CLOSE WINDOW

D3895
བོད་ཡིག

/[ ]@##/ /rgya gar skad du/ A lo ka mA la pra ka ra Na nA ma/ bod skad du/ snang ba'i phreng ba zhes bya ba'i rab tu byed pa/ mi shes gsum ni spang ba'i phyir/ /rang bzhin gsum ni bsgoms pa yis/ /gang gis sems tsam du gsungs pa//thub dbang de la phyag 'tshal lo/ /srid gsum mtha' ru byon pas spros gsungs pa/ /bsdus nas sems kyi rnam par rtog pa tsam/ /gal te de dag sems las ma lus spangs/ /yang srid 'ching ba'i skye ba yod ma yin/ /srid dang thar pa yongs shes pas//de spangs thob pa'i 'bras bu 'byung / /blo gros bzang po thams cad ni/ /nang sems pa la brtson pa yin/ /'dod chags la sogs drir bcas sems/ /'khor yin de las dben pa nyid/ /sgrib pa spangs pa'i rgyal ba yis/ /bsdus nas thar pa yin par gsungs/ / 'dod chags zhe sdang gti mug ni/ /lus can rang sems rtog pa yin/ /gang zhig chos ni gzhan dag kyang / /byis pas brtag pa brdzun bdag nyid/ /dam pa'i don gyi rtog pa la'ang / /mkhas pa de yis gnas mi bya/ /dge ba'am mi dge ba yi yang / /rtog la bye brag ci zhig yod/ / brten cing dbye ba la brten pa'i/ /mes sreg nyid du bye brag med/ /tsan dan gyi ni me 'dis kyang / /reg pa tsam gyis sreg pa nyid/ /rnam par rtog pa chung ngu yang / /thams cad nyid du spang bar bya/ /'khrul pa'i ngo bo rnam rtog gis/ /sems ni mngon par bslad pa yin/ /'khrul pa yang ni ma dag phyir//mig 'phrul gyi ni rnam 'phrul yin/ /mig 'phrul yang ni shes bya ste/ /sems kyi yang ni rnam 'phrul yin/ /de phyir sems kyi de dang de/ /'khrul par gnyis su med pa blta/ /dbu ma'i lam ni de nyid de/ /de nyid chos kyi bdag med pa/ /yang dag mtha' yang de yin te//de nyid de bzhin nyid stong nyid/ /chos rnams mnyam nyid de grol nyid/ /de nyid rnam par rig tsam nyid/ /chos kun nang du chud pa'i phyir/ /ring ba ma yin nye ba'ang min/ /de nyid rtogs par dka' bas na/ /'di yi ngo bo dpyad mi nus/ /rang rig de yang phra ba'i phyir//sangs rgyas rnams kyi phra ba gzigs/ /rang la gnas kyang bdag 'dra bas/ /rtsing ba'i phyir ni mthong ba med/ /nam yang rnal 'byor rig pa yin/ /thar pa ring snyam mi bsam ste/ /brtags pa'i ngo bos stong pa nyid/ /rang dngos mthong bas mya ngan 'das/ /nyi chu rab rib rmi lam dang //dri za'i grong khyer la sogs pa/ /'khrul pa yis kyang dgos byed do/ /'khrul pa gzhan dag bzlog phyir ro/ /yul du kun brtags de dang des/ /sad pa 'khrul pa'i bdag nyid kyi/ /rmi lam [(]bltan [,]bstan [)]pa'ang de yi shugs/ /mi bzad pa yi bag chags dug / e ma'o brdzun pa'i rnam rtog gi /rgyun ni shin tu mthug pa ste/ /rmi lam las kyang rmi lam gzhan/ /chu bur steng du chu bur bzhin/ /yang dag ma yin don snang bas/ /yang dag don ni bsgribs nas gnas/ /ma rig pa yis bskyed pa nyid/ /mig ser nad kyis btab pa bzhin//tha dad min pa'ang tha dad dang / /phyi rol min pa'ang phyi rol du/ /yul gyi rnam pa'i rnyog pa yis/ /sems ni rnam pa du mar snang / /nyi ma zla ba nam mkha' dang / /skar ma'i tshogs dang sa rnams dang / /chu bo'i rgya mtsho phyogs dang ni/ /'di dag sems kyi sprul pa'o/ / srid pa'i rtse mos yongs bcad pa/ /khams gsum po ni 'di dag par/ /ji ltar snang ba 'di thams cad/ /rnam shes dug gi thig le yin/ /gal te snang na ji ltar med/ /snang ba ji ltar med dngos yin/ /snang phyir yod pa snang ma yin/ /ci ga rmi lam mi snang ngam/ /lhag pa'i dri ma skyes pa yis//rang gi ngo bo nges rtogs bsgribs/ /gzhan gyi ngo bo snang ba ste/ /blo rnams shel dang 'dra ba yin/ /rang bzhin nyid ni mi snang ba'am/ /dus kyi brtsegs pa thob pa yis/ /'du byed bag chags kyis bsgos pas/ /rnam par rtog pa snang bar 'gyur/ /sems ni rnam par bslad pa'i phyir//gcig nyid gnyis su snang ba yin/ /gzung dang 'dzin pa'i dbye ba la/ /shin tu mkhas pa cis ma yin/ /gzung ba'i rnam pa mi g.yo'i phyir/ /phyi rol lta bu nyid du gnas/ /'dzin pa'ang srog dang bcas pa'i phyir/ /nang ni g.yo ba lta bu nyid/ / 'dir ni phyi nang cung zad med/ /phan tshun dag ni grub pa'i phyir/ /bar na ma yin med min te/ /sems tsam du ni gnas phyir ro/ /dbang po'i grong du 'dod chags med/ /don rnams la min sems la min/ /bdag la gnas min gzhan gnas min/ /de ni yod min med pa'ang min//ma brtags 'brel pa'i rgyu yis ni/ /sems ni 'khrul par gyur las yin/ /ga la yin yang sprin nang nas/ /gnam lcags 'bab par 'gyur ba bzhin/ /de bzhin zhe sdang gti mug dang / /nyon mongs rigs gzhan gang yin pa'ang / /khams gsum du ni khyab byed pa//rtog pa'i dug las kun tu byung / /rtog pa yang ni gzhi med pa/ /yang dag nyid du yod ma yin/ /'ga' yis me lce 'bar ba ni/ /nam mkha' la mched mthong ngam ci/ /mi sdug la sogs gnyen po'i phyogs/ /thub pa'i dbang pos gsungs pa ni/ /dug zin dogs pa zhi ba'i phyir//mkhas pas brdzun gyi bsngags bzhin no/ /kun da zla ba pad sogs med/ /bshad sogs med cing dngos yod min/ /sad pa'i skabs kyi bud med lus/ /rmi lam gyi ni skabs bzhin no/ /'dod chags dang ni chags bral nyid/ /de ltar shes na gnyi ga brdzun/ / 'ga' zhig chad pa phye ba la/ /chags pa ma yin chags med min/ /gang zhig chags dang bral ba des/ /slar yang chags kyi the tshom med/ /de phyir 'dod spong don gnyer bas/ /chags bral la yang brten mi bya/ /e ma'o 'jig