CLOSE WINDOW

D3893
བོད་ཡིག

/mkhas pa rnams kyis bzod par mdzod/ /de kho na la 'jug pa'i 'grel pa slob dpon dpal sbas kyis mdzad pa rdzogs so//[ ]@##/ /rgya gar skad du/ ma d+h+ya ma ka na ya sA ra sa mA sa pra kar Ni/bod skad du/ dbu ma'i lugs kyi snying po mdor bsdus pa'i rab tu byed pa/ thams cad mkhyen pa la phyag 'tshal lo/ /gang zhig thugs brtse'i ngang gyur pas/ /sems can rnams la dbu ma'i lam/ /mtha' yas pa dag ston mdzad cing / / the tshom ri bo mthon po'i rtse/ /ma lus rnam par 'joms pa po/ /tshig dbang gzhon nu'i gzugs mnga' ba/ /kun tu bzang po de la ni/ /phyag 'tshal nas de rgyas par bya/ /bde gshegs sras po smra mkhas rnams kyi dam pa gang / /gsung snyan gsal bas 'gro ba ma lus tshim par mdzad//gzhon nu'i gzugs 'chang phyag na ut+pal sngo bsnams pa/ /thub dbang rgyal sras bcas pas gleng bstod rgyal ba mdzad/ /klus bod dri ma med blos bden pa gnyis la brten nas gus par ni/ /thub dbang bka' lung rigs pa dag dang mi 'gal gtan la phab mod kyi//rmongs dang sdig pa'i grogs la brten pa'i dbang gis skyon dag rjod byed de/ /de phyir blo gros ldan rnams 'di la rtag tu rab gus bya ba'i rigs/ /thub pa khyu mchog dam pa thugs rje ldan pas mdo sde de dang de las sems can la//srid 'gro'i sgo bzang dang de zhi ba'i bgrod pa gcig dang rnam gnyis bdag nyid chos 'di bstan/ /bshad pa gong ma la ni mkhas rnams rtsod pa'i lan gyis yul rnams mang po yod min na/ /nges par legs la blo rgya chen po rnams kyang rmongs te de phyir 'di la 'bad pa byas//de ltar bsams nas che rnams rang don 'dod pas 'di la zhugs/ /des na bdag kyang blo gros chung bzhin de yi rjes su slob pa yis/ /zhugs pa yin pas mkhas pa rnams kyis cis kyang mi dpyad de/ /byis pa pha yi lam rjes 'brang ba smad par bya ma yin/ /dngos dang dngos po med pa yi//gdon gyis thebs pas skye bo rnams/ /khams gsum 'khor bar bsams nas ni/ /de dag med pa 'dir brjod do/ /de la sgrib lam ma lus pa/ /dkrol phyir rnal 'byor can rnams la/ /lung dang rigs pa dag gis ni/ /phyi rol dngos po dgag pa brjod//nang tsam yod pa nyid brten nas/ /phyi rol yod pa nyid bkag na/ /'di ltar phyi nas 'di yang ni/ /bde blag kho nar khegs par 'gyur/ /phung po la sogs yod pa dang / /de ni med pa bzlog yin pas/ /de phyir de ni gang yin zhes/ /med pa nyid ni gsal brjod dgos//ri bong rwa sogs gang yin pa/ /de mkhas rnams la med par grags/ /de dag bkag pas phung stsogs la/ /yod pa nyid du cis mi 'dod/ /de ni rigs min gang gi phyir/ /yod dang med par smra rnams kyi/ /de dag gnyi ga'ang ma grub ste/ / phan tshun ltos nas gnas phyir ro/ /ba lang rwa las ltos te 'dir/ /ri bong rwa stsogs 'gog byed na/ /gang tshe de go yod min na/ /ji ltar de go med par 'dod/ /rags pa gcig pur 'gyur ba'am/ /rdul bsags bdag nyid 'gyur grang na/ /rnam pa gnyi ga 'ang rung min te/ / de dag tshad mas gnod phyir ro/ /snang mi snang sogs mi rung phyir/ /snang ba'i spyod yul min pa'i phyir/ /de bas gzugs ni gnyi ga yi/ /bdag nyid du yang mi srid do/ /rdul phran so sor gse byas na/ /ba lang rwa ni mi dmigs te/ /de ma gtogs