CLOSE WINDOW

D3877
བོད་ཡིག

@/ /byang chub sems dpa'i spyod pa la 'jug pa'i shes rab le'u dang bsngo ba'i dka' 'grel bzhugs// @##/ /da ni sems mnyam par gzhag pa'i gang zag des go 'phang khyad par can thob par bya ba'i don du shes rab bskyed par bya ba'i phyir le'u brgyad pa gsungs te/ de la gang la brten te bskyed par bya zhe na/bsam gtan gyi le'ur zhi gnas kyi tshogs la gnas te/ zhi gnas bsgom par bya ba nyid du bsdogs pa 'di dag thams cad kyang gang gi don du bsdogs she na/ bdag dang gzhan gyi rgyud la bskyed pa'i don du bsdogs te/ gong du bsam gtan bstan pa'i le'ur/ zhi gnas rab tu ldan pa'i lhag mthong gis//nyon mongs rnam par 'joms par shes byas nas/ /thog ma zhi gnas btsal bya zhes de skad du bsdogs pa de bas na bdag dang gzhan gyi rgyud la mya ngan las 'das pa dang / bde ba 'dod pas de thob par bya ba'i don du shes rab bskyed par bya'o zhes bya ba'i don to/ /de la mya ngan las 'das pa zhes bya ba ni bdag gi don te/bde ba ni gzhan gyi don to/ /yang mya ngan las 'das pa ni spangs pa'o/ /bde ba ni ye shes so/ /yang na mya ngan las 'das pa ni nges par legs pa'o/ /bde ba ni mngon par mtho ba'o/ /de ltar bsam gtan dang ldan pa des mya ngan las 'das pa dang bde ba thob par bya ba'i don du shes rab gang bskyed par bya snyam pa la/don dam dang ni zhes bya ba la sogs pa smos te/ 'dis ni yul bden pa gnyis la dmigs pa'i shes rab de bskyed par bya'o zhes bstan te/ bshad ces bya ba ni de bzhin gshegs pas so zhes bya ba ni tshig gi lhag ma'o//de dag gi so so'i mtshan nyid ji lta bu yin snyam pa la/ don dam zhes bya ba la sogs pa smos te/ don dam blo yi spyod yul min/ /zhes bya ba la/ blo zhes bya ba ni mtshon pa tsam du zad kyi sgra'i yul ma yin par yang shes par bya ste/ ji skad du mdo las don dam pa'i bden pa ni gang la sems rgyu ba yang med na yi ge rnams lta smos kyang ci dgos zhes 'byung ba dang /yang lha'i bu don dam pa'i bden pa ni tha snyad thams cad las yang dag par 'das te/ ma skyes pa ma 'gags pa brjod pa dang / brjod par bya ba dang / bral ba shes pa dang / shes par bya ba dang / bral ba'o zhes gsungs pa'i phyir ro//'on te de don dam pa de ji ltar blo'i spyod yul ma yin snyam pa la/ don dam pa ni rigs pa ji lta ba bzhin du yin la/ rigs pas dpyad na dngos po gang yang ma grub ste/ ji skad du mdo las/ blo yis rnam par gzhigs na ni/ /gzhan dbang med cing brtags pa'ang med/ /ces bya ba la sogs pa gsungs pa dang /'phags pa klu sgrub kyis kyang / gang ci brjod pa thams cad ni/ /ngo bo nyid kyis stong rig bya/ /stong zhes bya ba de yang stong / /'di ltar mi stong yod ma yin/ /zhes gsungs pa dang / bden pa gnyis las kyang / de nyid phyir na de stong min/ /zhes bya ba la sogs pa gsungs pas gang ltar yang ma grub pa'i phyir rigs pas dpyad na blo dang sgras ji ltar yang yul du byar med do//yang na don dam pa zhes bya ba ni gzhan gyi dbang gi mtshan nyid la sgro btags pa'i spros pa rnam par chad pa tsam du zad pas/ de la ni blo dang sgras ji ltar yang yul du byar med de/ dgag pa tsam ni ci yang ma yin pa'i phyir ro//de las bzlog pa blo dang sgra ni kun rdzob yin zhes bya ba ni 'phags pa bden pa gnyis bstan pa las/ ji skad du/ lha'i bu gal te don dam par ni don dam pa'i bden pa lus dang / ngag dang yid kyi yul gyi ngo bor gyur na ni don dam pa'i bden pa zhes bya ba'i grangs su mi 'gro'o/ /de kun rdzob kyi bden pa nyid kho nar 'gyur/lha'i bu don dam par na don dam pa'i bden pa ni rnam pa thams cad mkhyen pa'i ye shes rnam pa thams cad kyi mchog dang ldan pa'i yul las kyang yang dag par 'das pa yin no zhes gsungs pa dang / 'phags pa blo gros mi zad pas bstan pa'i mdo las kyang / de kun rdzob kyi bden pa gang zhe na/ji snyed 'jig rten gyi tha snyad gdags pa dang / yi ge dang / skad dang / brdas bstan pa dag go zhes ji skad gsungs pa lta bu ste/ kun rdzob ni ji ltar snang bzhin yin pa'i phyir ro snyam du bsams pa'o/ /zhib tu ni dbu ma'i bstan bcos gzhan dag las shes par bya ba yin pa'i phyir 'dir rgya ma bskyed do//da ni dngos po'i bdag nyid la log par rtog pa bsal ba'i sgo nas dngos po'i bdag nyid dpyad par bya ba mdor bstan pa'i phyir/ de la zhes bya ba smos te/ dngos po'i bdag nyid bstan ma thag pa de la rnal 'byor pa dang / phal pa dang mthun pas phal pa ste mdo sde pa la sogs pa 'jig rten pa rnams kyis go rims bzhin du gnyis med pa'i tshul dang /gnyis kyi tshul du mthong ste/ de la rnal 'byor spyod pa bas 'jig rten phal pa'i 'dod pa sun 'byin par byed cing 'jig rten phal pa las gong mar gyur pa rnal 'byor pa'i 'dod pa de ni de las kyang gong mar gyur pa dbu ma pa'i lta ba'i khyad par gyis sun 'byin par byed pas de'i phyir mtshan nyid la dpyad par bya'o zhes bya ba'i tha tshig go//da ni re zhig de nyid rgyas par bshad pa'i dbang du byas nas/ 'on te 'jig rten phal pa'i 'dod pa ni gang / de la rnal 'byor spyod pa pas ni ji ltar sun 'byin par byed ce na/'jig rten pa yis zhes bya ba la sogs pa smos te/ 'jig rten phal pa mdo sde pa la sogs pas so/ /dngos mthong la zhes bya ba ni gzugs la sogs pa la'o/ /yang dag nyid du 'ang zhes bya ba ni ji ltar snang ba bzhin du phyi rol gyi don nyid yang dag par ro/ /sgyu ma bzhin du zhes bya ba ni de ltar snang ba'o//ji ltar rtsod ce na/ gzugs sogs zhes bya ba smos te/ 'di skad bstan te/ gzugs la sogs pa ni spros pa'i bag chags yongs su smin pa'i dbang gis mngon sum nyid du 'khrul nas de snang