CLOSE WINDOW

D3880
བོད་ཡིག

spyod pa la 'jug pa'i gtso bo'i don bcu gcig bsdus pa rdzogs so// //rgya gar gyi mkhan po dI paM ka ra dang / bod kyi lo tsA ba tshul khrims rgyal bas bsgyur ba'o// //[ ]@##/ /rgya gar skad du/ bo d+hi tsAr+yA ba tA ra tA ta par+ya pany+dzi ka bi shai Sha d+yo ta ni nA ma/bod skad du/ byang chub kyi spyod pa la 'jug pa'i dgongs pa'i 'grel pa khyad par gsal byed ces bya ba/ bla ma dang sangs rgyas byang chub sems dpa' rnams la phyag 'tshal lo/ /thog mar rgyal po 'jam dpal go cha'i sras gyur bar du gang / /b+haM ga'i nags su 'jam dbyangs bsgrubs pa bla ma'i gdams pa thob//gzhug tu nam mkhar 'jam dbyangs kyis ni dngos su byin gyis brlabs/ /theg chen lam mchog zhi ba'i lha la gus pas phyag 'tshal lo/ /rgyal ba'i bstan la bdag nyid che/ /skyes bu mang po byon mod kyi/ /zhi ba'i lha yis mdzad dang 'dra//nyams dang dgongs pa can mi rnyed/ /bdag med gnyis rtogs thugs rje can/ /'phags pas mdzad pa'i 'grel pa la/ /bcings pa ma lus dang ldan pa/ /dad pa'i rjes 'brang bdag mi 'os/ /'on kyang de lam thob 'dod pas/ /spyod 'jug bshad par rtsom pa 'di/ / bla mas gnang ba rdzogs sangs rgyas/ /lam gyi rin chen thob pa'i drin/ /'grel pa mdzad pa rnams kyis kyang / /'phags pa'i dgongs pa gsal ma byas/ /de'i phyir dgongs pa'i 'grel pa 'di/ /rnal 'byor zla bas cung zad bris/ /'di skad brgyud pa las thos te/ /lho'i phyogs su dpal ldan na ga ra la mi'i rgyal po 'jam dpal go cha'i bu ru skyes/sngon gyi sangs rgyas la bya ba byas pa/ thar pa'i cha mthun gyi dge ba'i rtsa ba thob pa/ theg pa chen po'i rigs yang dag pa sgyu rtsal thams cad la mkhas pa/ /rgyal tshab tu dbang bskur ba'i dus su rdo rje rnal 'byor ma'i sprul pa/ rgyal po'i btsun mo chen mo yum gyis chu dron pos khrus byed du bcug pas/de'i drod mi bzod pa mthong nas yum gyis 'di skad du smras te/ snyigs ma'i dus su rgyal po byas na nyon mongs pa'i dbang gis sems can sdug tu bcug la/ shi nas dmyal bar 'di bas kyang drag pa'i sdug bsngal myong bar 'gyur bas rgyal srid kyis dgos pa med kyi bu khyod b+haM ga la'i yul du song /der khyod la 'jam pa'i dbyangs kyis byin gyis rlob par 'gyur zhes so/ /de nas yum gyi bka' de spyi bor bzhag nas/ thugs drang po rta mchog ljang gu la zhon te gshegs so/ /de yang zhag du ma nyin mtshan med par 'gro ste/ bza' btung la sogs pa yid la mi byed par de'i bka' gcig pu la rtse gcig par 'gro ba la/b+haM ga la'i yul gyi mtha' mar nags tshal gyi nang na bu mo rin po che cig mthong ngo / /bu mo des rta bzung nas de rta las babs so/ /de ni shin tu skom pas mdun du chu mthong nas btung bar brtsams so/ /bu mos 'di ni dug gi chu yin pas ma 'thung cig ces smras nas de las bzlog ste bdud rtsi'i chu 'thung du bcug pa dang /sha bsregs nas za ru bcug pas tshim par gyur la bu mo la smras te khyed gang nas 'ongs zhes so/ /des smras pa/ nags tshal chen po 'di'i dbus su yon tan dam pa'i tshogs kyis brgyan pa/thugs rje can dpal 'jam pa'i rdo rje'i ting nge 'dzin sgrub pa bdag gi bla ma bzhugs te/ de nas 'ongs zhes so/ /de thos pa tsam gyis bkren pas rin po che thob pa ltar dga' bde chen pos dbugs phyung nas smras te/ kye de bdag la ston cig /bu mos de 'bod pa rta bzung ste gshegs par gyur to//der phyin pas shin tu zab pa'i thugs dang ldan zhing / lus ngag zhi ba gser gyi ri lta bu bla ma'i mchog mthong nas/ bdag nyid dang rta mchog phul nas gus pas bla ma de la phyag byas te/ 'jam pa'i dbyangs kyi ting nge 'dzin gyi gdams pas bdag rjes su 'dzin par 'tshal lo zhes gsol to//bla mas kyang de yongs su smin par mdzad pa'i rim pas gdams par mdzad do/ /de nas lo bcu gnyis der bzhugs la ting nge 'dzin gyis 'jam pa'i dbyangs mngon sum du mdzad cing / de rjes bla mas yul dbus su 'gro bar bka' stsal pas song ste/ma ga d+hA'i rgyal po brten cing shing gi ral gri shubs dang bcas pa bzung bas rta pa'i tshul mi g.yo ba'i sde zhes pa'i ming can rgyal pos bkur ba spyod pa de nyid kyis chos kho na yid la byed cing bzhugs so/ /dus gzhan zhig na rta pa gzhan rnams kyis de'i phun sum tshogs pa mi bzod pas rgyal po la smras te mi g.yo ba'i sde 'di ni shing gi ral gris khyed bsten pas 'khrugs pa'i dus su dgra la ji ltar rdeg par 'gyur/de bas na de'i ral gri blta bar 'tshal/ de ltar yin yang drang por smra mi nus pas rta pa thams cad kyis ral gri blta bar bya'o zhes rgyal pos bka' stsal pas kha cig gis ral gri bltas nas/mi g.yo ba'i sde la yang ral gri blta'o zhes bka' stsal to/ /des gsungs pa/ bdag gi ral gri khyed kyis lta bar mi 'os zhes so/ /rgyal pos nan tan gyis yang dang yang du zhus pas mi g.yo ba na re/ cis kyang mthong bar 'dod na phyogs dben par khyed rang kho na lag pas mig gcig bkab ste blta bar gyis shig /des bltas pas ral gri'i gzi brjid kyis rgyal po'i mig ma bkab pa ngos sa la lhung ngo / /nus pa de mthong nas rgyal po shin tu mos par 'gyur bar dgongs la mig gi bu gar mig bcug ste/zug rngu med par byas la gtsug lag khang chen po na len drar gshegs la/ mi g.yo ba'i sde rab tu byung ste/ zhi ba dang ldan pas zhi ba'i lha zhes ming btags/ der ni sde snod gsum mnyan pa'i rjes la/ za rung nyal rung 'chag rung rgyun du 'od gsal bsgoms pas b+hu su ku zhes ting nge 'dzin la gnas pa'i phyir b+hu su ku zhes ming yongs su grags so//de nas dus gzhan zhig na dge 'dun gyi nang du ma rungs pa 'ga' zhig gis/ 'dis ni dge 'dun gyi nang du bya ba gang yang ma byas par sgom pa ltar gnas te/ ci shes brtag dgos zhes bgros la/ /dang po cho 'phrul gyi dus su lo re re zhing chos 'don pa yod pas/'di la 'chol dgos zhes bsams nas de la zhus so/ /des gsungs pa bdag gis ci yang mi shes so/ /yang nas yang du bkag kyang de dag gis zhus shing gtsug lag khang gi phyi rol dbang ldan gyi mtshams su sa phyogs yangs pa la mchod pa'i rnam pa du ma bshams te/skye bo ma lus pa bos nas seng ge'i khri shin tu mthon po bshams te spyan drangs so/ /des der bzhugs shing bsams te/ mdo sde kun las btus pa dang / /bslab pa kun las btus pa dang / /byang chub spyod pa la 'jug pa zhes gzhung gsum bdag gis byas yod do//de la spyod pa la 'jug pa gdon par 'os bsams nas gsungs te drang srong gis gsungs pa'am/ de'i rjes las byung ba gang gdon don dam rtogs pa ni drang srong ngo / /des mdzad pa gsung rab po/ /de la brten nas gzhan gyis byas pa de rjes las byung ba'o/ /'phags pa byams pas de gsungs pa/gang ni don can chos kyi tshig dang ldan/ /khams gsum nyon mongs dag par byed pa'i tshig /zhi ba'i phan yon ston par byed pa de/ /drang srong las byung de las bzlog pa gzhan/ /zhes so/ /des gang 'chad par 'gyur ba le'u bcu pa nas/ /bdag kyang 'jam dbyangs bka' drin gyis//sa rab dga' ba thob bar du/ /rtag tu tshe rabs dran pa dang / /rab tu 'byung ba 'ang thob par shog /ces pa de yang rigs par 'gyur ro/ /de dag gis ngo mtshar skyes nas smras te/ gzhan pa 'don par zhu 'tshal zhes brjod pa dang / des kyang spyod pa la 'jug pa 'don par brtsams so//de la/ gang tshe dngos dang dngos min dag /blo yi mdun du mi gnas 'gyur/ /de tshe rnam pa gzhan med par/ /dmigs pa med par rab tu zhi/ /zhes bya ba 'don pa'i skabs su de la mthong lam mngon du gyur pa dang 'phags pa 'jam dpal mdun gyi nam mkha' la snang / de'i rjes la de dang bcas pa skye bo rnams la mi snang bar gyur/de nas de ma mthong bas 'gyod par gyur pa'i skye bo rnams kyis de'i brang khang du bltas pas/ mdo sde kun las btus pa la sogs pa gsum blangs te/ mkhas pa rnams kyi sgo nas 'jig rten du grags par byas so/ /de la bde gshegs sras bcas chos kyi sku dang bcas//phyag 'os kun la'ang gus pas phyag 'tshal te/ /zhes bya ba la sogs pa'i mchod brjod du phyag 'tshal ba dang / dad pa gtso bor gyur pa dang / brjod par bya ba dang / dgos pa dang / 'brel pa dang / rang dga' spong ba dang / dgos med kyi skyon spong ba ste/ don bdun 'chad do/ /de la klan ka 'di yin te/ /thog mar byang chub spyod 'jug tu/ /dkon mchog gsum la phyag byed na/ /blo ldan nus na rim med cing / /dge 'dun mos na tshogs bcas 'os/ /chos 'dod chos sku smos pa ci/ /de ni sangs rgyas dngos yin no/ /de tshe dkon mchog gsum ma tshang //sangs rgyas chos dang dge 'dun zhes/ /byams pas kyang ni rim pas gsungs/ /dus gsum la gnas sangs rgyas kun/ /chos dang dge 'dun mchog dang bcas/ /'dis kyang 'og tu 'chad par 'gyur/ /des ni mi slu'i gdams pa can/ /bla ma mkhas pa btsal bar bya/ /bde gshegs sras kyi sdom la 'jug pa rnams brjod par bya zhes 'brel te/legs par gshegs pas bde bar gshegs pa ste/ /dper na bu mo legs bzhin no/ /srid pa'i rtse mor phyin gyur kyang / /khyod kyi chos las log pa'i mi/ /las las byung ba'i srid pa rnams/ /ma rig ldongs pas sogs par byed//ces gsungs pas mu stegs kyi lam gyis 'khor bar 'khor ba kho na yin gyi bdag tu 'dzin pa ma btang bas thar pa thob pa med do/ /yang na phyir mi ldog par gshegs pas bde bar gshegs pa ste/ tshad pa shin tu sangs pa bzhin no/ /srid par lan bdun 'khor ba la sogs pa ni yang dang yang du 'khor ro//yang na bgrod par bya ba ji snyed par gshegs pas bde bar gshegs pa ste/ tshogs ma lus pa bsags pa'i phyir te/ bum pa shin tu gang ba bzhin no/ /'gro ba'i don thams cad ni shes pa'i don to/ /dgra bcom pa rnams la ni nyon mongs pa can ma yin pa'i ma rig pa yod de/thar pa'i sa bon shin tu phra/ /de la yod pa'ang bdag gis mthong / /rdo ba'i khams kyi nang du ni/ /gser ni mi gsal yod bzhin no/ /zhes gsungs pa'i phyir ro/ /bde ba'i don gsum bshad de/ legs par ma song mu stegs rnams//slob pa rnams ni yang yang 'khor/ /mi slob bgrod bya kun bgrod min/ /bde gshegs gsum las khyad par 'phags/ /zhes gsungs pa'i phyir ro/ /bde bar gshegs pa'i bdag nyid ni rang bzhin te chos kyi sku'o/ /de las byung bas na sras te chos nyid mngon sum du byas pas 'phags par 'gyur ba'i phyir ro//gang gi phyir byams pas gsungs pa/ 'di thams cad ni gnyis te/ chos dang chos nyid kyis bsdus pa'i phyir ro/ /chos las byung ba 'khor ba yin la/ chos nyid las byung ba ni theg pa gsum gyis mya ngan las 'das pa'o zhes so/ /de dag gi sdom pa ni rdzogs pa'i byang chub tu sems bskyed pa ste/bsdus na smon pa dang 'jug pa rnam pa gnyis so/ /de yang lo thog rnams kyi sa bon bzhin du byang chub kyi mchog gi rgyu thun mong ma yin pa'i rgyu'o/ /de'i bslab pa gnyis te/ de la bzlog pa'i tshul khrims ni nyes spyod thams cad las log pa'o//'jug pa'i tshul khrims ni pha rol tu phyin pa drug goms pa'o/ /de'i cho ga ni byang chub sems dpa'i sde snod kyi rgya mtsho las mang du bshad do/ /'bab stegs bzhin du gang gis der 'jug pa/ /de ni bde gshegs sras kyi sdom la 'jug pa ste/ /de yang dal 'byor rnyed par dka' ba dang / / rnyed kyang mi rtag pa dang / der yang sangs rgyas kyi byin gyi rlabs kyis/ bsod nams la 'jug pa dka' ba dang / sdig pa la 'jug pa ni rang gis ngang gis te/ thog ma med nas goms pa'i phyir ro/ /de bas sdig pa stobs dang ldan pa de'i gnyen po byang chub mchog tu sems bskyed pa kho na yin pa dang /'bras bu mthong nas 'jug pas de'i phan yon dang / lus la sogs pa dag par bya ba'i phyir sdig pa bshags pa dang / dkon mchog gsum la mchod pa dang / phyag 'tshal ba dang / bsod nams la rjes su yi rang ba dang / chos kyi 'khor lo bskor bar bskul ba dang / mya ngan las mi 'da' bar gsol ba gdab pa'i bar byang chub mchog tu sems bskyed pa'i sbyor ba byas la dkon mchog gsum la skyabs su 'gro ba dang /smon pa'i sems bskyed sngon du 'gro ba 'jug pa'i sems bskyed nas/ de'i rjes gso ba'i phyir sems spro dga' bskyed pa dang / sbyin pa dang / tshul khrims dang /bzod pa dang / brtson 'grus dang / bsam gtan dang / shes rab kyi pha rol tu phyin pa la spyod pa dang / de dag yongs su bsngo ba'i bar te/ de rnams kyis ni brjod bya bstan to/ /bshad par bya zhes pas ni rang dang gzhan gyi rgyud la de'i don gyi rtogs pa bskyed pa ste/ dgos pa bstan to//ci byas nas 'chad ce na phyag 'tshal te/ phyag byas pas bsod nams 'byung / des sdig pa'i rang bzhin gyi bgegs bzlog nas gzhung la sogs pa bar chad med par tshar ba'o/ /gang la phyag 'tshal zhe na/ bde gshegs la ste khyab 'jug dang dbang phyug chen po la sogs pa'i chos dang thun mong ma yin pa/theg pa chen po dang po nyid du ston pas bcom ldan 'das bla ma yin te/ dang po nyid du phyag byas so/ /de ji lta bu zhe na/ sras dang bcas pa yin pas sras bcas so/ /sras ni 'dir 'phags pa 'jam dpal te/ des yi dam bsgrubs pa'i phyir ro/ /yang ji lta bu zhe na/chos kyi sku dang bcas pa yin pas/ chos kyi sku dang bcas pa ste/ chos nyid ni khyab byed yin pas sku yin te/ de mngon sum du rtogs pas srid pa'i sdug bsngal zad de/ mngon sum du bya ba yin pas de la phyag byas so/ /yang ci byas na zhe na yang ni 'dus pa'i don to/ /kun ni ma lus pa ste/phyag 'os ni phyir mi ldog pa'i dge 'dun la sogs pa'o/ /sems dang po bskyed pa nas brtsams te dge 'dun gyi bslab pa dang mthun pa la spyod pa yin pas/ dge ba'i bshes gnyen te de la phyag byas so/ /dang po nyid du rigs ldan rnams 'jug pa ni dad pa ste/rtogs pas ma yin par gsungs te gus pas so/ /dad med pa yi mi rnams la/ /dkar po'i chos ni mi 'byung ste/ /sa bon me yis tshig pa la/ /myu gu sngon po mi 'byung bzhin/ /byams pas gsungs pa/ rang byung rnams kyi don dam pa/ /'dir ni dad pa nyid kyis 'gro//long bas brjid dang ldan pa yi/ /nyi ma'i dkyil 'khor mi mthong ngo / /zhes so/ /dad pa yang gsum ste/ yod la yid ches rnam pa can/ /yod bzhin yon tan ldan pa dang / /yon tan ldan yod sgrub nus la/ /'dod pa'i dad de rnam gsum mo/ /las 'bras la sogs mi slu bar yod pa la yid ches pa dang /yod pa yon tan dang ldan pas sangs rgyas la sogs pa la dang ba'i dad pa dang / yod pa nan tan dang ldan pa bsgrub par nus pa byang chub la 'dod pa'i dad pa'o/ /'brel pa ni/ bstan bcos dang ni dgos pa'i don/ /'brel pa'i gzhi ni gnyis la gnas//des bstan 'dus pa de yi phyir/ /dgos las logs shig ma bstan to/ /bstan bcos ni spyod 'jug ste/ dgos pa ni de'i don la mkhas pa'o/ /de gnyis kyi 'brel pa ni thabs dang thabs las byung ba'i mtshan nyid can/ brda'i stobs kyis tshig las don rtogs pa'i phyir ro//byang chub mchog tu sems bskyed pa la sogs pa'i spyod pas sangs rgyas pa ni tha mal pa'i spyod yul du ma gyur pas/ mi mkhas gdams pa don gnyer na/ /slu ba'i dogs pa dang ldan pas/ /'ga' zhig ye shes ldan 'dod de/ /des gsungs rab tu bsgrub phyir ro/ /des gsungs pa'i phyir sangs rgyas kyi gsung rab kho na gzung bya yin pas lung bzhin zhes gsungs te/skyon mtha' dang bral ba'i skyes bu ni tshad ma ste/ des gsung ba ni lung ste de dang mi 'gal bas so/ /ji ltar sa sogs gzung bya min/ /lha yi sku ni des byas na/ /dam pa rnams kyis mchod 'os ltar//lung brten bdag gis blang bar rigs/ /shes pas rang dga' spang ba'o/ /de ltar na lung nyid la 'jug par bya ba'i bstan bcos la zhugs pa don med ce na/ 'dir gsungs pa mdor bsdus nas te gdul bya'i dbang gis de dang der gzhung du ma las rgyas par bshad pa'i don rnams/'dir gzhung nyung bas bsdus te go sla bar bshad nas/ dgos pa med pa'i log rtogs sel to/ /tshigs bcad gnyis kyis khengs bskyung ba ste/ sngon chad ma byung zhes pa la sogs pa'o/ /bcom ldan 'das kyi gsung rab pas lhag pa'i don bdag gis brjod mi nus la/ snyan dngags kyi bye brag gis gzhung gi sdeb sbyor la yang mi mkhas so//de bas na gzhan gyi don du kho bos ma brtsams so/ /de bas rang gi yid la bsgom pa'i phyir bla ma'i gdams pa mi brjed pa'i slad du bstan bcos 'di bris so/ /des don ni thar pa'i lam la bcom ldan 'das kyis gsungs pa las lhag pa bcug na lam gol te/'di la bsal bya ci yang med/ /gzhag par bya ba 'ang cung zad med/ /yang dag nyid la yang dag lta/ /yang dag mthong nas rnam par grol/ /zhes gsungs pa'i phyir ro/ /'di'i don ni 'jig rten las 'das pa yin pas rtogs par dka' ba la snyan dngags kyi tshogs kyis go ba dka' bar gyur na bgrod par bya ba ma yin par 'gyur bas sdeb sbyor ma byas so//the tshom gyis ni sems g.yo na/ /gsang sngags dam pa log par 'gyur/ /zhes gsungs pas rang gi nges pa bshad de/ gzhan ni 'jig rten las 'das pa'i pha rol gyi don la bdag la the tshom med do//de bas na rang gi shes rab dang bla ma dang lung las nges pa'i don 'byung la thar pa thob par 'dod pa rnams kyis rang gi yid la bsgom pa'i phyir bdag gis 'di byas so/ /goms pa'i mthar phyin pa don gsal bar 'gyur ba'i phyir ro/ /'dis ni don gyis gzhan 'jug pa'i yan lag gsungs so//rang gi sems la yod pa'i khyad par gyis yid la goms par byed pa la yeng ba'i rgyu gzhung rtsom pas ci byed ce na/ smras pa/ dge ba zhes bya ba la sogs pa'o/ /thos pa tsam gyis nyon mongs pa 'joms pa ma yin mod//nan tan ma byas na thos pa yang brjed par 'gyur ro/ /re zhig ni rim pa ste 'dir bshad pa'i byang chub sems kyi phan yon la sogs pa yang dang yang du mngon du phyogs par byas pas dge ba ni byang chub mchog tu sems bskyed pa la sogs pa bsgom pa'i phyir/ dang ba'i dad pa'i shugs ni khyad par du 'phags pa ste/ gang las chos nyid rtogs par 'gyur ro/ /de 'phel ba ni khyad par du 'phags so/ /gal te bdag dang mnyam pa'i skal ba dang ldan pa ste/ blo dman pa'o/ /yang na bdag dang 'dra ba theg pa chen po'i rigs ldan no/ /gang gi phyir byams pas gsungs pa/theg mchog la mos gang la yod/ /ma ni shes rab sangs rgyas chos bskyed phyir/ /ma ma snying rje ma ma la ni bsam gtan bde/ /gang yin de ni thub pa'i rjes skyes sras/ /zhes so/ /gang gi phyir/ yon tan mkhas la yon tan yon tan 'gyur/ / yon tan med la de nyid skyon du 'gyur/ /yan lag brgyad pa'i chu ni chu bor rgyu/ /de nyid rgya mtshor btung du mi rung 'gyur/ /zhes so/ /bdag las gzhan yang gzhung 'di mthong na de'i tshe gzhan don byed pas don can du 'gyur ro/ /'di yang slob ma la slob pa ste gang gi phyir/ /mi shes skye bos ci ste 'di mi bsten//zhes 'chad par 'gyur ro/ /chos kyi grags pas kyang gsungs pa/ skye bo phal cher phal la chags shing shes rab rtsal med pas na legs bshad rnams/ /don du mi gnyer kho nar ma zad phrag dog dri ma dag gis sdang bar yang / /des na bdag la 'di ni gzhan la phan pa yin zhes bya ba'i bsam pa 'ang med//sems ni yun rings legs bshad goms pa lhur len bskyed phyir 'di la dga' ba skyes/ /'di'i don ni skye bo rnams gnas ma yin pa la mngon par zhen pa dang / shes rab 'chal ba dang / legs bshad la don du mi gnyer ba dang / phrag dog gi dri ma dang ldan zhing legs bshad la sdang bas gzhan don 'ong ba'i bsam pa med mod kyi/ 'on kyang legs bshad la goms pas gzhung 'di byas so/ /des don du slob par 'dod na skyon bzhi po de dag spangs nas bslab par bya'o zhes gzhan la ston pa'i don kho na yin no/ /gang gi phyir chos 'di seng ge'i 'o ma dang 'dra ste/de ni gser gyi snod ma yin par blugs na/ snod kyang 'chag la de yang chud gsan par 'gyur ro/ /srid pa la skyon dang mya ngan las 'das pa la yon tan du mthong nas byang chub ni brtson 'grus las 'byung bas de bskyed pa bshad de/ dal 'byor zhes bya ba la sogs pa'o/ /grang ba dang tsha ba'i dmyal bar shin tu grang ba dang tsha ba dag gis dang / yi dags su bkres pa dang skom pa dag gis dang / dud 'gror phan tshun za ba dang / gzhan gyis rdeg pa dang gti mug che ba la sogs pa dang / kla klor blang bya dang spang bya mi shes pa dang /lha tshe ring po la ting nge 'dzin gyis brgyal ba dang / tha mar log ltas dge ba'i rtsa ba gcod pa dang / sangs rgyas kyis stongs pa la 'jig rten las 'das pa'i gdams ngag med pa dang / glen lkugs 'on pa la sogs pa la gdams pa 'dzin pa la sogs pa'i nus pa med pa dang /'phags pa'i lam mngon du byed pa la mi 'os pa'i phyir/ dmyal ba yi dags dud 'gro dang / /kla klo tshe rings lha dang ni/ /log lta sangs rgyas kyis stongs pa/ /lkugs pa 'dir ni mi khom brgyad/ /mi khom brgyad bral dal ba dang / /dbus su mi lus dbang po tshang //mtshams med lnga bral gnas la gus/ /bde gshegs chos gsungs bstan pa gnas/ /bshes gnyen zas gos lus las rung / /'byor pa rnyed dka'i dpe la yang / /chu rgyas 'dom bdun steng dag g.yo/ /rlung bskyod gting zab rgya mtsho la/ /chu gnas shing skam gnya' shing gi//bu ga chung zhing gcig pu'i nang / /lo brgyar lan cig steng 'gro la/ /mi mkhas mig gcig 'gro ba bul/ /'og nas khog nang gnas pa yi/ /mgul pa chud ltar mthong bas ni/ /skyes bu'i don chen rnyed par dka'/ /gal te la sogs pa ni da ni shes rab thabs la gzhol ba'i blo med na/'di 'dra'i dal 'byor rnyed pa ga la srid/ /des bshad pa/ rgya mtsho cher g.yengs gnya' shing gi/ /bu gar rus sbal mgrin chud ltar/ /zhes so/ /dal 'byor rnyed par dka' ba yin kyang thob pas chog ce na/ smras pa ji ltar la sogs pa'o/ /dbang phyug chen po la sogs pa'i chos bsten nas bsod nams la 'jug pa yod du zin kyang /dbyar gyi mtshan mor sprin gyis rum pa'i mun pa la glog gis yud tsam gsal bar byed pa ltar rgyal ba'i so sor rtog pa'i shes kyi mthus theg pa chen po nas bshad pa'i bsod nams la 'jig rten pa'i blo 'jug pa 'ga' zhig kho nar ro//sems can de dag nyid la'ang sngon/ /rang gi don du'ang 'di 'dra'i sems/ /rmi lam du yang ma rmis na/ /gzhan gyi don du ga la skye/ /zhes bya ba la sogs pa dang / sangs rgyas byon pa u dum bA ra'i me tog lta bu yin pa'i phyir ro//de ltas ni 'chad pa'i rigs pas 'jig rten gyi dge ba dmigs bcas nyam chung ba nyid de/ sdig pa'i stobs che ste rang gi ngang gis rtag tu 'jug pa'i phyir ro/ /mi bzad pa ni dmyal ba la sogs par sdug bsngal 'byin pa'i phyir ro/ /sdig pa de byang chub kyi sems ma yin pa gang gis zil gyis gnon dgos pa ni 'di lta ste/thog ma med par 'khor ba la bdag dang bdag gi bar bzung nas sems can rnams la gnod pa dpag tu med pa byas/ de dag ni sangs rgyas kyi snying po can yin pas sems can gzhal du med pa sgrol ba'i smon lam kho nas der nus so gsungs pa yang /snying rje spangs te spyod pas skyon gang 'byung / /de spong snying rje nyid de gzhan ma yin/ /zhes so/ /byang chub mchog tu sems bskyed pa'i cho ga ni 'chad par 'gyur te/ ji ltar sngon gyi bde gshegs kyis/ /zhes bya ba la sogs pa tshig le'ur byas pa gnyis kyis so/ / byang chub sems dpa'i brtul zhugs la gnas pa mkhas pa 'os pa'i bla ma las sam de med na rang nyid mkhas pas nyin mor khrus byas te gos gtsang ma gyon nas sangs rgyas dang byang chub sems dpa'i sku gzugs yang dag par mchod la yan lag bdun pa byas te/ nus pa bzhin du bla ma mchod la/dkon mchog gsum la skyabs su 'gro ba dang / 'gro la phan phyir bdag sangs rgyas/ /zhes smon pa'i sems bskyed nas/ zhabs gnyis la btud de bla ma la lan gsum gsol ba btab nas/ dus gsum gyi de bzhin gshegs pa rnams dang / 'phags pa byang chub sems dpa' rnams la gsol ba gdab/de dag gi yon tan mngon sum du phyogs la sems shin tu dang bar byas te/ pus mo sa la btsugs te tsog pur 'dug la/ thal mo sbyar te bla ma'i rjes zlos bya zhing blang bar bya'o/ /sdom pa ji lta bu zhe na/ brjod de/ thal mo sbyar ba ni lus kyi rig byed/bla ma'i rjes zlos ni ngag gi rig byed de/ de gnyis kyi bla ma la gus par rig par byas pa'i phyir ro/ /lus ngag gi rig byed gnyis ni 'byung ba bzhi'i rang bzhin te/ 'dod na dbang po med pa dang / /sgra med phra rab rdul rdzas brgyad/ /lus dbang ldan la rdzas dgu ste/ /dbang po gzhan la rdzas bcu pa'o//zhes bshad pa'i phyir sa la sogs pa rgyur byas te rig byed kyi rang bzhin sems kyi chos sdom pa ni cho ga'i tha mar skye'o/ /skyes nas nyams pa'i rgyu med na byang chub kyi bar du rjes su 'brang ngo / /de ltar shan pa la sogs pa la sdom pa ma yin pa gsod pa'i sbyor ba nas brtsams te skye'o//mngon pa mdzod las de bshad pa/ /gnyid log g.yeng ba can na yang / /dge ba dang ni mi dge'i rgyun/ /'byung ba chen po rgyur byas na/ /rnam par rig byed min par brjod/ /ces so/ /sems bskyed pa ni gzhan don phyir/ /yang dag rdzogs pa'i byang chub 'dod/ / skyabs 'gro las byung gzhal du med/ /skad cig sems la bsod nams gang / /gal te gzugs can de yin na/ /nam mkha' bas kyang khyad par 'phags/ /sems bskyed dus mnyam blo ldan gyis/ /nyes spyod mtha' dag las sems log /bde dang sdug pas rtag tu dgyes/ /thugs rje dge ldan gnyis 'phel zhing //'dir yang / 'di ni byang chub sems stobs kyis/ /sngon gyi sdig pa zad byed cing / /bsod nams rgya mtsho sdud byed phyir/ /nyan thos rnam pas mchog tu bshad/ /ces gsungs pa'i phyir ro/ /'bras bu mthong nas skye bo 'jug pas byang chub sems kyi phan yon 'chad de/bskal pa zhes bya ba la sogs pa'o/ /bskal pa grangs med pa gsum du/ /sdug bsngal byung yang 'gyod mi byed/ /bde ba la yang 'dod pa med/ /chags dang 'jigs pa khro ba med/ /blo brtan gyur pa thub par brjod/ /de nyan thos la sogs pa'o/ /de dag gi dbang po ni de bzhin gshegs pa rnams so//de dag gi byang chub kyi sems 'di kho na phan pa gzigs pa/ gang dag la dus gsum dang 'jig rten gsum la mi mkhyen pa med do/ /byang chub kyi sems gang las bde ba nyid kyis ni bde ba dang ldan pa'i sems ting nge 'dzin dang ldan pa ji lta ba mkhyen pas grol zhes gsungs pa'i phyir ro//bde ba ni zag pa med pa ste/ rab tu dga' ba'i sa la sogs par khyad par 'phel bas tshad med pa'i skye bo'i tshogs rnams thob par byed pa ni grol bar byed pa'o/ /yang na dga' ba la sogs pas 'od gsal rab tu 'phel bas skye bo rnams bde bas tshim par byed de/ 'gro ba ma lus 'od gsal bas/ /bde chen rdol ba la nub po//zhes gsungs pa'i phyir ro/ /des skra 'bal ba la sogs pa ni lam ma yin par gsal to/ /'tshang rgya bar mi 'dod na mngon par mtho ba rnams kyis kyang byang chub kyi sems brtan par bya dgos pas smras pa/ srid pa la sogs pa'o/ /sdug bsngal ni skye ba dang / na ba dang / rgas pa dang / 'chi ba dang / 'dod pa dang bral ba dang /mi 'dod pa dang phrad pa la sogs pa brgya phrag mang po nye bar mtshon pa'o/ /rang gi 'khor ba'i sdug bsngal las grol bar 'dod pa rnams kyang / sbyin pa dang snyan par smra ba dang / don spyod pa dang / don mthun pas sems can gzhan rnams kyang bcing ba dang / rdeg pa dang / bsdigs pa dang / mi mgu ba la sogs pa'i sdug bsngal gzhom par 'dod pa rnams dang /lha dang mi'i bde ba dpag tu med pa myong bar 'dod pa rnams kyis kyang nam yang byang chub kyi sems spang bar mi bya'o/ /mdo sde las kyang dge slong rnams srog gi phyir yang byang chub kyi sems gtang bar mi bya'o zhes gsungs so/ /'di ltar 'phags pa shA ri'i bu la bdud kyis lag pa g.yas pa bslang bar byas pa'i tshe/des lag pa g.yas pa bcad nas g.yon pas byin pa na g.yon pas byin pa mi len no zhes smras pas/ shA ri'i bu byang chub kyi sems gtong bar 'dod pa na sangs rgyas kyis bkag go/ /khams bdun pa yang gtang bar mi bya'o/ /skyon med cing phan yon dpag tu med pa gtong bar mi rigs so//go 'phang mchog dang bkur sti la sogs pa 'dod pas kyang de gzung bar bya ba yin zhes smras pa/ byang chub sems zhes bya ba la sogs pa'o/ /srid pa kho na btson khang ste 'dod chags la sogs pas bcings pas so/ /der bcings pa gang yin zhing nyam thag pa de/ sangs rgyas kyi sras su brjod de/ don dam pa'i sems skyes pa'i skad cig gis 'dod chags la sogs pa thams cad kyi rang bzhin rtogs pas so//yang na shes rab ye shes skyes pa'i skad cig gis te/ /dbang bskur mchog ni thob pa yis/ /rdo rje yi ni slob dpon la/ /phyogs bcu'i 'jig rten khams bzhugs pa'i/ /bde gshegs rnams kyis dus gsum 'dud//ces bya ba gsungs pa'i phyir ro/ /lha mi dang bcas pa gang yin pa de ni lha ma yin dang klu la sogs pa ste/ de dag gi phyag gi 'os su sems bskyed pa dang dus mnyam du 'gyur ro/ /gser 'gyur rtsi ltar byang chub kyi sems dngos por 'gyur nus pa'i tshul du bshad de/mi gtsang zhes bya ba la sogs pa'o/ /pha ma'i sa bon dang khrag las byung ba/ ma'i mngal du mi gtsang ba'i khu bas gsos pa/ mi gtsang ba'i rang bzhin snying po med pa'i lus byang chub kyi sems des 'gyur nus pa'i rtsi 'bigs pas 'ju ba dang / gsod pa dang bskrad pa la sogs pas sam 'od gsal du 'jug pas na rgyal po rin po che'i skur 'gyur bar byed do//de la rin gyi tshad med pas rin thang med pa'o/ /dngos po 'bigs pas kun tu khyab byed do/ /mdo sde las gsungs pa ji ltar gser gyi gsal byed ces bya ba'i rtsi srang gcig gis lcags srang stong phrag gcig gser du 'gyur la zad par mi 'gyur ro//bir wa pas kyang gsungs pa/ mu zi'i lus la rtsi bsgrubs zos/ /rtsi yi rgyal po bir was smras/ /skra dkar gnyer ma rga shi med/ /'chi bdag gis ni ci zhig nus/ /zhes so/ /de bas na byang chub kyi sems zhes bya ba'i rtsi'i khyad par 'di ltar brtan par gzung bar bya'o//skye ba phyi ma'i rgyags kyi don du rigs drug gi sdug bsngal gyis sdug pa'i skye bos rin po che 'di gzung bar 'os zhes smras te/ 'gro ba'i zhes bya ba la sogs pa'o/ /dmyal ba la sogs pa'i rigs kho na grong khyer te/dngos por 'gyur ba'i gnas yin te/ las kyi 'bras bu myong ba'i phyir ro/ /de la nyon mongs pa dang las kyi dbang gis sna tshogs pa bgrod pa'i rang bzhin kun skye zhes 'bod na/ gzung bar bya'o zhes slob pa'o/ /'di la rin po che ngan pa'i dogs pa mi bya'o//gang gi phyir/ blo gros gzhal du med pa rnams kyis shin tu brtags pa yin no/ /yang ji lta bu zhe na/ 'gro ba dag gi ded dpon gcig pur gyur pa gang yin pa des so/ /ji ltar rin po che'i yul dang dus la mkhas la yid ches pa'i ded dpon tshong pa kun gyis bsten pa ltar/rgyal ba thugs rje can la yid ches dgos so/ /mdo sder gsungs pa/ ji ltar dbang gi rgyal po zhes bya ba'i rin po che ji srid zla ba dang nyi mas gling bzhi snang bar byed pa de'i nang du rin po che dang / nor bu dang / mu tig dang / byi ru dang / dung rdo la sogs pa ji snyed pa'i rin thang las khyad par du 'phags pa de bzhin du 'jig rten gyi khams ji snyed sangs rgyas kyi ye shes kyis snang bar byed pa de la/ rang sangs rgyas dang / nyan thos dang / lha dang mi la sogs pa'i dge ba'i rtsa ba ji snyed pa de thams cad byang chub kyi sems rin po che'i rin thang gis zil gyis gnon zhes pa'o//gang gi phyir rang sangs rgyas kyis gang zag gi bdag med kho na rtogs la lha la sogs pas de yang ma rtogs byang chub kyi sems kyis ni bdag med gnyis rtogs so/ /don dam pa'i sems bskyed la 'dzad pa med par bshad de/ dge ba zhes bya ba la sogs pa'o//'di las gzhan yang 'jig rten gyi dge ba dmigs bcas 'khor gsum mi dmigs pa med pa ni 'bras bu 'byin te zad la srid pa'i rgyu yin gyi byang chub kyi rgyu ma yin no/ /ji ltar chu shing 'bras bu smin pa dang zad pa 'di ni dpag bsam gyi shing las khyad par du 'phags pa byang chub sems kyi ljon shing rgyun du 'jig rten gyi 'khor los sgyur ba'i rgyal srid la sogs pa/byang chub la spyod pa'i dus su yang ster te/ 'jig rten las 'das pa'i sangs rgyas kyi yon tan rnams kyang ster la 'bras bu chung yang mi 'dzad de/ nam mkha' bzhin dngos po ma yin pa'i phyir ro//des mi zad byang chub sems kyi rgyun rim gyis khyad par du 'phags pa nyi shu rtsa gnyis pa'i bar 'phel zhing skyed par byed de/ /de yang sa gser zla ba me/ /gter dang rin chen 'byung gnas mtsho/ /rdo rje ri sman bshes gnyen dang //yid bzhin nor bu nyi ma glu/ /rgyal po mdzod dang lam po che/ /bzhon pa bkod ma'i chu dang ni/ /sgra snyan chu bo sprin rnams kyis/ /dper byas pa rnam pa nyi shu rtsa gnyis so/ /sems bskyed de rnams ni sangs rgyas pa'i mthar thug gi bar ro/ /sbyor ba ni 'khrul pa gang yin pa de ni yun rings mi gnas te/sgyu ma mkhan gyis sprul pa'i glang po la sogs pa bzhin dmigs pa dang bcas pa'i dge ba yang 'khrul te/ zhes rang gi mtshan nyid rang bzhin gyi gtan tshigs so/ /de ni rang bzhin gyis stong pa yin la dngos po nyid du gzung bas ci ste mi 'khrul/des ni ma grub pa'i skyon spangs so/ /'gal ba yang ma yin te mthun phyogs la yod pas so/ /gang du yun rings mi gnas pa'i tshul med pa de ma 'khrul te/ dper na nam mkha'o/ /'di ni stong pa yin pas yun rings gnas te/ yun rings mi gnas pa dang 'gal bas ma nges pa ma yin no//'o na stong pa la 'bras bu ji ltar 'byung zhe na/ bskal pa 'jig pa'i rjes su stong pa kho na las dngos po'i bag chags kyis bskul bas/ dngos po mtha' dag skyes la/ ye shes kyis bskul bas sangs rgyas kyi chos rnams skye'o//blo gros mi zad pa'i mdo las gsungs pa/ ji ltar chu'i thigs pa rgya mtsho chen po la lhung ba bskal pa'i mtha'i bar du mi zad pa de bzhin du byang chub tu bsngos pa'i dge ba'i rtsa ba byang chub ma thob kyi bar du mi 'dzad do zhes so/ /sdig pa 'dzad pa'i rgyu yin pa'i tshul gyis sems can grol ba'i nus pa yang bshad de/sdig pa zhes bya ba la sogs pa tshigs bcad phyed dang gnyis so/ /sems bskyed pa'i sngon du dmyal ba la sogs pa'i sdug bsngal ster bas mi bzad pa'i sdig pa byas nas kyang byang chub kyi sems gang bsten pas skad cig gis sgrol zhes pa ni brten pa'i stobs bshad do//ji ltar dpa' bo bsten pas dgra'i 'jigs pa las thar ba yin no/ /de nyid du gsungs pa rigs kyi bu ji ltar dpa' bo la brten pa'i skyes bu dgra mtha' dag la mi 'jigs pa de bzhin du/ byang chub kyi sems kyi dpa' bo la brten pa de nyes spyod kyi dgra thams cad la mi 'jigs so zhes so//ci ste ni ma rangs pa'i don to/ /'bad rtsol med par bsgrub tu rung zhing phan yon che ba mi mkhas pa rnams kyis mi sten pa sdig go/ /sdig pa'i bud shing sreg par bshad de/ des zhes bya ba la sogs pa'o//bskal pa bzhi'i mthar nyi ma bdun 'char bas mes ni ji ltar 'dod pa'i khams thams cad bsam gtan dang po dang bcas pa ma lus pa sreg par byed/ gang la ri rab la sogs pa'i thal ba yang brlag par mi 'gyur ba ltar/ byang chub kyi sems kyi mes ngu 'bod la sogs pa'i sdug bsngal ster ba'i sdig pa chen po sreg par byed de/de rnams skad cig gis 'joms pa'i phyir ro/ /de nyid du gsungs pa/ bskal par bsreg pa'i me lta bu ste nyes spyod thams cad sreg pa'i phyir ro/ /sa 'og lta bu ste mi dge ba thams cad 'joms par byed pa'i phyir ro zhes so//sa 'og gis rgod ma'i kha nas chu thams cad sreg par byed pa bzhin no/ /bdag med gnyis mthong ba'i dus su gnyen po'i stobs kyis las ngan thams cad nyams shing ji ltar 'bras bu phyung nas nyams pa bzhin te/ sbyang bya dang sbyong byed mi dmigs pa'i phyir ro//sbyong ba ni gang la rgyur gyur pa'i nus pa 'joms byed yod pa des 'bras bu mi skyed de/ sa bon la me bzhin no/ /sdig pa'i rgyur gyur pa'i nus pa 'joms byed byang chub kyi sems te/ rang bzhin gyi gtan tshigs so/ /sems can bsad la bdag gis gsod//ces nga rgyal skyes na las ngan 'phel lo/ /de ni 'khor gsum rang bzhin med par rtogs na 'joms pas gtan tshigs ma grub pa ma yin no/ /'gal ba yang ma yin te mthun phyogs la yod pas so/ /rgyur gyur pa'i nus pa 'joms mkhan yod kyang skyed par byed na sa bon tshig pas kyang myu gu skyed par 'gyur ro//de ni med de ma nges pa yang ma yin no/ /mgon po byams pas mdo sde sdong po bkod pa las/ byang chub sems dpa' nor bzangs la gang byang chub sems kyi phan yon ni yon tan de dpag tu med pa gsungs te/ rigs kyi bu byang chub kyi sems ni sangs rgyas kyi chos thams cad kyi sa bon yin no zhes bya ba la sogs pa'o//de'i don bsdus te smras pa/ sa bon sangs rgyas chos kun gyi/ /dge ba kun skyed zhing de yin/ /sa gzhi 'jig rten rten yin pas/ /blo ldan skyob pas pha yin no/ /nor sbyin bkren pa zhi byed pas//bsams bzhin bsgrubs pas yid bzhin no/ /bum bzangs bsams bzhin khengs pa ste/ /nus pa nyon mongs dgra 'joms pa'o/ /zhes so/ /phan yon bshad nas dbye ba bshad de/ byang chub ces bya ba la sogs pa'o/ /byang chub sems de mdor bsdu na gnyis te/'gro la phan phyir sangs rgyas bya/ /zhes smon pa'i sems gcig sbyin pa la sogs pa dang bral ba 'dod pa'i rnam pa can no/ /'jug pa ni 'gro ba la sems gnyis pa smon lam sngon du 'gro ba nyid gang sdom pa 'byung la tshogs la rab tu 'jug go/ /'phags pa sdong po bkod pa las bshad pa/bla na med pa'i byang chub tu smon pa'i sems bskyed pa'i sems can gang yin pa de ni rnyed par dka'o/ /de bas kyang rnyed par dka' ste gang zhig byang chub tu 'jug pa'o zhes so/ /mdor bsdus te shes par bya rgyas par bshad na nyi shu rtsa gnyis yin pas so//dpe brjod pas de gsal bar byas shing bshad de/ 'gro ba zhes bya ba la sogs pa'o/ /ji ltar 'ga' zhig 'dod pa'i gnas su 'gro bas sam/ 'gro bar 'dod de 'gro ba ma yin zhes smon pa'i dpe'o/ /gzhan ni de thob pa'i slad du rab tu 'jug cing 'gro ba bzhin no//de dang 'dra bar smon pa dang 'jug pa gnyis kyi dbye ba go rims bzhin du mkhas pas shes par bya'o/ /smon pa'i sems kyang ston pa'i 'bras bu chen por bshad ces smras te/ byang chub ces bya ba la sogs pa'o/ /byang chub kyi rgyu yin pa ni lta zhog / 'khor ba la yang lha dang mi'i bde ba chen po de'i 'bras bur gsungs so/ /byams pa'i rnam par thar pa las kyang gsungs pa/ rdo rje rin po che chag kyang thams cad las khyad par du 'phags pa'i gser gyi rgyan zil gyis gnon la/ rdo rje rin po che'i ming yang mi spong ste/ bkren pa las kyang zlog par byed do//de ltar rigs kyi bu byang chub kyi sems rin po che bsgrub pa med kyang nyan thos dang rang sangs rgyas thams cad kyi yon tan zil gyis gnon la byang chub kyi sems kyi ming yang mi spong ste/ 'khor ba'i bkren pa la yang zlog par byed do zhes so//rgyal po la gdams pa'i mdo las kyang gsungs pa/ sbyin pa la sogs pa ma nus pas rtag tu smon pa'i sems bskyed par bya'o zhes so/ /'di la bsod nams rgyun mi chad par 'byung ba ma yin te/ ji ltar 'jug pa'i sems la rtag tu 'phel ba la sogs pa'o//tshigs su bcad pa gnyis kyis bsod nams rgyun mi 'chad par bshad de/ gang nas zhes bya ba la sogs pa'o/ /dus gang nas bzung ste nam mkha' mtha' dag khyab cing gnas pa'i sems can mtha' med pa dgrol ba'i ched dang / sdug bsngal mtha' dag zhi ba'i phyir//phyir mi ldog pa'i sems brtan pas 'jug pa'i sems yang dag par bzung ba/ dus de nas brtsams te/ gnyid du song ba dang / bag med pa dang / kyang gi sgras 'gro ba dang 'dug pa la sogs pa la skad cig re rer rnam pa du ma rgyun mi 'chad par bsod nams kyi rgyun nam mkha' dang mnyam par rab tu 'jug go//'phags pa ting nge 'dzin gyi rgyal po las gsungs pa/ gzhon nu yang dag par rdzogs pa'i byang chub ni sgrub pa gtso bor byed pa la rnyed par dka' ba ma yin no/ /sangs rgyas kyis gsungs pa'i sdom pa 'di mu stegs kyi bstan pa gang la yang med do//rgyun mi 'chad pa'i bsod nams 'dir gar bshad ce na/ smras pa 'di ni la sogs pa ste lag bzangs kyis zhus pa'i mdo las te rigs pa dang bcas pa sangs rgyas kyis mos pa dman pa'i sems can gyi don du nyan thos dang rang sangs rgyas kyi theg par gsungs so//de'i rigs pa tshig le'ur byas pa gnyis kyis bshad de/ sems can zhes bya ba la sogs pa'o/ /gsang sngags sam sman gyis sems can rnams kyi mgo gzer zhi bar bya'o zhes yid la byed pas gzhal du med pa'i bsod nams dang ldan par 'gyur te/sems can la phan sems dang ldan pa'i phyir ro/ /'gro ba'i sems can re re la srid pa'i sdug bsngal mtha' yas pa bsal bar 'dod pa dang / de bsal nas sems can re re gzhal du med pa'i yon tan dang ldan par byed par 'dod pa'i bsod nams lta ci smos/dgos pa ni 'di lta ste/ 'dir tshogs mang du bsag dgos pa ltar phan yon yang dpag tu med pas/ 'jigs pa'i gnas ma yin pa las 'jigs shing ldog par mi bya'o/ /gang 'di lta bur gyur pa de ni lha la sogs pa las kyang khyad par 'phags zhes 'chad de/ pha'am zhes bya ba la sogs pa'o/ /byang chub sems dpa' la phan sems skye ba ltar zla ba dang chu bdag la sogs pa'i lha rnams sam/ drang srong ser skya la sogs pa rnams sam tshangs pa rnams kyi ma'am pha'i phan pa byed pa'i blo 'di lta bu gang las 'byung bar 'gyur/ byung ba dang da ltar 'byung ba lta zhog phyis kyang 'byung bar mi 'gyur ro//khyad par bshad de sems can zhes bya ba la sogs pa'o/ /pha la sogs pa de dag gi yang rang gi don du yang 'di lta bu sngar bshad pa'i sems rmi lam du yang sngar ma skyes pas spyod yul du ma gyur pa'i phyir ro/ /gzhan gyi don du ga la srid//de bsdus shing bshad de/ gzhan dag ces bya ba la sogs pa'o/ /sems can kho na rin po che'i khyad par te/ rin chen skye ba rnyed dka' dang / /rnyog pa med pa mthu dang ldan/ /'jig rten rgyan du 'gyur ba dang / /'gyur ba med pa mchog yin phyir/ /zhes byams pas gsungs so//sngar myong ba ma yin pa byang chub kyi sems ma yin pa gzhan las gal te mi skye'o/ /gang gi gzhan don gyi bsam pa dag gzhan la rang don du yang mi skye/ shin tu brtse ba'i gnas bdag yin pa'i phyir ro/ /sems can la bsngags pa brjod de/ 'gro ba zhes bya ba la sogs pa'o//sems rin po che ji lta bu lha la sogs pa'i phun sum tshogs pa skyed pa nas 'gro ba kun gyi dga' ba'i rgyu skye ba la sogs pa'i sdug bsngal nad kyi sman gyi bsod nams gang yin pa de ni ji ltar gzhal zhe na gzugs can ma yin pas gzhal mi nus so/ /dpas byin gyis zhus pa las gsungs pa/byang chub sems kyi bsod nams gang / /de ni gzugs can yin gyur na/ /nam mkha'i khams kun gang byas nas/ /slar yang lhag par 'gyur ba'o/ /zhes so/ /gang gi phyir phyogs bcu na 'jig rten gyi khams dpag tu med/ de dag na rigs drug gi sems can dpag tu med/de dag ni sangs rgyas kyi snying po can te/ de bas na shAkya thub pa la mya ngan med pas zan du bsams nas bye ma'i bsod snyoms phul bas stobs kyi 'khor los sgyur ba'i rgyal srid thob/ de bas sems can ma lus pa dgrol ba'i bsam pa'i 'bras bu bsam gyis mi khyab/des na de mngon par mtho ba dang nges par legs pa'i rgyu yin par gsungs so/ /gang gi phyir 'di ltar zhe na phan pa zhes bya ba la sogs pa'o/ /'gro ba bskyab pa'i slad du 'tshang rgya bar bya zhes smon pa tsam gyis bsod nams gang byung ba de sangs rgyas mchod pa las kyang khyad par du 'phags so//de nyid du gsungs pa/ gang gA'i bye ma'i grangs dang mnyam/ /sangs rgyas zhing khams mi gang gis/ /rin chen dam pas bkang byas nas/ /'jig rten mgon po rnams la phul/ /gzhan zhig thal mo sbyar byas nas//sems ni byang chub mchog bskyed pa'i/ /mchod pa 'di ni khyad par 'phags/ /gang la mtha' ni med pa nyid/ /ces so/ /sems can sdug bsngal thams cad dang bral bar byas la bde ba ma lus pa thob par bya ba'i phyir 'jug pa'i sems kyis brtson pas lta ci smos/ rang la phan pa dang gnod pa sems can gyis rang gis shes par 'gyur gyi byang chub sems dpas ci zhig bya zhe na/ smras pa/ sdug bsngal zhes bya ba la sogs pa tshigs bcad gsum gyis lan 'chad do/ /sdug bsngal las grol bar 'dod pas srog gcod pa la sogs pas ltogs pa'i sdug bsngal gsob par 'dod cing dmyal ba la sogs pa'i sdug bsngal nyid la rgyug ste/phye ma leb mar me'i rtse la rgyug pa bzhin no/ /bde ba 'phel bar 'dod pa nyid kyis chags pa can kun gti mug gis phan pa dang gnod pa mi shes pa bzhin du dgra ltar rang gi bde ba yang 'joms par byed do//lha'i dbang po yang 'di ltar yin na gzhan lta ci smos/ gang gi phyir de lta yin pa de bas bde ba la chags pas 'khrul pa de dag sdug bsngal brgya phrag du mas gzir ba rnams la bde ba mtha' dag gis de dang de'i gdams pa'i sgo nas tshim par mdzad pa gang yin pa dang / gal te 'dod chags dang ldan pa'i/ /skye bo 'dun pa can gyi ni/ /'dod pa de dag ma grub na/ /shing tshal zug bzhin sdug pa'o/ /zhes bya ba lta bu'i sdug bsngal gcod par byed pa gang yin pa dang / de ltar kun du rmongs pa'i gti mug sel bar byed pa gang yin pa de dang mnyam pa'i legs pa ga la yod de med do//dge ba'i bshes gnyen kyang de dang 'dra ba mi 'byung ste/ byams pas gsungs pa/ ji ltar thub sras phan sems kyis/ /'gro ba ma lus smin mdzad bzhugs/ /de ltar pha ma nye du rnams/ /bu dang nye du la yang min/ /de ltar mdzad pa'i bsod nams gang yin pa de dang 'dra ba gzhan mi srid do//ci'i phyir 'di ltar brjod ce na smras pa/ phan btags zhes bya ba la sogs pa'o/ /sngar phan btags pa la gang zhig phan lan ldon par byed pa de 'ang legs so zhes bsngags pa na gzhan ni ma bcol bzhin phan 'dogs pa'i byang chub sems dpa' de ji ltar smos/de la bstod par mi nus pa nyid do/ /'jig rten du mthong ba ltos pa'i bdag nyid chen po smos te/ 'gro ba zhes bya ba la sogs pa'o/ /sems can kha cig la 'tsho ba sbyin pa po yang dge ba mdzad pas skye bo rnams kyis mchod de/ 'tsho ba de yang nyin phyed kyang min/'on kyang skad cig tu bzang po ma yin zhing tshod ma la sogs pa med pa brnyas pa byas pa nyid ni btsan thabs su nang du zhugs pas rdeg pa la sogs pa byas pas so/ /zhugs kyang nyin phyed 'grangs pa byin pas so/ /byang chub sems dpa'i sbyin pa bshad de/sems can zhes bya ba la sogs pa'o/ /'di tsam la ster zhes 'bum mam sa ya la sogs pa'i grangs khungs med la/ bskal pa stong la sogs par byin nas de'i rjes mi ster zhes dus kyi nges pa yang med de/ nam mkha' dang mnyam pa'i skye bo rnams ma zad kyi bar sbyin pa gang yin pa de ni 'dzad pa med do//sems can gtan nas zad mi srid pa'i phyir ro/ /'gro ba mtha' dag sangs rgyas par gsungs pa dang 'gal zhe na ma yin te drang don yin pa'i phyir ro/ /de dbugs ma phyin pas chos la brtson pa mi byed pa'i phyir ro/ /gang gi phyir gsungs pa/phyogs bcu'i zhing khams rnams la rdul phra rab ji snyed pa de'i grangs dang mnyam pa'i sems can ngan song du skye la/ sen mo med pas mthe bo dang sdigs mdzub kyi rtse mos blangs pa'i rdul phra rab kyi grangs dang mnyam pa'i sems can ni bde 'gror skye ste/ de bas kyang nyung ba smon pa'i sems bskyed/de bas kyang shin tu nyung ba phyir mi ldog par 'gyur zhes ji ltar sangs rgyas par 'gyur ro/ /sbyin pa'i dngos po de yang tshad dang ldan pa ma yin te/ 'on kyang sems can thams cad kyis gang la gang 'dod pa'i dngos pos yi rangs shing shin tu bkur te/sbyin mkhan byang chub sems dpa' de la mchod pa gang zhig mi 'os so/ /na ra ya nas zhus pa las gsungs pa/ dngos po gang la gtong ba'i bsam pa mi skye ba de ni gzung bar mi bya'o/ /bdag nyid kyang btang zin pa'i phyir ro zhes bya ba la sogs pa'o/ /de ltar gzhan la phan pa dang bde ba byed pa'i brtul zhugs can la ma dad par mi bya'o zhes smras pa/gang zhig ces pa la sogs pa'o/ /dus thams cad du bde ba thams cad sems can la ster mkhan rgyal ba'i sras la ngan sems bskyed pa'i sems can de dmyal bar gnas par 'gyur ro zhes mgon po sangs rgyas kyis gsungs so//dus ji srid du zhe na/ ngan sems kyi grangs ji tsam