CLOSE WINDOW

D3862
བོད་ཡིག

@##/ /rgya gar skad du/ mA d+h+yA ma ka a ba tA ra b+hA Shu nA ma/ bod skad du/ dbu ma la 'jug pa'i bshad pa zhes bya ba/ 'phags pa 'jam dpal gzhon nur gyur pa la phyag 'tshal lo/ /dbu ma'i bstan bcos la 'jug par bya ba'i phyir/ dbu ma la 'jug pa rtsom par 'dod pas/yang dag par rdzogs pa'i sangs rgyas dang byang chub sems dpa' rnams pas kyang thog mar/ bcom ldan 'das snying rje chen po sangs rgyas nyid kyi rgyu phun sum tshogs pa dang po/ sems can 'khor ba'i btson rar bsdams pa skyabs med pa dpag tu med pa ma lus pa yongs su skyob pa'i mtshan nyid can la bstod par 'os pa nyid du bstan pa'i phyir/nyan thos sangs rgyas 'bring rnams thub dbang skyes/ /sangs rgyas byang chub sems dpa' las 'khrungs shing / /snying rje'i sems dang gnyis su med blo dang / /byang chub sems ni rgyal sras rnams kyi rgyu//zhes bya ba la sogs pa tshigs su bcad pa gnyis smos so/ /de la gong na med pa'i chos kyi dbang phyug phun sum tshogs pa mnga' bas/ nyan thos dang rang sangs rgyas dang byang chub sems dpa' rnams pas kyang dbang phyug dam pa phun sum tshogs pa nyid dang / nyan thos la sogs pa rnams de'i bkas mnga' bsgyur ba'i phyir/sangs rgyas bcom ldan 'das rnams la thub dbang zhes bya'o/ /de rnams las nyan thos la sogs pa dag skyes pa ni de dag las bskrun pa'o/ /ji ltar zhe na/ sangs rgyas rnams byung bar gyur pa na rten cing 'brel bar 'byung ba phyin ci ma log pa ston pa la 'jug pa'i phyir la/de nyan pa dang sems pa dang sgom pa'i rim pa las kyang lhag par mos pa ji lta ba bzhin nyan thos la sogs pa rnams yongs su rdzogs par 'gyur ba'i phyir ro/ /gal te yang kha cig gis rten cing 'brel bar 'byung ba nye bar bstan pa nyan pa kho na las don dam pa rtogs pa la mkhas su zin kyang mthong ba'i skye ba kho na la mya ngan las 'das pa thob par mi 'gyur mod kyi/de lta na yang nye bar ston pa'i sgrub pa po dag gis las rnam par smin par nges pa'i 'bras bu ltar tshe rabs gzhan du mngon par 'dod pa'i 'bras bu yongs su smin pa gor ma chag thob par 'gyur ro//ji skad du 'phags pa lhas/ de nyid shes pas gal te 'dir/ /mya ngan 'das pa ma thob kyang / /skye ba gzhan du 'bad med par/ /nges par thob 'gyur las bzhin no/ /zhes bshad do/ /de nyid kyi phyir dbu ma las kyang / rdzogs sangs rgyas rnams ma byung zhing / /nyan thos rnams kyang zad pa na/ /rang sangs rgyas kyi ye shes ni/ /rten pa med par rab tu 'byung / /zhes gsungs so/ /de la yang dag pa'i gdams ngag gi 'bras bu thob par byed pas na nyan thos dag ste/ 'di ltar bya ba byas so/ /'di las srid pa gzhan mi shes so zhes bya ba la sogs pa 'byung ba yin no//yang na 'bras bu'i mchog gam bla na med pa yang dag par rdzogs pa'i sangs rgyas kyi lam de bzhin gshegs pa rnams las thos nas de don du gnyer ba rnams la sgrogs par byed pas na nyan thos dag ste/ dam pa'i chos pad+ma dkar po'i mdo las/mgon po de ring bdag cag nyan thos gyur/ /byang chub dam pa yang dag bsgrags par bgyi/ /byang chub pa yi sgra yang rab tu brjod/ /de bas bdag cag nyan thos mi zad 'dra/ /zhes ji skad gsungs pa lta bu'o/ /byang chub sems dpa' rnams kyang de lta yin mod kyi/de lta na yang sgrogs par byed pa nyid yin gyi rjes su mthun pa tsam yang mi sgrub pa gang yin pa de dag nyan thos yin pas byang chub sems dpa' rnams la thal bar mi 'gyur ro/ /sangs rgyas kyi sgra 'di sangs rgyas kyi de nyid nyan thos dang rang sangs rgyas dang bla na med pa yang dag par rdzogs pa'i sangs rgyas gsum car la yang 'jug ste/des na sangs rgyas kyi sgras rang sangs rgyas dag bsnyad do/ /de dag ni bsod nams dang ye shes gong du 'phel ba'i khyad par gyis nyan thos rnams las khyad par du 'phags pa'i phyir dang / bsod nams dang ye shes kyi tshogs dang thugs rje chen po dang /rnam pa thams cad mkhyen pa la sogs pa med pas yang dag par rdzogs pa'i sangs rgyas rnams pas dman pa'i phyir na 'bring ngo / /de nyid kyi phyir de dag ni nye bar ma bstan par ye shes 'byung zhing bdag nyid gcig pu'i phyir rang nyid sangs rgyas pas rang sangs rgyas so//ji skad bshad pa'i tshul gyis nyan thos dang rang sangs rgyas de dag ni de bzhin gshegs pas chos bstan pa las nges par byung ba nyid kyi phyir thub dbang las skyes so/ /yang thub pa'i dbang po de rnams gang las bltams she na/ sangs rgyas byang chub sems dpa' las 'khrungs shing //zhes bya ba smos so/ /gal te byang chub sems dpa' rnams kyang de bzhin gshegs pas nye bar bstan pa las skyes par gyur pas rgyal ba'i sras zhes brjod pa ma yin nam/ de'i phyir ji ltar sangs rgyas bcom ldan 'das rnams byang chub sems dpa' las 'khrungs she na/'di ni bden mod kyi 'on kyang rgyu gnyis kyis byang chub sems dpa' dag sangs rgyas bcom ldan 'das rnams kyi rgyur 'gyur te/ gnas skabs kyi khyad par dang / yang dag par 'dzin du 'jug pa las so/ /de la gnas skabs kyi khyad par las ni de bzhin gshegs pa'i gnas skabs ni byang chub sems dpa'i gnas skabs kyi rgyu can yin pa nyid kyi phyir ro//yang dag par 'dzin du 'jug pa las ni ji ltar 'phags pa 'jam dpal byang chub sems dpar gyur pa nyid kyis bcom ldan 'das shAkya thub pa dang / de las gzhan pa'i de bzhin gshegs pa rnams ches thog ma kho nar byang chub kyi sems yang dag par 'dzin du bcug par 'dod pa yin no//de'i phyir de ltar 'bras bu mthar thug pa de'i rgyu gtso bor gyur pa la ltos nas de bzhin gshegs pa rnams byang chub sems dpa' las 'khrungs par bstan to/ /de nyid kyi phyir rgyu phun sum tshogs pa ches brling ba yin pa'i phyir la/rgyu la mchod pa brjod pas kyang 'bras bu la mchod pa don gyis 'phangs par dgongs te/ sangs rgyas bcom ldan 'das de dag gis sman gyi ljon shing chen po 'bras bu nges pa dpag tu med pa ster ba/ myu gu la sogs mtho zhing lo ma 'jam pa'i gnas skabs su gyur pa ltar bsgrims te yongs su bskyang bar bya ba nyid du bstan par bya zhing /dus der nye bar gyur cing theg pa gsum la bkod pa'i sems can gyi phung po theg pa chen po nyid la nges par sbyar bar bya ba'i phyir byang chub sems dpa' rnams la bsngags pa mdzad pa yin no//ji skad du 'phags pa dkon mchog brtsegs pa'i mdo las/ 'od srungs 'di lta ste dper na zla ba tshes pa la phyag 'tshal ba ltar nya ba la ni ma yin no/ /'od srungs de bzhin du gang dag nga la rab tu dad pa de dag gis byang chub sems dpa' rnams la phyag bya'i/de bzhin gshegs pa rnams la ni de lta ma yin no/ /de ci'i phyir zhe na/ byang chub sems dpa' rnams las ni de bzhin gshegs pa rnams byung ngo / /de bzhin gshegs pa rnams las ni nyan thos dang rang sangs rgyas thams cad byung ngo zhes gsungs pa lta bu'o//de'i phyir de ltar na rigs pa dang lung dag gis de bzhin gshegs pa rnams byang chub sems dpa' las 'khrungs pa yin no zhes bya ba 'di bsgrubs pa yin no/ /yang byang chub sems dpa' de dag ci'i phyir rgyu can zhig yin zhe na/ snying rje'i sems dang gnyis su med blo dang //byang chub sems ni rgyal sras rnams kyi rgyu/ /zhes bya ba smos so/ /de la snying rje ni brtse ba ste/ 'di nyid du 'chad par 'gyur ba'i rnam pa dang rang gi ngo bo can no/ /gnyis su med pa'i blo ni/ dngos po dang dngos po med pa la sogs pa mtha' gnyis dang bral ba'i shes rab po//byang chub kyi sems ni 'phags pa chos kun bgro ba'i mdo las/ byang chub sems dpas byang chub kyi sems las chos thams cad khong du chud par bgyi'o/ /chos thams cad ni chos kyi dbyings dang mnyam pa'o/ /glo bur du byung ba mi gnas pa chos thams cad ni shes par bgyi ba tsam dang /shes pa pos stong pa'i phyir yongs su shes par bgyi ba tsam du bas na chos nyid 'di lta bu 'di sems can rnams kyis khong du chud par bya'o snyam nas/ byang chub sems dpa' la sems gang skyes pa 'di ni byang chub sems dpa'i byang chub kyi sems zhes bgyi'o//sems can thams cad la phan pa dang bde ba'i sems dang / bla na med pa'i sems dang / byams pas mnyen pa'i sems dang / snying rjes mi zlog pa'i sems dang / dga' bas 'gyod pa ma mchis pa'i sems dang / btang snyoms kyis dri ma ma mchis pa'i sems dang / stong pa nyid kyis mi 'gyur ba'i sems dang / mtshan ma ma mchis pas sgrib pa ma mchis pa'i sems dang / smon pa ma mchis pas mi gnas pa'i sems zhes ji skad bstan pa bzhin no/ /byang chub sems dpa' rnams kyi gtso bo'i rgyu ni snying rje dang / gnyis su med pa'i shes rab dang / byang chub kyi sems zhes bya ba chos gsum po 'di dag yin no//ji skad du rin po che'i phreng ba las/ de yi rtsa ba byang chub sems/ /ri dbang rgyal po ltar brtan dang / /phyogs mtha' gtugs pa'i snying rje dang / /gnyis la mi brten ye shes lags/ /zhes gsungs so/ /byang chub kyi sems dang gnyis su med pa'i ye shes gnyis kyi rtsa ba yang snying rje yin pa'i phyir na snying rje gtso bo nyid du bstan par 'dod pas/gang phyir brtse nyid rgyal ba'i lo thog phun tshogs 'di/ /sa bon dang ni spel la chur 'dra yun ring du/ /longs spyod gnas la smin pa lta bur 'dod gyur pa//de phyir bdag gis thog mar snying rje bstod par bgyi/ /zhes bya ba smos so/ /ji ltar phyi rol gyi 'bru la sogs pa phun sum tshogs pa la/ thog ma dang bar dang tha ma rnams su sa bon dang chu dang smin pa rnams gtso bo nyid du gyur pas nye bar mkho ba nyid yin pa de bzhin du/ snying rje kho na dus gsum car du yang rgyal ba'i lo thog phun sum tshogs pa la nye bar mkho ba nyid du ston pa yin no/ /'di ltar snying rje can ni gzhan gyi sdug bsngal gyis sdug bsngal ba nyid kyis sems can sdug bsngal bar gyur pa ma lus pa yongs su bskyab par bya ba'i phyir/ gdon mi za bar bdag gis 'jig rten 'di mtha' dag sdug bsngal nas bton te/sangs rgyas nyid la nges par sbyar bar bya'o snyam du nges par sems skyed par byed do/ /dam bca' ba 'di yang gnyis su med pa'i ye shes spangs pas sgrub par mi nus pas gnyis su med pa'i ye shes la yang nges pa kho nar 'jug ste/de'i phyir sangs rgyas kyi chos thams cad kyi sa bon ni snying rje nyid yin no/ /ji skad du rin po che'i phreng ba las/ theg pa chen po gang zhig las / /snying rje sngon btang spyod pa kun/ /ye shes dri ma med bshad pa/ /sems yod su zhig de la smod / /ces gsungs so/ /byang chub kyi sems bskyed du zin kyang /gal te dus phyis snying rje'i chus yang dang yang du bcus par ma gyur na/ 'bras bu'i tshogs yangs pa ma bsags pa 'di nges par nyan thos dang rang sangs rgyas kyis yongs su mya ngan las 'das pas mya ngan las 'da' bar 'gyur ro/ / 'bras bu mtha' yas pa'i gnas skabs thob tu zin kyang gal te dus phyis snying rje'i yongs su smin pa dang bral bar gyur na ni 'di dus ring por nye bar longs spyod par mi 'gyur la/ 'phags pa'i 'bras bu'i tshogs chen po rim pa gcig nas gcig tu brgyud pa rnam pa bar ma chad pa yun ring por mngon par 'phel bar yang mi 'gyur ro//da ni dmigs pa'i bye brag la 'jug pa'i sgo nas kyang snying rje'i rang gi ngo bo'i khyad par mngon par gsal bar byas te de nyid la phyag 'tshal ba brtsam par 'dod pas/ dang por nga zhes bdag la zhen gyur zhing / /bdag gi 'di zhes dngos la chags bskyed pa/ / zo chun 'phyan ltar rang dbang med pa yi/ /'gro la snying rjer gyur gang de la 'dud/ /ces bya ba smos so/ /'jig rten 'di ni bdag gir mngon par zhen pa'i snga rol nyid du ngar 'dzin pas yod pa ma yin pa'i bdag yod do snyam du nye bar brtags nas 'di nyid du bden par mngon par zhen cing / 'di ni bdag gi'o snyam du ngar 'dzin pa'i yul las gzhan pa'i dngos po'i rnam pa ma lus pa la mngon par zhen pa yin no/ /bdag dang bdag gir mngon par zhen pa'i 'jig rten 'di ni las dang nyon mongs pa'i thag pas ches dam du bsdams pa/ 'khrul 'khor bskor mkhan rnam par shes pa'i bskyod pa la rag las par 'jug pa/'khor ba'i khron pa chen po srid pa'i rtse mo nas mnar med pa la thug pa zab la bar med par 'phyan pa/ rang gi rang nyid kyis thur du 'gro bar 'jug pa 'bad pas ci zhig ltar drang bar bya ba mi shes pa la sogs pa nyon mongs pa dang las dang skye ba'i kun nas nyon mongs pa gsum yod kyang snga ma dang phyi ma dang bar gyi rim pa nges par mi zin pa/nyi ma re re zhing sdug bsngal gyi sdug bsngal dang / 'gyur ba'i sdug bsngal nyid dag gis gcog pa'i phyir zo chun khyud mo'i gnas skabs las ma 'das par gnas pa zhig ste/ gang gi phyir byang chub sems dpa' de'i sdug bsngal gyis sdug bsngal ba de la shin tu snying rjes dmigs nas bskyab par spro ba de'i phyir ches thog ma kho nar bcom ldan 'das ma snying rje chen po la rab tu phyag 'tshal lo//'di ni byang chub sems dpa' rnams kyi snying rje sems can la dmigs pa'o/ / chos la dmigs pa dang dmigs pa med pa'i snying rje yang dmigs pa'i sgo nas gsal bar bya ba'i phyir/ 'gro ba g.yo ba'i chu yi nang gi zla ba ltar/ /g.yo dang rang bzhin nyid kyis stong par mthong ba yis / /zhes bya ba smos te/ snying rjer gyur gang de la 'dud/ /ces bya ba de dang sbyar bar bya'o/ / 'di ltar chu shin tu dngas pa rlung te por drag po ma yin pas cha shas brlabs pas khyab pa'i nang du zla ba'i gzugs brnyan sngar dmigs pa'i rten gyi yul dang / lhan cig 'jig pa de dag gi dngos po mngon sum du dmigs pa lta bu shar ba na/ dam pa dag gis gnyis po 'di rang gi bdag nyid gsal bar byed pa ltar gnas par mthong ste/'di lta ste/ skad cig re re la mi rtag pa nyid dang / rang bzhin gyis stong pa nyid do/ /de bzhin du byang chub sems dpa' snying rje'i gzhan gyi dbang du gyur pa rnams kyis kyang sems can 'jig tshogs la lta ba'i mtshor ma rig pa'i chos kyi bdud rtsi'i ro phul du byung ba 'byung ba'i rgyu/phyin ci log rtog pa mtha' dag pa'i mtshan nyid/ 'gro ba yongs kyi ma rig pa'i chu sngon po rgya che ba tshul bzhin ma yin pa'i rnam par rtog pa'i rlung gis rab tu bskyod pa'i nang na gnas pa rang gi las kyi gzugs brnyan lta bur mdun na gnas pa rnams skad cig re re la mi rtag pa'i sdug bsngal thog tu 'bab pa dang /rang bzhin gyis stong par mthong ba na/ de dag gi mi rtag pa nyid kyi sdug bsngal 'joms pa lta bur gyur pa/ dam pa'i chos kyi bdud rtsi'i ro phul du byung ba 'byung ba'i rgyu/ phyin ci log gi rtog pa mtha' dag log pa'i mtshan nyid/'gro ba yongs kyi gnyen nyid kyi rang bzhin du gyur pa sangs rgyas nyid yang dag par thob par 'dod pa yin no/ /de dag gi snying rje sems can la dmigs pa dang / chos la dmigs pa dang / dmigs pa med pa gang yin pa de rnams la rab tu btud nas/ byang chub sems dpa' rnams kyi byang chub kyi sems kyi dbye ba rnam pa bcu brjod par 'dod pas de byang chub kyi sems dang po'i dbang du byas nas/rgyal ba'i sras po 'di yi sems gang 'gro ba rnams/ /rnam par grol bar bya phyir snying rje'i dbang gyur zhing / /kun tu bzang po'i smon lam rab bsngos dga' ba la//rab tu gnas pa de ni dang po zhes bya'o/ /zhes bya ba smos so/ /byang chub sems dpa' rnams kyi zag pa med pa'i ye shes snying rje la sogs pas yongs su zin pa nyid char rnam par phye ba nas zhes bya ba'i ming 'thob ste/ yon tan gyi rten du gyur pa'i phyir ro//de yang gong nas gong du yon tan gyi grangs dang / mthu phul du byung ba thob pa dang / sbyin pa la sogs pa'i pha rol tu phyin pa klags pa dang / rnam par smin pa 'phel ba'i bye brag gis sa rab tu dga' ba la sogs pa'i rnam par dbye bas dbye ba rnam pa bcur bzhag gi /'di la rang gi ngo bo'i khyad par gyis byas pa'i dbye ba ni yod pa ma yin no//ji skad du/ ji ltar bar snang bya rjes mkhas rnams kyis/ /brjod par nus ma yin zhing mi mthong ba/ /de ltar rgyal ba'i sras kyi sa kun kyang / /brjod mi nus na mnyan par ga la nus/ /zhes gsungs so/ /de la byang chub sems dpa'i sa rab tu dga' ba ni/byang chub sems dpa' rnams kyi sems bskyed pa dang po yin la mthar chos kyi sprin ni sems bskyed pa bcu pa'o/ /de la byang chub sems dpa' ji skad bshad pa'i tshul gyis 'gro ba rang bzhin med par mthong ba snying rje'i khyad par nyid du nye bar gzung ba'i sems gang snying rje'i gzhan gyi dbang du gyur cing /byang chub sems dpa' kun tu bzang po'i smon lam gyis yongs su bsngos pa rab tu dga' ba zhes bya ba'i ming can gnyis su med pa'i ye shes de'i rgyu can gyi 'bras bus nye bar mtshon pa de la ni/ dang po zhes bya bar brjod do/ / de la smon lam chen po bcu la sogs pa smon lam 'bum phrag grangs med pa phrag bcu po gang dag byang chub sems dpa' sems dang po bskyed pas 'debs pa de dag ni byang chub sems dpa' kun tu bzang po'i smon lam gyi nang du 'dus pa yin te/ smon lam ma lus pa nye bar bsdu bar bya ba'i phyir kun tu bzang po'i smon lam khyad par bkod pa yin no//de la ji ltar nyan thos kyi theg par zhugs pa dang / 'bras bu'i lam la gnas pa'i dbye bas nyan thos kyi sa brgyad rnam par 'jog pa de bzhin du/ theg pa chen por yang byang chub sems dpa' rnams kyi byang chub sems dpa'i sa bcu yin no//yang ji ltar nyan thos nges par 'byed pa'i cha dang mthun pa'i gnas skabs skyed pa ni/ 'bras bu dang po la zhugs pa'i gnas skabs yin par mi 'dod pa de bzhin du/ 'byung bar 'gyur ba'i byang chub sems dpa' yang yin te/ dkon mchog sprin gyi mdo las/ mos pa chen po'i yang chen pos spyod pa'i chos nyid kyi sa dang po de ma thag tu thob par gnas pa 'di ni byang chub sems dpa'i byang chub kyi sems ma bskyed pa'i sa'o zhes ji skad gsungs pa lta bu'o//mos pas spyod pa'i skad cig de la gnas pa yang / rigs kyi bu 'di lta ste dper na 'khor los sgyur ba'i rgyal po ni mi'i mdog las ni 'das la/lha'i mdog ni ma thob pa yin te/ de bzhin du byang chub sems dpa' yang 'jig rten pa dang nyan thos dang rang sangs rgyas kyi sa thams cad las ni shin tu 'das la/ don dam pa'i byang chub sems dpa'i sa ni thob pa yin no zhes de nyid las rnam par bshad do//yang gang gi tshe 'di rab tu dga' ba zhes bya ba'i sa dang po la zhugs par gyur pa/ de nas bzung ste de ni de thob gyur pa yis/ /byang chub sems dpa' zhes bya'i sgra nyid kyis bsnyad do/ /sems de thob pa ni rnam pa thams cad du so so'i skye bo'i sa las 'das pa'i gnas skabs su byang chub sems dpa'i sgra kho nas brjod par bya ba yin gyi/rnam pa gzhan gyis ni ma yin te/ de'i tshe de 'phags pa yin pa'i phyir ro/ /ji skad du bcom ldan 'das ma nyis stong lnga brgya pa las/ byang chub sems dpa' zhes bya ba ni rjes su rtogs pa'i sems dpa'i tshig bla dgas te/gang gis chos thams cad rjes su rtogs shing shes pa'o/ /ji ltar shes she na/ ma byung ba dang yang dag par ma byung ba dang log pa dang de dag ji ltar byis pa so so'i skye bo'i brtags pa de lta ma yin pa dang / ji ltar byis pa so so'i skye bos rnyed pa de lta ma yin pa ste/ de'i phyir byang chub sems dpa' zhes bya'o//de ci'i phyir zhe na/ byang chub ni rnam par ma brtags pa'o/ /byang chub ni ma bsgrubs pa'o/ /byang chub ni dmigs pa med pa'o/ /rab kyi rtsal gyis rnam par gnon pa/ de bzhin gshegs pas ni byang chub brnyes pa med de/ chos thams cad ma rnyed pa'i phyir ro//chos thams cad ma dmigs pa'i phyir byang chub ces bya ste/ de lta bu ni sangs rgyas kyi byang chub ces bya'i / ji skad brjod pa ni ma yin no/ /rab kyi rtsal gyis rnam par gnon pa/ gang dag byang chub tu sems bskyed cing sems 'di byang chub tu sems bskyed par bya'o//gang du bdag cag gis sems bskyed par bya ba'i byang chub de ni yod do zhes byang chub tu rlom sems su byed pa de dag ni byang chub sems dpa' zhes mi bya'o/ /de dag ni skye bar sems dpa' zhes bya'o/ /de ci'i phyir zhe na/ 'di ltar skye ba la mngon par zhen/ sems su mngon par zhen/byang chub tu mngon par zhen/ zhes bya ba la sogs pa gsungs pa lta bu'o/ /yang byang chub ni mtshan nyid med pa ste/ mtshan nyid kyi rang bzhin dang bral ba'o/ /gang gis 'di ltar rjes su rtogs pa de ni byang chub ces bya'i/ yang ji skad brjod pa ni ma yin no/ /rab kyi rtsal gyis rnam par gnon pa chos de rnams rtogs pa'i phyir byang chub sems dpa' zhes bya'o//rab kyi rtsal gyis rnam par gnon pa gang la la zhig chos 'di ma shes shing rjes su ma rtogs bzhin du bdag nyid la byang chub sems dpa' byang chub sems dpa'o snyam du shes pa de ni byang chub sems dpa'i sa las ring ba yin zhing /de ni byang chub sems dpa'i chos rnams las ring ba yin no/ /de bzhin du de ni byang chub sems dpa'i ming gis lha dang mi dang lha ma yin gyi 'jig rten bslu ba yin no/ /rab kyi rtsal gyis rnam par gnon pa 'di tshig tsam gyis byang chub sems dpar 'gyur na ni/de bas na sems can thams cad kyang byang chub sems dpar 'gyur na/ rab kyi rtsal gyis rnam par gnon pa 'di ni gang gi las tsam ma yin te/ 'di lta ste/ byang chub sems dpa'i sa'o zhes bya ba la sogs pa gsungs pa yin no/ /ji skad du bshad pa'i byang chub kyi sems thob pa ni gnas skabs der byang chub sems dpa'i sgra kho nas brjod pa 'ba' zhig tu ma zad kyi/gzhan yang / 'di ni de bzhin gshegs pa rnams kyi rigs su'ang skyes pa ste/ /'di yi kun du sbyor ba gsum po thams cad spangs par gyur/ /byang chub sems dpa' de ni dga' ba mchog tu gyur 'chang zhing //'jig rten khams brgya kun nas g.yo bar nus par gyur pa'ang yin/ /so so'i skye bo dang / nyan thos dang rang sangs rgyas kyi sa thams cad las 'das pa'i phyir dang / de bzhin gshegs pa'i sa kun du 'od ces bya ba'i rjes su 'gro ba'i lam skyes pa'i phyir na byang chub sems dpa' de de bzhin gshegs pa'i rigs su skyes pa yin no//de'i tshe gang zag gi bdag med pa mngon sum du mthong bas 'di ni 'jig tshogs la lta ba dang the tshom dang tshul khrims dang brtul zhugs mchog tu 'dzin pa zhes bya ba kun du sbyor ba gsum dang yang bral ba yin te/ slar mi skye ba'i phyir ro//de kho na nyid ma mthong ba ni bdag tu sgro btags pa las 'jig tshogs su lta bar 'gyur zhing / de bzhin du the tshom gyis de lam gzhan du'ang 'gro ba srid pa zhig na gzhan ni ma yin no/ /nges pa la zhugs pas de'i rgyu can gyi yon tan thob pa dang / sa'i mi mthun pa'i phyogs kyi skyon dang bral bas thun mong ma yin pa'i dga' ba'i khyad par skyes pas rab tu dga' ba mang ba nyid kyi phyir na byang chub sems dpa' de ni dga' ba mchog tu gyur pa srel ba yang yin no//rab tu dga' ba khyad par 'phags pa yod pa'i phyir na sa 'dis ni rab tu dga' ba zhes bya ba'i ming yang rnyed par 'gyur ro//'jig rten gyi khams brgya bskyod par yang nus so/ /sa nas sar gnon byed cing gong bar rab tu 'gro bar 'gyur/ /de tshe 'di yi ngan 'gro'i lam rnams mtha' dag 'gags par gyur / /de tshe 'di yi so so'i skye bo'i sa rnams thams cad zad/ / 'di ni 'phags pa brgyad pa ji lta de ltar nye bar bstan/ /zhes bya ba la 'di ni ji ltar khong du chud pa'i chos la goms pa'i phyir dang / sa gnyis pa la sogs pa la gnon pa la spro ba che ba'i phyir sa nas sar gnon pa na gong du rab tu 'gro bar 'gyur ro/ /mdor na ji ltar 'phags pa rgyun du zhugs pa la rang dang rjes su mthun pa'i 'phags pa'i chos rtogs pa las skyon dang bral zhing /yon tan 'byung bar gyur pa de bzhin du byang chub sems dpa' 'di la yang sa rtogs pa las rang dang 'tsham pa'i yon tan 'byung ba dang / skyon zad par rgyun du zhugs pa'i dpe'i sgo nas yongs su gsal bar byas pa yin no//byang chub sems dpa' 'di/ rdzogs pa'i byang chub sems lta dang po la gnas kyang / /thub dbang gsung skyes dang bcas rang sangs rgyas rnams ni/ /bsod nams dag gi dbang gis pham byas rnam par 'phel/ /zhes bya ba gang yin pa 'di ni khyad par gzhan yin te/ji skad du 'phags pa byams pa'i rnam par thar pa las/ rigs kyi bu 'di lta ste/ dper na rgyal po'i bu skyes nas ring por ma lon pa rgyal po'i mtshan dang ldan pa ni blon po'i tshogs rgan po gtso bor gyur pa thams cad kyang rigs kyi bdag nyid che ba'i dbang gis zil gyis gnon to//de bzhin du byang chub sems dpa' las dang po pa byang chub tu sems bskyed nas ring por ma lon pa/ de bzhin gshegs pa chos kyi rgyal po'i rigs su skyes pas kyang byang chub kyi sems dang / snying rje'i dbang gis nyan thos dang rang sangs rgyas yun ring du tshangs par spyad pa rnams zil gyis gnon to//rigs kyi bu 'di lta ste/ dper na nam mkha' lding gi dbang po chen po'i phru gu skyes nas ring por ma lon pa'i gshog pa'i rlung gi shugs dang / mig yongs su dag pa'i yon tan gang yin pa de ni de las gzhan pa'i bya'i tshogs ma lus pa rgas par gyur pa thams cad la yod pa ma yin no//de bzhin du byang chub sems dpa' byang chub tu sems dang po bskyed pa/ de bzhin gshegs pa nam mkha' lding gi dbang po chen po'i rigs kyi rgyud du yang dag par byung ba nam mkha' lding gi dbang po chen po'i phru gu thams cad mkhyen pa nyid du sems bskyed pa'i gshog pa'i stobs kyis pha rol gnon pa dang /lhag pa'i bsam pa yongs su dag pa'i mig gi yon tan gang yin pa de ni bskal pa brgya stong du nges par 'byung ba'i nyan thos dang / rang sangs rgyas thams cad la yod pa ma yin no zhes pa la sogs pa gsungs pa lta bu'o//de ni ring du song bar blo yang lhag par 'gyur/ /'phags pa sa bcu pa las kyang / kye rgyal ba'i sras dag 'di lta ste/ dper na rgyal po'i rigs su skyes pa'i rgyal po'i bu rgyal po'i mtshan dang ldan pa ni skyes pa tsam gyis rgyal po'i byin gyis blon po'i tshogs thams cad zil gyis gnon gyi/rang gi blo'i stobs kyis rnam par dpyad pas ni ma yin no/ /nam de nar son par gyur pa de'i tshe rang gi blo'i stobs bskyed pas blon po'i bya ba thams cad las shin tu 'das pa yin no/ /kye rgyal ba'i sras dag de bzhin du byang chub sems dpa' yang sems bskyed ma thag tu lhag pa'i bsam pa'i che ba nyid kyis nyan thos dang rang sangs rgyas thams cad zil gyis gnon gyi/rang gi blo'i stobs kyis rnam par dpyad pas ni ma yin no/ /byang chub sems dpa'i sa bdun pa 'di la gnas pa'i byang chub sems dpa' ni rang gi yul shes pa'i che ba la gnas pas nyan thos dang rang sangs rgyas kyi bya ba thams cad las shin tu 'das pa yin no zhes ji skad gsungs pa lta bu'o//de'i phyir de ltar na ring du song ba kho na nas bzung nas ni byang chub sems dpas rang gi blo'i stobs bskyed pas kyang nyan thos dang rang sangs rgyas dag zil gyis gnon par 'gyur gyi/sa 'og ma rnams su ni ma yin no zhes bya bar shes par bya'o/ /lung 'di las ni nyan thos dang rang sangs rgyas rnams la yang chos thams cad rang bzhin med par shes pa yang yod do zhes bya bar gsal bar nges te/ de ltar ma yin na dngos po rang bzhin med par yongs su shes pa dang bral ba'i phyir//'jig rten pa'i 'dod chags dang bral ba ltar de dag kyang sems dang po bskyed pa'i byang chub sems dpas kyang rang gi blos rnam par dpyad pas kyang zil gyis gnon par 'gyur la/ phyi rol pa bzhin du 'di dag gis khams gsum na spyod pa'i phra rgyas thams cad spangs par yang mi 'gyur ro//gzugs la sogs pa'i rang gi ngo bo la dmigs pas phyin ci log tu gyur pa'i phyir gang zag gi bdag med par rtogs par yang mi 'gyur te/ bdag tu gdags pa'i rgyu phung po la dmigs pa'i phyir ro//ji skad du rin po che'i phreng ba las/ ji srid phung por 'dzin yod pa/ /de srid de la ngar 'dzin nyid/ /ngar 'dzin yod na yang las te/ /de las yang ni skye ba yi / /lam gsum thog mtha' dbus med pa/ /'khor ba'i dkyil 'khor mgal me yi/ /dkyil 'khor lta bu phan tshun gyi//rgyu can 'di ni 'khor bar 'gyur/ /de ni rang gzhan gnyis ka dang / /dus gsum nyid du'ang ma thob phyir/ /ngar 'dzin pa ni zad par 'gyur/ /de nas las dang skye ba dang / /zhes gsungs so/ /yang ji ltar mig ni 'khrul pa yis/ /mgal me'i 'khor lo 'dzin byed pa//de bzhin dbang po rnams kyis ni/ /de lta'i yul dag 'dzin par byed/ /dbang po dang ni dbang don rnams/ /'byung ba lnga yi rang bzhin 'dod/ /'byung ba so sor don med pas/ /'di dag don du don med do/ /'byung rnams so sor tha dad na/ /bud shing med pa'i mer thal 'gyur//'dus na mtshan nyid med 'gyur te/ /lhag ma la yang de ltar nges/ /de ltar 'byung rnams rnam gnyis su'ang / /don med pas na 'dus don med/ /'dus pa don med nyid kyi phyir/ /gzugs kyang don du don med do/ /rnam shes tshor dang 'du shes dang / /'du byed rnams kyang thams cad du//so sor bdag nyid don med phyir/ /dam pa'i don du don med do/ /ji ltar sdug bsngal phyir bcos la/ /don du bde bar nga rgyal byed/ /de bzhin bde 'joms byung ba la/ /sdug bsngal du yang nga rgyal byed/ /de ltar ngo bo nyid med phyir/ /bde dang phrad pa'i sred pa dang / / sdug bsngal bral ba'i sred pa spong / /de phyir de ltar mthong ba grol/ /gang gis mthong bar 'gyur zhe na/ /tha snyad du ni sems la brjod/ /sems 'byung med par sems med de/ /don med phyir na yod mi 'dod/ /de ltar yang dag ji bzhin du/ /'gro ba'i don med shes nas ni/ /rgyu med pa yi me bzhin du//gnas med len med mya ngan 'da'/ /zhes gsungs so/ /ci ste byang chub sems dpa' rnams kho nas de ltar rang bzhin med par mthong ba yin no zhe na/ de yang yod pa ma yin te/ nyan thos dang rang sangs rgyas rnams kyi dbang du byas nas de skad du gsungs pa'i phyir ro//'di ji ltar shes she na/ brjod par bya ste/ mjug thogs kho nar byang chub sems dpa' rnams kyi dbang du mdzad nas/ de ltar byang chub sems dpas kyang / /mthong nas byang chub nges par 'dod/ /'on kyang de ni snying rje yis/ /byang chub bar du srid mtshams sbyor//zhes bya ba la sogs pa gsungs pa'i phyir ro/ /nyan thos la bstan pa'i mdo dag las kyang / nyan thos rnams kyi nyon mongs pa'i sgrib pa spang bar bya ba'i phyir/ gzugs ni dbu ba rdos pa 'dra/ /tshor ba chu yi chu bur bzhin/ /'du shes smig rgyu lta bu ste/ /'du byed rnams ni chu shing bzhin//rnam par shes pa sgyu ma ltar/ /nyi ma'i gnyen gyis bka' stsal to/ /zhes bya ba la sogs pas dbu ba rdos pa dang / chu yi chu bur dang / smig rgyu'i chu dang / chu shing gi phung po dang sgyu ma la sogs pa'i dpe dag gis 'du byed rnams nges par dpyad pa yin no/ / don 'di nyid ston par mdzad pa ni/ slob dpon gyi zhal snga nas kyis/ theg pa che las skye med bstan/ /gzhan gyi zad pa stong pa nyid/ /zad dang mi skye don du ni/ /gcig pa de phyir bzod par gyis/ /zhes bya ba dang / de bzhin du/ bcom ldan dngos dang dngos med pa/ /mkhyen pas kA t+yA ya na yi//gdams ngag las ni yod pa dang / /med pa gnyis ka gdags pa mdzad/ /ces gsungs so/ /gang zhig gal te nyan thos kyi theg pa las kyang chos la bdag med pa bstan na de'i tshe theg pa chen po bstan pa don med par 'gyur ro snyam du sems pa de'i lugs de yang 'di ltar rigs pa dang lung dang 'gal bar rtogs so//theg pa chen po bstan pas ni chos la bdag med pa tsam 'ba' zhig ston par byed pa ma yin gyi/ /'o na ci zhe na/ byang chub sems dpa' rnams kyi sa dang pha rol tu phyin pa dang / smon lam dang snying rje chen po la sogs pa dang yongs su bsngo ba dang tshogs gnyis dang bsam gyis mi khyab pa'i chos nyid kyang yin no//ji skad du rin po che'i phreng ba las/ nyan thos theg pa de las ni/ /byang chub sems dpa'i smon lam dang / /spyod pa yongs bsngo ma bshad des / /byang chub sems dpar ga la 'gyur//byang chub spyod la gnas pa'i don/ /mdo sde las ni bka' ma stsal/ /theg pa che las bka' stsal pa/ /de phyir mkhas pa rnams kyis gzung / /zhes gsungs so/ /chos kyi bdag med pa gsal bar bya ba'i phyir theg pa chen po bstan pa yang rigs pa nyid de/rgyas par bstan pa brjod par 'dod pa'i phyir ro/ /nyan thos kyi theg pa las ni chos kyi bdag med pa mdor mtshon pa tsam zhig tu zad do/ /ji skad du slob dpon gyi zhal snga nas kyis/ mtshan ma med pa ma rtogs par/ /khyod kyis thar pa med par gsungs/ / de phyir khyod kyis theg chen las/ /de ni tshang bar bstan pa lags/ /zhes gsungs so/ /zhar la 'ongs pas chog go/ /de nyid kyi phyir blo ma dkrugs pa rnams kyis rang nyid kyi don gyi de kho na nyid khong du chud par nus pas dkyus ma nyid brjod par bya'o/ /de tshe de la rdzogs sangs byang chub rgyur //dang po sbyin pa nyid ni lhag par 'gyur/ /byang chub sems dpa' sa rab tu dga' ba thob pa de la/ sbyin pa dang tshul khrims dang bzod pa dang brtson 'grus dang bsam gtan dang shes rab dang / thabs dang smon lam dang / stobs dang ye shes zhes bya ba bcu po dag las sbyin pa'i pha rol tu phyin pa kho nas ches lhag par yod par 'gyur te/de las gzhan rnams med pa ni ma yin no/ /sbyin pa de yang rnam pa thams cad mkhyen pa nyid kyi rgyu dang po yin no/ /rang sha ster la'ang gus par byas pa yi/ /snang du mi rung dpog pa'i rgyur yang gyur/ /de'i tshe byang chub sems dpa' de'i yon tan snang rung ma yin pas rtogs pa la sogs pa gang dag yin pa de dag kyang phyi dang nang gi bdag nyid kyi dngos po stong pa'i khyad par gyi rjes su dpag pa nyid las gsal bar dpog par byed pa yin te/du ba la sogs pa las me la sogs pa dag bzhin no//ji ltar byang chub sems dpa' rnams kyi sbyin pa sangs rgyas nyid kyi rgyu dang po dang / mngon sum ma yin pa'i yon tan nges pa'i rtags yin pa de bzhin du/ so so'i skye bo dang nyan thos dang rang sangs rgyas rnams kyi yang sdug bsngal phyir bcos pa dang / gtan du ba'i bde ba thob pa'i rgyu yin no zhes bstan par 'dod pas/skye bo 'di kun bde ba mngon 'dod cing / /mi rnams bde ba'ang longs spyod med min la/ /longs spyod kyang ni sbyin las 'byung mkhyen nas/ /thub pas dang por sbyin pa'i gtam mdzad do/ /zhes bya ba smos pa la/ bkres pa dang skom pa dang nad dang grang ba la sogs pa'i gnyen po/sdug bsngal phyir bcos pa tsam srid pa'i bde ba 'byung ba'i rgyu 'ching ba phyin ci log tsam gyis bdag nyid kyi rgyun nye bar brtags pas/ nye bar 'tshe ba bsal ba bde ba'i bdag nyid ma yin pa nyid la 'jig rten shin tu ches mngon par zhen la/de lta bu'i bde ba mngon par 'dod pa de'i bde ba sdug bsngal phyir bcos pa tsam gyi rang bzhin gang yin pa de ni/ mngon par 'dod pa'i yul longs spyod sdug bsngal gyi gnyen por gyur pa/ phyin ci log gi bdag nyid can longs spyad pa med par skye bar ma dmigs so/ /sdug bsngal phyir bcos pa'i rgyur gyur pa'i yul de dag kyang sbyin pa las byung ba'i bsod nams bya ba'i dngos po ma bsags pa rnams la mi 'byung ngo snyam du mkhyen nas/bcom ldan 'das 'gro ba ma lus pa'i bsam pa'i rang bzhin mkhyen pas tshul khrims la sogs pa'i gtam rnams pas ches thog mar sbyin pa'i gtam nyid mdzad do//da ni stong pa po'i sems can tshul dang mi mthun pa yin du zin kyang / rang gi bya ba dang rjes su mthun pas sbyin pa'i bdag nyid chen po brjod par bya ba'i phyir/ snying rje dman zhing shin tu rtsub sems can/ /rang don lhur len nyid du gyur pa gang //de dag gi yang 'dod pa'i longs spyod rnams/ /sdug bsngal nyer zhi'i rgyur gyur sbyin las byung / zhes bya ba smos te / gang dag tshong pa bzhin du nor ches nyung ngu btang ba las 'bras bu nor gyi phung po ches yangs pa 'dod pa don du gnyer ba bas kyang lhag par don du gnyer bar gyur cing sbyin par 'dod par gus kyi/bde bar gshegs pa'i sras rnams ltar snying rje'i gzhan gyi dbang gis sbyin pa'i 'bras bu don du mi gnyer ba kho nar sbyin par 'dod pa'i dga' ston mngon par 'phel bar mi byed pa de dag la yang / sbyin pa'i skyon 'dzin pa la rgyab kyis phyogs pa yon tan tsam 'dzin pa la g.yer bag thob pa des/longs spyod phul du byung ba phun sum tshogs pa'i sgo nas lus kyi sdug bsngal yid du mi 'ong ba bkres pa dang skom pa la sogs pa 'joms par byed pas sdug bsngal nye bar zhi ba'i rgyur 'gyur ro/ /gang zhig snying rje dang bral bas rang gi sdug bsngal phyir bcos pa la ltos pa nyid kyis sbyin par 'dod par gus pa 'di yang /'di yang sbyin pa'i skabs kyis nam zhig tshe/ /'phags pa'i skye ba dang phrad myur du 'thob/ /de nas srid rgyun yang dag bcad byas te/ /de yi rgyu can zhi bar 'gro bar 'gyur/ /zhes bya ba smos so//sbyin bdag gtong ba po'i thad du dam pa dag gis bgrod pa yin no zhes 'byung ba'i phyir/ sbyin pa la lhag par mos pa ni/ sbyin pa'i skabs kyis 'phags pa'i skye bo dang phrad pas des nye bar bstan pa las 'khor ba la yon tan med par rig cing / 'phags pa'i lam dri ma med pa mngon du byas pas sdug bsngal nye bar zhi ba'i ma rig pa spangs nas/'khor ba'i rgyun skye ba dang 'chi ba gcig nas gcig tu brgyud pa thog ma med pa'i dus nas 'jug pa dor te/ nyan thos dang rang sangs rgyas kyi theg pas yongs su mya ngan las 'da' bar 'gyur ro/ / de lta na re zhig byang chub sems dpa' ma yin pa rnams kyi sbyin pa 'khor ba dang mya ngan las 'das pa'i bde ba thob pa'i rgyu yin no/ /'gro ba phan par dam bcas yid can rnams/ /sbyin pas ring por mi thogs dga' ba thob / /byang chub sems dpa' ma yin pa rnams ni sbyin pa dang dus mnyam du ji skad bshad pa'i sbyin pa'i 'bras bu nges par longs spyod pa ma yin te/des na de rnams ni sbyin pa'i 'bras bu mngon sum pa ma yin pa nyid kyi phyir sbyin pa la mi 'jug pa yang srid na/ byang chub sems dpa' rnams ni sbyin pa dang dus mnyam pa kho nar don du gnyer ba'i yid yongs su tshim par byas pa las/mngon par 'dod pa'i sbyin pa'i 'bras bu phun sum tshogs pa mchog tu dga' ba 'chang zhing / de nyid du sbyin pa'i 'bras bu nye bar longs spyod do/ /de'i phyir dus thams cad kyi tshe sbyin pa la dga' bar 'gyur ro/ /de'i phyir de ltar ji skad bshad pa'i tshul gyis/gang phyir brtse bdag brtse bdag ma yin pa/ /thams cad kyi mngon par mtho ba dang nges par legs pa'i rgyu sbyin pa yin pa/ de phyir sbyin pa'i gtam nyid rtsa ba yin/ /gang las de rnams dus rtag tu sbyin pa la gus par 'gyur ba/ don du gnyer ba rnams longs spyod kyis rnam par 'ged pa'i sgo nas yid tshim par byed pa na/byang chub sems dpa' rnams la dga' ba'i khyad par skye ba ko ci 'dra ba zhig ce na/ brjod par bya ste/ ji ltar byin cig ces sgra thos bsams las/ /rgyal sras bde 'byung de ltar thub rnams la / /zhi bar zhugs pas bde ba byin min na//thams cad btang bas lta zhig smos ci dgos/ /re zhig don du gnyer ba rnams kyis byin cig ces bya ba'i sgra thos pa nyid sems par byed pa na/ byang chub sems dpa' rnams la 'di dag ni bdag la slong ba zhig go snyam du rtogs nas yang nas yang du bde ba 'byung ba gang yin pa de nyid je mya ngan las 'das pa'i bde ba bas kyang phul du byung ba dang bcas pa yin na/phyi dang nang gi dngos po btang bas/ don du gnyer ba'i skye bo tshim par byed pa rnams kyi lta ci smos/ yang ci gang las de skad brjod pa phyi dang nang gi dngos po gtong ba'i byang chub sems dpa' rnams la lus kyi sdug bsngal yang mi 'byung ngam zhe na/bshad pa/ bdag nyid chen po rnams la ni sems med pa rnams bcad pa ltar lus kyi sdug bsngal 'byung ba mi srid pa nyid de/ 'phags pa nam mkha' mdzod kyi ting nge 'dzin las/ 'di lta ste/ dper na shing sA la chen po'i tshal zhig yod la/der 'ga' zhig 'ongs nas sA la gcig bcad pa na/ der shing sA la lhag ma de rnams 'di snyam du 'di ni bcad pa'o/ /bdag cag ni ma bcad pa'o snyam du mi sems shing / de dag la rjes su chags pa dang khong khro ba med do/ /rtog pa dang /rnam par rtog pa med do/ /byang chub sems dpa'i bzod pa de lta bu gang yin pa de ni bzod pa yongs su dag pa mchog nam mkha' dang mnyam pa yin no zhes ji skad gsungs pa lta bu'o/ /rin po che'i phreng ba las kyang / de la lus kyi sdug bsngal med/ /yid kyi sdug bsngal ga la yod//de ni snying rjes 'jig rten sdug /de nyid kyis ni yun ring gnas/ /zhes gsungs so/ /yang chags pa med pa'i gnas skabs ma thob pa gang zhig la lus gnas pa dang 'gal ba'i yul yang dag par babs pas lus kyi sdug bsngal gdon mi za bar 'byung ba de'i tshe de yang sems can gyi don bya ba dag la ches lhag par 'jug pa'i rgyu nyid du gnas pa yin no zhes bshad pa ni/lus bcad ster zhing bdag gi sdug bsngal gyis/ /gzhan dag rnams kyi dmyal ba la sogs pa'i/ /sdug bsngal rang rig nyid du mthong nas de/ /de gcad bya phyir myur du brtson 'grus rtsom//zhes bya ba ste/ byang chub sems dpa' ni sdug bsngal can dmyal ba dang / dud 'gro'i skye gnas dang / gshin rje'i 'jig rten la sogs pa'i 'gro ba mi bzad par chud pa bar mtshams med par sdug bsngal ches drag pas lus 'joms pa/ rang gi lus gcod pa'i sdug bsngal bas stong 'gyur bas kyang ches lhag par 'phel ba'i sdug bsngal bsran du med pa dang ldan pa dag la rang gi sdug bsngal myong ba nyid du lta ba na rang gi lus gcod pa'i sdug bsngal la/rtsis med par byas nas sems can rnams kyi dmyal ba la sogs pa'i sdug bsngal gcod par bya ba'i phyir ches myur du brtson 'grus rtsom mo//ji skad bshad pa'i sbyin pa la pha rol tu phyin pa'i rnam par dbye ba bstan pa'i phyir/ sbyin pa sbyin bya len po gtong pos stong / /'jig rten 'das pa'i pha rol phyin zhes bya/ /zhes bya ba smos te/ de la pha rol zhes bya ba ni gang 'khor ba'i rgya mtsho'i phar 'gram dang ngogs te/nyon mongs pa dang shes bya'i sgrib pa ma lus pa spangs pa'i rang bzhin mnga' ba'i sangs rgyas nyid do/ /pha rol du son pa ni pha rol tu phyin pa'o zhes bya ste/ tshig phyi ma yod na mi mngon par mi bya'o zhes bya ba'i mtshan nyid 'dis las kyi rnam par dbye ba mi mngon par ma byas pas gzugs su 'gyur ba'am/pre Sho da ra la sogs pa yin pa'i phyir phyi ma'i mtha' can nyid du bzhag go/ /shes rab bzung nas bye brag tu bshad pa yin te/ sbyin pa la sogs pa rnams ni pha rol tu phyin pa dang 'dra bas pha rol tu phyin pa yin no/ /yongs su bsngo ba'i khyad par gyis pha rol tu 'gro ba la nges par gzhag nas ni sbyin pas pha rol tu phyin pa'i ming rnyed par 'gyur ro//tshul khrims la sogs pa 'chad par 'gyur ba dag kyang de bzhin du rig par bya'o/ /pha rol tu phyin pa zhes bya ba'i sbyin pa 'di yang sbyin par bya ba dang / len pa po dang / sbyin pa por dmigs par bya ba dang bral bar gyur na/'jig rten las 'das pa'i pha rol tu phyin pa yin no/ /zhes bcom ldan 'das ma shes rab kyi pha rol tu phyin pa las gsungs te/ mi dmigs pa ni 'jig rten las 'das pa'i phyir la/ dmigs pa ni tha snyad kyi bden pas bsdus pa nyid kyi phyir 'jig rten pa nyid yin pa'i phyir ro//de ni byang chub sems dpa'i gnas skabs ma thob pa dag gis shes par mi nus so/ /gzhan yang / gsum po dag la chags skyes gyur pas de/ /'jig rten pa yi pha rol phyin zhes bstan/ /sbyin pa de nyid gsum du dmigs pa yod na 'jig rten pa'i pha rol tu phyin pa zhes bya bar bsnyad do//da ni ji skad brjod pa'i sa zhes bya ba shes pa'i khyad par gyi phul du byung ba'i yon tan rjes su brjod pa'i sgo nas bstan pa'i phyir/ de ltar rgyal ba'i sras kyi yid la rab gnas shing / /dam pa'i rten la 'od chags mdzes pa rnyed gyur pa'i/ /dga' ba 'di ni nor bu chu shel ji bzhin du//mun pa stug po thams cad rnam par bsal nas rgyal/ /zhes bya ba smos so/ /de ltar gyi sgra ni ji skad bshad pa'i rnam pa bstan par bya ba'i phyir ro/ /dga' ba zhes bya ba ni sa'i ming yang dag par sgrogs pa'o/ /rgyal zhes bya ba ni mi mthun pa'i phyogs pham par byas nas gnas so zhes bya ba'i don to//de ni shes pa'i rang bzhin yin pa nyid kyis rgyal ba'i sras kyi yid la gnas pa'i phyir mthon por gnas pa yin te/ sa rab tu dga' ba ni ji skad bshad pa'i tshul gyis mun pa stug po thams cad kyang rnam par bsal te rgyal bar 'gyur ro//ji skad bshad pa'i don nyid dpes gsal bar bya ba'i phyir smras pa ni/ nor bu chu shel ji bzhin du zhes bya ba'o/ /dbu ma la 'jug pa'i bshad pa las rab tu dga' ba zhes bya ba sems bskyed pa dang po'o// // byang chub sems dpa'i sems bskyed pa dang po bshad zin to// // da ni gnyis pa'i dbang du byas nas/ de tshul phun tshogs yon tan dag ldan phyir/ /rmi lam du yang 'chal khrims dri ma spangs/ /zhes bya ba smos te/ sa zhes bya ba shes pa'i khyad par thams cad ni rang bzhin gcig pa nyid kyi phyir/ de med na mi 'byung ba'i yon tan tshul khrims kyi pha rol tu phyin pa la sogs pa phul du byung ba nyid las sems bskyed pa gnyis pa la sogs pa'i khyad par ston par byed do//de la nyon mongs pa dang du mi len pa'i phyir dang / sdig pa mi 'byung ba'i phyir sems yid la gcags pa'i me zhi bas bsil ba nyid kyi phyir ram/bde ba'i rgyu yin pa nyid kyis dam pa dag gis bsten par bya ba nyid kyi phyir na tshul khrims te de yang spong ba bdun gyi mtshan nyid can no/ /chos gsum po ma chags pa dang zhe sdang med pa dang yang dag pa'i lta ba ni de dag kun nas slong bar byed pa yin te/ de'i phyir kun nas slong bar byed pa dang bcas pa'i tshul khrims kyi dbang du byas nas las kyi lam bcur rnam par bshad do//tshul khrims phun sum tshogs pa ni tshul khrims rab tu gyur pa'o/ /yon tan rnam par dag pa ni yon tan dag pa ste/ tshul khrims phun sum tshogs pa yongs su dag pa zhes bya bar tshig rnam par sbyar ro//rang gi yon tan yongs su dag pa nyid kyi phyir tshul khrims nyid khyad par du 'phags pa yin no/ /de dang ldan pa'i phyir byang chub sems dpa' de ni rmi lam gyi gnas skabs su yang tshul khrims 'chal ba'i dri ma dag gis mi gos pa'o/ /yang ji ltar na de de ltar tshul khrims phun sum tshogs pas yon tan yongs su dag par 'gyur zhe na/'di ltar byang chub sems dpa' byang chub sems dpa'i sa gnyis pa la rab tu gnas pa 'di ni/ lus ngag yid kyi rgyu ba dag gyur pas/ /dam pa'i las lam bcu char sogs par byed/ / ji skad du byang chub sems dpa'i sa gnyis pa las/ kye rgyal ba'i sras dag byang chub sems dpa'i sa dri ma med pa la gnas pa'i byang chub sems dpa' ni rang bzhin gyis srog gcod pa spangs pa yin te/ dbyig pa spangs/ mtshon cha spangs/ 'khon du 'dzin pa spangs nas/ 'dzem pa dang ldan zhing snying rje la zhugs pas/de srog chags 'byung po thams cad la phan pa dang / bde ba dang / snying brtse ba dang / byams pa'i sems dang ldan te/ de kun du rtog pa tsam gyis kyang / srog chags la rnam par 'tshe bar mi byed na/ sems can gzhan la sems can du 'du shes shing ched du bsams te/lus kyi mtho 'tshams pa chen po bya ba lta ci smos/ ma byin par len pa spangs pa yang yin te/ bdag gi longs spyod kyis chog shes shing snying brtse ba dang ldan te/ gzhan gyi longs spyod la bag byed pas de gzhan gyis yongs su bzung ba'i dngos po dag la gzhan gyis bzung bar 'du shes shing /rku sems nye bar gzhag ste tha na rtswa dang lo ma tsam yang ma byin par mi len na/ 'tsho ba'i yo byad gzhan dag lta ci smos/ 'dod pa la log par g.yem pa spangs pa yang yin te/ bdag gi chung mas chog shes shing / gzhan gyi chung ma la 'dod pa med pas/de gzhan gyis bzung ba'i bud med gzhan gyi chung ma dang / rus dang / mtshan dang / chos kyis bsrungs pa rnams la chags sems kyang mi bskyed na/ yan lag ma yin pa'i rnam par rig byed dam/ gnyis kyi dbang po gnyis sprod pa lta ci smos/ brdzun du smra ba spangs pa yang yin te/bden par smra zhing yang dag par smra la/ dus su smra ste/ ji skad smras pa de bzhin byed pa'o/ /de tha na rmi lam na yang lta ba dang bzod pa dang 'dod pa dang rab tu rtog pa bsgyur te/ bslu ba'i bsam pas brdzun gyi tshig mi smra na/ ched du bsams te smra ba lta ci smos/phra ma'i tshig spangs pa yin te/ sems can rnams la dbyen mi byed cing / rnam par mi 'tshe ba la zhugs pas/ des de dag dbye ba'i phyir tshu gi las thos nas pha gir snyod pa ma yin te/ de dag dbye ba'i phyir pha gi las thos nas tshu gir snyod pa ma yin te/ 'dum pa rnams mi 'byed cing /bye ba rnams la yang mi gnon te/ mi 'dum pa la dga' zhing mi 'dum pa la mos pa ma yin pas / bden nam brdzun yang mi 'dum par bya ba'i tshig mi smra'o/ /tshig rtsub mo spangs pa yin te/ zher 'debs pa dang / brlang pa dang / gzhan la gnod pa dang /gzhan gyi mtshang 'bru ba dang / grong mi'i tshig dang / ma rabs kyi tshig ngor brjod pa dang / ngor brjod par gzhol ba dang / brdzun dang rnar mi snyan pa dang / khro zhing gshe ba las byung ba dang / mi snyan pa dang / yid du mi 'ong bas snying na bar byed pa dang /yid gdung bar byed pa dang / rang gi sems kyi rgyud dang / gzhan gyi sems kyi rgyud ma rungs par byed pa'i tshig rnam pa de lta bu spangs te/ gang 'di mnyen pa dang / 'jam pa dang / yid du 'ong ba dang / brdzun du ma yin pa dang / rnar snyan pa dang / snying du sdug pa dang / grong khyer pa dang /skye bo mang po'i snying du sdug pa dang / skye bo mang po'i yid du 'ong ba dang / yid dga' bar byed pa dang / yid tshim par byed pa dang / rang gi sems kyi rgyud dang / gzhan gyi sems kyi rgyud dang bar byed pa'i tshig rnam pa de lta bu dag brjod do/ /tshig 'khyal pa spangs pa yin te/ lan legs par glon pa'i tshig dang /dus su smra ba dang / yang dag par smra ba dang / don smra ba dang / chos smra ba dang / rigs par smra ba dang / dul bar smra ba dang / bzod pa dang ldan pa dang / dus dang rmed dang bcas pa'i tshig smra ba yin te/ de tha na bzhad gad du bya ba'i yongs su spang bar bya ba yang yongs su spong na/tshig gis rnam par g.yeng ba lta ci smos/ brnab sems med pa yang yin te/ de gzhan gyi nor dang / gzhan gyi 'dod pa dang / gzhan gyi rdzas dang / yo byad gzhan gyis yongs su bzung ba la/ brnab sems mi bskyed la/ chags par mi byed la/ mi smon te/ chags pa'i sems mi bskyed do/ /gnod sems med pa yang yin te/ sems can thams cad la byams pa'i sems dang / phan pa'i sems dang / snying rje'i sems dang / bde ba'i sems dang / 'jam pa'i sems dang / skye bo thams cad la phan gdags pa'i sems dang ldan pas khong khro ba dang /'khon du 'dzin pa dang / tha ba dang / dri ma dang / gnod sems dang / khong khro ba sngon du 'gro ba gang dag yin pa de dag spangs te/ byams pa dang ldan pa gang dag yin pa de dag rtog pa yin no/ /log par lta ba spangs pa yang yin te/ yang dag par lta bar gyur la yang dag pa'i lam la gnas shing / dge mtshan dang bkra shis rnam pa sna tshogs dang / tshul khrims ngan pa'i lta ba can dang bral ba yin te/ lta ba drang zhing g.yo med la sgyu med pas/ sangs rgyas dang / chos dang dge 'dun la bsam pa nges pa yin no zhes bya ba la sogs pa gsungs pa lta bu'o//de la dge ba'i las kyi lam dang po gsum ni lus kyis rdzogs par byed do/ /bar gyi bzhi ni ngag gis so/ /tha ma gsum ni yid kyis so/ /de ltar na dge ba'i las lam bcu char yang sog par byed pa yin no/ /yang ci las kyi lam 'di rnams sems dang po bskyed pa'i byang chub sems dpas mi sog gam zhe na/des kyang sog mod kyi 'on kyang / dge ba'i lam 'di lta zhig bcu char yang / /de la klags te shin tu dag par 'gyur/ /de ltar byang chub sems dpa' sems dang po bskyed pa la ni ma yin no/ /ston ka'i zla ltar rtag tu rnam dag ste//zhi 'od chags par de dag gis rnam mdzes/ /zhi ba ni dbang po bsdams pa'o/ /'od chags pa ni lham mer gsal ba'i lus can nyid do/ /de ltar tshul khrims yongs su dag pa yin yang / gal te de ni khrims dag rang bzhin lta/ /de phyir de ni tshul khrims dag mi 'gyur//ji skad du/ 'phags pa dkon mchog brtsegs pa'i mdo las/ 'od srungs 'di la dge slong kha cig tshul khrims dang ldan pa yin te/ so sor thar pa'i sdom pas bsdams shing gnas/ cho ga dang spyod yul phun sum tshogs pa kha na ma tho ba phra rab rnams la yang 'jig par lta ba /yang dag par blangs te bslab pa'i gzhi rnams la slob cing lus dang ngag dang yid kyi las yongs su dag pa dang ldan par gyur pas 'tsho ba yongs su dag kyang bdag tu smra ba yin te/ 'od srungs de ni tshul khrims 'chal pa/ tshul khrims dang ldan pa ltar bcos pa dang po zhes bya ba nas/'od srungs gzhan yang 'di la dge slong kha cig sbyangs pa'i yon tan bcu gnyis yang dag par blangs kyang / dmigs par lta ba yin te/ ngar 'dzin pa dang nga yir 'dzin pa la gnas pa de ni/ 'od srungs tshul khrims 'chal pa tshul khrims dang ldan pa ltar bcos pa bzhi pa ste/zhes bya ba'i bar du gsungs so/ /de phyir de ni rtag tu gsum char la'ang / /gnyis blo'i rgyu ba yang dag bral bar 'gyur/ /sems can gang dag la spong bar byed pa dang gang zhig byed pa dang gang gis byed pa de gsum car la'ang dngos po dang dngos po med pa la sogs pa gnyis kyi blo dang bral bar 'gyur ro//de ltar re zhig byang chub sems dpa' rnams tshul khrims phun sum tshogs pa dang ldan par brjod nas/ de'i 'og tu spyir de las gzhan pa rnams kyi tshul khrims phun sum tshogs pa yang sbyin pa la sogs pa dag las kyang shin tu che ba nyid dang /yon tan phun sum tshogs pa thams cad kyi rten nyid du gyur par bstan pa'i phyir/ sbyin pas longs spyod dag ni 'gro ngan na'ang / /skye bo tshul khrims rkang pa nyams la 'byung / /zhes bya ba smos te/ sbyin pa gang kho na las sbyin bdag tshul khrims dang ldan par gyur pa de la/lha dang mi dag gi nang du khyad par du 'phags pa'i longs spyod phun sum tshogs pa 'byung ba de nyid tshul khrims kyi rkang pa dang bral ba las ngan 'gro'i 'gro bar ltung ba nyi tshe ba'i sems can dmyal ba dang ba lang dang / rta dang / glang po che dang / spre'u dang / klu la sogs pa dang / yi dags rdzu 'phrul chen po can la sogs pa rnams su skyes pa de la longs spyod phun sum tshogs pa sna tshogs 'byung ba kho nar 'gyur te/ de'i phyir/ bskyed bcas dngos 'du yongs su zad pas na/ /phyin chad de la longs spyod 'byung mi 'gyur/ / gang zhig sa bon ches nyung ngu btab nas 'bras bu rgya chen po 'byung ba rnyed cing slar yang 'bras bu'i ched du de bas kyang ches mang po'i sa bon 'debs par byed pa de la ni 'bras bu'i tshogs chen po dus ji lta ba bzhin du nye bar 'phel bas rim pa rnam par chad pa med pa yong srid kyi/ byas pa chud gson pa'i tshul can gang zhig blun pa nyid kyis sngar gyi sa bon tsam yang nye bar longs spyod pa de la ni skyed dang lhan cig tu dngos po 'du ba yang zad pa'i phyir/'byung bar 'gyur ba'i 'bras bu phun sum tshogs pa skye ba lta ga la yod/ de bzhin du tshul khrims dang bral ba'i phyir gnas ma yin par longs spyod nye bar longs spyod pa la yang shin tu blun pas snga na med pa'i 'phen pa dang bral ba'i phyir dang /sngar 'phangs pa ma lus par nye bar longs spyod pa'i phyir phyis longs spyod dag 'byung ba mi srid par 'gyur ro/ /tshul khrims kyi rkang pa dang bral ba 'di'i longs spyod 'byung ba rdzogs pa shin tu rnyed par dka' ba 'ga' zhig tu ma zad kyi/ngan 'gror song bas ngan 'gro las ldang ba yang shin tu rnyed par dka'o zhes bya bar bstan pa'i phyir/ gang tshe rang dbang 'jug cing mthun gnas pas/ /gal te 'di bdag 'dzin par mi byed na/ /g.yang sar lhung bas gzhan dbang 'jug 'gyur ba//de la phyi nas gang gis slong bar 'gyur/ /zhes bya ba smos te/ gal te 'di de'i tshe/ dpa' bo mthun pa'i yul na gnas pa'i 'ching ba las grol ba ltar 'dod pas gzhan la rag ma las par 'jug cing / lha dang mi la sogs pa'i 'gro bar gnas pa na/bdag nyid 'dzin par mi byed na/ dpa' bo bcings nas ri sul ches chen por bskyur ba ltar/ ngan 'gror song ba de phyi nas gang gis 'don par 'gyur/ des na gnod par bya ba'i phyir ngan 'gro kho nar nges par 'gyur ro/ /de nyid kyi phyir de nas gal te mi rnams kyi nang du skyes na yang rnam par smin pa gnyis mngon par sgrub ste zhes gsungs so//gang gi phyir de ltar tshul khrims 'chal pa nyes pa'i tshogs shin tu mang po'i gnas su gyur pa/ de phyir rgyal bas sbyin pa'i gtam mdzad nas/ /tshul khrims rjes 'gro'i gtam nyid mdzad pa yin/ / de nyid kyi phyir sdig pa'i chos mtha' dag pham par mdzad pa'i rgyal bas sbyin pa la sogs pa'i yon tan chud mi za bar bya ba'i phyir/ sbyin pa'i gtam gyi dus kyi mjug thogs su tshul khrims kyi gtam kho na mdzad do/ /gang gi phyir/ yon tan tshul khrims zhing du rnam 'phel na/ / 'bras bu nyer spyod chad pa med par 'gyur/ /yon tan thams cad kyi rten du gyur pa'i phyir/ tshul khrims nyid kyi zhing ngo / /der sbyin pa la sogs pa'i yon tan rnams rnam par 'phel ba na/ rgyu dang 'bras bu brgyud pa gong nas gong du rim pa rnam par ma chad pa'i sgo nas 'bras bu'i tshogs nye bar 'phel zhing /dus ring por nye bar longs spyad par nus kyi/ gzhan du ni ma yin no/ /de'i phyir tshul 'dis/ so so'i skye bo rnams dang gsung skyes dang / /rang byang chub la bdag nyid nges rnams dang / /rgyal sras rnams kyi nges par legs pa dang / / mngon mtho'i rgyu ni tshul khrims las gzhan med/ /ji skad du mi dge ba bcu'i las kyi lam 'di dag bsten pa dang / mang du byas pa'i shas che bas ni sems can dmyal ba'i rgyur 'gyur ro/ /'bring gis ni dud 'gro'i skye gnas kyi rgyur 'gyur ro/ /chung ngus ni gshin rje'i 'jig rten gyi rgyur 'gyur ro//de la srog gcod pas ni sems can dmyal bar khrid do/ /dud 'gro'i skye gnas su khrid do/ /gshin rje'i 'jig rten du khrid do/ /de nas gal te mi rnams kyi nang du skyes na yang rnam par smin pa gnyis mngon par sgrub ste/ tshe thung ba dang / nad mang bar 'gyur ro/ / ma byin par len pas ni sems can dmyal bar khrid do zhes bya ba nas longs spyod chung ba dang / thun mong gi longs spyod du 'gyur ba'o zhes bya ba'i bar dang / 'dod pas log par g.yem pas ni sems can dmyal bar khrid do zhes bya ba nas/ 'khor g.yog brtan du mi rung ba dang / dgra zla dang bcas pa'i chung mar 'gyur ba'o zhes bya ba'i bar dang / brdzun du smra bas ni sems can dmyal bar khrid do zhes bya ba nas/ skur pa mang ba dang / gzhan gyis bslu bar 'gyur ba'o zhes bya ba'i bar dang / phra mas ni sems can dmyal bar khrid do zhes bya ba nas/ 'khor g.yog mi 'dum pa dang /'khor g.yog ngan par 'gyur ro zhes bya ba'i bar dang / tshig rtsub mos ni sems can dmyal bar khrid do zhes bya ba nas/ yid du mi 'ong ba thos pa dang 'thab mo'i tshig tu 'gyur ba'o zhes bya ba'i bar dang tshig 'khyal bas ni sems can dmyal bar khrid do zhes bya ba nas/gzung bar 'os pa'i tshig ma yin pa dang / ma nges pa'i spobs par 'gyur ba'o zhes bya ba'i bar dang / brnab sems kyis ni sems can dmyal bar khrid do zhes bya ba nas/ chog mi shes pa dang / 'dod pa che bar 'gyur ro zhes bya ba'i bar dang / gnod sems kyis ni sems can dmyal bar khrid do zhes bya ba nas/phan pa mi tshol ba dang / gzhan gyis gnod pa byas bar 'gyur ro zhes bya ba'i bar dang / log par lta bas ni sems can dmyal bar khrid do/ /dud 'gro'i skye gnas su khrid do/ /gshin rje'i 'jig rten du khrid do/ /de nas gal te mi rnams kyi nang du skyes na yang /rnam par smin pa gnyis mngon par sgrub ste/ lta ba ngan par ltung ba dang / g.yo sgyu can du 'gyur ro/ /de ltar mi dge ba bcu'i las kyi lam 'di dag ni sdug bsngal gyi phung po chen po tshad med pa sdud par 'gyur gyis/ dge ba bcu'i las kyi lam yang dag par blangs pa'i rgyus ni lha dang mir skye ba la sogs pa srid pa'i rtse mo'i bar du skye ba yod par 'gyur ro//de'i gong du dge ba bcu'i las kyi lam 'di dag nyi tshe ba'i sems dang / khams gsum pas skrag pa'i yid dang / snying rje chen po med pa dang / gzhan las thos pa'i rjes su 'gro ste sgra'i rjes su 'brang bar shes rab kyi rnam pas yongs su bsgoms na/nyan thos kyi theg pa yongs su 'grub par byed do/ /de'i gong du gzhan gyi dring mi 'jog pa dang / rang mngon par rdzogs par 'tshang rgya ba dang / snying rje chen po dang / thabs mkhas pa med pa dang /rkyen nyid 'di pa zab mo khong du chud pas yongs su sbyangs na/ rang sangs rgyas kyi theg pa 'grub par byed do/ /de'i gong du shin tu rgya che zhing tshad med pa'i snying brtse ba dang / snying rje dang ldan pa dang / thabs la mkhas pas bsdus pa dang / smon lam chen po shin tu btab pa dang /sems can thams cad yongs su mi gtong ba dang / sangs rgyas kyi ye shes shin tu rgyas pa la dmigs pas yongs su sbyangs na/ byang chub sems dpa'i sa yongs su dag pa dang / pha rol tu phyin pa yongs su dag pa'i spyod pa rgya chen po 'grub par byed do zhes rgya cher gsungs pa lta bu'o//de'i phyir tshul 'dis dge ba bcu'i las kyi lam de dag ma gtogs par so so'i skye bo dang / nyan thos dang / rang sangs rgyas dang / byang chub sems dpa' rnams kyi ci rigs par mngon par mtho ba'i 'khor ba'i bde ba dang / nges par legs pa bde ba yang ma yin sdug bsngal ba yang ma yin pa'i rang bzhin thar pa'i mtshan nyid can thob pa'i thabs gzhan yod pa ma yin no zhes bya bar gsal bar bstan par 'gyur ro//gang sems bskyed pa gnyis pa'i byang chub sems dpa' de ni/ ji ltar rgya mtsho ro dang lhan cig dang //bkra shis sna nag ma dang lhan cig bzhin/ /de ltar tshul khrims dbang byas bdag nyid che/ /de 'chal ba dang lhan cig gnas mi 'dod do/ /sna nag ma zhes bya ba ni/ bkra mi shis pa'i rnam grangs so/ /ji skad bshad pa'i tshul khrims la pha rol tu phyin pa'i rnam par dbye ba bshad pa ni/gang gis gang zhig gang la spong byed pa/ /gsum du dmigs pa yod na tshul khrims de/ /'jig rten pa yi pha rol phyin zhes bshad/ /tshul khrims de ni gsum du dmigs pa yod na 'jig rten pa'i pha rol tu phyin pa'o zhes bstan to/ /gsum la chags pas stong de 'jig rten 'das//tshul khrims de nyid ji skad bshad pa'i gsum por dmigs pa med na ni 'jig rten las 'das pa'i pha rol tu phyin pa'o zhes bshad do/ /ji skad bshad pa'i sa'i yon tan rjes su brjod pa'i sgo nas tshul khrims kyi pha rol tu phyin pa'i skabs yongs su rdzogs par 'chad pa ni/rgyal sras zla ba las byung srid min srid pa yi/ /dpal gyur dri ma dang bral dri ma med 'di yang / /ston ka'i dus kyi zla ba'i 'od ni ji bzhin du/ /'gro ba'i yid kyi gdung ba sel bar byed pa yin/ /zhes bya ba'o / /dri ma med pa zhes bya ba ni/ dge ba bcu'i las kyi lam gyis dri ma med pa'i phyir te/byang chub sems dpa'i sa gnyis pa'i don dang mthun pa'i ming ngo / /ji ltar ston ka'i zla ba'i 'od dri ma dang bral ba skye bo'i gdung ba sel bar byed pa de bzhin du rgyal ba'i sras kyi zla ba las byung ba'i dri ma med pa 'di yang 'chal pa'i tshul khrims kyis bskyed pa'i yid kyi gdung ba sel bar byed pa yin no//'di ni 'khor ba'i khongs su ma gtogs pas srid pa ma yin yang srid pa'i dpal te/ yon tan phun sum tshogs pa thams cad de'i rjes su 'gro ba'i phyir dang / gling bzhi'i dbang phyug phun sum tshogs pa'i rgyu yin pa'i phyir ro//dbu ma la 'jug pa'i bshad pa las sems bskyed pa gnyis pa'o// //da ni sems bskyed pa gsum pa'i dbang du byas nas/ shes bya'i bud shing ma lus sreg pa'i me/ /'od 'byung phyir na sa ni gsum pa 'di/ /'od byed pa ste zhes bya ba smos so/ /'od byed pa ste zhes bya ba ni byang chub sems dpa'i sa gsum pa'i ming ngo //yang 'di ci'i phyir 'od byed pa yin zhe na/ don dang mthun pa nyid ston par byed do / /de'i tshe shes bya'i bud shing ma lus pa sreg pa'i ye shes kyi me zhi ba'i bdag nyid can gyi 'od 'byung ba'i phyir sa 'di la 'od byed pa zhes bshad do//sems gsum pa bskyed pa'i/ bde gshegs sras de la/ de tshe nyi ltar zangs 'dra'i snang ba 'byung / /ji ltar nyi ma shar ba'i gnas skabs kyi snga rol du zangs lta bu'i snang ba 'byung ba ltar/ de bzhin du byang chub sems dpa' la yang der ye shes kyi snang ba 'byung ngo / /ye shes kyi snang ba de lta bu rnyed pa'i byang chub sems dpa' de la/bzod pa'i pha rol tu phyin pa lhag pa nyid du bstan pa'i phyir/ gal te gnas min 'khrugs pa 'ga' yis de'i/ /lus las sha ni rus bcas yun ring du/ /srang re re nas bcad par gyur kyang de'i/ /bzod pa gcod par byed la lhag par skye//zhes bya ba smos so/ /byang chub sems dpa' ni gzhan gyi sems rjes su bsrung ba nyid kyi phyir dang / de lta bu'i ye shes yod pa'i phyir/ gang gis gzhan dag gi mnar sems kyi gzhi dus gsum gyi don ma yin pa dogs pa can du 'gyur ba de lta bu'i rang bzhin gyi lus dang ngag dang yid 'jug par mngon du byed pa ma yin te/de'i phyir na/ gal te gnas min 'khrugs pa 'ga' yis de'i/ /zhes khyad par du byas so/ /gal te rnam pa de lta bu'i sems can gyis byang chub sems dpa' de'i lus las sha rus pa dang bcas pa srang re re nas sdod cing sdod cing yun ring por gcod kyang /rnam pa de lta bu'i gcod par byed pa po la sems khong nas 'khrugs pa nyid du mi 'gyur ba 'ba' zhig tu ma zad kyi/ sdig pa'i las de'i rkyen can dmyal ba'i sdug bsngal la sogs pa la lhag par dmigs pa'i byang chub sems dpa' la ches lhag par bzod pa nyid skye bar 'gyur ro//gzhan yang / bdag med mthong ba'i byang chub sems dpa' la/ /gang zhig gang gis gang tshe ji ltar gcod/ /gang phyir chos kyang de yi gzugs brnyan ltar/ /mthong ba des na de yis bzod par 'gyur/ /sdig pa'i las de'i rkyen can dmyal ba la sogs pa'i sdug bsngal la lhag par dmigs nas ches lhag par bzod par 'gyur ba 'ba' zhig tu ma zad kyi/gang gi phyir des chos rnams kyang gzugs brnyan dang 'dra bar mthong zhing / bdag dang bdag gi ba'i 'du byed dang bral ba 'di'i phyir yang ches shin tu bzod pa nyid do //kyang gi sgras ni bzod pa'i rgyu bsdu bar bya ba'i phyir ro/ /bzod pa 'di byang chub sems dpa' rnams kyi 'tsham pa'i chos yin pa 'ba' zhig tu ma zad kyi/ de las gzhan pa rnams kyi yon tan mtha' dag bsrung ba'i rgyu yang yin pas mi bzod pa dang ldan pa ltar khro ba las ldog par rig par 'chad pa ni/gnod pa byas pas gal te der bkon na/ /de la bkon pas byas zin ldog gam ci/ /de phyir de bkon nges par 'dir don med/ /'jig rten pha rol yang ni 'gal