CLOSE WINDOW

D3867
བོད་ཡིག

@#/ /rgya gar skad du/ shU n+ya tA sap+ta kabrat+ti / bod skad du/ stong nyid bdun cu pa'i 'grel pa/ sangs rgyas la phyag 'tshal lo/ /mdor bsdus de nyid nges pa'i phyir/ /stong nyid bdun cu gsung ba gang / /de la phyag 'tshal bdun cu par / /bstan don bdag gis yang dag dbye//'dir slob dpon bdag nyid kyis zab pa dang shin tu rgya che ba'i dngos po rnams kyi don rnam par nges pa'i dbu ma'i bstan bcos rnams brtsams pa yod mod kyi/ gzhung dang don dag shin tu mang ba'i phyir dang / shes rab chung ba rnams bya bar nges pa 'di la kun nas chags pa dang ldan pa stong pa nyid bstan pa'i snod du gyur kyang /de thob pa dang / 'dzin pa dang / nye bar sems pas 'jigs pa rnams la slob dpon gyi thugs kyi rgyud shes rab dang thabs dang brtse ba'i rjes su zhugs pa'i phyir tshigs su bcad pa bdun cus kyang khyad par du 'phags pa don grub par gzigs nas/mdor bsdus pas de kho na nyid nges pa'i don du stong pa nyid bdun cu pa zhes bya ba 'di brtsams so/ /de yang mdor bsdus pas de kho na nyid nges pa 'di ni shin tu don chen po yang gnas pa dang skye ba la sogs pa'i sgo nas 'jig rten pas bde blag tu shes par 'gyur ro//gang zhig thog ma med pa nas log pa'i lta ba la goms pa'i phyir byis pa log par rtog pa'i dngos po'i rang gi mtshan nyid kyis gnas pa'i mtshan nyid la gnas pa la chags pa'i rten la dngos por nye bar brtags la/ de'i dbang las byung ba'i 'dod chags la sogs pa'i nyon mongs pa'i dbang phyug gzhan la rag las nas 'jug pa dag las mi byed par gnas pa ni skad cig kyang mi rnyed la/gal te yang las mi byed par 'gyur grang na/ 'di ltar las can rnams kyi las de'i rgyu las byung ba'i 'bras bu med par 'gyur ba'i phyir nges par skye ba ldog par 'gyur na/gang zhig dang drag cing rgyun ring ba'i mchog tu 'dzin pa dang / khon du 'dzin pa dang 'dod chags la sogs pa nyon mongs pa'i dbang phyug gis byin gyis brlabs pa'i skye ba'i skye bo rnams las mi byed par 'gyur zhing / las kyi 'bras bu yang srid 'byung bar mi 'gyur ba 'di lta bu yod pa yang mi srid do/ /de'i phyir gnas pa la sogs pa la mngon par zhen pa ni byis pa rnams kyi don ma yin pa thams cad kyi rgyu'i gtso bo'o/ /gnas pa 'di yang rten cing 'brel bar 'byung ba'i chos nyid dang rjes su 'brel ba dang ldan pas nges par skye ba dang 'jig pa la ltos la/skye ba dang 'jig pa dang mi ldan pa'i nam mkha' la sogs pa ni gnas pa ma yin pa'i phyir ro zhes bya'o/ /des na gnas pa'i sgo nas 'dus byas rnams 'chad par gyur ba'i mtshan nyid dang mtshan gzhi la sogs pa la dpyad pa stong pa nyid la mos pa rnams kyi yid mgu ba'i phyir brjod do//gzhan yang gnas pa la sogs pa'i don 'di rnams 'dus byas kyi mtshan nyid nye bar bstan bzhin pa'am bzung bzhin pa dag mtshan gzhi la ltos pa kho nas gnas la/ mtshan gzhi de yang mtshan nyid med na mtshan nyid la ltos pas mtshan gzhi med pa'i phyir ro//de bzhin phan tshun brten pas bsdus pa'i bdag nyid kyi dngos po mtshan gzhi dang mtshan nyid dag mtshan nyid la ltos par mtshan gzhir gyur pa gang du gnas pa la sogs pa'i mtshan nyid can gyi rten 'grub par ga la 'gyur/gnas pa la sogs pa ma grub pas rnam par shes pa la sogs pa yod pa ma yin la/ rnam par shes pa la sogs pa'i dngos po med na de la ltos nas de las log pa'i dngos po med pa'i rang bzhin ga la yod/ dngos po med par gyur pa la ci rnam par shes pa'i dmigs pa yod dam/dmigs pas bskyed pa'i rnam par shes pa dmigs pa med par skye bar nus pa ma yin no/ /rnam par shes pa skye ba med na 'dod chags la sogs pa rten med pas na med la/ phyin ci log rtsad nas phyung la yod pa ma yin pas las skyed pa'i rgyu ma yin no//las med na de'i 'bras bu ma 'ongs pa'i skye ba mi 'byung ba dang / sngar skyes pa'i nye bar len pa zad pas nyer len med de/ nges par gnas pa la sogs pa la dpyod pa rnams mya ngan las 'das pa'i snod du 'gyur ro/ /ji skad du 'phags pa lhas/ gang gi rnam shes de nyid dang //gnas pa la sogs rnam shes pa/ /de tshe blo ldan nyon mongs la/ /nam yang gnas pa ma yin no/ /zhes gsungs so/ /gal te de ltar gnas pa la sogs pa med na/ de lta na gang zhig 'di ltar phyin ci log gi ma rig pa ma lus pa bral bas mngon par rtogs pa'i sangs rgyas kyis gsungs pa/dge slong dag 'dus byas ni skye bar yang rab tu shes so/ /'gag par yang rab tu shes so/ /gnas pa las gzhan du 'gyur bar yang rab tu shes so zhes so/ /de ji ltar de bzhin gshegs pa'i gsung don med par 'gyur ba ni rigs pa ma yin no//'di dag bcom ldan 'das kyis gsungs pa ni bden la/ 'di dag don med par 'gyur bar rigs pa ma yin te/ rgyu mtshan cis na gang gi phyir/ /gnas pa'i skye 'jig yod med dam/ /dman pa'am mnyam pa'am khyad par can//sangs rgyas 'jig rten snyed dbang gis/ /gsungs kyi yang dag dbang gis min/ /'dir dngos po rnams phyin ci log dang phyin ci ma log pa'i shes pa'i dbang gis bden pa gnyis te/ kun rdzob kyi bden pa dang don dam pa'i bden pa zhes bya bar 'phags pas tha snyad mdzad la /'phags pa 'ba' zhig kho na bden pa gnyis rnam par 'jog par mdzad pa ma yin te/ 'jig rten pa 'jig rten gyi tha snyad la mkhas pa rnams kyang bden pa gnyis tha snyad byed do/ /'di ltar bden pa'i don ni mi snang la sgro btags pa'i don rigs par tha snyad byed pa la 'di ni kun rdzob pa'o zhes tha snyad byed do//gang du bden pa'i don mi snang ba ma yin la sgro ma btags pa'i don rig pa'i tha snyad la/ de la 'di ni don dam pa kho na'o zhes rnam par 'jog go/ /re zhig gang la 'di kun rdzob ces tha snyad byed pa de la mi bden pa'i don 'jig rten pas khong du chud pa nyid kyis de'i yul la bsam pa gtang bar mi bya'o//gang yang 'jig rten gyi tha snyad la bden par 'dod pa de yang 'phags pa rnams 'jig rten kun rdzob kyi bden par bzhed de/ med pa'i don la tha snyad 'dogs pa ltar don med pa nyid du brjod do//de yang brdzun pa nyid du rtogs par byed pa/ 'phags pa nyid kyis 'chad par 'gyur ba'i 'jig rten pa rab tu grags pa'i rigs pa nyid kyis nye bar ston par mdzad de/ de ni rab tu grags pa'i dpes ma grags pa'i don rtogs pa'i phyir ro/ /de ni 'dir 'jig rten gyi tha snyad la rnam par dpyad na/yang dag pa'i don ma grub pa'i phyir 'phags pas 'jig rten gyi tha snyad la kun rdzob ces gsungs so/ /kun rdzob kyi sgra ni 'jig rten pa'i tha snyad kyi rnam grangs ma yin te/ kun rdzob dang don dam pa'i dbye bas de ni rnam pa gnyis su gnas pa'i phyir dang tha snyad kyi phyogs gcig la kun rdzob kyi sgras brjod pa'i phyir ro//rigs pa'i stobs kyis 'di'i don ni gang zhig 'jig rten gyi tha snyad la kun rdzob kyi sgras brjod la/ de ni 'di ltar gang 'jig rten gyi tha snyad 'di ni 'jig rten kun rdzob ste/ de ni de kho na nyid ma yin no zhes 'phags pa kho na gsungs par rigs la/ tha snyad dang kun rdzob kyi sgra dag kyang rnam grangs nyid de/ de la skyon med do/ /de skad du mdo las/ kun rdzob kyi bden pa gang zhe na/ ji srid du 'jig rten gyi tha snyad yi ge dang skad kyis ston pa'o// zhes so/ /yang na ci zhig la 'dir 'jig rten gyi tha snyad ces bya zhe na/ de la re zhig bud shing la brten nas me bzhin du phung po la brten nas brtags pa'i gang zag la 'jig rten zhes brjod do/ /de yang phyin ci log dang phyin ci ma log pa nyid kyis rnam pa gnyis so/ /de la dbang po nyams pa'i rab rib can la sogs pa phyin ci log yin la/phyin ci ma log pa ni dbang po ma nyams par rab rib can la sogs pa las gzhan pa'o/ /'di nyid kho na yang 'dir 'jig rten pa'i sgras brjod kyi/ cig shos ni ma yin te/ 'jig rten pa kho na la rnam pa tshad ma ma yin pa'i phyir ro//'jig rten gyi tha snyad du gsungs pa yang gzhan gyi khong du chud par 'dod pa'i dngos po kun nas rtogs pa'i dngos po sna tshogs pa gzhan gyi rgyud la rtog pa 'jug par byed pa la tha snyad ces brjod do/ /'jig rten pa'i tha snyad ni 'jig rten tha snyad de/ ji ltar 'jig rten pa rtogs par 'dod pa'i don phan tshun du rtogs par byed pa'am/ shes par 'dod pa'i don khong du chud pa'o/ /de bzhin du don de la brjod bya rjod byed kyi 'brel pa dang / shes bya shes byed du rnam par 'jog par byed cing / dus gzhan du yang tha snyad kyi gdams pa mi 'chad pa'i don du de la 'di ltar rjod byed dang brjod bya dang /shes pa dang shes bya'i mtshan nyid can gyi don phyin ci log tsam gyis nye bar bskyed pa'i bdag nyid kyi dngos po la tha snyad ces brjod kyi/ byed pa po'i tshogs pa gcig dang 'brel pa ni ma yin no//de nyid kyang 'jig rten pa bden par 'dod pa'i phyir 'jig rten pa'i tha snyad kyi bden pa zhes bya ste gcig go/ /re zhig 'di dag 'jig rten pa phyin ci log gi shes pa'i dbang las bden pa la/ phyin ci ma log pa'i dbang las don dam pa'i bden pa rnam par gzhag go/ slar yang ci de phyin ci ma log pa'i shes pa yin/ gang du yang dag pa ma yin pas sgro 'dogs par mi byed pa'o/ /yang ci yang dag pa ma yin pas sgro 'dogs par mi byed pa yin/ de ni ji ltar gnas pa'i chos kyi rang bzhin la dmigs pa'o/ /slar yang ci 'di ni chos rnams kyi yang dag pa ji lta bar gnas pa'i rang bzhin yin/ma byas pa'o/ /yang ci ma byas pa yin/ rgyu dang rkyen gyis ma bskyed pa'o/ /'di ni brdar btags pa'i ming yin nam ci ma yin te/ 'jig rten pa yang ma byas pa nyid la rang bzhin zhes brjod pa'i phyir ro/ / 'di ltar 'jig rten pa 'ga' zhig 'ga' zhig tu bslu ba'i tha snyad dmigs pa na 'di'i tha snyad 'di ni byas pa ste/ rang bzhin ma yin pa'o zhes smra ba'o/ /de bzhin du sgyu ma'i skyes bu dmigs pa na skyes bu 'di ni byas pa'o zhes brjod de/ rang bzhin ma yin pa zhes bya'o/ /de bzhin du 'jig rten du rang bzhin zhes bya ba ma byas pa la brjod do //rten cing 'brel bar 'byung ba'i phyir byas pa nyid du yod pa'i gzugs dang tshor ba la sogs pa'i don yang bslu bar so sor snang ba'o zhes bya ste/ gang zhig gzugs dang tshor ba la sogs pa 'di dag nye bar dmigs pa'i rang bzhin de ni byas pa ste/byas pa'i phyir rang bzhin du mi 'gyur ro/ /de lta na yang byas pa'i rang bzhin du zhog cig ce na/ de ni de ltar ma yin te/ dngos po byas pa ma yin pa med la gang zhig gi rang bzhin no zhes pa'i ming yin par 'gyur na/ ji ltar gnas pa'i rang bzhin du phyin ci ma log pa'i shes pas dmigs par 'gyur grang na/de yang med la/ de med na yul med pas shes pa skye ba med do zhes bya ste/ ci'i phyir yang dag pa'i don du sgro 'dogs/ gang yang 'di ni yang dag pa'i sgro btags pa ni kun rdzob kyi bden pa la ltos te/'jig rten gyi tha snyad la brten nas don dam pa'i bden pa zhes brjod la/ de yang mtshan ma med pa'i phyir brjod bya rjod byed dang shes bya shes byed kyi tha snyad med do/ /ji skad du mdo las/ don dam pa'i bden pa gang zhe na/ gang la sems kyi rgyu ba yang med na yi ge rnams lta ci smos zhes so//de ltar bden pa gnyis rnam par gzhag pa la/ gal te don dam pa'i bden pa bstan pa'i dbang du byas nas gnas pa la sogs par bstan brtags nas brjod na de'i tshe/ de bzhin gshegs pa'i gsung don med par 'gyur bas mi rigs so zhes pa'i brtsad pa rigs par 'gyur la gnas pa la sogs pas bstan pa'i yul ni 'di ma yin no//'on kyang 'jig rten gyi tha snyad du'o/ /de'i phyir sangs rgyas bcom ldan 'das 'jig rten gyi tha snyad kyi mthus gnas pa la sogs pa nye bar bstan / gzhan gyi rkyen la mi ltos pa'i ye shes la ltos nas ma yin no/ /de'i ye shes ni rang bzhin yul yin pa'i phyir ni chos thams cad mya ngan las 'das pa dang khyad par med pa de gnas la sogs pa nye bar dmigs shing / kho bo cag gnas pa la sogs pa 'gegs par byed pa lung gis gnod pa go skabs ga la yod ces bya ste/lung gis brtsad pa rigs pa ma yin la/ ji ltar gnas pa dang skye ba dang 'jig pa sel ba yang 'jig rten gyi tha snyad kyi dbang gis brjod pa la lung gis gnod par mi nus so/ /de bzhin du yod pa dang med pa dang dman pa dang mnyam pa dang khyad par can sel ba la yang gnod par mi nus so//de la yod ces brjod pa ni/ gang yod pa 'di lta ste/ da ltar ba'i phung po dang / khams dang / skye mched rnams sam/ 'dus byas rnams so//med pa zhes brjod pa ni gang med pa ste/ 'di ltar gang 'das pa dang / ma 'ongs pa'i phung po dang khams dang skye mched rnams sam 'dus ma byas so/ /yang ji ltar na gnas pa la sogs pa bkag pa nyid kyis de rnams sel bar 'gyur/ de skad du yang rtsa ba'i rab byed bdun par/skye dang gnas dang 'jig pa yi/ /'dus byas grub pa yod ma yin/ /'dus byas rab tu ma grub na/ /'dus ma byas de ji ltar 'dod/ /ces bya ste/ 'dus byas rnams ni dus gsum gyis rnam par gnas la 'dus byas med na dus gsum ga la zhig /de la da ltar ba'i dus med pas dngos po med la/ 'das pa dang / ma 'ongs pa med pas dngos po med pa yang med do/ /de'i phyir dngos po 'di gnyis kyang gnas la sogs pa med bzhin du 'jig rten gyi tha snyad kyi dbang gis gsungs so//ji ltar dngos po dang dngos po med pa dag gnas pa la sogs pa ma grub la/ de bzhin du dman pa dang mnyam pa dang khyad par can rnams kyang ngo / /de la dman pa ni khyad par can ma yin pa ste/ 'di lta ste nyon mongs pa'o/ /khyad par can ni dge ba ste/ 'di lta ste dge ba la sogs pa'o//mnyam pa ni bar ma ste lung du ma bstan pa 'di lta ste/ mig la sogs pa rnams so zhes bya ba'o/ /'di dag ni nye bar bstan pa tsam ste/ 'di ltar khyad par thams cad 'dir gnas pa la sogs pa ma grub pas ma grub par khong du chud par bya ba tha snyad kyi dbang gis brjod pas lung gi gnod pa spang bar bya'o//rang gi sgra'i don la 'am gyi sgra'o/ /de yang ma smos pa rnams sdud pa'o zhes bya ste/ rnam par brtags pa thams cad dgag pa gnas pa la sogs pa dgag pa'i sgo nas gsungs pa la/lung gis gnod pa 'jig rten gyi tha snyad kyi dbang gis gsungs pas spang bar byos shig /slar yang 'di dag 'jig rten gyi tha snyad kyi ngor 'jug pas mdzad pa'i dgos pa ci zhe na/ 'di la dgos pa che ste/ 'jig rten pa'i tha snyad khas ma blangs na 'jig rten pa dang mi mthun pas rtag tu 'jig rten pa'i log rtogs las bzlog par nus pa ma yin te/kla klo bzhin no/ /kla klo 'phags pa'i skad mi shes pa la 'phags pa'i skad 'ga' zhig las bzlog par mi nus la/ kla klo'i skad rjes su mthun pas bde blag tu bzlog par 'gyur ro//yang na sangs rgyas bcom ldan 'das zhes bya ba ji ltar rtogs pa'i chos nyid la gnas par gyur na/ de'i tshe sangs rgyas pa de rnams la dgos pa med par 'gyur te/ chos nyid la gnas pa rnams gzhan gyi don mi mdzad pa'i phyir ro/ /chos nyid la gnas pa de rnams ni/brjod par bya ba ldog pas na/ /sems kyi spyod yul ldog pa ste/ /ma skyes pa dang ma 'gags pa'i/ /chos nyid mya ngan 'das dang mtshungs/ /lung las kyang gsungs pa/ sangs rgyas 'ga' yang mi shes shing / /yang na sangs rgyas chos nyid min//'jig rten rnam 'dren 'jig rten du/ /gal te 'jig rten rjes 'jug min/ /zhes so/ /yang na rang gis rtogs pa'i chos nyid kho na sgro btags nas rjod byed dang brjod bya'i tha snyad la gnas te nye bar ston par ma gyur na/ de yang 'jig rten pa'i don sgrub par mi nus la/ ji skad du lung bzhi / bam po gya drug pa / de nas bcom ldan 'das sangs rgyas nas ring po ma lon pa na 'di skad gsungs te/ bdag gis chos nyid zab mo zab mor snang ba mthong dka' ba rtogs dka' ba brtag dka' ba/ brtag pa'i spyod yul ma yin pa phra ba mdzangs pa mkhas pa sgrin pos shes par bya ba khong du chud de/de bdag gis gal te gzhan la bstan par gyur kyang gzhan gyis shes par mi 'gyur gyi/ de'i tshe bdag ni nyams par 'gyur/ la bar 'gyur/ sems mi spro bar 'gyur/ gang du bdag nyid gcig pu zhig /dgon pa dben pa mthong ba'i chos la bde bas gnas pa'i rnal 'byor dang ldan pas bde bar gnas pa 'gyur ro/ /de nas mi mjed kyi bdag po tshangs pa'i 'jig rten na gnas pas 'di skad smras so/ /kye ma 'jig rten 'di dag ni brlag go//da ni gang du na 'ga' zhig tu/ de bzhin gshegs pa dgra bcom pa yang dag par rdzogs pa'i sangs rgyas 'ga' zhig 'jig rten du 'byung ba ni 'di lta ste/ u dum bA ra'i me tog bzhin la/ de ni de sang na bcom ldan 'das chog shes pa la gnas pa thugs spro bar 'gyur gyi/chos 'chad pa la ni ma yin pas bdag ni gang du bcom ldan 'das kyi thad du dong la gsol ba gdab par bya'o/ /de nas mi mjed kyi bdag po tshangs pas 'di lta ste/ skyes bu stobs dang ldan pa'i lag pa bskum pa las brkyang ba'am/ brkyang ba las bskum pa bzhin mi mjed kyi bdag po tshangs pa'i 'jig rten du mi snang bar gyur nas/bcom ldan 'das kyi mdun du 'khod par gyur to/ /de nas mi mjed kyi bdag po tshangs pas de'i tshe na tshigs su bcad pa 'di dag smras so/ /ma ga d+hAr ni sngon chad ma byung chos//brjod bral dri mar bcas pa rjes su rig /nyon mongs med cing rdul dang bral ba'i chos/ /bdud rtsi'i sgo mo gsal bar mdzad du gsol/ /de nas bcom ldan 'das kyis de'i tshe tshigs su bcad pa 'di dag bka' stsal to/ /tshangs pa bdag gis tshogs chen pos//srid pa'i 'dod chags yongs bsrabs shing / /tha ba bcom nas rtogs pa yi/ /chos 'di rtogs par sla ma yin/ /rgyun las bzlog pa lta bu'i lam/ /zab mo shin tu mthong ba dka'/ /srid pa'i 'dod chags mun pa yi/ /phung pos bsgribs pas mthong ba min//zhes gsungs so/ /de'i phyir na nges par 'di rnams kyis ji ltar gnas pa'i 'jig rten gyi tha snyad ni 'jig rten pa'i don byed pa'i thabs kyi phyir thog ma nyid du khas blang bar bya ste/ 'jig rten pas rtogs pa'i thabs su gyur ba 'jig rten gyi tha snyad khas ma blangs par 'jig rten pas rtogs par byed nus pa ma yin no//yang ji ltar sangs rgyas bcom ldan 'das rang nyid kyis dngos por gyur pa cung zad ma dmigs kyang 'jig rten gyi tha snyad kyi rjes su mthun pa 'ba' zhig gis nye bar ston par mdzad ce na/ /'di ni rab tu grags pa'i dpe gcig tsam slob dpon gyis brjod par 'dod pa'i don bsgrub pa'i phyir nye bar bsdu bar bya'o//ngar 'dzin pa dang nga yir 'dzin pa med pa'i bde bar gshegs pas 'jig rten pa'i ngor 'jug tu dang nga'i zhes pas skad gzhan ji lta ba de ltar gsungs te / de la nga'o zhes pas bdag tu mngon par zhen pa ni ngar 'dzin pa'o//bdag gi 'o nga'i 'o zhes mngon par zhen pa ni nga yir 'dzin pa'o/ /nga dang nga yir 'dzin pa 'di gnyis kyang 'jig tshogs la lta ba'i yan lag ste/ de las bdag dang bdag gir 'jug pa'i phyir ro/ /de la 'jig tshogs su lta ba 'di ni sangs rgyas bcom ldan 'das kyis rab tu spangs pa'i phyir/spangs pas na bde bar gshegs pa la ngar 'dzin pa dang nga yir 'dzin pa'i phyir ro/ /de la bsod nams kyi tshogs kyi stobs kyis mngon par 'dod pa'i 'bras bu phun sum tshogs pa nye bar longs spyod par dgongs pa'i dus su nye bar btud pa gang zhig la nye bar longs spyod pa dang ldan zhing /ye shes kyi tshogs kyi stobs kyis nyes pa ma lus pa dang bral zhing / yon tan dang ldan pa'i lam gyis thob pa mtha' yas pa'i sems can phan 'dogs pa'i phyir mdzes par gshegs pas na bde bar gshegs pa'am sangs rgyas ni chos thams cad la sgrib pa med par rnam pa thams cad mkhyen pa'i ye shes kyis yang dag par rtogs pa'i phyir mdzes par gshegs pas bde bar gshegs pa'o//phyir mi ldog pa'i phyir mthar thug par gshegs pas te rims nad legs par byang ba bzhin nam/thog ma dang bar dang tha mar gcig tu dge ba'i chos ston pa la mdzes par gshegs pa'i phyir bde bar gshegs pa'o/ /nges pa'i tshig gi tshul gyis bde bar gshegs pa ngar 'dzin pa dang nga yir 'dzin pa shin tu spangs pas gnas kyang nga dang nga'i zhes gsungs te/ji skad du lung las/ dge slong dag nga'i lha'i mig rnam par dag pa mi las 'das pas mthong ngo zhes bya ba la sogs pa bcom ldan 'das kyis gsungs pa dang /de bzhin gshegs pas dge slong dag nga ni gcig pu dben pa zhig na gnas pa na zhes pas 'dir nga yi ba gsungs so/ /bdag nyid la nga dang nga yir 'dzin pa med kyang nga dang nga yi zhes pa gsungs pas 'jig rten pas rtogs pa'i thabs su 'gyur ba'i phyir 'jig rten pa la ltos nas nga dang nga yi zhes gsungs la/'di ltar gtsug na nor bu'i rtogs pa brjod pa la sogs par bya dka' ba brgya phrag gsungs pa de gang zhig de'i tshe long ba chen por gyur pa dang gang du 'di ltar bya dka' ba brgya phrag gsungs she na/ de dag go bar 'dod pa'i 'jig rten pa la gal te nga nyid de'i tshe na zhes ma gsungs na 'jig rten pas rtogs par 'dod pa'i don mi rtogs par 'gyur ba'am /de bzhin gshegs pa'i spyod pa la ngo mtshar bar yang mi 'gyur ro/ /de bzhin du nga yir 'dzin pa la yang sbyar bar bya'o/ /gang yang 'di ltar nga dang nga yir 'dzin pa med kyang 'jig rten pa'i ngor 'jug tu nga dang nga yir 'dzin pa yod pa lta bur mtshon no//de bzhin du dngos por gyur pa gzhan gsung ba na yang dngos po de'i rang bzhin lta bur mtshon par khas blang bar bya'o/ /de'i phyir sangs rgyas bcom ldan 'das rnams kyis gsungs pas dngos po yod pa ma yin pa nyid de 'jig rten gyi tha snyad kyi rjes su 'jug pas gsungs pa'o zhes shes par bya'o//nga dang nga yir 'dzin pa bzhin brjod byas stong pa'i phyir na/ brjod bya med par rab tu byed pa rdzogs kyi bar gyis ston par 'gyur ro// de'i phyir gnas pa la sogs pa 'di dag gi rjod byed ni brjod bya med pa ste/ tha snyad kyi dbang gis brjod pa 'ga' zhig tu grub kyi don dam pa'i dbang gis ni ma yin no zhes bya'o/ /gal te gsungs pa thams cad dngos med pa tshig tsam kho na yin na/ gang du bcom ldan 'das kyis 'di skad du/bdag nyid la ni bdag nyid mgon/ /rjes su mgon byed gzhan su zhig /bdag nyid legs par dul gyur na/ /mkhas pas mtho ris thob par 'gyur/ /zhes gsungs pa de la bdag la sogs pa yod pa min na mgon la sogs pa ji ltar rigs par 'gyur/de'i phyir bdag yod do zhe na/ gal te yang khyod ni rang nyid kyis yongs su spangs nas rtsod pa'i skabs tshol bar byed la de lta na yang smras pa/ bdag min bdag med min bdag dang / /bdag med min pas rjod 'ga' 'ang med/ /brjod bya mya ngan 'das dang mtshungs//dngos po kun gyis rang bzhin stong / /de la bdag med pa nyid do zhes bya ba ni tshig gi lhag ma'o/ /'dir bsgom pa las byung ba'i ngor rlom sems pa ni bdag ces bya'o/ /de nyid sred pa'i dngos por gyur pas sred pa'i snying stobs kyi phyir sems can no/ /srog gi dbang po dang 'brel bas 'tsho bas na srog go//las dang nyon mongs pas skye ba gzhan du skye bar byed pas skye ba po'o/ /yid gtso bor gyur pa las skyes pas shed las skyes so/ /yid shas che bar gyur pa'i phyir shed can no/ /dge ba dang mi dge ba dang lung du ma bstan pa'i las byed du 'jug pa'i phyir byed pa po'o//de'i 'bras bu myong bar byed pa'i phyir rig pa po'o/ /yul yongs su dpyod pa'i phyir shes pa po'o/ /dpyod par byed pa'i phyir mthong ba po'o zhes bya ba la sogs pa rnams de'i ming gi khyad par ro/ /bdag de yang rtsa ba'i rab byed bcu par//re zhig shing la me min zhing / /shing las gzhan du me ma yin/ /me ni shing dang ldan min la/ /me la shing med der de med/ /me dang bud shing bshad pa yis/ /bdag dang nye bar len rim bzhin/ /zhes pa'i tshig gis nye bar len pa las de nyid dang gzhan pa rnam pa lngas dpyad na mi srid pas bdag med do zhes bya'o//yang na 'dir phyogs snga ma gzhan te/ gal te yang sangs rgyas rnams ngar 'dzin pa dang / nga yir 'dzin pa spangs pa'i phyir/ nga dang nga yir 'dzin pa'i gsung dngos po med la/ ngar 'dzin pa dang nga yir 'dzin pa ma spangs pa'i 'jig rten pa'i nga dang nga yir 'dzin pa'i brjod pa don dang bcas par 'gyur ro zhe na/smras pa/ 'jig rten pa'i nga dang nga yir 'dzin pa'i tshig don dang bcas pa ma yin te/ ci'i phyir zhe na/ gang gi phyir bdag min ces bdag dgag pa sngar bzhin no//bdag ma grub pas kyang 'jig rten gyi nga dang nga yir 'dzin pa'i rjod byed kyang brjod byas stong pa'o/ /'dir smras pa/ gal te bdag med na yang de lta na yang ngar 'dzin pa sems las byung ba'i chos rang rig par yod pas de'i rjod byed tshig tsam ma yin no zhe na /slar yang ngar 'dzin pa de'i dmigs pa ci zhe na/ bdag go/ /gal te de lta na bdag med na dmigs pa las gzhan du ngar 'dzin ji ltar 'byung bar 'gyur/ dmigs pa med par sems dang sems las byung ba skye ba ni med do/ /kha cig ni phyi rol gyi dmigs pa la ltos pa med par sems dang sems las byung ba skye ste/dper na rmi lam la sogs pa'o zhe na/ dpe 'di ni gnyi ga la ma grub pas rnam par rig par smra ba'i 'dod pa'i don grub par byed pa ma yin no/ /khyod la yang dpe med pas 'dod pa'i don mi 'grub bo zhe na/slar yang kho bo'i 'dod pa ci zhe na/ rnam par shes pa'i phyi rol la dmigs par byed pa nyid do/ /slar yang de ji ltar ma grub ce na/ kho bos sun phyung ba'i phyir ro/ /gal te khyod kyi skyon brjod pa nus pa dang ldan par gyur na/ de ltar 'gyur la rag na gnyi ga la grags pa'i dpe brjod pa med pas nus pa med do//khyod la yang kho bo la ltos nas gnyi ga la grub pa'i dpe nus pa med pas 'dod pa'i don mi 'grub bo/ /slar yang ci kho bo'i 'dod pa rnam par shes pa phyi rol la dmigs pa yin la/ rnam par shes pa nyid kho bo mi 'dod na/ci'i phyir phyi rol la dmigs par byed pa po nyid kho bo'i 'dod pa yin/ 'jig rten pa'i tha snyad kho bos khas blangs la de'i yul dang rnam par shes pa yang 'jig rten pas shes kyi kho bos ni ma yin no/ /khyod kyis kyang kho bo cag dang 'brel ba'i 'jig rten pa'i don 'di sel bar mi nus so//de la ci 'jig rten pa la sems dang sems las byung ba dmigs pa dang bcas pa ma grub pas/ de las dmigs pas bskyed pa'i sems dang sems las byung ba dmigs pa med na de med pas bdag med na ngar 'dzin pa med par grub bo/ /kho bos de ltar khas ma blangs so zhe na/slar yang ci dngos po 'di dag 'jig rten pa la ma grub pas gang zhig khyod kyang khas mi len nam/ 'di dag ni 'jig rten pa la grub la/ 'on kyang 'jig rten rmongs pas phyin ci log ji lta ba de lta bar 'jug par 'gyur ro zhes kho bos smra'o/ /de'i phyir 'jig rten pa'i 'di dag kyang kho bos khas mi len no zhe na/smras pa/ 'dir don rtogs pa po rnams kyi don rtogs pa 'dzin pa las sam bstan bcos las 'gyur grang / de la re zhig 'jig rten pa khyod la tshad ma ma yin la/ bstan bcos las khas blangs pa'i don kyang gzhan la bsgrub par nus pa med la/de'i phyir khyod dang mtshungs pa'i skye bo'i sgra'i rjes su khyod 'jug pa'i rigs kyis khas pa ni ma yin no/ /mkhas pa ni 'thad pa dang bcas pa'i bstan bcos kyi tshad ma brjod pas sam/ 'jig rten pa las so/ /'thad pa med pa tshig tsam gyi bstan bcos tshad mar byed na bstan bcos thams cad tshad mar 'gyur ro//de'i phyir phyi rol gyi dmigs pa la mi ltos pa'i sems dang sems las byung ba ni med do/ /rigs pas dpyad na phyi rol gyi dmigs pa mi srid la/ de'i phyir phyi rol gyi don la mi ltos par sems dang sems las byung ba kho na khas blang bar bya'o zhe na/ji ltar khyod kyis dpyad pas phyi rol gyi dmigs pa mi srid la/ de bzhin du kho bos dpyad na sems dang sems las byung ba ni srid pa'i phyir/ phyi rol gyi dmigs pa bzhin du sems dang sems las byung ba yod pa nyid rnam pa thams cad du gtang bar byos shig /slar yang gzhan zhig gis smras pa/ rnam par shes pa thams cad dmigs pa dang bcas pa ma yin la/ gal te yang rnam par shes pa thams cad dmigs pa dang bcas par 'gyur na/ mo gsham gyi bu la dmigs pa'i rnam par shes pa mi 'byung ste/ dmigs pa med pa'i phyir ro/ /'o na mo gsham gyi bu zhes pa'i ming 'di nyid 'di'i rnam par shes pa'i dmigs par yod pa ma yin nam/ de ci 'di'i dmigs pa med do zhes smra/'di ni yod pa ma yin te/ mo gsham gyi bu'i sgra thos pa na gal te 'di'i ming nyid mo gsham gyi bu la dmigs pa'i rnam par shes pa'i dmigs par 'gyur na/ de'i tshe mo gsham gyi bu med do zhes pa na de nyid kyi ming yang med par 'gyur na/ de lta bu ni ma yin no//de'i phyir 'di'i ming nyid la dmigs pas ma yin no/ /nges par rnam par shes pa 'di'i dmigs pa ci zhig /rnam par shes pa 'di ni dngos po med pa la dmigs pa'o/ /mo gsham gyi bu ni dngos po med pa ste/ de la dmigs pa'i rnam par shes pa 'di ni dngos po med pa la dmigs par 'gyur ro//slar khyod kyi dmigs pa'i don ci zhig yin/ smras pa/ rnam par shes pa la rang gi rnam par gtod pa'i don ni dmigs pa'i don to zhe na/ gal te de lta na mo gsham gyi bu mo gsham gyi bu la dmigs pa'i rnam par shes pa la rnam par gtod dam ci/gal te gtod na de'i tshe dngos po med pa'i rnam pa dang rjes su 'brel pa'i rnam par shes pa dngos po'i rang bzhin du mi 'thad pas de 'di dag ni 'ga' la 'gal ba'i dngos po dang dngos po med pa dag dus gcig la gcig tu med pa'i phyir ro/ /dngos po dang dngos po med par 'gyur na yang /rnam par shes pa gnyis su ji ltar mi 'gyur/ de dag mun pa dang snang ba dag gcig pa med pa bzhin no/ /sngon po'i rnam par rtog pa'i rnam par shes pa'i dmigs pa sngon po yin pa ltar / dngos po med pa rtogs pa'i rnam par shes pa'i dmigs pa dngos po med par rigs so//de ltar na dngos po med pa dang rnam pa dag 'gal bas 'di ni mo gsham gyi bu bzhin dngos po nyid du mi 'gyur te/ sngon po'i rnam pa'i rnam par shes pa sngon po'i rnam pa dang 'gal ba'i dkar po bzhin no/ /dmigs pa dang rnam pas dben pa'i rnam par shes pa med pa na gang zhig ngo bo tha dad pa'i rnam par 'jog par byed/ci nges par dmigs pa'i rnam pa tsam zhig kho na rnam par shes pa'am/ gal te de ltar gyur na de'i tshe dmigs pa nyid rnam par shes par 'gyur ro/ /de ni dmigs pa kho na rnam par shes pa ma yin la/'on kyang dmigs pa'i rnam pa yongs su gcod pa'i rang bzhin no/ /de nyid kyis na rnam par shes pa dang dmigs pa dag rnam pa mtshungs mod kyi/ dmigs pa ni rnam par shes pa ma yin te/ yongs su gcad par bya ba'i rang bzhin yin pa dang /yongs su gcod pa po ma yin pa'i phyir/ dmigs par byed pa po yang dmigs pa ma yin te/ yongs su gcad par bya ba'i rang bzhin ma yin pa'i phyir dang / yongs su gcod pa'i rang bzhin gyi phyir ro/ /de'i phyir dmigs pa'i rnam pa tsam ni rnam par shes pa ma yin no//dmigs pa'i rnam par shes pa las tha dad pa yang ma yin te/ gang gi phyir dmigs pa'i rnam pa las tha dad pa'i rnam par shes pa'i ngo bo med do/ /de'i phyir dngos po med pa rjes su byed pas bskyed pa'i rnam par shes pa ni dngos po med pa dang rnam pa dag 'gal bas dngos po las log nas rnam par shes pa dngos po med par 'gyur ro//rnam par shes pa dngos po med pa na yang mo gsham gyi bu ni dngos po med pa'o zhes ji skad brjod do / /gzhan yang rnam par shes pa 'di ni skye ba las sngon rol du ci'i ngo bo yang ma yin la/de yang yul gyi rnam pa ma bzung bas skye ba thob par mi byed do/ /de'i tshe ci'i ngo bo yang ma yin pa 'di la 'dzin pas skye ba bsgrub par byos shig /dngos po med pa la dmigs pas dngos po med pa'i rnam pa thob pa ni skye ba dang shin tu 'gal ba'i gnas skabs thob par 'gyur la/ma skyes pas dngos po med pa la 'dzin par rtogs pa yang rigs pa ma yin no/ /yang na nges par 'dis dngos po med pa la dmigs pa nyid du rtog par byed na/ de'i skye ba las snga rol gyi gnas skabs nyid la brtag par bya na/ ma skyes pa'i gnas skabs su dngos po med pa dang rnam pa 'gal ba'i phyir ro//yang na gnas skabs de na dmigs pa la 'dzin par byed ngo bo nyid med pa'i phyir dngos po med pa la dmigs pa po nyid ni mi 'dod la/ smos pa'i skyon yod pa'i phyir na gnas skabs gzhan yang thob pa ba ma yin no//gal te yang mo gsham gyi bu la dmigs pa'i rnam par shes pas dngos po mang po la dmigs par 'gyur na/ de lta na sngon po'i sgra la ma ltos par sngon po'i rnam pa'i rnam par shes pa bzhin mo gsham gyi bu'i sgra la ma ltos par don rtogs la rag na rtogs pa ni med do//rgyu mtshan gyi sgo can gyi rnam par shes pa de ni rgyu mtshan med par 'jug par mi nus so/ /gal te rgyu mtshan las gzhan yang rnam par shes pa 'jug na/ phung po lhag ma med pa'i mya ngan las 'das pa la yang 'jug par 'gyur ro/ /skye ba log pas mi 'jug go zhe na/mtshan ma med pa la dmigs pa'i rnam par shes pa skye ba ldog par mi 'gyur ro/ /nyon mongs pa log na las ldog par 'gyur bas skye ba mi len no zhe na/ gal te las dang nyon mongs pa'i rgyu can gyi rnam par shes pa de ltar ma gyur kyang zag pa med pa'i rnam par shes pa mya ngan las 'das pa'i dmigs pa la rtag tu 'jug par 'gyur ro//rigs pas ni gang zhig chos thams cad skye ba med pa la mtshan ma 'ga' yang mi dmigs la mtshan ma med pas rnam par shes pa mi 'jug go zhes bya'o/ /de nyid kyis 'dir stong pa nyid du smra bas chos thams cad sel ba la rjes su sgrub par byed la/chos thams cad dngos po med pa'i ngo bo nyid la mtshan ma mi dmigs pas rnam par shes pa ldog go zhes bya ba'i don to/ /de skad du yang / 'phags pas brten pa 'di lta bu// dngos pos rtogs pa ma yin zhing / /rgyu mtshan med pas rnam shes ni/ /nam yang 'byung bar mi 'gyur ro/ /'phags pa lhas kyang gsungs pa/ srid pa'i sa bon rnam par shes/ /yul ni de yi spyod yul la/ /mthong ba'i yul rnams bdag med phyir/ /srid pa'i sa bon 'gag par 'gyur//zhes so/ /de'i phyir rgyu mtshan gyi sgo can gyi rnam par shes pa ni rgyu mtshan med pa'i phyir mo gsham gyi bu 'ba' zhig pa dmigs pa ma yin no zhes rigs so/ /gal te gang gi dngos po med pa rnam par shes pas dmigs na'o/ /su zhig 'di skad smra/ dngos po med pa 'di ni rnam par shes pas dmigs par bya ba'o zhes pa 'di skad du brjod par bya ste/dngos po'i sgo la mi ltos par dngos po med pa 'ba' zhig rnam par shes pas mi dmigs so zhes bya ste/ dper na sngon po'i rnam par shes pa ser po la sogs pa la mi ltos pa bzhin/ ji ltar na dngos po'i sgo can yin/ slar yang 'di'i gtan med kyi rnam par shes pa mo gsham gyi bu'i sgra la ltos pa bzhin no/ /'dir sgra 'ga' zhig ni don dang bcas pa'o/ /'ga' zhig don med pa'o/ /don dang bcas pa ni lha sbyin la sogs pa'i sgra'o/ /lha sbyin ni 'jig rten na za ba'i bya ba rdzogs pa'i rgyur dmigs pas don des na lha sbyin gyi sgra don dang ldan pa'o//mo gsham gyi bu bstan kyang 'jig rten pa la mi dmigs la/ dmigs pa ma yin pa ni dngos po zhes rnam par mi 'jig go/ /de'i phyir mo gsham gyi bu'i sgra 'di yang bsgrub