gi tshad mas grub pa ma yin te/ de sgrub par byed pa'i rigs pa med pa'i phyir dang / gcig dang du ma la sogs pa'i tshad mas gnod pa'i phyir/ dper na mi gtsang ba la gtsang bar 'dzin pa bzhin no zhes bstan pa yin no/ /'on te de ltar na 'phags pa don rnam par nges pa'i chos kyi rnam grangs las gzugs gang zhe na/ gzugs gang yin pa ci yang rung ste/ de thams cad 'byung ba chen po bzhi dag dang /'byung ba chen po bzhi dag rgyur byas pa'o zhes gsungs pa'i lung dang 'gal lo zhe na/ 'jig rten gzud par zhes bya ba la sogs pa smos te/ 'di skad du 'dul bar 'gyur ba'i skye bo dag gzud par bya ba'i ched du bstan pa yin gyi dngos su yod pa'i phyir bstan pa ni ma yin te/ des na 'gal ba med do zhes bstan pa yin no//ci de lta bu'i dpe mthong ngam zhe na/ sgyu ma lta bu'i zhes bya ba la sogs pa smos te/ ji skad du 'phags pa shes rab kyi pha rol tu phyin pa las/ rab 'byor 'di lta ste/ dper na de bzhin gshegs pa shin tu zhi ba zhes bya bas lung bstan par bya ba'i sems can 'ga' yang ma gzigs nas sprul pa zhig sprul te/mya ngan las 'das so/ /de nas sprul pa des sangs rgyas kyi bya ba byas te/ byang chub sems dpa' dag bla na med pa'i byang chub tu lung bstan te/ yongs su mya ngan las 'das par gyur to zhes gsungs pa'i tshul gyis gdul bya'i rgyud la bsod nams bskyed pa'i phyir sprul pa'i sgyu ma lta bu bstan pa bzhin no//de ltar 'jig rten phal pa'i 'dod pa rnal 'byor spyod pas ji ltar sun 'byin pa'i tshul bstan nas/ da ni rnal 'byor spyod pa'i 'dod pa dbu mas ji ltar sun 'byin pa bstan pa'i phyir/ gal te sems can zhes bya ba la sogs pa smos te/ gal te sems can zhes bya ba 'di dag kyang don dam par rang bzhin med pa yin na sgyu ma bzhin du shi ba'i rjes la yang mi skye bar thal bar 'gyur ba zhig na de lta ma yin te/skye ba'i phyir don dam par yod do zhe na/ thams cad kun rdzob yin pas kun rdzob thams cad 'khor ba'i nges pa med pa'i phyir/ rkyen rnams rgyus ni zhes bya ba la sogs pa smos te/ gang gi tshe gnyen po ye shes ma skyes pas rgyu las dang nyon mongs pa ma log pa'i tshe ni 'bras bu sdug bsngal gyi phung po mi ldog ste 'khor bar yang yin la/ gang gi tshe gnyen po skyes pas mi mthun pa'i phyogs las dang nyon mongs pa 'gags te 'bras bu sdug bsngal gyi phung po mi 'byung ste/ mi 'khor bar 'gyur ba de'i tshe ni skye 'gag gi mtshan nyid kun rdzob yin yang 'khor ba ma yin pas nges pa med do zhes bya ba'i don to//yang rnal 'byor spyod pa dag na re/ gang tshe zhes bya ba la sogs pa smos te/ 'di skad du khyod kyis gong du/ don dam blo yi spyod yul min/ /blo dang sgra ni kun rdzob yin/ /zhes smras pas don dam par sems nyid kyang ngo bo nyid med pa yin la/yul ni ji ltar snang ba bzhin du yod do zhes khas blangs pa yin pas de'i dam bcas pa la phan tshun 'gal ba'i skyon chags te/ ji ltar zhe na/ gang gi tshe shes pa nyid kyang don dam par med pa yin na ni yul sgyu ma lta bu de shes pa gang la snang nas ji ltar snang ba nyid du yod/'on te yul ji ltar snang ba bzhin du yod na de'i tshe gang la snang ba'i shes pa nyid kyang yod pas shes pa don dam par med pa nyid du mi 'thad do zhe na/ nyes pa 'di ni khyod la yang mtshungs so snyam nas/ gang tshe zhes bya ba la sogs pa smos te/ khyed rnal 'byor spyod pa dag chos thams cad sems tsam nyid du khas len pa de'i tshe yul sgyu ma tsam yang med pa'i phyir shes pa don dam par yod par mi 'thad la gang gi tshe shes pa don dam par yod pa yin na ni/de'i tshe yul sgyu ma tsam yang med pa mi 'thad de/ shes pa ni zhes bya ba la ltos pa yin pa'i phyir khyed la de yang ma nges pa nyid du bstan pa'i phyir/ji srid ces bya ba la sogs pa smos te/ dper na sgyu ma'i skyes bu yang rkyen tshogs pa'i dbang gis don dam par med kyang snga ma 'gags pa'i rjes la yang skye ba de bzhin du 'dir yang de dang 'dra bas skye ba'i phyir yang dag par yod ces bya ba de ni ma nges pa nyid do snyam du bsams pa nyid do//'o na de ltar don dam par ngo bo nyid med pa yin na/ de'i tshe lo brgya 'am stong la sogs par yun ring du gnas par mi rung ba zhig na/ da ltar ni sems can zhes bya ba'i dngos po 'di yun ring du gnas pa nyid kyi phyir don dam par yod do zhe na/ de yang ma nges pa nyid du bstan pa'i phyir/rgyun ring tsam gyis zhes bya ba la sogs pa smos te/ res 'ga' sgyu ma'i skyes bu la yang sman dang sngags la sogs pa'i stobs kyis yun ring du gnas pa srid pa'i phyir des na yun ring du gnas pa nyid kyi phyir/ don dam par yod ces bya ba de yang ma nges pa'i skyon chags pa nyid do snyam du bsams pa'o//'on te de ltar rang bzhin med pa nyid yin na/ sgyu ma'i skyes bu bzhin du srog bcad pas sdig pa mi 'byung bar thal bar 'gyur ba zhig na sems can zhes bya ba'i dngos po 'di ni srog bcad pa las sdig pa 'byung ba'i phyir don dam par yod do zhe na/ de yang ma nges pa nyid du bstan pa'i phyir sgyu ma'i skyes bu zhes bya ba la sogs pa smos te/'di snyam du sdig pa 'byung ba'i phyir don dam par yod par ni ma nges kyi 'o na ci zhe na don dam par med kyang kun rdzob tu srog yod pa'i phyir/ de bsad pa dang / ma bsad pa'i rgyus ci rigs par phan gnod 'byung ba yin pas de bas na de bsad pa'i rgyus sdig pa 'byung ba yin zhes bsams pa'o//'o na de ltar sems can rnams sems yod pa nyid kyi phyir don dam par yod pa yin gyi/ gal te don dam par med pa nyid yin na ni sems nyid kyang 'byung du mi rung ste/ dper na sgyu ma'i skyes bu bzhin no zhe na/ don dam par med kyang