CLOSE WINDOW

D3860
བོད་ཡིག

@##/ /rgya gar skad du/ mU la mA d+h+yA mi ka pr-it+ti pra san na pa da nA ma/ bod skad du/ dbu ma rtsa ba'i 'grel pa tshig gsal ba zhes bya ba/ 'phags pa 'jam dpal gzhon nur gyur pa la phyag 'tshal lo//gang zhig mtha' gnyis gnas la gnas bsal zhing / /rdzogs sangs rgyas blo rgya mtshor skye ba brnyes/ /dam chos mdzod kyi zab mo nyid ji ltar//rjes su rtogs bzhin thugs rjes ston par mdzad/ /gang gis lta ba'i me dag gis/ /da dung phas rgol gzhung lugs kyi/ /bud shing dang ni 'jig rten gyi/ / yid kyi mun rnams 'joms par mdzad/ /gang gi gnyis med ye shes gsung mda'i tshogs/ /lha dang bcas pa'i gdul bya'i 'jig rten la/ /khams gsum dag tu rgyal thabs legs mdzad pas//srid pa'i dgra sde ma lus 'joms mdzad pa'i / /klu sgrub de la phyag 'tshal nas ni de'i/ /tshig le'ur byas pa'i 'grel pa sla ba dang / /sdeb legs ngag gis sbyar zhing rtog ge yi//rlung gis ma dkrugs rab tu gsal bar bya/ /de la bdag las ma yin gzhan las min/ /zhes bya ba la sogs pa ni 'chad par 'gyur ba'i bstan bcos so/ /de'i 'brel pa dang brjod par bya ba dang /dgos pa'i dgos pa dag gang yin zhes 'dri na/ /dbu ma la 'jug pa las bstan pa'i tshul gyis sems bskyed pa dang po gnyis su med pa'i ye shes kyis brgyan pa/ snying rje chen po sngon du 'gro ba/de bzhin gshegs pa'i ye shes 'byung ba'i rgyur gyur pa thog mar mdzad nas/ mthar shes rab kyi pha rol tu phyin pa'i tshul phyin ci ma log pa thugs su chud par gyur pa'i slob dpon klu sgrub kyis gzhan khong du chud par bya ba'i phyir snying rjes bstan bcos mdzad de zhes bya ba 'di ni re zhig bstan bcos kyi 'brel ba yin no//slob dpon rang nyid 'chad par 'gyur ba'i bstan bcos mtha' dag gi brjod par bya ba'i don dgos pa dang bcas pa ston zhing /de phyin ci ma log par ston par mdzad pa nyid kyi sgo nas che ba'i bdag nyid brjod nas de'i ngo bo dang tha mi dad par bzhugs pa'i bla ma dam pa/ de bzhin gshegs pa la bstan bcos rtsom pa'i rgyu can gyi phyag mdzad par bzhed pas /gang gis rten cing 'brel par 'byung / /'gag pa med pa skye med pa/ /chad pa med pa rtag med pa/ /'ong ba med pa 'gro med pa/ /tha dad don min don gcig min/ /spros pa nyer zhi zhes bya ba la sogs pa gsungs so / /de la rten cing 'brel par 'byung ba 'gag pa med pa la sogs pa khyad par brgyad kyis khyad par du byas pa ni/bstan bcos kyi brjod par bya ba yin zhing mya ngan las 'das pa spros pa thams cad nye par zhi zhing zhi ba'i mtshan nyid can ni bstan bcos kyi dgos par bstan la/ smra rnams kyi/ dam pa de la phyag 'tshal lo/zhes bya ba 'dis ni phyag 'tshal ba bstan te/ de ltar na 'di ni re zhig tshigs su bcad pa gnyis kyi spyi'i don yin no/ /yan lag gi don yang rnam par dbye bar bya ste/ de la pra ti ni phrad pa'i don to/ i ti ni 'gro ba'i don to/ l+yab kyi mtha' can pra ti t+yi'i sgra ni phrad pa ste ltos ba la 'jug pa yin te/skad kyi byings ni nye par bsgyur bas yos su bsgyur ba'i phyir ro/ /nye bar bsgyur ba'i dbang gis na / skad byings don ni yongs bsgyur te/ /gang gA'i chu ni mngar mod kyi/ /rgya mtsho chu yis ji bzhin no/ /zhes bshad do//sa mud gong na yong ba'i pA ta ni 'byung ba'i don can yin pas sa mud pA ta'i sgra ni 'byung la 'jug go/ de'i phyir dngos bo rnams kyi 'byung ba rgyu dang rkyen la ltos pa ni rten cing 'brel par 'byung ba'i don to/ gzhan dag pra ti ni zlos ba'i don to//i ti ni 'gro ba ste chas pa dang 'jig pa'o/ /i t+ya ni 'gro bar rung ba dag go zhes de ltar i t+ya'i sgra de la phan ba'i mtha' can du bya breg tu bshad nas/ so so so sor 'gro zhing 'jig pa dang ldan pa rnams kyi 'byung ba ni rten cing 'brel par 'byung pa'o zhes rjod par byed do//de dag gi ltar na dge slong dag khyed la rten cing 'brel par 'byung ba bstan par bya yis/ sus rten cing 'brel bar 'byung ba mthong ba des chos mthong ngo zhes bya ba de lta bu la sogs pa'i yul la ni zlos pa'i 'don srid pa'i phyir dang / tshig bsdu ba yod pa'i phyir bye brag tu bshad pa legs par 'gyur na/mig dang gzugs la brten nas mig gi rnam par shes pa 'byung ngo zhes bya ba 'di lta bu la sogs pa'i yul 'dir ni mig dang gzugs la brten nas zhes don gyi khyad par dngos su zhal gyis bzhis shing /mig gi dbang po gcig gi rgyu can gyi rnam par shes pa gcig kyang skye bar bzhed pa na brten nas zhes bya ba'i sgra la zlos ba'i don nyid yod par ga la 'gyur/ phrad pa'i don ni phrad nas 'byung ba ni rten cing 'brel par 'byung ba'o zhes don gyi khyad par zhal gyis ma bzhes pa'i rten cing 'brel par 'byung ba'i sgra la yang yod pa yin la/don gyi khyad par zhal gyis bzhes pa la yang yod pa yin te/ ming dang gzugs la brten nas mig dang gzugs phrad cing mig dang gzugs la brten nas zhes bshad pa'i phyir ro/ i t+ya'i sgra de la phan pa'i mtha' can yin na ni mig dang gzung la brten nas mig gi rnam par shes pa 'byung ngo zhes bya ba 'dir pra ti t+ya'i sgra mi zad par ma yin pa'i phyir dang /tshig bsdu ba yod pa ma yin pa'i phyir rnam par dbye ba thos par 'gyur ba yin dang / mig dang gzugs la brten pa rnam par shes pa zhes bya bar 'don par 'gyur ba zhig na/'di ni de lta bu yang ma yin pas/ l+yab kyi mtha' can mi zad pa kho nar bye brag tu bshad pa khas blang bar bya'o/ /gang zhig kha cig na re rten cing zhes bya ba'i nye bar bsgyur ba ni zlos pa'i don yin pa'i phyir dang /'brel pa zhes bya ba phrad pa'i don yin pa'i phyir dang / 'byung ba zhes bya ba'i sgra ni skye ba'i don yin pa'i phyir rkyen de dang de la brten nas 'byung ba ste phrad nas 'byung ba'o zhe'o/ /gzhan dag na re so so so sor 'jig pa dang ldan pa rnams kyi 'byung ba ni rten cing 'brel par 'byung ba'o zhe'o zhes gzhan gyi bshad pa rjes su brjod nas sun 'byin par byed pa de ni/re zhig gzhan gyi phyogs rjes su brjod pa la mi mkhas pa nyid do snyam mo/ /ci'i phyir zhe na/ gang zhig rten cing 'brel par 'byung ba'i sgra phrad pa'i don can du 'chad pa des ni rten cing zhes bya ba zlos pa'i don du ma yin zhing 'brel par zhes bya ba phrad pa'i don du yang ma yin no//'o na ci zhe na rten cing ni phrad pa'i don yin zhing / 'brel par 'gro ba'i don yin la/ tshogs pa rten cing 'brel ba'i sgra ni phrad pa nyid yin par 'chad par byed do/ /des na da ni phrad nas 'byung ba ni rten cing 'brel par 'byung ba'o zhes de ltar bshad par gyur pa'i rten cing 'brel par 'byung ba'i sgras gal te dngos po srid tshad ma lus pa 'dzin par brjod par 'dod pa de'i tshe ni/rgyu dang rkyen gyi tshogs pa de dang de phrad nas 'byung ba ni rten cing 'brel par 'byung ba'o zhes zlos pa dang 'brel par byed la/'on te bye brag 'dzin pa de'i tshe ni mig dang gzugs la brten nas zhes zlos pa dang 'brel pa ma yin no/ /de ltar na re zhig slob dpon ni rjes su brjod pa la mi mkhas so / /de yang mi rung ste mig dang gzugs la brten nas mig gi rnam par shes pa 'byung zhes gsungs pa 'di la don gnyi ga med pa'i phyir ro zhes sun 'byin smras pa gang yin pa de yang mi 'thad do//ci'i phyir zhe na/ ji ltar med ces bya ba'i rigs pa ma bkod pas/ dam bca' ba tsam yin pa'i phyir ro/ /'on te rnam par shes pa ni gzugs can ma yin pa'i phyir mig dang phrad pa yod pa ma yin te/gzugs can rnams kho na la de dang phrad pa mthong ba'i phyir ro snyam pa'i bsam pa 'di yin na ni/ de yang mi rigs te/ dge slong 'di ni 'bras bu thob pa yin no zhes bya ba 'di la phrad pa khas blangs pa'i phyir dang /phrad nas zhes bya ba'i sgra yang ltos nas zhes bya ba'i sgra'i rnam grangs yin pa'i phyir dang / rten cing 'brel par 'byung ba zhes bya ba'i sgra ni/ de dang de rten gang 'byung ba/ /rang gi dngos por de ma skyes/ /zhes slob dpon klu sgrub kyis kyang phrad nas zhes bya ba'i don nyid du zhal gyis bzhes pa'i phyir ro//des na skyon yang mi 'thad do zhes gzhan dag zer ro/ /gang yang 'o na gang yin zhe na/ 'di yod pas 'di 'byung la/ 'di skyes pa'i phyir 'di skye ba ste zhes bya ba rkyen 'di dang ldan pa nyid kyi don ni rten cing 'brel bar 'byung ba'i don to zhes rang gi lugs rnam par gzhag pa de yang 'thad pa ma yin te/rten cing 'brel bar zhes bya ba dang 'byung ba zhes bya ba'i sgra gnyis re re la don gyi khyad par ma brjod pa'i phyir la de bye brag tu bshad pa yang brjod par 'dod pa'i phyir ro/ /ci ste yang dgon pa'i thig le zhes bya ba la sogs pa ltar rten cing 'brel par 'byung ba'i sgra ni gting tshugs pa'i sgrar khas blangs nas de skad du brjod do zhe na/de yang mi 'thad de/ rten cing 'brel bar 'byung ba'i sgra ni slob dpon gyis/ de dang de brten gang 'byung ba/ /rang gi dngos por de ma skyes/ /zhes yan lag gi don dang rjes su 'brel pa nyid du zhal gyis bzhes pa'i phyir ro//ci ste/ 'di yod na ni 'di 'byung ste/ /thung ngu yod na ring po bzhin/ /zhes bya bas 'chad par byed pas ni thung ngu dang phrad cing thung ngu la brten te/ thung ngu la ltos nas ring par 'gyur ro zhes de nyid khas blangs par 'gyur ro//de'i phyir gang zhig sun 'byin pa de nyid khas blangs par rigs pa ma yin no/ /shin tu spros pas chog go/ de'i phyir de ltar na 'dir bcom ldan 'das kyis dngos po rnams kyi 'byung ba rgyu dang rkyen la ltos pa yongs su gsal bar mdzad pa na/ dngos po rnams rgyu med pa nyid dang /rgyu gcig pu nyid dang / mi mthun pa'i rgyu las byung ba nyid dang / rang dang gzhan dang gnyi gas byas pa nyid bkag par 'gyur la/ de dag bkag pas ni dngos po kun rdzob pa rnams kyi rang gi ngo bo kun rdzob pa ji ltar gnas pa bzhin gsungs par 'gyur ro//da ni rten cing 'brel par 'byung ba kun rdzob pa de nyid rang bzhin gyis ma skyes pa nyid kyi phyir 'phags pa'i ye shes la ltos nas 'di la 'gag pa yod pa ma yin pa nas/ 'di la don gcig pu yod pa ma yin pa zhes bya ba'i bar 'gag pa med pa la sogs pa khyad par brgyad kyis khyad par du byed de/'gag pas na 'gag pa ste/ skad cig mar 'jig pa la 'gag pa zhes brjod do/ /skye bas na skye ba ste bdag nyid kyi dngos por red pa'o/ /chad pas na chad pa ste rgyun chad pa zhes bya ba'i don to/ /rtag pa na ther zug pa ste dus thams cad du gnas pa zhes bya ba'i don to//'ong bas na 'ong ba ste yul ring po na gnas pa rnams yul nye bar 'ong ba'o/ /'grogs na 'gro ba ste / yul nye ba na gnas pa rnams yul ring por 'gro ba'o/ /tha dad pa'i don ni don tha dad pa ste/ /don so so ba zhes bya ba'i tha tshig go/ /don yang de yin la gcig kyang de yin pas na don gcig ste/don tha mi dad cing so so ma yin zhes bya ba'i tha tshig go/ /rten cing 'brel par 'byung ba la ji ltar 'gag pa la sogs pa med pa de ltar ni bstan bcos mtha' dag gis ston par 'gyur ro/ /rten cing 'brel bar 'byung ba la khyad par mtha' yas pa yod du zin kyang brgyad dag gcig kho na nye bar bkod pa ni 'di dag kho na gtsor rtsod pa'i yan lag tu gyur pa'i phyir ro//rten cing 'brel par 'byung ba ji ltar gnas pa bzhin du 'phags pa rnams kyis gzigs na/ brjod bya dang rjod byed dang / mtshan nyid dang mtshon bya la sogs pa'i spros pa rnams rnam pa thams cad du bzlog pa'i phyir//'dir spros pa dag nye bar zhi bas rten cing 'brel par 'byung ba de nyid spros pa nyer zhi zhes bya'o/ /'di la sems dang sems las byung ba'i 'jug pa yang med pa dang / shes pa dang shes bya'i tha snyad log pa'i sgo nas skye ba dang rga ba dang na ba dang 'chi ba la sogs pa'i nye bar 'tshe ba ma lus pa dang bral ba'i phyir na zhi ba'o//ji skad bstan pa'i khyad par can gyis rten cing 'brel par 'byung ba ni bstan par bya ba'i sgo nas 'dod pa dam pa yin pa'i phyir las su bstan te/gang gis rten cing 'brel par 'byung / /'gag pa med pa skye med pa/ /chad pa med pa rtag med pa/ /'ong ba med pa 'gro med pa/ /tha dad don min don gcig min/ /spros pa nyer zhi zhi bstan pa/ /rdzogs pa'i sangs rgyas smra rnams kyi/ /dam pa de la phyag 'tshal lo//zhes bya ba'o/ /rten cing 'brel par 'byung ba ji skad bstan pa thugs su chud pa'i phyir/ de bzhin gshegs pa nyag gcig don phyin ci ma log par gsung ba nyid du gzigs shing pha rol po'i smra ba thams cad byis pa rtol thabs smra ba dang 'dra bar thugs su chud de/de nas slob dpon shin tu dad pa dang ldan par gyur pas slar yang bcom ldan 'das la khyad par du mdzad pa ni/ smra rnams kyi dam pa zhes bya'o/ /'dir 'gag pa sngar bkag pa ni skye ba dang 'gag pa dag la snga phyi'i rnam par gzhag pa med par bstan pa'i phyir te/gal te skye ba sngar gyur la/ /rga shi phyi ma yin na ni/ /skye ba rga shi med pa dang / /ma shi bar yang skye bar 'gyur/ /zhes 'chad par 'gyur ro/ /de'i phyir skye ba ni sngar 'gyur la/ rga shi ni phyis so zhes bya ba'i nges pa gang yin pa 'di med do/ /da ni slob dpon rten cing 'brel par 'byung ba 'gag pa med pa la sogs pas khyad par du 'phags par gyur pa bstan par bzhed nas/skye ba bkag pas 'gag pa la sogs pa dgag pa sla bar dgongs shing thog mar skye ba dgag pa rtsom pa mdzad do/ /skye ba yang gzhan gyis brtags pa na bdag gam gzhan nam gnyi ga 'am rgyu med pa zhig las rtog grang na/thams cad du 'thad pa ma yin no snyam du nges par mdzad nas bshad pa/ bdag las ma yin gzhan las min/ /gnyis las ma yin rgyu med min/ /dngos po gang dag gang na yang / / skye ba nam yang yod ma yin/ /de la gang dag ces bya ba'i sgra ni rten pa'i tshig ste/ su dag ces bya ba'i sgra'i rnam grangs so/ /gang na yang zhes bya ba'i sgra ni rten gyi tshig ste/ 'ga' zhig na yang zhes bya ba'i sgra'i rnam grangs so/ /nam yang zhes bya ba ni gzhar yang zhes bya ba'i tha tshig go//de'i phyir bdag las dngos po gang dag gang na yang skye ba nam yang yod pa ma yin no zhes de ltar sbyar bar bya'o/ /de bzhin du dam bca' ba gsum po la yang sbyar bar bya'o/ /gal te bdag las skye ba ma yin pa nyid do zhes bya bar nges par gzung ba na/gzhan las skye'o zhes mi 'dod pa nyid du 'gyur ba ma yin nam zhe na ma yin te/ med par dgag pa brjod par 'dod pa'i phyir dang / gzhan las skye ba yang 'gog par 'gyur ba'i phyir ro/ /'thad pa gang gis bdag las skye bar mi 'gyur ba de ni/ de las de ni 'byung na yon tan 'ga' yang yod ma yin//skyes par gyur pa slar yang skye bar rigs pa 'ang ma yin nyid/ /ces bya ba la sogs pas dbu ma la 'jug pa la sogs pa'i sgo nas nges par bya'o/ /slob dpon sangs rgyas bskyangs kyis kyang / dngos po rnams bdag las skye ba med de/de dag gi skye ba don med pa nyid du 'gyur ba'i phyir dang / shin tu thal bar 'gyur ba'i phyir ro/ /dngos po bdag gi bdag nyid du yod pa rnams la ni yang skye ba la dgos pa med do/ /ci ste yod kyang skye na nam yang mi skye bar mi 'gyur ro zhes gsungs so//'di la kha cig gis de ni rigs pa ma yin te/ gtan tshigs dang dpe ma brjod pa'i phyir dang / gzhan gyis smras pa'i nyes pa ma bsal ba'i phyir ro/ /thal bar 'gyur ba'i tshig yin pa'i phyir skabs kyi don las bzlog pas bsgrub par bya ba dang / de'i chos bzlog pa'i don mngon pas dngos po rnams gzhan las skye bar 'gyur ba dang /skye ba 'bras bu dang bcas pa nyid du 'gyur ba dang / skye ba thug pa yod par 'gyur ba'i phyir grub pa'i mtha' dang 'gal bar 'gyur ro zhes skyon smra ste/ skyon 'di dag thams cad ni rigs pa ma yin par kho bo cag gis mthong ngo //ji ltar zhe na/ de la re zhig gtan tshigs dang dpe ma brjod pa'i phyir dang zhes gang smra ba de ni mi rigs so/ /ci'i phyir zhe na/ gang gi phyir bdag las zhes bya ba ni yod pa rgyu nyid dang de nyid skye'o zhes smras pa yin la/ yod pa ni yang skye ba la dgos pa ma mthong zhing /thug pa med par yang mthong la/ khyod kyis skyes pa slar yang skye bar mi 'dod cing / thug pa med par yang mi 'dod do/ /de'i phyir khyed cag gi rtsod pa ni 'thad pa dang bral ba dang / rang gis khas blangs pa dang 'gal ba yin no zhes pha rol po bdag las skye bar 'dod pa la 'dri bar byed pa yin te/gang las gtan tshigs dang dpe bkod pa 'bras bu dang bcas par 'gyur ba 'di dag tsam zhig gis brtsad pa na ci pha rol po khas len par mi byed dam/ 'on te pha rol po rang gi khas blangs pa dang 'gal bas brtsad pas kyang mi ldog na ni/de'i tshe ngo tsha med pa nyid kyis gtan tshigs dang dpe gnyis kyis kyang ldog par mi 'gyur ba nyid do/ /kho bo cag ni smyon pa dang lhan cig rtsod pa yang ma yin no/ /de'i phyir slob dpon ni gnas ma yin par yang rjes su dpag pa tshang bar byed pa na/bdag nyid rjes su dpag pa la dga' ba nyid mngon par byed pa yin no/ /dbu ma pa yin na ni rang gi rgyud kyi rjes su dpag par bya ba rigs pa yang ma yin te/ phyogs gzhan khas blangs pa med pa'i phyir ro/ /de skad du yang 'phags pa'i lhas/ /yod dang med dang yod med ces//phyogs ni gang la'ang yod min pa/ /de la yun ni ring po na'ang / /klan ka brjod par nus ma yin/ /zhes bshad do/ /rtsod pa bzlog pa las kyang / /gal te ngas dam bcas 'ga' yod/ /des na nga la skyon de yod/ /nga la dam bca' med pas na//nga la skyon med kho na yin/ /gal te mngon sum la sogs pa'i/ /don gyis 'ga' zhig dmigs na ni/ /sgrub pa'ang bzlog par bya na de/ /med phyir nga la klan ka med/ /ces gsungs so/ /gang gi tshe de ltar dbu ma pas rang gi rgyud kyi rjes su dpag pa mi brjod pa nyid yin par de'i tshe/gang la grangs can pa dag gis/ / dam bca' ba'i don 'di gang yin/ /ci bdag las zhes bya ba 'bras bu'i bdag nyid las sam/ 'on te rgyu'i bdag nyid las yin grang / de las cir 'gyur/ gal te 'bras bu'i bdag nyid las yin na ni grub pa la sgrub pa yin la//rgyu'i bdag nyid las yin na ni 'gal ba'i don nyid du 'gyur te/ skye ba dang ldan pa thams cad ni rgyu'i bdag nyid du yod pa kho na skye ba'i phyir ro/ /zhes bya bar gang la grangs can pa dag gis phyir zlog par byed par 'gyur la / nang gi skye mched rnams dag las skye ba med de zhes bya ba'i rang gi rgyud kyi dam bca' ba lta ga la yod/kho bo cag la ni gang zhig grub pa la sgrub pa nyid dam/ 'gal ba'i don nyid du 'gyur zhing / /grub pa la sgrub pa nyid gang yin pa dang / 'gal ba'i don nyid gang yin pa spang bar bya ba'i phyir 'bad pa byed par 'gyur ba yod pa'i phyir zhes bya ba'i gtan tshigs kyang ga la yod/de'i phyir gzhan gyis smras pa'i nyes par thal bar mi 'gyur ba nyid kyi phyir slob dpon sangs rgyas bskyangs kyis de'i lan brjod par bya ba ma yin no/ /ci ste yang dbu ma pa rnams kyi ltar na phyogs dang gtan tshigs dang dpe dag ma grub pas rang gi rgyud kyi rjes su dpag pa ma brjod pa nyid kyi phyir bdag las skye ba dgag pa'i dam bca' ba'i don sgrub pa dang /gnyi ga la grub pa'i rjes su dpag pas gzhan gyi dam bca' bsal bar ma gyur mod/ gzhan gyi dam bca' ba la rang gi rjes su dpag pas 'gal ba brjod par ni bya dgos pas/rang nyid la phyogs la sogs pa dang gtan tshigs dpe'i skyon dang bral ba dag yod par bya dgos so/ /de'i phyir de ma brjod pa'i phyir dang / de'i nyes pa ma bsal ba'i phyir nyes pa de nyid du 'gyur ro snyam na/ bshad par bya ste/ de ni de ltar ma yin no/ /ci'i phyir zhe na/ gang gi phyir don gang zhig gang gis dam bcas pa des ni rang nyid kyis nges pa bzhin du gzhan dag la nges pa bskyed par 'dod pas/ don 'di'i 'thad pa gang gi sgo nas khong du chud pa'i 'thad pa de nyid gzhan la bsnyad par bya dgos so//de'i phyir rang gis khas blangs pa'i dam bcas pa'i don gyi sgrub par byed pa ni pha rol po kho nas nye bar dgod par bya ba gang yin pa 'di ni re zhig lugs ma yin no / /'di ni gzhan la gtan tshigs kyang ma yin no/ /gtan tshigs dang / dpe med pa'i phyir rang gi dam bca' ba'i don gyi sgrub par byed pa ni khas 'ches pa'i rjes su 'brangs pa 'ba' zhig nye bar bkod pa yin te/de'i phyir 'thad pa dang bral ba'i phyogs khas blangs pas 'di ni bdag nyid kho na la slu bar byed pas gzhan la nges pa bskyed par mi nus so/ /zhes bya bar gang rang gi dam bca' ba'i don gyi sgrub par byed pa la nus pa med pa 'di nyid 'di'i sun 'byin pa ches gsal po yin te/'dir rjes su dpag pas gnod pa brjod pa la dgos pa go ci zhig yod/ ci ste yang rang gi rjes su dpag pas 'gal ba gdon mi za bar brjod par bya ba yin no zhe na/ /de yang slob dpon sangs rgyas bskyangs kyis brjod pa nyid yin no//ji ltar zhe na/ gang gi phyir des ni 'di skad du bshad pa yin te/ dngos po rnams bdag las skye ba med de/ de dag gi skye ba don med pa nyid du 'gyur ba'i phyir dang zhes bshad pa'i phyir ro/ /de la de dag ces bya ba 'dis ni rang gi bdag nyid du yod pa 'dzin pa yin no//ci'i phyir zhe na/ 'di ltar rang gi bdag nyid du yod pa dag la ni yang skye ba la dgos pa med do zhes bya ba 'di ni mdor bzhag pa'i ngag de'i 'grel pa'i ngag yin la ngag 'dis ni chos mthun pa'i dpe gzhan la rab tu grags pa bsgrub par bya ba dang sgrub par byed pa'i chos dang ldan pa nye bar gzung ba yin no//de la rang gi bdag nyid du yod pa zhes bya ba 'dis ni gtan tshigs 'dzin pa yin no/ /skye ba don med pa nyid du 'gyur ba'i phyir dang zhes bya ba 'dis ni bsgrub par bya ba'i chos 'dzin pa yin no/ /de la ji ltar sgra mi rtag ste/ / byas pa mi rtag pa'i phyir ro/ /byas pa ni mi rtag par mthong ste/ dper na bum pa bzhin no/ /de bzhin du sgra yang byas pa yin te/ de'i phyir byas pa nyid kyi phyir mi rtag pa yin no zhes 'dir nye bar sbyar bas gsal bar byas pa'i byas pa gtan tshigs yin pa de bzhin du/ 'dir yang dngos po rnams bdag las skye ba med de/rang gi bdag nyid du yod pa la yang skye ba don med pa nyid du 'gyur ba'i phyir ro/ /'di na ji ltar bum pa la sogs pa mdun na gnas shing gsal ba rang gi bdag nyid du yod pa ni yang skye ba la mi ltos par mthong ba de bzhin du/ 'jim pa'i gong bu la sogs pa'i gnas skabs na yang gal te rang gi bdag nyid du yod pa'i bum pa la sogs pa yod do snyam du sems na ni de'i tshe yang rang gi bdag nyid du yod pa de la skye ba yod pa ma yin no//de ltar na gtan tshigs nye bar sbyar bas gsal bar byas pa/ yang skye ba dgag pa la mi 'khrul pa/rang gi bdag nyid du yod pa nyid kyis grangs can la rang nyid kyis rjes su dpag pas 'gal ba brjod pa mdzad pa yin te/ des na de ni rigs pa ma yin te/ gtan tshigs dang dpe ma brjod pa'i phyir dang zhes ci ste rjod par byed/ gtan tshigs dang dpe ma brjod pa ma yin pa 'ga' zhig tu ma zad kyi /gzhan gyis smras pa'i nyes pa ma bsal ba yang ma yin no/ /ci ltar zhe na/ grangs can pa dag mdun na gnas pa'i bum pa mngon par gsal ba'i rang bzhin can ni yang mngon par gsal bar mi 'dod cing / de nyid 'dir dpe nyid du grub pa'i ngo bo yin pa'i phyir la/nus pa'i ngo bor gyur cing mngon par gsal ba'i rang bzhin ma yin pa skye ba bkag pas khyad par du byas pa ni bsgrub par bya ba yin pa nyid kyi phyir grub pa la sgrub pa'i phyogs kyi skyon nyid du dogs pa'am/ gtan tshigs 'gal ba'i don nyid du dogs pa ga la yod/ de'i phyir rang gi rjes su dpag pas 'gal ba brjod pa na yang ji skad smras pa'i nyes pa brjod pa med pa'i phyir/ gzhan gyis smras pa'i nyes pa ma bsal ba med pa nyid de/ de'i phyir sun 'byin pa 'di dag ni 'brel pa med pa nyid do zhes shes par bya'o/ /bum pa la sogs pa zhes bya ba sogs pa'i sgras ni skye bar 'dod pa'i dngos po ma lus pa bsdu bar 'dod pa'i phyir snam bu la sogs pa dag gis ma nges par 'gyur ba yang ma yin no//yang na sbyor ba 'di ni tshul gzhan yin te/ rang las skye bar smra ba'i skyes bu las tha dad pa'i don rnams ni bdag nyid las skye ba med de/ rang gi bdag nyid du yod pa'i phyir/skyes bu bzhin no zhes dper brjod pa 'di nyid dper brjod par bya'o/ /gal te yang skye ba bkag pas mngon par gsal bar smra ba la gnod par byed pa ma yin pa de lta na yang skye ba'i sgra mngon par gsal ba la btags nas sngon dang phyi mar ma dmigs pa dang dmigs par chos mthun pas skye ba'i sgras mngon par gsal ba nyid brjod pa'i phyir/'di bkag pas gnod par byed pa ma yin no/ /yang ji skad smras pa'i don gyi rjod par byed pa med par rnam par dpyod pa 'di lta bu 'di ji ltar rnyed ce na/ bshad par bya ste/ don gyi ngag 'di dag ni don chen po can yin pas ji skad smras pa'i don bsdus nas 'jug pa yin la/de dag kyang bshad na ji skad smras pa'i don gyi bdag nyid 'byin par byed pa yin pas/ 'dir ma bstan pa cung zad kyang mi srid do/ /thal bar 'gyur ba bzlog pa'i don dang yang pha rol po nyid 'brel ba yin gyi/kho bo cag ni ma yin te/ rang la dam bca' ba med pa'i phyir ro/ /de'i phyir kho bo cag la grub pa'i mtha' dang 'gal ba ga la yod/ thal ba las bzlog pa bsgrubs pas pha rol po la nyes pa mang po ci tsam du 'gyur ba de tsam kho bo cag mngon par 'dod pa kho na yin pas/gang las 'di la gzhan gyis glags rnyed par 'gyur ba slob dpon klu sgrub kyi lugs phyin ci ma log pa'i rjes su 'brang ba slob dpon sangs rgyas bskyangs la glags dang bcas pa'i tshig gsung pa nyid ga la yod/ rang bzhin med par smra bas rang bzhin dang bcas par smra ba la thal ba bsgrubs pa na thal ba las bzlog pa'i don can du thal bar ga la 'gyur te/sgra rnams ni dbyug pa dang zhags pa can bzhin du smra ba po rang dbang med par byed pa ma yin no/ /'o na ci zhe na nus pa yod na smra ba po'i brjod par 'dod pa'i rjes su byed pa yin no//de'i phyir thal ba sgrub pa ni pha rol po'i dam bca' la 'gog pa tsam gyi 'bras bu can yin pa'i phyir thal ba las bzlog pa'i don du 'gyur ba yod pa ma yin no/ /de ltar yang slob dpon ni/ /nam mkha'i mtshan nyid snga rol na/ / nam mkha' cung zad yod ma yin/ /gal te mtshan las sngar gyur na/ /mtshan nyid med par thal bar 'gyur/ /zhes bya ba dang / de bzhin du/ gzugs kyi rgyu ni ma gtogs par/ /gzugs ni gzugs kyi rgyu med par/ /thal bar 'gyur te don gang yang / / rgyu med pa ni gang na'ang med/ /ces bya ba dang / de bzhin du/ mya ngan 'das pa dngos po min/ /rga shi'i mtshan nyid thal bar 'gyur/ /rga dang 'chi ba med pa yin / /dngos po yod pa ma yin no/ /zhes bya ba la sogs pas phal cher thal ba sgrub pa kho na'i sgo nas gzhan gyi phyogs sel bar mdzad do//ci skye slob dpon gyi ngag rnams ni don gyi ngag yin pa'i phyir don chen po nyid yin pas sbyor ba du ma'i rgyu nyid du rtogs na ni/ slob dpon sangs rgyas bskyangs kyi ngag dag kyang ci'i phyir de ltar yongs su mi rtog/ 'on te sbyor ba'i ngag rgyas par rjod par byed pa gang yin pa 'di ni 'grel pa mkhan po rnams kyi lugs yin no zhe na/de yang yod pa ma yin te/ rtsod pa bzlog pa'i 'grel pa mdzad pa na/ slob dpon gyis kyang sbyor ba'i ngag ma gsungs pa'i phyir ro/ /gzhan yang rtog ge pa 'dis bdag nyid rtog ge'i bstan bcos la shin tu mkhas pa tsam zhig bstan par 'dod pas/dbu ma pa'i lta ba khas len bzhin du yang rang rgyud kyi sbyor ba'i ngag brjod pa gang yin pa de ni ches shin tu nyes pa du ma'i tshogs kyi gnas su rtogs te/ ji ltar zhe na/ de la re zhig gang 'di skad du 'dir sbyor ba'i tshig tu 'gyur ba ni/don dam par na nang gi skye mched rnams bdag las skye ba med par nges te/ yod pa'i phyir dper na shes pa yod pa nyid bzhin no zhes smras pa yin no/ /'dir don dam pa zhes bya ba'i khyad par ci'i phyir nye bar bkod pa yin/ gal te 'jig rten gyi kun rdzob tu skye bar khas blangs pa dgag par bya ba ma yin pa'i phyir dang /'gog na yang khas blangs pas gnod par thal bar 'gyur ba'i phyir ro zhe na/ 'di ni rigs pa ma yin te/ bdag las skye ba ni kun rdzob tu yang khas ma blangs pa'i phyir ro/ /ji skad du mdo las sa bon gyi rgyu las byung ba'i myu gu de yang skye ba na/bdag gis ma byas/ gzhan gyis ma byas/ gnyi gas ma byas/ dbang phyug gis ma byas/ dus kyis ma bsgyur/ rdul phra rab las ma byung / rang bzhin las ma byung / ngo bo nyid las ma byung / rgyu med pa las ma skyes zhes gsungs pa dang /de bzhin du/ sa bon yod na myu gu ji bzhin te/ /sa bon gang yin myu gu de nyid min/ /de las gzhan min de yang ma yin te/ /de ltar rtag min chad min chos nyid do/ /zhes gsungs pa dang / 'di nyid las kyang / gang la brten te gang 'byung ba/ /de ni re zhig de nyid min/ /de las gzhan pa 'ang ma yin te /de phyir chad min rtag ma yin/ /zhes 'chad do/ /gzhan gyi lugs la ltos te khyad par du byas so zhe na/ de yang rigs pa ma yin te/ de dag gi rnam par gzhag pa ni kun rdzob tu yang khas blangs pa med pa'i phyir ro/ /bden pa gnyis phyin ci ma log par mthong ba las nyams pa'i mu stegs pa dag ji srid du gnyi ga'i sgo nas 'gog pa de srid du yon tan nyid yin par rtogs so//de ltar na gzhan gyi gzhung la ltos te khyad par brjod pa yang rigs pa ma yin no/ /gang las de la ltos nas kyang khyad par 'bras bu dang bcas par 'gyur ba 'jig rten las kyang bdag las skye bar mi rtogs te/'jig rten pas ni bdag dang gzhan las zhes bya ba de lta bu la sogs pa'i rnam par spyod pa 'jug pa med par byas nas/ rgyu las 'bras bu 'byung ngo zhes bya ba 'di tsam zhig rtogs pa yin no/ / slob dpon yang de ltar rnam par gzhag pa mdzad pa yin te/ de'i phyir rnam pa thams cad du khyad par don med pa nyid do zhes bya bar nges so/ /gzhan yang gal te kun rdzob tu skye ba dgag par 'dod nas khyad par 'di 'god par byed na ni de'i tshe/ rang la gzhi ma grub pa'i phyogs kyi nyes pa'am/gzhi ma grub pa'i gtan tshigs kyi skyon du 'gyur te/ rang gis don dam par mig la sogs pa'i skye mched rnams khas ma blangs pa'i phyir ro/ /gal te kun rdzob tu mig la sogs pa yod pa'i phyir nyes pa med do zhe na/ 'o na don dam par zhes bya ba 'di gang gi khyad par yin/gal te mig la sogs pa kun rdzob pa rnams don dam par skye ba 'gog pa'i phyir/ don dam pa smos pa ni skye ba 'gog pa'i khyad par yin no zhe na/ de lta na ni 'o na mig la sogs pa kun rdzob pa rnams don dam par skye ba yod pa ma yin te zhes de skad brjod par bya bar 'gyur na/de skad du yang ma smras so/ /smra na yang pha rol po dag gis mig la sogs pa rnams rdzas su yod pa nyid du khas blangs pa'i phyir dang / brtags par yod par khas ma blangs pa'i phyir/ gzhan la gzhi ma grub pa'i phyogs kyi skyon du 'gyur bas 'di ni mi rigs so//ci ste ji ltar sgra mi rtag ces bya ba la chos dang chos can gnyis spyi nyid gzung ba yin gyi/ khyad par ni ma yin te/ khyad par 'dzin na ni rjes su dpag pa dang rjes su dpag par bya ba'i tha snyad med par 'gyur ro/ /'di ltar gal te 'byung ba chen po bzhi las gyur pa'i sgra 'dzin na ni de pha rol po la ma grub po//'on te nam mkha'i yon tan 'dzin na ni de rang nyid sangs rgyas pa la ma grub pa yin no/ /de bzhin du bye brag pa sgra mi rtag par dam 'cha' ba na yang / byas pa'i sgra 'dzin na de gzhan la ma grub po/ /'on te mngon par gsal bar byas pa yin na ni de rang la ma grub pa yin no//de bzhin du ci rigs par 'jig pa yang gal te rgyu dang bcas pa yin na ni/ de sangs rgyas pa rang la ma grub pa yin la/ 'on te rgyu med pa yin na ni de pha rol po la ma grub pa yin no/ /de'i phyir ji ltar 'dir chos dang chos can spyi tsam zhig 'dzin pa de bzhin du/'dir yang khyad par dor ba'i chos can tsam zhig 'dzin par 'gyur ro zhe na/ de ni de ltar yang ma yin te/ 'di ltar gang gi tshe 'dir skye ba bkag pa bsgrub par bya ba'i chos su 'dod pa'i de'i tshe de kho nar de'i rten chos can phyin ci log tsam gyis bdag gi dngos po rnyed pa ni nyams par 'gyur bar 'dis rang nyid kyis khas blangs pa nyid do//phyin ci log dang phyin ci ma log pa dag ni tha dad pa yin no/ /de'i phyir/ gang gi tshe rab rib can gyis skra shad la sogs pa ltar phyin ci log gis yod pa ma yin pa yod pa nyid du 'dzin pa de'i tshe ni yod par gyur pa'i don cha tsam yang dmigs par ga la 'gyur/gang gi tshe rab rib can ma yin pas skra shad la sogs pa ltar phyin ci ma log pas yang dag pa ma yin pa sgro mi 'dogs pa de'i tshe na yang gang gis na de'i tshe na kun rdzob tu 'gyur ba yod pa ma yin par gyur pa'i don cha tsam yang dmigs pa ga la yod/de nyid kyi phyir slob dpon gyi zhal snga nas kyang / gal te mngon sum la sogs pa'i/ /don gyis 'ga' zhig dmigs na ni/ /sgrub pa'am bzlog par bya na de/ /med phyir nga la klan ka med/ /ces gsungs so/ /gang gi phyir de ltar phyin ci log pa dang phyin ci ma log pa dag tha dad pa de'i phyir phyin ci ma log pa'i gnas skabs na phyin ci log yod pa ma yin pa'i phyir na/gang zhig chos can nyid du 'gyur ba mig kun rdzob pa lta ga la yod/ de'i phyir gzhi ma grub pa'i phyogs kyi skyon dang / gzhi ma grub pa'i gtan tshigs kyi skyon ldog pa med pa nyid pas 'di lan ma yin pa nyid do//dpe la yang 'dra ba yod pa ma yin no/ /der ni sgra'i spyi dang mi rtag pa nyid kyi spyi khyad par brjod par mi 'dod pa gnyi ga la yang yod na/ de bzhin du mig gi spyi ni stong pa nyid dang stong pa nyid ma yin par smra ba dag gis kun rdzob tu yang khas ma blangs la/don dam par yang ma yin pas dpe la yang 'dra ba yod pa ma yin no/ /gzhi ma grub pa'i phyogs kyi nyes pa brjod pa'i tshul gang yin pa 'di nyid ni/ yod pa'i phyir zhes bya ba'i gtan tshigs 'di la ma grub pa'i skyon brjod pa la yang sbyar bar bya'o//de lta bu de ni 'di ltar yin te/ gang gi phyir ji skad bsnyad pa'i don 'di ni rtog ge ba 'dis rang nyid kyis khas blangs pa yin no/ /ji ltar zhe na/ nang gi skye mched rnams skyed par byed pa rgyu la sogs pa ni yod pa kho na yin te/ de ltar de bzhin gshegs pas gsungs pa'i phyir ro//gang de bzhin gshegs pas ji skad gsungs pa de ni de bzhin te/ dper na mya ngan las 'das pa ni zhi ba'o zhes bya ba bzhin no zhes bya ba gzhan gyis bkod pa'i sgrub byed 'di la/ 'dir khyod kyi gtan tshigs kyi don du 'dod pa gang yin de bzhin gshegs pas kun rdzob tu de skad gsungs pa'i phyir ram/'on te don dam par gsungs pa'i phyir/ gal te kun rdzob tu yin na ni rang la gtan tshigs kyi don ma grub pa nyid do/ /'on te don dam par ni/ gang tshe chos ni yod pa dang / /med dang yod med mi 'grub pas//de'i tshe 'bras bu yod pa dang med pa dang / gnyi ga'i bdag nyid kyi rkyen bsal ba'i phyir/ ji ltar sgrub byed rgyu zhes bya/ /de lta yin na mi rigs so/ /de ni sgrub par byed pa'i rgyu ma yin pa kho na'o zhes bya ba ni ngag gi don to/ /de'i phyir don dam par bsgrub par bya ba dang /sgrub par byed pa nyid ma grub pa'i phyir/ gtan tshigs ma grub pa'i don nyid dang 'gal ba'i don nyid do zhes 'dis skyon 'di smras pa yin no/ /gang gi phyir de ltar 'dis rang nyid kyi tshul 'dis gtan tshigs ma grub par khas blangs pa de'i phyir/ dngos po'i chos gtan tshigs su bkod pa'i rjes su dpag pa thams cad la gtan tshigs la sogs pa rang la ma grub pa'i phyir sgrub par byed pa thams cad rnam par 'jig par 'gyur ro//'di lta ste/ don dam par na nang gi skye mched rnams de dag gi rkyen gzhan dag las skye ba med de/gzhan yin pa'i phyir dper na bum pa bzhin no/ /yang na don dam par gzhan gyis brjod par 'dod pa'i mig la sogs pa nang gi skye mched 'grub par byed pa dag rkyen ma yin par nges te/ gzhan yin pa'i phyir/ dper na snal ma la sogs pa bzhin no zhes bya ba 'dir gzhan nyid ces bya ba la sogs pa rang nyid la ma grub pa yin no//ji ltar 'dis nang gi skye mched rnams skyes pa kho na yin te/ de dag gi yul dang ldan pa'i tha snyad khyad par can byed pa'i phyir ro/ /zhes gzhan gyis brjod pa'i gtan tshigs 'di la ma grub par brjod par 'dod pas/ 'di skad du 'on te don dam par rnal 'byor pa mnyam par gzhag pa'i shes rab kyi mig gis dngos po rnams kyi yang dag pa ji lta ba bzhin nyid mthong ba'i skye ba dang 'gro ba la sogs pa dag yod par bsgrubs na ni/ de'i tshe de dag gi yul dang ldan pa'i tha snyad khyad par can byed pa'i phyir ro zhes bya ba'i gtan tshigs ma grub pa'i don nyid do //'gro ba yang skye ba bkag pa kho nas bkag pa'i phyir ro zhes smras pa yin te/ de bzhin du rang gis byas pa'i sgrub par byed pa la yang / don dam par ma song ba la 'gro ba med de/ lam yin pa'i phyir/ song ba'i lam bzhin no//zhes bya ba'i gtan tshigs lam nyid rang nyid la ma grub pa'i don nyid du sbyar bar bya la/ don dam par brten pa dang bcas pa'i mig ni gzugs la lta bar mi byed de/ mig gi dbang po yin pa'i phyir/ dper na de dang mtshungs pa bzhin no zhes bya ba dang / de bzhin du mig ni gzugs la lta bar mi byed do //'byung ba las gyur pa nyid kyi phyir/ dper na gzugs bzhin no zhes bya ba dang / sa ni sra ba'i ngo bo ma yin te/ 'byung ba yin pa'i phyir/ dper na rlung bzhin no/ /zhes bya ba la sogs pa dag tu yang gtan tshigs la sogs pa rang nyid la grub pa sbyar bar bya'o//yod pa'i phyir zhes bya ba'i gtan tshigs 'di yang pha rol po'i ltar na/ ci nang gi skye mched rnams yod pa'i phyir shes pa yod pa ltar bdag las mi skye ba zhig gam/ 'on te bum pa la sogs pa bzhin du bdag las skye ba zhig yin zhes ma nges pa yin no//gal te bum pa la sogs pa yang bsgrub byar mtshungs pa'i phyir ma nges pa nyid ma yin no zhe na/ de ni de ltar ma yin te/ de skad du ma smras pa'i phyir ro/ /gal te gzhan gyi rjes su dpag pa dag la skyon ji skad du smras pa de bzhin du rang gi rjes su dpag pa la yang ji skad smras pa'i nyes par thal bas gzhi ma grub pa dang /gtan tshigs ma grub pa la sogs pa'i skyon de nyid du 'gyur ba ma yin nam/ de'i phyir gang gnyi ga la skyon du 'gyur ba des ni gcig la brgal bar mi bya ste/ des na skyon 'di dag thams cad mi rigs par 'gyur ro zhe na/brjod par bya ste/ rang gi rgyud kyi rjes su dpag pa smra ba dag la nyes pa 'dir 'gyur gyi/ kho bo cag ni rang rgyud kyi rjes su dpag pa mi sbyor te/ rjes su dpag pa dag ni gzhan gyi dam bca' ba 'gog pa tsam gyi 'bras bu can yin pa'i phyir ro/ /'di ltar gzhan mig lta'o zhes bya bar rtog pa de ni mig la rang gi bdag nyid mi lta ba'i chos kyang 'dod la/gzhan la lta ba'i chos med na mi 'byung ba nyid du yang khas blangs pa yin te/ de'i phyir gang dang gang la rang gi bdag nyid lta ba med pa de dang de la ni gzhan la lta ba yang yod pa ma yin te/ dper na bum pa bzhin no/ /mig la yang rang gi bdag nyid mi lta ba yod pa yin te/ de'i phyir gzhan lta ba yang 'di la med do/ /de'i phyir rang gi bdag nyid mi lta ba dang 'gal bar sngon po la sogs pa gzhan la lta ba rang la grags pa'i rjes su dpag pa dang 'gal ba yin no//zhes de la grub pa'i rjes su dpag pas sel bar byed pa yin no/ /gang gi phyir rjes su dpag pa dag gis 'di tsam zhig brjod par bya ba yin pas/ gang las nyes pa mtshungs par 'gyur ba/ kho bo cag gi phyogs la ji skad bsnyad pa'i skyon 'jug pa ga la yod yang ci gang yang rung ba la grub pa'i rjes su dpag pa'i sgo nas kyang rjes su dpag pas gnod pa yod dam zhe na/yod de de yang rang nyid la grub pa'i gtan tshigs nyid kyis yin gyi/ gzhan la grub pas ni ma yin te/ 'jig rten nyid du mthong ba'i phyir ro/ /'jig rten na ni res 'ga' dbang po'i rgol ba dang phyir rgol gnyis kyi tshad mar byas pa'i tshig gis rgyal ba'am pham par 'gyur la/res 'ga' ni rang gi tshig kho nas 'gyur gyi/ gzhan gyi tshig gis ni rgyal ba'am pham par 'gyur ba ma yin no/ /'jig rten na ji ltar yin pa de bzhin du rigs pa la yang yin te/ 'jig rten pa'i tha snyad kho na rigs pa'i bstan bcos su skabs su bab pa yin pa'i phyir ro//de nyid kyi phyir 'ga' zhig gis gzhan la grags pa'i dbang gis ni rjes su dpag pa'i gnod pa ma yin te/ gzhan la grags pa nyid dgag par 'dod pa'i phyir ro zhes bshad do/ /gang zhig gang gnyi ga la nges par brjod pa de ni sgrub pa 'am sun 'byin pa yin gyi/gang yang rung ba la grub pa 'am the tshom za ba smra ba ni ma yin no snyam du sems pa des kyang 'jig rten gyi tha snyad kyi rnam par gzhag pa la brten nas rjes su dpag pa la ji skad smras pa'i tshul 'di nyid khas blang bar bya'o/ / 'di ltar lung gis gnod pa ni gnyi ga la grub pa'i lung kho na'i sgo nas ma yin te/ 'o na ci zhe na/ rang la grub pa'i sgo nas kyang yin no/ /rang gi don gyi rjes su dpag pa ni thams cad du rang la grub pa nyid brling ba yin gyi/ gnyi ga la grub pa ni ma yin no/ /de nyid kyi phyir rtog ge'i mtshan nyid brjod pa ni dgos pa med pa yin te/sangs rgyas rnams kyis rang la ji ltar grags pa'i 'thad pas de kho na mi shes pa'i gdul bya'i skye bo la phan btags pa'i phyir ro/ /shin tu spros pas chog go/ /dkyus ma nyid bshad par bya'o/ /dngos po rnams ni gzhan las skye ba yang ma yin te/gzhan med pa'i phyir ro/ /'di yang / dngos po rnams kyi rang bzhin ni/ /rkyen la sogs la yod ma yin/ /zhes bya ba der 'chad par 'gyur ro/ /de'i phyir gzhan med pa nyid kyi phyir gzhan las kyang skye ba ma yin no/ / gzhan yang gzhan la brten nas gal te gzhan zhig 'byung bar 'gyur na ni/ /'o na me lce las kyang mun pa mthug po 'byung 'gyur zhing / /thams cad las kyang thams cad skye bar 'gyur te gang gi phyir/ /skyed par byed pa ma yin ma lus pa la 'ang gzhan nyid mtshungs//zhes bya ba la sogs pas gzhan las skye ba dgag pa dbu ma la 'jug pa las nges par bya'o/ /slob dpon sangs rgyas bskyangs ni dngos po rnams gzhan las skye ba med de/ thams cad las kyang thams cad skye bar 'gyur ba'i phyir ro/ /zhes rnam par 'chad do//'di la slob dpon legs ldan byed ni des na de la thal bar 'gyur ba'i ngag yin pa'i phyir/ bsgrub par bya ba dang sgrub pa byed pa bzlog par byas na/ dngos po rnams bdag gam gnyis sam rgyu med pa las skye bar 'gyur ba dang / 'ga' zhig las 'ga' zhig skye bar 'gyur ba'i phyir phyogs gong ma dang 'gal bar 'gyur ro//gzhan du na yang thams cad las thams cad las skye bar 'gyur ba'i phyir ro/ /de bas na de la sgrub pa dang sun 'byin pa nyid med pa'i phyir/ de ni don 'brel pa med pa yin te zhes sun 'byin smra'o//'di yang don 'brel pa med pa ma yin te/ gong kho nar bstan zin pa'i phyir dang gzhan gyis dam bcas pa'i don sun 'byin par byed pa yin dang / sun 'byin pa nyid kyang yin pa'i phyir 'di ni gyi na'o/ /des na slar yang 'bad par mi bya'o/ /dngos po rnams ni gnyi ga las skye ba yang ma yin te/phyogs gnyi ga la smras pa'i nyes par thal ba'i phyir dang / re re la skyed par byed pa'i nus pa med pa'i phyir ro/ /gal te re res byas 'gyur na/ /sdug bsngal gnyi gas byas par 'gyur/ /zhes 'chad par 'gyur ro/ /rgyu med pa las kyang mi skye ste/ /rgyu med na ni 'bras bu dang //rgyu yang 'thad par mi 'gyur ro/ /zhes bya ba la sogs pas 'chad par 'gyur ba'i skyon du thal bar 'gyur ba'i phyir dang / gal te rgyu yis stong na 'gro ba 'di dag gzung bya min/ /ji ltar nam mkha'i ut+pa la yi dri dang kha dog bzhin/ /zhes bya ba la sogs pa'i nyes par thal bar 'gyur ba'i phyir ro//slob dpon sangs rgyas bskyangs ni dngos po rnams rgyu med pa las kyang skye ba med de/ rtag tu thams cad las thams cad skye bar thal bar 'gyur ro zhes 'chad do/ /'di la yang slob dpon legs ldan byed / de la yang thal bar 'gyur ba'i ngag yin pa'i phyir/ gal te bsgrub par bya ba dang sgrub par byed pa bzlog pa gsal ba ngag gi don du mngon par 'dod na/de'i tshe 'di skad du/ dngos po rnams rgyu las skye bar 'gyur ba dang / lan 'ga' kha cig las kha cig skye bar 'gyur ba dang / rtsom pa 'bras bu dang bcas pa nyid du 'gyur ba'i phyir ro//zhes bstan par 'gyur na/ bshad pa de ni mi rigs te/ sngar smras pa'i skyon du thal bar 'gyur ba'i phyir ro/ /zhes sun 'byin pa smra'o/ /gzhan dag na re 'di ni mi rigs te sngar lan btab zin pa'i phyir ro zhe'o/ /gang yang dbang phyug la sogs pa nye bar bsdu ba'i phyir yin no zhes bya ba de yang rigs pa ma yin te/dbang phyug la sogs pa rnams ni khas blangs pa ji lta ba bzhin du bdag dang gzhan dang gnyi ga'i phyogs dag tu 'du ba'i phyir ro/ /de'i phyir skye ba yod pa ma yin no zhes bya ba 'di bsgrubs pa yin la/ skye ba yod pa ma yin pas/rten cing 'brel par 'byung ba skye ba med pa la sogs pas khyad par du byas pa grub pa yin no/ / 'dir smras pa gal te de ltar rten cing 'brel par 'byung ba skye ba med pa la sogs pas khyad par du byas pa rnam par gzhag na ni / 'o na bcom ldan 'das kyis ma rig pa'i rkyen gyis 'du byed rnams skye ba dang /ma rig pa 'gags pas 'du byed 'gag ces bya ba dang / de bzhin du/ kye ma 'du byed rnams mi rtag/ skye zhing 'jig pa'i chos can yin/ /skyes nas 'jig par 'gyur ba ste/ /de dag nye bar zhi ba bde/ / zhes bya ba dang / de bzhin du de bzhin gshegs pa rnams byung yang rung / de bzhin gshegs pa rnams ma byung yang rung / chos rnams kyi chos nyid 'di ni gnas pa kho na ste zhes bya ba dang / sems can gnas par byed pa'i chos ni gcig ste/ gang zas bzhi'o/ / 'jig rten skyong bar byed pa'i chos ni gnyis te/ ngo tsha shes pa dang khrel yod pa'o zhes bya ba la sogs pa dang / de bzhin du 'jig rten pha rol nas 'dir 'ongs so/ /'jig rten 'di nas 'jig rten pha rol du 'gro'o zhes de ltar rten cing 'brel par 'byung ba 'gag pa la sogs pas khyad par du byas pa bstan pa gang yin pa de ji ltar 'gal bar mi 'gyur zhe na/gang gi phyir de ltar rten cing 'brel par 'byung ba 'gag pa la sogs pa dag yod par thos par 'gyur ba de nyid kyi phyir slob dpon gyis drang pa dang nges pa'i don gyi mdo sde'i rnam par dbye ba bstan par bya ba'i phyir dbu ma'i bstan bcos 'di mdzad pa yin no//de la rten cing 'brel par 'byung ba'i skye ba la sogs pa dag bstan pa gang yin pa de dag ni ma rig pa'i rab rib dang bral ba dag gi ye shes zag pa med pa'i yul gyi rang bzhin la ltos nas ni ma yin no//'o na ci zhe na/ ma rig pa'i rab rib kyis blo gros kyi mig nyams par byas pa dag gi shes pa'i yul la ltos nas yin no/ /de kho na nyid gzigs pa la ltos nas ni bcom ldan 'das kyis dge slong dag 'di ni bden pa dam pa ste/ 'di lta ste/ slu ba med pa'i chos can mya ngan las 'das pa'o//'du byed thams cad ni brdzun pa slu ba'i chos can no zhes bya ba la sogs pa gsungs so/ /de bzhin du 'di ni de bzhin nyid dam phyin ci ma log pa'i de bzhin nyid ni med kyi/ 'di dag ni slu bar byed pa'i chos can no/ /'di dag ni brdzun pa sgyu ma byis pa 'drid pa'o zhes gsungs so//de bzhin du/ gzugs ni dbu ba rdos pa 'dra/ /tshor ba chu yi chu bur bzhin/ /'du shes smig rgyu lta bu ste/ /'du byed chu shing sdong po 'dra/ /rnam shes sgyu ma lta bu zhes/ /nyi ma'i gnyen gyis bka' stsal to//zhes bya ba dang / de bzhin du dge slong brtson 'grus brtsams pa dran pa dang shes bzhin dang ldan pa nyin dang mtshan du chos la so sor rtog par byed pa na/ 'du byed thams cad ni nye bar zhi ba'i go 'phang zhi ba/ chos rnams bdag med pa nyid rtogs par 'gyur ro/ / zhes bya ba la sogs pa gsungs so/ /de lta bur bstan pa'i dgongs pa mi shes pas/ 'dir de kho na'i don can gyi bstan pa ni gang zhig yin/ dgongs pa can ni 'dir gang zhig yin snyam du gang zhig the tshom du 'gyur ba dang / gang zhig blo zhan pa nyid kyis drang ba'i don gyi bstan pa la nges pa'i don du rtogs pa de gnyi ga'i the tshom dang log pa'i shes pa dag rigs pa dang lung