CLOSE WINDOW

D3873
བོད་ཡིག

@/ /spyod 'jug gi rnam par bshad pa bzhugs so// @#/ /thugs rje chen po spyan ras gzigs la phyag 'tshal lo/ /gang zhig thugs rjes byang chub sems gnyis rab bskyed nas/ /brtson 'grus mtshungs pa med pas tshogs gnyis rdzogs mdzad de/ / bdag dang gzhan don phun sum tshogs pa brnyes gyur kyang / /'jam dpal dbyangs kyis blo bskyed 'gyur la'ang phyag 'tshal te/ /spyod la 'jug pa'i tshig gi don/ /bdag 'dra'i spyod yul ma yin yang / /bslab pa kun las btus pa las/ /brten nas cung zad bri bar bya/ /da ni slob dpon bdag nyid kyis bstan bcos rtsom pa mthar phyin par bya ba dang /nyan pa po dang 'chad pa po rnams kyi nyan pa dang bshad pa mthar phyin par bya ba dang / bstan bcos la 'jug pa'i yan lag tu bya ba'i phyir/ gang gis rten cing 'brel par 'byung / /zhes bya ba la sogs pa dang /sangs rgyas rnams dang byang chub sems dpa' dag /ces bya ba la sogs pa mchod pa rnam pa gnyis gsungs te/ de la dang po ni sangs rgyas dkon mchog la gzhan gyi don phun sum tshogs pa'i thabs thun mong ma yin pa rten cing 'brel par 'byung ba spros pa'i mtha' rnam pa brgyad dang bral ba ji lta ba bzhin du ston par mdzad pa zhes bya ba'i sgo nas mchod pa bstan te/de bzhin gshegs pa kho na las gzhan gyi yul ma yin pa'i phyir ro/ /de la gnyis pa ni dkon mchog gsum char la yang gzhan gyi don phun sum tshogs pa'i sgo nas mchod pa bstan te/ sangs rgyas rnams dang byang chub sems dpa' dag /ces bya ba'i sangs rgyas dkon mchog dang / dge 'dun dkon mchog yin la/ de dag spyod dang zhes bya ba ni chos dkon mchog yin te/ ji lta zhe na/ bstan pa'i tshul gyis spyod pa dang / sgrub pa'i tshul gyis spyod pa dang / mngon sum du byed pa'i tshul gyis spyod pa ste/ go rims bzhin du bstan pa'i chos dang / sgrub pa'i chos dang / don dam pa'i chos yin pa'i phyir ro/ /sems can ma lus gnod pa sel mdzad cing / /bde ba rnam pa sna tshogs bsgrub mdzad pa/ /zhes bya ba ni 'bras bu gzhan ni don phun sum tshogs pa bstan pa'i phyir ro//de bas na mchod par brjod pa dang po'i dbang du byas nas phyag 'tshal lo zhes bya ba ni mchod pa dngos bstan pa yin la/ rdzogs pa'i sangs rgyas zhes bya ba ni mchod pa'i yul bstan pa yin zhing / smra ba rnams kyi dam pa zhes bya bas ni mchod pa'i rgyu mdor bstan pa yin la/lhag ma rnams kyis ni de nyid rgyas par bshad pa yin no/ /de bzhin du mchod par brjod pa gnyis pa'i dbang du byas nas/ sangs rgyas rnams dang byang chub sems dpa' dag /ces bya ba dang spyod dang zhes bya ba ni mchod pa'i yul bstan pa yin la/gus phyag 'tshal zhes bya ba ni mchod pa dngos bstan pa yin zhing / lhag ma rnams kyis ni mchod pa'i rgyu bstan pa yin no/ /yang na mchod par brjod pa dang po'i dbang du byas nas phyag 'tshal lo zhes bya bas ni phyag 'tshal ba'i sgo nas mchod pa yin la/ lhag ma rnams kyis ni bstod pa'i sgo nas mchod pa yin te/de yang rdzogs pa'i sangs rgyas zhes bya ba ni/ rang gi don phun sum tshogs pa yin zhing / lhag ma rnams ni gzhan gyi don phun sum tshogs pa'i thabs yin no/ ji lta zhe na/ nyon mongs pa dang shes bya'i sgrib pa de gnyis ma lus par spangs pa dang /bag chags dang bcas pa spangs pa dang ting nge 'dzin dang snyoms par 'jug pa thams cad kyi sgrib pa spangs pa'i phyir rdzogs pa'i sangs rgyas te/ dper na skyes bu gnyid sad pa lta bu yin zhing / shes bya ji snyed yod pa dang ji lta ba bzhin du yod pa mkhyen pas shes bya la blo rgyas pa'i phyir rdzogs par sangs rgyas pa ste/me tog ku mu ta kha bye ba lta bu yin pa'i phyir dang / rten cing 'brel par 'byung ba spros pa'i mtha' rnam pa brgyad dang bral ba ji lta ba bzhin du ston pa ni gzhan gyi don phun sum tshogs pa'i thabs yin te/ de yang ji lta zhe na/ kun rdzob dang don dam pa'i bden pa gnyis kyi dbang du byas nas spros pa'i mtha' rnam pa brgyad dang bral bar ston pas/go rims bzhin du gdul bya mtha' dag gi las rgyu 'bras la rmongs pa'i ma rig pa dang / de kho na'i don la rmongs pa'i ma rig pa bsal bas rim pa bzhin du mngon par mtho ba dang / nges par legs pa'i 'bras bu thob par byed pa'i phyir te/ de ni re zhig bsdus pa'i don yin no/ /da ni yan lag gi don brjod par bya ste/ gang gis zhes bya ba ni spyi'i sgra yin yang / sangs rgyas bcom ldan 'das kho na yin par mngon te/ gzhan dag la ji skad smos pa'i yon tan med pa'i phyir ro//rten cing 'brel par 'byung zhes bya ba ni/ gzhan gyi dbang gi mtshan nyid de/ de ji ltar kun rdzob kyi bden pa'i dbang du byas nas/ spros pa'i mtha' rnam pa brgyad dang bral ba yin zhe na/ ji ltar snang ba tshod tsam du yang gzhan mu stegs byed kyis khas blangs pa bzhin du dbang phyug la sogs pas bshig pa'i dgag pa med pa dang /mi mthun pa'i rgyu dang / rgyu med pa las skye ba med pa dang / grangs can gyis khas blangs pa lta bu'i rtog pa dang / rgyang 'phen pa 'dod pa lta bu chad pa dang / rang gi sde pa bye brag tu smra ba la sogs pas 'dod pa lta bu 'dus byas dang 'dus ma byas kyi mtshan nyid rnam pa de nyid dang phan tshun tha dad pa dang /grangs can pa 'dod pa lta bu dngos po thams cad yon tan gsum gyi rang bzhin du gcig pa dang / yang mu stegs rtag par smra ba rnams kyi 'dod pa lta bu'i skye ba'i tshe/ tshe snga ma'i dngos po de nyid 'dir 'ong ba dang / shi ba'i tshe nyid 'di nyid phyi mar 'pho ba med pas go rims bzhin du spros pa nye bar zhi ba yin la/de nyid ji lta ba bzhin du bstan pa'i phyir zhi bar bya'o/ /ji ltar na don dam pa'i bden pa'i dbang du byas nas spros pa'i mtha' rnam pa brgyad dang bral ba yin zhe na/ re zhig kun rdzob gong ma lta bu'i 'gags pa la sogs pa med kyang /rang rang gis 'gags pa dang / rgyu rkyen gzhan las skye ba dang / 'bras bu 'byung ba'i tshe 'gags pa dang / rgyu yod pa'i tshe 'bras bu 'byung ba dang / so so'i rgyu las rang dang rjes su mthun pa'i 'bras bu skye ba dang / rgyu dang 'bras bu de dag nyid kyang phan tshun log pa dang /tshe snga ma'i phung po las bar ma chad par 'dir 'ong ba dang / 'di nas shi 'phos pa'i dus su bar ma chad par skye ba yin yang don dam par des kyang ma grub ste/ ji lta zhe na/ mtshan gzhi dngos po nyid tshad mas dpyad na ma grub pa'i phyir de'i mtshan nyid dgag pa la sogs pa ga la 'grub ste/ji ltar de kho na nyid la 'jug pa las/ dngos po yod na ni de brten pa'i chos de dag dang / de bsam gyis/ mo gsham bu la gtong ba'i ngang tshul can du 'ga' mi 'dogs pa zhes gsungs pa lta bu ste/ de'i phyir tshad mas dpyad na bden pa gnyis rnam par 'byed pa las/ji skad du/ gal te rigs pa'i stobs kyis na/ /kun rdzob tu yang mi skye dang / /zhes brgal ba'i len de bden zhes bya ba la sogs pa gsungs pa'i tshul gyis na kun rdzob nyid kyang ma grub na/ dngos po smra bar khas blangs pa lta bu'i dngos po don dam par lta smos kyang ci dgos te/'phags pa rdo rje gcod pa las ji skad du de bzhin gshegs pas mngon par rdzogs par sangs rgyas pa'i chos de la ni bden pa yang med brdzun pa yang med ces gsungs pa lta bu yin pas/ de'i phyir rigs pa ji lta ba bzhin du dngos po gang yang grub pa med pas/ bden pa gnyis rnam par 'byed pa las kyang /ma skyes ngo bo nyid la ni/ /rtag dang chad pa ga la zhig /chos kyi bye brag rnam rtog pa/ /ngo bo nyid la rtog par byed/ /ji ltar sus kyang nam mkha' la/ /yig sogs dgod par mi nus ltar/ /dngos po rnams ni ma skyes la/ /chos su rnam rtog de bzhin no//zhes gsungs pa yin no/ /gal te de ltar tshad mas dpyad na/ kun rdzob skye 'gag nyid kyang ma grub pa yin na ni/ de'i tshe snang ba gsal ba nyid du 'gyur ro zhe na/ mi 'gyur te rigs pa'i bsam pa'i dbang du byas nas med par khas blangs pa'i phyir/ kun rdzob de rigs pas brtag bzod pa'i mtshan nyid du med ces bya bar 'gyur gyis/ji ltar snang ba tsam du yang med ces bya bar mi 'gyur te/ kun rdzob 'jog par byed pa'i shes pa rnams kyis bsam pa'i dbang du byas nas kyang med ces khas blang ba'i phyir ro/ /de bas na don dam par ni 'gag pa la sogs pa spros pa mtha' dag nye bar zhi ba ste/bden pa gnyis rnam par 'byed pa las kyang / ji skad du/ de nyid phyir na de stong min/ /mi stong ma yin yod med min/ /mi skye ma yin skye min zhes/ /de la sogs pa bcom ldan gsungs/ /zhes 'byung ba yin no/ /de bas na de bzhin gshegs pas kyang don dam pa'i bden pa ni 'phags pa yab dang sras mjal ba'i mdo las don dam pa gang yin pa de ni brjod du med pa ste/shes par bya ba ma yin pa/ rnam par shes par bya ba ma yin pa zhes bya ba la sogs pa gsungs pa'i phyir zhing bstan pa zhes bya'o/ /'on te de ltar don dam pa'i bden pa brjod du med pa nyid yin no//de'i tshe stong pa nyid la sogs pa'i sgra dag gis ji ste zhe na/ de ni don dam pa'i bden pa de la mi stong pa de la sogs pa'i zhen pa dgag pa'i phyir yin gyi/ stong pa la sgra dag gis brjod par byar rung ba'i phyir gsungs pa ni ma yin te/ ji skad du/ 'phags pa sangs rgyas thams cad kyi yul la 'jug pa ye shes snang ba'i rgyan las/ 'jam dpal stong pa zhes bya ba ni ma stong par mngon par zhen pa dgag pa'i tshig bla dgas yin gyi/ 'jam dpal 'di don dam par stong pa zhes bya ba'i chos ni 'ga' yang mi dmigs so zhes gsungs pa'i phyir te/spros pas chog go/ /'o na de ltar ston pa po de su yin zhe na/ rdzogs pa'i sangs rgyas zhes bya ba la sogs pa gsungs te/ gzhan dag gis ston mi nus pa'i phyir ro/ /'on te rab 'byor la sogs pas kyang ston to zhe na/ de ni ston pas byin gyis brlabs pa'i phyir te/ ji skad du/ rgyal ba'i nyan thos pa dag ji skad chos ston dang / /'chad dang rig pa dag dang ldan pa brjod pa dang / /mchog 'phags bde ba byed dang de yi 'bras ston pa/ /de dag kun kyang de bzhin gshegs pa skyes bu'i mthu/ /zhes gsungs pa'i phyir ro/ /de bas na smra ba rnams kyi dam pa zhes bya'o//da ni mchod pa gnyis pa'i yan lag gi don gyi dbang du byas nas/ sangs rgyas rnams dang zhes bya ba la sogs pa smos te/ 'dir sems can ma lus pa zhes bya ba spyi sgra 'byung mod kyi/ gdul bya ma lus pa yin par mngon te/ gnod pa sel mdzad cing zhes bya ba la sogs pa 'byung ba'i phyir ro//gdul bya de dag gi don ji ltar mdzad ce na/ yang sangs rgyas dang byang chub sems dpa' rnams ni skye ba rnam pa lnga zhes bya ba'i sgo nas phrin las rnam pa lnga'i tshul gyis gdul bya rigs rnam pa lngas bsdus pa rnams kyi tshe 'di dang phyi ma'i gnod pa spong zhing bde ba sgrub pa'i don mdzad pa'i phyir te/ji lta zhe na/ gnod pa las yongs su skyob pa'i phrin las kyis ni de dag las de dang der sems can long ba rnams ni mig gis mthong zhes bya bar gyur to zhes bya ba la sogs pa'i tshul gyis gdul bya rigs lngas bsdus pa rnams kyi tshe 'di gnod pa ma lus pa sel zhing bde ba sgrub par mdzad pa yin la/ngan song las yongs su skyob pa'i phrin las kyis gdul bya rigs 'chad pa rnams kyi tshe phyi ma'i ngan song gi gnod pa sel zhing mtho ris kyi bde ba sgrub par mdzad pa yin zhing / de bzhin 'jig tshogs las yongs su skyob pa'i phrin las kyis ni gdul bya nyan thos dang rang sangs rgyas kyi rigs can dag gis 'khor bar skye ba'i gnod pa sel bar mdzad cing /nyan thos dang rang sangs rgyas kyi bde ba sgrub par mdzad pa yin la/ de bzhin du theg pa dman pa las yongs su skyob pa'i phrin las kyis ni gdul bya rigs ma nges pa dag theg pa dman par ltung ba'i gnod pa sel bar mdzad cing /theg pa chen po'i bde ba yang sgrub par mdzad la/ de bzhin du gdul bya theg pa chen po'i rigs can dag la ni thabs ma yin pa las yongs su skyob pa'i phrin las kyis ni theg pa chen po'i thabs ma yin par 'jug pa'i gnod pa sel cing /yang dag pa'i theg pa chen po'i thabs nyid la 'god pa'i bde ba sgrub par mdzad pa'i phyir/ sems can ma lus gnod pa sel mdzad cing / /bde ba rnam mang sna tshogs sgrub mdzad pa/ /zhes 'byung ba yin no/ /da ni byang chub sems dpa'i spyod pa'i gzhi'i gzhung bshad pa'i phyir/de yang sgrub pa po gang zag gi dbang du byas nas/ dal 'byor 'di ni zhes bya ba la sogs pa tshigs su bcad pa gnyis gsungs te/ de la tshigs su bcad pa dang pos ni spyod pa sgrub pa'i lhan cig byed pa'i rkyen/ dal 'byor phun sum tshogs pa rnyed par dka' ba'i phyir/ de thob pa chud mi za bar bstan te/ tshigs su bcad pa gnyis pas ni spyod pa sgrub pa'i nye bar len pa'i rgyu theg pa chen po'i rigs dang ldan pa'i rgyud las/ bdag dang gzhan mnyam pa nyid du bya ba'i dge ba'i chos la 'dun pa rnyed par dka' bas de chud mi za bar bya ba nyid du bstan te/de yang bslab pa kun las btus pa las/ skyes bu'i don rnams bsgrub pa'i dal 'byor 'di zhes bya ba la sogs pa dang / de lta bu dang phrad pa la brten nas sems can chen po dag la 'di lta bu'i rnam par rtog pa 'byung ngo / /'di ltar bdag dang gzhan mnyam par/ /'jigs dang sdug bsngal mi 'dod na//bdag dang bye brag ci yod kyis/ /gang de bsrung la de mi srung / /snyam ste/ zhes 'byung ba dang go rims bzhin du sbyar ro/ /yan lag gi don brjod par bya ste/ dal 'byor zhes bya ba ni bdag gi 'byor pa lnga ste/ mir gyur pa dang / dbang po tshang ba dang / yul gyi dbus su skyes pa dang /gnas la dad par gyur pa dang / las kyi mtha' ma log pa dang / de bzhin du gzhan gyi 'byor pa lnga ste/ sangs rgyas 'jig rten du byung ba dang / dam pa'i chos ston pa dang / dam pa'i chos 'jig rten na gnas pa dang / gzhan dag kyang de'i rjes su 'jug pa dang /gzhan rjes su snying brtse ba ste/ bcu po 'di dag ni nyan thos kyi sa las 'byung ba bzhin du rig par bya'o/ /de rnyed par shin tu dka' ba ni mdo kun las btus pa las ji skad 'byung ba bzhin no/ /de nyid ni skyes bu'i don mngon par mtho ba dang nges par legs pa sgrub pa'i rten yin te/de ltar ci zhig ltar thob par gyur pa dang / gal te de thob pa'i gnas gnas skabs 'di la phan pa ste/ dge ba'i las ma bsgrubs na thob pa chud zos pa nyid du 'gyur bas de thob pa chud mi za bar bya ba'i phyir/ de'i las la 'bad par bya'o zhes bya bar bstan to/ / de ltar yin yang phyis bsgrub par bya mod ce na/ phyis ni 'grub par nges pa med pa'i phyir/ /phyis 'di yang dag 'byor par ga la 'gyur/ /zhes gsungs so/ /da ni spyod pa sgrub pa'i rten nye bar len pa'i rgyu'i dbang du byas nas/ ji ltar mtshan mo zhes bya ba la sogs pa smos te/ 'jig rten te theg pa chen po'i rigs can dag gi rgyud la dal 'byor phun sum tshogs pa dang phrad pa la brten nas bsod nams te dge ba'i chos bdag bzhin du sems can thams cad la yang sdug bsngal dang bral zhing / bde ba bsgrub par bya'o snyam pa'i byams pa dang snying rje'i bdag nyid kyi blo gros thang 'ga' zhig 'byung gi gtan du 'byung ba ma yin pas/de thob pa chud mi za bar bya'o zhes bstan to/ /de ni rten khyad par can thob pa'i gang zag des nyams su blang ba'i rim pa byang chub sems dpa'i spyod pa'i bdag nyid kyi dbang du byas nas/re zhig spyod pa bsgrub pa'i sngon du 'gro ba ni byang chub tu sems bskyed pa yin pas de'i phan yon bstan pa dang / de ltar dge ba nyam chung zhes bya ba la sogs pa gsungs te/ 'dir bsdus pa'i don to/ /dge ba bsgrub pa'i rten ni dal 'byor phun sum tshogs pa yin la 'di ni shin tu rnyed par dka' bas de la brten pa'i dge ba'i chos ni shin tu nyam chung ba'i phyir dang mi dge ba sgrub pa'i rten mi khom pa'i gnas ni shin tu rnyed par sla bas de bstan pa'i mi dge ba'i chos ni dpag tu med pa rgyud la gnas pa yin la/de rnams ni byang chub chen por sems bskyed pa rnam pa gnyis kyis spong bar 'gyur te/de ni rten gyi stobs dang nyes pa las bzlog pa'i stobs khyad par can yin pa'i phyir dang / lhag ma nyan thos la sogs par smon pa dang 'jug pa'i sems bskyed pa'i dge ba gzhan dag gis ni de ltar ma yin te/ de dag ni rten gyi stobs dang khyad par can ma yin pa'i phyir ro//de bas na dus dpag tu med par sems can gyi don la dgongs pa'i thub pa'i dbang po dngos kyis kyang nyan thos su sems bskyed pa la sogs pa'i nang nas theg pa chen por sems bskyed pa nyid mchog tu phan par gzigs so zhes bya ba yin no/ /phan yon gzhan yang byang chub tu sems bskyed pa 'dis ni gdul bya tshad med pa'i skye bo'i tshogs rnams kyis/bde ba thams cad kyi mchog bla na med pa'i sangs rgyas kyang me lnga bsten pa la sogs pa lta bu'i lus gdung ba'i dka' thub drag po bya mi dgos par grub par byed pas bde blag nyid du thob par byed ces bshad do//'di tsam gyis sdig pa spong zhing bde ba thob par byed pa'i rgyu nyid du bstan to/ /phan yon bstan pa'i sgo nas byang chub tu sems bskyed pa de gzung bar bya ba nyid du gdams ngag bstan pa/ 'jigs dang zhes bya ba la sogs pa smos te/ bdag gi rgyud la tshe 'di'i rgyal po'i chad pa la sogs pa'i 'jigs pa dang /tshe phyi ma'i 'khor ba'i sdug bsngal brgya phrag dpag tu med pa gzhom par 'dod cing / de bzhin du sems can gzhan gyi rgyud la tshe 'di dang phyi ma'i mi bde ba bsal bar 'dod pa dang / bdag dang gzhan gyi rgyud la tshe 'di dang phyi ma'i bde ba mang po brgya phrag dpag tu med pa spyod par 'dod pas kyang smon pa dang 'jug pa'i byang chub kyi sems bskyed pa nyid rtag tu gtong bar mi bya ste/gdon mi za bar sems bskyed par mi bya'o zhes bya ba'i tha tshig go/ /gzhan yang byang chub kyi sems bskyed par gyur na/ de bskyed pa'i skad cig gis gang zag de 'khor ba'i btson rar nyon mongs pa rnam pa sna tshogs kyis bsdams pa skye ba la sogs pa'i sdug bsngal gyis nyam thag pa rnams kyang /bde bar gshegs pa rnams kyi sras/ /zhes brjod par bya zhing / de nyid kyis na/ 'jig rten lha mir bcas pas phyag byar 'gyur/ /zhes smos te/mchod pa'i gnas su 'gyur ro/ /phan yon gzhan yang gser 'gyur rtsi'i zhes pa la sogs pa smos te/ 'phags pa sdang po bkod pa'i mdo las ji skad du rigs kyi bu 'di lta ste/ dper na dngul chu'i rigs gser du snang ba zhes bya ba yod de/ de ni srang gcig gis kyang lcags srang stong gser du bsgyur te/dngul chu srang gcig po de ni lcags srang stong po des zad par bya ba'am lcags su bsgyur bar mi nus so/ /de bzhin du thams cad mkhyen pa nyid du sems bskyed pa'i khu ba'i 'byung khungs dge ba'i rtsa ba yongs su bzung ba'i las dang nyon mongs pa'i sgrib pa'i lcags thams cad zad par byas te/chos thams cad thams cad mkhyen pa nyid kyi kha dog tu byed kyang thams cad mkhyen pa nyid du sems bskyed pa'i khu ba'i 'byung khungs gcig po de ni las dang 'bras bu nyon mongs pa'i lcags thams cad kyis kyang kun nas nyon mongs par bya ba'am zad par bya bar mi nus so zhes gsungs pa lta bu'o//de lta bas na byang chub tu sems bskyed pa'i phan yon ni dpag tu med pa dang ldan par de bzhin gshegs pa rnams kyis gzigs pa rtogs pa dang ldan pa gang zhig bdag dang gzhan gyi rgyud la spangs pa dang ye shes thob par 'dod pas yid bzhin gyi nor bu rin po che lta bur dkon pa dang rin che dang /dga' bar byed pa dang / phan 'dogs pa dang / mi ma yin pa la sogs pa'i gnod pa las skyob pa ste/ dal 'byor phun sum tshogs pa la sogs pa bstan pa'i phyir dang go rims bzhin du lus dang longs spyod dang /dge ba'i rtsa ba btang dgos pa'i phyir dang / 'gyod pa med pa'i rim gyis bde ba la reg par byed pa'i phyir dang / bsod nams dang ye shes kyi tshogs dpag tu med pa skyed pa'i phyir dang / de nyid kyis na gzhan dag gi gnod pas mi tshugs pa'i phyir te/de bas na yongs su gzung bar bya dgos pas/ 'gro ba'i ded dpon zhes bya ba la sogs pa smos so/ /gzhan yang dge ba gzhan kun zhes bya ba la sogs pas ni 'di skad bstan te/ ji ltar chu shing 'bras bu bskyed nas zad par 'gyur ba bzhin du byang chub tu sems bskyed pa'i rten dam pa dang /byang chub chen por yongs su bsngo ba dam pas ma zin pa'i dge ba de dag gis ni rang rang gi 'bras bu bskyed nas/ de'i rjes la yongs su zad par 'gyur gyi/ byang chub tu sems bskyed pa rten dam pa dang / yongs su bsngo ba dam pas yongs su zin pa'i dge ba'i rtsa ba rnams kyis ni ji srid du byang chub chen po ma thob kyi bar du mngon par mtho ba'i 'bras bu 'byin zhing de zad par mi 'gyur te/mthar byang chub chen po thob pas 'phel bar 'gyur ro zhes bya ba'am/ yang byang chub chen po'i 'bras bu 'byin zhing 'khor ba ji srid ma stongs par gzugs kyi sku rnam pa gnyis 'gro ba'i don mdzad pa'i phyir ram/yang na bdag gi don gyi 'bras bu 'byin cing / gzhan gyi don yang sgrub par byed pa'i phyir/ 'bras bu 'byin pas mi zad 'phel bar 'gyur/ /zhes bshad do/ /'dis ni byang chub tu sems bskyed pa 'di nyid dge ba'i rtsa ba mi zad par bsrung zhing lus la sogs pa spel ba'i thabs nyid du yang ston to//phan yon gzhan yang / sdig pa shin tu mi zad ces bya ba la sogs pas 'di skad bstan te/ grogs khyad par can la brten nas dgra la sogs pa'i 'jigs pa chen po las skyob pa bzhin du smon pa'i sems bskyed pa'i bdag nyid kyi nyes pa las bzlog pa'i stobs kyis kyang sdig pa las grol ba'i phyir/sdig pa sbyang bar 'dod pa rnams kyis gdon mi za bar bsten par bya dgos te/ des na bskal pa'i me bzhin du nyes byas rnams sreg pa'i phyir ro snyam du bsam pa ste/ 'di tsam gyi phan yon rig pa'i sgo nas bstan to//da ni lung gi sgo nas bstan pa'i phyir/ de'i phan yon zhes bya ba la sogs pa ste/ 'phags pa sdong po bkod pa'i mdo las/ rigs kyi bu byang chub kyi sems ni sangs rgyas kyi chos thams cad kyi sa bon lta bu'o/ /'gro ba thams cad kyi chos dkar po rnam par 'phel bas zhing lta bu'o//'jig rten thams cad rten pas sa lta bu'o/ /dbul ba thams cad yang dag par gcod pas rnam thos kyi bu lta bu'o/ /byang chub sems dpa' thams cad kyis yongs su bsrung bas pha lta bu'o/ /don thams cad yang dag par 'grub pas yid bzhin gyi nor bu'i rgyal po lta bu'o//bsam pa thams cad yongs su rdzogs par byed pas bum pa bzang po lta bu'o/ /nyon mongs pa'i dgra pham par byed pas mdung thung lta bu'o/ tshul bzhin ma yin pa yid la byed pa 'gegs pas go cha lta bu'o/ /nyon mongs pa'i mgo ltung bar byed pas ral gri lta bu'o//nyon mongs pa'i shing gcod par byed pas sta re lta bu'o/ /'tshe ba thams cad las skyab pas mtshon cha lta bu'o/ /'khor ba'i chu'i nang na gnas pa steng du 'byin pas mchil pa lta bu'o/ /sgrib pa thams cad khebs pa'i sa thams cad rnam par 'thor bas rlung gi dkyil 'khor lta bu'o//byang chub sems dpa'i spyod pa dang smon lam thams cad bsdus pa'i phyir mdor bstan pa lta bu'o/ /lha dang mi dang lha ma yin du bcas pa'i 'jig rten la mchod rten lta bu ste/ rigs kyi bu de ltar byang chub kyi sems ni yon tan de dag dang yon tan gyi bye brag tshad med pa gzhan dag dang ldan no zhes 'byung ba lta bu'o//'o na yon tan de lta bu dang ldan yang bdag cag lta bu so so'i skye bo la skyer rung ngam zhe na/ skyer rung ba nyid du rig par bya ste/ bslab pa kun las btus pa las ji skad bshad pa bzhin no/ /da ni byang chub kyi sems kyi rab tu dbye ba bstan pa'i phyir/byang chub sems su mdor bsdu na/ /zhes bya ba la sogs pa smos te/ yang byang chub tu sems bskyed pa'i rab tu dbye ba ni/ de yang sa gser zla ba me/ /zhes bya ba la sogs pa nyi shu rtsa gnyis nyid du 'byung ba las 'di ni sems bskyed pa dang po 'dun pa dang ldan pa lta bu'i dbang du byas pa yin la/yang sems bskyed pa ni/ mos dang lhag bsam dag pa dang / /rnam par smin pa gzhan du 'dod/ /de bzhin sgrib pa spangs pa'o/ /zhes ji skad bshad pa lta bur rnam pa bzhi nyid du dbye ba las 'di ni mos pa'i sems bskyed pa'i dbang du byas pa yin zhing /yang kun rdzob dang don dam pa'i sems bskyed pa rnam pa gnyis las 'di ni kun rdzob byang chub kyi sems bskyed pa'i dbang du byas pa las de nyid la yang dag par blangs pa brda las byung ba dang chos nyid kyis thob pa dang rnam pa gnyis las/ 'di ni yang dag par blangs pa brda las byung ba'i dbang du byas te/de ltar yang sdong po bkod pa'i mdo las gsungs pa/ rigs kyi bu sems can dag bla na med pa yang dag par rdzogs pa'i byang chub tu sems smon pa de dag kyang dkon na/ de bas kyang gang dag bla na med pa yang dag par rdzogs pa'i byang chub tu chas pa'i sems can de dag ni shin tu dkon no zhes 'byung ba lta bu'o//de la smon pa'i sems bskyed pa'i ngo bo ni sems can thams cad kyi don du bdag bla na med pa yang dag par rdzogs pa'i byang chub tu mngon par rdzogs par sangs rgyas par gyur cig snyam du byang chub dang sems can gnyis la dmigs pa'i don du gnyer ba'i 'dun pa dang /mtshungs par ldan pa'i yid kyi rnam par shes pa dper na 'gro bar 'dod pa lta bu ste/ byang chub sems dpa'i sa las ji skad 'byung ba bzhin no/ /de la 'jug pa'i sems bskyed pa'i ngo bo nyid ni spong ba'i sems pa dang 'jug pa'i sems mtshungs par ldan pa'i yid kyi rnam par shes pa bag chags dang bcas pa ste/de sdom pa'i tshul khrims ni spong ba'i sems pa'i ngo bo nyid yin la/ lhag ma gnyis ni 'jug pa'i sems pa'i ngo bo nyid yin te/ de ni dper na lam du zhugs te chas pa lta bu'o/ /'on te smon pa'i sems bskyed pas chog mod/'jug pa'i sems bskyed pas ci zhig bya zhe na ma yin te/ 'jug pa'i sems bskyed pa ni smon pa las kyang 'bras bu bsod nams kyi phung po shin tu che ba'i phyir te/ ji ltar zhe na/ byang chub smon pa'i sems las ni/ /zhes bya ba la sogs pa smos te/ smon pa'i sems bskyed pa las 'khor ba na 'khor ba'i tshe 'bras bu chen po 'byung bar ci mngon zhe na/'phags pa byams pa'i rnam par thar pa las gsungs pa bzhin te/ rigs kyi bu 'di lta ste dper na/ rdo rje rin po che ni chag kyang gser gyi rgyan khyad par du 'phags pa thams cad zil gyis gnon cing rin po che'i ming yang mi 'dor zhing dbul ba thams cad kyang rnam par bzlog go//rigs kyi bu de bzhin du thams cad mkhyen par sems bskyed pa'i rdo rje rin po che ni nan tan dang bral yang nyan thos dang rang sangs rgyas kyi yon tan gyi gser gyi rgyan thams cad zil gyis gnon cing / 'khor ba'i dbul ba thams cad kyang rnam par bzlog go zhes 'byung ba dang /de bzhin du rgyal po la gdams pa'i mdo las kyang / rgyal po chen po 'di ltar khyod ni bya ba mang ba byed pa mang ba ste/ thams cad kyi thams cad rnam pa thams cad kyi thams cad du sbyin pa'i pha rol tu phyin pa la bslab pa nas/ shes rab kyi pha rol tu phyin pa'i bar la bslab par mi nus kyis/de bas na rgyal po chen po khyod yang dag par rdzogs pa'i byang chub la 'dun pa dang don du gnyer ba dang / smon pa 'gro yang rung 'greng yang rung 'dug kyang rung sad kyang rung rtag par rgyun du dran par gyis la yid la zung ste sgoms shig dang / sangs rgyas dang byang chub sems dpa' dang 'phags pa nyan thos dang / rang sangs rgyas dang / so so'i skye bo thams cad dang / bdag nyid kyi 'das pa dang / ma 'ongs pa dang / da ltar byung ba'i dge ba'i rtsa ba thams cad bsdus shing gzhol te rtsis la rjes su yi rang ba mchog dang nam mkha' dang 'dra ba dang /mya ngan las 'das pa dang mtshungs par rjes su yi rang bar gyis shig /rjes su yi rang nas sangs rgyas dang byang chub sems dpa' dang / 'phags pa nyan thos dang / rang sangs rgyas thams cad la mchod par bya ba phul cig /phul nas sems can thams cad dang thun mong du gyis shig /de nas sems can thams cad thams cad mkhyen pa'i bar du 'thob par 'gyur ba dang / rang sangs rgyas kyi chos thams cad yongs su rdzogs par 'gyur ba'i phyir nyin gcig bzhin du dus gsum du bla na med pa yang dag par rdzogs pa'i byang chub tu bsngos shig /rgyal po chen po khyod de ltar zhugs na rgyal po'i bya ba yang nyams par mi 'gyur zhing byang chub kyi tshogs kyang rdzogs par 'gyur ro zhes gsungs so/ /mdo sde de nyid las rnam par smin pa yang gsungs te/ rgyal po chen po khyed yang dag par rdzogs pa'i byang chub kyi sems kyi dge ba'i rtsa ba'i rnam par smin pas lan du mar lha'i nang du skye/lan du mar mi'i nang du skye ste lha dang mi'i skye bar 'gyur ba na dbang po byed par 'gyur kyang / da dung rgyal po chen po khyod kyi yang dag par rdzogs pa'i byang chub kyi sems kyi dge ba'i rtsa ba'i las la bri ba'am gang bar mi mngon no/ / 'on kyang rgyal po chen po bla na med pa yang dag par rdzogs pa'i byang chub kyi sems gcig kyang sems can thams cad dga' bar dmigs pa dang / sems can thams cad dbugs dbyung bar dmigs pa dang / sems can thams cad yongs su mya ngan las bzla bar dmigs pa'i phyir ro//dge ba'i rtsa ba grangs med dpag tu med pa la sogs par 'gyur na/ gang de ltar mang du byed pa lta ci smos zhes 'byung ngo / /ji ltar 'jug pa'i sems bzhin du/ /bsod nams rgyun chags 'byung ba min/ /zhes bya ba ni ji ltar 'jug pa'i sems bskyed pa bzhin du bsod nams kyi phung po dpag tu med pa 'byung ba ni ma yin no//'o na 'jug pa'i sems bskyed pa las dus gang nas ji srid kyi bar du grangs du zhig rgya ji snyed 'byung zhe na/ go rims bzhin du lan btab pa'i phyir gang nas bzung ste zhes bya ba la sogs pa smos te/ deng nas bzung ste zhes bya ba'i bar gyis dus gang nas 'byung ba bstan to//rgyun mi 'chad par zhes bya ba'i bar gyis dus ji srid 'byung bar bstan to/ /nam mkha' mnyam par rab tu 'byung / /zhes bya bas ni rgya ji snyed cig 'byung bar bstan to/ /sems can khams/ mtha' yas rab tu dgrol ba'i phyir/ / zhes bya bas ched du bya ba dam pa bstan to/ /mi ldog pa yi sems kyis su/ /zhes bya bas ni srog la bab kyang gtang bar mi bya'o snyam pa'i bsam pa ste/ bsam pa phun sum tshogs pa bstan to/ /sems de zhes bya bas ni dngos po dam pa ste/ sdom pa'i ngo bo nyid bstan to//yang dag ces bya bas ni yang dag par len pa'i cho ga phun sum tshogs pa bstan to/ /bsod nams de snyed cig 'byung bar ci mngon zhe na/ 'di ni zhes pa la sogs pa gsungs te/ dman pa nyan thos kyi theg pa la mos pa rnams theg pa chen po la drang ba'i phyir/sems can dpag tu med pa'i don du yang dag par blangs pa'i phyir 'bras bu bsod nams kyi phung po dpag tu med pa dang ldan pa gsungs te/ lag bzangs kyi mdo nyid las shes par bya'o/ /'phags pa dpas byin gyis zhus pa las kyang / byang chub sems kyi bsod nams gang //de la gang de gzugs mchis na/ /nam mkha'i khams ni kun gang ste/ /de ni de bas lhag par 'phel/ /zhes bya ba 'byung ba dang / de bzhin du 'phags pa phung po gsum pa'i mdo las kyang byang chub tu sems bskyed pa de/ bskyed ma thag pa de bsod nams kyi phung po ni rab tu mang gi /'jig rten gyi khams kyi sems can thams cad 'khor los sgyur ba dang / 'jig rten skyong ba dang / brgya byin dang / tshangs ba dang / nyan thos dang / rang sangs rgyas su gyur pa'i bsod nams kyi phung po ni de tsam ma lags so zhes 'byung bas/ byang chub tu sems bskyed pa nyid kyis kyang nyan thos la sogs pa'i bsod nams kyi phung po thams cad de ltar zil gyis gnon na/bla na med pa'i byang chub lta ci smos te/ de lta bas na bdag gis theg pa dman pa 'dod par mi bya'i theg pa chen po 'dod par bya'o snyam du sems bskyed par bya ba'i phyir gsungs so//des ni ched du bya ba dam pas zin par bya ba'i phyir bsod nams kyi phung po dpag tu med pa dang ldan pa bstan to/ /da ni byed pa'i sgo nas bsod nams kyi phung po dpag tu med pa dang ldan pa bstan pa'i phyir/ pha'am yang na zhes bya ba smos te/ 'dir bsdus pa'i don ni shin tu rnyed par dka' bar gyur pa sems can thams cad la phan pa dang bde bar bya ba'i lhag pa'i bsam pas kun nas bslang ba'i phyir 'jug pa'i sems bskyed pa 'dis bdag dang gzhan thams cad la sdug bsngal dang yid mi bde ba thams cad spong zhing /bde ba dang yid bde ba thob par byed pas bsod nams kyi phung po dpag tu med pa dang ldan no zhes bya ba yin no//yang bsod nams zhes bya ba ni mchod pa las 'byung ba yin la/ mchod