gi phyir phung po rnams skad cig re rer gyur pa 'jig pa la rgyu med pa yin no//yang gang thob la sogs pas bum pa la sogs pa 'jig pa yin par rtog na/ de ni 'jig pa ma yin te/ 'on kyang mtshan nyid mi mthun pa gyo mo la sogs pa'i 'bras bu bskyed pa nyid du rtogs par bya'o zhes bya ba'i don to/ /'on kyang tshul 'dis theg pa chen po ni chos bdag med pa'i phyir rang bzhin gyis rnam par byang ba'i tshul gnyis su med pa sems tsam nyid du gnas te/gang 'di ni gsad par bya ba dang gsod par byed pa yin no zhes bya bar gzhag pa'i rgyu mtshan nyid med do zhes bya ba'i don to/ /'on kyang / mi 'dod pa yi las kyi mthus//zhes bya ba la sogs pa smos te mi 'dod pa'i las kyi mthus te/ sngar byas pa'i las kyi 'bras bu'i mthus 'ba' zhig tu/ drag shul spyod pa'i rnam rig ni/ /'jigs pa'i don du 'di skyes te/ shin tu 'jigs pa skyed par byed cing / gnod par byed pa'i rnam par rig pa skye'o zhes bya ba'i don to//ji lta bu nyid ce na/ dmyal ba zhes bya ba la sogs pa smos te/ dper na dmyal bar dmyal ba pa rnams kyi 'jigs pa bskyed pa'i phyir seng ge dang stag gi rnam par rig pa skye'o/ /'dir de bzhin no zhes bya ba'i don to/ /phyi'i don du smra ba'i zhar la gzhan bstan pa'i phyir/ji ltar snang zhes bya ba la sogs pa smos te/ ji ltar bum pa dang snam bu la sogs pa'i dngos po'i chos snang ba ni so sor snang ba'i ste/ de kho na'i gal te rang bzhin nyid don dam pa'i ngo bo yin gyi brtags pa ni ma yin na/ de'i tshe/ yang dag don ni mthong ba'i phyir//'gro ba thams cad cis mi grol/ /zhes bya ba yin no/ /da ni de dag brtags pa yin par bstan pa'i phyir/ de nyid kyi phyir zhes bya ba smos te/ gang gi phyir don dam par des chos rnams la byis pa rnams zhen pa bskyed na rgyu de nyid kyis rang byung ste/ rang gis dngos po thams cad mkhyen par gyur pa ni rang byung ngo //rang byung sangs rgyas bcom ldan 'das des thugs rjes te/ snying rjes byis pa de dag chos rnams kyi don dam pa'i ngo bo la 'gro ba 'khrul pa de spang ba'i phyir dgongs so zhes bya ba'i don to/ /gang gi phyir bdag nyid bde ba'i 'gro ba la thugs rje de med par 'gro ba'i phyir ro//nad med pa la smin pa'i ngag gis cung zad kyang bya ba med pa bzhin no/ /gzhan yang sems tsam nyid du khas mi len na nyes pa 'byung ba bstan pa'i phyir/ glog dang 'brug dang zhes bya ba la sogs pa smos te/ glog la sogs pa rang gi nye bar len pa'i rgyu mi dmigs pas sems tsam las ma gtogs par de dag nam mkha'i dkyil du skye ba 'grub par 'gyur ba ma yin zhes bya ba'i don to//da ni phyi'i dngos po rnams nges par rang bzhin med pas mi 'grub pa ni/ gal te dngos po zhes bya ba la sogs pa smos te/ gal te'i don ni brgya la'i don to//gal te phyi'i dngos po rnams gcig nyid dang rtag par 'ga' zhig la bdag nyid kyi rang bzhin grags pa bzhin du yin na/ de'i tshe 'dod pa'i dbye bas te/ 'dod pa dang mi 'dod pas nges pa'i dbye ba du mar snang bar mi 'gyur ro/ /dbye ba mthong ste 'di ltar 'ga' zhig ces bya ba la sogs pa smos te/bud med du gcig pa la gzhon nu dang / bar ma dang / tsho ba dang / skem pa dang / sngo bsangs zhes bya ba du ma tha dad pa'i shes pa skye'o/ /'dis ni cha shas can rags pa'i yul gyi dngos po bkag pa yin no//rdul phra rab rnams ni yul ma yin te/ dbang po las 'das pa'i phyir ro/ /de dag kyang rang bzhin med pa nyid yin te/ drug gis cig car sbyar ba yis/ /zhes bstan pa'i phyir ro/ /de ltar yang / sna tshogs rang bzhin nyid grub pas/ /de phyir mig dang rdzas la sogs//bdag dang gzhan smras mang po dag /rang bzhin med par mngon pa yin/ /zhes gsungs so/ /de lta bas na rags pa dang phra ba'i yul gyi dngos po med pa'i phyir/ sems tsam nyid yin pas/ sems nyid ces bya ba la sogs pa smos te/ phyi rol gyi don med mod kyi bag chags kyi dbang gis gang gi tshe bud med kyi rnam par sems nyid skyes pa de'i tshe/ngo tsha dang bcas 'dod chen gyis te/ 'dod pa la chags pa'i sems dang ldan pas/ bdag nyid bdag la su zhig chags/ /zhes bya ba'i don to/ /thams cad ces bya ba la sogs pa smos te/des na ni sngar bshad pa'i gtan tshigs kyis yul thams cad rang gi ngo bo yin par blo ldan te/ blo gros dang ldan pas so/ /thams cad du ni dus thams cad du ste/ yul gyi nye bar longs spyod phyir/ /byis pa lta bur 'jug mi rigs/ /zhes bya ba'i don to/ /yul yod pas yul gyi nye bar longs spyod ji ltar spang ba ma yin nam zhe na/rang gi zhes bya ba la sogs pa smos te/ phyi'i don ni med par snang ba yin te/ dper na 'ga' zhig rang gi rmi lam gyis 'khrul pa'i phyir lag pa ni lag pa ste/ lag pa yis ni lag bzung nas/ /bdag gis rkun ma 'di zin zhes//smras pa gzhan gyis spong bar byed/ /ces bya ba ni/ dper na 'di ni rkun ma ma yin te/ 'on kyang rmi lam gyis 'khrul pa khyod kyis mthong ba yin no/ /de bzhin du rkun ma lta bu'i yul 'di dag la de dag ji ltar nye bar longs spyod par rigs/ phyi'i don yod na gcig cing tha mi dad pa'i mtshan nyid la tha dad pa'i 'du shes bskyed par 'gal ba yin no zhes bstan pa'i phyir/dud 'gro zhes bya ba la sogs pa smos te/ dud 'gro ni ba lang la sogs pa'o/ /rtswa skam po'i tshogs la za ba'i 'du shes dang ldan na/ mi rnams bza' bar sems ma yin//de bas na/ rnam rtog 'jug pa ngo mtshar che ste/ mi rigs pa'i phyir ngo mtshar du gyur pa'o/ /gang / rnal 'byor pas kyang bsam mi khyab/ /ces bya'o/ /gzhan yang / ri dgas me mdag ces bya ba la sogs pa smos te/ yul kha cig na ri dgas me mdag ces bya ba mes dri ma med par 'gyur la/gzhan dag ni sreg go/ /de bzhin du de dag me za'i gzhan dag ni ma yin no/ /de bzhin du dug gi byi bas srog ni mtha' ru byed pa'i dug zos pas de ni 'chi bar 'gyur ba ma yin/ gzhan dag ni 'chi bar 'gyur ro/ /de bzhin du/ mas dran zhes bya ba la sogs pa smos te/sems can gzhan dag ni dngos po 'di dag gis 'tsho bar 'gyur ro/ /sems can gang dag dngos po gang dag gis she na/ de la nya dang bya dang khyi dang sbrul rnams ni sems can de rnams so/ /mas dran pas nya'i rgyud 'tsho ba yin gyi gzhan dag ni ma yin no//'tsho ba yin zhes bya ba ni thams cad la sbyar ro/ /de bzhin du sgo nga'i gnas skabs na bya rnams ni reg pas yin gyi gzhan dag ni ma yin no/ /khyi rnams gnyid log pas yin gyi gzhan dag ni ma yin no/ /sbrul ni brang 'gro'o/ /yang dag 'gro ste rlung gis yin gyi gzhan dag ni ma yin no//de bzhin du/ sna tshogs las kyis dben pa yi/ /slak+Sha mthong na gnod sbyin ni/ /sems can gyi khyad par ro/ /ci lta bur mthong zhe na/ 'khor gyi skye bo'i tshogs zhes bya ba ni bran gyi tshogs dang bcas pas rang gi khyim dang 'dra bar slak+Sha mthong ngo / /gnod sbyin 'ba' zhig gis mthong ba ma yin gyi gnod sbyin mos kyang mthong zhes bya ba'i bar du'o//yang gzhan dag gis slak+Sha nyid du mthong ngo / /de bzhin du yi dags zhes bya ba smos te/ 'dir yang las sna tshogs pas chu bo gcig la yang rnag tu 'brub cing de bzhin du bshang gci rnyog pa dang ldan na/phyi sa dang gcin 'dres pa'i rnyog pa dang ldan par yi dags kyis mthong ngo / /de bzhin du chu bo de nyid la mi yis chu bo dri ma med par mthong ba dang ni 'thung ba yang yin no zhes bya ba'i don to/ /'di dag thams cad phyi'i don yin na 'gal ba nyid do/ / de lta bas na/ dge min dge zhes bya ba la sogs pa smos te/ mi dge ba dang dge ba'i 'bras bu'i rnam pa las kyi bag chags kyis bsgos pas ni de dang de'i las kyis bsgos pas phyi'i don stong pa rnam par shes pa gal te 'di nyid la 'jug na/ de'i tshe 'di dag thams cad la 'gal ba med pa yin no//rnam par shes pa gcig du mar ci ltar snang zhe na/ e ma'o yul ni sna tshogs pa/ /zhes bya ba la sogs pa smos te/ e ma'o ni ngo mtshar ro/ /rnam par shes pa 'di yul gyi rnam pa nyid sna tshogs rnams te tha dad pa nyid do/ /dus gcig la ni du ma ru ste/ sna tshogs pa'i rnam par rtog pa'i rjes su 'gro ba yin no//ji ltar zhe na/ rol mo'i zhes bya ba la sogs pa smos te/ ji ltar rol mo'i tshogs kyi sgra bzhin te rol mo'i tshogs kyi sgra dal ba dang drag pa la sogs pa'i dbye bas sna tshogs pa'i rtog pa'i rjes su 'gro ba de bzhin du/ rnam par shes pa zhes bya ba'i don to//da ni don med pa don byed par mi rigs pa ni 'dir tshigs su bcad pa gsum gyis bstan pa ni/ gal te don yod don byed nyid/ /ces bya ba la sogs pa smos te/ gal te phyi'i don gyis don gyi bya ba byed par gyur pa dang / de med na yang de ru mi 'gyur na/ de'i tshe khyod kyi rtsod pa 'jug par rigs na/gang gi phyir phyi'i don gyi stong pa la don byed par snang ngo / /gang ji lta bu zhig ce na/ gzhan gyis zhes bya ba la sogs pa smos te/ gzhan skyes bu 'ga' zhig gis se'u ni bal po se'u la sogs pa zos pas gzhan gyi kha nas chu 'dzag 'gyur te/rlan gyis khyab par gyur pa yin no/ /gal te yang don gyis don byed par gyur pa yin na/ de'i tshe gang dag bal po se'u za ba de nyid kyis rlan 'dzag pa'i bya ba byed par rigs kyi yang don gzhan gyis gzhan gyi bya ba byed pa ni mi rigs so/ /de lta bas na don byed yod pas don byed pa ma yin no zhes bya ba'i don to//de bzhin du/ mtshan mo zhes bya ba la sogs pa smos te/ skyes bu 'ga' zhig gis grus za ba la gzhan 'ga' zhig gis dris pa na ste/ khyod ci za zhes dris pa na de la gal te se'u za zhes smras na ste/ bal po se'u za'o zhes smras na de'i tshe thos pas rlan gyis bya ba'i 'gyur ba ci mi bskyed dam/de lta bas na don byed pa ni ma yin no/ /de bzhin du/ rmi lam zhes bya ba la sogs pa smos te/ rmi lam du bde ba thob pa'i rgyu med las te/ 'dod pa'i bud med dang phrad pa med par yang khu ba shor ba 'byung ba min nam ci/ de bas na don yod pas don byed par ma grub pa yin no//gang zhig rmi lam du yod pa'i nga rgyal de bstan pa'i phyir/ rmi lam zhes bya ba la sogs pa smos te/ gal te 'ga' zhig rmi lam du mthong ba'i don la yod par 'dzin pa ni goms pa'i stobs kyis te/ sngon goms pa'i bag chags kyi nus pas yod pa de dag dpe 'dis sel te/dper na gzhon nu ma sbrum ma bu skyes pa ni 'di ltar rmi lam du mthong ba de ni 'di ltar rigs ldan min te/ rigs pas 'brel par mi 'gyur ro/ /de bzhin du rmi lam gyi don yod pa nyid ces bya ba'i don to/ /gzhan du na gang gzhon nu ma nyid du mi 'gyur la/bu yang mthong bar 'gyur ro/ /don de nyid gsal bar bya ba'i phyir/ khang pa'i nang du zhes bya ba la sogs pa smos te/ dpe 'dis kyang rmi lam du mthong ba'i dpe'i don med par ston te/ dper na khang pa'i nang du ni khang pa'i nang ste/ dus yun ring po dang lam dang ri dang /de bzhin du yul rnams kyang cig car rnam pa tha dad de/ so so'i dngos po rnams kyi rmi lam du mthong ba bskyed pa de'i tshe rmi lam mthong ba yod min zhes bya ba'i don to/ /'di ltar gzugs la sogs pa rnams phyi rol du gyur pa bkag nas rnam par rig pa gzhan yang yul gyi dngos po yin pa dgag pa'i phyir/rnam par rig pa'ang rnam rig gis/ /zhes bya ba la sogs pa smos te/ rnam par rig pa'ang rnam par rig par gzhan gyi don min te yul ma yin no/ /gal te yang 'ga' zhig yin par 'dod nas de'i tshe de'i grub pa'i mtha' ni dus gcig pa nyid du 'gyur ro//rgyud gcig pa nyid du 'dod na nges par rags pa'i gnas thob par 'gyur zhes bya ba la/ nges par ni rnam par rtog pa'o/ /rags pa'i dngos po bzhin du yul dang yul can gyi ngo bo'i gnas thob par 'gyur ro/ /de gnyis yul dang yul can du mi rigs te/'di ltar dmigs pa'i rkyen nyid kyi yul ni ngo bo yin gyi/ de yang 'gags nas yun ring du lon pa'i phyir mi rigs so/ /'das ma thag pa ni de'i de ma thag pa'i rkyen yin pa'i phyir dmigs pa'i rkyen ni ma yin te/ gzhan du na mig gi dbang po yang yin par 'gyur ro/ /skad cig gnyis pa de med pa'i phyir ji ltar yul nyid du 'gyur zhes bya ba'i don to//gzhan yang rags pa'i gnas thob 'gyur ni brtag pa nyid ces bya ba'i don to/ /de lta mod kyi gzhan sems dus mnyam pa 'dzin pa'i phyir de'i yul nyid du 'gyur ro/ /gzhan gyi zhes bya ba la sogs pa smos te/ gzhan gyi sems la sogs pa'i yul rnal 'byor pa'i sa gang shes pa'ang de yang shes pa kho na min te ma yin pa nyid do/ /ji lta bu zhig ce na/ rang gi sems kyis mos pa bzhin zhes bya ba smos te/ 'di ltar rang gi bdag nyid de/ rang gi bdag nyid kyi sems kyis 'das pa khong du chud snyam pa ni mngon pa'i nga rgyal yin no//'di yang de bzhin no zhes bya ba'i don to/ /gzhan yang dus mnyam du 'dzin to zhes smras pa de la yang skad cig ma yin pa'i ji ltar dus mnyam zhes bya/ gzhan yang gzhan gyi sems kyang gnyis su med pa'i phyir/ de ji ltar yul gyi rang bzhin nyid yin/gnyis su med pa'i shes pa phyogs gcig pa nyid ma yin te/ kun du 'gro ba'i phyir ro/ /'di ltar sems tsam la gnas pa yin no zhes gsungs pa yin pa'i phyir ro/ /'di ltar phyi'i don med na gzung ba dang 'dzin pa med pa'i phyir gnyis su med pa'i sems nyid gzung ba med par brjod par bya ba ma yin pa don dam pa'i rang bzhin grub ces bya ba'i don to//gal te brjod par bya ba ma yin la gzung bar bya ba don dam par yin na ji ltar bcom ldan 'das kyis ston par mdzad cing / byang chub sems dpa' rnams 'dzin par byed pa ma yin nam zhe na/ kun rdzob bden shes thams cad la//zhes bya ba la sogs pa smos te/ gang chung zad kun rdzob dang ldan pa'i shes pa thams cad la/ mkhas pa dang ni gzhan dag gis/ /gzung ba dang ni ston pa la/ /mtshungs pa kho nar 'jug par 'gyur te/ mi mnyam pa ma yin no/ /don dam pa'i ye shes ni ma yin te/ de brjod du med pa'i phyir ro//'di skad du bstan par 'gyur te/ kun rdzob kyis ston par byed pa dang / bstan par bya ba'i tha snyad du 'jug gi don dam par ni ma yin no/ /da ni chos la bdag med pa mthong bas rnal 'byor pa rnams snang ba'i 'bras bu bstan pa'i phyir/ stong nyid ces bya ba la sogs pa smos te/dang po ru ni snga ma ru'o/ /chos thams cad phyi'i gzugs la sogs pas stong ngo zhes gang gi tshe de kho na nyid mthong ba skyes pa de'i tshe/ mi snang ba'i 'bras bu 'ba' zhig ma yin gyi/ gang ji srid snang ba kho na'i 'bras chen yin te/ de las skyes pa ma yin no//gang gi phyir chos la bdag med pa mthong ba'i phyir 'jigs pa med pa thob pa 'di rnal 'byor pa/ 'jig rten gzhan bzhin 'jigs pa med de 'khor ba pa bzhin du 'jigs pa med ces bya ba'i don to/ /gal te yang stong pa nyid mthong ba des 'chi ba'i chos las ma 'das pa ma yin nam/de lta bas na yang de ji ltar 'jigs pa med par 'gyur zhe na/ 'chi ba zhes bya ba la sogs pa smos te/ gang bdag nyid kyi 'chi ba dang ni skye ba nyid/ sprul pa 'dra ba ni sprul pa'i skyes bu lta bur bzhed de/ de la ji ltar na rnam pa gang gis kyang 