bar 'gyur/ /zhes bya ba ste/ gal te re zhig khong 'khrugs pa'i skabs ster ba 'di gnod pa byas pa gzhan la khro na de'i tshe gnod pa byas zin pa bzlog tu med pa'i phyir/de la dmigs pa'i zhe 'kham pa don med pa nyid do / /rgyu byas zin pa'i phyir ro/ /'di'i bkon pa dang lta dgos pa med pa 'ba' zhig tu ma zad kyi/ 'jig rten pha rol dang yang 'gal bar 'gyur te/khong khro ba skyes pa yin dang rnam par smin pa yid du mi 'ong ba 'phen pa'i phyir ro/ /gang zhig rang gis nyes par spyad pa byas pa'i 'bras bu'i khyad par nye bar spyod pa bzhin du gti mug pas gzhan gyis bdag la gnod pa de byas so snyam du rtog pa de la ni gnod pa byed pa la khro ba nye bar skye la/lan du gnod pa bskyal bas de'i gnod pa pham par 'dod pa gang yin pa de yang bzlog par bya ba'i phyir bshad pa/ sngon byas pa'i mi dge ba'i las kyi 'bras bu gang / /zad par byed par brjod par 'dod pa de nyid ko/ /gzhan la gnod pa dang ni khro bas sdug bsngal phyir/ / sa bon nyid du ji lta bur na khrid par byed/ /gang zhig mtshon cha rnon po'i so babs pas/ /de la lus la gnod pa'i sdug bsngal ches che ba sgra dag gis nye bar bsgrubs pa de ni/ 'bras bu 'byung ba tha ma srog gcod pa'i las sngon byas pa sems can dmyal ba dang / dud 'gro'i skye gnas dang /gshin rje'i 'jig rten la sogs pa'i rnam par smin pa'i 'bras bu drag pa nyams su myong bar gyur cing / rgyu dang 'bras bu nyon mongs pa lhag mar lus pa can rnams kyi 'bras bu yid du mi 'ong ba ma lus pa ldog pa'i rgyu gang yin pa ste/ de ji ltar slar yang rnam par 'gyur bas sman gyi btung ba tha ma khong na yod pa'i nad gso ba'i rgyu ltar khong nas 'khrug pa dang /gzhan la gnod pa dag gis 'bras bu yid du mi 'ong ba 'das zin pa bas kyang ches lhag par gnod par byed pa'i 'bras bu 'byung ba'i rgyu nyid du bkri bar 'gyur/ de'i phyir des sman pa nad gso bar byed pa'i rgyur gyur pa gtsags cha rnon po'i las byed pa la bya ba ltar/'bras bu sdug bsngal 'byung ba'i rgyu la ches shin tu bzod par rigs so/ /mi bzod pa ni ji skad bshad pa'i tshul gyis rnam par smin pa yid du mi 'ong ba spangs pa 'phen pa'i rgyu yin pa 'ba' zhig tu ma zad kyi/ yun ring du bsags pa'i bsod nams kyi tshogs zad pa'i rgyu yang yin no zhes bstan pa'i phyir/gang phyir rgyal sras rnams la khro ba yis/ /sbyin dang khrims 'byung dge ba bskal pa brgyar/ /bsags pa skad cig gis 'joms de yi phyir/ /mi bzod las gzhan sdig pa yod ma yin/ /zhes bya ba smos te/gal te byang chub sems dpa' bdag nyid chen po des gang zag gi khyad par du nges pa dang bral ba'i phyir la/ nges pa yin du zin kyang nyon mongs pa goms pa la rag las nas 'jug pa nyid kyi phyir byang chub tu sems bskyed pa rnams la bden par gyur pa dang / bden par 'gyur ba ma yin pa'i nyes pa lhag par sgro btags nas khong khro ba'i bsam pa skad cig tsam zhig bskyed na yang /de tsam gyis kyang bskal pa brgyar bsags pa'i bsod nams kyi tshogs sngar bstan pa'i sbyin pa dang / tshul khrims kyi pha rol tu phyin pa goms pa las bskyed pa 'joms par 'gyur na/byang chub sems dpa' ma yin pas byang chub sems dpa' rnams la bskyed pa lta ci smos te/ de'i phyir rgya mtsho chen po'i chu'i tshad srang grangs kyis nges par mi nus pa ltar/ der rnam par smin pa'i mtshams nges par mi nus so/ /de'i phyir de ltar na 'bras bu yid du mi 'ong ba 'phen pa dang /dge ba la gnod pa byed pa'i sdig pa ni mi bzod pa las gzhan mchog tu gyur pa yod pa ma yin no/ de skad du yang / 'jam dpal khong khro ba khong khro ba zhes bya ba ni/ bskal pa brgyar bsags pa'i dge ba nye bar 'joms par byed pa de'i phyir khong khro ba khong khro ba zhes bya'o zhes gsungs so//gzhan yang mi bzod pa gzhan la gnod par byed mi nus pa rnams kyis ni bdag nyid kho na 'joms par byed la/ nus pa snying rje med pa rnams kyis ni bdag dang gzhan 'joms par byed pa 'di ni skyes pa nyid kyis/ mi sdug gzugs su byed cing dam pa min par dkri //tshul dang tshul min shes pa'i rnam dpyod 'phrog byed cing / /dus phyis rigs mthun pa btang nas/ mi bzod pa yis myur du ngan 'gror skyur bar byed/ /gal te mi bzod pa'i skyon de dag yin na de dang 'gal ba bzod pa'i yon tan ci yin zhe na/ bshad pa/ bzod pas bshad zin dang 'gal yon tan rnams byed do/ /bzod pas mdzes shing skye bo dam pa la/ /phangs dang lugs dang lugs min shes pa la/ /mkhas par gyur zhing de yi 'og tu ni/ /lha mi'i skye dang sdig pa zad par 'gyur/ /mi bzod pa la skyon gang dag bstan pa de dag dang 'gal ba'i yon tan de dag bzod pa la rig par bya'o//de'i phyir de ltar/ so so'i skye bo dang ni rgyal sras kyis/ /khro dang bzod pa'i skyon yon rig byas te/ /mi bzod spangs nas 'phags pa'i skye bo yis/ /bsngags pa'i bzod pa rtag tu myur bsten bya//khro ba dang bzod pa ni khro ba dang bzod pa'o/ /skyon dang yon tan ni skyon dang yon tan te/ khro ba dang bzod pa dag gi skyon dang yon tan gnyis zhes bya ba'i tshig rnam par sbyar ro/ /khro ba'i skyon ni ji skad bshad pa dang bzlog pa'i sgo nas bzod pa'i yon tan khong du chud par byas te/mi bzod pa spangs nas dus thams cad du bzod pa kho na bsten par bya ba yin no/ /de ni bzod pa la pha rol tu phyin pa'i rnam par dbye ba bstan pa'i phyir/ rdzogs sangs rgyas kyi byang chub phyir bsngos kyang / /gsum dmigs yod na de ni 'jig rten pa'o/ /sangs rgyas nyid du yongs su bsngos su zin kyang /gang bzod pa dang / gang gis bzod pa dang / sems can gang dag la bzod pa gsum po 'di la dmigs pa yod na/ bzod pa de ni 'jig rten pa'i bzod pa'i pha rol tu phyin pa zhes bya'o/ /dmigs pa med na de nyid sangs rgyas kyis/ /'jig rten 'das pa'i pha rol phyin zhes bstan//sa de la byang chub sems dpa'i bzod pa'i pha rol tu phyin pa rnam par dag par ji ltar 'gyur ba de bzhin du/ sa der rgyal sras bsam gtan mngon shes dang / /'dod chags zhe sdang yongs su zad par gyur / /des kyang rtag tu 'jig rten pa yi ni/ /'dod pa'i 'dod chags 'joms par nus par 'gyur//bsam gtan zhes bya ba'i bsam gtan gyi sgra ni nye bar mtshon pa'i don te/ snyoms par 'jug pa dang tshad med pa rnams kyang 'dzin pa yin no/ /ji skad du byang chub sems dpa'i sa gsum pa las gsungs pa bzhin te/ byang chub sems dpa'i sa 'od byed pa 'di la gnas pa'i byang chub sems dpa' de ni/'dod pa rnams las dben pa/ sdig pa mi dge ba'i chos rnams las dben pa/ rtog pa dang bcas pa dpyod pa dang bcas pa dben pa las skyes pa'i dga' ba dang bde ba can bsam gtan dang po bsgrubs te gnas so/ /de rtog pa dang dpyod pa dang bral zhing nang yongs su dang ste/sems kyi rgyud gcig tu gyur pas rtog pa med pa dpyod pa med pa ting nge 'dzin las skyes pa'i dga' ba dang bde ba can bsam gtan gnyis pa bsgrubs te gnas so/ /de dga' ba'i 'dod chags dang bral bas btang snyoms la gnas shing dran pa dang shes bzhin can yin te/bde ba lus kyis myong la 'phags pa rnams kyis gang de dran pa dang ldan pa bde ba la gnas pa btang snyoms pa'o zhes brjod pa ste/ dga' ba med pa'i bsam gtan gsum pa bsgrubs te gnas so/ /de bde ba yang spangs te snga nas sdug bsngal yang spangs shing yid bde ba dang yid mi bde ba yang nub pas/bde ba yang ma yin sdug bsngal ba yang ma yin pa btang snyoms dang dran pa yongs su dag pa bsam gtan bzhi pa bsgrubs te gnas so zhes bya ba de dag ni bsam gtan bzhi pa'o / /gzugs med pa'i snyoms par 'jug pa bzhi ni/'di lta ste/ de rnam pa thams cad du gzugs kyi 'du shes las yang dag par 'das te/ thogs pa'i 'du shes rnams nub par gyur cing / sna tshogs kyi 'du shes yid la mi byed pas nam mkha' mtha' yas so snyam nas nam mkha' mtha' yas skye mched bsgrubs te gnas so//de rnam pa thams cad du nam mkha' mtha' yas skye mched las yang dag par 'das te/ rnam par shes pa mtha' yas so snyam nas rnam shes mtha' yas skye mched bsgrubs te gnas so/ /de rnam pa thams cad du rnam shes mtha' yas skye mched las yang dag par 'das te/ci yang med do snyam nas ci yang med pa'i skye mched bsgrubs te gnas so/ /de rnam pa thams cad du ci yang med pa'i skye mched las yang dag par 'das te/ 'du shes med 'du shes med pa yang ma yin no snyam ste 'du shes med 'du shes med min skye mched bsgrubs te gnas so zhes bya ste/'di dag ni gzugs med pa'i snyoms par 'jug pa bzhi'o/ /tshad med pa bzhi ni 'di lta ste/ byams pa dang ldan pa'i sems yangs pa rgya chen por gyur pa/ mi gnyis pa/ tshad med pa/ 'khon med pa/ 'gran zla med pa/ sgrib pa med pa/gnod pa med pa thams cad du khyab pas chos kyi dbyings kyis klas pa/ nam mkha'i khams kyi mthas gtugs pa thams cad dang ldan pa'i 'jig rten khyab par byas nas bsgrubs te gnas so/ /de bzhin du snying rje dang ldan pa dang / dga' ba dang ldan pa dang / btang snyoms dang ldan pa'i sems yongs pa zhes bya ba ni snga ma bzhin no//mngon par shes pa lnga ni 'di lta ste/ de rdzu 'phrul bya ba rnam pa du ma myong bar byed des yang g.yo bar byed do/ /gcig tu gyur nas mang por 'gyur ro/ /mang por gyur nas gcig tu 'gyur ro/ /snang bar 'gyur zhing mi snang bar 'gyur ro//rtsig pa la yang thad kar 'gro/ /ra ba la yang thad kar 'gro/ ri la yang mi thogs par thad kar 'gro ste dper na nam mkha' la bya ba bzhin no/ /nam mkha' la yang skyil mo krung gis 'gro ste dper na 'dab chags bya bzhin no/ /sa la yang steng du 'byung ba dang byi'u 'dzul byed de/dper na chu la bya ba bzhin no/ /chu la yang mi nub par 'gro ste/ dper na sa la bya ba bzhin no/ /du ba 'thul bar yang byed 'bar bar yang byed de/ dper na me'i phung po chen po bzhin no/ /bdag gi lus la chu'i rgyun chen po 'phyin te/ dper na/ sprin chen po bzhin no/ /chu'i rgyun de dag gis kyang stong gsum gyi stong chen po'i 'jig rten gyi khams 'di kun tu 'bar zhing rab tu 'bar la/kun tu rab tu mched cing 'bar te me lce gcig tu gyur pa zhi bar byed do/ /zla ba dang nyi ma 'di ltar rdzu 'phrul che ba 'di ltar mthu che ba 'di gnyis la yang lag pas 'dzin zhing kun du nyug par byed do//tshangs pa'i 'jig rten gyi bar du yang lus kyis dbang bsgyur ro zhes bya ba 'di ni rdzu 'phrul gyi mngon par shes pa'o/ /de lha'i rna ba'i khams rnam par dag pa mi las 'das pas lha dang mi gnyis ka'i sgra yang thos so/ /phra ba dang rgya che ba dang gang dag ring yang rung nye yang rung /tha na sbrang bu dang / sha sbrang dang / bung ba dang / srin bu rnams kyi sgra yang thos so/ /'di ni lha'i rna ba'i mngon par shes pa'o/ /de sems can gzhan dag dang gang zag gzhan rnams kyi sems dang sems kyi yang dag pa ji lta ba bzhin du rab tu shes te/ 'dod chags dang bcas pa'i sems la yang 'dod chags dang bcas pa'i sems su yang dag pa ji lta ba bzhin du rab tu shes so//'dod chags dang bral ba'i sems la yang 'dod chags dang bral ba'i sems su yang dag pa ji lta ba bzhin du rab tu shes so/ /de bzhin du zhe sdang dang bcas pa dang zhe sdang dang bral ba dang /gti mug dang bcas pa dang gti mug dang bral ba dang / nyon mongs pa dang bcas pa dang nyon mongs pa med pa dang / chung ba dang yangs pa dang / chen por gyur pa dang tshad med pa dang / bsdus pa dang rgyas pa dang mnyam par bzhag pa dang mnyam par ma bzhag pa dang /rnam par grol ba dang rnam par ma grol ba dang / skyon can dang skyon med pa dang / sems rags pa la yang sems rags pa'o zhes yang dag pa ji lta ba bzhin du rab tu shes so/ /sems rags pa ma yin pa la yang sems rags pa ma yin pa'o zhes yang dag pa ji lta ba bzhin du rab tu shes so//de ltar na sems can gzhan dag dang gang zag gzhan rnams kyi sems sems kyis yang dag pa ji lta ba bzhin du rab tu shes so zhes bya ba 'di ni gzhan gyi sems shes pa'i mngon par shes pa'o/ /de sngon gyi gnas rnam pa du ma rjes su dran te/ tshe rabs gcig kyang rjes su dran no/ /tshe rabs gnyis dang / gsum dang / bzhi dang / lnga dang / bcu dang / nyi shu dang / sum cu dang / bzhi bcu dang / lnga bcu dang / brgya dang stong yang rjes su dran no/ /tshe rabs brgya phrag du ma dang tshe rabs stong phrag du ma dang / tshe rabs 'bum phrag du ma dang /tshe rabs bye ba 'bum phrag du ma dang / tshe rabs bye ba khrag khrig 'bum phrag du ma dang / 'jig pa'i bskal pa dang / 'chags pa'i bskal pa dang / 'jig pa dang / 'chags pa'i bskal pa du ma yang rjes su dran no/ /bskal pa brgya yang rjes su dran no/ /bskal pa stong yang rjes su dran no//bskal pa 'bum dang / bskal pa bye ba dang / bskal pa bye ba phrag brgya dang / bskal pa bye ba phrag stong dang / bskal pa bye ba phrag 'bum nas bskal pa bye ba khrag khrig 'bum phrag du ma'i bar du rjes su dran no/ /che ge mo zhig na bdag ming ni 'di zhes bya bar gyur/ rus ni 'di zhes bya/ rigs ni 'di zhes bya/ zas ni 'di lta bu zhig za za/ tshe ni 'di tsam zhig thub/ yun ni 'di srid cig gnas gnas/ bde ba dang sdug bsngal ni 'di lta bu zhig myong ngo / /bdag de nas shi 'phos nas che ge mo zhig tu skyes so/ /de nas shi 'phos nas 'dir skyes so zhes rnam pa dang bcas dan rtags dang bcas rgyu mtshan dang bcas par sngon gyi gnas rnam pa du ma rjes su dran no//de ni sngon gyi gnas rjes su dran pa'i mngon par shes pa'o/ /des lha'i mig rnam par dag pa mi las 'das pas sems can 'chi 'pho ba dang skye ba dang mdog sdug pa dang mdog mi sdug pa dang bde bar song ba dang ngan par song ba dang /bzang po dang ngan pa rnams mthong ngo / /las ji lta ba bzhin du nye bar 'gro ba'i sems can rnams yang dag pa ji lta ba bzhin du rab tu shes so/ /kye ma sems can 'di dag ni lus kyi nyes par spyod pa dang ldan pa/ ngag gi nyes par spyod pa dang ldan pa/yid kyi nyes par spyod pa dang ldan pa/ 'phags pa rnams la skur pa 'debs par spyod pa log par lta ba can dag ste/ log par lta ba'i las yang dag par blangs pa'i rgyus lus zhig ste shi ba'i 'og tu ngan song ngan 'gro rnam par ltung ba sems can dmyal ba rnams su skye'o zhes bya ba dang /kye ma sems can 'di dag ni lus kyi legs par spyod pa dang ldan pa/ ngag gi legs par spyod pa dang ldan pa/ yid kyi legs par spyod pa dang ldan pa/ 'phags pa rnams la skur pa mi 'debs pa yang dag par lta ba can dag ste/ yang dag par lta ba'i las yang dag par blangs pa'i rgyus lus zhig ste shi ba'i 'og tu bde 'gro mtho ris kyi 'jig rten du lha rnams kyi nang du skye'o zhes bya bar rab tu shes te/de ltar na lha'i mig rnam par dag pa mi las 'das pas sems can 'chi 'pho ba dang skye ba dang mdog sdug pa dang mdog mi sdug pa dang zhes bya ba nas thams cad rnam pa dang bcas dan rtags dang bcas/rgyu mtshan dang bcas par mthong ste/ las ji lta ba bzhin du nye bar 'gro ba'i sems can dag kyang rab tu shes so/ /de bsam gtan dang rnam par thar pa dang ting nge 'dzin dang / snyoms par 'jug pa 'di dag la snyoms par 'jug cing rnam par ldang yang /gang dag byang chub kyi yan lag yongs su rdzogs par 'gyur bar mthong ba der ched du bsams te smon lam btab pa'i dbang gis skyes pa ma gtogs par de dag gi dbang gis mi skye'o/ /de ci'i phyir zhe na/ 'di ltar byang chub sems dpa' de thabs mkhas pas mngon par bsgrubs pa'i sems kyi rgyud dang ldan pa'i phyir ro zhes bya ba'i bar du 'gyur ro //de ltar na sa 'dir byang chub sems dpa' las bsam gtan dang mngon par shes pa 'byung bar 'gyur ro/ /ci ltar rtag tu 'jig rten gyi 'dod chags dang zhe sdang yongs su zad par 'gyur zhe na/dang gi sgras ni ma smos pa bsdu bar bya ba'i phyir te de'i gti mug kyang yongs su zad par 'gyur ro/ /ci ltar zhe na/ 'di yang mdo ji lta ba bzhin te/ ji skad du des chos thams cad rkyen la rton pa nyid yin pas 'pho ba med pa nyid dang / rnam par 'jig pa med pa nyid du rtogs pas de bas kyang shas cher 'dod pa'i 'ching ba thams cad bsrabs par 'gyur ro//gzugs kyi 'ching ba thams cad dang srid pa'i 'ching ba dang ma rig pa'i 'ching ba bsrabs par 'gyur ro/ /de'i lta bar gyur pa'i 'ching ba rnams ni snga nas spangs pa yin no/ / byang chub sems dpa'i sa 'od byed pa 'di la gnas pa byang chub sems dpa' de ni bskal pa brgya phrag du ma dang bskal pa stong phrag du ma dang / bskal pa 'bum phrag du ma dang / bskal pa bye ba phrag du ma nas bskal pa khrag khrig 'bum phrag du mar log pa'i 'dod chags 'grib par bya ba ma yin pa spong bar 'gyur ro//log pa'i zhe sdang 'grib par bya ba ma yin pa spong bar 'gyur ro/ /log pa'i gti mug 'grib par bya ba ma yin pa spong bar 'gyur ro zhes gsungs pa lta bu'o/ /de ltar na de'i 'dod chags dang zhe sdang dang gti mug yongs su zad par 'gyur ro/ / de ci ltar rtag tu 'jig rten gyi 'dod pa'i 'dod chags 'joms par nus par 'gyur zhe na/ ji skad du kye rgyal ba'i sras dag 'di ni byang chub sems dpa'i sa gsum pa 'od byed pa zhes bya ba mdor bstan pa'o/ /de la gnas pa'i byang chub sems dpa' ni phal cher lha'i rgyal po lha'i bdag po dbang por gyur te/sems can rnams kyi 'dod pa la 'dod chags rnam par bzlog pa'i thabs bsgrub pa la byang ba dang / gtso bo yin zhing sems can rnams 'dod pa'i 'dam nas 'don pa la mkhas pa yin no zhes gsungs pa lta bu'o/ /de ltar rgyal ba'i sras po de ni 'jig rten gyi 'dod pa'i 'dod chags 'joms par nus par 'gyur ro//de ltar na byang chub sems dpa' 'dis byang chub sems dpa'i sa gsum par/ bzod pa'i pha rol tu phyin pa rnam par dag pa dang bsam gtan dang tshad med pa dang snyoms par 'jug pa dang mngon par shes pa dang 'dod chags la sogs pa yongs su zad pa gdon mi za bar thob par 'gyur ro zhes bstan nas/da ni bzod pa'i pha rol tu phyin pa la thug pa pha rol tu phyin pa gsum gyi rten gyi khyad par dang tshogs kyi rang bzhin dang 'bras bu yongs su grub pa rnam par gzhag pa gsal bar bya ba'i phyir bshad pa/sbyin sogs chos gsum de dag phal mo cher/ /bde bar gshegs pas khyim pa rnams la bsngags/ /bsod nams zhes bya'i tshogs kyang de dag nyid/ /sangs rgyas gzugs kyi bdag nyid sku yi rgyu/ /byang chub sems dpa' rnams kho na ji skad bshad pa'i sbyin pa la sogs pa'i rten yin mod kyi/de lta na yang khyim pa dang rab tu byung ba'i dbye bas de rnams la gnyis srid pa la ltos nas de skad du brjod do/ /de la khyim pa rnams la ni phal cher sbyin pa la sogs pa'i chos gsum po de dag sgrub par sla la/ rab tu byung ba rnams la ni brtson 'grus dang bsam gtan dang shes rab yin te cig shos dag la gcig mi srid pa ni ma yin no//sangs rgyas nyid kyi rgyu'i tshogs ni gnyis yin te/ gang 'di bsod nams kyi tshogs dang ye shes kyi tshogs so/ /de la bsod nams kyi tshogs ni pha rol tu phyin pa gsum po de dag nyid yin la ye shes kyi tshogs ni bsam gtan dang shes rab bo//brtson 'grus ni gnyis ka'i rgyu yin no zhes bya bar rnam par gzhag go/ /de la bsod nams kyi tshogs gang yin pa de ni rdzogs pa'i sangs rgyas bcom ldan 'das rnams kyi gzugs kyi sku bsod nams brgya'i mtshan nyid can rmad du byung zhing bsam gyis mi khyab pa'i gzugs sna tshogs dang ldan pa'i rgyu yin no//chos kyi bdag nyid can gyi sku skye ba med pa'i mtshan nyid can gyi rgyu ni ye shes kyi tshogs yin no/ /da ni rten la sogs pa'i che ba'i bdag nyid kyis bdag nyid che bar brjod nas byang chub sems dpa'i sa gsum pa'i skabs rdzogs par bshad pa/rgyal ba'i sras po nyi ma la gnas 'od byed 'di/ /rang gtogs mun rnams dang po yang dag bsal byas nas/ /'gro ba'i mun pa rnam par 'joms par mngon par 'dod/ /sa 'od byed pa bde bar gshegs pa'i sras kyi nyi ma la gnas pa 'di ni rang gi rten la yod pa'i mi shes pa bdag nyid 'byung ba'i gegs su gyur pa ni skye bzhin pa'i gnas skabs nyid du bsal nas/rnam pa de lta bu nye bar bstan pa las de las gzhan pa rnams kyi sa gsum pa 'byung ba'i gegs byed pa'i mun pa 'joms par 'dod pa yin no//byang chub sems dpa' de ni/ sa 'dir shin tu rno bar gyur kyang khro mi 'gyur/ /de ni nyes pa'i mun pa yon tan 'joms par byed pa bcom pas nyi ma ltar ches rno bar 'jug tu zin kyang skyon dang ldan pa'i skye bo la 'khrug par mi 'gyur te/bzod pa la ches lhag par goms pa'i phyir dang snying rjes rgyud snum par byas pa'i phyir ro/ /dbu ma la 'jug pa'i bshad pa las/ sems bskyed pa gsum pa'o// //da ni sbyin pa dang tshul khrims dang bzod pa'i pha rol tu phyin pa rnams pas brtson 'grus kyi pha rol tu phyin pa lhag par bstan pa'i sgo nas sems bskyed pa bzhi pa'i dbang du byas te bshad pa/yon tan ma lus brtson 'grus rjes 'gro zhing / /bsod nams blo gros tshogs ni gnyis kyi rgyu/ /brtson 'grus gang du 'bar bar 'gyur ba yi/ /sa de bzhi pa 'od ni 'phro ba'o//dge ba'i las la spro ba dang mi ldan pa la ni rnam pa thams cad du sbyin pa la sogs pa dag la 'jug pa med pas yon tan thams cad 'byung ba mi srid la/ sngar nye bar bkod pa'i yon tan bsags pa spros pa dang ldan pa la ni thob pa dang ma thob pa 'phel ba dang thob pa srid pas yon tan yin no cog gi rgyu ni brtson 'grus nyid yin no//tshogs gnyis kyi rgyu nyid du ni gong du bshad zin to/ /brtson 'grus de rang gi yon tan yongs su dag pa'i sgo nas sa gang zhig tu lhag par 'bar ba 'chang ba de ni byang chub sems dpa'i sa bzhi pa 'od 'phro ba zhes bya ba yin no//yang ci'i phyir 'od 'phro ba zhes brjod ce na/ ming 'jug pa'i rgyu mtshan bstan pa'i phyir/ der ni bde gshegs sras la rdzogs pa yi/ /byang chub phyogs lhag bsgoms pa las skyes pa'i/ /snang ba zangs kyi 'od bas lhag 'byung zhes / /zhes bya ba smos te/'di ltar sa 'dir byang chub sems dpa' la byang chub kyi phyogs kyi chos sum cu rtsa bdun bsgoms pa las sngar bshad pa'i zangs kyi snang ba bas lhag pa'i snang ba 'byung bar 'gyur te/ de'i phyir yang dag pa'i ye shes kyi me'i 'od 'byung bas byang chub sems dpa'i sa de la 'od 'phro ba zhes bya ba'o//de la byang chub kyi phyogs kyi chos sum cu rtsa bdun ni 'di lta ste/ dran pa nye bar gzhag pa bzhi dang / yang dag par spong ba bzhi dang / rdzu 'phrul gyi rkang pa bzhi dang / dbang po lnga dang / stobs lnga dang / byang chub kyi yan lag bdun dang / 'phags pa'i lam yan lag brgyad pa zhes bya'o/ /de la dran pa nye bar gzhag pa bzhi ni/ kye rgyal ba'i sras dag byang chub sems dpa'i sa 'od 'phro ba can 'di la gnas pa'i byang chub sems dpa' ni brtun pa can dang shes bzhin dang dran pa dang ldan par gyur nas/ 'jig rten la brnab sems dang yid mi bde ba nyid rnam par spongs te/nang gi lus la lus kyi rjes su lta zhing gnas so/ /brtun pa can dang / shes bzhin dang dran pa dang ldan par gyur nas 'jig rten na brnab sems dang yid mi bde ba nyid rnam par spangs te/ phyi'i lus la lus kyi rjes su lta zhing gnas so//nang dang phyi'i lus la lus kyi rjes su lta zhing gnas so zhes bya ba ni snga ma bzhin no/ /de bzhin du brtun pa can dang shes bzhin dang dran pa dang ldan par gyur nas/ nang gi tshor ba rnams dang / phyi'i tshor ba rnams dang / nang dang phyi'i tshor ba rnams dang /snga ma bzhin du nang gi sems dang / phyi'i sems dang / nang dang phyi'i sems la gnas so zhes bya ba dang / nang gi chos rnams dang / phyi'i chos rnams dang / nang dang phyi'i chos rnams la gnas so zhes bya ba rgyas par gsungs pa lta bu'o/ /yang dag par spong ba bzhi ni 'di lta ste/de sdig pa mi dge ba'i chos ma skyes pa rnams mi bskyed pa'i phyir 'dun pa bskyed do/ /'bad do/ /brtson 'grus rtsom mo/ /sems rab tu 'dzin to/ /yang dag par rab tu 'jog go/ sdig pa mi dge ba'i chos skyes pa rnams spong ba'i phyir zhes bya ba ni snga ma bzhin no//dge ba'i chos ma skyes pa rnams bskyed pa'i phyir zhes bya ba ni snga ma bzhin no/ /dge ba'i chos skyes pa rnams gnas pa dang mi nyams pa dang rgyas par 'gyur ba dang / phyir zhing 'byung ba dang rab tu rdzogs par bya ba'i phyir 'dun pa bskyed do//'bad do zhes bya ba ni snga ma bzhin no/ /rdzu 'phrul gyi rkang pa bzhi ni 'di lta ste/ 'dun pa'i ting nge 'dzin spong ba'i 'du byed dang ldan pa'i rdzu 'phrul gyi rkang pa dben pa la gnas pa/ 'dod chags dang bral ba la gnas pa/ 'gog pa la gnas pa rnam par spong bas yongs su bsgyur ba bsgom mo//de bzhin du brtson 'grus kyi ting nge 'dzin spong ba'i 'du byed dang ldan pa'i rdzu 'phrul gyi rkang pa dang / sems kyi ting nge 'dzin spong ba'i 'du byed dang ldan pa'i rdzu 'phrul gyi rkang pa dang / dpyod pa'i ting nge 'dzin spong ba'i 'du byed dang ldan pa'i rdzu 'phrul gyi rkang pa zhes bya ba yang snga ma bzhin no//dbang po lnga ni 'di lta ste/ dad pa'i dbang po dben pa la gnas pa zhes bya ba dang / de bzhin du brtson 'grus kyi dbang po dang / dran pa'i dbang po dang / ting nge 'dzin gyi dbang po dang / shes rab kyi dbang po dben pa la gnas pa dang /'dod chags dang bral ba la gnas pa zhes bya ba la sogs pa'o/ /stobs lnga ni de dag nyid mi mthun pa'i phyogs pham par byas pa rnams yin te snga ma bzhin no/ /byang chub kyi yan lag bdun ni 'di lta ste/ de dran pa yang dag byang chub kyi yan lag dben pa la gnas pa zhes bya ba la sogs pa ste/de bzhin du chos rab tu rnam par 'byed pa byang chub kyi yan lag dang / de bzhin du brtson 'grus yang dag byang chub kyi yan lag dang / dga' ba yang dag byang chub kyi yan lag dang / shin tu sbyangs pa yang dag byang chub kyi yan lag dang /ting nge 'dzin yang dag byang chub kyi yan lag dang / btang snyoms yang dag byang chub kyi yan lag dben pa la gnas pa zhes bya ba snga ma bzhin no/ /'phags pa'i lam yan lag brgyad pa ni 'di lta ste/ yang dag pa'i lta ba dben pa la gnas pa/'dod chags dang bral ba la gnas pa/ 'gog pa la gnas pa rnam par spong bas yongs su bsgyur ba sgom mo/ /yang dag pa'i rtog pa yang snga ma bzhin no/ /yang dag pa'i ngag dang / yang dag pa'i las kyi mtha' dang / yang dag pa'i 'tsho ba dang / yang dag pa'i rtsol ba dang / yang dag pa'i dran pa dang / yang dag pa'i ting nge 'dzin dben pa la gnas pa zhes bya ba yang snga ma bzhin no/ /sa 'di la byang chub kyi phyogs sgom pa 'byung ba 'ba' zhig tu ma zad kyi/ rang du lta ba dang 'brel yongs su zad/ /sa 'dir de'i rang du lta ba zad par yang 'gyur te/ji skad du/ kye rgyal ba'i sras dag byang chub sems dpa'i sa 'od 'phro ba can 'di la gnas pa'i byang chub sems dpa' de 'jig tshogs la lta ba sngon du 'gro ba'i bdag dang / sems can dang / srog dang / gso ba dang / skyes bu dang / gang zag dang / phung po dang / khams dang / skye mched la mngon par zhen pas kun nas bslang ba'i lhag par g.yo ba dang bral ba rnams dang / rnam par brtags pa rnams dang / rnam par dpyad pa rnams dang / brtan par 'dzin pa rnams dang / bdag gir 'dzin pa rnams dang / nor du 'dzin pa rnams dang / 'jig rten gyi gnas rnams gang yin pa de dag thams cad dang de bral ba yin no zhes gsungs pa lta bu'o/ /dbu ma la 'jug pa'i bshad pa las/ 'od 'phro ba zhes bya ba sems bskyed pa bzhi pa'o// // da ni sems bskyed pa lnga pa'i dbang du byas nas/ bdag nyid che de bdud rnams kun gyis kyang / /sbyang dka'i sa la pham par nus ma yin/ /byang chub sems dpa'i sa lnga pa la gnas pa'i byang chub sems dpa' ni 'jig rten gyi khams thams cad na gnas pa'i lha'i bu'i bdud rnams kyis kyang pham par bya bar mi nus na/de dag las gzhan bdud kyi bka' nyan la sogs pa rnams kyis lta ci smos so/ /de nyid kyi phyir sa 'di'i ming sbyang dka' ba zhes bya'o/ /byang chub sems dpa' ni/ bsam gtan lhag cing blo bzang bden rang bzhin/ / zhib mo rtogs la'ang shin tu mkhas pa thob pa yin par rig par bya'o/ /de la pha rol tu phyin pa bcu las bsam gtan gyi pha rol tu phyin pa nyid ches lhag par 'gyur ro/ /blo bzang zhes bya ba ni 'phags pa rnams so/ /de dag gi bden pa rnams ni blo bzang bden pa ste/'phags pa'i bden pa rnams zhes bya ba'i don to/ /rang bzhin ni rang gi ngo bo'o/ /shes pa zhib mos khong du chud par bya ba'i rang bzhin ni rang bzhin zhib mo ste/ de ni blo gros bzang po'i bden pa rnams kyi rang gi ngo bo phra mo shes pa la cher mkhas par 'gyur ro/ /de la 'phags pa'i bden pa bzhi ni sdug bsngal dang /kun 'byung dang 'gog pa dang lam zhes bya ba rnams so/ /gal te bcom ldan 'das kyis bden pa ni gnyis kho nar bstan te/ 'di lta ste/ kun rdzob kyi bden pa dang / don dam pa'i bden pa'o/ /ji skad du/ yab sras mjal ba'i mdo las/'jig rten mkhyen pas gzhan las ma gsan par/ /bden pa 'di gnyis nyid kyis bstan par mdzad/ /gang zhig kun rdzob de bzhin don dam ste/ /bden pa gsum pa 'ga' yang ma mchis so/ /zhes gsungs so/ /dbu ma las kyang / sangs rgyas rnams kyis chos bstan pa/ /bden pa gnyis la yang dag brten/ /'jig rten kun rdzob bden pa dang / /dam pa'i don gyi bden pa'o/ /zhes bshad do/ /de'i phyir bden pa gnyis las tha dad par 'phags pa'i bden pa bzhi po gzhan ga la yod ce na/ bshad pa/gal te yang de lta yin mod kyi/ de lta na yang blang bar bya ba yang spang bar bya ba dag re re'i rgyu dang 'bras bu'i dngos po bstan par bya ba'i phyir/ 'dir 'phags pa'i bden pa bzhi bsnyad do/ /de la spang bar bya ba'i phyogs ni kun nas nyon mongs pa'o/ /de'i 'bras bu ni sdug bsngal gyi bden pa'o//rgyu ni kun 'byung gi bden pa'o/ /blang bar bya ba'i phyogs ni rnam par byang ba yin la/ de'i 'bras bu ni 'gog pa'i bden pa'o/ /de thob pa'i rgyu ni lam gyi bden pa'o/ /de la sdug bsngal dang kun 'byung dang lam gyi bden pa ni kun rdzob kyi bden pa'i khongs su gtogs so//'gog pa'i bden pa ni don dam pa'i bden pa'i rang gi ngo bo'o/ /de bzhin du bden pa gzhan gang cung zad cig yod pa de yang ci rigs par bden pa gnyis kyi khongs su gtogs pa kho nar nges par bya'o/ /yang ci bden pa bzhi las tha dad pa'i bden pa gzhan yang yod dam zhe na/bshad pa yod de/ ji skad du byang chub sems dpa'i sa lnga pa las/ 'di ni sdug bsngal 'phags pa'i bden pa'o zhes yang dag pa ji lta ba bzhin du rab tu shes so/ /'di ni sdug bsngal kun 'byung ba'o/ /'di ni sdug bsngal 'gog pa'o/ /'di ni sdug bsngal 'gog par 'gro ba'i lam 'phags pa'i bden pa'o zhes yang dag pa ji lta ba bzhin du rab tu shes so//de kun rdzob kyi bden pa la mkhas pa yin/ don dam pa'i bden pa la mkhas pa yin/ mtshan nyid kyi bden pa la mkhas pa yin/ rnam par dbye ba'i bden pa la mkhas pa yin/phye ste rtogs pa'i bden pa la mkhas pa yin/ dngos po'i bden pa la mkhas pa yin/ rab tu skye ba'i bden pa la mkhas pa yin/ zad pa dang mi skye ba shes pa'i bden pa la mkhas pa yin/ lam shes pa la 'jug pa'i bden pa la mkhas pa yin/ byang chub sems dpa'i sa'i go rims thams cad kyi mtshams sbyar ba sgrub pa nas de bzhin gshegs pa'i ye shes yang dag par 'byung ba'i bar gyi bden pa la mkhas pa yin te/de la sems can gzhan dag gi bsam pa shes pa ji lta ba bzhin du tshim par byed pas kun rdzob kyi bden pa rab tu shes so//bgrod pa gcig pu la yang dag par gzhol bas don dam pa'i bden pa rab tu shes so/ /rang dang spyi'i mtshan nyid rtogs pas mtshan nyid kyi bden pa rab tu shes so/ /chos rnam par dbye ba rnam par gzhag par rtogs pa rnam par dbye ba'i bden pa rab tu shes so//phung po dang khams dang skye mched kyi rnam par gzhag pa rjes su rtogs pas phye ste rtogs pa'i bden pa rab tu shes so/ /lus dang sems la gnod pa nyams su 'bab pas dngos po'i bden pa rab tu shes so/ /'gro bar nying mtshams sbyor ba rtogs pas rab tu skye ba'i bden pa rab tu shes so//rims nad kyis yongs su gdung ba thams cad shin tu zhi bas zad pa dang mi skye ba shes pa'i bden pa rab tu shes so/ /mi gnyis pa mngon par bsgrubs pas lam shes pa la 'jug pa'i bden pa rab tu shes so/ /rnam pa thams cad mngon par rdzogs par khong du chud pas byang chub sems dpa'i sa'i go rims thams cad kyi mtshams sbyor ba sgrub pa nas de bzhin gshegs pa'i ye shes yang dag par 'byung ba'i bar gyi bden pa rab tu shes te zhes gsungs pa lta bu'o//dbu ma la 'jug pa'i bshad pa las/sbyang dka' ba zhes bya ba sems bskyed pa lnga pa'o// //da ni sems bskyed pa drug pa'i dbang du byas nas bshad pa/ mngon du phyogs par mnyam gzhag sems gnas te/ /rdzogs pa'i sangs rgyas chos la mngon phyogs shing / /'di rten 'byung ba'i de nyid mthong ba de//shes rab gnas pas 'gog pa thob par 'gyur/ /byang chub sems dpa'i sa lnga par bsam gtan gyi pha rol tu phyin pa yongs su dag pa thob pas sa drug par mnyam par gzhag par sems la gnas shing rten cing 'brel par 'byung ba zab mo'i de nyid mthong ba'i byang chub sems dpa' ni shes rab kyi pha rol tu phyin pa yongs su dag pas 'gog pa thob par 'gyur gyi snga rol du ni ma yin te/shes rab lhag par gyur pa med pa'i phyir te/ sbyin pa la sogs pa pha rol tu phyin pa phul du byung ba dang ldan pas ni 'gog pa thob par mi nus so//gzugs brnyan dang 'dra ba'i chos nyid khong du chud pa'i phyir dang / byang chub sems dpa' rnams kyis byang chub sems dpa'i sa lnga par lam gyi bden pa la dmigs pa'i phyir dang / rdzogs pa'i sangs rgyas kyi chos la mngon du phyogs pa'i phyir na sa 'di la mngon du gyur pa zhes bya'o//da ni de las gzhan pa'i yon tan gyi tshogs rnams shes rab kyi pha rol tu phyin pa la rag las pa nyid du bstan pa'i phyir bshad pa/ ji ltar long ba'i tshogs kun bde blag tu/ /mig ldan skyes bu gcig gis 'dod pa yi/ /yul du khrid pa de bzhin 'dir yang blos//mig nyams yon tan blangs te rgyal nyid 'gro/ /ji ltar skyes bu mig dang ldan pa gcig gis long ba'i tshogs mtha' dag mngon par 'gro bar 'dod pa'i yul du bde blag tu khrid par byed pa de bzhin du/ shes rab kyi pha rol tu phyin pas kyang de las gzhan pa'i pha rol tu phyin pa'i yon tan rnams blangs nas bde bar gshegs pa'i sa kun tu 'od ces bya bar 'jog par 'gyur te/yang dag pa'i lam dang lam ma yin pa mthong ba'i rang bzhin nyid yin pa'i phyir ro/ /'dir smras pa/ 'di rten 'byung ba'i de nyid mthong ba de/ /shes rab gnas pas 'gog pa thob par 'gyur//zhes de skad du gang smras na/ ci ltar byang chub sems dpa' chos rten cing 'brel bar 'byung ba mthong ba na/ 'di la brten nas 'byung ba'i de kho na nyid mthong bar 'gyur zhe na/ bshad pa/ de'i rang gi ngo bo ni ma rig pa'i ling thog mthug pos blo'i mig ma lus par g.yogs pa bdag cag gi yul du nye bar 'gro ba ma yin gyi/drug pa la sogs pa sa gong ma la gnas pa'i byang chub sems dpa' rnams kyi yul du ni 'gyur zhe na / de'i phyir de la kho bo cag la dri bar bya ba ma yin gyi gang dag stong pa nyid phyin ci ma log par mthong ba'i mig sman ma rig pa'i rab rib kyi ling thog 'joms pas bskus pa blo'i spyan ma rig pa'i rab rib kyi ling thog dang bral ba dri ma med pa mnga' ba byang chub sems dpa' dang sangs rgyas bcom ldan 'das de dag nyid la rmad par bya'o//gal te 'phags pa'i shes rab kyi pha rol tu phyin pa dang 'phags pa sa bcu pa la sogs pa mdo sde gang dag 'don pa de dag las 'phags pa shes rab kyi pha rol tu phyin pa la spyod pa'i byang chub sems dpa' ji ltar rten cing 'brel bar 'byung ba'i de nyid mthong ba zhes bya ba gsungs pa yin nam/de'i phyir lung gi rjes su 'brangs nas bshad par rigs so zhe na/ 'di yang yod pa ma yin te/ lung gi dgongs pa nges par dka' ba'i phyir bdag cag 'dra bas lung las kyang de kho na nyid bstan par mi nus so/ /rang dbang nyid kyi dbang du byas nas de skad du brjod kyi/bstan bcos tshad mar gyur pa'i skyes bus byas shing lung phyin ci ma log par 'chad pa mthong ba las lung gi dgongs pa nges pas ni/ ji ltar de yis ches zab chos rtogs pa/ /lung dang gzhan yang rigs pas yin pas na/ /de ltar 'phags pa klu sgrub gzhung lugs las//ji ltar gnas pa'i lugs bzhin brjod par bya/ /shes rab kyi pha rol tu phyin pa la spyod pa'i byang chub sems dpas chos rnams kyis bdag nyid ji lta ba nyid ji ltar mthong ba de ltar/ 'phags pa klu sgrub kyis lung phyin ci ma log par mkhyen nas dbu ma'i bstan bcos las rigs pa dang lung dag gis chos rnams kyi bdag nyid yang dag pa ji lta ba nyid rang bzhin med pa mtshan nyid can ches gsal bar bstan to//de'i phyir ji ltar 'phags pa klu sgrub kyi zhal snga nas rigs pa dang lung dag gis chos rnams kyi de nyid bstan pa de kho na ltar/ bdag gis des nye bar bstan pa'i lugs ji ltar gnas pa bzhin du brjod par bya'o//ci ste re zhig 'phags pa klu sgrub de nyid la lung phyin ci ma log par nges pa ci ltar yod ce na/ lung las shes te/ ji ltar 'phags pa lang kar gshegs pa las/ lho phyogs be ta'i yul du ni/ /dge slong dpal ldan cher grags pa//de ming klu zhes bod pa ste/ /yod dang med pa'i phyogs 'jig pa/ /nga yi theg pa 'jig rten du/ /bla med theg chen rab bstan nas/ /rab tu dga' ba'i sa bsgrubs te/ /bde ba can du de 'gro'o/ /zhes gsungs pa dang / yang 'phags pa sprin chen po stong phrag bcu gnyis pa las kyang /kun dga' bo li ts+tsha bI gzhon nu sems can thams cad kyis mthong na dga' ba zhes bya ba 'di ni nga mya ngan las 'das nas lo bzhi brgya lon pa na klu zhes bya ba'i dge slong du gyur nas nga'i bstan pa rgyas par rab tu bstan te/ mthar gyis rab tu dang ba'i 'od ces bya ba'i 'jig rten gyi khams su de bzhin gshegs pa dgra bcom pa yang dag par rdzogs pa'i sangs rgyas ye shes 'byung gnas 'od ces bya bar 'gyur ro zhes gsungs so//de'i phyir 'dis lung phyin ci ma log par nges par grub bo/ /rten cing 'brel par 'byung ba yang dag pa ji lta ba bzhin ston pa'i 'bras bu can gyi bstan bcos de yang sngar goms pas rgyud la stong pa nyid kyi sa bon bzhag pa rnams kho na la bstan par bya'i gzhan dag la ni ma yin te/de dag stong pa nyid nyan par gyur du zin kyang de la log par zhugs pa'i bsam pa dang ldan pa nyid kyis don ma yin pa chen po dang ldan pa'i phyir ro//'di ltar res 'ga' ni mi mkhas pas stong pa nyid spangs nas ngan 'gror 'gro bar 'gyur ro/ /res 'ga' ni stong pa nyid kyi don ni med pa yin no zhes de ltar phyin ci log tu nges par bzung ste/ dngos po thams cad la skur ba 'debs pa log par lta ba skyed nas 'phel bar byed do//de'i phyir ston pa pos lhag par mos pa'i khyad par nges par byas te/ nyan pa po rnams la stong pa nyid kyi lta ba bshad par bya'o/ /yang ci ltar 'di la stong pa nyid bstan par 'os so / /'di la stong pa nyid nye bar bstan par bya'o zhes nges par dka' ba nges par nus she na/de ni phyi rol gyi mtshan ma rnams kyis nges par nus pas de'i rgyu mtshan nye bar bstan pa'i phyir bshad pa/ so so skye bo'i dus na'ang stong pa nyid thos nas/ /nang du rab tu dga' ba yang dang yang du 'byung / /rab tu dga' ba las byung mchi mas mig brlan zhing //lus kyi ba spu ldang bar gyur pa gang yin pa/ /de la rdzogs pa'i sangs rgyas blo yi sa bon yod/ /de nyid nye bar bstan pa'i snod ni de yin te/ /de la 'chad par 'gyur ba'i mtshan nyid can / /dam pa'i don gyi bden pa bstan par bya/ /de lta bur gyur pa'i nyan pa po la de kho na nyid ston pa po'i 'bad pa 'bras bu med par mi 'gyur ro//de ci'i phyir zhe na/ 'di ltar/ de la de yi rjes su 'gro ba'i yon tan 'byung / /nyan pa po de la stong pa nyid du 'dzin pa'i phyin ci log gis bskyed pa'i don ma yin pa dang ldan par mi 'gyur ba 'ba' zhig tu ma zad kyi/stong pa nyid kyi lta ba nyan pa'i rgyu can yon tan rnams kyang 'byung bar 'gyur ro/ /ci ltar zhe na/ de stong pa nyid kyi lta ba nyan pa la gter rnyed pa dang 'dra bar sems shing de mi nyams par bya ba'i phyir/ rtag tu tshul khrims yang dag blangs nas gnas par 'gyur/ /sbyin pa gtong bar 'gyur zhing snying rje sten par byed//bzod pa sgom byed de yi dge ba byang chub tu/ /'gro ba dgrol bar bya phyir yongs su sngo byed cing / /rdzogs pa'i byang chub sems dpa' rnams la gus par byed/ /de la bdag tshul khrims 'chal ba'i rkyen gyis ngan 'gror ltung na stong pa nyid kyi lta ba rgyun chad par 'gyur du 'ong ngo snyam du rig nas rtag tu tshul khrims yang dag par blangs nas gnas so//bdag tshul khrims kyis bde 'gror skyes kyang dbul por gyur na zas dang sman dang chos gos la sogs pa 'tsho ba'i yo byad tshol ba lhur byed pas stong pa nyid nyan pa rgyun chad par 'gyur du 'ong ngo snyam zhing sbyin pa gtong bar byed do//stong pa nyid kyi lta ba snying rjes yongs su zin pa ni sangs rgyas nyid 'dren par byed pa yin gyi gzhan du ni ma yin no zhes snying rje sten par byed do/ /khro bas ni ngan song du 'gro zhing kha dog ngan pa thob par byed pas de'i rkyen gyis 'phags pa rnams mnyes par byed par mi 'gyur ro snyam ste bzod pa sgom par byed do//thams cad mkhyen pa nyid du yongs su ma bsngos pa'i tshul khrims la sogs pa dag ni sangs rgyas nyid thob pa'i rgyu dang 'bras bu dpag tu med pa/ rnam par chad pa med par 'byung bar mi 'gyur bas/dge ba'i rtsa ba de yang 'gro ba dgrol ba'i phyir byang chub tu rab tu sngo bar byed do/ /byang chub sems dpa' ma gtogs par gzhan dag gis rten cing 'brel bar 'byung ba'i bdag nyid ji lta ba nyid nye bar bstan par mi nus so snyam du bsams nas/ rdzogs pa'i byang chub sems dpa' rnams la gus par byed do/ /de ltar yun ring por bar chad med par dge ba'i tshogs gdon mi za bar bsags par gyur nas/ zab cing rgya che'i tshul la mkhas pa'i skye bos ni/ /rim gyis rab tu dga' ba'i sa ni thob 'gyur bas/ /de ni don du gnyer bas lam 'di mnyan par gyis//sa rab tu dga' ba don du gnyer bas zhes bya ba'i tha tshig go/ /'di zhes bya ba ni 'chad par 'gyur ba'i mtshan nyid can no/ /de la chos rnams kyi yang dag pa ji lta ba nyid bstan pa la 'di ni re zhig lung yin te/ ji skad du 'phags pa sa bcu pa las/kye rgyal ba'i sras dag byang chub sems dpa' sa lnga pa la lam shin tu yongs su rdzogs pa'i byang chub sems dpa' de byang chub sems dpa'i sa drug pa la 'jug ste/ de chos mnyam pa nyid bcus 'jug go/ /bcu gang zhe na 'di lta ste/ chos thams cad mtshan ma med par mnyam pa nyid dang /chos thams cad mtshan nyid med par mnyam pa nyid dang / de bzhin du skye ba med pa dang / ma skyes pa dang / dben pa dang / gdod ma nas rnam par dag pa dang / spros pa med pa dang / blang ba med pa dang / dor ba med par mnyam pa nyid dang /chos thams cad sgyu ma dang rmi lam dang mig yor dang brag ca dang chu zla dang gzugs brnyan dang sprul pa lta bur mnyam pa nyid dang / chos thams cad dngos po dang dngos po med pa gnyis su med par mnyam pa nyid do/ /de chos thams cad kyi rang bzhin de ltar rab tu rtogs pa na rno zhing rjes su mthun pa'i bzod pas byang chub sems dpa'i sa drug pa mngon du gyur pa rjes su thob ste zhes gsungs pa lta bu'o//de'i phyir 'dir chos skye ba dang mnyam pa nyid kho na rigs pas bstan pa nyid kyis chos mnyam pa nyid gzhan bstan pa sla bar dgongs te/ slob dpon gyis dbu ma'i bstan bcos kyi dang por/ bdag las ma yin gzhan las min/ /gnyis las ma yin rgyu med min/ /dngos po gang dag gang na yang / /skye ba nam yang yod ma yin/ /zhes nye bar bkod pa yin no/ /nam yang zhes bya ba ni gzhar yang zhes bya ba'i don to//gang na yang zhes bya ba'i sgra 'gar yang gi sgra'i rnam grangs rten gyi tshig gis ni yul dang dus dang grub pa'i mtha' bshad do/ /gang dag gi sgra brten pa'i tshig ni phyi dang nang gi dngos po brjod pa'o/ /des na phyi dang nang gi dngos po rnams ni yul dang dus dang grub pa'i mtha' 'gar yang bdag las skye ba srid pa ma yin no zhes 'di ltar sbyar bar bya'o//'dir ma yin zhes bya ba 'di yod pa nyid kyi sgrub byed rang las skye ba dang sbrel gyi yod pa dang ni ma yin te/ de dgag pa don gyis grub pa'i phyir ro/ /de bzhin du dam bca' ba gsum car la yang sbyar bar bya'o//dam bca' ba bzhi po de rjes su brjod nas rigs pas sgrub pa'i phyir bshad pa/ de nyid de las byung min gzhan dag las lta ga la zhig /gnyis ka las kyang ma yin rgyu med par ni ga la yod/ /bdag las skyes pa ma yin te zhes bya ba'i don gang yin pa de nyid de las 'byung min zhes bya ba yin te /de bzhin du lhag ma la yang sbyar bar bya'o/ /yang 'di gang las nges she na 'di ltar/ de ni de las byung na yon tan 'ga' yang yod ma yin/ /skyes par gyur pa slar yang skye ba rigs pa'ang ma yin nyid//de ni zhes bya ba ni skye bzhin pa skye ba'i bya ba'i byed pa po ste myu gu zhes bya ba'i don to/ /de las zhes bya ba ni skye bzhin pa de nyid kyi bdag gi ngo bo las zhes bya ba'i don to/ /de'i phyir myu gu'i rang gi bdag nyid de nyid las myu gu'i rang gi bdag nyid de nyid 'byung ba ma yin no zhes bya ba 'di ni 'dir dam bca' ba'i don yin no//ci'i phyir zhe na/ gang gi phyir bdag nyid yod pa thob pa de nyid myu gu'i rang gi bdag nyid yod bzhin pa de nyid las 'byung ba la yon tan lhag pa 'ga' yang yod pa ma yin te/ yod pa nyid sngar thob zin pa'i phyir ro/ /bdag las skye ba'i phyogs 'di ni rigs pa dang 'gal ba yang yin no zhes bshad pa ni/skyes par gyur pa slar yang skye ba rigs pa'ang ma yin nyid/ /ces bya'o/ /'di na dam bca' ba tsam zhig tu zad pas rigs pa'i dbang du byas nas/ skyes zin slar yang skye bar yongs su rtog par 'gyur na ni/ /myu gu la sogs rnams kyi skye ba 'dir rnyed mi 'gyur zhing //zhes bya ba smos te/ skyes zin pa'i sa bon yang skye bar 'dod na ni/ gang gi 'di yang skye ba bkag nas myu gu skye bar rtog par byed par 'gyur ba slar yang de skye ba la gegs ci zhig yod/ de'i phyir myu gu dang sdong bu dang sbubs 'cha' ba la sogs pa rnams gtan mi skye bar 'gyur ro//gzhan yang / sa bon srid mthar thug par rab tu skye ba nyid du 'gyur te/ ji skad du bshad pa'i rgyu nyid kyi phyir ro/ /ci ste myu gu skye ba la phan 'dogs pa'i rkyen chu dang dus la sogs pa rnams ni sa bon rnam par 'gyur bar byed cing myu gu skyed par byed la/myu gu de yang byed pa po dang lhan cig gnas par 'gal ba nyid kyi phyir sa bon 'jig par byed cing 'byung ba yin te/ de'i phyir ji skad smras pa'i nyes pa'i skabs med cing / sa bon dang myu gu dag gzhan ma yin pa nyid kyi phyir bdag las mi skye ba yang ma yin no snyam na/'di yang mi rung ste/ gang gi phyir/ ji ltar de nyid kyis de rnam par 'jig par byed par 'gyur/ sa bon dang myu gu dag gzhan ma yin pa nyid kyi phyir/ myu gus kyang 'di 'jig par byed par mi rigs te/ rang gi bdag nyid bzhin no snyam du bsams pa'o/ /gzhan yang /byed rgyu sa bon gyi las tha dad myu gu'i dbyibs dang ni/ /kha dog ro nus smin pa'i tha dad khyod la med par 'gyur/ /de la dbyibs ni ring po dang zlum po la sogs pa'o/ /kha dog ni ser po la sogs pa'o/ /ro ni mngar ba la sogs pa'o/ /nus pa ni mthu'i khyad par nus mthu'i bye brag ste/dper na gzhang 'brum gyi sman lus dang nye ba tsam gyis gzhang 'brum sel ba dang / rtsi sman la sogs pa rnams bcangs pa tsam gyis nam mkha' la 'gro ba lta bu'o/ /rnam par smin pa ni rdzas kyi khyad par yongs su 'gyur bas thob par bya ba ste/ dper na pi pi ling la sogs pa rnams mngar po nyid du 'gyur ba lta bu'o//gal te sa bon dang myu gu dag gzhan ma yin pa nyid yin na ni sa bon gyi rang gi bdag nyid la yod pa ltar/ myu gu la yang dbyibs la sogs pa tha mi dad par dmigs par 'gyur ba zhig na/ dmigs pa yang ma yin pa de'i phyir/sgog skya la sogs pa'i sa bon dag las chu shing la sogs pa'i myu gu rnams ltar gzhan ma yin pa nyid du mi rigs so/ /ci ste sa bon gyi gnas skabs btang nas gnas skabs gzhan 'thob pas sa bon nyid myu gur 'gyur ba yin no snyam na/ de ltar na yang / gal te sngar gyi bdag gi dngos po bsal nas de las gzhan//ngo bor 'gyur na de tshe de yi de nyid ji ltar 'gyur/ /de'i dngos po ni de nyid de gzhan ma yin pa nyid ces bya ba'i don to/ /rtog pa 'di las myu gu'i gzhan ma yin pa nyid srid pa ma yin pas 'di'i gzhan ma yin pa nyid snyam pa yin no//ci ste sa bon dang myu gu dag dbyibs la sogs pa tha dad kyang rdzas tha mi dad do snyam na/ de lta ma yin te/ dbyibs la sogs pa ma bzung na de dag gi rdzas ma bzung ba'i phyir ro/ /gzhan yang / gal te khyod kyi sa bon myu gu 'dir gzhan ma yin na/ /sa bon bzhin du myu gu zhes bya de bzung med pa 'am//yang na de dag gcig pas ji ltar myu gu 'di bzhin du/ /de yang gzung du yod 'gyur de phyir 'di ni khas mi blang / /ji ltar myu gu'i gnas skabs sa bon gyi bdag nyid rang gi ngo bos gzung du med pa de bzhin du/ sa bon las gzhan ma yin pa nyid kyi phyir sa bon gyi rang gi bdag nyid ltar myu gu'i rang gi bdag nyid kyang gzung du yod par mi 'gyur ro//yang na ji ltar myu gu gzung du yod pa de bzhin du myu gu'i rang gi bdag nyid ltar sa bon yang gzung du yod par 'gyur te/ myu gu la sogs pa las gzhan ma yin pa nyid kyi phyir ro//nyes par thal bar 'gyur ba yongs su spang bar 'dod pas ni sa bon dang myu gu dag gzhan ma yin pa nyid du khas blang bar bya ba yang ma yin no/ /de'i phyir de ltar de nyid rtogs par 'dod pa'i lugs gzhan du brtag pa'i bdag las skye ba bzlog nas lugs gzhan du blo ma sbyangs pa'i 'jig rten gyi tha snyad du yang rtog pa 'di mi 'thad do zhes bstan pa'i phyir bshad pa/gang gi rgyu zhig na yang de yi 'bras bu mthong ba'i phyir/ /de dag gcig pa yin zhes 'jig rten gyis kyang khas mi len/ /'di ltar rgyu sa bon zhes bya ba 'gags zin kyang 'bras bu myu gu zhes bya ba mthong ba de'i phyir/'jig rten gyis kyang sa bon myu gu dag gzhan ma yin pa nyid du mi mthong ste/ gcig nyid yin na ni rgyu bzhin du 'bras bu yang mthong bar mi 'gyur ba zhig na mthong ba yang yin te/ de'i phyir de dag gzhan ma yin pa nyid ma yin no/ /gang gi phyir phyogs gnyi ga ltar yang bdag las skye ba rigs pa dang 'gal ba//de phyir dngos po bdag las 'byung zhes rab tu brtags pa 'di/ /de nyid dang ni 'jig rten du yang rigs pa ma yin no/ /de nyid kyi phyir slob dpon gyis khyad par du ma mdzad par/ bdag las ma yin zhes spyir skye ba bkag pa yin no//gang zhig dngos po rnams ni don dam par bdag las skyes pa ma yin te/ yod pa'i phyir sems can bzhin no zhes khyad par du byed pa de'i don dam par zhes bya ba'i khyad par don med do zhes bsam par bya'o/ /gzhan yang / bdag las skye bar 'dod na bskyed par bya dang skyed byed dang //las dang byed pa po yang gcig nyid 'gyur na de dag ni/ /gcig nyid ma yin pas na bdag las skye bar khas blang bar/ /bya min rgya cher bshad pa'i nyes par thal bar 'gyur phyir ro/ /ji skad du/ rgyu dang 'bras bu gcig nyid du/ /nam yang 'thad par mi 'gyur ro//rgyu dang 'bras bu gcig nyid na/ /skye dang bskyed pa gcig tu 'gyur/ /zhes gsungs so/ /gcig pa nyid ni yod pa ma yin te/ pha dang bu dag gam mig dang rnam par shes pa dag kyang gcig nyid du thal bar 'gyur ba'i phyir ro/ /de nyid kyi phyir/ gal te shing de me yin na//byed pa po dang las gcig 'gyur/ /zhes gsungs so/ /de'i phyir de lta bu la sogs pa'i skyon du thal bar 'gyur ba'i 'jigs pa las na/ bden pa gnyis phyin ci ma log par rtogs par 'dod pas dngos po rnams bdag las skye bar khas blang bar mi bya'o/ /'dir dngos po rnams bdag las 'byung bar mi 'gyur te zhes bya ba 'di nges pa yin la phyogs 'di ni rigs pa nyid kyang yin na/gang 'di skad du/ gzhan dag las lta ga la zhig /ces smras pa de ni mi rigs so/ /'di ltar gzhan du gyur pa'i rkyen bzhi po rgyu dang dmigs pa dang de ma thag pa dang de bzhin du bdag po ste/rkyen rnams dngos po rnams kyi skyed par byed pa'o zhes bya ba'i gsung rab la ltos nas mi 'dod bzhin du yang gzhan las skye bar khas blang bar bya'o/ /de la kha cig na re/ rgyu'i rkyen ni byed rgyu ma gtogs pa'i rgyu lnga'o/ /de la dmigs par byas na dmigs pa ste/ ci rigs par rnam par shes pa drug gi dmigs pa chos thams cad ni dmigs pa'i rkyen no//phung po lhag ma med par mya ngan las 'das par 'jug pa'i sems las gzhan pa'i sems dang sems las byung ba rnams ni de ma thag pa'i rkyen no/ /byed rgyu ni bdag po'i rkyen yin no zhe'o/ / gzhan dag na re/ sgrub par byed pa ni rgyu yin no zhes bya ba'i mtshan nyid las gang zhig gang gi skyed par byed pa sa bon gyi ngo bor gnas pa de ni de'i rgyu'i rkyen yin la/ skyes bu rgan po ldang ba ltar sems dang sems las byung ba rgyu las skyes bzhin pa rnams rten mkhar ba dang 'dra ba'i dmigs pa gang gis bskyed par 'gyur ba de ni dmigs pa'i rkyen te/skye bzhin pa'i chos kyi rten yin no zhes bya ba'i don to/ /rgyu 'gags ma thag pa ni 'bras bu skye ba'i rkyen yin te/ dper na sa bon 'gags ma thag pa myu gu'i mtshungs pa de ma thag pa'i rkyen ma yin pa lta bu'o//gang zhig yod na gang 'byung ba de ni de'i bdag po'i rkyen yin no zhe'o/ /yang rkyen gzhan gang dag lhan cig skyes pa dang phyi nas skyes pa la sogs pa de dag kyang 'di rnams kyi nang du 'dus pa yin no/ /dbang phyug la sogs pa dag ni rkyen ma yin te de'i phyir/ rkyen lnga pa ni yod ma yin//zhes nges par 'dzin par byed do zhes smra'o/ /'di ni gzhag par nus pa ma yin te/ rigs pa dang lung dang 'gal ba'i phyir ro/ /de la rigs pa'i dbang du byas nas brjod pa/ gzhan la brten nas gal te gnas zhig 'byung bar 'gyur na ni/ /'o na me lce bas kyang mun pa mthug po 'byung 'gyur zhing ste gzhan nyid yin pa'i phyir ro//de ni mthong ba'am rig pa yang ma yin te/ de'i phyir 'di ni yod pa ma yin no/ /de nyid kyi phyir/ rgyu dang 'bras bu gzhan nyid du/ /nam yang 'thad par mi 'gyur ro/ /rgyu dang 'bras bu gzhan nyid na/ / rgyu dang rgyu min mtshungs par 'gyur/ /zhes gsungs so/ /gzhan yang / thams cad las kyang thams cad skye bar 'gyur te/ rgyur gyur pa dang rgyu ma yin par gyur pa thams cad las kyang dngos po 'bras bur gyur pa dang 'bras bur ma gyur pa thams cad skye bar 'gyur ro/ /ci'i phyir zhe na/gang gi phyir/ skyed par byed pa ma yin ma lus pa yang gzhan nyid mtshungs/ /ji ltar skyed par byed pa'i sA lu sa bon rang gi 'bras bu sA lu'i myu gu las gzhan nyid yin pa de bzhin du/ skyed par byed pa ma yin pa me dang sol ba dang nas kyi sa bon la sogs pa yang yin no// ji ltar sA lu'i sa bon gzhan du gyur pa las sA lu'i myu gu skye ba de bzhin du/ me dang sol ba dang nas kyi sa bon la sogs pa dag las kyang 'gyur ro/ /yang ji ltar sA lu'i myu gu'i gzhan du gyur pa sA lu'i sa bon las 'byung ba de bzhin du bum pa dang snam bu la sogs pa rnams kyang 'gyur ba zhig na/de ni mthong ba yang ma yin te/ de'i phyir 'di yang yod pa ma yin no/ /'dir smras pa/ rgyu dang 'bras bu gnyis la gzhan nyid kyang yod la thams cad las thams cad 'byung bar thal ba yang ma yin te/ nges pa mthong ba'i phyir ro/ /'dir nges pa ni 'di yin te/gang gi phyir/ rab tu bya bar nus pa de'i phyir 'bras bur nges brjod cing / /gang zhig des bskyed nus pa de ni gzhan na'ang rgyu yin la/ /rgyud gcig gtogs dang skyed par byed las skye ba de yi phyir/ /sA lu'i myu gu nas la sogs las de lta min zhe na/ /'dir 'bras bu zhes bya ba ni/nus pa'i don la kri t+ya'i rkyen can te/ gang zhig gang gis bya bar nus pa de nyid de'i 'bras bu yin la/ gang zhig 'bras bu 'di bskyed par nus pa de ni gzhan yin du zin kyang rgyu yin te/ des na gzhan nyid khyad par can kho nas rgyu dang 'bras bu'i dngos po dngos po yin gyi/gzhan nyid kyi spyis ni ma yin no/ /rgyud gcig tu gtogs pa dang skyed par byed pa de las kyang skye ba yin gyi rgyud tha dad par gtogs pa nas kyi sa bon la sogs pa'am/ rgyud gcig tu gtogs kyang skyed par byed pa ma yin pa skad cig ma phyi ma las kyang skad cig ma snga ma ma yin pas thams cad las thams cad 'byung bar thal bar mi 'gyur ro zhe na /'di ni mi rung ste/ 'di ltar gang sA lu'i myu gu'i rgyu ni sA lu'i sa bon kho na yin gyi gzhan ma yin la/ sA lu'i sa bon gyi 'bras bu ni sA lu'i myu gu kho na yin gyi gzhan ma yin no zhes bya ba'i nges pa gang yin pa 'di ko gang las yin zhes re zhig 'di nyid rgyu dang 'bras bu smra ba 'di la 'dri bar bya'o//smras pa/ nges pa mthong ba'i phyir ro zhe na/ yang ci'i phyir de ltar nges pa mthong zhes brgal zhing brtags pa na/ gang gi phyir nges pa mthong ba de'i phyir nges pa mthong ngo zhes bya ba de tsam zhig smra ba 'dis ni nges pa'i rgyu ma bstan par bshad zin pa'i nyes pa cung zad kyang spang bar mi nus so//gzhan yang gzhan nyid thun mong ba khyad par du yongs su ma bcad pa shin tu grags pa 'di nyid 'di'i ji lta ba bzhin 'dod pa la gnod byed du yod pa yin no zhes bstan pa'i phyir bshad pa/ji ltar nas dang ge sar dang ni king shu ka la sogs/ /sA lu'i myu gu skyed par byed par 'dod min nus ldan min/ /rgyud gcig khongs su gtogs min 'dra ba ma yin nyid de bzhin/ /sA lu'i sa bon yang ni de yi min te gzhan nyid phyir/ /ji ltar nas dang ge sar dang king shu ka la sogs pa rnams gzhan yin pa'i phyir sA lu'i myu gu skyed par byed par mi 'dod cing /sA lu'i myu gu bskyed pa'i nus pa dang ldan pa ma yin pa dang rgyud gcig tu gtogs pa ma yin pa dang 'dra ba ma yin pa de bzhin du/ sA lu'i sa bon yang de la ji skad bshad pa'i khyad par gyis khyad par can du 'gyur ba ma yin te/gzhan nyid yin pa'i phyir ro/ /de ltar re zhig gzhan la grags pa'i gzhan nyid grub grub ltar rjes su brjod nas sun 'byin byas pa yin no/ /da ni rgyu dang 'bras bu dag gi gzhan nyid mi srid par bshad pa/ myu gu sa bon dang ni dus mnyam yod pa ma yin te//gzhan nyid med par sa bon gzhan pa nyid du ga la 'gyur/ /des na myu gu sa bon las skye 'grub par 'gyur min nas / /gzhan las skye ba yin zhes bya ba'i phyogs 'di gtang bar byos/ /'di na byams pa dang nyer sbas yod bzhin pa dag kho na phan tshun ltos nas gzhan nyid du mthong gi /sa bon dang myu gu dag ni de ltar cig car dmigs pa yang ma yin te/ sa bon rnam par ma gyur par myu gu med pa'i phyir ro/ /gang gi tshe de ltar sa bon dang dus mnyam du myu gu yod pa ma yin pa de'i phyir sa bon la myu gu las gzhan nyid yod pa ma yin la/gzhan nyid med na gzhan las myu gu skye'o zhes bya ba 'di yod pa ma yin no/ /de'i phyir gzhan las skye'o zhes bya ba'i phyogs 'di gtang bar bya'o/ /don 'di ni/ dngos po rnams kyi rang bzhin ni/ /rkyen la sogs pa yod ma yin/ /bdag gi dngos po yod min na/ /gzhan gyi dngos po ga la yod//ces bshad pa yin no/ /'dir rkyen la sogs la zhes bya ba ni rgyu'am rkyen dag gam/ rgyu dang rkyen gyi tshogs pa'am de las gzhan yang rung ste/ rang bzhin rnam par ma gyur pa na 'bras bu rnams kyi rang bzhin yod pa ma yin pa kho na ste ma skyes pa'i phyir ro//de med na rkyen la sogs pa rnams la gzhan nyid yod pa ma yin no/ /gang yod pas na yod pa'i mtshan nyid do zhes bya ba 'di ni bdun pa yin no/ /gang gi tshe gzhi yin pa de'i tshe na 'bras bu rnams kyi rang bzhin rkyen la sogs pa dag la 'khar gzhong dang rgya shug ltar yod pa ma yin no zhes bya ba'i don to//gang zhig gang na med pa de ni de las skyes pa ma yin te/ dper na bye ma dag la til mar bzhin te/ ci ste de ni med par yang / /rkyen de dag las skye 'gyur na/ /rkyen ma yin pa dag las kyang / /ci yi phyir na skyed mi 'gyur/ /zhes ji skad gsungs pa yin no//de'i phyir rten gyi phyogs 'di ni slob dpon nyid kyis tshigs su bcad pa sbyar ba kho nas ches legs par rnam par phye bas nye bar ma bkod do/ /'dir smras pa/ myu gu sa bon dang ni dus mnyam yod pa ma yin te/ /zhes gang smras pa de ni rigs pa ma yin te/ ji ltar srang mda'i mthon dman dag dus gcig nyid du mthong ba de bzhin du sa bon 'gag bzhin pa na myu gu skye bar 'gyur ro//'di ltar gang kho na'i tshe sa bon 'gag pa de'i tshe kho nar dus gcig nyid du myu gu skye ba yin te/ de'i phyir sa bon 'gag pa dang myu gu skye ba gnyis dus gcig pa'i phyir sa bon dang myu gu dag kyang dus mnyam par 'gyur la/de'i phyir gzhan nyid yin no zhes bstan pa'i phyir smras pa ni/ ji ltar srang gi mda' gnyis mtho ba dang dma' ba dag /dus mnyam ma yin par ni min par mthong ba de bzhin du/ /bskyed par bya dang skyed byed dag gi skye 'gag 'gyur zhe na/ / zhes bya ba ste de'i phyir nyes pa med do zhe na/ de lta na yang / gal te gcig tshe yin na 'dir dus gcig med de yod min/ /gal te srang gi dpes bskyed par bya ba dang / skyed par byed pa gnyis kyi skye ba dang 'jig pa dus gcig tu rtog na de mi rung ngo / /de ci'i phyir zhe na/ gal te yang srang gi dper mtho dman dus gcig pa nyid yin mod kyi/de lta na yang dpe las byung ba'i don dngos po la dus gcig pa nyid med pas 'di mi rigs so/ /ji ltar yod pa ma yin pa de ltar bstan pa'i phyir bshad pa/ gal te skye bzhin pa de skye la phyogs pas yod min zhing //'gag bzhin pa ni yod kyang 'jig la phyogs par 'dod gyur pa/ /de tshe 'di ni ji lta bur na srang dang mtshungs pa yin/ /de la skye bzhin pa zhes bya ba ni skye ba la mngon du phyogs pas ma 'ongs pa yin la 'gag bzhin pa zhes bya ba ni 'gag pa la mngon du phyogs pa'i phyir da ltar ba yin te/de'i phyir yod pa ma yin pa nyid ma skyes pa'i phyir skye ba yin la yod pa nyid da ltar ba yin pas 'gag pa yin no/ /gang gi tshe 'di de ltar yin pa de'i tshe ji ltar srang dang mtshungs par 'gyur/ srang mda' gnyis la ni da ltar ba yin pa'i phyir/ mtho dman gyi bya ba dag dus gcig pa nyid yod kyi sa bon dang myu gu da ltar ba dang ma 'ongs pa dag la ni dus gcig med pas 'di ni srang dang mtshungs pa ma yin no//ci ste chos dag dus gcig pa nyid med mod kyi/ de lta na yang de'i bya ba dag la dus gcig pa nyid yod do snyam na de yang mi rung ste/ de dag gi bya ba chos las tha dad par khas ma blangs pa'i phyir ro//gzhan yang skye ba 'di ni byed po med par rigs pa'i ngo bo'ang min/ /skye ba'i bya ba gang yin pa de'i byed pa po myu gu ni ma 'ongs pa yin pa'i phyir yod pa ma yin pa nyid do/ /de med na yang rten med par 'di yod pa ma yin pa la yod pa ma yin pa ni 'gag pa dang dus gcig par ci ltar 'gyur te/de'i phyir bya ba dag dus gcig pa nyid du mi rigs pa kho na'o/ /gal te dngos po ma skyes pa/ /'ga' zhig gang na yod gyur na/ /de ni skye 'gyur dngos po de/ /med na ci zhig skye bar 'gyur/ /zhes gsungs so/ /'di'i don ni 'di yin te/ myu gu zhes bya ba'i dngos po ma skyes pa 'ga' zhig skye ba'i snga rol du 'ga' zhig na yod par gyur na ni skye bar 'gyur ba zhig na/ skye ba'i snga rol du ni 'ga' yang 'ga' zhig na yod par gzhag par mi nus te/ /ma skyes pa'i phyir ro/ /de'i phyir skye ba'i bya ba'i rten dngos po skye ba'i snga rol du med na ste mi bdog na ci zhig skye bar 'gyur zhes bya ba'o//de zhes bya ba'i sgra dngos po'i khyad par yin pas gzhi mthun no/ /dngos po zhes bya ba ni bdun pa'o/ /med na zhes bya ba yang dngos po'i khyad par ro/ /ci zhig gi sgra ni skye bar 'gyur zhes bya ba 'di dang sbyar bar bya ste/ dngos po de med na ci zhig skye bar 'gyur te cung zad kyang skye bar mi 'gyur ro zhes bya ba'i don to//gal te srang mda'i mthon dman gyi tshul gyis skad cig gang kho na la sa bon 'gag pa de nyid la myu gu skye'o zhes 'phags pa sA lu ljang pa'i mdo las srang gi dpe 'di nye bar bkod pa ma yin nam zhe na/ nye bar bkod pa ni bden mod kyi/de gzhan las skye bar bstan pa'i phyir ma yin zhing / rang gi mtshan nyid kyi skye ba bstan pa'i phyir yang ma yin no/ /'o na ci zhe na/ cig car du brten nas 'byung ba ma brtags par grub pa sgyu ma lta bu yongs su gsal bar bya ba'i phyir te/ ji skad du/ sa bon zhig dang ma zhig las//myu gu 'byung ba ma yin pa / /khyod kyis skye ba thams cad ni/ /sgyu ma 'byung ba bzhin du gsungs/ /zhes bshad do/ /'dir smras pa/ sa bon dang myu gu dag cig car ba nyid med pas gzhan nyid med pa'i phyir skye ba mi rigs na/ gang du cig car ba nyid yod pa der gzhan nyid yod pas skye ba yod par 'gyur te/dper na mig gi rnam par shes pa dang de dang lhan cig 'byung ba tshor la sogs pa rnams lta bu'o/ /mig dang gzugs la sogs pa dag dang tshor ba la sogs pa lhan cig 'byung ba rnams dus mnyam kho nar mig gi rnam par shes pa skyed par byed pa de bzhin du/mig la sogs pa dag dang sems kyang dus mnyam kho nar tshor ba la sogs pa rnams kyi rkyen nyid du 'gyur ro zhes smra'o/ /de ni yod pa ma yin te/ ci'i phyir zhe na/ gal te mig gi blo la rang gi skyed byed dus gcig pa/ /mig la sogs dang lhan cig 'byung ba 'du shes la sogs las//gzhan nyid yod na yod la 'byung bas dgos pa ci zhig yod/ /ci ste de med ce na 'di la nyes pa bshad zin to/ /gal te mig la sogs pa rnams dang 'du shes la sogs pa dus mnyam pa rnams mig gi blo da ltar ba'i rkyen nyid du 'dod na de'i tshe yod pa ni de la ltos pa'i gzhan nyid du 'gyur mod kyi yod pa la 'byung bas dgos pa cung zad kyang med pas skye ba med do//ci ste skye ba med pa yongs su spang bar 'dod nas de yod pa nyid du khas mi len na ni/ de'i tshe yang yod pa ma yin pa'i blo las mig la sogs pa rnams gzhan nyid ma yin no zhes nyes pa bshad zin pa kho na'o//de'i phyir de ltar gzhan las skye bar 'dod pa na gzhan nyid srid kyang skye ba mi srid la de mi srid pa'i phyir gnyi ga mi srid cing / skye ba srid kyang gzhan nyid mi srid pa de mi srid pa'i phyir gnyis ka yang mi srid pas rnam pa thams cad du phyi rol gyi don yod pa ma yin pa'i phyir/phyi rol gyi don gyi stong pas/ song song nas sgra tsam 'ba' zhig lus par 'gyur te/ de'i phyir rtogs pa 'di ni mi rung ngo / /da ni rgyu dang 'bras bu gnyis las rgyu