pa bla na med pa ni byang chub tu sems bskyed pa 'di yin te/ ji skad du 'phags pa blo gros mi zad pas bstan pa'i mdo las/gsum po 'di dag ni mchod pa bla na med pa ste/ byang chub tu sems bskyed pa dang zhes 'byung bas/ 'di ni mchod pa bla na med pa yin pa'i phyir/ bsod nams kyi phung po dpag tu med pa dang ldan par bstan pa phan par bsam pa tsam gyis kyang zhes bya ba la sogs pa gsungs so/ / da ni byang chub tu sems bskyed pa 'di nyid sems can thams cad la phan pa dang bde ba thob par byed cing sdug bsngal dang yid mi bde ba rgyud dang bcas pa spong bar byed pa'i phyir/ dge ba'i rtsa ba thams cad kyi mchog yin pa'i phyir dang / sems can thams cad la phan pa dang bde bar bya ba'i lhag pa'i bsam pas kun nas bslang zhing /de dang mtshungs par ldan pas sems can thams cad kyi mchog yin pa'i phyir bsod nams kyi phung po dpag tu med pa dang ldan pa bstan pa/ sdug bsngal 'dor 'dod sems yod kyang / /zhes bya ba nas/ bsod nams de 'dra ga la yod/ /ces bya ba'i bar du gsungs so//da ni 'jug pa'i sems bskyed pa'i gang zag de yang thams cad kyi bsngags pa'i gnas nyid du bstan pa'i phyir/ phan btags lan lon zhes bya ba la sogs pa gsungs so/ /da ni gang zag de sems can thams cad la mtho ris dang thar pa'i bde ba sbyin par byed pa'i yon tan dang ldan pa'i phyir/de la ngan sems bskyed pa'i nyes dmigs bstan pa'i sgo nas de spong du gzhug par bya ba'i phyir/ gang zhig de 'dra'i zhes bya ba la sogs pa smos te/ da ni de la sems dang ba'i phan yon bstan pa'i sgo nas sems dang ba bskyed du gzhug par bya ba'i phyir/ 'on te gang zhig ces bya ba la sogs pa smos so/ /de nyid thun mong ma yin pa'i yon tan dang ldan pas/ phyag 'tshal ba'i gnas yin pa'i phyir dang / gnod pa byas pas kyang bde bas phan 'dogs pa'i phyir phyag 'tshal zhing skyabs su 'gro ba'i gnas yin par bstan pa'i phyir/ gang la sems kyi dam pa zhes bya ba la sogs pa smos so//yan lag gi don ni go sla bas rnam par ma phye'o/ /byang chub sems dpa'i spyod pa la 'jug pa las zhes bya ba la sogs pa 'dis kyang byang chub sems dpa'i spyod pa la 'jug pa'i don ston pa'i phyir de skad ces bya ste/ de la byang chub sems dpa' ni gang / spyod pa la 'jug pa ni gang / gang gis ston ce na/ de la byang chub sems dpa' ni bdun te/ rigs la gnas pa dang / sems bskyed pa dang / mos pa spyod pa dang / spyod pa la zhugs pa dang / phyir mi ldog pa dang / skye ba gcig gis thogs pa dang / spong ba tha ma pa'o/ /de la rigs la gnas pa'i spyod pa ni/byang chub sems pa'i sa las pha rol tu phyin pa drug gi rigs kyi rtags ji skad 'byung ba bzhin du rig par bya'o/ /sems bskyed pa'i chog ni sdom pa nyi shu pa'am/ gzhung 'di nyid las ji skad 'byung ba bzhin no/ /mos pas spyod pa yang snga ma dang mthun par rig par bya'o/ / spyod pa la zhugs pa'i spyod pa ni sa dang po nas sa bdun pa'i bar gyi spyod pa ste/ mdo sde sa bcu pa las ji skad 'byung ba bzhin te/ 'dir yi ge mangs kyis dogs nas ma bris so/ /de la 'dir ni sems bskyed pa'i byang chub sems dpa'i spyod pa la 'jug pa bzung ste/ gang gi don du 'jug pa dang /thabs gang la brten te 'jug pa dang / gang du 'jug pa dang / tshul ji ltar 'jug pa ste/ lnga po de rnams ni go rims bzhin du gang gis 'jug pa ste/ dal 'byor zhes bya ba la sogs pa'i tshigs su bcad pa gnyis dang / gang gi don du 'jug pa ste/ le'u dang po las/ 'jigs dang sdug bsngal zhes bya ba la sogs pa tshigs su bcad pa gcig dang / le'u drug pa las bdag dang gzhan mnyam par bstan pa dang / le'u brgyad pa la sogs pa 'di dag thams cad kyang zhes bya ba la sogs pa tshigs su bcad pa gcig dang / yang de nyid las/ nyon mongs pa dang shes bya'i sgrib ces bya ba la sogs pa tshigs su bcad pa gcig dang /thabs gang la brten nas 'jug pa ste/ le'u bzhi pa las/ rtag par dge ba'i bshes gnyen ni/ /zhes bya ba nas/ de'i 'og tu bstan par bya ste zhes bya ba'i bar dang / gang la 'jug pa ste/ sems bskyed pa dang / pha rol tu phyin pa drug gi mtshan nyid de'i gzhung mtha' dag gis dang / tshul ji ltar 'jug pa ste/ le'u gnyis pa nas bzhi pa'i bar gyis bstan to/ /yang byang chub kyi spyod pa ni sems bskyed pa dang / pha rol tu phyin pa drug dang / sdom pa gsum dang / bslab pa gsum la sogs pa yin la/de la 'jug pa ni de rjod par byed pa'i sgo nas 'jug pa dang / shes par byed pa'i sgo nas 'jug pa dang / nyams su len pa'i sgo nas 'jug pa dang / de la 'dir ni rjod par byed pa'i sgo nas 'jug pa gzung ba ste/ ji ltar brjod par bya zhe na/ /le'u dang po nas le'u gnyis pas ni sems bskyed pa rjod par byed la/le'u gnyis pa las/ de ltar 'di dag kun byas nas/ /bdag ni nyer 'tsho'i rgyur yang shog /ces bya ba'i bar gyis sbyin pa'i pha rol tu phyin pa rjod par byed cing / ji ltar sngon gyi bde gshegs kyis/ /zhes bya ba nas/ le'u bzhi pa'i bar gyis tshul khrims kyi pha rol tu phyin pa rjod par byed la/ lhag ma le'u bzhis ni bzod pa la sogs pa go rims bzhin du rjod par byed de/ de la sdom pa gsum las che long rnam par gzhag pa'i dbang du byas nas/ sdom pa dang / dge ba dang / sems can gyi don byed pa'i tshul khrims ni shes bzhin bsrung ba'i le'u las/bre mo'i gtam ni sna tshogs dang / /zhes bya ba nas/ des ni shing bzhin gnas par bya/ /zhes bya ba'i bar dang / mi bzod le lo'i zhes bya ba la sogs pa tshigs su bcad pa gnyis dang / shin tu nges dang zhes bya ba la sogs pa'i tshigs su bcad pa gcig gis go rims bzhin du bstan to//de la zhib mo rnam par gzhag pa'i dbang du byas nas/ thog mar sems bskyed pa la sogs pa pha rol tu phyin pa drug po thams cad kyang so so'i mi mthun pa'i phyir sdom pa'i tshul khrims kyi ngo bo nyid yin la/ de bzhin du thams cad kyang byang chub chen po'i rgyur bsngos pa yin zhing /dngos brgyud nas sems can gyi don dmigs pa'i phyir/ dge ba'i chos sdud pa dang sems can gyi don byed pa'i tshul khrims kyi ngo bo nyid yin te/ de bas na gzhung mtha' dag sdom pa'i bslab pa gsum ston par rig par bya'o/ /de la bslab pa gsum gyi dbang du byas nas/le'u dang po bzhis ni lhag pa'i tshul khrims kyi bslab pa bstan te/ sbyin pa ni lhag pa'i tshul khrims kyi rgyu yin te/ lus la sogs pa btang na tshul la 'jug pa'i phyir dang / sdom pa len cing bsrung ba ni lhag pa'i tshul khrims kyi bslab pa'i ngo bo nyid yin pa'i phyir/le'u lnga pa dang bdun pas ni lhag pa'i sems kyi bslab pa bstan te/ skye ba bzod pa thob pa la brtson 'grus rtsom pas bsam gtan bsgom pa'i thabs shes pa'i phyir/ bzod pa dang brtson 'grus ni lhag pa'i sems kyi bslab pa'i rgyu yin pa'i phyir dang / bsam gtan ni de'i ngo bo nyid yin pa'i phyir ro//le'u brgyad pas ni lhag pa'i shes rab kyi bslab pa bstan te/ de ltar na bstan bcos 'di ni byang chub sems dpa'i spyod pa bstan ma thag pa de dag la brjod pa'i tshul gyis 'jug pa'i phyir byang chub sems dpa'i spyod pa la 'jug pa zhes bya'o/ /de la shes par byed pa'i sgo nas 'jug pa ni bstan bcos 'di nyid la brten la/nyan pa pos shes pa yin la/ de'i rjes la dngos po sems bskyed pa nas bzung ste/ slob pa'i lam gyi gnas skabs su ci rigs pa bsgrubs pa ni nyams su len pa'i tshul gyis 'jug pa zhes bya'o/ /byang chub sems kyi phan yon bstan pa zhes bya ba ni nyan pa pos 'jug par bya ba'i don du gtso bor phan yon thog mar bstan pa'i phyir ro//le'u dang po'i bshad pa rdzogs so// //de ltar phan yon thos pas spro ba skyes pa la 'jug pa 'byung bas/ de ni byang chub kyi sems yongs su gzung ba'i thabs brjod par bya ste/de la sngon du bya ba'i cho ga'i dbang du byas nas/ bsod nams kyi tshogs kyi rgyun bstan par bya dgos pas bsod nams kyi tshogs bskyed pa'i phyir/ rin chen sems de zhes bya ba la sogs pa nas/ brtul zhugs mchog la phyag 'tshal lo/ / zhes bya ba'i bar gyis ni/ dang por mchod pa bstan te/ de tshigs su bcad pa dang pos dgos pa gang gi don du gang la ji ltar mchod pa mdor bstan to/ /lhag ma rnams kyis rgyas par bstan to/ /de la yo byad dbul ba'i mchod pa'i dbang du byas nas/ me tog 'bras bu zhes bya ba nas/nyid kyi mthus bzhes shig ces bya ba'i bar gyis ni bdag pos yongs su ma bzung ba'i mchod pa bstan to/ /rgyal dang de'i sras zhes bya ba la sogs pa tshigs su bcad pa gnyis kyis ni lus dbul ba phan yon dang bcas pa bstan to/ /khrus kyi khang pa zhes bya ba nas thub dbang rnams la dbul bar bgyi zhes bya ba'i bar gyis ni yid kyi mchod pa bstan to//'di tsam gyis mchod pa bshad nas/ da ni de kun du gnas par bya ba'i phyir/ de las gzhan yang zhes bya ba la sogs pa'i tshigs su bcad pa gnyis kyis gsungs so/ /ji ltar 'jam dpal dbyangs zhes bya ba la sogs pa gcig gis bla na med pa'i mchod pa bstan to//yon tan rgya mtsho can dag la/ /zhing rdul kun gyi grangs snyed kyi/ /phyag 'tshal zhes bya bas ni bstod pa'i dus bstan to/ /dbyangs kyi yan lag ni/ rgya mtsho snyed kyi bstod pas bstod/ /ces bya bas ni bstod pa dngos bstan to//dus gsum zhes bya ba la sogs pas ni bstod pa de kun du gnas par bya ba'i phyir smon lam gdab pa bstan to/ /byang chub kyi sems kyi zhes bya ba la sogs pa'i tshigs su bcad pa gcig gis phyag 'tshal ba'i mchod pa bstan to/ /de la mchod pa mdor bstan pa'i skabs nas legs par mchod ces bya ba ni dam pa rnam pa drug gis zin pa ste/byang chub chen po thob par bya ba'i bsam pa dang / sems can thams cad kyi ched du bya ba dang / yid du 'ong ba'i dngos po dang / 'khor gsum yongs su dag pa dang / mi mthun pa'i phyogs kyi dri ma dang bral ba dang / byang chub chen por bsngo ba dang /go rims bzhin du rten dang / ched du bya ba dang / dngos po dang thabs la mkhas pa dang / rnam par dag pa dang / yongs su bsngo ba dam pas zin pa ni legs par rig par bya'o/ /lhag ma ni go sla'o/ /byang chub sems kyi gzhi rnams dang / /zhes bya ba ni 'phags pa chos bcu pa'i mdo las gsungs pa bzhin du byang chub kyi sems skye ba'i rgyu bzhi ste/gzhan dag gis bskul ba'am/ byang chub kyi sems kyi bsngags pa brjod pa thos pa dang / sems can rnams la snying rje chen po'i sems skyes pa dang / de bzhin gshegs pa'i che ba'i yon tan thos pa ste/de ltar na bdag la skul bar byed pa dang / bsngags pa ji lta ba bzhin ston pa dang / gang zag gang snying rje chen po dang ldan pa dang / thun mong ma yin pa'i yon tan dang ldan pa'i de bzhin gshegs pa ni byang chub kyi sems skye ba'i gzhi zhes bya'o/ /da ni bsod nams spel ba'i rgyu gnyis pa skyabs su 'gro ba'i dbang du byas nas/byang chub snying por mchis kyi bar/ /zhes bya ba la sogs pa smos so/ /rgyu gsum pa sdig pa rnam par sbyang ba'i dbang du byas nas/ rnam par sun 'byin pa kun du spyod pas sdig pa rnam par sbyang ba ni/ phyogs rnams kun nas zhugs pa yi//zhes bya ba la sogs pa ste/ de la rtsa ba dang po gsum gyis bshags pa'i yul bstan to/ /thal mo sbyar te zhes bya bas ni spyod lam ji lta bus bshags pa bstan to/ /lhag ma rnams kyis ni gang ji ltar bshags pa bstan te/ de la thog ma med ldan zhes bya ba la sogs pa tshigs su bcad pa gnyis kyis ni/ltung ba 'byung ba'i rgyu bzhi las/ mi shes pa'i rgyu las 'byung ba'i ltung ba bshags pa bstan to/ /bdag gis dkon mchog ces bya ba la sogs pa'i tshigs su bcad pa gcig gis nyon mongs pa mang po'i rgyu las byung ba'i ltung ba bshags pa bstan to//nyes pa du ma zhes bya ba la sogs pa'i tshigs su bcad pa gcig gis ma gus pa dang / bag med pa'i rgyu las byung ba'i ltung ba bshags pa bstan te/ nyes pa du ma zhes bya ba ni ma gus pa dang / bag med pa ste nyes pa byed pa'i rgyu yin pa'i phyir ro/ /da ni rten gyi stobs kyis sdig pa rnam par sbyang ba'i phyir myur du skyabs su 'gro ba'i rgyu dang bcas pa mdor bstan pa/bdag ni zhes bya ba la sogs pa tshigs su bcad pa gcig gsungs te/ de la rtsa ba dang po gnyis kyis ni myur du skyabs su 'gro ba'i rgyu bstan to/ /'og ma gnyis kyis ni myur du skyabs su 'gro ba dngos bstan to//da ni rgyas par bshad pa'i phyir/ yid brten mi rung zhes bya ba la sogs pa nas/ de tshe bdag gis ji ltar bya/ /zhes bya ba'i bar gyis skyabs su 'gro ba'i rgyu rgyas par bshad do/ /de bas rgyal ba 'gro ba'i mgon/ /zhes bya ba nas/ 'jigs pa myur du bsal du gsol//zhes bya ba'i bar gyis skyabs su 'gro ba dngos rgyas par bshad do/ /bdag gis mi shes pa la sogs pa'i dbang gis thog ma med pa nas sdig pa dpag tu med pa bsags pa'i phyir dang / bdag gi tshe la nges pa med pa'i phyir/ myur du skyabs su ma song ba'i sdig pa dang bcas bzhin du 'chi bar 'gyur ba'i nyes dmigs yod pa'i rgyu de'i phyir/myur du skyabs su 'gro bar bya'o zhes bya ba ni bsdus pa'i don yin no/ /da ni yan lag gi don brjod par bya ste/ ci'i phyir myur du skyabs su 'gro bar bya zhe na/ yid brtan mi rung ba'i zhes bya ba la sogs pa smos te/tshe la nges pa med pa'i phyir ro zhes bya ba'i tha tshig go/ /de ltar yin du zin kyang bdag mi ldan pa'i phyir myur du skyabs su 'gro ba ma song yang nyes pa med do zhe na/ thams cad bor te zhes bya ba la sogs pa smos so/ /de ltar yin du zin kyang de dag gi don du byas pa'i sdig pa ni de dag nyid kyis nyams su myong bar 'gyur gyi/bdag la mi gnod pa'i phyir myur du skyabs su 'gro bar mi bya'o zhe na/ mi mdza' ba rnams kyang zhes bya ba la sogs pa gsungs te/ de dag dang ni bral nas med par 'gyur ba'i phyir de dag gis ni nyams su myong bar mi 'gyur te/ de dag gi don du byas pa'i sdig pa ni 'chi ba'i dus su dran pa'i yul du 'gyur ro zhes bstan to//de ltar yin du zin kyang sdig pa dang bral bas med par 'gyur ro zhe na/ de dag don du zhes bya ba la sogs pa smos so/ /de ltar bdag ni zhes bya ba la sogs pas mjug sdud do/ /de lta yin du zin kyang bdag thams cad du mi 'chi ba'i phyir skyabs su 'gro bar mi byed do zhe na/nyin mtshan zhes bya ba la sogs pa smos so/ /de ltar yin du zin kyang tshul 'di ltar 'chi ba'i phyir des bdag mi 'jigs so zhe na/ bdag ni mal na zhes pa la sogs pa smos so/ /'o na de'i tshe gang phan zhe na/de'i tshe zhes bya ba la sogs pa smos so/ /'o na de nyid kyis chog mod ce na/ de yang zhes bya ba la sogs pa smos so/ /de ni slob dpon bdag nyid kyis 'dod pa'i lha la smra ba'i tshul gyis skyabs su 'gro ba bstan pa'i mgon po zhes pa la sogs pa smos so/ /de ltar yin du zin kyang de ni thams cad la 'byung ba'i phyir bdag mi 'jigs so zhe na/skye bo zhes bya ba la sogs pa smos so/ /de ltar yin du zin na de nyid kyi tshe skyabs btsal bas chog mod kyi zhe na/ su zhig ces bya ba la sogs pa smos te/ de'i tshe tshol bar byed mod kyi mi rnyed do zhes bya ba'i tha tshig go/ /de bas na de ltar nyid nas skyabs btsal bar bya dgos pas/de bas rgyal ba zhes bya ba la sogs pa smos so/ /'on te skyabs su song bas chog mod/ de'i bka' mnod ci dgos she na/ tha mal nad kyis zhes bya ba la sogs pa smos so/ /'on te nad de tsam du nyes dmigs che bas sman pa'i ngag mnod par bya zhe na/de gcig gis kyang zhes bya ba la sogs pa smos so/ /sman pa gang gi bka' nod par bya zhe na/ de dag gso ba'i zhes bya ba la sogs pa smos so/ /de ci'i phyir de'i bka' nod par bya zhe na/ zug rngu thams cad 'byin pa yi/ /zhes bya ba la sogs pa gsungs so/ /'on te bka' nod pas chog mod bsgrub ci dgos snyam nas/g.yang sa tha mal pa zhes bya ba la sogs pa smos so/ /de ltar yin yang de lta nyid nas bsgrub mi dgos so zhe na/ de ring kho na zhes bya ba la sogs pa smos so/ /'on te 'dod pa la longs spyad par bya dgos pas da lta nyid nas bsgrub par byar med ce na/sngon chad myong ste zhes bya ba la sogs pa smos so/ /'on te gnyen dgra la sogs pa la phan pa dang gnod pa byar yod do zhe na/ gson tshe 'di zhes bya ba la sogs pa smos so/ /de bas mi dge ba'i las kyi nyes dmigs shes par byas nas/ de las thar pa nyid gtso cher bstan gyi/gzhan bsam par mi rigs pas myur du skyabs su 'gro bar bya dgos so/ /zhes mjug sdud pa'i phyir/ mi dge ba las zhes bya ba'i tshigs su bcad pa gcig bshad do/ /da ni bsdus pa'i tshul gyis sdig pa bshags pa yan lag dang bcas pa bstan pa'i phyir/ bdag ni mi shes pa la sogs pa smos so//gang zhig mi dge ba'i sems kyis kun nas bslang bas lus ngag yid gsum gyis gang byas pa de ni rang bzhin gyi kha na ma tho ba yin la/ mi dge ba'i sems kyis kun nas bslang ba yang ma yin la/ de'i rkyen gyis gzhan dag mi mos par 'gyur ba'am/dgos pa'i las su byas pa de thams cad ni bcas pa'i kha na ma tho ba yin zhing / gong ma de dag las bzlog pa ni dge ba'i las yin par rig par bya'o/ /yang nas yang du phyag 'tshal te/ /zhes bya ba ni sdig pa bshags pa'i yan lag yin te/ nye ba 'khor gyis zhus pa las phyag 'tshal nas sdig pa bshags so zhes 'byung ba'i phyir/de la yul ji snyed la phyag 'tshal ba dang / lus ji snyed dang / ngag ji snyed dang / dgos pa gang gi don du dang / tshul ji ltar bshags pa rnams ni/ /'phags pa phung po gsum pa'i mdo las ji skad 'byung ba bzhin du rig par bya ste/ mdor na 'di yang dam pa rnam pa drug gis zin par bya'o/ /'di ni phung po gsum las bshags pa ste dang po'o/ /'on te de sdig pa rnam par sbyang ba'i thabs ni/ 'phags pa chos bzhi bstan pa'i mdo las chos bzhi nyid du gsungs pa ma yin nam/ ci'i phyir rnam par sun 'byin pa kun du spyod pa dang /rten gyi stobs kyis phyogs gcig skyabs su 'gro ba 'ba' zhig bshad kyi gzhan dag ci'i phyir ma bshad ce na/ rten gyi stobs kyis phyogs gcig smon pa'i sems bskyed pa dang nyes pa las bzlog pa'i stobs sdom pa yang dag par len pa ni dngos gzhi'i cho ga yin pa'i phyir/ 'dir sngon rol gyi cho gar ma bshad do//gnyen po kun du spyod pa ni mchod pa la sogs pa sngar yang bshad la/ rjes su yi rang ba la sogs pa 'og nas kyang ston pas 'dir logs shig tu ma bshad de/ de ltar yin na ni skyabs su 'gro ba yang gong du bshad zin pa'i phyir 'dir bshad par mi bya'o zhe na/ de ni ma yin te/ gong du bshad pa ni sdom pa yang dag par blangs pa'i rten nyid du yin la/ 'dir myur du sdig pa rnam par sbyang ba'i thabs nyid du bshad pa yin pa'i phyir nyes pa med do/ /da ni rgyu bzhi pa rjes su yi rang ba bstan pa'i dbang du byas nas sems can rnams kyi dge ba'i rtsa ba la rjes su yi rang ba bstan pa/sems can gyi zhes bya ba la sogs pa smos te/ rigs chad pa dang rigs dang ldan pa'i dge ba'i rtsa ba la rjes su yi rang ba ste/ tshig rkang gnyis dang go rims bzhin no/ /lus can zhes bya ba la sogs pa'i tshig rkang gnyis kyis ni/ nyan thos dang / rang sangs rgyas kyi dge ba'i rtsa ba la rjes su yi rang ba bstan to//skyob pa rnams kyi zhes bya ba la sogs pa'i tshig rkang drug gis sangs rgyas dang byang chub sems dpa'i dge ba'i rtsa ba la rjes su yi rang ba bstan to/ de yang nyid kyis don rnyed pa dang / gzhan gyi don mdzad pa'i thugs bskyed pa'o/ / de yang dngos su gzhan gyi don mdzad pa'i thugs bskyed pa dang / dngos su gzhan gyi don mdzad pa'i dge ba'i rtsa ba la rjes su yi rang ba ste/ tshig rkang gnyis gnyis dang go rims bzhin du sbyar ro/ /bsod nams kyi tshogs bskyed pa'i thabs lnga pa chos kyi 'khor lo bskor ba bskul ba'i dbang du byas nas/phyogs rnams kun gyi zhes bya ba la sogs pa smos te/ sangs rgyas ni mtshon pa tsam du zad kyi nyan thos dang rang sangs rgyas dang so so skye bo dag la bskul bar shes par bya ste/ 'phags pa phung po gsum pa'i mdo nas ji skad 'byung ba bzhin no/ /da ni drug pa mya ngan las mi 'da' bar gsol ba gdab pa'i dbang du byas nas/rgyal ba zhes bya ba la sogs pa smos te/ dge ba'i rtsa ba sems can rnams la gtong ba zhes bya ba 'di mtshon pa tsam du zad kyi/ de bzhin du nyan thos dang / rang sangs rgyas dang / sangs rgyas dang byang chub sems dpa' rnams la yang dbul zhing btang ba ste/de yang 'phags pa phung po gsum pa dang / 'phags pa rdo rje rgyal mtshan gyi yongs su bsngo ba las ji ltar 'byung ba bzhin no/ /de ni dge ba'i rtsa ba btang ba bshad nas/ de ci 'ba' zhig btang bar zad dam snyam pa bstsal ba'i phyir/ lus dang zhes bya ba la sogs pa smos te/'dis ni gang btang ba ste dngos po dam pa bstan to/ /sems can kun gyi don sgrub phyir/ /phongs pa med par gtang bar bya/ /zhes bya bas ni go rims bzhin du ched du bya ba dang / rnam par dag pa dam pa bstan to/ /lhag ma rnams kyis ni rten dang yongs su bsngo ba dam pa bstan te/ci'i phyir thams cad gtong zhe na/ thams cad btang bas mya ngan 'da'/ /zhes bya ste/ thams cad btang na tshul khrims la 'jug cing des bzod pa yongs su rdzogs par 'gyur la/ de mang du thos pa la sogs pa brtson 'grus rtsom zhing de'i dbang gis bsam gtan la mnyam par 'jog par 'gyur la/des shes rab 'byung ba'i sgo nas mya ngan las 'da' bar 'gyur ba'i phyir ro/ /thabs la mkhas pa dam pa ni don gyis shes par bya ste/ de dang mi ldan na byang chub chen po thob par mi 'gyur ba'i phyir ro/ /de ltar yin du zin kyang ci'i phyir thams cad gtong zhe na/bdag blo mya ngan 'das pa bsgrub/ /ces bya ba smos te/ bdag ni de don du gnyer ba'i phyir ro/ /de lta yang de mi phod do zhe na/ thams cad gtong du zhes bya ba la sogs pa smos te/ 'chi ba'i dus la sogs pa ni nges par gtong bar 'gyur ba'i phyir ro/ /de la don med pa yin la/gong du bshad pa bzhin btang na ni mya ngan las 'das pa'i rgyur 'gyur bas mchog yin pa'i phyir/ don med par gtang bar mi bya'o zhes bya ba'i tha tshig go/ /'o na lus la sogs pa ji ltar btang zhe na/ bdag gi zhes bya ba la sogs pa smos te/ lus 'di zhes bya ba ni mtshon pa tsam du zad kyi longs spyod kyang gzung bar bya'o//bsam pa thag pa'i sgo nas mi mos par byed pa'i gang zag la sogs pa'i mdun du ngag gis kyang btang zhing spyod lam thams cad du yid kyis kyang de ltar btang gi /las dang po pa'i skabs su lus kyis de ltar gtong bar mi bya ste/ srog dang tshangs par spyod pa'i bar chad du 'gyur bas dge ba'i bar chad du 'gyur ba'i phyir/ 'og nas kyang snying rje'i bsam pa ma dag par lus ni gtong bar mi bya ste zhes gsungs pa'i phyir ro/ /lus zhes bya ba ni mtshon pa tsam du zad de srog dang tshangs par spyod pa'i rten du gyur pa'i longs spyod dag kyang gtang bar mi bya ste/bslab pa kun las btus pa las tshe 'di'i longs spyod bsrung ba'i skabs su ji skad bshad pa dang / 'phags pa drag shul can gyis zhus pa las kyang / rab tu byung bas gsum rnam pa thams cad du sbyin par mi bya'o zhes gsungs pa'i phyir ro/ / tshig gi don ni go sla'o/ /da ni dngos gzhi'i cho ga'i dbang du byas nas/ ji ltar sngon gyi zhes bya ba la sogs pa smos te/ 'dis ni gang zag khyad par can gyi dbang du byas nas/ smon pa dang 'jug pa'i sems bskyed gnyis ka dus gcig tu byed pa'i cho ga bshad de/ byang chub sems ni bskyed bgyi zhing //zhes bya ba dang / byang chub sems dpa'i bslab pa la/ /zhes bya ba nas go rims bzhin du bstan pa'i phyir ro/ /'o na rim pa bzhin du zhes bya ba'i don ci zhe na/ rten dang brten pa'i dbang du byas pa ste/ smon pa med par 'jug pa mi 'byung ba'i phyir dang / 'byung yang byang chub sems dpa'i sdom pa nyid du mi 'gyur ba'i phyir dang /mya ngan las 'das pa'i bsam pa brtan po med par sdom pa mi skye'o zhes dam pa'i chos 'dul ba las ji skad 'byung ba bzhin no/ /de ltar rten dang brten pa nyid yin du zin pa nyid kyi phyir dus gcig tu skyer mi rung ngo snyam na/ 'gal ba med de 'dul ba las cig car rab tu 'byung ba dang /bsnyen par rdzogs pa dus gcig tu byar rung ba bzhin no/ /de ni gang zag khyad par can gyi dbang du byas pa yin no zhe na/ de 'dir yang mtshungs so/ /'on te nyan thos kyi sdom pa med par byang chub sems dpa'i sdom pa skyer rung ngam zhe na/ ci'i phyir mi rung / brten pa'i phyir ro zhe na/ ci'i phyir rten med pa'i phyir ro zhes brjod dam/ 'on te rten sdom pa zhig med pa'i phyir zhes rjod par byed/ phyogs dang po'i ni rigs pa ma yin te/ smon pa'i sems bskyed pa nyid rten yin pa'i phyir ro/ /phyogs gnyis pa yang rigs pa ma yin te/ yod na mi mthun pa med par 'gyur ro//'on te nyan thos kyi sdom pa zhig rten du dgos na ni de'i tshe yongs su dag pa'i 'jig rten gyi khams la lar nyan thos dang / rang sangs rgyas kyi ming yang med pa'i phyir/ chos nyid kyis thob pa 'ba' zhig las brda byung yang med par thal bar 'gyur ro/ / de ni 'dod pa yin no zhe na/ de sgrub pa'i tshad ma med pa'i phyir ro/ /gzhan yang shi 'phos pa'i dus su rten zhig pa'i phyir byang chub sems dpa'i sdom pa 'jig par thal bar 'gyur ro/ /'on te de ni thob pa'i rten yin gyi gnas pa'i rten ma yin pa'i phyir nyes pa med do zhe na/ ma yin te de nyid la sgrub pa'i rigs pa med pa'i phyir ro//'on te gnas pa'i rten ma yin pa'i phyir shi 'phos kyang byang chub sems dpa'i sdom pa mi 'jog na ni/ de'i tshe 'dir nyan thos kyi sdom pa zhig kyang byang chub sems dpa'i sdom pa mi 'jig par thal bar 'gyur te/ gnas pa'i rten ma yin pa'i phyir/dper na tshe phyi ma bzhin no/ /'on te tshe phyi ma la ni gnas pa'i rten ma yin pa'i phyir nyes pa med do zhe na/ 'o na ni tshe 'di la yang gnas pa'i rten ma yin pa nyid du mtshungs so/ /'on te tshe 'dir rang bzhin dang bcas pa'i kha na ma tho ba spong ba'i phyir gnas pa'i phyir rten yin no zhe na/de ni tshe phyi ma la yang mtshungs te/ de'i tshe rang bzhin dang bcas pa'i kha na ma tho ba spong ba'i phyir ro/ /'on te nyan thos kyi sdom pa med par byang chub sems dpa'i sdom pa mi skye ba'i phyir rten du dgos so zhe na/ mi skye ba nyid sgrub pa'i rigs pa med pa'i phyir ro/ /'on te nyan thos kyi sdom pa med par rang bzhin dang bcas pa'i kha na ma tho ba mi spong ba'i phyir nyan thos kyi sdom pa rten du dgos so zhe na/de ci'i phyir byang chub sems dpa'i sdom pa'i tshul khrims kyi kha na ma tho ba rnam pa gnyis mi spong ngam ci nyan thos kyi sdom pa zhig rten du tshol bar byed/ nyan thos kyi sdom pa ni spong ba bdun gyis bsdus pa yin la/byang chub sems dpa'i sdom pa'i tshul khrims ni spong ba bcus bsdus pa ma yin nam/ gzhan yang nyan thos kyi sdom pa ni bdag nyid 'ba' zhig spong ba yin zhing / tshe 'di 'ba' zhig tu spong bar byed pa'i bdag nyid yin la/ byang chub sems dpa'i sdom pa ni gzhan dag kyang spong du 'jug par byed pa dang /byang chub kyi snying po la thug gi bar du spong ba'i bdag nyid yin bzhin du de bor nas nyan thos kyi sdom pa rten du tshol bar byed pa ni bdag nyid blun por ston cing mkhas pa rnams kyis bzhad gad du bya bar rigs so/ /de bas na sdom pa'i rten ni byang chub sems dpa'i sdom pa tshul khrims yin te/byang chub sems dpa'i sa las dge ba'i chos sdud pa'i tshul khrims gang zhe na/ sdom pa'i tshul khrims yang dag par blangs pa la brten nas zhes 'byung ba dang / rnam par gtan la dbab pa bsdus pa las kyang / de dge ba'i chos thams cad sdud par byed pa dang 'byor par byed pa'i zhes 'byung ba dang /theg pa chen po bsdus pa las kyang / mi dge ba'i las bcu spang ba'i phyir sdom pa'i tshul khrims nyid rten du gsungs kyi/ nyan thos kyi sdom pa ni de ltar ma yin te/ de las gzhan pa'i dge ba'i rtsa ba chos thams cad sdud par byed pa dang 'byor par byed pa ma yin pa'i phyir dang /mi dge ba bcu'i las kyi lam thams cad dus thams cad du bdag kyang spong zhing gzhan dag kyang spong du 'jug par byed pa ma yin pa'i phyir ro/ /ji ltar na sdom pa'i tshul khrims de dge ba'i chos thams cad sdud par byed pa yin zhe na/ dge ba'i chos thams cad ni mdor bsdu na rang gi rgyud la dge ba'i chos yongs su rdzogs par byed pa dang /sems can yongs su smin par byed pa nyid yin la/ de la rang gi rgyud la dge ba'i chos yongs su rdzogs par byed pa ni pha rol tu phyin pa drug gis bsdus pa ste/ de la sdom pa'i tshul khrims la gnas pa ni tshul khrims kyi pha rol tu phyin pa'i ngo bo nyid yin par ma zad kyi/dus thams cad du sems can thams cad kyi srog gcod pa la sogs pa spong ba'am spong du 'jug pa'i phyir/ sems can thams cad la mi 'jigs pa byin pa dang / gzhan dag gnod par byed pa la mi bzlogs pa dang /de nyid la gong nas gong du mngon par spong ba dang / nyan thos dang rang sangs rgyas la sogs pa'i sar sems mi skyed kyi byang chub chen po nyid yid la bya ba dang mi 'bral ba dang / de yang 'khor gsum yongs su dag pa'i mi dmigs pa'i shes rab kyis yongs su zin pa'i phyir go rims bzhin sbyin pa dang /bzod pa dang / brtson 'grus dang / bsam gtan dang / shes rab kyi ngo bo nyid kyang yin pa'i phyir dang / tshul khrims gang bsrung ba de yang dngos sam brgyud pas sems can thams cad kyi don du 'gyur ba'i phyir sems can gyi don byed pa'i tshul khrims kyi ngo bo nyid kyang yin pa'i phyir ro//ji ltar na de las dge ba'i chos thams cad 'byor par byed pa yin zhe na/ gong ma lta bu'i sdom pa'i tshul khrims la gnas pas 'gyod pa med pa'i sgo nas sems bde ba la reg par gnas pa'i phyir/ dge ba'i chos sdud pa dang sems can gyi don byed pa'i tshul khrims la 'jug par 'gyur ba'i phyir ro//de bas na sdom pa'i tshul khrims nyid rten yin gyi/ nyan thos kyi sdom pa ni rten ma yin par rtogs pa dang ldan pa rnams kyis gzung bar bya'o/ /'on te de ltar sdom pa'i tshul khrims rten du bshad pa nyid nyan thos kyi sdom pa nyid du 'grub pa yin te/byang chub sems dpa'i sa las sdom pa'i tshul khrims gang zhe na/ so sor thar pa'i sdom pa ni sa bdun gyis bsdus pa ste zhes 'byung ba'i phyir ro zhe na/ de nyid nyan thos kyi sdom pa rten nyid du gyur pa'i khungs su mi rung ste/ 'phags pa nye ba 'khor gyis zhus pa las nyan thos kyi so sor thar pa'i sdom pa dang /rang sangs rgyas kyi so sor thar pa dang / byang chub sems dpa'i so sor thar pa'i sdom pa dang zhes gsum du gsungs pa'i phyir ro/ /de ni bden mod kyi nyan thos kyi so sor thar pa'i sdom pa zhes gsungs pa/ de nyid byang chub sems dpa'i so sor thar pa'i sdom pa nyid yin no zhe na/de ni ma yin te gzhan rjes su mi srung ba dang / mthar chags pa dang rjes su 'jug pa dang / bcos su rung ba'i sgo nas khyad phyed pa'i phyir mdo las ji skad 'byung ba bzhin no/ /'on te mdo las byang chub sems dpa'i so sor thar pa'i sdom pa zhes gsungs pa ni dge ba'i chos sdud pa dang /sems can gyi don byed pa'i tshul khrims kyi dbang du byas pa yin gyi/ sdom pa'i tshul khrims kyi dbang du byas pa ni ma yin no zhe na ma yin te/ de la rigs pa med pa'i phyir dang / de ltar khyad par phye ba ni sdom pa'i tshul khrims nyid kyi dbang du byas nas gsungs pa ste/ mdo nyid las bcos su rung ba'i khyad par ston pa'i skabs su mtshams med pa lnga la sogs pa bcos su rung ba nyid du bstan pa'i phyir ro//'o na slob dpon sa mu dra me g+has tshul khrims kyi le'u'i 'grel pa las nyan thos kyi sdom pa ni dge ba'i chos thams cad kyi gzhi yin no zhes bshad pa 'di ji ltar drang zhe na/de ni nyan thos kyi sdom pas ji ltar rang bzhin dang bcas pa'i kha na ma tho ba spong bzhin du sdom pa'i tshul khrims kyis kyang spong bas/ byang chub sems dpa'i sdom pa'i tshul khrims nyid la spong bya thun mong ba spong bar 'dra ba'i phyir nyan thos kyi sdom pa zhes bstan te/ dper na de bzhin gshegs pa la mnga' ba'i bsam gtan la sogs pa la 'jig rten pa'i yon tan zhes bshad pa bzhin du yin gyi/dngos su nyan thos kyi sdom pa rten nyid du bshad pa ma yin te/ gong du bsgyur yang nye bar mi 'gro zhes bshad pa'i skabs su sa bon nam ldang ba'i gzhi yang ma yin pa'i phyir ro zhes bshad pa'i phyir ro//da lta ma yin na snga phyi yang 'gal ba nyid du 'gyur ro/ /'on te da ltar de ltar nyan thos kyi sdom pa dang byang chub sems dpa'i sdom