med de dag kyang / /de yi rang gi ngo bo min//rdul phran rnams kyang yang dag par/ /gcig pa nyid du rung min te/ /phyogs cha dbye bas tha dad pa'i/ /nyes pa la sogs bshad phyir ro/ /de ltas shes rab can rnams kyis/ /gang la ltos nas ri bong gi/ /rwa la sogs pa med 'dod pa/ /de med nyid du nges rtogs bya//dngos po 'di kun de lta bu'i/ /chos can nyid pas mkhas rnams kyis/ /phan tshun ltos nas 'grub med pa/ /shin tu nges par shes par bya/ /de bas phyi rol gzung ba ni/ /rang gi ngo bor 'ga' med kyi/ /rab rib can la ji bzhin du/ /shes pa 'khrul pa 'di nyid snang //'di kun gzigs nas bcom ldan 'das/ /kun mkhyen mgon po smra rnams kyi/ /dam pa thugs rje'i bdag nyid kyis/ /'phags pa lang kar gshegs pa zhes/ /bya ba'i mdo las blo can gyis/ /blo tsam mthong bar bya ba'i phyir/ /rgyal sras blo gros chen po la//bos nas gsal bar bka' stsal pa/ /skra shad 'dzings dang sgyu ma dang / /rmi lam dri za'i grong khyer dang / /mgal me smig rgyu sna tshogs dag /med bzhin du ni mi la snang / /ji ltar mkha' la smig rgyu dang / /rmi lam mo gsham bu rmi ba/ /de bzhin dngos por snang ba'i sems//sna tshogs gzugs su snang ba yin/ /yang de nyid las gsungs pa/ rkyen dang khams dang phung po dang / /chos kyi rang gi mtshan nyid dang / /btags rang gang zag sems dang ni/ /rmi lam skra shad 'dzings pa 'dra/ /zhes 'byung ba yin no/ /yang gsungs pa/ rdul phran du ni ngas gzhigs shing / /gzugs su rnam par mi brtag go/ /sems tsam rnam par gzhag pa ni/ /lta ba ngan pas mi dang ngo / /zhes 'byung ba yin no/ /gal te 'di la phyi rol gyi/ /don du smra ba sogs byed de/ /sems tsam rnam par gzhag pa ni//kho bo khas yang mi len na/ /de ci khyod ni kho bo la/ /sems tsam rnam par gzhag pa ni/ /lta ba ngan pas mi dang zhes/ /sgro btags skyon 'di rjod par byed/ /gang dag mi shes de skad du/ /rab tu smra ba de la 'dir/ /'phags pa lang kar gshegs sogs kyi/ /mdo las rgyal ba rnams kyis ni//khams gsum po dag sems tsam du/ /rnam pa mang du rab gsungs pa/ /lung ldan rigs pa bzang po de/ /blo ldan mdun du gsal bar brjod/ /gal te der gsungs tshad ma min/ /ci phyir khyod lung tshad ma yin/ /sangs rgyas gsungs phyir gnyi ga mtshungs/ / ci phyir 'di la chos mi byed/ /gzhan yang / gal te gzugs rdzas gud na yod/ /lha mi sha za la sogs kyi/ /blo ni phan tshun 'gal sgo nas/ /tha dad par yang ji ltar 'gyur/ /zad par chu sogs bsam gtan pa'i/ /sa ni ji ltar chu sogs 'gyur/ /nam mkha' mtha' yas ldan pa la//de ni ji ltar mkhar yang 'gyur/ /gang phyir gcig la de lta bu'i/ /ngo bo yang dag mi rigs pa/ /de phyir tshad ma dang ldan pa'i/ /ngo bo nyid med rnam par mdzes/ /de bas grags pa gzhal yas pa'i/ /slob dpon chos kyi grags pa yis/ /shes rnam sna tshogs bsams nas ni//nyid kyi bstan bcos las bshad pa/ /gzhan du dngos po gcig la ni/ /sna tshogs gzugs su snang ba yis/ /snang ba ji ltar bden 'gyur te/ /de yis gcig nyid nyams phyir ro/ /zhes bya ba la sogs pa yin no/ /gal te ji ltar snang ba bzhin/ /gzugs ni de bzhin yang dag gyur//de tshe 'bad pa med par yang / /skye bo rnams ni grol