bya'i don gyis stong pa'o//rnam par shes pa yang sgra'i don mngon par shes pa rnams la don gyis stong pa'i sgra la dmigs pa'o/ /don dngos po med pa'i sgo nas don med pa nyid du nges par 'gyur la/ de la 'di'i sgra'i don yul 'ga' zhig na med cing dus nam zhig na med la rtogs pa po 'ga' zhig la snang ba ma yin no zhes bya ste /thams cad du dmigs pas gtan med ces 'jig rten du rnam par 'jog go/ /de yang 'di'i gtan med ni sgra'i dngos po la brten te/ sgra'i don mi dmigs pa'i sgo nas yongs su brtags la/ de bzhin du dngos po la brten nas snga na med pa dang gcig la gcig med pa pa rnams 'jig rten pas rnam par brtags so//de la da lta ba'i dngos po la ltos nas de'i skye ba'i sngon rol gyi gnas skabs la snga na med pa zhes rnam par 'jog la/ nam yang dngos po mi srid pa de ni snga na med pa ma yin te/'di lta ste mo gsham gyi bu lta bu'o/ /da ltar ba'i dngos po'i rang bzhin ni mi rtag pa'i phyir/ gang zhig 'jig pa'i gnas skabs sam/ mi rtag pa nyid la zhig nas med pa zhes bya'o/ /gcig la gcig med pa yang gsal bar dngos po la brten pa nyid do zhes bya ste/dngos po med pa zhes bya ba dngos po la ltos pa 'ba' zhig pa rnam par shes pas 'dzin pa ni mdo de nyid kyis na/ 'phags pa lhas gsungs pa/ dngos po med na dngos med ni/ /shes pa srid pa ma yin la// dngos po med na dngos med ni/ /grub par 'gyur ba ga la zhig /ces gsungs so/ /de nyid kyis na gang du mya ngan las 'das pa'am/ mya ngan las 'das pa dang mtshungs pa'i chos kyi rang bzhin khong du chud pa na/ de la dngos po med pa yang nye bar len pa med pas med do zhes bya ste/rnam pa thams cad du dngos po dang dngos po med pa la kun tu 'dzin pa zad pas rnam par shes pa skye ba med pa dang mya ngan las 'das pa 'gog pa rnal 'byor pa rnams kyis thob par 'gyur ro/ /de'i phyir 'dir dngos po med pa 'ba' zhig la dmigs pa'i rnam par shes pa med la/de las kyang bdag ma grub pas ngar 'dzin pa'i brjod pa dngos po med pa'o zhes 'dir grub bo/ /'o na chos 'di dag ni rang rig pas myong ba 'di lta ste ngar 'dzin pa dang nga yir 'dzin pa'o/ /gal te de dag dmigs par bya bar med kyang de lta na yang nyams su myong ba'i ngo bo yin pa'i phyir ngar 'dzin dang nga yir 'dzin pa 'di dag ni med pa'o zhes brjod par mi nus so zhe na/ci byang phyogs su kha bltas sam/ 'on te gzhan du kha bltas pa yin/ 'di ni shar gyi phyogs su zhes nyams su myong ba ma yin nam/ byang la sogs pa'i phyogs 'di rnams shar phyogs su 'gyur ba mi rigs la/rab rib can gyi skra dang sbrang bu la sogs pa'i don med kyang rang gis ci'i phyir nyams su ma myong / 'di dag sems can gzhan las 'byung ba ma yin no zhes bya ste/ nyams su myong tsam gyis yang dag pa'i don gyi dngos por rnam par gzhag par mi nus so//de'i phyir gal te rang nyid kyis ngar 'dzin pa dang nga yir 'dzin pa nyams su myong yang de lta na yang yod par lung dang rigs pa dang 'gal bas med do zhes bya'o/ /de'i phyir 'jig rten pa'i nga dang nga yir 'dzin pa yang de bzhin gshegs pa'i nga dang nga yir 'dzin pa dang mtshungs so zhes bya ste/chos thams cad ming tsam du grub bo/ /'dir smras pa/ gal te de ltar bdag med kyang / /re zhig de dang 'gal ba'i bdag med pa yod la/ de bzhin du bdag gi rang bzhin dang 'gal bas chos thams cad ni bdag med pa khas blangs so//ji skad du/ bcom ldan 'das kyis chos thams cad bdag med pa'o zhes gsungs pas bdag ni mi rtag pa ma skyes pa ngar 'dzin pa'i yul te/ chos thams cad ni de lta ma yin no zhes so/ /de'i phyir bdag gi rang bzhin dang 'gal ba'i bdag med pa'i rang bzhin gyi phyir ram/bdag dang bral ba'i phyir chos thams cad ni bdag med pa'o/ /de yang yod la de'i phyir bdag gi chos med pas chos thams cad ming tsam ma yin no zhe na/ smras pa/ ci khyod ni bdag med pa la phyin ci log tu sgro 'dogs par byed/ mu stegs byed kyi yongs su brtags pa'i bdag gi dngos po med pa dang /de'i rang bzhin ma yin pa nyid kyis chos thams cad bdag med pa nyid du rnam par gzhag pa ma yin no/ /de lta na ji ltar 'dir bdag med pa yin/ nye bar len pa la btags nas sam/ rang bzhin gyi rnam grangs la bdag med pa nyid du bstan pa na don chen po skye bar 'gyur ro//de la phung po la brten nas btags pa'i gang zag la bdag ces brjod de/ 'jig rten pa'i ngar 'dzin pa'i phyir ro/ /mu stegs byed kyis yongs su brtags pa ni ma yin te/ de yang mun nag gi nang du gyur pa'i skyes bu'i rnam pa la yongs su brtags pa bzhin du nyung zad kyis shin tu phyin ci log pas yongs su brtags kyi/'di ni ma lus pas 'gro bas yongs su brtags pa ma yin no/ /gang du phung po la brten nas 'gro ba ma lus pa nga yir 'dzin pa'i yin la/ de ni mngon par zhen pa'i gnas su gyur pa'i phyir 'dir bsal bar bya'o/ /bdag brtags pa ni 'jig rten pa'i tha snyad kyi rnam par gzhag pa nyid las shin tu bsal ba'i phyir de ni de kho na nyid la dpyod pa'i dbang du byas kyi/ de sel ba'i dbang du byas pa ma yin / gal te mu stegs byed kyis yongs su brtags pa'i bdag 'dir 'gegs par mi byed na/de lta na bcom ldan 'das kyis ci zhig dgag pa'i don du 'di skad gsungs/ mig ni bdag dang bdag gi brtag pa brten pa ther zug pa yongs su 'gyur ba'i chos can ma yin pas stong par grub bo zhes so// mig la brten nas btags pa'i bdag gis stong pa dang rang bzhin gyis stong pa nyid du lung 'dis gsal bar mdzad kyi/ nang gi byed pa'i skyes bu dang bral ba ni ma yin no/ /de la mig ni bdag gis stong ngo zhes pa phung po dang khams dang skye mched la brten nas gang zhig la btags la bdag de ni phung po dang khams dang skye mched la rnam pa lngas med kyang phung po dang khams dang skye mched la brten nas 'dogs la/de yang med pa nyid de/ mig la sogs pa so so la rnam pa lngas kyang med pa nyid du khong du chud par bya'o zhes thar pa 'dod pa rnams la bcom ldan 'das gdams pa ston par bzhed pa nyid kyis mig ni bdag gis stong par grub bo zhes gsungs so//gang gi phyir mig la dpyad pa na bdag mi srid pa de'i phyir mig ni bdag gis stong pa ste/ bdag dang bral ba'o zhes pa'i don to/ /shwa'i sgra ni ga pa la sogs par dpyad pa ste/ des na de'i phyir bshad pa zhes pas 'di'i don ni ga pa la sogs pa la yang dang ti byas pas shU n+ya ste stong pa'am dben pa'o//'phros pa las ring po nyid do zhes pa'am ga pa la sogs pa'i bshad pa las skye bo dang bral ba'i dben pa la stong pa'i sgrar sgra pa rnams 'chad par byed do/ /des na gang zhig gang dang bral ba de des stong pa'o zhes bya ba ste/'di ni bshad pa'i don to/ /med pa la yang stong pa'i sgra mthong ste/ 'di lta ste lha sbyin gyis stong pa'o zhes so/ /'dir ni snga ma nyid gzung bar bya ste/ mig ni bdag dang bral ba'i phyir stong pa'o zhes bdag med pas bdag gi cung zad kyang yod pa ma yin no zhes bya ste/bdag gir bya ba dang bral bas stong la/ bdag gir bya ba'i rang bzhin las tha dad pa'i mig gzhan yod pa ma yin no/ /mig la brten nas bdag tu btags pa dang ldan pa bzhin bdag gis bdag tu byas pas 'di ni bdag gi ba zhes bya la/bdag med na nye bar blangs pa 'ga' yang med pas nye bar len pa nyid mi 'thad pa'i phyir dang / nye bar len pa las gzhan pa'i mig med la/ bdag gi bas stong pa nyid du bsgrubs pas mig gi rang bzhin mi grub pa nyid bshad pa'o/ /yang na bdag gi sgra ni rang bzhin gyi rnam grangs te/mig bdag gis stong ngo zhes bya ba ni rang bzhin gyis zhes bya ba'i don to/ /bdag gi bas zhes pa rang bzhin dang 'brel ba'i gang su yang rung bas zhes pa'i don to/ /'o na de lta na mig nyid med do zhes smras par 'gyur bas/ de ltar smra bar bya ste/mig med do zhes de nyid gsal por smra bar byos shig /smras pa/ kho bo ni mig nyid med do zhes mi smra ste/ ci'i phyir mig med par 'jig rten pa smra'am/ bstan bcos las bshad/ de la re zhig 'jig rten pa la mig med do zhes smra ba med de/ bdag tu brten pa la nye bar brten pa nyid kyi mig yod bzhin pa'i phyir te/ ming dang gzugs kyi rkyen gyis skye mched drug go zhes pas ming dang gzugs la brten nas byung ba'i phyir/ des na gzugs mthong ba dang reg pa'i rgyu yin pa'i phyir ro/ /gang gi tshe 'di ltar 'jig rten pa la mig med do zhes med na de'i tshe kho bo 'jig rten pa mig med par khas len no zhes ji ltar smra/de'i phyir re zhig 'jig rten pa mig med do zhes mi smra'o/ /da ni bstan bcos las kyang mig med do zhes bstan pa bstan bcos zhes bya ba phyin ci ma log pa'i lam des nyon mongs pa 'jig par byed pas so//'gog pa ni 'jig rten pa ste/ 'di ltar 'jig rten na gsod pa na chad pa chen po 'jig par byed do zhes zer la/ phyin ci log pa'i lam yang phyin ci log nye bar bstan pa las nye bar thob pa yod pa mi srid ces bya ste/ mi dmigs pa'i phyir de'i tshe 'jig rten pa'i mig med do zhes med pa nyid do//dngos po rnams kyi rang bzhin mchog tu rjes su tshol ba nyid ni de'i phyin ci ma log pa'i lam de yang rang bzhin med pa skye ba med pa'i rang bzhin gyi phyir snang ba med pa'o zhes bya ste/ /dmigs pa med pa rnal 'byor pa su zhig gis khong du chud par 'gyur ba zhig go//khong du chud pa med pas med pa nyid nye bar ston par mi 'gyur zhes bya ste/ de ltar bstan bcos las kyang mig med do zhes kho bo mi smra'o/ /'di ltar kun rdzob dang don dam pa'i bden pa gnyis su rnam par gzhag pa la kun rdzob tu mig rang gi mtshan nyid sgyu ma dang smig rgyu dang dri za'i grong khyer gyi rnam pa khas blangs shing de don dam par med do zhes rtog pa de rnams ni dbu ma'i bstan bcos yang dag par rtogs par mi brjod do//mig ni rang gi mtshan nyid ma grub pa nyid rang gi mtshan nyid grub pa lta bur byis pa rnams kyis rtogs pas/de'i phyir kun rdzob tu mig gi rang gi mtshan nyid med do/ /gang zhig kho na kun rdzob tu yang med la de kho na nyid kyi shes pa la yang de nyid med pa'i phyin ci log tu brtags pa ma yin te/ rnal 'byor pa rnams de khong du chud pa la mngon par 'dod pa med pa'i phyir ro//yang na kun rdzob tu mig yod la don dam par med do zhes pa'i tshig gi rigs pa yang gdon mi za bar nus par rung na yang / de lta na yang rang gi mtshan nyid khas len pa dang spong ba dag nus pa dang ldan pa ma yin no/ /de bzhin du kun rdzob tu phyin ci log med la don dam par rang bzhin med pa nus pa dang ldan no zhes pa yang /dngos po rnams kyi rang gi mtshan nyid khas blangs pa de ni sgyu ma la sogs pa'i dpe rung ba ma yin te/ rang gi mtshan nyid khas blangs pa la sgyu ma la sogs pa'i dpe dang 'brel pa med pa'i phyir dang /slu ba med par khas blangs pa'i phyir ro zhes bya'o/ /gal te de ltar mig stong pa nyid du khyod la ma grub na/ ji skad smos pa'i rigs pas mig bdag dang bdag gi bas stong par bshad pas mig rang bzhin gyis stong par ci zhig 'grub ci nges par mig gi rang bzhin yod pa gang zhig dang bral ba las mig rang bzhin gyis stong pa ni ma yin te/gal te yin na de'i tshe de ni rang bzhin gyis stong pa nyid ma yin no/ /gal te 'di ltar rang bzhin med pa de ni sel ba mi rung la/ gang zhig gang na med pa de ni sel bar mi rung zhing gang na med pa der ni sel bar mi byed de/'di lta ste chu'i dro ba'o/ /rang bzhin du skyes pa sel bar byed na skyon 'dir 'gyur gyi/ 'on kyang mig rang bzhin med par gnas pa nyid la 'jig rten pa phyin ci log tu rmongs pa'i rnam par shes pa la mig rang bzhin med par gnas kyang logs su bzhag nas rang bzhin dang bcas par rtogs la/de la mngon par zhen pas 'di dag kho na bden par yod gzhan ni rmongs pa'o zhes 'di dag bden par mngon par zhen pas mchog tu 'dzin pa lus kyi mdud pa skyed pas 'khor bar 'khor ro// 'di dag bden par mngon par zhen pa mchog tu 'dzin pa lus kyi mdud pa de'i gnyen por kho bos mig rang bzhin med par rnam par gnas pa nyid mig rang bzhin med pa'o zhes pa'i tshig gis shes par byed kyi/ kho bos rang bzhin sel bar byed pa ni ma yin no zhes bya ste/ ji skad smos pa'i skyon du thal bar mi 'gyur ro/ /gal te de ltar mig rang bzhin stong par bsgrubs na/ de lta na mig de ni rang bzhin gang zhig gis stong pa rnam par gzhag pa yod pa ste/ 'di ltar khang pa lha sbyin gyis stong ngo zhes brjod pa na/ lha sbyin med pa nyid la khyim yod pa nyid du rtogs pas gang du gnyi ga yang stong par mi 'dod na/de ni stong pa nyid du mi rung ngo zhes 'dir rnam par rig par smra bas smras pa/ gzhan dbang ni yod pa kun brtags ni med pa'i phyir kho bo cag kho na la stong pa 'thad kyi gang zhig stong pa nyid gang zhig gis stong par khas mi len pa'i phyir dbu ma pa rnams la ni ma yin te/stong pa des ci zhig bya ste des stong pa dang de nyid kyis stong par mi rung ngo zhes bya'o/ /'dir gzhan dbang gi rang bzhin rten cing 'brel bar 'byung ba brjod du med pa dngos po tsam la de ni rnam pa gnyis te rnam par dag pa dang ma dag pa'o//de la yongs su ma dag pa ni 'khor ba thog ma med pa nas goms pa pa'i gzung ba dang 'dzin par yongs su brtags pa'i dri mas bsgos pa'o/ /yongs su dag pa ni gzung ba dang 'dzin pa spros pa'i bag chags kyi gnas ngan len spangs nas/gnas yongs su gyur pa yongs su gyur pa dag pa'i rang bzhin sangs rgyas rnams kyi so so rang gis rig par bya ba/ de yang gzhan dbang gi rang bzhin 'di ni rang nyid kho na mi 'byung ba dang rang bzhin la gzhan gyi rkyen gyi stobs kyis skye bas na gzhan dbang ngo //de yang rang bzhin ni dngos po'i ngo bo'i phyir dang / gzhan gyi rkyen las mthong ba'i phyir gzhan dbang du brjod la/ gzhan gyi rang bzhin la tha dad pa'i phyir dbang gi sgra ni gtso bo la 'jug ste/ 'di ltar 'jig rten na 'dir ni bdag rang dbang ba'o zhes smra ba na rang nyid gtso bor smra ba'o zhes bya la/'di ni gzhan gyi dbang las shes pas gzhan dbang ste/ gzhan las skye ba'o/ /yang na brgyud cing skyed pas dbang la gzhan dbang ni gzhan gyis bskyed pa'o zhes pa'i don to/ /gzhan dbang de ni kun rdzob kyi dngos po rang yod pa'i phyir dang brtags pa'i gzung ba dang 'dzin pa med pa'i phyir stong pa nyid kha na ma tho ba med par 'gyur ro//ji skad du mdo las gsungs pa gang zhig gang na med pa de ni stong pa las gang yang 'dir lhag ma de ni yod pa la 'dir yod do zhes yang dag pa ji lta ba bzhin rab tu shes so zhes 'di skad smra na stong pa nyid la phyin ci ma log par zhugs pa'o//gang du dge sbyong ngam bram ze dag de yang gang zhig gis stong pa mi 'dod na de ni stong pa las phyin ci log tu zhugs pa'o zhes so/ /'o na gal te gzhan dbang gi rang bzhin ni ngo bo nyid du yod pa'i phyir rten cing 'brel bar 'byung bar mi 'gyur ro//su zhig 'di skad smra/ skye ba las snga rol du gzhan dbang gi rang bzhin yod do zhes so/ /skyes nas 'di'i rang bzhin yod do zhes brjod do/ /smras pa/ gang zhig skye ba las snga rol du 'di'i rang bzhin med na cir 'gyur ba'i 'di'i skye ba yod pa yin/skyes nas yod pa la 'di ni yod pa'o zhes rung gi ma skyes pa la ni ma yin no/ /skyes pa nyid kyang nges par gzung bar mi nus na khyad par brtag par nus pa ma yin no/ /pha rol pos 'di zhes pa de las skye bzhin pa'o zhes pa'i khyad par nges par gzung bar mi nus la/de'i phyir 'di'i skye ba med la ma skyes pa la ci yod la nyid ni ga la zhig ces bya ste/ 'di ni yod pa ma yin no/ /gal te 'di yod pa ma yin na rgyu mtshan med pas 'khor ba dang mya ngan las 'das pa med par 'gyur ro/ /gal te re zhig 'di yod par gyur na/mu stegs byed kyis brtags pa'i bdag kyang yod par 'gyur la/ de ni tshig tsam gyis smra ba'o / /gal te kho bo cag gis bdag med par gyur na/ bcing ba dang grol ba la sogs pa mi 'grub bo zhe na/ 'di ni re zhig bdag yod par yang mi 'thad de/'di gnyis ni rigs pa dang 'gal ba'i phyir ro/ /'di ltar gzhan dbang dngos por yod na nang gi byed pa'i skyes bu yang yod la/ 'di ni ma dpyad pa'i yod pa'o zhes bya ste/ 'jig rten pa la yod pa ma yin no/ /de'i phyir gal te rigs pa dang 'gal ba gcig po yod cing 'khor ba dang mya ngan las 'das pa'i rgyur rtog na gnyis pa yang brtag par bya'o//de'i phyir 'khor ba dang mya ngan las 'das pa'i rgyu dngos po'i rang bzhin yin no/ /de lta na gang zhig bcom ldan 'das kyis gsungs pa/ gang yang 'dir lhag ma yod pa de ni yod do zhes yang dag pa ji lta ba bzhin du rab tu shes so zhes thos pa de ji ltar gsungs/rten cing 'brel bar 'byung ba ni dngos por gyur pa byas pa ste/ rten cing 'brel par 'byung ba'i phyir gzugs brnyan bzhin med la/ gang zhig byis pa rnams dngos por mngon par zhen pa'i gnas su gyur pa de yang byis pa'i skye bo'i blo'i spyod yul la rnam pa de lta bu'i dngos por gyur pa brdzun pa slu ba'i chos can ni yod la de'i rang bzhin ni med do//de'i phyir gang gang na med pa de ni des stong ngo zhes bya'o/ /brdzun gyis slu ba'i chos can dngos por gyur pa la rang bzhin med pas de'i phyir dngos por gyur pa de de'i rang bzhin gyis stong ngo //gang yang 'dir lhag ma zhes pa ni brdzun pa slu ba'i chos can rang gi mtshan nyid ma grub pa/ byis pa'i skye bo'i blo'i spyod yul phyin ci log las ma grol ba ni yod de/ji skad du bcom ldan 'das kyis gsungs pa/ sgyu ma'i rnam pa de ni yod do/ /byis pa rnams kyi brjod pa de ni yod do/ /rmongs pa chags pa de ni yod do/ /de ltar gang cung zad tsam de ni yod do zhes so/ /de'i phyir de ltar brtags pas dpyod pa pos brdzun pa slu ba'i chos can dngos por gyur pa mngon du shes pas/'jig rten pa'i las kyi 'bras bu 'khor ba dang mya ngan las 'das pa la sogs pa rnams brdzun pa'i dngos po'i rgyu mtshan can la gnod pa ma yin no/ /de la mi gnod pas chad par smra ba'am med pa nyid mi ltung la/rang bzhin la sgro ma btags pas phyin ci ma log pa la gnas te phyin ci log gis bskyed pa'i 'khor ba nges par spong zhing rtag par smra bar mi ltung ngo / /'dir yang thog ma nyid du 'thad pa dang bcas pas don chen por yang 'gyur la/ gzhan du rang bzhin yod pa nyid ni 'thad pa dang bral ba'i phyir ro//ci slar rang bzhin med pa dngos por gyur pa la brten nas skye bar 'gyur ram/ phyin ci log bdag nyid ngan pa la rnam par rol pa'i go 'phang la zhugs pas da gdod smos pa nyid las rgyas pa gsal bar rten cing 'brel ba rang bzhin med pa sgrub byed kyi ming thos pa lta bur rlom sems nas 'dri ba la 'jug pa kye ma ngo mtshar to//ji skad du smos pa'i dpyad pa rnams sems la gyis shig /lung 'di las kyang 'di gsal bar byed pas sems la zhog cig ji skad du/ brag phug ri dang rdzong dang chu klung la//gang zhig brjod pa la brten brag ca bzhin/ /'dus byas 'di kun sgyu ma lta bu dang / /smig rgyu dang mtshungs 'gro kun shes par gyis/ /zhes so/ /de'i phyir gang zhig gang na med pa de ni des stong pa nyid du smra ba rnams kyis de ltar yang don rnam par phye ba'i phyir de rnams stong pa nyid la phyin ci log tu khong du chud pa ma yin no//gang yang tshigs su bcad pa 'di skad du/ kun brtags dngos po yod min zhing / /gzhan gyi dbang ni yod pa na/ /sgro 'dogs pa dang skur 'debs pa'i/ /mthar rtogs pa ni phung bar 'gyur / / zhes pa de yang ji skad du smos pa'i bshad pas legs par bshad par 'gyur te/ rang bzhin du brtags pa med la/ gzhan dbang yang brdzun pa slu ba'i chos can byas pa rang bzhin med pa yod pa la/ gang zhig de'i tshe rang bzhin med pa la sgro 'dogs par byed pa dang sgyu ma dang mtshungs pa byas pa ni med do zhes smra ba de ni nges par phung bar 'gyur ro//rtag pa dang chad pa'i mtha'i phyogs nas gnas pas nges par ngan 'gror ltung bas/ 'di ltar rnam rig tu smra ba de rnams la stong pa nyid phyin ci log par rtogs pa med do zhes bya ste/ de rnams ni mkhas pa rnams kyi tshad mar brjod par mi rigs so//de ltar yang bdag dang bdag gi bas stong par bsgrubs pas mig rang bzhin med par bsgrubs nas/ slar yang mig gi rang bzhin stong par bsgrub pa'i phyir gsungs pa/ rtag pa brtan pa ther zug pa yongs su mi 'gyur ba'i chos can ma yin pas mig stong ngo zhes par 'brel to//de bzhin du yang bdag gi sgras ni rang bzhin gyi rnam grangs kyi phyir skyon med do/ /de la mi rtag pa dang bral bas rtag pa'o/ /mi g.yo ba'i phyir brtan pa'o/ /gnas skabs thams cad du gnas pa'i phyir ther zug pa'o//gzhan du mi 'gyur bas yongs su 'gyur ba'i chos can ma yin pa'o zhes bya ste/ 'di rnams ni rang bzhin gyi ming gi bye brag yin gyi nang gi byed pa'i skyes bu'i ni ma yin te/ rten cing 'brel bar 'byung ba rkyen 'di pa tsam la rnam par gnas pas na sngar nyid du de dag bkag pa'i phyir ro//ji skad du stong pa nyid don dam pa'i mdo las/ mig skyes bzhin pa gang du yang 'byung bar mi 'gyur ro/ /'gag bzhin pa nam yang dmyal bar 'gro ba yod pa ma yin no/ /las yod cing las kyi rnam par smin pa yod la/byed pa po ni ma dmigs so/ /gang phung po 'di ni 'jig la phung po gzhan du nying mtshams sbyor te/ chos kyi brda gzhan las so/ /de la chos kyi brda ni 'di'o/ /'di ltar ma rig pa'i rkyen gyis 'du byed ces bya ba la sogs pa'o/ /mdo 'dir ni thog mar byed pa po bkag la/phyis rten cing 'brel bar 'byung ba rnam par gzhag pa ni/ gang la rten cing 'brel bar 'byung ba rnam par gzhag pa las mig yod pa thob pa la/ thar pa 'dod pa rnams mig tu mngon par zhen pa'i gnyen por chos thams cad bdag med par nye bar bstan pas stong pa nyid rnam par thar pa'i sgo la 'jug pa'i phyir ro//de'i tshe rtag pa'i bdag bkag nas cung zad kyang nye bar mkho ba med cing / mig ji lta bar gnas pa la mngon par zhen pa ma bkag na rtag pa'i bdag bkag kyang mig la sogs par mngon par zhen pa'i ba spu yang 'gul bar nus pa ma yin no//ri dwags dang bya la sogs pa bdag rtag pa mi dmigs kyang der zhen pas de'i phyir 'dir rtag pa'i bdag bkag pa'i sgo nas mig bdag med par 'jog pa ni ma yin no/ /'jog na yang nye bar len pa la rtag pa'i bdag bkag pas sam rang bzhin dang bcas pa bkag pas so//gang yang de ltar ci skad gsungs pa'i rigs pas bdag med pas de'i tshe/ gnyen po med pa'i phyir bdag med pa nyid kyang yod pa ma yin no zhes gsungs la/ bdag med min zhes pa la/ bdag dang 'gal ba'i chos 'ga' yang med do zhes bya ba'i don to//yang na ji ltar dngos po dang dngos po med pa ltar bdag dang bdag med la/ ji ltar yang dngos po med na dngos po med pa med la/ de bzhin du bdag med na bdag med pa yang srid pa med do zhes dgongs pa'o/ /yang gang du bdag yod pa yin na de ni bdag med pa'i gzugs la sogs pa'i dngos por yang de med de/nye bar len pa po med na nye bar blangs pa med pas gzugs la sogs pa ma grub pa'i phyir zhes gsungs pa/ bdag med min pa ste bdag med pa yang ma grub pas chos thams cad ming tsam du grub pa'o //'dir smras pa/ gal te yang bdag 'ba' zhig pa med na bdag med pa 'ba' zhig pa yang med la/ de ltar na yang me dang bud shing dag bzhin du bdag dang bdag med dag phan tshun ltos nas grub pa yod pas des bdag dang bdag med pa gnyis ka yang 'byung bar 'gyur zhe na/gsungs pa/ de ltar yang bdag dang bdag med ces pa la yod pa ma yin no zhes pa tshig gi lhag ma'o/ /gal te yang dpyad bzhin pas bdag gam bdag med pa 'ga' zhig yod na/ de'i tshe phan tshun ltos pa 'grub par 'gyur la/gang du de gnyis med na bdag dang bdag med pa ga la 'byung zhes bya ste/ des na bdag dang bdag med pa yod pa ma yin no/ /yang na 'di ni don gzhan te/ kha cig gis smras pa/ gal te yang bdag dang bdag med pa med la de lta na yang bdag dang bdag med pa bkag pa'i bdag dang bdag med pa ma yin pa yod la/de yod pas dgag bya bdag med pa yang 'byung bar 'gyur ro/ /gal te yang bdag dang bdag med pa gnyis su brtags pa dang bral ba chos rnams kyi rang bzhin bdag dang bdag med pa ma yin par 'byung bar 'gyur ro zhes pa 'di yang mi rigs so zhes khong du chud par bya ba'i phyir gsungs pa/bdag dang bdag med 'ga' yang med/ /ces bya'o/ /'ga' yang med ces pa'i 'gag pa 'di ji ltar phyis de ma thag pa'i brjod pa 'ga' dang mngon par 'brel la/ de bzhin du sngar gyi de ma thag pa'i bdag dang bdag med pa dang yang 'brel to//de la 'dir re zhig sngar gyi rtog pa brjod de/ ji skad bshad pa'i rigs pas bdag dang bdag med pa gnyis ka yang ma grub pa'i phyir/ de bkag na bdag dang bdag med pa ga la 'byung zhes sgrub byed gsungs pa/bdag min zhes pa la sogs pa'o/ /phyi ma'i rtog pa yang bdag dang bdag med pa logs su bzhag pa'i dngos po rnams kyi rang bzhin yang med la/ bdag dang bdag med pa las tha dad pa'i rang bzhin ma grub pa'i phyir bdag dang bdag med pa ma yin pa 'ga' yang med do zhes gsungs pa/bdag dang bdag med min 'ga' med/ /ces so/ /yang 'di'i don gzhan te/ chos thams cad ni ming tsam mo zhes rnam par gzhag pa na mu stegs pas smras pa/ chos thams cad ming tsam ma yin te/ kho bo cag gi grub mthas bshad pa brtag pa ma byas pa la sogs pas khyad par du byas pa'i bdag gi don yod pa'i phyir ro zhe na/ 'dir smras pa/ bdag med de/ gang gi phyir pha rol po'i bdag gi sgra la brjod bya'i don bdag yod pa ma yin te/ rang nyid las ma skyes pa'i phyir bong bu'i rwa bzhin la/brtag pa ma byas pa kun tu 'gro ba ma yin te/ nam mkha'i me tog bzhin ma skyes pa'i phyir bdag med do/ /'byung ba'i sems pa can yang 'di snyam du sems te/ bdag med pa ni bden la/ 'on kyang bdag med pa 'byung ba tsam yod do zhes so//rang gi sde pa dag kyang smra ste/ nang gi byed pa'i skyes bu dang bral ba'i bdag med pa phung po tsam yod la/ bdag ni rnam pa thams cad du med do zhes so/ /de dag la ltos nas gsungs pa bdag med min no/ /bdag med pa ni med pa nyid de/ ji ltar med pa de ltar yang sngar nyid du rgyas par bsgrubs so//yang rang gi sde pa kha cig ni 'di skad smra ste/ nye bar len pa la btags pa'i rdzas su yod cing gang zag tu yod pa'i dngos po ni yod la/ chos thams cad bdag med pa 'di la 'ga' zhig gis dbang du byas pa med pa'i phyir/de yang yod pas de'i phyir bdag med pa yang yod do zhes so/ /smras pa/ bdag dang bdag med 'ga' yang med/ /ji skad du smos pa'i rigs pas chos dang gang zag dag bkag pa'i phyir/ gang gi tshe yang 'di ltar bdag dang bdag med pa ste/bdag dang bdag med pa yang mi 'thad la/ de'i tshe thams cad tshig tsam ste/ don gyis stong par grub bo/ /'dir smras pa/ gal te yang khyod kyis brjod bya'i don bkag la/ de lta na yang gang zhig don gyis stong pa'i tshig de de bzhin du yod la/ de las tshig dmigs pa'i phyir dngos po gzhan yang 'byung bar 'gyur ro zhes so//yang na brjod bya las gzhan du rjod byed mi 'thad la/ tshig 'di dag ma bkag par yod pas de'i phyir brjod bya yang 'byung bar 'gyur ro zhe na/ smras pa/ gal te rjod byed yod pa nyid na brjod bya 'byung bar 'gyur la/yod pa ma yin no zhes sgrub par byed pa gsungs pa/ brjod 'ga' med ces so/ /brjod bya las gzhan du rjod byed kyang mi 'jug pas brjod pa yang med do/ /'o na mo gsham gyi bu'i brjod pa brjod bya'i don gyis stong yang brjod bya las gzhan pa yod pas brjod pa yod do zhe na/smras pa/ brjod pas ni ji lta bar dngos po dang dngos po med pa'i brjod bya la brdar byed la/ dngos po dang dngos po med pa de dag kyang med do zhes bsgrubs la/ de dag med na gzhan brjod bya ci zhig yod/ brjod bya med na rjod byed med pas brjod pa yang med do//yang na gnas pa la sogs pa med par bsgrubs pas/ gnas pa la sogs pa med na sgra mi 'grub pa thugs la bzhag nas brjod 'ga' med ces so/ /yang na tshig ni don gyis stong par bsgrubs la/ sgra yang sgra gzhan gyi brjod bya yin pas don nyid la don de yang med pa nyid do zhes bya la/don med pa'i phyir sgra yang med par gzigs nas gsungs pa brjod 'ga' med ces so/ /brjod pa med par gyur na yang brjod bya'i don grub pa med do zhes gnas so/ /'dir smras pa/ gal te rjod byed kyis brjod pa'i don yang med na/de'i tshe ci zhig yod/ smras pa/ kho bos sgyu ma'i nor gyis phyug por byed pa'am smig rgyu'i chus khyod kyis chu'i gdung ba sel bar byed pa'am/ sgyu ma'i ri dwags kyi shas bkres pa nye bar zhi bar byed par mi nus so/ /'o na 'dir kho na nyid gang yin pa de nyid gzung bar bya bar 'gyur la/slar yang 'dir de kho na nyid de ci zhe na/ smras pa/ gal te khyod de kho na nyid la phyin ci log tu go ba dag spong ba dag gis log par sgrub par mi byed cing chos nyid zab mo la gus pa yang skyed na de'i tshe khyod kyi/ brjod bya mya ngan 'das dang mtshungs//dngos po kun gyi rang bzhin stong / /rang bzhin dang ngo bo nyid dang de kho na nyid ces pa rnam grangs so/ /rang bzhin gyis stong pa ni rang bzhin dang bral ba zhes bya ba'i don to/ /mya ngan las 'das pa ni rtag pa ma lus pa skye ba med pa'i rang bzhin rang gi mtshan nyid cung zad kyang med pa ste/ji skad du bcom ldan 'das kyis gang nges par 'di ni sdug bsngal ma lus pa spongs ba/ bor ba byang bar gyur pa zad pa 'dod chags dang 'bral ba 'gog pa nye bar zhi ba nub par 'gyur ba sdug bsngal gzhan du nying mtshams mi sbyor ba/ 'di ni nye bar len pa med pa'o//'di ni zhi ba gya nom pa'o/ /'di ltar phung po thams cad spangs pa sred pa zad pa 'dod chags dang bral ba 'gog pa ni mya ngan las 'das pa'o zhes so/ /'di ltar mya ngan las 'das pa'i rang bzhin ci yang med pa de ltar chos thams cad kyi rang bzhin ci yang med pas de'i phyir chos rnams kyi de kho na nyid phyin ci ma log par bsten pa/gang zhig chos thams cad kyi rang bzhin mya ngan las 'das pa dang mtshungs par brjod par bya'o/ /de ltar na chos rnams kyi de kho na nyid phyin ci ma log par brten par 'gyur gyi gzhan du ma yin no//'dir smras pa/ re zhig mya ngan las 'das pa sdug bsngal dang bral ba tsam la rang bzhin med pa ni rung gi /phyi dang nang gi chos 'du byed dang myu gu la sogs pa dang / ma rig pa dang sa bon la sogs pa rgyu dang rkyen gyis nye bar bskyed pa'i bdag nyid du yod pa rnams ji lta bar rang dang spyi dang thun mong du nyams su myong ba'i rang gi mtshan nyid mya ngan las 'das pa las shin tu bskal pa'i mtshan nyid rnams ji ltar rang bzhin gyis stong pa nyid du bsgrubs par nus/de'i phyir gang chos thams cad mya ngan las 'das pa'i rang bzhin ma yin no zhe na/smras pa/ gal te ma rig pas phyin ci log pa'i rnam par shes pa la nyams su myong ba rnams tshad mar 'gyur na/ de'i tshe 'phags pa dang 'phags pa'i lam gyis ci dgos par 'gyur/ byis pa'i skye bos nyams su myong ba nyid tshad ma la/ tshad mas yang dag par mthong ba'i phyir ma btsal bar de rnams grol bar gyur te/de lta bu yang med pas de rnams kyis nyams su myong ba ni tshad ma ma yin no/ /ji ltar 'phags pa'i lam gyis mngon du byas pa'i 'phags pas chos rnams kyi chos nyid gzigs par gyur pa de la rang bzhin no zhes rigs te/gang zhig ma mthong ba las byis pa rnams nyon mongs la/ gang zhig mthong ba las 'phags pa rnams rnam par grol lo/ /ji ltar na 'di rnams mya ngan las 'das pa dang mtshungs na rang bzhin gyis stong pa'o/ /'o na de kho bo la mngon sum ma yin na/de ji ltar kho bo cag gis 'di rtogs par nus she na/ smras pa/ mos pa med pa dad pa med pa sdig pa'i grogs po dang 'brel pa thos pa chung ba le lo can rmongs pa la sogs pa dang ldan pas de rtogs par 'gal bas des 'di mi mthong ste/ nyon mongs pa'i go skabs su 'gyur bas/sbyin pa dang spro ba dang thos pa mang ba dge ba'i bshes gnyen brten pa dad pa dang mos pa la sogs pa so sor brten par bya'o zhes bya ste/ 'di dag dang ldan pas 'phags pas bstan pa'i rigs pa dang dpe yang 'dir khas blang bar bya'o/ /de ltar thabs dang bcas gang rigs pas nges par yod na chos rnams kyi rang bzhin mngon sum nyid du 'gyur ro//slar yang ci zhig 'dir 'phags pas bstan pa'i rigs pa gang gis chos rnams kyi chos nyid mya ngan las 'das pa dang mtshungs par rigs pas mngon sum du 'gyur zhe na/'phags pas nye bar bstan pa'i phyir gsungs pa/ gang zhig dngos kun rang bzhin no/ /rgyu rkyen tshogs pa'am so so'i dngos/ /kun la yod min de phyir stong / /zhes pa la de la rgyu ni 'bras bu rdzogs par byed pa la 'dra ba'i 'bras bu rdzogs par byed pa'i thun mong ma yin pa'o//'di lta ste sA lu'i myu gus sA lu'i sa bon no/ /rkyen ni thun mong ba ste/ 'di lta ste sA lu'i myu gu de nyid kyi sa la sogs pa'o/ /de yang ji ltar sA lu'i myu gu skyed pa'i yan lag gi dngos por gyur pa de bzhin nas kyi myu gu la sogs pa yang ngo //myu gu la sogs pa'i rgyu las skyes pa'i 'bras bu sa la sogs pa'i rnam pa dang rjes su 'brel pa ma yin la sA lu'i sa bon gyi rnam pa dang rjes su 'brel to zhes bya'o/ /rgyu'i dngos po 'ba' zhig tsam du nye bar 'gro bas 'di la rkyen nyid du rnam par 'jog go//re zhig gang 'di'i rgyu dang rkyen du 'gyur na rdzogs par byed pa ni rgyu'i dngos por gnas la/ gang du rkyen ni 'di'i nges pa'i rgyu ma yin te/ 'di lta ste rnam par shes pa'i dmigs pa'i rkyen no/ /de nyid kyis na rgyu gnyis dang rkyen gnyis so zhes so //yul gcig la rgyu rkyen gyi sgra'i sbyor ba bcom ldan 'das kyis mdzad do / /tshogs pa ni dngos po de dag ma tshang ba med par nye bar gnas pa las skye'i gzhan de ma thag pa nye bar gnas pa las ma yin pas rgyu rkyen tshogs par 'dir rtogs par bya'o/ /so so'i dngos po ni de rnams tha dad pa ste/rgyu dang rkyen tshogs pa ma yin pa'i so so'i dngos po'i rgyu dang rkyen tshogs pa ma yin pas so sor dngos po de thams cad la 'bras bu'i dngos po thams cad kyi rang bzhin med do/ /de'i phyir des stong pas rang bzhin dang bral ba zhes bya ba'i don to//gal te 'dir dngos po rnams kyi rang bzhin 'ga' zhig yod na de nges par 'dus byas sam 'dus ma byas su yod par 'gyur/ de la re zhig 'dus ma byas ni rgyu med pa bdag nyid kyi dngos po ma skyes pa la rang bzhin gyis brjod pa'i skal ba dang ldan pa mi rigs so//'dus byas la yang rang bzhin mi 'thad de/ ci'i phyir na gal te 'dus byas kyi rang bzhin du gyur la/ 'dus byas rnams ni rgyu dang rkyen las skye ba'i phyir na skye ba rgyu dang rkyen la rag las par 'gyur la/ rgyu dang rkyen la rag las nas skye ba ni byas pa ste/ rang bzhin du mi 'thad do//yang 'di snyam du sems te/ rgyu dang rkyen gyis