'chi ba'i 'jigs pa med ces bya ba'i don to//lam thob pa la'ang 'jigs pa yod na lam tshol ba ni nyams par 'gyur ro zhe na/ 'di dag las kyi sprul nyid du/ /zhes bya ba la sogs pa smos te/ gang mthong ba'i lam la gnas pa'i rnal 'byor pa des 'di dag las kyi sprul pa yin gyi rang gi ngo bor grub pa ni ma yin no zhes sa gsum po yang shes pa yin/gal te phyir yang 'jigs 'gyur na ste/ 'khor ba pa'i sdug bsngal gyi 'jigs pa de ltar yin na/ bdag cag 'dra ba de kho na nyid ma mthong bas lam 'dis spang bar 'dod pa ngal ba 'bras bu med pa'i phyir nyams zhes bya ba'i don to/ /mthong ba'i lam la gnas pa'i rnal 'byor pas bdag nyams par rtog pa rigs pa ma yin no zhes bstan pa'i phyir/yan lag mchog ni zhes bya ba la sogs pa smos te/ 'di ltar yan lag mchog ni ste/ mgo bo gnyis pa dang / de bzhin mig ni gsum pa ste/med pa'i phyir ro/ /gnyis po de dag med na skyes bu su zhig bcad pa dang phyung bar dogs par 'gyur/ de bzhin du mthong ba'i lam la gnas pa'i rnal 'byor pas kun du brtags pa'i rang bzhin gyis med pas de'i sdug bsngal gyis ji ltar gnod par dogs zhes bya ba'i don to//'di ltar mthong ba'i lam la gnas pas mthong bas spang bar bya ba'i nyon mongs pa rnams spangs pa yin gyi/ bsgom pas spang bar bya ba'i nyon mongs pa rnams spangs pa ma yin te/ de bstan pa'i phyir/ de ltas blo dang ldan pas yul 'di rnam par nges/ /zhes bya ba la sogs pa smos te/de ltas ni sngar gsungs pa'i rim pas so/ /yul 'di rnam par nges pa ni phyi'i don med par rnam par nges pa yin no/ /blo dang ldan pa ni mkhas pa'o/ /gal te yang lhag pa'i dri ma dang 'dres pa rnam par bsgoms pas kyang ni lhag pa'i sgra ni 'byung po la sogs pa la brjod do/ /de nyid ni dri ma ste/lhag pa'i dri ma rnams so/ /'dres pa ni phan tshun 'dres pa'o/ /bsgoms pas kyang ste zil gyis gnon pa'o/ /de bzhin du yang shin tu dag pa'i phyir mthong ba'i lam gyis spang bar bya ba'i nyon mongs pa'i dri mas nam yang dri ma ldan pa ma yin te/ mi 'gro'o zhes bya ba'i don to//ci lta bur zhe na/ sprin dum zhes bya ba la sogs pa smos te/ ci ltar nam mkha' ni nam mkha'o/ /sprin gyi dum bu ni sprin gyi chas ma dag pas dri ma can nyid du de mi 'gyur ro/ /de bzhin du mthong bas spang bar bya ba'i nyon mongs pas blo dang ldan pa la ma yin no zhes bya ba'i don to//gal te gzugs la sogs pa'i yul rnam pa thams cad du med na/ 'di de yin zhes don nges pa'i rnam pa can gyi shes pa ci ltar skye zhe na/ 'dir ni mang zhes bya ba la sogs pa smos te/ 'dir ni ste phyogs snga ma la mang du smras pas ci zhig bya/ gal te khyi dang ri bong rta mgor skyes pa'i rwa rnams 'ga' zhig gis bsgoms na de'i tshe bsgoms pa'i stobs kyis med pa'i ngo bo yang mthong zhes bya ba'i don to//sbal pa zhes bya ba la sogs pa smos te/ sbal pa ni chu na gnas pa'i srog chags kyi bye brag go/ /de gal te 'ga' zhig gis 'di lta bu'i tshul du bsgoms na de'i tshe sgom pa goms pas de bzhin du snang zhes bya ba'i don to//ji lta bur gyur pa zhig ce na/ ral pa'i thod ces bya ba la sogs pa'i khyad par gyis zhes bya ba'i don to/ /khang pa zhes bya ba la sogs pa smos te/ khang pa mun pa dang bcas pa'i nang du de dang de brtags pas te/mi ma yin pa la sogs pa brtags pa'o/ /'jigs pa ni 'jigs pas non pa'o/ /ji lta bur gyur pa zhig ce na/ rang sems nges par snang ba ni/ zhes smos pa ste/ skye bo'i 'jigs pa'i don byed pa dang ldan zhes bya ba'i don to/ /byis pa ni byis pa ste/ mthong ba min nam ci/ de bzhin du/ shin tu zhes bya ba la sogs pa smos te/ shin tu 'jigs pa'i gnod sbyin gyi gzugs rang gis te/ bdag nyid kyis bris nas dben pa ni skye bo med pa'i phyogs so/ /gcig pu ni grogs med par nges yang gnod sbyin 'dis bdag 'dzin par 'gyur ro zhes sems pas ri mo mkhan 'jigs min nam ci ste/ci 'jigs pa thob par mi 'gyur ram zhes bya ba'i don to/ /de bzhin du/ sdong dum zhes bya ba la sogs pa smos te/ 'ga' zhig snang ba mi gsal ba'i phyogs su ring po na sdong dum dang thag pa mthong ba la/ sdong dum la rkun ma dang thag pa la sbrul yin no zhes brtags pa ste/ 'ga' zhig tu skye bo du ma lam nas 'gro ba na 'di dang 'di yin no zhes brtags pas glo bur du ste/ rgyu med par 'jigs pa thob pa ma yin nam ste/ ci 'jigs par mi 'gyur ram zhes bya ba'i don to//de bzhin du/ yang dag min zhes bya ba la sogs pa smos te/ yang dag min nyid ni gzugs la sogs pa'i yul rnams so/ /yul rnams ji ltar gyur pa zhig ce na/ rang rtog ces bya ba la sogs pa smos te/ rang gi rtog pa nyid ni bzo bo ste/ ri mo mkhan dang 'dra ste/des bris zhes bya ba'i don to/ /byis pa thams cad ni blang ba dang dor ba mi shes pas/ ci'i phyir byis pa'i skye bo yul rnams kyis bcom zhe na/ rang gi nyes pa zhes bya ba la sogs pa smos te/ gang gi tshe sems yul gyi rnam pa'i bag chags yin par khong du ma chud pa de'i tshe/rang bdag nyid kyi nyes pas bcom zhes bya ba'i don to/ /sgra brjod pas kyang yul rnams snang ba min nam zhe na/ nyin dang mtshan mo zhes bya ba la sogs pa smos te/ nyin dang mtshan mo mtshungs pa ni 'dra ba'o/ / long bas sngon mthong ba'i don nam nangs zhes bya ba'i sgra thos nas/ snang ba dang ni bcas pa ste/ /zhes bya ba ni ji ltar mthong ba dang ldan pa'i skyes bus don mthong ba de bzhin du long bas zhes bya ba'i don to/ /da ni yul dang dus la sogs pa yang gzhan du snang ba 'khrul pa nyid du bstan pa'i phyir/yul dus zhes bya ba la sogs pa smos te/ ji ltar rmi lam na yul dang dus la sogs pa'i dngos po gzhan du snang ba nyid kyi phyir 'khrul pa'i shes pa bskyed pa yin no/ /de bzhin du sad pa'i gnas skabs la yang skyes zhes bya ba'i don to/ /'di ltar dub pa ni lam ring pos skyo bar ro//lam nye ba la ring ba ru ni sems pa yin te/ de bzhin yid 'ong dang bral bas/ /zhes bya ba smos te/ de bzhin ni gang gi phyir gyi don to/ /gang gi phyir 'dod ldan ni 'dod pa la mngon par zhen pa'i skyes bu nyin gcig ste/ chu tshod grangs dang mnyam pa la ni chu tshod sum cu'i tshad ni rang bzhin yin na yang lo skor brgya dang 'dra bar sems te/lo brgyar gyur par ro/ /dus gang la zhe na/ yid du 'ong ba dang bral ba'i ste/ mngon par 'dod pa'i dngos po dang bral ba thob pas ma 'brel zhes bya ba'i don to/ /gang gi tshe phyi rol gyi don med na byang chub sems dpa' rnams sbyin pa la sogs pa la 'jug pa dang sems can gyi don ji ltar byed ce na/de nyid mthong ba zhes bya ba la sogs pa smos te/ de kho na nyid don dam pa mthong ba'i byang chub sems dpa' de nyid dang de 'dra ba ni brtags pa'i don gyi sbyin pa la sogs pa la kun rdzob kyi tha snyad du 'jug gi de bzhin du ni dmigs pa ma yin te/don dam pa rtogs zhes bya ba'i don to/ /don de nyid rgyas par bstan pa'i phyir/ sna tshogs 'di dag ces bya ba la sogs pa smos te/ 'di dag ni sngar bstan pa'i tshul gyis bstan pa yin te/ byang chub sems dpas sna tshogs 'di dag thams cad ri mo bzhin du mthong ste/don dam pa'i rang bzhin du mthong ba ni ma yin no zhes bya ba'i don to/ /ji lta bur gyur pa'i sna tshogs pa zhe na/ rnam rtog tshon gyis bris pa ni ste bris pa'i sgras ni rgyu mtshan bshad do/ /de la don ni 'di yin te/ 'di ltar tshon gyi rgyu mtshan gyis ri mo snang la/ de bzhin du rtog pa'i tshon gyi rgyu mtshan gyis sna tshogs pas snang zhes bya ba'i don to//de kho na nyid mthong ba la yang 'gro ba 'di dag gis 'khrul pa bskyed do zhe na/ e ma'o zhes bya ba la sogs pa smos te/ e ma'o ni ngo mtshar ro/ /sna tshogs ni ngo mtshar te gzhan du ma mthong ba'o/ /sna tshogs pa ni rnam pa du ma khams gsum po 'di dag go/ /mnyam dang mi mnyam mtho dang dma' dang rtogs te/rnal 'byor pa'i blo la 'khrul ba rgyas pa'o/ /'di dag thog ma med pa'i 'khor ba 'dir bdag cag mnyam pa ste/ mi'i 'gro ba ru skyes pa'am/ mi mnyam pa ste dmyal ba'i 'gro bar ro/ /yang dma' ba ni dud 'gro dang / yi dags la sogs pa'o/ /mtho ba ni lha la sogs pa'o//yang dag don gyi sgrub pa ni don dam pa'i ngo bo la brten nas kun brtags pa'i ngo bo shes kyang ni shes pas kyang ngo / /ji ltar rnal 'byor pa rnams kyi blo 'khrul par byed ce na/ sems kyi nam mkha'i dkyil du bris pa yi/ zhes bya ba la sogs pa smos te/ sems nam mkha' lta bu ste/de'i dkyil ni rgya che ba'o/ /de la bris pa lta bu zhes bya ba'i don to/ /brdzun pa'i kun tu rtog pas sa rnams gsum po 'di dag bsdus lta bu zhes bya ba smos te/ brdzun pa ni kun nas nyon mongs pas bsdus zhes bya ba'i don to/ /kun brtags pa de bden pa ma yin par bstan pa'i rigs pa gzhan bstan pa'i phyir/gal te dngos po zhes bya ba la sogs pa smos te/ gal te ni gang gi phyir gyi don to/ /gang gi phyir gal te dngos po dngos yin na de'i tshe don dam pa'i ngo bo yin pa'i phyir gzhan nyid du rtogs par mi 'gyur ro/ /de ji ltar chos la bdag med pa rtogs nas dngos po de nyid phyis ni ci'i phyir dngos po med par 'gyur/don dam pa la ngo bo gnyis ni med do/ /'o na gang la dngos po'i tha snyad du bya zhe na/ de bzhin zhes bya ba smos te/ gnyis med pa'i sems la de bzhin nyid kyi sgrar brjod do/ /de yang brtan ngo bo'i phyir gang gi tshe gzhan pa nyid du 'gyur ba ma yin pa de'i tshe/de'i dngos po'i sgra'i tha snyad du rigs kyi brtags pa ma yin zhes bya ba'i don to/ /kun du brtags pa rnams kyi ming la sogs pa'i ming yang dngos po med do zhe na/ chos zhes bya ba la sogs pa smos te/ gang 'di chos brtags pa brdzun pa'i dngos po ming dang rigs stsogs yon tan ni/yon tan gyi khyad par du mthong ba des nam mkha' la ri mo bris pa ni nam mkha'i dkyil du ri mo bri ba lta bur ro/ /de yang phyin ci log gis dub pa yin no/ /yon tan dang ldan pa yon tan la 'jug gi /gang gi tshe yon tan can med na de'i tshe gang gi yon tan yin zhes bya ba'i don to//de ni nye bar sdud par byed de/ de phyir zhes bya ba la sogs pa smos te/ de'i phyir ni sngar bstan pa'i gtan tshigs kyis so/ /sna tshogs rang bzhin rnams ni gzung ba dang 'dzin pa'i rang bzhin gyi chos rnams so/ /rang bzhin ngo bo med pa yin te de dang bral ba zhes bya ba'i don to//yang gang gis gzhan du ste gzung ba dang 'dzin pa'i dngos po'i rang bzhin du yongs su rtogs par byed pa de ni dam pa'i don las log ste/ don dam pa yongs su shes pa la mkhas par gyur pa yin no zhes bya ba'i don to/ /de ltar don dam pa'i mtshan nyid rnam par gzhag nas 'ga' zhig de mngon sum du bya ba'i phyir 'bad par mi bya ba ston par byed pas/gal te zhes bya ba la sogs pa smos te/ gang du stong pa nyid kyi sgrar bstan pa der gnyis su med pa'i sems nyid yin par khong du chud par bya'o/ /yang kun brtags pa'i sgrar bstan pa der ni gzung ba dang 'dzin pa'i ngo bo yin no//de la gal te kun brtags pa thams cad du med pa kho nar gyur la/ stong pa nyid yang gal te yod par gyur na/ de'i tshe skye ba dang ni 'jig pa dag 'bad pa med par rang nyid thob ste/ rnal 'byor pas 'bad pa med par rang nyid thob par 'gyur ro//de bas na stong pa nyid yod la kun brtags pa med pa de lta bu yin na 'bad pa dang bral bas lus can rnams grol bar 'gyur ro/ /de ltar ma yin te gang gi phyir/ mi shes zhes bya ba la sogs pa smos te/ ci srid rtogs pas sgro btags pa gzung ba dang 'dzin pa'i dngos po brtags pa dngos po med pa/rigs pa dang lung sngon du 'gro ba'i rnal 'byor pas mi shes pa de de srid med pa tsam gyis de ldog par ni rigs so/ /gnyen pos sgom pa med par de ldog pa ni med do/ /de lta bas na ldog pa med na ni bstan pa'i ngo bo yang stong pa nyid des bsgribs pa thob par mi 'gyur te/gsal ba ma yin na de bas na ci ltar don dam par 'grub par 'gyur/ /gzhan yang / 'di dag 'ga' yang bye brag med/ /ces bya ba la sogs pa smos te/ 'di kun brtags pa 'di ni stong pa zhes 'di gnyis ji srid 'ga' zhig gis bye brag ma mthong ba de srid kun brtags pa'i rang bzhin du stong pa nyid med pa'i bdag nyid 'thob bo zhes gzhan dag rgol bas lan gdab pa'i phyir/gzhan dbang zhes bya ba la sogs pa smos te/ gzhan dbang nyid ni gzhan gyi dbang gis sems la brten pa ste/ stong pa nyid dang brtags pa yang dag pa dang / yang dag pa ma yin pa mthong ba skyes pa de'i tshe de gnyis kyi dbye ba shes par 'gyur ro//'di ltar gzhan gyi dbang la ngo bo gnyis te/ kun brtags pa dang yongs su grub pa'o/ /de la kun brtags pa ni gzung ba dang 'dzin pa'i dngos por sgro btags pa yin no/ /yongs su grub pa ni yang des stong pa zhes bya'o//de la gang gi tshe rnal 'byor pas kun brtags pa brtag tu med par rig pas dpyad cing de'i gnyen por 'gyur ba yongs su grub pa'i ngo bo yang bsgoms pa de'i tshe/ yongs su grub pa'i ngo bo mthong bas stong pa nyid yang dag pa mthong bar 'gyur ro/ /yongs su grub pa'i ngo bo ma gtogs par gzhan stong pa nyid ces bya ba 'ga' yang med do//kun brtags pa ni brdzun pa nyid yin pa'i phyir/ yang dag par mthong ba ma yin no zhes bya bas don dam pa grub pa yin no/ /don de nyid tshigs su bcad pa 'dis bstan par bya ba'i phyir/ ji ltar zhes bya ba la la sogs pa smos te/stong pa nyid 'di la rnal 'byor pa rnams ji ltar 'jug ces dri ba la/ rang bzhin gsum ni mthong bas so/ /zhes bya ba ni lan yin no/ /gang gi tshe kun brtags pa dang gzhan gyi dbang dang yongs su grub pa'i rang bzhin gsum gyi ngo bo'i sems mthong bar gyur na/de'i tshe rang bzhin gsum mthong ba'i rgyus te/ sngar bstan pa'i rim pas stong pa nyid la 'jug par 'gyur ro/ /sems kyi ngo bo gsum po stong pa nyid 'ba' zhig mthong bar gyur pa ma yin gyi/ ji srid de mthong bas ni rang bzhin gsum gyi ngo bo gang gi tshe sems mthong ba de'i tshe/de mthong bas ni chos kun la/ /ril por 'dzin pa ldog par 'gyur/ /gcig tu mngon par zhen pa ldog par 'gyur ro/ /de bas na/ gcig la tha dad mthong ba med/ /ces bya ba la sogs pa smos te/ rang gi ngo bo gcig la tha dad pa mthong ba ni med do/ / de bas na tshul gsum du gsal bar snang ngo / /'on kyang bag chags 'jug pa'i nus pa yis te/ bag chags kyi nus pa'i mthus de gnyis las te gzhan gyi dbang dang yongs su grub pa'i ngo bo las kun brtags pa'i ngo bo gsal bar snang zhes bya ba'i don to/ /de'i phyi ma'i gnas skabs bstan pa'i phyir/kun brtags zhes bya ba la sogs pa smos te/ gzung ba'i dngos po dgag pa'i phyir/ /kun brtags don ni nub pa'i phyir/ /zhes bya ba smos te/ mi gsal bar gyur pa'i phyir ro/ /yongs su grub pa'i rang bzhin las dang por gzhan gyi dbang ni rab tu gsal bar mthong zhes bya ba'i don to//ji lta bur gyur pa zhig gsal zhe na/ rang bzhin snga nas ma mthong phyir/ /zhes bya