CLOSE WINDOW

D3874
བོད་ཡིག

@##/ /rgya gar skad du/ bo d+hi satwa tsAr+ya a ba tA ra sang kA ra/ bod skad du/ byang chub sems dpa'i spyod pa la 'jug pa'i legs par sbyar ba/ bcom ldan 'das gsung gi mnga' bdag 'jam dpal gzhon nur gyur pa la phyag 'tshal lo//ngo bo nyid ni byang chub pa'i/ /rgya mtsho de la phyag 'tshal te/ /bdag 'dra'i spyod pa'i yan lag la/ /'jug phyir legs sbyar bshad tsam bya/ /dam pa rnams kyis ni thog ma dang bar dang tha mar dge ba mngon par 'phel bar bya ba yin pas/bde gshegs zhes bya ba la sogs pa smos pa yin te/ 'dir phyag 'tshal ba ni dang por dge ba'o/ /chos bstan pa ni bar du dge ba'o/ /dge ba'i rtsa ba yongs su bsngo ba ni dge ba'i rtsa ba mngon par 'phel ba yin pas tha mar dge ba yin no//de la bde bar gshegs pa ni rtogs par bya ba'i lhag ma mi mnga' bas na yongs su rdzogs par thugs su chud pa'i phyir bde bar gshegs pa'o//chos kyi sku mnga' ba ni lung dang rtogs pa'i bdag nyid can gyi dam pa'i chos kyi tshogs ni chos kyi sku ste de dang bcas pa'o/ /sras bcas ni nyid las 'khrungs pa'i sras te/ byang chub sems dpa' dang bcas pa'o/ / la la las ni bde gshegs dam pa'i chos dang dge 'dun bcas zhes zer ro/ /btsun pa ni nyan thos chen po brgyad la sogs pa la bya ste/ de dag ma lus pa kun la phyag 'tshal ba'o/ /dkon mchog gsum po gtso bor gyur pas so sor smos pa yin la/de dag kyang phyag bya bar 'os pa yin pas gus pas phyag 'tshal te/ zhes bya ba smos te/ 'dir yon tan dam pa'i bstod pa rgya che ba dang / mchod pa khyad par du 'phags pa'i dmigs pa yid la byed pa las byung ba'i mos pa'i bsam pa shin tu phul du byung ba'i dga' ba rgya che ba'i mchod pa dang bcas pas lus zhing thams cad kyi rdul snyed kyis btud cing phyag 'tshal lo//de ltar phyag btsal nas ci zhig byed ce na/ bde gshegs sras kyi zhes bya ba la sogs pa smos te/ bde bar gshegs pa'i bdag nyid ni chos kyi sku ste/ de'i dbang du byas pa las skyes pa sa chen po thob pa dang / rgyu la gnas pa rnams so/ /de rnams kyi sdom pa ni mi dge ba spong ba dang / dge ba la 'jug pa dang / sems can gyi don bya ba'o/ /de yang bcom ldan 'das kyis shin tu zab cing rgya che ba'i bdag nyid can du gsungs la/der byang chub tu sems bskyed pa'i phan yon la sogs pa'i don rnam pa bcu po gang yin pa des 'jug pa'i bde bar gshegs pa'i sras kyi sdom pa la 'jug pa bstan par bya'o/ /de yang lung bzhin zhes bya ba ste/ lung gi don dang mi 'gal bar ro/ /lung las ni bcom ldan 'das kyis rgya cher gsungs so zhe na/mdor bsdus nas ni zhes bya ba smos so/ /de lta yin du chug na/ ci 'dir sngon chad ma byung ba gzhan 'ga' zhig smas sam/ lung ji lta ba yin zhe na/ sngon chad ces bya ba la sogs pa smos so/ /sdeb sbyor mkhas pas sngon ma yin nam zhe na/sdeb sbyor zhes bya ba la sogs pa smos so/ /gang gi phyir 'dir sdeb sbyor la mkhas pa med pa nyid kyi phyir gzhan gyi don du bdag gis 'di gzhung du nye bar sbyar ba ma byas so zhes bya bar dgongs so/ /de ltar gal te gzhan gyi don du ma byas na ci'i phyir byed ce na/ de'i phyir rang gi zhes bya ba la sogs pa smos te/ yid la 'dir byang chub kyi sems te/ de bsgom pa'i phyir zhes bya ba ni bslab pa'i phyir ro/ /bcom ldan 'das kyis lung las tshig gi don rgya cher gsungs pa de las mdor bsdus te rang gi yid la bsgom par bya ba'i phyir bdag gis 'di byas so zhes pa'o//de yang ji ltar zhe na dge ba bsgom phyir zhes bya ba la sogs pa smos te/ yid la dge ba bsgom par bya ba ni bdag gis dad pa'i shugs shin tu dag pa dang 'phel bar 'gyur ba'i phyir byas pa'o/ /re zhig ces bya ba'i sgras ni gzhan gyi don la yang ltos pa ste/'di ni gzhan gyi don du 'gyur te/ rgyud shin tu dag pa'i yid dang ldan pa rnams kyi goms pa phul du byung bar 'gyur ro/ /de bas na gzhan gyi don du yang 'gyur ba yin pas de'i phyir bdag dang zhes bya ba la sogs pa smos te/ bdag dang skal ba mnyam zhing rigs mtshungs pa gang yin pa gzhan dag kyang yod pas de'i don du yang 'gyur ba mthong bas bde bar gshegs pa'i sras kyi sdom pa la 'jug pa brtsams pa 'di ni don yod pa yin no//sdeb sbyor byed pa'i don ni kho bo mi 'dri'i/ brjod par bya ba 'dri ste/ brjod par bya ba ni 'jug pa'i don du 'gyur ba yin no zhe na/de ni bden mod kyi/ gzhung rtsom pa la ni rtog pa dang ldan pa dag brjod par bya ba'i gtam la brten pa nyid kyis na gtam yang bde bar gshegs pa'i sras kyi sdom pa la 'jug pa yin pas de ltar na bdag dang gzhan gyi gtam gyi dgos pa yin la/de gnyis thabs dang thabs las byung ba'i tshul du 'byung ba nyid ni 'brel ba yin no/ /de bas na bde bar gshegs pa'i sras kyi sdom pa la 'jug pa ni brjod par bya ba yin no zhes bstan par 'gyur ro/ /glegs bam la la la tshig 'di med de/ bslab pa kun las btus pa nyid yin mod kyi/ der rigs pa ma yin te/ bslab pa kun las btus pa nyid yin pa'i phyir bde bar gshegs pa'i sras kyi sdom pa la 'jug pa ma yin la/ 'dir ni bdag gis byang chub spyod pa la/ /'jug pa rnam par bsams pa zhes bshad pa'i phyir dang /byed pa po gcig yin pa'i phyir rigs pa yin te/ gzhan du na nyan pa po'i 'jug pa'i yan lag tu 'gyur ba'i 'brel pa la sogs pa ma smras par 'gyur bas 'di ni 'dir rigs la/ sangs rgyas dang ni byang chub sems dpa' dag /ces bya ba la sogs pa'i tshigs su bcad pa ni der smos pa'i rigs so/ /ci tshe 'di nyid du dge ba la 'bad par ci ltar nus she na/ de'i phyir dal 'byor 'di ni zhes bya ba la sogs pa smos te/ dal ba zhes bya ba ni mi khom pa las log pa ste/ 'dir ni sdom pa 'chags pa la dal ba zhes bya'o//de'i 'byor pa ni phun sum tshogs pa ste/ 'di ni shin tu rnyed par dka' ba'o/ /de yang bcom ldan 'das kyis rgyal ba'i drod kyi skye mched kyi rnam par thar pa la sogs pa gsungs pa yin la/ de ni kho bo cag rnams kyis thob par 'gyur ba yin no//skyes bu'i don sgrub ni sems can gyi don byed par nus shing skal ba yod de/ de thob par 'gyur ba yin no/ /gal te dal 'byor phun sum tshogs pa'i dus 'dir phan pa zhes bya ba bdag dang gzhan la yun ring du phan zhing bde bar 'gyur ba rnam par ma bsams na'o/ / phyis 'di yang dag 'byor par ga la 'gyur/ /zhes bya ba ni/ shin tu rnyed par dka'o zhes bya ba'i tha tshig go/ /phan pa de yang byang chub tu sems bskyed pa'i phan yon dang / de bzhin du sdig pa bshags par gtogs pa bdun dang / byang chub kyi sems yang dag par blang ba dang /byang chub kyi sems la bag yod par bya ba dang / shes bzhin la sogs pa bsrung ba dang / bzod pa dang / brtson 'grus dang / bsam gtan dang / shes rab dang / yongs su bsngo ba ste/ byang chub kyi sems rnam pa bcu la bya'o/ /de la byang chub kyi phan yon gyi dbang du byas nas/ji ltar mtshan mo zhes bya ba la sogs pa smos te/ ji ltar mtshan mo sprin stug po mang pos khebs pas mun pa shin tu gnag pa na sprin dang mun nag gi thibs po gang yin pa der glog 'gyu skad cig ste/ dus shin tu yun thung bas rab tu snang ba ston te gsal bar byed pa de bzhin du shin tu yun ring ba'i 'khor ba'i btson ra mun rum du sdig pa'i stobs can gyi sprin mang pos mun nag tu gyur pa'i 'jig rten sdug bsngal gyi mun gnag 'ba' zhig yod pa'o//sangs rgyas kyi mthus zhes bya ba la sangs rgyas glog lta bu'i dbang gis bsod nams la blo gros te/blo'i khyad par gyi snang ba thang 'ga' zhig 'byung bar 'gyur la/ de ni shin tu rnyed dka' ba yin pas na lan 'ga' zhes bya ba smos pa yin no/ /gang gi phyir de ltar yin pa des na des ltas zhes bya ba la sogs pa smos pa yin te/ 'dir dge ba ni rgyu la 'bras bu btags pa'i tshul gyi dge ba'i sa bon lhan cig byed pa'i rgyu'i grogs dang bcas pa la bya'o//de nyid ni nyam chung zhing stobs zhan pa nyid du rgyun gyis rtag pa yin no/ /sdig pa'i sa bon ni stobs chen po dang ldan pa yin te/ lhan cig byed pa'i rgyu'i grogs dang bcas par che ba yin pas shin tu zhes bya ba lhag par mi bzad pa ste/'jigs su rung ba yin no/ /de ni zhes bya ba stobs sam sdig pa de las rgyal bar 'dod na/ gal te rdzogs pa'i byang chub kyi sems 'tshang rgya bar bya ba yin pa'i phyir dad pas nye bar bstan par byas pa'i shes rab dang snying rje gnyis dang ldan zhing yod pa dang med pa las 'das pa'i sems ni rdzogs pa'i byang chub kyi sems yin pas rdzogs pa'i byang chub kyi sems ma yin pa dge ba gzhan gang gis zil gyis gnon par 'gyur zhing rgyal bar byed par 'gyur te/sems de nyid ni nyes pa thams cad sel bar byed pa'i gzhi yin no//de yang 'di nyid dang / shes rab kyi pha rol tu phyin pa'i le'u dang / shes rab kyi pha rol tu phyin pa brgyad stong pa la sogs pa las 'di nyid gsungs pa yin no/ /bskal pa du mar zhes bya ba la sogs pa la/ thub pa'i dbang po sangs rgyas bcom ldan 'das rnams kyis bskal pa grangs med pa gsum du rab tu dgongs shing dpyad par mdzad pas kyang yang dag par rdzogs pa'i byang chub kyi sems 'di phan pa yin par gzigs so//de yang gang gi phyir rang dang gzhan gyi bde ba'i rgyur 'gyur ba nyid kyis na lus dang sems tshim par byed pa'i bde ba nyid kyis bde ba rab tu 'phel zhing rgyas par gyur pa bde blag tu thob par 'gyur ba'am tshad med cing grangs med pa 'das pa'i skye bo'i tshogs te/sems can gyi tshogs rnams 'khor ba'i rgya mtsho las sgrol bar byed pa yin no/ / byang chub kyi sems la gnas pa dag brten par bya ba'i phyir/ srid pa'i zhes bya ba la sogs pa smos te/ bdag nyid kyi srid pa'i sdug bsngal brgya phrag ste/ gzhom par 'dod cing sel bar 'dod pas so/ /glegs bam la la las/ srid pa'i sdug bsngal brgya phrag las sgrol 'dod//ces zer te/ der yang don ni 'di yin no/ /gzhan yang / sems can gyi mi bde bsal bar 'dod pa dang / zhes bya ba ni gzhan dag gi phongs pa'i sdug bsngal gzhom par 'dod pas so/ /bde mang brgya phrag ni bde ba can gyi bde ba la sogs pa'o/ /spyod par 'dod pas zhes bya ba ni longs spyod par 'dod pas so//kyang zhes bya ba'i sgras ni gzhan dag spyod par 'dod pas kyang zhes ston to/ /des ni/ byang chub sems nyid rtag tu gtang mi bya/ /zhes bya ba ste de dor bar mi bya'o/ /phan yon 'di ni de'i tshe gzhan gyi yin no/ /tshe 'di'i phan yon ni/byang chub sems skyes gyur na zhes bya ba la sogs pa smos pa yin no/ /'khor ba'i btson ra ni sred pas bcings pa'i khyim ste/ 'dod chags la sogs pas bsdams pa gang yin pa de ni 'khor ba'i btson rar bsdams pa'o/ /nyam thag rnams zhes bya ba ni mya ngan bya bar 'os pa'i nyon mongs pa rnams so//de ni skad cig gis zhes bya ba skad cig tsam gyis bde bar gshegs pa rnams kyi sras zhes brjod par bya zhing / lha dang mir bcas pa'i 'jig rten gyis phyag bya bar 'os par 'gyur ro/ /skad cig gang gis she na/ byang chub sems skyes gyur nas zhes bya ba smos te/byang chub kyi sems skyes shing byung bar gyur pa nyid kyis 'gyur te/ de yang bcom ldan 'das kyis 'phags pa dkon mchog brtsegs pa la sogs pa las ji skad gsungs pa lta bu yin no/ /dris pa/ byang chub sems dpa'i sa rab tu dga' bar dang po byang chub kyi sems skye bar 'gyur ba yin la/de ni 'phags pa'i yin pas 'phags pa la ni nyam thag rnams zhes mi bya'o zhe na/ bden mod kyi de ni chos la dmigs pa can yin la/ 'di ni yang dag par blangs pa brda can la dgongs nas de skad bshad pa yin pas yang dag par blangs pa brda can ni 'phags pa ma yin pa la yang skye bar mdo sde rnams las shes par bya ste/chos thams cad 'byung ba med par bstan pa las/ byang chub sems dpa' rgyal ba'i blo gros la sas bar mthongs phye nas de 'chi ba'i dus byas pa dang / sems can dmyal ba chen por lhung ste/de ni stong pa nyid la ma dad cing stong pa nyid smra ba la khong khro ba byas pa yin no zhes gsungs pa dang / nges pa dang ma nges pa la 'jug pa'i phyag rgya'i mdo las kyang / gang la la zhig byang chub kyi sems bskyed la rtag par theg pa chen po mi 'dzin mi klog par nyan thos kyi theg pa pa rnams la brten cing zhes bya ba nas/'di ni phyugs kyi shing rta lta bus 'gro ba'i byang chub sems dpa' zhes bya ste/ nyan thos kyi theg pa'i phyugs kyi shing rtas sangs rgyas nyid kyi sar bgrod par 'gro ba yin no zhes gsungs pa dang / chos bcu pa'i mdo las kyang /byang chub sems dpa'i rigs la gnas pa byang chub tu sems ma bskyed na/ de bzhin gshegs pa'i nyan thos kyis bskul zhing skyo bar byas/ yang dag par 'dzin du bcug ste/ bla na med pa yang dag par rdzogs pa'i byang chub tu sems bskyed pa 'di ni byang chub kyi sems la mos pa'i rgyu dang po'o//yang dag par rdzogs pa'i byang chub bam/ byang chub kyi sems kyi bsngags pa thos nas bla na med pa yang dag par rdzogs pa'i byang chub tu sems bskyed pa 'di ni rgyu gnyis pa'o/ /sems can mgon med pa dang / skyabs med pa dang / dpung gnyen med pa rnams mthong nas snying rje'i sems nye bar gzhag ste/bla na med pa yang dag par rdzogs pa'i byang chub tu sems bskyed pa 'di ni rgyu gsum pa'o/ /des de bzhin gshegs pa'i rnam pa thams cad yongs su rdzogs pa mthong nas dga' ba bskyed nas bla na med pa yang dag par rdzogs pa'i byang chub tu sems bskyed pa 'di ni rgyu bzhi pa'o zhes gsungs pa yin no//byang chub kyi sems de lha dang bcas pa'i 'jig rten gyi mchod rten du gyur par ni sdong po bkod pa las kyang gsungs pas lha dang mir bcas pa'i 'jig rten gyis phyag bya bar 'os par gyur pa yin la/bde bar gshegs pa'i dbang du byas nas sangs rgyas kyi chos rnams thob par lhag par mos pa'i rang bzhin can gyi byang chub kyi sems kyi sa bon skad cig ma gang la skyes pa'i skad cig ma de la bde bar gshegs pa rnams kyi sras zhes brjod par bya ste/ de bas na lha dang mir bcas pa'i 'jig rten gyis phyag bya bar 'os pa yin no zhes bya ba brgal ba'i lan gdab par bya'o/ /gser 'gyur rtsi zhes bya ba la sogs pa'i tshigs su bcad pa la/ gser 'gyur rtsi ni rtsi'i khyad par ro/ /mchog lta bu zhes bya ba ni rin po che nyid du byed nus pa ste/de ltar bsgyur nus pa'o/ /mi gtsang lus 'di blangs nas zhes bya ba ni/ da ltar gyi lus 'di gzung nas so/ /rgyal ba'i sku/ rin chen rin thang med par bsgyur bas na/ /zhes bya ba ni sangs rgyas bcom ldan 'das kyi sku yid bzhin gyi nor bu rin po che dang 'dra bar don chen po nyid du bsgyur nus pa de lta bu'i byang chub kyi sems zhes bya bar ming btags pa'i gser 'gyur gyi rtsi de rab tu brtan cing ma nyams pa nyid du gzung zhing blang bar bya'o//zhes bya ba'i don to/ /de ltar na gser 'gyur rtsi dang 'dra bar bshad nas/ rin po che dang 'dra ba nyid bshad pa'i phyir/'gro ba'i ded dpon zhes bya ba la sogs pa smos te/ 'gro ba'i ded dpon gcig pu zhes bya ba ni 'gro ba'i ste/ 'jig rten thams cad skal ba ji lta ba bzhin du mya ngan las 'das pa'i grong khyer du khrid par mdzad pas so/ /tshad med blo zhes bya ba ni phra zhing tshad med pa'i yul yin pa nyid kyis gzhan dag gis gzhal bar mi nus pas tshad med pa'i blo gang la mnga' ba'i sangs rgyas bcom ldan 'das tshad med pa'i blo mnga' zhing rang gi don phun sum tshogs pa yang brnyes pa des legs par yongs su brtags pa ste/rin po che rtog pa na de'i mtshan nyid la rmongs pa'am/gzhan slu ba dag la log par rtog par byed na/ sangs rgyas la gnyis po 'di dag mi mnga' bas des legs par yongs su brtags pa yin no/ /ci lta bu zhe na/ rin che bas zhes bya ba ste/ yid bzhin gyi nor bu rin po che ltar dpal 'byor phun sum tshogs pa yang rnyed par dka' ba yin na/byang chub kyi sems rin po che 'di lta smos kyang ci dgos/ des na 'gro ba'i gnas dang bral bar 'dod pa rnams te/ dmyal ba la sogs pa'i 'gro bar rgyu ba'i skal ba can gyi sems tshong pa rnams kyi byang chub kyi sems de legs par shin tu brtan par zung shig pa'o//yang gzengs bstod par bya ba'i phyir/ dge ba gzhan kun zhes bya ba la sogs pa smos pa yin te/ byang chub kyi sems las gzhan pa'i dge ba thams cad ni zhi ba'i 'bras bu med par chu shing dang 'dra bar 'dzad pa yin la/ byang chub kyi sems kyi ljon shing ni rtag par yang 'bras bu 'byin pa yin te/ skad cig ma re re zhing rgyu mthun pa'i 'bras bu 'byin par byed pa nyid yin pa'i phyir ro/ /de yang 'og nas/ deng nas brtsams te gnyid log gam/ /zhes bya ba la sogs pa ji skad bshad pa lta bu yin pas skye ba re re zhing rnam par smin pa phul du byung ba bskyed du zin kyang /'gro ba ji srid gnas kyi bar du rgyu mthun pa'i 'bras bu rgyun mi 'chad pas zad par mi 'gyur ba yin no/ /de ltar na rang gi don phun sum tshogs pa dang ldan pa las gzhan gyi don phun sum tshogs pa yang 'byung bar 'gyur ba nyid yin no//gzhi de las gzhan rnams la yang byang chub kyi sems kyi ljon shing skye ba'i phyir ro/ /de ltar dge ba la mngon par 'jug pa bshad pas legs par gzengs bstod nas/ mi dge ba las ldog pa'i rgyu nyid yin par sbyar ba'i phyir dpa' bo dang 'dra bar bshad pa ni/sdig pa shin tu zhes bya ba la sogs pa smos pa yin te/ sdig pa mi bzad pa ste/ dkon mchog gsum la gnod pa byed pa la sogs pa 'jigs pa chen po dang 'dra ba byas kyang dpa' bo la brten pa dang 'dra bar gang zhig la brten cing gnas bcas na/yud kyis zhes bya ba ring po mi thogs par sgrol zhing skyob par nus pa'i byang chub kyi sems de la sems can bag dang ldan pa rnams kyis ci'i phyir brten par mi byed de/ shin tu yang rten bca' ba'i rigs so/ /bcom ldan 'das kyis kyang sdig pa byas shing bsags pa rnams rten gyi stobs kyis zil gyis gnon par 'gyur ro//de la rten gyi stobs ni dkon mchog gsum la skyabs su 'gro ba dang / byang chub kyi sems mi gtong ba'o zhes chos bzhi pa'i mdo las gsungs pa yin no/ /de ltar dge ba la 'jug pa dang /mi dge ba las ldog pa'i khyad par gyi gzhi ni byang chub kyi sems yin no zhes yang dag par gdams nas/ me'i khyad par dang 'dra bar bstan cing / phan yon dpag tu med pa nyid yod pas yang dag par gzengs bstod pa'i phyir/ des ni dus mtha'i zhes bya ba la sogs pa smos pa yin te/byang chub kyi sems gang yin pa de ni 'jig rten 'jig pa'i dus kyi me'i phung po dang 'dra ba yin pas dus mtha'i me ste/ de dang 'dra bar mtshams med pa la sogs pa'i sdig pa chen po rnams skad cig gcig gis zhes bya ba/ lhag par mos pa'i bzod pa chen po'i skad cig ma gcig gis gzung bar bya ba nye bar mi dmigs pa na/nges par sreg par byed pa nyid yin no/ /byang chub kyi sems gang yin pa de'i phan yon dpag tu med pa'i grangs med pa dag mgon po byams pa zhes bya ba blo dang ldan zhing shes rab che bas tshong dpon gyi bu pho nor bzangs zhes bya ba la bshad cing bka' stsal to//rigs kyi bu byang chub kyi sems ni sangs rgyas kyi chos thams cad kyi sa bon lta bu'o/ /'gro ba thams cad kyi chos dkar po rnam par 'phel bar byed pas zhing lta bu zhes bya ba la sogs pa dang / yon tan gyi khyad par gzhan dag dang yang dag par ldan pa yin par 'phags pa sdong po bkod pa las kyang gsungs pa yin no//de ltar de yan chad kyi tshigs su bcad pas ni byang chub kyi sems la goms par byas pa tsam gyi phan yon bshad pa yin la/ da 'di man chad kyis gnas skabs kyi dbye ba la dgongs nas bshad pa yin par shes par bya'o//de'i phyir byang chub sems de zhes bya ba la sogs pa smos te/ byang chub kyi sems de las byang chub tu mos pa'i sems ni bdag sangs rgyas su gyur nas sems can rnams kyi don bya'o zhes dad pas nye bar bstan par bya ba'i blo dang /bya ba dag gis zab cing rgya che ba'i don thob par 'dod pa'i sems de nyid byang chub tu smon pa'i sems yin no/ /byang chub kyi spyod pa yang dag par blang ba la sogs pas de la 'jug pa ni byang chub tu 'jug pa nyid yin te/ de lta na rnam pa gnyis so/ / de yang blo dang ldan pas nor bzangs la rigs kyi bu sems can gang bla na med pa yang dag par rdzogs pa'i byang chub tu sems bskyed pa de ni rnyed par dka'o/ /de bas na bla na med pa yang dag par rdzogs pa'i byang chub tu zhugs pa de yang ches rnyed par dka'o zhes gsungs pa yin no/ / bcom ldan 'das kyis ni sa dang pha rol tu phyin pa la sogs pa dbye ba mang du gsungs la 'dir ni rnam pa bcur bshad la/ de ji ltar na rnam pa gnyis yin zhe na/ de'i phyir mdor bsdu na/ rnam pa gnyis su shes bya ste/ /zhes bya ba smos pa yin te/ rnam pa bcu yin du zin kyang phan yon gyi skabs su mdor bsdu na/rnam pa gnyis su gnas te/ yang dag par blang ba dang / 'jug pa'i khyad par gyis gnyis yin par shes par bya'o/ /gal te de lta na smon pa byang chub kyi sems kyang spyod pa'i bdag nyid kyang yin na 'di gnyis la dbye ba ci zhig yod ce na/de'i phyir 'gro bar 'dod dang zhes bya ba la sogs pa smos te/ 'gro bar 'dod pa ni yul du 'gro 'dod pa nyid yin gyis 'gro ba ma yin no/ /'gro ba ni der 'gro ba ste/ de gnyis kyi bye brag ci ltar shes pa de bzhin du/ 'di gnyis kyi bye brag kyang rim pa ji lta ba bzhin du shes par bya ste/smon pa'i sems ni 'gro bar 'dod pa lta bu yin la/ 'jug pa ni 'gro ba lta bu yin no zhes bya ba'i don to/ /gang gis shes par bya zhe na/ mkhas pas te/ lus la sogs pa'i las la yang dag par brtags nas/ bdag dang gzhan la phan pa'i thabs shes nas rtag tu byed pa gang yin pa de ni ltung ba'i nyes pa mi 'byung bas de ni shes rab yin la/de 'di la yod pas na mkhas pa zhes bya ste/ mkhas pa des shes par bya'o/ /smon pa ni mngon par 'dod pa tsam nyid yin la/ 'jug pa ni yang dag par blangs pa la sogs pas 'jug pa'i rang bzhin yin la/'dir sdom pa yang dag par len pa 'am/ 'dis byang chub tu 'jug pas na yang dag par len pa dang / 'jug pa'i byang chub kyi sems yin pa ltar smon pa yang de dang 'dra'o/ /de bas na 'khor ba'i tshe 'bras bu chen po 'byung bar 'jug pa las smon pa dang dbye ba yod pa ma yin no zhe na/de ni bden mod kyi/ /yang zhes bya ba'i sgras byang chub tu smon pa'i sems ni 'khor ba bdag dang gzhan gyi byang chub kyi don du 'gyur ba 'bras bu che ba nyid 'byung ba yin mod kyi/ ji ltar 'jug pa'i sems kyis der 'jug pa bzhin du bsod nams rgyun mi chad par rgyun chags su 'byung ba ma yin pas/'dir 'jug pa'i sems ni snga ma las khyad par yod do/ /de nyid ji ltar bsod nams kyi rgyun mi 'chad par 'byung ba yin zhe na/ de'i phyir gang nas bzung ste zhes bya ba la sogs pa smos te/skad cig ma/ gang nas bzung ste sems can khams/ /mtha' yas rab tu dgrol ba'i phyir/ /zhes bya ba la sogs pa sems can gyi khams 'di tsam zhes mtha' gzung bar ni mi nus pa'i mtha' yas pa ste/ sems can de rnams kyang rang gi mtshan nyid 'dzin pas na khams te/nyon mongs pa dang las dang rkyen skye ba'i rgyun gyi rang bzhin no/ /de rnams ni nyon mongs pa'i 'ching ba dang / 'khor ba'i btson ra las rab tu dgrol bar bya ba de'i don gyi phyir/ 'khor ba ji srid gnas kyi bar du mi ldog cing phyir bzlog par mi nus pa'i sems kyis 'jug pa'i sems de ni mngon par 'phel zhing rnam par dag par bya ba yang dag par blangs pa'i sems de nyid kyis bya ba mthar phyin par bya ba'i phyir len par gyur pa'o//dus deng nas bzung nas te gnyid log par gyur tam/ bag med pa nyid du gyur kyang mi dge ba las ldog pa dang /dge ba la 'jug pa dang / sems can thams cad kyi don bya ba rnams la byams pa dang / snying rje chen po dag gis bsod nams kyi shugs te/ dge ba'i rgyun bar mi 'chad pa dang / de kho na nyid la lhag par mos pa'i dbang gis zad mi shes pa'i bsod nams kyi rgyun re re zhing yang rnam pa tha dad du ma zhig 'byung bar 'gyur la/de ltar shin tu rgya che ba dang / zad mi shes pa nyid kyis nam mkha' dang mnyam par rab tu 'byung bar 'gyur te/ dpa' sbyin gyis zhus pa las kyang / byang chub sems dpa'i bsod nams gang / / de la gal te gzugs yod na/ /nam mkha'i khams ni kun bkang ste/ /de ni de bas lhag par 'gyur/ /zhes gsungs pa lta bu'o/ /'dir rigs pa gang zhig yin zhe na/ de'i phyir 'di ni zhes bya ba la sogs pa smos te/ byang chub kyi sems phan yon chen po dang bcas pa yin pa 'di nyid ni/'thad pa dang bcas par zhes bya bar rigs pa dang ldan pa yin par de bzhin gshegs pa nyid kyis gsungs pa yin no/ /ci'i phyir gsungs she na/ dman mos sems can don gyi phyir/ /zhes gsungs te/ 'gro ba dman pa la mos pa dag gi don du bya'o/ / gang las gsungs she na/ lag bzangs kyis ni zhus pa las/ /zhes bya ba smos so/ /lag bzangs kyis zhus pa las 'thad pa dang bcas par ji ltar gsungs she na/ de'i phyir sems can zhes bya ba la sogs pa smos te/ sems can rnams kyi glad nad tsam/ /bsal lo snyam du sems pa yang //phan 'dogs bsam pa dang ldan te/ /sman pa la sogs pas rang gi 'dod pa'i don gyi srid pa med pa'i sems dang ldan na/ bsod nams su bya ba dpag tu med pa dag 'dzin par 'gyur na/ sems can re re'i mi bde ba'i sdug bsngal dpag tu med cing grangs med pa'i dbye ba snyed kyi bya ba la dmigs pa gsal bar 'dod cing gzhom par 'dod pa dang /sems can re re'ang yon tan dpag tu med pa 'grub cing skyed par 'dod pa dag ni smos ci dgos te/ shin tu yang tshad med pa'i bsod nams su 'gyur ro zhes bya bar dgongs so//de yang su la zhe na/ 'di 'dra ba'i phan sems su zhig la yod ces spyir nye bar brtags nas khyad par bstan pa'i phyir pha 'am zhes bya ba la sogs pa smos te/ pha 'am yang na ma yang rung / /zhes bya ba'i yang gi sgras ni mi rnams kyi spun zla 'am mdza' bo la sogs pa'o//lha dang zhes bya ba ni 'jig rten skyong ba la sogs pa rnams so/ /drang srong rnams zhes bya ba ni shed las skyes la sogs pa'i skyes bu rnams so/ /tshangs pa ni 'byin pa po nyid yin par gzhan dag mngon par 'dod pa ste/ de rnams la byang chub sems dpa' dag sems can rnams phan par dgongs pa lta bu'i phan pa'i sems 'di yod pa ma yin te mi srid pa nyid yin no//gzhan yang sems can de dag nyid de/ pha la sogs pa dang des rjes su gzung bar bya ba'i sems can rnams la/ sngon chad rang gi don du yang 'di 'dra ba'i yid la mngon par 'dod pa'i sems rmi lam du yang ma rmis shing sngar skyes pa ma mthong na/gzhan dag gi don du 'di 'dra ba'i sems par ga la 'gyur/ de bzhin du sdug bsngal ba'i nad kyi rtsi sman du gyur pa ni thar pa thob pa'i don du gyur pa'i phyir/ 'gro ba kun gyi dga' ba'i rgyur gyur pa dang /skye dgu'i sdug bsngal gyi sman du gyur pa'i sems rin po che'i bsod nams gang yin pa zhes sgra gcan zin gyi mgo dang 'dra bar dbye ba med kyang phye ste bshad pa yin no/ /'dir bsod nams ni 'gro ba'i don gyi rgyur gyur pa nyid yin pas/ bsod nams de las ji ltar gzhal gyis lang //de bas shin tu yang tshad med pa yin no zhes de ltar 'dir ni lag bzangs kyis zhus pa las 'thad pa dang bcas par gsungs pa yin no/ /gzhan yang / phan par bsams pa tsam gyis kyang / /sangs rgyas mchod las khyad 'phags na//zhes bya ba ste/ zla ba sgron ma'i mdo las/ mchod pa tshad med rnams mang ji snyed pa/ /zhing ni bye ba khrag khrig gtams rnyed du/ /skyes bu mchog la mchod pa de byas pas/ /byams pa'i sems la grangs dang char mi phod/ /ces ji skad gsungs pa lta bu'o/ /sems can kun gyi bde ba ni//kun don brtson pa smos ci dgos/ /zhes bya ba ni sems can thams cad kyis bde ba thams cad thob pa'i don du brtson pas 'jug pa dag ni ci'i phyir khyad par du 'phags pa nyid ma yin te/ khyad par du 'phags pa nyid yin no/ /de bzhin du byang chub tu smon pa dag gi bsod nams tshad med pa yin yang /sems can thams cad kyi don du 'jug pas/ khyad par du 'phags pa nyid ma yin par bstan pa'i phyir sdug bsngal zhes bya ba la sogs pa smos te/ sdug bsngal 'dor zhing de las nges par 'byung ba'i thar pa ste/ de 'dod pa'i phyir brtul zhugs can kha cig skra 'bal ba la sogs pa byed cing sdug bsngal nyid la mngon par brgyug go//de bzhin du gzhan ni bde ba 'thob par 'dod kyang mtho ris dang thar pa'i lam mi shes shing / kun tu gti mug pas shin tu sdug bsngal ba'i rgyu dag la bde ba'i rgyu yin no snyam pas mngon par brgyug cing rang gi bde ba dag ni dgra bo ltar 'joms par byed pa ste mthong ba dang ma mthong ba'i bde ba'i rgyu mi shes shing /de la kun tu rmongs pas sbyin pa la sogs pa ni bde ba'i rgyu yin la/ de kho na nyid shes pa'i blo ni thar pa'i rgyu yin no zhes mi shes pas de dang mi mthun pa 'ba' zhig ston par byed do//gang zhig ces bya ba la sogs pa la sdom brtson can dang / khyim pa gang zhig bde bas mi ngoms pa'i phyir bde bas phongs par gyur pa dang / dmyal ba la sogs pa'i sdug bsngal mang po dang ldan pas lan du mar gzir bar gyur pa de dag la byams pa chen po las byung ba'i bde ba kun gyis ni tshim par byed do//snying rje chen pos sdug bsngal thams cad ni gcod par byed cing 'gog par byed do/ /shes rab kyis gti mug kyang ni sel zhing 'jig par byed do/ /byang chub sems dpa'i rigs dang ldan pa dag ni rang bzhin gyis snying rje chen po la sogs pa dang ldan pa'i phyir gsol ba ma btab tu zin kyang gzhan gyi don 'jug pa yin no//de bas na sems can gyi don gyi 'jug pa'i byang chub sems dpa' de dang dge zhing legs pa mtshungs shing mnyam pa ga la yod de/smon pa la gnas su zin kyang de dang mnyam pa ma yin te/ ga la yod ces bya bas ni mi srid pa nyid yin par ston to/ /de bas na 'phags pa byams pas kyang rigs kyi bu byang chub tu smon pa 'di yang rnyed par dka'o/ /de bas kyang gang dag bla na med pa yang dag par rdzogs pa'i byang chub tu 'jug pa de yang ches rnyed par dka'o zhes gsungs pa yin no//de ltar na byang chub tu 'jug pa'i bsod nams ni shin tu yang rnyed par dka' ba yin no zhes bstan pa'i phyir/ de 'dra'i bshes kyang ga la yod/ /ces bya ba ni smon pa la gnas su zin kyang 'jug pa'i sems lta bu ma yin te/'jug pa ni shin tu yang bsngags par bya ba yin pas 'di ni khyad par yin no/ /de nyid kyi phyir phan btags zhes bya ba la sogs pa smos pa yin te/ gang gis phan 'dogs par byed pa 'dir phan 'dogs pa zhes bshad la/phan btags pa de la slar lan lon pa de gang yin pa de ni lan ldon pa zhes bya ba ste/ de yang re zhig bsngags par 'os pa nyid yin na/ ma bcol phan par byed pa yi/ /zhes bya ba gsol ba ma btab tu zin kyang thams cad du phan 'dogs par byed pa nyid yin na/ gang byang chub sems dpa' yod pa de ni byang chub sems dpa' ste/ de ni smos ci dgos pas shin tu yang bsngags par bya ba yin no zhes bya ba'i tha tshig go/ /bstod pa'i tshig dag gis bsngags par 'os pa yin pa 'ba' zhig tu ma zad de/ phyag 'tshal ba dang / me tog la sogs pas mchod pa bya ba yang yin no//de yang gang gi phyir 'gro ba nyung zad cig la nar ma tsam gyis kha zas sbyor zhing sbyin par byed pa gang yin pa de la yang 'di ni 'gro ba la zas sbyin par byed pa yin pas/ dge ba byed pa yin no zhes skye bo rnams kyis bkur zhing mngon par mchod par byed pa yin no//nar ma'i zas ci tsam zhig sbyor bar byed ce na/ skad cig tsam gyis dus thams cad du ma yin pa dang / zas tsam sbyin pa de yang brnyas pa dang bcas pa nyid du bsten par byed pa nyid yin pa'o/ /ji ltar na brnyas pa dang bcas par byin du zin kyang dge ba yin zhe na/ nyin phyed 'grangs par byed pa zhes bya ba smos te/'gro ba nyung zad cig gi nyi ma phyed kyi 'tsho ba yin pa'i phyir ro/ /byang chub sems dpa' dag ni sems can grangs nges pa med pa mtha' yas zhes bya bas nye bar mtshon pa rnams la/ dus ring du ste dus chad pa med par sbyin zhing ster bar byed pa'o//ci zhig sbyin par byed ce na/ mkha' dang 'gro ba zad kyang gang yin la bsams pa ma lus pa mtha' dag yongs su rdzogs par byed pa dang / nam mkha' dang 'gro ba rnams zad par gyur kyang mi zad pa gang yin pa de ni/ yid la bsams pa mtha' dag rdzogs byed cing / / mkha' dang 'gro ba zad kyang mi zad pa/ /zhes bya ba ste/ dus gsum thams cad du dge ba'i bdag nyid can gyi dngos po'i ngo bo nyid yin pa'i phyir ro/ /'di skad ston te/ yang dag par sbyin par byas pa'i sems can grangs mtha' yas nye bar mtshon pa'i phyir chad pa med pa dang / thams cad kyi yid la re ba ma lus pa yongs su rdzogs par byed pa dang / nam mkha' dang 'gro ba rnams yongs su zad kyang zad pa med pa nyid kyis dus kyi rgyun chad pa med par rjes su sbyin par byed pa dag ci'i phyir mchod par byed pa nyid du mi 'gyur te/ gzhan du na de ni shin tu mchod par byed pa yin no zhes bstan pa'i don to//de lta na gang zhig de 'dra'i rgyal sras nar ma'i sbyin bdag chen po'i yul la 'gro ba gang zhig gal te rang gi sems rnyog pa dang bcas shing / dad pa med pa'i ngan sems skyed par byed pa de/ ngan sems bskyed pa'i grangs bzhin bskal par ni//zhes pa rnyog pa'i ngan sems skyes pa'i skad cig ma'i grangs ji snyed pa'i skad cig ma de dang mnyam pa'i bskal pa'i grangs de snyed du dmyal bar gnas par 'gyur ro zhes rgyal bas te sangs rgyas bcom ldan 'das kyis shes rab kyi pha rol tu phyin pa brgyad stong pa la sogs pa las gsungs pa yin no//'on te rgyal ba'i sras la yid rab tu dang bar byed cing dang bar byed pa na skyes bu de'i 'bras bu sngar bshad pa'i 'bras bu yid du mi 'ong ba'i dus de las lhag par yid du 'ong ba'i 'bras bu bde 'gro la sogs pa skyed par 'gyur ro/ /de bzhin du rgyal ba'i sras rnams la do gal lam stobs chen pos kyang sdig pa mi 'byung ste/rkyen gyi stobs dang ldan pa dag nye bar gnas pas kyang / sems can gyi sdig pa'i las dang 'brel par mi mdzad la/ sems can mgu ba la mchog tu brtson pas dge ba ni ngang gis 'phel bar gyur pa yin no//de bas na gang gi sku la rgyal ba'i sras kyi sems kyi phan yon chen po de lta bu dang ldan pa'i mchog dam pa sems kyi rin po che 'di skyes shing 'khrungs par gyur pa de rnams kyi sku lus la phyag 'tshal zhing 'dud par byed do/ /de bzhin du gang la gnod pa byas kyang bde ba dang rjes su 'brel par 'gyur ba yin te/bcom ldan 'das kyis kyang sangs rgyas kyi chos rnams la gnod par byed pa gang yin pa de rnams kyang mtho ris su nye bar 'gro ba'o zhes ji skad gsungs pa lta bu'o/ /dmyal bar gnas par 'gyur zhes ma gsungs sam zhe na/ de ni bden mod kyis/ de rnams la gnod pa byas pa'i dbang gis dmyal ba rnams su gnas par gyur kyang de gzhi de las gnas skabs gzhan du sems dad cing dang bas slar yang snod du gyur pa na/ de dad pa la sogs pa'i rim pas mtho ris su 'gro ba'i thabs kyang de nyid yin par de rnams kyis gzigs te/dper na 'phags pa me tog zla mdzes kyis rgyal po dpa' byin la byas pa lta bu'o/ /'dir phan pa ni thar pa'i sa bon yin la/ bde ba dang sdug bsngal yang de dang 'brel pa'i ngang tshul yin pas de ltar na brgyud pa'i sgo nas gnod par byed pa la yang bde zhing phan pa dang 'brel pa yin no//sangs rgyas dang byang chub sems dpa' las ni phan pa dang bde ba nyid 'byung ba'i phyir bde ba'i 'byung gnas zhes bya ba smos te/ bde ba'i 'byung gnas ni bde ba'i zhing gyur pa yin pas/ byang chub sems dpa' skyob pa de la skyabs su mchi zhes pa'o/ /byang chub kyi sems kyi phan yon ni de'i 'bras bu'am yon tan gyi bdag nyid che ba'o//byang chub sems dpa'i spyod pa la 'jug pa'i legs par sbyar ba las le'u dang po'o// //de ltar phan yon chen po dang ldan zhing bde ba'i 'byung gnas su gyur pa nyid yin pa'i phyir/ sems rin po che de nges par gzung zhing blang dgos pas de'i phyir rin chen sems de zhes bya ba la sogs pa smos te/rin po che lta bu'i sems de yang dag par legs par gzung bar bya ba'i phyir/ mchod pa yang dag par bya'o/ /de yang dad pa'i shugs chen pos phyag 'tshal ba dang / skyabs su 'gro ba la sogs pas/ de bzhin gshegs pa ste/ sangs rgyas bcom ldan 'das rnams dang / dam pa'i chos dkon mchog dri ma med pa dngos po dang dngos po med par rnam dpyad na dri ma'i nag nog dang bral ba dag dang / sangs rgyas kyi sras yon tan mtha' yas pa ste rgya mtsho snyed mnga' ba rnams la legs par mchod par bya ste/mchod pa dang / bstod pa dang / phyag 'tshal ba dang / skyabs su 'gro ba la sogs pa byas/ bsam pa yang dag par sbyangs nas sdig pa rnams kyang bshags la/ de'i rjes la byang chub tu smon par bya ste/ de nas ni 'jug par bya'o/ /de ltar sbyor ba dang / dngos gzhi dang / mjug gis rgyas pa dang / yongs su dag pa nyid kyis sems rin po che de yang dag par 'dzin pa nyid du 'gyur ro/ /de la mchod pa ni me tog dbul ba dang / de'i rkyen du gyur pa'i las rnams so/ /de yang bla na yod pa dang bcas pa dang /bla na med pa'o/ /de las kyang re zhig dang po bstan pa ni me tog 'bras bu zhes bya ba la sogs pa yin te/ ji snyed yod pa dang zhes bya ba ni khyad par smras pa yin no/ /sman gyi rnam pa zhes bya ba ni sman gyi rigs su gtogs pa ste/ sman gyi me tog la sogs pa'i mchog gang dag ji snyed yod pa dang /de bzhin du 'jig rten dag na rin po che'i rnam pa mchog tu gyur pa gang dag ji snyed yod pa ste/ 'dir 'jig rten zhes bya ba lha la sogs pa ste/ 'jig rten na ji snyed yod pa zhes thams cad la yang sbyar ba'i phyir zlos pa'i tshig tu smos pa yin no//gtsang ma yang yin la yid du 'ong ba yang yin pas chu gtsang yid du 'ong ba'o/ /ri bo ni sa 'dzin no/ /dben zhing nyams dga' ba ni dben zhing nyams dga' ba'o/ /ljon shing rang gi me tog gis brgyan cing 'bar bar snang ba ni brgyan pas spud pa'o//de bzhin du shing gang 'bras bu bzang zhing mchog tu gyur pas yal ga dud cing g.yur za ba'i ngang tshul gang la yod pa de ni shing gang 'bras bzang yal ga dud pa zhes bya'o/ /dri ni bzhi po cha mnyam du sbyar ba la sogs pa'o/ /spos ni a ka ru nag po la sogs pa'o//de yang phyogs la sogs pa stong par lha la sogs pas legs par sbyar te btang ba'o/ /dpag bsam shing ni ji ltar mngon par 'dod pa'i 'bras bu 'byung ba'i shing ngo / /chu las skyes pa'i me tog pad+ma la sogs pas brgyan pa gang yin pa de ni pad+mas brgyan pa'o//de bzhin du ngang pa'i sgra skad shin tu snyan pa dang ldan pa gang yin pa de ni ngang pa shin tu skad snyan yid 'ong zhes bya'o/ /gzhan yang zhes bya ba ni re re nas brjod par ji tsam zhig nus te/ khyad par can gyi dngos po gang dag yod pa de dag thams cad dbul bar bya'o zhes bya bar dgongs te/sangs rgyas la sogs pa mchod par 'os pa'i sangs rgyas bcom ldan 'das rnams kyi rgyan du gyur pa me tog la sogs pa 'di dag ni/ nam mkha' rab 'byam khams kyi mthas gtugs pa/ /zhes bya ba ni nam mkha' ma lus pa khyab par byed pa yongs su gzung ba med pa ste/dper na byang gi sgra mi snyan lta bu'o/ /dpag bsam gyi shing la sogs pa de dag kun blo yis blangs shing kun nas bzung nas thub pa skyes bu rnams kyi mchog sras dang bcas pa rnams la legs par dbul ba bgyi zhing 'di dag bdag gis legs par bstab par bya'o//de nas yon gnas kyi dam pa thugs rje chen po dang ldan pa khyed rnams kyis bdag la rjes su brtse bar dgongs pas bdag gi me tog la sogs pa gnas gang na gnas pa de dag thams cad bzhes par mdzod cig /de ci'i phyir zhe na/ bsod nams mi ldan zhes bya ba smos te/bsod nams nye bar ma bsags pas so/ /de nyid kyis na bkren chen te shin tu dbul por gyur pa'o/ /de'i phyir mchod pa'i nor du rung ba ni ji skad du bshad pa'i me tog la sogs pa las gzhan pa bdag la cang yang ma mchis so/ /de bas na gzhan gyi don la dgongs par mdzad pa'i mgon po khyed kyis me tog la sogs pa 'di rnams rang rang gi gnas na/ji lta ba gnas su zin kyang bdag gi blo la gnas pa ste/ nyid kyi mthus bzhes par mdzod cig ces pa'o/ /dris pa/ khyed la rang gi bdag nyid la sogs pa yang yod bzhin du/bdag la ci yang ma mchis so zhes smra zhe na/ de'i phyir rgyal dang zhes bya ba la sogs pa smos te/ rgyal ba ni bdud bzhi las rgyal ba'i sangs rgyas te/ de sras dang bcas pa rnams la bdag gis ni dus gsum gyi dge ba thams cad dang bcas pa dang dngos po thams cad gtan du dbul bar bgyi'o//des na sems dpa'i mchog khyed rnams kyis bdag yongs su bzhes shig /bdag gir mdzod cig /kye sems dpa'i mchog mchog tu gus pas khyed kyi 'bangs su mchi bar bgyi zhing 'bangs kyi dngos po nyid bgyid do zhes pa'o/ / bdag nyid la sogs pa ni sems can thams cad la sbyin par byed pa yin la/ des gdul bya de rnams kyi don ni khyed kyis bya dgos pa yin na/ de bdag cag rnams la ci'i phyir dbul bar byed ce na/ de'i phyir bdag ni khyed kyis zhes bya ba la sogs pa smos te/ bdag khyed kyis yongs su gzung zhing bzhes par mdzad na/srid pa ste 'khor ba na mi 'jigs shing skrag pa med pas sems can rnams la phan par gyur pa'i don bgyid pa dang / sngon gyi sdig las yang dag 'da' bgyid cing / /sdig pa gzhan yang slan chad mi bgyid do/ /yang de ltar gyur na chos dang mi 'jigs pa dang /zang zing gi sbyin pas sems can rnams la phan pa bgyid par rngo thogs kyi gzhan du ni ma yin no/ /chen po rnams la brten bcas na don chen por 'gyur ba'i phyir ro/ /gzhan yang khyed rnams kyis bzhed pa'i don ni 'gro ba'i don nyid yin pas khyed rnams la phul bas sems can thams cad la stsal bar gyur pa lags te/khyed kyi bka' nyid kyis de rnams la yang stsal bar bgyi'o zhes sbyin par bshad pa yin no/ /yang de'i rkyen du gyur pa dag bstan par bya ba'i phyir/ khrus kyi khang pa zhes bya ba la sogs pa smos te/khrus kyi khang pa shin tu dri zhim pa dag ni shel gyi rang bzhin can gyi sa gzhi kun tu gsal zhing dngas la 'tsher bag dang bcas pa nyid du bstar zhing byi dor byas pa de ni rin po che sna tshogs 'od zer 'bar ba dang ldan pa'i ka bas yid du 'ong zhing nyams dga' bar gyur par mu tig gi rgyu las byas pa'i blo re 'od kyi mdangs chags pa bres pa gang yin pa der/de dag dang de las gzhan pa'i rgyan rnams kyis kyang brgyan pa dag tu/ de bzhin gshegs pa rnams dang / de'i sras rnams la rin po che'i rang bzhin las byas pa'i bum pa grangs mang po du ma dag spos dri zhim po sna tshogs pa dang sbyar ba'i chu yid du 'ong ba dang /me tog gis kyang legs par bkang ba byas pa dang / de bzhin du glu snyan pa dang / rol mo snyan pa dang bcas pa du ma dag gis sku khrus gsol bar bgyi'o/ /de nas de'i rjes la khrus gsol ba de dag gi sku la na bza'i rnam pa mtshungs pa med pa'i gos gtsang zhing dri zhim po'i bdug pas rab tu bsgos shing bdug pas mdzes par bya ba'i phyir sku phyi bar bgyi'o//de nas ni de dag la kha dog tshon gyis legs par bsgyur zhing mdzes par bya ba dang / dri shin tu zhim pos bsgos pa'i na bza' dam pa bdag gis dbul ba 'am dbul du gzhug par bya'o/ /na bza' dag la dri dang spos kyis bsgos shing byugs pa ni rgyan dang 'dra bar dregs pa'i rgyu yin pa'i phyir bkag pa yin la/ chos kyi bdag po yang rang nyid la gnas par mdzad pas slob ma rnams rjes su 'jug cing slob par mdzad pa ma yin nam/de ni bden mod kyi/ dad pas byin pa'i spos dang me tog la sogs pas mig la phan pa la sogs pa'i blos de la spyod par ni mngon sum snang ba yin gyi/ brgyan pa 'am chags pa'i blos ni ma yin la/ sangs rgyas kyi sku gzugs la sogs pa la ni de ltar byas pa nyid kyang nyes pa yod pa ma yin pas brtsad pa 'dis ci zhig bya/ khyim pa'i rtags can gyi byang chub sems dpa' rnams ni gos bzang po mtho ris na lha la yod pa lta bu srab cing shin tu phra ba sna tshogs shing kha dog du mas nye bar bsgyur bas mdzes pa gang yin pa de ni srab la 'jam pa sna tshogs mdzes//zhes bya ba ste/ de lta bu'i na bza' dang rgyan mchog brgya phrag de dang de dag gis zhes bya ba gdu bu dang / dpung rgyan dang / snyan cha dang / cod pan la sogs pa bzang po rnams kyis ma pham pa la sogs pa la mchod cing brgyan par bgyi'o//de la ma pham pa ni bdud thams cad kyis pham par mi nus pas na ma pham pa ste/ 'phags pa byams pa'o/ /kun nas bzang bas na kun tu bzang po ste/ 'di ni byang chub sems dpa' yin no/ /'jam zhing snyan pa'i dbyangs mnga' zhing byis pa 'dra bas na 'jam dbyangs so//'jig rten thams cad kyi dbang phyug bzang ba yin zhing de'i rnam pa 'dra ba'i phyir dang / 'gro ba sdug bsngal dang ldan pa rnams la spyan ras kyis 'tsho zhing gzigs par mdzad pas na 'jig rten dbang phyug ste/ 'phags pa spyan ras gzigs dbang phyug go//sogs pa'i sgras ni phyag na rdo rje la sogs pa bsdu ste/ de ltar na/ mi pham kun tu bzang dang 'jam dbyangs dang / /'jig rten dbang phyug sogs la 'ang brgyan par bgyi/ /zhes bya ste/ de rnams ni gdul bya rnams kyi dbang du mdzad nas khyim pa'i rtags 'dzin par mdzad pa yin no//'ang zhes bya ba'i sgras gdul bya'i dbang gis sangs rgyas de lta bur ston par mdzad pa la yang brgyan par bgyi'o zhes ston to/ /gling bzhi pa dang / nyi ma dang zla ba la sogs pa re re zhing stong stong yod pa la ni stong spyi phud ces bya'o/ / de stong la ni stong gnyis pa'o/ /stong gnyis pa stong la ni stong gsum gyi 'jig rten gyi khams te/ sangs rgyas kyi zhing