CLOSE WINDOW

D3882
བོད་ཡིག

/ //rgya gar gyi mkhan po shI len+d+ra bo d+hi dang / zhu chen gyi lo tsA ba ban+de ye shes sdes bsgyur cing zhus te gtan la phab pa'o//[ ]@#/ /rgya gar skad du/ sat+ya dwa ya bi b+haM ga br-it+ti/ bod skad du/bden pa gnyis rnam par 'byed pa'i 'grel pa/ 'jam dpal gzhon nur gyur pa la phyag 'tshal lo/ /gang dag dngos po'i ngo bo nyid med yang dag mkhyen gyur kyang / /thugs rjes 'khor ba ji srid bar du thub dbang sras bcas rnams/ /'jig rten ma lus pa yi 'tshal ba'i dngos po bsgrub slad du//'dir bzhugs dri med blo ldan de dag rnams la phyag 'tshal lo/ /bden pa gnyis ji lta ba bzhin du khong du chud par bya ba'i phyir/ rab tu 'byed pa 'di brtsams te/ gang gi phyir/ bden pa gnyis po rnam phye yang / /shing rta che dag rmongs nyid na/ /gzhan rnams smos kyang ci dgos te/ /de bas bdag gis rnam par dbye//gzhan gyi don 'byung ba la mkhas pa bcom ldan 'das kyis skye bo blo chung ngu la phan gdags pa'i phyir/ bden pa gnyis las mang du rnam par phye la/ slob dpon klu sgrub la sogs pas kyang gsal bar mdzad du zin kyang / rang gi sde pa chen po dag kyang rmongs pa nyid yin na/ de dag gi kha na las pas 'jug pa gzhan rnams lta smos kyang ci dgos/bden gnyis rnam dbye shes pa dag /thub pa'i bka' la mi rmongs te/ /de dag ma lus tshogs bsags nas/ /phun tshogs pha rol 'gro ba nyid/ /bden pa gnyis rnam par dbye ba la mkhas pa ni/ 'gro ba la phan pa 'byung ba bskyed pa'i blo dang ldan pa/bde bar gshegs pa'i bka' rab 'byam dag la shes pa'i snang ba skyes pa'i 'jig rten bsod nams dang ye shes kyi tshogs ma lus par bsgrubs pa bdag dang gzhan gyi don phun sum tshogs pa bye brag tu byar med pa'i pha rol tu nges par shin tu phyin par 'gyur ro/ /gzhan ni yid la bsams pa bzhin du re ba yongs su rdzogs par 'gyur ro//kun rdzob dang ni dam pa'i don/ /bden gnyis thub pas gsungs pa la/ /mdo de dang der zhes bya ba ni tshig gi lhag ma'o/ /ji ltar snang ba 'di kho na/ /kun rdzob gzhan ni cig shos yin/ /don dam pa'i bden pa zhes bya ba'i tha tshig go//ji ltar ba lang rdzi mo la sogs pa yan chad kyis mthong ba de ltar kun rdzob tu bden pa rnam par gnas kyi yang dag par ni ma yin te/ mthong ba dang mthun par dngos po'i don nges par 'dzin pa'i phyir ro/ /mthong ba ni rnam pa gnyis te rnam par rtog pa dang bcas pa dang / rnam par rtog pa med pa'o//rigs pa ji lta ba bzhin nyid ni don dam pa'i bden pa'o/ /ni zhes bya ba'i sgra ni bsnan pa'i don to/ /don dam par bden pa ni don dam pa'i bden pa ste/ de ni rigs pa'i rjes su 'gro ba can gyi bden pa nyid ces bya ba'i tha tshig go/ /gang gi phyir/ slu ba med pas rigs pa ni don dam yin te/ rigs pa'i stobs kyis don la nges pa ni slu bar mi 'gyur te/de'i phyir tshul gsum pa'i rtags kyis bskyed pa'i rtogs pa gang yin pa de ni dam pa yang yin la/ don yang yin pas don dam pa'o/ /des gtan la phab pa'i don kyang don dam pa ste/ mngon sum la sogs pa bzhin du brjod do/ /kun rdzob min/ don dam pa ni kun rdzob kyi bden pa ma yin te/tshig tha ma khong nas dbyung ba'i phyir ro/ /ci'i phyir zhe na/ de ltar mi slu min phyir te/ /de ji ltar shes pa'i bdag nyid la gnas pa de ltar rigs pas mi rung ba'i phyir ro/ /ji ltar snang ba de nyid bden/ /ji ltar snang ba de nyid ni kun rdzob kyi bden pa'o zhes bshad do/ /zla ba gnyis pa la sogs pa yang ji ltar snang ba kho na yin na/'jig rten pa dag de ltar ni khas mi len te/ de'i phyir yang dag pa ma yin pa'i kun rdzob ces 'og nas 'chad do/ /ji ltar snang ba'i dngos por ni/ /rnam par gnas par mi rung ste/ /shes pa'i dngos po thams cad la/ /ji lta bur yang snang mi 'gyur/ /don dam pa ni ji ltar snang ba bzhin du rnam par gnas pa med de/thams cad mkhyen pa'i mkhyen pa nyid la yang mi snang ba'i phyir ro/ /de nyid kyi phyir mdo sde las 'ga' yang mthong ba med pa ni de kho na mthong ba zhes gsungs so/ /gal te brtags pa'i ngo bo nyid/ /'ga' yang mthong ba med ce na/ /brtags pa'i ngo bo nyid kyi dbang du mdzad nas 'ga' yang mthong ba med pa ni de kho na mthong ba zhes bya ba 'di gsungs par 'dod de/de ni de lta bu yin no/ /de lta bu ma yin na 'ga' yang zhes ci'i phyir gsungs te/ ngo bo nyid mi mthong ba zhes bya ba kho nar gsung bar 'gyur ba'i rigs so zhe na/ de ni mi rung ste/ rang rig rigs pa ma yin pa'i phyir/shes pa ni gnyis kyis dben pa'i ngo bo rig par byung ba yin pa dang / de med par shes par 'gyur gyi/ de lta ma yin na mi rigs pa'i phyir ro/ /shes pa ni bdag gis bdag shes pa ma yin te/ rang snang bas stong pa'i phyir shes pa gzhan bzhin no/ /rang snang bar khas mi len na ni tha dad par thal bar 'gyur te/sngon po dang de shes pa bzhin no/ /rig pa'i ngo bo nyid yin pa'i phyir yang ma yin te/ ha cang thal bar 'gyur ba'i phyir ro/ /gal te rang rig pa'i ngo bo yin pas de'i phyir ha cang thal bar mi 'gyur ro zhe na/ de yang mi rung ste nye ba'i rgyu med pa'i phyir ro/ /de lta ma yin na ha cang thal ba nyid du 'gyur ro//gal te shes pa'i ngo bo nyid ni 'di 'dra ste/ rang gi rgyu las skyes shing des de ltar 'gyur ro zhe na/ yang mi rung ste/ lan btab zin pa'i phyir ram/ mi slu ba'i tshad ma med pa'i phyir te/ sems mi mthun pa'i gzhan rnams ni rang gi tshul brjod pa tsam la gus par mi byed do/ /shes pa rnam pa med par smra bas de skad brgal ba la/mtshan nyid dang rnam 'grel byed pa'am/ gzhan yang rung gang gis yul gyi rnam pa nyid kyi tshad ma bsgrub pa ji skad brjod par bya/ rgyu'i nus pa bkag phyir ro/ /'og nas rgyu'i nus pa bkag pa'i phyir yang 'di rigs pa ma yin no/ /de nyid kyi phyir ngo bo nyid thams cad mi mthong ba ni de kho na mthong ba'o zhes bya bar chug na yang ji ga nges par bya bar mi nus te/'di ltar/ yod med dngos po mkhyen pa po/ /kun mkhyen pas kyang gang ma gzigs/ /de yi dngos po ci 'dra zhig /shin tu zhib pa'i lta bas dpyod/ /shes bya mtha' dag la khyab pa'i ye shes dang ldan pa'i phyir kun mkhyen pa ste/des mi dmigs pa ji ltar yod par 'gyur zhes bsams pa'o/ /de nyid kyi phyir mdo las kyang de la kun rdzob kyi bden pa gang zhe na/ ji snyed 'jig rten gyi tha snyad gdags pa dang / yi ge dang skad dang brda bstan pa dag go/ /don dam pa'i bden pa ni gang la sems rgyu ba yang med na/yi ge rnams lta smos kyang