pa'i tshul khrims gnyis la mi 'dra ba'i khyad par ci lta bu zhig yod de snga ma rten ma yin la phyi ma ni rten nyid du gzhag ce na/ kho bos ni byang chub sems dpa'i sdom pa dang nyan thos kyi sdom pa'i khyad par ni dpag tu med pa yod kyang /gtsor na rten yang dag par len pa'i bsam pa'i sgo nas mi 'dra ba nyid du shes te/ dper na gang zag 'ga' zhig lha'i yul du 'gro bar bya snyam pa'i bsam pas lam du zhugs pa'i tshe rdzu 'phrul la sogs pa dang mi ldan pa'i dbang gis/lha'i yul du phyin par mi 'gyur yang der lam du zhugs pa zhes bya ba yin pa de bzhin du/ 'di na gang zag kha cig nyan thos thob par bya ba'i bsam pa sngon du btang nas srog gcod pa spong ba la sogs pa'i sdom pa yang dag par blangs pa'i tshe/ rigs dang mi ldan pa'i dbang gis nyan thos kyi byang chub thob par mi 'gyur yang nyan thos kyi sdom pa zhes bya ba yang dper na rdzu 'phrul la sogs pa dang ldan pa yin du zin kyang lha yul du 'gro ba ma bsams kyi gangs ri'i rtse mor 'gro ba nas lam du zhugs pa de ni gangs rir lam du zhugs pa zhes bya'o//lha yul du ma zhugs pa zhes bya ba la sogs pa 'di ni gang zag kha cig rigs dang mi ldan yang byang chub sems dpa'i bsam pas srog gcod pa la sogs pa'i sdom pa yang dag par blangs pa de'i tshe byang chub sems dpa'i sdom pa zhes bya bar 'gyur gyi/de nyid nyan thos kyi sdom par ni mi 'gyur te/byang chub chen po thob pa'i bsam pa yod pa'i phyir dang / nyan thos thob par bya ba'i bsam pa med pa'i phyir ro/ /'on te theg pa chen po'i rigs dang mi ldan pa'i dus de'i tshe bsam pa de lta bu'i sdom pa blangs kyang nye bar len pa'i rgyu med pas sdom pa mi skye'o zhe na/ nye bar len pa'i rgyu gang med par 'dod/'on te theg pa chen po'i rigs med pa'i phyir ro zhe na/ rigs zhes bya ba ni bsam pa nye bar len pa'i rgyu yin nam/ 'on te sdom pa nye bar len pa'i rgyu yin/ phyogs snga ma ni rigs pa ma yin te/ 'phags pa shA ri'i bu la sogs pa rigs dang mi ldan pa yang dge ba'i bshes gnyen la sogs pa dang phrad pa'i dbang gis sems bskyed pa 'byung ba'i phyir dang /de bzhin du sems can mtha' dag la yang rkyen gyi dbang gis sems bskyed pa mthong ba'i phyir dang / sems bskyed pa tsam gyis de dag theg pa chen po'i rigs su ma nges pa'i phyir dang /sems bskyed kyang de dag las ldog par mthong ba'i phyir ro/ /phyogs gnyis pa yang rigs pa ma yin te/ dam pa'i chos 'dul ba las kyang mya ngan las 'das pa'i bsam pa rten nyid du gsungs kyis sdom pa nye bar len pa'i rgyu rten nyid du ma gsungs pa'i phyir dang / byang chub sems dpa'i sa las kyang sdom pa yang dag par len pa'i dus su bsam pa rten yin pa'i phyir//khyod byang chub sems dpa' yin nam/ byang chub tu smon lam btab bam zhes 'dri ba'i tshig gsungs kyi/ theg pa chen po'i rigs dang ldan nam zhes 'dri ba'i tshig ma gsungs pa'i phyir dang / gzhan yang gal te rigs kho na sdom pa 'thob pa'i rgyu yin na ni bdag cag so so'i skye bo rnams kyis rang gi rigs ji lta bu mi rtogs pa'i phyir ro//mya ngan las 'das pa'i bsam pa yang ji lta bu bskyed par bya ba mi shes la sdom pa yang gang len par byed pa mi shes shing / dge ba'i rtsa ba yang 'bras bu gang du yongs su bsngo ba yang mi shes pa gcig tu 'gyur te/ci'i phyir zhe na/ gal te rigs dang mi ldan na mya ngan las 'das pa'i bsam pa dang ldan yang sdom pa mi skye ba'i phyir dang / sdom pa ma skyes pa'i gang bsngo bar bya ba nyid kyang med pa'i phyir ro/ /de'i phyir sdom pa tha dad pa nyid rnam par gzhag pa ni yang dag par len pa'i bsam pa'i dbang gis yin gyi rigs kyi sgo nas dang 'bras bu'i thob par bya ba'i sgo nas gzhag pa ni ma yin no//'o na rigs dang mi ldan pa la yang sdom pa skye ba yin na/ de'i tshe de'i nye bar len pa'i rgyu gang zhe na/ de ltar rigs dang mi ldan pa la yang sdom pa skye ba de ni rkyen ji lta ba bzhin du bsam pa skyes pa'i sgo nas sdom pa len pa la 'jug par byed pa'i spros pa'i bag chags thog ma med pa'i dus can kun gzhi'i rnam par shes pa la yod pa nyid yin te/dper na mu stegs can gzhan rnams kyi bdag la sogs pa grol bar bya ba'i phyir sdom pa len pa la 'jug par byed pa nyid bzhin du/de yang bdag grol ba zhes bya ba'i 'bras bu thob par byed pa nyid dam/ bdag ces bya ba rang gi rigs dang ldan pa zhes bya ba med kyang / spros pa'i bag chags kyi sdom pa len pa la 'jug pa lta bu'o/ /gzhan yang sdom pa zhes bya ba ni chos 'di nyid las kyang / spong ba'i sems ni thob pa las/ /tshul khrims pha rol phyin pa bshad/ /ces gsungs pa'i phyir/ spong ba'i sems pa bag chags dang bcas pa dang mtshungs par ldan pa'i yid kyis rnam par bshad pa nyid ma yin nam/ de ltar ma yin na ni rigs dang mi ldan pa dag la yang de lta bu'i sdom pa ni skye bar mi 'gal lo snyam du bsams pa'o//zhar la 'ongs pas chog go/ /da ni yang dag par blangs pa mi nyams par bsrung ba'i tshul gyis 'jug pa rgyas par bya ba'i phyir/ mi zhum pa'i brtson 'grus kyi dbang du byas nas/ de ltar blo dang ldan pa yis/ /zhes bya ba la sogs pa'i tshigs su bcad pa gnyis bstan to//da ni ji ltar yang dag par blang ba'i sdom pa nyams su blang ba la go cha'i brtson 'grus kyi dbang du byas nas/ da ni ci nas kyang zhes bya ba la sogs pa sems can mgron chen po tshim par byed pa zhes bya ba'i bar du bstan to/ /de la tshigs su bcad pa dang pos bdag ni rigs thams cad kyi mchog tu skyes pa'i phyir/rigs sun 'byin par mi bya ba'i don du bslab pa la 'bad par bya bar sems la go ba go bar bstan to/ /lhag mas ni phan yon bstan pa'i sgo nas yang dag par mi nyams par sems la go ba go ba nyid du bstan te/ de yang long bas zhes bya ba la sogs pas ni yid bzhin gyi nor bu rin po che lta bur gyur pa'i phyir de snyed kyi dka' ba las rnyed par bstan to//'gro ba'i 'chi bdag ces bya ba tshig rkang gnyis kyis ni rigs dang ldan pa dag gis 'chi bdag gi bdud spong bar byed pa'i gnyen po nyid du bstan to/ /'gro ba dbul ba zhes bya ba la sogs pa'i tshig rkang bzhis ni rigs can rnam pa lnga char gyi rgyud la mtho ris dang thar pa'i bde ba sbyin zhing 'khor ba'i sdug bsngal spong bar byed pa'i rgyu nyid bstan to//srid lam zhes bya ba la sogs pa'i tshig rkang gnyis kyis nyan thos dang rang sangs rgyas kyi byang chub thob par byed pa'i rgyu nyid bstan to//'gro ba thams cad ces bya ba tshig rkang gnyis kyis rigs chad pa nyid bde 'gro la dgod pa'i rgyu nyid du bstan to/ /'gro ba'i nyon mongs zhes bya ba la sogs pa'i tshig rkang bzhis theg pa chen po'i rigs can dag gi nyon mongs pa dang shes bya'i sgrib pa gnyis spong ba'i rgyu nyid du bstan to//bsdus pa'i don ni/ bdag gis byang chub tu sems bskyed de/ bslab pa la bslabs pas ci rigs par bdag dang gzhan nyid kyi don 'grub par byed pa'i rgyu yin no zhes bya ba'i tha tshig go/ /dam chos 'o ma zhes bya ba rkang pa gnyis kyis ni chos kyi rjes su 'brang ba'i 'jug pa'i gang zag ni lam gyi snying po nyid du bstan te/ji lta zhe na/ gang zag de dag gis chos mnyan pa la sogs pas chos kyi mtshan nyid ji ltar gnas pa khong du chud pa ni 'o ma bsrubs pa yin la/ de ma gtogs pa'i sems can rnams la snying rje chen po skye ste/ de dag gi don du byang chub tu sems bskyed pa ni mar gyi snying po phyung ba lta bu yin pa'i phyir ro/ /'gro ba'i mgron po zhes bya ba la sogs pa bzhis ni/ byang chub sems dpa' rnams kyi mgron chen po rigs lngas bsdus pa'i sems can thams cad la mtho ris dang thar pa'i ston mo ster ba'i thabs dam pa nyid du bstan to//bdag gis de ring zhes bya ba rkang pa bzhis ni mgron de dag mi slu ba'i phyir/ byang chub sems dpa'i bslab pa la 'bad par bya'o zhes gdams pa bstan to/ /yan lag gi don ni go sla'o/ /byang chub sems dpa'i spyod pa la 'jug pa zhes bya ba'i tshig gi don ni snga ma bzhin no//byang chub kyi sems yongs su bzung ba zhes bya ba ni sems bskyed pa'i cho ga'o/ /le'u gnyis pa'i bshad pa rdzogs so// //de ltar sdom pa yang dag par blangs pa'i las ni bsrung ba la 'jug pa 'byung bas/ da ni de'i thabs bstan pa'i phyir thog mar ma chags pa dang /zhe sdang med pa dang / gti mug med pa dang / brtson 'grus kyi ngo bo nyid kyis bag yod pa la gnas par bya dgos pas/ le'u gsum pa gsungs so/ /bag yod pa la gnas na rang gi ngang gis byang chub sems dpa'i bslab pa mi nyams par 'gyur ro snyam du dgongs so/ / 'on te de ltar sdom pa mnos pas chog gam/ 'on te bsrung dgos snyam pa la bsrung dgos pa nyid du bstan pa'i phyir/ rgyal ba'i sras kyis zhes bya ba la sogs pa smos te/ bsrung bar bya ba nyid du dam bcas pa'i phyir ro snyam du bsams pa'o/ /'on te dam bcas su zin kyang brtags nas bsrung bar bya ba'i phyir ma brtags pa ma yin no zhe na/bab col zhes bya ba la sogs pa smos te/ yang thams cad ma brtags pa'am/ cung zad brtags kyang legs par brtags pa de nyid gzod brtags la sgrub kyi/ 'dir ni de ma yin te/ sangs rgyas dang byang chub sems dpa' rnams dang bdag nyid kyis kyang yang nas yang du sdom pa yang dag par len pa'i sngon rol du brtags pa'i phyir ro zhes bya ba'i don to//'on te ma bsgrubs na nyes dmigs ci yod snyam pa la/ smon pa'i sems bskyed pa las 'das pa'i nyes dmigs kyi dbang du byas nas/ gal te de ltar zhes bya ba nas/bdag gis gus par bsgrub par bya/ /zhes bya ba'i bar du smos pas/ 'di skad ston to/ /gong du ji skad bstan pa'i tshul gyis bdag gis byang chub chen po thob par byas la sems can thams cad kyi don bya'o zhes dam bcas nas de bzhin du ma bsgrubs te/ yang bdag gis sems can gyi don du byang chub chen po thob par bya bar mi nus kyi de bas na bdag gis nyan thos la sogs pa thob par 'dod snyam du sems bskyed na de'i tshe de dag bslus pa yin pa'i phyir/skye ba phyi ma la bdag gis 'gro ba ci 'drar 'gyur zhes bya ba ni spong ba ste/ bzang por 'gro ba'i thabs med do zhes bya ba'i don to//de ci'i phyir zhe na/ dngos po phal pa zhes bya ba la sogs pa smos te/ dngos po tha mal pa las gang zag 'ga' zhig la tshig tu dam ma bcas par yod kyi sbyin par dam bcas nas ma byin par de yang yi dags kyi rgyu nyid du bshad na tha mal pa'i dngos po ma yin te/bla na med pa'i sangs rgyas kyi bde ba la yid kyis bsam pa lta bu ma yin gyis tshig tu dam bcas nas sems can 'ga' zhig bslus pa ma yin te/ thams cad bslus par byas pas gdon mi za bar ngan song du 'gyur gyi/ bde 'gror skye ba'i thabs med do zhes bya ba'i tha tshig go//'o na de thams cad du thar par mi 'gyur ram zhe na/ mi gang zhes bya ba la sogs pa smos te/ bsdus pa'i don ni sems can rnams kyi las kyi rnam par smin pa'i tshul bsam gyis mi khyab pa yin pa'i phyir/ lang kar gshegs pa las/ blo gros chen po de bzhin gshegs pa ni sems can thams cad yongs su ma btang ngo zhes gsungs pa de dag kyang thar par mdzad pa ni/de bzhin gshegs pa yin pa'i phyir dang / de bzhin gshegs pa'i ye shes ni shes bya thams cad la khyab pa yin pa'i phyir/ de bzhin gshegs pa nyid kho nas mkhyen gyi/ bdag cag gis ni mi shes so zhes bya ba'i tha tshig ste/ji skad du/ ngas ni 'di yi thar pa yi/ /sa bon shin tu phra ba yang / /sa yi khong na yod pa'i gser/ /bag la nyal ba bzhin du gzigs/ /zhes gsungs pa lta bu'o/ /de tsam du thar bar dka' ba ci'i phyir zhe na/ de ni zhes bya ba la sogs pa smos te/ smon pa'i sems bskyed pa de gtong ba de ni phas pham pas ltung ba lci ba ste/ de ci'i phyir zhe na/ phas pham pa'i ltung ba ni byung du zin kyang sems bskyed pa ma btang na las bya ba gtso bo sems can gyi don byed pa las nyams par mi 'gyur la/ sems bskyed pa btang na ni nyams par 'gyur ba'i phyir te/ gsang chen thabs la mkhas pa'i mdo las kyang / sems bskyed pa gtong ba rtsa ba'i ltung ba shin tu lci ba nyid du bstan pa'i phyir ro/ /'on te bdag nyid kyi sems bskyed pa btang ba 'ba' zhig ltung ba lci ba yin nam zhe na ma yin te/ gzhan dag smon pa'i sems bskyed par 'dod pa'i bar chad byas sam/gzhan dag sems bskyed pa las bzlog ste/ theg pa dman par sems bskyed du bcug na yang / nam mkha'i snying po'i mdo las ji skad du gsungs pa bzhin du rtsa ba'i ltung bar 'gyur bas/ gang gzhan zhes bya ba la sogs pa smos te/ gang zag de gdul bar bya ba mtha' dag gis bde bar nyams par bya ba'i phyir ro zhes bya ba'i tha tshig go//'on te de ltar res 'ga' sems bskyed pa btang ba yang res 'ga' sems bskyed pa byas na rung ngam zhe na/ rung ba ma yin te/ ci'i phyir zhe na/ de ltar zhes bya ba la sogs pa smos te/ stobs dang ldan pa'i las gnyis 'dra na mar spyad pa'i phyir mtho ris dang ngan song du res kyis nyams su myong bar 'gyur gyi/dge ba'i las thang chod par yongs su rdzogs par ma byas pa'i phyir thar pa thob par mi 'gyur ro zhes bya ba'i tha tshig go/ /de bas na bdag gis byang chub chen po thob par bya ste/ sems can yongs su smin par bya'o zhes dam bcas pa de ji ltar yang gtang bar mi bya'o zhes bstan pa'i phyir/de ltar zhes bya ba la sogs pa smos so/ /da ni 'jug pa'i sems bskyed pa las 'das pa'i nyes dmigs bstan pa'i phyir/ de nas zhes bya ba la sogs pa smos so/ /'on te bdag nyid kyis brtson par ma byas kyang de bzhin gshegs pa dpag tu med pa 'byung ba'i phyir ngan song du 'gro ba'i nyes pa med do snyam na/bdag nyid kyis brtson par ma byas na/ sngar gshegs pa rnams kyis kyang mi phan pa bzhin du phyis gshegs pa rnams kyis kyang phan par mi 'gyur bas/ bdag nyid kyis brtson par bya'o zhes bstan pa'i phyir ro//sems can thams cad ces bya ba la sogs pa smos so/ /de ltar bden mod kyi/ phyis dal 'byor thob pa'i dus su 'bad par bya'o snyam na de ni shin tu rnyed par dka' bas da lta nyid du 'bad par bstan pa'i phyir de bzhin gshegs pa zhes bya ba la sogs pa smos so//de lta bu yin du zin kyang bdag la nad kyang med cing / zas dang bcas la/ dgra la sogs pa'i 'tshe ba med pas dus phyis bslab pa la brtson par bya'o snyam na/ de ltar yin du zin kyang bdag ni 'dzam bu gling pa'i tshe la nges pa med cing lus la dbang byar med pas da lta nyid nas 'bad par bya'o zhes bstan pa'i phyir/nad med ces bya ba la sogs pa smos so/ /de ltar yin du zin kyang nyes pa ci yod ce na/ bdag gis zhes bya ba la sogs pa smos so/ /mi lus ma thob na nyes dmigs ci yod ce na/ mi lus zhes bya ba la sogs pa smos te/ de'i tshe dge ba'i ming yang mi grag la/sdig pa 'ba' zhig byed pas ngan song ltung bar 'gyur ro zhes bya ba'i don to/ /de ltar bden mod kyi ngan song du skyes pa'i dus kyi tshe/ dge ba bsgrub mod kyi snyam pa yang gang tshe zhes bya ba la sogs pa smos so/ /de ltar bden mod kyi dge ba ma byas kyang nyes pa ci yod snyam zhe na/dge ba dag kyang zhes bya ba la sogs pa smos so/ /de ltar yin par ci mngon zhe na/ de nyid phyir na zhes bya ba la sogs pa smos so/ /de nyid ci'i phyir zhe na/ yul khyad par can la zhe sdang bskyed pa lta bu'o/ /skad cig gcig byas zhes bya ba la sogs pa smos so/ /de bden mod kyi las kyi 'bras bu nyams su myong ba de las thar pa'i dus su 'bad par bya'o snyam na/de tsam zhes bya ba la sogs pa smos so/ /ci'i phyir zhe na/ 'di ltar de ni zhes bya ba la sogs pa smos so/ /de lta bas na da ltar gyi dus su brtson par ma byas pa'i nyes dmigs mjug bsdus te bstan pa'i phyir/ 'di 'dra'i dal ba zhes bya ba la sogs pa smos so/ /gal te bdag gis zhes bya ba la sogs pa smos te/ byang chub sems dpa' spyod pa de bya ba'i phyir yin par rtogs kyang gti mug gi dbang gis yang dag par blangs pa'i rjes la bya bar ga las nus snyam du sgyid lug ste/ ji ltar mnos pa bzhin du ma bsgrubs pa'i tshe 'dir yang 'chi ka'i dus su 'gyod pa'i me chen pos gdung bar 'gyur la/tshe phyi mar yang dmyal ba'i mes ni lus gdung zhing tshe snga ma'i las rjes su dran pa'i sgo nas 'gyod pa'i mes ni sems gdung bar 'gyur ro zhes bya ba'i don to/ /de bas na shin tu rnyed par dka' ba'i dal 'byor phun sum tshogs pa rnyed pa'i dus su bdag nyid kyi bya ba dang bya ba ma yin pa shes bzhin du/bya ba'i cha ma bsgrubs shing bya ba ma yin pa'i cha ma spangs pa ngan song du ltung bar 'gyur ba ni/ sngags kyis rmongs par byas pa bzhin du bdag nyid la gnod pa bya ba yin pas/de ltar bya bar mi rigs so zhes bstan pa'i phyir/ shin tu rnyed dka' zhes bya ba la sogs pa smos so/ /de ltar dam bcas pa las 'das pa'i nyes dmigs bstan pa'i sgo nas/ dam bca' ba las mi 'da' ba nyid du bstan nas/ da ni bag yod pa la gnas te bslab pa bsgrub pa'i dbang du byas te bslab pa las 'das par byed pa'i rgyu ni nyon mongs pa yin par bstan pa'i phyir/cis rmongs zhes bya ba la sogs pa smos so/ /da ni nyon mongs pa rnams kyi nyes dmigs bstan pa'i sgo nas/ de spang ba'i dbang du byas nas/ bdag nyid kyi sems la rten cing bdag nyid la tshe 'di dang phyi mar gnas pa ni byed na shin tu yang bzod par bya ba'i gnas ma yin pas/de spang bar bya ba nyid du bstan pa'i phyir/ bdag gi sems la zhes bya ba la sogs pa smos so/ /gal te nyon mongs pa de dag bdag la ji tsam du gnod par bya zhe na/ gal te lha dang zhes bya ba la sogs pa smos so//gal te dus ji srid du gnas she na/ bdag ces bya ba la sogs pa smos so/ /'on te tha mal pa'i dgra bzhin du bsdums byas pas phan nam zhe na/ mthun par zhes bya ba la sogs pa smos so/ /de ni mjug bsdu ba'i dbang du byas nas/ de ltar yun rings rgyun chags dgrar gyur pa//zhes bya ba la sogs pa tshigs su bcad pa gcig gis bsdus te/ gnod pa'i tshogs rab 'phel ba'i rgyu gcig pu/ /zhes bya bas/ gal te lha dang zhes bya ba la sogs pa tshigs su bcad pa gnyis don bsdus te bstan to/ /bdag gi snying la nges par gnas 'cha' na//zhes bya bas ni/ bdag gi sems la zhes bya ba tshigs su bcad pa bsdus pa'i don bstan to/ /de bas na de ji srid ma spangs kyi bar du/ 'khor bar 'jigs med dga' bar ga la 'gyur/ /zhes bya ba'o/ /nyes dmigs gzhan yang nyon mongs pa'i rkyen gyis las dang nyon mongs par 'dus byas pas khams gsum du 'ching bar byed pa'i phyir/mi dge ba'i las byas pas dmyal bar skyes pa'i dus su/ bya lcags kyi mche ba can la sogs pa bdag la gnod par byed pa'i phyir/ 'di ni 'khor ba'i zhes bya ba la sogs pa smos te/ de bas na bslab pa kun las btus pa las/srid pa'i btson srung bsrung ba ni/ /sems can dmyal ba'i khyi la sogs pa'ang sngon gyi las las byung ba yin no/ /de bas na nyon mongs pa 'di ni ji ltar seng ge 'chor ba'i lcags gzeb dang ma bral na bde bar mi 'gyur bas sdom brtson zhes bya ba la sogs pa gsungs te/de bas na de yang spong bar bya ba dang brtson par bskyed pa'i phyir/ ji ltar ji srid ces bya ba la sogs pa smos so/ /'on te nyon mongs pa'i sdug bsngal de spang ba la bdag gis bzod par mi nus pa'i phyir/ de spang ba la brtson 'grus rtsom par ma nus so snyam pa la/re zhig gnod byed ces bya ba la sogs pa dang / rang bzhin 'chi bas zhes bya ba la sogs pa smos te/ 'di ltar bsdus pa'i don ni tha mal pa'i dgra bo yang zhe sdang bskyed pa'i rgyus de la glan pa'i phyir/ tha na gnyid kyang mi log par brtson 'grus rab tu rtsom par byed na/ rtag tu gnod pa chen po'i rgyur gyur pa'i phyir/nyon mongs pa spong ba la brtson 'grus drag tu ci'i phyir mi rtsom zhes bya ba dang / gzhan yang tha mal pa'i dgra bo dag ni bdag gis ma bsad kyang rang bzhin gyis 'chi bar 'gyur/ de dag gsad pa'i phyir/ de'i gnas skabs kyis sdug bsngal de dag bzod cing dang du len par byed na/nyon mongs pa'i dgra bo rnams ni bdag gi gnyen po'i ral gris ma bsad pa'i bar du mi 'chi bar 'gyur ba'i phyir rang bzhin gyis dgrar nges pa de dag gzhom par bya ba'i phyir/ de 'joms pa'i gnas skabs kyi sdug bsngal la bzod cing dang du blang bar bya ba lta smos kyang ci dgos zhes bya ba yin no//'on te sdug bsngal de ni bdag la gnod pa'i phyir bdag gis bzod par nus so zhe na/ don med pa'i sdug bsngal la yang gnod pa byed pa nyid mi rtsi ste/ phyir zhing 'jig rten dag ngoms par byed pa yin no/ /nyon mongs pa spong ba'i skabs kyi sdug bsngal 'di ni shin tu don chen po dang ldan par bcas pa yin pa'i phyir/ci'i phyir gnod par byed pa yin te/ ma yin pas de la bzod par bya ba'i don to/ /gzhan yang 'jig rten na don chung ngu'i phyir yang sdug bsngal chen po dag la bzod par byed pa mthong na/ bdag kyang gzhan gyi don chen po'i phyir lta ci ste mi bzod de/shin tu yang bzod par bya dgos par bya ba'i phyir/ nya pa zhes bya ba la sogs pa smos so/ /'on te rgyu ci'i phyir nyon mongs pa de spang bar bya dgos snyam pa la/ de'i rigs pa bstan pa'i phyir/ phyogs bcu zhes bya ba la sogs pa smos te/ 'dir bsdus pa'i don ni bdag gis ni sems can thams cad kyi nyon mongs pa spong bar dam bcas pa yin pa'i phyir la/gang gi tshe rang nyid grol bas ni gzhan dgrol bar nus kyi rang ma song bar gzhan bsgral bar mi nus pa rgyu de'i phyir/ rang gi nyon mongs pa spong ba la 'bad par bya'o zhes bya ba yin no/ / 'on te nyon mongs pa de ji ltar spang zhe na/ rnam pa gnyis kyi sgo nas te/ de la re zhig dang po nyon mongs pa rnam pa gnyis rgyud la brten pa'i sgo nas/ nyon mongs pa spong bar bstan pa la/ re zhig khon du 'dzin pa rgyud la gzhag pa'i dbang du byas nas/ nyon mongs pa spang ba la zhes bya ba la sogs pa smos so//'on te khon du 'dzin pa zhes bya ba 'di ci yin zhe na/ nyon mongs pa rnams kyi nyes dmigs ji lta ba bzhin du shes pa dang / ma brjed pa'i mtshan nyid de dran pa ste/ de ni khon du 'dzin pa dang 'dra ba'i phyir/ /khon du 'dzin pa'i nyon mongs pa zhes bla dgas kyi/ dngos su nyon mongs pa ngo bo nyid ni ma yin no//da ni nga rgyal gyi mtshan nyid kyi nyon mongs pa'i rgyu las gzhag par bya ba'i phyir bdag ni bsregs te zhes bya ba la sogs pa smos so/ /nga rgyal zhes bya ba 'di ci zhig ce na/ de ni dran pa dang shes bzhin la gnas te/ sems nyid nyon mongs pa'i dbang du mi gtong ba nyid la/nga rgyal dang 'dra ba'i nga rgyal gyi nyon mongs zhes gdags kyi/ dngos su nyon mongs pa'i ngo bo nyid ni ma yin no/ /'on te thabs de de dag gis nyon mongs pa spangs nas/ de'i tshe tha mal pa'i dgra rnams gzhan du bdag la gnod par mi 'gyur ram zhe na/ mi 'gyur bar bstan pa'i phyir/tha mal pa'i dgra bo zhes bya ba la sogs pa rkang pa bzhi dang / bdag yid las bsal zhes bya ba gnyis smos so/ /'o na ci'i phyir ma spangs she na/ blo zhen zhes bya ba smos te/ brtson par byed pa'i phyir ma spangs par zad kyi/ phyis nad kyi 'jigs pas ni ma yin no zhes bya ba'i don to//da ni nyon mongs pa gzhi nas spang bar bya ba'i don du/ nyon mongs nyon mongs zhes bya ba la sogs pa gsungs te/ 'dod chags la sogs pa'i nyon mongs pa'i nyon mongs pa 'di dag ni chos thams cad bdag med pa nyid du dmigs pa'i shes rab kyi mig gis spang dgos te/des nyon mongs pa thams cad kyi rtsa ba dngos por mngon par zhen pa spang ba'i phyir ro/ /ji skad du de kho na nyid la 'jug pa las/ dngos por zhen pa'i dbang gis skyon/ /chags dang zhe sdang la sogs pa/ /dgra rnams rab 'byung de log na/ /de rnams 'byung bar ga la 'gyur//zhes 'byung ba dang / dbu ma rgyan las kyang / chos la bdag med mkhas pa ni/ /rang bzhin med pas goms byas pas/ /phyin ci log las byung ba yi/ /nyon mongs sgrib pa med par spong / /zhes 'byung ba'i phyir ro/ /'o na shes rab kyi mig ji ltar bskyed ce na/nyon mongs rnams ni zhes bya ba la sogs pa smos te/ don dam par nyon mongs pa rnams ni yul la sogs pa la mi gnas te/ gcig dang du ma dang bral bas yul la sogs pa nyid ma grub pa'i phyir/ yul la sogs pa grub tu zin kyang de dag la mi gnas te/ res 'ga' yid du 'ong ba la sogs pa nye bar yin yang 'dod chags la sogs pa mi 'byung ba'i phyir ro/ /de bas na nyon mongs pa 'di dag gang na yang mi gnas pa'i phyir/ nyon mongs pa nyid dmod par ma grub par gang gi 'gro ba kun la gnod par byed de mi 'thad do/ /de bas na nyon mongs pa 'di rnams sgyu ma dang 'dra bar rang bzhin med pa'i phyir/don dam par ni nyon mongs pa rnams kyis 'jigs par yang mi bya'o/ /de bas na nyon mongs pa nyid kyang rang bzhin med pa nyid du rtogs pa'i shes rab kyi mig bskyed pa'i sgo nas nyon mongs pa spang ba la brtson 'grus brtsam par bya'o zhes gdams pa'o//de ltar ma yin par bdag nyid dmyal ba rnams su bskyur bar bya ba mi rigs so zhe na/ da ni mjug bsdu ba'i tshul gyis gdams pa'i phyir/ de ltar rnam bsam zhes bya ba la sogs pa smos so/ /byang chub sems dpa'i spyod pa la 'jug pa zhes bya ba'i don snga ma bzhin no//bag yod bstan pa zhes bya ba ni/ chags pa dang / zhe sdang dang / gti mug pa le lo dang bcas pa ste/ de'i dbang du mi gtong ba'o/ /le'u gsum pa'i bshad pa rdzogs so// //da ni bag yod pa la gnas par bya ba'i phyir/ bag med pa las sems bsrungs pa'i nyes dmigs mdor bstan pa/bslab pa bsrung bar bya ba'i tshigs su bcad pa gcig gsungs te/ tshe 'di'i dbang du byas nas phan yon dang nyes dmigs dngos su bstan pa la/ tshe phyi ma'i phan yon dang nyes dmigs shugs la bstan te/ de la dang por rtsa ba gnyis kyis ni yang dag par bslab pa mi nyams par 'gyur ba'i phan yon bstan to//'og ma gnyis ni de las bzlog pa tshe 'di'i nyes pa bstan to/ /da ni tshe phyi ma'i nyes dmigs rgyas par bshad pa'i dbang du byas nas/ sems kyi glang po zhes pa la sogs pa smos so/ /da ni phan yon gyi dbang du byas nas/kun nas dran pa'i zhes bya ba la sogs pa tshe 'di'i dang phyi ma'i phan yon mdor bstan pa'o/ /stag dang zhes bya ba la sogs pa ni tshe 'di dang phyi mi'i 'jigs pa thams cad med par 'gyur ba'i phan yon rgyas par bshad pa'o/ /gal te zhes bya ba nas/ de dag don med gyi nar 'khyams//zhes bya ba'i bar gyis ni/ sems bsrungs pa'i phan yon dge ba thams cad lag tu 'ong ba rgyas pa bshad de/de la dge ba'i chos thams cad ni mdor bsdus na pha rol tu phyin pa drug gis bsdus pas de la dang po sbyin pa'i pha rol tu phyin pa'i dbang du byas nas/gal te 'gro ba dbul bor nas/ zhes bya ba la sogs pas so/ /gang ji ltar na sems bsrung ba las byung ba'i dge ba lag tu 'ong bar 'gyur zhe na/ gal te sems bsrung ba tsam gyis 'grub pa ma yin na/ 'o na ji ltar zhe na/ 'jig rten gyi 'gro ba thams cad dbul bor te/phyug por 'gyur bas sbyin pa'i pha rol tu phyin pa yongs su rdzogs par 'gyur na ni/ de ni shin tu tshegs che bar yang 'gyur la/ da rung 'jig rten na dbul po dpag tu med pa yod pa'i phyir ro/ /sngon gyi skyob pa rnams kyis sbyin pa'i pha rol tu phyin pa yongs su rdzogs par yang thal bar mi 'gyur bas de lta bu mi bya'o//'o na ci zhe na/ sems 'di nyid lus dang longs spyod la sogs pa la lhag par ma chags pas bsrungs te/ gzhan la gtong ba'i sems dang ldan pa nyid kyis sbyin pa'i pha rol tu phyin pa yongs su rdzogs par gsungs te/ de lta bas na gzhan dag phyug por bya ba tshegs med par yang 'grub pas lag tu 'ong zhes bya ste/de ni bsdus pa'i don yin no/ /bdog pa thams cad ces bya ba ni lus dang longs spyod yin la/ 'bras bcas te zhes bya ba ni de btang ba las 'byung ba'i 'bras bu dge ba'i rtsa ba yin te/de ltar na gsum po de mtha' dag gtong ba yin pas/ bdog pa thams cad 'bras bcas te/ /zhes bshad do/ /da ni tshul khrims kyi dbang du byas te/ nya la sogs pa zhes bya ba la sogs pa smos te/ srog gcod pa spong ba zhes bya ba ni nya la sogs pa mi 'chi bar bya ba'i don du srog gcod par byed pa'i nya pa la sogs pa de dag srog gcod pa la ni mi bya ste/de ni tshegs che ba'i phyir dang / sngon gyi skyob pa rnams kyis da rung srog gcod pa spong ba'i tshul khrims yongs su ma rdzogs par thal bar 'gyur ba'i phyir dang / de bas na srog gcod pa spong ba zhes bya ba ni/bdag nyid la srog gcod pa spong ba'i sems thob pa tsam gyis nya pa la sogs pa skrod pa'i tshegs med par yang srog gcod pa spong ba yongs su rdzogs par 'gyur ba'i phyir dang / tshul khrims las byung ba'i dge ba'i rtsa ba yang dag par lag tu 'ong ba zhes bshad do/ /tshul khrims la ji lta ba bzhin du bzod pa nas shes rab kyi bar du yang bdag nyid kyis sems bsrung ba las phyi rol du gnod pa byed pa'i dgra bo dang /le lo can gyi gang zag rnam par g.yeng ba dang / shes rab 'chal ba'i gang zag spong ba la sogs pa'i tshegs med par bdag nyid kyi sems gnod sems dang le lo dang /rnam par g.yeng ba dang / 'chal ba'i shes rab las bsrungs pa tsam gyis/ bzod pa nas shes rab kyi bar du yongs su rdzogs par 'gyur ba'i phyir/ dge ba thams cad lag tu 'ong ba'i zhes bshad do/ /da ni bzod pa'i dbang du byas nas/ bzod pa'i pha rol tu phyin pa gnod sems byed pa spong ba zhes bya ba yang /gnod sems pa'i dgra bo la sogs pa spong ba la mi bya ste/ tshegs chen la sogs pa'i skyon gong ma gnyis po 'byung ba'i phyir ro/ /de bas na bdag nyid kyi sems gnod par byed pa'i bsam pa las bzlog pa tsam gyis 'grub ste/ dper na rkang pa la tsher mas mi tshugs par bya ba'i phyir/sa stengs ko bas g.yogs pa ni mi 'grub kyi/ 'o na ci'i phyir zhe na/ lham mthil tsam gyi ko bas rkang pa tshur g.yogs na/ de ni tshegs chung ba'i phyir dang rkang pa la yang tsher mas mi 'dzug pa'i dgos pa yang 'grub pa'i phyir/ de ni bsgrub par bya ba'i gnas yin pa de bzhin du 'dir yang de dang 'dra'o zhes bstan pa'i phyir/sems can mi srun zhes bya ba la sogs pa smos so/ /da ni brtson 'grus kyi dbang du byas nas/ gang gi tshe sems 'di nyid le lo las bsrungs na ni/ bsam gtan dang po'i bar chad med pa'i lam dang mtshungs par ldan pa bsam gtan gyi sdom pas bsdus pa'i sems gsal po gcig tsam bskyed na ni/de'i tshe 'bras bu tshangs pa'i 'jig rten la sogs pa thob pa ltar gang gi tshe sems de 'di nyid le lo las ma bsrungs na ni/ de'i tshe las kyi lus ngag gnyi ga dang bcas kyang 'bras bu khyad par can thob pa ma yin par bstan pa'i phyir/sems gsal zhes bya ba la sogs pa smos so/ /da ni bsam gtan gyi dbang du byas pa gang gi tshe bdag nyid kyi sems nyid bsam gtan gyi mi mthun pa'i phyogs rnam par g.yeng ba las ma bsrungs pa'i tshe/ de'i dge ba'i rtsa ba ji snyed cig dus ji srid du spyad kyang /rten dam pa dang / ched du bya ba dam pa dang / rnam par dag pa dam pa dang / yongs su bsngo ba dam pas yongs su ma zin na/ tshogs rgya chen po mi sog cing / byang chub chen po thob par mi 'gyur bas/ de nyid kyi phyir bdag gi sems 'di nyid rnam par g.yeng ba las bsrung bar bya bar bstan pa'i phyir/bzlas brjod dang ni zhes bya ba la sogs pa smos so/ /da ni shes rab kyi dbang du byas nas bdag nyid kyi sems shes rab 'chal ba ste/ dngos po la mngon par zhen pa'i las srung zhing / chos kyi don gyi mchog bdag med pa'i don gyi de kho na nyid kyi sems la nang du bcangs te bslab par bya ba 'dir ma gtogs na/de'i tshe dge ba'i rtsa ba ci byas pa thams cad kyang thabs la mkhas pa dam pas ma zin pa'i phyir/ byang chub chen po 'thob pa'i rgyu nyid du mi 'gyur ro zhes bstan pa'i phyir/ gang gis chos kyi don po mchog /ces bya ba la sogs pa smos so/ /de ni mjug bsdu ba'i phyir de ltar zhes bya ba la sogs pa smos so/ /bsrungs pa'i phan yon dang ma bsrungs pa'i nyes dmigs yod pa de lta bas na/ bdag gi sems 'di nyid bag yod pa la legs par gzung zhing /bag med pa las legs par bsrung bar bya'o/ /ci'i phyir zhe na/ sems bsrung zhes bya ba smos te/ sgrib pa spong ba'i gnyen por gyur pa'i phyir sems bsrung ba nyid brtul zhugs kyi mchog yin pa ma gtogs pa/ sems brtul zhugs la mi gnas pa/ gzhan lus ngag yid brtul zhugs mang pos ci zhig bya ste/nyon mongs pa'i gnyen por gyur pa ma yin pa'i phyir don med ces bya ba'i tha tshig go/ /'on te de'i sbyangs pa'i yon tan bcu gnyis