rten las 'das pa'i/ /lam 'di rnam par dben pa nyid/ / gang zhig gzhan gyi tshig bden na/ /de nyid kho nas tshig 'di brdzun/ /gnod pa byed la bden par yang / /gang zhig smra bar brdzun pa nyid/ /bden dang brdzun par ci zhig dngos/ /gang zhig gzhan don byed de bden/ /bden la bden pa'i ye shes ni/ /mkhas pas bden par gsungs pa yin//bden pa brdzun par 'thob pa yis/ /bden pa la ni gnas mi bya/ /byis pa'i 'jig rten rnams kyi tshig /bden pa las ni brdzun pa mchog /thos blo de nyid min pa'i phyir/ /thams cad mthar ni de'i bdag nyid/ /dngos po gang gang rnam brtags pa/ /de dag thams cad brdzun pa yin//de bden de ni yang dag mtha'/ /gang zhig ma brtags de nyid yin/ /e ma'o skyes bu ma dul ba/ /de nyid phyir ni gnas med pas/ /sgrub pa dang ni sun 'byin pas/ /ji ltar mos pa'i don du 'jog /theg pa chen po mi shes pas/ /blun pa 'di ni legs pa yin//lam nor ba las 'phye bo nyid/ /mgyogs pa ma yin ring phyin brlag /gang dag theg pa che la gus/ /de ni bde bar gshegs pa pa/ /rang sde gzhan dag sman la gzhol/ /lam min g.yang sar 'khor phyir ro/ /sems ni yang dag 'jug pa yi/ /rnam par dpyod la mi 'jug gi /'khor ba rab tu spang ba'i phyir/ /thams cad blo ni mtshungs pa yin/ /rgyun mi 'chad par 'jug pa de/ /thog mtha' med pa'i bdag nyid can/ /'khor ba'i rang bzhin 'di ci zhes/ /shes rab can gyi yongs su tshol/ /sna tshogs 'di dag gang las 'byung //gang du yang ni 'gag par 'gyur/ /rang gi bag chags sa bon gyi/ /kun gzhi rnam par shes pa las/ /gnyid log brgyal dang mi dran dang / /rnam par shes pa 'gags pa las/ /snyoms par 'jug las ldang bas na/ /sa bon thams cad pa nges grub//dbang don las byung thams cad ni/ /'jug pa'i rnam par shes zhes bya/ /kun rnams shes dang tha dad min/ /phyir yang de ru 'gag par 'gyur/ /chu g.yos pa las de dang der/ /rlabs ni tha dad dngos 'byung bzhin/ /skad cig la ni snang ba nyid/ /phyir yang mi g.yo gnyid log bzhin//de ni gnyis snang gang yin pa/ /rigs pa'i spyod yul de ma yin/ /skad cig la ni brjod pa yin/ /sgra dang sgra brnyan ji bzhin no/ /sgyu ma mkhan gyis skad cig la/ /rnam pa sna tshogs ston pa na/ /'ga' zhig gsang ba'i gnas shes la/ /rang bzhin rnam par gnas pa bzhin//byis pa rnams la gzhan du snang / /mkhas la dngos po gzhan yin te/ /sngo dang dmar por nges snang ba'i/ /gtsang sbra yi ni bdag nyid bzhin/ /'di yi rang bzhin dri med 'dod/ /rnam pa med cing brjod du med/ /sangs rgyas min pas nam yang ni//de yi ngo bo shes mi nus/ /tha mal skye bo 'di dag bzhin/ /de bzhin sangs rgyas kyis mkhyen min/ /rab tu grags pa de nyid de/ /de nyid kho na des mkhyen no/ /lung dang bstan bcos la dris nas/ /bdag cag smra ba 'ba' zhig tsam/ /mig dang ldan pa'i spyod yul gyi/ / gzugs ni dmus long rnams kyis bzhin/ /ye shes mig sman khyad par gyis/ /gnas skabs de ru ma 'ongs 'gyur/ /gang phyir thub pa'i dbang po bzhin/ /bdag cag de nyid bden mthong 'gyur/ /byis pa rnams kyis yang dang yang / /'dir ni gang dang gang bsgoms pa/ /de dang de la mdun na snang //bsgoms pa'i stobs las byung ba yi/ /gos rnams bsgos kyang ma goms pas/ /yan lag la ni gnod pa yis/ /shin tu grang ba'i ba mos kyang / /mig la ma yin ngo mtshar che/ /goms pa'i stobs dang 'brel pa'i phyir/ /lag pas kyang ni nyid byed pa'i//mnyed mkhan la ni lpags pa yi/ /dri ngas shin tu gnod pa med/ /lus dang ldan pas thog ma ru/ /dug zos pas ni 'chi ba nyid/ /de nyid goms pa'i sbyor ba yis/ /mthar ni bcud kyis len du 'gyur/ /'byung ba rnams kyang ga las byung / /las las skyes zhes mi rigs te//'byung rnams de dang 'brel med de/ /las kyi bag chags sems gnas phyir/ /legs byas rgyu yi rnam rig ni/ /de phyir zhi ba'i rnam pa yin/ /stag dang seng ge dom dang sbrul/ /gsod cing shin tu 'jigs pa yin/ /gal te shes pa'i dngos nyid la/ /'byung bar brtag pa ma yin na//rkang pa lag pa'i g.yob la sogs/ /ji ltar gzhan las byas par 'gyur/ /rlung las she na rlung gang las/ /'bad pa yis na de gang las/ /gal te 'dod yin de nyid ni/ /khyod ni lam du nges par zhugs/ /pha ma'i khu ba khrag dag las/ /mgo dang rkang sogs ngo bo dang //shing rnams dngos po sa bon las/ /ji ltar skye zhing 'phel bar 'gyur/ /kha las sgra ni ci phyir dang / /rdza rnga las ni yang 'byung ba/ /tha dad pa yi rgyu 'di las/ /dngos dang dngos po med par snang / /bya rnams nam mkha' la lding zhing / /mun pa'i nang du dngos mthong dang //khung du byi ba la sogs dang / /nya rnams kyis ni chu nang du/ /sbrul rnams kyi ni mig gnyis kyis/ /thos pa dang ni mthong ba yin/ /'gal ba gzhan dang gzhan rnams ni/ /de bzhin du ma 'khor ba bsten/ /gnas dang gnas pa ma mthong ba'i/ /goms pas dgra la phog pa yi//shes pa'i rtog pa ma rtogs par/ /'ben la mi 'chor ji ltar phog /chu yi rgyun ni ci bzhin du/ /gal te rnam shes rgyu min na/ /dang po bzung ba goms med shor/ /phyi nas bzung 'di dgos ma yin/ /ri bo rnams ni mtho gyur dang / / rgya mtsho chen po gting dpag dka'/ /phra rab rnams ni 'dus pa yi/ /bya ba med na su yis bya/ /nus dang ldan pas byas na ni/ /de nyid smyon pa bzhin du yang / /bdag gis 'bad pa zhes bya bas/ /'jig pa'i dus la ji ltar 'jig /khab long