bskyed pa'i dngos po rnams kho na rang bzhin no zhe na/ nges par 'di skad brjod par bya ste rgyu dang rkyen gang las rang bzhin gang zhig skye na de ci de rnams la yod pa las de skye bar 'gyur gyi/ gang zhig gang la med par de de las mi skye ste/'di lta ste 'jim pa las snam bu'am skud pa las bum pa zhes so/ /'di ni rgyu la sogs pa las skye bar 'dod na nges par rgyu la sogs pa la rang bzhin yod pa nyid du khas blang bar bya na/ 'di ni khas blang bar mi rus te/ yod bzhin pa na dmigs par thal ba dang /skye ba don med pa dang / thug pa med pa'i skyon dang / rgyu med pa yod par thal bar 'gyur ro/ /gal te yang rgyu la sogs pa 'bras bu'i rang bzhin yod na/ de dag la thams cad kyi bdag nyid kyis yod dam cha shas kyis yod/ de la re zhig gal te thams cad kyis bdag tu rtog na rgyu dang rkyen rnams mang po'i phyir 'bras bu du mas 'jug la/de'i phyir rgyu la sogs pa so so la 'bras bu med la rgyu du mas 'bras bu gcig sgrub pa ma yin zhing / rgyu gcig gis bsgrub par bya ba nyid du 'gyur ro/ /de'i phyir gang la gnas pa de nyid la 'jug pa'i phyir de ltar re zhig thams cad kyi bdag nyid kyi rgyu la sogs pa la 'bras bu mi gnas so//da ni cha shas kyis kyang mi gnas te/ 'bras bu gcig dum bur skye bar thal bar 'gyur la/ rgyu tha dad pa na yang rgyu du mas 'bras bu skyed par thal lo/ /gang yang rgyu la sogs pa la mi gnas na/de rgyu la sogs pa las mi skye la rtsa ba'i rab byed dang por yang na de rkyen la sogs pa la med kyang de rnams las 'byung na/ rkyen min las kyang 'bras bu ni/ /ci phyir mngon par 'byung mi 'gyur/ /zhes pa'i tshig las so/ /gang gi tshe 'bras bu rgyu la sogs pa la mi gnas pa'i phyir de de rnams las mi skye la/de'i tshe ma skyes pa la yod pa nyid mi rung ngo / /gang yang de ni da ltar na des na dngos po rnams kyi rang bzhin med pas dngos po thams cad mya ngan las 'das pa dang mtshungs pa rang bzhin gyis stong par grub bo// 'dir kha cig gis smras pa/ rgyu dang rkyen gyi grangs bzhin du 'bras bu rnams yod par kho bo cag khas mi len la/ de'i phyir 'bras bu yod pa nyid kyi skyon kho bo la med cing med pa nyid kyang brjod par mi nus te/ shin tu mi 'dra ba med pa'i phyir/ bum pa dang thags mkhan lta bu sA lu'i sa bon dang sA lu'i myu gu la med la/de skyed pa'i nus pa yod pa'i phyir de ltar de ni rgyu la sogs pa la 'bras bu yod pa dang med pa nyid kyi bsam pa spangs te rgyu las 'bras bu skye'o zhes pa 'dis re zhig skye ba grub par rnam par 'jog go// skye ba grub par gnas pas 'gag pa grub par 'gyur te/ gnas pa la sogs pa ni ming tsam ma yin pa kho na'o/ /skye ba dang gnas pa dang 'jig pa dang ldan pas dngos po rnams rang bzhin med pa ma yin te/ rang gi mtshan nyid du yod pa'i phyir ro zhe na/ smras pa/ de ltar smras pa de ni gang cung zad tsam ste/ci'i phyir na/ gang zhig dngos po rnams kyi rang gi mtshan nyid grub par 'dod na/ de'i rang gi mtshan nyid de/ rgyu la sogs pa la yod pa'am med pa zhig /brtags pa gsum pa ni med la/ gal te yang rgyu ni 'bras bu skyed pa'i nus pa can du yod na/de lta na yang rgyu la 'bras bu'i rang gi mtshan nyid yod pa ma yin te/ dngos po rnams ma byung ba 'byung bar khas blangs pa'i phyir ro/ /de lta na yang skyon de nyid las log pa ma yin no/ /gzhan yang / yod pa yod phyir skye ba min/ /med pa med phyir mi skye la/ /chos mi mthun phyir yod med min//skye ba med pas gnas 'gag med/ /gang zhig 'di skad du smra ste/ /yod pa dang med pa'i bsam pa spangs nas rgyu las 'bras bu skye'o zhes bya ste/ 'dir skye ba grub bo zhe na/ de ni ma yin te/ ci'i phyir na dngos por smra ba'i dngos po rgyu mtshan ni yod pa dang med pa'o//ci'i phyir de gnyis su smra ba spangs nas rten cing 'brel bar 'byung ba stong par smra ba bzhin no/ /des na gang zhig rgyu las skye'o zhes brjod na/ ci de yod pa skye'am/ 'on te med pa skye/ gal te re zhig yod na/ de'i tshe 'bras bu de yod pa'i dngos po'i phyir rtag tu yod bzhin pa la ste/yod bzhin pa'i phyir da lta ba'i rnam par shes pa bzhin skye ba ma yin no zhes bya ste/ de ltar re zhig yod pa skye bar mi 'gyur te yod pa'i phyir ro/ /yang na med na med bzhin pa'i rang bzhin gyi 'bras bu ni de lta na yang med pa'i phyir 'bras bu rtag tu yod bzhin pa min la/ yod bzhin pa ma yin pa'i phyir ri bong gi rwa bzhin skye ba med do/ /de lta na yang gnyis kyi tshul gyis skye bar 'gyur ro zhe na/ smras pa/ chos ni mi mthun phyir yod min/ /gang zhig 'gal ba'i chos de ni mi mthun pa ste/ 'gal ba'i chos kyi dngos po'i chos mi mthun pa'o/ /yod pa dang med pa dag phan tshun 'gal ba gang la de yod pa de phan tshun 'gal ba'i chos mi mthun pa'i dngos po la gang zhig skye ba yod pa ma yin no//skye ba yod na yod par 'gyur gyi skye ba med pa la gnas pa dang 'gag pa mi 'thad do zhes bya ste/ gnas pa dang skye ba dang 'jig pa med cing / de las gnas pa la sogs pa'i tshig don gyis stong par grub la/ gnas pa dang skye ba dang 'jig pa dang bral ba'i dngos po rnams rang gi mtshan nyid yod par ga la 'gyur zhes bya ste/ dngos po rnams mya ngan las 'das pa dang mtshungs par rang bzhin med par grub bo/ /'dir smras pa/gal te yang de ltar yod pa las skye ba'am med pa las skye zhes smra bar mi nus kyang de lta na yang skye'o zhes bya ba 'di ni re zhig skye bo ba lang rdzi mo'i bar la grags par yod la/ de'i phyir skye ba la sogs pa yod pa'o zhes bya la de yod pas dngos po rnams kyi rang bzhin yod do zhe na/smras pa/ gal te bskyed pa zhes bya ba gzugs la sogs pa'i dngos po rnams kyi rang bzhin yod na de ltar 'gyur la 'on kyang med de ci'i phyir na 'dir bskyed bya cung zad yod na/ de skyed pas yod par 'gyur gyi/ bskyed bya cung zad kyang med la/ skyes pa dang ma skyes pa dang skye bzhin pa'i bskyed pa mngon par 'dod pa rnams kyi skyes pa dang ma skyes pa bskyed bzhin pa'i bskyed bya nyid mi srid do zhes bstan pa'i phyir gsungs pa/skyes pa gang zhig bskyed bya min/ /ma skyes de yang bskyed bya min/ /skyes pa dang ni ma skyes pa'i/ /skye bzhin pa yang bskyed bya min//de la re zhig skyes pa ni yod bzhin pa'i phyir ro / /da ltar ba bzhin bskyed bya min te/ skye bar mi rung bas so/ /yang na bskyed bya de de ltar na skyes pa ma yin pa de skye ba la ltos pa'i phyir ro/ /yang na skyes pa yang bskyed byar 'gyur na/ de'i tshe grub pa la sgrub par 'gyur la nam yang bskyed bya ma yin par mi 'gyur ro zhes bya ste/de ltar re zhig skyes pa bskyed bya min no/ /gang ma skyes pa de dngos po ma thob pa'i phyir ci'i ngo bo yang ma yin la/ gang zhig ci'i ngo bo yang ma yin pa de ni nges par gzung ba'i ngo bor med pa'i phyir 'di zhes bya ba de las skye'o zhes pa'i bye brag bstan du med pas ma skyes pa yang bskyed bya min no//gzhan yang gang ma skyes pa de la rten med pas skye ba'i bya ba 'jug pa nyid mi srid do zhes bya ste/ ma skyes pa bskyed bya min no/ /'dir smras pa/ ma skyes pa nyid bskyed bya min la skyes pa thams cad kyang ma yin no//'on kyang gang gis rgyu rkyen gyi tshogs pa nye ba las ma skyes pa de nyid bskyed par bya ba'o zhe na/ smras pa/ de su zhig gi /rgyu dang rkyen gang gis bskyed par bya ba'i 'o/ /slar yang su zhig gis bskyed par bya na/ gang de'i rgyu dang rkyen gyis so zhes brjod pa na phan tshun brten pa thob par 'gyur na phan tshun dag ma grub pas gnyi ga yang med pa'i phyir ma skyes pa bskyed bya min/ da ni skyes bzhin pa yang bskyed bya min te/ ci'i phyir ni skye bzhin pa ni skyes pa dang ma skyes pa'i phyir 'dir skye bzhin pa zhes bya ba gang zhig cung zad skyes la cung zad ma skyes pa'o//gang de'i cung zad skyes pa de de bzhin du bskyed bya ma yin te/ bshad pa'i skyon yin pa'i phyir ro/ /gang 'di'i ma skyes pa yang bskyed bya ma yin te/ smos pa'i skyon yod pa'i phyir ro/ /skyes pa dang ma skyes pa zhes pa skyes pa pa dang ma skyes pa'i phyir ro zhes pa'i don te/dang po'i mtha' can gyi gtan tshigs su bstan pa'i phyir dngos po gcig la skyes pa dang ma skyes pa dus gcig pa mi srid do zhes bya ste/ de ltar gyur pa'i dngos po mi srid pas bskyed bya ma yin pa nyid do/ /gang gi tshe de ltar skyes pa bskyed bya ma yin la ma skyes pa yang bskyed bya ma yin zhing skyes pa dang ma skyes pa'i skye bzhin pa yang bskyed bya ma yin pas/de'i tshe bskyed bya med pas 'di dag bskyed par ga la 'gyur zhes pa de ltar 'gyur ro/ /gang gi tshe bskyed pa zhes bya ba de la mi srid pa de'i tshe skye ba med do zhes bya ba grub bo// 'dir smras pa/ gal te bskyed bya mi srid kyang de lta na yang 'bras bu skyed byed kyi rgyu re zhig yod la/ bskyed bya med na skyed byed kyang mi rung ngo zhes bya ste/ des na bskyed bya yang 'byung bar 'gyur ro zhe na / smras pa/ gal te skyed byed kyi rgyu nyid yod na bskyed bya yod par 'gyur la/ yod pa ma yin no zhes bstan pa'i phyir gsungs pas / 'bras bu yod na 'bras ldan la/ /der med gyur na rgyu med mtshungs/ /yod dang med pa na yang 'gal/ /dus gsum du yang 'thad ma yin/ 'dir yod bzhin pa'i mnyam pa'i sa bon dang lcags sreg gi gong bu la sogs pa la/myu gu'i rgyur rnam par mi 'jog ste/ mi rung ba'i phyir/ sa bon la rnam par 'jog ste myu gu zhes bya ba'i 'bras bu dang ldan pa'i phyir ro/ /de ni 'di ltar 'bras bu dang 'brel ba med pa'i phyir rgyu ma yin la/ ldan pa'i sgra 'di ni rgyu'i rjod byed du 'chad na/ gyur na zhes kha bskang ngo //des na 'bras bu yod na 'bras bu dang ldan par 'gyur ro zhes bya ste/ 'bras bu yod na rgyur 'gyur ro zhes pa'i don to/ /gzhan du gal te 'bras ldan gyi sgras khyad par du byas par ma gyur na/ de'i tshe 'di su'i khyad par yin pas gzung bar ma gyur pas su zhig 'bras bu dang ldan zhes bya'o//de las kyang don ma tshang bar 'gyur te/ rgyu'i rjod byed la 'bras ldan gyi sgra'i don ma tshang bar 'gyur ro/ /yang na 'di ni rgyu med mtshungs/ /zhes brjod pa'i shugs las don gyis thob na/ de lta na yang 'gro ba po ma yin pa mi 'gro'o zhes pa 'di'i rgyu'i sgras brjod pa'i shugs gang zhig las don gyis thob par rigs kyi gzhan ma yin la/rgyu'i sgra'i rnam grangs nye bar len par brjod kyi shugs kyis thob par ma bshad do zhes bya'o/ /de ltar yin na yang de lta na yang skyon ci yang med de bshad pa las bye brag bsgrub par bya'o//de la lnga po da ltar ba'i 'bras bu 'dzin cing / gnyis ni da ltar bskyed par byed la da ltar ba dang 'das pa la ni gnyis kyis so/ /gcig ni 'das pas bskyed do zhes chos mngon pa las rnam par gzhag pa'i phyir/ lhan cig 'byung ba dang skal ba mnyam pa dang mtshungs par ldan pa dang kun tu 'gro ba dang rnam par smin pa zhes bya ba'i rgyu lnga da ltar ba'i gnas skabs nyid na 'bras bu 'dzin te/'bras bu ma bzung na ma 'ongs pa'i dngos po bskyed mi nus pa'i phyir na rgyu'i dngos po la gnas so/ /'bras bu yang 'ga' zhig da ltar ba nyid du skyed de 'di lta ste/lhan cig 'byung ba'i rgyu dang skal ba mnyam pa'i rgyu dag gi skyes bu byed pa'i 'bras bu bzhin no/ /'ga' zhig da ltar ba dang 'das pa ste/ 'di lta ste skal ba mnyam pa'i rgyu dang kun du 'gro ba'i rgyu dag gi rgyu mthun pa'i 'bras bu'o/ /'das pa'i dngos pos bskyed do zhes pa ni gsal lo//da ltar ba ni de ma thag tu rdzogs pa'i phyir 'bras bu bskyed pa'o/ /'bras bu skyes pa na de dag kyang 'das pa 'bras bu bskyed pa'i phyir slar yang 'bras bu skyed pa ma yin la/ da ltar bskyed pa'i 'bras bu slar bskyed par mi nus so// rnam par smin pa'i rgyu ni 'das pa nyid kyis 'bras bu 'byin to / /gang gi tshe de ltar rgyu rnams 'bras bu 'dzin pa dang skyed pa'i 'brel pa byas pas rgyu nyid la de'i tshe 'bras bu yod na de dang 'brel ba'i rgyu ni rgyu nyid du 'thad kyi med pa la ni ma yin no/ /gang yang rgyu rnams rgyu nyid du grub pa'i don du 'bras bu yod par khas len pa de'i tshe 'bras bu yod bzhin pa la rgyus ci zhig bya/gang gi don du rgyu yongs su tshol ba de'i 'bras bu yod pa nyid na rgyus dgos pa cung zad kyang med do zhes bya'o/ /yang na 'bras bu 'di'i rgyu 'di'o zhes pa rnam par gzhag pa'i don du 'bras bu yod bzhin pa'i rgyu 'dod pa de yang mi 'thad de/ci'i phyir na 'dir 'bras bu yod par khas blangs pa la dgos pa med pas rgyu med pa nyid du grub par 'bod pa dang / rgyu med na 'bras bu yod pa nyid sel ba dang phan tshun brten pas bsal bar 'gyur bas rgyu dang 'bras bu 'di'i rgyu 'di'o zhes mi 'thad do//des kyang 'bras bu 'di'i rgyu 'di'o zhes rnam par gzhag par don du 'bras bu yod bzhin pa'i rgyu 'dod pa de ni mi rigs te/ ji srid de'i 'bras bu ma rdzogs pa de srid du dngos po 'ga' zhig rgyu'i rnam par gzhag pa med par 'gyur bas 'bras bu don du gnyer ba'i 'jig rten pa su zhig nye bar len pa dang spong ba la 'jug par 'gyur/'bras bu don du gnyer ba rnams kyis sngar rgyu nye bar len cing rgyu ma yin pa yongs su spangs nas 'jug par 'gyur ro zhe na/ 'di dag ni cung zad tsam ste/ de ni 'bras bu yod na rgyus dgos pa cung zad kyang med do/ /yang na de'i rgyus dgos pa yod do zhe na/ de lta na yang de ni yod pa ma yin te/ skyes pa slar yang mi skye bas thug pa med pa'i skyon dang / skye bo don med pa'i phyir ro zhes bya ste/ skye ltar de bzhin du 'bras bu yod pa ni rgyu 'thad pa ma yin no//yang na ji skad smos pa'i skyon bsal ba'i don du med pa 'bras bu 'dod na/ de lta na yang / der med na yang rgyu med mtshungs/ /zho zhes bya ba 'bras bu yod na/ 'o ma ni de'i rgyu la chu ni ma yin no zhes rigs par 'gyur te/ 'bras bu ldan pa dang mi ldan pa'i phyir ro//gang du de'i 'bras bu zho zhes bya ba med / de'i tshe zho zhes bya ba 'o ma'i 'bras bu la chu la sogs pa ni rgyu ma yin pa dang 'o ma rgyu yin pa dag khyad par med pa'i phyir 'o ma la sogs pa la zho mi skye bar 'gyur te/ rgyu med pa dang mtshungs pa'i phyir ro/ /de ltar 'bras bu med na de la rgyu yang med do//yang na 'di snyam du yod pa dang med pa'i 'bras bu'i rgyu yod do zhe na/ smras pa/ yod dang med pa na yang 'gal te/ 'bras bu gcig la yod pa dang med pa phan tshun 'gal ba'i phyir mi srid do zhes bya ste/ de lta bu'i 'bras bu yod pa ma yin pa nyid do// de med na 'bras bu yod bzhin pa ma yin la/ 'bras bu la ltos pa med pa'i rgyu nam yang ga la zhig ces pas ji skad du smos pa'i rigs pas dus gsum du 'bras bu'i rgyu 'thad pa ma yin no zhes bya ste rgyu med do/ /de nyid kyis na gsungs pa/ dus gsum du yang 'thad ma yin/ /zhes bya'o// de la 'bras bu yod pa'i rgyu 'dod na sngar 'bras bu la phyis ni rgyu'o zhes thob par 'gyur te/ slob ma dang slob dpon bzhin no/ /'bras bu med na sngar ni rgyu la phyis ni 'bras bu'o zhes thob par 'gyur te zho dang 'o ma bzhin no/ /yod pa dang med pa'o zhe na/ da lta ba la rgyu dang 'bras bu dag 'thob par 'gyur te/skye bzhin pa ni yod pa dang med pa'i ngo bo'i phyir ro/ /de ni 'di ltar rnam pa thams cad rgyu mi 'thad par gzigs nas gsungs pa/ dus gsum du yang 'thad ma yin/ /zhes so/ /yang na dus gsum du yang 'thad ma yin// zhes pa'i yang gi sgra ni phyi bar blta'o/ /de la rgyu ni 'das pa dang da ltar dang ma 'ongs pa nyid kyis na dus gsum la 'bras bu yang dus gsum mo/ /'bras bu re re la yang dus gsum du yang rgyu mi srid do / /ji ltar bstan pa'i rigs pas zhes gsungs pa/ dus gsum rnams su 'thad ma yin//zhes bya'o/ /de skad du yang rtsa ba'i rab byed nyi shu par/ 'das pa'i 'bras bu 'das pa yi/ /rgyu dang lhan cig ma yin la/ /ma skyes pa dang ma skyes pa/ /nam yang lhan cig yod ma yin/ /ma skyes pa yi 'bras bu dang / /ma skyes rgyu dag lhan cig min//'das pa dang ni ma skyes pa/ /nam yang lhan cig yod ma yin/ /ma skyes pa yi 'bras bu dang / /skyes pa'i rgyu dag lhan cig min/ /ma skyes pa dang ma 'gags pa/ /lhan cig nam yang ma yin no/ /zhes gang gi chos 'di ltar dpyad na rgyu mi srid pa de'i tshe rgyu med na/des bskyed bya 'bras bu med la/ bskyed bya 'bras bu med pas skye ba med pa grub bo zhes bya'o/ /'dir smras pa/ rgyu'i grangs nye bar bstan pa yod pa'i phyir yod pa nyid de/ yod pa ma yin pa'i rus sbal gyi spu la grangs nye bar ston pa ma yin la rgyu'i grangs nye bar bstan pa'i phyir/byed rgyu lhan cig 'byung ba dang / /skal mnyam mtshungs par ldan pa dang / /kun tu 'gro dang rnam smin rgyu/ /rgyu ni rnam pa drug tu 'dod/ /ces chos mngon pa las so/ /mdo las kyang gsungs la/ chos gcig ni khyad par gyi skal ba can te/gang tshul bzhin yid la byed pa'o/ /rgyu dang rkyen gnyis kyis yang dag pa'i lta ba bskyed pa ste/ nang gi bdag nyid kyis tshul bzhin yid la byed pa dang / gzhan las rjes su mthun pa'i sgra'o/ /chos gsum ni mang po byed pa ste/ skyes bu dam pa bsten pa dang /dam pa'i chos nyan pa dang / tshul bzhin yid la byed pa'o zhes so/ /smras pa/ gal te rgyu yod na/ de'i grangs yod pa nyid la/ yod pa ma yin te/ ji ltar med pa de ltar bstan pa'i phyir gsungs pa/ gcig med par ni mang po dang / /mang po med par gcig mi 'jug /de phyir rten cing 'brel 'byung ba'i/ /dngos po mtshan ma med pa yin/ /'dir tha dad pa rnams su bgrang ba'i brda la 'jig rten du grangs zhes rnam par 'jog ste/ tha dad pa 'di rnams bgrang bar byed rtsi bar byed do zhes byas nas grangs de yang gcig dang gnyis dang mang po la sogs pas so //de la gang 'di'i gcig gi grangs las bgrang bya gcig tu rnam par 'jog la/ de bzhin du gnyis kyi grangs kyis gnyis kyi dngos po la/ mang po'i grangs kyis mang po'i dngos po'o/ /de la gang zhig gcig mang po dngos po la mi ltos par 'ga' zhig grub par 'gyur na gcig gi grangs su 'gyur la/mang po la ma ltos par gcig gi dngos po'i rang gi ngo bo grub pa med do/ /de la gang re zhig bdag nyid dang bco lnga'i chos skye ba de rnams chos bco lnga la ma ltos pa'i gcig gi chos ni med do// gzhan yang gal te 'di'i gzugs can gyi dngos po gcig 'dod na/ de 'dod pa'i khams su rdzas brgyad kyi bdag nyid la/ dbang po las 'das pa'i phyir zhes pa'i nges pa las sgra'i rdul phra rab ni ma yin no/ /rdzas bdun la ma ltos par rang gi ngo bo grub pa med do// yang na gal te gzugs khams su sems dang sems las byung ba'i rang bzhin la/ sems dang sems byung nges lhan cig /zhes pa'i nges pa las thams cad bsdus na rdzas bcu gcig gi bdag nyid la ltos so/ /yang na ldan pa ma yin pa rnams kyi ste/ de la yang /de dag skye ba'i skye la sogs/ /de chos brgyad dang gcig la 'jug /ces pa'i nges pa las de de ltar mang po la ltos par dngos po gcig med la/ gang gi tshe 'di ltar mang po la ma ltos par dngos po gcig med pa de'i tshe/ dngos po gcig pu 'grub par mi 'gyur na/gcig bsags pa ga la zhig /gcig bsags pa med na mang po yod pa ma yin no zhes bya ste/ mang po yang med do/ /ji skad du 'phags pa lhas / dngos po gang gang rnam brtags na/ /de dang de la gcig med la/ /gang du gcig kyang med pa na//gang du ma 'ongs yod ma yin/ /zhes so/ /gang gi tshe de ltar dngos po mang po la ma ltos par dngos po gcig med pa de'i tshe/ dngos po gcig med pa la mang po 'thad pa ma yin no/ /gang gi tshe yang dngos po gcig med par gyur na mang po ma 'thad pa de'i tshe mang po med pas de dang 'brel pa las byung ba'i gcig kyang med do zhes gsungs pa/mang po med par gcig mi 'jug /ces bya ba la/ mang po med na gcig mi srid do zhes bya ba'i don to/ /gang du gcig la gcig gam mang po'i dngos po med pa de la gcig gi grangs sam mang po nyid kyi grangs ga la 'jug bya ba ste/des na grangs med la/ grangs med na yang grangs srid pa'i rgyu mtshan gyis grub pas rgyu mi 'grub bo/ /'dir smras pa/ gal te gcig med na de la gcig gi tha snyad mi 'byung na/ bum pa gcig ces pa dang gal te mang po med na de'i tshe mang po'i tha snyad med par 'gyur na/bum pa mang po zhes so/ /smras pa/ su zhig de skad smra/ gcig med cing mang po med do zhes bya ba/ kho bos gcig dang mang po'i dngos po'i ngo bo grub pa bkag la/ gang las de rnams kyi rang gi ngo bo grub pa med pa/de phyir rten cing 'brel 'byung ba'i/ /dngos po mtshan ma med pa yin/ /gang kho na de rnams kyi ngo bo ma grub pa de nyid kyis na dngos po rnams rten cing 'brel bar 'byung bar 'gyur ro/ /rang bzhin yod pa rnams skye ba don med pa'i phyir/ rang bzhin ma grub pa'i gzugs brnyan la sogs pa ni rten cing 'brel bar 'byung ba nye bar thob la/de nyid kyis na chos thams cad mtshan ma med pa dang chos thams cad rang bzhin gyis stong par grub pa'am / rang bzhin med pas phan tshun du bye brag yongs su ma brtags pas mtshan ma med pa ste/ dngos po thams cad bye brag med pas gcig gi rang bzhin no zhes bya ba'i don to/ /rnam par shes pa'i yul ma yin pa'i phyir yang mtshan ma med pa ste/ rnam par shes pa ni mtshan ma la dmigs pa'i phyir na/ rnam par shes pa'i dmigs pa gzhan las khyad par 'ga' zhig gis khyad par du gyur pa'i rang gi dmigs pa la 'jug bzhin pas 'jug par 'gyur grang na/de yang khyad par gyi dmigs pa'i rang bzhin med pas med do zhes bya ste/ 'di nyid kyis na rnam par shes pa'i yul ma yin pas dngos po mtshan ma med pa'o zhes bya'o/ /gzhan dag ni gzhan du'ang smra ste/'dir nges par tha snyad kyi don du don la ming dag 'jug la/ de rnams kyang phan tshun du rang las gzhan pa'i ming rnam par gcad pa'i sgo nas rang gis rtogs par byed la/ mang po yod kyang de dag rnam par gcad pa'i don du gcig ces bya ba'i tshig 'thad la de yang gzhan med pa 'dis ci zhig rnam par gcad par bya zhes bya ste/sbyor bar mi byed par thal lo/ /ming gi rang bzhin las gzhan pa'i gcig gi grangs 'ga' zhig yod pa ma yin te/ dgra de las ma grol lo zhes bya ba lta bu la sogs pa yul gzhan du brjod pa'i tha snyad las de dag 'di ltar mang po dang 'brel ba dang mang po'i rgyu mtshan gyis mang po las gzhan du gcig yod pa ma yin no zhes bya ba la/gzhan la rag las pas rang brgyud pa ma yin la/ rang brgyud pa ma yin pa'i phyir yongs su ma grub pa'o/ /de bzhin grangs gcig shos kyang shes par bya'o//gal te de ltar grangs mi 'thad na gcig dang gnyis dang mang po la sogs pa'i tha snyad ji ltar 'dogs she na/ de phyir rten cing 'brel 'byung gi/ /dngos po mtshan ma med pa yin/ /'di skad ces smras par 'gyur te/ gang gi phyir de ltar phan tshun ltos pa'i phyir na gcig gam mang po la rang gi mtshan nyid mi gnas pa de'i phyir rten cing 'brel bar 'byung ba'i rnam pa thams cad la de ltar dngos po mtshan nyid med pa'o//ji ltar thags kyi yon tan gyi mtshan nyid pas thags nyid la ma grub kyang / nye bar brten nas snam bu nyid du btags la/ de bzhin du don dam par gcig med kyang de la brten nas mang po'i tha snyad byed la/ mang po ma grub na yang de la brten nas gcig gi tha snyad 'dogs la / don dam par ni mtshan ma med pas dngos po'i mtshan ma med pa zhes bya'o/ /mtshan ma med pa nyid pas mtshan ma med la/dngos po nyid du tha snyad pa'i blos mtshan mar byas pas mtshan ma zhes bya ste/ de yang yongs su ma grub pa nyid pas mtshan ma med pa zhes bya'o/ /'dir smras pa/ gal te khyod kyis de ltar grangs bkag pas rgyu med par bsgrubs na/ kho na de ltar gyur na khyod kyis rten cing 'brel bar 'byung ba thob par mi 'gyur te/ji ltar zhe na/ 'di ltar 'dir rgyu la brten nas 'bras bu gang zhig skye ba rten cing 'brel bar 'byung ba'o/ /de yang rgyu med par bsgrubs pas gnod par 'gyur la/ de la gnod pa yang rung ba ma yin te/ de mthong bas chos mthong bar bcom ldan 'das kyis gsungs te/gang rten cing 'brel bar 'byung ba mthong ba des chos mthong la/ gang gis chos mthong ba des de bzhin gshegs pa mthong ngo zhes mdo las gsungs pa'i phyir ro/ /des na rten cing 'brel bar 'byung ba yod pa'i phyir skyed byed kyi rgyu yod do zhe na/smras pa/ rgyu la brten nas 'byung ba brtags pa ni rung gi rgyu med pa la ni ma yin no/ /'di ltar yang rten cing 'brel bar 'byung bar brtags pa mi 'thad de/ bdag gi phyir/ rten 'byung yan lag bcu gnyis gang / /sdug bsngal 'bras can de ma skyes//sems gcig la yang ma yin zhing / /du ma la yang de ma yin/ /de la ma rig pa'i rkyen gyis 'du byed ces bya ba la sogs pa nas rga shi'i mthar thug pa la rten cing 'brel bar 'byung ba yan lag bcu gnyis su gsungs la/ de yang rten cing 'brel bar 'byung ba 'di'i 'bras bu sdug bsngal te/sdug bsngal ni 'di'i 'bras bu zhes bya bas sdug bsngal 'bras can la/ gang mi rtag pa de sdug bsngal lo zhes rnam par gzhag pa'i phyir/ yan lag bcu gnyis po 'di rnams ni rtag pa'o/ /mi rtag pa'i phyir gnod pa'i bdag nyid can la/gnod pa'i bdag nyid yin pa'i phyir sdug bsngal lo/ /de nyid kyis na gsungs pa/ 'di ltar 'di ni sdug bsngal gyi phung po chen po 'ba' zhig 'byung bar 'gyur ro zhes so/ /gang zhig byas pa de mi rtag la/ gang mi rtag pa de ngo bo nyid kyis ma skyes pa'o//gang zhig ngo bo nyid kyis ma skyes pa de skye ba med pa'o zhes gsungs pa/ sdug bsngal 'bras can de ma skyes/ /zhes so/ /sdug bsngal 'bras bu'i phyir ma skyes pa zhes bya ba'i don to/ /su zhig skye ba med ce na/ gsungs pa/ rten 'byung yan lag bcu gnyis gang / /zhes pa la/rgyu'i yan lag kyang sdug bsngal yin pa'i phyir skye ba med pas yongs su bzung bas stong pa nyid du so sor gnas par 'thad do/ /gang gi phyir 'di dag gang zhig sdug bsngal 'bras can yan lag bcu gnyis kyi rten cing 'brel bar 'byung ba gsungs pa de yang skye ba med / ci'i phyir zhe na/ gang gi phyir rnam par dpyad na/ sems gcig la yang ma yin zhing / /du ma la yang de ma yin/ /de la ma rig pa dang 'du byed dag /'das pa'i srid pas bsdus pa'i phyir dang / rnam par shes pa dang / ming dang / gzugs dang / skye mched drug dang / reg pa dang /tshor ba dang / sred pa dang / len pa dang / srid pa'i yan lag rnams da ltar gyi srid pas bsdus pa'i phyir dang / skye ba dang rga shi'i yan lag rnams ma 'ongs pa'i srid pas bsdus pa'i phyir sems gcig la mi skye la/ du ma'i sems kyang dus gcig tu nye ba ma yin pa'i phyir mi skye'o//sems gcig la yang 'das pa dang / ma 'ongs pa dang / da ltar byung ba'i srid pa rnams cig car du yod pa ma yin te/ sngar dang phyi ma'i yan lag dag sa bon dang myu gu bzhin du sems gcig la brten pa'i rigs pa dang 'gal ba'i phyir ro/ /zhes bya la/du ma la yang de mi srid do/ /yang na 'di ltar sems te/ 'das pa dang / ma 'ongs pa'i sems blos gzung zhing / da ltar ba ni yod bzhin pa'i phyir du ma'i sems la brten nas yan lag bcu gnyis kyi rten cing 'brel bar 'byung ba rnam par 'jog go zhe na/ smras pa/ gal te yang khyod kyis 'das pa dang ma 'ongs pa'i sems blos sgro btags par byas na/ de lta na yang de dag gi rang gi ngo bo med pas rten cing 'brel bar 'byung ba'i rten nyid du mi rung ngo / /sems la ma brten par yang rten cing 'brel bar 'byung ba'i rnam par gzhag pa mi 'thad do//de'i phyir sems du ma cig car du nye ba ma yin pas du ma'i sems la mi rung ngo / /gang zhig 'di snyam du yang sems na/ sems gcig la yang yan lag bcu gnyis rnam par 'jig ste/ 'di lta ste rnyed pa'i dbang gis srog chags rnams srog gcod par byed cing gang rmongs pa de ma rig pa'o//gang sems pa de 'du byed do / /dngos po so sor ma rig pas rnam par shes pa lhan cig 'byung ba'i dbang las phung po rnams ni ming dang gzugs ming dang gzugs la rnam par gnas pa'i dbang po rnams ni skye mched drug /skye mched drug las mngon par grub pa ni reg pa/reg pa nyams su myong ba ni tshor ba/ gang chags pa de ni sred pa/ de dang mtshungs par ldan pa'i kun nas bkris pa ni len pa/ des kun nas slong ba'i lus dang ngag gi las ni srid pa/ chos de rnams kyi gsal bar snang ba ni skye ba/ yongs su smin pa ni rgas pa/'jig pa ni 'chi ba zhes bya'o/ /'di dag ming bsgrags pa tsam gsungs pa ni bden te/ ma rig pa la sogs pa skad cig ma gcig la byas kyi rgyu dang 'bras bu'i dngos po nye bar bstan pa ni ma yin la/ rgyu dang 'bras bu'i dngos po'i don ni rten cing 'brel bar 'byung ba'i don te/de rnams lhan cig tu 'byung ba ma grub bo/ /mar me dang 'od bzhin du grub bo zhe na/ ma yin te/ de la yang mtshungs par 'gyur ba'i phyir ro/ /gang gi tshe sems gcig la yang rten cing 'brel bar 'byung ba du ma mi srid pa de'i phyir rten cing 'brel bar 'byung ba skye ba med do zhes grub bo//'dir smras pa/ gal te yang sems gcig gam du ma rten cing 'brel bar 'byung ba 'di rnams mi srid na/ de lta na yang bcom ldan 'das kyis rten cing 'brel bar 'byung ba yan lag brgyud ma rnams kyis rgyu brgyud ma nye bar gsungs la/ yod bzhin pa ma yin pa'i mo gsham gyi bu la rgyu brgyud mar nye bar ma bstan pas/ de'i phyir rten cing 'brel bar 'byung ba yod do zhes bya ste/ 'di ltar rga shi'i rgyu skye bar gsungs la/ skye ba'i srid pa la ji srid du 'du byed rnams kyi ma rig pa'o/ /ma rig pa de yang glo bur ba nyid dgag pa'i phyir bcom ldan 'das kyis gsungs pa/dge slong dag ma rig pa yang rgyu dang bcas rkyen dang bcas 'byung khungs dang bcas pa ste/ ma rig pa'i rgyu ni tshul bzhin ma yin pa yid la byed pa'o zhes brjod par bya bar 'gyur ro zhes bya'o/ /de la gal te ma rig pa med na 'di'i rgyu nye bar ston par mi 'gyur te/med pa'ang nam mkha'i me tog gi phreng ba'i rgyu nye bar mi ston la ma rig pa'i rgyu tshul bzhin ma yin pa nye bar bstan pas so/ /de yang phyin ci log bzhi'i rang bzhin brtag pa bdag sdug pa bde ba'i dbye bas ma rig pa'i rgyu'i dngos por khong du chud par bya'o//de'i phyir phyin ci log bzhi las byung ba'i ma rig pa yod la/ ji ltar ma rig pa phyin ci log bzhi las byung ba yod pa bzhin du 'di ltar ma rig pa las byung ba'i 'du byed kyang 'byung bar 'gyur zhing / ji srid du skye ba las byung ba'i rga shi'i bar du 'byung bar 'gyur ro/ /des na rten cing 'brel bar 'byung ba'i yan lag srid pas rten cing 'brel bar 'byung ba yod do zhe na/de la ma rig pa'i dbang du byas nas smos pa/ gal te rten cing 'brel bar 'byung ba yod na/ de las byung ba ma rig pa yod la/ gang gi tshe rten cing 'brel bar 'byung ba nyid ma grub na/de'i tshe rten cing 'brel bar 'byung ba'i yan lag tu gyur pa ma rig pa 'byung bar ga la 'gyur/ gzhan yang 'dir ma rig pa tshul bzhin ma yin pa yid la byed pa las byung na/ phyin ci log las 'byung bar brjod par bya la/ de las gal te phyin ci log yod na de'i tshe de las byung ba'i ma rig pa yang yod na/yod pa ni ma yin no zhes bsgrubs pa'i phyir gsungs pa/ mi rtag rtag min bdag med dang / /bdag min sdug dang mi sdug min/ /sdug bsngal bde ba ma yin zhing / /de'i phyir phyin ci log rnams med/ / de la mi rtag pa la rtag par 'dzin pa phyin ci log/ / ci slar yang de mi rtag pa'i dngos po las phyin ci log pa rtag pa khong du chud pa med na/ yang ji ltar mi rtag pa las phyin ci log rtag pa yin/ phyin ci log pas na phyin ci log ste log rtogs so/ /gang gi tshe mi rtag pa de rtag par mi 'gyur zhing mi rtag pa yang phyin ci log ma yin no//mi rtag pa'i dngos po ni mi rtag pa las phyin ci log rtag pa nyid du thob nas phyin ci log tu gyur pa ma yin te/ 'on kyang mi rtag pa nyid kyi dngos po de gang gi tshe ji ltar gnas pa'i mi rtag pa nyid du logs su bzhag nas rtag pa nyid du 'dzin pa de'i tshe/phyin ci log tu 'dzin pas phyin ci log ces bya'o/ /slar yang ci zhig phyin ci log 'dis phyin ci log tu 'dzin/ smras pa/ rtag par ro/ /slar yang de'i tshe ji ltar 'dis rtag par 'dzin/ rnam par shes pa de'i rnam par bskyed pa'i phyir ro/ /gal te de lta na 'di ltar de'i tshe/de'i rnam par shes pa de mi rtag pa'i dngos po la ma yin te/ de de'i rnam par ma skyes pa'i phyir ro/ /des na rnam par shes pa de yang mi rtag pa la ma yin te/ yod pa la rtag pa'i rnam par 'dzin pas/ rtag par 'dzin pa ji ltar phyin ci log /smras pa/dngos po mi rtag par gnas pa la rtag pa'i rnam par 'dzin pas phyin ci log pa zhes bya'o/ /slar yang dngos po mi rtag pa'i rnam par gnas so zhes de ji ltar de ltar rtogs/ gang la gang las gang gi rnam par shes pa bskyed pa des na/ rnam par shes pa la grags pa'i rnam pa de las dngos po rnam par 'jog ste/sngon po dang ser po zhes bya ba lta bu'o/ /rtag pa'i rnam par shes pa ni gzhan gyi rnam pa ma yin pa'i phyir/ de'i tshe mi rtag pa'i rnam pa na de'i rnam par shes pas dngos po gang zhig 'dzin par ga la 'gyur/ gzhan zhig la de'i mi rtag pa byas nas dngos po mi rtag go zhe na/'di ni de ltar ma yin te/ de nyid de'i tshe de'i mi rtag pa'o/ /gzhan zhig na de'i rnam par shes pa ma skyes pa'i phyir mi snang ba nyid la/ de ni de'i rnam pa'o zhes 'thad pa ma yin la phyin ci log la 'dzin pa yin no zhes bya'o/ /de'i phyir rtag pa'i rnam pa phyin ci log ma yin zhing /rtag pa dang mi rtag pa zhes byas nas phyin ci log nyid med de / de ltar nam yang bdag med pa dang bdag la min zhing / sdug pa dang mi sdug pa la yang ma yin la/ bde ba dang sdug bsngal la yang min no zhes rgyas par bshad par bya'o// des na de ltar phyin ci log med la gang gi tshe phyin ci log mi srid pa de'i tshe/ de med phyin ci log bzhi las/ /skyes pa'i ma rig mi srid la/ /de med 'du byed mi 'byung zhing / /lhag ma rnams kyang de bzhin no/ /de la gang zhig smos pa'i yan lag brgyud ma rnams kyis rgyu brgyud mar bstan pa yod pas rten cing 'brel bar 'byung ba yod do zhes pa tshul 'dis 'thad pa ma yin no//gang zhig phyin ci log bzhi las byung ba ma rig pa nyid la phyin ci log med na med do zhes bstan la/ de nyid kyis 'du byed la sogs pa'i yan lag dgag pa grub bo/ /gang du ma rig pa med par 'du byed rnams mi 'byung la de bzhin du rnam par shes pa med pas ming dang gzugs bkag pa ste/ji srid du skye ba med pas rga shi med do zhes bya ba'i bar du'o/ /de ltar rten cing 'brel bar 'byung ba med na/ de dag gi rgyu brgyud mar bstan pa las de'i yan lag brgyud ma ga la zhig des na rten cing 'brel bar 'byung ba skye ba med do zhes grub bo//'dir smras pa/ gal te na yang phyin ci log las byung ba'i