bar 'gyur/ /gzhan yang / gal te dngos rnams yang dag tu/ /rang gi rgyu las byung 'dod na/ /rang gi ngo bo gnas bya'i phyir/ /de ni ji ste blo la ltos/ /gsal sogs rang gi rgyu las ni/ / gsal sogs bdag nyid byung ba rnams/ /de yi bdag nyid 'gyur bya'i phyir/ /gzhan la nam yang mi ltos so/ /rdza mkhan sogs las byung ba yi/ /bum pa la sogs ji ltar yang / /chu mi 'bo sogs rang don la/ /'ga' yang ltos par mi byed do/ /gal te phyi rol rang rgyud yod//blo med par yang 'dzin par 'gyur/ /de lta bu yang mi snang ste/ /ji ltar de gzung de 'dzin 'dod/ /de bas blo gros ldan pa'i mchog /grags pa mtha' yas zil gnon pa/ /slob dpon chos kyi grags pa yis/ /rang gi bstan bcos las bshad pa/ / lta ba'i khyad par dang bral ba/ /mi 'dzin phyir de gzung 'dzin phyir/ /sngon por snang ba lta bu ste/ /'ba' zhig phyi rol don yod min/ /zhes bya ba yin no/ /gzhan yang / dngos rnams gang du dpyad pa ste/ /ngo bor yang dag nyid du med/ /'di ltar de dag gcig pa dang / /du ma'i ngo bor yod pa min//phung sogs khyad par mtshan nyid ni/ /byed pa'i khyad par nyid yin na/ /de yang yang dag ma yin pas/ /des kyang 'di dag mtshan nyid bral/ /zhes bshad do/ /de bzhin du/ don gyi rnam pa ldan pa yi/ /rnam par shes pa'ang cig shos kyis/ /phyi rol yongs su gcod pa ni//rigs pas shin tu mi 'thad de/ /rmi lam la sogs gzhan snang bas/ /rnam pa tshad ma min phyir ro/ /nye ba dang ni mi ldan phyir/ /rnam pa med pa'i sems kyis min/ /gzhan du snang ba bstan pa yi/ /shes pas yongs su gcod na yang / /khyad par med pas thams cad kyis//thams cad rig par thal bar 'gyur/ /de lta bu dag kun bsams nas/ /mkhas pa rnams kyi mchog gyur pa/ /dag pa'i chos ni skyed pa po/ /grags pa yis ni yang bsgrags pa/ /snang ba de don ngo bo ni/ /ma gtogs 'ol phyir don 'dzin na/ /ji lta bur na bden pa yin//de 'dra bdag kyang mi shes so/ /zhes bya ba la sogs pa yin no/ /de lta bas na blo ldan gyis/ /gzugs kyi rdzas su rnam mi brtag /de yod thog ma med dus na/ /dngos zhes bya ba'i ltas ngan gyis/ /dkrugs pa'i sems ldan rnams kyi sems/ /gzung 'dzin rnam rtog ces bya ba'i//mi bzad rlung gis bskyod pa gang / /rab tu dang bar mi gnas so/ /gal te phyi rol don med na/ /de tshe mngon pa'i chos las ni/ /thub pas 'byung ba chen po yi/ /mtshan nyid gsungs pa shin tu 'gal/ /mtshan gzhi med par mtshan nyid ni//mkhas pa 'ga' yang ston mi byed/ /de bas 'di ni ngo bo nyid/ /bcas par shin tu gsal rtogs bya/ /ma lus mkhyen pa'i skyob pa po/ /sman pa des 'dir gang du yang / /med pa'i mtshan nyid ma gsungs te/ /dper na bdag gi lta bu'o zhes/ /mkhas pa kha cig de skad du//'di la phyi ni zlog byed pa/ /de ni shin tu mi rigs zhes/ /blo bzang dbu ma gnas rnams smra/ /thams cad gzigs pas mtshan nyid ni/ /de dag yod pa las min gyi/ /der snang shes pa la brten nas/ /tha snyad du ni gsungs par zad/ /sra ba'i bdag nyid la sogs kun//ye shes 'ba' zhig kho na snang / /sems las gzhan pa'i snang ba ni/ /'ga' yang nam yang yod ma yin/ /'phags pa lang kar gshegs pa las/ /gsungs phyir de ltar khas blang bya/ /de las gnyis