gcig yin la zhing rnams la ni phyogs bcu dag tu mtha' yod pa ma yin te/ stong gsum de thams cad du dri'i ngad ldang zhing 'gro ba khyab par 'byung ba'i ngang tshul gang la yod pa de ni/stong gsum kun tu dri ngad ldang ba yi/ /dri mchog ces bya ba ste/ de rnams kyis thub dbang kun gyi sku zhes bya ba sangs rgyas dang byang chub sems dpa' thams cad kyi sku la byug par bgyi'o/ /ji lta bu'i sku la byug par bya zhe na/ thub pa rnams kyi sku gang yin pa de gser de mdog bzangs k+Sha ra dang /sa'i skyong bu kha sbyar nang du legs par bsregs shing btsos la shin tu sbyangs shing dag par byas nas byi dor byas te phyis pa lta bu'i 'od chags shing shin tu 'bar bar gyur pa de dag la bdag nyid rang gis byug par bgyi ba 'am gzhan dag nye bar byug tu gzhug par bya'o//gzhan yang thub pa'i dbang po mchog mchod par bya ba'i gnas kyi mchog la dri dang dbyibs la sogs pa yid du 'ong ba'i me tog lha yul na yod pa'i me tog dri zhim pa man+dA ra ba zhes bya ba dang / pad+ma dang / ut+pal la sogs pa zhes bya ba de dag thog mar gyur pa sna ma dang /tsam pa dang / nA ga ge sar la sogs pa'i me tog gang yin pa de thams cad kyis thub pa'i dbang po la mchod pa dang / phreng bas kyang mchod par bgyi'o/ /ji lta bus she na/ spel legs yid 'ong rnams kyis zhes bya ba ste/sna tshogs pa spel legs par byas pas dbyibs yid du 'ong zhing snying du sdug par gyur pa rnams kyis mchod par bgyi'o/ /de bzhin du spos kyi dri'i ngad kyis 'gro ba thams cad khyab par byed pas rgya cher spros par gyur pa ste/ de nyid kyis ni yid du 'ong bas/ spos mchog yid 'phrog dri ngad khyab pa yi//zhes bya ba ste/ de lta bu'i bdug pa'i sprin tshogs zhes bdug spos kyi tshogs rnams kyis thub pa'i dbang po de la dbul bar bgyi zhing bdug par bgyi'o/ /de bzhin du zhal zas kyi rnam pa 'bras chan la sogs pa dang / kha ra dkar po la sogs pa sna tshogs pa dang bcas pa dang /btung ba yid du 'ong ba dang / rgya star gyi 'bras bu'i khu ba la sogs pas nye bar mtshon pa'i lha bshos rnams kyang thub pa de rnams la dbul bar bgyi zhing bstab par bgyi'o/ /de bzhin du mar me'i rnam pa gser gyi pad+ma rnams la tshar du dngar nas gnas pa'i rin po che sgron ma ste/yid bzhin gyi nor bu rin po che la sogs pa gsal zhing snang bar byed pa rnams kyang de rnams la dbul bar bgyi'o/ /gzhan yang sa gzhi legs par bstar zhing byi dor byas pa dri zhim pas nye bar byugs pa gang yin pa der me tog gi sil ma kha dog dang dbyibs sna tshogs pa yid du 'ong bas spel ba dgram zhing dgod par bgyi'o//gzhal yas khang gi khyad par dbul ba ni sngar phul ba'i gzhal yas khang gi khyad par gyi tshogs kyi sprin mang po la de na gnas pa'i lha'i bu mo rnams kyis sbyar zhing nye bar blangs pa'i bstod pa dang / glu shin tu yid du 'ong zhing snyan pa dang ldan pa dang /gzhan yang mu tig dang / nor bu rnams kyi chun 'phyang gis de la mdzes par byas pa'am/ des mdzes par byas pas mu tig chun 'phyang mdzes pa 'bar/ /zhes bya ba la de dag thams cad kun nas 'bar zhing 'od dang ldan pa dang / rin po che'i gdugs dang / rgyal mtshan dang / ba dan dang / bla re la sogs pa 'od dang bcas shing snang ba'i rang bzhin can rnams kyis phyogs bcu pa thams cad kyi mtha' yas pa'i nam mkha' brgyan cing 'od kyis khyab par gyur la de dag kyang / byams pa chen po'i rang bzhin can byams pa chen po gang la goms shing mngon du mdzad pa rnams la khyab par dbul ba ste/sems can thams cad la phan zhing bde bar 'dod pas bsdus pa ni byams pa ste/ de'i rang bzhin can gyi thub pa rnams la bstab par bya'o zhes bya ba'i don to/ /gzhan yang gdugs kyi mchod pa ni gang 'di rin po che'i rgyu las byas pa'i gdugs sdug cing yid du 'ong bas mdzes par gyur pa de ni rin chen gdugs mdzes zhes bya ba yang de'i khyad par ni gser gyi yu ba can du byas pas nye bar mtshon pa dang /kho ra khor yug tu mu tig gi rgyan gyi rnam pa la sogs pa yid du 'ong ba btags pas brgyan cing mdzes pa dang /dbyibs legs shing blta na sdug par snang ba de gyen du bsgreng ba 'di yang rtag tu thub pa'i dbang po rnams kyi thad du bzung la dbul bar bgyi'o/ /de ltar mchod pa'i dbye ba phyogs tsam zhig smras nas/ gzhung mangs kyis dogs pas spyir mchod pa'i sprin ji snyed pa so sor gnas pa 'byung ba nyid du bstan pa'i phyir/de las gzhan yang zhes bya ba la sogs pa smos te/ mchod pa'i las kyi rten du gyur pa de dag las mchog ste/ snga ma las phul du byung ba nyid du so sor gnas shing 'byung bar byin gyis rlob par gyur cig pa'o//ci zhig ce na/ mchod pa'i tshogs te mchod pa'i sprin gyi phung po'o/ /rol mo ni rnga bo che la sogs pa'o/ /dbyangs snyan pa ni rdza rnga la sogs pa'i rol mo dang / gar dang bcas pa'i dbyangs snyan pa'i glu len pa yid du 'ong ba ste/ de rnams kyis sems can sdug bsngal ba rnams kyang tshim par byed pa nyid do/ /dam pa ni sangs rgyas te/ de'i chos ni lung dang rtogs pa'i bdag nyid can no/ /de ni dkon mchog yid bzhin gyi nor bu rin po che dang 'dra bar dal 'byor phun sum tshogs pa nyid thob kyang rnyed dka' ba dang /don che ba nyid yin pa'i phyir ro/ /dam chos dkon mchog kyang yin la thams cad kyang yin pas de skad ces bya ste/ dam pa'i chos dkon mchog de la/ de'i glegs bam la sogs pa mchod pa'i sgo nas mchod pa dang / de'i glegs bam la sogs pa dang ldan pa 'am sangs rgyas kyi sku gdung chud par byas pa'i mchod rten rnams dang /sku gzugs rnams la rin po che dang / me tog la sogs pa gang yin pa de'i char rgyun mi 'chad cing bar mtshams med pa nyid du 'bab par shog cig ces pa'o/ /de ltar bla na yod pa dang bcas pa'i mchod pa bshad nas/bla na med pa'i mchod pa bstan pa'i phyir/ ji ltar zhes bya ba la sogs pa smos te/ bgrod par bya ba ji snyed pa thugs su chud pas na/ de bzhin gshegs pa ste/ yang dag par rdzogs pa'i sangs rgyas so/ /bstod pa bshad pa ni yon tan rgya mtsho zhes bya ba la sogs pa smos pa yin te/dbyangs kyi yan lag ni so ring zhes bya ba la sogs pa lnga po re re zhing yang yan lag ni dbye ba mtha' yas pa yod pas rgya mtsho ji snyed pa gang ba'i bstod pa'i tshogs rnams kyis/ yon tan rgya mtsho de snyed mnga' ba rnams la bdag gis bstod pa bgyi'o zhes pa'o//bstod pa'i byin gyis brlab pa smras pa ni/ bstod dbyangs zhes bya ba la sogs pa smos pa yin te/ bstod pa'i dbyangs glur yang dag par blangs pa'i tshogs ni bstod dbyangs snyan pa'i sprin te/ de dag kyang yon tan rgya mtsho dang ldan pa'i spyan sngar nges par kun du 'byung ba 'am rnam pa thams cad du 'byung bar gyur cig pa'o//phyag 'tshal ba smras pa ni/ dus gsum zhes pa la sogs pa smos pa yin te/ dus gsum gshegs pa'i sangs rgyas kun/ /zhes bya ba ni 'das pa la sogs pa'i dus gsum po'i spyir bsdus pa ni dus gsum ste/de dag tu gshegs shing bzhugs pa'o/ /su zhig ce na/ sangs rgyas te/ shes bya mthar thug pa med na yang ye shes mtha' yas pa'i stobs mnga' ba nyid kyis na/ shes bya'i dkyil 'khor ma lus pa khyab par mdzad pa'i blo gang la mnga' ba de ni sangs rgyas te de rnams kun la'o//de 'ba' zhig tu ma zad kyi/ chos dang tshogs kyi mchog bcas la/ /zhes bya ba ste/ dam pa'i chos dang tshogs kyi mchog dang bcas pa ni lung dang rtogs pa'i bdag nyid dang / gang zag chen po brgyad la sogs pa'i dge 'dun dang bcas pa la sangs rgyas kyi zhing thams cad kyi rdul phra rab kyi grangs snyed kyi lus thams cad kyis rab tu btud pas ni bdag phyag 'tshal lo zhes pa'o//gzhan yang phyag bya ba'i gnas su gyur pa byang chub sems dpa' rnams kyi gzhi sku'i gzugs brnyan rnams dang /bang rim dang / bum pa dang / kha khyer dang / srog shing dang / 'khor lo dang / gdugs la sogs pa'i gzugs so phag la sogs pa las brtsigs shing bsags pa las bsgrubs pa nyid ni mchod rten no/ /mchod rten de la rten cing 'brel par 'byung ba'i tshigs su bcad pa la sogs pa'i snying po dang ldan par byas pa'i bcom ldan 'das kyi rten ni 'di la phyag bya ba la sogs pas bsod nams bskyed pa'i don du byin gyis brlabs pa yin pas de la phyag 'tshal ba'o//'dir phyag 'tshal ba'i sgra'i don ni yan lag gi dam pa sa la btud pa yin pa/yan lag gi dam pa yang mgo bo yin pas de btud pa zhes bya ba'i don to/ /ched du song ste 'di las lung nod pas na mkhan po'o/ /thar pa'i don du 'bad cing brtsal bas na brtul zhugs can te/ de dag mngon du dmigs nas phyag 'tshal lo zhes pa'o/ / de bzhin du skyabs su 'gro ba smras pa ni/ byang chub snying por zhes pa la sogs pa smos pa yin te/ sangs rgyas rnams la skyabs su mchi'o/ /ji srid kyi bar du zhe na/ byang chub snying por mchis kyi bar/ /zhes bya ste/ snying por gyur pa byang chub kyi mchog thob kyi bar du'o//chos ni mya ngan las 'das pa ste/ de la skyabs su mchi'o zhes pa'o/ /byang chub sems dpa' yi/ /tshogs la'ang de bzhin skyabs su mchi/ /zhes bya ba la/ sngar bde ba'i 'byung gnas de la skyabs su mchi'o zhes bya ba ni byang chub kyi sems bskyed pa rnams la dad pa skyes pa'i shugs kyis de skad smras pa yin la/da ltar ni sdom pa len pa'i don du skyabs su 'gro ba yin no/ /sdig pa bshags pa bstan par bya ba'i phyir/ phyogs rnams zhes bya ba la sogs pa smos te/ yang dag par rdzogs par kun la sangs rgyas pas na rdzogs pa'i sangs rgyas so//sdug bsngal dang sdug bsngal gyi rgyu las kun du gdon par bzhed pa nyid ni thugs te/ des gzhan gyi don du spyod par mdzad pas gzhan gyi don phun sum tshogs pa nyid brnyes par gyur pas na/ thugs rje chen po mnga' ba ste/ de lta bu'i byang chub sems dpa' rnams la yang thal mo sbyar te gsol bar bgyi'o//thog ma med ldan zhes bya ba ni rgyu med par skye ba dang / gtso bo las skye bar 'dod pa la sogs pa dgag pa'i phyir 'khor ba ni thog ma med par bstan pa yin te/ 'khor ba la thog ma yod pa ma yin te/ thog ma med ldan 'khor ba ste//des na tshe rabs 'di 'am sngon gyi skye ba gzhan dag la gang bdag gis ma 'tshal zhing phyugs ltar rmongs pas sdig pa'i rnam pa bdag nyid kyis bgyis pa'am/ gzhan bgyid du stsal ba nyid dang / rjes su yi rang ba gang bgyis pa ci yang rung ba'o/ /de ci'i phyir de ltar byed ce na/gti mug 'khrul pas zhes bya ba la sogs pa smos te/ de'i 'bras bu mi shes pa'o/ /ci zhig tu 'gyur zhe na/ bdag non te zhes bya ba la sogs pa smos te/ dmyal ba la sogs pa'i 'gro bar rang nyid gnas pa'i phyir ro/ /de ltar khyed kyi dka' ba las 'das pa'i nongs pa de ni rjes su 'gyod pa'i sgo nas de'i nyes pa mthong bar bgyis nas bsam pa thag pas yang dag par bshags par bgyid do//de ltar byas pa la sogs pa'i sgo nas bshad nas/ yul dang bsam pa dang / sbyor ba'i dbye bas de bshags pa bstan pa'i phyir/ bdag gis zhes bya ba la sogs pa smos te/ byang chub kyi spyod pa spyad pa mthar thug pa las byung ba'i sangs rgyas kyi ye shes ni sangs rgyas so/ /de kho na nyid du skye ba med pa ni 'dir de'i chos yin no/ /de mthong ba ni dge 'dun zhes bya ste/ 'di ni mngon par rtogs pa'i kun rdzob kyi dkon mchog gsum mo//'jig rten pa'i kun rdzob ni sangs rgyas kyi gzugs kyi sku sgyu ma lta bur bstan pa de'i sku'i gzugs brnyan la sogs pa ni sangs rgyas so/ /gzhi de las byung ba'i de'i lung gi glegs bam la sogs pa ni chos so/ /dge slong gzhi'i tshogs la sogs pa'i 'dus pa ni dge 'dun yin no//'dir mngon par rtogs pa'i dkon mchog gsum la ni gnod par bya bar nus pa ma yin pas/ dkon mchog gsum po cig shos kyi yul la/ shas che ba'i sems kyis gnod pa bgyis pa'am/ pha ma dag gam/ bla ma ste/ mkhan po dang / slob dpon la sogs pa'am/ gzhan gang yang rung ba dag la nyon mongs kyi sgo nas te/ gnod pa'i bsam pas lus dang / ngag dang / yid kyi sbyor ba'i bdag nyid can gyis gnod pa bgyis pa gang lags pa dang / mdor na/ nyes pa du ma'i skyon chags pa'i/ / sdig can bdag gis sdig pa gang / /shin tu mi bzad bgyis pa de/ /thams cad 'dren pa rnams la 'chags/ /zhes bya ba spyir bsdus te bshags pa'o/ /ci'i phyir 'bad pas 'chags she na/ gal te bdag ni sdig pa bgyis pa ma byang zhing ma zad par myur du 'gum par 'gyur du mchi zhing 'ong bar 'gyur bas//ji ltar na sdig pa 'di dag las sam/ thog ma med pa dang ldan pa'i 'khor ba las nges par thar cing 'byung bar 'gyur ba/ myur ba'i tshul gyis te/ rings pa nyid du mgon pos yongs su bskyab tu gsol zhing bde ba dam par nges par 'byung ba'i thabs bstan du gsol zhes pa'o//'di ltar 'chi bdag 'dis ni bya ba 'di byas zin la/ 'dis ni da rung ma byas so zhes sdod par mi byed pas na/ yid brtan mi rung 'chi bdag 'di/ /byas dang ma byas mi sdod pas/ /zhes bya ste/ nad med cing bde bar byas pas yid brtan du rung ba yin na yang /dogs pa med kyang 'joms par byed pas/ yid brtan du mi rung ba yin pas de bas na/ na dang mi na kun gyis kyang / /glo bur tshe la yid mi brtan/ /zhes bya ba ste dogs pa med kyang glo bur nyid du 'byung bas/ sprin med pa'i nam mkha' las thog chen po 'bab pa dag srid pa dang 'dra bar glo bur du gnod pa chen po 'byung ngo //de bzhin du/ thams cad bor te cha dgos par/ /bdag gis de ltar ma shes nas/ /zhes bya ba sdug pa la sogs pa'i dngos po thams cad bor zhing spangs nas/ rang gi las kyi lam 'ga' zhig dang chas shing 'gro dgos pa yin pas bdag gis de lta bu 'di mi shes na/mdza' dang mi mdza' kun gyi phyir/ /sdig pa rnam pa sna tshogs byas/ /zhes bya ba ni rgyu des mi dge ba du ma zhig byas so zhes pa'o/ /shi bar gyur nas ni bdag dang mi mdza' ba'i dgra bo rnams kyang med par 'gyur zhing /gzhan dag kyang med par 'gyur la/ mdza' ba ste sdug pa rnams kyang med par 'gyur ba dang / bdag nyid kyang ni med par 'gyur ro/ /de lta na su zhig cha dgos par 'gyur/ /sems kyi rgyun rgyun nyid 'gro'o/ /de lta na ni de nyid bdag ce na/de ni bden mod kyi/ tshe 'di'i phung po'i sdug bsngal la sogs pa'am/ de las gzhan pa dag la rnam pa thams cad du 'pho bar byed pa ma yin gyi/ 'chi ba'i skad cig ma'i rkyen dang phrad pa las skye ba gzhan du 'gro ba na dran pa'i tshul nyid kyis de dang de dran pa'i yul du de 'gyur ba yin pas na de dran par byed de/de bas na/ dngos po gang dang gang dag rjes su spyad pa de dang de goms pa'i sems kyis nyams su myong bar 'gyur la/ de yang rmi lam nyams su myong ba bzhin du tshe 'di 'das shing song bar gyur pa de dag thams cad ni slar mthong bar mi 'gyur zhing /nyams su myong bar mi 'gyur ro/ /skye ba gzhan dag tu nyams su myong ba lta smos kyang ci dgos kyi/ re zhig gson pa'i dus kyi da ltar gyi tshe 'di nyid la mdza' ba dang mi mdza' ba du ma zhig 'das par gyur kyang / rmi lam nyams su myong ba bzhin du/ dran pa'i yul du gyur pa yin gyi/slar mthong bar mi 'gyur ro/ /de dag gi don du byas pa'i sdig pa mi bzad cing rnam par smin pa yid du mi 'ong ba 'byin pa'i drag po gang yin pa de ni mdun na gnas pa yin no/ /de la thams cad bor te zhes bya ba la sogs pa ni mdza' ba dang mi mdza' ba dang bral ba sngon byung ba bshad pa yin no//mi mdza' rnams kyang zhes bya ba la sogs pas phyis 'byung bar 'gyur ba bshad pa yin no/ /rmi lam nyams su myong ba bzhin du zhes bya ba la sogs pa ni da ltar ba yin te/ tshe 'dir yang mi mdza' ba la sogs pa'i dngos po gang dang gang las 'jigs pa la sogs pa nyams su myong bar gyur pa de dang der ni skad cig ma re re zhing dran pa nyid kyis dran pa'i yul du gyur pa yin pas de ni rmi lam nyams su myong ba bzhin du 'das par gyur pa thams cad slar mthong bar mi 'gyur te/rnam pa thams cad du 'jigs pa yin pa'i phyir ro/ /ji ltar na dran pa dang /slar ngo shes par 'gyur/ las dang 'bras bu yang 'brel par mi 'gyur ro zhe na/ de ni ma yin te/ de nyams su myong ba'i skad cig ma re re las mngon sum mam/ gcig nas gcig tu brgyud pa'i tshul gyis dran pa la sogs pa skye bar 'gyur ba de'i sa bon dang rkyen du gyur pa yin pas/de ltar tshe snga ma nas 'ongs pa dang / thams cad bor te skye ba gzhan dag tu 'gro dgos pas bdag ni glo bur ba yin no zhes bdag gis so sor rtogs shing shes par ma gyur pas/ rgyu des na mdza' ba 'am mi mdza' ba rnams la/ rjes su chags pa dang zhe sdang ba'i dbang gis sdig pa rnam pa du ma zhig byas par gyur pa 'di la gal te bdag 'chi bar gyur pa na slar bcos pa'i thabs las brtson par ma byas na myur du 'chi bar 'gyur ro//ci'i phyir zhe na/ nyin mtshan sdod pa yod med par/ /tshe 'di rtag tu 'god 'gyur zhing / / snon pa gud nas 'ong med na/ /zhes bya ba ste/ tshe ma nyams pa 'am/ 'phel ba 'am/ slar 'ong bar gyur pa'i thabs yod pa ma yin pas/ bdag lta 'chi bar cis mi 'gyur te nges par 'chi bar 'gyur te/ 'chi ba'i tshe na yang bdag nyid kyi mal du 'dug pa bzhin du 'am/gnyen bshes rnams kyis mtha' nas nye bar bskor du zin kyang / srog chad pa'i tshor ba dag srog gcod pa la sogs pa'i sdug bsngal ni bdag nyid gcig pus rjes su myong bar 'gyur gyi/ nye du dang mal stan la sogs pa sdug bsngal ba ni ma yin no//de lta na yang de rnams ni skyob par byed do zhe na/ de rnams ni tshe 'di nyid la skyob par byed pa yin gyi/ 'chi ba'i tshe na/ gshin rje'i pho nyas zin pa la/ /gnyen pas ci phan bshes ci phan/ /de tshe bsod nams gcig skyabs na/ /bsod nams de yang bdag gis ma bsten to//de bas na mgon po bag med par gyur pa bdag gis ni sdig pa mang po zhig nye bar bsgrubs shing bsags par gyur to/ /ci'i phyir ji ltar byed ce na/ 'chi ba'i 'jigs pa 'di 'dra ba nyid ma 'tshal bas/ mi rtag tshe 'di nyid kyi ched du bdag dang bdag gir lhag par chags pa'i rgyus sdig pa rnams bsags so zhes pa'o//de bas na bdag nyid ni gshin rje'i pho nyas nges par khrid par 'gyur ro/ /de ltar na de nyid kyi tshe kun nas skyob pas bsod nams dag bya'o zhe na/ skye bo zhes bya ba la sogs pa smos te/ skye bo dag yan lag bcad pa'i phyir de'i sar nyes pa'i dbang gis de ring khrid par gyur pa yang 'jigs pas bred par 'gyur zhing skom pas shin tu gdungs pas kha skams pa dang /mig rtsa ngan pa la sogs pa rang bzhin snga ma las gzhan du gyur pa snang zhing / de phyogs bzhir skyabs dag tshol bar byed pa na/ skyabs byed pa dag med pa na/ lhag par zhum par byed pa yin na/ 'chi ba'i dus byed pa'i gshin rje'i pho nya shin tu 'jigs 'jigs lta bu'i sha tshugs can gyis bzung zhing / bdag gir byas par gyur la 'jigs pa chen pos skrag par byed pa'i rims nad kyis thebs par gyur cing /rab tu nyam thag byed pa ste/ bshang gci 'byung bar lus la gos par 'gyur ba'i gnas skabs su lta smos kyang ci dgos/ de nas sngar bas/ bred sha 'thon pa'i mig bgrad nas/ /phyogs bzhir skyabs dag tshol bar byed/ /ji lta zhe na/ su zhig 'jigs chen 'di las bdag /legs par skyob par byed 'gyur zhes/ /de ltar skyabs tshol bas/ phyogs bzhir skyabs med mthong nas ni ste bsod nams med pa'i phyir ro/ /bsod nams las ni sangs rgyas la sogs pa de'i tshe yang skyabs mdzad par snang ngo / /bsod nams kyang sangs rgyas kyis byin gyis brlabs kyis de la skyabs su 'gro ba la sogs pa ste/bdag nyid rang bzhin du gnas par gyur pa yang de ltar 'gyur gyi/ sdig pa shin tu drag pa yang de'i tshe rang bzhin du gnas par mi 'gyur ro/ /de nas kun tu yi mug 'gyur/ /skyob par gyur pas kyang /gnas der skyabs yod ma yin na/ /de tshe bdag gis ji ltar bya/ /de'i phyir/ de bas rgyal ba 'gro ba'i mgon/ /'gro ba bskyab pa'i don brtson pa/ /stobs chen 'jigs pa kun sel la/ /de ring nyid nas skyabs su mchi/ /rgyal ba de yis thugs su chud pa'i chos//de kho na nyid/ 'khor ba'i 'jigs pa sel ba dang / /byang chub sems dpa'i tshogs la yang / /de bzhin yang dag skyabs su mchi/ /bdag ni 'jigs pas rnam skrag nas/ /kun tu bzang la'ang bdag nyid dbul/ /'jam pa'i dbyangs la'ang bdag nyid kyis//bdag gi lus ni dbul bar bgyi/ /de la lhag par mos pa nyid kyi phyir ro/ /mos pa'i bdag nyid sna tshogs pa'i stobs kyis de la yang dang yang bdag nyid kyi lus dbul bar bgyi'o/ /'jam pa'i dbyangs ni de bzhin gshegs pa'i rigs nye bar mtshon pa yin te/de la mngon par brtson pa nyid kyi phyir bdag nyid phul nas/ pad+ma'i rigs gang la thugs rjes spyod pa ma 'khrul pa'i ngang tshul mnga' ba'i/ thugs rjes spyod pa ma 'khrul pa'i/ /spyan ras gzigs mgon de la ni/ /nyam thag nga ros 'o dod 'bod/ /sdig ldan bdag la bskyab tu gsol//'phags pa nam mkha'i snying po dang / /sa yi snying po dag dang ni/ /thugs rje che mgon thams cad la'ang / /skyabs tshol snying nas 'o dod 'bod/ /rdo rje rigs kyi bdag po la'ang / /gang zhig mthong nas gshin rje yi/ / pho nya la sogs sdang ba rnams/ /skrag nas phyogs bzhir 'byer byed pa'i/ /rdo rje can la skyabs su mchi/ /de yang blos mngon sum du byas nas bdag ni/ sngon chad khyed kyi bka' las 'das/ /da ltar nyid ni da ltar te/ /da ni 'jigs pa che mthong nas/ /khyed la skyabs su mchi lags kyis//skrag par gyur pa'i 'jigs pa myur du bsal du gsol/ khyed kyi bka' las 'das pa las/ /bdag shin tu smad par 'gyur ro zhes bstan pa'i phyir/ tha mal zhes bya ba la sogs pa smos te/ tha mal nad kyis zhes bya ba ni lus la byung ba ste/ de dag ni sman gyis bcos na legs par myur du zhi zhing dus thung ngus sel ba'i ngang tshul can nyid yin pa'i phyir ro//de dag kyang rims dang mdze la sogs pa'i dbye bas stong phrag nyi shu yod de/ des 'jigs pa la yang bdag nyid shes pas sman pa'i ngag bzhin du bya dgos na/ ci yid kyis thog ma med pa'i dus nas bsags pa yin pa'i phyir tha mal pa ma yin pa/'dod chags la sogs nyes brgya yi/ /nad kyis rtag btab smos ci dgos/ /'dod chags la sogs pa'i nad bzhi brgya rtsa bzhi po de dag kyang spyod pa stong phrag brgyad cu rtsa bzhi/ mdor bsdu na bzhi brgya dag yin te/bag la nyal ba tha dad pa las bshad pa yin no/ /bag la nyal de dag kyang 'dod pa'i 'dod chags kyi bag la nyal ba la sogs pa dgu bcu rtsa brgyad yin na/ kha cig gis ni brgya bzhi bcu yin te/ zag pa bzhi dang / chu bo bzhi dang / sbyor ba bzhi dang / nye bar len pa bzhi dang /'ching ba gsum dang / kun nas sbyor ba dgu dang / srid pa'i kun tu spyod pa bco brgyad dang / kun nas dkris pa bcu dang / nyon mongs pa'i sa mang po pa drug dang / nyon mongs pa'i dri ma drug dang / sgrib pa lnga dang / tha ma'i cha dang mthun pa lnga dang / gong ma'i cha dang mthun pa lnga dang /sa mang po pa bcu dang / mi dge ba'i sa mang po pa gnyis dang / rnal 'byor rnams kyi gzhi phran tshegs kyi ming can lnga bcu rtsa bdun dag yin no/ /nye ba'i nyon mongs pa dag ni mang du yod de gtso bo ji lta ba bzhin du brgya lnga bcu rtsa drug yin no/ /de gcig gis kyang zhes bya ba//nad brgya po gang yin pa dag las khros pa gcig gis kyang 'dzam gling na/ gnas pa'i mi kun rlag byed la/ /dper na gzhan dag tu drang srong khros pas zhes bshad pa lta bu'o/ /de dag sred pa'i 'tshe bas khros pas 'phel bar 'gyur/ rmongs pas kha na ma tho ba chen po thob par 'gyur zhing /dper na gzhan dag tu yid gnyis kha na ma tho cher zhes bya ba la sogs pa lta bu'o/ /de dag ces bya ba nad brgya po lus la byung ba'i nad kyi rgyu dag gi gso ba'i sman gzhan te/ phyi rol dag gi sman ni/ phyogs rnams kun nas btsal na'ang mi rnyed na/rims la sogs pa gso bar mi nus pa dang / glo bur ba ma yin pa gang yin pa de dag gi nang nas/ rlung las gyur pa brgya rtsa gcig dag dang / de bzhin bad kan las gyur pa dang / mkhris pa las gyur pa dang / 'dus pa las gyur pa dag yin no/ /nad bzhi brgya rtsa bzhi po de dag ni 'phags pa dpa' sbyin gyis zhus pa las/'phags pa phal chen gyi 'dul ba las bshad pa dag yin no/ /gang gi phyir nad 'ga' po gcig gis kyang 'dzam bu'i gling na gnas pa'i mi thams cad rnam par 'gyur bar byed cing 'jig par byed pa na/ yul ka shi ka'i bdag por gyur pa ni bcom ldan 'das kyis gang nyams par gzigs shing sman pa la dris nas/ phyogs thams cad du de'i sman mi rnyed pas na de mi srid do snyam pa nyid kyis sman pas gson pa'i sha chen po bstan pa na/ bden pa'i [(]phyin [,]byin [)]gyi rlabs bsgrubs nas gso bar mdzad do//nad bzhi brgya rtsa bzhi po de dag gis gzir ba ni de'i rgyu dag gis gzir ba'i phyir ro/ /de la ste de dag gi sman pa thams cad mkhyen pa nyid yin te/ sman pa thams cad mkhyen pas lus kyi zug rngu'i rgyu 'byin cing zug rngu 'byin par mdzad pa'i phyir/ gang la zug rngu thams cad 'byin pa'i ngang tshul mnga' ba de ni/zug rngu thams cad 'byin pa'i'o/ /bka' ste dam pa'i chos kyi sman gyi man ngag ltar mi byed mi sems pa ni/ /shin tu gti mug smad pa'i gnas/ /shin tu rmongs pa kun nas skyes pa yin no/ /de ltar ni g.yang sa tha mal chung ngu la'ang //bag yod gnas par bya dgos na/ /tshegs chung ngus bgrod par bya ba tha mal pa'i nad pa yang sman pa'i ngag las 'das par bya ba ma yin na/ dpag tshad stong du ltung ba yi/ /yun rings g.yang sar te/ yid kyi nad sman pa thams cad mkhyen pa'i bka' las 'das pa lta smos ci dgos bag med pas gnas par bya ba ma yin no//g.yang sa chung ngu la yang bag med pa gang yin pa de ni shin tu nyes pa chen por 'gyur ro zhes dgos so/ /de lta ni 'gyur mod kyis/ de ring kho na mi 'chi zhes/ /re zhig bde bar gnas la/ de nas sdig pa bshags pa la sogs pa dge ba'i las bya'o zhe na/ de ring kho na mi 'chi zhes bya ba smos te/ med do zhes bde bar 'dug pa'i rigs ma yin/ gang tshe bdag med 'gyur ba'i dus/ /de ni gdon mi za bar 'byung / /sdig pa las 'jigs par mi bya ba ma yin te/ nges par 'byung ba dang bcas pa nyid kyi phyir ro zhes bstan pa'i phyir/bdag la mi 'jigs su yis byin/ /'di las ji ltar nges thar 'gyur/ /gdon mi za bar med gyur na/ /ci phyir bdag nyid bde bar 'dug /ces bya ba smos so/ /longs spyod kyis bde bar gnas pa yin no zhe na smras pa/ sngon chad myong ste zhig pa las te longs spyod dag las/lhag par gnas pa ci yod na/ /bdag ni longs spyod la mngon par zhen nas/ bla ma'i bka' dang 'gal bar byas/ /'on kyang yid gnyen bshes kyis bde bar gnas pa yin no zhe na/ smras pa/ gson tshe 'di dang de bzhin du/ / gnyen dang bshes pa rnams spangs nas/ /gcig pu ga shed 'gro dgos na/ /mdza' dang mi mdza' kun ci rung / /de dag gi don byed par nus pa ma yin no zhes dgongs so/ /mi dge ba las sdug bsngal 'byung / /de las ji ltar nges thar zhes/ /nyin mtshan rtag tu bdag gis ni//'di nyid 'ba' zhig bsam pa'i rigs/ /zhes bya ba smos te/ thabs gang gis zhes bya ba'i tha tshig go/ /bdag grol ba med par gzhan grol bar mi nus so zhes bya bar dgongs so/ /sdig pa bshags pa la sogs pa sdug bsngal las thar pa'i thabs yin no zhes bstan pa'i phyir//smras pa/ bdag ni mi shes pa'i so so'i skye bo nyid yin pa'i phyir ro/ /gti mug pas zhes bya ba ni phan pa dang phan pa ma yin pa thob pa dang dor ba mi shes pa nyid kyi phyir/ lus dang ngag dang yid kyis sdig pa gang yang rung ba bgyis pa rnams yang dang yang du byas pa dang / rjes su yi rang ba'i bar du'o/ /rang bzhin ni ngo bo nyid kyis gang nyon mongs pa can nyid yin pa'i phyir kha na ma tho ba'am/ gang yang nyes dmigs su gzigs pa las nyon mongs pa can ma yin du zin kyang / bcom ldan 'das kyis kha na ma tho ba dang bcas par mdzad pa de lta na/ bcas pa'i kha na ma tho ba nyid yin no//de dag thams cad bshags par bgyi/ /gang la zhe na/ thams cad du thogs pa med par gzigs pa'i mgon po'i spyan sngar mngon sum du 'dug nas/ thal sbyar sdug bsngal 'jigs sems kyis/ /yang dang yang du phyag 'tshal te/ /yang dang yang du bshags par bya//'dren pa rnams kyis bdag gi sdig /nongs pa lags par gzung du gsol/ /thugs kyis bzod par mdzad nas kyang / /thugs rjes bdag la nongs pa bsal du gsol/ /yang byed pa la brten pa'i phyir/ mgon po 'di ni bzang po ma lags pas//slan cad bdag ni yong mi bgyid/ /yang dang yang du mi bgyid do/ /sdig pa bshags pa phal che ba nyid kyi phyir sdig pa bshags pa'o/ /byang chub sems dpa'i spyod pa la 'jug pa'i legs par sbyar ba las le'u gnyis pa'o// //de ltar bdag nyid la smad cing bshags nas kyang bya ba 'dod pa'i sgo nas bsam pa dang sbyor ba yongs su sbyangs nas mchod pa la sogs pa rgyas su zin kyang /yang dge ba'i rjes su yi rang ba la sogs pa 'phel bar byed pa gang yin pa/ sems can kun gyi ngan song gi /zhes bya ba la sogs pa smos te/ 'dis ni ngal so bar byed pas na ngal bso ba'o/ /ngan song gi sdug bsngal gyis ngal bso ba ni/ ngan song gi sdug bsngal ngal bso ba'o/ /sems can rnams kyis byas pa'i dge ba ste/ bsod nams kyi tshogs de dang / sdug bsngal can rnams bder gnas la//mgu zhing dga' bas rjes su yi rang ngo / /byang chub rgyur gyur dge bsags pa/ /de la rjes su yi rang ngo / /lus can te/ lus dang ldan pa dag /'khor ba'i sdug bsngal las nges par thar la ste/ ye shes kyi tshogs la rjes su yi rang ngo / /skyob pa rnams kyis te/dge rgyud skyong bar mdzad pa'i byang chub dang / rgyal sras nyid dang / tshogs gnyis la yang rjes su yi rang ngo / /gong nas gong na khyad par du 'phags pa ni khyad par du 'phags pa brjod pa'i don du/ byang chub sems dpa' dag gis sngar bshad pa sems can la phan pa mdzad pa ste/byang chub tu smon pa'o/ /bde ba mdzad pa zhes bya ba'i gzhung yang bde ba nyid phan pa yin te/ sems can thams cad la phan pa byed par 'jug pa'i sems yin no/ /thugs bskyed dge ba rgya mtsho dang / /zhes bya ba ste/ tshogs nyid kyi rgyu la dga' bas rjes su yi rang ngo //ji ltar brgyad stong pa las rjes su yi rang ba de ltar rjes su yi rang bar bya'o/ /rjes su yi rang bshad nas/ chos kyi 'khor lo bskor bar bskul ba ni/ phyogs rnams kun gyi sangs rgyas la/ /thal mo sbyar te gsol ba ni/ /zhes bya ba la sogs pa smos te/ sems can rmongs pas dmyal ba la sogs pa'i/sems can sdug bsngal mun 'thoms la/ /chos kyi sgron ma sbar du gsol/ /gsol ba gdab pa ni/ rgyal ba mya ngan 'da' bzhed la/ /thal mo sbyar te gsol ba ni/ /'gro ni ldongs par mi dgod cing / /bskal pa grangs med bzhugs par gsol//zhes bya ba smos so/ /yongs su bsngo ba ni/ de ltar kun byas te zhes bya ba smos te/ snying rje chen po dang / byams pa dag gis bdag nyid thams cad sbyin pa chen po yin no/ /byang chub tu smon pa'i sems kyang de yin te/ 'jug pa'i sems ni de sngon du 'gro ba can nyid yin pa'i phyir ro//smon pa dang sbyin pa ni yongs su bsngo ba yang yin te/ smon pa yongs su bsngo bar mi 'gyur ba ma yin no/ /gang cung zad ma byas pa nyid byas pa yin no/ /de ltar 'di dag kun byas te zhes bya ba mchod pa la sogs pa nas/ gsol ba gdab pa'i mthar thug pa/ / dge ba bdag gis bsags pa gang / /thob pa gang yin pa dang / des ni sems can thams cad kyi/ /sdug bsngal thams cad bsal bar shog /ci lta zhe na/ 'gro ba nad pa ji snyed kun/ /nad sos gyur [(]gi [,]gyi [)]bar du ni/ /sman dang sman pa nyid dag dang / /de yi nad g.yog byed par shog /gzhan dag la yang / zas dang skom gyi char phab ste/ /bkres dang skom pa'i gnod pa bsal/ /mu ge'i bskal pa bar ma'i tshe/ /bdag ni zas dang skom du gyur/ /zas dang skom de'i rgyur gyur cig pa'o/ /bskal pa 'jig pa na/ mu ge'i bskal pa bar mar gyur pa ni de la nye bar mtshon pa yin te/mtshon gyi bskal pa bar ma'i tshe/ /me tog gi char du gyur cig ces brjod par bya'o/ /sems can phongs shing dbul ba la/ /bdag ni mi zad gter gyur te/ /yo byad mkho dgu sna tshogs su/ /sprul pas mdun na nye bar gnas gyur cig /bdag gi lus ni bdag gi dngos po'i de bzhin longs spyod pa dang zhes bya ba ni longs spyad par bya ba yin pas na longs spyod de/ chung ma dang / bran dang / phyugs dang / gser dang / khang khyim la sogs pa'o/ /dus gsum dge ba thams cad kyang / /sems can kun gyi don sgrub phyir//phongs pa med par btang ba ni yang phyir len pa'i bsam pa med pa dang / lan la re ba'i bsam pa med pas kho bos gtang bar bya'o/ /ci'i phyir zhe na/ sems can kun gyi don sgrub pa'i phyir ro/ /thams cad gtang bas mya ngan 'da'/ /bdag blo mya ngan 'das pa bsgrub//rang dang gzhan mya ngan las 'das pa don du gnyer ba nyid kyi phyir ro/ /gal te bdag gis thams cad gtang bar chabs gcig la/ sems can rnams la gtang ba mchog /de ltar snying rje bstan nas byams pa yang / /bdag gis lus can thams cad la//zhes bya ba la sogs pa smos pa la bdag ste/ nye bar mkho ba sbyin pa can gyi yid dang / bdag gi lus 'di dag gis lus can thams cad la/ ci bder byin zin gyis bdag gi lus rtag tu gsod pa ste bsnun pa'am/ bdag la smod pa'am bdag la brdeg btsog ci dgar byed pa la rag /phyag dar gyi rdul la sogs pas 'god par byed pa la rag go/ /bdag gi lus la gtse byed dam/ /co 'dri ga zha'i rgyu byed kyang / /de la bdag lus byin zin gyis/ /'di yi kha das ci zhig bya/ /bdag nyid kyir gyur pas so//gzhan yang de la gnod par mi 'gyur ba'i/ /las gang yin pa byed du chug /gang de dag 'chi ba la sogs pa'i 'jigs pa chen po nye bar gnas pa yod na/ de bzlog pa'i phyir sdug bsngal gyi rgyu kha na ma tho ba med pa'i las bdag la byed du chug cig ces bya ba'i don to//bdag la dmigs nas nam du yang / /'ga' yang don med ma gyur cig /'ga' zhig gi tshe yang 'ga' zhig kyang bdag la brten nas/ dran pa tsam du yang don med par ma gyur cig /bdag la dmigs nas gang dag gi /khro ba 'am dad pa'i sems byung ba/ / de nyid rtag tu de dag gi /don kun grub pa'i rgyur gyur cig /gang dag bdag la kha zer ram/ /bdag la gang brdzun gyis sun 'byin par byed pa 'am/ gzhan gang gnod par byed pa 'am/ de bzhin phyar kha gtong ba'ang rung / /skyon gsal bar byed pa 'ang rung / gzhan de dag thams cad byang chub skal ldan gyur//gzhan yang bdag ni mgon med rnams kyi mgon/ /bdag ni mgon po skyabs nyid de/ /bdag ni mgon med rnams kyi mgon te/ lam zhugs rnams de/ lam la gnas pa rnams kyi ded dpon dang / chu bo la sogs pa rnams kyi pha rol tu phyin par 'dod cing /rgal 'dod rnams kyi gru dang ni/ /gzings dang zam pa nyid du gyur/ /gling don gnyer la bdag gling dang / /gnas mal 'dod la gnas mal dang / /bdag ni lus can bran 'dod pa/ /kun gyi bran du 'gyur bar shog /'dod pa thams cad yongs su rdzogs par byed pa'i nor bu dang bum pa ni/yid bzhin nor bu bum pa bzang po'o/ /klag pa nyid las don byed pa ni rig sngags grub pa'o/ /sman don chen po byed pa ni/ sman chen du gyur cig pa'o/ /ji ltar yongs su bsams pa'i 'bras bu 'byin pa'i shing ni/dpag bsam gyi ni shing dag dang / /ji ltar 'dod pa'i dngos po thams cad 'dod 'jor gyur pa de ltar na/ lus can rnams la 'dod 'jor gyur/ /mdor bsdu na ji ltar sa sogs 'byung ba chen po dang / /nam mkha' ma lus pa na gnas pa yi/ /sems can dpag tu med pa yi//rnam mang nyer 'tsho'i gzhir yang shog /rnam pa mang po dag gis so/ /de bzhin du bdag po'i dbang gis so/ /nam mkha'i mthas gtugs pa'i rgyun rings shing rgya che bas mtha' yas pa'i sems can khams la rnam kun du/ rnam pa du mas sems can thams cad mya ngan 'das par du/bdag ni nyer 'tsho'i rgyur yang shog /sangs rgyas su gyur nas sems can thams cad kyi don bya'o zhes bya ba'i tha tshig go/ /de ltar mchod pa la sogs pa dang / byang chub tu smon pa'i sems kyi mthar thug pa dka' ba dag gis sbyor ba rnam par dag cing bsam pa yongs su rgyas pa yin/sdom pa yang dag par len pa ni gang / ji ltar sngon gyi bde gshegs kyis/ /zhes bya ba la sogs pa smos te/ byang chub kyi sems ni 'dir byang chub sems dpa'i sdom pa yin no/ /de ltar ni/ bla ma sdom la gnas shing mkhas//nus dang ldan las blang bar bya/ /de 'dra ba mi rnyed na sangs rgyas dang byang chub sems dpa' sdom pa ma lus pa dang ldan pa/ byang chub kyi mthar byon pa thams cad la/ thogs pa med pa'i spyan mnga' bas mdun du bltas la/ de dag las dad pa'i bya ba drag po dang /de kho na nyid la lhag par mos pa dag gis yang dag par blang bar bya'o/ /ji skad du bshad pa'i mchod pa la sogs pa byas nas/ tshigs su bcad pa gnyis po 'di brjod par bya'o/ /bla ma rnyed nas yang de dang de dag las de bzhin du byas te/ tshul khrims kyi le'u las bshad pa 'am/bslab pa kun las btus las bshad pa'i tshogs yang dag par blang bar bya'o/ /de ni tsan+dan gyis brlan pa'i yan lag drug dang bcas pa'i zla ba'i zer dag gis ston ka'i bsil ba'i zla ba'i zer 'ba' zhig bzhin no/ / ji ltar rnam pa gang gis sngon gyi bde gshegs kyi byang chub thugs ni bskyed pa dang / bdag gi gnas skabs 'di lta bur gyur pas zhes bya ba'i tha tshig go/ /byang chub sems dpa'i bslab pa la/ /de dag rim bzhin gnas pa ltar/ /zhes bya ba la gnas pa ni rab tu zhugs pa'o//de bzhin 'gro la phan don du/ /de'i rgyu mtshan du 'jug pa'i byang chub sems ni bskyed bgyi zhing / /de bzhin du ni bslab pa la'ang / /rim pa bzhin du ste mthar gyis bslab par bgyi/ de ltar mchod pa la sogs pa'i sbyor ba dang / dngos gzhi'i rnam pa dag cing rgyas pa dag gis stong pa nyid dang /snying rje'i snying po can bzung bas blo snying rjes non pa'o/ /'di la yod pa dang med pa las 'das pa'i blo yod pas na blo dang ldan pa'o/ /ci zhig bzung nas she na/ byang chub sems so/ /ci ltar zhe na/ rab dang ste bsam pa dag pas so/ / mjug kyang rgyas pa ste/ sbyor ba dang dngos gzhi rgyas pa nyid yod pa de lta na yang / yang rgyas par bya ba'i phyir/ sems ni 'di ltar gzengs bstod do/ /ji ltar gzengs bstod par bya zhe na/ deng du zhes bya ba la sogs pa smos te/ deng du bdag tshe 'bras bu yod/ /'di ltar tshul khrims yang dag par blangs pas/mi yi srid pa legs par thob/ /de ring sangs rgyas rigs su skyes/ /sangs rgyas sras su da gyur to/ /sa bcu las sa dang po la gnas pa de bzhin gshegs pa'i rigs su skyes pa yin no zhes bshad pa ma yin nam zhe na/ bden te der ni sa chen po'i rigs la dgongs pa yin la/ sngar ni sangs rgyas nyid la mos pa'i rigs la brda yang dag par len pa byang chub tu sems bskyed pa las skyes par 'gyur ro zhes bshad pa yin no/ /nam mkha'i snying po'i mdo las/ byang chub sems dpa'i sdom pa yang dag par len pa ni 'phags pa ma yin pa dag la yang yod do zhes 'byung ste/rnyed pa la sogs pa la chags pa la rgyab kyis phyogs pa'i phyir ro/ /sa bcu las kyang sa dang po las 'ga' zhig kyang rnyed pa dang bkur sti lhag pa mi 'dod ces gsungs pa'i phyir ro/ / 'phags pa la yang log pa'i 'tsho ba mi mnga' ba'i phyir ro zhes shes par bya'o/ /byang chub sems dpa'i so sor thar pa las kyang rigs kyi bu mo zhes gsungs te/ bud med nyon mongs pa'i shas chung ba byang chub don du gnyer ba byang chub sems dpa'i bslab pa la slob par 'dod pa dag la yang byang chub kyi bar du sdom pa 'di skye bar 'gyur zhing /skye ba gzhan dag tu yang 'gyur ro/ /rtsa ba'i ltung ba 'am 'di'i sdom pa zhig na yang dran pa sad par bya ba'i don du nyin re zhing lan gsum du thugs rje chen po dang ldan pa bdag la dgongs su gsol/ bdag ming 'di zhes bgyi ba'i sdig pa thams cad so sor bshags par bgyi'o/ /yang mi bgyid do zhes bya ba'i bsam pas yang dag par blang bar bya'o/ /spyir sdig pa thams cad bshags pas gzhan yang skye ba gzhan du byas pa dang / ltung ba gzhan dag las kyang grol na dri ma med par 'gyur ro zhes bstan pa'i phyir da ni zhes bya ba la sogs pa smos te/da ni bdag gis ci nas kyang rigs dang mthun pa'i las brtsams te/ skyon med btsun pa'i rigs 'di la/ /rnyog par mi 'gyur de ltar bya/ /byang chub sems de rnyed par dka'o/ / zhes bstan pa'i phyir/ long bas phyag dar phung po las/ /phyag dar khrod kyi phung po dag las/ /ji ltar rin chen rnyed pa ltar de bzhin ji zhig ltar stes nas/ byang chub sems ni bdag la skyes/ /'di don chen po yin no zhes bstan pa'i phyir/ 'gro ba'i 'chi bdag 'joms byed pa'i//bdud rtsi mchog kyang 'di yin te/ /tha dad pa'i don can nyid yin pa'i phyir ro/ /'gro ba'i dbul ba sel ba yi/ /mi zad gter yang 'di yin no/ /longs spyod chen po mi zad pa'i don can nyid yin pa'i phyir ro/ /'gro ba'i nad rab zhi byed pa'i/ / sman gyi mchog kyang 'di yin te/ /'dod pa'i khams su bdag nyid kyi 'dod pa khyad par du 'phags pa'i don can nyid yin pa'i phyir ro/ /srid pa nyid la ma yin te/ de la 'khyams pa ni rgyu ba'o/ /des dub pa ni 'gro ba'i ngal bso ljon shing yin/ /lam ka'i grib ma can gyi shing yin te//gzugs dang gzugs med pa dag gi khams dag tu bdag nyid kyi dngos po khyad par du 'phags pa'i don can nyid yin pa'i phyir ro/ /sngar bshad pa'i thar pa la sogs pa thams cad du 'gro ba'i ngang tshul can du gang la yod pa de dag ni/ 'gro ba thams cad ngan 'gro las//grol bar byed pa'i spyi stegs yin/ /spyi ni thun mong gi'o/ /'gro ba'i nyon mongs gdung sel ba'i/ /de'i nyon mongs pa'i sgrib pa spong bar byed pa'i don can nyid yin pa'i phyir/ sems kyi zla ba shar ba yin/ /'gro ba'i mi shes rab rib dag / dpyis 'byin nyi ma chen po yin/ /shes bya'i sgrib pa spong bar byed pa'i don can nyid yin pa'i phyir ro/ /de nyid rigs yongs su smin pa dang / thar pa sangs rgyas nyid kyi rgyu nyid yin pa'i phyir phan pa dang / bde ba dang / gnyi ga'i don du zhes brjod par 'gyur ro/ /de bas na dam chos 'o ma ste/'o ma'i rgya mtsho bsrubs pa las/ /mar gyi snying khu ste/ byang chub kyi sems kyi bdud rtsi 'di 'byung ba yin no/ /de ltar bde ba dang / thar pa'i rgyu nyid yin na yang / re zhig dang por bde ba nyid dang ldan no zhes gsungs pa'i phyir/ 'gro ba'i 'gron pa srid pa'i lam rgyu zhing //zhes bya ba la sogs pa smos te/ bde ba nyid longs spyod kyi 'bras bu nyid yin pa'i phyir/ bde ba'i longs spyod do/ /de longs spyod par 'dod pa ni de longs spyod par 'dod pa'o/ /'di ni bde ba'i mchog tu nyer gnas te/ /sems can mgron chen tshim par byed pa yin/ / gtong ba thams cad ni longs spyod mi zad pa'i don nyid yin pa'i phyir ro/ /da ni gzengs bstod pa bskyed nas ma lus pa'i mjug sdud par byed do/ /bdag gis de ring skyob pa thams cad kyi/ /spyan sngar 'gro ba bde gshegs nyid dang ni/ /bar du bde la mgron du bos zin gyis/ /lha dang lha min la sogs dga' bar gyis//'di ni yang dag par len pa dngos su yin no// byang chub sems dpa'i spyod pa la 'jug pa'i legs par sbyar ba las le'u gsum pa'o// //rgyal ba'i sras kyis de lta bur/ /mchod pa la sogs pa'i tshogs byang chub pa'i bar du 'chi ba na yang dor ba med par//byang chub sems rab brtan bzung nas/ ci zhig bya zhe na/ bslab par bya ba yin pas na bslab pa ste/ tshul khrims kyi phung po rnam pa gsum la nan tan du bya ba'o/ /de'i gnas la 'dir bslab pa'i tshig gi don gyis bstan to/ /de la g.yel ba med par rtag tu yang //bag yod pas/ bslab las mi 'da' 'bad par bya/ /g.yel ba ni lus kyi snyom las kun nas bslang ba'i le lo ste g.yel ba'o/ /'di la g.yel ba skye ba med pas na/ /g.yel ba med pa'o/ /'di la spyod pa mi 'jug na yang rigs pa ma yin no zhes bstan pa'i phyir/ bab col zhes bya ba la sogs pa smos te/ bab col te ma dpyad par brtsams pa gang yin pa 'am/ dpyad du zin kyang / gang zhig legs par ma brtags pa/ /de ni dam bca' byas gyur kyang / /the tshom za bas khas blangs su zin kyang / /bya 'am gtang zhes brtag pa'i rigs/ / 'bad pas brtsam par bya ba yin no/ /sangs rgyas rnams dang de yi sras/ /shes rab chen pos gang brtags shing / /blo gzhal du med pa dang / byams pa la sogs pa bdag gis legs par yongs su brtags pa dang / bdag nyid kyis kyang brtag brtag pa/ /phan par bsams pa tsam gyis kyang //zhes bya ba la sogs pas so/ /de la bshol du ci zhig yod/ /gal te de ltar dam bcas nas/ /ji skad du bshad ji skad du bzung ba zhes bya ba la sogs pas las kyis sgrub pa ma byas na/ de dag thams cad kun bslus na/ /sangs rgyas dang byang chub sems dpa' dang /sems can thams cad kun bslus na/ /bdag gi 'gro ba ci 'drar 'gyur/ /gzhan 'ga' zhig tu yang mi 'gyur ro/ /zhes bya bar dgongs so/ /dngos po phal pa cung zad la'ang / /yid kyis sbyin zhes bsam byas nas/ /mi gang sbyin par mi byed pa/ / bsams pa nyid kyis dmyal bar 'gyur ro zhes bstan pa'i don te/ de de ltar na dngos po nyung ngu sbyin par bsams nas sbyin par mi byed pa de yang / yi dags rgyur gsungs na/ bla na med pa'i bde ba la ste/ bde bar gshegs pa nyid dang / bar du bde ba thams cad la 'gro ba ma lus pa la sogs pa/bsam pa thag pas mgron gnyer nas/ /khyad par can gyi tshig gis mgron du bos nas/ gdon mi za bar bya ba nyid kyis/ /'gro ba thams cad bslus byas na/ /bde 'gror ci ga 'gro 'gyur ram/ /bdag smad pa'i 'gro ba mnar med par 'gro bar 'gyur ro//chos sdud pa'i mdo las/ dngos po phal pa cung zad tsam