ba smos te/ snga nas ma mthong ba ni kun brtags pa'i gnas skabs so/ /gang gi ngo bo ma mthong ba de'i ngo bos g.yo ba bzhin te/ mi brtan pa'i ngo bo lta bur gsal zhes bya ba'i don to/ / da ni mthong ba'i lam bstan pa'i phyir/ rim gyis zhes bya ba la sogs pa smos te/ rim pa ni sngar bstan pa'i rim pas so/ /gzung ba med pas 'dzin pa med pa'i rigs pas so/ /de nyid kyi ste gzhan gyi dbang 'dzin pa'i rnam pa snang ba bzlog pa ste spangs pas so/ /gnyis dang bral ba ni stong pa nyid do//de nyid ni gzhan dbang ste bstan par bya ba'i phyir/ snying ga ru ni 'od gsal skyes te/ yongs su grub pa'i rang bzhin gyis gsal ba'i ngo bo bskyed ces bya ba'i don to/ /skad cig la de mthong bar bstan pa ni/ de yang zhes bya ba la sogs pa smos te/ de yang gang gi tshe mngon du ma byas na glog bzhin du mi brtan phyir/skad cig la ni 'gro zhing 'ong ste/ 'gro ba dang 'ong zhes bya ba'i don to/ /'dir rgyu gang yin zhe na/ thams cad ni dus thams cad du'o/ /thog ma med dus kyi gnyis po gzung ba dang 'dzin pa gnyis po'o/ /gang gi tshe kun du bslang ba de'i tshe gnyis po de nyid kyis bslad phyir te/skad cig la 'ong zhing 'gro zhes bya ba'i don to/ /don de nyid bstan par bya ba'i phyir/ gnyis gnas zhes bya ba la sogs pa smos te/ gnyis gnas ni gzung ba dang 'dzin pa gnyis so/ /gnyis med pa ni stong pa nyid kyi gnas so/ /rjes su 'byung ba ni res 'ga' rjes su 'gro ba yin no//ji srid ni stong pa nyid de'i dbus ma ni gzung ba dang 'dzin pa gnyis kyi dbus so/ /brtan par ma byas ni dngos po brtan par ma byas pa de srid yang dang yang du der 'gro zhes bya ba'i don to/ /da ni brtan pa nyid na/ brtan par gyur pa zhes bya ba la sogs pa smos te/gang gi tshe sa brgyad par stong pa nyid brtan par gyur pa de'i tshe/ mun pa'i 'jug pa'i gnas skabs nyid ni yod ma yin zhes bya ba'i don to/ /ji lta bu zhe na/ 'od zer stong zhes bya ba la sogs pa smos te/ 'di ltar 'od zer stong ldan ni nyi ma shar bas mun pa'i 'jug pa la gnas pa'i skabs med pa de bzhin du stong pa nyid yin te de dang 'gal ba'i phyir ro//da ni stong pa nyid rnam pa thams cad du dngos po med pa nyid dgag pa'i phyir/ gnas skabs de yang mi shes pas te/ gnas skabs gsum yod pa de'i phyir yang sgra smos so/ /de lta bas na gnas skabs de yang gnas skabs gang yin pa la stong pa nyid ces bya ste/bdag cag 'dra bas mi shes kyi sangs rgyas nyid kyis mkhyen zhes bya ba'i don to/ /'jig rten grags pa nyid bzhin du/ /med pa'i rjes su 'brang mi bya/ /'jig rten rgyang pan pa'i bstan par grags pa ni don cung zad kyang med ces smra ste/de stong pa nyid ma yin zhes bya ba'i don to/ /gang gi stong pa nyid ni chos kyi sgras bstan te/ chos can las chos nyid ni gzhan ma yin no/ /da ni mtha' med par bstan pa'i phyir/ de yi dngos po zhes bya ba la sogs pa smos te/ dngos por rtog pa'i mtha'i g.yeng ba spang ba'i phyir de'i stong pa nyid de dngos po med par khong du chud par bya'o//dngos po med par rtog pa'i mtha'i g.yeng ba spang ba'i phyir/ tha snyad don te/ kun rdzob tu yod par yang shes par bya'o/ /don dam pa rtogs na/ rang bzhin med pa'i chos rnams la/ /gang zhig yod dang med pa yin//zhes smos te/ mtha' gnyis med ces bya ba'i don to/ /yod pa dang med pa'i sbyor ba med na mi 'byung ba'i phyir/ gcig kyang gzugs par mi bya'o zhes bstan pa'i phyir/ khyod dran zhes bya ba la sogs pa smos te/ 'di ltar 'ga' zhig la/ khyod dran ma byed ces brjod na ste/khyod dngos po 'di dran par byed ces smra ba'o/ /de'i phyir dgag dbye ni dngos po ste med na mi 'byung ba'i phyir blos mchog tu dpyod pas dran pa yin no/ /de ltar de bzhin med pa'i sgras/ med na mi 'byung ba'i phyir yod par khong du chud pa yin no/ /de lta bas na yod pa dang med pa'i rnam par rtog pa gnyis spangs pa ni dbu ma'i lam du shes par bya'o//gal te dgag par bya ba mi 'byung bar grub pa yin na yang de'i phyir dngos po'i stobs kyis kun brtags pa de yod par grub bo zhe na/ rnam par rtog ces bya ba la sogs pa smos te/ rnam par rtog pa ni sgra'i rnam par rtog pa las bag chags kyi dbang gis/rnam par rtog pa las don rnams shes pa ni dran pa'i shes pa skye ba yin no/ /don gyi blo las rnam rtog kyang ste de las byung ba yin no/ /gnyi ga rnam rtog chos yin phyir te/ sgra dang don gyi rnam par rtog pa dag rnam par rtog pa'i chos yin pa'i phyir/yod pa gang yin med gang yin/ /zhes bya ba'i don to/ /med pa'i rnam par rtog pa la yang brtag par mi bya'o zhes bstan pa'i phyir/ rten ni gang zhig ces bya ba la sogs pa smos te/ rten ni gang zhig ni kun brtags pa la sogs pa ste/ med pa nyid kyang bsgoms pas med na mi 'byung ba'i phyir yod par 'gyur te 'gro ba yin no//gal te de bzhin du 'dod pa na de'i tshe yang de bzhin yod pa nyid kyang 'thob ste/ 'di ltar med pa nyid bsgoms pas yod par 'gyur ba de bzhin du yod pa yang bsgoms pas med na mi 'byung ba'i phyir med pa nyid kyang thob pa yin no//de dag thams cad kun brtags pa'i dngos po las len pa la yod par 'gyur ro/ /gang gi tshe kun du brtags pa rtag tu med pa'i phyir de'i tshe rten med pas brten pa yod pa ma yin no/ /da ni nye bar bsdu ba'i phyir/ de bzhin yod ces bya ba la sogs pa smos te/ de bzhin du yod pa dang med pa dang bde sdug la sogs med par bzhed de/dngos po med ces bya ba'i don to/ /gang gi phyir gang chung zad yod pa de dag thams cad ltos pas grub pa yin te skyes zhes bya ba'i don to/ /'di ji lta bu zhig ce na/ ring thung la sogs bye brag bzhin/ /zhes bya ba la sogs pa smos te/ 'di ltar thung ngu med na ring po'i bdag nyid yod par mi 'grub la/ ring po med na thung ngu yang de bzhin no/ /de bzhin du/ skyes bu zhes bya ba la sogs pa smos te/ 'di ltar skyes bu ni skyes bu rnams te/ sdug bsngal zhi ba la bde ba zhes bya ba rang gi rtog pas brtags pa yin no/ /bde ba nyams pa sdug bsngal yin te/de'i phyir gnyis po 'di ni ltos pas yin no/ /ltos pa nyid ces bya ba la sogs pa smos te/ 'di ni bde ba dang sdug bsngal la sogs pa'i rigs pas kun rags pa dang phra ba la sogs pa'i bdag nyid ltos pa las kun du byung bar shes par bya'o zhes bya ba'i don to//'di ltar/ gcig nyid la ni ma ltos par/ /gzhan dag khong du chud ma yin te/ gnyis par shes par mi 'gyur ro zhes bya ba'i don to/ /'di skad du bstan par 'gyur te/ ltos pa med par dngos po 'ga' zhig 'ba' zhig tu yod pa ni ma yin no zhes bya'o/ /gzhan du na thams cad rtag pa kho nar 'gyur ro//'di ltar dngos po dang dngos po med pa'i rnam par rtog pa'i g.yeng ba bkag pas sems gnyis su med pa'i ngo bo dbu ma'i lam yin par bstan nas/ 'di ltar ming dang rnam par rtog pa rgya cher dgag pa'i phyir/ gzhan sel ba yi zhes bya ba la sogs pa smos te/gzhan sel ba ni rigs mi mthun pa gzhan sel ba'o/ /spyod yul rnam par ma dpyad par te/ rang gi mtshan nyid kyi yul rnam par ma dpyad par ro/ /bstan pa la sogs sgrub pa yis te/ sgra brjod pa dang / nyan pa dang dran pa la sogs pa'i rgyus/kha cig 'khrul pa yang dag bskyed de/ dngos po med pa spyi'i mtshan nyid 'khrul pa'i shes pas don med pa la don du mngon par zhen zhes bya ba'i don to/ /sgra'i shes pa tshad mar gyur pa la 'khrul pa'i shes pa yin zhes ji ltar brjod ce na/ yi ge tshig dang zhes bya ba la sogs pa smos te/yi ge ni a la sogs pa'o/ /tshig ni yi ge'i sbyor ba ste bum pa dang snam bu dang shing rta la sogs pa'o/ /ngag ni lha sbyin ba lang dkar po la dbyug pas rgyob ces bya ba la sogs pa'o/ /rtags rnams kyi skyes pa dang bud med dang ma ning ngo / /tshig ni gcig gi tshig dang gnyis kyi tshig dang mang po'i tshig rnams so//bya ba ni 'chang ba nyid la sogs pa'o/ /byed pa ni las la sogs pa'o/ /'brel pa ni bya ba dang byed pa'i 'brel pa la sogs pa'o/ /de dag thams cad ni/ brdzun phyir rjod par byed ma yin te/ rjod par byed pa ma yin par rtogs par bya'o//'di ltar rim gyis brjod pa na gang gi tshe 'jig pa de'i tshe/ brjod par bya ba'i don med pa'i phyir rjod par byed pa ma yin no/ /tha mi dad pa dang 'dus pa'i ngo bor mi dmigs te/ gang gi phyir 'dus pa ni gcig yin pa'i phyir rim gyis brjod pa 'byung bar mi 'gyur ro//de'i cha shas kyi rdul phra rab dngos por yod pa yang ma yin te/ de dag rdzas su med pa'i phyir ro/ /sgra las logs shig pa'i yi ge dmigs pa ni med de/ de dag mtha' yas pa'i phyir 'di tsam zhes yongs su chad pa med pas thub pa med par 'gyur ro/ /sgra las don rtogs pa yang ma yin te/gang gi phyir dang don gyi tha snyad ni lag pa'i tha snyad dang brda dang dran pa la sogs pa bzhin du 'jug pa'i phyir ro/ /brdzun pa'i yi ge la brten pas tshig dang ngag dang rtags la sogs pa bden pa nyid kho na brdzun zhes bya ba'i don to/ /da ni zhar la byung ba'i sgra'i bstan bcos mi rigs par bstan pa'i phyir/tshigs bcad ces bya ba la sogs pa smos te/ ji srid rkang pa lnga 'am gsum gyis don rtogs par gyur na/ de srid tshigs su bcad pa ci'i phyir mi 'dod/ rjod byed brjod bya la ltos nas te/ de gtso bo yin pa'i phyir ro/ /'on te mi 'dod na de'i tshe rkang pa bzhi par nges pa ni/mkha' 'gro'i dam tshig bzhin du 'gyur te/ rang gi 'dod pas brtags par 'gyur ro/ /rnal 'byor pa rnams kyi brda sgra dang don la ma ltos par rang gi 'dod pas brtags par gyur pa yin no/ /de bzhin du lci ba dang yang ba la sogs pa khong du chud par bya'o//brda sprod pa rab tu brtags pa'i sgra'i sbyor ba nyon mongs shing don med pa'ang bstan pa'i phyir/ chos zhes bya ba la sogs pa smos te/ ji ltar 'ga' zhig lag pa'i tha snyad dang brda dang dran pa'i dbang gis chos rnams gzung bar bya ba yin no/ /de'i phyir sngon gyi yun ring por byung ba bya kar Na la sogs pa rtsoms pas/sgra rnams sbyor ba nyon mongs la ste/ sgra sbyor ba dka' ba'i gnas yin te/ 'jig rten pa dag ci phyir btsud/ /'di ni sna zhes bya ba la sogs pa smos te/ yang gang mi shes pa 'ga' zhig 'dri ste/ sna gang yin zhes zer ba la/ des kyang sna ni 'di yin no zhes gsal bar brjod pa de tsam gyis de la don go ba skye'o//mgo bo bskor bar gyur pa yi/ /lag ngar bkug pa'i lag pa yis/ /sna bzung nas 'di sna yin no zhes/ dris la su zhig ston par byed/ 'di ltar na sa'i sgra brjod pas don rtogs na/ na si ka'i sgra brjod pa la dgos pa ci zhig yod//dgos pa med pa'i sgra'i bstan bcos la mngon par zhen pa ni dpyod pa med pa la gus par bya ba ma yin no zhes bstan pa'i phyir/ sgra yi bdag nyid 'jig rten pa/ /sgra dgod pa'i khyad par shes pas bdag nyid dang de'i rjes su 'brang ba'i 'jig rten pa/ bdag nyid gus par 'gyur ma yin//de nyid kyi dpe bstan pa'i phyir/ brag gi dkyil gyi gab tshe bzhin/ /brag gi dkyil gyi gab tshe ni gab che'o/ /de yang gang gi tshe gser gyis bkang ba bdag gis thob snyam du 'ga' zhig sems nas de'i tshe gus pas spos dang me tog gis mchod de/ phyis phye ba dang nang na snying por gyur pa'i dngos po chung zad med par shes nas gus pa ma yin pa chen pos 'dor ba de bzhin du ji srid brda'i tha snyad kyi don yongs su shes pa ma skyes pa de srid du saM skr-i ta'i skad la gus par byed kyi/ji srid yang brda'i dbang gis don rtogs pa de'i tshe gus par mi byed do zhes bya ba'i don to//sngar ni sgra brdzun pa'i phyir/ rjod par byed pa ma yin par bstan nas/ da ni bden pa yin du chug na yang rjod par byed pa ma yin par bstan pa'i phyir/ gzhan gyis zhes bya ba la sogs pa smos te/ gzhan rgyu ma yin pa dang de'i bdag nyid ma yin pas gzhan ni 'bras bur gyur pa ma yin pa dang /de'i bdag nyid ma yin pa/ 'brel pa med phyir mi rigs so/ /gang gi phyir 'brel pa ni gnyis te/ de'i bdag nyid dang de las byung ba'o/ /de la de'i bdag nyid ni ma yin te/ ngo bo tha dad pa'i phyir ro/ /de las byung ba yang ma yin te/ de ma thag pa'i rkyen med par thal bar 'gyur ro//de lta bas na 'brel pa'i phyir brjod par bya ba dang rjod par byed pa ma yin no/ /'dir de nyid kyi dpe bstan pa'i phyir/ ral gri zhes bya ba la sogs pa smos te/ ral gri ni gcod pa ste/ gzhan la ste skyes bu la sogs pa la brgyab pa yis/ gzhan dag shing la sogs pa gcod par byed dam ci zhes bya ba'i don to//da ni kha cig sgra dang don la bskyed par bya ba dang skyed par byed pa'i dngos po 'brel pa'i mtshan nyid yod do snyam pa de bsal ba'i phyir/ ma byas zhes bya ba la sogs pa smos te/ phal cher 'bras bu'i bya ba byed pa'i nus pa rgyu dang 'bras bur bcas par rjes su 'gro ba dang ldog pa ma mthong ste/sa bon dang myu gu bzhin no/ /yang gang zhig bya ba dang bral ba'i dngos po bya ba byed pa'i nus pa dang bral ba dang sgra tha mal pa'i dbye bas des ni gang yang thob med de/ mi bskyed do zhes bya ba'i don to/ /de ni rtag pa'i dngos po yin pa'i phyir ro/ / 'on te dngos po gang gis dngos po gang zhig skyed ce na/ dngos po med pa'i zhes bya ba la sogs pa smos te/ dngos po gang zhig 'dir sngar ma skyes pa phyis rgyu dang rkyen gyi dbang gis skye ba de ltar gyur pa'i dngos pos yang dngos po rab tu bskyed pa yin zhes bya ba'i don to/ /'on te don med na sgra mi 'jug pa de'i phyir/sgra 'jug pa las rgyu mtshan yod pa'i phyir ji ltar 'brel pa med pa yin/ de ltar ni ma yin te/ gang gi phyir brjod par 'dod pa'i dbang gis sgra 'jug par mthong ba'i phyir ro/ /gal te sgra rang gi rgyu las skye mod kyi/ brda sprod pas 'dod pa'i don sbyor bar byed pa'i don rgyu de dang lhan cig sbyor ba dang sbyor bar byed pa'i dngos po'i 'brel pa'i mtshan nyid do zhe na/dngos po zhes bya ba la sogs pa smos te/ dngos po'i ni bskyed pa'i bya ba byed pa rdzogs na dngos po'i rang bzhin min te/ gzhan skad cig ma'i ngo bo ni sbyor bar byed pa ma yin no/ /dngos po'i dus na dngos ming phyir te/bskyed par bya ba yod pa'i dus na skyed par byed pa'i rgyu nyid du mngon par 'dod pa 'gag pa'i phyir ro/ /de nyid phyir na 'das pa'i dngos ni de nyid phyir ni skad cig ma yin pa'i phyir ro/ /'byung ba zhes ni brjod pa yin te/ brjod par bya ba ma yin zhes bya ba'i don to/ / gzhan yang bskyed par bya ba dang / bskyed par bya ba'i dngos po brtags pa yin na ni/ de nyid phyir zhes bya ba la sogs pa smos te/ de nyid phyir na ste sngar bshad pa'i skyed par byed pa'i ngo bo la gzhag nas skyob pa ni sangs rgyas te 'byung ba zhes bya ba ni sa la sogs pa'o/ /'byung ba kun ni gzugs la sogs pa'i gtso bo yin pa'i phyir ro//nges pa'i tshig la mkhas pa yin/ /sgra'i don rnam par bcad pa nus pa dang ldan pas rab tu gsungs pa yin no/ /kha cig gzhan skyed par byed par 'dod kyi 'byung