CLOSE WINDOW

D3886
བོད་ཡིག

/ //[ @##/ /rgya gar skad du/ mad+h+yA laM kA ra pany+tsi kA/ bod skad du/ dbu ma'i rgyan gyi dka' 'grel/ bam po dang po/ 'jam dpa' gzhon nur gyur pa la phyag 'tshal lo/ /gang zhig brtson 'grus mtshungs med pas//bdag gzhan phan pa phun sum tshogs/ /mtha' dag pha rol phyin de la/ /phyag byas dbu ma'i rgyan dbye bya/ /yul yon tan dang ldan pa la dang ba ni legs pa thams cad thob par byed pa'i dang po'i rgyu yin pas yon tan phul du dbyung du med pa dpag tu med pa rin po che'i 'byung gnas bcom ldan 'das rnams la gzhan dag dang ba bskyed pa'i phyir re zhig dang po nyid du de dag la ji lta ba bzhin gyi yon tan brjod pa sngon du 'gro ba'i phyag 'tshal ba/gang dag ces bya ba smos te/ 'di ltar tshigs su bcad pa 'dis ni bcom ldan 'das kyi che ba'i yon tan bdag nyid phul du byung ba dang ldan pa ston par byed do//de thos nas kyang re zhig dad pas rjes su 'brang ba rnams ni de dag la the tshom med par dang ba myur du skye bar 'gyur ro/ /gang dag chos kyi rjes su 'brang ba de dag kyang de lta bu dag la gnod pa ma mthong zhing / shes rab la sogs pa yon tan rnams goms pas bye brag tu 'phags pa yang rtogs nas de lta bu'i mkhas pa dag ni gdon mi za bar srid do zhes nges par bzung nas de dag la dang ba skyed par byed pa nyid do//de dag la dang ba'i phyir de dag gi yon tan 'dod pa rnams de dag gi gsung rab rnams dang / gsung rab dag la brten pa'i bstan bcos la gzung ba la sogs pa'i don du thog mar brtag pa sngon du 'gro ba'i gus pa byed do/ /de'i 'og tu thos pa las byung ba la sogs pa'i shes rab skye ba'i rim gyis legs pa dam pa thob par 'gyur ro/ /de'i phyir yon tan dang ldan pa rnams la dang ba ni legs pa thams cad kyi gtso bo'i rgyu yin no//de nyid kyi phyir de ni de la 'jug pa la yang yan lag yin pa'i phyir bstan bcos byed pa phal cher bstan bcos kyi dang por ston pa la mchod pa byed do/ /de nyid kyi phyir bstan bcos byed par 'dod pas rang gi ston pa'i che ba'i bdag nyid shes par bya ba'i phyir de la phyag 'tshal ba rtsom mo zhes bshad do//de la gang dag su rnams sa la bzhugs pa de dag rnams la phyag 'tshal lo zhes bya bar sbyar ro/ /'di spyir smos pa yin du zin kyang sangs rgyas bcom ldan 'das rnams kho na yin par mngon te/ gzhan dag la ni ji skad smos pa'i yon tan med pa'i phyir ro//de'i phyir bcom ldan 'das rnams la phyag 'tshal bar 'os pa nyid du bsgrub pa'i phyir ji lta ba bzhin gyi yon tan rjod par byed do/ /yon tan de dag kyang rang dang gzhan gyi don phun sum tshogs pa'i bye brag gis 'dir rnam pa gnyis su bstan to/ /rang gi don phun sum tshogs pa yang rgyu dang 'bras bu phun sum tshogs pa'i bye brag gis rnam pa gnyis so//rgyu phun sum tshogs pa de yang nye ba dang ring ba'i rgyu'i bye brag gis rnam pa gnyis so/ /'bras bu phun sum tshogs pa de yang ye shes dang spang ba phun sum tshogs pa'i bye brag gis rnam pa gnyis so//gzhan gyi don phun sum tshogs pa yang gzhan dag nges par legs pa dang mngon par mtho ba 'thob pa'i bye brag gis rnam pa gnyis su gnas te/ 'di ni yan lag rnam par bshad pa nas sbyar bar bya'o/ /yon tan phun sum tshogs pa 'di mtha' dag ni bcom ldan 'das rnams phyi rol pa dang slob pa dang mi slob pa chen po rnams kyi bla na bzhugs pa nyid kyi gtan tshigs yin no//de'i phyir de dag kho na dngos su phyag bya bar 'os pa yin gyi/ /gzhan dag ni ma yin no zhes bstan pa yin no/ /yan lag gi don brjod par bya ste/ gang dag la dag brtan blo mnga' ba de dag la de skad ces bya ste/de la dag pa ni 'dod chags la sogs pa'i dri ma thams cad dang bral ba'i phyir ro/ /'dis ni phyi rol pa'i 'dod chags dang bral ba rnams dang slob pa rnams las khyad par du ston par byed de/ 'di ltar phyi rol pa kun nas nyon mongs pa'i rtsa ba'i bdag nyid phyin ci log mtha' dag dang ldan pa'i yid can 'dod chags la sogs pa'i 'ching ba mtha' dag nyams par ma byas pa thams cad ni dri ma med pa'i blo can dag tu ji ltar 'gyur/slob pa bsgom pas spang bar bya ba'i dri ma ma lus pas dri ma can du byas pa'i yid can rnams kyang /dag pa'i blo can dag tu ji ltar rung / /brtan pa ni lus dang ngag dang blo'i mi mthun pa nyid kyi rgyu kun nas nyon mongs pa can ma yin pa'i bag chags kyi rlung gis mi bskyod pa'i phyir ro/ /'dis ni mi slob pa rnams las khyad par du ston par byed de/ de dag gis de ma spangs pa'i phyir ro//'dis ni spangs pa phun sum tshogs pa yongs su bstan to/ /sa la bzhugs zhes bya ba ni 'gro ba'i don du zhes bya bar shugs kyis go bas na ma bshad do/ /de lta ma yin na phun sum tshogs pa mtha' dag yang dag par thob pa bzhugs par mi rigs so/ / 'dis ni gzhan gyi don phun sum tshogs pa rnam pa gnyis ji skad du bshad pa bstan to/ /ji ltar na de dag brtan blo mnga' bar 'gyur ce na/ chos tshul zab mo zhes bya ba la sogs pa smos te/ chos ni gzugs la sogs pa'o/ /de dag gi tshul ni ji lta ba bzhin gnas pa'i ngo bo'o/ / de yang dngos po'i rigs mthun pa dang mi mthun pa dpag tu med pa ldog pa la ltos pas bskyed pa tha dad pa nyid kyis tshad mar gzung bar mi nus pa'i phyir rgya mtsho dang 'dra ba yin no/ /'di ni nyan thos la sogs pas gting dpag dka' bas zab mo yang yin la chos tshul rgya mtsho lta bu yang yin pas zhes tshig rnam par sbyar te/gang dag gis de'i pha rol mtha' mthong ba de dag la de skad ces bya'o/ /'dis ni rnam pa thams cad mkhyen pa nyid kyi mtshan nyid kyi ye shes phun sum tshogs pa bstan to/ /de nyid nyon mongs pa bag chags dang bcas pa ma lus pa thams cad rtsa nas 'byin pa'i rgyu yin te/de med pas nyan thos la sogs pas bag chags ma spangs pa'i phyir ro/ /ye shes phun sum tshogs pa yang yang dag pa'i kun rdzob kyi ngo bor bcom ldan 'das rnams kyi thams cad mkhyen pa nyid yin gyi/ don dam pa'i ngo bo nyid du ni ma yin te/ de lta bur thams cad ma skyes pa'i phyir ro//thams cad mkhyen pa dag gi ye shes kyang ji ltar skye snyam pa la 'di la 'di'i rgyu bstan pa'i phyir lhag par mos pa zhes bya ba la sogs pa smos te/ lhag par mos pa zhes bya ba'i sgra ni mos pas spyod pa'i sa nas bzung ste/ sa bcu pa'i bar yin par 'dod de/thams cad du chos thams cad ngo bo nyid med pa nyid du nges par 'dzin pa'i mtshan nyid kyi mos pa lhag pa nyid kyis rab tu phye ba'i phyir ro/ /yang na lhan cig spyod pa'i phyir rgyu'i gnas skabs thams cad rjod par byed do/ /gang dag gis lhag par mos pa de la thos pa la sogs pa las byung ba'i shes rab skye ba'i rim gyis rnam pa thams cad mkhyen pa nyid nye bar bskyed pa'i phyir gong nas gong du 'du byed khyad par can bskyed pas yongs su bsgoms pa'i thugs mnga' ba de dag la de skad ces bya ste/'dis ni rgyu phun sum tshogs pa rnam pa gnyis ji skad du bshad pa bstan pa yin no//de yang thams cad mkhyen pa nyid skye ba'i rgyu yin pa 'ba' zhig tu ma zad kyi/ sgrub pa'i rgyu yang yin te sgrub pa phyin ci ma log par nan tan byed pa rnams de'i 'bras bu 'thob par nges pa'i phyir nad med par bsgrub pa nan tan byas pas nad med pa 'thob pa bzhin no//gang gi phyir de ltar de dag nyid rang dang gzhan gyi don phun sum tshogs pa phul dbyung du med pa dang ldan pa de'i phyir de dag ni phyi rol pa dang slob pa dang mi slob pa chen po rnams kyi bla na bzhugs pa yin te/ 'gro ba mtha' dag gi gtsug gi nor bu yin no zhes bya ba'i tha tshig go/ / de'i phyir de dag kho na la phyag bya bar 'os pa yin gyi/ gzhan dag la ni ma yin no zhes bshad pa yin no/ /rnam pa gcig tu 'jig rten na chen po nyid du 'dod pa ser skya dang gzegs zan la sogs pa'i yang bla na bzhugs pa nyid kyis khyad par du 'phags pa'i phyir/ nyan thos dang / rang sangs rgyas dang / sangs rgyas dang byang chub sems dpa' rnams la yang phyag 'tshal bar ston to/ /de la dag brtan blo mnga' ba zhes bya ba 'dis ni nyan thos dang rang sangs rgyas dang sangs rgyas rnams bstan te/ blo brtan pa nyid ni yongs su nyams pa'i rlung gis mi bskyod pa'i phyir te/dge slong dag 'phags pa'i shes rab kyis spangs pa gang yin pa de ni spangs pa yin no zhes gsungs pa'i phyir ro/ /chos tshul zab mo rgya mtsho lta bu'i pha rol gzigs zhes bya ba 'dis ni sangs rgyas bcom ldan 'das rnams bstan te/ spyir bstan kyang gtso bo yin pa'i phyir logs shig tu bstan to//gang dag ces bya ba ni re re la yang sbyar bar bya'o/ /yang zhes bya ba zhig ni 'dir don gyis mngon pa'i phyir ma smos so/ /des na don ni 'di yin te/ gang dag su rnams chos tshul zab mo rgya mtsho lta bu'i pha rol gzigs pa sa la bzhugs pa de rnams la yang phyag 'tshal lo//de bzhin du byang chub sems dpa' lhag par mos pa yongs su bsgoms pa'i thugs mnga' ba rnams la phyag 'tshal lo zhes bya bar sbyar ba yin te/ 'dir yang yang gi don blta bar bya'o/ /ci'i phyir 'di dag kho na la phyag bya bar brjod ce na/cher rnams kyi zhes bya ba la sogs pa smos te/ gang gi phyir 'di dag kho na yon tan phun sum tshogs pa ji ltar bshad pa dang ldan pas phyi rol pa chen po nyid du 'dod pa rnams kyi bla na bzhugs pa de'i phyir 'di dag kho na la phyag 'tshal bar brjod do/ /de la ma zhugs pa'i snga rol na bstan bcos kyi don ni shin tu lkog tu gyur pa'i phyir tshig ma rtogs pa ste rtogs pa'i thabs gzhan med la/rtog pa dang ldan zhing don du gnyer yang sgrub pa'i dgos pa ma rtogs pa rnams so sor nges pa'i sgrub pa mi len pas de'i phyir nyan pa po'i skye bo gzud pa'i don du re zhig dang por rab tu byed pa 'di'i brjod par bya ba dang /dgos pa bstan pa'i phyir/ gzugs brnyan la sogs pa lta bur zhes bya ba smos so/ /'dir brjod par bya ba ni chos thams cad rang bzhin med pa nyid do/ /de rtogs pa ni dngos su dgos pa yin no/ /de'i yang dgos pa ni nyon mongs pa dang shes bya'i sgrib pa mtha' dag spong ba yin no//de phan chad ni re ba rnam par chad pa'i phyir dgos pa gzhan med do/ /'brel ba ni rab tu byed pa dang dgos pa dag gi bsgrub par bya ba dang sgrub pa'i dngos po'i mtshan nyid yin par bstan par bya ste/ gzhan gyi don du gnyer bar 'jug pa la yan lag ma yin pa'i phyir ro//de yang 'brel ba can kho nas bstan pa yin te/ de'i bdag nyid ni bstan du med pa'i ngo bo nyid yin pa'i phyir ro/ de'i phyir 'brel ba logs shig tu bstan par mi bya'o/ /gzugs brnyan la sogs pa lta bur zhes bya ba la sogs pas ni chos thams cad rang bzhin med pa nyid du rtogs pa nyon mongs pa la sogs pa'i sgrib pa spong ba'i thabs nyid du ston par byed de/'di ltar 'dod chags la sogs pa'i nyon mongs pa thams cad ni phyin ci log gis kun nas bslang ba dag kho na yin la/ phyin ci log de yang rang bzhin med pa la log par dmigs pa'i rnam pa yin pas dngos po la sogs par mngon par zhen pa'i mtshan nyid yin te/phyin ci log dang 'gal ba rang bzhin med pa nyid shes pas spong bar 'gyur ba kho na'o/ /phyin ci log spangs na phyin ci log gi rtsa ba can nyon mongs pa'i tshogs dang shes bya'i sgrib pa mtha' dag phyin ci log gi bdag nyid du ji ltar gnas par 'gyur/'di skad du/ chos la bdag med mkhas pa ni/ /rang bzhin med pa goms byas pas/ /phyin ci log las byung ba yi/ /nyon mongs sgrib pa med par spong / /zhes bya bas 'chad par 'gyur te/dngos po la sogs pa mngon par zhen pa phyin ci log nyid yin par rgyas par ni 'chad par 'gyur ro/ /rnam pa zhes bya ba'i sgra ni tshogs kyi don to/ /brtags pa ni dngos po'i de kho na yang dag par so sor rtog pa'o/ /de gnag rdzi la sogs pa'i shes pa gang la med pa de ni ma brtags pa'o//'dis dga' bas na dga' ba ste/ gang la ma brtags gcig pu na dga' ba kho na yod pa zhes tshig rnam par sbyar ro/ /'dis ni kun rdzob kyi shes pa la snang ba rnams mi bsal lo zhes bya bar ston par byed do/ /'o na ji ltar rang bzhin med pa nyid yin snyam pa la/ yang dag par na zhes bya ba smos te/ yang dag pa zhes bya ba'i sgras ni dngos po'i stobs kyis zhugs pa'i rjes su dpag pas rtogs par bya ba de kho na nyid kyi ngo bo la bya ste/ de kho na nyid kyis rnam par dpyad na stong ngo zhes bya ba'i tha tshig go/ /'dis ni de kho na nyid du dang don dam pa kho na zhes bya ba la sogs pa rnam par bshad do//yang na yang dag pa'i shes pa kho na yang dag pa la sogs pa'i sgrar brjod de/ de'i dmigs pa yin pa'i phyir ro/ /yang dag pa'i shes pa'i bsam pa'i dbang gis rang bzhin med pa yin gyi/ kun rdzob kyi shes pa'i dbang gis ni ma yin no zhes bya ba'i tha tshig go//spong bar gyur pa de su zhig yin snyam pa la/ bdag dang gzhan gyi don phun sum tshogs pa zhes bya ba la sogs pa smos te/ gang gis bdag dang gzhan gyi don phun sum tshogs pa bsgrub pa'i phyir/ ci la ma rag par sbyin pa la sogs pa bsod nams dang ye shes kyi bdag nyid chas pa brtsams pa de la de skad ces bya ste/nyan thos la sogs pa ni rten mi brtan pa'i phyir dang / snying rje dang brtson 'grus chung ba'i phyir/ shes bya'i sgrib pa mtha' dag spang ba bskal pa mi nyung bar goms par byas pas yang dag par bsgrub par bya ba sgrub par mi nus so snyam du bsams pa'o//byang chub sems dpa' rnams kyi ci la ma rag pa thams cad ni gzhan gyi don phun sum tshogs pa bsgrub pa'i ched kho na nyid yin mod kyi/ rang gi don phun sum tshogs pa bsgrub pa'i ched kyang med na med pa yin pas gnyi ga'i don brjod de/rab tu 'bad do zhes bya ba 'dis ni rab tu 'bad pa'i mchog ston par byed cing 'di'i zlos pa nyid yongs su spong bar byed do/ /des na 'di skad du/ sngon gyi slob dpon rnams kyis chos thams cad rang bzhin med pa nyid du bstan mod kyi/ klan ka ngan pa'i dri ma mtha' dag bsal ba'i phyir 'bad pa mchog dang ldan pas ston par byed do zhes bshad pa yin no//de'i phyir 'bad pa don med pa ma yin no/ /de nyid kyi phyir klan ka ngan pa'i dri ma bsal bas 'di dbu ma'i rgyan zhes bya'o/ /de la re zhig dang por rigs pa kho nas bsgrub par bya ba yin pas 'dir 'thad pa/de la lung zhes bya ba la sogs pa smos te/ tshad mas brtan por ma byas pa'i lung ni gzhan du yang drang bar nus pa'i phyir/ dad pas rjes su 'brang ba rnams kyang nges pa mi skye bas yongs su tshim par mi 'gyur ro/ /kyang zhes bya ba'i sgras ni sems log pa rnams lta smos kyang ci dgos zhes ston par byed do//dngos po'i stobs kyis zhugs pa smos pa ni lung las grags pa'i rjes su dpag pa bsal ba'i phyir te/ de yang lung dang 'dra bas de dang bcas te de yang nges par mi byed pa'i phyir tshim par mi 'gyur ro/ /rigs pa ni nges pa skyed par byed pas yongs su tshim par byed pa yin no//ji ste gal te de lta na go rigs pa kho nas chog mod/ lung gis ci zhig bya zhe na/ ma yin te/ lung ni rigs pa'i rgyan yin pa'i phyir ro/ /de lta ma yin na 'di ni rtog ge pa skam pos brtags pa yin no zhes mi mkhas pa kha cig gis brnyas par yang 'gyur ro//rang bzhin dang bral ba'am/ gang dag la rang bzhin dang bral ba yod pas zhes tshig rnam par sbyar te/ 'di ni tshad ma'i 'bras bu yin no/ /sbyor ba ni 'di lta bu yin te/ gang zag gcig dang du ma'i rang bzhin ma yin pa de dag ni don dam par na rang bzhin med de/dper na gzugs brnyan bzhin no/ /bdag dang gzhan gyis smras pa'i dngos po rnams kyang gcig dang du ma'i rang bzhin ma yin pas zhes bya ba ni khyab par byed pa mi dmigs pa yin te/ gcig pa nyid dang du ma nyid dag gis rang bzhin la khyab pa'i phyir ro/ /khyab pa de nyid bstan pa'i phyir//rang bzhin zhig yod par gyur na ni zhes bya ba smos so/ /gcig pa zhes bya ba ni cha med pa nyid do/ /cig shos zhes bya ba ni du ma nyid de tha dad pa nyid ces bya ba'i tha tshig go/ /gang gi ngo bo rnam par gcad pa med na yongs su gcod pa med pa gang yin pa de ni de spangs te gnas pa'i mtshan nyid yin te/dper na dngos po med pa rnam par gcad pa med na yongs su gcod pa med pa ltar gcig pa nyid dang du ma nyid gnyis kyang phan tshun gyi ngo bo rnam par gcad pa med na yongs su gcod pa med pa dag yin te/ tha snyad kyis nges par byed do/ /de lta bas na phan tshun spangs te gnas pa'i mtshan nyid dag yin no//'dis ni rtag pa dang mi rtag pa dang rim dang rim pa ma yin pa la sogs pa yang rnam par bshad pa yin no/ /phan tshun spangs te gnas pa'i mtshan nyid gang dag yin pa de dag kyang gcig yod pa dang dgag pa ni gzhan dgag pa dang yod pa med na med pa nyid yin pa'i phyir phung po gzhan med par rtogs par byed de/dper na dngos po dang dngos po med pa lta bur gcig pa nyid dang du ma nyid kyang phan tshun spangs te gnas pa'i mtshan nyid dag yin no/ /de lta bas na phung po gzhan med pa'i phyir rang bzhin ni gcig pa nyid dang du ma nyid dag gis bsdus pas khyab pa grub bo//rang gi sde pa dang phyi rol pa dag gis smras pa'i phung po dang gtso bo la sogs pa la de dag yang dag par na med de zhes bya ba ni phyogs kyi chos sdud pa yin no/ /yang dag par na zhes bya ba ni mngon sum la sogs pa dang 'gal ba med par ston to//'o na 'di ci thal bar 'gyur bar sgrub pa yin nam/ 'on te rang gi rgyud kyis sgrub pa yin/ gal te dang po yin par rtog na ni de'i tshe gtan tshigs ma grub pa yin te/ gzhan dag dngos po thams cad la gcig dang du ma dang bral ba khas mi len pa'i phyir ro//ji ste gnyis pa yin no zhe na ni/ de lta na yang shin tu ma grub pa yin te/ bdag nyid gzhi khas mi len pa'i phyir dang / phyir rgol ba la yang rang gi ngo bo ma grub pa'i phyir ro snyam du dogs pa la gtan tshigs 'di ma grub bo snyam du ma sems shig ces bya ba smos so/ / ji ltar snyam pa la/ 'bras bu rim can nyer sbyor bas/ /zhes bya ba la sogs pa smos so/ /'di snyam du sems te/ re zhig gzhan dag gis brtags pa nam mkha' la sogs pa'i dngos po ma grags pa'i rang gi ngo bo gang dag yin pa de la ni thal bar bsgrub pa kho na yin la/ grags pa'i rang gi ngo bo rnams la ni gnyi ga ltar yang nyes pa med de/ 'di ltar gzhan dag gis dngos po thams cad ni rtag pa dang mi rtag pa nyid kyis phung po gnyis su khas blangs pa'i phyir ro/ /de la re zhig bdag la sogs pa ma grags pa'i rang gi ngo bo rnams kyang rang bzhin gcig pa nyid du khas blangs mod kyi/de dag ni 'bras bu rim can rnam par shes pa la sogs pa la nye bar sbyor bar khas len te/ shugs kyis rang bzhin gcig pa nyid med pa 'dren par byed pas re zhig gcig pa nyid dang bral bar grub pa kho na yin no/ /rtag pa nyid du khas blangs pa'i phyir du ma dang bral ba yang shin tu grub pa yin te mdor bsdus pa'i don yin no//de dag ces bya ba ni rtag pa rnams so/ /rang gi sde pa dang gzhan gyi sde pas khas blangs pa'i dngos po de dag ni zhes bya ba la sogs pas ni tshig le'ur byas pa'i phyed rnam par 'grel bar byed do/ /dang po zhes bya ba ni rtag pa rnams so//dga' ba dang gdung ba la sogs pa zhes bya ba la sogs pa zhes bya ba'i sgras ni bde ba yang ma yin/ sdug bsngal ba yang ma yin zhes bya ba la sogs pa bsdu'o/ /de dag gis 'bras bu rnams kyang cig car du 'byung bar 'gyur ba'i phyir ro zhes bya ba ni rgyu ma tshang ba med pa'i phyir te/'bras bu myu gu la sogs pa du ma cig car skye ba bzhin no/ /'bras bu rnams ni rgyu ma tshang na shol gyi zhes bya ba la sogs pa ni 'dir cig car gyis khyab par ston par byed de/ gang dag la rgyu'i nus pa thogs pa med pa yod pa de dag la de skad ces bya'o/ /shol ba ni sdod pa'o//gal te 'bras bu rgyu'i chos thams cad kyi rjes su byed par gyur na/ der 'gyur ba ma yin nam/ ji tsam du rgyu dang 'bras bu gnyis gcig pa kho nar 'gyur du 'ong bas/ ji ltar 'bras bu chos thams cad kyi rjes su byed par mi 'dod pa bzhin du rim ma yin pa'i rjes su byed pa nyid 'di yang de ltar 'gyur du 'ong ngo snyam pa la/shol na ni zhes bya ba la sogs pa smos te/ de la gal te 'bras bu la rgyu'i chos mtha' dag gi rjes su byed pa nyid med mod kyi/ 'on kyang 'dis gdon mi za bar de la yod pa'i rdzas su 'gro ba dang ldog pa'i rjes su byed par 'gyur ro/ / de lta ma yin na ji ltar de'i 'bras bu zhes bya/ de lta na ni thams cad kyang thams cad kyi 'bras bur thal bar 'gyur ro/ /gal te lhan cig byed pa'i rgyu la ltos pa'i phyir rgyu ma tshang ba med pa nyid ma grub bo snyam pa la/ bye brag tu bsgyur du mi rung ba rnams la ni lhan cig byed pa'i rgyu la ltos par mi 'thad ces bya ba la sogs pa smos te/gal te de dag bdag nyid kyis nus na ni ci'i phyir lhan cig byed pa phan pa med pa de dag la ltos par 'gyur/ ji ste mi nus na ni de lta na yang ltos par rigs pa ma yin te/ de dag gis de dag las phan pa cung zad kyang mi 'thob pa'i phyir ro/ /'on te thob na ni rtag pa nyid nyams par thal bar 'gyur ro//gzhan yang 'bras bu byed pa'i dus na zhes bya ba la sogs pas ni lhan cig byed pa la ltos pa yin du chug na yang lhan cig byed pa'i rgyu nye ba'i dus na yod pa dang rang bzhin khyad par med pa'i phyir de dang 'brel ba'i rang bzhin gyi rjes su 'jug pas na mi 'dod bzhin du mgul nas btags pa bzhin du stobs kyis drangs pa'i phyir lhan cig byed pa rnams rtag tu gnas pa kho na yin pas rgyu ma tshang ba med pa nyid kyis 'bras bu dang mi 'bral bar thal bar bzlog dka'o zhes ston par byed de/gang la lhan cig byed pa'i rkyen mtha' dag dang 'dug pa yod pa zhes tshig rnam par sbyar ro//'dis ni gang dag lhan cig byed pa'i rgyu de nyid nus pa'i sgrar brjod de zhes bya ba la sogs pas ni dus la sogs par smra ba gang dag dus la sogs pa'i dngos po rnams rang bzhin gcig pa yod mod kyi / rim gyis 'jug pa can gyi mthu rnams la ltos nas 'bras bu dag skyed par byed do zhes zer ba de dag kyang 'dis bsal lo zhes ston par byed do / /'di ltar gal te mthu de dag don gzhan yin par 'gyur ba khas len na ni de'i tshe lhan cig byed pa'i rgyu de kho na la de skad du brjod par zad pas bye brag med do//de'i phyir sun dbyung ba yang de kho na yin no/ /ji ste don gzhan du gyur pa ma yin na ni/ de'i tshe de dag de'i rang bzhin las tha mi dad pa'i phyir de'i rang bzhin rjes su 'brang ba bzhin du rtag tu nye ba'i rang bzhin yin pas ji ltar na 'bras bu 'jig par 'gyur/ ji ste nyes pa 'dir 'gyur du 'ong zhes bya ba la sogs pas ni tshigs su bcad pa'i phyed 'og ma rnam par 'byed de/rtag par 'dod pa zhes bya ba ni rtag pa nyid du sems pa'o/ /de dag la zhes bya ba ni rtag par 'dod pa dag la'o/ /rang bzhin snga ma ni 'jig par 'gyur ro/ /phyi ma ni 'byung bar 'gyur ro//rang gi sde pa gang dag ces bya ba la sogs pas ni bye brag tu smra ba'i gzhung gis ma grub pa nyid rjod par byed do/ /de dag ni so sor brtags pa la sogs pa 'dus ma byas/ 'dus byas kyi 'jug pa thams cad dang mi mthun pa rdzas su yod pa tha na rang gi yul can yid kyi rnam par shes pa'i 'bras bu la yang dgos pa med pa'i phyir nus pa thams cad kyis stong par 'dod de/rgyu dang 'bras bu dag ni 'dus byas kyi yin gyi / de dag 'dus ma byas kyi ni ma yin no zhes gsungs pa'i phyir ro/ /de yang rnal 'byor pa'i shes pa dam pa'i yul yin pa'i phyir/ don dam par yod pa'o zhes bya'o//de'i phyir de dag gi lugs ltar na 'bras bu rim can la nye bar sbyor ba med pa'i phyir/ ji ltar na gcig dang du ma'i rang bzhin gyi 'gal ba can du 'gyur ro / /'gal te zhes bya ba la sogs pa ni lan 'debs te/ shes pa gang la bsgoms pa las byung ba yod pa des shes par bya ba'i 'dus ma byas gang yin pa de smra ba'i ngang tshul can gang dag yin pa zhes tshig rnam par sbyar ba'i don to//de dag ni zhes bya ba ni 'dus ma byas pa dag go/ /yul dang yul can yin pa'i phyir zhes bya ba la sogs pas ni pha rol gyi lan du dogs par byed pa ste/ pha rol gyi bsam pa ni gang dag gis na gcig pa nyid nyams par 'gyur ba rgya skyegs dang shing bzhin du shes pa rim can dang de dag 'brel par ni khas mi len gyi yul dang yul can nyid du'o//yul dang yul can nyid ni gcig pa nyid du yang mi 'gal ba kho na ste/ don dam par na shes pa'i rang gi ngo bo la mi reg pa kho nar yul tsam nyid du gnas pa'i phyir ro//yul ni gdon mi za bar rgyu'i ngo bo kho nar 'gyur ba yang ma yin no snyam pa yin no/ /mi 'gyur te zhes bya ba la sogs pas ni lan 'debs so/ /'di la phyogs gnyis te/ res 'ga' rnam par shes pa snga ma la sogs pas shes par bya ba gang yin pa de'i rang bzhin de rnam par shes pa phyi ma la sogs pa skye ba'i dus na yang rjes su 'brang ngam/yang na mi 'brang ba zhig yin grang / gal te rjes su 'brang ba yin na ni de'i tshe rnam par shes pa snga ma la sogs pa dus gcig pa nyid du 'gyur te/ rnam par shes pa rnams kyis shes par bya ba'i rang bzhin rjes su 'brang ba'i phyir ro//sbyor ba ni gang gi tshe gang zhig rnam par shes pa gang gis shes par bya ba'i rang bzhin rjes su 'brang ba de ni de'i tshe rnam par shes pa de'i rjes su 'brang ba'i rang bzhin yin no/ /dper na rang gi rnam par shes pa skye ba'i gnas skabs na 'dus ma byas de nyid lta bu ste/pha rol pos 'dod pa 'dus ma byas rnam par shes pa snga ma dang / phyi mas shes par bya ba'i rang bzhin rnams kyang rtag tu rjes su 'brang bas zhes bya ba ni rang bzhin gyi gtan tshigs yin no/ /de lta ma yin na zhes bya ba la sogs pa ni gtan tshigs 'di'i ma nges pa nyid yongs su spong bar byed de/rnam par shes pa med na rnam par shes pa'i shes bya'i rang bzhin nyid rigs pa ma yin te/ ha cang thal bar 'gyur ba'i phyir ro/ /de'i phyir gcig la dus gcig tu yod pa dang med pa phan tshun 'gal ba yod par khas blangs par 'gyur te/de'i phyir ma nges pa nyid ma yin no/ /phyogs gnyis pa la yang rang bzhin gzhan dang gzhan skye ba'i phyir dang / snga ma snga ma yang 'jig pa'i phyir rnam par shes pa de dang 'dra bar skad cig pa nyid du thal bar 'gyur ro/ / de nyid ji ste shes pa snga ma dang phyi mas shes par bya ba zhes bya ba la sogs pas dogs par byas nas gal te de lta na ni/ sngon dang phyi ma'i gnas rnams su zhes bya ba la sogs pas ston par byed de/ bsam gtan nyid thur ma yin la gang dag la des blo gros kyi mig phye ba yod pa zhes tshig rnam par sbyar ro//gzhan gyi dus na med ces bya ba ni res 'ga' yod ces bya ba'i tha tshig go/ /de yang zhes bya ba ni 'dus ma byas nyid kyi don to/ /mi 'da' bar 'gyur ro zhes bya ba ni yul gyi rim gyis yul can gyi rim pa la khyab pas yul can gyi rim pa ni yul gyis byas pa'i phyir khyab pa nyid ston par byed do zhes bya ba'i tha tshig