chung ngu zin kyang de yang yi dags su 'gyur bar gsungs so/ /bsam pa zhes bya brjod zin kyang / /yid kyis zhes bya ba smos pa ni/ lus dang ngag dang bcas pa yang mnar med pa'i 'gro ba las 'ga' zhig kyang yod pa ma yin te/byang chub ring du bsrings pa yin no zhes bya bar dgongs so/ /'o na ji ltar chos sdud pa'i mdo las/ byang chub kyi sems gtong ba yin zhe na/ byang chub kyi sems gtong ba bden te/ thabs kyis btang du zin kyang yang dag par len pas/sems can grol bar byed pa yin no zhes bstan par bya ba'i phyir/ mi gang zhes bya ba la sogs pa smos te/ las tshul bsam gyis mi khyab ste/ /rigs sna tshogs pa ni/ thams cad mkhyen pa kho nas mkhyen/ /mi gang byang chub sems gtang yang / /sems can de dag thar par mdzad pa ste//byang chub kyi sems gtang yang / sems can grol bar byed pa'i las kyi tshul bsam gyis mi khyab pa de ni thams cad mkhyen pa kho nas mkhyen gyi kho bos shes pa ni ma yin no/ /dkon mchog brtsegs pa las/ gang las 'di'i blo ni nus pa med pa de la de bzhin gshegs pa nyid tshad mar gyur pa de bzhin gshegs pa nyid mkhyen gyi/ngas ni mi shes zhes gsungs pa yin no/ /'gro ba thams cad bslus na kha na ma tho bar 'gyur ro zhes bstan pa'i phyir/ de ni byang chub sems dpa' zhes bya ba smos te/ byang chub sems dpa' la de nyid kyis/ltung ba'i nang na lci ba ste/ /'di ltar de ni byung gyur na/ /sems can kun gyi don la dman/ /gang gzhan 'ga' zhig 'di yi ni/ /byang chub sems dpa'i bsod nams bar chad bgegs byed pa/ sgra las kyang sems can thams cad kyi don gyi bgegs byed pa ltung bas de'i gzhan//de yi ngan 'gro mu mtha' med/ /ngan 'gro dag tu skye ba brgyud pa'i mtha' yod pa ma yin no/ /sems can gcig gi bde ba yang / /bshig na bdag nyid nyams 'gyur na/ /ngan 'gro'i sdug bsngal gyis/ nam mkha' ma lus mtha' klas pa'i/ / lus can bde bshig smos ci dgos/ /bde ba bshig na ches nyams par 'gyur ro zhes bya ba'i tha tshig go/ /bsod nams kyi bgegs byed pas kyang / sems can thams cad kyi don nyams par 'gyur bar byas pa de bas na/ sems can gyi don gyi bgegs byed pa de'i ngan 'gro ba mtha' yod pa ma yin no//de lta na yang gang lhung bar 'gyur ba yin no/ /lhag pa'i bsam pas bshags pa byas shing sdom pa gtang nas kyang len par byed pa yin te/ sangs rgyas pa'i chos 'dul ba ni nges par 'byin pa dang bcas pa nyid yin pa'i phyir ro/ /ngan song gi de ltar ltung ba'i stobs ldan dang /bde bar gshegs pa'i/ byang chub sems stobs ldan pa dag /ltung ba dang kun nas ldang ba dag gis/ 'khor bar res kyis spyod pa ni res kyis 'dre bar byed na'o/ /sa thob pa la ste/ byang chub sems dpa' sa rab tu dga' ba la sogs pa thob pa la/ yun rings thogs par 'gyur ro/ /tha na dam bcas pa mos pas spyod pa'i sa thob pa la yang ngo / /de thob na yang ngan song du 'gro bar mi 'gyur ro/ /de'i phyir de bzhin du bslab pa de dag la bslab par bya ba yin pa de ltar na/ ci ltar dam bcas pa yin pa bzhin du/ bdag gis gus par bsgrub par bya'o//g.yel ba med par rtag tu bslab pa las mi 'da' bar bya'o zhes bya ba'i tha tshig go/ /de ltar ni de bas brtson par ma byas na/ de'i 'og nas te ngan song nas so/ /'og tu ste ngan song du 'gro bar 'gyur te/ ngan 'gro kho nar brgyud par 'gyur ro zhes bya ba'i tha tshig go/ /sangs rgyas bzhugs pa ma yin nam de 'og nas 'og tu 'gro bar mi 'gyur ro zhe na/ sems can thams cad phan mdzad pa'i/ /zhes bya ba la sogs pa smos te/ gnas gzhan drug cus phyin pa ni grangs yin la/ bgrang bar mi nus pa ni grangs med pa ste/ sems can phan par mdzad pa yi//sangs rgyas grangs med 'das gyur kyang / /bdag ni rang gi nyes pa de'i/ /gso ba'i spyod yul ma gyur to/ /bdag de dag gis gso bar ma gyur to zhes bya ba'i tha tshig go/ /da dung de bzhin bdag byed na/ /ji ltar bdag sngon gyi skye bar bag med par gyur pas yang dang yang du de bzhin te/ngan 'gro dang / bde 'gro dang nad la sogs pa myong bar 'gyur zhing thob par 'gyur ro/ /sangs rgyas bzhugs na yang tshogs pa rnyed par dka'o zhes bstan pa'i phyir/ de bzhin gshegs pa 'byung ba dang / /dad dang mi lus thob pa dang / / mi'i 'gro ba nyid dang / dge goms rung ba de lta bur/ /dkon pa nam zhig thob par 'gyur/ /zhes bya ba smos te/ gzhan yang nad med nyi ma 'di lta bu zhes bya ba ni mi'i lus nyid de/ 'di nad med pa'i nyi ma yin pas na nad med nyi ma'o/ /zas bcas 'tsho ba med kyang ni/ /tshe ni skad cig slu ba ste//lus ni thang cig brnyan po bzhin/ /brnyan po byas pa'ang rnyed par 'gyur gyis/ nyes par spyod pa 'ang ma yin no zhes bstan pa'i phyir/ bdag gi spyod pa 'di 'dras ni/ /mi yi lus kyang 'thob mi 'gyur/ /mi lus thob par ma gyur na/ /sdig pa 'ba' zhig ces bya ba smos te/dge ba las kyang ngan 'gro 'byung bar 'gyur ba ma yin zhe na/ dge ba med ces bya ba smos te/ mi la yang dge ba goms pa las bde 'gror 'gyur gyi rnam pa gzhan du ni ma yin no/ /de nyid kyi phyir/ gang tshe dge spyad skal ldan yang / /dge ba bdag gis ma byas na//ngan song sdug bsngal kun rmongs pa/ /de tshe bdag gis ci byar yod/ /ngan song dag tu'o/ /dge ba dag kyang ma byas la/ /sdig pa dag kyang ste/ gcig la gcig za zhing dmyal ba'i srung ma sdang ba la sogs pa 'phel zhing nyer bsags na/ re zhig 'di gnyis kyis kyang bde 'gror mi 'gyur ro//bskal pa bye ba brgyar yang ni/ /bde 'gro'i sgra yang thos mi 'gyur/ /de nyid phyir na bcom ldan gyis/ /rgya mtsho cher g.yengs gnya' shing gi /bu gar rus sbal mgrin chud ltar/ /mi nyid shin tu thob dkar gsungs/ /dper na dge slong dag sa chen po 'di rgya mtsho chen por gyur zhing /de la gnya' shing bu ga gcig yod pa rlung gis g.yengs shing 'di nas bskyod pa dang / rus sbal long ba gcig cig yod la/ rus sbal de yang lo brgya brgya zhing mgrin pa 'degs par 'gyur na/ dge slong dag ji snyam du sems/ rgya mtsho chen po'i gnya' shing gi bu gar rus sbal mgrin pa chud pa rnyed par sla ba yin nam/ bcom ldan 'das de ni ma lags so/ /bcom ldan 'das kyis bka' stsal pa/ dge slong dag de bzhin du mi nyid shin tu thob par dka' ba yin no zhes gsungs pa lta bu'o/ /rnam pa 'di dang 'di zhes bstan pa'i phyir//skad cig gcig byas sdig pas kyang / /zhes bya ba smos te/ mtshams med pa la sogs pas/ bskal par mnar med gnas 'gyur na/ 'dug par 'gyur na/ thog med 'khor bar bsags sdig gis/ /bde 'gror mi 'gro smos ci dgos/ / sgra mi thos par smos kyang ci dgos/ de ltar ni 'gyur mod kyi/ sdig pa zad pa las mnar med pa las thar bar 'gyur ro zhe na/ sdig pa de tsam kho na myong gyur nas/ /nyams su myong ba mnar med pa la sogs pa las sems de ni rnam thar mi 'gyur te/ 'di ltar de ni sdig pa myong bzhin du/sdig pa gzhan dag rab tu skye/ /de'i phyir de nyid las dge ba bya'o/ /de lta ma yin na 'di las bslus pa gzhan med de/ 'di las rmongs pa'ang gzhan med do/ /gang las she na/ gal te 'di 'dra'i dal ba rnyed gyur nas/ bdag gis dge goms ma byas pa las so/ /de'i phyir gal te bdag gis de rtogs nas/rmongs pas phyis kyang sgyid lug na'o/ /bslab pa 'bad rtsol mi byed na/ de'i tshe 'chi bar 'gyur ba'i dus kyi tshe/ mya ngan chen po ldang bar 'gyur/ /ci'i phyir khyod 'di 'dra'i las byed ces yongs su smra bar byed pa na'o/ /dmyal ba dag tu yang / dmyal me bzod dka' yun ring du/ /bdag gi lus ni bsregs gyur na/ /zhes bya ba ni nye bar mtshon pa yin te/ lus can gzhan dang dud 'gro dag na dud 'gro rnams za bar byed pa na ngan song de la rnam pa 'ga' zhig lhar 'phos shing bde 'gror skye na ni/ sdig pa'i rgyu mthun pa'i shes pas gdungs shing phyis 'gyod pa mi bzod me 'bar bas/dus phyis mi bzad pa'i mes/ yun ring sems gdungs gdon mi za/ /bdag deng bslab pa dag la mi slob pa'o/ /gzhan yang shin tu rnyed dka' phan pa'i sa/ /bde 'gro dag gis ci zhig ltar stes rnyed gyur nas so//de ltar thos pa las byung ba la sogs pa'i shes pas/ bdag nyid shes dang ldan bzhin du/ /sdig pas spyir yang dmyal ba der khrid na'o/ /rmongs pas sdig pa byed pa yin no zhes bstan pa'i phyir/ sngags kyis zhes bya ba la sogs pa smos te/ bdag la 'dir te/ phan pa'i sar bslab pa dag la slob pa'o/ /sems med du zad de/ 'di ltar bdag 'ga' zhig sngags kyis rmongs par byed pa bzhin/ rgyu cis rmongs pa bdag kyang ma shes te/ bdag gi lus kyi khong na ci zhig yod/ sred pa la sogs pa zhes bya ba'o//zhe sdang sred sogs dgra rnams la/ /rkang lag la sogs yod min te/ /gzugs can ma yin pa'i phyir ro/ /dpa' min te brtson 'grus ni dge ba'i sa chen po pa yin pa'i phyir ro/ /sred pa la sogs pa ni mi dge ba nyid yin pa'i phyir te/ brtson 'grus dang mtshungs par ldan pa nyid med pa'i phyir ro//mdzangs min te/ rmongs pa dang mtshungs par ldan pa'i phyir ro/ /ci zhig ltar de dag bdag bran bzhin byas/ sred pa dang zhe sdang la sogs pa'i dgra rnams kyis so/ /de dag ni rmongs pa'i rgyu yin la/ sngar skyes pa'i rmongs pa yang de dag gi rgyu yin no//sngar skyes pa de lta na bdag bran du byas pa yin no/ /'di ltar bdag gi sems la gnas bzhin du/ dga' mgur bdag la gnod byed pa/ /de la mi khro bzod pa ni/ /'dir bzod pa shin tu smad pa bstan pa'i phyir/ gnas min bzod pa smad pa'i gnas//zhes bya ba smos so/ /deng ni mtshon la sogs pas gnod pa ltar bzod par nus zhes bstan pa'i phyir/ gal te lha dang lha min rnams/ /thams cad bdag la dgrar langs kyang / /de dag gis kyang mnar med pa'i/ /me nang 'jug cing 'khrid mi nus/ / me ci 'dra ba zhig ce na/ nyon mongs stobs can dgra 'dis ni/ /gang dang phrad na ste/ gang dang 'brel pa las/ ri rab kyang thal ba yang ni mi lus pa/ /der bdag skad cig gcig la 'dor/ /de ltar nyon mongs pa'i dgra stobs dang ldan pa yin no/ /stobs dang ldan pa 'ba' zhig du ma zad de/yun yang shin tu ring ba yin te/ bdag gi nyon mongs dgra bo gang / /dus ring thog mtha' med pa ltar/ /dgra gzhan kun kyang de lta bur/ /tshe ring thub pa ma yin no/ /'on kyang de dag rjes su mthun par brten par bya ba yin no snyam na/ smras pa/ mthun par rim gro bsten byas na//thams cad phan dang bde byed na'o/ /nyon mongs 'di rnams bsten byas na/ /phyir zhing sdug bsngal gnod pa byed/ /'khor bar dga' ba dang bde ba'i rgyu yang yin la/ 'di la mthun par bsten par bya ba ma yin no zhe na/ de ltar yun ring zhes bya ba la sogs pa smos te/ de ltar bshad pa'i tshul gyis/ yun rings rgyun chags te/ thog ma med pa'i dus nas dgrar gyur pa dag ni/ de ltar yun ring rgyun chags dgrar gyur pa'o/ /gnod pa'i tshogs ni gnod pa'i tshogs so/ /de rab tu 'phel ba'i phyir/ de rgyu gcig pu yin pa de lta na/ gnod pa'i tshogs rnams 'phel ba'i rgyu gcig pu'o//bdag gi snying la nges par gnas 'cha' na/ bsten par byed na yid bde bar ji ltar 'gyur/ ji ltar bde bar 'gyur zhes bstan pa'i phyir/ 'di ni zhes bya ba la sogs pa smos te/ de ni 'khor ba'i btson ra'i srung ma ste/ dmyal sogs su gsod par byed pa'i gshed ma yin/sdom brtson seng ge 'chor ba'i lcags gzeb lta bur sems kyi khang pa lcags kyi gzeb lta bur sems ni blo yin la khang pa ni khyim yin te/ der gal te gnas na ga la bde/ lus kyi yang ngo / /de bas na de dag ni rnam pa thams cad du don med pa'i rgyu yin no//de ltar ji srid bdag gis dgra 'di mngon sum du/ shin tu nges par ma bcom bdag de srid bdag 'dir te/ 'di 'gro 'am nyon mongs pa bcom pa la'o/ /brtson mi 'dor zhes bya ba ni brtson pa spong bar mi byed pa'o/ /re zhig gnod byed chung ngu la'ang khros gyur pa'i//nga rgyal bdo rnams de ma bcom par gnyid mi 'ong / /'jig pa la rgyu med pa'i phyir/ /rang bzhin te ngo bo nyid kyis sdug bsngal 'gyur ba'i nyon mongs dag /g.yul ngor dngar tshe nan gyis gzhom par 'dod pa yang / gtum zhing drag pa yang / mda' mdung mtshon gyis phog pa'i sdug bsngal khyad bsad nas//don ma grub par phyir phyogs 'byer bar mi byed na/ /rtag tu sdug bsngal kun gyi rgyur gyur pa/ /rang bzhin dgra ste/ nyon mongs pa dag des gzhom brtson pa bdag la deng / /sdug bsngal brgya phrag rgyur gyur gang gis kyang / /yi chad sgyid lug mi 'gyur smos ci dgos//sdug bsngal gyi rgyu de dag gis sgyid lug par 'gyur ro snyam na/ smras pa/ don med pa ni 'bras bu med pa nyid yin te/ 'bras bu chung ba nyid kyi phyir ro/ /dgra yis rma srol btod pa'i dgra bos rma srol zhing btod pa yang / lus la rgyan dang 'dra bar srel byed na//don chen bsgrub phyir yang dag brtson gyur pa/ /bdag la sdug bsngal ci phyir gnod byed yin/ /de bzhin nya ba gdol pa zhing pa la sogs pa/ /rang gi 'tsho ba tsam zhig sems pa yang / /grang dang tsha la sogs pa'i gnod bzod na/ /'gro ba bde phyir bdag lta cis mi bzod//'on kyang bzod pa kho na'i de lta ma yin na/ phyogs bcu nam mkha'i mthas gtugs pa ni/ phyogs bcu nam mkha'i mthas gtugs pa'i 'gro ba ste/ sems can gyi khams mtha' med pa ste/ nyon mongs dgra las grol bar dam bca' gang tshe bdag nyid kyang //nyon mongs rnams las ma grol bar/ /bdag gi tshod kyang mi shes par de'i tshe/ smra ba ji ltar smyon pa min/ /de phyir nyon mongs gzhom pa la/ /rtag tu phyir mi ldog par bya/ /nyon mongs pa spong ba 'di la rtag tu zhen par bya'o/ /phyir ldog na zhen par mi 'gyur zhing /skad cig zhen pa yang phyir mi ldog par 'gyur/ g.yul 'gyed pa na nyon mongs pa spong bar nus pa ste/ gnyen po'i phyogs rnams kyis re re zhing rnam pa dgu po de dag la bag yod pa ma yin no/ /snun par byed pa dag dbang du byed pa la/ legs par bslabs pa nyid kyi phyir/ skad cig g.yul 'gyed par gyur pa yin gyi/ 'khon du bzung ba'i ma yin no/ /kho bo 'dir 'khon du bzung ba dang / g.yul sprod par 'dod par 'gyur ro/ /rgyud gzhan gyi nyon mongs pa bcom pa la yang 'khor ba la 'khon du bzung bas/ nyon mongs pa thams cad bcom pa ma yin gyi/'on kyang de dang g.yul sprod pa na/ nyon mongs pa dang 'dre bas nyon mongs pa'i nang nas nga rgyal la sogs pa 'chad par 'gyur ba'i nyon mongs pa las gzhan du ste/ gzhan du nyon mongs pa gzhom pa la nyon mongs pa 'joms par byed pa gzhag /gang dag nga rgyal dgra las rgyal bar bya phyir nga rgyal brten ces bya ba dang /de bzhin du nyis na zhe sdang la khro rigs zhes bya bas 'chad par 'gyur ro/ /de ni bdag ni bsregs te bsad gyur tam/ /bdag gi mgo bo bcad kyang bla'i/ /rnam pa kun tu nyon mongs pa'i/ /dgra la 'dud par mi bya'o//zhes bya ba smos te/ nyon mongs pa'i dgra rnams la'o/ /nyon mongs pa dag la khro bar gyur pa na/ nyon mongs pa 'di ni de 'dra ba'i dgra ma yin no zhes bstan pa'i phyir/ tha mal dgra bo yul nas phyung yang ni/ /yul gzhan dag tu gnas shing yongs bzung nas/ /gnas gang nas nus pa brtas nas de nas phyir ldog gi /nyon mongs dgra tshul de dang 'dra ba ma yin/ zhes smos so/ /sems ni 'di ltar/ bdag yid las bsal gang du 'gro bar 'gyur/ /gang du gnas nas bdag gnod bya phyir 'ong / /blo zhan bdag la brtson pa med par zad/ /nyon mongs nyon mongs shes rab mig gis spang //shes rab nyid mig yin te/ des spang bar bya ba yin pas na/ shes rab kyi mig nyid mig yin te/ nyon mongs pa zhes bya ba'i don to/ /de ltar shes rab kyis bltas nas spang bar bya zhe na/ nyon mongs rnams ni zhes bya ba la sogs pa smos te/ nyon mongs pa rnams ni yul na mi gnas te/ kun tu rtog pa las skyes pa nyid kyi phyir dang / kun tu rtog pa la yang yul med pa nyid kyi phyir dang nyon mongs pa rnams ni gzugs can ma yin pa nyid kyi phyir dang / rten dang brten pa nyid mi rung ba'i phyir ro/ /de nyid kyi dbang tshogs la min te/mig la sogs pa ma yin no/ /bar na yang min te/ bar na gnas pa yang ma yin no/ /de las gzhan na min na/ 'di dag gal te gang du gnas shing 'gro ba kun gnod byed/ de yod pa nyid ni skad cig nyid yin pa'i phyir ro/ /skad cig gcig par bdag nyid thams cad 'jig pa med pa yin la/med pa skye bar byed pa'i rgyu nyid ma yin no zhes bya bar dgongs so/ /de nyid kyi phyir 'di ni sgyu 'dra zhes bya ba smos so/ /'di thams cad ni brdzun pa yin pa de'i phyir/ nyon mongs pa las/ snying la 'jigs pa spongs shes phyir/ kun rdzob tu yang brtson pa bsten zhes bya ba ni/bslab pa las mi 'da' bar brtson pa'o/ /shes phyir ni shes rab phul du byung ba'i don du'o/ /don med nyid du zhes bya ba ni skabs med pa nyid du ste/ bdag la ni dmyal ba ni mi chung ba rnams su ci ste gnod pa byed/ thabs dang shes rab dang snying rje chen po dang ldan pa'i byang chub sems dpa' ni pad+ma'i nags kyi ngang pa bzhin du mnar med par skye ba zhes pa lta bu'o//de ltar rnam bsams zhes bya ba la sogs pas mjug bsdu ba'i phyir smras pa/ de ltar ni bab col brtsam pa gang yin pa'am zhes bya ba la sogs pa'i tshul gyis rnam par bsams pa la/ ci skad bshad pa'i bslab pa bsgrub pa'i ched du 'bad par bya ste/ ji ltar sangs rgyas bcom ldan 'das kyis gsungs pa'i bslab pa de la bsgrub pa de'i don du ji skad bshad pa'i bslab pa ni bslab pa bsgrub pa'i ched du bag yod pas 'bad par bya'o/ /'jig rten na yang sman pa'i tshig ma mnyan na sman dag gis//bcos dgos nad pa sos pa ga la yod/ /nad med pa nyid ces pa'o/ /byang chub sems dpa'i spyod pa la 'jug pa'i legs par sbyar ba las/ byang chub kyi sems la bag yod pa bstan pa ste le'u bzhi pa'o// //'bad pas ci zhig bya zhe na/ bslab pa bsrung bar 'dod pa yis//rab tu bsgrims nas sems bsrung ste/ zhes bya ba smos te/ dran pa dang shes bzhin dag gis rab tu bsgrims nas bsrung bar bya'i de lta ma yin na/ sems 'di bsrung bar ma byas na/ /bslab pa bsrung bar yong mi nus/ /'di ltar sems kyi glang po yan btang bas//mnar med gnod pa byed pa ltar/ /dmyal ba de'i rgyus ngan song du 'jug par byed pa ltar/ /glang chen ma dul myos pa yis/ /glang po che myos pa 'dul sbyong ma byas pa btang bas kyang skye ba 'di la mi rnams la/ de 'dra'i gnod pa mi byed do/ /kun nas dran pa'i thag pa yis/ / sems kyi glang chen dam btags na/ /'jigs pa thams cad med 'gyur zhing / /dge ba thams cad lag tu 'ong / /gang gi phyir/ stag dang seng ge glang chen dred/ /sbrul dang dgra rnams thams cad dang / /dmyal ba'i srung ma thams cad dang / /byed ma de bzhin srin po rnams/ /dran pas sems 'di gcig pu btags pa yis//de dag thams cad btags par 'gyur/ /sems ni gcig pu 'dul ba yis/ /shes bzhin gyis de dag thams cad thul bar 'gyur/ de yang ci'i phyir zhe na/ 'di ltar 'jigs pa thams cad dang / /sdug bsngal dpag tu med pa yang //sems las byung ba yin no zhes/ /yang dag gsung ba nyid kyis bstan/ /sangs rgyas bcom ldan 'das kyis 'phags pa dkon mchog sprin las/ rigs kyi bu chos thams cad ni sems sngon du song ba tsam du yin no zhes bya ba nas/ 'on kyang sems nyid dbang du gyur na chos thams cad dbang du 'gyur ro zhes bya ba'i bar dang /chos sdud pa'i mdo las kyang / chos thams cad ni sems la rag las pa yin no zhes bya ba dang / de bzhin du 'phags pa sdong po bkod pa las kyang / byang chub sems dpa'i spyod pa thams cad ni rang gi sems kyis byin gyis brlabs pa yin no zhes bya ba dang /'jig rten sna tshogs ni las las skyes pa yin zhing / las kyang dngos su sems pa yin no zhes gsungs so/ /sa bcu pa las kyang khams gsum po ni sems zhes 'byung ngo / /'di de de lta bu'i rnam pa can yin gyi/ gzhan du ni spu gri'i nags la sogs pa/ sems can dmyal ba'i mtshon cha rnams/ /su zhig gis ni ched du byas/ /dbang phyug la sogs pa ni 'gog par 'gyur ba nyid kyi phyir ro/ /de bzhin du lcags bsregs sa gzhi ste/ lcags kyi sa gzhi bsregs par gyur pa 'bad rtsol dag gis su yis byas/ rab tu tsha zhing chu lan tshwa can gyi chu bo rab med na bud med lcags kyi lus can gyis gzhan gyi chung ma la 'jug pa la 'khyud cing bsnun cing za bar byed pa 'am/ sen mos gtubs par byed pa gang yin pa 'am/ yang 'tsho ba la 'pho bar byed byed kyi/ 'on kyang sdug bsngal drag po myong bar byed pa'i me tshogs de dag ci las skyes/bud med de dag ci las skyes/ /de 'dra de dag thams cad kyang / /sdig sems yin par thub pas gsungs/ /zhes pa thub pa sangs rgyas bcom ldan 'das kyis gsungs pa yin no/ /de'i phyir 'jig rten gsum po na/ sems las 'jigs pa gzhan gang med//sems nyid 'jigs pa dang 'jigs par byed pa yin no/ /de bcings na 'jigs pa thams cad med par 'gyur ro/ /ji ltar thams cad dge bar 'gyur zhe na/ gal te 'gro ba dbul bor nas/ /zhes bya ba la sogs pa smos te/ pha rol tu phyin pas na pha rol tu phyin pa ste/de'i dngos po ni pha rol tu phyin pa nyid do/ /de bzhin du shes rab kyi pha rol tu phyin pa nyid kyi bar du'o/ /de la gal te 'gro ba dbul bor nas/ /sbyin pa'i pha rol phyin yin na'o/ /'o na de lta na ni da rung 'gro bkren yod na sngon/ /skyob pa ji ltar pha rol phyin/ /'o na de ci'i phyir zhe na/bdog pa zhes bya ba la sogs pa smos te/ bdog pa thams cad 'bras bcas te/ /dus gsum gyi chos dang / mi 'jigs pa dang / zang zing gi sbyin pa thams cad kyis sems ni gtong ba thams cad kyi sems yin no/ /de'i phyir skye bo kun la gtang sems kyis/ / 'bras bu dang bcas par 'jug pa'i phyir/ 'phags pa blo gros mi zad pa las/ sbyin pa'i pha rol phyin gsungs te/ /de phyir de ni sems nyid do/ /chos sems pa'i ka ba chen po la dran pa'i thag pas kun nas btags na tshul khrims kyi pha rol tu phyin pa la sogs pa yang dge ba'i sems nyid yin pa'i phyir/nya pa la sogs pa zhes bya ba smos te/ nya ni srog chags nye bar mtshon pa'o/ /sogs pa'i sgras ni gzhan gyi bud med dang nor la sogs pa gzung ngo / /thag nye ba na yod na yang gang zhig tu/ /de dag gsod mi 'gyur bar bskrad/ /de dag nya pa la sogs pa'i srog chags so//thams cad kyang las kyi dbang gis yul la sogs pa nges pa yin gyi/ 'ga' zhig tu yang bskrad par nus pa ma yin no/ /gsod pa zhes bya ba ni 'phrog pa dang / len pa zhes bya ba la sogs pa ni nye bar mtshon pa yin no/ /gzhan las yang dag par blangs pa'i phyir/'tshe ba la sogs pa thams cad las spong ba'i sems ni thob pa las zhes bya ba ni nye bar mtshon pa yin te/ dge ba chos sdud pa dang / sems can gyi don byed pa la 'jug pa'i sems kyi dran pas bcings na/ tshul khrims pha rol phyin par bshad/ /sbyin pa sngon du song ba can ni/tshul khrims yang dag par len pa yin la/ de nas bzod pa yin pa de ltar na/ bzod pa'i pha rol tu phyin pa nyid ni/ sems can mi srun nam mkha' bzhin/ /de dag gzhom gyis yang mi lang / /zhes bya ba la sogs pa smos te/ dran pa dang shes bzhin dag gi zhags pa dang ral gri dag gis khro ba'i sems dgra bo drangs te bsnun cing bcom na/dgra bo thams cad choms dang 'dra/ /kun tu rtog pa las skyes pa'i dgra bo zhe sdang de med pa'i phyir med par 'gyur ro/ /'dir dpe ni/ sa stengs 'di dag kos g.yogs su/ /de snyed ko bas ga la lang / / lham mthil tsam gyi ko bas ni/ /sa stengs [(]ste [,]te [)]sa gzhi thams cad g.yogs dang 'dra/ /zhes bya ba smos so/ /gzhan gyi don la bzod pa'i bzod pa bshad nas/ mi skye ba'i chos la bzod pa bstan pa'i phyir/ de bzhin zhes bya ba ni nam mkha' bzhin du'o/ /phyi rol dngos po'i gzugs la sogs pa'o//gang gi phyir sa thams cad bcings nas bdag gis phyir bzlog mi long ba de'i phyir chos la spyod pa'i bzod pas de bzhin te/ lham mthil tsam gyi ko ba bzhin du/ bdag gi sems 'di phyir bzlog bya'i/ /gzhan rnams bzlog pa ci zhig dgos/ bcom ldan 'das kyis sdong dum tshig pa la yang las kyi bgo skal la dmigs nas sems sdang bar mi bya'o zhes bya ba dang /de bzhin du nad kyi dgon pa'i nang du zhugs pas stong pa nyid la so sor dpyad pas skrag par mi bya'o zhes gsungs so/ /bzod pa dang ldan pas brtson 'grus bskyed par bya ba de lta bas na/brtson 'grus kyi pha rol tu phyin pa nyid ni sems gsal de ni brtson 'grus drag po'i gcig /ces bya ba ni lus dang ngag med na yang / gang tshangs pa yin pa ltar/ lus ngag bcas pa'i 'bras bu yang / /lus dang ngag gi spyod pa zhan pas de ltar min no//brtson 'grus kyang bsam gtan gyi phyir yin pa de ltar na/ bsam gtan gyi pha rol tu phyin pa nyid bstan pa ni bzlas brjod ni nang du mi smra bar bzla ba'o/ /dka' thub kun te/ bzlas pa las gzhan dang gzhan pa'i bsod nams/ yun ring dus su spyad byas kyang //sems gzhan sems g.yengs pas byas pa ni/ dran pa dang bsam gtan med pa'i phyir dang / dman pa shes bzhin med pa'i phyir/ don med ces bsgoms pa 'bras bu can yin zhes sangs rgyas bcom ldan 'das thams cad mkhyen pa ste de nyid rig pas gsungs pa yin no//bsam gtan ni 'dir sems 'dod pa spyod pa yin yang nyon mongs pa can ma yin zhing rtse gcig pa yin no/ /de nas kho na nyid kyi blo yin pa de ltar na/ shes rab kyi pha rol tu phyin pa nyid ni gang gis chos kyi zhes bya ba la sogs pa smos te/ shes rab kyi nyon mongs pa spangs pa na yang skye ba la sogs pa'i sdug bsngal med pa de nyid kyi phyir mya ngan las 'das pa ni mchog tu bde ba thob pa'o//de dag don med kyi na 'khyam/ /chos thams cad ngo bo nyid kyis mya ngan las 'das pa nyid yin pa'i phyir ro/ /de skad du yang de bzhin gshegs pa rtag tu skye med chos//chos rnams kun kyang bde bar gshegs dang 'dra/ /byis pa'i blo can mtshan mar 'dzin pa yis/ /'jig rten dag na med pa'i chos la spyod/ /ces bya ba dang / gang 'di chos rnams thams cad sgyu ma lta bur shes/ sgyu ma'ang gzhan min chos rnams dag kyang gzhan ma yin//yod med ming dang bral ba nye bar zhi spyod pa/ /de 'di shes rab pha rol phyin mchog la spyod yin/ /zhes gsungs so/ /gang gi de de ltar zab cing rgya che ba'i bdag nyid can rnam pa bcu 'am/ pha rol tu phyin pa drug gi bdag nyid can gyi byang chub kyi sems yin no//rang gi mtshan nyid de 'dzin pa'i phyir dang / chos ma yin pa'i 'gog pa 'dzin pa'i phyir de tsam nyid ni chos yin no/ /chos kyi don po mchog sems kyi gsang 'di skye bo snod ma yin pa la bstan par bya ba ma yin pa de dang de ma shes shing goms par ma byas pa'o//cho ga 'dis grol bar mi 'gyur ro zhes zer ba de dag don med kyi na 'khyam mo/ /thabs kyi pha rol tu phyin pa'i chos kyang yod pa ma yin nam zhe na/ bden te/ de yang shes rab kyi pha rol tu phyin pa nyid kyi rab tu dbye ba nyid yin no/ /thabs ni snying rje chen po dang dad pas bsdus pa'i de kho na nyid kyi blo'o//rang gi don dang gzhan gyi don du gnyer ba'i smon lam yang de nyid yin no/ /stobs ni mi mthun pa'i phyogs rtsa nas 'don pa gnas dang gnas ma yin pa la sogs pa la thogs pa med do/ /ye shes ni nges par bdag nyid can yin no//de ltar na sbyin pa la sogs pa'i ka ba la dran pa'i thag pas sems kyi glang po dam du bcings na thams cad dge bar 'gyur ro/ /de phyir bdag gi sems de ni/ /dran pas legs par gzung shes bzhin gyis legs par bsrung bar bya'o/ /bdag gi sems bsrung brtul zhugs ma gtogs par//brtul zhugs mang pos ci zhig bya/ /skye bo ngan pa'i nang na gnas pas/ ji ltar sems bsrung bar bya zhe na/ dper na grol ba'i khrod gnas na/ /bsgrims te rma yi bag byed bzhin/ /skye bo ngan khrod gnas pas kyang / /sems kyi rma ni rtag tu bsrung //sdug bsngal gyi 'jigs pa bsrung ba yin gyi/ shig la sogs pa gsod pa la sogs pa las sems bsrung ba mi byed de/ rang la sdug bsngal med pa'i phyir zhe na/ rma'i sdug bsngal chung ngu yis/ /skrag pa'ang bdag rma'i bsgrims te bag byed na/ ri bo bsdus 'joms bcom skrag pas//bsdus 'joms zhes bya ba'i dmyal ba na/ lug lta bu'i ri bo dag phyogs gnyis nas 'ongs pas shig la sogs pa sen mos bcar ba ltar de dag 'joms pas skrag pa dag /sems kyi rma lta cis mi bsrung ba zhes bya ba ni cis mi bsrung ste/'on kyang bsrung ba nyid yin no zhes sbyar ro/ /ci'i phyir zhe na/ spyod pa 'di 'dras zhes bya ba la sogs pa smos te/ spyod pa 'di 'dras gnas byed na/ /sems bsrung ba'i bdag nyid kyis/ skye bo ngan pa'i khrod gnas sam/ /bud med khrod gnas kyang rung ba//bud med kyi nang na 'dug na yang / sdom brtson brtan pa ste/ bag yod pas nyams par mi 'gyur ro/ /de ltar ni 'gyur mod kyi/ gnas pa 'dis gnas pa na/ bdag la bstod pa la sogs pa med pa'i phyir/ 'ga' zhig gi tshe yang rnyed pa la sogs pa med par 'gyur ro zhe na/bdag gi rnyed dang bkur sti dang / /lus dang 'tsho ba med bla zhing / /med du zin kyang ngo / /gang bdag gi don nyid kyis/ dge ba gzhan yang nyams bla yi/ /sems ni nam kyang nyams mi bya/ /byang chub kyi sems rnams rnam pa bcu 'ga' zhig gi tshe yang nyams par mi 'gyur te/byang chub kyi sems nam yang zhig par ma gyur cig ces bya ba'i tha tshig go/ /ji lta zhe na/ sems bsrung 'dod pa rnams la ni/ /bdag gis thal mo sbyar byas nas/ /dran pa dang ni shes bzhin dag /srog la bab kyang srungs shig ces/ /bdag ni de skad 'dom par byed//dran pa ni dmigs pa ma brjed pa'o/ /shes bzhin ni yang dag par rab tu shes pa'i sgra'i tshig bya ba dang phyi ba dang bcas pa yin no/ /shes bzhin ni shes rab ste/ gang gis lus dang ngag dang yid kyi las thams cad yang dag par brtags shing / bdag dang gzhan la phan pa shes nas rtag tu byed pa dang / 'bad rtsol thams cad kyis bag yod pa phul du byung bas srungs shig ces so/ /kye sems bsrung bar ni 'dod rnams la/ /zhes rnam par bsgyur nas sbyar bar bya'o/ /ci'i phyir 'di bsrung zhe na/ 'di ltar nad kyis dkrugs pa'i mi dag ni//las rnams kun la mthu med pa/ /de bzhin du skyes bu shes bzhin med pa'i sems ldan pa'i/ /thos dang bsam dang bsgom pa yang / /glo rdol bum pa'i chu bzhin du/ /dran pa la ni de mi gnas/ /shes bzhin med par thos pa la sogs pa shin tu gsal bar nyams su myong ba med pa'i phyir ro//thos pa la sogs pa dang ldan pa'i don shes bzhin ma yin nam zhe na/ smras pa/ rang bzhin gyi thos ldan dad pa can dang ni/ /brtson pa lhur len du ma yang / /rnam pa 'ga' zhig gis rnam pa 'ga' zhig gi tshe/ shes bzhin med pa'i skyon chags pas//shes bzhin med pa'i nyes pas/ ltung ba'i rnyog dang bcas par 'gyur/ /thos pa la sogs pa las byung ba'i shes rab kyis nyes pa ma spangs pa de dag gi yang mi mthun pa'i phyogs kyis bcom pa yin pa des na de dag ni shes bzhin med pa'i chom rkun dag /dran pa nyams pa'i rjes 'brangs pas/ /bsod nams dag ni nyer bsags kyang / /rkun pos phrogs bzhin ngan 'gror 'gro/ /dran pa nyams pa ste/ zhig pa'i rjes su 'brangs pa'i ngang tshul yod pa ni dran pa nyams pa'i rjes su 'brangs pa can te/ shes bzhin med pa'i chom rkun de dag gis bsod nams nye bar bsags su zin kyang /phrogs nas ngan 'gror 'gro bar 'gyur ro/ /'di ltar nyon mongs chom rkun tshogs 'di ni/ /glags skabs tshol bar byed pa ste/ /glags te/ skabs rnyed gyur nas dge 'phrog cing / /dran pa rmongs pas 'phrog par byed pa de//bsod nams kyi 'bras bu'i skabs 'phrog par byed pa'i phyir ro/ /de bzhin du bde 'gro'i srog kyang 'phrog par byed/ de bas dran pa yid sgo nas/ /gud du nam yang mi gtang ngo / /yid ni byang chub kyi sems yin la de nyid sgo yin te/ byang chub pa'i thabs yin no/ / de las nam yang bzlog par mi bya'o/ /yul gzhan du song na yang / rnam pa 'ga' zhig gis nye bar gzhag /yul gzhan las yid la byed pas bzhag la/ yid kyi sgo las/ ngan song gnod pa dag dran par byas te nye bar gzhag par bya'o/ /ji ltar gzhag par bya zhe na/ bla ma dang ni 'grogs pa las//mkhan pos rjes su bstan pa dang / /slob ma dag la mkhan pos bslab pa las 'das pa na/ bskul zhing rjes su ston pa ni dran par byed pa zhes bya ba la sogs pa lnga yin te/ mkhan pos rjes su bstan pa des/ /'jigs pas skal ldan gus byed la//dran pa shin tu skye bar 'gyur ro/ /gzhan yang sangs rgyas byang chub sems dpa' dag /shes bya thams cad la thogs pa med pa'i gzigs pa ste/ spyan gang la mnga' ba de dag ni/ kun tu thogs med gzigs par ldan/ /thams cad mkhyen pa nyid do/ /de'i phyir de dag thams cad kyi spyan snga na/de dag gi mdun na bzhugs so zhes/ de ltar bsams nas/ de dag gi spyan sngar ngo tsha dang / gus pa dang 'jigs bcas dran pa rab tu gzhag /sdig pa dag las khrel yod pa dang / /dad pa las gus par gzhag pa'o/ /de la sangs rgyas dran pa yang //yang dang yang du 'byung bar 'gyur/ /de ltar spyan sngar gnas pa de la skad cig ma re re gzugs dang chos kyi sku la dmigs pa'i sangs rgyas rjes su dran pa yang rjes su 'byung bar 'gyur zhing / de'i tshe yid kyi sgo 'ba' zhig tu ma zad kyi gang tshe dran pa'i yid sgo nas//bslab pa dag bsrung ba'i don du gnas gyur la/ de tshe shes bzhin 'ong 'gyur zhing / /song ba dag kyang phyir 'ong bar 'gyur ro/ /dran pa dang shes bzhin dag gis ji ltar sems bsrung bar bya ba yin zhe na/ re zhig dang po sbyor ba'i mjug thogs su sdom pa yang dag par len pa'i de ma thag tu 'di 'dra ba'i sems te/byang chub kyi sems so so'i skye bo nyid yin pa'i phyir 'bad pas/ 'di ni skyon bcas shas byas nas te/ dran pa dang shes bzhin legs par bzhag nas so/ /glegs bam la la las ni de ni yul gzhan byas nas zhes 'byung ste/ khong du chud par sla'o/ /de bas na 'di ltar bsam par bya ste/ ltung ba'i sgo thams cad la/ de tshe bdag gis shing bzhin du/ /zungs thub par ni gnas par bya/ /shing yang rlung gis g.yengs pa'i rtse mo'i cha dbang po dang bcas pa bzhin du/ sgra 'byin pa de ltar na zungs thub pa zhes smos te/yid kyi dbang po med pa na brjod par 'dod pa'i don med pa yin no/ /dbang po med pa'i rlung yang g.yo ba yin pa de ltar na g.yo ba med pa'i don du shing zhes bya ba smos so/ /de ltar yin na slob pa yang spyod pa yang med pa ma yin nam zhe na/ smras pa/ don med g.yengs par blta ba ni/nam yang bdag gis mi bya ste/ /'bras bu dang bcas par bya ba yin no/ /de la yang nges par sems pa ste/ cung zad dpyod pa'i 'bad rtsol gyis rtag tu ni/ mig ni phab ste blta bar bya/ /blta ba ngal bso'i ched du ni/ /res 'ga' phyogs su blta bar bya//skyes bu 'ga' zhig mig lam snang gyur na/ /legs 'ongs don du blta bar bya/ /legs par 'ongs sam zhes brjod pa'i don du blta bar bya'o/ /lam la sogs zhes bya ba 'dis 'jigs pa ste/ rkun po la sogs pa'o/ /de brtag pa ni yongs su shes pa de'i phyir yang dang yang du ste/skad cig skad cig phyogs bzhir blta bar bya ba ni 'gro ba'i tshe ma yin gyi/ 'on kyang ngal bso ba na phyogs su blta bar bya'o/ /ngal bso kha ni phyir bltas nas/ lus thams cad phyir bsgyur nas blta bar bya'o/ /mdun dang rgyab tu brtag byas nas/ 'gro ba'am yang na 'ong bya ste//mdun brtags nas 'gro ba dang rgyab brtags nas 'ong bar bya'o zhes bya ba'i don to/ /de ltar phyogs 'dis gnas skabs thams cad du/ /spyod lam rnam pa bzhi dag la/ /dgos pa shes nas spyad par bya/ gnas skabs thams cad bshad na ni spros pa thams cad skye bar 'gyur ro zhes bya bar dgongs so//de ltar phyi'i rnam pa'i spyod pa bshad nas/ nang gi spyod pa ni/ lus kyis 'di ltar gnas byas te/ /zhes bya ba smos te/ 'di ltar gnas par bya'o zhes shing / de ltar byas nas mnyan pa la sogs pa bya ba bsdogs pas/ de nas ni skabs su lus 'di ste bya ba'i bar du ji lta bur/ gnas pa yin zhes blta bar bya/ /bltas nas bdag gis bya'o/ /bdag gis byas nas yang 'ga' zhig gi tshe/ yang dag par sems par mi 'gyur ro zhe na/ chos la sems pa'i ka chen la/ /dge ba yang sems pa'i ka ba la bcings pa grol bar mi 'gyur ltar//sems kyi glang chen smyon pa dag /'bad pa kun gyis dpyad par bya/ /ji ltar dpyad par bya zhe na/ /ci nas zhes bya ba la sogs pa smos so/ /ci nas yang dag blangs pa'i gtso/ /yang dag par blangs pa'i gtso bo 'di'i/skad cig gcig kyang mi 'chor bar/ /dge ba 'am gzhan dag la/ bdag gi yid 'di gar dpyod ces/ /de ltar yid la so sor brtag /gal te dge ba la yin na gong nas gong du dge ba dag la yang yang dag par sbyar bar bya'o/ /gal te gzhan la yin na mi dge ba de las bzlog cing /lung du ma bstan pa dang / de nas dge ba la sbyar bar bya ste/ go rims 'dis dge ba 'di la gzhag par bya zhing de ltar so sor brtag par bya'o/ /'jigs dang dga' ston sogs byung bas phyi'i 'jigs pa la yang 'dis 'jigs pas na 'jigs pa ste sbrul la sogs pa'o//dga' ston ni rigs kyi me skor la sogs pa'am/ gtsug lag khang du ni sangs rgyas kyi mchod pa la sogs pa'o/ /la sogs pa'i sgras ni gnyid log pa gzung ngo / /de dag dang 'brel cing ldan par 'gyur bas na/ snyoms par 'jug pa'i tshe/gal te ci bder mi nus na/ /'di la 'gyod par bya ba ma yin no/ /ci'i phyir zhe na/ gang phyir sbyin pa'i dus dag tu/ /tshul khrims btang snyoms gzhag par gsungs/ /zhes bya ba smos te sbyin pa ni 'dir nus pa nye bar mtshon pa'o/ /tu'i sgras ni nges par bzung ba ste/ sbyin pa'i dus na tshul khrims nyon mongs pa can nyid ma yin pa/ bdag gir ma byas pa nyid la sogs pa las ldog pa dang / nyon mongs pa can bdag gir ma byas pa la sogs pa yang rnam pa thams cad rjes su gnang ba med pa las snying rje'i bsam pa dag pa yin zhing mngon par shes pa thob pa yin na/'tshe ba la sogs pa yang nyon mongs pa ma yin no zhes rjes su gnang ba yin no/ /so so'i skye bo ni nyon mongs pa can ma yin na yang nyon mongs pa byed pa'i phyir dka' bar byed pa'o/ /de mi nus pa ni btang snyoms su gzhag pa ni/ 'phags pa blo gros mi zad pa'i mdo las/ sbyin pa'i dus su tshul khrims bsrung ba btang snyoms su gzhag par bya'o zhes rjes su gnang ba yin no/ /gal te rnam pa 'ga' zhig gis 'jigs pa dang / dga' ston la sogs pa dang 'brel ba las nus pa med pa la nyon mongs pa can gyi rtsa ba'i ltung ba 'byung bar 'gyur na/ 'phags pa nam mkha'i snying po'i mdo las gsungs pa'i cho ga bzhin du bshags pa byas nas/ rgyal po la sogs pas yang sdom pa gzung bar bya'o/ /gal te rnam pa gzhan du gzhan 'byung ba na yang / tshul khrims kyi le'u la sogs pa'i cho ga bzhin du bshags par bya'o/ /ji ltar na bya ba thams cad yang dag par byas par 'gyur zhe na/gang zhig zhes bya ba la sogs pa smos te/ gang zhig bsams te byar brtsams pa/ /de las gzhan du mi bsam ste/ /der gtad pa yi bsam pa yis/ /sems kyis de nyid re zhig bsgrub par bya/ /de lta na ni kun legs bya/ / gzhan du gnyi gar mi 'gyur ro/ /bsam pa dang de las gzhan pa 'ba' zhig tu ma zad kyi gnyis kar mi 'gyur ro/ /shes bzhin ma yin nye nyon mongs pa dag kyang / de lta na ni 'phel mi 'gyur/ /'phel ba nyid thob par mi 'gyur ro/ /de'i phyir de las gzhan pa bsam par mi bya'o/ /yang ci zhig bya zhe na/bre mo'i gtam zhes bya ba smos te/ bre mo'i gtam ni sna tshogs dang / /rgyal ba'i gtam la sogs pa dang / /ngo mtshar ltad mo ste mig 'phrul sogs pa rnam pa mang pos kun la ste/ dpung gi bkod pa dang / shi ba'i ro 'degs pa la sogs pa dang / 'jig rten gyi tshogs pa la 'jug par gyur pa na/de la chags pa spang bar bya'o/ /de bzhin du don med sa rko rtswa gcod dang / /sa ris 'dri sogs byed gyur na ste/ /dgos pa med pa byed pa na/ /bde gshegs bslab pa dran byas nas/ /skrag pas de'i mod la gtang bar byas so/ /gang tshe bskyod par 'dod gyur tam/ /smra bar 'dod par gyur na yang /de'i tshe re zhig dang por rang gi sems brtags nas/ de nas brtan pas g.yo ba dang / bskyod pa dang smra ba rigs par ldan par bya'o/ /gang tshe rang yid la so sor rtog pa dang chags pa dang / khro ba'am rnam par sdang ba mthong ba de'i tshe las su mi bya ste/ skyob par mi bya zhing smra bar mi bya'o//'on kyang btang snyoms su shing bzhin du ni gnas par bya/ /de ltar na gang gi tshe dgod dang ga zhar bcas pa'am/ gal te nga rgyal te khengs pa dang / rgyags shing dregs pa dang ldan zhing 'byor pa ni nga rgyal rgyags dang ldan pa'o/ /mtshang 'dru ba yi bsam pa dang //zhes bya ba ni gzhan dag gi skyon rnam par brjod pa'o/ /gal te skyor 'byin slu sems dang / /zhes bya ba ni g.yo sgyu'o/ /gang gi tshe bdag la bstod pa lhur len pas na/ bdag bstod lhur len pa'o/ /gzhan la smod pa nyid dang ni ste/ gzhan la tshigs su bcad pa ma yin pa rjod par byed pa nyid do//gshe bcas ni gzhan dag la brnyas pa dang bcas pa'o/ /'gyod dang bcas gyur pa ste/ khro bas 'khrugs par 'gyur ba dang bcas na'o/ /de'i phyir shing bzhin gnas par bya'o/ /'di ltar yang bsam par bya ste/ rnyed dang bkur sti grags 'dod pa'am/ /g.yog 'khor don du gnyer ba 'am//bdag sems rim gro 'dod gyur na/ /de tshe shing bzhin gnas par bya/ /de bzhin du gzhan gyi don yal bar 'dor zhing spong ba ni gzhan don yal bar 'dor ba'o/ /rang don gnyer bar 'dod pa dag /yang ni 'khor ni 'dod 'gyur ba 'am slob pa la sogs pa don du gnyer ba'am/ smra bar 'dod pa'i sems byung na//de ltar gyur pas bdag gi sems g.yo zhing smra bar byed par 'dod pa des ni shing bzhin gnas par bya/ de bzhin du bzod par mi nus pa'i ngang tshul ni mi bzod le lo'o/ /'jigs pa ni dngang ba'o/ /de bzhin spyi brtol ni phod pa can no/ /mu cor ni tshig 'khyal pa'o/ / de bzhin du rang gi phyogs zhen sems byung na/ des ni shing bzhin gnas par bya/ /ji ltar chags pa nas rang gi phyogs la mngon par zhen pa'i bar de ltar 'chab pa la sogs pa'i kun nas nyon mongs pa gzhan dag kyang brtags nas sam/ don med brtson pa'i yid brtags nas te/ sa rko ba la sogs byung na yid lung du ma bstan pa bltas shing brtags nas so//de tshe dpa' bos gnyen po yis/ /bag yod par gyur pas shes bzhin gyi yid de brtan par bya gzung bar bya'o/ /nges par gzung bas brtan pa rigs pa dang ldan pas/ lus kyi g.yo 'gul dang smra ba la 'jug par bya'o/ / sdom pa dang dge ba chos sdud pa'i tshul khrims kyi dbang du mdzad nas de ltar sems sbyor ba yin no/ /sems can don byed pa'i tshul khrims la ci 'dra ba gzung bar bya zhe na/ shin tu nges dang zhes bya ba la sogs pa smos te/ shin tu nges par ni brtan por dam bcas pas so/ /rab tu dang ba ni shes rab dang bag yod can dang /yon tan dag la dad pa'o/ /bstan pa ni dka' ba la sngar ba med pa'o/ /zab cing rgya che ba mos pas dkon mchog gsum dang / bla ma rnams dang chos 'dzin pa la gus pa ste/ bsnyen bkur byed pa zhes ni gzhon rabs dag la yang bla ma nyid du 'du shes pa'o/ / de dag dang bcas par 'jug pas na gus dang zhe sar bcas pa'o/ /rang dang gzhan la ltos nas nyes pas ngo tsha ba ni ngo tsha ba ste de dang bcas pa ni ngo tsha dang bcas pa'o/ /nyes pa dag las 'jigs pas 'jigs pa ste/ de dang bcas pa ni 'jigs pa dang bcas pa'o/ /rgod pa'i rkyen yod na yang zhi ba'o//sbyin pa la sogs pa bsdu ba'i dngos po bzhi po dag gis gzhan dga' bar byed pa la brtson/ phan tshun mi mthun byis pa yis/ /'dod pa rnams kyis mi skyo zhing bzod pas so/ /byis pa sdug bsngal mi 'dod cing / /sdug bsngal gyi rgyu gzhan la 'tshe ba yang 'dod par byed do/ /nyon mongs skyes pas 'di dag gi//sems 'di byung snyam brtser ldan dang / kha na ma tho med dngos la/ /bdag dang sems can dbang byas shing rtag tu dbang du bya'o/ /sprul pa bzhin du nga med par/ /yid 'di rtag tu gzung bar bya/ /de ring 'di 'dra ba'i sems shin tu legs par gzung bar bya'o zhes bstan pa'i phyir/ring zhig lon nas dal ba'i mchog /thob pa yang dang yang bsams nas/ /shin tu nges pa nas med pa'i bar gyi sems de lta bur ri rab ltar bdud thams cad kyis rab tu mi g.yo ba gzung bar bya'o/ /sems de 'dra ba gzung bar bya'o/ /lus ni ma yin te/ de ni sems med par rang gi don la yang nus pa med pa'i phyir ro//de lta ma yin na/ bya rgod sha la chags pa yis/ /sha la brkam pas bdag gi lus/ /phan tshun kun tu bshal khrid kyang / /gzhan du lus 'di phyir 'chos par/ /ci yi phyir na deng mi byed/ /byed pa med pa'i gson po'i lus la yang / byams pa la sogs pa'i sems nyid 'di ltar srung bar byed do//srung ba de yang bdag gis byas pas rigs pa ma yin te/ mi rigs so zhes bstan pa'i phyir/ lus ni zhes bya ba la sogs pa smos te/ kye lus 'di bdag gir gzung byas nas/ yid khyod ci'i phyir srung bar byed/ /bdag tu bzung ba yang 'dir mi rigs so zhes bstan pa'i phyir khyod dang zhes bya ba la sogs pa smos te/khyod dang 'di gnyis so so na/ lus 'di ma bsrungs na/ des ko khyod la ci zhig gnod/ /gal te gzung ba yod pa ma yin na/ kye rmongs pa'i yid khyod ci yi phyir/ /shing gzugs gtsang ma gzung mi byed//byed par nus pa ma yin no zhe na/ mi gtsang tshogs kyi 'khrul 'khor 'di/ /zhes smos so/ /de bas na bza' bar bya ba nyid ma yin pa'i phyir bsrung bar bya ba ma yin no zhe na/ ci'i phyir rul pa srung bar byed ces bya ba smos te/ nye bar mkho ba ma yin par 'gyur ro/ /'di la ni snying po cung zad yod pa yin pa de ltar na bsrung ba yin no zhe na/thog ma zhes bya ba la sogs pa smos te/ pags pa nyid rim pa yin pas na/ pags pa'i rim pa 'di'o/ /rang gi blo yis tha dad dbye bar bya'o/ /sha yang rus pa'i dra ba las/ /shes rab mtshon gyis gud du