med gsungs pa yis/ /der snang shes pa yin bshad de//ji skad du/ drod gsher g.yo ba sra ba'i chos/ /yang dag min las sgro btags nas/ /byis pa rnams kyis rnam par brtags/ /mtshan gzhi med cing mtshan nyid med/ /lus can sems ni gzung ba dang / /'dzin pa'i dngos por 'jig 'gyur gyi/ /ji ltar byis pa rnams brtags bzhin//snang ba'i mtshan nyid yod ma yin/ /ji ltar ri mo mtho dman du/ /snang yang yod pa ma yin pa/ /de bzhin dngos la dngos nyid du/ /snang yang yod pa ma yin no/ /ji ltar rab rib ldan pa yi/ /skye bos skra shad log bzung ba/ /de bzhin dngos por rtog pa 'di//byis pas log par rnam par brtags/ /zhes bya ba la sogs pa yin no/ /de phyir de bzhin gshegs pa'i bka'/ /ji skad gsungs pa bzhin du ni/ /shin tu rjes su sgrub mdzad cing / /bde ba can gyi bde btang ba/ /brnyes par gzhol ba'i dgongs pa can/ / thams cad mkhyen pas lung bstan pa/ /klu sgrub ces bya dang po yi/ /dbang phyug gis kyang bshad pa ni/ /'byung ba che la sogs bshad pa/ /rnam par shes su yang dag 'du/ /de shes pas ni 'bral 'gyur na/ /log par rnam brtags ma yin nam/ /zhes bya ba la sogs pa yin no//phyi rol don zhig yod na ni/ /theg pa chen po cher 'byung ba'i/ /mdo las kun mkhyen mnga' bdag gis/ /de skad gsungs pa mi rigs la/ /de yi gzhung lugs rjes 'gro ba'i/ /blo can slob dpon brtser ldan pa/ /de nyid mkhyen pa'ang de skad du/ /'chad pa gtan du rigs ma yin//yang 'dir kha cig phyi rol gyi/ /dngos po grub par bya ba'i phyir/ /theg pa chen po'i mdo nyid dang / /'gal ba shin tu rjod par byed/ /de ltar skyob pa bcom ldan 'das/ /kun mkhyen thub pa skyes mchog dang / /de'i bka' ji skad gsungs pa 'dir/ / ston de tshad mar 'dzin pa yi/ /mkhas pa kun la'ang tshad ma yin/ /gzhan ni 'ga' yang ma yin no/ /rgyal ba rnams kyi theg chen lung / /de dang de las gsungs pas na/ /gal te khyod ni phyi rol gyi/ /dngos gtan med par khas len na/ /des gsungs pa yi mdo dag dang / /'gal ba rnam pa mang du snang //de ltas sems bzhin phyi rol gyi/ /don yang rdzogs pa'i sangs rgyas kyis/ /bshad pa'i phyir dang gsal bar ni/ /snang phyir yang dag nyid du yod/ /phyi rol don zhig gtan med na/ /'gro ba'i rtsa lag rdzogs sangs rgyas/ /thugs rje'i dgongs pa dri med kyis/ / theg chen sA lu ljang pa yi/ /mdo las rten cing 'byung ba yi/ /ngo bo rnams kyi khyad par dngos/ /gnyis su bstan pa ji ltar yang / /'thad pa kho na ma yin no/ /de las dngos po thams cad ni/ /phyi dang nang gi bye brag gis/ /rnam pa gnyis su gsal bar bstan/ /de bas ngo bo nyid med min//dgos pa med pa nyid du ni/ /bcom ldan thams cad mkhyen pa yang / /gnyis su bshad pa ji ltar yang / /gsung ba ched cher mi mdzad la/ /kun gyi 'jug pa gang yin pa/ /de sngon 'gro ba yin pas na/ /blo rnal 'dug pa'i gdul ba yang / /'ga' yang de nyid gus mi 'os//ston pas mtshungs par bstan pa la/ /khyod kyis 'ga' zhig kho na la/ /yongs su blang zhing dor ba yi/ /nges pa 'di ko ci yi rgyus/ /de ltas rten cing 'brel 'byung ba'i/ /dngos po'i khyad par bstan pa'i phyir/ /ma rig la sogs yan lag bzhin//phyi rol dngos po'ang 'thad pa yin/ /de