go//des na rgyu dang rkyen rnams kyis byas pa nyid kyi phyir 'dus ma byas su ston pa yang mi rung ste/ skad cig snga ma snga mas phyi ma phyi ma rnams byed pa'i phyir ro/ /de lta ma yin na skad cig ma rnams rgyu med pa nyid du 'gyur ro//de'i phyir res 'ga' ba nyid du'ang mi 'thad do/ /yod pa dang med pa'i dus gnyis bye brag med pa'i phyir ro/ /'di dag thams cad ni bdag gis rloms te smras su zad kyi zhes bya ba la sogs pas ni sun dbyung ba gzhan yang ston te/ bsdus pa'i don ni gang gis na phyogs kyi chos nyid du mi 'gyur ba don byed pas stong pa de lta bu phyogs kyi khongs su 'dus par yod pa ni ma yin te/don byed pas stong pa ni rtog pa dang ldan pa rnams kyis btang snyoms su bya ba nyid du gnas pa'i phyir ro zhes bya ba yin no/ /'dis ni gang dag mi rtag pa nyid la sogs par sgrub pa yod pa la sogs pa la/de lta bus ma nges pa nyid du rjod par byed pa de dag kyang bsal ba kho nar khong du chud par bya ste/ rtog pa dang ldan pa'i tha snyad kyi yul don byed nus pa'i mtshan nyid kyi yod pa gtan tshigs nyid du brjod par 'dod pa'i phyir ro/ /de lta bu ni med pa rnams las logs shig tu ni bstan par yang mi nus te/med pa ni nus pa thams cad dang bral ba tsam gyi mtshan nyid yin pa'i phyir ro/ /rloms pa ni nga'o snyam pa'i nga rgyal lo/ /gzhan du na zhes bya ba ni gal te don byed par rung ba'i yul dpyad par mi 'dod na de'i tshe don byed pa don du gnyer ba'i skyes bu rnams la/dngos po don med par dpyad pa dag ci dgos zhes brjod par bya ba ste/ rtog pa dang ldan pa'i 'jug pa ni dgos pa dang ldan pas khyab pa'i phyir ro/ /gal te de ltar gang zag dang gzugs la sogs pa chos rnams gtan med na/ ji ltar bdag med pa bsgrub par bya snyam pa la/dngos po'i rnam pa de lta bu la zhes bya ba la sogs pa smos pa ste/ 'di skad du don byed nus par grags pa gang yin pa de kho na la sgro btags pa las bzlog pa yod pa'i sgo nas ni gang zag la sogs pa bdag med par sgrub par byed la/ dgag pa'i sgo nas ni gzugs la sogs pa la phyin ci log tu sgro btags pa'i ngo bo 'gog par byed kyi/ gang zag la sogs pa nus pa dang bral ba la gzhi med par 'gog par byed pa ni ma yin no zhes bshad pa yin no/ /'o na gzhan la ji lta ji ltar bsgrub snyam pa la/ gzhan ni bsgrub pa yang med dgag pa yang med ces bya ba la sogs pa smos so//'o na gang dag gang zag ces bya ba rtag pa la sogs pa'i rnam par brjod du med pa nyid dngos por 'dod pa de dag la ji ltar rang bzhin med pa nyid 'grub par 'gyur/ ji ltar 'di la gtan tshigs 'grub par 'gyur snyam pa la/de lta bas na don byed nus pa ni zhes bya ba la sogs pa smos te/ de nyid kyi phyir 'di ltar mkhas pa rnams ni don byed nus pa la dngos po'i mtshan nyid du rjod par byed la/ don byed nus pa la yang skad cig pa nyid kyis khyab pa yin no/ /gzhan ni rim dang cig shos kyis don byed par 'gal ba'i phyir ro//chos can gang zag la yang skad cig pa nyid log na/ skad cig pas khyab pa ji skad smras pa'i yod pa ldog pa yang sgrim mi dgos par grub pa nyid do/ /gzhan yang skad cig skad cig ma yin par zhes bya ba la sogs pas ni gtan tshigs grub par ston par byed de/skad cig pa yin par gyur na ni rang bzhin gzhan dang gzhan 'byung ba'i phyir du ma'i rang bzhin nyid du 'gyur ro/ /skad cig pa ma yin na ni rang bzhin phyi ma gzhan mi skye ba'i phyir dang / snga ma yang ma zhig pa'i phyir gcig pu nyid du 'gyur ro/ / gnyi ga'i ngo bo yang mi srid na ni gcig dang du ma'i rang bzhin dang bral bar ji ltar mi 'gyur khyab par byed pa log na khyab par bya ba gnas pa ni med de/ khyab par byed pas ma khyab pa nyid du thal bar 'gyur ba'i phyir ro/ /de'i phyir gang zag la gtan tshigs grub pa kho na yin no/ / re zhig de ltar rtag pa'i phung po gnas pa rnams la gcig dang du ma'i rang bzhin dang bral bar bsgrubs pa yin no/ /yang de lta ma yin par phung po gnyis su gzhag nas/ dngos po thams cad las gcig dang du ma'i rang bzhin dang bral bar rab tu bsgrub pa'i phyir gzhan yang gzhan dag gis zhes bya ba la sogs pa smos so//khyab pa zhes bya ba ni thams cad na yod pa ste/ dper na bdag dang nam mkha' la sogs pa lta bu'o/ /bzlog pa ni ma khyab pa yin par rig par bya'o/ /rags pa ni yan lag can rnams so/ /rdul phra rab la sogs pa ni phra mo rnams so//phung po snga ma bstan pa la mi rtag pa rnams ni ma khyab pa'i phung po'i nang du 'dus par khong du chud par byas te/ des na de dag logs shig tu gcig dang du ma'i rang bzhin dang bral bar rab tu mi bsgrub bo/ /bum pa la sogs pa gang dag la tha dad pa'i phyogs yod pa de dag la de skad ces bya'o//bsgribs pa dang ma bsgribs pa ni bsgribs pa dang ma bsgribs pa dag go/ /de gnyis kyi dngos po ni bsgribs pa nyid la sogs pa ste/ sogs pa'i sgras ni g.yo ba dang mi g.yo ba nyid la sogs pa bsdu'o/ /sbyor ba ni gang dag bum pa la sogs pa phyogs tha dad pa can dag dang ldan pa de dag ni nges par rang bzhin gcig pa ma yin te/dper na gzhong bu sna tshogs na 'dug pa'i rgya shug lta bu ste/ nam mkha' la sogs pa'i dngos po rnams kyang phyogs tha dad pa can dang ldan pas khyab par byed pa 'gal ba dmigs pa yin te/ 'di ni thal bar 'gyur bar bsgrub pa yin no//gtan tshigs kyi khyab pa bstan pa'i phyir/ nam mkha' la sogs pa phyogs tha dad pa'i shing la sogs pa dang 'brel pa zhes bya ba la sogs pa smos te/ gal te rang bzhin tha dad pa nyid du khas mi len na ni/ de'i tshe nam mkha' la sogs pa dang 'brel ba'i rang bzhin gsal ba thams cad phyogs gcig par thal bar 'gyur te/spyi la sogs pa dngos po gcig dang 'brel ba'i rang gi ngo bo yin pa'i phyir ro/ /de lta ma yin te/ /phyogs tha dad pa yin na ni spyi la sogs pa de nyid gzhan na gnas par mi 'gyur te/ de gsal ba gcig gis bsdus pa'i rang gi ngo bo yin pa'i phyir ro//rang bzhin tha dad pa gzhan yang med pa'i phyir te/ rang bzhin med na 'brel ba mi rung bsam nges pa nyid yin no/ /rags pa rnams kyang bsgribs pa dang ma bsgribs pa nyid la sogs pa phan tshun 'gal ba'i chos gnas pa'i phyir/ lus can dang lus can ma yin pa bzhin du rang bzhin gcig pa nyid du rigs pa ma yin no//gal te bsgribs pa la sogs pa yan lag rnams kyi yin gyi zhes bya ba la sogs pas ni pha rol pos ma grub pa nyid du brjod pa'i dogs pa bsal ba ste/ pha rol gyi bsam pa ni rten dngos po gcig la bsgribs pa nyid la sogs pa 'gal gyi/rten tha dad pa la ni ma yin te/ yan lag gcig la ni bsgribs pa dang ma bsgribs pa nyid la sogs pa ma grub bo/ /'o na ji lta bu zhe na/ yan lag rnams la ste de'i phyir gtan tshigs ma grub bo snyam pa yin no/ /ci yan lag can 'di dag ces bya ba la sogs pas ni lan 'debs par byed do//de la yan lag can dag ji ste na yan lag rnams dang ldan nam mi ldan zhes bya ba phyogs gnyis te/ re zhig gal te mi ldan zhes bya ba'i phyogs yin na ni de'i tshe bsgribs pa la sogs pa dag yan lag rnams kyi yin gyi/ yan lag can gyi ma yin no zhes gang smras pa de ni bden na/ 'on kyang yul phan tshun rnam par chad pas bsgribs pa dang ma bsgribs pa la sogs pa chos mi mthun par gnas pa dmigs pa'i rig byar gyur pa lus de dang rkang pa la sogs pa yul tha dad pa na gnas pa'i phyir so so so sor ci'i phyir mig gi spyod yul du mi 'gyur ba brjod par bya dgos so//'on te ldan pa zhes bya ba'i phyogs yin no zhe na ni de'i tshe nges par chos 'gal ba gnas par thal bar 'gyur ro zhes ston par byed do/ /gal te de dag kyang de yin no zhe na zhes bya ba la pha rol gyi bsam pa ni/gang gi phyir yan lag can de dang yan lag de dag 'du ba'i mtshan nyid kyi 'brel ba can yin pa de'i phyir logs shig tu dmigs par mi 'gyur ro snyam pa yin no/ /de nyid do zhes bya ba ni dris na de nyid do zhes pha rol khas len pa'o/ /gal te de nyid do zhes khyod khas mi len na ni de'i tshe nyes pa cir 'gyur zhe na/gzhan du na zhes bya ba la sogs pa smos te/ rags pa ni du ma tshogs pa tsam kho na yin par 'gyur gyi gcig pu ni ma yin par 'gyur ro/ /'di ni de bas kyang ches rags te zhes bya ba la sogs pas ni chos 'gal ba gnas par sgrub par byed de/ 'di ltar rags pa gang zhig yan lag dmigs pa dang ldan par kun tu dmigs pa de nyid yan lag bsgribs pa la yang yod pas/yan lag bsgribs pa la yang de kho na bzhin du dmigs par 'gyur ba zhig na ni mi dmigs te/ de lta bas na bsgribs pa dang ma bsgribs pa nyid la sogs pa chos 'gal ba gnas par grub pa nyid do//re zhig de ltar rags pa rnams la rang bzhin gcig pa nyid bsal ba yin no/ /da ni rdul phra rab rnams la yang bsal ba'i phyir ro/ /'on kyang gang thog mar de rtsom pa'am zhes bya ba la sogs pa smos so/ /thog mar de rtsom pa zhes bya ba ni ji ltar bye brag pa rnams kyis yongs su brtags pa lta bu ston par byed pa ste/de dag ni rdul phra rab gnyis pa la sogs pa rags pa'i rdzas dang po rtsom par byed pa ni rdul phra rab rnams kho na yin par 'dod do/ /rags pa gdags pa'i rgyu zhes bya ba ni mdo sde pa'i lugs su bshad pa ste/ de dag ni rags pa gdags pa'i rgyu rdul phra rab rnams de ltar gnas pa 'ba' zhig tu zad kyi rdzas gzhan ni med do zhes brjod do//de la kha cig na re rdul phra rab rnams la phra rab phan tshun reg go zhes zer ro/ /gzhan dag na re rigs mthun pa mang pos bskor ba rnams ni bar dang bcas pa kho na yin la/ rags par 'khrul pa'i rgyu mtshan yin no zhes zer te/dper na slob dpon dge bsrungs kyis/ gang la phyogs cha tha dad yod/ /de ni gcig pu mi rung ngo / /zhes bya ba 'di sun dbyung ba'i bsam pas/ tha dad phyogs nas mang po dag /'ga' la kun nas bskor tsam du/ /brjod par zad kyi rdul de ni//cha shas bcas pa'i bdag nyid min/ /zhes bshad pa lta bu'o/ /'di'i don ni 'di yin te/ tha dad phyogs nas zhes bya ba'i gtan tshigs 'dis ni rdul phra rab mang po rnams kyis yongs su bskor ba tsam du brjod par 'gyur gyi/ yan lag dang bcas pa ni ma yin no zhes bya bar zad de/'dir yang bar dang bcas pa dag kho nar gnas so zhes de snyam du bsams nas smras pa yin no/ /gzhan dag na re reg pa yang ma yin la bar dang bcas pa dag kyang ma yin mod kyi/ 'dab chags pa kho nar gnas so zhes zer te/ ji skad du btsun pa na re rdul rnams mi reg kyang bar med pas reg par 'du shes so zhes zer ba lta bu'o//de la phyogs dang po ltar na bdag nyid thams cad kyis 'byar na ni thams cad kyi rang bzhin phan tshun rjes su zhugs pa'i phyir gong bu rdul phra rab gcig tsam du 'gyur ro/ /bdag nyid thams cad kyis zhes bya ba ni rdul phra rab kyi rang bzhin ci 'dra ba de khyab nas zhes bya ba'i tha tshig go//phyogs gcig gis zhes bya ba ni rang bzhin ma khyab nas zhes bya ba'i tha tshig go/ /des ni snang byed kyi rdul phra rab ni rang bzhin gcig pa yin pas thams cad ces bya ba dang phyogs gcig ces bya ba'i sgra mi 'thad de/ thams cad dang phyogs gcig ni yul tha dad pa'i phyir ro zhes gang smras pa de bsal ba yin no//phyogs gnyis pa ltar na yang rigs mthun pa rnams dang reg par mi 'dod du chug kyang / phrag ni snang ba dang mun pa'i ngo bo yin pa'i phyir rigs mi mthun pa snang ba dang / mun pa'i rdul phra rab rnams dang ni reg par 'dod pa nyid do//snang bas ma non pa'i mun pa dang bral ba nyid dam / mun pas gnas su ma byas pa'i snang ba dang bral ba nyid ni rigs pa dang ldan pa ma yin te/ de gnyis 'byung ba ni yul la sogs pa phan tshun bral ba tsam la rag las pa'i phyir ro/ /bar med pa'i phyogs kyang phrad pa'i phyogs kho na'i khongs su 'dus te/phrad pa'i rnam grangs yin pa'i phyir ro/ /bar gyi yul dang bral ba rnams la ni 'byar ba ma gtogs pa rnam pa gzhan med do/ /don de nyid sgra gzhan gyis brjod kyang gzhan du ni mi 'gyur ro/ /phyogs thams cad spyir sun dbyung bar 'byar ba dang ni bskor ba'am zhes bya ba la sogs pa smos te/de la dbus na yod pa'i rdul phra rab gang yin pa de rang bzhin gang gis rdul phra rab gcig la bltas te gnas pa de nyid kyis gzhan la bltas sam/ 'on te ma yin zhes bya ba brtag pa gnyis so/ /de la phyogs dang po ltar na bskor ba'i rdul phra rab thams cad phyogs gcig pa nyid du thal bar 'gyur te/de'i rang bzhin la bltas pa nyid kyi phyir ro/ /rdul phra mo gang la rang bzhin de gcig yod pa de ni de'i rang bzhin yin la rdul phra mo gang la de'i rang bzhin gyi rdul phra mo la bltas pa yod pa zhes tshig rnam par sbyar te de'i dngos po ni de nyid do//sbyar ba ni rdul phra rab kyi ngo bo gcig la bltas pa'i rang bzhin gang yin pa de ni phyogs gcig pa can yin te/ dper na dbus na gnas pa'i rdul phra rab de nyid kyi shar phyogs na gnas pa'i rdul phra rab lta bu'am/ shar phyogs kyi khang pa la khang pa gcig bltas pa lta bu ste/bskor ba'i rdul phra rab thams cad kyang rdul phra rab gcig la bltas pa'i rang bzhin yin pas zhes bya ba ni rang bzhin gyi gtan tshigs so/ /phyogs tha dad pa na gnas pa yin na ni mngon par 'dod pa'i rdul phra rab gcig pu la bltas pa'i rang bzhin dag tu mi 'gyur te/rdul phra rab de la rang bzhin gzhan med pa'i phyir ro/ /rang bzhin med na bltas pa yang mi rung ba'i phyir gtan tshigs ma nges pa nyid ma yin no/ /de'i phyir yang dag par na bskor te gnas pa med pas rdul phra rab rnams rgyas par mi 'gyur ro/ /phyogs gnyis pa ltar na yang yan lag dang bcas pa nyid du thal bar 'gyur bar gsal bar rab tu bdag gis rnam par ma phye'o//rdul phra mo rnams rang bzhin med pa nyid du grub pa kho nas rdul phra mo la ltos nas rab tu brtags pa'i bdag nyid du gnas pa'i chos thams cad rang bzhin med pa nyid du 'bad mi dgos par grub pa nyid do zhes bstan pa'i phyir/rdul phran rang bzhin med grub pa/ /zhes bya ba la sogs pa smos so/ /'dir 'thad pa/ de yi rang bzhin des brtsams dang / zhes bya ba la sogs pa smos te/ de la re zhig rang gi sde pa rnams ni gzugs can gyi khams rnams su rnam par gzhag pa gang dag yin pa de dag ni rdul phra rab kyi rang bzhin kho na yin par 'dod do//khams gzhan gang dag yin pa de dag kyang dngos su'am brgyud pas rdul phra rab la brten pa yin pa'i phyir rdul phra rab kyis brtsams pa yin pa kho nar brjod do/ /bye brag la sogs pa ni rdul phra mo gnyis po la sogs pa'i bar 'bras bu'i rdzas ni rdul phra rab rnams kyis dngos dang brgyud de brtsams pa kho nar 'dod do//grangs la sogs pa yon tan rnams kyang phal cher mngon sum mam brgyud pas rdzas rnams kho na yin par khas len te/ de'i phyir de dag gi yon tan yin pas de'i yon tan zhes bya'o//'degs pa la sogs pa las kyi bye brag rnams kyang phal cher mngon sum mam brgyud pas de'i las kyi rang bzhin dag yin te/ las ni lus can gyi rdzas la brten pa'i phyir ro/ /de dag gi las ni de'i las te las kyi bye brag gang dag la de'i rang bzhin de nyid yod pa de dag la de skad ces bya'o/ / spyi yang rnam pa gnyis yin la/ khyad par rnams kyang rdzas tha ma la yod pa dag yin pas spyi dang khyad par te/ rdzas rnams kyi spyi dang khyad par zhes bya bar tshig rnam par sbyar ro/ /de 'di ltar spyi yod pa nyid dang ba lang nyid la sogs pa ni rdzas dang yon tan dang las gsum dang ldan pa'i phyir phal cher dngos su'am brgyud pas de dag la brten pa nyid do//khyad par rnams kyang phal cher dngos su de dag la brten pa dag kho na yin no/ /'bras bu'i rdzas la sogs pa ji skad bshad pa de dag kyang gang gi phyir 'du ba zhes bya ba'i 'brel ba'i stobs kyis de dang 'du ba can du 'dod pa de'i phyir 'brel ba can rnams med pas 'brel ba can dang 'brel ba'i ngo bo 'du ba yang med pa kho na'o//de'i phyir 'di dag thams cad ni rdul phra rab kyi rtsa ba can yin pa'i phyir rdul phra rab kun tu chad na ji ltar gnas thob par 'gyur/ rang gi sde pa dag ni gzugs can gyi khams bcu po dag rdul phra rab bsags pa yin par brjod de zhes bya ba la sogs pas ni tshig le'ur byas pa'i don rnam par 'grel par byed do//'o na 'dus ma byas la thabs ci yod snyam pa la/ nam mkha' la sogs pa 'dus ma byas mtha' dag kyang zhes bya ba la sogs pa smos so//yon tan rnams kyang phal cher zhes bya ba ni sgra la sogs pa rdul phra rab kyi yon tan ma yin pa'i phyir ro/ /brten pa rnams ni dngos su 'bras bu'i rdzas la sogs pa'o/ /nye bar brten pa rnams ni brten pa la brten pa la sogs pa'o/ /nam mkha' la sogs pa rdul phra rab la mi brten pa ji ltar dgag snyam pa la/rtag pa'i dngos po nam mkha' dang zhes bya ba la sogs pa smos te/ lhag ma ni go sla'o/ /gnyis dang gnyis ma yin pa'i tshul du brjod pa dngos su bstan par bya'o zhes bya ba ni rnam par shes pa'i phung po mtshungs par ldan pa dang bcas pa rang bzhin med pa nyid ces bya ba rnal ma dang sbyar ro//de la shes pa dang shes bya yod pa nyid kyi tshul ni gnyis kyi tshul lo/ /shes pa tsam yod pa nyid kyi tshul ni gnyis ma yin pa'o/ /de la gnyis kyi tshul la yang rnam pa gnyis te kha cig na re shes pa rnam pa med pa kho nas yul rtogs par 'gyur ro zhes zer ro//gzhan dag na re rnam pa dang bcas pa kho na'o zhes zer ro/ /de la rnam pa med pa'i phyogs ltar na/ shes pas phyi rol gyi don 'dzin par rigs pa ma yin te/ 'brel ba'i rgyu med pa'i phyir ro/ /rang rig pa la gang gis na rang rig pa kho nar 'dod kyi /phyi rol ma yin pa 'brel ba ci zhig yod par ma yin nam/ ji ste de ni rang rig pa'i rang bzhin yin pa'i phyir rang rig par rnam par gzhag go zhe na/ gal te de lta na ni yul 'dzin pa'i rang bzhin yin pa'i phyir yang yul rig par ci'i phyir mi gzhag / gal te shes pa'i sul 'dzin pa'i las ni ci 'dra ba zhig yin/ gang gis na yul rig par gzhag par bya zhe na/ gal te de lta na ni rang rig pa la yang brgal zhing brtag pa mtshungs so snyam pa 'di sems la bsngogs nas rang rig pa la yang rang 'dzin pa'i las ci 'dra ba de nye bar ston cing brgal zhing brtag pa mi mtshungs pa nyid du bsgrub pa'i phyir/rnam shes bems po'i rang bzhin las zhes bya ba la sogs pa smos to/ /mdor bsdus pa'i don ni rang rig pa'i las ni shing rta dang rtsig pa la sogs pa bems po'i rang bzhin dag las log pa kho na yin te / gsal ba gzhan la mi ltos pa nyid du tha snyad kyi lam la 'jug pa yin no/ /lhag ma ni go sla'o/ /ji ste bya ba dang byed pa'i dngos por ci'i phyir rnam par mi gzhag snyam pa la/ bya dang byed pa'i dngos por min/ /zhes bya ba la sogs pa smos so/ /'di ni nye bar mtshon par zad kyi de bzhin du gzung ba dang 'dzin pa'i dngos por yang mi 'dod pa nyid do /rnam par 'grel pa las kyang de bzhin nyid du ston to/ /gsum gyi rang bzhin mi 'thad phyir/ /zhes bya ba ni bskyed par bya ba dang skyed pa po dang bskyed par bya ba'i ngo bo'am/ rig par bya ba dang rig pa po dang rig pa'i ngo bor ro/ / ci'i phyir mi rigs snyam pa la/ 'di ltar skye ba'i snga logs na ni med pas nus pa med ces bya ba la sogs pa smos te/ dngos po bdag nyid bskyed pa na ma skyes pa'am/ skyes zin pa zhig skyed par 'gyur grang na/ re zhig ma skyes pa ni ma yin te/ skye ba'i snga logs na de med pa'i phyir ro//med na nus pa thams cad dang bral ba'i phyir te/ med pa'i mtshan nyid ni de tsam du zad pa'i phyir ro/ /ji ste skyes zin pa zhes bya ba'i phyogs yin na ni de'i tshe skyes zin te nus pa'i tshe bskyed par bya ba yang bdag nyid du grub pa'i phyir bskyed par bya ba nyid du mi 'thad do/ /de lta ma yin na 'chol ba dang thug pa med par yang 'gyur ro//gang zhig gang dang grub pa dang bde ba gcig pa ma yin pa de ni de'i rang bzhin yin par mi rigs te/ ha cang thal bar 'gyur ba'i phyir ro/ /de nyid kyi phyir rig par bya ba dang rig pa po'i dngos po yang bsal ba yin te/ rig par bya ba dang rig pa po'i dngos po ni bskyed par bya ba la sogs pa'i ngo bos rab tu phye ba'i phyir ro//de lta bas na zhes bya ba ni mjug sdud do/ /phyi rol rig pa'i bya ba mi rung bar bstan pa'i phyir/ de'i phyir 'di ni shes pa yi/ /zhes bya ba la sogs pa smos so//ji ste zhes bya ba ni pha rol gyi lugs kyi dogs pa bsu ba'o/ /yul so sor rnam par rig pa yin pas zhes bya ba ni yul la dmigs pa'i rang bzhin yin pa'i phyir zhes bya ba'i tha tshig go/ /rnam par shes pas ji ltar bdag nyid rig pa ltar yul la dmigs pa'i rang bzhin de nyid ma grub par/de'i rang bzhin gzhan la med/ /ces bya ba la sogs pas ston te/ gal te shes pa dang shes bya gnyis gcig pa nyid du khas blangs par gyur na ni de'i tshe rang rig pa'i mtshan nyid ni gsal ba'i ngo bo tsam yin pa'i phyir rang rig pa bzhin du don yang rig par 'gyur ba zhig na rnam pa gnyis su smra ba nyams par thal bar 'gyur ba'i phyir khyod de ltar yang mi 'dod do//yongs su gcod pa zhes bya ba'i ngo bo de ni zhes bya ba la sogs pas ni rnam par 'grel par byed do/ /de ni zhes bya ba'i tha tshig go/ /shes pa don dang lhan cig de'i bdag nyid du gyur ba ma yin du zin kyang rnam par shes pa don rig par byed par go ci'i phyir mi 'gyur snyam pa la/'brel ba gang gis na zhes bya ba la sogs pa smos so/ /'o na de las skyes pa'i phyir 'brel bar 'gyur ro snyam pa la/ de las byung ba tsam gyis ni zhes bya ba la sogs pa smos so/ / de nyid kyi phyir tshogs pa gcig la rag las pas kyang 'brel par bstan par rigs pa ma yin te/ mig la sogs pa dus mnyam pa dag la yang thal bar 'gyur ba'i phyir ro/ /shes pa'i rang bzhin nyid de 'dra ste/ des na yul kho na rig par 'gyur gyi/ mig la sogs pa ni ma yin no zhe na/de yang lan du mi rung ste/ brtag par brtsams pa'i rang gi ngo bo nyid ma grub pa'i phyir ro/ /nam zhig na don rang rig par byar rung snyam pa la/ gal te don kyang yongs su gcod pa'i bdag nyid du gyur la zhes bya ba la sogs pa smos so/ /bdag nyid du gyur ces bya ba ni rang bzhin du gyur ces bya ba'i tha tshig go//de'i bdag nyid ces bya ba ni yongs su gcod pa'i bdag nyid do/ /shes pa'i don yongs su gcod pa'i ngo bo yin pas zhes bya ba ni yin pas na zhes bya ba'i tha tshig go/ /de lta yin no snyam pa la phyi rol gyi don la mngon par zhen pa'i dug gis zhes bya ba la sogs pa smos te/phyi rol gyi don la mngon par zhen pa nyid dug bzhin du gdug pa yin la gang la des ma rung bar byas pa'i bsam pa yod pa zhes bya bar rnam par sbyar ro/ /gang zhes bya ba ni dpyod pa la sogs pa ste/ de ni 'di skad du rnam par shes pa rnam pa dang bcas pa ma yin pa 'ba' zhig tu ma zad kyi/rang rig pa yang ma yin no zhes zer ro/ /de ltar na 'di ni don yin no/ /'di ni shes pa'o/ /don dang shes pa de dag kyang bdag la grub bo zhes bya ba'i grags pa 'dir yang mi 'gyur te/ shes pa rab tu ma grub na don thams cad rab tu mi 'grub par thal bar 'gyur ba'i phyir ro//gal te shes pa 'di ma grub tu zin kyang re zhig don ni mngon sum kho nar grub bo/ /don de las ni shes pa yang don gyis go bas 'grub par 'gyur te/ shes pa med pas shes bya nyid mi 'thad pa'i phyir ro snyam pa'i dogs pa bsu nas shes pa ni gsal ba yin na zhes bya ba la sogs pa smos te/don gyi gsal ba ni shes pa las gzhan ma yin gyi shes pa kho na yin no/ /gsal ba yang gsal ba ma yin na ni gsal ba gsal ba ma yin pa'i phyir mi gzhan gyi mngon sum bzhin du mdun na rnam par gnas pa'i don kyang mngon sum du mi 'gyur ro//de lta ma yin na ni ha cang thal bar 'gyur ro/ /shes pa gsal ba yin du chug na yang shes pa rnam pa med par smra ba'i ltar na/ don rnam pa thams cad du mngon sum du mi 'gyur te/ don rig pa 'di yin no zhes bya ba 'brel ba'i rgyu yang med pa'i phyir ro//'di ni sngar bshad pa kho na yin te/ de ltar na shes pa rnam pa med pa'i phyogs la don dngos su rig pa med do/ /gzhan yang shes pa rnam pa med pa'i phyogs 'di ni zhes bya ba la sogs pa ni ji ltar shes pa rnam pa dang bcas par smra ba rnams kyis brjod pa lta bu btags pa gang yin pa de yang med do zhes ston par byed pa'o //gzugs brnyan zhes bya ba ni don gyi rnam par shes pa la yod pa'o/ /gdags pa zhes bya ba ni nye bar btags pa'o/ /des gzhag pa shes pa'i bdag nyid du gyur pa'i gzugs brnyan zhes bya ba la sogs pas ni rnam par 'grel par byed do//gzhag pa ni shes pa'i bdag nyid la yod pa ste/ shes pa'i bdag nyid du gyur pa'i gzugs brnyan gang yin pa de rig pa nyid don rig pa yin te/ rgyu la 'bras bu'i chos nye bar btags pa'i phyir ro/ /su zhig mi 'dod pa zhes bya ba ni shes pa rnam pa med par smra ba'o//'di yang zhes bya ba ni nye bar btags pa'o// //bam po gnyis pa/ re zhig de ltar shes pa rnam pa med pa'i phyogs mi 'thad par bsgrubs nas shes pa rnam pa dang bcas pa'i phyogs kyang rigs pa ma yin pa nyid du bsgrub par 'dod nas/gal te de lta na shes pa rnam pa dang bcas pa nyid ni mi rung ngo zhes bya ba la sogs pa smos so/ /'di la yang rnam pa rnams bden par 'gyur ba'am yang na brdzun par 'gyur grang na zhes bya ba phyogs gnyis te/ de la phyogs dang po ltar na shes pa gcig dang tha mi dad pa'i rang bzhin yin pa'i phyir shes pa gcig gi rang gi ngo bo bzhin du rnam pa sna tshogs pa nyid du mi 'gyur ro//de'i phyir ri mo brkyang ba la sogs pa rnam pa'i stobs kyis phyi rol gyi don mi 'grub ste/ ri mo'i rnam pa dang 'dra ba nyid med pa'i phyir ro/ /ji ste nyams su myong bas grub pa'i phyir rnam pa rnams brtsal ba ma yin no zhe na/de'i tshe rnam pa rnams las shes pa tha mi dad pa'i phyir rnam pa bzhin du du ma nyid du 'gyur ro/ /de lta ma yin na chos 'gal ba gnas pa'i phyir tha dad pa ma yin par khas mi blang bar bya'o/ /'di ltar 'dod de zhes bya ba la sogs pa ni gang zhig du ma nyid du thal bar 'gyur ba mi 'dod pa nyid du sgrub par byed pa ma yin te du ma nyid du 'dod pa'i phyir ro snyam du sems pa de'i lugs kyi dogs pa bsu bar byed pa'o//mgyogs par 'byung phyir zhes bya ba ni myur bar 'byung ba'i phyir ro/ /me tog ut+pala'i 'dab ma zhes bya ba la sogs pas ni rnam par 'grel bar byed do//shin tu myur ba'i phyir zhes bya ba ni shin tu myur bar 'byung ba'i phyir ro zhes bya ba'i tha tshig go/ /mthong ba de ni zhes bya ba ni cig car du mthong ba'o/ /gal te de lta na/ lcug ma'i sgra la sogs pa'i blo/ /zhes bya ba la sogs pas ni ha cang thal bar 'gyur bar byed pas myur du 'byung ba cig car du shes pa'i rgyu ma yin pa nyid du bstan te/lcug ma'i sgra la sogs pa dag la blo rnams zhes tshig rnam par sbyar nas bsdu'o/ /sogs pa zhes bya ba'i sgras ni ta la dang mtsho dang ro bro ba la sogs pa'i sgra