phye/ /rus pa rnams kyang dbye byas nas//rkang gi bar du blta bya zhing / /rkang mthar thug pa'i bar du'o/ /'di la snying po ci yod ces/ /bdag nyid kyis ni brtag par gyis/ /de ltar pags pa tha dad par bya ba la sogs pa'i rim gyis 'bad de btsal kyang der/ khyod kyi snying po ma mthong na/ /da dung ci yi phyir na khyod//lus 'di srung bar byed pa smos/ /de bzhin du/ khyod kyis mi gtsang bzar mi rung / /khrag kyang btung du mi rung la/ /btung bar bya ba ma yin no/ /rgyu lto'ang gzhib tu mi rung na/ /lus kyis khyod la ci zhig bya/ /nyis na wa dang bya rgod kyis/ /zas kyi don du 'di bsrung rigs/ / mi'o cog gi lus 'di ni/ /gson po dag gis yang / bkol bar bya ba nyid du zad/ /de ltar yang gal te bsod nams byed dam zhe na/ 'di ltar khyod kyis bsrungs kyang ni/ /'chi bdag brtse ba med pa yis/ /lus phrogs te bya dang khyir byin na/ de tshe khyod kyis ci byar yod/ /gal te deng 'di ltar dge ba byed pa ma yin na/'di la cung zad kyang sbyin par mi bya'o zhes bstan pa'i phyir/ bran g.yog ces bya ba la sogs pa smos te/ bran g.yog bkol du mi btub la'ang / /mi 'dug go zhes nges par byas nas/ gos la sogs pa mi byin ltar/ /lus 'di bsnyod kyang gzhan 'gro na//shi bar 'gyur na'o/ /bsnyod kyang zhes bya ba ni/ gos la sogs pa bskon pa zhes bya ba la sogs pa nye bar mtshon pa yin no/ /sems khyod ko ci'i phyir sha thang gso/ lus gso bas ci zhig bya/ de'i phyir 'di la gla rngan byin nas ni/ /lus la gos la sogs pa'i gla rngan byin nas ni kye yid da ni ste/deng rang gi don byed chug /ci'i phyir zhe na/ phan pa med pa zhes bya ba la sogs pa smos te/ phan pa med pa 'di la ni/ /'di ltar bran te/ bran g.yog bkol du mi btub pa'ang gla rngan gyis 'tsho ba la sogs pa btags pa'i gos la sogs pa'o/ / thams cad sbyin par mi bya'o/ /de'i phyir gla rngan tsam byin nas 'di rang gi don byed du gzhug par bya'o/ /rang gi don yang byang chub sems dpa' rnams kyi sems can gyi don bsgrub par bya ba nyid yin no zhes bstan pa'i phyir/ 'gro dang zhes bya ba la sogs pa smos te/ 'gro dang 'ong ba'i rten yin phyir rgyu yin pa'i phyir/lus la gru yi blo gzhag ste/ /sems can rnams don bsgrub pa'i phyir/ /yid bzhin gyi ni lus su bsgyur/ /'gro dang 'ong ba'i rten tsam du zhes bya ba'i gzhung ni lus so/ /'gro ba dang 'ong ba'i rten du rag lus pa gang la yod pa de ni/ 'gro ba dang 'ong ba'i rten tsam du/lus la gru'i blor sgro btags nas zhes bya ba'i tha tshig go/ /lhag ma ni snga ma bzhin no/ /de ltar bslab pa bsrung bar 'dod pa yis/ /zhes bya ba nas brtsams pa 'di tsam gyis sems sbyong ba'i spyod pa bshad nas da ni spyod pa ste de ltar zhes bya ba la sogs pa ston par byed do//'dzum pa'i bzhin yang 'ga' zhig gi tshe khro gnyer gyi ngo 'dzum du byar med do zhes bstan pa'i phyir/ khro gnyer zhes bya ba la sogs pa smos te/ phan pa ma yin zhes bya ba'i don to/ /'gro ba'i don byed par 'dod pa'i mdza' bshes ni 'gro ba'i bshes so/ /gzhan gyi smra ba'i don du legs par 'ongs pa la sogs pa'i ngang tshul gang la yod pa de la de skad ces bya'o//khri la sogs pa ste mal stan la sogs pa'o/ /sgra dang bcas pa mi dor ro/ /zhes bya ba 'dir sgra dang bcas par 'dor zhing gzhag par mi bya ste/ mi chags pa la sogs pa'i don du'o//bab col ni srog chags la gnod pa la sogs pa yongs su spang ba'i don te yang dag par brtags nas bya'o/ /de bzhin du sgo yang drag tu mi dbye ste/ rtag tu bcom bskyungs dga' bar bya/ /de lta ni chu skyar byi la chom rkun dag /sgra med 'jab cing 'gro ba yis/ /mngon par 'dod pa'i don sgrub ltar//nya dang byi ba dang rkun ma la sogs pa'i bya ba'o/ /de'i phyir 'di ltar chu skyar la sogs pa bzhin du mngon par 'dod pa'i dge ba thob par bya ba la/ thub pas rtag tu ste/ yang rgyun de bzhin du spyad par bya'o/ /de bzhin du dga' ba'i sems kyis phan 'dogs par byed pa'i ngang tshul gang la yod cing gzhan gyi skyon gyi bzhin skul byed pa'i mtshan nyid can dag ni/gzhan la bzhin skul 'debs mkhas shing / /ma bcol phan pa byed pa'i ngag /nyes pa yod na de'i phyir 'chos par byed 'dod cing / rnam pa gzhan du byed par mi 'dod pa yang / gus pas spyi bos blang byas nas/ / de'i phyir kun gyi slob mar gyur/ /de bzhin du/ legs par smras pa thams cad la/ /dge bar gsungs zhes brjod par bya'o/ /kun nas nyon mongs pa'i gnyen po'i phyogs kyi don du brjod par ni legs par smras te/ de thams cad sangs rgyas kyi byin gyi rlabs las byung ba'i phyir sangs rgyas kyis gsungs pa yin no//de bzhin du/ bsod nams byed pa mthong gyur na/ /mngon sum du bstod pas legs par dga' ba bskyed/ lkog nas yon tan brjod bya zhing ste/ bstod pa'i don du'o/ /gzhan gyis brjod par gyur pa na/ /yon tan brjod na rjes su brjod/ /byang chub sems dpa'i rang gi yon tan gzhan gyis brjod pa na/yon tan shes pa de dag ni yon tan shes par rig par bya/ byang chub sems dpa' yid la bya'o/ /yang gi sgras ni gzhan gyi yon tan gyis mgu bar yang bya'o/ /ji lta zhe na/ rtsom pa thams cad ces bya ba la sogs pa smos te/ 'di ltar rtsom pa thams cad de/ /bya ba thams cad ni'o//dga' phyir ste dga' ba de ni rin gyis nyo na'ang dkon/ de phyir gzhan byas yon tan gyis/ gzhan gyis nye bar bsags pa'i yon tan dag gis/ dga' ba'i bde ba spyad par bya/ bdag la 'dir god yod med la 'dir ni bsod nams yin te/ pha rol la yang bde ba che//gzhan gyi yon tan de dag la zhe sdang ba'i/ nyes pas mi dga' sdug bsngal zhing / /pha rol du yang sdug bsngal che/ /lus kyi yang ngo / /de ltar na dga' ba bskyed par bya'o/ /ji ltar smra bar bya zhe na/ smra na zhes bya ba la sogs pa smos te/ yid phebs pa ste/ yid ches su rung ba'i 'brel ba'i tshig go//gang la don gsal bar byed pa dang / de bzhin du yid 'phrog par byed pas yid du 'ong ba ste/ sems kyis gzung bar bya ba rna ba'i rnam par shes pa la snyan par bya ba'o/ /gang gi phyir gang la brtse ba sdug bsngal dang bral bar 'dod pa thams cad la zhe sdang med pa'i dge ba'i rtsa ba ste/rgyu yod pa'o/ /gang 'jam pa ni mnyen pa ste/ ran cing thon pa ma yin pa'i sgra yod pa'o/ /sgra yod pa des ni de ltar smra bar bya'o/ /ji ltar blta bar bya zhe na/ mig gis zhes bya ba la sogs pa smos te/ rtag tu mig gis sems can blta na yang zhes bya ba ni gtso bo yin pa'i phyir gzhan dag kyang de ltar bya'o//'dzum pa'i gdong can khro gnyer gyi ngo 'dzum spangs pas kyang 'ga' zhig gi tshe 'gyur bar mthong ba de lta na/ de skad du bstan te/ legs pa phul du byung ba'i don yin no/ /de nyid kyi phyir/ drang zhing byams pa'i tshul gyis blta zhes bya ba smos te/ drang ba ni 'khyogs pa med par blta ba'o//ci'i phyir de ltar blta zhe na/ 'di ltar sems can 'di dag nyid la brten nas bdag /sangs rgyas nyid du 'gyur phyir ro/ /de dag nyid ces bya ba la sogs pa'i gzhung ni sems can de dag gang la brten nas bdag /sangs rgyas nyid du 'gyur ba'i phyir//zhes bya ba'i blo 'dis/ drang zhing byams pa'i sems kyis blta/ /rtag tu sems can rnams la drang por blta bar bya'o zhes bya ba'i tha tshig go/ /de dag la yang rtag tu mngon par chags pas gnas par bya'o/ /de bzhin du zhe sdang la sogs pa'i gnyen po'i phyogs kyi don du rab tu dang ba bskyed par bya'o//yon tan ni chags pa med pa la sogs pa yin la/ phan 'dogs pa ste/ yang dag par skyong ba la sogs pa gang yin pa de ni yon tan phan 'dogs byed pa'i zhing yin no/ /de la sdug bsngal ba dang / nad pa la sogs pa la 'di ltar mthong ba la sogs pa gang yin pa de yang dge ba chen po yin no//byang chub kyi sems thams cad du dge ba chen po nyid ma yin nam zhe na/ bden te mos pa brtan po med pa dag la de skad du bshad pa yin no/ /de nyid kyi phyir brtson zhing zhes bya ba la sogs pa smos pa ste/ brtson pa ni don la le lo med pa'o//ldang dang ldan nas zhes bya ba ni/ rang gi don la rtag tu ldang ba'o/ /gzhan gyi bya ba bdag gis brjed pa med par byed pa'i ngang tshul gang la yod pa de ni/ las rnams bdag gis rtag tu bya/ /de'i yang las 'ga' zhig gi tshe/ /slob ma la sogs pa 'ga' zhig gis byas pa yin no snyam pa la/las rnams zhes bya ba la sogs pa smos te/ ltos par bya ba ste/ skabs sbyin par bya ba'o/ /de ltar ni 'gyur mod kyi rtag tu ldang nas/ sgo la sogs pa dbye ba la sogs par 'gyur ba de yang bkag pa yin pa de ltar na/ tshul khrims kyi pha rol tu phyin pa'i don dang ldan pas mi bya'o zhe na/sbyin pa'i zhes bya ba la sogs pa smos te/ gzhan gyi don la rtag tu ldang ba ni brtson 'grus kyi pha rol tu phyin pa yin te/ tshul khrims kyi pha rol tu phyin pa las mchog yin no/ /'o na ji ltar na sbyin pa'i dus su tshul khrims btang snyoms su bzhag ce na/ chung ngu'i phyir ni zhes bya ba la sogs pa smos te/ spyod pa ni chu lon bzhin du/ steng du 'gro ba'i rten yin pas na/ de ltar na gzhan spyod pa'i chu lon te ma gtogs pa ste/ de yang nam du yang dor bar mi bya'o zhes bya ba'i tha tshig go/ /'tshe ba la sogs pa bkag pa ma yin nam zhe na/ de ltar zhes bya ba la sogs pa smos te/thugs rje mnga' ba ring gzigs pa ste/ snying rje'i bsam pa dag pa la 'tshe ba la sogs pa yang don mthong ba la rjes su gnang ba yin no/ gzhan lta ci smos zhes bya ba'i tha tshig go/ /de ltar rig byas gzhan don la/ /rtag tu brtson par gnas par bya/ /de ltar mi 'jigs pa sbyin pa'i rnam pa spyod pa dag tu 'dzum pa zhes bya ba la sogs pa smos nas/zang zing gi sbyin pa'i rnam pa can bstan pa'i phyir/ log par lhung dang zhes bya ba la sogs pa smos te/ log par lhung ba ni yi dags la sogs pa'o/ /mgon med ni pha la sogs pa dang bral ba'i nad pa la sogs pa'o//brtul zhugs gnas ni dka' thub pa ste/ de dag la bgo bsha' byas nas bza' bar bya'o/ /mang po yang ma yin zhing nyung ngu yang ma yin par ran pa tsam du bza' byas te'o/ /chos gos gsum po snam sbyar dang bla gos dang mthang gos so/ /tshogs la gtso bor gyur pa ni chos gos gsum mo//de'i phyir de 'dra ba slong ba gzhan la lhag par sbyin par bya zhing gtang bar bya'o/ /gal te med na de las gzhan pa sbyin par bya'o/ /de de ltar sbyin pa'i don du tshul khrims nyid dbul bar khyad par can nyid yin pa'i phyir/ bcas pa'i kha na ma tho ba las ldog pa las tshul khrims gzhan gtang bar mi bya'o zhes bstan par 'gyur ro//'o na sdom pa gtong ba las yang bcas pa'i kha na ma tho ba nyid yin pa'i phyir bya'am zhe na/ dam pa'i chos ni zhes bya ba la sogs pa smos te/ dam pa'i chos ni spyod pa'i dge slong gi lus bsod nams thams cad kyi 'byung khungs nyid yin pa'i phyir ro//tshul khrims de cig shos ched du ste/ sbyin pa'i don du sbrang ma dang / mchu snyung dang / grang lhags la sogs pas gnod par mi bya'o/ /de ltar byas na ste/ lus la gnod pa ma byas na sems can gyi bsam pa myur du rdzogs par 'gyur te/ bde ba dang ting nge 'dzin dang / de las de kho na nyid kyi blo dang / de las snying rje'i bsam pa rnam par dag pa yod na sems can gyi don zhes bya'o/ /so so'i skye bo dag gis chos gos gsum yang gtang bar bya ba ma yin na/ srog la smos kyang ci dgos zhes bstan pa'i phyir/ snying rje'i zhes bya ba la sogs pa smos te/dam pa'i chos ni spyod pa'i lus/ /cig shos ched du gnod par mi bya ba yin pa de'i phyir/ snying rje'i bsam pa ma dag par/ /lus 'di gtang bar mi bya ste/ /mos pas spyod pa'i sa'i so so'i skye bo 'ga' zhig kyang / bdag dang gzhan mnyam pa nyid bsam pa mtshungs par 'gyur ba de yod na/des kyang srog btang ba na rnam pa 'dis des khyad par rtogs pa'i phyir/ nyams shing zhig par mi 'gyur ro/ /de de ltar mi 'jigs pa dang / zang zing gi sbyin pa'i spyod pa rnam par bshad nas/ chos kyi sbyin pa'i rnam pa bstan pa'i phyir ma gus pa la zhes bya ba la sogs pa smos te/ma gus pa la chos mi bshad/ /gus pa dang bcas pa yin na yang / /mi na bzhin du ste rang bzhin du gnas pa yin pa mgo bo g.yogs pa la sogs pa la bshad par mi bya'o/ /nad pa la ni bshad par bya ba yin no/ /dman la ste sems chung ba dag la theg pa chen po zab pa dang / rgya che ba'i chos bshad par mi bya'o//rig pa'i skyes pa med par bud med la yang theg pa chen po dang chos gzhan bshad par mi bya'o/ /dman pa dang mchog gi chos rnams dang / theg pa chen po dang gzhan la yang gus pa dang bcas par spyad par bya'o/ /rgya chen chos kyi snod gyur pa ste/ sangs rgyas kyi rigs can dman pa'i chos la sbyar bar mi bya'o//spyod pa yongs su spangs nas ni/ /mdo dang sngags kyis 'drid mi bya/ /sdom pa ni spyod pa'i gtso bo nyid yin pa'i phyir ro/ /de dag gis spyod pa brtan po la sbyar bar bya'o zhes bya ba'i tha tshig go/ /tshul khrims la gnas pa'i spyod pa bstan pa'i phyir/ so shing zhes bya ba la sogs pa smos te/mchil ma ni kha chu'o/ /dor ba na ni dgab par bya/ /lag pa la sogs pas dgab par bya'o/ /de yang mi 'dod pa na gcig la sogs pa'ang longs spyod pa'i/ chu dang thang la dor ba smad/ /kha bkang ba dang sgra bcas dang / /kha gdangs nas ni bza' mi bya ste/ kha bkang ba med pa yang sgra bcas dang //sgra med na yang kha gdangs nas ni ste kha rab tu phye nas bza' bar mi bya'o/ /rkang pa brkyang ste/ rkang pa rab tu brkyang ba nyid kyis mi 'dug cing gnas par mi bya'o/ /rang gi lag pa mnyam par mi mnye'o/ /bzhon pa mal stan gnas dag tu/ /bud med gzhan dang gcig mi bya/ / gnyis 'grogs nas khyim du 'jug pa dang mal stan dang stan gcig la 'dug pa dang gnas dben pa'i nang ngam dgon pa dag tu yang gnyis 'grogs par mi bya'o/ /brtul zhugs can gyis chung mar 'tshe bar byed pa gang yin pa de yang / chos kyi rgyal po la sogs pa las bsrung bar bya'o/ /bud med gzhan thams cad ni mdor bsdus pa yin pa'i phyir/'jig rten ma dad 'gyur ba kun/ /mthong dang 'dris pas spang bar bya/ /'di ltar 'ga' zhig gis kyang / sor mos brda ni mi bya ste/ gus dang bcas pa'i g.yas pa ni/ /lag pa dag ni kun gyis kyang / /brda bya zhing / lam yang gus pa dang bcas pa'i lag pa ma lus pas de ltar bstan par bya'o//lag pa shas cher bskyod min te/ /lag pa kun nas bskyod pas ni'o/ /cung zad bskyod cing sgra bsgrags la/ /se gol la sogs brda bya ste/ /sogs pa'i sgras ni lag pa g.yas pa'i brda'i brda la sogs pa gzung ngo / /gzhan ma bsdams par 'gyur ro//bcas pa'i kha na ma tho ba'i yan lag gang dang gang gis slob par mi 'gyur ba de dang de tshul khrims 'chal bar 'gyur ro/ /ji ltar nyal bar bya zhe na/ mgon po zhes bya ba la sogs pa smos te/ mgon po mya ngan 'das gzims ltar/ /mgon po ste ston pa mya ngan las 'das pa'i phyir/sku'i g.yas kyi logs phab cing zhabs kyis zhabs mnan pas seng ge bzhin du kun nas mtho ba/ sems dang chos gos dang yan lag dang thugs rnam par mi g.yengs pa/ bdag gir gyur pa gzims pa de bzhin du'o/ /'dod pa'i phyogs su sngas bstan bya/ /shes bzhin te ji ltar dge ba btsal bar bya//zhes snang ba la sogs pa'i 'du shes kyi myur du ldang ba ni thun phyi ma la dge ba'i don du myur du ldang ba'i 'du shes thog ma nyid du nges par sbyar/ re zhig dang po de ltar gyur pas gdon mi za bar nyal bar bya'o/ /phyis nus pa med pa na ji ltar 'dod pa cung zad kyang / thog mar gdon mi za bar zhes bya ba de ci'i phyir zhe na/ nges par sbyar zhes bya ba smos te/ ston pa'i bka' yin no/ /ston pas dge ba 'phel bar bya ba'i don du nges par sbyar ba de gnas pa yin no/ /bzod pa la sogs pa la gnas pa la spyod pa bshad par bya'o snyam pa'i dgongs pa dang ldan pas sbyin pa dang tshul khrims la gnas pa'i spyod pa dper mdzad nas/byang chub sems dpa'i zhes bya ba la sogs pas mjug bsdus pa yin te/ spyod pa ste/ legs par spyod pa dang / kun spyod pa zhes bya ba'i bar du'o/ /byang chub sems dpa' rnams kyi spyod pa ste/ tshad med par ni ste/ bcom ldan 'das kyis rab tu dbye ba grangs med pa'i dpes gsungs pa las/gal te de thams cad nan tan du bya bar mi nus na/ sems spyod pa'i spyod pa ni bshad pa/ nges par de srid sbyar bar bya/ /gzhan pa nyin mo dang mtshan mo ni nyin mo dang mtshan mo ste/ rtag tu ma yin gyi/ 'on kyang lan gsum du zhes bya ba ni thun gsum dang dus gsum du'o//thun bar la yang nyal ba'i sngas dang / zas kyi 'og tu sems sbyong ba la rgyun gyi 'jug pas rab tu 'jug par bya zhing spyad par bya'o/ /phung po gsum pa ste/ sdig pa bshags pa dang / bsod nams kyi rjes su yi rang ba dang / yongs su bsngo ba'o/ / de la dus gsum la yang lan gsum 'don pa la 'jug par bya'i/ nyin mo dang mtshan mo sems spyod pa 'ba' zhig ma yin no zhes bya ba'i tha tshig go/ /re zhig sems sbyong ba'i thabs des yid kyis ltung bar mi 'gyur ro/ /lhag ma lus dang ngag gi ltung ba dag kyang mtshungs par mi 'gyur ba dang / byung ba dag kyang phyir bcos par bya'o/ /de bas na/ rgyal dang byang chub sems brten pa ste/ de ni byang chub sems dpa' dang rgyal ba la brten pa de'i phyir/ chos bzhi pa'i mdo las/ rten gyi stobs kyis sdig pa byas shing bsags pa zil gyis gnon par 'gyur ro zhes gsungs so/ /gnas skabs thams cad du bslab pa thams cad la bslab par bya'o//'on kyang rang ngam gzhan gyi zhes bya ba la sogs pa smos so/ /kun nas nyon mongs pas kyang bslab par bya zhe na/ 'khor ba la gzhol ba'i yid kyis mi bya'o zhes bstan pa'i phyir/ rgyal sras rnams kyis mi bslab pa/ /zhes bya ba la sogs pa smos so//dngos sam yang na brgyud kyang rung / /zhes bya ba'i sdom pa dang / dge ba chos sdud pa dag gis sems can gyi don byed pa las gzhan mi spyad/ sems can gyi don spyod pa de nyid/ /sems can kho na'i don gyi phyir/ /thams cad byang chub phyir te/ sangs rgyas pa'i ched du bsngo'o/ /byang chub ni dge ba'i bshes gnyen la rag las pa yin no zhes bstan pa'i phyir/rtag par zhes bya ba la sogs pa smos so/ /dge ba'i bshes gnyen ci 'dra ba zhig ce na/ theg chen zhes bya ba smos te/ 'dis 'gro bar byed pas na theg pa ste/ zab pa dang rgya che ba dag gis so/ /theg pa yang yin la chen po yang yin pas na theg chen ste/sa dang pha rol tu phyin pa de dag gsal bar byed pa'i bka'o/ /de'i don la mkhas pa ni rig pa'o/ /byang chub sems dpa'i brtul zhugs ni spyod pa ste/ sems spyod pa'i spyod pa'o/ /de mnyes par bya'o zhes bstan pa'i phyir/ dpal 'byung ba yi rnam thar las kyang zhes bya ba smos te/kyang gi sgras ni sangs rgyas kyis gsungs pa gzhan la yang bslab par bya'o/ /dpal 'byung ba'i rnam par thar pa zhes bya ba 'di dang / sangs rgyas bka' stsal gzhan/ mdo sde bklags nas shes par bya/ /mdo sde rnams la bslab par snang //de bas mdo sde bklag par bya/ /nam mkha'i snying po'i mdo sde ni/ /thog ma nyid du blta bya ste/ /rtsa ba'i ltung ba brtag par bya'o/ /sdom pa 'jig par byed pa'i ltung ba dag ni/ nam mkha'i snying po'i mdo las phal cher gsungs pa yin na de ltar na blta bar bya'o/ / gang phyir rtag tu spyod pa ni/ /de bas rgya cher rab ston pas/ /bslab pa kun las btus pa yang / /nges par yang dang yang du blta/ /'phags pa nA gArdzu na dang / kho bo'i mdor bsdus pa'i 'dul ba bstan pa'i phyir/ gang las zhes bya ba la sogs pa smos te/ gang la mchod rten gyi las dang theg pa chen po la sogs pa yul dang dus dang gnas skabs gang la bla ma dang / gzhan dag gis 'di 'dir mi bya'o zhes bkag pa dang / 'bab stegs kyi khrus la sogs pa'i rigs pa dang rigs pa ma yin pa la nges par sbyar ba dag 'dir 'di yin no zhes te/'jig rten sems ni bsrung ba'i phyir/ /de la bslab pa mthong nas yang dag par spyad/ shes bzhin gyis sems sbyang ba bshad zin to/ /shes bzhin gyi mdor bsdus nas mtshan nyid dang rgyu gang yin zhe na/ lus dang sems kyi zhes bya ba la sogs pa smos te/'o na mdo la sogs pa brjod par bya ba nyid yin nam zhe na/ lus kyis 'di dag spyad par bya/ /zhes bya ba la sogs pa smos pa yin no/ /byang chub sems dpa'i spyod pa la 'jug pa'i legs par sbyar ba las shes bzhin bsrung ba zhes bya ba ste le'u lnga pa'o// // tshul khrims kyi de ma thag tu bzod pa bstan pa'i phyir/ bskal pa stong du zhes bya ba la sogs pa smos te/ bskal pa stong du bsags pa yi/ /sngar bstan pa'i/ sbyin dang bde gshegs mchod la sogs/ /bde bar gshegs pa ni dkon mchog gsum gyi nye bar mtshon pa'o//mchod pa ni kun tu spyad pa'o/ /de yang bstod pa ni phyag 'tshal ba dang skyabs su 'gro ba la sogs pa'i nye bar mtshon pa yin no/ /legs spyad ni tshul khrims te gang yin de kun kyang / khong khro gcig gis 'joms par byed/ /bcom ldan 'das kyis khong khro zhes bya bas ni bskal pa stong du bsags pa'i bsod nams dag kyang 'joms par byed cing 'bras bu med par byed do//rten bsregs nas gzhan sreg par byed do/ /de bas na zhe sdang la khong khro ba zhes bya'o zhes gsungs so/ /zhe sdang ni nye bar mtshon pa yin te/de'i rgyu mthun pa ni khro ba yin la/ de'i gnyen po'i phyogs ni bzod pa yin te/ de ltar na kun rdzob dang / don dam pa'i bden pa 'chad par 'gyur ba'i tshul dmigs pa la brten pa bsgom pa/ sna tshogs tshul gyis bsgom par bya/ /ji ltar na zhe sdang lta bu'i khong khro med pa yin zhe na/'di ltar re zhig skye ba 'di la yang / zhe sdang zug rngu'i sems 'chang na/ /yid ni zhi ba'i nyams mi myong / /zhi ba dang bde ba mi myong ba de'i phyir/ yid lus ngag dga' ba dang bde ba'ang mi mthong la/ gnyid mi 'ong zhing brtan med 'gyur ro/ /de ltar na gang dag nor dang bkur sti yis//rnyed pa dang bkur sti dag gis/ drin byin de la brten gyur pa/ /de dag kyang ni sdang ldan pa'i/ /zhe sdang gdul dka' ba/ rje dpon de la gsod par rgol bar 'dod pa/ de'i mdza' bshes zhes bya ba la sogs pa ni rtogs sla'o/ /khro ba'i dgra yis de la sogs//sdug bsngal dag ni 'di dang gzhan du byed par 'gyur de'i phyir dgra bo'i 'du shes kyis/ gang zhig bsgrims te khro bar te/ zhe sdang 'joms pa/ de ni 'di dang gzhan du bde/ /'di'i rgyu ma bcos par 'di gzhom par nus pa ma yin la/ 'di'i rgyu yang sdug bsngal yin la/de yang zhe sdang bag la nyal ba yin no zhes bstan pa'i phyir/ mi 'dod byas dang 'dod pa yi/ /gegs byas pa las byung gyur pa/ /yid mi bde bar gyur pa'i zas te/ yid mi bde ba'i zas rnyed nas/ /zhe sdang brtas te bdag 'joms so/ /gang gi phyir de ltar yin pa de'i phyir/bdag gis dgra bo de'i zhes bya ba la sogs pa'i las su bya ba dag go/ /ji ltar de'i zas gzhom par bya ba yin zhe na/ ci la bab kyang bdag gis ni/ /zhes bya ba la sogs pa smos te/ dga' ba ni yid bde ba'o/ /de 'khrugs pa ni yid mi bde ba'o//de la yang / mi dga' byas kyang 'dod mi 'grub/ /'on kyang dge ba dag ni nyams par 'gyur ro/ /yid mi bde bar rigs pa ma yin no zhes bstan pa'i phyir/ gal te bcos su yod na ni/ /zhes bya ba la sogs pa smos te/ rtogs par sla'o/ /mi 'dod pa zhes bshad pa de la/mi 'dod pa nyid gang zhe na/ bdag dang bdag gi bshes rnams la/ /sdug bsngal zhes bya ba la sogs pa smos te/ brnyas pa ni khyad du gsod pa'o/ /bdag gam bshes la sogs pa la sdug bsngal la sogs pa ni mi 'dod pa'o/ /dgra dang 'brel pa ni sdug bsngal la sogs pa de las bzlog pa 'byung ste/bzlog pa de las bde ba la sogs pa la mi 'dod pa 'byung ngo / /de la bzod pa ni rnam pa gsum ste/ sdug bsngal brnag par nus pa dang / /gzhan gyi don la bzod pa dang / /chos la spyod pa'o/ /de la sdug bsngal brnag par nus pa'i dbang du byas nas/bde ba'i rgyu ni res 'ga' 'byung / /zhes bya ba la sogs pa smos te/ mkhris pa la sogs pa'i bar du'o/ /de la nges 'byung ni sdug bsngal las grol ba ste/ sdug bsngal med par ma yin no/ /de bas na kye sems khyod sdug bsngal thams cad brnag pa'i phyir brtan par mnos so//de ltar bsams nas/ dka' bzlog dad pa'i mi dag kyang / /zhes bya ba ni lag pa la sogs pa thar pa'i don du bsregs pa dang / bcad sogs sdug bsngal don med gnod/ /don chung ba nyid kyi phyir dang /sdig pa'i don nyid yin pa'i phyir ro/ /rang dang gzhan grol bar bya ba'i don du don chen po la brtan par bya ba'i phyir/ bdag ni de la ci zhig sngar/ /gnod pa chen po nyid yod pa'i phyir ro zhe na/ goms pa zhes bya ba la sogs pa smos te/mi bzod pa ni ches shin tu sdug bsngal bar 'gyur ro zhes bstan pa'i phyir/ sbrul dang zhes bya ba la sogs pa smos te/ ji ltar bzod par bya zhe na/ tsha grang zhes bya ba la sogs pa smos so/ /de'i phyir sems nyid brtan por bya'o zhes bya ba la sogs pa bstan pa'i phyir/la la bdag gi khrag mthong na/ /zhes bya ba la sogs pa smos te/ sdug bsngal gyi sdug bsngal dang / g.yul 'gyed cing rgyal bde ltar na/ de bas sdug bsngal khyad bsad cing / /sdug bsngal rnams kyis mi tshugs bya'o/ /ji ltar bya zhe na/ mkhas pas sdug bsngal byung yang ni//zhes bya ba la sogs pa smos te/ sems kyi dang ste rab tu dang ba'o/ /byang chub sems dpa'i 'thab mo dang ni nyon mongs dang ste zhe sdang la sogs pa dang / g.yul 'gyed tshe na gnod pa mang / /de bzhin du sdug bsngal thams cad khyad bsad nas//zhes bya ba la sogs pa dang / zhe sdang la sogs pa dgra bo ste/ dgra bo dag 'joms pa ni re zhig de dag rgyal byed dpa' bo ste/ lhag ma ro la gsod pa'o/ /sdug bsngal bzod pa'i phyir yon tan te/ yon tan gzhan dang gzhan dag ste/ gang la skyo bas dregs pas sel bar byed par 'gyur ro//de ltar sdug bsngal brnag par nus pa kun rdzob kyi bden pa'i tshul gyis bsgoms nas/ gzhan gyi don la bzod pa bsgom par bya ba'i phyir/ mkhris pa zhes bya ba la sogs pa la/ mkhris pa dang / bad kan dang / rlung la sogs pa dang / yul dang dus kyi nad chen po sdug bsngal gyi rgyu nyid yin pa'i phyir/sdug bsngal 'byung gnas che la mi khro bar/ sems yod rnams la ste/ bdag la gnod pa byed pa rnams la'o/ /ci ste khro zhes bya ba ni/ /rgyu ci'i phyir khro ba'o/ /mkhris pa la sogs pa ni sems yod pa ma yin te/ rkyen las byung ba nyid yin pa'i phyir/ gnod pa'i bsam pa med pa yin no/ /yul la sogs pa yang gnod pa'i bsam pa med pa nyid kyi phyir/ sems dang ldan pa ma yin te rkyen las byung ba yin pa de ltar na/ de dag la khro bar mi 'gyur gyi/ gnod pa'i bsam pa yod pa dag la ji ltar ni mi 'gyur zhe na/de dag kun kyang rkyen gyis bskul/ /zhes bya ba la sogs pa smos te/ byed pa po 'gog par 'gyur ba nyid kyi phyir ro/ /lhag ma ni chos la spyod pa'i bzod pa yin no/ /rkyen las byung ba nyid kyi tshul la brten pa ji ltar rkyen gyis bskul ba yin zhe na/ dper na mi 'dod bzhin du yang / /zhes bya ba la sogs pa smos te/ nad 'di mkhris pa las 'byung bar 'gyur zhing / nyon mongs pa ni rang gi sa bon las 'byung bar 'gyur ro/ /khro bar bya zhes ma bsams te/ mngon par mi 'dod kyang rang dbang ni byed pa po/ rkyen rnams te sa la sogs pa tshogs par gyur pa ni rkyen rnams tshogs pa'o//de bzhin du dmigs pa la sogs pa dag kyang ste/ rkyen rnams kyi tshogs pa de dag myu gu dang / rnam par shes pa la sogs pa de dag bskyed par bya zhes pa sems pa med/ myu gu la sogs pa des bskyed de yang bdag bskyed ces/sems pa yod pa ma yin no/ /grangs can gyi gtso bor byas te/ byed pa sems pa med pa gang yin pa de la bdag ces brtags mod kyi gzegs zan la sogs pas so/ /re zhig de nyid bdag gis 'di 'dra'o zhes sems pa nyid med pa'i phyir ched du bsams shing 'byung ba med pa yin na/gzhan lta smos kyang ci dgos/ de ltar mi 'gyur mod kyi/ sems yod pa nyid dang ldan pa nyid kyi phyir/ ched du bsams nas 'byung bar 'gyur la/ yongs su gyur cing 'khor bar 'gyur gyi/ de kho na nyid du ni rtag pa nyid kyi phyir skye ba ma yin no zhe na/ma skyes par ni de med na zhes bya ba smos te/ gang ma skyes pa de ni yod pa ma yin te/ dper na nam mkha' lta bu'o/ /gtso bo la sogs pa yang de bzhin no/ /'di ni gang gi phyir te/ de'i tshe skye bar 'dod pa gang ste/ 'khor ba 'am yongs su gyur pa'am/ de ste ma skyes pa'i gnas skabs su skye ba yin pa de'i tshe yul la ste/ dgra'i lus la sogs pa ste/ byed pa po nyid du rtag tu g.yengs gyur pa dang / de kho na nyid du med pa nyid kyi phyir 'gag par 'gyur ba'ang ma yin no/ /'ang gi sgras ni 'byung ba nyid du 'gyur ba 'ang ma yin zhing byed pa'ang ma yin no//bden te rtag pa nyid kyi phyir yin gyi/ med pa nyid kyi phyir ni ma yin no zhe na/ ci ste bdag de rtag na yang / /zhes bya ba smos te/ yang gi sgras ni gtso bo yang ngo / /nam mkha' ni nam mkha'o/ /rkyen gzhan dang ldan pa na de byed pa dang bcas par 'gyur ro zhe na/rkyen rnams gzhan dang phrad na yang / /zhes bya ba smos te/ de ltar na gang zhig 'gyur ba med la ci byar yod/ /ngo bo sngon bzhin du 'pho ba med par/ byed pa'i tshe yang sngon bzhin na/ /des byed po ci zhig byas/ 'on kyang de'i byed pa ni rkyen gzhan gyis byas pa yin no zhe na/ de'i byed pa zhes bya ba la sogs pa smos te/ de'i byed pa 'di yin zhes/ /'brel pa'i rgyu ni gang zhig yod/ /de'i bdag nyid de las byung ba ma yin te/ de'i byed pa de'i bdag nyid dam/ 'bras bu ma yin no/ / dngos por gyur pa'i 'brel pa gang yang yod pa ma yin te/ rje bo bran la sogs pa'i bya zhes bya ba la sogs pa smos te/ rtog pa tsam nyid yin pa de'i phyir de'i 'brel pa zhes bya ba yang yod pa ma yin no/ /de ltar de bshad pa'i tshul gyis thams cad gzhan gyi dbang zhes bya ba ni rgyu las skyes pa'o//de yi dbang gis de dbang med/ /ces bya ba ste rgyu de yang gzhan gyi dbang skad cig ma yin pa na cha dang bcas pa bzhin du/ rim dang rim pa ma yin pa byed pa nyid kyi phyir ro/ /skad cig ma yin pas bya ba las sngar cig car bdag nyid thams cad zhig pas med pa nyid kyi phyir ro//de'i phyir sprul pa lta bu'i byed pa med pa'i/ /dngos po kun la khro mi 'gyur/ /gang gi sgo nas kyang ngo / /'di ni don dam pa'i tshul la brten pa'i chos la spyod pa'i bzod pa yin te/ mos pas spyod pa'i sa la ni sgra'i rjes su 'gro ba dang / sa bdun pa la ni rjes su mthun pa dang /sa brgyad pa la sogs pa la ni mi skye ba'i chos la bzod pa'o/ /gal te 'o na sprul pa bzhin dngos po thams cad byed pa med pa yin pa de lta na/ gang gi phyir/ gang gis gang zhig bzlog bya ste/ /khro ba la bzlog pa'ang rigs pa min zhe na/ de la brten pa'i dngos po ni de la brten pa nyid de/sgyu ma dang 'dra ba ni kun rdzob kyi bden pa'i tshul de la brten nas/ da 'di ltar sdug bsngal rnams rgyun chad 'gyur 'dod mi rigs te/ de lta ma yin na/ sdug bsngal yod pa gang gis rgyun chad par 'gyur te/ khro ba las kyang sdug bsngal myong bar 'gyur ro//de bas dgra 'am zhes bya ba la sogs pa tshigs su bcad pa ni rtogs par sla'o/ /de ni 'dod pa yin te/ 'di ltar tsher ma la sogs pas bdag nyid bdag nyid kyis gnod pa byed pa ma yin nam zhe na/ bag med pa zhes bya ba la sogs pa smos te/'di ni nyon mongs pa'i dbang du gyur pa nyid kyi tshul lam/ rang bzhin gyi tshul yin no/ /bag med pa las ni gti mug la sogs pa dang / khro ba las ni zhe sdang la sogs pa yin no/ /bud med la sogs thob bya'i phyir/ / rngam zhing zas gcod la sogs byed/ /yul la chags pas 'gag cing g.yang sa dag tu 'ang mchong / /yang gi sgras ni sngar bstan pa dang / gzhan dug la sogs pa dag gis gnod par byed cing 'joms par byed pa sdud pa'o/ /bsod nams ma yin pa ste/ gzhan la 'tshe ba bdag la sdug bsngal 'dod nas spyod pa yis/ /gang tshe de ltar bag med pa la sogs pa nyon mongs dbang gyur pas gzhan gyi dbang du gyur pa nyid kyi phyir/ bdag sdug nyid kyang gsod byed pa/ de tshe de dag gzhan lus la/ /gzhan dag gis gzugs phung dag la gnod pa byed pa/gnod mi byed par ji ltar 'gyur/ /'o na ni de dag la khro bar rigs so zhe na/ nyon mongs skyes pas zhes bya ba la sogs pa smos te/ rang bzhin gyi tshul bstan pa'i phyir/ gzhan la 'tshe bar byed pa 'di ni nyes pa yin te/ glo bur ba ni rang gi tshogs pa'i tshogs las byung nas gnyen po'i tshogs skyes par gyur na rgyun chad pa'i phyir ro//sems can rang bzhin te/ ngo bo nyid kyis nges pa na'ang / 'o na'ang de dag la khro bar mi rigs te/ mkha' la dud 'thul dkon pa bzhin/ /nam mkha' 'am gos la'o//nam mkha' rang bzhin gyis dag pa yin la de'i skyon du ba la sogs pa glo bur ba yin pa'i nam mkha' la khro bar bya ba ma yin pa de bzhin du sems can la khro bar bya bar rigs pa ma yin gyi nyes pa byed pa yin no zhes bstan pa'i phyir/ dbyug pa zhes bya ba la sogs pa smos te/'phen par byed pa nyid kyi tshul yin na sdug bsngal skye ba'i rgyu'i gtso bo dbyug pa la sogs pa bkag cing bor nas de gal te 'phen pa la khro na zhes bya ba'i tshul gyis de'i tshe dbyug pa la sogs pa 'phen par byed pa de yang zhe sdang gis sbad pas/ de ltar na nyis na zhe sdang la khro bar rigs so//de ltar nyon mongs pa'i dbang du gyur pa nyid kyi tshul gyis de'i nang du 'dus pa rang bzhin dang 'phen par byed pa dag la khro ba la sogs pa rigs pa ma yin gyi/ rang gi las las skyes pa'i tshul gyis kyang sdug bsngal bzod par rigs pa yin no zhes bstan pa'i phyir/bdag gis sngon chad sems can la/ /zhes bya ba la sogs pa smos te/ ci ste ma mthong mi 'dod 'on kyang de zhes bya ba ni rgyu nyid kyi tshul yin no/ /ma mthong ba mi 'dod pa ma yin nam zhe na/ de'i mtshon dang zhes bya ba la sogs pa smos te/rang la gnod pa'i tshul yin no/ /shu 'di zhes bya ba la sogs pa smos pa la/ 'di zhes bya ba'i skabs kyi lus yin no/ /reg par mi bzod pa ni reg tu mi bzod pa'o/ /skye ba snga ma las skyes pa'i sred mdongs te/ rigs pa dang rigs pa ma yin pa mi shes pa ste/lus kyi rgyu de tshe 'di nyid kyi ma yin gyi/ rgyu de 'dra ba de nyid ni 'ga' zhig gis skye ba snga ma'i sred pa ni 'di'i rgyu yin no/ /de'i sngon du song ba can las yin pa de ltar na/ sred mdongs zhes bstan to/ /ji ltar na bdag sred pa'i mun pa yin zhe na/ 'di ltar rmongs pa/ byis pa sdug bsngal mi bzod cing / /sdug bsngal rgyu la ste/ khro ba dang bcas pa'i lus la brkam pas na/ de'i phyir rang gi nyes pas gnod gyur pa/ /gzhan la dkon du ci zhig yod/ /ci'i phyir rang la khro bar mi byed/ dper na dmyal ba'i srung ma dang / /zhes bya ba la sogs pa la/ral gri lo ma zhes bya ba ni las kyis 'phangs pa'i rlung gis bdas pas ltung bar gyur pa'i ral gri'i lo ma rnon po can gyi shing gi nags su dmyal ba rnams skye ba ni ral gri'i lo ma'i nags tshal ltar ro/ /de bzhin du dmyal ba rnams su 'byung ba'i bud med shal ma li'i nags la sogs par dmyal ba'i bya rdo rje'i mchu can e ma'o//rang gi las kyis 'di bskyed pa/ /ral gri'i lo ma'i nags tshal la sogs pa ni bdag gi sdug bsngal gyi rgyu nyid yin pa'i phyir ro/ /de ltar na sdug bsngal 'di rang gi nyes pa las byung ba yin na bdag las gzhan pa 'ga' zhig la ni khro bar byed/gal te gnod par byed pa po la ma yin nam zhe na/ bdag gi las kyis zhes bya ba la sogs pa smos te/ bzlog pa'i tshul sdig pa mang po yin no/ /kye ma rung sems so/ /gal te khyod nyid de dag la gnod par byed pa yin na ci de dag dmyal bar 'gro zhing khyod mi 'gro 'am zhe na/bdag gi bsam pa'i yon tan gyis zhes bya ba la sogs pa smos te/ brtse ba'i bsam pa'i tshul yin no/ /'on te lan du gnod byas na zhes bya ba ni lan du gnod par byed pa ni brtse ba med pa zhes bya ba'i tha tshig go//des na dka' thub ces bya ba ni rang nyid kyis bya ba ston pa'o/ /de de ltar rgyu nyid ces bya ba la sogs pa'i tshul yin no/ /phal cher las las skyes pa'i tshul gyis nang du 'dus pa bshad pa yin no/ /de ltar mi 'dod pa nyid kyis kyang khro bar mi rigs pas snyam pa la sogs pas kyang rigs pa ma yin no zhe na/yid ni zhes bya ba la sogs pa smos te/ lus kyang bems po nyid yin pa'i phyir gnod par bya ba ma yin no zhe na/ bden te lus la mngon par zhen pas na yid ni 'di ltar lus yin no/ /lus la gnod pa'i phyir yid la gnod par 'gyur ba yin gyi/gzhan dga' bar ni gzhom par mi nus so zhes bstan to/ /sems dang bcas pa'i sdug bsngal gyis gnod nus par 'gyur gyi/ brnyas pa la sogs pa'i yon tan gyis lus la gnod par mi 'gyur na/ yid la smos kyang ci dgos/de'i phyir kye ma yon tan des/ /sems khyod ci'i phyir rab tu khro/ /gal te des na kho bo la 'ga' zhig ma dad pa'i phyir ro zhe na/ gzhan dag bdag la mi dga' ba zhes bya ba la sogs pa smos so/ /rnyed pa'i zhes bya ba la sogs pa 'tsho ba'i bar gyi tshul lo//'dor gyis zhes bya ba ni log pa'i 'tsho ba can rnyed pas 'tsho ba'i don du khro ba 'jug par 'gyur gyi'o/ /'chi ba'i dus dang / yun ring du 'tsho ba dang / yun thung ngur 'tsho ba dag las khyad par yod pa ma yin no zhes bstan pa'i phyir/ rmi lam lo brgyar bde myong nas//sad par gyur pa gang yin dang / /gzhan zhig yud tsam bde myong nas/ /sad par gyur pa gang yin pa/ /sad pa de dag gnyi ga la'ang / /rmi lam nyams su myong ba yi/ /bde ba de ni phyir 'ong med cing 'byung ba med do/ /tshe ring tshe thung gnyi ga yang / /'chi ba'i dus na de 'drar zad//ces bya ba smos te/ dper na rmi lam nyams su myong ba bzhin/ /dngos po gang dang gang dpyad pa/ /de de dran pa'i spyod yul 'gyur/ /'das pa thams cad mthong mi 'gyur/ /zhes bya ba lta bu'o/ /de'i phyir rnyed pa mang po thob gyur te/ yun ring dus su bde spyad kyang / /chom pos phrogs pa ji bzhin du/ /sgren mo lag pa stong par 'gro bar 'gyur te/ de ltar 'jig rten pha rol du 'gro bar 'gyur ro/ /gal te brnyas pa la sogs pa med pa'i phyir 'chi ba na sdig pas ngan song 'gro bar byed pas 'tsho bas sdig pa zad pa dang bsod nams bya ba yin no zhe na//rnyed pa'i don du khros gyur na/ /bsod nams zad sdig mi 'gyur ram/ /de bas na gang gi don du bdag gson pa/ /bsod nams de nyid gal te med gyur na/ /sdig pa 'ba' zhig byed pa yi/ /gson pas de ko ci zhig bya'o/ / brnyas pa la sogs pa byed pa rnyed pa'i bar chad byed pa yin na yang khro bar rigs pa ma yin pa de ltar na rigs pa'i tshul ni/ gal te brtan pa nyams byed pa/ /zhes bya ba la sogs pa smos pa la/ mi snyan par zhes bya ba ni brnyas pa la sogs pas dngos por smra ba dang byed pa'i tshul gang la yod pa de ni mi snyan smra bar khro zhe na/sems khyod ci'i phyir mi snyan par smra ba de 'joms par byed/ gal te rnyed pa dang bde ba las nyams pa yin no zhe na/ sngan chad grags min smra ba la yang mi snyan par smra ba la/ yid khyod ci'i phyir khro mi skye/ /gang ni snyan par smra ba yin pa de la khyod khro bar bya ba yin te/dper na bdag la mi snyan par smra ba lta bu'o/ /gzhan grags pa ma yin pa byed pa yang mi snyan par smra ba yin no/ /'on te log par mi snyan par smra ba de ltar na ma dad pa gzhan la rag las pas gzhan grags pa ma yin pa byed pa/ dad pa med la khyod brtse dang //grags pa la sogs pa la'o/ /gal te de lta yin na/ nyon mongs skye la rag las pa'i/ /mi snyan smra la cis mi brtse/ /phyogs 'di yang rigs so zhes bstan par 'gyur ro/ /gang ma dad pa gzhan la rag las pa gang yin pa de la bzod pa ni dper na dad pa med pa la sogs pa lta bu'o//ma dad pa gzhan la rag las pa yang mi snyan par smra ba yin no/ /de ltar na gnod par byed pa bzod pa bstan nas/ yid du 'ong ba la gnod pa byed pa la bzod pa bshad pa'i phyir/ sku gzugs zhes bya ba la sogs pa smos so/ / gnyen ni nye du'o/ /snga ma'i tshul gyis sngar bshad pa'i tshul gyis rkyen de dag las nyon mongs pa'i phyogs gnod pa byed pa/ 'byung ba mthong bas khro ba bzlog /gnod pa byed pa dag la khro bar mi bya'o zhes bya ba'i tha tshig go/ /de ltar gnod pa yang rkyen las byung ba yin no zhes bstan pa'i phyir/lus can rnams la sems yod dang / /zhes bya ba la sogs pa smos te/ sems par byed pas na sems yod pa'o/ /de dang sems med gnyi ga gnod byed na/ /brten nas 'byung ba yin te/ lus can rnams kyi sgra dang / sen mo la sogs pa dang /sems yod pa dang / sems med pa gnyi gas gnod par byed pa ni 'dod pa'i khams kyi las las skyes pa nyid kyi phyir/ nges par gdon mi za bar 'byung bar 'gyur ro/ /de yang sems yod pa ste/ lus dang sems la nyams su myong bar mthong ba/de bas gnod pa bzod par gyis/ /de ltar ni 'gyur mod kyi/ sems med pas byas pa gzo bar bya ba yin te/ de dag la blo sngon du 'gro ba med pa nyid kyi phyir gnod pa nyid med pa'i phyir ro/ /sems yod pa ni skyon med pa yin na yang de'i blo sngon du byed pas gnod pa byed pas de ltar na de dag la khro bar bya ba yin no zhe na/la la rmongs pas nyes pa byed ces bya ba la sogs pa smos te/ gzhan dag gis gzhan dag la gnod par byas pa la rmongs pa'i skyon gyis khro ba la sogs pa 'byung ba yin pa de ltar na gcig dang gzhan pa de dag gi nang nas/de la skyon med gang yin smos/ /gnod pa byed pa gang zhig yin smra bar bya'o/ /bdag gis sngon chad sems can la/ /'di 'dra ba'i gnod pa byas zhes bshad pa gang yin pa lta bu'o/ /de la gnas skabs 'ga' zhig rnyed pa ni/ gang gis gzhan dag gnod byed pa//zhes bya ba la sogs pa smos so/ /'dir thams cad ces bya ba la sogs pa smos te/ tshogs pa la nges pa'i las ni rnam pa gnyis te/ bya ba dang / 'bras bu yin pa de ltar na/ thams cad las la rag las na/ ngas 'di ci zhig gzhan du byed//tshogs pa la nges pa ni rnam pa gzhan du bya bar mi rung ba'i phyir 'jig rten sna tshogs pa las las skyes pa yin no/ /de ltar mthong nas ci nas kyang zhes bya ba la sogs pa ni khong du chud par sla'o/ /ci ltar 'bad rtsol bya zhe na/ /dper na khyim tshig gyur pa'i me zhes bya ba la sogs pa smos te/'bad rtsol byed pa'i tshul yin no/ /dngos po gang la sems chags nas/ /khang pa bzhin du tshig pa na/ /rtswa la sogs pa bzhin du de ni de'i mod la dor/ /gang gis she na/ de'i yul lam mngon par 'dod pa yul gyis/zhe sdang me ni mched gyur pa/ /bsod nams kyi bdag nyid can gyi sems kyi khang pa tshig par dogs pa yis so/ /dor ba na sdug bsngal 'byung ba ni dge ba nyid yin no zhes bstan pa'i phyir/ bsad pa'i mi zhig lag bcad dam/ /zhes bya ba la sogs pa smos te/de ni bzod par bya ba yin no/ /de lta ma yin na/ gal te da lta'i sdug bsngal 'di tsam la'ang zhes bya ba la sogs pa ni lci ba dang yang ba la ma rmongs pa'i tshul yin no/ /des na zhes bya ba ni de dag nye bar bkod pa yin no/ /dmyal ba'i gnod pa drag po de'i rgyu khro ba dang /'khrugs pa yin te/ de'i don 'bras bu med par 'gyur ro/ /dmyal ba'i sdug bsngal ci tsam pa 'dod pa'i dngos po dor ba las skyes pa'i sdug bsngal 'di ni de tsam gnod min la/ 'di ni byang chub kyis gzung ba nyid gang yin pa de'i phyir/ don chen dag kyang byed 'gyur bas//de phyir 'gro ba'i gnod sel sdug bsngal la/ /dga' ba 'ba' zhig 'dir ni bya rigs so/ /de ltar yid du 'ong ba 'am bdag la sdug bsngal dang brnyas pa la sogs pa'i bzod pa bstan nas/ 'gro ba'i bde ba la sogs pa mthong ba dang ma mthong ba la sogs pa'i bzod pa ni/gzhan gyis yon tan ldan bstod nas/ /zhes bya ba la sogs pa smos te/ yon tan gyis bskyed cing stobs dang ldan par dgra bo bstod pa dang / phrag dog gis ci'i phyir de dag dga' mi byed/ khyod kyi dga' ba'i bde ba 'di//bde 'byung kha na ma tho med/ /nyam nga ba na rang dang gzhan la 'di las bde ba 'byung bas na bde ba 'byung ngo / /dgra'i thar pa'i rgyu nyid yin pa'i phyir kha na ma tho ba med pa'o/ /byang chub sems kyis yang dag par zin pa nyid kyi phyir sangs rgyas la sogs pa yon tan dang ldan pa rnams kyis gnang ngo //bde ba las thar pa'i don ma yin pa gang yin pa de ni sangs rgyas kyis ma gnang ba yin la/ 'di ni ma yin pa de'i phyir/ gzhan sdud pa yi mchog kyang yin/ /dgra bo de nyid la bde ba dang dga' ba skyes pa 'di yang de'i tshe de'i yon tan bsags pa nyid yin pa'i phyir de ltar bde 'gyur zhes/gal te khyod bde mi 'dod pa'o/ /'on te de ltar bran la gla byin pa la sogs par mi 'gyur zhing des bsags pa'i nor dang / khrus dang / dril phyis dang / yan lag gi bsku mnye la sogs pa'i bde ba nyid kyi yin la/de'i phyir spongs pa dang gla rngan la sogs kyis 'di rang gzhan gyi bde ba 'bras bu mthong dang ma mthong ba nyams shing zhig par 'gyur te/ gla rngan med par gla pa las byed pa la gla'i don du de med pa yin pa las sdig par 'gyur ba'i phyir ro//gzhan yang / rang gi yon tan brjod pa'i tshe/ /bdag gi yon tan brjod pa na/ /gzhan gyi bde ba ni gzhan la bde ba ste/ de yang 'dod par byed/ gzhan gyi yon tan brjod pa'i tshe/ /rang la'ang bde ba mi 'dod de/ /de ni legs pa ma yin no zhes bstan par 'gyur ro//de nyid kyi phyir/ sems can thams cad bder 'dod pas/ /zhes bya ba la sogs pa smos so/ /bstod pa'i yul gyis phrag dog la bzod pa bshad nas/ rnyed pa dang bkur sti'i yul gyis phrag dog bstan pa'i phyir/ 'jig rten gsum zhes bya ba la sogs pa smos te/sems can de dag gi bsnyen bkur ngan ngon tsam ste/ nyung zad tsam mthong nas/ ci'i phyir de la gdung bar byed/ gal