gnyis kyi sgo nas bsal bar bya ba'i phyir/slob dpon gyis 'di brtsams so/ /de la bdag las ma yin zhes bya ba la sogs pas ni rigs pa gsungs pa yin no//bcom ldan 'das kyis chos gang zhig/ slu ba de ni brdzun zhes gsungs/ /'du byed thams cad slu ba'i chos/ /des na de dag brdzun pa yin/ /sngon mtha' sngon nam zhes zhus tshe/ /thub pa chen pos min zhes gsungs/ /'khor ba thog ma mtha' med de/ /de la sngon med phyi ma med//bcom ldan dngos dang dngos med pa/ /mkhyen pas kA ta ya na yi/ /gdams ngag las ni yod pa dang / /med pa gnyi ga'ang dgag pa mdzad/ /zhes bya ba la sogs pa lung gsungs pa yin no/ /'phags pa blo gros mi zad pas bstan pa'i mdo las/nges pa'i don gyi mdo sde ni gang / drang ba'i don gyi mdo sde ni gang zhe na/ mdo sde gang dag lam la 'jug pa'i phyir bstan pa de dag ni drang ba'i don zhes bya'o/ /mdo sde gang dag 'bras bu la 'jug pa'i phyir bstan pa de dag ni nges pa'i don zhes bya'o//mdo sde gang dag bdag dang / sems can dang / srog dang / 'gro ba dang / gso ba dang / skyes bu dang / gang zag dang / shed las skyes dang / shed bdag dang / byed pa po dang / tshor ba po dang / sgra rnam pa sna tshogs su bshad pa dang /bdag po med pa la bdag po dang bcas par bstan pa de dag ni drang ba'i don zhes bya'o/ /mdo sde gang dag stong pa nyid dang / mtshan ma med pa dang / smon pa med pa dang / mngon par 'du mi byed pa dang / ma skyes pa dang / ma byung ba dang / dngos po med pa dang /bdag med pa dang / sems can med pa dang / srog med pa dang / gang zag med pa dang / bdag po med pa nas / rnam par thar pa'i sgo'i bar du bstan pa de dag ni nges pa'i don zhes bya ste/ 'di dag ni nges pa'i don gyi mdo sde la rton gyi/drang ba'i don gyi mdo sde la mi rton pa zhes bya'o zhes gsungs pa dang / de bzhin du 'phags pa ting nge 'dzin gyi rgyal po las kyang / stong pa bde bar gshegs pas bshad pa ltar/ /nges don mdo sde dag gi bye brag shes/ /gang las sems can gang zag skyes bu bstan//chos de thams cad drang ba'i don du shes/ /zhes gsungs so/ /de'i phyir skye ba la sogs pa bstan pa rnams brdzun pa'i don can du bstan pa'i phyir/ slob dpon gyis rten cing 'brel bar 'byung ba rdzas su ston pa brtsams so/ /gal te skye ba la sogs pa mi srid pa yin dang /chos thams cad brdzun pa nyid du bstan par bya ba'i phyir slob dpon gyis 'di brtsams pa yin no / /de lta na ni gang brdzun pa de ni yod pa ma yin pas mi dge ba'i las dag med par 'gyur la/ de med pas ngan 'gro dag med par 'gyur zhing / dge ba dang bde 'gro dag kyang med par 'gyur ro//bde 'gro dang ngan 'gro med pa'i phyir 'khor ba yang yod pa ma yin pas/ rtsom pa thams cad don med pa nyid du 'gyur ba ma yin nam zhe na bshad par bya ste/ kun rdzob kyi bden pa la ltos nas 'di bden par mngon par zhen pa'i 'jig rten pa'i gnyen po nyid du kho bo cag gis dngos po rnams brdzun pa'i don du bstan gyi/gang zhig brdzun pa'am brdzun pa ma yin par 'gyur ba 'phags pa rnams kyis ni cung zad kyang gzigs pa ma yin no/ /gzhan yang gang gis chos thams cad brdzun pa'i don can nyid du yongs su mkhyen pa de la ci las yod cing 'khor ba yod dam/'dis ni chos 'ga' yang yod pa nyid dam med pa nyid du dmigs pa yang ma yin no/ /ji skad du bcom ldan 'das kyis 'phags pa dkon mchog brtsegs pa'i mdo las/ 'od srungs sems ni kun du btsal na mi rnyed do/ /gong ma rnyed pa de ni mi dmigs pa'o//gang mi dmigs pa de ni 'das pa yang ma yin/ ma 'ongs pa yang ma yin/ da ltar byung ba yang ma yin no/ /gang 'das pa yang ma yin/ ma 'ongs pa yang ma yin/ da ltar byung ba yang ma yin pa de la ni ngo bo nyid med do/ /gang ngo bo nyid med pa de la 'byung ba med do//gang 'byung ba med pa de la 'gag pa med do/ /zhes rgya cher gsungs pa lta bu'o/ /gang dag phyin ci log dang ldan pas chos rnams brdzun pa nyid du khong du mi chud cing / dngos po rnams rang bzhin yod par rtogs nas mngon par zhen pa de ni chos rnams la 'di bden par mngon par zhen pa nyid kyi sgo nas mngon par zhen par gyur dang /las kyang byed cing 'khor ba na yang 'khor bar 'gyur la/ phyin ci log la gnas pas mya ngan las 'das pa thob pa'i skal ba can du yang mi 'gyur ro/ /yang ci dngos po brdzun pa'i rang bzhin can rnams kyang kun nas nyon mongs pa dang /rnam par byang ba'i rgyur 'gyur ram zhe na/ 'gyur te dper na sgyu ma'i na chung ni de'i rang bzhin mngon par mi shes pa rnams kyi kun nas nyon mongs pa'i rgyu yin la/ de bzhin gshegs pa'i sprul pa ni dge ba'i rtsa ba bsags pa rnams kyi rnam par byang ba'i rgyur 'gyur ba bzhin no//lhag pa'i bsam pa bstan pa'i mdo las/ rigs kyi bu 'di lta ste/ dper na la la zhig gis sgyu ma mkhan gyi rol mo byung ba'i tshe/ sgyu ma mkhan gyis sprul pa'i bud med mthong nas 'dod chags kyis sems dkris nas 'khor gyis 'jigs shing bag tsha ste/ stan las langs nas song ste/de song nas bud med de nyid la/ mi sdug pa dang / mi gtsang ba dang / mi rtag pa dang / sdug bsngal ba dang / stong pa dang / bdag med par yid la byed na zhes rgyas par gsungs so/ /'dul ba las kyang / 'khrul 'khor mkhan gyis byas pa'i 'khrul 'khor gyi na chung ni yang dag par bden pa'i na chung gis stong bzhin du/ri mo mkhan gyi 'dod pa'i 'dod chags kyi gzhir gyur par bshad do/ /dpe de bzhin du dngos po brdzun pa'i rang bzhin can rnams kyang byis pa rnams kyi kun nas nyon mongs pa'i rgyu yin no/ /de bzhin du 'phags pa dkon mchog brtsegs pa las kyang /de nas dge slong bsam gtan thob pa lnga brgya ni bcom ldan 'das kyis chos bstan pa 'di la mi 'jug ste/ ma rtogs ma mos pas stan las langs te dong ngo / /de nas bcom ldan 'das kyis dge slong de dag lam gang nas dong ba'i lam der dge slong gnyis shig sprul pa sprul te/de nas dge slong lnga brgya po de dag dge slong de gnyis lam gang nas dong ba'i lam der dong ste phyin pa dang 'di skad ces smras so/ /tshe dang ldan pa dag gar dong / sprul pa gnyis kyis smras pa/ kho bo cag ni dgon pa'i gnas su bsam gtan gyi bde ba la reg par gnas par bya bar dong ngo //de ci'i phyir zhe na/ kho bo cag ni bcom ldan 'das kyis chos bstan pa gang yin pa'ang chos bstan pa de la mi 'jug ste/ mi rtogs mi mos shing / skrag ste kun du dngangs/ kun du rab tu dngangs par gyur nas kho bo cag dgon pa'i gnas rnams su bsam gtan gyi bde ba la reg par gnas pa rnams kyis gnas par bya'o//de nas dge slong lnga brgya po rnams kyis 'di skad ces smras so/ /tshe dang ldan pa dag/ kho bo cag kyang bcom ldan 'das kyis chos bstan pa la mi 'jug ste/ ma rtogs ma mos shing skrag ste/ kun du dngangs kun du rab tu dngangs par gyur te/de'i phyir kho bo cag kyang dgon pa'i gnas rnams su bsam gtan gyi bde ba la reg par gnas pa rnams kyis gnas par bya'o/ /sprul pa dag gis smras pa/ tshe dang ldan pa dag de'i phyir bdag cag yang dag par 'gro bar bya'o/ /rtsod par mi bya'o//rtsod pa med pa lhur byed pa de ni dge sbyong gi chos so/ /tshe dang ldan pa dag gang 'di yongs su mya ngan las 'das pa zhes bya ba gang / yongs su mya ngan las 'da' bar 'gyur ba'i chos de gang / lus 'di las bdag gam/ sems can nam/ srog gam/ skye ba po'am/ skyes bu'am/gang zag gam/ shed las skyes sam/ shed bu'am/ gang yongs su mya ngan las 'da' bar 'gyur/ gang zad pas yongs su mya ngan las 'da'/ de dag gis smras pa/ 'dod chags zad zhe sdang zad gti mug zad pas yongs su mya ngan las 'da'o/ /sprul pa gnyis kyis smras pa/tshe dang ldan pa dag/ 'dod chags dang zhe sdang dang gti mug yod pa yin nam/ ci nam de zad par bya/ de dag gis smras pa/ de dag ni nang na yang med phyi rol na yang med/ gnyi ga med par yang mi dmigs te/ de dag ni yongs su ma brtags pa las kyang mi skye'o//sprul pa gnyis kyis smras pa/ tshe dang ldan pa dag de lta bas na bdag tu ma rtog rnam par ma rtog shig / tshe dang ldan pa dag nam mi rtog rnam par mi rtog pa de'i tshe chags par mi 'gyur chags pa dang bral bar yang mi 'gyur ro/ /chags pa med cing chags pa dang bral ba yang med pa gang yin pa de ni zhi ba zhes bya'o//tshe dang ldan pa dag tshul khrims ni mi 'khor zhing yongs su mya ngan las mi 'da'o/ /tshe dang ldan pa dag ting nge 'dzin dang / shes rab dang / rnam par grol ba dang / rnam par grol ba'i ye shes mthong ba yang mi 'khor zhing yongs su mya ngan las mi 'da'o//tshe dang ldan pa dag/ chos de dag gis yongs su mya ngan las 'da' bar ston na/ chos de dag kyang stong pa dben pa gzung du med pa'o/ /tshe dang ldan pa dag 'di lta ste/ mya ngan las 'das pa'i 'du shes spongs shig/ 'du shes la yang 'du shes su ma byed cig/'du shes la 'du shes kyis yongs su shes par ma byed cig/ gang 'du shes la 'du shes kyis yongs su shes pa de'i de ni 'du shes la yongs su bcings pa yin no/ /tshe dang ldan pa dag/ khyed 'du shes dang tshor ba 'gog pa'i snyoms par 'jug pa la snyoms par zhugs shig/tshe dang ldan pa dag/ dge slong 'du shes dang tshor ba 'gog pa'i snyoms par 'jug pa la snyoms par zhugs pa las gong na bya ba med do zhes smra'o/ /chos kyi rnam grangs 'di bshad pa'i tshe dge slong lnga brgya po de dag len pa med par zag pa rnams las sems rnam par grol lo//de dag sems rnam par grol nas bcom ldan 'das ga la ba der dong ste lhags pa dang / bcom ldan 'das kyi zhabs la mgo bos phyag 'tshal te/ phyogs gcig tu 'khod do/ /de nas tshe dang ldan pa rab 'byor gyis dge slong dag la 'di skad ces smras so//tshe dang ldan pa dag gar dong / gang nas lhags/ de dag gis smras pa/ btsun pa rab 'byor gang du yang 'gro ba med pa dang / gang nas kyang 'ong ba med pa'i phyir bcom ldan 'das kyis chos bstan to/ /smras pa tshe dang ldan pa dag khyed kyi ston pa gang yin/smras pa gang ma skyes shing yongs su mya ngan las mi 'da' ba'o/ /smras pa khyed kyis ji ltar chos thos/ smras pa bcings pa'i phyir yang ma yin/ thar pa'i phyir yang ma yin no/ /smras pa khyed sus btul/ smras pa su la lus med cing sems med pas so//smras pa khyed ji ltar brtson/ /smras pa ma rig pa spang pa'i phyir yang ma yin rig pa skyed pa'i phyir yang ma yin no/ /smras pa khyod ji ltar rnam par grol/ smras pa sbyor ba'i phyir yang ma yin/ spang ba'i phyir yang ma yin no/ /smras pa khyed su'i nyan thos/ smras pa gang gis thob pa med cing mngon par rdzogs par sangs rgyas pa med pa'i 'o//smras pa khyed kyi tshangs pa mtshungs par spyod pa gang / smras pa gang khams gsum na mi rgyu ba rnams so/ /smras pa tshe dang ldan pa dag ji srid cig na yongs su mya ngan las 'da'/ smras pa de bzhin gshegs pa'i sprul pa nam yongs su mya ngan las 'da' ba na'o//smras pa khyod kyis bya ba byas sam/ smras pa ngar 'dzin pa dang nga yir 'dzin pa yongs su shes pas so/ /smras pa khyed kyi nyon mongs pa zad dam/ smras pa chos thams cad gtan du zad pa'i phyir ro/ /smras pa khyed kyis bdud btul lam/smras pa phung po'i bdud mi dmigs pa'i phyir ro/ /smras pa khyod kyis ston pa la bsnyen bkur byas sam/ smras pa lus kyis kyang ma byas/ ngag gis kyang ma byas/ sems kyis kyang ma byas so/ /smras pa khyod kyis yon gnas kyi sa sbyangs sam/ smras pa 'dzin pa med cing sdud pa med pas so//smras pa khyed 'khor ba las rgal tam/ smras pa chad pa med cing rtag pa med pa'i phyir ro/ /smras pa khyed yon gnas kyi sar zhugs sam/ smras pa 'dzin pa thams cad las rnam par grol ba'i phyir ro/ /smras pa tshe dang ldan pa dag gar 'gro/ / smras pa de bzhin gshegs pa'i sprul pa gang du bzhud par ro/ /de ltar tshe dang ldan pa rab 'byor gyis yongs su dris te/ dge slong de dag gis lan btab nas 'khor de'i dge slong brgyad brgya ni len pa med par zag pa rnams las sems rnam par grol lo/ /srog chags sum khri nyis stong ni chos rnams la chos kyi mig rdul med cing dri ma dang bral ba rnam par dag go zhes gsungs so//de ltar na dge slong de bzhin gshegs pa'i sprul pa brdzun pa'i rang bzhin can gnyis kyis dge slong lnga brgya'i rnam par byang ba'i rgyu byas pa yin no/ /'phags pa rdo rje snying po las kyang /'jam dpal 'di lta ste dper na/ gtsub shing dang gtsub gtan la brten/ mi'i lag pa'i rtsol ba la brten nas du ba 'byung zhing / me mngon par 'grub ste/ me de yang gtsub shing la yang mi gnas gtsub gtan la yang mi gnas/ mi'i lag pa'i rtsol ba la yang mi gnas so//'jam dpal de bzhin du med pa las skyes bu gang zag rmongs pa la 'dod chags dang zhe sdang dang gti mug gi yongs su gdung ba'ang 'byung ste/ yongs su gdung ba de yang nang na yang mi gnas phyi rol na'ang mi gnas/ gnyi ga med par yang mi gnas mod kyi/'jam dpal 'on kyang gti mug ces bya'o/ /de ci'i phyir gti mug ces brjod par bya zhe na/ 'jam dpal gti mug ni chos thams cad rab tu grol ba ste/ des na gti mug ces bya'o zhes bya ba dang / de bzhin du 'jam dpal chos thams cad ni sems can dmyal ba'i sgo ste/'di ni gzungs kyi tshig go/ gsol ba bcom ldan 'das ji ltar na 'di gzungs kyi tshig lags/ bka' stsal pa 'jam dpal sems can dmyal ba dag ni byis pa so so'i skye bo rnams kyis yod pa ma yin pa la phyin ci log gis bsgrubs shing / rang gi rnam par rtog pa las byung ba'o//gsol ba bcom ldan 'das sems can dmyal ba dag gang du yang dag par 'du bar 'gyur/ bcom ldan 'das kyis bka' stsal pa/ 'jam dpal sems can dmyal ba dag ni nam mkhar yang dag par 'du bar 'gyur ro/ /'jam dpal de ji snyam du sems/ sems can dmyal ba rang gi rnam par rtog pa las byung ngam/ 'on te ngo bo nyid las byung / gsol ba bcom ldan 'das byis pa so so'i skye bo rnams ni rang gi rnam par rtog pa kho nas sems can dmyal ba dang / dud 'gro'i skye gnas dang / gshin rje'i 'jig rten du 'du shes te/de dag ma mchis pa la sgro btags pa'i slad du tshor ba sdug bsngal myong zhing / ngan song gsum du sdug bsngal nyams su myong bar 'gyur lags so/ /bcom ldan 'das bdag gis ni ji ltar sems can dmyal ba ma khums pa de bzhin du sems can dmyal ba'i sdug bsngal yang ma khums so//bcom ldan 'das 'di lta ste skyes bu la la zhig gnyid kyis log ste rmi lam na bdag nyid sems can dmyal bar ltung bar 'du shes par 'gyur la/ des de ni lcags kyi bum pa skyes bu du ma dang ldan pa khol ba 'bar bar bdag nyid bcug par yang 'du shes par 'gyur ro/ / des de na sdug bsngal gyi tshor ba drag cing mi bzad la brnag par dka' zhing yid du mi 'ong ba myong bar 'gyur ro/ /des de na yid kyi gdung ba yongs su myang bar 'gyur/ de de na skrag par 'gyur/ dngangs par 'gyur/ kun tu dngangs par 'gyur ro/ /de de nas sad par 'gyur zhing rlom pa dang bcas pas kye ma sdug bsngal lo//kye ma sdug bsngal lo zhes ngu zhing cho nges 'debs la smre sngags 'don par 'gyur lags so/ /de nas de la grogs po dang gnyen dang snag gi gnyen mtshams rnams kyis ci zhig gis 'di ltar khyod sdug bsngal bar gyur zhes dris pa dang / de grogs po dang gnyen dang snag gi gnyen mtshams de dag la 'di skad du ngas ni sems can dmyal ba'i sdug bsngal nyams su myong ngo zhes smra bar bgyid/de bdag gis ni sems can dmyal ba'i sdug bsngal nyams su myong na/ khyed cag ci zhig gis 'di ltar khyod sdug bsngal bar gyur zhes 'dri bar byed dam zhes de dag la cho nges 'debs par bgyid/spyo bar bgyid do/ /de nas skyes bu de la grogs po dang gnyen dang snag gi gnyen mtshams de dag 'di skad du/ kye skyes bu ma 'jigs shig ma 'jigs shig khyod ni gnyid kyis log pa yin gyi/ khyod khyim 'di nas gar yang song ba med do zhes smra bar bgyid do//de yang bdag ni gnyid kyis log par gyur te/ yang dag pa ma yin pa 'di bdag gis kun du brtags so snyam du de la dran pa skye bar 'gyur zhing / slar yang de yid bde ba 'thob par 'gyur lags so/ /bcom ldan 'das ji ltar skyes bu gnyid kyis log pa de yod pa ma yin pa la sgro btags nas bdag nyid rmi lam du dmyal bar song bas 'du shes par 'gyur ba de bzhin du/bcom ldan 'das byis pa so so'i skye bo bden pa ma lags pa'i 'dod chags kyis kun nas bcings pa thams cad bud med la mtshan mar rtog par bgyid do//de dag bud med la mtshan mar brtags nas bdag nyid de dag dang lhan cig rtse zhing dga' bar 'du shes so/ /byis pa so so'i skye bo de 'di snyam du bdag ni skyes pa'o/ /'di ni bud med do/ /bud med 'di bdag gi'o snyam du 'gyur zhing de 'dun pa'i 'dod chags kyis kun nas dkris pa'i sems des longs spyod tshol bar sems 'jug par 'gyur lags so//de gzhi de las 'thab pa dang rtsod pa dang g.yul 'gyed par bgyid cing / gdug pa'i dbang po dang ldan pa de la khon du 'dzin pa 'byung bar 'gyur lags so/ /rlom pa dang bcas pa de 'du shes phyin ci log des 'chi ba'i dus bgyis par gyur nas bdag nyid bskal pa stong phrag mang por sems can dmyal ba dag tu sdug bsngal gyi tshor ba myong bar 'du shes so//bcom ldan 'das ji ltar skyes bu de la grogs po dang / gnyen dang snag gi gnyen mtshams rnams kyis 'di skad du kye skyes bu ma 'jigs shig ma 'jigs shig khyod ni gnyid kyis log pa yin gyi/khyod khyim 'di nas gar yang song ba med do zhes smra bar bgyid pa de bzhin du/ bcom ldan 'das sangs rgyas bcom ldan 'das rnams kyis kyang phyin ci log bzhis phyin ci log tu gyur pa'i sems can rnams la 'di skad du chos bstan te/'di la bud med kyang med/ skyes pa yang med/ sems can yang med/ srog kyang med/ gso ba yang med/ gang zag kyang med de/ chos 'di dag thams cad na log pa/ chos 'di dag thams cad ni yod pa ma yin pa/ chos 'di dag thams cad ni phyin ci log gis bsgrubs pa/chos 'di dag thams cad ni sgyu ma lta bu/ chos 'di dag thams cad ni rmi lam lta bu/ chos 'di dag thams cad ni sprul pa lta bu/ chos 'di dag thams cad ni chu zla lta bu ste zhes rgyas par 'byung ba dang / de bzhin du de dag de bzhin gshegs pa'i chos bstan pa thos nas chos thams cad 'dod chags dang bral bar khums so//chos thams cad zhe sdang dang bral ba dang / gti mug dang bral ba dang / ngo bo nyid med pa dang sgrib pa med par khums so/ /de dag sems nam mkha' la gnas pas 'chi ba'i dus bgyid par 'gyur zhing /'chi ba'i dus bgyis ma thag tu phung po lhag ma med pa'i mya ngan las 'das pa'i dbyings su yongs su mya ngan las 'da' ste/ bcom ldan 'das de ltar bdag gis sems can dmyal ba khums lags so zhes gsungs so/ /'phags pa nye ba 'khor gyis zhus pa las kyang / sems dmyal 'jigs pa nga yis bstan byas te//sems can stong phrag du ma skyo byas kyang / /gang dag shi 'phos ngan song drag 'gro ba'i/ /'gro ba de dag nam yang yod ma yin/ /gang dag ral gri mda' chen mtshon 'byin pa'i/ /gnod pa byed pa yod pa ma yin te/ /rtog pa'i dbang gis ngan song de dag na//lus la 'bab mthong de na mtshon cha med/ /sna tshogs yid dga' me tog kha bye zhing / /gser gyi khang mchog 'bar ba yid 'ong ba/ /'di na de la'ang byed pa 'ga' med do/ /de dag rtog pa'i dbang gis gzhag pa yin/ /rtog pa'i dbang gis 'jig rten rnam brtags te//'du shes 'dzin pas byis pa rnam par phye/ /'dzin dang 'dzin med de yang 'byung min te/ /yongs su rtog pa sgyu ma smig rgyu bzhin/ /zhes gsungs so/ /de'i phyir de ltar na dngos po yod pa ma yin pa'i rang bzhin can phyin ci log gis bzhag pa rnams ni 'khor ba na byis pa rnams kyi kun nas nyon mongs pa'i rgyur 'gyur ro zhes bya bar gnas so//dngos po brdzun pa'i rang bzhin can rnams ji ltar kun nas nyon mongs pa dang / rnam par byang ba'i rgyu nyid yin pa de ltar ni rgyas par dbu ma la 'jug pa las nges par bya'o/ 'dir smras pa/ gal te bdag dang gzhan dang gnyi ga dang rgyu med pa las dngos po rnams skye ba yod pa ma yin na/ ji ltar bcom ldan 'das kyis ma rig pa'i rkyen gyis 'du byed rnams zhes gsungs/ bshad par bya ste/ 'di ni kun rdzob pa yin gyi de kho na nyid ni ma yin no/ /ci kun rdzob kyi rnam par gzhag pa brjod par bya ba yin nam zhe na/rkyen nyid 'di pa tsam gyis kun rdzob grub par khas len gyi/ phyogs bzhi khas blangs pa'i sgo nas ni ma yin te/ dngos po rang bzhin dang bcas pa smra bar thal bar 'gyur ba'i phyir dang / de yang rigs pa ma yin pa'i phyir ro/ /rkyen nyid 'di pa tsam zhig khas blangs na ni rgyu dang 'bras bu gnyis phan tshun ltos pa'i phyir/ngo bo nyid kyis grub pa yod pa ma yin pas dngos po rang bzhin dang bcas par smra bar 'gyur ba ma yin no/ /de nyid kyi phyir/ sdug bsngal rang gis byas pa dang / /gzhan gyis byas dang gnyi gas byas/ / rgyu med rtog ge ba yis 'dod/ /khyod kyis brtan nas 'byung bar gsungs/ /zhes gsungs so/ /'di nyid las kyang / byed po las la brten byas shing / /las kyang byed po de nyid la / /brten nas 'byung ba ma gtogs pa/ /grub pa'i rgyu ni ma mthong ngo / /zhes 'chad par 'gyur ro//bcom ldan 'das kyis kyang de la chos kyi brda ni 'di yin te/ 'di lta ste 'di yod pas 'di 'byung la/ 'di skyes pas 'di skye ste/ gang 'di ma rig pa'i rkyen gyis 'du byed rnams/ 'du byed kyi rkyen gyis rnam par shes pa zhes bya ba la sogs pa 'di tsam zhig kho na gsungs so//'dir 'ga' zhig dag rgol bar byed de/ dngos po rnams skye ba med do snyam pa'i nges pa 'di tshad ma las skyes pa zhig gam/ 'on te tshad ma ma yin pa las skyes pa zhig yin grang / de la gal te tshad ma las skyes par 'dod na ni/ tshad ma dag ni du zhig/ mtshan nyid ni gang /yul dag ni ci zhig/ ci bdag las skyes pa zhig gam/ gzhan nam gnyi ga'am rgyu med pa las yin zhes bya ba 'di brjod par bya'o/ /'on te tshad ma ma yin pa las skyes pa yin na ni/ de ni mi rigs te/ gzhal bya rtogs pa ni tshad ma la rag las pa'i phyir te/ rtogs par ma gyur pa'i don ni tshad ma med par rtogs par mi nus so/ /tshad ma med pas don rtogs pa yang med na ni khyod kyi yang dag pa'i nges pa 'di ga las 'gyur te/ de'i phyir dngos po rnams skye ba med do zhes bya ba 'di ni rigs pa ma yin no/ /yang na khyed kyi dngos po rnams skye ba med do zhes bya ba'i nges pa 'di gang las gyur pa 'di nyid las nga'i dngos po thams cad yod pa yin no zhes bya ba yang yin la/yang ji ltar khyod kyi dngos po thams cad skye ba med do zhes bya ba'i nges pa 'dir 'gyur ba de kho na ltar nga'i dngos po thams cad skye bar yang 'gyur ro/ /ci ste khyod la dngos po thams cad skye ba med do snyam pa'i nges pa 'di med na ni/de'i tshe rang nyid kyis kyang ma nges pas gzhan khong du chud par byed pa mi srid pa'i phyir bstan bcos rtsom pa don med pa nyid du 'gyur te/ des na dngos po thams cad bkag pa med par yod pa yin no zhe na/ brjod par bya ste/ gal te kho bo cag la nges pa zhes bya ba 'ga' zhig yod par 'gyur na ni/de tshad ma las skyes pa'am/ tshad ma ma yin pa las skyes pa zhig tu 'gyur na/ yod pa ni ma yin no/ /ci'i phyir zhe na/ 'dir ma nges pa yod na ni de la ltos shing de'i gnyen por gyur pa'i nges pa yang yod par 'gyur ba zhig na/ gang gi tshe re zhig kho bo cag la ma nges pa nyid yod pa ma yin pa de'i tshe ni de dang 'gal ba'i nges pa yod par ga la 'gyur te/ 'brel pa can gzhan la ma ltos pa'i phyir/ bong bu'i rwa'i ring po dang thung ba nyid bzhin no/ /gang gi tshe de ltar nges pa med pa de'i tshe ci zhig 'grub par bya ba'i phyir tshad ma dag yongs su rtog par byed/de dag gi grangs dang mtshan nyid dang yul dang / bdag gam gzhan nam gnyi ga'am rgyu med pa las skye zhes bya bar yang ga la 'gyur te/ 'di dag thams cad ni kho bo cag gis brjod par bya ba ma yin pa zhig go/ gal te de ltar khyod la nges pa yod pa ma yin na/khyed cag gi dngos po rnams ni/ bdag las ma yin gzhan las min/ /gnyis las ma yin rgyu med min/ /zhes bya ba'i nges pa'i rang bzhin gyi ngag 'di ji ltar dmigs she na/ brjod par bya ste/ nges par gyur pa'i ngag 'di ni rang la grub pa'i 'thad pa'i sgo nas 'jig rten la yod kyi/'phags pa rnams la ni ma yin no/ /ci 'phags pa rnams la rigs pa mi mnga' 'am zhe na/ yod pa'am med pa 'di sus smras/ 'phags pa rnams kyi don dam pa ni cang mi gsung ba yin te/ de'i phyir gang la 'thad pa dang 'thad pa ma yin pa mi mnga' bar 'gyur ba de dag la spros pa mnga' bar ga la 'gyur/gal te 'phags pa rnams 'thad pa gsung bar mi mdzad na/ da ni ci zhig gis 'jig rten pas don dam pa khong du chud par mdzad ce na/ 'phags pa rnams ni 'jig rten gyi tha snyad kyis 'thad pa mi gsung gi/ 'on kyang 'jig rten kho na la rab tu grags pa'i 'thad pa gang yin pa de dag gzhan rtogs par bya ba'i phyir zhal gyis bzhes nas de nyid kyis 'jig rten khong du chud par mdzad do//ji ltar lus la mi gtsang ba nyid yod du zin kyang phyin ci log gi rjes su song ba'i 'dod chags can rnams kyis dmigs par mi 'gyur zhing /yang dag pa ma yin yang gtsang ba'i rnam par sgro btags nas yongs su nyon mongs par 'gyur ro/ /de dag 'dod chags dang bral bar bya ba'i phyir de bzhin gshegs pa'i sprul pa 'am lhas/ lus 'di la skra zhes bya ba la sogs pas sngar gtsang ba'i 'du shes kyis bkab pa'i lus kyi skyon rnams nye bar ston par byed do//de dag kyang gtsang ba'i 'du shes de dang bral bas 'dod chags dang bral ba thob par 'gyur ba de bzhin du 'di na so so'i skye bo dag kyang ma rig pa'i rab rib kyis blo gros kyi mig nyams pa nyid kyis dngos po rnams kyi rang bzhin phyin ci log/'phags pa rnams kyis rnam pa thams cad du ma dmigs pa'i bdag nyid can dang / 'ga' zhig tu khyad par 'ga' zhig lhag par sgro btags nas chos shin tu nyon mongs par 'gyur te/ de dag da ltar 'phags pa rnams kyis bum pa yod pa 'jim pa la sogs pa dag las skye ba ma yin no zhes khas blangs pa de bzhin du skyes pa'i snga rol nas yod pa la yang skye ba yod pa ma yin te/yod pa'i phyir ro zhes bya bar nges par gyis shig/ yang ji ltar me dang sol ba la sogs pa gzhan du gyur pa dag las myu gu skye ba yod pa ma yin no zhes bya bar khas blangs pa de bzhin du sa bon la sogs pa brjod par 'dod pa dag las kyang yod pa ma yin no zhes nges par gyis shig/ci ste yang 'di ni kho bo cag gis nyams su myong ba yin no snyam na 'di yang mi rigs te/ 'di ltar nyams su myong ba ni brdzun pa'i don can yin te/nyams su myong ba yin pa'i phyir rab rib can gyis zla ba gnyis nyams su myong ba bzhin no/ /de'i phyir nyams su myong ba yang bsgrub par bya ba dang mtshungs pa nyid yin pa'i phyir des phyir bzlog par rigs pa ma yin no zhes de dag la grags pa nyid kyis khong du chud par mdzad pa yin no//de'i phyir dngos po rnams skye ba med pa yin no/ /de ltar re zhig de'i rang bzhin phyin ci log lhag par sgro btags pa'i gnyen por rab tu byed pa dang po brtsams pa yin no/ /de nas khyad par 'ga' zhig 'ga' zhig tu sgro btags pa'i khyad par de bsal bar bya ba'i phyir rab tu byed pa lhag ma brtsams pa yin te/rten cing 'brel bar 'byung ba la 'gro ba po dang / bgrod par bya ba dang 'gro bar bya ba la sogs pa khyad par ro cog ma lus pa yang yod pa ma yin no zhes bstan par bya ba'i don du'o/ /ci ste tshad ma dang gzhal bya'i tha snyad 'jig rten pa 'di nyid kho bo cag gi bstan bcos su brjod pa yin no snyam na/'o na ni de brjod pa'i dgos pa bsnyad par bya dgos so/ /gal te rtog ge pa dag gis mtshan nyid phyin ci log brjod pas/ de brlag par byas pas kho bo cag gis de'i mtshan nyid yang dag par brjod pa yin no zhe na/ 'di yang mi rigs te/ gal te 'jig rten la rtog ge ngan pas mtshan nyid phyin ci log brjod pas byas pa'i mtshon bya phyin ci log yod par 'gyur na ni de'i don du 'bad pa 'bras bu dang bcas par 'gyur ba zhig na/de ni de ltar yang ma yin pas 'bad pa 'di don med pa nyid do/ /gzhan yang gal te gzhal bya rtogs pa tshad ma la rag las pa yin na/ tshad ma de dag gang gis yongs su gcod par byed ces bya ba la sogs pa rtsod pa bzlog pa las bshad pa'i skyon de ma spangs pas yang dag pa'i mtshan nyid gsal bar byed pa nyid kyang yod pa ma yin no/ /gzhan yang gal te rang dang spyi'i mtshan nyid gnyis kyi dbang gis mtshan ma gnyis smra na ni/ci mtshan nyid de gnyis gang la yod pa'i mtshan gzhi de yod dam 'on te med/ gal te yod na ni de'i tshe de dag las gzhal bya yod pas ji ltar tshad ma gnyis yin/ 'on te mtshan gzhi med na ni de'i tshe rten med pas mtshan nyid kyang yod pa ma yin pas ji ltar tshad ma gnyis su 'gyur te/mtshan nyid 'jug pa ma yin na/ /mtshan gzhi 'thad par mi 'gyur ro/ /mtshan gzhi 'thad pa ma yin na/ /mtshan nyid kyang ni yod ma yin/ /zhes 'chad par 'gyur ro/ /ci ste yang 'dis mtshon par byed pas ni mtshan nyid ma yin gyi/ 'o na ci zhe na/ byed pa dang lu Ta ni phal che'o zhes bya bas las la l+yu Ta byas nas 'di mtshon par bya bas na mtshan nyid yin no snyam na/de lta na yang de nyid kyis mtshon par bya ba nyid du mi srid pa'i phyir/ gang gis de mtshon par byed pa'i byed pa de dang las tha dad pa yin pa'i phyir nyes pa de nyid du 'gyur ro/ /ci ste shes pa byed pa yin pa'i phyir la/de yang rang gi mtshan nyid kyi khongs su 'du ba'i phyir nyes pa 'di med do snyam na/ bshad par bya ste/ re zhig 'dir ji ltar des de mtshon par byed pas sa'i sra ba dang / tshor ba'i myong ba dang / rnam par shes pa'i yul so sor rnam par rig pa ltar bdag nyid kyi rang gi ngo bo gzhan dang thun mong ma yin pa gang yin pa de ni rang gi mtshan nyid yin na/rab tu grags pa dang rjes su 'brel ba'i bye brag tu bshad pa bor nas/ las su sgrub pa khas len zhing rnam par shes pa byed pa'i ngo bor rtogs pas ni/ rang gi mtshan nyid kho na las nyid yin zhing / rang gi mtshan nyid gzhan ni byed pa'i ngo bo yin no zhes bya ba 'di smras par 'gyur ro/ /de la gal te rnam par shes pa'i rang gi mtshan nyid byed pa yin na ni/ de la tha dad par gyur pa'i las shig yod par 'gyur dgos pas nyes pa de nyid du 'gyur ro/ /ci ste sa la sogs par gtogs pa'i sra ba la sogs pa rnam par shes pas rtogs par bya ba gang yin pa de ni de'i las yin la/de yang rang gi mtshan nyid las tha dad pa ma yin no snyam na/ de lta na ni 'o na rnam par shes pa'i rang gi mtshan nyid las ma yin pa'i phyir gzhal bya nyid du mi 'gyur te/ las kyi rang bzhin gyi rang gi mtshan nyid kho na gzhal bya yin pa'i phyir ro//de'i phyir gzhal bya ni rnam pa gnyis te/ rang gi mtshan nyid dang spyi'i mtshan nyid do zhes bya bar/ rang gi mtshan nyid cung zad cig ni gzhal bya yin te/ mtshon par bya bas na zhes de ltar bsnyad pa gang yin pa'o/ / cung zad cig ni gzhal bya ma yin te 'dis mtshon par byed pas na zhes brjod pa gang yin pa'o zhes khyad par 'di tsam zhig brjod par bya dgos so/ /ci ste de yang las su sgrub pa yin na ni/ de'i tshe de la byed pa gzhan zhig yod par bya dgos la/ shes pa gzhan zhig byed pa'i ngo bor rtogs na yang thug pa med pa'i skyon du 'gyur ro//ci ste rang rig pa yod de des na rang rig pas des de 'dzin pa'i phyir las nyid yin dang / gzhal bya'i khongs su 'du ba yod pa yin no snyam du sems na/ bshad par bya ste/ dbu ma la 'jug pa las rang rig pa rgyas par bkag pa'i phyir rang gi mtshan nyid ni rang gi mtshan nyid gzhan gyis mtshon par byed pa la/de yang rang rig pa des mtshon par byed do zhes bya ba ni rigs pa ma yin no/ /gzhan yang shes pa de yang mi srid pa'i phyir rang gi mtshan nyid las tha dad par ma grub la/ mtshan gzhi med na rten med pa'i mtshan nyid 'jug pa med pa'i phyir rnam pa thams cad du yod pa ma yin pas rang rig pa ga la yod/de skad du yang 'phags pa gtsug na rin po ches zhus pa las/ de sems yang dag par rjes su ma mthong bas/ sems gang las byung zhes sems kyi rgyun kun du tshol zhing de 'di snyam du sems te/dmigs pa yod pa las sems 'byung bar 'gyur ro snyam mo/ /de yang 'di snyam du sems te/ ci dmigs pa de yang gzhan la sems de yang gzhan nam/ 'on te dmigs pa gang yin pa de nyid sems yin/ gal te re zhig dmigs pa yang gzhan la sems kyang gzhan na ni sems de gnyis su 'gyur ro//'on te dmigs pa gang yin pa de nyid sems yin na ni/ sems kyis sems de ji ltar mthong bar 'gyur te/ sems kyis sems de mthong bar mi rung ngo / /'di lta ste dper na ral gri'i so de nyid kyis ral gri'i so de nyid bcad par mi nus pa dang /sor mo'i rtse mo de nyid kyis sor mo'i rtse mo de nyid la reg par mi nus pa de bzhin du/ sems de nyid kyis sems de nyid mthong bar mi nus so snyam nas/ de 'di ltar tshul bzhin rab tu sbyor ba la/ gang sems mi gnas pa/ chad pa ma yin pa/ rtag pa ma yin pa/ ther zug tu mi gnas pa/rgyu med pa ma yin / rkyen dang mi 'gal ba de las kyang ma yin pa / gzhan las kyang ma yin pa/ de nyid kyang ma yin pa gzhan yang ma yin pa'i sems kyi rgyud sems kyi 'khri shing / sems kyi chos nyid/ sems kyi mi gnas pa dang / sems rgyu ba med pa dang /sems snang ba med pa dang / sems kyi rang gi mtshan nyid de ji ltar de bzhin nyid 'khrug par mi byed pa de ltar shes so/ /de ltar mthong ngo / /de bzhin nyid ji lta ba de bzhin du sems de dag dben pa nyid du rab tu shes/ de bzhin du mthong ba 'di ni rigs kyi bu byang chub sems dpa'i sems la sems kyi rjes su lta ba'i dran pa nye bar gzhag pa'i spyod pa yongs su dag pa'o zhes gsungs so//de'i phyir de ltar rang rig pa med la/ de med pas gang zhig gang gis mtshon par byed/ gzhan yang mtshan nyid de mtshan gzhi las tha dad par 'gyur ram tha mi dad par 'gyur grang / de la gal te re zhig tha dad pa yin na ni/ de'i tshe mtshan gzhi las tha dad pa'i phyir mtshan nyid ma yin pa bzhin du mtshan nyid kyang mtshan nyid ma yin par 'gyur la/ mtshan nyid las tha dad pa'i phyir mtshan gzhi yang mtshan gzhi ma yin pa ltar mtshan gzhir mi 'gyur ro/ /de bzhin du mtshan nyid mtshan gzhi las tha dad pa'i phyir mtshan gzhi mtshan nyid la ltos pa med par yang 'gyur te/de'i phyir de mtshan gzhi ma yin te/ mtshan nyid la ltos pa med pa'i phyir nam mkha'i me tog bzhin no/ /ci ste mtshan nyid dang mtshan nyid kyi gzhi dag tha mi dad pa nyid yin na ni/ de'i tshe mtshan nyid las tha mi dad pa'i phyir/mtshan nyid kyi rang gi bdag nyid bzhin du mtshan gzhi'i mtshan gzhi nyid nyams par 'gyur ro/ /mtshan gzhi las tha mi dad pa'i phyir mtshan nyid kyang mtshan nyid kyi rang bzhin du mi 'gyur te/ mtshan gzhi'i rang gi bdag nyid bzhin no/ /ji skad du/ mtshan nyid mtshan gzhi las gzhan na/ /mtshan gzhi de mtshan med par 'gyur/ /tha dad med na de dag ni/ /med par khyod kyis gsal bar bstan/ /zhes bshad do/ /de nyid dang gzhan nyid las ma gtogs par mtshan gzhi dang mtshan nyid 'grub pa'i thabs gzhan yod pa yang ma yin te/de skad du/ gang dag dngos po gcig pa dang / /dngos po gzhan pa nyid du ni/ /'grub par 'gyur ba yod min na/ /de gnyis grub pa ji ltar yod/ /ces 'chad par 'gyur ro/ /ci ste brjod du med pa nyid du 'grub par 'gyur ro zhe na/ de ni 'di ltar ma yin te/phan tshun rnam par dbye ba yongs su shes pa med pa yin na/ brjod du med pa nyid ces bya bar 'gyur na/ gang na rnam par dbye ba yongs su shes par 'gyur ba med pa der ni 'di ni mtshan nyid do/ /'di ni mtshan gzhi'o zhes khyad par du yongs su gcod pa med pas gnyi ga yang med pa nyid de/de'i phyir brjod du med pa nyid du yang grub pa med de / gzhan yang gal te shes pa byed pa yin na/ yul yongs su gcod pa'i byed pa po gang zhig yin/ byed pa po med par byed pa la sogs pa rnams yod pa yang ma yin te/ gcod pa'i bya ba bzhin no/ / ci ste der sems la byed pa po nyid du rtog na/ de yang rigs pa ma yin te/ 'di ltar don tsam lta ba ni sems kyi bya ba yin la don gyi khyad par lta ba ni sems las byung ba rnams kyi bya ba yin te/ de la don mthong rnam par shes/ /de yi khyad par sems las byung / /zhes khas blangs pa'i phyir ro//byed pa la sogs pa rnams ni bdag nyid ji lta bu'i bya ba phal pa sgrub pa'i sgo nas/ gtso bor gyur pa'i bya ba cig bsgrub par bya ba la yan lag gi ngo bor gyur pa las byed pa la sogs pa nyid du 'gyur na/ 'dir ni shes pa rnam par shes pa gnyis la gtso bor gyur pa'i bya ba gcig med do//'o na ci zhe na/ rnam par shes pa'i gtso bor gyur pa'i bya ba ni don tsam yongs su gcod pa yin la/ don gyi khyad par yongs su gcod pa ni shes pa'i gtso bor gyur pa'i bya ba yin te/ des na shes pa byed pa nyid ma yin la/ sems kyang byed pa po nyid ma yin no//de'i phyir nyes pa de nyid du 'gyur ro/ /ci ste chos thams cad bdag med pa zhes bya ba'i lung las na/ byed pa po rnam pa thams cad du med pa'i phyir bya ba la sogs pa'i tha snyad ni byed pa po med kyang yod pa nyid do snyam na/ 'di yang yod pa ma yin te/ lung gi don yang dag par ma bzung ba'i phyir ro//'di yang dbu ma 'jug pa las bstan zin to/ /ci ste yang dper na mchi gu'i lus sgra gcan gyi mgo zhes bya ba la/ lus dang mgo las tha dad pa'i khyad par med kyang khyad par dang khyad par gyi gzhi'i dngos po yod pa de bzhin du/ rang gi mtshan nyid las tha dad pa'i sa la sogs pa med kyang sa'i rang gi mtshan nyid ces bya bar 'gyur ro snyam na/de ni de ltar ma yin te/ mi mtshungs pa'i phyir ro/ /lus dang mgo'i sgra dag ni blo dang lag pa la sogs pa ltar lhan cig 'byung ba'i dngos po gzhan la ltos pa dang bcas te 'jug pas/ lus dang mgo'i sgra tsam la dmigs pa'i blo skyes pa lta zhig gang gi lus gang gi mgo snyam du lhan cig dpyod pa'i dngos po gzhan la re ba dang bcas pa nyid du 'gyur la/cig shos kyang khyad par gzhan dang 'brel ba bsal bar 'dod pas 'jig rten pa'i brda'i rjes su byed pa/ khyad par mchi gu dang sgra gcan gyi sgras rtogs pa po'i re ba sel bar byed do zhes bya bar rigs na /'dir ni sra ba la sogs pa las tha dad pa'i sa la sogs pa med pas khyad par dang khyad par can gyi dngos po mi rigs so/ /gal te mu stegs pa dag gis mtshan gzhi tha dad par khas blangs pa'i phyir de'i ngor khyad par brjod pa la skyon med do zhe na/de ni de ltar ma yin te/ mu stegs pas kun tu brtags pa'i dngos po rigs pa dang 'gal ba dag ni rang gi gzhung lugs la khas blangs par mi rigs te/ tshad ma gzhan la sogs pa khas blangs par thal bar 'gyur ba'i phyir ro//gzhan yang lus kyi rten can khyad par du byed pa 'jig rten pa'i tha snyad kyi yan lag tu gyur pa ma brtags na grub pa rten pa po mchi gu dang / mgo'i rten can brten pa po sgra gcan ni gang zag la sogs par brtags pa ltar yod pa'i phyir dpe 'di rigs pa ma yin no//gal te de tsam zhig dmigs pas lus dang mgo las tha dad pa'i don gzhan ma grub pa'i phyir dpe grub pa nyid do zhe na/ de ni de ltar ma yin te/ 'jig rten pa'i tha snyad la de ltar rnam par dpyod pa mi 'jug pa'i phyir dang / 'jig rten pa'i dngos po rnams ni ma brtags par yod pa'i phyir ro/ /ji ltar rnam par dpyad na gzugs la sogs pa las tha dad par bdag med mod kyi/ 'on kyang phung po la brten nas 'jig rten gyi kun rdzob tu 'di yod pa nyid yin pa de bzhin du/ sgra gcan dang mchi gu gnyis kyang yin pas dpe grub pa med do//de bzhin du rnam par dpyad na sa la sogs pa dag la yang sra ba la sogs pa las tha dad pa'i mtshan gzhi med la/ mtshan gzhi las tha dad par rten med pa'i mtshan nyid kyang med mod kyi/ de lta na yang 'di ni kun rdzob tu yod de/ de bas na slob dpon rnams kyis phan tshun ltos pa tsam gyis grub pa'i sgo nas grub par rnam par gzhag pa mdzad do//'di ni de kho na ltar gdon mi za bar khas blang bar bya ste/ de lta ma yin na kun rdzob 'thad pa dang ldan pa ma yin nam/ des na 'di de kho na nyid du 'gyur gyi kun rdzob tu mi 'gyur ro/ /'thad pas rnam par dpyad pa na mchi gu la sogs pa dag kho na mi srid pa ni ma yin te/'o na ci zhe na/ 'chad par 'gyur ba'i 'thad pas gzugs dang tshor ba la sogs pa rnams kyang yod pa ma yin pas/ de dag kyang mchi gu la sogs pa bzhin du kun rdzob tu yod pa yin pa nyid du khas blangs par 'gyur na/de ltar yang ma yin pas/ 'di ni yod pa ma yin no/ /brten nas brtags par rnam par gzhag pa 'di yang dbu ma la 'jug pa las rgyas par bstan pas de nyid las yongs su btsal bar bya'o/ /ci ste zhib mor dpyad pa 'dis ci zhig bya ste/ kho bo cag tshad ma dang gzhal bya'i tha snyad thams cad bden pa yin no zhes ni mi smra'i/'on kyang 'jig rten la rab tu grags pa 'di tshul 'dis rnam par 'jog par byed par 'gyur ro snyam na/ bshad par bya ste/ dpyad pa zhib mo 'jig rten pa'i tha snyad la bcug pa 'dis ci dgos zhes kho bo cag kyang de skad du smra ste/ kun rdzob phyin ci log tsam gyis bdag gi ngo bo yod par rnyed pa/thar pa 'dod pa rnams kyi thar pa 'dren par byed pa'i dge ba'i rtsa ba sog pa'i rgyur gyur pa 'di ni ji srid de kho na nyid ma rtogs pa de srid du gnas par 'gyur mod/ khyod ni don dam pa dang kun rdzob kyi bden pa la mi mkhas pas la lar 'thad pa bcug nas rigs pa ma yin pa las de 'jig par byed pa yin no//kho bo ni kun rdzob kyi bden pa rnam par 'jog pa la mkhas pa'i phyir/ 'jig rten pa'i phyogs nyid la gnas te kun rdzob kyi phyogs gcig bsal ba'i phyir bkod pa'i 'thad pa gzhan 'thad pa gzhan gyis zlog par byed cing 'jig rten gyi rgan rabs ltar/'jig rten gyi chos lugs las nyams pa khyod kho na zlog par byed pa yin gyi kun rdzob ni ma yin no/ /de'i phyir gal te 'jig rten pa'i tha snyad du yin na ni/ de'i tshe mtshan nyid bzhin du mtshan gzhir yang gdon mi za bar 'gyur bar bya dgos te/de'i phyir nyes pa de nyid du 'gyur ro/ /'on te don dam par yin na ni de'i tshe mtshan gzhi med pas mtshan nyid gnyis kyang med pas tshad ma gnyis su ga la 'gyur/ ci ste sgra rnams la bya ba dang byed pa po'i 'brel bar sngon du 'gro ba can gyi bye brag tu bshad pa de lta bu khas len par mi byed do zhe na/'di ni shin tu dka' ste/ khyod bya ba dang byed pa po'i 'brel bas rab tu zhugs pa'i sgra de dag kho nas tha snyad byed cing / bya ba dang byed pa po la sogs pa'i sgra'i don yang mi 'dod pas/ e ma kyi hud khyod ni 'dod pa tsam la rag las te 'jug pa nyid do/ / gang gi tshe de ltar gzhal bya gnyis gnas pa med pa de'i tshe lung la sogs pa rang dang spyi'i mtshan nyid kyi yul can ma yin pa nyid kyi sgo nas tshad ma gzhan nyid ma yin pa ma yin no/ /gzhan yang bum pa mngon sum mo zhes bya ba de lta bu la sogs pa 'jig rten pa'i tha snyad ma bsdus pa'i phyir dang / 'phags pa ma yin pa'i tha snyad khas blangs pa'i phyir mtshan nyid ma khyab pa nyid du 'gyur te/des na 'di ni mi rigs so/ /ci ste bum pa'i nye bar len pa sngon po la sogs pa dag ni mngon sum gyi tshad mas yongs su gcad par bya ba yin pa'i phyir mngon sum yin te/ de'i phyir ji ltar rgyu la 'bras bu btags par byas te/sangs rgyas rnams ni 'byung ba bde/ /zhes bsnyad pa de bzhin du/ sngon po la sogs pa mngon sum du gyur pa'i rgyu can gyi bum pa yang 'bras bu la rgyus btags pa byas nas mngon sum zhes bya bar brjod do snyam na/ rnam pa de lta bu'i yul la ni btags pa mi rigs te/'byung ba ni 'jig rten na bde ba las tha dad par dmigs la/ de yang 'dus byas kyi mtshan nyid kyi rang bzhin yin pa'i phyir dang / dka' ba brgya phrag du ma'i rgyu can yin pa'i phyir bde ba ma yin pa nyid do/ /de la bde ba zhes brjod pa na 'brel ba med pa nyid yin pas rnam pa de lta bu'i yul la nye bar btags pa rigs na/bum pa mngon sum zhes bya ba 'dir ni gang zhig brtags nas mngon sum nyid du 'gyur ba bum pa zhes bya ba mngon sum ma yin pa logs shig tu dmigs pa yang ma yin no/ /gal te sngon po la sogs pa las tha dad pa'i bum pa med pa'i phyir btags pa'i mngon sum nyid du 'gyur ro zhe na/de lta na yang ches shin tu btags par mi rigs te/ gzhi gdags bya med pa'i phyir ro/ /bong bu'i rwa la rnon po nye bar 'dogs pa ni rigs pa ma yin no/ /gzhan yang gal te 'jig rten gyi tha snyad kyi yan lag tu gyur pa'i bum pa sngon po la sogs pa las tha dad par gyur pa med pa'i phyir/de nye bar btags pa pa'i mngon sum nyid du rtogs na ni de lta na ni sngon po la sogs pa yang sa la sogs pa las tha dad pa med pas sngon po la sogs pa yang btags pa pa'i mngon sum nyid du rtogs shig/ ji skad du/ 'di ltar gzugs sogs ma gtogs par//bum pa yod pa ma yin pa/ /de bzhin rlung la sogs pa ni/ /ma gtogs gzugs kyang yod ma yin/ /zhes bshad do/ /de'i phyir de lta bu la sogs pa'i 'jig rten gyi tha snyad ni mtshan nyid kyis ma bsdus pa'i phyir mtshan nyid ma khyab pa nyid do//de kho na nyid gzigs pa la ltos nas ni bum pa la sogs pa dang sngon po la sogs pa rnams mngon sum nyid du mi 'dod do/ /'jig rten gyi kun rdzob tu ni bum pa la sogs pa rnams mngon sum nyid du khas blang bar bya ba kho na'o/ /ji skad du bzhi brgya pa las/ gzugs mthong tshe na bum pa ni//thams cad kho na mthong mi 'gyur/ /bum pa mngon sum zhes bya 'ang / /de nyid rig pa su zhig smra/ /rnam par dpyad pa 'di nyid kyis/ /blo mchog ldan pas dri zhim dang / /mngar dang 'jam pa thams cad dag/ so sor dgag par bya ba yin/ /zhes bshad do/ /gzhan yang mngon sum gyi sgra ni lkog tu ma gyur pa'i don gyi rjod par byed pa yin pa'i phyir/dbang po mngon du phyogs pa'i don ni mngon sum yin no/ /'di la dbang po mngon du phyogs pas zhes bya ba nas bum pa dang sngon po la sogs pa lkog tu ma gyur pa rnams mngon sum nyid du grub par 'gyur la/de yongs su gcod par byed pa'i shes pa ni rtswa dang sog ma'i me bzhin du mngon sum gyi rgyu can yin pa'i phyir mngon sum nyid du rjod par byed do/ /gang zhig dbang po dang dbang po so so la 'jug pas zhes bya bas mngon sum gyi sgra bye brag tu 'chad par byed pa/ de ltar na ni shes pa ni dbang po'i yul can ma yin pa'i phyir dang /yul gyi yul can yin pa'i phyir bye brag tu bshad pa mi rigs par 'gyur te/ yul so so ba'am don so so ba nyid ces bya bar ni mi 'gyur ro/ /ci ste ji ltar rnam par shes pa 'byung ba gnyi ga la rag las pa yin yang rnam par shes pa rnams rten gsal ba dang zhan pa'i rjes su byed pa'i phyir dang /de dag gyur na 'gyur ba'i phyir/ mig gi rnam par shes pa zhes rten nyid kyis ston par 'gyur ba de bzhin du/ don dang don so so la 'jug mod kyi de lta na yang dbang po dang dbang po la brten nas 'jug pa'i rnam par shes pa ni rten gyis bstan pas mngon sum nyid du 'gyur te/rnga'i sgra nas kyi myu gu zhes thun mong ma yin pa'i rgyus ston pa ni mthong ba yin no snyam na/ 'di ni snga ma dang mi 'dra ba yin te/ der ni gzugs kyi rnam par shes pa zhes bya ba de lta bu la sogs pas yul gyi rnam par shes pa bstan na/rnam par shes pa drug gi rnam par dbye ba ma bstan par 'gyur te/ yid kyi rnam par shes pa ni mig la sogs pa'i rnam par shes pa dang lhan cig yul gcig la 'dug pa'i phyir ro/ /'di ltar sngon po la sogs pa'i rnam par shes pa drug la rnam par shes pa zhes brjod na ni/ci rnam par shes pa 'di dbang po gzugs can las skyes pa zhig gam/ 'on te yid las byung ba zhig ces shes pa re ba dang bcas pa yid du 'gyur la/ rten gyis bstan na ni yid kyi rnam par shes pa mig la sogs pa'i rnam par shes pa'i yul la 'jug pa yin yang phan tshun dbye ba grub par 'gyur ro//'dir ni tshad ma'i mtshan nyid brjod par 'dod pas rtog pa dang