gis ni rdo sogs kyi//lcags la sogs pa 'dren phyir dang / /sman dang sngags la sogs pa yi/ /nus pa su zhig gis ni sprul/ /de phyir ma rig sna tshogs pas/ /cog chung sgra snyan rgya chen bzhin/ /ji ltar snang ba 'di thams cad/ /de dag sems kyis nye bar sprul/ zad par bsgom pa'i rnal 'byor pas//ci lta bur ni yang dag 'grub/ /brtan pa'i rang bzhin dngos po rnams/ /gzhan dang gzhan du ji ltar gzhag /des na 'khrul par rigs pa yin/ /rnam pa du ma'i shel bzhin du/ /'di dag sems kyis khyab pa ste/ /bag chags chu la til mar bzhin//'jig rten pa yi ngo mtshar rnams/ /'ga' la'ang ngo mtshar gyur ma yin/ /sa bon thams cad sa la ni/ /'di dag ma lus yod ces bsam/ /ji ltar phyi rol gnas snang ba/ /re zhig dngos 'di yod yin na/ /de dag yod pa nyid du yang / /khyed kyis ci ltar nges par bzung //e ma sems yin zhe na rigs/ /rgyu med par ni ci phyir sdang / /gang yin de ni rnam pa ni/ /bag chags 'bras bu mi 'dod dam/ /rnam par shes pa phyir byung nas/ /phyi yi yul rnams 'dzin nam ci/ /thog nas de ci yod dam med/ /gal te yod na yul ci dgos/ / lung gi don ni nges yin na/ /mngon sum don la lung ci dgos/ /mi snang 'jig rten pha rol sogs/ /lung las gsungs pa'i rjes 'brang rtogs/ /drang ba'i don yin phyir yang ste/ /lung gis yod par 'grub ma yin/ /gzugs la sogs pa'i skye mched kyang / /bstan pa sems kyi spyod yul lo//rang gi sa bon las skye bas/ /dbang po rnams kyang sems nyid yin/ /yul gyi rnam pa skye ba la'ang / /de nyid la ni yul du brjod/ /'di dag blo yi cha yin par/ /mkhas pa yis ni yongs su rtogs/ /cha shas med pa'i sems 'di la/ /'jig rten kun rdzob bden par yod//'di la mig med gzugs kyang med/ /snang ba med cing yid byed med/ /rmi lam lta bu'i 'khrul pa'i sems/ /thams cad yod min med pa'ang min/ /bzang dang ngan pa'i grogs bsten las/ /rgyud ni gang yin khyad par 'gyur/ /gzhan gyi sems kyi dbang gis ni//de yang 'byung pos bzung sogs bzhin/ /nye ba'i rim pas gzhan bsad na/ /skad cig mar yang 'dod ma yin/ /'on kyang tshul 'dis gang du yang / /gsad bya med cing gsod byed med/ /mi 'dod pa yi lus kyi mthus/ /drag shul spyod pa'i rnam rig ni/ /'jigs pa'i don du 'di skyes te//dmyal ba rnams kyi 'ba' zhig bzhin/ /ji ltar snang ba de bzhin du/ /chos kyi rang bzhin gal te yin/ /yang dag don ni mthong ba'i phyir/ /'gro ba thams cad cis mi grol/ /de nyid kyi phyir 'khrul pa yin/ /'gro ba 'di la rang byung rnams/ /thugs rjes 'khrul pa spang phyir yin//bdag nyid bde la don med 'gyur/ /glog dang 'brug dang char dag ni/ /sprin dang rlung dang gnam lcags ni/ /sems tsam yin las ma gtogs par/ /nam mkha'i dkyil du 'grub ma yin/ /gal te dngos po yod yin na/ /'ga' yang bdag nyid kyis grub na/ /'dod pa'i dbye bas nges phye ba'i//'di dag du mar mthong mi 'gyur/ /'ga' zhig gzhon nu la chags shing / /gzhan dag bud med bar ma la/ /kha cig tsho la gzhan dag ni/ /skem dang kha cig sngo bsangs la/ /gang tshe bud med rnam pa ni/ /sems nyid las skyes de yi tshe/ /ngo tsha dang bcas 'dod chen gyis//bdag nyid bdag la su zhig chags/ /'di dag thams cad blo ldan gyis/ /thams cad du ni rang dngos yin/ /yul gyis te bar longs spyod phyir/ /byis pa lta bur 'jug mi rigs/ /rang gi rmi lam gyis 'khrul phyir/ /lag pa yis ni lag bzung nas/ / bdag gis rkun ma 'di zin ces/ /smra ba gzhan gyis spong bar byed/ /dud 'gro rtswa skam bza' bar sems/ /mi rnams bza' bar sems ma yin/ /rnam rtog 'jug pa ngo mtshar che/ /rnal 'byor pas kyang bsam mi khyab/ /ri dwags me mdag mi za zhing / /dug gi byi ba dug gis ni//srog ni mtha' ru byed pas kyang / /de ni 'chi bar 'gyur ma yin/ /mas dran pa yis rgyud dang ni/ /reg dang gnyid dang rlung rnams kyis/ /nya dang bya dang khyi dang sbrul/ /sems can gzhan rnams 'tsho ba yin/ /sna tshogs las kyis dben pa yi//sla k+Sha mthong na sbyin mo dang / /gnod sbyin 'khor gyi skye tshogs kyis/ /rang gi khyim dang 'dra bar ro/ /yi dwags kyis chu rnag 'brub cing / /bshang gci rnyog pa dang ldan snang / /mi yis chu bo dri med par/ /mthong ba dang ni 'thung ba'ang yin/ /dge min dge ba'i 'bras rnam pa//las kyi bag chags kyis bsgos pas/ /rnam rig de dang de nyid ni/ /stong pa nyid kyi don la 'jug /e ma'o yul ni sna tshogs pa/ /dus gcig la ni du ma ru/ /rtog pa'i rjes su 'gro ba yis/ /rol mo'i tshogs kyi sgra bzhin no/ /gal te don yod don byed nyid//med na'ang de ru mi 'gyur ro/ /gzhan gyis sgyur ldan se'u zos pas/ /gzhan gyi kha nas chu 'dzag 'gyur/ /mtshan mo 'bras bu za ba las/ /gzhan 'ga' zhig gis dris pa na/ /gal te se'u za zhes smras na/ /thos pas 'gyur ba min nam ci/ /rmi lam mdzes ma dang 'phrad pa'i//bde ba thob la rgyu yod min/ /don med pa las khu ba ni/ /shor zhing 'byung ba min nam ci/ /rmi lam mthong ba 'di yod na/ /gal te goms pa'i stobs kyis 'dzin/ /gzhon nu ma sbrum bu skyes pa/ /mthong ba 'di ni rigs ldan min/ /khang pa'i nang du yun ring dang //lam dang ri dang yul rnams ni/ /rnam pa tha dad mthong ba'i phyir/ /rmi lam mthong la don med do/ /rnam par rig pa'ang rnam rig gi /don min gal te mi 'dod na/ /de tshe de yi grub pa'i mtha'/ /nges par rags pa'i gnas thob 'gyur/ /gzhan gyi sems