la ltos pa'i dus yod pa ma yin par bstan pa'i phyir bshad pa/ skyed par byed pa bskyed bya gzhan bskyed pa de rgyu yin na/ / yod pa'am 'on te med dang gnyi ga'i gnyis bral zhig bskyed grang / /yod na skyed byed ci dgos med la'ang des ni ci zhig bya/ /gnyis nyid la des ci bya gnyis dang bral la'ang des ci bya/ /zhes bya ba ni/ re zhig skyed par byed pa'i rgyu bskyed bya yod par 'gyur ba'i skyed byed ni ma yin te/ skyes par gyur pa slar yang skye bar rigs pa'ang ma yin nyid//ces bya ba la sogs pas nyes pa bshad zin pa nyid kyi phyir ro/ /de'i phyir de la rkyen dag gis dgos pa cung zad kyang med do/ /bskyed par bya ba yod pa ma yin par gyur pa la yang skyed par byed pa de dag gis ci zhig bya ste/ bong bu'i rwa ltar med pa'i phyir ro//ji skad du/ 'bras bu yod par gang 'dod dang / /'bras bu med par gang 'dod la/ /khyim gyi don du ka ba sogs/ /brgyan pa'i don yang med par 'gyur/ /zhes bshad do/ /dbu ma las kyang / 'bras bu ngo bo nyid yod na/ /rgyus ni ci zhig skyed par byed//'bras bu ngo bo nyid med na/ /rgyus ni ci zhig skyed par byed/ /skye ba yod pa ma yin na/ /rgyu nyid 'thad par mi 'gyur ro/ /rgyu nyid 'thad pa yod min na/ /'bras bu gang gi yin par 'gyur/ /zhes gsungs so/ /gnyis nyid yin par de la rkyen rnams kyis ci zhig bya ste/bshad zin pa'i nyes par thal bar 'gyur ba'i phyir ro/ /gnyis kyi dngos po ni gnyis nyid yin zhing gnyis nyid la yod pa ni gnyis nyid do/ /yod pa dang med pa'i ngo bo can nyid ni dus gcig gi tshe gcig la srid pa yang ma yin pas/ de'i rang bzhin can gyi dngos po ni yod pa ma yin la/yod pa ma yin pa nyid kyi phyir de la skyed par byed pa'i rkyen dag gis ci zhig bya/ ji skad du bstan bcos las/ mya ngan 'das pa dngos po dang / /dngos med gnyis kar ji ltar 'gyur/ /de gnyis gcig la yod min te/ /snang ba dang ni mun pa bzhin/ / zhes bya ba dang / de bzhin du/ byed pa por gyur ma gyur dang / /gyur ma gyur de mi byed do/ /yin dang ma yin gyur cig la/ /phan tshun 'gal bas ga la zhig /ces gsungs so/ /gnyi ga dang bral ba yod pa yang ma yin med pa yang ma yin pa'i 'bras bu gang yin pa gnyis ka dang bral ba de la yang rkyen de dag gis ci zhig bya ste/yod pa dang med pa'i ngo bo spangs pa'i 'bras bu yod pa ma yin pa'i phyir ro/ /yod pa dang med pa nyid mi srid na yod pa yang ma yin med pa yang ma yin zhes de dag bkag pas cung zad kyang khyad par du mi 'gyur ro/ /gang gi tshe 'di gnyi ga ma grub pa de'i tshe yod pa yang ma yin med pa yang ma yin pa mi srid pa nyid do//ji skad du/ dngos min dngos po med min pa/ /mya ngan 'das par gang ston pa/ /dngos med pa dang dngos po dag /grub na de ni 'grub par 'gyur/ /zhes gsungs so/ /gal te skye ba rab tu grub par bya ba'i phyir rigs pa gang dang gang smras pa de dang de ni bud shing skam po mar gyis bran pa ltar/khyod kyi blo'i mes ma lus par bsregs pas/ khyod kyi shes rab kyi mes sbor ba lhur byed pa'i rigs pa'i bud shing bskul bas chog go/ gal te rigs pa nye bar ma bstan par brjod par 'dod pa'i don grub par mi 'gyur ba ma yin nam zhe na/de ni yod pa ma yin no/ /don gang zhig 'jig rten nyid las/ grub pa der ni rigs pas ci yang bya ba med de/ 'jig rten gyi mthong ba ni shin tu stobs dang ldan pa'i phyir ro zhes smras pa/ gang gis rang lta la gnas 'jig rten tshad mar 'dod pas na/ /'dir ni rigs pa smras pa nyid kyis lta ko ci zhig bya/ /gzhan las gzhan 'byung ba yang 'jig rten pa yis rtogs 'gyur te/ /des na gzhan las skye yod 'dir ni rigs pas ci zhig dgos/ /'jig rten pa ni thams cad rang gi lta ba kho na la gnas pa na shin tu stobs dang ldan pa yin zhing gzhan kho na las skye bar lta ba yang yin la//rigs pa nyis par 'god pa yang dngos po mngon sum ma yin pa kho na la ni 'os kyi mngon sum la ni ma yin te/ de'i phyir 'thad pa med par yang dngos po rnams gzhan las skye ba yod pa kho na'o zhe na/gang zhig bstan bcos kyi don phyin ci ma log par ma rtogs shing thog ma med pa'i 'khor bar dngos po'i bag chags gzhag pa yongs su smin pa/ dngos po la mngon par zhen pa'i mdza' bo dang bral bar thos pa mi bzod pas 'jig rten gyis gnod pa'i rdol thabs la brten pa 'di ni/'jig rten gyi byung tshul shin tu mang zhing rgya che ba ma bshad par 'jig rten gyi gnod pa'i bla rdol las bzlog par mi nus pas/ 'jig rten gyi gnod pa'i yul khyad par can bstan par bya ba'i phyir/ re zhig bden pa gnyis kyi rnam par gzhag pa'i dbang du byas nas bshad pa/dngos kun yang dag brdzun pa mthong ba yis/ /dngos rnyed ngo bo gnyis ni 'dzin par 'gyur/ /yang dag mthong yul gang yin de nyid de/ /mthong ba brdzun pa kun rdzob bden par gsungs/ /'di na bden pa gnyis kyi rang gi ngo bo phyin ci ma log par mkhyen pa sangs rgyas bcom ldan 'das rnams kyis/'du byed dang myu gu la sogs pa nang dang phyi rol gyi dngos po thams cad kyi rang gi ngo bo rnam pa gnyis nye bar bstan te/ 'di lta ste/ kun rdzob dang don dam pa'o/ /de la don dam pa ni yang dag par gzigs pa rnams kyi ye shes kyi khyad par gyi yul nyid kyis bdag gi ngo bo rnyed pa yin gyi/rang gi bdag nyid kyis grub pa ni ma yin te/ 'di ni ngo bo gcig yin no/ /gzhan ni so so'i skye bo'i ma rig pa'i rab rib kyi ling thog gis blo'i mig ma lus par khebs pa rnams kyi mthong ba brdzun pa'i stobs las bdag gi yod pa rnyed pa yin te/byis pa rnams kyi mthong ba'i yul du 'gyur ba ji lta ba de lta bu'i rang bzhin du rang gi ngo bos grub pa ni ma yin no/ /de'i phyir dngos po thams cad rang bzhin de gnyis 'dzin pa yin no/ /rang bzhin de gnyis las kyang mthong ba yang dag pa'i yul gang yin pa de ni de nyid de / de ni don dam pa'i bden pa'o zhes bya ba'i don to//de'i rang gi ngo bo ni bshad par bya'o/ /mthong ba brdzun pa'i yul gang yin pa de ni kun rdzob kyi bden pa'o/ /de'i phyir de ltar bden pa gnyis rnam par gzhag nas/ mthong ba brdzun pa rnams la mthong ba yang dag pa dang brdzun pa nyid las gnyis nyid yod pas des gzung bar bya ba'i don dang /shes pa gnyis nyid bstan par bya ba'i phyir bshad pa/ mthong ba brdzun pa'ang rnam pa gnyis 'dod de/ /dbang po gsal dang dbang po skyon ldan no/ /skyon ldan dbang can rnams kyi shes pa ni/ /dbang po legs gyur shes ltos log par 'dod//de la dbang po gsal ba can ni rab rib dang bral zhing mig ser la sogs pas nyams par ma byas pa dang / rnam pa de lta bu'i phyi rol gyi yul phyin ci ma log par 'dzin pa rnams so/ /skyon dang ldan pa'i dbang po can rnams ni de las bzlog pa dag go/ /de la dbang po legs par gyur pa rnams kyi shes pa la ltos nas skyon dang ldan pa'i dbang po can rnams kyi shes pa gang yin pa de log par shes par 'dod do//ji ltar 'di dag gi shes pa phyin ci log pa dang phyin ci ma log pa nyid kyi sgo nas rnam pa gnyis yin pa de bzhin du/ yul yang yin no zhes bstan pa'i phyir bshad pa/gnod pa med pa'i dbang po drug rnams kyis/ /bzung ba gang zhig 'jig rten gyis rtogs te/ /'jig rten nyid las bden yin lhag ma ni/ /'jig rten nyid las log par rnam par gzhag /de la rab rib dang mig ser la sogs pa dag dang da dung zos pa la sogs pa rnams ni dbang po la gnod pa'i rkyen nang na yod pa yin no//til mar dang chu dang me long dang brag phug la sogs pa nas brjod pa'i sgra la sogs pa rnams dang / nyi ma'i 'od zer yul dang dus khyad par can dang nye bar gyur pa la sogs pa rnams ni dbang po la gnod pa'i rkyen phyi rol na yod pa yin te/de dag ni dbang po la gnod par byed pa nang na yod pa dag med par/ gzugs brnyan dang brag ca dang smig rgyu la chu la sogs par 'dzin pa'i rgyur 'gyur ro/ /de bzhin du mig 'khrul mkhan la sogs par rab tu sbyar ba'i sngags dang sman la sogs pa dag kyang shes par bya'o//yid kyi gnod par byed pa ni de dag dang yang dag pa ma yin pas byas pa'i grub pa'i mtha' la sogs pa dag dang / rjes su dpag pa ltar snang ba dag ste/ rmi lam la sogs pa rnams kyi rnam par gzhag pa ni 'chad par 'gyur ro//de'i phyir de ltar 'jig rten gyis dbang po la gnod pa'i rkyen ji skad du bshad pa med par dbang po drug car gyis gzung bar bya ba'i don rtogs pa de ni 'jig rten nyid las bden pa yin gyi 'phags pa la ltos nas ni ma yin no/ /gzugs brnyan la sogs pa gang zhig dbang po rnams la gnod pa yod pa na yul gyi ngo bo nyid du snang ba de ni 'jig rten nyid la ltos nas log pa yin no//da ni bshad zin pa'i don nyid dper brjod pa'i tshul gyis nye bar bstan pa'i phyir bshad pa/ mi shes gnyid kyis rab bskyod mu stegs can/ /rnams kyi bdag nyid ji bzhin brtags pa dang //sgyu ma smig rgyu sogs la brtags pa gang / /de dag 'jig rten las kyang yod min nyid/ /mu stegs can 'di dag ni de kho na nyid la 'jug par 'dod pas skye bo ma byang ba gnag rdzi dang bud med la sogs pa yan cad la grags pa'i dngos po skye ba dang 'jig pa la sogs pa phyin ci ma log par yang dag par nges par ma bzung bar/phul du byung bar 'gro bar 'dod pas shing la 'dzegs pas yal ga snga ma btang nas yal ga phyi ma ma bzung ba ltar lhung ba chen pos lta ba ngan pa'i ri'i sul dag tu ltung bar 'gyur zhing / bden pa gnyis mthong ba dang bral ba'i 'bras bu mi thob par 'gyur ro//de'i phyir 'di dag gis gang brtags pa yon tan gsum la sogs pa de dag ni 'jig rten gyi kun rdzob tu yang yod pa ma yin pa nyid do/ /de'i phyir 'dir/ mig ni rab rib can gyi dmigs pa yis/ /rab rib med shes la gnod min ji ltar//de bzhin dri med ye shes spangs pa'i blos/ /dri med blo la gnod pa yod ma yin/ /gzhan las skye ba dgag pa bshad pa gang yin pa de ni 'jig rten pa'i lta ba kho na la gnas nas ni ma yin no/ /'o na ci zhe na/ 'phags pa rnams kyi gzigs pa khas blangs nas yin no//gang gi tshe skye ba dgag pa 'di khyad par du yin pa de'i tshe ji ltar rab rib can rnams kyi skra la sogs pa'i ngo bo la dmigs pas rab rib med pa'i shes pa la mi gnod pa de bzhin du/ zag pa med pa'i ye shes dang bral ba so so'i skye bo rnams kyi shes pas kyang gzigs pa zag pa med pa la gnod pa ma yin pas rnam pa de lta bu yul la 'jig rten gyis gnod pa ma yin no//de'i phyir de ltar pha rol po ni dam pa dag gis bzhad gad du bya bar 'os pa nyid du 'gyur ro/ /de'i phyir 'dis ni bden pa gnyis yin pa dang / kun rdzob dang don dam pa'i dbye bas dngos po rnams kyi ngo bo gnyis su brjod pa yin no//de la 'jig rten gyi kun rdzob kyi bden pa bstan par bya ba'i phyir bshad pa/ gti mug rang bzhin sgrib phyir kun rdzob ste/ /des gang bcos ma bden par snang de ni/ /kun rdzob bden zhes thub pa des gsungs te/ /bcos mar gyur pa'i dngos ni kun rdzob tu'o/ / de la 'dis sems can rnams ji ltar gnas pa'i dngos po lta ba la rmongs par byed pas na gti mug ste/ ma rig pa dngos po'i rang gi ngo bo yod pa ma yin pa sgro 'dogs par byed pa rang bzhin mthong ba la sgrib pa'i bdag nyid can ni kun rdzob bo/ /kun rdzob des gang zhig bden par snang zhing rang bzhin med bzhin du rang bzhin du so sor snang ba de ni 'jig rten phyin ci log tu gyur pa'i kun rdzob tu bden pas 'jig rten gyi kun rdzob kyi bden pa ste/de ni bcos ma rten cing 'brel bar 'byung ngo / /brten nas 'byung ba gzugs brnyan dang brag ca la sogs pa cung zad cig ni brdzun yang ma rig pa dang ldan pa rnams la snang la/sngon po la sogs pa gzugs dang sems dang tshor ba la sogs pa cung zad cig ni bden par snang ste/ rang bzhin ni ma rig pa dang ldan pa rnams la rnam pa thams cad du mi snang ngo / /de'i phyir de dang gang zhig kun rdzob tu yang brdzun pa kun rdzob kyi bden pa ma yin no//de ltar na re zhig srid pa'i yan lag gis yongs su bsdus pa nyon mongs pa can gyi ma rig pa'i dbang gis kun rdzob kyi bden pa rnam par gzhag go/ /de la nyan thos dang rang sangs rgyas dang byang chub sems dpa' nyon mongs pa can gyis gzigs pa spangs pa/'du byed gzugs brnyan la sogs pa'i yod pa nyid dang 'dra bar gzigs pa rnams la ni bcos ma'i rang bzhin gyi bden pa ma yin te/ bden par mngon par rlom pa med pa'i phyir ro/ /byis pa rnams la ni slu bar byed pa yin la/ de las gzhan pa rnams la ni sgyu ma la sogs pa ltar rten cing 'brel par 'byung ba nyid kyis kun rdzob tsam du 'gyur ro//de yang shes bya'i sgrib pa'i mtshan nyid can ma rig pa tsam kun du spyod pa'i phyir/ snang ba dang bcas pa'i spyod yul can gyi 'phags pa rnams la snang gi/ snang ba med pa'i spyod yul mnga' ba rnams la ni ma yin no//sangs rgyas rnams la ni chos thams cad rnam pa thams cad du mngon par rdzogs par byang chub pa'i phyir/ sems dang sems las byung ba'i rgyu ba gtan log par 'dod pa yin no/ /de ltar na re zhig bcom ldan 'das des kun rdzob kyi bden pa dang kun rdzob tsam du gsungs pa yin no/ / de la so so'i skye bo rnams kyi don dam pa gang yin pa de nyid 'phags pa snang ba dang bcas pa'i spyod yul can rnams kyi kun rdzob tsam yin la/ de'i rang bzhin stong pa nyid gang yin pa de ni de rnams kyi don dam pa'o/ /sangs rgyas rnams kyi don dam pa ni rang bzhin nyid yin zhing / de yang slu ba med pa nyid kyis don dam pa'i bden pa yin la/de ni de rnams kyi so so rang gis rig par bya ba yin no/ /kun rdzob kyi bden pa ni slu bar byed pa nyid kyi phyir don dam pa'i bden pa ma yin no/ /de'i phyir de ltar kun rdzob kyi bden pa bstan nas/ don dam pa'i bden pa bstan par 'dod pas de ni brjod du med pa'i phyir dang shes pa'i phyir yul ma yin pa nyid kyi phyir dngos su bstan par mi nus pas/nyan par 'dod pa sems la rang gis myong ba nyid du de'i rang bzhin gsal bar bya ba'i phyir dpe bshad pa/ rab rib mthu yis skra shad la sogs pa'i/ /ngo bo log pa gang zhig rnam brtags pa//de nyid bdag nyid gang du mig dag pas/ /mthong de de nyid de bzhin 'dir shes gyis/ /rab rib kyi mthus rab rib can gyis rang gi lag na thogs pa'i bse ru la sogs snod kyi nang na skra shad la sogs pa'i tshogs yongs su 'gyur bzhin par mthong ba des bsal bar 'dod nas snod de la yang dang yang du sgre zlog byed pa'i tshegs thob par rig ste/'di ci byed pa zhig snyam nas rab rib med pas de'i gan du phyin nas skra shad la yul gyi yul der mig gtad kyang skra shad kyi rnam pa de dag ma dmigs shing / skra shad de'i rten can dngos po dang dngos po med pa dang skra shad dang skra shad ma yin pa dang mthon ka la sogs pa'i khyad par dag tu rtog par byed pa yang ma yin no//yang gang gi tshe rab rib can rab rib med pa la skra shad mthong ngo zhes rang gis bsam pa ston par byed pa de'i tshe de'i rnam par rtog pa bsal bar 'dod pas rab rib can gyi dmigs pa'i ngor byas nas 'di na skra shad dag yod pa ma yin no zhes dgag pa lhur byed pa'i tshig smra mod kyi/smra ba po 'di la de la skur pa 'debs pa yod pa ma yin no/ /skra shad dag gi de kho na nyid ni gang zhig rab rib med pas mthong ba de yin gyi cig shos ni ma yin no/ /de bzhin du ma rig pa'i rab rib kyis gnod pa byas pas de kho na nyid ma mthong ba dag gis phung po dang khams dang skye mched la sogs pa'i rang gi ngo bo dmigs pa gang yin pa de ni de dag gi ngo bo kun rdzob pa'o//gal te phung po la sogs pa de dag nyid ma rig pa'i bag chags dang bral ba sangs rgyas bcom ldan 'das rnams kyi rab rib can ma yin pas skra shad mthong ba'i tshul du rang bzhin gang gis gzigs pa de ni de dag gi don dam pa'i bden pa'o//gal te rnam pa de lta bu'i rang bzhin ni mthong ba med pa nyid ma yin nam de'i phyir ji ltar de dag gis gzigs she na/ bden mod kyi 'on kyang de ma gzigs pa'i tshul gyis de dag gis gzigs so zhes brjod ji skad du 'phags pa bden pa gnyis la 'jug pa las/lha'i bu gal te don dam par na don dam pa'i bden pa lus dang ngag dang yid kyi yul gyi rang bzhin du 'gyur na ni/ de don dam pa'i bden pa zhes bya ba'i grangs su mi 'gro ste kun rdzob kyi bden pa nyid du 'gyur ro//'on kyang lha'i bu don dam par na don dam pa'i bden pa ni tha snyad thams cad las 'das pa/ bye brag med pa/ ma skyes pa/ ma 'gags pa/ smra bar bya ba dang / smra ba dang / shes par bya ba dang / shes pa dang bral ba'o//lha'i bu don dam pa'i bden pa ni rnam pa thams cad kyi mchog dang ldan pa thams cad mkhyen pa'i ye shes kyi yul gyi bar las 'das pa yin te/ ji ltar don dam pa'i bden pa'o zhes brjod pa ltar ni ma yin no/ /chos thams cad ni brdzun te slu ba'i chos so/ /lha'i bu don dam pa'i bden pa ni bstan par mi nus so//de ci'i phyir zhe na/ gang gis ston pa dang / ci ston pa dang / gang la ston pa'i chos de dag thams cad ni don dam par rab tu ma skyes pa'o/ /rab tu ma skyes pa'i chos rnams kyis ni rab tu ma skyes pa'i chos rnams bshad par mi nus so zhes rgya cher gsungs pa lta bu'o//de'i phyir de kho na nyid la de'i yul can dngos po dang dngos po med pa dang / rang gi dngos po dang gzhan gyi dngos po dang / bden pa dang bden pa ma yin pa dang / rtag pa dang chad pa dang / rtag pa dang mi rtag pa dang / bde ba dang sdug bsngal ba dang /gtsang ba dang mi gtsang ba dang / bdag dang bdag med pa dang / stong pa dang mi stong pa dang / mtshan nyid dang mtshan gzhi dang / gcig nyid dang gzhan nyid dang / skye ba dang 'gag pa la sogs pa'i khyad par dag srid pa ma yin te/ de'i rang gi ngo bo ma dmigs pa'i phyir ro//de'i phyir de ltar na de kho na nyid bsam pa la 'phags pa rnams kho na tshad ma yin gyi 'phags pa ma yin pa dag ni ma yin no/ /ci ste 'jig rten gyi gnod pa brjod par 'dod pas de kho na nyid rnam par dpyod pa la 'jig rten gyi mthong ba yang tshad ma nyid du khas len na de lta yin dang / gal te 'jig rten tshad ma yin na ni/ /'jig rten de nyid mthong bas 'phags gzhan gyis/ /ci dgos 'phags pa'i lam gyis ci zhig bya/ /blun po tshad mar rigs pa'ang ma yin no/ /'jig rten tshad ma nyid du khas blangs pa yin pa dang / de nyid de kho na nyid mthong ba yin pa'i phyir ma rig pa spangs pa yin par khas blang bar bya dgos na/gang gi phyir blun po ni tshad mar rigs pa yang ma yin no/ /gang la gang gi yul can gyi mi shes pa yod pa de ni de la tshad ma nyid ma yin par mthong ste/ dper na nor bu rin po che la sogs pa brtags pa la de mi shes pa rnams lta bu'o//mig la sogs pa dag kho nas de kho na nyid nges pa'i phyir/ 'phags pa'i lam khong du chud par bya ba'i phyir/ tshul khrims dang / thos pa dang / bsam pa dang / bsgom pa la sogs pa'i bsgrim pa 'bras bu dang bcas pa ma yin par yang 'gyur ba zhig na de ni de ltar yang ma yin no//de'i phyir/ rnam kun 'jig rten tshad min de yi phyir/ /de nyid skabs su 'jig rten gnod pa med/ /ji skad bshad pa'i tshul 'di las na de kho na nyid kyi skabs su 'jig rten rnam pa thams cad du tshad ma ma yin zhing / de kho na nyid kyi skabs su 'jig rten gyis gnod pa yang ma yin no//'o na ci ltar 'jig rten gyis gnod par 'gyur zhe na/ bshad pa/ 'jig rten don ni 'jig rten grags nyid kyis/ /gal te sel na 'jig rten gyis gnod 'gyur/ /dper na kha cig gis nga'i rdzas 'phrogs so zhes smras pa dang / cig shos kyis de la brgal zhing brtags pa/rdzas de ci zhig yin/ des bum pa'o zhes smras pa la/ bum pa ni rdzas ma yin te/ gzhal bya yin pa'i phyir rmi lam gyi bum pa bzhin no zhes de des sun 'byin par byed pa de lta bu la sogs pa'i yul la 'jig rten pa'i don 'jig rten pa'i grags pa nyid kyis sel bar byed pa la 'jig rten gyis gnod par 'gyur gyi /gang gi tshe 'phags pa'i gzigs pa la gnas te/ skye bo mkhas pa tshad mar byed pa de'i tshe ni 'jig rten gyi gnod pa yod pa ma yin no/ /mkhas pas phyogs 'dis gzhan yang dpyad par bya'o/ /de ltar 'jig rten gyi grags pas gzhan las skye ba khas blangs nas kyang 'jig rten gyi gnod pa yongs su spangs te/da ni 'jig rten la yang gzhan las skye ba yod pa ma yin pas de'i lta ba la gnas nas kyang gzhan las skyes pa dgag par 'dod pa la 'jig rten gyi gnod pa yod pa ma yin no zhes bstan pa'i phyir bshad pa/gang phyir 'jig rten sa bon tsam btab nas/ /bdag gis bu 'di bskyed ces smra byed cing / /shing yang btsugs so snyam du rtogs des na/ /gzhan las skye ba 'jig rten las kyang med/ /pho'i dbang pos mngon par gsal bar byas pa 'ga' zhig nye bar ston pa na bu 'di bdag gis bskyed do zhes smra bar byed do//'di rnam pa de lta bu zhig rang gi lus las bton nas de'i ma'i khong du 'dzud pa ni ma yin te/ 'o na ci zhe na/ de'i sa bon du gyur pa mi gtsang ba tsam zhig go/ /gang gi phyir 'di de'i rgyu blugs nas rang gi bu gtong bar byed pa de'i phyir sa bon dang bu gnyis gzhan nyid ma yin no zhes bya bar 'jig rten du gsal bar nges pa yin no//gzhan nyid yin na ni gang zag gzhan ltar de yang nye bar ston par byed par mi 'gyur ro/ /de bzhin du sa bon dang ljon shing dag la yang sbyar bar bya'o/ /de'i phyir de ltar ji skad bshad pa'i tshul la rten cing 'brel bar 'byung ba rtag pa dang chad pa med par grub pa'i sgo nas yon tan bstan pa'i phyir bshad pa/gang phyir myu gu sa bon las gzhan min/ /de phyir myug tshe sa bon zhig pa med/ /gang phyir gcig nyid yod min de phyir yang / /myug tshe sa bon yod ces brjod mi bya//gal te myu gu sa bon las gzhan nyid yin na ni/ the tshom med par myu gu yod bzhin du yang sa bon rgyun chad par 'gyur te/ gang gi phyir ba men yod pas ba lang shi bar gyur kyang rgyun ma chad pa ni ma yin la/ so so'i skye bo yod pas 'phags pa rnams mya ngan las 'das pa yang ma yin no//gzhan nyid med pa'i phyir myu gu'i rang gi bdag nyid ltar sa bon chad par ma yin te/ de ltar na chad pa spangs pa yin no/ /gcig nyid med pas sa bon gang yin pa de nyid myu gu ma yin pas sa bon mi 'jig pa bkag pa'i phyir rtag pa yang bkag par 'gyur ro//ji skad du/ sa bon yod na myu gu ji bzhin te/ /sa bon gang yin myu gu de nyid min/ /de las gzhan min de yang ma yin te/ /de ltar rtag min chad min chos nyid do/ /zhes gsungs pa lta bu'o/ /sa bon yod na zhes bya ba ni sa bon yod par 'gyur ba na zhes bya ba'i don to//sa bon gyi rgyu can myu gu yang 'byung ba ni sa bon las gzhan nyid du mi rung ngo zhe na/ gsungs pa/ sa bon gang yin myu gu de nyid min/ /yang ci'i phyir sa bon de nyid myu gu der mi 'gyur zhe na/ de'i phyir/ de las gzhan min de yang ma yin te/ /zhes bya ba gsungs so/ / gang gi phyir de nyid dang gzhan nyid gnyi ga'i phyogs mi srid pa de'i phyir/ de las gzhan dang gzhan ma yin pa nyid mi rigs so/ /de ltar phyogs gnyis char yang bkag pa na rtag pa dang chad pa med pa'i chos nyid du yongs su gsal bar byas par 'gyur ro/ /'dir don gyi de kho na nyid ni sa bon dang myu gu gnyis la rang bzhin 'ga' zhig yod par gyur na ni/de gnyis gcig pa'am gzhan pa nyid du'ang 'gyur ba zhig na/ gang gi phyir tshe de dag la rang bzhin nyid yod pa ma yin pa de'i tshe rmi lam du dmigs pa'i sa bon dang myu gu dag ltar gcig pa nyid dam gzhan nyid du ga la 'gyur zhes bya ba 'di yin par rig par bya'o//don 'di nyid/ 'du byed rnams ni ma rig rkyen can te/ /'du byed de dag de nyid du yod min/ /'du byed ma rig pa gnyis stong pa ste/ /rang bzhin gyis ni g.yo ba dang bral ba'o/ /zhes bya bas bshad pa/ bstan bcos las kyang / gang la brten te gang 'byung ba/ /de ni re zhig de nyid min/ /de las gzhan pa'ang ma yin pa/ /de phyir rtag min chad pa'ang min / /zhes gsungs so/ /ji ltar rang bzhin gyis 'ga' yang skye ba med do zhes bya ba 'di ni gdon mi za bar khas blang bar bya dgos so/ /de ltar ma yin te/ gal te rang gi mtshan nyid brten gyur na/ /de la skur pas dngos po 'jig pa'i phyir/ /stong nyid dngos po 'jig pa'i rgyur 'gyur na/ /de ni rigs min de phyir dngos yod min/ /gal te gzugs dang tshor ba la sogs pa dngos po rnams kyang rang gi mtshan nyid de rang gi ngo bo dang rang bzhin rgyu dang rkyen dag gis bskyed na ni/de gang gi tshe na rnal 'byor pa 'dis dngos po rnams rang bzhin gyis stong par mthong zhing chos thams cad rang bzhin med par rtogs pa de'i tshe nges par ji ltar skyes pa'i rang bzhin la skur pa btab pas stong pa nyid rtogs par 'gyur te/ de'i phyir ji ltar tho ba la sogs pa dag bum pa la sogs pa rnams kyi 'jig pa'i rgyu yin pa de bzhin du/stong pa nyid kyang dngos po'i rang bzhin la skur pa'i rgyur 'gyur ba zhig na de ni rung ba yang ma yin te/ de'i phyir dngos po rnams kyi rang gi mtshan nyid ni thams cad kyi tshe skye bar khas blang bar mi bya'o//ji skad du/ 'phags pa dkon mchog brtsegs pa'i mdo las/ 'od srungs gzhan yang dbu ma'i lam chos rnams la yang dag par so sor rtog pa ni/ gang stong pa nyid kyis chos rnams stong par mi byed de/ chos rnams nyid stong pa dang / gang mtshan ma med pas chos rnams mtshan ma med par mi byed de/chos rnams nyid mtshan ma med pa dang / gang smon pa med pas chos rnams smon pa med par mi byed de/ chos rnams nyid smon pa med pa dang / gang mngon par 'du bya ba med pas chos rnams mngon par 'du byed pa med par mi byed de/ chos rnams nyid mngon par 'du byed pa med pa dang /gang ma skyes pas chos rnams skyes pa nyid du mi byed de/ chos rnams nyid ma skyes pa dang / gang ma byung bas chos rnams ma byung bar mi byed de/ chos rnams nyid ma byung ba dang zhes rgya cher gsungs pa lta bu'o/ /gang zhig gzhan gyi dbang gi ngo bo khas blangs nas de la brten pa'i stong pa nyid gzung ba dang 'dzin pa med pa'i mtshan nyid can mi rtag pa nyid la sogs pa ltar de nyid dang gzhan nyid du brjod par bya ba ma yin par sems pa de'i ltar na/stong pa nyid kho nas chos thams cad stong pa yin gyi/ rang bzhin nyid kyis ni ma yin no zhes bya bar 'gyur ro//bzhi brgya pa las/ stong min stong ldan mthong min te/ /myang 'das bdag gir gyur cig ces/ /log ltas mya ngan mi 'da' bar/ /de bzhin gshegs pa rnams kyis gsungs/ /zhes bshad la/ bstan bcos las kyang / stong nyid lta ba thams cad ni//nges par 'byin par rgyal bas gsungs/ /gang dag stong pa nyid lta ba/ /de dag sgrub tu med par gsungs/ /zhes gsungs so/ /'dir smras pa/ don dam par skye ba med pas bdag dang gzhan las skyes pa bdag la rag mod/ gzugs dang tshor ba la sogs pa gang dag mngon sum dang rjes su dpag pa dag gis dmigs pa de dag gi rang bzhin ni gdon mi za bar gzhan las skye bar 'gyur ro//ci ste de ltar mi 'dod na ni bden pa gnyis ci ste brjod de/ bden pa gcig kho nar 'gyur ro/ /de'i phyir gzhan las skye ba med pa nyid do/ /'di la bshad par bya ste/'di bden mod kyi don dam par na bden pa gnyis yod pa ma yin te/ dge slong dag bden pa dam pa 'di ni gcig ste/ 'di lta ste/ mi slu ba'i chos can mya ngan las 'das pa'o/ /'du byed thams cad ni brdzun pa slu ba'i chos can no zhes 'byung ba'i phyir ro/ /de'i phyir kun rdzob kyi bden pa gang yin pa de ni don dam pa'i bden pa la 'jug par bya ba'i thabs yin pa'i phyir/bdag dang gzhan dag las skye ba ma dpyad par 'jig rten pa'i lugs kyis khas len par byed pa yin no/ /'di lta ste / gang phyir dngos po 'di dag rnam dpyad na/ /de nyid bdag can dngos las tshu rol du//gnas rnyed ma yin de phyir 'jig rten gyi/ /tha snyad bden la rnam par dpyad mi bya/ /'di ltar gzugs dang tshor ba la sogs pa 'di dag ni ci bdag las skye ba zhig gam/ ci ga gzhan las skye ba zhig ces bya ba de lta bu la sogs pa rnam par dpyad pa na/ don dam par ma skyes pa dang ma 'gags pa'i phyir rang bzhin can las tshu rol te gzhan du gyur pa'i cha skye ba la sogs pa can la gnas pa ma yin te/de'i phyir bdag dang gzhan las zhes bya ba de lta bu la sogs pa'i rnam par dpyod pa 'jug pa med par byas te/ 'jig rten pas yongs su mthong ba 'di yod na 'di 'byung ngo zhes bya ba 'di tsam zhig gzhan la rag las pa'i 'jug pa'i sgo nas khas blang bar bya ste/'phags pa lhas/ ji ltar kla klo skad gzhan gyis/ /gzung bar mi nus de bzhin du/ /'jig rten pa yi ma rtogs par/ /'jig rten gzung bar nus ma yin/ /zhes ji skad du bshad pa lta bu'o//bstan bcos las kyang / tha snyad la ni ma brten par/ /dam pa'i don ni rtogs mi 'gyur/ /dam pa'i don ni ma rtogs par/ /mya ngan 'das pa thob mi 'gyur/ /zhes gsungs so/ /rnam par dpyad pa byas na ni 'jig rten pa'i tha snyad nyams par 'gyur te/ji skad du mdo las/ dper na shing dang rgyud la brten byas la/ /lag pa rtsol ba byas pa gsum tshogs na/ /sgrog byed pi wang gling bu la sogs las/ /de dag las skyes sgra yang 'byung bar 'gyur/ /de nas mkhas pa la las brtag byas te/ /de ni gang nas 'ongs la gar song zhes//phyogs dang phyogs mtshams kun du brtag byas na / /sgra yi 'ong ba'am 'gro ba rnyed mi 'gyur/ /de ltar rgyu dag dang ni rkyen dag las/ /'du byed gyur pa thams cad 'byung ba ste/ /yang dag mthong ba'i rnal 'byor pa yis ni/ /'du byed stong pa g.yo ba med par mthong //phung po dag dang skye mched khams rnams ni/ /nang yang stong la phyi rol stong pa ste/ /sems can bdag gis stong zhing gnas med la/ /chos kyi mtshan nyid nam mkha'i ngo bo nyid/ /ces rgya cher gsungs pa lta bu'o/ /ci ste yang de ltar dngos po la mngon par zhen pa'i bdog pa thams cad kun nas gcod pa na bred sha thon pa tha snyad kyi bden pa la mngon par zhen pa 'di gang zhig kun nas nyon mongs pa dang rnam par byang ba'i rgyur gyur pa rdzas kyi bdag nyid 'ga' zhig skye bar 'gyur bar bya dgos so zhes smra na/de lta na yang de skad du smra ba la tshig tsam zhig lhag ma lus par 'gyur ro//ci'i phyir zhe na/ de nyid skabs su rigs pa gang zhig gis/ /bdag dang gzhan las skye ba rigs min pa'i/ /rigs des tha snyad du yang rigs min pas/ /khyod kyi skye ba gang gis yin par 'gyur/ /ji ltar don dam pa'i skabs su ji skad bshad pa'i rigs pas bdag dang gzhan las skye ba mi rung ba de bzhin du tha snyad du yang /de nyid kyis skye bar mi rigs pas khyod kyi dngos po rnams kyi skye ba gang gis 'grub par 'gyur/ de'i phyir rang gi mtshan nyid kyi skye ba ni bden pa gnyis char du yang yod pa ma yin no zhes mi 'dod bzhin du yang gdon mi za bar khas blang bar bya'o//gang dag bdag las ma yin zhes bya ba la sogs pas ni slob dpon klu sgrub kyi zhal snga nas kyis brtags pa'i ngo bo nyid kho na bkag pa yin gyi/ gzhan gyi dbang gi ngo bo ni ma yin no snyam du sems pa de dag gi 'dod pa 'di yang gtan tshigs med par mi grub pas/de skad du smra ba de dag ni brgal zhing brtag par bya ba kho na yin no/ /'o na ni gal te bden pa gnyis char du yang rang gi mtshan nyid kyi skye ba yod pa ma yin pa de'i phyir ci ltar na de dag gi rang gi ngo bo 'jig rten du dmigs par 'gyur zhe na/ bshad pa/dngos po stong pa gzugs brnyan la sogs pa/ /tshogs la ltos rnams ma grags pa yang min/ /ji ltar der ni gzugs brnyan sogs stong las/ /shes pa de yi rnam par skye 'gyur ltar/ /de bzhin dngos po thams cad stong na yang / /stong nyid dag las rab tu skye bar 'gyur//dngos po thams cad ni rgyu dang 'bras bu tha dad pa med par gnas pa yin la/ gzugs brnyan rang bzhin med pa'i rgyu dang 'bras bu'i rnam par gzhag pa yang shes bzhin du mkhas pa su zhig gzugs dang tshor ba la sogs pa rgyu dang 'bras bu las tha dad pa med par gnas pa rnams yod pa tsam zhig tu dmigs pas rang bzhin dang bcas par nges par byed/de'i phyir yod par dmigs kyang rang bzhin gyis skye ba med do/ /ji skad du/ me long shin tu yongs dag la/ /ji ltar rang bzhin med pa yi/ /gzugs brnyan snang ba de bzhin du/ /ljon pa chos rnams shes par gyis//zhes gsungs so/ /de nyid kyi phyir/ bden pa gnyis su'ang rang bzhin med pa'i phyir/ /de dag rtag pa ma yin chad pa'ang min/ /gang gi phyir de ltar dngos po rnams gzugs brnyan gyi rnam pa ltar rang bzhin gyis stong pa de nyid kyi phyir/ /don dam pa dang kun rdzob kyi bden pa gnyis char du yang rang bzhin te ngo bo nyid med pa'i phyir rtag pa dang chad pa med pa nyid do//ji skad du bstan bcos las/ /gang zhig ngo bo nyid yod pa/ /de ni med pa min pas rtag /sngon byung da ltar med ces pa/ /des na chad par thal bar 'gyur/ /zhes bya ba dang / de bzhin du/ dngos po yod par khas blangs na//rtag dang chad par lta bar ni/ /thal bar 'gyur te dngos de ni/ /rtag dang mi rtag 'gyur phyir ro/ /zhes bya ba la sogs pa gsungs pa lta bu'o/ /de bzhin du/ ji ltar ston pas sprul pa ni/ /rdzu 'phrul phun tshogs kyis sprul zhing / /sprul pa de yang sprul pa na //slar yang gzhan ni sprul pa ltar/ /de bzhin byed po de las gang / /byas pa'ang sprul pa'i rnam pa bzhin/ /dper na sprul pas sprul gzhan zhig /sprul pa mdzad pa de bzhin no/ /nyon mongs las dang lus rnams dang / /byed pa po dang 'bras bu dag /dri za'i grong khyer lta bu dang / /smig rgyu rmi lam 'dra ba yin/ /zhes sprul pa'i dpes rang bzhin med pa las rang bzhin med pa rnams skye bar bstan to/ /de phyir de ltar bden pa gnyis kar yang rang bzhin med pas rtag pa dang chad par lta ba rgyang ring du spangs pa 'ba' zhig tu ma zad kyi/las rnams 'gags nas yun ring du lon yang las rnams kyi 'bras bu dang 'brel pa ni kun gzhi'i rnam par shes pa'i rgyun dang chud mi za ba dang thob pa la sogs par yang yongs su rtog pa med par yang 'thad pa yin no/ /ji ltar zhe na/ gang phyir rang bzhin gyis de mi 'gag pa/ / de phyir kun gzhi med kyang 'di nus phyir/ /la lar las 'gags yun ring lon las kyang / /'bras bu yang dag 'byung bar rig par gyis/ /gang gi ltar na las 'gags pa de ni 'gags zin pa'i las de las 'bras bu ji ltar 'byung bar 'gyur zhes brtsad pa'i lan du/ 'gags zin pa'i las kyi nus pa gzhag par bya ba'i phyir kun gzhi'i rnam par shes pa'am/bu lon gyi dpang rgya dang 'dra ba'i chos gzhan chud mi za ba'am/ thos pa'am/ las kyi bag chags kyis bsgos pa'i rnam par shes pa'i rgyun rtogs par byed do/ /gang gi ltar na las rang gi bdag nyid kyis ma skyes pa de'i ltar na ni de 'gag pa yod pa ma yin zhing /ma zhig pa las 'bras bu 'byung ba mi srid pa yang ma yin pas/ /las rnams mi 'jig pas las dang 'bras bu'i 'brel ba ches shin tu 'chad par 'gyur ro/ /ji skad du/ bstan bcos las/ gang phyir las ni skye ba med//'di ltar rang bzhin med de'i phyir/ /gang phyir de ni ma skyes pa/ /de phyir chud zar mi 'gyur ro/ /zhes gsungs pa lta bu'o/ /mdo las kyang / mi yi tshe tshad lo brgya ste/ /de srid 'tsho zhes brjod mod kyi/ /lo la phung por spungs pa med/ /sgrub pa de yang de dang mtshungs//zad pa med ces gang smras dang / /las zad ces ni gang smras pa/ /stong pa'i tshul du zad pa med/ /tha snyad tshul du zad par bstan/ /zhes 'byung ngo / /ji skad bsnyad pa'i don nyid dpe'i sgo nas bshad pa/ rmi lam dmigs pa'i yul dag mthong nas ni/ /sad kyang blun la chags pa skye 'gyur ba//de bzhin 'gags shing rang bzhin yod min pa'i/ /las las kyang ni 'bras bu yod pa yin/ /ji skad du/ srid pa 'pho ba'i mdo las/ rgyal po chen po 'di lta ste/ dper na mi zhig nyal ba'i rmi lam na yul gyi bud med bzang mo dang lhan cig spyod pa rmis la/de nyal ba las sad nas yul gyi bud med bzang mo dran na/ rgyal po chen po 'di ci snyam du sems/ gang rmi lam gyi yul gyi bud med bzang mo dang lhan cig spyod pa rmis la/ de nyal ba las sad nas yul gyi bud med bzang mo de dran pa'i mi de mkhas pa'i rang bzhin can yin nam/gsol pa/ bcom ldan 'das de ni ma lags te/ de ci'i slad du zhe na/ bcom ldan 'das rmi lam gyi bud med bzang mo yang ma mchis shing mi dmigs lags na/ de dang yongs su spyod pa lta ga la mchis te/ 'di ltar mi de ni phongs shing dub ba'i skal pa can du 'gyur lags so//bcom ldan 'das kyis bka' stsal pa/ rgyal po chen po de bzhin du byis pa so so'i skye bo thos pa dang mi ldan pa yang mig gis gzugs rnams mthong nas yid bde bar gyur pa'i gzugs rnams la mngon par zhen te/ mngon par zhen par gyur nas chags pa skyed par byed do//chags nas 'dod chags las byung ba dang / zhe sdang las byung ba dang / gti mug las byung ba'i las lus dang ngag dang yid kyis mngon par 'du byed do/ /las de mngon par 'du byas par gyur nas 'gag go/ /'gags pa na shar phyogs su brten te gnas pa ma yin pa nas phyogs mtshams rnams su ma yin no zhes bya ba'i bar dang /dus gzhan ji tsam zhig na 'chi ba'i dus dang nye bar gnas pa'i tshe de dang skal ba 'dra ba'i las zad nas rnam par shes pa tha ma 'gag pa'i tshe/ 'di lta ste/ dper na nyal nyal ba las sad pa'i mi'i yul gyi bud med bzang mo lta bur yid las de nyid la mngon du phyogs par 'gyur ro//rgyal po chen po de ltar rnam par shes pa tha ma 'gag cing skye ba'i char gtogs pa'i rnam par shes pa dang po yang na ni lha dag gi nang du zhes bya ba nas yang na ni yi dwags rnams su 'byung bar 'gyur ro zhes bya ba'i bar dang /rgyal po chen po rnam par shes pa dang po de 'gags ma thag tu gang la rnam par smin pa myong bar 'gyur bar mngon pa de dang skal ba 'dra ba'i sems kyi rgyun 'byung ngo / /rgyal po chen po de la chos gang yang 'jig rten 'di nas 'jig rten pha rol tu 'pho ba yang med la 'chi 'pho ba dang skye bar mngon pa yang yod de/rgyal po chen po de la gang rnam par shes pa tha ma 'gag pa de ni 'chi 'pho ba zhes bya/ gang rnam par shes pa dang po 'byung ba de ni skye ba zhes bya'o/ /rgyal po chen po rnam par shes pa tha ma 'gag pa'i tshe yang gang du yang mi 'gro'o//rnam par shes pa dang po skye ba'i char gtogs pa 'byung ba'i cha yang gang nas kyang mi 'ong ngo / /de ci'i phyir zhe na/ rang bzhin gyis dben pa'i phyir ro/ /rgyal po chen po de la rnam par shes pa tha ma ni rnam par shes pa tha mas stong ngo / /'chi 'pho ba ni 'chi 'pho bas stong ngo //las ni las kyis stong ngo / /rnam par shes pa dang po ni rnam par shes pa dang pos stong ngo / /skye ba ni skye bas stong la las rnams chud mi za bar yang mngon no zhes bya ba gsungs pa lta bu'o/ /ci ste gal te rang bzhin gyis ma skyes pa la zad pa med pas rnam par smin par 'dod na/de lta yin dang / ji ltar ma 'gags pa'i phyir rnam par smin pa 'byung ba de bzhin du/ rnam par smin par byas zin pa las kyang rnam par smin pa yin pa dang / de la las zad pa med pa'i phyir/ rnam par smin zin pa las kyang yang rnam par smin par 'gyur ba'i phyir thug pa med pa'i skyon du 'gyur ro snyam na/de ni yod pa ma yin te/ ji ltar yul ni yod nyid min mtshungs kyang / /rab rib can gyis skra shad rnam par ni/ /mthong gi dngos po gzhan rnams ma yin ltar/ /de bzhin smin las slar smin min shes kyi / /dper na yul yod pa ma yin par 'dra bzhin du rab rib can gyis yod pa ma yin pa'i skra shad la sogs pa'i ngo bo mthong gi /de las gzhan pa'i dngos po'i rnam pa bong bu'i rwa dang mo gsham gyi bu la sogs pa dag ni ma yin pa de bzhin du/ las kyi rang bzhin ma 'gags par mtshungs bzhin du rnam par smin pa la nges par 'gyur ro//dpe 'dis las rnams ma nges pa ma yin pa 'ba' zhig tu ma zad kyi rnam par smin pa yang nges pa yin no zhes bshad pa/ de'i phyir rnam smin mi dge nag po'i las/ /rnam smin dge nyid dge las yin mthong zhing / /dge mi dge med blo can mthar 'gyur te//las 'bras rnams la sems pa dgag pa mdzad/ /gal te yang dge ba dang mi dge ba'i las gnyis rang bzhin med pa yin mod kyi/ de lta na yang skra shad la sogs pa'i mthong ba nges pa de nyid kyi phyir na/ rnam par smin pa yid du 'ong ba ni mi dge ba las ma yin la/ yid du mi 'ong ba ni dge ba las ma yin no//dge ba dang mi dge ba'i las mi dmigs pas ni thar bar 'gyur ro/ /de nyid kyi phyir bcom ldan 'das kyis so so'i skye bo shin tu nges par dpyod par byed pa rnams la/ las dang 'bras bu la skur pa btab pa las kun rdzob 'jig par 'gyur du 'ong ngo snyam ste/las rnams kyi 'bras bu rnam par smin pa ni bsam gyis mi khyab bo zhes las dang 'bras bu la brten pa'i sems pa dgag pa mdzad do/ /gal te de ltar las rnams kyi 'bras bu 'brel pa rnam par gzhag na/ 'o na 'phags pa lang kar gshegs pa la sogs pa rnams las kun gzhi'i rnam par shes pa chos mtha' yas pa'i nus pa'i khyad par gyi gzhi sa bon thams cad rba rlabs rnams la rgya mtsho ltar dngos po thams cad skye ba'i rgyur gsungs pa gang yin pa de ci rnam pa thams cad du skye ba med pa zhig gam zhe na/de ltar ni ma yin te/ de skad du nye bar bstan pas gdul ba rnams la de yod pa nyid du bstan pa'i phyir ro//dngos po thams cad kyi rang bzhin rjes su zhugs pa'i phyir stong pa nyid kho na kun gzhi'i rnam par shes pa'i sgras bstan par rig par bya'o/ /kun gzhi'i rnam par shes pa 'ba' zhig yod par ma zad kyi gang zag kyang yod de/des 'dul ba'i skye bo la de yod pa nyid du bstan pas rjes su 'dzin pa'i phyir ro/ /ji skad du dge slong dag phung po lnga ni khur ro/ /khur khur ba ni gang zag go zhes gsungs pa lta bu'o/ /kha cig la ni phung po tsam zhig bstan pa mdzad de/ sems zhes bya ba'am yid ces bya ba'am/rnam par shes pa zhes bya ba de ni dus ring por dad pa dang tshul khrims la sogs pas yongs su bsgos shing gang du 'gro ba ni phyi ma la mtho ris su 'gro bar 'gyur ro zhes gang bshad pa yin no/ /'di dag thams cad ni dgongs pa'i dbang gis gsungs pa yin no/ /'dir dgongs pa gang zhig yin zhe na/brjod par bya ste/ kun gzhi yod cing gang zag nyid yod la/ /phung po 'di dag 'ba' zhig nyid yod ces/ /bstan pa 'di ni de ltar chos zab don/ /rig par mi 'gyur gang yin de la'o/ /gdul bya gang dag yun ring por mu stegs kyi lta ba la goms par byas pas chos nyid zab mo la 'jug par mi nus shing bdag med do 'byung bar mi 'gyur ro zhes ji skad bstan pa'i chos nyid thos nas skrag pa thog ma kho nar ston pa'i nye bar bstan pa la g.yang sa dang 'dra bar sems pa de dag de la rgyab kyis phyogs pas don chen po bsgrub par mi 'gyur ro//chos thog mar kun gzhi'i rnam par shes pa la sogs pa bstan pas ni mu stegs kyi lugs bsal nas de dag gi don chen po 'dren par 'gyur zhing / phyi nas gsung rab kyi don phyin ci ma log par rig pa rnams rang nyid kyis de dag spong bar 'gyur bas yon tan kho na 'byung gi skyon ni ma yin no//ji skad du 'phags pa lhas/ gang zhig gang gang la dga' ba/ /de yi de de sngar dpyad bya/ /nyams par gyur pa dam chos kyi/ /snod ni cis kyang ma yin no/ /zhes bshad do/ /gzhug par bya ba'i phyir dang por kun gzhi'i rnam par shes pa la sogs pa bstan pa 'ba' zhig tu ma zad kyi/'on kyang / 'jig tshogs lta dang bral yang sangs rgyas kyis/ /ji ltar nga dang nga yi bstan pa ltar/ /de bzhin dngos rnams rang bzhin med mod kyi/ /yod ces drang don nyid du bstan pa yin/ /'jig tshogs la lta ba mtha' dag spangs pas ngar 'dzin pa dang nga yir 'dzin pa spangs su zin kyang /nga dang nga'i zhes bsnyad pa'i 'jig rten gyis khong du chud par bya ba'i thabs yin pa'i phyir/ bcom ldan 'das kyis nga dang nga'i zhes bya ba de lta bu ji skad bstan pa de bzhin du/ dngos po rnams rang bzhin yod pa ma yin yang de yod pa nyid du nye bar bstan pa 'jig rten gyis khong du chud pa'i thabs yin pa'i phyir/yod pa nyid du bstan pa mdzad do/ /ji skad du shar gyi ri bo'i sde dang mthun pa'i tshigs su bcad pa dag las/ gal te 'jig rten rnam 'dren rnams/ /'jig rten mthun par mi 'jug na/ /sangs rgyas chos nyid gang yin dang / /sangs rgyas sus kyang shes mi 'gyur//phung po dag dang khams rnams dang / /skye mched rang bzhin gcig bzhed la/ /khams gsum po dag ston mdzad pa/ /'di ni 'jig rten mthun 'jug yin/ /ming med pa yi chos kyi rnams/ /bsam du med pa'i ming dag gis/ /sems can rnams la yongs brjod pa//'di ni 'jig rten mthun 'jug yin/ /dngos med nye bar ston mdzad cing / /sangs rgyas rang bzhin la bzhugs pas/ /dngos med 'ga' yang 'dir med pa/ /'di ni 'jig rten mthun 'jug yin/ /don dang don med mi gzigs la/ / 'gog pa dang ni dam pa'i don/ /smra ba rnams kyi mchog gsungs pa / /'di ni 'jig rten mthun 'jug yin/ /zhig pa med cing skye med la/ /chos kyi dbyings dang mnyam gyur kyang / /bsreg pa'i bskal pa brjod mdzad pa/ /'di ni 'jig rten mthun 'jug yin/ /dus gsum dag tu sems can gyi//rang bzhin dmigs pa ma yin la/ /sems can khams kyang ston mdzad pa/ /'di ni 'jig rten mthun 'jug yin/ /zhes rgya cher gsungs pa lta bu'o/ /de'i phyir de ltar rnam par shes pa smra ba pa dbu ma pa'i lugs ji skad bstan pa mi bzod cing / rang gi rnam par rtog pas sbyar ba'i lugs brjod pa'i sgo nas/don dag 'jog par byed pa rnams kyis ji skad bshad pa'i lugs bsal ba'i phyir smras pa/ gzung ba med pas 'dzin pa ma mthong zhing / /srid gsum rnam shes tsam du rab rtogs pas/ /shes rab la gnas byang chub sems dpa' des//rnam shes tsam du de nyid rtogs par 'gyur/ /gnas zhes bya ba'i sgra 'di ni bzhugs pa la 'jug go/ /shes rab la gnas pa ni shes rab la gnas te/ de 'di la yod pas shes rab la gnas te/ shes rab sgom par byed pa la bya'o//byang chub sems dpa' des zhes bya ba ni mngon du phyogs pa la rab tu gnas pa'o/ /gang gis de kho na nyid phyin ci ma log pa dang lhag par sgro ma btags par rtogs pa dang mthong ba dang khong du chud pa de ni de nyid rtogs pa ste/ rnam par shes pa tsam du de kho na nyid rtogs par 'gyur zhes tshig rnam par sbyar ro//gzugs med pas sems dang sems las byung ba rnams kyang rten cing 'brel bar 'byung ba'i dngos po tsam du rtogs pa'i phyir/ rnam par shes pa tsam du de kho na nyid rtogs pa zhes bya'o/ /yang ji ltar 'dis rnam par shes pa tsam du de kho na nyid rtogs par 'gyur zhe na/de'i phyir 'di ltar/ gzung ba med pas 'dzin pa ma mthong zhing / /srid gsum rnam shes tsam du rab rtogs pas/ /zhes bya ba smras te/ gang gi phyir byang chub sems dpa' 'dis 'chad par 'gyur ba'i rigs pas sems la gzung ba yod pa ma yin pa nyid kyis 'dzin pa nyid kyang ma mthong zhing /khams gsum po 'di ni rnam par shes pa tsam mo zhes yun ring por goms par byed la/ de goms par byas pa las kyang brjod du med pa'i dngos po tsam zhig rang rig pas mthong ste/ de'i phyir rim pa 'dis rnam par shes pa tsam du de kho na nyid rtogs par 'gyur ro//gal te 'di dag rnam par shes pa tsam nyid yin na/ 'o na 'dir ji ltar phyi rol gyi don med par de'i rnam pa can gyi rnam par shes pa tsam skye bar 'gyur zhe na/ smras pa/ ji ltar rlung gis bskul bas rgya mtsho ni/ /che las chu rlabs 'byung ba de bzhin du//kun gyi sa bon kun gzhi zhes bya las/ /rang gi nus pas rnam shes tsam zhig 'byung / /ji ltar rgya mtsho chu rlabs kyi rten du gyur pa'i chu'i yan lag rlung gis kun nas bskyod pa las/ rlung tsam gyis rkyen nye bar lhags pas gnyid log pa lta bu'i rba rlabs rnams 'gran pa'i sgo nas bdag gi lus rnyed pa ltar kun nas yongs su rgyug par rtogs pa de bzhin du 'dir yang rnam par shes pa gcig nas gcig tu brgyud pa thog ma med pa'i dus nas zhugs pa/gzung ba dang 'dzin par mngon par zhen pa'i bag chags yongs su smin pa las bdag nyid kyis dngos po yod pa thob par 'gag bzhin bas/kun gzhi'i rnam par shes pa la gang bag chags kyi khyad par rang gi rnam pa dang rjes su 'brel ba'i rnam par shes pa gzhan skye ba'i rgyur gyur pa gzhag pa rim gyis rang yongs su smin pa'i rkyen lhags pas yongs su smin pa thob pa de las gang yongs su ma dag pa gzhan gyi dbang tsam zhig nye bar bskyed pa de nyid la byis pa rnams gzung ba dang 'dzin pa'i rnam par rtog pa kun tu rtog par byed kyi/rnam par shes pa las tha dad par gyur pa'i gzung ba ni cung zad kyang yod pa ma yin no/ /dper na dbang phyug la sogs pa rgyur smra ba rnams/ba ni ba sgra rnams kyi rgyu/ /chu shel chu rnams kyi bzhin dang / /blag sha yal ga rnams kyi ltar/ /de ni lus can kun gyi rgyu/ /zhes dbang phyug la sogs pa 'gro ba'i byed pa po nyid du smra bar byed pa de bzhin du/ kun gzhi'i rnam par shes pa smra ba rnams kyang kun gzhi'i rnam par shes pa dngos po mtha' dag gi dmigs pa'i sa bon gyi rten nyid kyis sa bon thams cad pa smra bar byed do//gang dbang phyug rtag la kun gzhi'i rnam par shes pa ni mi rtag go zhes bya ba 'di ni khyad par ro/ /gang gi phyir gsung rab kyi rnam par gzhag pa ni 'di yin par grags pa/de phyir gzhan gyi dbang gi ngo bo gang / dngos po brtag par yod pa'i rgyur gyur zhing / /phyi rol gzung ba med par 'byung 'gyur la/ /yod dang spros kun yul min rang bzhin yod/ /gzhan gyi dbang gi ngo bo 'di ni gdon mi za bar khas blang bar bya ste/gang gi phyir de ni rtog pa'i dra ba ma lus pa'i gzhir 'dod pa'i phyir ro/ /sbrul du 'khrul pa thag pa'i rgyu mtshan can ni de la ma ltos par mi rigs la/ bum par 'khrul pa sa la sogs pa'i rgyu mtshan can ni sa la sogs pa la ma ltos par nam mkha'i khams su 'byung bar mi 'gyur ba de bzhin du/'dir yang phyi rol gyi don med na sngon po la sogs pa'i rtog pa ci'i rgyu mtshan can zhig tu 'gyur/ de'i phyir gdon mi za bar rtog pa'i rgyu gzhan gyi dbang gi ngo bo khas blang bar bya ste/ kun nas nyon mongs pa dang rnam par byang ba'i rgyu yin pa'i phyir ro//de ltar na gang gi phyir gang la gang med pa de ni des stong par yang dag par rjes su mthong la/ gang zhig 'dir lhag mar lus par gyur pa de 'di na bden par yod pa yin no zhes yang dag pa ji lta ba bzhin du rab tu shes pa 'di ni stong pa nyid la phyin ci ma log par 'jug pa'o zhes bya ba la sogs pas stong pa nyid kyang legs par gzung bar 'gyur ro//de ni spros pa thams cad kyi yul ma yin pa'i rang bzhin can yang yin te/ mngon par brjod pa ni btags pa'i rnam pa 'dzin pa'i phyir te/ ji srid mngon par brjod par yod pa de srid du dngos po brjod pa ma yin no//de'i phyir mdor bsdu na/ 'dir gzhan gyi dbang gi ngo bo la gsum rnam par gzhag par 'gyur te/ shes bya med par rang gi bag chags kho na las 'byung ba dang / yod pa nyid dang spros pa'o/ /gcig gi yul ma yin pa nyid do/ /gdags par yod pa'i dngos po'i rgyu nyid ni yod pa nyid las grub pa'i phyir de ni gsum po las tha mi dad do zhe'o//'di la bshad par bya ste/ phyi rol med sems dper ni gang du yod/ /ces 'di nyid yang dag par dpyad par bya'o/ /smras pa/ rmi lam ji bzhin zhe na/ khang mig shin tu chung ngu'i nang du nyal shing gnyid kyis log pas khang pa'i nang du glang po che myos pa'i khyu rmis pa ni ji zhig ltar yang yod pa ma yin te/de'i phyir phyi rol gyi yul med bzhin du gdon mi za bar rnam par shes pa 'di khas blang bar bya'o/ /'di yang snying po med pa nyid du bstan pa'i phyir bshad pa/de bsam bya/ yang de ci zhig ce na/ bshad pa/ gang tshe nga la rmi lam na yang sems/ /yod min de tshe khyod kyi dpe yod min/ /gang ban glang myos pa'i khyu'i rnam pa can gyi shes pa de ni yul ltar kho bo cag la yod pa ma yin te/ ma skyes pa'i phyir ro/ /rnam par shes pa med na yang gnyi ga la grub pa'i dpe yod pa ma yin pas phyi rol med par rnam par shes pa yod pa ma yin no//ci ste rmi lam na rnam par shes pa nor ba med na de'i tshe sad pas rmi lam gyi nyams su myong ba dran par mi 'gyur ro snyam na 'di yang mi rung ste/ 'di ltar/ gal te sad tshe rmi lam dran las yid//yod na phyi rol yul yang de bzhin 'gyur/ /ci'i phyir zhe na/ ji ltar khyod kyis ngas mthong snyam dran pa/ /de 'dra phyi rol la yang yod pa yin/ /ji ltar rmi lam gyi nyams su myong ba dran pa las yid yod pa nyid yin pa de bzhin du/ yul gyi nyams su myong ba dran pa yang yod pas yul yang yod pa'am/yang na rnam par shes pa yang yod pa ma yin no zhes nges par bya'o/ /'dir smras pa/ gal te glang po che la sogs pa'i gzugs rmi lam na yod na de gzung bar bya ba'i phyir mig gi rnam par shes pa yang yod par 'gyur ba zhig na/de ni yod pa yang ma yin te/ gnyid kyis dkrugs pas rnam par shes pa lnga'i tshogs mi srid pa'i phyir ro/ /'di ltar/ gal te gnyid nang mig blo mi srid pas/ /yod min yid kyi shes pa kho na yod/ /de yi rnam pa phyi rol nyid du zhen/ /rmi lam ji bzhin de bzhin 'dir 'dod na//ste rmi lam du mig gi rnam par shes pa rnam pa thams cad du yod pa ma yin te/ de med pas glang po che la sogs pa'i gzugs mig gi skye mched kyis gzung bar bya ba de yod pa ma yin la yid kyi rnam par shes pa ni yod pa yin no/ /de'i phyir phyi rol gyi gzugs med pa kho na yin zhing rnam par shes pa'i rnam pa phyi rol nyid du mngon par zhen pa ni bzlog tu med do//ji ltar rmi lam du phyi rol med par rnam par shes pa tsam 'byung ba de bzhin du 'dir yang 'gyur ro zhe na/ de ltar ma yin te/ rmi lam du yid kyi rnam par shes pa 'byung ba mi srid pa'i phyir ro//'di ltar/ ji ltar khyod kyi phyi yul rmi lam du/ /ma skyes de bzhin yid kyang skyes ma yin/ /de'i phyir/ mig dang mig gi yul dang des bskyed sems/ /gsum po thams cad kyang ni brdzun pa yin/ /ji ltar gzugs mthong ba ni mig dang gzugs dang yid de gsum po nye bar gyur pa de bzhin du/rmi lam du yang yul yongs su gcod pa na gsum 'dus par dmigs pa yin no/ /ji ltar der mig dang gzugs gnyis med pa de bzhin du/ mig gi rnam par shes pa yang yod pa ma yin no/ / gsum po 'di dag ji lta ba de bzhin du/ rna sogs gsum po lhag ma'ang skye ba med/ /rna sogs zhes bya ba'i sogs pa'i sgras ni sgra dang rna ba'i shes pa nas yid dang chos kyi khams dang yid kyi rnam par shes pa'i bar bsdu'o/ /de'i phyir rmi lam du gsum po 'di dag thams cad brdzun pa de'i phyir rmi lam na yid kyi rnam par shes pa yod do zhes bya ba de mi rigs so//gang zhig chos kyi skye mched du gtogs pa'i gzugs yid kyi rnam par shes pas gzung bar bya ba zhig rmi lam na yod de/ de'i phyir rnam par shes pa ni yul med par 'gar yang yod pa ma yin no snyam du sems pa de yang rigs pa ma yin pa nyid de/rmi lam na rnam pa thams cad du gsum po mi srid pa'i phyir ro/ /ci ste gzhan gyi gzhung lugs gsal bar bya ba'i phyir de ltar khas len na ni/ de'i tshe rmi lam gyi dpe don med pa nyid du 'gyur te/ de brdzun pa ma yin pa'i don can yin pa nyid kyis dpe las byung ba dngos kyi don brdzun pa'i don can nyid du bstan pa mi srid pa'i phyir ro//gang gi phyir rmi lam na gsum car yang mi bden pa de'i phyir rab tu grub pa'i sgo nas ma grub pa bsgrub pa'i phyir sad pa'i tshe na yang chos thams cad rang bzhin med pa nyid du bsgrub par 'gyur ro zhes bshad pa/rmi lam ji ltar de bzhin sad 'dir yang / /dngos rnams brdzun yin sems de yod ma yin/ /spyod yul med cing dbang po rnams kyang med/ /ji ltar rmi lam du yul dang dbang po dang rnam par shes pa rnams brdzun pa de bzhin du sad pa na yang yin no zhes shes par bya'o//de'i phyir/ ji ltar sgyu ma'i sems can dmigs pa ltar/ /snang yang de nyid du na yang dag min/ /sgyu ma lta bu rmi lam dang 'dra ba/ /de lta'i chos ni bde bar gshegs pas bstan/ /zhes bya ba dang / de bzhin du/ srid pa'i 'gro ba rmi lam lta bu ste/ /'di la su yang mi skye 'chi ba med/ /sems can ming dang srog kyang mi rnyed de/ /chos 'di rnams ni lbu ba chu shing 'dra/ /zhes bya ba la sogs pa yang legs par bshad par 'gyur ro/ /de'i phyir sad pa'i shes pa la ltos nas gsum char yang ma skyes par bshad la/rmi lam na rmi lam rmi bzhin pa'i shes pa la ltos nas ni/ 'di na ji ltar sad bzhin ji srid du/ /ma sad de srid de la gsum po yod/ /ji ltar mi shes pa'i gnyid yod kyang de las tha dad pa'i gnyid dang bral bas sad pa 'ga' zhig la rang gi bdag nyid kyis ma skyes kyang ma rig pa'i gnyid kyis rmi lam rmi bzhin pas dmigs par gsum char yang yod pa de bzhin du/gnyid dang ma bral ba rmi lam gyi gnas skabs las ma langs pa rnams la yang de lta bu'i rang bzhin can gsum char yang yod do//sad par gyur na gsum char yod min ltar/ /gti mug gnyid sad las de de bzhin no/ /ji ltar gnyid zad pas sad par gyur pa rmi lam du dmigs pa gsum po yod pa ma yin pa de bzhin du/ ma rig pa'i gnyid ma lus par drungs phyung ba chos kyi dbyings mngon sum du mdzad pa rnams la yang gsum char yod pa ma yin pas/phyi rol med par rnam par shes pa yod pa ma yin no/ /'o na rab rib can gyis yod pa ma yin pa'i skra shad la sogs pa dmigs pa'i phyir phyi rol med kyang rnam par shes pa yod pa yin no zhe na/ de yang mi 'thad de/ci'i phyir zhe na/ dbang po rab rib bcas pas blo gang gis/ /rab rib mthu las skra rnams gang mthong ba/ /de blo la ltos gnyis char bden pa ste/ /don gsal mthong la gnyi ga'ang brdzun pa yin/ /rmi lam kho na ltar blta bar bya'o/ /rab rib can gyis mthong ba la ltos nas skra shad kyi rnam pa yang yod pa yin la/rab rib med pa'i mthong ba la ltos nas gnyi ga yang ma skyes pa nyid do / /yul med par shes pa nges par dka' ba'i phyir ro/ /'di ni gdon mi za bar 'dod par bya dgos te/ de ltar ma yin te/ gal te shes bya med par blo yod na/ /skra de'i yul dang mig ni rjes 'brel ba'i/ /rab rib med la'ang skra shad blor 'gyur na/ /de lta ma yin de phyir de yod min/ /gal te rab rib can la skra shad dag med par skra shad kyi rnam pa can gyi shes pa skye na yul gang du rab rib can gyis skra shad dag mthong ba der mig gtad pa'i rab rib med pa la yang de dang 'dra bar skra shad kyi blo yod par 'gyur te/yul med par mtshungs pa'i phyir ro/ /de'i phyir yul med par rnam par shes pa skye'o zhes bya ba de ni mi rigs so/ / 'dir gal te yul gyi yod pa nyid rnam par shes pa skye ba'i rgyu yin na ni 'di de ltar 'gyur ba zhig go/ /'o na ci zhe na/ rnam par shes pa'i bag chags sngar gzhag pa de smin pa dang ma smin pa dag rnam par shes pa skye ba dang mi skye ba dag gi rgyu yin te/ de'i phyir gang la skra'i rnam pa can gyi shes pa gzhan gyis gzhag pa'i bag chags yongs su smin pa yod pa de kho na la de'i rnam pa can gyi shes pa 'byung gi gzhan la ni ma yin no//zhes smra'o/ /'di yang mi rung ngo zhes bshad pa/ gang phyir mthong ba dag la blo nus ni/ /smin med de ltar de la blo mi 'byung //shes bya yod dngos bral bas min zhe na/ /nus de med pas 'di ni 'grub ma yin/ /shes bya yod pa'i dngos po dang bral ba ni shes bya yod pa ma yin pa zhes bya ba'i don to/ /gal te nus pa zhes bya ba 'ba' zhig yod na ni/ de'i tshe smin pa dang ma smin pa dag la rnam par shes pa 'byung ba dang mi 'byung ba dag tu 'gyur ba zhig go//de'i phyir 'di mi 'grub bo/ /yang ji ltar na nus pa yod pa ma yin zhe na/ bshad pa/ skyes la nus pa srid pa yod ma yin / /ma skyes ngo bo la yang nus yod min / /'dir nus pa 'di yongs su rtog pa na rnam par shes pa da ltar ba'i 'brel pa can zhig gam/rnam par shes pa 'das pa dang ma 'ongs pa'i 'brel ba can zhig tu 'gyur grang / de la re zhig rnam par shes pa skyes pa la nus pa srid pa ma yin te/ gang gi tshe nus pa'i zhes drug pa yin pa de'i tshe ni rnam par shes pa 'bras bu'i ngo bor gyur pa ni rgyu nyid du yang yod do zhes bya bar rigs pa ma yin no//gal te yin na ni 'bras bu rgyu med pa can du 'gyur zhing myu gu skyes pa na yang sa bon mi 'jig par 'gyur ro/ /de'i phyir skyes pa'i rnam par shes pa la nus pa mi srid do/ / gang gi tshe nus pa las zhes lnga pa yin pa de'i tshe ni rnam par shes pa skyes pa nus pa las 'byung bar mi rigs te/ yod pa'i phyir zhes sngar bshad zin to/ /de ltar na re zhig skyes pa la nus pa srid pa yod pa ma yin no/ /ma skyes pa'i rang bzhin can gyi rnam par shes pa la yang nus pa yod pa ma yin te/gang gi phyir/ /khyad par med par khyad par can yod min/ /mo gsham bu la'ang de ni yod par thal/ /khyad par med par khyad par du bya ba yod pa ma yin pa nyid do/ /ci ltar zhe na/ rnam par shes pa'i nus pa zhes rnam par shes pa ni nus pa'i khyad par yin la/nus pa ni khyad par gyi gzhi yin no/ /gang ma skyes pa de ni rnam par shes pa'am/ rnam par shes pa ma yin zhes bya bar dgag pa dang sgrub pa'i ngo bos bstan par mi nus so/ /gang gi tshe de ltar yin pa de'i tshe 'di ni 'di'i nus pa'o zhes bya bar gang gi nus pa khyad par du byed par 'gyur/gang gi tshe de ltar khyad par yod pa ma yin pa de'i tshe 'di ni 'di las 'byung ngo zhes khyad par du ma smras pa 'dis ni cung zad kyang bstan par mi 'gyur ro/ /yang gal te ma skyes pa la nus pa 'dod na/ mo gsham gyi bu la yang 'dod par bya dgos te/de'i phyir ma skyes pa la nus pa yod pa ma yin no/ /ci ste rnam par shes pa gang zhig nus pa las skye bar 'gyur ba'i rnam par shes pa 'byung bar 'gyur ba de snying la bsams nas rnam par shes pa 'di'i nus pa 'di yin zhing 'di las 'di 'byung bar 'gyur ro zhes de ltar khyad par dang khyad par gyi gzhi'i dngos po 'grub par 'gyur te/ji skad du 'jig rten na 'bras chan tshos shig /snal ma 'di la ras yug thogs shig ces smras la/ bstan bcos las kyang / mngal du 'jug pa gsum dag ste/ / 'khor los sgyur dang rang 'byung gnyis/ /zhes bshad do snyam na/ de yang snying po med pa nyid du brjod pa'i phyir bshad pa/ gal te 'byung bar 'gyur bas bsnyad 'dod na/ /nus pa med pa 'di yi 'byung 'gyur med/ /res 'ga' gang zhig tu 'gyur na ni de 'byung bar 'gyur gyi/rtag tu 'byung ba ma yin par nges pa mo gsham gyi bu la sogs pa'am nam mkha' la sogs pa ni mi 'gyur ro/ /de'i phyir 'dir gal te nus pa yod par 'gyur na ni/ rnam par shes pa 'byung bar 'gyur ba nyid du 'gyur ba zhig na/ gang gi tshe rnam par shes pa ma 'ongs pa yod pa ma yin pa nyid kyis nus pa med pa nyid yin pa de'i tshe/mo gsham gyi bu la sogs pa bzhin du nus pa med par de'i 'byung bar 'gyur ba nyid yod pa ma yin no/ /'dis ni 'bras chan la sogs pa dag kyang bshad pa yin no/ /gzhan yang rnam par shes pa dang nus pa phan tshun ltos nas 'gyur la rag mod/de lta na yang gzhan gyi dbang gi ngo bo yod pa nyid ma yin te/ 'di ltar/ phan tshun don la brten pa'i grub pa ni/ /grub min nyid ces dam pa rnams kyis gsungs/ /rnam par shes pa yod na ni de'i nus pa yin la/de las rnam par shes pa 'byung ba yin no zhes de ltar phan tshun gyi don la brten par 'gyur ro/ /de ltar 'gyur mod ce na/ rnam par shes pa rang bzhin gyis yod pa ma yin no zhes bya bar 'gyur ro/ /dper na ring po yod na thung ngur 'gyur la thung ngu yod na ring por 'gyur zhing /pha rol yod na tshu rol du 'gyur la tshu rol yod na pha rol tu 'gyur ba ltar btags par 'gyur gyi de dag la grub pa rang bzhin pa med do/ /de lta yin na ni kho bo cag gi smra ba'i rjes su 'brang ba nyid du 'gyur ro/ /ji skad du/ bzhi brgya pa las/ 'bras bu med par rgyu yi ni//rgyu nyid yod pa ma yin pa/ /de yi phyir na 'bras bu kun/ /rgyu nyid du ni thal bar 'gyur/ /zhes bshad la / bstan bcos las kyang / gal te dngos po gang ltos 'grub/ /de nyid la yang ltos nas ni/ /ltos bya gang yin de 'grub na/ /gang la ltos nas gang zhes 'grub//ces gsungs so/ /'di'i don ni 'di yin te/ gal te dngos po rnam par shes pa la sogs pa gang zhig nus pa'i khyad par la ltos nas 'grub pa de nyid la yang ltos nas rnam par shes pas bdag nyid 'grub par bya ba'i phyir/ ltos par bya ba dngos po nus pa'i khyad par gang yin pa de 'grub na/de ni gnyi ga 'grub par bya ba gang la ltos nas gang zhig 'grub par 'gyur ba brjod par bya dgos so/ /gzhan yang / dngos po ltos 'grub gang yin pa/ /de ma grub na ci ltar ltos/ /ci ste 'grub pa ltos she na/ / de ni ltos par mi rigs so/ /zhes gsungs so/ /'di'i don yang 'di yin te/ gal te rnam par shes pa nus pa la ltos nas 'grub na/ de grub pa'am ma grub pa zhig nus pa la ltos grang / gal te ma grub pa yin na ni/ ma grub pa'i phyir bong bu'i rwa ltar nus pa la mi ltos so//'on te grub pa la ltos na ni/ grub pa'i phyir de ltos par mi rung ngo / /de ltar phan tshun don la brten pa'i grub pa ni grub pa min zhes mkhyen rab mnga' ba rnams kyis gsungs so/ /de'i phyir de ltar ma 'ongs pa la yang nus pa yod pa ma yin no/ /da ni 'das pa la yang nus pa yod pa ma yin no zhes bstan pa'i phyir bshad pa/gal te 'gags pa'i nus min las 'gyur na/ /gzhan gyi nus pa las gzhan 'byung bar 'gyur/ /gal te skyes nas 'gags bzhin pa'i rnam par shes pas 'bras bu'i don du kun gzhi'i rnam par shes pa la nus pa'i khyad par gzhag pa rnam par shes pa 'gags pa'i nus pa smin pa gang yin pa de las 'byung bar 'gyur ba'i rnam par shes pa 'byung na ni de'i tshe gzhan gyi nus pa las gzhan 'byung bar 'gyur ro//ci'i phyir zhe na/ gang gi phyir/ rgyun can rnams der phan tshun tha dad yod//ta nu ni rgyas pa la'o zhes bya ba 'di'i ltar na/ brgyud pas na rgyun te chu klung gi rgyun ltar rgyun chags pa rgyun lugs rgyu dang 'bras bu 'brel bar 'jug pa na skye ba dang 'chi ba brgyud pas bar med par rim pa rnam par ma chad par gnas pa 'du byed kyi skad cig dus gsum pa'i nye bar len pa can la bya la/de rgyun gyi cha shas rdzas kyi skad cig rnams la yod pas na rgyun gyi yan lag rdzas kyi skad cig rnams la rgyun can zhes brjod do/ /de dag phan tshun te gzhan dang gzhan du tha dad cing gzhan nyid du gzhan gyis khas blangs pa yin no/ / de'i phyir 'bras bu'i skad cig bag chags kyi rgyu can dus phyis 'byung ba la rgyu'i skad cig bag chags 'jog par byed pa las gzhan nyid yod pa yin te/ de ltar na gzhan gyi nus pa las gzhan 'byung bar 'gyur ro/ /ci ste 'dod pa'i phyir 'di skyon ma yin no snyam na/ de ltar ni ma yin te/de ltar 'dod na/ thams cad thams cad las skye bar 'gyur ro zhes bshad pa ni/ de phyir thams cad kun las 'byung bar 'gyur/ /zhes