te 'ga' zhig khyod la gnod pa byed pa de la yang khyod kyis de gso bar bya ba yin te/ 'gro ba thams cad ni skal ba chung ba bzhin du sdug pa nyid yin pa'i phyir ro//gso bya gang zhig khyod gso ba/ /khyod nyid kyis ni sbyin bya ste/ /de ci gnyen gyis 'tsho ba rnyed 'gyur na/ /dgar mi 'gyur bar slar khro 'am/ /de de ltar ni 'gyur mod kyi/ thams cad byang chub ni 'dod pa yin gyi dgra la bde ba ma yin no zhe na/de ci zhes bya ba la sogs pa smos pa la/ 'gro la zhes bya ba ni dgra bo dag la yang ngo / /des zhes bya ba ni dgra bos so/ /deng zhes bya ba ni de sbyin par bya ba'i dngos po'o/ /dngos po de dang bsod nams la sogs pa dag gis rnyed par 'gyur ro/ /de dag mi khro ba'i don du bzlog par mi nus so zhes bstan pa'i phyir/bsod nams dang ni zhes bya ba la sogs pa smos te/ bsod nams ni skye ba snga ma la byas pa'i dge ba'o/ /dad pa ni sbyin pa sbyin par byed pa'o/ /yon tan ni tshe 'di'i bzo la sogs pa lung du ma bstan pa la sogs pa'i rang gi yon tan ci phyir 'dor//rnyed pa 'gyur ba mi 'dzin la/ /gang gis khro bar mi byed smros/ /nga'i rnyed pa las khro bar mi bya'o zhes bstan pa'i phyir/ khyod ni rang gi sdig byas pa/ /zhes bya ba la sogs pa smos te/ bsod nams la phyogs pa dge ba yin no zhes bya bar dgongs so/ / gzhan yang bdag yid smon pa tsam gyis dgra bo mi dga' ba skye ba na bdag dga' bar 'gyur ro zhe na/ gal te dgra zhig mi dga' na'ang / /zhes bya ba la sogs pa smos te/ gal te rnam pa 'ga' zhig gis dgra bo mi dga' bar gyur pa na de la khyod dga' ste/ khyod dga' ba'i rgyu mtshan khyod kyi yid smon tsam yin par 'gyur ba de ltar na yang de la khyod dgar ci zhig yod ces bya ba la sogs pa smos te/khyod kyi yid smon tsam gyis ni/ /de la gnod pa'i rgyur mi 'gyur ro/ /de ltar rgyu la rag lus pa'i tshul bshad nas/ don med pa nyid kyi tshul khyod kyi 'dod pas sdug bsngal de zhes bya ba la sogs pa smos te/gang gi tshe khyod kyi 'dod pa yang dgra bo'i sdug bsngal gyi rgyu yin pa de'i tshe/ khyod kyi 'dod pas sdug bsngal de/ /grub na'ang khyod dgar ci zhig yod/ /gal te 'tshengs par 'gyur zhe na/ de ltar bde ba'am gzhan yang rung //de las phung ba'ang gzhan ci yod/ /de'i sdug bsngal yod na bde ba'am don gzhan du 'gyur na nges par don chen po byed par 'gyur ro zhes bya ba'i tha tshig go/ /de ci'i phyir zhe na/ nyon mongs zhes bya ba la sogs pa smos te/ gang gi phyir sdug bsngal de yod na/nyon mongs nya pas btab pa yi/ /zhes bya ba ni mchil pa dang 'tshe bas nye ba ste/ rigs ngan la sogs pa'o/ /sems kun nas nyon mongs par byed pas na/ kun nas nyon mongs pa ste/ 'dod chags dang zhe sdang dang gti mug la sogs pa mchil pa bzhin du btab pas na nyon mongs nya pas btab pa'o//bde ba'i mchil pa ste/ gnod pa'i don gyi zang zing de dang 'dra bar ro/ /mi bzad pa ni drag pa ste/ 'di ltar dmyal ba'i srung mas khyod/ /dmyal ba bzhin du nyon mongs pa'i mchil pa dang /bde 'gro'i chu bo las phyung nas/ srid pa bar do'i skam sar khrid do/ /sems dmyal bum pa yang ste/ til mar gyis bkang ba'i zangs chen shin tu khol ba de dag gi nang du'o/ /dmyal ba'i srung mas bdag 'tshed des/ /nges par sreg par 'gyur ro/ / bstod pa la sogs pa yang 'bras bu med pa nyid do zhes bstan pa'i phyir/ bstod dang zhes bya ba la sogs pa smos te/ gzhan gyi don shes pa ni rang gi don yin la/ de ni blo dang ldan pa mkhas pa gzhan gyi don nyid rang gi don nyid yin no/ /de dag gis rang gi don shes pa blo dang ldan pa ma yin pa'i yid bde bar 'gyur ro zhe na/yid bde 'ba' zhig 'dod na ni zhes bya ba la sogs pa smos te/ bstod pa la sogs pa bdag gis bya ba tsam yang bstod pa ma yin no zhes bya ba'i tha tshig go/ /de bzhin du grags pa'i don du zhes bya ba la sogs pa la/ tshig 'bru ni grags pa'i tha tshig go//bstod pa la sogs pa bcom pa na byis pa'i spyod pa'i tshul gyis mi bzod pa ni/ dper na bye ma'i khang bu rdib pa na zhes bya ba la sogs pa'o/ /'di ltar re zhig sgra la zhes bya ba la sogs pa la/ re zhig gi sgra ni lus dang sems la ltos pa yin no/ /lus ni rdos pa can yin na yang bems po yin pas na bstod pa ma yin no//yid ni lus can ma yin pa nyid kyi phyir dang byed pa po nyid du mi rung ba'i phyir ro/ /'o na gang las bdag la bstod do zhes bya ba'i dga' ba rang la skye bar 'gyur zhe na/ bdag la gzhan dga' zhes grags pa/ / zhes bya ba smos te/ dga' ba'i rgyu yin no zhes bya ba de ni btags pa tsam yin no/ /gzhan gyi dga' ba med pa yang dgra yod pa yin no zhes bstan pa'i phyir/ gzhan nam yang na bdag la'ang rung / /zhes bya ba smos te/ ci zhig ces bya ba mngon par 'dod pa ma yin no/ /bdag la gzhan gyi dga' ba yod na yang de bdag la phan pa'i ma yin no//gang gi phyir gzhan de dgra bo'am/ bdag la gzhan gyi bstod pa dang 'brel pa gzhan gyi dga' bas bdag la 'bras bu ci zhig tu 'gyur zhes bstan pa'i phyir/ dga' bde zhes bya ba la sogs pa smos te/ de nyid kyi ste bstod pa byed pa nyid kyi'o//bdag gis de las shas mi 'thob/ /bde ba ni rang gi yin pa'i phyir dang / gzugs can ma yin pa nyid kyis bgo bar bya ba ma yin pa'i phyir ro/ /gzhan bstod pa byed pa'i dga' ba de la brten nas bdag kyang dga' bar 'gyur ro zhe na/ bdag bde ba yis zhes bya ba la sogs pa ste/kun la'ang ste gzhan dag la'ang bde ba de yod par 'gyur na/ de bde ba yis bdag la bde bar 'gyur/ ci phyir gzhan la dga' ba yis/ /khro ba'i dgra la dga' ba bas/ /gzhan dag bde bar 'gyur ba la/ /de bde 'gyur bar bdag mi bder//de bas bdag ni bstod do zhes bya ba 'di lta bu ni log pa'i rtog pa tsam nyid yin pa'i phyir nga'o snyam pa'i nga rgyal gyis gzung ba'i sems kyi rgyud skye bar 'gyur ro/ /de yang de ltar gzhan gyi dga' ba dang bdag 'brel med phyir/ byis pa'i spyod pa kho nar zad do/ / phan 'dogs par byed pa'i tshul gyis dgra bo dag la sdang bar rigs pa ma yin no zhes bstan pa'i phyir/ bstod sogs zhes bya ba la sogs pa smos te/ g.yengs pa'i rgyu nyid yin pa'i phyir g.yengs par byed pa'o/ /des ni skyo ba'ang 'jig par byed/ /bdag yon tan ldan la phrag dog dang ste/sbyin par mi 'dod pa nyid du byed pa'o/ /bdag la byin pa de dag la byin zhing gzhan gyis kyang de dag bstod pa sbyin pa la sogs pa ni phun sum tshogs pa'o/ /de dag la bdag khro bar ni phun sum tshogs pa yang 'gro ba ste/ bstod pa la sogs pa des de yang khro bar byed par 'gyur ro//gang gi phyir de lta yin pa de'i phyir bstod pa dag la sogs/ gzhom phyir zhes bya ba la sogs pa'i tshigs su bcad pa ni rtogs par sla'o/ /sdug bsngal 'jug 'dod la zhes bya ba la sogs pa la/ sdug bsngal nyid ces nges par gzung bar bya ba'i phyir/mnar med par skye ba len pa la sogs pa'i sgo nas zhugs par 'dod pa la/ gang dag sgo 'phar nyid gyur pa ste/ bstod pa la sogs pa gzhom pa'i phyir nye bar gnas pa'o/ /bsod nams kyi gegs byed na yang gegs ma yin no zhes bstan pa'i phyir/'di ni bsod nams zhes bya ba la sogs pa smos la/ bzod mtshungs dka' thub yod min te/ /bsod nams yod pa ma yin no/ /de dang der dam pa rnams kyis gsungs pa gang yin pa/ de la bdag ni mi gnas sam//gal te bdag ni zhes bya ba la sogs pa la/ bsod nams rgyu ni zhes bya ba ni sbyin pa la sogs pa'i bsod nams kyi gegs byed pa yin yang bzod pa'i rgyu yin no/ /gzhan la phan pa byed pa'i rgyu ni dgra nyid do zhes bstan pa'i phyir/ gang zhig gang med mi 'byung la//zhes bya ba la sogs pa la/ de nyid de yi rgyu yin pa/ /zhes bya ba ni ci ltar mes bsregs pa nyid kyis yin pa de ltar bzod pa'i dgra yin na ji ltar de la ste/ rgyu la gegs zhes bya/ ji ltar ma yin zhe na/ dus su zhes bya ba la sogs pa smos so/ /'di yang 'dod par bya ba yin no zhes bstan pa'i phyir/'jig rten na ni zhes bya ba la sogs pa smos te/ khong du chud par sla'o/ /mchod par bya ba nyid kyi tshul ni/ 'di dang bdag gi zhes bya ba la sogs pa smos so/ /de ci'i phyir zhe na/ byang chub kyi spyod pa'i grogs su gyur pa nyid yin pa'i phyir/ dgra bo 'di dang bdag gis bsgrubs pas na/ de'i phyir dgra bo de la bzod pa de'i'o/ /de'i 'bras bu ni dam pa'i chos kyi bdud rtsi'o/ /spyod pa'i gnas skabs su sems can thams cad la mos pa tsam du byin du zin kyang 'bras bu'i gnas skabs su yang ches shin tu gsal bar byas la dang po de nyid la sbyin par bya'o//de sngon du song ba can ni dgra bo'i rgyu can yin no/ /grub pa'i rgyur rung ba dang zhes bya ba'i tshig gnyis gsungs pa ni/ bzod pa 'grub pa'i rgyu yin no zhes bya ba'i tha tshig go/ /gzhan du sman pa bzhin du phan brtson na/ /zhes bya ba ni gal te gnod pa'i bsam pa med par 'gyur ba de'i tshe sman pa bzhin te/sman pa bzhin du phan pa la brtson pa yin na gnod pa byed pa ma yin pa la bdag gis bzod pa'ang ci ltar 'grub/ de bas na dgra bo de'i rab tu sdang sems la/ brten nas bzod pa skye bas de phyir de ni bzod pa'i rgyu yin pas na bzod pa bsgrub pa'i bsam pa med na yang bdag gi dam pa'i chos bzhin mchod par 'os pa dam pa'i chos zhes bya ba ni/'dir dgra'i bdag nyid can gyi lus sems med pa yin na yang brnyas pa la sogs pa na bzod pa'i rgyu yin pa de'i phyir/ ji ltar bzod pa 'grub pa'i rgyu yin pas dam pa'i chos yang dag par mchod pa bzhin du dgra bo yang bzod pa 'grub pa'i rgyu yin no//sems can thams cad kyang rgyal ba bzhin du mchod par bya ba yin no zhes bstan pa'i phyir/ de'i phyir zhes bya ba la sogs pa smos te/ sems can ni rgyal ba'i zhing ste/skye ba'i gnas yin no/ /sems can zhing ni de sngon du song ba can gyi rgyal ba rnams te/ sems can rnams kyi 'bru'i sa gzhi thub pas gsungs so/ /ci'i phyir zhe na/ 'di dag ces bya ba la sogs pa smos te/ gzhan yang sems can rnams te/sems can gyi zhing gi dbang du byas pa dang / rgyal ba las te/ rgyal ba'i dbang du byas pa las so/ /sangs rgyas chos te/ stobs dang mi 'jigs pa la sogs pa'i 'bras bu 'grub cing 'ongs pa/ sangs rgyas chos 'grub 'dra ba la/ /rgyal la gus bya de bzhin du/sems can la min ci yi tshul/ /ji ltar na rigs so/ /de ltar ni 'gyur mod kyi sems can bsam pa zhan pa'i phyir gus par bya ba ma yin no zhe na/ bsam pa'i zhes bya ba la sogs pa smos pa la/ de zhes bya ba ni sangs rgyas kyi chos thob pa'o/ /'bras bu rgyal ba dang mtshungs pa dang /sems can rnams la'ang yon tan yod/ /rgyu de'i phyir sems can rnams dang mnyam pa yin no/ /gzhan yang byams sems ldan la zhes bya ba la sogs pa la/ sems can dag med par byams pa med cing / sangs rgyas med par yang bsod nams yod pa ma yin no//gang gi phyir de lta yin pa de'i phyir sangs rgyas kyi chos 'di las 'byung zhing 'grub pas na/ sangs rgyas chos 'grub cha yod pa ste/ rgyu dang rkyen gyi tshogs de'i cha na sems can yod pa sangs rgyas kyi chos 'grub pa'i cha des ni de dag mnyam par 'dod kyi/sangs rgyas dang 'ga' mi mnyam/ ji lta bur gyur pa dag dang zhe na/ yon tan rgya mtsho mtha' yas pa ste/ yon tan rgya mtsho gang la grangs dang mthu dag gi cha mtha' yas pa mnga' ba'i yon tan rgya mtsho ste/ stobs la sogs pa'i yon tan gyi tshogs dag gis nye bar mtshon pa rnams de lta bur gyur pa'i'o//yon tan mchog tshogs gcig pu ste/ gang dag la tshogs gnyis tshad med pa mnga' ba de dag ni/ yon tan mchog tshogs gcig pu'o/ /yon tan shas chung ba dang 'dra ba ni yon tan shas tsam ste/ de yang sems can 'ga' zhig la/ / snang ba'ang de la mchod don du/ /khams gsum phul yang chungs par 'gyur/ /'o na ji ltar na sems can la mchod pa byas pa yin zhe na/ sangs rgyas chos mchog skye ba'i shas/ /zhes bya ba la sogs pa smos so/ /gzhan yang zhes bya ba ni lan du phan pa byed pa'i tshul yin no//g.yo med gnyen 'gyur zhing / g.yo med pa'i gnyen rnams sems can dag la phan pa dpag tu med pa mdzad pa gang la mnga' ba de dag ni/ phan pa dpag med mdzad rnams la ste/ sangs rgyas rnams la/ sems can mgu bar bya ba ma gtogs pa/ gzhan gang zhig gis lan lon 'gyur/ /zhes bya ba lan ldon pa ni lan du phan 'dogs par byed pa ste/ sems can mgu bar bya ba nyid las gzhan cung zad kyang yod pa ma yin no/ /de dag sems can nyid de shin tu sdug pa nyid yin pa'i phyir/ gang phyir sku gtong zhes bya ba la sogs pa smos te/gang gi phyir ni sems can gyi don gyi phyir ro/ /sems can 'di dag gnod chen byed pa na/ /thams cad bzang dgu zhig tu spyad pa na/ /re zhig bdag gi rjer gyur nyid kyang ni/ /sangs rgyas dang byang chub sems dpa' nyid kyang ni/ gang phyir ni gang dag gi don du'o//sems can de dag la dgyes shing ste/ dgyes pa mnyes par gyur pa'o/ /ji ltar lus la kun nas me 'bar ba/ /lus kun nas tshig par gyur pa 'dod pa kun gyis yid bder mi 'gyur ba'o/ /de bas zhes bya ba la sogs pa ni khong du chud par sla'o//bran du sde bran nyid du mchi ste/ de dag ni sems can gyi ngo bo nyid yin pa'i phyir de ltar na de dag gis sems can rnams bdag gir mdzad pa nyid kyi phyir ro/ /'di nyid ces bya ba ni dgyes par byed pa nyid do/ /'di la stobs kyi tshul ni dper na rgyal po zhes bya ba la sogs pa smos te/skye bo mang la gnod byed kyang / /skye bo mig rgyang ring po dag dus ring por mthong ba la zhes bya ba'i tha tshig go/ /nus kyang phyir gnod mi byed de/ /rnam par 'gyur ba mi byed do/ /de ci'i phyir zhe na/ 'di ltar zhes bya ba la sogs pa smos te/ de ni rgyal po'i skyes bu'o//ci'i phyir khyad du gsad par mi bya ba yin zhe na/ 'di ltar dmyal ba'i srung ma dang / /thugs rje ldan rnams ni sangs rgyas dang byang chub sems dpa'o/ /khyad du bsad pa de'i dpung ni de'i stobs yin no/ /sems can ni rgyal po gtum po dag pas kyang / /tshar gcod pa dang phan 'dogs pa'i rgyu yin no zhes bstan pa'i phyir/rgyal po lta zhig khros na yang / /zhes bya ba la sogs pa smos so/ /gang yin pa zhes bya ba ni sdug bsngal lo/ /rgyal po lta zhig mgu na yang / /zhes bya ba la sogs pa ni rtogs par sla'o/ /phan yon bstan pa'i phyir/sems can zhes bya ba la sogs pa smos te/ gang las byung ba yin pas na byung ste/ sems can mgu las byung ba yi/ /re zhig bzod pa'i 'bras bu ni/ /ma 'ongs sangs rgyas 'grub lta zhog /ma 'ongs pa'i sangs rgyas nyid kyi 'bras bu'o/ / tshe 'di nyid la dpal che ba la sogs pa'i 'bras bu cis ma mthong ngo / /sangs rgyas nyid las sngar yang mdzes pa zhes bya ba la sogs pa'o/ /byang chub sems dpa'i spyod pa la 'jug pa'i legs par sbyar ba las bzod pa'i pha rol tu phyin pa bstan pa ste le'u drug pa'o// // de ltar bzod pas ci zhig bya zhe na/ de ltar bzod pas brtson 'grus brtsam/ /zhes bya ba la sogs pa smos te/ de skad du bshad pa'i bzod pa'i tshul gang la yod pa de ni/ de ltar bzod pas brtson 'grus brtsams te/ brtson 'grus ni dga' bar byang chub pa'i phyir ro//zhes bcom ldan 'das kyis gsungs pa nyid kyi phyir ro/ /'di ltar brtson la byang chub gnas/ /de ci'i phyir zhe na/ rlung med ces bya ba la sogs pa smos te/ dper na rlung med g.yo ba med pa bzhin/ /rlung ni skyod par byed pa'i las can yin pa'i phyir ro//bsod nams brtson 'grus med mi 'byung / /brtson 'grus ni dge ba'i sa chen po pa nyid yin pa'i phyir ro/ /byang chub ni bsod nams la rag las pa yin pa de ltar na/ 'jig rten la rab tu grags pa'i brtson 'grus ni 'dir mi rung ba yin pa'i phyir brtson 'grus gang yin zhe na/brtson gang dge la spro ba'o/ /de yi mi mthun phyogs bshad bya/ /le lo gang la ngan la zhen pa dang ste/ dman pa la dga' ba ni ngan pa la zhen pa'o/ /sgyid lug pas bdag nyid la smod pa ni/ sgyid lug bdag nyid brnyas pa'o/ /le lo'i rgyu ni mi rtsol ba dang bde nyams len/gnyid la brten pa'i sred pa dang / /'khor ba'i sdug bsngal mi skyo las/ /bdag nyid kho na le lo dang ldan pa yin no/ /de ltar yongs su brjod par bya zhe na/ nyon mongs rgya pas bshor nas ni/ /zhes bya ba la sogs pa smos te/ nyon mongs pa nyid rgya pa ste/ rngon pa bzhin des bshor zhing zin par gyur pa na/ skye ba'i rgyar ni chud gyur na ni/ skye ba'i rgyar ci ste da rung mi shes sam/ 'dod par bya ba ma yin pas skyo ba med dam/ rang dang rigs mthun bsad pa na/ /srog chags dge bsad par gyur pa na/ rim gyis mthong bar ma gyur na//'on kyang gnyid la brten pa gang / /rang dang rigs mthun pa'i rims kyis bsad par gyur pa na/ /gdol pa dang ni ma he bzhin/ /lam ni kun nas bkag nas su/ /'chi bdag gis ni bltas bzhin du/ /ji ltar khyod bder spyod srid ci ste/ nyams su myong bar ro//dga' ba'i rten sred yin na/ de nas brtson 'grus brtsam par bya'o zhe na/ myur ba nyid du 'chi 'gyur bas/ /zhes bya ba la sogs pa smos te/ 'di ni ma byas brtsams pa dang / /'di byed byas par gnas pa dang / /glo bur 'chi bdag 'ongs nas ni/ / kyi hud bcom zhes sems par 'gyur/ /mya ngan ci zhig bya'o/ /mya ngan shugs kyis skrangs pa yi/ /mig dmar gdong la mchi ma 'dzag pa gang yin pa'i nye du de dag khyod 'tsho ba la re thag chad pa mthong nas de ltar byed pa na kho bos ngan song gi sdig pa byas nas de dag skyabs ma yin no zhes rang gi sdig dran pas gdung ba dang /phyis gdung ba'i mes tshig par gyur pa'i sems kyis ci zhig bya'o/ /gshin rje yi ni bzhin bltas nas/ /skrag pas mi gtsang lus gos tshe/ /ci zhig bya'o/ /dmyal ba'i sgra ni thos pa yis/ /srid pa bar do'i gnas skabs su gdungs shing sngar 'chi ltas kyis myos par gyur tshe ci zhig bya/de'i tshe lha'i bzhin du las las skyes pa'i rna bas thos par 'gyur ro/ /tshe 'dir te/ de nyid khyod kyis sdig pa ma byas su zin kyang / 'jigs pa dang ldan 'gyur na/ sdig byas dmyal ba'i mi bzad pa'i//sdug bsngal ldan pa ni smos ci dgos/ khyod brtson med pas gnas pas sam/ /brtson med 'bras bu 'dod pa dang / /gzhon sha can la gnod mang ba/ /de nyid kyi phyir/ 'chi bdag gis zin pa lta bur ni/ /'chi bdag nye bar gyur pa'i lha bzhin du lus rnying par byas pa'i sems can gang yin pa de bzhin du'o//gnyid dang bya ba mi byed pa la sogs pa ni sred pa nye bar mtshon pa nyid yin na/ le lo dang ldan pa smad pa la zhen pa'ang rigs pa ma yin no/ /zhes bstan pa'i phyir/ dga' ba'i rgyu ni zhes bya ba la sogs pa smos te/dga' ba'i rgyu ni mtha' yas pa'i/ /zhes bya ba ni 'di la dga' ba'i rgyu yod pa de ltar na dga' ba'i rgyu mtha' yas pa can no/ /dam chos dga' ba'i mchog spangs nas/ /sdug bsngal rgyu ste/ sdig pas g.yeng ba dang / rgod la sogs la khyod ci'i phyir dga'/sgyid lug pa dang bdag la brnyas pa'i gnyen po'i phyogs ni/ sgyid lug ces bya ba la sogs pa smos te/ sgyid lug pa dang snyoms pa'i stobs kyis tshogs bcom pa ni stobs kyis bkod pa'o/ /bdag nyid dbang du gyur pa dang / bdag dang gzhan du brje bar gyis//de la sgyid lug pa med pa ni/ /bdag gis zhes bya ba la sogs pa smos te/ bdag gis byang chub ga la zhes/ /sgyid lug par ni mi bya ste/ /'dir sgyid lug pas bdag la brnyas pa de lta bu'i tshul du de mi bya'o/ /de ci'i phyir zhe na/ 'di ltar de bzhin gshegs pa ni//bden par gsung bas bden 'di gsungs/ /de'i phyir ci zhig gsungs she na/ sbrang bu zhes bya ba la sogs pa smos so/ /byang chub spyod pa ma btang na/ /zhes bya ba ni/ byang chub kyi sems so/ /gces dang mi gces ma dpyad par/ / rmongs pas bdag ni 'jigs par zad/ /gces pa dang mi gces pa rmongs pa nyid kyis so/ /gces pa dang mi gces pa yang gang zhe na/ bskal pa bye ba grangs med du/ /zhes bya ba la sogs pa smos te/ mi gces pa yin no/ /bdag gis byang chub sgrub pa yi/ / zhes bya ba la sogs pa ni gces pa yin te/ lag pa la sogs pa'i sbyin pa btang ba'i sdug bsngal yang dag pa'i byang chub sgrub pa de dag ni tshod yod pa ste/ chung ba yin no/ /ci dang 'dra bar zhe na/ zug rngu zhes bya ba la sogs pa smos te/ zug rngu khong brlag gnod bsal phyir ni de bsal ba'i rgyu mtshan no//zug rngu brlag pa de gdon pa'i sdug bsngal lo/ /de dang 'dra bar gces pa dang don che ba yin no/ /re zhig gdon pa ni gzhag go/ /sman pa kun kyang zhes bya ba la sogs pa la/ de bas sdug bsngal mang po dag /rang dang gzhan gyi rgyud la skyes pa skye ba brgyud pa rnams su/gzhom phyir mi bde chud bzod bya ste/ lag pa la sogs pa sbyin par btang ba las skyes pa'i sdug bsngal lo/ /gso dpyad phal pa 'di 'dra ba'am/ 'di ltar 'di yang / sman pa'i mchog gis ma mdzad de/ thams cad mkhyen pas so/ /'on kyang cho ga shin tu 'jam po yis//mgu bar byed pas nad chen dpag med gso bar mdzad/ nad brgya rtsa bzhis zin pa las ji ltar dpyod pa 'jam pos gso bar mdzad pa yin no snyam du sems pa la/ tshod ma zhes bya ba la sogs pa smos te/ de la zhes bya ba ni tshod ma la sogs pa sbyin pa la'o//gang zhig rim gyis goms par gyur pa na phyis thugs rje'i bsam pa rnam par gyur pas/ rang gi sha yang gtong bar mdzad par 'gyur ro/ /de ni dka' bar mdzad pa yin no zhe na/ gang tshe zhes bya ba la sogs pa smos so/ /de ltar ni sdig pa zhes bya ba la sogs pa dang /mkhas pa'i phyir na zhes bya ba ni phyin ci log gi rtog pa spangs pa'i phyir ro/ /de ltar yang 'khor ba na bzhugs pas skyo ba'am zhe na/ bsod nams kyis ni zhes bya ba la sogs pa smos so/ /dus ring pos skyo'am zhe na/ 'di ni byang chub sems stobs kyis//zhes bya ba la sogs pa smos so/ /thar pa'i cha dang mthun pa'i dge ba byas pa can gyi nyan thos ni bskal pa bye ba grangs med par gnas pa yin te/ 'phags pa shA ri'i bus rab tu byung ba'i don du ma rtogs pa lta bu'o/ /myur ba srid pa gsum gyis thar par 'gyur ro//'di ni byang chub kyi sems kyi stobs kyis nyan thos dag las kyang byang chub sems dpa' tha na bskal pa grangs med pa bzhi bcur myur bar 'gyur ro/ /de ltar na yang skyo 'am zhe na/ de bas skyo ngal kun sel ba'i/ /zhes bya ba la sogs pa smos so/ /stobs kyi tshogs ni/sems can don ni bsgrub bya'i phyir/ /zhes bya ba la sogs pa smos te/ 'dun pa ni 'dir dge ba 'dod pa'o/ /bstan pa ni stobs su gyur pa'o/ /dga' ba ni chags pa'o/ /grol ba ni spangs pa'o/ /'dun pa la sogs pa ni de dang de'i dpung yin no/ /byang chub kyi sems kyi phan yon ni sngar bshad zin to//brtson 'grus kyi mi mthun pa'i phyogs ni le lo la sogs pa'o/ /ji bzhin du 'dun pa'i stobs dang / dbang du gyur pa'i stobs kyis/ de srid mi mthun phyogs spangs te/ /spangs pa'i khyad par gtso bo yin pa'i phyir logs shig tu bstan to//brtson 'grus 'phel phyir 'bad par bya'o/ /de la 'dun pa'i dbang du mdzad nas/ 'bad la dbang sgyur stobs kyis ni/ /zhes bya ba la sogs pa smos te/ byang chub pa brtsam par bya'o/ /gzhan yang bdag dang gzhan gyi yon tan ni//zhes bya ba la sogs pa la/ mang po bdag gis ni zhes bya ba ni gal te rang dang gzhan gyis bdag nyid chung bas de dag bde bas bsgrub par bya ba yin na/ de ltar yang ma yin no zhes bya ba'i tha tshig go/ /de dag ci 'dra ba zhig ce na/ gang du yon tan gang bdag gi nang nas yon tan re re zhing bskal pa rgya mtshos lobs na'ang rung /bdag nyid du gyur na rung ste mi 'gyur ro/ /de lta na yon tan dang ldan pa ji ltar na log par mi 'gyur zhe na/ yon tan cung zad mi slob na zhes bya ba smos te/ lha gang byed pa la sogs pa log pa 'ba' zhig tu zad do/ / ci 'dra ba zhig ce na/ bstan la bya ba ma byas dang / /dbul ba'i zhes bya ba la sogs pa smos so/ /de yang zhes bya ba ni 'dun pa'i yang ngo / /rnam smin 'bras bu ni nye bar mtshon pa yin te/ rgyu mthun pa'i 'bras bu rtag tu bsgoms pas kyang ngo / /de'i dbang du mdzad nas/sdug bsngal yid mi bde ba dang zhes bya ba la sogs pa smos pa la/ sdug bsngal ni rnam par smin pa'o/ /yid mi bde ba dang / dge ba dang mi dge ba ni rgyu mthun pa'o/ /gang las 'jigs pa de dag ni 'jigs pa'o/ /'dod pa rnams dang bral ba ni bdag po'i 'bras bu'o//de ltar ni yid la bsam pa zhes bya ba la sogs pa la/ 'bras bu'i rim gyis mngon mchod 'gyur/ /zhes bya ba'i tha tshig go/ /sdig pa byed pa zhes bya ba ni khong du chud par sla'o/ /re zhig 'di ni mthong ba'i chos la mi 'dod pa mthong ba'i chos kyi 'bras bu yin no//ma mthong ba ni/ rgya che zhes bya ba la sogs pa la/ pad+ma ni chu skyes so/ /gsung snyan rgyal ba'i gdan byas 'di ni nyer bsags shing / gsal ba gang la mnga' ba de ni/ gsung snyan rgyal ba'i gdan byas 'di ni nye bar bsags pa can gyi'o/ /thub pa ste 'phags pa snang ba mtha' yas kyi phyag gi pad+ma rgyas pa ste/chu skyes kha phye ba las so/ /'byung ba'i lus kyi mchog gang mnga' ba de dag la de skad ces bya'o/ /bde bar gshegs pa ste/ 'phags pa snang ba mtha' yas kyi spyan sngar sngon gyi dge bas 'gyur ro/ /mi dge ba ni gshin rje'i zhes bya ba la sogs pa smos te/gshin rje'i skyes bus pags pa ma lus te/ /lus pa med par bshus pas shin tu nyam thag pa 'di la yod pas zhes tshig rnam par sbyar ro/ /rab tu tsha ba'i me yis te/ /sreg za dag gis bzhus pa'i zangs zhun lus la blugs par gyur pa gang la yod pa de la de skad ces bya'o//'bar ba yang de yin la ral gri dang mdung thung yang yin pas na 'bar ba'i ral gri mdung thung dag go/ /de dag gis bsnun sha yi dum bu brgyar lhags can te/ des bsnun pa'i sha'i dum bu gang la yod pa de la de skad ces bya'o//shin tu 'bar ba'i lcags kyi sa gzhir te/ yang sos la sogs pa'i dmyal bar lhung bar mi dge mang pos 'gyur te rnam pa du mar ro/ /de bas na 'di ltar dge ba dang mi dge ba'i 'bras bu la gus pa nyid du bsgom par bya'o/ /dge ba la 'dun par skyed par bya zhing /go cha'i brtson 'grus bskyed par bya'o/ /brtan pa'i dpung gi dbang du mdzad nas/ rdo rje rgyal mtshan zhes bya ba la sogs pa smos te/ byang chub sems dpa' rdo rje rgyal mtshan cho ga yis/ /rtag tu brtan par bsgom par bya'o/ /brtan par brtsam zhing zhes bya ba'i gzhung ni brtan par brtsam pa ste/lhag par byas nas rdo rje rgyal mtshan gyi cho gas bsgom par bya'o zhes bya ba'i tha tshig go/ /brtsam pa'am zhes bya ba ni/ sbyor ba'i brtson 'grus so/ /brtsams las ldog par mi bya'o/ /zhes bya ba ni mi ldog pa'i brtson 'grus so/ /log pa'i ni skye ba gzhan du de goms nas/de las sdig pa dang / sdig las sdug bsngal 'phel 'gyur te/ /gzhan spyod pa nyid kyi phyir ro/ /gzhan yang rgyu'i dus su ni zhes bya ba ni rgyu spyod pa'i dus su yang dman pa ste/ dor bar bya ba de ni bsgrub mi bya/ /de phyir brtsams pa las ldog par mi bya'o//brtan pa'i dpung gzhan yang / las dang nyon mongs nus pa dang / /zhes bya ba la sogs pa smos te/ nyon mongs pa yang 'dir nye ba'i nyon mongs pa yin no/ /ci'i phyir bdag nyid kyis she na/ bdag nyid gcig pus zhes bya ba la sogs pa smos te/nus pa'i nga rgyal dag las brjod par bya ba ma yin pa nyid kyi phyir ro/ /'di la zhes bya ba ni smad pa'i las so/ /'chi ba'i rnga ni brdung ba dang / /wa bzhin du yid nus pa med pa ni nyam chung ba na'o/ /zhum byas rtsol ba dor ba yis//phongs las bde bar 'gyur ram ci/ /zhes bya ba ni yul du byed par 'gyur ram bde bar byed pa ma yin no/ /'di ltar phongs pa las rgyal ba ni bdag phongs pa las rgyal ba ste/ khams gsum las ni rgyal 'dod pas/ /byang chub sems las dga' bar byed pa/de bas sems ni brtan pa yis/ /phongs pa rnams ni gzhom bya ste/ /rgod cing phongs las thar bar bya/ /bdag gis kun las rgyal byas te/ /zhes bya ba la sogs pa ste/ rtogs par sla'o/ /rgyal ba'i 'bras bu ni sangs rgyas nyid do/ /rdzogs par byed par ni mthar phyin par byed pa'o//nye ba'i nyon mongs pa dang / nga rgyal ba ni nyon mongs tshogs kyis zhes bya ba la sogs pa smos te/ sran gzugs pa ni dpa' ba'o/ /nyon mongs pa'i tshogs stong gis sdug bsngal gyi g.yul bzlog par mi nus pas na/ nyam nga che thang byung gyur kyang //ro la mig ni mi blta ltar zhes bya ba ni lce'i dbang pos gzung bar bya ba nyid yin pa'i phyir ro/ /dga' ba'i dpung gi dbang du mdzad nas/ rtsed mo'i bde 'bras 'dod pa ltar zhes bya ba la sogs pa smos te/ dper na byis pa rtsed mo la zhen pa mi ngoms pa bzhin du de dag bya ba yin no//zhen pa ni 'dir kun nas chags pa'o/ /mi ngoms pa ni dga' ba ste kun nas zhen par gyur pas mi ngoms par bya ba'o/ /bde ba'i yin pa de ltar na ci ltar las de las zhan par 'gyur zhe na/ bde ba'i don du las byas kyang zhes bya ba la sogs pa smos pa la/bder 'gyur mi 'gyur gtol med kyis/ /zhes bya ba ni/ spu gri sor chags sbrang rtsi lta'i/ /'dod pa rnams kyis mi ngoms na'o/ /glang po che mtsho dang phrad pa ni glang chen mtsho phrad de/ ji ltar mngon par 'dod pa phul du byung bas dang por mtshor 'jug pa de bzhin du/'dir bsod nams kyi bdud rtsi las de la yang 'jug par bya'o/ /stobs kyi dbang du mdzad nas/ rjes su mi bder gyur pa'i las zhes bya ba la sogs pa smos te/ rjes su mi bde bar 'gyur ba'i las ni yongs su skyo bar gyur pa yin la/ yang bya ba'i phyir las brtsam pa yang / rigs 'gyur zhes de ma thag tu gtang / bsnyems pa'i stobs kyi dbang du mdzad nas/ 'thab rnying zhes bya ba la sogs pa smos te/ 'dir nyon mongs pa ni nye ba'i nyon mongs pa mtshon pa yin no/ /dran pas gzung bar bya zhing /shes bzhin gyis brtag par bya'o/ /'jigs pas myur du len pa ltar ro/ /dran pa dang bcas pa'i shes rab ni 'dir dran pa'i mtshon no/ /nyungs mar zhes bya ba la sogs pa'i tshigs su bcad pa gsum ni khong du chud par sla'o/ /dge bshes phrad dang zhes bya ba ni gal te khyim pa dag gam/gal te sbyin pa la sogs pa la thob par 'dod pa'i rgyu 'dis so/ /de dag gang zhe na/ ji ltar zhes bya ba la sogs pa smos so/ /dbang du gyur pa'i stobs kyi dbang du mdzad nas bag yod gtam ni zhes bya ba la sogs pa smos te/bag yod gtam ni byang chub kyi sems la bag yod pa'i le'ur bshad pa ni/ bag yod gtam ni dran byas nas/ /ci nas las byung sngon rol nas te/ ji ltar las la sogs pa'i sngon rol nas shes bzhin thams cad la 'jug par bya ba de bzhin du/bdag nyid zo mdog bde bya zhing ldang ba yang bar bya'o/ /gzhan yang ji ltar dug gis khrag gyur nas/ lus kyi mtshon gyis rma la 'jug pa ltar te/ lus thams cad la khyab par byed de/ /de bzhin bu ga rnyed nas ni/ /sems can nyon mongs 'jug par byed/ /bu ga ni dran pa rmongs pa'o//ji ltar shing bal 'gro ba'am/ /'ong ba rlung gis dbang gyur nas/ /de bzhin 'byor pa brtson pa'i dbang du gyur nas myur du 'grub/ brtson 'grus ni dbang du 'gyur ro/ /de ltar na blo 'am gzhan gyi yon tan gyi tshogs 'byor bar 'gyur ro//bsam gtan dang shes rab gtso bor gyur pa bdag dang gzhan mnyam pa nyid dang / bdag dang gzhan brje ba zhes bya ba ni 'dir ma bshad do/ /byang chub sems dpa'i spyod pa la 'jug pa'i legs par sbyar ba las brtson 'grus kyi pha rol tu phyin pa ste le'u bdun pa'o// //de ltar bshad pa'i tshul gyis brtson 'grus bskyed nas ni ci zhig bya zhe na/ yid ni ting nge 'dzin la gzhag /'di ltar sems ni rnam par g.yengs pa'i mi/ /nyon mongs mche ba'i phrag na ste/ /ting nge 'dzin la rnam par g.yengs pa la gnas so//ting nge 'dzin ni rtse gcig pa yin no/ /de yang rnam pa gsum ste/ nang du yang dag 'jog dang / kun nas nang du yang dag 'jog gi dang / bya ba nan tan gyi nang du yang dag 'jog ces bya'o/ /gsum po dag la yang 'dir g.yeng ba med pa'i ting nge 'dzin ces bya'o/ / de la nang du yang dag 'jog gi dbang du byas nas/ lus dben pa la gnas nas rnam par g.yeng ba ste/ 'dod pa'i rnam par rtog pa la sogs pa yongs su spang zhing dor bar bya'o/ /sems dben pa ste 'dod pa nas bsam gtan bzhi'i bar la dben par bya zhing 'du shes med 'du shes med min dang /'gog pa'i bar du rdzogs par byas te gnas par bya'o zhes bya ba'i tha tshig go/ /bsam gtan bzhi pa ni byang chub sems dpa' sems can gyi don sgrub pa'i rten yin no/ /bstod pa'i khams kyis yongs su gyur pa las thams cad las su rung ba yin no/ /dbye ba yang mtha' yas pa'i yin pa de ltar na de rab kyi mthar gyur pas sa lnga pa la bsam gtan gyi pha rol tu phyin pa ches shin tu lhag par 'gyur ro//de ltar na lus dang sems ni dben pa yis/ /rnam par g.yeng ba mi 'byung ngo / /chags pa la sogs pa las 'jig rten gyi mi spong ba de'i phyir de yongs su spangs pa'i don du ji ltar dpyad par bya zhe na/zhi gnas zhes bya ba la sogs pa smos te/ zhi gnas rab tu ldan pa'i zhes bya ba ni ting nge 'dzin gyis so/ /khyad par du mthong ba nges pa'i tshig gi rnam pas lhag mthong zhes bya ste shes rab yin no/ /des shes byas te rtogs par byas nas so//zhi gnas de yang ji ltar btsal bar bya zhe na/ 'jig rten chags pa med pa mngon dgas 'grub/ /'jig rten la ltos pa med pa'i mngon par dga' zhes bya ba'i tha tshig go/ /de yang rigs so zhes bstan pa'i phyir/ mi rtag ces bya ba la sogs pa smos te/ma mthong na ni dga' mi 'gyur/ /yid kyang mnyam 'jog mi 'gyur la/ /mthong yang ngoms par mi 'gyur bas/ /'on kyang snga ma bzhin te/ ma mthong ba'i dus bzhin du/ sred pas zhes bya ba de rnyed pa la sogs pa la sred pas gdung bar 'gyur ro/ / de'i phyir/ sems can rnams la chags byas na/ /yang dag nyid la kun nas sgrib ste/ de kho na nyid la'o/ /skyo ba'i sems kyang 'jig par byed/ /skyo ba 'byung bar mi 'gyur ro/ /yang na bral bar gyur pas na/ /mya ngan gyis ni gdung bar 'gyur/ /gang gis she na/ sdug pa dang phrad par 'dod pa gang yin pa'i mya ngan des so/ /de la sems pa 'ba' zhig gis zhes bya ba ni sdug bsngal dang yang dang yang du sems pas/ tshe 'di don med 'da' bar 'gyur/ /gal te 'ga' zhig gis tshe ring por 'gyur ram zhe na/ de lta ma yin no zhes bya bar dgongs so//ji ltar don med par 'gyur zhe na/ rtag pa med pa'i mdza' bshes kyis zhes bya ba smos te/ dus rtag tu med pas de mi brtan pa nyid kyi phyir rtag pa med pa'i sdug pa'i mdza' bshes kyi rgyu des so/ /g.yung drung gi thar pa yin la chos ni thar pa'i rgyu yin te/ thar pa ni dngos po dang dngos po med pa dpyod pa'i mtshan nyid zad pa nyid yin pa'i phyir ro//de'i rgyu nyid yin pa'i phyir nye bar brtags nas g.yung drung chos yin te/ kun rdzob nyid yin pa'i phyir 'jig cing nyams par 'gyur ro zhes bya ba'i don to/ /ji ltar 'jig par 'gyur zhe na/ /byis dang skal ba mnyam spyod na//zhes bya ba la sogs pa smos te/ skal mnyam spyod pa ni las 'dra ba la spyod pa'o/ /byis pa ni byis pa ma yin pa dang skal ba mi mnyam par 'dod de/ byis pa de dang de la sdug pa ma yin zhes bya ba'i tha tshig go/ /de ltar na byis pa bsten pas ci zhig byas te/don ci zhig thob par 'gyur/ byis pa rnams la chags pas cir yang mi rung ste/ rnam pa thams cad du yang don med pa'i phyir ro/ /de ltar na skad cig gcig gis mdza' 'gyur la/ /zhes bya ba la sogs pa tshigs su bcad pa'i don khong du chud par sla'o//mtho la phrag dog ste/ gzhan gyi phun sum tshogs pa la phrag dog pa ni/ khyad par gyi yon tan gyis byis pa'i sems la bzod pa med do/ /mnyam dang 'gran pa ni khro ba las byung ba'i rtsod pa'o/ /mi snyan pa ni smad pa'o/ /'khor bar dga' ba'i gtam la sogs//zhes bya ba la sogs pa la/ sogs pa'i sgras ni brdzun la sogs pa gzung ngo / /de ltar zhes bya ba ni phan tshun no/ /'dris chen nyid du mi 'gyur ba ste/ 'dris pa las 'jug par bya ba ma yin no/ /'on kyang tha mal pa tsam legs par bya/ dga' bar bya'o//bung bas me tog sbrang rtsi bzhin/ /sbrang mas me tog la sbrang rtsi snga na med bzhin du/ 'dris pa med par chags med par/ /len cing thams cad du sbrang ma spyod pa bzhin du/ chos dang don ni chos kyi don te/ lung gi chos legs par bshad pa'i don tsam blangs nas ni zhes bya ba la chags pa la sogs pa ma yin pas blangs nas/'dris pa med par gnas par bya'o/ /de ltar chags pa spangs nas rnyed pa la sogs pa la sred pa spang ba'i phyir/ bdag ni rnyed mang zhes bya ba la sogs pa smos te/ de ltar shi ba'i 'og tu 'jigs pa skye'o/ /de de ltar spyad nas mi 'gyur ro snyam na/de bas rnam par rmongs pa'i yid ces bya ba la sogs pa smos te/ rnyed pa la sogs pa gang dang gang la yid bde ba la rmongs par gyur pa na/ chags par gyur pa'i rnyed pa la sogs pa de dang de bsdongs pa stong 'gyur du sdug bsngal gyi rgyu nyid du gyur cing ldang ngo //gang gi phyir de lta yin na/ de bas mkhas pas rnyed pa la sogs pa de la chags mi bya/ sred pa'i chags pa gang yin pa la 'jigs pa skye'o/ /chags pa yod na shi ba las 'jigs par 'gyur gyis gzhan du ni ma yin pa de'i phyir mkhas pas de 'dod par bya ba ma yin no/ / mi rtag pa dag la mi rtag pa'i 'dod pa rigs pa ma yin par bstan pa'i phyir 'di dag ces bya ba la sogs pa smos te/ rnyed pa la sogs pa 'di dag rang nyid 'dor 'gyur bar 'jig par 'gyur te 'jig pa'i rgyu med pa nyid kyi phyir ro/ /rgyu dang 'brel pa'i 'jug pa brtan par gyis te rab tu rtogs par bya'o//'di ltar rnyed pa dag ni mang byung zhing zhes bya ba la sogs pa smos so/ /mos pa ni de nyid 'di yin no zhes lhag par mos pa'o/ /de dag gis zhes bya ba ni byis pa dag dang lhan cig go/ /'di ltar byis pa dang 'dris pa smad cing dben pa'i phan yon bstan pa'i phyir/nags na zhes bya ba la sogs pa smos te/ shing rnams zhes bya ba la sogs pa ni dgon pa'i shing dag go/ /brgyad stong pa la sogs par byang chub sems dpa'i dben pa ni ma yin no zhes bshad pa ma yin nam zhe na/ bden te/ 'on kyang las dang po pa chags pa dang sred pas bcom pa la dkon mchog sprin la sogs par 'di yang gsungs mod kyi/gzhan ni theg pa dman pa la dben pa de mi 'dod cing ltas pa ma yin no/ /phug gam lha khang stong pa'am zhes bya ba la sogs pa la/ chags pa med par 'gyur zhig gu/ /sa phyogs bdag gir bzung med pa//bdag gir byas pa ma yin par/ /rang bzhin gyis ni yangs rnams su/ /bcos ma ma yin bde ba de dag tu/ rang dbang spyod cing chags med par te/ bdag gir ma byas pa'i gnas dag tu/ /nam zhig bdag ni gnas par 'gyur ro/ /sba ba ma byas pa ni bsrung ba ma byas pa'o//dur khrod ni ro'i gnas so/ /'jigs pa ni rul zhing rnags pa ste/ de nyid kyi chos can dag tu ste/ rang bzhin de 'di la yod pas na 'di ni/ 'jig pa'i chos can dag tu ni/ /bdag gi lus/ nam zhig mgo snyoms byed par 'gyur/ /bdag gi lus ni 'di nyid kyang zhes bya ba la sogs pa smos te/gang zhes bya ba ni tshig phrad yin te/ gang gis zhes bya ba'i don to/ /drung du zhes bya ba ni thag nye ba'o/ /sdug pa dang bral ba mi rigs pa ma yin no zhes bstan pa'i phyir lus 'di zhes bya ba la sogs pa smos te/de'i lus gyes par gyur pa ni de gyes par gyur pa'o/ /mdza' ba gzhan lta smos ci dgos/ /dben pa'i bde ba 'joms par byed pa gzhan lta zhog go/ /ci zhig ces bya ba ni smos kyang ci dgos zhes bya ba'i don to/ /sdug pa 'ba' zhig kyang yod pa ma yin no//lam dag tu zhes bya ba la sogs pa la/ skye ba'i gnas de la khri 'degs par byed pa'o/ /ji srid skyes bu bzhi yis ni/ /srid pa'i lam de las de ni ma bteg pa/ /kun nas 'jig rten mya ngan du gyur pas/ de srid du ni nags su song / /de ltar yang shi bar gyur pa la mya ngan byed pa yin nam zhe na/bshes med ces bya ba la sogs pa smos te/ 'ga' zhig dang 'dris pa med cing khon pa yang med pa de ltar na shi ba las sngar/ lus 'di gcig pu dben gnas te/ /snga nas shi dang 'drar brtsis nas/ /shi na'ang mya ngan byed pa med//drung na 'khod pa ni gnyen la sogs pa'o/ /'di'i sangs rgyas rjes dran sogs zhes bya ba la sogs pa'i sgras ni chos dang dge 'dun dang / gtong ba dang lha rjes su dran pa gzung ngo / /de bas na shin tu zhes bya ba la sogs pa ni/ mjug sdud pa ste/ rtogs par sla'o//de ltar chags pa dang rnyed pa la sogs pa'i sred pa spangs pas 'jig rten yongs su spangs nas rnam par rtog pa yang dor bar bya ba'i phyir/ bsam pa gzhan ni kun btang ste/ /zhes bya ba la sogs pa smos pa la/ bsam pa gzhan ni pha rol la sems pa ste/ dper na gzhan dag tu gzhan dag gis ni 'khrul pa'am/ gzhan gyis byas pa'am ma byas pa la/ rtag par mi bya bdag nyid kyi/ /mnyam dang mi mnyam yang dag brtag /ces bshad pa lta bu'o/ /bdag la sems pa ni byang chub kyi sems la sems pa'o/ /gcig pu de nyid de/dmigs pa la rtse gcig pa gang la yod pa de ni/ bdag la sems pa gcig pu yis/ /sems ni mnyam gzhag phyir yod pa de la de skad ces bya'o/ /zhi gnas kyis mnyam par gzhag pa'i phyir ro/ /lhag mthong gis dul bar bya phyir brtson te bya//dran pa dang / brtson 'grus dang / bag yod pa dag gis so/ /gzhan la sems pa yang byang chub sems dpa' dag gis bya ba ma yin nam/ dper na gzhan dag tu/ bdag gam yang na gzhan dag la/ /sdug bsngal yin yang gang phan la/ /phan dang bde ba rnams bya ste/bde yang mi phan mi bya'o/ /zhes gsungs pa lta bu'o/ /byang chub kyi sems 'dir yang gzhan la sems pa gtso bor gyur pa bshad pa yin no zhe na bden te/ las dang po'i gzhan gyi don gyi go rims 'di nyid yin te/ 'ga' zhig bdag nyid dul bar ma byas par gzhan gdul bar nus pa ma yin no//de nyid kyi phyir sems can gyi don byed pa'i tshul khrims ni sdom pa'i tshul khrims dang / dge ba'i chos sdud pa'i tshul khrims kyi phyir bstan pa ltar/ bya ba nan tan gyi bsam gtan yang phyis 'chad par 'gyur ro//'di ni nang du yang dag 'jog pa yin pa de ltar na ting nge 'dzin la rtsod pa cir yang mi rung ngo / /de la 'dod pa'i rtog pa spang ba'i dbang du mdzad nas/ 'jig rten 'di dang zhes bya ba la sogs pa smos so/ /bdag la 'dod pa yang smod pa ni gang phyir zhes bya ba la sogs pa smos te/gang gi phyir dga' ba'i don du'o/ /sngon ni sngar ro/ /rdzas ni nor te/ bdag dang gzhan gyis phan tshun bdag gis byas pa'o/ /gang zhig ste gdong 'bad de bteg pa ni 'o byed pa'i don du'o/ /drangs kyang ngo tshas 'og tu bltas/ /sngon ni mthong ngam ma mthong yang / /gos kyis gdong yang g.yogs par 'gyur//g.yogs sam ma g.yogs pa nyid kyi phyir khyod nyon mongs pa'i bud med kyi gdong de ni/ 'degs par byed pa'i 'bad rtsol gyis/ /da lta mngon sum gyur pa bzhin/ /brnag par mi bzod pa ni/ bya rgod kyis bsal byas mthong na te/ /dur khrod la sogs par ro/ / bud med kyi lus 'jigs su rung ba 'jigs pa dang / skyo bar byed pa des mthong nas/ /da ltar ci'i phyir 'byer bar byed/ /gzhan gang gis she na/ gzhan gyi zas la sogs pa smos te/ me tog gi phreng ba ni phreng ba'o/ /rgyan ni gdu bu la sogs pa'o//de dag gi ce spyang la sogs pa gang dag gi zas bud med kyi lus sha'i phung po la mchod par byed de/ de dag dang gzhan dag gi bza' ba yin no/ /ji srid de ni 'di ltar yang sha'i phung po ste/ bud med kyi lus kyi sha'i tshogs sha mang po nyid kyi phyir de lta bur gyur pa 'di mthong nas/ser sna can khyod cis mi srung / /rus gong nyid du mthong nas ni/ /bud med kyi lus bdag med pa/ /mi 'gul yang ni khyod skrag na/ /ro langs bzhin du 'ga' yis kyang / /bskyod par gyur na cis mi 'jigs/ /bshang ba dang ni mi gtsang ba'o//sngas la'ang dga' bar mi byed pa/ /dri nga 'dzag pa ma yin zhes/ /de'i phyir/ 'dod ldan mi gtsang ba la rmongs/ /mi gtsang ba nyid la rmongs pa ni chags pa'o/ /de ltar na/ gang la zhes bya ba la sogs pa la mi gtsang ba'i lus gang la g.yogs na'ang ste/de'i rnag gi pags pas g.yogs pa la chags par gyur pa bya rgod kyis bsal bar bya zhing des bshus na yang ci ste/ ci'i phyir mi sdud/ mi gtsang ba la chags pa ni ma yin gyi/ 'on kyang bud med la yin no zhe na/ gal te zhes bya ba la sogs pa smos te/de ni khyod do/ /rus pa'i gzeb rgyus pas 'brel pa'i 'khrul 'khor gang la yod pa de ni/ rus gzeb rgyus pas 'brel pa la/ /gzhan khyod ci'i phyir pang du 'khyud/ /de'i phyir mi gtsang ba la khyod kyi chags pa 'byung ba yin no/ /de ltar na yang gzhan gyis 'khyud par bya ba ma yin no zhe na/khyod nyid ces bya ba la sogs pa smos te/ mi gtsang ba du ma yod cing mi gtsang ba'i phung po thams cad za bar 'dod pa'i ngang tshul can ni/ mi gtsang brkam pas 'dod par byed/ /'on te bdag ni 'di dang gzhan la dga' ba yin no zhes 'di'i sha la reg cing blta bar 'dod pa yin pa de lta na yang rigs pa ma yin no zhes bstan pa'i phyir/bdag ni sha 'di la dga' zhes/ /reg dang lta bar 'dod na ko/ /sems med pa zhes bya ba la sogs pa smos te/ 'on te sems 'dod pa yin no zhe na/ gang de'i sems ni 'dod min na//zhes bya ba la sogs pa smos te/ de dang reg dang blta bar mi nus te/ /lus can ma yin pa nyid kyi phyir ro/ /reg pa dang mthong bar nus pa'i lus gang yin pa de ni sems ma yin na/ don med 'khyud de ci zhig bya/ /gzhan gyi mi gtsang ba'i rang bzhin gyi lus shes pa ni ma yin no zhe na/mi gtsang rang bzhin gzhan gyi lus/ /zhes bya ba la sogs pa smos te/ mi rtogs pa ni mi shes pa'o/ /rang nyid mi gtsang ba nyid yin par khong du ma chud cing rtogs par mi 'gyur ba ngo mtshar che'o/ /de ltar ni 'gyur mod kyi yid du 'ong ba'i lus kha dog dang /dbyibs dang / dri dang reg byar ldan pa la chags