ci dgos zhes gsungs so/ /'jig rten gyi tha snyad gdags pa ni 'jig rten gyi 'jug pa ste/ shes pa dang shes bya'i mtshan nyid yin gyi/ rjod par byed pa'i mtshan nyid ni ma yin te/ de ni 'og mas brjod pa'i phyir ro/ /ji snyed ces bya ba'i tshig ni mtha' dag ces bya ba'i don to//des na rnam par rtog pa med pa'i mngon sum gyi shes pas yongs su bcad pa'i ngo bo'i dngos po gzugs la sogs pa dang bde ba la sogs par rig par grub pa rnams ni kun rdzob kyi bden pa kho na yin no/ /de ni 'og tu yang sbyar bar bya'o/ /de'i phyir mdo las 'byung ba dang /yi ge dang skad dang brda bstan pa gzhan dag kyang gzung ngo / /de ni de ltar rtogs par bya ste/ don dam pa'i bden pa bstan pa la/ sems rgyu ba yang med ces gsungs pa'i phyir ro/ /rjod par byed pa'i mtshan nyid kho na kun rdzob kyi bden pa yin na ni/ yi ge rgyu ba yang med na zhes gsung bar 'gyur gyi/sems zhes gsung bar ni mi 'gyur ro/ /gal te ji skad gsungs pa'i go rims can de gnyis mi 'dod na ni/ sems rgyu ba yang med na yi ge rnams lta smos kyang ci dgos zhes bya bar brjod par bya ba'i go rims ci'i phyir mdzad/ rnam par rtog pa'i shes pa nyid yin par yongs su gzung na ni rnam par rtog pa rgyu ba yang med na zhes gsungs par 'gyur te/the tshom med pa'i phyir ro/ /'di la nges par byed pa'i tshad ma ni med do/ /spyi'i sgra yang don dang skabs la sogs pa med par bye brag tu gzhag par mi nus so/ /yang na rjod par byed pa'i spyi ni rnam par rtog pa'i rjes su 'jug pa'i phyir/ de brjod pas gnyis smos pa kho na yin na/ci'i phyir gnyis gsungs/ de lta na ni sems rgyu ba yang med pa ni yi ge rnams rgyu ba med pa kho nar bstan pa'i phyir/ yang zhes bya ba'i sgra mdzes pa ma yin pa'i phyir ro/ /rang gi mtshan nyid ni don rjod par byed pa ma yin pa'i phyir de thugs la bzhag nas brjod par rung ba kho na ma yin no//don 'og ma brjod par yang gong ma 'dus pa nyid yin te/ rjod par byed pa spyi'i rjes su nang gi brjod pa 'brang ba yin pa'i phyir ro/ /de lta bas na dngos po tsam dang mthun par byed pa'i ngang can gyi sems kyang rgyu ba yang med ces bya ba 'di nyid yang dag par na bcom ldan 'das bzhed do/ / de lta ni thams cad 'tsham mo/ /de ltar gyur na/ bdag nyid rig pa yin pa'i phyir/ /sems kyi spyod yul gyur pa'i shes/ /rnam par dag pa'ang yang dag tu/ /rigs sam 'on te min zhes soms/ /bar skabs kyi tshigs su bcad pa'o/ /kun rdzob de ni yang dag pa dang yang dag pa ma yin pa'i bye brag gis rnam pa gnyis te/de la brtags pa'i don gyis dben gyur pa/ /dngos tsam brten nas gang skyes te/ /yang dag kun rdzob shes par bya/ /brtags pa'i don ni yang dag par skye ba la sogs pa dang / rnam par shes pa snang ba dang / gtso bo dang 'byung ba'i yongs su 'gyur ba la sogs pa ste/de dag gis dben pa'o/ /dngos po tsam gang yin pa ni ji ltar snang ba bzhin du don byed nus pa'i phyir ro/ /rgyu dang rkyen rnams la brten nas skyes pa de ni yang dag pa'i kun rdzob kyi bden pa yin par shes par bya ste/ 'di ltar byis pa yan chad kyi shes pa la mthun par don ji snyed rgyu las snang ba de ni yang dag pa'i kun rdzob yin par rigs te/shes pa la snang ba dang mthun par dngos po gnas pa'i phyir ro/ /yang dag par skye ba la sogs pa ni mi snang ste/ ji lta bur yang rung ba'am/ grub pa'i mtha' la brten nas sgro btags pa 'ba' zhig tu zad do/ /de lta ma yin na ni rtsod pa med par thal ba kho nar 'gyur ro//rgol ba dang phyir rgol ba'i shes pa la snang ba'i cha la ni rtsod pa su yang med do/ /rtsod par byed na ni mngon sum la sogs pas gnod par 'gyur ro/ /yang dag min ni kun brtags yin/ /yang dag par skye ba la sogs pa gang yin pa de ni rtog pa'i bzos sbyar ba ste/ de ni yang dag pa ma yin pa'i kun rdzob kyi bden pa'o//ni zhes bya ba ni bsnan pa'i don tam go rims bzlog pa'o/ /'o na yang dag par skye ba la sogs pa bkag pa yang ci ga yang dag pa ma yin pa'i kun rdzob tu 'gyur te/ de ni dngos po snang ba na yang dag par skye ba la sogs pa bzhin du mi snang ngo / /ma yin te dngos po'i ngo bo dang tha dad pa ma yin pa'i phyir ro//chos gzhan zhig yin par yongs su brtags na ni yang dag pa ma yin pa'i kun rdzob tu yang 'gyur ro/ /gang gi phyir/ skye la sogs pa bkag pa yang / /yang dag par skye ba la sogs par rtog pa'i dngos po bkag pa'i gtan tshigs kyis/yang dag pa dang mthun phyir 'dod/ /don dam pa yin par kho bo cag 'dod do/ /gzhan dag ni yang dag pa kho nar 'dzin pas/ yang zhes bya ba ni bsdu ba'i don to/ /de yang rigs pas dpyad na kun rdzob kho na ste/ ci'i phyir zhe na/ dgag bya yod pa ma yin phyir/ /yang dag tu na bkag med gsal//dgag bya med na bkag pa mi 'byung ba'i phyir te/ yul med pa'i bkag pa mi rigs pa'i phyir ro/ /gal te gzugs la sogs pa la skye ba la sogs rnam par rtog pa'i rgyu can pha rol pos dngos po yang dag pa nyid du brtags pa gang yin pa de dgag bya nyid yin no zhe na/ gal te de lta na/ brtags pa'i rang gi ngo bo yi/ /bkag pa brtags min ji ltar 'gyur/ /dgag bya brtags pa yin du zin na/ bkag pa yang brtags pa nyid du 'gyur te/ mo gsham gyi bu'i sngo bsangs nyid la sogs pa bkag pa bzhin no/ /yang dag pa bkag pa med kyang skye ba la sogs pa yod par mi 'gyur te/ bkag pas skye ba med pa la sogs pa la ma khyab pa'i phyir dang /de yod pa'i rigs pa med pa'i yang phyir ro/ /de bas 'di ni kun rdzob ste/ /yang dag par na skye ba med ces bya ba la sogs pa'o/ /yang dag don yin yang dag min/ /yang dag pa'i don ces bya bar bsnyegs so/ /gang gi phyir zhe na/ yang dag tu na gnyis med de//de nyid phyir na de stong min/ /mi stong ma yin yod med min/ /mi skye ma yin skye min zhes/ /de la sogs pa bcom ldan gsungs/ /bar skabs kyi tshigs su bcad pa'o/ /de ci'i phyir zhe na/ de ni spros pa med pa yin/ /de kho na rtog pa'i dra ba thams cad dang bral ba'o/ /de nyid kyi phyir/'jam dpal gyis ni yang dag dris/ /rgyal ba'i sras po mi gsung bzhugs/ /mdo las/ de nas 'jam dpal gzhon nur gyur pas/ lits+tsha bI dri ma med par grags pa la 'di skad ces smras so/ /rigs kyi bu bdag cag gis ni rang rang gi bstan pa bshad zin na/ khyod kyang gnyis su med pa'i chos kyi sgo bstan pa la spobs pa mdzod cig /lits+tsha bI dri ma med par grags pa cang mi smra bar gyur to/ /de nas 'jam dpal gzhon nur gyur pas/ lits+tsha bI