bya ba ste/ 'di ni gzhan las skye ba 'gog pa bshad zin pas slar yang mi brjod do/ /'dir smras pa/ gal te der ni rgyun can tha dad kyi//de dag la rgyun tha dad med de'i phyir/ /nyes med ce na/ gal te yang der rdzas kyi skad cig rgyun can rnams la phan tshun gzhan nyid yod mod kyi de lta na yang rgyun 'di ni gcig pa kho na yin pas thams cad thams cad las skye bar thal bar mi 'gyur ro zhe na/gal te de ltar yin na de'i tshe nyes pa med par 'gyur ba zhig na/ 'di nyid ma grub pas na/ 'di ni bsgrub bya zhig go/ /ci'i phyir zhe na/ tha mi dad rgyun skabs mi rigs phyir ro/ /skabs ni go skabs so/ /bdag gi dngos po phan tshun tha dad pa rnams ni rgyun tha mi dad pa'i rten nyid du yod par mi 'os te/gzhan yin pa'i phyir gzhan bzhin no zhes bstan pa'i phyir bshad pa/ byams pa nyer sbas la brten chos rnams ni/ /gzhan nyid phyir na rgyud gcig gtogs min te/ /gang dag rang mtshan nyid kyis so so ba/ /de dag rgyud gcig gtogs par rigs ma yin//de bzhin du 'dir yang rgyud gcig pa nyid rigs pa dang ldan pa ma yin no snyam du bsams pa'o/ /de la nus pa smin pa yod pa dang yod pa ma yin pa dag gis rnam par shes pa yod pa dang med pa dag yin gyi / shes bya yod pa dang med pas ni ma yin no zhes gang smras pa de ni nus pa mi srid par brjod pas tshul 'dis bsal ba yin te/de'i phyir shes bya med pas rnam par shes pa med pa yin no/ /zhes bya ba 'di ni gnas pa yin no/ /de skad bstan pa yin dang / slar yang rnam par shes par smra bas rang gi lugs brjod pa lhur byas pa nyid kyis mngon par 'dod pa'i don grub par bsams shing smras pa/mig blo'i skye ba rang nus gang zhig las/ /de ma thag tu kun nas skye 'gyur zhing / /rang gi rnam shes rten gyi nus de la/ /dbang po gzugs can mig ces bya bar rtogs/ /mig gi rnam par shes pa'i bag chags gang zhig kun gzhi'i rnam par shes pa la rnam par shes pa gzhan gyis 'jog bzhin pa na gzhag pa yin la/de yongs su smin pa las dus phyis de'i rnam pa'i rjes su byed pa'i rnam par shes pa skye bar 'gyur zhing / rnam par shes pa de nus pa'i skad cig bar med par gang zhig las skye ba'i nus pa'i skad cig bar med pa rten du gyur pa de la gti mug gis 'jig rten na dbang po gzugs can mig yin no snyam du rtogs kyi/rnam par shes pa las tha dad pa'i mig gi dbang po ni yod pa ma yin no//de bzhin du dbang po gzhan yang nges par bya'o/ /de'i phyir de ltar rnam par shes pa las tha dad pa'i mig gi dbang po med par bstan nas/ gzugs kyang rnam par shes pa las tha mi dad par gnas pa nyid du bstan pa'i phyir smras pa/ 'di na dbang po las byung rnam par rig /phyi gzung med par rang gi sa bon las/ /sngo sogs snang nyid 'byung bar ma rtogs nas/ /skye bos phyi rol gzung bar sems khas len/ /ji ltar ban d+hu dzi ba ka dang king shu ka la sogs pa dag dmar po'i rnam pa can du skye ba na/ nor bu dag bzhin du phyi rol gyi nye bar bsgyur ba'i tshon la mi ltos kyi/'on kyang myu gu la sogs pa'i rgyun rang gi sa bon gyis 'phangs pa'i nus pa dang rjes su 'brel ba las rnam pa khyad par can nyid du skye bar dmigs pa de bzhin du/ sngon po la sogs pa phyi rol gyi gzugs med par rnam par shes pa sngon po la sogs par snang ba 'byung ba yin la/de'i sngon po la sogs par snang ba nyid gang yin pa de la 'jig rten gyi phyi rol gyi yul gyi ngo bor mngon par zhen te/ dper na mtsho chu shin tu dngas pas yongs su gang ba'i ngogs kyi mthar skyes pa'i shing gi yal ga la btags pa'i pad+ma rA ga'i gzugs brnyan chu nang na yod pa rin po che'i rnam par snang ba chu'i nang na phyi rol lta bur dmigs mod kyi/de de'i nang na yod pa ni ma yin pa de bzhin du rnam par shes pa la yang sbyar bar bya'o/ /de ltar na rnam par shes pa las phyi rol gyi don yod pa ma yin no//rnam pa gcig tu na/ rmi lam na ni gzugs don gzhan med par/ /rang nus smin las de yi rnam can sems/ /'byung ba ji ltar de bzhin sad la'ang 'dir/ /phyi rol med par yid ni yod ce na/ de ni de ltar ma yin no/ /ci'i phyir zhe na/ji ltar mig med par ni rmi lam du/ /sngo sogs snang ba'i yid sems 'byung de ltar/ /dmigs dbang med par rang gi sa bon ni/ /smin las long ba la 'dir cis mi skye/ /gal te 'dir ji ltar sad pa'i gnas skabs su gyur pa mig gis gzugs rnams lta ba las mig gi rnam par shes pa ches gsal ba 'byung ba de bzhin du/rmi lam du yang mig med par rang gi bag chags smin pa las yid kyi rnam par shes pa nyid mig gi rnam par shes pa'i rnam pa dang rjes su mthun par skye na/ sad pa'i gnas skabs kyi long ba la yang gang gis na 'dis ma long ba ltar mthong bar 'gyur ba rang gi bag chags yongs su smin pa las rnam pa de lta bu ci'i phyir 'byung bar mi 'gyur te/gnyi ga yang mig med par mtshungs pa'i phyir ro/ /ci ste rnam pa de lta bu'i yid kyi rnam par shes pa'i rgyu ni mig med pa ma yin gyi/ 'o na ci zhe na/ rnam pa de lta bu'i yid kyi rnam par shes pa'i nus pa smin pa yin no//de'i phyir gang nus pa yongs su smin pa yod pa de rnam pa de lta bu'i yid kyi rnam par shes pa 'byung ba yin la/ de yang gnyid kyi rkyen gyis rmi lam kho na na yod pa yin gyi sad pa la ni ma yin no snyam na/ de yang mi rigs so/ /ci'i phyir zhe na/ gal te khyod ltar rmi lam drug pa yi/ /nus pa smin yod sad par med 'gyur na/ /drug pa'i nus smin ji ltar 'dir med pa/ /de ltar rmi tshe med ces cis mi rigs/ /drug pa zhes bya ba ni yid kyi rnam par shes pa zhes bya ba'i don to/ /gal te tshig gi tshul tsam kho nas rmi lam du rnam pa de lta bu'i yid kyi rnam par shes pa'i nus pa smin par 'dod kyi/sad pa la ma yin na nged cag gi tshig gis kyang 'di ni ji ltar sad pa la rnam pa de lta bu'i rnam par shes pa'i nus pa smin pa/ yod pa ma yin pa de bzhin du rmi lam na yang med do zhes 'dod par bya dgos so/ /ji ltar mig med 'di yi rgyu min ltar/rmi lam du yang gnyid ni rgyu ma yin par brjod par nus so/ /rmi lam mthong ba ni sad pa'i gnas skabs kyi long ba ltar rnam par shes pa de'i rten dbang po byed pa dang bral ba'i phyir/ rnam par shes pa mig gi dbang po nus pa'i ming can la brten pa'i rnam pa'i rjes su byed pa/yid kyi rnam par shes pa'i nus pa smin pa'i yongs su 'gyur ba yid kyi rnam par shes pa can ma yin no/ /de'i phyir de ltar mig med pas sad pa'i long ba 'di la rgyu ma yin pa ji lta ba de bzhin du/ gnyid kyang rmi lam du rnam par shes pa'i bag chags yongs su smin pa'i rgyu ma yin no//gang gi phyir de ltar yin la / de phyir rmi lam du yang de dngos mig /brdzun pa'i yul can rtogs pa'i rgyur khas blang / /de'i phyir rmi lam du yang rnam pa de lta bu'i yul gyi shes pa rnam pa de lta bu dang / mig gi rnam par shes pa'i rten du gyur pa rnam pa de lta bu khas blang bar bya'o//de'i phyir de ltar na/ 'di yis lan ni gang dang gang btab pa/ /de dang de ni dam bca' mtshungs mthong bas/ /rtsod 'di sel byed/ sad pa'i gnas skabs kyi gsum po 'di rang bzhin gyis stong pa yin te/ dmigs pa'i phyir rmi lam yin no zhes bstan pa yin dang /pha rol po gang zhig sad pa'i rnam par shes pa ni don gyis stong pa yin te/ rnam par shes pa yin pa'i phyir rmi lam gyi rnam par shes pa bzhin no zhes bya ba dang / sad pa'i gnas skabs su dmigs pa'i yul ni brdzun pa'i rang bzhin can yin te/yul yin pa'i phyir rmi lam gyi yul bzhin no zhes bya ba dang / de bzhin du kun nas nyon mongs pa dang rnam par byang ba dag ni gzhan gyi dbang med na yod pa ma yin te/ rten med pa'i phyir rus sbal gyi spu'i gos bzhin no zhes smra'o/ /de bzhin du rab rib kyi dpe dag gis kyang brjod par bya'o//de lta bu la sogs pa'i sgo nas rnam par shes par smra ba 'dis lan gang dang gang btab pa de dang de ni mkhas pa dbu ma pas dam bca' ba dang mtshungs par mthong na rtsod pa 'di ste/ rnam par shes par smra ba zlog par byed do/ /de bzhin du lung gis gnod pa la sogs pa'i nyes pa yang srid pa ma yin te/gang gi phyir/ sangs rgyas rnams kyis ni/ 'gar yang dngos po yod ces ma bstan to/ /ji skad du/ srid pa gsum ni btags pa tsam/ /ngo bo nyid kyis dngos po med/ /btags pa dngos po'i ngo bor ni//rtog ge pa dag rtog par 'gyur/ /rang bzhin med cing rnam rig med/ /kun gzhi med cing dngos med na/ /byis pa ngan pa rtog ge pa/ /ro dang 'dra bas 'di dag brtags/ /zhes gsungs so/ /gcig la gcig med pa'i stong pa nyid kyis dngos po med pa nyid du yang rigs pa ma yin te/blo gros chen po gcig la gcig med pa'i stong pa nyid ni stong pa nyid thams cad kyi tha shal yin no zhes lung las 'byung ba'i phyir ro/ /ba lang rta ma yin pa'i phyir yod pa ma yin no zhes bya bar brjod pa ni rigs pa yang ma yin te/ rang gi bdag nyid kyis yod pa'i phyir ro zhes bya ba la sogs pa brjod par bya'o//de bzhin du bcom ldan 'das de dag dbang po la 'jug pas chos kyi dbyings la 'jug pa ni dbang po nyi shu rtsa gnyis te mig gi dbang po dang / rna ba'i dbang po dang / sna'i dbang po dang / lce'i dbang po dang /lus kyi dbang po dang / yid kyi dbang po dang / mo'i dbang po dang / pho'i dbang po dang / srog gi dbang po dang / bde ba'i dbang po dang / sdug bsngal gyi dbang po dang / yid bde ba'i dbang po dang / yid mi bde ba'i dbang po dang / btang snyoms kyi dbang po dang / dad pa'i dbang po dang / brtson 'grus kyi dbang po dang / dran pa'i dbang po dang / ting nge 'dzin gyi dbang po dang / shes rab kyi dbang po dang / mi shes pa kun shes par byed pa'i dbang po dang / kun shes pa'i dbang po dang / kun shes pa dang ldan pa'i dbang po ste/ de la mig gi dbang po ni dus gsum du yang mi dmigs so/ /gang dus gsum du mi dmigs pa de ni mig gi dbang po ma lags so/ /gang mig gi dbang po ma lags pa de de'i tha snyad ji ltar 'tshal bar bgyi/ 'di lta ste dper na/ chad pa stong pa ni brdzun pa yang dag pa ma lags pa ma mchis pa ste/'di ltar ming du gdags par bas kyi/ don dam par ni stong pa mi dmigs/ chad pa yang mi dmigs so/ /de bzhin du mig gi dbang po yang chad pa stong pa ltar brdzun zhing ma mchis la yang dag pa ma lags pa ste/ log par bslu ba'i chos can byis pa 'drid pa ma mchis pa yang dag pa ma lags pa/'di ltar ming du gdags par bas kyi/ don dam par ni mig dang dbang po mi dmigs so/ /de ni bcom ldan 'das kyis thams cad mkhyen pa'i ye shes brnyes nas ci tsam du phyin ci log la gnas pa'i sems can rnams gzung ba'i slad du mig gi dbang po zhes btags kyi don dam par ni ma lags so//dbang po ni rang bzhin dang bral zhing dbang po nyid kyis stong pa ste/ de la mig ni mig nyid du mchis pa ma lags la/ dbang po ni dbang po nyid du mchis pa ma lags so// de ci'i slad du zhe na/ mig ni mig gi rang bzhin dang bral ba lags te/ chos gang la rang bzhin mchis pa ma lags pa de ni dngos po ma lags so/ /gang dngos po ma lags pa de ni yongs su ma grub pa'o/ /de ni ma skyes pa dang ma 'gags pa'o/ /de ni 'das pa dang ma 'ongs pa zhes gdags par bgyi ba ma lags so zhes bya ba la sogs pa dang /bcom ldan 'das 'di lta ste dper na mi zhig gi rmi lam na dgod pa dang dga' ba dang rtse ba dag nyal nyal ba las sad de rjes su dran la de dran yang rnyed par mi 'gyur ro/ /de ci'i slad du zhe na/rmi lam na yang des de dag ma rnyed na nyal ba las sad pa'i tshe lta smos kyang ci 'tshal te 'di'i gnas ma mchis so/ /de bzhin du dbang po rnams ni rmi lam lta bu ste/ de bzhin du chos thams cad kyang ngo bo nyid kyis dmigs su ma mchis pa ste/ de'i slad du de dag ni brjod du ma mchis pa zhes bgyi ste zhes 'byung ngo //de ltar na phung po dang / khams dang / skye mched dang / rten cing 'brel bar 'byung ba la sogs pa dag dbang po ltar rnam par bshad pa yin no/ /des na de dag la rang bzhin ko ga la yod/ de'i phyir ston pa'i gsung rab kyi dgongs pa ma dpyod pa dag gis shes rab kyi rtsal med par sbyar ba rnam par shes par smra ba 'di bsal bar bya ba kho na yin no//'dir smras pa/ gal te yul med par rnam par shes pa yod pa ma yin na/ 'o na gang bla ma'i man ngag las rnal 'byor pa rnams kyis sa gzhi keng rus kyis yongs su gang bar mthong ba de ci ltar bshad pa/rnal 'byor pa yis bla ma'i man ngag las/ /keng rus kyis gang sa gzhi mthong ba gang / /der yang gsum char skye ba med par mthong / /ste yul dang dbang po dang rnam par shes pa'o/ / de ci'i phyir zhe na/ ting nge 'dzin de ni/ log pa yid la byed par bstan phyir ro/ /'di ni de kho na nyid ma yin pa yid la byed pa'o zhes 'byung ba'i phyir ro/ /'di ni gdon mi za bar de ltar khas blang bar bya'o/ /de lta ma yin te/ khyod kyi dbang blo'i yul rnams ji lta ba/ / de ltar mi sdug yid kyi yang 'gyur na/ /de bzhin yul der blo gtad cig shos kyis/ /rtogs 'gyur de ni brdzun par yang mi 'gyur/ /ji ltar khyod kyis zlos gar gyi ltad mo la sogs pa lta ba na/ yul der mig gtad pa rnams las ji ltar gcig la mig gi rnam par shes pa de'i rnam pa can skye ba de bzhin du gzhan dag la yang yin pa de bzhin du/rnal 'byor pa ltar rnal 'byor pa ma yin pa keng rus la sogs pa'i yul la lta ba rnams la yang de'i rnam pa can gyi shes pa skye bar 'gyur te/ sngon po la sogs pa'i rnam par shes pa bzhin no/ / ting nge 'dzin 'di de kho na nyid ma yin pa yid la byed par yid mi 'gyur ro/ /de bzhin du/ rab rib dang ldan dbang po can mtshungs pa/ /chu 'bab klung la yi dwags rnag blo yang / shes par bya'o/ /rab rib mthu las skra rnams gang mthong ba/ /zhes gang bshad pa de dang mtshungs pa de lta bu'i rigs can gzhan yang rig par bya ste spros pas chog go//mdor na ji ltar shes bya med de bzhin/ /blo yang med ces don 'di shes par gyis/ /shes bya rang bzhin med pa ji lta ba de bzhin du shes bya'i rnam pa can gyi blo yang rang gi bdag nyid kyis ma skyes par rig par bya'o//ji skad du/ ma shes pa ni shes bya min/ /de med rnam par shes med pa/ /de phyir shes dang shes bya dag /rang bzhin med par khyod kyis gsungs/ /zhes bya ba dang / de bzhin du/ rnam shes sgyu ma dang mtshungs par/ /nyi ma'i gnyen gyis gsungs pa yin//de yi dmigs pa'ang de bzhin te/ /nges par sgyu ma'i dngos dang 'dra/ /zhes gsungs so/ /de'i phyir rnam par shes pa rdzas su smra ba'i brjed byed kyi gdon gyis gzung ba phyi rol gyi yul la skur pa 'debs pa 'di ni ci nas/ bdag nyid g.yang sar lhung bar byed par mi 'gyur bar dam pa snying rje spyod pa rnams kyis lung dang rigs pa'i gsang sngags bzang po btab pas tshabs cher mnan te gzung bar bya'o//de'i phyir de ltar phyi rol med par rnam par shes pa mi srid par bstan nas dngos po tsam zhig tu yod pa nyid dgag par bya ba'i phyir bshad la /gal te gzung med 'dzin pa nyid bral zhing / /gnyis kyis stong pa'i gzhan dbang dngos yod na/ /'di ni yod par gang gis shes par 'gyur/ /ma bzung bar yang yod ces byar mi rung / /gal te gzung ba dang 'dzin pa zhes bya ba gnyis kyis stong pa gzhan gyi dbang yod na de'i yod pa de khyod kyis shes pa gang gis dmigs/de nyid kyis de 'dzin par ni mi 'thad de/ rang gi bdag nyid la byed par 'gal ba'i phyir ro/ /'di ltar ral gri'i so de nyid kyis de nyid mi gcod la/ sor mo'i rtse mo de nyid kyis de nyid la mi reg cing / / legs par bslabs pa'i g.yer zhing yang gzor can gyis kyang rang gi phrag pa la zhon par mi nus shing / mes rang gi bdag nyid mi sreg la/ mig gis rang gi bdag nyid la lta ba ma yin no/ /de ni shes pa gzhan gyis 'dzin pa yang ma yin te/ rang gi grub pa'i mtha' dang 'gal ba'i phyir te/gal te rnam par rig pa gzhan zhig rnam par rig pa'i yul yin na rnam par rig pa tsam nyid nyams par 'gyur ro zhes 'byung ba'i phyir ro/ /de'i phyir de ltar de'i 'dzin pa rnam pa thams cad du yod pa ma yin la ma bzung ba la ni yod pa nyid med do//'dir smras pa/ gal te yang gzhan gzhan gyis 'dzin pa yod pa ni ma yin mod kyi/ de lta na yang rang rig pa ni yod pa yin no/ /de'i phyir rang rig pa kho nas de 'dzin pa'i phyir yod pa nyid du 'gyur ro zhe na/ de yang yod pa ma yin par bshad pa/ de nyid kyis de myong bar grub ma yin/ de nyid kyis de 'dzin to zhes bya ba 'di ni ma grub bo//'dir kha cig gis mdo sde pa'i phyogs khas blangs nas rang rig pa rab tu sgrub pa'i phyir/ ji ltar me ni skyes pa nyid na rang gi bdag nyid dang bum pa la sogs pa dag gnyis su mi 'jug par cig car gsal bar byed la/ sgras kyang rang gi bdag nyid dang don ston par byed pa de bzhin du/rnam par shes pa yang nye bar skye ba nyid na gnyis su mi 'jug par rang gi bdag nyid dang / yul so sor yang dag par rig par byed pa yin no/ /de'i phyir rang rig pa zhes bya ba yod pa kho na yin no/ /gang zhig mi 'dod pa des kyang gdon mi za bar rang rig pa khas blang bar bya dgos te/gzhan du ma mthong ngo zhes dus phyis 'byung ba'i dran pas yul dran pa nyid dang / ngas mthong ngo snyam du yul gyi nyams su myong ba dran par mi 'gyur ro/ /de ci'i phyir zhe na/ dran pa ni nyams su myong ba'i yul can yin na shes pa yang nyams su ma myong bas dran pa yod par mi 'gyur ro//rang rig pa med pa'i phyir na re zhig de nyid kyis de nyams su myong ba yod pa ma yin no/ /shes pa gzhan gyis kyang de myong bar mi rigs te/ ci'i phyir zhe na/ shes pa gzhan gyis nyams su myong na thug pa med par thal bar 'gyur ro//'di ltar sngon po yongs su gcod par byed pa'i shes pa gcig de'i mjug thogs su 'byung ba'i rnam par shes pas gcod par khas len na/ sngon po'i shes pa'i shes pa de la yang myong ba po gzhan yod par bya dgos shing /de la yang gzhan zhig 'gyur dgos pas thug pa med pa'i skyon du thal lo/ /shes pas yul gzhan yongs su mi gcod par yang 'gyur te/ rnam par shes pa'i rgyun lugs mtha' dag shes pa gzhan gyi yul can yin pa'i phyir dang / sems can rnams rnam par shes pa'i rgyud gcig yin pa'i phyir ro//rnam par shes pa ut+pa la'i 'dab ma brgya 'bigs pa ltar rim gyis 'byung ba rnams 'jug pa myur bas cig car du 'jug pa lta bur mngon pa yin no/ /de'i phyir thug pa med pa'i skyon yongs su spang bar bya ba'i phyir gdon mi za bar rang rig pa khas blangs par bya dgos so//de ltar na ni ngas mthong ngo snyam du gnyi ga'i yul can gyi dran pa dus phyis 'byung ba yang 'grub ste/ shes pa'i rang bzhin rang rig pa ma rtogs par ni de'i yul can gyi dran pa de mi rigs so/ /de'i phyir ngas mthong ngo snyam du dus phyis dran pa'i shes pa skyes pa las gang las dus phyis gnyi ga'i yul can gyi dran pa skye ba nyams su myong ba'i shes pa'i rang gi bdag nyid dang yul gyi bdag nyid myong zhing skyes par dpog par byed do//de'i phyir dus phyis kyi dran pa las rang nyams su myong ba grub pa yin la/ rang nyams su myong ba yod na yang gzhan gyi dbang yod pa nyid yin pas de la 'di ni yod par gang gis shes par 'gyur zhes gang smras pa la/'di nye bar bstan pa yin no zhes smras pa de yang rigs pa ma yin no zhes bstan pa'i phyir bshad pa/ de nyid kyis de myong bar grub ma yin/ / gal te phyi dus dran pa las grub na/ /ma grub bsgrub par bya phyir brjod pa yi/ /ma grub 'di ni sgrub par byed pa min/ /de la gal te re zhig rdzas sgrub par byed pa yin pa'i dbang du byas nas de skad du smra na ni/ de'i tshe bdag dang gzhan las skye ba med pa'i phyir rnam pa thams cad du dran pa mi srid pas ji ltar ma grub pa'i dran pas ma grub pa'i rang rig pa 'grub par 'gyur/'on te 'jig rten gyi tha snyad kyi dbang du yin na de lta na yang rang rig pa'i rgyu can gyis dran pa mi srid pa nyid do/ /de ci'i phyir zhe na/ gal te 'dir me bzhin du shes pa 'ga' zhig gis rang rig pa 'grub par 'gyur na ni de yod pas du bas me ltar dus phyis 'byung ba'i dran pa'i sgo nas yod pa nyid du nges par 'gyur ba zhig na/rang rig pa de ni da rung du yang ma grub pas/ rang rig pa'i rgyu can rang rig pa med par mi 'byung ba'i dran pa ga la yod / 'di ltar chu tsam mthong ba las nor bu chu shel lam me tsam mthong ba las nor bu me shel yod pa nyid ni ma yin te/de dag med par yang char la sogs pa dang gtsub shing gtsubs pa la sogs pa las chu dang me dag 'byung ba'i phyir te/ de bzhin du 'dir yang rang rig pa med par dran pa ji ltar 'byung ba de ltar ston par 'gyur ro//de'i phyir rang rig pa'i rgyu can gyi dran pa ni de med par med pas/ ma grub bsgrub par bya phyir te/ /rang rig pa bsgrub par bya ba'i phyir dran pa'i tshig brjod pa'i ma grub pa 'di sgrub pa'i dgos pa can du ma grub ste/ sgra mi rtag pa la mig gis gzung bya nyid bzhin no snyam du bsam pa yin no//ji ste de ltar rnam par dpyod pa btang nas kyang / rang rig pa ni grub la rag mod kyi/ /de lta'ang dran pa'i dran pa rigs min te/ /gzhan phyir ma shes rgyud la skyes pa bzhin/ gtan tshigs 'dis ni khyad par dag kyang 'joms/ / gal te yang shes pas rang gi bdag nyid dang yul rig par byed mod kyi/ de lta na yang dran pa'i shes pas de dag dran pa ni mi rigs te/ dran pa'i shes pa ni yul nyams su myong ba'i shes pa las gzhan nyid du khas blangs pa'i phyir ro/ /'di ltar byams pa'i shes pa'i rang rig pa dang yul myong ba ni sngar nyams su ma myong bas nyer sbas kyi shes pas dran pa ma yin pa de bzhin du ma shes pa'i rgyud las shes pa ltar gzhan yin pa'i phyir na rang gi rgyud du gtogs pa'i rnam par shes pa dus phyis 'byung bas kyang shes pa dang don dag nyams su ma myong ba'i phyir dran par mi 'gyur ro//ci ste rgyud gcig tu gtogs pa rnams la rgyu dang 'bras bu'i dngos po gnas pa'i phyir/ dran pa yod par 'gyur ro snyam du sems na/ de yang yod pa ma yin te/ gang gi phyir gtan tshigs 'dis ni khyad par dag kyang 'joms/ gzhan yin pa'i phyir zhes bya ba'i gtan tshigs gang yin pa 'dis ni rgyud gcig tu gtogs pa nyid dang /rgyu dang 'bras bu'i dngos po la sogs pa'i khyad par thams cad nye bar 'joms par byed do/ /dran pa'i shes pa'i skad cig nyams su myong ba'i dus phyis 'byung ba ni gzhan yin pa'i phyir/rgyud gzhan gyi shes pa bzhin du nyams su myong ba'i shes pa dang / rgyud gcig tu gtogs pa ma yin la/ rgyu dang 'bras bu'i dngos po gnas pa yang ma yin no zhes bya ba la sogs pa gzhan yin pa'i phyir zhes bya ba'i gtan tshigs 'di nyid kyis rgya cher dgag par bya ba yin no//khyod kyi ltar na ji ltar zhe na/ brjod par bya ste/ gang phyir gang gis yul myong 'gyur de las/ /dran pa 'di gzhan nga la yod min pa/ /de phyir nga yis mthong snyam dran 'gyur te/ /'di yang 'jig rten tha snyad tshul lugs yin/ /gang gis yul myong ba de yul nyams su myong ba'i shes pa de las dran pa'i shes pa gzhan nyid du ji ltar med pa de ltar na sngar bshad zin to//gang gi phyir dran pa gzhan nyid yod pa ma yin pa de'i phyir/ gang nyams su myong bas myong ba de dran pa'i shes pas myong ba ma yin pa ma yin pas dran pa yul dang ldan par 'byung la/nyams su myong ba'i shes pas yongs su gcod pa gang yin pa de dran pas yongs su ma bcad pa ma yin pas bdag gis mthong ngo zhes bya bar 'gyur ro/ /'di yang 'jig rten tshul lugs yin gyi shin tu dpyad par bya ba ni ma yin te/ brdzun pa'i don can nyid kyis 'jig rten gyi tha snyad yin pa'i phyir ro//gang gi phyir de lta yin pa/ de'i phyir rang rig yod pa ma yin na/ /khyod kyis gzhan dbang gang gis 'dzin par 'gyur/ /byed po las dang bya ba gcig min pas/ /de nyid kyis de 'dzin par rigs ma yin/ /bdag rig par byed do zhes rig par bya bzhin pa'i bdag nyid las kyi dngos por 'gyur la rig par bya ba de nyid kyang byed pa po yin zhing de'i bya ba yang tha mi dad pa nyid yin pas byed pa po dang las dang bya ba gcig tu thal bar 'gyur na/'di dag gcig pa nyid du ni ma mthong ngo //'di ltar gcod pa po dang shing dang gcod pa'i bya ba gcig pa ni ma yin no/ /'di las kyang rang rig pa yod pa ma yin pas de nyid kyis de 'dzin pa ma yin no/ /'phags pa lang kar gshegs pa las kyang / ji ltar ral gyi rang gi so/ /gcod par mi byed sor mo ni/ / rang la reg par mi byed ltar/ /rang rig sems kyang de bzhin no/ /zhes gsungs so/ /de'i phyir de ltar rang rig pa med pa'i phyir/ gal te skye ba med cing ma shes pa'i/ /bdag can gzhan dbang ngo bo'i dngos yod na/ /gang gis na 'di yod par mi rig pa/ /gzhan la mo gsham bu gnod ji zhig bya//gzhan gyi dbang bdag dang gzhan las mi skye ba ni gong du cir bstan pa yin la/ de lta ni ma shes pa'i bdag nyid can nyid du yang bstan pa yin no/ /de'i phyir de ltar gal te skye ba med cing ma shes pa'i bdag nyid can gzhan gyi dbang gi ngo bo yod do zhes bya bar khas len na/gang las gzhan gyi dbang dang mtshungs pa'i chos can yin du zin kyang 'di yod pa nyid du 'dod par mi 'gyur ba/ khyod la mo gsham gyi bus gnod pa ci zhig byas te/ mo gsham gyi bu zhes bya ba spros pa thams cad las 'das shing 'phags pa'i ye shes kyi spyod yul du gyur pa brjod du med pa'i rang bzhin can ci zhig yod do zhes 'di yang yod pa nyid du 'dod par gyis shig gang yang dngos po btags par yod pa'i rgyur gyur cing zhes smras pa de yang gzhan gyi dbang yod pa nyid yin na/rigs pa zhig na/ gang tshe gzhan dbang cung zad yod min na//kun rdzob pa yi rgyur ni gang zhig 'gyur/ /kun rdzob pa rnams la rgyu cung zad kyang med do snyam du bsams pa'o/ /de'i phyir 'di la 'jig rten gyi tha snyad kyi rgyu gang yin pa de rang nyid kyi yod pa ma yin pas kye ma kyi hud/ gzhan gyi ltar na rdzas la chags pa yis//'jig rten grags pa'i rnam gzhag kun kyang brlag /shes rab med pas rdzas shas tsam la chags pa'i sgo nas gzhan gyi dbang gi bum pa so ma btang bar chu dang 'dra ba blugs nas rang gi blo gros kyi tshul ngan pa'i phyir 'jig rten pa'i rnam par gzhag pa 'jig rten kho na las grub pa 'dug shig /song shig byos shig tshos shig ces bya ba de lta bu la sogs pa dang / de bzhin du gzugs dang tshor ba la sogs pa gang yin pa de dag thams cad 'jig par rtogs te/ de'i phyir 'di la rgud pa nyid 'ba' zhig srid par 'gyur gyi/mngon par mtho ba ni ma yin no/ /de'i phyir de ltar slob dpon phyin ci log las rang gi rnam par rtog pas sbyar ba'i lugs kyi lam kho nar zhugs pa/ slob dpon klu sgrub zhabs kyi lam las ni/ /phyi rol gyur pa zhi ba'i thabs med do/ /ci'i phyir zhe na/ 'di ltar de dag kun rdzob de nyid bden las nyams//de las nyams pas thar pa grub yod min/ /yang ci'i phyir bden pa gnyis las yongs su nyams pas thar pa mi grub ce na/ bshad pa/ tha snyad bden pa thabs su gyur pa dang / /don dam bden pa thabs 'byung gyur pa de //de gnyis rnam dbye gang gis mi shes pa/ /de ni rnam rtog log pas lam ngan zhugs/ /ji skad du/ 'phags pa de kho na nyid nges par bstan pa'i ting nge 'dzin las/ 'jig rten mkhyen pas gzhan la ma gsan par/ /bden pa 'di gnyis nyid kyis bstan par mdzad//gang zhig kun rdzob de bzhin don dam ste/ /bden pa gsum pa gang yang ma mchis so/ /gang gis bde bar gshegs la 'gro ba rnams/ /bde ba'i don du dad pa skye 'gyur ba/ /rgyal bas 'gro ba rnams kyi don slad du/ /'jig rten phan phyir kun rdzob de bstan to/ / sems can tshogs kyi 'gro drug gang bstan pa/ /sems can dmyal dang dud 'gro yi dwags dang / /lha min ris dang mi dang lha yi rnams/ /mi yi seng ges kun rdzob btags pa mdzad/ /rigs dma' de bzhin mtho ba'i rigs rnams dang / /phyug po'i khyim dang dbul ba'i khyim rnams dang //bran gyi tshogs dang de bzhin g.yog gi tshogs/ /bud med tshogs dang skyes pa ma ning dang / /'gro ba'i khyad par ji snyed gang yang rung / /mtshungs med khyod kyis 'jig rten bstan mdzad pa/ /kun rdzob bden par mkhas pas thugs chud nas//'jig rten phan pas mi la de bstan to/ /'di la dga' ba'i 'gro ba 'khor ba na/ /'gro ba'i chos brgyad la ni 'jug 'gyur te/ /thob dang ma thob snyan dang mi snyan dang / /bstod dang smad dang bde dang sdug bsngal lo/ /thob pa rnyed na de la chags pa skyed //ma thob gyur na des kyang 'khrug par 'gyur/ /gang gzhan ma bstan tshul 'dis shes par bya/ /nad rnams brgyad kyis de rgyun gnod par 'gyur/ /kun rdzob de la don dam su smra ba/ /de dag nor ba'i blo ldan shes par bya/ /mi sdug sdug dang sdug bsngal bde ba dang //bdag med rang bzhin bdag tu smra ba dang / /mi rtag chos la rtag ces smra bgyid cing / /de ltar dga' ste mtshan mar gang gnas pa/ /de dag bde gshegs gsung ni thos gyur nas / /'jigs shing ji bzhin mi rtogs spong bar bgyid / /de dag bde gshegs gsung ni spangs gyur nas //sems can dmyal bar sdug bsngal mi bzad myong / /de dag tshul min bde ba tshol bgyid kyang / /sdug bsngal brgya dag byis pas myong bar 'gyur/ /'jig rten phan pa'i bstan pa su zhig gis/ /ma log blo yis rnam par rtogs myur na/ / sbrul gyi pags pa rnying ltar rab spangs te/ /srid pa kun las 'das nas zhi bar 'gyur/ /chos 'di thams cad rang bzhin 'byin pa ste/ /stong pa mtshan ma med pa don dam zhes/ /gang gis thos nas dga' ba skye 'gyur ba/ /de dag bla med byang chub thob par 'gyur/ / rgyal ba khyod kyis phung po dben par gzigs/ /khams dang skye mched rnams kyang de bzhin te/ /dbang po'i grong ni mtshan mas dben pa dag /kun kyang thub pa khyod kyis ji bzhin gzigs/ /zhes gsungs pa lta bu'o/ /de'i phyir de ltar kun rdzob dang don dam pa'i bden pas dben pa rnams la thar pa lta ga la yod/de'i phyir rnam par shes par smra ba de dag ni rnam par rtog pa log pa dag gis lam gol bar zhugs pa kho na'o/ /'dir tha snyad kyi bden pa bstan pa ni thabs su gyur pa ste/ ji skad du/ yi ge med pa'i chos la ni/ /nyan pa gang dang ston pa gang //'gyur ba med la sgro btags pas/ /'on kyang nyan zhing ston pa yin/ /zhes gsungs so/ /tha snyad kyi bden pa kho na la gnas te don dam pa ston pa yin la/ don dam pa bstan pa khong du chud pa las kyang don dam pa 'thob ste/ ji skad du/ bstan bcos las/tha snyad la ni ma brten par/ /dam pa'i don ni bstan mi 'gyur/ /dam pa'i don la ma brten par/ /mya ngan 'das pa thob mi 'gyur/ /zhes gsungs so/ /de la don dam pa bstan pa ni thabs las byung bar gyur zhing 'bras bur gyur pa ste/ thabs las byung ba dang 'bras bu dang thob par bya ba dang rtogs par bya ba zhes bya ba'i don to//'dir smras pa/ gal te khyod kyis de skad du kho bo cag la shin tu ltos pa med par smra na/ da ni nged cag kyang khyod la bzod pa mi byed de/ gal te bdag nyid gzhan gyi phyogs sun 'byin pa tsam la mkhas par mngon par byed cing 'thad pas mi rigs pa'i phyir gzhan gyi dbang gi ngo bo sel bar byed na/'o na da ni ji skad smras pa'i 'thad pa kho nas mi rigs pa'i phyir khyod la grags pa'i kun rdzob sel bar byed pa yin no zhe na/ gal te khyod thog ma med pa'i dus nas dka' ba brgya phrag gis bsags pa'i nor gyi tshogs 'phrog pa po mdza' bo'i zol gyis dug dang bcas pa'i kha zas byin nas slar phrogs pa bzhin du lan du gnod pa byas pas rangs par gyur na 'gyur la rag ste/kho bo cag ni mngon par mtho zhing dge ba nyid du 'gyur ro//'di ltar/ ji ltar khyod kyis gzhan dbang dngos 'dod ltar/ /kun rdzob kyang ni bdag gis khas ma blangs/ /'bras phyir 'di dag med kyang yod do zhes/ /'jig rten ngor byas bdag ni smra bar byed/ /ji ltar khyod kyis rang dbang du gnas nas/ / rang gi gzhung lugs kyis gzhan gyi dbang gi ngo bo 'phags pa'i ye shes kyis thugs su chud par bya ba zhig smra ba de ltar ni kho bos kun rdzob ma yin te/ 'o na ci zhe na/ yod pa ma yin yang 'jig rten kho na la grags par gyur pas yod do zhes 'jig rten gyi ngo kho nar brjod pa yin te/ de rjes su brjod pa ni de ldog pa'i thabs yin pa'i phyir ro//ji skad du/ bcom ldan 'das kyis 'jig rten nga dang lhan cig rtsod kyi/ nga ni 'jig rten dang mi rtsod de/ gang 'jig rten na yod par 'dod pa de ni ngas kyang yod par bzhed do/ /gang 'jig rten na med par 'dod pa de ni nga yang med par bzhed do zhes gsungs pa lta bu'o//ci ste kun rdzob 'di/ ji ltar phung po spangs nas zhir zhugs pas / /dgra bcom rnams la yod pa min de ltar/ /'jig rten la yang med na de bzhin 'di/ /'jig rten las kyang yod ces bdag mi smra/ /ji ltar dgra bcom pa phung po lhag ma med pa'i mya ngan las 'das pa'i dbyings su zhugs pa rnams la bdag nyid thams cad du kun rdzob yod pa ma yin pa de bzhin du/gal te 'jig rten pa la yang yod par mi 'gyur na ni de bzhin du dgra bcom pa'i phung po la sogs pa bzhin du 'di dag yod do zhes 'jig rten la ltos nas kyang kho bo mi smra ste/de'i phyir gzhan la rag las pa nyid kyi sgo nas bdag gis kun rdzob khas blangs kyi rang dbang du ni ma yin no/ /khas kyang 'jig rten kho nas blangs pa yin te/ de'i phyir gang gis khas blangs pa de kho na la ltos nas sel ba na bsal bar 'os pa yin te/gzhan la ltos nas ni ma yin no zhes bshad pa/ gal te khyod la 'jig rten mi gnod na/ /'jig rten nyid ltos 'di ni dgag par gyis/ /khyod dang 'jig rten 'dir ni rtsod gyis dang / /phyi nas stobs ldan bdag gis bsten par bya/ /kho bo cag ni 'jig rten gyi kun rdzob bzlog par bya ba'i phyir shin tu tshegs che bar gnas par 'gyur gyi khyod kyis 'jig rten gyi kun rdzob sol cig /gal te khyod la 'jig rten gyis gnod par mi 'gyur na ngas kyang khyod la stongs gdab par bya'o/ /'jig rten gyis ni gnod pa yang yin te/ de'i phyir btang snyoms nyid la brten par bya'o//khyod dang 'jig rten 'dir ni rtsod gyis dang / /de la gal te khyod rgyal na ni de'i phyir 'di kho bo cag 'dod pa nyid yod pas khyod la brten par bya'o/ /'on te khyod 'jig rten gyis pham par byas na ni de'i tshe shin tu stobs dang ldan pa'i 'jig rten nyid la bdag nyid brten par bya'o//'dir smras pa/ gal te 'thad pa dang bral yang 'jig rten gyi gnod pas 'jigs nas khyod kyis kun rdzob khas blangs na ni/ lung gi gnod pas 'jigs pas sems tsam nyid du yang khas blang bar bya dgos te/ ji skad du/ de 'di snyam du sems te/'di ltar khams gsum po 'di ni sems tsam ste zhes gsungs pa lta bu'o/ /brjod par bya ste/ bde bar gshegs pa'i gsung gi nor bu an da rnyil las sbyar ba'i mdo sde'i sa gzhi bstar ba la/ de'i rang bzhin gyi khyad par ma zin par byas nas rnam par shes pa dngos por smra ba'i chu'i rnam par yongs su 'gyur bar 'khrul pa khyod ni rnam par shes pa dngos por smra ba'i chu tsam zhig bcu bar 'dod pas/rang gi blo gros kyi sa'i bum pa so ma btang ba bshal zhing bsnyugs nas dum bu rnam pa brgyar klog pa na/ bdag nyid de'i rang bzhin shes pa rnams kyis bzhad gad du bya ba nyid du 'gyur bar byed pa yin no//mdo'i dgongs pa 'di ni ji ltar khyod kyi blo la snang ba de ltar ma yin no/ /yang 'dir mdo'i don ci yin zhe na/ de'i phyir bshad pa/ mngon gyur mngon phyogs byang chub sems dpa' yis/ /srid gsum rnam shes tsam du gang rtogs pa//rtag bdag byed po bkag pa rtogs phyir des/ /byed pa po ni sems tsam yin par rtogs/ /gang gi phyir mdo de nyid las lugs su byung ba'i rnam par rten cing 'brel bar 'byung ba la rab tu rtog go/ /de ltar na sdug bsngal gyi phung po sdug bsngal gyi ljon pa byed pa po dang tshor ba po med pa 'ba' zhig po 'di mngon par 'grub par 'gyur ro snyam mo//de 'di snyam du sems te/ byed pa po la mngon par zhen pas las rnams yod par gyur to/ /gang na byed pa po med pa de na don dam par las kyang mi dmigs so snyam mo//de 'di snyam du sems te/ 'di ltar khams gsum po 'di ni sems tsam ste/ srid pa'i yan lag bcu gnyis gang dag de bzhin gshegs pas rab tu phye ste bka' stsal pa de dag thams cad kyang sems gcig la brten pa dag go zhes rgya cher gsungs so/ / de'i phyir de ltar bdag rtag pa byed pa po bkag nas kun rdzob tu sems tsam zhig kho na byed pa po mthong zhing khams gsum rnam par shes pa tsam du rtogs pa yin no/ /byang chub ni thams cad mkhyen pa'i ye shes so/ /der sems pa ste sems shing mno ba de la yod pas byang chub sems dpa' 'am/yang na byang chub tu nges par yod pa nyid de bdog pa nyid de la yod pas byang chub sems dpa' yin pa'am/ byang chub tu nges pa'i sems can gang zag ni byang chub sems dpa' ste/ bar gyi tshig mi mngon par byas pa'i tshig bsdu ba'o/ /rtogs pa ni khong du chud pa zhes bya ba'i don to//mngon phyogs zhes bya ba ni chos kyi dbyings la mngon du phyogs pa'o/ /mngon gyur zhes bya ba ni sa drug par zhes bya ba'i don te de ltar yan lag gi don yin no/ /de'i phyir de ltar mdo'i don bshad nas/ don 'di nyid mdo gzhan gyis kyang bstan pa'i phyir bshad pa/de phyir blo ldan blo ni 'phel bya'i phyir/ /lang kar gshegs mdo de las kun mkhyen gyis / /mu stegs spo mthon ri 'joms dag rang bzhin/ /rdo rje 'di ni dgongs pa bcad phyir gsungs/ /'di ni zhes bya ba 'dis bstan pa'i tshigs su bcad pa 'don pa ni/ /gang zag rgyun dang phung po dang //de bzhin rkyen dang rdul dag dang / /gtso bo dbang phyug byed po rnams/ /sems tsam du ni ngas bshad do/ /zhes bya ba ste/ tshigs su bcad pa 'di ni 'phags pa lang kar gshegs pa las 'don pa yin no/ /'di'i don dgrol ba'i phyir bshad pa/ji bzhin rang gi bstan bcos de de las/ /mu stegs rnams kyis gang zag sogs de dag /smras pa de dag byed por ma gzigs nas/ /rgyal bas sems tsam 'jig rten byed por gsungs/ /mu stegs rnams kyis zhes bya ba ni phal cher bstan pa ste chos 'di pa dag gis kyang gang zag la sogs pa dag brtags pa kho na yin no//rnam pa gcig tu na de dag kyang chos 'di pa ma yin te/ mu stegs ltar bstan pa'i don phyin ci ma log par khong du ma chud pa'i phyir ro/ /de'i phyir nges par bsten pa 'di ni kun la khyab par byed pa kho na'o/ /ji skad du/ gang zag phung por smra ba yi//'jig rten grangs can 'ug phrug dang / /gos med bcas la gal te zhig /yod med 'das pa smra na dris / /de phyir sangs rgyas rnams kyi ni/ /bstan pa 'chi med yod med las/ /'das pa zab mo zhes bstan pa/ /chos kyi khud pa yin zhes gyis / /zhes gsungs so//phung po la sogs par mngon par zhen pa de dag ni phyi rol pa nyid du rig par bya'o/ /ji ltar rang gi zhes bya ba ni rang rang gi grub pa'i mthar zhes bya ba'i don to/ /de nyid kyi phyir mu stegs pa rnams kyis phung po la sogs pa dag kyang byed pa po nyid du 'dod pa nye bar mtshon pa yin te/'khor ba 'di ni thog ma med pas 'dir rtog pa ci zhig ma byung bar gyur cing ci zhig mi 'byung bar 'gyur/ 'di ltar da lta nyid du yang spong ba dkar po la sogs pa dag la phung po la sogs pa ston par snang ba nyid do/ /bcom ldan 'das kyis ni gang zag la sogs pa 'di dag byed pa po nyid du ma gzigs pa na sems tsam kho na 'jig rten gyi byed pa po nyid du bstan to zhes bya ba ni mdo'i don yin no//de ltar na re zhig byed pa po gzhan bkag pas don byas zin pa'i phyir tsam gyi sgras shes bya 'gog par mi nus par brjod nas/ rnam pa gzhan du bshad pa las kyang phyi rol 'gog pa mi srid par bstan pa'i phyir bshad pa/de nyid rgyas la sangs rgyas bsnyad ji bzhin/ /de bzhin sems tsam gtsor gyur 'jig rten la/ /mdo las sems tsam zhes gsungs gzugs ni 'dir/ /'gog pa de ltar mdo yi don ma yin/ /ji ltar de kho na nyid la rgyas pa la sangs rgyas zhes tshig snga ma mi mngon par byas nas kyang rnam par bshad pa yod pa de bzhin du/sems tsam gtso bor gyur pa la yang gzhan gtso bo yin pa bkag nas khams gsum na sems tsam mo zhes bya bar shes par bya'o/ /de'i phyir 'dis ni gzugs la sogs pa rnams gtso bo nyid yin pa sel bar ston pa yin gyi/sems tsam zhig kho na yod kyi gzugs ni med do zhes yod pa nyid 'gog pa ni ma yin no/ /mdo'i don 'di ni ji skad kho bo cag gis bshad pa de bzhin du gdon mi za bar 'dod par bya'o/ /khyod kyi lugs ltar/gal te 'di dag sems tsam zhes mkhyen nas/ /de las gzugs nyid dgag par mdzad na ni/ /slar yang de las bdag nyid chen pos sems/ /gti mug las las skyes par ci phyir gsungs/ /'phags pa sa bcu pa de nyid las/ rnam par shes pa ma rig pa dang 'du byed kyi rgyu can du gsungs kyi/rang gi mtshan nyid kyis grub pa ni ma yin no/ /gal te rnam par shes pa rang gi bdag nyid kyis grub par gyur na ni de ma rig pa'am 'du byed la mi ltos par 'gyur ba zhig na ltos pa yang yin no/ /de'i phyir rnam pa thams cad du rnam par shes pa rang bzhin gyis yod pa ma yin pa kho na ste/rab rib can gyis dmigs pa'i skra shad la sogs pa ltar phyin ci log gi rkyen yod na yod pa'i phyir la/ de kho na ltar phyin ci log gi rkyen med na med pa'i phyir ro snyam du bsams pa'o/ /ji skad du/ de ltar byang chub sems dpa' lugs su 'byung ba'i rnam par rten cing 'brel par 'byung ba la rab tu rtog go /de 'di snyam du sems te/ bden pa rnams mi shes pa ni don dam par ma rig pa'o/ /ma rig pas byas pa'i las kyi rnam par smin pa ni 'du byed rnams so/ /'du byed la brten pa'i sems dang po ni rnam par shes pa'o/ /rnam par shes pa dang lhan cig skyes ba len pa'i phung po bzhi ni ming dang gzugs so//ming dang gzugs rnam par 'phel ba ni skye mched drug go/ /dbang po dang yul dang rnam par shes pa gsum phrad pas zag pa dang bcas pa ni reg pa'o/ /reg pa dang lhan cig skyes pa ni tshor ba'o//tshor ba la chags pa ni sred pa'o/ /sred pa rnam par 'phel ba ni len pa'o/ /len pa las byung ba'i las zag pa dang bcas pa ni srid pa'o/ /las kyi rgyu mthun pa ni skye ba ste phung po rnams 'byung ba'o/ /phung po yongs su smin pa ni rga ba'o/ /rgas pa'i phung po 'jig pa ni 'chi ba'o//'chi zhing 'bral ba'i tshe myos shing chags pa dang bcas pas sems yongs su gdung ba ni mya ngan no/ /mya ngan las byung ba'i tshig tu brjod pa ni smre sngags 'don pa'o/ /dbang po lnga'i nyams su bab pa ni sdug bsngal lo/ /yid kyi lta ba nyams su bab pa ni yid mi bde ba'o//sdug bsngal dang yid mi bde ba mang po 'byung ba ni 'khrug pa ste/ de ltar na sdug bsngal gyi phung po sdug bsngal gyi ljon pa byed pa po dang tshor ba po med pa 'di mngon par 'grub par 'gyur ro snyam mo/ /de la ma rig pa ni bya ba gnyis su nye bar gnas pa yin te/ sems can rnams kyang dmigs pa la kun du tu rmongs par byed pa dang /'du byed mngon par 'grub pa'i rgyu yang 'byin pa'o/ /'du byed rnams kyang bya ba gnyis su nye bar gnas pa yin te/ ma 'ongs pa'i rnam par smin pa yang mngon par 'grub par byed pa dang / rnam par shes pa mngon par 'grub pa'i rgyu yang 'byin pa'o//rnam par shes pa yang bya ba gnyis su nye bar gnas pa yin te/ srid pa'i nying mtshams sbyor bar yang byed pa dang / ming dang gzugs mngon par 'grub pa'i rgyu yang 'byin pa'o/ /ming dang gzugs kyang bya ba gnyis su nye bar gnas pa yin te/ phan tshun rten par yang byed pa dang / skye mched drug mngon par 'grub pa'i rgyu yang 'byin pa'o/ /skye mched drug kyang bya ba gnyis su nye bar gnas pa yin te/ rang gi yul rnam par phye ba yang ston pa dang / reg pa mngon par 'grub pa'i rgyu yang 'byin pa'o/ /reg pa yang bya ba gnyis su nye bar gnas pa yin te/dmigs pa la reg par yang byed pa dang / tshor ba mngon par 'grub pa'i rgyu yang 'byin pa'o/ /tshor ba yang bya ba gnyis su nye bar gnas pa yin te/ yid du 'ong ba dang yid du mi 'ong ba dang gnyi ga las rnam par grol bas myong bar yang byed pa dang / srid pa mngon par 'grub pa'i rgyu yang 'byin pa'o//srid pa yang bya ba gnyis su nye bar gnas pa yin te/ chags par 'gyur ba'i dngos po la kun tu chags par yang byed pa dang / len pa mngon par 'grub pa'i rgyu yang 'byin pa'o/ /len pa yang bya ba gnyis su nye bar gnas pa yin te/ gong ma lta bu dang / srid pa mngon par 'grub pa'i rgyu yang 'byin pa'o/ /srid pa yang bya ba gnyis su nye bar gnas pa yin te/ srid pa'i rgyu gzhan gnas par byed pa dang / skye ba mngon par 'grub pa'i rgyu yang 'byin pa'o/ /skye ba yang bya ba gnyis su nye bar gnas pa yin te/gong ma lta bu dang / rga ba mngon par 'grub pa'i rgyu yang 'byin pa'o/ /rga ba yang bya ba gnyis su nye bar gnas pa yin te/ dbang po yongs su 'gyur bar yang byed pa dang / 'chi ba dang phrad pa mngon par 'grub pa'i rgyu yang 'byin pa'o/ /ji srid du 'chi ba yang bya ba gnyis su nye bar gnas pa yin te/'du byed 'jig par yang byed pa dang / yongs su mi shes pa rgyun mi 'chad pa'i rgyu yang 'byin pa'o zhes bya ba'i bar du gsungs pa lta bu ste/ de lta bu la sogs pas rnam par shes pa ma rig pa dang / 'du byed kyi rgyu can du bstan pa yin no/ /de ltar re zhig phyin ci log gi rkyen yod pas rnam par shes pa yod par gsal bar byas mod kyi/de med pas de yang med pa ji ltar zhe na/ ma rig pa 'gags pas 'du byed rnams 'gag go zhes bya ba ni rkyen ma rig pa med pas 'du byed rnams nye bar zhi zhing rton pa med pa'o/ /'du byed 'gags pas rnam par shes pa 'gag go zhes bya ba ni rkyen 'du byed med pa rnam par shes pa nye bar zhi zhing rton pa med pa'o zhes rgyas par gsungs nas/de 'di snyam du sems te/ 'du ba las ni 'dus byas 'byung ngo / /bral ba las ni 'dus byas mi 'byung ngo / /tshogs pa las ni 'dus byas 'byung ngo //ma tshogs pa las ni mi 'byung ngo / /de ltas bdag gis 'dus byas nyes pa mang po'i skyon chags pa de lta bu 'di shes par byas la 'du ba 'di dang tshogs pa 'di'i rgyun gcad par yang bya zhing sems can yongs su smin par bya ba'i phyir 'du byed rnams shin tu zhi ba thob par ni mi bya'o snyam mo//kye rgyal ba'i sras dag de de ltar 'du byed du gyur pa nyes pa mang po'i skyon chags shing ngo bo nyid med pa dang / ma skyes pa ma 'gags par so sor rtog pa na zhes rgyas par gsungs te/ de'i phyir de ltar na sems dang bcas pa su zhig de nyid las gsungs pa'i lung mthong nas rnam par shes pa rdzas su yod par rtog par byed de/yongs su rtog par byed pa de ni lta bas byas pa nyid du 'gyur ro/ /de'i phyir sems tsam du gsungs pa ni sems tsam zhig kho na gtso bor gyur pa nyid du yongs su gsal bar bya ba'i phyir yin gyi/ lung 'di gzugs med pa gsal bar byed pa ni rnam pa thams cad du ma yin no//sems kyi gtso bo de nyid bstan pa'i phyir bshad pa/ /sems nyid kyis ni sems can 'jig rten dang / /snod kyi 'jig rten shin tu sna tshogs 'god/ /'gro ba ma lus las las skyes par gsungs/ / sems spangs nas ni las kyang yod ma yin/ /de la sems can gyi 'jig rten ni sems can rang gi las dang nyon mongs pas bdag gi dngos po rnyed pa rnams so/ /snod kyi 'jig rten ni de dag kho na'i thun mong gi las kyis bskyed pa'i rlung gi dkyil 'khor la sogs pa'i 'og min gyi gzhal yas khang gi mthar thug pa dag go//de la rma bya la sogs pa rnams kyi mdongs la sogs pa sna tshogs pa gang yin pa de ni rma bya la sogs pa kho na'i las thun mong ma yin pas bskyed pa'o/ /pad+ma la sogs pa sna tshogs pa ni sems can thams cad kyi las thun mong bas bskyed pa yin te/de bzhin du gzhan yang shes par bya'o/ /ji skad du/ sems can las kyi dbang gis ri/ /nag po dus su skyes te dper/ /sems dmyal mtho ris 'jig rten du/ /mtshon dang rin chen shing bzhin no/ /zhes gsungs so/ /gang gi phyir de ltar na 'gro ba ma lus pa las las skyes shing las kyang sems la brten pa yin te/sems dang bcas pa kho na la sogs pa'i phyir la/ sems med na las med pa'i phyir ro/ /de'i phyir 'gro ba rab tu 'jug pa la/ sems nyid gtso bo'i rgyu yin gyi gzhan ni ma yin pas mdo las sems tsam zhig kho na gtso bor gzhag gi gzugs ni ma yin no//ci'i phyir zhe na/ gal te gzugs yod mod kyi de la ni/ /sems bzhin byed pa po nyid yod ma yin/ /gzugs ni bems po yin no snyam du bsams pa'o/ /des na sems las gzhan pa'i byed pa po/ / bzlog gi gzugs ni bkag pa ma yin no/ /'di na kha cig dag gis ni gtso bo la sogs pa rnams byed pa po nyid du 'dod la/ kha cig gis ni sems la 'dod kyi/ gzugs byed pa po nyid ma yin pa la ni rtsod pa med do/ /de'i phyir gtso bo la sogs pa byed pa po nyid du dogs par byas pa de'i mtshan nyid med pa kho na bsal ba'i phyir/byed pa po nyid du nus par mthong ba'i sems tsam zhig byed pa por brjod pa na gtso bo la sogs pa byed pa po nyid yin pa bsal nas rtsod pa'i gnas kyi yul gnon no zhes bya bar rigs te/ yul gcig la dbang byed par 'dod pa'i rgyal po gnyis kyi nang nas dgra zla gcig bton nas rang gi yul 'thob cing gnyi ga la nye bar mkho ba'i phyir skye bo phal pa la gnod pa med pa ltar de bzhin du/'dir yang gnyi ga la nye bar mkho ba'i phyir gzugs la rtag tu gnod pa med pas gzugs yod pa kho na yin no zhes bya bar nges par bya'o//de'i phyir de ltar ji skad bstan pa'i tshul gyis/ 'jig rten pa yi de nyid la gnas la/ /phung po 'jig rten grangs te lnga char yod/ /de nyid ye shes 'char bar 'dod pa na/ /rnal 'byor pa la de lnga 'byung mi 'gyur/ /gang gi phyir de lta yin pa de'i phyir/gzugs med na ni sems yod ma 'dzin cig /sems yod nyid na'ang gzugs med ma 'dzin cig /gang gi tshe 'thad pas gzugs med par rtogs na ni/ de'i tshe gnyi ga'i yod pa 'thad pa dang bral ba'i phyir sems med par yang rtogs par bya dgos la/yang gang gi tshe sems yod pa nyid du rtogs na ni de'i tshe gzugs kyang rtogs par bya dgos te/ gnyi ga yang 'jig rten la grags pa'i phyir ro/ /lung las kyang de ltar rtogs par bya ste/ 'di ltar/ de dag shes rab tshul mdor sangs rgyas kyis/ /mtshungs par spangs shing mngon pa'i chos las gsungs//gzugs la sogs pa'i phung po de dag ni chos mngon pa las rang dang spyi'i mtshan nyid la sogs pa'i rab tu dbye ba'i sgo nas lnga char yang mtshungs par gsungs la/ shes rab kyi pha rol tu phyin pa las ni lnga char yang mtshungs par bkag pa yin te/rab 'byor gzugs ni rang bzhin gyis stong ngo zhes bya ba nas rnam par shes pa ni zhes bya ba'i bar du gsungs pa'i phyir ro/ /de phyir de ltar lung dang rigs pas grub pa yi/ /bden gnyis rim pa 'di dag bshig nas kyang / /khyod kyi rdzas ni bkag pas 'grub mi 'gyur//gzugs med par rnam par shes pa tsam zhig 'dod pas ni kun rdzob dang don dam pa dag gi rim pa ji skad du smras pa bshig par 'gyur la/ de ltar bden pa dag gi rim pa de dag bshig nas kyang khyod kyi rdzas ni 'grub par mi 'gyur ro/ /ci'i phyir zhe na/ gang gi phyir sngar rdzas bkag pa de'i phyir khyod kyi ngal ba don med pa nyid du 'gyur ro//de phyir de lta'i rim pas dngos gdod nas/ /de nyid ma skyes 'jig rten skyes rig bya/ /'dir smras pa/ gal te yang mdo'i don 'di de ltar bshad mod kyi/ de ltar na yang lung gzhan las sems tsam yod pa nyid du nges te/ji skad du/ phyi rol snang ba yod med de/ /sems ni sna tshogs rnams su snang / /lus dang longs spyod gnas 'dra ba/ /sems tsam du ni ngas bshad do/ /zhes gsungs so/ /de la lus ni mig la sogs pa'i skye mched rnams so/ /longs spyod ni gzugs la sogs pa'i yul rnams so//gnas ni snod kyi 'jig rten no/ /sems las logs shig na phyi rol yod pa ma yin pa'i phyir/ rnam par shes pa tsam zhig kho na lus dang longs spyod dang gnas su snang ba skye ba na yul gyi dngos por gnas pa lus la sogs pa rnam par shes pa las tha dad par phyi rol lta bur mngon pa yin no//de'i phyir khams gsum po ni sems tsam yin no zhe na/ mdo 'di yang dgongs pa can nyid du brjod pa'i phyir bshad pa/ mdo sde gang las phyi rol snang yod min/ /sems ni sna tshogs snang ngo zhes gsungs pa/ /de'i dgongs pa ni 'di yin te/ gzugs la shin tu chags gang de dag la/ /gzugs bzlog pa ste de yang drang don nyid/ /de la 'di ni drang ba'i don yin te/ /gang dag gzugs la shin tu re ba dang bcas pa de'i rkyen can gyi rjes su chags pa dang khong khro ba dang nga rgyal la sogs pa rnams kyis 'jug pa rang dbang med par byas par 'gyur zhing /de la mngon par zhen pas de dag sdig pa chen po dang sbyar ba la bsod nams dang ye shes kyi tshogs bsags pa las nyams par 'gyur ba de dag la bcom ldan 'das kyis gzugs kyi rkyen can gyi nyon mongs pa gzhom pa'i phyir chags pa can dag la phyi rol gyi yul la chags pa 'joms pa'i keng rus ltar/de lta bur gyur pa ma yin yang de lta bu nyid du sems tsam nyid du bstan pa yin no zhes bya bar shes par bya'o/ /yang lung 'di drang ba'i don yin gyi nges pa'i don ni ma yin no zhes bya ba de ltar gang las nges she na/ lung dang rigs pa las so//de nyid ston par byed pa ni/ 'di ni ston pas drang don nyid gsungs shing / /'di ni drang don nyid du rigs pas 'thad/ /ces bya ba'o/ /mdo 'di drang ba'i don yin pa 'ba' zhig tu ma zad kyi gzhan yang / rnam pa de lta'i mdo sde gzhan yang ni/ /drang don nyid du lung 'dis gsal bar byed//rnam pa de lta bu'i mdo sde gang yin zhe na/ ji skad du dgongs pa nges par 'grel ba'i mdo las/ brtags pa dang gzhan gyi dbang dang yongs su grub pa zhes bya ba rang bzhin gsum bstan pa las/ brtags pa med pa nyid dang / gzhan gyi dbang yod pa nyid dang /de bzhin du/ len pa'i rnam par shes pa zab cing phra/ /sa bon thams cad chu bo'i rgyun ltar 'bab/ /bdag tu rtog par gyur na mi rung zhes/ /byis pa rnams la ngas ni de ma bstan/ /zhes bya ba la sogs pa ste 'di/ ji ltar nad pa nad pa la/ /sman pas sman rnams gtong ba ltar//sangs rgyas de bzhin sems can la/ /sems tsam du yang rab tu gsungs/ /zhes bya ba'i lung 'dis drang ba'i don nyid du gsal bar byed do/ /de bzhin du bcom ldan 'das kyis mdo brjod pa las de bzhin gshegs pa'i snying po gsungs pa de bcom ldan 'das kyis rang bzhin gyis 'od gsal ba rnam par dag pas thog ma nas rnam par dag pa nyid mtshan sum cu rtsa gnyis dang ldan pa sems can thams cad kyi lus kyi nang na mchis par brjod de/bcom ldan 'das kyis rin po che rin thang chen po gos dri ma can gyis yongs su dkris pa ltar phung po dang khams dang skye mched kyi gos kyis yongs su dkris pa/'dod chags dang zhe sdang dang gti mug gis zil gyis gnon pa/ yongs su rtog pa'i dri mas dri ma can du gyur pa/ rtag pa brtan pa ther zug par mi brjod na/ bcom ldan 'das de bzhin gshegs pas de bzhin gshegs pa'i snying por smra ba 'di ni mu stegs byed kyi bdag tu smra ba dang ji ltar 'dra ba ma lags/bcom ldan 'das mu stegs byed rnams kyang rtag pa byed pa po ma yin pa yon tan med pa khyab pa mi 'jig pa'o zhes bdag tu smra ba ston par byed do/ /bcom ldan 'das kyis bka' stsal pa/ blo gros chen po nga'i de bzhin gshegs pa'i snying po bstan pa ni mu stegs can gyi bdag tu smra ba dang mtshungs pa ma yin te/blo gros chen po de'i de bzhin gshegs pa dgra bcom pa yang dag par rdzogs pa'i sangs rgyas rnams ni/ stong pa nyid dang / yang dag pa'i mtha' dang / mya ngan las 'das pa dang / ma skyes pa dang / mtshan ma med pa dang / smon pa med pa la sogs pa'i tshig gi don rnams la de bzhin gshegs pa'i snying por bstan pa byas nas/ byis pa rnams bdag med pas 'jigs par 'gyur ba'i gnas rnam par spang bar bya ba'i don du de bzhin gshegs pa'i snying po'i sgo bstan pa rnam par mi rtog pa'i gnas snang ba med pa'i spyod yul ston te/blo gros chen po ma 'ongs pa dang da ltar byung ba'i byang chub sems dpa' sems dpa' chen po rnams kyis bdag la mngon par zhen par mi bya'o/ /blo gros chen po dper na rdza mkhan ni 'jim pa'i rdul gyi phung po gcig las lag pa dang bzo dang /lag gzungs dang chu dang srad bu dang nan tan dang ldan pa las snod rnam pa sna tshogs byed do/ /blo gros chen po de bzhin du/ de bzhin gshegs pa rnams kyang chos la bdag med pa rnam par rtog pa'i mtshan nyid thams cad rnam par log pa de nyid shes rab dang thabs la mkhas pa dang ldan pa rnam pa sna tshogs kyis de bzhin gshegs pa'i snying po bstan pa'am bdag med par bstan pas kyang rung ste/rdza mkhan bzhin du tshig dang yi ge'i rnam grangs rnam pa sna tshogs kyis ston to/ /de ltar de'i phyir blo gros chen po de bzhin gshegs pa'i snying po bstan pa ni mu stegs byed kyi bdag tu smra ba'i bstan pa dang mi 'dra'o//blo gros chen po de ltar de bzhin gshegs pa rnams kyis mu stegs byed bdag tu smra ba la mngon par zhen pa rnams drang ba'i phyir de bzhin gshegs pa'i snying po bstan pas de bzhin gshegs pa'i snying po ston te/yang dag pa'i bdag tu rnam par rtog pa'i lta bar rnam par lhung ba'i bsam pa can dag rnam par thar pa gsum gyi spyod yul la gnas pa'i bsam pa dang ldan zhing myur du bla na med pa yang dag par rdzogs pa'i byang chub tu mngon par rdzogs par 'tshang rgya bar ji ltar 'gyur zhes te zhes bya ba dang /yang de nyid las blo gros chen po stong pa nyid dang mi skye ba dang mi gnyis pa dang rang bzhin med pa'i mtshan nyid sangs rgyas thams cad kyi mdo sde'i nang du chud pa 'di zhes bstan to/ /de'i phyir de ltar na rnam pa de lta bu'i mdo sde rnam par shes par smra ba rnams kyis nges pa'i don nyid du khas blangs pa thams cad drang ba'i don nyid yin par lung 'dis mngon par gsal bar byas nas/rigs pas drang ba'i don nyid du gsal bar bya ba'i phyir bshad pa/ shes bya med na shes pa bsal ba ni/ /bde blag rnyed ces sangs rgyas rnams kyis gsungs/ /shes bya med na shes pa bkag 'grub pas//dang po shes bya dgag pa mdzad pa yin/ /sangs rgyas bcom ldan 'das rnams kyis ni gdul bya rnams rim gyis rang bzhin med pa la 'dzud par mdzad do/ /de la bsod nams byas pa rnams chos nyid la bde blag tu 'jug pa'i phyir chos nyid la 'jug pa'i thabs yin pas ji ltar thog mar sbyin pa la sogs pa'i gtam sbyor bar mdzad pa de bzhin du/shes bya bkag pa yang bdag med par khong du chud pa'i thabs yin pa'i phyir bcom ldan 'das rnams kyis sngar shes bya dgag pa kho na gsungs te/ shes bya'i bdag med par rig pa rnams shes pa'i bdag med pa la bde blag tu 'jug pa'i phyir ro//shes bya rang bzhin med par rig pa rnams kyis shes pa rang bzhin med par res 'ga' rang nyid kho nas rtogs par 'gyur la res 'ga' ni cung zad cig nye bar bstan pa tsam gyis 'gyur bar shes bya dgag pa nyid sngar gsungs so//shes rab can dag gis gzhan yang de bzhin du brtag par bya'o zhes bshad pa/ de ltar lung gi lo rgyus shes byas te/ /mdo gang de nyid ma yin bshad don can/ /drang don gsungs pa'ang rtogs nas drang bya zhing / /stong nyid don can nges don shes par gyis/ /mdo sde gang dag skye ba med pa la sogs pas khyad par du byas pa'i rten cing 'brel bar 'byung ba dngos su gsal bar byed pa ma yin pa de dag ni ji ltar rang bzhin med pa la 'jug pa'i rgyur 'gyur ba de ltar bshad par bya ste/ji skad du/ 'byung rnams mig bzung ma yin na/ /de 'byung mig bzung ji ltar zhes//gzugs la de skad gsungs pa na/ /khyod kyis gzugs kyi 'dzin pa bzlog /ces gsungs la/ mdo las kyang / mi rtag don ni med don zhes gsungs so/ /stong nyid don can nges don yang shes par gyis te/ ji skad du/ stong pa bde bar gshegs pas bshad pa ltar//nges don mdo sde dag gi bye brag shes/ /gang la sems can gang zag skyes bu bstan/ /chos de thams cad drang ba'i don du shes/ /zhes bya ba dang / de bzhin du/ 'jig rten khams ni stong phrag tu/ /nga yis mdo rnams gang gsungs pa/ /yi ge tha dad don gcig ste//yongs su bsgrag par nus ma yin/ /dngos po gcig ni bsam byas nas / /de dag thams cad bsgoms 'gyur te/ /sangs rgyas kun gyi chos mang po/ /ji snyed rab tu bstan pa rnams/ /chos rnams kun gyi bdag med yin/ /mi gang don la mkhas rnams kyis/ / gnas 'di la ni bslab byas na/ /sangs rgyas chos rnams rnyed mi dka'/ /zhes gsungs so/ /de bzhin du 'phags pa blo gros mi zad pa la sogs pa'i mdo sde dag las rgya cher bstan pa yang rtogs par bya'o/ /phyogs tsam zhig ni brjod par bya ste/ /dper na sbrul ni thag pas bsdoms pa rten cing 'brel bar 'byung ba la brtags pa yin te/de de la yod pa ma yin pa'i phyir ro/ /de sbrul dngos po la ni yongs su grub pa yin te/ kun [(]du [,]tu [)]ma brtags pa'i phyir ro/ /de bzhin du rang bzhin yang gzhan gyi dbang byas pa can la ni kun tu brtags pa yin te/ rang bzhin dag ni bcos min dang //gzhan la ltos pa med pa yin/ /zhes 'byung bas ngo bo nyid ni byas pa can ma yin no/ /bzung bzhin pa'i rten cing 'brel bar 'byung ba byas pa can gzugs brnyan dang 'dra ba la brtags pa gang yin pa de ni sangs rgyas kyi spyod yul la ni dngos yin te/kun tu ma brtags pa'i phyir te/ dngos po byas pa can la ma reg par rang bzhin 'ba' zhig mngon sum du mdzad pas de nyid thugs su chud pa'i phyir sangs rgyas zhes brjod do/ /de'i phyir de ltar brtags pa dang gzhan gyi dbang dang yongs su grub pa zhes bya ba ngo bo nyid gsum rnam par gzhag pa rtogs par byas nas mdo'i dgongs pa rnam par bshad par bya'o//gzung ba dang 'dzin pa gnyis ni gzhan gyi dbang las ma gtogs par dngos po med pa'i phyir na/ gzhan gyi dbang la de gnyis kun [(]du [,]tu [)]brtags pa nyid bsam par byas te / spros pas chog go/ /dkyus ma nyid bshad par bya'o//de'i phyir de ltar gzhan las kyang skye ba bsal nas/ da ni gnyi ga las skye ba bsal bar 'dod pas bshad pa/ gnyis las skye ba'ang rigs pa'i ngo bo ma yin gang gi phyir/ /bshad zin nyes pa de dag thog tu 'bab pa yin phyir ro/ /de la tshig gal gnyis su smra ba rnams ni skye ba bdag las kyang 'gyur zhing gzhan las kyang 'gyur bas gnyi ga las skye bar sems so//de la 'ji ba'i gong bu dang dbyu gu dang 'khor lo dang / skud pa dang chu dang rdza mkhan la sogs pa dag las bum pa 'byung bar 'dod pa na/ gang gi phyir 'ji ba dang bum pa gnyis gzhan nyid ma yin pas bum pa 'ji ba'i bdag nyid du yod pa kho na skye ba de'i phyir bdag las kyang skye la/gang gi phyir rdza mkhan gyi bya ba la sogs pa gzhan du gyur pa dag 'di'i skyed par byed pa yin pa de'i phyir/ gzhan las kyang skye'o snyam du bdag dang gzhan las skye bar sems so/ /phyi rol gyi bdag la ji lta ba de bzhin du nang gi rnams la yang bdag dang gzhan las 'gyur ro//de la srog dang srog ma yin pa dang / bsod nams dang sdig pa dang / zag pa dang sdom pa la sogs pa tshig gi don dgu ni de nyid dag go zhes tshig gi don gyi rnam par gzhag pa byas nas gang gi phyir byams pa tshe rabs gzhan du yang srog gi bdag nyid du yod pa kho nas skye ba 'di len pa de'i phyir bdag las skye ba yin te/byams pa dang srog gnyis gzhan nyid ma yin pa'i phyir ro/ /srog ni 'gro ba dang ldan pa'i phyir na gzhan gyi lha la sogs pa'i 'gro bar rgyu bar yang 'dod pa yin no/ /gang gi phyir pha dang ma dang chos dang chos ma yin pa dang zag pa la sogs pa gzhan du gyur pa dag las skye ba de'i phyir gzhan las kyang skye ba yin te/de'i phyir bdag las skye ba ma yin zhing gzhan las skye ba yang ma yin te zhes bya ba 'di kho bo cag la gnod par byed pa ma yin te/ bdag kho na las skye bar khas ma blangs pa'i phyir dang gzhan kho na las skye bar khas ma blangs pa'i phyir ro zhe'o//rtsod pa 'di yang / mi rigs pa nyid du bshad pa/ gnyis las skye ba'ang rigs pa'i ngo bo ma yin te/ ci'i phyir zhe na/ gang gi phyir/ bshad zin nyes pa de dag thog tu 'bab pa yin phyir ro/ /gang gi phyir phyogs gnyi ga dag la skyon gang dag bstan pa de dag gnyi ga'i phyogs 'di la yang 'bab pa de'i phyir gnyi ga las kyang skye ba srid pa ma yin no//gang gi phyir bum pa 'ji ba'i bdag nyid du yod pa de'i phyir skye ba ma yin te/ yod pa'i phyir ro/ /ji skad du/ de ni de las 'byung na yon tan 'ga' yang yod ma yin//skyes par gyur pa slar yang skye bar rigs pa'ang ma yin nyid/ /ces bya ba la sogs pa bshad pa yin no/ /de bzhin du srog gi bdag nyid kho nar gnas pa'i phyir byams pa la yang skye ba yod pa ma yin no zhes bya bar rig par bya'o/ /gang gi phyir bum pa chu dang skud pa dang 'khor lo la sogs pa'i bdag nyid du rnam par gnas pa ma yin pa de'i phyir de dag las skye ba ma yin te/ji skad du/ gzhan la brten nas gal te gzhan zhig 'byung bar 'gyur na ni/ /'o na me lce las kyang mun pa mthug po 'byung 'gyur zhing / /thams cad las kyang thams cad skye bar 'gyur te gang gi phyir//skyed par byed pa ma yin ma lus la yang gzhan nyid mtshungs/ /zhes bya ba la sogs pa bshad zin to/ /pha dang ma la sogs gzhan du gyur pa dag las byams pa skye ba la yang de bzhin du brjod par bya'o/ /de las ji ltar gong du bdag dang gzhan las skye ba 'jig rten gyi kun rdzob dang don dam par yang mi rigs so zhes bstan pa de bzhin du/tshig gal gnyis su smra ba la yang ji skad du bshad pa'i rigs pas mi srid do zhes gong du bstan pa mjug bsdu ba'i phyir/ 'di ni 'jig rten las min de nyid du yang 'dod min te/ /zhes bya ba smos so/ / sngar bshad pa'i rigs pa kho nas gnyi ga'i phyogs la yang gnyi ga las skye ba mi rigs pa 'ba' zhig tu ma zad kyi 'dir bshad pas kyang yin no zhes bstan pa'i phyir bshad pa/ gang phyir re re las ni skye ba 'grub pa yod ma yin/ /dper na til gcig gis 'bru mar 'byin nus pas/ mang po rnams kyis kyang 'gyur la/nus pa ma mthong ba'i bye ma rnams kyis ni ma yin pa ltar re res bskyed par 'gyur na ni/ de lta bu'i rang bzhin can mang po rnams kyis kyang 'gyur ba zhig go/ /de'i phyir gnyi ga las skye ba yang rigs pa ma yin no/ /'dir ngo bo nyid smra ba ni/ gal te skye ba rgyu las yin na ni rgyu de 'bras bu'i bdag nyid du gyur pa dang /gzhan du gyur pa dang / gnyi gar gyur pa zhig tu 'gyur bas nyes pa de dag tu 'gyur ba zhig na/ bdag gis ni rgyu khas ma blangs pas bshad zin pa'i nyes pa'i go skabs med do/ /de'i phyir dngos po rnams kyi skye ba ni ngo bo nyid las 'byung ba kho na yin te/'di ltar pad ma'i chu ba dang de'i 'dab ma rnams kyi rtsub pa dang de'i 'jam sha dag 'ga' zhig gis bsgrims te byed par ma mthong la/ de'i 'dab ma dang ze'u 'bru