la sogs pa'i yul//rnal 'byor pa yis gang shes pa'ang / /de yang shes pa kho na min/ /bdag nyid sems kyis mos pa bzhin/ /kun rdzob ldan shes thams cad la/ /mkhas pa dang ni gzhan dag gis/ /bzung ba dang ni ston pa ni/ /mtshungs pa kho nar rab tu 'jug /stong nyid mthong ba'i dang po ru/ /snang ba kho nar 'bras chen yin/ /gang phyir 'jigs med thob pa ni/ /'jig rten gzhan bzhin 'jigs pa med/ /'chi ba dang ni skye ba nyid/ /sprul pa 'dra ba nyid du bzhed/ /bdag nyid gang yin de yis ni/ /de ltar 'jigs pa zhes byar 'gyur//'di dag las kyi sprul nyid du/ /sa ni gsum po shes pa yang / /gal te phyir yang 'jigs 'gyur na/ /kye ma bdag 'dra'i skye bo nyams/ /yan lag mchog ni gnyis pa dang / /de bzhin mig ni gsum pa ste/ /bcad dang phyung bar dogs pa ni/ /de gnyis med na gang las 'gyur//de ltas blo dang ldan pas yul 'di rnam par nges/ /lhag pa'i dri ma dang 'dres rnam par bsgoms pas kyang / /dag pa'i phyir na nam yang dri ma ldan ma yin/ /sprin dum ma dag pa yis dri med nam mkha' bzhin/ /'dir ni mang smras ci zhig bya/ /gal te 'ga' zhig gis bsgoms na//khyi dang ri bong rta mgor skyes/ /rwa yang mthong bar snang ba yin/ /sbal pa ral pa'i thod bcings shing / /kha dog gsal ba'i thal bas byug /tshangs pa'i skud pa dkar po thogs/ /phrag pa la ni spyi blugs bzhag /khang pa mun pa dang bcas la/ / 'jigs pa de dang der brtags pas/ /rang sems nges par snang ba ni/ /byis pas gdon mthong min nam ci/ /shin tu 'jigs pa'i gnod sbyin gzugs/ /rang gis bris nas bltas pa yin/ /dben pa ru ni gcig pu yang / /ri mo mkhan 'jigs min nam ci/ /sdong dum la ni rkun ma dang //thag pa la ni sbrul brtags pas/ /skye bo du ma glo bur du/ /'jigs pa thob pa ma yin nam/ /rang gi rtog pas bzo byas pa/ /bden nyid min pa'i yul rnams kyis/ /byis pa thams cad rnam bcom ste/ /bdag nyid kyi ni skyon las so/ /nyin mtshan mtshungs pa'i long ba la'ang //nam langs zhes bya'i sgra thos nas/ /sngon gyi rdzas rnams mthong ba ni/ /snang bar bcas bzhin skye bar 'gyur/ /yul dus la sogs dngos po rnams/ /rmi lam 'khrul pa'i rnam shes la/ /lam ni thung ngu dag la yang / /ring por snang bas dub par 'gyur//de bzhin gang phyir 'dod ldan gyi/ /skyes bu 'dod ma dang bral na/ /chu tshod grangs mtshungs nyin mo yang / /lo brgyad dag dang mtshungs par 'gyur/ /de nyid gzigs pa de rnams kyi/ /de lta'i tshul du der brtags nas/ / tha snyad du ni mdzad na yang / /bden no snyam du mi sems so/ /de ltar bstan pas sna tshogs 'di/ /rtog pa'i mtshon gyi rgyu las ni/ /thams cad ri mo 'drar mthong ste/ /ngo bo nyid kyi mthong ma yin/ /e ma'o bden min kun tu rtog pas thog ma med pa'i 'khor ba ru/ /sa gsum po 'di bsdus pa bzhin du sems kyis nam mkha' dag khyab par//bris pa'i mnyam dang mi mnyam mtho dman 'gro ba ngo mtshar las ngo mtshar/ /bden no lta bur 'khrul pas rig par yang ni blo yis gzung bar bya/ /gal te dngos po dngos gyur na/ /slar yang dngos med 'gyur ba ci//de bzhin nyid bstan rang bzhin phyir/ /rnam gzhan nyid du mi 'thad do/ /ming dang rigs sogs yon tan gyis/ /gang zhig chos rnams mthong gyur pa/ /phyin ci log gis bcom pa yis/ /mkha' khongs ri mo de byed do/ /de phyir sems kyi rang bzhin gyi/ / chos rnams rang bzhin med pa nyid/ /gang zhig rnam pa gzhan du rig /de ni don dam rigs pa min/ /gal te rtog pa yod min la/ /gal te stong nyid yod na yang / /gsal ba dang ni mi gsal ba/ /rang nyid 'bad pa med par 'gyur/ /mi shes na ni rtog mi nyams/ / rtog pa nyams pa rtogs par byed/ /sgrib byed brtan pa'i rang bzhin can/ /stong pa nyid ni gsal mi 'gyur/ /'di dag dbye ba cung zad med/ /rtog pa med par 'gyur zhe na/ /gzhan dbang nyid kyis stong pa nyid/ /yang dag par ni mthong bar 'gyur/ /ji ltar 'di la yang dag zhugs//ngo bo nyid gsum mthong ba'i phyir/ /de mthong ba las chos kun la/ /ril por 'dzin pa ldog par 'gyur/ /gcig pu mthong mi tha dad pa/ /gsum gyi tshul du gsal bar mthong / /bag chags kyis bsgribs nus pa las/ /de la brtags pa bsal bar 'gyur//kun brtags rim gyis dman pa las/ /gzhan gyi dbang ni rab tu gsal/ /dang po las ni rab g.yos bzhin/ /rang bzhin ma mthong tshul gyis so/ /rim gyis de yi snang ba dang / /bral na slar yang stong pa nyid/ /de nyid bstan par byed pa bzhin//snying la gsal snang skye bar 'gyur/ /de yang glog bzhin mi brtan pa'i/ /skad cig la ni 'ong zhing 'gro/ /rnam kun thog ma med dus kyi/ /gnyis kyis de nyid bslad phyir ro/ /slar yang ji srid de dbus su/ /g.yo med ma gyur de srid du/ /gnyis dang gnyis min go 'phang dag /'char zhing nub pa nyid yin no/ /g.yo med gyur nas phyir yang ni/ /'od zer stong par shar ba bzhin/ /'gal phyir mun pa 'jug pa yis/ /gnas skabs thob par mi 'gyur ro/ /gnas skabs de yang 'di 'dra bar/ /shes min stong nyid du brjod mod//'jig rten la grags med pa pa'i/ /don gyi rjes su ltung ba min/ /med pa nyid dang gzugs nyid do/ /'di ni tha snyad don dam du/ /dngos po med pa'i chos rnams la/ /yod dam med pa su yi yin/ /khyod kyis dran par mi bya zhes/ /smras na bkag pa 'di dran pa/ /ji ltar de ltar yod min pa'i//sgra las gzhan ni rtogs par 'gyur/ /rnam par rtog las don rnams shes/ /don