lta bu ni ma yin na/ /ji ltar rta yi rwa la sogs/ /med pa nyid du nges pa la/ /khyad par 'ga' yang yod min pa/ /de bzhin 'di la'ang mi 'gyur ro/ /mi mkhas pa dag de skad du/ /bcom ldan dgongs pa mi shes par//shin tu rgol bar byed gyur pa/ /de la'ang 'dir ni brjod par bya/ /gnyis su bshad pa gang yin pa/ /de ni skye bo rnams dag la/ /grags pa'i ngor yin de tsam gyis/ /skye ba can rnams gnyis mi 'gyur/ /gzugs kyi phung por khyad med kyang / /phyi dang nang gi ngo bor ni//ji ltar gnyis su bshad pa ltar/ /de bzhin 'di la'ang nges par gzung / /de ltar mig la sogs pa ni/ /nang gi yin pa nyid gnas la/ /gzugs dang sgra sogs phyi yi yang / /gcig pa nyid du'ang 'gal ba med/ /gnyi ga'ang blo gros ngang tshul can/ / yang dag mkhyen pas yang dag tu/ /g.yo ba med sogs bsgrub bya gang / /de ni tha dad med par bstan/ /de bas gcig nyid na yang 'dir/ /bshad pa tha dad 'di mi 'gal/ /gdul ba'i ngor ni mgon po yis/ /bstan pa rnam pa sna tshogs so/ /gzhan yang / gal te mdo las bstan zhes te//bde gshegs dgongs pa ma brtags par/ /thams cad sgra bzhin bzung na ni/ /de yi tshe na bdag kyang ni/ /ci ste mi bzung de yang ni/ /'di ltar de yis de las gsungs/ /de lta bas na brtags te bzung / /gzhan du ha cang thal bar 'gyur/ /dper na bcom ldan 'das kyis ni//gdul ba'i dgos pa la gzigs nas/ /brdzus te skye ba bstan pa ltar/ /de bzhin phung po la sogs bstan/ /de lta bas na thub pa yi/ /dbu ma'i lugs ni gsal mdzad pa/ /slob dpon blo chen mkhas pa yi/ /rigs pa drug cu las bshad pa//dgos pa'i dbang gis rgyal ba rnams/ /nga dang nga'i zhes gsungs pa ltar/ /phung po khams dang skye mched rnams/ /de bzhin dgos pa'i dbang gis gsungs/ /zhes bya ba yin no/ /de lta bas na de'i stobs kyis/ /dngos rnams ngo bo nyid bcas pa/ /rnam pa kun du yod min par//gzhung 'dzin mkhas pa rnams kyis soms/ /zhar la 'ongs pa'i gtam gyis chog /blo tsam zhes pa 'di la ni/ /tshad ma yang ni gsal bar yod/ /tshad ma dang bral tshig dag ni/ /mkhas rnams mgu bar mi 'gyur ro/ /brtsad pa'i spyod yul gyur pa'i mi/ /gnyid ma log pa'i mig sogs blo//yang dag phyi rol snang min te/ /blo phyir rmi lam blo bzhin no/ /de la sogs pa'i tshad mas kyang / /sems tsam yin pa'i tshul du nges/ /blo tsam grub pa'i lung yang ni/ /blo can blo ni rgyas byed pa/ /lang kar gshegs pa'i mdo sde zhes/ /bya ba gsal ba nyid dmigs te//ji skad du/ ji ltar byis pa rnam brtags bzhin/ /phyi rol don yod ma yin te/ /bag chags kyis ni dkrugs pa'i sems/ /don du snang bar 'byung ba yin/ /zhes bya ba la sogs pa gsungs pa lta bu yin no/ /phyi rol gzung ba bkag kyang ni/ /khyod kyi lta bu sems tsam lugs//'grub par mi 'gyur gang gi phyir/ /sems ni de la rag lus brjod/ /shes bya med na ji lta bur/ /de la rag lus shes pa 'grub/ /shes pa gnyis su snang ba yis/ /dben zhes bya ba'ang gzu lums che/ /de nyid dgongs nas slob dpon che/ /bde gshegs thugs rje'i nor can la//bstod mdzad klu zhes bod pa yin/ /bstod pa las kyang gsungs pa ni/ /ma shes par na shes bya min/ /de med par yang shes pa min/ /de phyir khyod kyis shes pa