dang lte ba rnams kyi kha dog dang dbyibs sna tshogs pa dag kyang byed par mthong ba ma yin no/ /de bzhin du pa na sa dang bal po se'u la sogs pa'i sna tshogs pa yang yin no//phyi rol dag la ji ltar yin pa de bzhin du rma bya dang bya ti ti ri dang / bya gag la sogs pa nang gi bdag nyid can dag la yang 'ga' zhig gis 'bad pas bzung nas kha dog dang dbyibs la sogs pa 'god par ma dmigs pa nyid do//de'i phyir dngos po rnams kyi skye ba ni ngo bo nyid las 'byung ba kho na'o zhes smra'o/ /'di la bshad par bya ste/ gal te rgyu med kho nar skye bar lta zhig 'gyur na ni/ /de tshe mtha' dag rtag tu thams cad las kyang skye 'gyur zhing / /'bras 'byung ched du 'jig rten 'di yis sa bon la sogs ni//brgya phrag dag gi sgo nas sdud par byed par yang mi 'gyur/ /gal te dngos po rnams kyi skye ba glo bur bar 'gyur na ni ji ltar pa na sa'i shing de'i shing thog gi rgyu ma yin pa de bzhin du/ nim pa dang a mra la sogs pa dngos po thams cad kyang de'i rgyu ma yin pas de dag las kyang skye bar 'gyur te/rgyu ma yin pa nyid du 'dra ba'i phyir ro/ /yang ji ltar shing thog pa na sa de'i shing rgyu ma yin pa las skye ba de bzhin du khams gsum las kyang 'gyur ro/ /yang gang zhig a mra dang la ku tsa la sogs pa rnams kyi smin pa las skyes pa'i skye ba dus tshigs la ltos shing res 'ga' mngon pa de yang de dag la rtag tu kho nar yod par 'gyur te/dus tshigs kyi ltos pa la mi ltos pa'i phyir ro/ /de bzhin du rma bya rma bya'i mdongs kyi tshogs kyi rgyu ma yin pas bya rog la yang mdongs kyi tshogs yod par 'gyur la/ rma bya la yang dus thams cad kyi tshe ste mngal gyi gnas skabs na yang ne tso'i sgro yang yod par 'gyur ro//de ltar 'gro ba'o cog rtag tu skye bar 'gyur na de ni yod pa yang ma yin pas ngo bo nyid du smra ba mi rigs so/ /de ltar rigs pa dang 'gal ba brjod nas/ mthong ba dang 'gal ba brjod pa'i phyir bshad pa/ 'bras 'byung ched du 'jig rten 'di yis sa bon la sogs ni/brgya phrag dag gi sgo nas sdud par byed par yang mi 'gyur ba zhig na byed pa yang yin pa de'i phyir skye ba ngo bo nyid las byung ba ma yin no/ /gzhan yang / gal te 'gro ba rgyu yis stong par gyur na nam mkha' yi/ /ut+pa la yi dri mdog ji bzhin gzung du med nyid na//shin tu ches bkra'i 'jig rten 'dzin pa'ang yin de 'i phyir/ /rang gi blo bzhin 'jig rten rgyu las yin par shes par gyis/ /gal te 'gro ba rgyus stong par gyur na ni nam mkha'i ut+pa la'i dri dang kha dog bzhin du 'dzin pa'i lam du mi 'gyur ba nyid na 'gyur ba yang yin te/ de'i phyir rang gi blo ltar 'gro ba mtha' dag rgyu kho na las skye'o zhes bya bar rig par gyis shig /khyod kyi ltar na ni sngon po'i rnam pa can gyi blo yul sngon po gsal nas nye bar skye ba ma yin te/ sngon po'i rnam pa can gyi blo ni sngon po kho na las yin gyi ngo bo nyid las ma yin pas ngo bo nyid smra ba ni mi rigs so/ / sems pa 'byung ba las gyur pa dag ni rgyu dmigs bzhin pa la ni bsnyon par mi nus te/ mthong ba'i phyir dang / ji skad bshad pa'i skyon du thal bar 'gyur ba'i phyir te/ rgyu dang 'bras bu'i dngos po 'jig rten la grags pa 'di ni yod pa nyid do/ /de nyid ni bzhi kho na ste/'gro ba sna tshogs pa mtha' dag gi rgyur gyur pa sa dang chu dang me dang rlung zhes bya ba rnams so/ /de rnams kyi yongs su smin pa'i khyad par las pad ma dang bal po se'u la sogs pa dag dang / rma bya dang bya gag gi tshogs pa dag gi sna tshogs pa ji ltar mthong bzhin pa 'thad pa 'ga' zhig tu ma zad kyi/blo dngos po'i de kho na nyid sna tshogs yongs su gcod pa por gyur pa yang de kho na las skye ba yin no/ /de la ji ltar chang dag las 'byung ba'i bye brag phrad pa yongs su 'gyur ba'i khyad par las srog chags rnams kyi myos pa dang brgyal ba'i rgyu myos par 'gyur ba'i nus pa skye ba de bzhin du/nur nur po la sogs pa'i 'byung ba chen po'i khyad par can yongs su smin pa las blo dag skye zhing / de dag dngos po mtha' dag yongs su gcod par byed pa'i bar du yang 'gyur ro/ /de'i phyir phyi rol dang nang gi dngos po rnams ni 'jig rten 'di'i rgyu las 'byung ba kho na yin gyi/gang du byas pa'i las kyi rnam par smin pa 'dir ram/ 'dir byas pa'i rnam par smin pa 'jig rten gzhan du 'byung ba 'jig rten pha rol dag yod pa nyid ni ma yin no snyam du sems so/ /mdzes ma legs par spyod cing bza' bar gyis/ /lus mchog 'das gang de khyod la mi 'byung //lus 'di tshogs par gyur pa tsam zhig ste/ /'jigs ma song ba ldog par mi 'gyur ro/ /zhes smos te/ 'di ni bu mo la mngon par bgrod par 'dod cing bu mos 'jig rten pha rol med par rtogs par 'dod nas smras pa yin no/ /'di la brjod par bya ste/ khyod kyi 'jig rten pha rol yod pa ma yin no snyam pa'i nges pa 'di ga las yin/mngon sum ma yin pa nyid kyi phyir ro zhe na/ khyod kyi 'jig rten pha rol mngon sum ma yin pa nyid ci mngon sum zhig gam 'on te mngon sum ma yin pa zhig yin grang / mngon sum mo zhe na 'jig rten pha rol mngon sum du gyur pa nyid med pa mngon sum yin pas dngos po med pa yang mngon sum nyid du 'gyur ro//de'i phyir dngos po med pa yang khyod la dngos por 'gyur te/ mngon sum yin pa'i phyir dngos po bzhin no/ /de'i phyir dngos po med pa zhes bya ba 'ga' yang med pas zla bo med pa'i phyir dngos po yang med par 'gyur ro/ / dngos po dang dngos po med pa med na yang 'byung ba rnams kyi yod pa nyid dang / 'jig rten pha rol med pa nyid nyams par 'gyur ro/ /ci ste mngon sum ma yin na ni re zhig mngon sum ma yin pa de nyid mngon sum ma yin pa'i phyir ma bzung bas/ ci ltar ma bzung ba de'i sgo nas 'jig rten pha rol med par rjes su dpog pa 'gyur/ci ste rjes su dpag pas bzung ba yin no zhe na/ rjes su dpag pa las rab tu grub pas kyang don sgrub pa yin na 'di ni/ ji tsam dbang po'i spyod yul bas / /skyes bu de tsam kho nar zad/ /bzang mo mang thos gang smra ba/ /de ni spyang ki'i rjes dang 'dra//zhes khyod kyis khas blangs pa yang yin no/ /de'i phyir 'dir thams cad la skur pa 'debs par byed pa na/ sems pa yod pa 'byung ba las gyur pa pa la sun 'byin pa bshad zin pa'i lam gyi rjes su 'brangs te thams cad du sun 'byin pa brjod par bya'o/ /gzhan yang ji ltar rab rib can zla ba gnyis la sogs pa'i ngo bo yod pa ma yin pa yod do snyam du 'dzin pa'i mthong ba skra shad dang sbrang ma la sogs pa yang dag pa ma yin pa'i yul can du rnam pa de lta bu gzhan yang mi bden pa kho na yin pa de bzhin du khyod kyi 'jig rten pha rol la sogs pa med par shes pa gzhan yang mthong ba'i dngos po phyin ci log tu rtogs pa'i sgo nas phyin ci log nyid yin no zhes bstan pa'i phyir bshad pa/'byung ba de dag bdag nyid gang zhig gis ni khyod kyi blo'i/ /yul du 'gyur ba de yi bdag nyid can ni ma yin na/ /gang la yid kyi mun pa mthug po 'di nyid du yod pa/ /des na ji ltar 'jig rten pha rol yang dag rtogs par 'gyur//sa la sogs pa de kho na nyid bzhi po gang dag smras pa de dag ni ji ltar khyod kyi shes pa'i yul nyid du 'gyur ba'i bdag nyid der yod pa ma yin no/ /gang gi tshe de ltar khyod 'jig rten 'di nyid la phyin ci log tu mthong ba yin pa de'i tshe/ 'jig rten pha rol te por phra ba lha'i mig gi shes pa'i spyod yul du gyur pa ji ltar rtogs par 'gyur te mi srid pa nyid do//gzhan yang / 'jig rten pha rol 'gog par byed pa'i dus su bdag nyid ni/ /shes bya'i rang bzhin phyin ci log tu lta bar rtogs bya ste/ /de yi lta ba'i rnam pa'i rten mtshungs lus dang ldan nyid phyir//gang tshe 'byung ba'i bdag nyid yod nyid khas len de tshe bzhin/ /mtshungs pa ni mnyam pa ste 'dra ba zhes bya ba'i don to/ /rten ni gnas pa'i rgyu'o/ /lus ni khog pa'o/ /de'i lta ba'i rnam pa ni 'jig rten pha rol la skur pa 'debs pa de'i lta ba'i rnam pa'o/ /rten yang de yin la mtshungs pa yang de yin pas zhes khyad par gyi tshig bsdu ba'o//rten du mtshungs pa nyid lus yin pas na de'i lta ba'i rnam pa'i rten du mtshungs pa'i lus zhes tshig rnam par sbyar ro/ /de 'di la yod pas na ma tub kyi rkyen no/ /de'i dngos po ni/ de yi lta ba'i rnam pa'i rten mtshungs lus dang ldan nyid phyir//zhes bya ba ste gtan tshigs so/ /rten de ni ji srid sems pa 'byung ba las gyur pa'i 'jig rten pha rol yod pa nyid du lta ba'am/ the tshom gyi rten nyid du ma gyur pa de srid du log par lta ba 'jig rten pha rol la skur pa 'debs pa'i rten du mtshungs pa nyid du 'gyur bas 'byung ba'i bdag nyid yod pa nyid du rtogs pa na yang 'jig rten rgyang 'phen pa la de'i lta ba'i rnam pa'i rten du mtshungs pa'i lus dang ldan pa nyid yod pa yin te/'di ltar de'i gnas skabs ni gnyis te gcig ni 'byung ba'i rang bzhin khong du chud pa'i gnas skabs so/ /gzhan ni 'jig rten gzhan la skur pa 'debs pa'i gnas skabs so//de la gcig ni phyogs su byas pa nyid kyis na gzhan dpe nyid du bstan pa'i phyir/ gang tshe 'byung ba'i bdag nyid yod nyid khas len de tshe bzhin/ /zhes bya ba smos te/ gnas skabs der yang de'i lta ba'i rnam pa'i rten du mtshungs pa'i lus dang ldan pa nyid dang shes bya'i rang bzhin phyin ci log tu lta ba yod pa yin no//ci ste 'byung ba'i bdag nyid yod pa nyid rtogs pa'i gnas skabs na yang bdag phyin ci ma log pa mthong ba yin pa'i phyir dpe bsgrub byas stong pa nyid yin no snyam na/ de yang yod pa ma yin te/ ma skyes pa nyid kyis yod pa ma yin pa'i rang bzhin can gyi 'byung ba dag la skye ba dang yod pa nyid du rtogs pas phyin ci log tu lta ba nyid grub pa'i phyir ro//'byung ba dag ma skyes pa nyid de kho na bsgrub par bya dgos so zhe na/ ma yin te bsgrubs zin pa'i phyir ro zhes bshad pa ste / 'byung ba de dag ji ltar yod min de ltar bshad zin to / /gang gi phyir na gong du rang gzhan las dang gnyi ga las//skye dang rgyu med thun mong du ni bkag zin de yi phyir/ /ma bshad 'byung ba 'di dag lta zhig yod pa ma yin no/ /dngos po rnams thun mong du rang dang gzhan dang gnyi ga dang rgyu med pa las skye ba 'gog par byed pa na/ 'byung ba dang skye ba yang bdag gis phyir bkag pa kho na las skye ba med pa'i phyir/'byung ba dag la rang bzhin yod pa ma yin pas dpe grub pa nyid do/ /de bzhin du thams cad mkhyen pa la skur pa 'debs pa dang / dngos po yod pa nyid du smra ba dang / dngos po med pa nyid du smra ba dang / dbang phyug dang dus dang rdul dang rang bzhin dang ngo bo nyid smra ba rnams dang /de dag las gzhan pa rnams la yang rang rang gi ji lta ba yin pa smra ba na rtogs pa phyin ci log nyid sbyar bar bya'o/ /'di lta ste/ rdzogs pa'i sangs rgyas 'gog par byed pa'i dus su bdag nyid ni/ /shes bya'i rang bzhin phyin ci log tu lta bar rtogs bya ste//de yi lta ba'i rnam pa'i rten mtshungs lus dang ldan nyid phyir/ /gang tshe 'byung ba'i bdag nyid yod nyid khas len de tshe bzhin/ /zhes bya ba la sogs pa sbyar bar bya ste/ yod pa dang med pa nyid du lta ba thams cad dgag par 'dod pa'i phyir ro/ /kho bo cag la ni gnas skabs 'gar yang mi 'dod pa thob pa yod pa ma yin te/de'i phyir mkhas pas yongs su bsgyur la tshigs su bcad pa 'di nyid kyis gzhan gyis yongs su brtags pa'i phyogs snga ma ma lus pa bsal bar nges par bya ste/ rtog pa'i dra ba ma lus par bkag par don dam pa'i ye shes grub par mngon par 'dod pa'i phyir ro//ci ste khyod la yang thal bar 'gyur ba 'di tsam mtshungs so snyam na/ de yang yod pa ma yin te/ kho bo cag phyin ci ma log par sgrub pa la dpe med pa'i phyir ro/ /'jig rten gzhan rtogs yod pa nyid du rtogs pa'i dus su bdag /shes bya'i rang bzhin dam pa'i don ni lta bar rtogs bya ste//bdag gi lta ba'i rnam pa'i rten mtshungs lus dang ldan nyid phyir/ /gang gi tshe ni bdag med rtogs par khas len de tshe bzhin/ /zhes bya bar brjod par nus pa yang yin no/ /de bzhin du/ 'di na thams cad mkhyen pa yod ces rtogs pa'i dus su bdag /shes bya'i rang bzhin dam pa'i don ni lta bar rtogs bya ste/ /gtan tshigs dang dpe dag ni de gnyis kho na'o/ /de bzhin du dngos po thams cad nges pa la yang sbyar bar bya'o/ /de'i phyir tshul 'dis ni/ de nyid de las 'byung min gzhan dag las lta ga la zhig /gnyi ga las kyang ma yin rgyu med par ni ga la yod/ /ces gang dam bcas par gyur pa de rab tu bsgrubs pa yin no/ /'dir smras pa/ gal te dngos po rnams bdag dang gzhan dang gnyi ga dang rgyu med pa las mi skye na/ 'o na ji ltar skye/ bshad pa gal te dngos po rnams la rang bzhin 'ga' zhig yod na ni skye ba'i rnam par rtog pa gzhan mi srid pa'i phyir/the tshom med par de bdag gam gzhan nam gnyi ga'am rgyu med pa zhig las skye ba'am dmigs par 'gyur ba zhig go/ /gang dag dbang phyug la sogs pa dag las dngos po rnams skye bar mngon par 'dod pa de dag gi ltar na yang dbang phyug la sogs pa de dag bdag tu gyur pa'am/gzhan du gyur pa'am/ gnyi gar gyur pa zhig tu 'gyur bas dbang phyug la sogs pa rgyur smra ba dag kyang bshad zin pa'i skyon las mi 'da' ste/ de'i phyir skyed par byed pa'i rgyu'i rnam par rtog pa gzhan lnga pa yod pa ma yin no//de'i phyir gzhan med pa'i phyir la rnam par rtog pa bzhis skye ba bkag pa'i phyir dngos po rnams kyi rang bzhin skye ba med do zhes bstan pa'i phyir/ gang gi phyir na bdag dang gzhan dang gnyi ga las skye dang / /rgyu la ma ltos yod pa min pas dngos rnams rang bzhin bral//zhes bya ba smos so/ /'dir smras pa/ gal te dngos po rnams kyi rang bzhin skye ba med pa nyid yin na/ 'o na ma skyes pa sngon po la sogs pa rnams ci ltar bzung / bshad pa sngon po la sogs pa rnams kyi rang bzhin ni ji ltar yang 'ga' zhig gi yul nyid du 'gyur ba ma yin pas sngon po la sogs pa rnams kyi rang bzhin ni bzung ba ma yin no//gal te de ltar na ni 'o na gang zhig yang dang yang du yul gyi ngo bo nyid du mdun na snang bar mthong ba de ci zhig tu 'gyur bar 'os she na/ bshad pa 'di ni phyin ci log nyid kyis na rang bzhin ma yin te/ma rig pa dang bcas pa rnams kho na bdag nyid der dmigs pa'i phyir la ma rig pa dang bral ba rnams kyis ni ma dmigs pa'i phyir ro zhes bstan pa'i phyir bshad pa/ gang phyir sprin tshogs dang mtshungs gti mug stug po 'jig rten la/ /yod pa des na yul rnams log pa dag tu snang bar 'gyur//sprin tshogs ni char sprin gyi tshogs so/ /gang gi phyir sprin gyi tshogs dang 'dra ba'i gti mug stug po sngon po la sogs pa'i rang bzhin mthong ba g.yogs nas gnas pa de'i phyir byis pa rnams la sngon po la sogs pa'i rang bzhin mthong ba yod pa ma yin te/ rang gi ngo bo phyin ci log tu mngon par zhen pa'i gnas su gyur pa 'di ni byis pa bden par mngon par zhen pa rnams la snang ba yin no/ /'dir smras pa gti mug gis bkab pa'i phyir rnam pa thams cad du de kho na nyid mi mthong bar ni 'gyur la rag na/ phyin ci log tu mthong ba ga las she na/de lta bur gyur pa ma yin pa rnams ma rig pa'i dbang gis de lta bu'i bdag nyid du snang ngo zhes bya ba 'di nyid phyi rol gyi dpe'i sgo nas bstan pa'i phyir/ ji ltar rab rib mthu yis 'ga' zhig skra shad zla gnyis dang / /rma bya'i mdongs dang sbrang ma la sogs log par 'dzin byed pa//zhes bya ba smos te/ ji ltar rab rib kyi mthus rab rib can gyis skra shad la sogs pa rnams ma skyes pa'i rang bzhin yin du zin kyang dngos po nyid du 'dzin par byed pa/ de bzhin du ni gti mug skyon gyi dbang gis mi mkhas pas/ /'dus byas lta zhig sna tshogs blo gros kyis ni rtogs par 'gyur//'di ni ma rig pa'i skyon gyis 'du byed rnams zhes bya ba dang / de bzhin du ma rig pa dang rjes su 'brel ba'i gang zag 'di ni bsod nams mngon par 'du bya ba dang / bsod nams ma yin pa mngon par 'du bya ba dang / mi g.yo ba mngon par 'du bya ba yang mngon par 'du byed do zhes bya ba dang /de bzhin du ma rig pa 'gags pas 'du byed 'gag ces bcom ldan 'das kyis gsungs pa yin no/ /de'i phyir tshul 'dis/ gal te gti mug brten nas las byung gti mug med par de/ /mi 'byung zhes byar mi mkhas kho nas rtogs par gor ma chag /blo bzang nyi mas mun pa stug po rnam par bsal ba bzhin / /mkhas pa dag ni stong nyid khong du chud cing grol bar 'gyur/ /shes rab can ni ma rig pa'i rkyen gyis 'du byed do zhes bya ba mthong ba na 'du byed rnams rang bzhin med par khong du chud par 'gyur ba 'ba' zhig tu ma zad kyi/de rtogs pa las ma rig pa spangs shing 'du byed dag kyang nye bar mi len te/ de nye bar len pa'i rgyu spangs pa'i phyir ro/ /de'i phyir 'khor ba las rnam par grol bar 'gyur ro/ /'dir smras pa/ gal te de ltar gzugs la sogs pa rnams la don dam par rang bzhin 'ga' yang med na/'o na mo gsham gyi bu bzhin du don dam par yod pa ma yin pa'i phyir/ de dag gi rang bzhin kun rdzob tu yang yod par mi 'gyur bzhin/ gzugs la sogs pa rnams kyi rang bzhin ni kun rdzob tu yod pa yang yin no/ /de'i phyir de dag gi yod pa nyid ni don dam par yang yod pa kho na'o zhes smras pa/gal te dngos rnams de nyid du med na/ /tha snyad du yang mo gsham bu ji bzhin/ /de dag med pa nyid 'gyur de yi phyir/ /de dag rang bzhin gyis ni yod pa nyid/ /'di la brjod par bya ste/ gang dag rab rib can sogs yul gyur pa//skra shad la sogs de dag ma skyes pas/ /re zhig de dag nyid la brtsad bya ste/ /phyi nas ma rig rab rib rjes 'brel la'o/ /de ci'i phyir khyod cag gis yod pa ma yin pa'i yul skra shad la sogs pa dag mthong la mo gsham gyi bu ni ma yin zhes re zhig gang dag rab rib la sogs pas mig nyams par byas pa de dag kho na la brtsad par bya la/phyis ni ci'i phyir ma skyes pa'i rang bzhin can gzugs la sogs pa dag mthong la mo gsham gyi bu ni ma yin zhes ma rig pa'i rab rib kyis blo'i mig bsgribs pa rnams la brgal zhing brtag par bya dgos so/ /kho bo cag la ni 'di brgal zhing brtag pa ma yin te/'di ltar kho bo cag ni rnal 'byor pa rnams kyis dngos po de dag 'di ltar gzigs shing gzhan gang dag rnal 'byor pa'i ye shes thob par 'dod pa de dag gis kyang chos kyi rang bzhin de skad bshad pa la lhag par mos par bya'o/ /zhes lung ji lta ba bzhin du rnal 'byor pa'i ye shes kyis thugs su chud pa'i sgo nas dngos po rang bzhin med par 'chad par bzhugs pa yin gyi/rang gi shes pa la ltos nas ni ma yin te/ kho bo cag ni ma rig pa'i rab rib kyis blo'i mig bsgribs pa yin pa'i phyir ro/ /ji skad du/ phung po rang bzhin dben zhing stong pa nyid//byang chub rang bzhin dben zhing stong pa nyid/ / gang spyod de yang rang bzhin stong pa ste/ /ye shes ldan pas shes kyi byis pas min/ /ye shes rang bzhin stong par rig 'gyur te/ /shes bya'i rang bzhin stong par rig gyur nas/ /shes pa po dang 'dra bar rtogs gyur na//byang chub lam la de dag spyod ces bya/ /zhes gsungs pa lta bu'o/ /de'i phyir 'di ni rnal 'byor pa rnams la brgal zhing brtag pa ma yin te/ de dag gis ni kun rdzob tu yang chos 'ga' zhig gi rang bzhin ma gzigs la/ don dam par yang ma yin no/ /rab rib can la brgal zhing brtag pa ltar phar 'dug cig /re zhig 'di ni khyod nyid la cher brgal zhing brtag par bya ba yin no zhes bshad pa/ gal te rmi lam dri za'i grong khyer bcas/ /smig rgyu'i chu dang mig 'phrul gzugs brnyan sogs/ /skye med mthong na yod nyid min mtshungs kyang //khyod la ji ltar der 'gyur de mi rigs/ /dper na rmi lam du dmigs pa dang / mo gsham gyi bu yod pa ma yin pa nyid du 'dra yang rmi lam mthong la mo gsham gyi bu ma yin par 'gyur/ de bzhin du dri za'i grong khyer la yang ngo / /smig rgyu'i chu zhes bya ba ni smig rgyu la chu zhes bya ba'i don no//de bzhin du mig 'phrul la yang ngo / /gzugs brnyan la sogs zhes bya ba'i sogs pa'i sgras ni brag ca dang sprul pa la sogs pa dag yongs su bzung ngo / /dper na rang bzhin gyis stong pa yin du zin kyang / de dag mthong gi mo gsham gyi bu ni ma yin no/ / de'i phyir je bdag nyid la brgal zhing brtag pa gyis dang / de nas phyis nga la brgal zhing brtag par 'gyur ro/ /de nyid du 'di ji ltar skye med kyang / /mo gsham bu ltar gang phyir 'jig rten gyi/ /mthong ba'i yul du mi 'gyur ma yin na / /de yi phyir na smras 'di ma nges pa'o//zhes brjod par nus pa yang yin no/ /ji skad du bcom ldan 'das kyis/ 'gro ba dag ni rmi 'drar bshad/ /de nyid du ni rnam ma bzhag /rmi lam gang la'ang dngos po med/ /log pa'i blo can mngon par zhen/ /dri za'i grong khyer ji ltar snang gyur kyang / /grong khyer phyogs bcur yod min gzhan na'ang med//grong khyer ming tsam zhig gis rab tu bzhag /de bzhin bde bar gshegs pas 'gro 'di gzigs/ /chu yi 'du shes can gyis ni/ /mthong yang smig rgyu la chu med/ /de bzhin yongs su rtogs pas bkrus / /sdug pa min par sdug par rtog /me long shin tu yongs dag la/ /ji ltar rang bzhin med pa yi/ /gzugs brnyan snang ba de bzhin du/ /ljon pa chos rnams shes par gyis/ /zhes gsungs pa'i lung las na gzugs la sogs pa rnams rang bzhin gyis ma skyes pa yin bzhin du 'jig rten gyis 'dzin pa'i yul nyid du 'gyur la//mo gsham gyi bu ni ma yin pas 'di ni khyod la rang nyid las ma nges pa yin no/ /kho bo cag la ni 'di brtsad du med pa nyid de 'di ltar kho bo cag gis ni gzugs la sogs pa rnams kun rdzob tu rang bzhin gyis skye bar khas blangs nas don dam par 'gog pa ma yin no//ci'i phyir zhe na/ ji ltar mo gsham bu la rang gi bdag nyid kyis/ /skye ba de nyid du med 'jig rten gzhan du'ang / /yod min de bzhin dngos 'di kun ngo bo/ /nyid kyi 'jig rten de nyid du ma skyes/ /gang gi phyir de lta yin pa/ /de phyir 'di ltar ston pas chos rnams kun//gdod nas zhi zhing skye bral rang bzhin gyis/ /yongs su mya ngan 'das pa gsungs gyur pa/ /de phyir rtag tu skye ba yod ma yin/ /gang gi phyir de lta bu'i lung yod pa de'i phyir rtag tu skye ba yod pa ma yin no/ /lung brjod pa ni/ chos kyi 'khor lo bskor ba ni/ /gdod nas zhi zhing ma skyes pa//rang bzhin mya ngan 'das pa yi/ /chos rnams mgon po khyod kyis ston / /zhes bya ba'o/ /de yang ye shes zhi ba'i yul yin pa'i phyir chos thams cad zhi ba'o/ /yang ci'i phyir ye shes zhi ba'i yul yin zhe na/ ma skyes pa zhes bya ba smos te/ ma skyes pa'i phyir ro zhes bya ba'i don to//gang gi phyir ma skyes pa de'i phyir ye shes zhi ba'i yul lo/ /yang ci'i phyir ma skyes she na/ gang gi phyir rang bzhin mya ngan 'das pa zhes bya ba smos te/ gal te 'ga' zhig la rang bzhin te ngo bo nyid yod na de skye bar 'gyur ba zhig na/ rang bzhin de yang yod pa ma yin pas ci zhig skye bar 'gyur/'dis ni dus thams cad du ma skyes par ston pa yin te/ sngar ma byung ba las phyis 'byung ba ma yin zhing phyis 'byung nas kyang yang 'gyur ba ni ma yin te/ 'o na ci zhe na/ rang bzhin nyid kyis yongs su mya ngan las 'das pa'o/ /gdod nas zhes bya ba smos pas ni de dag rnal 'byor pa'i ye shes kyi gnas skabs kho nar ma skyes pa ni ma yin te/'o na ci zhe na/ de'i gong rol 'jig rten pa'i tha snyad kyi gnas skabs su yang chos de dag rang gi bdag nyid kyis ma skyes pa'o zhes bya ba 'di ston par byed do/ /gdod kyi sgra ni dang po'i sgra'i rnam grangs te/ 'jig rten gyi tha snyad kyi gnas skabs brjod do zhes bya bar shes par bya'o/ /de ltar chos kyi 'khor lo bskor ba'i dus su chos rnams khyod kyis bstan to zhes yon tan phul du byung ba brjod pa'i sgo nas bcom ldan 'das la byang chub sems dpa' 'phags pa sgrib pa thams cad rnam par sel bas bstod pa yin no//rang gi sde pa rnams kyis 'di ni brgal ba ma yin pa nyid de/ de ci'i phyir zhe na/ gang gi phyir de dag gis khas blangs pa/ bum sogs 'di dag de nyid du med cing / /'jig rten rab tu grags par yod ji bzhin/ /de bzhin dngos po thams cad 'gyur bas na/ / mo gsham bu dang mtshungs par thal mi 'gyur/ /ci ste gal te gdags pa'i rten sa dang / chu dang / me dang / rlung dang / gzugs dang dri dang ro dang reg bya la sogs pa rnams yod pa de'i phyir bum par brtags pa ni rgyu dang bcas pa zhes bya bar rigs na/ gang gi ltar nas thams cad brtags pa tsam kho na yin gyi brtags pa'i rten rdzas ci yang med pa de la ni mo gsham gyi bu dang 'dra bar thal ba zlog pa med pa nyid do snyam na/de yang mi rigs te/ brtags pa'i rten rdzas sgrub par mi nus pa'i phyir ro/ /ji skad du/ gzugs la sogs pa ma gtogs par//ji ltar bum pa yod min ltar/ /de bzhin rlung sogs ma gtogs par/ /gzugs kyang yod pa ma yin no/ /zhes bya ba dang / de bzhin du/ sa chu me dang rlung rnams ni/ /re re ngo bo nyid du med/ /gang gsum med par re re med/ /gcig med par yang gsum med do//gal te gsum med re re med/ /gcig med par yang gsum med na/ /so so rang yod ma yin te/ /ci ltar 'dus pa skye bar 'gyur/ /zhes bya ba la sogs pa gsungs so/ /ji ltar rtag pa las mi rtag pa skye bar mi 'dod pa de bzhin du rdzas su yod pa las kyang rdzas su med par skye bar mi rigs te/ji skad du/ dngos po rtag pa las byung ba/ /mi rtag par ni ji ltar 'gyur/ /rgyu 'bras mtshan nyid mi mthun pa/ /nam yang mthong ba ma yin no/ /zhes gsungs so/ /de'i phyir de ltar dper na brtags par yod pa bzhin la sogs pa'i tshogs pa la brten nas me long la gzugs brnyan brtags pa tsam dmigs pa dang /brtags par yod pa ka ba la sogs pa la brten nas khyim du brtags pa dang / de bzhin du shing gi rten can nags brtags pa dang / ji ltar rmi lam na ma skyes pa'i rang bzhin can gyi sa bon las ma skyes pa'i rang bzhin can gyi myu gu skye bar dmigs pa de bzhin du/dngos po brtags par yod pa thams cad kyi brtags pa yang dngos po brtags pa yod pa'i rten can du rigs te/ ji skad du/ ji ltar ston pas sprul pa ni/ /zhes bya ba la sogs pa nas/ dri za'i grong khyer lta bu dang / /smig rgyu rmi lam 'dra ba yin//zhes bya ba'i bar du gsungs so/ /de'i phyir 'di brgal ba ma yin no/ /'dir smras pa/ gal te khyod kyis bdag dang gzhan dang gnyi ga dang rgyu med pa las skye ba phyogs gnyi gar yang bkag nas / ma rig pa dang 'du byed dang sa bon la sogs pa dag las rnam par shes pa dang myu gu la sogs pa kun rdzob tu skye ba de ci ltar nges par bya /de brjod par bya ste/ gang phyir rgyu med pa dang dbang phyug gi /rgyu la sogs dang bdag gzhan gnyi ga las/ /dngos rnams skye bar 'gyur ba ma yin pa/ /de phyir brten nas rab tu skye bar 'gyur/ /gang gi phyir ji skad bshad pa'i tshul gyis dngos po rnams kyi skye ba ngo bo nyid las byung ba yod pa ma yin la dbang phyug dang dus dang rdul dang rang bzhin dang skyes bu dang sred med kyi bu la sogs pa rnams las kyang ma yin zhing /bdag dang gzhan dang gnyis ka las skye ba yang ma yin pa de'i phyir/ 'di la brten nas 'di 'byung ba zhig ste/ de tsam zhig la 'jig rten gyi tha snyad mi bcad pa'i don du brten to/ /ji skad du/ bcom ldan 'das kyis de la chos kyi brda ni 'di yin te/ 'di lta ste/ 'di yod na 'di 'byung / 'di skyes pas 'di skye ste/ gang 'di ma rig pa'i rkyen gyis 'du byed rnams zhes bya ba la sogs pa gsungs so//de bzhin du/ 'di yod pas na 'di 'byung dper/ /ring po yod na thung ngu bzhin/ /'di skyes pas na 'di skye dper/ /mar me 'byung bas 'od bzhin no/ /zhes bya ba dang / bstan bcos las kyang / byed po las la brten byas shing / / las kyang byed po de nyid la/ /brten nas 'byung ba ma gtogs pa/ /grub pa'i rgyu ni ma mthong ngo / /de bzhin nyer len shes par bya/ /las dang byed po bsal phyir ro/ /byed pa po dang las dag gis/ /dngos po lhag ma shes par bya/ /zhes bya ba 'di tsam zhig kho na gsungs so/ /de ltar rkyen nyid 'di pa tsam gyi rten cing 'brel par 'byung ba bshad pa na/rgyu med pa las skye ba la sogs pa'i rtog pa 'di dag mi srid pa 'ba' zhig tu ma zad kyi/ rtag pa dang chad pa dang rtag pa dang mi rtag pa dang dngos po dang dngos po med pa gnyis la sogs pa rtog pa gzhan dag kyang mi srid pa nyid do zhes bstan pa'i phyir bshad pa/gang phyir dngos po brten nas rab 'byung bas/ /rtog pa 'di dag brtag par mi nus pa/ /de phyir rten 'byung rigs pa 'di yis ni/ /lta ngan dra ba mtha' dag gcod par byed/ /gang gi phyir 'di la brten nas 'di 'byung ngo zhes bya ba'i rigs pas 'di tsam zhig gis dngos po kun rdzob pa rnams kyis bdag gi dngos po yod pa 'thob kyi gzhan du ma yin pa de'i phyir rten cing 'brel par 'byung ba rkyen nyid 'di pa tsam gyi rigs pa 'dis ji skad bshad pa'i lta ba ngan pa'i dra ba mtha' dag gcod pa yin no//'di ltar rkyen nyid 'di pa tsam zhig rten cing 'brel par 'byung ba'i don du rnam par 'jog pas ni dngos po 'ga' yang rang bzhin khas mi blangs te/'di skad du/ de dang de rten gang 'byung ba/ /rang gi ngo bor de ma skyes/ /rang gi ngo bor ma skyes gang / /des ni skyes zhes ji skad bya/ /zhes bya ba dang / de bzhin du/ rten cing 'brel par 'byung ba gang //de ni stong pa nyid du bshad/ /de ni rgyur bcas gdags pa ste/ /de nyid dbu ma'i lam yin no/ /zhes gsungs so/ /mdo sde las kyang / gang zhig rkyen las skyes pa de ma skyes/ /de la skye ba'i rang bzhin yod ma yin/ /rkyen la rag las gang de stong par bshad/ /gang zhig stong nyid shes de bag yod yin//zhes gsungs so/ /gang gi tshe de ltar rang bzhin khas ma blangs pa de'i tshe rang bzhin med pa na ji skad bshad pa rnams gang zhig tu 'byung bar 'gyur/ gal te rang bzhin 'ga' zhig yod na ni/ de'i tshe skye ba'ang ngo bo nyid las 'byung bar 'gyur ba 'am/bdag dang gzhan dang gnyi ga dang dbang phyug la sogs pa dag las 'gyur zhing / skyes zin pa gnas pas rtag pa dang / 'jig pas chad pa la sogs pa rtog pa 'byung ba srid pa zhig na/ rnam pa gzhan du ni ma yin no zhes bstan pa'i phyir bshad pa/ rtog rnams dngos po yod na 'gyur ba ste//dngos po ji ltar med par yongs dpyad zin/ /dngos po med par 'di rnams mi 'byung dper/ /bud shing med par me yod min de bzhin/ /gang gi phyir ji skad bshad pa'i rigs pas dngos po srid pa rnam pa thams cad du yod pa ma yin pa de nyid kyi phyir/ rnal 'byor pa 'phags pa'i lam mngon du mdzad par gyur pas ma gzigs pa'i tshul gyis de kho na nyid gzigs pa dag gis chos gang la yang dngos po rdul tsam yang mi dmigs shing /gzugs dang tshor ba dang dge ba dang mi dge ba dang dngos po dang dngos po med pa la sogs pa'i rtog pa 'du byed thog ma med pa nas goms pa rnams kyang de dag las log par 'gyur te/dper na mig sman bskus pas skra shad la sogs par rtog pa log pa nyid rab rib can la 'bras bur 'gyur gyi/ skra shad la sogs pa rang bzhin gzhan gyi yul nyid du 'gyur ba ni ma yin pa bzhin no/ /de'i phyir/ so so'i skye bo rnams ni rtog pas bcings//mi rtog rnal 'byor pa ni grol 'gyur bas/ /rtog rnams log par gyur pa gang yin te/ /rnam par dpyod pa'i 'bras bur mkhas rnams gsung / /gang gi phyir so so'i skye bo chos nyid 'di de ltar mi shes pa rnams rtog pa kho nas bcings pa de'i phyir/ chos nyid 'di de ltar thugs su chud pa na 'phags pa rnams rnam par grol bar 'gyur te/de'i phyir rtog pa ma lus pa bkag pa nyid slob dpon gyis dbu ma'i bstan bcos las bshad pa'i rnam par dpyod pa'i 'bras bur rnam par gzhag go/ /ji skad du/ dngos po rang bzhin gyis yod na/ / stong mthong yon tan ci zhig yod/ /rtog pas mthong ba 'ching ba ste/ /de nyid 'dir ni 'gog pa yin/ /zhes gsungs so/ /de nyid kyi phyir/ bstan bcos las dpyad rtsod la chags pa'i phyir/ /ma mdzad rnam grol phyir ni de nyid bstan/ /de nyid kyi phyir slob dpon gyis dbu ma'i bstan bcos las rnam par dpyad pa shin tu cher mdzad pa gang yin pa de ni rtsod la chags pa ste/gzhan zil gyis mnan par 'dod pas ma mdzad do zhes bya bar shes par bya ste/ rnam par dpyod pa mdzad pa na dbu ma'i bstan bcos las de kho na nyid bstan pa ni/ sems can gyis de kho na nyid 'di lta bu phyin ci ma log par rtogs nas thar pa thob par gyur na ci ma rung zhes skye bo rnams rnam par grol bar bya ba'i phyir yin no//gal te khyod kyis rgol ba ji ltar brtags pa thams cad bkod cing bkod cing bstan bcos las bkag pa ma yin nam/ de'i phyir bstan bcos kyi 'jug pa ni rtsod pa'i phyir yin pas rtog pa ldog pa tsam zhig kho na 'bras bur ci ltar rnam par gzhag ce na/brjod par bya ste/ rnam par dpyad pa 'di ni rtsod pa'i phyir mdzad pa ma yin mod kyi/ 'on kyang de kho na nyid nye bar bstan pa na rang bzhin gyis stobs chung bas gzhan gyi gzhung lugs rnams bdag nyid then mi 'dzugs shing /snang ba nye ba na mun pa ltar rang nyid 'jig par 'gyur ba des na kho bo cag la skyon med pa nyid do zhes bshad pa/ gal te de nyid rnam par bshad pa na/ /gzhan gzhung 'jig par 'gyur na nyes pa med/ /ji skad du/ chos 'di de bzhin gshegs rnams kyis//rtsod pa mdzad phyir gsungs ma yin/ /'on kyang me yis bud shing ltar/ /'di yis phas kyi rgol ba sreg /ces gsungs so/ /gal te de lta ma yin te/ rtsod pa'i phyir chos nye bar bstan par gyur na ni/ de'i tshe the tshom med par gzhan gyi phyogs skyon dang ldan pa la sdang zhing rigs pa dang ldan pa'i rang gi phyogs la rjes su chags par 'gyur bas rtog pa ldog pa nyid mi srid do//ci'i phyir zhe na/ 'di ltar rang gi lta la chags dang de bzhin du/ /gzhan gyi lta la 'khrug gang rtog pa nyid/ /de'i phyir rtog pa ma log pas bcings pa nyid du 'gyur gyi/ thar pa ni ma yin no//gang gi tshe chos 'di rtsod pa'i phyir bstan pa ma yin pa de'i tshe/ de'i phyir 'dod chags khong khro rnam bsal te/ /rnam dpyod pa ni myur du grol bar 'gyur/ /ji skad du/ rtsod med che ba'i bdag nyid can/ /de dag la ni phyogs med do/ /gang rnams la ni phyogs med pa//de la gzhan phyogs ga la yod/ /ces bya ba dang de bzhin du/ rang gi phyogs la chags yod cing / /gzhan phyogs la khyod mi dga' na/ /mya ngan 'das par mi 'gro ste/ /gnyis spyod zhi bar yong mi 'gyur/ /zhes gsungs so/ /mdo sde las kyang / gang zhig chos 'di thos nas chags byed cing //chos ma yin pa thos nas khong khro byed/ /nga rgyal rgyags pas bcom pas log pa ste/ /nga rgyal dbang gis sdug bsngal rjes su myong / /zhes gsungs so/ /de'i phyir de ltar lung dang rigs pa dag gis chos kyi bdag med pa bstan nas de'i 'og tu gang zag gi bdag med pa bstan pa'i phyir bshad pa/nyon mongs skyon rnams ma lus 'jig tshogs la/ /lta las byung bar blo yis mthong gyur zhing / /bdag ni 'di yi yul du rtogs byas nas/ /rnal 'byor pa yis bdag ni 'gog par byed/ /de la 'jig tshogs la lta ba ni nga dang nga'i snyam pa de lta bu'i rnam par zhugs pa shes rab nyon mongs pa can no//de las byung bas na 'jig tshogs la lta ba las byung ba'o/ /de dag kyang gang dag cig ce na/ nyon mongs pa rnams dang skyon rnams so/ /de la nyon mongs pa rnams ni 'dod chags la sogs pa rnams so/ /skyon rnams ni skye ba dang rga ba dang na ba dang 'chi ba dang mya ngan la sogs pa dag go//de dag ni ma lus par 'jig tshogs la lta ba las byung ste/ nyon mongs pa thams cad ni mdo las/ 'jig tshogs la lta ba'i rtsa ba can 'jig tshogs la lta ba'i rgyu can/ 'jig tshogs la lta ba'i kun 'byung ba can dag go zhes 'jig tshogs la lta ba'i rgyu can nyid du gsungs la 'jig tshogs la lta ba ma spangs pa rnams la 'du byed mngon par 'grub pa'i phyir dang /skye ba la sogs pa'i sdug bsngal 'byung ba'i phyir na/ ma lus pa'i 'jig tshogs la lta ba'i rgyu can yin no/ /de'i dmigs pa ni bdag kho na yin te/ ngar 'dzin pa ni bdag gi yul can yin pa'i phyir ro//de la nyon mongs pa dang skyon ma lus pa yongs su spong bar 'dod pas 'jig tshogs la lta ba kho na spang bar bya ba yin la/ de yang bdag gis bdag med pa nyid khong du chud pa las spong bar 'gyur bas thog mar rnal 'byor pas bdag kho na 'gog par byed do//de bkag pa las 'jig tshogs la lta ba yang spangs par gyur na nyon mongs pa dang / skyon ma lus par ldog pas na bdag rnam par dpyad pa na thar pa sgrub pa'i thabs yin te/ de'i phyir gang zhig 'jig tshogs la lta ba'i dmigs par gyur pa bdag ces bya ba 'di ci zhig ces rnal 'byor pa je thog mar bdag kho na rnam par dpyod par byed do//'jig tshogs la lta ba'i dmigs pa bdag de ci zhig ces de nyid mi shes so zhe na/ de la re zhig /za po rtag dngos byed po min pa'i bdag /yon tan bya med mu stegs rnams kyis brtags/ / de dbye cung zad cung zad la brten nas/ /mu stegs can rnams lugs ni tha dad 'gyur/ /de la grangs can pa dag ni/ rtsa ba'i rang bzhin rnam par 'gyur min la/ /chen po sogs bdun rang bzhin rnam 'gyur zhing / /bcu drug po ni rnam par 'gyur ba ste/ /skyes bu rang bzhin ma yin rnam 'gyur min//zhes smra bar byed do/ /de la rab tu byed pas na rang bzhin no/ /gnas skabs gang zhig tu rab tu byed ce na/ skyes bu'i 'dod pa mthong ba'i dus su'o/ /gang gi tshe skyes bu la sgra la sogs pa'i yul nye bar longs spyod pa'i rnam pa can gyi 'dod pa skyes pa de'i tshe skyes bu'i 'dod pa yongs su shes pa'i rang bzhin dang skyes bu sbyor zhing de nas sgra la sogs pa 'byin par byed do//de la tshul ni 'di yin te/ rang bzhin las ni chen po'o/ /de las nga rgyal lo/ /de las bcu drug po'i tshogs so/ /bcu drug po de las kyang 'byung ba lnga ni lnga las te sgra la sogs pa dag las 'byung ba lnga 'byung ngo zhes bya ba 'di ni rim pa yin no//rnam par 'gyur min la zhes bya ba ni gang gi phyir rab tu byed pa kho na yin gyi/ chen po la sogs pa ltar rnam par 'gyur ba yang ni ma yin no/ /chen po la sogs pa de dag ni rab tu byed pa yang yin la rnam par 'gyur ba yang yin te/de'i phyir chen po la sogs pa bdun rang bzhin rnam 'gyur zhing zhes bya ba smras te chen po la sogs pa dag kyang rang gi rnam par 'gyur ba la ltos nas rang bzhin yin la/ rang bzhin la ltos nas rnam par 'gyur ba yin no/ /blo'i dbang po la sogs pa bcu drug po ni rnam par 'gyur ba kho na ste/de'i phyir bcu drug po ni rnam par 'gyur ba ste zhes bya ba smras so/ /ni'i sgra ni rnam par 'gyur ba kho na ste zhes nges par bzung ba'i don du'o/ /skyes bu ni rab tu byed pa yang ma yin la rnam par 'gyur ba yang ma yin no zhes smra ba ni/ skyes bu rang bzhin ma yin rnam 'gyur min/ / zhes bya ba'o/ /rim pa 'dis rnam par 'gyur ba'i tshogs thams cad skyes pas 'dod pa skyes pa'i skyes bu nye bar za ba por ji ltar 'gyur ba brjod par bya ste/ rna ba la sogs pa'i blo'i dbang po yid kyis byin gyis brlabs pa dag gis yongs su bzung ba'i yul sgra la sogs pa dag la blos zhen par byed la de nas blos zhen par byas pa'i don la skyes bu sems par byed de/de ltar skyes bu sems pa yod pa'i rang gi ngo bo yin pa'i phyir/ bdag yul dag nye bar longs spyod do zhes brjod do/ /de ltar 'dod pas yul nye bar longs spyod cing / gang gi tshe chags pa chung ba nyid kyis skyes bu yul dag la chags pa dang bral bar gyur pa de'i tshe rim gyis bsam gtan bsgoms shing lha'i shes pa yang dag par blangs pas lha'i mig gi sgo nas rang bzhin la lta bar byed la des bltas pa dang de gzhan gyi bud med ltar ngo tsha bar gyur pas bdag la mi khro zhing bral bar 'gyur ro//rnam par 'gyur ba'i tshogs thams cad kyang skye ba'i rim pa las bzlog pa'i sgo nas de nyid du rab tu zhi ba'i phyir mi gsal ba'i ngo bor gyur pa de'i tshe skyes bu nyag gcig gnas te de'i phyir grol ba zhes bya'o/ /de ni rnam par 'gyur ba zhar zin kyang zha bar mi 'gyur ba nyid kyis rtag tu yan gar ba'i ngo bor gnas pa'i phyir rtag pa zhes bya ba'o//rang bzhin nyid byed pa po yin zhing rnam par 'gyur ba rnams las kyang kha cig byed pa po yin pa'i phyir la/ bdag ni bya ba la snyom las can nyid du gyur pa'i phyir na byed pa po ma yin pa nyid ces brjod do/ /nye bar longs spyod pa po nyid ni ji skad smras pa'i tshul gyis bstan zin pa nyid do//rdul dang mun pa dang snying stobs kyi rang bzhin med pa'i phyir na yon tan med pa nyid do/ /khyab par byed pa nyid ma yin pa'i phyir ni bya ba med pa nyid de/ de lta bu ni skyes bu'i khyad par dag go/ /de la rang bzhin nyid byed pa po yin zhing rnam par 'gyur ba rnams las kyang kha cig byed pa po yin pa'i phyir la zhes gang smras na/rnam par 'gyur ba gang dag gcig ni byed pa po nyid yin la gang dag gcig ni byed pa po nyid ma yin zhe na/ 'di la bye brag tu bshad par bya ba'i phyir cung zad cig brjod par bya ste/ de la rdul dang mun pa dang snying stobs gsum ni yon tan gsum mo//de la rdul ni g.yo ba dang 'jug pa'i bdag nyid can no/ /mun pa ni lci ba dang g.yogs pa'i bdag nyid can no/ /snying stobs ni yang ba dang rab tu gsal ba'i bdag nyid can no/ /bde ba dang sdug bsngal ba dang gti mug ces bya ba ni 'di dag kho na'i rnam grangs so//'di dag cha mnyam pa'i gnas skabs ni gtso bo ste/ 'dir yon tan dag gtso bor gyur cing rab tu zhi bar gyur pa'i phyir ro/ /de dag rnam par mi 'gyur ba'i gnas skabs ni rang bzhin can no/ /rang bzhin las chen po ste chen po zhes bya ba ni blo'i rnam grangs so//chen po las ni nga rgyal lo/ /de ni rnam pa gsum ste/ rnam par 'gyur ba dang / snying stobs can dang / mun pa can no/ /de la rnam par 'gyur ba'i nga rgyal las ni de tsam lnga ste/ gzugs dang sgra dang dri dang ro dang reg pa dag go//de tsam dag las ni 'byung ba rnams te/ sa dang chu dang me dang rlung dang nam mkha' zhes bya ba dag go/ /snying stobs can gyi nga rgyal las ni las kyi dbang po lnga po dag dang lag pa dang / rkang pa dang / rkub dang / mdoms dang / blo'i dbang po lnga po mig dang / rna ba dang / sna dang / lce dang / pags pa dang / gnyi ga'i bdag nyid can gyi yid de de ltar na bcu gcig go/ /mun pa can gyi nga rgyal ni nga rgyal gnyi ga'i 'jug par byed pa'o/ /de la chen po dang nga rgyal dang de tsam lnga ni rang bzhin dang rnam par 'gyur ba nyid yin zhing dbang po bcu dang yid dang 'byung ba chen po rnams ni rnam par 'gyur ba nyid kho na yin la/rang bzhin ni rnam par mi 'gyur ba kho na yin no zhes bya ba ni gzhung lugs so/ /ji ltar grangs can pa dag gis de ltar khas blangs pa de bzhin du/ de'i dbye ba cung zad cung zad la brten nas mu stegs can rnams kyi lugs tha dad par 'gyur te/'di lta ste bye brag pa rnams ni/ blo dang / bde ba dang / sdug bsngal dang / 'dod pa dang / sdang ba dang / 'bad pa dang / chos dang / chos ma yin pa dang / bya ba'i shugs te/ bdag gi yon tan dgu smra bar byed do/ /de la blo ni yul 'dzin pa'o/ /bde ba ni 'dod pa'i yul nyams su myong ba'o//sdug bsngal ni de las bzlog pa'o/ /'dod pa ni 'dod par 'gyur ba'i dngos po la re ba 'cha' ba'o/ /sdang ba ni mi 'dod pa'i yul la rgyab kyis phyogs pa nyid do/ /'bad pa ni don bsgrub par bya ba la de'i mthar thug par sems kyi mkhas pa nyid do//gang las mngon par mtho ba dang nges par legs pa 'grub pa de ni chos so/ /de las bzlog pa ni chos ma yin pa'o/ /shes pa las skyes shing shes pa'i rgyur gyur pa nyid ni 'du bya ba'i shugs so/ /bdag gi yon tan dgu po de dag ji srid du bdag la 'du shing yod pa de srid du de dag gis sbyar ba'i dge ba dang mi dge ba'i las bsgrub pa'i phyir 'khor bar 'gyur la/gang gi tshe skyes bu yang dag par rtogs pa'i shes pas blo la sogs pa'i yon tan rnams rtsa ba dang bcas par gcod pa de'i tshe rang gi bdag nyid la gnas shing thar par 'gyur ro/ /bdag de yang rtag pa dang /byed pa po dang / za ba po dang / yon tan dang bcas pa dang / 'khyab pa'i phyir na bya ba med par yang smra'o/ /kha cig dag ni bskum pa dang / brkyang pa nyid kyis bya ba dang bcas par khas len to/ /rig byed du smra ba dag ni bum pa la sogs pa'i nam mkha' ltar lus tha dad pas gcig sna tshogs pa nyid do zhes bya ba la sogs par khas len to//de ltar bdag gi khyad par cung zad cung zad la brten nas mu stegs can rnams kyi lugs phan tshun tha dad par 'gyur ro/ /mu stegs can rnams kyi gzhung lugs re re las bdag gang zhig smras pa de ni/ mo gsham bu ltar skye ba dang bral phyir/ /de ltar gyur pa'i bdag ni yod min zhing / /'di ni ngar 'dzin rten du'ang mi rigs la/ /'di ni kun rdzob tu yang yod mi 'dod/ /rang nyid kyi rjes su dpag pa dang 'gal ba'i phyir/ ji skad smras pa'i bdag ni yod pa ma yin pa nyid de/ ma skyes pa'i phyir te mo gsham gyi bu bzhin no//'di ni ngar 'dzin pa'i yul du yang mi rung ste/ ma skyes pa nyid kyi phyir ro/ /'di ni de kho na nyid du yod pa nyid dang / ngar 'dzin pa'i yul nyid du mi rigs pa 'ba' zhig tu ma zad kyi/ kun rdzob tu yang 'di gnyis char yang yod pa ma yin no zhes shes par bya'o//'di yod pa nyid dang ngar 'dzin pa'i rten nyid du/ mi rigs par ma zad kyi gzhan yang / gang phyir bstan bcos bstan bcos las de'i khyad/ /mu stegs rnams kyis gang bstan de kun la/ /rang grags ma skyes gtan tshigs kyis gnod pa/ /de phyir de khyad kun kyang yod ma yin//de la grangs can pa'i gzhung las ni bdag gi khyad par rtag pa dang byed pa po ma yin pa dang za ba po dang yon tan med pa dang bya ba med par 'dod do/ /de la bdag rtag pa ma yin zhing byed pa po ma yin pa yang ma yin pa nas bya ba med pa'i bar du yang ma yin te/ rang nyid kyis ma skyes pa'i phyir mo gsham gyi bu bzhin no//de bzhin du bdag ni rtag pa yang ma yin zhing byed pa po yang ma yin te zhes bya ba de lta bu la sogs pa yin te/ rang nyid kyis ma skyes pa'i phyir ro/ /zhes bye brag pa'i gzhung la yang brjod par bya'o/ / phyogs 'dis ni bdag tu smra ba thams cad du ma skyes pa nyid kyi gtan tshigs dang / mo gsham gyi bu'i dpes de'i rang gi ngo bo dang khyad par gsal bar rig par bya'o/ /de'i phyir de ltar na/ de phyir phung po las gzhan bdag med de/ /de'i phyir phung po las tha dad par bdag yod pa ma yin te/de dag ma gtogs par bdag ma bzung ba'i phyir ro/ /gal te phung po las tha dad par yod na ni/ de'i tshe so sor grub par bzung bar 'gyur ba zhig na de ltar ni ma yin pas/ de'i phyir phung po las gzhan bdag med de/ /phung po ma gtogs de 'dzin ma grub phyir//ji skad du/ bdag ni nye bar len pa las/ /gzhan du 'thad pa nyid ma yin/ /gal te gzhan na len med par/ /bzung yod rigs na bzung du med/ /ces bya ba dang / de bzhin du/ gal te phung po rnams las gzhan/ /phung po'i mtshan nyid med par 'gyur/ / zhes gsungs so/ /phung po las tha dad pa'i bdag yod pa nyid ma yin pa 'ba' zhig tu ma zad kyi/ gzhan yang / 'jig rten ngar 'dzin blo yi rten du yang / /mi 'dod de rigs min pa'ang bdag lta'i phyir/ /gang dag bdag de'i rnam pa de lta bur mi 'dzin pa de dag kyang mngon par zhen pa'i khyad par las bdag dang bdag gi zhes bdag tu lta bar 'gyur te/de'i phyir bdag 'di phung po las tha dad par ngar 'dzin pa'i rten du mi rigs so/ /ci ste gang dag da lta rtag par dang ma skyes pa la sogs pas khyad par du gyur pa de mi shes pa de dag la yang sngar goms pa'i dbang gis de'i yul can ngar 'dzin pa'i lta ba yod par 'gyur ro snyam na/de yang yod pa ma yin te/ kha cig dag kho na la de dag gi bstan bcos la goms par byas pa las bdag tu lta ba yod pa ma yin no/ /gang dag la sngar goms pa med pa de dag la yang 'dir ngar 'dzin pa 'jug pa mthong ste/'di lta ste/ gang dag dud 'gror bskal mang skyes gyur pa/ /des kyang ma skyes rtag 'di ma mthong la/ /ngar 'dzin de dag la yang 'jug mthong ste/ /des na phung po las gzhan bdag 'ga' med/ /sems can gang dag bskal pa grangs su zin kyang da rung du yang dud 'gro'i skye gnas las bzlog par mi 'gyur ba de dag gis kyang rnam pa de lta bu'i bdag ma dmigs so//kyang gi sgras ni dmyal ba la sogs par skyes pa rnams sdud pa'o/ /rnam pa de lta bu'i bdag ma dmigs pa de dag la yang ngar 'dzin pa 'jug par mthong nas shes rab can su zhig bdag rnam pa de lta bu'i ngar 'dzin pa'i rten du zhen par byed/de'i phyir phung po las tha dad pa'i bdag med do/ /'dir rang gi sde pa dag na re/ phung po las gzhan bdag grub med pa'i phyir/ /bdag lta'i dmigs pa phung po kho na'o/ /gang gi phyir ji skad bshad pa'i rigs pas phung po las tha dad pa'i bdag ma grub pa de'i phyir/phung po dag las gzhan pa'i bdag grub pa med pa'i phyir/ 'jig tshogs la lta ba'i dmigs pa ni phung po dag kho na yin no/ /de'i phyir bdag ni phung po tsam kho na yin no zhes zer ro/ /phyogs 'di ni rang gi sde pa 'phags pa mang pos bkur ba pa rnams kyi yin no//de las kyang / kha cig bdag lta'i rten du phung po ni/ /lnga char yang 'dod kha cig sems gcig 'dod/ /kha cig dag ni gzugs dang tshor ba dang 'du shes dang 'du byed dang rnam par shes pa zhes bya ba phung po lnga char yang 'jig tshogs la lta ba'i dmigs par 'dod cing bdag tu mngon par zhen pa 'di yang de la yin no zhes smra ste/ji skad du/ bcom ldan 'das kyis dge slong dag dge sbyong ngam bram ze gang su dag cig bdag go snyam du yang dag par rjes su lta ba de dag ni nye bar len pa'i phung po lnga po 'di dag kho na la yang dag par rjes su lta'o zhes gsungs pa lta bu'o//de nyid kyi phyir de dag la khyed cag gi lta ba 'di ni 'jig pa'i bdag nyid can gyi tshogs pa la yin gyi/ bdag gam bdag gi ba la ni ma yin no zhes gsal bar mdzad pa'i slad du bdag dang bdag gi ba'i rnam par zhugs pa'i lta ba la 'jig tshogs la lta bar gsungs so zhes smras so //gzhan dag ni sems la bdag go zhes 'dod de/ /bdag nyid bdag gi mgon yin gyi/ /gzhan ni su zhig mgon du 'gyur/ /bdag nyid legs par thul bas ni/ /mkhas pas mtho ris thob par 'gyur//zhes tshigs su bcad pa las/ /sems nyid la bdag gi sgrar gsungs so/ /'di gang las she na/ phung po las tha dad pa'i bdag med pa'i phyir dang / mdo gzhan dag las kyang sems 'dul bar gsungs pa'i phyir te/ sems 'dul ba ni legs pa ste/ /sems thul bas ni bde ba 'dren//zhes bya ba de las so/ /de'i phyir ngar 'dzin pa'i gzhi sems la bdag ces gdags so zhe'o/ /'di la lan brjod par bya ste/ gal te phung po bdag na de phyir te/ /mang bas bdag de dag kyang mang por 'gyur/ /bdag ni rdzas su 'gyur zhing der lta ba/ /rdzas la 'jug pas phyin ci log mi 'gyur//de la phung po rnams bdag yin no zhes bya ba'i phyogs gang gi yin pa de'i ltar na phung po rnams mang ba'i phyir bdag kyang mang por 'gyur ro/ /gang gi ltar na sems bdag yin pa de'i ltar na yang mig la sogs pa'i rnam par shes pa'i dbye bas sam/ skad cig re re la rnam par shes pa skye ba dang 'gag pas mang ba'i phyir bdag kyang mang por 'gyur ro//yang na ji ltar rigs pa bzhin du skyon brjod par bya'o/ /de ltar nyes pa 'di phung po dang rnam par shes pa bdag tu smra ba la brjod par bya zhing / 'chad par 'gyur ba'i nyes pa gzhan yang 'di la 'bab pa kho na yin pas phyogs gnyi ga la yang brjod par bya'o//'jig rten skye ba na gang zag nyag gcig skye'o zhes bya ba'i lung las ni/ bdag ni mang ba dag tu 'dod pa yang ma yin no/ /bdag ni rdzas su 'gyur zhing ste/ gzugs la sogs pa'i rdzas 'das pa la sogs pa'i dbye ba tha dad par gyur pa rnams kho na la phung po nyid du brjod pa'i phyir dang /de rnams kho na la bdag tu bsnyad pa'i phyir bdag rdzas su yod par 'gyur na/ dge slong dag lnga po 'di rnams ni ming tsam tha snyad tsam btags pa tsam ste/ gang 'di lta ste/ 'das pa'i dus dang ma 'ongs pa'i dus dang /nam mkha' dang mya ngan las 'das pa dang / gang zag go zhes bya ba dang / de bzhin du/ ji ltar yan lag tshogs rnams la/ /brten nas shing rtar brjod pa ltar/ /de bzhin phung po rnams brten nas/ /kun rdzob sems can zhes bya'o/ /zhes bya ba 'di las na 'dod pa yang ma yin no//de'i phyir bdag rdzas su yod par thal bar 'gyur ba'i phyir na phung po rnams bdag ma yin no/ /gzhan yang 'jig tshogs la lta ba rdzas kyi yul can ma yin pa'i phyir na/ sngon po dang ser po la sogs pa'i shes pa ltar phyin ci log nyid du mi 'gyur ro/ /de'i phyir 'jig tshogs la lta ba kun tu 'byung ba spangs par mi 'gyur ba'am/sngon po dang ser po la sogs pa tsam la dmigs pa'i mig gi shes pa ltar de la dmigs pa'i 'dun pa'i 'dod chags spangs pa kho nas spong bar 'gyur ro/ /gzhan yang / mya ngan 'das tshe nges par bdag chad 'gyur//mya ngan 'das sngon skad cig dag la ni/ /skye 'jig byed po med pas de 'bras med/ /gzhan gyis bsags las gzhan gyis za bar 'gyur/ /gal te bdag phung po'i rang bzhin can yin na mya ngan las 'das pa'i tshe phung po lnga char yang rgyun 'chad pas bdag chad par 'gyur ro/ / de'i phyir chad pa'i mthar 'dzin pas mthar lta bar thal bar 'gyur te/ gang gi phyir khyed cag gi ni bdag dang bdag gi ba'i rnam pa can 'jig tshogs la lta bas bdag nyid du gang bzung ba de nyid la rtag pa dang chad par 'dzin pas mthar 'dzin par lta bar rnam par gzhag pa'i phyir ro/ /de'i phyir bdag ni mya ngan las 'das pa'i dus su yang rgyun chad par khas blang bar mi bya ste mthar 'dzin par lta bar thal bar 'gyur ba'i phyir ro//de'i phyir bdag ni phung po'i bdag nyid can ma yin no/ /mya ngan las 'das par zhugs pa'i snga rol gyi skad cig dag tu ji ltar phung po rnams skad cig re re la skye zhing 'jig pa de bzhin du/bdag kyang skye zhing 'jig pa can du 'gyur te/ bdag phung po'i rang bzhin can yin pa'i phyir ro/ /de'i phyir ji ltar nga'i lus 'di byung bar gyur to zhes bya ba ma yin pa de bzhin du de'i tshe de'i dus na/ nga rgyal po nga las nu zhes bya bar gyur to zhes bya ba 'di yang gsung bar mi 'gyur te/de'i tshe bdag kyang lus ltar zhig pa'i phyir dang / 'dir gzhan nyid skye bar khas blangs pa'i phyir ro/ /bstan bcos las kyang / nye bar len nyid bdag ma yin/ /de dag 'byung dang 'jig pa yin//nye bar blang pa ji lta bur/ /nye bar len po yin par 'gyur/ /zhes bya ba dang / de bzhin du/ gal te phung po bdag yin na/ /skye dang 'jig pa can du 'gyur/ /zhes gsungs so/ /skye ba dang 'jig pa nyid yod na yang byed pa po bdag med pas de'i 'bras bu med pa nyid du 'gyur te/gal te las gang gis byas pa de mi rtag pa nyid du 'gyur na/ de'i tshe byed pa po med pas las la yang rten med pa'i phyir med pas las rnams 'bras bu dang 'brel ba med pa nyid du 'gyur ro/ /gal te skad cig snga mas byas pa'i las kyi 'bras bu skad cig phyi ma rnams su nye bar longs spyod na/de'i tshe gzhan gyis bsags pa'i las kyi rnam par smin pa gzhan gyis longs spyod pa'i phyir/ gzhan gyis bsags pa'i las gzhan gyis za bar 'gyur ro/ /de'i phyir byas pa chud zos pa dang ma byas pa dang phrad par 'gyur ro/ /bstan bcos las kyang / gal te 'di ni gzhan gyur na/ /de med par yang 'byung bar 'gyur/ /de bzhin du ni gnas 'gyur zhing / /der ma shi bar skye bar 'gyur/ /chad dang las rnams chud za dang / /gzhan gyis byas pa'i las rnams ni/ /gzhan gyis so sor myong ba dang / /de la sogs pa thal bar 'gyur/ /zhes gsungs so/ /de'i phyir phung po rnams bdag yin no zhes bya bar mi rigs so//'dir smras pa/ gal te yang skad cig snga phyi dag gzhan yin mod kyi/ de ltar na yang / rgyud 'di gcig kho na yin pas kho bo cag la nyes pa 'di med do/ /brjod par bya ste/ de nyid du rgyud yod na skyon med de / /sngar rnams dpyad tshe rgyud la nyes bshad zin//byams pa nyer sbas la brten chos rnams ni/ /zhes bya ba der ro/ /gal te lha las mi gzhan na/ /de lta na ni mi rtag 'gyur/ /gal te lha mi gzhan yin na/ /rgyud ni 'thad par mi 'gyur ro/ /zhes gsungs pa'ang yin no/ /de'i phyir de ltar phan tshun mtshan nyid tha dad pa rnams la rgyud gcig tu gtogs pa nyid mi rigs pa kho na yin pas thal bar 'gyur ba ldog pa med do//de'i phyir phung po rnams bdag nyid ma yin zhing sems kyang ma yin no zhes bstan pa'i phyir bshad pa/ de'i phyir phung po dang sems bdag mi rigs/ji skad du bshad pa'i nyes par thal bar 'gyur ba las phung po rnams dang sems bdag tu mi 'thad pa 'ba' zhig tu ma zad kyi/ 'di las kyang ste/ 'jig rten mtha' ldan la sogs med phyir ro/ /gang gi phyir 'jig rten mtha' dang ldan pa nyid la sogs pa med par 'don pa de'i phyir phung po rnams dang sems pa dag yin no zhes bya bar mi rigs so//'di ni lung du ma bstan pa'i dngos po bcu bzhi ni sde pa thams cad kyis 'don pa yin te/ 'di lta ste/ 'jig rten rtag go zhes bya ba dang / 'jig rten mi rtag go zhes bya ba dang / rtag kyang rtag la mi rtag kyang mi rtag go zhes bya ba dang /rtag pa yang ma yin mi rtag pa yang ma yin no zhes bya ba la sogs pa'o/ /'di dag ni brda sprad par bya ba ma yin no zhes bcom ldan 'das kyis gsungs pa'i phyir lung du ma bstan pa'i dngos por rnam par gzhag go/ /de ltar bkag pa dang / dge slong zhig gal te 'jig rten rtag go zhes bya bar 'dzin na/ shar gyi ri bo'i sde pa'i gzhung las/ 'jig rten rtag go zhes bya ba de lta bu'i lta ba can de la yang bskrad pa'i las bya'o/ /'jig rten mi rtag go zhes bya ba de lta bu'i lta ba can de la yang bskrad pa'i las bya'o/ /'jig rten rtag kyang rtag la mi rtag kyang mi rtag go zhes bya ba de lta bu'i lta ba can de la yang bskrad pa'i las bya'o//'jig rten rtag pa yang ma yin mi rtag pa yang ma yin zhes bya ba de lta bu'i lta ba can de la yang bskrad pa'i las bya'o zhes bya ba de dang mi 'grogs pa nyid du bshad do/ /de ltar lung du ma bstan pa'i dngos po bcu bzhi char brjod par bya'o//de'i phyir gal te 'jig rten gyi sgras phung po rnams 'dzin na/ de'i tshe phung po rnams skye ba dang 'jig pa nyid kyis mi rtag pa'i phyir 'jig rten mi rtag pa nyid ces bya bar yang lung du bstan par 'gyur la/ mya ngan las 'das pa'i 'og rol du phung po rnams med pas 'jig rten mtha' dang ldan no zhes bya bar lung bstan par yang 'gyur ro//de bzhin du de bzhin gshegs pa grongs phan chad yod pa ma yin no zhes bya bar yang lung bstan par 'gyur ro/ /de'i phyir 'jig rten mtha' dang ldan pa la sogs bkag pa'i phyir phung po rnams kho na bdag yin no zhes bya bar mi rigs so//gzhan yang / khyod kyi rnal 'byor bdag med mthong ba la/ /de tshe nges par dngos rnams med par 'gyur/ /gal te phung po rnams sam sems bdag yin na/ gang gi tshe rnal 'byor pa 'dis bden pa mthong ba'i dus su chos thams cad ni bdag med pa'o zhes bdag med pa'i rnam par sdug bsngal gyi bden pa mthong ba de'i tshe phung po med par mthong ba bdag med par mthong bar 'gyur na/de ltar ni 'dod pa yang ma yin te/ de'i phyir phung po rnams bdag ma yin no/ /ci ste gang gi tshe las dang 'bras bu 'brel ba'i dus su bdag gi sgra sbyor ba de'i tshe bdag gzhan mi srid pa'i phyir/phung po rnams kho na la 'jug pa gang gi tshe bdag med par mthong ba de'i tshe ni gzhan gyis kun brtags pa nang gi byed pa'i skyes bu nyid la 'jug ste/ de'i phyir bdag med par mthong ba'i dus su yang nang gi byed pa'i skyes bu dang bral ba 'du byed tsam mthong ba la dngos po rnams med par mthong bar thal bar mi 'gyur ro snyam na/brjod par bya ste/ rtag bdag spong na de tshe de yi phyir/ /khyod kyi sems sam phung po bdag mi 'gyur/ /gal te yang dngos po rnams med par mthong bar thal bar 'gyur bas 'jigs nas/bdag gi sgras bdag rtag pa nyid yongs su 'dzin zhing phung po rnams sam sems bdag tu mi 'dod na/ de lta na ni 'o na phyogs nyams par 'gyur ro/ /ci ste rnam pa de lta bu'i yul la 'di 'jug par mi 'dod de/ de'i phyir skyon med do snyam na/'di yang yod pa ma yin te/ 'dir ni nang gi byed pa'i skyes bu bdag yin la gzhan du ni phung po rnams yin no zhes 'dod dgur spyod pa rigs pa med par 'di ko ga las rnyed pa yin/ mi srid pa'i phyir ro zhe na/ phung po rnams la yang 'di 'jug pa srid pa yod pa ma yin no zhes bstan zin to//de'i phyir gal te chos thams cad ni bdag med pa'o zhes bya ba 'dir bdag gi sgra phung po rnams la 'jug par mi 'dod na gzhan du yang mi 'dod par bya dgos so/ /ci ste gzhan du phung po la 'jug par 'dod na ni de 'dir yang 'dod par bya dgos so/ / gzhan yang / khyod kyi rnal 'byor bdag med mthong ba yi/ /gzugs sogs de nyid rtogs par mi 'gyur zhing / /gzugs la dmigs nas 'jug phyir 'dod chags sogs/ /skye 'gyur de yi ngo bo rtogs med phyir/ /ze'u 'bru la khu byug yod ces te de tsam gyis ni ze 'bru'i mngar [(]po [,]mo [) nyid ma myangs par sus kyang de'i mngar [(]po [,]mo [)]nyid dmigs pa ma yin la de la khu byug med ces te ro myangs bzhin du yang mngar ba nyid ma dmigs pa ma yin zhing der gtogs pa'i mngon par zhen pa spong ba yang ma yin no//de bzhin du 'dir yang gal te rnal 'byor pas gzugs la sogs pa'i chos rnams rtag pa'i bdag dang bral ba de ltar mthong na/de'i tshe de'i rang bzhin yongs su ma shes pas/ de la ci zhig 'byung bar 'gyur/ yang na gzugs la sogs pa rnams kyi rang gi ngo bo dmigs pas de la dmigs pa'i 'dod chags la sogs pa spong na yang bdag gi dngos po med pa la ci zhig 'byung bar 'gyur te/gang gis na de med par yongs su shes pa las de yul dag la chags pa la sogs pa rnams spong bar 'gyur ba 'ga' yang nang gi byed pa'i skyes bu bde bar gyur cig /ces bde ba myong bar 'gyur ba'i yul bsten par mi byed la/de sdug bsngal bar dogs pas mi 'dod pa'i yul dang phrad pa spong bar yang mi byed do/ /de'i phyir gzugs la dmigs nas 'jug pa'i phyir na 'dod chags la sogs pa rnams skye bar 'gyur te/ de'i rang gi ngo bo yongs su shes pa 'dod chags la sogs pa spong ba'i rgyu med pa'i phyir te/phyi rol pa bzhin no snyam du bsams pa'o/ /ci ste kho bo cag lung tshad mar byed pa la rtog ge'i tshad mas gnod pa ma yin la lung gis kyang phung po rnams kho na bdag nyid du ston par byed de/ ji skad du/ dge slong dag dge sbyong ngam bram ze gang su dag cig bdag go snyam du yang dag par rjes su lta ba de dag ni nye bar len pa'i phung po lnga po 'di dag kho na la yang dag par rjes su blta'o zhes gsungs pa lta bu ste/de bzhin du 'dir yang yin no snyam na/ gang phyir ston pas phung po bdag go zhes/ / gsungs pa de phyir phung po bdag 'dod na/ /de ni phung po las gzhan bdag 'gog ste/ /gzugs bdag min sogs mdo gzhan gsungs phyir ro/ /mdo 'dis ni gang las phung po rnams bdag ces bya bar yid ches par 'gyur ba phung po rnams bdag nyid du gsal bar byed pa ma yin pa nyid de/'o na ci zhe na/ bcom ldan 'das kyi dgongs pa ni phung po las tha dad pa'i bdag 'ga' yang yod pa ma yin no zhes bya ba ste/ kun rdzob kyi bden pa la ltos nas mu stegs can gyi gzhung dgag par bya ba'i phyir dang kun rdzob kyi bden pa phyin ci ma log par gsal bar bya ba'i phyir ro//yang 'di ni phung po rnams las gzhan pa'i bdag 'gog pa yin no zhes bya ba 'di de ltar ga las nges she na/ mdo gzhan las gzugs la sogs pa rnams kyang bdag nyid yin pa bkag pa'i phyir ro/ /ci ltar zhe na/ gang phyir gzugs tshor bdag min 'du shes kyang / / ma yin 'du byed rnams min rnam shes kyang / /min par mdo gzhan las gsungs de yi phyir/ /mdor bstan phung po bdag ces bzhed ma yin/ /de'i phyir nye bar len pa'i phung po lnga po 'di dag kho na la bdag go snyam du yang dag par rjes su blta'o zhes bya ba'i mdo 'di las phung po las tha dad pa'i bdag bkag pa kho nar nges so//gang las gzugs la sogs pa rnams kyang bdag nyid yin pa bkag pa de las ni brten nas gdags pa'i bdag 'jig tshogs la lta ba'i yul phung po'i nye bar len pa can bkag go zhes bya bar rig par bya ste/ de kho na nyid sems pa'i skabs su bab pa'i phyir ro//gang gi phyir nye bar len pa po ma dmigs na de'i nye bar len pa yang yod pa ma yin no zhes gzugs la sogs pa dag la yang 'dod chags dang bral bar 'thad pa nyid do/ /gang gi phyir mdo gzhan las de skad du gsungs pa de'i phyir/ sngar gyi mdor bstan phung po bdag ces bzhed ma yin//gzhan yang mdo sde bstan pa 'di ni sgrub pa'i tshul du nges kyang phung po rnams bdag yin pa nyid du ston par nus pa ma yin no/ /ci'i phyir zhe na/ 'di ltar/ phung po bdag ces brjod tshe phung rnams kyi/ /tshogs pa yin gyi phung po'i ngo bo min/ /dper na shing rnams ni nags tshal lo zhes brjod pa na shing gi tshogs pa nags tshal yin gyi/shing re re dag la yang nags su thal bar 'gyur ba'i phyir/ shing gi ngo bo ni ma yin pa de bzhin du/ phung po tshogs pa nyid bdag tu 'gyur ro/ /de'i phyir tshogs pa ni ci yang ma yin pa nyid kyi phyir/mgon min 'dul ba'am dpang po nyid kyang min/ /de med phyir de tshogs pa ma yin no/ /gang bcom ldan 'das kyis ji skad du/ bdag nyid bdag gi mgon yin te/ /bdag nyid bdag gi dgra yang yin/ /legs dang ngan pa byas pa la/ /bdag nyid bdag gi dpang po yin//zhes bya ba de las mgon nyid dang dpang po nyid du gsungs la/ bdag nyid legs par dul bas ni/ /mkhas pas mtho ris thob par 'gyur/ /zhes bya ba 'di las 'dul bar gsungs nas / tshogs pa tsam po rdzas su yod pa ma yin pa nyid ni mgon nyid dang 'dul ba'am dpang po nyid du rigs pa yang ma yin no//de'i phyir tshogs pa bdag ma yin no/ /ji ste tshogs pa can las tha dad du med pa'i phyir 'bras bu ni tshogs pa can rnams kyi yin par rtogs par 'gyur ro/ /de'i phyir mgon nyid dang 'dul ba dang dpang po nyid rigs par 'gyur ro snyam na/'dir yang yod pa ma yin te/ 'di la nyes pa bshad zin pa'i phyir ro/ /gzhan yang / de tshe de yi yan lag tshogs gnas rnams/ /shing rta nyid 'gyur shing rta dang bdag mtshungs/ /mdo las kyang / bdag ces bya ba bdud kyi sems/ /khyod ni lta bar gyur pa yin//'du byed phung po 'di stong ste/ /'di la sems can yod ma yin/ /ji ltar yan lag tshogs rnams la/ /brten nas shing rta brjod pa ltar/ /de bzhin phung po rnams brten nas/ /kun rdzob sems can zhes bya'o/ /zhes gsungs so/ /de ltar na/ mdo las phung po brten nas yin gsungs