byas pa de tsam bskal par ro/ /rab tu zhi ba rnam par nges pa las gsungs pa/ byang chub sems dpa' la sdang sems ji tsam bskyed par byas pa de tsam des bskal par go bgos pa dang /dmyal ba chen por gnas par bya'o/ /'o na de bzhin gshegs pa la ngan sems kyis khrag phyung bas kyang bskal pa gcig dmyal bar gnas par bshad pa dang 'gal zhe na ma yin te/ gdul bya'i dbang gis de drang don yin gyi sgrib pa ma lus pa dang bral ba'i phyir ro/ /yid dang ba la ji ltar zhe na/smras pa/ 'on te la sogs pa'o/ /gang zhig de la yi rang bar byed pa de'i yi rangs pa'i grangs ji snyed pa grangs de bas lhag pa'i bskal par bde ba myong bar 'gyur ro/ /nges pa dang ma nges pa la 'jug pa'i phyag rgya'i mdo las gsungs pa/ phyogs bcu'i 'jig rten gyi khams na gnas pa'i sems can long ba thams cad la mig sbyin pa gang yin pa de bas kyang grangs med pa'i bsod nams thob/gang zhig theg pa chen po la mos pa'i byang chub sems dpa' yi rang bar lta'o zhes bya ba la sogs pa'o/ /'on kyang rdzu 'phrul chen po dang ldan pa de la byams pa bsgoms pa la sogs pa'i mthus gzhan gyi gnod pas mi tshugs pas sdig sems la do gal chen po dgos te mi srid do//'jam dpal gyi rnam par thar pa las gsungs pa/ rin po che'i rgyal po yid bzhin nor bu can dang / /gtsug tor dang ldan pa'i byang chub sems dpa' chen po rnams la ngan song dang /pha rol gyi gnod pa'i 'jigs pa med do zhes so/ /dge ba ngang gis 'phel zhes pa ni rtag tu thams cad kyis 'dod pa ma grub par byas pas de dag la dga' ba dang yi rang ba la sogs pa 'bad pa med par 'byung ngo / /shin tu dang ba ston par byed de/gang la zhes bya ba la sogs pa'o/ /de ltar yon tan dpag tu med pa dang ldan pa byang chub kyi sems gang la skyes pa de dag gi lus la phyag 'tshal lo/ /khyad par bshad de sems can gyi bde ba la brtson pa gang la gnod pa yang bde bar 'brel pa/ ji ltar byams pa'i stobs kyi skyes rabs las lnga sde'i dbang du byas te gsungs pa'o//byang chub sems dpa'i smon lam las kyang / gang dag nga la kha zer ram zhes bya ba la sogs pa'o/ /yang na gzhan gyis gnod pa byas pa yang bu gces pas byas pa bzhin du bde ba'i 'brel pa can yin no/ /de ltar bde ba thams cad kyi rgyu yin pas brten par 'chad de/'jig rten dang 'jig rten las 'das pa'i bde ba'i 'byung gnas de la skyabs su mchi/ byang chub ni gnyis dang bral ba'i sems so/ /de'i slad du sems ni sangs rgya bar 'dod pa ste/ de'i phan yon ni 'bras bu bsngags pa ste de bshad pa'i gzhung la yang der brjod de nye bar gcod pas so//byang chub spyod pa la 'jug pa'i byang chub sems kyi phan yon gyi le'u'i dgongs pa'i 'grel pa khyad par gsal byed ces bya ba las le'u dang po'o// //dal 'byor rnyed par dka' ba dang mi rtag par shes nas byang chub sems kyi yon tan thams cad thos te/byang chub tu sems bskyed pa'i phyir de'i yan lag tu gyur pa sangs rgyas la sogs pa la ston pa gzhan gyis 'chad mi nus pas bla na med pa yan lag bdun pa'i mchod pa 'khor gsum du rang bzhin med pa dang / byang chub tu bsngos pas bsod nams kyi tshogs bshad de/ rin chen sems zhes bya ba la sogs pa'o/ /'chad pa'i phan yon dang ldan pa'i byang chub kyi sems rin po che bskyed pa'i phyir/ de bzhin nyid du gshegs pas de bzhin gshegs pa rnams la bdag gis mchod par bgyi'o/ / dam pa yang yin la chos kyang yin pas dam pa'i chos/ yang na dam pa rnams kyi chos yin pa ste/ de yid bzhin gyi nor bu lta bu sgrib pa dang bral bas dri ma med pa dang / ma rig pa mtshan mo'i gnyid las sangs pas sangs pa ste 'dis spangs pa phun sum tshogs pa bshad do/ /yang na blo rgyas pa ste pad+ma rgyas pa bzhin thams cad mkhyen pas/ye shes phun sum tshogs pa bshad do/ /de'i sras ni 'phags pa spyan ras gzigs dang / 'jam dpal la sogs pa ste/ de dag ces pas phyir mi ldog pa'i dge 'dun bstan to/ /dang gi sgra ni 'dus pa'i don to/ /legs pa ni 'khor gsum du rang bzhin med pa ste/mchod pa'am gzung ba'i bye brag go/ /de dag ji lta bu zhe na/ dgongs pas ni yon tan te/ de dag gi rgya mtsho ni yon tan rin po che'i 'byung gnas te/ de dag rnams la'o/ /da yid kyi mchod pa bshad de/ phyogs bcu'i 'jig rten du bdag gir ma byas pa me tog rnams ji snyed pa/dzA ti dang / tsam pa ka dang / mya ngan med pa la sogs pa dang / dpal 'bras la sogs pa'i shing thog dang / sman gyi bye brag dang / nor bu dang / mu tig dang / byi ru la sogs pa'i rin po che dang / yan lag brgyad pa'i chu dang / yid du 'ong ba ni kun dang sbyor ro//nam mkha' rab 'byam khams kyi mthas gtugs pa/ /yongs su gzung ba med pa de dag kun/ /blo yis blangs nas thub pa skyes kyi mchog/ /sras dang bcas pa rnams la legs 'bul lo/ /zhes kun dang sbyar ro/ /rin po che'i rang bzhin ri dang de bzhin ni 'dus pa'i don to//bshad pa las gzhan nags tshal gyi phyogs nyams dga' ba dang dben par rung ba ste rjes su mthun pa'o/ /mdzes pa'i me tog kho na rgyan te/ des spras pa'i lcug ma rnams dang / kha dog dang dri dang ro phun sum tshogs pa'i 'bras bu rnams kyis 'dud pa sa la nye bar gyur pa'i yal ga gang gi yin pa de lta bu'i ljon shing dang /lha ni sum cu rtsa gsum pa la sogs pa ste/ sogs pa'i sgras klu'i 'jig rten la sogs pa ste/ der dri ni gla rtsi la sogs pa dang / spos ni a ka ru la sogs pa dang / dpag bsam gyi shing ni ba ri dz+nya da la sogs pa dang / rin po ches spras pa'i ljon shing dang /chu las skyes pas na chu skyes pad+ma ste/ de nyid rgyan gang yin pa de dang / ngang pa rnams kyi skad kyis yid du 'ong ba'i rdzing bu dang / thong bas ma rmos pa dang sa bon ma btab par skyes pa'i lo thog ni 'bras la sogs pa dang / gzhan ni ma bshad pa ste mchod par bya ba'i rgyan ni nam mkha'i mthas gtugs pa de dag thams cad sus kyang bdag gir ma byas pa/yid kyis gzung ste thub pa skyes kyi mchog dang / byang chub sems dpa' rnams la 'bul lo/ /'di dag thams cad yon gnas dam pa dang / bkren zhing sdug bsngal ba dag la shin tu thugs rje can bdag rjes su 'dzin pa'i phyir bzhes par zhu/'o na 'di dag brtags pa tsam yin pas yang dag pa'i mchod par ji ltar 'gyur zhe na/ 'o na gnod sems brnab sems log lta rnams rtog pa ma yin nam de shin tu nyes spyod du bshad pa ci/ rang gi nor ci ste mi 'bul zhe na/ smras pa/ bdag ni zhes pa la sogs pa'o/ /sngar bsod nams ma bsags pas bkren pa chen por gyur/ phun sum tshogs pa ni bsod nams kho na las 'byung na yid kyi mchod pa las gzhan bdag la cung zad kyang ma mchis so/ /de bas bdag gi bsod nams 'phel bar bya ba'i phyir/ gzhan la phan pa'i thugs dang ldan pa'i mgon po rnams kyis 'di dag rang gi mthus bzhes su gsol//rang gi dbang du gyur pa bdag nyid yod pa ni 'bul lo/ /thams cad kyi sgo nas ltos pa med par 'khor gsum du rang bzhin med bzhin du nyon mongs pa las rgyal bas rgyal ba rnams dang de sras rnams la'o//kye sems dpa' mchog rnams bdag ni yongs bzhes shig /khyed kyi 'bangs su mchi bar bgyi/ gus pas te 'tsho ba'i phyir ro/ /da byas pa'i yon tan bshad de/ khyed kyis gzung bas bdag nyid chen po brten pas 'jigs pa med cing 'khor bar sems can rnams la phan par bya'i/yang gi sgra ni 'dus pa'i don to/ /sngar byas pa'i sdig pa rnams 'gyod pa la sogs pas dag par byed pa dang / phyin chad sdom pa'i tshul du slar mi byed par dam 'cha'o/ /da ni rim bzhin mchod pa'i khyad par bshad de/ khrus zhes bya ba la sogs pa'o/ / rang rang gi gnas nas yid kyis spyan drangs pa rnams la ngal ba gso ba'i phyir lta bur rin po che 'bar ba'i ka ba yid du 'ong ba dang / steng du mu tig gi dra ba dang dra ba phyed pa'i bla re bres pa dang / dri ma med pa'i 'od dang ldan pa'i gser gyi sa gzhi dang / dri zhim pa'i khrus kyi phyir byas pa'i khang bzangs la yid du 'ong ba'i dri'i chu dang /me tog gis gang ba'i bum pa rin po che las byas pa stong phrag du mas de bzhin gshegs pa rnams dang / byang chub sems dpa' rnams la khrus bya ste glu dang rol mo sngon du 'gro bas so/ /de rjes khrus chu phyi ba bshad de/ dri ma thams cad bkrus te/ a ka ru la sogs pas bdugs te reg bya 'jam par bya ba'i phyir ras bal dang bcas pa'i na bzas rgyal ba la sogs pa'i sku phyi bar bya'o//de rjes shin tu mngar ba'i bdug spos kyis bdug pa'i na bza' de dag la 'bul lo/ /lha'i yul nas byung ba srab cing 'jam pa kha dog sna tshogs pas mdzes pa'i na bza' dang /de dang de'i rgyan gyi mchog mgul rgyan dang / dbu rgyan dang / dpung rgyan dang / phyag gdub dang / zhabs gdub la sogs pas kun du bzang po dang / byams pa dang / 'jam dpal dang / 'jig rten dbang phyug la sogs pa rgyal sras rnams la brgyan par bya'o/ /de rjes sku la byug pa bshad de/stong gsum zhes bya ba la sogs pa'o/ /gling bzhi pa dang nyi zla dang / /ri rab dang ni 'dod lha dang / /tshangs pa'i 'jig rten stong la ni/ /stong ni spyi phud yin par 'dod/ /de stong la ni stong gnyis yin/ /de stong la ni stong gsum ste/ /gling bzhi pa sa ya brgya phrag gcig tu 'gyur ro//de dag bro bas khyab pa'i dri mchog gnod sbyin gyi 'dam dang / ha ri tsan+dan la sogs pas de dag byug par bya'o/ /de dag ji lta bu zhe na/ sbyangs pa ni nang gi dri ma mes dag par byas pa dang / ro sa ni'i nor bus bdar ba dang / tsha dang skyur mo la sogs pas phyi rol gyi dri ma legs par bkrus pa'i gser gyi 'od zer bas gsal ba thub dbang gi sku rnams la'o//de rjes man da ra ba dang / ma hA man da ra ba dpag bsam shing gi me tog dang / ut+pal sngon po dang / dbyar gyi ma li la sogs pa dri bzangs kyi me tog snying la sdug pas mchod gnas mchog thub dbang rnams la mchod par bgyi/bkod pa'i khyad par gyis yid du 'ong ba'i phreng bas kyang ngo / /me tog gi rjes su spos bshad de/ dri'i ngad kyis phyogs khyab cing yid du 'ong ba'i dri gang gi yin pa de lta bu'i bdug spos sprin lta bu ste nam mkha' khyab pa'i phyir ro/ /des de dag la bdug par bya'o/ /bdug spos kyi rjes la zhal zas bshad de/zhal zas zan la sogs pa dang / bza' ba ni sos gcad par bya ba dang / btung ba ni bu ram gyi chu la sogs pa ste/ lha bshos sna tshogs pa de dag la 'bul lo/ /lha bshos kyi rjes su mar me bshad de/ gser las byas pa'i pad+ma'i phreng ba'i steng du rin po che'i rang bzhin snang gsal rnams de dag la 'bul lo//de rjes me tog sil ma dgram par bshad de/ tsan+dan dang gur gum la sogs pa'i dris byugs pa'i sa gzhi bstar ba la/ yid du 'ong ba'i me tog sil ma dgram par bya'i/ yang dag par mchod pa rnams la rang rang gi gnas su gshegs pa'i phyir bzhin du gzhal yas khang yang bstod par bshad de/nor bu dang mu tig gi phreng ba 'phyang bas mdzes pa gang yin pa de lta bu'i gzhal yas khang kho na sprin te mang ba'i phyir ro/ /de ji lta bu zhe na/ gzi brjid can phyogs rnams kyi rgyan du gyur pa bstod pa'i rang bzhin gyi glu gang yin pa yid du 'ong ba sems can thams cad la byams pa'i bdag nyid can la dbul bar bgyi'o//de rjes steng bsil bar bya ba'i phyir gdugs bshad de/ rin po che las byas pa nyi ma'i drod las skyob pas gdugs shin tu mdzes pa mu tig gi phreng ba dra ba dang dra ba phyed pa mtha' mar 'phyang ba/gser gyi yu ba yid du 'ong ba 'greng ba de bzhin gshegs pa rnams la gzung bar bya'i/ mchod pa rnam pa mang po mdzad pas gnas la dad pa 'phel bar bya ba'i phyir te/ gnas ma yin pa khyab 'jug la/ b+ha la zhes bya ba lha ma yin gyi rgyal pos sa gzhi thams cad phul nas sa 'og ri rab kyi khong gseng du btson thob po//b+ha la sbyin bdag mchod gnas khyab 'jug ste/ /sbyin rgyu sa gzhi rta yi sbyin sreg dus/ /ri rab khong du btson ni 'bras bu ste/ /rgyal ba mu stegs khyad par stos shig ang / /lam du gshegs pa na de rjes lha la sogs pas byas pa'i mchod pa'i sprin rnams rjes su 'gro bar 'gyur/de ji lta bu glu dang rol mo dang gar gyi sprin yid du 'ong ba sems can thams cad spro ba skyed cing de ltar rgyal ba mthong nas dang ba bskyed pa'o/ /gshegs par bzhed pa rnams gshegs par byas nas gnas pa rnams kyis mchod pa bshad de/ gsung rab bcu gnyis chos rin po che dang /rgyal ba'i mchod rten rnams dang / sangs rgyas dang byang chub sems dpa'i sku gzugs rnams la me tog sna tshogs pa dang / rin po che sna bdun gyi phye ma'i char dang / sogs pa'i sgras tsan+dan phye ma dang / na bza' la sogs pa'i char rgyun mi chad par gyur cig//mchod par bya ba la sogs pa dmigs nas mchod pa ni ma dag pas ji ltar bla na med par 'gyur ba'i thabs bshad de/ 'jam dpal la sogs pas chos nyid rtogs te shes bzhin pa'i dang bas rgyal ba rnams la mchod pa ltar/ bdag gis de bzhin gshegs pa dang de sras rnams la mchod par bya'o//bstod pa bshad de dbyangs ni/ ni ShA da la sogs pa bdun te/ de dag gi dbye ba ni ka mo da la sogs pa/ de mang bas rgya mtsho ste de dag gi yon tan mi zad pa la bstod par bya'o/ /bstod pa'i dbyangs kyi sprin ji lta ba bzhin du nges par 'byung bar gyur cig / bstod pa'i cho ga 'di yang dam tshig gsum bkod pa'i rgyal po las shes par bya'o/ /bstod pa rdzogs nas phyag bshad de/ phyogs bcur gnas pa'i zhing khams kyi rdul phra rab kyi grangs dang mnyam pa'i phyag gis phyogs bcur 'das pa dang / da ltar ba dang / ma 'ongs pa'i sangs rgyas dang chos dang dge 'dun la phyag 'tshal lo//bcom ldan 'das mya ngan las 'das pa'i pur sbyangs pa'i thab las byung bas mchod rten dang por bzhengs/ phyis gzhan du yang 'byung ngo / /de dag kun ni steng dang 'og dang phyogs mtshams su gnas pa rnams dang / byang chub sems dpa'i gzhi ni skyes rabs la sogs par bshad pa'i skye ba'i gnas rnams dang /mkhan po dang brtul zhugs rnams la phyag 'tshal lo/ /phyag byas nas sems bskyed pa'i thun mong ma yin pa'i rgyu skyabs su 'gro ba bshad de/ sangs rgyas dang chos dang byang chub sems dpa'i dge 'dun la skyabs su mchi zhes te/skyabs su 'gro ba ni sdom pa'i sgor gyur pa ste/ 'jigs pa med pa'i lam bstan pas/ sangs rgyas la ston par khas len ston par khas ma blangs na de'i bka' la dad par mi 'gyur ro/ /sdug bsngal thams cad shin tu zhi bar mdzad pa'i don dam pa'i chos mngon sum du bya bar khas len/de rjes grub pa la 'jug pa'i phyir ro/ /phyir mi ldog pa'i byang chub sems dpa'i dge 'dun 'jigs pa med pa'i gnas su 'dren pa po brten par bya bar khas len/ de lta min na de dag gi rjes su ji ltar slob/ byams pas gsungs pa/ sangs rgyas nyid ni skyob pa ste/ /nyon mongs pa yi tshogs kun dang //nyes spyod kun dang rga shi las/ /thabs min ngan song gnod kun dang / /theg pa dman dang 'khor ba las/ /de phyir skyabs ni bla na med/ /ces so/ /snying po ni gtso cher gyur pa'i don te/ deng nas brtsams te byang chub ma thob kyi bar du 'khor gsum rang bzhin med par bskyab par bya'o//skyabs su song ba'i rjes su sdig pa bshags pa bshad de/ sangs rgyas rnams ni mngon sum spyan/ /bstan pa dag kyang bsrung bar mdzad/ /thams cad de yi mngon gyur te/ /bdag ni de dag mdun na gnas/ /zhes bsams nas thal mo sbyar ba ni lus kyi rnam par rig byed/ gsal ba ni ngag gi rig byed/ de gnyis kyis sangs rgyas la sogs pa la shin tu gus par bstan to/ /ci gsol zhe na/ smras pa/ gang la thog ma med pa de ni thog ma med de 'khor ba dang skye ba 'di nyid du bya ba dang bya ba ma yin pa mi shes shing phyugs lta bu bdag gis zhes pas rang sun 'byin pa'o//byas pa ni rang gis te byed du bcug pa ni gzhan no/ /gzhan gyis byas pa la legs par byas so zhes rjes su yi rang ba ni rang nyid rang gsod pa'i phyir te/ de'i 'bras bu rang la smin pa'i phyir ro/ /gti mug gi 'khrul pas ni nyon mongs pa kun tu 'gro bas so/ /'dod chags la sogs pa'i dbang gis lus ngag yid kyi sgo nas rigs pa las 'da' bar byas pas sdig pa ste/de mthol bar bya ba'i mgo la gzhag pa'i ras la me 'bar ba na/ de myur du sgyur ba ltar 'gyod pas gdung zhing mthol bar bya'o/ /bye brag bshad de/ dkon mchog gsum bla na med pa'i yon tan gyi zhing dang /pha ma phan 'dogs pa'i zhing dang / bla ma yon tan can dang / bshad pa las gzhan rnams la lus la sogs pas/ gnod pa byas pa de bshags par bya'o dang sbyar ro/ /sems sgyur bar byed pas na nyes pa ste 'dod chags la sogs pa'o/ /de dag gis skyon chags pa sdig can bdag gis shin tu mi bzad mnar med dmyal ba'i rgyu 'dren pas so//zhes bos nas bshags par bya'o/ /'gyod cing smras te/ ji ltar thabs gang gis de las thar bar myur du bskyab tu gsol/ cis myur bar 'dod ce na/ sdig pa ma zad par 'chi ru dogs pa'o/ /gzhan du na ngan 'gror ltung ba'i phyir ro//gang gi phyir 'chi bdag ni 'dis byas 'dis ma byas zhes rtog par mi byed cing yid brtan 'joms pa po mi na ba ni bdag dar la bab pa'am nad med dam stobs dang ldan pas dang / nad pas ni de las log pas yid gcugs par mi rung ngo / /gang gi phyir 'di las byung zhes ma rig cing thog 'bab pa bzhin no//'o na ci ste byas she na/ smras pa/ mdza' ba ni bdag dang bdag gi ba'o/ /mi mdza' ba ni de la gnod pa'o/ /mdza' ba la phan pa dang bde ba/ mi mdza' ba la de las bzlog pa'o/ /de'i phyir gsod pa la sogs pa lan du mar byas so/ /mi rtag pa bdag gi mdza' bo la sogs pa thams cad spangs te/'chi bar 'tshal zhes rmongs pas ma rig go/ /mi mdza' ba rnams dang mdza' ba rnams dang bdag dang de phyir bsags pa thams cad rang gi ngang gis 'jigs par 'gyur bas/ de'i slad du sdig pa mi rigs zhes mi shes pas so/ /ji ltar rmi lam du mthong ba nyams te phyis blta ru med/de la dran pa tsam 'byung ste/ de ltar gzhan yang dngos po de dang de gang myong ba de skye ba 'di nyid du mi brtan pas dran par bya ba tsam ste/ de'i ched du bdag gi bar brtags nas sdig pas ci zhig bya/ tshe 'di nyid du bdag yod bzhin du mdza' ba dang mi mdza' ba du mas so//de dag gi ched du bdag gis byas pa'i sdig pa dmyal ba'i rgyu mi bzad pa bdag gi mdun du gnas te de dag dang 'grogs te mi 'gro'o/ /'o na khyod ji ltar rmongs she na/ smras pa/ bdag su'i yang nye du ma yin zhing bdag gi nye du yang gang yang ma yin pas glo bur ba yin zhes ma dpyad pas/bdag gi ba la rjes su chags pa dang / de las bzlog pa la sdang bas sdig pa du ma byas so/ /ma 'jigs shig khyod tshe ring ba yin zhe na/ smras pa/ nyin mtshan du tshe rtag la nang du zhugs pa med pas bdag ci ste 'chi bar mi 'gyur/ skye ba phyi ma ni lta zhog /skye ba 'di nyid du nad kyis gzir bas nyal ba gnyen bshes kyis mtha' ma bskor ba dag gcig pu kho nas srog gcod pa'i sdug bsngal dang / sogs pa'i sgras gdung ba dang skom pa la sogs pa bzod par bya'i/ nye du la sogs pas cung zad kyang mi myong ngo / / 'o na ci ste gzhan gyi don du 'jug ce na/ ma yin te 'dir gti mug sdig pa'i rgyu yin pas de bsal bar bya ba'i rigs pa 'di dag yin gyi/ 'dod chags dang zhe sdang dang gti mug pas ni gzhan don du 'jug pa'o/ /skye ba phyi ma la nye du la sogs pa'i phan pa nam yang med par bshad de/ 'chi bdag gi pho nyas zin pa/ zhags pas mgul pa bcings pa tho bas phyis brdung ba tsher ma dang rdo gshag mas zug pa las kyi sa gzhi ru khrid pa gcig pu la gnyen dang bshes kyis ci phan/ de tshe bsod nams gcig pus skyob pa yin te/ de ni bdag gis ma bsags so/ /gzhan gyi rkyen bshad nas rang gi rkyen 'chad de/mi rtag pa nyams pa'i rang bzhin srog la chags pas ma 'ongs pa'i dmyal ba la sogs pa'i 'jigs pa mi shes bzhin du lang tsho dang nor dang dbang la sogs pa'i nga rgyal gyis bag med pa bdag gis/ kye mgon po rnams sdig pa mang du bsags so//de ltar 'gyod pa cis she na smras pa/ dmyal ba'i sdug bsngal bas kyang rkang pa dang lag pa gcod pa'i sdug bsngal shin tu chung ste/ de'i slad du khrid kyang lus bskam pa dang / kha skom pa dang mig rtsa ngan pas 'gro ba bzlog pa mthong / 'jigs su rung ba'i gzugs can de dag gshin rje'i pho nya dag gis zin pa 'jigs pa chen po las byung ba'i nad kyis gzir ba bred cing bshang ba 'dor bas lus po 'khyig pa'o//'o na sdig pa bshags pa de'i rgyu mtshan la sogs pa smos pas ci byed ce na/ ma yin te ma spyad pas sdig pa 'byung gi spyod pa po la mi 'byung /chos rnam par 'byed pa med par gang gi phyir/ nyon mongs pa rnams zhi bar mi 'gyur bas so/ /bred pas mig bgrad nas phyogs bzhir skyabs tshol te su zhig snying rje can 'jigs pa chen po 'di las bdag gi skyabs su 'gyur zhes byas nas so/ /shin tu tsha ba la sogs pa dmyal ba'i gnas der phyogs rnams skyabs med par mthong nas yi mug pa'i tshe/bdag gis ji ltar bya ste bzlog pa'i thabs med pas so/ /de bas na da lta kho na de la phan pa bya dgos zhes smras pa/ kun tu dbugs 'byin pa blo bde ba'i gnas kun nas thogs pa med pa'i nus pa can/ sems can skyob pa'i don du byon pa/ sdug bsngal thams cad zhi bar byed pa/ rgyal ba rnams la de ring nyid du skyabs su 'gro bar bya zhes rten gyi stobs bshad do/ /chos dang dge 'dun bstan par bshad de sangs rgyas kyis rtogs pa'i chos srid pa'i 'jigs pa las skyob pa dang / phyir mi ldog pa'i byang chub sems dpa'i dge 'dun la de ring nyid du skyabs su mchi'o zhes skyabs kyi stobs dang / phyin chad mi byed pa'i stobs dang / gnyen po'i stobs dang / rang la smod pa bzhis sdig pa zad par 'gyur bas/ skyabs su 'gro ba zlos pa'i skyon med do/ /gtso che ba'i rim pas brtan pa bshad de/lus la sogs pa dag par bya ba'i phyir bdag ni 'jigs pas skrag nas kun du bzang po dang / 'jam dpal la bdag 'bul lo/ /bltas pa tsam gyis rgud pa sel bas na spyan ras gzigs thugs rje'i spyod pa ma 'khrul pa la nyam thag nga ros 'o dod 'bod/khyed kyis sdig ldan bdag la skyab tu gsol/ sdig pa las ring du song ba ni 'phags pa ste/ stong pa nyid kyi ting nge 'dzin la gnas pas nam mkha'i snying po/ /sa'i khams kyi dag pa yin pas sa'i snying po/ /gzhan yang sa bcu pa rnams la skyabs tshol bas snying nas 'o dod 'bod/gshin rje'i pho nya dang gnod sbyin dang srin po la sogs pa gzhan sdug pas dga' ba gang mthong ba tsam gyis skrag cing 'bros pa phyag na rdo rje de la phyag 'tshal lo/ /sngar mi shes pas khyed kyi bka' las 'das te sdig pa byas/ da ni chos shes pas de'i 'bras bu dmyal ba'i 'jigs pa mthong nas/khyed la skyabs su mchi lags kyi/ /'jigs pa myur du bsal du gsol/ /chos bzhi bstan pa las gsungs pa/ /stobs dang ldan pa la brten pas/ /sdig pas zil gyis gnon pa mi nus so zhes so/ /sangs rgyas kyi gsung la 'da' bar rigs pa ma yin par bshad de/thun mong rag la khad pa'i nad la 'jigs pas kyang sman pa'i tshig la 'da' bar mi byed de/ nad 'phel ba'i dogs pas so/ /bzhi dang bzhi brgya'i nad kyis zin/ /'da' bar mi byed lta ci smos/ /dus ma yin pa'i 'chi ba brgya phrag gcig ste/ dus kyi 'chi ba gcig dang bcas pa brgya rtsa gcig ste/de yang so sor rlung dang / mkhris pa dang / bad kan dang / de dag 'dus pa las byung bas bzhi dang bcas pa brgya phrag bzhi'o/ /de lta yin kyang ci zhe na/ smras pa/ gang las nad gcig 'khrugs pas kyang 'dzam bu'i gling na gnas pa'i mi rnams 'chi ste/nad gang gi gso ba'i sman mchog gang nas kyang mi rnyed do/ /'dir b+ha na shrI'i rgyal po pad+ma'i skye rabs dpe ste/ bcom ldan 'das 'di nyid 'das pa'i dus su pad+ma zhes ka shi'i rgyal por skyes te/ de'i dus su 'dzam bu'i gling gi mi thams cad nad dang bcas pas 'chi ste/de dag kun gyis byang chub sems dpa' la gsol te/ kye rgyal po chen po sems can thams cad la phan par byed kyang / bdag gi gnas skabs 'di lta bur gyur/ rgyal po dus de nyid du sman pa rnams la bka' stsal pa/ de dag gi gso ba'i bstan bcos kun bltas la/ de'i nyin mo skyes pa'i ro hi ta'i nya'i sha las gzhan ma mthong bar rgyal po la gsol to/ /de ni de'i nyin par gyes pa chu chen po gcod pa lam ma rnyed pa rnyed par dka'o/ /de bzhin du mtha' yas pa 'dod chags la sogs pa nad gcig gis kyang sems can thams cad chud gsan te/gang la sman pa thams cad mkhyen pa las gzhan gyis mi rnyed do/ /de la la lus dang yid kyi zug rngu rnams sel nus pa/ thams cad mkhyen pa sman pa'i gsung las 'da' bar byed pas bdag shin tu gti mug smad pa'i gnas shes bzhin du bka' las 'da' bar byed na bdag las gzhan rmongs pa su zhig yod ces bdag la smod pa'o//de bas na bag yod par 'tshal zhes smras te/ ri la sogs pa'i g.yang sa chung ba/ gang la rus pa 'chag pa'am 'chi ba tsam 'byung ba der yang bag yod par spyod na/ dpag tshad stong phrag gi tshad mnar med pa la sogs pa'i g.yang sa ring bar bar gyi bskal pa'i tshe dang ldan pa la bag yod par byed pa lta ci smos/ der sdug bsngal yod kyang 'dir yun rings bde ba myong bas chog ce na/ smras pa/ de ring kho na mi 'chi byas nas bde ba la re ba mi rigs te/gang gi phyir bdag 'chi ba'i tshe gang yin pa de ni mi rtag pas nges par 'byung bar 'gyur/ dbugs 'byin pa yang med par bshad de/ 'jigs par ma byed ces mi 'jigs pa sus bdag la byin/ dmyal ba'i 'jigs pa las thar ba'i thabs kyang med de/ gson pa ni 'chi ba'i mtha' ma can zhes gsungs pas/nges par 'chi bar 'gyur na bde bar 'dug pa mi rigs so/ /bde ba la re ba 'di bas kyang mi rigs par bshad de/ phreng ba dang tsan+dan la sogs pa sngar nyo ba gang yin pa de da lta med pas de'i snying po da lta ci zhig yod ce na/ de'i bde ba yang dus de nyid du nyams so//bde ba'i rgyu gang las mngon par zhen nas bdag gis bla ma'i bka' las 'das par byas/ de bas na bdag gis 'di kho na bsam par bya'i/ mi la sogs pa'i 'jig rten 'di spangs nas/ nye du rnams kyang gcig pu kho na las kyi 'phen pas mi shes pa'i gshed du 'gro bar 'gyur bas/da nye du la sogs pas bdag la ci de tshe phan pa med pas so/ /mi dge ba las sdug bsngal nges par 'byung zhes bsams nas phyin chad sdom par 'gyur/ de nas sngar byas pa las nges par ji ltar thar zhes bsams pas bshags pa la sogs pa 'byung /de bas nyin mtshan med par bdag gis 'di nyid bsam par rigs so/ /bsam pa'i 'bras bu bshad de/ byis pa mi shes pa gti mug gis ldongs pa bdag gis lus la sogs pas gang byas pa rang bzhin gyi kha na ma tho ba mi dge ba bcu dang / brtul zhugs can la bcas pa'i kha na ma tho ba dus ma yin pa'i kha zas la sogs pa/de dag thams cad bshags par bya/ /sangs rgyas dang byang chub sems dpa' rnams kyi mdun du thal mo sbyar la/ 'byung bar 'gyur ba'i sdug bsngal la 'jigs shing yang dang yang du phyag byas nas so//sdig pa 'di ni bdag gis byas/ /zhes khas blangs nas bshags par bya'o/ /gzung du gsol zhes pa ni bdag gis 'chab sems med par bshags par byas pa dgongs su gsol/ phyin chad sdom pa bshad de/ rnam par smin pa mi bzad pas bzang po ma yin/ dus 'di nas brtsams te slar mi bya'o//bla ma la sogs pa la bshags pa byed na bshags pa byas pa'i rjes su des dris te de ltung bar mthong ngam/ des mthong lags zhes brjod par bya'o/ /yang bla mas phyin chad sdom mam dris pas des sdom lags zhes brjod par bya'o/ /bshags pa mang du gsungs pas de'i le'u gnyis pa'i dgongs pa'i 'grel pa khyad par gsal byed ces bya ba le'u gnyis pa'o// //rjes su yi rang ba bshad de/ rigs drug la 'khor ba'i so so skye bos byas pa'i dge bas rjes su yi rang ngan song sdug bsngal ngal so ba ni 'bras bu phyung nas dge ba zad pa yin pas dus 'ga' zhig ngan song du mi ltung bas so//'jig rten gyi dge ba ni srid pa'i 'bras bu can kho na'o/ /'jig rten las 'das pa ni 'dzad pa med pa'o/ /'jig rten chos rnams sangs rgyas kyi/ /chos rnams dang ni rgyang ring ngo / /zhes gsungs pas so//rjes su yi rang ba ni gsum ste/ sems dang bas yid kyi dang / ba spu ldang ba dang mchi ma 'byung ba la sogs pas lus kyi dang / legs par byas so zhes pa la sogs pas ngag gi'o/ /dge ba byas pa de dag mi shes pas sdug bsngal ba rnams bde bar gyur cig ces smon lam mo//'jig rten las 'das pa'i dge ba la rjes su yi rang ste/ sdug bsngal las thar pa ni bdag nyid kyis gzigs pa'i lam ston pas skyob pa ste sangs rgyas so/ /de'i rgyu'i gnas skabs byang chub sems dpa' nyid dang / 'bras bu'i gnas skabs sangs rgyas te de la rjes su yi rang ngo //byang chub sems dpa'i dge ba la rjes su yi rang ba bshad de/ nyon mongs pa 'chos pa rnams kyis sems bskyed mang bas rgya mtsho sems can thams cad la phan pa dang bde ba mdzad pa la rjes su yi rang ngo / /chos bstan pa'i phyir gsol ba bshad de/ phyogs bcu dus gsum gyi de bzhin gshegs pa rnams la gsol ba gdab ste thal mo sbyar zhing mi shes pa'i mun pas bsgribs pas sdug bsngal gyis gdungs pa rnams la chos kyi sgron gsal mdzad du gsol zhes so//mya ngan las mi 'da' bar gsol ba bshad de/ bya ba byas pa'i phyir mya ngan las 'da' bar bzhed pa'i rgyal ba rnams la bskal pa mtha' yas par bzhugs par gsol te/'gro ba 'di dag blang bya dang spang bya mi shes par ma gyur cig/ /ston pa po med pa'i phyir ro/ /bsngo ba bshad de/ de ltar mchod pa dang phyag dang gsum la skyabs su 'gro ba dang sdig pa bshags pa dang rjes su yi rang ba dang gsol ba gdab pa ste/yan lag bdun pa bla na med pa'i mchod pa byas la/ dge ba bdag gis gang thob pa des sems can thams cad kyi sdug bsngal zhi bar byed nus par bdag gyur cig /thun mong du bshad cing bye brag bshad de/ des kyi sgra ni kun dang sbyar ro/ /nad pa rnams kyi sman du bdag gyur cig /ji ltar dge bsnyen ma byang chub sems mas/ rang gi sha dron gcod cing dge slong cig nad gsor mi rung ba la drangs pas de las grol bar byas pa'o/ /nad g.yog kyang bdag gyur cig /dus ji srid kyi nad de slar mi ldog pa de srid du'o/ /bkres pa dang skom pa'i nad la bza' ba dang btung ba byin nas bdag gis sel nus par gyur cig /bskal pa mtshon dang nad dang ni/ /mu ge dag gis mthar 'jig go/ /gang la 'jig rten tshe lo bcu pa'i dus der bza' btung med pas/ sha dang rus pa phan tshun du za ba'i dus der bdag bza' ba dang btung bar gyur cig / nor med pas bkren pa rnams la 'dzad pa med pa'i gter du bdag gyur cig /de dag gi mdun du gnas shing rnam pa sna tshogs pa mal dang / bza' ba dang gos dang gdan la sogs pa 'bul zhing nye bar gnas pa'o/ /rdo rje rgyal mtshan gyi mdo las gsungs pa/ dge ba'i rtsa ba 'dis bdag sems can thams cad kyi skyob par gyur cig ces bya ba la sogs pa mang ba'o//sems bskyed pa'i cho ga la nus pa ji lta ba bzhin du sbyin par byed pa bshad pas/ bsod nams kyi tshogs thun mong ma yin pa'i yan lag yin pas bshad de/ dus 'di nas brtsams te byang chub kyi bar du 'gro ba'i ris kun du bdag gi lus rnams dang /de bzhin du ris kun du longs spyod pa'i rdzas rnams rta dang glang po shing rta la sogs pa dang / 'jig rten dang 'jig rten las 'das pa'i dge ba 'das pa dang ma 'ongs pa dang da ltar ba de'i 'bras bu la ltos pa med par sems can thams cad kyi don bsgrub pa'i phyir gtang bar bya'o//blo gros mi zad pa'i mdo las gsungs pa/ dge ba rjes su dran pa de nas byang chub tu bsngo ba 'di ni 'das pa la mkhas pa'o zhes bya ba la sogs pa mang ba'o/ /yongs su bzung ba'i rtsa ba can srid pa'i sdug bsngal las grol bas grol zhes brjod de ser sna sel ba'i phyir bshad pa zag pa dang bcas pa bdag nyid la sogs pa thams cad btang bas mya ngan las 'das pa ste/bdag gi sems kyang mya ngan las 'da' bar 'dod de/ mya ngan las 'da' ba'i dus su gal te lus la sogs pa cis kyang gtong na de'i tshe sems can rnams la btang ba mchog yin no//de bas na sems can thams cad kyi don du ji ltar 'dod pa ltar bsgrub pa'i phyir bdag nyid btang bas ji ltar 'dod pa bzhin du dbyug pa la sogs pas rdeg pa dang / tshig ngan gyis smod pa dang / sa rdul gyis g.yogs pa dang / 'dod pa bzhin du byed du 'jug//byis pa yin pas bdag gi lus kyis rtse ba dang / rol pa dang / co 'dri ba dang / ga zha dang bdag gis kun nas lus 'bul bas/ de dag gi mnyam pa dang mi mnyam pa'i bsam pas bdag la dgos pa ci/ las thams cad kyang 'di byed du chug mi 'os pa yin te/ 'on kyang gang de dag la bde ba'i rgyu nyes spyod ma yin pa'o//gang gi phyir bdag la brten nas su la yang mi 'dod pa nam yang 'byung bar ma gyur cig /gang dag la bdag dmigs nas blo khros pa'am ma dad par 'gyur ba de dag gi 'dod pa'i don thams cad grub pa'i blo de nyid rgyur gyur cig /byang chub sems dpa'i bzod pa mthong nas dad pa skye bas so//med pa'i skyon brtags nas gang dag bdag la kha zer ba dang / gnod pa byed pa dang / phyar kha gtong ba de dag bshad pa'i rigs pa thams cad byang chub par gyur cig /gzhan yang mgon med pa rnams kyi mgon dang / lam du zhugs pa rnams kyi ded dpon dang /chu bo la sogs pa brgal bar 'dod pa'i gru dang / rags sam zam par bdag gyur cig /mun par mar me 'dod pa rnams kyi mar me dang / gnas mal 'dod pa la gnas mal dang / bran 'dod pa'i bran du gyur cig /'dod pa'i don bsgrub pa'i yid bzhin nor bu dang /lag pa nang du bcug pas ci 'dod 'ong ba'i bum pa bzang po dang / lha mo'i gsang sngags bsgrub pa las thams cad byed pas grub pa'i rig sngags dang / gcig pu nad thams cad zhi bar byed pa'i sman chen dang / brtags pa'i don kun sgrub pas dpag bsam gyi shing dang / 'dod pa'i don 'jo bas 'dod 'jo'i bar gyur cig /sa dang chu dang me dang rlung 'byung ba chen po bzhi ji ltar dmyal ba dang 'dod pa dang log rtog dang sman dang shing la sogs pa'i rten du gyur pa dang / btung ba dang khrus la sogs pa dang / 'tshed pa dang sreg pa la sogs pa dang / brkyang ba dang bskum pa la sogs pas/nam mkha' dang mnyam pa'i sems can rnams kyi longs spyod sna tshogs par gyur cig /de ltar nam mkha' dang mnyam pa'i sems can gyi bdag longs spyod du gyur cig /sems can thams cad ji srid mya ngan las 'das kyi bar zhes blo gros mi zad pa'i mdo las gsungs so//de sems rin chen zhes pa nas brtsams te/ de dag thams cad byang chub mchog tu sems bskyed pa'i sbyor ba ste/ sangs rgyas la sogs pa la nus pa bzhin du mchod pa byas te/ lus phul la byang chub sems kyi phan yon shes nas skyabs su 'gro ba byas te/dal 'byor rnyed par dka' ba go nas sdug bsngal ba'i sems can rnams la snying rje bskyed de/ gang tshe bdag dang gzhan gnyis ka / sdug bsngal mi 'dod mtshungs pa la/ /bdag dang khyad par ci yod na/ /gang phyir gzhan min bdag srung byed/ /ces bdag gzhan la khyad par med par rtogs te rang gzhan gyi/sdug bsngal thar bar byed 'dod cing / /bde ba'i mthar ni 'gro 'dod pas/ /dad pa'i rtsa ba brtan bya zhing / /byang chub la yang blo brtan bya/ /zhes gsungs pas byang chub sems dpa'i sdom pa tshigs bcad gnyis 'don cing len pa'o//de ji ltar la sogs pa ste/ byang chub ni bag chags dang bcas pa'i sgrib pa rnams spangs nas chos thams cad mi dmigs par rtogs pa ste/ shes rab kyi le'us brjod par bya'o/ /de la sems ni de rtogs pa'i phyir 'jug pa'o/ /de med na rang dang gzhan gyi sdug bsngal zhi bar mi 'gyur ro//de sngon gyi sangs rgyas kyis ji ltar bskyed pa ltar/ sems bskyed nas bslab pa bsrung ba ltar rim pa bzhin ni las dang po pas nus pa'i rim pas so/ /de ltar bdag gis bskyed par bya/ /de dag nyid kyis bskyed pa bzhin no/ /ji ltar 'phags pa 'jam dpal gyi sangs rgyas kyi zhing gi yon tan bkod pa'i mdo las skye rabs snga ma la spyod pa dang ldan pa'i sems bskyed pa dang /mtha' dang bral ba 'khor ba yi/ /mu ni dang po ji srid du/ /de srid 'gro la phan don du/ /spyod pa gzhal med spyod par bya/ /mgon po'i mdun du yang dag pa'i/ / byang chub tu ni sems bskyed bya/ /bkren pa las ni grol bya'i phyir/ /'gro ba dag la snyan gsan 'bebs/ /deng nas brtsams te byang chub bar/ /ser sna dang ni nga rgyal dang / /zhe sdang dang ni phrag dog dag /bdag gis byed par mi 'gyur ro/ /'dod pa sdig can spangs nas su//tshangs par spyod pa spyad par bya/ /sangs rgyas rnams kyi tshul khrims dang / /brtul zhugs la yang bslab par bya/ /sdom pa 'di bud med la yang nyon mongs pa chung zhing 'gro ba la phan pa'i phyir byang chub 'dod pas skye'o/ /gzhan go sla'o/ /sbyor ba dang dngos gzhi dang rjes thob kyis las tshang bar 'gyur te/gnyis bshad zin rjes gso ba'i phyir sems gzengs bstod pa bshad pa'i rim pas bskyed la/ byang chub sems dang bas 'di ltar ni 'og tu 'chad pa'i rigs pas so/ /'khor ba thog ma med pa nas 'di lta bu'i rnyed pa med kyi ji ltar de ring gzung ba legs par thob pa ni so sor thar pa'i sdom pa 'di ni mi kho na la skye'o//bsam gtan gyi sdom pa ni lha rnams la yang ngo / /zag pa med pa'i sdom pa ni byang chub sems dpa' rnams la'o/ /skye zhes bya ba ni sems skyes pas so/ /rgyal sras ni nga rgyal khyad par can yin no/ /sangs rgyas kyi rgyun dang rjes su mthun par byed pa bdag gis de ltar bya'i/ji ltar skyon med pa ni thog ma dang bar dang tha mar dag par gyur pa la bdag gi nyes spyod kyis rnyog par mi 'gyur ba'o/ /ji ltar mig med par lam gyi phyag dar phung po las rin po che rnyed pa de bzhin du sngar gyi legs spyad las/ sangs rgyas kyis byin gyis brlabs pa'i phyir phyag dar phung po lta bu 'khor ba las long ba lta bu bdag la rin po che thob pa ltar/byang chub kyi sems ni de kho na nyid rtogs pa'o/ /'gro ba'i 'chi bdag gzhom par bya ba'i phyir/ bdud rtsi ni rgas pa dang 'chi ba bzlog pa lta bu dang / 'gro ba'i dbul ba sel bar byed pa gter 'dzad pa med pa lta bu'o//nad zhi bar byed pa grub pa'i sman lta bu dang / ris lngar 'khor bas dub pa'i 'gro ba ngal gso ba'i gnas ljon shing lta bu'o/ /ngan song gsum gyi 'dam las sgrol bar byed pa'i rigs thams cad kyi thun mong ba lta bu dang / rigs dang gzugs la sogs pa ma brtags pa'i phyir ro//nyon mongs pa'i gdung ba sel ba'i phyir shar ba byang chub sems kyi zla ba gdung ba mtha' dag sel ba lta bu'o/ /mi shes pa kho na rab rib ste/ de kho na nyid rtogs pa la sgrib pas so/ /de dpyis 'byin nyi ma chen po ste nang gi rab rib sel bas so/ /gsung rab yan lag bcu gnyis kho na 'o ma ste/thos pa la sogs pa las byung ba'i shes rab srub sbyor gyis bsrubs pa las byung ba mar gyi snying po lta bu'o/ /bde ba la longs spyod par 'dod pas ris gcig nas gcig tu rgyu ba'i bde ba'i nye gnas lta bu mi gnas pa sems can thams cad tshim par byed pa'o//sangs rgyas kyi bya ba byang chub kyi sems la btags te/ rgyu'i tshogs pa thams cad tshang bas 'bras bu bsgrubs par btags nas so/ /byang chub thob par nges pas 'gro ba la snyan gsan 'bebs par bshad de/ khyed kun bdag gis 'tshang rgya bar byed pa dang / 'tshang ma rgyas kyi gong du lha dang mi'i bde ba la longs spyod du bcug pa yin zhes 'gro ba la bdag gis de ring snyan gsan 'bebs/sangs rgyas thams cad kyi mdun du lhag pa'i bsam pa 'di la/ lha dang lha ma yin la sogs pa rjes su yi rang bar mdzod cig /byang chub sems kyi cho ga gang gis yongs su gzung ba ste/'chad par byed pa'i gzhung la yang der brjod pas byang chub kyi sems yongs su gzung ba'i le'u dgongs pa'i 'grel pa khyad par gsal byed ces bya ba las le'u gsum pa'i bshad pa'o// //sgrub pa gtso cher byed pa la byang chub 'byung bas de bsgrub pa bshad de/de ltar de ma thag par bshad pa'i byang chub kyi sems brtan par bzung nas de'i bslab pa las mi 'da' ba'i phyir/ 'bad par byas te le lo med pa'i byang chub sems dpas so/ /'phags pa ga ya mgo ri bstan pa las sgrub pa gtso che bar bshad do/ /bslab pa ni thabs dang shes rab kyi rang bzhin te/de la shes rab bzhag nas/ sbyin pa'i pha rol tu phyin pa la sogs pa lnga dang / bsdu ba'i dngos po bzhi dang / lhag par zhing sbyang ba dang / longs spyod che ba dang / g.yog 'khor phun sum tshogs pa dang / sems can smin par byed pa dang / sprul pa la sogs pa mngon par mtho ba'i rgyu ni thabs yin no//shes rab ni de dag gi rang bzhin rtogs pa'i rgyu yin no/ /de la dang po tshogs lam la spyod de/ de'i mtshan nyid ni/ so sor thar pa'i sdom pa dang / /dbang po yul la bsrung ba dang / /zas kyi tshod shes mtshan mo yi//snga phyir dge sbyor shes bzhin du/ /spyod lam thos bsam la sogs la/ /tshogs zhes 'jig rten lam yin no/ /sems bskyed nas spyad par bya ba bshad de/ bab col ni nyams dga' ba ste/ des gang brtsams pa legs par ma dpyad pa de brtsams kyang bya'am mi bya zhes the tshom rigs so//'di ni de lta ma yin te mdo sde sna tshogs pa las sangs rgyas dang byang chub sems dpa' rnams/ byams pa la sogs pa shes rab chen po can gyis/ sdong po bkod pa las/ rgyal po 'am blon po nus pa ji lta ba bzhin du bdag gis kyang gang legs par dpyad pa de la bshol du med do//gal te de ltar ma grol ba rnams dgrol ba'i slad du dbugs phyung nas dam bca' las kyis ma bsgrubs na/ de'i tshe de dag thams cad bslu bar byas la/ dmyal ba la sogs pa las gzhan bdag gi 'gro ba gang zhig ste med do/ /blo gros rgya mtshos zhus pa'i mdo las/ji ltar rgyal po 'am blon po chen pos grong rdal gyi mi rnams la nang par ston mo'i snyan gsan 'bebs te/ de'i grabs ma byas par de dag slu bar byed pa de bzhin du/ byang chub sems dpa' sems can thams cad dbugs phyung nas mang du thos pa dang byang chub kyi phyogs la mngon par mi brtson na lha dang bcas pa'i 'jig rten slu bar byed ces bya ba la sogs pa'o//dngos po cung zad kyang sbyin par bya zhes bsams nas/ gang gis mi ster ba de skye ba phyi ma la yi dags su 'gyur zhes lung las gsungs so/ /bla na med pa sangs rgyas kyi bde ba sbyin par 'gyur zhes sangs rgyas la sogs pa'i mdun du dad pa chen pos sgra bo ches bsgrags nas/de ma grub na 'gro ba mtha' dag tho 'tshams nas bde 'gror cig 'gro 'gyur ram/ dam pa'i chos dran pa nye bar gzhag pa'i mdo las kyang 'di bshad pa'o/ /chos bka' 'du ba'i mdo las kyang byang chub sems dpa' bden pa la gtsor byed ces bya ba la sogs pa'o//sems bskyed pa'i thun mong ma yin pa'i nus pa bshad de/ dngos po thams cad rnam pa thams cad du mkhyen pa bcom ldan 'das kho nas las kyi tshul bsam gyis mi khyab pa mkhyen gyi gang sangs rgyas rnams kyi mdun du/byang chub tu sems bskyed pa de yongs su spangs nas kyang sngar dam bcas pa'i yul du byas pa'i sems can rnams 'khor ba'i sdug bsngal las grol bar byed pa kho na'o/ /'o na 'di 'gal zhe na/ gang gi phyir byang chub kyi sems ni byang chub kyi rgyur bshad/ sa bon med na byang chub kyi ljon shing yang mi skye bas de'i 'bras bu sems can grol ba ga la srid/ de la brjod pa gang gi phyir byang chub kyi sems rnam pa gnyis te/ kun rdzob pa dang don dam pa'o/ de la/ sems bskyed pa ni gzhan don phyir/ /yang dag rdzogs pa'i byang chub 'dod/ / ces 'phags pa byams pas kun rdzob pa gang gsungs pa de kho na spong ba srid de/ sems can gyi ngan spyod mthong nas ldog pa'i phyir ro/ /dper na shA ri'i bu la bdud kyis phyag g.yas pa bslang bar byas pa la de bcad de g.yon pas byin pa na/ g.yon pa mi gtsang bas byin pa nga mi len zhes ma blangs pas mi rigs pa mthong na/sems can mgu bar byed pa ni mi nus pa nyid do zhes bsams na byang chub spong ba nyid do/ /byang chub kyi sems gang ni don dam pa mthong nas bdag med gnyis rtogs pa'i rang bzhin/ rim pa lnga'i le'u bzhi pa mngon par byang chub pa las bshad pa/skal ldan slob mas legs gdams thob/ /byang chub tu ni don dam sems/ /slar yang bla ma las bskyed nas/ /thal sbyar me tog gzung byas te/ /dngos po mtha' dag dang bral ba phung po dang / khams dang / skye mched dang / gzung ba dang / 'dzin pas stong pa/ chos kyi bdag med dang mtshungs pas rang gi sems thog mar ma skyes pa stong pa nyid kyi rang bzhin zhes bya'o/ /de rjes yang gsungs pa/ slob dpon bka' drin thob pa dri med blo brtan dngos po rnams kyi ngo / /dang zhing dag bral zhi ba'i rang bzhin sangs rgyas sprul pa'i khams//gnyis med rtog bral rtag tu bde ldan de nyid rnal 'byor gyis bsgom bya/ /bsod nams de min las grol bcom ldan rdo rje sems dpa' dngos skyer 'gyur/ /zhes bshad pa'i mtshan nyid can 'phags pa klu sgrub kyis gsungs pa spong mi nus so//dngos po ma yin pa nam mkha' lta bu rtogs pa tsam yin pas so/ /phan yon las/ des na dge ba nyam chung nyid la rtag /ces ni kun rdzob pa'o/ /sdig pa'i stobs mi bzad pa gang gis pham par byed pa de ni don dam pa'o/ /'khor ba'i btson ra la sogs pa'i phan yon ni 'di nyid kyi'o//dge ba gzhan kun chu shing bzhin du ni 'jig rten gyi dge ba'o/ /'di nyid dgongs nas/ sems can kun gyi ngan song gi /sdug bsngal ngal so'i dge ba dang / /zhes gsungs so/ /byang chub sems kyi ljon shing rtag par yang / /'bras bu 'byin pas mi zad 'phel bar 'gyur//zhes don dam pa'i 'o/ /bsod nams bsags pa bla ma'i gdams pa thob pa rnams kyis/ /lam 'di nyid gzung bar bya'o/ /don dam pa'i sems bskyed la dgongs nas yang gsungs pa/ ri dbang rtse nas gang rung lhung gyur na/ /bar du ltung mi 'dod kyang ltung ba nyid//bla ma'i drin gyis phan pa'i gdams thob nas/ /grol mi 'dod kyang grol ba nyid du 'gyur/ /zhes so/ /sems can gyi skyon mthong bar re zhig sems log kyang rtogs pa mi ldog pas phyis grol bar byed pa nyid do/ /gnas skabs bshad de gang gi phyir 'dis sems can thams cad sgrol bar dam bcas te/des 'di la ltung ba chung yang shin tu lci bar 'gyur te/ gang gi phyir 'di gcig pu la ltung ba byung na sems can thams cad kyi don mi 'grub pa'o/ /gang gi phyir 'phags pa byams pas gsungs pa/ sems can khur lci mgor gzhag nas//byang sems 'gro ba bul mi mdzes/ /rang gzhan tshogs rnams 'ching bas bcings/ /brtson 'grus brgya 'gyur byed par 'os/ /zhes so/ /de ltar brtson 'grus dang ldan pa la/ gang zhig gzhan skad cig tsam yang gegs byed na de'i ngan 'gro'i grangs mi nus te/ sems can gyi don 'byongs pa'i phyir ro//ngan 'gro mang ba'i rigs pa bshad de/ mi cig bsad na gsod mkhan de skye ba lnga brgyar gzhan gyis bsad nas 'chi'o/ /nam mkha' dang mnyam pa'i sems can gyi phan pa 'byongs na lta ci smos/ rab tu zhi ba rnam par nges pa'i mdo las gsungs pa/gang gcig pu 'dzam bu'i gling gi sems can thams cad bsad la nor ci yod 'phrog /gzhan ni byang chub sems dpa'i dge ba'i sems gcig la bar chad byed na/ de la de bas kyang sdig pa mang por 'gyur zhes bya ba la sogs pa'o/ /de ltar bshad pa'i rigs pas gal te de rang nyid ltung ba dang ldan par gyur na de'i tshe/de'i stobs dang brtan par 'byung ba byang chub sems kyi stobs kyi rim pas ngan song dang rab tu dga' ba'i sa la 'dren pas mi gnyis kyis 'dzin pa'i 'do li ltar/ bar du 'khor bar gnas shing sa thob pa la yun rings stug par 'gyur ro//gang gi phyir de lta ma yin pa de bas na/ ji ltar dam bcas pa bzhin du gus pas bdag gis bsgrub par bya'o/ /dal 'byor thob pa da ltar gal te 'bad pa ma byas na/ ngan song gcig nas gcig tu 'gro ba'i tshe lam ga la yod/sangs rgyas byon kyang lam mi 'thob ste/ ngan song du gnas pa mi 'os pa'i phyir bshad de/ 'khor ba thog ma med pa yin pas sems can thams cad la phan pa mdzad pa'i sangs rgyas grangs med byon cing