ma rig pa phyin ci log med pas med do zhes smras na/ de lta na yang 'dir re zhig kho nar 'di dag med do zhes rnam par gzhag par mi nus te/'du byed skyed pas na de'i rgyu'i dngos por bstan pa'i phyir dang / 'du byed rnams kyang ma rig pa'i 'bras bur bstan pa'i phyir ro/ /de skad du yang bcom ldan 'das kyis gsungs pa/ ma rig pa'i rjes su 'gro ba'i gang zag 'di dag ni bsod nams kyi 'du byed kyang mngon par 'du byed do//bsod nams ma yin pa'i 'du byed kyang mngon par 'du byed do/ /lung du ma bstan pa'i 'du byed kyang mngon par 'du byed do zhes so/ /de'i phyir ma rig pa dang 'du byed dag yod la/ de yod na gzhan rten cing 'brel bar 'byung ba'i yan lag rnams grub pas rten cing 'brel bar 'byung ba yan lag bcu gnyis grub bo zhes brjod do//gal te ma rig pa dang 'du byed dag gi rang bzhin grub par gyur na/ rten cing 'brel bar 'byung ba yan lag bcu gnyis yod la yod pa ma yin te/ji ltar med pa de ltar bsgrub pa'i phyir gsungs pa/ ma rig 'du byed med mi 'byung / /de med 'du byed mi 'byung zhing / /de dag phan tshun rgyu can te/ /rang bzhin gyis kyang ma grub bo/ /gal te ma rig pa 'du byed rnams kyi rgyur rnam par gzhag pa ni 'di ltar 'du byed med pa'i phyir de med la rgyu gang zhig rgyu nyid du 'bras bu dang 'brel pa byas pa las yin gyi 'brel ba med na rgyu nyid nam yang ma yin pa'i phyir ro//yang na 'bras bu nye bar ma bzung bar 'ga' zhig rgyu nyid du 'gyur na/ de lta na 'ga' zhig 'ga' zhig gi rgyur mi 'gyur la/de'i phyir rgyu'i rnam par gzhag pa 'bras bu med na ma yin la rgyu yang ma rig pa ni 'du byed rnams kyi'o zhes bya ste/ ma rig pa ni 'du byed med na rgyur mi 'gyur la/ rgyu 'bras kyi dngos po'i skabs yin pa'i phyir/ rgyu'i sgra med kyang rgyu nyid du rtogs pa nyid kyi 'bras bu rgyu'i sgras ma gsungs so//ji ltar 'bras bu la ma ltos par 'ga' zhig rgyu nyid ma yin pa'i phyir ma rig pa 'du byed med na mi 'byung ba bzhin 'bras bu yang rgyu la ma ltos na/ rgyu med pa las mi srid do zhes bya ba ni/ de med 'du byed mi 'byung zhing / ma rig pa med na 'du byed mi 'thad de rgyu med par thal ba'i phyir ro//gang yang 'di ltar rgyu dang 'bras bu dag phan tshun ma ltos par grub pa med la/ de'i phyir de dag phan tshun rgyu can dang / ngo bo nyid kyis kyang ma grub ste/ pha rol dang tshu rol bzhin nam ring po dang thung ngu bzhin rgyu dang 'bras bu dag phan tshun ltos pa dang bcas pa'i phyir ngo bo nyid kyis grub pa med do//gal te rgyu dang 'bras bu dag ngo bo nyid kyis grub par gyur na/ de ni 'bras bu la mi ltos par rgyur 'gyur na/ de las kyang rgyu med pa nyid du 'gyur te/ rgyu ni gang las 'bras bu'i 'jug pa'i rgyu nyid pas rgyu'o//de med na rgyu med pa nyid rgyur 'gyur te/ rgyu med pa nyid rgyur 'thad pa yang ma yin no zhes bya bas/ des na nges par 'bras bu la ltos la/ 'bras bu la ltos pa'i phyir rang nyid ma grub bo/ /de bzhin du gal te 'bras bu ngo bos grub par gyur na/de ni rgyu la mi ltos par 'gyur la/ de yang rgyu la mi ltos na/ de ni nam mkha'i me tog bzhin du 'gyur bas de'i phyir rgyu la ltos/ rgyu la ltos pa'i phyir ngo bo nyid ma grub bo zhes gnas so/ /de ni 'di ltar ji skad du gsungs pa'i rigs pas/gang zhig rang nyid rang bzhin gyis/ /ma grub des gzhan ji ltar bskyed/ /de'i phyir gzhan las grub pa yi/ /rkyen gzhan dag ni skyed byed min/ /gang yang de'i tshe 'bras bu la ma ltos par rang gi ngo bo mi 'grub la/ de ji ltar rang nyid grub pa med par 'bras bu skyed par byed/gal te skyed na mo gsham gyi bu mo yang bu skyed par 'gyur la/ de'i phyir gzhan las grub pa yi/ /rkyen gzhan dag ni skyed byed min / /rang las tha dad pa gzhan du gyur pa ni 'bras bu la de la ltos nas grub pa'i ma rig pa la sogs pa'i rkyen gyis rang las tha dad pa'i 'bras bu 'du byed la sogs pa'i skyed byed ma yin no//phan tshun mi ltos par grub par yod par gyur na/ rgyu las gzhan pa 'bras bu las gzhan pa rgyu'i zhes 'thad par 'gyur la/ rgyu dang 'bras bu dag phan tshun ma ltos par grub pa yod pa ma yin no zhes bsgrubs zin to//des na ma rig pa las 'du byed rnams gzhan nyid du ma grub pas 'du byed rnams la ma ltos par ma rig pa gzhan nyid du grub par 'gyur ro zhes brjod par mi nus so/ /de ltar 'du byed la sogs pa las ma rig pa la sogs pa gzhan nyid du ma grub na/ ma rig pa la brten nas byung ba'i 'du byed rnams gzhan nyid du grub bo zhes rnam par gzhag par mi nus so/ /gang zhig de ltar/ de'i phyir gzhan las grub pa yi/ /rkyen gzhan dag ni skyed byed min/ /des na 'dir ma rig pa la brten nas 'du byed la/ 'du byed la ltos nas ma rig pa'o zhes rnam par gzhag pas re zhig rgyu dang 'bras bu dag gcig nyid ma yin no zhes smos par 'gyur ro//de nyid kyis de nyid skyed pa med do zhes byas nas/ phan tshun ltos pas rgyu dang 'bras bu dag grub par gyur la/ phan tshun ltos pas rang gi ngo bo grub pa med pas rgyu dang 'bras bu dag gzhan pa yang ma yin no zhes brjod par 'gyur ro//de nyid kyis na gcig pa dang gzhan pa dag med pas rtag pa dang chad pa'i mthar smra ba dang bral ba'i rten cing 'brel bar 'byung ba grub pa yongs su skye'o// ji skad du/ brten nas byung ba gang dang gang / /re zhig de nyid des mi bskyed/ /gzhan las kyang min de yi phyir/ /rtag min chad pa yang ma yin/ /zhes bya ste/ rten cing 'brel bar 'byung ba rang bzhin med par yang shin tu gsal bar khong du chud par byas par 'gyur ro//ji skad du/ gcig nyid gzhan nyid dang bral ba/ /'gro ba sgra brnyan lta bu ste/ /'pho dang 'jig pa bral ba yi/ /rtogs ldan khyod la mi smod do/ /zhes gsungs so/ /gal te yang de ltar rgyu dang 'bras bu dag phan tshun ltos pa can du grub par rnam par bzhag la/de lta na yang phan tshun ltos pa can du grub pas de dag kyang bu dang pha bzhin du grub par 'gyur ro zhe na/ gsungs pa/ pha ni bu min bu pha min/ /de dag phan tshun med min zhing / /de gnyis cig car yang med ltar/ /de ltar yan lag bcu gnyis so/ /pha nyid bu ma yin te/pha zhes bya ba skyed byed la/ de ji ltar bskyed byar 'gyur/ bu yang pha min te/ bu ni bskyed bya la/ de ji ltar skyed byed du 'gyur/ de ltar re zhig pha nyid bu ma yin la bu nyid pha ma yin no/ /tha mi dad pa ma yin pa'i phyir de gnyis phan tshun med pa min te/ bu med na pha 'thad pa ma yin te/skyed par byed pa'i lam gyis pha nyid du 'thad pa'i phyir/ bu med na ci zhig skyed par byed pas pha nyid du 'gyur/ pha yang bu med na mi 'grub pas/ pha med na bu yang mi 'thad do zhes bya bas/ de gnyis phan tshun med min zhing / /de gnyis cig car yang med ltar te/de gnyis cig car na ba lang gi rwa g.yas pa dang g.yon pa bzhin pas bskyed bya skyed byed med pa nyid du 'gyur ro/ /ji ltar pha dang bu dag ma grub pa de bzhin du yan lag bcu gnyis kyi rten cing 'brel bar 'byung ba yang ma grub ste/ ma rig pa nyid 'du byed ma yin la/'du byed nyid ma rig pa ma yin zhing / de gnyis phan tshun med min zhing / /de gnyis cig car yang ma yin/ /zhes bya bas thams cad la mtshungs par sbyar bar bya'o zhes gsungs so/ /gal te ma rig pa dang 'du byed dag rang gi ngo bo ma grub na/ de ni ma rig pa la brten nas 'du byed rnams skye ba mi 'thad de/ med bzhin pa'i mo gsham gyi bu la brten nas/ de'i bu 'byung ba ma yin no zhes brjod do/ /gal te ma rig pa dang 'du byed dag rang gi ngo bo grub par gyur na/ de ni 'di dag da lta ba bzhin pas rten cing 'brel par 'byung bar mi 'gyur ro//mo gsham gyi bu la yang brten nas 'byung ba ma yin zhing / ma rig pa la brten nas 'du byed 'byung ngo zhes bya ste/ des na mo gsham gyi bu lta bu ni rten cing 'brel bar 'byung ba'i don ma yin no/ /'o na gnyi ga yang rang bzhin gyis ma skyes par mnyam la/de lta na yang phyin ci log la ltos nas ma rig pa la sogs pa la brten nas skye ba yod la/ mo gsham gyi bu la phyin ci log la yang de la brten nas skye bar mi rtog pa'i phyir ro/ /yang ci'i phyir gnyi ga yang mtshungs par rang bzhin gyis ma skyes pa la gcig ni rten cing 'brel bar 'byung bar mthong la cig shos ni ma yin 'di ni 'jig rten pa kho na la dri bar bya'i/kho bo la ni ma yin no/ /de nyid kyis na rten cing 'brel bar 'byung ba 'jig rten gyi phyin ci log las so/ /gang dag rang bzhin gyis ma skyes par mnyam pa kha cig ni rten cing 'brel bar 'byung bar mthong la cig shos ni ma yin no//rigs pas ni mo gsham gyi bu bzhin du chos thams cad yongs su ma brtags la/ cung zad rtog par byed pas na/ phyin ci log tu rnam par gzhag ste/ 'di ltar rab rib can gyis yang dag pa ma yin pa'i skra la yongs su rtog pa mi 'thad pas/ji ltar rab rib med pa rnams kyis brtags pa las phyin ci log tu mthong ba zhes brjod do/ /de nyid kyis na sangs rgyas bcom ldan 'das sman pa chen po ltar rang bzhin med pa skye bo rnams la ston par mdzad de/gang zhig de'i rgyu yod pa ma yin pa la don du rtog pa'i rnam par rtog pa phyin ci log gi mtshan nyid las bzlog par mdzad do/ /rnam par rtog pa las yongs su bzlog nas yang chos rnams kyi chos nyid ji lta ba de lta bu la gnas so/ /de la gnas nas yang dag pa ma yin par sgro mi 'dogs pas mya ngan las 'das pa thob pa la rnam par grol ba zhes brjod do// // 'di ltar de phyin ci log tu zhugs pa'i phyir/ ma rig pa dang 'du byed dag gi rang bzhin med la/ gal te de ltar 'di gnyis rang bzhin med la rang bzhin med pa dag yod na/ji ltar rten cing 'brel bar 'byung / /ji ltar 'di dag rang bzhin med pa dag rten cing 'brel bar 'byung ba de ltar slob dpon gyis dpes gsal bar mdzad pas gsungs pa/ ji ltar rmi lam yul brten pa'i/ /bde sdug med bzhin de yul yang // brten nas gang skyes med de bzhin/ /brten pa nyid kyis de yod min/ /ji ltar gang kho na las rmi lam du nyams su myong bzhin pa bde ba dang sdug bsngal dag rmi lam du dngos po nye bar thob pa'i gzugs dang sgra la sogs pa de skyed pa'i rjes su mthun pa las brten nas byung ngo // zhes rmi lam nyid du rnam par 'jog la/ de las skyes pa la rang bzhin yang med la rmi lam yang sad pa na de bzhin du nyams su myong ba bden pa nyid du mi rtog pa'i phyir ro/ /bde ba dang sdug bsngal 'ba' zhig ngo bo nyid med pa ma yin te/ rmi lam gyi yul yang rten cing 'brel bar 'byung la/yul de yang rten cing 'brel bar 'byung ba'i phyir rang bzhin med pa'o/ /ji ltar rmi lam gyi yul dang de la brten nas gang zhig bde ba dang sdug bsngal nye bar skye ba de dang de ni gnyi ga brdzun la/ de bzhin du sad pa na yang ma rig pa zhes bya ba'i rgyu gang las 'du byed ces bya ba'i 'bras bu skye ba dag med de/rmi lam nye bar thob pa'i yul bzhin du de'i rgyu ma rig pa zhes bya ba'i don to/ /gang dang de gnyis rtag tu mngon par 'brel ba'i phyir/ gang gi sgra yin de'i sgra nye bar 'jog par byed de/ de ltar yang rmi lam du nye bar thob pa'i dpes rgyu ma rig pa zhes bya ba med la/de bzhin du rmi lam du nyams su myong ba'i bde ba dang sdug bsngal gyi dpes gang de'i 'bras bu 'du byed ces bya ba de nyid kyang ma rig pa zhes bya ba rgyu yod pa ma yin pa la brten nas skye bas de yang de bzhin du yod pa ma yin no zhes pa 'di dang 'brel to//de 'di ltar rmi lam du nyams su myong ba'i bde ba dang sdug bsngal gyi rten cing 'brel bar 'byung ba bzhin/ bde ba dang sdug bsngal gyi rgyu yul yang rten cing 'brel bar 'byung ba bzhin pas ma rig pa dang 'du byed dag phyin ci ma log par grub pa med do zhes gnas so// 'dir kha cig gis smras pa/ rmi lam gyi gzugs dang sgra la sogs pa'i yul rnam shes las/ phyi rol gyi rang bzhin stobs can du yod bzhin pa yin pas rten cing 'brel bar 'byung ba med la bde ba dang sdug bsngal bdag nyams su myong bzhin pa'i rang gi mtshan nyid rten cing 'brel bar 'byung ba dag rang gi mtshan nyid du yod pa'i phyir/ji skad du gsungs pa'i rigs pas rten cing 'brel bar 'byung ba bzhin med pa mi 'thad do/ /rgyu dang 'bras bu'i rang gi mtshan nyid ma grub pa la/ rten cing 'brel bar 'byung ba med pa'i phyir dang / rten cing 'brel bar 'byung ba ni rang gi mtshan nyid du grub pa las so zhes bya ste/ rnam par shes pa tsam du sgrub pa na rmi lam gyi dpe 'thad de/ rmi lam na rnam par shes pa las tha dad pa'i yul med la/ rnam par rig pa tsam yang yod pa'i phyir ro zhe na/ 'dir smras pa/ gang 'di skad du smras te rnam par shes pa las phyi rol gyi rang bzhin stobs can du yod bzhin pa ma yin pas rten cing 'brel bar 'byung ba med do zhes bya ba de ni re zhig mi rigs te/ gal te rmi lam yul dang bcas pa'i rten cing 'brel bar 'byung bar ma yin / rten cing 'brel bar 'byung ba med pa'i phyir mo gsham gyi bu bzhin rang gi rnam par shes pa la rnam pa skyed par mi byed la/'dis sad pa'i gnas skabs bzhin du skyed par byed pas mig la sogs pa'i dbang po la brten nas/ rnam par shes pa las tha dad pa'i rten cing 'brel bar 'byung ba'i yul la rnam par shes pa dmigs so zhes nges so//sad pa'i gnas skabs na yang phyi rol gyi yul la rnam par shes pas dmigs pa ma grub pas de ni mi 'thad do zhe na/ mi 'thad pa ma yin te/ 'jig rten pa phyi rol gyi yul la dmigs pa'i phyir dang /bcom ldan 'das kyis kyang phyi rol nyid du nye bar bstan pa'i phyir ro/ /bcom ldan 'das kyis gsungs pa/ dge slong dag gzugs ni phyi rol gyi skye mched de/ 'byung ba chen po bzhi dag rgyur byas pa zhes pa la sogs pa'o/ /'jig rten pa ni rmongs pa'i phyir dang /bcom ldan 'das kyi gsung yang dgongs pa can nyid pas drang don yin pa'i phyir skyon med do zhe na/ smras pa/ ji ltar na yang sngon po dang ser po la sogs pa mig la sogs pa'i rnam shes kyis yongs su dpyad par bya ba mngon sum du dmigs bzhin pa la med do zhes brjod par mi nus so//sngon po la sogs pa rnams dpyad na/ rang gi ngo bo ma dmigs pa'i phyir sngon po la sogs pa'i rnam par shes pa yang sngon po la sogs pa'i rdul phra rab bzhin nam/ 'dus pa la dmigs pa po nyid du mi rung bas rnam par shes pa'i rnam pa las tha dad pa'i sngon po la sogs pa yod par mi 'grub bo zhe na/smras pa/ gal te 'jig rten pa la dmigs bzhin pa yang rigs pas dpyad na med do zhes byas nas med do zhes brjod na de lta na 'di ltar rnam par shes pa la sogs pa'i rang gi mtshan nyid kyang med do zhes nges par byos shig /rnam par shes pa de yang rnam par shes pa'i rnam pa las tha dad pa yul bzhin du/ yod pa yod phyir skye ba min/ /med pa med phyir mi skye la/ /chos mi mthun phyir yod med min/ /skye ba med pas gnas 'gag med//ces bya ba la sogs pa ji skad gsungs pa'i rtag pa dang / dngos po med pas dngos med min/ /bdag las ma yin gzhan las min/ /de phyir dngos dang dngos med dang / /dngos dang dngos med min pas kyang / /zhes bya ba la sogs pa'i chad par 'gyur ba'i dpyad pa las kyang ma grub bo//gang zhig rigs pas dpyad na mi 'thad pa de la 'jig rten pa la rmongs pa'i phyir med pa la sgro btags la/ sangs rgyas rnams kyang de yod do zhes ston pa drang ba'i don du'o zhes bya'o/ /phung po lnga rnams kyang phyi rol gyi dmigs pa bzhin du de kho nar ma grub par khas blang bar byos shig /des na rnam par shes pa ni yod pa nyid dang / phyi rol gyi dmigs pa ni med pa nyid gtang bar bya'o/ /thams cad kyi rang bzhin ma grub par gyur pas rnam par shes pa ngo bo nyid kyis ma grub par khas blangs pa bzhin yul yang ma grub par khas blangs par byos shig dang skyon ci yang med do//rnam par shes pa dang yul dag mtshungs par rang gi ngo bo ma grub la/ rnam par shes pa'i rang gi ngo bo ma grub kyang yod la yul gyi rang gi ngo bo ma grub pas med do zhes bya ba 'di de kho na nyid du ma yin zhing 'jig rten pa la yang ma yin pas 'di skad du smra ba ni rigs pa smra bar rung ba ma yin no//de'i phyir ji ltar 'jig rten pas mthong ba de ltar zhog shig /mthong ba yang phyi rol gyi sngon po la sogs pa'i dmigs pa las rnam par shes pa yang nye bar dmigs pa'o/ /de'i phyir rnam par shes pa yang zhog la phyi rol gyi don yang zhog cig dang /'jig rten gyi kun rdzob las tha dad pas ci zhig bya/ de'i phyir rnam par shes pa las gzhan pa'i phyi rol la dmigs pas dgag pa'i don du rmi lam gyi dpe ma yin la/ 'on kyang gzugs la sogs pa'i phung po lnga char yang rang bzhin med par bsgrub pa'i don du'o//ji ltar sad pa'i bdag nyid kyi dngos po 'di nyid phyin ci log gi rgyu can gyi ma rig pa'i rkyen las/ mig gi dbang po la sogs pa'i tshogs pa dang / de'i rnam par shes pa yod pa can sna tshogs pa'i gzugs dang sgra la sogs pa'i yang nyams su myong ba la 'jug pas byis pa rnams 'di ni bden pa'o zhes mngon par zhen pa'i rgyu mtshan la/'phags pas brdzun pa slu ba'i chos can du yongs su chod la/ de bzhin du rmi lam gnyid kyis kun nas dkrugs pa'i sems sad pa'i bdag nyid kyi dngos po rkyen gyi mig la sogs pa'i tshogs dang /de'i rnam par shes pa yod pa can sna tshogs pa'i gzugs dang sgra la sogs pa'i yul nyams su myong ba la 'jug pas/ rmi lam gyi nang na gnas pa rnams 'di ni bden pa'o zhes mngon par zhen pa'i rgyu mtshan la/ sad pa rnams kyis brdzun pa slu ba'i chos can nyid du yongs su chod la/ sad pa'i skye bo tha snyad pa rnams la snang ngo / /ji srid 'dir rmi lam mthong ba las sad par ma gyur pa de srid du de'i bdag nyid kyi dngos po'i mig gis gzugs mthong ste/ ji srid mig ma tshang ba dang bsgribs par ma gyur gyi bar du'o//de gzhan du rna bas sgra thos pa nas/ ji srid yid kyis chos rnams shes pa dang dge ba dang mi dge ba'i las kyang byed la/ gang dag rmi lam nyid du 'bras bu nye bar longs spyod pa ji lta bar/ ma rig pa'i gnyid kyi nang na gnas pas bsdus pa'i nye bar spyod pa'i las kyi 'bras bu nyid la/ma rig pa'i gnyid log pa las langs pa phung po lhag ma med pa la gnas pa'i lhag ma med pa'i mya ngan las 'das pa la gnas pa'i 'phags pa rnams nye bar longs mi spyod de/ phyin ci log gis bskyed pa'i bdag nyid kyi dngos po shin tu zhi ba'i phyir ro//de bzhin du sad pa la yang ste/ gnyid log log pa'i bdag nyid las langs pa rnams/ rmi lam gyi bdag nyid kyi dngos po las shin tu 'das pas/ des byas pa'i las 'bras bu myong bar mi byed do/ /dge slong dag ltung bar byed pa'i chos kun tu spyod pa skyes kyang rmi lam gyi cha shas sad pas ltung ba chung ngu tsam du yang bcom ldan 'das kyis ma gsungs la ltung ba med par bzhag pas/de'i bdag nyid kyi dngos pos byas pa'i las kyis 'di'i bdag nyid kyi dngos po la rnam pa thams cad du mi myong ba'i phyir dang /de de bzhin du sad pa'i bdag nyid kyi dngos po dang 'brel ba'i rnam par shes pa rmi lam du rnam pa thams cad du mi srid do/ /gzhan du na der byas pa'i las kyis sad pa na yang 'bras bu nyams su myong ba sus zlog par byed/ de ni 'di ltar rnam par shes pa'i tshogs drug ni dbang po drug dang yul drug las te/dbang po yul dag med na med pa lta bu de la mig la sogs pa'i dbang po'i rnam par shes pa 'thad pa ma yin no/ /yid kyi rnam par shes pa nyid rnam par shes pa la bag chags sna tshogs pa yongs su smin pa sngon po dang ser po la sogs pa'i rnam par mi rung ste/gnyid dang mtshungs par ldan pas de shin tu blun pa'i phyir te/ gnyid dang bral nas sad par thal lo/ /dam pa'i chos klog pa dang / kha ton dang / shin tu phra ba'i don la sems pa la sogs pa yang sad pa'i bdag nyid kyi dngos pos bsgrub par nus pas de la nye bar dmigs la/gnyid kyis bslad pa'i rnam par shes pa la ji skad du smos pa mi 'thad do/ /'o na de ltar gyur na bdag nyid kyi dngos po gnyis pa thob par 'gyur ro/ /sus 'di la gnyis pa'o zhes yongs su brtag par nus/gal te sad pa'i bdag nyid kyi dngos po la de mi ldan te/ sad pa'i bdag nyid kyi dngos po'i gnas skabs na/ de mi dmigs pa'i phyir ro/ /yang na rmi lam gyi gnas skabs su yang de ltar de'i bdag nyid kyi dngos po mi dmigs pa'i phyir de'i tshe su zhig de la bdag nyid kyi dngos po gnyis pa zhes 'jog /'dir re zhig bdag nyid la chags pa'i rgyu mtshan gyis brdzun pa'i rang bzhin du brjod par nus kyi/ 'di la gnyis pa dang gsum pa zhes rnam par gzhag par mi nus so/ /'o na de lta na yang lhag ma med pa'i mya ngan las 'das pa lta bu na/rmi lam rmi ba las sad pa na dran pa 'byung bar mi 'gyur ro/ /gal te rmi lam las sad pa mya ngan las 'das pa lta bur rnam pa thams cad rnam par shes pa ldog par 'gyur na de ni de ltar 'gyur gyi/ /'dir sad pa na rnam par shes pa'i kun du spyod pa yod pas zhes bya ste/rmi lam du nyams su myong ba sad pa'i rnam par shes pa la mi dran pa ma yin no/ /rmi lam du nyams su myong ba'i phyir dran pa mi 'thad do zhe na/ de ltar na sngar gyi rnam par shes pas nyams su myong ba phyi ma'i dran pa'i rnam par shes pas nyams su ma myong bas dran par mi 'gyur ro//rgyu dang 'bras bu rgyun gcig tu rnam par gzhag pa'i phyir/ des na dran pa yod do zhe na/ 'dir yang sad pa dang rmi lam gyi shes pa dag rgyun gzhan ma yin par rgyu dang 'bras bus 'jug pa'i phyir ro//slar yang bden pa 'khrul pa bden pa'i rgyu nyid du ji ltar shes/ ji ltar sgra ni sgra brnyan gyi la sgra brnyan yang rang gi rnam par shes pa'i ste/ khyod la 'khrul pa la 'bad pa 'dis don ci zhig /gal te 'di dag rigs pas dpyad pas bdag nyid yod pa mi spong na/su zhig 'dir rang bzhin med par khong du chud par 'gyur/ gang kho na la de dag rigs pas mi 'thad pa de nyid kyis na de la brdzun par 'thad do/ /de'i phyir 'jig rten pas mthong ba kho na 'di dag rnam par gzhag par gyis shig/ 'jig rten pas rmi lam du yul dang dus dang gnas skabs khyad par mi bden pa'i bdag nyid kyang nye bar dmigs la/ mi bden pa nye bar dmigs pa des bden par 'dod pa'i sad pa'i bdag nyid dngos po la chags pa 'phags pas sel bar mdzad do/ /ji ltar gang zhig bdag nyid kyi dngos po de dmigs so zhes gang zhig 'dir dpyad pa na de sad pa'i bdag nyid kyi dngos po dang mtshungs la/bdag nyid kyi dngos po 'di yang smos pa'i brtag pas mi 'thad na/ ji ltar 'jig rten pas dmigs phyin ci log las so/ /'o na phyin ci log kyang skye ba med na de ji ltar 'jig rten pas nye bar dmigs/smras pa/ 'jig rten pas mthong ba tshad mar byas nas bdag nyid kyi dngos po 'di yod do/ /'jig rten pas mthong ba de yang dpyad na ma grub bo zhes bya ste/ ji ltar de tshad mar byed/ smras pa/ ji skad smos pa'i brtag pa ma byas pa'i 'jig rten pa'i mthong ba tshad mar byas pa'o//gal te de ltar na ni 'di thams cad la de bzhin kho nar rjes su gnas pas byos shig /des na 'jig rten pas ji ltar mthong ba dngos por yod 'ga' zhig la bden par mngon par 'dod pa 'khrul pa bsal ba la dgos pa ci zhig yod/'jig rten pa'i rmi lam sad pa'i bdag nyid lta bu'i mig la sogs pa'i bdag nyid ji ltar nye bar dmigs la/ brdzun pa nyid du rnam par gnas la dran pas na bdag nyid kyi dngos po las gzhan pa yang ma yin zhing tha dad pa yang ma yin te/phyin ci log las nye bar dmigs pa'o/ /des na 'jig rten las ji lta ba de lta bur grags pa'i dpes sad pa'i dngos po nye bar dmigs pa rnams la de chags pa mi skye ba'i don du 'phags pas brdzun pa nyid du gsal bar mdzad do/ /dngos po la chags pa sngon du 'gro ba las 'khor ba la nges par dngos po la chags pa zad pa las mya ngan las 'da'o zhes bya'o//de'i phyir rmi lam du rmis pa'i bde ba dang sdug bsngal bzhin dang rgyu yul bzhin du ma rig pa dang 'du byed dag rang bzhin med par grub bo/ /'dir smras pa/ gal te dngos rnams rang bzhin gyis//med na dman mnyam khyad 'phags dang / /sna tshogs nyid ni mi 'grub cing / /rgyu las kyang ni dngos grub min/ /ji skad du smos pa'i rigs pa dang / rmi lam gyi dpes kyang dngos po rnams rang bzhin med par bsgrubs pa'o / /gal te dngos po rnams kyi rang bzhin med na/de'i tshe dngos po med par smra ba khyod la dman pa dang mnyam pa dang khyad par 'phags pa nyid mi 'thob bo/ /yod bzhin pa ma yin pa nam mkha'i me tog la dman pa dang mnyan pa dang khyad par can la dmigs la/ dngos po rnams kyis 'gro ba dang /skye gnas dang / rigs dang / skye rgyud dang / rus dang / na tshod dang / gzugs la sogs pa nye bar dmigs pa rnams khyad par can dang khyad par can ma yin pa dang bar ma'i dbye bas gnas pa rnams so sor dman pa dang mnyan pa dang khyad par can yin la/ phyi rol gyi yang khang bzangs dang rgyan dang mal stan dang bza' ba dang btung ba la sogs pa'i nye bar mkho ba rnams la ltos nas dman pa dang mnyam pa dang khyad par can nyid la/ de yang 'di dag thams cad rang rang gi dngos por dngos po rnams grub par 'gyur 'thad la/ma skyes pa ro gcig pa la sna tshogs pa nyid du 'grub pa thob par mi 'gyur ro/ /ji skad smos pa'i 'gro ba la sogs pa phan tshun sna tshogs pa yang 'jig rten du yod la/ rang gi mtshan nyid med bzhin pa sna tshogs pa nyid du ni mi 'thad la/ dngos po rang bzhin med par smra ba rnams dngos po rgyu las skye ba yang mi 'thob ste/rang bzhin med par smra bas dngos po ri bong gi rwa dang mtshungs so/ /de la gal te 'du byed la sogs pa'i dngos po rang bzhin med par gyur na/ ri bong gi rwa bzhin rgyu las skye bar mi 'gyur la/ 'di dag kyang rgyu las skye ba yod pas de'i phyir dngos po rnams rang bzhin dang bcas pa'o zhes bya'o//'dir gsungs pa/ rang bzhin grub na rten 'byung gi/ /dngos po med 'gyur ma brten na/ /gang la rang bzhin med par 'gyur/ /dngos po yod dang dngos med kyang // gal te dngos po rnams rang bzhin med par smra ba'i phyogs la dman pa la sogs pa med par thal ba'i skyon gyis 'jigs pas dngos po rnams kyi rang bzhin grub par khas blangs so zhe na/ 'o na khyod kyis dngos po khas blangs kyang dngos po rnams 'ba' zhig tu ma zad kyi/ji ltar mngon par 'dod pa'i khyad par grub pa yang khyod kyis thob par mi 'gyur la/ rnam par gzhag pa thams cad med pa yang thob par 'gyur ro/ /ji ltar byas na/ gal te nges par dngos po rnams kyi rang bzhin grub par gyur na de ni rang bzhin gyis grub par gyur pas de dag rgyu dang rkyen la brten nas skye bar mi 'gyur te/yod bzhin pa'i dngos po nyid la dngos por rnam par gzhag par rung gi med pa la ni ma yin no/ /yod bzhin pa slar yang brten nas skye bar yang mi rigs la/ de las dngos po thams cad brten nas 'byung ba thob par 'gyur ro//brten nas 'byung ba med par gyur na/ dngos po rnams kyi dman pa la sogs pa'i khyad par mi 'byung ngo zhes bya ste/ dngos por smra ba rigs pa ma yin no/ /'dir kha cig gis smras pa/ dngos po rnams kyi rang gi mtshan nyid rgyu dang rkyen gyis mi bskyed de/dus gsum du rang gi mtshan nyid gnas pa'i phyir dang / gnas skabs kyi 'bras bu'i phyir yang dngos po rnams kyi rgyu dang rkyen gyis tshogs pas gnas skabs nyid skyed do zhe na/ de la ltos nas smras pa/ ma brten par yang gang la ste gal te dngos po rnams rang gi mtshan nyid kyis dus gsum du yang gnas par gyur na de ni ma brten par byung ba la rang gi mtshan nyid mi 'thad de/mo gsham gyi bu la yang rang gi mtshan nyid yod par 'gyur la/ de'i phyir ma brten par yang ma yin te/ ma brten par yang dngos po rnams kyi rang bzhin med do/ /gzhan yang dngos po rnams kyi rang bzhin khas blangs na ji ltar khas blangs pa'i rang bzhin med par yang mi 'gyur te/'du byed rnams skad cig ma so sor 'jig pa gnas pa med pa'i rang gi mtshan nyid la de yang gzhan du 'gyur ba mthong bas gnas pa med pa'i rang gi mtshan nyid kyi phyir rang bzhin med par gzhag go//de la gal te de dag rang bzhin yod na gnas pa med pa'i rang gi mtshan nyid du mi 'gyur zhing / 'du byed rnams 'jig pa med pa thob par 'gyur la/ ngo bo nyid grub pa'i phyir rang bzhin yod bzhin pa'o/ /yod bzhin pa ma yin pa la gzhan du 'gyur ba yang mi srid do//'o ma'i gnas skabs nyid du gnas bzhin pa'i 'o ma gzhan du gyur pas zho'i dngos po'i mtshan nyid du mi srid pa'am/ gzhon nu yang gzhon nu'i gnas skabs nyid du gnas bzhin pa rgas pa'i gnas skabs gzhan thob nas/'di las gzhan du gyur par rnam par 'jog par byed la/ de yang mi rigs te/ 'di gnas skabs gzhan thob pa ci zhig yod/ gal te 'o ma la ni de mi rung ste/ 'o ma'i gnas skabs dang 'gal ba'i zho'i gnas skabs su de ji ltar 'o ma ni gnas skabs nyid du gnas la/de med na 'o ma'i rnam par gzhag pa med pa nyid du 'gyur/ de las kyang 'o ma dang zho'i gnas skabs dag gcig tu gyur pa med pa'i phyir 'o ma la zho'i dngos po med la/ dngos po med na 'di la zho'i dngos po ga la zhig ces bya'o//de ltar rang gi mtshan nyid khas blangs par gyur na 'dis dngos po rnams yongs su 'gyur ba mi srid pa'i phyir la/ gzhan du 'gyur ba med par gyur na rang bzhin med par mi 'gyur ro/ /'o ma rang gi mtshan nyid las yongs su mi 'gyur ba'i dngos por gyur na/ji skad du bsgrubs pa'i rigs pas brtag par yod par thal lo/ /dngos po 'ba' zhig tsam khas blangs par gyur na rang bzhin med pa'i 'jig pa yang thob par mi 'gyur ba yang ma yin te/ rang gi mtshan nyid yod bzhin pa la rang bzhin du rnam par gzhag gi med pa la ni ma yin te/dngos po nyid du rnam par gzhag pa de dang 'gal ba dngos po med pa mi 'thad pas so/ /dngos po las bzlog pas na dngos po med pa ste 'jig pa zhes bya ba'i don to/ /rnam par 'jig pa med par 'gyur gyi rang bzhin ni ma yin la/zhig pa yang rang gi mtshan nyid yod bzhin pa ma yin pa'i phyir ro/ /de la 'di ltar ji skad du smos pa'i skyon yod pa'i phyir dngos por smra bar mi rigs so/ /'dir smras pa/ gal te yang khyod kyis dngos por smra ba bkag kyang de lta na dngos po ma bkag go// zhes bya ste/ de ni re zhig yod la/ gang de'i rang bzhin la de las cig shos ma mthong ba'i phyir rang bzhin gyis rnam par gzhag pa thob bo/ /'di lta ste/ me'i dngos po de'i gang zhig dro ba la/ de la de las gzhan pa ma mthong ba'i phyir rang bzhin zhes rnam par 'jog la dngos po 'ba' zhig pa grub pas rang bzhin grub pa dang gzhan gyi dngos po grub pa dang dngos po med pa grub par mi rung ba ma yin te/'di ltar gsher ba'i rang bzhin can gyi chu rang bzhin gzhan la ltos nas gzhan gyi dngos po zhes rnam par 'jog la/ de yang dngos po zhig pa la dngos po med pa zhes rnam par 'jog ste/de'i phyir dngos po yod pa las rang gi dngos po dang gzhan gyi dngos po dang dngos po med pa yod do zhe na/ smras pa/ gal te dngos po nyid yod na rang gi dngos po dang gzhan gyi dngos po dang dngos po med pa yod par 'gyur gyi/rang bzhin dang bral ba la dngos po 'thad pa ma yin te/ ri bong gi rwa la sogs pa yang dngos por thal bar 'gyur ro/ /de'i phyir med la gang gi tshe med pa de'i tshe de la/ med la rang dngos gzhan dngos sam/ /dngos med 'byung ba ga la zhig /des na rang dngos gzhan dngos dang //dngos med phyin ci log pa yin/ /med pa ni yod bzhin pa ma yin pa'i ri bong gi rwa bzhin du rang bzhin med la/ rang gi dngos po nyid kyang dngos po gzhan 'ga' zhig la ltos nas gzhan gyi dngos po zhes rnam par 'jog la/ rang gi dngos po med na gzhan gyi dngos po yang med do//rang gi dngos po dang gzhan gyi dngos po dag med na yang su zhig dang bral nas dngos po med par 'gyur/ 'o na rang gi dngos po la sogs pa dag med na/ 'di ltar khams gsum pa'i tha snyad rnams ji ltar zhe na/ smras pa/ ci mi bden pas 'jig rten gyi tha snyad 'gegs sam/ kho bo 'di skad du yang smras te / gang de ltar dngos po la sogs pa dpyad na mi srid la/ 'jig rten pa yang des tha snyad byed la/ gzhan gyi dngos po dang / rang gi dngos po dang / dngos po med pa yang des na phyin ci log pa ste/ 'jig rten pa'i phyin ci log tsam la ltos nas gang yang de dag grub pa'i phyir ro zhes dgongs pa'o//'dir smras pa/ gal te dngos po stong gyur na/ /'gag pa med cing skye mi 'gyur/ /gal te dngos po stong pa ste/ yod bzhin pa ma yin par 'gyur na/ yod bzhin pa ma yin pa'i phyir ri bong gi rwa bzhin mi skye bar 'gyur zhing /'gag par yang mi 'gyur ro/ /bcom ldan 'das kyis kyang dngos po'i skye ba dang 'gag pa gsungs te/ de'i phyir skye ba dag 'gag pa dang ldan pa'i phyir dngos po stong pa ma yin no/ /yang na 'di snyam du sems te/ de grub na rang bzhin yod pa nyid la/rang bzhin de yang med pa las stong pa nyid do zhe na/ 'o na de lta bu yang / ngo bo nyid kyis stong na yang / /gang la 'gag cing gang la skye/ /gang gi ngo bo med na de na ri bong gi rwa ltar 'gag pa dang skye ba yang mi 'byung ngo / /dngos po rnams skye ba dang 'gag pa yang yod pas 'di dag gi rang bzhin yod do zhes bya la/de grub na rang gi dngos po dang gzhan gyi dngos po yang 'byung bar 'gyur ro zhe na/ 'dir smras pa/ gal te skye ba dang 'gag par 'gyur na/ de ni de dang ldan pa'i dngos po rnams kyi rang bzhin grub par 'gyur la/de dag kyang med de/ ji ltar byas na/ 'dir skye ba dang 'gag pa gnyis su brtag pa 'di ni/ dngos po la brten nas brtag par nus kyi gzhan du ma yin la/ de dag de'i tshe skye ba dang 'jig pa'i dngos por 'jug par gyur na/ cig car ram tha dad par 'jug par 'gyur na/gnyis kar yang 'jug par mi srid do zhes bstan pa'i phyir gsungs pa / dngos dang dngos med cig car med/ /dngos po med na dngos med min/ /rtag par dngos po dngos med kyang / /dngos med las gzhan dngos mi srid/ /srid pas na dngos po ste skye'i /dngos po med pa ste 'jig pa'o/ /dngos po dang dngos po med pa ni dngos po dang dngos po med pa'o/ /dngos po dang dngos po med pa dag med pas dngos po dang dngos po med pa'o/ /re zhig dngos po dang dngos po med pa dag cig car te dus gcig nyid du med de/phan tshun 'gal ba'i phyir med pas dngos po gcig la dus gcig tu skye ba dang 'chi ba mi 'thad do zhes bya ste/ de ltar re zhig dngos po dang dngos po med par dag cig car med pa'o/ /da ni rim gyis kyang yang dag pa ji lta bar dngos po dang dngos po med pa dag med pas de bzhin du bsgrub pa'i phyir gsungs pa/dngos po med na dngos med min/ /rtag tu dngos po dngos med kyang / /zhes bya ba la/ gal te dngos po las gzhan du dngos po med pa 'jug na de'i tshe 'jig pa dang bral ba'i nam mkha' la sogs pa yang skye ba 'jug par 'gyur te/de ni mi 'jug