rkyen tshogs pa'i dbang gis kun rdzob tu 'byung ba mi 'gal te/dper na sgyu ma de nyid don dam par med kyang rkyen tshogs pa'i dbang gis rta dang glang po la sogs pa 'bras bu mi 'dra ba sna tshogs 'byung ba lta bu yin pas/ de bas na khyod kyi sems dang ldan par 'byung ba'i phyir/ don dam par yod ces bya ba de yang ma nges pa nyid do snyam du bsams nas/sngags la sogs pa zhes bya ba la sogs pa smos te/ 'di skad bstan to/ /sgyu ma'i rgyu rkyen sngags la sogs pa la nus pa med pa'i phyir sems dang mi ldan par 'byung ba yin gyi/ don dam par med pa'i phyir ni ma yin la sems can rnams la ni rgyu rkyen la nus pa yod pas sems dang ldan par 'byung ba yin gyi don dam par yod pa'i phyir ni 'byung ba ma yin te/de bas na ma nges pa nyid do zhes bya ba'i don to/ /'on te sems can rnams la don dam par med kyang sems 'byung na ni de'i tshe khyad par med pa de bzhin du sgyu ma la yang ci'i phyir mi 'byung zhe na/ rgyu rkyen gyi nus pa mi 'dra ba'i phyir te/de bas na sna tshogs rkyen las zhes bya ba smos te/ gal te rgyu rkyen gcig gis 'bras bu mtha' dag skyed nus pa yin na ni/ de tshe sgyu ma la yang sems byung bar 'gyur ba zhig na/ de mi srid pa'i phyir ro zhes pa'i don to/ /gzhan gyis gal te zhes bya ba la sogs pa smos te/spong lugs kyi don dam par ni mya ngan las 'das pa yin zhing bzlog nas kun rdzob ni 'khor ba nyid ma yin nam/ gang gi tshe khyed dbu ma pas ji skad bshad pa ltar don dam par ni skye 'gag thams cad dang bral ba yin zhing bzlog nas skye 'gag gi mtshan nyid thams cad ni kun rdzob yin par grub pa de lta na ni/de'i tshe sangs rgyas kyang gnyen po skye ba dang mi mthun pa'i phyogs 'gag pa'i mtshan nyid kyi kun rdzob yin pas 'khor ba nyid du thal bar 'gyur ba'i phyir byang chub kyi spyod pa don med par 'gyur ro zhe na/ nges pa med de skye 'gag phan tshun 'gag cing skyon 'di 'byung ba yin gyi/ gang gi tshe kho bo la ni shes pa don dam par med kyang sgyu ma tsam du gnas pa de la yul sgyu ma de lta bu snang ba'i phyir nyes pa med do zhes bya ba'i tha tshig go//gzhan gyis phan tshun 'gal ba'i nyes pa de nyid las ma grol ba nyid du bsgrub pa'i phyir/ gang tshe sems nyid ces bya ba la sogs pa smos te/ de ltar yul dang sems gnyis ka sgyu ma nyid du khas len pa ni gnyi ga yang don dam par rang bzhin med pa'i phyir gang zhig gang la snang ste/ de lta bas na yul ji ltar snang ba bzhin du yod pa shin tu yang mi 'thad pas phan tshun 'gal ba'i nyes pa so na gnas la/ kho bo cag ni yul sgyu ma tsam 'di med kyang rang rig pa'i sgo nas shes pa nyid du khas len pas dam bcas pa la phan tshun 'gal ba'i nyes pa mi mtshungs so zhe na/slob dpon gyis nyes pa de nyid so na gnas par bsgrub pa'i phyir/ ral gri so ni zhes bya ba la sogs pa smos te/ ji ltar ral gri so de nyid la bcad par bya ba dang / gcod par byed pa gnyis med pa'i phyir rang gis rang mi gcod pa bzhin du shes pa'i ngo bo de yang rig bya rig byed gnyis med pa'i phyir/ rang gis rang rig pa mi 'thad de/ de bas na yul khas mi len pa'i phyir/ shes pa don dam par yod pa nyid du mi 'thad pa'i nyes pa so na gnas la/ gang gi sgyu ma lta bu zhes bya ba 'dis ni ri bong gi rwa bzhin du thams cad du med pa'i don ni ma yin gyi/snang du zin kyang don dam par med pa'i don yin pas/ de bas na yul dang shes pa gnyis ga don dam par med kyang snang tshod tsam du yod pa yin pa'i phyir yul sgyu ma lta bu de ji lta ba bzhin du yod pas nyes pa so na gnas pa ma yin zhes bya ba'i don to//gzhan gyi shes pa gcig po de la rig bya dang / rig byed gnyis kyi bdag nyid ma grub kyang / rang rig pa nyid du gzhung gzugs pa'i phyir/ gal te mar me zhes bya ba la sogs pa smos te/ ji ltar mar me rang gi ngo bo la rang gsal bar bya ba dang /gsal bar byed pa gnyis ma grub kyang / gsal bar byed pa'i rkyen nyi ma la sogs pa gzhan la ma ltos par gsal ba'i rang bzhin yin pa'i phyir/ rang gis rang gsal bar byed pa de bzhin du shes pa gsal ba yang rig par bya ba dang / rig par byed pa gnyis med kyang / /rig byed gzhan la mi ltos par rig pa'i rang bzhin yin pa'i phyir tshul gyis rang rig pa yin pa'i phyir/yul sgyu ma tsam med du zin kyang / shes pa don dam par yod pa 'gal ba med do zhe na/ slob dpon gyis dpe nyid ma grub pa'i sgo nas/ de mi 'thad par bsgrub pa'i phyir/ mar me gsal bar byed ma yin zhes bya ba la sogs pa smos te/gal te de ltar mar me de gsal ba'i rang bzhin du khas len na ni/ de'i tshe rang gis gsal bar byed pa shin tu yang mi 'thad de/ ci'i phyir zhe na/ rang gis rang gsal bar bya mi dgos pa'i phyir te/ ji ltar zhe na/ gsal ba'i rang bzhin yin pa'i phyir mun pas bsgribs pa'i mtshan nyid kyi mi gsal ba med pa la/de nyid kyi phyir rang gis rang gsal bar bya mi dgos pas rang gis rang gsal bar byed pa ma yin pa bzhin du/ 'dir shes pa yang rig pa'i rang bzhin yin pa'i phyir/ ma rig pa'i cha shas med la/ de nyid kyi phyir rang gis rang rig par bya mi dgos pas rang gis rang rig par byed pa ma yin te/de bas na rig pa'i rang bzhin yin pa'i phyir/ shes pa rang gis rang rig par byed do zhes bya ba'i khyod kyi gtan tshigs 'di la 'gal ba'i skyon chags pa nyid do zhes bya ba'i don to/ /yan lag gi don brjod par bya ste/ gsal bar byed pa zhes bya ba ni rang gis rang gsal bar byed pa ma yin zhes bya ba'i don te/gsal bar bya mi dgos pa'i phyir ro/ /de nyid ci'i phyir zhe na/ 'di ltar mun gyis bsgribs pa'i mtshan nyid kyi mi gsal ba med