rnams bsdu ste/ lcug ma la sogs pa'i sgra la yang rgyu mtshungs pa'i phyir cig car yin par 'dzin pa'i mngon pa'i nga rgyal du 'gyur ro//de'i phyir lcug ma ta la zhes thos pa tha dad par mi 'gyur te/ thos pa tha dad pa ni rim gyis 'dzin pas byas pa'i phyir ro/ /rgyu rnams 'bras bu dang ldan pa 'dis ni gdon mi za bar 'gyur ba ma yin no/ /des na dngos po cig car rtogs pa'i rgyu yod pa'ang 'ga' kho na la 'gyur ro snyam pa la/rgyu 'dra ba'i rgyu rkyen ni tha dad par mi rigs te zhes bya ba la sogs pa smos so/ /'di snyam du sems te gang rgyu'i dngos po yin pa de ni gdon mi za bar 'bras bu skyed par byed pa kho na'o/ /rgyu rnams ni gdon mi za bar 'bras bu dang ldan pa ma yin no zhes gang smras pa de ni rgyu tsam la bsams nas dngos su btags par zad do//khyod rim gyis 'jug pa rnams la cig car yin par 'dzin pa'i mngon pa'i nga rgyal byed pa'i rgyu myur du 'byung ba las gzhan khas mi len la rgyu de yang thams cad du mtshungs te cig car gyi dngos por mngon par zhen pa'i nga rgyal byed pa ni myur du 'byung ba tsam la rag las te/'byung bar zad pas thams cad du 'byung ba kho nar 'gyur te/ rgyu ma tshang ba med pa'i phyir ro/ /myur du 'byung ba ma tshang ba med kyang gang mi 'byung ba de ni de'i rgyur rigs pa ma yin te/ ha cang thal bar 'gyur ba'i phyir ro/ /de'i phyir rgyu myur du 'byung ba'i mtshan nyid 'dra yang rgyu can 'bras bu cig car gyi dngos por mngon pa'i nga rgyal byed pa yod pa dang med pa tha dad par byas pa gang yin pa de ni mi 'gyur te/ 'bras bu tha dad pa ni rgyu'i bye brag gis byas pa'i phyir ro/ /de'i phyir de rgyu la yod pa'i rjes su 'gro ba dang ldog pa'i rjes su mi byed pa'i phyir rgyu'i 'bras bu nyid ma yin no//rgyu gzhan yang khas mi len pas rgyu med pa nyid kho nar 'gyur ro/ /sun dbyung ba gzhan yang / yid kyi rtog pa 'ba' zhig la'ang zhes bya ba la sogs pa smos so//rtog pa zhes bya ba ni rnam par rtog pa'o/ /'ba' zhig ces bya ba ni shes par rigs mi mthun pa gzhan dang ma 'dres pa'i phyir ro/ /ring du gnas pa ma yin pas zhes bya ba ni skad cig pa'i phyir ro/ /blo rnams kun zhes bya ba ni mig la sogs pa'i blo rnams so//sems pa ni 'phral gyi bya ba la sogs pa dpyod pa'o/ /dpyod pa ni sngon ma byung ba'i dngos po'i rang gi ngo bo la mngon par rtogs pa'o/ /sogs pa zhes bya ba'i sgras ni blo sbyong ba'i yid la sems pa la sogs pa gzung ngo / /sems pa dang dpyod pa la sogs pa nyid kyi dus de gnas skabs yin no//gnas skabs de ni 'byung ba'i ngang tshul can gang yin pa zhes tshig rnam par sbyar ro/ /gcig tu na zhes bya ba la sogs pas ni 'og ma'i phyed rnam par 'grel to/ /'di'i phyir zhes bya bas ni 'og nas 'byung bas so/ /pha rol gyi lugs las kyang zhes bya ba ni thams cad kyis myur du 'jig par khas blangs pa'i phyir ro//rim gyis 'dzin pa med na cir 'gyur snyam pa la/ rnam pa dag ni tha dad ltar/ /zhes bya ba la sogs pa smos so/ /dpe mgal me'i 'khor lo yang ma grub po zhes bstan pa'i phyir/ mgal me la yang cig car du//zhes bya ba la sogs pa smos so/ /rung ba ma yin te zhes bya ba ni rigs pa ma yin pa ste/ mgal me'i 'khor lo la ni mthong ba rim gyis 'byung ba can rnams cig car 'dzin par mngon pa'i nga rgyal byed pas mgal me la 'khor lo'i rnam par 'khrul pa ma yin gyi/ myur bar 'khor bar zhugs pa'i rjes su song bas mi 'khrugs par bskyed pa 'khor lo'i rnam par 'khrul pa skyed de gsal bar snang ba'i phyir ro//de ltar ma yin na gsal bar snang ba nyid du mi 'thad de/ dran pa kho nas mtshams sbyor ba'i phyir ro/ /mthong bas ni ma yin te/ mthong ba'i yul 'das pa ma yin pa'i phyir dang /rnam par rtog pa med pa'i phyir ro/ /dran pa ni dngos po myong zin pa'i yul yin pas rnam pa mi gsal ba nyid yin te/ myong zin pa med pa'i phyir dang / dran pa'i tshe rtogs pa yang mi gsal ba'i phyir ro zhes bsdus pa'i don yin no/ /'gal lam zhes dris pa dang /lan du 'gal te zhes bya ba smos so/ /des cir 'gyur zhes dris pa dang / smras pa zhes bya ba smos so/ /de'i zhes bya ba ni dran pa'o/ /de ni gsal ma yin zhes bya bar sbyar te/ ci'i phyir zhe na/ zhig pas so/ /mdun na 'dug pa zhes bya ba ni da ltar zhes bya ba'i tha tshig ste/dran pa'i yul ni 'dus pa yin no snyam du bsams pa'o/ /de'i bdag nyid du gyur pa zhes bya ba ni dran pa'i yul gyi bdag nyid du gyur pa'o/ /de bzhin du gyur pa'i rigs zhes bya ba ni yongs su mi gsal ba'o/ /ut+pala'i 'dab ma brgya 'bigs pa dper bstan pa gang yin pa de yang chos mi mthun pa yin no zhes bstan pa'i phyir/ut+pala'i 'dab ma brgya cig car phigs pa'i shes pa zhes bya ba la sogs pa smos te/ ut+pala'i 'dab ma 'bigs pa la ni ji ltar mgal me'i 'khor lo la sogs pa mthong ba ltar cig car du 'dzin par shes pa shin tu gsal ba ma yin no//ut+pala'i 'dab ma brgya phigs pa la ni rim pa yang tshad ma gzhan gyis grub kyi/ 'di la ni tshad ma yang ci yang med do/ /ut+pala'i 'dab ma brgya 'bigs pa la ni myur du 'gro ba tsam gyis cig car 'dzin pa shes pa 'byung ba med de/ rtse gcig pa med pa'i phyir ro zhes bya bar nges par byed do zhes bya bas ston par byed do//rjes su dpog pa ni rim gyis zhes bya bar sbyar ro/ /'dir rjes su dpag pa gang yin snyam pa la mang po dag la byed pa gcig gis 'bigs pa gang yin pa de ni zhes bya ba smos te/ 'di ni don brjod pa tsam du zad do/ /sbyor ba ni 'di lta bu yin te/ rim can bla 'og rim par gnas pa rnams mi gcig gi byed pas lus can gyis phug pa gang yin pa de ni rim gyis 'gyur ba kho na yin te/dper na zangs kyi glegs ma la sogs pa lta bu'o/ /ut+pala'i 'dab ma la sogs pa bla 'og gi rim par gnas pa rnams kyang mi gcig gi byed pas lus can gyis phug pa yin zhes bya ba ni rang bzhin gyi gtan tshigs yin no//de lta ma yin na ni gal te lus can gcig gis cig car du khyab par gyur na ni rim can nyid du mi 'gyur te/ lus can la gang gis na dngos po gcig la khyab par gyur pa ni de'i tshe gzhan la yang khyab par mi 'gyur ba rang bzhin gzhan ni med pa'i phyir ro//de'i tshe rang bzhin mi nye bas kyang gzhan mi phigs mi srid pas ma nges pa nyid ma yin no/ /gang dag ces bya ba ni phyi rol gyi don yod par smra ba kha cig kho na ste/ de dag gi lugs kyis shes pa rnam pa dang bcas pa yin yang ri mo brkyang ba la sogs pa la cig car du snang ba mi 'gal ba kho na'o//gal te de lta na zhes bya ba la sogs pas ni sun dbyung bar bshad do/ /rnam pa sna gcig ces bya ba ni kha dog gi rigs mi mthun pa dang ma 'dres pa ste/ rnam pa sna gcig la yang sngon po dang ser po la sogs pa'i rnam pa 'dzin pas sna tshogs su snang ba'i blo mi 'byung bar shar dang byang dang dma' ba nyid la sogs pa'i char snang ba'i phyir sna tshogs nyid yod pa kho na'o//du mar 'dod do zhes bya ba la sogs pas ni pha rol gyi gzhung gi dogs pa bsu bar byed do/ /'o na gcig tu 'gyur ba gang yin zhes dris pa dang pha rol pos gang yan lag med pa'i rdul gyi yul 'dzin pa ste zhes bya ba la sogs pa smos so//cha med pa zhes bya ba ni cha shas med pa ste/ rdul phra rab tsam 'dzin pa'i shes pa myong ba ni gang na yang med de/ dus thams cad du rags pa'i rnam par snang ba'i phyir ro/ /'dis ni dmigs pa'i rig byar gyur pa mi dmigs pa'i phyir med pa'i tha snyad du bstan to//des khas blang zhing zhes bya ba ni rdul phra mo tsam 'dzin pa'i shes pa yod do zhes khas blangs shing ngo / /de ltar mi dmigs bzhin du 'on kyang ci'i phyir khas mi blang snyam pa la/ rtog pa dang ldan pa rnams kyi zhes bya ba la sogs pa smos te/ 'dis ni yod pa'i tha snyad dgag pa bstan to//rnam pa rnams sna tshogs nyid yin yang lhan cig dmigs par nges pas shes pa gcig gi rang bzhin yin par rigs pa'i phyir shes pa gcig gi phyogs ci'i phyir 'gal snyam du sems par 'gyur ba 'di sems la bsdogs nas/ gzhan yang bcos ma dang zhes bya ba la sogs pas bsdus pa'i sgo nas shes pa gcig pa'i phyogs nyid sun dbyung ba bstan te/chos 'gal ba gnas pa'i phyir phye ma leb khra bo la sogs pa gcig pu nyid yin pa bsal to/ /rnam pa lhan cig dmigs pa de la yang chos 'gal ba yod pa kho na yin pas sna tshogs gcig pa nyid du don dam par ni rigs pa ma yin no//gal te nye bar btags pa yin na ni de'i tshe 'gal ba med do/ /'o na sna tshogs ma yin pa'i rnam par shes pa zhes bya ba la sogs pas ni pha rol po phyogs kyi phyogs gcig la ma grub pa nyid du rjod par byed de/ 'di ltar shes pa sna tshogs gang yin pa de kho na rang bzhin gcig pa 'gal gyi gang sna tshogs ma yin pa de ni gcig pa nyid du mi 'gal bas gtan tshigs phyogs kyi phyogs gcig la ma grub pa yin no//dmigs pa ni dmigs pa kho na yin te/ drug pa yid kyi rnam par shes pa'i khams gang la sems dang sems las byung ba la dmigs pa yod pa de la de skad ces bya'o//de dang don mthun te zhes bya ba ni mig gi rnam par shes pa la sogs pa dang yul gcig pa gang yin pa de yang bsags pa la dmigs pa kho na yin pa'o/ /'o na yid kyi rnam par shes pa chos kyi khams la dmigs pa nam mkha' la sogs pa 'dus ma byas la dmigs pa'i phyir rang bzhin gcig par 'gyur ro snyam pa la/chos kyi khams rnam par rig byed ma yin pa dang zhes bya ba la sogs pa smos te/ 'dus ma byas nam mkha' dang so sor brtags pa dang / so sor brtags pa ma yin pas 'gog pa dang /rnam par rig byed ma yin pa ni tshad mas gnod pa'i phyir shugs kyis tshor ba dang 'du shes dang 'du byed dang phung po gsum gyi rang bzhin kho na yin no/ /de la dmigs pa'i yid kyi rnam par shes pa yang zhes bya ba ni rnal 'byor pa rnams kyi shes pa gang yin pa de 'dir 'dod pa ste/rnal 'byor ba'i shes pa la dmigs par rung bar thams cad 'dra ba'i phyir ro/ /so so'i skye bo rnams kyis yid kyi rnam par shes pa rnam par rtog pa gang yin pa de ni sems la sogs pa'i nyi tshe shes pa can du myong ba kho na yin mod kyi/ 'on kyang don dam par na de ni yul med pa kho na yin no//de lta mod kyi / sgra'i rnam par skye ba'i phyir shes pa yang sna tshogs pa'i rnam pa nyid las mi 'da'o/ /re zhig de ltar rang gi sde pa'i lugs kyi shes pa thams cad sna tshogs pa nyid du bstan pa yin no/ /da ni phyi rol pa'i lugs kyis bstan pa'i phyir/ gang dag bde bar gshegs pa'i gsung rab ces bya ba la sogs pa smos so//gzegs zan ni gzegs ma za ba'o/ /'bras bu rdzas la sogs pa zhes bya ba la sogs pa zhes bya ba'i sgras ni yon tan dang las la sogs pa bsdu ste/ 'di ltar de dag gi lugs ni lus la sogs pa 'bras bu'i rdzas kyang gcig pa kho na yin la/rdzas dang ldan pa yon tan la sogs pa yang gcig pa kho nar gzung ngo zhes bya ba yin no/ /mi rung ste zhes bya ba ni lan 'debs pa ste/ 'bras bu'i rdzas gcig pa kho nar 'dod mod kyi/ 'bras bu'i rdzas yon tan la sogs pa dang lhan cig pa kho na 'dzin pa'i phyir dang /yon tan la sogs pa rten dang bral bar mi 'dzin pa'i phyir yul du ma yin pas shes pa sna tshogs kho na yin no/ /'o na zad byed pa dang dpyod pa pa'i lta ba la ji ltar snyam pa la/ rgyal ba pa zhes bya ba la sogs pa smos te/ zad byed pa rnams kyi ston pa rgyal ba yin la zad byed pa rnams rgyal ba'i yin pas na rgyal ba pa rnams so//zad byed pa rnams kyi lugs ni dngos po thams cad nor bu'i gzi bzhin du du ma'i ngo bo kho na yin te/ rtogs pa po'i bye brag gis dngos po 'gal la ngo bo rnam pa sna tshogs su dmigs pa'i phyir ro zhes bya ba yin no/ /gal te de lta na thams cad kyi rtogs pa 'dra bar 'gyur te dmigs pa gcig pa'i phyir ro//'dir len du du ma'i ngo bo'i dngos po la zhes bya ba la sogs pa smos te/ su zhig ngo bo gang kho na smra bar 'dod pa de ni tha snyad 'dogs pa'i dus na de nyid cig car ram rim gyis ston par byed la rtogs pa'i dus na tha dad pa dang tha dad pa ma yin pa rtogs pa ni 'dod pa'i dbang gis kha dog khra bo bzhin du thams cad sna tshogs kyi dngos po'i ngo bo kho na ston pas nyes pa med do//gal te de ltar yul sna tshogs pa yin du zin kyang / yul sna tshogs 'dzin pa'i shes pa sna tshogs su 'gyur ro zhes bya ba 'di la 'brel ba ci zhig yod snyam pa la/yul sna tshogs la rnam par shes pa sna tshogs ma yin pa snang ba ni zhes bya ba la sogs pa smos so/ /de dang mthun par mi 'jug ces bya ba ni shes pa rnam pa sna tshogs pa ma yin pas yul sna tshogs mi 'dzin par thal bar 'gyur te/ ji ltar sngar brjod pa bzhin no snyam du bsams pa'o//lha'i bla ma ni phur bu'o/ /phur bu'i lta ba'i rjes su 'brang ba rnams ni tshu rol mdzes pa dag go/ /'di ltar tshu rol mdzes pa pa rnams kyi mdo ni sa dang chu dang me dang rlung zhes bya ba ni de kho na bzhi yin la de kho na 'dus pa la ni yul dang dbang po dag gzhag go zhes bya ba yin no//'dus pa'i yul can yin bzhin du/ /ji ltar yul du ma nyid yin snyam pa la/ 'dus par rnam par gzhag pa'i rgyu ni zhes bya ba la sogs pa smos te/ tshu rol mdzes pa pa rnams kyi ltar na yang 'dus pa can rnams las 'dus pa gzhan med do/ /ser skya pa ni grangs can no//de dag gi gzhung 'di ni sgra la sogs pa yul thams cad ni snying stobs dang rdul dang mun pa'i ngo bo dag yin no zhes bya ba yin te de dag gi gzhung la ni yul sna tshogs pa nyid du gsal ba kho na'o/ /ji ste gsum gyi bdag nyid ces bya ba la sogs pas ni pha rol po'i lan la dogs pa bsu ba ste/yul ni snying stobs la sogs pa'i ngo bor gsum gyi bdag nyid yin yang de ni gsum gyi bdag nyid du mi snang gi /snying stobs la sogs pa'i ngo bo shas che ba kho na snang ba'i phyir rnam pa sna tshogs nyid du mi 'gyur ro/ /de yang de ltar mi rung ste zhes bya ba la sogs pas ni shas che ba yang 'khrul pa yod par ston par byed do//rigs kyi bye brag ni rnga mo la sogs pa'i rigs kyi bu bye brag las ni 'di ltar tsher ma la sogs pa la rnga mo la sogs pa ni dad la gzhan dag ni yid 'byung ngo / /bsgoms pa'i bye brag ni bud med la sogs pa la g.yem pa dang kun tu rgyu la sogs pa lta bu'o//gdung ba la sogs pa dang / zhum pa dang dga' ba ni go rims bzhin du rdul dang mun pa dang snying stobs shas che ba rnams kyi 'bras bu dag yin no/ /ngo bo gcig kho na shas che na gnyis kyi 'bras bu gang yin pa der yang mi 'gyur ro/ /mi snang ba la sogs pa'i dbang gis zhes bya ba ni pha rol gyi lan la dogs pa bsu ba ste/shas che ba kho na 'dzin pa ma yin gyi mi snang ba chos dang chos ma yin pa'i mthus kyang 'dzin pa yin no/ /sogs pa zhes bya ba'i sgras ni dbang phyug dang bcas pa'i grangs can gyi lugs kyis dbang phyug gi mthus kyang 'dzin pa bsdu'o//pha rol po dag na re dngos po 'ga' zhig 'dzin pa'i phyir shes pa 'ga' zhig rnam pa gcig pa kho nar 'gyur ro zhes zer ro/ /'dir lan du dngos po'i ngo bo rnam gsum la zhes bya ba la sogs pa smos so/ /de dang mi mthun pa snang zhes bya ba ni rnam pa gsum gyi dngos po dang mi mthun par snang ba ste/dngos po gcig pa kho na la rnam pa gsum du 'dod do/ /rnam pa gsum gyi dngos po yang rnam pa gsum gyi ngo bor mi 'dzin na / ji ltar na dngos po gzung bar 'gyur/ yang dag par na rnam pa gzhan gyis ni gzhan 'dzin pa ma yin te/ ha cang thal bar 'gyur ba'i phyir ro//de ni du ma'i bdag nyid dngos po de/ /bdag nyid gcig tu ston byed na/ /mi snang de ni ji lta bur/ /don ston byed pa yin par 'gyur/ /zhes bshad do/ /re zhig de ltar pha rol pos brjod pa gnyis kyi tshul la shes pa rang bzhin gcig pa nyid med do zhes bstan pa yin no//pha rol dang pha rol ma yin pas brjod pa gnyis ma yin pa'i tshul la yang bstan pa'i phyir/ gsang ba gang dag ces bya ba la sogs pa smos so/ /gsang ba brjod pa'am rig pas na gsang ba bdag ste/ rig byed kyi mtha' smra ba rnams zhes bya'o/ /de dag na re rnam par shes pa ni rtag pa gcig pu gnyis su med pa yin yang cig car dang rim gyis 'di thams cad sna tshogs kyi ngo bor rnam par shes pa nyid snang ngo zhes zer te/de dag gi phyogs ltar na sna tshogs pa nyid 'bad mi dgos par grub pa kho na'o/ /sna tshogs pa nyid yin yang ji ltar na gcig pa nyid du rung bar shin tu dka' snyam pa la/'di ltar sngon po dang ser po'i rnam pa zhes bya ba la sogs pa smos so/ /rim gyis snang ba nyid la ji ltar rigs pa ma yin snyam pa la/ rim yang gzugs dang sgra la sogs par snang ba ni zhes bya ba la sogs pa smos so/ /'di dag nyid kyis zhes bya ba ni rnam pa du ma dag dang tha dad pa ma yin pa dang rnam pa de'i rang gi ngo bo bzhin zhes bya ba dag gis so//'dir bzlog na gnod pa can gyi tshad ma ci yod snyam pa la/ de lta ma yin na zhes bya ba la sogs pa smos te/ /gal te grub pa dang bde ba gcig pa nyid du khas mi len na/de'i tshe rnam pa dang rnam par shes pa 'di gnyis gcig pa nyid du brjod par mi bya'o/ /de'i phyir du ma nyid yin na phyogs snga ma'i nyes pa ste/ rnam pa gnyis kyi phyogs la du ma'i nyes pa bshad pa thams cad du thal bar 'gyur ro zhes bya ba'i tha tshig go/ /rim gyis phyogs la zhes bya ba ni rim gyis snang ba'i phyogs la'o//sbyor ba ni gang zhig gang gi bdag nyid du gyur pa de ni de rig pa na rig pa kho nar 'gyur ro / dper na mngon par 'dod pa sngon po la sogs pa'i rnam pa'i rnam pa shes pa'i bdag nyid dam/ sngon po la sogs pa'i rnam pa lta bu'o/ / ser po la sogs pa'i rnam pa rim gyis snang ba can thams cad kyang mngon par 'dod pa sngon po la sogs pa'i rnam pa myong ba'i bdag nyid can du gyur pa yin te/ rang bzhin gyi gtan tshigs yin no/ /'di snyam du de'i tshe rnam pa snga ma dang phyi ma dag mi nye ba'i phyir de'i bdag nyid du gyur pa yin yang myong bar mi 'gyur ro snyam du sems par gyur na/de yang rigs pa ma yin te/ de'i bdag nyid du gyur pa'i phyir mngon par 'dod pa'i rnam pa bzhin du de'i tshe rnam pa snga ma dang phyi ma de gnyis kyang nye ba'i phyir ro/ /de lta bas na mngon par 'dod pa sngon po la sogs pa'i rnam pa gcig rig na rnam pa snga ma dang phyi ma'i rig par thal bar 'gyur ba bzlog dka'o//ji ste rim gyis snang ba la sogs pa brdzun pa'i phyir rim la sogs pa'i don mi 'thad pas/ 'di ni klan kar mi rung ngo snyam na/ de ni rigs pa ma yin te/ gal te thams cad brdzun pa yin na 'o na bden pa de gang zhig yin pa brjod par bya dgos so//gal te tshangs pa'i ngo bo gnyis su med pa kho na bden no zhe na/ gal te de lta na gnyis su med pa'i shes pa brdzun pa dang lhan cig tu 'brel ba ci zhig yod/ gang gis na de ltar bden pa de ltar brdzun pa'i ngo bor bdag nyid snang bar 'gyur/re zhig bden pa'i ngo bo nyid ni ma yin te/ bden pa dang brdzun pa'i ngo bo gnyis 'gal ba'i phyir ro/ /bden pa las skyes pa yang ma yin te/ brdzun pa ni bya ba ma yin pa'i phyir la rtag pa yang don byed pa'i nus pa dang bral ba'i phyir ro//bden pa ni bdag nyid de ltar mi snang ngo zhes brjod pa yang rigs pa ma yin te/ gang gi bden pa bdag nyid de ltar snang bar 'gyur ba shes pa las ma gtogs pa gzhan yang med pa'i phyir ro/ /cung zad kyang mi snang ngo zhes kyang brjod par yang rigs pa ma yin te/ nyams su myong ba dang 'gal ba'i phyir ro/ /de lta bas na shes pa'i rang bzhin nyid de 'dra ste/ des na de ltar brdzun pa'i rnam pa 'dzin par snang bar 'gyur ro zhes bya ba 'di kho na brjod par bya dgos so/ /de lta yin te brdzun pa'i rnam par snang ba na ni brdzun pa nyid du mngon par rgyug go zhes bya bar 'gyur ro//de lta ma yin na ni shes pas yul brdzun par 'dzin pa'i mi nus pas de'i phyir grogs po khyod kyis kho bo 'phel ba yin no/ /brdzun pa'i ngo bos bden pa sgrub par byed pa'i tshad ma yang ci yang med pas khyod kyi de ni bdag tu 'dzin pa shin tu dam pos bskyed pa'i bdag chad pas skrag pa'i phyir ltung bas 'jigs nas nam mkha'i rtswa la 'ju bar byed pa lta bu 'ba' zhig tu zad pas 'di ni gyi na'o//nam mkha' dang zhes bya ba la sogs pas mdo sde pa la sogs pa'i gzhung gis gtan tshigs ma grub par dogs pa bsu bar byed de/ de dag ltar na yang shes pa rnams sgra'i rnam par gzhag par 'byung ba'i phyir sna tshogs pa nyid yod pa kho na bas ma grub pa ma yin no//khas blangs te yang zhes bya ba ni sna tshogs su snang ba ma yin par ro/ /mtshan nyid bcas pa la zhes bya ba ni mtshan nyid dang bcas par 'dod pa mig gi rnam par shes pa la sogs pa la'o//mtshan nyid dang ldan pa la zhes bya ba ni dngos po mtshan nyid dang ldan pa la'o/ /'di skad du gang gi tshe dngos po nyid du 'dod pa mig gi rnam par shes pa la sogs pa rang bzhin med pa nyid du grub pa de'i tshe mig gi rnam par shes pa la sogs pa la dngos po'i mtshan nyid don byed pa nyid la sogs pa bkag pa'i phyir nam mkha' rnam par rtog pa la sogs pa gzhan yang ji ltar dngos po nyid du 'gyur te/mig gi rnam par shes pa la sogs pa dang 'dra ba kho nar thams cad kyang dngos po med par gyur to zhes bshad pa yin no/ /re zhig de ltar blo thams cad rang bzhin gcig pa nyid dang bral bar rab tu bsgrubs nas de ltar mjug bsdu ba'i tshigs su bcad pas ston par byed do//'dir zhes bya ba ni gzugs la sogs pa gcig gi rang bzhin nyid la sogs pa dgag par ro/ /gsungs pa zhes bya ba ni 'phags pa lhas so/ /gal te tshigs rnams las sor mo gzhan yin par gyur na/de'i tshe dmigs pa'i rig byar gyur pa'i phyir bum pa dang ras yug bzhin du logs shig tu dmigs par 'gyur ro/ /ji ste tshigs dang 'du ba'i phyir logs shig tu dmigs par mi 'gyur na de'i tshe tshigs re re la bdag nyid thams cad du rdzogs pa'i phyir tshigs gcig bsgribs na yang sor mo bsgribs par 'gyur ba'am/dmar na dmar bar 'gyur la sor mo mang po nyid du thal bar yang 'gyur ro/ /phyogs gcig gis khyab na ni gcig pa nyid nyams par 'gyur ro/ /de dag la yang phyogs gcig gis khyab na ni thug pa med par 'gyur ro/ / gzhan ma yin pa yang ma yin te/ sor mo gcig dang tha mi dad pa'i phyir sor mo'i rang gi ngo bo bzhin du rtse mo dang drung pa gnyis kyang gcig pa nyid du thal bar 'gyur la sor mo yang tshigs du ma dang tha mi dad pa'i phyir du ma nyid du thal bar 'gyur ro/ /de ltar na rnam par dpyad pa 'dis tshigs la sogs pa yang rang gi yan lag rnams las gzhan dang gzhan ma yin pa nyid du brjod du med pa'i phyir ma grub pas med do zhes brjod par bya'o//sor mo la sogs pa ma gtogs par yang 'dus pa med pa'i phyir dang / rdul phra rab rnams kyang phyogs tha dad pa nyid kyis ma grub pa'i phyir don dam par 'dus pa tsam yang med do//'o na gzugs dang sgra la sogs pa bden pa nyid du 'gyur ro snyam pa la/ sor mo la sogs pa rnams kyis ni zhes bya ba la sogs pa smos so/ /ji ltar sor mo la sogs pa dang / sor mo 'dus pa med par bshad pa de bzhin du dngos po thams cad dang gzugs la sogs pa yang med pa nyid du khong du chud par bya ste/de dag gi rang bzhin yang 'dus pa tsam yin pa'i phyir la 'dus pa yang dngos po med pa nyid du bstan pa'i phyir ro/ /'o na 'dus pa las ma gtogs par gzugs la sogs pa yod par 'gyur ro snyam pa la/ tshogs ma gtogs pa'i dngos phra'ang med//ces bya ba smos so/ /phra ba'ang zhes bya ba ni phra rab kyi bdag nyid kyang ste rdul phra rab kyang phyogs kyi bye brag gis tha dad pa'i phyir ro/ /'o na blo'i ngo bo gcig par 'gyur ro snyam pa la/ de ltar don gcig shes byed pa/ /zhes bya ba la sogs pa smos so/ / yul gyi rnam pa 'dzin par skye ba'i phyir shes pa yang sna tshogs pa'i ngo bo yin pa'i phyir ro snyam du bsams pa yin no/ /'o na yid kyi rnam par shes pa dang yid kyi rnam par shes pa'i sems las byung ba rnams dmigs pa gcig pa can yin par 'gyur ro snyam pa la/ sems byung tshogs dang bcas sems kyi//zhes bya ba la sogs pa smos te/ re zhig yid kyi rnam par shes pa dang yid kyi rnam par shes pa'i sems las byung ba gzugs la sogs pa'i yul can gang dag yin pa de dag ni yul sna tshogs pa can yin pa'i phyir sna tshogs pa nyid kho na yin no/ /gzugs shes pa la sogs pa'i yul can gang dag yin pa de dag kyang sna tshogs nyid kho na yin te/gong du gzugs la sogs pa la dmigs par gyur pa gzugs la sogs pa shes pa sna tshogs pa nyid kyi phyir ro zhes bshad zin to/ /rang gi sde pa sems tsam gyi tshul la brten pa'i blo gros dkar ba gang dag ces bya ba ni rnal 'byor spyod pa pa rnams so//shes pa la mthun pa'i bag chags yongs su smin pa la rag las nas 'byung ba yod pa zhes tshig rnam par sbyar ro/ /bag chags gang la thogs pa med pa'i sems can gyi rgyud la yod pa de la de skad ces bya'o/ /bag chags de smin pa ni yongs su smin pa ste/'jug pa thob pa zhes bya ba'i tha tshig go/ /yongs su smin pa de sprul pa ni bskyed pa'o/ /'dir 'thad pa gzugs la sogs pa'i skye mched ces bya ba la sogs pa smos so/ /rdzas dang yon tan la sogs pa zhes bya ba ni bye brag pa la sogs pa nye bar brtags pa rnams so//sogs pa zhes bya ba'i sgras ni las dang spyi dang bye brag dang 'du ba rnams bsdu ste/ 'dis ni phyi rol gyi gzung ba med pa'i phyir shes pa 'dzin pa med pa kho na'o zhes bstan pa yin no/ /phyi rol gyi don yod na yang shes pa ni gzung ba dang 'dzin pa'i rnam pas stong pa kho na yin no zhes bstan pa'i phyir tshor bar bya ba dang tshor ba po'i mtshan nyid dang yang bral ba'i phyir zhes bya ba la sogs pa smos te/re zhig rnam pa med na yod pa tsam gyis ni phyi rol gyi don rig par rigs pa ma yin te/ ha cang thal bar 'gyur ba'i phyir ro/ /yul gyi 'bras bu yin pas sam / /tshogs pa gcig la rag las pas kyang rig par rigs pa ma yin te/mig la sogs pa la yang thal bar 'gyur ba'i phyir ro/ /yul gyi rnam pa can tsam gyis kyang ma yin te/ rnam pa mtshungs pa'i sems gzhan yang 'dzin par thal bar 'gyur ba'i phyir ro/ /yul dang 'dra ba dang yul las byung ba dag gis kyang ma yin te/mtshungs pa de ma thag pa'i rkyen don mthun pa yang yul nyid du thal bar 'gyur ba'i phyir ro/ /de la sogs pa'i rnam pas tshor bar bya ba dang tshor ba po nyid kyi mtshan nyid mi srid pa'i phyir dngos po 'di dag ni sgyu ma la sogs pa'i rang bzhin ltar snang ngo / /'di dag de ltar snang ba'i rgyu gang yin snyam pa la/thog ma med par srid pa 'byung ba can zhes bya ba la sogs pa smos so/ /dngos po la mngon par zhen pa 'di la thog ma med pa'i srid par 'byung ba'i ngang tshul yod pas de skad ces bya ste/ mngon par zhen pa des bskyed pa'i bag chags gang yin pa'o//bag chags de yongs su smin pa ni 'jug pa thob pa nyid do/ /bag chags yongs su smin pa de'i mthu ni nus pa ste/ bdag po zhes bya ba'i tha tshig