go/ /de'i phyir dngos po med na dngos po med pa ma yin no/ /gzhan yang 'dus byas kyi mtshan nyid mi rtag pa'i phyir dngos po'i mtshan nyid la de yang nam yang dngos po las 'phrul nas gang la 'di med pa yang ma yin la/ de ni dngos po'i mtshan nyid las grol ba'i phyir yod pa yang ma yin no zhes bya'o//dngos po'i mtshan nyid las phyin ci log tu gyur pa 'di la skye ba yang bzod par ma yin te/ de ni dngos po'i mtshan nyid las bzlog pa'i phyir ro/ /de ltar re zhig dngos po med na dngos po med pa yang ma yin te/ ji ltar yang dngos po med na dngos po med pa yang mi 'thad na/ de ltar rtag par dngos po dang dngos po med pa yang med na med do zhes bya ba 'di dang 'brel to/ /dngos po dang dngos po med pa ni dngos po yod pa dang dngos po med pa zhes bya ste/ mi rtag pa la brjod do/ /dngos po med pa de yang rtag tu dngos po med na med la/gal te yod na skye ba med par yang rnam par 'jig par 'gyur ro/ /de las kyang 'dus ma byas kyang 'gyur la/ ma skyes pa yang 'chi bar 'gyur ro/ /de ni 'di ltar dngos po med na dngos po med pa yang med la/ gang gi tshe dngos po med pa dag de ltar dpyad bzhin pas cig car ram tha dad par grub pa med pas de'i tshe de dag gi rang bzhin ma grub na dngos po 'jug pa med do//yang na gal te dngos po dang dngos po med pa dag tu 'jug par mi 'gyur yang / de lta na yang re zhig de'i rten dngos po yod la/de yod pas brten pa'i dngos po dang dngos po med pa yang 'byung bar 'gyur ro zhe na/ smras pa/ gang gi tshe dngos po yang skye ba med na med do zhes brjod pa de'i tshe dngos po med pa las dngos po mi srid do zhes gsungs pa yin te/ dngos po med pas mtshan nyid kyi mi rtag pa las gzhan du ste/de med par dngos po srid dngos po yod pa nyid la de yang med do zhes gsungs par 'gyur ro/ /gang gi tshe dngos po med na de'i tshe de la brten pa'i skye ba dang 'jig pa ga la 'byung / de dag med na dngos po'i mtshan nyid las grol bas dngos po med do zhes grub bo// // 'dir smras pa/ gal te dngos po'i mtshan nyid med na dngos po med la/ 'di ltar dngos po'i mtshan nyid dang 'gal ba'i dngos po med pa re zhig yod la/ de yod na dngos po yang 'byung bar 'gyur ro zhe na/ smras pa/ gal te de dang 'gal ba'i dngos po med pa yod na dngos po yod par 'gyur la/de yang med do zhes bstan pa'i phyir gsungs pa/ dngos po med na dngos med min/ /rang las min zhing gzhan las min/ /de phyir dngos po dngos med cing / /dngos po med pas de dag med/ /gang gi tshe mi rtag pa dang bral ba'i dngos po bral ba'i dngos po med do zhes brjod la/de'i tshe dngos po med na de las bzlog pa'i dngos med ji ltar 'byung bar 'gyur/ de'i phyir dngos med kyang med do/ /ji skad du smos pa'i rigs pas dngos po med pa 'ba' zhig tu ma zad dngos med kyang med do//gzhan yang rigs pa 'dis dngos po dngos po med pas dngos po med pa yang med do zhes bstan pa'i phyir gsungs pa/ rang las min zhing gzhan las min/ /de phyir dngos po dngos med cing / /zhes so/ /gal te dngos po 'ga' zhig yod na rang las skye ba'am gzhan las skye bar 'gyur/de la rang gi bdag nyid ni re zhig skyes bzhin pa'i dngos po'i rang bzhin la skye ba med de/ rang zhes bya ba byung ba'i rnam par byed pa'i mtha' can so so'i rang bzhin gyis bsdus pa yod pa thob pa 'bras bu skyed par rung ba'i dngos po la brjod do//skyed pa zhes bya ba yang yod pa mthong ba'o / /gang kho na'i dngos po 'di rang ngo zhes grub pa'i ngo bo nyid la brjod la/ de nyid 'di ni skyed pa'o zhes skyed pa'i bya ba dang ldan pa 'gal te/ 'di'i dngos po gcig nyid la de gal te rdzogs pa'i rang bzhin du grub na 'di de dang 'gal ba'i skye bzhin pa'i rang bzhin du brjod par ji ltar 'thad/yang na skyed bzhin pa'i rang bzhin du brjod na ji ltar grub pa'i rang bzhin du brjod par nus/ de'i phyir gal te de bzhin zhes brjod na skyed do zhes brjod par mi bya la/ yang na skyed pa zhes brjod na de la rang zhes rnam par mi gzhag go//dngos por gyur pa gcig ni rang la ltos nas gcig la rgyu dang 'bras bu'i dngos por yang mi 'thad do zhes bya ste des na rang las ma yin no/ /gzhan du rnam par gzhag pa ni dngos po gzhan nye ba la ltos pa'i phyir la de'i 'bras bu zhes bya ba'i dngos po ma rdzogs pa'i phyir de la ltos nas 'ga' yang gzhan nyid du yod pa ma yin zhes bya ste/rgyu'i gzhan nyid med pa nyid kyis na gzhan las kyang skye ba med do/ /skye ba med par 'gyur bas dngos po yang med do zhes gsungs pa/ de phyir dngos po dngos med cing / /zhes so// gang gi tshe rigs pa 'dis dngos po yang dngos po med pas de'i tshe de med na dngos po med pa'i dngos med kyang med do zhes gsungs pa/ dngos med med pas de dag med/ /ces so/ /de las gang zhig smos pa ni gal te dngos po med na yang re zhig dngos po med pa yod pas dngos po yang 'byung bar 'gyur ro zhes bya ba de ni ma yin te/gang gi tshe de ltar dngos po yang dngos po med par gyur pas dngos po med pa yang med la/ de'i tshe yod pa dang med pa nyid du smra bar khas mi len pa'i phyir dngos po rnams kyi yod pa dang med pa dag yongs su spangs nas/dbu ma'i rtogs pa phyin ci ma log par bshad par 'gyur ro/ /gang yang rten cing 'brel bar 'byung ba dngos po tsam zhig la/ gzung ba dang 'dzin pa khas blangs pas sgro 'dogs la/ gzung ba dang 'dzin pa med pas dbu ma'i rtogs par brjod la/ gzhan dbang dngos po tsam du yod pa'i phyir med pa nyid du lta ba yang dag pa ma yin par 'dzin pa'o//kun brtags gzung ba dang 'dzin pa nyid med pas yod pa nyid du lta ba yang dag pa ma yin par 'dzin pa'o zhes bya'o/ /dngos po med pa khas blangs pa de dag gis yod pa nyid dang med pa nyid yongs su spong bar mi nus pa'o//gzhan dbang dngos tsam khas blangs par gyur pa de dag gi yod par lta ba kha na ma tho ba med pa'o/ /kun tu brtags pa gzung ba dang 'dzin pa mi srid par khas blangs par gyur na/ de dag kyang med par lta ba kha na ma tho ba med pa'o zhes bya ba de rnams kyis yod pa nyid dang med pa nyid du lta ba gang la spangs zhes bya ste/nges par 'di rnams 'khor ba nyid las mi ldog go/ /dngos po 'ba' zhig khas blangs na yang yod pa dang med pa nyid du smra ba las ma 'das la rtag pa dang chad par smra ba yang thob par 'gyur ro//gang gi phyir/ dngos po yod na rtag pa nyid/ /med na'ang nges par chad pa la/ /dngos por gyur na'ang de gnyis te/ /des na dngos po khas mi blang / /dngos po khas blangs par gyur na de'i rang bzhin yod bzhin pas slar yang gzhan du gyur pa mi srid pas dus thams cad du yod par 'gyur bas/dngos po de rtag par khas blang bar bya'o/ /gal te rtag pa khas blangs na de'i tshe ther zug thob par 'gyur te/ dus thams cad du gnas pa'i phyir ro/ /yang na gal te 'jig par gyur na de'i tshe dngos po med par khas blangs par gyur pas 'di ni med pa thob par 'gyur ro//de las kyang sngar byung la da ni med do zhes pa'i don khas blangs par gyur pas chad par lta ba thob ste/ zhig pa ni slar yang mi 'jug pas so/ /rtag pa dang chad pa'i mtha' 'dzin pa las mthar 'dzin pa'i lta ba rigs pas thob la/rigs pa'i stobs las 'ongs pas spang byar mi 'gyur te/ yang dag pa'i lta ba yin pa'i phyir ro/ /de las mtha' gnyis spangs nas zhugs pa'i lan 'di yang phyin ci log nyid du 'gyur la/ gang gi tshe rigs pas dpyad na dngos po rnam pa thams cad du med na de'i tshe de'i yul rtag pa dang chad par yongs su brtags pas yang dag pa'i lta ba ma yin no zhes 'thad do//gang yang yang dag pa'i lta ba ma yin pa de ni nges par spang bar bya la/ de spong ba'i thabs kyang rang bzhin khas ma blangs pa yin no zhes bya ste/dngos po bkag pas mya ngan las 'das par 'gro ba ma yin no zhes bya ba 'dir thar par 'dod pa rnams kyis khas blang bar mi bya'o zhes bya bar 'gyur ro/ /'dir smras pa/ bdag dang bdag gi ba'i rnam pa ni 'jig tshogs su lta ba la/ gang gi tshe bdag nyid du dmigs pa de nyid rtag pa dang chad pa'i mthar yongs su brtags pa las mthar 'dzin pa'i lta ba skyed la/de yang spang bya la chos tsam ni rtag pa dang chad pa'i lta bar mi dmigs so zhes bya ste/ des na gal te yang phung po rnams mya ngan las 'das nas slar mi 'jug na/de lta na yang lta ba de ni chad par lta ba ma yin no zhes bya'o/ /'o na 'jig tshogs su lta ba nye bar len pa'i phung po lnga la bdag dang bdag gi ba'i rnam par dmigs la/ de lta na yang mu stegs byed kyis brtags pa'i bdag gi rnam par dmigs bzhin pa na de'i dbang gis 'du byed rnams la yang bdag gi ba'i rnam par dmigs pas 'jug go//'o na 'di yang nye bar len pa'i phung po lnga la dmigs par 'gyur gyi/ khyad par ni 'di dag ste/ gang du de dag la bdag dang bdag gi ba'i rnam par dmigs nas yongs su 'dzin cing de las kyang mthar 'dzin par lta bas nye bar len pa'i phung po lnga po de nyid la rtag pa dang chad pa'i rnam pas dmigs so zhes bya'o//gal te yang 'jig tshogs su lta ba nye bar len pa'i phung po lnga la dmigs so zhes bya ba/ de ltar na yang 'di de'i rang bzhin mi dmigs la/ 'on kyang de dag las bdag tu sgro btags nas dmigs te/'di ni nye bar len pa'i phung po lnga la sgro btags pa'o zhes bya'o/ /dge slong ngam bram ze gang cung zad bdag go zhes yang dag par rjes su lta ba las yang dag par rjes su mthong ba ni nye bar len pa'i phung po lnga po 'di nyid mthong ngo zhes bcom ldan 'das kyis gsungs pa/de las tha dad pa'i nang gi byed pa'i skyes bu nyid ma grub bo zhes bya ba'i don du'o/ /de'i phyir 'jig tshogs su lta bas bdag kho na la dmigs so/ /gang yang bdag gi dbang du gyur pa'i phyir/ 'du byed rnams la bdag gi ba'i rnam par dmigs la/de'i phyir mthar 'dzin par lta ba yang rtag pa dang chad pa'i rnam pas 'jug bzhin pa na/ bdag dang bdag gi ba la dmigs kyi gzhan du ma yin no/ /de nyid kyis na bcom ldan 'das kyis gsungs pa/ kun dga' bo bdag yod do zhe na pha rol po'i rtag pa zhes bya la/bdag med do zhe na pha rol po'i chad par ro zhes so/ /'dir smras pa/ gal te 'ga' zhig chos tsam la rtag pa zhes rtogs na/ ci de ni rtag par lta bar 'gyur ram 'on te ma yin/ /gal te re zhig rtag par lta bar de 'dod na/de mi rung ste/ 'jig tshogs su lta ba chos tsam la dmigs shing gang la mthar 'dzin par lta ba 'jug pa ni med la/ mthar 'dzin par lta ba spangs nas gzhan rtag pa'i rnam par 'jug pa yod pa ma yin no/ /lta ba nyid med na yang rtag pas chos tsam mthong ba kha na ma tho ba med par 'gyur ro//'dus byas thams cad mi rtag ces bya ba'i tshig las rtag pa nyid du lta ba phyin ci log pa'o zhe na/ gal te der 'dzin pa phyin ci log na/ ji ltar 'di nyon mongs pa'i dmigs par 'gyur/ ji srid du 'dod chags pa de srid du sdug pa'i rnam par dmigs par byed /zhe sdang mi sdug pa'i rnam par ro/ /nga rgyal khengs pa'i rnam par ro/ /mi shes pa'i rnam par ni ma rig pa'o/ /yid gnyis kyi rnam par ni the tshom mo/ /'jig tshogs su lta ba ni bdag dang bdag gi bar 'jug pa'o//lta ba mchog tu 'dzin pa ni dman pa la mchog gi rnam par ro/ /tshul khrims dang brtul zhugs mchog tu 'dzin pa ni rgyu med pa dang lam ma yin pa la rgyu dang lam gyi rnam par 'jug pa'o zhes bya bas so/ /re zhig de dag rtag pa'i rnam par mi dmigs so zhes bya ste/su zhig de'i rnam par dmigs pa yod/ yang na mthar 'dzin pa'i lta ba'i zhes yongs su rtog na da lta na 'di ltar bdag gi ba'i rnam pa ma yin pa'i chos tsam la dmigs pa yang mthar 'dzin par lta ba'o zhes yongs su shes so/ /gal te yang de ni de ltar na de'i tshe mya ngan las 'das pa'i chos tsam yang chad pa'i phyir chad par lta ba ste/ci ltar mthar 'dzin par lta bar mi 'gyur/ gzhan yang de'i rnam pa ma yin pa'i chos tsam la de'i rnam par sgro 'dogs pas log par rtogs pa las nyon mongs pa rnams 'jug par 'gyur ro//de la rten cing 'brel bar 'byung ba'i dngos po rang bzhin med pa ste ngo bo nyid kyis ma skyes pa'i phyir ro/ /de dag la rang bzhin du gang zhig khong du chud pa de ni gtso bo phyin ci log gi bdag po ma rig pa zhes brjod do/ /gzhan du na gal te dngos po rnams kyi rang bzhin yod bzhin pa'i ngo bor gyur na/de nges par de kho na nyid la dmigs pa'i 'phags pa'i lam gyis dmigs par 'gyur la/ dngos po'i rang gi mtshan nyid la dmigs pa'i rnam pa 'phags pa'i lam la mi srid la/ bcu drug las gzhan dri med rnam pa med//ces bstan bcos las so/ /de'i phyir ma rig pas kun tu brtags pa'i dngos po rnams yod pa nyid de kho na nyid ma yin no zhes so/ /de ltar dngos po'i rnam par 'jug pas de kho na nyid ma rtogs pa'i phyir de kho na nyid ma shes par 'jug go zhes rnam par gzhag go//ma rig pas kun tu brtags pa'i dngos po la 'dod chags kyis sdug pa'i rnam par dmigs la/ zhe sdang gis mi sdug pa'i rnam par ro/ /nga rgyal gyis khengs pa'i rnam par ro/ /the tshom gyis yid gnyis su'o/ /'jig tshogs kyis bdag dang bdag gi ba'i rnam par ro//mthar 'dzin gyis rtag pa dang chad pa'i rnam par ro/ /log par lta bas med pa'i rnam par ro/ /lta ba mchog tu 'dzin pas dman pa la mchog gi rnam par ro/ /lam gyi rnam pas tshul khrims dang brtul zhugs mchog tu 'dzin pa'o zhes de ltar nyon mongs pa thams cad ma rig pas yongs su brtag pa'i phyin ci log gi dngos po nyid la de dag zhen pas sgro btags nas 'jug la/de nyid kyis na/ rmongs med cig shos skye ba med/ /ces bya bas ma rig pa'i rgyu can du nyon mongs pa thams cad rnam par gzhag go /rmongs pa spangs pa las thams cad ma lus par spong gi gzhan du ma yin te/ de dag ma rig pa dang lhan cig 'brel ba'i phyir/ ji skad du 'phags pa lhas/ ma rig kun tu gnas pa ni/ /ji ltar lus la lus dbang gis/ /de phyir kun kyang rmongs pa yis //nyon mongs pas de 'dir bsnun no/ /zhes bshad do/ /gang yang bcom ldan 'das kyis 'di skad du gsungs pa/ nye bar len pa'i phung po lnga po 'di nyid la bdag ces yang dag par rjes su mthong ngo zhes bya ba'i mdo de yang mthar 'dzin par lta ba dang /'jig tshogs su lta ba dang lhan cig tu gzhi gcig la dmigs par 'thad do zhes shin tu nges par sgrub pa'o/ /de las kyang 'di shin tu 'thad pas dngos por yod na yang des na gnyis ka khas blang ngo zhes bya bar 'gyur ro zhes so/ /'dir smras pa/ gal te dngos po yod kyang de lta na yang de'i rtag pa dang mi rtag pa dag med pas ther zug pa dang rgyun chad par lta bar thal ba ma yin pa ji ltar zhe na/ gsungs pa/ rgyun gyi phyir na 'di yod de/ /rgyu byin nas ni dngos po 'gag /sngar bzhin 'di yang ma grub cing rgyun chad par thal bar 'gyur/de la rgyu dang 'bras bu'i 'brel pa 'jug pa las dus gsum du 'dus byas rnams kyi skad cig ma'i nye bar len pa rab tu 'byung ba las rgyun zhes brjod do/ /'di ltar sA lu'i sa bon gyi myu gu dang sdong bu dang ldum bu rnams brgyud mar rab tu 'byung ba ni sa bon gyi rgyun no// de bzhin du gzhan la yang shes par bya'o/ /myu gu la sogs pa'i rgyun de yang sa bon gyi rgyus 'jug la/ sa bon gyi rgyu can gyi myu gu la sogs pa'i rgyun de las kyang sa bon dang 'dra ba'i 'bras bu mthar 'jug go/ /'bras bu de yang sa bon gyi rgyu can du rnam par gzhag ste/ ji ltar byas na 'dir sa bon 'gags la/ 'di'i bdag nyid kyi rgyun las 'dra ba'i 'bras bu skyed pa'i phyir dngos kyi 'bras bu'i rgyu myu gu byin nas 'gag par 'gyur ro/ /'bras bu skyed pa'i nus pas khyad par du byas pa'i myu gu skyed pa'i rgyu'i dngos por yongs su bsgrub pas/rgyu byin nas 'gags zhes brjod do/ /de bzhin du myu gu la sogs pa nas me tog gi mthar thug pa rnams rang gi rgyu las thob pa'i rgyus sa bon dang mthun pa'i 'bras bu rim gyis rdzogs par byed do/ /'bras bu de yang sa bon rgyur byas pa nyid las nye bar skye'o//gal te sa bon dang myu gu la sogs pa'i rgyun 'bras bu skyed pa'i nus pas mi 'jug na mthar yang de'i rigs can gyi 'bras bu mi 'byung ngo zhes bya la/ des na mthar yang 'byung bzhin pa'i 'bras bu sa bon gyi rgyu can nyid do zhes rnam par 'jog la/ ji skad du/ gang phyir sa bon las rgyun dang / /rgyun las kyang ni 'bras bu 'byung / /de'i phyir sa bon sngon 'gro'i 'bras/ /rtag min chad pa yang ma yin/ /zhes bstan to/ /de la sa bon ni 'bras bu skyed par nus pa'i myu gu la sogs pa'i rgyun gyi rgyur khong du chud par 'gag par 'gyur grang la/myu gu la sogs pa'i rgyun yang mi 'jug par 'gyur na/ de'i tshe chad par lta bar 'gyur ro/ /yang na myu gu la sogs pa 'jug kyang sa bon rang gi ngo bos gnas na de ni rtag par lta ba ste/ de ltar yang ma yin no zhes bya bas des na rgyun yod la rgyun can gyi rgyu'i skad cig ma rnams kyang 'bras bu'i don du rgyu byin pa'i phyir dang /rang gi ngo bos mi gnas pa'i phyir yang rtag pa dang chad par lta bar thal ba med do zhes bya'o/ /'dir yang slob dpon gyis skyon brjod/ sngar bzhin 'di yang mi 'grub cing / /rgyun chad par yang thal bar 'gyur//zhes bya ba la/ 'dir 'di skad du rtag pa dang chad pa'i skyon spang ba'i phyir/ de ni sngar bzhin du ma grub ste/ ji ltar byas na yod pa nyid la rgyu dang 'bras bu'i 'jug pa 'byung bar 'gyur ro zhes 'dir rtogs na/ rgyu dang 'bras bu 'jug pa mi srid pa yang sngar bstan te/'bras bu yin na 'bras ldan la/ /der med gyur na rgyu med mtshungs/ /yod dang med pa na yang 'gal/ /dus gsum du yang 'thad ma yin/ /ma rig 'du byed med mi 'byung / /de med 'du byed mi 'byung zhing / /de dag phan tshun rgyu can de// rang bzhin gyis kyang ma grub bo/ /gang yang / gang zhig rang nyid rang bzhin gyis/ /ma grub des gzhan ji ltar skyed/ /de phyir gzhan las grub pa yis / /rkyen gzhan dag ni skyed byed min/ /des na rgyu dang 'bras bu dag ma grub na/ rgyun ga la zhig rgyu byin pa ga la zhig ces pa dang /rgyu 'gags nas slar mi skye bas/ rgyu rgyun chad par thal bar brtag pa yang mi rigs te/ de ltar yang dngos por khas blangs na rtag pa dang chad pa'i lta bar thal lo zhes gnas so/ /'dir smras pa/ gal te rtag pa dang chad par lta bar thal bas rtag pa dang chad par khas mi len na/'di ltar dngos po las skye ba dang 'gag pa yang med par thal la/ de med na yang dag 'di dag skye ba dang 'jig par bstan pas bcom ldan 'das kyis mya ngan las 'das pa'i lam bstan pa gsungs pa/mi rtag dang ldan 'dus byas rnams/ /skye dang 'jig pa'i chos can te/ /skye zhing gang la 'jig 'gyur ba/ /de dag nyer zhi bde ba 'o/ /zhes pas/ de 'gag pa dang / skye ba dang / 'jig pa dag med pa'i stong pa dag nye bar bstan pa mya ngan las 'das pa'i lam du mi 'thad do zhes bstan pa'i phyir gsungs pa/skye 'jig bstan phyir myang 'das kyi/ /lam bstan ma yin stong nyid phyir/ /zhes pa'o/ /yang na 'di'i don ni gzhan te/ gal te 'di snyam du sems na/ dngos po yod bzhin pa ma yin pa'i phyir skye 'jig med par 'gyur na mya ngan las 'das pa'i lam bstan pa med par thal lo zhes pa'i skyon 'di med de/skye ba dang 'jig pa yod bzhin pa ma yin pa la bstan pa 'thad cing / gang las skye 'jig bstan pa las mya ngan las 'das pa thob par bya'o zhes bcom ldan 'das kyis gsungs pa mya ngan las 'das pa'i lam bstan pa rnam par gzhag pa ma yin no zhes bstan pa'i phyir gsungs pa/skye 'jig bstan phyir myang 'das kyi/ /lam bstan ma yin zhes so/ /slar yang ci'i phyir na skye 'jig bstan pa las thar pa med ces nye bar bstan par mya ngan las 'das pa'i lam bstan par yang mi 'thad do zhes bstan pa'i phyir gsungs pa/stong nyid phyir zhes pa'o/ /skye ba dang 'jig pa dag stong na ji ltar dag bstan pa mya ngan las 'das pa'i lam bstan par 'gyur/ slar yang nye bar dmigs bzhin pa skye bo thams cad la grags pa'i skye ba dang 'jig pa dag ji ltar stong pa nyid/ji ltar nye bar ma dmigs pa de dag kyang stong pa nyid la de ltar bstan pa'i phyir gsungs pa/ 'di dag phan tshun bzlog pa ru / /mthong ba phyin ci log las yin// bden te/ skye ba dang 'jig pa dag stong pa nyid kyi phyir/ de dag stong pa nyid yin kyang gang 'jig rten pas mthong ba phyin ci log pas 'jug pa'o/ /de dag 'di ltar ji ltar rtogs she na/ phan tshun bzlog pa las te/ phyin ci log pas na phan tshun bzlog pa ste gzhan du 'gyur ba thob pa'o//gal te skye ba dang 'jig pa dag rang gi ngo bos yod na 'di dag phan tshun byas pas gzhan du 'gyur bar mi 'gyur te/ skye ba las gzhan pa ma skyes pa la 'jig pa med la/ skye ba'i dus na yang skye ba'i dus dang 'gal ba'i 'jig pa mi rigs pa'i phyir dang /'jig pa dang bral ba yang skye ba med pa'i phyir dang / 'jig pa'i dus su yang de dang 'gal ba'i skye ba mi rung ba'i phyir dang / phan tshun las dus gcig tu skye ba thob pa 'gal ba dang / phan tshun med pas 'di dag gsal ba'i phyir phan tshun bzlog par 'gyur ro//skye ba ni skye ba'i rang gi ngo bo dang bral ba'i phyir phyin ci log go/ /yang na 'gag pa la ma ltos par skye bar mi 'gyur ro zhes bya'o/ /skye ba'i phyin ci log ni rang gi ngo bos ma grub pa dang 'gag pa la ltos pa'i phyir dang / 'di ltar 'gag pa yang brjod de/ gang yang 'di dag phan tshun bzlog pa phan tshun byas pas 'grub la/de 'di ltar rang gi ngo bos ma grub pa dag gang mthong ba de 'jig rten pa'i phyin ci log ces shes par bya'o/ /gang yang de dag de lta bas na des na skye ba dang 'jig pa dag stong pa'o/ /gang gi tshe de dag stong pa nyid na de'i skye ba dang 'jig pa bstan pa las mya ngan las 'das par 'gyur ro zhes nye bar bstan pa'i mya ngan las 'das pa'i lam bstan par mi 'thad do//byis pa'i skye bos rtogs pa'i don du des mthong ba'i rjes su 'jug pas bcom ldan 'das kyis skye ba dang 'jig pa gsungs par shes par bya'o//ji ltar du/ skye ba shes pas 'jig pa shes/ /'jig pa shes pas mi rtag shes/ /mi rtag nyid la 'jug shes pas/ /des ni chos kyang rtogs par 'gyur/ /zhes so/ /'dir smras pa/ skye med 'gag pa med ce na//ci zhig 'gags pas mya ngan 'da'/ /gang zhig skye ba dang 'jig pa med na de'i tshe sdug bsngal med la nye bar len pa'i phung po lnga dag skyes pa mi rtag pas sdug bsngal la/ de 'gags pa las mya ngan las 'das pa'o/ /gang gi tshe skye ba dang 'gags pa gang yang med pas sdug bsngal med pa de'i tshe ci zhig 'gags pas mya ngan las 'das par 'gyur/'di ltar sdug bsngal 'gag pa las mya ngan las 'das pa yang yod la/ de'i phyir skye ba dang 'jig pa dag yod do zhe na/ smras pa/ 'di la skyon med de/ gang gi phyir 'gags pa las mya ngan las 'das par rnam par gzhag pa ma yin la/de ni sdug bsngal med pa nyid de/ skye ba med cing 'gag med pa'i/ /ngo bo gang zhig thar min nam/ /nges par yang 'di ltar khas blang bar bya'o/ /gzhan du na/ gal te 'gags las myang 'das chad// gal te cig shos ltar na rtag /de phyir dngos po dngos med dag /mya ngan 'das par rung ma yin/ /gal te sdug bsngal rang bzhin gyis ma skyes pa dang ma 'gags par mi 'dod la/ sdug bsngal gyi ngo bo'i rgyun las log pa la mya ngan las 'das par yongs su rtogs na/de ni sdug bsngal rgyun chad pa'i rang bzhin gyi phyir mya ngan las 'das pa chad par 'gyur ro zhes bya la/ mya ngan las 'das pa chad par 'gyur ba mi 'thad de/ mthar 'dzin par lta bar thal ba dang / ngo bo nyid kyis ma grub pa las rgyun chad pa'i mya ngan las 'das pa de phyin ci log tu 'gyur la/mya ngan las 'das pa phyin ci log ma yin pa'i phyir/ sdug bsngal rgyun chad pa'i rang bzhin mya ngan las 'das par mi 'thad do/ /yang na skyon 'di dag yongs su spang bar 'dod nas/ de la cig shos khas len na/ de'i tshe sdug bsngal ma 'gags pa'i rang bzhin nyid kyi phyir/ther zug pas mya ngan las 'das pa de rang bzhin du 'gyur la/ sdug bsngal rtag pa'i rang bzhin mya ngan las 'das par 'gyur bar mi rung ste/ de ni sdug bsngal zad pa'i mtshan nyid du nye bar bstan pa'i phyir ro//gang gi tshe 'di ltar dngos po dang dngos po med pa dag mi rung bas/ de'i phyir sdug bsngal rang bzhin gyis gang ma skyes shing ma 'gags pa de nyid thar pa zhes rigs so/ /'dir smras pa/ sdug bsngal las log pa'i rang bzhin mya ngan las 'das pa ma yin te/gal te 'di ltar 'gyur na de'i tshe sdug bsngal las log pa'i rang bzhin ni ci yang ma yin pa'i phyir/ mya ngan las 'das pa zhes bya ba ci yang ma yin par 'gyur la/ ci yang ma yin pa mya ngan las 'das par 'gyur bar mi rigs te/ lam gyi bden pas thob bya/skye ba 'gags par gyur pa'i chu skyegs pa'i skyegs kyi gnas lta bu sdug bsngal las don gzhan du gyur pa la 'gog pa zhes brjod do/ /gal te de don gzhan du gyur pa ma yin na/ bden pa bzhi rnam par gzhag pa mi 'byung la/ des na 'gog pa sdug bsngal rtag pa'i rang bzhin ma yin la/sdug bsngal log pa'i rang bzhin yang ma yin te/ sdug bsngal las don gzhan du gyur pa'i phyir zhes pa'i phyir zhes pa'o/ /'dir gsungs pa/ gal te 'gog par 'ga' gnas na/ /dngos po las gzhan de yod 'gyur// dngos po med phyir 'di med la/ /dngos po med phyir de yang med/ /gal te sdug bsngal gyi dngos po las gzhan du ste/ de las tha dad pa'i 'gog par gyur na/ rtag par gnas par gyur te/ de dngos po las kyang gzhan du 'gyur la/ de ni dngos po las gzhan du yod pa nyid 'thad pa ma yin te/sdug bsngal las gzhan du de 'gags pa rnam par gzhag par mi nus so/ /gal te yang sdug bsngal las tha dad na 'gog pa rtag par 'gyur la/ der gyur na 'jig rten pa thams cad la sdug bsngal log par 'gyur ro// sdug bsngal las log pa des 'thob bo zhe na/ thob par gyur na gang gis sdug bsngal skyes pa 'gag par byas nas 'di'i khyad par ci zhig skyed par byed/ de thob pa'i rgyud la skye'o zhe na/ /phyis ci zhig 'di'i khyad par skye ba gang gis de thob pa'i rgyud la skye na/dus thams cad du de thob pa'i rgyud la skye bar 'gyur ba'am/ nam yang ma yin par 'gyur ro/ /de las lam bsgoms pa 'jig rten pa thams cad kyis ma btsal bar yang mya ngan las 'das par 'gyur ro/ /de'i phyir nges par sdug bsngal la ltos pa dang bcas pa'i rang bzhin gyis de 'byung bar 'gyur la//de la yang sdug bsngal mi srid pa'o/ /des na/ dngos po med phyir 'di med de/ /sdug bsngal med pas de med do/ /zhes pa'i don to / /yang gzhan zhig gis smras pa/ gal te sdug bsngal 'gags pa ste// sdug bsngal med pa'i rang bzhin dngos por gyur pa mya ngan las 'das par 'gyur na skyon 'dir 'gyur na/ rnam pa de lta bu ni med do/ /'on kyang 'di de ni sdug bsngal las log pa tsam mo zhe na/ smras pa/ 'di ltar brtags pas kyang mya ngan las 'das pa thob par mi 'gyur te/sdug bsngal gyi dngos por yod na sdug bsngal dang ldan par 'gyur la/ sdug bsngal yang mi srid na de med pa ga la zhig ces bya'o/ /dngos po med pa'i rang bzhin yang mya ngan las 'das pa'o zhe na/ des na dngos po med pas ni dngos po med pa'i phyir la/de yang med de/ dngos po med par gyur pas med pa'i phyir mya ngan las 'das pa med do zhes pa'i don to/ /yang na 'di'i don gzhan te/ gal te 'gog pa zhes bya ba dngos po'i rang gi ngo bo grub par gyur na/ de sdug bsngal la mi ltos pas kyang 'byung ste/rang gi mtshan nyid kyis grub pa'i phyir la/ 'byung ba yang ma yin te/ des na 'gog pa'i rang gi ngo bo grub pa med do/ /yang na gal te 'dod na yang nges par de ni dngos po'i rang bzhin gyis sam/ dngos po med pa'i rang bzhin gyis 'byung bar 'gyur/gal te dngos po'i rang bzhin du 'dod na/ de ni dngos po bkag pa'i phyir/ /dngos po med phyir de yang med/ /yang na dngos po med pa'i rang bzhin yin na/ 'di ltar dngos po med kyang bkag pa'i phyir te/ 'gag pa nyid dngos po med pa'i phyir / dngos po med pas yod pa nyid ma yin no zhes gsungs pa/dngos po med phyir de yang med/ /ces so/ /'dir smras pa/ mya ngan las 'das pa yod pa nyid de/ de'i tshe mtshan nyid yod pa'i phyir ro/ /yod bzhin pa ma yin pa'i mo gsham gyi bu la mtshan nyid yod pa ma yin la/ mya ngan las 'das pa la mtshan nyid yod de so sor brtags pa'i 'gog pa gang bral ba'o zhes pa'i tshig las so/ /smras pa/ mya ngan las 'das pa de'i mtshan nyid yod na yod par 'gyur na/ yod pa ma yin no zhes bstan pa'i phyir gsungs pa/ mtshan gzhi las gzhan mtshan nyid las//mtshan gzhi grub pas rang ma grub/ /phan tshun las kyang ma grub cing / /ma grub ma grub sgrub byed min/ /'dir gal te mtshan nyid ces bya ba'i ngo bo cung zad grub par gyur na/ de mtshan gzhi la mi ltos par 'gyur la/ mtshan gzhi la ma ltos pa'i mtshan nyid rgyu med pa thob par 'gyur la/rgyu med par yang mi rigs so zhes bya ste/ des na nges par mtshan gzhi las mtshan nyid grub pas/ mtshan gzhi'i rgyu can gyi mtshan nyid ma grub bo zhes bya ba'i don to/ /yang na 'di snyam du sems te/ mtshan gzhi la ltos nas mtshan nyid grub par yod do zhe na/smras pa/ gal te mtshan gzhi mtshan nyid la ma ltos par yod na/ de la ltos nas mtshan nyid yod la/ ltos pa med pa'i mtshan gzhi'i mi srid la/ mtshan nyid dang bral ba'i mtshan gzhi rgyu med par thal bas/ des na mtshan gzhi yang de'i mtshan nyid las grub pas/ rang las ma grub ste/ mtshan nyid dang mtshan gzhi ngo bo nyid kyis ma grub bo zhes pa'i don to/ /yang na 'di snyam du sems te/ gal te yang mtshan gzhi dang mtshan nyid dag rang las ma grub kyang / de lta na yang phan tshun ltos nas grub pas yod do zhe na/smras pa/ phan tshun las kyang ma grub cing / phan tshun ltos pas grub pa med do zhes pa'i don to/ /yang ci'i phyir phan tshun ltos pas grub pa med ce na/ gsungs pa/ ma grub ma grub sgrub byed min/ /zhes pa'o//'dir mtshan gzhi la brten pa'i phyir nyid mtshan gzhi la rten du grub par 'dod na / mtshan gzhi las gzhan du mtshan gzhi'i mtshan nyid mi 'thad pas/ mtshan nyid kyis brten pas mtshan gzhi grub bo zhes bya la/ de ltar phan tshun ltos pas mtshan gzhi dang mtshan nyid grub pa rnam par gzhag par gyur pa 'di dag dpyad par bya ste/gal te mtshan gzhi la ltos nas mtshan nyid rnam par 'jog pas de nyid kyis na re zhig mtshan gzhi mtshan nyid la ma ltos par ngo bo nyid kyis med la/ de ni rang nyid ma grub pas med pas ji ltar gzhan mtshan nyid 'grub par byed/de bzhin du mtshan gzhi la yang sbyar ro / /de ni 'di ltar mtshan gzhi'am mtshan nyid dag ma grub pa ma grub pa'i mtshan gzhi'am mtshan nyid grub par byed pa ma yin no zhes bya ste/ des na mtshan gzhi dang mtshan nyid dag med do// gang gi tshe mtshan gzhi dang mtshan nyid dag med pa de'i tshe mtshan nyid yod pa'i mya ngan las 'das pa ga la 'grub ces bya ste/ 'di ni mi rigs so/ /mtshan gzhi dang mtshan nyid la dpyad pa'i rim pas phan tshun ltos pas grub pa'i dngos po lhag ma rnams kyang ma grub par bde blag tu khong du chud par gzigs nas/de legs par bstan pa'i phyir gsungs pa/ 'dis ni rgyu dang 'bras bu dang / /tshor dang tshor ba po sogs dang / /blta bya lta ba po la sogs/ /des gang cung zad ma lus bshad/ /mtshan gzhi dang mtshan nyid dag ma grub pa'i rim pa 'dis/rgyu dang 'bras bu la sogs pa yang ma grub par khong du chud par bya'o/ /byas pa ni 'bras bu / byed pa ni rgyu'o/ /myong bar gyur pas tshor ba ste/ las la lugs byas nas tshor ba la tshor bar gsungs so/ /tshor ba po ni nyams su myong ba yang tshor ba dang tshor ba po ste/tshor ba dang tshor ba po'o/ /de tshor ba dang tshor ba po dag lhan cig 'jug pas tshor ba dang tshor ba po zhes bya'o/ /sogs pa'i sgras 'du shes dang 'du shes par bya ba la sogs pa gzung ngo / /blta bya dang lta ba po la sogs pa gang cung zad kyang zhes pa la sogs pa'i sgras thos pa dang thos pa po la sogs pa lnga po rnams kyi gnyis gnyis pa gzung la/gang cung zad ces pa 'dis phan tshun ltos nas grub pa'i gnyis gnyis pa'i dngos po rnams gzung ngo / /dngos po 'di dag thams cad kyang mtshan gzhi dang mtshan nyid dag ma grub pa'i rim pas ma grub par sbyar ro//rab tu byed pa 'dir yang re re'i dngos po'i grangs 'jug pa la dpyad pa'i rim pa'i skabs yin pa'i phyir/ re zhig thog mar dngos po gcig rnam par dpyad de/ 'di ltar rang bzhin no/ /de'i rjes la rgyu gcig pu nyid de/'bras bu yod na 'bras ldan la/ /zhes pa la sogs pa'o/ /de yang ma rig pa la sogs pa'i rim pas rnam pa mang po rnam par dpyad la/ de'i rjes la/ ma rig 'du byed med mi 'byung / /zhes pa de nas brtsams nas 'di'i bar du gnyis gnyis pa'i dngos po phan tshun ltos pas gnas pa rnams dpyad la/'di las gzhan pas/ ltos pa dang bcas pa'i gsum gyi grangs kyis yongs su bcad pa'i dngos po rnams rnam par dpyad pa brtsam par bya'o/ /gang 'di skad du/ dngos po yod na rtag pa nyid/ /med na nges par chad pa nyid//dngos por gyur na de gnyis la/ /de phyir dngos po khas mi blang / /zhes pa de ni mi 'thad de/ /gal te dngos po khas mi len na de'i tshe dus gsum med la/ dus gsum yod pas de'i phyir dngos po yod de/ dus gsum gyi rgyu mtshan yin pa'i phyir ro//'dir skyes la ma 'gags pa'i dngos po ngo bo nyid kyis gnas bzhin pa'i phyir dang / yod bzhin pa'i phyir da ltar ba'i sgras brjod par bya bar 'gyur ro/ /da ltar ba'i gnas skabs ma thob pa la ma 'ongs pa zhes brjod la/ da ltar ba'i gnas skabs las 'das pa nyid la 'das pa zhes brjod do//gal te dngos po med na de ci'i rgyu mtshan gyis dus gsum 'byung bar 'gyur/ de'i phyir dus gsum yod pas dngos po yod do zhe na/ smras pa/ gal te dus gsum yod na dngos po yod par 'gyur la yod pa ma yin no//ji ltar med pa de ltar bstan pa'i phyir gsungs pa/ gnas med phan tshun las grub pa/ /'chol phyir rang nyid ma grub phyir/ /dngos po med phyir yod min te/ /dus gsum po ni btags pa tsam/ /gal te dus zhes bya ba 'ga' zhig yod na de la 'dzin la rag na mi 'dzin la/de'i phyir 'dzin pa med pas dus med do/ /yang ci'i phyir mi 'dzin zhe na/ gnas med phyir te/ dus zhes bya ba cung zad yod pa ma yin no/ /ther zug pa'i dngos po yod na gang zhig 'dzin la rag na/ de las ma bzung ba'i phyir dus med do/ /yang na gal te yang ther zug pa'i dus gang cung zad mi 'dzin la/de lta na yang dus yod pa nyid du 'gyur te/ /skad cig la sogs pas mngon par gsal bar byas pa'i phyir ro/ /'di skad cig dang thang cig dang / yud tsam dang / zla ba phyed dang / zla ba dang / lo phyed dang / lo la sogs pa'i dus kyi tshad kyi khyad par rnams te/khyad par de rnams kyis 'dzin bzhin