la sogs pa yang don med par 'gyur zhe na ma yin te/ yang nyon mongs par bcas pa'i phyir yin pas/ gang gi tshe nyon mongs pa spong ba'i yan lag tu mi 'gyur na ni de dag kyang don med pa nyid yin na/ phyi rol brtul zhugs dag lta smos kyang ci dgos/ 'on te tshul ji ltar dus ji srid kyi bar du bsrung bar bya zhe na/ ma grangs zhes bya ba la sogs pa smos so/ /'on te nyes dmigs dang phan yon ji lta bu zhig yod nas sems bsrung snyam na/rma'i zhes bya ba la sogs pa smos pa dang / spyod pa 'di 'dra zhes bya ba la sogs pa smos so/ /'on te ji tsam du sems bsrung bar bya snyam pa la/ bdag gi rnyed dang zhes bya ba la sogs pa smos te/ rnyed pa la sogs pa rnams dang yang bsngos nas sems bsrung bar bya ba'i tha tshig go//'on te ji ltar sems bsrung bar bya snyam na/ sems bsrung 'dod pa zhes bya ba la sogs pa smos te shes bzhin la gnas pa ni bya ba dang bya ba ma yin pa shes par gyur pa la/ dran pa la gnas pas ni de nyid la ma brjed pa'i phyir bya ba la 'jug cing bya ba ma yin pa'i cha spong bar 'gyur ba'i phyir ro//mdor bstan pa de nyid rgyas par bshad pa'i dbang du byas nas nyes dmigs ji lta bu zhig yod na/ de spong ba'i phyir dran pa dang shes bzhin la gnas par bya snyam pa'i dogs pa bsus na/ dngos po shes bzhin la mi gnas pa'i nyes dmigs rnam pa gsum bstan te/de la dang po'i dbang du byas nas/ nad kyis zhes bya ba la sogs pa smos te/ nad kyis dkrugs pa bzhin du bya ba dang / ma yin pa shes pa'i phyir de dag la go rims bzhin du bsgrub pa dang spong ba'i mthu med par 'gyur ro zhes bya ba'i don to//gnyis pa'i dbang du byas nas/ shes bzhin med pa'i zhes bya ba la sogs pa smos te/ mang du thos pa la sogs pa ji snyed byas su zin kyang 'dir ni brjod du mi rung snyam pa'i shes bzhin med pa'i phyir brjed ngas par 'gyur bas thos pa nyid kyang chud za bar 'gyur ro zhes bya ba'i tha tshig go//gsum pa'i dbang du byas nas/ thos pa dang ldan pa zhes bya ba la sogs pa smos te/ mang du thos pa la sogs pa yin du zin kyang / bya ba dang bya ba ma yin pa mi shes pa'i phyir bya ba'i cha la 'jug pa dang / bya ba ma yin pa'i cha la 'jug pas ltung ba dang bcas par 'gyur ro zhes bya ba'i don to//da ni dran pa la mi gnas pa'i nyes dmigs gnyis las/ dang po shes bzhin ma yin pa'i nye ba'i nyon mongs pa rgyud la 'byung bar bstan pa/ shes bzhin med pa'i zhes bya ba la sogs pa smos te/ bya ba dang bya ba ma yin pa mi shes pa'i mtshan nyid kyi shes bzhin ma yin pa 'byung la/de'i dbang gis bya ba'i cha la mi 'jug pa'i phyir/ bsod nams phyi ma dag kyang sogs par mi 'gyur ba la/ bya ba ma yin pa byas pa'i phyir sngar bsags pa dag kyang brlag par byas pas mtho ris dang thar pa'i bde ba las nyams te ngan 'gror 'gro bar 'gyur ro zhes bya ba'i tha tshig go//da ni gnyis pa'i dbang du byas nas/ nye ba'i nyon mongs pa gzhan dag rgyud la 'byung bar bstan pa/ nyon mongs pa zhes bya ba la sogs pa smos te/ gang gi tshe bya ba dang bya ba ma yin pa brjed par gyur pa de'i tshe 'dod chags la sogs pa'i nyon mongs pa gzhan dag kyang 'byung bar 'gyur bas nyes dmigs 'das ma thag par bstan pa bzhin no//da ni dran pa ji ltar bsrung ba'i dbang du byas nas dran pa bdag gi yid dang mi 'bral bar gdams pa/ de bas na zhes bya ba la sogs pa smos te/ nyes dmigs de lta bu yod pa de bas na zhes bya ba'i don to//ji ltar mi gtong zhe na/ song na'ang song zhes bya ba la sogs pa smos te/ gal te dran pa nyams par gyur na gong du bstan pa bzhin gyi nyes dmigs yod pas dran pa mi 'chor bar bya ba'i tha tshig go/ /yang 'di'i don 'di yin te/dran pa mi gtong ba de lta bu yin du zin kyang gal te nyams te song na ji ltar bya snyam na/ song na'ang zhes bya ba la sogs pa smos te/ gal te nyams par gyur na yang sngar bstan pa'i nyes dmigs dran par byas nas slar dgug par bya zhes bya ba'i don to/ /'on te dran pa de rgyu gang las skyes she na/bla ma dang ni zhes bya ba la sogs pa smos te/ 'jigs pas zhes bya ba la sogs pa ni ngo tsha shes pa dang / khrel yod pa'o/ /gus byed la zhes bya ba ni bslab pa la gus par byed pa ste/ ji skad du bslab pa kun las btus pa las/ dran pa shin tu gus las byung //zhes smos pa'i phyir ro/ /de ltar na slob dpon mkhas pas bstan pa dang / bdag nyid kyis ngo tsha shes pa dang / khrel yod pa dang ldan zhing bslab pa la gus par byed pa'i rgyus bslab pa kun las btus pa las/ ji skad 'byung ba'i dran pa bcu gnyis dag skye bar 'gyur ro zhes bya ba'i tha tshig go//dran pa skye ba'i rgyu gzhan yang / sangs rgyas zhes bya ba la sogs pa smos te/ bdag ni ye shes dang ldan pa de dag gi spyan snga na rtag tu gnas pa yin pas/ gal te bslab pa las nyams par gyur na/ de dag gis thugs kyis bas na mi rung ngo snyam du bsams nas bslab pa mi nyams par bya ba'i dran pa rtag tu gzhag go zhes bya ba'i don to//'on te de ltar byas na yon tan ci yod ce na/ des ni zhes bya ba la sogs pa smos so/ /gal te dran pa bas na yon tan ci yod snyam pa la/ gang tshe zhes bya ba la sogs pa smos te/ bya ba dang bya ba ma yin pa brjed par ma gyur pa na/de ji lta ba bzhin du shes pa'i shes bzhin dang mi 'bral bar 'gyur zhing / gang tshe bya ba gzhan dag rab tu 'byed pa'i shes bzhin yang mi ldan yang dran pa ma nyams pa'i rgyus las gzhan de dag dang phrad pa'i tshe/ shes bzhin de mngon du 'gyur ba zhes bya ba'i tha tshig go//da ni bsams bzhin rjes su gzung ba'i thabs bstan pa'i dbang du byas nas/ de las kyang dang por bya ba thams cad kyi thog mar 'gro ba'i shes bzhin gyis sems kyi spyod lam la brtag par bya ba bstan pa'i phyir/ re zhig dang por zhes bya ba la sogs pa smos te/re zhig dang por zhes bya ba ni las de la ma zhugs pa'i sngon rol du bya ba thams cad kyi thog mar 'gro ba'i shes bzhin gyis mnyam par ma bzhag pa'i las la zhugs pa'i gong rol du yang bying ba dang rgod pa dang ldan pa'i sems ni skyon dang bcas pa yin la/ bzlog pa ni skyon med pa yin pa dang /'dug pa dang nyal ba'i dus la bab pa na/ 'dug pa dang nyal ba'i bde ba la lhag par chags pa ni skyon dang bcas pa yin zhing zhes lus kyi khams brtags pa ste/ dge ba'i chos yongs su rdzogs par bya ba'i bsam pa ni skyon med par shes par byas nas/ de'i tshe skyon dang bcas pa'i sems las bzlog pa ste/skyon med pa'i sems la shing bzhin du zung thub par bya'o zhes gnas par bya ba'i don to/ /de bas na 'di ni skyon bcas zhes bya ba ni mtshon pa tsam du zad kyi/ de las bzlog pa'i skyon med pa'i sems kyang shes par bya'o/ /da ni 'gro ba'i spyod lam gyi dbang du byas nas/bya ba thams cad kyi thog mar 'gro ba'i shes bzhin la lam du ma zhugs pa'i gong rol du/ ji ltar 'gro bar bya ba dang 'gro bar mi bya ba dang / yul gang du 'gro bar bya ba dang / 'gro bar mi bya ba la sogs pa shes par byas nas las la 'jug par bya'o zhes bstan pa'i phyir/don med ces bya ba la sogs pa smos so/ /da ni nyal ba dang / za ba dang / 'dug pa dang / smra ba la sogs pa'i lus dang ngag gi spyod lam gzhan dag la yang dang por bya ba thams cad thog mar 'gro ba'i shes bzhin gyis bya ba dang / bya ba ma yin pa shes par byas nas bsgrub par bya'o zhes bstan pa'i phyir/de ltar gnas skabs zhes bya ba la sogs pa smos so/ /de ni lhan cig rjes su spyod pa'i shes bzhin la gnas te/ lus dang ngag dang yid kyi spyod lam la brtag par bya ba'i phyir lus kyi zhes bya ba la sogs pa smos te/ dbye ba thams cad kyi thog mar 'gro ba'i shes bzhin gyis bya ba dang bya ba ma yin pa shes par byas nas/bar bar du spyod lam 'khrugs pa bsrung ba'i phyir/ da ltar bdag gi lus dang ngag dang yid kyi spyod lam 'di ci chos dang mthun pa'i tshul du gnas zhes brtag par bstan te/de la tshigs su bcad pa dang pos ni/ dngos su lus kyi spyod lam brtag par bstan la/ shugs kyis ni ngag gi spyod lam brtag par bstan pa'o/ /lus kyi spyod lam brtag pa yang / dngos su gnas pa dang 'dug pa'i spyod lam la brtag par bstan la/ shugs kyis ni za ba dang nyal ba dang /'gro ba'i spyod lam la brtag par bstan to/ /tshigs su bcad pa gnyis pas ni yid kyi spyod lam la brtag par bstan to/ /de la lus kyis 'di ltar gnas bya zhes bya ba bsdogs nas zhes bya ba ni/ dus gang gi tshe brtag par bstan la/ ci nas yang dag blangs pa'i gtso//skad cig gcig kyang mi 'chor bar/ /zhes bya bas ni dgos ched gang gi don du brtag pa bstan te/ yang dag par blangs pa mtha' dag kyang mi 'chor bar bya ba yin mod kyi/ gtso bo zhes smos pas ni res 'ga' bslab pa'i gzhi kha cig dus gcig tu bsrung du mi btub pa'i dus de'i tshe/gang gi tshe gtso che ba de bsrung zhing gtso chung ba btang snyoms su gzhag kyang nges pa med pa'i phyir ro/ /de la lus kyis zhes bya ba dang / lus 'di zhes bya ba dang / gnas pa yin zhes bya ba dag ni mtshon pa tsam yin gyi/ 'di ltar yang sbyar bar bya ste/ lus kyis 'di ltar 'gro bya ste/ /bya ba bsdogs nas de nas ni/ /ci nas yang dag blangs pa'i gtso/ /skad cig gcig kyang mi 'chor bar/ /skabs su lus 'di ji lta bur/ /gnas pa yin zhes blta bar bya/ /zhes bya ba dang / de bzhin du za ba dang nyal ba yang mi brjed par bya'o/ /de bzhin du ngag gi dbang du byas nas kyang /ngag gis 'di ltar smra bya zhes/ /bya ba bsdogs nas de nas ni/ /ci nas yang dag blangs pa'i gtso/ /skad cig gcig kyang mi 'chor bar/ /skabs su ngag 'di ji lta bur/ /smra ba yin zhes brjod par bya/ /de bzhin du/ yid kyis 'di dag bsam bya zhes//bya ba bsdogs nas de nas ni/ /ci nas yang dag blangs pa'i gtso/ /skad cig gcig kyang mi 'chor bar/ /bdag gi yid 'di gar spyod ces/ /da ltar yid la so sor brtag /ces bya bar sbyar ro/ /'di dang 'di ltar bya'o zhes bya ba bsdogs pa na/ mtshon pa tsam du thad de/'di dang 'di ltar bya'o zhes bya ba ma yin pa bsdogs par yang shes par bya'o/ /'on te de ltar brtags nas ji ltar bsrung bar bya snyam pa la/ 'jigs pa la sogs pa zhes bya ba la sogs pa smos so/ /dper na skabs 'ga' zhig tu gang zag 'ga' zhig la gshed ma la sogs pas bdas nas 'bros pa bdag nyid kyis mthong ba'i tshe gshed ma la sogs pa la ji ltar mthong ba bzhin du smra ba spong ba'i tshul khrims bsrung bar yang 'gyur yang /mi 'jigs pa'i sbyin pa byin par mi 'gyur la/ gang yang gang gi tshe mi 'jigs pa'i sbyin pa byin pa'i don du/ brdzun du smras par gyur na ni/tshul khrims bsrung bar mi 'gyur bas de'i tshe gnyis ka dus gcig tu bsrung bar mi nus pa de'i tshe/ mi 'jigs pa sbyin pa gtso che ba yin pa'i phyir/ srog gi skyabs bya ba'i don du brdzun smra ba spong ba'i tshul khrims btang snyoms su gzhag ste/ ji skad du dam pa'i chos 'dul ba las kyang /bsad pa bros te de tshe gshed ma yis/ /dris pa de la de tshe 'di skad brjod/ /tshur shog nam mkha' 'am ni sen mo mthong / /lus can rnams kyis de nyid ma mthong ngo / /zhes 'byung ba dang / 'phags pa blo gros mi zad pas bstan pa'i mdo las kyang / sbyin pa'i dus su tshul khrims brtul ba'i btang snyoms zhes bya ba la sogs pa rgya cher gsungs so//de bas na mi nus na ni ltung ba med par rnam par gzhag gi /nus na ni gang ma byas pa ltung ba nyid du 'gyur ro/ /'di ni mtshon pa tsam du zad kyi/ gang gi tshe byang chub sems dpa'i bslab pa'i gzhi dag skabs kha cig tu bsrung bar mi nus pa de'i tshe/gang gtso che ba de bsrung zhing cig shos btang snyoms su gzhag pa'i tshul gyis gsang bar bya'o zhes bstan to/ 'o na gang gi tshe bslab pa'i gzhi 'dra bar 'gyur ba la dus gcig tu bsgrub mi nus pa de'i tshe ji ltar bsgrub par bya snyam pa la/ gang thog mar brtsams pa de bsgrub par bya zhing cig shos ni btang snyoms su gzhag kyang ltung bar mi 'gyur ba nyid du bstan pa'i phyir/gang zhig bsams te zhes bya ba la sogs pa smos te/ dus de'i tshe na ni phyi mas bar du ma bcad pa'i phyir/ snga ma yang legs par zin pa nyid du 'gyur la/snga ma'i 'phro ma lus pa phyi ma yang thang chod par byar yod pa'i phyir/ gnyi ga legs par zin pa gcig tu 'gyur gyi/ de lta ma yin na ni phyi mar bar du gcod pa'i phyir dang / snga ma'i 'phro lus pa'i phyir snga phyi gnyi ga legs par zin par mi 'gyur la/ snga ma ma zin par phyi ma mi bya ba nyid du mi shes pa'i phyir/shes bzhin ma yin pa'i nye ba'i nyon mongs pa yang 'phel bar 'gyur gyi/ de lta ma yin na ni mi 'gyur ro/ /de ltar spyir bstan nas/ da ni bye brag tu sdom pa gsum las/ sdom pa'i tshul khrims la ji ltar bslab par bya ba'i phyir/ bre mo'i gtam zhes bya ba la sogs pa smos so//de la tshigs su bcad pa dang pos ni rang bzhin gyi kha na ma tho ba spong ba'i dbang du byas pa ste/ bre mo'i gtam la sogs pa ni rang bzhin gyi kha na ma tho ba yin pa'i phyir ro/ /de bas na de la 'jug par shes bzhin gyi tshor bar gyur ma thag tu spong bar bya'o zhes pa'i don to/ / don med sa rko zhes bya ba la sogs pa tshigs su bcad pa gcig gis ni bcas pa'i kha na ma tho ba spong ba bstan te/ sa rko ba la sogs pa bcas pa'i kha na ma tho ba yin pa'i phyir ro/ /'on te rang bzhin dang bcas pa'i kha na ma tho ba dag las 'di dag kho na ci'i phyir bshad ce na/ srog gcod pa dang / myos par 'gyur ba 'thung ba lta bu ni nyan thos kyi 'dul ba khyim pa dang rab tu byung ba'i gzhi thun mong ba nyid du bshad la/gong du bshad pa de dag gis rab tu byung ba la bshad kyi khyim pa la ma bshad pa'i phyir dang / 'dir ni de dag byang chub sems dpa' rab tu byung bas bsrung bar bya ba de bzhin du byang chub sems dpa' khyim pas kyang bsrung bar bya ba yin pa'i phyir ro//bde gshegs bslab pa zhes bya ba ni/ mdo las gang sems can gyi don du mi 'gyur ba de spang bar bya'o zhes gsungs pa'o/ /de ltar nyan thos dang thun mong ba'i sdom pa'i tshul khrims ji ltar bsrung ba'i tshul bshad nas/da ni thun mong ma yin pa'i yid kyi mi dge ba'i las spong bar byed pa'i sdom pa'i tshul khrims kyi dbang du byas nas/ gang tshe bskyod par 'dod gyur tam/ /zhes bya ba la sogs pa tshigs su bcad pa drug bshad de/ 'on te bdag la stod pa dang / gzhan la smod pa ji ltar na sdom pa'i tshul khrims kyi mi mthun pa'i phyogs yin zhe na/bdag la stod pa ni bdag gi lus dang longs spyod la lhag par chags pas kun nas bslang ba yin pa'i phyir la/ gzhan la smod pa ni phrag dog dang ser sna'i kun nas bslang ba'i phyir de dag yid kyi mi dge ba'i las yin pa'i phyir ro/ /mi dge ba'i chos sdud pa'i tshul khrims la ji ltar bslab pa'i tshul bstan pa'i phyir/mi bzod ces bya ba la sogs pa'i tshigs su bcad pa gnyis gsungs te/ 'di ji ltar na dge ba'i chos sdud pa'i mi mthun pa'i phyogs yin zhe na/ dge ba'i chos sdud pa ni pha rol tu phyin pa drug gis bsdus pa yin la/ 'dir yang mi bzod pa ni bzod pa'i mi mthun pa'i phyogs yin zhing / le lo ni brtson 'grus kyi yin la/ zab mo'i don la 'jigs pa ni shes rab kyi yin zhing / spyod pa spyi brtol dang mu cor smra ba ni bsam gtan gyi yin te/ rang gi lus dang longs spyod dang / gnyen 'dab la sogs pa la lhag par chags pa ni sbyin pa'i mi mthun pa'i phyogs yin no//'o na tshul khrims kyi mi mthun pa'i phyogs gang yin zhe na/ bshad pa 'di dag nyid yin gyi 'di las log na med pa'i phyir te/ ji ltar zhe na tshul khrims ni sdom pa gsum gyis bsdus pa yin la/ de la bre mo'i gtam zhes bya ba la sogs pas ni sdom pa'i tshul khrims kyi dbang du byas pa yin la/shin tu nges dang zhes bya ba la sogs pas ni/ sems can gyi don byed pa'i dbang du byas pa yin zhing / mi bzod ces bya ba la sogs pa ni dge ba'i chos sdud pa'i dbang du byas pa yin la/ de las ma gtogs pa'i tshul khrims zhes bya ba med pa'i phyir ro//da ni sems can gyi don byed pa'i dbang du byas nas/ shin tu nges dang zhes bya ba la sogs pa smos te/ shin tu nges dang zhes bya ba ni/ sems can gyi don byed pa'i 'bras bu la yid ches pa'i dad pa'o/ /rab ces bya ba ni sems can gyis byas pa'i phan yon mthong ba'i dbang gis dang ba'i dad pa dang /bdag nyid kyang de sgrub par 'dod pa'i dad pa'o/ /brtan dang zhes bya ba ni de las mi ldog pa'o/ /gus zhes bya ba ni lus kyi sgo nas so/ /zhes ni ngag gi sgo nas so/ /ngo tsha shes dang 'jigs dang ste/ khrel yod pa ni grogs kyi sgo nas so//zhi zhing bya ba ni yid kyi sgo nas te/ de lta bu'i tshul gyis gzhan gyi don byed pa la brtson par bya'o/ /yang na shin tu nges dang zhes bya ba ni/ bdag gis sems can gyi don byed par nus so snyam pa ste/ mi zhum pa'i brtson 'grus kyis so/ /rab dang zhes bya ba ni bdag gis gdon mi za bar sems can gyi don bya'o zhes sems la go gon pa ste/go cha'i brtson 'grus kyis so/ /brtan zhes bya ba ni de las mi ldog pa'i brtson 'grus kyis so/ /brtson zhes bya ba ni de la sbyor ba ste/ sbyor ba'i brtson 'grus kyis so/ /gzhan dga' byed la zhes bya ba ni gang la brtson 'grus brtsam par bya ba'i yul lo//ngo tsha shes dang 'jigs dang bcas/ /zhes bya ba ni/ ngo tsha shes pa dang khrel yod pa ste brtson 'grus kyi grogs kyis so/ /gus dang zhe sar bcas pa dang / /zhi zhing zhes bya ba ni snga ma bzhin du lus ngag yid gsum gyi sgo nas te/ sems can gyi don la brtson 'grus ji ltar rtsom pa'i tshul bstan pa'o//de ltar lhan cig rjes su spyod pa'i shes bzhin la gnas te/ sdom pa gsum la ji ltar bslab pa'i tshul bstan nas/ da ni gtsor sems bsrung ba la bslab pa bstan pa'i phyir/ phan tshun mi mthun zhes bya ba la sogs pa smos te/tshigs su bcad pa dang pos ni snying rje la gnas te sems bsrung bar bstan to/ /gnyis pas ni ngo tsha shes pa dang khrel yod pa la gnas te bsrung bar bstan to/ /gsum pas ni dal ba 'byor pa rnyed par dka' bar bsams nas sems bsrung bar bstan to/ /de bas na 'jig rten gnas pa'i sems can 'di dag ni phan tshun mi mthun pa'i dbang gis 'dod pa la lhag par chags pa la sogs pa'i sgo nas sdug bsngal ji snyed nyams su myong yang des skyo bar mi byed kyi/phyir zhing 'dod chags la sogs pa'i nyon mongs pa skyes pas mi dge ba'i las mngon par rtsom zhing / bsam pa 'di 'byung ba'i phyir 'di dag ni sdug bsngal dang sdug bsngal gyi rgyu la gnas pa yin pas de dag gi don du bdag gi sems nyon mongs pa'i dbang du mi gtang bar bya snyam pa dang /bdag dang sems can gyi dbang du byas te/ ngo tsha shes pa dang khrel yod pa la gnas nas bdag tu ma zhen par sgyu ma lta bu'i dbang gis dge ba'i chos kyi dmigs pa yid la gzung bar bya ba dang /dal ba 'byor pa shin tu rnyed par dka' ba las de thob pa'i dus su de thob pa chud mi za bar bya'o snyam nas sems bsrung ba ste/ yan lag gi don yin no/ /da ni lus la lhag par chags pa'i dbang gis bsrung bar mi bya bar bstan pa/bya rgod ces bya ba la sogs pa smos te/ 'di skad bstan te/ lus lhag par chags pa'i tshul gyis ma bsrungs na de'i tshe/ lus ni mi dga' bar 'gyur snyam pa'i dogs pa bsus nas dur khrod la sogs par bya rgod la sogs pas gnod pa ji snyed byas kyang lus khyod mi dga' ba mi byed na/ da lta ci'i phyir ma bsrungs pas mi dga' ba byed cing kha da ste kha zin byas su re ste re bar mi rigs so zhes bya ba yin no/ /de ltar yin du zin kyang yid kyis lus de lhag par chags pa'i sgo nas srung bar byed do zhe na/ lus ni zhes bya ba la sogs pa smos so/ /'on te ma bsrungs na yid dag la gnod do zhe na/ khyod dang zhes bya ba la sogs pa smos so/ /'on te bdag la brten te dgos so zhe na/ rmongs pa'i zhes bya ba la sogs pa smos te/ mi gtsang ba yin pa'i phyir rten du gzung rin mi chog snyam bsam pa'o/ /ji ltar mi gtsang ba yin snyam pa la/ thog mar zhes bya ba la sogs pa smos so/ / 'on te bdag gi longs spyod du dgos so zhe na/ khyod kyi zhes bya ba la sogs pa smos te/ gcig tu na khyod kyis longs spyod du mi rung ba'i phyir bsrung ba mi rigs te/ gnyis su na wa la sogs pas ni longs spyad du rung ba'i phyir bsrung bar rigs so zhes bya ba'i don to/ /'o na ji ltar bya snyam pa la mi 'o cog gi lus 'di ni 'phral gyi gos la sogs pa byin pa'i sgo nas dge ba'i las la bkol bar bya ba nyid du ma zad kyi longs spyod du dgos so zhes bya ba'i go nas bsrung bar bya bar ni mi rigs te/rtag tu khyod kyis longs spyod du mi rung ba'i phyir/ dper na bran la sogs pa las byed du mi btub pa bzhin no snyam nas/'di ltar khyod kyis zhes bya ba la sogs pa smos so/ /de bas na gos dang zas la sogs pa'i yo byad byin te/ byang chub sems dpas rang gi bya ba sems can gyi don du gzhug par bya'o/ /de lta bu'i don med par zhes bya ba'i sgo nas sbyin par bya ba ma yin pas/'di la gla rngan zhes bya ba la sogs pa smos so/ /de bas na de ltar chu bo las rgal ba'i rten yin pas gru'i zag lhan la sogs pa bya dgos pa de bzhin du/ bdag nyid 'khor ba las rgal te sems can gyi don byed pa'i rten yin pa'i phyir lus 'di la rten yid bzhin gyi nor bur 'gyur ba'i de bzhin gshegs pa'i sku thob par bya ba'i don du bsrung bar bya dgos so zhes bstan pa'i phyir 'gro dang zhes bya ba la sogs pa smos so//da ni nyon mongs pa'i dbang du ma song bar lhan cig rjes su spyod pa'i shes bzhin gyis rang nyid la dbang yod par bya ste/ cho ga dang spyod yul phun sum tshogs pa la bslab pa'i dbang du byas nas/de ltar rang dbang zhes bya ba la sogs pa smos so/ /bdag dang gzhan gyi don gyi rten du 'gyur ba'i longs spyod bsrung ba'i dbang du byas nas/ khri la sogs pa zhes bya ba la sogs pa smos so/ /zhi ba dang dul ba la gnas pa'i dbang du byas nas sgo yang zhes bya ba la sogs pa smos so//de la phan yon ci zhig yod snyam pa la/ chu skyar zhes bya ba la sogs pa smos so/ /legs par bslabs pa'i gdams ngag la gus pa skyed par bslab pa'i dbang du byas nas/ gzhan la zhes bya ba la sogs pa smos so/ /gzhan gyi yang dag pa'i yon tan la dga' ba skyed pa'i dbang du byas nas/legs par smras pa zhes bya ba smos so/ /ci gzhan gyi ngo bo 'ba' zhig bstod par bya ba'am zhe na ma yin te/ lkog na zhes bya ba smos so/ /bdag 'ba' zhig gis bstod par bya ba'am zhe na/ gzhan gyi g.yam yang brjod par bya ba yin pas/ yon tan brjod na zhes bya ba la sogs pa smos so//gal te gzhan gyis bdag gi yon tan brjod na de'i tshe ji ltar bya zhe na/ rang gi yon tan zhes bya ba la smos te/ des nga rgyal bskyed par mi bya'o zhes bya ba'i don to/ /de ltar gzhan gyi yon tan la dga' ba bskyed pa de ci'i phyir zhe na/ rtsom pa thams cad ces bya ba la sogs pa smos so//de la phan yon ci yod ce na/ bdag la 'dir god ces bya ba la sogs pa smos so/ /smra ba dang blta ba'i tshul bstan pa'i dbang du byas nas smra na yid phebs zhes bya ba la sogs pa smos so/ /dge ba'i las sgrub pa'i tshul gyis dbang du byas nas mkhas shing zhes bya ba la sogs pa smos te/'phral du tshegs drag chung zhing dge ba'i 'ongs che bar shes na/ de'i tshe mkhas pa zhes bya ste/ tshegs chung bas ni snga ma la 'gyod pa med par 'gyur zhing / phyi ma sgyid lug par mi 'gyur la/ 'ongs che bas ni myur du tshogs bsags par 'gyur bas/ gang gi tshe ji ltar byas na de ltar 'gyur snyam pa la/dge ba'i rtsa ba ci byed kyang dam pa rnam pa drug gis zin pa'i tshul du byas na/ de ltar 'gyur te las su bya ba chung bas ni tshegs chung ba yin la/ dam pa drug gis zin pas ni 'ongs che bar 'gyur ro snyam du bsam pa'o/ /dga' dang ldan byas nas zhes bya bas ni sngar byas pa la rjes su yi rang ba bskyed cing da ltar byas pa la ni phan yon mthong ba'i sgo nas dga' ba skyed pa ma 'ongs pa la ni snga mas chog par mi 'dzin te/khyed 'dod pa'i tshul gyis dga' ba dang ldan par byas nas/ bdag nyid kyis rtag tu bya'i gzhan la ltos par mi bya ste/ gzhan gyis byas pa de bdag gi don du mi 'gyur ba'i phyir ro//'on te bdag nyid kyis ji ltar spyad ce na/ sbyin pa'i zhes bya ba la sogs pa smos te/ sbyin pa 'ba' zhig tsam gyis chog par mi gzung gi /de las gong mar gyur pa'i phyir tshul khrims la sogs pa yang spyad la/ de bzhin du sbyin pa nyid la yang gtong ba tsam gyis chog par mi gzung gi /de las khyad zhugs par gtong ba chen po dang / shin tu gtong ba la sogs pa la khyad zhugs par spyad par bya ste/ de bzhin du tshul khrims la sogs pa la yang gong nas gong du 'gro ba dang / tshul khrims lta bu nyid la yang dge bsnyen dang / dge bsnyen gyi sdom pa zhes bya ba la sogs pa khyad zhugs par byed pa ci rigs su sbyar ro//gal te de ltar pha rol tu phyin pa drug po gong nas gong du spyad par bya ba yin na/ de'i tshe ji ltar sbyin pa'i dus dag tu tshul khrims btang snyoms gzhag par gsungs zhes bshad pa dang 'gal lo zhe na/ chung ngu'i phyir ni zhes bya ba la sogs pa smos te/ gong 'og gi rim pa de ltar yin yang 'di ltar re zhig srog gi skyabs byed pa'i sbyin pa lta bu 'og ma yin yang che la/de'i tshe brdzun du smra ba spong ba'i tshul khrims de lta bu gong ma yin du zin kyang chung ba yin pa de'i tshe ni/ gong ma yin pa tsam gyis tshul khrims chung ngu dang du blang ba'i phyir mchog ma yin zhes te/sbyin pa las byung ba'i dge ba'i rtsa ba che ba yin na/ mi gtong zhes bya ba yal bar dor bar mi bya'o zhes bya ba'i tha tshig ste/ 'og ma yin yang sbyin pa las byung ba'i dge ba'i rtsa ba che bar gyur pa'i dus su gong ma yin yang tshul khrims chung ba de btang snyoms su gzhag go zhes bya ba'i don to//de ltar che chung du 'gyur ba med pa'i tshe ni 'og ma gtso cher dang du blang ba nyid du rig par bya'o/ /'o na che chung gnyis gang gi sgo nas gzhag ce na/ gtso cher zhes bya ba la sogs pa smos so/ /gzhan gyi don de ni che ba yin pas gtsor de nyid la 'bad par bstan par bya ba'i phyir/de ltar rig byas zhes bya ba la sogs pa smos so/ /de ltar gzhan don gtso cher bya ba yin pas/ thugs rje mnga' ba zhes bya ba la sogs pa smos te/ gang gi tshe sdom pa'i tshul khrims la 'bad pa'i kha na ma tho ba spong ba'i dbang du byas nas/ bcom ldan 'das kyis nyan thos kyi 'dul ba las don nye ba dang bya ba nyung ba dang /byed pa nyung ba la gzigs te/ chos gos lhag pa la sogs pa rnams kyang bcang bar mi bya'o zhes bkag pa rnams kyang / thugs rje mnga' ba'i de bzhin gshegs pa don ring po gzhan gyi don du 'gyur ba la gzigs nas/ gzhan gyi don byed pa'i byang chub sems dpa' de la gnang ste/ji skad du mdo las de ni nor gyi phung po ri rab tsam zhig thob na yang len to zhes gsungs pa lta bu'o/ /yang rang bzhin gyi kha na ma tho ba'i dbang du byas nas don nye ba tshe 'di'i don las dgongs te/ nyan thos kyi 'dul ba las bsgral ba'i zhing du gyur pa rnams kyi srog gcod pa bkag pa yang don ring ba tshe phyi ma la ngan song gsum gyi sdug bsngal bsal bas bskyab par gzigs nas gzhan gyi don gtso cher byed pa'i byang chub sems dpa' de la gnang ste/ji skad du 'phags pa dkon mchog sprin las/ mtshams med pa byed pa'i mi gsang bar gnang ba lta bu'o//da ni dge ba'i chos sdud pa dang sems can gyi don byed pa'i dbang du byas nas bstan pa'i phyir/ rtsa ba'i tshig 'di gnang ba rnams kyang de la bkag ste rim pa bzhin du sbyar te gang gi tshe don nye ba slong ba po re re'i don la gzigs nas/ gos 'dod pa la gos dang / bgo ba 'dod pa la bgo ba sbyin pa la sogs pa gnang ba rnams don ring ba gzhan mang po dag gi don du 'gyur ba la gzigs nas/gzhan mang po dag gi don gtso cher byed pa'i byang chub sems dpa' de la bkag ste ji skad du 'phags pa drag shul can gyis zhus pa las/ byang chub sems dpa' rab tu byung bas chos gos gsum rnam pa thams cad du sbyin par mi bya'o zhes gsungs pa lta bu'o//'o na de ltar slong ba po dag la lus la sogs pa gtong ba rgyu ci'i phyir bkag ce na/ de ni tshangs par spyod pa'i rten yin pa'i phyir te/ de btang na sems can thams cad kyi don nyams par 'gyur bas slong mo pa 'ga'i don du gtang bar bya ba ma yin pa'i phyir/dam pa'i chos ni zhes bya ba la sogs pa smos te/ lus zhes bya ba ni mtshon pa tsam du zad kyi/ chos byed pa'i rten du gyur pa'i longs spyod kyang de bzhin du blta bar bya ste/ de yang bslab pa kun las btus pa las/ tshe 'di la longs spyod bsrung ba'i phyir gtong ba dgag pa ji skad bshad pa bzhin no//gal te de la phan yon ci yod snyam pa la/ de ltar byas na zhes bya ba la sogs pa smos te/ de dag la brten nas tshogs yongs su rdzogs pa'i rim gyis sangs rgyas thob par 'gyur bas snyam du bsams pa'o/ /'o na thams cad mi gtong ngam zhe na/snying rje'i bsam pa zhes bya ba la sogs pa smos te/ ji srid du lhag pa'i bsam pa dag pa'i sar ma chud kyi bar du zhes bya ba'i tha tshig ste/ gtong ba la ma goms pas gtong mi nus pa'i phyir ram/ nus su zin kyang tshe snga ma'i sdig pa'i las kyi stobs kyis nad la sogs pa'i sdug bsngal 'byung ba'i phyir 'gyod pa skye zhing sgyid lug par 'gyur ba'i phyir ram/chos thams cad la bde bar 'gro ba'i ting nge 'dzin ma thob pas dus de'i tshe bde ba'i tshor ba mi 'byung ba'i phyir/ phyi ma la byed 'dod pa'i bsam pa mi 'byung ba'i phyir ram/ bden pa'i stobs ma grub pas srog dang tshangs par spyod pa'i bar chad du 'gyur ba'i phyir ro snyam du bsam pa ste/lhag pa'i bsam pa dag pa'i sar chud pa la ni/ nyes pa gong ma rnams las bzlog pa'i phyir dngos su gtong bar byed pa kho na'o zhes bya ba'i don to/ /'on te de lta yin na rnam pa thams cad du mi gtong ngam/ de lta yin na ni dam bcas pa dang 'gal bar 'gyur ro zhe na/ ci nas 'di dag ces bya ba la sogs pa smos te/ tshe 'dir don chen po sems can gyi don 'grub pa'i rgyur lus 'di nyid sems can rnams la bran gyi tshul du btang ste/ sems can gyi don byed pa'i tshul khrims rnam pa bcu gcig ji skad du bshad pa lta bu'o//de bzhin du gzhan du ste/ tshe phyi mar yang bdag dang gzhan gyi rgyud la dge ba'i rtsa ba ci rtsom pa thams cad sems can thams cad kyi don du rtsom pa'i phyir/ bdag nyid sems can thams cad kyi bran gyi tshul du gtong ba yin la/ de bzhin du bdag nyid byang chub chen po thob par bya ba'i phyir yang bdag nyid sems can thams cad kyi thams cad du yid dang ngag gtong ste/le'u gnyis par ji skad bshad pa bzhin no/ /da ni gang la bslab par bya ba'i yul bsdus te bstan par bya ba'i phyir rang ngam gzhan gyi zhes bya ba la sogs pa smos te/ rang gi dbang du byas pa ste/sdom dang dge ba'i chos sdud kyis bsdus pa dang / gzhan gyi dbang du byas pa ste/ sems can gyi don byed pa'i bsdus pa'am/ gzhan yang spyod lam gyi gnas skabs gang du lus ngag yid gsum gyis ci spyod kyang / gang la bslab pa dang / ji ltar bslab par gsungs pa ste ji skad du mdo dag las/byang chub sems dpas chos rab tu mang po la bslab par mi bgyi ste/ snying rje chen po la bslab par bgyi'o zhes gsungs pa dang / yang byang chub sems dpas ni ji nas kyang mthong ma thag tu sems can rnams dga' bar 'gyur ba de ltar bsgrub par bgyi'o zhes gsungs pa dang / yang byang chub sems dpas ni rang gi sems kho na shin tu bsrung bar bgyi'o zhes gsungs pa dang / spyod lam thams cad du ji ltar bslab pa ste spyod yul yongs su dag pa las ji skad gsungs pa bzhin du bslab par bya'o/ /'o na de'i tshe rig pa'i gnas rnam pa lnga las gang dang gang la ji ltar bslab ce na/rig pa'i gnas rnam pa lnga po mtha' dag la dam pa drug gis zin pa'i tshul gyis bslab par bya ba yin pas/ rgyal sras rnams kyis zhes bya ba la sogs pa smos te/ 'di skad du mdo sde rgyan las/ rig pa'i gnas lnga dag las byang bar ma byas na/ /'phags mchog gis kyang thams cad mkhyen nyid thob mi 'gyur//de bas gzhan dag tshar gcad rjes su gzung phyir dang / /bdag nyid dul bar bya phyir de la de brtson byed/ /ces gsungs pa lta bu'o/ /'on te de la phan yon ci yod ce na/ de ltar gnas pa'i zhes bya ba la sogs pa smos te/ de ltar gnas pa'i zhes bya ba ni dam