ba chen po ni ma yin no zhes zer ba'i phyir ro/ /gzhan yang sgra'i rnam par rtog pa'i yul bstan pa'i phyir/gcig la zhes bya ba la sogs pa bstan te/ gcig ni dang po la'o/ /brgya'i blo skye min no/ /de bzhin du gnyis pa nas brtsams te brgya rdzogs kyi bar de la yang re re la yang med de/ de bzhin yang brgya'i sgra las 'dus pa'i ngo bo tha dad pa dngos po yod pa brgya'i don gyi rnam par rtog pa la 'khrul pa'i rang bzhin gyi sems yin no zhes bya ba'i don to//gal te sgra nyams pas kyang don rtogs par 'gyur mod kyi/ 'di ltar yang rtags la sogs pa dang ldan pa'i saMskr-i ta'i skad des don khyad par can nyid rtogs par byed pa yin no zhe na/ mtho ris zhes bya ba la sogs pa smos te/mtho ris dang sa 'og la sogs pa ma mthong ba dang / bum pa la sogs pa mthong ba la rnam pa 'ga' zhig gis lag pa'i tha snyad dang brdas de'i bdag nyid rtogs 'gyur na/ mtho ris dang bum pa la sogs pa'i tshig tu brjod pas ci zhig bya ste/de la dgos pa ci zhig yod ces bya ba yin no/ /don de nyid gsal bar bya ba'i phyir/ glang po dang ni zhes bya ba la sogs pa smos te/ tshig la sogs pa dang ldan pa'i saM skr-i tas sa srung gi bu dang lha'i bu mo khyad par gyi khyad par can glang po dang bud med yin la sgra nyams pas de bzhin du yang glang po nyid dang bud med rtogs te/de las snga na med blo med de skye ba med do/ /mtho ba la mngon par zhen pa 'ba' zhig gis mchog tu skye zhes bya ba'i don to/ /da ni nye bar bsdu ba'i phyir/ mthong ba zhes bya ba la sogs pa smos te/ gzhan rang gi mtshan nyid mthong nas/ spyi'i mtshan nyid gzhan rang gi rnam par rtog pa smras te/spyi'i mtshan nyid bstan pa thos pas rang gi mtshan nyid rtogs so/ /de ltar smyon pa bzhin te smyon pa lta bu'i 'jig rten gyis gzhan bstan pas gzhan mthong zhing gzhan thos pas gzhan rtogs te bdag nyid khong du chud ma yin zhes bya ba'i don to/ / shin tu smyon pa dang chos mthun par bstan pa'i phyir/ bdag nyid ces bya ba la sogs pa smos te zhes pa'i sgra'i don ni gal te 'ga' zhig smyon par gyur nas bdag smyon pa yin no zhes shes pa'i phyir ji ltar smyon par 'gyur/ 'on kyang rang rig pa'i ye shes la gang 'khrul pa de smyon pa zhes brjod do/ / de lta bu'i smyon nad kyis smyon pa lta bur mthong zhes bya ba'i don to/ /zhar la byung ba nye bar bsdus nas/ da ni rang bzhin gsum gyi rang gi ngo bo bstan pa'i phyir/ yul sogs zhes bya ba la sogs pa smos te/ yul sogs nges pa'i rnam par ni/ /stsogs pa smos pas ni dus nges pa'i rnam pa bzung ngo / / ji ltar 'gro ba gsum po 'dod pa dang gzugs dang gzugs med pa zhes bya ba ma rig pa'i bag chags kyi mthus rnam par rig pa snang ba ni gsal bar ro/ /de'i tshe 'khrul pa'i rang bzhin gzhan gyi dbang rnam par rig par gyur pa yin no/ /de'i phyir ni rgyu de nyid kyis kun brtags pa'i dri ma dang bral na/de ni rnam par rig pa 'khrul par mi 'gyur ro/ /gal te 'di ltar dus thams cad du ma 'khrul pa nyid yin na/ ci'i phyir rnam par rig pa mthong bar mi 'gyur zhe na/ de ltar ni ma yin te/ thams cad grol bar 'gyur ba'i phyir ro/ /gzhan nyid dang ma bral na de bzhin nyid du mi 'gyur ro//da ni rang bzhin gsum gyi rang gi ngo bo rnam par dpyad pa'i phyir/ glang po'i don zhes bya ba la sogs pa'i tshigs su bcad pa gnyis gsungs te/ sgyu ma mkhan gyis glang po gcig sprul pa la/ sgyu ma'i glang po la grangs ji lta ba bzhin du mkhas pas kun btags pa'i rang bzhin la sogs par shes par bya'o//'di ltar don dam par don stong pa'i glang po la glang po'i don du snang ba skye ba 'dis ni kun brtags pa'i ngo bo shes par bya'o/ /de bzhin du don snang ba ni de don ma yin te/ 'on kyang don gyi rnam pa can gyi rnam par shes pa skye'o/ /des ni gzhan gyi dbang gi rang bzhin yin par shes par bya'o//gzhan yang gzung ba'i dngos po brdzun don yin te/ gzung ba dang 'dzin pa'i dngos po de'i dngos po ni gnas su gyur pa ste rten du gyur pa'o/ /gzung ba dang 'dzin pa de yang dngos po med par gyur na/ mkhas pa shes rab dang ldan pas yongs su grub pa'i rang bzhin du shes par bya'o zhes bya ba'i don to//de bas na de nyid kyi phyir/ de ltar yang dag mthong bas sngar/ /zhes bya ba la sogs pa smos te/ de ltar ni sngar gsungs pa'i rim pas so/ /sgyu ma'i glang po bzhin du yang dag par mthong bas dang por don du 'dzin pa ldog par 'gyur ro zhes bya'o/ / rnal 'byor pa des de ma thag tu gzhan dbang de'i rnam pa ni bag chags kyi dbang gis de'i sems las byung ba yin zhes bya ba'i don to/ /dus ji snyed cig ce na/rnam pa de yi zhes bya ba la sogs pa smos te/ de'i ni gzhan gyi dbang gis sems bdun pa'i bar du rnam pa de'i rnyog pa yang ste dri ma dang ldan par 'jug go//yang phyi nas sa brgyad pa la bag chags ldog pas rgyu log pas 'bras bu ldog go zhes bya ba'i rigs pa 'di ste/ don gyi dngos po med mthong bas te rtsa ba dang bcas par 'don pa'i phyir ro/ /don gyi rnam pa gzhan gyi dbang gis sems ldog par 'gyur ro zhes bya ba'i don to//da ni byang chub sems dpa' sems can gyi don du srid pa yongs su 'dzin pa bstan pa'i phyir/ sems kyi zhes bya ba la sogs pa smos te/ /lhan cig skyes pa'i bdag tu lta ba la sogs pa'i 'brel bas rtag tu 'khor ba'i chos dang ldan pa'i phyir/ rdza mkhan gyi 'khor lo lta bur sems mthong na yid ldog pas yongs su grub pa'i chos yin pa'i phyir byang chub sems dpa' de phyir yang 'khor bar 'khor bar mi 'gyur te/ 'khor ba ma yin no/ /'on kyang sems can gyi don du thabs la mkhas pa'i dbang gis yang dag par skye ba 'byung zhes bya ba'i don to/ /gnyis su med pa la gnas pa'i rnal 'byor pa'i mtshan nyid bstan pa'i phyir/ri mor zhes bya ba la sogs pa smos te/ gnyis su med pa'i yul la gnas pa'i rnal 'byor pa'i mtshan nyid 'di yin te/ ri mor bris pa'i skyes bu bzhin du g.yo ba med pa yin te/ de kho na nyid la bya ba dmigs pa'i phyir ro/ / rdzas kyi bdag nyid phung po lnga po mi dmigs pa'i phyir rtog pa med pa'o/ /yul 'ga' la 'dod pa med pas na 'dod pa med pa'o/ /'khor ba kun brtags pa'i ngo bo ni de kho na nyid du med pa'i phyir dang / de dang bral ba'i mtshan nyid mya ngan las 'das pa mi dmigs pa'i phyir des mya ngan las 'das pa mi len cing 'khor ba 'dor ba cung zad kyang med do//gang gi phyir lhag ma dang bcas pa dang lhag ma med pa'i mya ngan las 'das pa don gzhan rdzas su yod par mi rigs te/ gang gi phyir lhag ma dang bcas pa'i mya ngan las 'das pa sdug bsngal dang / kun 'byung dang lam gyi gnas skabs gsum ma gtogs par don gzhan du gyur pa'i mya ngan las 'das pa ni med do//lhag ma med pa de yang don gzhan du gyur pa nyid ni mi rigs te/ 'di ltar lhag ma ni phung po rnams te/ de dang bral ba gang la yod pa'i mya ngan las 'das pa de ni lhag ma med pa'i mya ngan las 'das pa'o/ /yang de bas na mya ngan las 'das pa thob pa dang /mya ngan las 'das pa'i rten yang slar 'byung ba'i phung po'i tshogs med pa'i phyir gang zhig dngos por gyur pa'i mya ngan las 'das pa ni 'ga' yang med do/ /gzhan yang gal te gzugs la sogs pa bzhin du mya ngan las 'das pa tha dad par gyur na/ de'i de rnam par gzhan pa gang gis rtogs par 'gyur ba yin/shes pa gzhan gyis rang bzhin ngo bo nges par gzung na ni de'i ngo bo nyid du mi 'gyur te/ 'on te nges par gzung na ni de'i tshe gzugs la sogs pa bzhin du 'dus byas nyid du 'gyur ro/ /de nyid kyi phyir skad cig ma nyid ma yin no/ / de lta bas na mya ngan las 'das pa dngos po de len par rnal 'byor pa su zhig byed ces bya ba'i don to/ /don dam pa la gnas na de la sems can gyi don bya bas dgos pa ci zhig yod ce na/ smon lam zhes bya ba la sogs pa smos te/ 'khor ba dang mya ngan las 'das pa la rnam par mi rtog pa'o/ / 'on kyang sngon gyi smon lam gyi mthus srid pa gsum gyi sems can gyi don byed pa'i phyir 'byung ngo / /ci lta bur zhe na/ nyi ma bzhin zhes bya ba smos te/ ji ltar nyi ma'i dkyil 'khor 'jig rten gyi mun nag smag sel bar byed pa'i phyir 'byung ba de bzhin du/ byang chub sems dpa' rnams 'jig rten gyi mi shes pa'i mun pa bsal ba'i phyir byung ngo zhes bya ba'i don to//da ni kun rdzob kyi bden pa la brten nas sangs rgyas bcom ldan 'das rnams bstan pa la 'jug go zhes bstan pa'i phyir/ de phyir zhes bya ba la sogs pa smos te/ yang gang gi phyir gnyis su med pa kho na don dam pa yin pa de nyid kyi phyir dge ba dang mi dge ba'i las byed pa po'i skyes bu'i las kyi 'bras bu ni mtho ris dang dmyal ba la sogs pa skyob pas gsungs pa de yang rtog pa'i ngo bo ste/brtags pa kho nar khong du chud par bya'o/ /las 'bras bu 'ba' zhig ma yin gyi/ bcom ldan 'das kyis ji snyed bstan pa de snyed kun rdzob kyi 'jug pa yin no zhes bstan pa'i phyir/chos dang zhes bya ba la sogs pa smos te/ de la chos ni dge ba'i bya ba rnams ni mi brjed pa'o/ /chos min de las bzlog pa'o/ /dka' thub ni sdug bsngal la ji mi snyam pa'i bzod pa'o/ /gtong ba ni don du gnyer ba la lus la sogs pa ster ba'o//bsdams pa ni lus dang sems mi dge ba las ldog pa'o/ /des bsdams pa ni gnyen pos dka' ba las ldog pa'o/ /dul ba ni sems nye bar zhi ba'o/ /dud 'gro ni ba lang la sogs pa'o/ /dmyal ba ni mtshams med pa na gnas pa la sogs pa'o/ /sbyin pa la sogs pa la gegs byed pa'i las kyis zas skom dang bral ba'i yul gnas pa ni yi dags so//phung po lngas bsdus pa ni mi'o/ /mtho ris na gnas pas na lha'o/ /'byung ba ni sa la sogs pa'o/ /'byung ba las gyur pa ni gzugs la sogs pa'o/ / phung po ni gzugs dang tshor ba la sogs pa'o/ /khams ni mig la sogs pa'o/ /thub pas sems can la rjes su bstan pa ni bstan pa'o/ /ston pa ni sangs rgyas bcom ldan 'das so/ /nyan thos ni shA ri'i bu la sogs pa'o/ /de dag ni kun rdzob tu bstan pa yin te/ de dag thams cad kun rdzob yin par bstan gyi/don dam par ni ma yin no zhes bya ba'i don to/ /bcom ldan 'das don dam pa kho na 'ba' zhig ci'i phyir bstan par mi mdzad par kun rdzob tu dgos pa ci zhig yod pa ma yin nam zhe na/ dang po'i las can zhes bya ba la sogs pa smos te/ dang por bcom ldan 'das kyi bstan pa la dad pa dang ldan pa ni dang po'i las can no zhes bya'o//dang po'i las can 'jig rten pa de don dam pa gnyis su med pa'i ye shes la gzhug pa'i phyir thabs ni kun rdzob ste/ 'di rdzogs pa'i sangs rgyas bcom ldan 'das kyis skas la 'dzeg pa'i rigs pas gsungs kyi/ yang kun rdzob kyi rang gi ngo bo yod par grub pa ni ma yin no//don de nyid bstan par bya ba'i phyir/ de ltar zhes bya ba la sogs pa smos te/ de ltar ni kun rdzob pa'i dngos po thams cad byis pas brjod pa dang 'dra ba de kho na nyid kyi rang bzhin ma yin pa mthar ni thams cad 'jig pa yin te/ rnam par dpyad mi bzod pa'i phyir blo la gnas pa med ces bya ba'i don to//de bzhin du brjod par bya min te brjod par bya ba min zhes bstan to/ /gzung ba dang 'dzin pa'i ngo bo dpyad mi bzod pa'i phyir dpyad du med ces bya ba'i don to/ /cung zad gzhan yang ste don dam pa gsal ba zhes bya ba'i don to/ / da ni de kho na nyid la rab tu gnas pa bstan pa'i phyir/ de la nam mkha' zhes bya ba la sogs pa smos te/ 'di ltar brjod par bya ba ma yin pa dpyad du med pa cung zad med pa'i go 'phang la gnas pa/ de ni nam mkha' gsal ba'i dngos po byang chub sems dpas bdag nyid ni gang zag go/ / stong pa nyid ni des stong pa nyid de de kho na nyid kyi mtshan nyid do/ /stong pa nyid ni gsal bar byed pa ni 'jig rten rnams la rang bzhin med pa gsal bar byed ces bya ba'i don to/ /gang khams dang skye mched bstan pa de ni bdag nyid stong pa nyid do/ /gang gi phyir bdag nyid mthong ba po la sogs par 'ga' zhig 'dod pas yang gang gi tshe/mig la sogs pa yul la so sor nges pa nyid khong du chud pa de'i tshe bdag gang zag gi stong pa nyid grub pa'o/ /gal te mig la sogs pa'i dmigs pa chos la bdag med par mi 'gyur ro zhe na/ de ltar ni ma yin te/ gang zhig mi la sogs pa'i rang bzhin gyi gang zag stong pa nyid des stong pa nyid ni gnyis su med pa stong pa nyid do//'di ltar sems nyid gang gi tshe gnyis su med pa'i rang bzhin du mthong ba de'i tshe gang zag dang chos la bdag med par grub par gyur pa'i phyir 'di la rtsod pa med do/ /rnam par smin pa'i sa la gnas pa'i byang chub sems dpa' de'i nyon mongs pa dang shes bya'i sgrib pa spangs pas nyon mongs pa med pas bde bar gnas pa'i tshigs su bcad pa gnyis kyis bstan pa'i phyir/ji skad ces bya ba la sogs pa smos te/ nyan thos kyi lam gyi gang zag la bdag med par rtogs pas nyon mongs pa spangs pas 'dod chags la sogs pa'i nyes pa mi dmigs so//de bzhin du ji skad bstan pa'i byang chub sems dpa'i lam 'di la shes bya dang nyon mongs pa'i sgrib pa spangs pas gnyi ga mi dmigs so/ /gzhan gyi lam la brten pa'i 'gro ba ma lus pa 'dod chags la sogs pa'i khyad par gyis nye bar bcom par mthong ste/ bzhad gad bzhin te khrel bgad dang 'dra bar byang chub sems dpas mthong zhes bya'o//'gro ba ji lta bur gyur pa zhig ce na/ zhi ba spangs pa yin te/ zhi ba ni ting nge 'dzin gyis nyon mongs pa'i dgra las rgyal bar ma byas pas zhi ba spangs zhes bya ba'i don to/ /de bzhin du bdag nyid kyis zhes bya ba la sogs pa smos te/sngon gyi skye ba nyams su myong bas de gzung ba'i ro gcig dngos te lam gzhan bzung bas ro gcig pa'i bdag nyid kyis dran nas gang gis sems par byed pa ni byang chub sems dpa' ste/ gdon mi za bar ngo mtshar 'gyur ro zhes bya ba'i don to/ /chos la bdag med pa yin na chos 'ga' yang mi dmigs pa'i phyir/byang chub sems dpa' sbyin pa la sogs pa'i chos kyi rtsom pa don med par 'gyur ba ma yin zhe na/ gal te 'di kun stong nyid yin/ /zhes bya ba la sogs pa smos te/ gang gi zhes bya ba 'di'i phyir lan 'debs so//byang chub sems dpa' gang gi phyir/ /bya ba lhag ma med pa'i phyir/ /don byas pa dgos pa byas pa'i phyir 'gro ba stong pa mthong ba yin pa de'i chos kyi rtsom pa don med pa bden zhes bya ba'i tha tshig go/ /'di mos pa spyod pa'i gnas skabs na bsod nams kyi tshogs bsags pa'i stobs kyis sa brgyad pa la sogs pa thob pa'i byang chub sems dpa' de stong pa nyid la gnas pa skye'o zhes bya ba'i don to//de lta mod kyi sdig pa spong bar mi byed dam zhe na/ de tshe sdig pa'i rtsom pa yang / /zhes bya ba la sogs pa smos te/ gang gi tshe rnal 'byor pa stong pa nyid lta ba la gnas pa de'i tshe sdig pa'i rtsom pa ni sdig pa byed pa'i rtsom pa'o//de yis shin tu mi rigs so zhes bya ba'i don to/ /'di ltar 'jig tshogs la lta ba'i rtsa ba can nyon mongs pa dang nye ba'i nyon mongs pas