bral ba tsam zhig mngon sum nyid du khas blangs pas rnam par rtog pa las 'di khyad par du mngon par 'dod pa'i phyir/ thun mong ma yin pa'i rgyus bstan pa la dgos pa cung zad kyang ma mthong ngo //tshad ma'i grangs su 'jug pa gzhal bya'i gzhan gyi dbang yin pa'i phyir dang / gzhal bya'i rnam pa'i rjes su byed pa tsam gyis rang gi ngo bo yod par rnyed pa'i tshad ma dag gi rang gi ngo bo rnam par 'jog pa'i phyir dbang pos bstan pa cung zad kyang mi mkho bas rnam pa thams cad du yul kho nas bstan par rigs so//gal te 'jig rten na brjod par 'dod pa'i don la mngon sum gyi sgra rab tu grags pa'i phyir dang / don so so zhes bya ba'i sgra ma grags pa'i phyir rten kho nas bye brag tu bshad pa la rten par byed do zhe na/ bshad par bya ste/ mngon sum gyi sgra 'di 'jig rten la grags pa ni yod mod kyi/ de ji ltar 'jig rten na yin pa de ltar ni kho bo cag gis smras pa nyid do/ /'jig rten pa'i don ji ltar gnas pa spangs nas de bye brag tu 'chad par byed na ni/ rab tu grags pa'i sgra yang spong bar 'gyur ro/ /de'i phyir mngon sum zhes bya ba de ltar mi 'gyur ro//zlos pa'i don med pa'i phyir dbang po'i skad cig gcig gi rten can mig gi rnam par shes pa gcig mngon sum nyid du yang mi 'gyur la/ re re la mngon sum nyid med na ni mang po rnams la yang mi 'gyur ro/ /rtog pa dang bral ba'i shes pa nyid mngon sum nyid du khas blangs pa'i phyir dang /des kyang 'jig rten pa'i tha snyad byed pa med pa'i phyir dang / 'jig rten pa'i tshad ma dang gzhal bya'i tha snyad bshad par 'dod pa'i phyir na mngon sum tshad mar rtog pa ni don med pa nyid du 'gyur ro/ /mig gi rnam par shes pa dang ldan pas sngon po shes kyi sngon po'o snyam du ni ma yin no zhes bya ba'i lung yang mngon sum gyi mtshan nyid brjod pa'i don can gyi skabs ma yin pa nyid kyi phyir dang /dbang po'i rnam par shes pa lnga po rnams blun pa nyid du ston par byed pa nyid yin pa'i phyir/ lung las kyang rtog pa dang bral ba'i rnam par shes pa kho na mngon sum nyid ma yin pas 'di ni mi rigs so//de'i phyir gal te mtshan gzhi'am rang gi mtshan nyid dam spyi'i mtshan nyid kyang rung ste/ 'jig rten na yod na ni thams cad mngon sum du dmigs par bya ba yin pa'i phyir na lkog tu ma gyur pa yin te/ de'i phyir de'i yul can gyi rnam par shes pa dang lhan cig tu mngon sum nyid du rnam par gzhag go/ /zla ba gnyis la sogs pa dag ni rab rib can ma yin pa'i shes pa la ltos nas mngon sum nyid ma yin la/ rab rib can la sogs pa la ltos nas ni mngon sum nyid kho na'o/ / lkog tu gyur pa'i yul can rtags bsgrub par bya ba la mi 'khrul ba las skyes pa'i shes pa ni rjes su dpag pa'o/ /dbang po las 'das pa'i don mngon sum du rig cing yid ches par gyur pa dag gi tshig gang yin pa de ni lung ngo / /'dra ba las nyams su myong ba'i don rtogs pa ni nye bar 'jal ba ste/dper na ba min ni ba lang dang 'dra'o snyam pa lta bu'o/ /de'i phyir de ltar tshad ma bzhi las 'jig rten gyi don rtogs par rnam par 'jog pa yin no/ /de dag kyang phan tshun ltos pas 'grub par 'gyur te/ tshad ma dag yod na gzhal bya'i don dag tu 'gyur la/ gzhal bya'i don dag yod na tshad ma dag tu 'gyur gyi/tshad ma dang gzhal bya gnyis ngo bo nyid kyis grub pa ni yod pa ma yin no/ /de'i phyir mthong ba ji lta ba bzhin du 'jig rten pa nyid yin la rag ste/ spros pas chog go/ dkyus ma nyid bshad par bya'o/ /'dir rang gi sde pa dag na re/ gang 'di 'di skad du dngos po rnams bdag las skye ba ma yin te/ zhes smras pa de ni rigs te/ rang las skye ba don med pa'i phyir ro/ /gang yang gnyi ga la skye ba ma yin te zhes smras pa de yang rigs te/ yan lag gcig ma tshang ba'i phyir ro/ /rgyu med pa'i phyogs ni shin tu tha chad yin pa'i phyir/de dgag pa yang rigs na/ gang 'di skad du gzhan las skye ba yang ma yin te zhes smras pa de ni rigs pa ma yin te/ gang gi phyir bcom ldan 'das kyis gzhan du gyur pa dag kho na dngos po rnams kyi skyed par byed par bstan pa'i phyir te/ rkyen rnam bzhi ste rgyu dang ni/ /dmigs pa dang ni de ma thag/ bdag po yang ni de bzhin te/ /rkyen lnga pa ni yod ma yin/ /de la sgrub par byed pa ni rgyu yin no zhes bya ba'i mtshan nyid las na gang zhig gang gi sgrub byed sa bon gyi ngo bor gnas pa de ni de'i rgyu'i rkyen no/ /dmigs pa gang gis skye bar 'gyur ba'i chos can bskyed pa de ni de'i dmigs pa'i rkyen no//rgyu 'gags ma thag pa ni 'bras bu 'byung ba'i rkyen yin te/ dper na sa bon 'gags ma thag pa myu gu 'byung ba'i rkyen yin pa bzhin no/ /gang zhig yod pas gang 'byung ba de ni de'i bdag po'o/ /'di dag ni rkyen bzhi'o//gzhan gang dag sngar skyes pa dang lhan cig skyes pa dang / phyis skye ba la sogs pa de dag ni 'di rnams kyi khongs su 'dus pa yin no/ /dbang phyug la sogs pa dag ni rkyen ma yin te/ de nyid kyi phyir/ rkyen lnga pa ni yod ma yin/ /zhes nges par gzung ba yin no//de'i phyir gzhan du gyur pa 'di dag las dngos po rnams skye ba'i phyir gzhan las skye ba yod pa yin no zhes mdzer to/ /de la bshad par bya ste/ dngos po rnams ni rkyen gzhan du gyur pa dag las skye ba ma yin pa nyid de/ 'di ltar/ dngos po rnams kyi rang bzhin ni/ / rkyen la sogs la yod ma yin/ /bdag gi dngos po min na/ /gzhan dngos yod pa ma yin no/ /gal te 'bras bur gyur pa'i dngos po rnams rgyu la sogs pa'i rkyen gzhan du gyur pa 'dus pa'am so so ba'am 'dus pa dang so so ba dag gam/ rgyu dang rkyen gyi tshogs pa las gzhan 'ga' zhig la yang rung ste/skyes pa'i snga rol du yod par gyur na ni/ de dag las skye bar 'gyur ba zhig na/ gang zhig skye ba'i snga rol du yod par 'gyur ba de ltar yang ma yin te/ gal te yod par gyur na ni/ gzung du yod pa'am skye ba don med par 'gyur ro/ /de'i phyir dngos po rnams kyi rang bzhin ni rkyen la sogs pa dag la yod pa ma yin no//bdag gi dngos po yod pa ma yin pa nyid yin na gzhan gyi dngos po yod pa ma yin no/ /'byung bas na dngos po ste skye ba'o/ /gzhan gyi dngos po ni gzhan dag las skye ba ste de yod pa ma yin no/ /de'i phyir dngos po rnams gzhan du gyur pa dag las skye bo zhes bya ba 'di rigs pa ma yin no//rnam pa gcig tu na rgyu med pa can du thal bar 'gyur ba'i phyir myu gu la sogs pa 'bras bur gyur pa'i dngos po rnams kyi rang bzhin ni/ sa bon la sogs pa rkyen rnam par 'gyur ba med pa'i rang bzhin can dag yod pa na yod pa ma yin no//de'i phyir rkyen la sogs pa rnams ci la ltos nas gzhan nyid du 'gyur te/ byams pa dang nyer sbas dag ni yod pa gnyis kho na phan tshun ltos pa'i gzhan nyid du 'gyur na/ sa bon dang myu gu gnyis ni de ltar cig car ba ma yin no/ /de'i phyir 'bras bu rnams kyi bdag gi dngos po yod pa ma yin na/sa bon la sogs pa rnams la gzhan gyi dngos po ste gzhan nyid yod pa ma yin no/ /de'i phyir gzhan du bsnyad du med pa kho na'i phyir gzhan las skye ba ma yin pas dngos po rnams gzhan las skye'i zhes bya ba 'di ni mi rung ngo / /de'i phyir gzhan gyi lung gi dgongs pa mngon par ma shes pa nyid de/de bzhin gshegs pa dag ni rigs pa dang 'gal ba'i ngag mi gsung la/ lung gi dgongs pa yang gong du nye bar bstan zin to/ /de'i phyir de ltar rkyen dag las skye bar smra ba bkag pa yin dang / bya ba las skye bar smra ba ni/ mig dang gzugs la sogs pa'i rkyen dag ni dngos su rnam par shes pa skyed par mi byed kyi/rnam par shes pa skye ba'i bya ba sgrub par byed pa'i phyir rkyen zhes bya la/ bya ba des kyang rnam par shes pa skyed par byed de/ de'i phyir rnam par shes pa skye ba'i bya ba rkyen dang ldan pa ni rnam par shes pa skyed par byed pa yin gyi rkyen dag ni ma yin te/dper na/ 'bras chan gyi 'tshed pa'i bya ba bzhin no snyam du sems so/ /bshad pa/ bya ba rkyen dang ldan pa med/ /gal te bya ba 'ga' zhig yod par gyur na ni/ de mig la sogs pa'i rkyen dag gis rkyen dang ldan pas rnam par shes pa skyed par byed pa zhig na/yod pa ni ma yin no/ /ji ltar zhe na/ 'dir bya ba 'di 'dod pa na rnam par shes pa skyes zin pa la 'dod dam/ ma skyes pa la'am skye bzhin pa la yin grang na/ de la skyes zin pa la mi rigs te/ bya ba ni dngos po sgrub par byed pa yin na/ dngos po grub par gyur na ni de la bya bas ci zhig dgos te/ 'di ni skyes par gyur pa slar yang skye bar 'gyur ba rigs pa ma yin nyid/ /ces bya ba la sogs pa dbu ma la 'jug pa las bstan pa yin no/ /ma skyes pa la yang mi rigs te/ skye ba 'di ni byed pa med par rigs pa'i ngo bo 'ang min//zhes bya ba la sogs pa 'byung ba'i phyir ro/ /dngos po skye bzhin pa la yang bya ba srid pa ma yin te/ skyes pa dang ma skyes pa las ma gtogs pa'i skye bzhin pa med pa'i phyir ro/ /ji skad du/ skye bzhin pa ni phyed skyed phyir/ /skye bzhin pa ni skye ba min/ /yang na thams cad skye bzhin pa//nyid ni yin par thal bar 'gyur/ /zhes gsungs so/ /gang gi phyir/ de ltar dus gsum du skye ba'i bya ba mi srid pa de'i phyir de ni yod pa yang ma yin no/ /de nyid kyi phyir/ bya ba rkyen dang ldan pa med/ /ces gsungs te/ mo gsham gyi bu ba lang dang ldan no zhes ni brjod par bya ba ma yin no//'di ni khyad par med par khyad par can yod min/ /zhes bya ba la sogs pa dbu ma la 'jug pa las bstan pa nyid do/ /gal te de lta na/ 'o na rkyen dang mi ldan par 'gyur ro zhe na/ 'di yang rigs pa ma yin no zhes bshad pa ni/ rkyen dang mi ldan bya ba med/ /gang gi tshe bya ba rkyen dang ldan pa med pa de'i tshe ji ltar rkyen dang mi ldan pa rgyu med pa yod par 'gyur te/snam bu snal ma'i rang bzhin du mi rigs pas/ 'jag ma'i rang bzhin du khas len pa ni ma yin no/ /de'i phyir bya ba dngos po'i skyed par byed pa ma yin no/ /'dir smras pa/ gal te de ltar bya ba med na/ 'o na ni rkyen dag dngos po rnams kyi skyed par byed par 'gyur ro//bshad par bya ste/ bya ba mi ldan rkyen ma yin/ gang gi tshe bya ba med pa de'i tshe/ rkyen bya ba dang bral ba dang bya ba dang mi ldan pa rgyu med pa rnams ji ltar skyed par byed pa yin/ ji ste bya ba dang ldan pa dag kho na skyed par byed pa yin no zhe na/ bshad pa/ bya ba ldan yod 'on te na/ /ma yin no zhes skabs dang sbyar ro/ /'on te na'i sgra ni nges par gzung ba'o/ /de la bya ba med par bshad na/ rkyen rnams ji ltar bya ba dang ldan pa nyid yin na ji ltar rnam par shes pa'i skye ba'i bya ba la brjod pa de bzhin du 'tshod pa'i bya ba la sogs pa'i dngos po dag la yang brjod par rig par bya'o//des na bya ba las kyang dngos po rnams skye ba med pas skye ba'i rjod par byed pa don gyis stong par 'gyur ro/ /'dir smras pa/ rkyen bya ba dang ldan no zhes bya ba la sogs pa'i rnam par dpyad pa 'dis kho bo cag la ci dgos/ gang gi phyir mig la sogs pa'i rkyen dag la brten nas dngos po rnam par shes pa la sogs pa rnams skye bar 'gyur te/de'i phyir mig la sogs pa rnams rkyen nyid yin zhing / rnam par shes pa la sogs pa rnams kyang de dag las skye ba yin no/ /'di yang rigs pa ma yin no zhes bshad pa/ 'di dag la brten skye bas na//de phyir 'di dag rkyen ces grag /ji srid mi skye de srid du/ /'di dag rkyen min ji ltar min/ /gal te mig la sogs pa'i rkyen rnams la brten nas rnam par shes pa skye bas na 'di dag de'i rkyen zhes brjod na ni/ ji srid rnam par shes pa zhes bya ba'i 'bras bu de mi skye ba de srid du/ mig la sogs pa 'di dag rkyen ma yin pa ji ltar ma yin te/ rkyen ma yin pa nyid do snyam du dgongs pa'o/ /bye ma dag las til mar bzhin du rkyen ma yin pa dag las ni skye ba yang ma yin no/ /ci ste sngar rkyen ma yin par gyur pa las rkyen gzhan ci zhig cig la ltos nas rkyen nyid du 'gyur ro zhes bya bar 'dod na/'di yang mi rung ste/ gang zhig rkyen ma yin pa 'di'i rkyen nyid du rtog pa/ rkyen gzhan de'i rkyen nyid de yang rkyen yod na yin pas 'di la yang dpyad pa de nyid yin no/ /de'i phyir de ni mi rigs so/ /gzhan yang mig la sogs pa 'di dag rnam par shes pa'i rkyen du rtog pa na/'di yod pa'am med pa zhig la rtog grang na/ rnam pa thams cad du mi rigs so zhes bya bar bshad pa/ med dam yod pa'i don la yang / /rkyen ni rung ba ma yin te/ /de ci'i phyir zhe na/ bshad pa/ med na gang gi rkyen du 'gyur/ yod na rkyen gyis ci zhig bya/ med pa ste/ yod pa ma yin pa'i don la ni rkyen du ji ltar 'gyur/ gal te 'byung bar 'gyur bas ston par 'gyur ro zhe na/ de ltar ni ma yin te/ gal te 'byung bar 'gyur bas bsnyad 'dod na/ nus pa med par 'di yi 'byung 'gyur ni/ /yod min ces bya ba la sogs pas nyes pa brjod pa'i phyir ro//yod na ste bdog pa skye ba thob zin pa la yang rkyen yongs su brtag pas 'bras bu med pa nyid do/ /de ltar rkyen 'dus pa rnams 'bras bu skyed par nus pa med pas rkyen nyid ma yin par bsnyad nas/ de'i 'og tu so so ba rnams rkyen nyid ma yin par bstan par bya'o/ / 'dir smras pa/ gal te de ltar rkyen rnams mi srid mod kyi/ de lta na yang mtshan nyid nye bar bstan pa las rkyen grub pa yod pa nyid do/ /de la sgrub par byed pa ni rgyu'o zhes rgyu'i rkyen gyi mtshan nyid brjod de yod pa ma yin pa mo gsham gyi bu la ni mtshan nyid nye bar ston pa la mi brjod do/ / gal te de'i mtshan nyid yod par gyur na ni/ rgyu'i rkyen du 'gyur ba zhig na/ yod pa ni ma yin te/ gang gi phyir/ gang tshe chos ni yod pa dang / /med dang yod med mi 'grub pa/ /ji ltar sgrub byed rgyu zhes bya/ /de lta yin na mi rigs so/ /de la sgrub par byed pa ni skyed par byed pa ste/ gal te bsgrub par bya ba'i chos 'grub na ni/skyed par byed pa'i rgyus de bskyed par 'gyur na/ 'grub pa yang ma yin te/ yod pa dang med pa dang gnyi ga la ngo bo 'grub pa med pa'i phyir ro/ /de la yod pa ni 'grub pa ma yin te yod pa'i phyir ro/ /med pa yang ma yin te yod pa ma yin pa'i phyir ro/ /yod pa dang med pa yang ma yin te/phan tshun 'gal ba'i don gcig med pa'i phyir dang / phyogs gnyi ga la brjod pa'i skyon du 'gyur ba'i phyir ro/ /gang gi phyir de ltar 'bras bu skye ba med pa de'i phyir rgyu'i rkyen yang yod pa ma yin no/ /de'i phyir mtshan nyid yod pa'i phyir rgyu'i rkyen yod pa yin no zhes smras pa gang yin pa ste/de lta yin na mi rigs so/ /da ni dmigs pa'i rkyen dgag pa'i phyir/ yod pa'i chos 'di dmigs pa ni/ /med pa kho na nye bar bstan/ /ci ste chos ni dmigs med na/ /dmigs pa yod par ga la 'gyur/ /zhes gsungs so/ /'dir dmigs pa dang bcas pa'i chos gang dag ce na/sems dang sems las byung ba thams cad do/ /zhes bya ba'i lung las na / sems dang sems las byung ba rnams gzugs la sogs pa'i dmigs pa gang gis ci rigs par skyed par byed pa de ni de dag gi dmigs pa'i rkyen yin pa na/ yod pa dag la brtag gam/med pa dag la yin grang / de la yod pa dag la ni dmigs pa'i rkyen de don med de/ chos bskyed par bya ba'i phyir dmigs pa yongs su rtog par byed na/ de ni dmigs pa'i snga rol du yod pa nyid kyi phyir ro/ /ci ste de ltar chos rang gi bdag nyid dmigs pa med par rab tu grub na/'di ni dmigs pa dang ldan par brtags pas ci zhig bya/ de'i phyir yod pa bdog pa'i chos sems la sogs pa 'di dmigs pa med pa kho na khyed cag gis rang 'dod kyi dmigs pa dang bcas pa yin no zhes nye bar bstan pa 'ba' zhig tu zad kyi/ 'di la dmigs pa dang 'brel ba cung zhig yod pa ni ma yin no//ci ste med pa la dmigs pa yongs su rtog par byed na/ de yang rigs pa ma yin te/ chos 'di dmigs pa med par ni/ /yin pa kho nar nye bar bstan/ /zhes bya ba la sogs pa la/ 'di ltar yod pa ma yin pa la ni dmigs pa dang 'brel ba yod pa ma yin no//chos 'di dmigs pa med pa ni/ yin pa ste gyur pa kho nar khyod kyis nye bar bstan te/ dmigs pa dang bcas par zhes bya ba ni tshig gi lhag ma'o/ /ci ste chos ni dmigs med na/ /dmigs pa yod par ga la 'gyur/ /zhes bya ba la/ ci ste'i sgra ni dri ba'o//ga la 'gyur zhes bya ba ni gtan tshigs so/ /des na don ni/ ci ste de ltar chos yod pa ma yin zhing mi bdog pa ni dmigs pa med na/ yang dmigs pa yod par ga la 'gyur zhes bya ba 'dir 'gyur te/ dmigs par byed pa med pa'i phyir dmigs pa yang med do zhes bya bar dgongs pa'o//ji ltar sems dang sems las byung ba rnams dmigs pa dang bcas par 'gyur zhe na/ mtshan nyid 'di ni kun rdzob pa yin gyi/ don dam pa ni ma yin pas nyes pa med do/ /da ni mtshungs pa de ma thag pa'i rkyen dgag pa'i phyir/ chos rnams skyes pa ma yin na//'gag pa 'thad par mi 'gyur ro/ /de phyir de ma thag mi rigs/ /'gags na rkyen yang gang zhig yin/ /zhes bya ba gsungs te/ de la tshigs su bcad pa phyed phyi ma'i rkang pa go bsnor bar blta bar bya'o/ /yang gi sgra ni 'gags na yang zhes rim pa bzhin du sbyar ro//des na 'di skad du/ 'gags na rkyen yang gang zhig yin/ /de'i phyir de ma thag mi rigs/ /zhes 'don par 'gyur te/ de skad du gsungs pa ni tshigs su bcad pa sdeb pa'i phyir yin no/ /de la rgyu 'gag ma thag pa 'bras bu skye ba'i rkyen du 'gyur ba ni mtshungs pa de ma thag pa'i rkyen gyi mtshan nyid yin te/'di la dpyad par bya'o/ /myu gu la sogs pa 'bras bur gyur pa'i chos rnams skyes pa ma yin na/ rgyu sa bon la sogs pa'i 'gag pa 'thad par mi 'gyur ro/ /gang gi tshe 'di de lta yin pa de'i tshe rgyu 'gag pa med pa'i phyir/myu gu'i mtshungs pa de ma thag pa'i rkyen gang zhig yin par 'gyur/ ci ste 'bras bu ma skyes par yang sa bon 'gag par 'dod na ni/ de lta na sa bon 'gags na ste med par gyur na/ myu gu'i rkyen yang gang zhig yin la/ sa bon 'gag pa'i rkyen yang gang zhig yin te/'di gnyi ga rgyu med par 'gyur ro zhes 'chad pa ni/ 'gags na rkyen yang gang zhig yin/ /zhes bya ba'o / /yang gi sgra ni skye ba med pa la ltos pa ste/ des na myu gu ma skyes par sa bon 'gag par 'dod na yang gnyi ga rgyu med pa can du 'gyur te/ de'i phyir de ma thag mi rigs//zhes bya'o/ /yang na/ bdag las ma yin gzhan las min/ /zhes bya ba la sogs pas skye ba bkag pa yin la/ skye ba bkag pa de la dgongs nas/ chos rnams skyes pa ma yin na/ /'gag pa 'thad par mi 'gyur ro/ /de phyir de ma thag mi rigs/ / zhes gsungs so/ /gzhan yang / 'gags na rkyen yang gang zhig yin te/ 'di la bshad pa ni snga ma nyid sbyar bar bya'o/ /da ni bdag po'i rkyen bsal bar bzhed nas bshad pa/ sa bon la sogs pa/ dngos po rang bzhin med rnams kyi/ /yod pa gang phyir yod min na//'di yod pas na 'di 'byung zhes/ /bya ba 'di ni 'thad ma yin/ /'dir gang zhig yod pas gang 'byung ba de ni de'i bdag po yin no zhes bya ba ni bdag po'i rkyen gyi mtshan nyid yin na/ dngos po rnams ni rten cing 'brel par 'byung ba'i phyir/ rang bzhin med pa na gang zhig 'di zhes rgyu nyid du bsnyad pa de ga la yod cing /gang yang 'di zhes 'bras bu nyid du ston pa de ga la yod/ de'i phyir mtshan nyid las kyang rkyen grub pa yod pa ma yin no/ /'dir smras pa/ snal ma la sogs pa dag las snam bu la sogs pa skye bar dmigs nas/ snal ma sogs pa dag snam bu la sogs pa'i rkyen yin no/ /bshad par bya ste/snam bu la sogs pa 'bras bu 'byung ba nyid yod pa ma yin na/ rkyen rnams kyi rkyen nyid lta 'grub par ga la 'gyur/ ji ltar snam bu la sogs pa 'bras bu 'byung ba med pa de ltar bstan pa'i phyir/ rkyen rnams so so 'dus pa las / /'bras bu de ni med pa nyid/ /rkyen rnams la ni gang med pa//de ni rkyen las ji ltar skye/ /zhes gsungs so/ /de la snal ma dang tshig pa dang thag zangs dang / son shing la sogs pa so so ba dag la snam bu so sor yod pa ma yin te/ de dag la ma dmigs pa'i phyir dang / rgyu mang pos 'bras bu mang por thal bar 'gyur ba'i phyir ro//snal ma la sogs pa 'dus pa dag la yang snam bu yod pa ma yin te/ yan lag re re ba dag la med pa'i phyir dang / 'bras bu gcig dum bu skye bar thal bar 'gyur ba'i phyir ro/ /de'i phyir 'bras bu med pas rkyen dag med do/ /ci ste de ni med par yang / /rkyen de dag las skye 'gyur na// zhes bya bar bsams par gyur na ni/ rkyen ma yin pa dag la yang / /'bras bu yod pa ma yin pas/ /rkyen ma yin pa 'jag ma dag las kyang snam bu ci'i phyir na skye bar mi 'gyur/ de'i phyir 'bras bu 'byung ba med do/ /'dir smras pa/ gal te 'bras bu gzhan zhig yin zhing rkyen yang gzhan yin par 'gyur na ni/de'i tshe ci rkyen dag la 'bras bu yod dam med ces bya bar bsams par gyur na/ 'bras bu tha dad pa ni med do/ /'o na ci zhe na/ rkyen gyi rang bzhin kho na yin no/ /bshad par bya ste/ 'bras bu rkyen gyi rang bzhin ni //rkyen rnams bdag gi rang bzhin min/ /bdag dngos min las 'bras bu gang / /de ni de ltar rkyen rang bzhin/ /gal te 'bras bu rkyen gyi rang bzhin rkyen gyi rnam par 'gyur ba yin no zhes rnam par 'jog na ni/ de mi rigs te/ gang gi phyir rkyen rnams kyang bdag gi rang bzhin ma yin te/rkyen ma yin pa'i ngo bo zhes bya ba'i don to/ / snam bu ni snal ma'i rang bzhin can no zhes bya bar brjod na ni/ gal te snal ma dag rang gi ngo bor grub par gyur na/ snam bur 'gyur na/ de dag ni cha shas kyi rang bzhin gyi rnam par 'gyur ba yin gyi/rang bzhin gyis grub pa ni yod pa ma yin no/ /de'i phyir bdag nyid kyi rang bzhin ma yin pa de dag la snam bu zhes bya ba'i 'bras bu gang yin pa de ltar snal ma'i rang bzhin du 'gyur/ ji skad du/ snam bu rgyu las 'grub 'gyur zhing / /rgyu yang gzhan las 'grub 'gyur bas/ / gang zhig rang gi 'grub med pa/ /des gzhan bskyed par ji ltar 'gyur/ /zhes bshad do/ /de phyir rkyen gyi rang bzhin min/ /de'i phyir rkyen gyi rang bzhin gyi 'bras bu ni yod pa ma yin no/ /'o na rkyen ma yin pa'i rang bzhin du 'gyur ro zhe na/ rkyen min rang bzhin 'bras bu ni/ /yod min te/gang gi tshe snam bu snal ma'i rang bzhin du yang med pa de'i tshe 'gal ba 'jag ma'i rang bzhin du ji ltar 'gyur/ 'dir smras pa/ 'bras bu med du zad mod/ rkyen dang rkyen ma yin pa'i nges pa ni yod pa yin te/ de ltar yang khyod kyis gal te 'bras bu med pa yang rkyen dag las skye na/ rkyen ma yin pa dag las kyang ci'i phyir skye ba ma yin zhes smras la/ snam bu dang re lde zhes bya ba'i 'bras bu med na ni snal ma dang 'jag ma dag rkyen dang rkyen ma yin pa nyid du yang mi rigs te/ des na 'bras bu yang yod pa yin no/ /bshad par bya ste/ gal te 'bras bu yod par gyur na ni/ rkyen dang rkyen ma yin pa dag tu 'gyur ro/ /'di ltar 'bras bu yod na ni 'di dag ni 'di'i rkyen yin no/ /'di dag ni 'di'i rkyen ma yin no zhes bya bar 'gyur na/ de yang rnam par dpyad pa na med pa nyid de/ de'i phyir 'bras bu med pas na/ /rkyen min rkyen du ga la 'gyur te/ rkyen dang rkyen ma yin par zhes tshig bsdu'o//de'i phyir dngos po rnams skye ba yod pa ma yin no/ /ji skad du 'phags pa dkon mchog 'byung gnas kyi mdo las/ gang na'ang stong pa rig pa med pa na / /nam mkha' bar snang bya yi rjes dang mtshungs/ /gang na'ang ngo bo nyid 'ga' yod min pa/ /de ni nam yang gzhan gyi rgyur mi 'gyur//gang gi ngo bo nyid ni mi rnyed pa/ /rang bzhin med de ji ltar gzhan gyi rkyen/ /rang bzhin med pa gzhan gyis ci zhig bskyed/ /rgyu de bde bar gshegs pas bstan pa'o/ /thams cad chos kyang mi g.yo brtan par gnas/ /mi 'gyur 'tshe ba med cing zhi ba ste//ji ltar nam mkha' shes pa med pa bzhin/ /de la mi shes 'gro ba rmongs par 'gyur/ /ji ltar ri bo dag ni mi sgul ba/ /de bzhin chos rnams rtag tu bskyod mi nus/ /'chi 'pho med cing skye ba med pa yi/ /chos rnams de ltar rgyal bas rab tu bstan/ /zhes bya ba la sogs pa dang /de bzhin du/ chos gang skye ba med cing 'byung ba med/ /'chi 'pho med cing rga bar mi 'gyur ba/ /mi yi seng ge yis ni der ston zhing / /sems can brgya phrag dag ni de la bkod/ /gang la ngo bo nyid ni gang yang med/ /gzhan yang ma yin sus kyang mi rnyed pa//nang na ma yin phyi rol dag na yang / /mi rnyed de dag la ni mgon pos bkod/ /bde bar gshegs pas zhi ba'i 'gro gsungs kyang / /'gro ba gang yang rnyed par mi 'gyur te/ /de dag 'gro las grol bar rnam par gsungs/ /grol nas sems can mang po grol bar mdzad//ces gsungs pa lta bu'o/ /slob dpon zla ba grags pa'i zhal snga nas sbyar ba'i tshig gsal ba las/ rkyen brtag pa zhes bya ba rab tu byed pa dang po'i 'grel pa'o// //'dir smras pa/ gal te yang skye ba bkag pa las rten cing 'brel par 'byung ba'i khyad par 'gag pa med pa la sogs pa grub mod kyi/de ltar na yang rten cing 'brel bar 'byung ba 'gro ba med pa dang 'ong ba med pa grub par bya ba'i phyir/ 'gro ba dang 'ong ba'i bya ba dgag par bya ba'i ched du/ rab tu grags pa'i 'thad pa gzhan cung zad brjod par bya dgos so/ / brjod par bya ste/ gal te 'gro ba zhes bya ba nges pa zhig yod na de song ba'i lam gyi rnam pa'am/ ma song ba'am bgom pa zhig la brtag grang na/ rnam pa thams cad du rigs pa ma yin no zhes bshad pa/ re zhig song la mi 'gro ste/ /ma song ba la'ang 'gro ba med//song dang ma song ma gtogs par/ /bgom pa shes par mi 'gyur ro/ /de la lam gyi rnam par 'gro ba'i bya ba 'gags pa la ni song ba zhes bya'o/ /'gro ba'i bya ba ma skyes pa la ni ma song zhes bya la/ da ltar ba 'gro ba'i bya bas zin pa la ni sgom pa zhes brjod do/ /de la song ba 'gro ba'i bya ba 'gags pa gang yin pa de ni sgom pa zhes bya ba'i sgra 'gro ba'i bya ba da ltar ba dang 'brel ba brjod pa 'dis brjod na 'brel ba med pa de'i phyir na re zhig song ba la 'gro'o zhes bya ba ni mi rigs so//re zhig gi sgras ni dgag pa'i rim pa ston pa'o/ /ma song ba la yang 'gro ba ma yin te/ma song ba ni 'gro ba'i bya ba ma skyes pa ma 'ongs pa la brjod la/ 'gro ba zhes bya ba ni da ltar byung ba yin te/ de'i phyir ma 'ongs pa dang / da ltar byung ba gnyis shin tu tha dad pas/ ma song ba la yang 'gro ba zhes bya ba mi rigs te/ gal te ma song ba yin na ni ji ltar 'gro ba yin la/'on te 'gro na ni de ji ltar ma song ba yin/ bgom pa la yang 'gro ba med de/ gang gi phyir/ song dang ma song ma gtogs par/ /bgom pa shes par mi 'gyur ro/ /'di na 'gro ba pos yul gang brgal bar gyur pa de ni/ de'i song ba'i yul yin la/ gang brgal bar ma gyur pa de ni de'i ma song ba yin na/ song ba dang ma song ba las tha dad par bgom pa zhes bya ba lam gyi rnam pa gzhan gsum pa ni ma mthong ngo / /gang gi phyir de ltar bgom pa shes par mi 'gyur te / shes par mi 'gyur ba dang rtogs par mi 'gyur ba de'i phyir bgom pa yod pa ma yin no//de'i phyir de 'gro ba'i bya bas zin pa ma yin zhing 'gro ba ma yin pas bgom pa la yang 'gro ba med do/ /ci ste 'gro bzhin pa'i 'gro ba po'i rkang pas mnan pa'i phyogs gang yin pa de ni bgom pa'ang yin par 'gyur ro snyam na/ de ltar ma yin te/rkang pa yang rdul phra rab 'dus pa yin pa'i phyir sor mo'i rtse mo la gnas pa'i rdul phra rab kyi rgyab kyi phyogs gang yin pa de ni de'i song ba'i khongs su gtogs pa yin zhing / rkang pa'i rdul phra rab rting par gnas pa'i mdun gyi phyogs gang yin pa de ni de'i ma song ba'i khongs su gtogs pa yin zhing /rdul phra rab las ma gtogs pa'i rkang pa yang yod pa ma yin te/ de'i phyir song ba dang ma song ba las tha dad par bgom pa yod pa ma yin no/ /de ltar rkang pa la ji ltar rnam par dpyad par byas pa de bzhin du/ rdul phra rab rnams la yang shar nub kyi phyogs kyi cha dang 'brel ba'i sgo nas rnam par dpyad par bya'o//de'i phyir de ma thag tu skye bzhin pa'i rnam par dpyad pas phyed song bar gyur pa'i bgom pa rigs pa ma yin no/ /de'i phyir bgom pa la 'gro ba ma yin no zhes bya bar grub bo/ /'dir smras pa/ bgom pa la ni 'gro ba yod pa nyid de 'di na/gang na g.yo ba de na 'gro/ /de yang gang phyir bgom pa la/ /g.yo ba song min ma song min/ /de phyir bgom la 'gro ba yod/ /de la g.yo ba ni rkang pa 'degs pa dang 'jog pa'i mtshan nyid can no/ /gang gi phyir 'gro bzhin pa'i 'gro ba po'i g.yo ba yul gang na yod pa'i yul de nyid na 'gro ba yod pa yin la/g.yo ba de yang song ba'i lam la yod pa ma yin zhing / ma song ba la yang ma yin te/ 'on kyang bgom pa kho na la yod pa yin no/ /de'i phyir bgom pa kho na la 'gro ba yod pa yin te/ gang zhig tu 'gro ba dmigs pa de ni bgom pa yin la/de yang bya bas zin pa yin no/ /de'i phyir bgom pa kho na la 'gro ba yod do/ /'dir 'gro ba gcig ni shes pa'i don yin la/ gzhan ni yul gzhan du phyin pa'i don yin no zhes bya ba'o/ /de ltar brtags kyang bgom pa la 'gro ba med do zhes bya bar bshad pa/bgom la 'gro ba yin par ni/ /ji lta bur na 'thad par 'gyur/ /gang tshe 'gro ba med pa yi/ /bgom pa 'thad pa med phyir ro/ /'dir khyod 'gro ba'i bya ba dang ldan pa nyid las bgom par brjod par 'dod cing / de la yang 'gro'o zhes smra na/'dir 'gro ba'i bya ba ni gcig yin pas/ des lam bgom pa brjod par 'gyur mod/ 'gro'o zhes yang bgom par bya ba dang 'brel bar ni mi rigs te de'i phyir/ bgom la 'gro ba yin par ni/ /ji lta bur ni 'thad par 'gyur/ /zhes bya'o//gtan tshigs bshad pa/ gang tshe 'gro ba med pa yi/ /bgom pa 'thad pa med phyir ro/ /'gro ba med pa ni 'gro ba dang bral ba'o/ /bgom pa zhes bya ba ni 'gro bzhin pa zhes bya ba'i don to/ /dgos pa ni gang gi tshe 'gro ba'i bya ba gcig ni bgom pa zhes bya ba der nye bar mkho ba'i phyir dang /gnyis pa med pa'i phyir la 'gro'o zhes bya ba'i brjod pa 'di yang 'gro ba med par mi 'thad pa de'i tshe bgom pa la 'gro'o zhes bya ba la ngag gi don yongs su rdzogs pa yod pa ma yin no zhes bya ba ste/ bya ba gnyis pa med pa'i phyir bgom pa zhes bya ba 'di tsam zhig srid kyi/'gro'o zhes bya ba ni ma yin no/ /ci ste 'gro'o zhes bya ba de nyid dang / 'gro ba'i bya ba 'brel bar 'dod na/ de lta yin na bgom pa'i brjod pa la bya ba dang 'brel ba med pas/ ngag gi don yongs su rdzogs pa nyid ma yin no zhes bshad pa/ gang gi bgom pa la 'gro ba/ / de yi bgom la 'gro med par/ /thal bar 'gyur te/ gang gi phyir bgom la 'gro ba yin phyir ro/ /rgol ba gang gi bgom pa la 'gro'o zhes bya ba'i phyogs yin zhing / gang zhig bgom pa'i ming can du gyur pa 'gro ba'i bya bas stong pa la 'gro ba'i bya ba brten par gyur par 'dod pa de'i phyogs la bgom pa la 'gro ba med par thal bar 'gyur te/de'i bgom pa 'gro ba dang bral bar 'gyur ro/ /'di ltar 'di'i bgom pa la 'gro ba yin pa'i phyir ro/ /gang gi phyir gyi sgra ni 'di ltar gyi don no/ /'di ltar rgol ba de'i ltar na ni 'gro'o zhes bya ba der bya ba nye bar mkho ba'i phyir 'gro ba dang bral ba'i bgom pa kho na la 'gro ba yin te/de'i phyir bgom pa la 'gro ba dang bral bar thal bar 'gyur ro/ /ci ste bgom pa dang 'gro'o zhes bya ba gnyi ga yang bya ba dang 'brel bar 'dod na ni/ de lta na yang / bgom la 'gro ba yod na ni/ /'gro ba gnyis su thal 'gyur te/ / gang gis de bgom gyur pa dang / /de la 'gro ba gang yin pa'o/ /'gro ba gang dang ldan pas lam gyis bgom pa zhes bya ba'i brjod pa rnyed par 'gyur ba de ni 'gro ba gcig yin no/ /gang gis lam de bgrod pa'i gzhir gyur pa'i bgom pa de la 'gro ba ni gnyis pa ste/ bgom pa la 'gro ba yod na 'gro ba 'di gnyis su thal bar 'gyur ro//'gro ba gnyis yod mod skyon ci yod ce na/ skyon 'di yod de gang gi phyir/ /'gro ba gnyis su thal 'gyur na/ /'gro ba po yang gnyis su 'gyur/ /yang ci'i phyir 'gro ba po gnyis su thal bar 'gyur zhe na/ bshad pa/gang phyir 'gro ba med par ni/ /'gro bo 'thad par mi 'gyur phyir/ /gang phyir bya ba ni/ gdon mi za bar las sam byed pa po yang rung ste/ rang gi sgrub par byed pa la ltos pa yin la/ 'gro ba'i bya ba 'di yang byed pa po la gnas pa yin te/ de'i phyir 'gro ba po la ltos pa yin no//lha sbyin gcig 'gro ba na byed pa po gnyis pa yod pa ma yin te/ de'i phyir byed pa po gnyis pa med pa'i phyir bya ba gnyis med do/ /de'i phyir bgom pa la 'gro ba yod do zhes bya ba 'thad pa ma yin no/ /ci ste gang gi tshe lha sbyin 'di 'dug bzhin du smra bar yang byed cing lta bar yang byed pa de'i tshe byed pa po gcig bya ba du ma dang ldan par mthong ba de bzhin du/'gro ba po gcig la bya ba gnyis yod par 'gyur ro snyam na ma yin te/ gang gi phyir nus pa byed pa po yin gyi rdzas ni ma yin la/ bya ba tha dad pas de'i sgrub byed nus pa yang tha dad par grub pa yin te/ 'dug pa'i bya bas smra ba por 'gyur ba ni ma yin no//gal te rdzas gcig yin no zhe na/ de lta yin du chug mod rdzas ni byed pa po ma yin te/ 'o na ci zhe na/ nus pa yin na de yang tha dad pa kho na yin no/ /gzhan yang gcig dus gcig tu bya ba 'dra ba gnyis kyi byed pa po gnyis yin par yang ma mthong ste/de'i phyir 'gro ba po gcig la 'gro ba gnyis med do/ /'dir smras pa/ gal te yang de ltar yin mod kyi/ 'on kyang lha sbyin 'gro'o zhes brjod pa las na 'gro ba po lha sbyin la 'gro ba dmigs pa yin no/ /de'i phyir 'gro ba ni yod pa nyid de/ 'gro ba'i rten 'gro ba po yod pa'i phyir ro//brjod par bya ste/ gal te 'gro ba'i rten 'gro ba po yod na de ltar 'gyur ba zhig na de ni med do/ /ci ltar zhe na/ bshad pa/ gal te 'gro po med 'gyur na/ /'gro ba 'thad par mi 'gyur te/ /'gro ba med na 'gro ba po/ / yod pa nyid du ga la 'gyur/ /'gro ba po med par rten med pa'i 'gro ba med do zhes bshad zin to/ /de'i phyir gal te 'gro ba po med 'gyur na ste bsal na 'gro ba yod pa ma yin la/ 'gro ba med na rgyu med pa'i/ /'gro ba yod par ga la 'gyur/ /de'i phyir 'gro ba med do/ /'dir smras pa/'gro ba ni yod pa nyid de/ de'i sgo nas de dang ldan pa brjod pa'i phyir ro/ /'di na 'gro ba po ni 'gro ba dang ldan pa yin la/ de dang ldan pa las kyang 'gro ba yin no/ /gal te 'gro ba med par gyur na ni/ 'gro ba dang mi ldan pa'i lha sbyin la 'gro'o zhes brjod par mi 'gyur te/khar ba med na khar ba can du brjod pa med pa bzhin no/ /brjod par bya ste/ gal te 'gro'o zhes bya ba'i brjod pa 'di nyid yod na/ 'gro ba yod par 'gyur na de ni med de/ gang gi phyir/ re zhig 'gro po mi 'gro ste/ /'gro ba po min 'gro ba min/ /'gro po 'gro po min las gzhan/ / gsum pa gang zhig 'gro bar 'gyur/ /'dir 'gro bar byed pas na 'gro ba po yin na/ de ni re zhig mi 'gro'o/ /ji ltar mi 'gro ba de ltar ni tshigs su bcad pa 'og ma gsum gyis ston par 'gyur ro/ /'gro ba po ma yin pa yang mi 'gro ste/ 'gro ba po ma yin pa zhes bya ba ni gang zhig 'gro ba'i bya ba dang bral ba yin la/'gro'o zhes bya ba'i sgra 'di ni 'gro ba'i bya ba dang ldan pa la 'jug pa yin te/ de'i phyir 'di gal te 'gro ba po ma yin na ni ji ltar 'gro la/ 'on te 'gro na ni 'di 'gro ba po ma yin zhes bya/ gal te de gnyis las tha dad pa zhig 'gro'o zhe na/ de ltar ma yin te/gang zhig la 'gro'o zhes bya bar rtog pa 'gro ba po dang 'gro ba po ma yin pa las ma gtogs pa'i gsum pa zhes bya ba yang gang zhig yod/ de'i phyir 'gro ba med do/ /'dir smras pa / 'gro ba po ma yin pa mi 'gro la/ gnyi ga ma gtogs pa yang mi 'gro ste/ 'o na ci zhe na/'gro ba po kho na 'gro ba yin no/ /'di yang yod pa ma yin no/ /ci'i phyir zhe na/ 'di ltar/ gang tshe 'gro ba med par ni/ /'gro po 'thad par mi 'gyur na/ /re zhig 'gro po 'gro'o zhes/ /ji ltar 'thad pa nyid du 'gyur/ /'gro ba po 'gro'o zhes bya ba'i ngag 'dir 'gro ba'i bya ba ni gcig nyid yin la/des kyang 'gro'o zhes bya bar brjod par 'gyur zhing / 'gro ba po zhes bya ba'i brjod pa la ni 'gro ba'i bya ba gnyis pa yod pa ma yin pas gang gi tshe 'gro ba med par 'gro ba po ste/ mi 'gro bar 'gro ba po zhes bya ba yod pa ma yin pa de'i tshe 'gro ba po 'gro'o zhes bya ba mi rigs so/ / 'gro'o zhes bya ba ni yin du chug na/ 'gro ba po zhes bya ba 'di mi srid pas/ rigs pa ma yin no/ /ci ste 'gro ba dang ldan pa las 'gro ba po 'gro ba dang bcas pa yin no zhe na/ de ltar na yang 'gro ba'i bya ba gnyis pa med pa'i phyir 'gro'o zhes brjod pa yod par mi 'gyur ro zhes bshad pa/ gang gi phyogs la 'gro ba po//'gro ba de la 'gro med pa'i/ /'gro po yin par thal 'gyur te/ /'gro po 'gro bar 'dod phyir ro/ /rgol ba gang gi 'gro ba dang ldan pa nyid las 'gro ba po yin no zhes bya ba'i phyogs yin zhing / 'gro ba po 'gro bar 'dod pa de la/ 'gro ba po'i brjod pa 'gro ba dang bcas pas/'gro ba med par 'gro ba po 'gro'o zhes bya bar 'gyur te/ 'gro ba'i bya ba gnyis pa med pa'i phyir ro/ /de'i phyir 'gro ba po 'gro'o zhes bya ba mi rigs so/ /'gro ba med pa'i 'gro po yin par zhes bya ba'i ngag 'di'i 'gro ba po zhes bya ba'i sgra ni 'gro ba'i bya ba 'di'i don la 'jug go/ci ste 'gro ba po 'gro'o zhes gnyi ga yang / 'gro ba dang ldan par 'dod do zhe na/ de lta na yang / gal te 'gro po 'gro 'gyur na/ /'gro ba gnyis su thal 'gyur te/ /gang gis 'gro por mngon pa dang / /'gro por gyur nas gang 'gro ba'o/ /'gro ba gang dang ldan pas 'gro ba po zhes bya bar mngon zhing brjod pa 'gro ba gcig po de dang /'gro ba por gyur nas gang 'gro ba ste/ 'gro ba'i bya ba gang zhig byed pa ste/ 'gro ba gnyis po 'di dag tu thal bar 'gyur ro/ /de'i phyir 'gro ba po gnyis su yang thal bar 'gyur ro zhes gong ma bzhin du skyon brjod par bya'o//de'i phyir 'gro'o zhes bya bar brjod pa don med par 'gyur ro/ /'dir smras pa/ gal te yang de ltar yin mod kyi/ de lta na yang lha sbyin 'gro'o zhes bya ba'i brjod pa yod pa'i phyir 'gro ba yod do/ /de ltar ni ma yin te/ gang gi phyir ci 'di 'gro ba por gyur pa zhig gam/'on te 'gro ba po ma yin pa zhig gam/ de gnyis las tha dad pa zhig 'gro grang / zhes dpyad pa 'di ni lha sbyin gyi rten can yin la/ rnam pa thams cad du 'thad pa yang ma yin pas 'di ni gyi na'o/ /'dir smras pa/ 'gro ba ni yod pa nyid de/ de'i rtsom pa yod pa'i phyir ro//'di na lha sbyin sdod pa btang nas 'gro bar rtsom la/ rus sbal gyi spu yod pa ma yin pa'i gos ni rtsom pa yang ma yin no/ /brjod par bya ste/ gal te de'i rtsom pa nyid yod na/ 'gro ba yod par 'gyur ba zhig na/ de ni med do/ /song la 'gro ba rtsom med de/ /ma song ba la'ang 'gro rtsom med//bgom la rtsom pa yod min na/ /gang du 'gro ba rtsom par byed/ /gal te 'gro ba'i rtsom pa de yod na/ de'i tshe song ba'i lam la'am/ ma song ba'am bgom pa zhig la rtsom par 'gyur ba zhig na/ de la song ba la ni 'gro ba'i rtsom pa med de/ song ba ni 'gro ba'i bya ba 'gags pa yin na/gal te der 'gro ba rtsom na ni de song ba nyid du mi 'gyur te/ 'das pa dang da ltar ba dag ni 'gal ba'i phyir ro/ /ma song ba la yang 'gro ba'i rtsom pa med de/ ma 'ongs pa dang da lta ba dag ni 'gal ba'i phyir ro/ /bgom pa la yang yod pa ma yin te/ de med pa'i phyir dang / bya ba gnyis su thal bar 'gyur ba'i phyir dang /byed pa po gnyis su thal bar 'gyur ba'i phyir ro/ /de'i phyir de ltar thams cad du 'gro ba'i rtsom pa ma gzigs nas/ /gang du 'gro ba rtsom par byed/ /ces gsungs so/ /ji ltar 'gro ba yod pa ma yin pa de ltar bstan par bya ba'i phyir bshad pa/'gro ba rtsom pa'i snga rol na/ /gang du 'gro ba rtsom 'gyur ba/ /bgom pa med cing song ba med/ /ma song 'gro ba ga la yod/ /'di ltar gang gi tshe lha sbyin 'dug par gyur pa de'i tshe 'gro ba rtsom pa yod pa ma yin te/ de la 'gro ba rtsom pa'i snga rol du ni gang du 'gro ba rtsom par 'gyur ba bgom pa'i lam gyi rnam pa yod pa ma yin la/song ba yang yod pa ma yin no/ /de'i phyir song ba dang bgom pa med pa'i phyir 'di gnyis la 'gro ba'i rtsom pa med do/ /ci ste gal te yang 'gro ba rtsom pa'i snga rol du song ba med cing bgom pa med mod kyi/ de lta na yang gang du 'gro ba rtsom par 'gyur ba ma song ba ni yod pa yin te/der 'gro ba rtsom par 'gyur ro snyam na brjod par bya ste/ ma song 'gro ba ga la yod/ /ma song ba ni 'gro ba'i bya ba ma skyes shing 'gro ba'i bya ba ma brtsams pa yin na/ der 'gro ba rtsom mo zhes bya ba 'di ni ma 'brel ba yin no zhes bshad pa ni/ma song 'gro ba ga la yod/ /ces bya ba'o/ /gal te yang song ba dang ma song ba dang bgom pa dag la 'gro ba'i rtsom pa med mod kyi/ song ba dang ma song ba dang bgom pa dag ni yod pa yin la/ 'gro ba med na ni 'di dag mi rung ngo zhe na/ brjod par bya ste/ gal te 'di dag nyid yod na 'gro ba yod par 'gyur ba zhig go/'gro ba'i rtsom pa yod na ni/ gang du 'gro ba'i bya ba 'gags pa de ni song ba zhes brtag par bya la/ gang du da lta bar gyur pa de ni bgom pa yin zhing / gang du ma skyes pa de ni ma song ba yin no zhes brtag na/ gang gi tshe 'gro ba'i bya ba rtsom pa nyid yod pa ma yin pa de'i tshe/'gro rtsom rnam pa thams cad du/ /snang ba med pa nyid yin no / /song ba ci zhig bgom pa ci/ /ma song ci zhig rnam par brtag/ thams cad du 'gro ba'i rtsom pa nyid dmigs pa med na/ phyin ci log tu dus gsum du rtog par ci ste byed/ de'i brjod pa'i rgyu 'gro ba yang lta ga la yod/de'i phyir 'di ni rigs pa ma yin no/ /'dir smras pa 'gro ba ni yod pa nyid de/ de'i gnyen po yod pa'i phyir ro/ /gang la gnyen po yod pa de ni yod pa yin te/ snang ba dang mun pa bzhin dang / pha rol dang tshu rol dang the tshom dang gtan la phebs pa bzhin no//'gro ba la yang gnyen po gnas pa yod pa yin no/ /brjod par bya ste/ gal te de'i gnyen po gnas pa yod na ni 'gro ba yod par 'gyur ba zhig na de ni med do/ /ji ltar zhe na/ 'dir gnas pa 'di 'gro ba po'am/ 'gro ba po ma yin pa'am/ de gnyis las gzhan pa zhig la brtag grang na/rnam pa thams cad du mi rung ngo zhes bshad pa/ re zhig 'gro po mi sdod de/ /'gro ba po min sdod pa min/ /'gro po 'gro po min las gzhan/ /gsum pa gang zhig sdod par 'gyur/ /'gro ba po ji ltar mi sdod pa de ltar ni tshigs su bcad pa phyi mas ston par 'gyur ro//'gro ba po ma yin pa yang mi sdod de/ de ni sdod pa nyid yin na/ de la gnas pa gzhan gyis dgos pa ci zhig yod/ gnas pa gcig gis ni 'gro ba po ma yin par 'gyur la/ gzhan gyis ni sdod par 'gyur ro zhes gnas pa gnyis su thal bar 'gyur ba'i phyir gnas pa po yang gnyis su thal bar 'gyur bas nyes pa snga ma bzhin du 'gyur ro//'gro ba po dang 'gro ba po ma yin pa las ma gtogs pa'i don yang med do/ /'dir smras pa/ 'gro ba po ma yin pa mi sdod la/ 'gro ba po dang 'gro ba po ma yin pa las gzhan pa yang mi sdod de/ 'o na ci zhe na/ 'gro ba po nyid sdod do//de ltar ni ma yin te gang gi phyir/ gang tshe 'gro ba med par ni/ /'gro po 'thad par mi 'gyur na/ /re zhig 'gro po sdod do zhes/ /ji ltar 'thad pa nyid du 'gyur/ /gang gi tshe 'di sdod do zhes brjod pa de'i tshe de la gnas pa dang / 'gal ba'i 'gro ba yod pa ma yin la/ 'gro ba med par yang 'gro ba por brjod pa yod pa ma yin te/de'i phyir 'gro ba po sdod do zhes bya ba ni mi 'thad do/ /'dir smras pa/ 'gro ba ni yongs su yod pa nyid de ldog par yod pa'i phyir ro/ /'di na 'gro ba las ldog pa na gnas pa rtsom par byed na/ 'gro ba med na ni de las ldog par mi 'gyur ro zhe na/brjod par bya ste/ gal te de las ldog pa nyid yod na/ 'gro ba yod par 'gyur na de ni med de/ 'di ltar/ bgom las ldog par mi 'gyur te/ /song dang ma song las kyang min/ /de gnyis 'gro ba po song ba'i lam las ni mi ldog ste/ 'gro ba med pa'i phyir ro//ma song ba las kyang ma yin te/ 'gro ba med pa nyid kyi phyir ro/ /bgom pa las kyang mi ldog ste/ de ma dmigs pa'i phyir dang / 'gro ba'i bya ba med pa'i phyir ro/ /de'i phyir 'gro ba las ldog pa med do/ /'dir smras pa/ gal te 'gro ba'i 'gran zla gnas pa med pas 'gro ba med pa yin na/de lta na 'o na 'gro ba grub par bya ba'i phyir gnas pa grub par bya ste/ de grub pas 'gro ba grub pa yin no/ /de'i phyir gnas pa ni yod pa nyid de 'gran zla yod pa'i phyir ro/ /gnas pa'i 'gran zla ni 'gro ba yin la/ de ni yod pa yin no/ /de'i phyir gnas pa yang yod pa yin te/'gran zla yod pa'i phyir ro zhe na/ 'di yang mi rung ste/ 'di ltar/ 'gro ba dang ni 'jug pa dang / /ldog pa yang ni 'gro dang mtshungs/ /'dir gnas pa bsgrub pa'i phyir bkod pa'i 'gro ba gang yin pa de ni 'gro ba dang mtshungs te/ 'gro ba sun 'byin pa dang 'dra'o zhes bya ba'i don to//ji ltar/ re zhig 'gro po mi sdod de/ /zhes bya ba la sogs pas/ 'gro ba rab tu bsgrub pa'i phyir gtan tshigs nyid du nye bar bkod pa'i gnas pa la sun 'byin pa brjod pa de bzhin du 'dir yang gnas pa bsgrub pa'i phyir gtan tshigs nyid du nye bar bkod pa'i 'gro ba la yang /re zhig gnas po mi 'gro ste/ /zhes bya ba la sogs pa'i tshigs su bcad pa gnyis 'don pa go bsnor te sun 'byin pa brjod par bya'o/ /des na 'gro ba med la de med pas 'gran zla gnas pa yang med do/ /de ltar re zhig 'gro ba ni 'gro ba dang 'dra bar gsal bar bya'o//ci ste gnas pa ni yod pa nyid de/ de'i rtsom pa yod pa'i phyir ro/ /'dir 'gro ba btang nas gnas pa rtsom par 'gyur la/ rtsom pa gang yin pa de yang yod par ji ltar mi 'gyur snyam na/ brjod par bya ste/ 'jug pa yang 'gro ba dang mtshungs par brjod par bya'o//de la ji ltar sngar/ song la 'gro ba'i rtsom med de/ /zhes bya ba la sogs pas 'gro ba'i rtsom pa bkag pa de bzhin du/ 'dir yang / gnas la gnas pa'i rtsom med de/ zhes bya ba la sogs pas tshigs su bcad pa gsum go bsnor te gnas pa'i 'jug pa la yang 'gro ba dang mtshungs par bsal bar bya'o//ci ste gnas pa ni yod pa nyid de de las ldog pa yod pa'i phyir ro/ /'dir lha sbyin gnas par gyur nas gnas pa las ldog pa na 'gro ba rtsom par 'gyur te/ gal te gnas pa yod par ma gyur na ni de las ldog par yang mi 'gyur ro snyam na/brjod par bya ste/ gal te de'i ldog pa yod par gyur na ni gnas pa yod par 'gyur na/ de ni med de/ gang gi phyir ldog par yang ni 'gro dang mtshungs te/ gnas pa las ldog pa yang 'gro ba las ldog pa dang mtshungs par bsal bar bya ba yin no//ji ltar 'gro ba 'gog pa na/ /bgom las ldog par mi 'gyur te/ /song dang ma song las kyang min/ /zhes 'gro ba la sun 'byin pa brjod pa de bzhin du gnas pa dgag pa la yang / gnas bzhin pa las mi ldog ste/ /gnas dang mi gnas las kyang min/ / zhes 'gro ba dang sun 'byin pa 'dra ba yin te/ de'i phyir gnas pa med do/ /de med pas 'gro ba'i gnyen po gnas pa yod par smra ba rnams kyis 'gro ba grub par ga la 'gyur te/ de'i phyir 'gro ba rnam pa thams cad du med pa nyid do/ /gzhan yang gal te 'gro ba yod par gyur na/ de 'gro ba po las tha dad par ram tha mi dad par yod par 'gyur ba zhig na/rnam par dpyad pa na rnam pa thams cad du yod pa ma yin no zhes bshad pa/ 'gro ba de dang 'gro ba po/ /de nyid ces kyang byar mi rung / /'gro ba dang ni 'gro ba po/ /gzhan nyid ces kyang byar mi rung / /yang ji ltar mi rung zhe na/bshad pa/ gal te 'gro ba gang yin pa/ /de nyid 'gro po yin 'gyur na/ /byed pa po dang las nyi kyang / /gcig pa nyid du thal bar 'gyur/ /'gro ba'i bya ba gang yin pa de gal te 'gro ba po las tha mi dad par 'gyur na ni/ de'i tshe byed pa po dang bya ba yang gcig pa nyid du 'gyur ro/ / de'i phyir 'di ni bya ba'o 'di ni byed pa po'o zhes bya ba'i khyad par du yang mi 'gyur na/ gcod pa'i bya ba dang gcod pa po ni gcig pa yang ma yin te/ de'i phyir 'gro ba gang yin pa de ni 'gro ba po yin no zhes bya bar mi rung ngo / /'gro ba dang 'gro ba po gzhan pa nyid du yang ji ltar med pa de ltar bstan pa'i phyir bshad pa/gal