gshegs kyang de dag gi gso ba'i spyod yul du ma gyur te rang gi nyes pas so//bdag sngon du ji ltar yin pa gal te da lta yang bslab pa la lhod pa de ltar rang byed na de'i tshe/ yang nas yang du ngan song du nad dang 'chi ba dang / rkang lag gcod pa dang / mdung dang mdas phug pa dang / sogs pa'i sgras 'ching ba dang /rdeg pa la sogs pa myong bar 'gyur ro/ /tshogs pa rnyed dkar bshad de/ u dum bA ra'i me tog lta bur sangs rgyas byon pa dang / dkon mchog gsum gnas la dad pa dang / yul dbus su dbang po tshang ba'i mi lus thob pa dang / lus dang sems las su rung ba nam zhig thob par 'gyur te rnyed par dka' bas so//nad dang bral ba'i dus dang zas dang gos rnyed pa sla ba dang / rgyal po dang chom rkun la sogs pa'i gnod pa med pa ni nam thob par 'gyur zhes bya ba dang sbyar ro/ /thob nas kyang lhod par mi bya zhes bshad de/tshe ni skad cig gis slu ba ste/ ji ltar gzhan gyi nor brnyas pa yun rings mi gnas pa ltar lus po ste mi rtag pas gzung ba'i phyir ro/ /de bas da lta 'bad pa ma byas na slar mi lus dge ba la spyod pa 'di lta bu mi thob pa nyid do/ /gzhan yang de ma thob na sdig pa kho na 'byung ste/lha rnams la yang lha min dang rtsod pas so/ /gzhan yang gang gi tshe nus pa yod kyang dge ba mi byed pa phyis ngan song gsum gyi sdug bsngal gyis gzir ba ci byed par 'gyur/ dge ba ma byas par sdig pa bsags na rang bzhin gyi kha na ma tho ba mi dge ba bcu ni ris drug la yod pa'i phyir bde 'gro'i skad kyang med de/bskal pa sa ya brgya phrag la yang 'byung bar mi 'gyur ro/ /de bas rgyal bas gsungs te/ mi khom pa dang bral ba'i mi lus rnyed par dka'o/ /dpe bshad de/ rgya mtsho chen po la khru bzhi pa gnya' shing gi bu ga gcig pu la/rus sbal mig gcig pa'i mgul pa chud pa bzhin no/ /mdo las gsungs pa/ 'dzam bu'i gling thams cad rgya mtsho chen po gcig tu gyur la/ der gnya' shing bu ga gcig yod pa na/ shar gyi rlung gis nub kyi mthar dang /nub kyi rlung gis shar gyi 'gram du bdas te/ /de bzhin du lho'i rlung gis byang dang / byang gi rlung gis lhor bdas/ 'di lta bu'i rgya mtsho la rus sbal mig gcig pa gting nas lo brgya 'das te mgul pa steng du byung nas lta'o/ /de la 'ga' zhig tu gnya' shing de mig med pa'i phyogs su song ba na de mi mthong bar de'i mgul pa bu ga der chud de/de nyid 'dir dpe'o/ cis de lta zhe na/ smras pa/ dngos gzhi'i skad cig gcig la byas pa'i sdig pa de bzhin gshegs pa la ngan sems kyis khrag phyung ba'i mtshams med byas la lha sbyin ltar mnar med du bar bskal gcig gnas par gyur na/dus thog ma med pa nas bsags pa'i sdig pa las bde 'gror skye ba'i bdam kha ga la yod/ /las kyi rnam par smin pa phyung nas zad kyang myong ba'i las dang 'bras bu tsam myong nas byed pa po de las byung ba'i sdug bsngal de las mi grol te/ de ci'i phyir zhe na/gang gi phyir de myong zhing sdig pa gzhan sog par 'gyur ro/ /'gyod cing smras te 'di las gzhan rang slu bar byed pa med de/ ma rig pa yang 'di las gzhan ci yod 'di lta bu'i dal 'byor thob nas kyang / gang dge ba la goms pa ste/ dge ba zhes bya ba'i nor lag tu byung ba lta bu gzhan gyis 'phrog pa'o//dal 'byor rnyed par dka' ba 'di lta bu dang / sdig pa'i stobs rtogs nas kyang rmongs pa'i mthus sgyid lug nas ni le lo can du gyur na de'i tshe dmyal ba la sogs par yun ring du mya ngan thob par 'gyur ro/ /ji ltar sngon du gshin rje'i pho nya rnams kyis ci ste khyod kyis 'di ltar byas pa zhes brjod cing bsdigs pa dang rdeg pa la sogs pas so//gzhan yang dmyal ba'i mes bdag yun ring du sreg cing thal bar 'gyur/ de shin tu bzod par dka' ba ci ste/ ji ltar zhes 'gyod pa me lta bus ma bslabs pa'i sems gdung bar 'gyur ro//las ngan zad pas phan pa de'i sa rnyed pa dka' ba ci zhig ltar dge ba'i bshes gnyen dang mjal bas rnyed par gyur na yang / shes kyang dmyal ba de dang der khrid de/ sngon du goms pas slar yang de lta'i las bsags pas so/ /srid pa la 'gyod par byed pa'i sdug bsngal bden pa bshad nas kun 'byung bshad de/don 'di la bdag la sems med du zang sngags kyis rmongs pa ltar sus bdag rmugs pa mi shes/ bdag gi nang na su zhig yod/ nyon mongs pa yod ce na smras pa/ lag pa dang rkang pa dang mgo dang mgul pa med pa srid pa nas yang srid pa la mngon par dga' ba chags pa dang bcas zhe sdang la sogs pa'i sgras nga rgyal la sogs pa bag la nyal bcu phye bas/brgya phrag gcig dang nyi shu dpa' bo yang min la shes rab can yang ma yin de dag gis ci ste bdag bran bzhin byas/ 'di dag gi gnyen po lam bsgom pa'i don du sngon du 'gro ba 'di yin no//yang 'di ni ngo mtshar che ste bdag rang gi sems rten la bdag la 'jigs pa'i dogs pa yang med bzhin du/ gnod par byed pa de dag de lta bu mi rigs pa byed pa rnams la yang bdag mi khro ba 'di ni gnas ma yin pa la dad pa smad/lha dang lha min rnams dgrar gyur kyang gsod nus kyi mnar med dmyal ba'i me nang du khrid par mi nus so/ /me ji lta bu zhe na smras pa/ gzhan lta zhog lha'i bzhugs gnas ri rab kyi 'ang me gang dang phrad pas thal ba yang mi dmigs par 'gyur te shin tu mi bzad pas so//me de la nyon mongs stobs can dgra mtshams med las kyi rgyus skad cig tu 'dor ro/ /'di dag kho na lta ci ste khros pa zhe na/ smras pa/ lha la sogs pa dgra bo gzhan la tshe 'di lta bu'i ring ba 'khor ba ltar thog mtha' med de/ ji ltar bdag gi nyon mongs pa'i dgra bo rnams las so//lha la sogs pa thams cad de'i 'dod pa bzhin du mnyes par byas na phan par byed par 'gyur gyi/ nyon mongs pa ni bsten par byas na shin tu sdug bsngal bar byed do/ /dug sbrul kho bo ma byin pas dug 'phel ba bzhin no/ /'di ltar bar med pa rgyun du sdug bsngal gyi tshogs bskyed pa'i rgyu yun rings kyi dgra bo rnams bdag gi sems la 'jigs pa med cing ldog pa med par gnas pa na bdag la sems la sems yod na 'khor ba la dga' bar mi rigs so//slar yang smad par 'os pa nyid bshad de/ srid pa kho na btson khang ste de'i srung ma ni thar du mi ster ba ste/dmyal ba la sogs par yang gsod bya gsod mkhan gshin rje'i pho nya 'di dag nyid bdag gi yid kyi khang pa na gang chags pa'i rang bzhin dra ba der gal te gnas na dgra bo stobs ldan btsan po sten pa de tshe bdag la bde ba ga la yod/ gang gi phyir de lta yin pa de bas ji srid du dgra bo de dag mngon sum nyid du bsad par ma gyur pa de srid du bdag brtson pa mi 'dor ro//gang gi phyir nyes pa chung ngu'i dgra la yang khro ba brtan pa nga rgyal bdo ba rnams dgra de ma bcom par gnyid du mi 'gro'o/ /gzhan yang rang gi ngang gis 'chi ba 'chi ba'i chos can sdug bsngal ba'i skye bo g.yul du btsan thabs su bsad pa'i phyir sngar 'tshe ba de ji lta bu zhe na/g.yul gyi mtshon cha rnams kyis phog pa'i sdug bsngal khyad du bsad nas/ bsgrub bya'i don ma grub par phyir phyogs par mi byed do/ /bshad pa rnams las khyad par bshad de/ rtag tu sdug bsngal ma lus byed pa nyes pa med par dgra bo gsod par brtson pa bdag la sgyid lug ni mi nus pas le lo dang /yi chad sems rmugs pa ni sdug bsngal brgya phrag byung bar gyur kyang / rgyu gang gis te le lo mi rigs pa kho na'o zhes bya ba'i don to/ /lam gyi bden pa bsgom pa'i don du bshad de/gang gi phyir skye ba phyi ma dag la sogs pa'i dgos pa med kyang dgra bo'i snying la sogs par phog pa'i mtshon rgyan bzhin du dga' ba'i sems kyis 'chang bar byed pa na 'gro ba mtha' dag sangs rgyas par byed pa la go bgos pa bdag la sdug bsngal rnams ci ste gnod byed yin/ 'di lta bu'i sdug bsngal la dang ba kho nar rigs te/'og tu 'chad pa yang / 'gro ba'i sdug bsngal 'joms byed pa'i/ /sdug bsngal nyid la dga' bar rigs/ /zhes so/ /de nyid bshad de/ nya ba rnams kyis 'tsho ba tsam gyi don du/ nya bsad pa'i phyir grang dus su chu grang ba la 'jug pa dang /gdol pa rnams gzhan gyi nor rku ba'i phyir mtshan mo tsher ma can gyi lam la char dang rlung dang dug sbrul la sogs pa'i 'jigs pa la ma ltos par gsod par dogs pa yang rab tu 'jug pa dang / zhing pa yang tsha grang gi sdug bsngal dang ldan pa dang / sogs pa'i sgras rngon pa dang / 'dod pa log par g.yem par tshol ba dang / tshong pa dang bran la sogs pa las dman pa byed pa rnams sdug bsngal bzod pa na skyes bu'i don grub par 'dod pa bdag gis ci ste mi bzod/ gzhan yang phyogs bcur nam mkha' khyab pa'i 'gro ba rnams nyon mongs pa las sgrol ba'i don du dam bcas nas/gang gi tshe gzhan lta zhog bdag kyang sred pa la sogs pa las grol bar ma byas/ de'i tshe rabs kyi nus pa ma bltas par 'gro ba rnams 'tshang rgya bar bya'o zhes brjod mkhan smyon par 'gyur te/ de bas nyon mongs pa 'joms pa la phyir mi ldog par dam bca' brtan par bya ste/sngon du rang nyid ma grol bar/ /gzhan dag dgrol bar ga la nus/ /zhes bya ba'i rigs pas rang gi nyon mongs pa 'joms pa ni dang por brtsam mo/ /de bas na sdug bsngal thams cad khyad du bsad de/ nyon mongs pa 'joms pa la brtson pa brtan pas mi mthun khon du bzung nas rtag tu g.yul sprad par bya'i/'o na nyon mongs pa rnam pa kun nas 'joms par 'dod na de'i tshe/ 'joms pa la mngon par zhen pa yang gzhom dgos pas nyon mongs pa med par mi 'gyur zhe na/ smras pa rnam pa la sogs pa ste/ nyon mongs pa gang nyon mongs pa 'joms pa'i rgyur gyur pa sems can rnams la rjes su chags pa la sogs pa de ni tshogs sog pa'i rgyu yin pas rang gi dbang du byas nas gzhag par bya'o/ /'di ni byed pa dka' zhe na/ smras pa rgyu ma rnams dum bu dum bur gtubs kyang mgo bcad cing sha dang khrag zad kyang /nyon mongs pa'i dgra bo rnams kyi dbang du mi 'gro'o/ /gal te rang gi yul nas phyung ba rnams stobs ldan gzhan la brten te slar 'ong bar gyur na ci bya zhe na/ smras pa/ dgra bo gzhan phyung ba na yul gzhan du gnas te/ gang la nus pa thob nas slar dgra bo gzhom pa'i phyir 'ong bar 'gyur/ nyon mongs dgra'i lugs ni/ de lta ma yin pas slar 'ong ba mi srid do/ /nyon mongs pa bag la nyal gzhom pa'i phyir bshad de/ bdag gi sems las phyung ba na gar song ste gzhom par 'gyur gang du gnas te bdag 'joms pa'i phyir brtson 'grus rtsom/gnas med pa'i phyir rtsa ba nas bton pa slar ldang mi nus so/ /'on kyang blo mi gsal ba bdag la brtson 'grus med/ nyon mongs pa 'di rnams de kho na nyid mthong ba'i shes rab tsam gyis gzhom par bya ba yin no/ /kun slong bshad de/yid du 'ong ba'i yul las kyang dbang po dul ba rnams la nyon mongs pa mi skye ba'i phyir rdul phra rab tu bcad kyang mi mthong bas nyon mongs pa yul la med/ dbang po'i tshogs rnams la yang med/ chos rnam par 'byed pa'i dus su sngar bzhin du'o/ /mi dmigs pa'i phyir de gnyis kyi bar na yang med do//'di dag las gzhan du yang med de/ 'gro ba kun gnod byed ces pas snang rung du brtags pa mi dmigs pa'i phyir ro/ /de bas na rtsa ba med pa'i phyir glo bur ba kho na yin te/ tshul bzhin ma yin pa yid la byed pa las byung ba'i phyir ro/ /de lta yin kyang 'gro ba ma lus pa la gnod pa byed do//'o na bdag gi sems la gnas zhes pa dang 'gal zhe na/ ma yin te de ni bag la nyal la ltos te bshad/ 'dir ni kun slong gi rang bzhin bshad de/ med pas sgyu ma kho na yin no/ /ji ltar glang po che med kyang sngags dang sman gyi mthus glang po'i rnam pa can sgyu ma snang /de ltar nyon mongs pa yang rten cing 'brel par 'byung bas so/ /yid 'ong la sogs brtags nas su/ /dngos po la ni 'khrul gyur pa/ /'dod chags la sogs rtog pa 'byung / /de yang yid mi 'ong rtogs nas/ /zhes bshad pas nyon mongs pa dag las snying la 'jigs pa spong /shes rab kyi don du ni de kho na nyid rtogs pa'i phyir brtson 'grus brtsam par gyis/ dgos pa med par dmyal bar bdag nyid sdug tu bcug na ci bya/ de ltar le'u 'dis bstan pa'i don nges par byas la 'bad de ji ltar gsungs pa'i bslab pa bsgrub pa'i don du'o//'dir gang bsdus te bstan pa mdo sde nas mang du bstan pa'i bslab pa de dag la bslab pa'i phyir bslab pa kun las btus pa las gsungs pa bzhin te/ bdag nyid dang ni longs spyod rnams/ /dus gsum gyi ni dge ba dag /sems can kun la gtong ba dang //bsrung ba dag pa spel ba'o/ /ji ltar sman pas gdams pa ltar mi byed na sman gyi reg pa'i nad pa la sogs pa ga la yod/ de bzhin du thams cad mkhyen pa sman pa chen pos gdams pa'i bslab pa la mi slob na/ skye ba la sogs pa'i sdug bsngal gyi nad las grol bar ga la 'gyur/bag yod pa ni bskyed pa'i sems bsrung ba la nan tan te/ de'i don ston pa'i gzhung la yang de skad bshad/ bag yod par bstan pa'i le'u'i dgongs pa'i 'grel pa khyad par gsal byed ces bya ba bzhi pa'o// //byang chub sems dpas btang ba'i lus la yang bsrung ba dang /dag pa dang spel bar 'tshal lo/ /gang gi phyir/ sems can rnams la longs spyod phyir/ /bdag nyid la sogs sbyin pas na/ /ma bsrungs na ni longs spyod med/ /longs ma spyad na sbyin pa ci/ /de bas na/ sems can kun gyi longs spyod phyir//bdag nyid la sogs bsrung bar bya/ /dge ba'i bshes gnyen bsten pa dang / /mdo rnams rtag tu blta ba'o/ /de la bslab par 'dod pas bshad pa'i nyon mongs pa'i sgyu ma las sems bsrung bar bya'o/ /bslab pa yang snang bar byed pa dang / bkag pa mi byed pa'o//'o na bslab pa kho na bsrung bar bya'i zhe na/ smras pa/ g.yo ba nyon mongs pas myos su bcug pa'i sems dbang du ma gyur pa ma bsrungs na bslab pa bsrung bar mi nus so/ /gang gi phyir glang po che myos pa ma thul bas kyang de lta bu'i gnod pa mi byed kyi/ gang ma bsrungs pa'i sems kyis dmyal bar byed pa'o//'di ltar myos pa las 'chi ba kho na 'byung gi /sems las ni skye ba phyi ma la yang sdug bsngal chen po 'byung zhes khyad par ro/ /yon tan bshad de de bzhin gshegs pa'i gsung gi lcags kyus dbang du byas nas 'chad par 'gyur ba'i dran pa'i thag pas mi mthun pa'i phyogs kun la spyod pa bkag pas/gal te sems kyi glang po che bcings na de'i tshe nyon mongs pa las 'jigs pa thams cad nub la/ mngon par mtho ba la sogs pa dge ba rnams rim gyis thob par 'gyur ro/ /'o na sems zin kyang stag la sogs pa ma bcings pas 'jigs pa thams cad ji ltar nub ce na/bshad de stag la sogs pa tshigs bcad gnyis go sla'o/ /'di rigs pa gang zhe na/ smras pa/ gang gi phyir sngar byas pa'i las ngan gyis 'phags pa 'jigs pa la sogs pa yin gyi/ gzhan du na ji ltar mi cig la thog babs pa la sogs pa 'byung ba ltar/sems can thams cad la 'byung zhing yang na kun la mi 'byung ste rgyu med pa'i phyir ro/ /las kyang sems kho na ste lus kyi las la sogs pa bskyed pa'i phyir ro/ /mdzod las/ 'jig rten sna tshogs las las skyes//las de sems pa dang nges byas/ /sems pa yid kyi las yin te/ /des bskyed lus dang ngag gi las/ /zhes gsungs pa'i phyir ro/ /gang gi phyir gsungs pa/ sdig pa'i sems ni log pa dang / /'gro la dgra yi 'jigs pa med/ /sems ni gang gi dbang du gnas//de la bde ba med mi 'gyur/ /sems dul ba ni legs pa ste/ /sems ni zhi ba bde ba'i rgyu/ /zhes so/ /yang dag gsung ba ni thams cad mkhyen pa thugs rje can te/ rang la phan par 'dod pa de la yid ches bya'o/ /gzhan du na ral gri lo ma'i nags tshal la sogs par mtshon cha rnams dang /lcags bsregs pa'i sa gzhi dang / shal ma li'i nags kyi sdong po la 'dod log gi yul bud med sus byas so/ /'di dag sems kyis byas par bshad de/ de dag thams cad sdig pa'i sems las byung bar thub pas gsungs/ de bas na sems bsrung bar bya'o//rin po che'i sprin las gang gi phyir gsungs pa/ chos thams cad sems sngon du 'gro ba ste sems shes na de dag kyang shes par 'gyur zhes bya ba la sogs pa mang po'o/ /dge ba'i tshogs kyang sems kho nar bshad de/ dbul ba ni nor med pa ste 'gro ba dag gi de bsal nas/gal te sbyin pa'i pha rol tu phyin pa rdzogs na de'i tshe sngon gyi rgyal ba rnams la de ji ltar 'byung / gang gi phyir 'gro ba da ltar yang dbul bas so/ /'o na ji ltar de 'byung zhe na/ smras pa/ phyi dang nang gi dngos po thams cad dang / de'i sbyin pa'i 'bras bu dang /sems can thams cad la gtong bas goms pa'i khyad par gyis ser sna la sogs pa dang bral zhing sems chags pa med par gyur pa'i tshe/ sbyin pa'i pha rol tu phyin pa rdzogs pas de yang sems yin no/ /'o na ji ltar de 'byung zhe na/ smras pa/ phyi dang nang gi dngos po thams cad dang nya la sogs pa'o//gsod pa la sogs pa'i yul dngos po med pas srog gcod pa la sogs pa med de/ gal te tshul khrims 'dod na de'i tshe nya la sogs pa dang / gzhan gyi nor dang / bud med dang chang la sogs pa gar bskrad/ gang du de dag mi mthong bar 'gyur/mi mthong bas bdag gis de dag gsod par mi 'gyur ro/ /de lta min te de bas na de dag yod kyang de las bzlog pa'i sems thob na tshul khrims kyi pha rol tu phyin par 'dod de/ de bas de sems kho na'o/ /bzod pa yin nam brjod pa yang sems su bshad de sems can la sogs pa'o//gal te dgra bo thams cad 'joms pas khro sems med pa'i phyir gnod byed gang yang med pas bzod pa yin na de'i tshe mi nus pa kho nar 'gyur te/ skye bo ma rungs pa la nam mkha' bzhin du 'dzad pa med pas so/ /de bas na khro ba la sogs pa las bzlog pa'i sems kho na gzhan gyi gnod pa bzod pa'o//dgra bos byed par bya ba zhe sdang 'phel ba ste/ de med na de'i tshe de dag bcom pa ltar med pa lta bu'o/ /'di mi nus pa'i don yin kyang dpes thabs la mkhas na nus par bshad de/ sa zhes bya ba la sogs pa'o/ /tsher ma la sogs pa'i gnod pa bskyab pa'i don du/ sa gzhi dag par 'os te de ni mi nus te ko ba de tsam med pa'i phyir ro/ /thabs kyis nus te lham mthil tsam gyi ko bas sa gzhi thams cad bkab par 'gyur ro/ /de bzhin du phyi rol gyi dgra la sogs pa bzlog par mi nus kyi/de bas rang gi sems kho na bzlog par bya'i/ gzhan bzlog par mi nus pa dang / dgos pa med pas so/ /dge ba la spro ba'i rang bzhin brtson 'grus kyang sems su bshad de/ sems gsal zhes bya ba la sogs pa'o/ / dge ba'i phyogs la spyod pa dman pa'i sems la lus ngag dang bcas pa yin kyang 'bras bu de lta bu mi 'byung / ji ltar sems gcig pu yin pa la yang bsam gtan la sogs pa la gsal bar 'gyur bas 'bras bu 'byung ba tshangs pa nyid la sogs pa'o/ /de bas de yang sems nyid do//bsam gtan ni sems rtse gcig pa'i mtshan nyid can/ sems nyid du bshad de/ bzlas brjod ces pa la sogs pa'o/ /bzlas pa ni sngags dang rig pa la sogs pa bskyar ba'o/ /dka' thub ni dbang po rnams bsdams pa'o/ /de dag yun rings su goms kyang sems g.yengs pa 'am/gnyid la sogs pas rmugs pas don med du 'gyur te bsgrub bya mi 'grub pas so/ /zhes thams cad mkhyen pa bcom ldan 'das kyis gsungs so/ /shes rab ni brjod med sems yin zhes bshad de/ sdug bsngal zhes bya ba la sogs pa'o//ris drug gi sdug bsngal 'joms pa dang / mya ngan las 'das pa'i bde ba myong ba'i phyir don med 'khor te/ ka shi'i me tog nam mkhar 'khor ba bzhin/ /me lnga bsten pa dang skra 'byid pa la sogs pa don med de/ gang dag gi chos kyi don gyi mchog 'jig rten dang 'jig rten las 'das pa'i chos mchog gi gter sems nyid gsang ba ste/tha mal gyi spyod yul ma yin pa de kho na nyid sems pas chos kyi sku'i rang bzhin ma goms pa'o/ /sdong po bkod pa las gsungs pa/ rang sems kho na chos kyi sprin gyis rlan par byed pa'o//sgrib pa rnams las sbyang bar bya'o/ /brtson 'grus kyis brten par bya'o zhes bya ba la sogs pa'o/ /gang gi phyir sems can sems kyi rang bzhin yin pa de bas brtan par gzung ba ni dran pas so/ /legs par bsrung ba ni shes bzhin gyis so/ /brtul zhugs gtso bor gyur pa 'di ma yin pa brtul zhugs gzhan mang pos ci zhig bya/bka' bsdu ba'i mdo las gsungs pa/ rang gi sems byin gyis brlab cing shin tu brtan par gzung bar bya'o/ /gang gi phyir gang na sems pa der yon tan dang skyon rnams so/ /de la byang chub sems dpa' skyon rnams las sems log ste/yon tan rnams la rab tu bcug go zhes bya ba la sogs pa'o/ /dpe bshad de/ ji ltar byis pa rtsa bkrol rnams kyi nang du gang rung gi rma bsrung bar 'dod pas gnod pa'i dogs pas sems rtse gcig par rma bsrungs pa de bzhin du/ bslab pa bsrung bar 'dod pas sems ni sdug bsngal gyi rgyu yin pas rma lta bu'o//zhe sdang la sogs pa skye bo ma rungs pa'i nang du dus thams cad du bsrung bar bya'o/ /rmas bskyed pa'i sdug bsngal chung ste/ de la 'jigs shing rma nan tan gyis bsrung na/ bsdus 'joms kyi ris 'joms pa las yun ring po sdug bsngal chen po las yun ring 'jigs shing sems can gyi rma ci ste mi bsrung /bsdus 'joms kyi ris lus 'joms pa yin kyang de'i sdug bsngal sems kho na la'o/ /de ltar byas na yon tan ci zhe na/ smras pa/ spyod pa zhes bya ba la sogs pa'o//mi rigs pa byed pa'i skye bo rnams la sdang bar mi bya'o/ /lang tsho rnams kyi nang du yang mi chags shing bag yod par bya'o/ /de bstan par bya zhing bshad de/ snam sbyar la sogs pa rnying pa dang / gdan gding ba dang phyag la sogs pa'i bkur sti dang / lus dang tshe dang dge ba gzhan dag gang bdag gi don du gyur pa de dag thams cad nyams kyang bla'i sems ni nam yang nyams par mi bya'o//'dir dad pa skyed pa'i phyir bshad de/ sems bsrung ba la sogs pa'o/ /gtsug na rin po ches zhus pa las dran pa bshad de/ dran pa gang gis nyon mongs pa rnams dang /bdud kyi las rnams la skabs mi 'byed pa dang / lam ma yin par mi ltung ba dang / mi dge ba rnams la skabs mi 'byed pa zhes bya ba la sogs pa ste/ dmigs pa'i yul la ma rmugs pas so/ /shes bzhin ni rgyal ba'i yum las gsungs te/ spyod pa na bdag spyod do zhes gnas pa na bdag gnas so zhes rab tu shes zhes bya ba la sogs pa'o//shes bzhin ni lus dang sems so sor brtags pa'o/ /'di gnyis ma bsrungs na skyon du bshad de/ nad kyis gzir ba'i mi las thams cad mi nus pa ltar/ dran pa dang shes bzhin med pa'i sems kyis thos pa dang /bsam pa la sogs pa mi nus so/ /gnyis kyi skyon so so bshad de/ ji ltar bum pa bu ga can la kha nas blugs pa'i chu 'dzag pa ltar/ shes bzhin med pa'i sems dang ldan pa la thos pa la sogs pa dran pa mi gnas so/ /skyon gzhan bshad de/mang du thos pa dad pa dang ldan pa bslab pa bsrung ba la brtson pa mang po rnams kyang lus dang sems shes bzhin med pas gdung bar 'gyur ro/ /dge ba 'phrog pas na chom rkun pas dran pa nyams pa la brten nas 'phrog pas bsod nams bsags kyang ngan 'gror 'gro / nyon mongs pa rnams dang chom rkun rnams glags skabs tshol bar byed/ 'jug pa'i lam thob na dge ba 'phrog go/ /de bas bde 'gro kho na srog ste de 'joms dge ba 'phrog pas so/ /gang gi phyir de lta yin pa de bas na yid kyi khang par 'jug pa'i sgo khar chom rkun bsrung ba'i phyir dran pa bzhag par bya'o//gal te song na yang nye bar gzhag par bya ste/ dmyal ba la sogs pa'i sdug bsngal dran nas so/ /dran pa yang mkhan po'i gdams pa dang / de las 'jigs pa dang / dad pa che ba dang / legs spyad kyi dbang dang bla ma dang lhan cig 'grogs pas dka' sla med pa skye'o//gzhan yang sangs rgyas dang byang chub sems dpa' rnam pa thams cad mkhyen pa nyid yin pas khams gsum gyi dngos po de dag gi mdun na yod de/ bdag kyang de dag gi mdun du gnas so/ /de ltar bsams shing rtag tu mi rigs pa la ngo tsha ba dang /bslab pa la gus pa dang / de las mi 'da' ba'i 'jigs pa de dag dang ldan zhing / de ltar bsams shing rtag tu gnas par bya'o/ /yang na sangs rgyas la sogs pa la ngo tsha ba la sogs pa'o/ /de ltar gzhan yang yon tan 'byung ste/ skad cig re rer de ltar spyad na 'bad pa med par sangs rgyas rjes su dran pa yang de las skye'o//shes bzhin skye ba dang de brtan pa'i rgyu ni dran pa nyid bshad de/ gang tshe rnal 'byor gyi yid kyi sgor lus dang sems bsrung ba'i phyir dran pa gnas pa de'i tshe shes bzhin 'byung ste/ 'byung ba yang phyir mi ldog go//dgos pa med la spros pa spang bar bshad de/ dang por re zhig sems rtag tu bshad pa'i rim pa dang ldan pa nye bar gzhag par bya'o zhes nang du sems pa'o/ /mi dgos pa la spros pa spang ba'i phyir dbang po rnams med pa ltar dgos pa med par gzugs la sogs pa sbyin pa las log par shing bzhin du gnas par bya'o//de nyid gsal bar byed cing bshad de/ mig cung zad phye ba 'og tu lta ba g.yeng ba spang ba'i phyir te/ des bsam gtan gyi lta ba bstan te/ g.yo ba med pa de kho na nyid bsgom pa'o/ /las dang po pa mi nus na ngal bso ba'i phyir bshad de/lta ba zhes bya ba la sogs pa'o/ /mig dang sems ngal ba spang ba'i phyir/ res 'ga' phyogs su blta bar bya ste/ gal te gang rung de nye bar 'ong na de'i tshe de'i grib ma tsam shes nas/ legs par byon nam smra zhing blta ste de dad pa mi ldog pa'i phyir ro//lam du yang de ltar blta zhing 'gro na 'jigs pa brtag par bshad de/ 'jigs pa'i rgyu ni chom rkun pa la sogs pa ste/ de shes par bya ba'i phyir phyogs bzhi rim pas yud tsam blta ste rang bsrung ba'i phyir ro/ / phyogs thams cad blta na bsdad de blta bar bya'o/ /rgyab blta na log ste blta'o/ /mdun du 'gro ba dang rgyab tu blta ba ste/ de ltar spyod lam thams cad du gang tshe gang rigs de shes bzhin byed pa'o/ /lus shes bzhin bslab pa bshad de/ spyod lam gang rung la lus 'di ltar gnas par 'tshal zhes klog pa la sogs pa brtsams nas/bar du yang lus ji ltar gnas zhes brtag par bya'o/ /sems shes bzhin bshad de/ rang dang gzhan la phan pa'i chos sems pa kho na dka' ba chen po ste/ de la bcings pas rang dbang du 'gyur ba'i phyir ro/ / de la bcings kyang brtag par bshad de/ rang gi dmigs yul lam gzhan du yod pa brtag ste/ gzhan las log ste de nyid la sbyar bar bya'o/ /rang gi ngang gis der rgyun btang snyoms su gzhag go/ /ji ltar brtsams pa'i bsam gtan skad cig kyang mi gtong ba de ltar gzung bar bya'o//gang gi phyir tshul khrims ni ting nge 'dzin gyis dag par bya ba yin no/ /zla ba sgron mas zhus pa las/ ting nge 'dzin thob na tshul khrims myur du dag par 'gyur ro zhes bya ba la sogs pa'o/ /shes bzhin gtong bar bshad de/ me la sogs pa'i 'jigs pa dang dkon mchog gsum gyi mchod pa la sogs pa'i dga' ston yod pas/ting nge 'dzin mi nus na dus de srid du ci bder spyad par bya'o/ /de ltar cis she na/ sbyin pa bas tshul khrims gya nom pas de mi nus pa'i tshe dus de srid du btang snyoms byas kyang ltung ba med do/ /blo gros mi zad pa'i mdo las/thag ring po nas chos nyan du 'ongs pa rnams kyi don du bsam gtan las langs te/ chos kyi sbyin pa kho na bsngags pa zhes bya ba la sogs pa'o/ /de ltar yin kyang bslab pa la lhod pa mi rigs par bshad de/ gang zhig bsams nas byed par brtsams pa re zhig bsam gtan la sogs pa de nyid rdzogs par bya'i//de la sems rtse gcig pa ste/ de spangs nas gzhan ma yin no/ /de ltar byas nas ci zhe na smras pa/ de ltar bsgrub par byas na thams cad legs/ bzlog pa na gnyis ka mi legs te/ sngar brtsams pa dang phyis khas blangs pa'o//de ltar na shes bzhin ma yin par rab tu 'jug pa dang / de zhugs pa 'phel bar 'gyur ro/ /gzhan yang rgyal po'i gtam la sogs pa rnam pa sna tshogs pa dang / gar la sogs pa ngo mtshar che ba la 'dod pa byung na de gzhom par bya'o/ /gzhan yang dgos pa med par 'jim pa 'dril ba dang /sen mo la sogs pas rtswa gcod pa dang / rkang pas sa la ri mo 'bri ba dang / sogs pa'i sgras zhal ba dang / bzo byed pa la sogs pa bkag pa mthong nas/ de'i rnam par smin pa la 'jigs shing / skad cig de nyid la spang bar bya'o/ / tshigs bcad bdun gyis shes bzhin byed par bshad de/ gang tshe la sogs pa'o/ /dang po rang sems brtags te rigs pa gang yin pa de brtan par bya'o/ /gang gi tshe rang sems chags pa 'am sdang ba de'i tshe/ lus kyis bya ba mi bya zhing ngag tu mi brjod de/ de gnyis nyon mongs par rtogs nas so//dbang po'i 'phro ba dang rnam rtog bsdus te gnas par bya'o/ /dgongs pa 'di ste/ 'dod chags la sogs pa kun slong gang yin pa de rang gi ngang gis yal 'gro ste/ skad cig ma yin pa'i phyir ro/ /gang gi tshe rgod pa ni g.yeng ba dang / gzhan ngag gis co 'dri ba dang /nga rgyal ni sems khengs pa dang / rgyags pa dang / mtshang 'bru ba ni lus kyis tho 'tshams pa dang / 'di dag gis skyor ba kyog po slu bar 'dod pa na/ gang gi tshe bdag la stod pa ni rang gi yon tan gsal bar byed pa dang / gzhan la smod pa ni mi mgu ba dang / gshe bcas ni khro bas rtsod pa dang /nor gyi rnyed pa dang / bkur sti dang / grags pa 'dod pa dang / g.yog 'khor dang / rim gro 'dod pa dang / gzhan don yal bar 'dor ba dang / rang don don du gnyer ba dang / 'khor ni slob ma la sogs pa dang / mi rigs pa smra bar 'dod pa na mi bzod pa dang /le lo dang / 'jigs pa dang / spyi brtol dang / mu cor dang / rang gi phyogs la zhen pa'i sems byung na/ de'i tshe bya ba mi byed par shing bzhin gnas par bya'o/ /de'i gnyen po bshad de/ de ltar kun nas nyon mongs pa'i sems mthong nas yang na don med pa'i bya ba rtsom pa de'i tshe/bag yod pa'i dpa' bos gnyen po shes bzhin byed pas brtan par gzung bar bya/ u gras zhus pa'i mdo las gsungs pa/ rgod pa med par dran pa nye bar gzhag pa shes bzhin dang ldan pa'o/ /bslab pa kun las btus pa las kyang /de la bdag nyid bsrung ba ni/ /gang zhig don min spong bas so/ /de dag gang gis 'thob ce na/ /don med spros pa spangs pas so/ /de dag rtag tu dran pas 'grub/ /dran pa shin tu dad las 'byung / /dad ni zhi ba'i bdag nyid che/ /shes te bstan pas skye bar 'gyur/ / zhes so/ /tshigs bcad gsum gyi gnyen po kho na bshad de/ shin tu nges pa ni dam bca' brtan pa ste/ rab tu dad pa ni yon tan can la dang ba'o/ /brtan pa ni mi 'jigs pa'o/ /gus pas bkur sti'o/ /zhes ni lus la sogs pas byed pa'o/ /bcom ldan 'das la ngo tsha ba dang 'jigs pa dang bcas/zhi zhing ni dbang po rnams bsdams pa'o/ /sbyin pa la sogs pas gzhan dga' bar byed pa'o/ /gcig la 'dod pa gang yin pa de gzhan la mi 'dod pas/ phan tshun du 'gal ba byis pa'i 'dod pas mi skyo ba'o/ /nyon mongs pa'i dbang gis 'di dag la de ltar 'byung zhes byas nas snying rje dang ldan pa'o//rang bzhin dang bcas pa'i kha na ma tho ba ma yin pa rnams la rtag tu rang bzhin gyi dbang du gyur pa/ sprul pa bzhin du nga rgyal med par sems bdag gis gzung bar bya'o zhes bsam par bya'o/ /yun ring mo zhig nas dal 'byor thob pa zhes skad cig re re zhing bsam par bya zhing /'dod chags la sogs pa'i rtog pas mi g.yo bar ri rab bzhin du sems brtan par bya'o/ /sems sbyong ba kho na byang chub sems dpa'i bslab pa zhes des bsgrubs so/ /lus kyi shes bzhin bshad de/ lus bems po yin pas rang gzhan gyi don mi 'grub ste/gzhan du sems dang bral ba'i lus sha la chags pa'i bya rgod rnams kyis phan tshun du khrid pa na ci ste dgag par mi byed do/ /sems kyis zhen pa spangs pa'i phyir bshad de/ kye yid bdag med pa kho nas bdag tu gzung nas sha dang rus pa'i phung po ci ste bsrung zhe na/khyod las lus 'di tha dad yin tsa na de nyams kyang khyod la ci gnod/ tha dad pa phan gnod mi shes pa bdag gir byed na/ shing gi gzugs shin tu gtsang ma ci ste mi bzung / 'di ni mi gtsang ba'i sprul pa nyams pa'i chos yin no/ /snying po med par bshad de/shes rab kyis rang gi lus las pags pa tha dad du rtogs pa dang / de nas rus pa'i dra ba las sha ni tha dad par rtogs shing / rus pa rnams kyang shes rab kyis bcag ste/ de'i nang du rkang mar la blta ste/ mkhas pas bsngags par 'os pa'i snying po 'dir ci yod ces brtag par bya'o//de ltar 'bad pas btsal kyang snying po ma mthong na/ de dus smros shig /ci ste lus bsrung ngo / /dgos pas bsrung bar bshad de/ khyod kyis la sogs pa go sla'o/ /dgos pa gnyis kyis 'di bsrung bar 'os pa bshad de bsod nams bsag pa'i yan lag yin pa dang /bya rgod la sogs pa'i kha zas yin pas so/ /gang gi phyir bshad pa/ gang la cung zad kyang zhen pa skye ba'i dngos po de nye bar blang bar mi bya'o/ /gang gi phyir byang chub sems dpa' lus dang srog btang bas ltos pa mi rung ngo //de ltar shes kyang bsod nams la 'jug par mi byed na/ 'di ltar khyod kyis zhes bya ba la sogs pa go sla'o/ /'dir gnas par mi 'gyur zhes byas nas/ g.yog la gos la sogs pa mi ster ba bzhin du/ lus kyang mi rtag par 'gro bar 'gyur bas de zar bcug pa ci/'o na ji ltar rigs she na/ kye yid lus la gla tsam byin te rang gi don la 'jug par bya'o/ /gang gi phyir gla bas btab pa'i lo tog rnams/ de la kun ster ba ma yin no/ /de bas lus la gru'i blo bskyed de/ bsod nams la 'jug pa dang / bsod nams ma yin pa las bzlog pa'i rten yin pa'i phyir ro//sems can gyi don bsgrub pa'i phyir 'dod pa ji bzhin du byed du gzhug go/ /de ltar lus shes bzhin gyis de'i rang bzhin dang dgos pa rnam par dpyad nas bsdus shing bshad de/ de ltar bshad pa'i rigs pas sems dang /lus kyi mtshan nyid can/ bdag dbang du byas te rtag tu bzhin 'dzum pa/ khro gnyer gzhan dad pa zlog par byed pa spangs nas byung ba rnams kyis gsong por smra ba'i gong du legs par 'ongs sam zhes bya ba la sogs pas gsong por smra ba'o//'gro ba la gnyen bshes ltar bya'o/ /bsam gtan gyi g.yeng ba dgag pa bshad de/ khri la sogs pa ste go sla'o/ /de ltar byas pas yon tan bshad de/ chu skyar la sogs pa ste de bas na rtag tu sgra med par bag yod par bya'o/ / gzhan yang gzhan la bskul ba ni nyes byas bshags pa la bskul ba ste/ de la brtson pa ni gdams ngag sbyin nus pa ste/ ma bcol bar phan pa byed pa rnams te/ de dag gi ngag spyi bos blang bar bya ste/ de bas thams cad kyi slob ma nga rgyal med par thams cad las slob ste/bla ma ltar byed do/ /phrag dog mi bya bar bshad de/ legs par smras pa ni nyon mongs pa'i gnyen po gzhan gyis smras pa na'o/ /bstod pas legs par byas so zhes bya ba la sogs pa'o/ /gzhan gyi yon tan de'i lkog tu smra ste/ gzhan gyis de'i mdun du de'i yon tan brjod pa na rjes su slob ste/dga' ba bzhin du'o/ /gzhan du na 'dis mi 'dod kyis ko/ /rang gi yon tan gzhan gyis brjod pa na nga rgyal mi byed do/ /de yang kho gzhan gyi yon tan la dga' bar zhes yid la bya'o/ /gzhan gyi yon tan la phrag dog spang bar bshad de/ dman pa bar ma mchog rnams kyi gang rung brtsams pa de sdug bsngal gyi phyir ma yin te/'on kyang dga' ba'i phyir te/ dga' ba de nor rdzas btang yang rnyed par dka'/ 'dir ni 'bad pa med par bsgrubs pas ci ste spong / de bas dga' ba'i bde ba spyad par bya/ phrag dog gi yul gzhan gyis 'bad de bsgrubs pa'i yon tan rnams kyis so//'dir khyad par bshad de 'dir gzhan gyi yon tan la dga' bas skye ba 'di la god med de ci yang ma brlag /skye ba phyi ma la bde ba che ste gzhan gyi yon tan la bstod pas so/ /gzhan gyi yon tan la mi bzod na 'jig rten gnyi ga la skyon te/'dir mi dga' bas sdug bsngal zhing pha rol du yang zhe sdang gis sdug bsngal che'o/ /byed par rigs pa yang bslab par bya bar bshad de/ yid ches pa'i tshig dang / phan tshun 'brel pa dang / don la the tshom mi 'byung ba dang / yid du 'ong ba dang / rnar snyan pa dang /snying rje'i rgyu mthun pa dang / 'jam pa dang / ran pa'i tshig gis brjod par bya'o/ /ji ltar blta zhe na/ smras pa/ drang ba dang ni kyog po ma yin pa dga' bas gzhol ba'i mig gis/ skom pas chu ltar btung zhing sems can la blta bar bya'o/ /chags pa dang / sdang ba dang gti mug gis ma yin gyi/'on kyang 'di dag nyid la sogs pa go sla ba'o/ /bslab btus las/ kun du rtsa bkrol med par 'jam/ /nyung ba yid du 'ong smras pa'i/ /skye bo skal ldan gzhol bar byed/ /tshang mar smra ba 'byung bar 'gyur/ /zhes so/ /bka' bsdu ba las/ ji ltar mthong ba tsam gyis 'gro ba rnams dang bar 'gyur ba de ltar bya'o//gang gi phyir sems can yongs su smin par byed pa las bya ba gzhan 'di la med do zhes so/ /de ltar ma byas na/ bslab btus las/ rgyal ba'i myu gu yid gcugs par/ /ma gyur pa la smad byas nas/ /thal bas bkab pa'i me bzhin du//dmyal la sogs par 'jig rten bsreg/ /'dir yang bya bar 'os par bshad de/ yi dam du byas pa'i sbyin pa la sogs pa dang / mngon par zhen pa las byung ba shin tu dang bas byas pa dang / gnyen po las byung ba nyon mongs pa'i gnyen po stong pa nyid bsgom pa la sogs pa dang /yon tan gyi zhing sangs rgyas la sogs pa dang / phan pa'i zhing pha ma la sogs pa dang / sdug bsngal ba nad pa la sogs pa la phan par byas pas 'bras bu gzhal du med pa'o/ /rtag tu bya bar bshad de/ brtson pa ni le lo med cing sdang ba yang rang gzhan gyi don ma bskul bar ngang gis byed pa bzhin du las thams cad la gzhan la go skabs mi 'byed pa'o//rim pas byed par bshad de/ gong nas gong du sbyin pa las tshul khrims dang / de las bzod pa mchog ces bya ba la sogs pa'o/ /de bas dman pa'i ched du mchog gtang bar mi bya'o//'o na sbyin pa'i dus su tshul khrims la gang gi phyir btang snyoms bshad pa'o zhes pa dang / 'gal zhe na/ legs spyad ni bslab pa gong ma ste/ de nyid dge ba'i chu bsrung bas rags yin te/ de ma gtogs pas gong ma gtang bar mi bya'o/ /ji ltar bsam gtan gzhag ste 'ong bar 'dod pa'i skye bo rnams la chos kyi sbyin pa bla na med pa byed do//bsam gtan tshul khrims kyi yan lag yin pa'i phyir ro/ /'dod pa rnams tshim par ma byas na ltung ba'o/ /de ltar bshad pa'i don rtogs nas gzhan don du rtag par brtson 'grus dang ldan par bya'o//'o na ma las 'da' ba ji ltar zhe na/ smras pa/ thugs rje can gzhan don gzigs pa la bkag pa yang gnang ngo / /gzhan yang sems can gyi don gzigs nas/ mi tshangs par spyod pa dang / mi gsod pa yang bshad do/ /dge slong gis 'bras gsol ba na/log par ltung ba ni rkang lag la sogs pa bcad pa dang / mgon med pa ni skyob pas stong pa dang / brtul zhugs la gnas ni sdom pa dang ldan pa ste/ de dag la skal ba byin nas/ tshad bar mar gsol bar bya'o/ /ji ltar lus dang sems las su rung ba'o//snam sbyar dang bla gos dang mthang gos te chos gos gsum ma gtogs pa gzhan lhag pa gtang bar bya'o/ /'o na de yang ci ste mi gtong zhe na/ smras pa/ dam pa rnams kyi chos sam/ yang na dam pa yang yin chos kyang yin/ yang na de sbyin byed pa'i lus gzhan sbyin pa'i don du gnod par mi bya/de ltar lus la gnod par mi bya zhing lhag ma go sla'o/ /gang gi phyir de lta yin pa de'i phyir/ ma dag pa gnyen dang gnyen ma yin pa la mi mnyam pa'i snying rje'i bsam pa yod kyi bar srog gtang bar mi bya'o/ /thams cad las sems mnyam par gyur pa'i tshe de gtang bar mi bya'o//gang gi phyir de ltar byas na 'gyod pa la sogs pa med pas nyams par mi 'gyur ro/ /mthong lam thob nas zhes bya ba'i don to/ /chos bstan pa ni gdod bshad de/ chos ni gsung rab yan lag dgu'o/ /legs par mi gnas zhes kun dang sbyar ro//lha dang klu la sogs pas dam pa'i chos mchod par 'os pa yin pas/ de la ma bstan na de dag gis smod par 'gyur ba dang / chos ston pa po la yang ltung ba 'byung ste/ bkag pa byed pa'i phyir ro/ /mgo g.yogs pa dang mgo dkris pa la sogs pa la chos bshad par mi bya'o//zab ni blo dman pas rab mi rtogs pa'i phyir ro/ /rgya che ba ni rdzu 'phrul la sogs pa blor mi shong ba'i phyir ro/ /dman pa ni mos pa dman pa'o/ /mi bshad ces gong ma dang sbyar ro/ /bud med min ni dben par skyes pa med par ro/ /dman pa ni nyan thos dang rang rgyal gyi theg pa dang /mchog ni theg pa chen po ste/ gnyi ga nyon mongs pa'i gnyen po yin pas so/ /theg pa chen po'i chos kyi snod ni nyan thos kyi chos la mi sbyar ro/ /spyod pa ni bslab pa sdom pa ste/ de spangs la mdo sde dang sngags zlos pa kho nas thar pa thob po zhes 'dod pa bskyed par mi bya'o//so shing dang mchil ma 'dor ba ni bkag pa'i phyogs su yin gyi/ chu dang longs spyod pa'i phyogs su ma yin/ gci ba la sogs pa yang mi dor te bkag pas so/ /kha bkang ba dang / su su dang phu phu'i sgra dang bcas pa dang / kha gdangs nas bza' bar mi bya'o/ /rkang pa brkyang ste shing stan la sogs par 'dug par mi bya'o//dus mnyam du lag pa gnyis mnye bar mi bya'o/ /gzhan gyi bud med gcig pu dang bcas par 'gro ba dang kha cig tu nyal ba dang gdan gcig la 'dug par mi bya ste kun tu chags pa med kyang ma dad pa'i rgyu yin pas so/ /'jig rten pa ma dad par byed pa kun bstan bcos la mthong ba dang /yul chos dris te spang bar bya'o/ /bslab btus las/ des na bsdus te sdom pa ni/ /rin chen sprin las rgyal bas gsungs/ /gang gis sems can ma dad pa/ /de ni 'bad pas spang bar bya/ /zhes so/ / sdigs mdzub la sogs pa sor mo gcig gis gang yang mi la bstan par mi bya'o/ /lag pa g.yon pas kyang ma yin te ma dad pas so/ /lag pa g.yas pa thams cad kyis dad pa dang ldan zhing lam yang bstan par bya'o/ /lag pa brkyang nas don chung ba la gang yang 'bod par mi bya'o/ /brang khang na gnas pa go bar bya ba'i phyir se gol la sogs pa'i sgra bya ste/gzhan du nam bsdams pa srid do/ /'dod pa'i phyogs su mgo bzhag nas gzhogs g.yas 'og tu bcug /rkang pa'i steng du rkang pa gzhag ste/ lag pa g.yas pa sngas su bcug ste rkang pa'i steng du lag pa g.yon pa brkyang ste/snam sbyar gyis lus g.yogs nas shes bzhin du thog mar nyal ba'i dus su nges par myur du ldang bar bya'o zhes glos 'di ltar nyal bar bya'o/ /spyod pa ni bslab pa ste/ gzhal du med pa ni grangs mi nus pa'o/ /sbyong ba ni dri ma spong ba ste/ 'di ni gdon mi za bar bya'o/ /de'i don du bshad de/nyin dang la sogs pa'o/ /ltung ba bshags pa dang / bsod nams la rjes su yi rang ba dang / byang chub tu yongs su bsngo ba dang / phung po gsum pa mtshan mo lan gsum nyin mo lan gsum du gdon par bya'o/ /ltung ba lhag ma ni pham pa las gzhan te des zhi bar 'gyur ro/ / pham pa rnams ni slar dkon mchog gsum la skyabs su 'gro ba dang / byang chub mchog tu sems bskyed pas so/ /gnas skabs su gang spa bar bya ba'i spyod pa la sogs pa ste/ rang nyid kyi'am gzhan don gyi dbang du gyur pas spyod na de la 'bad de bslab par bya'o/ /nyes pa med par ci ste spyod ce na/smras pa/ rgyal ba'i sras kyis gang bslab par bya ba ma yin pa de ni med do/ /bdag dang bdag gi bar mi bzung zhing bden pa gnyis rtogs nas gzhan don la 'bad pa de ltar spyod pa na gang bsod nams ma yin pa de ni med do/ /rang don rdzogs pa na gzhan don byed pa zhes brgyud pa dang /dngos ni nus par gyur pas thog ma nas gzhan don las gzhan mi byed do/ /de ltar byas pa las byung ba'i bsod nams sems can rnams kyi don du byang chub tu bsngo'o/ /bla ma dam pa dge ba'i bshes gnyen byang chub sems dpa'i brtul zhugs 'dzin pa/ theg pa chen po'i don la mkhas pa srog gi phyir yang rtag tu gtang bar mi bya'o//sdong po bkod pa'i le'u dpal 'byung gi rnam thar las gsungs pa/ bla ma bsten pa'i rim pa la bslab par bya'o/ /'di ni 'dir bshad pa ste gzhan ni 'dir ma bshad pa rnams so/ /gang gi phyir mdo sde zhes bya ba la sogs pa'o//rtsa ba'i ltung ba ni sdom pa 'jig par byed pa ste/ nam mkha'i snying po'i mdo sde la blta bar bya'o/ /bslab pa kun las btus pa ni de nyid kyis mdzad pa'o/ /mdo sde kun las btus pa ni 'di nyid kyi'o/ /gnyis pa ni bslab pa kun las btus pa dang mdo sde kun las btus so//'jig rten pa'i sems bsrung ba'i phyir yang bslab pa bshad de/ yul gang la bya ba gang bkab pa gzhan gang la ma bkag pa de 'jig rten gyi sems bsrung ba'i phyir 'dir bslab pa mthong nas bya'o/ /dran pa'i mtshan nyid ni rang gi ming kho nas bstan to/ / shes bzhin gyi mtshan nyid bshad de/ lus dang la sogs pa go sla'o/ /nges par bya ba'i phyir bshad de/ lus ni yid sngon du 'gro ba yin pas lus kyi bya ba la thams cad 'dus pas lus kyis 'di dag dpyad par bya/ dper na sman dpyad klags pas nad mi ldog pa bzhin no/ / shes bzhin bsrung ba'i le'u'i dgongs pa'i 'grel pa khyad par gsal byed ces bya ba las lnga pa'o// //bdag nyid la sogs pa sbyin pa dang / bslab pa zhes bya ba la sogs pas tshul khrims bshad/ da ni bzod pa 'chad de/ bskal pa zhes bya ba la sogs pa'o//de kun ni de ma thag par bshad pa'i tshul khrims dang / sbyin pa dang / bla na med pa yan lag bdun pa'i mchod pas bde bar gshegs pa mchod pa dag /bskal pa stong du bsags pa yang sems can la khong khro bas 'joms so/ /gsungs pa yang kye 'jam dpal khong khro khong khro zhes bya ba ni bskal pa brgya phrag stong du bsags pa'i dge ba yang 'joms par byed do//rang rten bcom nas gzhan yang 'joms pas zhe sdang ni khro zhes bya'o/ /zhe sdang sdig pa chen po'i rgyu yin pas/ de'i gnyen po bzod pa bsgom pa bshad de/ zhe sdang zhes bya ba la sogs pa'o//zhe sdang nye bar mtshon pas des drangs pa'i khro ba la sogs pa yang gzung bar bya'o/ /bzod pa dang mnyam dka' thub med/ /bzod pa dka' thub dam pa bzod pa ni/ /mya ngan 'das pa mchog ces sangs rgyas gsungs/ /zhes gsungs pa'i phyir ro/ /tshul ni thabs yin te 'chad par 'gyur ro//mthong ba'i chos kho na la zhe sdang gi skyon tshigs su bcad pa gsum gyis bshad de/ zhe sdang gi me 'bar ba'i phyir yid zhi bar mi 'gyur ba dang / dga' ba dang de'i dbang gis lus kyi bde ba yang mi myong ba'o/ /gnyid dang brtan pa'ang mi 'thob po/ / zhe sdang ni zug rngu lta bu ste/ ji ltar zug rngu mtshon cha'i khyad par snying la zug na gnyid la sogs pa mi 'byung ste/ gnad la phog pa'i phyir ro/ /de bzhin du sems la zhe sdang phog pas so/ /rnyed pa dang bkur stis rang nye du la sogs pa gang la mchod/ gang zhig de la brten nas gnas pa g.yog la sogs pa de dag kyang rje dpon 'di gsod par 'dod/zhe sdang gis yid du mi 'ong ba'i phyir ro/ /zhe sdang can de la gnyen yin yang bred par 'gyur te/ 'tsho ba ster yang g.yog gis 'di mi brten skyon mang pos ci mdor na nye bar zhi ba'i rgyu 'jig rten na gang yang med/ gang gis zhe sdang can bde ba dang ldan par 'gyur ro//skye ba 'di nyid du gsod pa la sogs pa'i sdug bsngal bskyed pas/ dgra'i blos mkhas pa gang zhen pa drag pos khro ba 'joms par byed de/ 'di dang pha rol tu bde ba dang ldan par 'gyur ro/ /zhe sdang sel ba'i phyir rgyu brtags shing bshad de/mi 'dod pa byed pa dang / bde ba'i rgyu 'dod pa 'joms pas byung ba'i yid mi bde ba de nyid zas te/ de bsten nas byung ba'i zhe sdang brtas te bdag 'joms so/ /rgyu med na 'bras bu mi 'byung bas dgra de'i zas gzhom par bya'o/ /gang gi phyir bdag gi dge ba'i srog nyams par byed pa las bya ba gzhan dgra bo de la med do//zhe sdang gi gnyen po bzod pa ni rnam pa gsum ste/ bka' bsdu ba'i mdo las gsungs pa/ sdug bsngal dang du len pa'i bzod pa dang / gnod pa la ji mi snyam pa'i bzod pa dang / chos la nges par rtogs pa'i bzod pa ste/de la dang po'i dbang du byas nas bshad de/ ci la zhes bya ba la sogs pa'o/ /rin chen sprin las gsungs pa/ gang 'di dag nang gi mya ngan dang / smre sngags 'don pa dang / yid mi bde ba dang / 'khrug pa de dag bzod cing dang du len zhes so/ /zla ba sgron ma las kyang /bde ba la mngon par zhen cing sdug bsngal mi 