dang / /shes bya ngo bo nyid med gsungs/ /zhes bya ba yin no/ /de 'dzin tshad ma med pa'i phyir//de yod rab tu mi 'grub bo/ /de yod 'bad pa med nyid du/ /khyod ni yang dag mthong bar 'gyur/ /de ltas 'di yang phyi rol bzhin/ /gcig dang du ma'i bdag nyid du/ /mi rung gzugs brnyan la sogs bzhin/ /ngo bo med par gsal shes kyis/ / theg chen rab tu ston pa'i lung / /shes rab pha rol phyin sogs shes/ /bya ba las kyang bdag med par/ /nges par khong du chud bya ste/ /gal te gnyis med shes pa zhig /yang dag nyid yod de yi tshe/ /rgyal bas dngos po phra rab kyang / /dgag pa gsung bar mi 'gyur ro//shes rab ces brjod mdo las ni/ /dngos po skra yi rtse mo'i cha/ /bzhag pa tsam yang bsal ba'i phyir/ /de med rigs pa kho na yin/ /sangs rgyas kun yum rdo rje zhes/ /bya ba las kyang skyob pa yis/ /sems kyi rgyun ni rgyun med gsungs/ / de bas sems ni yang dag min/ /'das pa'i sems kyang sangs rgyas kyis/ /ji lta bur yang ma dmigs la/ /ma 'ongs yod par ma yin te/ /da ltar gyi yang ma dmigs so/ /yang dag nyid du sems yod na/ /dkon mchog brtsegs las bdag nyid ches/ /'od srungs las ni gsungs pa gang //de yang 'thad par mi 'gyur ro/ /ting 'dzin rgyal po'i mdo las kyang / /yod dang med pa nyid dag gi /dbus la'ang gnas pa bkag pa 'di/ /ngo bo nyid med zur gyis gsungs/ /'phags pa lang kar zhes brjod pa'i/ /mdo las sangs rgyas rnams kyis yang //tshigs bcad dag gis gsal gsungs te/ /de ltar dngos med rigs ldan nyid/ /ji skad gsungs she na/ ji ltar gzugs ni me long la/ /de nyid gzhan nyid rnam spangs par/ /snang yang de yi ngo bor min/ /de bzhin dngos la dngos nyid do/ /blo yis rnam par gzhigs rnams kyi//ngo bo nyid ni nges mi zin/ /de bas de dag brjod med dang / /ngo bo nyid kyang med par brjod/ /ces 'byung ba yin no/ /gal te dngos po gang dag yod/ /'jam pa'i dbyangs kyis yang dag nyid/ /dris nas 'phags pa dri med grags/ /ci phyir de tshe mi gsung bzhugs//de skad gzhung lugs mthun pa la/ /gnas pa'i skyes bu 'khod pa ni/ /dris na blo dang ldan pa dag /mi smrar rigs pa ma yin no/ /gzhan yang / ma dros pa zhes bya ba yi/ /mdo las bcom ldan gyis gsungs gang / /des kyang rkyen la rag las te/ /skye bo ngo bo nyid med nyid//ji skad du gsungs she na/ rkyen las gang skye de ni ma skyes pa/ /de la ngo bo nyid kyis skye ba med/ /rkyen la rag las gang de stong par bshad/ /gang zhig stong nyid shes de bag yod yin/ /zhes bya ba yin no/ /de bzhin du/ 'phags pa klu dbang rgya mtsho yis/ / zhus pa las kyang bcom ldan gyis/ /dngos rnams rten cing 'brel 'byung phyir/ /ngo bo nyid ni med gsungs te/ /gang dag rten cing 'brel te byung / /de dag ngo bo nyid 'ga' 'ang med/ /gang dag ngo bo nyid med pa/ /de dag gang du'ang 'byung ba med/ /ces bya ba yin no/ /de bzhin glang po'i rtsal las kyang //bcom ldan thub pa skyes mchog gis/ /dus gsum rtogs pa'i dngos po rnams/ /ngo bo nyid med rab gsal gsungs/ /gang la skye ba srid pa yi/ /chos ni 'ga' yang med rnyed de/ /skye ba med pa'i chos rnams la/ /byis pa rnams ni skye bar 'dod/ /ces bya ba yin no//dkon mchog 'byung