pa'i phyir te/ de gsal ba'i rang bzhin yin zhes bya ba'i tha tshig go/ /sngon po dag ni mthun pa'i dpe ste/de bzhin du bai DUr+ya bzhin no/ /shel lta bu zhes bya ba ni sngon po de nyid kyi mi mthun pa'i dpe ste/ ji ltar shel ni rang bzhin gyis sngon po ma yin pa'i phyir ro/ /sngon por byed pa'i rkyen bai DUr+ya la sogs pa la ltos pa yin la bai DUr+ya sngon po nyid ni sngon po'i rgyu la mi ltos te/ ci'i phyir zhe na/dang po nas sngon po nyid du 'dug pa yin pa'i phyir/ de lta bu'i bai DUr+ya sngon po ste/ rang la rang gi sngon por byed de/ sngon por bya mi dgos pa'i phyir rang la sngon por mi byed pa bzhin no zhes bya ba'i tha tshig go/ /yang gzhan gyis shes pa rang rig pa'i bdag nyid du bsgrub pa'i phyir/ rkyen gzhan zhes bya ba la sogs pa smos te/ de ltar rang rig pa'i rang bzhin yin pa'i phyir/ rang rig par byed ces bya ba mi 'thad du zin kyang yul gzugs dang mig gi dbang po la sogs pa rkyen gzhan gyi stobs kyis shes pa de rang rig par byed do zhe na/ khyed kyi lugs kyis chos thams cad sems tsam du 'dus pa yin pas/sems las ma gtogs pa'i rkyen gzhan nyid ma grub pa'i phyir rkyen gzhan gyi stobs kyis kyang shes pa de rang rig par byed pa nyid du mi 'thad do zhes bstan pa'i phyir/ gzugs dang zhes bya ba la sogs pa smos so/ /de ltar gnod par byed pa'i tshad ma'i sgo nas shes pa don dam par yod pa nyid mi 'thad par bsgrubs nas/da ni shes pa don dam par yod pa la sgrub par byed pa'i tshad ma med par bstan pa'i phyir/ mar me zhes bya ba la sogs pa smos te/ mar me gsal bar byed pa yin par ni dbang po'i mngon sum gyi blos nyams su myong ba'i phyir/khas len par rigs na shes pa rang gis rang gsal bar byed pa mngon sum gyi tshad ma gang gis kyang ma grub pa'i phyir rtog pa dang ldan pa rnams kyis khas blang bar mi rigs so snyam du bsams pa ste/ ci'i phyir zhe na/ rtog pa dang ldan pa rnams kyis khas len pa la ni sgrub par byed pa'i tshad mar khyab pa'i phyir zhes bya ba'i don to//'on te mngon sum ji ltar ma grub snyam pa la/ re zhig yid dang dbang po'i mngon sum gyis ni mi 'grub ste/ de gnyis kyis yul ni gzugs dang sgra la sogs pa gzugs can gyi skye mched lnga yin pa'i phyir dang / rang rig pa'i mngon sum gyis kyang mi 'grub ste/de nyid ni bzod dpyod pa'i skabs yin pa'i phyir dang / rnal 'byor gyi mngon sum gyis kyang mi 'grub ste/ tshu rol mthong ba rnams la rnal 'byor gyi mngon sum gyi tha snyad mi 'dogs pa'i phyir ro/ /de bas na rang gis rang gsal bar byed kyang rung mi byed kyang rung ste/ mngon sum gyi tshad mas ma grub pa'i phyir dam bcas kyang mi 'grub po snyam zhes bya ba'i tha tshig go//gal te mngon sum gyis ma grub kyang 'bras bu'i rtags la brten nas skyes pa rjes su dpag pas 'grub po snyam na/ gal te rang rig ces bya ba la sogs pa smos te/ gal te bde ba la sogs par nyams su myong ba'i rang rig pa med na phyis kyang dran pa skye ba'i rgyu rang rig pa zhig yod par rjes su dpag pas 'grub po snyam pa la/don dran pa zhes bya ba la sogs pa smos te/ dran pa'i shes pa skye ba'i sgo nas rang rig pa'i shes pa don dam pa zhig sgrub mi dgos te/ gong du ji skad bshad pa'i tshul gyis rang rig pa don dam pa de ni mi 'grub pa'i phyir ro snyam du bsams pa'o//'on te rang rig pa don dam pa de yod pa nyid du ma grub na phyis dran pa'i shes pa skye ba mi 'thad do zhe na/ don dam pa med kyang rang rig pa kun rdzob tu yod pa'i dbang gis dran pa'i shes pa skye ba'i phyir de dran no zhes gsungs so/ /'on te kun rdzob tu yod pa nyid du yang mi 'thad de/rang bzhin med par khas len pa'i phyir ro zhe na/ 'di ltar zhes bya ba la sogs pa smos te/ mthong ba dang thos pa la sogs pa kun rdzob ni 'dir mi 'gog pa'i phyir dang / 'o na 'dir ci zhig 'gog snyam pa la/ 'dir ni zhes bya ba la sogs pa smos te/'di ni sdug bsngal thams cad 'byung ba'i rgyu dngos por zhen pa dgag pa'i phyir/ yang dag pa'i rang bzhin 'gog go snyam du bsams pa'o/ /da ni yul bden pa gnyis la dmigs pa'i stong pa nyid kyi phyir rnal 'byor bsgom par bya bar bstan pa'i phyir/ sgyu ma lta bu zhes bya ba la sogs pa dri ba'i tshig bkod de/gzhan dag 'di snyam du stong pa nyid du shes pa ni sgrib pa spong ba'i rgyu ma yin pa'i phyir rtog pa dang ldan pa rnams kyis bsgom par mi bya ste/ dper na sgyu ma mkhan la sogs pa bzhin no snyam du sems na/ de byed pa'i zhes bya ba la sogs pa smos te/ yongs su zhen pa 'byung ba'i rgyu ni gnyis te/ nang gi tshul bzhin ma yin pa yid la byed pa ma spangs pa dang / phyi rol na rtag par bya ba'i yul nye bar gyur pa yin pa las/ sgyu ma mkhan la ni de gnyi ga dang ldan pa'i phyir re zhig ma brtags pa'i tshe zhen pa skye ba ni rigs pa yin na gang gi tshe rnal 'byor pa chen po bskal pa grangs med pa gsum gyis bar du stong pa nyid la goms par byas pa ni dngos por zhen pa'i bag chags spong bas chos thams cad lag mthil du skyu ru ra'i 'bru bzhag pa bzhin du gzigs kyang zhen pa mi mnga' ba'i phyir nyon mongs pa mi 'byung bas de bas na sgrib pa spong ba'i rgyu yin pa'i phyir stong pa nyid kyi rnal 'byor bsgom par bya'o zhes bya ba'i don to//'o na stong pa nyid kyi rnal 'byor ji ltar bsgom par bya snyam pa la/ gang gi tshe zhes bya ba la sogs pa smos te/ re zhig gcig dang du ma dang bral ba la sogs pas spyod pa'i dus gang gi tshe gzugs la sogs pa'i dngos po gang zhig med do zhes brtags shing dgag par bya ba'i dngos po yod pa cung zad kyang ma rnyed pa'i dus de'i tshe yod