'dor bar skye bcad kyang bdag gis dga' ba ni dkrug par mi bya'o/ /gang gi phyir yid mi bde ba byas kyang 'dod pa grub par mi 'gyur dge ba ni nyams par 'gyur ro/ /chos rjes su dran pas dga' ba dang dang ba ni dga' bar brjod do//rigs pa bshad de/ gal te zhes bya ba la sogs pa'o/ /'dod pa'i don 'dod pa 'joms pa bzlog pa'i phyir dang / mi 'dod pa 'byung ba dgag pa gal te bcos su yod na de'i tshe de nyid byed pa yin gyi de la yid mi bde bas ci zhig bya/ bcos su med na yang 'dis ci bya/goms pas sdug bsngal mi gnod par bshad de/ sdug bsngal ni lus kyis te/ brnyas pa ni yid kyis te/ tshig rtsub pa ni gnad reg pa'i tshig gis so/ /grags pa ma yin pa 'di dag thams cad bdag dang bshes rnams kyis mi 'dod pa'o/ / sdug bsngal la sogs pa byed pa dgra'i de las bzlog pa ste/ de'i sdug bsngal la sogs pa 'dod pa nyid do/ /zag bcas kyi bde ba res 'ga' rnyed pa/ sdug bsngal ni rtag tu rnyed par sla bas de nyid goms par bya'o/ /gzhan yang srid pa las thar pa ni sdug bsngal kho na ste/sdug bsngal gyis srid pa la 'gyod pa bskyed de thar pa tshol ba'i phyir ro/ /de bas na kye sems can sdug bsngal bzod pa la brtan par gyis shig go/ /gzhan yang lha mo tsaN+Di ka'i bu nam sa tshes dgu chen po la ltogs nyal byas te/ ra lu 'breg pa dang gcod pa la sogs pa byed do//yul kar+Na tra las skyes pa rnams rang gi ming gzhan gyi thog ma bri ba'i phyir phan tshun du khengs pas dgos pa med par sdug bsngal myong bar byed do/ /bdag ni rang dang gzhan dgrol ba'i phyir sdug bsngal bzod pa las rigs pa gang gis 'jigs/lag pa dang rkang pa dang mgo ster mi nus pas she na/ smras pa/ goms pas byed par dka' ba gang yin pa de ni cung zad kyang med do/ /bsam pa gang dang gang gis ni/ /mi rnams kyi ni yid rnams sbyor/ /de dang de yi ngo bor 'gyur/ /sna tshogs nor bu ji bzhin no//zhes gsungs pas so/ /de bas gnod pa chung ba goms pa'i rim pas gnod pa chen po yang bzod par bya'o/ /ji ltar goms pas byis pa rnams la 'khor ba sdug bsngal ba la bde ba'i blo 'byung ba ltar/ bde ba dang ldan pa'i ting nge 'dzin la gnas pa la lag pa dang rkang pa la sogs pa gcod pa na yang bde ba'i 'du shes kho na skye'o//gnod pa chung ba la sogs goms pa'i dpe bshad de/ 'dre shig pa dang / sha sbrang dang / sbrang bu'i gnod pa dang / bkres pa dang skom pa la sogs pa'i tshor ba dang / g.yan pa chen po la sogs pa'i sdug bsngal goms pa don med par ci ste mi mthong /gzhan yang bze re goms pa byar mi btub ste/ de byas na/ grang ba dang / tsha ba dang / char dang / rlung dang / lam dang / nad dang / 'chi ba dang / rdeg pa las byung ba'i gnod pas shin tu sdug bsngal bar 'gyur ro/ / sdug bsngal la yang sems [(]pa rtan [,]brtan [)]na de las ldog pa'o/ /blo brtan na bzod mi nus pa med par bshad de/ dpa' bo 'ga' zhig g.yul du rang gi khrag mthong na lhag par dpa' bar 'gyur/ gzhan ni gzhan gyi khrag mthong yang brgyal bar 'gyur te 'jigs pas so/ /de gnyis sems snying stobs dang /de med pa las byung ste de bas sdug bsngal rnams kyis mi tshugs byos/ gnod pa khyad du bsad par bya'o/ /sdug bsngal byung yang sdug bsngal gang gi de med de bdag med pas rten cing 'brel pa las byung ba mi rtag pa tshor ba tsam du shes nas chos la rab tu dga' ba gtang bar mi bya'o//gang gi phyir nyon mongs pa'i dgra rnams dang g.yul 'gyed par rtsom pa yin pas der gnod pa ni gdon mi za ba'o/ /dgra bos brgyab pa snying gis len cing gang zhig dgra bo pham par byed pa da ni dpa' bo bsngags pa yin no/ /gzhan ni 'gyel ba la rdeg pa ltar ro la gnod pa'o//sdug bsngal gyi yon tan gzhan yang lam dang rjes su mthun pa yod de/ sdug bsngal la skyo ba des nor la sogs pa'i dregs pa sel ba dang / srid pa'i sdug bsngal dang ldan pa la snying rje skye ba dang / sdig pa'i 'bras bu 'di yin par shes nas de la 'jigs pa dang /rgyal ba kho na sdug bsngal zad pa'i lam ston pa po yin pas/ rgyal ba la 'dod pa skye'o/ /bzod pa'i don du rigs pa bshad de/ zas kyi skyon las byung ba mkhris pa dang / rlung dang bad kan dang 'dus pa rnams sdug bsngal chen po'i rgyu la bdag mi khro ste/de dag sems pa med pas/ bsams bzhin du sdug bsngal mi skyed de/ 'on kyang rten cing 'brel par 'byung ba las shes so/ /de lta yin pas sems pa dang bcas pa la yang khro ba mi rigs te/ de dag kyang las dang po'i stobs kyis khro ste bdag gi las kyis bskul ba zhes gsungs pa'i phyir ro//rkyen nyid kyis khro ba bshad de/ mkhris pa la sogs pa las mi 'dod pa'i gzer 'byung ba ltar yid mi bde ba la sogs pa las khro ba skye bas rgyu la brten pa ni mnyam mo/ /sems pa dang bcas pa bsams bzhin du khro bas bdag mi bzod ce na/smras pa/ skye bo gang yang khro bar bya'o zhes bsams nas khro ba ma yin la bdag skye bar bya'o zhes bsams te khro ba yang mi skye ba'o/ /'on kyang rgyu de dang de las so/ /de bas nyes pa ji snyed pa dang sdig pa sna tshogs pa rnams rkyen gyi nus pa las skye bas rang dbang med pa nyid do//tshogs pa yang bsams bzhin du mi skyed do/ 'on kyang rang gi rgyu mthar phyin pa las 'bras bu skye'o/ /gang skyes de la yang tshogs pas bdag bskyed ces sems pa med do/ /'on kyang 'di yod na 'di 'byung 'di skyes pa las 'di skye'o/ /brten nas 'byung ba ni gzung ba zhes dpyad nas gnod pa la bzod par bya'o//rang dbang kyang yod de ji ltar grangs can gyi gtso bo dang bdag ce na smras pa/ snying stobs dang / rdul dang mun pa rnams mnyam pa'i gnas skabs rang bzhin gtso bor 'dod pa/ gang bdag ces brtags pa de'ang bdag 'byung bar bya'o zhes bsams bzhin mi skye'o//gang gi phyir gtso bo la sogs pa de ma skyes par med pa nyid mo gsham gyi bu lta bu la skye bar 'dod pa ga la yod/ med pa cung zad kyang mi skye bas rnam par smin pa tsam gsal bar skye ba zhe na/ rnam par smin pa 'am gsal ba yang med pa ji ltar skye/bdag la'ang skyon 'di med pa ma yin te rtag pa la skye ba med pa'i phyir ro/ /ri bong gi rwa lta bu de la yang skyon de nyid do/ /ma skyes par ni de med na/ /de tshe skye bar 'dod pa gang / /skyon gzhan yang 'di la yod de/ gang gi tshe bdag gtso bos byin pa'i longs spyod la 'jug pa de'i tshe/sngar ma zhugs pa rtag pa phyis 'jug pa mi rigs so/ /'jug pa ni yang yul la longs spyod byed pas ldog par mi rigs te/ yul la longs spyod pa'i rang bzhin yin pa'i phyir ro/ /rigs pa la sogs pa'i bdag la yang skyon 'di ste/grangs can la khyad par ni sems pa med pa'o/ /rtag pa ni rtag tu tshul gcig pa'o/ /sems pa dang sbyor bas sems pa dang ldan/ nam mkha' bzhin du khyab byed bya ba med pa'o/ /gang gi phyir smras pa/ 'dir bdag gzhan gyis 'dod pa ni/'dod pa la sogs pa yi rten/ /rang nyid sems pa med pa'i tshul/ /rtag par kun tu khyab pa ste/ /dge dang mi dge'i byed pa po/ /las kyi 'bras la longs spyod pa/ /sems pa'i sbyor bas sems pa can/ /rang nyid kyi ni ma yin no/ /zhes so/ /de bas ci yang mi byed pa kho na'o//gal te rnam shes dang 'bad pa'i 'brel pas byed pa por 'dod na rnam shes dang 'bad pa la sogs pa rkyen gzhan dang 'brel kyang rtag pa yin pas 'gyur ba med pa la bya ba ga la yod/ sngar bzhin byed pa'i dus su yang bya ba gang yin pa la des phan pa ci byas/ bdag de'i byed pa 'di zhes 'brel pa'i rgyu mtshan med do//des na rang dbang can med do/ /bsdus shing bshad de bshad pa'i rigs pas thams cad gzhan dbang ste/ rgyu gang las byung ba rgyu de yang rang gi rgyu la ltos pa can yin pas/ thog ma med pa nas chos thams cad byed pa med pa'o//de ltar mya ngan las 'da' ba bzhin byed pa dang bral ba chos thams cad yin pa la blo ldan gar khro/ 'o na de ltar rang dbang can med pas gang gis gang 'gog ce na/ rigs pa mnyam pa'i phyir bzlog pa'ang rigs pa min zhe na/ lan ni bzlog par rigs te gang gi phyir bzlog pa de rten nas sdug bsngal rgyun chad par 'dod/de bas na zhe sdang la sogs pa bzlog par rigs pa kho na'o/ /de bas dgra'am mdza' ba'am gnod pa byed pa mthong na 'di 'dra'i rkyen ni gnod pa'i tshul can 'di la yod par nges nas bde bar 'dod de/ yid mi bde ba mi byed do//gal te rgyu med par rang dga' tsam gyis skye bo rnams kyi don grub na/ de'i tshe sdug bsngal su la mi 'byung ste/ gang gi phyir bdag gi sdug bsngal sus kyang mi 'dod do/ /gzhan gyi gnod pa la ji mi snyam pa'i bzod pa bshad de/ ma dpyad par byed pa 'di ni bag med pa'o//rang gi lus rang nyid kyis tsher ma'i lam la sogs pa dang / khros pas bud med la sogs pa rnyed par dka' ba thob pa'i phyir bza' btung la sogs pa spangs pas gnod par byed do/ /'gyeg pa dang / ri'i g.yang la sogs par mchong ba dang / mi'i nang du 'gro'am/ chur 'jug pa'am/ dug dang mi 'phrod pa za ba 'am/ bza' btung ha cang mang bas rmongs pa 'ga' zhig rang gi lus nyams par byed/ gzhan gsod pa la sogs pa bsod nams ma yin pa spyod pas kyang ngo / /gang gi tshe de ltar bshad pa'i rigs pas nyon mongs pa'i shugs kyis bdag nyid sdug pa 'ang gsod na/de'i tshe de dag gzhan gyi lus la gnod pa mi byed par ga la 'gyur/ de dag snying rje'i snod yin par bshad de/ nyon mongs pas myos par byas pa/ bshad pa'i rigs pas bdag gsod pa la 'jug pa rnams la snying rje med pa skyon 'ba' zhig pa ma yin gyi zhe sdang ji ltar skye/snying rje'i gnas la de mi rigs so/ /bzod pa'i thabs bshad de/ gal te byis pa so so'i skye bo rnams kyi rang bzhin gzhan la gnod pa byed pa kho na yin na/ de'i tshe de dag la bdag gis zhe sdang mi rigs te/me'i rang bzhin tsha ba la sreg par byed pas so/ /gal te skyon de rang bzhin ma yin glo bur ba ste/ sems can rnams ni rang bzhin gyis nges pa yin na/ de lta na de dag la khro ba mi rigs te/ dper na dud pa ma rungs pa dang ldan pa'i nam mkha' bzhin no//ma rungs pa ni nam mkha'i rang bzhin ma yin te/ dri ma med pa'i phyir ro/ /'on kyang du ba'i skyon yin te/ du ba ltar skyon rnams la khro bar mi rigs shing sems can la ma yin te/ rang bzhin yongs su dag pas so/ /gzhan yang gang sdug bsngal gyi rgyu gtso cher gyur pa gal te/de nas de 'phen pa po la khro na de'i tshe de'ang zhe sdang gis 'phen pa yin pas bdag zhe sdang nyid la zhe sdang bar rigs so/ /las 'bras mi slu bar bsgoms nas 'di brjod par bshad de/ skye ba gzhan du bdag gis kyang sems can kun la de ltar gnod pa byas/de bas bdag la gzhan la gnod pa byas pa'i rgyu mthun 'di 'byung bar rigs pa kho na'o/ /rigs pa gzhan bshad de/ dgra'i mtshon dang bdag gi lus 'di gnyis sdug bsngal gyi rgyu yin/ gal te rgyu nye bar sdud pa po la khro na de'i tshe rang la yang rigs te/gang gi phyir des mtshon cha dang / bdag gi lus phyung bas gang la khro/ gnyis ka la skyon mnyam pa nyid kyi phyir ro/ /rang dang gzhan la skyon mnyam par bshad nas/ rang kho na'i skyon bshad de/ shu ba ni mi'i gzugs 'dra ba brdeg pa la sogs pa mi bzod pa bdag gis gzung ba yul lnga la sred pa spong bar gyur pa ste/dbang po lnga dang ldan pa'i lus de dag gis de la longs spyod pa'i phyir ro/ /de la gnod pa byung bas su la khro/ /lus ma bzung na gnod pa med/ /bzung ba ni bdag gis te bdag kho na skyon can no/ /gzhan yang bdag byis pa sdug bsngal mi 'dod sdug bsngal gyi rgyu ni 'dod/rgyu yod pas 'bras bu gdon mi za bar 'byung ste/ de la longs spyod pa'i phyir ro/ /de la gnod pa 'byung bas su la khro/ /lus ma bzung na gnod pa med bzung ba ni bdag gis te/ 'bras bu mi 'dod na rgyu yang spang dgos/de las zlog pa byed pas byis pa bzhin/ de bas rang gi nyes pa las byung ba'i sdug bsngal yin pa la gzhan la khro bas ci/ ral gri ni gri la sogs pa mtshon pa ste/ de dag ral gri lo ma yin pa de lta bu'i nags dang / bya ni bya rgod la sogs pa bdag gi las las byung ba ltar/gzhan gyi mtshon cha la sogs pa yang ngo / /de bas nga'i las kyis bskul ba bdag gis gnod pa sngar byas pas bdag la gnod pa byed pa 'byung / de bas de dag dmyal bar 'gro bas/ bdag kho nas de dag ma brlag gam 'am gyi sgras rang sems 'bod pa'o//phan pa byed pa kho na la dga'i byed/ ces tshigs bcad gnyis kyis bshad de/ gnod byed 'di dag la brten nas bzod pa bsgoms pas skye ba snga ma la bdag gis byas pa'i sdig pa mang po cig zad/ bdag la brten nas bdag la gnod pa byas pas/ de dag sdug bsngal shin tu mi bzad pa'i dmyal bar 'gro de bas bdag kho na de dag gi gnod byed yin zhes bya ba la sogs pa go sla'o//gnod pa'i le lan las log pa bsam pa'i yon tan gal te bdag la 'byung na des dmyal bar mi 'gro bas phan byed de dag la yon tan ci byung /bdag gis bdag bsrung bar gyur pa na'o/ /gal te de dag la gnod pa'i le lan byas par gyur na/ des kyang de dag bsrung bar mi 'gyur ro/ /bdag la gnod pa byas nas 'og tu 'gro ba'i phyir/ bdag gi spyod pa ni rdeg pa la yang brdeg par mi bya'o zhes bya ba la sogs pa nyams par 'gyur/de bas thabs med pa'i phyir de dag nyams so zhes snying rje'o/ /chos la nges par rtogs par bzod pa bshad de/ yid ces bya ba la sogs pa'o/ /sdug bsngal rnam pa gnyis ma spyad pas gnod byed yin te lus dang yid las byung ba'o/ /de la yid ni sus kyang gar yang gzhom mi nus te lus can ma yin pa'i phyir ro//de bas de las byung ba'i sdug bsngal ni don dam par med do/ /rtog pa las byung ba yid mi bde ba la sogs pa yod pas bshad de/ lus la mngon par zhen pas na lus kyi sdug bsngal sems la gnod do//brnyas pa la sogs pa lus la yang mi gnod de/ bems po yin pa'i phyir ro/ /'di dag ni lus la mi gnod pas kye sems can khyod ci ste khro brnyas pa la sogs pa thos nas bdag la 'jig rten ma dad par rtogs nas mi 'dod ce na/ smras pa/ 'di ni dpyad par bya ba yin te/ bdag la brnyas pa la sogs pa thos nas skye bo rnams ma dad pa gang yin pa des bdag za bar 'gyur ram/ skye ba 'di'am pha rol du gang gis ma dad pa 'di bdag mi 'dod/ de bas 'dir mngon par zhen par mi bya'o/ /bdag gi rnyed pa'i bar chad byed pas ma dad pa mi 'dod na/rnyed pa mi rtag pa 'di nyid du nyams par 'gyur/ brnyas pa la sogs pa byed pa la khros pas byung ba'i sdig pa brtan par gnas par 'gyur ro/ /gnod byed la gnod pa byas pas rnyed pa na/ log 'tsho yun ring po byung yang mchog ma yin te/rnyed pa med pas de ring shi yang rung / gang gi phyir yun ring po bsdad kyang 'chi ba'i sdug bsngal de nyid do/ /khyad med kho na gnyis kyis bshad de/ rmi lam zhes bya ba la sogs pa'o/ /ji ltar 'ga' zhig rmi lam du myong ba lo brgyar bde ba la longs spyod nas sad kyang gzhan ni skad cig tu'o//rmi lam du dmigs pa'i bde ba myong ba gnyi ga gnyid sad na myong ba'i bde ba de 'ong nyams/ de rjes su mi 'brang 'on kyang dran pa tsam lhag ma'o/ /'chi ba'i dus su dpe de nyid yin te/ yun ring por gson pa dang /yun thung bar gson pa gnyis kyi'o/ /yun rings gson pa dang yun thung bar gson pa gnyi ga yang phyis rjes su mi 'brang ste 'on kyang dran pa tsam/ thams cad rmi lam myong ba ltar/ /song ba slar ni mthong mi 'gyur/ /zhes gsungs pa'i phyir ro/ /de bas log 'tshol dgos pa med do//de bas na rnyed pa'i phyir dang bde ba'i phyir mi bzod pa mi rigs par bshad de/ rnyed pa mang po thob nas bde ba yun rings myong nas kyang 'chi ba'i dus su rgyags med pas lag pa stong pa dang / 'dod yon dang mi ldan pas sgren mo kho na chom rkun pas phrogs pa bzhin du 'jig rten pha rol du 'gyur ro//gal te rnyed pas yun rings gson cing sdig pa bshags pa la sogs pas sdig pa zad cing / sdom pa bsrung bas bsod nams kyang byed ce na/ 'o na rnyed pa'i ched du de la gnod pa rnams la zhe sdang byas te/ bsod nams zad pa dang sdig pa mi 'byung ngam/de bas gang tshogs bsags pa'i phyir gson pa/ gal te legs spyad de nyid nyams na mi dge ba byed pa'i gson pas ci zhig bya/ grags pa ma yin pa sgrog mkhan la gang khyod khros pa des nyams par byed pa ste/ yon tan sbed pa dang / skyon brjod pas so//yang na sems can ni 'jig rten pa rnams nyams par byed de/ bdag gi grags pa ma yin pa bsgrags pas bdag la ma dad par byed pas/ grags pa ma yin pa sgrogs pa la khro zhe na/ smras pa/ de'i tshe gang gzhan gzhan rnams kyi grags pa ma yin pa brjod/ de la yang khyod ci ste mi khro/ des kyang sems can rnams nyams par byed pa'i phyir ro/ /de bas na bdag med kyang de sgro btags nas gzhan la mi bzod pa mi rigs so/ /gzhan yang sems can gzhan la rag las pa'i ma dad pa gzhan gyis byas pa de'i phyir/ ma dad pa rnams las te/ gzhan la thos nas mi snyan pa sgrogs pa rnams la khyod bzod ce na/ de'i tshe nyon mongs pa 'byung ba nyid gzhan yin te/ de la rag las pa la yang khyod kyis bzod pa bya bar 'os/ rigs pa mtshungs pa'i phyir ro/ /des rang sems la go bar bya'o/ /dad pas kyang sdang sems mi bya'o zhes bshad de/sku gzugs zhes bya ba la sogs pa'o/ /'joms par byed pa dang / sun 'byin pa rnams la zhe sdang mi rigs te/ gang gi phyir sangs rgyas dang byang chub sems dpa' dang / rang rgyal dang / nyan thos la gnod pa mi srid de/ bdag tu 'dzin pa med pa'i phyir ro//dgag par nus na snying rje'i sems kyis dgag par bya'o/ /bla ma dang rang gi gnyen dang sogs pa'i sgras rus gcig pa'am nye du la sogs pa ste/ de dag la gnod pa rnams la sngar bzhin du/ nyes pa ji snyed thams cad dang / /sdig pa rnam pa sna tshogs pa//de kun rkyen gyi stobs las byung / /rang dbang yod pa ma yin no/ /zhes so/ /gzhan yang sems can gyis byas pa ni lag pa dang rkang pas gang byas pa'o/ /sems can ma yin pas byas pa ni dbyug pa dang mtshon dang nad la sogs pas byas pa'o/ / gnod pa ni sems can kho na la 'byung ste/ de bas gnod pa'i rgyu gnyis yin pas/ kye yid sems can kho na la gnod pa mthong nas bzod par mdzod/ gang zhig gang skye ba'i gnas yin pa de nyid las bskyed de/ dper na 'dam las pad+ma bzhin/ /rnam shes dang bcas pa'i lus kyang skye ba'i gnas zhes rang bzhin gyis brtags so//rang bzhin la klan kas mi phan te bzod par bya'o/ /gnyis ka'i skyon bshad de/ gti mug gis bdag dang bdag gi bar bzung ste/ 'ga' zhig gis bsdigs pa dang brdeg pa la sogs pa byas pas nyes pa can du 'gyur/de la rmongs pas gzhan la yang khros te/ slar brdeg pa la sogs pa byas pas so/ /de dag gi nang nyes pa med par gang brjod/ gang nyes pa can du brjod gnyi ga la skyon mtshungs pas so/ /gang gi phyir gzhan dag gis khyod la gnod pa bskyal ba/ kye yid 'bras bu 'di lta bur gyur pa'i las sngar khyod kyis ci ste byas/ de lta yin kyang phan pa 'tshal zhe na/ smras pa/ sdug bsngal gyi rgyu thams cad las kyis bskyed pa yin pas/ de bzlog par bdag gis ga la nus/ gang gi phyir tshogs pa mthar phyin pas 'bras bu nyid bskyed pa nyid do//sems can 'di dag nyon mongs pa'i dbang gis las ngan byed pa las bzlog par mi nus par shes na/ dge ba la de ltar 'bad par bya ba'i gang gi nus pa'i khyad par thob nas/ lam dam pa la 'jug par byed pa rnams phan tshun du byams sems can dang ldan par 'gyur ba rnams so//da byed pa'i cho ga bshad de/ khang pa gcig tshig pa na khang pa gzhan du me song zhing / rtswa sogs gang la mched pa de phyung ste dor ba yin thams cad mi nyams pa'i phyir ro/ /de ltar bshad pa'i rigs pas sems ni dngos po gang la chags pas/zhe sdang gi mes tshig pas skad cig de dor bar bya zhes pa spangs nas so/ /de ci'i phyir zhe na/ bsod nams tshig tu dogs pas so/ /gsod par 'os pa gang yin pa gal te de lag pa tsam bcad nas btang na de'i tshe rnyed pa chen po rnyed pa ma yin nam/ de ltar mi lus kyi sdug bsngal 'ching ba dang smod pa la sogs pa myong nas dmyal ba'i sdug bsngal las grol na ci ma rung zhes rtogs nas bzod par bya'o//gal te rdung ba dang rdeg pa la sogs pa tsam lta bzod par mi nus na/ dmyal ba'i rgyu khro ba ci ste bzlog par mi byed/ khros pa'i nyes pas don med par btsan thabs su yang sos la sogs par lan stong phrag tu gcod pa dang 'tshed pa la sogs pas bdag sdug bsngal bar 'gyur ro//sdug bsngal myong zhing bdag gis rang gi don nam gzhan gyi don phan pa bde ba ma byas pa nyid do/ /lag pa gcod pa la sogs pa 'dis dmyal ba'i sdug bsngal dang mi 'dra mod/'on kyang don chen ni 'gro ba kun gyi don byed pa sangs rgyas nyid kyis byed par 'gyur/ de bas 'gro ba'i sdug bsngal sel bar byed pa'i sdug bsngal la dga' ba kho na byed par rigs so/ /gzhan gyi yon tan thos nas phrag dog dri ma 'khru bar bshad de/yon tan lhag pa can la bstod nas gal te 'ga' zhig gi bde ba thob pa/ de'i tshe yid khyod kyis kyang de la bstod nas ci ste bde ba myong bar mi byed/ don med par phrag dog gi me 'bar bas ci ste bdag 'tshig par byed/ gang dang gang du dga' bar 'gyur/ /zhes bya ba la sogs pas bde ba la zhen pa dgag ce na ma yin te nyes pa dang bcas pa dgag pa yin gyi 'di ni nyes pa med pa bde ba'i rgyu brtan pa la mkhas pa rnams kyis ma bkag par gzhan gyi yon tan 'di la phrag dog mi byed ces nas gzhan dag kyang sdud par 'gyur ro//bstod pa byed mkhan kho na'i bde ba de yin pas bdag gis bzod mi nus she na/de'i tshe rang gi don du gla ba la gla rngan dang sogs pa'i sgras phan btags pa la phan lan gzhan gyi bde ba la sdang bas mi yong / gang gi phyir des de la bde bar 'byung ngo / /de bas mthong ba ni skye ba 'di nyid kyi dang ma mthong ba ni pha rol gyi ste/mi bzod pa la gnyi ga med par 'gyur/ gal te 'ga' zhig khyed kyi yon tan brjod na de'i tshe gzhan gyi bde ba'ang khyed 'dod/ gal te gzhan gyi yon tan brjod na de'i tshe khyod kyis de la bstod nas/ gang rang gi bde ba de'ang mi 'dod pa/ gzhan yang kye yid khyod kyis ma rig pa la smod/gang gi phyir sems can thams cad bde ba thams cad dang ldan par bdag gis bya'o zhes bya ba'i 'dod pas byang chub tu sems bskyed nas/ da ni dad pa'i gnas la sems dang bar byas la rang nyid kyis thob pa'i bde ba can sems can rnams la ci ste khro/rnyed pa la sogs pa mi 'dod pa mi rigs par bshad de/ 'dod pa dang gzugs dang gzugs med pa'i khams gsum la gnas pas mchod pa'i sangs rgyas nyid sems can rnams kyi khyod 'dod la bsnyen bkur ngan ngon tsam mthong nas ci'i phyir de la gdung bar byed/rnyed pa dgongs te bshad pa/ khyod kyis gso bar bya ba khyed rang gi bu la sogs pa gang gis gso bar byed/ de khyed kho na la ster bas khyed kyi nye du gso bar byed pa gang yin pa de thos nas/ dga' bar mi byed par khro ba ci/ byang chub kho na 'dod ce na/ smras pa/ sems can rnams kyi byang chub 'dod mkhan gang yin pa des de dag gi phun sum tshogs pa ci ste mi 'dod/gzhan gyi phun sum tshogs pa la khro ba'i mi la byang chub kyi sems ga la yod/ de nyid kyi rnyed pa bdag gi ma yin zhe na/ smras pa/ gal te khyod kyis mi 'dod pa'i gang zag gis de ma thob cing /de'i yon bdag gi khyim kho nar gnas par 'gyur/ de bas de la byin pa dang ma byin pas khyed la ci/ rnam pa thams cad du khyed la de med pas mi bzod pa don med re zhig dpyod dang gang la skye bo rnams kyis mchod pa des rang gi bsod nams 'bras bu ster ba la phyogs pa de 'dor ba yin nam/yang na dad pa can yon bdag 'dor ram/ yang na dang ba'i rgyu rang gi yon tan 'dor/ rnyed kyang mi len nam smros shig /khyed ci la mi bzod/ bsod nams la sogs pa 'dor mi nus pa nyid do/ /khyod ni rang gi la sogs pa go sla'o/ /gzhan yang khyed la dri/gal te khyod kyi dgra bo la mi 'dod pa byung na las ngan gyi dbang gis de la khyod dga' bas slar ci/ bdag gis smon pas mi 'dod pa de byung zhe na/ ma yin te de tsam gyis rang gi rgyu med na mi srid do/ /srid du chug /gal te dgra bo las mi 'dod pa khyed kyi smon pas 'grub na/ de'i sdug bsngal khyed la dgos pa ci/bde ba ni med do/ /gal te gzhan gyi sdug bsngal la dga' ba don yin na/ 'di bas phung po gzhan ci zhig yod/ ngan song gi rgyu yin pas so/ /gang gi phyir gzhan phung ba'i sems lcags kyu 'jigs su rung ba/ nyon mongs pa'i nya pas btab pa/ gang las gshin rje'i pho nya rnams kyis bslangs te/ me 'bar ba'i bum pa chen por bcug ste 'tshed par 'gyur/ de bas 'di mi legs so/ /bstod pa la sogs pa la gnod pas bde ba gang yin pa de yang ma spyad pas zhes bshad de/ skyes bu'i don ni rnam pa lnga ste/ bsod nams dang /tshe ring ba dang / lus stobs dang / nad med pa dang lus kyi bde ba'o/ /de dag gi nang na bstod pa la sogs pa 'di gsum gar yang mi dgos so/ /blo dang ldan pa bdag gi don rig pa'i rang don rnam pa lnga po 'di dag srid de/ 'di dag gis ye shes sgrub pa'i phyir ro//'o na yid la yang yod ce na/ smras pa/ yid kyi bde ba 'dod na chang dang cho long dang / smad 'tshong gi bud med bsten par 'gyur/ de ni mi rigs te sdig pas so/ /de bas bstod pa la sogs pa la byis pa dga' bar byed pa yin gyi blang bya ma yin no/ /byis pa rnams kho na khyod nyi ma yin khyod zla ba zhes bya ba'i ched du stod byed kyis nor shor bar byed/brtags pa'i yon tan de dag gis bdag nga rgyal bskyed nas dgra bo phung ba'i grags pa'i don du g.yul du zhugs te bdag kyang gsod par byed/ don dam par bstod pa de dag bza' bar bya ba yin mod/mi bden pa'i rnam rtog las byung ba/ nga'i grags pa zhes brtags pa'i bde ba yang shi na su'i yin par 'gyur/ de bas byis pa'i rtse ba 'di dag dang mnyam par bshad de/ ji ltar byis pa bye ma la khang pa byas te/ de la rtse zhing yi rangs 'ga' zhig gis de bshig pa na bdag gi khang pa bcom par bsams te/brang rdung zhing ngu / sdug bsngal chen po can du 'gyur/ de bzhin du bstod pa la sogs pa nyams pa'i don med par sdug bsngal bar bdag la snang / 'di nyid du rnam dpyod ni tshigs su bcad pa bzhis bshad de/yi ge rnams kyis bzhin sgra ni sems pa med pas des bdag la bstod ces mi srid de/ gzhan bstod pa la sogs pa mngon par dang bas zhes bya ba rtog pa dga' ba'i rgyu yin no/ /'brel pa med par bshad de/ sems can gzhan nam bdag la yang rung ste/ gzhan dga' bas bdag la ci/gang gi phyir dga' ba de de nyid kyi yin pas de'i cha shas chung ngu yang bdag la med do/ /gal te de'i bde bas blo ldan nyid kyang bde na de'i tshe gzhan la dang bas bde ba thams cad la bdag gi bde ba de yod par 'gyur/ gzhan la dang ba bskyed nas bde bar gyur pa rnams la ci'i phyir bdag bde bar mi byed/de bas rgyu mtshan gzhan med pa'i phyir/ bdag ni bstod do zhes brtags pas rang la dga' ba skyes te gzhan dga' bas dga' ba'i phyir ma yin no/ /der yang bdag la dga' bo zhes bya ba la de'i bdag dang / de las byung ba'i 'brel pa med par byis pa'i ro la 'ba' zhig pa 'di yin no//don dam par bstod pa la sogs pa 'di bdag gi bsrung ba dang / srid pa'i duHkha las skyo ba nyams par byed/ yon tan gyi nga rgyal gyis gzhan gyi yon tan dag la ser sna byed pa de'i yon tan sbed pa'i phyir ro/ / de dag gi phun sum tshogs pa la yang khro ba phrag dog byed do/ /de bas bdag gi bstod pa la sogs pa gzhom pa'i phyir gang nye bar gnas pa de dag ngan song du ltung ba las/ bdag bsrung ba'i tshe ched du 'jug pas mdza' bo yin gyi gnod byed ma yin no/ /gzhan yang grol bar 'dod pas rnyed pa la sogs pa'i 'ching ba lta bu zhen pa'i gnas yin pas mi rigs te/dgra bo gang zhig gis bdag bcings pa la grol bar byed pa de la bdag sdang bar ji ltar rigs/ rnyed pa la sogs pa la zhen pas srid pa'i sdug bsngal la ltung bar 'dod pa'i gang sgo 'phar du gyur pa'i sangs rgyas kyi byin gyi rlabs kyi mthus 'di dag go bzhin du de la zhe sdang rigs so//rnyed pa la sogs pas 'joms pas bsod nams la gegs byas nas/ de lta yin kyang de la khro ba mi 'dod de/ gang gi phyir bzod pa dang mnyam pa'i dka' thub med/dge ba thams cad kyi rgyu yin pa'i phyir ro/ /kye 'bad pa med par de ni nye bar gnas so/ /gal te bdag rang gi skyon ma rig pas bzod pa mi byed na de'i tshe bdag kho nas bsod nams 'di la gegs byas/ bsod nams kyi rgyu rnyed pa 'joms pa po nye bar gnas pa'o/ / rigs pa bshad de bzod pa zhes bya ba/ /gang zhig gnod pa med na mi 'byung ba/ /gnod byed gang zhig yod na bzod pa 'byung / /gnod byed de nyid bzod pa'i rgyu yin pas/ /thabs la mkhas pa'i de gegs ji ltar yin/ /dpe bshad de/ sbyin bdag gi sbyin pa'i dus la sleb pa'i 'dod mkhan gyis/sbyin pa'i bar chad byed par ga la 'gyur/ /de bzhin du rab tu 'byung bar 'dod pas mkhan po thob pas na rab tu 'byung ba'i gegs byar mi rigs so/ /gzhan yang bsod nams ma bsags pa mang bas nor 'dod pa ni rnyed par sla'i/ gnod byed ni ma yin te rgyu mtshan med par mi 'byung bas so//gang gi phyir gzhan la gnod pa las bzlog pa na/ bdag la sus kyang gnod pa mi byed do/ /de bas khyim du byung ba'i gter du 'bad pa med par thob pa'i dgra bo la dga' bar bya'o/ /byang chub spyod pa'i tshogs sogs pa'i grogs yin pa'i phyir ro//de bas bzod pa 'di dag bzod pa bsgom pa dang / 'di gnod pa byed pa gnyis kyis bsgrubs pa yin te/ chos rtogs pa 'di thog mar 'di la sbyin gyi gdul bya gzhan la phyis zhes smon lam bya'o/ /ji ltar byams pa'i stobs byang chub sems dpas lnga sde la ltos nas smon lam byas pa gang gi phyir 'di sngon du 'gro ba bzod pa yin no//byang chub sems dpa'i bzod pa grub par gyur cig ces pa'i bsam pa gnod byed la med pas/ bsod nams bzod pa'i rgyu yin kyang mchod par 'os pa ma yin zhe na/dge ba rdzogs pa'i rgyu dam pa'i chos bsam pa gang yang med pas ji ltar mchod/ gal te gnod pa'i bsam pa dgra la yod pas 'dir mchod ce na/ smras pa/ gnod pa'i bsam pa 'di la med pa na bdag gi bzod pa ga la 'grub/ dper na phan pa dang bde ba byed pa'i sman pa las bzhin no//gang gi phyir gnod byed la zhe sdang mi byed na bzod pa 'grub bo/ /de bas de'i bsam pa ngan pa kho na la brten nas bzod pa skye'o/ /de bas de nyid bzod pa'i rgyu yin pas dam pa'i chos bzhin mchod par bya'o/ /gnod byed tshogs kyi rgyu yin par lung gis grub cing bshad de/sems can rnams dang rgyal ba rnams mgu bar byed pa'i zhing yin par thub pa sangs rgyas kyis gsungs so/ /gang gi phyir 'di thams cad mgu bar byas nas mang po zhig phun sum tshogs pa'i mthar thug sangs rgyas nyid rtogs par 'gyur ro//ji ltar sangs rgyas dang mnyam zhe na/ smras pa/ sangs rgyas kyi chos stobs la sogs pa gnyi ga las rtogs pa mnyam pa la/ rgyal ba la mgu ba ltar sems can la mi byed pa mi rigs so/ /sems can zhe sdang la sogs pa'i dri ma dang bcas pas rgyal ba dang ji ltar mnyam zhe na/smras pa/ bsam pa'i bdag nyid che ba rang bzhin gyis 'dir ma yin te/ 'on kyang byang chub ces bya ba'i 'bras bu byed pa la nus pa mnyam pa'i sgo nas so/ /de la bdag nyid chen po mnyam pas sems can dag rgyal ba rnams dang mnyam mo//'di nyid la rigs pas bshad de/ sems can rnams la byams pa sgom pa po skye bo rnams kyis mchod pa gang de ni sems can bdag nyid che ba nyid yin te/ dper na sangs rgyas la sems dang bar byas pas bsod nams gang 'byung ba de sangs rgyas kyi bdag nyid che bar brjod pa bzhin no//de bas na sangs rgyas kyi chos thob pa'i rgyu yin pas rgyal ba dang mnyam par bshad/ don dam par rgyal ba dang mnyam pa gang yang med de/ gang dag gis yon tan rnams kyi cha shas la yang mtha' med pa/ de lta bu yon tan rin po che'i 'byung gnas rnams dang mtshungs pa ga la srid/gang gi phyir yon tan gyi snying po rnams kyi phung po gcig pu'i yon tan phra rab tsam yang gal te sems can gang rung cig la mthong bar gyur na/ de mchod pa la khams gsum las byung ba'i rin po che la sogs pa rnams 'os pa ma yin no/ /'khor ba thog ma med pa na nyon mongs pa srin po'i shugs kyis sems can la gnod pa dpag tu med pa byas yod/de'i lan po sems can mgu bar byed pa las gzhan thabs gang yang med do/ /de byas nas sems dri ma med pa la stobs bcu la sogs pa gsal bar snang ngo / /cha shas 'di dang rjes su mthun pa'i bya ba 'di yin pas/de byas nas sangs rgyas la mchod par 'gyur te/ bcom ldan 'das kyis gnang ba'i cho ga byas pas so/ /gzhan yang bcos pa ma yin pa'i gnyen phan mtha' yas pa btags pa/ sangs rgyas dang byang chub sems dpa' rnams phan btags pa'i lan pos sems can mgu bar byed pa ma yin pa de med de/de dag la rang don bsgrub tu med pa'i phyir ro/ /gang gi phyir rgyal ba rnams rang gi sku'i phyag dang zhabs dang dbu la sogs pa gcod pa dang / mnar med kyi dmyal bar 'jug pa des na sems can gdon pa'i phyir sems can de dag la phan pa byas na rgyal ba rnams la phan pa byas par 'gyur/gang gi phyir de lta yin pa des gnod pa byed pa rnams la yang dge ba kho na byed pa yin gzhan du na de bzhin gshegs pa la mnyes pa byas par mi 'gyur ro/ /bla ma la mnyes pa byed par bshad de/bdag gi rjer gyur pa rgyal ba rnams gang dag gi ched du bskul yang ltos pa med pa lta zhog /rtswa bzhin du rang gi sku gtong ba na bdag bran yin yang rje bu rnams la ci ste nga rgyal byed/ bran du mi byed bdag la smad/ /yid du mi 'ong ba'i bu rnams lta bu gang dag bde na dga' bar 'gyur ba dang /gang la gnod pa byas pas mya ngan du 'jug /chags sdang med kyang smon lam gyi mthus rgyal ba la 'di ltar 'byung / byang chub sems dpa' rnams la ni dngos su'o/ /gzhan ni go sla'o/ /thugs rje kho na gsal bar bshad de/ ji ltar yan lag thams cad la khyab cing lus 'bar ba'i mi la 'dod pa'i yon tan lnga kas kyang yid bde bar mi 'gyur ba ltar/sems can la gnod pa 'byung na thugs rje can rnams la mnyes pa'i thabs med do/ /gang gi phyir de lta yin pa de bas na/ bdag gi skye bo rnams sdug par byas la rgyal ba rnams sdug bsngal bar byas pa gang yin pa de sdig pa de ring bshags par bya ste/bdag gis gang mi dge ba byas pa de thub pa rnams kyis bzod par gsol/ bdag bu yin pas bdag la thugs rje yod pas so/ /mos pa bstan par bshad de/ de bzhin gshegs pa rnams zhes pa la sogs pa go sla'o//kun rdzob tu thugs rje chen po'i dbang du gyur pas 'gro ba ma lus pa bdag tu 'dzin pa 'di la the tshom med/ gzhan du na 'tshang rgya ba mi srid pas so/ /bdag dang gzhan brje ba shin tu goms pa'i phyir ro/ /de bas sems can gyi ngo bor mthong ba 'di dag mgon po kho na yin pas 'dir mi mgu ba'i rigs pa med do//de bzhin gshegs pa rnams mnyes par byed pa ni sems can mgu bar byed pa kho na yin te/ bshad pa'i rigs pas so/ /rang don bsgrubs pa yang 'di yin te sems can mgu bar byas pa'i le lan yin pa'i phyir ro//'jig rten gyi sdug bsngal sel ba yang 'di nyid de/ des byas pa'i gnod pa la bzod pa byas pas de dag mos pa la lam sbyar bas so/ /bsgrub bya gsum ka bsgrubs pas 'di nyid bdag gi brtul zhugs nges par shog / rigs pa gzhan bshad de/ ji ltar rgyal po'i mi gcig pu yin yang skye bo'i tshogs chen po la yang gnod pa byed/ skye bo'i tshogs mig rgyang ring ba ni phyis rgyal po'i gnod pa mthong bas gcig pu de la gnod par mi byed do/ /gang gi phyir de gcig pu kho na ma yin gyi rgyal po'i thabs de stobs ldan pa'i phyir ro//dpe de bzhin du gzhan lta zhog stobs med pa la yang smad par mi bya'o/ /gang gi phyir stobs med kyi gnod byed la gshin rje'i pho nya rnams dang / snying rje dang ldan pa lha la sogs pas gnod lan byed do/ /de bas sems can rnams mgu bar bya ste/ji ltar rgyal po gtum po dam pa kun gyis ci 'dod byas pas/ mgu bar byed pa bzhin no/ /gsungs pa bas lhag pa bshad de/ rgyal po khros na nor 'phrogs pa dang tha mar gsod nus kyi dmyal bar gtong mi nus so/ /sems can rnams sdug tu bcug pas dmyal bar 'gro ba'o//rgyal po mnyes nas nor la sogs pa'i phun sum tshogs pa kho na ster gyi sangs rgyas nyid ster mi nus so/ /gang sems can mgu bar byas pas thob pa kho na'o/ /skye ba 'di nyid kyi 'bras bu bshad de/ bzod pa dang ldan pa'i sems can dga' bar 'gyur ro//de nas grags pa 'byung ngo / /dgra bo med pas skyid par 'gyur ro/ /skye ba gzhan du zhe sdang la sogs pa med pas dang ba 'dren pa'i lus dang / nad med pa dang / rgyun du dga' ba dang / yun rings gson pa dang / 'khor los sgyur ba'i bde ba thob par 'gyur ro/ /chos rnams de kho na nyid du spyod pa/chos rnams ma skyes pa yin no zhes bzod pa ni chos la nges par rtogs pa'i bzod pa'o/ /bzod pa'i le'u'i dgongs pa'i 'grel pa khyad par gsal byed ces bya ba ste drug pa'o// //de ltar bshad pa'i rigs pas bzod pa dang ldan pa brtson 'grus rtsom ste/ma bzod na pham par 'gyur bas so/ /gang gi phyir brtson 'grus la 'tshang rgya ba nyid gnas pa yin no/ /brtson 'grus med na bsod nams kyi tshogs mi 'byung ste/ ji ltar brkyang ba dang bskum pa la sogs pa'i g.yo ba rlung med na mi 'byung ngo / /brtson 'grus kyi mtshan nyid gang zhe na smras pa/dge ba la spro ba'o/ /mi dge ba la rang gi ngang gis 'jug pa ni le lo kho na'o/ /brtson 'grus ni dge ba sbyin pa la sogs pa dang / thos pa la sogs pa rtsom pa'o/ /des spang bar bya ba yin pas de'i dgra bshad de/ 'joms par byed pas mi mthun pa'i phyogs ni le lo ste lus la sogs pa las su mi rung ba'o//ngan pa rgod pa la sogs pa la zhen pa dang / byed pa dka' ba la sogs pa sems log pa ni sgyid lug dang / des rang la ma nus pa smod pa ni bdag nyid brnyas pa'o/ /le lo'i rgyu bshad de/snyom las kho na bde ba ste/ de la zhen pa dang gang rung bsten par 'dod pa 'di dag kyang srid pa'i sdug bsngal la skyo ba mi skye bas 'byung / 'di dag las le lo 'byung / de la le lo'i gnyen po bshad de nyon mongs pa kho rgya bas bshor te des zin pa/ skye ba kho na rgyu yin te/de'i nang du chud pa de bas gshin rje'i khar chud pa zhes da dung mi shes sam/ skyes nas nges par 'chi ba'i phyir ro/ /yang skyo ba'i rgyu bshad de/ rang gi sde ni rang gi rigs te/ de 'chi bdag gi rim pas khyer ba ma mthong ngam/ khyod kyang de ltar 'gyur ro/ /dper na nges par gsad par bya ba'i ma he rang sde bsad kyang gti mug gis rig par mi nus pa bzhin no//'chi bdag gis mgul pa bteg nas bltas pa 'bros pa'i lam kun bkag pa khyod ji ltar bza' bar 'dod pa dang / gnyid dang dga' byed nus/ gal te da lta le lo mi spong na/gang gi tshe nad dang rgas pa la sogs pa'i tshogs pa grabs su chud nas myur du 'chi ba 'ong bar 'gyur/ de'i tshe le lo spangs nas kyang ci/ 'di ma 'ongs pa ma thob pa dang / 'di byed par 'dod pas brtsams te/ 'di ni phyed zin pas mthar ma phyin pa kho na la glo bur du 'chi ba 'ong bar 'gyur/kyi hud bcom zhes bsams shing khyod ci byed par 'gyur/ nye du dang bral ba'i mya ngan gyi shugs kyis skrangs pa'i mchi ma dang bcas pa/ dmar por gyur pa'i mig gis blta ba'i re thag chad pa'i nye du rnams dang / gshin rje'i pho nya rnams kyis bzhin la blta zhing /rang gis byas pa'i sdig pa dran pas/ 'chi bdag rang gi lag gis dug zos zhes phyis 'gyod pas gdungs pa dang / sdug tu bcug pa'i sdug bsngal gyi skrag pa'i dmyal ba'i sgra thos nas/ bdag gi gnas skabs kyang 'di ltar 'gyur zhes skrag pa byung ba'i bshang ba yis lus la sogs pas myos par 'gyur tshe ci zhig bya/dper na ji ltar nya gson po kho na chus gang ba'i bum pa la sogs par bzhag nas 'dod pa de'i tshe gsod/ de bzhin du bdag kyang 'chi bdag gis yin zhes shes nas mi'i yul kho nar khyod 'jigs par rigs/ sdig pa byas nas dmyal ba'i sdug bsngal la 'jigs pa lta ci smos/kye gzhon sha can chu dron pos reg kyang shin tu snyi bas rab tu tsha bar 'gyur/ lhag ma go sla'o/ /bde ba bskyed pa'i rgyu bskyed pa la brtson pa med pa de'i 'bras bu bde ba 'dod pa dang / sdug bsngal mi bzod cing gnod pa mang ba dang /'chi bdag gis bzung bzhin du 'chi ba med pa'i rnam pa can/ de ltar 'khrul pa khyod kyi sdug bsngal can gyi kyi hud sdug bsngal dag gis bcom/ /mi khom pa brgyad spangs nas thob pa'i mi lus kho na gru yin te/ de brten nas sdug bsngal gyi rang bzhin chu bo chen po sgrol cig /brtson 'grus kyi lam du phyogs nas so/ /kye rmongs pa gnyid log pa'i dus 'di ma yin/ phyis ngan song du gru ni rnyed par dka'o/ /de ltar le lo bkag nas ngan la chags pa bkag par bshad de/ dge ba'i las la dga' ba mchog/ /ji lta bu zhe na/ bde 'gro'i rgyun skyed pas dga' ba'i rgyu mtha' yas pa dor nas/ g.yeng ba ni lus dang sems khengs pa dang / rgod pa la sogs pa'i sgras glu la sogs pa sdug bsngal gyi rgyu la/ khyod dga' ba ji ltar rigs/ kun rang sems la slob pa'o/ /sgyid lug pa la sogs pa'i tshigs bcad 'di gzhan gyis bcug pa yin gyi slob dpon gyi ma yin/sdom tshig yin zhe na/ 'o na le lo'i gnyen po dang / ngan la chags pa dang / bdag nyid brnyas pa'i gnyen po skabs su bab pa ci ste mi 'chad/ bdag dang gzhan mnyam pa dang / bdag dang brje ba gnyis/ 'dir skabs su ma bab pa ci ste 'dir bcug /bsam gtan gyi le'u kho nar brjod par bya ba yin no/ /sgyid lug pa'i gnyen po bshad de/ bdag lta bu byis pa byang chub kyi snod du ga la rung / dbang po rnon po dang / brtson 'grus rtsom pa dang / bsod nams bsag pa kho na snod du rung gi/ bdag la byang chub ga la yod/ /ces sgyid lug mi bya'o/ /don chen po las nyams pa'i rgyu yin pa'i phyir ro/ /sgyid lug pa yang don ma yin no zhes gsungs pas yang ngo / /gang gi phyir rgyal ba bden par gsungs pa'i rang bzhin gyis 'di bshad par 'gyur ba bden par gsungs so//de ci zhe na/ smras pa/ de dag kyang sangs rgyas shAkya thub pa dang / rin chen gtsug tor can dang / mar me mdzad la sogs pa sngar sbrang bu la sogs pa yin te/ gang dag gi brtson 'grus kyi stobs kyis thob par dka' ba'i bla na med pa'i byang chub thob bo/ / bdag nyid brnyas pa'i gnyen po bshad de/ bdag mir skye la 'di dge 'di mi dge zhes nus pa dngos po thams cad kyi de nyid rig pa'i lam ma btang na sangs rgyas thob par ci ste mi 'gyur/ rin chen sprin las 'di mang du bshad do/ /rigs pa bshad de/ 'on te lag pa dang rkang pa son pa gtong bar byed pa dka' bar shes nas bdag 'jigs she na/de ni lci ba don chen po la chung ba'i blo dang chung ba la che ba'i blo 'di bdag rmongs pa yin te ma dpyad pas khyad par mi shes so/ /lci ba la rmongs pa bshad de/ las kyi dbang gis 'khor ba na lag pa dang rkang pa 'thub pas gcod pa dang /nus pa dang mdung la sogs pas phug pa dang / dmyal ba'i mes bsreg pa dang / 'bar ba'i sog le la sogs pas gshegs pa lan du mar bskal pa bye ba grangs mi nus pa zhes pa ni lci ba ste/ de yin kyang byang chub kyi rgyu ma yin/ byang chub kyi phyir lag pa la sogs pa sbyin pa ni yang ba ste/dus nges pa can yin pa'i phyir ro/ /chung ba la rmongs pa bshad de/ byang chub sgrub pa'i sdug bsngal 'di ni nyung ba dus nges pa sdug bsngal zhi ba'i rgyu'o/ /ji lta bu zhe na/ lus la zug pa'i zug rngu gang yin pa de'i gnod pa bsal ba'i phyir/ de chung ba phyung ba la sdug bsngal gang byung ba de dang 'dra'o//'di ni nyung ba yun thung ba yun ring po'i sdug bsngal zhi bar byed pa'i rgyu yin no/ /de dang 'dra ba 'di yang bzod par 'os pa'o/ /'di bas kyang 'di rigs zhes bshad de/ sman pa kun kyang ltogs nyal la sogs pa'i bya ba'i sdug bsngal gyis nad sel bar byed de gzhan du na mi nus pas so//de bas na sdug bsngal mang po cig gzhom pa'i phyir shin tu nyung ba'i sdug bsngal bzod pa kho na'o/ /sems can thams cad bdag gi thog mtha' med pa'i sdug bsngal thams cad zhi ba'i phyir ro/ /'on kyang bya ba 'di las dang po pas lag pa la sogs pa sbyin par 'os pa yin yang /sman pa'i mchog bcom ldan 'das nad thams cad kun nas sel bar byed pas ma gnang gi /'on kyang thugs rje chen po dang ldan pa'i phyir shin tu 'jam pa'i gso dpyad kyis/ 'dod chags la sogs pa'i nad chen po dang ldan pa gso bar mdzad do//'jam pa'i gso dpyad kho na bshad de/ ser sna la sogs pa'i gnyen po goms pa'i phyir/ lo ma dang phye la sogs pa tsam ster ba la dang po 'jug par byed/ thar pa'i grong khyer du 'dren pa po'i mgon pos so/ /de nas sbyin pa chung ba la goms pas nus pa thob pa'i sbyin pa po shin tu spro ba chen pos ji ltar rang gi sha yang gtong ba de bzhin byed do//cis de ltar zhe na/ smras pa/ sbyin pa la goms pa'i mthar phyin pas gang gi tshe/ lo ma la gang yang mi rung ba'i blo bzhin/ mi rtag cing snying po med pas rang gi sha la yang 'byung de'i sha dang rus pa la sogs pa gtong ba ci ste dka'/de lta bu'i byang chub sems dpa' sdig pa spangs pa'i phyir/ sdug bsngal dang ldan par mi 'gyur/ sdig pa kho na la sdug bsngal zhes nges pa'o/ /rgyu 'bras mi slu ba'i chos nyid la mkhas pas mi dga' bar mi 'gyur/gang gi phyir lus kyi sdug pa kho na las 'byung la/ yid mi bde ba yid la 'byung ba yang log par rtog pa bdag dang bdag gi bar mngon par zhen pa las 'byung / de ni bdag med gnyis rtogs pa la ring du song ngo / /yun rings 'gor ba las kyang 'jigs pa mi byed par bshad de/'jig rten las 'das pa'i bsod nams kyi lus bde ba yang yin la/ chos rnam par 'byed pa la mkhas pas yid bde/ de bas rang gi don grub pas snying rje yod pa can/ gzhan don du 'khor bar gnas kyang sdug bsngal gang gis sdug par 'gyur te mi 'gyur ro//yun rings thogs pa yang med par bshad de/ sngar byas pa'i sdig pa yang zad par byed cing / des ni dus mtha'i me bzhin sreg par byed/ ces pa la sogs pa gsungs pa'i phyir ro/ /bsod nams rgya mtsho sdud byed ni//rgyun mi 'chad par du ma zhig /ces bya ba la sogs pa gsungs so/ /bshad pa'i byang chub kyi sems theg pa chen po la zhon pa thabs kyi shugs chen pos nyan thos rnam pas myur bar 'gro /nye bar bsdus shing bshad de/ de ltar bshad pa'i rigs pas bde 'gro nas bde 'gror 'gro zhing blo dang ldan pa su zhig sgyid lug par 'gyur/byang chub kyi sems gzhal yas khang lta bu thob nas de la gnas te/ ji lta bu zhe na/ nyon mongs pa thams cad kyis ngal ba gang yin pa de thams cad sel ba'o/ /'dun pa la sogs pa'i tshigs bcad skabs su ma bab ste/gzhan gyis bcug par snang / gang gi phyir le lo la sogs pa brtson 'grus kyi mi mthun phyogs bzhi nye bar bsdus nas brtson 'grus 'phel bar bya ba'i phyir/ stobs kyi dpung bzod par bya ba yin te/ de ni 'dun pa zhes bya ba'i tshigs su bcad pa la yod pa nyid/ 'dir ni mi mthun phyogs nye bar bsdus pa yang med la/stobs dang 'brel pa yang med do/ /gzhan yang mdor bstan yin na rgyas bshad yod dgos pa yin te de ni med do/ /snga phyir 'brel pa bshad de/ de ltar bshad pa'i rigs pas le lo dang / ngan la zhen pa dang / sgyid lug pa dang /bdag nyid brnyas pa ste/ brtson 'grus kyi mi mthun phyogs spangs nas/ brtson 'grus 'phel ba'i phyir/ 'bad par bya ste thabs gang gis she na/ smras pa 'dun pa zhes bya ba la sogs pa'o/ /'dun pa ni 'dod pa'o/ /nga rgyal ni sems khengs pa'o/ / dga' ba ni zhen pa'o/ /dor ba dang / lhur len dang / dbang sgyur dang / stobs ni kun dang sbyor ba/ de la 'dun pa bskyed pa'i phyir bshad de/ sems can thams cad dang bdag gi skyon thams cad spong ba dang / yon tan ma lus pa bskyed pa'i phyir/ byang chub tu sems bskyed pa yin/gang du skyon re re yang bskal pa'i rgya mtsho brtson 'grus dang ldan pas zad par byed/ skyon zad par byed par brtsams