bsgribs pas bsod nams ma yin pa la 'jug par 'gyur gyi/ yang gang zhig chos la bdag med pa mthong ba dang ldan pa de dag mi dge ba rtsom par ji ltar 'gyur/de nyid bstan pa'i phyir/ chang ba zhes bya ba la sogs pa smos te/ 'di ltar skyes bu 'ga' zhig lag pa stong pa'i phyir chang pa mi 'chang ba de bzhin du byang chub sems dpa' chos la bdag med pa rtogs pa'i phyir bya ba la mi 'jug ces bya ba'i don to/ / de kho na nyid ma mthong bas bsod nams dang sdig pa las 'da' ba ma yin no zhes bstan pa'i phyir/ rtog pa zhes bya ba la sogs pa smos te/ gang rtog pa'i nang du lhung ba ni rtog pa dang bcas pa'o/ /de dag thams cad gzhan nyid 'gyur te/ bsod nams dang sdig pa ji lta ba bzhin du de kho na nyid ces bya ba'i don to//gang gi phyir 'khor ba 'dir rgyu dang 'bras bu'i dngos pos de dag 'bras bu thob par mthong ngo / /'di ltar bsod nams ma yin pa'i rgyus dmyal ba la sogs pa'i 'bras bu 'thob la/ bsod nams kyi rgyus mtho ris la sogs pa'i 'bras bu 'thob ces bya ba'i don to//da ni 'khor ba'i las dang 'bras bu rtog pa'i rang bzhin la/ rnam par mi rtog pa dpes bstan pa'i phyir/ rmi lam zhes bya ba la sogs pa smos te/ 'di ltar rmi lam gyi nang na byas pa'i dge ba dang mi dge ba'i las kyis dge ba dang mi dge ba'i mtho ris dang dmyal ba la sogs pa chung zad kyang mi dmigs so//de bzhin du 'khor ba'i las dang 'bras bu 'brel pa yin par rtogs par bya'o/ /dngos po'i rang bzhin ni ma yin no zhes bya ba'i don to/ /dper na rmi lam kho na'i nang du skyes bu 'ga' zhig ma sad par 'bras bu nyams su myong ba ni med do/ /de bzhin du 'jig rten thams cad 'khor ba'i las dang 'bras bu ma sad par brtags pa nyid du mi shes pa'i don to//sad na zhes bya ba la sogs pa smos te/ gang gi tshe sad pa na rmi lam du mthong ba don med do zhes de'i shes pa skyes pa de'i tshe/ rmi lam 'jug pa'i 'bras bu med par 'gyur ro/ /de bzhin du mi shes pa nyid ma sad pa'i 'jig rten pas las dang 'bras bu'i 'brel pa brtags pa nyid du ji srid mi shes pa de srid 'jig rten las 'das pa'i ye shes kyis sad par mi 'gyur ro//sad par gyur na rmi lam gyi gnas skabs kyi ngo bo lta bu'i ye shes skyes na las dang 'bras bu la sogs pa thams cad kyi 'bras bu mtha' ru brdzun zhes bya ba'i don to//rmi lam gyi mthong ba brdzun pa'i phyir rgyu dang 'bras bu'i ngo bor rigs pa dang mi ldan pa yin mod kyi/ gzhan la yang rten cing 'brel bar 'byung ba'i phyir rgyu dang 'bras bu'i ngo bor rigs pa dang ldan pa ma yin zhe na/ rmi lam zhes bya ba la sogs pa smos te/ rmi lam mgal me mig 'phrul ni rmi lam dang mgal me dang mig 'phrul lo//rmi lam la sogs pa ji lta ba bzhin du rgyu dang 'bras bu'i dngos po skye ba dang 'gag par mthong ba de'i tshe tha dad med pa ni gzhan dag dang khyad par med par rtogs par bya'o/ /gzhan yang gang cung zad ci mthong ba de dag thams cad mtshan nyid mi mthun par snang ba med do//de bas na rmi lam la sogs pa bzhin du rgyu dang 'bras bu'i dngos po rigs pa dang ldan pa ma yin no/ /de ltar yang / bdag las ma yin gzhan las min/ /gnyi ga las min rgyu med min/ /dngos po gang yang gang na yang / /skyes pa nam yang yod ma yin//zhes gzhan dag las gsungs so/ /don de nyid dpes bstan pa'i phyir/ nyi ma gzhan la zhes bya ba la sogs pa smos te/ gzhan ni 'das pa'i zhag dang de bzhin du rmi lam gyi gnas skabs dang / des sad de/ sad pa'i gnas skabs so/ /gang gzugs la sogs pa'i yul nye bar longs spyod pa de dag rang bzhin nyams su myong ba na/ji ltar 'gas kyang bye brag smra bar mi nus pa de bzhin du rmi lam dang gzhan la skye ba dang 'jig pa la bye brag 'ga' yang med do/ /yang kha cig las ni rang bzhin nyams su myong ba ni zhes brjod de/ der yang gnas skabs gsum bde ba la sogs pa nyams su myong ba las bye brag cung zad kyang med do//da ni rten nas skyes pa rang bzhin med par bstan pa'i phyir/ gang dang gang ni zhes bya ba la sogs pa smos te/ gang dang gang rgyu dang rkyen la brten nas skyes pa de de'i rang bzhin zhi zhing skye ba med pa nyid du rtogs par bya'o/ / ji lta bur zhe na/ sgyu ma'i yan lag ces bya ba smos te/ dper na/ sgyu ma mkhan gyis sgyu ma'i yan lag sngags dang sman rgyu dang rkyen bstsogs nas glang po la sogs pa 'byung bar ston to/ /de dag kyang rang gi ngo bor ni med do/ /de bzhin du gzhan dag kyang de bzhin no/ /'di ltar gal te rang bzhin gyis skye bar 'gyur na de'i tshe/yongs su grub pa'i gnas skabs bzhin du rgyu la ltos par mi 'gyur ro/ /yang gang gi tshe ltos pa de'i tshe rang bzhin ma yin no/ /gal te gzhan gyi dbang gi rang bzhin gyis chos rang bzhin dang bral ba yin na de'i tshe ji ltar bye brag tu snang bar 'gyur zhe na/ rnam pa du ma zhes bya ba la sogs pa smos te/'di ltar rnam pa tha dad pa du ma dang ldan pa'i gos mer bsregs pa'i thal bar bye brag 'ga' yang med pa de bzhin du gzhan dbang gi dngos po sna tshogs pa du ma rnams chos thams cad stong pa nyid kyi mes bsregs na bye brag 'ga' yang med ces bya ba'i don to/ / de bzhin du/ snod dang zhes bya ba la sogs pa smos te/ sems can gyi 'jig rten dang snod kyi 'jig rten gnyis so/ /de dag 'di ltar chos thams cad bdag med pa'i stong pa nyid kyi mes bsregs nas bdag nyid de yang bdag nyid kyi ngo bor 'jig rten gnyis kyi dbus su stong pa nyid stong pa nyid kyis bsregs zhes bya ba'i don to//ji lta bur zhe na/ me lce bzhin du zhes bya ba la sogs pa smos te/ dper na me lces bud shing la sogs pa bsregs pa de bzhin du chos thams cad stong pa nyid stong pa nyid kyis so/ /'di'i dgos pa ni 'di yin te/ phyi'i 'jig rten gnyis bsregs pa gang yin pa de tsam zhig chos thams cad stong pa nyid kyi dgos pa ma yin gyi/ji srid bsregs pa chos gzhan dang mnyam par gnas pa yang shes pa bsregs par gyur pa ma yin no/ /gzhan du chad par lta bar 'gyur ro/ /gzhan yang / chu khams gser dang nam mkha' bzhin/ /dri ma dang bcas pa dang dri ma med pa'i bye brag gis gang gi tshe stong pa nyid rnam pa gnyis kyi bdag nyid du gyur pa de'i tshe/dri ma dang bcas pa'i rtogs pa'i bdag nyid sreg ces bya ba'i don to/ /bsregs zhes bya ba'i don ci zhig ce na/ rnam par dag cing dri ma med par gnas zhes bya ba'i don to/ /stong nyid me yis nges bsregs par//zhes bya ba la sogs pa smos te/ de ltar na sngon du gsungs pa'i rim pas 'gro ba gsum po stong pa nyid kyi mes bsregs par mthong ba'i rnal 'byor pa 'khor ba ru ni gnas pa na/ 'ga' la yang chags min te chags pas 'ching ba med ces bya ba'i don to/ /da ni rdo rje lta bu'i ting nge 'dzin gyi bsgom pa bstan pa'i phyir/gang tshe zhes bya ba la sogs pa smos te/ gang gi tshe stong nyid de gnyis su med pa'i stong pa nyid la gnas pa de'i tshe 'di la rab tu sbyor min te/ nyon mongs pa rab tu spyod pa ma yin no/ /de dag bkag pa'i phyir spyod pa yang min no/ /blang ba dang dor bar spyod pa'ang ma yin no//spyod yul min ni yul 'ga' la yang mi skye ba zhes bya ba'i don to/ /byang chub sems dpa'i rang bzhin gyis phra mor grub pa yin no/ /de ma thag tu byang chub thob par bstan pa'i phyir/ stong nyid la gnas zhes bya ba la sogs pa smos te/ dper na me ni bud shing la sogs pa spangs nas sreg pa'i bya ba spong ngo //lhag ma med pa ni sgra'i tha snyad kyi yul du mi 'gyur ro/ /de bzhin du byang chub sems dpa' de gnyis su med pa'i stong pa nyid la gnas phyin chad ni dus phyis nas te/ ye shes kyi mes nyon mongs pa'i bud shing bsreg pa spangs nas don byed pa spong ngo //lhag ma med pa ni sgra'i tha snyad kyi yul dang rnam par rtog pa'i yul las 'das par 'gyur ro zhes bya ba'i don to/ /da ni byang chub thob pa'i mtshan nyid bstan pa'i phyir/ de ltar gyur zhes bya ba la sogs pa smos te/ de ltar gyur pa ni byang chub thob pa'i rnal 'byor pa'o//kun brtags dang gzhan dbang med pa'i phyir thogs pa med de chags pa med pa yin no/ /rtog pa med pas na gos med do/ /gsal ba'i dngos po med pa'i phyir chags yod ma yin no/ /nyon mongs pa dang shes bya'i sgrib pa'i bud shing med pas phyir yang du ba 'byung ba med cing 'bar ba med ces bya ba'i don to//'bar ba med pas rnal 'byor pa nyon mongs pa'i bud shing rang du byas pas zhi ba mthong ba ni thob pa'o/ /thob pa'i sgra ni thams cad la sbyar ro/ /zhi ba dam pa la gnas pa'i phyir nyer zhi nyid de/ nyan thos la sogs pa las bag chags dang bcas pa'i nyon mongs pa rab tu spang ba'i phyir/shin tu zhi bas rab zhi nyid do/ /gzhan rjes su gdung ba med pas na bsil ba nyid do/ /rang gi rgyun mi bsreg pa'i phyir gdung med nyid do/ /nad thams cad dang bral ba'i phyir rims med brjod do/ /rdul gyi nyes pa dang bral ba'i phyir rdul med do/ /rdul med pa de nyid kyi phyir dag pa'o/ /gnyis spangs pas na gnyis med do//'ga' la yang gnod par sems pa med pas gnod pa med pa yin no/ /bdag gi zhes byar med pa'i phyir bdag gi med do/ /ngar 'dzin pa yongs su spangs pas na ngar 'dzin med do/ /de nyid kyi phyir srid pa'i rgya mtsho yang dag brgal lo/ /gang gi bdag dang bdag gi ni 'khor bar gnas pa'i rgyu yin zhes bya ba'i don to//skye ba la sogs pa med pa'i phyir rga ba dang 'chi ba dag med do/ /bdud rtsi'i go 'phang nyams su myong ba gnyis su med pa'i go 'phang thob ces bya ba'i don to/ /tshul de ni gnyis su med pa stong pa nyid kyi lam thob pa'o//thob par bya ba gzhan mi dmigs so zhes bya ba'i don to/ /da ni mi gnas pa'i mya ngan las 'das pa thob pa bstan pa'i phyir/ 'khor bar zhes bya ba la sogs pa smos te/ nye bar len pa'i phung po lnga las byung ba'i gzhan du byas pa'i 'khor ba dang bde ba dang sdug bsngal gyis zhe sdang dang 'dod chags byang chub sems dpa' 'chang ba ma yin te/mi 'dzin to/ /gang gi phyir thams cad zhe sdang 'dod chags la btang snyoms spyod/ 'di skad bstan par 'gyur te/ 'khor ba'i sdug bsngal la skyo ba skyes na mya ngan las 'das pa la myur du gzhol ba yin no/ /nyon mongs pa'i bde ba la chags par gyur na/'khor ba la gcig tu gzhol bar 'gyur ro/ /de lta bas na de dag la btang snyoms su byas te/ mi gnas pa'i mya ngan las 'das pa la spyod ces bya ba'i don to/ /don de nyid bstan par bya ba'i phyir/ ltos dang bcas pa zhes bya ba la sogs pa smos te/ ltos pa dang bcas pa ni skye bo thams cad la dmigs pa dang ldan pa'o//bde ba dang sdug bsngal dang 'khor ba dang mya ngan las 'das pa de kho na nyid du mthong na 'dod chags dang zhe sdang gis 'jig pa ste/ zad pa thob po/ /stong pa nyid mthong na ltos pa med pa ni/ ltos pa spangs pas rtag tu 'jig pa med do/ / de lta bas na 'jig pa ni yun ring po nas bsags pa'i tshogs rnam pa gnyis kyis mi 'gyur ba'i go 'phang 'thob bo/ /gang gi phyir 'gyur ba med par bzhugs te sgra'i tha snyad kyi bag chags kyi rnam par rtog par 'gyur ba'i spros pa spangs pas 'gyur ba med ces bya ba'i don to/ /mi gnas pa'i mya ngan las 'das pa gsal bar bstan pa'i phyir/'jig pa med pa'i zhes bya ba la sogs pa smos te/ gang gi tshe 'jig pa med pa'i gnas thob par rnal 'byor ba gyur pa de'i tshe/ 'khor ba'am mya ngan las 'das pa 'ga' la yang gnas par 'gyur ba ma yin no/ /ci'i phyir mi gnas she na/ dbang thob ces bya ba la sogs pa smos te/ ji srid 'khor bar gnas kyi bar du dbang la sgrib pa'i bag chags spangs pas dbang thob khyab bdag dbang bsgyur phyir mi gnas zhes bya ba'i don to/ /da ni byang chub sems dpa'i phan yon bstan pa'i phyir/ de dbang zhes bya ba la sogs pa smos te/ dbang thob pa'i phyir/ de dbang ngo / /lus dang ngag dang yid thub pas na thub pa'o/ /theg pa gsum gyi 'gro ba rnams la rjes su ston pa'i phyir ston pa'o/ /'dul ba'i thabs kyi phyir brtul zhugs 'dzin pas na bya ba byas so/ /gang du bgrod par bya bar phyin pa'i phyir de bzhin gshegs pa'o//bla na med pa'i lam gyis phyir mi phyin pa'i phyir bde bar gshegs pa'o/ /de ltar gyur pa'i gnyis su med pa'i ye shes dbang phyug rnam 'phrul snang ba'o/ /da ni stong pa nyid kyi lam gyi phan yon bstan pa'i phyir/ yul zhes bya ba la sogs pa smos te/'phags pa'i lam thob pas na byis pa'o/ /yul ni 'dod chags la sogs pa'i yul la shin tu chags pa'o/ /sems ni ma sbyangs pa ste/ mngon par 'dus ma byas pa'i sems kyis stong pa nyid bstan pa thos pa yis/ snying ni gnyis su 'gas par 'gyur/ /zhes bya ba'i don to//rgya che ba yi chos thos ni/ /shes rab kyi pha rol tu phyin pa'i don thos pa'i rgyu dang / bshes gnyen bzang po bsten pa'i rgyu dang / byang chub sems dpa' rigs kyi nus pa'i rgyus zhes bya ba'i don to/ /gang dag yang 'bar byed pa ni bdag dang gzhan gyi don grub pa'i phyir/ brtson 'grus 'bar bar byed pa'i ngang tshul can de'i rgyu 'di dag gis de la stong pa nyid bstan pa thos pa la 'jug par 'gyur ba yin no//de bzhin du/ rtag tu brtson dang zhes bya ba la sogs pa smos te/ gnyis su med pa'i stong pa nyid ston pa dang / nyan pa dang sems pa la rtag tu ste dus thams cad du brtson pa'o/ / de bzhin du stong pa nyid bsgom pa la sbyor ldan pa zhes bya ba'i don to/ /lam 'di la ni rjes su zhugs pas de rnal 'byor pa 'ga' zhig theg pa chen po'i lam la rjes su zhugs pas ring por mi thogs chos rnams kun te/ brtags pa rnams dus de nyid du bdag med par ni rtogs par 'gyur zhes bya ba'i don to//da ni thos pa dang bsams pa las bsgoms pa'i khyad par bstan pa'i phyir/ chos zhes bya ba la sogs pa smos te/ chos ni lam gyi mtshan nyid thos pa dang bsams pa yang ma bsgoms pas chos nyid thob par mi 'gyur te/ gnyis su med pa'i stong pa nyid thob pa'i rgyur mi 'gyur ro zhes bya ba'i don to//'di nyid kyi dpe bstan pa'i phyir/ chu ni zhes bya ba la sogs pa smos te/ chu ni gzhol 'gro'o/ /thos pa dang ni mthong ba yis/ /ma 'thungs par te/ ma byin par skom pa ji ltar zlog ces bya ba'i don to/ /da ni bsgom pa'i rim pa rnal 'byor pa ji lta bus bya ba bstan pa'i phyir/tshul gnas zhes bya ba la sogs pa smos te/ tshul khrims phun sum tshogs pa'i phyir tshul gnas pa'o/ /dam pa'i chos thos pa na thos pa dang ldan pa'o/ /'jig rten las 'das pa'i shes rab thob pas na shes rab ldan no/ /bsod nams bya ba'i dngos po byed pas na bsod nams tshogs ni yang dag bsags so//yul rnams ni gzugs la sogs pa la dug bzhin du blta ba'o/ /de bzhin du bya ba byas pa'i phyir lus dang srog la chags pa med de 'dod pa spangs zhes bya ba'i don to/ /de ltar yang / ci la'ang mngon par dga' min te/ /srog la mngon par dga' ma yin/ / zhes gsungs so/ /da ni gang du gang gi phyir ji lta ba bzhin du goms pas sgom mo zhes bstan pa'i phyir/ khyim mam zhes bya ba la sogs pa smos te/ thog mar ni dang por te/ khyim ste rang gi gnas sam nags ni dgon pa'o/ /byang chub sems dpa' gang zhig sangs rgyas kyi go 'phang la 'jug pas te/'jug 'dod pa des bdag med pa'i ting nge 'dzin la dmigs par bya'o/ /de la dmigs nas gang zag la bdag med pa la 'jug par ro/ /gang gi phyir/ blo dang dbang po dang po dang ni yid rnams spangs/ /lus kyi bya byed gal te rang dbang byed gyur na/ /gang tshe blo sogs spangs na chung zad yod min te//de phyir dngos po 'di dag tshogs pa'i bdag nyid yin/ /zhes bya ba'i rigs pa 'dis bdag med ces bya ba'i don to/ /de ltar bdag gi rnam par rtog pa bzlog nas/ 'jig rten don ni gtso bor byas/ /bdag nyid kyi don du'o/ /rang don zhar mdzad ni gtso bo ma yin par byas pa'o//thugs rje'i bdag ni snying rje dang ldan pa'i byang chub sems dpa'o/ /'jig rten du ni sems can gyi 'jig rten du'o/ /'khor ba las gdon pa'i phyir dang chos rnams ni bdag med pa la zhugs pa'i phyir ro/ /rang bzhin gsum gyi ngo bo nyid/ /skad cig tsam yang skabs ldan na ste/ gnas skabs thob pa'o/ /khyim par gyur pa ni dgon pa la ltos pa med pas kyang / bsgom zhes bya ba ni blos rnam par dpyad ces bya ba'i don to/ /skyil mo krung ni bcas nas su/ /g.yo ba ni g.yo ba'o/ /sna'i rtse mor yid bsdu bar bya'o/ /'di ltar gzhan gyi dbang gi ngo bo gnyis te/ gzung dang 'dzin pa'i ngo bo rnam par sgro btags pa kun brtags pa'i rang bzhin ni ngo bo gcig go//kun brtags pa de yang rtag tu med pa'i phyir chos la bdag med par grub bo/ /chos la bdag med pa de nyid kyi gzhan dbang gi sems la yongs su grub pa'i rang bzhin ngo bo gnyis pa gsal bar 'gyur ro//de ltar rnam par dpyod pa'i byang chub sems dpa' gang gi tshe kun brtags pa med pa dang / gzhan gyi dbang sgyu ma bzhin du rang bzhin med pa nyid du mthong ba de'i tshe/ yongs su grub pa'i phyir gnyis su med pa'i ye shes sems can gyi don gyi phyir sgom zhes bya ba'i don to//rang gi gnas su yid kyis chos la dmigs na rtse gcig par mi 'gyur te/ de'i phyir sna'i rtse mor gtad par bya'o/ /da ni dmigs pa'i dbang du byas nas/ longs spyod ces bya ba la sogs pa smos te/ longs spyod ni phyi rol lo/ /nyer gnas pa ste gzugs la sogs pa'o//de bzhin du kun brtags pa'i rang bzhin snang ba'i phyir brdzun ni mi bden pa'i rang bzhin zhes bya ba'i don to/ /de bzhin du slu ba ni yul med kyang de la 'jug par byed ces bya ba'i don to/ /ji ltar snang ba'i rang gi sems gang dang gang gi ming gi snang ba de dang de'i ming gis dmigs pa mdun du byas nas ni ste/de dag nyes pa dang ldan par bsgom pa yin te/ dmigs pa spyir bstan pa yin no/ /da ni khyad par bstan par dmigs kyis dgag pa'i phyir/ 'dod chags zhes bya ba la sogs pa smos te/ gang 'dod chags can des 'dod chags gnas la ni bud med la sogs pa rten gyi ngo bo mdun du dmigs par mi bya'o//de bzhin du sdang ba ste/ sdang ba'i rgyu dgra la dmigs par mi bya'o/ /gang gi phyir nye ba dang ldan pa las zhe sdang du 'gyur ba'i phyir ro/ /rmongs mi bya ste gti mug bskyed pa mun pa dang bcas pa rtog pa med pa med pa'i rang bzhin dmigs par mi bya'o zhes bya ba'i don to//rab tu dgag pa'i dngos po nye bar bstan pa tshigs su bcad pa gsum gyis 'chad de/ chags pa'i zhes bya ba la sogs pa smos te/ 'dod chags can gang zhig yang 'dod chags kyi gnas pa de dang mthun par bud med kyi dngos po la sogs pa la gal te dmigs par byed na/ de'i tshe 'dod chags kyis gnod par 'gyur ro//de bzhin du/ zhe sdang can la sdang bas dang / /rmongs pa gti mug gis ni nyams/ /gang gi phyir 'dod chags dang gti mug shin tu ste/ phul du byung bar nyon mongs pa 'phel ba'i phyir zhes bya ba'i don to/ /de bzhin du/ ting nge 'dzin ni mi brtan phyir/ /zhes bya ba smos te/gang zhig ting nge 'dzin brtan pa de la 'dod chags la sogs pa'i nyon mongs pas gnod par mi 'gyur ro/ /yang gang zhig ting nge 'dzin ni mi brtan phyir te/ zhes thar pa med pa'i phyir/ rnam par rtog pas nyams byas nas/ /nyams pa'i sgo ni de dang des te/ 'dod chags dang zhe sdang dang gti mug la sogs pa la dmigs pas rnal ma'i ting nge 'dzin spangs nas gzhan dag nyid ni 'dod chags la sogs pa'i gnas su gyur pa bud med la sogs pa'i dngos po rab tu rtogs zhes bya ba'i don to//de bzhin du rmongs pa'ang zhes bya ba smos te/ rmongs pa ni rmongs pa'i bdag nyid gang yin pa'o/ /'du shes rmongs pa'i phyir ni rmongs pa'i rgyu'i phyir ro//rmongs pa'i dngos po ni rtog pa med pa'i rang bzhin gyis rten cing 'byung ba'i dngos po spangs nas gzhan bdag dang byed pa po sems pa yin no/ /shin tu mun nag smag tu lhung ste ma rig pa'i mun nag tu shin tu lhung zhes bya ba'i don to/ /ci lta ba bzhin du dmigs par bya ba de bzhin du rigs pa bstan pa'i phyir/mkhas pa zhes bya ba la sogs pa smos te/ mkhas pa ni blo ldan no/ /dmigs pa'i gnas ni bud med la sogs pa'o/ /bzlog ni gnyen po yid la bya ba'o/ /nyon mongs chung zad goms pa'i sa 'dod chags la sogs pa'i khyad par 'phel bar 'gyur ba yin no//ji lta bu zhe na/ me la zhes bya ba la sogs pa smos te/ snum ni mar gyi thigs pa ste/ /nyung ngus kyang me 'bar zhing 'phel bar byed pa de bzhin du 'di yang zhes bya ba'i don to/ /ting nge 'dzin gyi stobs legs par thob pas phyis 'dod chags la sogs pa'i gnas la mngon par phyogs par byas nas spong ba bstan pa'i phyir/de nas zhes bya ba la sogs pa smos te/ dper na mtshon cha'i thabs legs par bslabs pa'i mkhas pa dpa' bo ste/ g.yul ngor te g.yul gyi nang du dgra bo rnams brdeg pa de bzhin du rnal 'byor pa'i ting nge 'dzin bstan pa'i phyir/sbyor ba legs par byas pas 'dod chags la sogs pa'i gnas dpa' ba'i dgra las te dgra gzhan bzhin du thabs pa de bas sgrub par mi nus pa la bsnun par bya zhes bya ba'i don to/ /'di ni lung gi tshad ma yin te/ ma lus zhes bya ba la sogs pa smos te/gang zhig de kho na nyid gnyis su med pa'i ye shes ma lus pa gzigs pa sangs rgyas bcom ldan 'das des gsungs te bka' stsal to/ /'di ltar nyon mongs pa ni 'dod chags la sogs pa'o/ /sogs pa smos pas ni shes bya ste gzugs la sogs pa'o/ /'di ltar de kho na nyid kyi gegs su gyur pa'i phyir sgrib pa'o//de phyir 'bad pa thams cad kyis/ /de dag nyid ni spang bar bya/ /zhes smos te/ stong pa nyid kyi ye shes kyis gzhom par bya ba'i don to/ /de ltar zhi gnas bstan pas lhag mthong la 'jug par bya ba'i phyir/ rtags stsogs zhes bya ba la sogs pa smos te/de nas de ma thag tu rnal 'byor pas kun brtags pa dang gzhan gyi dbang dang yongs su grub pa'i ngo bo sems kyi snang ba de dag gsum thos pa'i shes rab kyis dmigs par bya'o/ /don 'dzin ni kun brtags pa'i dngos po'o/ /don du des snang ni gzhan gyi dbang gi ngo bo'o/ /don rnams stong pa nyid ni yongs su grub pa'i ngo bo'o//da ni bsam pa'i shes rab kyi dbye ba nges par yang bsam bya ste/ 'dres pa la dmigs par bya'o/ /bsgom pa'i rang bzhin gyi shes rab brtags pa'i dri med pas shes rab kyi pha rol tu phyin pa'i tshul ni don dam pa'i rang bzhin yongs su grub pa sgom pa bsam gyis mi khyab pa bsam par bya ba ni 'ba' zhig pa sems pa'o//da ni brtags pa'i don bsam par bya ba'i phyir/ gang snang zhes bya ba la sogs pa smos te/ gang snang de ni rnam par rtog pas brtags pa rang bzhin gyi sems de nyid min te/ don dam par mthong ba med do/ /gang zhig ma mthong ba ni yongs su grub pa'i rang bzhin gyi sems so//de de bzhin ni phyin ci ma log pa zhes bya ba'i don to/ /dper na rab rib kyis 'khrul pa'i mig gis skra shad med pa la skra shad du mthong ba de bzhin du'o/ /ji skad bstan pa de nyid bstan pa'i phyir/ bdag gis zhes bya ba la sogs pa smos te/ tshad mas ma grub pas na mi dben pa brtags pa'i dngos po mthong ngo //de bzhin du kun brtags pa 'khrul pa tsam ni dngos po'o/ /rgyu mtshan med pa zhes bya ba ni rgyu mtshan yod pa ma yin pa'o/ /mtshan mar yang ste rgyu dang rkyen las skyes pa'o/ /mtshan mas bcom pa ni bag chags kyis bcom pa'o/ /bag chags kyis yun ring po ste/dus thams cad du mthong zhes bya ba'i don to/ /da ni gzhan gyi rgyud la 'khrul par bstan pa'i phyir/ kye ma zhes bya ba la sogs pa smos te/ kye ma ni ngo mtshar ro/ /'jig rten pa'i mig brdzun pa'i dbang gis 'khrul pa yin/ gang gis ri'i rtse mor skra med pa mthong zhing / rags pa'i ri bo mthong ma yin/de bzhin du mi snang ba'i ngo bo kun brtags pa mthong ngo / /rnam par rig pa tsam gyi mngon sum gyis grub pa ni ma mthong zhes bya ba'i don to/ /phyi'i don smra ba'i rgyu mtshan phog pa la bzhad gad du bya ba'i phyir/ skra nyag ces bya ba la sogs pa smos te/ skra nyag mu tig shin tu phra ba la/de dag la gang gis phog ces bya ba'i don to/ /ji lta bur gyur pa zhig ce na/ 'gro na 'phong skyen ni 'gro ba na 'phong skyen pa bstan pa gang la yod pa ni 'gro na 'phong skyen no/ /mtshan ma la phog ni phyi'i don la rab tu phog pas gnyis po yang rkyen ma yin te/ phog par byas zhes bya ba'i don to//'di skad bstan par 'gyur te/ skra dang mu tig ni mngon sum gyi yul yin la/ phyi'i don mngon sum las 'das pa la yang rab tu phog pa'i phyir/ de gnyis las de dag rkyen yin zhes bya ba'i don to/ /ji skad du bstan pa'i don de nyid rgyun dang bcas pa spong bar bstan pa'i phyir/don du zhes bya ba la sogs pa smos te/ 'di ltar don du lta ba ni phyi'i dngos por lta bas thams cad kun brtags pa kho na'i don ni gsal bar snang / snang ba ni rab tu snang ba'o/ /rlung gis zhes bya ba la sogs pa smos te/ rlung gis bskyod pa ni rab tu bskyod pa'o//dba' tshogs ni dba' rlabs kyi tshogs gang la yod pa'o/ /de nyid kyi dpe ni gar mkhan te gar byed pa la zhugs pa lta bu zhes bya ba'i don to/ /ri dgas chu bzhin ni ri dgas chu 'dod pa bzhin no/ /rdzing bu la sogs pa na gnas pa'i chu'i dngos po yod pa nye bar gnas pa ni yang dag pa'i shes pas rtogs pa mi snang zhes bya ba'i don de nyid kyi don gzhan dgod pa bstan pa ni yang dag pa ma yin brtags par lhung ni de kho na nyid ma mthong ba'o//'bad med ni 'bad pa dang bral bas so/ /phal cher ni phal cher ro/ /yang dag ni bden pa mi bden zhes bya ba'i don to//'di skad du bstan par 'gyur te/ rnam par rig pa tsam yang dag pa yongs su spangs nas yang dag pa ma yin pa'i kun du brtags pa la dngos por mngon par zhen to/ /da ni gzhan gyi dbang dang yongs su grub pa bsam pa'i shes rab kyis rnam par dpyad pa bstan pa'i phyir/ sems kyis zhes bya ba la sogs pa smos te/sems kun brtags pa'i rnam par skye ste/ de la brtags pa'i bdag nyid ni dngos po med do/ /gang gi tshe rnal 'byor pa de ltar sems pa de'i tshe/ 'di ltar rmi lam du don du snang ba yod pa de la don yod pa ni ma yin no/ /de bzhin du phyi'i don gyi rgyu mtshan gyi bag chags yin no//kun brtags med pas gzhan gyi dbang / /de nas sems kyis thob pa yin/ /zhes bya ba'i don to/ /de bzhin du/ nyon mongs med ces bya ba la sogs pa smos te/ ji srid yongs su grub pa yongs su rdzogs pa'i sa dang nye ste/ sa ma thob pa de srid du sa bdun pa'i bar du gzhan gyi dbang gi rang bzhin don gyi rnam pa nyon mongs pa can gyi yid la snang zhes bya ba'i don to//gang gi tshe sa brgyad pa thob pa de'i tshe/ yongs su rdzogs pa gang thob pa/ /rnam par mi rtog pa la gnas/ /zhes bya ba'i don to/ /de yang ni yongs su grub pa'i ngo bo/ /sems blo ldan ldan gyis mthong nas gzhan gyi dngos la 'jug ma yin te/gzhan gyi ngo bo la mi 'jug ces bya ba'i don to/ /gang gi kun brtags pa'i rang bzhin shin tu med pa'i phyir/ de nyid ni de'i bdag nyid kun brtags pa'i rang bzhin mi 'jug ces bya ba'i don to/ /brdzun par zhes bya ba la sogs pa smos te/gal te brdzun pa'i bdag nyid mthong bas yang ste/ kun brtags pa'i rang bzhin du yang bdag nyid dang bcas pa de'i bdag nyid bstan pa de'i tshe rmi lam bzhin du bsam mo/ /'di ltar rmi lam gyi gzung ba dang 'dzin pa yod mod kyi de kho na nyid ma yin te/ de bzhin no zhes bya ba'i don to//de nyid kyi phyir/ rmi lam lta bur nges shes na/ /zhes bya ba la sogs pa smos te/ gang gi tshe rmi lam dang chos mthun par don mthong ba de'i tshe/ brdzun pa'i bdag nyid ni kun brtags pa'i rang bzhin de'i sems skad cig gcig la snang ba ma yin te/ yongs su grub pa'i rang bzhin gsal bar mi snang ngo //gang gi phyir/ gnyen po yis ni dgag phyir ro/ /zhes smos te gnyen po rmi lam gyi dpes kun brtags pa'i phyir ro/ /da ni mtha' gnyis dang bral ba'i lam bstan pa'i phyir/ snying po zhes bya ba la sogs pa smos te/ de lta bu ni sngar bstan pa'i rigs pa'o//snying po 'dzin pa yongs su grub pa'i rang bzhin gyi snying po 'dzin pa'i rnal 'byor pas gal te med pa'i mtha' la reg na med pa'i rnam par rtog pa'i g.yeng bas sems kyis reg na de'i des de bzhin nyid la shin tu dmigs te/ gnyis su med pa'i ye shes kyi rang bzhin la dmigs par bya ste/de dus thams cad du yod pa'i phyir ro/ /gzhan du na skur pa 'debs pa'i lta bar 'gyur ro/ /'on te yod pa'i mtha' ni yod pa'i rnam par rtog pa'i g.yeng bas gal te sems kyis reg na de'i tshe de ni spang ba'i don phyir yang / stong nyid shin tu dmigs par bya/ gang gi phyir sna tshogs ni dngos po dang dngos po med pa'i lta ba'i rnam par rtog pa spang ba'i phyir bcom ldan 'das kyis stong pa nyid bstan to//'di skad bstan par 'gyur te/ dngos po gang tshad mas yongs su ma bcad pa de dgag pa'i stong pa nyid bstan pa yin gyi gnyis med pa'i sems ni ma yin te/ de dngos po dang dngos po med par mchog tu med pa'i phyir rtag tu dbu ma'i lam gyi rang bzhin du gnas pa'i phyir ro//don de nyid dpes bstan pa'i phyir/ rdo rje sbyin zhes bya ba la sogs pa smos te/ dper na 'ga' zhig lha ma yin gyi khang pa'i sgo rdo rje sbyin gyis nye bar byug pa nas phyogs gnyis ma reg par zhugs pa de bzhin du rnal 'byor pa yod pa dang med par mi rtog pas rnam rig ni gnyis su med pa stong pa nyid la 'jug go//de bzhin du 'di ltar lha ma yin gyi khang par 'ga' zhig zhugs pa na gal te phyogs gnyis las gang yang rung ba zhig reg na/ de'i tshe rdo rje sbyin gyis bzung bas ni de'i lus ni sreg par 'gyur te/ lus bsregs na dus nam yang 'jug par mi 'gyur ro//de bzhin du rnal 'byor pa yod pa dang med pa gnyis gang yang rung ba cig gi mtha' la reg na rnam par rig pa tsam la mi 'jug ces bya ba'i don to/ /da ni kun brtags pa dang gzhan gyi dbang mthong ba'i mtshan ma bstan pa'i phyir/snang ba zhes bya ba la sogs pa smos te/ snang ba thob pa ni ye shes kyi snang ba thob pa'i rnal 'byor pas de'i rtags ni