pa'i phyir/ dus yod pa nyid do zhe na/ smras pa/ gal te lo la sogs pa nyid yod na/ lo la sogs pa'i tshad dang ldan pa'i dus 'dzin la rag na/ de skad cig la sogs pa las tha dad pa'i ther zug pa'i lo la sogs pa mi 'dzin no//yang na 'di snyam du sems na/ re zhig skad cig ma yod na/ de la 'dzin pas des na de 'dus pa'i rang bzhin thang cig la sogs pa 'byung bar 'gyur ro zhe na/ smras pa/ gang du gnas pa med pa'i skad cig ma rnams la 'dus pa ga la zhig gang du thang cig la sogs pa 'dzin par gyur cing skad cig ma yang yod na thang cig la sogs pa rnam par 'jog grang na/skad cig de la yang thog ma dang bar dang tha ma yod la/ thog ma dang bar dang tha ma de rnams la yang thog ma dang bar dang tha ma yod pa'i phyir/gnas pa med pas skad cig ma yang med na/ skad cig ma 'dus pa'i thang cig la sogs pa ga la 'grub/ blo'i rang bzhin gyi 'dus par brtags pas skad cig ma grub pa mi srid de/ blo'i skad cig de yang yongs su brtags pa'i phyir dang / de nyid gnas pa med pa'i phyir dus med do//dus med na dus gsum ni ga la zhig /gnas pa med pa 'ba' zhig gis dus gsum med par ma zad kyi/ phan tshun las grub pas kyang dus gsum med de/ 'di ltar da ltar ba 'das pa las 'das pa'o/ /da ltar ba ma 'ongs pa las ma 'ongs pa la/gnas bzhin pa'i phyir da ltar ba'o zhes de ltar phan tshun ltos nas grub la/ dus gsum phan tshun ltos nas grub pas de ma grub pa nyid do zhes bsgrubs pas so zhes bya'o/ /des na yang dus gsum med do/ /'di ltar yang dus gsum med de/ 'chol ba'i phyir te/ma 'ongs pa'i dus de nyid da ltar bar 'ongs pa la da ltar ba zhes brjod la/ da ltar ba la 'das par zhugs pas 'das pa zhes bya'o/ /gcig nyid la dus gsum du rnam par gzhag pa'i phyir 'chol ba'o/ /yang na phan tshun ltos nas grub pa'i phyir dus gsum po med de/'das pa ni da ltar ba dang ma 'ongs pa la ma ltos par med la/ gal te yang 'das par da ltar ba dang ma 'ongs pa yod na de'i tshe de la ltos pa 'thad kyi/ 'das pa ni mo gsham gyi bu bzhin du med la/ yod bzhin pa ma yin pa'i mo gsham gyi bu mi ltos pa bzhin no//gang gi tshe yang 'das par da ltar ba dang ma 'ongs pa dag yod na de'i tshe/ 'das par da ltar ba yod pa'i phyir/ 'das pa'i rang gi bdag nyid bzhin 'das par 'gyur la/ de ltar 'das pa dang ma 'ongs pa dag 'das pa dang da ltar ba la yang bsam par bya'o//'di ltar de ni 'das pa dang ma 'ongs pa dang da ltar ba rnams la so sor dus gsum du thal bar 'chol bas/ 'chol ba'i phyir yang dus gsum med do/ /'di ltar yang / dus gsum med de rang nyid ma grub phyir/ /'dir skad cig ma la sogs pas dus mngon par gsal bar pha rol po 'dod do//skad cig ma la sogs pa las tha dad pa'i dus gang cung zad yod cing / gang zhig des mngon par gsal bar byed pa yang ma yin te/ ri bong gi rwa rang gi ngo bor ma grub pas sus kyang mngon par gsal bar byed pa ma yin no//des na ngo bo nyid kyis dus ma grub bo/ /dus kyang med na de'i gsum nyid ga la zhig ces bya ste/ dus gsum med do/ /gzhan yang khyod kyis dngos po bsgrub pa'i phyir dus gsum nye bar gzhag la/ dus de yang dngos po la ma ltos par ma grub la/dngos po nyid la brten nas de rnam par gzhag pa'i phyir ro/ /dngos po de yang sngar nyid du med do zhes bsgrubs la/ dus gsum po/ dngos po med phyir yod min te/ /gal te de ltar dus gsum po med na/ de'i tshe ji ltar dus gsum du tha snyad byed ce na/smras pa/ dus gsum po btags pa tsam yang dag pa ma yin pas sgro btags pa tsam zhes bya ba'i don to/ /dus gsum med la/ de'i rgyu mtshan gyi dngos po yang med do zhes grub bo/ /'dir smras pa/ dngos po yod pa nyid de/ de yang 'dus byas kyi rang bzhin te de'i mtshan nyid yod pa'i phyir ro//yod bzhin pa ma yin pa la mtshan nyid med de/ 'di lta ste mo gsham gyi bu lta bu'o/ /dngos po ni 'dus byas kyi mtshan nyid skye ba dang 'jig pa dang gnas pa zhes bya ba yod la/ de'i phyir mtshan nyid yod pas 'dus byas kyi rang bzhin gyi dngos po yod do zhe na/smras pa/ gal te de'i 'dus byas kyi mtshan nyid yod na/ 'dus byas kyi rang bzhin yod la/ yod pa ma yin no zhes bstan pa'i phyir gsungs pa/ 'dus byas mtshan nyid skye ba dang / /gnas 'jig gsum po 'di yang med//gang phyir 'dus byas med 'di las/ /'dus ma byas pa cung zad med/ /de la 'dis mtshon par byed pas na mtshan nyid de/ rgyu dang rkyen 'dus pas shes pas / 'dus pa las 'byung bar byed pa 'dus byas la/ 'dus byas dang mtshan nyid pas 'dus byas kyi mtshan nyid de/de ci zhe na/ skye ba gnas dang 'jig pa'o/ /skye gnas 'jig pa zhes bya ba gsum po de nyid kyang med na/ gang gi phyir gsum pos 'dus byas 'jug pa med par de ni sngar nyid du bsgrubs te/ yod pa yod phyir skye ba min/ /med pa med phyir mi skye ba//zhes pas 'dir gang gi tshe gang las 'dus byas 'jug pa de'i gsum po ma grub na/ de'i tshe 'dus byas ma grub pa don gyis bsgrub par 'gyur ro/ /gang gi phyir 'dus byas med na 'di las 'dus ma byas yin pa yang cung zad kyang med do//de la gzugs med pas nam mkhar tha snyad byas la/ 'dus byas rnams rkyen ma tshang bas mi skye ba la so sor brtags pa ma yin pa'i 'gog pa'o/ /zag pa dang bcas pa'i 'dus byas rnams nyid shes rab kyi stobs kyis bral ba'i mtshan nyid kyi thob bya'i 'gog pa ni so sor brtags pa'i 'gog pa'o//'dus byas med na de la ma ltos par 'dus ma byas kyang med pa'i phyir 'dus ma byas med do zhes bya'o/ /smras pa/ slar yang skye ba la sogs pa gsum po 'di dag ci ltar med ces brjod/ 'di ni skyes pa bskyed bya min//zhes pa la sogs pa bstan pas bsgrubs pa yang ma yin nam/ de ni rgyu brtag pa dang 'brel bas 'dus byas brtag pa dang 'brel par brjod la/ ji ltar de ltar smos pas kyang 'di dag gsungs par 'gyur la/ gal te de ltar yang 'dus byas dang 'dus ma byas dag med par bstan na/slar yang de bsgrub pa brtsam pa'i phyir/ 'dir gsungs pa/ 'jig pa med pa mi 'jig cing / /gnas pa gnas par mi 'gyur la/ /gnas pa min pa'ang mi gnas te/ /skyes pa skye min ma skyes pa'ang / /'dir gal te 'jig pa zhes bya ba cung zad yod na/de bzhin gshegs pa'i dngos po'am/ mi 'jig par 'gyur la/ de la re zhig 'jig pa med pa la mi 'thad de/ ci'i phyir zhe na/ gang las 'jig pa med pa mi 'jig ste/ 'jig pa med pa zhes bya ba 'jig pa dang bral ba de 'jig pa med la 'jig par 'gyur ro zhes brjod par ji ltar nus/de'i phyir 'jig pa med pa mi 'jig cing / da ni zhig pa'ang 'jig par mi 'gyur te/ zhig pa zhes bya ba yod bzhin pa ma yin pa'o/ /de yang 'jig ces brjod par ji ltar rung /zhig pa dang ma zhig pa dag las gzhan du rnam par gzhag pa med do/ /gang zhig 'jig par 'gyur zhes pa yang gang gi tshe 'jig pa med pa mi 'jig cing zhig pa yang mi 'jig pa de'i phyir/ 'jig pa med do zhes grub bo/ /da ni ji ltar gnas pa yang med do zhes bsgrub par bya ste/'dir 'di dag gnas par yongs su rtog pa na/ gnas pa'i dngos po'am mi gnas pa'i dngos por yongs su rtog / gnyi ga yang mi 'thad do zhes bsgrub pa'i phyir gsungs pa/ gnas pa gnas par mi 'gyur la/ /gnas pa med pa'ang mi gnas te//zhes pa la/ re zhig gnas pa'i dngos po la gnas pa med de/ gnas par bya ba dang bral ba'i dngos po gnas pa zhes brjod la/ gnas pa la gnas pa'i bya ba dang bral ba mi srid pas de'i phyir gnas pa gnas par mi 'gyur ro// gnas pa med pa'ang gnas pa'i bya ba dang bral ba'o/ /gang yang gnas pa'i bya ba dang bral ba de ji ltar gnas par 'gyur/ de'i phyir gnas pa yang med do/ /da ni skye ba mi srid par bsgrub pa'i phyir gsungs pa/ skyes pa skye min ma skyes pa'ang // zhes pa la/ skyes pa re zhig mi skye ste//skye ba'i bya ba dang bral ba'i phyir ro/ /ma skyes pa'ang mi skye ste/ /skye ba'i bya ba'i yul ma yin pa'i phyir ro/ /des na 'dus byas med la/ de ma grub na/ 'dus ma byas kyang med do zhes grub bo/ /gal te na yang 'dus byas sam/ 'dus ma byas gang cung zad yod na/ de nges par tha dad pa'am tha mi dad pa zhig grang / gnyi ga yang mi 'thad do zhes bsgrub pa'i phyir gsungs pa/ 'dus byas 'dus ma byas pa dag /du ma ma yin gcig ma yin/ /med min yod min yod med min/ /mtshams 'dir sna tshogs thams cad 'dus//re zhig 'dus byas dang 'dus ma byas dag tha dad par grub pa med la/ gal te yod na 'dus byas la ma ltos par 'dus ma byas yod de/ bum pa las gzhan pa snam bu'i rang gi ngo bo grub pas bum pa la mi ltos pa bzhin no/ /'dus byas la ma ltos par 'dus ma byas kyi rang gi ngo bo grub pa mi srid la/ji ltar mi srid pa de ltar yang sngar bsgrubs so/ /gzhan yang 'dus ma byas kyi sgras/ 'dus byas rnam par bcad nas rang gi don rtogs par byed de/ 'di ni 'dus byas ma yin la 'on kyang 'dus ma byas so zhes pa'o//gang gi tshe yang de de ltar na de'i tshe 'dus byas kho na la ltos nas 'dus ma byas rnam par gzhag la/ du ma grub par mi 'thad do/ /'dus byas 'dus ma byas dag 'gal bas kyang 'gal zla'i dngos po gzhan la ma ltos par rang nyid dang 'gal ba mi rigs so zhes bya ste/des na yang 'dus byas la ma ltos par 'dus ma byas mi srid do/ /de bzhin du 'dus byas la yang brjod do zhes bya ste/ de ltar na re zhig du ma 'dus byas dang 'dus ma byas ma yin no/ /da ni gcig nyid la yang 'dus byas dang 'dus ma byas dag med de/snang ba dang mun pa bzhin phan tshun 'gal bar khas blangs pa'i phyir dang / mtshan nyid tha dad par khas blangs pa'i phyir dang / gnyis nyid du khas blangs pa'i phyir ro/ /gzhan yang 'dus byas zhes bya ba cung zad yod na/ de yod pa'am med pa'am yod med skye/de la re zhig yod pa mi skye ste yod bzhin pa'i phyir ro/ /med pa yang mi skye ste med bzhin pa'i phyir ro/ /yod med kyang mi skye ste phan tshun 'gal ba dag gcig pa mi srid do/ /yang na gal te 'dus byas zhes bya ba cung zad yod na/ de yod pa'am med pa'am yod med du yod par 'gyur la/de la re zhig yod pa ma yin te/ yod pa rgyu la mi ltos pa'i phyir dang / rgyu med pa la yod bzhin pa med pa'i phyir ro/ /ji srid du/ 'phags pa lhas/ ma brten yod pa nam yang ni/ /'ga' zhig gang na'ang yod ma yin/ /nam yang 'ga' zhig gang na yang //med pa des na rtag ma yin / /zhes so/ /med pa yang ma yin te/ ngo bo nyid ma grub pa kho nas dngos po med pa yang med pa'i phyir ro/ /dngos po rab tu ma grub na/ /dngos med 'grub par ga la 'gyur/ /zhes pa'i tshig las so//yod med kyang ma yin te/ gcig la 'gal ba'i chos gnyis kyi bdag nyid can med pa'i phyir ro/ /de bzhin du 'dus ma byas la yang brjod par bya'o/ /'dus byas 'ba' zhig kho na la gcig dang / gzhan dang / yod pa dang / med pa dang / gnyi ga yang mi srid pa 'thad par ma zad kyi/gzhan yang nges par zag pa dang bcas pa dang zag pa med pa dang / gzugs can dang gzugs med pa dang / bstan du yod pa dang bstan du med pa dang / thogs bcas dang thogs med dang / rgyu dang 'bras bu dang / mtshan gzhi dang / mtshan nyid dang nye bar len pa dang /nye bar len pa po dang / 'byung ba dang 'byung ba las gyur pa la sogs pa dang dngos po thams cad la yang 'di ltar brtag pa'i rnam par gzhag pa las shin tu mi rtogs te/ ji skad du smos pa'i de nyid dang gzhan nyid la sogs pa'i rnam pa las bsams pa'i sgo nas dgag pa'i ngag gi go skabs thob par byas pas so//der 'dus pa'i phyir yang nges par 'dus byas dang 'dus ma byas ltar de dag dgag par rig par bya'o zhes gsungs pa/ mtshams 'dir sna tshogs thams cad 'dus/ /zhes pa la/ mtshams dang khrims dang de'i bar du zhes pa don gzhan ma yin no//thams cad kyi sgra ni zad par gyi don to/ /sna tshogs kyi sgra ni rnam pa'i don to zhes rig par bya'o// // 'dir smras pa/ ji skad du smos pa'i 'dus byas la sogs pa rang bzhin med par bsgrub par mi nus te/ lung dang 'gal ba'i phyir/'di ltar/ bla ma bcom ldan la gnas dang / /las kyi bdag nyid 'bras bu gsungs/ /sems can rang gi las dang ni/ /las ni rnam par 'jig med gsungs/ /mdo las gsungs pa/ nor dang 'bru dang sa le sbram/ /nor bu'i rna rgyan ba lang rta//bran dang las byed mngag gzhug pa/ /gang yang gzhag pa'i nor rnams dang / /cung zad khyer nas 'gro min zhing / /thams cad bor nas 'gro bar 'gyur/ /tha ma'i gnas skabs mngon gyur pa/ /mi yi srid pa spong bar 'gyur/ /ci de rang gis cung zad tsam//blangs nas de ni 'gro bar 'gyur/ /'di yis ci zhig mi spong na/ /ji ltar grib ma rjes 'gro bzhin/ /gang zhig skyes bu 'dir byas pa'i/ /sdig pa dang ni bsod nams gnyis/ /de ni de yi rang gir 'gyur/ /de yang blangs nas 'gro bas na/ /'di dag de yis mi spong ste//ji ltar grib ma rjes 'gro bzhin/ /ji ltar lam ngan nas 'gro ba/ /'gro ba po 'dir sdug bsngal 'gyur/ /de bzhin bsod nams ma byas pa'i/ /sems can ngan 'gror 'gro bar 'gyur/ /ji ltar lam bzang nas 'gro ba/ /'gro ba po 'dir bde bas 'gro//de bzhin 'dir byas bsod nams kyis/ /sems can bde 'gror 'gro bar 'gyur/ /skyes bu yun ring 'gron byas nas/ /ring nas dge bar 'ongs pa na/ /gnyen 'dun snying dga' 'grogs bshes rnams/ /'dir 'ongs pa la mngon par bstod// de bzhin bsod nams byas pa yi/ /'jig rten 'di nas pha rol 'gro/ /bsod nams kho na mngon bstod de/ /mdza' sdug bshes gnyen lta bur 'ongs / /de phyir bsod nams phung po ni/ /pha rol 'gro ba rnams kyis byos/ /bsod nams 'jig rten pha rol du / /srog chags rnams kyis rab gnas brjod//bsod nams lha rnams bsngags par byed/ /zhi ba'i spyod pa'ang gang spyod pa/ /'dir yang smod par mi 'gyur zhing / /mtho ris 'gro la rjes yi rang / /zhes mdo 'dir/ nor dang 'bru la sogs pa chud zos kyang las gnas par bcom ldan 'das kyis gsungs so//slar yang gsungs pa/ bsod nams me yis mi tshig cing / /rlung gis 'jig pa'ang ma yin to / /chu yis gsher ba ma yin la/ /sa la nub par mi 'gyur ro/ /zhes pa 'dis kyang gnas par gsungs la/ yod bzhin pa ma yin pa'i nam mkha'i me tog la gnas pa nye bar bstan pa mi 'thad do zhes bya'o//des na 'dus byas dang 'dus ma byas bzhin chos thams cad med par gnas par mi nus so/ /las kyi bdag nyid kyang bcom ldan 'das kyis gsungs te/ dge slong dag mtha' gcig tu gnag pa rnams kyi las kyi rnam par smin pa yang mtha' gcig tu gnag pa'o/ /mtha' gcig tu dkar ba'i las kyi rnam par smin pa yang mtha' gcig tu dkar ba'o/ /'dren ma rnams kyi 'dren ma'o zhes pa'i tshig las/ gang gi las kyi bdag nyid rang gi ngo bo de/las kyi bdag nyid kyi 'bras bu'o/ /las kyi med na yang de'i rgyu dang 'bras bu'i nges par mi brjod pas/ des na las yod par rigs la/ de las dngos po thams cad grub bo zhes bya'o/ /sems can rang gi las kyang bcom ldan 'das kyis gsungs te/sems can mi rnams kyi rang gi las la las ni sbyin pa sbyin par byed pa'o zhes bya ba'i tshig las lus zhig na nor dang 'bru la sogs pa 'jog par byed la/ las ni 'jig rten pha rol du rjes su 'brang ba'i phyir las kyang gang gi rang gi bde ba ni rang gi las so//des na yang de'i las yod la/ sems can de'ang yod pas dngos po rnams rang bzhin med pa ma yin no zhes bya'o/ /las rnam par 'jig pa med par yang de bzhin gshegs pas gsungs te/ lus can rnams kyi las rnams ni//bskal pa brgyar yang chud mi za/ /tshogs pa rnyed nas dus su ni/ /'bras bu gdon mi za bar smin/ /zhes bya ba la sogs pas kyang las med na chud mi za ba'i tshig rung ba ma yin no/ /de'i phyir las yod la las yod pa'i phyir dngos po rnams rang bzhin dang bcas pa'o zhes bya'o//'dir smras pa/ dngos po rnams kyi rang bzhin med pa la lung 'dis gnod pa ma yin te/ ci'i phyir zhe na/ gang gi phyir sngar nyid du de lta bu la sogs pa'i lung 'jig rten gyi tha snyad kyi dbang gis gsungs so zhes bsgrubs pa rjes su gnas so//'di dag kyang gdon mi za bar khas blang bar bya ste/ ci'i phyir zhe na/ gang gi phyir bcom ldan 'das kyis/ las rnams rang bzhin med gsungs te/ /ma skyes gang de chud mi za/ /de las kyang ni bdag 'dzin med/ /des bskyed 'dzin pa'ang rnam rtog las//de la mi rtag dang ldan 'dus byas rnams/ /zhes gsungs pas na/ las kyang mi rtag go zhes bcom ldan 'das kyis gsungs pa/ gang mi rtag pa de yang rang bzhin med pa'o zhes gsungs par 'gyur te/ ngo bo nyid ni gzhan du mi 'gyur ba'i phyir ro/ /de yang gal te rang bzhin yod pa la dgongs nas las yod do zhes bcom ldan 'das kyis gsungs par gyur na/slar yang las mi rtag par gsung bar mi 'gyur te/ de ni mi rtag pa dang rang bzhin yod pa 'gal ba'i phyir ro/ /bcom ldan 'das kyis kyang / ma rig pa'i rkyen gyis 'du byed du gsungs la/rang bzhin yod bzhin pa la brten nas skye ba 'thad pa ma yin no/ /de'i phyir bcom ldan 'das kyi bka' ni las rang bzhin med pa gsal bar byed pa nyid do zhes bsgrub par bya ba'i phyir gsungs pa/ las rnams rang bzhin med gsungs pa// zhes bya ba la/ gang kho nas rang bzhin med pa de nyid kyis na ma skyes la/ gang yang ma skyes pa de nyid kyis na de ni 'jig pa med par bcom ldan 'das kyis gsungs so/ /las rnams chud mi za zhes bya ba la sogs pas gang yang 'di ltar mi 'dod na/ de las 'dus byas su yang khas blang bar mi bya ste/'di dag phan tshun 'gal ba'i phyir ro/ /gang yang 'di ltar las rang bzhin gyis ma skyes pa des na rang bzhin med pa'i phyir ro/ /gang zhig las ni 'di dag ste/ /rnam par shes pa dang ming dang gzugs dang skye mched drug dang reg pa dang tshor ba zhes bya ba yan lag lngas rab tu 'jug pa ni/'jig rten pas bdag tu mngon par rlom pa'i rgyu mtshan te/ de la bdag gi zhes 'dir 'dzin pa'o zhes bya'o/ /bdag tu 'dzin pa'i ming can de yang rang bzhin med pa'i las kyis bskyed pa'i phyir rang bzhin med pa'o zhes gsal bar khong du chud par bya'o//yang na 'di snyam du sems na/ rnam par shes pa la sogs pa yan lag lnga po rang bzhin med de/ rang bzhin med pa'i las kyis bskyed pa'i phyir ro zhes yin du chug na yang gang yang bdag tu 'dzin pa dang 'dzin pa'i mtshan nyid can 'di yang rang bzhin med pa'i las kyis bskyed pa'i phyir rang bzhin dang bcas par 'gyur ro zhe na/'di dag kyang med de/ ci yi phyir na gang gi phyir/ /des bskyed 'dzin pa'ang rnam rtog las/ /gang yang 'di bdag tu sgro btags pas bskyed pa'i ngar 'dzin pa de yang rang bzhin med pa'i tshul bzhin ma yin pa yid la byed pa'i mtshan nyid can gyi rnam par rtog pas bskyed pa'i phyir rang bzhin med pa kho na'o zhes bya ba grub bo//gdon mi za bar 'di ni 'di ltar khas blang bar bya ste/ 'di lta ste las ni rang bzhin med pa'o zhes gsungs so//gzhan du na/ gal te las la rang bzhin yod/ /de skyes ther zug bdag dngos 'gyur/ /las kyang sdug bsngal rnam smin du/ /mi 'gyur de phyir bdag tu 'gyur/ /bdag ces bya ba'i dngos po 'di'o zhes bya ba rnam par shes pa la sogs pa'i yan lag lnga po zhes brjod do//gal te las la rang bzhin yod na de mi rtag par mi 'gyur te/ rang bzhin ni mi 'gyur ba'i phyir dang / rtag pa'i las kyis bskyed pa yang rgyu dang 'dra bar 'bras bu 'jug pas/ rtag pa'i bdag gi dngos por 'gyur la rtag pa nyid du gyur na rnam par shes pa la sogs pa de dag gi las kyis sdug bsngal gyi rnam par smin pa 'byung bar mi 'gyur ro//las ni mi rtag pas rnam par smin par 'byung ste/ gang mi rtag pa de sdug bsngal lo zhes sdug bsngal gyi rnam par smin par 'gyur la/ rtag par gyur na las la sdug bsngal gyi rnam par smin par mi 'gyur ro//gang mi rtag pa de yang bdag med pa'o zhes gsungs so/ /gang gi tshe yang las kyi 'bras bu dang las ther zug pa yin nam / de'i phyir bdag tu 'gyur la/ de las kyang chos thams cad bdag med pa'o zhes ston par mi rigs so//des na gdon mi za bar las rang bzhin med par rig par bya'o/ /yang las rang bzhin med pa'i 'thad pa ci zhig tu rig par bya zhe na/ gsungs pa/ las ni rkyen skyes yod min zhing / /rkyen min las skyes cung zad med/ /'du byed rnams ni dri za yi// grong khyer sgyu ma smig rgyur mtshungs/ /gal te las zhes bya ba cung zad yod na/ nges par de ni rkyen las skyes pa'am rkyen med pa las skye bar 'gyur/ re zhig gal te rkyen las skye bar 'dod na/ nges par 'bras bu rkyen las yod par 'gyur la/ ma skyes pa rkyen la yod par nus pa ma yin te/'bras bu ma skyes na yang sa'i rgyu dang rkyen la de'i 'bras bu rkyen la med pa zhig rkyen las skye na/ de'i tshe rkyen ma yin pa las kyang skye bar 'gyur la de dag kyang med do zhes bya bas des na rkyen las skye ba'i las cung zad med do/ /rkyen med pa yang rgyu med pas 'bras bu cung zad kyang mi srid do zhes bya'o//des na las med do/ /gang gi tshe las med pa de'i tshe rnam par shes pa la sogs pa med par gyur pas nye bar len pa med pas nye bar len pa po yang med do zhes bya ste/ 'dus byas thams cad mi rtag pa chos thams cad bdag med pa'o zhes bya bar 'gyur te/rang bzhin khas ma blangs na thams cad legs par gnas par 'gyur ro/ /gal te dngos rnams rang bzhin med pa'o/ /zhes 'chad na/ 'o na de ltar gyur na dngos po thams cad med do zhes bya ba thob par 'gyur ro//smras pa/ rang bzhin med pa'i don ni med pa'i don ma yin te/ 'on kyang 'khrul ba'i don te/ brdzun zhing slu ba'i chos can nyid kyi don to/ /rten cing 'brel bar 'byung ba'i don 'di dag rang bzhin med pa'i don to zhes bya ba du mar bsgrubs pas mang pos ci zhig bya/don 'di yang dpes yongs su gsal bar byed pa gsungs pa/ 'du byed rnams ni dri za yi/ /grong khyer sgyu ma smig rgyur mtshungs/ /zhes bya ba la 'di ltar yul dang dus su rnam par lta ba'i dbang po phyin ci log gi rkyen las skyes pa khang pa dang / skyed mos tshal dang / shing dang / ldum ra dang / khang bzangs dang / ba gam dang / phyugs lhas la sogs pas nye bar mdzes pa 'khrul pas grong khyer rang bzhin du dmigs la/ yang dag pa'i grong khyer gyi rnam pa byis pa'i skye bo grong khyer du mngon par rlom pa 'byung ba'i rgyu mtshan can brdzun pa slu ba'i chos can no//ji ltar yang sgyu ma'i rnam pa ston pa'i nus pa dang ldan pa'i sgyu ma'i mkhan po'i sngags kyi sbyor bas/ glang po dang / stag dang / ma he dang / skyes pa dang / bud med la sogs pa'i dngos po yang dag pa'i bud med la sogs pa'i rang bzhin dang bral bar gnas kyang byis pa rnams bud med la sogs pa'i mngon par rlom pa 'byung ba'i rgyu mtshan can brdzun pa slu ba'i chos can la rmongs pa'i skye bos chags pa'o//ji ltar yul dang dus dang gnas skabs khyad par can gzhan thob pa'i nyi ma la brten pa'i tsha bas phyogs su shin tu phog pa las 'bab par mthong bas phyin ci log thob pas yang dag pa'i chu'i rnam pa can/chu'i rang bzhin gyis stong pa yang smig rgyu nye bar dmigs pa'o/ /de bzhin du rnam par shes pa la sogs pa'i dngos po rnams rang rang gi rgyu rkyen gyi tshogs pa la brten nas nye bar dmigs pa rnams rang bzhin dang bral ba nyid nye bar dmigs pa ste/dri za'i grong khyer la sogs pa bzhin du brten nas 'byung ba'i phyir ro zhes bya'o/ /'dir kha cig brtsad pa/ dri za'i grong khyer ni rtswa dang shing la sogs pa'i rten cing 'brel bar 'byung ba'i khang pa dang skyed mos tshal la sogs pa'i tshul gyis snang la/de na khang pa dang skyed mos tshal la sogs pas rten cing 'brel bar 'byung ba'ang med do zhes bya'o/ /de'i phyir dpe 'di ni stong pa nyid bsgrub par nus pa ma yin te/rtswa dang shing la sogs pa de la yod pa'i phyir zhes bya'o/ /de la ltos nas smras pa/ gang nye bar dmigs pa'i khang pa dang skyed mos tshal la sogs pa rten cing 'brel bar 'byung ba ma yin no / /khang pa dang skyed mos tshal la sogs pa bzhin du rtswa dang shing la sogs pa yang rten cing 'brel bar 'byung bar mi 'gyur/de'i phyir khang pa la sogs pa yang nye bar dmigs pa'i phyir/ rtswa dang shing la sogs pa bzhin rten cing 'brel bar 'byung bar 'thad do/ /gzhan yang gang gi tshe de bzhin gshegs pa nam mkha'i phyogs nyid du sprul pa stong ston par mdzad la/de'i tshe rtswa dang shing la sogs pa yod par ga la rtog /de'i phyir gang nye bar dmigs pa de rten cing 'brel bar 'byung bar nyid nye bar dmigs pa'o/ /de la rten cing 'brel bar 'byung ba'i dngos po yang 'jig rten pas kha cig ni bden pa'i rang bzhin du rtog la/kha cig ni mi bden pa'i rang bzhin du'o/ /de la dri za'i grong khyer dang sgyu ma dang smig rgyu dang sprul pa dang chu zla dang mgal me'i 'khor lo dang gzugs brnyan dang snang brnyan la sogs pa rten cing 'brel bar 'byung ba mi bden par mngon par 'dod pa'i bden par mngon par zhen pa bzlog pa'o zhes rigs so//gang yang pha rol pos smos pa'i skyon sel bar 'dod pas/ ji ltar rtswa dang shing la sogs pa'i rang bzhin dang bral ba glang po che la sogs pa'i tshul du snang la/ de bzhin du rnam par shes pa la sogs pa yang rnam par shes pa la sogs pa'i rang bzhin dang bral ba rnam par shes pa la sogs pa'i tshul du snang ngo zhes smra ba ni/glang po la sogs pa rtog pa dang bral ba la/ rtswa dang shing la sogs pa ji lta bar yod pa ltar glang po che la sogs pa yang med do/ /de bzhin du rnam par shes pa la sogs pa la yang de'i cha shas gang zhig rten cing 'brel bar 'byung bas de ni rtswa dang shing la sogs pa bzhin du yod pa'i phyir dang /rten cing 'brel bar 'byung ba'i rnam par shes pa'i ngo bo la sgro btags pa'i rang bzhin yang bsal bzhin pa'i phyir dngos po rnams kyi rang bzhin grub bo zhes bya bar thob par 'gyur ro//des na rnam par rig par smra ba'i rjes su mthun pa brjod par 'di 'gyur la/ dbu mar smra ba'i rjes su mthun par brjod pa ni ma yin no/ /yang na rmi lam mthong ba'i rjes su 'jug pas khas blang par mi bya ste/ de'i tshe rten cing 'brel bar 'byung ba'i gtan tshigs nyid rnam par rig par smra ba la ltos nas rjes su mi mthun pa med pa'i phyir dang /'gal ba'i phyir/ yang dngos po rnams rang bzhin med par sgrub pa la ltos nas nus pa med pa nyid du khong du chud par byas pa gzhan gyis smras pa'i skyon spangs so zhe na/de ltar bshad pa 'di mi rung ste/ de ni 'di ltar smos pa'i rig pas dri za'i grong khyer la sogs pa bzhin du rten cing 'brel bar 'byung ba'i phyir/ dngos po rnams rang bzhin med pa'o zhes gnas pas kyang gdon mi za bar 'di dag khas blang bar bya ste/'du byed dri za'i grong khyer dang mtshungs zhes gsungs so/ /ci'i phyir na/ gang gi phyir rang bzhin dang bcas par gyur na/ 'di dag rten cing 'brel bar 'byung bar mi 'gyur la/ rten cing 'brel bar 'byung ba yang yod pas/ gang gi phyir/ las ni nyon mongs rgyu mtshan can//nyon mongs 'du byed las bdag las/ /lus ni las kyi rgyu mtshan can/ /gsum ka ngo bo nyid kyis stong / /de la ma rig pa'i rkyen gyis 'du byed do zhes bya bas las ni nyon mongs pa'i rgyu mtshan te nyon mongs pa 'di rgyur byas pas/ nyon mongs las bdag las ni 'du byed rnams te/ las dang nyon mongs pa las gang zhig rnam par shes pa la sogs pa'i bdag nyid pas/ rnam par shes pa la sogs pa de rnams 'du byed kyi las dang nyon mongs pa'i bdag nyid de ma rig pa dang 'du byed kyis bskyed pa'i phyir/de rnams kyang 'dir 'du byed yongs su rdzogs pa'i skye mched drug gi gnas skabs kyis lus thob pa'i rgyu mtshan du 'gyur ro zhes bya ste tha dad pa'i lus 'dzin pa'o/ /lus de yang 'du byed bzhin du las dang nyon mongs pa'i rgyu can kho na'o zhes byas nas/ gcig gis kyang nye bar mtshon nas las kyi rgyu mtshan can gyi lus zhes bya'o//de las kyang de dag gi las dang de'i 'bras bu lus po ste/ gsum po rnams kyang rten cing 'brel bar 'byung ba nyid la/ des na dri za'i grong khyer la sogs pa bzhin du 'di dag gsum yang ngo bo nyid kyis stong pa'o//'dir smras pa/ las yod pa nyid de/ de'i byed pa po yod pa'i phyir ro/ /'dir las kyi byed pa po nye bar bstan pa/ ma rig pa'i rjes su 'gro ba'i gang zag 'di ni bsod nams kyi mngon par 'du byed pa mngon par 'du byed do zhes bya ba la sogs pas de nas byed pa po yod pa'i phyir las yod pa 'bras bu yang 'byung bar 'gyur ro//'bras bu yod na gdon mi za bar de la longs spyod pa po yod la/ de'i phyir las dang byed pa po dang de'i 'bras bu dang de la longs spyod pa po rnams yod pa'i phyir/ dngos po thams cad kyi rang bzhin yod pa nyid do zhe na/smras pa/ gal te las yod na de'i tshe de'i byed pa po la sogs pa yod la/ gang gi tshe yang ji skad du smos pa'i rigs pas las med par bsgrubs pas de'i tshe na/ las med gyur na byed po med/ /de nyid med pas 'bras bu min// de med nye bar spyod pa med/ /des na dngos pos dben pa yin/ /gang gi tshe rkyen las skyes pas las cung zad kyang med do zhes bya ba 'dis las med pa nyid du bsgrubs la/ de'i tshe las med par gyur na/ su'i byed pa por yongs su rtog par byed/ byed pa po dang las med na/rgyu med pa'i 'bras bu ga la zhig /'bras bu med na yang su'i longs spyod pa por yongs su rtog par byed ces bya bas/ des na las la sogs pa med pas rnam par dben pa ste thams cad stong ngo zhes bya ba grub bo/ /'dir smras pa/ slar yang de ltar 'bad pa chen pos stong pa nyid du bsgrubs par gyur pas/khyod la 'bras bu ci zhig /ji srid du las dang 'bras bu la skur ba 'debs pa na/ log lta'i gang zag spyod pa bzang po yang mi 'dod pa'i 'bras bu ster bar bcom ldan 'das kyi gsungs la/ shi nas kyang dmyal bar skye bar gsungs so//des na 'dir shin tu 'bad pa chen pos don ma yin pa sgrub par byed pas zhog cig smras pa/ gang zhig las stong pa'i don ni las med pa'i de la ji skad smos pa'i nyes par 'gyur la/ gang yang rang bzhin dang 'bral ba'i phyir las stong pa'o zhes khong du chud pa de ni/las ni stong par yang dag par/ /shes na de nyid mthong ba'i phyir/ /las mi 'byung ste de med na/ /las las 'byung gang mi 'byung ngo / /gang zhig las rang bzhin med pa'o zhes khong du chud na/ des ni las phyin ci ma log pa'i stong pa nyid du yongs su shes par 'gyur ro/ /las de yang ma rig pa'i rkyen gyis 'di ni bden pa'o zhes mngon par zhen pa ste/ las rang bzhin med pa'i phyir rang bzhin med pa la 'bras bu mi 'dod do/ /des na des skur pa btab nas log lta thob pa ma yin las kyang rang bzhin med par rtog pas 'di dag bden par mngon par zhen pa spong la/las la ma chags pas slar yang las mi rtsom mo/ /las ma brtsams par gyur na las kyi rgyu can 'bras bu log go/ /las kyi 'bras bu 'khor ba las log na nges par 'di ni mya ngan las 'das pa la gzhol bar 'gyur ro zhes bya ste/de ltar de kho na nyid mthong bas las yang dag par shes pa ste rang bzhin gyis stong par rtog pa'o/ /de kho na nyid mthong bas ma rig pa spong la/ ma rig pa spangs na rgyu med pas las mi 'byung ngo //der las med na gang zhig las las 'byung ba rnam par shes pa la sogs pa de la mi 'byung ngo / /rnam par shes pa la sogs pa rnams kyang skye ba med par gyur na mya ngan las 'das pa grub bo zhes bya ste/ rigs pa des skyes bu mngon par rlom pas gnas pa la/rang dang gzhan gyi don sgrub pa la mkhas pas/ las rang bzhin med par sgrub pa'i phyir ro/ /'dir smras pa/ gal te ji ltar bsgrubs pa'i rigs pas las rang bzhin med pa nyid du rnam par 'jog na/ gang zhig 'di dag las las skyes pa'i sems can dang snod kyi 'jig rten sna tshogs de yang mi 'thad la/gang yang las dang byed pa po nye bar bstan pa 'di yang thob par mi 'gyur ro/ /rang bzhin med pa'i dri za'i grong khyer la sogs pas/ 'di ltar rnam pa sna tshogs pa'i 'bras bu sgrub pa dang byed pa po yod bzhin pa yang mi 'thad do zhes so//'o na dri za'i grong khyer la sogs pa'i don yang rnam par shes pa rang gi dmigs pa la dmigs pa'i dngos por bsgrub bzhin pas na/ sems dang sems las byung ba rnams sgrub par byed pa por 'gyur te/ rang rang gi rgyu dang rkyen la brten nas skye bzhin pas byed pa po yod bzhin par 'gyur ro//smras pa/ gal te yang rnam par shes pa'i dmigs pa nyid du bsgrubs na/ de lta na yang 'khrul pa 'khrul ba'i rgyu nyid du bsgrubs pa ma yin te/ rnam par shes pa ma 'khrul bas de'i phyir mi bden pa bden pa'i rgyur mi 'gyur ba nyid la/mi bden pa yang mi bden pa'i ma yin no zhes bya'o/ /de la rnam par shes pa yang mi bden pa nyid du 'dod la/ de lta na yang rang bzhin med pa yang rang bzhin med pa'i 'bras bu rdzogs par byed pa po nyid du gsal bar byed pa shin tu gsal bar dper nye bar bstan pas gsungs pa/ji ltar bcom ldan de bzhin gshegs/ /rdzu 'phrul gyis ni sprul pa sprul/ /sprul pa de yis slar yang ni/ /sprul pa gzhan ni sprul par 'gyur/ /bsod nams dang ye shes kyi tshogs yongs su rdzogs pa'i sems can gyi bye brag 'ga' zhig ni chos rnams kyi rang bzhin ji lta ba de ltar rtogs pa'i phyir ram/ji ltar 'das pa'i sangs rgyas thams cad gshegs pa/ de ltar gshegs pa'i phyir de bzhin gshegs pa zhes brjod do/ /de bzhin du sde pa gzhan gyi gzhung las/ 'og min kho nar de kho na nyid rnam pa thams cad du mngon par rtogs pa'o//de yang gtso bo de bzhin gshegs pa'i rdzu 'phrul gyis sprul pa sprul nas 'dzam bu'i gling du mngon par byang chub pa ston par byed do/ /sprul ba'i mngon par byang chub de yang yang dag pa'i de bzhin gshegs pa dang mthu mnyam pas dgos pa'i dbang gis sprul pa gzhan ston par mdzad de/de nyid kyis na gsungs pa/ ma skyes gnas pa med pa yi/ /'di ni chos kyi dbyings dang mtshungs/ /mngal du 'jug pa ston pa yang / /'di dag 'jig rten rjes 'jug phyir// zhes gsungs so/ /'dzam bu'i gling du mngon par rdzogs par sangs rgyas pa nyid yang dag pa'i de bzhin gshegs pa yin du chug na yang / de lta na yang de bzhin gshegs pa ni bsam gyis mi khyab pa'i mthu mnga' bas/ sprul pa sprul nus pa'i nus pa can nyid de/bsams bzhin du rnam pa de lta bu'i sprul pa sprul la/ gang zhig sprul pa las sprul pa gzhan yang 'jug par mdzad do/ /de la de bzhin gshegs stong sprul/ /sprul pas sprul pa smos ci dgos/ /gnyis po ming tsam yod pa yang / /gang ci rung ste rtog pa tsam//gang 'dir yang dag pa'i de bzhin gshegs pas sprul ba'i sprul pa de nyid re zhig stong pa ste de bzhin gshegs pa'i rang bzhin dang bral ba'o/ /ci 'on te gang sprul pa'i sprul pa the tshom med par 'di ni de bzhin gshegs pa'i rang bzhin dang bral ba yin gyi / sprul pa 'di yang rnam pa thams cad kyis med do zhes brjod par mi nus te/ de dag nye bar dmigs bzhin pa'i phyir ro zhes gsungs pa/ gnyis po'i