pa//de phyir phung po 'dus tsam bdag ma yin/ /gang zhig la brten nas gang btags pa de ni btags pa nye bar len pa'i yan lag tshogs pa tsam ma yin te/ brten nas btags pa'i phyir 'byung ba las gyur pa bzhin no/ / ji ltar 'byung ba dag rgyur byas nas 'byung ba las gyur pa sngon po la sogs pa dang mig la sogs pa btags mod kyi/ de gnyis 'byung ba 'dus pa tsam nyid ni ma yin no/ /de bzhin du bdag phung po rgyur byas nas btags pa'i rang bzhin can yang phung po tshogs pa tsam yin par mi rung ngo //bum pa la sogs pa rnams kyi ma nges pa nyid do zhe na/ de yang yod pa ma yin te/ bum pa la sogs pa rnams kyang gzugs la sogs pa tshogs pa tsam nyid yin par ma grub pa'i phyir dang / brgal zhing brtags pa mtshungs pa'i phyir ro/ /ci ste 'phang lo la sogs pa tshogs pa tsam nyid ni shing rta ma yin te/'o na ci zhe na/ gang gi tshe 'phang lo la sogs pa rnams dbyibs khyad par can dang ldan par gyur pa de'i tshe shing rta'i ming rnyed par 'gyur ro/ /de bzhin du gzugs la sogs pa rnams kyi bkod pa tsam bdag yin no snyam na/ de yang yod pa ma yin no//ci'i phyir zhe na/ dbyibs she na/ de gzugs can la yod phyir/ khyod la de dag nyid bdag ces 'gyur gyi/ /sems sogs tshogs ni bdag nyid 'gyur min te/ /ci'i phyir zhe na/ gang phyir de dag la dbyibs yod ma yin/ /gzugs can ma yin pa'i phyir ro snyam du bsams pa'o//gzhan yang / len po rang nyer len gcig rigs dngos min/ /ci'i phyir zhe na/ de ltar na las byed po gcig nyid 'gyur/ /'dir nye bar len par byed pas na len po ste byed pa po yin la/ nye bar blangs pa na nye bar len pa ste las so/ /'dir nye bar len pa po ni bdag yin la/nye bar len pa ni phung po lnga rnams yin no/ /de la gal te gzugs la sogs pa tshogs pa tsam zhig bdag yin na ni de'i tshe byed pa po dang las gcig tu 'gyur na/ 'di ni 'dod pa yang ma yin te/ 'byung ba dang rgyur byas pa'i gzugs dag dang bum pa dang rdza mkhan dag kyang gcig nyid du thal bar 'gyur ba'i phyir ro//ji skad du/ bud shing gang de me yin na/ /byed pa po dang las gcig 'gyur/ /zhes bya ba dang / me dang shing gis bdag dang ni/ /nye bar blang ba'i rim pa kun/ /bum snam sogs dang lhan cig tu/ / ma lus par ni rnam par bshad/ /ces gsungs so/ /'dir ji ltar me dang bud shing dag gcig nyid du mi 'dod pa de bzhin du/ bdag dang nye bar len pa dag la yang mi 'dod par bya dgos so/ /ci ste gang zhig byed pa po nyid du 'gyur ba nye bar len pa po ni 'ga' yang yod pa ma yin pa nyid de/'di ni nye bar len pa 'dus pa tsam zhig tu zad do snyam du sems na/ de yang mi rigs pa nyid du bshad pa/ byed po med las yod snyam blo yin na/ /ma yin gang phyir byed po med las med/ /de ni de ltar ma yin te/ gal te byed pa po mi 'dod na rgyu med pa'i las kyang 'dod par mi bya'o//bstan bcos las kyang / de bzhin nyer len shes par bya/ /las dang byed po bsal phyir ro/ /byed pa po dang las dag gis/ /dngos po lhag ma shes par bya/ /zhes gsungs so/ /'dir dngos po la lA Ta'i rkyen byas nas nye bar len pas na nye bar len pa po zhes bya ba yin la/dngos po yang sgrub par byed pa med par 'byung ba ma yin pas/ rang gi sgrub par byed pa nye bar blang ba dang nye bar len pa po nye bar 'jog pa yin na/ nye bar len pa'i sgras ni kr-i ta dang lA Ta ni phal cher ro zhes bya bas las la lA Ta'i rkyen byas nas nye bar blang bar bya ba las kyang brjod pa nyid do//de'i phyir ji ltar byed pa po la brten nas las su gdags par bya la/ las la brten nas kyang byed pa po yin pa de bzhin du nye bar blang ba la brten nas nye bar len pa por gdags par bya la/ nye bar len pa po de nyid la brten nas nye bar blang ba yin no//yang de ltar lan pas gzhan ma yin/ /de ni nyer len nyid kyang min/ /bdag ni nye bar len med min/ /med pa nyid du'ang de ma nges/ /zhes gsungs so/ /de'i phyir de ltar byed pa po med pa na las kyang yod pa ma yin no zhes shes par bya'o//yang gang las byed pa po ni ma dmigs kyi las kyang yod la rnam par smin pa yang yod do zhes brjod pa de las ni byed pa po rang bzhin du gyur pa bkag par shes par bya'i/ brten nas gdags par bya ba tha snyad kyi yan lag tu gyur pa yang bkag go zhes bya ba ni shes par mi bya'o//de skad du yang / ma rig pa dang rjes su 'brel ba'i gang zag 'di ni bsod nams mngon par 'du bya ba yang mngon par 'du byed do zhes rgya cher gsungs so/ /gzhan yang / gang phyir thub pas bdag de sa chu me/ /rlung dang rnam shes nam mkha' zhes bya ba//khams drug dang ni mig sogs reg pa yi/ /rten drug dag la brten nas nyer bstan zhing / sems dang sems byung chos rnams nyer bzung nas/ /des gsungs de phyir de ni de rnams dang / /de nyid ma yin tshogs pa tsam nyid de / /de phyir ngar 'dzin blos de rnams la min/ / mdo sde las/ rgyal po chen po skyes bu gang zag de ni khams drug dang / reg pa'i skye mched drug dang / yid kyi nye bar rgyu ba bco brgyad do zhes gsungs so/ /de la khams drug ni sa dang chu dang me dang rlung dang rnam par shes pa dang nam mkha' ste/ de dag la brten nas bdag tu btags so//mig la sogs pa reg pa'i rten drug ni mig gi 'dus te reg pa'i skye mched nas yid kyi 'dus te reg pa'i skye mched kyi bar du ste/ de dag la brten nas bdag tu btags so/ /yid kyi nye bar rgyu ba bco brgyad ni/ gzugs dang sgra dang dri dang ro dang reg bya dang chos la dmigs pa'i yid bde ba'i nye bar rgyu ba drug dang /de bzhin du yid mi bde ba'i nye bar rgyu ba dang / de bzhin du btang snyoms kyi nye bar rgyu ba ste/ de dag la brten pa dang / sems dang sems las byung ba'i chos rnams nye bar bzung nas bdag tu gdags so/ /gang gi phyir khams la sogs pa de rnams kyi sgo nas bdag tu gdags so zhes bya bar gsungs pa de'i phyir de rnams dang de nyid ma yin te/gzhan ma yin pa nyid ma yin no zhes bya ba'i don to/ /de tshogs pa tsam nyid du yang rigs pa ma yin no/ /gang gi phyir ji skad bshad pa'i chos de rnams bdag nyid du mi rung ba de'i phyir na chos de rnams la ngar 'dzin pa'i blo mi rigs so//gang gi tshe de ltar phung po rnams ngar 'dzin pa'i yul yang ma yin la/ phung po las tha dad pa yang yod pa ma yin pa de'i phyir/ ngar 'dzin pa'i yul nyid yod pa ma yin pas/ rnal 'byor pas bdag ma dmigs pa las bdag gi ba yang snying po dang ldan pa ma yin pa nyid du yongs su shes shing /'dus byas mtha' dag bsal nas nye bar len pa med par mya ngan las 'da' bar 'gyur te/ de'i phyir rnam par dpyod pa 'di ches mdzes so/ /ngar 'dzin pa'i yul ni phung po rnams dang sems yin no zhes bya ba gang gi phyogs yin pa de'i ltar na ji srid du phung po rnams 'byung ba de srid du ngar 'dzin pa 'jug par 'gyur te/bdag tu 'dzin pa'i gzhi dngos po yod pa'i phyir ro zhes bshad pa/ bdag med rtogs tshe rtag pa'i bdag spong zhing / / 'di ni ngar 'dzin rten du'ang mi 'dod pa/ /de'i phyir bdag med shes pas bdag lta ba/ /cis kyang 'byin zhes smra ba shin tu mtshar/ /gal te bdag rtag pa dang ngar 'dzin pa'i yul yin na ni/ de med pas ngar 'dzin pa spong bar 'gyur ba zhig na/ ngar 'dzin pa'i yul na ni gzhan yin zhing gzhan dngos po med par mthong ba las ngar 'dzin pa ldog go zhes bya ba ni kye ma ma la khyod kyis mdzes so//phan tshun 'brel pa med pa'i don 'di nyid dpe'i sgo nas gsal bar bya ba'i phyir bshad pa/ rang khyim rtsig phug sbrul gnas mthong bzhin du/ /'di ni glang chen med ces dogs bsal te//sbrul gyi 'jigs pa'ang spong bar byed pa ni/ /kye ma gzhan gyi gnas por gyur nyid do/ /gang zhig 'jigs pa'i rkyen nyer zin kyang de la yod pa'i 'jigs pa ma mthong zhing phyir 'chos par mi byed pa spong ba nyid kyis bdag nyid 'jigs pa med pa nyid du mngon par byed pa de ni phebs pa rnyed pa nyid kyis na sbrul gyis 'dzin par 'gyur ro//gang gi phyir glang po che med pas ni de'i sbrul gyi 'jigs pa sel bar mi nus so/ /de bzhin du phung po dag dang rnam par shes pa dag tu smra ba 'di'i ltar na yang / rtag pa'i bdag med pas phung po'i yul can gyi ngar 'dzin pa bsal bar mi nus te/de'i phyir nges par 'di'i 'khor ba pa nyid nyams par mi 'gyur ro/ /de'i phyir de ltar bdag ni phung po'i rang bzhin can ma yin la/ phung po rnams las gzhan pa yang ma yin no zhes bya ba de lta bu'i phyogs gnyis yang dag par bsgrubs nas bdag gi yod pa nyid ni rten dang brten pa nyid du yang med par brjod pa'i phyir bshad pa/phung po bdag yod ma yin bdag la yang / /phung po de rnams yod min gang phyir 'dir/ /gzhan nyid yod na rtog pa 'dir 'gyur na/ /gzhan nyid de med de phyir 'di rtog pa'o//gzhan nyid yod na ni rten dang brten pa'i dngos por rigs par 'gyur te/ dper na 'khar gzhong na zho yod do zhes bya ba lta bu'o/ /'khar gzhong dang zho gnyis ni 'jig rten na gzhan nyid yin pa na rten dang brten pa'i dngos po mthong ngo / /phung po rnams ni de ltar bdag las tha dad pa ma yin la bdag kyang phung po rnams las tha dad pa ma yin pas de gnyis la rten dang brten pa'i dngos po yod pa ma yin no//phung po dang ldan pa nyid kyang bdag la ji ltar yod pa ma yin pa de ltar bstan pa'i phyir bshad pa/ bdag ni gzugs ldan mi 'dod gang phyir bdag /yod min de phyir ldan don sbyor ba med/ /gzhan ni gnag ldan gzhan min gzugs ldan na/ /bdag ni gzugs las de nyid gzhan nyid med/ /bdag phung po rnams de nyid dang gzhan nyid yin pa ni sngar bkag zin la/ ldan pa'i skyon yang lha sbyin gzugs dang ldan no zhes bya ba de ni tha mi dad pa nyid la dmigs la/ba lang dang ldan no zhes bya ba ni tha dad pa yin na/ de nyid dang gzhan nyid de dag ni gzugs bdag la yod pa ma yin pas bdag gzugs dang ldan no zhes bya ba 'di yang mi srid do/ /da ni bkag zin pa'i phyogs rnams bsdams te bstan pas 'jig tshogs la lta ba dmigs pa dang rnam pa log pa la 'jug par grangs kyi sgo nas bstan pa'i phyir bshad pa/gzugs bdag ma yin bdag ni gzugs ldan min/ /gzugs la bdag med bdag la'ang gzugs yod min/ /de ltar rnam bzhir phung kun shes bya ste//de dag bdag tu lta ba nyi shur 'dod/ /phung po lnga po bdag dang bral ba dag la 'jig tshogs la lta bas rnam pa bzhi'i sgo nas bdag nyid du bzung ba na 'jig tshogs la lta ba'i cha nyi shur 'gyur ro/ /gal te rnam par dpyad pa rnam pa lnga la skabs su bab la/bstan bcos las kyang / phung min phung po las gzhan min/ /de la phung med der de med/ /de bzhin gshegs pa phung ldan min/ / de bzhin gshegs pa gang zhig yin/ /zhes gsungs pa ma yin nam/ de'i phyir 'dir cha lngar 'gyur na/ cha nyi shu'i ji skad brjod ce na/'jig tshogs la lta ba'i cha de dag ni mdo sde las rnam par gzhag la des kyang phung po rnams ma bzung bar bdag tu mngon par zhen par mi nus pas rnam pa bzhi'i sgo nas phung po rnams la dmigs shing 'jug go/ /'di ltar phung po ma gtogs par ni 'ga' la yang bdag tu mngon par zhen pa med pas 'jig tshogs la lta ba'i rnam pa lnga pa mi srid do//de'i phyir 'jig tshogs la lta ba ni cha nyi shu kho na'o/ /bstan bcos las lnga pa gzhan pa nyid kyi phyogs su gsungs pa ni mu stegs pa'i lugs dgag pa'i phyir ro zhes bya bar shes par bya'o/ / de la 'jig tshogs la lta ba'i ri'i rtse mo nyi shu mtho ba ye shes kyi rdo rjes bcom nas rgyun du zhugs pa'i 'bras bu mngon du byas so zhes gang lung las gsungs pa ni/ lta ri bdag med rtogs pa'i rdo rje yis/ /bcom bdag gang dang lhan cig 'jig 'gyur ba/ /'jig tshogs lta ri lhun sdug la gnas pa'i//rtse mo mtho bar gyur pa 'di dag go/ /'jig tshogs la lta ba'i ri bo 'phags pa'i ye shes kyi rdo rje ma babs pas nyin re bzhin nyon mongs pa'i brag rdo 'phel ba/ 'khor ba thog ma med pa nas byung ba/ dpangs khams gsum du mtho ba/phyogs kyi ngos ma lus par khyab pa/ ma rig pa'i gser gyi sa gzhi las 'thon pa/ bdag med pa khong du chud pa'i rdo rjes bshig pa na/ rtse mo ches mtho ba gang dag dang lhan cig 'jig par 'gyur ba de dag ni rtse mo yin par shes par bya'o/ /da ni 'phags pa mang pos bkur ba dag gis brtags pa'i gang zag rdzas su yod par smra ba bsal ba'i phyir bshad pa/kha cig de nyid gzhan nyid rtag mi rtag /la sogs brjod med gang zag rdzas yod 'dod/ /rnam shes drug gi shes byar de 'dod cing / /de ni ngar 'dzin gzhir yang 'dod pa yin//de la re zhig phung po ma gtogs de 'dzin ma grub phyir/ /gang zag phung po dag las gzhan du ni mi 'gyur ro/ /phung po'i rang bzhin can yang ma yin te/ skye ba dang 'jig pa dang ldan pa nyid du thal bar 'gyur ba'i phyir ro/ /de'i phyir de ltar na phung po dag las de nyid dang gzhan nyid du brjod du med do//ji ltar de nyid dang gzhan nyid du ma yin pa de bzhin du rtag pa dang mi rtag pa nyid du yang brjod du med do/ /rnam par shes pa drug gis shes pa yang yin no/ /gang zag de ni rdzas su yod pa nyid du yang rigs te/ de la byed pa po nyid dang za ba po nyid du brjod pa'i phyir dang 'khor ba dang mya ngan las 'das pa dang /bcings pa dang thar pa dang 'brel ba can nyid yin pa'i phyir ro/ /de ni bdag tu 'dzin pa'i yul nyid du yang 'dod do/ /smra ba 'di yang mi rigs pa nyid du bshad pa/ gang phyir gzugs las sems brjod med mi rtogs//dngos yod brjod med rtogs pa ma yin nyid/ /gal te bdag 'ga' dngos por grub 'gyur na/ /sems ltar grub dngos brjod du med mi 'gyur/ /de'i phyir tshigs su bcad pa 'dis/ brjod du med pa la rdzas su yod pa nyid mi srid par bstan nas/btags par yod pa nyid du bstan pa'i phyir bshad pa/ gang phyir khyod bum dngos por ma grub pa'i/ /ngo bo gzugs sogs las brjod med 'gyur bas/ /bdag gang phung po las brjod med 'gyur te/ /rang gis yod par grub par rtogs mi bya/ /bum pa gzugs la sogs pa dag las de nyid dang gzhan nyid du brjod du med cing btags par yod par 'dod pa de bzhin du/bdag kyang bum pa ltar btags par yod par 'gyur ro snyam du bsams pa'o/ /de'i phyir de ltar tshigs su bcad pa gnyis kyis dgag pa dang sgrub pa nye bar bstan nas/ da ni de nyid dang gzhan nyid dag dngos po'i rten nyid du brjod nas dngos po'i chos kyi rten can ma yin pa nyid kyis bdag 'gog par rtsom pa/ khyod kyi rnam shes rang bdag las gzhan ni/ /mi 'dod gzugs sogs las gzhan dngos 'dod cing / /dngos la rnam pa de gnyis mthong gyur pa//de phyir bdag med dngos chos dang bral phyir/ /gal te khyod kyi ltar bdag rdzas su yod par gyur na ni de gdon mi za bar rnam par shes pa ltar rang gi bdag nyid las gzhan ma yin par 'gyur zhing gzugs la sogs pa dag las tha dad pa'i ngo bo zhig tu 'gyur na/ 'di ni yod pa yang ma yin no/ /de'i phyir dngos po'i chos dag gi rten can ma yin pa nyid kyi phyir bum pa ltar bdag yod pa ma yin no/ /gang gi phyir de ltar rnam par dpyad pa na gang zag rdzas su yod pa nyid du mi rigs pa/ de phyir ngar 'dzin rten ni dngos pos min/ /phung las gzhan min phung po'i ngo bo min//phung po rten min 'di ni de ldan min/ /ngar 'dzin pa'i yul ni nges par gzhig pa na rdzas su yod par mi rigs shing / phung po las tha dad par yang mi rung la/ phung po'i rang bzhin can yang ma yin zhing / phung po rnams kyi rten yang ma yin no//yang na 'di la rten phung po yod pas na phung po la rten zhes bya ba ste/ rten dang brten pa'i phyogs gnyi ga gsal bar bya ba'i phyir tshig bsdu ba gnyi ga la brten to/ /bdag ni phung po dang ldan par yang mi rigs so/ /de'i phyir bdag btags pa'am/ ma dmigs par 'dod pas kyang rung ste/ji skad smras pa'i rnam pa dag gis bdag khas blang bar mi bya'o zhes bshad pa ni/ 'di ni phung po rnams rten grub par 'gyur/ /zhes bya ba'o/ /ji ltar 'di la brten nas 'di 'byung zhes bya ba 'di tsam zhig kun rdzob kyi bden pa'i rnam par gzhag pa ma chad par bya ba'i phyir khas len gyi rgyu med la sogs pa dag las skye ba ma yin pa de bzhin du/'dir yang brten nas gdags pa la yang dag par brten pa na ji skad bshad pa'i skyon dang ldan pa'i rnam pa bsal nas phung po rnams la brten nas gdags pa zhes bya 'di tsam zhig 'jig rten gyi tha snyad rnam par gnas par bya ba'i phyir khas blang bar bya ste/bdag tu tha snyad btags pa mthong ba'i phyir ro/ /bdag btags pa tsam du grub par bya ba'i don du ji skad bshad pa'i don nyid gsal bar bya ba'i phyir phyi rol gyi dpe ston zhing bshad pa/ shing rta rang yan lag las gzhan 'dod min/ /gzhan min ma yin de ldan yang min zhing / /yan lag la min yan lag dag der min/ /'dus pa tsam min dbyibs min ji bzhin no/ /de'i phyir 'dir de nyid kyi phyogs dang gzhan nyid kyi phyogs dang / rten gyi phyogs dang brten pa'i phyogs dang /de dang ldan pa'i phyogs te phyogs lnga po dag ni sngar bstan zin pa nyid do/ /tshogs pa'i phyogs dang dbyibs kyi phyogs gnyis ni bsgrub par bya dgos pas de dag ston pa brtsam par bya ste/ gal te tshogs tsam shing rtar 'gyur na ni/ /sil bur gnas la shing rta nyid yod gyur//'di ni sngar bshad du zin kyang slar yang nye bar bkod de skyon gzhan brjod pa'i sgo nas gsal bar bya ba'i phyir ro/ /de nyid kyi phyir/ gang phyir yan lag can med yan lag dag /med pas dbyibs tsam shing rtar rigs pa'ang min/ /zhes bya ba smos so/ / gang gi phyir yan lag can med na yan lag dag yod pa ma yin pa'i phyir yan lag dag med pa nyid do/ /de'i phyir gang dag gi tshogs pa zhig shing rtar gyur / 'ang gi sgra ni bsdu ba'i don te/ dbyibs tsam yang shing rtar mi rigs la tshogs pa tsam po'ang mi rigs so zhes shes par bya ba'i phyir ro//ga las she na/ gang gi phyir yan lag can med na yan lag dag med pas so/ /de'i phyir dbyibs tsam zhig shing rtar mi rung ngo / /yan lag can med pa nyid du ni de dag gi rang nyid kyis khas blangs pa yin no/ /gzhan yang gal te dbyibs tsam zhig shing rtar 'dod na dbyibs de yan lag dag gi'am/tshogs pa'i yin par rtog grang / de la yan lag gi dbyibs kyi khyad par yin par 'dod na yang sngar gyi dbyibs kyi khyad par ma btang ba dag gi'am/ sngar gyi dbyibs kyi khyad par btang ba dag gi yin par 'gyur grang na/ de la gal te gong ma shos 'dod na ni de mi rigs so/ /ci'i phyir zhe na/ khyod dbyibs yan lag re re sngar yod gyur/ /ji bzhin shing rtar rtogs la'ang de bzhin na/ /bye bar gyur pa de dag la ji ltar/ /da lta yang ni shing rta yod ma yin/ /gal te shing rta'i gnas skabs kyi gong rol na 'phang lo la sogs pa'i dbyibs kyi khyad par ji ltar yod par gyur pa de kho na ltar shing rta nyid kyi dus su'ang 'phang lo la sogs pa rnams kyi dbyibs kyi khyad par yin na ni de'i tshe yan lag bye bar gyur pa dag la med pa ltar shing rta nyid kyi dus na'ang shing rta yod pa ma yin par nges par bya ste/de'i yan lag gi dbyibs tha mi dad pa'i phyir ro/ /ci ste phyogs gnyis pa ste dbyibs gzhan kho na shing rta zhes bya bar 'gyur na/ de lta na yang / da lta gal te shing rta nyid dus 'dir/ /'phang lo sogs la dbyibs tha dad yod na/ /'di gzung 'gyur na de yang yod min te/ /de phyir dbyibs tsam shing rtar yod ma yin//gal te 'phang lo dang srog shing dang gzer bu la sogs pa shing rta'i yan lag rnams kyi dbyibs kyi khyad par so sor lham pa dang / ring ba dang zlum po la sogs pa gang zhig sngar yod par gyur pa de las de dag gi dbyibs kyi khyad par gzhan zhig kho na shing rta nyid kyi dus su skye bar 'gyur na ni/de bzung du yod par 'gyur na bzung ba yang ma yin no/ /ji ltar rtsibs dang mu khyud dang lte ba la sogs pa'i khyad par du gyur pa'i dbyibs can 'phang lo la ni shing rta'i gnas skabs na rang gi dbyibs gzhan du gyur pa nyid ma mthong ngo / /de bzhin du srog shing la sogs pa de dag gi lham pa nyid la sogs pa yang gzhan nyid du 'gyur ba ma yin no//de phyir yan lag rnams kyi dbyibs shing rta'o zhes bya ba mi rigs so/ /ci ste 'phang lo la sogs pa tshogs pa rnams kyi dbyibs kyi khyad par shing rta yin no snyam na/ de yang mi rigs so zhes bshad pa/gang phyir khyod kyi tshogs pa cang med pas/ /dbyibs de yan lag tshogs kyi ma yin na/ /gang zhig ci yang ma yin de brten nas/ /'dir ni dbyibs su lta zhig ci ltar 'gyur/ /gal te tshogs pa zhes bya ba dngos po cung zad cig yod na ni de'i rten can dbyibs su gdags par 'gyur na/yan lag tshogs la zhes bya ba ni cung zad kyang yod pa ma yin no/ /gang zhig cung zad kyang yod pa ma yin pa de'i rten can gyi dbyibs su gdags par yang ji ltar 'gyur te btags pa ni rdzas kyi rten can kho nar khas blangs pa'i phyir ro//ci ste mi bden du zin kyang tshogs pa la brten nas mi bden pa'i dbyibs su 'gyur ro zhes bya bar 'dod na de lta yin dang / khyod kyi 'di ni ji ltar 'dod de ltar/ /mi bden pa yi rgyu la brten byas nas/ /'bras bu'i rnam pa mi bden rang bzhin can/ /thams cad kyang ni skye bar shes par gyis//ma rig pa mi bden pa la brten nas 'du byed mi bden pa'i rang bzhin can kho na skye la/ mi bden pa'i rang bzhin can gyi sa bon la brten nas myu gu mi bden pa'i rang bzhin can skye ba de bzhin du rgyu dang 'bras bu'i ngo bo mi bden pa'i rang bzhin can ma lus pa yang rtogs par bya ste/ 'bad rtsol brgya phrag dag gis kyang gang gis sha dag za bar mi nus pa'i dngos po grib ma'i ri dwags lta bu la mngon par zhen pa don med pa 'dis ci zhig bya ste / 'dis ni gzugs sogs de ltar gnas rnams la/ /bum blo zhes bya'ang rigs pa ma yin nyid/ /de la kha cig na re/ gzugs la sogs pa de ltar gnas pa rnams la bum pa la sogs pa'i blor 'gyur ro zhes smra ba de yang shing rta'i dpe 'dis bsal ba yin no/ /gzhan yang / skye ba med pas gzugs sogs kyang yod min/ /de yi phyir yang de dag dbyibs mi rigs/ /ji ltar gzugs la sogs pa rnams la skye ba yod pa ma yin pa de ltar ni sngar bshad zin to//de'i phyir skye ba med pa'i phyir gzugs la sogs pa dag yod pa ma yin no/ /ji ltar yod pa ma yin pa rnams bum pa la sogs pa dag gdags pa'i rgyu mtshan nyid du rigs par 'gyur/ de'i phyir rdzas kyi nye bar len pa can du 'dod pa bum pa la sogs pa dag mi rigs pas/bum pa la sogs pa dag gzugs la sogs pa'i dbyibs kyi khyad par gyi bdag nyid can ma yin no/ /'dir smras pa/ gal te 'o na shing rta 'di ji skad bshad pa'i tshul du rnam pa bdun gyis btsal ba na yod pa ma yin pa de'i tshe shing rta med pas gang zhig shing rtas 'jig rten na tha snyad 'dogs pa de rgyun chad par 'gyur na/shing rta 'on cig /shing rta nyos shig /shing rta chos shig ces bya ba la sogs pa mthong ba yang yin no/ /de'i phyir 'jig rten la grags pa'i phyir na/ shing rta la sogs pa dag ni yod pa nyid do//brjod par bya ste/ nyes pa 'di ni khyod kho na la 'gyur te/ 'di ltar sngar bshad pa'i tshul du rnam pa bdun gyis btsal ba na shing rta mi 'thad cing / khyod kyis kyang rnam par dpyad nas dngos po grub par rnam par 'jog par byed la/ grub pa'i thabs gzhan yang khas ma blangs pa de'i phyir na shing rta 'on cig ces bya ba de lta bu la sogs pa'i 'jig rten pa'i tha snyad khyod la ci ltar grub par 'gyur/kho bo cag la ni nyes pa 'di med de/ gang gi phyir/ de ni de nyid du'am 'jig rten du/ /rnam pa bdun gyis 'grub 'gyur min mod kyi/ /rnam dpyad med par 'jig rten nyid las 'dis //rang gi yan lag brten nas 'dogs pa yin/ /shing rta rang yan lag las gzhan 'dod min/ /zhes bya ba la sogs pa'i tshul 'di de rnam pa bdun du btsal ba na/ don dam pa dang kun rdzob tu shing rta 'grub par mi 'gyur mod kyi/ de lta na yang 'di ni rnam par dpyad pa spangs te/ sngon po la sogs pa dang tshor ba la sogs pa ltar 'jig rten nyid las 'phang lo la sogs pa yan lag rnams la brten nas 'dogs pa yin no/ /de'i phyir rten cing 'brel bar 'byung ba rkyen nyid 'di pa tsam khas blangs pa ltar brten nas brtags pa khas blangs pa'i phyir kho bo cag gi phyogs la 'jig rten gyi tha snyad chad par thal bar mi 'gyur la/pha rol pos kyang 'di nyid khas blang bar 'os pa yin no/ /phyogs 'dir 'jig rten la grags pa'i sgo nas shing rtas tha snyad 'dogs pa ches gsal bar grub pa 'ba' zhig tu ma zad kyi/'di'i ming gi khyad par gang dag yin pa de dag kyang rnam par dpyad pa med par 'jig rten la grags pa'i sgo nas khas blang bar bya'o/ /'di lta ste/ de nyid yan lag can te cha shas can/ /shing rta de nyid byed po zhes 'gror bsnyad/ /skye bo rnams la len po nyid du'ang grub//de la shing rta ni 'phang lo la sogs pa rang gi yan lag la ltos nas yan lag can nyid du 'gyur ro/ /'phang lo la sogs pa cha shas la ltos nas ni cha shas can nyid do/ /'phang lo la sogs pa nye bar blang ba nye bar len pa'i bya ba la ltos nas ni byed pa po nyid do//rang gi nye bar len pa la ltos nas ni nye bar len pa po nyid do/ /gang 'ga' zhig gsung rab kyi don phyin ci log tu rtogs pas yan lag tshogs pa tsam zhig yod kyi yan lag can ni rnam pa thams cad du yod pa ma yin te/ de las tha dad par ma dmigs pa'i phyir ro//de bzhin du cha shas tsam zhig yod kyi cha shas can ni med do/ /las 'ba' zhig kho na yod kyi byed pa po ni med do/ /nye bar len pa las tha dad par ma dmigs pa'i phyir nye bar len pa kho na yod kyi nye bar len pa po ni med do zhes de lta bur rnam par gnas pa ni 'jig rten gyi kun rdzob phyin ci log tu smra ba de'i ltar na gtan tshigs de nyid kyis yan lag la sogs pa tsam yang med par thal bar 'gyur bas/'jig rten grags pa'i kun rdzob ma brlag cig /ces 'di ni bzlog par bya ba kho na'o/ /gang gi phyir 'jig rten gyi kun rdzob 'di de ltar rnam par dpyad pa na yod par mi 'gyur zhing ma brtags par grags pas yod pa de nyid kyi phyir rnal 'byor pas rim pa 'di nyid kyis 'di la rnam par dpyod pa na ches myur ba kho nar de kho na nyid kyi gting dpogs par 'gyur ro//ci ltar zhe na/ rnam bdun gyis med gang de ji lta bur/ /yod ces rnal 'byor pas 'di'i yod mi rnyed//des de nyid la'ang bde blag 'jug 'gyur bas/ /'dir de'i grub pa de bzhin 'dod par bya/ /nye bar rtogs pa'i rnal 'byor pa la gal te shing rta zhes bya ba'i dngos po rang bzhin gyis grub pa 'ga' zhig yod par 'gyur na ni the tshom med par de rnam pa bdun las rnam pa gang yang rung ba zhig gi bdag nyid yod pa rnyed par 'gyur ba zhig na/rnyed pa yang ma yin no/ /de'i phyir shing rta zhes bya ba ni ma rig pa'i ling thog gis nyams par byas pa dag kho nas brtags pa yin gyi/ rang bzhin gyis grub pa ni yod pa ma yin no snyam du de ltar nges pa skye bar 'gyur zhing de kho na nyid la yang rnal 'byor pa bde blag tu 'jug par 'gyur ro//'ang gi sgras ni kun rdzob nyams par yang mi 'gyur ba ste/ de'i phyir 'di ni ma brtags par grags par grub par 'dod par bya'o/ /mkhas pa dag gis phyogs 'di ni skyon med cing phan yon dang bcas pa'o snyam du bsams te gdon mi za bar khas blang bar bya'o//'dir smras pa rnal 'byor pas shing rta mi dmigs la rags mod de'i yan lag tshogs pa tsam zhig dmigs pa ni yod pa ma yin no/ /bshad par bya ste/ gang zhig snam bu tshig na thal ba la snal ma tshol ba khyod ni bzhad gad du bya ba zhig ste/shing rta yod nyid min na de yi tshe/ /yan lag can med de'i yan lag kyang med/ /gal te shing rta zhig na de'i 'phang lo la sogs pa tshogs pa dmigs pa nyid ma yin nam/ de'i phyir yan lag can med par yan lag dag kyang med do zhes ci ste brjod ce na/de ni de ltar ma yin te/ rtog pa po shing rta dang 'brel par rig pa kho nas 'phang lo la sogs pa 'di dag ni shing rta yin no snyam du rtogs kyi gzhan gyis ni ma yin te/ des ni rang gi cha shas la ltos nas 'phang lo la sogs pa dag kho na yan lag can nyid du rtogs par 'gyur ro/ / 'phang lo la sogs pa rnams shing rta dang 'brel pa yang rgyang ring du spangs pa kho na yin pas de'i tshe de dag shing rta'i yan lag tu mi rtogs so/ /gzhan yang don 'di ni dpe 'di las shes par bya ste/ shing rta tshig na yan lag med dpe bzhin/ /blo mes yan lag can sreg yan lag go//dper na shing rta yan lag can mes tshig na de'i yan lag dag kyang nges par tshig par 'gyur ba de bzhin du rnam par dpyod pa'i gtsub shing gtsubs pa las byung ba blo'i me mi dmigs pa'i sreg par byed pa can gyis shing rta lus pa med par bsregs pas na shes rab kyi me'i bud shing du gyur pa yan lag dag gis kyang bdag nyid zug tshugs par mi byed de nges par bsregs pa'i phyir ro//ji ltar kun rdzob kyi bden pa mi gcad par bya ba'i phyir dang / rnal 'byor pa rnams de kho na nyid la bde blag tu 'jug par bya ba'i phyir shing rta rnam par dpyad pa'i tshul la bsams te brten nas gdags pa rnam par gzhag pa/de bzhin 'jig rten grags pas phung po dang / /khams dang de bzhin skye mched drug brten nas/ /bdag kyang nye bar len po nyid du 'dod/ /ji ltar 'phang lo la sogs pa dag la brten nas shing rtar 'dogs shing der 'phang lo la sogs pa dag nye bar len pa yin la shing rta nye bar len pa po yin pa de bzhin du/bdag kyang kun rdzob kyi bden par 'jig rten gyi tha snyad kun tu mi gcad par bya ba'i phyir shing rta ltar nye bar len pa por 'dod pa yin no/ /phung po lnga dang khams drug dang skye mched drug ni bdag de'i nye bar len pa ste/phung po la sogs pa rnams la brten nas bdag tu btags pa'i phyir ro/ /ji ltar 'phang lo la sogs pa dag shing rta'i nye bar len pa yin pa de bzhin du phung po la sogs pa rnams kyang bdag gi nye bar len pa'o zhes bya'o/ /ji ltar nye bar len pa dang nye bar len pa po'i rnam par gzhag pa 'di 'jig rten gyi tha snyad du rnam par gzhag pa de bzhin du 'di'i las dang byed pa po'i rnam par gzhag pa yang shing rta ltar khas blang bar bya'o zhes bshad pa/nyer len las yin 'di ni byed pa po yang yin/ /nye bar len pa zhes bya ba phung po la sogs pa dag ni las nyid dang bdag ni byed pa po zhes bya bar rnam par gzhag go//brten nas gdags pa la yang dag par brten pa na bdag rnam pa thams cad du brtan pa dang mi brtan pa la sogs pa'i rtogs pa'i rten ma yin pa nyid pas rtag pa dang mi rtag pa la sogs pa'i rtog pa zlog pa sla bar 'gyur ro zhes bshad pa/dngos yod min phyir 'di ni brtan min zhing / /mi brtan nyid min 'di ni skye 'jig min/ /'di la rtag pa nyid la sogs pa yang / /yod min de nyid dang ni gzhan nyid med/ /phung po dag la brten nas gdags pa'i bdag 'di ni brten pa nyid kyang ma yin zhing mi brtan pa nyid kyang ma yin no//de la gal te bdag mi brtan pa yin na ni de'i tshe/ nye bar len nyid bdag ma yin/ /de dag 'byung dang 'jig pa yin/ /nye bar blangs pa ci lta bur/ /nye bar len po yin par 'gyur/ /zhes bya ba dang / de bzhin du/ ma byung ba las 'byung min te/ /'di la skyon du thal bar 'gyur//bdag ni byas par 'gyur ba 'am / /'byung ba'ang rgyu med can du 'gyur/ /zhes bya ba'ang bstan bcos dang 'gal bar 'gyur ro/ /de nyid kyi phyir/ gal te phung po bdag yin na/ /skye dang 'jig pa can du 'gyur na skye zhing 'jig pa can du 'dod pa'ang ma yin te/ de'i phyir phung po bdag ma yin no zhes bya ba'i thal bar 'gyur ba 'di yang 'thad par 'gyur ro/ /de'i phyir 'di ni mi brtan pa nyid du yang mi 'thad do/ /de bzhin du brtan par yang mi 'thad de/ ji skad du/ 'das pa'i dus ni byung gyur zhes/ /bya ba 'di ni mi 'thad do/ /sngon tshe rnams su gang byung ba//de nyid de ni ma yin no/ /de nyid bdag tu 'gyur snyam na/ /nye bar len pa tha dad 'gyur/ /nye bar len las ma gtogs par/ /khyod kyi bdag ni gang zhig yin/ /zhes gsungs so/ /skye dang 'jig pa can du 'gyur/ /zhes bya ba'i thal bar 'gyur ba 'di nyid las na 'di ni skye 'jig min zhes bya ba'i khyad par gnyis slob dpon gyi bzhed pa yin no//'di la rtag pa nyid la sogs pa'ang yod pa min te/ ji skad du slob dpon gyis de bzhin gshegs pa brtags pa'i thabs kyis bdag yongs su rtogs par mdzad pa na/rtag dang mi rtag la sogs bzhi/ /zhi ba 'di la ga la yod/ /mtha' dang mtha' med la sogs bzhi/ /zhi ba 'di la ga la yod/ /gang gis de bzhin gshegs yod ces/ /'dzin pa stug po bzung gyur pa/ /de ni mya ngan 'das pa la/ /med ces rnam rtog rtog par byed/ / rang bzhin gyis ni stong de la/ /sangs rgyas mya ngan 'das nas ni/ /yod do zhe 'am med do zhes/ /bsam pa 'thad pa nyid mi 'gyur/ /zhes gsungs pa lta bu'o/ /'di ni phung po dag las de nyid dang / gzhan nyid du yod pa yang ma yin te/ ji skad du/ gal te phung po bdag yin na/ / skye dang 'jig pa can du 'gyur/ /gal te phung po rnams las gzhan/ /phung po'i mtshan nyid med par 'gyur/ /zhes bya ba dang de bzhin du/ shing nyid me ni ma yin te/ /zhes bya ba la sogs pa gsungs so/ /yang ci'i phyir mi brtan pa la sogs pa'i rtog pa 'di rnams bdag la mi rung zhe na/dngos yod min phyir zhes bya ba smos te/ gal te bdag dngos po'i rang bzhin can 'ga' zhig yod na ni de la mi brtan pa la sogs pa'i rtog pa rnams yod par 'gyur ba zhig na/ bdag ni 'ga' yang med de/ de med pa kho na'i phyir ro//ji skad du mdo las/ mi bzad pa yi chos bzhi ni/ /'jig rten mgon gyis bstan pa ste/ /sems can nam mkha' byang chub sems/ /de bzhin sangs rgyas chos rnams so/ /gal te de dag rdzas yod na/ /de dag yongs su zad 'gyur grang / / med pa de dag mi zad de/ /de phyir de dag zad med gsungs/ /zhes gsungs so/ /gang zhig rnam pa bdun gyis btsal na/ rtag pa dang mi rtag pa nyid du mi srid cing gang zhig gi med pa nyid ma mthong zhing ma rig pa'i dbang gis yod pa nyid du zhen par byas nas 'jig tshogs la lta bas 'di ni bdag go snyam du mngon par zhen pa rnams 'khor bar 'gyur la/gang la rtag tu 'gro rnams ngar 'dzin blo/ /rab tu 'byung zhing de yi gang yin der/ /nga yi 'dzin blo 'byung ba'i bdag de ni/ /ma brtags grags par gti mug las yin no/ /gang zhig yongs su tshol ba ni mu stegs pa de'i rigs pas mi 'thad pas de'i rang bzhin la phyin ci log tu gyur pa thams cad phung po las tha dad par zhen zhing /rang gi sde pa rnams kyis kyang phung po las tha dad par bdag med do snyam du 'khrul pas phung po tsam nyid bdag tu khas blangs pa /de bzhin gshegs pas nye bar bstan pa phyin ci ma log par khong du chud pa rnams ni yod pa ma yin pa nyid do snyam du rig par byas nas lan brgyar yongs su grol bar 'gyur ba de ni bdag yin zhing / 'gro ba mi dang yi dwags dang dud 'gro la sogs pa'i 'gro bar gnas pa mi shes pa dang rjes su 'brel ba mtha' dag la rtag tu gang zhig la ngar 'dzin pa'i blo 'byung ba de dag yin par rig par bya la/gang du 'di dbang byed pa nyid dam 'brel pa 'ga' zhig tu 'gyur ba 'di gdags pa'i rkyen mig la sogs pa nang gi bdag nyid can dang /phyi rol gang yin pa der bdag gir 'dzin pa'i blo 'byung ba bdag de ni shes pa las grub pa yin gyi rang gi ngo bos grub pa ni ma yin no/ /gang gi phyir 'di yod pa ma yin mod kyi 'on kyang gti mug las tha snyad 'dogs pa de nyid kyi phyir/ rnal 'byor pa dag gis rnam pa thams cad du mi dmigs la/de ma dmigs na yang mig la sogs pa de'i nye bar len pa rnams mi 'byung bar 'gyur ro/ /'di ltar rnal 'byor pas ni dngos po 'ga' la yang rang gi ngo bo dmigs pa med de/ de'i phyir 'khor ba las rnam par grol bar 'gyur ro/ /ji skad du/ nang dang phyi rol nyid dag la/ /bdag dang bdag gi snyam zad na/ /nye bar len pa 'gag 'gyur zhing / /de zad pas na skye ba zad/ /ces gsungs so/ /yang ji ltar na bdag med na bdag gi ba yang med ce na/ bstan pa'i phyir bshad pa/ gang phyir byed po med can las med pa/ /de phyir bdag gi bdag med par yod min//de phyir bdag dang bdag gi stong lta zhing / /rnal 'byor pa de rnam par grol bar 'gyur/ /ji ltar rdza mkhan med par bum pa yang mi srid pa de bzhin du bdag med par bdag gi ba yang ma yin no/ /de'i phyir bdag dang bdag gi nye bar ma dmigs pas 'khor ba ma gzigs pa na rnal 'byor pa grol bar 'gyur ro//gzugs la sogs pa ma dmigs na ni de la der gtogs pa'i 'dod chags la sogs pa rnams mi 'byung bas/ nyan thos dang rang sangs rgyas rnams len pa med par mya ngan las 'da' bar rnam par gzhag la/byang chub sems dpa' rnams ni bdag med par mthong du zin kyang snying rje'i gzhan gyi dbang gis byang chub kyi bar du sred pa'i rgyun 'dzin par byed pas mkhas pas ji skad bshad pa'i bdag med pa yongs su btsal bar bya'o/ /ji ltar bdag dang de'i nye bar len pa gdags pa shing rta'i rnam par dpyad pa dang mtshungs pa de bzhin du/dngos po gzhan rnams kyi'ang yin no zhes bsgre ba'i phyir/ bum pa snam bu re lde dmag dang nags tshal phreng ba ljon shing dang / /khang khyim shing rta phran dang 'gron gnas la sogs dngos rnams gang dag dang / / zhes bya ba smos te/ de rnams shing rta'i rnam dpyad byas pas rnam bdun yod min zhing / /de las gzhan du gyur par 'jig rten grags pa'i sgo nas yod pa yin/ /zhes bya ba 'di dang sbyar ro/ /gang yang de lta bu'i rigs can gyi dngos po gzhan/ de bzhin gang dag sgo nas skye 'dis bsnyad pa de rnams rtogs bya ste/ma brtags par grags pa kho nar ro/ /ci'i phyir zhe na/ gang phyir thub dbang de ni 'jig rten lhan cig rtsod mi mdzad phyir ro/ /'jig rten nga dang lhan cig rtsod kyi nga ni 'jig rten dang mi rtsod do zhes bya ba'i lung las na 'jig rten gyi grags pa la gnod par mi bya'o//yang 'jig rten dngos po gang dag gis ji ltar tha snyad 'dogs she na/ de bstan pa'i phyir bshad pa/ yon tan yan lag 'dod chags mtshan nyid dang ni bud shing la sogs dang / /yon tan can yan lag can chags dang mtshan gzhi me la sogs don dag /de rnams shing rta'i rnam dpyad byas pas rnam bdun yod pa ma yin zhing / /de las gzhan du gyur par 'jig rten grags pa'i sgo nas yod pa yin/ /ji ltar bum pa yan lag can yin la gyo mo la sogs pa de dag de'i yan lag yin zhing / bum pa yon tan can yin la me ris sngo bsangs la sogs pa dag 'di'i yon tan yin zhing /bum pa mtshan gzhi yin la lto smad ldir ba dang mchu 'phyang ba dang mgrin pa ring ba nyid la sogs pa dag de'i mtshan nyid yin pa de bzhin du/ snam bu la sogs pa rnams la yang sbyar bar bya'o/ /'dod chags ni lhag par zhen pa'o//chags pa ni 'dod chags kyi rten no/ /me ni sreg par byed pa'o/ /bud shing ni bsreg bya'o/ /de la yan lag rgyur byas nas yan lag can du gdags la yan lag can la ltos nas yan lag dag 'dogs pas shing rta'i dpe dang mtshungs te/ bud shing la ltos nas me yin la de la ltos nas bud shing yin pa'i bar du'o//'di ni 'jig rten gyi tha snyad yin gyi 'di la dpyad na mi gzhug go/ /yan lag la sogs pa rnams phan tshun ltos pa'i grub pa yin pa 'ba' zhig tu ma zad kyi/ rgyu dang 'bras bu gnyis kyang phan tshun ltos pa yin no zhes bshad pa/gang gi phyir/ gal te rgyu yis bskyed par bya bskyed de lta na de rgyu yin zhing / /gal te 'bras bu mi bskyed na ni de med rgyu med can du 'gyur/ /'bras bu yang ni rgyu yod gyur na skye bar 'gyur ba de yi phyir/ /rgyu dang 'bras bu 'di gnyis kyang de las gzhan yod na cig shos yod pa nyid yin no zhes shes par bya'o// rgyu dang 'bras bu dag rang bzhin gyis yod pa nyid ni ma yin no/ /ci ste khyed de gnyis rang gi ngo bos grub par sems na kye/ /gang las gang zhig 'gyur ba gang zhig las sngar gang zhig 'gyur de smos/ /ci rgyu'am 'bras bu sngar grub pa gang las rgyu'am 'bras bu skye bar 'gyur ba de gnyis las dang po rgyu'am 'on te 'bras bu zhig tu 'gyur/de'i phyir rgyu dang 'bras bur gdags pa yang shing rta ltar rgyur byas nas yin par rig par bya'i rang bzhin las gyur pa ni ma yin no/ /gzhan yang gal te rgyus 'bras bu rang bzhin gyis skyed par byed na phrad nas sam ma phrad par skyed par byed grang /de la re zhig /gal te khyod kyi rgyu yis phrad nas 'bras skyed byed na de yi tshe/ /de dag nus pa gcig pas skyed byed 'bras bu tha dad med gyur zhing / /so sor na ni rgyu 'di rgyu min rnams dang khyad par med 'gyur la//gnyis po 'di dag spangs nas rtog pa gzhan yang yod par 'gyur ma yin/ /de la gal te rgyus 'bras bu phrad nas skyed par byed na de'i tshe/ /phrad pa yin dang klung dang rgya mtsho'i chu phrad pa tha dad med pa ltar gcig yin pas 'di ni rgyu'o/ /'di ni 'bras bu'o zhes khyad par med pa'i phyir/gang zhig gang gis bskyed par 'gyur / /ci ste ma phrad par skyed par byed na ni/ /de'i tshe ji ltar ma phrad par 'bras bu ma yin pa gzhan mi skyed pa de bzhin du ma phrad par 'bras bu yang bskyed par mi 'gyur ro/ /'on te ma phrad bzhin du skyed par byed na ni ril bskyed par 'gyur ro//rgyu dang 'bras bu rang bzhin du smra ba la bskyed bya skyed par byed pa la phrad pa dang ma phrad pa dag las ma gtogs pa'i rtogs gsum pa gzhan yang srid pa ma yin pas/ rang bzhin gyis grub pa'i rgyus 'bras bu skyed par mi byed pa kho na'o/ /de'i phyir/ ci ste khyod kyi rgyu yis 'bras bu skyed par mi byed de phyir 'bras/shes bya yod min/ /gang gi tshe rgyus 'bras bu mi skyed pa de'i tshe 'bras bu med pas/ 'bras bral rgyu ni rgyu med can 'gyur yod pa'ang min/ /rgyu rgyu nyid du bya ba la ni 'bras bu 'byung ba rgyu yin na/ /gal te 'bras bu med par yang rgyu nyid du 'gyur na ni/de'i tshe rgyu'i rgyu nyid rgyu med pa can du 'gyur na 'di ni 'dod pa yang ma yin te/ de'i phyir rgyu dang 'bras bu gnyis rang bzhin gyis yod pa ma yin no/ /khyod kyi ci ltar zhe na/ gang phyir 'di dag gnyis char yang ni sgyu ma dang 'dra de yi phyir/ /bdag la skyon du mi 'gyur 'jig rten pa yi dngos po rnams kyang yod//gang gi ltar na rang gi mtshan nyid bskyed par bya ba nyid dang skyed par byed pa nyid yin pa de la rnam par dpyad pa 'dir 'gyur gyi/ gang gi ltar na dngos po rnams log par kun brtags pas bskyed pa nyid kyis sgyu ma ltar ma skyes pa'i rang bzhin yin zhing rang bzhin med kyang rab rib can gyi dmigs pa'i skra shad la sogs pa ltar rnam par rtog pa'i yul du 'gyur ba de la ni bsam du med pa nyid de/de'i phyir bdag la ji skad bshad pa'i skyon gyi skabs yod pa ma yin zhing / 'jig rten pa'i dngos po ma brtags par grub pa rnams kyang yod pa yin pas thams cad 'grub po//'dir kha cig lan du 'di skad du ci rgyus 'bras bu phrad nas skyed par byed dam/ 'on te ma phrad par yin zhes gang smras pas 'dir khyod la yang brgal zhing brtag pa mtshungs so/ /ci ltar zhe na/ sun 'byin 'dis sun dbyung bya phrad nas 'byin nam ma phrad par//yin zhes nyes pa 'di ni khyod la'ang 'gyur ba ma yin nam/ /gal te sun 'byin pas sun dbyung bya phrad nas sun 'byin par byed na ni de'i tshe nyes pa de nyid du 'gyur ro/ /'on te ma phrad par yin na de lta na yang de nyid du 'gyur ro/ /gnyis po 'di dag spangs nas rtogs pa gzhan yang yod par 'gyur ba ma yin/gang gi tshe de ltar byed kyi sun 'byin pa la sun dbyung bya sun 'byin pa'i nus pa ma yin pa de'i tshe khyod kyi sun 'byin pa nyid sun phyung pa yin pas shugs kyis rgyu dang 'bras bu'i dngos po yang grub pa nyid do zhes bstan pa'i phyir smras pa/gang tshe de skad smra zhing rang phyogs kho na rnams 'joms pa/ /de tshe khyod kyi sun dbyung sun ni 'byin par nus ma yin/ /gzhan yang / gang phyir rang gi tshig la'ang thal ba mtshungs pa'i ltag chod kyi/ /rigs pa med par dngos mtha' dag la skur 'debs de yi phyir/ / khyod ni skye bo dam pas bzhed mi 'gyur zhing gang gi phyir/ /khyod la rang phyogs med pas sun ci phyin du rgol ba'ang yin/ de la rang gi tshig la'ang thal bar 'gyur bar mtshungs pa nyid ni smras zin to/ /rigs pa med par dngos mtha' dag la skur 'debs zhes bya ba 'di bshad par bya'o//gang ma phrad par mtshungs pas skyed par byed pa ma yin pa nyid do/ /zhes bya ba 'di la rigs pa ci zhig yod/ 'di ltar khab len gyis ma phrad pa nyid du rung ba'i yul na gnas pa'i lcags 'dren par byed kyi thams cad ni ma yin no/ /de bzhin du mig gis ma phrad pa kho nar rung ba'i yul na gnas pa'i gzugs mthong gi /ril ni ma yin pa de bzhin du rgyus kyang ma phrad par bskyed du zin kyang ma phrad pa thams cad skyed par mi 'gyur gyi/ 'bras bu rung ba kho na skyed par 'gyur ro/ /gang gi phyir de ltar rigs pa med par dngos po'o cog la skur pa 'debs pa de'i phyir khyod skye bo dam pas bzhed par mi 'gyur ro//gzhan yang khyod ni sun ci phyin du rgol ba pa nyid du yang 'gyur te/ rang gi phyogs bzhag pa dang bral zhing gzhan gyi phyogs sel ba tsam la zhugs pa'i rgol ba ni sun ci phyin du rgol ba pa zhes bya ba'o/ /khyod la ni rang gi phyogs 'ga' zhig yod pa yang ma yin te/khyod kyi rnam par dpyad pa ni gzhan gyi phyogs sel ba nyid yin pa'i phyir ro zhes smras so / /'di la brjod par bya ste/ sun 'byin pas sun dbyung bya ma phrad gsum ni 'byin byed dam/ /'on te phrad nas yin zhes smras zin nyes pa 'dir gang la//nges par phyogs yod de la 'gyur gyi bdag la phyogs 'di ni/ /yod pa min pas thal bar 'gyur ba 'di ni srid ma yin/ /de la rang gi tshig la'ang thal ba mtshungs pa'i ltag chod kyis/ /zhes gang smras pa ni kho bo cag gi phyogs la mtshungs par thal bar mi 'gyur te/ gang gi phyir kho bo cag gi phyogs la ni sun 'byin pas sun dbyung bar bya ba phrad nas kyang sun 'byin par mi byed pa nyid la sun 'byin pas sun dbyung bar bya ba ma phrad par yang sun 'byin par mi byed de/sun 'byin pa dang sun dbyung bya gnyi ga rang bzhin gyis ma grub pa'i phyir ro//de'i phyir phrad pa dang ma phrad pa'i bsam pa mi byed do/ /ji skad du/ tshe dang ldan pa rab 'byor ci skyes pa'i chos kyis ma skyes pa'i thob pa 'thob par 'gyur ram/ 'on te ma skyes pa'i chos kyis ma skyes pa'i thob pa 'thob par 'gyur/ rab 'byor gyis smras pa/ tshe dang ldan pa shA ri'i bu kho bo ni skyes pa'i chos kyis ma skyes pa'i thob pa 'thob par mi 'dod la/ma skyes pas kyang ma skyes pa'i thob pa 'thob par mi 'dod do/ /shA ri'i bus smras pa/ tshe dang ldan pa rab 'byor yang ci thob pa med cing mngon par rtogs pa med dam/ rab 'byor gyis smras pa/ tshe dang ldan pa shA ri'i bu thob pa yang yod mngon par rtogs pa yang yod mod kyi/gnyis kyi tshul gyis ni ma yin no/ /tshe dang ldan pa shA ri'i bu thob pa dang mngon par rtogs pa ni 'jig rten gyi tha snyad du yin la/ rgyun du zhugs pa dang / lan cig phyir 'ong ba dang / phyir mi 'ong ba dang / dgra bcom pa dang /rang sangs rgyas dang / byang chub sems dpa' yang 'jig rten gyi tha snyad du yin gyi don dam par ni thob pa med cing mngon par rtogs pa med do zhes rgya cher gsungs pa lta bu'o/ /'dir ji ltar gnyis su thal bar 'gyur ba'i phyir skyes pa'am ma skyes pa'i chos kyis thob pa 'thob pa bkag cing gnyis kyang dngos po med pa la mi rigs pa'i phyir/ma brtags par 'jig rten gyi tha snyad du thob par khas blangs pa de bzhin du/ sun dbyung bar bya ba dang sun 'byin pa dag kyang phrad pa'am ma phrad par ma yin mod kyi/ 'on kyang tha snyad du sun 'byin pas sun dbyung ba sun 'byin par byed do zhes shes par bya'o//gzhan yang / ji ltar khyod kyis nyi ma'i dkyil 'khor la yod khyad par rnams/ /gzugs brnyan la yang gzas gzung la sogs rnam 'tshe mthong 'gyur la/ /nyi ma dang ni gzugs brnyan rnam pa phrad dang ma phrad par/ /mi rigs mod kyi brten nas tha snyad tsam zhig 'byung 'gyur zhing //mi bden bzhin du'ang rang gi byad bzhin mdzes par bsgrub bya'i phyir/ /de ni yod pa ji ltar de bzhin 'dir yang shes rab gdong / /sbyang bar bya la nus pa mthong bar gyur pa'i gtan tshigs ni/ /'thad pa dang bral las kyang bsgrub bya rtogs zhes shes par bya//ji ltar gzugs brnyan zhes bya ba cung zad kyang yod pa ma yin pa'i phyir na/ nyi ma'i dkyil 'khor dang phrad pa'am ma phrad par skye zhes bya ba'i rtogs pa rnam pa thams cad du mi srid mod kyi/ 'on kyang rkyen gzugs nye ba las gzugs brnyan du dmigs pa na rtogs par 'dod pa'i don nges par byed pa de bzhin du/rang bzhin gyis stong pa'i sun 'byin pas sun dbyung bya sun 'byin pa dang / rang bzhin gyis stong zhing 'thad pa dang bral ba'i gtan tshigs kyis bsgrub par bya ba bsgrub pa yin la/ gnyis su thal bar yang mi 'gyur bas rang gi tshig la'ang thal bar mtshungs par mi rigs so zhes shes par bya'o//shes rab nyid gdong yin pas shes rab gdong ngo / /de sbyang ba ni ma rig pa spangs pas yongs su dag pa nyid do/ /de la nus pa mthong bar gyur pa'i zhes bya ba ni der nus mthu can du mthong ba zhes bya ba'i don to/ /gang gi phyir btags par yod pa rnams la gnyis su smra ba 'di mi rigs pa de nyid kyi phyir/gnyis la brten nas sun 'byin pa dang lan smra bas dbu ma pa la rnam pa thams cad du glags mi rnyed do/ /ji skad du 'phags pa'i lhas/ yod dang med dang yod med ces/ /gang la phyogs ni yod min pa/ /de la yun ni ring po la'ang //klan ka brjod par nus ma yin/ /zhes bya ba dang / de bzhin du/ stong pa nyid kyis brtsad byas te / /gang zhig lan 'debs smra byed pa/ /de yis thams cad lan btab min/ /bsgrub par bya dang mtshungs par 'gyur/ /zhes bya ba gsungs so/ /'dis ni skyed par byed pa'i rgyu yang rnam par bshad par bya'o//de la kha cig dbu ma pa'i bstan bcos 'dir skyed par byed pa'i rgyu'i skabs su bab pa yin gyi gsal bar byed pa ni ma yin la/ phrad pa dang ma phrad pa'i brgal ba yang gsal bar byed pa'i rgyu la yin gyi skyed par byed pa la ni ma yin pas kho bo cag gi tshig rnams la ltag chod kyi skabs med pa nyid do zhes gang smra bar byed pa de'i 'di ni lan ma yin te/gang gi phyir glags dang bcas pa'i dngos po brjod na pha rol po mi bzod pa nyid yin la/ skyed par byed pa ltar gsal bar byed pa la yang glags yod pa yin pas de'i lan mi rigs pa nyid do//gzhan yang 'dis bstan bcos su dam bcas pa'i don sgrub pa'i phyir yongs su bzung ba'i sgrub byed kyi sun 'byin pa rnams la ltag chod 'god par byed pa'i lan smra bar byed pa de'i phyir/ 'di ni gzhan gyis sun dbyung bar bya ba kho na yin pas kho bo cag gis btab pa'i lan kho na ches mdzes so//gzhan yang / gal te rang gi bsgrub bya go byed gtan tshigs dngos grub dang / /dngos su go bya nyid 'gyur bsgrub bya'i ngo bo'ang yod 'gyur na/ /phrad pa la sogs rigs pa nye bar sbyor bar 'gyur zhig na/ /de yang yod pa min pas khyod kyi yi chad 'ba' zhig yin/ / yongs su dag pa'i phyogs kyi skyon yongs su ma dag pa'i phyogs kyi steng du 'god pa khyod ni kho bo cag la don med par yid 'byung ba kho na yin par rtogs te/ dper na rab rib can gyis dmigs pa'i skra shad la sogs pa rnams kyi gcig nyid dang / mang po nyid dang / ring po nyid dang / zlum po nyid dang / nag po la sogs pa'i phyogs sun 'byin pas/ rab rib med pa rnams la mi gnod pa de bzhin du/ rang bzhin med pa'i rgyu dang 'bras bu rnam par dpyod pa na/ khyod kyis gnyis yongs su bzung nas sun 'byin pa bkod pas kyang mi gnod do/ /de nyid kyi phyir gang dag mig dang khab len la sogs pa ma phrad par rang gi bya ba byed par rnam par gzhag pa dpe de dag kyang bkag par rig par bya ste/de dag la yang thal bar 'gyur ba mtshungs pa'i phyir ro/ /gang zhig khyod rang bzhin med pa nyid kyi lam drang po btang nas rtog ge ngan pa'i lam shin tu 'khyog pa/rang gi rnam par rtog pa'i bzo bo ngan pas sbyar ba/ yang dag pa'i lam 'gegs par byed par spro ba/ te por tshegs che ba 'dis khyod la ci zhig bya/ gzhan yang / dngos rnams mtha' dag dngos po med par rtogs su gzhug par ni/ /nus pa ches sla ji lta de ltar rang bzhin gzhan dag la/khong du chud par bde blag tu ni nus pa ma yin no/ /rtog ge ngan pa'i dra bas 'jig rten ci ste 'dir gcol byed/ /ji ltar rmi lam dang sgyu ma la sogs pa rang gi phyogs la grub pa'i dpe rnams kho nas/ 'jig rten gyi dngos po rang bzhin med pa nyid du rtogs su gzhug par nus pa de ltar/'ga' zhig dngos po rnams rang bzhin dang bcas par 'dzin du gzhug par nus par sla ba ma yin te/ gnyi ga la grags pa'i dpe med pa'i phyir ro/ /de ltar yin dang / kho bos rtsod pa thams cad bzlog pa yin la lan yang sus kyang brjod par nus pa ma yin no//de'i phyir 'jig rten la don ma yin pa bya ba'i phyir/ su zhig gis sbed cing khyod 'jig rten nyon mongs dar gyi srin bu ltar rang gi rtog pa'i sbubs kyis gtums pa'i steng du rtog ge ngan pa'i srad bus bres pa'i rgya shin tu bsran te ma kun nas 'dzugs par ci ste byed/ rtsod pa 'di ni dor bar bya dgos te/ dngos po gzugs brnyan dang 'dra bas de dag thams cad la rang gi mtshan nyid med cing spyi'i mtshan nyid kyang med la mngon sum mam rjes su dpag pa'ang ci zhig yod/ 'di ni mngon sum gcig nyid kho nar zad de gang thams cad mkhyen pa'i ye shes so/ /gzhan yang /sun 'byin lhag ma gong du bstan pa yang ni shes byas nas/ /phrad pa la sogs phyogs kyi lan gyi ched du 'di gtang bya/ /sun ci phyin du rgol ba pa yang ji ltar yod min pa/ /de skad sngar bshad lhag ma phyogs 'di nyid kyis rtogs par bya/ /rten cing 'brel bar 'byung ba rnam par gzhag pa dang brten nas gdags pa rnam par gzhag pa gzhan gyi phyogs la sun 'byin pa gang bshad pa de nyid las sun 'byin pa lhag ma shes par byas nas/ci rgyus 'bras bu phrad nas skyed par byed dam/ 'on te ma phrad par zhes bya ba'i sun 'byin pa'i lan gyi don du gang gis smras pa de la sun 'byin gtang bar bya'o//bstan bcos las ni rtog pa ldog pa nyid brjod par 'dod pa yin la/ de yang kho bo cag gis bstan zin pa'i phyir bstan bcos las sun ci phyin du rgol ba nyid ga la yod/ 'dir bdag gis gzhan gyi phyogs bsal bar byas pa yang ma yin te/bsal bar bya ba'i dngos po med pa nyid kyi phyir ro/ /de'i phyir sun ci phyin du rgol ba pa nyid ga la yod/ gang gis na mtshan nyid byas pa 'di yang dag pa'i mtshan nyid du 'gyur ba sus rang gi phyogs gzhag cing gzhan gyi phyogs bzlog pa ste/de'i phyir sun ci phyin du rgol ba'i mtshan nyid 'di ni rnam pa thams cad du mi rigs so/ /de lta bu la sogs pa sun 'byin lhag ma ni phyogs 'di nyid kyis rtogs par bya'o/ /de la de nyid de las 'byung min zhes bya ba nas brtsams te/ rnam dpyod pa na myur du grol bar 'gyur/ /zhes bya ba'i bar 'dis ni chos kyi bdag med pa mngon par gsal bar byas so//nyon mongs skyon rnams ma lus 'jig tshogs la/ /lta las 'byung bar zhes bya ba la sogs pa nas 'di yan chad kyis ni gang zag gi bdag med pa gsal bar byas so/ /de'i phyir 'di ston zhing stong pa nyid kyi rab tu dbye ba brjod par 'dod nas bshad /bdag med 'di ni 'gro ba rnam dgrol phyir/ /chos dang gang zag dbye bas rnam gnyis gsungs/ /bdag med pa 'di ni mdor bsdus nas rnam pa gnyis su gsungs te/ chos kyi bdag med pa dang gang zag gi bdag med pa'o/ /yang ci'i phyir bdag med pa rnam pa gnyis nye bar bstan zhe na/bshad pa/ 'gro ba rnam dgrol phyir te/ bdag med pa rnam pa gnyis po 'di ni bcom ldan 'das kyis 'gro ba rnam par dgrol bar bya ba'i don du nye bar bstan to/ /de la gang zag gi bdag med pa ni rang sangs rgyas rnams dang / nyan thos rnams rnam par dgrol bar bya ba'i phyir bstan la byang chub sems dpa' rnams rnam pa thams cad mkhyen pa nyid thob pas rnam par dgrol bar bya ba'i phyir ni gnyi ga bstan to//nyan thos dang rang sangs rgyas rnams kyis kyang rten cing 'brel bar 'byung ba rkyen nyid 'di pa tsam mthong mod kyi/de lta na yang de dag la chos kyi bdag med pa yongs su rdzogs par sgom pa med de/ khams gsum na spyod pa'i nyon mongs pa spong ba'i thabs tsam zhig ni yod do/ /de dag la gang zag gi bdag med pa ma lus par sgom pa ni yod par rnam par gzhag go/ de ltar ston pas slar yang 'di nyid ni//gdul bya rnams la phye ste rnam mang gsungs/ /bdag med pa rnam pa gnyis po 'di ni slar bcom ldan 'das kyis gdul ba'i bsam pa sna tshogs pa nyid kyis mang por bstan to/ /de la/ spros dang bcas par stong pa nyid/ /bcu drug bshad nas mdor bsdus te/ / slar yang bzhir bshad de dag ni/ /theg chen du yang bzhed pa yin/ /ji skad du/ rab 'byor gzhan yang byang chub sems dpa'i theg pa chen po ni 'di lta ste/ nang stong pa nyid dang / phyi stong pa nyid dang / phyi nang stong pa nyid dang / stong pa nyid stong pa nyid dang / chen po stong pa nyid dang / don dam pa stong pa nyid dang / 'dus byas stong pa nyid dang / 'dus ma byas stong pa nyid dang / mtha' las 'das pa stong pa nyid dang / thog ma dang tha ma med pa stong pa nyid dang / dor ba med pa stong pa nyid dang / rang bzhin stong pa nyid dang / chos thams cad stong pa nyid dang / rang gi mtshan nyid stong pa nyid dang /mi dmigs pa stong pa nyid dang / dngos po med pa'i ngo bo nyid stong pa nyid do/ /zhes gsungs so/ /de skad du stong pa nyid bcu drug bstan nas/ rab 'byor gzhan yang dngos po ni dngos pos stong ngo / /dngos po med pa ni dngos po med pas stong ngo / /rang bzhin ni rang bzhin gyis stong ngo / / gzhan gyi dngos po ni gzhan gyi dngos pos stong ngo zhes slar yang stong pa nyid bzhi bstan te/ stong pa nyid 'di rnams ni theg pa chen po zhes bya'o/ /stong pa nyid dam stong pa nyid ma yin pa ni cung zad kyang yod pa ma yin te/ rnam pa de lta bus gdul bya'i skye bo'i dbang gis gzugs la sogs pa ltar kun rdzob tu bsnyad par zad do//ji skad du bstan bcos las/ gal te stong min cung zad yod/ /stong pa cung zad yod par 'gyur/ /mi stong cung zad yod min na/ /stong pa'ang yod par ga la 'gyur/ /stong ngo zhes kyang mi brjod de/ /mi stong zhes kyang mi bya zhing //gnyis dang gnyis min mi bya ste/ /gdags pa'i don du brjod par bya/ /zhes gsungs so/ /de la nang stong pa nyid kyi dbang du byas nas bshad pa/ gang phyir de yi rang bzhin de/ /yin phyir mig ni mig gis stong / /de bzhin rna ba sna dang lce/ /lus dang yid kyang bsnyad par bya//ther zug gnas pa ma yin dang / /'jig pa ma yin nyid kyi phyir/ /mig la sogs pa drug po yi/ /rang bzhin med nyid gang yin pa/ /de ni nang stong nyid du 'dod/ /ji skad du/ de la gang dag nang stong pa nyid du 'gyur ba na nang gi chos rnams gang dag yin zhe na/nang gi chos rnams zhes bya ba ni/ mig dang rna ba dang sna dang lce dang lus dang yid de/ de la ther zug tu gnas pa ma yin pa dang / 'jig pa ma yin pa nyid kyi phyir/ mig ni mig gis stong ste/ de ci'i phyir zhe na/ de'i rang bzhin de yin pa'i phyir ro zhes rgya cher gsungs pa lta bu'o//de la ther zug tu gnas pa ma yin pa nyid ni rang bzhin mi 'dor ba la bya'o/ /de yang dus cung zad cig gnas nas ldog par yang 'gyur bas 'jig pa ma yin pa nyid kyi phyir zhes gsungs so/ /'di skad bstan par 'gyur te/ dngos po gang zhig rang bzhin dang bcas pa nyid de ni gor ma chag par ther zug pa ma yin pa dang mi ldog pa zhig tu 'gyur dgos so//ji skad du/ rang bzhin rgyu dang rkyen dag las/ /'byung bar rigs pa ma yin no/ /rgyu dang rkyen las byung ba yin / /rang bzhin byas pa can du gyur / /rang bzhin byas pa yin no zhes/ /ji lta bur na rung bar 'gyur//rang bzhin nyid ni bcos min dang / /gzhan la ltos pa med pa yin/ /zhes gsungs so/ /yang ci gang zhig slob dpon gyis bstan bcos las khyad par du mdzad pa rnam pa de lta bu'i rang bzhin slob dpon gyis zhal gyis bzhes pa zhig yod dam zhe na/ gang gi dbang du mdzad nas bcom ldan 'das kyis de bzhin gshegs pa rnams byung yang rung / ma byung yang rung chos rnams kyi chos nyid 'di ni gnas pa nyid do zhes rgyas par gsungs pa chos nyid ces bya ba ni yod do/ /chos nyid ces bya ba 'di yang ci zhig /mig la sogs pa 'di dag gi rang bzhin no//de dag gi rang bzhin yang gang zhig ce na/ 'di dag ni bcos ma ma yin pa dang gzhan la ltos pa med pa gang yin pa ste/ ma rig pa'i rab rib dang bral ba'i shes pas rtogs par bya ba'i rang gi ngo bo'o/ /ci de yod dam med do zhes de skad du smra/ gal te de med na ni ci'i don du byang chub sems dpa' rnams pha rol tu phyin pa'i lam sgom par 'gyur te/gang gi phyir chos nyid de rtogs par bya ba'i phyir/ byang chub sems dpa' rnams de ltar dka' ba brgya phrag rtsom pa yin no/ /ji skad du/ rigs kyi bu don dam pa ni skye ba med pa dang / 'gag pa med pa dang /'jig pa med pa dang / 'ong ba med pa dang / 'gro ba med pa dang / yi ge rnams kyis brjod par bya ba ma yin pa dang / yi ge rnams kyis rab tu bsnyad du med cing spros pas rtogs pa ma yin te/ rigs kyi bu don dam pa ni brjod du med cing zhi ba 'phags pa rnams kyis so so rang gis rig par bya'o//rigs kyi bu don dam pa ni de bzhin gshegs pa rnams byung yang rung ma byung yang rung ste/ gang gi don du byang chub sems dpa' rnams skra dang kha spu dag bregs nas gos ngur smrig bgos te/ yang dag par dad pas khyim nas khyim med par rab tu byung zhing /rab tu byung nas kyang chos de nyid thob par bya ba'i phyir/ skra'am gos la me shor ba ltar brtson 'grus rtsom zhing gnas pa rnam par 'jig pa med pa'o/ /rigs kyi bu gal te don dam pa yod par ma gyur na ni tshangs par spyod pa med par 'gyur zhing de bzhin gshegs pa rnams byung ba don med par 'gyur ro//gang gi phyir don dam par de yod pa de'i phyir byang chub sems dpa' rnams la don dam pa la mkhas pa zhes bya'o zhes gsungs pa lta bu'o/ /'dir smras pa/ kye ma ma la gang zhig dngos po cung zad kyang mi 'dod cing / glo bur du bcos ma ma yin pa dang / gzhan la ltos pa med pa'i rang bzhin yang 'dod pa khyod ni phan tshun 'gal ba'i don brjod pa zhig go/ /brjod par bya ste/ khyod kyis bstan bcos kyi dgongs pa ma rig pa zhig ste/ 'di'i dgongs pa ni/ gal te mig la sogs pa rnams kyis rang gi ngo bo rten cing 'brel bar 'byung ba byis pa'i skye bos gzung bar bya ba gang yin pa de nyid de rnams kyi rang bzhin yin na ni//rang bzhin de phyin ci log tu gyur pas kyang rtogs pa'i phyir/ tshangs par spyod pa don med par 'gyur na/ gang gi phyir 'di nyid rang bzhin ma yin pa de'i phyir/de'i lta ba'i don du tshangs par spyod pa don dang bcas par 'gyur ro/ /de yang bdag gis kun rdzob kyi bden pa la ltos nas bcos ma ma yin pa nyid dang / gzhan la mi ltos pa nyid du brjod do/ /gang zhig byis pa'i skye bos blta bar bya ba ma yin pa de nyid ni rang bzhin du rigs la/de tsam gyis don dam pa dngos po ma yin zhing dngos po med pa yang ma yin te/ de ni rang bzhin gyis zhi ba nyid kyi phyir ro zhes bya ba 'di yin no/ /rang bzhin 'di ni slob dpon gyis zhal gyis bzhes pa 'ba' zhig tu ma zad kyi/ gzhan yang don 'di khas len du gzhug par nus pas rang bzhin 'di ni gnyi ga la grub pa nyid du yang rnam par gzhag go//gang dag me la sogs pa'i rang bzhin tsha ba la sogs pa yin par smra ba de dag gi ltar na ni/ rnam pa thams cad du mi rung ste/ rten cing 'brel bar 'byung ba nyid kyis bcos ma nyid yin pa'i phyir dang /ltos pa dang bcas pa'i phyir ro/ /yod pa nyid kyi phyir de la bcos ma nyid med pa dang / gzhan la ltos pa nyid med pa yod do zhes bya bar brjod par yang mi rigs te/ de la zhes bya ba 'dis mchog tu 'dzin pa'i dngos po med pa'i phyir la/ kun rdzob tu rnam pa de lta bu'i don bstan pa'i phyir te/rgya chen pos chog go/ /dkyus ma nyid rnam par bshad par bya'o/ /de la mig la sogs pa rnams mig la sogs pa rnams nyid kyis stong pa nyid du smras pas ni rang bzhin stong pa nyid yongs su gsal bar byas pa yin gyi/ mig ni nang gi byed pa dang bral ba'i phyir stong zhing gzung ba dang 'dzin pa'i bdag nyid kyis stong ngo zhes gcig la gcig med pa'i stong pa nyid ni ma yin no//de la phyi stong pa nyid ni/ gang phyir de yi rang bzhin de/ /yin phyir gzugs ni gzugs kyis stong / /sgra dang dri ro reg bya dang / /chos rnams nyid kyang de bzhin no/ / gzugs sogs rang bzhin med pa nyid/ /phyi rol stong pa nyid du 'dod/ /ji skad du/ de la phyi stong pa nyid gang zhe na/ phyi'i chos rnams zhes bya ba ni gzugs la sogs pa'o/ /de la ther zug tu gnas pa ma yin pa dang 'jig pa ma yin pa nyid kyi phyir/ gzugs ni gzugs kyis stong ste/de'i rang bzhin de yin pa'i phyir ro zhes gsungs te snga ma bzhin no/ /gnyis char rang bzhin med nyid ni/ /phyi nang stong pa nyid yin no/ /ji skad du/ phyi dang nang gi chos rnams phyi dang nang gi chos rnams kyi rang bzhin med pa nyid ni phyi dang nang gi stong pa nyid do zhes gsungs te snga ma bzhin no/ / chos rnams rang bzhin med pa nyid/ /mkhas pas stong pa nyid ces bsnyad/ /stong nyid de yang stong nyid kyi/ /ngo bos stong par 'dod pa yin/ /stong nyid ces bya'i stong nyid gang / /stong nyid stong nyid du 'dod de/ /stong nyid dngos po'i blo can gyi/ /'dzin pa zlog phyir gsungs pa yin/ /ji skad du/ de la stong pa nyid gang zhe na/ chos rnams kyi stong pa nyid gang yin pa'i stong pa nyid des stong pa nyid stong pa 'di ni stong pa nyid stong pa nyid ces bya'o zhes gsungs so/ /gang dag stong pa nyid la yang dngos por mngon par zhen pa de dag gi stong pa nyid la dngos por 'dzin pa bzlog pa'i don du nye bar bstan te/ji skad du/ kun rtog thams cad gzhom pa'i phyir/ /stong nyid bdud rtsi bstan par mdzad/ /gang la de la'ang 'dzin yod pa/ /de ni khyod kyis smad par mdzad/ /ces gsungs so/ /sems can snod kyi 'jig rten ni/ /ma lus khyab byed nyid phyir dang / /tshad med dpe yi mu mtha' ni//med phyir phyogs rnams chen po nyid/ /phyogs las logs shig tu sems can gyi 'jig rten med cing snod kyi 'jig rten med pas 'gro ba ma lus pa la khyab par byed pa nyid kyis phyogs rnams chen po nyid do/ /gang gi phyir byams pa la sogs pa sgom pa ni phyogs yongs su bcad nas sgom pas na/phyogs rnams tshad med pa'i dpe can du gnas pa de'i phyir mu med pas kyang chen po nyid do/ /'di dag bcu char phyogs rnams kyis/ /stong pa nyid ni gang yin te/ /chen po stong pa nyid yin te/ /chen