te 'gro dang 'gro ba po/ /gzhan pa nyid du rnam brtag na/ /'gro po med pa'i 'gro ba dang / /'gro ba med pa'i 'gro por 'gyur/ /gal te 'gro ba po dang 'gro ba dag gzhan nyid du gyur na ni/ de'i tshe 'gro ba la ma ltos pa'i 'gro ba por 'gyur zhing / bum pa las snam bu ltar 'gro ba po la ltos pa med pa gzhan du grub pa'i 'gro ba gzung bar bya bar 'gyur na/ byed pa po las logs su grub pa'i 'gro ba ni 'dzin pa yang ma yin pas/ 'gro ba las 'gro ba po gzhan nyid yin no zhes bya ba ni mi rigs so zhes bya ba 'di ni rab tu bsgrubs pa yin no//de'i phyir de ltar/ gang dag dngos po gcig pa dang / /dngos po gzhan pa nyid du ni/ /grub par gyur pa yod min na/ /de gnyis grub pa ji ltar yod/ /'gro ba dang 'gro ba po gang dag la ji skad bshad pa'i tshul gyis gcig gi ngo bo dang gzhan gyi ngo bo grub par 'gyur ba ji ltar yang yod pa ma yin na/de gnyis rnam pa gzhan gang du grub par 'gyur/ de nyid kyi phyir/ de gnyis grub pa ji ltar yod/ /ces gsungs te/ 'gro ba dang 'gro ba po gnyis grub pa med de snyam du dgongs pa'o/ /'dir smras pa/ 'di ni 'gro ba po lha sbyin 'gro'o zhes bya bar ni 'jig rten du grags pa yin no//de la smra ba po tshig smra'o/ /byed pa po bya ba byed do zhes ji ltar grags pa de bzhin du 'gro ba gang gis 'gro ba por mngon pa de 'gro'o zhes bya ba yang yin pas/ ji skad du brjod pa'i nyes par mi 'gyur ro/ /'di yang yod pa ma yin te gang gi phyir/'gro ba gang gis 'gro por mngon/ /'gro ba de ni de 'gro min/ /'gro ba gang gis lha sbyin 'gro'o zhes bya bar mngon par gsal ba de ni 'gro ba por gyur pa de 'gro ba ma yin te/ yin par mi 'gyur ba'am/ byed pa ma yin no zhes bya ba'i don to/ /'di ltar/ gang phyir 'gro ba'i snga rol med//de'i 'gro ba'i snga rol ni de 'gro ba'i sngon rol lo/ /gal te 'gro ba'i snga rol du 'gro ba po grub par 'gyur na ni/ de der 'gro bar 'gyur ba zhig go/ /ji ltar zhe na/ gang gi phyir gang zhig gang du 'gro bar 'gyur/ lha sbyin gang zhig don gzhan du gyur pa'i grong ngam/grong khyer gang zhig tu 'gro bar mthong ba yin na/ de bzhin du 'gro ba gang gis 'gro ba po zhes brjod pa de'i snga rol du gang zhig de 'gro bar 'gyur ba 'gro ba la mi ltos pa'i 'gro ba po zhes bya ba ni yod pa yang ma yin no/ /ci ste 'gro ba gang gis 'gro ba po zhes mngon pa de nyid ni 'dir 'gro ba ma yin te/'o na ci zhe na/ de las gzhan 'gro'o snyam du sems na/ 'di yang yod pa ma yin te/ gang gi phyir/ 'gro ba gang gis 'gro por mngon/ /de las gzhan pa de 'gro min/ /gang phyir 'gro po gcig po la/ /'gro ba gnyis su mi 'thad do//'gro ba por gyur pa de ni 'gro ba gang gis 'gro ba por mngon pa de las gzhan yang 'gro ba ma yin te/ 'gro ba gnyis su thal bar 'gyur ba'i phyir ro/ /'gro ba gang gis 'gro ba por mngon par gsal ba dang / 'gro ba por gyur nas gzhan gang zhig 'gro'o zhes bya ba ste/'gro ba 'di gnyis su thal bar 'gyur na/ 'gro ba po gcig la 'gro ba gnyis kyang med pas 'di ni mi rigs so/ /'dis ni smra ba po tshig smra'o zhes pa dang / byed pa po bya ba byed do zhes bya ba yang bsal ba yin no/ /de'i phyir de ltar/ 'gro po yin par gyur pa ni/ / 'gro rnams gsum du 'gro mi byed/ /ma yin par ni gyur de yang / /'gro rnam gsum du 'gro mi byed/ /yin dang ma yin gyur pa yang / /'gro rnam gsum du 'gro mi byed/ /de la 'dir 'gro bar bya ba nas 'gro ba zhes bya'o/ /de la 'gro ba po yin par gyur pa ni/ gang zhig 'gro ba'i bya ba dang ldan pa'o//'gro ba po ma yin par gyur pa ni 'gro ba'i bya ba dang bral ba'o/ /yin pa dang ma yin par gyur pa ni gnyi ga'i ngo bo gang yin pa'o/ /de bzhin du 'gro ba yang 'gro ba'i bya ba dang 'brel ba'i sgo nas rnam pa gsum du rig par bya'o/ /de la 'gro ba po yin par gyur pa ni yin par gyur pa dang ma yin par gyur pa dang /yin pa dang ma yin par gyur pa'i 'gro ba rnam pa gsum du 'gro bar mi byed de / 'di yang las dang byed pa brtag pa las 'chad par 'gyur ro/ /de bzhin du 'gro ba po ma yin par gyur pa yang 'gro ba rnam pa gsum du 'gro bar mi byed la/yin pa dang ma yin par gyur par yang mi byed do zhes de nyid las ston par 'gyur ro/ /gang gi phyir de ltar rnam par dpyad na/ 'gro ba po dang bgrod pa dang 'gro ba rnams yod pa ma yin pa/ de phyir 'gro dang 'gro po dang / /bgrod par bya ba yod ma yin/ /zhes bya'o/ / ji skad du/ 'phags pa blo gros mi zad pas bstan pa'i mdo las/ btsun pa shwa ra dwa ti'i bu 'ong ba zhes bya ba de ni bsdu ba'i tshig go/ btsun pa shwa ra dwa ti'i bu 'gro ba zhes bya ba de ni bsal ba'i tshig go/ gang la bsdu ba'i tshig med pa dang / bsal ba'i tshig med pa de la 'ong ba yang med/ 'gro ba yang med do/ /'ong ba dang 'gro ba med pa ni/ 'phags pa rnams kyi 'gro ba'o zhes gsungs pa lta bu'o/ /gal te sa bon nyid myu gur 'pho ba yin na ni de sa bon nyid yin gyi myu gu ma yin pa dang / rtag pa'i skyon du thal bar 'gyur ro/ /'on te myu gu gzhan nas 'ong na ni rgyu med pa'i skyon du thal bar 'gyur na/rgyu med pa ni skye ba yang ma yin te/ bong bu'i rwa bzhin no/ de nyid kyi phyir bcom ldan 'das kyis kyang / sa bon yod na myu gu ji bzhin te/ /sa bon gang yin myu gu de nyid min/ /de las gzhan min de yang ma yin te/ /de ltar rtag min chad min chos nyid do/ /zhes bya ba dang /rgya las rgya'i 'bur ni snang mod kyi/ /rgya de 'phos par dmigs pa'ang yod ma yin/ /de la de med gzhan la ma yin te/ /de ltar 'dus byas rtag med chad pa med/ /ces bya ba dang / me long ngos dang 'bru mar snod rnams la/ /bud med kha bzhin brgyan pas bltas pa na//byis pa de ni de la chags bskyed nas/ /'dod pa tshol ba'i phyir yang shin tu rgyug /bzhin ni der yang 'pho ba ma yin te/ /gzugs brnyan la ni nam yang bzhin mi rnyed/ /rmongs pa de dag 'dod chags bskyed pa ltar/ /chos rnams thams cad de bzhin shes par gyis/ / zhes gsungs so/ /ji skad du/ 'phags pa ting nge 'dzin gyi rgyal po las kyang / de tshe sdig med stobs bcu ldan pa yi/ /rgyal ba de ni ting 'dzin mchog 'di 'chad/ /srid pa'i 'gro ba rmi lam lta bu ste/ /'di la su yang mi skye 'chi ba med/ /sems can mi dang srog kyang mi rnyed de/ / chos 'di rnams ni dbu ba chu shing 'dra/ /sgyu ma lta bu nam mkha'i glog 'dra ste/ /chu yi zla ba 'dra zhing smig rgyu bzhin/ /mi 'ga' 'jig rten 'dir yang shi nas ni/ /'jig rten gzhan du 'pho zhing 'gro med kyang / /las byas rnams ni nam yang chud mi za/ /'khor ba na yang dkar nag 'bras bu smin//rtag pa ma yin chad par mi 'gyur te/ /las bsags med cing gnas pa dag kyang med/ /de yang byas nas reg par mi 'gyur min/ /gzhan gyis byas pa tshol bar gyur pa'ang med/ /'pho ba med cing phyir yang 'ong ba med//thams cad yod pa ma yin med pa'ang min/ /'di ni lha gnas 'jug pa dag pa min/ /sems can spyod pa rab zhi 'jug pa med/ /srid gsum rmi lam dang 'dra snying po med/ /myur du 'jig cing mi rtag sgyu ma bzhin/ /'ong ba med cing 'di nas 'gro ba'ang med/ / rgyun rnams rtag tu stong zhing mtshan ma med/ /bde gshegs spyod yul rgyal ba'i yon tan ni/ /skye med zhi ba mtshan ma med pa'i gnas/ /stobs dang gzungs rnams dang ni stobs bcu'i stobs/ /'di ni sangs rgyas khyu mchog gyur pa'i mchog /dkar po'i chos mchog yon tan bsags pa ste//yon tan ye shes gzungs dang stobs mchog dang / /rdzu 'phrul rnam par 'phrul par bya ba'i mchog/ mngon shes mchog lnga thob pa dam pa'i tshul/ /zhes rgya cher gsungs pa lta bu'o/ /de bzhin du/ tshe dang ldan pa dag gar dong / gang nas lhags/ de dag gis smras pa/ btsun pa rab 'byor gang du yang 'gro ba med pa dang / gang nas kyang 'ong ba med pa'i phyir bcom ldan 'das kyis chos bstan to zhes gsungs so/ /slob dpon zla ba grags pa'i zhal snga nas sbyar ba'i tshig gsal ba las/ 'gro ba dang 'ong ba brtag pa zhes bya ba ste/rab tu byed pa gnyis pa'i 'grel pa'o// //'dir smras pa/ gal te yang 'gro ba dang 'gro ba po dang bgrod pa yod pa ma yin mod kyi/ de lta na yang gsung rab las rab tu grub pa la ltos nas lta ba po dang blta bar bya ba dang / lta ba la sogs pa rnams yod par khas blang dgos so//de skad du yang / chos mngon pa las/ lta dang nyan dang snom pa dang / /myong bar byed dang reg byed yid/ /dbang po drug ste de dag gi/ spyod yul blta bar bya la sogs/ /zhes gsungs so/ /de'i phyir lta ba la sogs pa dag ni rang bzhin gyis yod pa yin no/ /yod pa ma yin te/ 'dir mig ni lta bas na lta bar byed pa yin la/gzugs ni de'i yul nyid yin par nye bar bstan to/ /ji ltar lta ba gzugs la mi lta ba de ltar bstan pa'i phyir bshad pa/ lta de rang gi bdag nyid ni/ /de la lta ba ma yin nyid/ /gang zhig bdag la mi lta ba/ /de bzhin dag la ji ltar lta/ / de la lta ba de rang gi bdag nyid la lta ba ma yin pa nyid de/ rang gi bdag nyid la bya ba 'gal ba'i phyir ro/ /de'i phyir rang gi bdag nyid la mi lta ba'i phyir rna ba la sogs pa bzhin du sngon po la sogs pa la'ang mi lta bar 'gyur ro/ /de'i phyir lta ba yod pa ma yin no/ /gal te yang lta ba rang gi bdag nyid la mi lta mod kyi/de lta na yang gzhan la lta ba yin te me bzhin no/ /'di ltar me ni gzhan gyi bdag nyid kho na sreg par byed kyi/ rang gi bdag nyid ni ma yin no/ /de bzhin du lta ba yang gzhan kho na la lta'i/ rang gi bdag nyid ni ma yin no zhe na/ 'di yang rigs pa ma yin te gang gi phyir/lta ba rab tu bsgrub pa'i phyir/ /me yi dpes ni nus ma yin/ /lta ba rab tu bsgrub par bya ba'i phyir khyod kyis me'i dpe nye bar bkod pa gang yin pa des ni nus pa ma yin te/ mi chog pa dang / mthu med pa dang / mi rigs so zhes bya ba'i don to/ /gang gi phyir/ song dang ma song bgom pa yis/ /de ni ltar bcas lan btab po/ /lta ba dang lhan cig gnas pas ni ltar bcas so/ /khyod kyis lta ba rab tu bsgrub pa'i phyir me'i dpe bstan pa gang yin pa de yang dngos kyi don lta ba dang lhan cig lan btab bo ste sun phyung ba yin no/ /gang gis she na/song dang ma song bgom pa yis/ /zhes gsungs te/ gang gi phyir ji ltar song ba la mi 'gro zhing / ma song ba la yang ma yin la/ bgom pa la ma yin pa de bzhin du/ /mes kyang bsregs pa la mi sreg la/ ma bsregs pa la yang mi sreg go zhes bya ba la sogs pas mtshungs pa brjod par bya'o//yang ji ltar song ba dang ma song ba dang bgom pa la mi 'gro ba de bzhin du/ re zhig bltas la mi lta ste/ /ma bltas pa la'ang lta ba min/ /bltas dang ma bltas ma gtogs par/ /lta bzhin shes par mi 'gyur ro/ /zhes bya ba la sogs pa brjod par bya'o//ji ltar/ re zhig 'gro po mi 'gro ste/ /zhes bya ba la sogs pa bshad pa de bzhin du/ re zhig sreg po mi sreg ste/ /zhes bya ba la sogs pa brjod par bya zhing / re zhig lta po mi lta ste/ /zhes bya ba la sogs pas me'i dpe dang lhan cig tu song ba dang ma song ba dang bgom pa dag dang sun dbyung ba mtshungs pa de'i phyir me bzhin du lta ba grub bo zhes bya ba mi rigs so//de'i phyir lta ba rang gi bdag nyid bzhin du gzhan dag la yang lta ba ma yin no zhes bya ba 'di grub pa ma yin no/ /gang gi tshe de lta yin pa de'i tshe/ gang tshe cung zad mi lta ba//lta bar byed pa ma yin no/ /lta bas lta bar byed ces byar/ /de ni ji ltar rigs par 'gyur/ /gang gi tshe de ltar cung zad kyang mi lta bas lta bar byed pa ma yin pa de'i tshe mi lta ba lta bar byed pa nyid mi rigs pa'i phyir lta bas na/ lta bar byed pa'o zhes brjod pa mi rigs te/ka ba la sogs pa bzhin no/ /gal te yang tshigs su bcad pa sdeb pa'i ngor lta bar byed pa ma yin no zhes bya ba'i mjug thogs su/ lta byed lta bas yin zhes byar/ /zhes bya bar 'don mod kyi de lta na yang 'chad pa'i dus su/ lta bas lta bar byed ces byar/ /de ni ji ltar rigs par 'gyur//zhes gdon par bya'o/ /gzhan yang 'dir lta bas na lta bar byed pa'o zhes brjod pa ni lta ba'i bya ba dang mi lta ba'i rang bzhin can zhig gam/ lta ba'i rang bzhin can ma yin pa zhig 'brel par rtog grang / gnyi ga ltar yang mi rung ngo zhes bshad pa/lta ba lta nyid ma yin te/ /lta ba min pa mi lta nyid/ /re zhig lta ba'i rang bzhin can lta ba'i bya ba dang ldan pa ni yang lta bas na zhes bya ba dang 'brel bar mi 'thad de/ lta ba'i bya ba gnyis su thal bar 'gyur ba'i phyir dang / lta bar byed pa gnyis su thal bar 'gyur ba'i phyir ro//lta ba'i rang bzhin ma yin pa yang mi lta ste/ lta ba'i bya ba dang bral ba'i phyir sor mo'i rtse mo bzhin no zhes bya bar dgongs pa'o / /gang gi tshe de ltar/ lta ba lta nyid ma yin te/ /lta ba yin pa min lta nyid/ /yin pa de'i tshe/ lta bas lta bar byed ces byar/ /de ni ji ltar rigs par 'gyur//zhes bya ba 'di nyid dang sbyar bar bya'o/ /kha cig skye bzhin par 'gyur ba chos tsam po 'di ni bya ba med par skye bas 'gag kyang yul cung zad kyang mi lta ste/ bya ba med pa'i phyir ro/ /de'i phyir lta ba mi lta'o zhes bya ba 'di ni grub pa la sgrub pa yin no snyam du sems so/ / 'di la brjod par bya ste/ gal te tha snyad kyi yan lag tu gyur pa'i bya ba med na ni/ de'i tshe chos tsam po yang med par 'gyur te/ bya ba dang bral ba'i phyir nam mkha'i me tog bzhin no/ /des na bya ba dang bral ba'i chos tsam du go ga la 'gyur/ /de'i phyir gal te tha snyad kyi bden pa yin na ni chos tsam po bzhin du bya ba yang khas long la//'on te de kho na nyid sems na ni bya ba bzhin du chos tsam po yang yod pa ma yin no zhes khas blang bar bya'o/ /ji skad du brgya pa las/ bya ba dang ldan rtag pa nyid/ /kun tu 'gro la bya ba med/ /bya ba med pa med dang mtshungs/ /bdag med la khyod cis mi dga'//zhes bshad do/ /de'i phyir gzhan gyi tshul 'di gnod par byed pa ma yin la/ kho bo cag la grub pa la sgrub pa'i skyon du yang mi 'gyur ro/ /'dir smras pa/ lta bas na lta bar byed pa'o zhes byed pa po sgrub pa ni khas mi len gyi/ 'o na ci zhe na/ 'dir lta bar byed pas na lta ba'o zhes byed pa sgrub pa yin te /des na ji skad smras pa'i skyon du thal bar mi 'gyur ro/ /gang zhig byed par gyur pa'i lta ba 'dis lta bar byed pa de ni lta ba po yin la/ 'di yang rnam par shes pa 'am bdag yin yang rung ste yod pa nyid do/ /byed pa po yod pa las kyang lta ba grub pa yin no//brjod par bya ste/ lta ba nyid kyis lta ba po'ang / /rnam par bshad par shes par bya/ /de la ji ltar/ lta de rang gi bdag nyid ni/ /zhes bya ba la sogs pas lta ba la sun 'byin par brjod pa de bzhin du lta ba po yang sun 'byin pa lta ba dang 'dra bar rig par bya'o//'di lta ste/ lta po rang gi bdag nyid ni/ /lta bas lta ba ma yin nyid/ /gang zhig bdag la mi lta ba/ /de gzhan dag la ji ltar lta/ /zhes bya ba la sogs pas brjod par bya ste/ de'i phyir lta ba bzhin du lta ba po yang yod pa ma yin no zhes bya bar grub bo/ /'dir smras pa/lta ba po ni yod pa nyid de/ de'i las dang byed pa yod pa'i phyir/ 'dir gang med pa de la ni las dang byed pa med de/ dper na mo gsham gyi bu bzhin no/ /byed pa po la ni byed pa lta ba dang blta bar bya ba las kyang yod pa yin te/ de'i phyir gcod pa po bzhin du las dang byed pa po yod pa'i phyir lta ba po yod pa nyid do//brjod par bya ste/ blta bar bya ba dang lta ba ni yod pa ma yin pa nyid de/ de'i phyir lta ba po yod par ga la 'gyur/ blta bar bya ba dang lta ba ni lta ba po la ltos pa yin la/ de yang nges par dpyad pa na/ /ma spangs lta po yod min te//lta ba spangs par gyur kyang ngo / /'dir lta ba po zhes bya ba 'ga' zhig yod na ni de lta ba la ltos pa dang bcas pa'am/ ltos pa med pa zhig tu 'gyur grang / de la gal te lta ba la ltos pa dang bcas pa ma spangs pa'i lta ba po 'dod na ni/ de'i tshe grub pa zhig gam ma grub pa zhig lta ba la ltos par 'gyur ba zhig na/de la grub pa'i lta ba po ni lta ba la ltos pa ma yin te/ grub par gyur nas lta ba po yang lta ba la ltos pas ci zhig byed/ grub pa ni slar yang bsgrub par bya ba ma yin no/ /ci ste ma grub pa'i lta ba po lta ba la ltos so zhe na/ma grub pa'i phyir mo gsham gyi bu bzhin du lta ba la ltos pa med do/ /de ltar re zhig ma spangs pa ste lta ba la ltos nas lta ba por gyur pa med pa yin no/ /lta ba po lta ba spangs par gyur pa yang mi 'grub ste/ lta ba la ltos pa med pa'i phyir te sngar bshad pa yin no/ /de'i phyir de ltar gang gi tshe lta ba spangs pa dang /ma spangs pa'i lta ba po yod pa ma yin pa de'i tshe/ lta po med na blta bya dang / /lta ba de dag ga la yod/ /lta ba po med na rgyu med pa'i blta bya dang lta ba dag ni srid pas de dag yod pa las lta ba po grub par ga la 'gyur/ /'dir smras pa/ blta bar bya ba dang lta ba dag ni yod pa nyid de/ de dag gi 'bras bu yod pa'i phyir ro/ /de la ji ltar pha dang ma dag la/ /brten nas bu ni 'byung bshad pa/ /de bzhin mig dang gzugs brten nas/ /rnam par shes pa 'byung bar bshad/ /ces bya ba la/ blta bar bya ba dang lta ba la brten nas rnam par shes pa 'byung la/gsum 'dus par gyur pa las reg pa zag pa dang bcas pa 'byung zhes / reg pa dang lhan cig 'byung ba ni tshor ba yin la/ de'i rkyen gyis srid pa yin no/ /de ltar na srid pa'i yan lag bzhi po blta bar bya ba dang lta ba'i rgyu can dag ni yod pa yin te/de'i phyir/ de dag gi 'bras bu yod pa'i phyir blta bar bya ba dang lta ba gnyis yod do/ /brjod par bya ste/ gal te rnam par shes pa la sogs pa bzhi po nyid yod na/ de gnyis yod par 'gyur na yod pa ni ma yin te / 'di ltar blta bya lta ba med pa'i phyir/ /rnam par shes la sogs pa bzhi//yod min/ 'di lta ba po med pas blta bar bya ba dang lta ba gnyis kyang med do zhes bshad zin to/ /de'i phyir rnam par shes pa dang reg pa dang tshor ba dang sred pa zhes bya ba rnam par shes pa la sogs pa bzhi po yod par ga la 'gyur/ de'i phyir rnam par shes pa la sogs pa bzhi po rnams med do//'dir smras pa/ de dag ni yod pa nyid de dag gi 'bras bu yod pa'i phyir ro/ /'dir sred pa'i rkyen gyis len pa zhes bya ba la sogs pas len pa dang srid pa dang skye ba dang rga shi la sogs pa ni rnam par shes pa la sogs pa bzhi las skye ste/ de'i phyir rnam par shes pa la sogs pa dag yod de de dag gi 'bras bu yod pa'i phyir ro//brjod par bya ste/ gal te rnam par shes pa la sogs pa bzhi po yod na ni len pa la sogs pa dag yod par 'gyur na/ gang gi tshe blta bar bya ba dang lta ba med pas rnam par shes pa la sogs pa bzhi po yod pa ma yin pa de'i tshe/ nye bar len la sogs/ji lta bur na yod par 'gyur/ /nye bar len pa la sogs pa rnams yod par mi 'gyur ro zhes bya ba'i don to/ /da ni dbang po lhag ma rnams kyi rnam par bshad pa lta ba dang 'dra bar bsgre bar bya ba'i phyir/ lta bas nyan dang snom pa dang / /myong bar byed dang reg byed yid//nyan pa po dang mnyan la sogs/ /rnam par bshad par shes par bya/ /zhes bya ba gsungs so/ /bcom ldan 'das kyis/ mig gis gzugs rnams mi mthong zhing / /yid kyis chos rnams mi shes te/ /gang du 'jig rten mi 'jug pa/ /'di ni bden pa'i mchog yin no//gang du rkyen tshogs pas mthong ba/ /'dren pa rab tu ston mdzad pa'i/ /sa de don dam 'dzin pa ni/ /nye bar brtags par chub par 'gyur/ /zhes bya ba dang / de bzhin du/ ming dang gzugs la brten nas ni/ /mig gi rnam shes 'dir skye yang / / gzugs ni mig la brten ma yin/ /gzugs ni mig las 'pho ba'ang min/ /bdag med mi sdug chos 'di dag/ slar yang bdag dang sdug ces brtags/ /med la log par brtags pa ste/ /de las mig gi rnam shes 'byung / /rnam shes 'gag dang 'byung ba las/ /rnam shes zad dang 'phel bar 'thong //'gar yang 'gro 'ong med stong dang / /sgyu 'drar rnal 'byor pa yis mthong / /zhes gsungs so/ /de bzhin du 'phags pa nye ba 'khor gyis zhus pa las kyang / mig ni thams cad ldan na mthong 'gyur te/ /mig gis gzugs rnams mthong ba gang yin pa'ang / / mtshan mo rkyen rnams med na mthong mi 'gyur/ /de phyir ldan dang bral ba rnam rtog yin/ /mig ni snang la brten te yid 'ong dang / /yid du mi 'ong sna tshogs gzugs mthong bas/ /de ltar snang la brten te mthong bas na/ /de phyir mig gis nam yang mthong ba med/ /yid du 'ong ba'i sgra grag gang yin pa//de yang nam yang nang du zhugs pa med/ /der 'gro dmigs su yod pa ma yin te/ /rtog pa'i dbang gis sgra rnams 'byung ba yin/ /zhes gsungs so/ /de bzhin du/ glu dang gar dang rol mo'i sgra yang gzung bya min/ /rmi lam lta bu mi mkhas rmongs dang chags pa'i rgyu//mi mkhas kun du rtog la zhen rnams brlag 'gyur zhing / /skye bo byis pa nyon mongs bran bzhin bdag gyur tam/ /zhes gsungs so/ /slob dpon zla ba grags pa'i zhal snga nas sbyar ba'i tshig gsal ba las/ dbang po brtag pa zhes bya ba rab tu byed pa gsum pa'i 'grel pa'o// //'dir smras pa/ gal te de ltar dbang po rnams med na/ /phung po lnga ma bkag pa'i phyir dang / dbang po rnams kyang de'i khongs su 'dus pa de'i phyir de rnams kyang yod par 'gyur ro/ /brjod par bya ste/ gal te phung po rnams yod na de ltar 'gyur ba zhig na de rnams ni med do//de la gzugs kyi phung po'i dbang du mdzad nas bshad pa/ gzugs kyi rgyu ni ma gtogs par/ /gzugs ni dmigs par mi 'gyur ro/ /gzugs zhes bya ba ma gtogs par/ /gzugs kyi rgyu yang mi snang ngo / /de la gzugs ni 'byung ba las gyur pa'o/ /de'i rgyu ni 'byung ba chen po bzhi'o//de dag las tha dad cing gzhan du gyur pa 'byung ba las gyur pa'i gzugs ni bum pa las snam bu ltar dmigs par mi 'gyur ro/ /gzugs zhes bya ba ma gtogs par te/ gzugs las gzhan du gyur pa'i gzugs kyi rgyu yang dmigs par mi 'gyur ro/ / dam bca' ba 'di gnyis sgrub par bzhed nas bshad pa/ gzugs kyi rgyu ni ma gtogs par/ /gzugs na gzugs ni rgyu med par/ /thal bar 'gyur te don gang yang / /rgyu med pa ni gang na'ang med/ /ji ltar bum pa las don gzhan du gyur pa'i snam bu bum pa'i rgyu can ma yin pa de bzhin du/gzugs kyi rgyu 'byung ba chen po las tha dad par gyur pa 'byung ba las gyur pa'i gzugs 'dod na yang 'byung ba'i rgyu can du mi 'gyur te/ /rgyu med pa can du 'gyur na/ don gang zhig rgyu med pa ni gang na yang yod pa ma yin no/ /de'i phyir rgyu med par thal bar 'gyur ba'i phyir na gzugs kyi rgyu las ma gtogs pa'i gzugs khas blang bar bya ba ma yin no//de ni gzugs las ma gtogs par gzugs kyi rgyu yang ji ltar med pa de ltar bstan pa'i phyir bshad pa/ /gal te gzugs ni ma gtogs par/ /gzugs kyi rgyu zhig yod na ni/ /'bras bu med pa'i rgyur 'gyur te//gal te 'bras bu'i gzugs ma gtogs pa'i gzugs kyi rgyu zhig yod par gyur na ni de'i tshe ji ltar snam bu las tha dad par grub pa'i 'khar gzhong snam bu'i rgyu can ma yin pa de bzhin du 'bras bu las tha dad par 'dod pa'i rgyu yang rgyu med par 'gyur ro/ /rgyu rgyu nyid du bya ba'i rgyu ni 'bras bu 'jug pa yin na//tha dad par grub pa nyid kyi phyir 'bras bu la mi ltos pa'i rgyu las ni 'bras bu 'jug pa yod pa ma yin no/ /'bras bu med pa'i rgyu gang yin pa de ni rgyu med pa can yin pa'i phyir nam mkha'i me tog ltar med pa nyid yin no zhes bshad pa ni/ 'bras bu med pa'i rgyu med do//zhes bya ba'o/ /gzhan yang gzugs kyi rgyu 'di 'dod pa na/ gzugs yod pa na rgyu nyid du 'dod dam/ /med pa na 'dod grang na/ gnyi ga ltar yang mi 'thad do zhes bshad pa/ gzugs yod na yang gzugs kyi ni/ /rgyu yang 'thad par mi 'gyur nyid//gzugs med na yang gzugs kyi ni/ /rgyu yang 'thad par mi 'gyur nyid/ /de la gzugs yod pa na ste bdog pa na ni gzugs kyi rgyus dgos pa ci zhig yod/ med na yang ste gzugs yod pa ma yin na yang gzugs kyi rgyus dgos pa ci zhig yod/ yang na de gang gi rgyu yin par brtag/de'i phyir gzugs med na yang gzugs kyi rgyu ni 'thad par mi 'gyur ro/ /ci ste gal te yang de ltar gzugs kyi rgyu mi srid mod kyi de lta na yang 'bras bu'i gzugs ni yod la/ de yod pa las rgyu yang yod par 'gyur ro snyam na/ gal te 'bras bu'i gzugs yod na de ltar 'gyur na/yod pa yang ma yin te/ gang gi phyir/ rgyu med pa yi gzugs dag ni/ /'thad par mi rung rung min nyid/ /gzugs kyi rgyu ni ji ltar med pa de ltar bshad zin to/ /rgyu med na ni 'bras bu'i gzugs rgyu med pa ga la yod/ mi rung rung min nyid ces bya ba nges par gzung ba dang bcas pa'i dgag pa gnyis po 'dis ni rgyu med par smra ba po shin tu tha chad yin par ston par mdzad pa'o//gang gi phyir/ de ltar gzugs rnam par dpyad pa na rnam pa thams cad du med pa de'i phyir rnal 'byor pa de kho na nyid gzigs pas/ gzugs kyi rnam par rtog pa ni//'ga' yang rnam par brtag mi bya/ /thogs pa dang bcas pa dang thogs pa med pa dang / bstan du yod pa dang bstan du med pa dang / 'das pa dang ma 'ongs pa dang / sngon po dang ser po la sogs pa'i rnam par rtog pa gzugs la dmigs pa 'ga' yang brtag par mi 'os so zhes bya ba'i don to//gzhan yang 'di gzugs kyi rgyur 'dod pa na/ 'bras bu 'dra ba'am mi 'dra ba zhig sgrub par byed grang / gnyi ga ltar yang mi 'thad do zhes bshad pa/ 'bras bu rgyu dang 'dra ba zhes/ /bya ba 'thad pa ma yin te/ /'bras bu rgyu dang mi 'dra zhes/ / bya ba'ang 'thad pa ma yin no/ /de la gzugs kyi rgyu ni sra ba dang gsher ba dang dro ba dang g.yo ba'i ngo bo yin la/ 'byung ba las gyur pa nang gi bdag nyid mig la sogs pa ni mig gi rnam par shes pa la sogs pa'i rten gzugs dang ba'i bdag nyid can yin zhing / phyi rol gzugs la sogs pa'i skye mched ni mig gi rnam par shes pa la sogs pas gzung bar bya ba'i mtshan nyid can yin gyi/'byung ba chen po'i rang bzhin can ma yin pa de'i phyir mtshan nyid can tha dad pas mya ngan las 'das pa bzhin du rgyu dang 'bras bu gnyis la 'dra ba nyid yod pa ma yin te/ de'i phyir 'bras bu rgyu dang 'dra ba zhes bya ba 'thad pa ma yin no//sA lu'i sa bon la sogs pa 'dra bar gyur pa rnams la phan tshun rgyu dang 'bras bu'i dngos po ma mthong ste/ 'di'i phyir yang / 'bras bu rgyu dang 'dra ba zhes bya ba 'thad pa ma yin no/ /'bras bu rgyu dang mi 'dra ba zhes bya ba yang 'thad pa ma yin te/ mtshan nyid tha dad pa'i phyir mya ngan las 'das pa bzhin no zhes bya bar dgongs pa'o/ /ji ltar gzugs 'di rnam par dpyad pa na rnam pa thams cad du mi 'thad pa de bzhin du tshor ba la sogs pa yang yin no zhes bya bar bsgre ba'i phyir bshad pa/ tshor dang 'du shes 'du byed dang / /sems dang dngos po thams cad kyang //rnam pa dag ni thams cad du/ /gzugs nyid kyi ni rim pa mtshungs/ /tshor ba la sogs thams cad kyang gzugs rnam par dpyad pa dang mtshungs par sbyar bar bya'o/ /dbu ma pas ni ji ltar chos gcig stong pa nyid du bstan par 'dod pa de bzhin du chos thams cad kyang yin pa de'i phyir/stong pa nyid kyis brtsad byas tshe/ /gang zhig lan 'debs smra byed pa/ /de yi thams cad lan btab min/ /bsgrub par bya dang mtshungs par 'gyur/ /de la brtsad pa ni gzhan gyi phyogs sun 'byin pa'o/ /stong pa nyid rgyur gyur pas gzugs rang bzhin med do zhes bya bas de ltar rang bzhin dang bcas par smra ba bkag pa na/gal te gzhan lan du tshor ba la sogs pa ni re zhig yod la/ de bzhin du gzugs kyang yod do zhes smra na/ de'i de lta bu de thams cad ni lan btab pa ma yin te/ gang gi phyir tshor ba la sogs pa rnams kyi yod pa yang bsgrub bya gzugs kyi yod pa dang mtshungs par rig par bya'o//ji ltar gzugs ni rang gi rgyu las de nyid dang gzhan nyid du rnam par dpyad pa na med pa de bzhin du/ reg pa'i rkyen gyis tshor ba dang / rnam par shes pa dang lhan cig 'byung ba'i 'du shes dang / ma rig pa'i rkyen gyis 'du byed dang / 'du byed kyi rkyen gyis rnam par shes pa yang / reg pa la sogs pa rang gi rgyu las de nyid dang gzhan nyid du rnam par dpyad na/ yod pa ma yin pas 'di dag thams cad bsgrub par bya ba dang mtshungs pa yin no/ /ji ltar tshor ba la sogs pa dag bsgrub par bya ba dang mtshungs pa de bzhin du mtshan nyid dang /mtshan gzhi dang / rgyu dang 'bras bu dang / yan lag dang yan lag can la sogs pa dngos po thams cad kyang bsgrub par bya ba gzugs dang mtshungs pa yin no/ /de'i phyir gzhan gyis lan gdab pa lta yod par ga la 'gyur te 'di'i tshig thams cad bsgrub par bya ba dang mtshungs par 'gyur bas/bstan bcos su smras pa'i lan thams cad la dbu ma pas bsgrub par bya ba dang mtshungs pa nyid brjod par bya'o zhes slob dpon slob par mdzad do/ /ji ltar gzhan gyi phyogs sun 'byin pa la tshul 'di brjod pa de bzhin du bshad pa byed pa'i tshe na yang yin no zhes bshad pa/stong pa nyid kyis bshad byas tshe/ /gang zhig skyon 'dogs smra byed pa/ /de yis thams cad skyon btags min/ /bsgrub par bya dang mtshungs par 'gyur/ /bshad pa byed pa'i dus su yang slob ma lta bu gang zhig rgol bar byed pa de'i tshe brgal ba de yang snga ma bzhin du bsgrub par bya ba dang mtshungs par rig par bya'o//ji skad du/ dngos po gcig gi lta po gang / /de ni kun gyi lta por brjod/ /gcig gi stong nyid gang yin pa/ /de ni kun gyi stong pa nyid/ /ces gsungs pa lta bu'o/ /'phags pa nam mkha' mdzod kyi ting nge 'dzin gyi mdo las kyang //chos gcig gis ni chos rnams thams cad sgyu ma dang / /smig rgyu dang 'dra gzung byar med cing gsog dang ni/ /brdzun zhing ther zug min par rjes su rtogs gyur pa/ /de ni ring por mi thogs byang chub snying por 'gro/ /zhes gsungs so/ / de bzhin du ting nge 'dzin gyi rgyal po'i mdo las kyang / ji ltar khyod kyis bdag gi 'du shes ni/ /shes pa de bzhin kun la blos sbyar bya/ /chos rnams thams cad de yi ngo bo nyid/ /rnam par dag pa nam mkha' lta bu yin/ /gcig gis kyang ni thams cad shes/ /gcig gis kyang ni thams cad mthong //ji snyed mang po bshad byas kyang / /de la dregs pa skye ba med/ /ces gsungs so/ /slob dpon zla ba grags pa'i zhal snga nas sbyar ba'i tshig gsal ba las/ phung po brtag pa zhes bya ba rab tu byed pa bzhi pa'i 'grel pa'o// //'dir smras pa/ khams rnams ni yod de/bkag pa ma byas pa'i phyir ro/ /bcom ldan 'das kyis kyang / rgyal po chen po skyes bu gang zag 'di ni khams drug pa'o zhes bya ba la sogs pa gsungs so/ /de'i phyir gsung rab 'don pa las na khams bzhin du phung po dang skye mched kyang yod do/ /brjod par bya ste/gal te khams rnams nyid yod na phung po dang skye mched rnams yod par 'gyur na de dag ni med do/ /ji ltar zhe na bshad pa/ nam mkha'i mtshan nyid snga rol na/ /nam mkha' cung zad yod ma yin/ /gal te mtshan las sngar gyur na/ /mtshan nyid med par thal bar 'gyur/ /de la khams drug gsungs pa ni//sa dang / chu dang / me dang / rlung dang / nam mkha' dang / rnam par shes pa zhes bya ba rnams so/ /de la nam mkha'i dbang du byas nas sun dbyung ba brjod par bya ste/ 'dir nam mkha'i mtshan nyid ni sgrib pa med pa zhes bya la/ gal te sgrib pa med pa'i mtshan nyid 'di las sngar mtshan gzhi nam mkha' yod par gyur na/de la mtshan nyid 'jug par 'gyur na/ mtshan nyid sgrib pa med pa'i snga rol du nam mkha' yod pa yang ma yin no/ /gang gi tshe de ltar/ nam mkha'i mtshan nyid snga rol na/ /nam mkha' cung zad yod ma yin pa de'i tshe gang du mtshan nyid 'jug par 'gyur/de med na nam mkha'i me tog ltar nam mkha' med do zhes bshad pa/ gal te mtshan las sngar gyur na/ /mtshan nyid med par thal bar 'gyur/ /mtshan nyid med pa'i dngos po ni/ /'ga' yang gang na'ang yod ma yin/ /'dir smras pa/ re zhig mtshan nyid 'jug pa ni yod la/ /de yang mtshan gzhi la yin pas/ /de yod pas na mtshan gzhi yang yod do/ /'di yang yod pa ma yin te/ 'di ltar/ mtshan nyid med pa'i dngos med na/ /mtshan nyid gang du 'jug par 'gyur/ /mtshan nyid kyi snga rol na mtshan nyid med pa'i dngos po med do zhes bshad zin to//de'i phyir mtshan nyid med pa'i dngos po med cing mi bdog na/ da ni mtshan nyid gang du 'jug par 'gyur te/ des na mtshan nyid 'jug pa med do/ /gzhan yang / mtshan nyid la 'jug pa na mtshan nyid dang bcas pa'am/ mtshan nyid med pa la 'jug par 'gyur ba zhig na/gnyi ga ltar yang mi 'thad do zhes bshad pa/ mtshan nyid med la mtshan nyid ni/ /mi 'jug mtshan nyid bcas la min/ /mtshan bcas mtshan nyid med pa las/ /gzhan la'ang 'jug par mi 'gyur ro/ /de la mtshan nyid med pa la ni mtshan nyid 'jug pa ma yin te/bong bu'i rwa la bya ba bzhin no/ /mtshan nyid dang bcas pa'i dngos po la yang mtshan nyid 'jug pa mi 'thad de dgos pa med pa'i phyir ro/ /mtshan nyid dang ldan par grub pa la slar yang mtshan nyid dang ldan pas bya ba ci yod na / de ltar na thug pa med par thal bar yang 'gyur ro//'di ni nam yang mtshan nyid dang bcas pa ma yin par mi 'gyur bas/ rtag tu mtshan nyid 'jug par thal bar 'gyur na/ de ltar ni 'dod pa yang ma yin no/ /de'i phyir mtshan nyid dang bcas pa'i dngos po la yang mtshan nyid 'jug par 'thad pa ma yin te/ dgos pa med pa'i phyir ro//de la 'di snyam du mtshan nyid dang bcas pa dang mtshan nyid med pa gnyis las gzhan pa zhig la 'jug par 'dod par 'gyur ro snyam na/ brjod par bya ste/ mtshan bcas mtshan nyid med pa las/ /gzhan la'ang 'jug par mi 'gyur ro/ /ci'i phyir zhe na/ mi srid pa'i phyir ro//gal te mtshan nyid dang bcas pa yin na ni/ mtshan nyid med pa ma yin no/ /de ste mtshan nyid med pa yin na ni mtshan nyid dang bcas pa ma yin te/ de'i phyir mtshan nyid dang bcas pa yang yin la/ mtshan nyid med pa yang yin no zhes bya ba 'di ni 'gal ba yin na/ 'gal ba dag ni srid pa yang ma yin no//de'i phyir mi srid pas mtshan nyid dang bcas pa yang yin la/ mtshan nyid med pa yang yin pa la mtshan nyid 'jug pa mi 'thad do/ /ci ste yang gal te mtshan nyid 'jug pa med pa de ltar na yang mtshan gzhi yod do snyam na/ 'di yang yod pa ma yin te/ gang gi phyir/ mtshan nyid 'jug pa ma yin na/ /mtshan gzhi 'thad par mi 'gyur ro/ /gang gi tshe mtshan nyid 'jug pa nyid med pa de'i tshe ji ltar mtshan gzhir 'gyur te/ yod pa ma yin pa nyid do snyam du dgongs pa'o/ /'dir smras pa/ khyod kyis 'jug pa bkag pa yin gyi mtshan nyid ni ma yin te/de'i phyir mtshan nyid yod pas mtshan gzhi yang yod pa yin no/ /brjod par bya ste/ mtshan gzhi 'thad pa ma yin na/ /mtshan nyid kyang ni yod ma yin/ /zhes bya ba'o/ /mtshan nyid 'jug pa ma yin na/ /mtshan gzhi 'thad par mi 'gyur ro/ / zhes bstan pa de'i tshe/ mtshan gzhi 'thad pa ma yin dang / /mtshan nyid kyang yod pa ma yin te rten med pa'i phyir ro/ /gang gi tshe de ltar mtshan nyid yod pa ma yin pa de'i tshe/ mtshan nyid yod pa'i phyir mtshan gzhi yang yod do zhes gang smras pa de med do/ /gang gi phyir 'di de ltar yin pa/de'i phyir mtshan gzhi yod min te/ /mtshan nyid yod pa nyid ma yin/ /zhes mjug bsdus pa yin no/ /'dir smras pa/ gal te yang mtshan nyid dang mtshan gzhi dag med pa de lta na yang dngos po'i rang bzhin gyi nam mkha' yod pa yin la/ nam mkha' dngos po'i rang bzhin can du gyur na ni mtshan gzhi'am mtshan nyid du yang 'gyur te/de'i phyir mtshan gzhi dang mtshan nyid dag kyang yod do/ /'di yang mi rigs so zhes bshad pa/ /mtshan gzhi mtshan nyid ma gtogs pa'i/ /dngos po yang ni yod ma yin/ /mtshan gzhi dang mtshan nyid dag ji ltar med pa de ltar ni gong du bshad zin to//gang gi tshe 'di dag med pa de'i tshe mtshan gzhi dang mtshan nyid dang bral ba'i phyir nam mkha'i me tog ltar nam mkha' med do/ /gal te nam mkha' dngos por gyur pa med na/ 'o na dngos po med pa yod par 'gyur ro zhe na/ 'di yang yod pa ma yin te/'di ltar/ dngos po yod pa ma yin na/ /dngos med gang gi yin par 'gyur/ /gang gi tshe nam mkha' dngos po ma yin pa de'i tshe dngos po yod pa ma yin na/ dngos po med pa gang gi yin par brtag par bya ste/ gal te dngos po ma grub na/ /dngos po med pa 'grub mi 'gyur//dngos po gzhan du gyur pa la/ /dngos po med ces skye bo smra/ zhes 'chad par 'gyur ro/ /de'i phyir dngos po med pas nam mkha' dngos po med pa yang med do/ /nam mkha' dngos po zhes bya ba ni gzugs med pa la rnam par gzhag ste/ /de'i phyir gal te gzugs yod na ni de'i tshe gzugs med pa la nam mkha' zhes bya bar 'gyur na/gang gi tshe ji skad bshad pa rigs pas gzugs nyid yod pa ma yin pa de'i tshe gang gi dngos po med pa nam mkhar 'gyur/ 'dir de dag ni yongs su rtogs par byed pa po yod pa'i phyir/ dngos po dang dngos po med pa gnyis ni yod pa nyid yin la/gang zhig 'di skad du/ dngos po yod pa ma yin na/ /dngos med gang gi yin par 'gyur/ /zhes smra ba dngos po dang dngos po med pa dag gi yongs su rtog par byed pa khyod yod pa yang yin te/ de'i phyir dngos po dang dngos po med par rtog par byed pa khyod yod pas brtag bya dngos po dang dngos po med pa gnyis kyang yod pa yin no zhes smra'o//brjod pa 'di yang mi rung ste/ /gang gi phyir/ dngos dang dngos med mi mthun chos/ /gang gis dngos dang dngos med shes/ /gal te de gnyis kyi rtog par byed pa po yod na ni/dngos po dang dngos po med pa dag tu yang 'gyur na/ yod pa yang ma yin no/ /yod na yongs su rtog par byed pa gang yin pa de dngos po 'am dngos po med pa zhig tu 'gyur grang / gal te dngos po yin par 'dod na ni/ mtshan gzhi mtshan nyid ma gtogs pa'i/ /dngos po yang ni yod ma yin//zhes 'di'i sun 'byin pa bstan zin to/ /'on te/ dngos po med pa yin na ni/ /dngos po yod pa ma yin na/ /dngos med gang gi yin par 'gyur/ /zhes bya ba der sun 'byin pa bshad zin to/ /gang zhig 'di gnyis kyi rtog par byed par 'gyur ba/ dngos po med pa dang chos mi mthun pa gsum pa 'ga' zhig yod pa yang ma yin te/de'i phyir dngos po dang dngos po med pa dag gi yongs su rtog par byed pa med do/ /de nyid kyi phyir/ bcom ldan 'das kyis kyang / gang gis dngos rnams dngos med shes pa de/ /nam yang dngos po kun la chags mi 'gyur//gang zhig nam yang dngos kun chags med pa/ /de ni ting 'dzin mtshan ma med la reg/ ces bya ba dang / de bzhin du/ gang dag chos rnams stong la sems byed pa'i/ /byis pa de dag lam ngan zhugs pa yin/ /chos rnams stong pa yi ges brjod pa yin/ / de dag yi ge med par yi ges bstan/ /gang dag zhi zhing rab zhi'i chos sems pa'i/ /sems dpa' de yang nam yang byung ma yin/ /spros kun sems kyi rnam par rtog yin te/ /de'i phyir chos rnams bsam yas rtogs par gyis/ /zhes bya ba la sogs pa gsungs so/ /da ni ji ltar bstan pa de ltar mjug bsdu ba'i phyir/de phyir nam mkha'i dngos po min/ /dngos med ma yin mtshan gzhi min/ /mtshan nyid ma yin zhes bya ba gsungs so/ /nam mkha' ji lta ba de bzhin du khams lnga po gzhan gang dag kyang nam mkha' mtshungs/ sa la sogs pa'i khams lnga po gzhan gang dag lhag mar gyur pa de dag kyang nam mkha' ltar dngos po dang dngos po med pa dang mtshan gzhi dang /mtshan nyid dang bral bar shes par bya'o zhes bya ba'i tha tshig go/ de'i phyir dngos po rnams kyi rang bzhin de ltar rnam par gnas pa yin dang / ma rig pa'i rab rib kyis blo gros kyi mig nyams par gyur pa nyid kyis 'khor ba thog ma med pa nas dngos po dang dngos po med pa la sogs pa phyin ci log tu lta ba goms pa rang bzhin med pa phyin ci ma log par mthong ba'i lam mya ngan las 'das pa dang mthun par 'gro ba las nyams pa/blo chung gang dag dngos rnams la//yod pa nyid dang med nyid du/ /lta ba de ni blta bya ba/ /nye bar zhi ba zhi mi mthong / /blo zhan pa nyid kyis yod pa nyid dang med pa nyid du mngon par zhen pa de dag gis mya ngan las 'das pa blta bar bya ba nye bar zhi zhing zhi ba'i mtshan nyid rtog pa thams cad dang bral ba/ shes pa dang shes bya log pa'i ngo bo don dam pa/stong pa nyid kyi rang bzhin can mi mthong ngo / /ji skad du/ rin po che'i phreng ba las/ med pa pa ni ngan 'gror 'gro/ /yod pa pa ni bde 'gror 'gro/ /yang dag ji bzhin yongs shes phyir/ /gnyis la mi brten thar par 'gyur//zhes bshad do/ /mdo las kyang bcom ldan 'das kyis/ yod dang med ces bya ba gnyi ga mtha'/ /dag dang ma dag 'di yang mtha' yin no/ /de'i phyir gnyi ga'i mtha' ni rnam spangs nas/ /mkhas pas dbus la'ang gnas par yong mi byed/ /yod dang med ces bya ba rtsod pa ste//dag dang ma dag 'di yang rtsod pa yin/ /rtsod par gyur pa sdug bsngal zhi mi 'gyur/ /rtsod pa med par 'gyur ba sdug bsngal 'gag /ces gsungs so/ /de'i phyir 'khor ba'i lam gyis mya ngan las 'das pa dam pa 'thob pa zhes bya ba gang yin pa ni srid pa ma yin no/ / slob dpon zla ba grags pa'i zhal snga nas sbyar ba'i tshig gsal ba las/ khams brtag pa zhes bya ba rab tu byed pa lnga pa'i 'grel pa'o// //'dir smras pa/ phung po dang khams dang skye mched rnams ni yod pa nyid de/ de'i rten can kun nas nyon mongs pa dmigs pa'i phyir ro//'di na gang yod pa ma yin pa de'i rten can gyi kun nas nyon mongs pa ni dmigs pa med de/ dper na mo gsham gyi bu dang mo gsham gyi bu mo'i kun nas nyon mongs pa bzhin no/ /'dod chags la sogs pa'i kun nas nyon mongs pa'i rgyu dag ni yod pa yin te/ ji skad du/ bcom ldan 'das kyis dge slong dag byis pa so so'i skye bo thos pa dang mi ldan pa rtag par lhung ba mig gi gzugs rnams mthong nas yid bde ba'i gnas su mngon par zhen par 'gyur ro/ /de mngon par zhen par gyur nas 'dod chags skyed par byed do/ /chags par gyur nas lus dang ngag dang yid kyi 'dod chags las byung ba'i las mngon par 'du byed par 'gyur ro//zhes rgya cher gsungs so/ /brjod par bya ste/ gal te 'dod chags la sogs pa dag nyid yod na/ phung po dang khams dang skye mched rnams yod par 'gyur na/ yod pa ni ma yin te/ 'dir 'dod chags 'di yongs su brtags pa na/chags pa yod pa'am/ med pa na rtog pa zhig na/ gnyi ga ltar yang mi rung ngo zhes bshad pa/ gal te 'dod chags snga rol na/ /'dod chags med pa'i chags yod na/ /de la brten nas 'dod chags yod/ /chags yod 'dod chags yod par 'gyur/ / 'dod chags dang / chags zhen dang / lhag par zhen pa dang / phrad zhen dang / mngon par zhen pa zhes bya ba dag ni rnam grangs so/ /chags pa ni 'dod chags kyi rten yin te/ gal te 'dod chags kyi snga rol na/ 'dod chags med pa ste/ 'dod chags dang bral ba zhig yod par gyur na ni/'dod chags dang bral ba'i chags pa de la brten nas 'dod chags yod par 'gyur ro/ /de lta na ni chags pa yod na 'dod chags yod do zhes bya ba rigs par 'gyur na/ 'dod chags dang bral yang chags pa yin par 'gyur ba gang yin pa de lta bu ni med de/ dgra bcom pa dag la yang chags pa yod par thal bar 'gyur ba'i phyir ro//gal te de ltar chags pa yod pa na 'dod chags med na/ 'o na chags pa med pa yin no zhe na/ 'di yang rigs pa ma yin no zhes bshad pa/ chags pa yod par ma gyur na'ang / /'dod chags yod par ga la 'gyur//gang gi tshe chags pa yod pa na 'dod chags yod pa ma yin pa de'i tshe/ ji ltar chags pa yod par ma gyur pa na/ rten med pa'i 'dod chags grub par ga la 'gyur te/ shing thog med par de'i smin pa nyid yod pa ni ma yin no/ /'dir smras pa/ gal te yang khyod kyis 'dod chags bkag mod kyi/de lta na yang chags pa ni yod pa yin te/ ma bkag pa'i phyir ro/ /chags pa yang 'dod chags med par ni mi rigs te de'i phyir 'di yang yod do/ /brjod par bya ste/ gal te chags pa yod na 'dod chags yod par 'gyur ba zhig na/ yod pa ni ma yin te/ 'di ltar chags pa 'di 'dod pa na/ 'dod chags yod pa'ang med pa na rtog grang na/ gnyi ga ltar yang 'thad pa ma yin no zhes bshad pa/ chags pa la yang 'dod chags ni/ /yod dam med kyang rim pa mtshungs/ /de la gal te 'dod chags yod pa na chags pa yod par rtog par byed na ni/de lta na yang / gal te chags pa'i snga rol na/ /chags med 'dod chags yod na ni/ /zhes bya ba la sogs pas chags pa la yang bshad ma thag pa 'dod chags mi 'thad pa'i rim pa 'di nyid mtshungs so/ /ci ste 'dod chags med par chags pa 'dod na ni/'di yang mi rigs te/ 'di ltar 'dod chags yod par ma gyur na'ang / /chags pa yod par ga la 'gyur/ /de'i phyir chags pa yang med do/ /'dod chags dang chags pa med pa'i phyir na phung po la sogs pa dag kyang med do/ /'dir smras pa/ gang las skyon 'dir 'gyur ba 'dod chags dang chags pa dag snga phyir 'byung ba ni ma yin pa nyid do //'o na ci zhe na/ 'dod chags dang chags pa dag ni lhan cig kho nar 'byung ste/ sems dang lhan cig 'byung ba'i 'dod chags kyis/ sems chags par byas la/ de la chags pa yin te/ de'i phyir 'dod chags dang chags pa dag yod do zhe na/brjod par bya ste/ de lta na yang / 'dod chags dang ni chags pa dag /lhan cig nyid du skye mi rigs/ /'dod chags dang chags pa gnyis lhan cig skye ba yang mi rigs te/ gang gi phyir/ 'di ltar 'dod chags chags pa dag /phan tshun ltos pa med par 'gyur/ /lhan cig 'byung ba'i phyir ba lang gi rwa g.yas g.yon bzhin no snyam du dgongs pa'o/ /gzhan yang 'dod chags dang chags pa 'di dag lhan cig pa nyid du gcig nyid dam/ tha dad pa zhig la rtog grang / de la gal te gcig nyid la yin na ni de mi rung ngo //gang gi phyir/ gcig nyid lhan cig nyid med de/ yang ci'i phyir med ce na/ de nyid de dang lhan cig min/ /'di ltar 'dod chags kyi rang gi bdag nyid 'dod chags las tha mi dad pa ni 'dod chags dang lhan cig pa yin no zhes brjod pa ma yin no/ / da ni tha dad pa nyid la yang lhan cig pa nyid med par bshad pa/ ci ste tha dad nyid med na/ /lhan cig tu ni ji ltar 'gyur/ /snang ba dang mun pa'am 'khor ba dang mya ngan las 'das pa tha dad par gyur pa dag la ni lhan cig pa nyid ma mthong ngo / /gzhan yang / gal te gcig pu lhan cig na//grogs med par yang der 'gyur ro/ /gal te tha dad lhan cig na/ /grogs med par yang der 'gyur ro/ /gal te gcig nyid la lhan cig pa nyid du 'gyur na ni/ de'i tshe gang dang gang na gcig nyid yod pa de dang de na lhan cig pa nyid yod do zhes bya bas gcig pu zhig la yang lhan cig pa nyid yod par 'gyur ro//tha dad pa nyid la lhan cig pa nyid 'dod na yang / gang dang gang na tha dad pa nyid yod pa de dang de na lhan cig pa nyid yod do zhes bya bas ba lang rta la sogs pa las tha dad cing so sor gnas pa grogs med pa la yang lhan cig pa nyid yang yod par 'gyur ro//gzhan yang / gal te tha dad lhan cig na/ /ci go 'dod chags chags pa dag /tha dad nyid du 'grub 'gyur ram/ /de nas de gnyis lhan cig 'gyur/ /gal te yang 'dod chags dang chags pa dag tha dad pa nyid la lhan cig pa nyid du rtog na ni/ ci 'di gnyis tha dad pa nyid du grub bam/gang las de dag lhan cig pa nyid du 'gyur ba/ ci go 'dod chags chags pa la mi ltos pa'am/ chags pa yang 'dod chags la mi ltos pa zhes bya bar grub bam/ 'di ltar tha dad par grub pa'i ba lang dang rta dag kho na la lhan cig pa nyid du mthong ba lta bu yin na/'dod chags dang chags pa dag ni de ltar tha dad par grub pa ma yin pas 'di gnyis la lhan cig pa nyid med do/ /ci ste yang tha dad par ma grub pa dag la lhan cig pa nyid med pa'i phyir/ gal te 'dod chags chags pa dag/ tha dad nyid du grub gyur na ste khyod rtog par 'gyur na da ni cung zad kyang mi byed pa'i lhan cig pa nyid brtags pas ci zhig bya zhes bshad pa/de dag lhan cig nyid du ni/ /ci yi phyir na yongs su rtog/ 'dod chags dang chags pa dag grub par bya ba'i phyir lhan cig pa nyid rtog par byed la/ de yang tha dad par ma grub pa dag la