par rigs pa yin no zhe na/ sprin bral zhes bya ba la sogs pa smos te/ sprin dang bral zhing sgrib pa med pa'i nyi zer te/ nyi ma'i 'od kyis phye ba'i pad+ma de/ /chu skyes gzhon nu mngon par gsar pa'i pad+ma spangs nas mi gtsang ba la zhen cing chags pa'i sems gang la yod pa de ni mi gtsang zhen pa'i sems ldan pa ste/'dod ldan 'dis mi gtsang gzeb ste/ lus la ci'i phyir dga'/ mi gtsang ba'i gzeb las byung ba'i mi gtsang ba yang khrus la sogs pas mngon par 'dus byas pa la chags par rigs pa yin no zhe na/sa sogs zhes bya ba la sogs pa smos te/ sa la sogs pa ni bong ba la sogs pa'o/ /gal te mi gtsang bas gos par gyur pa de'i tshe mi gtsang ba nyid kyis gos pa nyid kyi phyir reg par mi 'dod pa na/gal te 'di ltar lus gang las de ni byung ba'i mi gtsang ba de'i lus la ci ste khyod reg 'dod/ phyi rol la gtsang ba ni yod pa ma yin pas des na/ de'i rgyu mthun pa nyid yin pa'i phyir lus ni gtsang ba nyid yin no zhe na/ gal te mi gtsang zhes bya ba la sogs pa smos te/mi gtsang zhing las byung gyur cing / /de yi sa bon des bskyed pa ste/ mi gtsang ba'i sa bon gyis te/ khu ba dang khrag 'dres pa sa bon nyid yin pa'i phyir ro/ /mi gtsang ba des bskyed pa ni mi gtsang ba'i tshogs kyis 'phel bar byas pa nyid kyi phyir ro//mi gtsang ba la sogs byung ba yin na yang mi gtsang ba mang po ma yin pa de yang re zhig mi 'dod na/ lus ni smos kyang ci dgos zhes bstan pa'i phyir/ mi gtsang las byung zhes bya ba la sogs pa smos te/ mi gtsang srin/ chung ngu yang mi gtsang ba las byung ba yin na khyod 'dod mi byed na/mi gtsang mang gi rang bzhin lus/ /mi gtsang skyes pa 'dod par byed/ /khyod ni zhes bya ba la sogs pa la/ 'di ltar lus ni shin tu mi gtsang ba yin no/ /ga pur la sogs pa zhes bya ba dang / gal te mi gtsang 'di 'dra ba zhes bya ba la sogs pa ni khong du chud par sla'o//dge slong 'dod chags la spyod pa mi gtsang ba la mos pa'i don du mkhan pos dur khrod du khrid pa bas shi ba'i mo mtshan 'bus gzhigs pa mthong ba na mkhan po bzang ba la gzigs zhes chags par 'gyur na/ rang bzhin du gnas pa'i mtshan mthong na lus la chags par ci'i phyir mi 'gyur zhe na/gang zhig pags pa kha phye na zhes bya ba la sogs pa smos te/ mtshan gyi pags pa tsam ni lus thams cad kyi nye bar mtshon pa yin no/ /de ni kha phye zhing gcer bur byas nas lus gang la 'jigs pa chen po skye bar 'gyur te/ de'i gzugs dang sgra la sogs pa ni yi dwags la sogs pa 'khrul pa bskyed pa'i phyir/shes kyang ji ltar de nyid la/ /lus de 'di nyid yin no zhes shes su zin kyang rang bzhin du gnas pa'i lus la yang / phyir zhing dga' ba skye bar 'gyur/ /ji ltar na 'di srid pa ma yin te/ shin tu ngo mtshar che'o//mo mtshan gyi pags pa kha phye zhing gsal bar byas pa'am/ mtshon gyis gtubs pa'i phye ma de la dga' bar 'gyur zhing / lus thams cad la yang zhes bya ba 'dir mi 'gyur ro/ /dri nga ba la sogs pas 'jigs su rung ba me tog gi phreng ba dang tsan+dan la sogs pas 'dus byas pa de la yang dga' bar rigs sam zhe na/lus la bskus pa'i zhes bya ba la sogs pa smos te/ dri dang tsan+dan ni kha dog dang / me tog gi phreng ba dang / gos la sogs pa nye bar mtshon pa yin no/ /gzhan min na zhes bya ba la sogs pa las gzhan ma yin pa'o/ /chags pa dang bral ba nyid don yin no zhes bstan pa'i phyir gal te zhes bya ba la sogs pa smos te/'di la ni lus la'o/ /lus de dri zhim pa'i don du skud pa yin no zhe na/ 'jig rten don med ces bya ba la sogs pa smos so/ /rtogs pa dang ldan pa 'di la skud par rigs pa yin no zhes bstan pa'i phyir 'on te dri zhim tsan+dan zhes bya ba la sogs pa smos te/rmongs pa ni mngon par 'phel ba yin no/ /de ltar ni rus gong zhes bya ba la sogs pa la/ grong gi dur khrod la ste/ g.yo ba'i rus gong gi lus kyi khyad par gyi dur khrod dang 'dra'i khyod de la dga' 'am/gzhan yang de ltar zhes bya ba la sogs pa smos so/ /de ltar yang 'dod ldan ngan pa kha cig ni zhes bya ba la sogs pa la/ 'dod ldan ni bran no/ /khyud kor los kyang zhes bya ba ni lo mang po dag kyang ngo / /bud smad 'dod bzhin zhes bya ba ni bu dang bu mo la sogs pa don du gnyer ba'o//gang don nyid ni bu la sogs pa nyid do/ /tshong pa bsten pas rang gi lus btsongs pa ste/ rang gi lus 'tshong ba gang la yod pa de dag ni la la rang gis lus btsongs shing ngo / /g.yul du 'jug pa ni rab tu 'jug pa'o/ /'dod ldan pa ni 'di nga rgyal yin par dgongs so//lus kyang bcad ces bya ba la sogs pa ni khong du chud par sla'o/ /don phun sum tshogs pa yod na 'dod pa rnyed sla ba ma yin nam zhe na/ ma yin te/ byis pa nor spel mi nus pas/ /dar la bab nas 'dis ci bde/ /bsags pas gzhom par gyur na ni/ / rgas nas 'dod pas ci zhig bya/ /de'i phyir bsag par bya ba ma yin no zhes bstan pa'i phyir/ bsag dang bsrung dang zhes bya ba la sogs pa smos te/ re zhig don 'jig par mthong ba 'di ni don med par mthong ba yin no/ /don med par mthong ba ni nor la chags pa zhes bya ba la sogs pa smos so//'dod ldan rnams la de la sogs/ /zhes bya ba ni mjug bsdu ba yin no/ /nyes dmigs ni skyon yin te/ gang zhing ches mang la mnog chung ba ste/ nyams su myong ba chung ba yin no/ /mnog chung ba gang yin pa de zhes bya ba ni 'dod pa'i bde ba mnog chung ba gang yin pa de'o//gang zhe na/ phyugs kyis sgrub na'ang mi dkon pa'i'o/ /de'i don du dal 'byor phun sum tshogs pa rnyed dka' 'di bcom pa yin no/ /gang gis bcom zhe na/ las kyis mnar ba rnams kyis te/ /las ni las dang nyon mongs pa'o/ /des mnar ba ni 'dod ldan nye bar bcom pa ste/bdag nyid kyis bdag bcom pa zhes bya ba'i tha tshig go/ /de ltar ni 'gyur mod kyis/ byang chub kyi spyod pa la yang sdug bsngal chen po yin no zhe na/ /'dod pa nges par 'jig 'gyur zhing / /dmyal ba la sogs la ltung byed pa/ / chung ba nyid kyi phyir/ chen po min phyir dus kun tu zhes bya ba ni skye bo so sor te/ 'dod pa dang ldan pa 'khor bar ro/ /de yang 'dod ldan byang chub spyod pa bas sdug bsngal che ba yin la/ bla na med pa'i byang chub ste/ /sangs rgyas yod pa ma yin no/ /ji ltar chen po yin zhe na/ dmyal ba la sogs pa zhes bya ba la sogs pa smos te/ 'dod ldan rnams kyis/ dmyal sogs sdug bsngal bsam byas na/ /dmyal ba la sogs pa'i dus kyi'o/ /'dod pa rnams la mtshon la sogs pa'i sdug bsngal gyis kyang dper mi phod do/ /'di skad du/ 'jig rten 'di dang pha rol tu//zhes bya ba la sogs pa'i tshul gyis 'dod pa po las skyo ba skyed cing / 'dod pa'i rnam par rtog pa spangs nas gnod sems la sogs pa'i rnam par rtog pa yongs su spang ba'i ched du/ de ltar 'dod las skyo ba ste/ /dben pa la ni dga' ba skyed ces ston par 'gyur ro//de ltar zhes bya ba la sogs pa smos te/ zhi ba ni 'jigs pa med pa'o/ /zla 'od ni zla ba'i zer nyid do/ /dga' bar byed pa nyid kyi phyir tsan+dan te/ des bsil ba'i'o/ /khang bzangs te/ gzhal yas khang bzhin yangs shing rgya che bar/ /gzhan la phan don sems shing 'chag par byed//gang zhe na/ skal ldan te dam pa'o/ /ci 'dra ba zhig gis she na/ sgra med zhi ba'i nags rlung g.yob pa yis so/ /khang stong la sogs pa gang du ste/ la lar ci srid 'dod gnas shing ste/ 'dug nas yongs 'dzin srung ba'i sdug bsngal spangs/ / zhes bya ba ni lhung bzed la sogs pa yongs su 'dzin pa bsrung ba'i sdug bsngal de dang bral bar bya ste/ sa'i lhung bzed la sogs pa'i yo byad ni rkun pos dbrog par bya ba nyid yin pa'i phyir ro/ /sa'i lhung bzed la sogs pa'i yo byad dang / brang khang stong pa de la/ ltos pa med par bag yangs spyod//ltos pa med par spyod pas gnas par bya'o/ /de ltar ni gya nom pa'i yo byad med pa'i phyir sdug bsngal gyis gnod par 'gyur zhing bde ba las kyang ting nge 'dzin skye ba ma yin nam zhe na/ rang dbang spyod cing ces bya ba la sogs pa smos te/ gang dang yang 'brel med pa ste/ gzhan gyi rnam par rtog pa la sogs pa med pa'i phyir ro/ /chog shes bde spyod gang yin pa/ /zhes bya ba ni gzhan gyi rnam par rtog pa la sogs pa med pa'i phyir ro/ /de ltar rnam par rtog pa gzhan spang bar bya'o zhes bstan pa'i phyir de la sogs pa'i rnam pa yis zhes bya ba la sogs pa smos te/mjug bsdu ba yin no/ /de la sogs pa'i rnam pa yis/ /zhes bya ba ni rnam par rtog pa'i rgyun dang mtshungs par ldan pa'i rnam par rtog pa la sogs pa dmigs pa dang 'dzin pa'i rnam pa yongs su spang bar bya ba yis so/ /de la rnam par rtog pa'i rgyun dang mtshungs par ldan pa'i rnam par rtog pa ni/ji ltar na gzhan gyi yon tan gyi rnam pa med par bla ma byed/ /ces bya ba'o/ /de ltar spong bar byed pa'i rnam pa ji ltar bdag gis 'gro ba'i bla mar bya ba yin na de 'dra ba'i yon tan bdag la med pa'i dben pa'i yon tan goms par byas na rim gyis 'byung bar 'gyur ro/ /dben pa med par las dang po pa'i sems las su rung bar mi 'gyur te/bslab pa 'dod pa'i dge slong rnams/ /dben pa dag kyang mthong bar shog /g.yeng ba thams cad spangs nas ni/ /sems ni las rung bsgom gyur cig /ces 'chad pa lta bu'o/ /de ltar na dben pa'i yon tan bsam byas nas/ / rnam rtog nye bar zhi ba dang / /byang chub sems ni bsgom par bya'o/ /de ltar nang du yang dag 'jog pa'i bsam gtan gyis byang chub sems kyi rnam pa bcu bsgoms nas kun nas nang du yang dag 'jog gis bdag dang gzhan mnyam pa nyid dang por bsgom par bya ba yin pa de ltar na 'chad par 'gyur ba'i tshul gyis/bdag dang gzhan du mnyam pa ni/ /dang po nyid du 'bad de bsgom par bya ste/ bdag dang gzhan mnyam pa nyid la sogs pa ni khyad par can gyi yon tan gyi bdag nyid yin pa'i phyir ro/ /ji ltar bsgom par bya zhe na/ bde dang zhes bya ba la sogs pa smos te/bde ba dang bde ba ma yin pa'i bdag nyid bde ba dang sdug bsngal gang yin pa de dag mtshungs shing mnyam pas na/ thams cad bdag bzhin bsrung bar bya/ /ji ltar bdag sdug bsngal las bzlog nas bde ba la sbyor zhing bsrung bar bya ba yin pa de ltar bsrung bar bya'o//ji ltar zhe na lag pa la sogs zhes bya ba la sogs pa smos te/ ji ltar/ lag pa la sogs dbye ba rnam mang yang / /du ma yin na yang de bde ba dang sdug bsngal gyi bdag nyid can du tha dad pa'i phyir ro/ /yongs su bsrung bya'i lus su gcig pa ltar//du ma'i bdag nyid can yin pa'i phyir/ de bzhin 'gro ba'i sdug bsngal tha dad kyang / /'gro ba thams cad bdag bzhin bde ba 'dod mnyam gcig /de ltar yongs su bskyang bar bya/ /gzhan gyi lus la bdag gi sdug bsngal gnod par byed pa ma yin na de ji ltar na 'di thams cad sdug bsngal dang bde ba'i bdag nyid du tha dad pa med pa yin zhe na/bdag ni zhes bya ba la sogs pa smos te/ bdag nyid kyi sdug bsngal ni bdag nyid kyi sdug bsngal lo/ /bdag nyid la chags pas mi bzod pa ste/ bde ba ma yin pa la bdag la chags pas brnag par dka' ba'o//de bzhin gzhan gyi sdug bsngal dag /gal te bdag la bab par mi 'gyur yang gzhan de 'di las cir 'gyur zhe na/ bdag gis gzhan gyi sdug bsngal bsal/ /zhes bya ba la sogs pa smos te/ phan par bya ba ni bde bar bya ba'o/ /gzhan las bzlog pa'i lus dang sems kyi rgyud ni 'dir bdag yin no//de yang yin la sems can yang de yin pas na sems can de yin pa'i phyir te/ sems can ma yin pa las bzlog pa ste/ sems can bzhin no/ /bdag nyid kho na bde ba la brtson par bya ba ma yin nam gzhan la sems ci zhig bya ste/de'i bde ba khyod kyis nyams su myong ba med pa nyid kyi phyir ro zhe na/ gang tshe bdag dang zhes bya ba la sogs pa smos te/ 'dir bdag nyid kho na la yin gyi gzhan dag la yang ma yin nam/ de dag gis bde ba la brtson par bya'o zhes bya ba'i tha tshig go//gang tshe bdag dang zhes bya ba la sogs pa smos te/ gzhan ni cig shos so/ /gal te de las cig shos kyi sdug bsngal ni de la sdug bsngal lo/ /des bdag la mi gnod pa de'i phyir mi srung na'o/ /'o na de ltar na ni ma 'ongs pa'i lus kyi sdug bsngal yang bdag la gnod pa med pa de'i phyir ma 'ongs pa'i lus kyi sdug bsngal las don cis bdag srung bar byed par 'gyur zhing /gang gis na de'i don du bslab pa bsrung bar bya/ de ltar ni 'gyur mod kyi/ ma 'ongs pa'i lus gzhan yin gyi 'on kyang ma 'ongs pa'i dus su de'i tshe yang bdag nyid yin pa des na ma 'ongs pa'i lus kyi sdug bsngal gyis kyang bdag la gnod pa yin no zhe na/bdag gis de ni zhes bya ba la sogs pa smos so/ /ci'i phyir zhe na/ 'di ltar shi ba'ang gzhan yin la/ /zhes bya ba la sogs pa smos so/ /'o na de ltar na ni ma 'ongs pa'i lus kyi sdug bsngal las kyang bslab pa bsrung ba la sogs pas bdag mi bsrung ngam zhe na/bsrung ba yang yin pa de'i phyir bdag nyid de'i tshe yod pa yin no zhes bya ba ni kun tu rtogs pa log pa yin no zhes bstan pa'i phyir gang gis zhes bya ba la sogs pa smos te/de ni de nyid kyis bsrungs na/ /zhes bya ba ni sdug bsngal gyi rgyu nyid yin pa'i phyir bdag sdug bsngal yin te/ tha dad pa med pa la nye bar btags nas de skad du ston to/ /rkang pa ni nye bar mtshon pa yin te/ mgo bo'i sdug bsngal yang lag pa ma yin no/ / ci'i phyir tha dad pa med pa la nye bar btags nas rkang pa'i sdug bsngal te lag pas srung bar byed ce na/ de dag gcig pa nyid ma yin te/ yan lag can med pa'i phyir dang / lag pa la sogs pa bskyod pa na thams cad bskyod par 'gyur ro zhes bya ba la sogs pas gzhan du bkag zin pa'i phyir dang /bdag rtag pa gcig pu ni dgag par bya ba yin pa'i phyir ro/ /gal te gzhan gyis bsrungs pa de ltar mi rigs gyur kyang ni/ bdag gir 'dzin pa zhes bya ba ni nye bar mtshon pa yin te/ bdag tu 'dzin pa la sogs pa phyin ci log las 'jug par 'gyur ro//gal te de ltar sdug bsngal yang mi rigs pa yin pa de ltar na bdag gir 'dzin pa las byung ba'i las las 'jug par 'gyur ro/ /de'i phyir de dag rang gis bzlog par bya zhing / gzhan dag gi stobs ji lta ba bzhin du bdag gir byas nas bzlog par bya'o zhes bshad pa gang yin pa lta bu'o//de de ltar gyur mod kyi lus dang sems kyi rgyun rten nyid yin pa'i phyir rten nyid sdug bsngal yin par rigs pa ma yin te/ dgra bo'i sdug bsngal nyid 'dod pa yin pa'i phyir ro/ /sdug pa dag kyang dgra bo med pa la sogs pa yang yin no//bdag nyid kyi sdug bsngal de bdag gir 'dzin pa la sogs pas spang bar bya ba yin no zhe na/ ji ltar zhes bya ba la sogs pa smos so/ /lus dang sems kyi rgyud la ltos nas kyang de kho na nyid du sdug bsngal yod pa ma yin no zhes bstan pa'i phyir rgyud ces bya ba la sogs pa smos te/'brel pa'i rgyud ni rgyun yin te/ /tshogs ni 'dus pa ste/ lag pa la sogs pa'i phung po lta bu'o/ /sogs pa'i sgras ni chu'i rgyun la sogs pa bzhin du brdzun te log pa yin no/ /de'i phyir gzhan yang / gang gi sdug bsngal med pa 'dis//zhes bya ba la sogs pa smos te/ bdag de ni gzhan la med pa'i rgyu de'i phyir sdug bsngal gang dang 'brel pa yin no/ /de ni su'i bdag gir 'gyur/ de ltar na mi srid pa de'i phyir/ sdug bsngal bdag po med pa ni zhes bya ba la sogs pa rtogs par sla'o//gal te sdug bsngal yin na yang / /de ltar brdzun yin pa de ltar na gang gis bzlog par bya/ ci'i phyir kun gyi sdug bsngal ni rang dang gzhan gyi sdug bsngal rang gi sde pas ji ltar mthong ba bzhin du bzlog par bya zhes brtsad du med do/ /rang nyid kyang brdzun yin pa de ltar na/bzlog par bya ba ma yin la/ gal te bzlog par bya ba yin na thams cad bzlog pa ste/ bdag nyid kyi bzhin du gzhan dag gi yang bzlog par bya ba yin no/ /gal te ma yin na thams cad kyang bzlog par bya ba ma yin no/ /'o na de ltar na sdug bsngal sna tshogs kyi bdag nyid 'dir tha dad pa med pa la nye bar btags nas bdag yin la/de yang thams cad bzlog par bya ba yin no/ /snying rjes de gzhan sdug bsngal dang bral bar 'dod pas so/ /bdag gi sdug bsngal dang sems can gzhan gyi sdug bsngal du mar gyur pa bzlog par bya ba yin na/de ci'i phyir 'byung ba yin/ gal te stobs kyis yin no zhe na/ 'gro ba'i sdug bsngal bsam byas nas/ /ji ltar snying rje'i sdug bsngal mang ba ma yin nam/ gal te zhes bya ba la sogs pa ni khong du chud par sla'o/ /des na me tog zla mdzes kyis te/byang chub la sems can gdul ba'i phyir/ rgyal po'i gnas su zhugs pa na/ /mngon par shes pa brnyes pa nyid kyis shes kyang rgyal po'i gnod pa la ste/ rgyal po dpas byin de las byung ba'i gnod pa ni rgyal po'i gnod pa'o/ /bdag gi sdug bsngal te/bdag nyid 'chi ba'i sdug bsngal ma bsal bar zhes bya ba ni spyod du zin kyang ma spangs par ro/ /gdul bya mang po'i don sdug bsngal zad par byas pa'i phyir ro/ /de dag gi sdug bsngal zad pa zhes bya ba'i don yin zhing de la sa bon bskrun pa dang / yongs su smin pa la sogs pa yang ngo //de yang de'i tshe bdag nyid sdug bsngal nyid kyis gzigs pa yin pa de ltar na/ de'i bdag nyid kyis sdug bsngal ma yin no zhes bstan pa'i phyir/ de ltar yid ni bsgoms gyur pa/ /zhes bya ba la sogs pa smos te/ de ltar bdag dang gzhan mnyam pa nyid du bsgoms pas goms par 'gyur ba'i rgyud gang la mnga' ba de dag gis gzhan gyi sdug bsngal zhi bar dga' bas so//ci'i phyir bdag nyid kyi sdug bsngal zhi ba la byang chub sems dpa' dga' bar mi 'gyur zhes bstan pa'i phyir/ sems can grol bar byed pa zhes bya ba la sogs pa smos te/ro la sred pa med cing 'dus ma byas pas rgyud goms par byas pa de nyid kyi phyir gzhan gyi don la gcig tu sred pa bdag nyid khyad par can gyis/ rnam smin 'bras bu'i re ba med/ /de dag la ni gzhan gyi sdug bsngal zhi ba la dga' ba yin no//gang gi phyir de ltar yin pa de bas na/ ji ltar zhes bya ba la sogs pa smos te/ ji ltar na gzhan gyi lus la yang bdag ces 'dzin par byed ce na/ goms pa yis ni zhes bya ba la sogs pa smos te/ gzhan gyis zhes bya ba ni ma dang pha'i 'brel pa las/ khu ba khrag gi thigs pa la ste/ rim gyis pha'i khu ba dang ma'i khrag dang las kyi dbang gis 'phel ba phal cher mi'i lus de la/ bdag go zhes ni shes pa ltar te/ thog ma med pa nas phyin ci log tu goms pa'i phyir ro/ /ci'i phyir goms pa med par ma yin zhe na/ dngos po med par gyur kyang ni zhes bya ba la sogs pa smos te/'di ltar rgyud dang mtshungs pa dang ni brdzun pa nyid kyi phyir dang / bdag rtag pa gcig pu la sogs pa ni dgag par bya ba nyid yin pa'i phyir dngos po med pa yin du zin kyang bdag ces bya ba shes pa nyid ni sgyu ma lta bu 'ba' zhig tu 'gyur ro//de'i phyir goms pa med par yang sgyu ma lta bu yod pa ma yin no/ /kyang gi sgras ni dngos po bden pa nyid kyang ji ltar mthong ba bzhin du gsal bar snang ba ni goms pa nyid kyi phyir ro zhes ston par byed do/ /de dag ni gzhan dag gis kyang / de phyir yang dag yang dag min//gang gang zhig tu bsgoms pa las/ /bsgoms pa'i stobs ni rdzogs pa na/ /de gsal mi rtog blo 'bras can/ /zhes gsungs pa yin no/ /de bzhin gzhan gyi lus la yang / /bdag ces ci yi phyir mi gzung / /zhes bya ba de bzhin ni goms pa nyid kyi phyir ro/ /de ltar bdag dang gzhan mnyam pa nyid kyi kun nas nang du yang dag 'jog gi bsam gtan bshad nas/bdag dang gzhan brje ba la sogs pas bya ba nan tan gyi bsam gtan bstan pa'i phyir/ bdag gi lus ni zhes bya ba la sogs pa ste/ yid las gzhan nyid ni gzhan dag tu'ang rang gi lus la rmongs pas yid kyis bdag gir byas pa bzhag pa de ltar bkag pa med/rtogs dka' ba ma yin nam/ gzugs can dang gzugs can ma yin pa rtogs pa dang rtogs pa'i bdag nyid ma yin pa dag 'gal ba'i phyir log par goms pa las yid kyis bdag gir byas pa yin no//bdag nyid skyon bcas shes nas ni/ /gzhan la yang / yon tan rgya mtshor shes byas nas/ /bdag 'dzin yongs su dor ba dang / /gzhan blang ba ni bsgom par bya/ /ji ltar na gzhan dag bdag nyid du blang ba yin zhe na/ ji ltar lag pa la sogs pa/ / zhes bya ba la sogs pa smos te/ tshigs su bcad pa gsum po dag gi don khong du chud par sla'o/ /bdag bsrung ba ni bdag sbed par 'dod pa'o/ /byin gyis brlab par mdzad pa de bas te/ goms pa'i phyir mgon po spyan ras gzigs/ /'gro la thugs rjes mnga' bas so/ / ci zhig byin gyis brlab par mdzad ce na/ /spyan ras gzigs zhes bya ba de'i rang gi mtshan yang ste/ re zhig sems lta smos kyang ci dgos zhes bya ba ni yang gi sgra'i don yin no/ /ci'i phyir byin gyis brlab ce na/ 'khor gyi 'jigs pa ste/ spobs pa med pa de las 'jigs pa ni 'khor gyis 'jigs pa'o//'ang gi sgras ni skye bo gzhan gyis yang 'jigs pa'i sdug bsngal bskyab pa'i phyir te/ 'phags pa sdong po bkod pa'i mdo la sogs pa dag las ji skad bshad pa lta bu'o/ /gang gi phyir/ de bzhin 'gro la bsrung sems dang / / snying rje'i sems ni goms par byas/ sems de ni dka' bas byed cing grub pa yin pa de lta na dka' bar byed pa yin no zhe na/ dka' las phyir ldog mi bya ste/ /zhes bya ba la sogs pa smos te/ 'di ltar/ mdza' bar goms pa'i mthu yis ni/ /gang gi ming ste/ sgra thos pa 'am 'jigs pa yang /de nyid med na'ang mi dgar 'gyur ro/ /dga' bar spyod pa 'di med par yang bdag dang gzhan bskyab pa yod pa ma yin no zhes bstan pa'i phyir/ gang zhig bdag dang gzhan rnams ni zhes bya ba la sogs pa smos te/ byang chub dam pa sgrub par byed pa nyid kyi phyir ro//gsang ba ni dman pa dag las sba bar bya ba nyid yin pa'i phyir ro/ /ji ltar bdag skyon dang bcas pa nyid yin par shes nas spang bar bya zhe na/ bdag lus gang la zhes bya ba la sogs pa smos te/ gang la 'jigs pa de la 'jigs gnas chung la ste/tsher ma la sogs pa'i 'jigs pa la 'jigs pa skye ba/ 'jigs pa skye ba'i lus de la/ /su zhig dgra bzhin sdang mi byed/ /lus gang bkres dang skom sogs nad/ /gso ba'i cho ga byed 'dod pas/ /nya la sogs pa gsod par byed cing lam sgugs byed pa ste/ gzhan la 'tshe ba'i don du lam sgugs byed cing gnas so//brkus nas zhes bya ba ni len par byed pas so/ /pha gsod pa'i mtshams med pa'i las dang / dkon mchog gsum gyi dkor phrogs pa mtshams med pa dang nye ba gang yin pa des ni mnar med bsreg 'gyur na/ mnar med pa'i bud shing du gyur na bdag nyid kyis me tog la sogs pas mchod par byed cing gzhan dag gis gus par byed pa'o//gal te byin na zhes bya ba la sogs pa'i tshigs su bcad pa bcu gnyis ni khong du chud par sla'o/ /de ltar ni lung dang rigs pa dag gis brjes par rab tu bsgrubs nas/rang gi yid brtan par bya ba'i phyir rjes su ston pa ni/ bdag nyid gzhan la gtad bya dang / /zhes bya ba la sogs pa smos so/ /bdag gi lus la ci mthong la sogs pa zhes bya ba la sogs pa'i sgras ni rang gi don gyi sgra la sogs pa bzung ngo / /gang gi phyir de lta yin pa des na sems can gtsor byas te/sems can thams cad gtsor byas pa gang yin pa la/ mig la sogs pa dag gis mthong ba gang yin pa de dang de ni bdag gi lus la phrogs nas kyang yid brtan pas blangs nas de dang des gzhan dag la ni phan par spyod cing bya ba yin no/ / gzhan gyi don la sbyor bar byed/ /ces bya ba'i gzhung ni rtogs par sla'o/ /yang ji ltar zhe na/ dman sogs zhes bya ba la/ dman pa dang / bar ma dang / mchog la rnam rtog med pa zhes bya ba la/ rnam par rtog pa ni 'dir the tshom yin te/ the tshom med pa'i sems kyis bdag nyid kyis so//ji ltar bsgom par bya zhe na/ nga rgyal zhes bya ba la sogs pa smos te/ bdag nyid de dman pa dag las/ gzhan nyid ni bdag ma yin no zhe na/ de bzhin 'og ma dag la yang brje ba la rjes su 'brang bar bya'o/ /'di ni bstod byas zhes bya ba la sogs pa ni khong du chud par sla'o//mtho ba dang dma' ba la yang ltos pa can yin no zhes bstan pa'i phyir/ tshul khrims lta ba phongs la sogs/ /zhes bya ba la sogs pa smos te/ lta ba ni 'dir sbyin pa zhes bya ba la sogs pa'i rnam pa yod pa ni yang dag pa'i lta ba'o/ /lta ba dang tshul khrims rgud pa ni log par ltung ba nyid dang /tshul khrims 'chal pa'i 'o/ /sogs pa'i sgras ni 'tsho ba rgud pa la sogs pa gzung ngo / /nyon mongs pa'i nad kyi dbang gyur de'i phyir bdag nyid gso bya yin pas na/ ci nus bdag gis gso bya ste/ /gnod kyang de ni dang du blang / /'on te bdag 'di bya ba la sogs pa ni rtogs par sla'o//ngan 'gro gdug pa ste/ stag la sogs pa'i khar gnas pa ste/ ngan 'gro'i gdug pa'i khar gnas pa las rgyal zhing zil gyis gnon par 'dod do/ /de bzhin du dman pa dag la bdag nyid kyis bdag nyid la phrag dog dang nga rgyal bsam par bya ba yin no//bdag dang mnyam par bltas nas ni/ /de yis lhag par bya ba'i phyir/ /'di ltar ci zhig ltar byas nas/ /bdag gis rnyed dang bkur sti ni/ /gzhan dang lhan cig rtsod pa yis kyang nges par bsgrub/ /de bzhin lus dang ngag gi rtsod pa yang yid sngon du song ba can yin no zhes de ltar bsam par bya'o//'on te bdag ni zhes bya ba la sogs pa la/ 'gro ba kun la ji ltar yon tan gsal bar bsgrags pas te/ /'jig rten thams cad la 'di'i yon tan de dag gsal bar sus kyang thos par mi 'gyur zhes bya'o/ /'on kyang gsang bar bya'o//'jig rten yang zhes bya ba'i gzhung ni gal te bdag gi yon tan gsal bar mi 'gyur na sus kyang thos par mi 'gyur te/ don med pa yin pas yon tan gsal bar mi 'gyur ro zhes bya ba'i tha tshig go/ /mi 'gyur zhes bya ba de ni rnam par dbye bas bsgyur nas gzhan dag la sbyar bar bya ste/re zhig med pa gsal bar sus kyang thos par mi 'gyur bar bya'o/ /bdag gi skyon yang sba bya zhing / /ji ltar gsal bar mi 'gyur ba de ltar ro/ /bdag ni mchod 'gyur 'di la min/ /yun ring zhes bya ba ni dus ring po'o/ / ngag gi rtsod pa ni 'gro ba kun gyi zhes bya ba la sogs pa smos so/ /ji ltar bdag gis rtsod pa yin pa de ltar bstan nas/ de bzhin du lus kyi rtsod pa ni/ 'di las bdag gis zhes bya ba la sogs pa ste/ khong du chud par sla'o/ /rtsod pa ni brdzun pa nyid ni/ yid khyod rang don byed 'dod pas//zhes bya ba la sogs pa smos te/ rang gi don byed 'dod pa ni shes par byed 'dod pa'i sdug bsngal 'ba' zhig ni/ zhes bya ba ni de nyid kyis kho bos de ltar gnod par byas pa yin no/ /de ltar nges par zhes bya ba ni rang gi don bzhin du gzhan dag gi don la ste/bdag dang gzhan brje ba la yang ngo / /rtsod pa la sogs pa spong ba ni rnam pas bdag gi don nyid ma yin pa yin nam zhe na/ de'i phyir thub pa'i bka' ni zhes bya ba la sogs pa smos te/ de'i yon tan ni gzhan gyi don la 'jug pa'i yon tan bdag dang gzhan brje ba'i yon tan las so//phyis zhes bya ba ni byang chub sems dpa'i sa'am/ sangs rgyas kyi sa la'o/ /mi slu ba'i bden pa 'di zhes bya ba ni bdag dang gzhan brje bar byed 'dod pa'o/ /gal te sngon byas par gyur na ni/ sangs rgyas dang 'brel pa'i phun sum bde min pa/ 'di 'dra gnas skabs srid mi 'gyur/ /gzhan gyi don la chags pa'o/ /'on kyang sangs rgyas nyid kyi bde ba phun sum tshogs pa'i bde ba dang rang dang gzhan gyi don du yang dag par gyur na/ kye yid khyod ji ltar de mi byed/ /de bas 'di ltar gzhan dag gi /zhes bya ba la sogs pa smos te/tshigs su bcad pa de dag ni rtogs par sla'o/ /mchog dang bar ma la bltas nas/ /gzhan gyi grags pa lhag brjod pas/ /zhes bya ba ni gzhan gyi grags pa lhag par brjod pa yis/ /bdag grags dri ma can du gyis/ /de ci'i phyir zhe na/ de dag ni thos pa la sogs pa'i yon tan dang ldan pa'i phyir ro//de dag mnyam pa ma yin no zhes bstan pa'i phyir/ 'di ni skyon can rang bzhin gyis/ /zhes bya ba la sogs pa smos te/ so so'i skye bo'i yon tan ni phal cher rgyun chad pa nyid kyi phyir glo bur ba yin no/ /glo bur ba'i yon tan de dag gi cha ste/phyogs gcig gis bdag la khyod kyis mi bstod do/ /so so skye bo ni skyon gyi rang bzhin yin pas na/ 'di ni skyon can rang bzhin no/ /yon tan gang dag gzhan la yod do zhes bstan pa'i phyir/ 'di'i yon tan ci nas kyang / /zhes bya ba la sogs pa smos so//gnod byas ni sdug bsngal bar byas pa'o/ /gnod de ste/ sdug bsngal bdag nyid la ni 'bab par gyis/ /sems can gyi don ni rgyu mtshan no/ /ji ltar gzhol bar bya zhe na/ /bag ma sar pa'i tshul bzhin du/ /zhes bya ba la sogs pa smos te//ngo tsha ni 'dzem zhing bag 'khums pa'o/ /ji lta zhe na/ 'di ni gnya' grag 'gyur tshul du/ /shed bskyed par ni mi bya'o/ /'di ltar bya ste/ khyod kyis de ltar gnyen po'i phyogs kyis bdag dbang du gyur par gzhag par bya'o/ /ji skad smras nas she na/ 'on te de ltar brtags kyang ni//zhes bya ba smos te/ kye gal te sems khyod de ltar mi byed na/ /khyod la nyes pa kun bsten pas/ /khyod ni tshar gcad bya bar zad/ /ces pa ni rtogs par sla'o/ /mi nus pa ni bsgrub par dka' ba'o/ /nyon mongs pa ni dub pa'o/ / bsam pa nyams pa ni bsam pa chad pa'o/ /re thag chad pa ni 'dod pa med pa ste/ nus pa dang mi nus pa'i dngos po thams cad do/ /de yi phun tshogs ma spyad pa/ /zhes bya ba ni/ phun sum tshogs pa lhag par gyur pa'o/ /lus kyi zhes bya ba ni sems dang bcas pa'i ste/ / gzhan gyi 'dod pa 'phel bar mi rung ba'i phyir ro/ /dngos po nus pa bzang po la ji ltar re thag chad par 'gyur zhe na/ gang zhig ces bya ba la sogs pa smos te/ de ni dngos po bzang po yin/ /gang gi tshe zhe na/ gang zhig yid 'ong zhes bya ba yid du 'ong ba yul du byas nas mi 'jigs pa'o//ting nge 'dzin ni 'dzin pa don med par don med pa'i rgyu nyid yin pa'i phyir bzang po nyid yin pas so/ /nus pa'i dngos po bzang po gzhan dag la 'dzin pa'am zhen par mi 'gyur na yang rang bzhin gyi lus la yang ci'i phyir mi 'dzin zhe na/ tha mar thal ba'i zhes bya ba la sogs pa smos te/lus tshig pa de rlung la sogs pas tha mar thal ba'i mthar gtugs shing bcom par gyur pa de nyid yang srid par mi 'byung ba de la de skad ces bya'o/ /gzhan gyis bskyod bya ba ni spyis so/ /'dir gson po la kun nas 'dzin par rigs sam zhe na/mi g.yo phan tshun zhes bya ba la sogs pa smos so/ /de ltar yang 'di la bdag ces bya ba zhen pa'i ngar 'dzin pa ni thams cad du don med pa'i rgyu yin no zhes bstan pa'i phyir/ ci'i phyir na 'khrul 'khor 'di zhes bya ba la sogs pa smos so/ /kyi hud ces bya ba ni skye bo ste/nga rgyal sel mi byed/ 'on kyang rang gi sa bon gyi rgyun rgyun chad pas bsal bar bya'o/ /'dir ji ltar na 'dzin pa don med pa'i rgyu yin zhe na/ lus kyi kha ta byas pa yis/ /zhes bya ba la sogs pa smos te/ phyogs 'dzin pa med na yang rlung la sogs pa 'khrugs pas khro bar 'gyur ro zhe na/rjes su chags dang khong khro ba/ /zhes bya ba la sogs pa smos so/ /'di la rjes su chags pa dang khong khro ba de dag ci zhig bya ste/ las kyi rlung la sogs pa 'khrugs pa yin no zhes bya bar dgongs so/ /de ltar bdag gis zhes bya ba ni bdag gi lus 'di'i don du'o//skye bo gang la rjes su chags pa dang khong khro ba byed na yang 'di la byas pa yin no zhe na/ gang zhig smod pas khro ba dang zhes bya ba la sogs pa smos te/ khong du chud par sla'o/ /de ltar bdag dang gzhan brje ba bya ba nan tan gyi rnam pa dper byas pa/de bas bdag gis dper byas pa'ang / /zhes bya ba la sogs pa mjug sdud par byed de/ gang phyir de ltar yin par rgyu/ /de bas byis pa'i spyod pas chog /bdag gis mkhas pa'i rjes bsnyegs te/ /rjes su 'jug par bya ste/ de'i spyod pa'i rjes su 'jug pa'i phyir ro//ci zhig byas nas she na/ sngar bstan pa'i/ bag yod gtam ni dran byas nas/ /gnyid dang rmugs pa bzlog par bya/ /gnyid ni lus dang sems las su mi rung ba yin la/ rmugs pa ni sems blong ba yin te/ de dag bzlog pa ste/ mkhas pa'i rjes su 'brang ba yin no//gdams ngag med cing gnyid dang rmugs pa yod na bsgom nus par mi 'gyur ro/ /de nyid kyi phyir bcom ldan 'das kyis byang chub ni dge ba'i bshes gnyen la rag lus pa yin no zhes gsungs so/ /de ltar bsam gtan gyi sbyor ba rnam pa gsum gyi rnam pa dper byas pa/de bas sgrib pa bsal ba'i phyir/ /zhes bya ba la sogs pa mjug sdud par byed de/ sgrib pa de nyon mongs pa'i sgrib pa dang / shes bya'i sgrib pa bsal ba'i phyir/ /log pa'i lam las sems blan te/ /tshul bzhin yid la byed pa'i zhags pas drang zhing dran pa'i thag pas kun nas dam par btags la/yang dag dmigs la rtag par yang / /rgyun mi 'chad par bdag nyid mnyam par gzhag par bya/ mnyam par gzhag pa la de kho na nyid kyi blo 'byung zhing des sgrib pa rnams spong bar 'gyur ro/ /byang chub sems dpa'i spyod pa la 'jug pa'i legs par sbyar ba las bsam gtan gyi pha rol tu phyin pa bstan pa ste le'u brgyad pa'o// //mnyam par 'jog pa las de kho na nyid kyi blo skye bar 'gyur bas de'i rjes thogs la shes rab bstan par bya ba'i phyir/ bsngogs zhes bya ba la sogs pa smos te/ byang chub tu sems bskyed pa'i phan yon dang /bde bar gshegs pa la sogs pa mchod pa'i don du/ sbyin pa la sogs rgyur bsngogs pa'i/ /tshogs 'di dag thams cad ni shes rab kyi pha rol tu phyin pa'i don 'dir bshad do/ /ci'i phyir zhe na/ phun sum tshogs pa thams cad kyi kyi gzhi yin pa'i phyir ro//yang na shes rab ni bla na med pa'i byang chub yin la/ de'i don du bskyed par bya'o zhes gsungs so/ /gsungs zhes bya ba ni byang chub 'dod pa'i don du gnyer ba la ni go rims 'di nyid kyis yin gyi gzhan ma yin no zhes nges pa bskyed par bya ba'i phyir/yang dang yang du bka' stsal pa'o/ /su zhig gis gsungs she na/ thub pas so/ /de yang 'di ltar byang chub kyi sems kyi phan yon rtogs nas de dag yang dag par blang ba la sogs pa'i bsod nams kyis skye ba brgyud pa thams cad du bde ba dang ldan par 'gyur la/bde bar 'gyur ba'i sems ni mnyam par 'jog par 'gyur la/ bsam gtan la mnyam par bzhag pa de las ni de kho na nyid kyi blo skye bar 'gyur ba dang / gzhan yang sangs rgyas la sogs pa dang phrad par gyur pa la/ gdams ngag 'thob par 'gyur ba ni thos pa'i rang bzhin can/de'i rjes la ni bsam pa'i rang bzhin no/ /de nas mos pas spyod pa'i sa la sbyangs pa ni bsgom pa'i rang bzhin la/ de'i rjes la ni sa dang po thob ste/ chos kyi dbyings kun tu 'gro ba rtogs pa na mthong bas spang bar bya ba'i nyon mongs pa ma lus pa spong bar byed mod kyi/de 'bras bu mngon sum du ni mi byed de/ 'dir byams pa'i bya ba dang / sa dang 'dra ba'i smon lam chen po gnyis kyi yon tan mngon par bsgrubs te gnas so/ /de yan chad kyis gzhan gyis ni sa la bsgribs pa'i bsgom pas spang bar bya ba rnams ma lus par spangs pa dang / stobs dang / mi 'jigs pa la sogs pa'i yon tan ma lus pa yongs su rdzogs pa'i mtshan nyid can bla na med pa yang dag par rdzogs pa'i byang chub tu mngon par rdzogs par sangs rgyas pa na/ nyon mongs pa'i nyes pa bag chags dang bcas pa ma lus par zad pas mya ngan las 'das pa yin yang sngon gyi smon lam dang thugs rje chen po la sogs pa'i 'phen shugs kyis sems can gyi don ma lus pa la dbang thob pa nyid kyis yongs su mya ngan las mi 'da' ste/gang gi phyir de med pa gzhan rnams kyis sdug bsngal zad pa'i mya ngan las 'das par mi 'gyur ro/ /de bas na de kho na nyid kyi ye shes kyi bdag nyid can lam gyi bden pa dang /de'i rgyur gyur pa thos pa dang / bsam pa dang bsgom pa rnam pa gsum gyis shes rab bskyed par bya'o/ /de yang bzod bya thos pa btsal bar bya/ /de nas nags su gnas par bya/ /mnyam par gzhag la brtson bya zhing / / mi sdug la sogs bsgom par bya/ /zhes bya ba 'di ni las dang po pa rnams kyis tshe gcig la bya ba'i rim pa'i dbang du byas nas bshad pa yin no/ /de bas na de yang shes rab bskyed pas dam pa rnams dang phrad cing gdams ngag thos pa la sogs pa ni de'i rgyu yin no/ /rgyu ci'i phyir bskyed par bya zhe na/sdug bsngal te nye bar len pa'i phung po lnga'i bdag nyid can ni de'i rgyu ma zad par mi 'gyur la/ kun 'byung 'gog par 'gyur na ni mya ngan las 'das pa yin te/ phung po lhag ma dang bcas pa dang / lhag ma med pa dang / gnas pa dang mi gnas pa'i mya ngan las 'das pa thob pas/de 'dod pa rnams kyis 'di ltar bden pa bzhir gsungs pas gtso bo yang shes rab yin no/ /yang mdor bsdus nas ni shes rab bsngogs pa dang bcas pa gang yin pa de thams cad ni kun rdzob dang don dam pa zhes bya ba bden pa gnyis su 'dod pa de 'dir de rnams ni de'i khongs su chud pa yin no//yang na shes rab ni bden pa rnams rnam par 'byed pa yin te/ sangs rgyas rnams kyis chos bstan pa/ /bden pa gnyis la yang dag brten/ /ces bshad pa yin no/ /de na 'dir bden pa gnyis kyi rang bzhin bshad pa'i phyir/ don dam dang ni zhes bya ba la sogs pa smos te/'dir de zhes bya ba'i sgra ni thams cad pa'i ming yin yang shin tu lkog tu gyur pa dngos po rnams dbyer mi phyed pa'i rang bzhin la bya bar bshad la/ de nyid ni don dam pa ste/ de kho na nyid yin gyi ltos pa tsam gyi de kho na nyid ni btags pa tsam du zad pa ma yin te/ rtog pa'i yul yin pa'i phyir ro//de gzhan yang rnam pa dang bcas pa dang / rnam pa med pa'i mngon sum la sogs pa'i blo ni kun rdzob ces bya ste/ 'dis don dam pa thob pa la sgrib pa'i phyir ro/ /gang 'di yon tan dang nyes pa 'phel ba dang 'bri bar byed pa'i mthar thug par byed pa'i rnal 'byor pa rang rig pa'i mngon sum de yang skad cig ma re re zhing gzhan dang gzhan yin gyi/de nyid ma yin pa de yang don dam pa yin te/ de bzhin nyid 'di skad cig min/ /zhes bya ba 'og nas bshad pa'i phyir ro/ /de bas de yang 'jig rten las 'das pa'i de kho na nyid bla na med pa rtogs par byed pa'i kun rdzob yin te/mthong ba med pa nyid de kho na mthong ba'i bla na med pa'i lam gyi bden pa yin no/ /bden bzhi rtogs par byed pa'i kun rdzob kyang lam gyi bden pa yin te/ 'jig rten pa'i lam sogs la ltos pa yin pa'i phyir ro/ /de yang / 'jig rten la ltos de nyid mthong //zhes 'og nas ji skad bshad pa lta bu'o/ /de yang 'jig rten pas 'jig rten no/ /'dir ni blo'i yul gtso bor byas par sems can la bya'o/ /rnam gnyis mthong ba ni 'jig rten tha mal pa dang / rnal 'byor pa'o/ /rnal 'byor pa zhes bya ba ni zhi gnas dang lhag mthong zung du 'brel par 'jug pa dran pa'i thag pas btags pa dang ldan pa'i ni rnal 'byor pa ste/ting nge 'dzin yin te/ de gang la yod pa ni rnal 'byor pa'o/ /tha mal pa ni rnal 'byor pa las phyi rol du gyur pa'o/ /de la de ltar rnam par gnas pa'i 'jig rten la rnal 'byor pas phal pa sun 'byin pa ni gang mi gtsang ba nyid yin te/dper na bum pa mi gtsang ba bug rdol can dang 'dra'o/ /mi gtsang ba ni 'dir bud med do/ /bya ba'i don ni bsgrub par bya ba'i don to/ /dpe yis zhes bya ba ni phyogs dang bcas pa'i don mtshon pa'i tshul gyis ni dpyad mi dgos pa ste/gnyi ga 'dod pa yin pa'i phyir dpyad mi dgos so/ /de la 'jig rten tha mal pa rnams ni bud med la khrus la sogs pa byas pas gtsang ba yin no zhes smra ba na rnal 'byor pa'i 'jig rten mi gtsang bar mos pa'i tshul gyis sun 'byin par byed do/ /de yang phra rab tu mthong bas sun 'byin te/cha shas dang bral ba gang yin pa de ni mi gtsang ba ma yin te blo dang 'dra'o/ /rdul phra rab ni cha shas med pa yin la de'i tshogs pa ni bud med yin pas cha shas can ni dngos po gcig tu mi 'grub ste nags dang 'dra'o/ /de yang sems tsam pas sun 'byin te/phyogs kyi cha yod pa'i phyir phra rab ni cha shas med pa ma yin te bum pa la sogs pa dang 'dra'o/ /de yang dbu ma pas sun 'byin te yod pa gang yin pa de ni de kho na nyid ma yin te sgyu ma dang 'dra'o/ /dbu ma pa'i ni bsgrub par bya ba med pa tsam yin te/ gang 'dir yod par khas len pa de yang ma btags na nyams dga' ba tsam du tha snyad la brten nas smra ste/bya ba byed pa'i phyir sgyu ma yang yod par smra ba la/ khyod nyid kyis sems gzhan sus kyang ma mthong yang yod par khas len pa dang 'dra'o/ /gzhan yang khyod kyis sems med du zin kyang gzung ba dang /'dzin pa po dang / yang dag par rig pa zhes bya ba gzhal bar bya ba dang / 'jal ba po dang / 'bras bur gnas pa med du zin kyang mthong ba lta bur byed pa dang 'dra'o/ /bum pa la sogs pa'i dngos po yang rim pa'am cig car bya ba byed par snang bas yang dag par yod pa'i phyir sgyu ma lta bur mi rigs so zhe na/dngos po rnams 'byung ba skad cig gam skad cig ma yin par skyed par byed na/ rim ma ma rim pa ma yin par byed pa med pa'i skad cig ma ma yin pa ni nam mkha'i me tog dang 'dra'o/ /gang skad cig ma yin pa de ni skad cig ma nyid kyis lan cig kyang mi sdod na/gang las ci zhig 'byung / rgyu dang 'bras bu lhan cig 'byung ba ma yin te/ ba lang gi rwa g.yas g.yon gcig gi rgyu gcig ma yin pa bzhin no/ /med pa yang de kho na nyid ma yin te/ med pa ni de la ltos pa yin na dngos po nyid du ma grub pa'i phyir ro//de ltar na blo'i khyad par zhes pa shes rab kyi bye brag gis gong ma gong mas rnal 'byor pa sun 'byin no/ /de yang gnyi ga 'dod cing kun la grags pa'i dpes bsgrub par bya bsgrub pa'i don du dpyad mi dgos shing sun 'byin par byed pa yin no/ /de lta yin du zin kyang dbu ma pa yang 'jig rten pa ltar sun 'byin du rung ngo zhe na/de'i phyir 'jig rten pa'i sa zhes bya ba smos te/ gzugs la sogs pa'i dngos po 'jig rten na mngon sum gyis mthong ba yin la/ rjes su dpag pa la sogs pas kyang dpag tu rung ba yin no/ /de bas na thams cad du rtsod pa'i gzhir gyur par srid do snyam na/sgyu ma la sogs pa'i dpe 'di la ni 'jig rten pa dang rnal 'byor pa dag phan tshun mi mthun pa'i rtsod pa yod pa ma yin no/ /de bas na dpe 'dis ni gzugs la sogs pa tshogs pa tsam la snang ba'i rgyu slu ba'i rang bzhin yin pa'i phyir sgyu ma yin no//gzugs la sogs pa rang gi mtshan nyid mngon sum la sogs pa'i tshad mas grub tu zin na ji ltar na yang dag pa nyid ma yin zhe na/ de'i phyir gzugs sogs zhes bya ba la sogs pa'i sgras ni tshor ba dang / 'du shes dang / 'du byed dang / rnam par shes pa la sogs pa bsdu'o/ /de la gzugs ni dbang po lnga po mig dang / rna ba dang / sna dang / lce dang lus zhes bya ste/ de dag ni rang rang gi rnam par shes pa'i tshogs las rjes su dpag par bya ba yin du zin kyang mngon sum gyi rgyu yin pa'i phyir nye bar btags pas mngon sum zhes bshad do//de bzhin du yul ni lnga ste/ gzugs dang / sgra dang / dri dang / ro dang / reg bya ste/ mngon sum du bcad par bya ba yin pas na mngon sum mo/ /tshor ba la sogs pa ni sems dang sems las byung bas thams cad bdag nyid kyi rang rig pa'i mngon sum yin pa de nyid ni gtso bo yin no//yang gzugs la sogs pa mngon sum yin pas sngon po la sogs pa'i dmigs pa nges pa bcas pas sngon po la sogs pa'i shes pa dang khyad par med pas mngon sum ni gtso bo yin no/ /de bas na rab tu grags zhes smos te/ blo zhes bya ba'i tha tshig go/ /de yang kun rdzob tu brdzun pa'i snang ba tsam yin te/de'i phyir tshad mas min zhes bya ba smos te/ slu ba med pa ma yin no zhes bya ba'i tha tshig go/ /ci'i phyir gzugs la sogs pa rab tu grags su zin kyang brdzun yin zhe na/ de'i phyir de ni mi gtsang zhes bya ba la sogs pa smos te/ /mi gtsang la sogs zhes bya ba ni mi gtsang ba dang /mi rtag pa dang / sdug bsngal ba dang / bdag med pa yin la/ gtsang sogs grags pa bzhin zhes bya ba gtsang ba dang / bde ba dang / bdag yod par grags pa bzhin du gzugs la sogs pa mngon sum du grags pa de ni brdzun yin te slu ba yin no/ / de ltar na gzugs la sogs pa'i dngos po med pa rnams la 'jig rten mgon po sangs rgyas bcom ldan 'das kyis skad cig ma la sogs par ci'i phyir ston par mdzad ce na/ de'i phyir 'jig rten zhes bya ba la sogs pa smos te/ thar pa 'dod pa'i 'jig rten pa rnams de kho na nyid la 'dir 'dzud cing gzhug par bya ba'i phyir ro//yang zhes bya ba'i don ni yongs su smin par bya ba'i don du yang dngos po rnams skad cig mar mgon pos bstan par mdzad pa yin gyi yang dag par ni ma yin no/ /de lta yin na ni kun rdzob 'dis don dam pa dang / don gyi shugs kyis 'gal bar 'gyur ro zhe na/gang du tha dad pa'i blo gzhan sel bar byed pa'i yul de ni kun rdzob kyi bden pa yin la/ don dam pa'i bden pa de las gzhan du gyur pa yin pas skad cig ma yang de bzhin nyid dam/ yang dag pa nyid du rung ste/ cha shas med pa'i phyir bdag med pa dang 'dra'o//ci'i phyir kun rdzob tu mi 'gyur zhe na/ rnal 'byor kun rdzob nyes med de/ /zhes bya ba smos te/ skye ba dang 'jig pa gnyi ga de kho na nyid kyi blos brtags pa na rang bzhin med pa'i phyir skad cig ma dang / bdag med pa la sogs pa'i blo yod pa ma yin la/ gzhan du na skad cig ma la sogs pa rnal 'byor pa'i blos mthong ba ni mig yor tsam du zad do//de'i phyir rnal 'byor pa'i kun rdzob ni don dam par yang 'gyur bas skad cig ma la sogs pa dang 'gal ba'i nyes pa med do/ /'o na de nyid mthong ba zhes ci'i phyir zhe na/ de yang 'jig rten la ltos zhes bya ba tha mal pa'i 'jig rten pa la ltos nas rnal 'byor pa de kho na nyid mthong ba zhes bshad do//gzhan du na gal te tha mal pa nyid rnal 'byor pa'i 'jig rten la ltos nas de kho na nyid