gyi blo las rnam rtog kyang / /gnyi ga rnam rtog chos yin phyir/ /yod pa gang yin med gang yin/ /rten ni gang zhig bsgoms pa yis/ /med pa yang ni yod par 'gyur//gal te de bzhin du 'dod pa/ /de bzhin yod pa nyid kyang thob/ /de bzhin yod dang med pa dang / /bde sdug la sogs med par bzhed/ /ltos pas grub pa de thams cad/ /ring thung la sogs bye brag bzhin/ /skyes bu'i sdug bsngal zhi ba la/ /bde ba zhes byar rab tu brtags//bde ba nyams pa sdug bsngal yin/ /gnyis po 'di ni ltos pas yin/ /ltos pa nyid las kun 'byung bar/ /'di dag thams cad shes par bya/ /gcig nyid la ni ma ltos par/ /gzhan dag khong du chud ma yin/ /gzhan sel ba yi rnam shes ni/ /spyod yul rnam par ma dpyad par//bstan pa la sogs bsgrub pa yis/ /kha cig 'khrul pa yang dag bskyed/ /yi ge tshig dang ngag dang ni/ /rtags rnams dang ni tshig dang ni/ /bya ba byed pa'i 'brel pa dang / /brdzun phyir rjod par byed ma yin/ /tshigs bcad tshig rkang lnga pa'am/ /gsum pa ru ni ci mi 'dod//rjod byed brjod bya la ltos nas/ /mkha' 'gro'i dam tshig bzhin du 'gyur/ /chos rnams gzung bar bya ba yin/ /sngon gyi mkhas par rang 'dod pas/ /sgra rnams sbyar bas nyon mongs la/ /'jig rten pa dag ci phyir btsud/ /'di ni sna zhes brjod pa na/ /mgo bo bskor bar gyur pa yi//lag ngar bkug pa'i lag pa yis/ /dris la su zhig ston par byed/ /sgra yi bdag nyid 'jig rten pa/ /bdag nyid gus par 'gyur ma yin/ /sgra 'don pa yi sbal tshogs dang / /brag gi dkyil gyi gab tshe bzhin/ /gzhan gyis gzhan ni rig pa ru//'brel pa med phyir mi rigs so/ /ral gri gzhan la brgyab pa yis/ /gzhan dag gcod par byed dam ci/ /ma byas pa yi dngos po ni/ /'ga' yis gang yang mthong ba med/ /dngos po med pa'i ngo bo yis/ /dngos po rab tu bskyed pa yin/ /dngos po dngos po'i rang bzhin min//dngos po'i dus na dngos med phyir/ /de nyid phyir na 'das pa'i dngos/ /'byung ba zhes ni brjod pa yin/ /de nyid phyir na skyob pa yis/ /'byung ba zhes ni rab tu gsungs/ /'byung ba kun gyi 'byung mchog phyir/ /nges pa'i tshig la mkhas pa yin/ /gcig la brgya yi blo skye min//de bzhin brgya yi bar la'ang med/ /de bzhin du yang brgya brjod pa/ /sems ni 'khrul par gyur pa yin/ /mtho ris sogs pas bum pa'am/ /mthong ba'am ni ma mthong ba/ /de yi bdag nyid rtogs 'gyur na/ /tshig tu ston pas ci zhig bya/ / glang po dang ni sa srung glang / /bud med dang ni lha'i bud med/ /de las snga na med blo med/ /mthong ba las ni mchog tu skye/ /mthong ba gzhan min smra ba'ang gzhan/ /thos pa gzhan yin rtogs pa'ang gzhan/ /de ltar 'jig rten smyon pa bzhin/ /bdag nyid khong du chud ma yin/ /bdag nyid smyon pa yin zhes pa//de ni ji ltar smyon yin 'gyur/ /yang dag rang shes smyon pa min/ /rnam par 'khrul pa smyon par brjod/ /yul sogs nges pa'i rnam par ni/ /'gro ba gsum po gang snang ba/ /de phyir de ni 'khrul ma yin/ /rnam par rig yin de yi phyir/ /glang po'i don dang de'i rnam pa//de nyid dngos med mkhas pa yin/ /kun brtags la sogs rang bzhin rnams/ /rim pa bzhin du shes par bya/ /sgyu ma mkhan gyi sprul pa yis/ /glang po gcig pu kho na la/ /don stong don du snang ba dang / /gzung ba'i dngos po brdzun don yin/ /de ltar yang dag mthong bas sngar//don du 'dzin pa ldog par 'gyur/ /gzhan dbang de yi rnam pa ni/ /de yi sems las byung ba yin/ /rnam pa de yi rnyog pa yang / /don gyi dngos po med mthong bas/ /bag chags spangs pa'i phyi nas ni/ /sa brgyad pa la ldog par 'gyur/ /sems kyi 'khor lo nges log na//phyir yang 'khor bas 'khor mi 'gyur/ /yongs su grub pa'i chos yin phyir/ /'on kyang yang dag skye ba 'byung / /ri mor bris bzhin g.yo ba med/ /rtog pa med cing 'dod pa med/ /de ni gnyis med spyod yul phyir/ /len dang 'dod pa cung zad med/ /smon lam rnams kyi mthu yis ni//thog mtha' med pa'i srid gsum du/ /rtog pa med par 'jig rten gyi/ /mun pa sel byed nyi ma bzhin/ /de phyir byed pa po rnams dang / /skyes bu'i las 'bras gang yin pa/ /de yi dge dang mi dge ba/ /skyob pas rtog pa'i ngo bor gsungs/ /chos dang chos min dka' thub gtong //bsdams dang des bsdams dul ba dang / /dud 'gro dmyal ba yi dwags dang / /lha dang bcas pa'i mi rnams dang / /'byung dang 'byung 'gyur phung po dang / /khams dang thub pa'i bstan pa dang / /ston pa dang ni nyan thos te/ /thams cad kun rdzob yin par bstan//dang po'i las can 'jig rten pa/ /dam pa'i don la gzhug pa'i phyir/ /thabs 'di rdzogs pa'i sangs rgyas kyis/ /skas kyi them pa lta bur gsungs/ /de ltar byis pas brjod pa rnams/ /mthar ni thams cad 'jig pa yin/ /brjod par bya min dpyad du med//cung zad gzhan yang gsal ba yin/ /de la nam mkha' gsal ba 'dis/ /stong pa nyid ni gsal bar byed/ /bdag nyid dang ni stong pa nyid/ /cung zad gnas pa'i gnas pa med/ /ji skad ston pa'i lam 'di ni/ /cung zad kyang ni mthong ba med//nyams shing zhi ba spangs pa yi/ /'jig rten ma lus bzhad gad bzhin/ /bdag nyid kyis ni sngon gyi rabs/ /de bzung ba yi ro gcig dngos/ /gang zhig sems par byed na yang / /gdon mi za bar ngo mtshar 'gyur/ /gal te 'di kun stong nyid yin/ /dge ba'i rtsom pa don med 'gyur//gang gi stong nyid don byas pa/ /bden te don la don med yin/ /de tshe sdig