dri ma med par grags pa la legs so zhes bya ba byin te/ rigs kyi bu gang la yi ge dang skad dang / rnam par rig byed 'jug pa med pa de ni byang chub sems dpa' rnams kyi gnyis su med pa'i sgo la 'jug pa ste/legs so legs so zhes ji skad gsungs pa lta bu'o/ /gnyis po dag las dben pa'i dngos/ /gzhan dbang dngos po yang dag na/ /dris na ci phyir rgyal ba'i sras/ /de ni mi gsung bzhugs par gyur/ /brda shes rigs pa shes pa yi//skye bo dag ni ji ltar yang / /rang gi rtogs pa rjod byed de/ /de bas mi gsung mi rigs so/ /de lta min na sgra rnams kyi/ /rang gi mtshan nyid mthar phyin nyid/ /rigs pa smra bas gang brjod de/ /ji ltar rigs pa gsal bar smros/ /gang phyir kho na de la ni/ /brjod bya'i bag kyang ci yang med//de yi phyir na dris kyang don/ /mi gsung bzhugs pas rgya cher bshad/ /bar skabs kyi tshigs su bcad pa dag go/ /chos rnams la chos kyi rjes su lta ba can du gnas pa'i byang chub sems dpa' des gang rten cing 'brel par 'byung ba las ma gtogs pa'i chos rdul phra rab tsam yang yang dag par rjes su mi mthong ngo zhes bya ba 'di la 'gal ba med de/chos smos pa'i phyir ro/ /yang kun rdzob ni rnam pa gnyis su bstan te/ snang du 'dra yang don byed dag /nus pa'i phyir dang mi nus phyir/ /yang dag yang dag ma yin pas/ /kun rdzob kyi ni dbye ba byas/ /zhes bya ba'o/ /shes pa gsal ba'i rnam pa snang ba can du 'dra yang /ji ltar snang ba bzhin du don byed pa la slu ba dang mi slu ba yin par nges par byas nas chu la sogs pa dang smig rgyu la sogs pa dag 'jig rten gyis yang dag pa dang yang dag pa ma yin par rtogs so/ /dngos su na gnyis ni ngo bo nyid med pa nyid du ngo bo nyid mtshungs pa kho na'o//ji ltar snang ba bzhin du ni rnam par gnas so/ /don byed pa la slu ba dang mi slu ba yang ji ltar grags pa kho na bzhin te/ de yang ngo bo nyid med pa'i phyir ro/ /brten nas skyes pa don gyi bya ba byed pa dngos po tsam ni kho bo dang khyod kyis kyang khas blangs te/ de la 'u bu cag bye brag ci zhig yod pa ma yin nam/bden te/ gal te khyod kyang rigs min par/ /ji ltar snang bzhin 'dod na ni/ /'u bu cag la de mtshungs nyid/ /rigs par na ni thams cad 'khrugs/ /gal te ji ltar snang ba bzhin du khyod kyang 'dod na ni/ 'u bu cag mtshungs pa yin te kho bo cag kyang nga rgyal ga la byed/ gal te khyod 'di rigs pa'i rjes su 'gro ba can yin par khas len na ni/de kho bo cag mi 'dod do/ /gang gi phyir rigs par na thams cad brdas nas 'thor ba dang 'dra ba'i phyir te/ 'di ltar rgyu dang 'bras bu'i dngos por nges pa 'di la khyod kyi thabs med pa kho na yin no/ /'di ltar rnam pa med pa'i shes pa ni//yul la 'dzin par mi rigs so/ /rnam pa tshad ma min phyir dang / /mi rigs phyir na cig shos min/ /gang phyir sna tshogs ngo bo ru/ /snang ba can gyi dngos gcig la/ /rnam pa rnams bden ji ltar 'gyur/ /de yi gcig nyid nyams phyir ro/ /de lta yin na mngon sum dang / /mi dmigs pa yi 'bras bu dang //rgyu nyid du ni mi 'grub bo/ /rnam pa gzhan zhig rnam par soms/ /gal te rgyu 'bras nyid blo yi/ /thabs 'ga' zhig ni yod ce na/ /de smros 'dud pa bdag cag la/ /ser sna bya bar ga la rigs/ /des na thams cad mkhyen des kyang / /gzhan gyi dbang gi skad cig gi / rgyu dang 'bras bu gsal bar ni/ /cung zad tsam yang mkhyen mi spyod/ /sangs rgyas spyod yul bsam yas pas/ /thams cad mkhyen pa kho nas mkhyen/ /rigs pa'i rjes su 'gro ba la/ /yug pa rkyang 'di mi rigs so/ /bar skabs kyi tshigs su bcad pa dag go/ /rgyu dang 'bras bu'i dngos po yang rigs pa ma yin te 'di ltar/du mas dngos po gcig mi byed/ /du mas du ma byed ma yin/ /gcig gis du ma'i dngos mi byed/ /gcig gis gcig byed pa yang min/ /du mas gcig byed ma yin te/ /'di ltar ngo bo nyid tha dad pa mig la sogs pa dag las 'bras bu tha dad pa ma yin pa 'byung na ni/rgyu'i tha dad pa ni tha dad pa byed par mi 'gyur te/ de tha dad kyang tha dad pa med pa'i phyir ro/ /tha dad pa ma yin pa med kyang tha dad pa med par 'gyur bas/ tha dad pa med pa yang tha dad pa med pa byed par mi 'gyur ro/ /de'i phyir tha dad pa dang tha dad pa med pa ni rgyu med pa can du 'gyur te/ thams cad kyang de las gud na med pa'i phyir/thams cad kyang rgyu med pa can du 'gyur ro/ /de ltar gyur na rtag tu yod pa'am med pa zhig tu 'gyur ro/ /de ltar mi 'gyur te gang gi phyir rgyu du mas du ma byed phya'i phyir ro/ /ci'i phyir zhe na/ rang gi ngo bo nyid ji lta ba'i bye brag gis de'i bye brag la nye bar sbyor ba'i phyir te/ rgyu'i nye bar sbyor bas 'bras bu'i ngo bo nyid kyi bye brag ma 'dres pa'i phyir ro//'di ltar mtshungs pa de ma thag pa'i rkyen gyi rnam par shes pa las ni mig gi rnam par shes pa rtogs pa'i bdag nyid du 'gyur ro/ /mig gi dbang po las ni rtogs pa'i bdag nyid de nyid gzugs la 'dzin nus pa nyid du so sor nges so//yul las ni de dang mthun pa'i ngo bo nyid kho nar 'gyur ro/ /dngos su na 'bras bu tha dad pa ma yin yang rgyu rnams kyi ngo bo nyid tha dad pa dag gis ngo bo nyid tha dad pa kho nar 'gyur te/ rgyu'i tha dad pas kyang 'bras bu bye brag de tha dad pa med pa ni ma yin no/ /gzhan du yang de bzhin du sbyar bar bya'o/ / de ni rigs pa ma yin te rtogs pa'i bdag nyid la sogs pa dag phan tshun tha dad na ni/ rnam par shes pa de du mar 'gyur te/ de dag dang tha mi dad pa'i phyir ro/ /tha dad na ni rgyu med pa can du 'gyur te rgyu'i byed pa gzhan du nye bar sbyar ba byas pa'i phyir ro/ /de dag phan tshun tha dad pa med par yang 'gyur te/ rnam par shes pa gcig las gzhan ma yin pa'i phyir ro/ /de lta na ni rgyu'i yul tha dad par brtags pas don ci zhig sos par 'gyur te/ de'i phyir gnas skabs de'i nyes par 'gyur ro/ /gal te 'bras bu'i bdag nyid du ma las log pa dang ldan pa'i chos rgyu dang mthun par tha dad par brtags pa byas na de'i byed pa'i yul tha dad par brtag pa byed do zhe na/gyis shig rgyu'i byed pa de ni rtogs pa'i bzos sbyar ba dag la yin te/ de'i phyir yang dag pa'i don du na btags pa kho na yin par 'gyur ro/ /de lta na ni 'bras bu rgyu med pa can du 'gyur te/ rgyu'i byed pa brtags pa'i bdag nyid rnams la nye bar sbyor bar byed pa'i phyir ro//gzhan yang gal te dngos su na 'bras bu tha dad pa ma yin yang bye brag rnams ni tha dad do zhe na/ de ltar gyur na ni chos dang chos can dngos su