ming tsam yod pa yang / /gang cung zad de rtog pa tsam zhes bya ba snying po dang bral ba ste rang bzhin dang bral ba zhes bya ba'i don to//slar yang ji ltar de yod ce na/ gsungs pa rtogs pa tsam zhes bya ba la yongs su brtags pa tsam yang dag pa ma yin par sgro btags pa tsam brdzun pa slu ba'i chos can tsam zhes bya ba'i don to/ /re zhig de dag gi rang bzhin med la/ gal te yang 'khrul ba tsam du yang dmigs pa med do zhes bya bar gyur na de ni kun rdzob kyi bden pa la gnod par yang 'gyur te/ri bong gi rwa bzhin nye bar dmigs par yang mi 'gyur la/ 'bras bu gzhan sgrub par byed par mi 'gyur te/ 'di thams cad kyang yod pas des phyir rtog pa tsam ste/ kun rdzob tsam du de dag yod do zhes rnam par gzhag go/ /de yang gang rang bzhin med pa mthong ba de ni don dam pa mthong la ngo bo mi dmigs pas kyang de la mi bden pa las skyes pa la/ sred pa zad pas rnam par grol bar 'gyur ro/ /de ni 'di ltar brdzun par mthong pa ni nyon mongs pa'i rang bzhin mthong bas rnam par grol lo zhes gnas so//ji ltar yang de bzhin gshegs pa'i sprul pa rang bzhin med pa las gzhan rang bzhin med pa de bzhin gshegs pa'i rnam pa can gyi sprul pa mtha' yas pas rnam pa sna tshogs pa'i bya ba sgrub pa rung ba rab tu 'jug pas/de bzhin byed po sprul par mtshungs/ /las ni sprul pas sprul dang mtshungs/ /rang bzhin gyis stong gang cung zad/ /yod pa de dag rtog pa tsam/ /ji ltar de bzhin gshegs pas sprul pa lta bu'i las kyi byed pa po ma rig pa'i rjes su 'brang ba'i gang zag ni/de bzhin gshegs pas sprul pa bzhin du rang bzhin med la 'di yang rtog pa tsam ste/ kun rdzob tsam brdzun pa slu ba'i chos can byis pa'i skye bo slu ba tsam rmongs pa'i skye bo chags pa tsam du yod do zhes bya ba'i don to/ /gal te yang las de rang bzhin med pa'i byed pa pos bskyed la/de yang rang bzhin med pa nyid du yod pas/ 'gro ba sna tshogs pa bskyed par nus par 'gyur ro/ /'dir smras pa/ 'di ni mi rigs te/ dpe dang don dag mi 'dra ba'i phyir ro/ /dpe ni yang dag pa'i de bzhin gshegs pa yod la/de'i phyir yang dag pa las yang dag pa ma yin pa'am/ yang dag pa'i sprul pa 'byung bar 'gyur ro zhes rigs so/ /'dir yang dag pa'i dngos po med na gang zhig sprul nus pa'i byed pa po 'jug pa'i rgyu mtshan nyid du rtogs par byed de/ de'i phyir dpe dang mi 'dra'o//smras pa/ gang 'dir yang dag pa'i de bzhin gshegs pa yod do zhes mngon par 'dod na/ de byed pa por gyur pa'am las su gyur pa'i yang dag pa nyid du yongs su rtogs / gal te re zhig byed pa por gyur par yongs su rtogs na/ de yang / yang dag pa'i de bzhin gshegs pa'i rang bzhin ma yin te/ byed pa po'i phyir sprul pa'i byed pa po de bzhin gshegs pa'i sprul pa bzhin/ yang na las su gyur pas yang dag par yongs su rtogs na/ de lta na yang sprul pa ni sprul pas sprul pa bzhin 'di la yang dag par brjod par rigs pa ma yin no//nges par de bzhin gshegs pa yang med dam ci zhe na/ su zhig 'di skad du yod pa'am med do zhes smra/ gang zhig de bzhin gshegs pa zhes bya ba rang bzhin du rtogs na de ni de la yod pa'am med par yongs su rtogs par byed na/gang yang rang bzhin med pa ste de bzhin gshegs pa'i sprul pa bzhin du rtog pa med pa/ sprul pa bzhin du rang bzhin gyis zhi ba ngo bo nyid kyis ma skyes pas de la yod pa'am med par brtag par mi bya'o/ /de na de bzhin gshegs pa'i rang bzhin grub pa med pas dpe dang mi 'dra bar rtog par ga la byed/'dir smras pa/ gang 'di skad du smras pa'i stong pa nyid kyi rang bzhin med pas/ gang cung zad yod pa rtog pa tsam zhes pas/ slar yang ci'i phyir na 'di dag kyang rang bzhin med pa dang rtog pa tsam du yod pa gnyis khas len par byed/gal te slar yang rang bzhin yod pa nyid pas/ rtog pa tsam gyi dngos por khas mi len na/ de'i tshe skyon cir 'gyur zhe na/ smras pa/ gal te rang bzhin yod par gyur na/ de'i tshe mya ngan las 'das pa med par 'gyur la/ yod bzhin pa la byed pa po don med pa'i phyir dang / byed pa po yang med par 'gyur ro/ /gal te rtog pa tsam yang med par 'gyur na/ de'i tshe las kyi 'bras bu med pas log ltar 'gyur la/ des na rang bzhin khas blang bar mi bya zhing / rtog pa khas mi blang bar yang mi bya'o zhes bsgrub pa'i phyir gsungs pa/las kyi rang bzhin yod ce na/ /myang 'das byed po las kyang med/ /gal te med na las bskyed pa'i/ /'bras bu sdug dang mi sdug med/ /gal te las kyi rang bzhin yod na/ /de'i tshe de rang bzhin gyis yod bzhin pa'i phyir slar yang gzhan du 'gyur ba med do zhes bya'o//gang 'di ltar mya ngan las 'das pa las dang nyon mongs pa zad pa las rnam par gzhag la/ de mi 'byung bar 'gyur ba dang / las de yang byed pa po la mi ltos par 'gyur la/ de lta na rgyu med pa'i phyir 'di ni yod pa nyid du mi 'gyur ro//re zhig las la rang bzhin yod par gyur na/ skyon 'di dag ste de'i phyir las la rang bzhin med pa'o/ /gal te gang ci yang rung ba rtog pa tsam du mi 'gyur na/ de'i tshe las kyis bskyed pa'i sdug pa'am mi sdug par mi 'gyur la/ dge ba dang mi dge ba dag gi las kyis sdug pa dang mi sdug pa dag kyang yod pas/de'i phyir 'di dag gang ci yang rung rtog pa tsam du yod do zhes gnas so/ /gang yang 'di las kyi rang bzhin ni med la gang cung zad rtog pa tsam yod pas/ de nyid kyis shin tu tha dad pa'i spyod pa'i 'dus byas skye bo'i rjes su 'brang ba'i bcom ldan 'das de bzhin gshegs pas/nyon mongs pa dang rjes su mthun pa'i gnyen po'i dngos por 'jug pa phan tshun du 'gal bas/ brjod pa'i tshig kyang chos nyid dang mi 'gal bar gnas so/ /'di ltar las yod do zhes bya ba'i tshig med do zhes bya ba'i tshig dang 'gal ba med do zhes bya ba'i tshig yod do zhes bya ba'i tshig dang 'gal ba dang /de bzhin du gnyi gar brjod pa yang gnyi ga dang 'gal lo/ /tshig 'di dag thams cad kyang las stong pa nyid 'jug pa'i thabs kyi phyir/ chos nyid dang mi 'gal lo zhes bsgrub pa'i phyir gsungs pa/yod ces pa yod med ces yod/ /med dang yod ces de yang yod/ /sangs rgyas rnams kyi dgongs pa yis/ /gsungs pa rtogs par sla ma yin/ /de la gcig tu nges par gzung bar mi nus pas las ngo bo nyid kyis yod par 'jig rten pas yang dag par mthong nas mngon par zhen pa'i yod pa yang gang ci yang rung ba rtag pa tsam ste/dri za'i grong khyer la sogs pa'i rnam pa la med do zhes bya bar rtogs pa khong du chud pas log par lta bas/ gang zhig dmyal ba chen por ltung ba la mngon par phyogs pas sdig pa chen po dang ldan par gyur pas/de dag med par lta ba las bzlog pa'i don du las yod do/ /las kyi rnam par smin pa yod do zhes bcom ldan 'das kyis gsungs la/ gang zhig de gang ci yang rung ba rtog pa tsam byis pa'i skye bos yongs su brtags pa'i dri za'i grong khyer la sogs par yod pa de thugs la bzhag pa'o//gang yang las dang 'bras bu la 'di dag bden no zhes mngon par zhen la/ mngon par zhen pa des de dag 'khor ba las mi grol bas/ rang bzhin gyis ma skyes pa thugs la bzhag nas gsungs pa/gang la las med cing las kyi rnam par smin pa med pa de ni 'phags pa rnams kyi rigs so zhes bya ba la sogs pa'o/ /gnyi ga yang thugs la bzhag nas 'ga' zhig tu yod pa dang med pa gnyi ga'o zhes so/ /de ltar ji skad smos pa'i rigs pas bden pa gnyis su rnam par gzhag pa ma byas na/sangs rgyas rnams kyi dgongs pa yis/ /gsungs pa rtogs par sla ma yin/ /'dir tshig kha cig ni don gyi rjes su 'brangs nas 'jug la/ 'ga' zhig dgongs pa'i rjes su 'brangs nas 'jug go/ / re zhig gang don gyi rjes su 'brangs nas 'jug pa de ni nges pa'i don te dgongs pa ma yin pas na/ji skad gsungs pa'i don yod bzhin pa'i phyir na/ 'di lta ste chos rnams rang bzhin med pa'o/ /de yang ji skad du smos pa'i rigs pa dang lung gis dpyad pa na de bzhin kho nar 'gyur gyi gzhan du ma yin no//gang du dgongs pa'i rjes su 'brangs nas 'jug pa de ni dri ba'i don te dgongs pa dang bcas pa'o/ /'di lta ste gzugs yod do tshor ba yod do zhes bya ba la sogs pa'i tshig 'di dag kyang don gyi khyad par cung zad tsam thugs la bzhag nas gsungs so zhes nges te/ji skad du thos pa'i don dang mi ldan pa'i phyir ro/ /dngos po rnams kyi rang bzhin ni/ /rgyu rkyen tshogs pa'am so so yi/ /dngos la rnams kun yod min pa'i/ /rang bzhin gang zhig des na stong / /yod pa yod phyir mi skye la/ /med pa med phyir mi skye zhing //chos mi mthun phyir yod med min/ /skye ba med pas gnas 'gag med/ /zhes bya ba la sogs pa'i rigs pa dang / dge slong dag 'di dag ni don dam pa'i bden pa gcig pu ste/ 'di ltar zhi ba'i chos can mya ngan las 'das pa'o/ /'du byed thams cad ni brdzun zhing slu ba'i chos can te/gzugs ni dbu ba rdos pa lta bu/ tshor ba ni chu'i chu bur lta bu zhes bya ba la sogs pa'i lung gis kyang gzugs dang tshor ba la sogs pa'i yod pa nyid du gnas par mi nus te/ de'i phyir de lta bu la sogs pa'i tshig gis ji ltar thos bzhin pa'i don dang mi ldan pa'i phyir dgongs pa nyid du nges te/rang bzhin med pa gsal bar byed pa'i tshig bzhin du 'di dag ni don dang rjes su mthun pa'i tshig ma yin no/ /'on kyang don gyi bdag nyid cung zad tsam thugs la bzhag nas gsungs so zhes bya'o/ /de ltar gnyis nyid du rnam par gnas pa 'di dag 'dir bsam par bya ste/ci yod pa nyid kyi tshig 'di dag sgra ji bzhin pa yin nam/ 'on te dgongs pa dang bcas pa yin/ de la re zhig yod pa nyid kyi tshig 'di dag sgra ji bzhin pa yin na/ de'i tshe shin tu don ma yin pa skye ba thob par 'gyur la/med pas mthong ba tsam las ther zug pa dang rgyun chad pa'i mtha'o/ /yang na drang don ni de'i tshe ji skad smos pa'i don dang mi ldan pas 'di ni don dang rjes su mthun pa'i tshig ma yin no/ /de lta na yang don gyi bdag nyid cung zad tsam thugs la bzhag nas gsungs pas zhes bya ste/re zhig 'di tsam yongs su gcod pa'o/ /gang yang don 'di ni bden pa gnyis rnam par gzhag pa la mi mkhas pa rnams kyis 'dir legs par mi shes pa'i phyir ro / /des na ji skad smos pa'i bden pa gnyis kyi blo dang ldan pas mngon par sbyor bar byed par rung ngo zhes bya'o//'dir smras pa/ gal te yang las dang byed pa po bkag la/ de lta na yang re zhig las kyi 'bras bu gzugs la sogs pa yod pas gzugs la sogs med do zhes kyang brjod par mi nus so zhes bya ste/ skye bo thams cad kyi mngon sum du rags pa dang nye bar dmigs bzhin pa'i gzugs yod pa nyid las su zhig med do zhes smra /gang du bcom ldan 'das kyis kyang gsungs te/ dge slong dag gzugs ni phyi rol gyi skye mched de 'byung ba chen po bzhi dag rgyur byas pa'i gzugs bstan du yod la/thogs pa dang bcas pa'o/ /de bzhin du dge slong dag reg bya ni phyi rol gyi skye mched de 'byung ba chen po bzhi rgyur byas pa'i gzugs can bstan du yod la thogs pa dang bcas pa'o/ /gal te de med na 'byung ba chen po bzhi dag rgyur byas so zhes 'byung ba'i rgyu can du ston par mi 'gyur te/yod bzhin pa ma yin pa'i nam mkha'i me tog la 'byung ba rgyur byas pa nye bar ma bstan la/ de'i phyir 'jig rten pa dang / lung las grags pa'i phyir gzugs yod do gzugs yod par gyur na de la 'dzin pa'i dbang po'i shes pa 'byung bar 'gyur la/de yod na yang de bzhin kho nar dngos po thams cad grub bo zhe na/ smras pa/ gal te gzugs nyid yod na gzugs la brten nas dngos po thams cad 'grub par 'gyur na/ yod pa ma yin la/ ji ltar med pa yang de ltar sngar nyid du rgyas par bsgrubs la/ gzhan yang gal te med pas gzugs med par grub kyang / de lta na yang shin tu rags pa dang nye ba 'di dag mngon sum du dmigs pa bzhin du chags pa'i gnas su gyur pa'i phyir/ des na de sel ba'i sgo nas skye mched thams cad dgag pa'i don du slar yang brtag pa tsam pa'i phyir gsungs pa/gal te 'byung ba'i rang bzhin gzugs/ /'byung las gzugs ni 'byung ba min/ /rang las 'byung min gzhan las kyang / /'byung min de phyir med min nam//gal te 'di snyam du sems na/ gang las 'byung ba chen po bzhi la brten nas gzugs nye bar bstan pas/ de'i phyir gzugs yod do zhe na/ smras pa/ de nyid kyis na gzugs rang bzhin med pa'o zhes gsal bar bcom ldan 'das kyis bstan pa ma yin nam/ji ltar byas na gang las 'jig rten 'dir rgyu dang 'dra ba'i 'bras bu 'jug bzhin pa nye bar dmigs te/ 'di lta ste/ sA lu las sA lu dang / gro las gro dang / ba lang las ba lang dang / ba men las ba men no zhes de bzhin du gzugs kyang 'byung ba las kyang gyur pas na 'byung ba'i rang bzhin kho nar 'jug par 'gyur la rag na/gzugs kyang 'byung ba'i rang bzhin ma yin te/ sra ba la sogs pa ma yin pa'i ngo bo'i phyir dang / 'byung ba rnams lus kyi dbang po'i gzung bya'i phyir dang / gzugs ni mig gi dbang po'i gzung bya yin pa'i phyir ro//bcom ldan 'das kyis 'byung ba rgyur byas nas gzugs 'byung bar 'gyur ro zhes gsungs pa yang / gzugs la rigs pa dang 'gal bar gsungs pa'o zhes mtshon pas 'jig rten pa rnams kyis de mi bden par khong du chud par bya ba'i don du'o//de'i phyir lung ni gzugs yod pa nyid kyi sgrub byed ma yin la/ 'on kyang gzugs med pa'i sgrub byed do zhes bstan pa'i phyir gsungs pa/ gal te 'byung ba'i rang bzhin gzugs/ /'byung las gzugs ni 'byung ba min/ /'byung ba'i rang bzhin zhes pa 'di ni rgyu la rang bzhin du'o//kha zas kyi rang bzhin sro ga la/ /rtswa'i rang bzhin ba lang zhes pa'o/ /ji ltar gal te 'byung ba'i rang bzhin te/ 'byung ba'i rgyu can gyi gzugs su skyes pa de ni 'byung ba las mi 'byung ste/ 'byung ba'i rang bzhin gyis yod pa ma yin pas/ de ltar gyur na rgyu dang mi 'dra ba'i 'bras bu skye ba mi srid pas de ni gzugs kyi rang bzhin ma yin pa ma yin zhes bya ste go sla'o//gal te de ltar rgyu dang 'bras bu dag mtshan nyid tha dad pa'i phyir gzugs kyi rang bzhin las ma yin yang / de lta na yang gzhan dngos las 'byung ngo zhe na/smras pa/ gal te gzugs ni rang dngos las 'byung min/ /zhes gnas la/ de'i tshe de med pa ste/ rang gi dngos las gzhan las ma yin no zhes gsal bar nges so/ /rang bzhin ni rang bzhin gzhan la ltos nas gzhan nyid du 'gyur la/ rang bzhin de yang med pas rang bzhin gzhan las kyang skyes pa med do// // gzhan yang gal te 'byung ba chen po bzhi la brten nas gzugs kyi skye mched 'byung ngo zhes pa de ltar gyur na gzugs kyi skye mched gcig pu la rnam pa bzhir thob par 'gyur te/ gcig la phan tshun mtshan nyid tha dad pa'i bdag nyid bzhi brten par mi 'thad de/de'i phyir gzugs ni rnam pa bzhir khas blang bar bya ba'am/ gal te skye mched gcig gi rten gyi dngos por rtog na yang 'byung ba rnams gcig nyid du khas blang bar bya'o/ /'di dag kyang de ltar med do zhes bsgrub pa'i phyir gsungs pa/gcig la bzhi ni yod ma yin/ /bzhi gang gcig tu ma yin pas/ /gzugs ni 'byung ba chen po bzhi/ /rgyur byas nas grub ji ltar yod/ /gal te 'byung ba chen po bzhi yod bzhin pa la gzugs brten par gyur na/ de'i tshe gzugs gcig kyang bzhir 'gyur te/brten pa ni rten gyi dbye ba'i rjes su 'brel ba'i phyir ro/ /de ltar yod pa yang ma yin pas gzugs ni 'byung ba chen po bzhi rgyur byas nas grub par ci ltar yod/ yang na rten tha dad kyi rjes su mthun pa brten pa'i gzugs ma yin na/ de ltar na rten du gyur pa rnams brten pa gcig gi rjes su 'jug par byos shig /de dag kyang mi srid la/ de'i phyir gar gyi skyes bu bzhin du phan tshun mi bden pa rnams nges par 'di dag gi yod pa nyid nyams so zhes bya ste/ gzugs ni 'byung ba chen po bzhi rgyur byas nas grub pa ji ltar yod/'dir smras pa/ gzugs ni yod pa nyid de/ 'dzin bzhin pa'i phyir/ 'dir mig gi rnam par shes pa de'i sngon po'i rnam par skyes pas 'dzin la/ de la gal te sngon po med na de'i 'dzin pa mi 'byung la/ 'dzin pa yang yod pas de'i phyir gzugs yod do zhe na/smras pa/ gal te de'i 'dzin pa yod na gzugs yod la/ 'di la 'dzin pa mi srid do/ /de'i phyir shin tu yang 'dzin pa med pas/ gzugs ni ji ltar zhes pa 'dir 'brel to/ /'di dag gi shin tu mi 'dzin pa yang rgyas par bsgrub par bya ste/ 'dir smras pa/gzugs la 'dzin pa ni yod pa nyid do / /rtags ci las she na/ gal te gzugs 'dzin par mi 'gyur na 'di ni gzugs so zhes pa'i blo mi 'byung la/ 'di'i blo yang yod pas shes bya ste/ rtags des na 'dzin pa yod do zhes bya'o/ /smras pa/ rtags las she na de'i rtags kyang med de/ rgyu dang rkyen las skyes pa'i phyir med pa nyid do/ /gzhan yang gzugs yod na gzugs kyi blo 'thad kyi med pa la ma yin no/ /gang gi tshe 'di dag de lta na de'i tshe yod pa'i gzugs kyi gzugs kyis blo skyed par byed na gzugs yod par rung na/gzugs kyi blo med na ji ltar gzugs yod pa'i rtags su 'gyur zhes gsungs pa/ yod na yang rtags de med na mi 'thad pas zhes bya ste/ de nyid shin tu mi 'dzin pa'i phyir ro/ /rtags las she na/ rtags de yang med de/ rgyu dang rkyen las skyes pa'i phyir//yod na'ang rtags de med mi rigs/ /zhes pa 'dis/ pha rol gyi rtags las gzugs yod pa nyid du khas blangs pa de sel to/ /'dir smras pa/ gang 'di skad du shin tu mi 'dzin pa'i phyir zhes smos pa de ni mi rigs te/ gzugs 'dzin bzhin pa'i phyir ro zhes bya'o//'dir smras pa/ slar yang cis gzugs 'dzin na blos so/ /smras pa/ blos gzugs la ji ltar 'dzin/ de'i rnam par skye bas so/ /smras pa/ 'di dag mi 'thad de rgyu mtshan cis she na/ gang gi phyir/ gal te blo des gzugs 'dzin na//rang gi rang bzhin la 'dzin 'gyur/ /rkyen las skyes pas yod min la/ /yang dag gzugs med ji ltar 'dzin/ /'dir dngos po rnams kyi rang bzhin 'dzin na sngon du rang gi bdag nyid mthong ste/ 'di lta ste/ me'i dro ba nyid lta bu de dang ldan pa las pha rol gyi bdag nyid kyang nye bar dmigs par byed do //chu lta bu'o/ /de ltar gal te blo ni 'dzin pa'i rang bzhin du 'gyur na/ de ni 'dzin pa'i rang gi bdag nyid kho na la re zhig nye bar dmigs par 'gyur la/ dmigs pa yang ma yin te/ bdag nyid la 'jug pa dang 'gal ba'i phyir dang /las dang byed pa po dag gcig nyid du thal ba dang / dmigs pa med par dmigs pa po mi 'thad pa'i phyir ro/ /gang gi tshe 'di ltar blo rang gi bdag nyid la 'dzin par mi nus pa de'i tshe/ 'dir gzugs ji ltar 'dzin par byed/rigs pas ni rang gi bdag nyid mi 'dzin pa'i phyir gzugs kyang mi 'dzin te/ bong ba la sogs pa bzhin no zhes bya'o/ /gzhan yang 'di'i blo ni rten cing 'brel bar 'byung ba'i phyir ngo bo nyid yod pa ma yin pa'o/ /rten cing 'brel par 'byung ba'i phyir yang rang bzhin gyis yod pa ma yin pa'i gzugs ji ltar 'dzin par 'gyur/des na gzugs 'dzin pa med do// // 'di ltar yang 'dzin pa med de/ gang gi phyir/ ji skad smos pa gzugs skyes blos/ /skad cig skad cig gis mi 'dzin// 'das dang ma 'ongs pa gzugs kyang / /de yis ji ltar rtogs par 'gyur/ /ji skad smos pa'i gzugs zhes pa la/ ji skad du bshad pa'i gzugs la smos pa zhes brjod/ 'dir mig gi yul ni ji skad smos pa'i gzugs su shes par bya la/ blo yang mig gi blos 'dzin gyi gzhan ma yin no//skyes pa'i sgra ni 'dir da ltar ba'i rjod du shes par bya'o/ /'dir gal te blo yis gzugs la 'dzin par byed na/ des da ltar ba'i gzugs la 'dzin nam/ 'das pa dang ma 'ongs pa la'o/ /de la re zhig ji skad smos pa'i rnam pas ni/da ltar ba'i gzugs da ltar ba'i blos mi 'dzin te/ gnyi ga yang skad cig ma'i phyir skyes ma thag tu rnam par 'jig pa'i blo ni de la skad cig tsam yang gnas pa med na/ gang las 'dis yul la 'dzin pa srid par 'gyur/ bskyed par bya ba la 'dzin no zhe na/ de ni de lta ma yin te/ bskyed par bya ba ni ma 'ongs pa yin la/ de yang ma skyes par gyur pa'i gzugs ji ltar 'dzin par 'gyur/ gzugs kyang skyes ma thag tu rnam par 'jig pas skad cig tsam yang gnas pa med na/ gang las 'dzin par byed/ de ni 'di ltar skad cig ma'i blo la ji skad smos pa'i gzugs skyes pa'i skad cig ma la mi 'dzin no//yang na 'di snyam du sems na/ skad cig ma'i phyir da ltar ba'i gzugs mi 'dzin la/ de lta na yang 'das pa dang ma 'ongs pa la ji ltar 'dzin par mi 'gyur zhe na/ smras pa/ gang gi tshe da ltar ba'i dngos po nyid skad cig ma'i phyir 'dzin par mi nus na/de'i tshe ji ltar rnam pa thams cad du yod bzhin pa ma yin pa'i zhig pa dang ma skyes pa blos 'dzin par nus/ de ltar re zhig 'dzin pa mi srid pa des na yang gzugs med do zhes bsgrub pa'i phyir gsungs pa/gang tshe nam yang kha dog dang / /dbyibs dag tha dad nyid med pas/ /de dag tha dad 'dzin yod min/ /gcig tu'ang ma yin grags pa'i gzugs/ / gal te mig gi yul gzugs kyi skye mched ces bya ba cung zad yod na de 'dzin par 'gyur grang na/ yod pa yang ma yin la/de yod bzhin pa ma yin pa ni gang gi phyir mi 'dzin no/ /ji ltar yang gzugs kyi skye mched yod bzhin pa ma yin zhe na/ smras pa/ 'dir kha dog dang dbyibs dag la gzugs kyi skye mched ces bya ba la/ kha dog dang dbyibs 'di dag ni gcig nyid du gyur pas sam/tha dad pa nyid du'o/ /re zhig kha dog dang dbyibs dag tha dad pa nyid du med la/ gal te yod la phan tshun ma ltos par 'dzin par 'gyur la/ 'di dag kyang kha dog las tha dad pa'i dbyibs 'dzin par mi nus te/ bum pa las snam bu lta bu ma yin la de bzhin du dbyibs las tha dad pa'i kha dog 'dzin par mi nus so//gdon mi za bar dbyibs gang yang rung ba la de'i kha dog 'byung bar 'gyur la/ gang yang 'di'i gnas lugs la de'i dbyibs zhes bya ste/ dbyibs las tha dad pa'i kha dog logs su grub par mi srid do zhes bya'o//de 'di ltar tha dad pa nyid na/ gang gi tshe kha dog nam yang dbyibs la mi srid la/ des na de dag tha dad par 'dzin pa yod pa ma yin no/ /yang na 'di snyam du sems na/ gal te tha dad du ma grub pa'i phyir kha dog dang dbyibs dag tha dad du mi 'dzin la/de lta na yang gcig tu gyur pa 'dren ma'i dngos por de dag 'dzin par 'gyur ro zhe na/ smras pa/ so so so sor ma grub pa dag 'dren ma'i dngos por med pas 'di dag gcig tu ga la zhig /de'i phyir de dag gang gcig tu 'dzin pa mi srid do/ /kha dog dang dbyibs las gzhan du gzugs mi dmigs la/gang gi phyir de yang pha rol pos gzugs na kha dog dang dbyibs kyi bdag nyid do zhes grags pa de dag kyang mi 'dzin no zhes bsgrubs so zhes bya ste/ des na mi 'dzin pa'i phyir gzugs med do/ /yang na gal te yang 'dzin pa med pas gzugs med par 'gyur la/de lta na yang mig gi blo re zhig yod de de ma bkag pa'i phyir la/ de yang gzugs med na mi 'byung ngo zhes bya ste/ de'i phyir gzugs kyang 'byung bar 'gyur ro zhe na/ smras pa/ gal te mig gi blo yod na gzugs yod par 'gyur na/yod pa ma yin no zhes bsgrub pa'i phyir gsungs pa/ mig blo mig la yod ma yin/ /gzugs la yod min par na med/ /gzugs dang mig la brten nas su/ /legs so log par yongs brtags pa/ /'dir mig gi blo mig dang gzugs la brten nas skye'o zhes rnam par 'jog pa nyid rnam par dpyad par bya ste/ci mig gi blo 'di mig la yod dam/ de ni gzugs can ma yin pa'i phyir yul na gnas pa ma yin pas de'i phyir de mig la yod pa ma yin no/ /ji ltar mig la med pa de bzhin du gzugs la yang med la/mig dang gzugs de dag gi bar du yang mi srid de/ yul na mi gnas pa nyid kyi phyir ro/ /gang yang de'i tshe mig gi blo mig la ma yin/ gzugs la yang ma yin/ bar na yang ma yin pas de'i tshe rnam pa thams cad du yod pa ma yin pa nyid de ji ltar yod do zhes smra bar rung ste/'di ni med pa nyid do zhes bya'o/ /smras pa/ gal te yang de mig la med cing gzugs dang bar na yang med kyang / de lta na yang mig dang gzugs la brten nas skye ba yod pas/ de'i phyir mig gi blo yang yod do zhe na// smras pa/ gang gang na mi gnas pa ji ltar de las skye/ yang na de ltar 'gyur na thams cad las thams cad skye bar 'gyur na de dag ni med la/ ming dang gzugs la brten nas mig gi blo skye'o zhes smra na yang / des na 'di ni yang dag par mi skye ste/ skye ba rigs pa dang mi ldan pa'i phyir ro zhes bsgrub pa'i phyir gsungs pa/mig dang gzugs la brten nas su/ /legs so log par yongs brtags pa/ /zhes pa la/ gang gi bdag nyid kyis so sor snang ba de'i bdag nyid la brtags na mi srid pas na de nyid kyis na/ rnam shes sgyu ma lta bu yang / /nyi ma'i gnyen gyis gsungs pa'o//zhes mdo las gsungs so zhes bya'o/ /de ni de ltar mig gi blo mi srid pa'i phyir mi bzung bas gzugs med do/ /'dir smras pa/ gzugs 'dzin pa nyid de/ de la 'dzin pa po mig gi dbang po yod pa'i phyir na bcom ldan 'das kyis gsungs te/mig gis gzugs mthong bas yid bde ba'i gnas la mngon par zhen no zhes pa la sogs pa'o/ /smras pa/ gal te mig rang gi bdag nyid mthong na gzugs 'dzin par 'gyur la/ mthong ba ni ma yin te/ gal te mig gis bdag mthong min//des gzugs mthong ba ji ltar 'gyur/ /de phyir mig dang gzugs bdag med/ /de bzhin skye mched lhag ma rnams/ /gal te mig gis bdag nyid mi mthong la/ de'i tshe rang gi bdag nyid ma mthong bas bong ba la sogs pa bzhin du gzugs kyang mi mthong la/de ni bong ba la sogs pa bzhin pas mig nyid du mi 'gyur ro zhes sgrub par byed na de / de phyir mig bdag med ces pa la/ gang gi phyir mig gis gzugs mi mthong ba de'i phyir rang bzhin med do/ /mig med na mig dang de la brten pa'i mig gi blo med pas gzung ba med pa'i phyir/gzugs ni shin tu yang rang bzhin med do/ /ji ltar mig dang gzugs kyi skye mched dag rang bzhin med pa nyid ltar/ de bzhin skye mched lhag ma rnams ni/ skye mched thams cad mig dang gzugs bzhin du rang bzhin yin par khong du chud par bya'o zhes bya ba'i don to//'dir smras pa/ reg gi skye mched nye bar bstan pa'i phyir mig yod pa nyid de/ 'dir reg gi skye mched drug pa 'di lta ste/ mig gi reg pa'i skye mched nas/ ji srid yid kyi reg pa'i skye mched kyi bar du zhes so//de la reg pa zhes brjod pa ni dbang po dang yul dang shes pa rnam gsum 'dus pa'i mtshan nyid can/ tshor ba'i rgyu sems las byung ba'i chos la/ de la reg pa'i skye mched ni reg pa skye ba'i sgo'i dngos por rnam par gnas pas reg pa'i skye mched de/mig gi reg pa'i skye mched nas ji srid yid kyi reg pa'i skye mched kyi bar du rig par bya'o/ /gal te mig med na de'i reg pa'i skye mched nye bar mi ston la/ de yang nye bar bstan pas de'i phyir reg gi skye mched nye bar bstan pas na mig yod pa nyid do zhe na/smras pa/ skye mched rnams yod na reg gi skye mched ces bya bar 'gyur na/ de lta na yang skye mched rnams ma grub ste/ ji ltar byas na gang gi phyir zhes gsungs pa/ gang tshe gcig dang reg ldan gcig /de tshe cig shos stong pa nyid/ /stong pa'ang mi stong mi brten la//mi stong pa yang stong pa min/ /sems can rnams kyi rnam par shes pa rgyud gcig gi phyir rnam par shes pa gcig gi rgyud nyid la nye bar 'byung la/ de yang mig gi rnam par shes pa la nye ba na/ mig gcig nyid reg pa dang lhan cig gyur par 'byung bas reg ldan gcig ste/reg dang 'brel pas zhes bya ba'i don to/ /gang gi tshe gcig reg dang lhan cig gnas pa na de'i tshe cig shos rna ba la sogs pa'i reg gi skye mched rnams stong pa reg gi skye mched kyi rang bzhin dang bral ba zhes bya ba'i don to/ /yang 'di snyam du sems na/gal te yang de'i gnas skabs nas rang gi rnam par shes pa stong pa'i rna ba la sogs pa reg gi skye mched kyi rang bzhin dang bral ba yod pa'i rna ba la sogs pa de dag kyang rang gi rnam shes mngon du gyur pa na reg gi skye mched kyi rang bzhin gyis mi stong bar 'gyur ro zhe na/smras pa/ stong pa'am mi stong mi brten la/ /gang las gang gi rang bzhin dang bcas par mi rung ste/ 'di lta ste gang sra ba'i rang bzhin dang bral ba nam yang sra ba'i rang bzhin dang ldan pa ma yin la/ de bzhin du rna ba la sogs pa yang nam yang reg gi skye mched mi 'byung la/mig kyang rtag pa nyid du reg gi skye mched can du 'gyur te/ gang gi phyir mi stong pa yang stong pa ma yin te/ gang mi stong pa'i rang bzhin de ni stong pa nyid mi brten la/ da ltar ba me dro ba'i mtshan nyid dang ldan pa de nyid des stong pa mi brten no//yang na rang bzhin gyis mi 'gyur ba'i phyir stong pa yang mi stong pa mi brten la/ mi stong pa yang stong pa min/ de'i phyir gang zhig reg gi skye mched kyi rang bzhin yin na/ de ni reg gi skye mched kyi rang bzhin nyid thob pa'am/ gang zhig reg gi skye mched kyi rang bzhin ma yin pa nyid thob pa de yang mi 'thad do zhes bya'o//de'i phyir reg gi skye mched med do/ /'dir smras pa/ gal te reg gi skye mched med kyang de lta na yang re zhig reg pa yod de/ gsum 'dus pa'i mtshan nyid pas / de yod na reg gi skye mched kyang 'byung bar 'gyur ro zhe na/smras pa/ gal te reg pa nyid yod na reg pa'i skye mched yod de / de yod pa ma yin la/ ji ltar yang med pa de ltar sgrub par byed pa gsungs pa/ ngo bo mi gnas yod min pas/ /gsum 'dus pa yang yod ma yin/ /de yi bdag nyid reg med pas/ /de tshe tshor ba yod ma yin//gnas pa'i rang bzhin can gyi dngos po rnams las phan tshun 'dus pa 'byung srid la/ mi gnas pa'i rang bzhin can gyi dbang po dang yul dang rnam par shes pa rnams la ma yin te/ skyes ma thag tu 'jig pa'i phyir mi gnas pa'i ngo bo la/ mi gnas pa'i ngo bo'i phyir yang skyes ma thag tu 'jig pa nyid kyis ni 'du ba'i dus kyi bar du med pa'i phyir/ 'di dag phrad pa ga la zhig /ces bsgrubs pas/ ngo bos mi gnas pa'i ngo bo la gsum 'dus pa yod pa ma yin no zhes bya'o/ /gang gi tshe med pa de'i tshe 'du ba med pas/de'i bdag nyid kyi reg pa med de/ gsum 'dus pa'i rang bzhin gyi reg pa med do zhes pa'i don to/ /'dir smras pa/ reg pa yod pa nyid de/ de'i 'bras bu tshor ba yod pa'i phyir ro/ /'dir reg pa'i rkyen gyis tshor ba nye bar dmigs la/ de yod pas de'i rgyu reg pa 'byung bar 'gyur ro zhe na/smras pa/ gal te tshor ba nyid yod na reg pa yod la yod pa ma yin no zhes bsgrub pa'i phyir gsungs pa/ de tshe tshor ba yod ma yin/ /zhes pa la/ gal te reg pa yod na de'i tshe reg pa'i rgyu can tshor ba yod la/gang gi tshe reg pa nyid med na de'i tshe rgyu med pa'i tshor ba ga las 'byung / tshor ba med pa'i phyir yang reg pa med do zhes grub bo/ /'dir smras pa/ gal te yang khyod kyis/ de'i phyir mig dang gzugs bdag med/ /de bzhin skye mched lhag ma rnams/ /shes pas skye mched dgag pa de ltar smras la/de lta na yang rnam par shes pa'i khams drug ma bkag pa'i phyir yod la/ de yod pas de'i rten dang dmigs pa'i skye mched kyang 'byung bar 'gyur ro zhe na/ smras pa/ gal te rnam par shes pa nyid yod na skye mched rnams yod la yod pa ma yin no zhes bstan pa'i phyir gsungs pa/nang dang phyi yi skye mched la/ /brten nas rnam par shes pa 'byung / /de phyir rnam par shes pa med/ /smig rgyu sgyu ma lta bur stong / /gal te rnam par shes pa rang bzhin gyis yod na/ de ni nang dang phyi'i skye mched la brten nas 'byung bar mi 'gyur te/da ltar bzhin du rnam par shes pa yod pa nyid du gnas pas brten nas 'byung bar yang mi 'gyur ro/ /rgyu dang rkyen las skyes par 'gyur ba'i phyir/ /nges par rnam par shes pa de med de/ /rang bzhin gyis yod pa ma yin pa'i phyir ro// gal te de ltar rnam par shes pa med na/ de bzhin du de lta yod pa ma yin pa'i phyir/ 'di ni dmigs par mi 'gyur ro zhes gsungs pa/ smig rgyu sgyu ma lta bur stong / /zhes pa la/ sgyu ma dang smig rgyu bzhin du rang bzhin gyis stong pa'i rnam par shes pa yang 'jig rten pas nye bar dmigs la/de tsam zhig kyang 'di'i rang bzhin ma yin pa nyid do/ /'dir smras pa/ yul yongs su gcod pa yod pas rnam par shes pa yod pa nyid do/ /gal te rnam par yul yongs su gcod pa po yod na de ltar yod la/ yod pa yang ma yin no zhes bsgrub pa'i phyir gsungs pa/rnam shes shes bya la brten nas/ /'byung ba shes bya yod ma yin/ /shes bya shes pa med pa'i phyir/ /de phyir shes pa po nyid med/ /'dir 'di'i rnam par shes pa dmigs pa med par mi 'byung bas shes bya la ltos la / gang gi phyir de ltar rnam par shes pa dang /shes bya dag la brten nas 'byung bas ngo bo nyid kyis ma grub pas/ de'i phyir shes bya med la/ shes bya med par gyur na dmigs pa med par rnam par shes pa ga la 'byung zhes bya ste/ rnam par shes pa med pas rnam shes ni/ smig rgyu sgyu ma bzhin du stong //zhes gnas so/ /'dir smras pa/ rnam par shes pa ni yod pa nyid do/ /shes bya dang shes pa po yod pa'i phyir ro/ /'dir re zhig rnam par shes so zhes pas rnam par shes pa po yod de/ phung po la brten nas brtags pa'i gang zag byed pa por gyur pa'o//de gang gis rnam par shes so zhes de ni 'di'i byed pa yin la/ gang zhig rnam par shes so zhes de ni 'di'i las so/ /byed pa dang las med par byed pa po yod par rigs pa ma yin no zhes bya ste/ des na byed pa po yod pas na/ de bzhin du shes bya dang shes pa po yod do zhes bya'o//smras pa/ gal te shes pa po nyid yod na/ rnam par shes pa dang shes bya yod par 'gyur na/ gang ji srid du rnam par shes pa dang shes bya dag med pas las dang byed pa dang bral ba'i phyir/ byed pa po nyid 'ga' yang ga la zhig ces bsgrub pa'i phyir gsungs pa/shes bya shes pa med pa'i phyir/ /de phyir shes pa po nyid med/ /ces pas/ shes pa po med pas shes pa dang shes bya med do zhes grub po/ /'dir smras pa/ phyi rol dang nang gi skye mched dag yod pa nyid de/ de dag mi rtag par nye bar bstan pa'i bcom ldan 'das kyis gsungs pa/'dus byas thams cad mi rtag pa'o zhes so/ /gal te na yang nang dang phyi rol gyi bdag nyid kyi skye mched med na/ de'i tshe ci gal te thams cad mi rtag par 'gyur zhes bya / de'i phyir mi rtag pa nyid bstan pas dngos po thams cad grub bo zhe na/smras pa/ bcom ldan 'das kyis gsungs te/ thams cad mi rtag cung zad kyang / /mi rtag med la yang na rtag /dngos po yod na rtag pa dang / /mi rtag par 'gyur de ga la/ /de la bcom ldan 'das kyis gang 'di skad du thams cad mi rtag go zhes gsungs zhes bya'o//de rnam par 'jig pa'i dngos po'i rang gi mtshan nyid mthong ba min la/ 'on kyang dngos po rnams kyang rang bzhin ma gzigs la/ dngos po thams cad kyi rang bzhin ma gzigs pas snying po med pa nyid gsal bar byed pa la ltos nas/bcom ldan 'das kyis gsungs pa 'di ni rang bzhin la log par rtogs pa dgag pa'i don du'o/ /don dam par ni rnam par