pa nyid du mngon par zhen pa mi 'byung la 'di ltar dgag bya ma grub pa nyid kyis bkag pa yang ma grub par shes pa'i tshe med do zhes bya bar yang mngon par mi zhen pa'i phyir med par zhen pa'i rtog pa nyid kyang spong bar 'gyur ro//de ltar gang tshe dngos po dang dngos po med pa gnyi ga rnal 'byor pa'i blo'i mdun du mi gnas te gzung ba'i cha la mi snang ba'i dus de'i tshe/ rnam pa gzhan gsum pa ni med pa'i phyir cir yang dmigs pa med pa'i sgo nas rtog pa thams cad rab tu zhi bar 'gyur ro zhes bya ba'i don to//'on te de ltar rtog pa mi mnga' na gdul bya rnams la sangs rgyas kyi gzugs kyi skur snang ba mi 'thad do zhe na/ rtog pa mi mnga' yang gdul bya'i bsod nams kyis yid bzhin gyi nor bu dang dpag bsam gyi shing bzhin du snang ba la 'gal ba med do snyam du bsams nas/ yid bzhin nor bu zhes bya ba la sogs pa gsungs so/ /'on te de ltar rtog pa mi mnga' ba nyid yin na sems can gyi don mdzad pa 'gal lo zhe na/ sngar byang chub sems dpa'i gnas skabs kyi rtog pa'i 'phen shugs kyis sangs rgyas nyid la rtog pa mi mnga' yang sems can gyi don mdzad pa mi 'gal te/dper na mkha' lding gi mchod sdong dang 'dra'o snyam nas/ mchod sdong grub pas zhes bya ba smos te/ 'di dag sangs rgyas kyi sa la rtog pa med pa ston pa yin gyi sku dang ye shes nyid kyang mi mnga' bar ston pa ma yin te/ phyi'i don yod par smra ba'i dbu ma'i lugs la de dag ji ltar snang ba bzhin du mi 'gal ba'i phyir dang /rmi lam gyi don la sogs pa yang ji ltar snang ba bzhin khas len pa'i phyir/ de bas na dpe yid bzhin gyi nor bu dang / dpag bsam gyi shing dang / mchod sdong la sogs pa yang rtog pa med bzhin du de dang de ltar snang ba dang / de dang de ltar don byed pa yin gyi/de dag rang nyid kyang med pa ni ma yin pa bzhin no/ /de bas na la la dag na re 'di 'gog par smra ba'i dbu ma yin zhes zer ro zhes grag ste/ bdag gis ni de ltar ma mthong ngo / /des ni sgrib pa spong ba'i rgyu nyid du bstan nas/ da ni thams cad mkhyen pa'i ye shes thob par byed pa'i rgyu yin pa'i phyir stong pa nyid kyi rnal 'byor bsgom par bya ba nyid du bstan pa/nyon mongs pa dang zhes bya ba la sogs pa smos so/ /da ni rang gi sde pa bye brag tu smra ba dag na re/ theg pa chen po ni sangs rgyas thob par byed pa'i lam nyid du dge slong klu sgrub la sogs pas bshad par zad kyi/sangs rgyas kyis gsungs pa ma yin pas de'i phyir bsgom par mi bya'o zhes zer ba dag gi log par rtog pa dgag pa'i phyir/ lam 'di nyid kyis zhes bya ba la sogs pa smos te/ man ngag brgyud pas zhes bya ba ni bcom ldan 'das kyis 'phags pa 'od srungs chen po la gtad/ des kun dga' bo la gtad/ des sha na'i gos can la gtad/ des u pa gub ta la gtad/ des mi tsha ga la gtad ces bya ba la sogs pa gsungs so/ /da ni mtshungs pa nyid du bsgrub pa'i phyir/ khyed kyi gzhung gis zhes bya ba la sogs pa gsungs te/ de lta ma yin na nyan thos pa khyed kyi gzhung gis byang chub thob par byed pa yin par sangs rgyas kyi bka' nyid du yang ji ltar 'grub ste/mtshungs so snyam du bsams pa'o/ /de la yid ches de 'grub na/ /zhes bya ba ni pha rol po dag 'di skad du kho bo cag gzhung de la sangs rgyas kyi bka' nyid du yid ches pa'i man ngag brgyud pas 'grub po snyam na/theg pa chen po la yang yid ches kyis zhes bya ba theg pa chen po la yang sangs rgyas kyi bka' nyid du yid ches pa na man ngag brgyud pa las 'grub pa nyid du shes par gyis shig ces bya ba'i don to/ /gnyi ga 'dod pa bden na ni zhes bya ba ni/ gal te pha rol po 'di snyam du sangs rgyas kyi bka' nyid rnam par gzhag pa ni khyed dang 'u bu cag gnyi gas 'dod pa yin na sangs rgyas kyi bka' nyid du bden pa yin gyi/theg pa chen po ni kho bo cag gis mi 'dod pa'i phyir sangs rgyas kyi bka' nyid du bden pa ma yin no zhe na/ 'o na ni de'i tshe rig byed rnams kyang bden par 'gyur zhes pa ni rig byed kyi tshig rnams kyang dug la sogs pa zhi bar byed pa'i nus pa dang ldan par gnyi gas 'dod pa'i phyir sangs rgyas kyi bka' nyid du thal bar 'gyur ba'i phyir/sangs rgyas kyi bka' nyid du rnam par bzhag pa gnyi ga 'dod pa pa zhes bya ba nyid ni rigs par 'thad pa ma yin zhes bya ba'i don to//'on te sangs rgyas kyi bka' nyid du rnam par bzhag pa ni mdo sde la 'jug 'dul ba la snang / mtshan nyid dang mi mthun med pa zhes bya ba yin na theg pa chen po ni de lta ma yin te/ ji lta zhe na/ nyan thos kyi theg pa'i lung las ni bsags pa la sogs pa yod pa nyid du gsung la/theg pa chen po las ni bkag pa'i phyir te/ de lta bas na mdo sde dang 'gal bas sangs rgyas kyi bka' ma yin no zhes bsams nas/ gal te phan tshun 'gal zhes bya ba smras so/ /'on te de ltar phan tshun mi mthun pa tsam gyis sangs rgyas kyi bka' nyid du mi 'gyur na ni de'i tshe 'dul ba la sogs pa dor dgos so zhes bya ba khyed nyan thos kyi lung las kyang phan tshun mi mthun pa'i phyir sangs rgyas kyi bka' ma yin no zhes dor dgos pa nyid du thal bar 'gyur ro//'on te de ni sems can mos pa mi mthun pa rnams dga' bar bya ba'i don du gsungs pa'i phyir na mi mthun pa yin yang sangs rgyas kyi bka' nyid du mi 'gal lo zhe na 'on te kho bo cag la yang mtshungs so snyam nas/sems can mi mthun dga' bya'i phyir/ /gsungs pa zhes bya ba de theg pa chen po'i lung la yang mi 'dod dam ste/ de yang sems can mos pa mi mthun pa rnams dran par bya ba'i don du gsungs pa yin pas/nyan thos kyi lung dang mi mthun pa yin yang sangs rgyas kyi bka' nyid du mi 'gal lo zhes bya ba'i don to/ /da ni mjug bsdu ba'i phyir/ de ltar zhes bya ba la sogs pa smos so/ /sun 'byin pa zhes bya ba ni sangs rgyas kyi bka' ma yin pa nyid du'o//the tshom med par zhes bya ba ni sangs rgyas kyi bka' yin nam ma yin zhes bya ba'i the tshom mo/ /da ni las dang po pa dag stong pa nyid kyi rnal 'byor bsgom pa la mi skrag par bya'o zhes bstan pa'i phyir/ sdug bsngal bskyed dngos zhes bya ba la sogs pa smos so/ / stong nyid 'jigs pa zhi byed na/ /zhes bya ba ni sdug bsngal zhi bar byed pa'i rgyu yin na zhes bya ba'i don to/ /da ni gang 'jigs par 'gyur ba'i bdag ces bya ba ma grub pas/ stong pa nyid bsgom pa la 'jigs par mi bya'o zhes bstan pa'i phyir/ bdag ces bya ba la sogs pa smos so/ /bdag ji ltar ma grub ce na/re zhig gzugs bdag ma yin par bstan pa'i phyir/ so dang skra sen zhes bya ba la sogs pa smos te/ de dag ni bdag ma yin te/ bdag dang mtshan nyid mi mthun pa'i phyir te/ ji ltar zhe na/ so la sogs pa de dag ni mi rtag pa du ma yin pa'i phyir dang / bdag ni rtag pa gcig pu yin pa'i phyir ro//gal te de dag bdag bzhin du rtag pa dang gcig pu nyid du 'gyur ba 'am/ yang na ni bdag kyang mi rtag pa du ma nyid du thal bar 'gyur ba'i phyir ro/ /da ni rnam par shes pa'i phung po bdag ma yin par bstan pa'i phyir/ rnam kun du/ /rnam shes drug ni bdag ma yin//zhes bya ba smos te/ de dag ni yul gzugs la sogs pa rnams la so sor 'dzin pa yin la bdag ni thams cad la 'dzin pa'i phyir/ de dag kyang bdag ma yin no/ /gal te yin na ni de dag kyang bdag nyid du re res kyang yul thams cad 'dzin par thal bar 'gyur ba 'am/ yang na ni bdag kyang de bzhin du yul re re la 'dzin gyi/ thams cad mi 'dzin pa nyid du thal bar 'gyur ba'i phyir ro/ /da ni yid bdag ma yin par bstan pa'i phyir/ gal te yin na ni zhes bya ba la sogs pa smos te/ yid ni 'gags ma thag pa yin pas/ da ltar med pa yin la/ bdag ni rtag pa yin pas da ltar spyod pa'i phyir ro/ /gal te yin na ni bdag bzhin yid kyang da ltar yod par thal bar 'gyur ba'i phyir/ yid kyi mtshan nyid nyams par 'gyur ba'am/ yang na ni yid bzhin du bdag kyang da ltar med pas bdag gi mtshan nyid nyams par gyur pa'i phyir ro/ / da ni ma 'ongs pa'i sems bdag ma yin par bstan pa'i phyir/ 'on te ma 'ongs zhes bya ba la sogs pa smos te/ ma 'ongs pa'i sems ma byung bas da ltar med pa yin zhing / bdag ni rtag pas da ltar yod pa'i phyir ro/ /gal te yin na ni ma 'ongs pa'i sems bzhin bdag kyang da ltar med par thal bar 'gyur ba'am/yang na bdag bzhin du ma 'ongs pa'i sems da ltar yod pa nyid du thal bar 'gyur ba'i phyir ro/ /da ni da ltar ba'i sems bdag ma yin par bstan pa'i phyir/ gal te bum sems zhes bya ba la sogs pa smos te/ gal te da ltar gyi dus su bdag tu 'dzin pa'i sems de bdag yin no zhe na/mi rung ste/ de ni yul can yin pa'i phyir ro/ /gal te yin na de bdag tu 'dzin pa'i sems yin par mi rung ste/ yul gyi ngo bo yin pa'i phyir te/ dper na bum pa yin na bum pa la 'dzin pa'i sems yin par mi rung ba bzhin nam bum pa la 'dzin pa'i sems yin na bum pa yin par mi rung ba bzhin no//da ni 'das pa'i sems bdag ma yin par bstan pa'i phyir/ gal te byung sems zhes bya ba la sogs pa smos te/ 'das pa'i sems ni 'gags nas med pa'i phyir dang / bdag ni rtag pa yin pas da ltar yod pa'i phyir ro//gal te yin na ni 'das pa'i sems bzhin du bdag kyang 'gags nas med par 'gyur ba'am/ yang na ni bdag bzhin du 'das pa'i sems kyang da ltar yod pa nyid du 'gyur bas/ de gnyis kyi so so'i mtshan nyid nyams par 'gyur ba'i phyir ro/ /de ltar rnam par shes pa'i phung po bdag ma yin par bstan nas/da ni khams bco brgyad bdag ma yin par bstan pa'i phyir/ gal te bdag mig ces bya ba la sogs pa smos te/ mig gi khams ni gzugs la yongs su 'dzin gyi sgra la sogs pa gzhan yongs su mi gcod pa'i phyir dang / bdag ni thams cad 'dzin pa'i phyir ro//de ltar ma yin na mig gi khams bzhin du bdag gis kyang sgra mi thos par 'gyur ba'am/ yang na ni bdag bzhin du mig gi khams kyis kyang thams cad 'dzin pa nyid du thal bar 'gyur ba'i phyir ro/ /mig gi khams ji lta ba bzhin du mtshan nyid mi mthun pa'i phyir zhes bya ba sgrub par byed pa'i rigs pa dang /so so'i mtshan nyid nyams par thal bar 'gyur/ /'gyur zhes bya ba bzlog pa gnod pa can gyi tshad mas ci rigs su sbyar bar bya'o/ /da ni tshor ba dang 'du shes dang mtshungs par ldan pa'i 'du byed kyi phung po ste/ dngos su sems las byung ba rnams bdag ma yin par bstan pa'i phyir/de bzhin bde min zhes bya ba la sogs pa smos te/ bde ba ni bde bar nyams su myong gi sdug bsngal la sogs par nyams su mi myong ba'i phyir ro/ /tshor ba bde ba ni bdag ma yin te/ gal te yin na bdag bzhin du tshor ba bde bas kyang thams cad nyams su myong bar thal bar 'gyur ba'am/yang na tshor ba bde ba bzhin du bdag gis kyang bde ba 'ba' zhig nyams su myong bar 'gyur ba'i phyir ro/ /de bzhin du sdug bsngal la sogs pa gzhan dag la ci rigs su sbyar ro/ /da ni skabs kyi don gyi mjug bsdu ba'i phyir/ de ltar bdag tu rung ba zhes bya ba la sogs pa smos so//da ni mu stegs grangs can pas bdag sems pa yod pa'i bdag nyid du 'dod pa dang / bye brag gi sems pa med pa bdag nyid du 'dod pa de dag gnyi ga yang sems las ma gtogs pa nyid du khas blangs pa'i phyir bdag nyid yin par mi 'thad do zhes bstan pa'i don du/sems 'di nyid ni zhes bya ba la sogs pa smos so/ /da ni bdag grub tu zin kyang rtag pa nyid kyis na las dang 'bras bu ji ltar yang mi 'thad par bstan