tha dad pa kho nar 'gyur te/ tha dad pa dang tha dad pa ma yin pa'i ngo bo nyid dang ldan pa'i phyir ro/ /de lta na yang sngar smos pa'i nyes pa yod do//ji ste bye brag de dag kyang brtags pa kho na yin no zhe na/ de lta yin na ni rgyu'i tha dad pa'i rang bzhin rnams las bye brag tha dad pa rnams kho na 'byung ngo zhes bya ba yang rigs pa ma yin te rtog pas bkod pa'i tha dad pa ni rgyu'i byed pa la mi ltos so/ /'bras bu tha dad ma yin yang //bye brag rnams ni tha dad dang / /gzhan min khyed 'dod de bas na/ /kye ci dbang phyug gis byas sam/ /rtogs pa'i ngo bo las gzhan min/ /de ni gzugs las skyes ma yin/ /rnam pa de las gzhan min phyir/ /gzugs las kyang ni skye bar 'gyur/ /gcig la cig car skye ba dang //mi skye de bzhin skyed byed dang / /skyed byed ma yin yang dag par/ /ci yi phyir na mi 'gal smros/ /kun las thams cad skye na ni/ /tha dad tha dad ma yin pa/ /khyed la rgyu med gsal bar 'gyur/ /rigs pa'i rjes su 'brangs nas smras/ /gal te bye brag rkyen rnams las//skye bar 'dod na re re ni/ /skyed par byed pa ma yin 'gyur/ /yin na 'bras bu rgyu med 'gyur/ /gal te khyod ni rkyen rnams las/ /'bras bu skye bar 'dod na ni/ /tha dad tha dad ma yin pa/ /snga ma bzhin du rgyu med thal/ /ji ste de gnyis gzhan min na/ /rnam par dbye ba ci phyir 'thad//bshad zin nyes par thal 'gyur phyir/ /'di ni glang chen khrus 'drar 'gyur/ /bar skabs kyi tshigs su bcad pa dag go/ /gzhan yang gzhan 'di brjod par bya ste/ mig la sogs pa'i bdag nyid khyad par gang gis 'bras bu gcig skyed pa na ci de nyid kyis gzhan yang byed dam/ gal te de nyid kyis so zhe na/ ji ltar tha dad pa dang tha dad pa ma yin pa dag rgyu med pa can du mi 'gyur te rgyu tha dad pa med pa bzhin du yang 'bras bu tha dad pa'i phyir ro/ /gal te gzhan gyis so zhe na/ 'o na ni dngos po de gcig pur mi 'gyur te/ bdag nyid kyi khyad par las tha dad pa med pa'i phyir ro/ /gal te rgyu gcig gis 'bras bu gcig kho na byed du zad mod ce na/de lta ni ma yin te/ mig la sogs pa rang gi rigs dang mthun pa'i skad cig skyed par byed pa yin pa'i phyir/ 'gro ba thams cad long ba dang 'on pa la sogs pa nyid du thal bar 'gyur ba'i phyir ro/ /rang gi rnam par shes pa skyed par byed pa nyid yin na ni/rang gi rigs chad de/ de bas na cir yang mi rung la/ khas kyang mi len to/ /dbang phyug bzhin du gzhal bya'i phyir/ /'gro ba'i byed po dbang phyug min/ /de lta min na gzhal bya nyid/ /la sogs ye med kho nar 'gyur/ /slob dpon gyis ni skye dgag 'di/ /rnam pa mang po mdzad de la/ /skye bo bdag nyid mi shes pas//sun 'byin byed pa 'di 'dra smra/ /bdag las gzhan las zhes bya ba'i/ /snyad 'dogs pa ni btags pa yin/ /de bzhin skye ba 'gog byed 'di/ /grub pa bsgrub pa de ma yin/ /'di ltar dngos po rgyu med min/ /'di yi rgyu ni dgos pas na/ /de gang zhes ni mngon dris na/ /khyod kyis 'ga' zhig mngon smra dgos//sA lu'i sa bon sogs rgyu na/ /ci de gzhan nam de nyid yin/ /phan tshun log pa'i lus la ni/ /rnam pa gzhan dag mi srid do/ /brjod par mi nus zhe na yang / /mi rigs bram ze'i rgod ma bzhin/ /'di ltar rigs pa shes pa yis/ /lam gzhan zhig kyang bgrod na legs/ / tha snyad kyi ni rjes mthun par/ /ji ltar bsnyad par nus pa ltar/ /'di yang cung zad de bzhin gnong / /de lta min na mi smra thug /khyod phyogs gnyis las 'ga' brjod na/ /de gnyis kho bo cag gis dgag /de bas de lta yin na ni/ /rtsod la bzo ba ga la yin/ /ma zhig pa las 'bras skye na/ /de tshe ci phyir 'bras bu med//zhig nas 'bras bu skye na ni/ /de tshe gang las 'bras bu 'byung / /de dag rnam par rtog byed pa/ /don med 'gyur bas yal bar dor/ /lag 'gro 'o ma 'thung ba ni/ /dug 'phel 'gyur ba 'ba' zhig bzhin/ /gcig pu byed po ma yin te/ /du ma'ang byed po gang yang min/ / gcig dang du ma ma gtogs pa/ /gzhan gang byed po yin pa smros/ /gcig pu bya ba ma yin te/ /du ma bya ba gang yang min/ /gcig dang du ma ma gtogs pa/ /gzhan ni gang zhig bya ba smros/ /'di yod 'di zhes bya ba 'di/ /tshad ma med par mi 'gyur ro/ /sngar bshad pa yi rnam pa yis/ / tshad ma'ang khyed la yod ma yin/ /nged kyi rkyen nyid 'di pa tsam/ /ji ltar snang ba kho nar zad/ /'di ltar 'di la dngos bsams na/ /gnas mi rnyed pa kho na yin/ /nged kyang de ltar 'dod ce na/ /kho bo'i dga' ston chen po ni/ /dngos por 'dzin pa'i gdon babs las/ /grol ba yin na 'byung bar 'gyur/rkyen nyid 'di pa tsam zhig ni/ /yang dang yang du rjod byed de/ /de bsgrub bya la tshad ma ni/ /cung zad tsam yang ston mi byed/ /thams cad grub par thal 'gyur phyir/ /tshig gis kyang ni de mi 'grub/ /bdag nyid stod par byed pa ni/ /kye ma'o blo ni shin tu zhib//bar skabs kyi tshigs su bcad pa dag go/ /ci ste kun rdzob ces bya ba 'di ci zhig yin zhe na/ /gang zhig gis sam gang zhig la/ /yang dag sgrib byed kun rdzob bzhed/ /blo gang zhig gis sam blo gang zhig la yod na yang dag pa sgrib par byed pa 'jig rten na grags pa de lta bu ni kun rdzob tu bzhed de/mdo las ji skad du/ dngos rnams skye ba kun rdzob tu/ /dam pa'i don du rang bzhin med/ /rang bzhin med la 'khrul pa gang / /de ni yang dag kun rdzob 'dod/ /ces gsungs pa lta bu'o/ /des na 'di kun bde ba ste/ /dam pa'i don du bden ma yin/ /kun rdzob des na 'di kun thams cad bden pa yin no//ji ltar 'jig rten na grags pa de ltar bden no zhes bya ba'i tha tshig ste/ mdo las ji skad du/ rab 'byor phyin ci log ma gtogs par gang la gnas nas byis pa so so'i skye bo rnams las mngon par 'du byed par 'gyur ba'i dngos po bden pa ni skra'i rtse mo'i cha shas gzugs pa'i tshad tsam yang med do zhes gsungs pa lta bu'o//phyin ci log ni 'jig rten na grags pa ste/ rigs pa'i mtshan nyid gsum ji ltar 'jug pa de ltar bden no zhes bya ba'i bar du'o/ /kun rdzob dngos po med yin na/ /skye ba dngos po yin pa'i phyir/ /de tshe dngos po gcig de la//nus dang mi nus cig car 'gyur/ /kun rdzob skye ba yin na yang / /kun rdzob tu skye zhes bya 'dir/ /mkhas pa rnams kyi tshig don ni/ /skye ba skye bar 'gyur te mtshar/ /'di yi skye ba kun rdzob ste/ /don dam par ni skye med na/ /skye ba med pas dngos po rnams/ /ma skyes par ni smra na de//grub pa bsgrub pa smra 'gyur 'dis/ /mi 'dod ci zhig bsgrub par 'gyur/ /rigs pa'i rjes su 'brangs nas 'dis/ /gnas pa la