go/ /mthu de las rnam pa 'di dag snang ste/ phyi rol gyi don med par yang zhes bya ba'i tha tshig go/ /de dge zhes bya ba ni lugs thams cad kyi mchog yin pa'i phyir ro//dngos po de yang bdag nyid dam ci zhes bya ba ni sngon po la sogs pa'i rnam pa'i ngo bo'o/ /lugs 'di ni tshad ma dang zhes bya ba la sogs pas ni tshig le'ur byas pa'i don rnam par 'grel par byed do/ /'di ni zhes bya ba ni 'di zhes bya ba'i tha tshig go/ / gang dag dmigs pa la spyod pa de dag ni dmigs pa can te/ de dag ni dmigs pa can yang yin la mtha' yas pa dag kyang yin zhes tshig rnam par sbyar te/ dmigs pa can rnams kyi mngon par zhen pa ngan pa'am/ dmigs pa can rnams kyi mngon par zhen pa ngan pa mtha' yas pa gang yin pa de'i gnyen po yin pas so//tshad ma shin tu gsal ba gang yin snyam pa la/ 'di ltar rdul phra rab la sogs pa zhes bya ba la sogs pa smos so/ /sngar bshad pa zhes bya ba ni/ tha dad phyogs dang 'dre bas na/ /khyab rnams gcig pur ga la 'gyur//zhes bya ba la sogs pas so/ /lung gis shes par bya ba yang yin par bstan pa lung dang ldan pa yang yin te zhes bya ba la sogs pa smos so/ /gzugs brnyan lta bu zhes bya ba ni gzugs brnyan bzhin no zhes bya ba'i tha tshig go/ /snang yang ni zhes bya ba ni don gyi rnam par zhes bya ba dang sbyar ro//thog ma med pa'i blos bsgos pa zhes bya ba ni thog ma med pa'i dngos por mngon par zhen pa can gang yin pa des bsgos pa ste sbags pa'o/ /gcig tu na 'khor ba thog ma med pa nas bsgos pa yin no/ /gal te sems don gyi rnam pa can yin na 'o na ni yod do/ zhes bya ba khas blangs par 'gyur ro snyam pa la don med ces bya ba smos so/ /yang dag ji bzhin mthong zhes bya ba ni gcig dang du ma'i ngo bos don dpyod pa ste/ don yod pa nyid du mi snang ngo zhes bya ba'i tha tshig go/ /de ltar na chos la bdag med pa bshad pa yin no/ /gang zag la bdag med pa yang gtso cher bshad pa'i phyir gang zag ces bya ba smos te/kha cig na re tshe rabs gzhan dang gzhan dag tu 'khor ba'i gang zag gang yin pa ni rdzas su yod par 'dod do zhes zer ro/ /gzhan dag na re 'khor bar 'gyur ba rgyun rdzas su yod par 'dod do zhes zer ro/ /la la na re gzugs la sogs pa phung po rnams kho na 'khor ro zhes zer ro//gzhan dag na re phyi rol gyi rgyu dang rkyen rnams kho na 'khor ba pa yin no zhes brjod do/ /gzhan dag na re rdul rnams 'khor ro zhes zer ro/ /gzhan dag na re sna tshogs 'di ni gtso bo'i khongs su 'gyur ba yin no zhes zer ro/ / kha cig gis ni thams cad kyi byed pa po ni dbang phyug kho na yin no snyam du rtogs te / rab tu smra ba 'di dag thams cad ni sems tsam po kho na las rnam par rtog par byed kyi/ don dam par gang zag la sogs pa yod pa ni ma yin no zhes bstan pa yin no/ /'di thams cad ni ji ltar 'grub snyam pa la/ phyi rol don mthong zhes bya ba la sogs pa smos te/ don zhes bya ba'i sgra ni gzugs la sogs pa dang gang zag la sogs pa gnyi ga la yang bya'o/ /log pa yin zhes bya ba ni log pa'i don zhes bya ba'i tha tshig go/ /sbyor ba ni sems don gyi rnam pa can gang dang gang yin pa de ni log pa'i don yin te/dper na rmi lam la sogs pa lta bu'o/ /phyi rol gyi don mthong ba nyid du 'dod pa rtsod pa'i gzhir gyur pa'i sems 'di yang don gyi rnam pa can te/ rang bzhin gyi gtan tshigs 'phel ba yin no/ /'di la gnod pa can gyi tshad ma gang yin snyam pa la/ don yod ma yin te zhes bya ba smos te/gang gi phyir gcig dang du ma'i rang bzhin dag gis dpyad na don mi gnas pa'i phyir don med par grub pa ni gnod pa can gyi tshad ma yin no/ /phyi rol gyi yul dang 'brel ba'i don mngon sum kho nar grub pa ma yin nam/ de ji ltar na med kyang dam bcas pa yang ji ltar 'gal ba can du mi 'gyur snyam pa la/sems nyid de zhes bya ba smos te/ 'dis ni lugs 'di sngar bshad pa mngon par zhen pa ngan pa'i gnyen po nyid yin par bstan to/ /de nyid kyi phyir mkhas pa dag tshul 'di la brten nas zhes bya ba la sogs pa smos te/ 'di tsam gyis ni de dge zhes bya ba rnam par phye ba yin no//'on kyang zhes bya ba la sogs pas ni tshigs su bcad pa'i cha lhag ma 'grel par byed de/ yang dag pa nyid yin na rnam pa dang rnam par shes pa gnyis snga ma bzhin du rang bzhin phan tshun gnas par thal bar 'gyur te/ khong du chud par sla ba nyid do/ / g.yo dang mi g.yo la sogs la/ /zhes bya ba ni g.yo ba dang mi g.yo bar snang ba dag la zhes bya ba'i tha tshig go/ /de lta ma yin na zhes bya ba ni g.yo ba la sogs par snang ba ngo bo gcig la kho na ma yin na zhes bya ba'i tha tshig go/ /thal ba 'di ni zhes bya ba ni g.yo ba la sogs pa rnam pa gcig tu snang bar thal bar 'gyur ba'o//nges par tha dad par 'gyur ro zhes bya ba ni shes pa dang rnam pa gnyis zhes bya ba lhag ma'o / /la la las ni nges par de kho nar 'gyur ro zhes 'byung ste/ der ni de kho na zhes bya ba tha dad pa kho na la snyegs te/ gong du gdon mi za bar sna tshogs nyid du 'gyur ro zhes bshad pa der tha dad pa kho na'i skabs yin pa'i phyir ro//gang dag ces bya ba ni rnal 'byor spyod pa kha cig kho na yin te/ ji skad bshad pa'i sun dbyung bar thal bar 'gyur bas 'jigs nas rnam par shes pa rigs mthun pa mang po yang cig car skye'o zhes brjod do//de dag gi lugs kyis gcig la sna tshogs nyid du khas mi len pa'i phyir ji skad bshad pa'i sun dbyung bar mi 'jug mod kyi/ nyes pa gzhan yod pas smra ba de dag gi ni gang zhes bya ba la sogs pa smos so/ /lung gang yin snyam pa la gang snga phyi med par sems gnyis 'byung ba 'di ni gnas ma yin te zhes bya ba smos so//gnas ma yin te zhes bya ba ni mi srid pa'o/ /de nyid kyi bshad pa ni go skabs med do zhes bya ba yin no/ /snga phyi med par zhes bya ba ni dus gcig tu zhes bya ba'i tha tshig ste/ 'dir 'gal ba ni 'di yin no/ / de bzhin du zhes bya ba ni lung dang 'gal ba gnyis pa yang ston pa'o/ /rnam par smin pa'i rnam par shes pa'i dbang du mdzad de de skad ces gsungs par 'dod do zhe na zhes bya ba ni pha rol po lung gi gzhung 'dzugs pa'i dogs pa bsu bar byed pa'o/ /rnam par smin pa'i rnam par shes pa zhes bya ba ni kun gzhi'i rnam par shes pa ste/kun gzhi rnam par shes pa ni gcig kho na 'byung gi /du ma cig car ni mi 'byung bas na de'i phyir 'di ni bcom ldan 'das kyis kun gzhi'i rnam par shes pa'i dbang du mdzad nas gsungs kyi/ 'jug pa'i rnam par shes pa ni ma yin no zhes grags te/ rnam par bshad pa 'di yang sngon gyi slob dpon gyis rnam par bshad pa dang 'gal ba'i phyir dang / rnam par smin pa'i rnam par shes pa yang lus dang / longs spyod dang / gnas su snang bas sna tshogs pa yin pa'i phyir du mar thal bar 'gyur ba ma bzlog pas skyon chags pa kho na yin no snyam du bsams nas/gal te de lta na 'di ni zhes bya ba la sogs pa smos te/ sngon gyi slob dpon chos kyi grags pa la sogs pas 'di skad du bcom ldan 'das kyis gnas ma yin pa zhes bya ba la sogs pas rnam par rig pa rnams nges par bshad pa gang yin pa de ni rnam par rig pa de dag rnams las rnam par shes pa rigs mthun pa kho na'i dbang du mdzad de gsungs kyi/rigs mi mthun pa ni ma yin te/ 'di ltar rnam par rtog pa'i rigs mthun pa rnams rim gyis 'byung bar rtogs so zhes rnam par bshad do/ /de lta ma yin te gal te khyod sngon gyi slob dpon gyi tshul bor nas rang dgar rnam par 'chad par byed na ni de'i tshe kho bo yang 'di skad du 'di lta ste/gnas ma yin no zhes bya ba la sogs pa 'di ni mi mthun pa dang gnyen po'i sems gnyis cig car 'byung ba dgag pa lhur mdzad pa yin no zhes rnam par 'chad do/ /'o na rnam par shes pa'i rgyud gcig pa'o zhes bya ba 'di ni ji ltar dran snyam pa la/gcig ces bya ba'i sgra ni 'ba' zhig ces bya ba'i rnam grangs su gtogs pa yin gyi zhes bya ba la sogs pa smos te/ de lta yin na phyi rol gyi don dgag pa bstan par bshad pa yin no/ /de ltar bshad na yon tan ci zhig 'thob snyam pa la/de bas na rnam par smin pa'i rnam par shes pa zhes bya ba la sogs pa smos te/ khyod kyis bshad pa ltar na tha dad par thal bar 'gyur ba'i gnod pa skyed par 'gyur ba kho na'o snyam du bsam pa'o/ /gal te de lta na pha rol po de ltar bshad pa yin yang khyod kyis kho bo cag 'dod pa kho na bsgrubs pa yin no zhes smra bar 'gyur ro snyam pa la/ci lugs 'di rma med pa yin nam zhes bya ba la sogs pa smos so/ /dpyad pa de gang yin snyam pa la/ 'di ltar dbus su 'dod pa'i rnam par shes pa zhes bya ba la sogs pa smos so/ /shes pa rnams ni lus can ma yin pa'i phyir yul gyis byas pa'i snga ma dang phyi ma med pa ma yin nam/de ji ltar na shes pa rnams rdul phra mo bzhin du dbus na gnas par 'gyur/ de ni bden na smra ba 'di la skyon gzhan rnam pa yul khebs par snang ba rnams bden pa nyid du 'dod pas shes pa mang po yul med pa yin yang de bzhin du yul khebs par gnas par skye bar yongs su rtogs pa gang yin pa 'di yod do//de lta ma yin te gal te rnam par shes pa du ma skye bar rtogs pa la yang de ltar yul khebs par skye bar snang ba log pa yin par gyur na de'i tshe rnam par shes pa du ma skye bar rtogs pa don med par 'gyur te/sngon po la sogs par snang ba yul khebs par gnas pa ma rtogs par ni gang zhig bden par 'gyur ba sngon po la sogs pa gzhan nyams su myong ba ni med do/ /sngon po la sogs par snang ba yang brdzun pa nyid yin na gzhan ci zhig bden par 'gyur te/ 'di ni gyi na'o/ /rdul phra rab rnams ni lus can yin la rnam par shes pa ni lus can ma yin pa ma yin nam/ de ji ltar na 'dir nyes pa 'di nyid du 'gyur snyam pa la/ bar chad med par rigs gcig pa'i rdul du ma 'dzin pa na zhes bya ba la sogs pa smos te/ bsdus pa'i don ni ming tsam tha dad pa 'ba' zhig tu zad kyi/yul 'dab chags par gnas pa'i mtshan nyid kyi don la ni tha dad pa med do/ /ming tsam la 'jug pa'i sgos byas pa'i nyes pa mtshungs par bsgrub pa ni ma yin gyi/ yul 'dab chags par gnas pas byas pa'i nyes pa mtshungs par byed pa de la yang ming tha dad pa yod kyang ji ltar nyes pa mtshungs par mi 'gyur zhes bya ba yin no//gang dag nor bu'i gzi bzhin du zhes bya ba la sogs pas ni rnal 'byor spyod pa pa gzhan gyi lta ba'i dogs pa bsu bar byed de/ de dag ni dus thams cad du rnam par shes pa sna tshogs kyi rnam pa can gcig kho na skye'o zhes brjod do//snga ma rnams ni mig la sogs pa'i rnam par shes pa sna tshogs kyi rnam pa can yin par 'dod kyang gcig pu kho nar mi 'dod kyi/ rnam par shes pa brgyad par 'dod cing / gsang ba pa rnams ni 'gro ba thams cad ni rnam par shes pa rtag pa gcig pu tsam gyi rang bzhin yin par 'dod la/'di ni srog chags re re zhing so so'i mi rtag pa re rer 'dod pas phyogs snga ma gnyis las 'di la bye brag yod do/ /nam mkha' ni gnam yin te/ gang dag la nam mkha' de nyid kyi gos yod pa de la de skad ces bya'o/ /de dag gi lta ba zhes tshig rnam par sbyar te/'dir yang nam mkha'i gos can gyi lta ba bzhin du sun dbyung ba brjod par bya'o snyam du bsams pa'o/ /sun dbyung ba de nyid bstan pa'i phyir/ sna tshogs gcig pu'i rang bzhin min/ /zhes bya ba la sogs pa smos so/ /sbyor ba ni gang zhig sna tshogs yin pa de ni gcig pu ma yin te/dper na rin po che rigs sna tshogs pa lta bu'am/ dper na sems kyi rgyud sna tshogs la yod pa'i shes pa dag lta bu yin no/ /rnam par shes pa 'di yang sna tshogs pa yin te/ rang bzhin 'gal ba dmigs pa yin no/ /'di la ji ltar 'gal ba 'grub snyam pa la/sna tshogs zhes bya ba ni rnam pa tha dad pa la bya ste zhes bya ba la sogs pa smos te/ rang bzhin sna tshogs pa ma gtogs pa gzhan sna tshogs pa'i sgrar brjod par bya ba ni med do/ /sna tshogs pa dang gcig pa gnyis kyang ngo bo phan tshun rnam par bcad pa med na med pa yin pa'i phyir phan tshun spangs te gnas pa'i mtshan nyid kyi 'gal ba yin pas 'gal ba grub bo//'gal ba gnyis kyang rang bzhin gcig pa nyid yin na ni 'gro ba mtha' dag rdzas gcig tu 'gyur te/ de'i phyir lhan cig skye ba dang 'jig pa la sogs par thal bar 'gyur ba bzlog dka'o//de lta ma yin na ni gcig ces bya ba ming tsam kho nar 'gyur te/ ming la ni brtsad pa med pas gtan tshigs ma nges pa nyid ma yin te/ dper na rin po che rigs sna tshogs ni nam mkha'i gos can gyi lugs kyis blta bar bya'i/ rnal 'byor spyod pa'i lugs kyis ni ma yin te/rnal 'byor spyod pa la ni rin po che ma grub pa'i phyir ro/ /rnal 'byor spyod pa'i lugs kyis ni dpe sems rgyud sna tshogs la yod pa'i shes pa rnams yin te/ dpe sems rgyud sna tshogs la yod pa'i shes pa ni sogs pa zhes bya ba'i sgras bstan pa kho na yin no/ / des na sun dbyung ba 'di ni gnyis ka'i lugs la yang thun mong yin no/ /sun dbyung ba thun mong gzhan yang / /sna tshogs gcig pu'i rang bzhin ni / /zhes bya ba smos so/ /sna tshogs ngo bor snang bar yang mi 'gyur zhes bya ba ste/ sna tshogs kyi ngo bor snang ba ni sna tshogs kyi ngo bos khyab pa yin no//de ni tha dad pa'i bdag nyid du 'khrul pa med de zhes bya ba la sogs pa ni khyab pa de nyid ston par byed pa'o/ /de bzhin du gcig rtogs pas zhes bya ba ni rnam pa sna gcig snang na rnam pa thams cad snang bar 'gyur ba'o/ /sogs pa zhes bya ba'i sgras ni gcig dmar ram tshig na thams cad dmar ba la sogs par thal bar 'gyur ro zhes ston to//ji ste ngo bo nyid du de'i zhes bya ba la sogs pas ni 'di la pha rol po'i lan gyis dogs pa bsu bar byed do/ /de'i zhes bya ba ni shes pa'i'o/ /'o na ji ltar snang snyam pa la/ / nor pas zhes bya ba smos so/ /bsdus pa'i don ni gal te rnam pa 'di dag bden pa'i ngo bo kho na zhig tu gyur na de'i tshe 'gal ba 'di dag thams cad du 'gyur ro/ /brdzun pa nyid gcig yin na ni 'gal ba med de/ don dam par shes pa'i ngo bo gcig pa kho na khas blangs pa'i phyir ro zhes bya ba yin no//sngon po la sogs pa rnam pa'i bye brag tu gyur pa ma yin pa ni shes pa la phrad pa med pa'o/ /gzhan zhig gzhan gyi ngo bor snang bar ji ltar 'grub snyam pa la/ 'jim pa'i dum bu la sogs pa zhes bya ba smos so/ /sngags la sogs pas dkrugs pa'i mig can gyi mi rnams la zhes bya bar sbyar te/sogs pa'i sgras ni sman la sogs pa yongs su bsdu'o/ /gal te med na ji lta bur/ /zhes bya ba la sogs pas ni sun dbyung bar bshad de/ de dag ces bya ba ni rnam pa rnams so/ /'di ltar zhes bya ba ni byis pa yan chad la shin tu grags pa ltar ro//de yi dngos las tha dad pa'i/ /zhes bya ba ni rnam pa gsal ba snang ba las tha dad pa gnyis su med pa'i ste/ 'di ni 'jig rten las 'das pa yin no zhes ston par byed de/ 'di ltar shin tu gsal bar nyams su myong ba gang yin pa de ni brdzun la nyams su myong ba med pa gang yin pa de ni bden no zhes bya ba 'di las legs par smras pa 'di ni gzhan ci zhig yod/'di ltar gang la dngos gang med/ /ces bya ba la sogs pas ni tshad ma ston te/ dngos po gang zhig gang la med pa de ni de la shes pa ma yin te/ dper na sdug bsngal la bde ba la sogs pa'i dngos po'am dkar po'i rnam pa la sngon po'i rnam pa lta bu'o//shes pa la yang sngon po la sogs pa'i rnam pa med do zhes bya ba ni khyab par byed pa 'gal ba dmigs pa yin no/ /gal te tshad ma 'di la don dam par shes pa med par thal bar 'gyur bar rab tu bsgrubs na ni de'i tshe sgrub pa la grub pa nyid do//ji ste spyir sgrub na ni de'i tshe bzlog na gnod pa can gyi tshad ma med pa'i phyir ma nges pa nyid yin no zhes pha rol po'i lan gyi skabs spang ba'i phyir 'di la bsgrub par bya ba'i chos las bzlog pa dang zhes bya ba la sogs pa smos so/ /'dir ni spyi kho nar bsgrubs la/'di ma nges pa nyid kyang ma yin te/ 'di ltar shes pa ni rnam pa gnyis te/ dngos dang btags pa'o/ /de la dngos ni bems po'i ngo bo ma yin pa yin la/ bems po'i ngo bo ma yin pa yang shes pa kho na'i thun mong ma yin pa rang gi bdag nyid du gyur pa'i chos can yin na ji ltar rnam pa med pa'i yin par 'gyur/sbyor ba ni gang zhig shes pa'i ngo bo ma yin pa de la ni shes pa'i dngos po yod pa ma yin te/ dper na nam mkha'i pad+ma lta bu'o/ /med par khas blangs pa sngon po la sogs pa'i rnam pa rnams kyang shes pa'i ngo bo ma yin pas khyab par byed pa 'gal ba dmigs pa yin no//btags pa yang mi srid de/ 'di ltar rang gi rnam par snang ba'i shes pa bskyed pa nyid btags pa'i shes pa zhes bya na/ btags pa'i shes pa yang nus pa thams cad kyis stong pa rta ru lta bur med pa la ni rigs pa ma yin te/ med pa'i mtshan nyid ni nus pa thams cad kyis dben pa yin pa'i phyir ro//rta ru med pa ni zhes bya ba la sogs pa ni de nyid ston pa yin te/ rta ru ni btags pa'i shes pa nyid nyams su myong ba med do zhes bya bar sbyar ro/ /ci'i phyir snyam pa la/ rang snang ba'i shes pa bskyed par mi 'gyur te/ rigs pa gdags pa'i rgyur mi 'gyur ro zhes bya ba smos so//sbyor ba ni gang zhig nus pa med pa de ni btags pa'i shes pa ma yin te/ dper na rta ru lta bu'o/ /med par 'dod pa'i rnam pa rnams kyang nus pa med pa yin pas khyab par byed pa 'gal ba dmigs pa yin no/ /de ltar dngos dang nye bar btags pa phan tshun spangs te gnas pa'i mtshan nyid dag gis shes pa la khyab pa'i phyir khyab par byed pa de med de log pas des khyab pa shes pa yang ldog pa kho na yin pas shes par bya ba'i go skabs med pas na med pa'i phyir zhes bya ba'i gtan tshigs ni ma nges pa nyid ma yin no//tshad ma gzhan rnam pa de/ shes dang 'brel ba ci zhig yod/ /ces bya ba la sogs pa smos so/ /sbyor ba ni gang zhig dang lhan cig 'brel ba med pa de ni de tshor ba na nges par tshor ba med de/ /dper na shes pa'i bdag nyid tshor na mo gsham gyi bu tshor ba med pa lta bu'o//med par 'dod pa'i rnam pa rnams kyang shes pa dang lhan cig de'i bdag nyid dang de las byung ba'i mtshan nyid kyi 'brel pa gnyi ga yang med pas khyab par byed pa mi dmigs pa yin no/ /shes pa las byung ba yin na yang rgyu dang 'bras bu ni dus tha dad pa'i phyir tshor ba med pa kho na ma yin nam/des 'dir ci'i phyir klan ka mi btsal snyam pa la/ de las byung ba yin na yang snga phyi yod pas zhes bya ba la sogs pa smos te/ 'di yang 'dir nyes pa kho na yin mod kyi / 'on kyang 'di khas blangs nas nyes pa gzhan du brjod do zhes bya ba'i tha tshig go/ / rnam pa rnams med kyang tshor ba med par thal bar 'gyur ba 'ba' zhig tu ma zad kyi/ rgyu med pa nyid du yang thal bar 'gyur ro/ /de'i phyir res 'ga' ba nyid du mi 'thad pa'i nyes pa yod do zhes bstan pa'i phyir/ shes pa dang dus mnyam du dmigs pa'i rnam pa zhes bya ba la sogs pa smos so//'o na rgyu dang ldan par 'gyur ro snyam pa la/ rgyu dang ldan na'ang 'ga' zhig gis/ /zhes bya ba la sogs pa smos so/ /gzhan gyi dbang zhes bya ba ni rten cing 'brel bar 'byung ba yin pa'i phyir gzhan gyi dbang gi rang bzhin du 'gyur gyi/ kun brtags pa ni ma yin no zhes bya ba'i tha tshig go//yod par khas blangs ma thag pa ni rten cing 'brel bar 'byung ba yin pa'i mtshan nyid de/ rten cing 'brel bar 'byung ba'i mtshan nyid dang lhan cig de'i bdag nyid kyis 'brel bar nges pa'i phyir med na mi 'byung ba yin no/ /de'i bdag nyid kyis 'brel ba de nyid bstan pa'i phyir/rten cing 'brel par 'byung ba las gzhan gyi dbang ni zhes bya ba la sogs pa smos so/ /gal te de lta yin du chug kyang yod pa go rten cing 'brel bar 'byung ba med na mi 'byung bar ji ltar 'grub snyam pa la/ rkyen las byung ba'i rang bzhin las kyang zhes bya ba la sogs pa smos so//de zhes bya ba ni rnam pa'o/ /rnam pa med pa nyid kyis 'gyur/ /zhes bya ba ni rtag tu rnam pa med pa kho nar myong bar 'gyur ba'o/ /gal te shes pa nyid dmigs pa'i rig byar gyur pa yin pa'i phyir myong bar 'gyur ba kho na'o snyam na/ shel sgong dag pa 'dra ba yin/ / zhes bya ba la sogs pa smos te/ /shel sgong dag pa nyid ni nye bar bzhag pas kha sgyur ba dang bral ba'i gnas skabs so/ /tshu rol mthong ba rnams kyi dmigs pa'i rig byar gyur pa ma yin te/ de'i phyir shes pa dmigs par mi 'gyur ro snyam pa la/ nang dang phyi rol du gyur pa'i rnam pa zhes bya ba la sogs pa smos te/gal te nang ngam phyi rol gyi rnam pa dag cig srid par gyur na ni de'i tshe rnam pa rnams myong bas 'khrul pa bskyed pa rnams myong yang nges par mi 'gyur ro zhes bya ba 'gyur na gang gi tshe de dag nang na yang med phyi rol na yang med pa de'i tshe gang gi mthus bslus par 'gyur/gang gis na gnyis su med pa myong bzhin du yang nges par mi 'gyur/ smig rgyu la sogs pa la chu la sogs pa'i rnam pa med bzhin du yang myong ba'i phyir gang la gang dngos po med ces bya ba la sogs pa'i gtan tshigs ma nges pa nyid ma yin nam snyam pa la/smig rgyu la sogs pas zhes bya ba la sogs pa smos so/ /brgal zhing brtag pa mthun pa'i phyir ro zhes bya ba la ni smig rgyu la sogs pa yang phyogs su byas pa'i phyir ro zhes bya ba'i tha tshig ste/ 'di ltar smig rgyu la sogs pa la yang chu la sogs pa'i rnam pa gal te nang na yang med phyi rol na yang med na de'i tshe shin tu med pa de ji ltar myong bar 'gyur te/brgal zhing brtag pa mtshungs pa na kho na'o/ /'di snyam du brdzun pa'i rnam pa kun tu snang ba gang yin pa 'di nyid 'khrul pa'i rang gi ngo bo yin te/ des na rnam pa med pa yang 'khrul pa'i dbang gis myong bar 'gyur ro snyam du sems par gyur na de ni yang dag pa ma yin te/'di ltar 'khrul pa yin zhes bya ba'i sgrar ni 'khrul pa skye ba'i bag chags brjod par 'gyur ba'am yang na bag chags de lta bu la skyes pa 'khrul pa can gyi shes pa kho na brjod par 'gyur grang na de la phyogs dang po ltar na ni bag chags dang rnam pa rnams 'brel ba med pa'i phyir bag chags kyi stobs kyis rnam pa rnams myong bar rigs pa ma yin te/ha cang thal bar 'gyur ba'i phyir ro/ /de las byung ba'i mtshan nyid kyis 'brel ba yod pa kho na'o zhes bya bar yang rigs pa ma yin te/snga ma bzhin du gzhan gyi dbang nyid du thal bar 'gyur ba'i phyir ro/ /ji de yang phyogs gnyis pa yin no zhe na/ 'khrul pa can gyi shes pa dang rnam pa rnams 'brel pa zhig yin na yang de'i bdag nyid kyi mtshan nyid kho nar 'gyur gyi/ shes pa dang dus mnyam du myong ba'i phyir de las byung ba'i mtshan nyid ni ma yin no//dus mnyam pa gnyis kyang rgyu dang 'bras bu'i mtshan nyid du mi rung ste/ de'i phyir bag chags kyi 'bras bu'i bdag nyid ces bya ba la sogs pas 'khrul pa bzhin du shes pa las tha mi dad pa'i phyir gzhan gyi dbang nyid du thal bar 'gyur bar bzlog dka'o zhes ston par byed do//'khrul pa la ji skad bshad pa'i bag chags kyi 'bras bur gyur pa shes pa gang yin pa de kho na'i bdag nyid rang gi ngo bo yod pa zhes tshig rnam par sbyar ro/ /'dis ni zhes bya ba ni 'brel ba ma grub pa'i phyir med pa myong bar mi rung bar bsgrub pas so zhes bya ba la sogs pas zhes bya ba la sogs pa'i sgras ni/sngags dkrugs la sogs mig can la/ /dper na 'jim dum la sogs pa/ /de yi ngo bo bral bzhin du/ /gzhan nyid du ni snang ba ltar/ /zhes bya ba la sogs pas yongs su bsdu'o/ /gang la phyi rol gyi don la mngon par zhen pas dbang med par gyur pa'i blo yod pa zhes tshig rnam par sbyar te/phyi rol gyi don yod par smra ba'i dbang du byas nas bshad kyi bdag cag gi dbang du byas nas ni ma yin no zhes bshad pa yin no/ /'dis ni slob dpon gyi tshig skyon chags pa ma yin pa nyid du sgrub par byed do// //bam po gsum pa/ de bas na dngos dang cig shos kyis rig pa'i don ma grub pa dang zhes bya ba la sogs pas ni/ slob dpon dge bsrungs na re/ so so'i skye bo'i shes pa thams cad kyang sngon po la sogs pa'i rnam pas nye bar bsgyur bar gyur pa ma yin par 'jug ste/shes pa de la ni gcig pa nyid nyams par thal bar mi 'gyur te/ blo sna tshogs kyi ngo bo nyid ma yin pa'i phyir ro/ /shes pa de la sngon po la sogs pa myong ba'i ngo bo nyid du rnam par gzhag pa gang yin pa de ni sngon po la sogs pa myong ba'i ngo bo yin pa'i phyir yin gyi/ sngon po la sogs pa'i ngo bor gyur pa'i phyir ni ma yin te/'di ltar rnam pa ni dmigs pa 'dzin pa'i rnam pa kho na yin par brjod kyi/ dmigs pa'i ngo bo ni ma yin no/ /sngon po la sogs pa phyi rol gyi lta bur snang bar shes pa gang yin pa de ni shes pa'i rnam pa ma yin gyi/ sngon po la sogs par rig pa'i shes pa nyams su myong na sgrub pa pos sngon po la sogs pa de lta bu'i ngo bor rtogs so zhes zer ba de 'di nyid kyis lan btab pa yin no zhes ston par byed do//sngon po la sogs pa nyams su myong ba'i shes pa de'i 'jug pa ni nyams su byang ba ste/ gang la des yongs su rmongs pa'i bdag nyid yod pa zhes tshig rnam par sbyar ro//'di skad du gal te sngon po la sogs pa dang shes pa lhan cig 'brel ba 'ga' yang med na de'i tshe ji ltar sngon po la sogs pa de myong bar 'gyur/ sngon po la sogs pa'i ngo bo ma gtogs par gang gis na slob dpon gyis sngon po la sogs pa'i ngo bo las ma gtogs pa'i rnam pa rnam par gzhag pas khungs su 'gyur ba shes pa g.yo ba med pa dmigs pa 'dzin pa'i rnam pa gzhan ni med de/shes pa sngon po la sogs pa'i ngo bor skyes pa nyid bya ba dang bcas pa yin par shes la/ shes pas dmigs pa 'dzin pa'i rnam pa zhes bya'o//gzhan yang gal te sngon po la sogs pa nang na yang med/ phyi rol na yang med na ji ltar sems rnam par rtog pa med pa la sngon po la sogs pa shin tu gsal bar snang ba brjod dgos so/ /mi snang ba kho na'o zhes de skad brjod par yang mi nus te/ sngon po la sogs par snang ba thams cad kyi nyams su myong ba grub pa'i phyir ro//gsal bar snang ba ni gang gis na rmongs pa'i bdag nyid la de ltar snang bar rnam par rtog pa'i yul yin par yang rigs pa ma yin no/ /gal te yang shes pa thams cad rnam pa med pa kho nar nyams su myong na ni de'i tshe shes pa rnam pa med pa'i rjes la 'byung ba'i tshul can rnam par rtog pas kyang sngon po la sogs pa'i rnam pa so sor nges pa shes par rigs pa ma yin pa nyid de 'brel ba med pa'i phyir ro//gal te sngon po la sogs par shes pa nyid nor pa'i rang bzhin yin no zhes na 'dir/'di ni 'khrul pas shes she na/ /de ci 'khrul la rag las sam/ /zhes bya ba la sogs pa bshad zin to/ /de lta bas na 'brel ba med pas rnam par rtog pa'i yul ma yin pa'i phyir yang sngon po la sogs pa myong bar mi 'thad pas 'di ni rigs pa ma yin no/ /'o na yongs su ma dag pa'i gnas skabs na shes pa sna tshogs su snang ba brdzun pa kho na