pa drug gis zin pa'i phyir de ji lta zhe na/sems can thams cad kyi don du byang chub chen po thob par bya ba'i bsam pas rig pa'i gnas lnga po de dag la 'khor gsum yongs su dag pa'i tshul gyis so so'i mi mthun pa'i phyogs kyi dri mas ma gos par slob cing dge ba'i rtsa ba de yang byang chub chen por yongs su bsngo ba'i phyir te/de ltar go rims bzhin du ched du bya ba dang / rten dang dngos po dang / thabs la mkhas pa dang / rnam par dag pa dang / yongs su bsngo ba dam pas yongs su rig par bya'o/ /de lta bas na byang chub sems dpa'i bya ba ni mdor na sems can gyi don yin pas dngos sam zhes bya ba la sogs pa smos te/de la dngos su don du 'gyur ba ni sems can gyi don byed pa'i tshul khrims rnam pa bcu gcig ji skad bshad pa lta bu'o/ /brgyud nas don du 'gyur ba'i bsam gtan dang shes rab kha cig lta bu'o/ /dngos dang brgyud pa gnyi gas don du 'gyur ba ni sbyin pa byin te/dge ba'i rtsa ba ci byas pa thams cad yongs su bsngo ba dam pas zin par bya ba'i phyir sems can kho na'i zhes bya ba la sogs pa smos so/ /de ltar shes bzhin gyis brtags te bslab pa bsrung ba nyid bdag cag gis rgyu gang las shes par bya snyam na rgyu gnyis las shes par bya ste/rgyu dang po ni rtag par zhes bya ba la sogs pa bstan te/ mkhas pa dang btsun pa'i yon tan gnyis dang ldan pa las shes par bya'o/ /dge ba'i bshes gnyen ji ltar mi gtong zhe na/ dpal 'byung zhes bya ba la sogs pa smos so/ /rgyu gnyis pa'i dbang du byas nas bstan bcos 'dis mdo sde las zhes bya bar bstan pa'i phyir 'di dang zhes bya ba la sogs pa smos so//yang na 'di dang zhes bya ba ni 'dir bslab pa ji ltar bstan pa rnams so/ /gzhan zhes bya ba 'dir ma bshad pa de bzhin gshegs pas gsungs pa rnams so/ / de dag thams cad ni mdo sde las shes par bya ste ci'i phyir zhe na/ mdo sde zhes bya ba la sogs pa smos so/ /'on te mdo sde rnams la bklag pa'i go rims yod dam zhe na/ thog mar rtsa ba'i ltung ba rnams shes par bya ba'i phyir/ nam mkha'i snying po zhes bya ba la sogs pa smos so/ /de'i rjes la bslab pa phra ba gzhan dag kyang shes par bya ba'i phyir 'phags pa zhes bya ba la sogs pa smos so//'on te de'i rjes la ji ltar gsungs she na gang las zhes bya ba la sogs pa smos te/ mdo sde gang las 'di ni lus ngag gis spyad par mi bya'o/ /'di ni sems kyis bsgom par mi bya'o zhes ma bkag pa de nyid spyad kyi/bkag pa rnams ni spyad par mi bya'o/ /'on te bkag pa thams cad mi spyad dam zhe na/ 'jig rten zhes bya ba la sogs pa smos te/ 'dir ni 'di ltar sbyar te/ 'jig rten sems ni bsrung ba'i phyir/ /bslab pa mthong nas yang mi spyad/ /ces bya ba ste mdo sde las gang dang gang la ci dang ci dgos pa de sbyin par bya'o zhes gnang du zin kyang /de byin pas gzhan mang po dag gi mi mos par 'gyur ba la sogs pa gtsor bya ba'i bslab pa'i gzhi mthong nas longs spyad par mi bya'o zhes bya ba'i don to/ /da ni lhan cig rjes su spyad pa'i shes bzhin bsrung ba'i mtshan nyid mjug bsdu ba'i phyir/lus dang zhes bya ba la sogs pa smos so/ /da ni nyams su blang ba'i gdams ngag bstan pa'i phyir/ lus kyi zhes bya ba la sogs pa smos so/ /bstan bcos kyi ming gi don ni snga ma bzhin no/ /le'u'i ming gi don ni phyogs gcig las bstan to//le'u bzhi pa'i bshad pa rdzogs so// //de ltar sems bskyed cing sdom pas bsdams pa la bzod pa 'byung bas/ bsags pa'i dge ba chud mi za bar bya ba dang / dge ba'i chos la brtson 'grus brtsam par bya ba'i le'u lnga pa gsungs te/ de la bskal pa stong zhes bya ba la sogs pa tshigs su bcad pa gnyis kyis zhe sdang gi nyes dmigs dang /bzod pa'i phan yon bstan pa'i sgo nas zhe sdang spangs te bzod pa bsgom pa mdor bstan to/ /da ni rgyas par bshad pa'i dbang du byas nas zhe sdang gi tshe 'di'i nyes dmigs bstan pa'i phyir/ zhe sdang zug rngu la sogs pa smos te zhi ba ni btang snyoms kyi tshor ba'o//dga' ba ni lus kyi'o/ /brten med 'gyur zhes bya ba ni lus kyi spyod pa'i thang thub med pa'o/ /nyes dmigs gzhan yang gang dag ces bya ba ni bran la sogs pa'o/ /drin sbyin zhes pa ni rje bos so/ /de la zhes bya ba ni rje bo la'o/ /de dag ces pa ni bran la sogs pa'o//sdang ldan pa zhes bya ba ni zhe sdang dang ldan pa'i dbang gis so/ /de yis zhes bya ba ni shin tu drin che ba'i rje bo la yang rgol bar byed pa'i rgyus so/ /sbyin pas sdud dang rten mi byed/ /ces bya ba ni/ bran gtong phod che yang zhe sdang ldan pa'i dbang gis su yang de dang 'grogs par mi byed ces bya ba'i don to//bde gnas pa zhes bya ba ni tshe 'di la'o/ /de la sogs pa zhes bya ba ni/ tshe 'di la gnod par ma zad kyi 'di dang phyi ma gnyi ga dang bdag la gnod pa byed par ma zad kyi/ gzhan dang bdag dang gzhan gnyi ga dang / dngos su gnod pa byed par ma zad kyi brgyud pa dang dngos dang brgyud pa gnyi ga'i sgo nas gnod par byed pas so//'on te zhe sdang spangs pa'i phan yon gang zhe na/ gang zhig ces bya ba la sogs pa smos so/ /de ni 'di dang gzhan du bde/ /zhes bya ba ni tshe 'di dang / phyi ma dang / gnyi ga dang bdag dang gzhan dang gnyi ga dang dngos dang brgyud pa dang gnyi gar bde bas so//'on te zhe sdang de ji ltar spang zhe na/ zas spangs pa'i sgo nas zhe sdang spang bar bstan pa'i phyir mi 'dod ces bya ba la sogs pa smos te/ de la rtsa ba dang po de gnyis kyis zas de'i rgyu bstan to/ /gsum pas ni ngo bo nyid bstan to/ /bzhi pas ni byed pa bstan to//tshigs su bcad pa gnyis pas ni zas spang ba'i sgo nas spang ba'i 'thad pa bstan pa'o/ /tshigs su bcad pa gsum pa dang bzhi pas ni zas de nyid spang bar bya ba'i rigs pa bstan to/ /'on te zhe sdang gi zas de ji ltar spang zhe na/ bzod pa rnam pa gsum gyi sgo nas spang bar bya ba yin pas dang po gnod par byed pa la ji mi snyam pa'i sgo nas yid mi bde ba spang bar bstan pa'i phyir/bdag gam zhes bya ba la sogs pa smos te/ de la tshigs su bcad pa dang pos ni sems can rnams kyi 'dod pa'i bye brag bstan to/ /tshigs su bcad pa gnyis pa'i phyed gong mas ni 'dod pa dang mi mthun par 'byung ba bstan to//phyed gong ma'i rtsa ba dang pos ni de'i gnyen po bsgom pa bstan to/ /rtsa ba gnyis pas ni yid mi bde ba spongs shig ces gdams par bstan to/ /de la sems can rnams kyi 'dod pa'i bye brag ni bzhi ste bdag dang bdag gi gnyen bshes la sogs pa la/sdug bsngal ba la sogs pa mi 'dod cing bde ba la sogs pa 'dod pa yin la/ dgra la ni bde ba 'byung bar mi 'dod cing sdug bsngal 'byung bar 'dod pa'i bsam pa skye bas de'i tshe bde ba'i rgyu ni dkon zhing sdug bsngal gyi rgyu ni shin tu mang ba'i phyir bde bas ni phongs la/sdug bsngal mang po dang ldan pa'i dus su sdug bsngal med na khams gsum la skyo ba mi skye zhing nges par 'byung ba mi tshol bas de'i phyir sdug bsngal ni yon tan can nyid du shes par byas pa'i sgo nas yid mi bde ba spangs te/ tha mal pa'i ngang la brtan par gnos shig ces bya ba'i don to//'on te gnod pa dang sdug bsngal bzod pa de dag gis mi phod do zhe na/ dka' bzlog ces bya ba ni ma ha de ba dang lha mo uM ma de ba ste/ lha'i dka' thub las log pa yin pa'i phyir te/ de ni 'jig rten pa'i lo rgyus las shes par bya'o/ /de bas na de la dad pa'i mi mu stegs can dag gis kyang /me lnga bsten pa la sogs pa sdug bsngal bzod na/ bdag gis ji ste mi bzod ces bya ba'i don to/ /'on te de ni shin tu dka'o zhe na/ goms nas zhes bya ba la sogs pa smos te/ da ni sdug bsngal dang du len pa la bzod pa'i dbang du byas nas/ sbrul dang zhes bya ba la sogs pa smos te/'jig rten na don med par yang sbrul la sogs pa'i gnod pa bzod na/ don chen po dang bcas pa'i dam pa'i chos bsgrub pa'i gnas skabs kyi tsha ba la sogs pa'i sdug bsngal 'byung ba'i tshe yid mi bde ba'i bze re mi bya ste/ zhe sdang skye ba'i skyon yod pa'i phyir ro/ /'o na ji ltar bya snyam pa la/la la bdag gi zhes bya ba la sogs pa smos te/ sdug bsngal bzod pa'i phan yon shes par byas la/ de la dga' ba bskyed par bya ba'i mi snga ma rnams bzhin du yid mi bde ba bskyed par mi bya'o zhes pa'i don to/ /de bas zhes bya ba la sogs pas ni mjug sdud do/ /de bas na tha mal pa'i dgra dag kho nyid rang 'chi bar 'gyur ba yin pas de gsod pa ni dpa' bo ma yin te/nyon mongs pa rnams ni gnyen po ma bskyed kyi bar du 'bral bar mi 'gyur ba'i phyir/ de spong bar byed pa ni dpa' bo chen po nyid yin pas/ de bas na 'thab mo dang ni zhes bya ba la sogs pa smos so/ / gzhan yang sdug bsngal gyi yon tan shes par bya ba'i sgo nas yid mi bde ba spang ba'i phyir/ gzhan yang zhes bya ba la sogs pa smos te/ skyo bas zhes bya ba'i tshig gsum ni bdag dang gzhan dang gnyi ga'i rgyud la sdug bsngal yod pa'i yon tan de go rims bzhin du sbyar ro/ /da ni bdag nyid la gnod pa byed pa rnams la don dam pa'i bden pa'i dbang du byas pa'i chos kyi mtshan nyid la nges par sems pa'i bzod pa bsgom pa'i dbang du byas nas/mkhris pa la sogs pa zhes bya ba la sogs pa smos te/ bdag la yod pa'i mkhris pa la sogs pa nyid sdug bsngal gyi rgyu yin pa'i phyir/de la khro bar rigs kyi gnod pa byed pa rnams la ni khro bar mi rigs te de dag gnod pa byed pa ni rang bzhin gyis gnod pa byed pa ni ma yin gyi/ glo bur gyi rkyen las byung bas don dam par rang bzhin med snyam du bsams pa'o/ /ji ltar na glor bur gyi rkyen las byung ba yin zhe na/ rkyen las byung ba'i mtshan nyid ni mdor bsdus na rnam pa gsum ste/dang po nus pa'i rkyen las byung ba bstan pa'i phyir/ dper na zhes bya ba la sogs pa smos te/ dper na bdag la nad la sogs pa 'byung bar mi 'dod bzhin du yang de skyed par nus pa'i rkyen tshogs pa'i dbang gis 'byung bar 'gyur ba bzhin du dgra bo de dag gis gnod par bya bar bdag nyid kyang mi 'dod de/de bskyed par nus pa'i rkyen tshogs pa'i dbang gis 'byung bar 'gyur ro zhes bya ba'i don to/ /da ni gnyis pa g.yo ba med pa'i rkyen las 'byung ba bstan pa'i phyir/ khro bar bya zhes bya ba la sogs pa smos te/ rkyen de dag la yang 'bras bu khro bar bya zhing / gnod pa'i mtshan nyid skye bar bya'o zhes bya ba'i blo sngon du gtong ba'i g.yo ba med la/ 'bras bu de dag la yang bdag ni rgyu rkyen 'di dag gis bskyed par bya ba yin no zhes blo sngon du ma btang yang nus pa'i rkyen de dag yod pa tsam gyis 'byung bar 'gyur ro zhes bya ba'i don to//ci de 'ba' zhig tu zad dam zhe na/ ma yin te las dang nyon mongs pa mtha' dag kyang nus pa'i rkyen dang g.yo ba med pa'i rkyen las 'byung ba bstan pa'i phyir/ nyes pa zhes bya ba la sogs pa smos te/ de la tshigs su bcad pa dang pos ni nus pa'i rkyen las byung ba bstan te/ji skad du bcom ldan 'das kyis kyang / ma rig pa'i rkyen gyis 'du byed rnams zhes bya ba la sogs pa gsungs so/ /nyes pa ni nyes par byed pa'i rgyu yin pas nyes pa ste 'dod chags la sogs pa rnams so/ /sdig pa ni des kun nas bslang ba'i srog gcod pa la sogs pa mi dge ba'i las rnams so//rkyen rnams tshogs zhes bya ba la sogs pas ni g.yo ba med pa'i rkyen las byung ba bstan te/ bcom ldan 'das kyis kyang 'di yod pas 'di 'byung zhes bya ba'i dka' rgyu de dag yod pa tsam gyis 'byung gi blo sngon du gtong ba'i g.yo ba yod pa ma yin no zhes gsungs so//da ni mi rtag pa'i rkyen las byung ba bstan pa'i phyir/ gtso bor bya ba zhes bya ba la sogs pa smos te/ gal te 'di snyam du dgra bo la sogs pa de dag bdag la gnod par byed pa ni bdag la sogs pa'i rtag pa'i dngos po 'ga' zhig gi stobs kyis yin no zhe na ma yin te/khyod kyis ni dngos po thams cad kyi gtso bo ste byed pa po nyid du gnas pa de la bdag ces bya bar khas blangs mod kyi/ de ni ma skyes pas med pa'i phyir ram/ yod du zin kyang rtag pa nyid kyi dngos po thams cad kyis stong pa'i phyir rang gis kyang mi skye la lhan cig byed pa'i rkyen la ltos te 'bras bu bskyed pa yang mi 'thad pa'i phyir/bdag la sogs pa ni mi bskyed kyi gzhan mi rtag pa 'ga' zhig gi stobs 'byung ba yin no zhes te bsdus pa'i don to/ /ji ltar bdag ces bya ba ma skyes pas med ce na/ re zhig skye gnas bdag nyid 'di lta bu zhig tu 'byung bar mi bya'o zhes blo sngon du btang nas skye ba'am/yang na yul la sogs pa yod pa tsam gyis skye zhes bya ba gnyis su brtag grang ste/ de la phyogs dang po ni khyed nyid khas mi len pa'i phyir/ de nyid bdag ni zhes bya ba la sogs pa smos so/ /de lta yin na yang smos pa ci yod snyam pa la/ ma skyes par de med na ni//zhes bya ba smos te/ de ltar ma skyes na med pa'i phyir de 'bras bu bskyed pa lta ga la nus snyam du bsams pa'o/ /da ni phyogs gnyis pa'i dbang du byas nas de'i tshe skye bar 'dod pa zhes smos te/ gzhan gyis bsams pa'i blo sngon du btang nas ma skyes kyang / yul la sogs pa'i rkyen tshogs pa'i tshe skye bar 'dod dam snyam na/de lta yin na yul ni dus gsum char du yod pa de la dmigs te 'byung ba'i bdag kyang rtag tu gnas pa'i phyir dus thams cad du mi 'gal bas yul la rtag tu zhes pa la sogs pa ste/ 'on te de ni rtag pa yin pa'i phyir 'dod pa kho na'o zhe na ji ste zhes bya ba la sogs pa smos te/de ltar rtag pa nyid kyis nus pa thams cad kyis stong pa'i phyir/ nam mkha' bzhin du 'bras bu mi skyed par shin tu yang gsal zhes bya ba'i don to/ /de lta yin du zin kyang lhan cig byed pa'i rkyen gzhan la ltos te/ 'bras bu bskyed do zhe na/ rkyen rnams zhes bya ba la sogs pa smos te/de ni rtag par 'gyur ba med pa'i phyir grogs ci zhig byar yod/ de bas na lhan cig byed pa'i rkyen la ltos te 'bras bu skye bar yang mi 'thad do/ /ji ltar na bdag de la 'gyur ba med ce na/ byed pa'i tshe yang zhes bya ba la sogs pa smos te/ lhan cig byed pa'i rkyen dang phrad pa'i tshe yang rtag pa yin pa'i phyir/sngon gyi ma phrad pa'i tshe yang gnas skabs kho na bzhin yin na/ byed pas bya ba lhan cig byed pa'i rkyen gyis bdag de la sngar mi nus pa las nus pa'i mtshan nyid kyi grogs ci zhig bya ste/ cung zad kyang ma byas so zhes bya ba'i tha tshig go//des ni lhan cig byed pa'i rkyen yod par grub na yang zhes khas blangs nas bcad do/ /de ni lhan cig byed pa'i rkyen nyid kyang ma grub par bstan pa'i phyir/ de'i byed par zhes bya ba la sogs pa smos te/ bdag de'i lhan cig byed pa'i rkyen ni 'di yin no zhes gzhag pa'i rgyu mtshan bdag dang lhan cig byed pa'i rkyen du 'dod pa'i dngos po de gnyis la 'bras bu skyed mi nus pa las phyis nges pa'i mtshan nyid du phan 'dogs par 'gyur ba'i 'brel pa ci zhig yod de bdag ni rtag pa yin pa'i phyir phan gdags par bya ba ma yin la rtag pa nyid kyis 'gyur ba med pa'i phyir/lhan cig byed pa'i rkyen yang phan 'dogs par byed pa ma yin pas de ltar na 'bras bu thams cad ni rgyu rkyen gzhan mi rtag pa'i dbang gis 'bras bu de rang la dbang med par skye'o zhes bya ba'i don to/ /de ltar na dgra la sogs pa de dag gnod pa de dag ni rkyen las byung ba ste/ rten 'brel yin pa'i phyir don dam par rang bzhin med do zhes bya ba'i tha tshig go//da ni de ltar shes pa'i phan yon bstan pa'i phyir/ de ltar shes na zhes bya ba la sogs pa gnyis gsungs so/ /gal te de ltar chos thams cad rang bzhin med pa yin te/ bzod pa bsgom pa nyid mi rigs so snyam pa 'di sems can la bsdogs nas/gang gis zhes bya ba la sogs pa smos so/ /slob dpon gyis de la brten nas zhes bya ba la sogs pa smos te/ kun rdzob tu bzod pa bsgom pa la brten nas/ sdug bsngal spong ba'i dgos pa yod pa'i phyir/ bzod pa bsgom par mi 'gal lo snyam du bsams pa'o/ / de bas zhes bya ba la sogs pas ni gong du bstan pa'i don mjug bsdu ba'o/ /gal te rang dgas zhes bya ba la sogs pas ni gal te gzhan dag gnod par byed pa de rkyen la mi ltos par khas len pa'i nges pa bstan to/ /da ni lus kyis brdeg pa la sogs pa'i tshul gyis gnod pa byed pa de dag kun rdzob kyi bden pa'i dbang du byas pa'i chos kyi mtshan nyid la nges par sems pa'i bzod pa bsgom par bstan par bya ba'i phyir bag med pas ni bdag ces bya ba'i tshigs su bcad pa bzhi gsungs te/bsdus pa'i don ni kun rdzob tu yang nyon mongs pa'i dbang gis shin tu gces pa'i bdag nyid la yang gnod pa byed pa de dag nyon mongs pa'i dbang gis gzhan la gnod pa byed pa mi rigs pa med pa las/de dag snying rje bar rigs kyi khro bar bya bar mi rigs so zhes bya ba yin no/ /da ni gzhan la gnod pa byed pa sems can rnams kyi rang bzhin ni rang bzhin pa nyid kyi phyir khro bar bya bar mi rigs la/'on te rang bzhin ma yin na yang de'i rang bzhin ma yin pa nyid kyi phyir khro bar bya bar mi rigs so zhes dpe'i sgo nas bstan pa'i phyir/ gal te gzhan la zhes bya ba la sogs pa tshigs su bcad pa gnyis smos so/ /yang gcig tu na gzhan gyi mtshon la sogs pas nyes kyi sems can gyis ma nyes pa'i phyir dang /gnyis su na sems can gyis kyang ma nyes kyi de'i rgyud la yod pa'i zhe sdang gis nyes pa'i phyir dang / gsum du na zhe sdang gis kyang ma nyes kyi bdag nyid kyi las kyis nyes pa'i phyir sems can la khro bar byar med do zhes bstan pa'i phyir/ dbyug pa la sogs pa zhes bya ba la sogs pa gnyis smos so//rnam pa gcig tu na bdag gis ni sdug bsngal 'byung ba'i gzhi'i lus bzung la gzhan gyis ni sdug bsngal 'byung ba'i rkyen mtshon phyung ba'i phyir/ bdag la nad la sogs pa'i sdug bsngal 'byung ba ni bdag cag gnyi gas nyes pas gzhan 'ba' zhig la khro bar byar med do zhes bstan pa'i phyir/de'i mtshon dang zhes bya ba la sogs pa'i tshigs su bcad pa bzhi smos so/ /yang rnam pa gcig tu na bdag gis tshe snga ma'i dus su gzhan la gnod pa byas pa'i las kyi dbang gis bskul nas tshe 'dir bdag la gnod pa byas pa'i dbang gis de dag skye ba phyi mar ngan song du ltung bar 'gyur ba'i phyir bdag ni de dag la shin tu gnod pa byed pa yin la bdag ni de dag la brten te bzod pa bsgom pa/zla ba sgron ma'i mdo las/ byis pas yang dag ma lags pas/ /spyos shing brgyab pa bzod par bgyi/ /smod dang 'dren pa dang du blang //byang chub sems dpa' gzhan dag la/ /bdag gis gnod sems bskyed pa dang / /sngon chad bdag gis sdig pa'i las/ /bgyis pa rnams ni byang bar 'gyur/ /zhes ji skad gsungs pa'i tshul gyis sngon nas bsags pa'i sdig pa byang bar byed pa bzod pa las byung ba'i bsod nams dpag tu med pa sdud par byed pa'i phyir de dag ni bdag la phan 'dogs pa yin pas de dag la shin tu yang khro bar bya bar mi rigs so zhes bstan pa'i phyir/bdag gi las kyis zhes bya ba la sogs pa tshigs su bcad pa gsum gsungs so/ /'on te gnod pa byed pa de dag la bdag gis bzod pa bsgom pa'i bsam pa'i yon tan gyis dgra bo de dag kyang 'gyod pa skyes pa'i dbang gis shad kyis sbyangs pa la sogs pa byas nas ngan song du ltung bar ma gyur na de'i tshe dgra bo de la bdag shin tu drin che ba yin no zhe na/de'i tshe bdag nyid ngan song du skye ba'i rgyu ma lags pas bdag nyid kyis don byas par zad kyi/de'i tshe yang gzhan la lhag par drin che rgyu med do zhes bstan pa'i phyir/ bdag gi bsam pa'i zhes bya ba la sogs pa smos pa'o/ /ci'i phyir zhe na/ bdag gis bzod pa ma bsgoms na dgra bo de dag kyang shas cher nyon mongs pa skye ba'i phyir de dag kyang ngan song du ltung bar 'gyur zhing des na gzhan gyi lus bsrung ba'i spyod pa yang nyams par 'gyur ro zhes bstan pa'i phyir/'on te len du zhes bya ba la sogs pa smos so/ /da ni ngag gi mi snyan pa smra ba la sogs pa la chos kyi mtshan nyid la nges par sems pa'i bzod pa bsgom pa'i dbang du byas nas yang yid ni gzugs can ma yin pa'i phyir thams cad du gang gis kyang gnod pa bya bar mi nus la/lus ni gzugs can ma yin pa'i phyir dang zhen pas bdag tu gzung ba'i phyir de la brdeg pa la sogs pas gnod pa bya bar nus kyi mi snyan par smra ba la sogs pa rnams kyi ni lus la yang gnod pa bya bar mi nus na gzugs can ma yin pa la lta smos kyang ci dgos te/de bas na gang la yang mi gnod pas shin tu yang khro bar mi rigs so zhes bya ba bstan pa'i phyir/ yid ni zhes bya ba la sogs pa'i tshigs su bcad pa gnyis gsungs so/ /'on te mi snyan par smra ba de ni bdag la mi dga' ba la ma yin pa'i phyir de bdag mi 'dod de khro'o zhe na/gzhan dag ces bya ba la sogs pa smos so/ /'on te gzhan dag bdag la mi dga' ba des ni bdag gi grags pa ma yin pa bsgrags pas bdag gi rnyed pa la sogs pa'i bar chad byed pa'i phyir gzhan dag mi dga' bar 'di bdag mi 'dod do snyam du bsams nas rnyed pa'i bar chad ces pa la sogs pa smos so//slob dpon gyis bdag gi rnyed pa zhes bya ba la sogs pa smos te/ 'di skad bstan te/ sdig pa dang bsngos pa'i nad pa 'di 'dor la/ rnyed pa bsgrub pa'i don du gzhan la khros pa ni rtag pa ni 'bral ba'i phyir/gal te sdig pa mi sogs su rung ba de rnyed pa med pa'i phyir/ bdag nyid shi ba ni bla'i sdig pa bsdus pa'i rnyed pa log pas 'tsho ba'i sgo nas yun ring du gnas pa las ni med de/ ci'i phyir zhe na/ de ltar gnas kyang mthar 'chi bar 'gyur la/ de'i rjes la ngan song du ltung bar 'gyur ro zhes bya ba yin no//gal te rnyed pa 'di 'dor ba ma yin te/ shi 'phos kyang mi 'bral bar gnas so zhe na/ rmi lam zhes bya ba la sogs pa smos so/ /ci'i phyir zhe na/ rnyed pa mang po zhes bya ba la sogs pa smos so/ /gzhan gyi gal te rnyed pas zhes bya ba la sogs pa smos te/gal te sdig pas bsgrubs pa'i rnyed pas gson par 'gyur zhing rjes la sdig pa zad par bya zhing bsod nams bsags par bya ba yin pas/ des na rnyed pa'i don du khros pa la 'gal ba med do zhe na/ len du rnyed pa'i don du zhes bya ba la sogs pa smos so/ /de bas na sdig pas bsgrubs pa'i rnyed pa'i sgo nas gson par bya ba'i don nyid mi 'grub ste/slar zhing sdig pa ni 'phel zhing bsod nams ni nyams par 'gyur te/ ji skad du/ bskal pa stong du bsags pa yi/ /sbyin dang bde gshegs mchod la sogs/ /legs spyad gang yin de kun yang / /khong khro gcig gis 'joms par byed//ces gong du bshad pa lta bu'o/ /gal te tha mal pa'i ngang la gnas pa'i sems bstan pa nyams par byed pas/ rgyu de'i phyir mi snyan par smra ba la khro'o zhe na/ 'o na ni sngon chad snyan par smra ba la/ yid khyod ci phyir mi khro skye ste brtan pa nyams par byed par mtshungs so snyam du bsams pa'o//da ni snyan par smra ba de ji ltar dad pa med pa'i gang zag dge ba'i las la mi 'jug cing mi dge ba'i las la 'jug par byed pas snying rje'i gnas yin pa de bzhin du/ 'di yang snying rje'i gnas nyid du bstan pa'i phyir/ dad pa zhes bya ba la sogs pa smos so//da ni dkon mchog la gnod pa byed pa'i dbang du byas nas/ chos kyi mtshan nyid la nges par sems pa'i bzod pa bstan pa'i phyir/ sku gzugs zhes bya ba la sogs pa smos te/ de la zhe sdang bskyed par bya ba ni ma yin te/ bdag ni ngan song du ltung bar 'gyur ba'i phyir dang /des sangs rgyas la gnang bar mi 'gyur ba'i phyir/ 'on kyang bdag nyid la yang nus pa dang ldan zhing sbyor ba dang / gzhi'i gnas skabs su snying rje la sogs pa'i bsam pa'i thabs la mkhas pa dang ldan pa la sbyor ba'i thabs la mkhas pas zin pa'i bsgrub par bya ba de nyid kyi yang don du 'gyur zhing gzhan mang po dag gi mi mos pa skye bar 'gyur la thabs gzhan gyis mi bzlogs par las de byed pa'i phyir tshar gcad pa'i zhing du 'gyur ba yang yin na ni/de'i tshe gdon mi za bar bya dgos te/ 'dir sdug bsngal yang phyi ma la phan par 'gyur bar bya ba'i phyir dang /gal te ma byas na de'i tshe ltung bar 'gyur te/ sdom pa nyi shu pa las ji skad du/ gzhan gyi yid mi bde ba srung ba'i phyir/ /ma byas na ni nyon mongs bcas kyang chos mi byed/ /ces bya ba'i ltung bar 'gyur la de lta ma yin te/ da ni bla ma dang bshes gnyen la sogs la gnod pa byed pa rnams la don dam pa'i bden pa'i dbang du byas pa'i chos kyi mtshan nyid la nges par sems pa'i bzod pa bsgom par bstan pa/bla ma zhes bya ba la sogs pa smos te snga ma bzhin no/ /da ni kun rdzob kyi bden pa'i dbang du byas nas bzod pa bsgom pa bstan pa'i phyir/ lus can rnams la zhes bya ba la sogs pa smos te/de yang gong du dbyug pa la sogs pa dngos bkol te zhes bya ba la sogs pa sngar bshad pa bzhin no/ /da ni gnyi gas nyes pa'i phyir gzhan 'ba' zhig la khror med do bar bstan pa'i phyir/ la la rmongs pas zhes bya ba la sogs pa smos te/ de yang de'i mtshon dang bdag gi lus zhes sngar bshad pa dang mtshungs so//bdag gi gnyen la sogs pa nyid kyi las kyis nges par gzhan la khro ba byar med par bstan pa'i phyir/ gang gis gzhan dag ces bya ba la sogs pa smos te/ de yang gong du/ byis pa sdug bsngal med 'dod cing / /zhes bya ba la sogs pa ji skad bstan pa dang mtshungs so//da ni 'jug pa'i tshul gyis thams cad kyang las la rag las pa'i phyir ma 'ongs pa'i dus su phan tshun dge ba'i sems su 'gyur gyi/ de las gzhan pa'i sems su mi 'gyur bar bya ba'i phyir/ da ltar gyi dus su bsod nams la 'bad par bya'o zhes bstan par bya ba'i phyir/de ltar mthong nas zhes bya ba la sogs pa gsungs te/ ji ltar 'phags pa brgyad stong pa las gang gA'i lha mo'i le'u'i nang nas ji skad gsungs pa de bzhin du bsgrub par bya'o zhes bya ba'i don to/ /da ni zhe sdang gi rgyu spangs pa'i sgo nas zhe sdang spang bar bya bar bstan pa'i phyir/ dper na khyim tshig ces bya ba la sogs pa smos te/ gang la lhag par chags pa de la bdag gis gnod par byas pas zhe sdang 'byung ba'i phyir/ chags pa ni zhe sdang gi rgyu yin la/ bskal pa stong du bsags pa'i zhe sdang bya ba la sogs pa gong du bstan pa bzhin du zhe sdang skyes pa'i dbang gis bsod nams tshig par dogs pa'i phyir/zhe sdang spong ba'i don du de'i rgyu lhag par chags pa spang bar bya'o zhes bya ba'i don to/ /'on te de spong ba'i gnas skabs kyi sdug bsngal bzod par mi nus so zhe na/ sdug bsngal chen po spang ba'i phyir/ de spong ba'i thabs su gyur pa'i sdug bsngal bzod par bya ba yin pas/ngan song gsum gyi sdug bsngal gyi rgyu zhe sdang spang ba'i phyir/ zhe sdang gi rgyu 'dod chags spong ba'i gnas skabs kyi sdug bsngal la bzod par bya ba'i sgo nas/ zhe sdang bzlog par bya dgos so zhes bya ba'i don to/ /yang gang gi tshe res 'ga' bdag dang gzhan gyi rgyud la mngon par mtho ba dang /nges par legs par sgrub pa'i don byed par yang 'phral gyi 'dod pa'i yon tan tsam bsgrub pa'i don du mi dge ba'i las byas pa'i rgyus sems can dmyal ba la sogs pa'i sdug bsngal dpag tu med pa yang bzod par nus na/ lhag par chags pa spang ba'i gnas skabs kyi sdug bsngal 'di ni ci ste bzod par mi nus te/ci'i phyir zhe na/ dmyal ba la sogs pa'i sdug bsngal de tsam du gnod pa yang ma yin pa'i phyir te/ ji ltar zhe na/ de la brten nas zhe sdang la sogs pa spang ba'i rim gyis glags dang / gzhan gyi don chen po mngon par mtho ba dang /nges par legs pa yang 'grub pa'i phyir/ 'gro ba bdag dang gzhan gyi don chen po mngon par mtho ba dang / nges par legs pa'i rgyur gyur pa'i zhe sdang gi rgyu lhag par chags pa spang ba'i gnas skabs su sdug bsngal dang du blang ba 'di la phan yon mthong ba'i sgo nas dga' ba bskyed par rigs kyi/sgyid lug par mi bya'o zhes bya ba'i don to/ /da ni zhe sdang gi char gtogs pa phrag dog spong ba'i dbang du byas nas/ gzhan gyi yon tan brjod pa thos pa'i tshe de la phrag dog spang ba'i phyir/ gzhan gyis zhes bya ba la sogs pa smos te/ gal te 'ga' zhig gis gzhan gyi yon tan dang ldan pa la bstod pa'i rgyus/ bstod pa'i yul de'i yid la dga' ba skye na/ de'i tshe yid khyod kyis kyang pha rol po de la bstod pa'i sgo nas gzhan gyis bstod cing dga' bar byas pa ltar/ ci'i phyir dga' bar mi byed de/ dga' bar bya bar rigs so zhes bya ba'i don to//'on te de ltar na byas na phan yon ci yod snyam na/ khyod kyi zhes bya ba la sogs pa smos te/ gzhan yon tan dang ldan pa khyod kyi yid dga' ba dang bde ba ni ma 'ongs pa'i dus su yang bdag nyid la gzhan gyis bstod pa la sogs pa'i rgyus yid dga' ba'i bde ba 'byung la/gzhan yang sems can gyi don byed pa'i tshul khrims bcu gcig las gzhan gyi yon tan brjod pas dga' bar byed pa'i tshul khrims yin pa'i phyir/ kha na ma tho ba med pa yang yin zhing de nyid kyi phyir de bzhin gshegs pas kyang / 'phags pa shes rab kyi pha rol tu phyin pa la sogs pa las/gzhan gang dag pha rol tu phyin pa drug la gnas pa de dag gi legs pa brjod cing mthun pas dga' bar bya'o zhes yon tan dang ldan pa rnams la bya ba'i cha yin par gnang ba yin no/ /der ma zad kyi gzhan la yon tan ji lta ba bzhin du brjod cing dga' bar byed pa 'di ni bsdu ba'i dngos po bzhi las snyan par smra ba zhes bya ste/bdag nyid la tshegs chung ba'i sgo nas gzhan mos par byed pa'i phyir/ gzhan bsdu ba'i mchog kyang yin zhes bshad do/ /gal te 'di snyam du pha rol po bstod pa'i yul de la gzhan gyis bstod pas dga' bar byed pa de ltar bdag gis ni bstod kyang dga' ba mi skye ba'i phyir/stod par mi byed do/ /snyan pa'i dogs pa bsus nas/ gzhan yang zhes bya ba la sogs pa smos te/ gzhan ni bdag gis bstod du zin kyang pha rol gyis bstod pas yul de'i rgyud la dga' ba skye ba de ltar bde ba skye bar mi 'gyur ro zhes gal te yid khyod bstod pa'i yul de'i rgyud la yid dga' ba'i bde ba 'di skye bar mi 'dod na de'i tshe srog gcod pa spong ba dang /gla pa la gla rngan sbyin pa la sogs pa'i 'bras bu gang zhe na/ mthong ba ste 'dir gla pas las byed pa la sogs pa ma mthong ba ste/ tshe phyi mar mtho ris thob pa la sogs pa yang nyams te mi 'byung bar thal bar 'gyur ba zhig na de'i tshe srog gcod pa spong ba la sogs pa la brten pa'i phyir/'bras bu mtho ris su skye ba la sogs pa gdon mi za bar 'byung du rung ba bzhin du/ gzhan la bstod pa zhes bya ba'i rgyu de bdag gis byas na yang de'i tshe de'i 'bras bu pha rol po de'i rgyud la yid dga' ba skye bar 'gyur bas/pha rol po de la gzhan gyis bstod pa'i tshe bdag gis kyang bstod par bya'i/ phrag dog mi bya'o zhes bya ba'i don to/ /yang ji ltar gzhan gyis bdag rang gi yon tan brjod pa'i tshe/ bdag la stod par byed pa'i gang zag gzhan la bdag yid dga' zhing bde ba skyed par 'dod par byed na/de bzhin du bdag gis gzhan gyi yon tan brjod pa'i dus de'i tshe/ pha rol po de bdag rang la yid dga' zhing bde ba skye bar ji ste mi 'dod par byed de/ gdon mi za bar 'dod par bya dgos so zhes bya ba'i don to/ /da ni pha rol po yon tan dang ldan pa la sogs pa mthong ba'i tshe/de la phrag dog spong bar bstan pa'i sems can thams cad ces bya ba la sogs pa smos te/ bdag gis sems can thams cad kyi don du dang por byang chub tu sems bskyed pa yin pa'i phyir/ gang gi tshe bdag gis ma bsgrubs par sems can nyid kyis bde ba phun sum tshogs pa rnyed pa de'i tshe/de la shin tu dga' bar bya bar rigs kyi phrag dog mi bya'o zhes bstan to/ /da ni zhe sdang la brten pa'i chos rnam pa gnyis las/ dang po dgra la sogs pa'i sdug bsngal byung ba'i tshe/ de la rjes su yi rang ba spang bar bstan pa'i phyir/gal te dgra zhig ces bya ba la sogs pa smos te/ byung ba nyid kyis chog mod de la dga' ba bskyed mod med do zhes bya ba'i tha tshig go/ /da ni nyes pa ma byung ba las yid smon mi bya bar bstan pa'i phyir/ khyod kyis zhes bya ba la sogs pa smos so/ /gal te yid smon byas pa'i gzhis sdug bsngal de/pha rol po la grub pa'i phyir de la gdags par byed do zhe na/ khyod kyi 'dod pas zhes bya ba la sogs pa smos te/ de yang grub pa nyid kyis chog mod/ de la dga' bar bya mi dgos zhes bya ba'i don te/ /gal te des mtshungs par 'gyur ba'i phyir de la bdag dga' bar byed do zhe na ma yin te/de las phung ba gzhan ci yod/ /ces bya ba smos so/ /ji ltar phung bar 'gyur zhe na/ nyon mongs zhes bya ba la sogs pa smos te/ nyon mongs pa'i nya pas btab pa'i mchil