sogs de bzhin brjod/ /de la sogs pa ma 'brel la/ /sgra don ma yin rnam rtog cing / /rgol ba kun rdzob mtshan 'di las/ /nyams par khong du chud par gyis//rigs pas brtags na bden ma yin/ /de las gzhan du bden pa yin/ /des na gcig la bden nyid dang / /mi bden par ni ji ltar 'gal/ /rigs pas brtags na dngos ma yin/ /de las gzhan du dngos po yin/ /des na gcig la dngos po dang / /dngos po med pa ji ltar 'gal//bar skabs kyi tshigs su bcad pa dag go/ /de ltar yin na yang / dam pa'i don du ma skyes pa/ /tshig don 'di ni rigs pa yi/ /rjes su 'brangs na skye ba med/ /gzhan la'ang de bzhin sbyar bar gyis/ /ji ltar 'di sbyar ba de bzhin du yang dag par na med do//yang dag par na stong ngo zhes bya ba la sogs pa 'di dag la yang rigs pa'i lam gyi rjes su 'brangs na yod pa ma yin zhing de dag la stong pa nyid ma yin pa med ces bya ba la sogs pa sbyar bar bya'o/ /pha rol rnams kyis dngos rnams kyi/ /skye sogs rigs lam brten pa can//'dod pa dag ni 'gog byed de/ /des na 'di la ci zhig gnod/ /bar skabs kyi tshigs su bcad pa dag go/ /de nyid kyi phyir/ kun rdzob de bzhin nyid gang yin/ /de nyid dam pa'i don gyis bzhed/ /ci'i phyir zhe na/ tha dad min phyir/ kun rdzob dang don dam pa gnyis zhes bya ba lhag ma'o//rigs de yang / ji ltar snang ba bzhin du gnas/ /rigs pa yang ji ltar snang ba'i ngo bo yin pa'i phyir kun rdzob kho na yin te/ rigs pa ni gzhan du mi 'jug go/ /'di ltar/ rgol ba gnyi ga'i shes pa la/ /ji tsam snang ba'i cha yod pa/ /de tsam de la brten nas ni/ /chos can chos la sogs par rtog /de tshe rjes su dpag pa 'byung / /gang gi tshe na gzhan na min/ /de bas rigs pa smra ba rnams/ /de skad smra la su zhig 'gog /rjes su dpag pa dang rjes su dpag par bya ba 'di tha snyad kyi rgol ba dang / phyir rgol ba dag gi blo'i bdag nyid la snang ba'i chos can dang chos dang dpe nyid du rnam par gzhag par 'byung gi//chos can dang chos la sogs pa gnyi ga la ma grub pa nyid kyis rjes su dpag pa 'byung ba mi rung ba'i phyir gzhan na ni ma yin te/ gzhung lugs tha dad pa la gnas pa rnams ni gang la yang blo mtshungs pa nyid med pa'i phyir ro/ /chos can de lta bu la gnas pa rnams ni gtan tshigs la sogs pa de lta bu kho nas yang dag par na yod dam med ces sems par byed par khas blang bar bya'o//de lta bas na rigs pas smra ba yang de ltar rjes su dpag pa 'byung bar byed na/ su zhig 'gog par 'gyur/ 'di ni mtshungs pa nyid du grub par gtan la phab pas/'dir ni 'di'i rgya ma bskyed do/ /de nyid kyi phyir mdo las kyang rab 'byor 'jig rten gyi kun rdzob kyang gzhan la/ don dam pa yang gzhan pa ni ma yin gyi/ 'jig rten gyi kun rdzob kyi de bzhin nyid gang yin pa de nyid don dam pa'i de bzhin nyid yin no zhes gsungs so//yang na skye ba la sogs pa bkag pa yang 'ga' zhig gis don dam pa nyid du 'dod la/ gzhan dag gis ni yang dag pa kho nar 'dod de/ de lta na yang mdo'i tshig 'di legs par drangs pa kho na yin no/ /'di ltar/ gzhan gyi don dam byas gang yin/ /de ni gzhan gyi kun rdzob ste//gzhan gyi mar 'dod gang yin de/ /gzhan gyi chung mar 'dod pa bzhin/ /zhes bshad do/ /gal te rigs pa'i stobs kyis na/ /kun rdzob tu yang mi skye dang / /ci ste kun rdzob tu yang snang ba dang ldan pa dang / shes pa cig shos kyis yongs su gcod par mi rung ba'i phyir snga ma bzhin du rgyu dang 'bras bu nyid nges pa med pa kho na'o//du mas dngos po gcig mi byed/ /ces bya ba la sogs pa gtan tshigs snga ma kho na'i phyir yang de ni rigs pa ma yin no zhes bya bar 'dod na/ bshad pa/ de bden de yi phyir na 'di/ /ji ltar snang bzhin yin par gsungs/ /gang gi phyir/ de lta yin na nyid kyi phyir//bcom ldan 'das kyis skye ba'am/ gzhan yang rung ji ltar snang ba bzhin yin par/ rtag tu skye med chos ni de bzhin gshegs/ /chos rnams kun kyang bde bar gshegs dang 'dra/ /byis pa'i blo can mtshan mar 'dzin pa yis/ /'jig rten na ni med pa'i chos la spyod/ /ces bya ba gsungs te/'di ltar/ ji ltar snang bzhin ngo bo'i phyir/ /'di la dpyad pa mi 'jug go/ /ci ste kun rdzob ni ji ltar snang ba bzhin yin te/ de la ni ji skad bshad pa'i dpyad pa'i gnas med pa nyid do/ /'di ltar/ rnam par dpyod pa byed na don/ /gzhan du song bas gnod par 'gyur/ /kho bo cag ni 'di la dpyod par mi byed kyi/dpyod par byed pa la ni 'gog par byed do/ /gal te dpyad par byas te ma rung na ma rung du zad do/ /ji ltar snang ba'i ngo bo'i kun rdzob pa la brten nas de la dpyod pa byed pa ni don gzhan du 'gro ba'i phyir gnod pa 'ba' zhig tu zad do/ /ji skad bshad pa'i mtshan nyid ma yin pa la ni nyes pa brjod kyang kho bo cag la gnod pa ci yang med pa nyid do//'o na gal te don dam par ma skyes pa kho na yin na de'i tshe/ ci yi phyir na rgyu 'di las/ /der snang ba 'di smra bar byos/ /'di yi lan glon par byed de/ /'di 'dra 'di ni rgyu 'di las/ /snang ste ci zhig smra bar bya/ /khyod la cha ji tsam snang ba de tsam kho bo cag la yang snang na de la kho bo cag la yang ci zhig dri/dris na yang kho bos de tsam kho na zhig smra bar bya'i/ sngon ma byung ba ni ci yang smrar med do/ /de'i phyir 'dri ba 'di ni kun nas nyon mongs pa la brten pa 'ba' zhig tu zad do/ /skye bo gang zhig mthong bzhin du'ang / / mi shes pa des rtsod pa yis/ /grags pas gzhan la smra ba na/ /mi shes ma 'phags ngan pa yin/ /bar skabs kyi tshigs su bcad pa dag go/ /'di ni gzhi med par mi rung ngo zhes kyang brjod par mi nus te/ 'di ltar/ btags pa gzhi dang bcas pa ni/ /'ga' yang gang la'ang mi snang ngo / / shing la sogs pa 'di yang ni/ /gzhi la ltos pa ma yin nyid/ /shing la sogs pa gdags pa'i rgyu ni yal ga la sogs pa yin la/ de'i yang gzhan yin te/ rim gyis rdul phra rab kyi bar du yin la/ de yang phyogs tha dad pas dpyad na med pa kho na yin na/ shing la sogs pa gdags pa'i rgyu dngos po yod pa de lta ga la yod/de lta bas na ji ltar snang ba 'di kho na yin gyi/ gang la yang rgyu dngos po yod pa kho na la ltos nas 'jug pa ni ma yin zhes khas blang bar bya'o/ /gal te kun rdzob gzhi la ni/ /ltos gyur de lta yin na ni/ /dngos 'gyur yang na khyod kyi gzhi/ /de ltar kun rdzob mi 'gyur te/bar skabs kyi tshigs su bcad pa dag go/ /de ni de lta yin te gang gi phyir khyod kyi ltar na yang / 'di ltar brtags pa'i ngo bo nyid/ /ci