por 'dzin pa bzlog phyir gsungs/ /ji skad du/chen po stong pa nyid gang zhe na/ shar phyogs ni shar phyogs kyis stong ngo zhes rgya cher gsungs pa lta bu'o/ /chen po stong pa nyid de ni gang dag phyogs tshad med do snyam du phyogs rnams la chen por 'dzin pa de dag gi 'dzin pa de bzlog pa'i phyir bstan te/ 'di ltar bye brag pa dag gis phyogs rnams rdzas nyid du rtogs so//de ni dgos pa mchog yin pas/ /don dam mya ngan 'das pa yin/ /de ni de yis stong nyid gang / /de ni don dam stong nyid de/ /mya ngan 'das dngos blo can gyi/ /'dzin pa bzlog par bya ba'i phyir/ /don dam mkhyen pas don dam pa//stong pa nyid ni bstan pa mdzad/ /ji skad du/ de la don dam pa stong pa nyid gang zhe na/ don dam pa zhes bya ba ni mya ngan las 'das pa ste/ ther zug tu gnas pa ma yin pa dang / 'jig pa ma yin pa nyid kyi phyir/ mya ngan las 'das pa ni mya ngan las 'das pas stong ste/ zhes rgya cher 'byung ngo / /de yang mya ngan las 'das pa la dngos por mngon par zhen pa rnams kyi dngos por 'dzin pa bzlog par bya ba'i phyir gsungs so/ /don gyi sgra ni dgos pa'i tshig gam shes bya'i tshig go/ /rkyen las byung phyir khams gsum po/ /'dus byas yin par nges par bsnyad//de ni de yis stong nyid gang / /de ni 'dus byas stong nyid gsungs/ /ji skad du/ de la 'dus byas stong pa nyid gang zhe na/ 'dus byas zhes bya ba ni khams gsum mo/ /de la 'dod pa'i khams ni 'dod pa'i khams kyis stong ste zhes rgya cher gsungs pa lta bu'o/ /gang la skye gnas mi rtag nyid//de dag med pa 'dus ma byas/ /de ni de yis stong nyid gang / /de ni 'dus ma byas stong nyid/ /de yis zhes bya ba ni 'dus ma byas kyis zhes bya ba'i don to/ /ji skad du/ de la 'dus ma byas stong pa nyid gang zhe na/ 'dus ma byas zhes bya ba ni/ gang la skye ba med pa dang /'gag pa med pa dang / 'jig pa med pa dang / gnas pa las gzhan du 'gyur ba nyid med pa'o/ de la 'dus ma byas ni 'dus ma byas kyis stong ste zhes gsungs pa lta bu ste snga ma bzhin no/ /gang la mtha' ni yod min pa/ /de ni mtha' las 'das par brjod/ / de de kho nas stong pa nyid/ /mtha' las 'das pa stong nyid bsnyad/ /ji skad du/ de la mtha' las 'das pa stong pa nyid gang zhe na/ mtha' zhes bya ba ni rtag pa'i mtha' dang chad pa'i mtha' ste/ gang la mtha' yod pa ma yin pa de ni mtha' las 'das pa'o/ /mtha' las 'das pa ni mtha' las 'das pas stong ste zhes rgya cher gsungs pa lta bu'o//thog ma dang po tha ma mtha'/ /de dag med pas 'khor ba ni/ /thog ma tha ma med par brjod/ /'gro 'ong bral zhing rmi lam lta'i/ /srid 'di de yis dben nyid gang / /de ni thog ma dang tha ma med pa stong pa nyid do zhes bstan bcos las ni nges par bsnyad//ji skad du/ de la thog ma dang tha ma med pa stong pa nyid gang zhe na/ gang la thog ma dang tha ma mi dmigs pa de la dbus med cing / gang la thog ma dang tha ma dbus ma dmigs pa de la 'ong ba dang 'gro ba med do/ /de la ther zug tu gnas pa ma yin pa dang / 'jig pa ma yin pa nyid kyi phyir/ thog ma dang tha ma dang dbus rnams ni thog ma dang tha ma dang dbus rnams kyis stong ste zhes bya ba la sogs pa gsungs pa lta bu'o/ /thog ma zhes bya ba ni dang po la bya'o/ /tha ma zhes bya ba ni mtha'o/ /dor ba zhes bya 'thor ba dang / /'bor ba la ni nges par brjod//dor med stong pa med pa ste/ /'ga' yang 'bor med gang yin pa'o/ /dor ba med pa de nyid kyis/ /de nyid stong pa nyid gang yin/ /de de'i phyir na dor med pa/ /stong pa nyid ces bya bar brjod/ /ji skad du/ de la dor ba med pa stong pa nyid gang zhe na/ dor ba ni 'thor ba dang 'bor ba dang gtong ba'o//de la dor ba med pa ni dor ba med pas stong ste zhes rgya cher gsungs pa lta bu'o/ /dor ba ni gtong ba yin la dor ba med pa ni gang la 'ga' yang gtong ba med pa'o zhes bya ba'i don to/ /'dus byas la sogs ngo bo nyid/ /gang phyir slob ma rang sangs rgyas//rgyal sras de bzhin gshegs rnams kyis/ /ma mdzad de phyir 'dus byas la / /sogs pa rnams kyi ngo bo nyid/ /rang bzhin nyid du bsnyad pa ste/ /de nyid kyis de stong nyid gang / /de ni rang bzhin stong pa nyid/ /ji skad du/ de la rang bzhin stong pa nyid gang zhe na/ gang chos rnams kyi rang bzhin ma byas shing mngon par 'dus ma byas pa ste/ de ni nyan thos rnams kyis ma byas zhes rgya cher gsungs pa lta bu'o/ /khams bco brgyad dang reg drug dang / /de las byung ba'i tshor ba drug /gzugs can gzugs can min de bzhin/ /'dus byas 'dus ma byas chos rnams//chos de dag ni thams cad kyi/ /de dag gis dben stong nyid gang / /yin pa 'di ni chos thams cad stong pa nyid do/ /ji skad du/ de la chos thams cad stong pa nyid gang zhe na/ chos thams cad ces bya ba ni 'dus byas rnams dang / 'dus ma byas rnams dang zhes bya ba la sogs pa gsungs pa lta bu'o//de la khams bco brgyad ni/ nang gi skye mched drug dang / phyi'i drug dang rnam par shes pa'i tshogs drug go/ /reg pa drug ni mig gi 'dus te reg pa nas yid kyi 'dus te reg pa zhes bya ba'i bar ro/ /reg pa'i rgyu can gyi tshor ba yang drug go//de la chos thams cad ni chos thams cad kyis stong ngo / /gzugs rung la sogs dngos med gang / /de ni rang mtshan stong pa nyid/ /yang gzugs la sogs pa rnams kyi rang gi mtshan nyid ci yin zhe na/ rgyas par bstan pa'i phyir bshad pa/ gzugs ni gzugs rung mtshan nyid can/ /tshor ba myong ba'i bdag nyid can/ /'du shes mtshan mar 'dzin pa ste/ /'du byed mngon par 'du byed pa'o/ /yul la so sor rnam rig pa/ /rnam shes rang gi mtshan nyid de/ /phung po sdug bsngal rang mtshan nyid/ /khams kyi bdag nyid sbrul gdug 'dod//'dzin par chos mthun pa'i sgo nas khams rnams ni sbrul gdug pa'i mtshan nyid can no zhes bya ba'i don to/ /skye mched rnams ni sangs rgyas kyis/ /skye ba'i sgor gyur nyid du gsungs te sdug bsngal 'byung zhing skye ba'i sgor gyur pa nyid kyi phyir ro/ / rten cing 'brel bar 'byung ba gang / /de ni 'du 'phrod mtshan nyid do/ /rten cing 'brel bar 'byung ba ni 'du 'phrod kyi mtshan nyid can / rten cing 'brel bar 'byung ba 'du 'phrod kyis rab tu phye ba nyid kyi phyir ro/ /gtong ba sbyin pa'i pha rol phyin/ /tshul khrims gdung med mtshan nyid bzod//khro med mtshan nyid brtson 'grus kyi/ /kha na ma tho med nyid do/ /brtson 'grus ni dge ba yongs su 'dzin pa'i mtshan nyid can yin pa'i phyir ro/ /bsam gtan sdud pa'i mtshan nyid can te/ dge ba'i chos thams cad sdud par byed pa nyid kyi phyir ro/ /shes rab chags med mtshan nyid do//mya ngan las 'das par bgrod pa'i phyir 'ga' la yang chags pa med pa'i phyir ro/ /pha rol phyin pa drug rnams kyi/ /mtshan nyid 'di dag yin par brjod/ /bsam gtan rnams dang tshad med dang / /de bzhin gzhan gang gzugs med pa/ /de dag yang dag mkhyen pa yis//mi 'khrugs mtshan nyid can du gsungs/ /de dag ni bcom ldan 'das kyis khro ba med pa'i mtshan nyid can du gsungs te/ de dag khong khro ba spangs pas 'thob pa'i phyir ro/ /byang chub phyogs ni sum cu bdun/ /nges par 'byung byed rang mtshan nyid/ / nges par 'byung ba ni nges par 'byung ba ste thar pa'o zhes bya ba'i don to/ /'khor ba las 'da' ba'i rgyu yin pa'i phyir nges par 'byung bar byed par nus pas nges par 'byung bar byed pa ste/ thar pa thob par byed pa'i mtshan nyid can no zhes bya ba'i don to/ /bsam gtan la sogs pa dag ni sngar bshad zin to//stong pa nyid kyi mtshan nyid ni/ /dmigs pa med pas rnam dben nyid/ /dngos po ma dmigs pas rnam par rtog pa'i dri mas nye bar ma sbags pa'i phyir na/ rnam par thar pa'i sgo stong pa nyid ni rnam par dben pa'i mtshan nyid can no/ /mtshan ma med pa zhi nyid de//gsum pa'i mtshan nyid sdug bsngal dang gti mug med/ rnam par thar pa'i sgo mtshan ma med pa ni/ mtshan ma ma dmigs pa'i sgo nas zhi ba'i mtshan nyid can no/ /gsum pa'i zhes bya ba ni rnam par thar pa'i sgo smon pa med pa zhes bya ba'i don to/ /rnam par thar pa'i sgo smon pa med pa 'di ni sdug bsngal dang gti mug med pa'i mtshan nyid can te/'du byed sdug bsngal gyi bdag nyid can rnams la yang dag par rjes su lta zhing shes rab kyis 'du byed kyi rang bzhin la lta ba na smon par mi byed pa'i phyir na/ rnam par thar pa'i sgo gsum pa ni sdug bsngal dang gti mug med pa'i mtshan nyid can no//rnam thar rnams kyis mtshan nyid rnam par grol byed pa'o/ /rnam par thar pa brgyad ni 'di lta ste/ gzugs can gzugs rnams la lta ba ni rnam par thar pa dang po'o/ /nang gzugs su 'du shes pas phyi rol gyi gzugs rnams la lta ba zhes bya ba ni gnyis pa'o//sdug pa'i rnam par thar pa bsam gtan bzhi pa'i bdag nyid can ni gsum pa'o/ /gzugs med pa bzhi ni ji skad bshad pa bzhin no/ /'du shes dang / tshor ba 'gog pa ni brgyad pa ste/ rnam par thar pa 'di dag ni snyoms par 'jug pa'i sgrib pa las grol bar byed pa'i phyir/rnam par grol bar byed pa'i mtshan nyid can no/ /stobs rnams shin tu rnam par ni/ /gtan la 'bebs pa'i rang bzhin gsungs/ /'chad par 'gyur ba'i stobs bcu ni shin tu gtan la 'bebs pa'i mtshan nyid can du rig par bya ste/shin tu rnam par gtan la 'bebs pa nyid kyis thogs pa med pa'i mtshan nyid yin pa'i phyir na stobs rnams zhes bya'o/ /skyob pa'i mi 'jigs pa rnams ni/ /shin tu brtan pa'i ngo bo yin/ /mi 'jigs pa ni bzhi yin te/ /'di lta ste/nga yang dag par rdzogs par sangs rgyas so zhes dam bcas na/ kye ma de la chos 'di rnams mngon par rdzogs par sangs ma rgyas so zhes dge sbyong ngam/ bram ze'am/ lha'am/ bdud dam/ tshangs pa'am su yang rung ste/ 'jig rten na chos dang mthun par bdag la rgol lo snyam pa'i rgyu yang dag par rjes su mi mthong ste zhes rgyas par 'byung zhing /kye ma nga zag pa zad do zhes dam bcas na/ kye ma de la zag pa de rnams zad par ma gyur to zhes bya bar bdag la dge sbyong ngam zhes bya ba la sogs pa 'byung ngo / /ngas gang bar du gcod pa'i chos su bstan pa de dag bsten na bar du gcod pa'i chos su mi 'gyur ba de lta bu'i gnas med do zhes bya ba ni snga ma bzhin no//gang yang ngas lam 'phags pa'i nges par 'byin pa de byed pa'i sdug bsngal yang dag par zad par 'gyur bar nges par 'byung ba bstan pa de dag la nan tan byas na/sdug bsngal yang dag par zad par 'gyur bar nges par mi 'byung ngo zhes bya ba de lta bu'i gnas med de zhes bya ba rgyas par 'byung ngo / /'di dag ni shin tu brtan pa'i mtshan nyid can te sus kyang gzhan du 'gyur bar bya bar mi nus pa'i phyir ro/ /so so yang dag rig rnams ni//spobs sogs chad med mtshan nyid can/ /so so yang dag par rig pa rnams ni/ 'chad par 'gyur ba rnams te de dag ni chad pa med pa'i mtshan nyid can no/ /'gro la phan pa nyer sgrub pa/ /byams pa chen po zhes bya'o/ /byams pa chen po ni phan pa nye bar sgrub pa'i mtshan nyid can no//sdug bsngal can rnams yongs skyob pa'i / /thugs rje chen po'o/ / thugs rje chen po ni/ sems can sdug bsngal bar gyur pa yongs su skyob pa'i mtshan nyid can no/ /dga' ba ni rab dga'i mtshan nyid dga' ba chen po ni/ rab tu dga' ba nyid kyi mtshan nyid can no//btang snyoms ni/ ma 'dres mtshan nyid can zhes bya ba / btang snyoms chen po ni/ rjes su chags pa dang / khong khro ba la sogs pa dang bral ba'i phyir ma 'dres pa'i mtshan nyid can no/ /sangs rgyas chos ni ma 'dres pa/ /bcu dang brgyad du gang 'dod dag /gang phyir ston des mi 'phrogs pa/ /de phyir mi 'phrogs rang mtshan nyid/ /de la sangs rgyas kyi chos ma 'dres pa ni bco brgyad de/ 'di lta ste/ rab 'byor gang gi nam la de bzhin gshegs pa bla na med pa yang dag par rdzogs pa'i byang chub tu mngon par rdzogs par sangs rgyas pa dag dang /gang gi nam la len pa mi mnga' bar mya ngan las 'das par 'gyur ba de'i bar du de bzhin gshegs pa la 'khrul pa mi mnga'o/ /ca co mi mnga'o/ /bsnyel ba mi mnga'o/ /thugs mnyam par ma bzhag pa mi mnga'o/ /de bzhin du tha dad pa'i 'du shes dang / so sor ma brtags pa'i btang snyoms dang /'dun pa nyams pa dang / brtson 'grus nyams pa dang / dran pa nyams pa dang / ting nge 'dzin nyams pa dang / shes rab nyams pa dang / rnam par grol ba nyams pa mi mnga'o/ /lus kyi las thams cad ye shes sngon du 'gro zhing ye shes kyi rjes su 'brang /ngag gi las thams cad ye shes sngon du 'gro zhing ye shes kyi rjes su 'brang / yid kyi las thams cad ye shes sngon du 'gro zhing ye shes kyi rjes su 'brang / 'das pa'i dus la ma chags ma thogs pa'i ye shes gzigs pa 'jug /ma 'ongs pa dang da ltar byung ba la yang de ltar brjod par bya'o//de lta bu'i sangs rgyas kyi chos ma 'dres pa bco brgyad gang dag yin pa de dag ni mi 'phrogs pa'i mtshan nyid can te/ 'khrul pa la sogs pa mi mnga' bas glags med pa nyid kyis thub par mi nus pa nyid kyi phyir ro/ /'di dag gis bshad pa ni 'phags pa gzungs kyi dbang phyug rgyal pos zhus pa las rig par bya'o//rigs kyi bu gzhan yang gang gi phyir de'i lus 'khrul pas byis pa'am mkhas pas kyang rung ste/ chos dang mthun par rtsod par 'gyur ba'i 'khrul pa de bzhin gshegs pa la med do/ /de ci'i phyir zhe na/sangs rgyas bcom ldan 'das rnams ni lus kyi las 'khrul pa med pa dang ldan pa ste/ kun tu lta ba dang rnam par lta ba dang bskum pa dang myong ba dang / chos gos sbyar ma dang / thang pa dang / lhung bzed dang / chos gos thogs pas/ spyod lam mdzes par spyod lam bzhi yod pa dang /grong dang grong khyer dang grong rdal du 'jug pa dang 'byung ba na rkang mthil sa la mi reg ste/ 'khor lo rtsibs stong pa sa las 'byung zhing dri yid du 'ong ba'i pad+ma mngon par 'byung ste/ de la de bzhin gshegs pa'i rkang pa 'jog go/ /de la gang byol song gi skye gnas su song ba'i sems can gang dag de bzhin gshegs pa'i rkang pa la reg pa de dag zhag bdun rab tu bde ba dang ldan par 'gyur ro//shi 'phos nas kyang lha dag gi nang du skye bar 'gyur ro/ /de bzhin gshegs pa'i sku la chos gos sor bzhi tsam gyis mi reg mod kyi / rdzi rlung yug pa'i rlung gis kyang bzlog par mi nus so//lus kyi 'od kyis mnar med pa'i bar gyi sems can bde bar byed de/ de'i phyir de bzhin gshegs pa'i lus la 'khrul pa med ces bya'o/ /byis pa'am mkhas pa dag kyang rung ste/ chos dang mthun par rtsod par 'gyur ba'i ngag gi 'khrul pa de bzhin gshegs pa la med do//de ci'i phyir zhe na/ rigs kyi bu de bzhin gshegs pa ni dus su smra ba/ tshig tu smra ba/ yang dag par smra ba/ ji skad smras pa de bzhin byed pa'o/ /shin tu nges pa'i tshig dang ldan pa'o/ /sems can thams cad tshim par byed pa'i tshig dang ldan pa'o//mi zlos pa'i tshig dang ldan pa'o/ /don dang tshig 'brus brgyan pa'i tshig dang ldan pa'o/ /skad cig brjod pas sems can thams cad kyi bsam pa tshim par byed pa ste/ de'i phyir de bzhin gshegs pa'i ngag 'khrul pa med ces bya'o/ /gang gi phyir de'i sems 'khrul pas byis pa'am mkhas pas kyang rung ste/chos dang mthun par rtsod par 'gyur ba'i sems 'khrul pa de bzhin gshegs pa la med do/ /de ci'i phyir zhe na/ 'di ltar mnyam par gzhag pa'i gnas mi 'dor zhing sangs rgyas kyi bya ba thams cad byed kyang sems der mi gtong zhing chos thams cad la chags pa med pa'i ye shes mthong ba 'jug ste/de'i phyir de bzhin gshegs pa'i sems la 'khrul pa med ces bya'o/ /ji ltar de'i sems 'khrul pa med pa de bzhin du 'khrul pa thams cad spangs pa'i phyir sems can rnams la chos ston te/ 'di ni de bzhin gshegs pa'i de bzhin gshegs pa'i las bco lnga pa'o//'di sangs rgyas kyi chos ma 'dres pa ni dang po'o/ /rigs kyi bu gzhan yang de'i ca co gang las bdud dam bdud kyi ris kyi lha'am gzhan mu stegs can dag gis glags rnyed par 'gyur ba'i ca co de bzhin gshegs pa la med do/ /de ci'i phyir zhe na/de bzhin gshegs pa la ca co'am rjes su ca co med do/ /de ci'i phyir zhe na/ de bzhin gshegs pa ni rjes su chags pa dang khong khro ba dang bral ba/ sems can thams cad kyis bkur sti byas kyang mtho bar mi sems/ sems can thams cad kyis bkur sti ma byas kyang sro shi bar mi 'gyur ro//gang gi phyir de 'gyod pas rjes su ca co 'byung bar 'gyur bar bya dka' ba'i bya ba'am/ mthar ma phyin pa cung zad kyang de bzhin gshegs pa la med do/ /de bzhin gshegs pa ni 'jig rten gang dang yang rtsod pa ma yin te/ de'i phyir de bzhin gshegs pa la ca co med do//de bzhin gshegs pa ni nyon mongs pa med pa la gnas pa ste/ nga'i ba med pa yongs su 'dzin pa med pa/ len pa med pa mdud pa thams cad dang bral ba ste/ de'i phyir de bzhin gshegs pa la ca co med do/ /ji ltar de la ca co med pa de bzhin du sems can thams cad kyi ca co thams cad spang ba'i phyir chos ston te/'di ni de bzhin gshegs pa'i de bzhin gshegs pa'i las bcu drug pa'o/ /'di sangs rgyas kyi chos ma 'dres pa ni gnyis pa'o/ /rigs kyi bu gzhan yang bsnyel ba gang gis chos gang la yang rmongs par 'gyur ba'i bsnyel ba de bzhin gshegs pa la med do//de ci'i phyir zhe na/ de bzhin gshegs pa ni bsam gtan dang rnam par thar pa dang ting nge 'dzin dang snyoms par 'jug pa thams cad la bsnyel ba med do/ /de bzhin gshegs pa ni sems can thams cad kyi sems kyi spyod pa dang g.yo ba la rnam par lta zhing so so ci rigs par chos ston pa la bsnyel ba med do//de bzhin gshegs pa ni don dang chos dang nges pa'i tshig dang spobs pa so so yang dag par rig pa rnams la bsnyel ba med do/ /de bzhin gshegs pa ni 'das pa dang ma 'ongs pa dang da ltar byung ba la chags pa med pa'i ye shes mthong ba la bsnyel ba med do//de bzhin gshegs pa ji ltar bdag la bsnyel ba med pa de ltar sems can thams cad brjed par mi 'gyur bar chos ston te/ 'di ni de bzhin gshegs pa'i de bzhin gshegs pa'i las bcu bdun pa'o/ /'di sangs rgyas kyi chos ma 'dres pa ni gsum pa'o//rigs kyi bu gzhan yang de bzhin gshegs pa la sems mnyam par ma bzhag pa med do/ de bzhin gshegs pa ni 'chag gam zhes bya ba rgyas par 'byung ste/ rtag tu mnyam par bzhag pa'i ting nge 'dzin zab mo'i mchog thob pa sgrib pa med pa'i bsam gtan la bsam gtan byed pa ste/de bzhin gshegs pa'i byin gyi rlabs ma gtogs par sems can gyi ris na sems can gang mnyam par bzhag kyang rung mnyam par ma bzhag kyang rung ste/ su yang de bzhin gshegs pa'i sems la blta bar nus pa med do/ /de bzhin gshegs pa ji ltar rtag tu mnyam par bzhag pa de ltar sems can rnams la chos ston te/'di ni de bzhin gshegs pa'i de bzhin gshegs pa'i las bco brgyad pa'o/ /'di sangs rgyas kyi chos ma 'dres pa ni bzhi pa'o/ /rigs kyi bu gzhan yang tha dad pa'i 'du shes gang gis sems mi mnyam par gnas par 'gyur ba'i tha dad pa'i 'du shes de bzhin gshegs pa la med do//de ci'i phyir zhe na/ nam mkha' bzhin du zhing mi zad pa'i phyir/ de bzhin gshegs pa zhing rnams la tha dad pa'i 'du shes med do/ /rang bzhin gyis bdag med pa'i phyir/ de bzhin gshegs pa sems can rnams la'ang tha dad pa'i 'du shes pa med do//chos kyi dbyings 'dres pa med cing mnyam pa nyid du shes pa'i phyir/ de bzhin gshegs pa sangs rgyas rnams la tha dad pa'i 'du shes med do/ /'dod chags dang bral ba'i chos nyid kyi phyir/ de bzhin gshegs pa chos rnams la tha dad pa'i 'du shes med do/ / de bzhin gshegs pa ni tshul khrims dang ldan pa rnams la rjes su chags pa med/ ngang tshul ngan pa can rnams la khong khro ba med/ phan btags pa rnams la lan du phan 'dogs pa med/ gnod pa byas pa rnams la lan du gnod pa byed pa med/ gdul bar 'os pa rnams la ri mor ma yin/log par nges pa rnams la smod pa ma yin gyi/ de bzhin gshegs pa ni chos thams cad la mnyam pa nyid du gnas pa ste/ de'i phyir zhes bya ba la sogs pa 'byung ste/ 'di sangs rgyas kyi chos ma 'dres pa ni lnga pa'o/ /rigs kyi bu gzhan yang de bzhin gshegs pa la so sor ma brtags pa'i btang snyoms med do//de ci'i phyir zhe na/ de bzhin gshegs pa'i btang snyoms ni lam bsgoms pa yin gyi/ lam ma bsgoms pa ma yin te/ de bzhin du de bzhin gshegs pa'i btang snyoms ni shes rab bsgoms pa yin gyi ma bsgoms pa yang ma yin no//de bzhin gshegs pa'i btang snyoms ni ye shes dang ldan pa yin pa dang / 'jig rten las 'das pa yin gyi 'jig rten par ltung ba ma yin no zhes bya ba nas/ de bzhin gshegs pa ni btang snyoms chen po de lta bu phun sum tshogs pa/ sems can rnams la btang snyoms de lta bu yongs su rdzogs par bya ba'i phyir chos ston te/'di ni de bzhin gshegs pa'i las nyi shu pa'o zhes bya ba'i bar du 'byung ste/ 'di sangs rgyas kyi chos ma 'dres pa ni drug pa'o/ /rigs kyi bu gzhan yang de bzhin gshegs pa'i 'dun pa nyams pa med pa'o / / de la 'dun pa gang zhe na/ 'di lta ste/ dge ba'i chos la 'dun pa'o/ /de yang gang zhe na/ byams pa chen po la de bzhin gshegs pa'i 'dun pa nyams pa med do/ /de bzhin du snying rje chen po dang / chos ston pa dang / sems can 'dul ba dang / sems can yongs su smin par bya ba dang /rab tu dben pa dang / sems can byang chub yang dag par 'dzin du bcug pa la 'dun pa nyams pa med do/ /dkon mchog gsum gyi rigs rgyun mi gcod pa la 'dun pa nyams pa med do/ /de bzhin gshegs pa ni 'dun pas 'gro ba ma yin gyi/de bzhin gshegs pa'i 'dun pa ni ye shes sngon du 'gro ba nyid de de'i phyir zhes bya ba rgyas par 'byung ste/ 'di sangs rgyas kyi chos ma 'dres pa ni bdun pa'o/ /rigs kyi bu gzhan yang de bzhin gshegs pa'i brtson 'grus nyams pa med do/ /de la de bzhin gshegs pa'i brtson 'grus ni 'di yin te/'di lta ste/ 'dul ba'i sems can rnams yal bar mi 'dor ba'i brtson 'grus dang / chos nyan pa rnams la brnyas pa med pa'i brtson 'grus so/ /gal te de bzhin gshegs pas chos kyi snod chos nyan pa gang bskal par yang chos nyan pas skyo bar mi 'gyur ba rnyed na de bzhin gshegs pa yang chos ston zhing kha zas dang bral ba'i rgyud du gyur kyang bskal par yang mi ldang ngo //de bzhin gshegs pa ni sems can la lta bas tha na gang na sangs rgyas kyis 'dul ba'i sems can gcig gi phyir yang sangs rgyas kyi zhing gang gA'i klung gi bye ma snyed 'da' zhing 'gro ste/de bzhin gshegs pa la lus ngal ba'am/ ngag ngal ba'am sems ngal ba med do/ /de bzhin gshegs pa ni sems shin tu sbyangs pa brtson 'grus brtsams pa brtson 'grus kyi bsngags pa smra ba ste/ yang dag par sbyor ba'i brtson 'grus gang gis sems can rnams 'phags pa'i rnam par grol ba thob par 'gyur ba'i brtson 'grus de sems can rnams la bsngags pa byed de zhes bya ba la sogs pa 'byung ste/'di sangs rgyas kyi chos ma 'dres pa ni brgyad pa'o/ /rigs kyi bu gzhan yang de bzhin gshegs pa'i dran pa ni yong ye nyams pa med do//de ci'i phyir zhe na/ de bzhin gshegs pa la bsnyel ba med do/ /rigs kyi bu de bzhin gshegs pas bla na med pa yang dag par rdzogs pa'i byang chub mngon par rdzogs par sangs rgyas ma thag tu 'das pa dang / ma 'ongs pa dang /da ltar byung ba'i sems can rnams kyi sems kyi rgyud la rnam par bltas kyang de bzhin gshegs pa la bsnyel ba shin tu med do/ /sems can gyi spyod pa ji lta ba bzhin du shes kyang de la de bzhin gshegs pas ye shes gtong ba yang med do/ /de bzhin gshegs pas ni phung po gsum du rnam par dgod pa dang /sems can gyi dbang po la 'jug pa dang / sems can gyi bsam pa la 'jug pa dang / sems can gyi spyod pa la rnam par lta bas dran pa nyams pa med de/ de bzhin gshegs pa ni dran par byas sam bsams sam rnam par brtags te/ sems can rnams la chos ston pa med do/ /ston kyang nyams pa med do/ /de ci'i phyir zhe na/ de bzhin gshegs pa'i dran pa ni ji ltar yang nyams pa med do/ /de ji ltar bdag ces bya ba rgyas par 'byung ste/ 'di sangs rgyas kyi chos ma 'dres pa ni dgu pa'o/ /rigs kyi bu gzhan yang de bzhin gshegs pa'i ting nge 'dzin nyams pa med do//de bzhin gshegs pa'i ting nge 'dzin gang yin pa de ni chos thams cad mnyam pa nyid dang mi mnyam pa ma yin pa dang / ji lta ba bzhin no/ /ci'i phyir de bzhin gshegs pa'i ting nge 'dzin nyams par mi 'gyur zhe na/ de bzhin nyid gang dang mnyam pa de dang ting nge 'dzin mnyam mo/ /ting nge 'dzin gang dang mnyam pa de dang de bzhin gshegs pa mnyam pa ste/ de'i phyir mnyam par gzhag pa zhes bya ba nas/ khams gsum char la yang mi gnas pa'i phyir nyams pa med de/ de'i phyir de bzhin gshegs pa'i ting nge 'dzin nyams pa med ces bya'o//de bzhin gshegs pa sems can thams cad kyang ting nge 'dzin thob par bya ba'i phyir zhes bya ba la sogs pa'i bar du 'byung ste/ 'di sangs rgyas kyi chos ma 'dres pa ni bcu pa'o/ /rigs kyi bu gzhan yang de bzhin gshegs pa'i shes rab nyams pa med do//shes rab gang zhe na/ gang chos thams cad rab tu shes pa ste gzhan gyi dring mi 'jog pa'i shes pa'o/ /sems can gzhan dag dang / gang zag gzhan rnams la chos yang dag par ston pa'i shes pa'o/ /so so yang dag par rig pa la mkhas pas tshig rab tu dbye ba shes pa'o//tshig gcig la 'jug pas bskal pa brgya stong du gnas shing ston pa shes pa'o/ /ji ltar dris pa bzhin du the tshom gcod pa'i shes pa'o/ /thams cad du chags pa med pa'i shes pa'o/ /theg pa gsum rnam par dgod par bstan pa shes pa'o//sems can gyi sems kyi spyod pa brgyad khri bzhi stong du yongs su shes pa'i shes pa'o/ /chos kyi phung po brgyad khri bzhi stong so so ci rigs par ston pa shes pa'o/ /'di ni de bzhin gshegs pa'i shes rab mtha' yas pa thug pa med pa zad pa med pa tshad med pa bstan pa'o//ji ltar de bzhin gshegs pa la nyams pa med pa de ltar sems can thams cad kyang shes rab mi zad par bya ba'i phyir chos ston te/ 'di ni de bzhin gshegs pa'i de bzhin gshegs pa'i las nyi shu rtsa lnga pa'o/ /'di sangs rgyas kyi chos ma 'dres pa ni bcu gcig pa'o//rigs kyi bu gzhan yang de bzhin gshegs pa'i rnam par grol ba nyams pa med do/ /de la rnam par grol ba ste/ nyan thos rnams kyi rnam par grol ba ni sgra'i rjes su 'gro ba'o/ /rang sangs rgyas rnams kyi rnam par grol ba ni rkyen khong du chud pa'o//sangs rgyas rnams kyi rnam par grol ba ni chags pa dang 'dzin pa thams cad dang bral bas rnam par grol ba zhes bya ste/ sngon gyi mtha' yang ma bcings/ phyi ma'i mthar yang mi 'pho/ de ltar byung ba la yang mi gnas so/ /mig dang gzugs la gnyis su 'dzin pa las rnam par grol ba'o//rna ba la sogs pa yid dang chos la gnyis su 'dzin pa las rnam par grol ba ste/ 'dzin par mngon par zhen pa'i gnas las rnam par grol ba'o/ /sems rang bzhin gyis 'od gsal ba de bzhin du shes pa ste/ de'i phyir sems kyi skad cig gcig dang ldan pa'i shes rab kyis bla na med pa yang dag par rdzogs pa'i byang chub mngon par rdzogs par sangs rgyas zhes bya'o zhes bya ba nas chos ston to zhes bya ba'i bar du 'byung ste/'di sangs rgyas kyi chos ma 'dres pa ni bcu gnyis pa'o/ /rigs kyi bu gzhan yang lus kyi las thams cad ye shes sngon du 'gro zhing ye shes kyi rjes su 'brang ngo //de bzhin gshegs pa'i lus kyi las de dang ldan pas lta bas kyang sems can rnams 'dul/ smra ba dang cang mi smra ba dang za ba dang spyod lam dang mtshan dag gis kyang sems can rnams 'dul zhes rgyas par 'byung zhing / sangs rgyas bcom ldan 'das rnams kyi spyod lam gang sems can 'dul bar mi 'gyur ba de gang yang med do zhes bya ba rgyas par 'byung ste/ 'di sangs rgyas kyi chos ma 'dres pa ni bcu gsum pa'o/ /rigs kyi bu gzhan yang de bzhin gshegs pa'i ngag gi las thams cad ye shes sngon du 'gro zhing ye shes kyi rjes su 'brang ba'o//de ci'i phyir zhe na/ de bzhin gshegs pa ni 'bras bu yod pa'i chos ston pa'o/ /chad par lung ston pa'o/ /shin tu nges pa'i tshig smra ba'o/ /de bzhin gshegs pa'i ngag de yang kun shes par byed pa'o/ /rnam par shes par byed pa'o //mi mtho ba'o/ /mi dma' ba'o/ /mi g.yo ba'o/ /ldab ldib can ma yin pa'o zhes bya ba la sogs pa nas nam mkha'i tshad ni rjes su 'gro ba'o/ /rnam pa'i mchog thams cad dang ldan pa'o zhes bya ba'i bar yan lag drug cu dang ldan par brjod par bya zhing / rigs kyi bu de bzhin gshegs pa'i ngag ni de lta bu ste/de'i phyir zhes bya ba la sogs pa 'byung ste/ 'di sangs rgyas kyi chos ma 'dres pa ni bcu bzhi pa'o/ /gzhan yang de bzhin gshegs pa'i yid kyi las thams cad ye shes sngon du 'gro zhing ye shes kyi rjes su 'brang ba'o/ /de ci'i phyir zhe na/de bzhin gshegs pa ni sems kyis brjod par bya ba ma yin/ yid kyis ma yin/ rnam par shes pas ma yin gyi/ ye shes kyis rab tu phye ba ste/ ye shes kyi bdag por gyur pa'o/ /de bzhin gshegs pa'i ye shes de ni sems can thams cad kyi sems kyi rjes su song ba'o zhes bya ba nas chos thams cad la nges par bsams pa'o//lam gyi yan lag shin tu bsgoms pa'o/ /ting nge 'dzin thams cad la gzhan gyi dring mi 'jog pa'o/ /dmigs pa las shin tu 'das pa'o/ /rkyen las skye ba dang bral ba'o/ /srid pa gsum bsal ba'o//bdud kyi las thams cad las rnam par grol ba'o zhes bya ba'i bar dang / chos kyi dbyings dang dbyer med pa ste de bzhin gshegs pa'i yid kyi las ye shes sngon du 'gro ba ni de lta bu'o/ /'di ni de bzhin gshegs pa'i de bzhin gshegs pa'i las nyi shu rtsa dgu pa'o zhes bya ba'i bar du 'byung ste/'di sangs rgyas kyi chos ma 'dres pa ni bco lnga pa'o/ /gzhan yang 'das pa'i dus la ye shes mthong ba chags pa med cing thogs pa med par 'jug go/ /'das pa'i dus kyi sangs rgyas kyi zhing byung ba dang zhig pa ji snyed pa de dag thams cad bgrang ba'i tshul gyis rab tu shes so//de dag na rtswa dang shing gel ba dang / sman dang nags tshal du gyur pa de dag thams cad kyang rab tu shes so/ /de dag na sems can gyi tshogs sems can du btags par gyur pa ji snyed pa dang / sangs rgyas 'byung ba ji snyed pa dang /sangs rgyas re res chos bstan zhing brjod pa ji snyed pa dang / ji snyed cig nyan thos kyi theg pa la btul ba dang / ji snyed cig theg pa chen po la btul ba de dag thams cad rab tu shes so zhes bya ba rgyas par 'byung zhing sems kyi rgyud kyang rab tu shes so/ /sems gang gi 'og tu sems gang byung ba de thams cad kyang bgrang ba'i tshul gyis rab tu shes te/de yang mngon sum gyi shes pa dang rjes su 'gro ba'i shes pas so/ /de yang de bzhin gshegs pa'i sems kyi rgyud 'das pa btang ba rnams kyang dmigs so/ /de bzhin gshegs pa ni ye shes de lta bu dang ldan pas sems can rnams la phyad par chos ston to zhes bya ba la sogs pa 'byung ste/'di sangs rgyas kyi chos ma 'dres pa ni bcu drug pa'o/ /rigs kyi bu gzhan yang ma 'ongs pa'i dus la de bzhin gshegs pa'i ye shes mthong ba chags pa med cing thogs pa med par 'jug go//sems can nam chos sam zhing gang dag cig ma 'ongs pa na 'byung bar 'gyur ba'am 'jig par 'gyur ba de dag thams cad de bzhin gshegs pas rab tu shes so zhes bya ba rgyas par 'byung zhing / ma 'ongs pa'i sems kyi rgyud bskal par 'gyur ba ma yin par ma 'ongs pa la lta bas sems can rnams la chos ston to zhes bya ba 'byung ste /'di sangs rgyas kyi chos ma 'dres pa ni bcu bdun pa'o/ /rigs kyi bu gzhan yang da ltar byung ba'i dus la de bzhin gshegs pa'i ye shes mthong ba chags pa med cing thogs pa med par 'jug go/ /de bzhin gshegs pas phyogs bcu dag na da ltar byung ba'i sangs rgyas kyi zhing thams cad bgrang ba'i tshul gyis rab tu shes so//da ltar byung ba'i sangs rgyas thams cad rab tu shes so/ /de bzhin du byang chub sems dpa' thams cad dang / nyan thos dang rang sangs rgyas thams cad nas dngos po thams cad dang /sa'i khams rdul phra rab kyi rdul gyi char brlags pa thams cad kyi bar du bgrang ba'i tshul gyis rab tu shes shing / de bzhin du chu'i khams skra'i rtse mos blangs pa bgrang ba'i tshul dang / me'i khams kyi skye ba dang 'gag pa bgrang ba'i tshul dang /rlung gi khams thams cad gzugs su gyur pa la bab pa'i tshul dang / nam mkha'i khams thams cad skra'i rtse mos rgyas par dgang ba'i tshul gyi bar gyis rab tu shes so/ /de bzhin du sems can dmyal ba la sogs pa'i 'gro bar skyes pa'i sems can gyi khams dang /de bzhin du da ltar byung ba'i lha'i sems can gyi khams kyang rab tu shes so zhes rgya cher sbyar bar bya zhing / de bzhin gshegs pa la ni gnyis kyi rjes su 'brang ba'i rnam par shes pa med cing gnyis su med pa la gzud pa'i phyir sems can rnams la chos kyang ston te /'di ni de bzhin gshegs pa'i de bzhin gshegs pa'i las sum cu rtsa gnyis pa'o zhes bya ba 'byung ste/ 'di sangs rgyas kyi chos ma 'dres pa ni bco brgyad pa'o/ /rnam kun mkhyen nyid ye shes ni/ /mngon sum mtshan nyid can du 'dod/ /gzhan ni nyi tshe ba nyid kyis//mngon sum zhes byar mi 'dod do/ /gang zhig 'dus byas mtshan nyid dang / /'dus ma byas kyi mtshan nyid gang / /de de kho nas stong pa nyid/ /de ni rang mtshan stong pa nyid/ /rang gi mtshan nyid stong pa nyid bshad zin to/ /da ltar ba 'di mi gnas shing //'das dang ma 'ongs yod ma yin/ /gang du de dag mi dmigs pa/ /de la mi dmigs pa zhes brjod/ /mi dmigs pa de rang ngo bo/ /de yis dben pa nyid gang de/ /ther zug gnas min 'jig min pas/ /mi dmigs zhes bya'i stong nyid do/ /'das pa dang ma 'ongs pa gnyis zhig pa dang ma skyes pa'i phyir la/da ltar ba mi gnas pa'i phyir dus gsum char yang med do/ /de la mi dmigs pa zhes bya ba ni gang du dus gsum mi dmigs pa'o/ /ji skad du/ de la ther zug tu gnas pa ma yin pa dang / 'jig pa ma yin pa nyid kyi phyir mi dmigs pa ni mi dmigs pas stong ngo //de ci'i phyir zhe na/ de'i rang bzhin de yin pa'i phyir te/ 'di ni mi dmigs pa stong pa nyid ces bya'o zhes gsungs so/ /rkyen las byung phyir dngos rnams la/ /'dus pa pa yi ngo bo med/ /'dus pa pa ni de nyid kyis/ /stong nyid dngos med stong nyid do//'dus pa pa ni 'dus pa las byung ba'o/ /rgyu dang rkyen las byung ba'i phyir na 'dus pa pa yod pa ma yin no/ /ngo bo nyid ni dngos po med pa nyid yin la/ de'i stong pa nyid ni dngos po med pa'i ngo bo nyid stong pa nyid do/ /stong pa nyid bcu drug po de dag spros pa dang bcas par bshad do//gang gzhan bzhi po de dag brjod par bya ste/ dngos po'i sgras ni mdor bsdus na/ /phung po lnga rnams brjod pa yin/ /de rnams de yis stong nyid gang / /de dngos stong pa nyid du bshad/ /dngos po zhes bya ba ni phung po lnga'o/ /dngos po ni dngos pos stong zhes bya ba ni gong ma bzhin te 'di ni dngos po stong pa nyid ces bya'o//mdor bsdus na ni dngos med pa/ /'dus ma byas chos rnams la brjod/ /de ni dngos med des stong nyid/ /dngos po med pa stong nyid do/ /dngos po med pa zhes bya ba ni 'dus ma byas kyi chos rnams te nam mkha' dang mya ngan las 'das pa la sogs pa dag go//de la dngos po med pa ni dngos po med pas stong ste/ 'di ni dngos po med pa stong pa nyid ces bya'o/ /rang bzhin ngo bo nyid med ni/ /rang bzhin zhes bya'i stong nyid de / /'di ltar rang bzhin ma byas pas/ /rang bzhin zhes ni bya bar bsnyad//rang bzhin zhes bya ba ni rang bzhin la bya ste/ nyan thos la sogs pa rnams kyis ma byas pa'i phyir ro/ /rang bzhin ni rang bzhin gyis stong ste/ 'di ni rang bzhin stong pa nyid ces bya'o/ /sangs rgyas rnams ni byung ba 'am/ /ma byung yang rung dngos su ni //dngos po kun gyi stong pa nyid/ /gzhan gyi dngos por rab tu bsgrags/ /yang dag mtha' dang de bzhin nyid/ /de gzhan dngos po'i stong nyid do/ /gzhan gyi dngos po ni mchog tu byung ba'i de kho na nyid do/ /de'i mchog tu byung ba nyid ni rtag tu yod pa nyid do//rnam pa gcig tu na gzhan gyi dngos po ni ye shes phul du byung bas rtogs par bya ba'i dngos po ste/ de ni de nyid kyis stong ngo / /yang na pha rol na yod pa ni gzhan gyi dngos po'o/ /'khor ba las 'das pa'i phyir gzhan gyi dngos po zhes bya ba ni yang dag pa'i mtha' ste/rnam par 'gyur ba med pas don de bzhin nyid stong pa nyid kyi mtshan nyid can gyi stong pa nyid ni gzhan gyi dngos po stong pa nyid do/ /shes rab pha rol phyin tshul las/ /de dag de skad rab tu bsgrags/ /da ni shes rab kyi pha rol tu phyin pa la lhag par mos pa'i byang chub sems dpa' rnams kyi thun mong ma yin pa'i yon tan phul du byung ba brjod pa'i sgo nas shes rab kyi skabs yongs su rdzogs par bya ba'i phyir bshad pa/de ltar blo gros zer gyis snang ba gsal byas pa/ /rang gi lag na gnas pa'i skyu ru ra bzhin du/ /srid gsum 'di dag ma lus gdod nas skye med par//rtogs de tha snyad bden pa'i stobs kyis 'gog par 'gro/ /de ltar gyi sgra ni ji skad bshad pa'i rnam par dpyad pa nye bar ston pa'i don du'o/ /ji skad bshad pa'i rnam par dpyad pa las byung ba'i blo gros kyi 'od zer gyis de kho na nyid mthong ba la gegs byed pa'i mun pa 'joms pa'i snang ba gsal bar byas pa gang la yod pa'i byang chub sems dpa' de la de skad ces bya'o//de ni kun rdzob kyi bden pa'i stobs kyis 'gog pa la snyoms par 'jug par 'gyur ro/ / 'gog pa'i ngo bos 'gro ba yongs su skyob pa'i bsam pa yongs su 'dor ba yang ma yin no zhes bshad pa/ rtag tu 'gog par rtogs pa'i bsam ldan yin mod kyi / /'gro ba mgon med pa la snying rje'ang skyed par byed/ /'di'i sbyor ba ni 'khor bar gtogs pa yin la /lhag pa'i bsam pa ni mya ngan las 'das par gtogs pa yin pas 'gro ba mgon med pa la 'di'i snying rje ches shin tu rnam par 'phel bar 'gyur ro/ /de gong bde gshegs gsung skyes sangs rgyas 'bring bcas ni/ /ma lus pa rnams blo yis pham par byed pa'ang yin//sangs rgyas bar ma rnams dang lhan cig tu gyur pa ni sangs rgyas 'bring bcas so/ /de dag su yin zhe na/ bde bar gshegs pa'i gsung las skyes pa rnams te nyan thos rnams so zhes bya ba'i don to/ /de dag thams cad kyang byang chub sems dpa'i sa drug pa de'i gong rol bdun pa la sogs par shes rab kyis pham par byed do//kun rdzob de nyid gshog yangs dkar po rgyas gyur pa/ /ngang pa'i rgyal po de ni skye bo'i ngang pa yis/ /mdun du bdar nas dge ba'i rlung gi shugs stobs kyis/ /rgyal ba'i yon tan rgya mtsho'i pha rol mchog tu 'gro//de'i kun rdzob kyi yon tan rnams kyang ches lhag par rab tu 'bar bar 'gyur ro/ /gang gis na 'di skye bo'i ngang pa phul du byung ba bskyed pa rnams dang lhan cig rgyal ba'i yon tan gyi rgya mtsho chen po'i pha rol tu 'gro bar 'gyur ba bden pa gnyis po de ni 'di'i gshog pa yangs pa gnyis yin no//sems bskyed pa drug pa bshad zin to/ /dbu ma la 'jug pa'i bshad pa las sems bskyed pa drug pa'o// //da ni sems bskyed pa bdun pa'i dbang du byas nas bshad pa/ ring du song ba 'dir ni skad cig dang / /skad cig la ni 'gog par 'jug 'gyur zhing //thabs kyi pha rol phyin legs 'bar ba 'thob/ /'gog pa la snyoms par 'jug pa ni yang dag pa'i mtha' la snyoms par 'jug pa yin pas/ de bzhin nyid la 'gog pa zhes brjod de 'dir spros pa thams cad 'gag par 'gyur ba'i phyir ro//sa bdun pa ring du song ba 'dir ni sa drug pa thob pa'i 'gog pa de la byang chub sems dpa' skad cig dang skad cig la snyoms par 'jug par 'gyur te/ ji skad du/ kye rgyal ba'i sras dag byang chub sems dpa'i sa drug pa yan chad byang chub sems dpa'i 'gog pa la snyoms par 'jug ste/byang chub sems dpa'i sa bdun pa 'di la gnas pa'i byang chub sems dpa' ni sems kyi skad cig dang sems kyi skad cig la yang 'gog pa la snyoms par 'jug cing ldang ste/ 'gog pa mngon sum du byas zhes ni mi bya'o zhes rgyas par gsungs so//'di'i thabs la mkhas pa'i pha rol tu phyin pa ches yongs su dag par yang 'gyur ro/ /shes rab nyid rnam pa khyad par du zhugs pa la thabs dang smon lam dang stobs dang ye shes zhes shes par bya ste/ rab tu rnam par 'byed pa'i gnas skabs kho nar shes rab la shes rab kyi pha rol tu phyin pa zhes brjod kyi gzhan du ni ma yin no//dbu ma la 'jug pa'i bshad pa las sems bskyed pa bdun pa'o// //da ni sems bskyed pa brgyad pa'i dbang du byas nas bshad pa/ yang yang sngar dge las lhag thob bya'i phyir/ /gang du phyir mi ldog pa nyid 'gyur ba//mi g.yo de la bdag nyid che de 'jug /byang chub sems dpa' de ni yang dang yang du sngar gyi dge ba las lhag pa thob par bya ba'i ched du gang du de phyir mi ldog par 'gyur ba byang chub sems dpa'i sa brgyad pa mi g.yo ba la 'jug par 'gyur ro/ /de la yang dang yang du sngar gyi dge ba las lhag pa thob pa ni/ji skad du/ kye rgyal ba'i sras dag 'di lta ste dper na/ rgya mtsho chen por 'gro ba'i gru bo che ni rgya mtsho chen po la ma thug gi bar du ched du bskyod cing 'gro bar bya ba yin te/ gang gi tshe rgya mtsho chen po la phyin ma thag tu rlung gi dkyil 'khor gyis bskyod nas ched du 'bad mi dgos par 'gro ste/des rgya mtsho chen po la nyin gcig gis ci chod pa de ni sngon chad du bskyod cing 'gro bas lo brgyar yang de srid du tshad med par phyin par mi nus so/ /kye rgyal ba'i sras dag de bzhin du/ byang chub sems dpa' dge ba'i rtsa ba'i tshogs shin tu bsags pa theg pa chen po yang dag par bsgrubs pa yang / byang chub sems dpa'i spyod pa'i rgya mtshor phyin nas lhun gyis grub pa'i ye shes kyis yud tsam cig la thams cad mkhyen pa'i ye shes ci tsam gnon pa de ni sngon gyi ched du bya ba'i las kyis bskal pa 'bum du yang de snyed du dpag tu med pa gnon par mi nus so zhes gsungs pa lta bu'o//'di yi smon lam shin tu dag 'gyur zhing / /rgyal ba rnams kyis 'gog las slong bar mdzad/ /'dis sems dang po bskyed par gyur pa na smon lam chen po bcu la sogs pa smon lam 'bum phrag grangs med pa phrag bcu gang dag mngon par btab pa de dag 'di la yongs su dag par 'gyur bas 'di'i smon lam gyi pha rol tu phyin pa ches lhag par 'gyur ro//byang chub sems dpa' rnams kyi sa mi g.yo ba 'di ni gzhon nu'i sar rnam par gzhag ste/dgu par ni rgyal tshab thob la/ bcu par ni 'khor los sgyur ba ltar rgyal ba rnams kyis dbang bskur ro/ /byang chub sems dpa' sa mi g.yo bar 'gog pa la snyoms par zhugs par gyur pa na/ sangs rgyas bcom ldan 'das rnams kyis 'gog pa las slong bar yang mdzad do//ji skad du/ kye rgyal ba'i sras dag de ltar byang chub sems dpa'i sa mi g.yo ba 'di la gnas pa'i byang chub sems dpa' sngon gyi smon lam gyi stobs bskyed pa dang / chos kyi sgo'i rgyun de la gnas pa de la sangs rgyas bcom ldan 'das rnams de bzhin gshegs pa'i ye shes nye bar bsgrub par mdzad do //de la 'di skad ces kyang bka' stsal te / rigs kyi bu legs so legs so/ /sangs rgyas kyi chos rjes su rtogs par bya ba la 'di ni don dam pa'i bzod pa yang yin na/ 'on kyang rigs kyi bu gang nged kyi stobs bcu dang mi 'jigs pa bzhi la sogs pa sangs rgyas kyi chos ma 'dres pa phun sum tshogs pa de khyod la med kyi /sangs rgyas kyi chos phun sum tshogs pa de yongs su btsal ba'i phyir sbyor ba byos shig /brtson 'grus rtsoms shig /bzod pa'i sgo 'di nyid kyang ma dor zhig /rigs kyi bu khyod kyis de ltar zhi ba'i rnam par thar pa la gnas pa thob kyang byis pa so so'i skye bo ma zhi ba rab tu ma zhi ba nyon mongs pa sna tshogs kun tu 'byung bar gyur pa rnam par rtog pa rnam pa sna tshogs kyis yid g.yen spyo ba 'di dag la soms shig /gzhan yang rigs kyi bu sngon gyi smon lam dang zhes rgya cher 'byung ba nas/gal te sangs rgyas bcom ldan 'das de dag gis byang chub sems dpa' de la thams cad mkhyen pa'i ye shes mngon par sgrub pa'i sgo rnams su gzhug pa mdzad du zin na/ de de nyid kyi tshe yongs su mya ngan las 'da' bar 'gyur te zhes bya ba la sogs pa'i bar du gsungs pa lta bu'o//gang gi phyir 'di de ltar 'gog pa las slong ba de nyid kyi phyir 'di'i/ chags pa med pa'i blo ni skyon rnams dag dang lhan cig mi gnas phyir/ /sa brgyad pa la dri ma de dag rtsar bcas nye bar zhi 'gyur zhing / /nyon mongs zad cing khams gsum bla mar gyur kyang sangs rgyas rnams kyi ni//'byor pa mkha' ltar mtha' bral ma lus thob par nus ma yin/ /rnam par mi rtog pa'i ye shes kyi nyi ma shar bas mun pa ltar nyon mongs pa sngar byung ba 'khor bar skye ba'i rgyur gyur pa khams gsum na spyod pa gang yin pa de dag thams cad kyang rtsa ba dang bcas par zhi ba kho nar 'gyur la/de de spangs pas sa gsum gyi bla ma nyid du gyur du zin kyang byang chub sems dpa' 'dis gnas skabs der sangs rgyas bcom ldan 'das rnams kyi 'byor pa thob par mi nus te/ de thob par bya ba'i phyir 'dis bsgrim par bya dgos so//de de nyid kyi tshe yongs su mya ngan las 'da' bar 'gyur te zhes 'byung ba'i phyir/ 'di khams gsum las 'dod chags dang bral ba nyid srid pa yin te/ 'dod chags dang ma bral ba la mya ngan las 'das pa thob pa srid pa med pa'i phyir / gal te 'dis der khams gsum las 'dod chags dang bral bar gyur na/de'i tshe 'khor ba 'gags pas ji ltar 'di sangs rgyas kyi chos ma lus pa yongs su rdzogs par 'gyur zhe na/ bshad pa/ 'khor ba 'gags kyang dbang rnams bcu po thob par gyur zhing de dag gis/ / srid pa'i 'gro bar rang gi bdag nyid sna tshogs ston par byed par 'gyur/ /'dir 'khor ba ni 'gags mod kyi de lta na yang 'di la dbang bcu po de dag nye bar skye la/ de dag gis 'dis yid kyi rang bzhin gyi lus kyi sgo nas bdag nyid kyi dngos po sna tshogs pa ston par byed do//de'i phyir 'di'i tshogs ma lus par yongs su rdzogs par mi 'gal lo/ /de la dbang bcu ni/ ji skad du/ bskal pa brjod du med pa'i yang brjod du med par tshe tshad byin gyis rlob pas tshe la dbang ba 'thob bo/ /ting nge 'dzin nges par sems pa dpag tu med pa'i ye shes kyis 'jug pas sems la dbang ba 'thob bo//'jig rten gyi khams thams cad rgyan bkod pa du mas rab tu brgyan pa'i byin gyi rlabs kun tu ston pas yo byad la dbang ba 'thob bo/ /las kyi rnam par smin pa byin gyi rlabs kyis dus ji lta ba bzhin du ston pas las la dbang ba 'thob bo//'jig rten gyi khams thams cad du skye ba kun tu ston pas skye ba la dbang ba 'thob bo/ /sangs rgyas kyi zhing dang / dus gang du ci dga' bar mngon par rdzogs par byang chub pa kun tu ston pas smon lam la dbang ba 'thob bo/ /'jig rten gyi khams thams cad sangs rgyas kyis rab tu gang ba kun tu ston pas mos pa la dbang ba 'thob bo//sangs rgyas kyi zhing thams cad du rdzu 'phrul gyi rnam par 'phrul pa kun tu ston pas rdzu 'phrul la dbang po 'thob bo/ /de bzhin gshegs pa'i stobs dang / mi 'jigs pa dang / sangs rgyas kyi chos ma 'dres pa dang /mtshan dang dpe byad bzang po dang / mngon par rdzogs par byang chub pa kun tu ston pas ye shes la dbang ba 'thob bo/ /mtha' dang dbus med pa'i chos kyi sgo snang ba kun tu ston pas chos la dbang ba 'thob bo zhes rgyas par gsungs pa lta bu'o/ /sems bskyed pa brgyad pa bshad zin to//dbu ma la 'jug pa'i bshad pa las sems bskyed pa brgyad pa'o// //da ni sems bskyed pa dgu pa'i dbang du byas nas bshad pa/ dgu pa la ni de'i stobs lta zhig mtha' dag rdzogs par dag 'gyur zhing / /de bzhin yang dag rig chos rang gi yon tan yongs su dag pa'ang 'thob//byang chub sems dpa'i sa dgu par ni byang chub sems dpa'i stobs kyi pha rol tu phyin pa chos yongs su dag par 'gyur zhing so so yang dag par rig pa rang gi yon tan yongs su dag pa bzhi yang 'thob ste/ chos so so yang dag par rig pa dang /don so so yang dag par rig pa dang / nges pa'i tshig so so yang dag par rig pa dang / spobs pa so so yang dag par rig pa'o/ / de la chos so so yang dag par rig pas ni chos thams cad kyi rang gi mtshan nyid rab tu shes so/ /don so so yang dag par rig pas ni chos thams cad kyi rnam par dbye ba rab tu shes so//nges pa'i tshig so so yang dag par rig pas ni chos rnams ma 'dres par ston pa rab tu shes so/ /spobs pa so so yang dag par rig pas ni chos rnams kyi mthun pa'i rgyu rgyun chad pa med pa nyid du rab tu shes so/ /sems bskyed pa dgu pa bshad zin to//dbu ma la 'jug pa'i bshad pa las sems bskyed pa dgu pa'o// //da ni sems bskyed pa bcu pa'i dbang du byas nas bshad pa/ bcu pa'i sa la de yis kun nas sangs rgyas rnams las dbang bskur ba/ /dam pa thob cing ye shes lhag par mchog tu 'byung bar 'gyur ba'ang yin//char sprin rnams las chu char 'bab pa ji ltar de bzhin 'gro rnams kyi/ /dge ba'i lo thog ched du rgyal sras las kyang lhun grub chos char 'bab/ /byang chub sems dpa'i sa bcu pa la gnas pa'i byang chub sems dpa' la ni sangs rgyas bcom ldan 'das rnams kyis dbang bskur te/ji skad du/ de la ting nge 'dzin grangs med pa 'bum phrag bcu ji snyed pa'i tha ma la byang chub sems dpa'i ting nge 'dzin thams cad mkhyen pa'i ye shes dang khyad par med par dbang bskur ba dang ldan pa zhes bya ba mngon du 'gyur te/mngon du gyur ma thag tu stong gsum 'bum phrag bcu'i gtos dang mnyam pa'i rin po che chen po'i pad+ma rin po che rnam pa thams cad kyi mchog dang ldan pas spras pa zhes bya ba nas rgyas par stong gsum 'bum phrag bcur tshang ba'i rdul phra rab kyi rdul snyed kyi pad+ma'i 'khor dang ldan pa 'byung bar 'gyur te/byang chub sems dpa' de'i lus kyang de dang 'tsham zhing de'i rkyen du 'bab par gnas so/ /de ting nge 'dzin de thob ma thag tu pad+ma de la 'dug par kun tu snang ngo / /de de la 'dug pa dang sangs rgyas bcom ldan 'das sangs rgyas kyi zhing kun nas gdan 'dzom pa rnams kyi mdzod spu nas 'od zer dag phyung nas/byang chub sems dpa' de la dbang bskur bar mdzad do zhes bya ba'i bar du gsungs pa lta bu'o/ /'di'i ye shes kyi pha rol tu phyin pa ches yongs su dag par yang 'gyur la/ sprin chen po ltar 'jig rten gyi dge ba'i lo thog mngon par spel ba'i phyir/lhun gyis grub par dam pa'i chos kyi char yang mngon par 'bebs so/ /sems bskyed pa bcu pa bshad zin to/ /dbu ma la 'jug pa'i bshad pa las sems bskyed pa bcu pa'o// // da ni sems bskyed pa dang po nas brtsams te de dag gis yon tan gyi grangs thob pa'i dbang du byas nas bshad pa/de'i tshe 'dis ni sangs rgyas brgya mthong zhing / /de dag byin gyi rlabs kyang 'di yis rtogs/ /de nyid tshe na bskal pa brgyar gnas shing / /sngon dang phyi ma'i mthar yang yang dag 'jug /blo ldan ting 'dzin brgya phrag snyoms par 'jug cing gtong byed de/ /'jig rten khams brgya 'di yis kun nas g.yo zhing snang bar nus/ /de bzhin rdzu 'phrul gyis de sems can brgya phrag smin byed cing / /brgya phrag grangs dang rjes 'brel zhing dag tu yang 'gro bar 'gyur//des ni chos kyi sgo rnams yang dag 'byed byed thub dbang sras/ /rang gi lus la lus rnams kun nas ston par byed pa'ang yin/ /rang gi 'khor dang bcas pas mdzes 'byor lus ni re re zhing / /rgyal ba'i sras po brgya phrag dag dang rjes su 'brel ba'ang ston//ji skad du/ rab tu byung nas kyang skad cig thang cig yud tsam cig la ting nge 'dzin brgya rab tu 'thob cing de dag la snyoms par 'jug pa yang 'jug pa dang / sangs rgyas brgya mthong ba dang / de dag gi byin gyi rlabs kyang yang dag par shes pa dang /'jig rten gyi khams brgya g.yo bar byed pa dang / zhing brgyar yang 'gro ba dang / 'jig rten gyi khams brgya snang bar byed pa dang / sems can brgya yongs su smin par byed pa dang / bskal pa brgyar yang gnas par byed pa dang / bskal pa brgya la sngon dang phyi ma'i mthar 'jug pa dang /chos kyi sgo brgya rnam par 'byed pa dang / lus brgya kun tu ston pa dang / lus re re yang 'khor byang chub sems dpa' brgya brgya dang ldan par kun tu ston pa'o zhes gsungs pa lta bu'o/ /blo ldan rab tu dga' bar gnas pas yon tan de dag ni//thob par gyur nas de bzhin kho nar dri ma med gnas pas/ /de dag stong ni yang dag thob par 'gyur ba ste / /sems dang po bskyed pa'i byang chub sems dpa' 'dis yon tan grangs brgya dang rjes su 'brel ba gang dag thob pa de dag kho na sems gnyis pa bskyed pa'i byang chub sems dpas stong 'thob par 'gyur ro zhes rgya cher bgrang bar bya'o//yon tan de dag nyid sems bskyed pa gsum pa la sogs pas lnga pa'o / /'di dag rnams la byang chub sems dpa' yis ni 'bum phrag dang / /bye ba phrag brgya 'thob cing de yis bye ba stong 'gyur 'thob//de nas bye ba brgya phrag stong 'gyur yang 'thob bye ba phrag /khrag khrig phrag brgyar rdzogs par sgyur dang slar yang stong phrag tu/ /yang dag par ni sgyur ba mtha' dag rab tu 'thob par 'gyur/ /de la sems gsum pa bskyed pa'i byang chub sems dpas ni ji skad bshad pa'i yon tan rnams 'bum 'thob bo//sems bzhi pa bskyed pa'i byang chub sems dpas ni bye ba phrag brgya 'thob bo/ /sems lnga pa bskyed pa'i byang chub sems dpas ni bye ba phrag stong 'thob bo/ /sems drug pa bskyed pa'i byang chub sems dpas ni bye ba 'bum 'thob bo//sems bdun pa bskyed pa'i byang chub sems dpas ni yon tan de dag nyid bye ba khrag khrig phrag 'bum 'thob par shes par bya'o/ /de yan chad ni yon tan dag la grangs kyis yongs su bgrang bar mi srid pas/ rdul phra rab rnams kyis yongs su bgrang bar bshad pa/mi g.yo'i sar gnas rnam rtog med pa des/ /stong gsum brgya phrag stong bsdoms 'jig rten na/ /rdul tshad ji snyed yod pa de rnams dang / /grangs mnyam yon tan dag ni 'thob par 'gyur/ /byang chub sems dpa' sems brgyad pa bskyed pas ni ji skad du bstan pa'i yon tan dag stong gsum gyi 'jig rten gyi khams 'bum gyi rdul phra rab kyi rdul snyed 'thob bo//legs pa'i blo gros sa la gnas pa yi/ /byang chub sems des sngar bstan yon tan dag /grangs med brgya phrag stong du yang dag par//bsdoms pa phrag bcu'i rdul tshad thob par 'gyur/ /sems dgu pa bskyed pa'i byang chub sems dpas ni sngar bstan pa'i yon tan dag stong gsum gyi 'jig rten gyi khams grangs med pa 'bum phrag bcu'i rdul phra rab kyi rdul dang mnyam pa 'thob bo/ /re zhig bcu pa 'dir de'i yon tan dag /ngag gi spyod yul las ches 'das gyur zhing / /ngag gi spyod yul ma yin bsdoms rnams na/ /rdul dag ji snyed yod pa de snyed 'gyur/ /byang chub sems dpa' sems bcu pa bskyed pas ni yon tan ji skad du bstan pa dag sangs rgyas kyi zhing brjod du med pa'i yang brjod du med pa'i rdul phra rab kyi rdul snyed 'thob par 'gyur ro//re zhig bcu pa 'dir de'i zhes bya ba'i re zhig gi sgra 'dis ni de tsam kho nar zad pa ni ma yin no zhes yon tan brjod par bya ba la go rims ston par byed do/ /gzhan yang byang chub sems dpa' 'dis ni/ba spu'i khung bur byang chub sems rnams dang / /lhan cig rdzogs sangs rgyas sku bgrang 'das dang / /de bzhin lha dang lha min mi dag kyang / /skad cig skad cig la ni ston par nus/ /byang chub sems dpa' sems bcu pa bskyed pa 'dis ni rtog pa kun nas rgyu ba med par rang gis lus kyi ba spu'i bu ga re rer sangs rgyas bcom ldan 'das bgrang ba las 'das pa re re zhing byang chub sems dpa' gzhal gyis mi lang ba'i 'khor mnga' ba dag skad cig skad cig la rnam pa gzhan dang gzhan du'ang ston par nus la/de dag las gzhan 'gro ba lnga'i 'khor ba mi la sogs pa'i dbye bas tha dad pas yang ma 'dres par ba spu'i khung bu re rer skad cig re re la ston par nus so/ /kyang gi sgra ni ma smos pa bsdu ba'i don du ste/ brgya byin dang / tshangs pa dang / 'jig rten skyong ba dang / mi'i rgyal po dang / nyan thos dang / rang sangs rgyas dang / de bzhin gshegs pas gdul ba'i sems can rnams la brgya byin la sogs pa'i gzugs bzung nas lhun gyis grub par chos ston par nus so zhes bya ba la sogs pa'i bar gyi don sdud pa'o/ /yon tan gyi khyad par rnams rgyas par ni mdo nyid las btsal bar bya'o//byang chub sems dpa'i sa'i yon tan bstan pa bshad zin to/ /de'i 'og tu sangs rgyas kyi sa'i yon tan cung zad tsam cig brjod par 'dod pas bstod pa sgrub pa'i sgo nas sangs rgyas bcom ldan 'das kyi dbang du byas te bshad pa/gang phyir nam mkha' dri ma med la zla snang gsal bar 'gyur ba'i phyir/ /sngon tshe stobs bcu bskyed pa'i sa la khyod kyis slar yang 'bad gyur zhing / /'og min du ni gang gi don du 'bad gyur go 'phang mchog zhi ba/ /yon tan mtha' dag mthar thug mtshungs pa med de khyod kyis brnyes//dper na zla bas nam mkha' dri ma med pa kho na la 'gro ba ma lus pa gsal bar nus pa de bzhin du/ bcom ldan 'das sangs rgyas kyi chos rnams thob pa la gegs byed pa'i mun pa sbyong ba nyid du mdzad pa/ thugs bskyed pa bcu pa brnyes pas rang nyid sangs rgyas kyi chos brnyes nus par mkhyen nas dus phyis sangs rgyas kyi sa la 'bad pa brtsams par gyur la/gang gi don du 'bad pa 'di brtsams pa bla na med pa'i ye shes de yang bcom ldan 'das kyis 'og min gyi gnas kho nar brnyes par gyur to/ /de ni yon tan mtha' dag gi mthar thug pa ste yon tan mtha' dag 'dir mthar thug cing phul du byung ba'i phyir ro//de ni mtshungs pa med pa yang yin te/ de dang 'dra ba med pa'i phyir dang gong na med pa'i phyir ro/ /der mngon par rdzogs par 'tshang rgya ba na bcom ldan 'das kyis skad cig gcig kho na la thams cad mkhyen pa'i ye shes brnyes so zhes bya ba 'di bstan pa'i phyir bshad pa/ji ltar snod kyi dbye bas mkha' la dbye ba med de ltar/ /dngos byas dbye ba 'ga' yang de nyid la med de yi phyir/ /ro mnyam nyid du yang dag thugs su chud par mdzad gyur nas/ / mkhyen bzangs khyod kyis skad cig gis ni shes bya thugs su chud/ /dper na bum pa dang 'khar gzhong la sogs pa tha dad kyang sgrib pa med pa nyid du mtshungs pa'i phyir der rtogs pa'i nam mkha' la tha dad pa med pa de bzhin du/ gzugs dang tshor ba la sogs pa'i dngos po tha dad kyang der gtogs pa'i de kho na nyid skye ba med pa'i mtshan nyid can la tha dad pa med pas de kho na nyid ni ro gcig pa kho nar shes par bya'o//de yang mkhyen pa'i skad cig gcig kho nas thugs su chud pas bcom ldan 'das kyis mkhyen pa'i skad cig gcig kho nas thams cad mkhyen pa'i ye shes brnyes so//'dir smras pa/ gang tshe zhi ba de nyid yin na de la blo gros 'jug mi 'gyur/ /blo ma zhugs par shes bya'i yul can nges par rigs pa'ang ma yin la/ /kun nas shes med pa ni shes par ji ltar 'gyur te 'gal bar 'gyur/ /mkhyen po med par khyed kyis gzhan la 'di lta'o zhes su zhig ston//skye ba med pa ni gzugs la sogs pa rnams kyi de kho na nyid do zhes rnam par 'jog cing de yang shes pa yin no zhes 'jog pa na/ gang gi tshe zhi ba de kho na nyid yin no zhes rnam par gzhag pa de nyid kyi tshe de la rnam pa thams cad blo mi 'jug par khas blang dgos te/'di ltar de kho na nyid skye ba med pa'i rang bzhin can la blo 'jug pa na ci'i rnam pa can zhig tu 'byung bar 'gyur te/ de'i phyir rnam pa med pas de kho na nyid la blo mi 'jug pa nyid do/ /blo mi 'jug na ni/ 'o na shes bya'i yul can gyi nges pa yang mi rigs pas de'i phyir 'di yongs su shes par 'gyur bar ji ltar 'os/yongs su shes pa med pa nyid de kho na nyid yongs su shes pa'o zhes bya bar yang mi rigs so/ /ci'i phyir zhe na/ smras pa/ kun nas shes pa med pa ni shes par ji ltar 'gyur te 'gal bar 'gyur/kun nas mi shes pa nyid shes pa yin no zhes bya ba 'di ni phan tshun 'gal ba zhig ste/ gal te kun nas mi shes pa yin na ji ltar shes pa yin/ sems skye ba med na yang mkhyen pa po med par 'di lta bu'i mtshan nyid can gyi de kho na nyid ngas thugs su chud do zhes khyed cag gi gzhan dag la su zhig gis rtogs par byed/de'i phyir 'di mi rigs so/ /'di la brjod par bya ste/ gang tshe skye med de nyid yin zhing blo yang skye ba dang bral ba/ /de tshe de rnams bsten las de yis de nyid rtogs pa lta bu ste/ /ji ltar sems ni gang gi rnam pa can du 'gyur ba de yis yul//de yongs shes pa de bzhin tha snyad nye bar bsten nas rig pa yin/ /'di na de'i rnam pa'i rjes su byed pa nyid 'dzin pa na rnam par shes pas yul rig go zhes brjod do / /dper na rnam par shes pa sngon po'i rnam par bsrel ba nye bar skye ba na sngon po shes so zhes brjod pa de bzhin du/shes pa de kho na nyid kyi rnam pa'i rjes su byed pa skye ba na de kho na nyid shes so zhes nye bar gdags so/ /shes pa de'i rnam pa'i rjes su byed pa nyid bstan pa'i phyir/ gang tshe skye med de nyid yin zhing blo yang skye ba dang bral ba/ /de tshe de rnams bsten las de yis de nyid rtogs pa lta bu ste//zhes bya ba smos te/ de'i rnam pa bsten pa'i sgo nas rnam par gzhag go/ /ji ltar sems ni gang gi rnam pa zhes bya ba la sogs pas ni rab tu grags par gyur pa'i dpe smos te de yang rnam par bshad zin to/ /de'i phyir btags pa las de kho na nyid rtogs so zhes rnam par gzhag gi/dngos su na 'ga' zhig 'ga' zhig gis shes pa ni ma yin te/ shes pa dang shes bya gnyi ga yang ma skyes pa nyid kyi phyir ro/ /gang yang mkhyen po med par khyed kyis gzhan la 'di lta bu'o zhes su zhig ston zhes smras pa de la yang brjod par bya ste/shes pa 'di skye ba med pa de kho na yin pa bden mod kyi 'jig rten na de nyid ston pa mi srid pa yang ma yin no/ /ji ltar zhe na/ brjod par bya ste/ de yi longs spyod rdzogs sku bsod nams kyis/ /zin dang sprul pa mkha' gzhan las de'i mthus//sgra gang chos kyi de nyid ston 'byung ba/ /de las 'jig rten gyis kyang de nyid rig /de bzhin gshegs pa rnams ni gzugs kyi sku gang la bzhugs nas chos kyi dbyings mngon sum du mdzad pa'i sku bsod nams brgyas zin pa/ bsam gyis mi khyab cing sna tshogs pa'i sku mnga' ba de ni ngo bo de dang der byang chub sems dpa' rnams kyi chos kyi longs spyod kyi rgyu nyid du yongs su 'gyur ba yin te/gang las da dung du yang 'jam dpal skye ba med cing 'gag pa med pa zhes bya ba 'di ni de bzhin gshegs pa'i tshig bla dwags so zhes bya ba de lta bu la sogs pa gsung rab kyi tha snyad sna tshogs pa dag rtogs par 'gyur ba/bsod nams brgya las bskrun pa de bzhin gshegs pa'i byin gyi rlabs kyi sgra gang zhig 'byung ba de las 'jig rten rnam pa de lta bu'i chos nye bar ston pa'i snod du gyur pas de kho na nyid phyin ci ma log par nges par 'gyur ro//bsod nams kyis 'dus byas pa'i sku las 'byung ba lta zhog gi de'i byin gyi rlabs kyis sprul pa dag las chos kyi de kho na nyid gsal bar byed pa'i sgra gang zhig 'byung ba de las kyang 'jig rten gyis de kho na nyid nges par 'gyur ro//sprul pa dag las 'byung ba 'ba' zhig tu ma zad kyi gzhan yang de'i mthus sems dang sems las byung ba 'jug pa med du zin kyang / nam mkha' dang gzhan rtswa dang shing dang rtsig pa dang brag la sogs pa las de'i mthus sgra gang zhig 'byung ba de las kyang 'jig rten gyis de nyid rig pa yin no//yang ji ltar sems dang sems las byung ba med pa'i rang bzhin can rnam par rtog pa med pa ni bya ba da lta ba mi srid kyang ji skad bshad pa'i bya ba 'byung ba'i rgyu nyid du 'gyur zhe na/ de bstan pa'i phyir phyi rol gyi dpe nye bar bkod pa/ ji ltar rdza mkhan stobs chen ldan pas 'dir//yun rings 'bad pas ches bskor 'khor lo ni/ /de rtsol da lta skyes pa med bzhin du'ang / /'khor zhing bum pa la sogs rgyur mthong ltar/ /de bzhin da lta skyes rtsol med bzhin du/ /chos kyi bdag can sku nyid la bzhugs de'i//'jug pa skye bo'i dge dang smon lam gyi/ /khyad par gyis 'phangs las ches bsam mi khyab/ /de la gang gis na rtog pa med par gyur du zin kyang gdul ba'i bya ba ji ltar 'tsham pa ltar 'jug pas sems can gyi khams mtha' yas pa'i don byed par 'gyur ba/ji ltar sangs rgyas bcom ldan 'das 'di dag da ltar rnam par rtog pa mi mnga' zhing / yid bzhin gyi nor bu dang dpag bsam gyi shing dang 'dra bar ji ltar 'tsham par sems can gyi don sgrub pa lhur mdzad cing chos kyi dbyings las skad cig kyang mi bskyod la/ sems can 'dul ba'i dus las kyang mi 'da' ba de bzhin du bdag kyang gyur cig ces byang chub sems dpa' sngar smon lam gang btab pa'i smon lam de'i shugs dang /gdul ba rnams kyi rnam pa de lta bu'i chos nyan par 'gyur ba'i las yongs su smin pa las bya ba'i khyad par de 'dra ba dag mngon pa yin no//de ltar na da ltar skyes pa'i 'bad rtsol med par de kho na nyid nye bar ston pa dang / sems can gyi don bya ba yang 'grub bo zhes bya ba shes par bya'o/ /da ni chos kyi sku'i dbang du byas nas bshad pa/ shes bya'i bud shing skam po ma lus pa/ /bsregs pas zhi ste rgyal rnams chos sku ste//de'i tshe skye ba med cing 'gag pa med/ /sems 'gag pa de sku yis mngon sum mdzad/ /ye shes kyi rang bzhin can gyi sku shes bya'i bud shing skam po ma lus pa bsregs pa la shes bya skye ba med pas skye ba med pa dang ldan par gyur pa gang yin pa 'di ni sangs rgyas rnams kyi chos kyi sku'o//'di nyid kyi dbang du mdzad nas/ sangs rgyas rnams ni chos nyid lta/ /'dren pa rnams ni chos kyi sku/ /chos nyid shes bya'ang ma yin te/ /de ni shes par nus ma yin/ /zhes gsungs so/ /chos kyi sku 'di ni/ de'i tshe skye ba med cing 'gag pa med pa ste/'di nyid kyi dbang du mdzad nas 'jam dpal skye ba med cing 'gag pa med pa zhes bya ba 'di ni de bzhin gshegs pa'i tshig bla dwags so zhes gsungs so/ de ltar na ye shes kyi yul de kho na nyid la rnam pa thams cad du de'i yul can sems dang sems las byung ba rnams mi 'jug pas sku kho nas mngon sum du mdzad par kun rdzob tu rnam par gzhag go//'di ni/ zhi sku dpag bsam shing ltar gsal gyur cing / /yid bzhin nor bu ji bzhin rnam mi rtog /'gro grol bar du 'jig rten 'byor slad rtag /'di ni spros dang bral la snang bar 'gyur / /sku gang gis de kho na nyid 'di mngon sum du mdzad par bshad pa de ni zhi ba'i rang bzhin can du 'dod de/ sems dang sems las byung ba dang bral ba'i phyir ro/ /zhi ba'i rang bzhin can yin yang sems can gyi don mdzad par spyod pa gsal bar byed pa ni/dpag bsam shing ltar gsal gyur cing / /yid bzhin nor bu ji bzhin rnam