yin du chug kyang yongs su dag pa'i gnas skabs na ni rang bzhin gcig pa gnyis su med pa'i ngo bo kho nar 'gyur te/de'i phyir gtan tshigs the tshom za ba'i ma grub pa nyid yin no snyam pa 'di sems la bsngogs nas de bas na sngon po la sogs pa'i rnam pa ni zhes bya ba la sogs pa smos te/gal te dag pa'i gnas skabs na rnam pa thams cad ldog par srid par gyur na ni de'i tshe 'di yang srid pa zhig na 'di lta ste/ 'khrul pa log kyang rnam pa rnams ldog par mi srid de/ 'khrul pa dang rnam pa rnams 'brel ba med pa'i phyir ro//de lta ma yin na ni ha cang thal bar 'gyur ro/ /gzhan yang gal te ma dag pa'i gnas skabs na shes pa brdzun pa kho na yin na de'i tshe dag pa'i gnas skabs na bden pa'i ngo bo de dag las skye ba brjod par bya dgos so/ /brdzun pa las ni bden pa'i ngo bo skye bar yang rigs pa ma yin te/brdzun pa la nus pa med pa'i phyir ro/ /nus na ni de ji ltar brdzun par 'gyur/ de lta bu yang brdzun pa nyid yin na ni gzhan yang bden pa nyid du ji ltar 'gyur te/ /de'i phyir bden pa rgyu med pa can kho nar 'gyur ro/ /de yang rigs pa ma yin te/ rtag tu yod pa la sogs par thal bar 'gyur ba'i phyir ro//ji ste 'ga' zhig gi shes pa rang bzhin gyis gnyis su med par grub pa kho nar 'gyur te/ /dper na dbang phyug gi shes pa dbang phyug tu smra ba rnams kyis rtogs pa lta bu'o snyam pa na / de lta na yang the tshom za bar ma grub pa nyid kho na yin no zhe na/de ni rigs pa ma yin no / /rang bzhin gyis grub pa nyid yin na yang de ltar yod pa de dang 'ga' yang 'bral bar mi 'gyur te/ snga ma bzhin du rag lus pa med pa'i phyir ro/ /dbang phyug la sogs pa'i dngos po de lta bu yang bkag zin pa'i phyir ro/ /ji ste skad cig ma snga ma'i mthu'i stobs kyis skye ba'i phyir rgyu so sor nges pa la rag lus pa'i rang gi ngo bos 'ga' kho na la yod do zhes bya bar khas len na/de yang rigs pa ma yin te/ don dam par rgyu dang 'bras bu 'brel ba'i dngos po kho na mi 'thad pa'i phyir ro/ /'di ltar re zhes rgyu dang 'bras bu'i dngos po dus mnyam pa ni ma yin te/'bras bu skye ba'i snga rol na ni rgyu med pas nus pa med pa'i phyir ro/ /nus pa'i tshe ni 'bras bu yang grub zin pa'i phyir de'i tshe rgyu'i nye bar sbyor ba med pa kho na yin no/ /'di ni 'bras bu'o/ /'di ni rgyu'o zhes bya ba'i bye brag kyang ming pa'i phyir rnam par gzhag pa nges par yang mi 'gyur ro//rgyu dang 'bras bu dus tha dad pa dag kyang ma yin te/ dus gzhan gyis mchod pa'i rgyu las skyes na ni zhig pa kho na las skye bar khas blangs par 'gyur ro/ /zhig pa ni rgyu'i dngos por yang rigs pa ma yin te/ zhig pa ni med pa'i phyir dang / med pa yang nus pa thams cad dang bral ba'i mtshan nyid yin pa'i phyir ro//de lta ma yin na rgyu ji ltar zhig par 'gyur/ mchod pa las kyang ma yin te/ dus mnyam par thal bar 'gyur ba'i phyir ro/ /skad cig pa yan lag med pa gnyis mchod na ni dus mnyam pa ma gtogs pa rnam pa gzhan med de/'di ltar rgyu dang 'bras bu gnyis kyi bar na dus gzhan dang bral ba gang yin pa de nyid mchod pa yin no/ /de'i phyir skad cig ma snga phyi bar mchod pa gnyis ni ji ltar na dus phan tshun 'dus te rig par mi 'gyur te/ dper na rdul phra rab gnyis par med pa yin na gdon mi za bar rang bzhin phan tshun 'dus te phrad par thal bar 'gyur bas bdag nyid thams cad kyis phrad na gong du rdul phra mo tsam du gyur par bya ba de bzhin du bskal pa yang skad cig tsam du 'gyur bas gtan tshigs kyi the tshom za ba ma grub pa ma yin no// 'di snyam du kun rdzob tu dang rgyu dang 'bras bu yod pa la yang rnam par dpyad pa 'di ci'i phyir yang dag par mi 'jug snyam du sems pa ltar na de yang yang dag pa ma yin te/ gang gi phyir kho bo cag rgyu dang 'bras bu'i dngos po 'di grags bzhin du yang rnam par dpyad pa'i brtag pa mi bzod pa'i phyir kun rdzob ces smra'i/de lta ma yin na ni don dam pa kho nar 'gyur gyi kun rdzob tu ni ma yin no/ /de lta bas na kun rdzob la ni brgal zhing brtag pa mtshungs pa ma yin no/ /de ltar dngos po rnams kyi gcig pa nyid bkag nas shugs kyis du ma nyid dgag pa yang dngos su dgag par 'dod nas /de lta na/ dngos po gang dag rnam dpyad na/ /zhes bya ba la sogs pa smos so/ /phra rab tsam yang zhes bya ba ni chung ngu tsam yang ngo / /ci'i phyir rigs pa ma yin pa nyid yin snyam pa la/ 'di ltar/ du ma ni gcig pa bstsags pa/ /zhes bya ba la sogs pa smos te/ 'di skad du gang gi tshe rnam par dpyad na dngos po rnams kyi cha shas kyi ngo bo 'ga' yang rang bzhin gcig pa cha shas dang bral ba nyid du ma grub pa de'i tshe du mar ji ltar 'grub par 'gyur te/ du ma ni gcig 'dus pa'i bdag nyid yin pas gtan tshigs ma grub pa yin no zhes bstan par 'gyur ro//bsags pa ni tshogs pa'o/ /de la du ma yang med pa yin zhes bya ba gsungs so zhes bya ba ni sngon gyi slob dpon rnams kyis so/ /mdo de nyid las yang zhes bya ba ni 'phags pa lang kar gshegs pa'i mdo las so/ /ngo bo nyid ni gzung du med ces bya ba ni gcig pa dang du ma'i ngo bo ste/ji ltar sngar dpyad pa bzhin no/ /de'i phyir zhes bya ba ni gcig dang du ma'i rang bzhin dang bral ba'i phyir ngo bo nyid med pa yin pa dang / gcig dang du mar brjod du med par yang ngas bshad do zhes bya ba'i tha tshig go/ /de ltar bcom ldan 'das kyis phyi rol gyi don yod par lta ba la dngos po rnams rang bzhin med pa nyid du bstan nas/shes bya nang gi yin par lta ba la yang bstan pa'i phyir/ blo yis rnam par gzhigs na ni/ /zhes bya ba gsungs so/ /gzhan dbang med ces bya ba ni gzhan gyi dbang po ngo bo nyid med ces bya ba'i tha tshig ste/ gzhan gyi dbang yang gcig dang du ma'i rang bzhin gyis stong pa'i phyir ro snyam du dgongs pa'o//brtags pa'ang med ces bya ba ni kun tu brtags pa'i ngo bo nyid do / /kun tu brtags pa ni mtshan nyid stong pa kho nas ngo bo nyid med pa'i phyir ro/ /grub pa zhes bya ba ni yongs su grub pa'i ngo bo nyid de/ yongs su grub pa ni chos nyid kyi ngo bo yin pa'i phyir la rtog pa'i yul ni ngo bo med pa nyid du grub pa'i phyir ro//gal te 'di dag med pa kho na yin na ni 'jig rten la ji ltar grags pa yin snyam pa la/ rang bzhin med cing rnam rig med/ /ces bya ba la sogs pa smos te/ /rang bzhin ni gzhan gyi dbang gi ngo bo la sogs pa rnam pa gsum yin par dgongs so//rnam rig ces bya ba ni phyi rol gyi yul rnam par rig pa rnam pa drug gzung ngo / /rnam par rig pa'i dmigs pa gang yin pa de ni dngos po'i sgrar dgongs so/ /pha rol po dag gis mig la sogs pa'am/ bdag la sogs pa gang dag rnam par rig pa de'i rten nyid du brtags pa de dag ni rnam par rig pa'i rten yin pa'i phyir kun gzhi yin no//yang na 'jig pa'i tshe dngos po thams cad rang bzhin la sogs pa'i bag la zha bar 'gyur bas grangs can gyis yongs su brtags pa'i rang bzhin la sogs pa kun gzhi'i sgrar bzhed pa yin no//ro mtshungs zhes bya ba ni chos yang dag pa ji lta ba bzhin rnam par 'byed pa'i g.yo ba dang bral ba'i phyir shi ba dang 'dra ba rnams kyis zhes bya ba'i tha tshig ste/ 'di skad du 'di dag don dam par na med pa kho na yin mod kyi/ byis pas kun tu brtags pa'i dbang gis grags te yang dag par ni ma yin no zhes bstan pa yin no//'o na ji ltar chos kyi tshul yang dag pa la mkhas pa gnas par 'gyur snyam pa la/ mtshan ma dngos po rnam rig dang / /zhes bya ba la sogs pa gsungs te/ /mtshan ma ni sngon po dang ser po dang skyes pa dang bud med la sogs pa'o/ / dngos po ni phyi dang nang gi skye mched do/ /rnam rig ni mig gi rnam par shes pa la sogs pa rnam par shes pa'i tshogs lnga'o/ /yid kyi g.yo ba zhes bya ba ni gzhan gyi dbang la sogs pa rnam par rtog pa'o/ /rab 'das te zhes bya ba ni mtshan ma la sogs pa spros pa thams cad las rnam par 'das te/'di skad du sngon po la sogs pa'i mtshan ma la sogs pa la kun tu spyod pa'i gnas skabs ji snyed pa de dag thams cad ni spros pa'i gnas skabs yin pas spros pa'i gnas skabs dag las 'das na rnam par mi rtog pa'i ting nge 'dzin la 'jug pa yin no zhes bstan pa yin no//de bas na zhes bya ba ni gang gi phyir rigs pa dang lung dag gis grub pa'o/ /blo gros dkar po rnams kyis zhes bya ba ni slob dpon chos kyi grags pa la sogs pas so/ /de dang der zhes bya ba ni tshad ma rnam 'grel la sogs par ro/ /smos te zhes bya ba ni dngos su bshad pa ma yin pa ste/tshad ma rnam par 'grel pa la sogs par ni rnal 'byor spyod pa'i tshul bshad pa'i gnas skabs yin pa'i phyir ro/ /slob dpon gyis kun tu brtags pa'i ngo bo nyid kyi dbang du byas te de skad du bshad mod kyi/ yongs su grub pa nyid ma grub pa'i phyir te/rigs pa thun mong ba'i phyir slob dpon gyi tshig 'di thams cad du rung ba nyid do snyam du bsams pa'o/ /de nyid kyi phyir smos te zhes bya ba smos so/ /de bas mtshan nyid stong pa'i phyir/ /zhes bya ba smos pa 'di ni phyed 'og ma'o/ /phyed gong ma ni/ gzung 'dzin rnam par ma gtogs par//mtshan nyid yod pa ma yin no/ /zhes bya ba ste/ de bas mtshan nyid stong pa'i phyir zhes bya'o/ /de ltar ma grub pa nyid yongs su spangs nas ma nges pa nyid dgag pa'i phyir gtan tshigs grub tu zin kyang zhes bya ba smos so/ /chos gnyis ka dang ldan pa zhes bya ba ni bsgrub par bya ba dang sgrub pa'i chos dang ldan pa'o//rgyal dpog pa la sogs pa na re gdong la sogs pa nyid de de ltar dmigs pa gzugs brnyan gyi tha snyad ston to zhes zer ro/ /bye brag tu smra ba la sogs pa na ra me long la sogs par gzugs gzhan kho na zhig 'byung ngo zhes zer ro/ / mdo sde pa la sogs pa na re shes pa kho na de ltar 'khrul par snang ngo zhes zer te/ de dag thams cad kyi lugs kyis gdong la sogs pa dang dngos po yod pa'i phyir dpe ma grub bo/ /yang dbyung ba'i mi rigs so zhes bya ba ni yang gyen du dbyung ba mi rigs so zhes bya ba'i tha tshig go/ /gang gis ni gdong la sogs pa tshad mas gnod par byas pa grub pa'i phyir dpe ma grub par 'gyur ba/rang dga'i stobs kyis dngos po rnams de lta bu'i ngo bor dmigs pa ni ma yin gyi/ ji ltar na dpe ma grub par 'gyur/ 'di la khyad par du gnod pa can gyi tshad ma yod pas de'i phyir dpe byed do snyam du bsams nas/gzhan yang zhes bya ba smos te/ de la re zhig gzugs la sogs pa ni gzugs brnyan shes pa'i yul ma yin te/ gzugs dang mtshan nyid mi mthun par snang ba'i phyir ro/ /sbyor ba ni rnam par shes pa gang zhig gang dang mtshan nyid mi mthun par snang ba de ni de'i dmigs pa ma yin te/dper na sgrar shes pa gzugs dang mtshan nyid mi mthun par snang ba bzhin no/ /gzugs brnyan gyi shes pa yang gdong la sogs pa yul ji lta ba bzhin gnas pa dang mtshan nyid mi mthun par snang ba yin pas khyab par byed pa 'gal ba dmigs pa ma yin no//gal te me long gi ngos la sogs pa la zhes bya ba la sogs pas ni gtan tshigs 'di ma grub pa nyid yongs su spong bar byed do/ /shing dang ri zhes bya ba ni shing rnams dang ri rnams so/ /yal ga ni shing rnams kyi yal ga'o/ /rtse mo ni ri rab rnams kyi rtse mo ste/ rtse mo dag kho na me tog gi thod bzhin du rtse mo dag yin no/ /ha cang thal bar 'gyur ba'i gnod pa can gyi tshad ma yin pas na gtan tshigs ma nges pa nyid ma yin no/ /phyogs gnyis pa yang bsal ba'i phyir/ gzhan 'byung ba'i phyir rigs pa ma yin pa nyid de zhes bya ba la sogs pa smos so//lhan cig mi gnas pa'i phyir zhes bya ba ni yul gcig na mi gnas pa'i phyir ro/ /rang gi yul du gzhan 'byung ba'i bgegs byed pa gang yin pa 'di ni lus can rnams kyi chos yin la/ 'di la yang yul tha dad pa med pas gzugs gzhan 'byung bar rigs pa ma yin no/ / sbyor ba ni dngos po lus can gang dag yin pa de dag ni yul phan tshun spangs te/ gnas pa'i rang bzhin dag yin te/ dper na bum pa la sogs pa lta bu dag yin no/ /rtsod pa'i gzhir gyur pa'i dngos po 'di dag kyang lus can yin pas rang bzhin gyi gtan tshigs yin no//rlung dang nyi ma la sogs pas ma nges pa yang ma yin te/ de la yang rlung dang nyi ma la sogs pa'i rdul phra mo rnams 'dres pa yin mod kyi / yul phan tshun spangs te gnas pa kho na'i phyir ro/ /gal te yul gcig pa nyid du gyur na ni de'i tshe yul gcig rang bzhin phan tshun zhugs pas ngo bo gcig pa kho nar 'gyur bas 'di ni bzlog na gnod pa can gyi tshad ma yin no//de lta yang ma yin te de lta bas na bzlog ste brjod par bya'o/ /der snang ba'i shes pa tsam 'byung bar zad do zhes bya ba la sogs pa ni phyogs gsum pa yang sel bar byed pa yin te/ gal te yul gnod par byas pa nyid kyi phyir de la der snang ba'i rnam par shes pa tsam du dam 'cha' na de'i tshe bden pa'i gzugs la sogs pa'i rnam par shes pa gzhan yang gnod par byas pa'i yul can de nyid de dang mtshungs pas khyad par med pa'i phyir lhag ma bden par 'dod pa'i gzugs la sogs pa la yang de kho na bzhin du rnam par shes pa tsam du ci'i phyir khas mi blang /'di ltar rdul phra rab rnams zhes bya ba la sogs pas ni gnod par byas pa'i yul can de nyid dran par byed do/ /pha rol pos gzugs brnyan la sogs pa 'di dag rnam par shes pa'i ngo bor rdzas su yod par khas blangs mod kyi/gzugs brnyan la sogs pa de dag ni dpe nyid du 'dod pa ma yin no/ /'o na ci zhe na/ gzugs brnyan la sogs par shes pa'i snang ba can gyi ngo bo gang yin pa'o/ /de yang brdzun pa'i phyir dpe grub pa kho na'o snyam du bsams pa'o/ /de bzhin du sgyu ma la sogs pa dper byed pa lnga yang gang dag ci 'jim pa'i dum bu la sogs pa sgyu ma la sogs pa'i sgrar brjod dam/ji sta de ltar snang ba can gyi shes pa yin/ phyogs gnyi ga ltar na yang dpe bsgrub par bya ba dang sgrub pa med pa yin no snyam du rtogs par byed pa de dag kyang 'di kho nas lan btab pa yin no zhes bstan pa'i phyir/'dis sgyu ma dang rmi lam zhes bya ba la sogs pa smos so/ /brgya la 'di la yang rgyal dpog pa la sogs pa dag 'jim pa'i dum bu la sogs pa de dag nyid de ltar dmigs te/ de'i phyir sgyu ma la sogs par shes pa la snang ba can gyi ngo bo brdzun pa nyid du ma grub bo zhes smra bar 'gyur bas/'jim pa'i dum bu la sogs pa ni de ltar dmigs pa ma yin no zhes bya ba smos so/ /rnam pa dang bcas pa'i phyogs la ni snang ba yin no/ /rnam pa med pa'i phyogs la ni rigs pa yin no/ /de gnas med do zhes bya ba ni gzhon nu ma len gyis smras pa gong du smos pa'o//'o na rmi lam gyi shes pa la dmigs pa gang yin snyam pa la/ yul de dang ni yul gzhan no/ /zhes bya ba smos so/ /lhag ma ni go sla'o/ /bshad ma thag pa zhes bya ba ni gang rang gi ngo bor snang ba'am rig pa'o/ /mi mthun pa'i phyogs las ldog pa la the tshom za ba bsal ba'i phyir/'di ni phyogs dang mthun pa'i phyogs la yod par 'gyur du zin kyang zhes bya ba smos te/ 'di ni bdag gis sngar bshad pa kho na yin no/ /'di la ldog pa mi ldog pa med do zhes bya ba ni bsgrub par bya ba las bzlog na gtan tshigs las ldog pa yod pa kho na ste med ces bya ba'i tha tshig go//'dir dam bca' ba'i don gyi phyogs gcig yin pa'i phyir gtan tshigs ma grub pa ma yin nam/ gcig dang du ma'i ngo bo gnyis ni dngos po'i rnam grangs yin pa'i phyir de las bzlog pa'i ngo bo bsgrub par bya ba dang / sgrub pa gnyis tha mi dad pa'i ngo bo kho na yin no//de'i phyir gal te bsgrub par bya ba ma grub na/ bsgrub par bya ba dang tha mi dad pa'i ngo bo gtan tshigs kyang ma grub pa yin no/ /ji ste gtan tshigs grub na ni de'i tshe dngos po rnams kyi rang bzhin med pa nyid kyang grub pa yin te/ gcig dang du ma dang bral ba ri bong gi rwa la sogs pa la ni dngos po'i ngo bo nyid 'ga' yang khas mi len to snyam du dogs pa la/gtan tshigs 'di la ni zhes bya ba la sogs pa smos te/ re zhig gtan tshigs ji ltar grub pa de ltar ni rgyas par bsgrubs zin to/ /gtan tshigs grub kyang 'di yin no zhes bya ba'i ngo bos rang bzhin med par sgrub mod kyi/'on kyang rmongs pa la dngos po thams cad la rang bzhin med pa nyid du tha snyad gdags pa'i 'os nyid du rab tu bsgrub pa'i phyir gtan tshigs dam bcas pa'i don gyis phyogs gcig nyid ma yin te/dper na lkog shal la sogs pa dang ldan pas ba lang nyid lta bu dang / dper na dmigs pa'i rig byar gyur pa mi dmigs pas med pa lta bu yin pas klan kar mi rung ngo / /'khor ba gang zhig thog ma dang bral ba de ni thog ma med pa ste/ thog ma yod pa ma yin no zhes bya ba'i tha tshig go//lhag ma ni go sla'o/ /gang gi tshe rang bzhin la khyab par byed pa gcig dang du ma nyid dag log pas shing log pas sha pa ldog pa bzhin du dngos po'i rang bzhin ldog par sgrub pa de'i tshe dam bcas pa'i don gyi phyogs gcig pa nyid du ga la 'gyur/ khyab par bya ba dang khyab par byed pa ldog pa'i tshig rnam par chad pa tha dad pa'i ngo bo gnyis rnam grangs nyid ni ma yin no//rnam grangs kyi ngo bo ma yin pa ni dam bcas pa'i don gyi phyogs gcig nyid ni ma yin te/ dper na byas pa nyid mi rtag pa nyid du bsgrub par bya ba la don dam par gcig kyang gang byas pa nyid ni mi rtag pa sgrub par byed pa lta bu yin pas gyi na'o//de ltar rigs pas chos thams cad rang bzhin med pa nyid du bsgrubs nas lung gis kyang bsgrub par bya ba'i phyir/ 'di thams cad ni bcom ldan 'das kyis kyang gsungs te zhes bya ba la sogs pa smos so/ / yongs dag ces bya ba ni gsal bar snang ba nyid kyi rgyu bstan to/ /de bzhin du zhes bya ba 'di rang bzhin med par te/ 'di ni dngos kyi don dang sbyar ba yin no/ /gtan tshigs ni gcig dang du ma'i rang bzhin stong pa'i phyir zhes bya ba la ltos par bya'o/ /ljon pa zhes bya ba ni bod pa'o/ / shes par gyis zhes bya ba ni shes par gyis shig ces bya ba'i tha tshig go/ /gal te nyan pa po'i skye bo 'dir gzugs brnyan gyi dpes ni bcom ldan 'das kyis kun brtags pa'i ngo bo nyid kyis ngo bo'i chos kho na rang bzhin stong par bstan to snyam du go bar 'gyur bas/ nga yis rang bzhin stong pa zhes //zhes bya ba la sogs pa smos so/ /brtags pa'i ngo bo nyid kyis stong pa yongs su grub pa'i ngo bo nyid ces bya ba'i dngos po gang yin pa de bcom ldan 'das kyis bdag la kun brtags pa'i ngo bo nyid kyis stong par bstan to snyam du sems na de yang rang bzhin stong pa nyid du shes par gyis shig ces bya bar sbyar te/de yang rigs pas dpyad na mi gnas pa'i phyir ro/ /'di ni 'dir khungs yin no/ /gal te thams cad stong pa kho na yin na/ 'o na su la ni bstan par bya/ su zhig ni ston par byed/ ci'i phyir ni bstan snyam pa la/ byis pa log pa'i blo can zhes bya ba la sogs pa smos te/don dam par 'gro ba rang bzhin med mod kyi/ 'on kyang ston pa po la sogs pa yang dag pa dang yang dag pa ma yin pa'i kun rdzob kyi ngo bor yod pa kho na'o/ /de'i phyir de'i byin gyi rlabs kyis rmongs pa bzlog pa'i phyir bshad pa la 'jug pa nyid do zhes bsdus pa'i don to//de la de dag gi blo gros phyin ci log pa'i phyir log pa yang yin la/ blo ma byang ba'i phyir byis pa'i blo can dag kyang yin pas byis pa log pa'i blo can dag go/ /yang na 'bru mang po par sbyar ro / /blo ni chos kyi de kho na la ma byang ba'i phyir byis pa nyid yin no/ /de dag rnams la bstan pa'i phyir zhes bya ba ni ma rig pa bzlog nas rig pa bskyed pa'i phyir ro//gal te thams cad rang bzhin gyis stong pa kho na yin no/ / 'o na ji ltar kun nas nyon mongs pa dang rnam par byang bar rnam par gnas snyam pa la/ kun tu rtog pa'i rtog pas bskyed/ /ces bya ba la sogs pa smos te/'di lta bu dang 'di lta bu bya'o snyam pa'i sems pa ni kun tu rtog pa'o/ /de nyid rtog pa yin te/ rnam par rtog pa zhes bya ba'i tha tshig go/ /'dis ni las kyi kun nas nyon mongs pa rgyu nyid du bstan pa yin no/ /yang dag ma yin rtog pa ni ma rig pa la sogs pa ste nyon mongs pa thams cad ni yang dag pa ma yin pa kun tu rtog pa yin no//de dag gis bcings pa ni de dag gi dbang gis 'jug pa'i phyir te/ 'dis ni nyon mongs pa'i kun nas nyon mongs pa bdag po yang yin par bstan to/ /'di skad du don dam par stong mod kyi/ 'on kyang rgyu dang 'bras bu'i dngos po kun rdzob pa yod pa'i phyir kun nas nyon mongs pa la sogs pa rnam par gnas par 'gyur ro zhes bshad par 'gyur ro//nyon mongs pa dang las kyi rgyu rkyen gyi kun nas nyon mongs pa bstan pas rnam par byang ba yang shugs kyis bstan pa kho na yin te/nyon mongs pa dang las log na kun nas nyon mongs pa log par 'grub pa'i phyir ro/ /gzhan pa nyid dang gcig pa nyid ni ltos par lta bar byed pa yin pas gcig pa nyid dang du ma nyid dag gis spangs pa zhes bya ba'i tha tshig go/ /dngos po'i zhes bya ba ni spyir brjod pa'i phyir rang dang gzhan gyi mngon par 'dod pa gzugs la sogs pa dngos po thams cad kyi'o//gal te dngos po 'di dag don dam par rang bzhin med na/ 'o na shugs kyis 'di dag gi mtshan nyid ci zhig yin par 'gyur snyam pa la/ de'i phyir dngos po 'di dag ni zhes bya ba la sogs pa smos te/'khrul pa'i blos dngos po'i de kho na nyid bsgribs pas blo 'khrul pa thams cad ni kun rdzob yin no/ /'khrul pa'i blo'i bsam pa'i dbang gis brtags pa'i bdag nyid du gnas pa'i phyir de la yod pa ni kun rdzob pa yin no/ /'di ji lta snyam pa la/ gal te 'di dag don 'dod na//zhes bya ba la sogs pa smos te/ 'di skad du yang dag pa dang yang dag pa ma yin pa dag gis ni phung po thams cad la khyab ste/ de gnyis ni phan tshun spangs te gnas pa'i mtshan nyid yin pa'i phyir ro/ /yang dag pa'i ngo bo bkag na shugs kyis 'di dag cig shos su gnas par rang bzhin gyis 'gyur ro zhes bshad par 'gyur ro//lcags kyu med pa zhes bya ba ni rang dga' ste de ni res 'ga' 'di dag gi ngo bo brdzun par yang 'jog par 'gyur ro snyam du bsams pa'o/ /lhag ma ni go sla'o/ /lung gzhan yang ji ltar gnas pa'i dngos po'i de kho na la mkhas pas zhes bya ba la sogs pa smos so//mdo 'di las ni gzugs la sogs pa'i dngos po thams cad spyir mjug bsdus te/ kun rdzob tsam gyi rang bzhin yin par bstan to zhes ston par byed do/ /tha snyad du ston pa zhes bya ba ni phung po la sogs pa tha snyad tsam kho nar ston pa yin gyi don dam par ni ma yin no zhes bya ba'i tha tshig go//don dam pa'i rang bzhin bstan par mi nus su zin kyang brjod pa'i kun rdzob kyis res 'ga' zhig na bstan par bya ba nyid do snyam pa de'i phyir de bzlog pa'i ched du tha snyad ces bya ba smos so/ /de bzhin du tshor ba dang / 'du shes dang /'du byed rnams dang / rnam par shes pa rnams so/ /ci zhe na 'dogs la don dam par yang mi dmigs so zhes bya bar sbyar te/ 'di ni 'dir khungs yin no/ /tshul bzhin zhes bya ba ni tshad ma dang ldan pa'o/ /bdag med pa zhes bya ba ni bdag gi rang bzhin ma yin zhes bya ba'i tha tshig go//de bzhin du zhes bya ba ni bdag med par ro/ /sems can bdag med par zhes bya ba ni ji ltar gang zag la bdag med par bshad pa kho na ltar ro/ /de bzhin du zhes bya ba ni gang zag bzhin du rang bzhin kho nas ngo bo nyid med par mthong ngo zhes bya ba'i tha tshig ste/ 'di ni 'dir khungs yin no//rgyal ba skyed ma las zhes bya ba ni shes rab kyi pha rol tu phyin pa las so/ /bar du zhes bya ba ni mtha' bstan pa ste/ rang gi mtshan nyid stong pa nyid kyi phyir gzugs ni gzugs kyi rang gi ngo bo nyid kyis stong la/ rnam par shes pa'i bar du yang zhes bya ba'i tha tshig go//'dir khungs ni rang gi mtshan nyid stong pa nyid kyi phyir zhes bya ba yin no/ /'di ni zhes bya ba ni stong par bshad pa 'di thams cad du stong pa nyid du bshad pa gang yin pa'o/ /gang gi rang bzhin yod pa yin te/ med pa ma yin pa de la de skad ces bya'o/ /'di yang zhes bya ba ni ji skad bshad pa'i tshig gis bstan par bya ba'i don to//brtags pa'i ngo bo nyid kho na'o zhes bya ba ni rigs pa dang bral ba'i phyir dang tshad mas gnod pa'i phyir ro/ /gnyis la sogs pa zhes bya ba la sogs pa ni tshad mas gnod pa de nyid ston par byed do/ /lung gzhan yang glang po'i rtsal zhes bya ba smos so//ma mchis zhes bya ba ni yul med pa'i phyir de yang med ces bya'o/ /de ci'i slad du zhes bya ba ni 'di dag sgyu ma lta bu nyid du gang las grub/ gang gis na dpe des rang bzhin med pa nyid du 'grub par 'gyur zhes bya ba'i gtan tshigs 'dri ba'o/ /'di la yang dag pa'i chos gang yang mi dmigs pa'i slad du'o zhes bya ba ni gcig pa nyid dang du ma nyid la sogs pas dpyad na snyam du dgongs pa'o//ji ste don dam pa'i rang bzhin bkag pas dngos po rnams kun rdzob pa'i ngo bor bzhag pa gang yin pa de ci sgra'i tha snyad kyi bdag nyid kyi kun rdzob la yod pa'i phyir kun rdzob par 'dod dam/'on te rten cing 'brel bar 'byung ba don bya ba byed pa gnag rdzi yan chad la shin tu grags pa de nyid brda'i dbang gis kun rdzob kyi sgrar brjod ces bya ba rtog pa gnyis so/ /de la gal te phyogs dang po lta bu yin na ni de'i tshe mngon sum la sogs pas gnod pa yin te/'di ltar sgra'i tha snyad ni spyi tsam gyi spyod yul can yin pa'i phyir rten cing 'brel bar 'byung ba'i dngos po'i mtshan nyid kyi yul can ma yin no/ /spyi de yang kun tu brtags pa'i ngo bo yin pa'i phyir dngos po med pa yin na de'i ngo bo nyid du khas len pas dngos po rnams kyi don bya ba byed pa shin tu grags pa la skur par 'gyur te/spyi ni don byed mi bzod pa'i phyir ro/ /ji ste phyogs gnyis pa lta bu yin na ni de'i tshe ming la brtsad pa yod do snyam pa'i bsam pas pha rol pos ji ste zhes bya ba smos te/ gal te tshad mas dpyad na rten cing 'brel bar 'byung ba yin pa 'di dag kyang rang gi ngo bo grub par gyur na ni de'i tshe de la kun rdzob kyi sgrar rjod par byed na ming la brtsad par 'gyur ro//gang gi tshe gcig pa nyid dang du ma nyid la sogs pas dpyad na 'di dag gi rang bzhin mi gnas pa de'i tshe de lta bu la kun rdzob kyi sgrar brjod na ni gnas kho na yin pas ji ltar ming la sogs par 'gyur/mthong ba ni mig gi rnam par shes pa la sogs pas nyams su myong ba'i phyir ro/ /'dod pa ni ji ltar nyams su myong ba bzhin nges pa'i phyir ro/ /gang dag la ma brtags gcig pu na dga' ba yod pa de dag la de skad ces bya ste/ma brtags pa nyid ce na dga'o zhes bya ba'i tha tshig go/ /yang dag pa'i kun rdzob ces bya ba ni ji ltar grags pa bzhin nye bar brtags pa'i phyir ro/ /grags pa las 'das te rtogs pa dper na dbang phyug la sogs par rtogs pa gang yin pa de ni log pa'i kun rdzob yin no//ji skad du rten cing 'brel bar gang 'byung ba zhes bya ba ni 'di la sngon