la'ang mi ltos kho na yin/ /gal te med pa'i phyir mi ltos so zhe na/ mngon sum dang 'gal ba kun tu spyod de/ gzung ba dang 'dzin pa ni brtags pa'i ngo bo nyid yin la/de gnyis kyang mngon sum kho nar grags pa de dag yin no/ /gal te ma rig pas dkrugs pa'i rnam par shes pa nyid de ltar rtogs so zhe na/ myong ba dang 'gal ba grub pa khyod la 'gog par byed pa su zhig yod de/ bdag nyid mi shes pa de lta bu de ni 'jig rten gyis thag ring po kho nar spang ngo //gal te rmi lam la sogs pa na mthong ngo zhe na/ bden na mthong bzhin du yang mngon par zhen pa ngan pas khyod la log par snang ngo / /gang yang gzung ba dang 'dzin pa'i rnam par snang ba 'di ci zhig gzhan gyi dbang yin nam/ de ni yang dag par na des dben pa'i ngo bo can yin na/ ji ltar de ltar snang / ma rig pas dkrugs pa'i phyir de ltar snang bar ni chug mod kyi/ de ni de'i bdag nyid ni ma yin te de'i bdag nyid ni gnyis kyis dben pa'i phyir ro/ /de lta yin na yang 'brel pa med pa'i phyir de snang ba na gnyis po ci'i phyir snang bar 'gyur/gal te 'brel pa smras zin to zhe na/ gal te de lta yin na ni/ gzhan dbang nyid smros de su bzlog /cig shos kyang gzhan gyi dbang nyid du bya ba la/ rgyu 'di kho nar zad la/ de ni 'di la yang yod de/ de bas na brtags pa med do/ /gal te yang shes pa kho na rgyu dang rkyen rnams kyis skyed na/skyed la ni reg na de go ci'i phyir snang / gal te shes pa kho na de ltar snang ngo zhe na/ de ni bshad zin te de dag gis ji lta bu kho nar bskyed pa de lta bu kho nar snang du zad do/ /gal te de lta bu kho nar bskyed do zhe na/ 'o na ni gnyis kyis dben pa can gyi ngo bo ma yin te/ 'di la bshad kyang zin to//gnyis med pa'i ngo bo nyid yin yang shes pa gzhan gyis 'khrul pa'i dbang gis de ltar rtogs pa yang ma yin te/ brgal zhing brtags pa mtshungs pa'i phyir ro/ /de'i phyir na 'di ni gyi na'o/ /rtsod ngan grags pa kha cig ni/ /yang dag par dngos ma skyes pas/ /mo gsham bu la sogs bzhin du//kun rdzob tu yang mi skye zer/ /yang dag par ma skyes pa'i ngo bo nyid gang yin pa de dag ni kun rdzob tu yang skye bar mi 'gyur te/ dper na mo gsham gyi bu la sogs pa lta bu'o/ /gzugs la sogs pa 'di dag kyang de dang 'dra'o/ /de ni rigs pa ma yin te/ / 'jig rten gnod sogs srid pa'i phyir/ /'di la bsgrub pa nyid med do/ /gal te 'jig rten ma skyes phyir/ /gnod pa med par khyod 'dod na/ /gtan tshigs la sogs med pa'i phyir/ /de tshe bsgrub bya 'grub mi 'gyur/ /rang gi tshig dang 'gal ba'i phyir/ /gal te de gcig ma gtogs na//'o na des na khyod kyi ni/ /ma nges nyid 'gyur bzlog par dka'/ /sgrub par byed pa yod na ni/ /dpe la'ang yod pa ma yin no/ /gal te rgyu 'di khyod la grub/ /bsgrub byas khyab pa'ang de bzhin na/ /der ni bdag la nyes med par/ /khyod kyis ji ltar klan ka btsal/ / gal te nga la tshad ma yis/ /grub na grub ste khyod la khyab/ /mkhas khyod ci'i phyir bdag nyid kyi/ /nyes pa nga la 'dogs par byed/ /tshad mas ma grub ce na yang / /yod med skye ba bkag pa'i phyir/ /yang dang yang du bsgrubs zin no/ /khyab pa de yang khyod kyis smras/ / kho bo'i bden par ma skyes dang / /kun rdzob mi skye lhan cig tu/ /khyab bya khyab byed nyid ma grub/ /de lta yin na khyod kyis nyes/ /yang dag skye ba bkag pa yis/ /yang dag par na skye med 'dod/ /brtags pa mi skye de lta min/ /de phyir 'di gnyis de bdag min/ /yang dag par na gnyis po med//gang phyir spros dang bral ba ni/ /yang dag 'dod de de phyir der/ /gtan tshigs la sogs yan lag med/ /'di ltar de gnyis med pa'i phyir/ /rgyu dang 'bras bu med pa nyid/ /'di nyid kyis ni thal bar yang / /dogs pa rnam par bzlog pa yin/ / bar skabs kyi tshigs su bcad pa dag go/ /gzhan yang / gal te kun rdzob mi rung na/ /tshad mas so/ /tshad ma ma yin pa ni gzung bar bya ba ma yin pa'i phyir/ rigs smra de la ci zhig gnod/ /rigs pas 'ongs pa'i dngos po la rtog pa sngon du gtong ba su yang sdang bar gzo ba med pa'i phyir ro//sngar khas blangs pa'i phyir tshad mas gnod bzhin du yang dor bar mi nus so zhes kyang brjod par rigs pa ma yin no/ /gang gi phyir kun rdzob khas blangs nas 'di ci rigs sam 'on te mi rigs zhes dpyod par byed pa mi mdzes pa de'i phyir 'di sngar khas ma blangs so snyam du bsams te 'di ltar/rigs pa shes pas dpyad pa yi/ /'og tu khas blangs bya bar bshad/ /brtags pa'i 'og tu khas blang gi/ /khas blangs nas brtag pa 'jug pa ni ma yin no zhes bya ba'i don 'di ni tshad ma rnam par gtan la dbab pa la sogs par rab tu dpyad zin pa'i phyir ro//mngon sum la sogs 'gal zhe na/ /kun rdzob ni ji ltar snang ba bzhin yin la/ de yang gal te khas mi len na mngon sum la sogs pa dang 'gal bar thal bar 'gyur bar sems na/ bden na mngon sum la sogs pa dang 'gal ba/ de ci 'di smra nyid la'am/ gang gis na khyod ma gtogs par 'gyur ba khyod dang 'brel bar ma byas pa de ni med do/ /gal te des khyod mi 'jigs so zhe na/ de ci kho bo cag rang bzhin med par smra ba yin bzhin du yang 'jigs sam zhes bsams pa'o/ /tshad mas gnod na tshad ma'i bdag /yid brtan du ni mi rung 'gyur/ / kun rdzob ni ji ltar snang ba bzhin yin la de yang gal te tshad mas mi rung na mi rung du zad do/ /mngon sum de la gnod pa bab na/ tshad ma'i bdag nyid la yid brtan du mi rung bar brjod de/ mtshan nyid dang ldan pa la gnod pa srid phan chad mtshan nyid sun phyung bar 'gyur ro/ /de'i phyir tshad ma'am tshad ma ma yin pa cir yang mi 'gyur ro//de lta na yang kun rdzob kyang dgag par mi nus pa kho na'o snyam du sems pa'o/ /gang zhig yang dag dngos mi 'dod/ /de la kun rdzob ci zhig smos/ /gal te tha snyad sogs med na/ /de ci gzhan la'ang mi mtshungs sam/ /khyod dang de bzhin kho bos kyang / / 'jig rten bzhin du bsnyad bya dgos/ /de lta yin na khyod kyis ni/ /bsnyad par byas pas khe ci yod/ /bar skabs kyi tshigs su bcad pa dag go/ /de lta bas na/ snang ba'i ngo bo gang yin pa/ /de ni 'gog pa ma yin nyid/ /nyams su myong ba gang yang ni/ /dgag par rigs pa ma yin no/ / mngon sum dang 'gal bar 'gyur ba'i phyir ro snyam du bsams pa yin no/ /skye la sogs pa'i rnam pa gang / /snang ba min la de yang ni/ /yang dag par zhes bya sogs par/ /gzhan gyis yongs su brtags pa 'gog /gang yang gzugs la sogs pa snang ba dang ldan pa'i shes pa la mi snang ba'i