pa'i rtsom pa yang / /de yis shin tu mi rigs so/ /gang tshe stong mthong rnal 'byor pas/ /chad pa stong bzhin 'ching ba med/ /rtog pa'i nang du lhung ba la/ /de dag thams cad gzhan nyid 'gyur//rgyu dang 'bras bu'i dngos po yi/ /'khor ba'i 'bras des thob phyir ro/ /rmi lam na byas las rnams la/ /dge dang mi dge ci zhig yod/ /ma sad par yang 'bras mi myong / /ma lus rmi lam nyid na yang / /sad na med par shes pa'i phyir/ /rmi lam 'jug pa'i 'bras bu med//de phyir ye shes skyes pas na/ /thams cad kyi 'bras mtha' ru brdzun/ /rmi lam mgal me mig 'phrul ni/ /skye dang 'gag pa tha dad med/ /rgyu dang 'bras bu'i dngos po ni/ /gang gis thams cad yang dag mthong / /nyi ma gzhan la yul myong dang / /gang zhig rmi lam nges sad dang //rang bzhin nyams su myong ba ni/ /de dag bye brag gang yin smos/ /gang dang gang ni rten cing 'byung / /de dang de yi rang bzhin zhi/ /sgyu ma'i yan lag tshogs pa yis/ /sgyu ma mkhan gyis ston pa bzhin/ /rnam pa du ma tha dad pa/ /gos 'dra ba yi dngos po rnams/ / stong nyid me yis bsregs pa na/ /thal bar bye brag 'ga' yang med/ /snod dang sems can zhes bya ba'i/ /'jig rten gnyis ka bsregs nas ni/ /bdag nyid de yang de nyid du/ /me lce bzhin du bsregs pa yin/ /stong nyid me yis nges bsregs par/ /de ltar 'gro ba gsum mthong bas//'khor ba ru ni gnas pa na/ /'ga' la'ang chags min rnal 'byor pa/ /gang tshe stong nyid la gnas pas/ /rab tu spyod min spyod pa'ang min/ /spyod pa ma yin spyod yul min/ /de tshe de la phra mor 'byung / /stong nyid la gnas phyin chad ni/ /bud shing bzhin du thams cad spong / / me bzhin yongs su mya ngan 'das/ /de ni lhag ma med par 'gyur/ /de ltar gyur pa thogs pa med/ /gos med chags pa yod ma yin/ /phyir yang du ba 'byung ba med/ /rnal 'byor rig pas yang 'bar med/ /'bar ba med pa zhi ba thob/ /zhi bas kyang ni nyer zhi nyid/ /nye bar zhi bas rab zhi nyid//rab tu zhi bas yang bsil nyid/ /bsil bar gyur pas gdung med nyid/ /gdung ba med pas rims med brjod/ /rims med pa yis rdul med dag /gnyis med gnod pa med pa yin/ /bdag gi med pas rang 'dzin med/ /srid pa'i rgya mtsho yang dag brgal/ / phyir yang skye ba len mi byed/ /skye med de la 'chi ba'ang med/ /skye dang 'chi ba spangs pa yis/ /bdud rtsi'i go 'phang nyams su myong / /tshul de thob nas phyir yang ni/ /thob par bya ba dmigs pa med/ /'khor bar skye ba'i sdug bsngal dang / /sdug bsngal gyis rgyu bde bas kyang / / 'dod chags zhe sdang 'chang ma yin/ /thams cad du ni btang snyoms spyod/ /ltos dang bcas pa thams cad 'jig /ltos med rtag tu 'jig pa med/ /'jig pa med pas mi 'gyur thob/ /'jig med 'gyur ba med par bzhugs/ /'jig pa med pa'i gnas thob pa/ / gang la'ang gnas pa ma yin no/ /mya ngan 'das pa'am 'khor ba la/ /dbang thob khyab bdag dbang bsgyur phyir/ /de dbang de thub de ston yin/ /bya ba byas te de bzhin gshegs/ /bde bar gshegs te'ang gang yin pa/ /ye shes dbang phyug rnam 'phrul ba'o/ /yul la shin tu chags pa ni//byis pa'i sems ni ma sbyangs pas/ /stong nyid bstan pa thos pa yis/ /snying ni gnyis su 'gas par 'gyur/ /rgya che ba yi chos thos dang / /bshes gnyen bzang po bsten pa dang / /rigs ldan 'bar bar byed pa ni/ /'di la 'jug par 'gyur ba yin//rtag tu brtson dang sbyor ldan pa/ /lam 'di la ni rjes zhugs pas/ /ring por mi thogs chos rnams kun/ /bdag med pa ni rtogs par 'gyur/ /chos 'di yongs su ma bsgoms pas/ /chos nyid thob par mi 'gyur te/ /chu ni thos dang mthong ba yis//ma 'thungs skom pa ji ltar bzlog /tshul gnas thos dang shes rab ldan/ /bsod nams tshogs ni yang dag bsags/ /yul rnams la ni dug bzhin blta/ /lus dang srog la chags pa med/ /khyim mam yang na nags su ni/ /byang chub sems dpa' mnyam gzhag ste//dang por bdag med lam gyis ni/ /sangs rgyas go 'phang la 'jug pas/ /'jig rten don ni gtso bor byas/ /rang don zhar mdzad thugs rje'i bdag /'jig rten nyid dang chos rnams ni/ /rang bzhin gsum gyi ngo bo nyid/ /skad cig tsam yang skabs ldan na/ / khyim par gyur pa yin yang bsgom/ /skyil mo krung ni bcas nas su/ /sna rtser g.yo ba'i yid bsdus la/ /longs spyod nyid ni nyer gnas pa/ /brdzun dang slu bar byed pa yin/ /ji ltar snang ba'i rang gi sems/ /dmigs pa mdun du byas nas ni/ /'dod chags gnas la chags mi bya//nyes dang ldan la sdang mi bya/ /gti mug bcas pas rmongs mi bya/ /mkhas pas dmigs par mi bya'o/ /chags pa'i gnas la chags byed dang / /zhe sdang can la sdang bas gnod/ /nyon mongs shin tu 'phel ba'i phyir/ /rmongs pa gti mug gis ni nyams/ /ting nge 'dzin ni mi brtan phyir//rnam par rtog pas nyams byas nas/ /nyams pa'i sgo ni de dang des/ /gzhan dag nyid ni rab tu rtog /rmongs pa'ang 'du shes rmongs pa'i phyir/ /rmongs pa'i dngos po sems dpa' yin/ /shin tu mun nag smag tu lhung / /'khrul pa yis ni long ba bzhin//mkhas pas dmigs pa'i gnas la ni/ /bzlog pa ru ni yid la bya/ /nyon mongs cung zad goms pa yis/ /me la snum gyis bzhin du 'phel/ /de nas sbyor ba byas pa yis/ /g.yul ngo ru ni dpa' bo bzhin/ /'dod chags la sogs pa yi gnas/ /dpa' ba'i dgra la bsnun par bya//ma lus pa ni gzigs pa yis/ /nyon mongs de nyid sgrib par gsungs/ /de phyir 