mthong bar 'gyur na de'i tshe tha mal pa'i 'jig rten pas 'gal bar byas pas rnal 'byor pa'i 'jig rten las 'gal bar 'gyur te/mi gtsang ba'i bud med rtogs pas mi gtsang ba la sogs par rtogs pa'i tshe 'gal bar byas par 'gyur na/ de lta bur ni mi 'gyur ro/ /de bas na de ni 'jig rten pa la ltos nas de nyid mthong ba yin no/ /de'i phyir rnal 'byor pa'i 'jig rten gyis tha mal pa'i 'jig rten sun 'byin par byed do//de kho na nyid mthong ba la ltos pa yin pas gong ma gong ma'i khyad par gyis rnal 'byor pa yang sun 'byin no zhes bya bar gnas so/ /ci ste 'dir rnal 'byor pa dang 'jig rten pa gnyis kyis thams cad sgyu ma lta bur brtags na de lta na ni rgyal ba yang sgyu ma dang mtshungs par 'gyur la/des na sgyu ma dang 'dra zhing brdzun yin pa'i rgyal ba la mchod pa la sogs pa byas pa la bsod nams ji ltar skyed par 'gyur zhe na/ dbu ma pas sgyu ma lta bu zhes bya ba la sogs pa smos te/ ji ltar rgyal ba yod du zin kyang mchod pa la sogs pa las bsod nams ji ltar 'byung /de ni ji ltar yod du zin kyang 'di ni rkyen tsam yin pa de bzhin du/ sgyu ma tsam yin yang bsod nams skye bar mtshungs so zhes bya ba'i don to/ /gal te zhes bya ba la sogs pa ni gzhan gyi dri ba'o/ /ci srid ces bya ba la sogs pa ni dbu ma pa'i lan yin no//de ltar yin du chug na yang sems can rnams yun ring du gnas pa yin pas yang dag par yod pa yin no zhe na/ de'i phyir rgyun ring ba tsam gyis zhes bya ba la sogs pa smos te/ rgyun ring zhes bya ba thog ma med pa'i dus dang 'brel pa'i skad cig ma gcig tu brgyud pa'i rgyun de ni yang dag par yod pa ma yin te/rgyun tsam nyid smos pa'i phyir ro/ /gnas pa'i rgyun skad cig ma ni sgyu ma yang yin no zhes bya bar yang dgongs so/ /de bas na sgyu ma ni rgyun yun rings su gnas su zin kyang brdzun pa yin par 'dra'o/ / gal te de ltar 'dra na ni sgyu ma'i skyes bu bsad sogs zhes smos pas/ de'i rdzas dbrog pa la sogs pa byas na sdig par ci'i phyir mi 'gyur zhe na/ de'i phyir sems med phyir na zhes bya ba smos te/ sgyu ma'i sems ni bsod nams dang bsod nams ma yin pa gnyi ga'i rgyu yin na/ sgyu ma'i skyes bu la sgyu ma'i sems yod pa ma yin no/ /des na gal te khyed kyi sgyu ma'i skyes bu de dang 'dra na ni bsod nams dang bsod nams ma yin pa 'byung ba de nyid srid na de yin no/ /ci'i phyir sgyu ma'i skyes bu la sems med ce na/ sngags la sogs pa zhes bya ba la sogs pa smos te/ sogs pa'i sgras ni rnal 'byor gyi mthu la sogs pa la yang sems bskyed pa'i mthu yod pa ma yin no/ /bde bar gshegs pa'i sprul pa'i sgyu ma ni sems dang bcas pa yin du zin kyang bsam gyis mi khyab pa yin no/ /de ltar na ni sems can dang sgyu ma 'dra ba ma yin te/ sems dang ldan pa'i phyir ro zhe na/de'i phyir sna tshogs zhes bya ba smos te/ gang gi phyir sgyu ma'i rkyen gyi dngos po gcig las 'bras bu dngos po thams cad bskyed par nus pa yod pa ni gang yang med do/ /de bas sgyu ma la de dag kyang rkyen sna tshogs pa las byung ba'i phyir rnam pa sna tshogs su gnas pa yin no//shes rab kyi pha rol tu phyin pa las don dam par chos thams cad mya ngan las 'das pa yin par gsungs la/ de rnams kun rdzob tu ni 'khor bar 'dod pas/ de ltar na sangs rgyas kyang 'khor bar thal bar 'gyur bas/ de nyid kyi phyir gal te zhes bya ba la sogs pa'i tshigs su bcad pas brgal ba yin no//'dir de'i lan ni rkyen rnams zhes bya ba la sogs pa'i tshigs su bcad pa yin te/ so so'i skye bo don dam par mya ngan las 'das pa'i rang bzhin yin yang bag chags kyi rgyun ma chad pas kun rdzob tu 'khor ba yin gyi/bcom ldan 'das kyis ni bag chags zhes bya ba'i rkyen rgyun bcad nas kun rdzob tu yang 'byung bar mi 'gyur ro/ /yang zhes bya ba'i sgras ni don dam par lta smos kyang ci dgos zhes bya ba'i don to/ /yang na sangs rgyas bcom ldan 'das kyis bag chags ma lus pa spangs pa'i phyir/'jig rten gyi khams de dang der 'byung bar ston cing / rdzu 'phrul dang cho 'phrul la sogs pa'i khyad par de dang der ston par mdzad cing sems can sna tshogs pa'i bsam pa thams cad yongs su rdzogs par mdzad pa ni 'khor ba ma yin te/ sngon gyi smon lam gyi 'phen pa'i shugs kyis 'byung ba yin gyi/rkyen ma spangs par 'byung ba ma yin pas 'gal bar 'gyur ro zhes ston to/ /'dir sems tsam pa na re gang 'di bum pa dang snam bu la sogs pa'i mtshan nyid can gyis sgyu ma de dmigs pa med na ni sgyu ma nyid du 'khrul pa yang mi 'thad la/'khrul par gnas pa'i sems kyis de rtogs pa yin no zhes smra bar nus pa yang ma yin te/ khyed dbu ma pa'i 'khrul pa ni sems nyid med par 'grub pa'i phyir ro/ /de bas na gang 'di skad du/ gang tshe 'khrul pa'ang med na zhes bya ba smos te/de'i lan ni gang tshe zhes bya ba la sogs pa smos pa yin te/ gang khyed kyi bum pa dang snam bu la sogs pa'i mtshan nyid can du bshad pa'i sgyu ma yang yod pa ma yin te/ gal te de yod par khas len na thams cad yod par smra ba'i gzhung dang 'dra bar thal bar 'gyur ro//de bas na sgyu ma de yod pa ji ltar dmigs/ de'i phyir sems tsam pa'i ltar sgyu ma med pa dag ni dmigs pa ji ltar 'gyur/ kho bo cag dbu ma pa rnams kyi ni med pa'i mtshan nyid can gyis 'khrul pa yang dmigs par byar rung ba yin no/ /gal te sems tsam pa dag sems nyid sgyu ma'i rnam pa de yin mod ces zer na/de lta yin du chug na gal te sgyu ma 'am gzhan pa'i don khyad par can yin yang yang dag par yod na de ltar rung na/ skye ba dang bral ba'i sems nyid sgyu ma yin na de'i tshe gang gis gang la dmigs te mthong bar 'gyur te/ sus kyang ci yang mi mthong ngo //de yang 'jig rten gyi ni mgon po zhes bya ba la sogs pa smos pa yin te/ ci zhig gsungs she na/ sems byed pa pos de las gzhan pa'i sems gnyis pa mi mthong ngo zhes gsungs so/ /de ni 'dir lung yin la/ rigs pa ni ral gri'i so ni zhes bya ba la sogs pa smos pa yin te/gang zhig bdag nyid gang yin pa de ni des gcod par mi byed do/ /dper na ral gri'i so rang gis rang la mi gcod pa dang 'dra bar/ yid kyang de bzhin te rang gis rang la dmigs par mi nus te/ rang la rang byed pa 'gal ba'i phyir ro/ / de bas na nye bar mi dmigs pa'i sems de ji ltar yod pa yin/ ral gri gzhan gyis mi chod pa dang 'dra bar shes pa gzhan gyis gzhan shes pa med do/ /rang rig pa med na rig par mi rung ba'i phyir ro/ /'dir 'khrul pa'i dbang gis dogs pa gzhan skye ba gsal ba'i phyir/ bdag gis zhes bya ba la sogs pa smos te/de lta yin na yang yid ni rang nyid rang la rig par rung ngo / /dper na mar me rang la rang gsal bar snang ba dang 'dra ba de bzhin du/ sems kyang rang la rang snang du rung ba yin no zhe na/ 'dir dpe ma grub par bstan pa'i phyir/ mar me zhes bya ba la sogs pa smos te/mun pas bsgribs pa'i bum pa la sogs pa ni gsal bar byed du rung gi/ mar me ni bdag nyid bum pa ltar mun pas bsgribs pa med pas gsal bar byed pa ma yin te/ gang gi rang bzhin gang yin pa de ni de'i rang bzhin gyi bdag nyid rgyur 'gyur ro zhes bya ba'i tshig ni rigs pa ma yin pas gsog yin no//de yang 'di ltar de'i rang bzhin ma yin pa rang bzhin gzhan dang phrad nas de'i rang bzhin du 'gyur ba ni rigs te/ dper na shel de dang mi mthun pa'i sas sngon po de dang phrad na de sngon por 'gyur bar rung gi /sngon po nyid gzhan la ltos nas rang la sngon por mi byed do//de ltar bum pa la sogs pa gzhan dag ni mar me la sogs pa la ltos nas snang ba mar me la sogs pa gzhan 'ga' ni snang ba gzhan la mi ltos par snang ba bdag nyid snang bar byed do zhes bya ba ni rigs so/ /sngon po nyid sngon po ma yin na ni de shel dang 'dra bar bdag nyid sngon por byed kyi/sngon po nyid du gnas pa ni sngon por byed par mi rigs so/ /gal te mar me rang nyid kyang gsal bar mi byed la/ gzhan gyis kyang gsal bar mi byed na ni rnam pa thams cad du snang ba'i rgyun chad par 'gyur na/ de ltar mi rung bas snang ba gzhan la mi ltos pa'i phyir rang la rang gsal bar byed do zhes bshad pa yin no//de bzhin du sems kyang gzung ba dang 'dzin pa dang bral ba yin pa'i phyir rang nyid gsal bar byed pa yin no zhe na/ de'i phyir mar me zhes bya ba la sogs pa smos te/ mar me ni gsal bar byed pa yin par shes pas de ltar rtogs pa'i phyir sgro btags pa'i tshul gyis lan 'ga' zhig brjod du rung gi shes pa la ni de las gzhan pa'i shes pa po med pas de la rang gsal bar byed do zhes shes pa rgyu gang gis shes nas rjod par byed/yang blo ni gzhan gyi sems shes pas kyang ji lta ba bzhin du mi mthong bas de'i phyir sus kyang ji lta ba bzhin du mi mthong bas gsal ba'am mi gsal ba zhes brjod du rung ba ma yin no//blo ni brjod du med pa yin du zin kyang sgro btags pa tsam gyis yod par bshad pa de bden pa ma yin no/ /de'i phyir gsal lam mi gsal zhes bya ba la sogs pa smos te/sus kyang zhes bya ba la sogs pas sangs rgyas kyis kyang ma gzigs pa ste/ 'od srungs sems ni sangs rgyas thams cad kyis ma gzigs mi gzigs gzigs par mi 'gyur ro zhes bya ba la sogs pa ji skad bshad pa lta bu'o//de bas na mo gsham gyi bu'i tshul spyod dang 'dra bar gsal ba dang mi gsal ba la sogs pa ji skad du brjod du zin kyang don med brdzun yin no/ /de ltar rang rig pa rnam par bsal ba na rgol ba rtsod pa la brtson pas brgal ba ni gal te zhes bya ba la sogs pa yin te/gzhan dag gi rnam par shes pas rjes su myong bar rab tu gsal bar gyur pa ni dran pa'i rgyu yin no/ /gal te de ltar yin na sems gzhan gyi rjes su myong ba'i don skyes bus ji ltar dran par 'gyur du rung zhes dris pa dang / gzhan dag gis 'brel pa las zhes bya ba smos te/rgyu dang 'bras bu'i mtshan nyid can gcig nas gcig tu brgyud pa la sogs zhes bya ba'i tha tshig go/ /'di la byi ba'i dug ji ltar dran par 'gyur zhes dri bar sbyar te/ de yang dbyar gyi tshe byi ba dug dang bcas par 'gyur la/ de dag yod par rtogs pa na sbrul gyi mche bas zin pa'i rjes thogs la sbrul ni ma mthong bar gyur pa dang lus la gnod pa'i 'gyur ba mthong bas byi ba'i dug med bzhin du de'i dug gis zin pa'i dran pa 'byung mod kyi/sbrul gyi dug ni de las gzhan pa nyid yin no/ /de bzhin du rma'am lus kyi nad gzhan las/ byi ba'i dug gi shes pa med pa bzhin du dran pa dang 'dra bar rang rig pa med pa nyid du brjod pa rnam par shes pa'i dran pa 'byung ba yin no//yang 'di skad du bdag nyid mi 'byung mod kyi/ 'on kyang mig gi rnam par shes pa la sogs pa 'byung ba na gzugs la sogs pa'i rkyen gzhan dang ldan par snang ba'i rang bzhin can yin no zhe na/de mi rigs par bstan pa'i phyir/ rkyen gzhan zhes bya ba la sogs pa smos te/ dper na grub pa'i mig sman med par yang bum pa la sogs pa mi mthong ba dang 'dra bar rkyen nyid dang ldan pa tsam gyis shes pa yin du mi rung ngo / /de ltar na rang rig pa med par bum pa la sogs pa mthong ba yang med par thal bar 'gyur ro zhe na/de'i phyir 'di ltar zhes bya ba la sogs pa smos te/ mthong ba zhes bya ba ni 'dir mngon sum gyi tshad mas nges par byas pa'o/ /thos pa ni sgra las byung ba'o/ /shes pa ni rjes su dpag pas so/ /ji ltar mthong ba la sogs pa gang yin pa de ni 'dir dbu ma pas kyang bkag pa med kyang gzhan du tshad mas yang dag pa nyid yin pa gzhan du mi rung ste/de ci'i phyir zhe na/ 'dir mthong ba la sogs pa bden pa nyid du rtogs pa ni sdug bsngal gyi rgyur gyur pa'i gti mug yin pas de bzlog pa yin no//gal te sems las sgyu ma gzhan yang ma yin/ gzhan ma yin pa yang ma yin na/ dper ji ltar rung zhes rtog pas de'i phyir/ sems las zhes bya ba la sogs pa smos te/ gal te sgyu ma dngos po yin na ni sems las ji ltar gzhan pa ma yin te/ bum pa la sogs pa dang 'dra bar gzhan yin no//gal te mtshan min zhes pa sems las sgyu ma gzhan ma yin na ni yang dag par dngos por ma grub ste yod pa ma yin no/ /sems med du zin na sgyu ma ji ltar mthong zhes rtog pa de'i phyir/ ji ltar zhes bya ba la sogs pa smos te/ji ltar sgyu ma mi bden zhing med du zin kyang snang ba dang 'dra bar sems gzhan rang bzhin med kyang kun rdzob tu blta bar bya ba'i yul dang / lta ba por snang ba la nyes pa ci zhig yod/ 'dir sems tsam pa na re gal te dngos po la brten na ni de nyid kyis 'khor bar 'gyur la/de la ma brten na ni 'khor ba nyid nam mkha' dang 'dra bar 'gyur ro zhes rtog pas de'i phyir/ dngos po la brten nas zhes bya ba la sogs pa smos te/ don dam par dngos po med pa'i 'khor ba skye ba'i bya ba dang ldan par ji ltar 'gyur te mi 'gyur ro/ /'khor ba dngos po med kyang yang dag pa ma yin pa'i kun tu rtog pa zhes bya ba'i gzhan dbang yod do zhe na/de'i phyir grogs po zhes bya ba la sogs pa smos te/ gal te 'khor ba med kyi sems kyi rnam pa ma yin par kun tu rtog na 'di ni grogs med pa cha shas dang bral ba ma yin no//de ltar yin na ci nyes she na/ gang tshe zhes bya ba la sogs pa smos te/ gal te sems gcig pu gzung ba dang bral bar gnas pa de'i tshe 'dzin pa po yang med la/ de gnyi ga dang bral na ni sems can thams cad kyang de bzhin gshegs par 'gyur ro/ / de ltar na khyod kyi sems tsam du bstan pa des yon tan ci zhig thob ste/ btags pa tsam nyid nyon mongs pa yin pas nyon mongs pa las ldog par mi 'gyur ro zhes dgongs so/ /'di ltar gzhan dag gis dbu ma pa la dris pa ni/ sgyu ma zhes bya ba la sogs pa smos te/ khyod kyis bshad pa'i sgyu ma lta bur shes pas kyang /'dod chags la sogs pa nyon mongs pa ldog par ji ltar 'gyur te/ gang gi tshe sgyu ma'i bud med sprul pa la sgyu ma de byed pa de u0f37nyid kyang 'dod chags skye bar 'gyur bas de ltar shes su zin kyang nyon mongs pa mi ldog go/ /de ltar brgal ba'i l an gdab pa'i sgo nas nyon mongs pa spang ba'i rim pa bstan pa'i phyir/de byed ces bya ba la sogs pa smos te/ sgyu ma de'i byed pa po ni de byed pa ste/ de zhes bya ba bud med la sogs pa kun nas nyon mongs pa skye ba'i sa bon ma spangs pa las sgyu ma'i bud med de mthong ba'i dus su nyon mongs pa skye ba ni stong pa nyid kyi bag chags bsgom pa nyam chung ba nyid yin no//'o na ji ltar nyon mongs pa spong zhe na/ de'i phyir stong pa nyid ces bya ba la sogs pa smos te/ 'dir stong pa nyid ni de kho na nyid kyi ye shes so/ /de'i sa bon ni bag chags so/ /de bsgom pas ni bsgom pa shin tu goms pa skyes pa ste/de ni dngos po'i bag chags gzugs la sogs pa'i rtog pa'i sa bon spong zhing sel bar byed do/ /cung zad med ces bya ba ni dngos po med pa dag go/ /med do zhes stong pa nyid la bslab pa'i bag chags ji ltar spong bar 'gyur zhe na/ de'i phyir gang tshe zhes bya ba la sogs pa smos te/don dam par na stong pa nyid ni yod pa ma yin te/ dngos po med pa ni dngos po rnams ldog pa la ltos pa ma yin pas/ dngos po la brten zhes bya ba'i dngos po med na ni rten med pa yin na blo zhes bya ba shes pa ste/ mdun na dmigs pa med pa'i don gyis na ji ltar gnas par 'gyur te mi gnas so//de ltar na dngos po med par rtogs pa'i bag chags kyi sa bon yang tshul 'di ltar spang bar bya'o zhes bya ba'i tha tshig go/ /de ltar lhag ma dang bcas pa'i mya ngan las 'das pa bshad nas/ lhag ma med pa bstan pa'i phyir/ gang tshe zhes bya ba la sogs pa smos te/dmigs pa med pa ni yul med pa'am nye bar len pa med pa'o/ /blo ni sems so/ /rab tu zhes bya ba ni mya ngan las 'das pa'o/ /de ltar na rgyal ba'i sku ji ltar snang bas blta zhe na/ de'i phyir yid bzhin zhes bya ba la sogs pa smos te/ gdul bya ni 'gro ba rnams kyi don gyi rkyen dang smon lam gyi rgyu de gnyis ji srid yod pa de srid du/skal ba ji bzhin du 'dod pa yongs su skong bar mdzad par snang ste/ de yang yid bzhin gyi nor bu la sogs pa dang 'dra bar rtog pa mi mnga' yang re ba yongs su skong bar mdzad do/ /ji ltar na sems med du zin kyang bya ba de byed ces rtog pa de'i phyir/mkha' lding zhes bya ba la sogs pa smos te/ dper na nam mkha' lding gi dug sngags grub pa'i skyes bus mchod sdong gi ka ba bsgrubs te btsugs pa des skyes bu sbrul la sogs pa'i dug gis zin pa sel bar byed pa'i mthu yod la/ de'i grub pa po de med nas yun ring por lon na yang mchod sdong du btsugs pa'i shing gis dug sel bar nus pa yin no//de bzhin du byang chub kyi spyod pa'i rjes su mthun pa'i spyod pas snying por bya ba thams cad tshul bzhin spyod de/ byang chub kyi spyod pa yongs su rdzogs par byed pa des/ rgyal ba'i mchod sdong zhes bya ba rgyal ba'i sku sprul par gyur nas byang chub sems dpa' sems dang bcas pa 'das par gyur nas kyang gdul bya rnams dang smon lam gyi rnam pa'i shugs gnyis kyis sems can thams cad kyi don mdzad par 'gyur gyi/nyan thos ltar yongs su mya ngan las 'da' bar mi 'gyur ro//gal te mya ngan las 'das su zin kyang yid bzhin gyi nor bu dang 'dra bar 'gro ba'i don mdzad pa ni kyang zhes bya ba'i sgra'i don yin no/ /de nyid kyi phyir/ sems med ces bya ba smos te/ sangs rgyas la mchod pa byas pa'i bsod nams ni 'bras bu las 'dra ba nyid yin te/ji ltar 'dra zhes rtog na de'i phyir/ gang yang zhes bya ba la sogs pa smos te/ sangs rgyas bzhugs pa na mchod pa byas pa ci lta bar 'dir yang de dang 'dra'o zhes bya ba'i tha tshig go/ /sngar ni sgyu ma dang 'dra ba'i sems de las bsod nams skye bar bshad la/da ltar ni de med du zin kyang zhes bya ba ni 'dir khyad par ro/ /bsod nams kyi 'bras bu 'dir mtshungs pa de yang lung gi tshad ma las grub pa yin pas kun rdzob bam don dam pa gang yin yang sangs rgyas bzhugs pa la mchod pa byas pa dang 'dra bar 'bras bu dang bcas pa yin no//de ltar de kho na nyid rtogs pa de'i rim pa bshad pa na theg pa dman pa dag theg pa chen po mi bzod pas phyir rgol bar byed pa ni/ bden pa zhes bya ba la sogs pa smos pa yin te/ sdug bsngal la sogs pa'i bden pa mthong na gang zag la bdag med pa rtogs pa'i ye shes yang srid par 'gro bar byed pa'i las rnams mi byed pas mya ngan las 'das shing grol bar 'gyur gyi/stong pa nyid mthong bas yod pa bkag cing med par lta bar mi shes pa des 'bras bu ci zhig 'grub pa yod de/ ci yang med do zhes rtog pa la/ de'i khyad par chen po yod pe la khyed kyis ma shes pa yin no zhes ston te/de'i phyir gang phyir zhes bya ba la sogs pa smos te/ gang gi phyir lung yang dag pa las 'di lta bu'i stong pa nyid ma mthong bas byang chub tu ni mi 'gyur bar gsungs la/ de bas na stong pa nyid mthong ba ni don chen po yin par smra'o zhes bya ba'i tha tshig go//'on te zhes bya ba la sogs pa ni gzhan zhig la smra ba ste/ theg chen zhes bya ba la sogs pa ni theg pa yang yin la chen po yang yin pas na theg pa chen po ste/ sa bcu 'bras bu dang bcas pa de thob par byed pa'i phyir theg pa'o/ /'bras bu dang / dus dang / dmigs pa dang /bsam pa dang / 'byor pa dang / brtson 'grus dang / tshogs kyi che ba nyid yin pa'i phyir chen po ste/ thos pa la sogs pa'i rang bzhin gyi shes rab dang de ston pa'i bstan bcos sa bcu pa la sogs pa'o/ /de ni mi 'grub par gzhan smra na'o/ /khyed kyi lung ni ji ltar 'grub ces bya ba ni theg pa chen po pas dris pa'o//gang phyir 'dir ni gnyi ga'ang 'grub/ /ces bya ba ni nyan thos pa'i ste/ gnyi ga sangs rgyas pa yin pa'i phyir ro zhes bya bar dgongs so/ /dang po khyod kyi 'di mi 'grub/ /ces bya ba theg pa chen po'i tshig ste/ dang por zhes bya ba theg pa chen po med par 'tshang rgya bar mi 'gyur la/de med par khyed kyi lung grub pa ma yin no zhes pa'o/ /'dir gzhan yang rgyu gang gis zhes bya ba la sogs pas ni 'di skad ston te/ gang la de rgyu gang gis khyed kyi lung gis der sangs rgyas kyis gsungs pa yin par yid ches par 'jog na/yid ches pa theg pa chen po la yang gyis shig ces pa'o/ /'on te gnyi ga 'dod pa nyid yin pas khyed kyi lung la ni yid ches kyi/ sangs rgyas kyis gsungs pa las ni ma yin te/ sangs rgyas kyis gsungs pa las gzhan pa gnyi ga 'dod pa de la bden par khas len na rig byed la sogs pa 'ga' zhig kyang gnyi ga 'dod pa yod pas bden par 'gyur ro//'on te sangs rgyas kyis gsungs pa nyid bden mod kyi theg pa chen po rtsod pa dang bcas pa'i phyir mi 'dod do zhe na/ khyed kyi lung yang mu stegs pa rnams dang rtsod pa dang bcas pa'i phyir dor dgos so//gzhan gyi lung gzhan dag kyang dor dgos so/ /rang gi sde pa dang / gzhan 'ga' zhig dang rtsod pa dang bcas pa'i phyir ro/ /gzhan yang sangs rgyas kyi bstan pa'i rtsa ba ni dge slong nyid yin te/ dge slong gi sdom pa'i rtsa ba gzhi gang la yod pa dge slong nyid do//de nyid kyang dka' bas gnas pa ni mu stegs pa dang rtsod pa dang bcas pa'i phyir ro/ /re zhig dge slong nyid lta smos kyang ci dgos kyi/ sems dmigs pa dang bcas pa ste/ nye bar dmigs pa yod pa rnams kyis ji srid phung po'i 'dzin pa yod pa de srid kyi bar nga'o zhes kyang nga rgyal byed par 'gyur zhing /yang las dang skye ba yod la/ de ltar na mya ngan las 'das pa yang dka' bas gnas pa yin no/ /bden pa mthong bas nyon mongs pa spong ba'i phyir dka' bas gnas pa ma yin no zhes zer ba de'i phyir/ nyon mongs pa zhes bya ba la sogs pa smos te/nyon mongs pa spangs pa'i rjes thogs la yang stong pa nyid ma bsgoms par de mi 'byung ste/ dmigs pa dang bcas pa'i sems dang ldan pa la gnod pa dang bcas par snang ngo / /dper na 'phags pa maud gal gyi bu lus kyi sdug bsngal gyis gzir zhing rmongs pa'i las kyi nus pa yod par snang ba yin no//de ltar yin na yang re zhig sred pa ni srid pa'i rtsa bar gyur na de de rnams la med do zhe na/ de nges par gzung zhing dpyad pas nges par bya dgos la/ ci zhig nges par bya dgos she na/ ji tsam zhes bya ba la sogs pa smos te/ 'dir gzhan dag na re nyon mongs pa can dang /lung du ma bstan pa'i sred pa dang / 'dod pa'i khams kyi mi dge ba ni 'dir yang srid pa 'byung ba'i dbang du byas pa yin te/ de yang dga' ba'i 'dod chags dang bcas pa ni nyon mongs pa can yin na/ nyon mongs med kyang zhes ci'i phyir smra zhes 'di ltar dgongs te/gti mug kyang nyon mongs pa chen po yin pas nyon mongs pa can yin la/ de'i bag chags kyang ni kun tu rmongs pa can ma yin pa'i mi shes pa'i sems dmigs pa dang bcas pa 'di la yod par 'dod do/ /de bzhin du nyon mongs pa can ma yin pa'i sred pa la bag chags nyon mongs pa can ma yin pa yod do//de yang tshor ba yin no/ /de yang dpyad par bya ste/ nyon mongs pa can ma yin yang lhan cig byed pa'i rgyu dang phrad nas nyon mongs pa can bskyed do zhes bya ba yang zhes bya ba'i sgras ston to/ /de bas na sred 'di zhes bya ba la sogs pa smos pa yin no//rgyu rnams 'bras bu nges par skyed pa ni ma yin no zhe na/ de'i phyir dmigs pa zhes bya ba la sogs pa smos te/ gang yang rung ba der 'jog par 'gyur ro zhes bya ba ni/ sems dmigs pa dang bcas pa yin na/ srid pa'am zag pa med pa'i dbyings gang yin pa der nges par 'gyur ro//de yang ci'i phyir zhe na/ stong pa nyid ces bya ba la sogs pa smos te/ stong pa nyid rtogs pa dang bral ba'i sems de'i dngos po'i bag chags kyis bcings pa yin pa'i phyir grol bar mi 'gyur te/ slar yang skye bar 'gyur ro/ /de yang ci dang 'dra zhe na/de'i phyir 'du shes zhes bya ba la sogs pa smos te/ 'du shes ni sngon po la sogs pa mtshan mar 'dzin pa'i sems kyi 'du shes so/ /de gang la med pa de 'du shes med pa ste/ 'du shes med pa de yang yin la/ /lus dang sems kyi rnam par g.yeng ba bkag pa bskyed pas snyoms par 'jug pa yang yin pa'i phyir 'du shes med par snyoms par 'jug pa ste/de yang bsam gtan bzhi pa'i 'bras bu chen po nam zhig thob pa na srid pa la thar par 'du shes pas 'ga' zhig gis 'du shes bkag ste snyoms par 'jug par byed pa'o/ /de'i sems ni phyin ci log gi bag chags kyis bcings pa'i phyir 'du shes bkag tu zin kyang dus ji srid du snga ma'i 'phan shugs zad pa dang /lus kyi dbang po de las skye bar 'gyur ro/ /'bras bu che ba'i lha 'du shes med pa'i sems can du skye ba'i rnam par smin pa de ni mi khom pa yin no/ / des na stong pa nyid bsgom par bya'o/ /gal te khyod kyi lung sangs rgyas kyis gsungs pa'i mtshan nyid can ma yin no zhes zer na/ de'i phyir gang zhig ces bya ba la sogs pa smos te/ sangs rgyas kyi gsung yin par ci'i phyir mi 'dod de/ 'dod par bya ba yin no/ /phal cher zhes bya ba ni rnam pa thams cad du mi mnyam yang zhes bya ba'o//yang stong pa nyid la sogs pa'i phyogs 'ga' zhig mi mthun pas sangs rgyas kyis gsungs pa ma yin no zhes rtog na/ de'i phyir gal te zhes bya ba la sogs pa smos te/ theg pa chen po dang khyed kyi mdo tshig 'ga' zhig mi mthun pa mi rung ngo snyam na/khyed kyi mdo yang yang dag par ldan pa'i lung la sogs pa las stong pa nyid chen po dang mtshungs par ston pa don yod la/ de ltar mnyam pa'i tshig gis kyang theg pa chen po thams cad rgyal bas gsungs pa ci ste ma yin te/ sangs rgyas kyis gsungs pa nyid yin no//'od srungs chen po zhes bya bas ni gsung rab zab mo ma rtogs pa nyid kyi nyes pa yin no zhes ston to/ /gzhan yang stong pa nyid ma rtogs su zin kyang grol bar gdags su rung ba ni srid kyis/ de med par 'tshang rgya bar ni mi 'gyur te/de ci'i phyir chags dang zhes bya ba la sogs pa smos te/ chags dang 'jig pa gnyis de ltar mi gnas pa'i mya ngan las 'das pa thob pa 'di ni stong pa nyid du rtogs pa'i 'bras bu yin no/ /de ltar zhes bya ba la sogs pa de ni nye bar sdud pa yin no/ /'dod chags la sogs pa'i nyon mongs pa'i sgrib pa dang /shes shing khong du chud par bya ba de thams cad la 'gebs shing sgrib pa'i mi shes pa nyid ni mun pa dang 'dra bas mun pa ste/ de gnyis spang ba'i gnyen po ni stong pa yin no/ /de ltar yin na yang bdag med do zhes bya ba'i rnam pa 'di la 'jigs pas kho bo mi bsgom mo zhe na/de'i phyir sdug bsngal zhes bya ba la sogs pa smos so/ /de ltar zer ba de ci las 'jigs pa'i gzhi med do zhes bstan pa'i phyir bdag ces bya ba la sogs pa smos so/ /ci ltar na ci yang med ces rtog na/ de'i phyir so dang zhes bya ba la sogs pa smos te/bu ga dgu zhes bya ba ni mig dang / rna ba dang / sna dang / kha ste bdun dang / bshang ba dang / gci ba'i lam ste dgu'o/ /rnam shes drug ni mig dang / rna ba dang / sna dang / lce dang / lus dang / yid kyi rnam par shes pa'o/ /de ltar re zhig bad sa'i bu la sogs pa bdag dang srog las gang zag ces bya ba yod par 'dod pa sun phyung ba dang /grangs can dag kyang shes pa la bdag ces 'dogs pas de yang shes pa dang bcas pa'i skyes bu'i rang gi ngo bo yin pa las de'i 'dod pa las/ snying stobs dang / rdul dang / mun pa cha mnyam pa'i gnas skabs su rang bzhin rtag pa dang 'dres par gyur pa las chen po/de las nga rgyal/ de las sgra la sogs pa de tsam lnga 'byung la/ sgra la sogs pa'i shes pa de yang skyes bu la sgra la sogs pa gzugs brnyan gyi tshul du snang ngo zhes zer bas/ de'i phyir gal te sgra'i zhes bya ba la sogs pa smos te/gal te sgra la sogs pa'i shes pa ni sems de ni skyes bu rtag pa yin la/ sgra yang rtag par dus thams cad du 'dzin cing thos par 'gyur na/ rtag tu mi thos pas shes pa de mi rtag pa yin no zhes ston to/ /'dir gzhan dag na re sgra la sogs pa rtag tu mi gnas pas dus thams cad du mi thos pa yin no zhe na/de'i phyir gang gis zhes bya ba la sogs pa smos te/ gal te de lta yin na rgyu gang gis shes pa zhes brjod cing ming du btags pa de shes par bya ba'i yul med par ci zhig des shes par ma gyur pas shes pa ji ltar yin te mi rung ngo / /de nyid kyi phyir gal te zhes bya ba la sogs pa smos te de ni go sla'o//sgra'i shes pa de nyid sgra nye bar mi gnas pa na gzugs dang nye bas gzugs shes pa yin te/ de'i phyir yod do zhes zer na/ gal te de ltar yin na gang gi tshe gzugs shes pa de'i tshe rgyu gang gis ci ste thos par yang ma gyur/ sgra drung na med pa'i phyir ro zhe na/des na sgra'i shes pa yod pa yin no/ /med pa ma yin te de'i bdag nyid can yin pa'i phyir ro zhe na/ rgyu des na shes bya drung na med cing rgyang ring na shes pa yang med pa kho nar nges pa yin no/ /gzhan yang gang tshe zhes bya ba la sogs pa smos te/ gal te sgra'i shes pa dang / gzugs kyi shes pa gnyis skyes bu'i rnam pas gcig yin la/ gang gi gzugs shes pa de'i tshe sgra thos par yang ci'i phyir mi 'gyur/ 'on te gzugs 'dzin pa'i dus na sgra med pas ma thos pa yin no zhe na/ de lta na ni shes bya med pa'i shes pa'ang med pa kho nar 'gyur bas shes pa rtag par mi 'gyur ro//gzhan yang sgra 'dzin par byed pa'i rang bzhin gyi shes pa gang yin pa de gzugs 'dzin par nus par ji ltar 'gyur/ de gnyis gcig na ni dbang po lngar brtag pa yang don med do/ /gzhan yang rang bzhin las skyes bu 'byung bar brtag pa yang rigs pa ma yin pa'i phyir pha dang zhes bya ba la sogs pa smos te/snying stobs dang / rdul dang mun pa cha mnyam pa'i gnas skabs su rang bzhin zhes brtags pa la sogs pa skye bar bshad pa yang rtog pa nyid/ gcig pu yin na yang mi rung ngo / /de bas na sgra 'dzin pa'i rang bzhin yod par 'dod pa'i ngo bo nyid ma mthong bar grub pa rigs pa ma yin no//de'i phyir sgra 'dzin zhes bya ba la sogs pa smos te/ sgra 'dzin pa'i shes pa'i ngo bo gang yin pa de ni gzugs 'dzin par ji ltar 'gyur te/ ci nas kyang mi 'gyur ro//de yang gcig pa du ma nyid du 'gyur ba ni 'gal ba'i phyir ro/ /gcig pu nyid yin na yang du mar gdags su rung ste/ skyes bu gcig la yang bu la ltos nas pha zhes bya la pha la ltos nas bu zhes bya bas du ma'i bdag nyid can yin pa dang 'dra bar shes pa yang de dang 'dra bar yod mod ce na/de ni pha dang zhes bya ba la sogs pa smos so/ /ci'i phyir zhe na/ snying stobs zhes bya ba la sogs pa smos te/ snying stobs ni bde ba'o/ /rdul ni sdug bsngal ba'o/ /mun pa ni gti mug ste/ snying stobs la sogs pa de dag kyang gcig pu brtan pa yin pa'i phyir rnam par 'gyur ba tsam du brtags kyi/'gro ba ni de las skyes pa ma yin pas yang dag par na snying stobs la sogs pa ni pha yang ma yin bu yang ma yin no/ /gang gi phyir de ltar yin pa des na yang dag pa nyid du ma yin no/ /de bzhin du sgra nye bar mi gnas pa'i tshe na yang sgra 'dzin pa'i shes pa gzugs kyi shes pa'i rang bzhin ldan par yang ma mthong zhing mi snang ngo //de bas na sgra'i shes pa de yod pa ma yin no/ /'on te de nyid ces bya ba'i sgra'i shes pa de nyid gar mkhan dang 'dra bar tshul gzhan gyis gzugs kyi shes par snang ba yin te/ dper na gar mkhan gzugs gzhan gyis 'jigs sder ston la gzhan gyis ni srid sgrub tu ston te/de yang de dang 'dra'o zhe na/ de lta na ni shes pa de yang gar mkhan dang 'dra bar rtag cing ther zug pa ma yin no/ /gal te de nyid rang bzhin gzhan yin no zhes rtog na/ de'i gcig pa nyid 'di ni sngon chad med pa yin te/gzhan pa dang gzhan gcig pa nyid 'di ni phan tshun 'gal ba'i phyir ro/ /de lta gcig pa bkag pa na rang bzhin gzhan yin pa ni brdzun pa yin te/ de ltar med do zhes zer ba ni de ltar na bdag de'i rang gi rang bzhin nam/ ngo bo ji lta bu yin pa smros shig ces dris pa'o/ / gal te de'i rang gi ngo bo shes pa nyid yin no zhe na/ de lta na ni skyes bu thams cad gcig tu thal bar 'gyur te/ grol ba dang ma grol ba'i skyes bu rnams gcig kho nar 'gyur ba'i skyon yod do/ /gzhan yang sems dang bcas pa'i skyes bu dang / sems med pa'i rang bzhin de gnyis gcig pa kho nar thal bar 'gyur ro//yang grangs can gyis de shes pa dang rang bzhin ni yod pa nyid du mnyam zhing mtshungs te/ de'i phyir gcig pa nyid du 'dod do zhe na/ dbu ma pas gang tshe zhes bya ba la sogs pa smos te/ gang gi tshe skyes bu dang rang bzhin gnyis sems dang sems med pa'i bye brag gi khyad par gang yin pa de med cing rim dang rim ma yin par byed pa dang bral bas ri bong gi ra ltar med pas phyin ci log yin na/de'i tshe 'dra ba'i rkyen gang zhig yin te ci yang med do/ /de bas na gcig pa yang ma yin no zhes bya ba'i tha tshig go//'di dag gis ni rgyu la sogs pa spyi dang ris mthun pa dag kyang gsal ba yin no/ /de ltar re zhig bdag sems dang ldan pa yin par tshad mas bkag pa dang / sems med pa nyid yin no zhes zer na/ de'i phyir sems med pa yang zhes bya ba la sogs pa ste/ yang gzhan dag na re bdag der sngar sems med pa yin yang bdag nyid kyi yon tan shes pa zhes bya ba yod pa de dang phrad pa las kyang shes pa can du 'gyur ro zhes zer na/de lta na ni snga ma'i mi shes pa de 'jig cing med pas mi rtag par thal bar 'gyur ro/ /'on te rtag pa yin par 'gyur bas med pa yin no zhe na/de'i tshe bdag 'di la shes pa yod pa'i sems dang phrad du zin kyang ci zhig bya ste/ ci yang ma byas so zhes bya ba'i tha tshig go/ /de ltar bya ba med pa zhig yod du yang mi rung ste/ shes pa med cing bya ba med pa ni nam mkha' dang 'dra bas de la bdag tu sgro btags pas bdag tu byas pa yang rigs pa ma yin no//gal te zhes bya ba la sogs pa la gzegs zan pa yang 'di skad du de ltar bdag med na dge ba dang mi dge ba'i las kyis yid du 'ong ba dang / 'bras bu yid du mi 'ong ba dang 'brel pa yod par mi rigs te/ las byas nas sems kyi skad cig ma snga ma 'jig pa'i rjes la/sems kyi skad cig ma gzhan nyid 'byung bar 'gyur la/ las de ni gzhan pa de'i ni ma yin pas de'i 'bras bu myong na shin tu thal ches par 'gyur ba'i phyir ro/ /las de gang gi yin pa 'jig par 'gyur bas 'bras bu gang gi yin zhes smra na/de'i phyir yu bu cag gnyis zhes bya ba la sogs pa smos te/ 'di dang phyi ma'i gzhi tha dad pa gang la yod pa de ni gzhi tha dad pa zhes bya ste/ las 'dir byas pa'i 'bras bu phal cher ni phyi mar 'byung la/ bya ba dang 'bras bu de dag la bdag gang yin pa de ni rtag pa yin pa'i phyir bya ba med cing bya ba dang bral ba yin no//de bas na 'dir bdag byed pa po dang tshor ba po yin pa la sogs pa'i smra ba de ni log pa yin pas don med pa nyid yin te/ rigs pa dang mi ldan pa'i phyir ro/ /gzhan dag na re sems can gcig gi rgyud kho na la kha zas mi mthun pa la sogs pa'i rgyu dang ldan na nad la sogs pa'i 'bras bu dang ldan pa tshe 'di nyid la snang /tshe phyi ma la yang bdag de dang 'dra mod ce na/ de'i phyir rgyur bcas zhes bya ba la sogs pa smos te/ tshe 'di nyid la yang sems can rnams bya ba dang ldan pa'i sems can yin pa'i phyir skad cig ma yin gyi/skad cig ma yin pa dag ni rim dang rim ma yin pas mi byed pas med pa yin pa'i phyir/ rgyu dang bcas shing ldan pa gang yin pa de 'bras bu dang ldan par snang ngo zhes bya ba 'di ni mi srid do/ /'o na sangs rgyas bcom ldan 'das kyis byed pa po dang longs spyod pa por gsungs pa yod do zhe na/de'i phyir rgyun zhes bya ba la sogs pa ste/ de ni sems skad cig ma'i rgyun du gnas pa snga phyi'i 'brel pa la dgongs nas las chud mi za bar ston par mdzad pa yin no/ /de ltar yin na yang 'das pa la sogs pa'i sems gang yin pa de bdag ces bya ba'i nga rgyal gyi gzhi yin pa'i phyir bdag nyid yin no zhe na/de'i phyir 'das dang zhes bya ba la sogs pa smos te/ de la re zhig 'das pa dang ma 'ongs pa'i sems med pa yin pa'i phyir gzhir mi rung bas bdag ma yin la 'on te da ltar byung ba'i sems bdag yin par 'dod na da ltar gyi yang byung ma thag 'jig pa yin pas gzhir mi rung ste/sems de med la/ de med pas bdag kyang med do/ /gal te lus dang sems dang sems las byung ba'i tshogs bsdus pa la spyir bdag ces bya bar 'dod do zhe na/ de'i phyir ji ltar zhes bya ba la sogs pa smos te/dper na 'di na chu shing gi phung po la cha shas su phye zhing phyogs char rnam par bsal na cha shas can gyi dngos po ci yang med pa dang 'dra bar phung po rnams la bdag ces bya yang rnam par dpyad cing btsal na yang dag pa ma yin pas yod pa ma yin no/ /de yang 'phags pa klu sgrub kyi zhal snga nas/rin po che'i phreng ba las/ bdag yod ma yin zhes bya ba la sogs pas nga rgyal bsal ba mdzad pa yin no/ /de bas na rnam par dpyad cing kun tu btsal na yang dag pa ma yin pa kho nar mthong ngo / /'o na khyed 'dod pa'i 'gro ba'i don byed par mi 'grub po zhe na/de'i phyir gal te zhes bya ba la sogs pa smos te/ dgos pa'i don du sdug bsngal nye bar zhi bar bya ba'i don du'o/ /khas blangs pa zhes bya ba ni 'dod pas sam/ bdag gis byas pas bdag nyid du ni rab brtags gang / /zhes bya ba ni gti mug gis sems can du rab tu brtags pa sgro btags pa gang yin pa de la snying rje byed do zhes bya ba'i tha tshig go//gzhan dag na re sems can med na dgos pa nyid su'i don du bya ste mi rung ngo zhe na/ de'i phyir sems can zhes bya ba la sogs pa smos te/ sems can med na dgos pa de su'i dgos pa yin te/ su'i yang ma yin no//bden yang zhes bya ba ni bden mod kyi zhes khas blangs pa'o/ /don du zhes bya ba ni bdag dang gzhan gyi don bya ba'o/ /bdag btags zhes bya ba 'di 'dod pa'am 'gro ba'i don gyis la bya ba'o/ /bya ba de ni sgro 'dogs pa'i dbang gis sdug bsngal nyid yin na yang sdug bsngal rnams nye bar zhi ba'i don nyid du bya ba'i rmongs pa 'di ni dgag cing bzlog par bya ba ma yin no//de yang rtag pa dang bdag la sogs pa rmongs pa las ni nga rgyal 'byung la/ de ni sdug bsngal 'phel ba'i rgyu yin pas/ de nyid ni bzlog par bya dgos so/ /de skad du smras pa dang /gzhan dag na re sems can tsam du sgro 'dogs pa'i khyed kyi rmongs pa des kyang nga rgyal bzlog par mi 'gyur te/ bya ba'i rmongs pa yang rmongs pa nyid yin pa'i phyir sdug bsngal gyi rgyu bzlog par mi nus la/ de mi nus pas na thar pa med do zhe na/byang chub 'dod pa rnams kyis ni sgyu ma lta bu la snying rje bya zhing bdag med pa shes pa kho na bsgrub par bya ba yin pa'i phyir/ bdag med bsgom pa mchog yin no zhes bya ba smos so/ /yang na sdug bsngal gyi rgyu snga ma'i tshul de las kyang bzlog par mi 'gyur zhes khyed smra na/de ltar na bdag med pa bsgoms te/ sel bas de mchog yin mod ces bya bar sbyar ro/ /sems yod pa dang med pa dgag pa'i tshul gyis bdag med par sun phyung ba na yan lag can gyi mtshan nyid dang ldan pa'i lus zhes bya ba sems dang 'brel pa yod pas bdag yod do zhe na/de'i phyir lus ni zhes bya ba la sogs pa smos pas ni lus rjes su dran pa yang ston to/ /thams cad la zhes bya ba ni yan lag la sogs pa'o/ /cha ni lag pa la sogs pa'o/ /cha re ni sor mo la sogs pa'o/ /yan lag dang nying lag de ltar gnas par gyur pa yin na de lta bu ma yin pa'i yan lag can gdags pa'i lus de yan lag las logs shig na bdag nyid gang na gnas/de bzhin du lus ni gcig pu'am phra rab tsam gyi cha shas su yang brtag par bya ba ma yin pas/ de'i phyir de bzhin phyi nang zhes bya ba smos so/ /de bas na de'i dbyibs su bkod pa'i khyad par gyi zhes bya ba la sogs pa'i dbyibs kyi tshogs pa'i khyad par gyis sdong dum gyi shing la 'dra ba'i tshul gyis mi'i blo skye ba lta bu yin no//sdong dum la dus cung zad cig thag ring po nas skyes bu'i blo 'byung ba yin la/ lag pa la sogs pa la gam du nye ba 'am/dus yun ring por yang lus kyi blo 'byung bar 'gyur bas mi 'dra'o zhe na/ de'i phyir ji srid rkyen ni zhes bya ba la sogs pa smos te/ sdong dum gyi shing rgyang ring ba la sogs pa'i rkyen gyi tshogs pas mig dang ba gang yin pa de ni rkyen gyi tshogs pa yin la/ 'dir lag pa la sogs pa la yang de dang 'dra'o//glegs bam la las ji srid lus la sogs zhes smos te/ de ni gzhan du bshad par bya ste/ ci srid du gti mug gi rkyen gyi tshogs pa yod pa de srid du lus la skyes bu med du zin kyang skyes bu ltar snang ngo / /de bzhin du lag pa la sogs pa la yang rkyen gyi tshogs pa yod pa de srid kyi bar du 'dir lag pa la sogs pa lus su rmongs pa'i dbang gis snang ngo //phyogs snga ma ni sdong dum dang lus de gnyis med pa yin par bye brag med par ston to/ /de ltar lus med par bkag na de dang mtshungs pa nyid kyi rkang pa la sogs pa la bsgre ba bstan pa'i phyir/de bzhin zhes bya ba la sogs pa smos te/ sor mo de yang tshigs kyi tshogs yin pas de med pa'i sor mo gzhan ga la yod/ tshigs kyang cha shas kyis phye na de las gzhan ci zhig yod/ cha shas kyang rdul phra rab dbye bas phye na/ de las gzhan pa ci zhig yod/rdul phra rab de yang phyogs kyi cha shas drug tu phye na gang zhig yod/ phyogs kyi cha shas de yang cha shas med pa yin pas nam mkha' dang mtshungs shing 'dra ba yin no/ /rgyu gang gis de ltar gzhigs pa des na rdul phran yang yod pa ma yin no/ /tshul de ltar gzugs zhes bya ba ni gzugs kyi phung po la su zhig chags shing zhen par byed de/chags pa'i gnas med do/ /de ltar re zhig lus dran pa nye bar gzhag pa bshad nas/ tshor ba dran pa nye bar gzhag pa bshad pa'i phyir gal te zhes bya ba la sogs pa smos so/ /gal te tshor ba sdug bsngal yang dag par ram/don dam par nges par yod na yid rab tu dga' ba la sogs pa de dang mi mthun pa'i phyogs ci'i phyir 'gog cing sel bar mi byed/ de mi byed pa las na sdug bsngal yang dag par yod pa ma yin no/ /de bzhin du gal te bde ba yang dag par yod na mya ngan la sogs pa'i sdug bsngal gyis gdungs pa na gos dang mal stan la sogs pa bde ba'i rgyur 'gyur ba yin na/bde ba de ci'i phyir 'dod pa las na bde ba yang dag par med do/ /gal te bde ba 'am sdug bsngal lam rga ba dang mya ngan la sogs pa mnga' ba'i stobs kyis zil gyis mnan pa'i phyir de mi myong ba yin no zhe na/bde ba'am sdug bsngal gang yang rung ba zhig nyams su myong ba'i bdag nyid can med na de'i tshor ba nyid ji lta bu yin te/ tshor bar bzhag tu mi rung ngo / /tshor ba nyams su myong ba ni rnam pa gsum ste/bde ba dang sdug bsngal ba dang / bde ba yang ma yin sdug bsngal ba yang ma yin pa'o/ /de dag ni 'dod pa yin mod kyi/ 'on kyang skyes bu dga' ba dang ldan pa rnams la ni sdug bsngal nyams su myong ba phra ba'i bdag nyid can du yod do zhe na/ de lta yin na sdug bsngal 'di'i rigs pa nyid ni yang dag pa nyid du yod pa ma yin no//sdug bsngal phra ba de yang de las gzhan pa'i rab tu dga' ba rnams kyis bde ba nyams su myong ba cung zad kyang 'gog par mi nus pas med pa yin no zhes bya bar dgongs so/ /yang gzhan pa zhes bya ba bde ba'i tshor ba ni dga' ba tsam du gyur pa yin na/de'i phyir dga' ba tsam de la sdug bsngal gyi phra ba nyid kyis bde ba'i tshor ba la mi gnod pas sdug bsngal yang phra ba nyid yin pa'i phyir tshor ba myong bar mi 'gyur ro/ /gal te sdug bsngal dang mi mthun pa dga' ba'i rkyen byung ba na sdug bsngal 'byung bar mi 'gyur zhing skye bar mi 'gyur ba yin la/de bzhin du mya ngan la sogs pa'i rkyen dang phrad par gyur pa na bde ba mi 'byung ste/ gnyis po 'di dag phan tshun ltos pa yin pa'i phyir bde ba dang sdug bsngal mi 'byung ba yin no zhe na/ de ltar na rkyen phan tshun 'dres pas tshor ba yang med pa yin pas brtags pa la mngon par zhen pa tsam yin no zhes de dang der bshad pa de ni rigs pa nyid de/mya ngan dang dga' ba la sogs pa ni brtags pa tsam yin pa'i phyir yang dag par na rgyu dang 'bras bu nyid kyang phrad pa med pa'i phyir ro/ /de ltar na ma grub cing rnam par mi rtog pa yin du zin kyang thog ma med pa'i dus nas shin tu mngon par zhen pa'i stobs kyis bde ba la sogs pa sgyu ma lta bu nyid nyams su myong bar snang ba yin no//de bas na brtags pa la mngon par zhen pa 'di ni brdzun pa nyid yin pa'i phyir rnam par dpyad pa gang yin pa 'di nyid 'di'i gnyen po yin pa'i phyir tshor ba dran pa nye bar gzhag pa'i bdag nyid can bsgom par bya zhing goms par bya ste/log par mngon par zhen pa'i kun nas nyon mongs pa 'di gzhom par bya ba'i phyir/ mngon par zhen pa'i rang bzhin la rnam par dpyad pa nyid yid la bya ba bya'o zhes bya ba'i tha tshig go//ci ltar na gnyen po yin zhe na/ de'i phyir rnam par rtog ces bya ba la sogs pa smos te/ 'di ltar rnam par rtog pa zhes bya ba ni/ de kho na nyid la rnam par dpyod pa la mngon par zhen cing dga' ba'i mtshan nyid can gyi rtog pa ste/ de kho na nyid ma yin par rtog pa la mngon par zhen pa'i gnyen por gyur cing de las byung ba'i rnam par rtog pa'i bsam gtan te/de ni zag pa med pa'i zas te/ de kho na nyid rtogs pa'i mtshan nyid can de gang la yod pa de ni rnal 'byor par 'gyur te/ thos pa las bsam pa/ de las bsgom pa/ de las de kho na nyid kyi ye shes skye ba yin pa'i phyir te/'di ltar sgyu ma'i seng ges sgyu ma'i glang po che bsad pa ni yang dag pa nyid du ma yin no/ /de bzhin du de kho na nyid rnam par dpyod pas log pa rnam par rtog pa yang dag par med bzhin du 'joms pa yin no/ /de lta yin du chug na/ de kho na nyid kyi rnam par rtag pa la mngon par zhen pa reg