yod pa ma yin pas tha dad par grub par khas len na ni/de ltar grub pa'i phyir 'di dag gi lhan cig pa nyid kyis ci zhig bya/ 'on te/ tha dad grub par ma gyur pas/ /de phyir lhan cig 'dod byed na ste/ /'dod chags dang chags pa dag tha dad par grub pa yod pa ma yin pa'i phyir/gal te 'di dag lhan cig pa nyid du 'dod na ni/ de yang tha dad par ma grub pa dag la yod pa ma yin pas/ lhan cig rab tu bsgrub pa'i phyir/ /tha dad nyid du yang 'dod dam/ /de ltar yin na ni/ grub pa phan tshun rten par gnas pa yin dang / de gang grub pas gang zhig grub par 'gyur te/gang gi phyir/ tha dad dngos por ma grub pas/ /lhan cig dngos po 'grub mi 'gyur/ /tha dad dngos po gang yod na/ /lhan cig dngos por 'dod par byed/ /tha dad pa'i dngos po gang zhig yod na/ lhan cig pa'i dngos po grub par 'gyur ba lhan cig pa'i dngos po la mi ltos pa tha dad pa'i dngos po de ni yod pa ma yin pa nyid do//de'i phyir mi srid par dgongs nas bshad pa/ tha dad dngos po gang yod na/ /lhan cig dngos por 'dod par byed/ /de'i phyir de ltar ji skad bshad pa'i rnam par dpyad pas gzhigs pas 'dod chags dang chags pa gnyis ma grub pa mjug bsdu ba'i phyir/de ltar 'dod chags chags pa dag /lhan cig lhan cig min mi 'grub/ /ces gsungs so/ /ji ltar 'dod chags dang chags pa dag snga phyir ma grub la/ lhan cig pa nyid du yang ma grub pa de bzhin du dngos po thams cad kyang yin no zhes bsgre ba'i phyir bshad pa//'dod chags bzhin du chos rnams kun/ /lhan cig lhan cig min mi 'grub/ /zhe sdang dang sdang ba dang / gti mug dang rmongs pa rnams la yang 'dod chags dang chags pa ltar ma grub par sbyar bar bya'o/ / de nyid kyi phyir bcom ldan 'das kyis/ gang 'dod chags pa dang / gang la 'dod chags pa dang / gang gis 'dod chags pa dang / gang zhe sdang ba dang gang la zhe sdang ba dang / gang gis zhe sdang ba dang / gang gti mug pa dang / gang la gti mug pa dang / gang gis gti mug par 'gyur ba'i chos de des yang dag par rjes su mi mthong zhing chos de mi dmigs so//des chos de yang dag par rjes su ma mthong zhing ma dmigs pas/ 'dod chags med pa zhe sdang med pa/ gti mug med pa sems phyin ci ma log pa/ mnyam par gzhag pa zhes bya'o//brgal ba pha rol tu phyin pa zhes bya'o/ /bde bar son pa zhes bya'o/ /mi 'jigs pa thob pa zhes bya ba nas zag pa zad pa zhes bya'o/ /nyon mongs pa med pa dbang dang ldan par gyur pa/ sems shin tu rnam par grol ba/ shes rab shin tu rnam par grol ba/ cang shes pa/glang po chen po/ bya ba byas pa/ byed pa byas pa/ khur bor ba/ bdag gi don rjes su thob pa/ srid par kun tu sbyor ba yongs su zad pa/ yang dag pa'i shes pas sems shin tu rnam par grol ba/ sems kyi dbang thams cad kyi dam pa'i pha rol tu phyin pa'i dge sbyong zhes bya'o zhes bya ba'i bar du rgya cher gsungs so//de bzhin du/ gang dag 'dod chags zhe sdang rgyags dang gti mug gi /ngo bo kun rtog gis bskyed log par zhugs shes nas/ /rnam par rtog par mi byed chags bral mi 'gyur ba'i/ /sgom pa de dag gnas ni dngos po thams cad yin//zhes gsungs so/ /slob dpon zla ba grags pa'i zhal snga nas sbyar ba'i tshig gsal ba las/ 'dod chags dang chags pa brtag pa zhes bya ba ste rab tu byed pa drug pa'i 'grel pa'o// //'dir smras pa/ phung po dang khams dang skye mched 'dus byas kyi rang bzhin can dag ni yod pa nyid de/de dag gi 'dus byas kyi mtshan nyid skye ba la sogs pa yod pa'i phyir ro/ /bcom ldan 'das kyis kyang dge slong dag gsum po 'di ni 'dus byas kyi mtshan nyid dag ste/ 'dus byas skye bar yang mngon/ 'jig par yang mngon te / gnas pa las gzhan du 'gyur bar yang mngon no zhes gsungs so/ /med pa la ni ri bong gi rwa ltar skye ba la sogs pa mtshan nyid yod pa ma yin no/ /de'i phyir 'dus byas kyi mtshan nyid nye bar bstan pa las phung po dang khams dang skye mched rnams yod pa nyid do/ /brjod par bya ste/ gal te khyod kyi lugs ltar skye ba la sogs pa'i mtshan nyid yod na ni/ phung po dang khams dang skye mched 'dus byas kyi rang bzhin can dag yod par 'gyur ba zhig na/ yod pa ni ma yin no/ /'dir skye ba ni 'dus byas kyi mtshan nyid du 'dod pa na/ 'dus byas zhig gam 'dus ma byas zhig de'i mtshan nyid du 'dod grang na/de la/ gal te skye ba 'dus byas na/ /de la mtshan nyid gsum ldan 'gyur/ /mtshan nyid gsum gyi tshogs ni mtshan nyid gsum mo/ /gal te skye ba 'dus byas su rtog na ni/ des na skye ba la yang mtshan nyid gsum yod par thal bar 'gyur te/skye ba dang gnas pa dang 'jig pa'i tshogs kyi rang bzhin 'di ni 'dus byas thams cad la mi 'khrul ba yin pa'i phyir ro/ /de'i phyir gzugs la sogs pa bzhin du skye bar mtshan gzhi nyid du 'gyur gyi/ 'dus byas kyi mtshan nyid du ni mi 'gyur ro//ci ste skye ba la mtshan nyid gsum mi 'dod na ni/ de'i tshe mtshan nyid gsum pa dang bral ba'i phyir de 'dus byas kyi mtshan nyid yin pa nyams par 'gyur te/ nam mkha' bzhin no zhes bshad pa ni/ ci ste skye ba 'dus ma byas/ /ji ltar 'dus byas mtshan nyid yin/ /zhes bya ba ste/ 'di ni 'dus byas kyi mtshan nyid ma yin no snyam du dgongs pa yin no / /gzhan yang / skye ba la sogs pa 'di dag 'dus byas kyi mtshan nyid du rtog pa na/ so so ba ste re re ba zhig gam/ 'dus pa ste lhan cig pa zhig mtshan nyid du rtog pa zhig na/ gnyi ga ltar yang mi rung ngo zhes bshad pa/ skye la sogs gsum so so yis/ /'dus byas mtshan nyid bya bar ni/ /nus min gcig la dus gcig tu/ /'dus pa yang ni ji ltar rung / /de la so so ba dag gis ni mtshan nyid bya bar mi rigs te/ gal te skye ba'i dus na gnas pa dang 'jig pa med na/ /de'i tshe nam mkha' ltar gnas pa dang 'jig pa dang bral ba la skye ba 'dus byas kyi mtshan nyid du 'thad pa ma yin pa nyid do//ci ste gnas pa'i dus na skye ba dang 'jig pa dag med na ni de'i tshe de dag dang bral ba la gnas pa yod par 'gyur na/ skye ba dang 'jig pa dang bral ba'i dngos po ni yod pa yin pas/ nam mkha'i me tog ltar med pa 'di la gnas pa yod par mi rigs so//gzhan yang gnas pa dang ldan pa ni phyis mi rtag pa nyid dang yang ldan par mi 'gyur te/ de dang 'gal ba'i chos dang ldan pa'i phyir ro/ /ci ste sngar rtag par gyur pa las phyis mi rtag par 'gyur ro snyam na/ /dngos po gcig rtag pa dang mi rtag pa dang ldan par ni mi rigs so//de'i phyir skye ba dang 'jig pa dang bral ba la gnas pa med do/ /de bzhin du 'jig pa'i dus na gnas pa dang skye ba med na/ de lta na yang skye ba med cing gnas pa dang bral ba 'di la 'jig pa yang yod pa ma yin te nam mkha'i me tog bzhin no//de ltar na re zhig skye ba la sogs pa gsum po so so ba dag gis mtshan nyid kyi bya ba nus pa ma yin no/ /nus pa ma yin pa ni mthu yod pa ma yin no zhes bya ba'i don to/ /da ni 'dus pa dag kyang mi rung ngo zhes bshad pa/ gcig la dus gcig tu/ 'dus pa yang ni ji ltar rung / / dngos po gcig pa dus gcig tu 'dod chags dang chags pa dang bral ba bzhin nam snang ba dang mun pa ltar phan tshun 'gal ba'i phyir mi rigs so snyam du dgongs pa yin no/ /skad cig gang kho na la dngos po skye bar 'gyur ba'i skad cig de kho na la gnas pa dang 'jig pa yin no zhes sems dang bcas pa su zhig gis rtogs par 'gyur te/de'i phyir skye ba la sogs pa 'dus pa rnams la yang 'dus byas kyi mtshan nyid kyi bya ba la mthu yod pa ma yin no/ /'dir/ gal te skye ba 'dus byas na/ /zhes gang brjod pa de la/ gal te skye ba la sogs pa rnams la mtshan nyid gsum yod par 'gyur zhing thal bar 'gyur na/de las nyes pa cir 'gyur la/ de ste 'dus ma byas pa yin pa de lta na yang nyes pa ci yod ce na/ brjod par bya ste/ skye dang gnas dang 'jig rnams la/ /'dus byas mtshan nyid gzhan zhig ni/ /gal te yod na thug med 'gyur/ /med na de dag 'dus byas min//gal te phyogs gnyi ga la yang nyes par brjod zin pa nyid ma yin nam/ de la zlos bu brjod pas ci zhig bya zhe na/ nyes pa brjod pa bden mod kyi/ de slob dpon gyis gsungs pa ni ma yin no/ /'o na ci zhe na/ 'grel pa mkhan gyis yin no/ /rnam par gcig tu na sngar dam bcas pa kho na skyon gzhan brjod pa'i sgo nas gsal bar bya ba'i phyir slob dpon gyis slar gsungs pa yin te/gal te skye ba dang gnas pa dang / 'jig pa rnams la skye ba la sogs pa 'dus byas kyi mtshan nyid gzhan 'dod na ni/ de'i tshe de dag la yang gzhan yin pas mtha' thug pa med pa'i skyon du 'gyur ro//thug pa med pa'i skyon du gyur na yang / gang la dus phyi mar gzhan du 'gyur ba/ snga ma ci zhig yod par 'gyur/ de'i phyir rnam par gzhag pa med pas skye ba la sogs pa rnams mi srid pa nyid do snyam du dgongs pa yin no/ / yang na sngar ni mi gtso bo yin pas skye ba kho na la sun 'byin pa brjod la/ da lta ni thun mong du yin no/ /med na de dag 'dus byas min/ /zhes bya ba 'di ni don go bar zad do/ /'dir mang pos bkur ba dag/ skye ba la sogs pa rnams la skye ba la sogs pa dag yod la/ thug pa med par thal bar yang mi 'gyur te/mtshan nyid dang mthun pa'i mtshan nyid rnams phan tshun sgrub par byed pa'i phyir ro/ /gang gi phyir 'dir / 'dus byas kyi chos dge ba'am nyon mongs pa can zhig skye ba na/ bdag nyid dang bco lnga skye bar 'gyur te/ chos de nyid dang / de'i skye ba dang /ldan pa dang / gnas pa dang / rga ba dang / mi rtag pa nyid dang / gal te chos de nyon mongs pa can zhig yin na ni/ de'i log pa'i rnam par grol ba dang / 'on te dge ba zhig yin na ni/ de'i yang dag pa'i rnam par grol ba dang / gal te nges par 'byung ba zhig yin na ni de'i nges par 'byung ba nyid dang /de ste nges par 'byung ba ma yin pa zhig yin na ni/ de'i nges par 'byung ba ma yin pa nyid de/ de ltar na 'di dag ni 'khor yin no/ /de nas gzhan skye ba'i skye ba nas/ nges par 'byung ba ma yin pa'i nges par 'byung ba ma yin pa nyid ces bya ba'i bar 'di dag ni 'khor gyi 'khor yin no//de dag rtsa ba'i skye ba gang yin pa des ni bdag nyid ma gtogs pa chos gzhan bcu bzhi skyed par byed la/ skye ba'i skye ba'i ming can mthun pa'i mtshan nyid du gyur pa'i skyes pas ni rtsa ba'i skye ba kho na skyed par byed do/ /de bzhin du/ nges par 'byung ba ma yin pa nyid kyis ni chos bcu bzhi nges par 'byung bar mi byed de/de dag gis mya ngan las 'das pa thob par mi byed do zhes bya ba'i don to/ /nges par 'byung ba ma yin pa'i nges par 'byung ba ma yin pa nyid kyis ni nges par 'byung ba ma yin pa de kho na nges par 'byung bar mi byed do zhes bya ba'i bar du yin no//de'i phyir de ltar skye ba la sogs pa rnams kyi thugs pa med pa spang ba'i phyir/ skye ba'i skye bas rtsa ba yi/ /skye ba 'ba' zhig skyed par byed/ /rtsa ba'i skye bas skyed ba yi/ /skye ba'ang skyed par byed pa yin/ /zhes smras so/ /skye ba ni rnam par gnyis te/ gcig ni rtsa ba'i skye ba'o//gzhan ni skye ba'i skye ba zhes bya ba ste/ skye ba'i skye ba ni skye ba'i skye ba'o zhes bya ba'i phyir ro/ /de la gang skye ba'i skye ba zhes bya ba'i skye ba des ni rtsa ba'i skye ba 'ba' zhig gi skyed par byed pa yin la/ de nas skye ba'i skye ba zhes bya'i skye ba de ni rtsa ba'i skye bas skyed par byed pa yin no/ / de'i phyir de ltar phan tshun sgrub par byed pa'i phyir skye ba la sogs pa rnams la mtshan nyid gsum po yod pa yin la/ thug pa med par thal bar yang mi 'gyur ro zhes smra ba'o / /'di la brjod par bya ste/ gal te khyod kyi skye ba'i skyes/ /rtsa ba'i skye ba skyed byed na/ /khyod kyi rtsa bas ma bskyed des/de ni ji ltar skyed par byed/ /gal te skye ba'i skye bas rtsa ba'i skye ba skyed par byed pa yin no zhes bya ba khyod kyi lugs yin na/ de ni rtsa ba'i skye bas ma bskyed par gyur pa'i skye ba'i skye ba des ji ltar rtsa ba skyed par byed pa yin/ ci ste rtsa ba'i skyes pas bskyed pa'i skye ba'i skye ba kho nas rtsa ba skyed par byed do snyam du sems na/'di yang yod pa ma yin no zhes bshad pa/ gal te khyod kyi rtsa ba yis/ /bskyed pa de yis rtsa bskyed na/ /des ma bskyed pa'i rtsa ba des/ /de ni ji ltar skyed par byed/ /gal te skye ba'i skye ba zhes bya ba'i skye ba rtsa bas bskyed pa des rtsa ba skyed par byed na/des ma bskyed cing yod pa ma yin pa'i rtsa ba'i skye ba des ji ltar skye ba'i skye ba skyed par 'gyur/ de'i phyir rtsa bas bskyed par ma gyur pa'i skye ba'i skye bas rtsa ba bskyed par 'gyur ro zhes bya ba mi rigs so/ /de'i phyir phan tshun sgrub par byed pa med pa'i phyir thug pa med par thal bar de nyid du 'gyur ro//de'i phyir skye ba med do/ /'dir smras pa/ rtsa ba'i skye ba skye bzhin pa nyid kyis skye ba'i skye ba skyed par byed la/ skye ba'i skye ba de nyid kyis rtsa ba'i skye ba skyed par 'gyur ro zhe na/ gal te/ de ma skyes pa de yis ni / /de skyed par ni byed nus na / / khyod kyi skye bzhin pa de yis/ /de bskyed par ni 'dod la rag /gal te rang nyid ma skyes pas ma skyes pa gzhan bskyed par nus na ni/ rtsa ba'i skye ba skye bzhin pa des skye ba'i skye ba bskyed par 'dod la rag pa zhig na/ skye bzhin pa zhes bya ba ni ma 'ongs pa yin la/ de yang ma skyes pa yin pas ji ltar gzhan skyed par 'gyur te/ 'di ni mi rigs so snyam du dgongs pa yin no / /skye ba'i skye ba la yang de bzhin du brjod par bya'o/ /'dir smras pa/ gang las thug pa med par thal bar 'gyur ba/ skye ba la ni skye ba gzhan yod pa ma yin te/'o na ci zhe na/ ji ltar mar mer rang dang gzhan/ /snang bar byed pa de bzhin du/ /skye ba'ang rang dang gzhan gyi dngos/ /gnyi ga skyed par byed pa yin/ /ji ltar mar me snang ba'i rang bzhin yin pa'i phyir/ bdag nyid dang bum pa snang bar byed pa de bzhin du/ skye ba yang skye ba'i rang bzhin yin pa'i phyir/bdag nyid dang gzhan nyid bskyed par 'gyur ro/ /brjod par bya ste/ gal te mar me rang dang gzhan gyi bdag nyid snang bar byed na ni/ 'di de ltar 'gyur ba zhig na/ byed pa yang ma yin te/ 'di ltar/ mar me dang ni gang dag na/ /de 'dug pa na mun pa med//mar mes ci zhig snang bar byed/ /mun pa sel bas snang byed yin/ /'dir snang bar byed pa zhes bya ba ni mun pa sel bas yin na/ mun pa gang sel bar byed pas rang gi bdag nyid snang bar byed pa nyid du 'gyur ba/ re zhig mar me'i rang gi bdag nyid la ni mun pa yod pa ma yin te/'gal ba'i phyir ro/ /mun pa rang gang sel bar byed pas mar me la gzhan snang bar byed pa nyid yod par 'gyur ba/ yul gang na mar me 'dug pa de na yang mun pa yod pa ma yin no/ /de'i phyir/ mar me la rang dang gzhan gyi bdag nyid snang bar byed pa nyid med do//gang gi tshe de ltar yin pa de'i tshe mar me bzhin du skye ba la rang dang gzhan gyi bdag nyid skyed par byed pa nyid yod par 'gyur ro zhes bya ba 'di ni rigs pa ma yin no/ /'dir smras pa/ mar me dang ni gang dag na/ /de 'dug pa na mun pa med//ces gang smras pa de ni mun pa bsal ba med na/ de ltar brjod par mi rigs pa zhig ste/ gang gi phyir/ skye bzhin pa'i mar me nyid kyis mun pa bsal ba yin te/ de'i phyir mar me la mun pa med cing / gang na mar me yod pa de na yang mun pa med do zhes bya bar rigs pa yin no//gal te mar mes mun pa bsal bar ma byas par 'gyur na ni/ de'i tshe mar me mi 'bar ba de bzhin du 'bar ba na yang / bum pa la sogs pa rnams dmigs par mi 'gyur te/ sngar gyi gnas skabs bzhin du mun pa bsal ba med pa'i phyir ro/ /de'i phyir mar me la mun pa sel ba'i mtshan nyid can gyi snang bar byed pa yod pa yin la/de yang mar me skye bzhin pa 'dis byas pa yin no/ /brjod par bya ste/ gang tshe mar me skye bzhin pa/ /mun pa dang ni phrad med na/ /ji ltar mar me skye bzhin pas/ /mun pa sel bar byed pa yin/ / 'dir snang ba dang mun pa gnyis la cig car ba nyid med pa'i phyir phrad pa med la/ gang gi tshe de ltar phrad pa med pa de'i tshe/ de ni ji ltar de rnam la gang gis mar me skye bzhin pas mun pa sel lo zhes brtag par rigs par 'gyur/ gang gi phyir de ltar mar me skye bzhin pa mun pa dang phrad pa med la/phrad pa med pa de'i phyir mar mes cung zad kyang snang bar byed pa ma yin no zhes bya bar nges par bya'o/ /ci ste ye shes kyis ma rig pa ma phrad pa kho na 'joms pa dang / mig gis gzugs ma phrad pa nyid mthong ba dang / nor bu khab len gyis lcags ma phrad pa kho na 'dren par byed pa de bzhin du mar mes ma phrad pa'i mun pa sel bar 'gyur ro snyam du sems na/'di yang snying po med do zhes bshad pa/ mar me phrad pa med par yang / /gal te mun pa sel byed na/ /'jig rten kun na gnas pa'i mun/ /'di na gnas pa des bsal 'gyur//gal te mar mes phrad pa med par mun pa sel na ni/ de lta yin dang 'di na gnas pa'i mar mes 'jig rten no cog na gnas pa'i mun pa sel bar 'gyur te/ ma phrad pa'i phyir nye ba na gnas pa bzhin no snyam du dgongs so/ /tshul 'dis ni ye shes kyis ma rig pa 'joms shing /mig gis gzugs mthong la/ nor bu khab len gyis lcags 'dren no zhes bya ba de lta bu la sogs pa yang bsgrub par bya ba dang mtshungs par shes par bya'o/ /ci ste ma phrad pa yin yang nor bu khab len pa la sogs pa rung ba'i yul na gnas pa rnams kho nas rang gi 'bras bu byed pa nyid du 'gyur ro zhe na/de yang mi rung ste/ ma phrad pa yin na ni/ yul gzhan thag ring ba na gnas pa dang / bar du chod pa'i yul gzhan na gnas pa gzhan du ma phrad pa'i phyir na / rung ba'i yul na gnas pa rnams kyis rung ba'i yul na gnas pa nyid mi rigs pas rung ba'i yul na gnas pa'i sgo nas rang gi 'bras bu byed pa nyid kyang gang las 'grub par 'gyur/gal te 'jig rten du mthong ngo zhe na/ de ni de lta ma yin te/ ji ltar khyod rtog par byed pa de ltar ni 'jig rten du ma mthong ngo //'di ltar 'jig rten du ni de lta bu'i yul la sogs pa la phrad pa dang ma phrad pa'i dpyad par bcug nas/ mar me la sogs pa rnams la snang bar byed pa nyid la sogs pa rtog par mi byed de/ ji skad brjod pa'i rnam par dpyad pa mi 'jug par mar mes mun pa sel ba dang / mig gis gzugs mthong ba dang / nor bu khab len gyis lcags 'dren no zhes bya ba la sogs par 'dod pa yin no/ /de'i phyir khyod kyis ji skad smras pa de ltar 'jig rten du ma mthong ba nyid do/ /yang na 'jig rten gyis de ltar mthong mod/ de kho na rnam par dpyod pa'i dus su 'jig rten tshad ma ma yin pa'i phyir des gnod par byed mi nus so//de ltar na re zhig ma phrad par snang bar byed pa mi rigs so/ /yul la sogs pa 'dzin pa ni phrad na/ yang mi rigs pa nyid de/ phrad pa ni gcig nyid yin par 'gyur la/ gang gi tshe/ gcig nyid yin pa de'i tshe ni rang gi ngo bo bzhin du mthong ba dang 'dren pa la sogs pa yod pa ma yin no//gal te yang 'thad pa dang bral ba nyid kyis 'di brdzun pa'i don can nyid yin pa'i phyir/ 'jig rten pa'i tha snyad la phrad pa dang ma phrad pa la sogs pa'i bsam pa 'di mi 'jug mod kyi/ de lta na yang don dam par yang 'thad pa dang bral ba'i phyogs khas blangs par 'gyur du 'ong bas de kho na nyid rnam par dpyod pa na gzhug par bya ba yin no//spros pas chog go/ gal te mar me rang dang gzhan gyi bdag nyid snang bar byed par rtog na/ 'o na ni gnyen por gyur pa mun pa la yang rang dang gzhan gyi bdag nyid sgrib par brtag par bya dgos so zhes bshad pa /mar me rang dang gzhan gyi dngos/ /gal te snang bar byed 'gyur na/ /mun pa'ang rang dang gzhan gyi dngos/ /sgrib par 'gyur bar the tshom med/ /'gal zla yin pa'i phyir/ mar me bzhin du mun pa yang rang dang gzhan gyi dngos por rtogs pa'i bya ba byed par 'gyur ro//de'i phyir gzhan bzhin du/ bdag nyid la yang sgrib par 'gyur ro/ /gal te mun pas bdag nyid sgrib par byed na ni/ mun pas bsgribs pa'i phyir de nyid kyang mi dmigs par 'gyur te/ bum pa la sogs pa bzhin no//de nyid kyi phyir 'phags pa nye ba 'khor gyis zhus pa las kyang / shin tu dga' ba'i bstan pa 'di la ni/ /khyim pa'i rtags spangs rab tu byung gyis dang / /'bras bu yod cing mchog tu 'gyur gyi zhes / /thugs rje can gyis de skad bstan pa'ang mdzad/ /khyim pa'i rtags spangs rab tu byung gyur nas//'bras bu thams cad thob par gyur yang ni/ /chos kyi rang bzhin dag la gzhal byas nas/ /'bras bu kun med 'bras bu thob pa'ang med/ /'on kyang 'bras bu thob pa thob 'gyur ba/ /kye ma'o mi mchog thugs rje ldan pa yi/ /rgyal bas rigs pa shin tu legs bshad ces//de dag ngo mtshar che ba skye bar 'gyur/ /zhes gsungs pa dang / de bzhin du 'phags pa dkon mchog brtsegs pa'i mdo las kyang / dper na khyim du mi 'ga' la la yis/ /yun ring lon nas mar me bus byas na/ /de la mun pa bdag gnas rang lon gyis//'di nas mi 'gro snyam du sems pa med/ /mar me byung na mun pa mun nag la/ /med par mi 'gyur ba yi nus pa med/ /mar me brten nas mun pa med par 'gyur/ /gnyi ga stong la rlom sems ci yang med/ /de bzhin zag med 'phags pa'i ye shes brten//mi shes nyon mongs bsags pa med par 'gyur/ /ye shes dang ni nyon mongs rtag par yang / /de dag lan 'ga' tsam yang 'grogs pa med/ /ye shes mi shes med bya mi sems kyang / /ye shes brten nas mi shes med par 'gyur//gnyi ga gzung med nam mkha'i me tog bzhin/ /de bzhin ye shes mi shes gnyi ga stong / /zhes gsungs so/ /gzhan yang 'dir gal te skye ba 'dis bdag nyid skyed par byed na/ de skyes pa zhig gam ma skyes pa zhig gis rang gi bdag nyid skyed par byed grang //gnyi ga ltar yang mi 'thad do zhes bshad pa/ skye ba 'di ni ma skyes pas/ /rang gi bdag nyid ji ltar bskyed/ /ci ste skyes pas skyed byed na/ /skyes na ci zhig bskyed du yod/ /gal te skye ba ma skyes pas rang gi bdag nyid skyed par byed na ni/ nam mkha'i me tog kyang rang gi bdag nyid skyed par byed par 'gyur ro//'on te skyes pas skyed par byed na ni/ skyes zin pa la skye ba gzhan gyis dgos pa ci zhig yod/ de ltar re zhig skye bas bdag nyid bskyed pa ma yin no/ /da ni gzhan yang ji ltar mi skyed pa de ltar bstan pa'i phyir bshad pa/ skyes dang ma skyes skye bzhin pa//ci lta bur yang mi skyed pa/ /de ni song dang ma song dang / /bgom pas rnam par bshad pa yin/ /gal te 'ga' zhig skye bar 'gyur na ni/ /de skye bas skyed par byed pa zhig na/ 'ga' yang skye ba ni ma yin te/ dus gsum kar yang skye ba med pa'i phyir ro/ / 'di yang sngar song ba dang ma song ba dang / bgom pas bshad pa yin no/ /de la ji ltar song ba la ni 'gro ba ma yin te/ 'das pa dang da ltar ba dag 'gal ba'i phyir ro/ /ma song ba la yang 'gro ba ma yin te/ ma 'ongs pa dang da ltar ba gnyis 'gal ba'i phyir ro/ /bgom pa la yang 'gro ba ma yin te/song ba dang ma song ba las ma gtogs pa'i bgom pa mi dmigs pa'i phyir ro zhes bshad pa de bzhin du/ skyes pa ni mi skye ste/ 'das pa dang da ltar ba dag 'gal ba'i phyir ro/ /skye ba'i bya ba 'gags pa la ni skyes pa zhes bya la/ skye ba zhes bya ba ni bya ba dang da ltar bas zin pa la bya ste/de'i phyir skyes pa skye'o zhes brjod pa na/ 'das pa dang da ltar ba gnyis dus gcig pa nyid du 'gyur ro/ /ma skyes pa yang mi skye ste/ ma 'ongs pa dang da ltar ba gnyis 'gal ba'i phyir ro/ /skye bzhin pa'i dngos po yang mi skye ste/ skyes pa dang ma skyes pa las ma gtogs pa'i skye bzhin pa de med pa'i phyir ro//de'i phyir skye bas gzhan skyed par byed do zhes bya ba mi rigs so/ /'dir smras pa/ skye bzhin pa kho na skye'i skyes pa dang ma skyes pa ni ma yin no/ /ci ste ma skyes pa dang skyes pa las tha dad par skye bzhin pa med pa'i phyir skye bzhin pa skye ba ma yin no snyam du sems na/'di yang yod pa ma yin te/ gang gi phyir 'dir skye ba'i bya ba dang ldan pa la skye bzhin pa zhes bya bar brjod de/ de'i phyir skye ba yod dang skye ba la brten nas skye bzhin pa grub pa'i phyir skye bzhin pa kho na skye la/ skye bzhin pa de yang skye bas skyed par byed do//brjod par bya ste/ gang tshe skye ba yod pa na/ /skye bzhin 'di 'byung med pa'i tshe/ /ji ltar skye la brten nas ni/ /skye bzhin zhes ni brjod par bya/ /skye ba la brten nas skye bzhin par 'gyur la/ de yang skye ba yin no zhes gang smras pa des ni 'di'i skye ba la brten nas skye bzhin pa 'di zhes bya bar 'gyur ro zhes bye brag tu smra bar bya dgos na/de skad du ni smras pa yang ma yin no/ /skye bzhin pa de ni skye bzhin pa 'di yin no zhes bya bar bye brag tu nges par gzung bar yang mi nus te/ ma skyes pas de'i mtshan ma ma gzung ba'i phyir ro/ /de'i phyir skye bzhin pa med pa'i phyir skye ba'i bya ba yang med pas ji ltar na skye ba med par de la brten nas skye bzhin par 'gyur/de'i phyir skye bzhin pa skye la/ de yang skye bas skyed par byed do zhes bya ba ni mi rigs so/ /'dir smras pa/ e ma kyi hud bdag ni gang zhig de bzhin gshegs pa'i gsung rab rnam par 'chad pa'i zol gyis bdag nyid sun 'byin par byed pa tsam la mkhas pa nyid du mngon par byed cing don dam pa'i bden pa/drang srong mchog gis gsungs pa/ rkyen nyid 'di pa tsam gyis rten cing 'brel bar 'byung ba'i mtshan nyid can 'jig par byed pa mthong ba dang ma mthong ba'i dngos po la ltos pa med pa gtan med par smra ba khyod la shin tu 'jigs te/'dir bcom ldan 'das de bzhin gshegs pas ni 'di lta ste/ 'di yod pas 'di 'byung la/ 'di skyes pas 'di skye ste zhes bya ba la sogs pas rten cing 'brel bar 'byung ba phyin ci ma log par gsal bar mdzad cing /rang bzhin dang / dbang phyug dang / ngo bo nyid dang / dus dang / rdul dang / sred med kyi bu la sogs pa byed pa por smra ba bsal nas/ dngos po rnams kyi de kho na nyid bstan par mdzad pa yin la/ khyod kyis ni/ skyes dang ma skyes skye bzhin pa//ji lta bur yang mi skyed pa/ /zhes bya ba la sogs pas de sun 'byin par byed pa na/ de bzhin gshegs pa bskrun par mdzad pa'i yul rten cing 'brel bar 'byung ba bsad par byas pa yin te/ de'i phyir thams cad med par smra ba pa khyod dang brtsad pas chog go/brjod par bya ste/ bdag ni de bzhin gshegs pa bskrun par mdzad pa'i yul rten cing 'brel bar 'byung ba nyams par byed pa ma yin gyi / khyod kyi rten cing 'brel bar 'byung ba mchog tu zab pa la mos pa dang bral bas de'i don phyin ci log tu bzung nas kho bo cag la smod par byed pa yin te/bcom ldan 'das de bzhin gshegs pas ni 'di la brten nas 'di 'byung ngo zhes de skad gsungs pa na/ chos thams cad rang bzhin med pa nyid du gsal bar bstan pa yin no/ /gang gi phyir/ rten cing 'byung ba gang yin pa/ /de ni ngo bo nyid kyis zhi/ /'di ltar dngos po yod pa'i rang bzhin can gang zhig rang gi bdag nyid kyis rang gi rang bzhin nyams pa med pa 'dzin pa de ni yod par 'gyur ba'i phyir gzhan 'ga' la yang ltos pa med cing /skye ba yang med pa de'i phyir na dngos po rang bzhin dang bcas par khas blangs pa na rten cing 'brel bar 'byung ba yod par ga la 'gyur/de'i phyir khyod kho nas rang bzhin dang bcas pa nyid du khas blangs pa na/ rnam pa thams cad du dngos po rnams kyi rten cing 'brel bar 'byung ba la gnod pa byas par 'gyur ro/ /de'i phyir sus rten cing 'brel bar 'byung ba mthong ba des chos mthong ngo //sus chos mthong ba des sangs rgyas mthong ngo zhes bya ba'i lung las na chos dang sangs rgyas mthong ba la yang gnod par byas par 'gyur ro/ /kho bos ni sa bon zhes bya ba'i rgyu gang zhig la brten nas myu gu zhes bya ba'i 'bras bu gang zhig 'byung la/ de gnyi ga yang rten cing 'brel bar 'byung ba zhi ba rang bzhin dang bral bar ston pa na/rnam pa thams cad du bcom ldan 'das de bzhin gshegs pa rnams kyi yum rten cing 'brel bar 'byung ba gsal bar byas par 'gyur ro/ /gang gi phyir de lta yin pa/ /de'i phyir skye bzhin nyid dang ni/ /skye ba yang ni zhi ba nyid/ /ces bya bar gsal bar nges par bya'o//'dir smras pa/ gang tshe skye ba yod pa na/ /skye bzhin 'di 'byung med pa'i tshe/ /ji ltar skye la brten nas ni/ /skye bzhin zhes ni brjod par bya/ /zhes bya ba ni rigs pa ma yin te/ gang gi phyir skye bzhin pa 'di zhes bya ba de lta bu 'byung bar 'gyur te/ bum pa'i skye ba la brten nas bum pa skye bzhin par 'gyur la/ skye bzhin pa de yang skye bas skyed par byed do zhe na/ brjod pa 'di yang mi rigs te/ gang gi phyir/ gal te dngos po ma skyes pa/ /'ga' zhig gang na yod gyur na/ /de ni skye 'gyur dngos po de/ /med na ci zhig skye bar 'gyur//gal te skye ba'i sngon rol na bum pa zhes bya ba ma skyes pa 'ga' zhig gang zhig yod na ni/ de skye ba'i bya ba la brten nas skye bar 'gyur ba zhig na/ de lta bu ni cung zad kyang skye ba'i sngon rol na gang na yang yod pa ma yin no/ /bum pa de med na yang ci zhig skye bar 'gyur/ ci ste skye ba'i snga rol na bum pa med mod kyi/ de lta na yang skyes par gyur nas bum pa'i ming rnyed par 'gyur te/ de'i phyir 'byung bar 'gyur ba'i ming gis nyes pa med do snyam na/ 'di yang rigs pa ma yin te/ gal te skye ba'i bya ba 'jug na ni de'i tshe da ltar bar gyur pa'i dngos pos bum pa'i brjod pa 'thob par 'gyur ba zhig na/gang gi tshe dngos po ma 'ongs pa dang ma 'brel bas bya ba mi 'jug pa de'i tshe da ltar ba nyid yod par ga la 'gyur/ ci ste bum pa ma yin pa la brten nas bya ba rtsom mo zhe na/ bum pa ma yin pa gang yin pa de ci zhig yin par 'os pa de brjod par bya dgos te/yong ni snam bu'am ci yang ma yin pa zhig tu 'gyur grang / gal te skye bzhin pa'i snam bu yin na ni/ de skyes nas bum par ji ltar 'gyur/ 'on te ci yang ma yin pa zhig yin na ni/ de'i tshe ji ltar de'i rten gyi bya ba 'jug pa 'am/de skyes nas bum par 'gyur te/ de'i phyir 'byung bar 'gyur ba'i rtog pa yang rnam pa thams cad du mi rigs so/ /de'i phyir skye bas skye bzhin pa yang skyed par mi byed do zhes bya bar grub bo/ /gzhan yang de ltar skye bzhin pa skye bar mi rigs su zin kyang / /khyod kyi lugs khas blangs nas brjod par bya ste/gal te skye ba de yis ni/ /skye bzhin pa ni skyed byed na/ /skye ba de ni skye ba lta/ /gang zhig gis ni skyed par byed/ /gal te yang khyod kyi lugs kyi skye bas dngos po skye bzhin pa skyed par byed pa yin na/ da ni skye ba de skye ba rang ngam gzhan gang zhig gis bskyed par 'gyur ba 'di ni brjod par bya dgos so//ci ste skye ba 'di'i skyed par byed pa/ skye ba gzhan rtog par 'gyur na ni/ de'i tshe thug pa med pa'i skyon du thal bar 'gyur ro zhes bshad pa ni/ gal te skye ba gzhan zhig gis/ /de skyed thug pa med par 'gyur//zhes bya ba ste/ 'di ni bshad zin to/ /'on te 'di la skye ba gzhan ma 'dod na ni de ltar yin na skye ba med par yang skye ba skye ba yin no zhes bya ba de ltar 'gyur ba ma yin nam/ de'i phyir skye bas bskyed par bya ba'i dngos po rnams kyang / skye ba med par skye bar 'gyur te dngos po yin pa'i phyir skye bzhin no zhes bstan pa'i phyir/ci ste skye ba med skye na/ /thams cad de bzhin skye bar 'gyur/ /zhes bya ba gsungs pa yin no/ /gzhan yang skye bas rang dang gzhan skyed par byed do zhes bya ba'i phyogs 'di la da ltar bdag cag gis skyon brjod par bya ba ma yin pa nyid de/gang gi phyir phyogs 'di la sun dbyung ba/ re zhig yod dang med pa yang / /skye bar rigs pa ma yin zhing / /yod med nyid kyang ma yin zhes/ /gong du bstan pa nyid yin no/ /yod dam med pa'i don la yang / /rkyen ni rung ba ma yin te/ /zhes bya ba dang /gang tshe chos ni yod pa dang / /med dang yod med mi 'grub pa/ /zhes bya ba la sogs pas sngar skye ba bkag pa yin no/ /de'i phyir de ltar skye ba bkag pa yin dang / skye bas skye bzhin pa bskyed pa dang / rang dang gzhan gyi bdag nyid skyed do zhes bya ba'i rtog pa 'di 'jug pa med pa nyid do//de'i phyir skye ba'i skye ba dang / skye bzhin pa skye ba dang / rang dang gzhan gyi bdag nyid skye ba zhes bya ba 'di ga las 'grub par 'gyur/ gzhan yang 'dir skye ba 'di brtags pa na/ dngos po da ltar ba mi rtag pa dang rjes su 'brel ba 'gag bzhin pa'am/ 'das pa dang ma 'ongs pa mi rtag pa nyid dang bral ba 'gag pa zhig pa ma yin pa zhig la rtog grang na/gnyi ga ltar yang mi 'thad do zhes bshad pa/ dngos po 'gag bzhin nyid la ni/ /skye ba 'thad par mi 'gyur ro/ /gang zhig 'gag bzhin ma yin pa/ /de ni dngos por mi 'thad do//de la da ltar ba 'gag bzhin pa la ni skye ba 'thad pa ma yin te yod pa'i phyir ro/ /'das pa dang ma 'ongs pa 'jig pa dang bral ba/ dngos po'i mtshan nyid dang mi mthun pa 'gag bzhin ma yin pa la yang nam mkha'i me tog ltar skye ba yod pa ma yin no/ /de ltar re zhig dngos po rnams la skye ba med par bstan nas/de'i 'og tu gnas pa dpyad par bya'o/ /'dir smras pa/ dngos po rnams kyi skye ba ni yod pa nyid de/ de yod na yod pa'i phyir ro/ /skye ba med pa la ni gnas pa yod pa ma yin te/ de'i phyir skye ba yod pas gnas pa yod pa'i phyir gnas pa ni skye ba yod pa can du 'gyur ro//de'i phyir skye ba yang yod de/ de yod na yod pa'i chos yod pa'i phyir ro/ /'dir gang med par de yod na yod pa'i chos yod pa ni ma yin te/ dper na nam mkha'i me tog gi dri zhim po bzhin no/ /brjod par bya ste/ gal te de yod na yod pa'i gnas pa nyid yod na ni/skye ba yang yod par 'gyur ba zhig na yod pa ni ma yin te/ 'di ltar/ dngos po gnas pa mi gnas te/ /dngos po mi gnas gnas pa min/ /gnas bzhin pa yang mi gnas te/ /ma skyes gang zhig gnas par 'gyur/ /de la gnas pa ni mi gnas pa ste/de la gnas pa bya ba 'gags zin pa'i phyir ro/ /dngos po mi gnas pa yang gnas pa ma yin te gnas pa dang bral ba'i phyir ro/ /gnas bzhin pa yang mi gnas te/ gnas pa gnyis su thal bar 'gyur ba'i phyir dang / / gnas pa dang mi gnas pa las tha dad pa'i gnas bzhin pa med pa'i phyir ro/ /gzhan yang ma skyes gang zhig gnas par 'gyur te/ 'dir skye ba bkag pa'i phyir gang zhig gnas par 'gyur ba ma skyes pa'i dngos po de gang zhig yod/ de'i phyir gnas pa rnam pa thams cad du med do/ / gzhan yang gnas pa 'di 'gag bzhin pa'am 'gag bzhin pa ma yin pa zhig la 'gyur grang / gnyi ga ltar yang mi rigs so zhes bstan pa'i phyir bshad pa/ dngos po 'gag bzhin pa la ni/ /gnas pa 'thad par mi 'gyur ro/ /gang zhig 'gag bzhin ma yin pa//de ni dngos por mi 'thad do/ /re zhig dngos po 'gag bzhin pa 'gag pa la mngon du phyogs pa la ni 'gal ba gnas pa yod pa ma yin no/ /gang yang 'gag bzhin pa ma yin pa de ni dngos po nyid du mi 'gyur na/ de la gnas pa yod par ga la 'gyur/ gzhan yang dngos po thams cad ni rga ba dang /'chi bas skad cig tsam yang mi gtong ba yin la/ gang gi tshe 'di de lta bu yin pa de'i tshe dngos po rnams la rga ba dang 'chi ba dag dang 'gal ba'i gnas pa 'jug pa'i sgo nas go skabs nyid yod pa ma yin pa'i phyir ro zhes bstan pa'i phyir bshad pa/ / dngos po thams cad dus kun du/ /rga dang 'chi ba'i chos yin na/ /gang dag rga dang 'chi med par/ /gnas pa'i dngos po gang zhig yin/ /gang dag la gnas pa yod par 'gyur ba rga ba dang 'chi ba dang bral ba'i dngos po gang zhig yod/ de'i phyir gnas pa med pa nyid do snyam du dgongs pa yin no//gzhan yang gnas pa 'di la gnas pa'i ched du gnas pa gzhan zhig rtog gam/ rang gis rang gi bdag nyid gnas par byed grang na/ gnyi ga ltar yang rigs pa ma yin no zhes bshad pa/ gnas pa gnas pa gzhan dang ni/ /de nyid kyis kyang gnas mi rigs//ji ltar skye ba rang dang ni/ /gzhan gyis bskyed pa ma yin bzhin/ /skye ba 'di ni ma skyes pas/ /rang gi bdag nyid ji ltar bskyed/ /ces bya ba la sogs pas ji ltar skye bas bdag nyid mi bskyed par bshad pa de ltar/ gnas pas kyang bdag nyid gnas par mi byed par brjod par bya ste/gnas pa 'di ni mi gnas pas/ /rang gi bdag nyid ji ltar gnas/ /gal te gnas pas gnas byed na/ /gnas na ci zhig gnas su yod/ /ces sbyar bar bya'o/ /yang /gal te skye ba gzhan zhig gis/ /de bskyed thug pa med par 'gyur//zhes/ ji skad du/ skye ba la rnam par bshad pa de bzhin du/ gal te gnas pa gzhan zhig gis/ /de gnas thug pa med par 'gyur/ /zhes gnas pa la yang brjod par bya'o/ /de ltar gnas pa yang mi rigs so/ /de nyid kyi phyir bcom ldan 'das kyis/chos 'di dag ni mi gnas te/ /'di dag la ni gnas yod min/ /gnas med gnas pa'i smras brjod kyang / rang gi ngo bos rnyed ma yin/ /'jig rten mgon pos gnas pa dang / /skye ba bstan pa ma yin te/ /des na de lta'i 'jig rten mgon/ / rigs nas ting 'dzin shes par gyis/ /zhes gsungs so/ /de bzhin du 'phags pa sdud pa tshigs su bcad pa las kyang / mkha' la rlung brten de la chu yi phung po brten/ /de la sa chen 'di brten de la 'gro ba brten/ /zhes bya ba nas/ gnas med gnas yin 'di ni rgyal bas gnas par gsungs//zhes bya ba'i bar du rgya cher gsungs so/ /'dir smras pa/ skye ba dang gnas pa dag ni yod pa nyid de/ de dang lhan cig spyod pa'i chos yod pa'i phyir ro/ /'dir 'dus byas rnams la skye ba dang gnas pa'i mtshan nyid dang lhan cig spyod pa mi rtag pa nyid yod pa yin te/de'i phyir skye ba dang gnas pa nyid kyang yod pa yin no/ /brjod par bya ste/ gal te mi rtag pa nyid yod na ni/ skye ba dang gnas pa dag kyang yod par 'gyur na/ yod pa ni ma yin no/ /ci ltar zhe na/ 'di ltar/ 'gag pa 'gag par mi 'gyur te//ma 'gags pa yang 'gag mi 'gyur/ /'gag bzhin pa yang de bzhin min/ /ma skyes gang zhig 'gag par 'gyur/ /gal te mi rtag pa zhes bya ba 'ga' zhig yod na ni/ de dngos po 'gags pa'am ma 'gags pa'am/'gag bzhin pa zhig la 'gyur ba zhig na/ de la 'gags pa 'gag go zhes bya ba ni mi rung te/ 'das pa dang da ltar ba gnyis 'gal ba'i phyir ro/ /ma 'gags pa la yang mi rigs te/ 'gag pa dang bral ba'i phyir dang / gang zhig ma 'gags pa ni ji ltar 'gag par 'gyur zhes phan tshun 'gal ba'i phyir ro//'gag bzhin pa yang de bzhin min te/ 'gag mi 'gyur zhes bya ba 'di dang sbyar ro/ /'gag bzhin pa yang 'gag par mi 'gyur te/ 'gag bzhin pa med pa'i phyir dang / 'gag pa gnyis su thal bar 'gyur ba'i phyir ro//gang gi phyir de ltar dus gsum kar yang 'gag pa mi srid pa de'i phyir 'gag pa yod pa ma yin pas/ de dang lhan cig rgyu ba'i skye ba dang gnas pa yod par ga la 'gyur/ gzhan yang sngar skye ba bkag pa'i phyir bkag pa yod pa ma yin pa nyid do zhes bshad pa ni/ ma skyes gang zhig 'gag par 'gyur/ /zhes bya ba'o/ /gzhan yang / 'gag pa 'di dngos po gnas pa'am mi gnas pa zhig la 'gyur grang na/ gnyi ga ltar yang mi rung ngo zhes bshad pa/ re zhig dngos po gnas pa la/ /'gag pa 'thad par mi 'gyur ro/ / 'gag pa dang 'gal ba gnas pa la ni 'gag pa yod pa yin no/ /dngos po ni gnas pa la yang / 'gag pa 'thad par mi 'gyur ro/ /dngos po mi gnas pa yod pa ma yin pa la yang 'gag pa yod pa ma yin no/ /de'i phyir 'gag pa rnam pa thams cad du mi 'thad do/ /gzhan yang / gal te 'dir 'gag pa zhig tu 'gyur na/de gnas skabs de nyid gyis gnas skabs de nyid la'am/ gzhan gyis gzhan la 'gyur ba zhig na/ rnam pa thams cad du mi 'thad de zhes bstan pa'i phyir bshad pa/ gnas skabs de yis gnas skabs ni/ /de nyid 'gag pa nyid mi 'gyur//gnas skabs gzhan gyis gnas skabs ni/ /gzhan yang 'gag pa nyid mi 'gyur/ /re zhig 'o ma'i gnas skabs de nyid kyis 'o ma'i gnas skabs de nyid 'gag par ni mi 'gyur te/ rang gi bdag nyid la byed pa 'gal ba'i phyir ro/ /gzhan zho'i gnas skabs kyis kyang 'o ma'i gnas skabs 'gag par mi 'gyur te/yong ni 'o ma dang zho'i gnas skabs gnyis dus gcig tu 'gyur na ni/ de gnyis gzhig par bya ba dang 'jig par byed pa'i dngos por 'gyur ba zhig na/ zho'i gnas skabs na ni 'o ma'i gnas skabs yod pa ma yin no//gang gi tshe med pa de'i tshe ni med par 'gyur ba gang zhig 'jig par byed de/ gal te 'jig par byed na ni/ bong bu'i rwa'i rno ba nyid kyang rnam par 'jig par byed par 'gyur ba zhig go/ de'i phyir gnas skabs gzhan gyis kyang gnas skabs gzhan 'gag par 'gyur ba ma yin pa nyid do//'dir smras pa/ gal te yang gnas skabs de nyid kyis gnas skabs de nyid dam/ gnas skabs gzhan gyis gnas skabs gzhan 'gag par mi 'gyur mod kyi/ de lta na yang 'o ma'i gnas skabs la ni re zhig 'gag pa yod pa yin no//de'i phyir skye ba yang yod par 'gyur ro/ /brjod par bya ste/ kye ma ma la khyod ni bdag nyid shin tu blun pa nyid du mngon par byed pa yin te/ sngar bshad pa'i tshul gyis/ gang tshe chos rnams thams cad kyi/ /skye ba 'thad par mi 'gyur ba / /bshad pa/ de tshe chos rnams thams cad kyi//'gag pa 'thad par mi 'gyur ro/ /zhes ches gsal ba nyid du bstan par 'gyur ba ma yin nam/ gzhan yang / gal te 'gag pa zhes bya ba 'ga' zhig yod na ni/ de dngos po yod pa'am med pa zhig la 'gyur grang / de la/ re zhig dngos po yod pa la//'gag pa 'thad par mi 'gyur ro/ /dngos po yod pa rang bzhin las ma nyams pa la ni 'gag pa mi rigs te/ gang gi phyir/ gcig nyid na ni dngos po dang / /dngos po med par 'thad pa med/ /dngos po gang zhig la 'gag pa zhes bya ba dngos po med pa de/yod pa de ni med pa nyid du 'gyur ro/ /de'i phyir dngos po yod pa la 'gag pa yod par smra ba na/ dngos po dang dngos po med pa gnyis gzhi gcig pa nyid du khas blangs par 'gyur la/ gcig nyid yin na ni gnyi ga mi rigs te/ da lta gal te dngos po yin na ni de'i tshe 'gag pa dngos po med pas zin pa'i phyir/dngos por bsnyad pa mi rigs so/ /'on te dngos po med pa yin na/ de yang 'di la mi rigs te/ dngos po med pa dang 'gal ba dngos po nyid dang bral ba ma yin pa'i phyir ro/ /de'i phyir dngos po dang dngos po med pa dag gcig nyid yin na dngos po de dngos po ma yin zhing /dngos po med pa yang ma yin no zhes bya bar rung ngo / /rnam pa gcig tu na gcig nyid yin na phan tshun 'gal ba'i phyir snang ba dang mun pa ltar/ dngos po yang yin la dngos po med pa yang yin pa mi 'thad do zhes bya'o//de'i phyir de ltar re zhig dngos po yod pa la 'gag pa mi rigs pa yin no/ /da ni/ dngos po med par gyur pa la'ang / /'gag pa 'thad par mi 'gyur ro/ /dngos po yod pa ma yin par gyur pa la'ang 'jig pa yod pa ma yin te/ yod pa ma yin pa'i phyir nam mkha'i me tog bzhin no//mgo gnyis pa la ji ltar ni/ /gcad du med pa de bzhin no/ /mgo bo gnyis pa med par rab tu grags pa nyid dper nye bar bkod pa'i phyir bshad pa ma tshang ba nyid du 'gyur bas med pa zhes nye bar ma bkod do/ /de'i phyir/ de ltar dngos po yod pa dang dngos po med pa la 'gag pa med do//gang zhig gnyi ga ltar yang med pa de dag nyid gzhan gang gis yod par 'gyur te/ 'gag pa med pa nyid do zhes rtogs par bya'o/ /gzhan yang / gal te 'gag pa zhes bya ba dngos po rnams kyis 'gag par byed pa yin no zhes rtog na/ da ni ci yang 'gag pa gzhan 'dod dam 'on te ma yin/gal te 'dod na ni de mi rigs te/ gang gi phyir/ 'gag pa rang gi bdag nyid kyis/ /yod min 'gag pa gzhan gyis min/ /ji ltar yod pa ma yin pa de ltar bstan pa'i phyir/ ji ltar skye ba rang dang ni/ /gzhan gyis bskyed pa ma yin bzhin//zhes bya ba gsungs so/ /de la ji ltar/ skye ba 'di ni ma skyes pas/ /rang gi bdag nyid ji ltar bskyed/ /ces bya ba la sogs pas/ skye bas rang gi bdag nyid mi bskyed pa de bzhin du 'gag pas kyang rang gi bdag nyid 'gag par mi byed do/ /ji ltar zhe na/ brjod par bya ste/'gag pa 'di ni ma 'gags pas/ /rang gi bdag nyid ji ltar 'gog /ci ste 'gags pas 'gog byed na/ /'gags na ci zhig dgag tu yod/ /ces skye ba dang mtshungs par brjod par bya'o/ /de ltar na/ 'gag pa la rang gi bdag nyid kyis 'gag pa yod pa ma yin no//gzhan gyi bdag nyid kyis kyang yod pa ma yin no/ /ji ltar zhe na/ gal te skye ba gzhan zhig gis/ /zhes bya ba la sogs pa skye ba la bshad pa de bzhin du/ gal te 'jig pa gzhan zhig gis/ /de 'jig thug pa med par 'gyur/ /ci ste 'jig med de 'jig na//thams cad de bzhin 'jig par 'gyur/ /zhes 'gag pa la yang brjod par bya'o/ /de'i phyir de ltar gzhan gyi bdag nyid kyis kyang 'gag pa yod pa ma yin pas 'gag pa'i 'gag pa med do/ /ci ste 'gag pa la ni 'gag pa med pa nyid do snyam du sems na/ de ni mi rigs te/gal te 'gag pa la 'gag pa med na de'i tshe 'gag pa dang bral ba'i phyir/ 'dus byas kyi mtshan nyid nyams par 'gyur ro/ /de'i phyir de ltar gal te 'jig pa la 'jig pa brtags pa de lta na yang 'jig pa mi rigs la/ 'on te ma brtags pa de lta na yang mi rigs pas/da ni ji ltar gzhan gyis 'jig par 'gyur/ ci ste de ltar rnam par dpyad pa yin na khyod la yang 'jig pa mi rigs te/ de'i phyir gang zhig gnyi ga'i skyon yin pa des gcig la brgal bar bya ba ma yin no snyam na/ brjod par bya ste/ bdag la ni brgal ba 'dir mi 'gyur ba nyid de/'di ltar dngos po rnams ni rang nyid rang bzhin med pa yin la/ de dag kyang rang bzhin med pa nyid du gyur pa na/ ma brtags par grub pa'i tshul gyis byis pa 'di bden par mngon par zhen pa rnams kyi tha snyad kyi lam du nye bar 'gro ba yin te/ kho bo cag gi ltar na de dag la ji skad du bshad pa'i rnam par dpyad pa yod pa ma yin no//'jig rten pa'i dngos po rnams ni sgyu ma dang rmi lam dang dri za'i grong khyer la sogs pa ltar 'thad pa dang bral bar gyur cing / ma rig pa'i rab rib kyis blo gros kyi mig nyams par gyur pa'i phyir 'jig rten la grub par gyur pas phan tshun ltos pa nyid kyis 'grub par gyur pa 'ba' zhig byis pa rnams kyis khas len pa yin no//ji skad du brgya pa las/ mgal me'i 'khor lo sprul pa dang / rmi lam sgyu ma chu zla dang / /khug rna dang ni brag ca dang / /smig rgyu sprin dang srid pa mtshungs/ / zhes bshad do/ /de'i phyir/ bskyed bya yod na skyed byed dang / skyed byed yod na bskyed bya yod cing / 'gag pa yod na dgag bya dang / dgag bya yod na 'gag pa yod pa yin no/ /de ltar 'jig rten pa'i tha snyad khas blangs pa'i phyir kho bo cag gi phyogs la thal bar 'gyur ba mtshungs pa nyid du 'gyur bar ga la 'os/gang zhig 'jig pa rgyu med pa nyid du khas blangs nas 'dus byas rnams skad cig ma nyid du smra ba de'i ltar na nam mkha'i me tog ltar rgyu med pas 'jig pa med pa'i phyir dngos po rnams skad cig ma nyid dang / 'jig pa dang bral ba rnams 'dus byas nyid du'ang 'grub par ga la 'gyur//de'i phyir de'i thams cad mi 'grig pa nyid du 'gyur ro/ /skye ba'i rkyen gyis rga shi zhes bya ba dang / 'dus byas kyi mtshan nyid rnams kyang 'du byed kyi phung po'i nang du 'du bar gsungs pa ni / bcom ldan 'das kyis 'jig pa rgyu dang bcas pa nyid du gsal bar bstan pa ma yin nam/skye ba tsam la ltos pa'i phyir 'di'i skad cig mar 'jig pa yang bsgrub par sla ste/ de'i phyir thams cad legs par gnas par 'gyur ro/ /ci ste 'jig pa zhes bya ba 'di ni dngos po med pa yin na/ gang zhig dngos po med pa de la rgyus ci zhig byed/ de'i phyir 'jig pa rgyu med pa yin no snyam na/dngos po la yang rgyu med par thal bar 'gyur ba ma yin nam/ 'di ltar dngos po ni yod par gyur pa yin la/ yod pa gang yin pa de la ni rgyus dgos pa ci zhig yod de/ skyes zin pa la ni yang bskyed du med do/ /de'i phyir thams cad du rgyu med par thal bar 'gyur bas 'di ni mi rigs so//gzhan yang ji ltar sngar med pa'i phyir dang / phyis yod pa'i phyir skye ba rgyu dang bcas pa yin pa de bzhin du/ 'jig pa yang yin par 'dod par bya'o/ /'jig pa yang thams cad kyi tshe 'gyur ba ni ma yin te/ skye ba'i sngar med pa'i phyir dang / phyis ni yod pa'i phyir ro//gang yang gang zhig dngos po med