gyi slob dpon rnams 'dra bar byed pa ste/ 'di ni 'phags pa klu sgrub kyi zhal snga nas kyis dbu ma'i bstan bcos las gsungs so/ /rten cing 'brel bar 'byung ba'i dngos po rnams kho na don dam pa'i rang bzhin dang bral ba'i phyir stong pa zhes bya'i ri bong gi rwa dang 'dra ba'i bdag nyid kyi phyir ni ma yin no//des na mthong ba la sogs pa dang mi 'gal lo/ /de ni rgyur byas gdags pa ste/ /zhes bya ba ni kun rdzob de nyid ces bya ba'i tha tshig ste/ rgyur byas pa dang gdags pa'i sgra ni kun rdzob kyi rnam grangs yin pa'i phyir ro//'di ni 'dir khungs yin no/ /de nyid dbu ma'i lam yin no zhes bya ba ni sgro 'dogs pa dang skur pa 'debs pa'i mtha' gnyis spangs pa'i phyir/ de nyid de dang de las dbu ma'i lam du gsungs so zhes bya ba'i tha tshig go/ /'o na gal te rten cing 'brel bar 'byung ba'i dngos po dag kho na brtag mi bzod pa'i phyir kun rdzob kyi sgrar brjod na/'phags pa blo gros mi zad pa'i mdo las/ kun rdzob sgra'i tha snyad kyi bdag nyid yin par ji ltar gsungs snyam du sems pa la/ 'phags pa blo gros mi zad pas bstan pa'i mdo las zhes bya ba la sogs pa smos so//'dis ni mdo de dang de dag las sgra'i tha snyad kyi bdag nyid kyang kun rdzob yin par bstan du zin kyang / kho bo cag gis yang dag pa'i kun rdzob tu brjod pa gang yin pa de yang der 'jig rten gyi tha snyad ji snyed pa zhes bya ba 'dis bstan pa kho na yin te / kho bo cag sgra'i tha snyad kyi bdag nyid kyang mi 'dod pa ni ma yin te/de yang log pa'i kun rdzob yin no zhes de ston par byed do/ /myong bar bya ba dang myong ba'i ngo bo zhes bya ba ni shes bya dang shes pa'i bdag nyid do/ /de ci ltar tha snyad kyi sgras brjod par nus snyam pa la/ byed pa'i sgrub pa yongs su gzung ba'i phyir ro zhes bya ba smos te/shes bya dang shes bya'i bdag nyid kyis sgro 'dogs par byed pa tha snyad do/ /'di ni shes pa'o/ /'di ni shes bya'o zhes bya ba sgra'i tha snyad kyi gzhi yin pa'i phyir byed pa nyid yin no/ /de'i rjes su 'brel ba'i phyir zhes bya ba ni ji snyed pa zhes bya ba de'o/ / 'dir kyang gi don yang blta bar bya'o/ /des na don ni yi ge'i sgra dang brda bstan pa ji snyed pa yod pa de thams cad kyang kun rdzob kyi bden pa yin no zhes bya ba 'dis yin no/ /de'i phyir/ lung las 'byung ba dang 'jig rten pa'i yi ge bstan pa yang bsdu'o/ /de lta ma yin na 'ga' zhig 'phags pa ma yin pas bstan pa kho na kun rdzob yin gyi /'phags pa rnams kyis bstan pa ni ma yin no/ /de dag ni phyin ci ma log pa de bzhin du gsungs pa'i phyir ro snyam du 'khrul par 'gyur ro/ /de ni zhes bya ba ni rnam pa gnyis ka yang ngag gi dang yid kyi bye brag gis rnam pa gnyis su dbye ste/nang gi brjod pa'i rnam pa ni yid kyi'o/ /phyi rol gyi brjod pa'i ngo bo ni ngag gi'o/ /ji ltar na yid kyi bshad pa yin snyam pa la/ dper na brgya byin zhes bya ba la sogs pa smos so/ /yang ci'i phyir 'jig rten gyi tha snyad yi ge dang skad bstan pa ji snyed pa'i bdag nyid ces bya ba kho nar tshig gcig tu mi shes snyam pa la/de bas na spros pa'i tshogs zhes bya ba la sogs pa smos te/ spros pa phyin ci log gi bdag nyid thams cad kyi tshogs ni phung po'o/ /de dang bral ba ni don dam pa'i bden pa gang yin pa ste de bstan pa'o/ /sems rgyu ba yang med ces bya ba ni nyams su myong ba'i rgyu ba yang med par ston pa'o//gal te mngon par brjod pa'i mtshan nyid kho na kun rdzob kyi bden pa yin na de'i tshe gang la yi ge'i rgyu ba yang med pa zhes brjod par bya bar 'gyur ro/ /de lta na ni ji skad du bshad pa'i rim pa dang mi 'gal ba don dam pa'i bden pa kun rdzob las bzlog pa yin par bstan par 'gyur ro//gal te rnam par rtog pa'i rgyu ba bzlog pa'i phyir sems kyi zhes bya ba bshad do zhe na/ ma yin te rnam par rtog pa'i rgyu ba yang med pa zhes de skad kho na mngon par brjod par bya bar 'gyur te/ de lta na ni ji ltar brjod par bzhed pa'i don bstan par mdzad par 'gyur ro//rnam par rtog pa dang mngon par brjod pa gnyis kyang yul gcig pa yin pa'i phyir yi ge rnams lta ci smos zhes bya ba la dor ba'i tshig ci'i phyir mdzad par 'gyur/ /de lta bas na nyams su myong ba'i mtshan nyid sems rgyu ba yang med pa yin pa dang /mngon par brjod pa phyi ma 'brel bar 'gyur ro/ /kun rdzob 'di ni rgyu med par mi rung ste zhes bya ba la sogs pas ni dam bcas pa la rjes su dpag pa'i gnod pa yod par dogs pa ste/ 'di ltar gang dang gang du kun rdzob yin pa de dang de ni rgyu dang bcas pa yin te/ dper na shing rta dang sems can la sogs pa btags pa lta bu yin no//'di ni kun rdzob yin pas rang bzhin gyi gtan tshigs yin no/ /rgyu med pa nyid gcig yin na ni rtag tu yod pa la sogs par thal bar 'gyur te/ gnod pa can gyi tshad ma yin no/ /des na rgyu gang yin pa de ni don dam pa'i dngos po grub pa yin no snyam du bsams pa'o //gang dag la yan lag 'khor lo la sogs pa'i tshogs yod pa de la de skad ces bya'o/ /gang las yan lag gi tshogs las zhes 'byung ba der ni brten nas zhes bya ba de la ltos pa'i phyir te/ nas bya ba mi mngon par byas na rnam par dbye ba lnga pa yin no//gang gi tshe yan lag gi tshogs rnams la zhes 'byung ba de'i tshe yang 'og nas 'byung ba rgyur byas zhes bya ba de la ltos na las kyi rnam par dbye ba yin no/ /de la gal te spyir rgyu dang bcas pa tsam du sgrub par byed na ni de'i tshe grub pa sgrub pa yin te/ kun rdzob pa'i rgyu snga ma snga ma thog ma med par 'dod pa'i phyir ro//ji ste don dam pa'i rgyu zhig sgrub par byed na ni de'i tshe dpe bsgrub par bya ba'i chos ma tshang ba'i phyir rjes su 'gro ba ma grub pas ma nges pa nyid yin no zhes ston par byed do/ /brtags pa ma byas zhes bya ba la sogs pa la de 'dra zhes bya ba ni kun rdzob pa kho na'o/ / 'di yi zhes bya ba ni kun rdzob pa'i'o/ /brjod pa'i tshul gyis zhes bya ba ni gcig dang du ma'i rang bzhin stong pa nyid du bstan pas so/ /blo gros dang ldan pa zhes bya ba ni bod pa'o/ /shing rta la sogs pa yang zhes bya ba la sogs pas ni dpe bsgrub par bya bas stong pa nyid du ston par byed do/ / chos nyid 'di las zhes bya ba ni kun rdzob kyi mtshan nyid kyi rgyu'i chos nyid las te/ de'i rgyu rdul phra rab la sogs pa sngar dpyad zin pa'i phyir ro/ /rten cing 'brel bar 'byung ba ni ma brtags na nyams dga' bar 'dod pa kho na yin gyi/ don dam par ni ma yin te/ don dam par ni de bzhin nyid yod pa dang med pa las rnam par 'das pa kho na yin no zhes slob dpon gyi tshig gis bstan pa'i phyir 'dir yang gsungs pa zhes bya ba smos te/'di ni 'phags pa klu sgrub kyi zhal snga nas kyis tha snyad grub pa las bstan to/ /de las ni sngags dang sman dang sgyu ma'i dpes chos thams cad rten cing 'brel bar 'byung ba nyid kyi gtan tshigs kyis don dam par yod pa dang med pa nyid las yang dag par 'das par sgrub par byed do//'di ltar sngags ni yi ge re re'am 'dus pa zhig yin par 'gyur grang na/ re zhig re re ni ma yin te/ yi ge gcig brjod pa kho nas 'bras bu 'byung bar thal bar 'gyur ro//gang yang a zhes bya ba la sogs pa yi ge gcig pa'i sngags 'byung ba de yang yi ge rnams ni cha shas dang bcas pa yin pa'i phyir yang dag par na gcig par mi rung ba nyid de de lta bas na/ yi ge gcig sngags gang yang med de/ yi ge re re'i sngags med do zhes bya ba'i tha tshig go//yi ge mang po gzhan yang med ces bya ba ni yi ge 'dus pa rnams kyang sngags ma yin pa ste/ yi ge rnams ni rim gyis 'byung ba can yin pas tshogs pa med pa'i phyir ro/ /'o na 'gags pa rnams tshogs par 'gyur ro snyam pa la/ yi ge 'gags pa rnams min la zhes bya ba smos te/'gags pa zhes bya ba ni rang gi ngo bo las nyams pa zhes bya'o/ /gang dag rang gi ngo bo las nyams pa de dag ni bdag nyid med pa yin na gang dag rang gi bdag nyid med pa de dag ji ltar bsags par 'gyur/ de lta bas na re zhig sngags yod pa nyid bstsal ba yin no//'o na ni shugs kyis med pa nyid du 'gyur te/ de'i phyir rtog pa dang ldan pa rnams sngags grub par bya ba'i phyir 'bad pa don med pa kho na'o snyam pa la brten nas de ni med pa'ang min zhes bya ba smos te/ rkan la sogs pa'i byed pa las yi ge rnams 'byung ba yang mthong sa de las kyang dug sel ba la sogs pa'i 'bras bu 'byung ba yang mthong na/ji ltar gcig tu med pa nyid du 'gyur/ 'dis ni sngags kyi dpe bsgrub par bya ba ma tshang ba nyid yongs su spangs so/ /sman gyi dpe'i yang yongs su spang ba'i phyir/ de bzhin rang gi yan lag las/ /zhes bya ba la sogs pa smos so//gal te zwa rgod dang gla sgang la sogs pa rang gi yan lag rnams las sman tha dad pa zhig yin na ni de'i tshe dmigs pa'i rig byar gyur pa'i phyir/ logs shig na dmigs par 'gyur ro/ /ji ste dmigs pa'i rig byar gyur pa ma yin na ni de'i tshe yan lag rgyur byed pa don med pa kho nar 'gyur ro//ji ste yan lag 'dus pa tsam sman yin no snyam na de yang rigs pa ma yin te/ de'i yan lag rnams kyang 'dus pa tsam gyi rang bzhin yin pas rang gi ngo bo ma grub pa'i phyir ro/ /rang gi ngo bo ma grub pa rnams kyang ji ltar 'dus par 'grub par 'gyur/ sgyu ma'i dpe las yang bsgrub par bya ba'i phyir/sgyu ma'i glang po de yang snang zhes bya ba la sogs pa smos so/ /'di ltar sgyu ma'i glang po che de ni 'jim pa'i dum bu la sogs pa las tha dad pa'am tha dad pa ma yin pa zhig tu 'gyur grang na/ re zhig tha dad par ni ma yin te/ 'di ltar sgyu ma mkhan dang sgyu ma'i rgyu de dag las gud na mi snang ba'i phyir ro zhes khong nas 'byung ngo //yang na de dag las zhes bya ba ni sngags dang sman dag las te/ gang gis ni de dag las tha dad par 'gyur ba 'jim pa'i dum bu la sogs pa dag las logs shig tu ni sgyu ma'i glang po che yang dag par mi dmigs so/ /tha dad pa ma yin pa yang ma yin no snyam pa la/gzhan min min zhes bya ba smos te/ rigs pa zhes bya ba lhag ma yin no/ /gzhan ni tha dad pa zhes bya'o/ /gzhan ma yin pa ni tha dad pa ma yin pa zhes bya ba'i tha tshig ste/ de lta bu kho nar mig ma 'khrul pa can rnams kyis mi mthong ba'i phyir tha dad pa ma yin pa'ang ma yin no zhes bya ba'i tha tshig go//'o na ni de med pa kho na yin no snyam pa la/ rten cing 'brel bar 'byung ba de zhes bya ba la sogs pa smos so/ /de zhes bya ba ni sgyu ma'i glang po che ste/ rten cing 'brel bar 'byung ba yin pa'i phyir med do zhes brjod par yang mi nus la/ de nyid dang gzhan du brjod par bya ba ma yin pa'i phyir yod do zhes brjod par yang mi nus pas de'i phyir dpe grub pa yin no//phyogs kyi chos bsdu ba'i phyir de la dmigs par byed pa yin zhes bya ba la sogs pa smos te/ gang la gzugs kyi skye mched de la dmigs pa'i ngang tshul yod pa de la de skad ces bya'o//mig gi zhes bya ba ni mjug lnga pa can yin te/ mig nas 'byung ngo zhes bya ba'i tha tshig go/ /yang na 'di ni mjug drug pa can yin te/ mig dang 'brel ba can gyi mig gi rnam par shes pa zhes bya ba'i tha tshig ste/ srid pa las 'byung ngo zhes 'og nas 'byung ba dang sbyar bar bya'o//las kyi bag chags 'bras bu 'byin pa la mngon du phyogs par gyur pa ni srid pa'o/ /las dang nyon mongs dbang 'phangs pa/ /zhes bya ba ni chod pa'i las kyi dbang gis 'jug pa'i phyir ro/ /len bcas pa ni zag pa dang bcas pa ste/ srid pa las de lta bu'i ngo bo byung ba zhes bya bar sbyar ro//de bzhin du zhes bya ba ni las dang nyon mongs pa'i dbang gis 'phangs pa nye bar len pa dang bcas pa bzhin du'o/ /srid pa'i yan lag kun zhes bya ba ni ma rig pa la sogs pa rnams so/ /de la sbyor ba ni 'di ltar bya ste/ gang dang gang dag rten cing 'brel bar 'byung ba de dag ni don dam par yod pa dang med pa nyid kyi tha snyad kyi lam las 'das pa'i yul yin te/dper na sngags la sogs pa lta bu'o/ /rnam par shes pa la sogs pa 'di dag kyang de dang 'dra bas na rang bzhin gyi gtan tshigs so/ /gal te de lta na ji ltar bcom ldan 'das kyis 'du byed rnams ni rtag pa med ces bya ba la sogs pas dngos po rnams skye ba la sogs par bstan snyam pa la/'di ltar 'gog pa la sogs pa'i zhes bya ba la sogs pa smos te/ gang gi phyir dgongs nas bstan pa de'i phyir 'gal ba med do zhes bya ba lhag ma yin no//dgongs pa ni skye ba la sogs pa ji ltar snang ba kho na bzhin yod pa'i phyir de las dgongs nas/ bdag med pa la 'jug par bya ba'i phyir skye ba la sogs pa bstan to snyam pa yin no/ /ji ltar sman yang sman min pa/ /zhes bya ba la sogs pas ni ji skad bshad pa'i don gyi mjug sdud do//gnyis ka zhes bya ba ni rgyu dang 'bras bu'o/ /chos thams cad rang bzhin med pa nyid du zin na zhes bya ba la sogs pas ni sbyor ba'i gzhi nyid la dam bcas pa dang lung dang 'gal bar ston par byed de/ 'di ltar grub pa'i mtha' las ni mthong ba dang thos pa dang /bye brag phyed pa dang / rnam par shes pa'i don rnams la de bzhin du smra ba gang yin pa 'di ni 'phags pa rnams kyi tha snyad yin la/ bzlog ste smra ba ni 'phags pa ma yin pa rnams kyi tha snyad yin no zhes bstan na de yang mthong ba la sogs pa'i don med pa'i phyir rigs pa ma yin no/ / nam mkha'i me tog ni nam mkha'i pad+mo'o / /de dang mtshungs pa ni 'dra ba'o/ /klan ka 'di ni snying po yod pa ma yin te zhes bya ba la sogs pas ni lan 'debs so/ /de la bsdus pa'i don ni pha rol po dag gis ji ltar snang ba las 'das par rigs pa kho nas dngos po rnams kyi rang bzhin yod do zhes sgro 'dogs par byed pa de kho na 'gog par byed kyi/sngon po la sogs pa snang ba ma brtags gcig pu na nyams dga' ba la sogs pa 'gog pa ni ma yin no/ /don dam par ni dpyad na yod pa 'ga' yang ma grub pa'i phyir yod par yang khas mi len la med par yang khas mi len te/med pa ni dngos po ldog pa'i mtshan nyid yin pa'i phyir yod pa ma grub na yod pa sngon du 'gro ba can gyi med pa yang ma grub pa'i phyir ro/ /de'i phyir gcig tu yod pa dang med pa'i phyogs la yod pa'i nyes pas kho bo cag la mi dgos so zhes bya ba'i tha tshig go/ /myong ba zhes bya ba ni sngon po la sogs pa myong ba'o//'o na gang zhig 'gog par byed snyam pa la/ 'bras bu yang dag par yod pa dang med pa dang zhes bya ba la sogs pa smos te/ 'bras bu yod par smra ba ni ser skya ba rnams so/ /'bras bu med par smra ba ni bye brag pa la sogs pa'o/ /gnyi gar smra ba ni 'tsho ba pa la sogs pa'o//yod pa dang med pa zhes bya ba la sogs pa rnam par 'byed pa ni 'phags pa lha'i tshigs su bcad pa 'di dang sbyar ba de'i phyir zhes bya ba smos te/ 'di ni zhes bya ba ni phyogs dang sbyar ro/ /de'i phyir yang dag nyid du na zhes bya ba la sogs pa tshigs su bcad pa 'di ni slob dpon bdag nyid kyi yin no//'dis ni tshad ma'i 'bras bu lung gi don dang sbyar ba'am/ lung gi don tshad ma'i 'bras bu dang sbyor bar byed do/ /'dir yang gang gi phyir zhes bya ba la ltos par bya ste/ des na don ni gang gi phyir dngos po 'ga' yang yang dag par bsgrub pa/ med pa de'i phyir chos thams cad ma skyes pa'o zhes bya/sangs rgyas bcom ldan 'das kyis gsungs so zhes bya ba 'di yin no/ /gzhan yang zhes bya ba ni rga ba la sogs pa'o/ /de la brten pa zhes bya ba ni skye ba la brten pa'o/ /'byung ba med pa zhes bya ba ni gang dag la 'byung ba med pa yod pa de dag la de skad ces bya ba'o//rang bzhin yod pa ma yin te zhes bya ba ni gcig pa nyid la sogs pas dpyad na don dam par gang la rang bzhin yod pa ma yin no zhes bya ba'i tha tshig go/ /rang bzhin med pas gzhan rkyen ji ltar 'gyur zhes bya ba ni ri bong gi rwa la sogs pa bzhin du rtag tu rang bzhin med pa'i phyir gzhan gyi rkyen du rigs pa ma yin no//rang bzhin med pas gzhan gyis ji ltar bskyed ces bya ba ni rkyen gzhan yang de'i 'bras bu rtag tu med pa'i phyir ri bong gi rwa la sogs pa lta bu kho na yin na rang bzhin yod pa ma yin pa ji ltar bskyed ces bya ba'i tha tshig go//'di zhes bya ba ni don dam par skyed pa po ma yin pa nyid do/ /yang na rgyu zhes bya ba'i sgras ni rten cing 'brel bar 'byung ba mtshon par byed do/ /des na rten cing 'brel bar 'byung ba don dam par skye ba med pa'i mtshan nyid can 'di bde bar gshegs pas bstan to zhes bya ba'i tha tshig go /rten cing 'brel par 'byung ba la 'jug pas zhes bya ba ni ma rig pa la sogs pa'i rang bzhin dpyad pas zhes bya ba'i tha tshig go/ /chos kyi dbyings zhes bya ba ni chos thams cad kyi rang bzhin skye ba med pa'i mtshan nyid do/ /ming ma mchis pa zhes bya ba ni sgra'i spyod yul ma yin pa'o/ /mtshan nyid ma mchis pa zhes bya ba ni skye ba la sogs pa'i mtshan nyid dang bral ba'o//mtshan ma ma mchis pa zhes bya ba ni 'du shes kyi yul sngon po la sogs pa'i mtshan ma med pa'i phyir ro/ /gdags su ma mchis pa zhes bya ba ni rnam par rtog pa'i yul ma yin pa'i phyir ro/ /'o na ji ltar de dag bstan snyam pa la/gzhan du ma lags kyi zhes bya ba la sogs pa smos te/ sems can rnams gzung ba'i don du ming la sogs pa tsam gyis ston par zad kyi gzhan du ni ma yin no zhes bya bar sbyar te/ 'dir yang bstan pa zhes bya ba khong nas 'byung ngo / /ming tsam zhes bya ba la sogs pa'i tshig rnams ni tshig gnyis gnyis shing tshig snga ma snga ma'i bshad pa phyi ma phyi ma yin no//kun rdzob ni 'dir kun rdzob kyi shes pa la snang ba'i ngang can gyi ngo bo yin par dgongs so/ /'dis mngon par rjod par byed pas na brjod pa ste rnam par rtog pa zhes bya'o/ /yang na 'di dag thams cad ni rnam grangs yin no//yang na dang po'i bshad pa lhag ma yin no/ /ma rig pa dus gsum du med du zin kyang ci'i phyir gdags pa'i yul ma yin snyam pa la/ ma rig pa de ni zhes bya ba smos so/ /'o na ni thams cad ming tsam du yod par khas blangs pa'i phyir ming tsam bden par yod do snyam pa la/ bcom ldan 'das gang ming tsam zhes bya ba smos so//de ltar byas na zhes bya ba ni ma rig pa la sogs pa dus gsum du yang med pa'i phyir ro/ /yang de nyid las zhes bya ba ni yab dang sras mjal ba'i mdo las so/ /gal te skye ba la sogs pa kun tu brtags pa'i ngo bo yin pa'i phyir dngos po rnams kyi skye ba la sogs pa khas mi len na/'o na ji ltar bcom ldan 'das kyis skye ba med pa ni bden no zhes bya ba la sogs pas skye ba med pa la sogs pa bden pa nyid du gsungs snyam pa la/ skye ba med pa la sogs pa yang zhes bya ba smos so/ /de zhes bya ba ni don dam pa'o/ /skye ba med pa la sogs par rnam par rtog pa dang /rnam par rtog pas dngos po rnams kyi ngo bo rnam par gzhag pa ni skye ba med pa la sogs pa'o/ /stsogs pa'i sgras ni 'gog pa dang zhi ba la sogs pa bsdu'o/ /yang de med par don dam pa la 'dzeg mi nus sam zhe na/ gang gi phyir de lta bu'i ngo bo bstan pa'i phyir de skad ces bya snyam pa la/ yang dag kun rdzob rnams kyi skas/ /zhes bya ba la sogs pa smos so/ /yang dag pa nyid khang pa yin no/ /de'i steng ni rab kyi mtha' ste der 'gro bar zhes bsdu'o/ /yang dag kun rdzob nyid them skas bzhin du skas yin te/ gom pa'i rten zhes bya ba'i tha tshig go/ /'di ni slob dpon snang bral gyis dbu ma'i snying po las gsungs pa yin no//des na gang la la gal te tshul gsum pa'i rtags kyis bskyed pa'i blo don dam pa'i sgrar brjod na ni de'i tshe de yang kun rdzob kyi ngo bo yin pa'i phyir ji ltar na don dam pa nyid yin/ gal te yang de'i dbang gis dngos po rnams rang bzhin med pa nyid du rnam par 'jog na de yang gang gis gzhag par bya/de nyid kyis gzhan du ni rigs pa ma yin te/ rang gis bdag nyid la byed pa 'gal ba'i phyir ro/ /tshad ma gzhan gyis kyang ma yin te/ thug pa med par thal bar 'gyur ba'i phyir ro/ /ji ste blo de gcig pu ma gtogs par 'jog go zhe na/'o na ni yul thams cad bdag med par ma bsgrubs par 'gyur ro zhes rgol ba gang yin pa de yang 'di nyid kyis lan btab pa yin te/ de yang don dam pa dang mthun pa'i phyir don dam pa nyid yin la rang bzhin med pa yang de nyid kyis rnam par 'jog go/ /rang gis bdag nyid la byed pa 'gal ba yang med de/spyi'i ngo bor chos thams cad rang bzhin med pa nyid du rnam par 'jog pa'i phyir la/ blo'i rang gi ngo bo yang spyi'i mtshan nyid der 'dus pa'i phyir ro/ /dper na chos thams cad la yod pa la sogs pa'i gtan tshigs rnams kyis 'jig pa nyid kyi rkyen du 'gyur ba na bdag nyid spangs nas ma yin pa ltar 'dir yang de dang 'dra bar klan kar mi rung ngo //skye ba med la sogs mi srid/ /ces bya ba ni don dam par skye ba med pa la sogs pa'i shes pa dang / mngon par brjod pa rnams 'jug pa mi srid do zhes bya ba'i tha tshig go/ /ci'i phyir snyam pa la/ de'i ngo bo dgag pa'i phyir zhes bya ba la sogs pa tha ma smos te/gang gi phyir phyis brjod par bya ba'i ngo bo dgag par bya ba la don dam par de brjod pa'i sgra'i sbyor ba mi srid pa de'i phyir skye ba med pa la sogs pa mi srid do/ /'o na med pa 'ba' zhig sbyor bar 'gyur ro snyam pa la/ yul med pa la zhes bya ba la sogs pa smos so//'di snyam du don dam par skye ba la sogs pa med du zin kyang gzhan gyi rjes su smra bas blos skye ba la sogs pa gzhag ste/ de dag bkag pas skye ba med pa la sogs pa rnam par 'jog par 'gyur ro snyam pa la/ rnam par rtog pa la brten na yang zhes bya ba la sogs pa smos te/ skye ba med pa la sogs pa rnam par rtog pa la brten pa nyid du khas len na skye ba med pa la sogs pa de kun rdzob yin gyi don dam pa ni ma yin te/ rnam par rtog pa la kun rdzob kyi ngo bo yin pa'i phyir dang / rnam par rtog pa'i spyod yul yang sgro btags pa'i ngo bo yin pa'i phyir ji ltar don dam par 'gyur// //bam po bzhi pa ste tha ma'o / /ji ste rang gi mtshan nyid ni zhes bya ba la sogs pas ni/ rnam par rtog la brten na yang / /kun rdzob par 'gyur yang dag min/ /zhes bya ba phyogs snga ma dang bcas te rnam par 'grel par byed do/ /bag chags gang la thog ma med pa'i dus yod pa de las byung ba rnam par rtog pa gang yin pa de la snang ba'i ngang tshul can gyi don gang yin pa zhes tshig rnam par sbyar ro//de nyid bstan par bya ba'i phyir chos can 'di nyid la gnas nas zhes bya ba la sogs pa smos so/ /rnam par rtog pa la snang ba'i ngang can gyi don bkag na tha snyad thams cad chad par thal bar 'gyur ba'i phyir ro//rnam par rtog pa yang zhes bya ba la sogs pas ni lan btab bo/ /bsam pa ni 'di yin te/ gal te rnam par rtog pa'i blo la snang ba'i ngang can nyid skye ba med pa la sogs pa yin na de'i tshe snang ba dang blo tha mi dad pa'i phyir de yang gong du rnam par shes pa'i rang gi ngo bo dpyad pas brdzun pa nyid du bstan pa'i phyir ji ltar don dam pa nyid du 'gyur snyam pa yin no//blo bden pa nyid du chud kyang de la snang ba'i ngang can gyi ngo bo thams cad brdzun pa yin pa'i phyir skye ba med pa la sogs pa brdzun pa nyid do zhes bstan pa'i phyir/ gzhan yang de lta na yang zhes bya ba smos so//gzhan yang zhes bya ba ni lan gzhan brjod pa'o/ /'di skad gsungs te zhes bya ba ni 'phags pa klu sgrub kyi zhal snga nas so/ /rgyal dpog pa la sogs pa med pa ni dngos po gzhan du gyur pa yin no zhes zer ba de bstan pa'i phyir de skad du zhes bya ba smos te/'di ni gzhon nu ma len gyis bshad do/ /des na med pa rnam pa bzhi dngos po gzhan du gyur pa kho na yin par brjod do/ /de la 'o ma la sogs pa'i mtshan nyid yod pa nyid zho la sogs pa 'bras bu'i mtshan nyid snga na med pa zhes bya la/ zho la sogs pa 'bras bu yod pa nyid kyang 'o ma la sogs pa rgyu zhig nas med pa yin no//ri bong gi mgo bo'i yan lag khyad par can nyid ri bong gi rwa gtan med pa yin no/ /ba lang la sogs pa la rta la sogs pa ngo bo med pa ni gcig la gcig med pa zhes zer ro/ /de bas na zhes bya ba ni med pa ni yod pa sngon du 'gro ba can yin pa'i phyir yod pa med na med pa yang med pa legs par bshad pa yin no zhes bya ba'i tha tshig go//de'i phyir de gnyis ni phan tshun ltos par rab tu brtags pa'i bdag nyid du gnas pa'i phyir med do zhes brjod par mi bya'o/ /'di snyam du skye ba'i sngon rol na yod pa nyid med pa nyid dag med du zin kyang skye ba dang 'gag pa dag gi 'og tu dngos po yod pa nyid dang med pa nyid rnam par gzhag par 'gyur ro snyam pa la/gang la ci yang mi skye ba zhes bya ba la sogs pa smos te/ 'gro ba gang la sngar dpyad pa bzhin ngo bo ci yang skye ba med cing 'gag pa yang med pa de la yod pa nyid dang med pa nyid med do zhes bya bar mthong ba'i rnal 'byor pa la ste/nges pa yin no zhes bya ba lhag ma'o/ /'di la don ni 'di yin te zhes bya ba ni mdo gnyi ga'i 'o/ /de lta bas na blo gros bzang pos gang gsungs pa zhes bya ba ni 'phags pa klu sgrub kyi zhal snga nas so//gang dag bdag dngos gzhan dngos dang / /zhes bya ba 'dis ni bdag tu rtog pa ston par byed de/ bdag dang gzhan du 'byed pa ni bdag tu 'dzin pas byas pa'i phyir ro/ /dngos dang dngos po med ces bya ba ni chos su rnam par rtog pa ston par byed pa yin no/ /yang dag mthong ba ma yin no//zhes bya ba ni lta ba'i gnas su gyur pa'i phyir ro/ /gang gi tshe yang dag pa mthong ba dag yin snyam pa la/ gang dag brten nas dngos po rnams/ /zhes bya ba la sogs pa smos so/ /de dag ltas mi 'phrogs zhes bya ba ni sgro 'dogs pa dang / skur pa 'debs pa'i mtha' gnyis spangs nas dbu ma'i lam du zhugs pa'i phyir ro //de ni zhes bya ba ni dngos po'o/ /ga la yod ces bya ba med pa nyid do zhes bya ba'i tha tshig go/ /stong zhes bya ba de yang stong / /zhes bya ba ni stong pa zhes mngon par brjod pa gang yin pa de yang stong ngo zhes bya ba'i tha tshig go/ /'byung ba zhes bya ba ni kun tu spyod pa'o/ /'di zhes bya ba ni dngos po thams cad la khyab pa yin gyi nyi tshe ba ni ma yin no//de la don rnams thams cad 'byung / /zhes bya ba ni 'jig rten dang 'jig rten las 'das pa'i phun sum tshogs pa thams cad 'byor par 'gyur ro zhes bya ba'i tha tshig go/ /de la tshigs su bcad pa dang po ni slob dpon gyis dbu ma'i bstan bcos kyi rtsa ba las gsungs so / /gnyis pa ni rigs pa drug cu pa las gsungs so//gsum pa dang bzhi pa ni stong pa nyid bdun cu pa las gsungs so/ /lnga pa ni rtsod pa bzlog pa las gsungs so/ /de bas na zhes bya ba ni gang gi phyir dngos po'i yul thams cad stong pa nyid du tshad mas grub pa'o/ /sngon mtha' stong zhes bya ba ni 'das pa'i dus su stong pa ste/sngon yang don dam par ma skyes pa kho na'o zhes bya ba'i tha tshig go/ /phyi ma'i mtha' yang stong