dpyad na mi rtag pa cung zad kyang med do/ /yang rtag pa'o/ /'di dag gnyi ga yang don dam par ma grub po zhes dgongs so//ci'i phyir slar yang 'di dag gnyi ga ma grub ce na/ smras pa/ gang gi phyir dngos por yod na rtag pa'am mi rtag par 'gyur na/ dngos po de ga la zhig go ste/ ji skad du smos pa'i rigs pas dngos po med par bsgrub pa'i phyir dngos po de ga la zhig pa'o//dngos po de med do zhes bya ba'i don to/ /dngos po med par gyur pa la rtag pa nyid dam mi rtag pa nyid ga la zhig /de'i phyir dngos po rnams snying po med pa nyid du gsal bar byed pa la ltos nas 'di dag gsungs pa nyid la rang bzhin med pa gsal bar byed pa yin no zhes bya ste/rnam pa thams cad du tshig 'di dag gis rang bzhin gsal bar sgrub par byed pa ma yin no/ /ji ltar yang dngos po med pas rtag pa dang mi rtag pa'i log par rtog pa 'byung ba mi srid pas/ de bzhin du sdug pa dang mi sdug pa dag gi phyin ci log kyang dngos po rnams kyi rang bzhin med par gyur pas 'byung mi srid la/de med pas sdug pa dang mi sdug pa'i phyin ci log gi rgyu can gyi 'dod chags dang zhe sdang dang gti mug kyang mi rigs so zhes bsgrub pa'i phyir gsungs pa/ sdug dang mi sdug phyin ci log/ rkyen skyes chags sdang gti mug ste/ /de phyir ngo bos 'dod chags dang / /zhe sdang gti mug yod ma yin/ /de la sdug pa zhes brjod pa yid dang mthun pa'i phyin ci log pas mi sdug pa'o/ /phyin ci log kyang rtag pa bdag med pa gtsang ba'o zhes so/ /de la sdug pa la brten nas 'dod chags 'byung /mi sdug pa la brten nas zhe sdang 'byung zhing / phyin ci log la brten nas gti mug 'byung ngo / /dngos po'i rang bzhin yod na de la sdug pa la sogs par ram/ rtag pa la sogs pa nyid du rtog pa las 'dod chags la sogs par 'gyur na/dngos po rnams kyi rang bzhin med pas sdug pa la sogs pa med pa'i phyir/ de'i rgyu can gyi 'dod chags dang zhe sdang dang gti mug kyang yod pa ma yin la/ dngos po'i rang bzhin med pa 'ba' zhig tu ma zad kyi sdug pa la sogs pa mi srid pas 'dod chags la sogs pa mi rigs so//'di ltar yang sdug pa la sogs pa mi srid pas mi rung ngo zhes bsgrub pa'i phyir gsungs pa/ gang phyir de nyid la chags shing / /de la zhe sdang de la rmongs/ /de phyir rnam par rtog pas bskyed/ /rnam rtog de yang de nyid med/ /'dir sdug pa zhes bya ba ngo bo nyid kyis med de/rgyu mtshan ci'i phyir na/ gang gi phyir gang zhig kho na kha dog dang dbyibs gzhon sha can la sogs pa dang ldan pa'i dngos por gyur pa gang ci yang rung ba la 'dod chags can 'ga' zhig shin tu yid du 'ong bar gyur pa la sdug pa'i rnam par brjod la/ de nyid la zhe sdang can 'ga' zhig gis mi sdug par brjod de/'di lta ste chung ma gnyis kyi gzugs la/ chung ma dag zhe sdang ba lta bu ste/ gang kho na la khyo shin tu chags pa de nyid la chung ma dag zhe sdang bar 'gyur la/ de'i rang bzhin yongs su ma shes pas de la 'ga' zhig rmongs par 'gyur ro//dngos po gcig nyid skad cig la phan tshun du 'gal ba'i don de dag mi srid do/ /des na dngos po gcig la rang bzhin gsum mi srid la/ rnam par rtog pas de'i phan tshun tha dad par rung ngo / /yang na 'di snyam du sems na/ gal te yang dngos po rnam pa gsum gcig nyid du mi 'gyur la/de lta na yang de'i rnam par rtog pa re zhig yod la/ des na de yod pas de las skyes pa'i 'dod chags la sogs pa 'byung bar 'gyur ro zhe na/ smras pa/ rnam rtog de yang de kho na nyid du ma yin te/ log pa'i rnam par bskyed pa rnams la bden pa'i rang bzhin mi srid pa dang rten cing 'brel bar 'byung ba'i phyir yang rnam par rtog pa yang de kho na nyid du med do//de med na de las skyes pa'i 'dod chags la sogs pa yang med do zhes grub bo// // 'di ltar yang rnam par rtog pa de kho na nyid du med pa ste/gang gi phyir/ rtog bya med na rnam rtog gang / /de med rnam rtog ga la zhig /de phyir rtog bya rkyen skye phyir/ /stong yin rnam par rtog pa yang / /gal te rnam par rtog par bya ba'i dngos po cung zad yod na de la rtog par byed pa rnam par rtog pa skye la/ de yang dngos po rten cing 'brel bar 'byung ba'i phyir ngo bo nyid kyis stong la/des na de la rnam par rtog bya med na rnam rtog med do zhes bya ste/ stong yin rnam par rtog pa yang / /gal te rnam par rtog pa bya ba'i rang bzhin stong pa'o/ /de las dngos po gang yang rung ba'i rang bzhin mi dmigs pas/rnam par rtog bya dang rtog pa dag tu yongs su mi rtog pa'i phyir de kho na nyid rtog par 'gyur ro/ /de las kyang de nyid rtog pas phyin ci log bzhi las byung ba'i ma rig med/ de med 'du byed 'byung ba ni/ /srid min de bzhin lhag ma rnams// de kho na nyid mthong ba ni phyin ci ma log pa ste/ de kho na nyid de mthong ba de dang 'gal ba'i phyir phyin ci log rnams nges par spong la/ de spangs pas phyin ci log las byung ba'i ma rig pa spong ngo / /ma rig pa spangs pas ma rig pa'i rkyen gyis 'du byed ldog la de 'gags pas skye ba'i rkyen gyi rgas pa dang shi ba la sogs pa'i bar du thams cad ldog go//slar yang ji ltar ma rig pa 'gag pas 'du byed la sogs pa 'gag ce na/ bsgrub pa'i phyir gsungs pa/ gang la gang rten skye ba'i dngos/ /de de med pas de mi skye/ /dngos dang dngos med 'dus ma byas//'dus bya zhi bas mya ngan 'das/ /gang zhig ma rig pa zhes bya ba'i rgyu la brten nas 'du byed ces bya ba'i 'bras bu gang zhig skye / 'du byed ces bya ba'i 'bras bu de'i rgyu ma rig pa zhes bya ba med na mi 'byung ngo zhes bya ste/ de ltar ma rig pa la sogs pa med na 'du byed la sogs pa srid pa ma yin no//gang gi tshe 'di ltar ma rig pa la sogs pa 'jug pa med na de'i tshe dngos po med la/ dngos po med na de yang log pa'i rang bzhin dngos po med pa yang med do zhes bya ste/ gang yang dngos po dang dngos po med pa dag med na yang /dngos po'i tshul gyis 'dus byas dang dngos po med pa'i tshul gyis 'dus ma byas med do zhes bya ste/ dngos dang dngos med dang 'dus byas dang 'dus ma byas dag zhi ba'o/ /zhi ba ni mi 'jug pa la/ de nyid mya ngan las 'das pa'o/ /slar yang 'dus ma byas kyi tshul mya ngan las 'das pa yang ma yin te/'dus ma byas su rtog pa 'jug par thal bas so/ /'dir smras pa/ gang smos pa'i de kho na nyid rtogs pas phyin ci log bzhi las byung ba'i ma rig pa mi 'byung ngo zhes pas/ slar yang ci ma rig pa'i mtshan nyid dang /dmigs pa ni ci zhig gang las de kho na mthong ba na mi 'byung ngo zhe na/ mtshan nyid dang dmigs pa dag bsgrub par 'dod pas gsungs pa/ rgyu rkyen las skyes dngos po rnams/ /dngos por khong du chud pa gang / /ston pas ma rig par gsungs la// de las yan lag bcu gnyis 'jug /rgyu dang rkyen las skyes pa'i dngos po ngo bo nyid kyis ma skyes pa la/ de dag la gang zhig rang bzhin du rtog pa de la ma rig par bcom ldan 'das kyis gsungs la/ yang dag pa ji lta bar gnas pa'i rang bzhin med pa ma rtogs pa'i phyir/ma rtogs pa las ma rig pa zhes brjod do/ /de yang rang bzhin du sgro 'dogs pa la zhugs pa'i phyir dang / rang bzhin la dmigs pas de kho na nyid yongs su ma shes pa'i ngo bo'i phyir mi shes pa'i rang bzhin la/ ma rig pa de las 'du byed la sogs pa'i rten cing 'brel bar 'byung ba'i yan lag bcu gnyis 'jug go//yang 'di'i ma rig pa sgro btags nas 'jug pa ji ltar bzlog par bya zhe na/ gsungs pa/ dngos po stong par yang dag par/ /shes na rmongs pa mi 'jug la//ma rig legs par 'gags pa yis/ /de nas yan lag bcu gnyis 'gag /gang la rten cing 'brel bar 'byung ba yang dag par shes pa ste/ yang dag pa ji lta ba mthong ba de nam yang chos rnams kyi rang bzhin du sgro mi 'dogs la/ gang gi tshe rang bzhin du mi 'dogs pa de'i tshe 'di'i ma rig pa spong la/ma rig pa spangs pas 'du byed kyang mi skye la/ ji srid du skye ba med pas rgas pa dang 'chi ba mi 'byung ba'i bar du'o/ /de las dngos po dang dngos po med pa dang 'dus byas dang 'dus ma byas zhi bas mya ngan las 'das par 'gyur ro//slar yang thar pa 'dod pas ma rig pa spong bar 'dod pa ma rig pa spong bar 'dod pas dngos po 'di dag ji ltar blta bar bya/ smras pa/ thar pa 'dod pa rnams kyis de kho na nyid la blta bar bya la/ de kho na nyid kyang dngos po rnams kyi rang bzhin la/de yang ma skyes pa'o/ /des na thar pa 'dod pas 'di dag la dngos por blta bar mi bya'o/ /'dir smras pa/ 'o na de ltar na 'di ltar dngos po thams cad ma mthong ngo zhes mi nus te/ mig ma nyams shing mig bye ba dang yul phun sum tshogs pa snang ba dang bcas pa'i sngon po la sogs pa mi mthong bar mi nus so//de bzhin du rna ba la sogs pa'i dbang pos kyang rang gi yul ji lta bar mi 'dzin par mi nus so/ /smras pa/ gal te yang dbang po la ltos nas sngon po la sogs pa mngon sum la/ de lta na yang rig pas nye bar dpyad pa las skyes pa'i blo'i mngon sum gang zhig de nyid 'dzin pa'i dbang po'i mngon sum pas glengs pa'i phyir ro//'di ltar rab rib can la mi bden pa'i skra dang sbrang bu la sogs pa mngon sum du so sor snang la/ de dag kyang rigs pa dang bcas pa'i blo'i mngon sum du med la/de ni blo'i dbang po'i mngon sum du yang de dag gnas pa ma yin te/ rigs pa'i rjes su 'brang ba'i blos yang dag pa'i mngon sum nyid du mngon par rlom pa gsal ba'i phyir ro/ /gal te de lta na yang dngos po de dag phyin ci log gi las las byung bas yang dag pa ma yin pa'i don yongs su gcod pa dbang po dang yul gyi gnas par yod pas mngon sum du 'gyur ro//de lta na yang rigs pas nye bar dpyod pa la zhugs pa'i blos de dag gi blos mngon sum nyid ldog ste/ de ni stobs can yin pa'i phyir ro zhes bya ste/des na dngos po rnams su mngon par zhen nas 'dzin pa'i phyir dang / de kho na 'jug pa'i sgo'i phyir dpe'i phreng ba gsungs pa/ dri za'i grong khyer sgyu ma dang / /smig rgyu dbu ba chu bur dang / /gzugs brnyan sprul pa rmi lam dang / /mgal me dang mtshungs 'du byed rnams//ji ltar dri za'i grong khyer la sogs pa'i don to / /'di dag nyid rang gi rgyu dang rkyen ji lta ba las 'byung na yang / grong khyer la sogs pa'i rang bzhin gyis stong pa grong khyer la sogs pa nyid du snang la/ de bzhin du 'di ltar gzugs dang tshor ba la sogs pa'i dngos po yang gzugs dang tshor ba la sogs pa'i rang bzhin gyis stong pa nyid snang ba la/gzugs dang tshor ba la sogs pa nyid du shes par bya'o/ /yang dpe gcig nyid kyi rang bzhin med pa nyid rtogs par 'gyur na/ dpe mang po nyid nye bar bsdus pa la don med do zhe na/'di dag de ltar ma yin te/ rang bzhin med pa'i don la 'khor ba thog ma med pa nas ma goms pa'i 'jig rten pa de dag dpe du mas 'jig rten pa'i sems la phebs pas/ de kho na nyid la nges pa skyed par 'gyur ro/ /ji skad du/ re zhig phung po mi gtsang ba/ /rags pa mngon sum spyod yul te/ /rtag tu mthong bar 'gyur na yang / /gang tshe sems ni mi gnas pa/ /de tshe shin tu phra zhing zab/ /dam chos 'di ni gnas med pa/ /mngon sum min pa ji ltar du/ /sems la bde blag rtogs par 'gyur/ /zhes so//de'i sems la bde blag tu 'jug pa'i phyir dpe mang po bstan pa ni rigs pa nyid do zhes bya'o/ /gzhan yang dpe mang po nye bar bkod pas 'ga' zhig 'ga' zhig la shin tu nges par 'gyur ro zhes bya ste/ de la dpe des de'i don bde blag tu bdag nyid kyis khong du chud pas des na dpe mang po nye bar bsdu ba rigs pa nyid do//yang na dngos por 'dzin pa tha dad pas dpe tha dad pa'o/ /yul dang dus nges par 'dzin pa la/ med pa la yul dang dus nges par 'dzin pa mi rung zhes bya ste/ de la ltos nas dri za'i grong khyer dper brjod do//gzhan dbang du 'dzin pa la/ med pa la rgyu gzhan gyi dbang las ma yin no zhes bya ste/ de la ltos nas sgyu ma dper brjod do/ /ldog par 'dzin pa la/ med pa ldog pa med do zhes bya ste/ de la ltos nas smig rgyu dper brjod do/ /de yang bye brag med par ldog pa'o//snying po med par 'dzin pa la/ /snying po med pas de med do zhes bya ste/ de la ltos nas sprul pa dper brjod do/ /gzhan dang gzhan du 'dzin pa la/ med pa la gzhan dang gzhan 'byung ba ma yin no zhes bya ste/ de la ltos nas chu'i chu bur dper brjod do//kun nas snang bar 'dzin pa la/ /med pa la kun nas snang ba med do zhes bya ste/ de la ltos nas sprul pa dper brjod de/ rnam pa sna tshogs par 'dzin pa la/ med pa la rnam pa sna tshogs pa med do zhes bya ste/ de la ltos nas rmi lam dper brjod do//'jug par 'dzin pa la/ med pa'i myu gu la sogs pa la 'jug pa la mi ltos so zhes bya ste/ de la ltos nas mgal me'i 'khor lo dper brjod do/ /de'i 'jug pa'i sa bon mgal me yin pa'i phyir ro zhes bya'o/ /de ltar de dag 'das ma thag pa'i tshigs su bcad pa drug cu rtsa bzhis rten cing 'brel bar 'byung ba ji lta bar gnas pa'i rang bzhin bsgrubs nas/de las gzhan pa'i tshigs su bcad pa gnyis kyis don 'di nyid de bzhin gshegs pas gsungs pa'i rten cing 'brel bar 'byung ba phyin ci ma log par bshad pas/des na shin tu yang de dang 'brel par bsgrub par bya'o/ /de ltar gyur na legs par nyan pa rnams don 'di la shin tu nges pa skye bar 'gyur te/ dngos kun rang bzhin stong pas na/ /rten cing 'brel bar 'byung ba 'di/ /de bzhin gshegs pa mtshungs med kyis//dngos po rnams ni nye bar bstan/ /dri za'i grong khyer la sogs pa dang 'dra bar 'du byed rnams ngo bo nyid kyis ma grub bo zhes nye bar bstan pa'i don du 'di dag ni rten cing 'brel bar 'byung ba'o zhes gsungs so/ /mtshungs med kyis zhes pa/'jig rten gyi khams gcig tu brtsams nas 'jig rten gyi khams gzhan na yang de bzhin gshegs pa 'dra ba'i de bzhin gshegs pa yod pa ma yin no/ /yang na shAkya thub pa gau ta ma'o zhes smra na brtsad pa 'di dag tu 'gyur te/ de bzhin gshegs pa'i sgra 'di ni yang dag pa ji lta bar ston pa'i yon tan la brten nas 'jug la/de yang sangs rgyas thams cad la thun mong du grub bo zhes bya ste/ de bzhin gshegs pa thams cad ni mtshungs med ces bya'o/ /lhag ma bshad zin to/ /de ni dri za'i grong khyer la sogs pa 'di dag gi rang bzhin med pa'i don dang /rten cing 'brel bar 'byung ba'i don ni dam pa nyid du nye bar mtshon par gsungs pa/ 'di tsam re zhig don dam ste/ /zhes pa la dngos por rtog pa thams cad ji lta ba'i don ma yin pa'i phyir/ 'di ni re zhig ces pa nges par gzung ba ste/nye bar bsgrubs pa'i chos thams cad rang bzhin med pa nyid do/ /stong pa nyid de la ji srid du dngos por mngon par zhen pa thams cad 'dir phyin ci log pas 'khrul pa ste/ 'khrul pa yang don dam pa yin par ni mi rigs so/ /'di nyid yod pa dang med pas ma bsdus pas skyon gyis rnam par dben pa/rten cing 'brel bar 'byung ba gsungs pa las dbu ma khong du chud pa ni don dam pa nyid do zhes gsungs pa/ 'di tsam re zhig don dam ste/ /'jig rten tha snyad la brten nas/ /sna tshogs thams cad bcom ldan 'das// sangs rgyas bden par gdams pa mdzad/ /ces pa la ji ltar rmi lam mthong ba 'ga' zhig gi rmi lam rmis pa'i sems 'ga' zhig rnam par shes nas de ni bden par smra'o zhes brjod cing / de ring rmi lam du mas mgo la 'o byas shing phas so sor bsngags pa brjod/skyed mos tshal btsongs nas stong phrag gcig bram ze la byin pa dang / bskor ba byed pa mthong zhes so/ /de bzhin du bcom ldan 'das kyis byin pas mngon par zhen pa ltar skye ba dang gnas pa dang 'jig pa la sogs pa'i dbye ba tha dad dang dngos po thams cad med par tha snyad kyis gsungs par 'gyur ro//de la rmi lam du mthong ba'i ma la sogs pa nyid la bden par mngon par 'dod pa de'i ngo bo rigs pa ma yin no/ /de bzhin du byis pa phyin ci log pa rnams kyis skye ba dang gnas pa dang 'jig pa la sogs pa mngon par brjod kyi sangs rgyas rnams la ni ma yin no//lhag ma bshad zin to/ /mya ngan las 'das pa dang mtshungs par chos thams cad rang bzhin med pa la gnas pa'i sangs rgyas bcom ldan 'das so zhes bya ste/ spros pa ga la zhig /ji skad du mdo las/ tshe dang ldan pa kun dga' bo reg pa'i skye mched drug po zad pa dang / 'dod chags dang bral ba dang / 'gags pa dang / nye bar zhi ba dang / nub par gyur pa 'di las gzhan pa'i spros pas spros par byed pa yod dam zhes pa dang / yod pa dang med pa zhes pa'i spros pas spros par byed dam zhes pa nas/tshe dang ldan pa kun dga' bo skye mched drug ni spros pa'o/ /skye mched drug 'gag pa las spros pa med pa'o zhes pa'i bar du mya ngan las 'das pa bcom ldan 'das kyis gsungs so/ /de bzhin gshegs pa'i ye shes kyi dbang gis na don dam pa'o//'jig rten pa'i shes pa'i dbang gis kyang kun rdzob bo zhes gnas so/ /de nyid kyis na/ 'jig rten pa yi chos bstan mi nyams shing / /yang dag nyid du nam yang chos bstan med/ /de bzhin gshegs pas gsungs pa ma rig pas// des na dri med brjod pa 'di la skrag /des na skrag ces pa la/ des na'i sgra ni ji skad du smos pa'i rigs pa dang lung gis dpyad pa rnams te/ 'jig rten pa'i thog mar blta bar bya ste/ des na 'jig rten pa'i zhes bya ste/ 'dir tshigs su bcad pa sdebs pa'i ngor 'jug pas rim pa 'chol bar blta bar bya'o//des na 'di'i don kyang gang gi phyir ji skad du smros pa'i rten cing 'brel bar 'byung ba bshad par/ brdzun pa slu ba'i chos can tsam byis pa'i skye bo'i blo'i spyod yul/ rmi lam dang sgyu ma dang dri za'i grong khyer gyi rnam pa can de'i rang bzhin gyi las kyi 'bras bu kun nas nyon mongs pa can dang rnam par byang ba 'ching ba dang grol ba'i rgyu mtshan 'jig rten pa'i tha snyad du yod pa nyid du 'dod pa des na de'i phyir/'jig rten pa yi chos bstan mi nyams shing / tha snyad pa nyid la ji lta ba'i don yin pa'i phyir ji ltar gnas pa phyin ci ma log par 'jig rten pa'i dngos po rnams kyi de kho na nyid brjod la/de nyid brjod bya las rim gyis de kho na nyid la 'jug pa'i rgyu'i phyir yang / 'jig rten pa yi chos bstan mi nyams shing ngo / /'jig rten pa'i chos bstan pa yang dngos po gang cung zad kyi rang bzhin khas ma blangs pas/ston pa dang bstan bya dang ston pa po rnams rang bzhin gyis ma grub pa'i phyir/ yang dag nyid du nam yang chos bstan med/ /de bzhin gshegs pas chos 'ga' zhig yang dag par dmigs nas nye bar ston par mi 'gyur la/des na chos thams cad kyi rang bzhin yongs su mi rtog pas 'di ni bden no zhes par mngon par zhen pa yongs su btang nas gnas pa'i rnal 'byor pa nges par mya ngan las 'das pa la gzhol bar 'gyur ro/ /de ltar na 'di ni bden pa gnyis la brten nas las yod pa'i phyir dang rtog pa med pa'i phyir rnal 'byor pa rnams kyi mya ngan 'das las 'das pa grub pa yang cung zad kyang mi nyams la/grol ba yang bde blag kho nar myur du skye bar 'gyur ro/ /gal te yang rang bzhin med pa la phyin ci log pa rnams kyis de yongs su ma shes pas rang bzhin med pa la dngos po'i rgyu mtshan gyis kun nas nyon mongs pa'i phyogs su 'jug la/phyin ci ma log pa rnams rang bzhin med pa mthong ba las kun nas nyon mongs pa'i phyogs las log nas rnam par byang ba yang bskyed do/ /de ci slar yang 'dir brjod pa la de skrag pas 'jig rten pa rang bzhin dang bcas par smra ba la brten/skyon dang ldan par brjod pa ni spang bar rigs la/ brjod pa 'di ni skyon dang ldan pa ma yin no/ /yon tan dang ldan na yang brjod pa la brten par rigs na/ rang bzhin dang bcas par smra ba ni yon tan dang ldan pa ma yin no zhes bya ste/de la 'jig rten pa 'di dag rang bzhin smra ba spangs nas rang bzhin dang bcas par smra ba la ji ltar zhe na/ smras pa/ dngos po ji ltar smras pa rnams mi srid pa nyid kyis/ ji skad smos pa'i brjod pa spangs nas gnas pas 'jig rten pa dngos po'i lta ba la mi gnas shing phyin ci log ji lta bar gnas so//'o na de bzhin gshegs pa nyi ma'i gsung gi 'od zer gsal bar snang bas na 'jig rten pa rnams kyi phyin ci log par mi rigs so/ /bden te gal te 'jig rten pa la shes rab kyi mig yod na rigs kyi ma rig pas ldongs pa'i 'jig rten pas ji lta ba'i de bzhin gshegs pa'i gsung las khong du chud par ji ltar 'gyur/de ma rtogs pas gdon mi za bar 'jigs pa ma yin pa'i gnas la skrag par 'gyur ro zhes bsgrub pa'i phyir gsungs pa/de bzhin gshegs pas gsungs pa ma rig pas/ /des na dri med brjod pa 'di la skrag /ces pa la/ ji ltar bud shing la brten nas me 'byung la/ sprin la brten nas char pa'o zhes pa ni 'dir rgyu'i don to/ /de bzhin du gsungs pa ma rig pas shes pa 'dir yang k+ta'i rkyen gyis rgyu'i don to//ji skad du gsungs pa'i kun rdzob dang don dam pa'i bden pa la mi mkhas pa'i skye bos de bzhin gshegs pas gsungs pa mi shes la/ mi shes pas gdod ma nas zhi ba skye ba med pa'i chos bstan pa la nges par skrag par 'gyur ro//de yang gdod ma nas zhi ba ma skyes pa'i chos bstan pa'i rnam par dbye ba mi mthong zhing / ji ltar nye bar dmigs bzhin pa'i bdag dang bdag gi ba'i chos kyi dngos po sems la bzhag nas/ bdag ni med par gyur ta re zhes byis pa dag dri med kyi brjod bya la skrag par 'gyur ro//brjod par bya ba'i phyir brjod pa ste bshad pa'i don la brjod pa zhes brjod de/ bstan bzhin pa'i phyir ro/ /brjod pa de yang mtshan ma med pa'i phyir dri ma med pa'o/ /mi gsal ba mngon sum ma yin pa zhes bya'o/ /'o na dri med brjod bya 'di la skrag /ces pa 'dir/ 'jigs pa'i rgyu ni 'byung khungs so/ /zhes pa'i 'dir 'byung khungs la brten nas lnga par 'gyur ro/ /ma yin te k+ta'i rkyen gyi rgyu'i don gsungs pas she na/ ma yin te don gzhan yin pa'i phyir te/ dri ma med pa'i brjod bya nyid la srog chags rnams skrag pas so//brjod bya ci'i phyir na rgyur 'gyur/ de las skrag pas so/ /de la 'jigs pa'i rgyu ci zhe na/ ma rtogs pa rgyur k+ta'i rkyen gyis brjod la/ de'i phyir 'jigs pa'i rgyu nyid ni ma rtogs pa rgyu mtshan no/ /dri ma med pa'i brjod bya 'jigs pa'i rgyu'o zhes pas yang /gal te dri ma med pa'i brjod pa 'jigs pa'i rgyur 'gyur na lnga par 'gyur la/ 'di ni 'jigs pa'i rgyu ma yin te/ 'jigs pa ma lus pa las ldog pa'i rgyu'i phyir ro/ /de nyid kyis na gsungs pa/ rin po che phreng ba las/ sdug bsngal thams cad zad byed chos//thos pas rtogs pa mi ldan pa/ /skrag 'gyur yongs su ma shes pas/ /'jigs min gnas la 'jigs par 'gyur/ /'di dag thams cad mi 'byung ba'i/ /mya ngan 'das pas de mi 'jigs/ /'dir smos pa yi dngos med la//ci yis de la de 'jigs byed/ /thar pa bdag med phung po med/ /'di 'dra'i thar pa la yang dga'/ /phung po khams dang skye mched rnams/ /'di lta bu des ci mi dga'/ /zhes so/ /de nyid kyis na 'jigs pa'i rgyu nyid du ma yin par shes par bya ba'i phyir/ dri ma med pa'i brjod pa yul ma yin par bstan to zhes shes par bya'o/ /gang yang 'di snyam du sems te/ sgra'i mtshan nyid la mngon par zhen pa spang ba'i don du slob dpon gyi bsams bzhin du zur chag pa'i sgra'i sbyor ba byas so zhes pa de mi 'thad de/ / gal te sgra'i mtshan nyid bor nas brjod pas des mngon par zhen pa dang bral nas sgra'i mtshan nyid logs su bor ba'i brjod pa la mngon par zhen pa 'byung bar 'gyur la/ de ltar yang ma yin no/ /yang ji ltar de ltar sgra'i sbyor ba byed na/ de'i tshe tshig lhug pa la yang mngon par zhen pa spong ba'i phyir sbyor ba mdzad par 'gyur na/de yang ma mdzad la/ de'i phyir mtshan nyid mi dran pa nyid srid kyi mtshan nyid la mngon par zhen pa spong bas ni yin no/ /thabs gzhan gyis de'i mngon par zhen pa spong bar byed pa med pa ma yin la/ de'i phyir slob dpon ni nam yang zur chag pa'i sgra'i sbyor ba mi mdzad do//'o na re zhig 'gro ba mi 'gro zhing / /zhes pa la sogs pa zur chag pa'i sgra'i sbyor ba mthong ba ma yin nam zhe na/ 'di ni zur chag pa'i sgra ma yin te/ gang gi phyir bzlog pa ni mang po'o zhes pas 'di ni/ sa mtha'i ri mtha' nye bar gzung ba rtags dang skyes bu dang //ka la ha la dbyangs yig byed po ya nga nya/ /bstan bcos byed pas 'di dag bzlog pa ste/ /des kyang mang po 'grub par 'gyur zhes bya/ /zhes pa ma nges par brjod pa las te/ bzlog par smra ba la/ smra bas bdag gi tshig tu 'gyur ro//'o na rig byed kyi'o zhes pa'i gzhi las 'di ni rig byed kyi brjod pa'o/ /gzhan yang bzlog pa ni sdeb sbyor gyi kho na'o zhe na/ bdag ni ma yin te/ der ni tshigs su bcad pa'i sdeb sbyor 'jig rten pas rig byed kyi sgras yongs su gzung ba ma yin no/ /'on kyang sngags dang bram ze rtogs pa rnams kyi'o//de'i phyir 'di dag mtshan nyid kyi rjes su 'gro ba ma yin no zhe na/ smras pa/ de ltar 'gyur du chug na yang / de lta na rig byed bzhin du snyan ngag mkhan gyis sbyor te/ de skad du yang / rig byed 'jig rten par mthong la//'jig rten pa yang rig byed la/ /sgra ni khyad 'phags sbyor ba'i phyir/ /nam yang tha dad ma yin no/ /zhes so/ /khyad par 'phags pa yang slob dpon 'di'o zhes bya ste/ des na 'dir zur chag pa'i sgra'i sbyor ba mi srid la/ mtshan nyid byed pas mtshan nyid ma tshang ba yang srid do //mtshan nyid ni mtshon bya ma lus pa la khyab par 'gyur bas so/ /mtshon cha yang khyad par 'phags pas sbyar ba byas pa'i sgra'o/ /de rnams mtshan nyid kyis ma bsdus pa'i phyir 'di ni mtshan nyid byed pa'i skyon yin gyi slob dpon gyi ni ma yin no/ /de'i dus na rab tu grags pa'i sgra mang po slob dpon gyis gzigs pa rnams kyang /deng sang gi pA Ni ni la mtshan nyid la yod pa ma yin no/ /deng sang dus na des mtshan nyid byas pa yang ma lus pa'i sgra'i rjes su 'brangs nas mtshan nyid brjod kyang / gal te na yang / de bsams pa dang dran pa nyams pa dag gis mtshon bya ma lus pa la khyab pa'i mtshan nyid brjod par ma lus pas na/de'i tshe de su'i skyon yin/ 'di ltar kA t+yA ya nas 'dir yang shin tu ches ma tshang ba'i mtshan nyid smos pa ni/ ji ltar pA Ni ni dran pa dang bsams pa nyams pas mtshan nyid ma tshang ba ltar de bzhin du dus deng sang na skyes pa'i kA t+yA ya na la sogs pa'i la srid la/gal te na yang rig pa'i sgras sngags dang bram ze dang rtog pa gzung yang rung / tshigs su bcad pa'i sdeb sbyor kyi mdo ru gzung yang rung ste/ de ltar pA Ni ni'i sgra yang skyon can du mi 'gyur la/sder sbyor gyi mtshan nyid ston pa po rnams la yang 'di dag 'thad par 'gyur ro/ /gzhan yang mon sran gre'ur byas pa'i sdeb sbyor nyams par mi bya'o zhes so/ /de bzhin du yang khyad par 'phags pa'i sbyor ba'i rjes su 'brangs nas/ yangs shing che ba la sogs pa dang /rma bya rol pa la sogs pa dang / sbyor ba rnam par phye ba la sogs pa yang don chen po 'thad de/ mtshan nyid byed pas ma tshang ba ma yin la/ khyad par 'phags pas sbyar ba'i sgra rnams kyang zur chag pa'i sgra ni ma yin no zhes bya ste/ spros pa de tsam gyis chog go/ /skabs su bab pa nyid bshad par bya ste/ yang ni ji skad smos pa de las/ 'jig rten pa yi chos bstan mi nyams shing / /yang dag nyid du nam yang chos bstan med/ /ces pa la/ slar yang 'dir ji ltar na/ 'jig rten pa la chos bstan cing //ji ltar yang 'dir mi 'jigs la/ /gzhan yang nam yang de kho na nyid la gang du gang chos bstan pa med ces pa de dag 'dir ston par 'dod pas gsungs pa/ 'di la brten nas 'di 'byung zhes/ /'jig rten tshul 'di mi 'gog cing / /gang rten rang bzhin med pas de//ji ltar yod 'gyur de nyid des/ /'dir sems can dang snod kyi 'jig rten du brdar btags pa 'di dag ma rig pa dang rlung gi dkyil 'khor la sogs pa'i rim pas 'jug pa nang gi bdag nyid dang phyi'i dbye bas tha dad pa rnams/ rang dang gzhan dang gnyi ga'i rgyu dang yod pa dang med pa dang gnyi ga dang gnyi ga ma yin pa las skye bar brtags pa rnams rkyen 'di pa tsam las skye bar brtags pa las skye bar skye ba nye bar bstan pa ni 'jig rten pa'i chos bstan pa zhes brjod do//de yang rkyen 'di pa tsam du khas blangs par gyur pas mi nyams la/de las gzhan du na brtags nas khas blangs par 'gyur na/ rten cing 'brel bar 'byung ba mi srid par 'gyur la/ gzhan du brtags pa yang 'jig rten pa'i ma yin te/ de ni 'jig rten las de bzhin du khas ma blangs pa'i phyir/ 'jig rten pa ma yin pa thar pa 'dod pa kha cig gis phyin ci log gis 'dir brtags pa'i phyir ro/ /ji skad du/ bstan bcos las/ byed po las kyi rten 'byung ni/ /de la brten nas byed po dang / /las 'jug gzhan pa 'grub pa yi/ /rgyu mtshan ci yang ma mthong ngo // zhes so/ /de 'di ltar 'di la brten nas 'byung ngo zhes pa'i 'jig rten pa'i tshul 'di ni mi 'gog pas/ 'jig rten pa'i chos bstan mi nyams so zhes gnas so/ /gang la rten cing 'brel bar 'byung ba de ni ngo bo nyid kyis med pa ste/ yod bzhin pa la brten nas 'byung ba med pa'i phyir ro//gang yang de ltar rang bzhin gyis yod pa ma yin pas/ de ji ltar rten cing 'brel bar 'byung ba yod bzhin par 'gyur/ de'i rang bzhin yod bzhin pa ma yin pa nyid do zhes dgongs pa'o/ /des na 'di ltar dpyad na rnal 'byor pa de kho na nyid nges par 'gyur te/rang bzhin gyis ma skyes pa'i dngos po'i de kho na nyid yongs su shes par 'gyur ro/ /de kho na nyid mthong bar gyur na chos thams cad kyi rang bzhin mi dmigs pa'i phyir/ nam yang chos rnams kyi rang bzhin yongs su gsal bar mi byed de/ rang nyid kyis ma dmigs par gzhan la bshad pa mi srid do//des na yang dag nyid du nam yang chos bstan pa ma yin no zhes grub bo/ /de ltar tshigs su bcad pa gnyis kyis rab tu byed pa ma lus par bsgrub pa'i don bsdus ba'i tshul gyis nye bar bstan nas/ de las gzhan la ji ltar bstan pa'i chos rnams kyi rang bzhin rnam par 'byed pas nges par bla na med pa'i 'bras bu'i dngos grub ma thob pa rnams/ slar yang thos pa dang bsam pa dang bsgom pa la yang dag par brtson pa bskyed pa'i phyir dang / ma zhugs pa rnams zhugs pa dang ldan pa yang spro ba bskyed pa'i don du yang tshigs su bcad pa gnyis gsungs pa/tshul 'di yang dag rjes dpog gang / /dad ldan de nyid tshol la brtson/ /rten med chos 'gal brten pa yis/ /srid dang srid min spangs nas zhi/ /tshul 'di ni de ltar ji skad du smos pa'i rten cing 'brel bar 'byung bar gnas so zhes pa'i don to//yang dag rjes dpog gang ni/ rang gi rang bzhin yongs su gcod pa'o zhes bya ba'i don to/ /khong du chud pa yang gal te na skyon rjes su tshol ba la brtson pas khong du chud pa'o zhe na/ gsungs pa/ dad pa dang ldan yang gal te rtsod pa'i bsam pas kyang 'byung ngo zhe na/ gsungs pa/ de nyid tshol la brtson zhes pa la/ /dad pa dang ldan na yang don dam pa khong du chud par 'dod pas de kho na nyid 'di nyid tshol ba'o/ /de yang rang bzhin gyis mi dmigs pa'i phyir mi brten pa'o//chos 'ga' brten pas ni/ chos 'ga' zhig gsal bar byed pa'o zhes bya ba'i don to/ /de ltar rten med chos 'ga' brten pa des ci zhig byed ce na/ gsungs pa/ srid pa srid min spangs nas zhi/ /zhes pa la/srid pa ni nye bar len pa'i phung po lnga'o/ /srid min ni de med pa'o/ /de gnyis 'dir spangs na nges par dngos po dang dngos po med pa zhi bar 'gyur te/ srid dang srid min dag gi 'jug pa 'gag pas zhi bar gyur pa'o zhes pa'i don to// // slar yang ji ltar/ srid dang srid min rtag spong zhing / /ji ltar de bzhin zhes brjod na/ /gang las de'i rnal 'byor pa ni/ /'di dag rkyen 'di las rig na/ /lta ngan dra bas zin pa ldog /des ni chags rmongs khro ba rnams/ /spangs phyir mya ngan 'das pa thob/ /'di ni 'di'i rkyen la'o zhes pas//rkyen 'di pa la/ de'i dngos po ni rkyen 'di pa'o/ /'dis ji skad du bstan pa'i rkyen 'dis gsungs so/ /rnal 'byor pa gang zhig gis ji skad du smos pa'i rkyen 'di pa khong du chud pas chos kyi rang bzhin 'ga' yang mi dmigs pa'i phyir / dngos po dang dngos po med pa dag tu yongs su mi rtog par gyur pas/'jig rten pa'i lta ba ngan pa'i dra ba'i nang nas ldog la/ de las log nas kyang / dngos po dang dngos med kyi lta bas bslang ba 'di'i srid dang srid min gyi rang bzhin du nye bar dmigs pa spangs pas spongs la/de spangs nas kyang lta ba'i rtsa ba 'dod chags la sogs pa 'di'i nyon mongs pa las ldog go/ /yang dag pa ma yin pa'i lta bas kun nas bslangs pa'i dngos po dang dngos po med pa'i yul nyid 'jig rten pas rtogs la/ de spangs par gyur na yang /dngos po dang dngos po med pa dag de la mi snang ba'i phyir/ rgyu mtshan med pas 'dod chags la sogs pa 'di la mi ldan la/ des na rnal 'byor pa de 'dod chags dang / khong khro dang / gti mug spangs pa'i phyir dri ma med pa ste/ nyon mongs pa med par 'gyur ro//nyon mongs pa med na yang / sngar 'phangs pa'i dngos po 'di yongs su zad pa dang / sngon med pa'i dngos po 'phen pa spangs pas nges par mya ngan las 'das par 'gro ba ma yin nam/ de 'di ltar bla na med pa'i mya ngan las 'das pa'i 'bras bu don du gnyer ba'i thugs rje chen po dang ldan pa/shes rab can dang / dad pa can dang ldan pas kyang / ji skad du smos pa'i rkyen 'di pa'i mtshan nyid/ rang bzhin gyis stong pa la/ de bzhin du bsgom par bya zhing / tshul bzhin du nyan pa dang bsam par bya ba yin la/ gzhan yang rnal 'byor pas rtag tu bsgom pa la shin tu brtson pa dang ldan par 'gyur bar rigs so zhes bya'o/ /bsil ba'i ngag gi 'od kyi ku mu da can ni/ /bdun cu pa ni kun nas rab tu gsal byed pa'i/ /zla ba rnam par 'phro bas gsal byas lam rig pa/ /ci yang min zhing ci yang min min chags pas brten //gang zhig dbu mar 'jug par ma smos pa dag dang / /gang zhig dbu ma'i tshigs su bcad pa mi gsal ba/ /dngos po'i de nyid ma lus de dag bdag gis ni/ /bdun cu pa yi rnam par byed pa 'dir gsal byas//gang zhig thugs rje'i bdag nyid thub pa'i dbang po yis/ /yun rings dus nas 'bad pa chen pos mdzad pa yi / /de yang ngo bo nyid kyi stong pa zhes bya 'di/ /lam chen rgyal ba thams cad rjes su gshegs pa ste/ /de la 'jug phyir stong nyid bdun cu zhes bya ba'i//bstan bcos gang zhig 'phags pa klu sgrub ces bya bas/ /gsungs pa de ni bdag gis rnam par phye ba yi //dge ba gang gis skye bo sangs rgyas nyid gyur cig /stong nyid bdun cu pa'i rgya cher 'grel pa slob dpon zla ba grags pas mdzad pa rdzogs so // stong nyid bdun cu'i 'grel pa ni/ dge slong d+harma grags kyis bsgyur/ /gzhung grangs stong phrag gnyis dang ni/ /brgya phrag gcig gis lhag pa yin/ /dpal na len dra'i gtsug lag khang du paN+Di ta a b+ha yA kA ra dang / snur lo tsA ba d+harma grags kyis bsgyur ba'o// //