gnas las kyang ni/ /thams cad gzigs pas dngos rnams kyi/ /skyed par byed pa nyid gsal bas/ /dngos kun bdag med nyid du gsungs/ /ji skad du gsungs she na/ gang la rang bzhin yod pa ma yin pa/ /rang bzhin med de gzhan rkyen ji ltar 'gyur//rang bzhin med pas gzhan ci skyed 'gyur zhes/ /rgyu 'di bde bar gshegs pas bstan pa yin/ /zhes bya ba yin no/ /de bzhin klu dbang rgya mtsho yis/ /zhus pa che las thub pa yis/ /dus gsum 'dod pa'i dngos po rnams/ rang bzhin med par gsungs nyid de//sngon gyi mtha' stong phyi ma'i mtha' stong zhing / /skye dang 'jig dang gnas pa'i dngos po stong / /'di ni dngos yod ma yin dngos med min/ /chos kun ngo bo nyid kyis stong pa yin/ /zhes bya ba la sogs pa yin no/ /gzhan yang / dngos po khas len yod na ni/ /sa bcu pa yi mdo las gang //skye mched mnyam pa nyid gsungs te/ /ji ltar rtsod pa med par 'gyur/ /ji skad du gsungs she na/ sa lnga pa las sa'i lam yongs su rdzogs par byas pa mnyam pa nyid bcus byang chub sems dpa'i sa drug pa 'jug go/ /bcu gang zhe na/'di lta ste/ chos thams cad mtshan ma med par mnyam pa nyid dang / chos thams cad mtshan nyid med par mnyam pa nyid dang / chos thams cad skye ba med par mnyam pa nyid dang zhes bya ba la sogs pa bstan pa ste/ dngos po thams cad rang bzhin med pa rjod par byed pas dus gsum du gnas pa'i dngos po'i rigs ngo bo nyid med pa nyid du gsal lo zhes bya bar nges par zung shig /de bzhin du 'phags pa ma skyes dgra'i 'gyod pa bsal ba'i mdo las kyang / dngos po thams cad ngo bo nyid med pa nyid ji lta ba bzhin du bstan pa kho na ste/de bstan pa/ de bzhin dngos zhig srid na ni/ /ma skyes dgra yi 'gyod bsal las/ /chos rnams mya ngan 'das pa dang / /mnyam nyid gsungs par ji ltar rigs/ /ji skad du gsungs she na/ rgyal po chen po chos thams cad ni shin tu ma skyes pa'i phyir/ mya ngan las 'das par yang dag par 'du'o/ /rgyal po chen po de ji snyam du sems/ chos gang ma skyes shing ma byung ba de kun nas nyon mongs par nus sam/ smras pa/ 'jam dpal ma lags so/ /'jam dpal gyis smras pa/ de brtsal bar nus sam/ smras pa/ 'jam dpal ma lags so//smras pa/ rgyal po chen po de ltar na de bzhin gshegs pa rnams kyis chos thams cad mya ngan las 'da' bar yang dag par 'du bar mkhyen te/ des na de dag gis khyod kyi 'gyod pa bstsal bar mi spyod do/ /rgyal po chen po de lta bas na khyod kyis tshul bzhin du rab tu sbyar bar bya'o zhes bya ba la sogs pa mya ngan las 'das pa dang mnyam pa nyid du ston par mdzad pas ngo bo nyid med pa nyid du gsal bar bstan pa yin no//gang phyir mya ngan 'das dngos min/ /dngos po med pa'ang rung min nyid/ /de phyir dngos rnams de dang ni/ /mnyam par ngo bo nyid med do//mya ngan 'das pa dngos nyid na/ /'dus byas nyid du thal bar 'gyur/ /de phyir de ni 'bad med par/ /'dus byas mtshan nyid ldan par 'gyur/ /'on te 'dus ma byas par 'dod/ /de ni mkha' dang 'dra 'gyur bar/ /de dngos nyid du rnam pa ni/ /gnyi gar yang rung min par mngon//gal te mya ngan 'das dngos med/ /de'i lam sgom pa don med 'gyur/ /de ni de yi stobs kyis su/ /'thob par yang