pa'i phyir/ lus la sogs pa zhes bya ba la sogs pa smos so/ /bdag med kyang dngos po mi rtag pa la las dang 'bras bu mi 'gal bar phyi rol dang nang gi dpe gnyis kyis go rims bzhin du bstan pa'i phyir/sa bon la ni zhes bya ba la sogs pa dang / byis pa'i lus la zhes bya ba la sogs pa smos so/ /da ni lus la sogs pa mi rtag pa yin pa bstan pa'i phyir/ mngal na zhes bya ba la sogs pa smos so//ji ltar mi rtag par 'gyur ba'i tshul bstan pa'i phyir/ dper na zhes bya ba la sogs pa smos so/ /de ltar ni ma grub kyi so so'i rgyud las skye zhing 'jig par bstan pa'i phyir/ de ltar sems can zhes bya ba la sogs pa smos so/ /sems can med kyang snying rje bya ba mi 'gal bar bstan pa'i phyir/gal te sems can zhes bya ba la sogs pa smos te/ dgos pa'i don du zhes bya ba ni/ tha snyad gdags pa sla ba'i phyir te/ skyes bu lha sbyin zhes bya bar tha snyad ma btags par/ gzugs dang tshor ba dang zhes bya ba la sogs pas tha snyad gdags dka' bar 'gyur ba'i phyir dang /'jig rten pa dang mthun par bya ba'i phyir te/ 'jig rten la yang gang zag ces bya ba la sogs par grags kyi gzugs la sogs pa'i chos tsam du ma grags pa'i phyir dang lung dang mthun par bya ba'i phyir te/lung las kyang skyes bu gang zag 'di ni khams drug pa zhes bya ba la sogs par gsungs kyi/ gzugs la sogs pa 'di ni zhes bya ba la sogs pa ma gsungs pa'i phyir ro/ /skyon dang yon tan tshad gzung ba'i phyir te/ skyes bu gang zag ces bya bar btags na de'i skyon la sogs tshad zin par 'gyur gyi/gzugs la sogs pa 'di ni skyon 'di tsam dang ldan no zhes brjod na de'i tshad zin par mi 'gyur ba'i phyir ro/ /ji ltar khyed la zhes bya ba ni khyed kyis sems can dang zhes bya ba la sogs par btags nas/ de snying rje skye ba bzhin du kho bo cag gi gzhung gis gong du bstan pa bzhin du dgos pa rnam pa bzhi'i dbang gis sems can zhes bya bar btags nas snying rje bya bar 'gal ba med do zhes bya ba'i don to//de ltar ji skad du bshad pa'i tshul gyis bdag ces bya ba ma grub pa'i phyir/ stong pa nyid du bsgoms pas 'jigs pa yang med la/ de bcings pa yang med cing grol bar bya ba'i phyir dge ba la brtson par bya ba ni ma yin gyi/bdag ma grub kyang bdag tu gzung ba'i gzhi sems de bcings pa las grol bar bya ba'i phyir/ dge ba la brtson par bya'o zhes bstan pa'i don du/ ji ltar chu shing zhes bya ba la sogs pa smos so/ /'on te stong pa nyid kyi rnal 'byor de ji ltar bsgom par bya zhe na/de bsgom pa'i rim pa bstan pa'i phyir/ lus ni rkang pa byin pa min/ /zhes pa la sogs pa gsungs te/ thog mar so sor rtog pa'i shes rab kyis lta ba bzhin du gtan la phab nas de'i rjes la gtan la phab pa'i don bsgom pa ni bsgom pa'i rim pa yin no//de ltar ma byas na nyes pa ci yod snyam pa la/ dngos po'i mtshan nyid gtan la ma phebs pa'i phyir/ de bsgom pa la 'jug par yang mi 'gyur la/ zhugs kyang the tshom za bar 'gyur zhing / de ni sgrib pa spong ba'i gnyen por yang mi 'gyur ba'i phyir te/ 'phags pa ting nge 'dzin gyi rgyal po las/ting 'dzin de ni bsgom pa byed mod kyi/ /de ni bdag tu 'du shes 'jig mi byed/ /de ni nyon mongs phyir zhing rab 'khrugs te/ /lhag spyod 'di ni ting 'dzin sgom pa bzhin/ /zhes gsungs pa lta bu'o/ /'on te so sor rtog pa'i shes rab kyis gtan la phab nas bsgom na de'i tshe cir 'gyur zhe na/thog ma sgom pa la 'jug par 'gyur zhing / zhugs nas the tshom mi za bar yang 'gyur la/ sgrib pa spong ba'i gnyen por 'gyur ba'i sgo nas mya ngan las 'das pa'i rgyur 'gyur ba'i yang phyir te/ ji skad du mdo sde de nyid las/ gal te chos la bdag med so sor rtog /so sor de brtags gal te sgom pa ni/ /de ni mya ngan 'das thob 'bras bu'i rgyu/ /rgyu gzhan gang yin des ni zhir mi 'gyur/ /zhes gsungs pa lta bu'o/ /gal te de lta yin na de'i tshe gang la ji ltar brtag par bya snyam pa la/ rgyal ba byams pas dbus mtha' las/phyin ci log bzhi spang ba dang / /bden pa bzhi la 'jug bya'i phyir/ /dran pa nye bar gzhag pa bsgom pa zhes gsungs pas/ lus dang / tshor ba dang / sems dang chos la brtag par bya ste/ de la dang po lus la brtag pa'i dbang du byas nas lus ni rkang pa zhes bya ba ni lus zhes bya ba de rkang pa la sogs pa de nyid kyi ma yin la gzhan na yang med par bstan te/ci'i phyir zhe na/ rkang pa la sogs pa de dag ni tha dad pas/ du ma yin pa'i phyir dang / de las logs shig na dmigs pa'i rig byar gyur pa las mi dmigs pa'i phyir ro snyam du bsams pa'o//da ni yul zhes bya ba de yan lag rnams la cha shas kyis gnas sam bdag nyid thams cad kyis gnas brtag ste/ de la phyogs dang po'i dbang du byas nas cha shas dang bcas pa nyid du thal bar 'gyur ro zhes bstan pa'i phyir/ gal te lus 'di zhes bya ba la sogs pa smos so//phyogs gnyis pa ltar yin na ni/ lus de nyid mang po nyid du thal bar 'gyur ro zhes bstan pa'i phyir ro/ /lus ni lag sogs zhes bya ba la sogs pa smos so/ /da ni lag pa la sogs pa'i nang dang phyi rol na yang med par bstan pa'i phyir/ lus ni lag sogs nang na gnas/ / zhes bya ba la sogs pa smos te/ cha shas med pas zhes bya ba ni lus gcig gi mtshan nyid de'o/ /cha can gyi nang du 'jug par zhes bya ba ni yan lag du ma'i nang du 'jug pa ste/ lus ni gcig yin pa'i phyir/ yan lag du ma'i nang du 'jug par mi rung ngo zhes bya ba'i don to//'on te de ltar lus med na lus kyi blo ji ltar 'byung snyam pa la/ de bas lus med ces bya ba la sogs pa smos so/ /da ni yan lag rnams kyang ma grub par bstan pa'i phyir/ de bzhin sor mo zhes bya ba