pa'i rkyen gyis tshor ba yin par bcom ldan 'das kyis gsungs so zhe na/de'i phyir dbang don zhes bya ba la sogs pa smos te/ dbang po ni mig la sogs pa'o/ /de'i dmigs par bya ba'i don yin pas na don te/ gzugs la sogs pa'o/ /de gnyis bar mtshams dang bcas pa'i ni rdul phra rab ma 'dres par 'gyur te/de ltar gyur na ni dbang po dang yul 'di dag 'dus phrad pa med na reg pa med pa'i phyir tshor ba yang ga la yod ces bya ba ste/ de ltar smras pa de yang yang dag par na rdul phra rab yod pa ma yin mod kyi/ sun phyung ba'i phyogs kyi dbang du byas nas rdul phra rab khas blangs pa yin no//gzhan dag na re de ni bar mtshams med pa'i tshul gyis gnas so zhe na mi rung ste/ gcig pu yin pa la gzhan dang 'du zhing phrad pa'i tha snyad mi 'jug pa'i phyir ro/ /de bzhin du rdul phra rab kyi nang du rdul phra rab 'jug pa yang med de/gal te de la 'jug pa'i go skabs kyis nam mkha' yod na lta 'jug tu rung na/ de med pa'i phyir des na de dag mnyam pa nyid mtshungs pa yin la/ de nyid kyi phyir 'dre bar 'du ba yang med pa'i phyir ro/ /de med pas cha shas med pa la 'du ba dang phrad par ji lta bu'i tshul gyis kyang rigs pa dang 'thad pas sgrub tu rung ba ma yin no//de'i phyir phan tshun gnyis 'dus pa dang cha shas med pa gnyis pa nyid gcig tu sgrub pa ni yod pa ma yin la/ gal te de lta bu yod pa mthong na/ yod pa'i dpe dang gtan tshigs bstan par gyis shig ces sun dbyung ba ste/bstan du mi rung ngo zhes bya ba'i don to/ /de bzhin du gal te shes pa'i rang bzhin yin na yang 'du ba'i tha snyad du rung ba ma yin ste/ gzugs can gyi lus med cing rang rig par 'dod pa de la 'du bar mi 'thad do/ /rkyen tshogs par yang brtags pa tsam du zad pas dngos po med pa'i phyir mi 'grub ste/sngar phyogs cha drug gis dpyad nas nam mkha' dang mtshungs pa 'dra'o/ /de ltar zhes bya ba la sogs pa ni nye bar bsdus pas so/ /reg pas na reg pa ste/ yul dang / dbang po dang / rnam par shes pa 'dus pa'am/ de las byung ba'i sems las byung ba'i chos so//de yang 'dus pa med par yod pa med pa yin no/ /de ltar med na go tshor ba zhes bya ba'i rgyu gang las kun tu 'byung bar 'gyur te mi 'gyur ro/ /nyon mongs pa ni bde ba dang phrad pa dang / sdug bsngal ba dang bral bar 'dod pa'i sred pas nor la sogs pa de la'o/ / ci'i phyir zhes bya ba ni bde ba med pa'o/ /gnod pa zhes bya ba ni sdug bsngal yang med pa'o/ /de ltar na ni thar pa'i don du yang dka' ba byas pa la dgos pa med par 'gyur ro zhes de ltar rtog pa de'i phyir/ gang phyir zhes bya ba la sogs pa smos te/ tshor ba'i rkyen gyis sred pa 'byung ba yin la/ de de ltar yod pa ma yin na de zad pa'i mtha' ni thar pa yin pas chos thams cad ni rang bzhin gyis mya ngan las 'das pa yin mod kyis/ 'on kyang gnod pa'i rgyu yin pas/ /srid pa ci ste 'joms mi byed/ /ces bya ba smos te/ mngon par zhen pas sed pa'i sred pa bsal ba nyid thar pa yin no zhes bstan to//'di dag gis ni gzegs zan la sogs pa yang sun phyung ba na de rnams 'di skad du smra ste/ rdzas ni rnam pa gnyis yod de/ mthong bar bya ba dang reg par bya ba'o/ /dbang po dang don phrad pa las byung ba'i shes pa ni mngon sum zhes bya'o zhes zer na/ rnam par dpyad pa'i tshul gyis rdzas sam phrad pa yod pa ma yin no//yang gzugs la sogs pa'i rdzas bum pa la sogs pa dang 'dra bar mthong ba'am reg tu zin kyang yod pa ma yin no/ /kyang zhes bya ba'i sgra ni kun rdzob tu khas len pa ste/ don dam par mthong ba'am reg pa gang yang med pa'o/ /'di ni rmi lam dang sgyu ma la dper byas pa'i bsod nams dang /bsod nams ma yin pa dang ldan pa'i sems gang yin pa de lta bu'i rang bzhin bdag nyid gang la yod pa'i sems te/ rmi lam dang sgyu ma dang 'dra ba de ni rang bzhin rtag pa ma yin te/ kun rdzob tu yang tshad mas gzhig cing bcom na/med pa ma yin no/ /de ltar na yang sems dang lhan cig yod par snang ngo / /sems dang zhes bya ba la sogs pa smos te/ sems dang tshor ba dus gcig byung ba ni lhan cig skyes pa yin pa'i phyir sems des tshor ba mi mthong ste/ nyams su myong ba ma yin no zhes bya ba'i tha tshig go//phyi nas skyes pa'i sems kyis sngar tshor ba 'gags ma thag tu myong ba yin du zin kyang de ni dran pa yin gyis myong ba ma yin no/ /gzugs la sogs pa'i lhan cig skyes pa yang mthong ba'am reg pa med kyi/ gzung bar bya ba'i rgyu nyid tsam du gnas kyi skad cig ma 'gags pa na byi ba'i dug bzhin du dran par byed pa yin mod kyi/'on kyang gzugs la sogs pa ni re zhig sems las tha dad par snang ba yin la/ tshor ba la sogs pa ni ma yin pas de skad du smras pa yin no/ /de nyid kyi phyir bdag gis bdag nyid ces bya ba la sogs pa smos te/rang gis bdag nyid la myong bar mi byed de/ de 'gal ba'i phyir ro/ /gzhan gyis zhes bya ba ni sems gzhan gyis so/ /tshor ba po ni bdag dang gang zag la sogs pa'o/ /bdag med pa'i tshogs 'di la zhes bya ba ni ji skad bshad pa'i tshul 'dis rang bzhin med pa'i tshogs 'di la'o//'di la su yis gnod ces bya ba ni gnod pa dang / gnod pa byed pa po rang bzhin med pas tshor ba 'dis su la gnod par 'gyur te/ gnod par mi 'gyur ro/ /de ltar tshor ba dran pa nye bar gzhag pa bshad nas/ sems dran pa nye bar gzhag pa bshad pa'i phyir sems ni zhes bya ba la sogs pa smos te/gzugs la sogs pa la lhag par dbang byed cing rang gi rnam par shes pa skyed par byed pas na dbang po ste/ mig dang / rna ba dang / sna dang / lce dang / lus dang / yid kyi dbang po ste/ de rnams la yang mi gnas so/ /'dir 'di ni rtag cing brtan pa dang /gnod par byar rung bas gzugs te/ sngon po la sogs pa'o/ /sogs pa'i sgras ni sgra dang / dri dang / ro dang / reg bya dang / chos rnams bsdu ste/ der yang mi gnas so/ /bar na'ang min zhes bya ba ni dbang po dang don gnyis kyi bar na yang med pa'o/ /de yang gang gi phyir nang zhes bya ba lus kyi nang na yang med la/lus las phyi rol na'ang med pa'o/ /gzhan na'ang med ces bya ba ni lus kyi nang dang phyi rol ma yin pa gzhan dag na yang yod pa ma yin pa'o/ /yul dang dbang po gzhan la mi gnas pa ni rung na yid kyi dbang po ni sems nyid yin na dbang po la mi gnas zhes bya ba la sogs par smrar ci ltar rung /yid dang sems gnyis blo'i rang bzhin can yin pas yid kyang dran pa nye bar gzhag pa yin par thal bar 'gyur ro zhe na/ de'i phyir de'i khyad par yang ji skad du smras pa yin te/ de nyid kyis na lus gang la gang med ces bya ba la sogs pa smos te/'dres min zhes bya ba ni lus dang ngo / /tha dad pa ma yin nas bya ba ni lus las logs shig na gzhi med par gnas pa yang ma yin no/ /sems ni gzugs med pa'i phyir la lar sems 'dres te yang gnas la/ lus las tha dad pa yang yin no zhe na de'i phyir zhes bya ba las zhes bya ba la sogs pa smos te/ga la yod ces bya ba ni gzugs la sogs pa'i shes bya rnams skad cig ma yin pa'i phyir cha shas med de/ cig car 'jig cing med pa'i phyir dang / cha shas dang bcas na yang dngos po med pa'i phyir sems kyi skad cig ma snga ma med pa yin no//shes pa dang shes bya lhan cig srang gi mda' ltar yod du zin kyang gcig gi rgyu gcig ma yin pas yang dag par de gnyi ga yang med pa nyid ma yin no/ /de nyid kyi phyir de ltar zhes bya ba smos te/ 'dis ni chos dran pa nye bar gzhag pa bshad pa yin te/ de ltar ji skad bshad pa'i tshul gyis chos thams cad skye ba yod par ni shes shing bsgrub tu mi rung ngo //yang de'i kun rdzob tu blo rang bzhin yod par bshad pa de yang nges par brtags na rang rig pa ma grub pas de yang yod pa ma yin la/ de'i phyir bden pa gnyi ga yang dag par yod pa ma yin no//yang na kun rdzob rgyu gzhan gyis sam phyi ma'i dbang gis kun rdzob tu 'gyur na/ logs su grub pa'i phyir sems can rnams mya ngan las 'das par mi 'gyur te/ kun rdzob gzhan par brtags pas mya ngan las ga la 'da'/ glegs bam la la las ni/ de bas mya ngan 'das pa med//ces zer ro/ /de yang 'on te kun rdzob gzhan yin par 'grub na/ gzhan du byas pa yin pas sems can mya ngan las 'das pa yin par yang mi 'gyur ro zhes pa yang don de nyid yin no/ /de ltar gzhan gyis brgal ba'i lan bshad pa'i phyir 'di ni zhes bya ba la sogs pa smos te/gzhan sems kyi rnam rtog ces bya ba ni gzhan gyi 'am gzhan pa ste/ gzhan gyi rgyud du 'am phyi ma'i tshul du sems yod par rtog pa'i kun rdzob bo/ /sems smos pa ni brda sprod pa rnams kyi rtog pa pa las dgar ba'o/ /de yang phyogs gzhan gyi sems su brtags pa de ni 'dir gzung bar mi bya ste/rab tu byed pa 'di la ni sgrub pa snying por bya ba yin pa'i phyir ro/ /rnam par rtog pa smos pa ni sems de yang rdzun pa tsam du bstan pa'i phyir ro/ /de nyid kyi phyir rang gis zhes bya ba la sogs pa smos pa yin no/ /de ltar gzhan su zhig yin zhe na/de'i phyir de ni zhes bya ba la sogs pa smos te/ gang rang gi kun rdzob tu med pa de ni de'i 'og tu rnam par dpyod pa nyid kyis med pa kho nar nges pa yin la/ sngar rnam par ma bshig pa'i ma brtags na nyams dga' ba'i rnam par yod pa yin no/ /de yang / de nyid tshol ba thog mar ni//thams cad yod ces brjod par bya/ /don rnams rtogs shing chags med nas/ /de yi 'og tu dben pa'o/ /zhes ji skad bshad pa lta bu'o/ /ma brtags pa'i gong du de yod na phyis brtags pas kyang rnam par bsal bar nus pa ma yin te/gzhan dag nas kyang / 'di la bsal bya ci yang med ces bya ba la sogs pa ji skad bshad pa lta bu'o zhes zer na/ de'i phyir de med ces bya ba la sogs pa smos te/ de'i tshe rang ngam gzhan pa'i kun rdzob med pa nyid yin no/ /de rnam par mi rtog pa yin du zin kyang rtog pas rgyu dang 'bras bur brtags pa yin no//de ltar na rtog pas brtags pas gnyis po 'di dag ni phan tshun gcig la gcig brten pa yin te/ brtag par bya ba med par ni rtog pa med la/ de med par ni brtag par bya ba yang yod pa ma yin no/ /de ltar ci ltar rnam par dpyad ce na/ji ltar grags pa zhes bya ba la sogs pa smos te/ rgol ba dang / phyir rgol ba gnyi ga la grags pa'i chos dang chos can gzugs la sogs pa ji ltar grags pa gang yin pa de la brten nas/ dbu ma pa de ni yod pa'i phyir yang dag pa ma yin pas sgyu ma dang 'dra'o//zhes bya ba la sogs pa grags par rnam par dpyad pa thams cad brjod pa yin no/ /dpyod par byed par yang rnam par bya ba nyid ma yin nam zhe na/ de'i phyir gang tshe zhes bya ba la sogs pa smos te/ rnam par dpyod pa ni kho bo cag gis dgos pa'i don du khas blangs pa yin te/dpyad par bya ba de kho na nyid la sogs pa la rnam par dpyod cing brtag pa na brtag pa'i gnas med la/ gnas med pa nyid kyis na de mi skye zhing 'byung bar mi 'gyur te/ rnam par dpyod pa yang rang bzhin gyis ma skyes pa yin la/ ma skyes pa de ni mya ngan las 'das par bshad do//yang rtog pa po dang brtag par bya ba gnyis po 'di dag de kho na nyid dam bden par yod pa'am med par smra ba de nyid ni shin tu 'gal ba dang bcas pa yin pas sdug bsngal ba yin no/ /ci ltar dka' bas gnas she na/ gal te zhes bya ba la sogs pa smos te/rtog par byed pa ni shes pa'o/ /brtag par bya ba ni don to/ /de ltar na shes pa dang shes bya med na shes pa yod par ga la 'gyur te/ 'dis ni rtog dang brtag par bya ba dag /gnyis po phan tshun brten pa yin zhes gang bshad pa gsal bar byed pa yin no/ /phan tshun gcig la gcig brten du zin kyang shes pa dang yul dag pha dang bu'i tshul du yod ce na/de'i phyir pha ni zhes bya ba la sogs pa smos te/ 'di ltar pha dang bu gnyis phan tshun ltos pa yin pa nyid kyis yang dag par na med cing ma grub pa yin pa de bzhin du shes pa dang don gnyis kyang bskyed pa po dang /skyed par byed pa gnyis kyi tshul du phan tshun ltos pa nyid yin pas des na/ de gnyis med pa yang de bzhin du blta'o/ /myu gu zhes bya ba la sogs pa ni gzhan dag gi tshig go/ /myu gu las gzhan zhes bya ba la sogs pa ni lan te/ myu gu las gzhan pa'i shes pas myu gu shes nas sa bon yod do zhes rtog par byed pa yin na/shes bya la shes byar shes pa nyid kyang ga la yod de/ rang rig pa med pa'i phyir shes pa de med do zhes bya ba'i don to/ /de ltar shes pa las sa bon yod do zhes kyang ji ltar rtogs she na/ de'i phyir re zhig ces bya ba la sogs pa smos te/ re zhig ces bya ba'i sgra ni rjes su dpag pa la sogs pa la ltos pa'o/ /thams cad ces bya ba ni rgyu rkyen gyi tshogs pa ji ltar snang ba'i nus pa las dgag pa med pa zhes bya bar dgongs so/ /de nyid kyi phyir pad+ma zhes bya ba la sogs pa smos te/de skad ces smras pa dang / rgyu med par smra ba dag na re/ pad+ma'i sdong bu la sogs pa de ni su zhig gis byas pa zhes smra ba la/ de'i phyir rgyu'i dbye ba zhes bya ba la sogs pa smos te/ snga ma'i rgyu'i dbye ba nyid kyis so zhes bya ba ni las las skyes pa'i 'jig rten sna tshogs pa'i rab tu dbye ba las gyur pa yin gyi/rgyu med pa nyid ni yul dang dus la sogs pa'i dbye ba med pa'i phyir mi rigs so/ /rgyu'i dbye ba las 'bras bu'i dbye ba 'byung ba yin du chug na/ rgyus 'bras bu bskyed par ji ltar 'gyur zhes rtog na/ thams cad rgyu'i mthu las 'byung //zhes bya ste/ rgyu gcig nas gcig tu brgyud pa las 'bras bu skye ba'i nus pa'i mthu gang la yod pa de las 'byung ba yin no/ /'dir dbang phyug rgyur smra ba dag na re rgyu de yod du chug na de ni dbang phyug gi blo sngon du btang ba de nyid kyis lus can dang gnas la sogs pa thams cad byas pa yin no zhes rtog pas/de'i phyir 'gro ba'i rgyu ni zhes bya ba la sogs pa smos so/ /re zhig dbang phyug gang yin smros/ /zhes bya ba ni/ de ltar dbang phyug 'gro ba'i rgyu zhes bya ba yin na/ dbang phyug nyid gang yin smros shig ces dri ba'o//gal te de dag na re 'byung ba rnams yin no zhes zer na/ de ltar yin par ni zad de/ gang gi phyir kho bo cag kyang de rnams la snga ma snga ma las phyi ma phyi ma 'bras bu'i tshul gyis 'gro ba'i rgyu nyid du 'dod pas de yin du ni chug na/ de rnams la khyed kyis dbang phyug ces ming btags pa tsam du zad na/ming tsam las med du zin na ngal bas ci zhig bya ste/ ci'i phyir khyod de tsam dub cing nyon mongs par byed/ 'on kyang sa la sogs pa 'di dag ni du ma yin pa dang / skye ba dang 'jig pa dag gis mi rtag pa yin pa dang / sems med pa yin pa'i phyir lha ma yin te/ling ga la sogs pa dang 'dra'o/ /de bzhin du 'gom par bya ba gang yin pa dang / mi gtsang ba nyid kyang yin zhing / mi gtsang ba dang 'dres pas sa la sogs pa de dag dbang phyug ma yin te/ khyod ni 'di ltar gcig pa nyid dang rtag pa dang / blo gros bzang po dang ldan pa dang /lha nyid yin pa des na/ ling ga la sogs pa de yang 'gom par bya ba ma yin par gtsang ma yin par 'dod pa'i phyir ro/ /gal te khyod dbang phyug nam mkha' yin par 'dod na/ de yang bya ba dang 'dod pa'i spyod pa dang bral bas dbang phyug ma yin no/ / nyi ma dang zla ba mchod pa byed pa la sogs pa'i bdag nyid can gyi bdag nyid kyang dbang phyug de ma yin te/ de ni sngar/ /so dang skra sen bdag ma yin/ zhes bya ba la sogs pas bkag pa yin pa'i phyir ro/ /gal te dbang phyug de bsam gyis mi khyab pa yin no zhes 'dod na/ de byed pa nyid kyang bsam gyis mi khyab pa yin pas ci zhig brjod du yod de/bsam gyis mi khyab pa de brjod pa'i yul ji ltar yin/ gal te de ltar yin na des na dngos po ci zhig 'byin cing skyed par 'dod/ gal te bdag ces bya ba 'byin par 'dod na/ de ni rtag cing brtan par khyed smra bas dbang phyug dang 'dra ba ma yin no//sa la sogs pa gang 'byin pa ma yin te/ dbang phyug nyid de'i rang bzhin yin pa'i phyir ro/ /shes pa yang 'byung ba ma yin te/ de ni shes pa las 'byung ba ma yin pa'i phyir dang / thog ma med pa can nyid yin pa'i phyir ro/ /shes bya yang rang gi rgyu thog ma med pa can rang bzhin yin pa'i phyir de las 'byung bar mi 'dod do//gal te bde ba dang sdug bsngal sprul to zhe na/ dge ba dang mi dge ba'i las rnams las bde ba dang sdug bsngal skyes pa yin pa'i phyir dang / las de yang thog ma med pa'i dus can yin pa'i phyir mi rung ngo //de lta yin na dbang phyug des dngos po ci zhig sprul zhing 'byin par byed pa yin pa smros shing / /yang gzhan dag na re shes pa la sogs pa thog ma med pa nyid ma yin gyi/ dbang phyug thog ma med pa nyid yin no zhe na/ de'i phyir rgyu'i zhes bya ba la sogs pa smos te/khyed gal te rgyu dbang phyug thog ma yod pa ma yin par 'dod na/ 'bras bu yang thog ma med par 'gyur ro/ /de ltar yin du zin kyang rtag tu mi byed de/ de ltos nas yang byed pa yin no zhe na/ de'i phyir de ni zhes bya ba la sogs pa smos te/ 'byin pa ni de dngos po gzhan la mi ltos pa yin na rtag par dus thams cad du ci'i phyir mi byed/de ma byas pa'i dngos po zhig la ltos nas rtag tu mi byed do zhe na/ de'i phyir de ma byas so zhes bya ba la sogs pa smos te/ gal te ma byas pa'i dngos po zhig yod na ni de la ltos su rung na/ thams cad 'dis byas par khyed 'dod pa dang /ltos pa yod par 'dod pa ni mi rigs so/ /gal te 'ga' zhig la ltos par 'dod na ni de'i tshe tshogs pa nyid rgyu yin gyi/ dbang phyug ma yin no/ /de yang gal te tshogs pa yod na ni dbang phyug de mi byed cing bya ba bshol bar yang mi nus la de med pa ste/ tshogs pa de med na ni dbang phyug gis byed pa med de/ tshogs pa las byung ba yin no/ /gal te tshogs pa yod par gyur nas dbang phyug mi 'dod bzhin du byed par 'gyur ro zhe na/ de lta na ni dbang phyug de gzhan gyi dbang du thal bar 'gyur bas khyod kyi rang dbang du yod par 'dod pa dang mi mthun no//'on te 'dod pa la rag las par byed do zhe na/ de'i phyir 'dod pa zhes bya ba la sogs pa smos te/ 'dod pa yang 'dod pa nyid la rag las par 'gyur/ dbang phyug de byed pa po yin par rnam pa thams cad du ga la yod de med do/ /des na rang dgar dbang byed pa ga la yin/gang yang gzegs zan la sogs pa rdul phra rab rtag par smra ba dag gis 'du ba dang cha shas su dbye ba dag gi 'bras bu skyed par 'dod pa de yang / phyogs cha rnams kyang cha med pa zhes bya bas rnam par dpyad de bzlog pa yin no/ /de ltar dbang phyug rgyur 'dod pa la sogs pa bkag nas/'di man chad grangs can dag gtso bo zhes bya ba ni rgyu yin par 'dod pa'i phyir gtso bo zhes bya ba la sogs pa smos te/ mnyam du gnas zhes bya ba ni chen po la sogs pa 'gyur ba med/ de dag la ni gtso bo zhes bya la/ 'gyur ba las mi mnyam par gyur pa de'i tshe ni 'gro ba zhes zer ro/ /de la dbu ma pas gtso bo zhes bya ba gcig pu la rang bzhin gsum yod pa ni mi rigs pa yin la/ des na gtso bo zhes bya ba de med do/ /de bzhin du yon tan yang yod pa ma yin te/ yon tan gsum po de dag re re zhing yang snying stobs dang /rdul dang mun pa gsum dang ldan par 'gyur ro/ /gsum po de dag kyang bde ba dang / sdug bsngal dang / gti mug gi bdag nyid can yin par 'dod la/ de dag ni phan tshun 'gal te/ bde ba myong ba'i skabs su yang sdug bsngal mi myong ba'i phyir/yon tan ma grub cing med pa yin pas de de las byung ba'i sgra la sogs pa'i gzhan dag yod pa nyid ni shin tu yang thag ring ba yin te/ tshad ma gzhan gyis mi bzod pa'i phyir ro/ /de ltar na yang grangs can dag gos la sogs las byung ba'i bde ba yang de'i 'gyur ba yin par 'dod pa de thams cad 'dod pa yang ma yin pas mi rung ngo //de'i phyir sems med ces bya ba la sogs pa smos te/ sems med pa dang sems yod pa dag phan tshun 'gal ba yin pas de ni mi srid do/ /'on te bde ba la sogs pa rgyu'i rang bzhin nam ngo bo nyid yin pa gos la sogs pa'i dngos po gang yin pa de ni rgyu'i rang bzhin du gyur pas rgyu yin la/de'i 'bras bu ni gos la sogs pa yin pas de la bde ba la sogs pa yod pa yin gyi/ gzhan du na de las 'byung bar mi 'gyur ro zhe na/ dngos po rnams dpyad ma zin nam zhes bya ba smos te/ dran pa nye bar gzhag pa rnams kyis de ma grub par dpyad zin te zhes bya ba'i don to//grangs can khyod kyis dngos po rnams kyi rgyu bde ba la sogs pa nyid yin par 'dod na/ de ni ma yin te/ bde ba la sogs pa nyams su myong ba de las kyang snam bu la sogs pa'i dngos po rnams kyang skye bar ma mthong ngo //gzhan du na gos la sogs pa las bde ba la sogs pa 'gyur ba yin la/ yang dag par na gos la sogs pa de med cing ma grub pas na bde ba la sogs pa yang med pa yin no/ /bde ba la sogs pa ni rtag pa yin pas nges par yod do zhe na/bde sogs zhes bya ba la sogs pa smos te/ bde ba la sogs pa rtag pa nyid ma yin no/ /dus nam yang rnyed cing dmigs par mi 'gyur ro/ /gal te rtag par yang yod mod kyi/ gal te de gsal ba'i tshe na bde bar snang gi /nus pa'i tshul du mi gsal ba'i tshe na ni ma yin no zhes zer na/de'i phyir bde ba zhes bya ba la sogs pa smos te/ gal te rang rig pa'i mngon sum gyis bde ba la sogs pa nyid yod do zhes smra na/ des bde ba la sogs pa ci'i phyir mi 'dzin/ de ni phra ba nyid kyi phyir mi 'dzin no zhes zer na/gal te rags pa yin na phra bar yang ji ltar 'gyur te/ rags pa dang phra ba gnyis ni phan tshun 'gal ba yin no/ /de ltar yin mod kyi bde ba des rags pa spangs nas phra bar gyur pa yin pas/ de phra ba dang rags pa'i gnas skabs tha dad pa yin gyi gnas kyi gzhi bde ba la ni tha dad pa med do zhe na/de'i phyir rags pa zhes bya ba la sogs pa smos so/ /gal te gnas skabs mi rtag pa yin gyi de'i gzhi rtag pas tha dad do snyam na/ de'i phyir de las zhes bya ba la sogs pa smos te/ yang dag par na bde ba las rags pa de gzhan ma yin pas/bde ba de mi rtag pa nyid yin par shin tu gsal ba yin no/ /yang gzhan dag na re bde ba rags pa'i zla la mi 'jigs te/ zhig cing mi rtag na ci yang med pa yin pas med pa las mi skye'o zhe na/ de'i phyir med pa zhes bya ba la sogs pa smos te/ khyod 'dod pa de ni mi rung ngo //yod par khas len pa rags par yod dgos la/ de ni gsal bar yin te/ de las skye bar 'gyur bas na khyed rags pa'i tshul du med do zhes zer te/ gsal bar mi 'dod kyang med cing mi gsal ba las mi skye'i yod pa las skyes pa nyid kyis rags par gnas par 'gyur ro//gal te 'bras bu gsal bar rgyu la gnas na ni rgyu zas la sogs pa la 'bras bu mi gsal bar gnas pas de za ba ni mi gtsang ba za bar 'gyur ro/ /gzhan yang rgyu la 'bras bu gsal bar gnas na ni ras kyi rin gang yin pa des ras bal gyi sa bon nyos la gos su bgo bar gyis shig pa'o//gal te ras bal gyi sa bon las ras yod mod kyi/ 'jig rten pa rnams rmongs pas ma mthong bar zad do zhes zer na ni/ de kho na nyid shes shing ma rmongs pa la yang rmongs pa de gnas shing yod pa ma yin te/ gal te med na ras bal gyi sa bon gos su ci'i phyir mi gyon yang gal te de kho na nyid kyi shes pa gang yin pa de 'jig rten pa la yang yod do//rgyu dang 'bras bu yod pas mthong ba nyid yin na ni 'jig rten pa yang de kho na nyid mthong ba yin na ci'i phyir de ma mthong / de bzhin du bde ba la sogs pa'i rgyu dang 'bras bus 'jig rten pa ci'i phyir ma mthong /'jig rten pa rnams ni tshad ma dang ldan pa ma yin pas rgyu la 'bras bu ma mthong ngo zhe na/ de'i phyir 'jig rten gsal bar zhes bya ba la sogs pa smos te/ de lta na ni sgra la sogs pa yod par don gyi tshad mas gsal bar mthong ba dang /'ang zhes bya ba'i sgras rjes su dpag pa dang / lung la yod pa yang bden pa ma yin zhing med par 'gyur ro/ /de kho na nyid du sgra la sogs pa brtags pa'i dngos po rnams las stong pa nyid yin na gsal bar mthong ba gang zhig yod/ de med na tshad ma yang tshad ma yin par 'gyur bar de'i phyir tshad ma zhes bya ba la sogs pa smos te/stong pa nyid ni tshad ma gzhal ba yin gyi gzhan du na ji ltar shes par 'gyur/ de yang tshad ma dag tshad ma ma yin zhing brdzun na ni des gzhal ba'i stong pa nyid la sogs pa thams cad brdzun par 'gyur ba de bas na dngos po rnams kyi stong pa nyid mi 'thad par 'gyur ro//glegs bam la la las ni khyod kyis 'thad pa ma yin no zhes zer te/ grangs can khyod kyis stong pa nyid smra bar yang dag par 'thad cing rigs pa ma yin te/ sangs rgyas rnams ni kun rdzob tu thams cad yod par 'dod pa rigs pa yin no//gang gi phyir brtags pa'i dngos po rnams kyis btsal zhing yongs su ma dpyad par de med pa nyid ces brtags pa'i dngos po med pa nyid 'dzin par mi nus kyi/ de'i rang bzhin stong pa nyid du shes shing 'dzin pa de las dngos po rnams brdzun par shes par 'gyur ro//de bas na brtags pa'i dngos po rnams brdzun pa ma yin pas de'i dngos po med pa nyid ni shin tu gsal bar brdzun pa yin te/ med pa ni yod pa la ltos pa yin pas dngos po ma grub pas na de'i med pa yang mi 'grub po/ /grangs can la dpe bstan pa'i sgo nas nye bar bsdu ba smras pa ni/de bas zhes bya ba la sogs pa smos so/ /dper na rmi lam gyi nang na bu skyes pa rmis la rmi lam na de shi ba rmi la de'i med do zhes bya ba ni rnam par brtags pa tsam yin pa'i rtog pa des bu yod pa'i rtog pa skyes pa gang yin pa de rjes su zlog par byed cing 'gog par byed do//de bzhin du gal te dngos por brtags pa yod na de med do zhes bya ba rnam par rtog par 'gyur te/ de nyid kyang brdzun pa yin no/ /de ltar rgyu med par smra ba dang mi mthun pa rgyur smra ba rnam par bsal nas/ gzhung nye bar bsdu ba'i phyir de ltar zhes bya ba la sogs pa smos te/rkyen rnams so so 'am 'dus pa zhes bya ba la/ dbang phyug dang gtso bo la sogs pa rtag pa rnams la'am/ sa bon la sogs pa rang snang ba mi rtag pa nyid dang 'dus pa zhes bya ba nye bar len pa'i rgyu la sogs pa mi rtag pa rnams dang /bdag dang sa bon la sogs pa rtag pa dang / mi rtag pa la sogs pa rnams la'ang / mthong ba dang ma mthong ba'i rgyu dang rkyen la rnam pa bzhi po dag la yang gnas pa ma yin no/ /gzhan nas zhes bya ba ni rkyen rnams las gzhan pa las kyang 'ong ba ma yin no/ /de ltar ma 'ongs su zin kyang yod par gnas pa yin no zhe na/gnas pa med ces bya ba smos te/ skad cig kyang sdod pa med do/ /de nyid kyi phyir 'gro ba yang med de/ med pa nyid yin pa'i phyir ro/ /de bas sgyu ma nyid dang 'di la khyad par du bya ba ci zhig yod na/ rmongs pa rnams kyis bden pa kho nar brtags shing sgro btags pa'i gzugs la sogs pa gang zhig yod de med do//gzugs la sogs pa ni rgyus bskyed pa yin no/ /sgyu ma'i sgyu mas byas pa khyad par ci yod ce na/ de'i phyir sgyu ma zhes bya ba la sogs pa smos te/ de dag ni 'gro ba dang 'ong ba med pas gnyi ga yang log par yin no zhes bya ba'i tha tshig go//de ltar yin na yang rkyen las byung ba ni bden pa yin no zhe na/ de'i phyir gang zhig ces bya ba la sogs pa smos te/ dngos po gang gzhan gang zhig dang nye ba na nges par mthong zhing snang la/ de med na ni mi mthong bas de ni yod pa ma yin te gzugs brnyan dang 'dra'o//de yang gzugs brnyan ni me long la sogs pa bzhin dang nye ba na snang gi /de med par ni ma yin no/ /de bzhin du/ gzhan dag la yang rang gi rgyu dang nye ba las yin gyi/ de med par ma yin pa'i phyir/ gzugs brnyan zhes bya ba la sogs pa smos te/ gang rgyu dang rkyen la ltos shing rag las pas bskyed pa ni bcos ma dang 'dra ba yin na/ de bden zhing yang dag pa nyid du ji ltar yod pa yin/ de ltar na rgyu ni yod do zhe na de'i phyir dngos po zhes bya ba la sogs pa smos te/ gser la sogs pa'i dngos po rna cha la sogs pa byas par gyur pa'i rgyu yod do zhe na/bye ba brgya phrag ces bya ba la sogs pa smos te/ dngos po med pa'i phyir cha shas med par 'gyur ba yin la/ de ltar dngos po med cing bsgyur du med pa'i gnas skabs de'i dngos po ci zhig tu gyur nas dngos po zhes smra ste/ de lta bu'i gnas skabs de dngos po med pa las gzhan pa'i dngos po ji lta bu zhig tu 'gyur ba yin/yang dag par ni rgyu dang 'bras bu med pa'i phyir de las 'dir skad cig mar yod par smra ba dag 'di skad ces dngos po med pa'i dus su 'ga' yang dngos por mi 'gyur ba ni bden mod kyi/ skad cig mar yod do zhes rtog pa de'i phyir/ med pa'i tshe na zhes bya ba la sogs pa smos te/dngos po med pa'i tshe na ni dngos po med pa nyid yin la/ dngos po de dus nam zhig na 'byung bar 'gyur te/ nam yang 'byung bar mi 'gyur ro/ /ci'i phyir zhe na/ dngos po zhes bya ba la sogs pa smos te/ dngos po rnams la skye ba med pa nyid kyi dngos po med cing ma skyes pa dang ni bral zhing tha dad par mi 'gyur te/de dngos po rnams med pa dang ma bral ba nyid kyis dngos po rnams yod cing 'byung ba'i skabs yod par mi 'gyur ro/ /de ltar re zhig 'ga' yang dngos po nyid du mi 'gyur ba yin mod kyi/ de ltar na khas len par byed pa dag gi phyir rang bzhin zhes bya ba la sogs pa smos so//dngos po gang yin pa de ni dngos po med pa nyid du mi 'gyur ro/ /ci'i phyir zhe na/ rdzas gcig la dngos po dang dngos po med pa'i rang bzhin nyid kyi rnam par 'gyur ba der thal bar 'gyur te/ dngos po gcig la dngos po med pa mi mthun pa'i chos gnyis su 'gyur ba na 'gal ba yin pa'i phyir ro//de ltar zhes bya ba la sogs pas ni nye bar sdud pa yin no/ /de skyed par ma grub na 'gag pa yang yod pa ma yin no/ /de bzhin du rnam pa thams cad du rtag par gyur pa'i dngos po yang mi dmigs shing yod pa ma yin no//rgyu de bas na 'gro ba'i skye bo de dag thams cad skye ba med pa dang / 'gag pa med pa'i rang bzhin can yin no/ /'gro ba rnams zhes bya ba dmyal ba dang / dud 'gro dang / yi dwags dang / mi dang / lha ste 'gro ba lnga 'am drug go/ /chu shing bzhin du snying po med ces bya ba ni chu shing la ral gri la sogs pas gshegs shing rnam par phye nas bltas na sra ba'i snying po ci yang mi rnyed pa dang 'dra bar chos nyid 'di dag kyang de dang 'dra'o//de nyid kyi phyir/ mya ngan 'das dang zhes bya ba la sogs pa smos so/ /de bas na rnyed pa la sogs pa 'jig rten pa'i chos brgyad dang /sred pa la sogs pa thams cad brdzun yin no zhes bstan pa'i phyir ro/ /de ltar zhes bya ba la sogs pa smos te/ de lta bu'i rang bzhin rnyed par bya ba yang ci zhig yod/ de bzhin du bstod pa la sogs pas rim gro bya ba 'am/ smad pa la sogs pas brnyas par gyur pa dang /grags pa ma yin pa la sogs pas mi dga' ba dang / grags pa la sogs pas dga' ba yang ci zhig yod/ 'jig rten gyi chos brgyad po 'di ni sred pa las byung bas de'i phyir sred pa zhes bya ba la sogs pa smos te/ sred pa ni 'dod pa'o/ /'o na mi 'chi ba la sogs pa la sred pa dgos so zhe na/gson gyis zhes bya ba la sogs pa smos so/ /yang 'di na byung bar 'gyur ba'i lus rnams la sred do zhe na/ de'i phyir su zhig ces bya ba la sogs pa smos so/ /de ltar na yang gnyen 'dun dang mdza' bshes la sogs pa dang phrad par mngon par 'dod pa la sred do zhe na gnyen gang zhes bya ba la sogs pa smos te/gnyen ni nye du rnams so/ /bshes ni mdza' bo rnams so/ /de dag thams cad ni yang dag par na ma skyes pa yin pa'i phyir nam mkha' dang 'dra bar dngos po med pa yin pas/ bdag dang 'dra ba yis zhes bya ba ni gzhung 'di bdag dang skal ba mnyam pa'i don du byas pas des 'di ltar sgyu ma lta bur brtags pas yongs su shes par gyis shig pa'o//de ltar yin na yang bde ba dang / sdug bsngal gyi sems ni yod do zhe na/ de'i phyir bdag nyid ces bya ba la sogs pa smos te/ 'thab pa dang rtsod pa la sogs pa'i rgyus so//spro ba ni dga' ston la sogs pa'i rgyus so/ /shin tu mi bder 'tsho bar byed/ /ces bya ba ni mya ngan la sogs pas shin tu nyam thag pa yin no/ /rdeg pa ni gzhan la 'khu zhing gnod pa byas pa la sogs pa'o/ /ngan 'gro ni dmyal ba la sogs par yang nas yang du ltung nas slar bde 'gror lha'i 'jig rten du skye zhing 'byung ba'i tshul gyis srid pa na 'khor ba dang /g.yang sa mang po ste/ grang ba dang tsha ba'i dmyal ba bcu drug dang / de'i nye 'khor ba rnams dang / dud 'gro dang / yi dwags kyang dbye bas shin tu mang bar skye ba nas srid pa der de kho na ma yin pa 'di ni sgyu ma dang 'dra ba nyid yin no//der yang phan tshun 'gal bar 'gyur ba dag ste/ tsha ba dang / grang ba la sogs pa dang / sems can gzhan dag kyang phan tshun gyi mi mthun par gyur pas gnas pa dang / sred min zhes pa sred pa med par 'gyur ba de srid kyi bar du de kho na nyid ma yin pa 'di med par mi 'gyur gyi/sred pa med na 'gyur ro/ /de ltar g.yang sa mang po yod pa'i srid pa der yang nyam chung zhing stobs zhan par gyur pa dang / der yang tshe thung zhing nad mang ba dang / yang der yang gson zhing 'tsho ba dang / nad med pa'i don dang bya ba rnams kyis byis pa 'dres pa'i rgyus 'bras bu med pa kho nar myur du dus 'da' bar byed pa yin la/der yang sngon nas goms pa'i rnam par g.yeng ba bzlog cing dben par bya ba dang / sems mnyam par 'jog pa'i dus ga la yod de/ shin tu rnyed par dka'o zhes bya ba'i tha tshig go//der yang bya ba de rnams la brtson par zhugs par gyur kyang 'dod pa'i khams kyi dbang phyug gi bdud dam/ thams cad du song ba'i bdud kyis lam log par 'jug par byed pa 'am/ the tshom skyed par byed pas rnam pa 'di 'dra bas de kho na nyid rtogs par mi 'gyur zhing sdug bsngal bas 'tsho bas/thub par dka' bas zhes bya'o/ /de ltar bdud kyis byin gyis brlabs pas sdig pa chen po la 'jug pas yang nas yang du ngan 'gro rnams su skye bar 'gyur bas de'i phyir des slar dal 'byor thob pa ni shin tu rnyed par dka' zhing 'khor ba las 'byung ba yang rnyed par dka' ba yin pa dang /der yang sangs rgyas 'byung ba dang / dam pa'i chos sems shing sems mnyam par 'jog pa shin tu yang rnyed par dka' bas 'dod chags pa'i tshogs kyi chu bo rnams ni sdug bsngal bas kyang shin tu bzlog par dka' ba yin no/ /e ma'o zhes pa ni ngo mtshar du gyur pa'o//sdug bsngal rgyud ces bya ba ni gang gi phyir nyon mongs pa las las/ de las sdug bsngal/ de las kyang nyon mongs pa'i chu bo bzlog dka' ba 'byung ba'i phyir ro/ /de yang 'gro ba thog mtha' dbus med par/ /'khor ba'i 'khor los 'khor gyur pa//mgal me bskor ba lta bur ni/ /phan tshun rgyu can 'khor bar 'gyur/ /zhes bshad pa lta bu'o/ /'di zhes bya ba la de su zhig ce na/ gang 'di ltar shin tu sdug bsngal bar gnas kyang rang sdug bsngal bar gnas par mi mthong gi /gzhan du na rang shin tu bde bar gnas pa yin snyam du sems so//de ltar sdug bsngal bar gnas pa yin zhe na/ dper na rnga mo tsher ma za zhing 'tsho yang bde bar gnas snyam du sems pa de bzhin du thams cad kyang bde bar rlom pa tsam yin pa'i phyir de la gzhan ci yang med do/ /bsod nams sprin ni bsod nams kyi phung po'o/ / dmigs pa la mngon par zhen pa la gnas pas dmigs pa la spyod pa'o/ /sogs pa ni nye bar bsdus pa'o/ /byang chub sems dpa'i spyod pa la 'jug pa'i legs par sbyar ba las shes rab kyi pha rol tu phyin pa bstan pa ste le'u dgu pa'o// //bsngo ba'i dbang du mdzad nas/bdag gis byang chub spyad pa la/ /zhes bya ba la sogs pa smos pa la/ byang chub ni yon tan dang skyon thams cad 'phel ba dang sgrib pa'i mthar thug pa la gnas pa'i de kho na nyid kyi blo ste/ thams cad mkhyen pa nyid do/ /de'i spyod pa ni byang chub kyi spyod pa byang chub sems kyi phan yon la sogs pa don rnam pa bcu po gang yin pas sa dang pha rol tu phyin pa dag la 'jug pa ni ji skad du bshad pa de bsngo ba dang bcas pa/rnam par bsams pa'i zhes bya ba brtsams nas yongs su ma rdzogs pa de ltar gyis yongs su bsngo ba'i don yin no/ / dga' ba zhes bya ba ni yid bde ba'o/ /nyams pa ni 'jig pa'o/ /rgyun mi 'chad ces bya ba ni rtag tu'o/ /de ltar spyir 'gro ba'i don du tshigs su bcad pa gsum gyis dge ba yongs su bsngo ba bstan nas 'gro ba dbye ba'i sgo nas bstan pa'i phyir/ 'jig rten khams na dmyal ba dag /ces bya ba la sogs pa smos te/ bdag gi dge ba'i stobs kyis lha yi lus thob nas/ /lha mo rnams dang lhan cig dal gyis 'bab gnas shog /ces bya ba de yan chad dang sbyar bar bya'o/ /dmyal ba ni yang sos la sogs pa tsha ba dang / chu bur can la sogs pa grang ba dag go//'phags pa sangs rgyas bcom ldan 'das snang ba mtha' yas kyi skye ba la sogs pa yang dag pa ston pa'i sa rtag tu bde ba nyid dang ldan pa'i phyir bde ba can zhes bya ba la/ bde ba can de la bde dgas dga' bar shog /byang chub sems dpa'i sprin chen las te/gang la de las byung ba'i chu bo mtsho mtha' yas kyi chu bo'i tshogs kyis so/ /ral gri lo ma'i nags tshal yang / /zhes bya ba spu gri'i so 'phel ba'i dmyal ba'i lam mo/ /de nyid la shal ma li'i sdong po dag/ /ces bya ba las kyi sgyu mas rdo rje'i tsher ma kha thur du bltas shing rno ba can gyi ri'i shing ni shal ma li'i sdong po'o//brgya byin gyi skyed mos tshal dga' ba'i tshal der/ dpag bsam shing du 'khrungs par shog / mthing ril la sogs pa'i bya de dag ni skad snyan 'byin pa ste/ skad snyan sgrogs pas mdzes 'gyur shog /shin tu ring du song ba nyid kyi phyir pad+ma ste/chu skyes dri bsung che ldan gang la yod pa'i mtsho de dag gis/ dmyal ba'i sa phyogs dag ni nyams dgar shog /sol phung ni me ma mur gyi dmyal ba'i lam mo/ /sa bsregs ni tsha ba la sogs pa'i dmyal ba'i'o/ /bsdus 'joms ri bo rnams kyang ni/ /zhes bya ba la bsdus 'joms zhes bya ba ni dmyal ba chen po na lug lta bu'i ri chen po rnams kyang ngo //mdag me la sogs pa'i char ni gshin rje'i skyes bu la sogs pas phab pa'o/ /bskal pa zad pa'i da ltar yang mtshon gyis 'thab pa dmyal ba rjes su byed pa nyid kyi phyir bstan to/ /chu bo rab med ni dmyal ba'i lam mo//lha mo rnams ni lha'i bud med dag go/ /dal gyis 'bab pa ni mtho ris kyi chu bo gang+gA ste/ de la gnas par shog ces bya ba la sogs pa ni dmyal ba rnams la rnam par rtog pa'o/ /ci'i phyir zhes bya ba la sogs pa la/ /kun nas mun pa ni kun nas smag tu gyur pa'o//de ko su'i mthu snyam ste/ /gyen du bltas na nam mkha'i dkyil na phyag na rdo rje 'bar ba bzhugs mthong nas/ rab tu dga' ba'i shugs kyis sdig dang bral nas te/ sdig pa spangs par gyur nas/ bdag ni dge ba'i stobs kyis phyag na rdo rje de dang lhan cig 'gro bar shog /ces bshad zin pa dang sbyar ro/ /me tog char pa spos chu dang 'dres 'bab pa yis/ /dmyal ba'i me mdag chil chil gsod pa mthong gyur nas/ /zhes rnam par rtog par 'gyur ba na/ glo bur bde bas tshim pa 'di ci snyam na/ sems can dmyal ba rnams kyis lag na pad+ma ste/spyan ras gzigs dbang phyug mthong bar shog /de ltar rdo rje dang pad+ma'i rigs bstan nas/ de bzhin gshegs pa'i rigs bstan pa'i phyir/ grogs po dag 'jigs pa bor la zhes bya ba la sogs pa smos te/ sdug bsngal ni phongs pa'o//brtse ba yang bdag la skyes par gyur pa'o/ /gang la dbu'i zur phud mnga' ba de ni gzhon nu zur phud can no/ /zhabs kyi pad+ma ni zhabs so/ /thugs rjes brlan pa'i spyan gang la mnga' ba de ni thugs rjes brlan spyan no/ /dbu la me tog du ma'i tshogs kyis char phab pa gang la mnga' ba de la de skad ces bya'o//khang brtsegs yid 'ong lha mo stong phrag bstod dbyangs sgrogs ldan te/ de lta bur ni mtshan nyid rnam par gyur pa'i mtshan nyid can gyis 'jam pa'i dbyangs de 'dra mthong nas/ grogs dag 'jigs pa bor la tshur sheg ces bya ba la sogs pa smra ba la/da ni sems dmyal ku co 'don par shog /dmyal ba'i 'gro ba'i mjug bsdu ba ni/ /de ltar bdag gis zhes bya ba la sogs pa smos so/ /dud 'gro'i 'gro ba ni dud 'gro rnams ni gcig la gcig ces bya ba la sogs pa smos te/'di man chad bdag gi bsod nams 'di yis ni zhes bya ba 'chad par 'gyur ba dang sbyor ro/ /yi dwags kyi 'gro ba ni/ sgra mi snyan pa'i mi bzhin du zhes bya ba la sogs pa smos te/ 'phags pa spyan ras gzigs dbang gi /zhes bya ba ni khong du chud par sla'o/ / mi'i 'gro ba ni/ long ba rnams kyis mig mthong shog /ces bya ba la sogs pa smos te/ phan pa dang / bcas pas kha na ma tho ba med pa'o/ /skrag pa rnams ni zhes bya ba la sogs pa tshigs su bcad pa lnga ni rtogs sla'o/ /lha'i 'gro ba ni/ /mi dal kun las thar pa dang / / zhes bya ba la sogs pa smos te/ ji srid du thams cad nam mkha'i mdzod bzhin du 'am/ 'phags pa nor bzangs bzhin du longs spyod chad pa med par shog /nam mkha' ma lus pa'i mdzod gang la mnga' ba de ni byang chub sems dpa' nam mkha'i mdzod do/ /des gang dang gang don du gnyer ba de dang de nam mkha' las blangs nas sbyin par mdzad do//rtsod pa med cing ca co med pa ni rtsod pa med pa'o/ /rang dbang du spyod cing 'jug pa gang la yod pa de dag ni rang dbang du spyod par shog /gzi brjid chung ba ni gzi mdangs chung ba'o/ /nga rgyal dag kyang bcom par shog /ces bya ba ni nga rgyal byed par ma gyur cig ces pa'o/ /ji ltar zhe na/ bdag gi bsod nams kyis sems can rnams 'di lta bu'i rnam par gyur te/ de dag gi 'bras bu nyid ni 'di nyid yod na yang / rgyu mthun pa dang / rnam par smin pa'i 'bras bu nyid du 'gyur ro//bdag po dang skyes bu byed pa'i 'bras bu ni rgyud gzhan la yod ces bstan pa'i phyir/ bdag gi bsod nams 'di yis ni zhes bya ba la sogs pa smos te/ bdag gi bsod nams kyis bdag gi gtso bo'i stobs kyis sdig pa thams cad de ma lus par spangs nas ni'o//byang chub sems dpa' zhes bya ba la sogs pa tshigs su bcad pa ni khong du chud par sla'o/ /de ltar dmyal ba la sogs pa'i 'gro ba'i dbye bas gzhan dag gi mngon par mthong ba'i don du yongs su bsngos nas/ sangs rgyas dang / byang chub sems dpa' yang dag par dgongs pa'i don dang /chos yang dag par longs spyod pa'i don du/ sangs rgyas kyi mchod pa dag gis de ltar sngo bar byed do/ /dpag bsam gyi shing ji lta bur gyur pa zhig ce na/ sangs rgyas dang ni sangs rgyas sras/ /yid du 'ong ba'i chos snyan sgrogs pas gang ba yis so//gseg ma la sogs pa zhes bya ba la sogs pa'i sgras ni tsher ma la sogs pa gzung ngo / /bai DUr+ya'i rang bzhin ni rin po che bai DUr+ya'i khang pa'o/ /'jam pa ni mnyen pa ste/ ka tsa lin da'i gos ltar reg na 'jam pa'o//byang chub sems dpa' mang po yis/ /'khor gyi dkyil 'khor chen po dag /kun nas legs par sa stengs dag/ /brgyan par mdzad pas bzhugs gyur cig /lus can kun gyis bya dang ni/ /zhes bya ba la sogs pa ni khong du chud par sla'o//yang mi rnams ni gtso bor gyur pa yin pa'i phyir mthong ba'i chos kyi bde ba'i don du/ lha yang dus su char 'bebs shing zhes bya ba la sogs pa'i tshigs su bcad pa gsum gyis sngo bar byed pa yin te/ khong du chud par sla'o/ /klog pa dang kha ton gyis rgyas shing /dar ba gang yin pa de la de skad ces bya'o/ /dge 'dun mthun pa dang / dge 'dun mnyam pa nyid dang / dge 'dun don yang 'grub par shog /'grub par 'dod pa'i dge slong rnams zhes bya ba la sogs pa'i tshigs su bcad pa lnga ni rtogs sla'o/ /gang gtso bor gyur pa yin pa'i phyir sems can thams cad kyis sangs rgyas kyi mchod pa sngon du song ba'i sangs rgyas nyid thob par byed pa'i phyir/sems can kun gyis lan mang du zhes bya ba'i tshigs su bcad pas sngo bar byed pa yin te/ rtogs sla'o/ /rang sangs rgyas dang nyan thos gzung bar bya ba'i phyir de bzhin zhes bya ba la sogs pa smos so//de ltar gzhan gyi don grub pa'i phyir dge ba yongs su bsngos nas/ da ni rang gi don sgrub pa'i phyir/ bdag kyang zhes bya ba la sogs pa tshigs su bcad pa drug gis yongs su sngo bar byed pa yin te/ khong du chud par sla'o/ / gzhan don phun sum tshogs pa'i rang gi don phun sum tshogs pa sngon du song ba can yin pas/ gtso bo nyid yin pa'i phyir gzhan gyi don du yongs su bsngo ba sngar bstan nas/ bstan pa gnas pa'i phyir/ 'gro ba'i sdug bsngal sman gcig pu/ /zhes bya ba la sogs pa yongs su sngo bar byed pa yin te/thams cad du bdag gi bsod nams 'di yis ni/ /zhes bya ba dang sbyar ro/ /gzhan gyi don du legs par yongs su bsngo ba rdzogs nas/ dad pa mngon par 'phel ba can gyis dge ba'i bshes gnyen la/ gang gi drin gyis dge blo 'byung / /zhes bya ba la sogs pas phyag 'tshal ba yin te/dge ba'i blo ste/ byang chub kyi sems 'ba' zhig yod par ma zad kyi/ 'byung zhing 'phel bar byed par yang 'gyur ro/ /byang chub sems dpa'i spyod 'jug gi /legs par sbyar ba'i dge ba yis/ /'gro ba 'dul dang ldan bzhin du/ / byang chub sems gyur dga' bar shog /dpal ldan bkra shis rna bas gsol btab nas/ /bdag gis 'di yi legs sbyar byas pa la/ /mkhas pa rnams kyis dpyad 'khrul yod na ni/ /yon tan dam pa'i blo can gyis bzod mdzod/ /[(]sha [,]sho [)]lo ka stong phrag gcig dang ni/ /dgu brgya bdun cu rtsa lnga zhes//grangs nyid kyis ni legs bgrangs nas/ /dge ba'i lha yis byas pa yin/ /byang chub sems dpa'i spyod pa la 'jug pa'i legs par sbyar ba las yongs su bsngo ba bstan pa ste le'u bcu pa'o// //rgya gar gyi mkhan po shrI ku mA ra dang / zhu chen gyi lo tsA ba dge ba'i blo gros kyis bsgyur cing zhus te gtan la phab pa/