ni 'thad ma yin/ /ji ltar de yi stobs kyis ni/ /mo gsham bu 'thob min pa ltar/ /de bzhin dngos med khyad med phyir/ /de yi de yang rigs ma yin//gang gi mthu dang ldan pas kyang / /mo gsham bu ni thob med cing / /'byung ba'ang yod min de yi phyir/ /de dngos med pa nyid kyang med/ /de kun yang dag gzigs nas ni/ /dpal ldan klu sgrub ces bya ba/ /sa ni dang po bskrun brnyes pa/ /mkhas pa'i mchog rab kyis bshad pa//mya ngan 'das dngos med min na/ /de dngos nyid lta ga la yin/ /dngos dang dngos med 'dzin zad pa/ /mya ngan 'das pa zhes brjod do/ /zhes bya ba la sogs pa yin no/ /gnyi ga'i phyogs bshad nyes phyir 'di/ /gnyi ga'i bdag nyid kyang ma yin/ / phan tshun med pa'i ngo bor rnams/ /gcig med rnam par bcad pa yis/ /cig shos yod par thal phyir te/ /gnyi ga min bdag kyang min pas/ /de rnams kun du nam mkha' yi/ /me tog bzhin du srid pa med/ /gang tshe rab tu spyad na tshad ma'i stobs kyi dngos/ /dus gsum gang du'ang 'ga' yang mi gnas rab gsal na//de la rag lus 'grub pas dngos po'i zlar gyur pas/ /ji ltar de yi bdag nyid dag tu yod par 'gyur/ /gal te dngos po rnam par brtags nas de 'gog na/ /de ltar blos byed de brtags kho nar mi 'gyur ram/ /gang phyir gnyi ga'ang rigs pa'i stobs kyis mi 'grub pa//de phyir mkhas pa rnams kyis der 'dzin thag bsrings 'or/ /de bas blo ldan legs byed pa/ /snying rje dpag tu med sems ldan/ /ye shes snying po mkhas pa yis/ /gdul blo rgyas bya'i phyir bshad pa/ /dgag par bya ba med pa'i phyir//yang dag tu na bkag med gsal/ /yang dag chos kun mi len pa/ /de ni de nyid rig pa yin/ /zhes bya ba la sogs pa yin no/ /lang kar gshegs pa'i mdo las kyang / /bdag nyid chen po thugs brtse bas/ /sems can rnams kyi gnyis 'dzin pa/ / bzlog par bya ba'i phyir gsungs pa/ /ma byung ba las gang 'byung zhing / /byung nas kyang ni 'jig 'gyur ba/ /rkyen gyis yod dang med pa des/ /nga yi bstan la mi gnas so/ /gang la cung zad skye med cing / /'gag pa ci yang yod min par/ /'gro ba dben par mthong ba ni//de la yod dang med nyid med/ /ces bya ba la sogs pas gnyis su lta ba dang bral ba nyid gsal bar rab tu bstan to/ /de bzhin 'di las yang gsungs pa/ /yod pa'i zlas drangs med pa ste/ /yod pa'ang med pa'i zlas drangs so/ /de bas med par brjod mi bya//yod pa nyid du'ang mi brtag go/ /zhes bya ba la sogs pas dngos po dang dngos po med pa'i gdon gyis 'debs pa med pa kho na bcom ldan 'das nyid kyis gsal rab tu gzhung btsugs pa yin pas mjug bsdu'o/ /bdag nyid dran par bya ba'i phyir/ /mdor bsdus cung zad bdag gis bsgrags//'di ni mgo smos go rnams la/ /dbu ma'i lam gyi phyogs yin no/ /sangs rgyas dngos dang dngos med bshig pas mtho ba'i che bas dbang phyug rab brnyes shing / /srid gsum don gyi de nyid mkhyen la thugs rjes 'khor ba ji srid bzhugs pa'i lugs//lung dang rigs pas rab tu gsal byas bsod nams gzhal yas thob pa gang yin des/ /mtha' dag dngos por lta ba'i ling tog ma lus sel zhing 'di la dga' bar shog /dbu ma'i lugs kyi snying po mdor bsdus pa'i rab tu byed pa slob dpon bid+yA ka ra pra b+has mdzad pa rdzogs so/