pa de la rgyus ci zhig byed ces smras pa de yang mi rigs te/ gang gi phyir/ kho bo cag ni 'jig pa la rgyus cung zad cig byed par ni mi 'dod kyi/ 'o na ci zhe na/ 'on kyang 'jig pa nyid byed pa yin no zhes smras so / /gal te de lta na byed bzhin pa yin pa'i phyir 'jig pa yang dngos por 'gyur ba ma yin nam zhe na/'di ni 'dod pa nyid yin te/ 'jig pa ni rang gi ngo bo la ltos nas dngos po yin la/ gzugs la sogs pa'i chos log pa'i rang bzhin yin pa'i phyir na ni dngos po med pa yin no/ /gzhan yang 'chi ba yang bya ba gnyis su nye bar gnas pa yin te/'du byed 'jig par yang byed pa dang / yongs su mi shes pa rgyun mi 'chad pa'i rgyu yang 'byin pa'o zhes bya ba'i lung las ni ji ltar 'jig pa rgyu dang bcas pa ma yin par 'gyur/ gzhan yang / gzhan gyis brtags pa'i dngos po med pa'i dngos po'i mtshan nyid can stong pa nyid dngos po'i ngo bor khas blangs pa na ji ltar dngos po med pa dngos po nyid du khas ma blangs par 'gyur/dngos po yin pa'i phyir na yang ji ltar stong pa nyid 'dus ma byas yin te/ de'i phyir khas blangs pa thams cad nyams par 'gyur ro//de nyid kyi phyir/ ji ltar mya ngan 'das pa ni/ /dngos dang dngos med gnyis yin te/ /mya ngan 'das la 'dus ma byas/ /dngos dang dngos med 'dus byas yin/ /zhes 'chad par 'gyur ro/ /spros pas chog go/ /dkyus ma nyid bshad par bya'o/ /'dir smras pa/ gal te 'dus byas kyi skye ba dang gnas pa dang 'jig pa dag bkag mod kyi/ de lta na yang khyad par gyi mtshan nyid dang ldan pa'i 'dus byas ni yod pa yin te/ 'di ltar sra ba la sogs pa dang / lkog shal la sogs pa ni de'i khyad par gyi mtshan nyid du nye bar bstan pa yin no/ / de'i phyir 'dus byas yod pas de'i mtshan nyid kyang yod do/ /brjod par bya ste/ gal te 'dus byas nyid yod na/ /de ltar 'gyur ba zhig na yod pa ni ma yin te/ 'di ltar/ skye dang gnas dang 'jig pa dag/ ma grub phyir na 'dus byas med/ /gang gi tshe ji skad bshad pa'i tshul gyis skye ba dang gnas pa dang 'jig pa dag kho na bkag pa de'i tshe 'dus byas ga la yod//de'i phyir de'i khyad par ga la yod/ 'dir smras pa/ 'dus byas ni yod pa nyid de/ de'i gnyen po 'dus ma byas yod pa'i phyir ro/ /brjod par bya ste/ gal te 'dus ma byas nyid yod na/'di de ltar 'gyur na/ yod pa ni ma yin te/ gang gi phyir/ 'dus byas rab tu ma grub pas/ /'dus ma byas ni ji ltar 'grub/ /'dir kha cig ni nam mkha' dang so sor brtags pa ma yin pa'i 'gog pa dang / mya ngan las 'das pa rnams ni 'dus ma byas yin no zhes rtog par byed la/gzhan dag ni de bzhin nyid kyi mtshan nyid can stong pa nyid la 'dus ma byas su rtog par byed pa de thams cad 'dus byas rab tu ma grub par gyur pas yod pa ma yin pa nyid do zhes gsal bar bstan to/ /'dir smras pa/ gal te skye ba dang gnas pa dang 'jig pa yod pa ma yin no zhes nges par gzung na/'o na thub pa ye shes sgrib pa med pa mnga' bas/ dge slong dag 'dus byas ni skye bar yang mngon/ 'jig pa dang gnas pa las gzhan du 'gyur bar yang mngon no zhes gang gsungs pa de ji ltar rig par bya zhe na/ brjod par bya ste/ rmi lam ji bzhin sgyu ma bzhin//dri za'i grong khyer ji bzhin du/ /de bzhin skye dang de bzhin gnas/ /de bzhin du ni 'jig pa gsungs/ /ji ltar sgyu ma la sogs pa rnams rang bzhin gyis ma skyes pa yin yang / 'jig rten na sgyu ma la sogs pa'i sgra'i brjod bya dang / sgyu ma la sogs pa'i rnam par shes pa'i rtogs par bya bar 'gyur ba de bzhin du skye ba la sogs pa de dag kyang rang bzhin gyis yod pa ma yin yang 'jig rten la grags pa tsam gyi sgo nas/bcom ldan 'das kyis bstan pa yin no/ /de skad du yang / lpags rgyus sha rus 'dus la 'di dag gi/chung ma yin snyam 'du shes bskyed nas ni/ /byis pa rmongs rnams 'dod chags skyed byed cing / /sgyu ma ji bzhin bud med mi shes so/ /ji ltar bu mo gzhon nu'i rmi lam na/ /bu pho byung zhing shi ba des mthong nas/ /byung nas dga' zhing shi nas mi dga' ltar/ /chos rnams thams cad de bzhin shes par gyis//ji ltar dri za'i grong khyer smig rgyu dang / /sgyu ma ji bzhin rmi lam ci 'dra bar/ /chos rnams thams cad de bzhin shes bya ste/ /mtshan ma sgom pa ngo bo nyid kyis stong / /zhes bya ba dang / de bzhin du/ 'dus byas 'dus ma byas kun dben pa ste/ / drang srong de dag la ni rnam rtog med/ /'gro ba kun du 'dus ma byas 'thob pas/ /lta ba dag las khor mor rnam par dben/ /gang dag 'di 'dra'i chos rnams shes pa ni/ /rtag tu ma chags mi gtum mi rmongs te/ /de yi sems ni rang bzhin mnyam par gzhag/ de ni ting 'dzin stobs can stobs dang ldan//zhes gsungs so/ /slob dpon zla ba grags pa'i zhal snga nas sbyar ba'i tshig gsal ba las/ 'dus byas brtag pa zhes bya ba rab tu byed pa bdun pa'i 'grel pa'o// // 'dir smras pa/ rnam par shes pa la sogs pa 'dus byas kyi chos 'dus byas kyi rang bzhin can rnams ni yod pa nyid de/de'i rgyu las dang byed pa po yod pa'i phyir ro/ /bcom ldan 'das kyis kyang / ma rig pa dang rjes su 'brel ba'i skyes bu gang zag 'di ni/ bsod nams mngon par 'du bya ba yang mngon par 'du byed do/ / bsod nams ma yin pa dang mi g.yo ba mngon par 'du bya ba yang mngon par 'du byed do zhes bya ba la sogs pas las kyi byed pa po dang / las de dang / 'bras bu rnam par shes pa la sogs pa 'dus byas kyang nye bar bstan pa yin no/ /gang la byed pa po yod pa de ni yod pa yin te/ dper na bum pa bzhin no/ /gang zhig byed pa med pa de la ni byed pa po med de/ dper na rus sbal gyi spu'i gos bzhin no/ /brjod par bya ste/ gal te de'i skyed par byed pa las dang byed pa po gnyis yod na ni/ rnam par shes pa la sogs pa 'dus byas kyang yod par 'gyur ba zhig na/de dag ni med do/ /'di ltar/ byed po yod par gyur pa de/ /las su gyur pa mi byed do / /byed po ma yin gyur pa yang / /las su mi 'gyur mi byed do/ /de la byed pas na byed pa po'o/ /cung zad byed pa kho na la byed pa por bsnyad kyi/ mi byed pa ni ma yin la/byed pa de yang byed pa po yin par gyur pa'am/ ma yin par gyur pa'am/ yin pa dang ma yin par gyur pa zhig la rtog pa zhig go/ bya bas na las de byed pa po'i 'dod par gyur pa dam pa'o/ /de yang rnam pa gsum ste/ yin par gyur pa dang / ma yin par gyur pa dang /yin pa dang ma yin par gyur pa'o/ /de la byed pa po yin par gyur pa bya ba dang ldan pa ni las su gyur pa ste/ bya ba dang ldan pa mi byed do zhes bya ba ni dam bca' ba gcig go/ /de nas byed pa po ma yin par gyur pa bya ba dang bral ba yang las su ma gyur pa ste/ bya ba dang bral ba mi byed do zhes bya ba ni dam bca' ba gzhan yin no//de la dang po rab tu sgrub par bzhed nas/ bshad pa/ yin par gyur la bya ba med/ /byed po med pa'i las su'ang 'gyur/ /byed pa por brjod pa ni/ bya ba ni rgyu can yin pa'i phyir byed do zhes bya ba'i bya ba dang bral ba dang ldan pa yin par gyur pa 'ga' zhig kho nas/byed pa po'i brjod pa 'thob par 'gyur te/ de'i phyir bya ba'i rgyu can gyi byed pa po'i brjod pa thob pa rnam pa de lta bu de la ni/ gang gis las de byed par 'gyur ba bya ba gzhan med do/ /gang gi tshe/ bya ba med pas byed pa po las mi byed pa de'i tshe byed pa po la ltos pa med cing byed pa po med pa'i las su 'gyur na/byed pa po med pa'i las ni srid pa yang ma yin te/ mo gsham gyi bus bum pa byed pa bzhin no/ /de ltar na re zhig yin par gyur pa la bya ba med pa dang / byed pa po med pa'i las su yang 'gyur ro zhes bya ba'i nyes par thal bar 'gyur ba'i phyir//byed pa po yin par gyur pa las mi byed do/ /da ni las yin par gyur pa yang byed pa pos byed pa ma yin no zhes bstan pa'i phyir/ yin par gyur pa bya ba med/ /las med byed pa por yang 'gyur/ /zhes gsungs so/ /las yin par gyur pa zhes bya ba ni bya ba dang ldan pa yin la/bya ba'i rgyu can gyi las kyi brjod pa thob zin pa de la ni/ gzod yang gang gis las de byed par 'gyur ba'i bya ba gzhan yod pa yang ma yin no/ /de lta na ni/ re zhig las yin par gyur pa la bya ba med pa yin no/ /gang gi tshe/ bya ba gzhan med pa de'i tshe ni las yin par gyur pa de byed pa po mi byed pa nyid do//gang gi tshe las la bya ba gnyis pa med pas mi byed pa de'i tshe ni las de'i byed pa po ni las med pa ste/ las mi bdog cing las de mi byed pa kho nar byed pa por 'gyur na/ 'di ni rigs pa yang ma yin te/ mtshams med pa'i las ma yin pa la ni/ mtshams med pa'i las kyi byed pa po nyid ma mthong ngo / /de ltar byed pa po yin par gyur pas las yin par gyur pa mi byed do zhes yang dag par bsgrubs nas/ da ni byed pa po ma yin par gyur pa yang las ma yin par gyur pa ji ltar mi byed pa de ltar bstan pa'i phyir bshad pa/ gal te byed por ma gyur na //las su ma gyur byed pa ni/ /las la rgyu ni med par 'gyur/ /byed pa po yang rgyu med 'gyur/ /las ma yin par gyur pa ni rgyu med par 'gyur ro/ /byed pa po ma yin par gyur pa ni gang bya ba dang bral ba yin la/ bya ba yang byed pa por bsnyad pa'i rgyu yin pa'i phyir na/ bya ba dang bral ba'i byed pa po yang rgyu med par 'gyur ro/ /rgyu med par smra ba khas len pa yin na yang rgyu dang 'bras bu ril bsal bar 'gyur ro zhes bshad pa/ rgyu med na ni 'bras bu dang / /rgyu yang 'thad par mi 'gyur ro/ /rgyu khas blangs par gyur na ni gang zhig rgyus bskyed pa de ni 'bras bu yin la/de'i skyed par byed pa gang yin pa de ni rgyu yin no zhes bya bar rigs te / dper na bum pa'i rgyu ni 'jim pa yin la/ bum pa 'bras bu yin zhing 'khor lo la sogs pa de'i byed rgyu yin pa bzhin no/ /rgyu med par smra ba khas blangs na ni rgyu la mi ltos pa'i phyir/ nam mkha'i me tog ltar bum pa med la/bum pa med na de'i byed rgyu yod par ga la 'gyur/ /de ltar na rgyu med na ni 'bras bu dang / /rgyu yang 'thad par mi 'gyur ro/ /de'i phyir/ /de med na ni bya ba dang / /byed pa po dang bya mi rigs/ /de med na ste/ 'bras bu dang rgyu med na ci zhig byed pa la bya ba yod par 'gyur zhing /bya ba gang zhig la rdza mkhan rang dbang du gyur pas byed pa po nyid du 'gyur/ 'jim pa dag kyang de'i bdag nyid kyis nye bar gyur pa las sgrub par byed pa dam pa nyid yin pa'i sgo nas byed par rigs pa ma yin no/ /de ltar na re zhig/ de med na ni bya ba dang //byed pa po dang byed mi rigs/ /zhes bya'o/ /de'i phyir/ bya ba la sogs mi rigs na/ /chos dang chos min yod ma yin/ /'di ltar lha sbyin srog gcod pa spong ba'i bya ba la rang dbang du gyur pa las byed pa por gyur nas/ las byed par gyur pa'i sgo nas srog gcod pa spong ba'i bya ba byed pa de'i tshe/de la chos nye bar skye bar 'gyur ro/ /de bzhin du dge ba'i las kyi lam dge ba'i bya bas bsgrub par bya ba bcu char dang / dge ba'i chos kyi rtsom pa dkon mchog gsum dang / pha dang / ma dang / de las gzhan mchod par 'os pa mchod pa la sogs pa'i mtshan nyid can dag la yang sbyar bar bya'o//de bzhin du/ bya ba dang byed pa po dang byed pa rnams med na chos ma yin pa srog gcod pa la sogs pa'i mtshan nyid can la yang med par thal bar 'gyur ba las bzlog ste brjod par bya'o/ /gang gi tshe/ de ltar chos dang chos ma yin pa med pa de'i tshe/de'i 'bras bu yang med do zhes bstan pa'i phyir bshad pa/ chos dang chos min med na ni/ /de las byung ba'i 'bras bu med/ /chos dang chos ma yin pa gnyis med na ni/ chos dang chos ma yin pas bskyed pa'i 'bras bu 'dod pa dang / mi 'dod pa yang med par 'gyur ro//de'i phyir/ 'bras bu med na thar pa dang / /mtho ris 'gyur ba'i lam mi 'thad/ /gal te 'jig rten pa'i lam gyi 'bras bu bsam gtan dang gzugs med pa'i mtshan nyid can bde 'gro yod par gyur na ni de'i tshe de'i don du 'jig rten pa'i lam bsgom pa mdzes par 'gyur la//gal te de yang 'bras bu mya ngan las 'das pa thar pa'i mtshan nyid can yod na yang de'i don du/ 'jig rten las 'das pa 'phags pa'i lam yan lag brgyad pa bsgom par 'gyur ba zhig na/ gang gi tshe 'bras bu yod pa ma yin pa de'i tshe/ 'bras bu med na thar pa dang //mtho ris 'gyur ba'i lam mi 'thad/ /gzhan yang / de ltar 'bras bu med na ni/ /bya ba dag ni thams cad kyang / /don med nyid du thal bar 'gyur/ /zhing las dang / tshong spogs dang / gla bkol gyi bya ba la sogs pa gang dag 'bras bu'i don du rtsom pa de dag thams cad kyang 'bras bu med na mi 'thad do//de'i phyir de ltar/ bya ba dag ni thams cad kyang / /don med nyid du thal bar 'gyur / 'di dag ni don med pa yang ma yin no/ /de'i phyir nyes pa ma lus pa'i 'byung khungs su gyur pa mtho ris dang byang grol la skur pa 'debs pa/ sems can dmyal ba la sogs pa'i g.yang sa chen po'i rgyu mthong ba dang ma mthong ba'i rgyu'i dngos po dang 'gal ba yin pa'i phyir/byed pa po yin par ma gyur pa las su ma gyur pa byed do zhes bya ba'i phyogs 'di ni tha chad kho na yin no/ /de'i phyir de ltar dam bca' ba gnyis yang dag par bsgrubs nas//de ni byed pa po gnyi ga'i ngo bo las gnyi ga'i ngo bo yang mi byed do zhes bshad pa/ byed pa por gyur ma gyur pa/ /gyur ma gyur de mi byed de/ las yin pa dang ma yin par gyur pa bya ba dang ldan pa dang / bya ba dang mi ldan pa gang yin pa de ni byed pa po yin pa dang / ma yin par gyur pas mi byed do//gang gi phyir/ yin dang ma yin gyur cig la/ /phan tshun 'gal bas ga la yod/ /dngos po gcig la dus gcig tu bya ba dang ldan pa yang yin la bya ba dang mi ldan pa yang yin pa zhes bya ba 'di ni mi rigs pa nyid do/ /de'i phyir/ byed pa po yin pa dang ma yin par gyur pa yang las yin pa dang ma yin par gyur pa mi byed do //yod pa ma yin pa'i phyir ro snyam du dgongs pa'o/ de ltar phyogs mthun pa la skyon brjod nas/ phyogs mi mthun pa la yang bsal bar bzhed nas bshad pa/ byed pa por ni gyur pa yis/ /ma gyur las ni mi byed de//ma gyur pas kyang gyur mi byed/ /re zhig byed pa po yin par gyur pa bya ba dang ldan pas ni las su ma gyur pa bya ba dang mi ldan pa mi byed de/ /gang gi phyir/ 'dir yang skyon der thal bar 'gyur ba'i phyir ro/ /yin par gyur la bya ba med/ /byed po med pa'i las su'ang 'gyur//zhes bya bas de ltar byed pa po yin par gyur pas las mi byed do/ /las yin par ma gyur pa'ang byed pa ma yin te/ las yin par ma gyur pa ni rgyu med par 'gyur la/ de'i phyir rgyu med na ni 'bras bu dang zhes bya ba la sogs pa'i skyon thams cad du 'gyur ro//de'i phyir phyogs mi mthun pa ni sngar bshad zin pa'i gtan tshigs dag gis sun phyung ba'i phyir yang gtan tshigs dgod par mi bya'o/ /byed pa po yin par gyur pas las yin par ma gyur pa mi byed do zhes bya ba ji ltar bstan pa de bzhin du bshad zin pa'i 'don pa'i rjes su 'brangs nas byed pa po ma yin par gyur pa bya ba dang mi ldan pas las yin par gyur pa mi byed do zhes bya ba yang rnam par bshad par bya'o//de ltar re zhig/ phyogs mi mthun pa la tshig re re dpyad pa'i sgo nas skyon brjod nas/ da ni tshig re re la tshig gnyis gnyis dpyad nas/ skyon brjod par bzhed nas bshad pa/ byed pa por ni gyur pa dang / /bcas pa las ni ma gyur dang / /gyur ma gyur pa mi byed de/ /gtan tshigs gong du bstan phyir ro/ /byed pa por gyur pa dang bcas pa de ni las yin par ma gyur pa dang / yin par gyur pa dang yin par ma gyur pa mi byed do/ /ji ltar zhe na/ gtan tshigs gong du bstan pa'i phyir ro zhes bya ba gsungs so/ /de la/ yin par gyur la bya ba med/ /ces bya ba la sogs pas byed pa por gyur pa dang bcas pas ni mi byed do/ /las su ma gyur pa yang mi byed de / las la rgyu ni med par 'gyur/ /rgyu med na ni 'bras bu dang / /zhes bya ba la sogs pas skyon bstan zin pa'i phyir ro//las su gyur pa dang ma gyur pa yang mi byed de/ yin dang ma yin gyur cig la/ /phan tshun 'gal bas ga la yod/ /ces bshad pa'i phyir ro/ /de ltar re zhig byed pa po yin par gyur pas las yin par ma gyur pa dang yin par gyur pa byed pa ma yin no/ /da ni byed pa po ma yin par gyur pa yang /las su gyur pa dang bcas pa dang gyur pa dang ma gyur pa byed pa ma yin no zhes bshad pa/ byed pa por ni ma gyur pas / /las ni gyur dang bcas pa dang / /ma gyur gyur pa mi byed de/ /gtan tshigs gong du bstan phyir ro/ /byed pa po yin par ma gyur pa ni rgyu med par 'gyur la/rgyu med na ni 'bras bu dang zhes bya ba la sogs pas nyes pa bshad zin pa'i phyir/ byed pa por ma gyur pa ni mi byed pa yin no/ /las su gyur pa dang bcas pa yang mi byed de/ yin par gyur la bya ba med/ /las med byed pa por yang 'gyur/ /zhes bya bar thal bar 'gyur ba'i phyir ro//las yin par gyur pa dang yin par ma gyur pa yang mi byed de/ yin dang ma yin gyur cig la/ /phan tshun 'gal bas ga la yod/ /ces bshad pa'i phyir ro/ /da ni byed pa po yin par gyur pa dang / yin par ma gyur pa nyid kyang gnyi ga'i ngo bo yin pa na/ las yin par gyur pa dang ma yin par gyur pa gang yang rung ba ji ltar mi byed pa de ltar bstan pa'i phyir bshad pa/ byed pa por gyur ma gyur ni/ /las su gyur dang ma gyur pa/ /mi byed 'di yang gtan tshigs ni/ /gong du bstan pas shes par bya/ /byed pa po yin par gyur pa dang / ma yin par gyur pa ni mi byed de/ yin dang ma yin gyur cig la/ phan tshun 'gal bas ga la yod/ /ces bshad pa'i phyir ro/ /las su gyur pa yang mi byed de/ /yin par gyur la bya ba med/ /las med byed pa por yang 'gyur/ /zhes bya bar thal ba'i phyir ro/ /las su ma gyur pa rgyu med pa yang mi byed de/rgyu med na ni 'bras bu dang zhes bya ba la sogs pas skyon bshad zin pa'i phyir ro/ /de'i phyir/ de ltar phyogs mthun pa dang phyogs mi mthun pa dag la byed pa po dang las su grub pa rnam pa thams cad du rigs pa ma yin no/ /de'i phyir rnam par shes pa la sogs pa 'dus byas kyi rang bzhin can dag ni yod pa nyid de/de'i rgyu las dang byed pa po yod pa'i phyir ro zhes gang smras pa de ni mi rigs pa yin no/ /'dir smras pa/ dngos po rnams med do zhes bya ba 'di ci khyod kyis nges par bzung ba yin nam zhe na/ ma yin te/ dngos po rang bzhin dang bcas par smra ba khyod la ni dngos po dang bral ba las thams cad la skur pa 'debs pa srid kyi/kho bo cag gis ni brten nas skyes pa'i phyir dngos po thams cad kyi rang bzhin nyid nye bar mi dmigs te/ des na gang zhig la skur pa 'debs par 'gyur/ ji skad du rin po che'i phreng ba las//smig rgyu la ni 'di chu zhes/ /bsams te der ni song ba las/ /gal te chu de med do zhes/ /'dzin pa de ni blun pa nyid/ /de bzhin smig rgyu chu lta bu'i/ /'jig rten yod ce'am med pa zhes/ /'dzin pa de ni rmongs pa ste/ / rmongs pa yod na mi 'grol lo/ /mi shes pa las sngar brtags shing / /phyi nas de nyid don nges na/ /gang tshe dngos po mi dmigs pa/ /de tshe dngos med ga la 'gyur/ /zhes gsungs so/ /de'i phyir de ltar dngos po rang bzhin med pa rnams la ji skad smras pa'i rnam pa 'grub pa ga la yod/de'i phyir/ dngos po kun rdzob pa smig rgyu'i chu dang mtshungs pa rnams ni 'jig rten pa'i phyin ci log khas blangs nas rkyen de nyid 'di pa tsam du khas blangs pa kho nas grub pa yin gyi/ gzhan gyis ni ma yin no zhes bshad pa/ byed po las la brten byas shing / / las kyang byed po de nyid la/ /brten nas 'byung ba ma gtogs pa/ /grub pa'i rgyu ni ma mthong ngo / /'dir ni byed cing las la ltos pa med pa ni byed pa po nyid ma yin pa'i phyir/ /byed pa po'i byed pa po nyid ni las la ltos nas yin zhing / byed pa pos byed bzhin pa ma yin pa ni 'gal yang las nyid du mi 'gyur bas byed bzhin pa nyid las su brjod pa'i phyir las kyang byed pa po de nyid la brten nas byung ba yin no//de ltar las dang byed pa po dag phan tshun ltos pa'i grub pa las ma gtogs par grub pa'i rgyu gzhan ni ma mthong ngo / /ji ltar las dang byed pa po gnyis phan tshun ltos pa'i grub pa yin pa de bzhin du dngos po gzhan rnams kyang yin no zhes bsgre ba'i phyir bshad pa/de bzhin nyer len shes par bya/ /las dang byed po bsal phyir ro/ /de bzhin zhes bya ba 'dis ni las dang byed pa po'i tha snyad thal ma thag pa ston pa'o/ /nye bar len pas na nye bar len pa ste/de ltar na 'dis ni nye bar len pa'i bya ba bstan la/ des kyang rang gi sgrub byed byed pa po dang nye bar len pa po de nye bar blang bar bya ba las 'dzin par byed cing / nye bar blangs pa dang nye bar len pa po de gnyis kyang las dang byed pa po ltar phan tshun los pas grub pa yin gyi ngo bo nyid kyis ni ma yin no//yang ci'i phyir ngo bo nyid kyis ma yin zhe na/ las dang byed po bsal phyir ro/ /zhes gsungs te / bsal ba ni bzlog pa'o/ /phyir ro'i sgras ni gtan tshigs 'dzin pa'o/ /de'i phyir don ni bdag cag gis gtan tshigs gang dag gis las dang byed pa po bsal bar bshad pa'i gtan tshigs de dag kho nas nye bar blang ba dang nye bar len pa po'ang bkag par rig par bya'o zhes bya ba 'di 'thad par 'gyur ro//las dang byed pa po bkag pas 'di gnyis phan tshun ltos pa'i grub pa yin par nges par bya ba 'ba' zhig tu ma zad kyi/gzhan yang / byed pa po dang las dag gis/ /dngos po lhag ma shes par bya ste/ shes rab can gyis zhes bya ba ni tshig gi lhag ma'o/ /shes rab can gyis las dang byed pa po dang nye bar blang ba dang nye bar len pa po las tha dad pa'i dngos po gzhan gang dag bskyed bya skyed byed dang /'gro ba dang 'gro ba po dang / blta bya dang lta byed dang / mtshan nyid dang mtshan gzhi dang / 'byung bar bya ba dang 'byung bar byed pa dang / de bzhin du/ yan lag dang yan lag can dang / yon tan dang yon tan can dang /tshad ma dang gzhal bya la sogs pa'i dngos po ma lus pa de dag las dang byed pa po'i rnam par dpyad pas ngo bo nyid kyis yod pa bkag ste/ phan tshun ltos pa'i grub pa nyid yin par shes par bya'o/ /de dag rnam par dpyad pa yang dbu ma la 'jug pa las nges par bya'o//gal te/ dngos po lhag ma shes par bya/ /zhes bya ba 'di nyid kyi nye bar blang ba dang nye bar len pa po'i don rtogs zin pa'i phyir yang bkod pa mi rigs pa ma yin nam zhe na/ 'di ni bden mod kyi/ 'on kyang rnam par dpyad par bya ba la gtso bor gyur par shes par bya ba'i phyir/nye bar blang ba dang nye bar len pa po logs shig tu bkod de/ 'di ltar rab tu byed pa phyi ma dag tu yang 'di gnyis kho na'i brtag pa phal cher 'byung bar 'gyur ro/ /de nyid kyi phyir/ bcom ldan 'das kyis/ sems dmyal 'jigs pa nga yis bstan bya ste/ / sems can stong phrag du ma skyo byas kyang / /gang dag shi 'phos ngan song drag 'gro ba'i/ /'gro ba de dag nam yang yod ma yin/ /gang dag ral gri mda' chen mtshon 'byin pa'i/ /gnod pa byed pa yod pa ma yin te/ /rtog pa'i dbang gis ngan song de dag na//lus la 'bab mthong de na mtshon cha med/ /sna tshogs yid dga' me tog kha phye zhing / /gser gyi khang mchog 'bar ba yid 'ong ba/ /'di na de la'ang byed po 'ga' med de/ /de dag rtog pa'i dbang gis bzhag pa yin/ /rtog pa'i dbang gis 'jig rten rnam brtags te//'du shes 'dzin pas byis pa rnam par phye/ /'dzin dang 'dzin med de yang 'byung ba min/ /yongs su rtog pa sgyu ma smig rgyu bzhin/ /zhes gsungs so/ /slob dpon zla ba grags pa'i zhal snga nas sbyar ba tshig gsal ba las/ las dang byed pa po brtag pa zhes bya ba rab tu byed pa brgyad pa'i 'grel pa'o// //'dir/ de bzhin nyer len shes par bya/ /las dang byed po bsal phyir ro/ /zhes gang smras pa de ni mi rigs te/ 'di ltar/ lta dang nyen la sogs pa dang / tshor sogs dang yang dbang byas pa/ /gang gi yin pa de dag gi /snga rol de yod kha cig smra//lta ba dang nyan pa dang snom pa dang myang ba la sogs pa rnams dang / tshor ba dang reg pa dang yid la byed pa la sogs pa rnams nye bar len pa po gang gis nye bar len pa yin pa'i nye bar len pa po de ni nye bar len pa de dag gi snga rol na yod do zhes mang pos bkur ba pa smra'o/ ci'i phyir zhe na/gang gi phyir/ dngos po yod pa ma yin na/ /lta ba la sogs ji ltar 'gyur/ /de phyir de dag snga rol na/ /dngos po gnas pa de yod do/ /'di na lha sbyin yod par gyur pas nor sogs par byed kyi/ /yod pa ma yin pa'i mo gsham gyi bus ni ma yin no/ /de bzhin du gal te re zhig lta ba la sogs pa dag gi snga rol na gang zag gnas par ma gyur na ni/des lta ba la sogs pa nye bar len par byed par yang mi 'gyur ba nyid do/ /de phyir nor gyi snga rol na lha sbyin gnas pa ltar/ lta ba la sogs pa dag gi snga rol na/ gang zhig 'di'i nye bar len par byed par 'gyur ba'i gang zag de yod pa yin no zhes 'dzer to//brjod par bya'o/ /lta dang nyan la sogs pa dang / /tshor ba la sogs nyid kyi ni/ /snga rol dngos po gang gnas pa/ /de ni gang gis gdags par bya/ /gang zag ces bya ba lta ba la sogs pa'i sngon rol na yod do zhes rnam par gzhag pa gang yin pa de gang yang gdags par bya/'di ltar gang zag tu tha snyad gdags pa'i rgyu ni lta ba la sogs pa yin na/ de gal te de dag las sngar rnam par gnas par yod par rtog na ni/ de'i tshe bum pa dang snam bu ltar/ lta ba la sogs pa la ltos pa med par 'gyur la/ gang zhig rang gi rgyu la ltos pa med pa de ni rgyu med pa yin te/nor la sogs pa la mi ltos pa'i nor can ltar med pa yin no snyam du dgongs pa'o/ /gzhan yang lta ba la sogs med pa yang / /gal te de ni gnas gyur na/ /de med par yang de dag ni/ /yod par 'gyur bar the tshom med/ / gal te lta ba la sogs pa dag gi sngon rol na gang zag ces bya ba zhig yod pa des lta ba la sogs pa nye bar len par byed do snyam du sems na/ de lta na ni the tshom med par lta ba la sogs pa 'di dag kyang gang zag med par yod par 'gyur ro/ /'di ltar nor dang 'brel ba'i sngon rol na lha sbyin nor las tha dad par rnam par gnas par gyur nas nor so sor grub cing don gzhan du gyur pa sogs par byed pa de bzhin du/nye bar len pa po la yang nye bar len pa lta ba la sogs pa rang las tha dad par don gzhan du gyur pa yod par 'gyur ba zhig go/ /srid pa yang ma yin no zhes gsungs pa ni/ ci yis gang zhig gsal bar byed/ /gang gis ci zhig gsal bar byed/ /ci med gang zhig ga la yod/ /gang med ci zhig ga la yod/ /ces bya ba ste/ 'di na 'di ni 'di'i rgyu yin la/ 'di ni 'di'i 'bras bu yin no zhes bya bar sa bon zhes bya ba'i rgyus myu gu zhes bya ba'i 'bras bu gang zhig mngon par gsal bar byed cing /'bras bu des kyang sa bon zhes bya ba'i rgyu ci zhig mngon par gsal bar byed pa de bzhin du gal te 'di ni 'di'i nye bar len pa po'o zhes bya bar lta ba la sogs pa nye bar len pa ci zhig gi bdag gang zhig mngon par gsal bar byed cing /'di ni 'di'i nye bar len pa'o zhes bya ba bdag gang gis lta ba la sogs pa nye bar len pa ci zhig mngon par gsal bar byed par 'gyur na ni de'i tshe phan tshun ltos nas nye bar len pa dang nye bar len pa po dag grub par 'gyur na/ gang gi tshe nye bar len pa po med par logs shig tu lta ba la sogs pa khas len pa de'i tshe ni rten med pas de med pa nyid yin no//de'i phyir gnyi ga yang grub pa med pas/ lta ba la sogs pa las tha dad par nye bar len pa po gnas ma yin no zhes bya ba 'di ni mi rigs so/ /'dir smras pa/ lta dang nyan la sogs pa dang / /zhes bya ba la sogs pa gang smras pa de la brjod par bya ste/gal te lta ba la sogs pa thams cad kyi snga rol na gnas so zhes bya bar khas blangs par gyur na ni/ nyes pa 'dir 'gyur ba zhig na/ gang gi tshe/ lta ba la sogs thams cad kyi/ /snga rol gang zhig yod pa min / 'o na ci zhe na/ re re'i snga rol na yod pa yin no gang gi tshe de lta yin pa de'i tshe/lta sogs nang nas gzhan zhig gis/ /gzhan gyi tshe na gsal bar byed/ /gang gi tshe lta ba po zhes bya bar lta bas gsal bar byed pa de'i tshe ni/ nyan pa la sogs pa dag la brten nas nye bar gdags par bya ba ma yin no/ /de'i phyir sngar smras pa'i nyes pa'i go skabs med do zhe na//brjod pa 'di yang rigs pa ma yin te/ ci'i phyir zhe na/ lta ba la sogs pa dang bral ba ni nye bar len pa med pa/ rgyu med pa gsal byed dang bral ba ni yod pa nyid ma yin pa'i phyir ro/ /lta la sogs pa thams cad kyi/ /snga rol gal te yod min na ste/de ltar rtog na/ de lta na yang / lta la sogs pa re re yi/ /snga rol de ni ji ltar yod/ /gang zhig thams cad kyi snga rol na yod pa ma yin pa de ni re re'i snga rol na yang ma yin te/ dper na shing thams cad kyi snga rol na nags med pa de'i tshe re re'i snga rol na yang med la/ /bye ma thams cad la til mar 'byin pa med la //bye ma re re la yang til mar med pa bzhin no/ /gzhan yang / gang zhig re re'i snga rol du yod par 'gyur ba de ni thams cad kyi snga rol na yang yod par khas blangs par 'gyur te/ re re ma gtogs par thams cad med pa'i phyir ro/ /de'i phyir re re'i snga rol na yod do zhes bya ba ni mi rigs so//'di'i phyir yang mi rigs te/ gang gi phyir/ /lta po de nyid nyan po de/ /gal te tshor po'ang de nyid na/ /de'i tshe/ re re'i snga rol yod gyur na/ /lta ba po gang yin pa de nyid nyan pa po yin no zhes bya bar brjod par ni rigs pa yang ma yin no//gal te yin na / /de'i tshe lta ba'i bya ba dang bral ba'i nyan pa po yang lta ba po nyid du 'gyur la/ nyan pa'i bya ba dang bral ba'i lta ba po yang nyan pa por 'gyur na/ lta ba'i bya ba dang bral ba yang lta ba por 'gyur zhing / nyan pa'i bya ba dang bral ba yang nyan pa por 'gyur ro zhes bya ba gang yin pa de lta bu ni mthong ba yang ma yin no//de nyid kyi phyir/ de ni de ltar mi rigs so zhes bshad do/ /bya ba so so la byed pa po tha dad pa'i phyir 'di ni de ltar yod par ga la 'gyur zhes bstan pa'i phyir/ de ni de ltar mi rigs so zhes gsungs so/ /slob dpon sangs rgyas bskyangs ni//bdag gcig yin na ni/ dbang po gzhan la 'gro bar thal bar 'gyur te/ skyes bu skar khung gzhan du nye bar 'gro ba bzhin no zhes rnam par 'chad do/ /slob dpon legs ldan byed ni/ thams cad na yod pa'i bdag la dbang po gzhan la 'gro ba yod pa ma yin pas thal bar 'gyur ba'i skyon mi rigs so zhes de la sun 'byin par smra'o//'di ni mi rigs te/ rang gi sde pas brtags pa'i gang zag tu smra ba dgag pa'i skabs su bab pa'i phyir dang / de yang thams cad na yod pa nyid du khas ma 'ches pa'i phyir ro/ /de'i phyir thal bar 'gyur ba'i skyon rigs pa nyid do//'on te yang ji skad du bshad pa'i skyon spang bar 'dod pas/ gal te lta po gzhan nyid la/ /nyan pa po gzhan tshor gzhan na ste/ rtog par byed na de yang mi rigs te/ de ltar 'dod par gyur na/ lta po yod tshe nyan por 'gyur/ / bdag kyang mang po nyid du 'gyur/ /ji ltar ba glang las gzhan du gyur pa'i rta ni ba glang yod pa'i tshe cig car du yod par mi 'gyur ba ma yin pa de bzhin du/ gal te nyan pa po lta ba po las gzhan du gyur na ni/ de lta ba po yod pa'i tshe na yang cig car du yod par 'gyur ba zhig na/de ltar ni mi 'dod pas gzhan nyid yod pa ma yin no/ /gzhan yang de lta yin na ni bdag mang por 'gyur te/ lta ba po dang nyan pa po dang tshor ba po la sogs pa rnams so so so sor grub par khas blangs pa'i phyir ro/ /de'i phyir/ gang zag ces bya ba ni lta ba la sogs pa re re'i snga rol na yang 'ga' zhig kyang med do//'dir smras pa/ bdag ni lta ba la sogs pa thams cad kyi snga rol na yod pa nyid do/ /ci ste gal te de yod na/ /de ni gang gis gdags par bya/ /snyam du sems na/ de la brjod par bya ste/ 'di ltar lta ba la sogs pa dag gi snga rol na ming dang gzugs kyi gnas skabs na//gang las rim gyis ming dang gzugs kyi rkyen gyis skye mched drug go zhes lta ba dang nyan pa la sogs pa dag 'byung bar 'gyur ba 'byung ba chen po bzhi yod de/ de'i phyir lta ba la sogs pa dag gi snga rol na/ bdag 'byung ba chen po bzhi'i nye bar len pa can yod do//de lta na yang / lta dang nyan la sogs pa dang / /tshor ba dag la sogs pa yang / /gang las 'gyur ba'i 'byung de la'ang / /de ni yod pa ma yin no/ /'byung ba chen po gang dag las lta ba la sogs pa skye ba de dag la'ang / nye bar len pa 'byung ba chen po'i rgyu can 'di yod pa mi rigs te/sngar bshad pa'i gtan tshigs kyis so zhes bya bar dgongs so/ /de la ji skad sngar/ ci med gang zhig ga la yod/ /gang med ci zhig ga la yod/ /ces bshad pa de kho na ltar 'dir yang brjod par bya'o/ gal te nye bar len pa 'byung ba chen po'i snga rol du bdag grub par gyur na ni/ des 'byung ba chen po dag nye bar len par 'gyur na/ de ltar yang ma yin te rgyu med pa'i phyir ro/ /gang zhig yod pa ma yin pa de ni ji ltar 'byung ba chen po dag nye bar len par 'gyur/ de'i phyir/ lta ba'i nye bar len pa can ltar 'byung ba chen po'i nye bar len pa can la yang skyon brjod pa nyid yin pas slar yang ma brjod do//gang gi phyir de ltar yin pa de'i phyir 'di ni 'byung ba dag la yang yod pa ma yin no/ /'dir smras pa/ gal te yang de ltar bdag bkag mod kyi/ 'on kyang lta ba la sogs pa ni yod pa nyid de/ bkag pa ma byas pa'i phyir ro/ /bum pa la sogs pa bdag gi rang bzhin ma yin pa rnams la ni lta ba la sogs pa dang 'brel ba yod pa ma yin no//de'i phyir de dag dang 'brel ba can bdag yod pa kho na'o/ /brjod par bya ste/ gal te lta ba la sogs pa rnams nyid yod na/ bdag kyang yod par 'gyur na/ yod pa ni ma yin te/ lta ba la sogs pa bdag gang gi nye bar len pa yin pa de med do zhes bstan pa de'i tshe/nye bar len pa po bdag med na lta ba la sogs pa/ nye bar len par gyur pa rnams/ /yod pa nyid du ga la 'gyur/ /zhes gsungs pa ni/ lta dang nyan la sogs pa dang / /tshor ba dag la sogs pa yang //gang gi yin pa gal te med/ /de dag kyang ni yod ma yin/ /zhes bya ba ste/ lta ba la sogs pa dag gang gi yin par rtog pa de gang gi tshe med do zhes bshad pa de'i tshe kho nar lta ba la sogs pa de yang med do zhes gsal bar bstan pa ma yin nam/ de'i phyir lta ba la sogs pa med pa'i phyir bdag med do//'dir smras pa/ ci bdag med do snyam du de ltar khyod kyis nges sam/ de skad sus smras/ lta ba la sogs pa med pa'i phyir/ bdag kyang med do zhes thal ma thag tu smras pa ma yin nam zhe na/ de skad du kho bo cag gis smras mod kyi/ 'di'i don ni khyod kyis yang dag par gtan la ma phab pa yin no//gang gi phyir bdag dngos po'i rang bzhin can yod do zhes brtags pa yin la/ de yang ngo bo nyid kyis yod pa ma yin zhing / bdag gis kyang yang dag pa ma yin pa'i phyin ci log gi gnyen por de la rang bzhin du mngon par zhen pa zlog par byed pa'i tshig smras pa yin gyi/'di'i dngos po med par brtags pa ni ma yin te/ 'di ltar 'di gnyis ni spang bar bya ba yin te/ gang dngos po la mngon par zhen pa dang / gang yang dngos po med pa la mngon par zhen pa'o/ /ji skad du slob dpon 'phags pa'i lhas/ khyod kyi bdag kyang nga'i bdag min/ /des bdag nges med de phyir med/ /dngos po mi rtag pa rnams la/ /rtog pa zhes kyang nye bar skye/ /zhes gsungs pa lta bu'o/ /de nyid bstan pa'i phyir/ /gang zhig lta la sogs pa yi/ /snga rol da lta phyi na med/ /de la yod do med do zhes/ /rtog pa dag ni ldog par 'gyur//zhes bya ba gsungs so/ /re zhig lta ba la sogs pa dag gi snga rol na ni bdag med de/ de dang bral ba la yod pa nyid med pa'i phyir ro/ /lta ba la sogs pa dang lhan cig tu gyur pa yang med do/ /so so so sor ma grub pa dag la/ lhan cig pa nyid ma mthong ba'i phyir dang /ri bong gi rwa gnyis ltar phan tshun ltos pa med pa'i bdag dang nye bar blangs pa dag kyang so so so sor ma grub pa'i phyir da ltar yang med do/ /phyis kyang med de/ 'di ltar gal te lta ba la sogs pa dag gong du yod par 'gyur zhing / bdag 'og rol gyi dus su yod par 'gyur na ni de'i tshe phyis 'byung bar 'gyur na/de ni de lta ma yin te/ byed pa po med pa'i las ma grub pa'i phyir ro/ /bdag gang zhig de ltar yongs su brtags pa na lta ba la sogs pa dag gi sngar ram phyis sam lhan cig yod pa ma yin pa de'i tshe/ dmigs pa med pa'i rang bzhin de la yod pa'am/med pa nyid du shes rab can su zhig rtog par byed/ de'i phyir nye bar len pa dang nye bar len pa po gnyis las dang byed pa po bzhin du phan tshun ltos pa'i grub pa nyid yin gyi/ ngo bo nyid kyis ni ma yin no zhes bya bar gnas so/ /de nyid kyi phyir/ bcom ldan 'das kyis kyang / 'phags pa ting nge 'dzin gyi rgyal po'i mdo las/ de tshe sdig med stobs bcu ldan pa yi/ /rgyal ba de ni ting 'dzin mchog 'di 'chad/ /srid pa'i 'gro ba rmi lam lta bu ste/ /'di la su yang mi skyo 'chi ba med/ /sems can ming dang srog kyang mi rnyed de/ /chos 'di rnams ni dbu ba chu shing 'dra//sgyu ma lta bu nam mkha'i glog 'dra ste/ /chu yi zla ba 'dra zhing smig rgyu bzhin/ /mi 'ga' 'jig rten 'dir yang shi nas ni/ /'jig rten gzhan du 'pho zhing 'gro med kyang / /las byas rnams ni nam yang chud mi za/ /'khor ba na yang dkar nag 'bras bu smin/ /rtag pa ma yin chad par mi 'gyur te//las bsags med cing gnas pa dag kyang med/ /de yang byas nas reg par mi 'gyur min/ /gzhan gyis byas pa tshor bar 'gyur ba'ang med/ /'pho ba med cing phyir yang 'ong ba med/ /thams cad yod pa ma yin med pa'ang min/ /'di na lta gnas 'jug pa dag pa min//sems can spyod pa rab zhi 'jug pa med/ /bde gshegs spyod yul rgyal ba'i yon tan ni/ /skye med zhi ba mtshan ma med pa'i gnas/ /stobs dang gzungs rnams dang ni stobs bcu'i stobs/ /'di ni sangs rgyas khyu mchog dam pa'i mchog /ces rgya cher gsungs so//slob dpon zla ba grags pa'i zhal snga nas sbyar ba'i tshig gsal ba las/ /snga rol na gnas pa brtag pa zhes bya ba rab tu byed pa dgu pa'i 'grel pa'o// //'dir smras pa/ nye bar len pa dang nye bar len pa po gnyis ngo bo nyid kyis grub pa ni ma yin no zhes gang smras pa de ni rigs pa ma yin te/dngos po ltos pa dang bcas pa rnams la yang ngo bo nyid dang bcas pa nyid mthong ba'i phyir ro/ /'di ltar bud shing la ltos nas me 'byung mod kyi/ me rang bzhin med pa ni ma yin te/ tsha ba dang sreg par byed pa nyid rang bzhin dang 'bras bu dmigs pa'i phyir ro/ / de bzhin du me la ltos nas bud shing yin mod kyi/ de rang bzhin med pa ni ma yin te/ bsreg par bya ba 'byung ba chen po bzhi'i rang bzhin nyid yin pa'i phyir ro/ /de bzhin du/ nye bar len pa la ltos pa dang bcas pa'i nye bar len pa po dang / nye bar len pa po la ltos pa dang bcas pa'i nye bar len pa yang ngo bo nyid yod par 'gyur ro//de'i phyir me dang bud shing bzhin du nye bar len pa dang / nye bar len pa po de gnyis kyang 'byung bar 'gyur ro/ /brjod par bya ste/ gal te me dang bud shing dag nyid yod na de ltar 'gyur na/ yod pa ni ma yin no/ /'dir gal te me dang bud shing dag yod par gyur na/de dag nges par gcig nyid dam tha dad pa nyid du yod par 'gyur grang / gnyi ga ltar yang mi rigs so zhes gsungs pa/ bud shing gang de me yin na/ /byed pa po dang las gcig 'gyur/ /gal te shing las me gzhan na/ /shing med par yang 'byung bar 'gyur/ / bud shing bsreg par bya ba shing la sogs pa las su gyur pa gang yin pa de'i sreg par byed pa po ni me yin no/ /de la gal te bud shing de nyid me yin no zhes bya bar rtog na ni de'i tshe byed pa po dang / /las dag gcig nyid du 'gyur na/ de ltar ni ma mthong ste/ rdza mkhan dang bum pa dag gam/gcad bya dang gcod pa po yang gcig nyid du thal bar 'gyur ba'i phyir la/ de yang khas ma blangs pa'i phyir ro/ /ci ste gzhan nyid yin na ni / de lta na yang / gal te bud shing las me gzhan du gyur na/ de'i tshe bud shing la ltos pa med par mi dmigs par 'gyur ro//bum pa las gzhan du gyur pa'i snam bu ni de la ltos pa med par mthong ba ma yin pa ma yin no/ /bud shing la ltos pa med pa'i me ni de ltar yang ma yin pas/ 'di ni mi rigs so/ /gzhan yang gal te bud shing las me gzhan du gyur na ni de'i tshe/ rtag tu 'bar ba nyid du 'gyur//'bar byed rgyu las mi 'byung zhing / /rtsom pa don med nyid du 'gyur/ /de lta yin na las kyang med/ /me bud shing las tha dad par gyur par 'dod pa na rtag tu 'bar ba nyid du 'gyur zhing / 'bar byed rgyu las mi 'byung bar 'gyur la/ /yang rtsom pa don med par 'gyur zhing /de lta yin dang / las kyang med par 'gyur ro/ /don 'di nyid bstan par bzhed nas/ gzhan la ltos pa med pa'i phyir/ /'bar byed rgyu las mi 'byung zhing / /rtag tu 'bar ba yin na ni/ /rtsom pa don med nyid du 'gyur/ /zhes bya bar gsungs so/ /de la des 'bar bar byed pas na 'bar bar byed de bud shing ngo //'di la 'bar bar byed pa rgyur yod pas na 'bar bar byed pa'i rgyu las 'byung ba'o/ /'bar bar byed pa'i rgyu las byung ba ma yin pa ni/ 'bar bar byed pa'i rgyu las mi 'byung ba'o/ /gal te 'bar bar byed pa las me gzhan yin par gyur na ni de'i tshe bud shing la ltos pa med par 'gyur ro//gang zhig gang las gzhan yin pa de ni ltos pa med de/ /bum pa dang snam bu bzhin no/ /de'i phyir gzhan la ltos pa med pa'i phyir 'ba' bar byed pa'i rgyu las mi 'byung bar 'gyur ro/ /de'i phyir rtag tu 'bar bar byed do / /'bar bar byed pa la ltos pa dang bcas pa'i me de ni med na 'chi bar 'gyur na//gang gi tshe/ 'bar bar byed pa la ltos pa med pa de'i tshe ni 'chi ba'i rkyen ma tshang bas rtag tu 'bar ba nyid du 'gyur ro/ /rtag tu 'bar ba yin na ni/ /mi 'chi bar bya ba'i phyir de nye bar len pa dang spar ba la sogs pa'i rtsom pa don med pa nyid du 'gyur ro//de lta yin na me las med cing mi bdog pa yin bzhin du byed pa por yang 'gyur ro/ /las yod pa ma yin pa ni byed pa po nyid kyang ma yin te/ /mo gsham gyi bu bzhin no/ /de'i phyir bud shing las me gzhan pa nyid kyang mi rigs so/ /'dir smras pa/ gang 'di skad du/gal te shing las me gzhan na/ /shing med par yang 'byung bar 'gyur/ /zhes gang smras pa de ni mi rigs te/ 'dir me dang bud shing dag gzhan nyid yin yang / bud shing med par me yod pa nyid ma yin te/ gang gi phyir/ 'bar bar gyur pa'i don mes bsreg par bya ba'i mtshan nyid can ni bud shing yin la/me yang de la brten nas dmigs kyi/ so sor ni ma yin no/ /gang gi tshe/ /de ltar me dang 'brel pa las bud shing du brjod par 'gyur zhing / me yang bud shing la brten nas dmigs kyi so sor ma yin pa de'i tshe/ gal te shing las me gzhan na zhes bya ba la sogs pa'i nyes par thal ba'i go skabs med do zhe na phyogs 'di yang mi rigs pa nyid du brjod pa'i phyir ro //de la gal te 'di snyam du/ bsreg bzhin bud shing yin sems na/ /gang tshe de tsam de yin na/ /gang gis bud shing de sreg byed/ /ces bya ba gsungs te/gal te 'bar ba dang ldan pa'i don bsreg par bya ba'i mtshan nyid can ni bud shing yin la/ me ni de'i rten can yin no snyam du sems na/ de ltar brtags kyang / mes bud shing bsreg go zhes bya ba mi 'thad de/ gang gi phyir/ /gang tshe de tsam de yin na/ /gang gis bud shing de sreg byed//ces bya ba 'byung ngo / /gang tshe de tsam de yin na/ /zhes bya ba ni gang gi tshe bsreg bzhin pa tsam zhig de yin pa na zhes bya ba'i don to/ /'dir mes bud shing bsreg go zhes rtog pa na/ bud shing ni 'bar bar gyur pa bsreg par bya ba yin no zhes bya bar 'gyur ro zhe na/ 'di las ma gtogs par gang gis bud shing sreg par byed pa'i me gzhan ni ma mthong ngo //de'i phyir 'di tsam zhig tu gyur pa 'di nye bar dmigs te/ 'di lta ste/ 'bar bar gyur pa'i bsreg par bya ba tsam mo/ /gang gi tshe de las tha dad pa'i me yod pa ma yin pa de'i tshe bud shing de gang gis sreg par byed/de'i phyir mes bud shing mi bsreg ste/ de las ma gtogs pa'i me med pa'i phyir ro/ /gang gi tshe de lta yin pa de'i tshe 'bar bar gyur pa 'ga' zhig kyang ga la yod de/ de'i phyir nyes pa de nyid bzlog tu med do/ /gzhan yang me dang bud shing dag gzhan nyid du khas len na/bsreg bzhin pa'i brjod pa med pas/ bsreg bzhin pa bud shing dug la 'gyur zhing / mes bud shing bsreg par yang ga la 'gyur zhes bstan pa'i phyir/ gzhan phyir mi phrad phrad med na/ /sreg pa mi 'gyur mi sreg na/ /'chi bar mi 'gyur mi 'chi na/ /rang rtags dang yang ldan par gnas//zhes gsungs te/ gal te bud shing las me gzhan du gyur na ni/ de gzhan yin pa'i phyir snang ba dang mun pa ltar bud shing dang phrad par mi 'gyur ro/ /phrad pa med pa'i phyir bsreg par yang mi 'gyur te/ bskal pa'i yul na gnas pa bzhin no snyam du dgongs so//de ltar na bsreg bzhin pa bud shing yin no zhes bya ba mi 'thad pa nyid do/ /de'i phyir me 'chi bar mi 'gyur la/ mi 'chi na yang rang gi rtags dang ldan pa nyid du gnas par 'gyur te/ rab tu 'bar zhing zhes bya ba'i tha tshig go/ /yang gi sgra ni rang gi rtags dang ldan pa kho nar gnas par 'gyur ba'am/yang na bud shing las me gzhan du gyur pa nyid med do zhes nges par bzung ba'am rnam par rtog pa'i don du blta bar bya'o/ yang na gzhan yin pa'i phyir mi phrad pa dang / phrad pa med na bsreg par mi 'gyur ba dang / mi bsreg na 'chi bar mi 'gyur ba dang /mi 'chi na rang gi rtags dang yang ldan par 'gyur ro zhes bsdu bar bya ba'i phyir ro/ /de'i phyir bud shing las me gzhan nyid du yang mi rigs so/ /'dir smras pa/ me dang bud shing dag gzhan yin na gzhan phyir mi phrad phrad med na/ /bsreg par mi 'gyur zhes bya ba la sogs pa gang smras pa de ni mi rigs te/'di ltar skyes pa dang / bud med dag gzhan nyid yin yang phrad par mthong ba yin la/ /me dang bud shing dag kyang de bzhin du 'gyur ro/ /brjod par bya ste/ ji ltar bud med skyes pa dang / /skyes pa'ang bud med phrad pa bzhin//gal te shing las me gzhan na/ /shing dang phrad par rung bar 'gyur/ /gal te me dang bud shing dag skyes pa dang bud med ltar/ phan tshun ltos pa med par grub par gyur na ni/ de de ltar 'gyur ba zhig na/ gyur pa ni ma yin no zhes gsungs pa ni/ gal te me dang shing dag ni//gcig gis gcig ni bsal gyur na/ /shing las me gzhan nyid yin yang / /shing dang phrad par 'dod la rag /ces bya ba ste bud shing la ltos pa med par me yod par 'gyur zhing / me la mi ltos par bud shing yod par 'gyur ba gang yin pa de lta bu ni mi srid do/ /de'i phyir dpe 'di ni don med pa yin te/gzhan nyid yin yang phan tshun ltos pa la rag las te/ skyes par gyur pa gang dag phrad par grub pa de dag nyid dpe nye bar dgod par rigs par 'gyur na/ de dag kyang yod pa ma yin pas/ gzhan nyid yin bzhin du phrad pa yod do zhes bya ba mi rigs so/ / 'dir smras pa/ gal te yang me dang bud shing dag la skyes pa dang bud med ltar phan tshun ltos pa med par grub pa med mod kyi/ de lta na yang phan tshun ltos pa ni re zhig yod pa yin no/ /phan tshun ltos pa de'i phyir me dang bud shing dag gi rang gi ngo bo grub pa ni yod pa yin te/ yod pa ma yin pa'i mo gsham gyi bu dang bu mo dag ni phan tshun ltos pa dang bcas pa nyid du ma mthong ngo //brjod par bya ste/ de lta na yang / gal te shing ltos me yin la/ /gal te me ltos shing yin na/ /gang ltos me dang shing 'gyur ba/ /dang por grub pa gang zhig yin/ /gal te me 'di ni bud shing 'di'i sreg par byed pa'i byed pa po yin no zhes de ltar bud shing la ltos nas mer rnam par 'jog cing /gal te bud shing 'di ni me 'di'i las yin no zhes de ltar me la ltos te/ bud shing rnam par 'jog pa de'i tshe de gnyis las sngar grub pa gang zhig yin / ci bud shing la ltos nas mer 'gyur ram/ /'on te me la ltos te bud shing du 'gyur/de la gal te bud shing