pa'i brtson 'grus de la/ cha tsam yang bdag la ma mthong na/ de bas dpag tu med pa'i sdug bsngal gyi gnas bdag gi snying ci ste mi 'gas/ nyes pa zad pa'i don du 'dun pa bshad nas/yon tan gyi don du 'dun pa bskyed par tshigs bcad gnyis kyis bshad de go sla'o/ /'dis kyang don med ces bshad de/ bdag gi zhes bya ba la sogs pa ste go sla'o/ /'chi ba la sogs pa'i 'jigs pa las 'jigs pa ma byed ces mi 'jigs pa ma byin/lus dang yid kyi sdug bsngal zad par ma byas pas bde bar yang ma byas/ de bas sdug bsngal la sogs pa don med par bshad/ skye ba snga mar chos la 'dun pa ma byas pas de ltar phongs par 'gyur zhes shes nas blo dang ldan pa su zhig chos la 'dun pa gtong zhes bya ba ni chos la 'dun pa bskyed pa'o//phongs pa bzlog pa 'ba' zhig pa'i ma yin gyi 'jig rten dang 'jig rten las 'das pa'i dge ba thams cad kyi rtsa ba 'dun par thub pas gsungs 'dun pa de'i yang rtsa ba las dge ba dang mi dge ba rnam par smin pa'i 'bras bu ni 'jig rten phyi ma la 'dod pa dang /mi 'dod pa thob pa ste/ de bsgom pa'o/ /de la re zhig mi dge ba'i rnam smin bshad de/ lus dang yid kyi sdug bsngal dang / yid mi bde ba dang / gsod pa la sogs pa'i 'jigs pa sna tshogs dang / 'dod pa btsal zhing ma rnyed pas 'dod pa ma grub pa dag sdig pa byed pa kho na la 'byung ngo //dge ba'i rnam smin bshad de/ 'dod pa smon pa'i rnam rtog ni yid la byed pa'o/ /'bras bu kho na yon tan de mchod pa lhag ma go sla'o/ /yang mi dge ba'i 'bras bu bshad de/ sdig pa zhes bya ba la sogs pa'o/ /sdug bsngal kho na mtshon yin te/ de'i 'dod pa gcod pas so//'jig rten las 'das pa'i dge ba'i rnam smin bshad de/ rab tu dga' ba la sogs pa'i sa thob pa kho na bde ba can gyi zhing khams su rgya che ba/ dri bzang ba/ bsil ba/ reg bya bde ba'i pad+mo'i nang du gnas pa/ rgyal ba'i chos kyi dbyangs yid du 'ong ba'i zas kyis sku'i gzi brjid bskyed par byas pa/yongs su smin pa'i dus su de bzhin gshegs pa'i 'od zer kha phye ba'i pad+ma las 'khrungs pa/ mtshan dang dpe byad dang ldan pa'i sku de lta bu rgyal ba'i sras bcom ldan 'das 'od dpag med kyi mdun du/ mtha' gcig tu dge bas skye bar 'gyur ro//ma'i mngal nas skye ba rnams la de las bzlog pa sdug bsngal bar shes par bya'o/ /mtha' gcig tu mi dge ba'i rnam smin bshad de/ dus kyi pho nyas 'bar ba'i tho ba la sogs pas rdeg pas thams cad pags pa bshus pa dang / shin tu gnod pas nyam thag cing smre sngags 'don pa dang /rab tu tsha ba'i me yis bzhu ba'i zangs zhun lus la blugs par gyur pa dang / 'bar ba'i ral gri dang mdung gis bsnun pas sha'i dum bu brgyar gtubs pas/ de lta bur gyur pa nag po'i las kyis lan du me shin tu 'bar ba'i lcags kyi sa gzhir ltung ste/ de'i las yun ring pos sad pa'i phyir 'dun pa'i stobs nye bar bsdus te bshad pa/de bas na bshad pa'i rigs pa bzhin du/ rnam smin goms pa nas dge ba la 'dun pa kho na gus pas bya'o/ /da ni nga rgyal gyi stobs bshad de/ rdo rje rgyal mtshan gyi mdo las bshad pa'i cho gas rtsom pa brtan pas bsgrub bya'i don du nga rgyal bsgom par bya'o//de la dang po nyid du 'byor pa ni sgrub par nus pa ste/ de brtags nas brtsam par bya'i mi nus na mi brtsam mo/ /dam bca' nyams pa'i phyir ma brtsams pa mchog /brtsams nas ldog par mi rigs so/ /log pa'i nyes dmigs bshad de/ skye ba zhes bya ba la sogs pa'o//dge ba dang mi dge ba thams cad dang / rgyu mthun dang / rnam par smin pa'i 'bras bu 'byin no/ /de la rgyu mthun ni rnam pa gnyis te byed pa dang myong ba'i rgyu mthun no/ /'di ni byed pa'i rgyu mthun te/ gang dam bca' nyams pas de goms pa'i bag chags kyis skye ba gzhan la yang ngo gsungs pa yang /skye ba gcig ni 'bad pa yis/ /mkhas pas dag pa sbyang bar bya/ /skye ba'i rgyun gzhan byang chub par/ /de nyid kyis ni sbyong bar 'gyur/ /zhes so/ /rgyal ba dang bla ma'i bka' las 'das pas byung ba'i sdig pa las sdug bsngal yang 'phel lo/ /gzhan ni thog mar brtsams nas bzhag pa dang / 'bras bu'i dus can ni gzhag pa'i dus su gnyis pa gang brtsams pa de yang nyams so/ /de yang ni gang gnyis pa gtong ba de yang ma bsgrubs so/ /gang las nga rgyal zhes bshad de/ gsum las so/ /de la las kyi nga rgyal bshad de/ bdag ces bya ba la sogs pa'o/ /nyes pa med pa'i las sems can rnams la gang bya bar 'os pa/ de bdag nyid gcig pus bya'i/ gang gi phyir nyon mongs pa zhes bya ba la sogs pa go sla'o/ /dman pa'i las ni mi gtsang ba 'dor ba la sogs pa ste go sla'o/ /nye ba'i nyon mongs pa'i nga rgyal bshad de/shi ba la sogs pa ni dpe yin no/ /gal te bdag gi yid brtson pa med par gyur na/ de'i tshe nye ba'i nyon mongs pa chung ngus byas pa'i ltung ba yang gnod par 'gyur ro/ /zhum pas rtsol ba dor zhing dga' ba med la gnod par 'byung ba sla'o/ /langs pa ni rtsol ba dang ldan zhing dran pas nye ba'i nyon mongs pa la skabs mi 'byed na/nyon mongs pa chen po yis kyang thub par dka'o/ /de bas brtan pas ni nga rgyal gyi go cha gyon pa ste/ ltung ba rnams 'jug tu mi ster ba des gzhom par bya'o/ /gzhan du 'jig rten gsum gdul bar rtsom pa ni bzhad gad du 'gyur te/ bdag ltung bas pham par byas pas so/ /de bas bdag gi nyon mongs pa la sogs pa thams cad pham par bya'o/ /gang gi phyir rgyal ba rnams kho na seng ge ste/ bdud kyi ri dgas kyi gnod pas mi tshugs pa'i phyir ro/ /de dag gi sras bdag yin pas gzhan gyis pham par ga la nus/ 'o na nga rgyal gyi nyon mongs pa yin pas de ji ltar blang bya yin zhe na/ smras pa skye bo gang zhes bya ba la sogs pa'o/ /de ci'i phyir zhe na/ nga rgyal can dgra bo'i dbang du mi 'gyur ba'i phyir ro/ /de dag ni nga rgyal dgra'i dbang du mi 'gyur/ de bas nga rgyal 'dir dgongs pa yin no/ /tshigs bcad gnyis kyis 'jig rten gyi nga rgyal spang bar bshad de/ngan song ni dmyal ba ste/ las zad pas de nas thar te mir skyes kyang gzhan gyi zas za'i bran zhes bya ba la sogs pa go sla'o/ /'dod pa'i nga rgyal bshad de/ gang zhig nga rgyal spang ba'i phyir/ brtson pa de kho nas nga rgyal can dang /rnam rgyal dang / dpa' bo yin no/ /gang zhig kun du slong ba'i nga rgyal gyis dgra bo bsad nas/ 'gro ba la 'dod pa bzhin du rgyal ba'i 'bras bu ni nga rgyal med pa nyid de/ de rdzogs par byed pa'o/ /nus pa'i nga rgyal bshad de/ kun nas nyon mongs pa'i tshogs kyi nang du gnas na/stong 'gyur du sran gzugs 'gyur bar 'tshal/ nyon mongs pa'i tshogs kyis mi tshugs par bya ste/ dper na seng ge gzi brjid che ba ri dgas thams cad zil gyis gnon pa bzhin no/ /ji ltar mngar ba la sogs pa'i ro lce'i yul shin tu 'bad kyang mig gis mthong mi nus te/de gzugs kyi yul can yin pa'i phyir ro/ /de bzhin du nyam nga ba yin kyang nyon mongs pa'i dbang du mi 'gyur ro/ /blo ldan gyi las nyon mongs pa'i gnyen po yin pa'i phyir ro/ /nga rgyal gsum bshad nas dga' ba'i stobs bshad de/ las gang skabs su bab pa bsam gtan nam thos pa la sogs pa/de nyid du sems nub pa ltar de la 'dod pa bskyed de/ dper na cho long rtse ba'i 'dod pa bzhin no/ /thams cad kyi las kyi 'bras bu'i bde ba thob par 'dod pas las byed kyi/ de ltar yin yang la lar bde ba 'byung la/ la lar bde ba mi 'byung ste/tshong la sogs pa 'bras bu med pa gang gi las kho na bde ba yin la de'i 'bras bu ma yin te/ las med na ji ltar bde bar 'gyur/ yon tan kun gyi 'bras la min/ /rgyu la mngon par zhen par 'gyur/ /des khyod yang dag bsgrub pa yin/ /khyod la yon tan mthar phyin to//zhes gsungs so/ /'dod pa'i yon tan lngas 'khor ba la yang nas yang du myos kyang tshim par mi 'gyur/ ji lta bus she na/ spu gri'i so la chags pa'i sbrang myangs na lce gcod par 'gyur ro/ /dpe de dang 'dra bar mngar yang 'gyur nas sdug bsngal chen po'i rgyur 'gyur ro//bsod nams bdud rtsi lta bus ji ltar tshim/ /ji lta bus she na mngon par mtho ba ster bas bde ba/ nges par legs pa ster bas zhi ba'o/ /de bas brtsams pa'i las 'jig pa'i dus su yang / de la nub pa ltar byed de/ dper na sos ka'i dus su nyin phyed la nyi ma dron pos phyogs kun du chu ma mthong ba/bsil ba'i chus gang ba'i rdzing bu la glang po che dang po nub pa bzhin no/ /dor ba'i stobs bshad de/ bsam gtan la skyo na/ btsan thabs su sems de nyid du 'jug pa ma yin te/ 'on kyang bsam gtan dar cig 'dor ro/ /slar bsam gtan la 'jug pa'i phyir shin tu rdzogs pa'i tshe 'ang gtong ste/phyi mas phyi ma la sred pas so/ /snga ma la smad cing phyi ma sred pa bskyed pas bsam gtan dang po la sogs pa thob pa'i phyir ro/ /lhur len bshad de/ 'dod chags dang zhe sdang la sogs pa'i gnod pa yang dag par srung zhing de dag la rdeg go//gang gi phyir nyon mongs pa rtog pa'i rang bzhin yin pas/ de dang de'i dmigs pa stong par bsgoms te rtog med kyi ting nge 'dzin la 'jug pa na de dag med par 'gyur ro/ /dpe ni go sla'o/ /ji ltar g.yul du lag pa nas lhung ba'i ral gri 'jigs pas myur du len pa ltar/rmugs kyang dran pa kho na ral gri ste nyon mongs pas pham pa'i phyir 'khrul na dmyal ba'i 'jigs pas len to/ /ji ltar sems rmugs pa'i khrag thob nas lus la dug khyab pa ltar na/ sems la glags rnyed nas nyes pas khyab pas bag yod par bya'o/ /mar nag gis bkang ba'i snod 'dzin pa'i mi zab pa 'dred pa la rgyal po gtum po'i bkas thigs pa tsam bo na khyod gsod do zhes zer ba'i ral gri thogs pa rgyal po'i mi dag gis srung ba/bo na 'chi ba'i 'jigs pas sgrim par 'gro ba ltar/ brtul zhugs kyis dbang po rnams sdom pa'o/ /de bas dug sbrul pang du zhugs pa na bdag rmugs par ma gyur cig snyam du bsams nas myur du ldang ba'i mi ltar gnyid dang le lo byung ba'i dus su langs te chos bshad pa dang /'don pa dang / bza' ba dang / btung ba la sogs pa bya'o/ /de ltar byas kyang las dang po pa la nyes pa re re byung ba na yang rang la smad par bya ste/thabs gang zhig bya na gang byas pas slar 'di dag mi 'byung ba zhes bsam par bya'o/ /rang gis mi shes na de'i thabs ston pa po mkhan po'am slob dpon brten nas gnas par bya'o/ /yang na las ni man ngag go/ /ci byas nas nyon mongs pa kun slong ba'i skabs su bdag la dran pa la sogs goms par 'byung zhes so//dbang bsgyur ba bshad de/ de ma thag tu gsungs pa'i bag yod pa'i gtam dran cing ji ltar las byung ba'i sngon rol du kun la mthu yod pas gyur pa de bzhin brtson 'grus la goms pas lus dang sems yang bar bya'o//de nyid kyi dpe dang phan yon bshad de/ ji ltar shing bal rlung 'gro ba dang 'ong ba'i dbang du gyur pa yang ba'i phyir te/ de bzhin du spro ba'i dbang du 'gyur te/ de ltar goms pas rdzu 'phrul yang 'byung ngo / /brtson 'grus bstan pa'i le'u'i dgongs pa'i 'grel pa khyad par gsal byed ces bya ba ste bdun pa'o// //bzod bya thos pa btsal bar bya/ /de nas nags su gnas par bya/ /mnyam par gzhag la brtson bya zhing / /mi sdug la sogs bsgom par bya/ /zhes gsungs pas bsam gtan bshad de/ de ltar bshad pa'i rim pas spro ba 'phel bar bya ste/ ting nge 'dzin la sems brtan par bya'o/ /gang gi phyir sems rnam par g.yeng ba'i mi nyon mongs pa srin po'i mche ba'i phrag na gnas so/ /de la ting nge 'dzin gyi mi mthun phyogs g.yeng ba spang ba bshad de/ lus dang zhes bya ba la sogs pa'o//lus kyi dben pa ni dben par gnas pa'o/ /sems kyi dben pa ni 'dod chags la sogs pa'i rtog pa spong ba'o/ /de ni stong pa nyid bsgom pa ste/ de bas 'jig rten dor nas stong pa nyid la gzhol zhing rtog pa rnams spang bar bya'o/ /de la 'jig rten mi gtong ba'i rgyu spong bar bshad de/bdag dang bdag gi bar zhen pa ni chags pa ste/ de dang rnyed pa la chags pa dang / sogs pa'i sgras bkur sti dang grags pa la sogs pa la chags pas 'jig rten mi gtong ste/ de bas chags pa dang rnyed pa la sogs pa spong ba'i phyir/ mkhas pas 'di ltar 'chad par 'gyur ba bsam par bya'o/ /zhi gnas ni sems rtse gcig pa'o/ /lhag mthong ni de kho na nyid la dmigs pa'i shes rab po/ /de gnyis dang ldan pas nyon mongs pa 'joms par byed par shes nas/ thog mar zhi gnas tshol te/ de yang 'jig rten la ltos pa med par bsam gtan la dga' bas 'grub po//de la chags pa spang bar bshad de/ blo dang ldan pa gang rang nyid mi rtag pa yin la/ bu dang chung ma la sogs pa mi rtag pa la chags par mi rigs rgyu mtshan gang gis/ tshe rabs stong dag tu sdug pa slar mthong bar mi 'gyur te/mi rtag pas 'joms pas so/ /dga' bar byed pas na sdug pa ste/ de yang 'dir med par bshad de/ gang gi phyir mi mthong bas dga' bar mi 'gyur/ mi dga' bas ting nge 'dzin la mi gnas/ de mthong yang tshim par mi 'gyur ro/ /sngar bzhin lhag par chags pas sdug par 'gyur/lhag mthong med pas de kho na nyid mi mthong / sdug pa la chags pas 'khor ba la skyo ba mi skye/ yud tsam cig bral na yang de'i mya ngan gyis gdung bar 'gyur/ sdug pa dang tshogs pa 'dod pas so/ /de dang tshogs par sems pa dang / de'i yon tan bsgoms pas dgos pa med par tshe zad/dge ba med pas so/ /mdza' bshes mi rtag pa'i ched du chos rtag pa nyams so/ /ris gcig nas gcig tu lhan cig 'brang ba'i phyir ro/ /gzhan yang byis pa rnams dang mnyam par spyod na/ nges par ngan song du 'gro ste de dang spyod pa 'dra bas so/ /gal te 'phags pa'i rjes su 'brang na/de'i tshe de mi 'dod/ spyod pa mi mthun pas so/ /de bas 'jig rten gnyis nyams pa'i rgyu des ci byed/ gzhan yang rang gi don la ltos nas skad cig gcig gis mdza' bar 'gyur/ de nyid skad cig gcig gis dgrar 'gyur te/ de'i rjes su mi 'brang na'o/ / dga' ba'i gnas la yang khro ste 'khrul bas so/ /de bas 'phags pa ma yin pa rnams mgu bar dka'o/ /gzhan yang phan par bslabs na khro bar byed de mi shes pas so/ /slar bdag kyang phan pa las zlog par byed/ gal te phan pa ma yin pas de la mi nyan na/ de'i tshe khros pas ngan song du 'gro ste/phan pa la sdang bas so/ /rang las rig pa dang rigs dang nor la sogs pa mthong na phrag dog byed/ gzhan gyi phun sum tshogs pa mi bzod pas so/ /rang dang mnyam pa dang rtsod par byed do/ /rang las dman pa las nga rgyal byed/ yod pa dang med pa'i yon tan gyis bstod na khengs par byed/de'i skyon brjod pa thos nas khong khro/ de bas byis pa la phan pa nam yang med do/ /byis pa gcig las byis pa gzhan la nges par mi dge ba 'byung ste/ thos pa la sogs pa'i sgo nas bsngags pas rang la bstod pa dang / gzhan la thos pa la sogs pa sbed cing skyon brjod pas smod pa dang 'dod pa'i yon tan brjod pas 'khor bar dga' ba'i gtam zhes bya ba la sogs pa'o/ /de ltar gzhan la yang de gnyis dang tshogs pas mi dge ba gang rung nges par 'byung / rgyu mtshan des byis pa dang tshogs pa ni don ma yin pa dang tshogs pa nyid do//de bas byis pa'i tshogs dang bral ba gcig pu'i bde ba spyad par bya'o zhes lus kyi dben pa'o/ /nyon mongs pa dang bral ba'i sems dang ldan pa ni sems kyi dben pa'o/ /'o na lus dang sems kyi dben pa thob pa rnams byis pa dang tshogs na ji ltar byed ce na/byis pa las ring du song nas byol te/ ji ltar de dang 'brel par mi 'gyur ro/ /gal te ma tshor bar slob na de'i tshe dga' ba'i spyod pas mgu bar bya'o/ /'dris pa'i ched du ma yin te/ 'on kyang rjes su chags pa dang / khong khro ba med cing mtha' gnyis su ma lhung ba bzhin no//grong la rgyu na chos kyi don tsam chos gos dang bsod snyoms blangs te/ bung ba me tog la sbrang rtsi len pa ltar/ kun la sngon chad ma mthong ba bzhin 'dris pa med par spyad par bya'o/ /rnyed pa la sogs pa la chags pa spong bar bshad de/ rnyed pa ni snam sbyar la sogs pa'o//bkur sti ni skye bo rnams kyis byas pa'o/ /mi mang po zhig gis bkur bar zhus nas/ cig car byung ba'i 'chi ba las 'jigs pa 'byung ngo / /de ni 'di ltar spyad na mi 'byung bar bshad de/ yid bde bar rgyal ba gang dang gang du chags par 'gyur ba de dang der/ sdug bsngal nyid stong 'gyur du yongs su smin par 'gyur ro//de bas mkhas pas rnyed pa la sogs pa la chags par mi bya'o/ /gang gi phyir 'dod pa las 'jigs pa skye'o/ /gzhan yang rnyed pa la sogs pa 'di dag mi rtag pa yin par rang gi ngang gis nyams te/ bstan pa brtag par bya'o//nyams pa'i rang bzhin la zhen pas ci ste/ 'di ltar sngon du rnyed pa dang grags pa can mang du byung ste/ byung kyang nyams pa'i rang bzhin yin pas rnyed pa dang grags pa dang bcas pa gar song mi shes so/ /de rnyed pa dang de ma yin pa/ grags pa dang de ma yin pa/ bde ba dang sdug pa bstod pa dang smad pa la mi zhen par bshad de/bstod pa byas pas bdag ci ste dga'/ gang gi phyir bdag la gzhan smod pa'o/ /bdag la smod pas ci ste mi dga'/ gang gi phyir bdag la gzhan gyis bstod pa'o/ /smad pa mi byed pa'i phyir 'di dag mgu bar byed pa mi nus par bshad de/sems can mos pa rnam pa sna tshogs pas rgyal bas kyang mgu bar mi nus na/ bdag mi shes pas lta ci dgos/ de bas 'jig rten bsam pa btang ngo / /gzhan yang rnyed pa med pa la bsod nams ma bsags pa zhes smod/ rnyed pa can la spyod log gis gzhan gyi mgo bskor nas rnyed do zhes 'phya'o//gzhan du na gzhan la yon tan med dam/ kho gcig pus rnyed pa ci/ rang bzhin gyis 'grogs par dka' ba de dag dang ji ltar dga' bar 'gyur/ byis pa su dang yang mdza' bar mi 'gyur zhes sangs rgyas kyis gsungs/ gang gi phyir kho rang gi don ma grub na dga' bar mi 'gyur ba'i phyir ro//rang gi don gyi sgo nas dga' ba gang yin pa de ni mdza' bo dang ma yin gyi/ ji ltar rang don kho na'i phyir te/ nor brlag nas gang mi dga' ba de nor gyi thog tu ma yin gyi/ 'on kyang rang gi bde ba nyams pas so/ /lus la sogs pa'i dben pa'i phyir nags la sogs pa dben pa'i gnas bshad de/ljon shing la sogs pa ni smod pa mi byed la/ de dang rjes su mthun pa'i spyod pas 'bad de mgu bar byed kyang mi dgos pas/ bsam pa mi mthun pa dang bral ba 'grogs bde ba dang lhan cig tu gnas pa na ma 'byung zhes smon pa'o//mi med pa'i lha khang ngam/ shing drung ngam/ dgon par dus 'dod pa bzhin bsdad la nam ltos pa med par chags pa'i gnas med par rgyab tu mi lta bar 'gyur zhig gu/ ri'am nags kyi phyogs sus kyang bdag gir ma byas pa ched du ma byas pas rang bzhin gyis yangs pa/stong pa nyid bsgom pa dang rjes su mthun par rang gi dbang gis byang chub la spyod cing dmigs pa med par nam gnas par 'gyur/ rdza'i lhung bzed tsam gyi nor can/ phyag dar khrod pa yin pas chom rkun mi 'dod pa'i gos can/ de bas 'jigs pa med par zhen pa med pas lus mi srung zhing nam gnas par 'gyur/ 'dis kyang phyi nang la zhen pa med par bshad do/ /tshigs bcad gsum gyis dur khrod la spyod pa sman par bshad de/ rang gi lus kyi gnas dur khrod du song la sngar shi ba rnams kyi keng rus dang / rang gi lus 'jig pa'i chos can du mgo snyoms par nam byed par 'gyur/de nyid bshad de/ bdag gi lus ni zhes bya ba la sogs pa go sla'o/ /bdag tu 'khrul pa'i gnas/ 'khrul pas gcig pur brtags pa/ rdul phra rab kyi phung po'i lus dang lhan cig tu skyes pa/ rus pa'i dum bu rnams kyang zhig ste so sor gyur na/mdza' ba gzhan rnams lta smos kyang ci dgos/ de bas skyes na'ang 'chi na'ang gcig pu yin pas/ de'i sdug bsngal gyi cha bu la sogs pas mi len pas/ dge ba'i bar chad de dag gis ci bya/ lam du zhugs pas nub mo sdod pa'i phyir gnas 'dzin pa ltar ris drug tu 'khor bas skye ba len pa ste/yun rings mi gnas pas de la chags par mi bya'o/ /tshigs bcad gsum gyis gcig pur gnas pa'i yon tan bshad de/ khang pa 'dor mi nus kyang phyis btsan thabs su 'dor dgos par shes nas/ 'chi na khyim de las mi bzhis ji srid phyi rol du ma bton gyi bar du/bu kyi hud ces bya ba la sogs pa 'jig rten pas mya ngan ma byas kyi bar du nags su 'gro bar bya'o/ /lus 'di la bstod kyang dga' ba med/ mi mthun pa la yang khong khro ba med/ gnyi ga la nyams te bems po yin pa'i phyir/ de gnyis med pas sngon du skye ba'i dus kho nar 'chi ste/sems pa med pas mtshungs pa'i phyir/ 'chi ba'i tshe na'ang 'jig rten gyi mya ngan gyis mya ngan mi byed de/ bems po yin pa'i phyir ro/ /nye bar gyur pa'i nye du rnams de dang bral ba'i gdung bas nags su gnas pa'i yid la gnod pa mi byed de/drung na med pa'i phyir ro/ /sangs rgyas la sogs pa rjes su dran pa dang / sogs pa'i sgras de kho na nyid dmigs pa la sogs pa la g.yeng bar byed pa 'ang med do/ /de bas bu la sogs pa gso mi dgos pas tshegs chung ba nges par legs par skyer rung ba/ g.yeng ba thams cad zhi ba nyams dga' bar rtag tu gcig pur gnas par bya'o//lus kyi dben pa bshad nas sems kyi dben pa bshad de/ bsam pa gzhan thams cad spangs nas rang gi sems gcig tu dmigs pa'i yid kyis sems kyi zhi gnas dang / dul bar bya ba'i phyir 'bad par bya'o/ / ting nge 'dzin gyi mi mthun pa'i phyogs yin pas rnam rtog spang bar bshad de/ 'dod pa'i yon tan lnga ni phung khrol byed de/ 'di dang pha rol du 'dir ni bcing gsod gcod pa yis/ ji ltar tshangs pa'i mchod sbyin gyi gzhan gyis gsod mi nus pa lha mo spun gnyis sun d+ha dang u pA su b+ha'i ming can ti lo ta ma rig 'dzin ma la chags pas phan tshun du brtse ba spangs te 'thabs pas shi'o//si ta'i ched du ra ma Na shi'o/ /pha rol du dmyal ba la sogs par/ dmyal byas shal ma ri yi sdong / /tsher ma sor ni bcu drug can/ /rno shing 'bar ba btsan thabs su/ / 'dod log spyod rnams 'dzeg par bcug /ces bya ba la sogs pa'o/ /gzhan gyi bud med la sogs pa'i ched du gang pho nya dang pho nya mo la/ de'i skad dang des bskur ba'i nor khyer ba'i don du/ thal mo sbyar ba khyod kyi drin gyis nga dang de phrad par ji ltar 'gyur ba de ltar mdzod cig ces so//'dod pa gang gi ched du sdig pa'am/ bkrabs pa ma yin pa sngon ci yang mi bsgom pa'o/ /'jigs pa'i gnas rgyal po'i btsun mo'i sa la sogs par rang lus phyin pa dang / gos dang rgyan dang byug pa dang / ga bur la sogs pa'i nor zad par byas pa/ gang zhig brtan par 'khyud nas tshim par 'gyur/dur khrod na gnas pa'i keng rus bstan nas bshad de/ rus pa de nyid 'di yin gyi gzhan ma yin te/ de nyid shi ba'i 'o/ /khyad par du da lta rang dbang du gyur pa bdag gir ma byas pa 'dod pa bzhin du 'khyud nas ci ste khyod tshim par mi byed/ de bas khyod rmongs pa yin/'di lta bu mi rtag pa snying po med pa mi gtsang ba la chags nas 'jig rten gnyis med par byed do/ /rang gi chung ma la chags pa la ltos nas bshad de/ gsal bar blta ba'i phyir ngo tshas le lo can chung ma'i gdong shin tu chags pa'i sems kyis khyos 'bang de bteg kyang chung mas ngo tsha ste 'og tu byed cing /dur khrod du ma 'ongs kyi gong du mthong ngam mthong ba byung tshad gang gi phyir/ yul ma thur ram/ dbus su rigs kyi bu mo rnams kyi gdong pa dra bas bkab pa'o/ /gdong pa de da lta dur khrod du bya rgod kyis bsal bar byas pa 'dod pa bzhin du ltos shig /de ji lta bu zhe na gdong blta ba'i ched du khyod ngal bas mi bzod pas bzhin no/ /ma rungs pa mthong nas 'jigs shing khyod ci ste 'bros/ sus kyang mthong bar ma gyur cig ces bsams nas gzhan gyi mig zur las kyang gang bsrungs pa/ de ni da lta bya rgod la sogs pas zos pa'i bar/ da kye ser sna can khyod kyis ci ste mi srung / de ltar gdong pa bshad nas lus 'chad de/ bya rgod la sogs pa'i zas sha'i phung po ma rig pas khyod kyis phreng ba dang tsan+da la sogs pas gang dang po mchod pa/ de ni bya rgod dang de las gzhan wa la sogs pas zos pas mi sdug pa mthong na ser sna can ci ste mi srung zhes pa dang sbyar ro//keng rus la brten nas bshad de/ mi g.yo ba shing dang 'dra ba mi sdug pa keng rus mthong nas/ gal te khyod 'jigs skrag na de'i tshe 'byung po'i rdzas 'byung ba ltar srog rlung gis g.yo bar byas pa las gson pa'i dus su ci ste mi skrag ste/shin tu skrag par rigs so/ /pags pa srab pas g.yogs kyang gang la chags pa de ma g.yogs pa ci ste mi dga'/ mi gtsang ba des dgos pa med ce na/ 'o na ci'i phyir pags pa srab pas bkab pa nyed par byed/de'i tshe'ang de de bzhin yin pas spyad pa med pa'o/ /dred pa kha chu la dga' ba nye bar bsdus shing bshad de/ bza' btung rigs gcig pa kho na las bud med 'di dag las kha chu dang mi gtsang ba skye na/ de la mi gtsang ba la mi dga' na/ ma mchu 'thung ba la ji ltar dga' bar rigs/gzhan yang shing bal gyis bkang ba reg bya 'jam pa'i sngas zlum pos mi dga' bar byed/ 'on kyang bud med kyi nu ma la dga' ste/ sngas ni mi gtsang ba'i dri mi bro ba zhes spyad nas khyad par shes te de med/ 'dod chags can la mi gtsang bas rmongs te/ mi gtsang ba la gtsang bar 'khrul pas so//gal te khyod mi gtsang ba la chags pa med/ ci ste gzhan la 'khyud/ de ci lta bu zhe na/ sha kho na 'dam lta bu ste/ des byugs pa rgyus pas sbrel ba keng rus so/ /gal te mi gtsang ba la chags pa yod na rang gi mi gtsang ba mang du yod kyi khyed kyi lus la kha chu dang /snabs dang / klad pa dang / chu dang / bshang ba la sogs pa de nyid kyis tshim par gyis shig /mi gtsang ba'i spung ba gzhan bud med kyi gzugs kyis mi gtsang ba brkam pas sems par mi bya'o/ /gal te 'di dang dga' bas 'di'i sha blta ba dang reg par 'dod par khyod 'dod ce na/kye spyod cig rang bzhin gyis sems pa med pa'i sha lus bems po yin pa'i phyir ro/ /khyod kyi reg pa des mi myong bas khyod 'dod pa ci/ mdza' bo mgu bar 'dod ce na/ gang sems mgu bar 'dod pa de reg pa dang blta bar yang mi nus te/gzugs ma yin pa'i phyir ro/ /gang nus pa'i lus des mi shes te/ sems pa med pa'i phyir ro/ /dgos pa med par 'khyud nas ci zhig bya/ gzhan gyi lus mi gtsang ba'i rang bzhin khyod kyis mi shes pa ngo mtshar med de lkog tu gyur pas so//rang gi mi gtsang ba'i rang bzhin mngon sum yin kyang ma nges pas gti mug che ba la ngo mtshar skye'o/ /bud med kyi gdong pa pad+ma lta bu la skyon bshad de/ sprin gyis ma bkag pa'i nyi ma'i 'od zer gyis kha phye ba pad+ma gsar pa spangs nas mi gtsang ba la chags pa'i sems/ mi gtsang ba'i keng rus la ci ste dga' zhes ngo mtshar ro//sa dang sogs pa'i sgras gos la sogs pa mi gtsang bas gos pas reg tu mi 'dod/ gtsang bar 'dod pas de mi gtsang ba'i lus gang las byung ba lus de ji ltar reg par 'dod ma rig pa che bas so/ /gzhan ni bud med kyi gzugs te/mi gtsang ba'i zhing ni ma'i mngal te de las byung ba/ pha dang ma'i dkar dmar gyi sa bon can/ mas bza' btung byas pa'i rgyu mthun gyis gso/ /phyi rol tu 'thon nas ma'i nu zhos gso/ /gal te mi gtsang ba la khyod chags pa yin na/ 'o na sngar ma mthong ba'i dngos po la chags pa skye ste/mi gtsang ba kho na la khyod skyes pa ma myong ba ma yin/ gzhan yang mi gtsang ba las byung ba 'dod na/ mi gtsang srin ci ste mi 'dod/ mi gtsang ba mang ba'i bud med kyi lus kho na 'dod pa mi rigs te/ gnyi ga mtshungs pas so/ / gzhan yang khyed kyis 'dir gti mug chen po/ rang gi mi gtsang ba la mi smod pa 'ba' zhig pa ma yin gyi gzhan mi gtsang ba'i bum pa rnams 'dod pas spyod med la smod/ gang gi phyir 'jig rten du ga pur la sogs pa dang / sA lu'i 'bras dang tshod ma snying la 'dod pa khar bcug ste bor na de dang 'brel pas sa yang mi gtsang bar 'dod/de dag lta ci smos/ shin tu rmongs pa'i gal te mngon sum du gyur pa bud med kyi gzugs mi gtsang bar ma nges na de'i tshe dur khrod du bor ba/ cung zad zos pa/ sngon por gyur pa/ rul pa la sogs pa mi sdug pa 'jigs su rung ba gzhan yang ltos shig /rang bzhin gyis ma rungs pas pags pa bshus pa'i lus la 'jigs pa chen po skye ste/ de ltar shes kyang de la dga' ba ji ltar skye/ 'o na tsan+dan bskus na yid du 'ong bar 'gyur zhe na/ smras pa/ dri 'di lus la bskus kyang tsan+dan kho na las yin gyi lus las ma yin no//de bas gzhan gyi dris gzhan la chags pa ci/ gal te rang bzhin gyi dri nga bas 'dir bud med kyi gzugs la chags pa mi skye na/ legs min nam/ de ltar yon tan yod kyang 'jig rten don med srid pa ci/ lus de la gla rtsi la sogs pa'i dri byugs so//byug pa byas kyang gtsang du mi 'gro bar bshad de/ lus rang bzhin gyis dri nga ba la tsan+dan dri zhim pas khyad par ci byung / dri'i stobs kyis de yid du 'ong bar byung zhe na/ gzhan dris gzhan la chags pa ci/ /skra la sogs pa la 'dus byas pa yang don ma yin par tshigs bcad gnyis kyis bshad de/gal te ma bcad pas skra dang sen mo ring ba dang / ma bkrus pas dri ma chags pas dri ma'i 'dam dang ldan pa/ gos med pas gcer bu yi dags kyi bzhin du rang bzhin gyis 'jigs su rung ba'i lus/ rang gsod pa'i phyir mtshon la bzhin du/ci ste de la 'bad de byi dor byed/ bdag nyid shes bzhin du rmongs par byed pa la brtson pa smyon pa rnams kyis kyi hud sa gzhi ni dkrugs so/ /'phral la byung ba bshad nas gnas skabs bshad de/ rus gong 'ba' zhig dur khrod du mthong nas khyed la yid byung skyes na/grong khyer nyid dur khrod de mtshan mo gnyid du song nas rang bzhin gyis dbye ba med par sems can la 'dir dbugs rgyu bas khyad par du g.yo ba'i rus gong gis khyab pa la ci ste dga'/ des na lus bems po yin pas g.yo ba kho na khyad par yin par bshad do/ /de ltar bshad pa'i rigs pas/bud med kyi lus mi gtsang ba yin kyang / rin med na mi rnyed rin gyi ched du nor tshol ba la sha thang ba'i duHkha dang / gzhan gyi bud med blangs pas dmyal ba la sogs par gnod par 'gyur/ nor spel ba'i nus pa yang byis pa'i dus su med/ de ma byas na dar la bab na cis bde bar 'gyur/der nor spel na tshe gtugs par 'gyur/ gang pha dang mes pos spel ba'i nor gyis dar la bab pa'i dus su bde ba de yang nyung ste/ skal ba dang mi ldan pa thams cad nyams pa'i phyir ro/ /rin med par mi rnyed pa dang / dmyal ba la sogs par sdug bsngal ba 'di ni mtshungs so//tshe rgas pa la sogs pa la longs spyod pa'i nus pa med do/ /nor spel ba la yang bde ba yod ce na/ smras pa/ smad pa 'ga' zhig shing dang rtswa la sogs pa khur 'ongs pas lus dang yid ngal te/ nyi ma nub pa nas khyim du 'ongs nas/zhag re re zhing shi ba ltar nyal te/ de la bde ba ga la yod/ rgyal po'i pho nya 'ga' zhig yul gzhan du ring du 'gro bas sha thang gi sdug pa/ lo du mar yang bu dang chung ma la sogs pa mi mthong ste/ bu smad kyi don du rgyal po bsten kyang ngo / /mya ngan byed cing de nyid bshad de/bde ba'i don du bdag gzhan gyi bran du byas kyang 'dod pas rmongs pa dag gis bde ba de ma thob don med gzhan gyis bya bas tshe zad par byas dge ba la ma sbyar ba smod/ bde ba 'dod pas bdag gzhan dbang du byas pa 'ga' zhig gzhan gyi don du chung ma dang bcas par 'gro ba la lam du nags la sogs par chung ma bu btsas te/de'i tshe bde ba ga la yod/ sbrum ma 'am byis pa khur ba dang lhan cig tu 'gro ba la rtag tu sdug pa kho na'o/ /'khrul pa kho na bshad de/ 'ga' zhig gson pa'i don du/ gson pa the tshom za ba'i g.yul du 'jug /gzhan ni stobs ldan gang rung gis gnod pas de bzlog pa'i phyir sor mo bcad pa la sogs pa sngon du 'gro bas gzhan gyi bran du khas len te/ len pa 'don pas dkrugs pa'o/ /'di nyid du sdug bsngal bshad de/ 'dod ldan zhes bya ba la sogs pa'o/ / gzhan gyi bud med dam nor 'phrog pa la sogs pas so/ /lhag ma go sla'o/ /nor spel bas kyang sdug bsngal bar byed ces bshad de/ spel ba ni med pa bskyed pas kyang sdug bsngal bsags pa yang chu 'am me la sogs pa las srung bar dka'/ de bzhin du bsrung ba chom rkun la sogs pas nyams sgyid lug pa'o//rgyu mtshan de dag gis nor ni phung khrol mtha' yas par rtog cig /rtag tu spel ba ga la g.yeng bas nor la chags pa'i blo ldan rnams skye ba la sogs pa'i duHkha las dgrol ba'i phyir bsam gtan gyi skabs med do/ /nye bar bsdus shing bshad de/de ltar bshad pa'i rnam pa can la nyes dmigs sna tshogs pa 'khrul bas gang bde ba de yang shin tu lci ba'i khur khur zhing glang chen 'gro ba la g.yas g.yon du ltogs pas rtsa za ba lta bu'o/ /bde ba mnog chung phyugs kyis bsgrub na'ang bla ba'i don du las kyis mnar bas sngar bshad pa'i dal 'byor rnyed par dka' ba 'joms so//gnyis kyi mya ngan bshad de/ mi rtag pas cis kyang 'jig pa bems po yin pas 'jig rten las 'das pa'i don mi nus pas chung ba de'i don du mi dge ba spyad pas/ dmyal ba la sogs par lhung bar byed pa'i lus kyi don du gso ba'i phyir 'khor ba thog ma med pa nas gang byas pa'i dub pa de'i bye ba brgya'i cha tsam gyis sangs rgyas thob par 'gyur ro//'o na byang chub kyi spyod pa la yang sdug bsngal mtha' yas pa yod ce na/ smras pa/ spyod pa'i sdug bsngal la ltos nas 'dod pa can gyi sdug bsngal che ste/ mi 'dod kyang rnam pa du ma 'byung ngo //byang chub sems dpa' ni 'dod bzhin du dus nges pa can gzhan don du sdug bsngal myong ba la/ gang byang chub 'byung ba 'dod pa can la de med do/ /sdug bsngal kho na 'byung ngo / /'dod pa'i rnam par smin pa dmyal ba la sogs pa'i gnod pa/ lung las thos pa dran pa'i mtshon la sogs pa'i gnod pa yongs su grags pa dper mi 'gyur ro//mtshon la sogs pas lan cig 'chi la 'dod pas skye ba mang por sdug bsngal lo/ /de ltar bshad pa'i rigs pas 'dod pa'i yon tan rnam pa lnga la skyo ba bskyed de/ spyod yul ji srid pa brtags pa yang de srid de la dmigs pa'i rtog pa 'byung ste/dmigs pa dang bcas pa kho na sems pa skye'i dmigs pa med pa ma yin no zhes gsungs pa'i rnam rtog kun gyis dben pa/ dmigs pa kun gyis stong pa la dga' ba brtan pa bskyed par bya'o/ /gar gnas she na/ mi mthun pa'i phyogs med pas rtsod pa dang ngal ba med pa skye bo med pas dben pa/gnod sbyin dang / stag dang / sbrul dang / chom rkun la sogs pa med pas zhi ba'i nags kyi nang du'o/ /bsam gtan gyi phan yon bshad de/ skal ldan zhes bya ba la sogs pa'o/ /bsam gtan ni gsum ste/de ltar brtson 'grus spel nas zhes bya ba la sogs pa'i sbyor ba dang / de ltar 'dod pa la skyo ba bskyed nas zhes bya ba la sogs pa dngos gzhi/ skal ldan zhes bya ba la sogs pa phan yon no/ /zla ba'i 'od zer kho na dkar ba dang bsil bas tsan+dan yin te des bsil ba/ khang bzangs ltar yangs pa rtsub pa ma yin pas nyams dga' ba'i rdo leb la sogs pa skal ba dang ldan pas sgra med pa/ 'jam pa nags rlung gis g.yob cing / thag mi ring ba la 'gro 'ang byed pas 'chag pa/ bsam gtan dang po la sogs pa thob pas/ gti mug gi mun par lhung ba'i sems can la phan pa'i don du sems pa yang ngo //'dir ni mi mthun pa med pas rgyal srid kyi bde bas 'di khyad par du 'phags so/ /khang stong ngam shing drung ngam ri phug la sogs pa gang rung du ji srid par gnas la/ lus dang sems kyi dben pa thob nas 'dod pa lnga yongs su bzung ba dang /bsrung ba'i sdug bsngal dang bral ba/ ltos pa med pa 'dod pa bzhin du spyod pa'o/ /rang gi 'dun pa bzhin spyod pa rang khyim med pa/ rgyal po 'am blon po la sogs pa dang 'brel pa/ skyon mthong bas yul la log pa/ yon tan mtha' yas pa'i chos nyid la dmigs pa/gang chog shes pa'i bde ba la longs spyod pa/ yul la zhen pas dbang pos kyang de rnyed par dka'o/ /bshad pa'i rim pas dben pa'i yon tan bsgoms pas nyon mongs pa dang nye ba'i nyon mongs pa'i rnam rtog zhi ba/ dben pa kho na la dga' ba 'ba' zhig pa bsgom pa ma yin gyi/nyan thos dang khyad med du 'gyur ba'i phyir/ 'on kyang byang chub kyi sems bsgom par bya'o/ /'di ni chos nyid yin te/ rigs pa dang ldan pa la chos nyid rtogs pa'i rjes su sems can la snying rje skye bar bshad de/ bdag dang zhes bya ba la sogs pa'o/ / bdag tu 'dzin pa gang yin pa srid pa'i rgyu yin pa de byang chub sems dpa'i byang chub kyi rgyu yin te/ bdag tu 'dzin pa'i gnyen po yin pa dang / sems can thams cad yongs su 'dzin pa'i rgyu yin pas so/ /nga rgyal sngar bshad pa bzhin no/ /bdag dang gzhan mnyam pas bdag bzhin du gzhan dag bsrung bar bya'o zhes thams cad bdag tu 'dzin pas bdag 'dzin chen por 'gyur ro//dang po ni bdag gzhan brje ba 'chad par 'gyur ba'o/ /'bad pa ni mngon pas so/ /bde ba dang sdug bsngal mnyam pa nyid ni bdag la 'di dag la khyad par med ji ltar bdag la sdug bsngal gnod pa ltar 'di dag la yang ngo //ji ltar bdag la bde bas rjes su 'dzin pa ltar 'di dag la yang ngo / /de bas thams cad bdag bzhin bsrung ba ni rang gi sdug bsngal gyi gnyen po bsten pa ltar gzhan dag la yang ngo / /bdag bde bar byed pa ltar gzhan dag la yang ngo //'dir rigs pa ci zhe na/ smras pa/ lag pa la sogs pa'o/ /lag pa dang rkang pa la sogs pa'i dbye bas du ma yin kyang ji ltar lus gcig tu zhen nas bsrung ba ltar/ 'gro ba tha dad pa yin kyang bde ba dang sdug bsngal tha dad pa'i bdag nyid ji ltar gcig sdug bsngal mi 'dod pa de bzhin gzhan yang ngo //ji ltar gcig bde ba la dga' ba ltar gzhan yang yin pas ris dang skye gnas dang rigs kyi tha dad pa thams cad gcig tu lhag par mos nas bsrung bar bya'o/ /gcig yin na gcig gi sdug bsngal gzhan la ci ste mi gnod ce na/ smras pa/ bdag gi sdug bsngal gzhan gyi lus la mi gnod kyang /de sdug bsngal yin gyi 'on kyang bdag kho nas mi bzod pa de bdag tu zhen pas so/ /gzhan du rkang pa'i sdug bsngal lag pa'i min pas des ji ltar bsrung de ltar gzhan gyi sdug bsngal bdag gis mi myong na yang de/ sdug bsngal yin gyi de nyid kyis bzod mi nus pa de bdag tu zhen pas so//rang dang gzhan gyi dbye ba sgro btags te bsgoms pa las 'byung gi /sdug bsngal la khyad med par bshad de/ bdag gis zhes bya ba la sogs pa'o/ /gang dang gang sdug bsngal yin pa de bdag gis gzhom par bya'i/ dper na bdag gi sdug bsngal bzhin/gzhan gyi rgyud la byung ba'ang sdug bsngal yin zhes rang bzhin gyi rtags kyi sbyor ba'o/ /sdug bsngal tsam la gzhom par byas pas khyab/ /ma grub pa med de sdug bsngal bsgrubs pa'i phyir ro/ /ma nges pa'ang ma yin te/ rang gi sdug bsngal yang gzhom par bya ba ma yin par 'gyur ba'i phyir te/khyad par med pas bzlog na gnod pa'o/ /'di nyid kyi phyir 'gal ba'ang med pa'o/ /de bzhin sbyor ba gzhan yang gang dang gang sems can yin pa de dang de rjes su gzung bya yin te/ dper na rang bzhin no/ /gzhan dag kyang sems can yin zhes rang bzhin gyi rtags so//sems can tsam la rjes su gzung bar bya bas khyab/ 'dir ma grub pa med de/ sems can mngon sum du grub pa'i phyir ro/ /ma nges pa 'ang ma yin te/ bdag kyang rjes su gzung bya ma yin par 'gyur ba'i phyir ro/ /de nyid kyi phyir 'gal ba 'ang med do/ /bdag kho na la bde ba'i mngon par zhen pa yod pas ma nges pa yin zhe na/smras pa/ ji ltar bdag bde ba 'dod pa de ltar gzhan dag kyang 'dod pas de dag gi bde ba yang bskyed par bya ba yin no/ /dang po'i gtan tshigs kyi ma nges pa spang bar bshad de/ ji ltar bdag la 'jigs pa dang sdug bsngal mi 'dod pas bzlog par bya ba yin te/de ltar gzhan dag la yang ngo / /dgongs pa 'di yin te/ bdag ni med pas chos 'ba' zhig pa yod de/ de dag la ni khyad med do/ /thad kar sems can dag mnyam par bsgrub pa'i phyir/ rgyun gcig la 'das ma 'ongs pa mnyam par bshad de/gzhan gyi sdug bsngal bdag la mi gnod pas/ gal te gzhan mi bsrung na dmyal bar ma 'ongs pa'i lus kyi sdug bsngal gyis da lta mi gnod pas de ji ltar bsrung / mi dge ba las log pas so/ /de'i tshe bdag kho na yin zhe na ma yin te/ rtog pa 'di ni brdzun yin te/ bdag med pa'i phyir ro/ /phung po lnga gang 'dir 'chi ba de nyid phyis skye ba ma yin no/ /'phags pa klu sgrub kyis gsungs pa/ kha ton mar me me long dang / /rgya dang brag ca me shel dang / /de la rten byung 'phos pa min/ /phung po mkhas pas shes par bya//zhes so/ /gzhan yang gal te/ sdug bsngal gang gi yin pa de nyid kyis de bsrung gi gzhan gyi ma yin na de'i tshe/ rkang pa'i sdug bsngal lag pa'i ma yin pas/ rkang pa la byung ba'i gnod pa lag pas ci ste srung / gal te 'di mi rigs kyang lus 'di bdag tu bzung bas rkang pa bsrung ba la 'jug go zhe na/'di ni legs pa ma yin te/ gang mi rigs pa de bzlog par bya ba yin/ rang yin rung gzhan yin rung nus pa bzhin du'o/ /bdag med kyang rgyun gcig yod/ lag pa la sogs pa tshogs pa'i lus bdag gis sdug bsngal zlog par byed pa yod/ /des khyad par med pa zhes gtan tshigs ma grub po//dang po ni ma nges pa'o/ /smras pa/ rgyun zhes med la 'on kyang rgyu 'bras kyi skad cig gi rgyun yod/ de las gzhan mi dmigs pas so/ /yan lag kun las tshogs pa yang med de/ mi dmigs pa nyid kyi phyir ro/ /dper na rgyun ni phreng ba bzhin no//tshogs pa ni dmag bzhin no/ /sogs pa'i sgras phreng ba dang nags la sogs pa'o/ /grog mo la sogs pa snga phyi kho na yod kyi de las gzhan phreng ba med do/ /rta dang glang po la sogs pa kho na yod kyi de las gzhan dmag med do/ /de bas na brdzun yin no/ / de ltar med de bdag la sogs pa med pa/ de bas sdug bsngal gang gi yin pa de med de/ su'i de bdag gir 'gyur phung po lnga tsam la dgongs te/ bdag bzhin dang bdag lus bzhin zhes pa'o/ /de bas sdug bsngal thams cad rang dang gzhan gyi rgyu las byung ba/ rig byed med pas bdag med pa'o//khyad par med pas sdug bsngal yin pa'i phyir bsal bar bya/ rang bzhin gyi dbye ba ma byas par rgyu 'joms pa'i sgo nas spang bar bya'o/ /de bas bdag gi kho na bsal ba yin gyi gzhan gyi ma yin zhes nges pa'i rgyu ci zhig yod/ de bas sdug bsngal nyid kyi phyir zhes gtan tshigs ma nges pa ma yin no//gal te srid pa la sdug bsngal can med na sdug bsngal bsal nas ci byed/ snying rje'i snod med pas she na/ ma yin te/ rgyang pan la sogs pa thams cad rtsod pa 'dir med pas so/ /sdug bsngal can su'ang mi 'dod do/ /bdag sdug bsngal ba yin no zhes 'khrul pa kho na yod de/de bsal ba'i phyir 'dir brtson pa'o/ /de mi 'dod pas gal te sdug bsngal bar gyur na/ thams cad bsal bar bya'i/ yang na mi sel na rang gi yang mi sel te/ gzhan gyi sdug bsngal bzhin no/ /gal te snying rje bas gzhan gyi sdug bsngal gyis kyang sdug bsngal bar 'gyur/de bas sdug bsngal thams cad spang bar bya ba'i phyir 'bad pa na de'i tshe btsan thabs su ci ste snying rje bskyed ce na/ smras pa/ 'gro ba'i dmyal ba la sogs pa'i sdug bsngal bltas nas/ snying rje'i sdug bsngal ci ste mang /de nam mkha' dang mnyam pa dang thog mtha' med pa'i phyir ro/ /mang po zhig gi sdug bsngal gal te gcig gi sdug bsngal gyis med par 'gro na/ de lta bu'i sdug bsngal bskyed par bya ba yin gyi/ rang dang gzhan la snying rje can gyis so/ /'di dag mdo las ma byung snyam pa'i rtog pa bsal ba'i phyir bshad de/des na zhes bya ba la sogs pa'o/ /de bas na me tog zla mdzes zhes bya ba'i byang chub sems dpas/ rang dang rgyal po la gnod pa shes kyang / rang gi sdug bsngal ma bsal/ byang chub sems dpa' la gnod pa byas nas/ rgyal po la dmyal ba'i sdug bsngal byung bas so/ /de ci ste zhe na/ sdug bsngal can mang po gcig gi sdug bsngal gyis sdug bsngal zad pa'i phyir ro/ /rgyal po'i dmyal ba dang / byang chub sems dpa'i rdzu 'phrul mthong nas de dag la yang dag pa'i lta ba byung nas/ dmyal ba la sogs pa'i sdug bsngal ma byung bas so//'di ltar 'das pa'i dus su rin chen pad+ma zla ba'i rnam par dag pa las byung ba'i rgyal po zhes de bzhin gshegs pa byon te/ des yun ring po sangs rgyas kyi phrin las mdzad nas/ mya ngan las 'das nas de'i bstan pa nub pa'i dus su/ dpa' sbyin zhes pa'i rgyal po byung de'i pho brang rin chen ldan te der gnas pa thams cad lta ba log pa ste/de dag rjes su bzung ba'i phyir byang chub sems dpa' mang po byon rab tu byung / de dag gi bla ma me tog zla mdzes de pho brang du gnas pa rnams kyis byang chub sems dpa' rnams phrad pa kun du bzang po zhes bya ba'i nags la gnas/de la me tog zla mdzes dben par gnas pa la sems can de dag la snying rjes bsam pa 'di ltar byung / bdag grong khyer dang grong rdal dang / pho brang du phyin la sems can rnams dge ba'i lam la gnas par bya'o zhes tshangs pa mtshungs par spyod pa rnams la yang gsungs so//de dag gis bkag kyang rang ngam rgyal po la gnod par shes bzhin du nags las babs te/ chos 'chad cing pho brang du sleb/ rgyal po dang blon po la sogs pa mang po btul nas lam gyi bden pa la gnas par byas shing / rgyal po'i lam na stong gis yongs su bskor ba/btsun mo stong phrag brgyad cu dang bcas pa/ nags tshal du 'gro ba na rgyal pos mthong skye bo thams cad dang btsun mo rnams de la mos par mthong nas/ khros te phrag dog gis de bsad pa'i phyir/ bu rnams la bka' stsal to/ /de dag de gsod pa la mi dga' bar shes nas/'khor stong dang ldan pa'i gshed ma nan+di zhes bya ba 'ong bar mthong nas bka' stsal pa/ de'i tshe rlung gis bskyod pa'i rdul byang chub sems dpa'i spyan la phog /spyan gyi rnam 'gyur shes nas bdag gi btsun mo rnams la chags shing 'di lta bar 'dug /mtshan dang dpe byad dang ldan pas bdag pas kyang 'di gzugs bzang /de bas skam pas 'di'i mig phyung shig /dum bu brgya ru gtubs shig ces smras nas rgyal po nags tshal du song / nan+di kas rna ba gnyis dang / sna dang / mig dang / lag pa dang / rkang pa la sogs pa bcad pas/de dang de las 'od zer sna tshogs pa byung ste/ khams gsum du bskor nas slar de nyid du zhugs par gyur to/ /de ltar 'o ma'i rgyun stong phrag du ma de dang de nas bab po/ /'khor lo la sogs pa yang 'phros te lus la zhugs so/ /shi nas zhag bdun lon pa'i tshe/ rgyal po log ste 'ongs kyang rnam 'gyur med pa 'od zer 'phro ba de mthong nas de'i rdzu 'phrul 'jig rten pa las thos te/'di ni nges par byang chub sems dpa' yin/ bdag rmongs pa phyugs dang 'dra bas rgyal srid la chags pas gnod pa mi byed pa/ rgyu mtshan med par brtse ba la gnod pa byas nas mnar med kyi sdug bsngal bsags pa ci/gnas gtsang ma'i lha rnams kyis kyang / de'i yon tan dang de la gnod pa byas pa'i skyon rnams bshad pas du/ sdig pa bshags pa byas/ dkon mchog gsum la skyabs su 'gro ba byas/ skyo ba chen po bskyed nas/ phreng ba dang / na bza' dang /tsan+dan ga pur la sogs pas de'i sku bsregs nas/ mchod rten brtsigs te/ rab gnas byas la ji srid 'tsho'i bar du thun gsum du sdig pa bshags pa la sogs pa dang / mchod pa nus pa bzhin du byas so/ /skye bo thams cad kyang sdig pa las log cing / yang dag pa'i lta ba dang ldan par gyur ro//rgyal po shi nas mnar med du skyes so/ /bcom ldan 'das shAkya thub pas gsungs pa/ de'i dus su dpa' sbyin zhes pa'i rgyal po bdag yin no zhes 'phags pa ting nge 'dzin gyi rgyal po las mang du bshad do/ /gzhan gyi sdug bsngal gyis sdug bsngal can rnams la sdug bsngal mang po'ang mi gnod par bshad de/de ltar bdag gzhan mnyam par rang gi rgyud goms par rang gi dga' ba de yang gzhan gyi duHkha dang mnyam/ sdug bsngal kho nar 'gyur/ gzhan gyi sdug bsngal zhi ba dga' ba de lta bu mnar med par yang dmyal ba'i sems can gdon pa'i phyir ngang pas pad+ma'i mtsho bzhin du sdug bsngal bde ba kho nar dgongs la 'jug par 'gyur ro//de lta bu sdug bsngal gzhan gang gis sdug par 'gyur/ gzhan gyi bde bas thun mong ma yin pa'i bde