rnam pa yang dag par skye ba dang rnam par shes pa snang ba dang /gtso bo dang yongs su 'gyur ba la sogs pa bstan bcos la sogs pa la brten nas yongs su brtags pa 'di 'ba' zhig 'gog par byed de/ de bkag pa la mngon sum la sogs pa'i gnod pa mi 'jug pa kho na'o/ / sogs pa smos pa ni yod pa nyid la sogs pa yongs su bsdu ba'o/ /de bas 'dir ni de lta bu'i/ /brtags pa kho na dgag par rigs/ /ji skad smos pa'i nyes pa med pa'i phyir ro/ /brtags pa ma yin 'gog pa 'di/ /bdag la gnod 'gyur 'ba' zhig go/ /gzugs la sogs pa'i lus rtog pa'i nyes pas ma sbags pa gzhan gyi dbang gi bdag nyid rnam par shes pa tsam snang ba dgag par mi nus pa 'ba' zhig tu ma zad kyi/byed na byed pa po la mngon sum la sogs pas phyir gnod pa kho na byed do/ /rnam par rtog pa snang ba yi/ /gtso bo la sogs yang dag par/ /dngos po rnams kyi rgyur gyur par//gzhan gyis brtags gang de 'gog go/ /brtags pa 'gog par byed pa la/ /yang dag ces bya bkag pa yi/ /bye brag min te de yi phyir/ /kun rdzob ji ltar med par 'gyur/ /bar skabs kyi tshigs su bcad pa dag go/ /de nyid kyi phyir mdo las kyang / / brtags pa'i dngos po yod ma yin/ /gzhan gyi dbang ni yod pa ste/ /sgro 'dogs pa dang skur 'debs pa'i/ /mthar rtog pa ni phung bar 'gyur/ /chos rnams thams cad brtags pa yi/ /ngo bo nyid kyis ma skyes so/ /mi rnams gzhan gyi dbang la ni/ /brten nas rnam par rtog pa skye/ / zhes gsungs te/ /de ltar byas na/ rab 'byor gzugs ni gzugs med pa'i ngo bo nyid yin no zhes rgyas par 'byung ba dang / tshe dang ldan pa shA ri'i bu 'di ltar gzugs ni rang bzhin gyis stong ngo / /gang yang rang bzhin gyis stong pa de la ni skye ba med 'jig pa med do/ /gang yang skye ba med 'jig pa med pa de la ni gzhan du 'gyur bar mi mngon te/tshor ba nas rnam par shes pa'i bar du yang de dang 'dra'o zhes rgyas par 'byung ba 'di yang grub pa yin no/ /gal te dngos po ji ltar snang ba bzhin kho nar gnas par zad na las dang 'bras bu dag ji lta bu snyam pa la/ mthong ba po'i lta ba la/ las 'bras ji ltar snang ba dag /de ltar des bshad de yi phyir/ /thams cad ji ltar snang bzhin gnas/ /ston pa'i gzigs pa snang ba thogs pa mi mnga' ba can gyis mkhyen pa'i bdag nyid la las dang 'bras bu dag bye brag tu ji ltar snang ba de bzhin du 'gro ba la phan par bzhed pa thugs rje'i rang bzhin can des bye brag tu rab tu bshad de/gang gi phyir de lta yin pa de'i phyir dbang po'i yul du ma gyur pa thams cad kyang ji ltar snang ba bzhin kho nar gnas so/ /thugs rje'i bdag nyid de nyid kyis/ /rtog pas bcings pa gzigs nas ni/ /sems tsam la sogs bye brag gis//bcings pa thar pa bstan pa mdzad/ /bcom ldan 'das las dang 'bras bu mkhyen pa thugs rje'i rang bzhin gyi sku can de nyid kyis 'khor ba'i btson rar 'gro ba rtog pa'i lcags sgrog gis bcings pa la gzigs nas/ bsam pa ji lta ba bzhin du phung po dang khams dang skye mched dang /sems tsam dang / chos thams cad bdag med par bstan pa'i rim gyis dngos por 'dzin pa ma lus par sel bar mdzad cing / 'gro ba la bcings pa dang thar pa bstan pa mdzad do/ /ji ste rtog pa zhes bya ba 'di ci yin zhe na/ sems dang sems byung khams gsum pa/ /sgro btags rnam pa can rtog yin//khams gsum pa'i sems dang sems las byung ba'i sgro btags pa'i rnam pa can du 'byung ba'i rnam pa ni rtog pa yin no/ /de dag 'ching ba'i rgyu nyid du/ /ji ltar gzigs pa de bzhin gsungs/ /de dag kyang de bzhin gshegs pas rnam pa gang gis kyang 'ching ba'i rgyu nyid du gzigs pa de kho na bzhin du gsungs kyi yang dag par ni ma yin te/'di ltar/ med pa rnams kyi nus pa yang / /ji ltar snang ba bzhin du 'dod/ /med pa rnams kyang ji ltar grags pa bzhin du 'ching ba la sogs pa'i bya ba byed par mi 'gal ba kho na'o/ / yang dag par na 'ching ba dang / 'ching bar bya ba dag kyang med do/ /yod pa rnams kyi nus pa ni/ /ji lta bur yang mi mthong ngo / /yod pa rnams don byed par nus pa ni sangs rgyas rnams kyis kyang gzigs par mi spyod de/ shes pa rnam pa med pa dang / /rnam pa dang bcas pas yongs su gcod pa mi srid pa'i phyir la/yongs su gcod par byed pa gzhan yang mi rung ba'i phyir ro/ /gang las gang zhig yod gzigs pa/ /de yod na ni de nges yod/ /de med na ni de med nyid/ /de phyir ha cang thal mi 'gyur/ /bar skabs kyi tshigs su bcad pa dag go/ /gzhan la dngos po ji bzhin du//tha snyad rung ba ma yin no/ /tha snyad thams cad ji ltar snang ba kho na bzhin du 'jug go zhes bya ba de ni de lta yin no zhes bya bar shes par bya ste/ 'di ltar dngos por smra ba'i lta ba la yang / dngos po ji lta ba bzhin tha snyad gdags su ni mi snang ba'i phyir/ rigs pas mi rung ngo //shes pa'i bdag nyid la ni rdul phra rab dag dang / gnyis su med pa'i dngos po'i ngo bo mi snang ngo / /mi snang ba la ni tha snyad med do/ /snang ba gang yin pa de yang dngos po'i ngo bo kho na ma yin te/ 'dus pa dang gnyis kyang dngos po ma yin pa'i phyir ro/ /tha snyad ni 'di gnyis las yin na/'di gnyis kyang dngos po ma yin pa kho na'o/ /gal te snang bzhin du yang de nges par mi zin to snyam na/ des na ci de lta bu la ni tha snyad med do/ /snang ba zhes bya ba yang yid ches pa med pa'i phyir mna' chu btung dgos so/ /tshad ma med pa'i phyir dang / tshad mas gnod pa'i phyir yang /dngos po'i ngo bo mi rung ba'i phyir ro/ /de ji ltar snyam pa la/ rigs pa'i rjes su 'brangs nas bshad/ /ces bya ba smos te/ de lta bas na dngos po'i ngo bo yod du zin kyang ji ltar snang ba bzhin tha snyad 'dogs pas de la mngon par zhen pa ni cir yang mi dgos so/ / rang lta chags pas ci zhig bya/ /skye bo reng bur skyes 'gyur zhing / /yon tan nyes pa ma mthong la/ /rang gi lta ba ci zhig yod/ /rang gi lta la chags bor te/ /rigs pa nyid la 'jug par gyis/ /gang tshe rigs stobs las 'ongs pa'i/ /dngos po yang dag nyid zung shig /bar skabs kyi tshigs su bcad pa dag go//lta ba 'di la chad par thal bar 'gyur ba yang ma yin te/ gang phyir rgyu las byung de'i phyir/ /'di ni ci phyir chad par 'gyur/ /de log na ni log pa la/ /ci phyir rtag pa nyid yin smros/ /gang gi tshe dngos po 'di ji ltar snang ba bzhin las dang nyon mongs pa'i dbang gis 'khor ba ji srid par 'jug pa de'i tshe/'di chad par ji ltar 'gyur te 'gro ba brgyud pa 'khor ba'i rjes su 'gro ba kho na la