dang por grub po zhes rtog na ni/ de ni mi rigs te me la ltos pa med cing bsreg bzhin pa ma yin pa ni bud shing nyid ma yin pa'i phyir dang / rtswa la sogs pa thams cad kyang bud shing nyid du thal bar 'gyur ba'i phyir ro/ /ci ste dang por me yin la phyis bud shing yin no zhe na/de yang rigs pa ma yin te/ bud shing las sngar grub pa'i me med pa'i phyir dang / rgyu med pa nyid du thal bar 'gyur ba'i phyir dang / phyis ltos pa dgos pa med pa'i phyir ro/ /de'i phyir 'dir gang la ltos nas cig shos 'grub par 'gyur ba dang por grub pa gang yang med do//ci ste yang sngar bud shing yin la phyis me yin no snyam du sems na / /de lta na yang / gal te shing ltos me yin na/ /me grub pa la sgrub par 'gyur/ /gal te bud shing la ltos nas mer 'gyur ro zhes rtog na/ de ltar na 'o na me grub zin pa la yang bsgrub par 'gyur te/dngos po yod cing grub pa'i ngo bo can kho na ltos par rigs kyi/ /yod pa ma yin pa'i lha sbyin ni khyim 'ga' la yang ltos pa ma yin no/ /gal te de ltar me yod par ma gyur na ni/ de bud shing la ltos par mi 'gyur ro/ /de'i phyir me yod par khas blang bar bya dgos la/de'i tshe na yang 'di bud shing la ltos pas ci zhig bya/ /gang gi don du bud shing la ltos pa 'bras bu dang bcas par 'gyur ba grub zin pa'i me ni yang bud shing gis byar med do/ /de'i phyir bud shing la ltos nas mer 'gyur ro zhes bya ba ni mi rigs so/ /gzhan yang gal te bud shing la brten nas mer 'gyur ro zhes rtog na/de lta yin na/ bud par bya ba'i shing la yang / /me med par ni 'gyur ba yin/ /gal te bud shing grub par ma gyur na ni de la me mi ltos pa nyid de/ ma grub pa la ltos pa mi rung ba'i phyir ro/ /de'i phyir bud shing me med par grub par khas blang par bya bar 'gyur na de ni de lta bu yang ma yin no//de'i phyir 'di ni yod pa ma yin no/ /ci ste dus gcig kho nar bud shing 'grub pas me 'grub cing / me 'grub pas kyang bud shing 'grub par 'gyur te/ de'i phyir/ gcig kyang sngar grub par khas ma blangs pa'i phyir/ /gang ltos me dang shing 'gyur ba//dang por grub pa gang zhig yin/ /zhes smras pa gang yin pa de mi rigs so zhes 'dod na/ /brjod par bya ste/ de ltar 'dod na ni yang gnyi ga grub pa yod pa ma yin te/ 'di ltar/ gal te dngos po gang ltos 'grub/ /de nyid la yang ltos nas ni/ /ltos bya gang yin de 'grub na/ / gang la ltos nas gang zhig 'grub/ /de la gal te me zhes bya ba'i dngos po gang zhig bud shing zhes bya ba'i dngos po gang zhig la ltos nas 'grub la/ bud shing zhes bya ba'i dngos po bdag nyid grub par bya ba'i phyir ltos par bya bar 'gyur ba gang yin pa de/ gal te me zhes bya ba'i dngos po gang zhig la ltos nas 'grub na/da ni gang la ltos nas gang zhig 'grub par 'gyur ba smros shig /gal te me med pa na bud shing 'grub pa nyid yod pa ma yin pa de'i tshe/ rgyu med pas bud shing med pa'i phyir de'i rgyu can gyi me 'grub par ga la 'gyur/ de bzhin du gal te bud shing zhes bya ba'i dngos po gang zhig /me zhes bya ba'i dngos po gang zhig la ltos nas 'grub la/ me zhes bya ba'i dngos po bud shing gi bdag nyid 'grub par bya ba'i phyir/ ltos par bya bar grub pa gang yin pa de yang gal te bud shing zhes bya ba'i dngos po de nyid ltos nas 'grub na/ da ni gang la ltos nas gang zhig 'grub par 'gyur ba brjod par bya dgos so//gal te bud shing med pa na me 'grub pa nyid yod pa ma yin pa de'i tshe rgyu med pas me med pa'i phyir de'i rgyu can gyi bud shing yod par ga la 'gyur/ 'di'i phyir yang me dang bud shing dag phan tshun ltos nas grub pa med de/ grub pa dang ma grub pa dag ltos pa ma yin pa'i phyir ro zhes bstan pa'i phyir gsungs pa/dngos po ltos grub gang yin pa/ /de ma grub na ji ltar ltos/ /ci ste grub pa ltos she na/ /de ni ltos par mi rigs so/ /me zhes bya ba'i dngos po bud shing zhes bya ba'i dngos po la ltos nas grub pa gang yin pa de ma grub pa 'am grub pa zhig bud shing la ltos grang /gal te ma grub pa zhig yin na ni/ de'i tshe ma grub pa'i phyir/ bud shing la mi ltos te bong bu'i rwa bzhin no/ /ci ste grub pa yin na ni grub pa'i phyir de ltos ci dgos te/ don med par 'gyur ba'i phyir grub zin pa yin yang bsgrub par bya ba ma yin no/ /de bzhin du bud shing la yang brjod par bya'o//de'i phyir me dang bud shing dag phan tshun ltos par ram/ dus gcig tu grub pa med do/ /gang gi phyir de lta yin pa de'i phyir/ shing la ma ltos pa'i me med de zhes bya ba'o/ /ci ste 'o na ma ltos par mer 'gyur ro snyam na/ 'di yang mi rung ngo zhes gsungs pa ni/shing la ma ltos me yang med/ /ces bya ba ste/ gzhan nyid bkag zin pa'i phyir dang / rgyu med pa nyid du thal bar 'gyur ba'i phyir ro/ /ji ltar bud shing la ltos pa'am/ ma ltos pa'i me med pa de bzhin du bud shing yang yin no zhes gsungs pa ni/me la ltos pa'i shing med de / me la ma ltos shing yang med/ /ces bya ba ste/ 'di'i don ni thal ma thag tu go bar zad pa nyid kyis na yang mi brjod do/ /'dir smras pa dpyad pa shin tu phra mo 'dis kho bo cag la ci dgos te/ gang gi phyir kho bo cag ni mngon sum gyi bud shing mes bsreg bzhin pa dmigs pa de'i phyir me dang bud shing dag yod do zhes bya ba 'di tsam zhig smra'o zhe na/brjod par bya ste/ gal te mes bud shing bsregs na de de ltar 'gyur na/ /sreg pa ni ma yin te 'di ltar gal te/ shing la me yod na ni des bud shing sreg par 'gyur na/ yod pa ni ma yin no zhes gsungs pa/me ni gzhan las mi 'ong ste/ /shing la'ang me ni yod ma yin/ /re zhig me ni bud shing ma gtogs par gzhan 'ga' zhig las 'ong ba med de/ de ma mthong ba'i phyir dang / rgyu med pas bud shing dang bral ba'i me la 'ong ba med pa'i phyir dang / bud shing dang bcas pa 'ong ba la dgos pa med pa'i phyir dang /der yang bud shing dang brgal zhing brtag pa mtshungs pas thug pa med par thal bar 'gyur ba'i phyir te/ me ni gzhan las mi 'ong ste/ /zhes bya ba'o/ /de bzhin du/ shing la yang me yod pa ma yin te/ de la ma dmigs pa'i phyir ro//ci ste rtsa ba dang chu la sogs pa ltar yod du zin kyang mngon par gsal bar byed pa'i rkyen ma tshang bas sngar dmigs par ma gyur bzhin du phyis gtsub shing gtsubs pa la sogs pa/ mngon par gsal bar byed pa'i rkyen yod pa las dmigs pa yin no snyam na/ ci ste rtsa ba dang chu la sogs pa rnams la mngon par gsal bar byed pa'i rkyen dag gis ci zhig byed ces 'di nyid re zhig dpyad par bya'o//de la re zhig rang gi ngo bo ni mi byed de yod par gyur pa'i phyir ro/ /mngon par gsal bar byed do zhe na/ mngon par gsal ba zhes bya ba 'di ci zhig gsal ba'o/ /de lta na ni/'o na de sngar yod pa ma yin pa'i phyir de nyid byed par 'gyur la/ de lta na rgyu la 'bras bu yod par smra ba btang bar 'gyur te/ sngar mngon par gsal ba med pa'i phyir dang / phyis yod pa'i phyir ro/ /rang gi ngo bo skye ba'i rkyen la ltos pa med pa'i phyir mngon par gsal ba rkyen la ltos pa nyid du yang mi 'gyur te/nam mkha'i me tog bzhin no/ /gzhan yang mngon par gsal ba 'di ni dngos po mngon par gsal bar gyur pa'am/ mngon par gsal bar ma gyur pa 'ga' zhig la rtog pa zhig na/ de la re zhig mngon par gsal bar gyur pa gang yin pa de ni mngon par gsal bar bya ba ma yin no /de la mngon par gsal bar bya ba don med pa'i phyir dang / thug pa med par thal bar 'gyur ba'i phyir ro/ /mngon par gsal bar ma gyur pa yang mngon par gsal bar mi byed de/ mngon par gsal bar ma gyur pa'i phyir/ nam mkha'i me tog bzhin no/ /de ltar na mngon par gsal ba yod pa ma yin no//ci ste yang rkyen rnams kyis yod par gyur pa rags pa nyid du byed pa yin no snyam na/ /de lta na yang rags pa nyid sngar med pas de nyid byed par 'gyur te/ de'i phyir rags pa nyid du byas pas mngon par gsal bar ga la 'gyur/ phra ba nyid kyang rgyu med pas med pa'i phyir/ci zhig rags par byas pa las mngon par gsal bar 'gyur/ de'i phyir de ltar rnam pa thams cad du bud shing la me mi srid pa'i phyir/ shing la'ang me ni yod ma yin/ /zhes bya ba'o/ /yod pa ma yin pa'i mes ni bud shing sreg pa yang mi 'thad pas/ / 'di ni khyod kyis mi bden pa zhig mthong ba yin no/ /gzhan yang song ba dang ma song ba dang / bgom pa dag la sun 'byin pa sngar bshad pa ji lta ba/ de bzhin shing gi lhag ma ni/ /song dang ma song bgom pas bstan/ /bud shing mes sreg bzhin pa dmigs so zhes bya ba'i bud shing 'di'i ste/bud shing gi skabs kyi sun 'byin lhag ma ni/ re zhig bsregs pa mi sreg ste/ /ma bsregs pa la'ang sreg pa min / /bsregs dang ma bsregs ma gtogs pa'i/ /bsreg bzhin shes par mi 'gyur ro/ /zhes bya ba la sogs pas bstan zin pa'i phyir 'don pa bzlog pa'i sgo nas song ba dang ma song ba dang bgom pa'i sun 'byin pa dang mtshungs par rig par bya'o//gang gi phyir de lta yin pa de'i phyir bud shing mes bsreg pa yod pa ma yin no zhes bya bar rig par bya'o/ /da ni ji skad bstan pa'i don gyi mjug bsdu ba'i phyir/ shing nyid me ni ma yin te/ /shing las gzhan la me yang med//me ni shing dang ldan ma yin/ /me la shing med der de med/ /ces bya ba gsungs so/ /de la/ bud shing gang de me yin na/ /byed pa po dang las gcig 'gyur/ /zhes bya ba 'dis me dang bud shing dag gcig nyid yin pa bkag pa'i phyir/ shing nyid me ni ma yin te//zhes bya'o/ /gal te shing las me gzhan na/ /shing med par yang 'byung bar 'gyur/ /zhes bya ba la sogs pas gzhan yin pa bkag pa'i phyir/ shing las gzhan la me yang med do/ /de nyid dang gzhan nyid kyi phyogs gnyi ga bkag pa nyid kyis na de dang ldan pa dang rten dang brten pa'i phyogs dag kyang /don gyis bkag pa'i phyir de dag kyang mjug bsdu ba'i phyir/ me ni shing dang ldan ma yin/ /me la shing med der de med/ /ces bya ba gsungs so/ /de la me ni shing dang ldan pa ma yin no/ /'di'i lam 'di la bud shing yod do zhes tha dad pa'am/ tha mi dad par bye brag tu 'chad grang na de la tha dad par ni/dper na lha sbyin ba glang dang ldan no zhes bya ba lta bu yin la/ tha mi dad par ni lha sbyin blo dang ldan no/ /lha sbyin gzugs dang ldan no zhes bya ba la sogs pa lta bu yin na/ me dang bud shing dag la phyogs gnyi ga yang bkag pa'i phyir/ me shing dang ldan no zhes bya ba'ang bkag pa byas pa yin no//gzhan du gyur pa'i 'khar gzhong ni rgya shug rnams kyi rten nyid du rtog na/ me la ni bud shing las gzhan pa nyid kyang yod pa ma yin pas/ me la shing med ces bya bar rigs so/ /bud shing la yang me med de gzhan nyid bkag pa nyid kyi phyir ro//de ltar na rten dang brten pa nyid bkag pa yang don gyis bstan pa nyid yin no/ /ji ltar rnam pa lngar rnam par brtags pa na/ me yod pa ma yin pa de bzhin du bdag kyang yin no zhes bsgre ba'i phyir/ me dang shing gis bdag dang ni/ /nye bar len pa'i rim pa kun/ /bum snam sogs dang lhan cig tu//ma lus par ni rnam par bshad/ /ces gsungs so/ /de la nye bar blang bar bya bas na/ nye bar len pa ste nye bar len pa'i phung po lnga'o/ /de dag la nye bar brten nas brtags pa/ nye bar len pa po/ 'dzin pa po/ sgrub par byed pa po gang yin pa de ni bdag tu 'dzin pa'i yul yin pa'i phyir 'di la bdag tu nga rgyal bzhag cing bskyed pas na bdag ces bya'o//de'i phyir/ bdag de dang nye bar len pa'i grub pa'i rim pa de thams cad ma lus par me dang bud shing dag gis rnam par bshad par khong du chud par bya'o/ /yang kun dang ma lus pa la khyad par ci lta yod ce na/kun smos pa ni thal ma thag pa'i phyogs lnga po sbyor bar byed pa yin te/ phyogs lnga po de dag thams cad kyang ma tshang ba med par me dang bud shing ltar bdag dang nye bar len pa gnyis la yang sbyar bar bya'o/ /'di dag ston pa la 'thad pa'i tshul sngar brjod pa gang yin pa de yang ma lus pas bdag dang nye bar len pa dag dgag par rig par bya'o//bdag dang nye bar len pa dag dgag pa me dang bud shing dag dang bdag nyid thams cad kyis mtshungs pa ni 'di gnyis kyi sgo nas yin par rig par bya'o zhes bstan par bya ba'i phyir/ rim pa kun/ma lus par ni zhes bshad do/ /de la nye bar len pa gang yin pa de nyid bdag nyid yin no zhes bya ba de lta bu ni mi rigs te/ byed pa po dang las dag gcig nyid du thal bar 'gyur ba'i phyir ro/ /nye bar len pa gzhan la nye bar len pa po gzhan ma yang ma yin te/ bdag phung po las tha dad par yang dmigs par thal bar 'gyur ba'i phyir dang /gzhan la ltos pa med pa'i phyir zhes bya ba la sogs par thal bar 'gyur ba'i phyir ro/ /gcig nyid dang gzhan nyid bkag pa'i phyir bdag phung po dang ldan pa yang ma yin no/ /gzhan nyid med pa'i phyir bdag la phung po dag yod pa dang /phung po dag la bdag yod pa yang ma yin no/ /gang gi phyir de ltar rnam pa lngar bdag yod pa nyid ma yin pa de'i phyir/ las dang byed pa po ltar bdag dang nye bar len pa gnyis phan tshun ltos pa'i grub pa yin no zhes bya bar gnas so/ /bdag dang nye bar len pa dag gi rim pa gang yin pa de yang de gnyis kho na'i ma yin te/'o na ci zhe na/ bum snam sogs dang lhan cig tu/ /zhes gsungs te/ dngos po ma lus pa dag dang lhan cig tu rnam pa thams cad rnam par bshad par rig par bya'o/ /bum pa la sogs pa ni rgyu dang 'bras bur gyur pa'am/yan lag dang yan lag can du gyur pa'am/ mtshan nyid dang mtshan gzhir gyur pa'am/ yon tan dang yon tan can du gyur pa dag yin te/ de la 'jim pa dang dbyu gu dang 'khor lo dang skud pa dang chu dang rdza mkhan gyi lag pa'i rtsol ba la sogs pa rnams ni bum pa'i rgyur gyur pa yin la/bum pa ni 'bras bur gyur pa'o/ /dum bu la sogs pa'am/ sngon po la sogs pa dag ni yan lag tu gyur pa yin la/ bum pa ni yan lag can yin no/ /lto ba yangs pa dang / mchu 'phyang ba dang / kha g.yel ba dang / mgul pa ring ba nyid la sogs pa rnams ni mtshan nyid yin la/bum pa ni mtshan gzhi'o/ /sngo bsangs nyid la sogs pa dag ni yon tan yin la/ bum pa ni yon tan can yin no zhes de ltar rnam par gzhag pa la yang me dang bud shing ltar rim par rnam par sbyar bar bya'o/ /bum pa la sogs pa rnams dang bdag dang nye bar len pa dag rnam par bshad pa ni dbu ma la 'jug pa las nges par bya'o//de'i phyir de ltar las dang byed pa po ltar bdag dang nye bar len pa dang bum pa la sogs pa rnams phan tshun ltos pa'i grub pa yin par rnam par gzhag la de bzhin gshegs pa'i gsung rab kyi don phyin ci ma log par yin par mngon par rlom pa nyid kyis/mu stegs pa'i gzhung lugs kyis nye bar brtags pa'i don gyi rnam par gzhag pa/ bde bar gshegs pa'i gsung rab las khong du chud pa'i don nyid du gcus nas/ shin tu blun pa nyid kyis na/ /gang dag bdag dang dngos po rnams//de bcas nyid dang tha dad par/ /ston pa de dag bstan don la/ /mkhas so snyam du mi sems so/ /de la de dang lhan cig tu 'jug pas na de bcas so/ /de dang bcas pa'i dngos po nyid ni de bcas nyid de/ tha mi dad pa rang gzhan ma yin pa dang gcig nyid ces bya ba'i don to/ / gang dag de bcas nyid der smra ba de dag ni bstan pa'i don la mkhas par slob dpon mi dgongs so/ /'di lta ste/ nye bar len pa gang gis bdag tu 'dogs pa'i nye bar len pa de dang de lhan cig pa nyid du yod de/ so so ma yin zhing tha mi dad par yod par 'gyur ro zhes bya ba'i tha tshig yin pa dang / de bzhin du 'jim pa la sogs pa'i rgyu gang gis bum par 'dogs pa de dang der tha mi dad pa nyid du yod pa yin gyi/ so sor ni ma yin pa de ltar gang dag bdag dang dngos po rnams de dang bcas pa nyid du smra ba de dag ni/ rten cing 'brel bar 'byung ba mchog tu zab pa/ rtag pa dang chad pa dang bral ba/brten nas gdags pa'i ming can gyi de kho na nyid mthong ba ma yin no/ /gang dag bdag kyang gzhan la nye bar len pa yang gzhan/ 'bras bu yang gzhan rgyu yang gzhan no zhes bya ba la sogs pas so so so sor ston par byed cing gzhan nyid du mthong ba de dag bstan pa'i don la mkhas par slob dpon ni mi dgongs so//ji skad du/ 'gro ba sgra brnyan dang 'dra bar/ /gcig nyid gzhan nyid dang bral zhing / /'pho dang 'jig pa dang bral bar/ /sman med khyod kyis thugs su chud/ /ces bshad pa lta bu'o/ /de ltar rnal 'byor pa me dang bud shing brtag pas chos kyi de kho na nyid khong du chud pa'i lus ni dus mtha'i me dag gam//nyon mongs pa 'dod chags dang zhe sdang dang gti mug gi me dag gis 'tshig pa ma yin no/ /ji skad du/ bcom ldan 'das kyis/ bskal pa brgya phrag mang por rab bsregs kyang / /nam mkha' sngon chad nam yang mi 'tshig bzhin//chos rnams nam mkha' mtshungs par rnam rig pas/ /de ni gzhar yang me nang yong mi 'tshig/ gal te sangs rgyas zhing rnams 'bar gyur la/ /'bar ba 'di dag ma lus zhi shog ces/ /ting 'dzin gnas nas smon lam 'di btab pa / /sa rnams zhig kyang de la 'gyur ba med//ces gsungs pa lta bu'o/ /de bzhin du/ ji ltar gtsub shing dang ni gtsub stan dang / /lag pa'i rtsol ba 'di gsum 'dus pa yi/ /rkyen 'di dag las me ni 'byung 'gyur zhing / /byung ste bya ba byas nas myur du 'gag /de nas 'di ni gang nas 'ongs sam gar//song zhes mkhas pa gang zhig tshol bar byed/ phyogs dang phyogs mtshams kun tu btsal ba dang / /'di yi 'gro dang 'ong ba rnyed min bzhin/ /phung po dag dang skye mched khams rnams ni/ /nang yang stong la phyi rol stong pa ste/ /thams cad bdag gis dben zhing gnas med la//chos kyi mtshan nyid nam mkha'i ngo bo nyid/ /chos kyi mtshan nyid 'di 'dra 'di dag ni/ /mar me mdzad pa mthong nas khyod kyis rtogs/ /ji ltar nyid kyis rjes su rtogs pa ltar/ /de bzhin lha mir bcas pas rtogs par gyis/ /log pa yang dag ma yin brtags pa yi //'dod chags zhe sdang dag gis 'gro ba gdungs/ /thugs rje'i sprin las zhi ba bsil ba'i chu/ /'dren pa bdud rtsi'i rgyun ni rab tu phob/ /ces bya ba la sogs pa gsungs so/ /slob dpon zla ba grags pa'i zhal snga nas sbyar ba'i tshig gsal ba las/ me dang bud shing brtag pa zhes bya ba rab tu byed pa bcu pa'i 'grel pa'o// //'dir smras pa/ bdag ni yod pa nyid de/ 'khor ba yod pa'i phyir ro/ /gal te bdag yod par ma gyur na ni/ 'gro ba lnga'i 'khor bar 'gro ba dang 'ong ba'i ngo bor skye ba dang 'chi ba gcig nas gcig tu brgyud pas gang zhig 'khor bar 'gyur//bcom ldan 'das kyis kyang / dge slong dag skye ba dang rga shi'i 'khor ba ni thog ma dang tha ma med do/ /sems can ma rig pa'i sgrib pa dang ldan pa/ /sred pa'i kun tu sbyor ba can/ /sred pa'i lu gu rgyud kyis bcings pa/ /'khor zhing rgyug pa rnams kyi sngon gyi mtha' mi mngon no zhes gsungs so//gang gi tshe bcom ldan 'das kyis bstan pas 'khor ba yod pa de'i tshe 'khor ba po yang yod la/ de la yang bdag ces bya'o/ /brjod par bya ste/ /gal te 'khor ba nyid yod na/ /bdag kyang yod par 'gyur na yod pa ni ma yin no/ / 'di ltar/ sngon mtha' sngon nam zhes zhus tshe/ /thub pa chen pos min zhes gsungs/ /'khor ba thog ma mtha' med de/ /de la sngon med phyi ma med/ /mtha' dang cha dang cha shas zhes bya ba rnams ni rnam grangs so/ /sngon gyi mtha' ni sngon gyi cha zhes bya ba'i don to/ /gal te 'khor ba zhes bya ba 'ga' zhig yod na ni/bum pa la sogs pa dag bzhin du de la nges par sngon dang phyi ma yang yod par gyur na/ yod pa ni ma yin te/ bcom ldan 'das kyis kyang / dge slong dag skye ba dang rga shi'i 'khor ba ni thog ma dang tha ma med do zhes gsungs so/ /gang gi phyir de ltar 'khor ba thog ma dang tha ma med par gsungs pa de'i phyir 'khor ba nyid yod pa ma yin no zhes bcom ldan 'das kyis gsal bar gsungs pa ma yin nam/de'i phyir sngon dang phyi ma'i mtha' ma dmigs pa'i phyir/ 'khor ba med de mgal me'i 'khor lo bzhin no zhes bya bar gnas so/ /'dir 'di dpyad par bya ste/gal te bcom ldan 'das kyis 'khor ba'i sngon dang / phyi ma bkag na/ ji ltar dge slong dag de lta bas na/ 'khor ba zad par bya ba'i phyir nan tan du bya'o snyam du de ltar khyed kyis bslab par bya'o zhes bya ba 'di gsungs she na/ brjod par bya ste/ sems can ma rig pa'i sgrib pa dang ldan pa zhes bya ba la sogs pa'i khyad par nye bar bkod pas de dag kho na'i 'khor ba de thog ma dang tha ma med par rtogs kyi/de kho na nyid kyi ye shes kyi rlung gi shugs kyis ma rig pa'i sgrib pa'i ljon shing drungs phyung ba rnams kyis ni ma yin te/ 'jig rten las 'das pa'i lam gyi mes/nyon mongs pa'i ljon shing ma lus par bsregs pa de dag la ni mtha' yod pa nyid do zhes shes par bya'o/ /yang ji ltar na thog ma dang bral ba rnams la tha ma yod par bstan zhe na/ phyi rol gyi 'bru la sogs pa dag la thog ma med kyang / /me la sogs pa dang phrad pa las tha ma yod pa ni mthong ba nyid do//ji skad du/ 'phags pa'i lhas/ ji ltar sa bon mtha' mthong zhing / /de la thog ma yod min ltar/ /de bzhin rgyu ni ma tshang phyir/ /skye ba'ang 'byung bar mi 'gyur ro/ /zhes bshad do/ /tha ma bstan pa de yang sems can 'khor ba'i btson rar bsdams pa rnams spo bar bya ba'i phyir//'jig rten pa'i tha snyad la gzhug te / 'jig rten pa'i shes pa la ltos nas mdzad pa yin te/ dngos po sems pa yin na ni/ 'khor ba nyid med na de'i phyir de zad pa lta ga la yod/ 'dir smras pa/ 'jig rten pa'i shes pa la ltos te tha ma ltar thog ma yang ci ste ma gsungs she na/brjod pa/ rgyu med pa'i skyon du thal bar 'gyur ba'i phyir/ 'jig rten pa'i shes pa la ltos nas kyang 'khor ba'i thog ma med de/ de'i phyir gnyi ga ltar yang thog ma med pa nyid do zhes shes par bya'o/ /'dir smras pa/ gal te yang 'khor ba la thog ma dang tha ma gnyis yod pa ma yin mod kyi de lta na yang ma 'gags pa'i phyir/dbus yod pa yin no/ /de'i phyir 'khor ba yod de / /dbus yod pa'i phyir ro/ /'dir gang yod pa ma yin pa de la ni dbus med de / dper na rus sbal gyi spu'i gos bzhin no/ /khyod ni bzhad gad bya bar 'os pa zhig ste/gang la thog ma tha med pa/ /de la dbus ni ga la yod/ /ma yin nam/ thog ma zhes bya ba ni/ je dang sngon dang dang po la zhes bya'o/ /tha ma zhes bya ba ni mtha' dang mjug dang rgyun chad pa la bya'o/ /'khor ba gang la thog ma dang tha ma bkag pa de la dbus yod par ga la 'gyur/de'i phyir 'khor ba ni nam mkha' ltar thog ma dang tha ma dang dbus dang bral ba'i phyir ming tsam zhig tu zad de/ mgal me'i 'khor lo la sogs pa bzhin no snyam du dgongs pa yin no/ /'khor ba med pa'i phyir/ bdag kyang yod pa ma yin no/ /gang gi phyir/ de ltar 'khor ba la thog ma dang /tha ma dang dbus dag med pa de nyid kyi phyir 'khor ba med pas/ /skye ba dang / rga shi la sogs pa rnams la snga ba dang phyi ba rnams dang lhan cig pa'i rim pa yang yod pa ma yin pa nyid do zhes gsungs pa/ de phyir de la snga phyi dang / /lhan cig rim pa mi 'thad do/ /ji ltar mi 'thad pa de ltar bstan pa'i phyir/gal te skye ba sngar 'gyur la/ /rga shi phyi ma yin na ni/ /skye ba rga shi med pa dang / /ma shi bar yang skye bar 'gyur/ /zhes bya ba gsungs te/ gal te skye ba snga mar gyur na ni/ de'i tshe rga shi dang bral bar 'gyur na/ rga ba la sogs pa dang bral ba ni mi rung ste/ 'dus ma byas nyid du thal bar 'gyur ba'i phyir ro/ /rga shi dang bral ba'i dngos po la skye ba yod par rtog pa na/ lha sbyin gzhan du ma shi bar 'dir dang por skye bar rtogs par 'gyur ro/ /de'i phyir 'khor ba la thog ma yod par 'gyur zhing / rgyu med pa'i nyes par yang 'gyur ro/ /bdag 'das pa'i dus na byung bar gyur to zhes de ltar sngon gyi mtha' la rtogs par yang mi 'gyur zhing /sngon byung bar ma gyur pa las phyis 'dir skye bar yang 'gyur ro/ /ci ste ji ltar a mra la sogs pa rnams sngar rga shi dang 'brel ba med par yang dang po kho nar skye bar mthong ste/ de bzhin du bdag kyang yin no snyam na/de ltar ma yin te/ bsgrub par bya ba dang mtshungs pa'i phyir ro/ /a mra la sogs pa rnams kyang ni rang gi sa bon 'gags par gyur pa na / /skye ba'i phyir gzhan du ma zhig pa skye ba ma yin pas 'di ni gong ma dang mtshungs so/ /ci ste sa bon ni shing las gzhan nyid yin te/ de'i phyir shing gi skye ba ni gzhan du ma zhig pa sngon du 'gro ba can nyid do snyam na/ de ltar ni ma yin te/ rgyu dang 'bras bu dag gzhan nyid yin par ma grub pa'i phyir ro/ /de skad du yang / gang la brten te gang 'byung ba/ /de ni re zhig de nyid min/ /de ni gzhan yang ma yin te/ /de phyir chad min rtag ma yin//zhes 'chad par 'gyur ro/ /de phyir sa bon las shing gzhan nyid ma yin te/ des na 'di ni bsgrub par bya ba dang mtshungs pa yin no/ /gang gi phyir/ gzhan du ma shi ba la 'dir skye ba yod pa yang ma yin pa de'i phyir skye ba snga ma yin par khas blang bar mi bya'o/ /ci ste rga shi snga la skye ba 'phyi ba yin na ni//de lta na yang / gal te skye ba 'phyi 'gyur la/ /rga shi snga ba yin na ni/ /skye ba med pa'i rga shi ni/ /rgyu med par ni ji ltar 'gyur/ /skye ba'i rkyen gyis rga shi zhes bya ba 'byung bas na/ bcom ldan 'das kyis rga shi skye ba'i rgyu rkyen nyid du gsungs na/ gal te 'di snga ba yin na ni/de'i tshe rgyu med par 'gyur ro/ /de'i phyir 'di ni mi rigs so/ /gang las/ bong ba bteg par gyur pa ni/ /bteg pa la ni rgyu yod kyi/ /bteg pa lta zhig rgyu las ni/ gzhan pa ltung ba med pa nyid/ /ces bshad pa de yang ji ltar bteg pa kho nar ltung ba'i rgyu yin gyi//gzhan ma yin pa de bzhin du/ /'dir yang skye ba kho na 'jig pa'i rgyu nyid yin par smra'i gzhan ni ma yin no/ /de'i phyir 'jig pa rgyu med pa nyid yod pa ma yin no/ /'di skye ba'i rgyu rkyen nyid yin pas 'byung ba kho na 'jig pa'i rgyu yin pa'i phyir na/ de ltar 'dus byas chos de dag//rgyu dang bcas par 'byung ba ste/ /skyes nas 'jig pa gang yin pa/ /'di ni chos rnams rang bzhin no/ /zhes bya ba'i tshigs su bcad pa 'di yang legs par drangs par 'gyur ro/ /da ni skye ba dang rga shi dag lhan cig nyid du yang mi 'gyur bar bstan pa'i phyir/ skye ba dang ni rga shi dag/lhan cig rung ba ma yin te/ /skye bzhin pa na 'chi 'gyur zhing / /gnyi ga rgyu med can du 'gyur/ /zhes bya ba gsungs te/ gal te skye ba dang rga shi dag lhan cig pa nyid du 'gyur na ni/ de'i tshe skye bzhin pa 'chi bar 'gyur na/ 'di ni rigs pa yang ma yin te/ mun pa dang snang ba ltar phan tshun 'gal ba'i phyir dus gcig pa nyid du rigs pa yang ma yin zhing /skye bzhin pa nyid 'chi ba zhes bya ba gang yin pa de lta bu ni 'jig rten du yang ma mthong ngo / /gzhan yang skye ba la sogs pa dag lhan cig 'byung bar rtog na ni rgyu med pa nyid du 'gyur ro/ /ba glang gi rwa g.yas g.yon lhan cig tu gyur pa dag ni phan tshun gyi rgyu can nyid du mthong ba yang ma yin pas/'di ni mi rigs so/ /de'i phyir de ltar/ gang la snga phyi lhan cig gi/ /rim pa de dag mi srid pa'i/ /skye ba de dang rga shi de/ /ci yi phyir na spro bar byed/ /skye ba gang dang rga shi gang la snga ba dang 'phyi ba dang lhan cig gi rim pa de dag med pa'i skye ba de ma dmigs pa na/'phags pa rnams ci'i phyir spro bar byed/ ci'i phyir gyi sgra ni mi srid pa la bya ste/ spro bar mi mdzad pa nyid do zhes ba'i don to/ /rga shi de yang ma dmigs na ci'i phyir spro bar byed/ yang dag pa ji lta ba bzhin gzigs pa nyid kyi phyir ro snyam du dgongs so//yang na de ltar skye ba la sogs pa dag yod pa ma yin na/ byis pa rnams yod pa ma yin pa'i skye ba de dang / gang zhig yod pa ma yin pa'i rga shi de ci'i phyir spro bar byed/ de'i phyir byis pa rnams kyis spros pa ni dngos po yod pa ma yin pa nyid do zhes bya bar dgongs pa'o//ji ltar 'khor ba la sngon gyi mtha' yod pa ma yin pa de bzhin du dngos po gzhan rnams la yang yin no zhes gsungs pa/ 'khor ba 'ba' zhig sngon gyi mtha'/ /yod ma yin par ma zad kyi/ rgyu dang 'bras bu nyid dang ni/ /mtshan nyid dang ni mtshan gzhi nyid/ /tshor dang tshor po nyid dang ni//don yod gang dag ci yang rung / /dngos rnams thams cad nyid la yang / /sngon gyi mtha' ni yod ma yin/ /de la gal te rgyu snga la 'bras bu 'phyi bar gyur na ni/ 'bras bu med pa'i rgyu rgyu med par 'gyur ro/ /'on te 'bras bu snga la rgyu 'phyi na ni/ de lta na yang rgyu bas snga ba'i 'bras bu rgyu med pa nyid du 'gyur ro//ci ste rgyu dang 'bras bu cig car du gyur na ni/ de lta na yang gnyi ga rgyu med par 'gyur ro/ /de bzhin du mtshan nyid dang mtshan gzhi dag dang / tshor ba dang tshor ba po dag la yang sbyar bar bya'o/ /'khor ba'i rgyu bshad pa rgyu dang 'bras bu la sogs pa bshad par bya ba 'ba' zhig tu ma zad kyi/gzhan yang dngos po gzhan gang dag shes pa dang shes bya dang / tshad ma dang gzhal bya dang / bsgrub bya dang sgrub byed dang / yan lag dang yan lag can dang / yon tan dang yon tan can la sogs pa de dag la yang sngon gyi mtha' mi rigs so zhes bya bar sbyar bar bya'o//de nyid kyi phyir/ 'phags pa dkon mchog sprin gyi mdo las/ /chos kyi 'khor lo bskor ba dang / /gzod nas zhi zhing ma skyes pa/ /rang gzhan mya ngan 'das pa yi/ /chos rnams mgon po khyod kyis bstan/ /zhes 'phags pa byang chub sems dpa' chen po sgrib pa thams cad rnam par sel bas bcom ldan 'das la bstod pa yin no//de bzhin du/ gzod ma nas ni stong zhing ma 'ongs chos/ /song ba med cing gnas med gnas kyis dben/ /sgyu ma'i rang bzhin rtag tu snying po med/ /thams cad dag cing rnam dag nam mkha' bzhin/ rgyal ba'i chos ni gang dag rab ston pa//der yang mi zad pas ni mi mthong ste/ /chos 'di snga nas bdag med sems can med/ /de dag rab tu ston kyang mi zad 'gyur/ /btags pa tsam du brtags nas bstan pa yin/ /'khor ba la ni tha ma mi rnyed de/ /gang dag sngon byung mtha' ni mtshan nyid med/ma 'ongs dus kyang shes par bya ba'i phyir/ /las dang bya ba de ltar zhugs 'gyur te/ /rab dang tha ma dag tu'ang 'byung bar 'gyur/ /chos rnams rab tu blun zhing rang bzhin stong / /thams cad bdag med par yang shes par gyis/ /zhes bya ba la sogs pa 'byung ngo / / slob dpon zla ba grags pa'i zhal snga nas sbyar ba'i tshig gsal ba las/ sngon dang phyi ma'i mtha' brtag pa zhes bya ba rab tu byed pa bcu gcig pa'i 'grel pa'o// //'dir smras pa/ /bdag ni yod pa nyid do / /de dang 'brel ba can gyi sdug bsngal yod pa'i phyir ro//'dir nye bar len pa'i phung po lnga la sdug bsngal zhes brjod do/ /de yang yod la/ sdug bsngal de yang 'ga' zhig la 'gyur bar bya dgos te/ rten med par ni ma yin no/ /de'i phyir sdug bsngal la rten yod pa nyid yin la/ de yang bdag yin no/ /brjod par bya ste/ gal te sdug bsngal nyid yod na/bdag yod par 'gyur na yod pa ni ma yin no/ /'di ltar de ni yod na/ bdag gis byas pa'am/ gzhan gyis byas pa'am/ gnyi gas byas pa'am/ rgyu dang bral ba zhig tu 'gyur ba zhig na/ 'dod pa na yang rnam pa thams cad du de byas pa nyid yod pa ma yin no//zhes bstan pa'i phyir/ /kha cig sdug bsngal bdag gis byas/ /gzhan gyis byas dang gnyi gas byas / /rgyu med pa las 'byung bar 'dod/ /de ni bya bar mi rung ngo / /zhes bya ba gsungs so/ /de la rgol ba kha cig gis ni/ sdug bsngal bdag gis byas so zhes bya ba rtogs so/ / gzhan po dag gis ni gzhan gyis byas pa yin la/ gzhan dag gis ni gnyi gas byas pa yin zhing 'ga' zhig dag gis ni sdug bsngal rgyu med par 'byung ba nyid do zhes bya bar rtogs so/ /'dod par gyur pa'i sdug bsngal de ni rnam pa thams cad du bya bar te bskyed par bya bar mi rung ngo //'di ni dam bca' ba tsam yin pa de bsgrub par bya ba'i phyir/ /gal te bdag gis byas gyur na/ /de phyir brten nas 'byung mi 'gyur/ /gang phyir phung po 'di dag la/ /brten nas phung po 'di dag 'byung / /zhes bya ba gsungs so/ /de la bdag gis zhes bya ba ni bdag rang gis zhes bya ba'i don to//gal te bdag gis sdug bsngal byas par gyur na ni/ sdug bsngal gyi rang gi ngo bo de nyid kyis sdug bsngal gyi rang gi ngo bo de nyid byas par 'gyur ro/ /de ci'i phyir rten cing 'brel bar 'byung bar mi 'gyur ro/ /rgyu dang rkyen la mi ltos par 'byung bar 'gyur ro zhes bya ba'i don te/rang gi ngo bo yod pa'i phyir ro/ /yod pa ma yin pas ni rang gi ngo bo byed pa ma yin no/ /'di ni rten cing 'brel bar 'byung ba yang yin te/ 'di ltar/ gang phyir phung po 'di dag la/ /brten nas phung po de dag 'byung ba'i phyir te/ gang gi phyir/ 'chi ba'i dus kyi phung po 'di dag la brten nas/ skye ba'i char gtogs pa'i phung po de dag 'byung ba'i phyir ro/ /de'i phyir sdug bsngal bdag gis byas so zhes bya ba mi rigs so/ /da ni gzhan gyis byas pa yang yod pa ma yin no zhes gsungs pa/ gal te 'di las de gzhan zhing / /gal te de las 'di gzhan na/ /sdug bsngal gzhan gyis byas 'gyur zhing //gzhan de dag gis de byas 'gyur/ /gal te 'chi ba'i dus kyi phung po 'di dag las skye ba'i cha'i phung po de dag gzhan du 'gyur zhing / skye ba'i char gtogs pa de dag las 'chi ba'i dus kyi phung po 'di dag gzhan yin na ni/ de'i tshe sdug bsngal gzhan gyis byas par 'gyur na/ de dag la ni gzhan nyid ma mthong ste/rgyu dang 'bras bu'i 'brel par gnas pa med pa'i phyir ro/ /gang la brten te gang 'byung ba/ /de ni re zhig de nyid min/ /de las gzhan pa'ang ma yin phyir/ /de phyir chad min rtag ma yin/ /zhes 'chad par 'gyur ro/ /de'i phyir sdug bsngal gzhan gyis byas par yang yod pa ma yin no//gal te gzhan nyid yin na ni/ /de yi tshe gzhan nyid yin dang / /gzhan du gyur pa'i phung po de dag gis gzhan du gyur pa de dag byas so zhes bya ba brjod par nus par 'gyur na/ de ni de ltar yang ma yin no/ /de'i phyir sdug bsngal gzhan gyis byas pa yang yod pa ma yin no//ci ste gang gi phyir sdug bsngal nyid kyis sdug bsngal byas pa de'i phyir bdag gis byas so zhes ni mi smra'o/ /'o na ci zhe na/ gang zag bdag gis gang bdag nyid kyis byas pa yin gyi/ gzhan gyis byas nas 'di la byin pa ni ma yin te/ de'i phyir sdug bsngal bdag gis byas so zhes smra'o snyam na/brjod par bya ste/ gal te gang zag bdag gis ni/ / sdug bsngal byas pa'i gang zag ste/ /sdug bsngal ma gtogs gang zhig yin/ /gal te mi'i sdug bsngal nye bar len pa'i phung po lnga'i mtshan nyid can 'di gang zag bdag nyid kyis byas so zhes bya bar rtag na/gang bdag gis sdug bsngal de byas pa'i gang zag te rtog mod/ gal te re zhig sdug bsngal gang gis gang zag bdag nyid der 'dogs par byed pa'i sdug bsngal de nyid des byas pa yin na ni/ sdug bsngal de ni 'di yin la/ 'di'i byed pa po ni 'di yin no zhes phye ste brjod dgos so//ci ste yang mi'i sdug bsngal gyi nye bar len pa can gyi gang zag gis/ lha'i sdug bsngal byas par gyur na ni/ /'o na de gang zag bdag gis byas pa ma yin gyi/ gang zag gzhan gyis byas pa nyid du 'gyur ro/ /ci ste nye bar len pa tha dad kyang gang zag tha mi dad par 'dod na/'di yang yod pa ma yin te/ nye bar len pa las tha dad cing / gzhan du gyur pa'i gang zag bstan par mi nus pa'i phyir ro/ /de ltar na re zhig sdug bsngal gang zag bdag gis byas pa ma yin no/ /'dir smras pa/ gang zag bdag gis sdug bsngal byas so zhes de skad du su smra/'o na ci zhe na/ sdug bsngal ni gang zag gzhan las 'byung ba yin no/ /'di ltar mi'i gang zag ni lha'i sdug bsngal las gzhan nyid yin la/ gang gi phyir mi'i gang zag gis kyang / lha'i sdug bsngal byas nas lha'i gang zag la ster bar byed cing / lha'i sdug bsngal des kyang lha'i gang zag go zhes 'dogs par byed pa de'i phyir/gang zag de'i sdug bsngal de ni gang zag gzhan las 'byung ba yin no/ /brjod par bya ste/ gal te gang zag gzhan las ni/ /sdug bsngal 'byung na gzhan zhig gis/ /sdug bsngal de byas gang sbyin de/ /sdug bsngal ma gtogs ci ltar rung //gal te lha'i sdug bsngal mi'i gang zag gis byas la/ /mi'i gang zag des kyang sdug bsngal de byas nas/ /gzhan lha'i gang zag la ster bar byed do zhes bya ba yin na ni/ gang la sbyin par bya ba'i lha'i gang zag de/ lha'i sdug bsngal las ma gtogs par ji ltar rung bar 'gyur/de ltar na/ re zhig gang zag gzhan las 'byung ba'i sdug bsngal la len pa po nyid yod pa ma yin no/ /da ni gang zhig sbyin par byed pa de yang yod pa ma yin no zhes gsungs pa/ gal te gang zag gzhan sdug bsngal/ /'byung na gang gis de byas nas/ /gzhan la ster ba'i gang zag gzhan//sdug bsngal ma gtogs gang zhig yin/ /gang gis lha'i sdug bsngal byas nas lha'i gang zag la ster bar byed cing / nye bar len pa gang gis mi'i gang zag der gdags pa de ni/ mi'i nye bar len pa las tha dad pa gang zhig yin par 'gyur/ de'i phyir gang zag gzhan las byung ba'i sdug bsngal yang yod pa ma yin no//de'i phyir/ bdag gis byas par ma grub pas/ /sdug bsngal gzhan gyis ga la byas/ /gzhan gyis sdug bsngal gang byed pa/ /de ni de yi bdag byas 'gyur/ /gal te lha'i gang zag gis sdug bsngal mi'i gang zag gis byas pa'i phyir/gzhan gyis byas pa yin na ni/ de ni mi'i gang zag gi rang gis byas pa nyid du 'gyur na/ de yang yod pa ma yin no zhes bshad zin to/ /de'i phyir/ gang gi tshe bdag gis byas par ma grub pa'i phyir sdug bsngal de mi'i gang zag gi bdag gis ma byas pa de'i tshe/ lha zhes bya ba'i gang zag gzhan gyi sdug bsngal de gzhan gyis byas par ga la 'gyur zhes bya ba 'di las kyang sdug bsngal gzhan gyis byas pa yod pa ma yin no//da ni phyogs gnyis char rnam pa gzhan gyi sgo nas kyang yod pa ma yin par bstan pa'i phyir/ re zhig sdug bsngal bdag byas min/ /de nyid kyis ni de ma byas//gal te gzhan bdag ma byas na/ /sdug bsngal gzhan byas ga la 'gyur/ /zhes bya ba gsungs so/ /'di las kyang sdug bsngal bdag dang gzhan dag gis byas par mi rigs so/ /gang gi phyir re zhig sdug bsngal bdag gis byas pa ni ma yin no/ /ci'i phyir zhe na/gang gi phyir de nyid kyis de byas pa ma yin pa'i phyir te/ bdag nyid la byed pa 'gal ba'i phyir ro/ /de'i phyir/ bdag gis byas pa yod pa ma yin no/ /gzhan gyis byas pa yang yod pa ma yin te/ gang gi phyir/ byed po zhes bya bar brtags pa'i gzhan gang yin pa de nyid re zhig bdag gis ma byas shing bdag nyid kyis ma grub ste/de yang rgyu gzhan la ltos pa'i phyir ro/ /gang zhig rang gi bdag nyid kyis grub pa ma yin pa de ni yod pa ma yin pa'i rang bzhin du gyur pas gzhan byed par ji ltar 'gyur te/ 'di ni mi rigs so/ /da ni sdug bsngal gnyis kas byas pa yang yod pa ma yin no zhes gsungs pa/gal te re res byas gyur na/ /sdug bsngal gnyi gas byas par 'gyur/ /gal te re res sdug bsngal byed par 'gyur na ni/ de'i tshe sdug bsngal gnyi gas byas pa yin na/ de ni re res byas pa yang ma yin te/bshad zin pa'i skyon du 'gyur ba'i phyir ro/ /re res srog gcod pa ma byas par ni gnyi gas byas so zhes brjod pa ma mthong ngo / /da ni sdug bsngal rgyu med pa las byung ba yang ji ltar med pa de ltar bstan pa'i phyir/ /bdag gis ma byas gzhan ma byas/ /sdug bsngal rgyu med ga la 'gyur//zhes gsungs te/ gzhan gyis ma byas pa/ gzhan gyis ma bskyed pa 'di la yod pas na/ gzhan gyis ma byas pa'o/ /'di la bdag gis ma byas pa yod pas na bdag gis ma byas pa'o/ /gal te ji skad bshad pa'i tshul gyis sdug bsngal bdag gis byas pa med cing /gzhan gyis byas pa yang med pa de'i tshe rgyu med pa yod par ga la 'gyur te/ nam mkha'i me tog gi dri zhim po bzhin no/ /sdug bsngal med pa'i phyir na de'i rten du gyur pa'i bdag kyang lta ga la yod/ ji ltar rnam pa bzhir dpyad na sdug bsngal yod pa ma yin pa de bzhin du/ phyi rol gyi dngos po sa bon dang myu gu dang bum pa dang snam bu la sogs pa dag kyang rig par bya'o zhes bstan pa'i phyir/sdug bsngal 'ba' zhig rnam pa bzhi/ /yod ma yin pa ma yin gyi/ /dngos po thams cad dag la yang / /rnam pa bzhi po yod ma yin/ /zhes bya ba gsungs te/ thams cad snga ma bzhin sbyar bar bya'o//gal te sdug bsngal la sogs pa 'di dag la rnam pa bzhi po med na/ 'o na da ni 'di dag rnam pa gang gis 'grub ce na/ brjod par bya ste/ gal te sdug bsngal la sogs pa 'di dag rang bzhin gyis yod par gyur na ni/ nges par rnam pa bzhi po 'di dag las gang yang rung ba zhig gis 'grub par 'gyur ba zhig na/yod pa ni ma yin no/ /de'i phyir sdug bsngal la sogs pa dag rang bzhin gyis yod pa ma yin par nges so/ /'on te phyin ci log tsam gyi bdag nyid yod par rnyed pa/ sdug bsngal la sogs pa kun rdzob la rten cing 'brel bar 'byung ba'i rnam par gzhag pa tshol na ni/de'i tshe las dang byed pa po brtags pa'i rab tu byed par bshad pa'i rnam pas ji skad smras pa'i phyogs bzhi bsal nas rkyen nyid 'di pa tsam gyi don gyi rten cing 'brel par 'byung ba grub par khas blang bar bya'o/ /ji skad du/ sdug bsngal bdag gis byas pa dang /gzhan gyis byas dang gnyi gas byas/ /rgyu med rtog ge ba yis 'dod/ /khyod kyis brten nas 'byung bar gsungs/ /zhes bshad do/ /bcom ldan 'das kyis kyang / kun rdzob tu ni rgyal bas chos bshad de/ /'dus byas 'dus ma byas yin de ltar ltos/ /yang dag nyid du bdag dang bdag med de//'gro ba kun gyi mtshan nyid 'di 'dra'o/ /dge dang nag po'i las rnams mi 'jig ste/ /bdag gis byas pa bdag ni myong bar 'gyur/ /las kyi 'bras bu 'pho bar mi 'gyur te/ /rgyu med par yang myong bar mi 'gyur ro/ /srid pa thams cad sgyu ma dbang med pa//gsog dang gsob tu gyur pa dbu ba bzhin/ /sgyu ma smig rgyu lta bur rtag tu stong / /sgra yis bshad kyang de dag dben pa yin/ /brag phug ri dang gcong rong klung rnams su/ /rkyen gyis ji ltar brag ca 'byung ba ltar/ /de bzhin 'dus byas 'di kun rig par gyis/ /'gro ba thams cad sgyu ma smig rgyu bzhin//zhes bya ba la sogs pa gsungs so/ /slob dpon zla ba grags pa'i zhal snga nas sbyar ba'i tshig gsal ba las/ bdag gis byas pa dang gzhan gyis byas pa brtag pa zhes bya ba rab tu byed pa bcu gnyis pa'i 'grel pa'o// //gang gi phyir de ltar rab tu byed pa thal ma thag pa'i tshul gyis rnam par dpyad pa na/dngos po rnams la bdag dang gzhan dang gnyi gas byas pa dang / rgyu med pa las byung ba nyid med cing skyed par byed pa'i rnam pa gzhan yang med la/ ma rig pa'i rab rib kyis blo gros kyi mig nyams par byas pa rnams la dngos po 'di dag skye ba'i ngo bor yang snang ba de'i phyir/rang bzhin med pa nyid du gyur pa na sgyu ma'i rta dang glang po che la sogs pas/ de mi shes pa rnams ltar byis pa rnams slu bar byed pa yin no/ /de nyid kyi phyir/ blo'i spyan chos thams cad kyi rang bzhin lkog tu ma gyur pa mnga' ba/ ma rig pa'i bag chags ma lus par drungs phyung ba/sems can phyin ci log bzhis phyin ci log tu gyur zhing skyabs med pa yongs su bskyab par mdzad pa'i slad du rang bzhin med pa phyin ci ma log par nye bar ston pa lhur mdzad pa/ thugs rje chen po'i mnga' ba'i sangs rgyas bcom ldan 'das kyis chos gang zhig/slu ba de ni brdzun zhes gsungs/ /'du byed thams cad slu ba'i chos/ /des na de dag brdzun pa yin/ /mdo las dge slong dag 'dus byas slu ba'i chos can gang yin pa de ni brdzun pa yin la/ mi slu ba'i chos can mya ngan las 'das pa gang yin pa de ni bden pa dam pa'o zhes bya ba dang /de bzhin du 'di ni slu bar byed pa'i chos can no/ /'di ni 'jig pa'i chos can no zhes gsungs so/ /de'i phyir tshul 'dis gang su zhing 'jig pa'i chos can de ni brdzun pa yin no zhes de skad du/ bcom ldan 'das de bzhin gshegs pas gsungs pa dang /'du byed thams cad kyang slu ba'i chos can yin pas de'i phyir/ 'du byed de dag slu ba'i chos can yin pas brdzun par 'gyur ro/ /de la slu ba'i chos can ni 'drid par byed cing phyin ci log tu snang ba ste/ mgal me'i 'khor lo bzhin no/ /de'i rang bzhin ma yin pa nyid kyis na 'du byed thams cad brdzun pa ste//slu ba'i chos can yin pa'i phyir/ smig rgyu'i chu bzhin no/ /gang zhig bden pa de ni slu ba'i chos can ma yin te/ dper na mya ngan las 'das pa bzhin no/ /de'i phyir/ bstan pa'i rigs pa dang lung 'di las/ dngos po rnams rang bzhin med par grub ste/ shes rab kyi pha rol tu phyin pa las chos thams cad ni stong pa ste/rang bzhin med pa'i tshul gyis so zhes 'byung ba'i phyir ro/ /'dir smras pa/ gal te de ltar slu ba'i chos can nyid kyis/ 'du byed thams cad brdzun pa nyid du bstan na/ de lta na ni dngos po thams cad med pas dngos po thams cad la skur pa 'debs pa'i log par lta ba nyid du 'gyur ro//brjod par bya ste/ gang dag da dung du yang khyod slu bar byed pa slu ba'i chos can dag yod pa 'di ni bden no/ /gal te slu chos gang yin pa/ de brdzun de la ci zhig slu / /ma yin nam/ gang gi tshe kho bo cag gi slu ba can gang yin pa de ni brdzun pa'o zhes bshad pa de'i tshe de la ci zhig slu ste/de la ci zhig dngos po med par 'gyur/ /gal te dngos po 'ga' zhig yod par gyur na ni/ de la skur pa btab pas med par lta ba'i log par lta bar 'gyur na/ /gang gi tshe dngos po cung zad kyang ma mthong ba de'i tshe/ der ci zhig slu bar 'gyur te/ 'ga' yang dngos po med par mi 'gyur bas/khyod kyis glan ka 'di ni mi rigs so/ /'dir gal te dngos po med pa'i lta ba yang mi ston na/ lung 'dis ci zhig ston/ brjod par bya ste/ bcom ldan 'das kyis de gsungs pa/ /stong nyid yongs su bstan pa yin/ /bcom ldan 'das kyis de skad bstan pa gang yin pa de ni dngos po med par ston pa ma yin gyi//'o na ci zhe na/ stong pa nyid yongs su ston pa yin te/ rang bzhin gyis ma skyes pa'i yongs su gsal bar byed pa yin no zhes bya ba'i don to/ /ji skad du mdo las/ gang zhig rkyen las skyes pa de ma skyes/ /de la skye ba'i rang bzhin yod ma yin//rkyen la rag las gang de stong par bshad/ /gang zhig stong nyid shes de bag yod min / /zhes gsungs so/ /'dir lung gis dngos po'i rang bzhin gyis ma skyes pa yongs su gsal bar byed pa ni ma yin te/ 'on te ci zhe na/ rang bzhin med pa ste rang bzhin mi gnas pa nyid dang /'jig pa nyid ston par byed pa yin no/ /'di gang las she na/ dngos rnams ngo bo nyid med de/ /gzhan du 'gyur bar snang phyir ro/ /gzhan du 'gyur ba ste/ yongs su 'gyur ba mthong ba'i phyir ro zhes bya ba'i tha tshig go/ /'di skad du gal te/ dngos po rnams la rang bzhin med na/de'i tshe 'di dag gzhan du 'gyur ba dmigs par mi 'gyur na/ yongs su 'gyur ba ni dmigs pa yang yin te/ de'i phyir rang bzhin mi gnas pa nyid mdo'i don yin par shes par bya'o zhes bstan par 'gyur ro/ /'di'i phyir yang de ni de ltar yin te/ gang gi phyir/ dngos po ngo bo nyid med de//gang phyir dngos rnams stong pa nyid/ /'di ltar dngos po gang zhig ngo bo nyid med pa de ni yod pa ma yin te/ dngos po rnams kyi chos stong pa nyid ces bya ba ni 'dod pa yin no/ /yod pa ma yin pa'i mo gsham gyi bu la/ de'i sngo bsangs nyid mi 'thad pas chos can med pas/ de la brten pa'i chos kyang mi 'thad pa de'i phyir dngos po rnams rang bzhin yod pa yin no//gzhan yang / gal te ngo bo nyid med na/ /gzhan du 'gyur ba gang gi yin/ /gal te dngos po rnams kyi rang bzhin med na/ yongs su 'gyur ba'i mtshan nyid can gyi gzhan du 'gyur ba gang yin pa de gang gi yin par 'gyur zhes 'dzer to//'di la brjod par bya ste/ de ltar yongs su btags kyang / gal te ngo bo nyid yod na/ /ji lta bur na gzhan du 'gyur/ /'dir chos gang zhig dngos po gang la mi 'khrul pa de ni de'i rang bzhin zhes bsnyad de/ gzhan gyis gegs byar med pa'i phyir ro//de la