ba de dag la yang 'byung bar bshad de/dmyal ba la sogs pa las sems can grol ba na gang la dga' ba'i rgya mtsho skye ba de nyid kyis chog /bde ba gzhan 'og tu bcug go/ /'o na grol ba'i bde ba lhag yod ce na/ smras pa/ nyan thos la sogs pa'i thar pas sems can gyi don la mi dga' bas ci bya/sangs rgyas nyid zhar la 'byung bar 'dod pas so/ /gang gi phyir thar pa la yang 'dod pa med pa de bas gzhan don byas pa la/ rlom sems kyang med la byed pa dka' bas ngo mtshar ba'ang med de/ byas pa'i las kyi 'bras bu la re ba med de/ las gzhan don la mtha' gcig tu sred pas so//nye bar bsdus shing bshad de/ de bas na rang gzhan la khyad med pas/ ji ltar gnod pa dang mya ngan dang sogs pa'i sgras grags pa ma yin pa las bdag bsrung ba ltar/ de ltar gzhan dag la yang bsrung ba dang snying rje bya'o/ /sems gzung bas bsrung ba'i nus pa med kyang sems bskyed pa'i don du'o//bdag dang gzhan mnyam par bsgoms nas/ bdag dang gzhan brje ba de bas kyang dka' ba dpe'i sgo nas bshad de/ bar do las ma'i mngal du 'jug pa na pha dang ma'i sa bon dang khrag gi thig le rim pas nur nur po dang /mer mer po lus po'i bar du thob nas de la bdag tu gzung bas de'i yul bdag med kyang bdag tu 'dzin pa 'byung / de bzhin gzhan gyi lus po yang bdag tu byas nas ci ste mi bsgom/ bsam pa gang dang gang gis ni/ /mi rnams kyi ni yid rnams sbyar/ /de dang de yi ngo bor 'gyur/ / sna tshogs nor bu ji bzhin no/ /zhes gsungs pas so/ /rang gi lus gzhan gyi yin par grub pa kho na ste/ pha ma'i 'brel pa can yin pas bdag gzhan gzhan bdag tu bsgom par bya'o/ /des skyon spang ba dang yon tan blang ba'i dgos pa bshad do/ /'o na gzhan la mthar thug med la bdag ni gcig pu yin pas/ji ltar de bdag tu bsgom zhe na/ smras pa/ gcig tu lhag par nges pa'i lus kyi yan lag nyid du/ ji ltar lag pa la sogs pa du ma yin kyang 'dod pa/ de bzhin du 'gro ba mtha' dag nga'i bdag yin zhes lhag par mos nas/ de'i yan lag skye bo rnams yin zhes ci ste mi 'dod/'o na lag pa la sogs dbye ba yis/ /zhes bya ba la sogs pa bshad zin/ slar bskyar ba ci/ de ni bden te/ sngar bdag gzhan mnyam pa'i dpe yin gyi 'dir ni bdag gzhan brje ba ste/ don gzhan la brten pas skyon med do/ /gnyis kyis khyad par bshad de/rang gi lus 'di la bdag med kyang goms pas bdag gi blo skye ba ltar gzhan dag la yang bdag gi blo goms pas ci ste mi srid/ srid kyang ci zhe na/ smras pa/ de ltar bdag tu brtags pas gzhan don byas kyang bdag gis 'di la phan btags zhes rlom sems mi skye/ mang ba yin pas ngo mtshar yang mi skye dpe bshad de/ ji ltar bdag nyid zan za ru bcug nas/ 'jig rten phyi ma la 'bras bu la re ba med pa bzhin/ bdag gzhan brje ba la yang ste/ 'bras bu yang gtang bas so/ /de ltar mi nus pa'i skyon spangs te/ log par goms pa la sems sbyar bar bshad de/gnod pa dang mya ngan dang sogs pa'i sgras sdug bsngal gzhan las bdag bsrung ba ltar/ 'gro ba la yang bsrung ba dang snying rje bsgom par bya'o/ /dpe bshad de de bas na 'phags pa spyan ras gzigs rang gi mtshan nyid spyan ras gzigs zhes bya ba/ byin gyis brlabs pa gang zhig snying rlung can yin kyang bdag gi ming brjod pa de'i sdug bsngal dang /tha mar tshogs pa'i nang du spobs pa med pa'i 'jigs pa bsal bar bya ba'i phyir te/ dgongs pa 'di yin te/ bdag bdag ma yin gyi 'on kyang 'phags pa spyan ras gzigs zhes gang gis dran pa de kho na bdag yin/ bdag gis de bsrung bar bya'o/ /des gsungs pa/ gang gis rgud tshe bdag dran na/ /de yi rgud pa bdag gis bzlog/ /rang gi thog ma'i smon lam 'di/ /bdag la 'ang 'bras bu ldan par mdzod/ /ces so/ /gzhan yang byed pa dka' bar snang ba yang ma goms pas te/gang gi phyir goms pas nus pa thob na gang yang byed par dka' ba las mi ldog gang gi phyir lag pa la sogs pa ster ba thos nas sngon du gang skrag par 'gyur/ de nyid goms pas da ni de med na mi dgar 'gyur/ de bas mang po smra mi dgos bdag dang gzhan myur du skyob par 'dod pa gang yin pa des bdag dang gzhan brje ba bsgom par bya'o//de ji lta bu zhe na/ de'i rigs ma yin pa las gsang bar bya ba yin te/ gzhan du na 'di la ma dad pas ngan song du 'gro ba srid do/ /bdag nyid skyon bcas zhes bya ba la sogs pa gang bshad pa des bdag gzhan gyi skyon dang yon tan bshad de/bdag ces bya ba la sogs pa'o/ /bdag tu 'dzin pa gang las 'jigs pa chung ba grib ma la yi dags su rtogs pa las kyang 'jigs par 'gyur/ sems pa dang ldan pa gang zhig bdag de la khong mi khro/ dgra bzhin du 'jigs pa'i rgyu yin no/ /bdag 'dzin med na 'jigs pa med de/dper na ro bzhin no/ /bkres skom dang nad bsal bar bya ba'i phyir/ bya la sogs pa gsod pa dang lam ma yin pa la 'gro ba su de 'dod ces pa dang sbyar ro/ /gang zhig rnyed pa la sogs pa'i don du/ 'di bdag gson na bdag la rnyed pa mi 'ong bas pha ma yang gsod sangs rgyas la sogs pa dkon mchog gsum gyi nor yang 'phrog /sdig pa gang gis mnar med kyi me'i bud shing du 'gyur ro/ /blo dang ldan pa gang zhig nyes pa'i 'byung gnas bdag de 'dod/ /de la brtse ba byed pa bsrung ba lha ltar mchod/ /sdug bsngal thams cad kyi rgyu yin pas dgra bzhin mi lta/brnyas pa'i yul la phu dud byed/ rang bzhin gyi don la chags pa'i skyon dang yon tan bshad de/ gal te slong ba la ster na de'i tshe bdag ci za 'di ltar rang don la chags pa de ser snas sha zar 'gyur ro/ /gal te bdag nyid kyis dran de'i mchod par bya ba dang rjes su gzung bar bya ba la ci ster zhes gzhan don la 'bad na lha'i dbang por 'gyur ro//rang gi ched du gzhan la gnod pa byas na dmyal ba la sogs pa'o/ /gzhan don du bdag ngal bar byas na phun sum tshogs pa kun 'byung ngo / /bsams pa tsam gyis bdag mtho bar 'dod/gang gis ngan song dang / rigs ngan par skye ba dang / glen par 'gyur ba de nyid gzhan la spo bar byas/ de mtho bar byas na bde 'gro dang / rim gro dang bcas pa nyid thob par 'gyur ro/ /mtho bar 'dod pa ni rig pa'am nor ram gzugs la sogs pas nga rgyal lo//rang don du btsan thabs su gzhan bkol na bran la sogs par 'gyur ro/ /rang nyid kyis gzhan don byas na rje dpon dang sogs pa'i sgras skye ba phyi mar rigs mtho ba la sogs pa'o/ /nye bar bsdus te bshad 'jig rten du sdug bsngal dang ldan pa ji snyed pa de dag gi bde ba zhen pas so//bde ba ldan pa rnams ni gzhan bde bar smon pa ste/ sems can rnams rang bzhin gyis dag pa sangs rgyas kyi snying po can yin pas so/ /dpe bshad de/ mang po bshad ci dgos rang don la chags pa so so skye bo dang / gzhan don 'ba' zhig mdzad pa shAkya thub pa'i khyad par nges la bdag gzhan brje ba la 'bad par bya'o//gang sangs rgya bar mi 'dod cing srid pa'i bde ba la chags pa/ des kyang rang gi bde bas gzhan gyi sdug bsngal brje bar ma byas na/ de la lha dang mi'i bde ba ga la yod/ skye ba phyi ma lta zhog 'jig rten 'dir mthong ba'i don yang mi 'grub kyi/rje dpon gyis gla mi ster na las mis las ma byas na gnyi ga'i don mi 'grub bo/ /shes bzhin du ma rig pas log pa'i spyod pa bshad de/ phan tshun du bde ba skyed pa bor nas de ji lta bu 'jig rten 'di dang / phyi mar bde ba phun sum tshogs pa'i rgyu de bzhag nas dmyal ba'i rgyu phan tshun du gnod pa byas nas/sdug bsngal len te rmongs pas so/ /phyi dang nang du gnod pa ji srid pa dang / sdug bsngal dang 'jigs pa ji srid pa/ de thams cad bdag tu 'dzin pa las byung gi /de bas bdag tu 'dzin pas ci/ / dper na rang gi lag gis dug za bas so/ /'o na bdag tu 'dzin pa 'di sems can kun phyugs dang bya la yang yod de/ mda' dang rdob 'phen pa mthong nas 'bros pa'i phyir ro/ /bdag 'dzin shes pa yin pas de'i shes bya bdag kho na'o/ /'di la brjod pa shes pa ni rnam pa gnyis te/rtog bcas dang rtog med do/ /de la rtog med ni shes bya la dmigs nas skye ba'i phyir de med na mi 'byung ngo / /bdag tu 'dzin pa ni rtog pa yin te/ yul med kyang 'byung / gzhan du na bdag rgyal po yin zhes brtags pas rgyal por 'gyur ro/ /de bas/bdag tu 'dzin pa ma spangs na/ /sdug bsngal spong bar mi nus so/ /dper na me ma spangs na de'i drod spong mi nus so/ /nye bar bsdus shing bshad de/ de bas rang dang gzhan gyi sdug bsngal zhi bar bya ba'i phyir/ sems can thams cad la bdag gis lus bdag tu 'dzin pa'i rten 'bul lo//des bdag 'dzin bzlog /bsod nams kyi tshogs 'byung / dus thog ma med pa nas sems can la gnod pa byas pa'i sdig pa'ang zad do/ /gzhan dag bdag bzhin du gzung bar bya'o/ /lus phul gnas rang gi sems la gces pa'i bu bzhin du bslab par bya'o/ /kye yid gzhan la gzhan la la phul bdag gzhan gyi yin zhes mnyes par gyis shig /de bas de ring nas brtsams te/ sems can thams cad kyi don kho na khyod kyis bsam par bya'i/ gzhan ma yin te/ bdag la chags pas mi dge ba ma yin no/ /rang dga' ba'i phyir ci 'ang blta bar mi bya ste/gang gi phyir yid du 'ong ba'i yul la rjes su chags pa dang / yid du mi 'ong ba la khong khro bar 'gyur ro/ /sus mi lta zhe na/ de dag gi ste de dag la byin pa'i phyir ro/ /sogs pa'i sgras rna ba la sogs pas sgra la sogs so/ /rang gi don du lag pa la sogs pa'i g.yo ba yang mi rigs te/gang la srog gcod pa dang ma byin par len pa dang / 'dod pa log par g.yem pa 'byung bar 'gyur ro/ /gzhan gyi dbang du gyur pa des na gzhan gyi don du nye bar 'gyur ba la/ rang gi lus las gang gang mthong ba de dang de blangs shing gzhan dag la byin/ des dngos po la sred pa dang rlom sems med par 'gyur ro//snying rje gzhan don lta ci smos/ de ltar goms pas skyon thams cad zad pa dang / yon tan thams cad 'phel bar 'gyur ro/ /de phyir 'gro ba'i gnyen gyi ni/ /thabs dang snying rje mchog tu 'gyur/ /zhes gsungs so/ /da ni dman pa'i sems can la sogs pa la/rlom sems la sogs pa'i rnyog ma spang ba'i phyir bshad de/ dman pa la rlom sems dang / mnyam pa la 'gran pa dang / mchog la phrag dog byis pa rnams la skye ste/ rlom sems la sogs pa de nyon mongs pa'i phyogs yin kyang / gzhan dang bdag brje ba rnam par byang ba'i rgyur 'gro ste/de bas 'chad par 'gyur ba'i rigs pas/ rnam rtog med pa ni the tshom med pas so/ /the tshom med pa sgoms shig /phrag dog la sogs pa kho na bsgom par bshad de/ 'di ni zhes bya ba la sogs pa'o/ /tshul khrims la sogs pas bdag mchog tu gyur pa dang /gzhan de dang bral bas dman par mthong na rang la phrag dog bsgoms te/ 'di ni zhes bya bas bdag gzhan du gyur par bstan to/ /bdag ces bya bas gzhan bdag tu gyur pa bstan to/ /de ltar 'chad par 'gyur ba la yang ngo / / las ni khur khur ba la sogs pa'o/ /sems khral med pas legs par gnas/ che ba ni goms pa dang 'bad pas bsgrubs te/ bdag la'ang srid/ gong ma la ltos nas khyed kyang dman no/ /khyed yon tan dang ldan la yon tan med pas ci byed/ 'dir yon tan gyi cha shas med par yang ma grub ste/gang gi phyir yon tan gang yang med pa'i sems can med/ 'on kyang mtho dman ltos pa can yin/ gang gi phyir gang 'di dman pa dang de'ang yod la/ bdag pas kyang dman pa yod de/ gang la bdag mchog yin no zhes phrag dog dang bcas pa'o/ / tshul la sogs pa khyod la med ce na/ tshul khrims 'chal pa dang / lta ba log pa dang sogs pa'i sgras spyod pa log pa ste/ 'di thams cad nyon mongs pa'i mthus 'byung gi /bdag gi 'dod pas ma yin/ khyod snying rje can yin na nus pa bzhin du bdag gso dgos/ zug rngu 'ang bdag gis dang du blang /'on te mi 'grib pa'i rigs pas gso bar bya ba ma yin/ bdag mtho 'di dman byas te ci'i phyir bdag la brnyas pa byed/ gal te gso mi nus kyang yon tan gzhan gyis khyod la lhag pas she na/ smras pa/ de'i yon tan gyis bdag la ci/rang gi don du kho yon tan can yin pas so/ /snying rje gzhan don yin te de kho la med par bshad de/ gang gi phyir mi dge ba byas pas ngan song kho na dug sbrul te/ de'i kha la gnas pa'i skye bo la 'di snying rje med pas so/ /der yang ma zad yon tan gyi rlom pas mkhas pa rnams las rgyal bar 'dod do//mchog la phrag dog bshad nas mnyam pa la 'gran pa bshad de/ gzhan yang yon tan la sogs pas bdag mnyam par shes nas/ gzhan pas lhag par bya ba'i phyir/ yon tan 'phel ba la 'bad par gyis/ rnyed pa la sogs pas lhag na 'di la phrogs te khyer cig /mi ster na 'thab mo byas nas kyang bdag la rnyed pa dang bkur sti bsgrub par bya'o/ /dge ba'i mchog sba bar shugs kyis bstan te/ bdag gis de ltar brtsam par bya'i ji ltar 'jig rten kun la bdag gi yon tan gsal bar 'gyur/gzhan yang 'di'i yon tan gzhan sus kyang mi thob pa'o/ /de ltar bya'i ji ltar yod pa'i skyon yang bdag gis sba ba dang / ji ltar bdag kho na la mchod pa yod cing / kho la ma yin/ deng bdag gis rnyed pa legs par rnyed cing / gang bdag bkur bar 'gyur gyi 'di la ma yin no//goms pas shin tu spro ba bshad de/ shin tu dga' ba'i sems kyis yun ring po zhig nas 'di la ma rung ba byas pa rnyed pa la sogs pa las phyir phyung ba/ skyon brjod pas skye bo rnams kyis bzhad gad byas pa/ phan tshun smod pa blta bar bya'o/ /dman pa la rlom sems bshad de/de ltar dman pa cir yang mi rung bas bdag la 'gran par byed/ bstan bcos la sogs pa'i thos pa de tsam kho la yod dam/ bdag la yod pa bzhin shes rab dang / gzugs dang / rigs dang nor te de med do/ /de ltar bdag gi yon tan phyogs kun tu skye bo rnams kyis bsgrags pa thos nas/spu ldang zhing dga' ba dga' ston la longs spyad par bya'o/ /gal te 'di la rnyed pa 'ga' zhig yod na bdag gis btsan thabs su phrogs te thams cad ma yin/ 'on kyang 'di la 'tsho ba tsam byin te/ bdag gi bya ba byed pas so//der ma zad 'di bde ba las kyang nyams par byas la/ bdag gis sdug bsngal la sbyar bar bya'o/ /bdag gis sdug bsngal gyi khur po 'di'i mgo la gzhag gi gang gi sngon du 'khor gsod pa dang / 'ching ba dang / rdeg pa la sogs pas bag med pa'i phyir sdug bsngal bar byas so//da ni drang por yid la go ba bskyed cing bshad de/ kye yid rang don shes par 'dod pas 'dod cing bskal pa grangs med khyod kyis so/ /'khor bar 'khor ba la thog ma med pas so/ /rang don du ngal ba chen po 'dis/ khyod kyis sdug bsngal kho na bsgrubs so//ji ltar rang don la sngon du 'jug pa ltar/ da lta bdag gi tshig gis gzhan don la ma dpyad ma brtags par zhugs pa dang / mngon du ma gyur pa la dpyad du med pas so/ /phyis 'di'i yon tan mthong bar 'gyur/ thub pa'i gsung bden pas so/ /gal te sngon du gzhan gyi don khyod kyis byed par 'gyur na de'i tshe sangs rgyas kyi go 'phang thob pa ma yin pa/'di 'dra'i gnas skabs khyod la 'byung bar mi 'gyur ro/ /sems bstan cing nye bar bsdus te/ de bas zhes bya ba la sogs pa go sla'o/ /sems can gzhan gyi don du rtog chen du 'gyur la/ rang la gang mthong ba de dang de blangs shing gzhan dag la phan pa gyis/da ni bdag gzhan brje ba ma sbyar bar phrag dog bsgoms par bshad de/ 'di ni skyid nas gzhan sdug go zhes bya ba bdag la phrag dog gis/ de bzhin gzhan yang ngo / /gnyid la sogs pa'i bde ba las phral te/ gzhan don gyi sdug bsngal la sbyar bar bya'o/ /de rjes 'di'i skyon brtag par bya ste/ sdig pa lta ci smos/ rang gi yang 'di'i skyon yin no/ /gzhan gyis 'di la gnod pa byas na yang / khyod kyi las ngan gyis 'di byung zhes brjod nas kho rang gi skyon du byed do/ /'di'i skyon chung ba'ang mi sbed cing skye bo mang po la bshags par gyis/gang gis 'di 'jigs/ slar byed par mi 'gyur ro/ /gzhan gyi grags pa 'di bas lhag pa sgrogs la/ rang gi grags pa zil gyis gnon/ dran dman pa ltar gzhan gyi don du bkol bar gyis/ bag med du ma gyur pa'i phyir ro/ /tha mal pa'i yon tan mi brtan pas glo bur ba ste/ stobs bcu la sogs pa kho na rang bzhin pa yin no/ /'gas kyang mi shes pa ni rtogs par bya ba'i yon tan kun sbas pa kho na las 'phel lo/ /mdor bsdus na 'khor ba thog ma med pa nas/bdag tu rmongs pas gzhan la gnod pa dpag med byas/ de las thar pa'i thabs sems can gyi don kho na yin no/ /de la spro ba bskyed du mi ster te/ gang byas pas gzhan gyi skyon brjod par 'gyur/ bag ma gsar pa'i tshul bzhin du/ /ngo tsha ni bya ba ma yin pa las so//'jigs pa ni dmyal ba las so/ /bsdams pa ni dbang po rnams so/ /de ltar ni 'jug pa'i tshul khrims kyis rang gi dmigs pa la sdod/ bzlog pa'i tshul khrims mi bya'o/ /de ltar lus dbang du bya'i de las 'das na tshar bcad do/ /lus tshar bcad nas/ sems la slob cing bshad de/ 'on te la sogs pa'o/ /kye sems 'di mi byed ces bkag kyang byed par 'gyur na khyod nyid tshar gcod/ gang gi phyir lus bems po yin pas skyon thams cad khyod la brten nas 'byung ngo / /kye rtsa bkrol thabs mkhas pa bdag gis mthong bzhin khyod gar 'gro /khyod kyi dregs pa thams cad gzhom par bya'i/ yid ni gang gang 'gro 'gyur ba/ /shes bya la ni de nyid sbyar/ /thams cad de yi rang bzhin phyir/ song na'ang gang du 'gro bar 'gyur/ /zhes gsungs pas so/ /khyod kyis bdag brlag par byas pa'i dus gzhan yin gyi/thabs dang mi ldan pas so/ /da dung bdag gi rang don yod ces pa'i re ba spongs shig /gang gi phyir khyed sems can kun la byin pas/ mi dmigs pa'i lta bas mi ngal cing / sems can gyi don la zho sha phul cig /bag med pas gal te khyod sems can la ma byin na de'i tshe byas pa'i las kyi rnam smin myong ba'i phyir/khyod kyis bdag dmyal ba'i srung ma rnams la byin par 'gyur/ khyod dang rjes su mthun par spyad pas/ khyod kyis byin pas yun rings ngal bar byas/ khon te dran cing rang don gyi bran khyod gzhom par bya'i/ sems la 'jam pa'i rim pas slob par bshad de/gal te bdag la dga' ba yod na/ de'i tshe phung po lnga 'di la zhen par mi bya'o/ /gal te ngan song las bsrung bar 'dod na log 'tsho la sogs pas mi skyob cing / sems can gyi don du sbyar bar bya'o/ /bsrungs na skyon ci zhe na/ smras pa/ ji ltar la sogs pa'o//bze re can ni shin tu snyi ba'o/ /ltung ba ni dge ba las so/ /lus 'di bde ba 'dod pas de la shin tu chags na sa gzhi thams cad kyis kyang kho'i 'dod pa gang bar mi nus so/ /ji ltar rgyal po maN+Da ta'i 'dzam bu'i gling la dbang sgyur bas kyang tshim par ma gyur pas/ gling bzhi dbang thob kyang slar lha'i dbang po'i gdan phyed byin te/ des kyang ma tshim pa 'dod pa shin tu che bas ltung bar 'gyur ro/ /rnyed par dka' ba 'dod na ngal bar 'gyur la 'dod pa'i don yang mi 'grub/ gang zhig bsgrub nus pa'am mi nus pa thams cad re ba med pa de'i phun sum tshogs pa zad pa med do//phung po lnga'i lus la rang dbang sgyur du mi 'jug ste/ gzhan du na yul lnga la 'dod pa 'phel bar 'gyur ro/ /'dod pa'i dngos po 'ang ma bzung na legs te/ de la zhen pa mi 'byung ba'i phyir ro/ /rang lus la mi zhen pa'i rgyu bshad de/ gang zhig shi na mthar thug thal bar 'gyur/rang nyid g.yo ba med cing srog rlung gis g.yo bar byed/ mi gtsang ba'i gzugs mi zad pa 'di la khyod ci'i phyir bdag tu zhen/ gal te chos la mi sbyor na de'i tshe lus 'di bems po yin pas bong ba dang khyad med pas gson nam shi nas kyang 'dis ci bya/nga rgyal gyi gnas yin zhe na/ kyi hud kye nga rgyal khyod ci'i mi 'ching yul ma yin pa la 'jug /lus la zhen pas don med/ sdug bsngal bsags pa yin gyi/ khos chags pa'am sdang ba gang mi shes te/ shing dang mtshungs pa'i phyir ro/ /bdag gis gya nom pa'i bza' btung gis gsos kyang bdag la brtse ba med/bya rgod la sogs pas zos kyang de la sdang ba med/ de lta bu cig la chags nas ci/ gang lus la smod pa la bdag khro/ de la mchod na bdag dga'/ gal te des mi shes na bdag khong khro ba dang rjes su chags pas ngal ba su'i phyir/gang zhig gis lus 'di 'dod pa de'ang bdag gi bshes yin na bdag lta ci smos/ thams cad rang lus 'dod de/ de dag ci ste bdag gi bshes ma yin/ gal te rang gi lus 'dod pa'i rgyu mtshan gyis brtse ba yin na de'i tshe sems can gzhan dag kyang rang lus 'dod pas bshes su 'gyur ba dag med pas so//bdag gzhan brje ba nye bar bsdus te bshad pa/ bdag la brtse ba ma spangs par sems can gyi don mi 'byung bas/ bdag gis ltos pa med par 'gro ba la phan pa'i phyir lus btang ngo / /de nyid kyi phyir skyon du ma'i 'byung gnas yin kyang bya ba byed pa'i snod bzhin du gzung bar bya'o//ting nge 'dzin med na nyon mongs pa 'joms mi nus pas 'jig rten gyi spyod pas don med/ mkhas pa sangs rgyas kyi rjes su 'brang gi /de'i spyod pa la spyad pa'i phyir ro/ /bag yod pa'i gtam le'u bzhi pa nas bshad pa dran cing gnyid dang rmugs pa bzlog par bya zhing ngo //de bas zhes nye bar bsdu ba ste/ nyon mongs pa dang shes bya'i sgrib pa gzhom pa'i phyir/ de bzhin nyid la sems yang dag par gzhag par bya ste/ lam ma yin pa rnam rtog gi dra ba las log ste/ bshad pa'i dmigs pa las bar med par ro//bsam gtan bstan pa'i le'u'i dgongs pa'i 'grel pa khyad par gsal byed ces bya ba brgyad pa'o// //gang las 'phags pa ma yin lha yang thams cad long ba kho nar 'gyur/ /rgya mtshor dra ba'i ku ba bzhin du ngo mtshar don yang spongs/ /zab mo 'bras chen de nyid chos gter de ni med pa na//sdug bsngal mi 'chi bla ma'i drin gyis bdag 'jug 'gyur/ /shes rab bsam gtan med mi 'byung / /zhi gnas mi 'byung de med kyang / /gang la de gnyis yod pa na/ /de la srid mtsho rmig rjes bzhin/ /zhes bshad pas bsam gtan bstan nas shes rab bshad de/yan lag la sogs pa'o/ /'dir 'chad pa'i sbyin pa la sogs pa 'dis mtshon to/ /yan lag bskyed pa'i rgyu'o/ /'di dag shes rab kyi don du thub pas gsungs so/ /stong pa nyid la dmigs pas shes pa rab yin no/ /de'i slad du ste shes rab gtso che ba'i phyir ro//gang gi phyir sbyin pa ni bsod nams tshogs kyi yan lag yin pas 'tshang rgya ba'i rgyu'o/ /de 'ang tshul khrims kyis brgyan par gyur na/ bde 'gro dang bde ba la longs spyod pa mkho ba'i yo byad dang ldan pa bla na med pa'i ye shes kyi rgyu'o/ /bzod pa ni de'i mi mthun phyogs khong khro'i gnyen po'o//de 'ang brtson 'grus med na mi 'byung ngo / /bsam gtan ni ye shes tshogs kyi yan lag ste/ ting nge 'dzin dang ldan na ji lta ba bzhin du rtogs so/ /sbyin pa la sogs pa yang / shes rab med na sangs rgyas su 'dren mi nus la pha rol tu phyin pa'i ming yang mi 'thob po//dbu ma la yang 'jug pa nas/ mig ldan skye bo zhig gis 'dod bzhin du/ /long ba'i tshogs kun yul du ci bde bar/ /'dren pa bzhin du 'dir ni mig med rnams/ /yon tan khrid nas shes rab rgyal bar 'gro/ /zhes gsungs so//rtog med kyi bstod pa las/ smod med dri ma med pa yi/ /khyod ni pha rol phyin kun gyi/ /skar ma rnams kyis zla tshes ltar/ /rtag tu rjes su 'gro ba'o/ /zhes so/ /yang na 'di ni bsam gtan te/ shes rab bskyed pas so/ /shes rab kyi don du ste/ zhi gnas lhag mthong dang ldan pas//nyon mongs 'joms byed shes nas su/ /zhes bya ba la sogs pa 'dir gsungs pa'i phyir ro/ /lhag ma sngar gsungs pa bzhin no/ /gang gi phyir sbyin pa la sogs pa'i yan lag gam/ bsam gtan gyi yan lag shes rab kyi don du gsungs pa/ de'i phyir shes rab bskyed par bya'o//de ni gnyis te rgyu dang 'bras bu'i dbye bas so/ /rgyu'ang gnyis te/ mos pa spyod pa'i sa la spyod pa dang sa la 'jug pas so/ /'bras bu ni chos thams cad stong pa nyid du rtogs pa'i mtshan ma med pa'i shes rab po/ /de ci'i phyir zhe na/ sems can rnams kyi sdug bsngal zhi bar 'dod pas te/'di ltar log rtog bzhi ni bdag dang bdag gir 'dzin pa dang / tshul bzhin ma yin pa yid la byed pas 'dod chags la sogs pa skye/ de las las/ de las skye ba dang nad la sogs pa'i sdug bsngal 'byung ngo / /de ltar rim pa bzhin du rten cing 'brel pa shes rab kyis bltas nas/slar de'i phung po lnga'i bdag nyid 'bras bur gyur pa sdug bsngal te/ de 'ang bdag med pa/ sgyu ma la sogs pa lta bu don dam par rang bzhin med pa/ shes rab kyis mthong na srid pa'i yan lag ma rig pa ldog go/ /de nas 'du byed dang /rga shi'i bar ro/ /de ltar sdug bsngal gyi phung po 'di 'gog par 'gyur ro/ /de la ma rig pa dang / sred pa dang / nye bar len pa'i nyon mongs pa'i lam 'chad pa med pa'o/ /'du byed dang srid pa ni las kyi lam gyi'o/ /lhag ma'i yan lag rnams ni sdug bsngal gyi lam gyi'o//de'i rim pas bshad de/ kun rdzob ni ma rig pa dang / gti mug dang / mi shes pa dang / nga 'o nga rgyal dang / log rtog dang 'khrul pa ste rnam grangs so/ /de kho na nyid sbas pas na kun rdzob po/ /sA lu ljang pa'i mdo sde las gsungs pa/ de kho na nyid ma rtogs pa log par rtogs pa mi shes pa ni ma rig pa'o zhes so//snang ba'i phreng ba las/ mi bden don ni ston par byed/ /bden pa'i don ni sbas te gnas/ /ma rig skye dang dus mnyam du/ /mig ser nad la sogs pas bzhin/ /zhes so/ /des rtogs pa'i dngos po kun rdzob kyi bden pa ste 'jig rten kho na'i kun rdzob kyi bden pa yin la kun rdzob kyang yin no//gang gi phyir bshad pa/ gti mug rang bzhin bsgribs pas kun rdzob ste/ /des snang gang nyid bcas pa bden pa yin/ /kun rdzob bden par de yi thub pas gsungs/ /byas pa'i tshig don yang ni kun rdzob po//zhes so/ /de gnyis te/ bden pa dang mi bden pa'i dbye bas so/ /sngon po la sogs pa skyon med dbang pos dmigs pa yang dag pa'o/ /smig rgyu la sogs pa dang / mu stegs kyis brtags pa la sogs pa log pa'o/ /'phags pa klu sgrub kyis/ snod med dbang po drug po yi//gzung byar rtogs pa 'jig rten gyis/ /de bden 'jig rten kho na las/ /lhag ma brtags pa log pa'o/ /zhes gsungs so/ /bla na med pa'i don ma byas pa ni don dam ste/ gang rtogs pas nyon mongs pa'i sgrib pa bag chags dang bcas pa 'gog pa'o/ /chos thams cad rang bzhin med pa stong pa nyid dang /de bzhin nyid bden pa'i mtha' chos kyi dbyings la sogs pa rnam grangs so/ /kun rdzob rang bzhin med pa ni don dam ste/ don dam par med pa la ma rig pas snang ba'i phyir ro/ /'di ni bden pa gnyis su 'dod/ /rim pas 'jig rten dang 'phags pa rnams kyi'o//dngos kun yang dag brdzun par mthong bas na/ /dngos snyed ngo bo gnyis ni 'dzin par 'gyur/ /yang dag mthong bas gang yin don dam ste/ /mthong ba brdzun pa kun rdzob bden par gsungs/ /zhes so/ /'o na gzhan du bden pa bzhi bshad pa ma yin nam zhe na/de'i skyon mi 'byung ste/ sdug bsngal dang / kun 'byung dang / lam gyi bden pa ni kun rdzob yin la/ 'gog pa'i bden pa ni don dam pa yin pas gnyis kho na'o/ /de la don dam blo'i spyod yul ma yin te/ rtog bcas kyi blo ji snyed pa'i yul ma yin zhing tshig gis brjod du med do//de lta yin kyang skal ba dang mi ldan pa'i skye bo rjes su gzung ba'i phyir dpe'i sgo nas bshad de/ ji ltar mig la rab rib yod pa rnams kyis nam mkha' la skra shad mthong / rab rib med pas mi mthong ste med pa'i phyir ro/ /nam mkha' 'ba' zhig pa mthong ngo //de ltar ma rig pa'i rab rib kyis bsgribs pa rnams kyis/ phung po la sogs pa'i dngos po mthong la/ sangs rgyas kyis ma gzigs so/ /ji ltar sangs rgyas kyis [(]gzigag [,]gzigs [)]pa dngos po rnams kyi de kho na nyid de rang yin no/ /gang gi phyir bstan bcos rig pas gsungs pa/rab rib kyis ni brtags pa gang / /skra shad la sogs brdzun de nyid/ /dag pa'i mig gis ji ltar mthong / /de ni de nyid 'dir rtogs bya/ /zhes gsungs so/ /'phags pa brgyad stong pa las kyang gsungs pa/ ji ltar chos rnams med pa de ltar yang dag par yod de/de ltar med pas ma rig pa zhes brjod do zhes so/ /de ltar kun rdzob kyis don dam bstan pa'o/ /gang gi phyir bshad pa/ rnam rtog 'di ni rang nyid kyis/ /ma rig pa yi tshul du 'gyur/ /zhes so/ /don dam pa ni rnam pa thams cad mkhyen pa'i ye shes kyi 'ang spyod yul ma yin no//rang bzhin dang glo bur gyi dri mas dag pa don dam pa la dmigs pa'i rdo rje lta bu'i ting nge 'dzin sangs rgyas yin la/ de la rnam pa'i cha shas kyang med do/ /rab tu dga' ba'i sa dang po nyid du don dam pa mthong ba/dngos gzhi'i ting nge 'dzin kho na mthong lam yin no/ /de nas brtsams te 'phags pa yin no/ /'di dag la thams cad du glo bur gyi dri mas dag pa med do/ /bden pa gnyis rnam par gzhag la/ de'i dbang du byas pa 'jig rten yang gnyis bshad de/ de la zhes bya ba la sogs pa'o//'jig rten ni rnam pa gnyis te/ kun rdzob rig pa dang don dam rig pa'o/ /rang bzhin ni ma rig pa dang sred pa la sogs pa'o/ /de las byung bas phal pa'o/ /rnal 'byor ni ting nge 'dzin chos thams cad mi dmigs pa'o/ /de 'di la yod pas rnal 'byor pa'o//de gnyis kyi nang na phal pa ni rnal 'byor pas 'joms/ de ma yin pa la der gzung bas 'khrul pas so/ /de bshad pa/ ji ltar rab rib can la dmigs pa ltar/ /rab rib med pa'i ye shes gzhom du med/ /ye shes dri ma med kyis zil gnon pa'i/ /blo ni 'joms la dri ma med mi 'joms//zhes so/ /de bas don dam pa'i ye shes gzhom du med do/ /'on kyang phal pa'i blo kho na 'joms te 'khrul pa'i phyir ro/ /rnal 'byor pa'i dbye ba bshad de/ rnal 'byor pa 'ang zhes bya ba la sogs pa'o/ /rnal 'byor pa ye shes kyi khyad par gong ma gong mas 'joms te/ye shes kyi khyad par gyis so/ /sgrib pa de dang des bral ba'i shes rab kyis so/ /ji lta zhe na/ gnyi ga 'dod pa'i dpes te/ rnal 'byor pa dang phal pa 'dod pa'i dpes gang yin pa mdor gsungs pa/ sgyu ma dang smig rgyu la sogs pa gnyi ga la rang bzhin med par grub pa de dang chos mthun pas chos rnams rang bzhin med par bstan pas so//'di ltar bden par 'dod pa gzugs la sogs pa rnams rnal 'byor pa kho na la don dam pa rtogs pas rang bzhin med par grub/ sgyu ma la sogs pa ni phal pa la yang ngo / /gnyi ga la grub pas dpe yin no//rigs pa grub pa yang gnyis ka la grub pa'o/ /de bas tha mal pa'i blo dpes 'khrul par bstan to/ de ltar rnal 'byor pa rnams la yang ji srid bar ro/ /'on dngos po thams cad rang bzhin med pa yin na ji ltar sems can grol ba'i phyir ro/ / de kho na nyid rtogs pa rnams kyang sbyin pa la sogs pa 'jug /sbyin sogs kyang rang bzhin med pa'i phyir ro/ /smras pa/ 'bras bu'i don du ma spyad pa'i phyir 'bras bu ni bsgrub par bya ba ste/ de'i don du ma spyad cing de'i rgyu la rab tu 'jug pas so/ /rang bzhin med pa yang 'khor gsum du mi dmigs pas 'bras bu'i rgyur gyur pa'i phyir ro//kun rdzob kyi bden pa thabs yin la/ don dam pa'i bden pa thabs las byung ba yin pas bden pa gnyis khas blangs/ gzhan du na dgos pa med pas de ci/ rnal 'byor pa yang dang po nyid du don dam pa mthong ba ma yin gyi 'on kyang thabs goms pa'i khyad par gyis te 'gal ba med do//'o na dngos po gang dag rnal 'byor pas sgyu ma lta bur mthong ba de/ gal te de nyid phal pas kyang mthong na/ de'i tshe ji ltar rtsod ce na/ smras pa/ 'jig rten phal pas dngos po mthong ba 'ba' zhig ma yin gyi dngos po yod par don dam par brtags/don dam pa nyid mngon par zhen na rnal 'byor pa bzhin du/ sgyu ma lta bur ma yin no/ /des rnal 'byor pa dang phal pa rtsod pa yin no/ /rnal 'byor pas bden par bkag pas so/ /ji ltar sprul pa'i glang po la sogs pa'i tshul kho na skye bos mthong la sprul mkhan gyis shing la sogs pa nyid du'o//'o na skye bo thams cad la mngon sum gyis grub pa'i dngos po ji ltar sbas she na/ smras pa/ gzugs dang sgra la sogs pa mngon sum du gyur pa gang brjod pa de ni/ 'jig rten la grags pa ste/ tshad mas don dam pa rtogs pa yin/ /tha snyad pa'i mngon sum la sogs pas grub pa'i phyir ro//mdzod las/ brtags dang rjes su dran pa yi/ /rtog pas rtog bral zhes byar brjod/ /ces gsungs pas/ dbang po'i rnam shes rtog pa kho na'o/ /gzhan du na/ dbang po dag gi dmigs pa gang //de de nyid du grub pa na/ /byis pas de nyid rig par 'gyur/ /de'i tshe de nyid ye shes ci/ /zhes so/ /'o na rgyu med na grags pa yang mi 'byung ste/ grags pa ni yod pas ji ltar brdzun zhe na/ smras pa/ de ni mi gtsang ba la gtsang ba la sogs par grags pa bzhin/ bud med kyi gzugs la sogs pa mi gtsang ba la/ 'dod pas 'khrul pa rnams la gtsang ba'i blo 'byung ste/ de ni brdzun yin te de ma yin pa la der zhen pa'i phyir ro/ /sogs pa'i sgras mi rtag pa la sogs pa rtag pa dang / bde ba dang / bdag gi blo bzhin du gzugs la sogs pa la yang ngo //'o na bcom ldan 'das kyis gsungs pa/ bram ze thams cad ces bya ba ni phung po lnga dang / skye mched bcu gnyis dang / khams bco brgyad do/ /yang gzhan du/ 'dus byas thams cad skad cig ma/ /mi gnas bya ba ga la yod/ /ces bya ba la sogs pa'o//sgyu ma la sogs pa'i rang bzhin yin na skad cig ma'i rang bzhin ga la grub/ rang bzhin med pas don dam par yod pa ci ste ma yin zhe na/ smras pa/ 'jig rten zhes bya ba la sogs pa'o/ /dngos po la mngon par zhen pa'i skye bo rnams la/ phung po la sogs pa bstan pa 'di bdag dgag pa'i phyir rim gyis stong pa nyid la gzhug pa'i phyir te/gzhan du na skal ba med pas skrag pas ldog par 'gyur ro/ /sems can gyi bsam pa mkhyen pas thugs rjes bstan pa yin gyi/ don dam par ma yin no/ /des gsungs pa/ rgyal bas ji ltar don dbang gis//bdag dang bdag gi ba zhes gsungs/ /phung po skye mched khams rnams kyang / /de ltar don gyi dbang gis gsungs/ /zhes so/ /'o na skad cig ma ji ltar zhe na/ smras pa/ skad cig de bzhin nyid ma yin te/ rang bzhin med pa nyid kyi phyir ro/ /skad cig ma la sogs pa bstan pa ni gdul bya'i dbang gi'o//gzhan dag na re/ gal te don dam par skad cig ma yin na/ kun rdzob tu yin nam/ de ltar na 'jig rten gyi snang ba dang 'gal lo/ /dngos po rnams skad cig ma ma yin par 'jig rten la snang ba'i phyir ro/ /lan bshad de/rnal 'byor kun rdzob nyes med cing / /snang ba dang 'gal ba'i skyon med de/ rnal 'byor pa'i kun rdzob kyis skad cig ma yin pa'i phyir ro/ /gang zag gi bdag med pa bsgom pa'i rnal 'byor pa rnams la skad cig mar snang ba'i phyir ro/ /de'ang kun rdzob yin te/ blo kun rdzob yin zhes gsungs pas so//snang ba dang 'gal ba yang med de/ de lta bu'i snang ba 'dir 'gog pa'i phyir ro/ /'o na skad cig ma la sogs pa kun rdzob pa yin na/ ci'i phyir rnal 'byor pa kho nas mthong zhe na/ 'jig rten las des de nyid mthong / so so'i skye bo las des dbang po'i yul las 'das pa mthong /gzhan du na de ltar mi 'dod pa'i tshe/ 'jig rten gyi rnal 'byor pa la gnod par 'gyur/ bud med mi gtsang bar bsgoms pa la 'jig rten gyis gtsang bar bzung ba'i phyir ro/ /de ltar lung las kyang dngos po rnams don dam par mi 'gyur ro/ /de bas sgyu ma lta bu kho na'o//chos thams cad sgyu ma lta bu yin na/ sangs rgyas kyang khyed kyi sgyu ma lta bur 'gyur/ de'i tshe de la bkur sti dang gnod pa byas pas bsod nams dang sdig pa ji ltar 'byung zhe na/ smras pa/ ji ltar zhes bshad de/ sgyu ma dang 'dra ba'i rgyal ba las bsod nams ji ltar 'byung na/ sgyu ma'i skyes bu bsad kyang mi bsad pa'i nyes pa mi 'byung ba bzhin no/ /'di'i lan ni ji ltar dngos po yod pa la ji bzhin dgongs pa 'di ste/ ji ltar dngos por smra ba la rgyal ba don dam pa las bsod nams don dam pa 'byung / de bzhin bdag gi sgyu ma lta bu las bsod nams sgyu ma lta bu bsgrubs pas 'gal ba med do//gzhan yang don dam yin kyang bsod nams lung las bshad pa bzhin de bzhin sgyu ma lta bu yang ngo / /bye brag med par sgyu ma lta bur bsgrubs pa'i phyir ro/ /gal te sems can rnams sgyu ma lta bu yin na/ de'i tshe rgyu mtshan gang gis shi ba de skye bar 'gyur/sgyu ma'i skyes bu shi ba ni slar skye ba med kyi 'di dag ni skye ste/ de bas dngos po thams cad don dam par yod par grub po/ /'dir ni lan te ji srid du rkyen rnams sngags dang sman la sogs pa'i tshogs pa tshang ba yod pa/ de srid du sgyu ma'ang rgyun du yod pa nyid de ltar ji srid ma rig pa dang las dang sred pa la sogs pa'i tshogs pa yod pa 'phags pa'i lam gyis ma bcos pa de srid du phung po'i rgyun skye ba dang 'chi ba'i sgyu ma yang rten cing 'brel pas yod pa'o//'o na sgyu ma ltar yun rings mi gnas par rigs/ ji ltar 'khor ba na yod pa'i bar dang 'jug ce na/smras pa/ rgyun rings tsam gyis ji lta bar/ /sems can bden par yod pa yin/ /yun rings gnas pa tsam gyis yang dag par ga la 'gro /yun rings gnas pa'i rgyun tsam gyis sems can don dam par yod par ji ltar khas len/ de lta yin na 'khor ba gnas pa'i bar skabs su dri za'i grong khyer gyi snang ba de yang don dam par 'gyur/gzhan yang gang dag rgyu las byung ba la de med na ni med par 'gyur/ gzugs brnyan dang ni mtshungs pa nyid/ /gsal bar ci yi phyir mi 'dod/ /'o na ji ltar sgyu ma mkhan gyis sprul pa'i skyes bu bsad pa la sogs pa byas kyang srog gcod pa med pa ltar/skyes bu gzhan bsad kyang med par 'gyur te/ khyad med pas she na/ smras pa/ sgyu ma la sogs pa'o/ /sgyu ma'i skyes bu bsad pa na sogs pa'i sgras de'i nor 'phrog pa la sogs pa na rang bzhin med par mtshungs pa yin kyang /sprul pa la rnam shes med pas sdig pa mi skyed/ srog gcod pa'i dngos gzhi mi 'byung ste/ srog med pa'i phyir ro/ /rdeg pas sbyor ba'i sdig pa ni 'byung ba'ang yod do/ /'o na sems can la ji ltar zhe na/ smras pa/ sems kho na sgyu ma ste/ de dang ldan pa la bsod nams dang bsod nams ma yin pa gnyi ga 'byung ngo //sems de la bde sdug skyed pas so/ /gzhan yang dngos por smra ba la/ dngos po mnyam pa yin kyang gson pa'i lus bcad pa ltar/ shing bcad pa la srog gcod mi 'byung ba ltar/ sgyu ma lta bur mnyam pa la'ang shes par bya'o//sems sgyu ma zhes gang gsungs pa/ de la gzhan gyis gnod par bshad de/ sngags zhes bya ba la sogs pa'o/ /nor bu dang sngags dang sman la sogs pas sems bskyed mi nus pas/ sems sgyu ma'i rang bzhin ma yin la/ sgyu ma mkhan gyi glang po la sogs pa bzhin sems byed mi nus pas/de ji ltar sgyu mar 'gyur zhe na/ bsam pa 'di ste/ sngags la sogs pa ma byas pas sems don dam par grub po zhes so/ /de la lan bshad de/ sna tshogs zhes bya ba la sogs pa'o/ /sgyu ma zhes pa'i sgra mtshungs kyang de'i rgyu rnams gcig ma yin te/ 'on kyang sna tshogs pa yin/dgongs pa 'di ste/ rgyu las byung bas byas pa'i phyir sems la sogs pa sgyu ma lta bur bshad pa bsgrub bya yin la/ dpe ni sgyu ma mkhan gyis sprul pa yin/ de la sngags la sogs pas ma byas pas ji ltar bden par grub/ gal te byas pa ma yin par sgrub par nus na bden pa yin te/de ni med do/ /de nyid bshad de/ sngags la sogs pa gcig gis sems la sogs pa thams cad bskyed par mi nus te/ gang na yang ni yul lam dus so/ /de bas sgyu ma la la la sngags la sogs pa las 'byung / la la sems la sogs pa ma rig pa la sogs pa las 'byung / de bas rgyu las byung ba'i phyir byas pa yin pas so//rang bzhin gyis mya ngan las 'das pa chos thams cad ces bya ba mi bzod cing gzhan gyis smras te/ gal te la sogs pa'o/ /rang bzhin gyis stong pas skye ba la sogs pa dang bral ba/ don dam par mya ngan las 'das pa gal te kun rdzob tu skye ba dang 'chi ba'i rim pas 'khor bar 'khor na de'i tshe sgrib pa thams cad spangs nas mya ngan las 'das pa sangs rgyas kyang de ltar 'khor bar 'gyur/de bas na lag pa dang rkang pa la sogs pa 'bul ba'i byang chub spyod pas ci zhig bya/ sdug bsngal thams cad zhi ba dang / yon tan thams cad thob pa'i phyir spyod pa yin mod kyi/de ltar byas kyang des ci 'di la lan ni ji srid rkyen rnams la sogs pas lan btab tu zin kyang / gsal bar bya ba'i phyir slar gsungs pa/ rkyen rnams zhes bya ba la sogs pa'o/ /don dam par 'khor ba med pa nyid 'khrul pas 'khor ba'i snang ba ni gti mug yod pa ji srid du'o//'phags pa'i lam gyis gti mug spangs nas de'ang med par 'gyur ro/ /dgongs pa 'di ste/ don dam par chos thams cad mya ngan las 'das zhes bya bar chos thams cad mi dmigs par bshad do/ /de ni 'phags pa rnams kyis dngos gzhi'i ting nge 'dzin gyi spyod yul lo//de la chos rnams kyang med 'khor ba'i gtam lta ci smos/ gang gi don dam pa spyod yul du ma gyur pa'i sems can de'i spyod yul kun rdzob kho na ste de ni gti mug yin/ rmongs pa la skye ba dang 'chi ba la sogs pa'i duHkha myong ba yod pa nyid/ de bas srid pa dang gti mug la sogs pa rkyen yod pa'i bar du/skye ba la sogs pa'i sgyu ma 'ang mi ldog go/ /gti mug la sogs pa'i rkyen rnams 'phags pa'i lam gyis bcad pa na skye ba la sogs pa kun rdzob tu 'ang mi 'byung bas sangs rgyas kyang ni 'khor 'gyur ba zhes bya ba'i thal 'gyur ga la yod/ de ltar mdo sde pa la sogs pa'i klan ka / spangs nas/ rnal 'byor spyod pa pas bkod pa'i skyon bshad de/ gang tshe la sogs pa'o/ /gang gi tshe 'gro ba sgyu ma lta bur khas blangs nas/ gang don dam pa'i blo de ni phyi rol gyi dngos po snang zhes bya bas 'khrul par gyur pa phyi rol bzhin du de 'ang dbu ma pa la med na/ de'i tshe sgyu ma sus dmigs/gang la rang gi sems don dam par yod pa phyi rol gyi dngos por snang zhes 'khrul pa phyi rol gyi dngos po'i tshul du snang / de la 'di med do/ /lan ni gang tshe la sogs pa'o/ /'di ni mnyam ste gang gi tshe glang po che la sogs pa'i rnam pa gzung bar bya ba'i sgyu ma sems tsam pa la med pa/ sems tsam du khas blangs pas te/de'i tshe ci dmigs phyogs nges pa la sogs pa rnam shes las tha dad pa snang ba mi rigs so/ /gang gi phyir bshad pa/ 'dir ni kun brtags med pa'i phyir/ /gzhan dbang kho na yod pa ste/ /sems tsam yod par sma ba la/ /mtha' gnyis spangs pa med pa'o/ /kun du brtags pa phyi rol med pas chad pa'i mtha'//nyon mongs gzhan gyi dbang du gyur pa'i rnam shes yod pas rtag pa'i mtha'/ /de bas rnam shes don dam par yod par 'dod pa spang bar 'tshal lo/ /gal te phyi rol med kyang 'dzin pa'i rnam pa las gzhan sems kho na'i rnam pa don dam par yod ces smra na/ de ni mi rigs te rnam shes kho na sgyu ma yin pas don dam par yod pa dbu ma la ma grub pa'i tshe/de'i rnam pa gzhan don dam par ji ltar grub/ de ma grub na gzung bar bya ba gang zhig 'dzin pa gang gis mthong / chos can ma grub na chos mi 'grub pa'i phyir ro/ /gzhan gyis smras te/ 'o na rang rig gi shes pas rang rig cing de las tha mi dad pa sgyu ma'i snang ba yang rig ste/sngar bkod pa'i skyon med do/ /lan bshad de/ 'jig rten zhes bya ba la sogs pa'o/ /gtsug na rin po ches zhus pa'i mdo las/ des sems kyi rgyun tshol te de la 'di ltar 'byung / dmigs pa yod na sems skye'i/ 'o na sems kyang gzhan la dmigs pa'ang gzhan yin nam/gang na dmigs pa gang yin pa de nyid sems te/ gal te dmigs pa'ang gzhan la sems kyang gzhan yin na sems gnyis su 'gyur/ gal te dmigs pa gang yin pa de nyid sems yin na/ de ji ltar sems nyid kyis sems mi mthong ngo / /ral gri'i so de nyid kyis so de nyid mi chod/sor mo'i rtse mo de nyid kyis de nyid la reg par mi nus zhes bya ba la sogs pa'o/ /dgongs pa 'di ste/ 'jig rten gyi snang ba ji lta bar spyad pa yin gyi/ de la ni gzung 'dzin gyi snang ba yod kyi de'ang ma rig pa las byung phan tshun du ltos pa can yin no/ /shes rab kyi pha rol tu phyin pa las kyang gsungs pa/dmigs pa dang bcas pa kho na la sems pa skye'i dmigs pa med pa la ni ma yin/ dmigs pa dang bcas pa la las skye'i dmigs pa med pa la ma yin no zhes so/ /de bas na sems kyis rang mi mthong zhes pa lung las grub pa yang ma yin la/ 'jig rten gyi snang bas grub pa yang ma yin zhing rigs pas kyang mi 'grub bo//gzhan yang blo kun rdzob rnam rtog yin te/ rnam rtog las gzhan pa'i 'khor ba 'ga' zhig kyang med do zhes gsungs pas grol bar 'dod kyang srid par lhung ba'i phyir ro/ /sems tsam pa rang rig bsgrub pa'i phyir dpe bshad de/ ji ltar mar mes bum pa la sogs pa mun pa la yod pa snang bar byas shing rang yang snang bar byed pa de bzhin du rang rig kyang snang zhe na/lan ni bum pa la sogs pa bzhin du mar me snang bar bya ba ma yin gyi/ gang gi phyir mun pas bsgribs pa yang ma yin no/ /bsgribs pa snang bar bya ba yin gyi bum pa la sogs pa bzhin no//mar me ni bsgribs pa ma yin te/ mun pa la mar me med pas gang snang bar byed/ mar me la mun pa med par cis snang bar byed/ gzhan gyis smras te gzhan la ma ltos par snang ba kho na brjod de/ shel bzhin la sogs pa'o/ /ji ltar shel rang gi sngon gyi sngon po ma yin pa sngon po byed pa la/lo ma sngon po la sogs pa la ltos pa can de ltar rang bzhin gyi sngon po'i dngos po ni ma yin no/ /de ltar bum pa la sogs pa 'ga' zhig gzhan la ltos pa can yin la mar me la sogs pa ni ltos pa med par snang ba zhes brjod do/ /lan ni sngo nyid min la zhes bya ba la sogs pa'o//dpe 'di 'ang mtshungs pa ma yin la gang gi phyir sngon po yang sngon po nyid la ma ltos pa ma yin te/ rang gi rgyu la ltos pa'i phyir ro/ /gal te mi sngo bar skyes bzhin du/ gzhan la ma ltos par rang gis rang sngon por byed na/ de ltar 'byung gi de ni med de/ sngar bzhin du rang nyid kyis rang byed pa 'gal bas so//gang bshad pa/ rnam shes bems po'i rang bzhin las/ /bzlog par rab tu skye ba ste/ /zhes bya ba la sogs pa des kyang rang rig tu mi 'grub ste/ byas pa gzugs brnyan lta bu rang bzhin med pa'i phyir/ rang gi rang bzhin med la bems po yang ma grub pas gang las log/de ni mar me rang gis gsal bar khas blangs nas/ blo rang nyid kyis gsal bar mi rigs par bshad de/ mar me la sogs pa'o/ /mar me gsal ba'i rang bzhin lta zhog /de lta yin kyang rang rig bsgrub pa'i don du/ dpe mi mtshungs zhes bya ba'i don to/ /gang gi phyir mar me gsal bar byed do zhes mar me'i rnam pa can shes pas shes te brjod/shes pa ni rnam pa gang gis sam gang gis shes nas brjod ces pha rol la 'dri bar 'dug /dang po'i shes pas ma yin te/ dus der ma skyes so/ /phyis 'byung 'gyur gyis kyang ma yin te/ 'di de'i tshe 'das pas so/ /dus mnyam par yang ma yin te/ des 'di la phan ma btags so//sgyu mar gyur pa yul ma yin zhes gsungs pas/ phan ma btags pa yul ma yin pa'i phyir ro/ /rang nyid kyis kyang ma yin te/ rtsod gzhi yin pa'i phyir ro/ /de bas rang rig mi rigs zhes bshad de/ /gang tshe zhes bya ba la sogs pa'o/ /mar me bzhin du gsal ba 'am/ /bum pa bzhin du mi gsal ba'ang rung /skye bo rnams kyi yul kho na myong bas gang gi tshe blo sus kyang mthong ba/ rang gis sam shes pa gzhan gyis mthong na smos/ blo'i kha dog dang dbyibs gang yin/ de'i tshe mo gsham gyi bu mo'i 'gying bag bzhin/ rang rig de brjod kyang 'bras bu med do//pha rol pos smras pa/ gal te zhes bya ba la sogs so/ /gal te rnam shes la rang rig med na de'i tshe rnam shes ji ltar dran/ myong ba gsal na dran pa skye'i/ ma myong na dran pa gang nas 'byung / lan ni gal te dran pa ni rang rig gis byed par nges na/ mes du ba ltar de'i tshe de lta yin gyi/rang rig ni ma grub pas/ de dang bya ba dang byed pa ji ltar 'grub/ bdag la ni gzhan myong ba la sogs pas so/ /'dzin pa'i shes pa las gzhan gzung ba myong ba na/ shes pa dran pa skye'o/ /gzhan myong bas gzhan dran na ha cang thal ba'i skyon yang med de 'brel pa yod pas so/ / yul gyis bskyed par bya ba yin shes pa dran/ myong ba dang bcas pa'i yul dran/ yul myong ba ni shes pa nyid do/ /de lta yin