'bad pa thams cad kyis/ /de dag nyid ni spang bar bya/ /rtags sogs bdag nyid ma lus pa/ /de dag gsum du dmigs par bya/ /don 'dzin don du nges snang dang / / don rnams stong pa nyid bstan pa/ /bsams pa yis ni shes rab kyis/ /dbye ba nges par yang bsam bya/ /shes rab pha rol phyin pa'i tshul/ /bsam gyis mi khyab bsam par bya/ /gang snang de ni de nyid min/ /gang zhig ma mthong de de bzhin/ /dngos por rtog pa nyid kyis long / / rab rib kyis ni 'khrul pa bzhin/ /bdag gis cung zad mthong bden min/ /kun tu brtags pa 'khrul pa tsam/ /rgyu mtshan med pa'i mtshan mar yang / /yun ring gnas ni mtshan mas bcom/ /kye ma 'jig rten pa yi mig /brdzun pa'i dbang gis 'khrul pa yin/ /ri yi rtse mo'i skra mthong zhing //rags pa'i ri bo mthong ma yin/ /skra nyag mu tig la phog pa/ /'gro na 'phong rkyen gang yin pa/ /mtshan ma la phog khyad 'phags par/ /rkyen te gnyis po rkyen ma yin/ /don du lta la thams cad kun brtags kho na'i don ni shin tu gsal bar snang / /rlung gis bskyod pas gar mkhan lta bu'i dpa' tshogs 'dra ba'i ri dgas chu bzhin no//rdzing bu la sogs chu ni nye bar de bzhin bden par rigs min snyam/ /yang dag ma yin brtags par lhung bzhin 'bad med phal cher yang dag 'dzin ma yin/ /sems kyis med pa 'di sems pa/ /rgyu mtshan rmi lam 'jug pa bzhin//kun brtags med pas gzhan gyi dbang / /de na sems kyis thob pa yin/ /nyon mongs med pa'i rang bzhin snang / /yongs su rdzogs pa'i sa dang nye/ /yongs su rdzogs pa gang thob pa/ /rnam par mi rtog pa la gnas/ /yang de mthong ba'i blo ldan gyis/ / gzhan gyi dngos la 'jug ma yin/ /kun brtags bdag nyid med pa'i phyir/ /de nyid shin tu bsgom ma yin/ /brdzun par bdag nyid mthong bas yang / /gal te 'di de de dag nyid/ /bdag nyid myur du mthong na ni/ /de tshe rmi lam bzhin du bsam/ /rmi lam lta bur nges shes na/ / phyi nas brdzun pa'i bdag nyid ni/ /skad cig gcig la snang ma yin/ /gnyen po yis ni bkag phyir ro/ /snying po de lta bu 'dzin pa/ /med pa'i mtha' la gal te reg /de bzhin nyid la shin tu dmigs/ /gal te de nyid dmigs gyur na/ /de ni spang ba'i don phyir yang //stong nyid shin tu dmigs par bya/ /sna tshogs lta kun spang ba'i phyir/ /spong ba'i stong nyid bstan pa yin/ /rdo rje sbyin gyis byugs pa yi/ /khang pa'i sgo la lha min bzhin/ /rnam rig la 'jug rnal 'byor pas/ /phyogs gnyis yang dag reg ma yin/ /de gnyis dbus su bag med pas//gzhan 'ga' zhig gis reg gyur na/ /rdo rje sbyin gyis bzung nas ni/ /de yi lus ni bsreg par 'gyur/ /snang ba thob pa'i rnal 'byor pas/ /de yi rtags kyang shes bya ste/ /dngos grub med na mi 'byung ste/ /du ba sol ba dngos po bzhin/ /kun tu brtags pa spang ba des//mi gsal ba yi ri mo bzhin/ /bsam gtan las ni langs pa yis/ /'gro ba thams cad mi gsal snang / /zad dang rnying pa lta bu dang / /kun tu zhib pa lta bu dang / /grong stong lta bur dben pa dang / /dga' ba med cing rten med pa/ /shin tu skyo skye 'gro ba la/ /tsi ri sgra 'don pa la bzhin//bdag dang bdag gi med pa dang / /ming tsam 'ba' zhig kho na'o/ /gzhan dbang zhes bya mthong bas kyang / /rang bzhin 'di lta bu ru snang / /rang sems shing rta la zhon dang / /bdag gis snang du zhugs lta bur/ /mig 'phrul 'byung ba lta bu ste/ /de nyid kho na 'khrul pa tsam//ma lus mun pas khyab pa bzhin/ /de la kun brtags stong ma yin/ /bag chags lhag ma'i ri mo yis/ /thams cad bris pa lta bu ru/ /nyon mongs nyid kyis khyab pa dang / /'khor lo lta bur 'khor ba dang / /rmi lam gsal sad shes pa dang / /mtshan dang mtshan nyid med par snang //mthong nas mi snang dang mtshungs par/ /ci zhig lta bur snang ba yin/ /yongs su grub pa shes pa ni/ /thams cad ro gcig bdag nyid de/ /cha shas med cing thog mtha' med/ /rnam pa med cing gzung du med/ /skyo med 'tshe ba yod ma yin/ /ring po ma yin zlum por min//nyi mas mun pa bsal ba yi/ /nam mkha' lta bur dri ma med/ /mnyam nyid chos ni rtogs pa'i phyir/ /thams cad mi mnyam pa dang mnyam/ /kun rdzob tu ni chos 'di snang / /dam pa'i don du snang ma yin/ /rnam par rtog pa gzhan gyi rgyu'i/ /rnam rtog kun rdzob ces byar brjod//rnam par rtog pa bzlog pa ni/ /de nyid kho na dam pa'i don/ /ji ltar ming gis bstan de yang / /kun rdzob nyid du gnas pa yin/ /dam pa'i don ni de bzhin te/ /de bzhin tshig gis de yul min/ /rig la gnas pa ma yin pas/ /de phyir de 'jigs thub pa yis/ /stong nyid bdag nyid gsungs shing gsungs//tha dad pa yi chos rnams bstan/ /yun ring 'phel ba'i rnam rtog la/ /byis pa rnams ni dga' ba nyid/ /spros la sems ni chags pas na/ /de lta na ni 'di 'phel lo/ /mtshan ma 'god pa'i don la ni/ /sems 'di yang ni mkhas pa yis/ /rnam rtog bye brag zhi ma yin//mi 'gyur ba ni gang du'ang med/ /bdag med pA la sems dmigs pa/ /btang snyoms 'dra ba thob pa dang / /gnyid log lta bur 'dod pa med/ /dub pa brtags pa lta bu dang / /stong nyid stong par mthong ba yis/ /mig ni 'dzum par byed ma yin/ / mgo 'phang mthon po ma yin dang / /sems dang sems byung 'gag par 'gyur/ /rtags ni 'di dag mthong nas kyang / /bdag gis don byas 'di nyid mthong / /dpa' bos bsgom pa 'dor ma yin/ /mchog las kyang ni mchog yod phyir/ /de yang 'di zhes 