pa ste lcags kyu'o/ /des ni bdag gi sems kyi rgyud gzhan du mi 'chor bar gzung ba la shin tu mi bzad par gze zhing rno ste/gang zhe na/ dgra la sogs pa sdug bsngal byung zin pa la dga' bar byed pa dang / ma byung ba la yid smon byed pa ste/ des bzung na bdag tshe phyi ma'i dus su sems can dmyal ba la sogs par gdon mi za bar 'tshed par 'gyur ro zhes bya ba'i don to//da ni bstod pa la sogs pa la lhag par dga' bar bya ba yin gyi/ gnod pa byed pa rnams ni bdag la phan 'dogs pa yin pa'i phyir/ de la ni khro bar mi bya bar dga' bar bya'o zhes bstan pa'i phyir/ bstod dang zhes bya ba la sogs pa smos te/de la dga' zhing chags par bya ba'i rgyu med pa'i phyir ro/ /ci'i phyir zhe na/ des bsod nams la sogs par mi 'gyur ba'i phyir ro/ /'on te de la rang don zhig yod do snyam na bdag ni zhes bya ba la sogs pa smos te/ 'on te des yid bde bar 'gyur ro snyam na/ yid bde ba 'ba' zhig ces bya ba smos te/ rab tu byung nas kyang dgos pa med do zhes bya ba'i don to/ /yang 'jig rten pa dag ni phyug po dang dpa' bo la sogs pa yin pa'i grags pa'i dbang gis bya ba sna tshogs byed mod kyi/ grags pa ni tshig gi bdag nyid yin pas de la chags par bya ba'i rgyu med do zhes bstan pa'i phyir/grags pa'i don du zhes bya ba la sogs pa smos so/ /gzhan yang 'gyur ba'i sdug bsngal gyi ngo bo nyid yin pas de la chags par mi bya'o zhes bstan pa'i phyir/ bya ma'i khang bu zhes bya ba la sogs pa smos so/ /'on te 'di snyam du bstod pa la sogs pa'i tshig ni bems po yin pa'i phyir bdag gi yon tan brjod par bya ba'i bsam pa med pas/de chags par bya ba ma yin nam stod par byed pa'i gang zag de bdag la dga' ba yin pa'i phyir de la bdag chags par byed do snyam nas/ re zhig ces bya ba la sogs pa smos so/ / slob dpon gyis len du gzhan nam zhes bya ba la sogs pa smos te/ pha rol po de bdag gam bdag gi gnyen bshes la sogs pa dag la dga' ba la dga' ba yin du zin kyang de ni pha rol po de nyid kyi rang bzhin pas nyams su myong du zad kyang bdag la mi phan no zhes bya ba'i don to/ /gal te des bdag la phan na ni de'i tshe gzhan dag kyang bde bar bya ba'i phyir/bdag gis kyang bstod cing dga' bar bya bar rigs na/ de ltar ci'i phyir mi byed de/ de ltar yang bya dgos so zhes bstan par bya ba'i phyir/ de bde ba yis zhes bya ba la sogs pa smos te/ bdag bde zhes bya ba ni bdag dga' bar bya ba'i don du bdag kyang ci ste mi bde ste/ci'i phyir dag par mi byed ces bya ba'i don to/ /de bas zhes bya ba la sogs pa ni ji skad bshad pa'i tshul gyis gzhan dga' ba de la lhag par chags par bya ba'i rgyu med do zhes bstan to/ /da ni stod par byed pa la sogs pa'i nyes dmigs shes par bya ba'i sgo nas de la chags pa spong bar bstan pa'i phyir/bstod ces bya ba la sogs pa smos so/ /da ni gnod pa byed pa'i phan yon shes par bya ba'i sgo nas de la khro bar mi bya ba bstan pa'i phyir/ gang dag bdag bcings zhes bya ba la sogs pa smos te/ gzhan gyis gnod pa byas pa la bzod pa byas pa'i rgyus bdag gi sdig pa byang zhing bsod nams spel bas ngan song las thar bar bya ba'i phyir ro zhes bya ba'i don to//'on te bsod nams kyi gegs byed pa'i phyir de la khro bar byed ce na/ 'di ni zhes bya ba la sogs pa smos te/ bsod nams kyi rgyu 'di dka' thub yin la/dka' thub kyi mchog tu gyur pa ni bzod pa yin zhing de'i rgyu ni gnod pa byed pa rnams yin la/ gal te bdag la gnod par byed pa yod bzhin du bzod pa sgom par mi byed na/ de'i tshe bdag gis gegs byas pa yin gyi gnod par byed pa rnams kyis gegs byas pa ma yin no zhe na/ gang zhig ces bya ba la sogs pa smos so/ /de ltar rgyu yin pa'i phyir gegs nyid du mi 'thad pa'i dpe bstan pa'i phyir/ dus su phyin pa'i zhes bya ba la sogs pa smos so/ /de lta bas na bzod pa'i rgyu ni rnyed par dka' ba yin pa las res 'ga' rnyed pa'i tshe/ de'i phan yon shes par bya ba'i sgo nas de la khro bar mi bya'i dga' bar bya ba nyid du bstan pa'i phyir/'jig rten na ni zhes bya ba la sogs pa smos so/ /bzod pa las byung ba'i bsod nams 'di ni gnod par byed pa 'di la brten te 'grub pas/ dge ba'i rtsa ba de yang de nyid kyi don du yongs su bsngo ba'i tshul gyis de mchod par bya ba nyid du bstan pa'i phyir/'di dang zhes bya ba la sogs pa smos so/ /'on te de ltar rgyu yin du zin kyang phan gdags pa'i bsam pa med pas mchod par bya ba ma yin no snyam du bsam nas/ gal te bzod pa sgrub ces bya ba la sogs pa smos so/ /rgyu yin yang bsam pa med pa tsam gyis mchod par bya ba ma yin pa ni/de'i tshe de la mgo bsgre ba'i phyir/ 'grub pa'i ni zhes bya ba la sogs pa smos so/ /pha rol pos mi mtshungs pa nyid du bstan pa'i phyir/ gal te dgra 'di zhes bya ba la sogs pa smos so/ /de ltar gnod par bya ba'i bsam pa dang ldan pas bzod pa'i rgyu nyid yin gyi/de lta ma yin na ni rgyu nyid du yang mi rung ba'i phan gdags pa'i bsam pa med kyang mchod par bya ba'i gnas yin pas sman pa bzhin du zhes bya ba la sogs pa smos so/ /de ltar sems can rnams la brten nas sbyin pa dang tshul khrims dang bzod pa la sogs pa'i chos skye bas de'i phyir zhes bya ba la sogs pa smos so//ci'i phyir snyam pa la/ 'di dag ces bya ba la sogs pa smos so/ /de ltar dge ba'i chos skye ba'i rgyur 'dra bas rgyal ba bzhin du sems can la yang mchod pa'i gnas yin pa'i phyir/ sems can rnams dang zhes bya ba smos so//'o na rnam pa thams cad du 'dra'o zhe na/ sangs rgyas ni gzhan la phan gdags pa'i mthu mnga' la/ sems can la ni de lta ma yin yang / dge ba'i chos skye bar 'dra ba'i phyir/ bsam pa'i yon tan zhes bya ba la sogs pa smos so/ /'on te 'bras bu'i sgo nas ji ltar mnyam pa yin snyam pa la byams sems zhes bya ba la sogs pa smos te/dge ba'i las stobs dang ldan pa ni mthong ba'i chos la myong bar 'gyur ba yin la/ de ni gnyi ga las kyang 'grub ste/ ji ltar sems can yin yang byams pa'i ting nge 'dzin las langs pa la mchod pa byas pa lta bu ste/ji ltar chos mngon pa las/ 'phags pa min yang pha ma dang / /nad pa dang ni chos smra dang / /skye mtha'i byang chub sems dpa' la/ yon ni mthong ba'i chos la myong / /zhes bshad pa lta bu dang / de bzhin du sangs rgyas la mchod pa byas pas tshe 'di nyid la rnam par smin pa phyug po la sogs pa'i 'bras bu nyams su myong bar 'gyur ro zhes mdo sde las ji skad gsungs pa lta bu'o//'on te de bzhin gshegs pa yon tan dpag tu med pa dang ldan pa'i phyir/ mchod par bya bar rigs kyi sems can rnams la ni de lta ma yin no zhe na/ de bzhin gshegs pa'i yon tan rnams kyi nang nas gang la brten te sangs rgyas kyi chos skye ba zhes bya ba'i yon tan ni sems can rnams la'ang yod pa'i phyir/des na mchod pa'i gnas yin pas yon tan rgya mtsho zhes bya ba la sogs pa gsungs te/ ji ltar de bzhin gshegs pa la mchod pa la sogs pa la brten nas sangs rgyas kyi chos skye ba bzhin du sems can rnams la brten nas kyang skye bar 'gyur ro zhes bya ba'i tha tshig go//da ni thams cad la shin tu phan 'dogs par mdzad pa'i de bzhin gshegs pa de rnams la drin lan ldon pa'i thabs dam pa yin pa'i phyir yang sems can rnams mgu bar bya'o zhes bstan pa'i phyir/gzhan yang zhes bya ba la sogs pa smos so/ /'on te ji tsam du bdag la phan 'dogs par mdzad ce na/ gang gi phyir zhes bya ba la sogs pa smos so/ /da ni slob dpon nyid kyis sems can gyis don la 'bad par bdag nyid la gdams pa'i phyir re zhig ces bya ba la sogs pa smos so//'on te gang dag bde bas thub pa rnams dgyes par 'gyur zhing / gang la gnod pa byas na thub pa'i dbang po rnams mi dgyes 'byung bar 'gyur ba yin zhe na/ de dag ces bya ba la sogs pa smos so/ /ji ltar zhe na/ ji ltar zhes bya ba la sogs pa smos so/ / da ni bdag gis sngon chad sems can la gnod pa byas pas de bzhin gshegs pa rnams mi dgyes par 'gyur zhing / sdig pa bshags shing phyin chad mi byed par bsdam par bya ba'i phyir/ de bas bdag gis zhes bya ba la sogs pa smos so/ /'gums kyang mi bsngo zhes bya ba ni/sems can de dag gis bdag gi srog bcad kyang de bzhin gshegs pa rnams mi dgyes pas mi bsdo ste/ 'o na ji ltar zhe na/ bdag gi srog gcod pa ni bla'i/ mi dgyes pa ni mi bgyi'o zhes bya ba'i don to/ /'on te de ci'i phyir zhe na/ sems can rnams mgu bar 'gyur ba de ltar bya zhe na/de nyid ces bya ba la sogs pa smos so/ /'on te nyes dmigs ci zhig yod nas de spang ba'i phyir sems can rnams mgu ba de ltar zhe na/ dper na rgyal po zhes bya ba la sogs pa smos so/ /'on te sems can rnams mgu bar byas na phan yon ci zhig yod nas de ltar bya zhe na/ sems can mgu las zhes bya ba la sogs pa smos so//bstan bcos kyi ming gi don ni snga ma bzhin no/ /bzod pa bstan pa zhes bya ba ste le'u lnga pa'o// //da ni bzod pa dang ldan pa la brtson 'grus 'byung bas/ dge ba'i chos yongs su rdzogs par bya ba'i phyir le'u drug pa gsungs te/brtson 'grus brtsams pa'i phan yon dang ma brtsams pa'i nyes dmigs bstan pa'i sgo nas/ brtson 'grus brtsam par bya ba bstan pa'i phyir/ de ltar bzod pas zhes smos so/ /da ni brtson 'grus kyi le'u las rnam par gzhag pa bstan pa'i phyir/ sgyid lug ces bya ba la sogs pa smos te/de la rtsa ba dang pos ni mi mthun pa'i phyogs gzhom pa bstan to/ /rtsa ba gnyis pas ni brtson 'grus kyi ngo bo nyid bstan to/ /gsum pas ni gang gi don du brtsams pa bstan to/ /bzhi pas ni gang la brtsams pa bstan to/ /da ni de'i rgyas par bshad pa bstan pa'i phyir/de la sgyid lug pa'i stobs gzhom pa'i dbang du byas nas/ bdag gi zhes bya ba la sogs pa smos so/ /de ci'i phyir zhe na/ 'di ltar zhes bya ba la sogs pa smos so/ /'on te byang chub thob par bya ba la ni shin tu gces pa'i rkang lag la sogs pa nyid kyang btang dgos pa'i phyir de ni bdag gis mi phod de 'jigs so zhe na/gces dang zhes bya ba la sogs pa smos so/ /gces dang mi gces pa ji lta ba bzhin du mi shes pas gces par bya ba ma yin pa la gces su gzung ba'i phyir 'jigs par zad pas/ 'jigs par mi bya'o zhes bya ba'i don to/ / gzhan yang res 'ga' mi dge ba'i las kyis ngan song du skyes pa'i dus su don med par yang nas yang du lus dang yan lag la sogs pa gtong bar byed pa ni/ byang chub chen po bsgrub pa'i don du gtong ba'i sdug bsngal gyis te 'jigs zhes gsungs pa'i phyir/ bskal pa bye ba zhes bya ba la sogs pa gsungs so//de bas na 'khor ba'i sdug bsngal chen po bsal ba'i phyir byang chub bsgrub pa'i gnas skabs kyi yan lag gtong ba la sogs pa'i sdug bsngal gyis 'jigs par mi bya'i/ de bzod cing dang du blang bar bya'i zhes bstan par bya ba'i phyir/ bdag gi byang chub ces bya ba la sogs pa smos so//'on te 'khor ba'i sdug bsngal chen po bsal bar bya ba'i phyir/ tha mal pa'i phyir nad sel ba'i sdug bsngal lta bu zhig dang du blang bar bya dgos sam zhe na/ mi dgos par bstan pa'i phyir/ gso dpyad ces bya ba smos so/ /'o na ji lta bus gso bar mdzad ce na/cho ga shin tu zhes bya ba la sogs pa smos so/ /'on te de'i tshe sha la sogs pa yang gtang bar bya ba ma yin nam/ ji ltar na cho ga 'jam po yin zhe na/ tshod ma la sogs pa gsungs te/ bsdus pa'i don ni las dang po pa'i skabs su sha la sogs pa gtang bar bya ba ma yin gyi/tshod ma la sogs pa sbyin pa tsam du zad la de ni dga' ba med pa'i phyir dang / gang gis lhag pa'i bsam pa dag pa'i sar chud par 'gyur ba'i dus su ni gtong ba la shin tu goms par 'gyur ba'i phyir dka' ba med pas cho ga shin tu 'jam po yin no zhes bya ba'i don to/ / 'on te goms par 'gyur ba de lta yin na yang tsha ba la sogs pa'i sdug bsngal dang yan lag la sogs pa ma tshang ba'i rgyus sems la mi dga' ba skye ba'i phyir cho ga shin tu 'jam po ma yin no zhe na/ sdig pa spang phyir zhes bya ba la sogs pa smos so/ /lus la gnod pa 'byung ba'i rgyu sdig pa spang ba'i phyir dang /sems la gnod pa byed pa'i log par rtog pa'i gnyen po rang bzhin med pa nyid du mkhas pa'i phyir/ sdug bsngal dang yid mi bde ba med kyi chos thams cad la bde bar 'gro ba'i ting nge 'dzin goms par byas pa'i bsod nams kyi yan lag la bsod nams bcad pa nyid kyi dus su bde ba'i tshor ba sha stag 'byung ba'i phyir/lus bde ba yin zhing lus la sogs pa gtong ba de nyid byang chub chen po'i rgyu nyid yin par mkhas pa'i phyir/ bdag gis sbyin pa'i pha rol tu phyin pa yongs su rdzogs par bya snyam du sems dga' ba skye bar 'gyur bas/de lta bas na cho ga shin tu 'jam po nyid yin pa'i phyir/ bskal pa grangs med pa gsum gyi bar du sems can rnams kyi don 'khor bar gnas shing bya dka' ba'i spyod pa ji snyed byed du zin kyang des skyo zhing sgyid lug par mi bya'o/ /'o na ci zhe na/ le'u dang por ji skad bshad pa'i tshul du byang chub kyi sems shin tu 'jam po nyid yin pa'i phyir/sdig pa thams cad zad par byed cing / bsod nams dpag tu med pa 'tshogs pas/ 'phags pa phung po gsum pa las ji skad gsungs pa bzhin du/ nyan thos dang rang sangs rgyas la sogs pa las khyad par du 'phags pa'i phyir/ mchog tu spro ba bskyed par bya'o zhes bya ba'i don to/ /de bas zhes bya ba la sogs pa ni mjug sdud de/ bde nas bde bar zhes bya ba ni bde 'gro rnams su'o/ /sems zhes bya ba ni byang chub kyi sems kyi phan yon shes pa'o/ /des ni mi zhum pa'i brtson 'grus kyi sgo nas sgyid lug pa'i stobs gzhom pa bstan to//de bas na sems can gyi don bsgrub pa bstan pa'i phyir/ go cha dang / sbyor ba dang / mi ldog pa dang / chog par mi 'dzin pa'i brtson 'grus kyi sgo nas snyom las kyi stobs gzhom pa'i phyir/ sems can don ni zhes bya ba la sogs pa rkang pa gnyis kyis dpung rnam pa bzhi bskyed pa bstan te/tshigs su bcad pa sdebs pa'i dbang gis 'di ltar gsungs kyang / don gyi dbang gis 'di ltar sbyar te/ cho ga'i brtson 'grus te mos pa'i dpung bskyed pa dang / sbyor ba ste rigs pa'i dpung dang / mi ldog pa ste brtan pa'i dpung dang / chog par mi 'dzin pa ste/ dga' ba'i dpung bskyed par bya'o zhes bya ba'i don to/ /da ni rgyas par bshad pa'i dbang du byas nas/ mos dpung bskyed pa rkang pa gnyis kyis bstan te/ dge ba'i las de ma byas pa'i nyes dmigs 'khor ba'i sdug bsngal gyi 'jigs pa dang / de byas pa'i phan yon bdag dang gzhan gyi don yongs su rdzogs par 'gyur ba'i phan yon la bsams pas/bdag gis dge ba'i chos bsgrub par bya'o snyam du sems la go gon pa'i mos pa'i mtshan nyid kyi dpung bskyed par bya'o zhes bya ba'i don to/ /da ni de'i 'og tu sbyor ba'i brtson 'grus kyi dbang du byas nas/ bya bar mi rigs pa las ldog cing bya bar rigs pa la sbyor bas rigs pa'i dpung bskyed par bstan pa'i phyir/ nyam nga che thang zhes bya ba la sogs pa smos te/ bya bar rigs pa ni bdag dang gzhan du brje bar 'gyur ba yin la log par ni bya bar mi rigs pa yin no/ /de ltar bya bar rigs pa la sbyor ba'i tshe brtsams pa'i 'phro mi gcod pas mi ldog pa'i brtson 'grus te/brten pa'i dpung bskyed pa'i dbang du byas nas nyon mongs zhes bya ba la sogs pa smos te/ gang gis nyon mongs pa'i dbang du gyur na bya bar rigs pa las ldog par 'gyur ba'i phyir/ gang du nyon mongs pa skye bar 'gyur ba'i rkyen dang lhan cig gnas pa'i dus na gnyen po sna tshogs kyis nyon mongs pa'i dbang du mi gtong zhing /bya bar rigs pa'i las las mi ldog par brtan par bya'o zhes bya ba'i don to/ /yang nyon mongs pa zhes bya ba ni sdug bsngal gyi don yin te/ bdag nyid dge ba'i las la zhugs pa'i tshe bya dka' ba'i sdug bsngal ji snyed byung yang gnyen po sna tshogs kyi sgo nas sdug bsngal de dag gis ji mi snyam par bya zhing /las de la mi ldog par brtan par bya'o zhes bya ba'i tha tshig go/ /da ni bya bar rigs pa'i las ji snyed byas kyang / des chog par mi 'dzin par yang nas yang du byed 'dod pa'i dga' ba'i dpung bskyed par bstan pa'i phyir/rtsed mo zhes bya ba smos so/ /ci'i phyir de ltar bya snyam pa la/ bde ba'i don du zhes bya ba la sogs pa smos te/ yang 'jig rten dag na las gang zhig byas pas 'dod pa'i bde ba 'grub pa'i nges pa med pa la yang 'grub par srid pa tsam gyi sgo nas kyang /yang nas yang du brtson 'grus rtsom par byed na/ gdon mi za bar 'dod pa'i bde ba 'grub par 'gyur ba'i las la yang nas yang du brtson 'grus brtsams na 'dod pa'i bde ba thob pa'i phyir/ yang nas yang du brtson 'grus brtsam par bya'o zhes bya ba'i don to//yang las su bya ba 'ga' zhig gis ma 'ongs pa'i sdug bsngal dpag tu med pa skyed kyang / 'phral gyi bde ba tsam la bltas nas des ngoms par mi byed/ thams cad la phan pa dang bde ba skyed par byed pa'i dge ba'i las kyis lha shin tu yang ngoms par mi bya ste/yang nas yang du brtson 'grus brtsam par bya'o zhes bstan pa'i phyir/ spu gri zhes bya ba la sogs pa smos te/ rnam smin bde la zhi ba yi/ /zhes bya ba la/ bde ba ni tshe 'di'o/ /zhi ba ni tshe phyi ma'i'o/ /yang na bde ba ni mtho ris kyi'o/ /zhi ba ni thar pa'i'o/ /yang na bde ba ni tshe phyi ma'i'o//zhi ba ni tshe 'di'i ste/ nyon mongs pa dang las de nyid kyi mi mthun pa'i phyogs zhi bar byed pa'i phyir ro/ /yang na bde ba ni gzhan gyi don to/ /zhi ba ni rang gi don to/ /'di ltar zhes bya ba la sogs pas ni mjug sdud do/ /'o na mi dge ba'i las la yang chog par mi 'dzin par dga' ba'i dpung bskyed par bya'am zhe na/ma yin te/ mi dge ba'i las la ni lhan cig rjes su spyod pa'i shes bzhin gyis byed pa'i mod la tshor bar 'gyur na phyis byed par 'dod pa'i bsam pa spang bar bya'o zhes bstan pa'i phyir rjes su zhes bya ba la sogs pa smos so/ / da ni mi dge ba'i las la mngon par dga' ba'i rgyu nyon mongs pa'i mtshon brjed ngas pa dang / shes bzhin ma yin pa'i dbang du mi gtong zhing dran pa dang shes bzhin la gnas te/ nyon mongs pa rnams spang bar bya'o zhes bstan pa'i phyir/ 'thab rnying zhes bya ba la sogs pa smos so/ / dran pa nyams par 'gyur na ji ltar bya zhe na/ g.yul du zhes bya ba la sogs pa smos so/ /dang po nyid nas kyang mi 'chor bar bsgrub pa'i phyir/ yungs mar zhes bya ba smos te/ dran pa zhes bya ba ni/ mtshon pa tsam du zad kyi shes bzhin la yang rig par bya'o/ /gal te de ltar 'bad kyang res 'ga' ltung ba byung na ji ltar bya snyam pa la/nyes pa 'byung ba zhes bya ba la sogs pa smos so/ /dge bshes phrad dang zhes bya ba la sogs pa'i don ni/ gal te 'di snyam du dge ba'i bshes gnyen dang phrad pa la sogs pa la brten te/ dus thams cad du dran pa dang mi 'bral bar bya snyam na de'i tshe de la thabs ji ltar bya snyam pa yin no//des na gdams ngag mi brjed par bya zhing bdag nyid kyi lus sems kyi so glod de ha cang yang bsgrim pa ma yin par byas la/ las la ma zhugs pa'i gong rol nas bya ba thams cad kyi thog mar 'gro ba'i bshes bzhin la gnas par byas na/de'i tshe dus thams cad du mi 'bral bar 'gyur ro zhes bya ba'i phyir/ bag yod gtam zhes bya ba la sogs pa smos so/ /de ltar ma byas na nyes pa ci yod snyam pa la/ ji ltar khrag la zhes bya ba smos so/ /da ni dpung rnam pa bzhi la gnas te/ snyom las kyi stobs gzhom par bya ba mjug bsdus te bstan pa'i phyir/de bas pang du zhes bya ba la sogs pa smos so/ /de ltar mi mthun pa'i phyogs gzhom par bstan nas/ da ni brtson 'grus kyi ngo bo'i dbang du byas nas/ bdag nyid la dge ba'i chos yongs su rdzogs pa ni/ brtson 'grus rnam pa lnga'i dbang du gyur pas 'grub par 'gyur ro zhes bstan pa'i phyir/ji ltar shing bal zhes bya ba la sogs pa smos te/ mos pa'i dbang du gyur pa zhes bya ba ni mtshon pa tsam du zad kyi/ de bzhin du mi zhum pa'i dbang du gyur pa dang / rigs pa'i dbang du gyur pa dang / brtan pa'i dbang du gyur pa dang / dga' ba'i dbang du gyur pas zhes bya ba de ltar yang shes par bya'o//da ni gang gi don du brtson 'grus brtsams pa'i dbang du byas nas/ 'di snyam du nyan thos la sogs pa dag kyang de ltar brtson 'grus rtsom pa ma yin nam/ de'i tshe byang chub sems dpa'i brtson 'grus 'di gang gis khyad par du 'phags snyam pa'i sgo nas bsdus nas/de dag de ltar brtson 'grus rtsom mod kyi/ de dag ni bdag gcig pu dul bar bya ba'i phyir brtson 'grus rtsom gyi bdag dang gzhan mnyam pa nyid du bya ba'i don du brtson 'grus rtsom pa ma yin la/ byang chub sems dpa' ni bdag dang gzhan mnyam pa nyid du bya ba'i don du brtson 'grus rtsom par byed pas/de ltar na nyan thos la sogs pa'i brtson 'grus pas byang chub sems dpa'i brtson 'grus dgos pa'i sgo nas/ khyad par du 'phags par bstan par bya'o snyam du slob dpon gyi thugs la gzhag nas/ lag pa la sogs zhes bya ba la sogs pa smos so//'dir 'grel pa byed pa gzhan dag na re/ bdag dang gzhan du mnyam pa dang / /zhes bya ba dang / bdag dang gzhan du brje ba zhes bya ba 'di ni/ slob dpon gyis skabs 'dir bshad kyang / 'dir ni bsam pa dang shes rab kyis bsdus pa yin pa'i phyir bshad pa'i rigs pa ma yin pas/le'u 'og mar bshad par bya'o zhes/ slob dpon la skyon rjod par byed pa de dag gis ni/ slob dpon gyi dgongs pa ma shes par mthong ste/ gal te don gnyis po 'dir ma bshad na/ dus de'i rgol ba de la lan ji ltar gdab cing / nyan thos la sogs pa'i brtson 'grus las byang chub sems dpa'i brtson 'grus rgyu gang gis khyad par du 'phags te de'i khyad par ma bstan pa nyid du 'gyur bas/gzhan gyi bshad pa de ni shin tu rigs pa ma yin pa'i phyir rtogs pa dang ldan pa rnams kyis/ slob dpon nyid kyis 'dir bshad pa'i dgongs pa btsal bar bya'o//slob dpon gyis dgongs pa mi tshol bar slob dpon blo gros mi zad pas 'phags pa 'jam dpal gyi dngos grub brnyes pa'i bka' lung khyad du bsad nas/ so so skye bo rang dgar smra ba rnams kyi rjes su 'brang bar bya ba ni shin tu rigs pa ma yin pas de ni thag bsrings te spang bar bya'o//de bas na slob dpon gyi dgongs pa ni gong du bshad pa lta bu yin no snyam du sems so/ /ci'i phyir bdag dang gzhan mnyam pa nyid du bya ba'i phyir brtson 'grus rtsom zhe na/ bdag nyid ltar bde ba 'dod la sdug bsngal mi 'dod pa bzhin du sems can thams cad kyang de bzhin te/de bas na bdag la ji ltar bde bas phan gdags shing sdug bsngal las bskyab pa de bzhin du sems can thams cad la yang de bzhin du bya dgos te/ dper na lus 'di nyid la lag pa la sogs pa nang tshan du dbye ba mang yang bde bas phan gdags shing gnod pa las bsrung ba thams cad mtshungs pa bzhin no//de bas na bdag dang gzhan mnyam pa nyid du bya ba'i don du brtson 'grus rtsom zhes bya ba ni/ bdag dang gzhan gyi don phun sum tshogs pa rab kyi mthar phyin par bya ba'i don du brtson 'grus brtsam par bya ba'i don yin no/ /'on te gzhan gyi sdug bsngal de bdag la mi 'bab pa ma yin nam/ci'i phyir mi bzod de/ gsal bar snyam pa la/ de lta yin mod kyi rang gi nyams kyis te/ ji lta zhe na/ bdag gi sdug bsngal de gzhan la mi 'bab kyang rang gi lus la chags pa'i phyir te/ mi bzod pa'i nyams kyis so/ /de bas na bdag gi sdug bsngal zhes bya ba la sogs pa smos so//gal te de ltar nyams gcig pa yin du zin kyang phan tshun mi gnod pa nyid kyi phyir bsal bar mi rigs so zhe na/ sdug bsngal gyi ngo bo nyid du mtshungs pa'i phyir te/ de bas na bdag gis gzhan gyi sdug bsngal zhes bya ba la sogs pa smos so/ /ci'i phyir bdag bzhin du gzhan la phan par bya zhe na/gzhan de yang sems can yin pa'i phyir te/ de bas na bdag gi gzhan las zhes smos so/ /yang gzhan gyi don du bstan par bya ba'i phyir/ gang gi tshe bdag dang zhes bya ba la sogs pa tshigs su bcad pa gnyis smos te/ 'dod pa mtshungs pa'i phyir gnyi ga mnyam pa nyid du bya dgos zhes bya ba'i don to//gzhan yang gal te de la zhes bya ba la sogs pa smos te/ gzhan gyi rgyud la yod pa'i sdug bsngal de ni gzhan nyid la gnod pa yin pa'i phyir/ gzhan de nyid kyis bsrung bar rigs kyi bdag la mi gnod pa'i phyir bdag la bsrung bar mi rigs so zhe na/gal te de lta na ni tshe phyi ma ngan song du skye ba'i sdug bsngal de yang da ltar rang gi lus 'di nyid la mi gnod pa'i phyir lus 'dis sbyin pa gtong ba la sogs pa'i tshul gyis bsrung bar mi rigs so snyam nas/ bdag gis de ni zhes bya ba la sogs pa smos so/ / yang gang gi tshe gzhan gyi sdug bsngal de ni gzhan nyid kyis bsrung bar bya ba yin no/ /de'i tshe rkang pa'i sdug bsngal yang rkang pa nyid kyis bsrung bar bya'i/ lag pas bsrung bar mi rigs so snyam du bsam nas/ gang tshe gang gi zhes bya ba la sogs pa smos so/ /'on te ma 'ongs pa'i sdug bsngal dang /rkang pa'i sdug bsngal yang go rims bzhin du/ tshe 'di'i lus dang / lag pas bsrung bar rigs te/ rgyud dang tshogs gcig pa'i phyir la/ gzhan gyi sdug bsngal de ni bdag dang rgyud dang tshogs pa mi gcig pa'i phyir ro zhe na/ rgyud dang zhes bya ba la sogs pa smos te/dper na phreng ba dang chu'i rgyud la rgyun can gyi dbang po dang gnyis pa dang / chu rgyun snga ma phyi ma la sogs pa so so tha dad pa nyid yin la/ de la ma gtogs pa'i rgyun can zhes bya ba gcig pa ni med pa bzhin du/ tshe phyi ma yang rgyud ni tshe snga phyi'i skye 'jig so so tha dad pa yin la/de las ma gtogs pa'i rgyud ces bya ba gcig pa ni cung zad tsam yang med do/ /yang de bzhin du nags tshal gyi tshogs zhes bya ba yang / tshogs pa can ni dang ba dang kha da re sogs pa tha dad pa yin la/ de las ma gtogs pa can zhes bya ba gcig pa med pa bzhin du/ lus la yang tshogs pa can ni lag pa la sogs pa mtshan nyid mi mthun pa'i phyir so so tha dad pa yin la/de las ma gtogs pa'i lus kyi tshogs bya ba gcig pa nyid du gzhan pa ni cung zad kyang med do/ /'on te de lta yin na/ tshe snga ma la sems can gyi rgyud ces bya ba dang lag pa la sogs pa lus kyi tshogs zhes bya bar gcig tu 'dzin par byed ce na/de ni 'khrul pa'i dbang gis gcig tu 'dzin pa yin zhes bya ba'i tha tshig go/ /da ni yang khas blangs nas brjod par bya ste/ ji ltar lag pa la sogs pa lus kyi yan lag tu gcig pa'i phyir rkang pa'i don lag pas byed pa bzhin du/sems can thams cad kyang 'gro ba'i yan lag tu gcig pa'i phyir bdag bzhin du gzhan gyi don yang bya'o zhes bstan pa'i phyir/ ji ltar lag pa zhes bya ba la sogs pa smos so/ /yang na ji ltar sems can thams cad la yang bdag bzhin du goms par byas pa'i sgo nas/gzhan gyi don bya'o zhes bstan pa'i phyir/ ji ltar bdag med ces bya ba la sogs pa smos so/ /de ltar bdag dang sems can thams cad gcig pa nyid du gzung ba la yon tan ci yod snyam pa la/ de ltar na ni zhes bya ba la sogs pa smos so/ /de bas na ji ltar zhes bya bas ni mjug sdud do//bsrung sems zhes bya ba ni sdug bsngal las so/ /snying rje'i sems zhes bya ba ni gong ma dang zlos pa'i phyir yi ge nor bar brtsi ste/ de bas na byang chub sems ni goms par bya zhes bya ba yin no/ /de bas na mgon po zhes bya ba la sogs pa la rang gi mtshan zhes bya ba ni/ gang gis bdag gi ming thos pa de dag kyang 'jigs pa brgyad las thar bar gyur cig ces bya ba la sogs pa'i tshul gyis so/ /bdag dang gzhan mnyam pa nyid du bya ba de ni dka' ba'i phyir mi nus so snyam na/ goms par gyur na dka' ba med pa'i phyir/ dka' las zhes bya ba la sogs pa smos te/gang gi ming zhes bya ba ni 'dre la sogs pa'o/ /de nyid med na zhes bya ba ni shin tu 'dris par gyur pa'i phyir 'dre la sogs pa de nyid med na'o/ /de ltar bdag dang gzhan mnyam pa nyid du bya bar 'dod pa de/ las gang zhig la brtson 'grus brtsam par bya zhe na/ bdag gi bde ba gzhan la btang zhing gzhan gyi sdug bsngal bdag gis dang du blang ba'i tshul gyis bdag dang gzhan brje bar bya ba nyan thos la sogs pas thos na/skrag par 'gyur ba'i phyir gsang bar bya ba de la brtson 'grus brtsam par bya'o zhes bstan pa'i phyir/ gang zhig bdag dang zhes bya ba la sogs pa smos so//ji tsam gyis bdag dang gzhan du brje ba zhes bya zhe na/ gang zhig bdag gi bde ba zas dang skom la sogs pa gzhan la byin zhing / de nyid kyi bkres pa la sogs pa'i sdug bsngal bdag gis dang du blangs pa lta bu yang yin mod kyi/ de tsam 'ba' zhig la ni mi bya'am/'o na ci zhe na/ gang gi tshe sdom pa'i tshul khrims kyi dbang du byas nas/ sems can thams cad bde bar bya'o zhes byams pa chen pos kun nas bslang nas/ gzhan bde ba dang phrad par bya ba'i don du bdag gi khyim gyi bde ba la sogs pa yal bar 'dor bar byed pa de tsam gyis na bde ba gzhan la btang zhes bya ste/mdor na bdag gi bde ba gzhan bde bar bya ba'i phyir btang zhes bya ba'i tha tshig go/ /de bzhin du gzhan gyi sdug bsngal bdag gis dang du blang zhes bya ba yang gzhan gyi sdug bsngal bsal bar bya ba'i snying rje chen pos kun nas bslang nas/rab tu byung ba la sogs pa'i dka' las dang du blang zhes bya ba ste/ mdor na gzhan gyi sdug bsngal bsal bar bya ba'i don du bdag gis sdug bsngal nyams su blang ba zhes bya ba'i tha tshig go/ /de bzhin du dge ba'i chos gzhan dag la yang ci zhig par bya ste/mdor na ci tsam du gzhan bde ba'i phyir bdag gi bde ba la mi lta ba de ni/ bdag gi bde ba gzhan la btang ba yin la/ ji tsam du gzhan gyi sdug bsngal bsal ba'i phyir bya dka' ba ji snyed nyams su len pa ni gzhan gyi sdug bsngal bdag gis dang du blangs pa zhes bya'o//yang ci'i phyir bdag gi bde ba gzhan la gtang bar bya'i/ bdag nyid la phan gdags par mi bya zhe na/ bdag gi lus ni tshe 'di dang phyi ma'i 'jigs pa bskyed pa'i rgyur gyur pa'i phyir/ 'di la dgra bzhin du sdang bar bya'i/ bde bas phan gdags par bya rin mi chog go snyam nas/bdag dang lus zhes bya ba la sogs pa smos so/ /'jigs pa gnas chung ngu la yang zhes bya ba ni skrag par bya rin mi chog pa la yang ngo / /ji ltar 'jigs pa skye ba'i gnas yin zhe na/ rgyas par bshad pa'i phyir/ lus gang zhes bya ba smos te/ su zhig ces bya ba ni gnyi ga yang dgag pa'i dgra ste/su zhig de la 'dod cing bsrung ba dang / mchod par byed kyi su yang mi 'dod ces bya ba dang / su zhig dgra bzhin du sdang bar mi byed cing dgra bzhin du brnyas par mi byed de/ lus 'di la dgra bzhin du sdang zhing brnyas par bya'o zhes bya ba'i don to/ / bdag gi don byas na nyes dmigs ci yod/ gzhan gyi don byas na phan yon ci zhig yod nas rang gi don yal bar bor te gzhan gyi don la 'bad par bya snyam pa la/ gal te byin na zhes bya ba la sogs pa smos te/ 'dre'i tshul zhes bya ba ni dman pa'i spyod pa zhes bya ba'i don to/ /lha'i chos zhes bya ba ni khyad par gyi spyod pa zhes bya ba'i don to//bdag phyir zhes bya ba ni bde bar bya ba'i phyir ro/ /gzhan phyir zhes bya ba la sogs pa ni gzhan bde bar bya ba'i phyir ro/ /de nyid ces bya ba ni bdag mtho bar 'dod nas bdag la stod par byed pa'o/ /gzhan la spro byas na zhes bya ba ni/gzhan la spro bar bya ba'i phyir gzhan la bstod pa'o/ /lhag ma ni go sla'o/ /mdor bsdus te bstan pa'i phyir 'jig rten zhes bya ba smos so/ /de lta yin par ci mngon snyam pa la/ mang du bshad lta zhes bya ba la sogs pa smos so/ /bdag dang gzhan du ma brjes pa'i nyes dmigs gzhan bstan pa'i phyir/bdag bde zhes bya ba smos so/ /'o na tshe phyi ma'i don 'grub bam snyam pa la/ 'khor ba na yang zhes smos so/ /'o na tshe 'di'i don 'grub bam snyam pa la 'jig rten zhes bya ba smos so/ /bdag dang gzhan du brje bar mi bya ba'i sgo nas de spong du gzhug par bya ba'i phyir/mthong dang zhes bya ba smos te/ mthong ba zhes bya ba ni tshe 'di la'o/ /ma mthong ba zhes bya ba ni tshe phyi ma la'o/ /bdag tu 'dzin pa las gyur zhes bya ba ni bdag tu chags pa'i dbang gis bdag gi don byed pa'o/ /'dre chen zhes pa yang de nyid do/ /da ni bdag dang gzhan mnyam pa nyid du bya ba'i phyir/bdag dang gzhan brje bar bya'o zhes mjug bsdus te bstan pa'i phyir de ltar zhes bya ba smos te/ gnod pa dang sdug bsngal zhes bya ba ni