ni chad par rigs pa ma yin no/ /gang gi tshe 'phags pa'i bden pa mthong ba'i mes/ las dang nyon mongs pa mtha' dag bsregs pa can mya ngan las 'das pa'i grong khyer na gnas pa de'i tshe/'di ji ltar rtag par 'gyur/ de bas de ltar na kun rdzob kyi dngos po med pa'i bdag nyid la yang rtag pa dang chad pa'i chos nyid thag ring po kho nar gnas so/ /don dam pa la lta ba'i gnas mi thod pa kho na ste/ 'di ltar/ ma skyes ngo bo nyid la ni/ / rtag dang chad nyid ga la zhig /chos kyi bye brag rnam rtog pa/ /ngo bo nyid la rtog par byed/ /ji ltar sus kyang nam mkha' la/ /yig sogs dgod par mi nus ltar/ /dngos po rnams ni ma skyes la/ /chos su rnam rtog de bzhin no/ /bar skabs kyi tshigs su bcad pa dag go/ /brtags pa'i ngo bos dben pa yi//ji ltar snang ba 'di kho na/ /brten te skyes pa thams cad ni/ /thams cad mkhyen pas mngon sum gzigs/ /dngos po rnams ngo bo nyid med bzhin du yang ji ltar snang ba la yang dag par skye ba la sogs pas dben pa brten nas skyes pa kho na'i dngos po thams cad rnam pa thams cad du cig car mngon sum du mkhyen pas na/thams cad mkhyen pa zhes bya'o/ /gang la don gzhan yongs gcod pa'i/ /shes pa cung zad kyang med pas/ /de yi thams cad mkhyen pa 'dir/ /brtags yin cung zad 'gal ba med/ /shes bya nang gi yin par smra ba'i ltar na/ thams cad mkhyen pa brtags pa kho na yin par 'gyur te/blo rnam pa dang bcas pa dang cig shos kyis yongs su gcod pa mi rung ba'i phyir ro/ /rgyud gzhan la yod pa'i dngos po yongs su mi gcod pa'i phyir te/ rang gi rgyud la yod pa yang de dang 'dra'o/ /ngo bo nyid med par smra ba'i ltar na ni/ ji ltar grags pa bzhin du yongs su gcod pa'i phyir nyes pa med do//gang gi tshe yang dag par skye ba la sogs par rtog pa bkag pa'i ngo bo nyid kyis chos rnams ma skyes so zhes bya ba la sogs pa yang brtags pa'i bdag nyid yang dag yin no zhes bya bar khong du chud par byas nas/ dngos po'i rang gi ngo bo dpyod par byed cing cung zad kyang mi mthong ba de'i tshe ni de kho na bzhin gnas te/'di ltar/ gang tshe shes dang shes bya dang / /bdag nyid rjes su mi mthong ba/ /de ni mtshan ma mi 'byung phyir/ /gnas pa brtan phyir mi bzhengs so/ /bcom ldan 'das 'di rtog pa'i sa bon mtha' dag bag chags dang bcas te/ rtsad nas bton pa nyid kyi phyir/ /mtshan ma mi 'byung na bzhengs pa lta ga la yod/ bskal pa grangs med pa du mar gus par mdzad de/ bar chad med par legs par bsgoms pas ting nge 'dzin brtan pa'i yang phyir ro/ /gang la bzhugs na bsam mi khyab/ /yon tan kun gyi gnas 'gyur dang / / mtshungs med phyag gnas 'dren gyur pa'i/ /gnas skabs 'ga' de bsam mi khyab/ /chos rnams kun gyi lus yin phyir/ /yon tan bsam yas kun rten phyir/ /rigs pa'i rjes 'brang ngo bo'i phyir/ /skyob pa rnams kyi chos sku yin/ /rnam pa gsum gyis chos kyi sku/ /zhes bya ste/ chos thams cad kyi lus kyi 'gro ba thams cad de bzhin gshegs pa'i ngo bo nyid las mi 'da' ba'i phyir ro/ /'jig rten pa dang 'jig rten las 'das pa'i yon tan thams cad kyi rten lus ni tshogs yin pa'i phyir ram/ yang na 'dir chos rnams sgrogs pa'i phyir ro/ /rten gyi dngos po ni de la 'jug pa thob pas kun brtags pa'o//chos kyi sku ni rigs pas rnam par gnas pa'i ngo bo nyid ces bya ba'i tha tshig go/ /de nyid rigs pa dang ldan pa'i phyir ro/ /de tshe rnam rtog med de yi/ /sngon gyi shugs kyis sems can don/ /rtag tu phyogs rnams thams cad du/ /rnam pa kun tu thams cad 'byung / / mkhyen pa'i skad cig gcig gis ni/ /shes bya dkyil 'khor kun khyab can/ /yon tan rin chen tshogs ting 'dzin/ /bsam gtan bsam mi khyab pa'i rten/ /rtog pa dang ni nyon mongs dang / /bag chags ma lus gtan bcad can/ /shes bya'i yul la mi shes pa'i/ /tshogs ni mtha' dag rnams spangs can//nyes pa kun gyi sa ma yin/ /yon tan rgya mtsho kun gyi sa/ /rtag tu 'gro ba thams cad kyi/ /'dod pa rnam pa kun du sgrub/ /yid bzhin nor bu bzhin du ni/ /mtshungs med 'khor ba srid du 'jug /thugs rje ches bsgrubs bsam mi khyab/ /bsod nams ye shes mtshungs med 'byung //yang dag pa yi mchog thob cing / /bsod nams rab che'i las mnga' ba/ /byang chub sems dpa' rnams mig gi/ /yul du bsam gyis mi khyab 'gyur/ /de las byang chub sems dpa' rnams/ /gang gis chos kyi longs spyod ni/ /ji ltar 'dod bzhin nyer spyod pas//sku ni longs spyod rdzogs par 'dod/ /sems can so so'i 'dod pa'i don/ /dus bzhin rab tu 'grub pa'i phyir/ /de las sprul pa'i sprin gyi rgyun/ /kun du rab tu 'byung bar 'gyur/ /rnam pa gang dang gang gis na/ /gang dang gang na gang gang tshe/ /skal ldan skye bo gang dang gang //de de yongs su smin bya bar/ /rnam pa de des de dang der/ /de yi tshe dang de yi tshe/ /thub pa'i spu yi khung sogs nas/ /sprul pa gdon mi za bar 'byin/ /rgyal bas 'jig rten ma lus pa'i/ /bya ba dag la gang gis mdzad/ /de ni de yi sprul sku ste/ /'gro ba dbugs 'byin mdzad pa yin//khyab bdag shugs kyi mthu yis ni/ /sprul pa yis ni sprul pa yang / /ji ltar bzhed bzhin mdzad nyid de/ /mdzad pa kun la 'jug pa bzhin/ /bar skabs kyi tshigs su bcad pa dag go/ /bcom ldan 'das kyi sku 'di ni shin tu mdor bsdus nas rnam pa gsum du bshad kyi/ rnam pa thams cad du ma lus par brjod par ni/ ye shes dang ldan pa thams cad mkhyen pas kyang mi spyod na bdag 'dra bas lta smos kyang ci dgos/ phyogs 'dis nyan thos la sogs pa'i lus kyi rnam par dbye ba yang shes par bya'o/ /de ltar bden gnyis rnam phye 'dir/ /ci nyes yod dam 'on te med//phyogs 'dzin pa yis dkrugs pa'i yid/ /legs par bor la dpyad par gyis/ /mi yang shin tu thob par dka'/ /blo sbyangs nyam yang rab tu chung / /'khor ba'i dgon pa bgrod par dka'/ /srog kyang shin tu g.yo ba yin/ /bshes gnyen bzang po rnyed dka' na/ /rab tu sdang ba gang du dgos//mos pa med du zin na yang / /de ni 'ga' la bsod nams kyis/ /goms par byas la rim gyis ni/ /'di ni re zhig cig na 'gyur/ /sdang bas tshig pa khyod la ni/ /dal ba 'byor pa'ang ring bar gsal/ /bden pa gnyis ni rnam phye bas/ /dge ba bdag nyid thob pa gang / /des ni 'gro ba ma lus pa//ye shes snying por bskyed par shog /bden pa gnyis rnam par gtan la dbab pa/ yang dag pa mthong bar brtson pa slob dpon ye shes snying pos mdzad pa rdzogs so// //paN+Di ta shI len dra bo d+hi dang ban+de ye shes sde'i 'gyur// //