la sogs pa smos so/ /da ni rdul phra rab ma grub kyang bstan pa'i phyir/ phyogs cha zhes bya ba la sogs pa smos te/cha med par zhes bya ba ni cha shas kyis gzhigs na med ces bya ba'i don to/ /da ni rdul phra rab bsags pa ma grub par bstan pa'i phyir/ rdul rnam pa zhes bya ba la sogs pa smos so/ /de ltar lus dran pa nye bar gzhag pa bsgom pa'i thabs bstan nas/ da ni bsgom pa'i phan yon bstan pa'i phyir/ de ltar brtags na zhes bya ba la sogs pa smos te/ rjes su chags pa dang khong khro ba la sogs pa'i nyon mongs pa spong bar 'gyur ro zhes bya ba'i don to/ /da ni tshor ba dran pa nye bar gzhag pa bsgom pa'i thabs kyi dbang du byas nas/ sems dang zhes bya ba la sogs pa smos te/ 'di ni yul myong bar byed pa mi 'thad par bstan to/ /bdag gis zhes bya ba ni rang nyams su myong bar byed pa nyid mi 'thad par bstan to/ /gzhan gyis kyang ni zhes bya ba la sogs pa ni myong bar bya ba nyid du mi 'thad par bstan to/ /de ltar tshor ba zhes bya ba myong ba'i ngo bo yin la/da ni myong bar byed pa dang / myong bar bya ba gnyis las gnyi ga mi 'thad par bstan to/ /da ni de ltar bsgoms pa'i phan yon bstan pa'i phyir/ de ltar zhes bya ba la sogs pa smos te/ tshor ba ni sred pa skye ba'i rten byed pa'i las can yin la/ de ltar bde ba la sogs pa'i tshor ba rang bzhin med par shes pas phrad pa'am bral ba'am/rmongs pa'i sred pa mi 'byung ngo zhes bya ba'i don to/ /da ni sems dran pa nye bar gzhag pa bsgom pa'i thabs bstan pa'i phyir/ yid ni dbang po zhes bya ba la sogs pa smos te/ 'dis ni dbang po la sogs pa de dag la yid ches bya ba de gsung du med pa'i phyir/mi gnas par rang bzhin med par ston te/ sems can zhes bya ba ni sems kyi zhes bya ba'i don to/ /da ni ma skyes pas rang bzhin med par bstan pa'i phyir/ shes bya las ni zhes bya ba la sogs pa smos te/ ci'i phyir shes bya dus mnyam pa la dmigs te skyer mi rung snyam pa la shes bya'i dus na zhes bya ba la sogs pa smos te/shes bya dus mnyam pa yod pa'i dus na shes pa de yod na shes bya dus mnyam pa des shes pa de la phan ci zhig bya ste/ shes pa ma skyes pa'i dus na ni shes bya nyid kyang med pa'i phyir gang gis phan byed/ gang gi tshe shes bya skyes pa'i dus de'i tshe na ni shes pa nyid kyang skyes pas phan bya mi dgos pa'i phyir ro//'on te gang las kyang ma skyes kyang rang bzhin gyis gnas so snyam na/ rang gis gnas pa 'gal med de/ /ci'i phyir zhe na/ rgyu med pa'i phyir te/ dper na nam mkha'i me tog bzhin/ /zhes bya ba'i don to/ /da ni chos dran pa nye bar gzhag pa bsgom pa'i thabs kyi dbang du byas nas/rkyen rnams zhes bya ba la sogs pa smos te/ rkyen so so ba las mi skye ste/ sa bon la sogs pa re re las mi 'byung ba'i phyir ro/ /'dus pa las kyang mi skye ste/ gang las mi skye ba de dag nyid 'dus pa'i phyir ro/ /'o na gnyis po de las gzhan pa las skyes sam zhe na/gzhan nas 'ong ba ma yin la/ de ltar ma skyes pa'i phyir/ gnas pa med la 'gro ba med/ /ces smos so/ /'o na 'jig rten pa rnams kyis ji ste bden par rtogs snyam pa la/ de ni 'khrul nas brtags pa'i phyir/ /sgyu ma dang ni zhes bya ba la sogs pa smos so//da ni dngos po rnams la don dam par 'gro ba dang / 'ong ba dang bral bar bstan pa'i phyir sgyu mas sprul pa zhes bya ba la sogs pa smos so/ /da ni dngos po rnams yod pa dang / med pa gang yang ma skyes pa'i phyir/ dngos po med pa'i mtshan nyid yin pas dngos po yod pa nyid du mi 'gyur bar bstan pa'i phyir/dngos po yod par 'gyur ba la zhes bya ba la sogs pa smos so/ /'o na gnyi ga yin no snyam pa la/ rang bzhin zhes bya ba la sogs pa smos so/ /da ni mtshan gzhi ma grub pa de'i mtshan nyid ma grub par bstan pa'i phyir/ de bzhin zhes bya ba la sogs pa smos so//da ni mjug bsdu ba'i phyir/ de bas zhes bya ba la sogs pa smos te/ rmi lam zhes bya ba la sogs pa ni don dam par med kyang snang ba'i phyir ro/ /snying po med ces bya ba ni brtags nas ma grub pa'i phyir ro/ /da ni de ltar brtags pa'i phan yon 'jig rten gyi chos brgyad la zhen pa dang bral bar 'gyur bar bstan pa'i phyir/de ltar zhes bya ba la sogs pa smos te/ yan lag gi don ni go sla'o/ /da ni dngos por zhen pa'i dbang gis sdug bsngal la bde bar gnas par phyin ci log pa dag la gnyen por stong pa nyid bstan pa'i phyir/rang nyid grol bar bya ba'i thabs la 'bad par bya'i zhes bstan pa ni/ /bdag nyid bde bar 'dod rnams ni/ /zhes bya ba la sogs pa smos so/ /yan lag gi don ni go sla'o/ /bstan bcos kyi ming gi don ni snga ma bzhin no/ /shes rab bstan pa zhes bya ba le'u brgyad pa'i bshad pa rdzogs so// //da ni las 'bras bu dang bcas par bya ba'i phyir dge ba'i rtsa ba bsngo ba dang / rang gi dge ba'i bshes gnyen la drin du gzo ba'i sgo nas phyag 'tshal ba'i phyir/ le'u dgu pa gsungs te/ bdag gis byang chub spyod pa la/ /zhes bya ba nas/ ston pa bzhin du mchod byed shog /ces bya ba'i bar gyis las 'bras bu dang bcas par bya ba'i phyir dge ba'i rtsa ba bsngo ba bstan to/ /bstan pa rnyed dang zhes bya ba'i tshig gnyis kyis bstan pa yun ring du gnas par bya ba'i phyir bsngo ba bstan to/ /gang gi drin gyis dge blo 'byung / /zhes bya ba'i tshigs su bcad pa gcig gis drin gzo ba'i sgo nas rang gi dge ba'i bshes gnyen la phyag 'tshal ba bstan to//bstan bcos kyi ming gi don ni le'u dang por bshad pa bzhin no/ /yongs su bsngo ba zhes bya ba ste le'u dgu pa'i bshad pa rdzogs so// //de dag gi yan lag gi don shin tu go sla ba'i phyir rnam par ma phye'o/ /