mtshon pa tsam du zad kyi bde ba dang yid bde ba thob par bya ba'i phyir zhes bya ba yang shes par bya'o/ / gnod pa ni tshe 'di'o/ /sdug bsngal ni tshe phyi ma'o/ /yang na gnod pa ni yid kyi'o/ /sdug bsngal ni lus kyi'o/ /de ltar bdag dang gzhan du brje bar bya ba nyid du slob dpon nyid kyi thugs dang gzhan gyi rgyud bye brag ma phye bar spyir bstan to/ /'grel pa byed pa kha cig na re lung gis bstan pa zer mod kyi/de ni mi rigs te/ lung gang yang khungs su ma drangs pa'i phyir ro/ /'on te lung gi don bstan pa yin no zhe na/ 'o na ni de'i tshe 'di 'ba' zhig lung gis bstan pa zhes bya bar mi rigs te/ gzhung mtha' dag gis kyang lung gi don bstan pa'i phyir ro/ /de lta bas na bdag dang gzhan gyi rgyud la bye brag phye ba med par bdag dang gzhan gyi brje bar bya ba nyid du spyir gdags pa bstan pa zhes bya'o//da ni slob dpon gyis bye brag tu bdag nyid kyis yid la bdag dang gzhan du brje bar bya'o zhes gdams pa bstan pa'i phyir/ bdag ni zhes bya ba smos te/bdag ni dbang ba yin pa'i phyir/ gzhan gyi don bya ba las rang gi don mi bya'o zhes bya ba'i don to/ /gzhan dbang ba de nyid gang yin don ji lta bu zhig bya snyam pa la/ go rims bzhin du gzhan dbang ba de ni bdag nyid kyi phung po dang mig la sogs pa yin la/ don ni de la phan par 'gyur ro zhes bstan pa'i phyir/gzhan dbang zhes bya ba la sogs pa smos so/ /'on te rang gi don bya ba la nyes ci yod ce na/ yid khyod ces bya ba la sogs pa smos so/ /'on te gzhan gyi don bya ba la phan yon ci yod ce na/ de ltas zhes bya ba la sogs pa smos te/ las 'di zhes bya ba ni gzhan gyi don byed pa'o/ /phun sum bde ba min zhes bya ba ni/ sangs rgyas kyi phun sum tshogs pa'i bde ba thob pa las ma gtogs pa'i khams gsum gyi 'khor ba'i sdug bsngal 'di 'dra ba'i gnas skabs su re mi 'gyur ba zhig na zhes bya ba'i don to/ /da ni rang nyid la bdag tu bzung nas don byed pa byed bzhin du gzhan gyi don yang gyis shig ces gdams pa'i phyir/de bas zhes bya ba la sogs pa smos te/ gzhan dag gis zhes bya ba ni pha ma la sogs pa'o/ /gzhan gyi don ji ltar bya snyam pa la/ gzhan gyi rtog ces bya ba smos te/ gzhan gyi rgyud la bde ba gang gis phongs pa dang / sdug bsngal gang dang ldan pa de nyid brtags nas gzhan gyi sdug bsngal bsal zhing bde ba bsgrub pa'i phyir/ bdag gi bde ba la mi lta bar bor nas/ gzhan la phan pa byed pa'i sdug bsngal dang du blang bar bya'o zhes bya ba'i don to/ /de yang ji ltar bya snyam pa la/bdag skyid ces bya ba la sogs pa smos so/ /ci nas kyang bdag la phrag dog byas pa'i sgo nas te/ ji lta zhe na/ gzhan skyid par bya ba'i don du/ bdag skyid pa yal bar bor te/ gzhan la btang bar bya ba'am/ bdag gi mtho ba btang ste/ gzhan dag mtho bar bya ba'i phyir gzhan la bstod par bya ba'am/bdag gis gzhan la phan pa byed pa yal bar bor te/ gzhan la sbyin zhing gtong du gzhug pa'i sgo nas te/ ji ltar mdo las/ de las yo byad dag long la sbyin pa byin ces ji skad gsungs pa lta bu'o/ /de ltar na bdag skyid ces bya ba ni yo byad kyi sgo nas so//bdag mtho bya ba ni yon tan gyi sgo nas so/ /bdag gi phan byed ces bya ba ni phan 'dogs pa'i sgo nas so/ /yang na bdag skyid ces bya ba la sogs pa ni ji ltar bdag nyid sdom pa gsum la gnas pa de bzhin du gzhan dag kyang sdom pa la dgod pa'i dbang du byas te/bdag skyid gzhan ni mi skyid la/ /zhes bya ba ni bdag ni sdom pa'i tshul khrims la gnas pa'i sgo nas sems bde ba la reg par gnas pa'i tshul gyis skyid la/ gzhan ni mi skyid pa ji ste snyam nas gzhan de dag la 'god pa dang / bdag mtho gzhan ni dma' ba dang / /zhes bya ba ni/bdag ni dge ba'i chos sdud pa'i yon tan gyis brgyan pa'i sgo nas mtho la/ gzhan ni de lta ma yin pa ji ste snyam nas gzhan dag kyang de la 'god pa dang / bdag ni phan byed gzhan min zhes bya ba ni/ bdag ni sems can gyi don byed pa'i tshul khrims kyi sgo nas gzhan la phan par byed la/gzhan ni de lta ma yin pa ji ste snyam nas gzhan dag kyang de dgod pa'i tshul gyis bdag nyid 'ba' zhig de ltar gnas pa la/ bdag la phrag dog cis mi byed de/ gzhan dag kyang de la dgod par bya'o zhes bya ba'i don to/ /de bas na gzhan la phan gdags pa'i don du bdag gi bde ba la mi lta zhing de yal bar bor ba'i sgo nas bdag bde ba la dang bral gyis te/gzhan gyi sdug bsngal bsal ba'i don du bdag gis dka' ba spyad pa'i sgo nas bdag la sbyor zhes bya'o/ /yang spyod lam thams cad du bdag dang gzhan brje bar mi byed pa'i nyes pa bsal phyir lhan cig rjes su spyod pa'i shes bzhin gyis brtag par bya ba yin pas na/res 'ga' zhes bya ba la sogs pa smos so/ /ci nas kyang gzhan gyi nyes pa bdag gis dang du blang bar bya ba yin pas/ gzhan gyi nyes pa zhes bya ba la sogs pa smos te/gzhan gyis nyes pa byas kyang bdag gis nyes pa ltar bya'o zhes bya ba'i don to/ /'on te gzhan gyi nyes pa bzhin du rang gi nyes pa yang bcab par bya'am zhen ma yin te/ bdag gi nyes pa zhes bya ba la sogs pa smos so/ /bdag mtho ba bsal nas/ gzhan mtho bar bya ba'i phyir/gzhan gyi grags pa zhes bya ba la sogs pa smos so/ /ci nas kyang gzhan mtho zhing bdag dma' bar bya ba'i phyir/ bdag ni bran gyi zhes bya ba la sogs pa drug gsungs te/ mdor na tha mal pa'i spyod lam thams cad kyang / spyod yul yongs su dag pa'i mdo las gsungs pa'i tshul du gzhan gyi don du bsngo zhing byed na sdom pa gsum gyis bsdus pa'i dge ba'i las la lta ci smos te/de bas gral gyi tha ma ltar/ /don rnams kun la bkol bar gyis/ /zhes bya ba dngos su gzhan gyi bang chen la sogs pa zhes byed pa lta bu ma yin te/mi nus pa'i phyir dang / de sems can thams cad kyi don du mi 'gyur ba'i phyir ro/ /'di ni skyon can zhes bya ba ni bdag gi yon tan gzhan la bsgrags par gyur na dregs pa dang nga rgyal skye ba'i skyon 'byung bas bsgrags par mi bya ste/ bcab par bya'o zhes bya ba'i don to//da ni mdor bsdus nas sngon gyi dus su bdag bde bar bya ba'i don du/ gzhan la gnod pa byas pa de da phyin chad ni de'i lan gyi tshul du gzhan pa bya ba de/ bdag gis dang du blang bar bya'o zhes/ mdor na zhes bya ba la sogs pa smos te/ sems can rnams kyi don du dge ba'i rtsa ba de dang /de dag 'grub par byed pa'i sdug bsngal dang du blang bar bya'o zhes bya ba'i don to/ /'di ni zhes bya ba la sogs pas ni 'di skad bstan te/ gnya' bo drag po gnya' phud pa'i tshul du'am/ glegs bam kha cig las gnya' thag ces 'byung ste/de'i tshe gnya' thag 'gyur ba'i tshul du zhes bya ba'i don to/ /tshul de bzhin du bdag gi sems de yang rang gi don byed pa'i las la shed skyed par mi bya'o/ /'on kyang bag sar bzhin du ngo tsha shes pa dang / 'jigs pa ste khrel yod pa gnyis kyi gnya' ba'am gnya' thag gis bsdams te gzhag go zhes bya ba'i don to//de ltar ma byas pa'i nyes dmigs kyi dbang du byas nas/ 'on te de ltar zhes bya ba la sogs pa smos so/ /de ltar 'das pa'i dus su rang gi don byas par gyur kyang phyin chad du rang gi don mi bya'i gzhan gyi don la 'bad par bya ba'i rang gi don byas pa'i nyes dmigs dang /gzhan gyi don byas pa'i phan yon gyi sgo nas bstan par bya ba'i phyir/ khyod kyis kho bo zhes bya ba la sogs pa tshigs su bcad pa bzhi smos te/ khyod kyi rtsa yang kun shes bya ba ni rgyu ste/ ngan song du skye ba'i rgyu rang gi don byed par 'dod pa bcom pa dang /ngan song du 'gro ba'i thabs med do zhes bya ba'i don to/ /lhag ma ni go sla'o/ /da ni bdag dang gzhan du brje bar bya ba'i don nyid dang / de'i phan yon bstan pa'i sgo nas mjug bsdu ba'i phyir/ de ste zhes bya ba la sogs pa smos te/ bdag gi bde ba yal bar bor te/ gzhan dag bde bar byas shing gzhan gyi sdug bsngal bsal ba'i don du bdag gi sdug bsngal dang du blangs na dus de'i tshe bdag dang gzhan gyi don 'grub pa'i phyir/ bdag dang gzhan du 'grub par bya'o zhes bya ba'i don to/ /bstan bcos kyi ming gi don ni snga ma bzhin no/ /brtson 'grus bstan pa zhes bya ba ste le'u drug pa'i bshad pa rdzogs so// //brtson 'grus dang ldan pa la bsam gtan 'byung zhing / sems mnyam par gzhag pa las nyon mongs pa'i gnyen po lhag mthong 'byung bas/ lhag mthong bskyed par bya ba'i phyir/ de'i rgyu bsam gtan bskyed pa'i don du/ zhi gnas zhes bya ba la sogs pa le'u bdun pa gsungs te/ zhi gnas rab tu ldan pa'i lhag mthong gis/ /nyon mongs rnam par 'joms par shes byas nas/ /zhes bya bas ni gang gi don du zhi gnas btsal ba bstan to/ /lhag mas ni ji ltar btsal ba bstan te/zhi gnas kyi tshogs la gnas par bya ba dang / tshogs la gnas pa des mnyam par gzhag pa'i gnas skabs su ji ltar btsal bar bya ba dang gnyis kyis bstan te/ snga ma zhi gnas kyi tshogs la gnas par bya ba la/ 'jig rten la chags pa spang pa dang dgon par gnas par bya ba gnyis las/de la/ dang po'i dbang du byas nas de yang ni/ /'jig rten chags pa med la mngon dgas 'grub/ /ces bya bas ni mdor bstan te/ 'jig rten la chags pa ni dgon par gnas pa la sogs pas mi 'grub pas zhi gnas thob par mi 'gyur la/de las bzlog pas ni 'grub par 'gyur ro zhes bya ba'i don to/ /da ni de nyid rgyas par bshad pa'i dbang du byas nas/ gnyen 'dun la sogs pa la chags pa spang ba dang / 'jig rten gyi chos brgyad la chags pa spang ba gnyis las re zhig dang po'i dbang du byas nas/mi rtag pa yin pa'i phyir/ chags par byed pa mi rigs la/ gnyen la sogs pa yang mi rtag pa yin pa'i phyir chags par bya bar mi rigs te/ myur du 'bral bar 'gyur ro snyam du bsam pa'o/ /da ni gnyen la sogs pa la lhag par chags pa'i nyes dmigs bstan pa'i sgo nas/de la lhag par chags pa spang ba'i phyir/ des ni zhes bya ba la sogs pa smos so/ /de la lhag par chags pa'i rgyu sdug pa ste yid du 'ong ba'i dngos po mtho ris dang thar pa thob par mi 'gyur ro zhes bstan pa'i don to/ /gzhan yang gnyen la sogs pa de mthong ba'i tshe na ni mthong na ci rung du snyam nas yid dga' bar mi 'gyur zhing /de'i dbang gis yid kyang ting nge 'dzin la mnyam par 'jog par mi 'gyur la/ 'o na mthong na phan nam zhe na/ mthong yang ngoms par mi 'gyur bas/ snga ma bzhin de sngar ma phrad pa'i gnas skabs bzhin du da rung yang ma bral na ni ci ma rung snyam pa'i sred pas gdung bar 'gyur ro//nyes dmigs gzhan bstan pa'i phyir/ sems can rnams la zhes bya ba la sogs pa smos te/ kun nas sgrib ces bya ba ni de'i rkyen gyis 'khor ba'i sdug bsngal la mi sems pa'i phyir ro/ / tha mar zhes bya ba ni 'chi ba'i dus su 'gyod par 'gyur ba'i phyir ro/ /don med ces bya ba ni dge ba ma brtsams pa'i phyir ro/ /'jig par 'gyur zhes bya ba ni mya ngan las 'das pa mi 'thob pa'i phyir ro/ /skal ba mnyam sbyong na zhes bya ba ni mi dge ba'i las kyi rjes su 'jug pa'i phyir ro//dga' ba'i gnas la zhes bya ba ni dga' bar byed pa'i gnas so/ /gzhan yang byis pa rnams kyi mtshan nyid bstan pa'i phyir/ phan par smras na zhes bya ba la sogs pa smos te/ phan las zhes bya ba ni dge ba'i las so/ /bzlog ces bya ba ni pha rol po de dag go//lhag ma ni go sla'o/ /res 'ga' phrad pa'i tshe ji ltar bya snyam pa la/ phrad na zhes bya ba la sogs pa smos te/ chos kyi don tsam zhes bya ba ni/ gdams ngag 'tsho ba'i rkyen tsam mo/ /kun la zhes bya ba ni sbyin bdag la sogs pa la'o/ /da ni gnyis pa 'jig rten pa'i chos brgyad la chags pa spang ba'i dbang du byas nas/de'i nyes dmigs bstan par bya ba'i phyir/ bdag ni rnyed mang bkur sti zhes bya ba la sogs pa smos so/ /'o na ji ltar spang bar bya zhe na/ 'di dag ces bya ba la sogs pa smos te/ mi rtag pa yin no zhes bya ba'i tha tshig ste/de bas na de dag dang rtag tu 'grogs par 'gyur ba yin no zhes bya ba'i don to/ /stod pa dang smod pa la dga' ba dang mi dga' ba spong ba'i phyir/ bdag la smod pa zhes bya ba la sogs pa smos te/ sems can thams cad bdag la stod pa'am smod par byed pa ni ma yin gyi/kha cig de ltar byed pa tsam gyis dga' ba'am/ mi dga' bar bya rin chen mi chog go zhes bya ba'i don to/ /ci'i phyir de ltar yin snyam pa la sems can zhes bya ba smos te/ mos pa sna tshogs pa'i phyir ro zhes bya ba'i don to/ /sems can rnyed pa zhes bya ba la sogs pas ni de dag dang 'grogs pa spang bar bya'o zhes bya ba'i don to//da ni zhi gnas kyi tshogs las gnyis pa dgon par bya ba'i dbang du byas nas dgon par gnas pa'i phan yon bstan pa la/ dang po grogs kyi dbang du byas pa'i phan yon gyi dbang du byas nas/nags zhes bya ba smos so/ /lus dang longs spyod la lhag par chags pa mi skye ba'i phan yon gyi dbang du byas nas/ phug gam zhes bya ba la sogs pa smos te/ rgyab tu mi lta zhing zhes bya ba ni 'phrog pa dang / bsad pa'i 'jigs pa med pa'i phyir ro/ / nags tshol ba'i zhen pa dang / spong mi nus pa'i zhen pa med pa'i phan yon bstan pa'i phyir/ sa phyogs zhes bya ba la sogs pa smos so/ /longs spyod phrogs kyis dogs pa dang / lus kyi mi mdzes pa'i gnas gzhan gyis mthong bar dogs pa'i 'jigs pa med pa'i phan yon bstan pa'i phyir/lhung bzed la sogs pa smos so/ /phyi'i lus la lus kyi rjes su lta ba'i dran pa nye bar gzhag pa bsgom par 'gyur ba'i sgo nas/ lus la rtag pa dang gtsang ba nyid du mngon par zhen pa'i nyon mongs pa spong ba'i gnyen por gyur pa bskyed pa bstan par bya ba'i phyir dur khrod ces bya ba smos so//tshigs su bcad pa dang pos ni gzhan shi ba'i lus mthong ba spyi'i dbang du byas nas ston to/ /gnyis pas ni shi nas zhag bdun lon pa'i dbang du byas nas ston to/ /lus 'di gcig pu zhes bya ba la sogs pas ni dgon par gnas pa'i tshe gnyen 'dun la sogs pa dang bral ba'i rgyus yid mi bde ba spang ba'i phyir gnyen po ji ltar bsgom pa bstan to/rkyen gang zhes bya ba la sogs pas ni gnyen po la sogs pa dang bral bar mi phod pa'i gnyen po bsgom pa bstan to/ /lus 'di zhes bya ba la sogs pas ni dgon par gnas pa'i tshe gnyen la sogs pa dang lhan cig mi 'grogs pa'i phan yon bstan to//de bas na zhes bya ba la sogs pas ni phan yon brtag pa'i sgo nas dgon par gnas par bya bar gdams pa bstan to/ /da ni tshogs la gnas pa des mnyam par 'jog pa'i skabs su ji ltar btsal bar bya ba'i dbang du byas nas bsam pa gzhan gyi bya ba la sogs pa smos te/bsam pa gzhan ni zhes pa ni bsam gtan gyi sgrib pa lnga'o/ /bdag la sems pas zhes bya bas ni bdag ci'i phyir dgon par 'ongs zhes bya bsams nas bdag ni sgrib pa spang ba'i don du 'ongs so//mnyam par gzhag phyir zhes bya ba ni rgod pa'i mtshan nyid kyi mtho ba dang / bying ba'i mtshan nyid kyi dma' ba spang ba'i sgo nas so/ /dul bar bya ba'i phyir zhes bya ba ni nyon mongs pa las so/ /da ni bsam gtan gyi sgrib pa lnga las 'dod pa'i rnam par rtog pa spang ba'i nyes dmigs bstan pa'i sgo nas/de spang bar bya ba mdor bstan pa'i phyir/ 'jig rten 'di dang zhes bya ba la sogs pa smos so/ /de dag nyid rgyas par bshad pa'i phyir/ de la dang por 'dod ldan ngan pa zhes bya ba nas rgas na 'dod pas ci zhig bya ba'i bar gyis tshe 'di'i nyes dmigs bstan te/tshig gi don ni go sla'o/ /da ni tshe 'di dang phyi ma'i nyes dmigs bsdus te bstan pa'i sgo nas de sgrub pa'i don du/ dal 'byor chud zos par byas pa'am/ de chud za bar mi bya ba gdams pa zur gyis bstan pa'i phyir/ 'dod ldan rnams la zhes bya ba la sogs pa smos so/ /da ni 'dod pa la zhen pa spangs te de bas shin tu tshegs chung bar bya ba'i phyir/thar pa thob par bya ba'i don la 'bad par bya'o zhes bya ba bstan pa'i phyir/ 'dod pa zhes bya ba la sogs pa smos so/ /'on te 'dod pa la mngon par zhen pa ji tsam du nyes dmigs che bas de spang bar bya zhe na/ de'i dpe med par bstan pa'i phyir/ 'dod pa rnams la zhes bya ba la sogs pa smos te/ /de dag gis ni tshe 'di'i srog 'phrog par byed pa tsam du zad kyi/ tshe phyi mar dmyal ba la sogs par ltung bar byed mi nus pa'i phyir ro snyam du bsam pa'o/ /de ltar phyi rol gyi yo byad la 'dod pa'i rnam par rtog pa spang bar bstan nas/da ni nang sems can la 'dod pa'i rnam par rtog pa spang bar bstan pa'i phyir/ 'dod ldan zhes bya ba la sogs pa smos so/ /reg bya shin tu 'jam pa shing la sogs par yang nyal po bya bar mi rung zhes bsams nas/ de la chags par mi byed na/de'i tshe sems la yang reg bya'i sgo nas ci'i phyir chags par byed de/ chags par byar mi rigs so zhes bya ba'i don to/ /da ni gos kyi sgo nas chags par byar mi rigs par bstan pa'i phyir/ gang la g.yogs na zhes bya ba la sogs pa smos te/ snga ma las ngan par gyur pa med par gyur pa'i phyir ro snyam pa'i bsam pa'o//ci'i phyir 'dod par byed ces bya ba ni bla lhag tu bzang bar gyur pa med pa'i phyir ro snyam du bsams pa'o/ /de ni mi gtsang ba yin pa'i phyir/ chags par bya bar mi rigs par bstan pa ni/ gal te zhes bya ba la sogs pa smos te/yan lag gi don ni go sla'o/ /da ni dri'i sgo nas chags par mi rigs par bstan pa'i phyir/ lus la bskus pa'i zhes bya ba la sogs pa smos pa'o/ /da ni rmugs pa dang gnyid spang ba'i phyir/ bdag gis zhes bya ba la sogs pa smos te/ bag yod gtam ni zhes bya ba rmugs pa dang gnyid kyi gnyen por ting nge 'dzin gyi phan yon dang /de bzhin gshegs pa'i che ba'i yon tan rjes su dran pa la sogs pa'o/ /'on te bsam gtan gyi sgrib pa lnga yod pa ma yin nam/ 'dir 'dod pa la 'dun pa dang / gnyid spang ba 'ba' zhig bshad kyi gzhan dag ci'i phyir ma bshad ce na/rgod pa spang ba ni 'dod pa la 'dun pa spang ba'i thabs ji skad bstan pa nyid kyis 'grub pa'i phyir dang / 'gyod pa spang ba ni le'u gnyis par sdom pa yang dag par blang ba'i cho ga ji skad bshad pa bzhin du yang dag par blangs pas sdom pa legs par mgon nas sam snyam pa'i 'gyod pa yang mi 'byung la/le'u gsum pa dang bzhi par sdom pa bsrung ba'i thabs ji skad bshad pa bzhin du bsrung ba'i phyir/ legs par ma bshags sam snyam pa'i 'gyod pa yang mi 'byung zhing res 'ga' ltung ba 'byung yang le'u gnyis par sdug pa rnam par sbyong ba'i thabs ji skad bshad pa dang /le'u gsum par nyes pa byung ba re re zhing / byang ba la sogs pa ji skad bshad pa bzhin du/ sdig pa rnam par sbyang ba'i phyir ltung ba byung ba legs par ma bshags sam snyam pa'i 'gyod pa yang mi 'byung ba'i phyir dang / gnod sems spang ba ni le'u lnga pa las bshad zin pa'i phyir dang /the tshom spang ba ni le'u brgyad pa las ston par 'gyur ba'i phyir 'dir ma bshad do/ /da ni bsam gtan gyi sgrib pa ma spangs pa'i nyes dmigs bstan pa'i sgo nas/ sgrib pa gnyis spang ba'i don du bsam gtan gyi sgrib pa lnga spangs te/sems mnyam par gzhag par bya bar gdams pa'i phyir/ rgyal sras zhes bya ba la sogs pa smos so/ /bstan bcos kyi ming gdags pa ni snga ma bzhin no/ /bsam gtan bstan pa zhes bya ba ste/ le'u bdun pa'i bshad pa rdzogs so// // da ni sems mnyam par gzhag pa'i gang zag des go 'phang khyad par can thob par bya ba'i don du/ shes rab bskyed par bya ba'i phyir le'u brgyad pa gsungs te/ de la gang la brten te bskyed par bya zhe na/ bsam gtan gyi le'ur zhi gnas kyi tshogs ga la gnas te/ zhi gnas bsgom par bya ba nyid du bsdogs pa 'di dag thams cad kyang gang gi don du bsdogs she na/bdag dang gzhan gyi rgyud la shes rab skyed pa'i don du bsdogs te/ gang du bsam gtan bstan pa'i le'ur/ zhi gnas rab tu ldan pa'i lhag mthong gis/ /nyon mongs rnam par 'joms par shes byas nas//thog mar zhi gnas btsal bya zhes/ de skad du bsdogs pa de bas na bdag dang gzhan gyi rgyud la mya ngan las 'das pa dang bde ba 'dod pas/ de thob par bya ba'i don du shes rab bskyed par bya'o zhes bya ba'i don to/ /de la mya ngan las 'das pa zhes bya ba ni bdag gi don to//bde ba ni gzhan gyi don to/ /yang na mya ngan las 'das pa ni spangs pa'o/ /bde ba ni ye shes so/ /mya ngan las 'das pa ni nges par legs pa'o/ /bde ba ni mngon par mtho ba'o/ /de ltar bsam gtan ldan pa des mya ngan las 'das pa dang bde ba thob par bya ba'i don du shes rab gang bskyed par bya snyam pa la/don dam pa dang ni zhes bya ba la sogs pa smos te/ 'dis ni yul bden pa gnyis la dmigs pa'i shes rab de bskyed par bya'o zhes bstan te/ bshad ces bya ba ni de bzhin gshegs pas so zhes bya ba ni tshig gi lhag ma'o/ / de dag gi so so'i mtshan nyid ji lta bu yin snyam pa la don dam pa zhes bya ba la sogs pa smos te/ don dam blo'i spyod yul min/ /zhes bya ba la/ blo zhes bya ba ni mtshon pa tsam du zad kyi/ sgra'i yul ma yin pa yang shes par bya ste/ ji skad du mdo las don dam pa'i bden pa ni gang la sems rgyu ba yang med na/yi ge rnams lta smos kyang ci dgos zhes 'byung ba dang / yang lha'i bu don dam par don dam pa'i bden pa ni tha snyad thams cad las yang dag par 'das te/ ma skyes pa ma 'gags pa brjod pa dang bral ba shes pa dang / shes par bya ba dang bral ba'i phyir ro zhes gsungs pa'i phyir ro//'on te don dam pa ji ltar blo'i spyod yul ma yin snyam pa la/ don dam par ni rig pa ji lta ba bzhin du yin la/ rig pas dpyad na dngos po gang yang ma grub ste/ ji skad du mdo las/ blo yis rnam par gzhigs na ni/ /gzhan dbang med cing brtag pa'ang med//ces bya ba la sogs pa gsungs pa dang / 'phags pa klu sgrub kyis kyang / gang ci brjod pa thams cad ni/ /ngo bo nyid kyis stong rig bya/ /stong pa zhes bya de yang stong / /'di ltar mi stong yod ma yin/ /zhes gsungs pa dang /bden pa gnyis las/ de nyid phyir na de stong min/ /zhes bya ba la sogs pa gsungs pas gang ltar yang ma grub pa'i phyir/ rig pas dpyad na blo dang sgras ji ltar yul du byar med do/ /yang na don dam pa zhes bya ba ni/ gzhan gyi dbang gi mtshan nyid la/ sgro btags pa'i spros pa rnam par chad pa tsam du zad pas/de la ni blo dang sgras ji ltar yang yul du byar med na/ dgag pa tsam ni ci yang ma yin pa'i phyir ro/ de las bzlog pa/ blo dang sgra ni kun rdzob yin/ /zhes bya ba ni 'phags pa'i bden pa gnyis bstan pa las/ ji skad du lha'i bu gal te/don dam par ni don dam pa'i bden pa lus dang ngag dang yid kyi yul gyi ngo bor gyur na ni/ de don dam pa'i bden pa zhes bya ba'i grangs su mi 'gro'o/ /de kun rdzob kyi bden pa nyid kho nar 'gyur ro/ /lha'i bu don dam pa'i bden pa ni rnam pa thams cad mkhyen pa'i ye shes rnam pa thams cad kyi mchog dang ldan pa'i yul las kyang yang dag par 'das pa yin no zhes gsungs pa dang /'phags pa blo gros mi zad pas bstan pa'i mdo las kyang / de la kun rdzob kyi bden pa gang zhe na/ ji snyed 'jig rten gyi tha snyad gdags pa dang / yi ge dang skad dang brdas bstan pa dag go zhes bya ba ji skad gsungs pa lta bu ste/kun rdzob ni ji ltar snang bzhin yin pa'i phyir ro snyam du bsam pa'o/ /zhib tu ni dbu ma'i bstan bcos gzhan dag las kyang shes par bya ba yin pa'i phyir/ 'dir rgya ma bskyed do/ /da ni dngos po bdag nyid la log par rtog pa bsal ba'i sgo nas dngos po'i bdag nyid dpyad par bya bar mdor bstan pa'i phyir de la zhes bya ba smos te/dngos po'i bdag nyid bstan ma thag pa de la rnal 'byor pa dang /phal pa dang mthun pas phal pa ste/ mdo sde pa la sogs pa 'jig rten pa rnam pa gnyis kyi go rims bzhin du/gnyis med pa'i tshul dang / gnyis kyi tshul du mthong ste/ de la rnal 'byor spyod pas 'jig rten phal pa'i 'dod pa sun 'byin par byed cing 'jig rten phal pa las gong mar gyur pa 'byor pa'i 'dod pa de ni/ de las gong mar gyur pa dbu ma pa'i lta ba'i khyad par gyis sun 'byin par byed pas de'i phyir mtshan nyid la dpyad par bya'o zhes bya ba'i tha tshig go//da ni re zhig de nyid rgyas par bshad pa'i dbang du byas nas 'on te 'jig rten phal pa'i 'dod pa ni/ gang de ltar rnal 'byor spyod pa pas ni ji ltar sun 'byin par byed ce na/ 'jig rten phal pa'i zhes bya ba la sogs pa smos te/ 'jig rten phal pa mdo sde pa la sogs so/ /dngos mthong la zhes bya ba ni gzugs la sogs pa'o/ /yang dag nyid du'ang zhes bya ba ni ji ltar snang ba bzhin du phyi rol gyi don nyid du yang dag par ro/ /sgyu ma bzhin du zhes bya ba ni de ltar snang bar ro//ji ltar rtsod ce na/ gzugs la sogs zhes bya ba smos te/ 'di skad bstan te/ gzugs la sogs pa ni spros pa'i bag chags yongs su smin pa'i dbang gis mngon sum nyid du 'khrul nas de snang ba'i tshad mas 'grub pa ma yin te/ de grub par byed pa'i rigs pa med pa'i phyir dang /gcig dang du ma la sogs pa'i tshad mas gnod pa'i phyir/ dper na mi gtsang ba la gtsang bar 'dzin pa bzhin no zhes bstan pa yin no/ /'on te de ltar na 'phags pa don rnam par nges pa'i chos kyi rnam grangs las/ gzugs gang zhe na/ gzugs gang yin pa ci'ang rung ste/de dag thams cad 'byung ba chen po bzhi dag rgyur byas pa'o zhes gsungs pa'i lung dang 'gal lo zhe na/ 'jig rten gzud par zhes bya ba la sogs pa smos te/ 'di skad du 'dul bar 'gyur ba'i skye bo dag gzud par bya ba'i ched du bstan pa yin gyi dngos su yod pa'i phyir bstan pa ni ma yin te/des na 'gal ba med do zhes bstan to/ /ci de lta bu'i dpe mthong ngam zhe na/ sgyu ma lta bu'i zhes bya ba la sogs pa smos te/ ji skad du 'phags pa shes rab kyi pha rol tu phyin pa las/ rab 'byor 'di lta ste/ dper na de bzhin gshegs pa shin tu zhi ba zhes bya bas lung bstan par bya ba'i sems can 'ga' yang ma gzigs nas sprul pa zhig sprul te/mya ngan las 'das so/ /de nas sprul pa des sangs rgyas kyi bya ba byas te/ byang chub sems dpa' dag bla na med pa'i byang chub tu lung bstan te/ yongs su mya ngan las 'das par gyur to zhes gsungs pa'i tshul gyis/gdul bya'i rgyud la bsod nams bskyed pa'i phyir ro/ /sprul pa sgyu ma lta bu bstan pa bzhin no/ /de ltar 'jig rten phal pa'i 'dod pa rnal 'byor spyod pas ji ltar sun 'byin pa'i tshul bstan nas/ da ni rnal 'byor spyod pa'i 'dod pa dbu ma pas ji ltar sun 'byin pa bstan pa'i phyir/gal te sems can zhes bya ba la sogs pa smos pa ste/ gal te sems can 'di dag kyang don dam par rang bzhin med pa yin na/ sgyu ma bzhin du shi ba'i rjes la yang / mi skye bar thal bar 'gyur ba zhig na de lta ma yin te/skye ba'i phyir don dam par yod do zhe na/ thams cad kun rdzob yin pas kun rdzob thams cad 'khor ba yin pa'i nges pa med pa'i phyir rkyen rnams rgyu ni zhes bya ba la sogs pa smos te/ gang gi tshe gnyen po ye shes ma skyes pas rgyu las dang nyon mongs pa ma log pa'i tshe ni 'bras bu sdug bsngal gyi phung po mi ldog ste/'khor bar 'gyur ba de'i kun rdzob de ni 'khor ba yang yin la gang gi tshe gnyen po skyes par mi mthun pa'i phyogs las dang nyon mongs pa 'gags te 'bras bu sdug bsngal gyi phung po mi 'byung ste/ mi 'khor bar 'gyur ba de'i tshe ni/ skye 'gag gi mtshan nyid kun rdzob yin yang 'khor ba ma yin pas nges pa med pa'i zhes bya ba'i don to//yang rnal 'byor pa dag na re/ gang tshe zhes bya ba la sogs pa smos te/ 'di skad du khyod kyis gong du/ don dam blo yi spyod yul min/ /blo dang sgra ni kun rdzob yin/ /zhes smras pas don dam pa sems nyid kyang ngo bo med pa nyid yin la/yul ni ji ltar snang ba bzhin du yod do zhes khas blangs pa yin no/ /de ni dam bcas pa la phan tshun 'gal ba'i skyon chags te/ ji ltar zhe na/ gang gi tshe shes pa nyid kyang don dam par med pa yin na ni/ yul sgyu ma lta bu de shes pa gang la snang nas ji ltar snang ba nyid du yod/'on te yul ji ltar snang ba bzhin du yod na ni de'i tshe de gang la snang ba'i shes pa nyid kyang yod pas shes pa don dam pa nyid du mi 'thad do zhe na nyes pa 'di ni khyod la yang mtshungs so snyam nas/ gang tshe zhes bya ba la sogs pa smos te/ khyod rnal 'byor spyod pa dag chos thams cad sems tsam nyid du khas len pa de'i tshe/yul sgyu ma tsam yang med pa'i phyir/ shes pa don dam par yod par yang mi 'thad pa la yang gang gi tshe shes pa don dam par yod pa yin na ni/ de'i tshe yul sgyu ma tsam yang med pa mi 'thad de/ shes pa ni shes bya la ltos pa yin pa'i phyir khyed la de yang nges pa nyid du bstan pa'i phyir/ji srid ces bya ba la sogs pa smos te/ dper na sgyu ma'i skyes bu yang / rkyen tshogs pa'i dbang gis don dam par med kyang snga ma 'gags pa'i rjes la yang skye ba de bzhin du 'dir yang de dang 'dra bas skye ba'i phyir yang dag par yod ces bya ba de ni ma nges pa'i don to snyam du bsam pa nyid do//'o na de ltar don dam par ngo bo nyid med pa yin na/ de'i tshe lo brgya'am stong la sogs par yun ring du gnas par mi rung ba zhig na/ da ltar ni sems can zhes bya ba'i dngos po ni yun ring du gnas pa nyid kyi phyir don dam par yod do zhe na/ de yang ma nges pa nyid du bstan pa'i phyir rgyun ring tsam gyis zhes bya ba la sogs pa smos te/res 'ga' sgyu ma'i skyes bu la yang sman dang sngags la sogs pa'i stobs kyis yun ring du gnas pa srid pa'i phyir des na yun ring du gnas pa nyid kyi phyir don dam par yod ces bya ba de yang ma nyes pa'i skyon chags pa nyid do snyam du bsams pa'o//'on te de ltar rang bzhin med pa nyid yin na sgyu ma'i skyes bu bzhin du srog bcad pas sdig mi 'byung ba la thal bar 'gyur ba zhig na/ sems can zhes bya ba'i dngos po 'di ni srog bcad pa las sdig 'byung ba'i phyir don dam par yod do zhe na/de yang ma nges pa nyid du bstan pa'i phyir/ sgyu ma'i skyes bu zhes bya ba la sogs pa smos te/ 'di snyam du sdig pa 'byung ba'i phyir/ don dam par yod pa ni ma nges kyi/ 'o na ci zhe na don dam par med kyang kun rdzob tu srog yod pa'i phyir de bsad pa dang ma bsad pa'i rgyus ci rigs par phan gnod 'byung ba yin pas/de bas na de bsad pa'i rgyus sdig pa 'byung ba yin zhes bsams pa'o/ /'o na de ltar sems can rnams sems yod pa'i phyir don dam par yod pa yin gyi/ gal te don dam par med pa nyid yin na ni/ sems nyid kyang 'byung du mi rung ste/ dper na sgyu ma'i skyes bu bzhin no zhe na/ don dam par med kyang rkyen tshogs pa'i dbang gis kun rdzob tu sems 'byung bar mi 'gal te/ dper na sgyu ma de nyid don dam par med kyang rkyen tshogs pa'i dbang gis rta dang glang po la sogs pa 'bras bu mi 'dra ba sna tshogs pa 'byung ba lta bu yin pas/de bas na khyod kyi sems can dang ldan par 'byung ba'i phyir/ don dam par yod ces bya ba de yang ma nges pa nyid do snyam du bsams nas/ sngags la sogs pa zhes bya ba la sogs pa smos te/ 'di skad bstan te/ sgyu ma'i rgyu rkyen sngags la sogs pa la nus pa med pa'i phyir sems dang mi ldan pa 'byung ba yin gyi/don dam par med pa'i phyir ni ma yin la/ sems can rnams la ni rgyu rkyen la nus pa yod pas/ sems dang ldan par 'byung ba yin gyi/ don dam par yod pa'i phyir ni 'byung ba ma yin te/ de bas na ma nges pa nyid do zhes bya ba'i don to//'on te sems can rnams la don dam par med kyang sems 'byung na ni/ de'i tshe khyad par med pa de bzhin du sgyu ma la yang ci'i phyir mi 'byung zhe na/ rgyu rkyen gyi nus pa mi 'dra ba'i phyir te/ de bas na sna tshogs rkyen las zhes bya ba la smos te/ gal te rgyu rkyen gcig gis 'bras bu mtha' dag skyed nus pa yin na ni/de'i tshe sgyu ma la yang sems 'byung bar 'gyur ba zhig na/ de mi srid pa'i phyir ro zhes bya ba'i don to/ /gzhan gyi gal te zhes bya ba la sogs pa smos te/ yong lugs kyi don dam pa ni mya ngan las 'das pa yin zhing bzlog nas kun rdzob ni 'khor ba nyid ma yin nam/gang gi tshe khyed dbu ma pas ji skad bshad pa ltar don dam par ni skye 'gag thams cad dang bral ba yin zhing bzlog nas/ skye 'gag gi mtshan nyid thams cad ni kun rdzob yin par grub pa de lta na ni/ de'i tshe sangs rgyas kyang gnyen po skye ba dang mi mthun pa'i phyogs 'gags pa'i mtshan nyid kyi kun rdzob yin pas 'khor ba nyid du thal bar 'gyur ba'i phyir/byang chub kyi spyod pa don med par 'gyur ro zhes pa/ nges pa med