kyang / shes pa myong ba med na ji ltar dran zhe na/ smras pa/ dran 'gyur byi ba'i dug bzhin no/ /byi ba ni 'dir ba bla byugs te/ de'i dug des rmugs pa'i rmas lus la sngar bkram pa dus gzhan du 'brug sgra grag pa'i dus na ldang bar 'gyur ro//dgongs pa 'di lta ste/ ji ltar rmugs pa'i dus su dug ma langs kyang dug gzhan du ldang ba ltar/ yul myong ba'i dus su rnam shes ma myong yang dus gzhan du dran te/ 'gro zhing gyo mog la sogs pa'i rma'i rnam shes bzhin no//sems tsam pas smras te/ rkyen la sogs pa'o/ /rkyen gzhan ni ye shes dbab pa la sogs pa dang / gzhan gyi sems shes pa la sogs pa'i mngon shes te/ de dag dang ldan pa mthong bas rang rig yod ce na/ lan ni grub pa'i mig sman gyi cho gas mthong ba/ sa 'og tu sbas pa'i rin po che'i bum pa mig sman du mi 'gro ste/gang zhig gang la snang ba de de nyid mi 'gyur/ ye shes dbab pa la sogs pa'i rkyen dang ldan pa'i shes pas/ gzhan gyi sems bum pa la sogs pa ltar mthong yang de rang rig tu mi 'grub/ gzhan gyi sems shes pa'i mngon shes kyis mthong ba'i sems gal te mngon shes su 'gyur na/de'i tshe rang gis rang rig pas/ rang rig grub ste de ni med do/ /'o na shes pa ma myong na don myong bar mi 'gyur/ de ma myong na don gsal bar mi 'gyur ba'i phyir ro/ /de bshad pa shes pa ni rtogs pa'i don zhes so//de lta yin na bum pas ras kyang gsal bar byed do/ /shes pa gzhan gyis rig na thug pa med do/ /des gang bshad pa gzhan myong ba la sogs pa de mi rigs don myong ba med pas so/ /mthong ba la sogs pa'i tha snyad kyang 'jig rten du med par 'gyur ro/ /'dir lan bshad de/ ji ltar la sogs pa'o/ /mthong ba la sogs pa'i tha snyad kyi don dam par med par 'gyur ba'am/ yang na kun rdzob tu med par 'gyur ro/ /de la don dam par med par 'gyur zer na 'dod pa nyid/ kun rdzob pa kun de la med pa'i phyir ro/ /gal te kun rdzob tu zer na de'i tshe ji ltar mthong ba ni mig gi rnam shes la sogs pa'o//thos pa ni gzhan las dang lus las so/ /shes pa ni tshul gsum pa'i rtags las byung ba'i rjes dpag las so/ /de thams cad dgag pa ni ma yin gyi ma dpyad par legs par zhog /don dam par ma yin no/ /gang gi phyir gsungs pa/ mthong dang thos sogs thub pa yis//bden dang brdzun par ma gsungs so/ /phyogs las bzlog phyogs yod pa'i phyir/ /de gnyis don la med pa'o/ /zhes so/ /de shes pa ma rig na don mi rtogs pa la sogs pa'i skyon don dam par med do/ /gzhan gyis smras pa/ gal te tha snyad khas len na ci 'gog ce na/lan bshad de/ don dam par rtogs pa ni sgro btags pa bzlog par bya ba yin/ de ci'i phyir zhe na/ sdug bsngal gyi rgyu yin pas te/ sdug bsngal gyi phung po'i rang bzhin 'khor ba'i rgyu 'jigs pa la sogs pa'i rtog pa rgyu yin pas mi bden par sgro btags pa la sogs pa bzlog pa yin no//de bas rig pa rang rig don dam par med do/ /des gsungs pa/ rtogs bya rtogs byed rnam pa can/ /sems ni rgyal bas ma gzigs so/ /gang la rtogs bya rtogs byed yod/ /der ni byang chub med pa nyid/ /ces so/ /gang zhig sems tsam gsungs pa/ de phung po la sogs pa bzhin du rtogs par bya'o//gnas skabs bshad de/ sems las zhes bya ba la sogs pa'o/ /'di ltar sgyu ma ni sems las gzhan nam/ gzhan ma yin pa'am gnyis ka'i tshul lam gnyis ka'i tshul ma yin pa'am zhes mu bzhi'o/ /de la gzhan ma yin te/ sems tsam du grub pa'i phyir ro//gzhan ma yin na de la/ gang tsho khyod la sgyu ma nyid/ /ces bya ba la sogs pas skyon bshad do/ /phan tshun du 'gal ba gnyis gcig tu mi srid pas gnyis ka'i tshul med do/ /mu bzhi pa la brten nas bshad de/ sems las zhes bya ba la sogs pa'o/ /sgyu ma sems las/ / gzhan ma yin pas gzhan yin par 'gog /gzhan ma yin pa yang ma yin pas/ de nyid yin pa yang 'gog /gnyis ka 'gog pa 'di ni mi rigs te/ phan tshun du spangs te/ gnas pa gnyis gcig 'jug par ma byas par gzhan ldog par mi btub pas gcig tu gnas pa med do/ / de bshad pa/ 'jug pa dang ni ldog pa dang / /de gnyis kho na lhan cig dang / /de gnyis lhan cig 'gog pa ste/ /kun nas kun du mi rtogs so/ /zhes so/ /gzhan yang sgyu ma de dngos po yin na/ ji ltar sems las gzhan ma yin/ gal te gzhan ma yin na de'i tshe sems kho na sgyu ma yin pas don dam par med do//sems 'ba' zhig pa kho na'o/ /gang tshe khyod la sgyu ma nyid/ /med na'ang de tshe ci zhig dmigs/ /zhes bya ba kho na da ni 'byung ngo / /de ltar rnam pa bzhis sgyu ma med de/ med kyang gti mug gi gzung bya yin/ de ltar sems kyang 'dzin par shes par gyis shig /don dam par yod pa sgro btags nas rang gis rang bcom nas ci bya zhes bya ba bsdus shing bshad de/ ji ltar zhes bya ba la sogs pa'o/ /sgyu ma mkhan gyis sprul pa'i glang po che la sogs pa ltar rgyu med kyang / ji ltar mthong bar bya bar gyur pa de bzhin du/ yid mthong byed de/don dam par med kyang yul mthong bar 'gyur ro/ /des/ gang tshe 'khrul pa yod min na/ /zhes bya ba la sogs pa gang bshad pa de bsgrubs so/ /yang don dam par yod par 'dod pa'i sems tsam pa la smras te/ gal te la sogs pa'o/ /kun nas nyon mongs pa dang rnam par byang ba'i rten sems yin pas/sems la brten pa'i 'khor ba 'di/ /dngos po yin nam dngos med dam/ /dngos po 'ang sems sam de las gzhan/ /gal te sems kho na dngos po yin na/ de'i tshe sems las gzhan de la brten pa 'khor ba ma yin/ sems kyang rang bzhin gyis 'od gsal bas rnam par byang ba'i rang bzhin te/ spang bya ma yin no/ /gal te sems las gzhan yin na de'i tshe sems las tha dad pa yod par khas blangs pas grub mtha' zhig go/ /gal te dngos med yin na de'i tshe nam mkha' bzhin du/ 'khor ba brtags pa don byed mi nus pa nyid du 'gyur ro//yang na rang bzhin med pas bdag gi grub mtha' la 'jug go /gal te dngos po min kyang dngos por yod pa'i sems brten pas don byed nus pa yin zhe na/ smras pa/ dngos po la brten pas dngos med kyis ji ltar don byed nus/ brten par bya ba dang rten par byed pa yang bya ba dang byed pa nyid de/dngos po ma yin pa ni bya ba ma yin pas ji ltar byed/ gang gi phyir dngos po'i mtshan nyid don byed nus pa'o/ /de lta yin na sems gcig pu don dam par smra ba khyod kyi sems 'di grogs med par gcig pur 'gyur ro/ /gnyis su med pa'i sems 'dod pa kho na yin zhe na/de lta yin kyang rgol ba las mi grol zhe na/ bshad de/ gzung bar bya ba dang bral ba ni nye bar mtshon pas 'dzin pa la sogs pa dang bral ba'o/ /yang na 'dzin pa yang gzung bar bya ba la rag las/ de'ang 'dzin no/ /gang gi tshe 'gro ba mtha' dag gis sems gnyis su med pa'i rang bzhin du gyur pa/de'i tshe thams cad sangs rgyas yin par 'gyur ro/ /de bas kun nas nyon mongs pa spang ba'i phyir/ 'phags pa'i lam bsgom pa don med du 'gyur ro/ /de ni ma yin te/ de bas gzung bar bya ba la sogs pa dang bral kyang / dngos por mngon par zhen pa mnyam du yod pas/nyon mongs pa ma spangs par bshad de/ de lta zhes bya ba la sogs pa'o/ /sems tsam du yod par brtags kyang yon tan ci zhig thob/ nyon mongs pa la sogs pa'i kun slong mtshungs pas so/ /'o na khyed la yang 'di mtshungs she na/ smras pa sgyu ma zhes bya ba la sogs pa'o//'gro ba sgyu ma lta bur shes kyang ji ltar nyon mongs pa zlog /gang gi tshe sgyu ma mkhan gyis sprul pa'i bud med la/ de sprul mkhan la yang chags pa skye na gang rmongs par bya ba'i phyir de sprul pa de lta ci smos/ de bas sgyu ma lta bur nges kyang srid pa'i rgyun gcod par ji ltar 'gyur/de la lan bshad de/ de byed pa ni la sogs pa'o/ /'di'i skyon ni med de/ gang gi phyir skye bo rnams la mdzes ma sprul mkhan gyi shes bya la rang bzhin du sgro btags pas nyon mongs pa 'dod chags kyi bag chags shes bya'i sgrib pa 'phags pa'i lam gyis ma spangs so/ / 'o na sems tsam par smra ba la'ang 'di mtshungs te/ 'di ltar gnyis su med pa'i de kho na nyid yod kyang glo bur ba nyon mongs pa'i bag chags ma spangs pas/ sems can thams cad rgyal bar mi 'gyur ro zhe na/ mi mtshungs te khyod kyi rnam shes kho na yod la/ dri ma rnams dngos po ma yin te/don byed mi nus pas sgrib par mi nus pa ste/ rnam shes kho na yod pas de spang bya ma yin no/ /bdag la ni bskyed par bya ba dang skyed par byed pa gnyis rang bzhin med pa nyid/ rang bzhin du sgro btags pa ni de'i tshe/ gang gi phyir ma spangs pa de'i shes bya rang bzhin can du mthong ba de'i tshe/ sgyu ma'i bud med mthong nas bag chags ma spangs pas stong pa nyid kyi bag chags stobs med de sgro btags la zhen pas so/ /ji ltar de bzlog ce na/ smras pa/ stong pa zhes bya ba la sogs pa'o/ /sgyu ma rang bzhin med pa'i bag chags 'byed pa 'gal ba'i rkyen las thog ma med pa nas goms pa dngos po'i bag chags bzlog ste/stong pa nyid dngos po'i rang bzhin yin pa dang / gzhan ni glo bur ba yin pas so/ /stong pa nyid la mngon par zhen pa yang skyon med ce na/ smras pa/ dngos po 'am/ stong pa nyid ci 'ang med goms pas phyis stong pa nyid kyi bag chags kyang spong bar 'gyur ro//thabs ni gru lta bu yin pa'i phyir ro/ /'o na stong pa nyid kyi bag chags kyang ci'ang med ces goms pas med pa'i rtogs pa rgyun du yod pa bzlog par mi nus she na/ smras pa/ gang tshe la sogs pa'o/ /dngos por gang med ces rtog pa gang gi tshe brtags pas rang bzhin med pas mi thob//rab rib can la skra shad bzhin/ /de'i tshe dngos med rten dang bral bas blo'i mdun du ji ltar gnas/ dngos po la brten pa'i 'gog pa dngos po log pa na rten med pas mi gnas te/ rten med pa'i me bzhin mdun du mi snang ngo / /de ltar rtog pa thams cad 'gags pas sgrib pa rnams las grol bar 'gyur ro zhes bshad de/gang tshe la sogs pa'o/ /gang gi tshe don dam yod pa'i dngos po med pa la dngos med kyang med/ de gnyis blo'i mdun du mi snang de'i dngos po dang dngos med ma yin pa'i phung po gsum pa med pas dmigs pa med pa rten med pa/bud shing zad pa'i me bzhin du blo mya ngan las 'da'o/ /'o na bskal pa mtha' yas par 'dod pa'i gzhan gyi thabs 'tshang rgya ba nyid rtogs nas/ gzhan don ji ltar zhe na/ smras pa/ yid bzhin la sogs pa'o/ /bsams pa'i don ster ba'i rin po che dang / bsams pa'i don kun sgrub par byed pa'i dpag bsam gyi shing gis ji ltar rtog pa med kyang sems can la skal ba ji lta ba bzhin du 'dod pa'i don sgrub par byed pa de bzhin du bdud bzhi pham par byas pas rgyal ba'i sku mtshan dang dpe byad dang ldan pa snang bar 'gyur ro//gang las she na/ gdul bya dang smon lam las te/ sangs rgyas kyi gdul bya'i dge ba'i rtsa ba yongs su smin pa dang / bcom ldan 'das kyis 'gro ba'i don du mdzad pa'i smon lam lhun gyis grub pa las so/ /ji ltar rol mo'i 'khrul 'khor gyis/ /rlung gis bskyod tshe sgra sgrogs ltar/ /de bzhin sems can bsam pa yis/ /bskyod pas sangs rgyas gsung 'byung ngo //de nyid bsam gtan snyoms zhugs pa/ /yid bzhin nor bu ltar zhugs kyang / /'dod bzhin rtsig pa la sogs las/ /chos ston pa ni nges par 'byung / /de ni shes par 'dod pa'i don/ /thams cad skye bos shes par 'gyur/ /skal ba bzhin du phan pa yang / / des ni myur du thob par 'gyur/ /zhes gsungs pa'i phyir ro/ /rgyu'i gnas skabs kho na'i mthus lhun grub tu gzhan don gyi dpe tshigs bcad gnyis kyis bshad de/ dper na zhes bya ba la sogs pa'o/ /ji ltar dug sel ba'i sman pa sngags kyi nus pa thob pa shing la sogs pa'i sdong sngags kyis bsgrubs la/bdag med kyang 'dis dug thams cad sel bar 'gyur snyam du bsams nas shi ba/ sdong de dug sel sman pa shi nas yun rings lon kyang / dug la sogs pa sel ba la sogs pa'i sgras gdon gyis brlams pa la sogs pa'o/ /don bshad de/ byang chub la sogs pa'o/ /byang chub kyi ched du spyod pa gang yin pa de'i mthus 'khor ba na gnas kyi bar du 'gro ba'i don rgyal ba'i sdong yongs su rdzogs pa/bsams pa'i don thams cad sgrub par byed do/ /byang chub sems dpa' mya ngan las 'das kyang ngo / /'o na de ltar bcom ldan 'das sems pa med pa la/ byas pa'i mchod pa ji ltar 'bras bu chen por bshad ce na/smras pa/ gang zhig la sogs pa'o/ /gsung rab las gnas pa'am mya ngan las 'das pa'i rgyal ba'i mchod pa'i 'bras bu mtshungs par bshad pa'i phyir ro/ /bzhugs pa la ni gang gis mchod/ /gang yang mya ngan 'das pa mchod/ / de mtshungs sems ni dang ba yis/ /bsod nams khyad par med pa nyid/ /ces gsungs pas so/ /yang ni 'dir rigs pa mi dgos par bshad de/ der 'bras lung las yin/ ston pa mya ngan las 'das na khyad par 'di yin te/ dbu ma pa'i kun rdzob tu khyed kyi don dam par ro/ / 'di ni ci nas kyang khas len dgos par bshad de/ dper na la sogs pa'o/ /sangs rgyas don dam pa la byas pa'i mchod pa 'bras bu ldan pa ji lta bu zhe na/ 'dir lung kho na dper byed pa'o/ /stong nyid bag chags zhes gsungs pa der nyan thos la sogs pas chos thams cad stong pa mi bzod pas 'phags pa'i bden pa bzhi mthong ba kho nas grol bar gsungs te/bden pa zhes bya ba la sogs pa'o/ /sdug bsngal dang / kun 'byung dang / 'gog pa dang / lam gyi bden pa rnams mngon sum du byas pa kho nas thar pa thob pas stong pa nyid mthong bas ci zhig bya/ lan bshad de/ gang phyir zhes bya ba la sogs pa'o//lung las stong pa nyid mthong ba'i lam med na/ sangs rgya ba med do zhes gsungs so/ /rgyal ba'i yum las gsungs pa'i dngos po'i 'du shes can la shes rab kyi pha rol tu phyin pa bsgom pa med do/ /ting nge 'dzin thams cad dang / gzungs kyi sgo thams cad dang / stobs dang /mi 'jigs pa dang / so so yang dag par rig pa dang / byams pa chen po dang / snying rje chen po la sogs pa sangs rgyas kyi chos ma 'dres pa rnams bsgom pa'i bar du med do zhes bya ba la sogs pa'o/ /rtog med kyi bstod pa las/ thar pa'i lam ni khyod gcig ste/ / gzhan ni nges par med pa'o/ /zhes so/ /'di ni theg pa chen po yin byas nas lung ma yin par bshad de/ 'o na theg chen ma grub po/ /kye stong pa nyid smra ba po theg pa chen po bdag gi lung du ma grub po zhe na lan bshad de/ /khyed kyi lung 'di ji ltar grub/ /'di ni khyod dang bdag la mtshungs so/ / gzhan gyis smras te/ gang phyir la sogs pa'o/ /bdag gi lung 'di khyod dang bdag gnyis ka la grub/ khyed 'dir mi rtsod pas so/ /bdag ni theg chen la rgol bas so/ /lan ni dang po khyod la 'di ma grub/ 'dir ma zhugs pa'i gong du re zhig khyed kyi lung 'di ma grub pas/ gnyis ka la grub ces rgyu ma grub po//'o na rgyud las byung ba'i sgrub byed 'di bya'i/ gang mdo sde la 'jug pa 'dul ba la snang ba/ mngon pa'i chos nyid dang mi 'gal ba ni sangs rgyas kyi bka' las gzhan ma yin/ 'dir bshad de/ rkyen gang zhes bya ba la sogs pa'o/ /rkyen gang gis lung de gzung bar bya ba yin/de ni theg pa chen po la'ang gyis shig /rkyen de 'dir yang yod pas so/ /gzhan gyis smras te/ gnyi ga'i zhes gang bshad pa/ de khyod dang bdag la ma yin gyi 'on kyang gzhan yin te/ lan ni gang yang rung ba 'ga' zhig mi 'gal ba gnyis 'dod pas bden par khas len na/ rig byed la sogs pa 'ang bden par 'gyur/sogs pa'i sgras gshag ma za ba la sogs pa'i gang zag kyang gzung bar bya bar 'gyur ro/ /de bas 'di la khyad par ma yin no/ /gal te bdag gi lung la rtsod pa med kyi theg pa chen po la de yod de 'ga' zhig gis mi 'dod pa'i phyir ro/ /rgyu mtshan 'dis gzung bar bya ba ma yin zhe na/de'i rang gi lung yang khyod kyis dor bar gyis shig /de ci'i phyir zhe na/ mu stegs spyod pa la sogs pa dang rtsod pas so/ /gzhan yang bstan pa 'di sde pa bzhi dang / gyes pa'i sde bco brgyad kyi dbye bas tha dad pa yang rang gi sde pa dang / sde pa gzhan rtsod pa dang bcas pas lung gzhan gyis kyang mdo sde dang /'dul ba dang / mngon pa yang spang bar 'os so/ /de ltar klan ka dang lan mtshungs par bshad nas/ gzhan gyis khas blangs pa la skyon gyi khyad par bshad de/ bstan rtsa la sogs pa'o/ /lung gi bdag nyid bstan pa'i rtsa ba ni dge slong nyid de/ ljon shing gi rtsa ba yun rings brtan pa la sogs pa'i rgyu ltar nyon mongs pa zad pa'i dge slong yin te/ de ni stong pa nyid ma rtogs par bden pa mthong ba tsam gyis mi 'grub/ gang gi phyir 'di dag sdug bsngal la sogs pa'i bden pa dang / nyon mongs pa dang bral ba dngos po nyid du dmigs pas mya ngan las 'das pa dka'/dmigs pa med pa'i sems dang ldan pa la de med/ gang phyir gsungs pa/ stong nyid rtogs pas grol 'gyur bas/ /de phyir lhag ma bsgom pa'o/ /zhes so/ /de la re zhig dge slong nyid mi rigs par bshad de/ nyon mongs shes pa la sogs pa'o/ /gal te 'phags pa'i bden pa mthong bas/nyon mongs pa dang bral/ de bas grol na/ de'i tshe nyon mongs pa dang bral ba de ma thag par grol bar 'gyur te/ de ni ma yin/ cis she na/ smras pa/ nyon mongs pa la sogs pa'o/ /kyang gi sgra ni rgyu'i don to/ /lung las nyon mongs pa dang bral ba 'phags pa maud gal gyi bu dang /'char ka la sogs pa la dge ba dang mi dge ba'i las kyi 'bras bu ster ba la nus pa nyon mongs pa med kyang mthong ngo / /grol ba'i rigs pa bshad de/ sred pa zhig pa slar skye ba'i rgyu yin/ de su la med pa slar mi skye zhe na/ smras pa/ re zhig la sogs pa'o/ / ma rig pa spangs pas/ re zhig sred pa slar skye ba'i rgyu med par nges na de ni mi rigs te/ dmigs pa dang bcas pa rnams la ma rig pa spong ba'i rigs pa med pas/ sred pa spong ba med do/ /yod kyang nyon mongs pa can ma yin pa'i sred pa yang khyed cag gi rnal 'byor pa la nyon mongs pa can ma yin pa'i ma rig pa bzhin du ci ste med/gzhan yang srid pa ni tshor ba'i rkyen can te/ bde sdug gi tshor ba ni 'di dag la yod pas/ rgyu tshogs tshang ba yod pas 'bras bu ci ste mi 'byung / dge slong nyid dka' bar bshad nas mya ngan las 'das pa dka' ba nyid du bshad de/ dmigs pa la sogs pa'o//dmigs pa dang bcas pa'i sems 'phags pa'i lam la sogs pa 'ga' zhig tu chags nas gnas par 'gyur ro/ /slar yang chags pa skye srid pas/ mya ngan las 'das pa la the tshom za'o/ /de bas stong pa nyid mya ngan las 'das pa'i rgyu yin par bshad de/ stong pa nyid med na dmigs pa la chags pa'i 'ching bas bcings pa'i sems skye ste/ting nge 'dzin gyi stobs kyis yun rings mya ngan las 'das kyang skye bar 'gyur/ gar mthong zhe na 'du shes med pa'i snyoms 'jug la gnas pa'i sems dang sems las byung ba de srid du 'gog kyang / slar skye ba bzhin no/ / 'gog pa la snyoms par 'jug pa 'ang shes par bya'o/ /gang gi phyir dge slong nyid mya ngan las 'das pa dka' bar gnas pa de'i phyir/ mya ngan las 'das pa'i don du stong pa nyid kho na bsgom par bya'o/ /de bas stong pa nyid kho na byang chub kyi lam zhes nges pa'o/ /ngag gang mdo sde la sogs pa tshig le'ur byas pa gsum gzhan gyis bcug pa ste ma yin pa la yod pas so//rkyen gang gis ni la sogs pa gsungs zin pas kyang ngo / /'o na ji ltar dmigs pa dang bcas pa nyid kyi phyir/ mi grol ba bzhin du/ stong pa nyid la 'jigs pas kyang ste/ de bas gnyis ka spangs nas srid par gnas pa kho na mchog ce na/smras pa/ don du ni yul la rmongs pas chags pa'i phyir/ skye ba la sogs pa'i duHkha'i gnod pa rnams chags pa dang stong pa nyid ma rtogs pas de thos nas 'jigs pas ma grol cing 'khor ba la gnas pa grub/ des na stong pa nyid kyi 'bras bu 'di yin te/ slar log nas srid pa'i bde ba don du gnyer zhing stong pa nyid la 'jigs pas srid pa kho nar gnas so/ /des ci bsgrubs ci 'ang de med do/ /gzhan dag na re srid pa la chags pa dang / stong pa nyid la 'jigs pa ni rtag pa dang chad pa'i mtha' gnyis te/ de gnyis spangs nas de 'ang don dam par dpyad pas rtag pa'i mtha' spangs/kun rdzob khas blangs pas chad pa'i mtha'o/ /de bas dbu ma'i lam gyis 'khor ba la gnas pa grub ste/ shes rab kyis srid pa'i skyon gyis ma gos/ snying rjes sdug bsngal ba rnams kyi don du ste/ 'o na don dam par sdug bsngal ba med pas gnas nas ci bya zhe na/ smras pa/rmongs pa de kun rdzob tu sems can dmigs pa'i phyir ro/ /de bas snying rjes gnas kyang shes rab kyis srid pa'i skyon gyis ma gos pas/ de nyid stong pa nyid 'bras bu yin pa ni rab tu mi gnas pa'i mya ngan las 'das pa stong pa nyid kyi 'bras bu yin no/ /nye bar bsdus shing bshad de/ de ltar bshad pa'i rigs pas 'jigs pas srid pa kho nar gnas zhes skyon gang yin pa de ni stong pa nyid kyi phyogs su mi 'jug ste/de bas the tshom mi za bar rang bzhin med pa bsgom par bya'o/ /stong pa nyid mthong bas ci zhig bya zhes gang gsungs pa de la/ lan ni/ nyon mongs pa la sogs pa'o/ / 'dod chags la sogs pa'i nyon mongs pa dang / shes bya kho na sgrib pa ste/ de nyid mun pa ste don dam pa la bsgribs pas so/ /de spong ba'i rgyu stong pa nyid yin pas myur du thams cad mkhyen pa'i go 'phang thob par 'dod pas/ stong pa nyid ci ste mi bsgom 'bad de bsgom par bya'o/ /stong pa nyid la 'jigs pa gang bshad pa//de la lan bshad de/ dngos gang la sogs pa'o/ /dngos po gang sdug bsngal bskyed pa de la 'jigs par rigs/ stong pa nyid ni srid pa'i sdug bsngal zhi bar byed pas 'jigs pa'i gnas ma yin pa la ci ste 'jigs/ yon tan thams cad kyi rgyu la dga' ba kho nar rigs so//gzhan yang 'jigs pa ni bdag 'dzin gyis de kho na nyid ma rig pa rnams la 'byung bar bshad de/ gal te zhes bya ba la sogs pa'o/ /'jigs pa'i rgyu gang yang rung ba las 'jigs pa lta zhog /gal te bdag ni nga rgyal gyi yul du gyur pa gang yang rung ba yod na 'byung gi /gang gi tshe bdag ces bya ba dpyad pas tshig dang rtog pa ma yin pa gzhan med pa de'i tshe/ 'jigs pa su la 'ong de'i tshe dpyad pas 'jigs pa ldog go/ /de gsungs pa/ bdag ni da ltar 'ong 'gyur med/ /bdag gi 'ang da ltar 'ong 'gyur med/ /des ni byis pa skrag par 'gyur/ / mkhas la 'jigs pa zad pa'o/ /zhes so/ /de nyid dpyad par tshigs bcad gsum gyis bshad de/ so la sogs pa'o/ /bdag ma yin na ni bdag gi rkyen yul ma yin no/ /snabs ni sna las byung ba'o/ /bad kan ni lud pa'o/ /rnag ni khrag smin pa'o/ /bdag ni zhag dang zhes bya ba la sogs pa go sla'o//rgyus pa ni rus tshigs sbrel ba'o/ /drod ni lus kyi'o/ /rlung ni 'byung ba dang rngub pa la sogs pa'o/ /bu ga dgu ni rna bug gnyis dang / mig gnyis dang sna bug dang / kha dang bshang ba dang / gci ba'i bu ga'o/ /rnam shes drug ni mig dang rna ba dang sna dang lce dang lus dang yid kyi rnam shes te drug go//rnam kun ni so sor ram tshogs pa bdag ma yin/ 'di ltar so la sogs pa tshogs pa'i bdag nyid lus dmigs pa la so sor bdag 'dzin gyi rtog pa'i yul ma yin te/ bdag ma yin pa'i phyir ro/ /tshogs pa yang de dag 'ba' zhig pa ste/de dag la de gcig pu mi srid de/ 'gog par 'gyur ba'i phyir ro/ /du ma la gcig tu 'dzin pa yang ma 'khrul pa ma yin/ 'khrul pa la yang de nyid med/ /de bas rtog pa tsam 'di yin no/ /shes rig gi skyes bu'i spyod yul bdag /rigs pa bas 'dod pa de'ang mi rigs te/ gang gi phyir bdag ser po bde ba dang ldan mig gcig pa la sogs pa'i bdag lus la yod pa'i phyir ro//sems kyi rang bzhin bdag tu smra ba grangs can la sogs pa rnam shes drug gi rang bzhin bdag tu smra ste/ de la lan bshad de/ gal te sgra'i la sogs pa'o/ /gal te sgra'i rnam shes kyi bdag nyid can/bdag yin na de rtag pa yin pas sgra'i rnam shes kyang rtag par 'gyur ro/ /de'i tshe sgra yang de yod pa dang med pa'i dus su rtag tu gzung bar bya bar 'gyur ro/ /de ltar yin mod shes pa rtag tu nye bar gnas te/ sgra ni res 'ga' ba yin pas rtag tu yod par mi gsal zhe na/ smras pa/shes bya la sogs pa'o/ /de med pa'i dus su shes par bya ba sgra med pas ci shes/ gang gi shes byas stong yang shes pa zhes brjod do/ /de gnyis bshad de/ gal te yul mi shes kyang shes pa yin na/ de'i tshe shing yang shes par 'gyur/ de ni ma yin te/ de bzhin du gzhan yang ma yin zhes bshad de/rgyu mtshan gang gis yul med pa shes pa ma yin/ des shes par bya ba ring du gyur pas shes pa yang med par nges so/ /gal te sgra'i shes pa kho na bdag yin na/ de'i tshe de 'dzin pa'i bdag nyid can yin pas gzugs 'dzin par mi 'gyur ro/ /de ni ma yin te/ gang gi phyir de nyid kyis zhes bya ba la sogs pa'o//gal te sgra'i rnam shes nyid gzugs shes par 'dod na de'i tshe ci ste mi thos/ gzugs 'dzin cing sgra yang 'dzin par 'gyur ro/ /sgra med pas mi 'dzin zhe na/ de bas sgra'i rnam shes kyang med de/ sgra'i rnam shes de ma yin zhes pa'i don to/ /gzhan yang sgra 'dzin pa'i rnam shes gang yin pa de nyid gzugs 'dzin pa'i bdag nyid du ga la 'gyur/cha shas med pa gcig la rang bzhin gnyis mi srid pas so/ /'o na ji ltar gcig kho na gnyis la ltos nas pha yang yin la bu yang yin pa ltar de ltar yin zhe na/ de ni rtog pas gzhag pa yin gyi gcig gnyis ka'i bdag nyid ma yin no//'dir ni gcig don don dam par tshul gnyis pa brjod par bya ba ste/ de ni med do/ /'di las kyang don dam par 'di ma yin par bshad de/ 'di ltar zhes bya ba la sogs pa'o/ /grangs can pa la 'gro ba yon tan gsum gyi bdag nyid de/ de nyid so so'am tshogs pa rang rang gi rang bzhin du gnas pas/don dam par pha ma yin la bu'ang yin/ rtag tu yon tan kho na yin/ gal te gzugs dang sgra 'dzin pa'i rnam shes gcig yin na/ de'i tshe de ltar dmigs par 'gyur/ de ni med par bshad de/ gzugs 'dzin pa'i rnam shes sgra 'dzin pa'i rang bzhin dang ldan par mi dmigs so//de bas med par nges so/ /gal te sgra'i rnam shes de nyid gzugs 'dzin pa'i rang bzhin gyis gzugs 'dzin/ dper na gar mkhan gcig pu tshul du ma ltar 'dzin zhe na/ 'dir lan de'ang mi rtag ste/ dang po'i tshul spangs nas gzhan tshul 'dzin te/ dpe bsgrub bya dang mi mtshungs so//gal te dngos po de nyid yin la/ rang gzhan pa can yin zhe na/ smras pa/ gal te la sogs pa'o/ /bdag nyid de'am gar mkhan de nyid yin la/ rang bzhin gzhan brjod na de'i tshe 'di lta bu gcig na de sngar med pa yin no/ /de nyid du gzhan tha dad pas 'gal tshabs can yin no//gal te shes pa nyid dang gzugs la sogs pa 'dzin pa nyid de/ de tshul gnyis pa yin la de rang gi tshul ma yin pa gzhan de kho na nyid ma yin zhe na/ smras pa/ tshul gzhan de'i yul la ltos pa can shel gyi bzhin du mi bden zhe na/ 'o na de'i rang bzhin gyi tshul gang yin/ de smros dang / smras pa/ shes pa de nyid gzhan yod ce na/ 'o na skyes bu thams cad gcig tu thal te/ sgra dang gzugs kyi shes pa tha dad pa gcig par 'dod pa ltar/ skyes bu thams cad kyang gcig tu 'gyur te/ shes pa nyid du tha mi dad pa'i phyir ro/ /gzhan yang dbye ba dor nas tshul gang rung gcig gis gcig tu byed na/sems pa na skyes bu'i chos yin la/ sems pa ma yin pa ni rang bzhin la sogs pa'i chos yin/ de gnyis tha dad du 'gyur te gang gi phyir/ de gnyis ka yod pa mtshungs pa'i phyir ro/ /'dod pa kho na yin zhe na/ smras pa/ dngos po rnams kyi bye brag gang tshe brdzun yin pa/de'i tshe 'dra ba'i rten gang yin/ dngos po tha mi dad pa 'dra ba mang po yod na/ 'dra ba'i sgo nas gcig tu byed pa yin te/ de ni med do/ /rigs pa pa la sogs pa'i bdag sems pa med pa 'gog pa ste/ re zhig sems pa can bshad pa'i rim pas mi rigs par bstan/ sems pa med pa yang mi rigs te/sems la med pa nyid kyi phyir ro/ /dper na bum pa la sogs pa bzhin no/ /ji ltar bum pa la sogs pa sems pa med pa khyod kyis bdag tu mi 'dod pa ltar/ las byed pa po de'i 'bras bu la longs spyod pa po'i bdag kyang sems pa med pa mi rigs te/ shing dang mtshungs pa'i phyir ro//rang nyid sems pa can ma yin kyang blo dang sems pa dang sbyor bas sems can yin zhe na/ smras pa/ 'on te la sogs pa'o/ /gal te bdag shes pa dang sbyor bas sems pa can yin par 'dod na/ 'o na mi shes pa de 'jig par thal/ /brgyal ba la sogs pas sems pa med pa na yang mi shes pa ste/mi rtag par 'gyur ro/ /gal te sems pa yod pa dang med pa'i gnas skabs kyis 'gyur ba med par bdag 'dod na/ 'o na sems pas 'di la khyad par ci byas/ dngos po'i rang bzhin las ma 'das pa'i phyir ro/ /de bas khyod kyis phan pa dang gnod pa mi shes pa bya ba med pa/las thams cad byed pa'i nus pa dang bral ba/ gnas skabs kyi don la ma phog pas/ nam mkha' lta bur bdag rnam par gzhag go/ /pha rol pos smras pa/ pha rol du 'gro ba'i bdag gcig pu med na/ las dang 'bras bu'i 'brel pa mi rigs te/ gang gis las byas pa de nyid kyi 'bras bu la longs spyod pas so//de ni 'dod ji ltar mi 'gyur zhe na/ las byas nas byed pa po zhig na 'bras bu su la smin/ des bdag med na byas pa nyams shing ma byas pa 'byung ba dang / dran pa dang de nyid 'di yin zhes bya ba'i mngon shes dang / dang po'i the tshom la nges pa dang / rang nyid kyis gzhag pa len pa dang /myong ba'i don la ngo mtshar med pa dang / rgyu 'bras rgyun 'dzin pa dang / de rtogs pa'i tshad ma dang / bcings pa dang grol ba la sogs pa med par 'gyur ro/ /de ni mi rigs par lan 'debs pa pos bshad de/ bya ba la sogs pa'o/ /bdag tu smra ba khyod dang / bdag med par smra ba gnyis ka la las 'dir 'bras bur skye ba phyi mar 'byung bas phung po tha dad pas lus gang gis dge ba dang mi dge ba'i las byas pa de las lus gzhan gyi 'bras bu la longs spyod pas bya ba dang 'bras bu rten tha dad par gnyis ka la grub/de la bdag ni las byed pa dang / longs spyod pa la byed pa med de/de la byed pa dang bral ba dang / sems pa med pas rtsod pa don med de/ gang gi phyir bdag khas blangs pa de mi nus pa'i phyir ro/ /byas pa don med la brjod de/ rgyu dang ldan pa ni las byed pa po ste/ de nyid 'bras bu dang ldan par mthong ba mi srid/ gang gi phyir 'jig rten du 'chi ba'ang gzhan yin la skye ba'ang gzhan yin/de bas bya ba dang byed pa nyid du rab tu 'jug pa'i rgyun gcig tu sgro btags te/ de la brten nas byed pa po gang yin pa longs spyod pa po'ang de yin zhes ston pas bstan to/ /bshad pa yang / gang phyir rgyun ni gang nyid du/ /las kyi bag chags rnam gzhag pa//de nyid du ni 'bras smin byed/ /ras bal la ni dmar po bzhin/ /zhes so/ /ras bal gyi sa bon tshos kyi khu bas yang dang yang du byugs pa'i myu gu nas brtsams te/ 'bras bu'i bar dmar po kho nar skye ba ltar/ tha dad yin kyang sems kyi rgyun gang gis las byas pa de nyid du 'bras bu smin par byas pa'i klan ka gang yang mi 'byung ngo //lang kar gshegs pa las gang gsungs pa/ gang zag rgyun dang phung po rnams/ /phra rab rdul dang rkyen dag dang / /gtso bo dbang phyug byed pa po/ /sems tsam nyid du bdag gis bshad/ /ces bya ba de'ang gang zag la sogs pa la mngon par zhen pa spang ba'i phyir te/des sems don dam par mi grub/ grub kyang nga rgyal gyi yul ma yin par bshad de 'das la sogs pa'o/ /sems ni rnam pa gsum ste/ 'das pa dang ma 'ongs pa dang da ltar ba'o/ /de la 'das pa dang ma 'ongs pa 'gags pa dang ma skyes pa'i phyir/ nga rgyal gyi yul ma yin te/gang gi phyir da ltar med pa'o/ /da ltar ba bdag tu 'gyur/ 'on te skye sems bdag yin na/ de'ang bdag ma yin te/ gang gi phyir skad cig gnyis pa la de zhig na bdag med do/ /de bas sems la dmigs pa'ang bdag ma yin no/ /nye bar bsdus shing bshad de dper na la sogs pa'o//chu shing gshags pa ltar bdag kyang mo gsham gyi bu bzhin du bden pa ma yin rnam par dpyad pas btsal kyang ma rnyed pa'o/ /pha rol pos smras te/ gal te la sogs pa'o/ /gal te bdag gam gang zag thams cad du med na gang la snying rje zhe na/chos yang dag par sdud pa'i mdo las gsungs pa/ 'phags pa spyan ras gzigs kyis te/ byang chub sems dpas chos mang po la mi bslab kyi 'on kyang snying rje kho na las te dper na 'khor los sgyur ba'i rgyal po'i 'khor lo gang du 'gro ba der dpung thams cad 'gro ba ltar/ snying rje gang la yod pa der sangs rgyas kyi chos thams cad do zhes so//de ni sems can med na mi 'byung bar bshad de/ 'bras bu ni skyes bu'i don te/ de'i phyir 'dod pa rmongs pa ni kun rdzob tu brtags pa'i sems can la zhes bya ba'i don to/ /shes rab kyis dpyad pas sems can med kyang kun rdzob tu phung po la sogs pa yod pa nyid do//'o na sems can med na su'i 'bras zhes bshad de/ sems la sogs pa'o/ /sems can med na gcig rtag pa med pa dang / gzugs la sogs pa 'jig pa'i rang bzhin yin pas 'bras bu su'i yang ma yin par 'gyur/ de ni bden te don dam par 'bras bu su'i yang ma yin te rmongs pas 'dod/sangs rgya ba la 'bad pa'i rmongs pa ste/ bdag kho na 'tshang rgya ba yin zhes gcig tu lhag par nges pas so/ /'o na rmongs pa thams cad du spangs pa ma yin nam ji ltar len zhe na/ smras pa/ sdug bsngal la sogs pa'o/ / rmongs pa gnyis te srid pa la 'jug pa'i rgyu dang / ldog pa'i rgyu'o/ /de la sems can thams cad kyi skye ba la sogs pa'i sdug bsngal zhi ba'i ched du don dam pa rtogs pa'i phyir gti mug gang yin pa de ni mi 'gog go/ /'o na 'bras bu'i rmongs pa bzhin du bdag kyang yod du chug /ci ste 'gog ce na/ smras pa/ sdug bsngal la sogs pa'o/ /bdag tu rmongs pa yod na nga rgyal zad par mi 'gyur/ bdag tu 'khrul pas nga rgyal 'phel ba nyid/ des gsungs pa/ gang zhig bdag mthong de yis 'dir/ /bdag la brtse ba rtag par 'gyur/ /brtse bas bde la sred par 'gyur/ /sred pas skyon rnams sbed par 'gyur//yon tan mthong bas yongs su sred/ /de yi rgyu dag nye bar len/ /des ni bdag tu zhen yod par/ /de srid 'khor bar 'khor ba'o/ /yon tan mthong ba ni gzugs dang lnga tshor ba la sogs pa'o/ /yongs su sred na ni bdag la sred pas so/ /de bas bdag mthong ba kho na las nga rgyal bzlog par mi nus par 'gyur ro//de bas gang zag dang chos kyi bdag med bsgom pa mchog yin no/ /bdag med mngon sum du mthong na 'jig tshogs kyi lta ba ldog la 'dod chags la sogs pa yang ldog ste yul ma mthong bas so/ /lus rjes su dran pa bstan pa'i phyir lus kyi yan lag can nga rgyal gyi yul yin zhe na/smras pa/ lus la sogs pa'o/ /dpyad pas lus gcig pu ni med do/ /de bshad pa/ de dang de yi yan lag tu/ /cha shas kho na snang ba la/ /de dag dang ldan cha med pa/ /gzhan ni gang yang mi snang ngo //zhes so/ /lag pa la sogs pa lus ma yin te/ phyogs gcig bcad kyang lus nyams pas 'chi bar 'gyur ro/ /de ni ma yin rkang pa la sogs pa yan lag so so yin/ de dag la yan lag can gcig dpyad pas med do/ /gal te lag pa la sogs pa re re lus ma yin gyi 'on kyang yan lag thams cad la khyab pa/yan lag can yan lag kun la yod ce na/ smras pa/ 'di la zhes bya ba la sogs pa'o/ /phyogs gcig gis khyab bam thams cad kyis de la gal te yan lag gang rung gis yan lag gang rung la khyab par 'dod na/ de ni ma yin te yan lag rnams la yan lag can gyi cha gnas pas/yan lag can rang dgar gnas de mi shes so/ /phyogs gnyis pa la gal te bdag nyid kun gyi lag pa la sogs pa la lus yan lag can gyis khyab na/ de'i tshe lag pa la sogs pa ji snyed pa lus kyang de tsam du 'gyur ro//de bas nang na ma yin te/ shes rig gi skyes bu sngar bkag pa'i phyir ro/ /sha la sogs pa bcad pas lus nang du ma yin no/ /de ltar yan lag can bkag pas/ phyi rol du mngon sum la sogs pa'i spyod yul kyang lus ma yin no/ / lag pa la sogs par lus ji ltar rnam par gzhag /gal te lag pa la sogs pa las gzhan yin zhe na/ smras pa/ lag pa la sogs pa las tha dad pa lus med de/ snang rung ma dmigs pa'i phyir ro/ /de ltar lag pa la sogs pa'i rang bzhin nam/ de la brten pa'am/ de dang 'brel pa'am/ de'i nang na gnas pa'am/ de las tha dad pa med pas/ ji ltar yod de mi dmigs pa'i phyir med pa nyid do/ /de bas de'i phyir dpyad pas lus med de/ ma rig pa'i dbang gis kun rdzob kyi tha snyad du lag pa la sogs pa la lus kyi blo 'byung ngo / /gzhan du ci ste med ce na/smras pa/ lag pa dang rkang pa la sogs pa'i dbyibs su bkod pa'i khyad par gyis 'khrul pas lag pa la sogs pa kho na las te/ mtho yor la mir 'dzin pa'i blo bzhin te/ langs pa'i dbyibs dang ldan pa'i phyir ro/ /ci ste gti mug gis lus kyi blo 'byung zhe na/smras pa/ ji srid la sogs pa'o/ /sngar mer mer po la sogs pa'i gnas skabs su'ang med la/ phyis thal ba la sogs pa'i gnas skabs su'ang med/ 'on kyang sa la sogs pa khams drug tshogs pa'i rkyen tshogs pa ji srid du/ de srid lus la mi la sogs pa'i blo 'byung dgongs pa 'di ste/tshogs pa de dang de yod pas/ /rang bzhin med kyang 'khrul pas skyes bu la sogs pa'i rtog pa 'byung ngo / /de ltar lag pa la sogs pa la de tshogs pa yod pa'i bar du lus kyi snang ba 'byung ngo / /de ltar lag pa la sogs pa yang brtags pa kho nar bshad de/ de bzhin la sogs pa'o/ /lus bzhin du lag pa dang rkang pa la sogs pa'ang med de/ sor mo'i phung po yin pas de las gzhan rkang pa'ang med do/ /sor mo'i phung po'ang dngos po ma yin te/ tshigs kyi tshogs yin pa'i phyir ro/ /tshigs kyang dngos po ma yin te/ /rang gi cha shas phye bas so//tshigs kyi cha shas kyang dngos po ma yin te/ rdul phra rab tu phye bas so/ /rdul phra rab kyang re re nas dngos po ma yin te/ shar dang nub dang lho dang byang dang / 'og dang steng gi phyogs dang 'brel pas tha dad par 'gyur ba'i phyir ro/ /de bshad pa/ drug gi cig car sbyar ba na/ /phra rab rdul cha drug tu 'gyur/ /drug po dag ni go gcig na/ /gong bu'ang rdul phran tsam du 'gyur/ /zhes so/ /rdul phra rab kyi cha shas de yang sngar bzhin du drug tu phye bas dngos po ma yin te/ cha shas med pa'i phyir ro/ /rgyu mtshan des nam mkha' stong pa nyid kho na ste/rdul phra rab med do/ /de ltar dngos po brdzun pa la sgro btags nas 'dod chags la sogs pa skye bar bshad de/ de ltar la sogs pa'o/ /bshad pa'i rim pas rmi lam lta bu'i gzugs la yid du 'ong bar brtags nas su chags/ yid du mi 'ong ba la su sdang /gzugs tsam la sra bar brtags nas su rmongs/ de ltar sgra la sogs pa yang ngo / /dpyod ldan ni mkhas pa'o/ /'du shes med na bud med la sogs pa'i rtog pa yang mi rigs par bshad de/ gang tshe la sogs pa'o/ /gang gi tshe bshad pa'i rigs pas lus med pa de'i tshe/chags pa dang chags pa 'dod chags kyi yul gang yin pa de med do/ /de ltar lus rjes su dran pa bshad nas/ tshor ba bshad de/ sdug bsngal zhes bya ba la sogs pa'o/ /tshor ba ni gsum ste/ bde ba dang / sdug pa dang / bde sdug ma yin pa'o//de la don dam par sdug bsngal yod na de'i tshe rab tu dga' ba rnams la ci ste mi gnod/ bde ba yang don dam par yod na de'i tshe mya ngan la sogs pa gdung ba rnams la sogs pa'i sgras 'jigs pa la sogs pas gdung ba rnams la zhim sogs ni lce'i yul btung ba la sogs pa ste/sogs pa'i sgras phreng ba dang tsan+dan la sogs pa bde ba'i rgyu yin na ci ste dga' bar mi byed/ dngos po'i rang bzhin nam yang mi ldog pas so/ /de bas bde ba dang sdug pa'i yul brtags pa kho na'o/ /sdug bsngal yod pa yang bde ba stobs dang ldan pas zil gyis gnon pa'i phyir mi myong zhe na/de ni mi rigs te/ mi gsal bas myong ba'i bdag nyid can ma yin na tshor ba'i rang bzhin ji ltar yin/ myong bas tshor bar bshad pa'i phyir ro/ /rig kyang tshor ba yin na ha cang thal bar 'gyur ro/ /sdug bsngal thams cad du med pa ma yin te/'on kyang phra mo yod/ de'i tshe dga' ba'i gnas skabs su 'jug pa'i bde ba stobs can gyis sdug bsngal gyi rags pa bsal ba yin nam/ sdug bsngal phra mo yang de'i tshe mi myong bas dris te phra mo gang yin/ kun slong bde ba las gzhan dga' ba tsam 'dod na lan bshad de/de yang sdug bsngal gyi phra mo ma yin/ dga' ba tsam ni bde ba'i rigs yin pas so/ /des sdug bsngal phra ba ni bde ba la med pa nyid do/ /rgyu med pas 'ga' zhig tu ma dmigs she na/ smras pa/ gal te zhes bya ba la sogs pa'o/ /sdug bsngal dang 'gal ba bde ba'i rgyu reg bya mngon phyogs pa'i tshe sdug bsngal mi skye zhes brjod na/de'i tshe tshor bar rtogs pas mngon par zhen pa nyid yin zhe na bya bar grub pa ma yin nam/ gzhan du na gang la gcig gi bde ba de nyid du gzhan gyi sdug bsngal lo/ /sngar gang thos kyang sdug bsngal skye/ /de dus gzhan du mthong nas dga' ba skye/de bas tshor ba dang de'i rgyu brtags pa kho na'o/ /bshad pa yang / sbrul gyis rma bya bde bar 'gyur/ /dug ni bcud len de goms la/ /rnga mo'i kha la gnod pa yi/ /gnod par byed pa'i tsher ma ni/ /khyad par rnga mo'i kha la bde/ /tsher ma khyad par bde ba'i rgyu//zhes so/ /rgyu bshad de/ de nyid la sogs pa'o/ /gang gi phyir tshor ba mngon par zhen pa'i rang bzhin yin/ de phyir de la mngon par zhen pa'i gnyen po rnam dpyad tshor ba rjes su dran pa bsgom pa yin/ 'di bas tshor ba mngon par zhen pa bshad de/ rnam brtags la sogs pa'o//gang gi phyir rtog pa'i zhing las byung ba'i bsam gtan 'dod pa dang / mi dge ba dang bral ba rtog pa dang bcas pa dpyod pa dang bcas pa dben pa las skyes pa'i dga' ba dang bde ba la sogs pa'o/ /rtog pa las byung ba'i dga' ba dang bde ba rnal 'byor pa'i zas yin rtog pa nyid du grub po//de ltar tshor ba'i rgyu khas blangs te/ mngon par zhen pa tsam du tshor ba bshad nas/ da ni rgyu med pas tshor ba dngos po ma yin par bshad de/ gal te la sogs pa'o/ /reg pa'i rkyen gyis tshor ba ste yul dang dbang po rnam shes gsum tshogs pa ni reg pa'o//de yang ma grub pas tshor ba ga la yod de/ 'di ltar dbang po dang don dam par bcas la reg pa 'byung ngam/ 'on te bar med la/ de la de gnyis bar dang bcas pa yin na de'i tshe 'di gnyis tshogs pa ga la yod/ tshogs pa las byung ba'i reg pa bar bcas ga la yod/gal te bar med gnyis yin na/ de'i tshe yang thams cad du phan tshun du zhugs pas su dang su phrad/ gcig pur gyur pa'i phyir ro/ /'o na rdul phra rab ni phrad par 'gyur zhe na/ smras pa/ rdul phran la sogs pa'o/ /rdul phran gcig gcig gi nang du mi 'jug /bu ga med pa dang mnyam pas mthon dman med pa'i phyir ro//'o na 'jug pa med kyang phrad pa tsam yod ce na/ smras pa/ thams cad du 'jug pa med pas ma 'dres shing ma 'dres pas phrad pa med do/ /shin tu chung ba la yang cha yod pas cha med pa la gzugs med pas/ med pa nyid la phrad pa ga la yod/'di ni khyed la yang tshad mas grub pa ma yin par bshad de/ phrad pa yod na cha med pa mi 'grub/ gal te mthong nas bstan par gyis/ gsum pa bshad de/ rnam shes la sogs pa'o/ /rnam shes gzugs can ma yin pas de la phrad pa shin tu'ang med do//de ltar gsum la phrad pa bkag nas de tshogs pa yang dngos po ma yin par bshad de/ tshogs pa yang dngos po ma yin pas ri bong gi rwa bzhin tshogs pa med do/ /de bzhin sor mo'i tshogs yin phyir la sogs pas sngar ji ltar bshad pa bzhin no/ /nye bar bsdus shing bshad de/de bas bshad pa'i rim pas reg pa med pa na tshor ba ga la srid de/ rgyu med pa na 'bras bu mi 'byung ba'i phyir ro/ /de bas bde ba dang sdug pa'i rgyu thob pa dang spang ba'i phyir reg pa ni nam mkha' bza' ba ltar rigs pa ma yin no/ /sdug bsngal zad pa'i phyir zhe na/ smras pa/ bdag med pa dang / tshor ba rang bzhin med pas gnod byed brtags pa yin pa'i phyir gang gis gang la gnod par 'gyur/ da ni de'i rkyen can sred pa yang mi rigs par bshad de/ gang tshe la sogs pa'o/ /gang gis tshor ba po bdag med la tshor ba yang med pa de'i tshe rang gi rgyu med pa'i gnas skabs mthong na pha'i mya ngan gyis skye sred pa ci ste khyod ldog par mi 'gyur/khyod mi 'byung ba kho nar rigs so/ /gal te tshor ba po dang tshor ba mang na 'o na dngos po rnams la mthong ba la sogs pa'i tha snyad cis she na/ smras pa/ mthong ba la sogs pa'o/ /mig gi rnam shes kyis mthong ba dang /lus kyi dbang po'i rnam shes kyis reg pa ste/ 'o na sems nyid tshor ba po don dam par yod ce na/ smras pa/ don dam par yod pa des ma yin gyi 'on kyang rmi lam dang sgyu ma lta bu bag chags las byung ba'i sems kyis so/ /'o na bde ba la sogs pa'i tshor ba sems las gzhan sems kyis ci ste mi mthong /lan ni sems dang lhan cig skyes pa'i phyir sngon gyi bag chags las sems dang lhan cig tu tshor ba skye ste/ lhan cig tu skye ba kho nas mthong ba yin don dam par tshor ba mthong ba med do/ /lhan cig tu skyes pas mthong ba ma yin gyi 'on kyang yul gyi rnam pa can de las byung ba'i shes pas de 'dzin zhe na/'dir lan ni tshigs bcad gnyis kyis te/ sngar zhes bya ba la sogs pa'o/ /dngos po snga ma phyis 'byung ba'i shes pas dran pa yin gyi myong ba ma yin te/ shes pa'i dus su de 'gags pa'i phyir ro/ /'gags pa de rang gi tshul gyis kyang tshor ba ma yin no//rang rig sngar bkag pa'i phyir/ rang gi bdag nyid kyang rang gis mi rig pa'o/ /'o na gzhan gyis rig gam ma yin te/ gzhan dag gis kyang myong ba yin/ de yang rang rig ma yin pas de dang mtshungs pa'i phyir ro/ /gang gis tshor ba tshor te tshor ba po yang med do//de bas mtshan nyid kyis stong pas don dam par tshor ba med do/ /mngon par zhen pa las gzhan de bas su la yang bde ba dang sdug pa dang rang gi med de/ rjes su 'gro ba cig med pas de ltar bdag med pa'i tshogs 'di la tshor ba 'di yis su la gnod/gang la yang ma yin no/ /chos yang dag par sdud pa'i mdo las/ tshor ba myong bas bshad pa ste/ /'di ni su yis myong bar byed/ /tshor bya tshor byed tshor ba ni/ /tha dad 'gyur ba med pas so/ /mkhas pa rnams kyis tshor ba la/ /de ltar dran pa nyer gzhag bya/ /zhes bya ba la sogs pa'o//tshor ba rjes su dran pa bshad nas sems rjes su dran pa bshad de/ yid la sogs pa'o/ /re zhig mig la sogs pa'i dbang po rnams la'ang yid gnas pa ma yin gzugs la sogs pa'i yul la'ang ma yin/ gzugs yul dang dbang po'i bar du'ang ma yin/lus kyi nang ngam phyi'i yan lag rnams la'ang ma yin/ bshad pa rnams las gzhan phyogs su'ang dpyad pas ma mthong ngo / /sems gang lus kyi phyi nang du med pas lus las dngos po gzhan du yang med/ phyi nang 'dres pa la'ang mi gnas/ tha dad du yang med de don dam par med do//de bas sems can rnams rang bzhin gyis mya ngan las 'das pa rnams so/ /yid dpyad nas mig gi rnam shes la sogs pa dpyad cing bshad de/ shes bya zhes bya ba la sogs pa'o/ /mig la sogs pa'i tshogs pa brten nas gzugs la sogs pa 'dzin pa skye zhes gzhan rig rtogs nas smras pa/shes bya las sngar ram/ dus mnyam pa'am yang na phyis te/ de la gzung bya las sngar shes bya ma skyes par gal te shes pa ma yin na/ de'i tshe gang dmigs nas de skye/ gal te shes bya dang dus mnyam pa'i shes pa yin na de'i tshe ci dmigs nas de 'byung /dus mnyam pa rgyu ma yin pa'i phyir ro/ /rgyu ma yin pa spyod yul ma yin no/ /gal te shes pa dang po de 'gags nas phyis shes pa de skye na/ de'i tshe shes pa ga la skye/ dmigs bya 'gags pa'i phyir ro/ /de bas don dam par tshogs pa las kyang mi 'grub bo/ /de ltar sems rjes su dran pa bshad nas chos rjes su dran pa gsungs pa'i rim pas bshad de/de ltar chos la sogs pa'o/ /de bzhin du chos thams cad dang dngos po rnams rang gi rgyu'i sngon nam/ lhan cig gam phyis skye ba'ang skyon 'di nyid do/ /skye ba med pas 'gag pa yang mi rigs so//de ltar chos rjes su dran pa nye bar gzhag pas chos thams cad la ma chags pa'i shes pa skye'o/ /de ltar kun rdzob kyi bden pa mi rigs pas bden pa gnyis med