mtshan ma ste/ med na mi 'byung bar shes par bya'o/ /gang dang med na mi 'byung zhe na/ dngos grub dang ngo / /ji ltar kun brtags pa dang gzhan gyi dbang gzung ba log pas yongs su grub pa'i rang bzhin mngon sum du byed de/de bzhin du gyur pa'i dngos grub dang med na mi 'byung ba'i rtags de dag ni rnal 'byor pas shes par bya'o/ /ji lta bu zhe na/ du ba zhes bya ba la sogs pa smos te/ dpes sgrub pa'i phyir du ba mi 'khrul pa ltar 'di de bzhin no zhes bya ba'i don to/ / de la dang po'i tshigs su bcad pa gsum gyis kun brtags kyi rtags bstan pa'i phyir/ kun brtags zhes bya ba la sogs pa smos te/ des ni kun du brtags pa'i gzung ba la spangs pa med par byas pa'i phyir ro/ /mi gsal ba'i ri mo bzhin ni bsam gtan la gnas pa'i rnal 'byor pa 'ba' zhig ma yin gyi ji srid bsam gtan las na langs pa yis kyang 'gro ba thams cad mi gsal snang zhes bya ba'i don to//gal te snang ba'i dngos po dngos po med pa yin na ji ltar snang ma yin nam zhe na/ de ltar ma yin te/ 'di dag ni kun brtags pa rtag tu dngos po med pa rnam pa dngos po med ces bya ba'i don to//gzhan yang ji lta bur gyur par 'gro ba mthong zhe na/ zad dang zhes bya ba la sogs pa smos te/ 'di ltar shing zad pa la sogs pa don bya ba 'ga' yang mi byed cing mi dgos pa de bzhin du mthong ngo / /mthong ba zhes bya ba thams cad du sbyar ro/ /rnyings pa lta bu ni 'di ltar snam bu la sogs pa bgo ba la sogs pa'i bya ba mi byed pa de bzhin no//gzhan yang kun tu zhig pa lta bu phyogs thams cad nas rnyings pa'i khang pa lta bu'o/ /grong stong lta bur skye bos dben pa'o/ /dga' ba med pa ni dga' ba ni dga' ba'o/ /de med pa'i phyir dga' ba med pa'o/ /tshad ma'i rten med pa ni rten med do//'di skad du bstan par 'gyur te/ 'di ltar 'di dag dngos po med par yang mthong bas 'gro ba 'di dag kyang de bzhin zhes bya ba'i don to/ /skra las byung ba'i 'gro ba la shin tu skyo ba skyes te/ ji lta bu zhe na/ ci ri bzhin te 'khor lo zhes bya ba'i srog chags kyi bye brag go/ /de sgra 'don pa la thos pa rnams skyo ba skye'o//'gro ba yang de bzhin no/ /bdag ces bya ba smos te/ gzhan yang de las tha dad pa'i kun brtags pa'i chos med pas na bdag med do/ /gang gi phyir tha dad pa yod na ni bdag med na 'di ltar tha dad pa'i rgyus drug pa yin no/ /bdag gi ngo bo med na bdag gi ba yang med do//brjod par bya ba'i don med pas na ming tsam 'ba' zhig kho na'o/ /da ni gzhan gyi dbang gi rtags tshigs su bcad pa gnyis kyis bstan pa'i phyir/ gzhan dbang zhes bya ba la sogs pa smos te/ sngar kun brtags pa'i rang bzhin gyi bdag nyid du 'gro ba mthong ba la/ da ni gzhan gyi dbang gi rang bzhin de nyid du 'gro ba mthong zhes bya bar 'brel to//'gro ba ji lta bur gyur pa zhig ce na/ rang sems zhes bya ba smos te/ shing rta lta bu rang gi sems gang yin pa de la zhon pa ste/ gang gi phyir sems las ma gtogs par phyi'i don mi dmigs pa'i phyir bdag gi nang du zhugs lta bur mthong zhes bya ba'i don to//gzhan yang ji ltar gyur pa zhig ce na/ mig 'phrul zhes bya ba la sogs pa smos te/ mig 'phrul las byung ba'i glang po la sogs pa de bzhin du dag snang ngo / /de nyid du kho na 'khrul pa tsam ste/ dngos po'i rang bzhin ni ma yin te/ de bzhin du ma lus mun pas zhes bya ba smos te/ 'di ltar mun pas khyab pa'i ri mo mi gsal ba de bzhin du kun brtags pa dang gzhan gyi dbang ma lus par mthong zhes bya ba'i don to/ /gzhan yang ri mo 'gro ba de dag ji ltar mthong ba tshigs su bcad pa gnyis kyis bstan pa'i phyir/ bag chags zhes bya ba la sogs pa smos te/bag chags dang bcas par kun du brtags pa ma spangs pas kun du brtags pa'i bag chags dang 'dra bas thams cad bris pa lta bu ru ste bris pa lta bu ru'o/ /nyon mongs pa nyid kyis khyab par te/ nyon mongs pa'i bag chags kyis mngon par khyab pas mtshon pa zhes bya ba'i don to//gzhan yang shing rta'i 'khor lo lta bur 'khor ro zhes bya ba'i don to/ /rmi lam gsal sang zhes bya ba la sogs pa smos te/ 'di ltar 'ga' zhig rmi lam shin tu gsal bar mtshan nyid dang mtshan nyid can du ldan par snang ba sad pa'i dus na de dag thams cad med par 'gyur ro//de de bzhin no zhes bya ba'i don to/ /gzhan yang ji lta bur gyur pa 'gro ba snang zhe na/ mthong nas zhes bya ba la sogs pa smos te/ 'di ltar mig 'phrul gyis sprul pa'i glang po la sogs pa'i dngos po mthong ba skad cig de nyid la slar mi snang ngo / / 'gro ba de bzhin no zhes bya ba'i don to/ /da ni yongs su grub pa'i rtags bstan pa'i phyir 'gro ba de nyid rnal 'byor pas ji lta ba bzhin du mthong ba bstan pa'i phyir/ yongs su grub pa shes pa ni/ /zhes bya ba la sogs pa smos te/ yongs su grub pa'i rang bzhin nyid shes pa'i rnal 'byor pas 'gro ba ji lta bur mthong zhe na/cha shas med cing zhes bya ba smos te/ kun brtags pa'i dngos po med pa'i phyir cha shas med de/ thog mtha' med pa ni sngar bshad pa'o/ /rnam pa dang bral ba'i phyir rnam pa med cing ngo / /thams cad du chags pa med pa'i phyir gzung du med do/ /nyon mongs pa spangs par gyur cing skyo ba dang 'tshe ba log par gyur pas na skyo med 'tshe ba yod min no//dbyibs med pa'i phyir ring po ma yin zlum por min no/ /gzhan yang nyi mas mun pa bsal ba gang la yod pa de ni nyi mas mun pa bsal ba'o/ /nam mkha' lta bur dri ma med de dri ma spangs pa yin no/ /gzhan yang /mnyam nyid chos ni rtogs pa'i phyir/ /thams cad mi mnyam pa dang mnyam/ /zhes bya ba smos te/ mnyam pa'i chos nyid ni de bzhin nyid do/ /de rtogs pa ni mnyam nyid chos rtogs pa'o/ /mnyam nyid chos rtogs pa'i rgyu de bas na yang 'gro ba thams cad mnyam pa nyid du mthong ba yin gyi mi mnyam par mthong ba ni ma yin no//bsam gtan las 'das pa des ji ltar de dag mthong zhe na/ kun rdzob ces bya ba la sogs pa smos te/ rnal 'byor pa des kun rdzob tu ste/ 'jig rten gyi tha snyad du chos 'di snang ste/ kun brtags pa'i chos des mthong bar gyur pa yin no//dam pa'i don du snang ma yin te yongs su grub pa'i rang bzhin du gnas pas chos nyid mthong ba skye ba ma yin te/ de dag kun brtags pa nyid kyis ni dben pa ma yin no/ /gal te de lta yin na kun rdzob tu yod pa'i chos rnams mthong ba de lta yin na kun brtags pa'i chos rnams yod par gyur par khas blang bar bya'o//rnam par rtog pa zhes bya ba la sogs pa smos te/ kun rdzob ces bya ba'i dngos po ni chung zad kyang med de/ gang gi phyir kun brtags pa'i chos rnams yod pa nyid du grub par 'gyur ba'i phyir ro/ /sgra dang rnam par rtog pa la ni kun rdzob ces bya ste/'di ltar blos brjod par 'dod pa'i don sgras bstan pa de la kun rdzob kyi sgrar brjod do/ /sgra dang rnam par rtag pa des kyang bum pa la sogs pa don gyi rnam pa bskyed par 'gyur ba yin no/ /de nyid kyis rnam par rtog pa blo dang sgra dang 'brel pa med pa don dam pa'i bden pa la brten pa kun rdzob kyi rnam par rtog pa bzlog par gyur pa yin no zhes bya ba'i don to//don de nyid bstan par bya ba'i phyir/ ci ltar zhes bya ba la sogs pa smos te/ ming gis bstan de'ang ni don dam pa nyid do/ /gzhan rtogs pa'i ched du sgras don dam pa yin no zhes bstan pa de ni kun rdzob nyid du gnas pa yin zhes bya ba'i don to//gang gi phyir don dam pa ni de bzhin nyid de ni don dam pa nyid do/ /de bzhin tshig gis de yul min te/ tshig gi spyod yul ma yin pa ni blo'i yang spyod yul ma yin pa nyid do/ /da ni bcom ldan 'das kyi bka' bstan pa yang kun rdzob nyid du bstan pa'i phyir/ rig la zhes bya ba la sogs pa smos te/ 'di ltar sgra'i don don dam ma yin pa de nyid kyi phyir/ rig la gnas pa ma yin pa zhes bya ba ni phung po dang khams dang skye mched bstan pa'i chos gdul bya rnams kyis khong du ma chud pa'i phyir/ thub pa ste bcom ldan 'das kyis bstan cing gsungs te/ don dam pa'i bden pa la brten nas stong pa nyid tha dad pa'i chos rnams bstan zhes bya ba'i don to/ /'di ltar gang gi tshe rnal 'byor pa kun rdzob la gnas pa de'i tshe des chos mthong bar 'gyur ro/ /gang gi tshe yang don dam pa gnas pa de'i tshe kun brtags pa'i chos rnams med pa'i phyir chos de rnams des ji ltar mthong bar 'gyur zhes bya ba'i don to//yang ci'i phyir sems can rnams kun rdzob la gnas par 'gyur zhe na/ yun ring 'phel zhes bya ba la sogs pa smos te/ yun ring 'phel ba ni thog ma med pa'i dus nas kun rdzob kyi rnam par rtog pa la goms pas so//byis pa rnams ni rmongs pa dga' ba nyid du gyur pa'o/ /spros la sems ni chags pas na ste/ don dam pa ma yin pa kun rdzob sgra dang rtog pa ste/ da ltar na yang 'di 'phel lo zhes bya ba ni 'phel bar 'gyur ro zhes bya ba'i don to/ /de dag gis phyi'i don du smra ba rnams rmongs pa yin par bstan nas/rnal 'byor spyod pa pa byis pa yin par bstan pa'i phyir/ mtshan ma zhes bya ba la sogs pa smos te/ mtshan ma dgod pa'i don la ni ste/ rnal 'byor pa spyod pa pa ni bag chags kyi dbang gis sems nyid don gyi rnam par snang gi phyi'i don ni med de dgod pa'i don la mkhas pa nyid su zhig yin/gang gis de dag dus gang du yang / rnam rtog bye brag zhi ma yin/ /mi 'gyur ba ni gang du'ang med/ /ces bya ba'i don to/ /chos la bdag med pa'i rang bzhin mthong ba'i chos la bde bar gnas pa'i phan yon bstan pa'i phyir/ bdag med ces bya ba la sogs pa smos te/chos thams cad bdag med par sems dmigs pas btang snyoms 'dra ba thob pa yin te/ btang snyoms dang bcas par 'gyur ro/ /de bzhin du kun brtags pa'i chos chos med na gnyid log lta bur 'dod pa med pa ni gnyid kyis log pa lta bu'i mtshan nyid do/ /dub pa brtags pa lta bu dang ste kun brtags pa la sogs pa'i lam la yongs su skyob pas dub pa brtags pa lta bur mthong zhes bya ba'i don to//stong pa nyid bsgoms pa dang stong pa nyid mthong ba'i lus dang sems kyi byed pa bstan pa'i phyir/ mig ces bya ba la sogs pa smos te/ chos thams cad stong pa nyid kyis chos thams cad rang bzhin med pa mthong bas mig ni 'dzums par byed ma yin dang /mgo dpangs mthon por byed pa ma yin pa dang / de bzhin du sems dang sems byung 'gag par 'gyur te/ 'jug pa'i rnam par shes pa dang tshor ba la sogs pa gnyid log pa dang 'dra bar byed ces bya ba'i don to//de bzhin du mthong ba'i lam skyes pas bsgom pa'i lam bskyed pa'i dgos pa dang bcas pa tshigs su bcad pa gnyis kyis ston te/ rtags ni zhes bya ba la sogs pa smos te/ 'di dag ces bya ba sngar bstan pa'i rtags mthong nas/ mthong ba'i lam gyis chos la bdag med pa rtogs nas/bdag gis don byas de nyid mthong / /zhes bya ba ni 'di tsam gyis dpa' bos ni byang chub sems dpas so/ /phyir yang bsgom pa 'dor ma yin ni yongs su mi spang ba'o/ /gang gi phyir mchog yod phyir/ mthong ba'i lam las bsgom pa'i lam mchog yod pa'i phyir ro//ji lta bur gyur pa zhig ce na/ de nyid ces bya ba la sogs pa smos te/ de yang ni bsgom pa'i lam de 'di yin no zhes 'gas kyang bstan par nus pa ma yin no/ /de 'di yin no zhe na gang dpyad par mi nus na de yod do zhes ji ltar rtogs she na/ smras pa/ rnam par rig pa tsam mthong bas chos kyi dbyings kun du 'gro ba'i don so sor rig pa'i phyir ro//de bas na de kho na nyid mthong ba bstan pa'i phyir/ rnam par rig pa tsam zhes bya ba la sogs pa smos te/ rnam par rig pa tsam gyi sngar bstan pa'i rim pas so/ /yod pa dang med pa'i mtha' gnyis kyi dbus rnal 'byor pa gang gis mthong ba des 'gro ba ma lus pa 'di dag la de dag nyid phun sum tshogs pa ston zhes bya ba'i don to//da ni sems can gyi don byed pa bstan pa'i phyir/ de nyid phun sum tshogs pa zhes bya ba la sogs pa smos te/ de dang por de nyid phun sum tshogs pa gnas te/ phyi nas snying rje dang ldan te/ snying rje ba bsngags pa'o/ / bde gshegs sras ni byang chub sems dpa' srog gis kyang ste/ srog sbyin par btang ba'i bar gyis so/ /sems can don byed pa la btang snyoms la 'jog ma yin te/ sems can gyi don byed ces bya ba'i don to/ /yul la chags pa'i sems can gyi don byed pa ma yin no/ /yul rnams zhes bya ba la sogs pa smos te/yul rnams ni nor dang 'bru 'ba' zhig ma yin gyi bu dang bu mo la sogs pa'i gzhan gyi nye bar longs spyod kyang byang chub sems dpa' yul rnams 'ga' la yang mi sems zhes bya ba'i don to/ /yul ji lta bur gyur pa zhig ce na/ rmi lam zhes bya ba smos te/ dper na rmi lam gyi yul nye bar longs spyod pa sad pa dang yul du mi sems pa de bzhin no zhes bya ba'i don to/ /byang chub sems dpa' ltung ba thams cad las log par bstan pa'i phyir ro/ /bag med ces bya ba la sogs pa smos te/ rgya che ba'i sems dang ldan pa'i mkhas pa gang yin pa de dag kyang bag med pa'i gnas dang ldan na 'gyur ba thob par 'gyur ro//byang chub sems dpa' ni yang 'byor pa yang ni rgud pas 'gyur ba thob par mi 'gyur ro/ /gang gi phyir thams cad du ni sems mnyam nyid ces bya ba'i don to/ /da ni byang chub sems dpa'i mngon par shes pa'i rnam par 'phrul pa tshogs su bcad pa bzhin bstan pa'i phyir/dus ma yin zhes bya ba la sogs pa smos te/ dus ma yin pa'i sprin bzhin yang / ga la'i 'ang zhes bya ba ni gnas ma yin pa'i ting nge 'dzin las ldang ste/ nam mkha' la gnas pa nas de'i dbus su bdag nyid kyis ni de dang de ngo mtshar rnam par 'phrul pa ston te/ngo mtshar khyad par can ston zhes bya ba'i don to/ /rnam par 'phrul pa ji lta bu zhig ce na/ 'bar ba zhes bya ba smos te/ dus shes pa'i byang chub sems dpa' dus gcig la 'bar ba dang ni char 'bab byed de gdung ba dang 'bab pa ston par byed do//'bar ba dang 'bab pa 'ba' zhig ma yin gyi/ sa la yang ni chu bzhin du/ byi zul du ni byed pa'ang yin te/ rab tu ston par byed ces bya ba'i don to/ /de bzhin du ri la sogs zhes bya ba mi 'gul ba'i ri yang 'gul bar byed pa'o/ /de dag nyid ni 'byed pa dang / de bzhin du lag pas sdud pa yang ston par byed do//gzhan yang bdag nyid nam mkha' la 'gro ste chu la ngang pa'i rgyal po bzhin nam mkha' la ston par byed ces bya ba'i don to/ /de bzhin du/ sprul pa yis kyang zhes bya ba smos te/ sprul pa ni tshangs pa dang brgya byin la sogs pa'i gzugs kyis sems can rnams 'dul ba'o//mthong dang thos byed ni lha'i mig gis thag ring po nas dngos po mthong ba dang / lha'i rna bas thag ring po nas sgra thos pa'o/ /de dag thams cad ni mngon par shes pa'i rnam par 'phrul pa yin te/ theg chen tshul la ste rnam par rig pa tsam la bsnyen pa la rigs pa yin gyi/phyi'i don la brten pa la ni ma yin no zhes bya ba'i don to/ /gzhan yang rnam par rig pa tsam la mi brten pas mngon par shes pa la sogs pa byed pa yin no zhes bstan