de skye 'gag phan tshun 'gal zhing skyon 'di 'byung ba yin gyi/ gang gi tshe kho bo la ni shes pa don dam par med kyang sgyu ma tsam du gnas pa de la/yul sgyu ma de lta bu snang ba'i phyir nyes pa med do zhes bya ba'i tha tshig go/ /gzhan gyi phan tshun 'gal ba'i nyes pa de nyid las ma grol ba nyid du bsgrub pa'i phyir/ gang tshe sems nyid ces bya ba la sogs pa smos te/ de ltar yul dang sems gnyi ga sgyu ma nyid du khas len na ni/gnyi ga yang don dam par rang bzhin med pa'i phyir/ gang zhig gang la snang ste/ de lta bas na yul ji ltar snang ba bzhin du yod pa shin tu yang mi 'thad pas/ phan tshun 'gal ba'i nyes pa so na gnas la/ kho bo cag ni yul sgyu ma tsam 'di med kyang rang rig pa'i sgo nas shes pa nyid du khas len pas dam bcas pa phan tshun 'gal ba'i nyes pa mi mtshungs so zhe na/slob dpon gyis nyes pa de nyid so na gnas par sgrub pa'i phyir/ ral gri so ni zhes bya ba la sogs pa smos te/ ji ltar ral gri'i so de nyid la gcad par bya ba dang gcod par byed pa gnyis med pa'i phyir/rang gis rang mi gcod pa bzhin du shes pa'i ngo bo nyid de yang rig bya dang rig byed gnyis med pa'i phyir/ rang gis rang rig pa mi 'thad de/ de bas na yul khas mi len pa'i phyir/ shes pa don dam par yod pa nyid du mi 'thad pa'i nyes pa so na gnas la/gang gi tshe sgyu ma lta bu zhes bya ba 'dis ni ri bong gi rwa bzhin du thams cad du med pa'i don ni ma yin gyi/ snang du zin kyang don dam par med pa'i don yin pas/ de bas na yul dang shes par gnyi ga don dam par med kyang snang tshod tsam du yod pa yin pa'i phyir yul sgyu ma lta bu de la ji lta ba bzhin du yod pas/nyes pa so na gnas pa ma yin no zhes bya ba'i don to/ /yang gzhan gyis zhes pa gcig po de la rig bya dang rig byed gnyis kyi bdag nyid ma grub kyang / rang rig pa nyid du gzhung gzugs pa'i phyir/ gal te mar me zhes bya ba la sogs pa smos te/ji ltar mar me rang gi ngo bo la rang gsal bar bya ba dang / gsal bar byed pa gnyis ma grub kyang / gsal bar byed pa'i rkyen nyi ma la sogs pa gzhan la mi ltos par gsal ba'i rang bzhin yin pa'i phyir rang gis rang gsal bar byed pa de bzhin du/shes pa gsal bar yang rig par bya ba dang / rig par byed pa gnyis med kyang / rig byed gzhan la mi ltos par rig pa'i rang bzhin yin pa'i tshul gyis rang rig pa yin pa'i phyir/ yul sgyu ma tsam med du zin kyang shes pa don dam par yod pa 'gal ba med do zhe na/ slob dpon gyis dpe nyid ma grub pa'i sgo nas/ de mi 'thad par sgrub pa'i phyir/ mar me gsal bar byed pa ma yin zhes bya ba la sogs pa smos te/ gal te mar me de gsal ba'i rang bzhin du khas len na ni/ de'i tshe rang gis gsal bar byed pa shin tu yang mi 'thad de/ ci'i phyir zhe na/rang gis rang gsal bar bya mi dgos pa'i phyir te/ ji ltar zhe na/ gsal ba'i rang bzhin yin pa'i phyir mun pas bsgribs pa'i mtshan nyid kyi mi gsal ba med pa la/ de nyid kyi phyir rang gis rang gsal bar bya mi dgos pas/ rang gis rang gsal bar byed pa ma yin pa bzhin du/'dir shes pa yang rig pa'i rang bzhin yin pa'i phyir/ ma rig pa'i cha shas med la/ de nyid kyi phyir rang gis rang rig par bya mi dgos pas rang gis rang rig par byed pa ma yin te/ de bas na rig pa'i rang bzhin yin pa'i phyir shes pa rang gis rang rig par byed do zhes bya ba ni khyod kyi gtan tshigs 'di la 'gal ba'i skyon chags pa nyid do zhes bya ba'i don to//yan lag gi don brjod par bya ste/ gsal bar byed pa ma yin zhes bya ba ni/ rang gis rang gsal bar byed pa ma yin zhes bya ba'i don to/ /gsal bar bya mi dgos pa'i phyir ro/ /de nyid ci'i phyir zhe na/'di ltar mun gyis bsgribs pa'i mtshan nyid kyis mi gsal ba med pa'i phyir te/ de gsal ba'i rang bzhin yin no zhes bya ba'i tha tshig go/ /sngon po dag ni mthun pa'i dpe ste/ de bzhin du bai DUr+ya bzhin no/ /shel lta bu zhes bya ba ni sngon po de nyid kyi mi mthun pa'i dpe ste/ji ltar shel ni rang bzhin gyis sngon po ma yin pa'i phyir/ sngon po ma yin pa'i rkyen bai DUr+ya la sogs pa la ltos pa yin la/ bai DUr+ya sngon po nyid ni sngon po'i rgyu la mi ltos te/ ci'i phyir zhe na/ dang po nas sngon po nyid du 'dug pa yin pa'i phyir de lta bu'i bai DUr+ya sngon po de rang la rang gis sngon por byed de/sngon por bya mi dgos pa'i phyir rang la sngon bzhin no zhes bya ba'i tha tshig go/ /yang gzhan gyis shes pa rang rig pa'i bdag nyid du bsgrubs pa'i phyir/ rkyen gzhan zhes bya ba la sogs pa smos te/ de ltar rang rig pa'i rang bzhin yin pa'i phyir rang rig par byed ces bya ba mi 'thad du zin kyang /yul gzugs dang mig gi dbang po la sogs pa rkyen gzhan gyi stobs kyis shes pa de rang rig par byed do zhe na/ khyed kyi lugs kyis chos thams cad sems tsam du 'dus pa yin pas sems las ma gtogs rkyen gzhan nyid ma bsgrubs pa'i phyir/rkyen gzhan gyi stobs kyis kyang shes pa de rang rig par byed pa nyid du mi 'thad do zhes bstan pa'i phyir/ gzugs dang zhes bya ba la sogs pa smos so/ /de ltar gnod pa byed pa'i tshad ma'i sgo nas shes pa don dam par yod pa nyid mi 'thad par bsgrubs nas da ni shes pa don dam par yod pa la sgrub par byed pa'i tshad ma med par bstan pa'i phyir/mar me zhes bya ba la sogs pa smos te/ mar me gsal bar byed pa yin par ni dbang po'i mngon sum gyi blos nyams su myong ba'i phyir/ khas len par rigs na/ shes pa rang gis rang gsal bar byed pa mngon sum du tshad ma gang gis kyang ma grub pa'i phyir rtog pa dang ldan pa rnams kyis khas blangs par mi rigs so snyam du bsam pa ste/ci'i phyir zhe na/ rtog pa dang ldan pa rnams kyis khas len pa ni/ sgrub par byed pa'i tshad mas grub pa'i phyir ro zhes bya ba'i don to//'on te mngon sum gyis ji ltar ma grub snyam pa la/ re zhig yid dang dbang po'i mngon sum gyis ni mi grub ste/ de gnyis kyi yul ni gzugs dang sgra la sogs pa gzugs can gyi skye mched lnga yin pa'i phyir ro/ /rang rig pa'i mngon sum gyis kyang mi 'grub ste/de nyid ni gzod dpyod pa'i skabs yin pa'i phyir dang / rnal 'byor gyis mngon sum gyis kyang mi 'grub ste/ tshu rol mthong ba rnams la rnal 'byor gyis tha snyad mi 'dogs pa'i phyir ro/ /de bas na rang gis rang gsal bar byed kyang rung mi byed kyang rung ste/mngon sum gyi tshad mas ma grub pa'i phyir/ dam bcas kyang mi 'grub bo zhes bya ba'i tha tshig go/ /gal te mngon sum gyis ma grub kyang 'bras bu'i rtags las skyes pa'i rjes su dpag pas 'grub bo snyam nas/ gal te rang rig ces bya ba la sogs pa smras te/gal te bde ba la sogs pa'i nyams su myong ba'i rang rig pa med na phyis kyang dran pa skye ba'i rang rig pa zhig yod la rjes su dpag pas 'grub bo snyam pa la/ don dran pa zhes bya ba la sogs pa smos te/ dran pa'i shes pa skye ba'i sgo nas rang rig pa'i shes pa don dam pa zhig sgrub mi dgos te/gong du ji skad bshad pa'i tshul gyis rang rig pa don dam pa de ni grub pa'i phyir ro snyam du bsam pa'o/ /'on te rang rig pa don dam pa de yod pa de nyid du ma grub pa ni phyis dran pa'i shes pa skye ba mi 'thad do zhe na/ don dam pa med kyang rang rig pa kun rdzob tu yod pa'i dbang gis dran pa'i shes pa skye ba'i phyir de dran no zhes gsungs so//'on te kun rdzob tu yod pa nyid du yang mi 'thad do/ /rang bzhin med par khas len pa'i phyir ro zhe na/ 'di ltar zhes bya ba la sogs pa smos te/ mthong ba dang thos pa la sogs pa kun rdzob pa ni 'dir mi 'gog pa'i phyir dang /'o na 'dir ci zhig 'gog snyam pa la 'dir ni zhes bya ba la sogs pa smos te/ 'dir ni sdug bsngal thams cad 'byung ba'i rgyu dngos por zhen pa dgag pa'i phyir rang bzhin 'gog go snyam du bsam pa'o/ /da ni yul bden pa gnyis la dmigs pa'i stong pa nyid kyi phyir rnal 'byor bsgom par bya ba bstan pa'i phyir/sgyu ma lta bu zhes bya ba la sogs pa dri ba'i tshig bkod de/ gzhan dag 'di snyam du stong pa nyid du shes pa ni sgrib pa spong ba'i rgyu ma yin pa'i phyir rtog pa dang ldan pa rnams kyis bsgom par mi bya ste/ dper na sgyu ma mkhan la sogs pa bzhin no snyam du sems na/de byed pa'i zhes bya ba la sogs pa smos te/ yang zhen pa 'byung ba'i rgyu ni gnyis te/ nang gi tshul bzhin ma yin pa yid la byed pa ma spangs pa phyi rol na brtag par bya ba'i yul nye bar gyur pa yin pa las sgyu ma mkhan la ni de gnyis ka dang ldan pa'i phyir re zhig ma brtags pa'i tshe zhen pa skye ba ni rigs pa yin na gang gi tshe/rnal 'byor pa chen po bskal pa grangs med pa gsum gyi bar du stong pa nyid la goms par byas pas ni/ dngos por zhen pa'i bag chags spong bas/ chos thams cad lag mthil du skyu ru ra'i 'bru bzhag pa bzhin du gzigs kyang zhen pa mi mnga' ba'i phyir nyon mongs pa mi 'byung bas/de bas na sgrib pa spong ba'i rgyu yin pa'i phyir stong pa nyid kyi rnal 'byor bsgom par bya'o zhes bya ba'i don to/ /'o na stong pa nyid kyi rnal 'byor ji ltar bsgom par bya snyam pa la/ gang tshe zhes bya ba la sogs pa smos te/re zhig gcig dang du ma la sogs pa dang bral ba'i spyod pa'i gang gi tshe/ gzugs la sogs pa'i dngos po gang zhig med do zhes brtag cing dgag par bya ba'i dngos po yod pa cung zad kyang ma rnyed pa'i dus de'i tshe yod pa nyid du mngon par zhen pa mi 'byung la/ de ltar dgag bya ma grub pa nyid kyis bkag pa yang ma grub par shes pa'i tshe med do zhes bya bar yang mngon par zhen pa med pa'i phyir rtog par 'gyur ro//de ltar gang gi tshe dngos po dang dngos po med pa gnyi ga rnal 'byor pa'i blo'i mdun na mi gnas te/ gzung ba'i cha las mi ldan pa'i dus de'i tshe/rnam pa gzhan gsum pa ni med pa'i phyir/ cir yang dmigs pa med pa'i sgo nas/ rtog pa thams cad rab tu zhi bar 'gyur ro zhes bya ba'i don to/ /'on te de ltar rtog pa mi mnga' na gdul bya rnams la sangs rgyas kyi gzugs kyi skur snang ba mi 'thad do zhe na/ rtog pa mi mnga' gdul bya'i bsod nams kyis yid bzhin nor bu dang / dpag bsam gyi shing bzhin du snang ba la 'gal ba med do snyam du bsams nas/ yid bzhin nor bu zhes bya ba la sogs pa gsungs so/ /'o na de ltar rtog pa mi mnga' ba nyid yin na gdul bya rnams la sangs rgyas kyis 'gal lo zhe na/sngar byang chub sems dpa'i gnas skabs kyi rtog pa'i 'phen shugs kyis sangs rgyas nyid la rtog pa mnga' yang sems can gyi don mdzad pa mi 'gal te/ dper na nam mkha' lding gi mchod sdong dang 'dra'o snyam nas/mchod sdong grub pas zhes bya ba smos te/ 'di dag sangs rgyas kyi sa la rtog pa med pa ston pa yin gyi sku dang / ye shes nyid kyang mi mnga' bar ston pa ma yin pa'i phyir don yod par smra ba'i dbu ma'i lugs la de dag ji ltar snang ba bzhin du mi 'gal ba'i phyir dang / rmi lam gyi don la sogs pa yang ji ltar snang ba bzhin khas len pa'i phyir te/de bas na dpe yid bzhin nor bu dang / dpag bsam gyi shing dang / mchod sdong la sogs pa yang rtog pa med pa bzhin no/ /de dang de ltar snang ba dang / de dang de ltar don byed pa yin gyi/ de dag rang nyid kyang med pa ni ma yin pa bzhin no/ /de bas na la la dag na re/ 'di 'gog par smra ba'i dbu ma yin zhes zer ro zhes grags te/ bdag gis ni ma mthong ngo / /des ni sgrib pa spong ba'i rgyu nyid du bstan nas/ da ni thams cad mkhyen pa'i ye shes thob par byed pa'i rgyu yin pa'i phyir stong pa nyid kyi rnal 'byor bsgom par bya ba nyid du bstan pa/nyon mongs pa dang zhes bya ba la sogs pa smos so/ /de ni rang gi bde ba bye brag tu smra ba dag na re/ theg pa chen po ni sangs rgyas thob par byed pa'i lam nyid du dge slong klu sgrub la sogs pas bshad par zad kyi/sangs rgyas kyis gsungs pa ma yin pas/ de'i phyir bsgom par mi bya'o zhes zer ba dag ni log par rtog pa dgag pa'i phyir lam 'di nyid kyis zhes bya ba la sogs pa smos te/ man ngag brgyud pas zhes bya ba ni/ bcom ldan 'das kyis 'phags pa 'od srungs chen po la gtad/des kun dga' bo la gtad/ des sha na'i gos can la gtad/ des u pa gup+ta la gtad/ des mi bya ka la gtad ces bya ba la sogs pa gsungs so/ /da ni mtshungs pa nyid du bsgrub pa'i phyir khyed kyi gzhung gis zhes bya ba la sogs pa gsungs te/de la ma yin na nyan thos pa khyed gzhung gis byang chub thob par byed pa ni sangs rgyas kyi bka' nyid du ji ltar 'grub ste/ mtshungs so snyam du bsam pa'o/ /de la yid ches te 'grub na zhes bya ba ni pha rol po dag 'di skad du kho bo cag gzhung de la sangs rgyas kyi bka' nyid du yid ches pa'i man ngag brgyud pas grub po snyam nas/theg pa chen po la yang yid ches kyi zhes bya ba theg pa chen po la yang sangs rgyas kyi bka' nyid du yid ches pa man ngag brgyud pa las grub pa la grub pa nyid du shes par gyis shig ces bya ba'i don to/ /gnyi ga 'dod pa bden na ni zhes bya ba ni/gal te pha rol 'di snyam du sangs rgyas kyi bka' nyid du yid ches par gzhag pa la ni khyed dang 'u bu cag gnyis kas 'dod pa yin na/ sangs rgyas kyi bka' nyid bden pa nyid du/ theg pa chen po ni kho bo cag gis mi 'dod pa'i phyir sangs rgyas kyi bka' nyid du bden pa ma yin no zhe na/'o na ni de'i tshe rig byed rnams kyang bden par 'gyur zhes pa ni rig byed kyi tshig rnams kyang dug la sogs pa zhi bar byed pa'i nus pa dang ldan pas gnyis kas 'dod pa'i phyir sangs rgyas kyi bka' nyid du thal bar 'gyur ba'i phyir/ sangs rgyas kyi bka' nyid du rnam par gzhag pa gnyi ga 'dod pa zhes bya ba nyid ni rigs par 'thad pa ma yin pa zhes bya ba'i don to/ /'on te sangs rgyas kyi bka' nyid du rnam par gzhag pa ni mdo sde la 'jug 'dul ba la snang / mtshan nyid dang mi mthun pa med pa zhes bya ba yin na theg pa chen po ni de lta ma yin te/ji ltar zhe na/ nyan thos kyi theg pa'i lung las ni bsags pa la sogs pa nyid du yod par gsungs la/ theg pa chen po las ni bkag pa'i phyir te/ de lta bas na mdo sde dang 'gal bas sangs rgyas kyi bka' ma yin no zhes bya ba bsams nas/gal te phan tshun 'gal zhe na/ /zhes bya ba smras so/ /'on te de ltar phan tshun mi mthun pa tsam gyis sangs rgyas kyi bka' nyid du mi 'gyur na ni de'i tshe/ 'dul ba la sogs pa dor dgos so zhes bya ba khyed nyan thos kyi lung las kyang phan tshun mi mthun pa'i phyir/sangs rgyas kyi bka' ma yin no zhes dor dgos pa nyid du thal bar 'gyur ro/ /'on te de ni sems can mos pa mi mthun pa rnams dga' bar bya ba'i don du gsungs pa'i phyir na/ mi mthun pa yin yang sangs rgyas kyi bka' nyid du mi 'gal lo zhe na/'o na kho bo cag la yang mtshungs so snyam nas/ sems can mi mthun dgag bya'i phyir gsungs pa/ /zhes bya ba de theg pa chen po'i lung la yang mi 'dod dam/ de yang sems can mos pa mi mthun pa rnams drang bar bya ba'i don du gsungs pa yin pas nyan thos kyi lung mi mthun pa yin yang sangs rgyas kyi bka' nyid du mi 'gal lo zhes bya ba'i don to//de ni mjug bsdu ba'i phyir de ltar zhes bya ba la sogs pa smos so/ /sun 'byin pa zhes bya ba ni sangs rgyas kyi bka' ma yin pa nyid du'o/ /the tshom med par zhes bya ba ni sangs rgyas kyi bka' yin nam ma yin zhes bya ba'i the tshom mo//de ni las dang po pa dag stong pa nyid kyi rnal 'byor bsgom pa la mi skrag par bya'o zhes bstan pa'i phyir/ sdug bsngal bskyed dngos zhes bya ba la sogs pa smos so/ /stong nyid 'jigs pa zhi byed na/ /zhes bya ba ni sdug bsngal zhi bar byed pa'i rgyu yin na zhes bya ba'i don to//da ni gang 'jigs par 'gyur ba'i bdag ces bya ba ma grub pas/ stong pa nyid bsgom par bya ba la 'jigs par mi bya'o zhes bstan pa'i phyir/ bdag ces bya ba la sogs pa smos so/ /bdag gi ltar ma grub ce na/ re zhig gzugs bdag ma yin par bstan pa'i phyir/so dang skra sen zhes bya ba la sogs pa smos te/ de dag ni bdag ma yin te/ bdag dang mtshan nyid mi mthun pa'i phyir te/ ji ltar zhe na/ so la sogs pa de dag ni mi rtag pa du ma yin pa'i phyir dang / bdag ni rtag pa gcig pu yin pa'i phyir ro//gal te de dag yin na ni/ de dag kyang bdag bzhin du rtag pa dang gcig pu nyid du 'gyur ba'am/ yang na ni bdag kyang mi rtag pa du ma nyid du thal bar 'gyur ba'i phyir ro/ /da ni rnam par shes pa'i phung po bdag ma yin par bstan pa'i phyir/rnam kun du rnam shes drug ni bdag ma yin no zhes bya ba smos te/ de dag ni yul gzugs la sogs pa rnams la so sor 'dzin pa yin la/ bdag ni thams cad la 'dzin pa'i phyir/ de dag kyang bdag ma yin no/ /gal te yin na ni de dag kyang bdag bzhin du re res kyang yul thams cad 'dzin par thal bar 'gyur ba'am/yang na ni bdag kyang de bzhin du yul re re la 'dzin gyi thams cad mi 'dzin pa nyid du thal bar 'gyur ba'i phyir ro/ /da ni yid bdag ma yin par bstan pa'i phyir/ gal te yid ni zhes bya ba la sogs pa smos te/ yid ni 'gags ma thag pa yin pas/da ltar med pa yin la/ bdag ni rtag pa yin pas da ltar yod pa'i phyir ro/ /gal te yin na ni/ bdag bzhin du yid kyang da ltar yod par thal bar 'gyur ba'i phyir ro/ /yid kyi mtshan nyid nyams par 'gyur ba'am/ yang na ni yid bzhin du bdag kyang de ltar med pas bdag gi mtshan nyid nyams par 'gyur ba'i phyir ro//da ni ma 'ongs pa'i sems bdag ma yin par bstan pa'i phyir/ 'on te ma 'ongs pa zhes bya ba la sogs pa smos te/ ma 'ongs pa'i sems ma byung bas de ltar med pa yin zhing / bdag ni rtag pas da ltar yod pa'i phyir ro//gal te yin na ni ma 'ongs pa'i sems bzhin bdag kyang da ltar med par thal bar 'gyur ba'am/ yang na bdag bzhin du ma 'ongs pa'i sems da ltar yod pa nyid du thal bar 'gyur ba'i phyir ro/ /da ni de ltar ba'i sems bdag ma yin par bstan pa'i phyir/gal te bum sems zhes bya ba la sogs pa smos te/ gal te da ltar gyi dus su bdag tu 'dzin pa'i sems de bdag yin no zhe na/ mi rung ste/ de ni yul can yin pa'i phyir ro/ /gal te yin na de bdag tu 'dzin pa'i sems yin par mi rung ste/yul gyi ngo bo yin pa'i phyir te/ dper na bum pa yin na bum pa la 'dzin pa'i sems yin par mi rung ba bzhin nam/ bum pa la 'dzin pa'i sems yin na bum pa yin par mi rung ba bzhin no/ /da ni 'das pa'i sems bdag ma yin par bstan pa'i phyir/gal te byung ba sems zhes bya ba la sogs pa smos te/ 'das pa'i sems ni 'gags nas med pa'i phyir dang / bdag ni rtag pa yin pas da ltar yod pa'i phyir ro/ /gal te yin na ni 'das pa'i sems bzhin du bdag kyang 'gags nas med par 'gyur ba'am/yang na ni bdag bzhin du 'das pa'i sems kyang da ltar yod pa nyid du 'gyur bas/ de gnyis kyi so so'i mtshan nyid nyams par 'gyur ba'i phyir ro/ /de ltar rnam par shes pa'i phung po bdag ma yin par bstan nas/ da ni khams bco brgyad bdag ma yin par bstan pa'i phyir/gal te bdag mig ces bya ba la sogs pa smos te/ mig gi khams ni gzugs la sogs pa yongs su 'dzin gyi/ sgra la sogs pa gzhan yongs su mi gcod pa'i phyir dang / bdag ni thams cad 'dzin pa'i phyir ro/ /de lta ma yin gyi mig gi khams bzhin du bdag gis kyang sgra mi thos par 'gyur ba'am/yang na ni bdag bzhin du mig gi khams kyis kyang thams cad 'dzin pa nyid du thal bar 'gyur ba'i phyir ro/ /mig gi khams ji lta ba bzhin du mtshan nyid mi mthun pa'i phyir zhes bya ba sgrub par byed pa'i rigs pa dang / so so'i mtshan nyid nyams par thal bar 'gyur zhes bya ba bzlog na/ gnod pa can gyi tshad mas ci rigs su sbyar bar bya'o/ /da ni tshor ba dang / 'du shes dang mtshungs par ldan pa'i 'du byed kyi phung po ste/ dngos su sems las byung ba rnams bdag ma yin par bstan pa pa'i phyir/de bzhin du bden min zhes bya ba la sogs pa smos te/ bde ba ni bde bar nyams su myong gi /sdug bsngal la sogs pa nyams su mi myong ba'i phyir/ tshor ba bde ba ni bdag ma yin te/ gal te yin na bdag bzhin tshor ba bde bas kyang thams cad nyams su myong bar thal bar 'gyur ba'am/yang na tshor ba bde ba bzhin du bdag gis kyang bde ba 'ba' zhig kyang nyams su myong bar thal bar 'gyur ba'i phyir ro/ /de bzhin du sdug bsngal la sogs pa gzhan dag la ci rigs su sbyar ro/ /da ni skabs kyi don gyis mjug bsdu ba'i phyir/ de ltar bdag tu rung ba zhes bya ba la sogs pa smos so/ /da ni mu stegs grangs can pas bdag sems pa yod pa'i bdag nyid du 'dod pa dang / bye brag gi sems pa med pa bdag nyid du 'dod pa de dag gnyis ka yang sems las ma gtogs pa nyid du khas blangs pa'i phyir/ bdag nyid yin par mi 'thad do zhes bstan pa'i don du sems 'di nyid ni zhes bya ba la sogs pa smos so//da ni bdag grub tu zin kyang rtag pa nyid kyis na las dang 'bras bu ji ltar yang mi 'thad par bstan pa'i phyir/ lus la sogs pa zhes bya ba la sogs pa smos so/ /bdag med kyang dngos po mi rtag pa la las dang 'bras bu mi 'gal bar phyi rol dang nang gi dpe gnyis kyis/go rims bzhin du bstan pa'i phyir sa bon la ni zhes bya ba la sogs pa dang / byis pa'i lus la zhes bya ba la sogs pa smos so/ /da ni lus la sogs pa mi rtag pa yin par bstan pa'i phyir/mngal na gnas zhes bya ba la sogs pa smos so/ /de ltar mi rtag par gyur pa'i tshul bstan pa'i phyir/ dper na zhes bya ba la sogs pa smos so/ /de ltar ni ma grub kyi so so'i rgyud las skye zhing 'jig par bstan pa'i phyir/ de ltar sems can zhes bya ba la sogs pa smos so//sems can med kyang snying rje bya ba mi 'gal bar bstan pa'i phyir/ gal te sems can zhes bya ba la sogs pa smos so/ /dgos pa'i don du zhes bya ba la sogs pa ni tha snyad gdags pa sla ba'i phyir te/ skyes bu lha sbyin zhes bya bar tha snyad ma btags par gzugs dang /tshor ba dang zhes bya ba la sogs pas tha snyad gdags dka' ba'i phyir dang / 'jig rten pa dang mthun par bya ba'i phyir te/ 'jig rten la yang gang zag ces bya ba la sogs par grags kyi gzugs la sogs pa'i chos tsam du ma grags pa'i phyir dang /lung dang mthun par bya ba'i phyir te/ lung las kyang skyes bu gang zag 'di ni khams drug par zhes bya ba la sogs par gsungs kyi gzugs la sogs pa 'di ni zhes bya ba la sogs pa ma gsungs pa'i phyir dang / skyon dang / yon tan tshad gzung ba'i phyir te/ skyes bu gang zag ces bya bar btags na de'i skyon la sogs pa tshad zin par 'gyur gyi/ gzugs la sogs pa 'di ni skyon 'di tsam dang ldan no zhes bya ba brjod na de'i tshad zin par mi 'gyur ba'i phyir ro//ji ltar khyed la zhes bya ba ni/ khyed kyi sems can dang zhes bya ba la sogs par brtags nas/ de snying rje skye ba bzhin du kho bo cag gi gzhung gis gong du bstan pa bzhin du dgos pa rnam pa bzhi'i dbang gis sems can zhes bya ba btags nas snying rje bya bar 'gal ba med do zhes bya ba'i don to//de ltar ji skad bshad pa'i tshul gyis bdag ces bya ba ma grub pa'i phyir/ stong pa nyid du bsgoms pas 'jigs pa yang med la/ de ni bcings pa yang med cing grol bar bya ba'i phyir dag pa la brtson par bya ba ni ma yin gyi/ bdag ma grub kyang bdag tu gzung ba'i gzhi'i sems de bcings pa las grol bar bya ba'i phyir dge ba la brtson par bya'o zhes bstan pa'i don du/ ji ltar chu shing zhes bya ba la sogs pa smos so/ /'on te stong pa nyid kyi rnal 'byor de ji ltar bsgom par bya zhe na/ de bsgom pa'i rim pa bstan pa'i phyir/lus ni rkang pa byin pa min/ /zhes pa la sogs pa gsungs te/ thog mar so sor rtog pa'i shes rab kyis ji lta ba bzhin du gtan la phab nas/ de'i rjes la gtan la phab pa'i don bsgom pa ni bsgom pa'i rim pa yin no//de ltar ma byas na nyes pa ci yod snyam pa la/ dngos po'i mtshan nyid gtan la ma phebs pa'i phyir/ de bsgom pa la 'jug par yang mi 'gyur la/ zhugs kyang the tshom za bar yang 'gyur zhing / de ni sgrib pa spong ba'i gnyen por yang mi 'gyur ba'i phyir te/'phags pa ting nge 'dzin gyi rgyal po las ting nge 'dzin de ni bsgom pa med mod kyi/ de ni bdag tu 'du shes 'jig mi byed/ /de ni nyon mongs phyir zhing rab 'khrugs te/ /lhag spyod 'dir ni ting 'dzin bsgom pa bzhin/ /zhes gsungs pa lta bu'o//'on te so sor rtog pa'i shes rab kyis gtan la phab nas bsgoms na de'i tshe cir 'gyur zhe na/ thog mar bsgom pa la 'jug par 'gyur zhing / zhugs nas the tshom mi za bar yang 'gyur la/ sgrib pa spong ba'i gnyen por 'gyur ba'i sgo nas mya ngan las 'das pa'i rgyur 'gyur ba'i yang phyir te/ji skad du mdo sde nyid las/ gal te chos la bdag med so sor rtog /so sor de brtags gal te bsgom pa ni/ /de ni mya ngan 'bras thob 'bras bu'i rgyu/ /rgyu gzhan gang yin de ni zhir mi 'gyur/ /zhes gsungs pa lta bu'o/ / gal te de ltar yin na de'i tshe gang la ji ltar brtag par bya snyam pa la/ rgyal ba byams pas dbus mtha' las phyin ci log bzhi spang ba dang / bden pa bzhi la 'jug pa'i phyir/ dran pa nye bar gzhag pa bsgom zhes gsungs pas/ lus dang tshor ba dang / sems dang chos la brtag par bya ste/de la dang po lus la brtag pa'i dbang du byas nas lus ni dbang po zhes bya bas ni lus zhes bya ba ste rkang pa la sogs pa de nyid kyi ma yin la gzhan na yang med par bstan te/ ci'i phyir zhe na/ rkang pa la sogs pa de dag ni tha dad pas/ dus ma yin pa'i phyir dang / de nas logs shig na dmigs pa'i rig byar gyur pa las mi dmigs pa'i phyir ro snyam du bsams pa'o/ /da ni lus zhes bya ba de yan lag rnams la cha shas kyis gnas sam bdag nyid thams cad kyis gnas brtag ste/ de la phyogs dang po'i dbang du byas nas cha shas dang bcas pa nyid du thal bar 'gyur ro zhes bstan pa'i phyir/gal te lus 'di zhes bya ba la sogs pa smos so/ /phyogs gnyis pa ltar yin na ni/ lus de nyid du mang po nyid du thal bar 'gyur ro zhes bstan pa'i phyir ro/ /lus ni lag stsogs zhes bya ba la sogs pa smos so//da ni lag pa la sogs pa'i nang dang phyi rol na yang med par bstan pa'i phyir/ lus ni lag sogs nang na gnas/ /zhes bya ba la sogs pa smos te/ cha shas med pa zhes bya ba ni lus gcig gi mtshan nyid de'o/ /cha can gyi nang du 'jug par zhes bya ba ni/yan lag du ma'i nang du 'jug pa ste/ lus ni gcig yin pa'i phyir/ yan lag du ma'i nang du 'jug par mi rung ngo zhes bya ba'i don to/ /'on te de ltar lus med par lus kyi blo ji ltar 'byung snyam pa la/de bas lus med ces bya ba la sogs pa smos so/ /da ni yan lag rnams kyang ma grub par bstan pa'i phyir/ de bzhin sor mo zhes bya ba la sogs pa smos so/ /da ni rdul phra rab ma grub par bstan pa'i phyir/ phyogs cha zhes bya ba la sogs pa smos te/cha med par zhes bya ba ni cha shas kyis gzhigs na med ces bya ba'i don to/ /da ni rdul phra rab bsags pa ma grub par bstan pa'i phyir/ rdul rnams zhes bya ba la sogs pa smos so/ /de ltar lus dran pa nye bar gzhag pa bsgom pa'i thabs bstan nas/da ni bsgoms pa'i phan yon bstan pa'i phyir/ de ltar brtags na zhes bya ba la sogs pa smos te/ rjes su chags pa dang khong khro ba la sogs pa'i nyon mongs pa zhes spong bar 'gyur ro zhes bya ba'i don to/ /da ni tshor ba dran pa nye bar gzhag pa bsgom pa'i thabs dbang du byas nas/sems dang zhes bya ba la sogs pa smos te/ 'dis ni yul myong bar byed pa mi 'thad par bstan to/ /bdag gis zhes bya ba ni rang bzhin nyams su myong bar byed pa nyid mi 'thad par bstan to/ /gzhan gyis kyang ni zhes bya ba la sogs pa ni myong bar byed pa nyid du mi 'thad par bstan to//de ltar tshor ba bdag ces bya ba myong ba'i ngo bo yin la/ de ni myong bar byed pa dang myong bar bya ba dang gnyis las/ gnyi ga mi 'thad par bstan to/ /da ni de ltar bsgom pa'i phan yon bstan pa'i phyir de ltar zhes bya ba la sogs pa smos te/tshor ba ni sred pa skyed pa'i rten byed pa'i las can yin la/ de ltar bde ba la sogs pa'i tshor ba rang bzhin med par shes pas phra ba'am bral ba'am/ rmongs pa'i sred pa mi 'byung ngo zhes bya ba'i don to/ / da ni sems dran pa nye bar gzhag pa bsgom pa'i thabs bstan pa'i phyir/ yid ni dbang po zhes bya ba la sogs pa smos te/ 'dis ni dbang po la sogs pa de dag la yid ces bya ba de gzung du med pa'i phyir/ mi gnas par rang bzhin med par ston to/ sems can zhes bya ba ni sems kyi zhes bya ba'i don to//da ni ma skyes pas rang bzhin med par bstan pa'i phyir/ shes byas ni shes bya la sogs pa smos te/ ci'i phyir shes bya dus mnyam pa la dmigs te/ skyer mi rung snyam pa la/ shes bya'i dus na zhes bya ba la sogs pa smos te/ shes bya dus mnyam pa yod pa'i dus na shes pa de yod na/shes bya dus mnyam pa de shes pa de la phan ci zhig bya ste/ shes pa ma skyes pa'i dus na ni shes bya nyid kyang med pa'i phyir/ gang gi phan byed gang gi tshe shes bya skyes pa'i dus de'i tshe na ni/ shes pa nyid kyang skye bas phan bya mi dgos pa'i phyir ro//'on te gang las kyang ma skyes kyang rang bzhin gyis gnas so snyam na/ rang gi gnas pa 'gal med de/ /ci'i phyir zhe na/ rgyu med pa'i phyir te/ dper na nam mkha'i me tog bzhin zhes bya ba'i don to/ /da ni chos dran pa nye bar gzhag pa bsgom pa'i dbang du byas nas/rkyen rnams zhes bya ba la sogs pa smos te/ rkyen so so ba las mi skye ste/ sa bon la sogs re re las mi 'byung ba'i phyir ro/ /'dus pa las kyang mi skye ste/ gang las mi skye ba de dag nyid 'dus phyir ro/ /'o na gnyis po de las gzhan pa las skyes sam zhe na/ gzhan nas 'ongs pa ma yin la//de ltar ma skyes pa yi phyir/ /gnas pa med la 'gro ba med/ /ces smras so/ /'o na 'jig rten pa rnams kyis ji ste bden par rtogs snyam pa la/ de ni 'khrul nas brtags pa'i phyir/ sgyu ma dang ni zhes bya ba la sogs pa smos so/ /da ni dngos po rnams la don dam par 'gro ba dang 'ong ba dang bral bar bstan pa'i phyir/sgyu mas sprul pa zhes bya ba la sogs pa smos so/ /da ni dngos po rnams yod pa dang med pa gang yang ma skyes pa'i phyir/ dngos po med pa'i mtshan nyid yin pas/ dngos po yod pa nyid du mi 'gyur bar bstan pa'i phyir/ dngos po yod par 'gyur ba la//zhes bya ba la sogs pa smos so/ /'o na gnyi ga yin no snyam pa la/ rang bzhin zhes bya ba la sogs pa smos so/ /da ni mtshan gzhi ma grub pas de'i mtshan nyid ma grub par bstan pa'i phyir de bzhin zhes bya ba la sogs pa smos so/ /da ni mjug bsdu ba'i phyir de bas zhes bya ba la sogs pa smos te/rmi lam zhes bya ba la sogs pa ni/ don dam par med kyang snang ba'i phyir ro/ /snying po med ces bya ba ni brtags nas ma grub pa'i phyir ro/ /da ni de ltar brtags pa'i phan yon 'jig rten gyi chos brgyad la zhen pa dang bral bar 'gyur ba bstan pa'i phyir/ de ltar zhes bya ba la sogs pa smos so/ /yan lag gi don ni go sla'o/ /da ni dngos por zhen pa'i dbang gis sdug bsngal la bde bar gnas par phyin ci log pa dag la gnyen po stong pa nyid bstan pa'i phyir/ rang nyid grol bar bya ba'i thabs la 'bad par bya'o zhes bstan pa ni/ bdag nyid bde bar 'dod rnams ni//zhes bya ba la sogs pa smos so/ /yan lag gi don ni go sla'o/ /bstan bcos kyi ming gi don ni snga ma bzhin no/ /shes rab bstan pa zhes bya ba ste/ le'u brgyad pa'i bshad pa rdzogs so// //da ni las 'bras bu dang bcas par bya ba'i phyir/ dge ba'i rtsa ba bsngo ba dang / rang gi dge ba'i bshes gnyen la drin du gzo ba'i sgo nas phyag 'tshal ba'i phyir le'u dgu pa gsungs te/ bdag gis byang chub spyod pa la/ /zhes bya ba nas/ ston pa bzhin du mchod byed shog /ces bya ba'i bar gyis las 'bras bu dang bcas par bya ba'i phyir dge ba'i rtsa ba bsngo ba bstan to//bstan pa rnyed dang zhes bya ba tshig gnyis kyis bstan pa yun ring du gnas par bya ba'i phyir bsngo ba bstan to/ /gang gi drin gyis dge blo 'byung / /zhes bya ba'i tshigs su bcad pa gcig gis drin gzo ba'i sgo nas rang gi dge ba'i bshes gnyen la phyag 'tshal ba bstan to/ /bstan bcos kyi ming gi don ni le'u dang por bshad pa bzhin no//yongs su bsngo ba zhes bya ba ste le'u dgu pa'i bshad pa rdzogs so// //de dag gi yan lag gi don shin tu go sla ba'i phyir rnam par ma phye'o/ /byang chub sems dpa'i spyod pa la 'jug pa'i rnam par bshad pa'i dka' 'grel rdzogs so// //