zhes bya ba ni ma 'ongs pa'i dus su stong pa ste/ der yang skye bar mi 'gyur ro zhes bya ba'i tha tshig go/ /skye dang 'jig dang gnas pa'i dngos po stong / /zhes bya ba 'dis ni da ltar byung ba'i dus su yang mtshan nyid stong pa nyid kyis stong pa nyid du ston par byed do//ci'i phyir dus gsum char du yang stong snyam pa la/ 'di ni dngos po yod min zhes bya ba la sogs pa smos so/ /gang gi phyir zhes bya ba'i sgras ni rim pa gzhan du sbyar ba yin pa'i phyir gong ma dang sbyar ro/ /des na don ni gang gi phyir don dam par dngos po yod pa yang ma yin la med pa yang ma yin pa de'i phyir chos thams cad rtag tu ngo bo nyid kyis stong zhes bya ba 'di yin no//'o na de ni rtog gyur pas/ /zhes bya ba la sogs pas ni dam bcas pa la mngon sum la sogs pas gnod pa rjod par byed de/ 'di ltar dngos po'i rang bzhin nyid sgro btags pa'i rnam pa dang bral ba'i phyir stong pa nyid kyi sgra brjod la/dngos po'i rang bzhin de yang mngon sum yin pa'i phyir de'i rang bzhin du gyur pa stong pa nyid kyang mngon sum kho nar khas blangs pa la/ stong pa nyid ni byis pa rnams kyis mngon sum du mi rtogs pas mngon sum gyis gnod pa yin no/ /dmigs pa'i rig byar gyur pa mi dmigs pas med par thal bar tha snyad gdags su rung ba'i phyir rjes su dpag pas gnod pa yang yin no//mi mkhas rnams zhes bya ba ni byis pa rnams so/ /gal te mngon sum ma yin pa'i phyir mi rtogs so snyam pa la/ mngon sum phyir zhes bya ba la sogs pa smos te/ gang gi phyir stong pa'i rang gi ngo bo nyid dngos po'i rang bzhin rtogs pa yin na tha mi dad pa'i phyir mngon sum kho na yin gyi/mngon sum ma yin pa ni ma yin pa de'i phyir ci'i phyir mi rtogs/ de rtogs na zhes bya ba la sogs pas ni ldog pa'i sgo nas rnam par 'grel te/ de lta na ni grub pa dang bde ba tha dad pa'i phyir tha mi dad pa nyid nyams par 'gyur ro//de'i phyir dngos po stong pa nyid du mi 'gyur te/ 'brel ba med pa'i phyir ro/ /stong pa nyid dang de las byung ba'i mtshan nyid kyi 'brel ba yang med de/ de ni rtag pa yin pa'i phyir ro/ /dngos po rnams kyi stong pa ni sus kyang mi byed de/ de bzhin gshegs pa rnams byung yang rung ma byung yang rung chos nyid ni gnas pa'i phyir dang /dngos po med pa'i phyir de ni 'bras bu ma yin pas 'brel pa ga la zhig yod/ de ni sgro btags pa yang yin la/ ji skad smos pa yang yin pas zhes tshig rnam par sbyar te/ des na sgro btags pa dngos po la sogs pa'i rnam pa yang dag pa gang yin pa de dag dang bral ba zhes bsdus pa'i don yin no//so so'i skye bo tha shal ni gnag rdzi la sogs pa bstan bcos kyis blo ma sbyangs pa gang dag yin pa'o/ /ma yin thog med rgyud lci bar/ /zhes bya ba la sogs pas ni lan 'debs te/ 'dis ni dngos po rnams kyi sgro btags pa'i rnam pas dben pa nyid stong pa nyid ces bya na/stong pa nyid sgro btags pa'i rnam pas bsgribs pa'i ngo bo yin pa'i phyir dngos po'i rang bzhin bzung bzhin du yang byis pa rnams kyis nges par mi 'gyur te/ de'i phyir bzung mod kyi/ tha snyad gdags su mi rung ba'i phyir ma bzung ba dang 'dra ba nyid pas 'di ni dmigs pa'i rig byar gyur pa ma yin no//de lta bas na mngon sum la sogs pas gnod pa ma yin no zhes bya ba 'di ston to/ /dngos po la sogs par sgro btags pa gang la thog ma med pa'i rgyud yod pa de la de skad ces bya'o/ /de ni spang bar dka' ba'i phyir lci ba yang yin la/ dngos por sgro 'dogs pa thog ma med pa yang yin pas zhes tshig rnam par sbyar ro//des dbang du byas zhes tshig rnam par sbyar ro/ /mngon sum zhes bya ba ni mngon sum du'o/ /dbang po las byung ba'i phyir na mngon sum ste shes pa la bya'o/ /dngos po la mngon par zhen pa gang la thog ma med pa'i srid pa 'khor bar 'byung ba skye ba'i ngang tshul yod pa de nyid yang dag pa'i don mthong ba la myos pa'i rgyu yin pa nyid kyis dug bzhin du dug yin te/gang dag la des dkrugs pa'i blo yod pa zhes tshig rnam par sbyar ro/ /gzhan yang 'di ni ngo mtshar mi che ste zhes bya ba la sogs pas ni nyes par bshad pa'i grub pa'i mtha' la mngon par zhen pas kyang blo gros phyin ci log pa rnams nges par mi byed do zhes dpes ston par byed de/'di ltar ser skya ba la sogs pa ba lang nyid la sogs pa spyi mi snang ba bzhin du rtogs par byed de/ dngos po snang ba la lta ci'i phyir rtogs par mi 'gyur te/ 'di ni ngo mtshar mi che'o/ /dngos po la sogs par sgro 'dogs pa de gcod pa ni med pa'o//de shes par byed pa'i gtan tshigs ni gcig pa nyid dang du ma nyid la sogs pa'i mtshan nyid do/ /'dis ni legs par nyan pa dang / bsams pa dang / bsgoms pa las byung ba'i shes rab skyes pas de nges par 'gyur gyi/ gzhan du ni ma yin no zhes bshad par 'gyur ro/ /spros pa dang bral ba zhes bya ba ni spros pa thams cad med pa'i mtshan nyid stong pa nyid ces bya ba'i tha tshig go//gang dag la bsams pa las byung ba'i chos rab tu rnam par 'byed pa shes rab bsags pa yod pa zhes tshig rnam par sbyar ro/ /yang mi skye ba zhes bya ba ni mi 'byung ba zhes bya ba'i tha tshig go/ /snying po med pa nyid du ston par byed pa'i lung /snying rje chen po la 'jug pa'i mdo zhes bya ba la sogs pa smos te/ de las ni/ dper na chu shing rlon pa'i sdong po la/ /snying po 'dod mis rim par bshigs byas kyang / /phyi dang nang na snying po med pa ltar/ /chos rnams thams cad de ltar shes par gyis/ /zhes 'byung ngo / ma rtogs pa zhes bya ba ni rtogs par ma gyur pa ste/ ji ltar u dum wA ra la me tog dpyad na med pa kho na'i phyir rtogs par ma gyur gyi phra ba nyid la sogs pa'i phyir ni ma yin no/ /de bzhin du srid pa dag la snying po 'di yang rtogs par ma gyur pa zhes bya ba yin no/ /pha rol min pa'i pha rol son/ / zhes bya ba ni pha rol ma yin pa da ltar byung ba'i skye ba nas pha rol ma 'ongs pa'i skye ba'o//chos thams cad rang bzhin med pa nyid du khas blangs na zhes bya ba la sogs pa ni dam bcas pa 'gal bar rjod par byed de/ 'di ltar chos thams cad rang bzhin med pa nyid du rab tu bsgrubs pa'i phyir gtan tshigs la sogs pa yongs su gzung ba byas pa de dag yod par khas blangs la chos thams cad rang bzhin med pa nyid du dam bcas pas med do zhes khas blangs pas phan tshun 'gal ba yin no//'di snyam du kho bo cag sgrub pa mi brjod pa nyid do snyam na/ gal te yang zhes bya ba smos te/ dam bcas pa tsam kho nas ni 'dod pa'i don 'grub pa ma yin te thams cad kyi thams cad 'grub par thal bar 'gyur ba'i phyir ro//'di yang gyin ste zhes bya ba la sogs pas ni lan 'debs so/ /gzhung ni grub pa'i mtha'o/ /des bskyed pa'i bye brag bsgrub par bya ba dang / dpe'i chos can rnam pa gnyi ga la yang yod pa de la de skad ces bya'o//mkhas pa dang bud med dang byis pa zhes bya ba bsdu ste/ mjug tu bar gyi sgras mi 'gyur ba'i dngos po yin no/ /de la grags par gyur pa rnam shes drug par bsdu'o/ /ma lus pa ni rgol ba thams cad kyi'o/ /gal te grub pa'i mtha' la brten pa'i gtan tshigs sam chos can byas na nyes pa ci yod snyam pa la/de lta min na gzhi ma grub ces bya ba la sogs pa smos te/ de lta yin na ni chos can de rtsod pa'i gzhir gyur pa'i phyir ma grub pas gzhi ma grub pa'i gtan tshigs su 'gyur ro/ /sogs pa smos pas ni rang gi ngo bo ma grub na/ dpe'i chos can yang mi 'grub bo zhes bya ba yin no//de skad du sun dbyung ba brjod na/ lan ci zhig brjod par bya/ de'i phyir bsgrub par bya ba dang / sgrub pa'i tha snyad thams cad chad par 'gyur ro/ /'di snyam du gang zhig chos can snang ba la brten nas sgro btags pa'i rnam pa dgag pa'i phyir sgrub pa sbyor bar byed pa de la ni gzhi ma grub pa la sogs pa nyes pa'i glags mi thod na/khyod ni chos can snang ba 'gog par byed de/ de lta bas na khyod la ci'i phyir gzhi ma grub pa la sogs pa'i glags mi thod snyam pa la/ bdag ni zhes bya ba la sogs pa smos te/ chos can snang ba 'di la yang rang bzhin yang dag par sgro btags pa dgag pa sgrub par byed kyi/ chos can gyi rang gi ngo bo 'gog par ni ma yin pas mtshungs so//'di snyam du gal te don dam pa pa'i rang bzhin bkag na chos can de'i ngo bo gang snang bar 'gyur ba gzhan ci zhig lus par 'gyur snyam du sems na/ de yang yang dag pa ma yin te/ gang gis na don dam pa pa'i rang bzhin log na ldog par 'gyur ba/ don dam pa pa'i rang bzhin nyid kyis snang ba la khyab pa ni med de/zla ba gnyis dang skra shad la sogs pa brdzun pa yang snang ba'i phyir ro/ /'di skad du zla ba gnyis la sogs pa phyi rol gyi gzugs su brdzun mod kyi/ de dag shes pa'i ngo bor ni don dam pa pa kho na yin pas snang bar rigs so zhes bya bar brjod par yang mi nus te/ de dag sna tshogs kyi ngo bo dang yul na gnas par snang ba'i phyir ro//shes pa ni sna tshogs su rigs pa ma yin te/ gcig pu nyid nyams par thal bar 'gyur ba'i phyir dang / shes pa du ma skye ba yang sngar bkag zin pa'i phyir ro/ /yul na gnas pa yang ma yin te lus med pa'i phyir ro/ /de lta bas na zla ba gnyis la sogs pa don dam pa ma yin bzhin du 'on kyang snang bas don dam pa'i rang bzhin log kyang snang ba 'gal ba med pas chos can la sogs pa grub pa nyid do//de'i phyir bsgrub par bya ba dang / sgrub pa 'jug pa 'gal ba med pa kho na yin pas mang du ni mi dgos so/ /bye brag pa la sogs pa ni phyogs la sogs pa chos can yan lag can yin pa dang /sgra yang nam mkha'i yon tan yin no zhes bya bar 'dod de/ chos can de dag ni sangs rgyas pa la sogs pa la ma grub po/ /brgal ba'i grags pa zhes bya ba ni brgal bas grags pa zhes bya ba'i tha tshig go/ / bdag ni snang ba'i ngang can gyi/ /dngos po dgag par mi byed de//zhes bya ba ni 'di'i 'grel pa ni/ kho bo yang mig la sogs pa'i shes pa la snang ba'i dngos po ni mi sel to zhes bya ba yin no/ /dgag pa 'di ni don dam par mi 'dod do zhes 'og nas 'byung ba dang sbyar ro/ /chu shing gi sdong po bzhin du zhes bya ba ni chu shing gi sdong bu lta bur ro/ /mngon par zhen pa med pa zhes bya ba ni rang gi grub pa'i mtha'i sgo nas chos can la sogs pa la brten pa med pa zhes bya ba'i tha tshig go//ji skad du zhes bya ba ni sngon gyi slob dpon rnams kyis so/ /'dzin pa stug po ni grub pa'i mtha' la grags pa pa'i chos can la sogs pa yongs su 'dzin pa'o/ /tha snyad rnams la zhes bya ba ni bsgrub par bya ba dang sgrub pa'i tha snyad rnams la'o//don dam pa'i tshul la sdang bas dbang bsgyur ba gang dag ces bya ba ni bye brag tu smra ba la sogs pa ste/ de dag ni rang bzhin med pa nyid du smra ba na/ 'jig rten pha rol la sogs pa khas blangs pa nyams par thal bar 'gyur bas dam bcas pa la khas blangs pas gnod do snyam du sems shing gleng bar byed do zhes grag go//spyi bo nas dbang bskur ba zhes bya ba ni dngos po thams cad 'gog pa'i phyir mchog tu gyur pa yin no/ /rgyu dang 'bras bu la skur pa 'debs pa nyid log lta yin te/ gang dag gis des dkar phyogs las/ dge ba drungs 'byin pa de dag la de skad ces bya'o//dam chos kyi lo tog ser ba zhes bya ba ni de'i don la skur pa 'debs pa nyid kyis de rlag par byed pa'i rgyu yin pa'i phyir ro/ /nam mkha'i me tog ces bya ba ni chos thams cad la skur pa 'debs pas bdag nyid kyang med pa'i ngo bo yin pa'i phyir nam mkha'i me tog dang 'dra zhes bya ba'i tha tshig go//de'i phyir zhes bya ba ni gang gi phyir dngos po la sogs pa don med pa dag la 'jug pa la goms pa ma gtogs pa de dag gi rgyu gzhan yang yod pa ma yin pa de'i phyir thog ma med pa'i rigs mthun pa pa'i sa bon rjes su dpag pa'o/ /rigs mthun pa'i sa bon gang la thog med srid rgyud yod pa de la de skad ces bya ste/gang dag la thog ma med pa'i srid pa'i rgyud can rigs mthun pa pa'i sa bon yod pa de dag la de skad ces bya'o/ /de'i dngos po ni de nyid do/ /de'i phyir dngos po la sogs par rnam par rtog pa chos can kun rdzob tu grub pa thog ma med pa'i rigs mthun pa pa'i sa bon las rab tu skye ba tsam du grub na 'jig rten pha rol 'grub bo zhes bya ba'i tha tshig go//sbyor ba ni gang dang gang dngos po la sogs pa'i rnam par rtog pa yin pa de ni rigs mthun pa pa'i sa bon las rab tu skye ba yin te/ dper na dus phyis khong du chud pa rnams kyi lta bu yin no/ / skye ba dang po byung ba'i rnam par rtog pa 'di yang dngos po la sogs par rnam par rtog pa yin pas 'di ni rang bzhin gyi gtan tshigs yin no/ /'di'i ma nges pa nyid yongs su spang ba'i phyir/ 'di ni dngos po'i mthu stobs kyis 'byung ba ma yin zhes bya ba smos so/ /dngos po'i mthu stobs kyis zhes bya ba ni phyi rol gyi dmigs pa'i dngos po'i mthu stobs kyis te phyi rol gyi dngos po de ni gsal zin pa'i phyir ro//nang gi dngos po rnam par shes pa'i bdag nyid don dam par bkag tu zin kyang / de ni kun rdzob tu gsal ba'i bdag nyid du rang gis grub pa'i phyir la/ phyi rol gyi ni bems po'i ngo bo yin pa'i phyir rang gis grub pa yang ma yin la/rnam par shes pas 'dzin par mi rung ba'i phyir gzhan las kyang grub pa yang ma yin te/ de'i phyir rtag tu ma grub pa nyid pas bye brag yod do/ /yang na dngos po la rnam pa med pa kho na las sgro btags nas rnam par rtog pa 'jug pas des na yul med pa'i phyir dngos po'i mthu stobs kyis byung ba ma yin no snyam du bsams pa'o//rim gyis snang ba'i phyir glo bur nyid la sogs pa'i chos yin par yang mi srid de/ ltos pa med pa rim gyis 'byung ba 'gal ba'i phyir ro/ /de bas na zhes bya ba ni tshad ma'i don ston par byed do/ /goms 'dra zhes bya ba ni dpe'o/ /de nyid phyir zhes bya ba ni dngos po la sogs pa rnam par rtog pa yin pa'i phyir te/'di ni gtan tshigs bstan pa yin no/ /dang po zhes bya ba ni bsgrub par bya ba'i chos can bstan pa'o/ /rang gi rigs las zhes bya ba ni bsgrub par bya ba chos bstan pa'o/ /'di ltar zhes bya ba la sogs pas ni rnam par 'grel par byed de/ 'di ni dngos po'i mthu stobs kyis 'byung ba ma yin zhes bya ba la sogs pa'i rnam par 'grel pa ni de dag ni dmigs pa'i stobs kyis 'byung ba yang ma yin te zhes bya ba la sogs pa yin no//glo bur min zhes bya ba la sogs pa'i rnam par 'grel pa ni skye ba'i rgyu med pa'am zhes bya ba la sogs pa yin no/ / shes pa yod pa rtag ces khas len pa ni rgyal dpog pa la sogs pa'o/ /rgyu la mi ltos pa ni rgyu med par smra ba rnams kyi lta ba'o/ /gang dag la rtag tu nye bar gnas pa'i rgyu dang rang bzhin yod pa zhes bya bar tshig rnam par sbyar te/ 'di ni go rims bzhin du rgyu med rtag pa nyid du smra ba rnams dang shes pa yod pa rtag par smra ba rnams kyi lta ba bstan pa yin no//'o na ma 'ongs pa'i skye ba ji ltar 'grub snyam pa la/ 'dis ni ma 'ongs pa'i srid pa zhes bya ba la sogs pa smos so/ /'dis ni zhes bya ba ni sems gzhan gyi rgyu nyid ni phyin ci log gi bag chags dang rjes su 'brel ba'i sems tsam yin par bstan pa ste/ma 'ongs pa rgyu ma tshang ba med pa yang skye bar rjes su dpag go/ /'di ltar zhes bya ba ni tshad ma ston par byed do/ /'di ni don tsam ston par zad kyi/ sbyor ba ni 'di ltar bya ste/ bdag dang bdag gir chags pa phyin ci log gi bag chags dang 'brel ba'i sems gang yin pa de ni sems gzhan gyis mtshams sbyor bar nus te/dper na sngon gyi gnas skabs na nyal po byed pa la sogs pa'i sems lta bu yin no/ /mi 'dod chags dang ma bral ba'i 'chi ka ma'i sems kyang de dang 'dra bas rang bzhin gyi gtan tshigs yin no/ /gtan tshigs ma grub pa nyid kyang ma yin te/ 'dod chags dang bcas pa'i 'chi ka ma'i sems gnyen po med pa phyogs su byas pa'i phyir ro//rgyu gzhan bkag pas rgyu'i rgyu ma tshang ba med pa nyid 'di tsam du zad par grub pa'i phyir ma nges pa yang ma yin te/ de lta bu la yang mi skye na/ de'i rgyu ma yin pa nyid du thal bar 'gyur ba'i phyir ro/ / mthun pa'i phyogs la yod pas 'gal ba yang ma yin pas ma 'ongs pa'i skye ba yang grub bo/ /de nyid kyi phyir kun rdzob tu yang rtag pa dang / chad pa med par yang 'grub bo zhes bstan pa'i phyir/ de phyir rtag chad lta ba rnams/ /zhes bya ba smos te/ dngos po thams cad skad cig snga ma ldog ste/ de'i phyir rtag par lta ba yang ma yin la/ skad cig gzhan dang gzhan rjes su 'gro ba ste skye ba'i phyir chad par lta ba yang ma yin no/ /de nyid ni dngos po la brten pa yin pas zhes bya ba ni rtag pa dang chad pa dag ste/ 'di ltar dngos po rtag tu yod par mngon par zhen pa 'di ni rtag par lta ba yin la/ de nyid ldog par mngon par zhen pa'i phyir chad par lta ba yin pas de gnyis ni dngos po la brten pa yin no/ /'di ni rnam par 'grel ba tsam du zad kyi / skye ba ldog pa dang rjes su 'gro ba dag gis kyang rtag pa dang chad pa dag mi srid par sbyar bar bya'o/ /'dir gsungs pa zhes bya ba ni sngon gyi slob dpon rnams kyis so//gnyi gar 'gyur zhes bya ba ni rtag pa dang chad pa'i mtshan nyid do/ /yod na zhes bya ba ni don dam par yod pas phyis med par 'gal ba'i phyir ro/ /'di ni 'phags pa klu sgrub kyi zhal snga nas kyis gsungs so/ /tshigs su bcad pa gnyis pa ni 'phags pa lha'i yin no/ /lus dang ngag dang yid rnams kyis med pa pa'i chos spyod na med pa par 'gyur ro//kun rdzob tu yod par lta ba bzhin rgyu dang 'bras bu'i dngos po yang khas len na / lus la sogs pa'i las byed pa yang mi 'gal na ji ltar med pa pa nyid yin zhes rin po che'i phreng ba las bstan pa'i tshigs su bcad pa 'dis ston par byed do//de la kha cig na re 'jig rten pha rol la sogs pa med do zhes khas len pa ni dam bca' ba yin na / de yang thams cad tha snyad du khas len pa rnams la med do/ /ji ste 'jig rten gyis brnyes kyis 'jigs pas khas len par mi byed do zhe na/ 'o na ni de'i tshe lus kyis nyes par spyod pa'i mtshan nyid kyi spyod par 'gyur ba zhig na/de yang tshangs par spyod pa la sogs pa spyod pa rnams la med do/ /gal te rnyed pa dang bkur sti chad kyis dogs pas de lta bu mi byed do zhe na/ 'o na ni sems yin grang na de lta bu'i sems ji snyed pa yang med do/ /ci'i phyir zhe na/ byang chub rten pa'i phyir te byang chub kyi ched du zhugs pa'i phyir ro zhes bya ba'i tha tshig go//des na don gyi stobs kyis med pa nyid du bsgrub par bya ba la/ ji ltar gtan tshigs gang gis na 'di dag med par 'dod ces de skad du 'chad do/ /yang na byang chub kyi phyir rnam par mi rtog pa'i ye shes la gnas pa rnams la yod par 'dzin pa log na yod par 'dzin pa sngon du 'gro ba can yin pa'i phyir med do zhes 'dzin pa 'di yang shugs kyis log pa'i phyir gang dag la dam 'cha' ba la sogs pa'i nyes pa ji skad bshad pa mi srid pa de dag ji ltar med par 'dod ces bya ba'i tha tshig go//rgyu de dang rkyen de dang gzhi des chad par lta bar yang mi ltung zhes bya ba ni rgyu dang 'bras bu'i dngos po kun rdzob tu rnam par gnas pa'i phyir ro//rgyu de zhes bya ba la sogs pa ni rnam grangs yin no/ /gang la skye ba med pa la spyod pa'i ngang tshul yod pa zhes tshig rnam par sbyar ro/ /rnam par grol ba la yang gzhung 'di la sla ba nyid de zhes bya ba ni dngos po la mngon par zhen pa yod na/res 'ga' kun nas nyon mongs pa 'byung ba'i phyir dngos por 'dzin pa log na gang gis na grol bar mi 'gyur ba dngos por 'dzin pa'i rtsa ba can kun nas nyon mongs pa lta zhig ga la yod snyam du bsams pa'o/ /gang chags pa dang zhes bya ba la sogs pa la/gang la zhes bya ba ni dmigs pa la'o/ /gang gis zhes bya ba ni sdug pa'i mtshan mas so/ /'dir yang gsungs zhes bya ba ni 'phags pa klu sgrub kyis te 'di ni rigs pa drug cu pa las gsungs so/ /ci'i phyir dngos por khas len pa yod na 'dod chags la sogs pa skyon rnams 'byung bar 'gyur snyam pa la/'di ni lta ba kun gyi rgyu/ /zhes bya ba smos te/ de zhes bya ba ni dngos por khas len pa'o/ /de ni zhes bya ba ni dngos po'o/ /yongs shes na zhes bya ba ni rang bzhin med par ro/ /de zhes bya ba ni dngos po'o/ /ji ltar na rten cing 'brel bar 'byung ba bstan pas rang bzhin med par rtogs par 'gyur snyam pa la/brten nas skyes pa zhes bya ba smos so/ /ma skyes zhes bya ba ni don dam par zhes bya ba lhag ma yin te/ de lta ma yin na gtan tshigs 'gal bar 'gyur ro/ /'dir dpe ni gzugs brnyan yin no/ /lan gdab pa gcig kho nas 'di thams cad gzhung gzugs par 'dod nas dri ba'i phyir gzhan yang zhes bya ba smos so//ma rig pa dang 'du byed ces bya ba la sogs pas ni pha rol po'i bsam pa ston par byed do/ /kun nas nyon mongs pa ni ma rig pa la sogs pa rga shi la thug pa rnams te/ rgyu dang 'bras bu'i dngos po yin no/ /rnam par byang ba ni nyon mongs pa dang mi mthun pa'i rten skyes pa'o/ / las dang 'bras bur 'brel ba ni las kyi rnam par smin pa'o/ /dngos gang ni sgra la sogs pa'o/ /yang dag ji bzhin ni mi rtag pa la sogs pa'i chos dang ldan pa'o/ /de lta bu mtshon par byed pa byas pa nyid la sogs pa gang yin pa de ni de 'dra ba'i rtags so/ /rtags la sems ni der nges pa ste/de'i rgyu yin no/ /rtags kyi sems de las sgra la sogs pa la mi rtag pa la sogs pa'i chos dang ldan pa'i chos can de lta bu la rtags can blo byung ba gang yin pa de ni dngos po kho na la skye ste/ de brgyud pas de dang 'brel ba'i phyir ro/ /gal te de lta na yang zhes bya ba la sogs pas ni len 'debs par byed do//'di thams cad ni rgyu dang 'bras bu'i dngos pos rab tu phye ba yin la/ rgyu dang 'bras bu'i dngos po kun rdzob pa yang ma bkag pa'i phyir thams cad mi 'gal ba nyid do/ /gal te 'di snyam du rgyu dang 'bras bu'i dngos po kun rdzob tu khas len na de'i tshe kho bo cag gi dngos po grub pa yin te/don bya ba byed pa zhes bya ba gang yin pa 'di nyid dngos po'i mtshan nyid yin no/ /gal te de mi 'gog go zhe na/ 'o na ni ming kun rdzob ce'am gzhan yang rung ming ci dgar thogs shig /dngos po'i ngo bo nyams pa ni med do snyam du sems pa'i dogs pa bsu bar gal te rnam par gzhag pa 'di zhes bya ba la sogs pa smos so//'dis ni gal te khyod 'ol byir rten cing 'brel te byung ba ma brtags na nyams dga' bar khas blangs nas dngos por brjod na ni/ de'i tshe der zad de kho bo cag kyang ming la brtsad pa med do/ /'on kyang gang gi tshe gzugs brnyan la sogs pa rten cing 'brel bar 'byung ba rnams la brtag mi bzod pas dngos po med pa nyid du khas blangs pa de'i tshe gzugs brnyan la sogs pa bzhin du rdul phra mo la sogs pa la yang brtag mi bzod pas 'khrul pa med pa'i mtshan nyid yin na ci'i phyir bye brag tu dngos por khas len par byed/de lta bas na gal te rten cing 'brel bar 'byung ba nyid don dam par khas blangs nas dngos po nyid du smra na ni de'i tshe rdul phra mo la sogs pa la gang gis na mtshan nyid 'grub par 'gyur ba don dam pa pa'i ngo bo de sgrubs shig /ji skad bshad pa'i lugs kyis de ji snyed pa de ni thams cad du ma grub bo/ /ci ste gyi na zhig yin na ni gzugs brnyan la sogs pa yang dngos po nyid du khas blang bar bya ste/de la yang de'i mtshan nyid yod pa'i phyir ro/ /ji ltar gzugs brnyan la sogs pa ni shes pa'i ngo bor yang yod pa med do zhes bya ba 'di ni dpyad zin to/ /bden zhing zhes bya ba la sogs pa ni rnam grangs yin no/ /'di skad ces kyang gsungs te zhes bya ba ni sngon gyi slob dpon gyi lugs dang bstun par byed pa ste/'di ni rigs pa drug cu pa las gsungs so/ /rnam par dben don zhes bya ba ni rgyu dang 'bras bu'i dngos po kun rdzob pa 'dod pa'i phyir ro/ /thos pa tsam la 'jug byed cing / / zhes bya ba ni chos thams cad rang bzhin med pa zhes bya ba la sogs pa sgra ji bzhin du tshig gi don tsam gyi rjes su 'brang ba'i phyir ro//brlag ces bya ba ni ngan 'gror 'gro bas so/ /ci'i phyir snyam pa la las kyi 'bras bu yod pa dang zhes bya ba la sogs pa smos te/ kun rdzob kyi ngo bor las dang 'bras bu 'brel pa bstan la don dam par skye ba med pa la sogs pa bstan te/de'i phyir kun rdzob kyi bden pa dang don dam pa'i bden pa gnyi ga yang ji skad bstan pa bzhin bsod nams dang ye shes kyi tshogs rnam par 'phel bar bya ba'i phyir brten par bya bsgom par bya zhes bstan pa yin no/ /re zhig bcom ldan 'das kyis sems can rnams la don dam pa'i bden pa bstan pa ni de dag la mi slu ba'i phyir rigs grang na/kun rdzob brdzun pa'i ngo bo yin pa ci'i phyir bstan snyam pa la/ 'jig rten dbang du rgyal ba rnams/ /zhes bya ba la sogs pa smos te/ dper na bdag med bzhin du/ bcom ldan 'das kyis bdag gi dang bdag ces bya ba la sogs pa gsungs pa de bzhin du bdag tu 'dzin pa la sogs pa bzlog pa'i phyir dgos pa'i dbang gis phung po la sogs pa gsungs pas klan kar mi rung ngo //yang dmigs pa can gang dag na re zhes bya ba ni/ bye brag tu smra ba la sogs pa phyi rol gyi don yod par smra ba rnams so//lta ba 'di la ni zhes bya ba ni dbu ma pa dang rnal 'byor spyod pa pa dag gi lta ba la'o/ /'khor gsum ni sbyin par bya ba dang / sbyin pa po dang / len pa po de dag kho na ste/ de mi dmigs pa ni 'khor gsum yongs su dag pa'o/ /rang gi zhes bya ba ni bdag gi'o/ /de dag rang gis rig par byed//ces bya ba ni bdag nyid gsal bar byed ces bya ba'i tha tshig go/ /'di nyid la zhes bya ba ni dbu ma'i gzhung la'o/ /tshul khrims kyi yan lag rnams ni srog gcod pa dang / ma byin par len pa dang / mi tshangs par spyod pa dang / brdzun du smra ba spong ba bzhi'o/ /sogs pa'i sgras ni bag yod pa'i yan lag dang /brtul zhugs kyi yan lag dag bzung ste/ bag yod pa'i yan lag ni myos par 'gyur ba'i btung ba spong ba'o/ /brtul zhugs kyi yan lag ni glu dang gar spong ba la sogs pa gsum mo/ /de dag ni yang dag pa'i lta ba las byung ba yang yin la/ tshul khrims kyi yan lag rnams kyang yin pas zhes tshig rnam par sbyar te/de dag rnam par dag pa de bzhin du'o/ /log par g.yem pa sogs las bzhin/ /zhes bya ba ni 'dod pas log par g.yem pa la sogs pa bzhin no/ /sogs pa'i sgras ni srog gcod pa la sogs pa bsdu'o/ /lhag ma ni go sla'o//dngos po zhes bya ba ni dmigs pa la ltos nas drug pa yin no/ /sbyor ba ni gang zhig tshad ma'i gnod pa yod pa de ni phyin ci log yin te/ dper na smig rgyu la chur shes pa lta bu'o/ /dngos por dmigs pa yang tshad ma'i gnod pa yod pa yin pas rang bzhin gyi gtan tshigs so/ /'di ni ma nges pa nyid yongs su spang ba'i phyir yang dag par na zhes bya ba la sogs pa smos te/sngar bshad pa zhes bya bar sbyar ro/ /gnod pa'i tshad ma zhes bya ba ni sngar bshad ces bya bar sbyar ro/ /'di yang