mi rtog /ces bya ba ste/ 'di rnam par mi rtog pa nyid yin du zin kyang dpag bsam gyi shing dang yid bzhin gyi nor bu ltar ji ltar mngon par 'dod pa'i don 'grub pa'i rgyu nyid do zhes bya ba'i don to//sku 'di ni 'khor ba ji srid par 'jig rten gyi 'byor pa'i slad du gnas pa yang yin no/ /rtag ces bya ba 'dis ni yun ring por gnas pa nyid du mtshon to / /de'i phyir 'jig rten ji srid pa dang nam mkha' ji srid pa de srid du sangs rgyas rnams tshul 'dis sems can gyi don kho na mdzad cing rnam par bzhugs so zhes bya bar shes par bya'o//bsod nams brgya'i mtshan gyis brgyan pa'i sku 'di ni byang chub sems dpa' spros pa dang bral ba rang gi bsod nams dang ye shes kyi tshogs las shes rab dri ma med pa'i me long thob pa rnams kho nal yod pa nyid du snang gi spros pa dang bcas pa rnams la ni ma yin no//chos kyi sku las byung ba'am gzugs kyi sku'i mthu las byung ba yin yang rung ste/ ji skad bshad pa'i sku las gzhan du gyur pa rgyu mthun pa'i sku gang dag sems can 'dul ba'i rgyus byung ba de dag la yang mthu'i khyad par bsam gyis mi khyab pa mnga' bar brjod pa'i phyir bshad pa/thub dbang dus gcig kho nar de'i rgyu mthun/ /gzugs sku gcig la rang gi skye gnas skabs/ /sngar 'gags gsal dang ma 'chol byung tshul ni//ma lus kyis bkra mtha' dag ston par mdzad/ /thams cad mkhyen pa'i ye shes kyi gnas skabs kyi snga rol 'khor ba thog ma med pa rang nyid kyi skye ba'i gnas skabs 'gags zin pa byung mtha' dag ma lus par bstan pa'i phyir gsal ba dang ma 'chol bar de phan tshun ma 'dres par byung tshul du mas bkra bar gyur pa de dag thams cad cig car kho nar me long gi dkyil 'khor shin tu yongs su dag pa la bzhin gyi gzugs brnyan ltar rgyu mthun pa'i sku gcig nyid la lhun gyis grub par ston par mdzad do//'di byang chub sems dpa'i spyod pa spyad pa'i byung tshul gang dang gang du ji ltar gang gi don du byung ba de dag thams cad lhun gyis grub par sku gcig kho na la ston par spyod par brjod pa'i phyir bshad pa/sangs rgyas zhing ci 'dra der thub dbang dang / /de dag sku spyod mthu stobs ci 'dra dang //nyan thos dge 'dun ji snyed ji lta dang / /byang chub sems rnams der gzugs ci 'dra dang / /ci 'dra'i chos dang de bdag ci 'dra dang / /chos thos spyod pa gang la spyad pa dang / /sbyin gang ji tsam de dag la phul ba/ /de ni ma lus sku gcig la ston mdzad/ / bcom ldan 'das kyi sngon sbyin pa'i pha rol tu phyin pa la spyod pa na/ sangs rgyas bcom ldan 'das gang rnams la bsnyen bkur mdzad pa dang / sangs rgyas kyi zhing baiDUr+ya dang / pad+ma rA ga dang / an+da rnyil dang / shel la sogs pa'i rang bzhin can/ rin po che'i ljon shing la sogs pas mdzes par byas pa chu dang zheng dang kun nas zlum pa dang bcas pa de la brtan pa'i sems can gyi khyad par gyis nye bar mdzes pa ci 'dra ba zhig na/sangs rgyas bcom ldan 'das dag bltams pa la sogs pa ston par mdzad pa de ma lus par sku gcig la ston par mdzad do//sangs rgyas bcom ldan 'das de dag gi sku dang spyod pa dag gi mthu phul du byung ba gang yin pa dang / de dag gi nyan thos kyi dge 'dun 'dus par gyur pa ji snyed pa'am ji lta dang ste/ chos kyi rjes su mthun pa'i chos kyi nan tan rnam pa gang gis nyan thos kyi dge 'dun der gyur pa dang /sangs rgyas bcom ldan 'das de dag gi sangs rgyas kyi zhing na byang chub sems dpa' mtshan dang dpe byad kyis lus spras pa/ dbyibs dang ldan pa chos gos dang zas dang gnas la sogs pa yongs su longs spyod pa nye bar longs spyod pa dang ldan pa ci 'dra ba de dag yod par gyur pa dang /ci 'dra ba'i chos dang ste theg pa gcig dang gsum gyi rten can bstan pa de dag thams cad sku gcig la ston par mdzad do/ /de bdag ci 'dra dang ste bram ze la sogs pa'i rigs su skyes pa gzugs dang blo dang ldan pa/ khyim pa dang rab tu byung bar gyur pa dang /chos thos nas lhag ma dang bcas pa dang lhag ma med pa'i bslab pa khas blangs te spyod pa gang la spyad pa dang / sbyin pa gang ci tsam de dag la phul ba ste sangs rgyas bcom ldan 'das nyan thos dang byang chub sems dpa'i dge 'dun dang bcas pa de dag la bza' ba la sogs pa dang /chos gos dang rin po che'i rgyan la sogs pa gang phul ba dang / ji tsam ste dus ji tsam dang tshad ji tsam phul ba de ma lus par sku gcig la ston par mdzad do/ /sbyin pa'i pha rol tu phyin pa la spyod pa'i byung mtha' 'di ji ltar ston pa/ de bzhin tshul khrims bzod brtson ting 'dzin dang //shes rab spyod tshe sngar gyi gnas skabs gang / /ma tshang med de dag /ma lus sku gcig la ston mdzad ces gong ma dang sbyar ro/ /sku gcig la cig car gnas skabs thams cad ston pa lta zhog gi 'on kyang / nyid spyod pa kun/ sku yi ba spu'i khung bu'ang gsal bar ston//bdag nyid kyi spyod pa kho na ston par mdzad pa 'ba' zhig tu ma zad kyi/ gzhan yang / sangs rgyas gang dag 'das dang 'byung 'gyur gang / /gang dag da ltar nam mkha'i mthar thug par/ /gdangs mthon chos ston sdug bsngal gyis bzung ba'i/ / 'gro dbugs 'byin zhing 'jig rten bzhugs pa dang / /dang po'i thugs bzung byang chub snying po'i bar/ /de dag spyod kun dngos rnams mig 'phrul gyis / /rang bzhin mkhyen nas bdag bzhin ba spu yi/ /khung bur dus gcig la ni gsal bar ston/ /re zhig mig 'phrul gyi tshul shes pa tha mal pa dag kyang sngags kyi mthu rnam pa de lta bu tsam zhig gis rang gi lus la dngos po'i rnam pa sna tshogs pa gnas par ston nus na/ci 'gro ba'i dbang phyug sangs rgyas bcom ldan 'das rnams dang / byang chub sems dpa' rnams kyis dngos po'i rang bzhin mig 'phrul gyi rang bzhin rnam pa de lta bu dang tha mi dad pa mkhyen nas mi spyod par 'gyur ram/de'i phyir/ mkhas pa gang zhig ma rtogs pa'am som nyi za bar 'gyur/ /de'i phyir mkhas pas dpe 'di'i sgo nas gsal bar 'di la lhag par mos par bya'o/ /ji ltar nyid kyi spyod pa dang de bzhin gshegs pa gzhan gyi spyod pa dag dus gcig tu rang nyid kyi ba spu'i khung bur ston par mdzad pa/de bzhin dus gsum byang chub sems dpa' dang / /rang rgyal 'phags pa nyan thos ma lus kyi/ /spyod dang de lhag skye bo'i gnas skabs ni/ /thams cad ba spu'i khung bur gcig tshe ston//sku phun sum tshogs pa brjod nas rnam par rtog pa mi mnga' bar zin kyang bzhed pa la mnga' bsgyur ba nyid phun sum tshogs par bstan pa'i phyir bshad pa/ dag pa 'di ni bzhed par 'jug pa yis/ /rdul gcig yul la mkha' gtugs 'jig rten dang / / 'jig rten mtha' yas phyogs khyab rdul ston mod/ /rdul rags mi 'gyur 'jig rten phra mi 'gyur/ /sangs rgyas bcom ldan 'das rnams kyis ni bzhed pa'i sgo nas nam mkha'i mthas gtugs pa'i 'jig rten rdul phra rab gcig gi yul la ston par byed de/ 'jig rten phra bar yang mi 'gyur zhing rdul phra rab rags par yang mi 'gyur la/bzhed pa nyid kyis rang gi ngo bo ji ltar gnas pa yang de ltar yang dag par ston to/ /'jig rten mtha' yas phyogs khyab rdul yang ston te/ sangs rgyas bcom ldan 'das rnams ni bzhed pa tsam gyis mtha' yas phyogs te 'jig rten ma lus pa'i 'jig rten rdul phra rab gcig gis khyab par yang ston par mdzad do//de bzhin du/ rnam rtog mi mnga' khyod kyis srid mtha'i bar/ /skad cig de re re la spyod sna tshogs/ /ji snyed ston pa de snyed 'dzam bu'i gling / /ma lus rdul gang de dag la grangs med/ /rnam par rtog pa mi mnga' ba khyod 'khor ba'i bar du skad cig dang skad cig la spyod pa sna tshogs ston pa'i tshad gang yin pa'i tshad de'i grangs ni 'dzam bu'i gling ma lus pa na rdul phra rab ji snyed yod pa de dag la yod pa ma yin no zhes 'di ni thun mong ma yin pa'i yon tan phul du byung bar brjod pa'i sgo nas bcom ldan 'das la bstod pa yin no//sangs rgyas kyi sa ni stobs bcus rab tu phye ba yin pa'i phyir de'i rnam par dbye ba cha tsam zhig bstan pa'i phyir bshad pa/ gnas dang gnas min mkhyen stobs dang / /de bzhin las rnam smin blo dang / /mos pa sna tshogs thugs chud dang / /sna tshogs khams ni mkhyen stobs dang //de bzhin dbang mchog mchog ma yin/ /mkhyen dang thams cad du 'gro dang / /bsam gtan rnam thar ting 'dzin dang / /snyoms par 'jug sogs mkhyen stobs dang / /sngon gnas dran pa mkhyen pa dang / /de bzhin 'chi 'pho skye blo dang / / zag rnams zad pa mkhyen stobs te/ /stobs ni bcu po 'di dag go/ /de la gnas dang gnas ma yin pa mkhyen pa'i stobs kyi dbang du byas nas bshad pa/ rgyu gang zhig las gang zhig nges par skye 'gyur ba/ /de ni de yi gnas su de mkhyen rnams kyis gsungs/ /bshad pa las bzlog gnas min shes bya mtha' yas pa//mkhyen pa thogs pa spangs pa de ni stobs su bshad/ /rgyu gang zhig las gang zhig ces bya ba 'di ni nye bar mtshon pa ste/ de'i phyir rgyu gang las gang zhig skye ba 'di lta ste/ mi dge ba dag las rnam par smin pa yid du mi 'ong ba dang / gang las gang zhig 'thob pa 'di lta ste/'phags pa'i lam las mya ngan las 'das pa zhes bya ba de lta bu la sogs pa sdud pa 'thad par 'gyur ro/ /rgyu gang las gang zhig nges par skye ba can de'i gnas te 'dir gnas pa na zhes bya bas gnas kyi sgras btags pa'i tshul gyis rgyu brjod do//bshad zin pa dang 'gal ba ni gnas ma yin par 'gyur ro/ /gang zhig las gang mi 'byung ba de ni de'i gnas ma yin te/ dper na dge ba dag las 'bras bu yid du mi 'ong ba mi 'byung ba dang / mthong ba'i lam thob pa la srid pa brgyad pa mngon par 'grub pa mi 'byung ba bzhin no//de'i phyir mkhyen pa mi mthun pa'i phyogs dang bral ba 'di ni sangs rgyas bcom ldan 'das kyi stobs su rnam par gzhag ste/ ji skad du 'phags pa gzungs kyi dbang phyug rgyal pos zhus pa'i mdo las/ rigs kyi bu 'di la de bzhin gshegs pas de bzhin gshegs pa'i ye shes bla na med pas gnas pa la yang gnas su yang dag pa ji lta ba bzhin du rab tu shes so//gnas ma yin pa la yang gnas ma yin par yang dag pa ji lta ba bzhin du rab tu shes so/ /rigs kyi bu de la gnas ni gang gnas ma yin pa ni gang zhe na/ rigs kyi bu 'di ni gnas ma yin zhing go skabs med de/gang lus kyis nyes par spyad pa dang / ngag gis nyes par spyad pa dang / yid kyis nyes par spyad pa'i rnam par smin pa 'dod pa dang sdug pa dang dga' ba dang yid du 'ong bar 'gyur ba 'di ni gnas med do/ /'di ni gnas yin zhing go skabs yod pa ste/gang lus kyis legs par spyad pa dang / ngag gis legs par spyad pa dang / yid kyis legs par spyad pa'i rnam par smin pa 'dod pa dang / sdug pa dang / dga' ba dang / yid du 'ong bar 'gyur ba 'di na gnas yin no/ /rigs kyi bu 'di ni gnas ma yin zhing go skabs med de/gang ser snas longs spyod chen po mngon par 'grub pa dang / ngang tshul ngan pas lha dang mir skye ba dang / gnod sems kyis mdzes par 'gyur ba dang / le los mngon par rtogs pa 'thob pa dang / sems g.yengs pas skyon med pa la 'jug pa dang / 'chal ba'i shes rab kyis bag chags kyi mtshams sbyor ba thams cad kun tu 'joms par 'gyur ba dang /mtshams med pa byed pas sems gnas par 'gyur ba dang / dmigs pa can gyis rjes su mthun pa'i bzod pa thob par 'gyur ba dang / 'gyod pa la rab tu gnas pa'i sems shin tu sbyang bar 'gyur ba 'di ni gnas med do//gnas ma yin zhing go skabs med do / /gang bud med kyi lus de nyid kyis 'khor los sgyur ba'i rgyal po'am/ brgya byin nam tshangs pa'am zhes bya ba la sogs pa dang / 'di ni gnas yin zhing go skabs yod pa ste/ sbyin pas longs spyod chen po mngon par 'grub pa dang zhes thams cad bzlog nas sbyar bar bya zhing /'di ni de bzhin gshegs pa'i de bzhin gshegs pa'i las dang po'o zhes gsungs pa lta bu'o/ /da ni las dang rnam par smin pa mkhyen pa'i stobs kyi dbang du byas te bshad pa/ 'dod dang mi 'dod de las bzlog dang zad dngos kyi / /las dang de yi rnam smin shin tu sna tshogs la'ang / /mkhyen pa nus mthu thogs med so sor 'jug 'gyur la/ /dus gsum shes bya khyab mdzad de ni stobs su 'dod/ /las yid du 'ong ba dang / las yid du mi 'ong ba dang / yid du 'ong ba dang / yid du mi 'ong ba'i las dang / zad pa'i rgyu zag pa med pa dang rnam pa gsum po de'i rnam par smin pa las ltar shin tu sna tshogs pa dus gsum gyis bsdus pa 'jig rten ma lus pa khyab pa la yang rang gi ngo bo dang rab tu dbye ba la sogs pa thams cad yongs su mkhyen pas shes bya ma lus pa khyab par mdzad pa'i mkhyen pa shes bya 'gar yang thogs pa mi mnga' ba gang yin pa de ni/bcom ldan 'das kyis las dang rnam par smin pa mkhyen pa'i stobs su rnam par gzhag ste/ ji skad du/ gzhan yang de bzhin gshegs pas 'das pa dang /ma 'ongs pa dang / da ltar byung ba'i las rnams dang las yang dag par blangs pa rnams gnas dang rgyu dang / dngos po dang / rnam par smin pa la mkhas pa yang dag pa ji lta ba bzhin du rab tu shes so/ /ji ltar rab tu shes she na/ rigs kyi bu 'di la 'das pa'i las yang dag par blangs pa gang dge ba'i rgyu las byung ba mi dge ba dang bral ba gang ma 'ongs pa'i dus na/dge ba'i rgyu 'byin pa de de bzhin gshegs pas rab tu shes so/ /las yang dag par blangs pa gang mi dge ba'i rgyu las byung ba dge ba dang bral ba gang ma 'ongs pa'i dus na mi dge ba'i rgyu 'byin pa de yang de bzhin gshegs pas rab tu shes so//de bzhin du las yang dag par blangs pa gang ma 'ongs pa'i dus na nyams pa'i cha dang mthun par 'gyur ba dang / gang khyad par gyi cha dang mthun par 'gyur ba de yang rab tu shes so/ /de bzhin du da ltar byung ba'i dus na nyams pa'i cha dang mthun la/ma 'ongs pa'i dus na khyad par gyi cha dang mthun par 'gyur ba dang / da ltar byung ba'i dus na khyad par gyi cha dang mthun la/ ma 'ongs pa'i dus na nyams pa'i cha dang mthun par 'gyur ba de yang rab tu shes so/ /de bzhin du re re zhing phyogs mthun pa la yang rab tu shes par bya'o//de bzhin du las yang dag par blangs pa gang 'das pa na sbyor ba chung la de ma 'ongs pa'i dus na rgya che zhing sbyor ba rgya che bar 'gyur ba dang / de bzhin du rtsom pa chung la khyad par chen por 'gyur ba dang / rtsom pa chen por 'gyur la khyad par du 'gyur ba chung ba dang /las yang dag par blangs pa gang nyan thos nyid kyi rgyu 'byin pa dang / gang rang sangs rgyas nyid dang / gang sangs rgyas kyi byang chub kyi rgyu 'byin pa de yang de bzhin gshegs pas rab tu shes so/ /de bzhin du las yang dag par blangs pa gang de ltar byung ba na sdug bsngal la ma 'ongs pa na rnam par smin pa bde bar 'gyur ba dang /da ltar byung ba na bde la ma 'ongs pa na rnam par smin pa sdug bsngal bar 'gyur ba de yang de bzhin gshegs pas rab tu shes so/ /de ltar na 'das pa dang / ma 'ongs pa dang / da ltar byung ba'i sems can rnams kyi las gang yin pa dang /rgyu gang yin pa dang / rnam par smin pa gang yin pa de bzhin gshegs pas de kho na dang gzhan ma yin pa la brten par yang dag pa ji lta ba bzhin du rab tu shes so/ /shes nas kyang de bzhin nyid du chos ston te/ 'di ni de bzhin gshegs pa'i de bzhin gshegs pa'i las gnyis pa'o zhes gsungs pa lta bu'o//da ni mos pa sna tshogs mkhyen pa'i stobs kyi dbang du byas nas bshad pa/ 'dod chags sogs kyi 'byung ba'i stobs kyis 'dod pa ni/ /shin tu sna tshogs dman 'bring gang yang khyad 'phags 'dod/ /de las gzhan rnams kyis g.yogs mos la'ang mkhyen pa ni//dus gsum 'gro ba ma lus khyab pa stobs shes bya/ /'dir 'dod chags kyi sgra ni nyon mongs pa'i nye bar mtshon pa yin pa'i phyir zhe sdang la sogs pa rnams kyang 'dzin par byed do/ /sogs pa'i sgras ni dad pa la sogs pa dge ba'i chos yongs su bsdu bar bya ba'i phyir ro//'byung ba'i sgras ni 'dod chags la sogs pa rnams kyi sa bon smos te/ 'di las 'dod chags la sogs pa 'byung bas na zhes bya ba'i phyir ro/ /de'i phyir de ltar na 'dod chags la sogs pa dang / dad pa la sogs pa'i sa bon gyis yongs su bzung ba'i bsam pa ni lhag par mos pa dang /lhag par bsam pa dang 'dod pa dang mos pa zhes bya bar brjod la/ mos pa de las gzhan pa'i chos kun tu spyod pas bsgribs pa de la yang rang gi ngo bo'i khyad par yongs su gcod par mdzad pa rnam pa thams cad mkhyen pa nyid gang 'byung ba de ni sangs rgyas bcom ldan 'das rnams kyi mos pa sna tshogs mkhyen pa'i stobs su rnam par gzhag ste/ji skad du/ rigs kyi bu gzhan yang de bzhin gshegs pas sems can gzhan dag dang / gang zag gzhan rnams kyi mos pa du ma dang /mos pa sna tshogs yang dag pa ji lta ba bzhin du rab tu shes so/ /rigs kyi bu de bzhin gshegs pa ji ltar sems can gzhan dag dang gang zag gzhan rnams kyi mos pa du ma dang mos pa sna tshogs yang dag pa ji lta ba bzhin du rab tu shes she na/ gang zag gang 'dod chags la gnas la zhe sdang la mos pa dang /gang zag gang zhe sdang la gnas la 'dod chags la mos pa dang / gang zag gang gti mug la gnas la 'dod chags dang / zhe sdang dang / gti mug la mos pa de yang de bzhin gshegs pas rab tu shes so/ /gang zag gang dge ba la gnas la mi dge ba la mos pa de yang de bzhin gshegs pas rab tu shes so//gang zag gang dag sbyor ba chung ba bsam pa rgya chen po la mos pa dang / gang dag sbyor ba rgya che la bsam pa chung ngu la mos pa de dag kyang de bzhin gshegs pas rab tu shes so/ / mos pa gang gis sbyor ba chung la khyad par la gnas par 'gyur ba dang / sbyor ba khyad par du 'phags la chung ngu la gnas par 'gyur ba dang / yang dag pa nyid du nges la log pa nyid du nges pa'i khams la 'jog par 'gyur ba dang / log pa nyid du nges la yang dag pa nyid du nges pa'i khams la 'jog par 'gyur ba dang /ma nges la yang dag pa nyid du nges pa'i khams la 'jog par 'gyur ba dang / mos pa gang gis 'dod pa'i khams las shin tu 'da' bar 'gyur ba dang / gang gis gzugs kyi khams dang / gang gis gzugs med pa'i khams dang / gang gis khams gsum pa las shin tu 'da' bar 'gyur ba de yang de bzhin gshegs pas rab tu shes so/ /shes nas kyang de bzhin du chos ston te/ 'di ni de bzhin gshegs pa'i de bzhin gshegs pa'i las gsum pa'o zhes gsungs pa lta bu'o/ /da ni khams sna tshogs pa mkhyen pa'i stobs kyi dbang du byas nas bshad pa/sangs rgyas khams kyi rnam par dbye la mkhas rnams kyis/ /mig sogs dag gi rang bzhin gang de khams su gsungs/ /rdzogs pa'i sangs rgyas rnams kyi mkhyen pa mtha' yas shing / /rnam kun khams kyi khyad par la 'jug stobs su 'dod//rang bzhin dang ngo bo dang stong pa nyid ces bya ba ni rnam grangs dag go/ /sangs rgyas khams mtha' dag gi rab tu dbye ba la mkhas pa rnams kyi mkhyen pa gang zhig mig la sogs pa'i khams kyi rang bzhin gang nang stong pa nyid la sogs pa'i mtshan nyid can rab tu dbye ba du mar gyur pa de la thogs pa mi mnga' ba de ni khams sna tshogs mkhyen pa'i stobs su rnam par gzhag ste/ji skad du/ rigs kyi bu gzhan yang de bzhin gshegs pas mig gi khams dang / gzugs kyi khams dang / mig gi rnam par shes pa'i khams rab tu shes so//nang stong pa nyid dang / phyi stong pa nyid dang / phyi nang stong pa nyid rab tu shes so/ /de bzhin du khams bco brgyad char yang stong pa nyid gsum gsum dang sbyar bar bya'o/ /sa la sogs pa'i khams kyang rab tu shes so/ /ji ltar rab tu shes she na/ nam mkha'i khams ji lta ba de bzhin du rab tu shes so//de bzhin du 'dod pa dang / gzugs dang / gzugs med pa'i khams dag yongs su brtags pa las yang dag par byung bar rab tu shes so/ /'dus byas kyi khams ni mngon par 'du bya ba'i mtshan nyid du'o/ /'dus ma byas kyi khams kyang mngon par 'du bya ba med pa'i mtshan nyid du'o//kun nas nyon mongs pa'i khams ni glo bur gyi nyon mongs pa'i mtshan nyid du'o/ /rnam par byang ba'i khams ni rang bzhin gyis 'od gsal ba'i mtshan nyid du'o/ /'khor ba'i khams ni tshul bzhin ma yin pa'i ma rig pa'i mtshan nyid du'o//mya ngan las 'das pa'i dbyings ni tshul bzhin rig pa'i mtshan nyid du'o/ /de ltar na 'jig rten gnas pa'i khams gang yin pa dang / rab tu gnas pa'i khams gang yin pa dang / rjes su khrid pa'i khams gang yin pa dang / thogs pa'i khams gang yin pa dang / bsam pa'i khams gang yin pa dang /brten pa'i khams gang yin pa de de bzhin gshegs pas yang dag pa ji lta ba bzhin du rab tu shes so/ /shes nas kyang de bzhin du chos ston te/ 'di ni de bzhin gshegs pa'i de bzhin gshegs pa'i las bzhi pa'o zhes gsungs pa lta bu'o//da ni dbang po mchog dang mchog ma yin pa mkhyen pa'i stobs kyi dbang du byas nas bshad pa/ kun tu rtog sogs ches rno nyid ni mchog bzhed la/ /'bring gnas skabs dang rdul nyid mchog min par bshad dang / /mig la sogs dang phan tshun sgrub nus chub pa la//rnam pa thams cad mkhyen pa chags med stobs su gsungs/ /kun tu rtog pa ni yang dag pa ma yin pa lhag par sgro 'dogs pa'o/ /kun tu rtog pa ni dbang po nyid yin te/ 'dod chags la sogs pa skyed pa la mnga' bdag nyid du gnas pa'i phyir ro/ /sogs pa'i sgras ni dad pa la sogs pa dge ba'i rgyu can rnams sdud par rtogs par bya'o//de'i phyir mchog gi sgras ni phul du byung ba brjod de/ chung ngu dang 'bring gi gnas skabs ni mchog ma yin pa'i sgras brjod do/ /mig sogs zhes bya ba 'dis ni mig la sogs pa'i dbang po nyi shu rtsa gnyis 'dzin to//de'i phyir 'dir dbang po'i rang gi ngo bo thugs su chud pa dang / phan tshun 'bras bu sgrub par nus pa'i rang gi ngo bo thugs su chud pa la mkhyen pa gang zhig thogs pa mi mnga' ba 'di ni dbang po mchog dang mchog ma yin pa mkhyen pa'i stobs su rnam par gzhag ste/ji skad du/ rigs kyi bu gzhan yang de bzhin gshegs pas sems can gzhan dag dang / gang zag gzhan rnams kyi dbang po'i rim pa yang dag pa ji lta ba bzhin du rab tu shes so/ /rigs kyi bu de bzhin gshegs pas ji ltar sems can gzhan dag dang / gang zag gzhan rnams kyi dbang po'i rim pa yang dag pa ji lta ba bzhin du shes she na/rigs kyi bu 'di la de bzhin gshegs pas sems can dbang po rtul po rnams kyang sems can dbang po rtul por yang dag pa ji lta ba bzhin du rab tu shes so/ /de bzhin du dbang po 'bring yang rab tu shes so//dbang po rnon po yang rab tu shes so/ /yongs su rtog pa'i dbang po ci 'dra bas mthar song ba'i 'dod chags skye ba dang / mthar song ba'i zhe sdang dang / mthar song ba'i gti mug skye ba de yang de bzhin gshegs pas rab tu shes so/ /mthar song ba zhes bya ba ni rab tu gyur pa'o//yongs su rtog pa'i dbang po ci 'dra bas 'dod chags dang zhe sdang dang gti mug bcos ma skye ba de yang de bzhin gshegs pas rab tu shes so/ /yongs su rtog pa'i dbang po gang gis snrel zhi'i 'dod chags dang / zhe sdang dang / gti mug skye ba dang /yongs su rtog pa'i dbang po gang gis tshar bcad pa'i 'dod chags dang / zhe sdang dang gti mug skye ba de yang de bzhin gshegs pas rab tu shes so/ /dbang po gang dag dge ba'i rgyu las byung ba dang / dbang po gang dag nges par 'byung ba'i rgyu las byung ba de dag thams cad kyang de bzhin gshegs pas rab tu shes so//gzhan yang de bzhin gshegs pas mig gi dbang po rab tu shes pa nas kun shes pa dang ldan pa'i dbang po'i bar rab tu shes so/ /dbang po gang mig gi dbang po'i rgyu las byung ba rna ba'i dbang po 'jig pa de yang de bzhin gshegs pas rab tu shes so//de bzhin du rna ba'i dbang po la sogs pa rnams kyang rig par bya'o/ /sems can gang sbyin pa'i dbang po can yin la/ de yang tshul khrims la sbyor ba de la de bzhin gshegs pa dbang po mchog dang mchog ma yin pa shes pas sbyin pa'i gtam byed do//de bzhin du tshul khrims dang / bzod pa dang / brtson 'grus dang / bsam gtan dang / shes rab kyi dbang po can yin la/ de yang sbyin pa la sogs pa de la sbyor ba de la de ltar tshul khrims la sogs pa'i gtam byed do/ /de bzhin du gang nyan thos kyi theg pa'i dbang po can yin la/de yang rang sangs rgyas kyi theg pa la sbyor ba zhes bya ba la sogs pa sbyar ro/ /rigs kyi bu de ltar na de bzhin gshegs pas sems can thams cad kyi dbang po yongs su smin pa rnams ni dbang po yongs su smin pa rnams so zhes bya bar yang dag pa ji lta ba bzhin du rab tu shes so//yongs su ma smin pa rnams kyang yongs su ma smin pa rnams so zhes bya bar yang dag pa ji lta ba bzhin du rab tu shes so/ /nges par 'byung ba ma yin pa rnams ni nges par 'byung ba ma yin pa rnams so zhes bya bar yang dag pa ji lta ba bzhin du rab tu shes so//nges par 'byung ba dang bcas pa rnams kyang nges par 'byung ba dang bcas pa rnams so zhes yang dag pa ji lta ba bzhin du rab tu shes so/ /sems can gyi dbang po'i rnam pa gang yin pa dang / sbyor ba gang yin pa dang / gsum pa gang yin pa dang / gang gi rgyu las byung ba dang / rkyen gang yin pa dang / dmigs pa gang yin pa dang / mthar thug pa gang yin pa dang / mtha' gang yin pa/ de dag thams cad de bzhin gshegs pas yang dag pa ji lta ba bzhin du rab tu shes so/ /'di ni de bzhin gshegs pa'i de bzhin gshegs pa'i las lnga pa'o zhes gsungs pa lta bu'o//de ni thams cad du 'gro ba'i lam mkhyen pa'i stobs kyi dbang du byas nas bshad pa/ lam 'ga' rgyal ba nyid dang 'ga' zhig rang rgyal gyi/ /byang chub dang ni nyan thos byang chub yi dwags dang / /dud 'gro lha mi rnams dang dmyal la sogs 'gro ba//de la mkhyen pa chags med mtha' yas stobs su 'dod/ /de la lam gyi sgras ni lam shul brjod do/ /lam gang la lam thams cad du 'gro ba'i ngang tshul yod pa de ni thams cad du 'gro ba'i lam mo/ /lam 'ga' zhig ni sangs rgyas nyid du 'dod do/ /la la ni rang rgyal ba'i byang chub tu'o//la la ni nyan thos kyi byang chub tu'o/ /la la ni lha dag tu yin pa nas dmyal ba dag tu yin pa'i bar ro/ /sogs pa'i sgra ni rnam pa sna tshogs bstan par mtshon pa'i don to/ /de la de bzhin gshegs pas lam gang zhig gang du 'gro ba'i lam de ni der 'gro ba yin no zhes yang dag pa ji lta ba bzhin du rab tu mkhyen to//de'i phyir bcom ldan 'das kyi mkhyen pa lam thams cad kyi yul can thogs pa mi mnga' ba 'di ni thams cad du 'gro ba'i lam mkhyen pa'i stobs su rnam par gzhag ste/ ji skad du/ rigs kyi bu gzhan yang de bzhin gshegs pas kun tu 'gro ba'i lam shes pa yang dag pa ji lta ba bzhin du rab tu shes so//ji ltar rab tu shes she na/ yang dag pa nyid du nges pa'i sems can gyi khams kyang yang dag pa ji lta ba bzhin du rab tu shes so/ /ma nges pa dang log pa nyid du nges pa'i sems can gyi khams kyang rab tu shes so//nges pa dang bcas pa'i sems can gyi khams ni 'di ltar rab tu shes so / /sems can gang dag rgyu'i stobs can sngon gyi sbyor ba phun sum tshogs pa/ zur tsam gyis go ba dbang po rnon po'i sems can de dag la de bzhin gshegs pas chos bstan kyang rung /ma bstan kyang rung ste/ rnam par grol ba'i skal ba yod pa de dag de bzhin gshegs pas sngon gyi rgyu dang stobs shes nas chos ston to/ /ma nges pa'i sems can gyi khams kyang 'di ltar shes te/ gang dag rkyen gyi stobs can yongs su smin par bya ba'i mtshan nyid can gyi sems can de dag gal te mthun par 'doms shing rjes su ston pa dang phrad na rnam par grol bar 'gyur gyi/ma phrad na rnam par grol bar mi 'gyur ba de dag la yang de bzhin gshegs pas de lta de ltar rgyu dang rkyen dang ldan pa'i gtam yang dag par gsungs te/ / gang gi phyir de bzhin gshegs pa las de lta bu'i chos thos nas tshul bzhin du rab tu sbyor bas 'bras bu thob par 'gyur ba de dag gi don du sangs rgyas bcom ldan 'das rnams 'byung ngo / /log pa nyid du nges pa'i sems can gyi khams 'di ltar rab tu shes so/ / yongs su sbyang ba ma byas pa/ kho re chung ba/ blun pa snod du ma gyur pa'i sems can de dag la de bzhin gshegs pas chos bstan kyang rung ma bstan kyang rung ste/ sems can de dag rnam par grol ba'i skal ba med pas de dag de bzhin gshegs pas snod ma yin par rig nas btang snyoms su 'jog ste/de dag gi ched du byang chub sems dpa' rnams go cha gyon to/ /gzhan yang de bzhin gshegs pas 'dod chags kyi lam rnam pa gsum rab tu shes te/ gsum gang zhe na/ 'dod chags kyi lam gang sdug pa'i rnam pa las skye ba yang yod/ 'dod chags kyi lam gang rjes su chags pa'i rnam pa las skye ba yang yod/'dod chags kyi lam gang sngon gyi bag la nyal gyi rgyu las skye ba yang yod do/ /zhe sdang gi lam rnam pa gsum yang rab tu shes te/ zhe sdang gi lam gang khong khro ba'i rgyu las skye ba yang yod/ zhe sdang gi lam gang bsam pa yongs su ma rdzogs pa las skye ba yang yod/zhe sdang gi lam gang sngon gyi bag la nyal las skye ba yang yod do/ /gti mug gi lam rnam pa gsum char yang rab tu shes te/ gti mug gi lam gang ma rig pa'i rgyu las skye ba yang yod/ gti mug gi lam gang 'jig tshogs la lta ba'i rgyu las skye ba yang yod/gti mug gi lam gang the tshom gyi rgyu las skye ba yang yod de/ de dag kyang de bzhin gshegs pas rab tu shes so zhes bya ba rgyas par 'byung zhing / de ltar sems can thams cad kyi 'jug pa'i rgyu las byung ba dang / ldog pa'i rgyu las byung ba'i lam gang ji snyed pa de dag thams cad du de bzhin gshegs pa'i ye shes mthong ba thogs pa med par 'jug ste/'di ni de bzhin gshegs pa'i de bzhin gshegs pa'i las drug pa'o zhes gsungs pa lta bu'o/ /da ni bsam gtan dang / rnam par thar pa dang / ting nge 'dzin dang /snyoms par 'jug pa dang / kun nas nyon mongs pa dang / rnam par byang ba'i ldang ba mkhyen pa'i stobs kyi dbang du byas nas bshad pa/ 'jig rten mtha' yas rnal 'byor bye brag la tha dad/ /bsam gtan rnam thar brgyad gang zhi gnas gang dag dang / /snyoms 'jug khyad par gang dag gcig dang brgyad gyur pa//de la mkhyen pa thogs med 'di ni stobs su bshad/ /de la 'jig rten mtha' yas pa na/ rnal 'byor pa'i khyad par gyis rab tu dbye ba mtha' yas par gyur pa bsam gtan dag ni bzhi'o/ /rnam par thar pa ni brgyad do//zhi gnas ni ting nge 'dzin dag ste/ dge ba la sems rtse gcig pa'i mtshan nyid can no/ /mthar gyis gnas pa'i snyoms par 'jug pa dag ni dgu ste/ bsam gtan bzhi dang / gzugs med pa bzhi dang / 'du shes dang / tshor ba 'gog pa'o/ /kun nas nyon mongs pa'i rgyu ni ma rig pa dang /tshul bzhin ma yin pa'i yid la byed pa la sogs pa dag go/ /rnam par byang ba'i rgyu ni gzhan las rjes su mthun pa'i sgra dang so so rang gi tshul bzhin yid la byed pa ste/ de lta bu la sogs pa dag go/ /de'i phyir rnal 'byor pa'i dbye bas so sor rab tu dbye ba mtha' yas par gyur pa bsam gtan la sogs pa de la mkhyen pa gang zhig thogs pa mi mnga' ba de ni bsam gtan dang /rnam par thar pa dang / ting nge 'dzin dang / snyoms par 'jug pa dang / kun nas nyon mongs pa dang / rnam par byang ba'i ldang ba mkhyen pa'i stobs su rnam par gzhag ste/ji skad du/ rigs kyi bu gzhan yang de bzhin gshegs pas bsam gtan dang / rnam par thar pa dang / ting nge 'dzin dang / snyoms par 'jug pa dang / kun nas nyon mongs pa dang / rnam par byang ba'i ldang ba shes pa thams cad yang dag pa ji lta ba bzhin du rab tu shes so//ji ltar rab tu shes she na/ sems can rnams kyi kun nas nyon mongs pa skye ba'i rgyu gang yin pa dang / rkyen gang yin pa de de bzhin gshegs pas rab tu shes so/ /sems can rnams kyi rnam par dag par 'gyur ba'i rgyu gang yin pa dang /rkyen gang yin pa de yang de bzhin gshegs pas rab tu shes so/ /de la rgyu ni gang / rkyen ni gang zhe na/ sems can rnams kyi kun nas nyon mongs pa'i rgyu ni tshul bzhin ma yin pa yid la byed pa'o/ /sems can rnams kyi kun nas nyon mongs pa'i rkyen ni ma rig pa'o//ma rig pa ni rgyu'o/ /'du byed rnams ni rkyen to/ /'du byed ni rgyu'o/ /rnam par shes pa ni rkyen to zhes bya ba nas/ nyon mongs pa rnams ni rgyu'o/ /las rnams ni rkyen to/ /lta ba ni rgyu'o/ /sred pa ni rkyen to/ /bag la nyal ba ni rgyu'o//kun nas ldang ba ni rkyen te zhes bya ba'i bar dang / de la sems can rnams kyi rnam par byang ba'i rgyu ni gang rkyen ni gang zhe na/ rgyu gnyis dang rkyen gnyis so/ /gnyis gang zhe na/ gzhan las rjes su mthun pa'i sgra dang / so so rang gi tshul bzhin yid la byed pa'o/ / gzhan yang gnyis te/ zhi gnas la rtse gcig pa dang / lhag mthong la mkhas pa'o zhes rgyas par 'byung zhing / 'di ni sems can rnams kyi rnam par dag pa'i rgyu'o/ /'di ni rkyen te de yang de bzhin gshegs pas rab tu shes so/ /de bzhin du rigs kyi bu de bzhin gshegs pa ni ye shes dang ldan pas 'dod pa rnams las dben pa/sdig pa mi dge ba'i chos rnams las dben pa/ rnam par rtog pa dang bcas pa rnam par dpyod pa dang bcas pa/ dben pa las skyes pa'i dga' ba dang bde ba can bsam gtan dang po la snyoms par zhugs te 'gog pa las ldang ngo //'gog pa la snyoms par zhugs te bsam gtan dang po las ldang ngo / /rnam par thar pa brgyad la lugs dang mthun par yang snyoms par 'jug go/ lugs dang mi mthun pa dang / snrel zhir yang ngo / /ting nge 'dzin ni snyoms par 'jug par ston/ snyoms par 'jug pa ni ting nge 'dzin du ston kyang de bzhin gshegs pa'i ting nge 'dzin la 'dres pa gang yang med cing / de bzhin gshegs pa la ni dmigs pas ting nge 'dzin la snyoms par 'jug par bya ba med do/ /de bzhin gshegs pa'i ting nge 'dzin gcig gis ting nge 'dzin thams cad mngon par 'grub ste/de bzhin gshegs pa ni ting nge 'dzin gcig las ma langs par ting nge 'dzin thams cad la snyoms par 'jug kyang de bzhin gshegs pa la sems gcig nas gcig tu 'jug pa med/ de bzhin gshegs pa la sems mnyam par ma bzhag pa mi dmigs so//de bzhin gshegs pa'i ting nge 'dzin ni sus kyang blta bar mi nus te/ nyan thos kyi ting nge 'dzin ni rang sangs rgyas kyi ting nge 'dzin gyis zil gyis gnon to/ /rang sangs rgyas kyi ting nge 'dzin ni byang chub sems dpa'i ting nge 'dzin gyis zil gyis gnon to//byang chub sems dpa'i ting nge 'dzin ni de bzhin gshegs pa'i ting nge 'dzin gyis zil gyis gnon to/ /de bzhin gshegs pa'i ting nge 'dzin ni zil gyis mi gnon pa ste / 'di la de bzhin gshegs pa'i ye shes ni zil gyis mi gnon par 'jug pa'o / /gdams pa dang rjes su bstan pa gang dang gang gis nyan thos rnams ting nge 'dzin bskyed pa de yang de bzhin gshegs pas rab tu shes so//gang gis rang sangs rgyas rnams dang / gang gis byang chub sems dpa' rnams kyis ting nge 'dzin bskyed pa de yang de bzhin gshegs pas rab tu shes so//shes nas kyang de bzhin du 'doms shing de bzhin du rjes su ston te/ 'di ni de bzhin gshegs pa'i de bzhin gshegs pa'i las bdun pa'o zhes gsungs pa lta bu'o/ /da ni sngon gyi gnas rjes su dran pa mkhyen pa'i stobs kyi dbang du byas nas bshad pa/ ji srid gti mug de srid srid gnas 'das bdag dang //sems can gzhan re re yi srid pa sems can ni/ /ji snyed de snyed mtha' yas gzhir bcas yul phyogs dang / /bcas rnams la blo gang dang gang yin stobs su bshad/ /ji srid gti mug ces bya ba 'dis ni skye ba gcig nas gcig tu brgyud pa thog ma med pa sngon gyi gnas rjes su dran pa mkhyen pa'i yul nyid du bshad do//sems can ji snyed ces bya ba 'dis ni sems can gyi khams mu mtha' med pa bsdu bar brjod do / /gzhir bcas smos pas ni rgyu dang bcas pa nyid kyi sgo nas de bsdu ba bshad do//ga ge mo zhig nas bdag kha dog ni 'di 'dra bar gyur/ rnam pa ni 'di lta bur gyur zhes bya ba la sogs pa ni mdo ji lta ba bzhin no/ /de la kha dog ni 'di 'dra bar gyur zhes bya bar rjes su dran pas ni rnam pa dang bcas par rjes su dran par 'gyur ro//che ge mo zhig na bdag gnas nas de nas shi 'phos nas ga ge mo zhig tu skyes/ de nas shi 'phos nas 'dir skyes so zhes bya bar dran pas ni yul phyogs dang bcas par rjes su dran par 'gyur ro/ /lhag ma ni rgyu dang bcas par rjes su dran pa'o/ /de ltar sngon gyi srid pa gzhi dang bcas pa dang /yul phyogs dang bcas pa dang / rnam pa dang bcas pa sangs rgyas bcom ldan 'das kyi mkhyen pa gang zhig thogs pa mi mnga' ba ni sngon gyi gnas rjes su dran pa mkhyen pa'i stobs yin no/ /stobs 'dis ni sangs rgyas bcom ldan 'das rnams sems dang sems las byung ba'i rgyu ba 'das pa dag ma lus par ji lta ba bzhin thugs su chud de/skal ba dang ldan pa dang / skal ba dang mi ldan pa'i tshul mkhyen pa nyid kyis chos 'bras bu yod pa ston par mdzad pa yin no zhes bya bar rnam par gzhag ste/ ji skad du/ de sems can de'i sngon gyi gnas rjes su dran no/ /sngon gyi rgyu ji lta bu dang / rgyu gang gis sems can gang kun tu byung ba de'i sngon gyi rgyu de bzhin gshegs pas rab tu shes te shes nas kyang de bzhin du chos ston to/ /sems can thams cad kyi sems kyi rgyu ba 'das pa yang de bzhin gshegs pas rab tu shes so//sems gang gis dmigs pa can gyi 'og tu sems gang gis dmigs pa can skye ba dang / dmigs pa gang gis skye ba dang / dmigs pa gang dang bral ba na 'gag pa de yang de bzhin gshegs pas rab tu shes so/ /de ltar ji tsam du sems can gcig gi sems gcig nas gcig tu brgyud de 'jug pa de lta bu zhig gi 'og tu sems 'di lta bu zhig byung la/de'i 'og tu yang 'di lta bu zhig byung ba de bskal pa gang gA'i klung gi bye ma snyed du yang tshig tu bstan pas bstan par dka'o/ /de bzhin du sems can thams cad kyi yang de lta bu so sor sems gcig nas gcig tu brgyud pa de bzhin gshegs pas rab tu shes so//yongs su brtag pa nye bar bzung ste phyi ma'i mur thug par bstan kyang de'i ye shes mthar thug par mi 'gyur ro/ /de bzhin gshegs pa'i sngon gyi gnas rjes su dran pa shes pa 'di ni bsam gyis mi khyab cing mtshungs pa med la/tshad med de/ de'i mtha' ni bstan par sla ba ma yin no/ /sangs rgyas khyu mchog tu gyur pas de bzhin gshegs pas sems can de dag la/ kye sems can gang dag dge ba'i rtsa ba sangs rgyas la bskrun pa'am/nyan thos la bskrun pa'am/ rang sangs rgyas la bskrun pa de lta bu dran par gyis shig ces dran par byed do/ /'di lta ste/ sangs rgyas kyi mthus sems can de dag gis kyang dran par 'gyur ro/ /de bzhin gshegs pas de dag la dge ba'i rtsa ba la dmigs pa de dang des ci nas theg pas rnam par grol ba las phyir mi ldog par 'gyur ba de lta de ltar chos ston to//'di ni de bzhin gshegs pa'i de bzhin gshegs pa'i las brgyad pa'o zhes gsungs pa lta bu'o/ /da ni 'chi 'pho ba dang skye ba mkhyen pa'i stobs kyi dbang du byas nas bshad pa/ sems can rnams kyi sems can re re'i 'chi 'pho dang / /skye gang 'jig rten la gnas nam mkha'i mthar thug dang / /bkra mang de la mkhyen pa dus der 'jug pa yis/ /ma chags rnam kun yongs dag mtha' yas stobs su 'dod/ /'chi 'pho ba ni phung po 'jig pa'o/ /skye ba ni phung po'i nying mtshams sbyor ba'o//'jig rten ma lus pa'i 'chi 'pho ba dang skye ba nam mkha'i khams kyi mthas gtugs pa/ las shin tu sna tshogs pa'i bzos sbyar ba gang dag yin pa de dag bcom ldan 'das kyis skad cig gcig kho na la lhun gyis grub par yang dag par ji lta ba bzhin du mkhyen la/de'i ye shes yul 'ga' la yang chags pa mi mnga' ste/ rnam pa thams cad yongs su dag pas thogs pa mi mnga' ba 'di ni bcom ldan 'das kyi 'chi 'pho ba dang skye ba mkhyen pa'i stobs su rnam par gzhag go/ /bcom ldan 'das kyis sems can rnams kyi 'chi 'pho dang skye ba mkhyen pa 'ba' zhig tu ma zad kyi/'on kyang lha'i spyan gyis 'chags pa dang 'jig pa la sogs pa sna tshogs pa mang po thams cad kyang ma tshang ba med par rab tu mkhyen to zhes bya bar rnam par gzhag ste/ ji skad du/ de la de bzhin gshegs pa'i lha'i mig ni 'di yin te/mig des phyogs bcu'i 'jig rten gyi chos kyi dbyings kyis klas pa nam mkha'i khams kyi mthas gtugs pa/ tshad med grangs med pa bgrang ba las shin tu 'das pa'i sangs rgyas kyi zhing de dag na zhing du snang ba gang la la sems can gyi rjes su bzung ba 'jig pa dang 'chags pa de dag mthong ngo //gang la la sems can du snang ba 'chi 'pho ba dang skye ba dang bde 'gro dang ngan 'gro dang las ji lta ba bzhin du nye bar 'gro ba de dag thams cad mthong ngo / /gang la la byang chub sems dpar snang ba 'chi 'pho ba dang mngal du 'jug pa dang 'byung ba de dag thams cad mthong ngo //gang la la sangs rgyas su snang ba mngon par rdzogs par 'tshang rgya ba chos kyi 'khor lo bskor ba che'i 'du byed 'dor ba yongs su mya ngan las 'da' ba de dag thams cad mthong ngo / /gang la la nyan thos su snang ba rnam par grol ba yongs su mya ngan las 'da' ba de dag thams cad mthong ngo //gang la la rang sangs rgyas su snang ba rdzu 'phrul ston pa yon sbyong ba de dag thams cad mthong ngo / /sems can gang dag snang bar gyur pa dag dang gang dag phyi rol gyi mngon par shes pa lnga po rnams kyi mig lam du byung ba dang /nyan thos rnams kyi ma yin pa dang / rang sangs rgyas rnams kyi ma yin pa dang / byang chub sems dpa' dag gi ma yin pa de dag kyang de bzhin gshegs pa'i lha'i mig la snang bar 'gyur ro/ /yang shing rta'i 'phang lo tsam gyi phyogs na snang bar ma gyur pa'i sems can gang dag de bzhin gshegs pa la snang bar gyur pa de dag ni ches mang gi /stong gsum gyi stong chen po'i 'jig rten gyi khams kyi lha dang mi rnams ni de lta ma yin no/ /de bzhin du snang bar ma gyur pa'i sems can gyi khams tshad med do/ /de ltar sangs rgyas kyis 'dul ba'i sems can gang yin zhes de bzhin gshegs pa'i lha'i mig gis sangs rgyas kyi zhing thams cad du sems can gyi khams la rnam par blta'o//sangs rgyas kyis 'dul ba'i sems can gyi ris ji snyed pa de dag gi mdun du de snyed kyi de bzhin gshegs pa bzhugs shing sems can de dag 'dul yang de ma yin pa'i sems can gzhan gyis mi shes te/'di ni de bzhin gshegs pa'i de bzhin gshegs pa'i las dgu pa'o zhes gsungs pa lta bu'o/ /da ni zag pa zad pa mkhyen pa'i stobs kyi dbang du byas nas bshad pa/ rnam kun mkhyen pa'i stobs kyis myur du rgyal rnams kyi//nyon mongs dang ni bag chags dang bcas 'jig 'gyur dang / /slob ma la sogs nyon mongs blo yis 'gog pa yang / /de la mkhyen pa chags med mtha' yas stobs su 'dod/ /de la nyon mongs pa dag ni ma rig pa dang 'dod chags la sogs pa dag ste/ 'jig rten khams gsum pa nyon mongs par byed pa'i phyir ro/ /gang gis sems kyi rgyud 'bag par byed cing sgo bar byed la rjes su bgrod par byed pa de ni bag chags te nyon mongs pa'i mur thug pa dang goms pa dang rtsa ba dang bag chags zhes bya ba ni rnam grangs dag go/ /de ni zag pa med pa'i lam gyis nyon mongs pa spangs su zin kyang nyan thos dang rang sangs rgyas thams cad kyis spang bar mi nus te/til mar dang me tog la sogs pa bsal du zin kyang bum pa dang snam bu la sogs pa rnams la de dag dang phrad pas yon tan phra mo dmigs pa bzhin no/ /'di ltar nyon mongs pa spangs kyang bag chags yod pas dgra bcom pa sngon du spre'ur gyur pa mchong zhing mchong zhing 'gro ba dang sngon bram zer gyur pa'i dmangs mor brjod pa'i kun tu spyod pa bcom ldan 'das kyis bzlog tu zin kyang ma log pa dmigs pa yin no//de la ma rig pa'i bag chags ni shes bya yongs su dpyod pa'i gegs su gyur pa yin la/'dod chags la sogs pa'i bag chags yod pa ni lus dang ngag gi 'jug pa rnam pa de lta bu'i rgyu yang yin te/ ma rig pa dang 'dod chags la sogs pa'i bag chags de yang rnam pa thams cad mkhyen pa dang sangs rgyas kho na la ldog par 'gyur gyi gzhan dag la ni ma yin no//de'i phyir nyon mongs pa'i bag chags lhag ma lus par spangs pa dang / bag chags kyi mtshams sbyor ba'i nyon mongs pa spangs pa de la sangs rgyas rnams kyi mkhyen pa gang zhig thams cad du thogs pa mi mnga' ba de ni zag pa zad pa mkhyen pa'i stobs su rnam par gzhag ste/ji skad du/ rigs kyi bu gzhan yang de bzhin gshegs pas zag pa thams cad zad pas bdag gi skye ba ni zad/ tshangs par spyod pa ni bsten/ bya ba ni byas te 'di las srid pa gzhan mi shes so zhes te/ zag pa med pa sems rnam par grol ba shes rab rnam par grol ba rang gi mngon par shes pa mngon sum du byas nas de nye bar bsgrubs te gnas so// de bzhin gshegs pa'i zag pa zad pa shes pa de ni rnam par dag pa dri ma med pa yongs su dag pa 'od gsal ba bag chags kyi mtshams sbyor ba thams cad [(]yang [,]kyang [)]yang dag par bcom pa'o//nyan thos rnams kyi zag pa zad pa ni tshad yod pa bag chags yang dag par ma bcom pa'o/ /rang sangs rgyas rnams kyi zag pa zad pa ni tshad yod pa snying rje chen po dang bral ba spobs pa dang bral ba'o/ /de bzhin gshegs pa'i zag pa zad pa ni rnam pa'i mchog thams cad dang ldan pa bag chags kyi mtshams sbyor ba thams cad yang dag par bcom pa/thugs rje chen pos kun tu bzung ba mi 'jigs pa dang spobs pa dang ma bral ba/ 'jig rten thams cad kyis zil gyis mi gnon pa ste sems kyi skad cig gcig dang ldan pa'o//de ci'i phyir zhe na/ de bzhin gshegs pa la las kyi bag chags med/ nyon mongs pa'i bag chags med/ spyod lam 'khrul pa'i bag chags med do/ /'di lta ste/ dper na nam mkha' rang bzhin gyis yongs su dag pas rdul dang du ba dang lhan cig mi gnas pa de bzhin du/de bzhin gshegs pa'i zag pa zad pa shes pa yang las dang nyon mongs pa'i bag chags thams cad dang lhan cig mi gnas pa'o / /de zag pa zad pa de lta bu la rab tu gnas ma thag tu zag pa dang bcas pa nye bar len pa dang bcas pa'i sems can rnams la zag pa zad par bya ba dang nye bar len pa spang ba'i phyir chos ston to//kye ma sems can yang dag pa ma yin pa yongs su rtog pa las byung ba dag khyed zag pa dang nye bar len pa de dag la yang dag pa ji lta ba bzhin du so sor rtogs shig ces de dag la de bzhin gshegs pas ci nas kyang zag pa rnams yang dag pa ma yin par yang dag pa ji lta ba bzhin rab tu shes par 'gyur ba dang /rab tu shes nas chos gang yang nye bar mi len pas yongs su mya ngan las 'da' bar 'gyur ba de lta de ltar nye bar bkod pa'i dpe rnams kyis chos ston to/ /rigs kyi bu 'di ni de bzhin gshegs pa'i de bzhin gshegs pa'i las bcu pa'o zhes gsungs pa lta bu'o//de ltar gang dag rnam pa thams cad du yongs su rdzogs pa nyid las de bzhin gshegs pa'i ye shes kyi yul bsam gyis mi khyab pa mnga' ba/ de dag las gzhan pa'i yon tan mtha' dag dang ldan pa/chos kyi sku dang tha mi dad par bzhugs pa/ yon tan rgyas pa re re zhing dpe nam mkha' gcig pus nye bar gzhal ba mnga' ba rnams/ 'gro ba 'dod pa dang srid pa dang lta ba dang / ma rig pa zhes bya ba chu bo chen po bzhi'i nang du chud pa mgon med pa'i mgon du gyur pa sangs rgyas bcom ldan 'das rnams kyi stobs bcu po 'di dag ni sangs rgyas kyi sa kun tu 'od du rnam pa thams cad du yongs su dag par 'gyur ro//rgya bskyed pas chog go/ /sangs rgyas bcom ldan 'das rnams kyi gzugs kyi sku'i ba spu'i bu ga re re dang / skyes bu chen po'i mtshan dang /dpe byad dang / stobs dang / mi 'jigs pa dang / sangs rgyas kyi chos ma 'dres pa la sogs pa yon tan gyi khyad par yongs su gcod pa ni sangs rgyas kho nas spyod la/ gal te gsungs na ni rang nyid kyi ye shes kyi yul du gyur pas bskal pa grangs med pa bsam gyis mi khyab par sku tshe'i tshad byin gyis brlabs shing phrin las gzhan mi mnga' bar skyen pa skyen par gsungs pa de ltar na yang yon tan dag yongs su rdzogs par mi 'gyur na/byang chub sems dpas lta ci smos te rang sangs rgyas dang nyan thos rnams kyis sangs rgyas kyi yon tan mthar phyin par shes pa'am brjod par nus par 'gyur ba lta smos kyang ci dgos/don 'di nyid dpe'i sgo nas bshad pa/ nam mkha' med pas 'dab chags ldog par mi 'gyur gyi/ /'dir ni rang mthu zad pas ldog par 'gyur de bzhin/ /slob ma dang bcas sangs rgyas sras rnams sangs rgyas kyi//yon tan mkha' ltar mtha' yas ma brjod ldog par 'gyur/ /'di ltar nam mkha' lding 'dab gshog yangs pa'i rlung gi shugs kyis pha rol gnon pa thob pa yang nam mkha' yongs su zad pas nam mkha' la ldog pa ma yin gyi 'on kyang rang gi stobs dang pha rol gnon pa dang bral bas yin pa de bzhin du/re zhig byang chub sems dpa' gang dag sa bcu pa la rab tu gnas pa rnam par thar pa bsam gyis mi khyab pa brnyes pa de dag kyang / de bzhin gshegs pa'i yon tan brjod par mi nus pas yon tan nam mkha' ltar mu mtha' med pa dag las ldog gi yon tan yongs su rdzogs pas ni ma yin te/rang gi blo'i stobs yongs su nyams pas ldog par gnas na/ rang sangs rgyas sam nyan thos rnams kyis yon tan mthar thug pa rtogs par 'gyur ba lta ci smos/ gang gi tshe sangs rgyas kyi yon tan yongs su shes pa'am brjod pa la de dag gi lo rabs 'di yin pa de'i phyir kho bo cag lta bu ma rig pa'i rab rib kyis ldongs pa/yang dag pa ji lta ba bzhin shin tu lkog tu gyur pa rnams la/ de bzhin gshegs pa'i yon tan brjod par bya ba la go skabs yod par ga la 'gyur te/ de'i phyir 'di ni gnas ma yin pa kho na'o zhes bshad pa/ de'i phyir bdag 'dras khyod yon 'di dag ci/ /shes pa dang ni brjod par nus 'gyur ram/ /'on kyang de dag 'phags pa klu sgrub kyis/ /bshad phyir dogs spongs cung zad tsam zhig smras/ /de ltar bdag la de bzhin gshegs pa'i yon tan shas tsam zhig yongs su shes pa yang med mod kyi/de lta na yang bdag gis tsham tshom med par yon tan phyogs gcig gi cha tsam zhig glengs pa ni gzhan la brten nas yin no/ /de nyid smras pa ni/ 'phags pa klu sgrub kyis bshad phyir zhes bya'o/ /mdor bsdu na bstan bcos 'di las sangs rgyas kyi yon tan zab pa ste chos nyid dang rgya che ba nye bar bstan to//de la/ zab mo stong pa nyid yin te/ /yon tan gzhan rnams rgya che ba'o/ /zab dang rgya che'i tshul shes pas/ /yon tan 'di dag thob par 'gyur/ /da ni sprul pa'i sku nyan thos dang rang sangs rgyas dang sangs rgyas dang byang chub sems dpa' thams cad kyi don thun mong ba dang thabs thun mong ba 'byung ba so so'i skye bo rnams kyi don yang ci rigs par 'byung la/bde 'gro la sogs pa'i sgrub byed du gyur pa lhun gyis grub par nges par 'byung ba'i dbang du byas nas bshad pa/ slar yang mi g.yo'i sku mnga' khyod kyis srid gsum byon nas sprul rnams kyis//gshegs pa dang ni bltams dang byang chub zhi ba'i 'khor lo'ang ston par mdzad/ /de ltar khyod kyis 'jig rten g.yo bag spyod can re re'i zhags pa ni/ /mang pos bcings pa ma lus thugs rjes mya ngan 'das par bkri bar mdzad//bcom ldan 'das ni khams gsum las 'das su zin kyang sprul pa'i sku rnams kyis yab dang yum dang sras la sogs pa dang 'brel par ston zhing 'jig rten dang rjes su bstun te/ khams gsum du gshegs nas ji ltar 'tsham pa'i chos bstan pa 'jug pa'i sgo nas sems can gyi khams dang spyod pa rnam pa sna tshogs can mya ngan las 'das pa la 'god par mdzad do//thugs rjes te grags pa dang phan lan la sogs pa bzhed pas ni ma yin no/ /de'i phyir de ltar de bzhin gshegs pa'i sku'i rnam par gzhag pa byas nas theg pa gcig la theg pa gsum bstan pa dgongs pa can nyid du bshad pa/gang phyir 'di ni de nyid shes las dri ma mtha' dag sel ba ni/ /lhur byed gzhan med chos rnams de nyid rnam 'gyur dbye ba'ang bsten min zhing / /de nyid yul can blo gros 'di yang tha dad 'gyur ba ma yin pa//de yi phyir na khyod kyis 'gro la theg pa mi mnyam dbyer med bstan/ /gang zhig de kho na nyid mi shes pa des ni nyon mongs pa rnams ma lus par spang bar mi nus la dngos po ma lus pa la yod pa'i de kho na nyid skye ba med pa'i rang bzhin can yang tha dad pa med par sngar bstan zin to/ / mthong ba tha dad kyang de la dbye ba med pas de kho na nyid 'di rnam par mi 'gyur ba nyid yin la/ gang gi phyir dbye ba dang rnam par 'gyur ba nyid med pa de'i phyir de kho na nyid kyi yul can ye shes kyang rang bzhin gcig yin no/ /'di ltar ye shes kyi rang bzhin du ma nyid yin na ni ye shes kyis de kho na nyid rtogs par mi 'gyur te/rang bzhin ji ltar gnas pa bzhin ma rtogs pa'i phyir ro/ /gang gi phyir de ltar de kho na nyid gcig nyid yin pas/ /de kho na nyid kyi yul can ye shes tha mi dad pa de'i phyir theg pa gcig kho na bas theg pa gsum yod pa ma yin te/ /'od srungs chos thams cad mnyam pa nyid du rtogs na mya ngan las 'das pa yin la de yang gcig nyid yin gyi gnyis dang gsum ni ma yin no zhes 'byung ba'i phyir ro//theg pa chen po zhes bya ba la chen po zhes bya ba ni sangs rgyas bcom ldan 'das rnams te/ ma rig pa ma lus pa spangs pas sgrib pa dang bral ba'i ye shes mnga' ba'i phyir ro//de rnams kyi theg pa ni theg pa chen po ste/ pre Sho da ra la sogs pa yin pa'i phyir yi ge ta a nyid du 'gyur ro/ /yang na theg pa yang de yin la chen po yang yin pas theg pa chen po ste/ sangs rgyas kyi ye shes bsam gyis mi khyab pa mnga' ba rnams de la bzhugs pa'i phyir ram/dngos po'i rab tu dbye ba mtha' yas pa'i yul can yin pa'i phyir ram mi shes pa ma lus pa spangs pa'i phyir na/ theg pa yang de yin la chen po yang de yin pas theg pa chen po'o/ /gal te mya ngan las 'das pa gcig kho na yin na ji ltar nyan thos dang rang sangs rgyas kyi theg pas kyang yongs su mya ngan las 'da' bar bstan zhe na/bstan pa 'di dgongs pa can nyid du bshad pa/ gang phyir 'gro la nyes pa skyed byed snyigs ma 'di dag yod gyur pa/ /de phyir 'jig rten sangs rgyas spyod yul gting zab la 'jug mi 'gyur zhing //bde gshegs gang phyir khyod la mkhyen rab thugs rje'i thabs dang lhan cig pa/ /mnga' dang gang phyir bdag gi sems can dgrol zhes khyod kyis zhal bzhes te/ /lus dang sems dag las su mi rung ba nyid du sgrub par byed pas na snyigs ma lnga bstan te/sems can dang / bskal pa dang / nyon mongs pa dang / lta ba dang / tshe'i snyigs ma rnams so/ /gang gi phyir nyon mongs pa rnams 'jug pa shas che ba'i rgyur gyur pa de dag ni lhag par mos pa khyad par du 'phags pa 'joms par byed pa yin pa'i phyir/ de bzhin gshegs pa'i ye shes bla na med pa la 'dod pa yang 'gog par byed pa yin te/de'i phyir sangs rgyas kyi ye shes zab pas gting dpag dka' ba la 'jig rten 'jug par mi 'gyur la/ bcom ldan 'das kyang 'gro ba rnams snod ma yin pa 'di tsam gyis de dag rnam par dgrol bar bya ba la g.yel ba bsten par mi mdzad de/gang gi phyir bcom ldan 'das la mkhyen rab thugs rje'i thabs dang lhan cig tu gyur pa mnga' ba dang / gang gi phyir bdag gis sems can rnams dgrol bar bya'o zhes bcom ldan 'das kyis sngar smon lam stsal ba de'i phyir de dag rnam par grol ba la snyom las la brten par mi mdzad cing de'i rnam par grol ba'i thabs tshol bar mdzad de zhal gyis 'ches pa rnam pa gzhan gyi sgo nas gdon mi za bar bsgrub par bya dgos pa'i phyir ro//gang gi phyir 'gro ba rnams theg pa chen po la 'jug pa la gegs byed pa'i rkyen mang po 'di dag yod cing 'jig rten rnams kyang gdon mi za bar mya ngan las 'das pa la 'god par bya dgos pa/de phyir mkhas pas rin po che yi gling du chas pa'i skye tshogs kyi/ /ngal ba nyer sel grong khyer yid 'ong bar du rnam par bkod pa ltar/ /khyod kyi theg pa 'di ni slob ma nye bar zhi ba'i tshul la yid//sbyar bar mdzad cing rnam par dben la blo sbyangs rnams la logs su gsungs/ /dpe 'di ni 'phags pa dam pa'i chos pad ma dkar po las nges par bya'o/ /bsdus pa'i don ni 'di yin te/ ji ltar bsti ba'i phyir ded dpon des rin po che'i gling du ma phyin pa'i bar du grong khyer mngon par sprul pa de bzhin du/bcom ldan 'das kyis kyang thabs kyi sgo nas theg pa chen po'i tshu rol du de thob pa'i thabs su gyur zhing zhi ba'i bde ba'i rten du gyur pa theg pa gnyis po nyan thos dang rang sangs rgyas kyi theg pa gsungs pa yin no/ /de la 'khor ba'i nyon mongs pa spangs pa thob pa rnams la ni phyi nas theg pa chen po kho na nye bar bstan la/de rnams kyis kyang sangs rgyas rnams ltar tshogs yongs su rdzogs par byas nas gdon mi za bar thams cad mkhyen pa'i ye shes thob par bya dgos so/ /theg pa gcig bstan pa 'di yang mdo kun las btus pa la sogs pa dag las nges par bya'o//da ni bcom ldan 'das mngon par byang chub pa'i dus dang / bzhugs pa'i dus kyi dbang du byas nas bshad pa/ bde bar gshegs pa ma lus phyogs shing sangs rgyas yul dag na/ /phra rab rdul gyi rdul rnams bdog par gyur pa ji snyed pa//byang chub mchog rab dam par gshegs pa'i skal ba de snyed de/ /'on kyang khyod kyi gsang ba 'di ni bsnyad bgyi ma lags so/ /sangs rgyas bcom ldan 'das rnams ni sprul pa'i sku'i sgo nas bltams pa dang mya ngan las 'da' ba nye bar ston mod kyi/bcom ldan 'das sprul pa'i sku 'byung ba'i rgyu gang yin pa de'i mngon par rdzogs par byang chub pa'i dus ji tsam yin pa de'i tshad brjod par bya ste/ bcom ldan 'das kyis mngon par rdzogs par byang chub pa'i skal ba dag ni 'jig rten gyi khams de bzhin gshegs pa'i ye shes kyi yul du gyur pa ji snyed pa de na rdul phra rab kyi rdul dag ji snyed yod pa de snyed do//'di ni sngon dge ba'i rtsa ba ma bsags pa rnams kyis lhag par mos par bya bar dka' ba'i phyir na bsnyad par bya ba ma yin te/ 'ga' zhig tu de la lhag par mos par byed pa rnams la bsod nams gzhal du med pa bsags par bya ba'i phyir bshad do//de ltar re zhig mngon par rdzogs par byang chub pa'i dus brjod nas/ de'i 'og tu bzhugs pa'i dus kyi dbang du byas nas bshad pa/ rgyal ba ji srid 'jig rten mtha' dag mchog tu rab zhi bar/ /'gro ba min zhing nam mkha' rnam 'jig 'gyur min de srid du//shes rab yum gyis bskyed pa de la thugs brtse ma ma yi/ /tshul lugs byed pas rab tu zhi bar 'gyur ba ga la mnga'/ /bcom ldan 'das ni yum shes rab kyi pha rol tu phyin mas bskrun nas snying rje ma ma la gtad pas bcom ldan 'das kyi ma 'ongs pa'i sku tshe'i tshad ni ji srid 'jig rten mtha' dag sangs rgyas nyid du 'gyur ba ma yin pa dang /ji srid nam mkha' brlag par mi 'gyur ba de srid yin par rig par bya'o/ /gang gis sems can thams cad kyi don bsgrub par bya ba'i phyir dus mu mtha' med par 'di dag gso bar byed pa sangs rgyas rnams kyi thugs rje ci 'dra ba zhig ce na/bshad pa/ gti mug skyon gyis 'jig rten kha zas dug bcas za ba yi/ /skye bo nyid kyi nang mi de la khyod brtse ji lta ba/ /de ltar dug zos nyen pa'i bu la ma yis sdug bsngal min/ /des na mgon po mchog tu rab zhir gshegs par 'gyur ma lags//'jig rten kha zas kyi sgras ni 'dod pa'i yon tan lnga brjod do/ /de dag kyang 'di nyid du mngon par zhen pas zos na dug dang bcas par 'gyur te/ sdug bsngal rgya chen po'i rgyu yin pa'i phyir ro/ /de dag la 'di nyid du bden par mngon par zhen pa yang gti mug gi skyon las skye bar 'gyur ro//de la ji ltar bcom ldan 'das la skye bo 'khor ba pa 'jig rten gyi kha zas dug dang bcas pa za ba la brtse ba 'khrungs pa de ltar ma la bu gcig pa phangs pa de las gzhan pa'i dug dang 'dres pa'i kha zas za ba la gdung ba skye ba ma yin te/ de'i phyir snying rjes btsas pa la yongs su mya ngan las 'da' ba ko ga la mnga'/thugs rjes mya ngan las 'da' ba'i thugs las bzlog pa'i phyir na/ bcom ldan 'das 'jig rten sdug bsngal rnam pa sna tshogs nyams su 'bab pa'i gzhir gyur pa'i rjes su gzigs pa la yongs su mya ngan las 'da' ba mi mnga'o zhes bstan pa'i phyir bshad pa/gang gi phyir na mi mkhas dngos dang dngos po med par zhen pa'i blo can gyis/ /skye dang 'jig gnas skabs dang sdug dang mi sdug bral phrad kyis bskyed sdug bsngal dang / /sdig can 'gro ba thob pa de phyir 'jig rten thugs brtse'i yul du rab dong bas//bcom ldan thugs rjes khyod thugs zhi las bzlog pas khyod la mya ngan 'da' mi mnga'/ /de la gang gi phyir mi mkhas pa dngos po la mngon par zhen pa'i blo can las dang 'bras bu la yid ches pa yod pas lha dang mi dag tu skye ba yod par lta ba pas ni skye ba dang 'chi ba'i sdug bsngal nges par thob cing /yul sdug pa dang bral ba'i sdug bsngal dang yul mi sdug pa dang phrad pa'i sdug bsngal yang myong bar 'gyur ro/ /dngos po med par mngon par zhen pa'i blo can log par lta ba dang ldan pas ni sdig to can gyi 'gro ba dmyal ba la sogs pa dag dang /gong du bshad pa'i sdug bsngal yang 'thob pa de'i phyir sangs rgyas bcom ldan 'das kyi thugs rje ni skye bo sdug bsngal ba la dmigs nas thugs mya ngan 'das pa las bzlog ste gnas so/ /lugs 'di dge slong zla grags kyis/ /dbu ma'i bstan bcos las btus nas//lung ji bzhin dang man ngag ni/ /ji lta ba bzhin brjod pa yin/ /'di las gzhan na chos 'di ni/ /ji ltar med pa de bzhin du/ /'dir 'byung lugs kyang gzhan na ni/ /med ces mkhas rnams nges par mdzod/ /ji ltar dbu ma'i bstan bcos ma gtogs par bstan bcos gzhan las stong pa nyid ces bya ba'i chos 'di phyin ci ma log par mi brjod pa de bzhin du/kho bo cag gis 'dir lugs gang zhig brgal lan dang bcas par bsnyad pa'i lugs 'di nas 'byung ba de yang stong pa nyid kyi chos ltar bstan bcos gzhan na med do zhes mkhas pa rnams kyis nges par mdzad du gsol lo//de'i phyir kha cig gis mdo sde pa rnams kyi lugs gang zhig don dam par smras pa de nyid dbu ma pa rnams kyis kun rdzob tu 'dod do zhes smras pa gang yin pa de ni dbu ma'i bstan bcos kyi don gyi de kho na nyid mngon par mi shes pa kho nas smras pa yin no zhes shes par bya'o//yang gang dag bye brag tu smra ba rnams kyis gang don dam par smras pa de dbu ma pa rnams kyis kun rdzob tu yin no snyam du sems pa de dag gis kyang bstan bcos kyi don gyi de nyid yongs su ma shes pa de kho na ste/ 'di ltar 'jig rten las 'das pa'i chos ni 'jig rten pa'i chos dang chos mtshungs par mi rigs pa'i phyir te/lugs 'di ni thun mong ma yin no zhes mkhas pa rnams kyis nges par bya'o/ /de nyid kyi phyir slob dpon gyi thugs dgongs mi shes shing don gyi de kho na nyid nges par zin pa med par yi ge tsam nges pas 'jigs par 'gyur ba rnams kyis 'jig rten las 'das pa'i chos 'di yongs su spangs pas de'i phyir bstan bcos kyi don gyi de kho na nyid phyin ci ma log par bstan par bya ba'i phyir/dbu ma'i bstan bcos la 'jug pa 'di sbyar ba yin no zhes bshad pa/ klu sgrub blo mtsho shin tu rgya che'i kha dog gis 'jigs pas//skye bos lugs bzangs gang dag rgyang ring spangs pas de yi tshig /le'ur byas pa'i kha 'bus ku mu ta kha bye ba'i chus/ /da lta zla ba grags pa re rnams rab tu skong bar byed/ /gal te gnas brtan dbyig gnyen dang / phyogs kyi glang po dang / chos skyong la sogs pa bstan bcos rnams kyi mdzad pa po byon zin par gyur pa de dag gis kyang yi ge tsam thos pas 'jigs te/rten cing 'brel bar 'byung ba'i don phyin ci ma log par ston pa 'di yongs su spangs sam zhe na/ de skad du smra'o/ /yang 'di ji ltar rtogs par bya zhe na/ bshad par bya ste/ de nyid bshad zin zab mo 'jigs rung 'di ni sngon goms nyid las skye bo yis//nges par rtogs 'byung 'di ni gsan rgya che yang gzhan gyis thugs su chud mi 'gyur/ /de phyir tshul lugs rang blos sbyar ba de dag mthong nas bdag tu brjod pa yi/ /gzhung lugs rnams ltar gzhan lugs bzhed gzhung 'di las gzhan la dga' blo dor bar bya//ji ltar mu stegs can sngon sems kyi rgyud la stong pa nyid la lhag par mos pa'i bag chags ma bzhag pa rnams kyi khams gsum po 'dod pa dang / gzugs dang / gzugs med pa'i nyon mongs pa spangs shing grub pa'i mtha' gzhan nye bar sbyor nus par mthong du zin kyang thub pa'i dbang po'i don dam pa nye bar ston pa la lhag par mos par mi nus pa de bzhin du/de dag gis kyang mang du gsan pa rnam pa de lta bu mngar zin kyang stong pa nyid la lhag par mos pa'i sa bon dang bral bas stong pa nyid thugs su chud par mi spyod do zhes bya bar shes par bya'o//'di ltar deng sang nyid na'ang tshe rabs gzhan du stong pa nyid la lhag par mos pa'i bag chags gzhag pa kha cig gis rgyu'i stobs kho na las stong pa nyid kyi gting rtogs par snang la rgyu'i stobs kho na las mu stegs kyi gzhung lugs rnams la 'di bden par mthong ba rnam par nyams pa rnams kyis kyang stong pa nyid kyi gting dpogs par mthong ngo //de'i phyir dbu ma'i gzhung lugs las/ gzhan pa'i gzhung la tshul lugs rang gi blos sbyar ba de dag bltas nas kyang bdag gsal bar byed pa'i gzhung lugs rnams la bya ba ltar dga' ba'i blo gros dor bar bya ste/lugs gzhan po rang gi blos sbyar ba la ya mtshan par rtogs par mi bya'i/ rang gi stong pa nyid kyi lta ba la lhag par mos pa kho na la ya mtshan rtogs par bya'o/ / slob dpon klu sgrub lugs bzangs bsnyad las bdag gi bsod nams phyogs kyi mthar//khyab cing yid mkha' nyon mongs kyis sngon ston ka'i rgyu skar ltar dkar ba'am/ /sems kyi sbrul la gdengs ka'i nor bu dang 'dra gang zhig thob pa des/ /'jig rten ma lus de nyid rtogs nas myur du bde gshegs sar bgrod shog /dbu ma la 'jug pa'i bshad pa zab pa dang rgya che ba'i tshul gsal bar byed pa/ slob dpon zla ba'i grags pa theg pa mchog la thugs gzhol ba/ mi 'phrogs pa'i mkhyen rab dang thugs rje mnga' ba/ ri mor bris pa'i ba drus ma las 'o ma bzhos pas bden par zhen pa bzlog par mdzad pas sbyar ba rdzogs so// //khungs rnams phal cher mdo bzhin bris/ /phyin chad skad gnyis 'byung srid na/ /rtsa 'grel sgra don bzhin bsgyur la/ /gzu bor byos la dpyad par gyis/ /kha che'i yul gyi grong khyer dpe med kyi dbus rin chen sbas pa'i gtsug lag khang du/kha che'i rgyal po dpal 'phags pa lha'i sku ring la/ rgya gar gyi mkhan po ti la ka ka la sha dang / bod kyi lo tsA ba pa tshab nyi ma grags kyis kha che'i dpe dang mthun pa ltar bsgyur/ phyis ra sa ra mo cher rgya gar gyi mkhan po ka na ka warma dang / bod kyi lo tsA ba de nyid kyis nyi 'og shar phyogs pa'i dpe dang gtugs shing legs par bcos te gtan la phab pa'o// //gzhung 'di'i tshad ni bam po bcu gcig dang bam po sum gnyis so // //