'ga' yis kyang / / de nyid bstan par nus ma yin/ /'di ni goms byas rnal 'byor pas/ /bdag nyid kyis ni rtogs par 'gyur/ /rnam par rig tsam nyid mthong na/ /de ni mtha' gnyis dbus la gnas/ /'gro ba ma lus 'di dag la/ /de nyid phun sum tshogs pa ston/ /de nyid phun sum tshogs gnas phyir//snying rje ldan pa bde gshegs sras/ /srog gis kyang ni sems can don/ /byed la btang snyoms 'jog ma yin/ /yul rnams 'ga' yang sems pa med/ /rmi lam 'jug pa bzhin du brten/ /bu dang bu mo la sogs pa'i/ /gzhan gyi nye bar longs spyod kyang //bag med gnas ni rgya che bas/ /sems ni rnam par 'gyur ma yin/ /'byor pa dang ni rgud pa la/ /thams cad du ni sems mnyam nyid/ /dus ma yin pa'i sprin bzhin yang / /ga la'i mkha' las sprin ldang ba/ /bdag nyid kyis ni de dang de/ /ngo mtshar rnam par 'phrul pa ston//dus rnams shes par dus gcig la/ /'bar ba dang ni char 'bab byed/ /sa la yang ni chu bzhin du/ /byi zul du ni byed pa'ang yin/ /ri la sogs pa g.yo ba dang / /'byed dang sdud pa de bzhin no/ /bdag nyid nam mkha' la 'gro zhing / /chu la ngang pa'i rgyal po bzhin//sprul pa yis kyang ring po nas/ /mthong dang thos byed de bzhin no/ /theg chen tshul la thams cad du/ /rigs kyi 'di ni gzhan la min/ /de las gzhan pa'i phyi rol pa/ /gang zhig cung zad mthong ba ni/ /rang gi ro las 'ongs pa ste/ /de nyid kyis ni lam 'di la//cung zad cig kyang mthong ba med/ /thams cad mkhyen pas thams cad gzigs/ /rnam pa tha dad brtags pa yang / /de nyid phyir na dngos gcig nyid/ /stong nyid don gcig mthong ba yis/ /'gro kun don ni gcig tu mthong / /phyogs gcig gi ni chu 'thungs pas/ / rgya mtsho ma lus shes par 'gyur/ /dus gcig la ni tha dad pa/ /yul la sogs pa tha dad la/ /stong par mthong ba ma gtogs par/ /skyob pa'i ye shes 'khrung ma yin/ /rang sems kyis ni kun brtags bris/ /phyi rol gsal ba'i dbyibs su gnas/ /skye ba du ma goms pas gsal//srid gsum ri mo'i bye brag bzhin/ /kun brtags de yi spros mkhyen pa'i/ /skyob pas 'di dag thams cad gzigs/ /dngos med mtshan med zad pa med/ /kun tu brtags pa 'ba' zhig go/ /'di bsgoms tshul gyis 'dod chags thul/ /rim gyis bde spyod 'dod pa med//thub dbang 'dod pa ma spangs pas/ /gnas mchog gzhan gyi don ldan thob/ /bde gshegs kyis gsungs dbye ba rab grags pa/ /don chen rnam gsal tshig gis rab sbyar bas/ /log pa'i lam zhugs mi shes mun sel bya/ /snang ba'i phreng ba 'di ni bdag gis sbyar//dngos por 'dzin pa spong byed yul gyi thob pa'i zhen pa gcod/ /sems la snang ba 'phel byed sgron me chen po gsal 'bar bzhin/ /ye shes snang skyes de nyid yang thob rang gi lag na gnas pa bzhin/ /shes rab pha rol phyin 'di rgyud gnas kun tu yid bzhin nor//kun rdzob sgro btags gsungs la phyi rol pa/ /nges pa'i don du zhen pas bde gshegs nyid/ /gang zhig phyi rol don 'dod de mdun du/ /slob dpon chang ba bde gshegs phyed mi mdzad/ /gang tshe 'jigs pa med pa'i byang chub mngon thob pas/ /khyod kyis kyang ni yi ges yi ge gsum mi mnga'//de tshe yun rings nas nyams lcags kyu med pa yis/ /phyin ci log la ji ltar mngon par brtson par byed/ /sangs rgyas pa dang phyi rol rnam par 'byed byed pa/ /gal te stong nyid gcig pu 'di ni ma bstan par/ /zhib mo'i blo yis rnam par dpyad byas na/ / grub mtha' thams cad mtshungs par 'gyur ba yin/ /gal te stong min rtag cing mnyam nyid ma yin na/ /tha dad bdag nyid rgyu mtshan skad cig ma dag tu/ /thams cad mkhyen pas dngos po yongs dpyad pas/ /gang gi rgyu yis ston par grub par gyur//gang zhig rnal 'byor pa yi dngos grub khyad 'phags rgyu/ /gzhan sems spyod yul shes pa'i nga rgyal yin/ /de dag bun pa'i dri ma lhag pa yin par 'dod/ /'ching ba'i bdag nyid byis la ji ltar gnas pa bzhin/ /gang zhig kun tu dmus long dang ni rab rib can//gnyis po dag las snga ma bzhin du mchog yin te/ /bdag ni long ba yin zhes nga rgyal gyis stong gi /rab rib kyis mthong 'bras bu med la nga rgyal min/ /gang zhig rang skyon skyon gyi ngo bor mi shes pa/ /de bzhin yon tan kun las yon tan du ma yin/ /dge ba'i bshes gnyen rnams la gus par byed ma yin//de dag de nyid ro ni ji ltar 'thung bar 'gyur/ /nam mkha'i dkyil la ri mo byed pa la mkhas pa/ /dngos po'i bye brag ston pa'i brtson 'grus can/ /kye ma thog mar spros pa thob pa'i 'chad pa pos/ /skye bo gzhan la sna tshogs bstan pas spros pa bskyed//chu nang sprul zhugs rjes ni mthong ba dang / /nam mkha'i me tog phreng bas rab tu rgyan byed dang / /rgyu spun med pa'i snam bu 'thag par byed pa ni/ /'jig rten rnams la ji ltar ngo tsha mi shes 'gyur/ /sun 'byin 'dod pas kyang ni ngag gcig 'dzin byed pa//thub pa'i dbang po'i gsung la de gus min mod kyi/ /shin tu mngar ba myangs nas kha ba'i ro bzhin du/ /gzhan gyis smras pa'i tshig la rjes su chags ma yin/ /khyad par 'phags pa'i bud med 'dod pa dang / /gsal ba'i rigs rgyud dbang phyug khyim 'dod pas/ /glang po'i khyu yi gtso bo spangs nas ni//dman pa'i bzhon pa bong bus su zhig 'gro/ /snang ba'i phreng ba zhes bya ba slob dpon kam+pa la'i zhal snga nas mdzad pa rdzogs so// //rgya gar gyi mkhan po ku mA ra ka la sha dang / lo tsA ba dge slong shAkya 'od kyis bsgyur cing zhus pa'o/