pa'i phyir/ de las zhes bya ba la sogs pa smos te/ de las ni sngar bstan pa'i rgyu las so/ /gzhan pa'i phyi rol pa ni mu stegs la sogs pa dang /gzhan gyi sgras ni nyan thos la sogs pa la gang zhig cung zad mthong bas ni mngon par shes pas rnam par 'phrul pa mthong ba'o/ /de nyid ni de rnams so/ /lam 'di las yin gyi gzhan las ni ma yin no zhes bya ba'i don to/ /lam ji lta bur gyur pa zhig ce na/ rang gi ro las 'ongs pa ste//zhes bya ba smos te/ gal te yang de dag gi bstan bcos las rnam par rig pa tsam gyi lam ma bstan pas de lta mod kyi rang gi ro ni bsgom pa'i stobs goms pas lam de nyid las 'ongs pa yin te/ gang gi phyir phyi rol gyi don khas len par byed na mngon par shes pa la sogs pa mi 'grub bo zhes bya ba'i don to//'di ltar dngos po bstan pa'i phyir zhes bya ba'i don to/ /chos la bdag med pa'i lam gyis bcom ldan 'das thams cad mkhyen par bstan pa'i phyir/ cung zad ces bya ba la sogs pa smos te/ gzugs la sogs pa tha dad par brtags pa ngo bo gcig tu brtags par mi nus so//thams cad mkhyen pas thams cad gzigs/ /zhes bya ba smos te/ bcom ldan 'das kyis tha dad pa'i kun brtags pa thams cad gzigs so/ /'di ltar rnam pa tha dad pa brtags pa ni kun brtags pa thams cad do/ /de nyid phyir na dngos gcig nyid/ /chos thams cad bdag med pa'i ngo bor gcig pa yin te/ngo bo gcig pa de nyid kyi rgyus gzigs zhes bya ba'i don to/ /don de nyid dpes bstan pa'i phyir/ stong nyid ces bya ba la sogs pa smos te/ stong nyid don gcig ni bdag med pa'i dngos po mthong ba'o/ /'gro kun don ni gcig tu mthong ba de'i ngo bo nyid du mthong bar gyur pa yin no//ji lta bu nyid du zhe na/ phyogs gcig ces bya ba smos te/ dper na phyogs gcig nas chu 'thungs pas chu thigs kyi ngo bo nyid kyis rgya mtsho ma lus shes par 'gyur te/ rgya mtsho'i chu thams cad ngo bo gcig tu shes par 'gyur ro/ / 'di de bzhin zhes bya ba'i don to/ /gang zhig stong pa nyid kyi lam las phyi rol du gyur pas ni thams cad mkhyen pa ma yin no zhes bstan pa'i phyir/ dus gcig ces bya ba la sogs pa smos te/ tha dad pa ni sngon po dang ser ba'i ngo bo nyid kyis so/ /yul la sogs pa tha dad pa la ste/tha dad pa'i yul dang dus dang nus pa la sogs pa'i phyi'i don du brtags pa rnams so/ /stong par mthong ba ma gtogs par/ /skyob pa'i ye shes 'khrungs ma yin te/ sangs rgyas bcom ldan 'das rnams kyi thams cad mkhyen pa'i ye shes ji ltar 'khrung bar 'gyur/de nyid kyi phyir chos la bdag med par ma mkhyen na de skyob par mi 'gyur ro zhes bya ba'i don to/ /chos kyi sku'i ngo bo thugs su chud pa'i skyob pas 'gro ba gsum po ma lus pa phyi rol du gyur pa ji lta bur gzigs she na/ rang zhes bya ba smos te/ rang gi sems kyis ni kun brtags pa nyid bris pa ni kha dog tu bris pa'o//phyi rol gsal ba'i dbyibs su gnas te/ dbyibs sna tshogs bkod pas ma lus par gsal ba'o/ /gzhan yang ji lta bur gyur pa zhig ce na/ skye ba du ma goms pas gsal/ /zhes bya ba'i don to/ /skye ba du mar goms pa'i phyir gsal te/ gsal ba'i ngo bo ru'o//'di ltar lan cig mthong ba'i dngos po gang yin pa gsal bar mi snang ste/ ji srid yang dang yang du ma bltas kyi bar du'o/ /de bas na de nyid kyi phyir/ srid gsum ri mo'i bye brag bzhin/ /zhes bya ba smos te/ 'di ltar ri mo'i bye brag kha dog tu bris pas glang po dang rta la sogs pa'i dbyibs bkod pa gsal bar snang ba de bzhin du 'dod pa dang gzugs dang gzugs med pa ni khams gsum po bris zhes bya ba'i don to//tha dad pa'i ngo bor 'gro ba gsum po mthong ba 'dis khyab pa med pa'i phyir/ thams cad mkhyen pa nyid mi 'grub po/ /chos kyi sku thugs su chud pa'i skyob pas 'gro ba gsum ji ltar gzigs she na/kun zhes bya ba la sogs pa smos te/ de'i spros pa ni 'gro ba gsum po de dri za'i grong khyer lta bur brdzun pa'i ngo bor mkhyen pas zhes bya ba'i don to/ /gzung ba dang 'dzin pa'i dngos po med pa'i phyir dngos po med do/ /mtshan ma mi dmigs pas na mtshan ma med do//skye ba dang 'gag pa med pas zad pa med do/ /kun tu brtags pa 'ba' zhig go ste/ kun rdzob ces bya ba'i don to/ /de ltar chos kyi dbyings kyi rang bzhin du 'gro ba gsum gzigs pa'i phyir/ bcom ldan 'das thams cad mkhyen par grub bo/ /de lta bas na stong pa nyid kyi lam gyis thams cad mkhyen pa yin no//da ni nye bar bsdu ba'i phyir/ 'di zhes bya ba la sogs pa smos te/ 'di zhes bya ba ni 'di ltar gyi don no/ /khams gsum gyi 'dod chags dang bral ba'i phyir 'dod chags thul ba'o/ /rim gyis bde spyod 'dod pa med pa ni brtags pa la sogs pa med pa'i phyir 'dod pa med ces bya ba'i don to//gzhan yang thub dbang 'dod pa ma spangs pas ni gang la ma spangs pa yod pa de ni thub dbang 'dod pa ma spangs pa ste/ byang chub sems dpa' zhes bya ba'i don to/ /de ltar gnyis su med pa bsgoms pas gnas mchog gzhan gyi don ldan thob ste/ gzhan gyi don byed pa dang ldan pa'i byang chub sems dpas rim gyis sangs rgyas nyid thob ces bya ba'i don to//da ni slob dpon gyi rab tu byed pa 'di'i don dang ldan pa'i mtshan bstan pa'i phyir/ bde gshegs kyis gsungs zhes bya ba la sogs pa smos te/ bde gshegs kyis gsungs dbye ba ni theg pa gsum bstan pa'i rang bzhin no//des grags pa'i ngang tshul can no/ /'di skad du bstan par 'gyur te/ bcom ldan 'das kyis theg pa gsum gyi snying por gang cung zad gsungs pa de thams cad 'di la yod de 'di ltar/ don chen rnam gsal tshig gis rab sbyar ba/ /zhes bya ba ni rgyan dang bcas pa'i phyir don chen no//don rtogs par byed pa'i phyir na rnam gsal lo/ /tshig gis rab sbyar ba ni tshig bkod pa gang la yod pa de bzhin du 'gyur ro/ /log pa'i lam zhugs pa ni lam ngan par zhugs pa rnams kyi mi shes mun pa sel pa ste/ ye shes kyi snang ba bskyed pa'i phyir ro/ /snang ba'i phreng ba 'di ni bdag gis sbyar te/de bdag gis byas zhes pa'i don to/ /da ni de'i phan yon bstan pa'i phyir/ dngos por 'dzin pa zhes bya ba la sogs pa smos te/ dngos po 'dzin pa ni gzung ba dang 'dzin pa'i dngos po'o/ /de spong ba ni zlog par byed pa'o/ /de bzhin du kun brtags pa'i dngos po med pa'i phyir yul gyi thob pa'i zhen pa gcod de/gzugs la sogs pa'i zhen pa gcod pa'o/ /sems la snang ba 'phel byed ni byang chub sems dpa'i thugs la ye shes kyi snang ba rgya cher skyed pa'o/ /ji lta bu zhe na/ chen por te/ dper na sgron me chen po sbar na snang ba bskyed pa de bzhin du snang ba'i phreng bas ye shes kyi snang ba skyed ces bya ba'i don to//ye shes snang ba skyed pa ni byang chub sems dpa' rnams kyi rang gi lag na gnas pa bzhin du de kho na nyid mthong ba yin no/ /gzhan yang shes rab kyi pha rol tu phyin pa 'di rgyud gnas ni snang ba'i phreng ba 'dis de'i rang bzhin thob pa'i phyir ro//de bzhin du mngon par 'dod pa'i dngos po ster ba'i phyir kun du yid bzhin nor bu zhes bya ba'i don to/ /kun du brtags pa'i rang bzhin dgag pa nyan thos rnams la bcom ldan 'das ci'i phyir ston par mi mdzad ce na/ kun rdzob ces bya ba la sogs pa smos te/kun rdzob ni dgongs pa 'ga' zhig bcom ldan 'das kyis gzigs pa'i skye mched bstan pa ni sgro btags pa ste/ de tsam gyi gsung las phyi rol pa de dag la don dam pa bstan pa ci zhig bya nyan thos gang yin pa de yang bde bar gshegs pa nyid de nges pa'i don ni phyi'i don la don dam par zhen pa'o//de'i mdun du bde gshegs ni bcom ldan 'das kyis slob dpon gyi chad pa phyed par mi mdzad do/ /'di skad bstan par 'gyur te/ gnyis su med pa'i ye shes gsal bar mi mdzad ces bya ba'i don to/ /ko Tha ba'i zas kyis 'dres na 'bras sA lu mchog gi dgos pa med do/ /gal te phyi'i don med na de ji ltar ston ce na/gang tshe zhes bya ba la sogs pa smos te/ kye 'jigs pa med pa gang gi tshe khyod kyis 'jigs pa med pa'i byang chub thob nas yi ge tsam yang gsungs pa mi mnga' ste/ de tshe yun ring nas nyams lcags kyo med pa yis/ /zhes bya ba smos te/ de kho na nyid kyi lam yun ring nas nyams pa dang nges par 'byed pa'i slob dpon med pa'i phyir lcags kyo med pa'i nyan thos kyis/phyin ci log la ji ltar mngon par brtson par byed/ ces bya ba ni ji ltar bcom ldan 'das kyis phyi'i don bstan par mdzad ces brdzun du smra ba la dgos pa ci zhig yod ces bya ba'i don to/ /da ni rang gi grub pa'i mtha' gzhan las stobs dang ldan par bstan pa'i phyir/sangs rgyas pa dang zhes bya ba la sogs pa smos te/ sangs rgyas pa dang ni sangs rgyas pa'i grub pa'i mtha'o/ /phyi rol pa rnams ni mu stegs pa rnams kyi grub pa'i mtha'o/ /rnam par 'byed pa gal te stong nyid gcig pu 'di ni ma bstan par te/rnam par 'byed par byed pa ma smras na de'i tshe/ zhib mo'i blo ni dpyod par nus pa'i blo gang la yod pa de zhib mo'i blo'o/ /zhib mo'i blo yis rnam par dpyad byas na/ /grub mtha' thams cad mtshungs par 'gyur ba yin te 'dra bar 'gyur ro/ /thams cad mkhyen pa nyid dmigs pa gzhan gyis mi rigs kyi/stong pa nyid la dmigs pa kho nas yin no zhes bstan pa'i phyir/ gal te zhes bya ba la sogs pa smos te/ gal te stong pa de chos thams cad stong pa nyid brtags dang mnyam pa nyid ma yin na ni rtags ma yin te/ de'i tshe tha dad bdag nyid rgyu mtshan skad cig tu ste/ brtags pa'i dngos po la thams cad mkhyen pa ni sangs rgyas bcom ldan 'das te/gang gi rgyu yis ston par 'grub par 'gyur/ /zhes bya ba'i don to/ /gal te de kho na nyid stong pa nyid la dmigs pas thams cad mkhyen pa yin na rnal 'byor pa rnams kyis gzhan la sems la dmigs pa'i mngon par shes pa ji ltar skye zhe na/gang zhig ces bya ba la sogs pa smos te/ rnal 'byor pa'i pha rol gyi spyod yul mngon par shes pa grub pa'i rgyu'i khyad par ni shes pa'i nga rgyal yin te/ de dag mun pa'i dri ma lhag pa yin par 'dod/ ces bya ba ni byis pa'i skye bo rnams las shin tu lhag pa'i shes pa'i dri ma yin no//'ching ba'i bdag nyid ni 'khor bar 'ching ba'i bdag nyid du bdag gis shes so/ /gang gi phyir byis pa la ji ltar gnas pa bzhin ni bdag med pa'i las 'thob pas phyi'i don du mngon par zhen pa la de dag thams cad gnas so/ /ji skad bstan pa'i don de nyid dpes spros nas bstan pa'i phyir/gang zhig kun du zhes bya ba la sogs pa smos te/ gang zhig kun ni rnam pa thams cad du long ba'o/ /de bzhin du gzhan rab rib can gnyis po dag las snga ma mchog yin te/ shin tu mchog yin no/ /gang gi phyir bdag ni long ba yin zhes bya ba ni bdag gi nga rgyal lo zhes bdag gi ba'i nga rgyal lo//nga rgyal gyis stong ni bdag dang bdag gi nga rgyal gyis stong pa'o/ /yang gang 'bras bu med pa ste/ snying po med pa'i mig go/ /rab rib kyis mthong ba de ni bdag dang bdag gi nga rgyal gyis stong pa ma yin no//de bzhin du chos la bdag med pa'i rnal 'byor pa dang / phyi'i don du mngon par zhen pa'i rnal 'byor pa blta bar bya'o/ /skyon dang yon tan mi shes par de kho na nyid thob par mi 'gyur ro zhes bstan pa'i phyir/ gang zhig ces bya ba la sogs pa smos te/ gang zhig rang skyon gyi ngo bor mi shes pa ste/nyes pa'i rang bzhin phyi'i don du mngon par zhen pa skyon du mi shes so/ /de bzhin du yon tan gnyis su med pa'i ye shes mi shes pa'i phyir/ dge ba'i bshes gnyen rnams la gus par byed ma yin/ de dag gis de kho na nyid ro ste/ gnyis su med pa'i ye shes kyi ro ji ltar 'thung bar 'gyur zhes bya ba'i don to//yang rgya che ba'i bdag med pa'i lam la ji ltar 'jig rten ma rmongs par gyur ce na/ nam mkha'i dkyil zhes bya ba la sogs pa smos te/ nam mkha'i dkyil du bris pa lta bu'i brtags pa'i dngos po 'byed pa la mkhas pa ste/ de ltar phung po dang khams dang skye mched rnam par 'byed pa la mkhas pa zhes bya ba'i don to/gzhan ji lta bur gyur pa zhig ce na/ dngos po'i zhes bya ba la sogs pa smos te/ chos rnams ni de bzhin nyid kyi ngo bo spyi'i mtshan nyid spangs nas/ sngon po la sogs pa'i rnam pa phyi rol gyi dngos po'i khyad par bye brag ston pa'i brtson 'grus can zhes bya ba'i don to//kye ma thog mar spros pa thob pa'i 'chad pa pos te/ de ltar 'das pa'i 'chad pa pos da ltar gyi 'chad pa po spros par byed do/ /de'i tshe de dag bdag med pa'i lam mi mos so zhes bya ba'i don to/ /gang zhig kun brtags pa don dam par med par mi 'dod pa de dag gis 'di yang mi srid pa ni ma yin zhe na/chu nang zhes bya ba la sogs pa smos te/ chu'i nang sbrul zhugs pa rjes mthong ba dang / de bzhin du nam mkha'i me tog phreng bas rab tu rgyan byed dang / gzhan yang rgyu spun med pa'i snam bu 'thag par byed pa ni byed pa po'i dngos po byed pa 'jig rten rnams la ji ltar ngo tsha mi shes 'gyur zhes bya ba'i don to//'di skad bstan par 'gyur te/ 'di ltar de ltar de dag mi shes bzhin du kun brtags pa'i dngos po med par gyur pa yod pa dngos por ston par byed ces bya ba'i don to/ /da ni bcom ldan 'das kyi gsung rab mu stegs pa'i gzhung las yid 'phrog par bstan pa'i phyir/sun 'byin zhes bya ba la sogs pa smos te/ yang gang zhig thub pa'i dbang po'i gsung la gus pa spangs nas sun 'byin 'dod pa gang zhig 'dzin byed pa ste/ 'dzin par zhugs bya ba'i don to/ /shin tu mngar ba myangs nas kha ba'i ro bzhin ni/ mu stegs kyis bstan pa'i tshig rnams la rjes su chags ma yin te/rjes su mi 'brang zhes bya ba'i don to/ /theg pa chen po theg pa gzhan las mchog tu bstan pa'i phyir/ khyad par zhes bya ba la sogs pa smos te/ khyad par 'phags pa'i bud med ni gzugs dang ldan pa'i gzhon nu ma'o/ / 'dod pa ni de 'dod pa'o/ /gsal ba'i rigs rgyud dbang phyug ni rigs rgyud dag pa las byung ba'i rgyal po khyim 'dod pa ste/ yun ring po nas 'dod pa'o/ /glang po'i khyu'i gtso bo ni glang po'i mchog spangs nas dman pa'i bzhon pa ste/ bong bu'i bzhon pas skyes bu su zhig 'gro de bzhin du khyad par du 'phags pa'i bud med lta bu bla na med pa yang dag par rdzogs pa'i byang chub thob par 'dod pas theg pa chen po spangs nas ci nyan thos kyi theg pa la brten par bya ba yin nam/sngon gyi slob dpon dge slong ni/ /dga' ba sbas pas mdzad pa yi/ /rab tu byed pa dka' 'grel gyi//rtogs dka' yid ni dga' byed min/ /de gzhung chung zad bzung nas ni/ /mkhas pa yid ni dga' skyed pa/ /don gsal ba yi dka' 'grel 'di/ /bdag gis yang dag sbyar ba yin/ /bdag gis chung zad 'di byas pa'i/ /bsod nams bsags pa gang yod pa//de yis ma rig ldongs pa'i blo/ /lus can ye shes snang thob shog /snang ba'i phreng ba zhes bya ba'i dka' 'grel yid dga' ba skyed pa zhes bya ba dge bsnyen btsun pa ngo bo nyid med pas mdzad pa rdzogs so// //rgya gar gyi mkhan po ku mA ra kA la sha dang / dge slong shAkya 'od kyis bsgyur//