ces pha rol pos smras te/ gal te la sogs pa'o/ /gal te don dam par chos thams cad ma skyes ma 'gags na kun rdzob med pas tha snyad mi 'grub po//don dam pa'i bden pa gcig pu kho na grub pas bden pa gnyis med de/ bsod nams sogs pa la sogs pa med par 'gyur ro/ /gal te rgyud gzhan gyi blos rnam par gzhag pa'i kun rdzob yod na/ don dam pa'i bden pa 'ba' zhig pa ma yin gyi kun rdzob kyang gzhan gyi rtog pa'i blos rnam par gzhag na/sems can mya ngan las ga la 'da'/ stong pa yang rtog pas yul du byed pas kun rdzob par 'gyur ro/ /don dam pa rtogs nas spros pa thams cad mi dmigs pas/ sems can gang mya ngan las 'das/ de yang blos dmigs pas mya ngan las 'das par 'gro/blo kun rdzob brjod pas mya ngan las 'das pa'ang kun rdzob par 'gyur ro/ /lan bshad de/ 'di ni la sogs pa'o/ /mya ngan las 'das pa las gzhan 'chad pa pos de'i blo'i yul du byas pas/ de'i rnam rtog 'di yin/ des mya ngan las 'das pa la kun rdzob mi rigs de ni mya ngan las 'das pa kho na'o//gang gi phyir rang gi kun rdzob kyis de med pa nyid do/ /de la rang gi rtog pa thams cad 'gags pa'i phyir ro/ /gzhan gyi kun rdzob kyis kyang ji ltar zhe na/ smras pa/ phyis de la sogs pa'o/ /'di yod na 'di 'byung zhes rten cing 'brel pas rnal 'byor pa la gzhan gyi rtog pa snang /rtsa ba'i ting nge 'dzin gyi dngos gzhi'i rjes su gzhan gyi rtog pa nges pas rnal 'byor pa la kun rdzob yod do/ /rdo rje lta bu'i ting nge 'dzin sangs rgyas rnams kyi chos kyi sku/ chos thams cad mi dmigs pa'o/ /de las longs spyod rdzogs pa'i sku mngon shes drug thams cad mkhyen pa nyid de/me long lta bu'i ye shes te ye shes kyi me long la/ 'das pa ma 'ongs pa da ltar ba thag nye ba dang ring ba 'chad pa'i rigs par dngos po thams cad snang ba'i phyir ro/ /'o na 'das ma 'ongs med pas ji ltar snang zhe na/brjod de ji ltar thag ring ba dus ring ba yang de ltar te/ ris drug gi 'khor lo thog ma dang tha ma med pa gang gi phyir bshad pa/ sangs rgyas ngo mtshar bsod nams shes rab 'byung gnas yin phyir phyogs dang rang bzhin gyis/ /ring ba gzigs ltar dus rings 'das la sogs pa ci ste mi gzigs so//de gnyis rigs pa mtshungs pas ris drug 'khor lo thog mtha' bar ma dang bral ba/ /gzigs te de ltar 'gro ba thog med dang ni ston pa thams cad mkhyen par grub/ /ces so/ /des bshad pa/ gal te 'khor ba thog mtha' med pa yin na/de'i tshe de mi shes pas thams cad mkhyen pa ji ltar grub ces bya ba ni med de/ ris drug gi 'khor lo la thog ma med cing tha ma yang med de/ 'on kyang mngon sum gyis gzigs/ de bas/ thams cad mkhyen la 'gro ba dag /ma lus da ltar ba bzhin snang / /tha mal lta ba la ltos nas//ring ba gsum ni bshad pa yin/ /longs spyod rdzogs pa la gdul bya dang smon lam gyi dbang gis sprul pa'i sku dang / mnyam pa nyid kyi ye shes la sogs pa yang ngo / /de bas don dam par skye ba la sogs pa med kyang kun rdzob yod par mi 'gal lo/ /'o na rnal 'byor pas gzhan gyi sems shes pa'i mngon shes kyis gzhan gyi rnam rtog shes kyi brtags pa'i dngos po ji ltar shes she na/smras pa/ rtog pa'i blo dang des brtags pa'i shes bya 'di gnyis phan tshun ltos pa can yin pas/ rtog pa'i yul kyang shes so/ /'o na kun rdzob dpyod pa'i rten gang yin/kun rdzob kyang ma yin te bkag pas so/ /don dam kyang ma yin te/ de la spyod pa mi srid pas she na/ smras pa/ ji ltar 'jig rten la grags pa'i dngos po dang dpyod pa la brten nas 'jig rten gyi dpyod pa thams cad 'dir skye bo la go bar bya ba'i phyir brjod do/ /'o na dpyod pa yang dpyad par bya ba ltar brtags pa yin pas dpyad par bya bar 'gyur zhe na ma yin te/ji ltar grags pa zhes bya bas lan zin to/ /de lta yin na skyon yang bshad de/ gang gi tshe legs par dpyad pa'i dpyod pas dpyod par byed na de'i thug pa med par 'gyur ro//de ci'i phyir dpyod pa'i don du/ gzung ba yang dpyad dgos pa'i phyir ro/ /dpyad par bya ba la thug med du ci ste med ce na smras pa/ dpyad par bya ba'i yul dpyad zin pa la dpyad pa'i rten med de/ gang la brten nas slar dpyod pa na thug med du 'gyur ba de stong par byas pa'i phyir ro/ / dpyad par bya ba dpyod pas bya ba byas par 'gyur ba'i phyir ro/ /de bas rten pas skyod pa mi skye'o/ /rnam rtog med pa'i phyir 'jug pa dang ldog pa med pas chags pa'ang ma yin/ chags pa dang bral ba yang ma yin pa de ni mya ngan las 'das par brjod par bya ba dang bral bas rab tu zhi ba'i phyir ro/ / brtags pa'i yul la dpyod pa bden te don dam par ma yin zhes bshad/ dngos por smra ba gang la dpyad par bya ba dang dpyod pa gnyi ga bden/ don dam par yod kun rdzob ma yin pa de nyid ni shin tu dka' bar gnas/ de nyid bshad de/ gal te tshad ma'i shes pa'i mthus gzhal bya'i don rnam par bzhag na/shes pa yod pa cis nyes te rang rig med pas tshad ma gzhan tshol na thug pa med pa'i phyir ro/ /'on te pha rol la brtags nas bshad de/ gal te shes par bya ba'i dbang gis shes pa rnam par bzhag na/ shes par bya ba yod par cis shes/ shes pa dang shes bya phan tshun gyi dbang gis gal te gnyis yod par brjod/shes bya'i dbang gis shes pa dang / shes pa'i dbang gis shes bya yod par 'dod na de'i tshe phan tshun du brten pa'i phyir shes pa dang shes bya gnyi ga med par 'gyur ro/ /'dir dpe bshad de/ bu med par pha med na bu skyed pa la ltos pa can de yin pas/'o na bu ga las 'byung ste pha med pa'i phyir ro/ /de bas bu med pas pha med do/ /gang gi phyir phas bu skyed de yang bu med na pha ma yin pas phan tshun du brten pas gnyi ga med pa nyid do/ /don la yang sbyar te/ de bzhin pha dang bu ltar shes pa dang shes bya gnyi ga med de/ shes bya shes na shes par brjod de/shes pas dpyad par bya ba shes bya yin/ ji srid du shes pa ma grub de srid du shes bya'o/ /'o na shes pa ni shes bya las byung / myu gu las sa bon bzhin du shes pa de las shes bya grub par 'gyur zhes smras te/ g.yul sa'i bu gar gnas pa'i sa bon las myu gu skye la/myu gus sa bon rtogs pa ltar shes bya las skyes pa'i shes pas shes bya yod par ci ste mi rtogs/ lan bshad de/ dpe 'di mi mtshungs te/ bya ba myu gu las sa bon yod par rtogs pa gang / de ni myu gu las tha dad pa'i shes pa las so/ /rgyu 'bras kyi 'brel pa sngar rtogs pas de med na mi 'byung ba'i myu gu mthong nas sa bon rjes su dpog par byed do//shes pa yod par cis shes te rang rig med pa dang shes pa gzhan gyis shes na ha cang thal bar 'gyur ro/ /gang gi phyir shes bya des rtogs/ rang gis ma nges pa'i rtags kyi bsgrub bya mi rtogs pa'i phyir ro//de bas tha snyad 'di kun rdzob pa kho na yin no/ /da ni rang bzhin du smra ba'i 'dod pa bshad de/ rgyang phan pa'i 'dod pa rgyu thams cad la ltos pa med pa las dngos po rnams skye/ rgyu med pa'i rgyu mtshan yang smras te/ pad+ma'i ge sar la sogs pa/ /ngo mtshar ba ni su yis byas//rma bya'i mdongs la sogs pa yang / /ngo mtshar ba ni su yis byas/ /ji ltar tsher ma la sogs pa'i/ /rnon po la sogs rgyu med pa/ /res 'ga' 'byung bas de bzhin du/ /sdug bsngal la sogs rgyu med do/ /'di ltar smra ba rnams la 'jig rten gyis rtogs pa'i rgyu'i nus pas gnod pa bshad de/re zhig la sogs pa'o/ /skye bo thams cad kyis mngon sum gyis ni mi dmigs pa de'i khyad par yin pa'i phyir/ mngon sum dang mi dmigs pa dag gis thams cad rnam pa du ma rgyu dang ldan pa/ 'gro ba sna tshogs par mthong / gang yod na 'bras bu 'byung gi med na mi 'byung ba de/de'i rgyu yin no zhes nges par byed do/ /pad+ma dang sdong bu dang sogs pa'i sgras 'dab ma dang 'bras bu dang ge sar la sogs pa'i dbye ba rgyu'i khyad par las skye ste/ gzhan du na thams cad las skye bar 'gyur ro/ /de bas rgyu nges pa can las 'bras bu nges pa can skye'o/ / rgyu'i khyad par 'di grub na 'bras bu'i khyad par 'byung gi /rgyu'i khyad par 'di gang las 'byung zhe na/ lan ni sngar gyi rgyu dbye nyid las so/ /skyed par byed pa'i rgyu'i khyad par las so/ /rgyu de la yang khyad par 'di gang las she na/ 'dir rgyu snga ma'i khyad par las zhes brjod par bya'o//ha cang thal ba'i skyon yang med de/ 'khor ba thog mtha' med par 'dod pa'i phyir ro/ /rgyu 'bras kyi rjes 'gro dang ldog par grub ste/ gzhan las ma skyes der mi gnas/ /yul gzhan las kyang 'ongs pa min/ /gang yod pa na 'bras bu 'byung / /de yi min na su yang min/ /zhes byas nas so//de bas 'bras bu la 'khrul pa'ang med de/ rgyu gang dang gang las 'bras bu'i khyad par la nges pa'i rgyu yin/ snga ma skyed par byed pa'i rgyu nus pa las so/ /rang gi rgyu nyid kyis de lta bu'i rang bzhin can du de skyed/ gang gis gnod pa med na de lta bu'i 'bras bu skyed do/ / gzhan yang rgyang pan pas 'di dngos po rnams kyi/ rgyu med ces smras rgyu mtshan dang bcas na/ /rang gi dam bca' rang gis 'jig par byed/ /gal te gtan tshigs de la mi brjod na/ /dam bca' 'ba' zhig brjod pas dgos pa med/ /rgyu 'bras grub pas 'jig rten pha rol dang thar pa yang grub po//rgyang pan pa bsal nas dbang phyug rgyur smra ba bsal bar bshad de/ dbang phyug la sogs pa'o/ /rigs pa pa la sogs pa na re/ bcom ldan 'das de yod 'gro ba sna tshogs pa sprul pa la mkhas pa/ rtag tu nus pa ma nyams pa/ thog mar gyur pa rtag pa thams cad mkhyen pa dbang phyug ste/des 'gro ba rgyu dang bcas pa'o/ /lus dang khams dang / ri dang rgya mtsho la sogs pa byed pa dang / gnas pa dang 'jig pa'i rgyu dbang phyug chen po'o/ /lan byed pa pos ni re zhig dbang phyug gang yin smros/ 'bras bu ni sa gzhi dang sa bon la sogs pa bya ba las tha dad pa de'i rjes 'gro dang ldog pa la rjes su 'jug pa ni ltar snang ngo //de bshad pa/ gang yod na ni gang zhig 'byung / /de min de yi rgyu nyid du/ /rtog par byed pa thams cad la/ /rgyu rnams thug pa med par 'gyur/ /zhes so/ /gal te sa la sogs pa 'byung ba rnams dbang phyug yin na de lta mod/ de'i rjes 'gro mthong bas ming tsam la ngal bas ci bya/don la khyad med pas so/ /du ma rang bzhin sna tshogs pa mi rtag pa 'jig pa'i ngo bo/ /g.yo ba med pas sems pa ma yin pas bya ba dang bral ba/ mchod par bya ba lha ma yin pa/ de bas bsgom par bya ba mi gtsang ba bshang ba la'ang sa la sogs pa yod pas sogs pa'i sgras chu dang me dang rlung 'dzin no//de dag dbang phyug ma yin te/ de yi mtshan nyid med pas so/ /de ni rtag pa dang gcig pu yin no/ /sa la sogs pa ma yin na nam mkha' yin zhe na/ smras pa/ dbang phyug nam mkha' ma yin g.yo ba med pa'i phyir ro/ /rang bzhin med pas bya ba dang bral bas so//'o na bdag yin mod ce na/ ma yin te sngar bkag zin pa'i phyir/ tha mal pas bsam par bya ba ma yin pa dbang phyug yin na/ bsam par bya ba'i lam las 'das pa'i bya ba nyid kyang bsam par bya ba ma yin pas/ de brjod pa mi rigs pas brjod pas ci zhig bya/gal te de mtshon pa bkag na yang de'i bya ba skye ba thams cad kyis shes pas bsam par bya ba yin zhe na/ smras pa/ des bskyed par 'dod pa gang yin/ gal te bdag yin na de rtag pa yin pas/ de ji ltar bskyed/ sa chu me rlung nam mkha' dus phyogs yid sogs pa'i sgras 'dzin to//de dag kyang rtag pa yin pas des mi skyed do/ /dbang phyug ces bya ba'i bdag nyid kyang des mi skyed de/ rtag pa nyid kyi phyir ro/ /shes pa yang des mi skyed de/ shes bya las 'byung ba dang / 'khor ba thog ma med pa nas shes bya la dmigs nas skye bas de las mi skye'o//bde ba dang sdug bsngal 'di las mi 'byung ste/ dge ba dang mi dge ba las so/ /de la yang de'i bya ba med do/ /da ni dbang phyug chen pos ci byas/ de ni thun mong gi skyon bshad de/ 'gro ba'i rgyu rtag pa'am mi rtag pa'ang de la rtag pa yin na rgyu la thog ma med pas/'bras bu thog ma ga la 'byung / des skyed cig /rtag tu 'jug pas thog ma med pas des dbang phyug gis byas par mi 'grub po/ /rtag tu nus shing gnas pa rgyu yod na 'bras bu yang rtag tu 'byung ngo / /ci ste 'bras bu thams cad rtag tu mi byed bskal pa'i dus su yang yod/de ltar gnas pa dang bsdus pa yang brjod par bya'o/ /rkyen med pas mi byed ce na/ ma yin te de ni gzhan la ltos pa ma yin/ nus pa'i phyir dang rtag pa la rkyen gyis khyad par skyed mi nus pas so/ /khyad par de las tha mi dad pa skye na/de yang skye bar 'gyur ro/ /tha dad pa na khyad par kho na las 'bras bu skye bas/ de rgyu ma yin par 'gyur ro/ /de'i khyad par yin na de dang cis 'brel/ 'brel pa gsum pas so zhe na/ de yang de dag la cis 'brel zhes 'brel pa bsams na thug pa med par 'gyur ro//rkyen la ltos pa yod kyang de'i tshe tshogs pa yang des byed pas med pa mi srid de dbang phyug gis ma byas pa med pa mi srid pa'i phyir ro/ /des na byed pa po rtag pa ci la ltos/ nyer len gyi rgyu lhan cig byed pa'i rkyen tshad ma'i rgyu ste gsum las dbang phyug tshad ma'i rgyu yin pas rkyen la ltos pa mi 'gal zhe na/smras pa/ gal te tshogs pa la ltos na dbang phyug rgyur mi 'gyur/ de'i tshe thag pa la sogs pa'i tshogs pa las 'bras bu 'byung ba'i phyir ro/ /de las mi 'byung bas so/ /gzhan yang tshogs pa yod pa ni mi skyed par mi nus pa dang / tshogs pa med na byed mi nus pa'i phyir ro//gzhan yang tshogs pa yod nas byed kyang / rang nyid 'dod bzhin du skyed dam mi 'dod bzhin du skyed/ de la gal te dbang phyug mi 'dod bzhin du byed na/ de'i tshe gzhan dbang du 'gyur ro/ /gal te 'dod bzhin du bskyed na de'i tshe 'dod pa'i dbang du 'gyur ro/ / de ltar gzhan la ltos nas skyed pas dbang phyug tu mi 'gyur ro/ /des 'gro ba sna tshogs pa dbang phyug gi bya ba ma yin par grub po/ /de ltar rdul phran rtag pa'i rang bzhin rdul phran gnyis pa la sogs pa'i rim pas sa gzhi dang / ri la sogs pa yin zhe na/ smras pa/ spyod pa la sogs pa gang dag 'gro ba sna tshogs pa'i rgyu rdul phra rab rtag par smra/de sngar cha rdul du phye bas zhes bya ba la sogs pas bkag pa yin no/ /de bas rdul phran rtag pa'i rang bzhin kyang 'gro ba ma yin no/ /da ni rang bzhin yongs su gyur pa'i tshul dgag par bshad de/ bstan pa dang g.yo ba'i rgyu gtso bo yin par grangs can gyis 'dod do//de'ang gang zhe na/ snying stobs rdul dang mun pa zhes yon tan gsum mnyam par gnas pa gtso bo zhes brjod do/ /snying stobs la sogs pa mi mnyam na 'gro bar brjod do/ /gang gi tshe skyes bu yul la longs spyod par 'dod pas de'i tshe gtso bo skyes bu dang 'byor ro/ /slar yang sgra la sogs pa nyid du yongs su 'gyur ro//rim pa ni gtso bo las blo ste/ de las nga rgyal de las phyogs bcu drug dbang po lnga ste/ rna ba/ reg pa/ mig /lce/ sna'o/ /las kyi dbang po lnga ni ngag dang / lag pa dang / rkang pa dang / bshang lam dang / dbang po'o/ /yid ces pa dang bcu gcig go//de tsam lnga ste sgra dang / reg pa dang / gzugs dang / ro dang dri'o/ /sgra la sogs pa lnga las nam mkha' dang / rlung me chu sa rnams so/ /gtso bo ni rgyu nyid yin la 'bras bu min no/ /blo dang nga rgyal dang sgra la sogs pa lnga ni 'bras bu'ang yin la rgyu'ang yin no/ /dbang po bcu gcig dang /nam mkha' la sogs pa 'bras bu kho na yin te rgyu ma yin no/ /skyes bu ni 'bras bu'ang min la rgyu'ang ma yin no/ /gang gi phyir bshad pa/ bya ba'i rang bzhin 'gyur ba med/ /che sogs rang bzhin 'gyur ba bdun/ /rnam 'gyur rnam pa bcu drug ste/ / skyes bu gtso min 'gyur ba min/ /zhes so/ /de ni rten med pa'i ri mo ltar shes nas lan 'debs pa pos bshad de/ gcig la sogs pa'o/ /gtso bo gcig pu la snying stobs rdul mun pa'i dbye bas rang bzhin gsum mi rigs pas gtso bo med do/ /de bas de'i 'bras bu thams cad kyang med do//re zhig yon tan ni yod ce na/ smras pa/ de ltar gtso bo bzhin du snying stobs la sogs pa'i yon tan yang med do/ /gang gi phyir de dag re re yon tan gsum pa yin/ 'gro ba yon tan gsum gyi rang bzhin zhes grub mtha' yin pas so/ /re re yang yon tan gsum pa yin pas rang bzhin gcig pa ma yin pas so//snying stobs la sogs pa yon tan med na/ dpyad pas des bskyed pa'i sgra la sogs pa yang gnas pa ring du 'gyur ro/ /rgyu med 'bras bu mi srid pas so/ /gang bshad pa/ /rtag tu bde sogs sems pa min/ /'di ni gsal bar yang dag mthong //dad dang gdung bkren pa la sogs/ /tshul du 'dir ni dmigs pas so/ /de'ang mi rigs par bshad de/ sems pa med pa bems po gos la sogs pa la/ bde ba la sogs pa sems kyi rang bzhin de'i bdag nyid du mi srid/ gang gi phyir snying stobs rdul mun pa kho na bde ba dang sdug bsngal de rmongs pa'o//yon tan de dag sems byung yin pas gos la sogs par med/ /ji ltar de la bde ba la sogs pa 'byung / bde ba la sogs pa'i rang bzhin yin pas gos la sogs pa bde ba la sogs pa'i ngo bo ma yin 'on kyang bde ba la sogs pa de las skye bas she na/smras pa/ bde ba la sogs pa de'i rgyu gos la sogs pa'i dngos po rnams kyang dpyad de/ de dag yan lag can yang ma yin/ rdul phran gyi rang bzhin yang ma yin/ yon tan gsum pa yang ma yin par dpyad pa'i phyir ro/ /snang ba rnams kyang rang bzhin med pa'i phyir ro//gsal ba bde ba la sogs pa'i rang bzhin yin na/ gos la sogs pa kho na bde ba la sogs pas bskyed par 'gyur zhes bshad de/ khyod kyi la sogs pa'o/ /de ltar yin kyang de la gos la sogs pa dang / sogs pa'i sgras tsan+dan la sogs pa de las 'byung ba med do//gos sogs la bde sogs kyang 'byung ste/ gos sogs la bde sogs kyang med/ de'i rjes 'gro dang ldog pa'i rjes su 'brang bas bde ba la sogs pa ni de'i 'bras bu yin no/ /snying stobs la sogs pa'i yon tan gyi bdag nyid yin pas/ gang bde ba la sogs pa rtag par 'dod pa de'ang rtag pa ma yin par bshad de/bde ba dang sdug bsngal ba dang rmongs pa rtag pa nam yang mi dmigs so/ /yon tan rnams med pa'i phyir ro/ /gal te bde ba la sogs pa rtag pa yin na de'i tshe rtag tu dmigs par 'gyur zhes bshad de/ bde sogs la sogs pa'o/ / de'i rang bzhin ma spangs pa'i phyir ro/ /gal te mi gsal ba'i tshul gyis nub pas mi mthong zhe na/ smras pa/ bde ba la sogs pa gsal ba nyid lan cig tu gyur na rtag pa yin pas bde ba myong ba rtag tu ci ste mi 'gyur/ gal te de nyid gsal bar gyur la mi dmigs pa'i tshe/ phra bar 'gro ste nyin mo skar ma bzhin no//de ni mi bden te gang gi phyir rags pa'i rang bzhin kho na phra zhing mi gsal bar ga la 'gyur/ rtag pa'i phyir ro/ /gcig la tshul du mi rigs so/ /rags pa gsal ba'i dngos po dor nas phra ba mi gsal ba'i tshul du gyur na/ 'o na rags pa dang phra ba mi rtag pa'i tshul du 'gyur/skye ba dang 'gags pas so/ /mi rtag pas ci ste zhe na/ smras pa/ de tsam nyi shu lnga thams cad rags pa dang / phra ba bzhin du mi rtag par ci ste mi 'dod/ gzhan yang rags pa 'di bde ba la sogs pa las tha dad dam mi dad/ gal te tha dad na de'i tshe de log na sngar bzhin du bde ba myong bar 'gyur/gos log na bum pa mi dmigs pa med pa bzhin no/ /gal te tha mi dad na de la bshad de/ rags pa bde ba las gzhan ma yin na/ de'i tshe bde ba kho na yin pas bde ba la gsal bar mi rtag pa nyid/ rags pa log nas bde ba yang ldog pa'i phyir ro//gal te thams cad du 'gag na bde ba slar mi skye ba nyid/ gtan nas med pa nam mkha' ltar skye ba mi rigs pas so/ /gal te med pa 'ga' yang mi skye na gang rnam pa thams cad du med pa de mi skye/ dper na nam mkha'i me tog bzhin no/ /gzhan yang ni de lta ste/ ci'i phyir med pas so zhes 'dod na 'dir bshad de/sngar mi gsal ba'i gnas skabs su gsal ba med/ phyis gsal bar skye ba khyod mi 'dod kyang gnas/ gzhan du na/ sngar yang dmigs par 'gyur ro/ /skyon gzhan yang yod de/ 'bras bu rgyu la yod pa na zan za ba yang mi gtsang ba za bar 'gyur/zan gyi 'bras bu mi gtsang ba zan gyi gnas skabs su yang yod pas so/ /gzhan yang ras bal gyi sa bon la skye bar 'gyur ba'i gos yod pas/ gos kyi rin gyis ras bal gyi sa bon nyos la gyon cig /gal te mun pa'i ngo bo mi rigs pas rgyu la 'bras bu 'jig rten gyis ma mthong zhe na/'o na de nyid shes kyi de mthong bar 'gyur/ de ni med de/ grangs de nyid shes pa'i yang 'jig rten bzhin du 'di ni tha snyad yod/ de'ang zan za ba mthong gos 'dod kyang ras bal gyi sa bon mi nyo'o/ /rgyu la 'bras bu yod pa gang gis rtogs/ /shes pa de tha snyad pa'i skye bo la yang yod pas/de nyid shes pa bzhin du 'jig rten pas ci ste mi mthong / 'jig rten gyis mthong ba tshad ma ma yin zhe na/ lan 'debs pa pos gal te 'jig rten tshang ma ma yin na de'i tshe/ des gsal bar mthong ba yang bden pa ma yin 'di ni dbu ma pas 'dod pa nyid do//pha rol pos 'di smras te/ gal te tshad ma don dam par tshad ma ma yin na/ des gzhal ba brdzun par mi 'gyur ram des ci ste zhe na/ don dam par rang bzhin med pa stong pa nyid tshad ma nges pa gang yin pa de'ang med par 'gyur ro/ /lan bshad de/rtog pas brtags pa'i dngos po ma brtags pas de dngos med 'dzin pa ma yin/ sa phyogs la brtags pa'i bum pa med par rtogs so/ /'jig rten la grags pa'i dpyad pas/ der bum pa'i gzugs gang yang med do/ /de bas brtags pa'i dngos po ma grub pas med pa'o//de phyir brdzun pa'i dngos po gang yin pa de med pa gsal bar brdzun/ de ltar dngos dang dngos min brtags pa yin pas/ rang bzhin med pa kho na gnas par 'gyur ro/ /de nyid gsal bar byed de de bas rmi lam du gnas pa'i bu skyes nas 'chi na de med rmi ba'i rtog pas bu de yod par rtog pa 'gog par byed do//yod pa'i rtog pa 'gog par byed kyang de brdzun yin bu de rmi lam du ma skyes pa dang / ma 'gags pa'i phyir ro/ /yang na bu bden la rmi lam du shi ba la 'di sbyar bar bya'o/ /de ltar chos rnams skye ba dang 'gag pa'o/ /'di tshad ma ma yin kyang rang bzhin med pa la skyon med do//de ltar rgyu med pa dang rgyu mi mnyam pa bsal nas nye bar bsdus te/ gang gi phyir rang bzhin las 'bras bu mi 'byung / de bas de ma thag pa'i dpyad pas 'ga' 'ang rgyu med yod ma yin/ skyes bu dang dus la sogs pas byas pa yang med par shes par bya'o/ / des rgyu med pa la ma yin par grub po/ /'o na rang bzhin dang dbang phyug dang gtso bo la sogs pa las mi skye na yang / 'dod pa'i rgyu las don dam par skye bas ji ltar rang bzhin med ce na/ 'dir rang las ma yin gzhan las min/ gnyis las ma yin zhes mtha' gsum bsgrub par bshad de/ so so la sogs pa'o/ /de la rang ngam gzhan so so re re la ma yin/ gnyis 'dus pa la yang ma yin/ rkyen rnams las skye ba'i tshul du gnas pa ma yin no/ /de la re zhig rang las dngos po mi skye ste/ skye ba'i sngon du dngos po med pa'i phyir gang las skye/ skyes na'ang rdzogs pa'i phyir ci skye/gzhan yang kho na las skye na skyes pa nyid slar skye bar 'gyur te/ de ni mi rigs byas pa byed pa mi srid pas so/ /yang na sa bon la sa bon kho na 'byung gi myu gu nam yang mi skye'o/ /sa bon dang myu gu ngo bo gcig pa yang ma yin no/ /rang gi dngos po bskyed na gang yang skye bar mi 'gyur/phan tshun du brten pa'i phyir ro/ /rang bzhin yod na skye/ skyes nas rang bzhin no/ /gzhan las ma yin te/ sA lu'i sa bon las sran ma'i myu gu skye bar thal lo/ /gzhan nyid du khyad med pas thams cad las thams cad skye bar 'gyur ro/ /bskyed bya dang skyed byed kyi nus pa nges pa can yin pas skyon med ce na/ma yin te/ 'bras bu ma skyes pa'i tshe su'i nus pa/ 'bras bu skyes nas rgyu med pas su la nus pa/ dus mi mnyam pas bskyed bya dang / skyed byed kyi nges pa yang med do/ /rgyun gcig gis nges pa'ang mi rigs te rgyun med pa kho nas so/ /gnyi ga la yang ma yin te/so so la bkod pa'i skyon rnams 'dir 'byung bar thal bas so/ /so sor mi nus na bsdus kyang mi nus pas so/ /long ba brgya tham pas yang mi mthong bas so/ /bye ma gcig gis snum 'byin mi nus pa ltar mang po bsdus kyang mi nus pa bzhin no/ /dngos po rnams 'jig rten 'das pa las da ltar ba/da ltar ba las/ ma 'ongs par 'gro zhes dus gsum smra ba rtogs nas bshad de/ dus dang phyogs gzhan las cung zad kyang byung ba ma yin la/ da ltar ba la mi gnas de las ma 'ongs par yang mi 'gro /gang gi phyir de lta yin na 'dus byas kyang rtag par 'gyur te/rtag tu yod pa'i phyir da ltar ba kho na'o/ /rang bzhin rtag tu yod pa dang dngos po rtag par mi 'dod de/ dngos po rang bzhin las gzhan min/ /dbang phyug spyod 'dis gsal ba yin/ /thams cad yod par smra ba'i bsdus pa yin no/ /de ltar dus gsum las 'das pas sgyu ma las 'di khyad par ci yod/rmongs pas bden par gang byas pa 'di sgyu ma mkhan gyis sprul pa'i glang po che la sogs pa las/ rgyu las byung ba 'di la rang bzhin med pas khyad med de/ de nyid bshad de/ rnam shes la sogs pa sgyu mas sprul pa dang / 'jig rten du grags pa'i rgyus byas pa 'di gang las 'byung / 'gags pa'i dus su gar 'gro ba rigs pa phra mos brtag par bya/ 'o na rgyus bskyed pa ji ltar mi bden zhe na/ smras pa/ gang zhig la sogs pa'o/ /dngos po gang rgyu nye na mthong gi de med na mi mthong / gzhan la rag las pas me long gi gzugs brnyan dang mtshungs la/me long yod na byad mthong gi de med na mi mthong / de ltar dngos po yang rgyu dang nye ba dang ring ba la'o/ /gzhan la rag las pas byas pa rang bzhin ma yin pa la bden pa ga la yod/ gzhan yang rang dang gzhan gnyi ga'i bdag nyid rgyus dngos po yod pa'am/med pa'am gnyi ga'i rang bzhin bskyed/ de la rgyu'i bya ba'i sngon du yod pa la rgyus dgos pa ci/ rdzogs pa'i phyir ro/ /gnyis pa bshad de/ 'on te de ni med pa na yang rgyus ci bya/ ri bong gi rwa lta bu med pa la rgyu'i bya ba med pas so/ /'o na med pa nyid rgyu las skye ba ma yin nam/smras pa/ dngos med nam mkha' lta bu la bye ba brgya phrag rgyu yis kyang bsgyur du med de gzugs med pa'i phyir ro/ /dngos po yin du chug ce na/ smras pa/ dngos po ma yin pa de ji ltar dngos por 'gyur/ dngos po ma yin pa las log nas she na/ smras pa/ dngos po ma yin pa las log nas gzhan dngos por gyur pa gang zhig yin/zan za ba la sogs pas rgyu yongs su smin pa 'gog pa'i phyir ro/ /sngar med pa log nas dngos po 'byung zhe na/ smras pa/ dngos med kyi dus su dngos po mi 'byung na gang gi tshe nam dngos po 'byung bar 'gyur/ dngos min 'gal tshabs can gyis rtag tu don dam pas dngos po skye bar mi nus so//skye 'gyur gyi dngos pos dngos min bzlog ce na/ smras pa/ ji srid dngos po ma skyes pa de srid du dngos min mi ldog pas dngos po ma skyes par sngar gyi dngos min 'bral bar mi 'gyur ro/ /gal te dngos min ma log par dngos po skye/skyes nas 'gal bas dngos min bzlog ce na/ smras pa/ dngos med la sogs pa'o/ /dngos min ma log par dngos po la skabs med de/ 'gal ba dngos min yod las so/ /don dam par dngos po'i skye ba 'gag nas skyes pa bzlog pa med par bshad de/ dngos po'ang med par 'gyur ba ma yin te/ji ltar dngos min dngos por mi 'gyur ba ltar/ de cis she na/ rang bzhin gnyis su thal bar 'gyur ba'i phyir/ gcig pu kho na la dngos po dang dngos min tshul gnyis mi srid pas so/ /nye bar bsdus shing bshad de/ de ltar bshad pa'i rim pas skye ba dang 'gag pa med pas/gang gi phyir 'gag pa med la dngos po'ang yod pa ma yin te/ rtag tu ma skyes pa ma 'gags pa de bas/ 'gro ba 'di thams cad rang bzhin med pa'o/ /'o na kun rdzob kyi bden pa ji ltar zhe na/ smras pa/ dmyal ba la sogs pa'i ris kun rdzob kyi bden pa ni gnyid kyi gnas skabs na ma skyes pa nyid mthong ba ltar/kun rdzob rmongs pa la'ang de ltar ro/ /de bas kun rdzob ni rmi lam lta bu'o/ /don dam pa ni skye ba med pa'o/ /rnam par dpyad na chu shing dang 'dra'o/ /chos thams cad rang bzhin med pas chu shing ltar snying po med pa'o/ /gang gi phyir don dam par chos thams cad skye ba med la 'gag pa med/de bas mya ngan las 'das pa ni nyon mongs pa dang shes bya'i sgrib pa spangs pa dang / ma 'das pa ni sems 'dod chags la sogs pa nyon mongs pa'i dbang du gyur pa rnams te/ de dag gnyi ga la don dam par dbye ba med la kun rdzob tu nyon mongs pa skye ba la sogs pa brtags pas so//bshad pa'i rigs pas nyon mongs pa la sogs pa skye ba la sogs pa med pas mya ngan las 'das pa dang khyad med pa'i phyir ro/ /'di ltar de kho na nyid mi shes pas brdzun pa la mngon par zhe na/ rang nyid kyis rang sdug par byed ces bshad de/ de ltar bshad pa'i lam gyis thams cad rang bzhin med pa la gang rung las ci thob/gang rung gi su zhig la shor/ rim gro byas pa'am yongs su brnyas pa sus su la slar byed par 'gyur/ dngos po la rang bzhin med pas gang las bde ba/ gang las sdug ste bde sdug gi rgyu med pas so/ /gang dga' ba gang mi dga' ba gang dang phrad pa dang bral ba'i phyir 'bad pa'o//sred pa gang yin pa'i ci la sred/ gang gis 'khor ba de btsal bas gti mug tsam ste rang bzhin med do/ /dpyad na gson pa'i 'jig rten gang yin te med pas so/ /gang zhig 'dir 'chi bar 'gyur te/ gang zhig byung bar gyur/gang 'byung bar 'gyur te/ 'das pa la sogs pa ltos pa can yin pas so/ /gnyen dang bshes gang zhig gang gi yin/ gang las mi dge ba dang srid par 'chi ba'o/ /thams cad nam mkha' dang 'dra ba bden pa'i don goms pa'i khyad par gyi mthar thug las byung ba rnal 'byor pa'i ye shes la snang ngo //de bas de bzhin du bdag 'dra ba gzhan gyis kyang de kho na nyid the tshom med par gzung bar bya'o/ /gang mi shes pas byis pa rnams 'thab pa'i rgyus rab tu 'khrug spro ba'i rgyus dga' bar byed do/ /mya ngan dang / ngal ba dang / sgyid lug dang /phan tshun du gcod pa dang 'bigs pa la sogs pa'i sdig pas bdag bde bar 'dod pa rnams tshegs chen pos 'tsho ba'o/ /de ltar zhe sdang dang 'dod pa la sogs pas ngan spyod byas te shi nas mi bzad sdug bsngal ngan song du yun rings ltung ste/ las zad na yang dang yang du bde 'gror 'ongs shing bde ba mang po spyad nas so//'dod pa dang gzugs dang / gzugs med kyi srid pa la nye bar 'tshe ba rnam pa sna tshogs pa 'byung ste/ mi shes pa'i dbang gis so/ /srid pa der ni de nyid ma yin pa gzugs la sogs pa 'di 'dra rmongs par byed pa dang / de'i don du phan tshun du 'gal ba 'byung ste/mu bzhi dang bral ba'i de nyid mi rtogs pas so/ /der yang dpe med cing mi bzad pa'i sdug bsngal rgya mtsho mtha' las 'das pa dang / der ni de ltar brtson 'grus chung zhing der ni tshe yang thung ba nyid do/ /gson pa dang nad med pa la phan pa'i bya ba dang / bkres pa dang / skom pas ngal ba dang /gnyid dang / phyi nang gi 'tshe ba dang / byis pa dang 'grogs pas dgos pa med par dus 'da' bar mi bya'o/ /de bas tshe ni don med par myur du 'da' la chags pa dang bral ba'i rnam dpyod shin tu rnyed par dka'/ chags pa dang bral kyang ting nge 'dzin gyi dgra g.yeng ba dgag pa dka'o/ /de'i steng du ngan song chen por ltung bar byed pa'i ched du bdud brtson par byed/der yang rgyang pan pa dang dpyod pa pa la sogs pa lam log pa mang bas the tshom spong ba dka'o/ /de ltar shi nas slar dal 'byor rnyed par dka' ba dang / sangs rgyas 'byung ba rnyed pa de bas kyang dka' la 'dod chags la sogs pa nyon mongs pa'i tshogs kyi chu bo bzlog par dka'o//de bas kye ma sdug bsngal brgyud par 'gyur/ gcig las thar kyang gzhan du ltung ba'i phyir ro/ /slar gzhan gyi sdug bsngal gyis sdug bsngal bas bshad de/ de ltar bshad pa'i rim pas phan pa dang gnod pa mi shes pas gong nas gong du yongs su gdungs pa'i sdug bsngal gyi chu bo la gnas pa/ma rig pas long bas rang gi sdug bsngal mi mthong ba la/ kyi hud mya ngan bya bar 'os/ dpe bshad de/ ji ltar blo rgod pa 'ga' zhig yang yang khrus byas nas grang ba'i gdung bas/ yang dang yang du me la 'jug pa ltar sems can 'di dag kyang sdug bsngal gyi me 'bar bas bzung yang bdag nyid bde bar rlom pa bzhin gnas so//rang nyid bag med pa mi mthong bar bshad de/ de ltar la sogs pa'o/ /'chi ba dang rgas pa med pa'i rol pa bzhin du spyod pa ci dgar gnas pa rnams la/ rgas pa dang na ba la sogs pa 'jigs su rung ba bcos su med pa'i 'chi ba sngon du 'gro ba mi bzad pa 'ong bar 'gyur ro//ji ltar rgyal po la gdams pa'i mdo las gsungs pa/ phyogs bzhi nas ri bzhi bu ga med pa/ sra ba nam mkha' reg cing / sa gzhi rmo zhing 'ong ba gang la brgyugs te 'bros pa sla ba ba ma yin/de ltar rgas pa dang / na ba dang / gdung ba dang / 'chi ba bzhi/ dar la bab pa dang / nad med pa dang / phun sum tshogs pa dang / gson pa rnams 'joms shing 'ong bar 'gyur ro zhes bya ba la sogs pa'o/ /de dag gi sdug bsngal zhi ba'i phyir smon lam byed de/ de ltar la sogs pa'o//sdug bsngal kho na med de/ dpe gdungs pa rnams la/ bsod nams kho na sprin te/ gdung ba sel bas so/ /de las byung ba bdag gi bde ba'i yo byad gos dang zas la sogs pas bdag nam zhi bar byed par 'gyur/ mngon par mtho ba bshad nas/ nges par legs pa bshad de/nam zhig la sogs pa'o/ /dngos por dmigs pa'i lta ba rnams la tshig dang rtog pa'i yul du ma gyur pa'i stong pa nyid kun rdzob kyis nam ston par 'gyur/ ye shes kyi tshogs bshad nas/ bsod nams kyi tshogs bshad de/ sbyin pa la sogs pa bsod nams kyi tshogs gus pas 'khor gsum du rang bzhin med pa yang ngo //shes rab bstan pa'i le'u ni phung po ste/ de'i dgongs pa'i 'grel pa khyad par gsal byed ces bya ba dgu pa'o// //yongs su bsngo ba bshad de/ bdag gi la sogs pa'o/ /byang chub ni yon tan dang skyon ni 'phel ba dang 'grib pa'i mthar thug la gnas pa/de kho na nyid kyi shes rab dang thams cad mkhyen pa nyid de/ de'i slad du spyod pa ni sbyin pa la sogs pa goms pa ste/ de la 'jug pa byang chub tu sems bskyed pa la sogs pa rnams dgu gang gis de ni de bzhin no/ /de'i khyad par du bsams pas dge ba bdag la gang byung ba des skye bo thams cad byang chub spyod pa kho na rgyan/tshigs bcad thams cad blo la len pa dang don gyis de'i don sgom pa'i phyir de snying la gnas pas de gang gi yin pa de bzhin no/ /thugs rjes bshad de/ phyogs la sogs pa'o/ /lus sems kyi gnod pa can lus kyi bde ba reg pa'i rgya mtsho sems kyis yid bde ba'i rgya mtsho thob par shog//byang chub sems dpa'i bde ba ni zag pa med pa ste/ sems can grol ba zhes bya ba la sogs pas bshad pas so/ /dmyal ba ni yang sos dang / thig nag dang / bsdus 'joms dang /ngu 'bod dang / ngu 'bod chen po dang / tsha ba dang / rab tu tsha ba dang / mnar med de brgyad tsha ba'i dmyal ba'o/ /so thams thams pa dang / kyi hud smra ba dang / a chu sgrogs pa dang / chu bur dang / chu bur chen po dang / ut+pal ltar gas pa dang / pad+mo ltar gyes pa dang / pad+mo ltar cher gyes pa ste grang ba'o//zag pa med pa'i bde ba 'di la yod pas bde ba can/ sa la rab tu 'jug pa kho na der skye ba'o/ /byang chub sems dpa' kho na sprin chen po ste/ des snying brtse bas tsha ba'i dmyal ba la chu bsil ba'i char phab pas so/ /de ltar grang ba'i dmyal bar shin tu dro ba'i 'od zer spros pas so//nye ba'i dmyal ba bshad de/ ral gri dang / mda' dang / mdung dang / nus pa la sogs pa'i lo ma can ni lha'i kun dga' ra ba dga' tshal ltar sdu gur shog /ku tra ni las kyi sgyu mas kha thur du bltas pa/ rnon po sor bcu drug pa/ 'bar ba lcags kyi tsher ma can shal ma ri'i sdong po nye ba'i dmyal ba shal ma ri'i nags la gnas pa rnams ni/chos dang mthun pa 'dod pa'i don ster ba'i lha'i yul na gnas pa'i dpag bsam gyi shing la gnas par gyur cig /bdag gi dge ba'i stobs kyis zhes 'chad par 'gyur ba kun dang sbyar ro/ /dmyal ba'i tshogs dag ni nyams dgar shog /cis she na pad+ma'i dri bsung dang ldan pa'i mtsho dang / thing ril la sogs pa'i skad snyan 'byin pas so/ /byang chub sems dpa'i rdzu 'phrul gyi mthus nye ba'i dmyal ba me ma mur la sol ba'i phung po 'bar ba ni gzi brjid 'bar bar nor bu'i phung por shog /lcags kyi sa gzhi me 'bar ba shel gyi sa gzhi ru gyur cig /gang la sems can 'dus pa cher gdungs pas 'joms par byed pa'i dmyal ba'i ri rnams ni/ mchod pas brgyan pa rgyal ba gnas pa'i gzhal yas khang du dmyal ba pa rnams la snang bar gyur cig /me 'bar ba bsil ba'i char dang / rdo ba tsha ba'i char dang /mtshon gyi char ni ding nas brtsams te/ log par lta ba rnams kyi mgor me tog gi char du snang bar shog /'dir brnab sems kyis gzhan gyi nor la 'dod pa mi nyams pas dmyal bar nor gyi phung po mthong nas brgyugs pa rnams phan tshun du 'thab pa ni brtse ba'i phyir me tog 'phen par shog /dmyal ba'i 'obs 'bar ba'i zangs ma'i khu ba'i chus gang ba'i nang du nub pa'i sems can sha kun zhig pa/ me tog kun da ltar dkar ba'i rus pa'i lus can ni bdag gi bsod nams kyis lha'i lus thob nas lha'i bu mo rnams dang / lha yul gyi chu bo gang gA'i chu la rtse zhing gnas par gyur/chu bor gnyi ga mtshungs so/ /dmyal ba 'dir gshin rje'i pho nya dang / khwa dang / bya rgod rnams 'jigs su rung ba skrag cing phyag na rdo rje mthong bar gyur cig /des dmyal ba pa rnams sdug tu mi 'jug /sha dang rkang mar la sogs pa'i du ba gyen du rgyu bas byas pa'i mun pa/phyogs kun du 'joms pa'i 'od zer yid du 'ong ba dga' ba dang bde ba skyed pa dmyal ba rnams kyis gyen du bltas pas mthong nas 'od zer 'di su'i yin bltas pas/ nam mkha' la phyag na rdo rje gzi brjid 'bar ba mthong nas/ rdzu 'phrul chen po de la dang ba'i shugs kyis rnyog pa med pa bzhin du/dmyal ba las de dang lhan cig tu 'grogs par shog /'phags pa spyan ras gzigs kyi mthus dmyal ba la dri bzangs kyi chu dang 'dres pa pad+ma'i char 'bab par shog /des chil chil sgrogs shing dmyal ba'i me 'joms pa mthong bar gyur cig /de bas 'di yin zhes bde bas tshim pa dmyal ba pa rnams kyis gang las byung mi shes par thugs rje chen po mthong bar gyur cig /'jam dbyangs mthong nas dmyal ba pa rnams phan tshun du 'bod de/ kye grogs bdag ding nas brtsams te 'jigs par ma byed myur du tshur shog /bdag cag gson pa nyid/grol ba nyid gang gi phyir gzhon nu zur phud lnga dang ldan pa mi 'jigs sbyin pa'i 'od zer can bdag cag gi gan du 'ongs gang gi mthus sdug bsngal thams cad bral/ dga' ba'i shugs rnams rab tu 'jug /yang dag par rdzogs pa'i byang chub tu sems byung / skye bo thams cad skyob pa'i phyir ma lta bu'i snying rje skyes so//khyed cag steng du 'di la ltos shig /lha'i yul nas babs pa lha brgya phrag du mas cod pan gyis zhabs kyi pad+ma la mchod pa/ 'u cag la brtse bas spyan brlan pa lha rnams kyis ma chod pas dbu la me tog du ma'i tshogs kyi char 'bab pa/ lha mo stong phrag du mas 'jam dpal gyi bstod pa sgrogs pa dang ldan pa/ yid du 'ong ba gzhal yas khang du mas nye bar spras pa/ 'jam dbyangs mthong nas da ni grogs dag tshur shog la sogs pa'i dmyal ba rnams ku co 'don par shog /de ltar gzhung brtsams pa las byung ba'i bdag gi dge bas kun tu bzang po la sogs pa nyon mongs pa dang shes bya'i sgrib pa dang bral ba/sa bcu'i byang chub sems dpa' rnams kho na sprin bde bar reg pa/ bsil ba dri bzang ba'i rlung dang char 'bebs par mthong nas dmyal ba rnams mngon par dga' bar gyur cig /sdug bsngal mi bzod cing slar yang bshad de/sreg pa dang gcod pa dang 'bigs pa la sogs pa'i tshor ba mi bzad pa dang / gshin rje'i pho nya rnams la 'jigs pa dmyal ba rnams kyi sdug bsngal zhi bar gyur cig /de dang der gnas pa dmyal ba dang yi dags dang dud 'gro las grol bar gyur cig / chen po kun gyis chung ba kun za ba/ chung ba mang po 'dus pas che ba yang srid/ de'i 'jigs pa dud 'gro rnams la med par gyur cig /bkres skom gyi sdug bsngal dang bral zhing bde ba dang ldan pa/ yi dags rnams ni sgra mi snyan gyi mi rnams bzhin du tshe lo stong phrag gcig pa/dus ma yin par 'chi ba dang bral ba/ ma rmos pa dang ma btab pa'i sA lu dang / dpag bsam shing la sogs pa phun sum tshogs pa dang ldan par gyur cig /'jig rten dbang phyug gi phyag las 'bab pa bdud rtsi'i rgyun/ snying rje'i rgyu mthun brgya phrag du mas khrus byas pas tshim par gyur cig /yi dags rnams bsil bar gyur cig /mi'i ris la 'ang long ba rnams kyis gzugs mthong ba dang / 'on pa rnams kyis sgra thos pa dang / sbrum ma rnams sangs rgyas kyi yum bzhin du na tsha med par btsa' bar shog /mi rnams kyis kyang gos la sogs pa bde ba yang mi phan pa mi rung bas gang gang 'dod pa'i phan pa thams cad thob par gyur cig /rgyal po dang chom rkun la sogs pas 'jigs pa rnams 'jigs pa med pa dang / pha ma dang bu la sogs pa'i sdug bsngal gyis gdung ba rnams yid bde bar 'gyur ba dang /phyi nang gi gnod pas yi chad pa rnams kyang yid sos pa de bas brtan pa'i bde ba dang ldan par gyur cig /tshad pa'i nad la sogs pa las grol bas nad med pa dang / bcings pa sna tshogs pa las grol ba dang / phyi nang gi stobs thob pas stobs dang ldan pa dang /phan tshun du sdong ba dang bral zhing brtan par gyur cig /'gron po la sogs pa go sla'o/ /gru chen ni gzings la sogs pa'o/ /ngogs ni rgya mtsho la sogs pa'o/ /mya ngan ni lam bgrod par dka' ba'o/ /lam gol ni log pa'o/ / gnyid du song ba dang / chang la sogs pas myos pa dang / rab tu myos pa ni g.yeng ba che ba la/ rngon pa dang / nags dang / dgras bgrod par dka' ba las mgon med pa dang / byis pa dang / rgan po rnams la lha yis bsrung bar shog mi khom pa ni sngar bshad do//dad pa ni mos pa ste/ bsod nams dang ni 'gyod pa med/ /yid bde ba dang bde ba che/ /nyam nga med cing brtan pa dang / /khyad par du ni 'gro ba dang / /chos rnams mngon par rtogs pa dang / /bla na med pa rang gzhan don/ /myur du mngon par shes pa dag /lhag par mos pa'i phan yon no/ /shes rab kun rdzob de nyid don/ /sems can kun don spyod yul can/ /sa la 'jug par byed pa dang / /sangs rgyas chos rdzogs byed pa dang / /sangs rgyas bya ba byed pa'i phyir/ /bya ba dag la ma 'khrul ba/ /ji lta bar ni yongs shes nas//ting 'dzin la gnas grol byed pa/ /don dam gsal bar byed pa dang / /chos kyi bdag med rtogs pa dang / /shes bya'i sgrib pa dag pa'i thabs/ /rtog pa med cing the tshom bral/ /sa bon las byung snying rje ni/ /rang gi sa bon las byung ba'i/ /mi mthun phyogs kyis ma bcom na//shin tu sems kyi bdag nyid 'gyur/ /de bas rang gzhan sdug bsngal me/ /'joms par byed pa bdud rtsi che/ /snying rje goms pa byang chub kyi/ /rgyu yin pa ni nges pa'o/ /'gro ba lo tog phun tshogs kyi/ /thog mar sa bon de med na/ /blo ldan rab tu mi 'jug la//byang chub sems ni ring ba'o/ /'gro ba bdag med shes nas su/ /mi brtan sdug bsngal gsum gyis gzir/ /chos la dmigs pa'i snying rje ni/ /rab tu 'phel 'gyur chu bzhin no/ /skad cig re re snying rje'i chu/ /'debs pa med na nges par ni/ /bsod nams tshogs ni mi rdzogs shing //byang chub dman par ltung bar 'gyur/ /tha mar mi dmigs yun rings su/ /long bya lo thog smin pa bzhin/ /'gro ba nam mkha' bzhin mthong kyang / /sngar rtogs shugs kyis 'jug par 'gyur/ /de dag dang ldan pa gzugs dang ba 'dren pa dang /tshul khrims phun sum tshogs pa dang / rtag tu tshe rabs dran pas sdig la 'dzem pa'o/ /nam mkha' kho na mdzod gang gi yin pa de ni de bzhin no/ /'dod pa bzhin du nam mkha' las blangs shing sbyin pa gtang bas so/ /sems can la sogs pa go sla'o/ /bud med 'tshang mi rgya bas de ltar bshad de/bud med skye la smod pa gang / /chags pa chung la tshul khrims bzang / /rtag tu skyes par skye bar 'dod/ /bud med de ni skyes bur 'gyur/ /ma rabs ni rigs la sogs pa la'o/ /nga rgyal ni nyon mongs pa la sogs pa yin pas so/ /bdag gi la sogs pa tshigs bcad bzhi go sla'o//gyo mo ni rdza'i bum pa chag pa'i dum bu rnams so/ /chos bzhin byed pa la 'jug pa'i rgyu yin pas 'khor ba la sogs pa go sla'o/ /sems can yongs su smin par bya ba'i phyir sangs rgyas kyi byin rlabs kyis bya la sogs pa las chos ston par 'byung ngo //de dag la sogs pa tshigs bcad lnga go sla'o/ /las su rung ba ni bsam gtan nus pa'o/ /rab tu byung ba ni thar pa'i grong khyer du 'jug pa'i phyir khyim nas byung ba'o/ /tshul khrims 'chal pa la sogs pa tshigs bcad drug go sla'o/ /se rab dga' ba thob par du//zhes gsungs pas gzhung 'di ni dang po nyid du mdzad par nges/ ston pa'i dus su yang gzhung ma rdzogs par nam mkha' la gshegs pa'i phyir ro/ /'jam pa'i dbyangs dang mjal bas dus de nyid du sa dang po thob pa'o/ /bdag ni kha zas kyi nas kyang la sogs pa tshigs bcad drug go sla'o//bstan pa ni lung dang rtogs pa gnyis te/ nyon mongs dgra rnams ma lus 'chos pa dang / /ngan 'gro srid las skyob pa gang yin pa/ /'chos skyob yon tan ldan phyir bstan bcos te/ /gnyis po 'di dag gzhan gyi lugs la med/ /ces gsungs pa'i phyir ro//gang gi drin gyis zhes bya ba la sogs pa ni go sla'o/ /yongs su bsngo ba'i le'u'i dgongs pa'i 'grel pa khyad par gsal byed ces bya ba bcu pa rdzogs so// //dam chos dri med 'o ma'i rgya mtsho bsrubs pa'i snying por gyur pa bdag med gnyis/ /rang gis shes nas skye bo sdug bsngal gyur pa rnams la byang sems phan yon gtam//bla med yan lag bdun dang bdag nyid 'bul ba dang ni dkon mchog gsum mchod pas/ /byang chub sems bskyed gnyis kyi cho ga bslab bya dang bcas 'dir ni gsungs pa yin/ /longs spyod dus gsum dge ba bdag nyid 'bul ba tshul khrims rnyog med bzod pa gsum//brtson 'grus mi mthun phyogs bral stobs kun dang ldan bsam gtan snying rje ye shes ldan/ /shes rab gang zag chos kyi bdag med yul can gang yin de bsngo byang chub tu/ /gzhan yang gang dag nyan thos lam nas dbu mar 'jug par 'byung mdza' 'di yin no//rigs pa ngo mtshar ba la mkhas/ /dam pa'i gzhal bya rgya mtsho che/ /drang pos phra bar 'dren pa po/ /zhi lha'i zhabs la phyag 'tshal lo/ /rgyal ba mtha' yas mnyes mdzad cing / /shes rab snying rje yun rings sbyangs/ /zhi ba'i lhas mdzad gzhung gi 'grel/ / brtsams dges 'gro rnams rgyal bar shog /slob dpon 'phags pa dpal zhi ba'i lha'i zhabs kyis mdzad pa byang chub sems dpa'i spyod pa la 'jug pa'i dgongs pa 'grel pa khyad par gsal byed ces bya ba rig pa'i 'byung gnas dbus 'gyur 'chang gi shar phyogs b+ha ren drar rgyal rigs las 'khrungs shing /sa bcu'i dbang phyug rje btsun 'jam pa'i dbyangs kyis rjes su bzung ba/ rig pa'i gnas rnam pa lnga la mkhas shing tshul khrims dri ma med pa'i rgyan gyis spras pa/ rim pa gnyis kyi don la rgyud legs par sbyangs pas lam gyi rtogs pa gong nas gong du cher 'phel ba/rtsod pa'i dus kyi thams cad mkhyen pa gnyis par grags pa ma 'ongs pa'i sangs rgyas kha che'i paN+Di ta chen po bsod snyoms pa shAkya shrI b+ha dra la sogs pa paN grub du ma'i legs bshad kyis/ thugs kyi bum pa legs par bltams pas phyogs phyi nang gi theg pa ma lus pa la mnga' brnyes shing /sgra dang tshad ma'i mig gis shes bya'i de nyid gzigs pa/ rgya gar shar phyogs dza ga ta la bi ha ra'i paN+Di ta chen po shrI bi b+hU ti tsan+d+ras mdzad pa rdzogs so// //paN+Di ta chen po de nyid kyis ru lag gtsang stod 'bring mtshams kyi sa'i cha dpal rgya rtags kyi gtsug lag khang du rang 'gyur du mdzad pa'o// //