dag par yod do zhes mngon par zhen ces bya ba ni dmigs pa'i rang bzhin ston par byed do/ /phyin ci log gi tha snyad kyi rgyu ni 'di tsam du zad pa'i phyir gtan tshigs ma nges pa yang ma yin la/mthun pa'i phyogs la yod pa'i phyir 'gal ba nyid kyang ma yin no/ /de mthus zhes bya ba ni dmigs pa'i mthus so/ /nang gi mu stegs can rnams ni gang zag tu smra ba 'phags pa mang pos bkur ba rnams so/ / de ma thag tu zhes bya ba ni bla na med pa yang dag par rdzogs pa'i byang chub kyi nye ba'i yan lag ma yin no zhes bya ba'i tha tshig go/ /dmigs pa can rnams kyi yang zhes bya ba ni stobs chung zhes bya ba dang sbyar ro/ /bye brag med pa'i phyir ro zhes bya ba ni 'dra ba'i phyir ro zhes bya ba'i tha tshig go/ /yod par bya ba dang rig par bya ba mi 'thad pa'i phyir zhes bya ba ni yod pa yang gcig dang du ma'i rang bzhin gyis dpyad na mi 'thad la/don rig par bya ba yang dus mnyam pa dang mi mnyam pa la sogs pas dpyad na mi 'thad par sngar bstan zin to/ /sbyin par bya ba la sogs mi dmigs pa lung dang ldan pa nyid du yang bstan pa'i phyir/'di ni chos yang dag par sdud pa las gsungs te zhes bya ba smos so/ /rgyal ba'i yum las zhes bya ba ni 'phags pa shes rab kyi pha rol tu phyin pa sum brgya pa las so/ /dngos por lhung zhes bya ba ni dngos por mngon par zhen pa'o/ /bzlog pa ni dngos por ma lhung ba'o//mchod pa dang phan gdags par 'dod pas zhes bya ba la sogs pas ni mchod pa dang phan gdags par 'dod pa la sogs pa dang / mi dmigs par lhan cig 'gal ba med pa nyid do zhes ston par byed pa ste/ mchod pa dang phan gdags par 'dod pa'i dus na dmigs pas yongs su zin kyang sgyu ma la sogs pa'i rang bzhin nyid mos pa'i phyir 'di dmigs pa med pa kho na yin te/des na 'gal ba med pa nyid do snyam du bsams pa'o/ /de nyid blo gros dang ldan pa rnams la shin tu dad pa'i gnas su mi 'gyur te zhes bya ba ni phyin ci ma log par zhugs pa nyid kyis gti mug med pa'i dge ba'i rtsa bas kun nas bslang ba'i phyir ro//gsum char yang zhes bya ba ni sbyin par bya ba dang / sbyin bdag dang / len pa po'i mtshan nyid do/ /'di skad du don dam par mi dmigs su zin kyang kun rdzob tu thams cad yod pa'i phyir mi 'gal ba nyid pas/ dam bcas pa ngan pa ma yin pa kho na'o zhes bshad pa yin no//de spyad par bya'o zhes bya ba ni 'dir dbu ma'i lam rnam pa gnyis dpyod par byed pa yin no/ /phyogs phyi ma zhes bya ba ni phyi ma'i bdag nyid kyang yin zhes bya'o/ /gal te de lta na ni kye rgyal ba'i sras dag 'di ni sems tsam mo zhes bya ba la sogs pa de dag ji ltar drang snyam pa la/bstan bcos zhes bya ba la sogs pa smos te/ 'di ni slob dpon skal ldan gyis dbu ma'i snying po las gsungs so/ /gzhan dag sems pa ni zhes bya ba ni phyogs snga ma kho na rigs par mthong ba rnams so/ / shes pa 'ba' zhig kho na ste/ /zhes bya ba ni shes pa rnams kho na ste/ don ni shin tu lkog tu gyur pa'i phyir ro/ /rang gis grub pa'i ngo bo zhes bya ba la sogs pas ni don shin tu lkog tu gyur pa de nyid ston par byed do/ /'o na rjes su dpag pas 'grub pa yod do snyam pa la/ de lta na yang zhes bya ba smos so//'o na ni the tshom du 'gyur ro snyam pa la/ rdul phra mo la sogs pa bkag pa'i phyir ro zhes bya ba smos so/ /des na rnam par shes pa smra ba rnams kyis dgongs pa nges par 'grel pa'i mdo las bstan pas phyir 'jil bar byed pa gang yin pa de yang dag pa'i kun rdzob tu bstan pa'i phyir mi 'gal ba nyid du zhes ston par byed do//de ltar byas na zhes bya ba ni tshig de ni mdo der gsungs pa kho na las khong du chud par bya'o/ /gal te de lta na sems tsam kho na bden par yod do snyam pa la/ blo'i mthu mi chung ba zhes bya ba la sogs pa smos te/ gang la blo'i mthu mi chung ba yod pa de la de skad ces bya'o//de la blo'i mthu mi chung bas zhes bya ba ni sangs rgyas bcom ldan 'das rnams kyis zhes bya ba'i tha tshig go/ /lhag par mngon du brtson pa dag gis kyang zhes bya ba ni so so'i skye bo rnams dang / byang chub sems dpa' rnams te/ de dag ni lhag par mngon du brtson pa'i phyir ro//lta ba de nyid de kho na la 'jug pa dang mthun pa'i phyir rigs pa yin no zhes bstan pa'i phyir de'i phyir zhes bya ba smos so/ /'dir zhes bya ba ni chos thams cad rang bzhin med pa nyid kyi tshul la'o/ /de la yang zhes bya ba ni sems tsam la'o/ /sems tsam nyid kyi tshul la yang 'di rang 'byung ba med pas zhes 'byung ba'i phyir gzhan gyi dbang de yang rang bzhin med pa kho nar ston pa yin na/de ji ltar na tshul 'dir brten nas shes par bya snyam pa la/ tshul 'dis ni zhes bya ba smos so/ /shin tu zhes bya ba ni rnam grangs med par ro/ / legs par bshad par 'gyur zhes bya ba ni de kho na la 'jug pa'i rim pa ji skad bshad par bstan pa'i phyir ro/ /rtsa ba ma mchis pa zhes bya ba ni rtsa ba sems kyi mtshan nyid kyang don dam par mi dmigs pa'i phyir ro/ /sems tsam la ni brten nas su/ /zhes bya ba ni 'dzin pa'i rnam pa la gnas nas so//phyi rol zhes bya ba ni gzung ba'i rnam par gzhig par bya zhes bya ba'i tha tshig go/ /yang dag dmigs par zhes bya ba ni de bzhin nyid kyi mtshan nyid kyis dmigs pa la'o / /sems tsam las kyang shin tu bzla/ / zhes bya ba ni 'dzin pa'i rnam pa des kyang 'da' bar bya ste/de'i gzung ba med na de yang mi rung ba'i phyir ro/ /snang ba med las shin tu 'da'/ / zhes bya ba ni gnyis su med pa la mngon par zhen pa de yang tshul 'di la brten nas dor bar bya'o zhes bya ba'i tha tshig go/ /'di skad du 'di ni sems kho na tsam du zad kyi don ni med do zhes de ltar bsgom pa na don la mngon par zhen pa yongs su dor bar bya'o//de yang yongs su bor nas gzung ba med na de yang med do zhes bsgom pa ni 'dzin pa'i rnam par mtshan nyid sems tsam nyid de yang yongs su spang bar bya zhing snang ba med pa'i shes pa kho na la gnas par bya'o//shes pa de yang gcig la sogs pa'i ngo bos bsgom zhing gnyis med pa las 'das par byas nas snang ba med pa nyid la 'jug par bya ste/ de la gnas pa ni theg pa chen po la zhugs pa yin no zhes bstan pa yin no/ /gal te de yi gnas skabs na/ /rnal 'byor de ni gang zhig yod//gang zhig gis ni lta zhe na/ /don dam par ni 'ga' yang lta ba med la rnal 'byor bar yang med mod kyi/ kun rdzob tu dper na lhas byin lta'o nyan to zhes bya ba la sogs pa ston pa ltar rnal 'byor pa yang de dang 'dra bas nyes pa med do/ /ji ste rnal 'byor pa'i shes pa gnyis med pa'i shes pa snang ba med par byed pa gang yin pa de yang gang zhig gis snang ba med pa nyid du khong du chud/re zhig de nyid kyis ni ma yin te/ bdag nyid la byed pa 'gal ba'i phyir ro/ /gzhan dag gis kyang ma yin te thug pa med par thal bar 'gyur ba'i phyir ro zhe na/de ni nyes par mi 'gyur te ji ltar gnyis med pa nyid dang / snang ba med pa nyid du rang rig pas nyams su myong nas phyir rjes su thob pa'i shes pas rnam par 'jog par byed la rang la bdag nyid med par 'gal ba yang ma yin pa ltar/ rang bzhin med pa yang de dang 'dra'o/ /rang rig pa yang gnag rdzi yan chad la grub pa'i phyir klan kar yang mi rung ngo //thug pa med pa yang ma yin te/ shes pa gnyis kyis thams cad yul kho nar byed pa'i phyir dper na bye brag tu smra ba rnams kyi dang 'dra bas thams cad mtshungs so/ /rnal 'byor pa rnams kyi gnas skabs kyi mtshan nyid can gyi 'jug pa de 'dra ba de ni blta bar bya ba gzhan med pa'i phyir lhun gyis grub pa yin no//spros pa thams cad nye bar zhi ba'i phyir zhi ba yin no/ /smon lam dag gis rnam par sbyangs/ /zhes bya ba ni snying rje chen pos sems can thams cad kyi don la smon pa'i phyir te/ rang bzhin med pa nyid mkhyen pas kyang 'khor ba ji srid par rjes su 'jug pa'i phyir ro//de yang gang zhig yin snyam pa la/ ye shes dam pa zhes bya ba la sogs pa smos te/ gnas skabs de nas gnyis med pa'i mtshan nyid kyi ye shes dam pa la snang ba med pa'i ye shes gzhan gyi bdag med pa ste rang bzhin med par mthong ngo zhes bya ba'i tha tshig go//yang zhes bya ba ni 'phags pa lang kar gshegs pa'i mdo de nyid las so/ /phyi rol gyi rgyu dang rkyen rgyu'i mtshan nyid rnam pa lnga dang bdag po'i mtshan nyid rgyu log pas sems tsam nyid du gnas pa ni rnam par rig pa tsam nyid kyi tshul la skye ba med pa gcig yin no//dbu ma pa'i lugs kyi skye ba med pa gang yin pa de bstan pa'i phyir ro/ /phyi dngos med ces bya ba smos te/ dngos po rnams phyi rol gyi ngo bo nyid du med par ngas bshad do zhes bya bar sbyar ro/ /sems kyang yongs su gzung ma yin/ /zhes bya ba ni dngos po rnams sems kyi ngo bo nyid du med par ngas bshad do zhes bya bar sbyar ro//ci'i phyir zhe na/ lta ba thams cad spangs pa'i phyir te de ltar na dngos po la sogs par lta ba thams cad spangs par 'gyur ro/ /de'i phyir dngos po rnams kyi skye ba med pa'i mtshan nyid ni de lta bu kho na yin no/ / 'dir yang gsungs pa zhes bya ba ni sems tsam kun rdzob tu smra ba'o/ /'phags pa lang kar gshegs pa las gsungs pa'i khungs shes pa 'ba' zhig kho na'o zhes bya ba smos te/ rnam par shes pa dag kho nar zad do/ /'o na ji ltar bcom ldan 'das kyis 'byung ba chen po bzhi dag dang /'byung ba chen po bzhi dag la brten nas zhes bya ba la sogs pa gsungs snyam pa la/ de'i phyir 'phags pa klu sgrub kyi zhal snga nas gsungs pa'i tshigs su bcad pa gnyis pa/ 'byung ba che la sogs bshad pa/ /zhes bya ba smos so/ /bcom ldan 'das kyis 'byung ba chen po la sogs pa bshad pa gang yin pa de thams cad ni rnam par shes pa kho nar yang dag par 'du ste/de'i so sor snang ba kho na la de dag rnam par gzhag pa'i phyir ro/ /gal te de lta na rnam par shes pa'i bdag nyid du yod kyang rung / phyi rol gyi bdag nyid du yod kyang rung ste/ 'byung ba chen po rnams ni rnam pa thams cad du don dam par yod pa kho na'o snyam pa la/ de shes pas ni zhes bya ba smos te/ gang gi phyir yang dag pa'i ye shes la de mi snang ba de'i phyir log par rnam par brtags pa yin no zhes bya ba'i tha tshig go/ /de zhes bya ba ni shes pa nyid do/ / ma yin nam zhes bya ba ni bod pa'o/ /'di ni rigs pa drug cu pa las gsungs pa yin no/ /tshul gnyis zhes bya ba ni dbu ma pa dang rnal 'byor spyod pa zhes bya'o/ /rigs pa nyid srab skyogs dang 'dra bas srab skyogs te/ rta kha lo sgyur ba'i thag gu dang 'dra zhes bya ba'i tha tshig go//gang dag la tshul gnyis kyis bsdus pa'i theg pa chen po ji skad bshad pa yod pa/ de dag ni theg pa chen po pa yin te/ de'i phyir ming don ji lta ba bzhin no/ /ci'i phyir tshul gnyis kyis bsdus pa kho na theg pa chen po yin gyi/ gzhan ni ma yin no snyam pa la/ 'di snyed de zhes bya ba smos so//chos lnga ni ming dang rgyu mtshan dang / rnam par rtog pa dang / de bzhin nyid dang / yang dag pa'i shes pa ste/ de la ming ni sgra'i spyi nang du brjod par gnas pa'o/ /rgyu mtshan ni gzung ba dang 'dzin pa'i rnam pa'o/ /rnam par rtog pa ni gzhan gyi dbang gi ngo bo nyid do//de bzhin nyid ni gnyis med pa nyid de gzhan gyi dbang gi ngo bo nyid de nyid gnyis dang bral ba nyid yin no zhes bya ba'i tha tshig go/ /yang dag pa'i shes pa ni 'jig rten las 'das pa'i rnam par mi rtog pa'i ye shes so/ /rang bzhin ni ngo bo nyid gsum po kun brtags pa dang /gzhan gyi dbang dang yongs su grub pa zhes bya ba rnams so/ /rnam par shes pa brgyad ni mig gi rnam par shes pa la sogs pa 'jug pa'i rnam par shes pa drug dang / nyon mongs pa can gyi yid dang / kun gzhi'i rnam par shes pa'o/ /bdag med pa gnyis ni gang zag la bdag med pa dang /chos la bdag med pa'o/ /tshul rnam pa 'di gnyis ni zhes bya ba ni rnam par rig pa tsam nyid kyi tshul dang / dbu ma'i tshul lo/ /rnam 'dor ni tshangs pa'o/ /mig mi bzang ni dbang phyug go/ /sogs pa'i sgras ni ser skya la sogs pa gzung ngo / /'di lta ste/ zhes bya ba ni rnam 'dor gyis bshad pa'i rnam par rig pa tsam nyid kyi tshul ston to/ /rnam rig tsam zhes bya ba ni bdag ces bya ba la ltos par bya ba ste/ gsang ba smra ba de dag ni srog chags thams cad la rnam par shes pa'i rang bzhin 'gro ba thams cad la khyab pa rtag pa gcig pu kho na'i bdag gcig yod par 'dod do//rtag tu rnam par dag ces bya ba ni de dang rang bzhin gyis yongs su dag pa'i phyir ro/ /sangs rgyas zhes bya ba ni ma rig pa'i gnyid dang bral ba'i phyir ro/ /grol ba zhes bya ba ni 'dod chags la sogs pa'i 'ching ba med pa'i phyir ro/ /'di thams cad ni don dam pa yin no//ma rig pa dang 'dod chags la sogs pa glo bur ba yin pa'i phyir rig par bya'o/ /blang ba dang dor ba med ces bya ba ni 'di las ma gtogs pa'i 'dor ba'am/ dor bar bya ba'am/ len pa'am/ blang bar bya ba med pa'i phyir te/ de'i phyir 'di ni blang ba yang med la dor ba yang med pa yin no//tshangs pa zhes bya ba ni bdag gi rang bzhin no/ /mya ngan med ces bya ba ni grol ba zhes bya ba'i tha tshig ste/ /de'i tshe ma rig pa ma lus par spangs pa'i phyir ro/ /zhag lnga pa las byung ba zhes bya ba 'dis ni khyab 'jug gis bshad pa dbu ma'i lugs ston to zhes grag go//ming tsam las ni rab 'das shing / /zhes bya ba ni tha snyad thams cad las 'das pa yin pa'i phyir 'di'o zhes bya ba'i tha snyad gdags pa tsam las kyang 'das pa'o/ /dngos dang dngos med rnam par spangs/ /zhes bya ba ni de las ma gtogs par gzugs la sogs pa'i dngos po med pa'i phyir te/de thams cad ni brdzun pa'i phyir ro/ /de'i phyir de ni gzugs la sogs pa dngos po'i rang bzhin yang ma yin no/ /dngos po med pa'i rang bzhin yang ma yin te / dngos po'i ngo bo'i bdag nyid du gnas pa'i phyir ro/ /dbyung dang bsdu las nges grol ba//zhes bya ba ni skye ba dang 'jig pa dag dang bral ba zhes bya ba'i tha tshig ste/ de ni rtag pa yin pas skye ba dang 'jig pa dag med pa'i phyir ro/ /de ni zhes bya ba ni bdag dam pa'o/ /de ji ltar dngos po dang dngos po med pa las grol ba yin snyam pa la/ dngos la dngos nyid yod ma yin/ / zhes bya ba la sogs pa smos so/ /dngos la zhes bya ba ni gzugs la sogs pa la bya ste/ de ni brdzun pa'i phyir ro/ /dngos po med pa'ang dngos nyid med/ /ces bya ba ni de dngos po la ltos pa'i phyir dngos po ma grub na de yang ga la 'grub/ de rig byed rig ces bya ba ni de tshangs par rig ces bya ba'i tha tshig go//zhi ba'i mdzes pa sbyar ba las 'byung ba zhes bya ba la sogs pa ni mig mi bzang gis bshad pa yang dbu ma pa'i lugs yin par ston to/ /'di ni zhi ba'i yin pas na zhi ba'i yin no/ /bu gcig ces bya ba ni bod pa'i tha tshig go/ /tshangs pa mchog bya ba ni mchog dam pa ste/ gzhan thams cad brdzun pa'i phyir ro snyam du bsams pa'o/ /gang la rig pa kho na dbang phyug yin pa yod pa de la de skad ces bya'o/ /mu mtha' yas zhes bya ba ni khyab pa'o/ /de yang zhags pa zhes bya ba ni skye bo ji tsam du de la yod do snyam du mngon par zhen pa de tsam du de ni de'i 'ching ba'i rgyu yin no zhes bya ba'i tha tshig go//'di yang mdzes par sbyar ba de'i gang tsam nas bshad snyam pa la pha dang bu'i sbyar ba las brjod pa zhes bya ba smos so/ /yon tan rnams kyi zhes bya ba ni snying stobs dang rdul dang mun pa rnams kyi'o/ /ri dgas rnams kyi zhes bya ba ni ri dgas rnams so/ /mu stegs rnams nyid glang po che dang ri dgas dang 'dra bas/mu stegs byed kyi glang po che dang ri dgas rnams so/ /de dag gi tshogs ni khyu'o zhes tshig rnam par sbyar ro/ /'di lta ste zhes bya ba 'dis ni mu stegs can 'di dag gzugs la sogs pa brdzun pa nyid du ston du zin kyang de dag ni shes pa yod pa la sogs pa'i rang bzhin yang dag pa nyid du rjod par byed de/de'i phyir ji ltar na bcom ldan 'das don dam par gang zag ma lus par bdag med par gsungs pa dang 'di dag lhan cig mtshungs par 'gyur zhes ston par byed do/ /nam mkha' chen po dang 'dra ba zhes bya ba ni nam mkha' chen po dang mtshungs pa ste/bum pa la sogs pa'i khongs su gtogs pa'i nam mkha' gang yin pa de ni chung bas de rnam par bcad pas thams cad la khyab pa'i nam mkha' bstan pa'i phyir chen po nyid bye brag tu byas so/ /gnyug ma ni lhan cig skyes pa ste/ ri dgas dang bya rnams la yang yod pa'i ma rig pa gang yin pa'o//gnyug ma ma yin pa ni bstan bcos ma nyan pa la sogs pa las skyes pa gang yin pa'o/ /de'i nam mkha' zhes bya ba bum pa'i nam mkha'o/ /rab tu smra ba dag gis zhes bya ba ni bstan bcos byed pa rnams kyis so/ /gal te 'o na gnyis su med pa de ji ltar sna tshogs kyi ngo bo mngon snyam pa la /rmi lam rmis pa bzhin du zhes bya ba smos te/ ji ltar rmi lam gyi gnas skabs na rnam par shes pa don dam par gnyis ma yin mod kyi/ sna tshogs kyi ngo bor snang ba ltar bdag 'di yang de dang 'dra bas 'gal ba med do/ /'di thams cad ni de dag gis bdag kho na'i dbang du byas te/smras pa gsang ba'i bstan bcos las bshad pa'i khungs 'dir smras pa zhes bya ba smos te/ 'dir zhes bya ba ni gsang ba'i bstan bcos las so/ /gzugs zhes bya ba ni phyi'i gzugs la sogs pa'o/ /'bras bu ni lus so/ /rab brjod pa ni brjod pa ste/ gzugs dang lus dang brjod pa zhes tshig rnam par sbyar ro/ /thag pa zhes bya ba ni ji ltar thag pa nges rtogs na zhes gong ma dang sbyar ro/ /de ltar bdag kyang nges pa yin/ /zhes bya ba ni gnyis min zhes bya bar nges pa ste 'di skad du ji ltar thag par nges te rnam par rtog pa log na thag pa kho na'o snyam du nges pa yin pa de bzhin du bdag la'ang gnyis kyi rnam par rtog pa log na gnyis ma yin no snyam du nges pa yin no zhes bshad pa yin no//gal te bdag gi de kho na gnyis ma yin pa nyid yin na de ji ltar rab tu smra ba rnams srog la sogs pa yang de kho nar smra snyam pa la/ srog la sogs pa zhes bya ba la sogs pa smos so//de ni lha de'i rgyu ma yin/ /zhes bya ba ni ma rig pa sgyu ma'i dbang gis de'i bdag nyid du rang nyid rmongs nas rab tu smra ba rnams rmongs par byed pa yin gyi/ de las ma gtogs pa'i gzhan nyid ni med do/ /srog tu rigs pas zhes bya ba la sogs pas ni ji skad bshad pa'i don nyid ni ston par byed do//de rig byed ces bya ba ni de kho na rig pa'o/ /ji ste gal te 'di gnyis ma yin no zhes bya ba tshad ma gang las grub snyam pa la/ gnyis min zhes bya ba smos te/ 'di ni dper gzhag pa yin no/ /sbyor ba ni 'di lta bu ste gang dang gang yid yin pa de ni don dam par gnyis med pa yin te/dper na rmi lam gyi gnas skabs lta bu'o/ /sad pa'i gnas skabs na yod pa 'di yang yid yin pas rang bzhin gyi gtan tshigs so/ /gal te yid don dam par gnyis med pa kho na yin na/ 'o na de ji ltar 'gro ba rgyu ba dang mi rgyu ba gzung ba dang 'dzin pa'i ngo bor gnyis su snang snyam pa la/snang ba 'di yid yin no zhes bya ba smos te/ 'di skad du ji srid du ma rig pa'i dbang gis bdag nyid gzung ba dang 'dzin pa'i ngo bor snang ba de srid du yid 'di yin te/ khong du chud cing rtogs pa'i phyir ro/ /de'i phyir yid snang ba'i dbang gis gnyis dmigs so zhes bshad par 'gyur ro//gang gi tshe yid kyi yid log pa'i tshe mi dmigs so/ /gal te nam zhig ldog snyam pa la/ gang tshe kun tu mi rtog pa/ /zhes bya ba la sogs pa smos so/ /de 'dzin pa med ces bya ba ni 'dzin pa'i 'dzin pa med pa'o/ /gang la gnyis su med par brjod pa'i tshul yod pa zhes tshig rnam par sbyar ro//sngar zhes bya ba ni sngar dngos po rtag pa thams cad rgya cher bsal zin pa'i phyir ro/ /gzhan yang zhes bya ba ni sun dbyung ba gzhan ston pa ste/ 'dis ni bcing ba dang grol ba khas blangs pa dag kun rdzob tu yang med par thal bar 'gyur bar bstan to//rnal 'byor pa rnams kyis bsgoms pa la sogs pa'i sgrib pa yang 'bras bu med par thal bar bstan pa'i phyir ro/ /ci zhig ces bya ba smos te/ rnal 'byor goms pas ci zhig bzlog cing ci zhig bsgrub ces bya bar sbyar ro/ / mi zlogs pa yi gtan tshigs su/ /spang bar nus pa ma yin no/ /zhes bya ba smos so/ /de'i bdag nyid ces bya ba ni bdag rtag pa'i bdag nyid de/ rtag pa gcig pu'i ngo bo ni spang bar mi nus pa'i phyir ro/ /bsgrub tu mi rung ba'i gtan tshigs su shes pa yang dag ces bya ba la sogs pa smos so/ / de nyid ces bya ba ni yang dag pa'i shes pa ni de'i bdag nyid yin pa'i phyir ro/ /bum pa la sogs pa zhig pa na zhes gang smras pa de la sun dbyung ba bum pa'i nam mkha'i dpe yang zhes bya ba la sogs pa smos so/ /der yang zhes bya ba ni nam mkha' la'o/ /ji ltar byis pa rnams la ni/ / zhes bya ba de la/ yang sun dbyung ba de kho na mthong ba goms pas glo bur gyi zhes bya ba la sogs pa smos te go sla'o/ /ji ltar mun khung ma gtogs te/ /zhes bya ba la sogs pa de la yang sun dbyung ba nges pa dang ma nges pa zhes bya ba la sogs pa smos te/ 'di thams cad kyis ni nges pa la sogs pa chos 'gal ba khas blangs pa'i phyir/skyes bu rtag pa gcig pu nyid du khas blangs pa gang yin pa de la gnod do zhes bstan pa yin no/ /gnyis min gnyis snang zhes bya ba'i sbyor ba de la yang / sun dbyung ba shes pa'i skyes bu rtag pa dang gcig pu zhes bya ba la sogs pa smos te/'dis ni bsgrub par bya ba'i chos can las log pa'i dpe'i chos can ma grub pa nyid du bstan to/ /gal te spyir chos can tsam la gnyis med pa'i ngo bor bsgrub na ni/ de'i tshe grub pa sgrub pa yin te/ kho bo cag kyang rnam par shes pa smra ba la de bzhin du khas len pa'i phyir ro/ / chos can rtag pa la ni gtan tshigs kyi gzhi ma grub pa nyid dang / dpe'i chos can yang ma grub pa nyid yin no/ /de dag gis gang brjod pa zhes bya ba ni gsang ba smra ba rnams kyis te / de ni bde bar gshegs pa'i lugs la mdzes so zhes bya bar sbyar te/ dngos po thams cad la khyab pa'i stong pa nyid bstan pa ni bcom ldan 'das kho na'i yin gyi/gzhan dag gi ni ma yin no/ /ye srid pa zhes bya ba ni ye srid pa dbang phyug gi yin pas ye srid pa'o/ /yang dag pa nyid ces bya ba ni de kho na nyid do/ /sngar smos pa zhes bya ba ni dngos po rtag pa bsal ba'i tshul gyis so//rang gi sde pa gang dag ces bya ba ni btsun pa dge bsrungs la sogs pa ste thams cad go sla'o/ /chos rnams thams cad rtag tu rang bzhin stong / /zhes bya ba la sogs pa ni tshigs su bcad pa'i lhag ma/ rgyal sras rnams kyis dngos po rnams bshig na/ /srid pa kun ni yong gis thams cad stong //phyogs gcig stong nyid mu stegs can rnams kyi/ /zhes bya ba gsungs so/ /'dir yang gsungs pa zhes bya ba ni 'phags pa klu sgrub kyis so/ /rkyen las byung ba zhes bya ba ni/ rten cing 'brel bar 'byung ba'i'o/ /ci'i phyir ma mthong snyam pa la/gal te don gcig ces bya ba la sogs pa smos te/ gal te don gcig cig don dam par yod par gyur na yang / de'i tshe ci'i phyir/ chos thams cad rang bzhin med pa nyid du khas blang / 'dis ni tha snyad 'di 'jig rten dang 'gal ba yin no zhes bstan pa yin no/ /mdo sde mang dang 'gal bar 'gyur//zhes bya ba ni bcom ldan 'das kyis rab 'byor phyin ci log ma gtogs par byis pa rnams gang la gnas nas las mngon par 'du byed par 'gyur ba'i chos nyid skra'i rtse mo'i cha shas gzhag pa tsam yang med do zhes gsungs pa dang / 'phags pa chos yang dag par sdud pa las/rigs kyi bu 'jig rten gnas pa 'di ni skye ba dang 'gag pa la mngon par zhen pa yin te/ de lta bas na de bzhin gshegs pa ni 'jig rten skrag pa'i gnas yongs su spang pa'i phyir tha snyad kyi dbang gis skye'o/ /'gag go zhes gsung gi 'di la chos gang yang skye ba med do zhes gsungs so//khyab dang dbang la sogs zhes bya ba ni khyab 'jug dang dbang phyug la sogs pa'o/ /dpag tu med par gnas pa'i rgyu zhes bya ba ni tha snyad thams cad rnam par gzhag pa'i rgyu'o/ /'jig rten spyi bor gyur pas kyang / / zhes bya ba ni nyan thos dang rang sangs rgyas rnams kyis kyang ngo / /kyang gi sgras ni so so'i skye bo mchog rnams kyis kyang ngo / /zla ba'i 'od zer bzhin dag pas na zla ba'i 'od zer ltar dag pa'o/ /bdag med pa dang po ni gang zag la bdag med pa'o/ /gang dag la log par bstan pa'i grub mthar 'chel ba'i blo yod pa zhes tshig rnam par sbyar ro//de lugs rjes 'jug blo can rnams/ /zhes bya ba ni de bzhin gshegs pa'i lugs kyi rjes su 'jug pa'i blo can rnams so/ /de bzhin gshegs pa'i bstan pa gang la snying rje nyid rigs kyi khyim yod pa de la de skad ces bya'o//me lce zhes bya ba ni me'o/ /grangs yod pa zhes bya ba ni gcig kho na'o/ /chos kyi sku la zhes bya ba ni gnod pa zhes bya bar sbyar te/ chos kyi sku'i sa bon de kho na nyid la mos pa gang yin pa de la gnod pa byed par zhugs pa'i phyir ro/ /yang gsungs pa zhes bya ba ni 'phags pa klu sgrub la sogs pa ste/'dir tshigs su bcad pa dang po ni/ slob dpon klu sgrub kyi zhal snga nas kyis yin no/ /gnyis pa la sogs pa ni 'phags pa lha'i yin no/ /gti mug dbang gis bsgribs gyur te/ /zhes pa ni gti mug gis kun nas bsgribs pa'o/ /zla ba sgron ma'i ting nge 'dzin las dang po bzod pa'i khyad par bstan pa las ji skad gsungs pa bzhin no zhes bya ba ni de las/'jig rten 'di na mu stegs can gzhan gang / /'khod pa dag la de ni yid mi sdang / /de dag rnams la snying rje nyer 'jog la / /'di ni bzod pa dang po'i bye brag yin/ /zhes bya ba 'byung ngo //gangs ni kha ba'o/ /de'i rang bzhin gyi ri ste/ ri bo ni gangs ri'o/ /de yi kha ba'i dum grugs ni/ /gangs ri'i kha ba'i dum grugs so/ /de ni nyi ma'i 'od zer shin tu 'jebs pa'ang yin la/ gangs ri'i kha ba'i dum grugs la babs pa yang yin pas zhes tshig rnam rnam par sbyar te/de dang 'dra ba'i phyir ro/ /rigs ngan zhes bya ba ni gdol pa'o/ /thog ma dang bar dang tha mar dge ba zhes bya ba ni thos pa dang / bsams pa dang / bsgoms pa'i dus su go rims ji bzhin pa 'am/ /yang na mngon sum dang / rjes su dpag pa dang / phan tshun dpyod pa dag tu'o//gser ni sa le sbram mo/ /gang la 'khor ba na ma 'dris pa'i ye shes yod pa de la de skad ces bya'o/ /de ni mi dang lha yul pa'i 'dren pa mtha' dag gi cod pan gyi phreng bas brgyan pa yang yin la zhabs pad+ma gnyis kyang yin pas zhes tshig rnam par sbyar ro/ /yang dag ye shes tshol brtson zhes bya ba ni gyur nas zhes bya ba lhag ma yin no//gang dag la blo mig zhib pa yod pa zhes tshig rnam par sbyar ro/ /lhag ma ni go sla bas rnam par ma phye'o/ / dbu ma'i rgyan gyi dka' 'grel slob dpon ka ma la shI las mdzad pa rdzogs so// //rgya gar gyi mkhan po su ren dra bo ng+hi dang /