mi 'khrul ba'i me'i tsha ba la ni 'jig rten na rang bzhin zhes brjod la/ tsha ba de nyid chu dag la dmigs pa na rkyen gzhan las byung bas bcos ma yin pa'i phyir rang bzhin ma yin no/ /gang gi tshe/ de ltar rang bzhin ni 'khrul ba med par 'gyur ba yin par bya dgos pa de'i tshe 'khrul pa med pas gzhan du 'gyur ba med de/me ni grang bar 'gyur ba ma yin no/ /de bzhin du dngos po rnams la yang rang bzhin khas len na gzhan du 'gyur ba nyid med par 'gyur na/ de dag ni gzhan du 'gyur ba nyid du dmigs pa yang yin te/ de'i phyir rang bzhin yod pa ma yin no//gzhan yang gang zhig snang ba las rang bzhin dang bcas pa nyid du 'gyur ba gzhan du gyur pa 'di ni dngos po rnams la mi srid pa nyid do/ /ji ltar mi srid pa de ltar bstan pa'i phyir/ de nyid la ni gzhan 'gyur med/ /gzhan nyid la yang yod ma yin/ /gang phyir gzhon nu mi rga ste/ /gang phyir rgas pa'ang mi rga'o//zhes bya ba gsungs te/ re zhig dngos po sngar gyi gnas skabs na gnas pa de nyid ni gzhan du 'gyur bar mi 'thad do/ /'di ltar lang tsho'i gnas skabs nyid la gnas pa'i gzhon nu la ni gzhan du 'gyur ba yod pa ma yin no/ /ci ste gnas skabs gzhan thob pa nyid la gzhan du 'gyur ba nyid rtog na/de yang mi 'thad de/ gzhan du gyur pa zhes bya ba ni rgas pa'i rnam grangs yin te/ de gal te gzhon nu la mi 'dod kyi gzhan rgas pa kho na la 'gyur na ni/ de yang mi rigs te/ gang gi phyir rgas pa la ni yang rga ba dang / 'grel pa dgos pa med pa'i phyir ro/ /rgas pa la yang rga ba dang 'brel pas ci zhig bya ste/de med par yang rgas pa nyid yod pas rgas pa rga'o zhes bya ba ni mi rigs so/ /ci ste gzhon nu nyid gzhan du 'gyur ro zhe na/ de ni mi rigs te/ rgas pa'i gnas skabs ma thob pa la gzhon nu zhes brjod pa'i phyir dang / gnas skabs gnyis kyang phan tshun 'gal ba'i phyir ro//gzhan yang / /gal te de nyid gzhan 'gyur na/ /'o ma nyid ni zhor 'gyur ro/ /ci ste 'o ma'i gnas skabs btang nas/ zho'i gnas skabs su gyur pa de'i phyir 'o ma nyid zhor 'gyur ro snyam na/ brjod par bya ste/ gal te phan tshun 'gal bas 'o ma nyid zhor 'gyur ro zhes bya bar mi 'dod na ni/'o ma las gzhan gang zhig ni/ /zho yi dngos po yin par 'gyur/ /ci chu zho'i dngos por 'gyur ram/ /de'i phyir gzhan zho'i dngos por 'gyur ro zhes bya ba 'di ni ma 'brel ba yin no/ /de'i phyir/ de ltar gzhan du 'gyur ba med pa'i phyir de snang ba las dngos po rnams rang bzhin dang bcas par 'grub par ga la 'gyur/de'i phyir 'di ni mi rigs so/ /ji skad du/ 'phags pa dkon mchog 'byung gnas zhes bya ba theg pa chen po'i mdo las/ chos gang skye ba med cing 'byung ba med/ /'chi 'pho med cing rga bar mi 'gyur ba/ /mi yi seng ge yis ni der bstan zhing / /sems can brgya phrag dag ni de la bkod//gang la'ang ngo bo nyid ni gang yang med/ /gzhan yang ma yin sus kyang mi rnyed pa/ /nang na ma yin phyi rol dag na yang / /mi rnyed de dag la ni mgon pos bkod/ /bde bar gshegs pas zhi ba'i 'gro gsungs kyang / /'gro ba gang yang rnyed par mi 'gyur te/ / de dag 'gro las grol bar rnam par gsungs/ /grol nas sems can mang po grol bar mdzad/ /bdag med par ni chos kun ston mdzad cing / /sems can 'dzin las 'jig rten rnam par grol/ /bdag nyid 'gro las grol zhing 'gro grol bas/ /de bzhin pha rol gshegs kyang rgal ba'ang med//drang srong chen po srid pa'i pha rol phyin/ /pha rol gshegs pa gang yang mi rnyed 'gyur/ /pha rol yod ma yin zhing tshu rol med/ /pha rol song ngo zhes kyang tshig tu gsung / /gang gis tshig tu smra ba de yang med/ /gang smras de yi tshig kyang yod ma yin/ /gang la smra ba de yang rnyed mi 'gyur//gang gis shes pa de yang yod ma yin/ /log par rtog la chags pa'i dbang gis su/ /'dir ni 'gro ba 'di kun rab tu 'khyams/ /skyes bu gang zhig zhi ba'i chos rig pa/ /des ni rang 'byung de bzhin gshegs pa mthong / /chos mchog zhi ba rnams kyang rab tu shes//dga' ba rnyed nas sems can tshim par byed/ /nyon mongs rgyal nas de nyid rgyal bar 'gyur/ /bdag nyid rgyal bar gyur zhing gnas pa med/ /de phyir rgyal ba'i byang chub rab tu mkhyen/ /sangs rgyas nas ni 'gro ba shes par byed/ /ces bya ba la sogs pa gsungs pa lta bu'o//dngos po ngo bo nyid med pa ni yod pa ma yin te/ dngos po rnams stong pa nyid du ni 'dod pa yin no/ /de'i phyir stong pa nyid kyi rten du gyur pa dngos po'i rang bzhin yod do zhes bya ba gang yin pa de dag mi rigs so zhes gsungs pa/ /gal te stong min cung zad yod/ /stong pa'ang cung zad yod par 'gyur//mi stong cung zad yod min na/ /stong pa'ang yod par ga la 'gyur/ /gal te stong pa nyid ces bya ba zhig 'ga' zhig tu yod na ni/ de'i tshe de'i rten dngos po'i rang bzhin yod par 'gyur na/ de ltar ni ma yin no/ /'dir stong pa nyid dang bdag med pa nyid dag ni chos thams cad kyi spyi'i mtshan nyid yin no zhes khas blangs pas stong pa ma yin pa'i chos med pa'i phyir stong pa nyid ma yin pa yod pa ma yin no//gang gi tshe stong pa ma yin pa'i dngos po med cing stong pa nyid ma yin pa yang yod pa ma yin pa de'i tshe/ gnyen po la ltos pa dang bral bas nam mkha'i me tog gi phreng ba ltar stong pa nyid kyang yod pa ma yin no zhes nges par bya'o//gang gi tshe stong pa nyid yod pa ma yin pa de'i tshe de'i rten dngos po yang yod pa ma yin no/ /'dir smras pa/ gang bstan par bya ba'i phyir sangs rgyas bcom ldan 'das/ 'gro ba mu stegs pa'i smra ba ma rig pa'i smag chen po'i rjes su son pa la/'gro ba'i sgron me gcig pur gyur pa/ bdag med pa nye bar ston pa'i me lce rgyun mi chad pa mnga' ba rnams 'byung ba/ rnam par thar pa'i sgo gsum po stong pa nyid dang mtshan ma med pa dang smon pa med pa zhes bya ba/ bcom ldan 'das kyis gdul bya rnams la rnam par grol bar bya ba'i phyir bstan pa mu stegs pa'i gzhung lugs thams cad dang thun mong ma yin pa dag ni/bde bar gshegs pa'i gsung rab kho na la dmigs na/ khyod kyis ni da ltar de bzhin gshegs pa'i gsung rab rnam par 'chad pa'i rgyu thabs kyis stong pa nyid de spong bar brtsams pa yin pas/mtho ris dang byang grol gyi lam rgyun gcod par byed pa khyod dang brtsad pas chog go/ brjod par bya ste/ e ma kyi hud gnam du phyogs pa ltar shin tu phyin ci log tu gyur pas mya ngan las 'das pa'i grong khyer du 'gro ba'i lam zhi ba drang po bor nas/ /dngos po la mngon par zhen pa'i sbrul gyis dkris pa/'khor ba'i dgon pa'i lam las thar pa'i grong khyer du 'gro ba nyid du rten pa khyod ni dam pa dag gis smad par bya ba yin bzhin du mngon pa'i nga rgyal zhen pas gzung ba'i dbang nyid kyis de dag nyid la smod par byed pa zhig ste/ kwa'i nyon mongs pa'i nad ma lus par gso bar mdzad pa/sman pa'i rgyal po chen po ni / /rgyal ba rnams kyi stong pa nyid/ /lta kun nges par 'byung bar gsungs/ /gang dag stong pa nyid lta ba/ /de dag sgrub tu med par gsungs/ /ma yin nam/ 'dir stong pa nyid ni 'di lta bar gyur pa thams cad kyi mngon par zhen pa thams cad nges par 'byung ba ste log pa gang yin pa de yin la/lta bar gyur pa rnams log pa tsam ni dngos po yang ma yin no/ /gang dag stong pa nyid de la yang dngos por mngon par zhen pa de dag la ni kho bo cag mi smra ste/ de'i phyir kho bo cag gis nye bar bstan pa las rtog pa mtha' dag logs na thar par 'gyur ba ga la yod/'di ltar gang zhig la khyod la zong ci yang mi ster ro zhes smras pa dang / kye bdag la ci yang med pa zhes bya ba'i zong de nyid byin cig ces smra na/ de zong med par 'dzin du gzhug par thabs gang gis nus/ de bzhin du gang dag stong pa nyid la yang mngon par zhen pa de dag gi de la dngos por mngon par zhen pa de gang gis 'gog par 'gyur/de'i phyir sman pa chen po la yang nyes pa'i 'du shes yod pa'i phyir gso bar mdzad pa'i mchog sman pa chen po de bzhin gshegs pa rnams kyis de dag bor ba nyid yin no//ji skad du 'phags pa dkon mchog brtsegs pa chen po'i mdo las/ gang stong pa nyid kyis chos rnams stong par mi byed de/ chos rnams nyid stong pa dang / gang mtshan ma med pas chos rnams mtshan ma med par mi byed de/ chos rnams nyid mtshan ma med pa dang /gang smon pa med pas chos rnams smon pa med par mi byed de chos rnams nyid smon pa med par gang dag de ltar so sor rtog pa de ni 'od srungs dbu ma'i lam chos rnams la yang dag par so sor rtog pa zhes bya'o/ /'od srungs gang dag stong pa nyid du dmigs pas stong pa nyid la rtog pa de dag ni ngas gsung rab 'di las nyams rab tu nyams zhes bshad do//'od srungs gang zag tu lta ba ri rab tsam la gnas pa ni bla'i/ mngon pa'i nga rgyal can stong pa nyid du lta ba ni de lta ma yin no/ /de ci'i phyir zhe na/ 'od srungs lta bar gyur pa thams cad las byung ba ni stong pa nyid yin na/'od srungs gang stong pa nyid kho nar lta ba de ni gsor mi rung ngo zhes ngas bshad do/ /'od srungs 'di lta ste dper na mi nad pa zhig yod la/ sman pas de la sman btang nas sman des de'i nad thams cad bskyod de sman lto na 'dug pa de nyid mi 'byung na/ 'od srungs 'di ji snyam du sems/mi de nad de las thar bar 'gyur ram gsol pa/ bcom ldan 'das de ni mi 'gyur lags te/ gang sman des nad thams cad bskyod nas sman ltor mchis pa de nyid ma byung na/ mi de'i bro nad shin tu tshabs che bar 'gyur lags so/ /bcom ldan 'das kyis bka' stsal pa/'od srungs de bzhin du lta bar gyur pa thams cad las 'byung ba ni stong pa nyid kho nar yin na/ 'od srungs gang dag stong pa nyid kho nar lta ba de ni gsor mi rung ngo zhes ngas bshad do zhes gsungs pa lta bu'o/ /slob dpon zla ba grags pa'i zhal snga nas sbyar ba'i tshig gsal ba las/'du byed brtag pa zhes bya ba rab tu byed pa bcu gsum pa'i 'grel pa'o// //'dir smras pa/ dngos po'i rang bzhin ni yod pa nyid de/ de dag gi phrad pa nye bar bstan pa'i phyir ro/ /'dir gang med pa de la ni phrad pa med do / /dper na mo gsham gyi bu dang bu mo gnyis bzhin no//mig dang gzugs la brten nas mig gi rnam par shes pa 'byung ngo zhes bya ba dang / gsum 'dus pa las reg pa'o/ /reg pa dang lhan cig 'byung ba ni tshor ba'o zhes rgya cher 'byung ba dang / de bzhin du tshor ba dang 'du shes zhes bya ba'i chos 'di gnyis ni phrad pa yin gyi/ ma phrad pa ni ma yin no zhes 'du byed rnams la ni phrad par bstan pa yang yin no//de'i phyir de ltar phrad pa bstan pa las ni dngos po'i rang bzhin yod pa nyid do/ /brjod par bya ste/ gal te phrad pa nyid yod par 'gyur na/ 'di de ltar 'gyur ba zhig na yod pa ni ma yin no/ /gang gi phyir/ blta bya lta ba lta ba po//gsum po de dag gnyis gnyis dang / /thams cad kyang ni phan tshun du/ /phrad par 'gyur ba yod ma yin/ /de la blta bya ni gzugs so/ /lta ba ni mig go/ /lta ba po ni mig gi rnam par shes pa'o/ /gsum po 'di dag las rnam pa gnyis gnyis phrad pa ni yod pa ma yin te/ mig dang gzugs sam/ mig dang rnam par shes pa'am/ rnam par shes pa dang gzugs la phrad pa yod pa ma yin no/ /de ltar rnam pa gnyis gnyis dang phrad pa yod pa ma yin no/ /thams cad kyang ni ste gsum po de dag gcig car phrad pa yang yod pa ma yin no/ /ji ltar blta bar bya ba dang lta ba dang lta ba po rnams gnyis gnyis sam thams cad du yang phrad pa med pa/de bzhin 'dod chags chags pa dang / chags par bya ba lta ba ste/ 'dod chags dang chags pa'am/ 'dod chags dang chags par bya ba la phrad pa yod pa ma yin la/ gsum po dag cig car yang phrad pa yod pa ma yin no//'di dag ji ltar yin pa de bzhin du/ nyon mongs pa/ lhag ma rnams dang skye mched kyi/ /lhag ma'ang rnam gsum nyid kyis so/ /ste phan tshun du phrad par 'gyur ba yod pa ma yin no/ /rnam pa gsum ni rnam gsum mo/ /rnam pa gsum gyi dngos po ni rnam gsum nyid de//rnam gsum nyid nges so/ /nyon mongs pa lhag ma ni zhe sdang dang gti mug la sogs pa dag go/ /de dag ni zhe sdang dang zhe sdang ba po dang / sdang bya la sogs pa rnam pa gsum gyis yin la/ nyan pa dang / nyan pa po dang / mnyan par bya ba la sogs pa gsum gyis kyang ngo //yang ci'i phyir 'di dag la phrad par yod pa ma yin zhe na/ gzhan dang gzhan du phrad 'gyur na/ /gang phyir blta bya la sogs pa / /gzhan de yod pa ma yin pa/ /de phyir phrad par mi 'gyur ro/ /zhes gsungs te/ gang phyir zhes bya ba 'di ni gang gi phyir gyi don la'o//gal te blta bar bya ba la sogs pa dag la phan tshun du gzhan nyid yod na ni/ de'i tshe chu dang 'o ma gnyis bzhin du phan tshun phrad pa yod par 'gyur ba zhig na/ gang gi phyir blta bar bya ba la sogs pa dag la gzhan de yod pa ma yin pa de'i phyir/ de dag phrad par mi 'gyur ro//gzhan yang / blta bya la sogs 'ba' zhig la/ /gzhan nyid med par ma zad kyi/ /gang yang gang dang lhan cig tu/ /gzhan pa nyid du mi 'thad do/ /blta bar bya ba la sogs pa rgyu dang 'bras bu'i dngos por gnas pa rnams 'ba' zhig la gzhan nyid yod pa ma yin par ma zad kyi/bum pa dang snam bu la sogs pa'i dngos po thams cad la yang yod pa ma yin no zhes nges par bya'o/ /blta bar bya ba la sogs pa 'di dag la phan tshun gzhan nyid ji ltar med pa de ltar bstan pa'i phyir/ gzhan ni gzhan la brten te gzhan/ /gzhan med par gzhan gzhan mi 'gyur//gang la brten te gang yin pa/ /de ni de las gzhan mi 'thad/ /ces gsungs te/ 'dir bum pa zhes bya ba'i dngos po snam bu las gzhan no zhes brjod pa gang yin pa'i gzhan de ni gzhan la brten nas gzhan du 'gyur la/ dngos po gzhan med par te gzhan mi bdog par ni gzhan gzhan du mi 'gyur ro//bum pa zhes bya ba'i dngos po gang zhig snam bu zhes bya ba'i dngos po gzhan la brten nas gzhan yin par 'gyur ba'i bum pa zhes bya ba'i dngos po de ni snam bu'i dngos po de las gzhan du 'gyur ba ni ma yin no zhes bya bar nges par bya'o//gang gi phyir gang la brten nas gang zhig tu 'gyur ba de ni de las gzhan du mi 'gyur te/ ltos pa dang bcas pa'i phyir sa bon dang myu gu'am/ ring po dang thung ngu bzhin no/ /de skad du yang / gang la brten te gang 'byung ba/ /de ni re zhig de nyid min/ /de ni gzhan pa'ang ma yin phyir/ / de phyir rtag min chad ma yin/ /zhes 'chad par 'gyur ro/ /'dir smras pa/ gal te snam bu ni bum pa las gzhan yin la/ tha dad par gyur pa'i snam bu de la ltos nas bum pa gzhan du 'gyur na de'i tshe nyes pa ci zhig yod ce na/ brjod par bya ste/ gal te gzhan ni gzhan las gzhan/de tshe gzhan med par gzhan 'gyur/ /gzhan med par ni gzhan 'gyur ba/ yod min de yi phyir na med/ /ces bya ba ste/ 'dir gzhan gyi sgra gcig ni nye bar bstan par bya ba yin la/ gzhan ni don gzhan 'dzin pa yin zhing / yang gzhan ni rab tu grags par gyur pa brjod pa yin pas gzhan gyi sgra gsum nye bar bkod do//gal te bum pa zhes bya ba'i dngos po de gzhan snam bu las gzhan yin par 'gyur na ni/ bum pa zhes bya ba'i dngos po de gzhan snam bu med par yang gzhan du 'gyur te/ de'i tshe snam bu la ma ltos pa'i bum pa gcig pu gzhan nyid du 'gyur ro//'di ltar gang zhig gang las gzhan yin pa de ni de med par yang 'grub ste/ dper na bum pa de nyid rang gi ngo bor grub pa las gzhan snam bu la mi ltos pa bzhin no/ /de bzhin du gal te bum pa'i gzhan nyid gzhan snam bu las yin na ni/ de'i tshe snam bu la ma ltos pa'i bum pa la yang gzhan nyid yin par 'gyur na/snam bu la ma ltos pa'i bum pa gcig pu la ni gzhan nyid ma mthong ngo / /de'i phyir/ /gzhan la brten nas gzhan du 'gyur ro zhes smra ba na/ gang la ltos nas gang zhig gzhan yin pa de ni de las gzhan ma yin no zhes gsal bar khas blangs par 'gyur ro//'dir smras pa/ gal te de ltar 'ga' zhig las gzhan nyid 'ga' zhig la yod pa ma yin na/ de'i tshe gang gi phyir gzhan ni gzhan la brten nas gzhan yin pa de'i phyir/ de gzhan du mi 'gyur ro zhes bya ba 'di nyid kyang brjod par mi srid pa ma yin nam/brjod par bya ste/ gang gi phyir/ dngos po rnams kyi gzhan nyid grub pa phan tshun ltos pa ma yin pa de nyid kyi phyir/ 'jig rten pa'i tha snyad la gnas te gzhan zhes brjod kyi/ dngos su na gzhan nyid brtags pa na yod pa ma yin no zhes smra'o/ /gal te gzhan nyid yod pa ma yin yang /'jig rten pa'i kun rdzob tu bum pa snam bu las gzhan yin no zhes brjod na/ 'o na ni sa bon dang myu gu gnyis kyang gzhan nyid du ci'i phyir mi smra zhe na/ brjod par bya ste/ 'jig rten pas ni sa bon dang myu gu gnyis bum pa dang / snam bu ltar gzhan nyid du mi rtogs pa nyid de/bum pa dang snam bu ltar bskyed bya skyed byed nyid med par thal ba'i phyir dang / cig car yod par thal bar 'gyur ba nyid kyi phyir ro/ /gzhan yang gang gi phyir 'jig rten pa ni shing 'di ngas btsugs so zhes sa bon tsam zhig btsugs nas sa bon gyi 'bras bu shing ston par byed pa yin te/de'i phyir rgyu dang 'bras bur gyur pa rnams kyi gzhan nyid ni 'jig rten na yang yod pa ma yin no zhes bya bar rnam par 'jog pa yin no/ /'dir smras pa/ gal te dngos po gzhan la ltos pa dang bcas pa'i gzhan gyi blo 'byung na ni/ de'i phyir de gzhan du mi 'gyur ro/ / zhes bya ba'i nyes pa 'dir 'gyur na/ de skad du ni mi smra ste/ 'o na ci zhe na/ 'di na gzhan nyid ces bya ba spyi yang yin la khyad par yang yin pa zhig yod pa yin la/ de gang la 'du ba'i dngos po de ni dngos po gzhan la ltos pa med kyang gzhan zhes rjod par byed de/ de'i phyir kho bo cag gi phyogs la smras pa'i nyes pa'i go skabs med do//brjod par bya ste/ gal te gzhan nyid yod na ni 'di de ltar 'gyur na yod pa ni ma yin no/ /'dir gzhan nyid 'di rtog pa na/ /gzhan nam gzhan ma yin pa zhig la rtog grang na/ gnyi ga ltar yang mi 'thad do zhes bstan pa'i phyir/ /gzhan nyid gzhan la yod ma yin//gzhan ma yin la'ang yod ma yin/ /zhes gsungs so/ /de la gal te gzhan la gzhan nyid yod do zhes rtog na ni/ gzhan nyid brtags pas ci zhig bya/ /gzhan nyid du rtogs pa ni gzhan du brjod pa grub par bya ba'i phyir yin na/ gzhan du brjod pa de ni gzhan nyid med par yang grub pa nyid de/gang gi phyir gzhan du brjod pa rnyed pa'i dngos po gzhan la gzhan nyid rtog pa'i phyir ro/ /de ltar na re zhig gzhan la gzhan nyid mi srid do/ /da ni gzhan ma yin pa la yang gzhan nyid yod pa ma yin te/ gang gi phyir gzhan ma yin pa ni gcig nyid la bya la/ de la ni gzhan nyid dang 'gal ba gcig nyid yod pa de'i phyir 'gal bas/ gzhan ma yin pa la yang gzhan nyid yod pa ma yin no/ /gang zhig de ltar gzhan dang gzhan nyid ma yin pa la yod pa ma yin zhing / de dag las ma gtogs pa'i dngos po med pas de dag las ma gtogs pa'i dngos po la yang yod pa ma yin pa de ni med pa nyid do//gang gi phyir de ltar gzhan nyid med pa de'i tshe gzhan nyid dang 'du ba'i rgyu can blo dang sgra 'jug pa'i rgyu dngos po gzhan yang yod pa ma yin no zhes bya bar grub bo/ /'dir smras pa/ gal te gzhan nyid med pa de lta na yang gzhan ni re zhig yod pa yin la/gzhan nyid med par ni gzhan yod par 'os pa yang ma yin te/ de'i phyir gzhan nyid kyang yod par 'gyur ro/ /brjod par bya ste/ gzhan nyid yod pa ma yin na/ /gzhan nam de nyid yod ma yin/ /gang gi tshe sngar gzhan nyid ni yod pa ma yin no zhes bstan zin pa de'i tshe gzhan nyid med par gzhan nam de nyid yod par ga la 'gyur/de nyid ces bya ba ni gzhan ma yin pa nyid ces bya ba'i tha tshig go/ /de'i phyir gzhan nam de nyid yod pa ma yin no/ /'dir smras pa/ lta ba la sogs pa dag ni yod pa nyid de/ phrad pa yod pa'i phyir ro/ /'dir gal te yang lta ba la sogs pa dag la gzhan nyid med do zhes bstan zin mod kyi/de lta na yang reg pa ni gsum 'dus shing tshogs pa'o zhes bya bas phrad pa yang yod pa yin te/ de'i phyir phrad pa yod pas lta ba la sogs pa dag yod pa nyid do/ /brjod par bya ste/ gal te de dag phrad pa nyid yod na ni de ltar 'gyur na/yod pa ni ma yin no/ /ji ltar yod pa ma yin pa de ltar bstan pa'i phyir/ de ni de dang phrad pa med/ /gzhan dang gzhan yang phrad mi 'gyur/ /zhes gsungs te/ 'dir gal te lta ba la sogs pa dang phrad pa yin na/ de dag gcig nyid dam gzhan nyid du brtag grang /de la gcig nyid yin na ni phrad pa med de/ chu la ltos pa med pa'i 'o ma gcig pu la ni chu dang phrad pa zhes mi brjod do/ /tha dad pa yin na yang phrad pa med de/ chu las tha dad du gnas pa'i 'o ma la ni chu dang phrad pa zhes mi smra'o/ /de ltar gal te lta ba la sogs pa dag gcig nyid yin pa na/phrad par rtog na de ni mi 'thad de/ mig gcig pu la yang phrad pa yod par thal bar 'gyur ba'i phyir ro/ /'on te tha dad pa nyid yin na/ de lta na yang mi 'thad pa nyid de/ gzugs la sogs pa las so sor gyur pa'i mig gcig pu la yang phrad pa yod par thal bar 'gyur ba'i phyir ro//phrad pa med na ni lta ba la sogs pa yang med do zhes bya bar grub po/ /'dir smras pa/ gal te yang phrad pa yod pa ma yin mod kyi/ de lta na yang phrad bzhin pa dang phrad pa dang / phrad pa po ni yod pa ma yin te/ de dag bkag pa med pa'i phyir ro/ /phrad bzhin pa dang phrad pa dang phrad pa po ni phrad pa med par yod pa yang ma yin te/de'i phyir phrad pa yang yod par 'gyur ro/ /brjod par bya ste/ 'di yang mi rigs te/ gang gi phyir gang gi tshe phrad pa nyid med do zhes bstan pa de'i tshe phrad pa med par phrad bzhin pa la sogs pa yod par ga la 'gyur/ de la phrad bzhin pa ni da ltar ba phrad pa'i bya ba'i sgrub byed las su gyur pa'o/ /phrad pa ni phrad pa'i bya ba rdzogs pa can no/ /phrad pa po ni byed pa po bya ba rdzogs par bya ba la rang dbang du gnas pa'o/ /de'i phyir 'dir phrad pa med pas/ phrad bzhin pa la sogs pa ma gzigs shing / de dgag pa mjug bsdu ba'i phyir/phrad bzhin pa dang phrad pa dang / /phrad pa po yang yod ma yin/ /zhes gsungs so/ /de nyid kyi phyir/ bcom ldan 'das kyis kyang / mig ni ldan na thams cad mthong 'gyur te/ /mig gis gzugs rnams mthong ba gang yin pa'ang / /mtshan mo rkyen rnams med na mthong mi 'gyur//de phyir ldan dang bral ba rnam rtog yin/ /mig ni snang la brten te yid 'ong dang / /yid du mi 'ong sna tshogs gzugs mthong bas/ /de ltar ldan pa brten te mthong bas na/ /de phyir mig gis nam yang mthong ba med/ /gang dag rang bzhin med chos 'di shes pa//dpa' bo de dag 'jig rten mya ngan 'da'/ /'dod pa'i yon tan spyod cing chags med cing / /chags pa rnams spangs sems can 'dul bar byed/ /'di na sems can 'ga' med srog med kyang / /mi dbang rnams ni sems can phan pa mdzad/ /sems can yod pa min yang don mdzad pa/de dag rnams kyi don ni dka' ba che/ /zhes bya ba nas/ de la nam yang chags pa yod ma yin/ /gang dag chos nyid 'di la mos gyur pa/ /de dag yid ni srid la chags mi 'gyur/ /zhes bya ba'i bar dang / de bzhin du/ gang gis lam bsgoms chos kun stong pa dang / / bdag med ye shes rab tu bskyed byas nas/ /chos 'di dag ni rnam par bsgom 'gyur ba/ /de yi spobs pa thogs pa med par 'gyur/ /zhes bya ba la sogs pa gsungs so/ /slob dpon zla ba grags pa'i zhal snga nas sbyar ba'i tshigs gsal ba las/ phrad pa brtag pa zhes bya ba rab tu byed pa bcu bzhi ba'i 'grel pa'o// //'dir smras pa/ dngos po rnams kyi rang bzhin ni yod pa nyid de/ de dag skyed par byed pa'i rgyu dang rkyen nye bar lan pa'i phyir ro/ /'dir gang yang yod pa ma yin pa de la ni skyed par byed pa'i rgyu dang rkyen nye bar len pa yod pa ma yin te/ dper na nam mkha'i me tog bzhin no/ /myu gu dang 'du byed la sogs pa rnams skyed par byed pa'i rgyu dang rkyen sa bon dang ma rig pa la sogs pa dag nye bar len pa yang yin te/ de'i phyir dngos po'i rang bzhin yod pa nyid yin no/ /brjod par bya ste/ gal te dngos po 'du byed dang myu gu la sogs pa rnams la rang bzhin yod na ni/de'i tshe yod par gyur pa rnams la rgyu dang rkyen dag gis dgos pa ci zhig yod de/ ji ltar 'du byed dang myu gu la sogs pa da lta bar gyur pa rnams la yang bskyed par bya ba'i ched du ma rig pa dang / sa bon la sogs pa dag nye bar len par mi byed pa de bzhin du gzhan la yang de bskyed par bya ba'i phyir blang bar mi bya bar 'gyur te/de'i rang bzhin yod par 'gyur ba'i phyir ro zhes bstan pa'i phyir/ rang bzhin rgyu dang rkyen las ni/ /'byung bar rigs pa ma yin no/ /zhes gsungs so/ /ci ste gang las de yod pa nyid kyis skye ba don med par 'gyur ba skye ba'i snga rol du ni dngos po 'ga' la yang rang bzhin yod pa ma yin te/'o na ci zhe na/ skye ba'i snga rol du yod pa ma yin pa'i rang bzhin kho na rgyu dang rkyen la brten te phyis 'byung bar 'gyur ro snyam na/ de ltar 'dod na yang / rgyu dang rkyen las byung ba yi/ /rang bzhin byas pa can du 'gyur ro//ci ste rgyu dang rkyen las byung bas rang bzhin byas pa nyid du 'gyur ba na 'dod pa kho na ste/ de'i phyir rang bzhin byas pa nyid du khas blangs pa'i phyir/ byas pa thal bar brtsad pa ni kho bo cag la gnod par byed pa ma yin no snyam na/ /'di yang mi rigs so zhes gsungs pa/rang bzhin byas pa can zhes byar/ /ji lta bur na rung bar 'gyur/ /byas pa yang yin la/ rang bzhin yang yin no zhes bya ba 'di ni phan tshun 'gal ba'i phyir 'brel pa med pa'i don yin no/ /'di ltar 'dir rang gi ngo bo ni rang bzhin no zhes bya bar bye brag tu bshad pa las na dngos po byas pa gang yin pa de ni 'jig rten na rang bzhin zhes mi brjod de/dper na chu'i tsha ba dang / ke ke ru la sogs pa dag nor sgyur mkhan gyis 'bad pas pad+ma rA ga la sogs pa'i dngos por byas pa lta bu'o/ /gang zhig rang bzhin yin pa de ni ma byas pa yin te/dper na me'i tsha ba nyid dam/ pad+ma rA ga la sogs pa rig ma rnams kyi pad+ma rA ga la sogs pa rnams kyi ngo bo bzhin te/ de ni dngos po gzhan dang phrad pas ma bskyed pa'i phyir de dag gi rang bzhin zhes bya'o/ /de'i phyir de ltar rang bzhin ni ma byas pa yin no zhes 'jig rten gyi tha snyad rnam par gnas pa yin dang /da ni kho bo cag tsha ba nyid gang yin pa de yang byas pa'i phyir me'i rang bzhin ma yin no zhes gzung bar bya'o zhes smra'o/ /'dir nor bu dang me sbru dang nyi ma phrad pa dang / gtsub shing dang gtsubs pa las byung ba'i me ni rgyu dang rkyen la ltos pa dang bcas pa nyid du dmigs la/me las gzhan pa'i tsha ba nyid kyang med pa de'i phyir tsha ba nyid kyang rgyu dang rkyen gyis bskyed pa yin te/ de'i phyir byas pa yin zhing / byas pa yin pa'i phyir na/ chu'i tsha ba bzhin du rang bzhin ma yin no zhes bya bar ches gsal bar nges pa yin no/ /gal te me'i rang bzhin ni tsha ba nyid do zhes skye bo ba glang rdzi dang bud med yan chad la grags pa ma yin nam zhe na/ci kho bo cag gis ma grags so zhes smras sam/ 'di ni rang bzhin yin par mi 'os te/ rang bzhin gyi mtshan nyid dang bral ba'i phyir ro zhes bya ba 'di ni kho bo cag smra'o/ /ma rig pa'i phyin ci log gi rjes su song ba'i phyir 'jig rten pas ni dngos po'i rnam pa rang bzhin med pa nyid la rang bzhin dang bcas pa nyid du rtogs pa yin no//ji ltar rab rib can rnams kyis skra shad la sogs pa rang bzhin med pa nyid la rab rib kyi rkyen gyis rang bzhin nyid du mngon par zhen pa de bzhin du byis pa rnams ma rig pa'i rab rib kyis blo gros kyi mig nyams pa nyid kyis dngos po'i rnam pa rang bzhin med pa la rang bzhin dang bcas pa nyid du mngon par zhen par gyur nas gzhan du ma dmigs pa las thun mong ma yin pa nyid kyis me'i rang bzhin gyi rang gi mtshan nyid ni tsha ba'o zhes bya bar mngon par zhen pa ji lta ba bzhin du mtshan nyid smra ste/bdag nyid kyi mtshan nyid ni rang gi mtshan nyid do zhes bya ba'i phyir ro/ /de rnams la grags pa nyid kyi sgo nas/ bcom ldan 'das kyis kyang chos mngon par de dag gi rang gi ngo bo kun rdzob pa de rnam par gzhag pa mdzad la/ mi rtag pa la sogs pa thun mong pa ni spyi'i mtshan nyid do zhes bshad do//gang gi tshe ma rig pa'i rab rib dang bral ba dri ma med pa'i shes rab kyi spyan mnga' ba rnams kyis gzigs pa la ltos nas ni/ de'i tshe rab rib dang bral ba dag gis rab rib can gyis dmigs pa'i skra shad ma mthong ba ltar 'phags pa byis pa'i skye bo'i blos brtags pa'i rang bzhin ma gzigs pa rnams kyis 'di ni dngos po rnams kyi rang bzhin ma yin no zhes gsal bar gsungs par mdzad pa yin te/ji skad du 'phags pa lang kar gshegs pa'i mdo las/ ji ltar rab rib can dag gis/ /skra shad log par 'dzin pa ltar//de bzhin dngos por rtog pa 'di/ /byis pas log par rnam par brtags/ /rang bzhin med cing rnam rig med/ /kun gzhi med cing dngos med na/ /byis pa ngan pa rtog ge ba/ /ro dang 'dra bas 'di dag brtags/ /zhes bya ba dang / de bzhin du blo gros chen po rang bzhin gyis ma skyes pa la dgongs nas ngas chos thams cad ma skyes pa'o zhes gsungs so zhes rgya cher gsungs pa lta bu'o//'dir smras pa/ gal te me la sogs pa'i tsha ba nyid la sogs pa 'di rgyu dang rkyen las byung bas byas pa nyid yin pa'i phyir rang bzhin ma yin no zhes smra na/ da ni de dag gi rang bzhin gyi mtshan nyid gang yin zhing /rang bzhin de yang gang zhig yin pa brjod dgos so/ /brjod par bya ste/ rang bzhin dag ni bcos min dang / /gzhan la ltos pa med pa yin/ /'di ni rang gi dngos po ni rang bzhin no zhes bya bas gang zhig dngos po gang gi bdag gi ba'i ngo bo yin pa de ni de'i rang bzhin yin no zhes brjod do//gang zhig gang gi bdag gi ba yin zhe na/ /gang gis gang ma bcos pa'o/ /gang zhig bcos ma yin pa de ni de'i bdag gi ba ma yin te/ dper na/ chu'i tsha ba nyid bzhin no/ /gang zhig gang la rag ma las pa de yang de'i bdag gi ba yin te/dper na/ rang gi khol po dang rang gi nor dag bzhin no/ /gang zhig gi gzhan la rag las pa gang yin pa de ni de'i bdag gi ba ma yin te/ dper na/ re zhig pa'i brnyan por rang dbang med pa lta bu'o/ /gang gi phyir de ltar bcos ma dang rang la ltos pa rang bzhin nyid du mi 'dod pa de nyid kyi phyir tsha ba nyid me'i rang bzhin no zhes bya ba ni mi rigs te/rgyu dang rkyen la rag las pa'i phyir dang / sngar ma byung ba las phyir 'byung bas byas pa yin pa'i phyir ro/ /gang gi phyir 'di de ltar yin pa de'i phyir/ dus gsum du yang me la mi 'khrul pa gnyug ma'i ngo bo ma bcos pa/gang zhig sngar ma byung ba las phyis 'byung ba ma yin pa/ gang zhig chu'i tsha ba'am/ tshu rol dang pha rol lam/ ring po dang thung ngu ltar rgyu dang rkyen la ltos pa dang bcas par ma gyur pa gang yin pa de rang bzhin yin par brjod do/ /ci me'i rang gi ngo bo de lta bur gyur pa de yod dam zhe na/de ni rang gi ngo bos yod pa yang ma yin la med pa yang ma yin no/ /de lta yin mod kyi/ 'on kyang nyan pa po rnams kyi skrag pa spang bar bya ba'i phyir/ sgro btags nas kun rdzob tu de yod do zhes bya bar de smra'o/ /ji skad du bcom ldan 'das kyis/ yi ge med pa'i chos la ni//nyan pa gang yin ston pa gang / /sgro btags pa las yi ge med/ /de ni nyan zhing ston pa'ang yin/ /zhes gsungs pa lta bu'o/ /'di nyid las kyang / stong ngo zhes kyang mi brjod de/ /mi stong zhes kyang mi bya zhing / /gnyis dang gnyis min mi bya ste/ /gdags pa'i don du brjod par bya//zhes 'chad par 'gyur ro/ /gal te sgro btags pa las de yod do zhes brjod na/ de ci 'dra ba zhig yin zhe na/ de'i rang gi ngo bo ni chos rnams kyi chos nyid ces bya ba gang yin pa de nyid yin no/ /de nas chos rnams kyi chos nyid 'di yang gang zhig yin zhe na/ chos rnams kyi ngo bo'o//ngo bo 'di yang gang zhe na/ rang bzhin no/ /rang bzhin 'di yang gang yin/ stong pa nyid do/ /stong pa nyid 'di yang gang yin zhe na/ rang bzhin med pa'o/ /rang bzhin med pa 'di yang gang zhig yin/ de bzhin nyid do/ /de bzhin nyid 'di yang gang zhig ce na/ de bzhin nyid kyi ngo bo 'gyur ba med pa nyid dang /rtag tu gnas pa nyid de/ rnam pa thams cad du skye ba med pa nyid ni bcos ma ma yin pa'i phyir dang / gzhan la ltos pa med pa'i phyir me la sogs pa rnams kyi rang bzhin yin no zhes brjod do/ /'di skad du bstan par 'gyur te/ dngos po'i rnam pa ma rig pa'i rab rib kyi mthus dmigs pa ni ma gzigs pa'i tshul gyis/bdag nyid gang gis 'phags pa ma rig pa'i rab rib dang bral ba rnams kyi yul du 'gyur te/ ngo bo de nyid de dag gi rang bzhin du rnam par gzhag go/ /rang bzhin dag ni bcos min dang / /gzhan la ltos pa med pa yin/ /zhes bya ba 'di ni slob dpon dag gis de'i mtshan nyid du rnam par gzhag go zhes bya bar shes par bya'o//dngos po rnams kyi rang bzhin du gyur pa skye ba med pa de yang ci yang ma yin pa nyid kyis dngos po med pa tsam yin pas ngo bo med pa'i phyir dngos po'i rang bzhin du yod pa ma yin no zhes shes par bya'o/ / ji skad du bcom ldan 'das kyis/ gang gi dngos rnams dngos med shes pa ste/ /nam yang dngos po kun la chags mi 'gyur/ /gang zhig nam yang dngos kun chags med pa/ /de ni ting 'dzin mtshan ma med la reg/ ces gsungs pa lta bu'o/ /'dir smras pa/ gal te yang dngos po rnams la rang bzhin yod pa ma yin pa de lta na yang re zhig gzhan gyi dngos po ni yod de/de ma bkag pa'i phyir ro/ /gzhan gyi dngos po yod na ni rang bzhin yang yod par 'gyur te/ rang bzhin med par gzhan gyi dngos po mi 'grub pa'i phyir ro/ /brjod pa/ rang bzhin med pa ma yin na/ /gzhan gyi dngos po ga la yod//gzhan gyi dngos po'i rang bzhin ni/ /gzhan gyi dngos po yin zhes brjod/ /'dir 'jig rten na ni rang bzhin 'ga' zhig kho na rang bzhin gzhan la ltos nas gzhan gyi dngos po zhes brjod do/ /gal te tsha ba nyid me'i rang bzhin yin na ni/ gsher ba'i rang bzhin can gyi chu la ltos nas gzhan gyi dngos po zhes brjod par 'gyur ba zhig na/gang gi tshe rnam par dpyad pa na gang la yang rang bzhin yod pa ma yin pa de'i tshe ni gzhan nyid yod par ga la 'gyur/ gzhan nyid med pas ni rang bzhin yang yod pa ma yin par grub bo/ /'dir smras pa/gal te yang rang bzhin dang gzhan gyi dngos po dag yod pa ma yin pa de lta na yang dngos po ni re zhig yod pa yin te/ ma bkag pa'i phyir ro/ /dngos po de yod na yang rang bzhin nam gzhan gyi dngos po zhig tu 'gyur dgos te/ de'i phyir/ rang bzhin dang gzhan gyi dngos po dag kyang yod par 'gyur ro//brjod pa/ rang bzhin dang ni gzhan dngos dag/ ma gtogs dngos po ga la yod/ /rang bzhin dang ni gzhan dngos dag/ yod na dngos po 'grub par 'gyur/ /'di ltar dngos po brtags pa na/ /rang bzhin nam gzhan gyi dngos po zhig yin grang / de gnyis kyang sngar bshad pa'i tshul gyis yod pa ma yin te/de'i phyir de gnyis med pas dngos po yang yod pa ma yin no zhes nges par bya'o/ /'dir smras pa/ gal te yang khyod kyis dngos po bkag mod kyi/ de lta na yang dngos po med pa ni yod pa nyid de/ ma bkag pa'i phyir ro/ /de'i phyir 'gal zla yod pas//dngos po yang yod par 'gyur te/ dngos po med pa bzhin no/ /brjod par bya ste/ gal te dngos po med pa nyid yod na/ dngos po yang yod par 'gyur na/ /yod pa ni ma yin no zhes gsungs pa/ gal te dngos po ma grub na/ /dngos med 'grub par mi 'gyur ro/ /dngos po gzhan du gyur pa ni//dngos med yin par skye bo smra/ /'di na gal te dngos po zhes bya ba 'ga' zhig yod par gyur na ni/ de gzhan du gyur pa las dngos po med par 'gyur ba zhig ste/ 'di ltar bum pa la sogs pa da ltar gyi gnas skabs las nyams shing / gzhan du gyur pa thob pa dag ni 'jig rten na dngos po med pa'i sgra'i brjod byar 'gyur ba yin no//gang gi tshe/ bum pa la sogs pa 'di dag dngos po'i ngo bo nyid du ma grub pa de'i tshe yod pa ma yin pa'i rang bzhin can rnams la gzhan du 'gyur pa nyid yod par ga la 'gyur/ de'i phyir dngos po med pa yang yod pa ma yin no/ /de'i phyir de ltar rnam pa thams cad du rang bzhin dang gzhan gyi dngos po dang /dngos po dang dngos po med pa dag yod pa ma yin pa la/ ma rig pa'i rab rib kyis blo gros kyi mig nyams pa nyid kyis phyin ci log tu/ gang dag rang bzhin gzhan dngos dang / /dngos dang dngos med nyid lta ba/ /de dag sangs rgyas bstan pa la//de nyid mthong ba ma yin no/ /gang dag de bzhin gshegs pa'i gsung rab phyin ci ma log par rnam par 'chad par rlom pa nyid kyis/ sa'i rang bzhin ni sra ba'o/ /tshor ba'i ni yul myong ba'o/ /rnam par shes pa'i rang bzhin ni yul so sor rnam par rig pa'o zhes de ltar dngos po rnams kyi rang bzhin smra ba dang /gzugs gzhan la rnam par shes pa yang gzhan yin zhing / tshor ba yang gzhan nyid do zhes de ltar gzhan gyi dngos po smra ba dang / rnam par shes pa la sogs pa da ltar ba'i gnas skabs su gyur pa dngos por ram/rnam par shes pa la sogs pa 'das par gyur pa dngos po med par smra ba de dag ni rten cing 'brel bar 'byung ba mchog tu zab pa'i de kho na nyid smra ba ma yin no/ /gang gi phyir/ rang bzhin dang gzhan gyi dngos po la sogs pa rnams yod pa nyid ni ji skad bshad pa'i 'thad pa dang 'gal ba yin la/de bzhin gshegs pa rnams ni dngos po'i rang bzhin 'thad pa dang 'gal ba gsung ba yang ma yin te/ rang nyid kyi dngos po ma lus pa'i de nyid phyin ci ma log par thugs su chud pa'i phyir ro/ /de nyid kyi phyir/ mkhas pa dag ni sangs rgyas bcom ldan 'das rnams kho na'i gsung tshad mar rjod par byed de/'thad pa dang bcas pas mi slu ba'i phyir ro/ /de nyid kyi phyir nyes pa ma lus pa spangs pa yid ches pa dag las 'ongs pa'i phyir ram/ /kun du go bar byed pa ste/ de kho na nyid kun nas go bar byed pa'i phyir ram/ mngon du phyogs nas 'gro ba ste/ de la brten nas 'jig rten pa mya ngan las 'das par 'gro ba'i phyir rdzogs pa'i sangs rgyas kyi gsung nyid lung du rnam par gzhag la/ de las gzhan gyi gzhung lugs rnams ni 'thad pa dang bral bas tshad ma ma yin pa nyid dang lung ma yin pa nyid du rnam par gzhag go//gang gi phyir/ rang bzhin dang gzhan gyi dngos po dang / dngos po dang dngos po med par lta ba 'di dag rigs pa dang bral bas de kho na nyid ma yin pa de nyid kyi phyir/ gdul bya'i skye bo thar pa 'dod pa rnams la/ bcom ldan dngos dang dngos med pa/ /mkhyen pas kA ta ya na yi/ /gdams ngag las ni yod pa dang //med pa gnyi ga'ang dgag par mdzad pa yin no/ /bcom ldan 'das kyis kA ta ya na la gdams pa'i mdo las/ kA ta ya na gang gi phyir 'jig rten 'di ni phal cher yod pa nyid dang med pa nyid la mngon par zhen te/ des na skye ba dang rga ba dang na ba dang 'chi ba dang mya ngan dang smre sngags 'don pa dang /sdug bsngal ba dang yid mi bde ba dang / 'khrugs pa dag las yongs su grol bar mi 'gyur/ 'gro ba lnga'i 'khor ba las grol bar mi 'gyur/ 'chi ba'i gdung ba'i sdug bsngal las grol bar mi 'gyur zhes rgya cher gsungs pa yin la/ mdo sde 'di yang sde pa thams cad kyis 'don pa yin no//de'i phyir lung 'di dang ji skad bshad pa'i rigs pa las na shes rab can gyi rang bzhin dang / gzhan gyi dngos po dang / dngos po dang dngos po med par lta ba de bzhin gshegs pa'i bka' dang shin tu 'gal ba khas blang bar 'os pa ma yin te/ bcom ldan 'das kyis bkag pa'i phyir ro//bcom ldan 'das kyis khyad par du 'phags pa zhig gis she na/ dngos dang dngos med mkhyen pas te/ 'di la dngos po dang dngos po med pa dag mkhyen pa'i ngang tshul mnga' bas na/ dngos po dang dngos po med pa mkhyen pa'o/ /dngos po dang dngos po med pa'i rang bzhin ji ltar gnas pa bzhin phyin ci ma log par yongs su mkhyen pa'i phyir//bcom ldan 'das nyid dngos po dang dngos po med pa mkhyen pa zhes bya'o/ /gang gi phyir bcom ldan 'das dngos po dang dngos po med pa mkhyen pa des yod pa dang med pa nyid gnyi ga yang dgag pa mdzad pa de'i phyir dngos po dang dngos po med par lta ba de kho na nyid yin no zhes khas blangs par rigs pa ma yin no//de bzhin du/ 'od srungs yod ces bya ba 'di ni mtha' gcig go/ /med ces bya ba 'di ni mtha' gnyis so/ /de gnyis kyi dbus gang yin pa de ni dpyad du med pa/ bstan du med pa/rten ma yin pa/ /snang ba med pa/ rnam par rig pa med pa/ gnas pa med pa ste/ 'od srungs 'di ni dbu ma'i lam chos rnams la so sor rtog pa zhes bya'o zhes bya ba dang / de bzhin du/ yod dang med ces bya ba gnyi ga mtha'/ /gtsang dang mi gtsang 'di yang mtha' yin te/ /de phyir gnyi ga'i mtha' ni rnam spangs nas//mkhas pas dbus la'ang gnas par yod mi byed/ /yod dang med ces bya ba rtsod pa ste/ /gtsang dang mi gtsang 'di yang rtsod pa yin/ /rtsod par gyur pa'i sdug bsngal zhi mi 'gyur/ /rtsod pa med par gyur pas sdug bsngal 'gag/ ces gsungs so//'dir smras pa/ gal te yang de ltar me la sogs pa rang bzhin kho nas yod pa nyid du gyur na nyes pa cir 'gyur/ rgyu dang rkyen las byung ba yi/ /rang bzhin byas pa can du 'gyur/ /zhes bya ba la sogs pas nyes pa bshad zin to/ /gzhan yang / gal te me la sogs pa 'di dag gi rang bzhin 'di nyid yod pa yin na ni/yod par gyur pa de yang gzhan du gyur pa ma yin no zhes bstan pa'i phyir/ gal te rang bzhin gyis yod na/ /de ni med nyid mi 'gyur ro/ /zhes gsungs te/ gal te 'di nyid me la sogs pa 'di dag gi rang bzhin te rang gi ngo bo yin par gyur na ni/ de'i tshe rang bzhin gyis yod pa'i rang bzhin de la slar yang gzhan du 'gyur ba med de/ gang gi phyir/ rang bzhin gzhan du 'gyur ba ni/ /nam yang 'thad par mi 'gyur ro/ /gal te 'di nyid me la sogs pa 'di dag gi rang bzhin yin par gyur na ni/ de'i tshe rang bzhin ni mi 'gyur ba nyid yin pa'i phyir nam yang gzhan du 'gyur bar 'thad pa ma yin no//nam mkha'i mi sgrib pa nyid nam yang gzhan du 'gyur ba ma yin pa de bzhin du me la sogs pa rang bzhin gyis yod pa dag kyang slar gzhan du mi 'gyur ba zhig na/ de dag gzhan du 'gyur ba rgyun chad pa'i mtshan nyid can gyi 'jig pa ni khyod kyis dmigs pa yang yin no//de'i phyir rnam par 'gyur ba'i chos can yin pa'i phyir chu'i tsha ba nyid ltar 'di 'di dag gi rang bzhin ma yin no zhes shes par bya'o/ /'dir smras pa/ gal te rang bzhin gyis yod pa la gzhan du 'gyur ba yod pa ma yin pa'i phyir dang /gzhan du 'gyur ba nyid kyang dmigs pa'i phyir dngos po 'di dag la rang bzhin yod pa ma yin no zhes brjod na/ de lta na yang / rang bzhin yod pa ma yin na/ /gzhan du 'gyur ba gang gi yin/ /da ni nam mkha'i me tog ltar rang bzhin te rang gi ngo bos yod pa ma yin pas gzhan du 'gyur ba gang gi yin par 'gyur/de'i phyir rang bzhin yod pa ma yin pa la gzhan du 'gyur ba ma dmigs pa'i phyir la/ gzhan du 'gyur ba nyid kyang mthong ba'i phyir rang bzhin yod do/ /brjod par bya ste/ gal te khyod kyi lugs kyis rang bzhin te rang gi ngo bos yod pa ma yin pa la gzhan du 'gyur ba med pa'i phyir la/gzhan du 'gyur ba yang mthong ba'i phyir rang bzhin yod do zhes smra ba yin na ni/ de lta na yang rang bzhin yod pa ma yin na yang gzhan du 'gyur ba ji ltar rung / da ni da ltar byung ba ltar rang bzhin te rang gi ngo bos yod pa'i phyir gzhan du 'gyur ba gang gi yin par 'gyur/de'i phyir rang bzhin gyis yod pa la gzhan du 'gyur ba nyid yod pa ma yin pa'i phyir gzhan du 'gyur ba rnam pa thams cad du mi srid pa nyid do/ /de'i phyir dngos po rnams la rang bzhin med do zhes shes par bya'o/ / gang yang gzhan du 'gyur ba mthong ba'i phyir rang bzhin yod pa ma yin no zhes bshad pa de yang gzhan la grags pa'i gzhan du 'gyur ba mthong ba'i dbang du byas nas brjod pa yin gyi/ kho bo cag gis nam yang gang la yang gzhan du 'gyur ba yod par khas ma blangs so/ /de'i phyir de ltar rang bzhin gtan yod pa ma yin dang /chos thams cad yod pa ma yin pa'i rang bzhin can yin pa dang / de dag la gzhan du 'gyur ba yang yod pa ma yin bzhin du/ da lta gang zhig dngos po rnams yod pa nyid dang med pa nyid du rtog par byed de/ de ltar rtog pa de la ni nges pa kho nar yod ces bya ba rtag par 'dzin//med ces bya ba chad par lta bar thal bar 'gyur ro/ /gang gi phyir rtag pa dang chad par lta ba 'di yang mtho ris dang byang grol gyi lam gyi bar du gcod par byed pa yin pa'i phyir don ma yin pa chen po byed pa/ de phyir yod dang med pa la/ /mkhas pas gnas pas mi bya'o//yang ci'i phyir dngos po dang dngos po med par lta ba yod na rtag pa dang chad par lta bar thal bar 'gyur zhe na/ 'di ltar/ gang zhig rang bzhin gyis yod pa/ /de ni med pa yin pas rtag /sngon byung da ltar med ces pa/ /des na chad par thal bar 'gyur/ /gang zhig rang bzhin gyis yod par brjod pa de ni rang bzhin la ldog pa med pas nam yang med pa ma yin te/de ltar na rang bzhin yod pa nyid du khas blangs pas rtag par lta bar 'gyur la/ sngon gnas pa'i gnas skabs su/ /dngos po'i rang bzhin khas blangs nas da ltar phyis de zhig pas med do zhes khas blangs pas chad par lta bar thal bar 'gyur ro//gang gi ltar na dngos po'i rang bzhin nyid mi 'thad pa de la ni rtag pa dang / chad par lta bar thal bar mi 'gyur te/ dngos po'i rang bzhin ma dmigs pa'i phyir ro/ /gal te dngos po rnams rang bzhin yod pa ma yin no zhes khas len pa la dngos por lta ba med pas rtag par lta ba med mod/chad par lta bar thal bar ni nges par 'gyur ba ma yin nam zhe na/ de ltar med par lta bar ni mi 'gyur ro/ /'di ltar gang zhig sngar dngos po'i rang bzhin khas blangs nas/ phyis de ldog pa la rten par byed pa de ni dngos po'i rang bzhin sngar dmigs pa la skur pa btab pas med par lta bar 'gyur gyi/gang zhig rab rib can gyis dmigs pa'i skra shad dag la rab rib med pa ltar gyur cing ci yang ma dmigs pa des med do zhes smras pa na / ci zhig med par smras par 'gyur te/ dgag bya med pa'i phyir ro/ /phyin ci log tu gyur pa rnams log par mngon par zhen pa bzlog par bya ba'i phyir rab rib med pa rnams ltar dngos po thams cad yod pa ma yin no zhes kho bo cag smra mod kyi/de skad smras pa na/ kho bo cag chad par lta bar thal bar 'gyur ba ni ma yin no/ /ji skad du mdo las/ bcom ldan 'das gang gis sngar 'dod chags dang zhe sdang dang gti mug dag dngos por g.yar gyis blangs nas/phyis 'dod chags dang zhe sdang dang gti mug dag dngos po yod pa ni ma yin no zhes smra ba de ni med pa par yang 'gyur lags so zhes rgya cher gsungs pa lta bu'o//gang zhig gzhan dbang sems dang sems las byung ba dngos po tsam khas blangs nas/ /de la kun du brtags pa'i ngo bo nyid med pas yod par lta ba nyid spong zhing gzhan gyi dbang gi dngos po kun nas nyon mongs pa dang rnam par byang ba'i rgyur gyur pa tsam zhig yod pas ni med par lta ba nyid spong bar byed pa de'i ltar na/kun tu brtags pa yod pa ma yin pa'i phyir dang / gzhan gyi dbang yod pa'i phyir yod pa dang med pa nyid du lta ba gnyi gar yang 'gyur ba'i phyir mtha' gnyis spangs par ga la 'gyur/ rgyu dang rkyen gyis bskyed pa ni rang bzhin dang bcas pa nyid du yod par mi rigs par bstan zin pa'i phyir bshad pa mi rigs pa nyid do//de'i phyir de ltar dbu ma pa'i lta ba kho na la yod pa dang med pa nyid du lta bar thal ba med pa yin gyi/ rnam par shes par smra ba'i lta ba la sogs pa dag la ni ma yin no zhes shes par bya'o/ /de nyid kyi phyir/ rin po che'i phreng ba las/gang zag phung por smra ba yi/ /'jig rten grangs can 'ug phrug dang / /gos med bcas la gal te zhig/ yod med 'das pa smra na dris/ /de phyir sangs rgyas rnams kyi ni/ /bstan pa 'chi med yod med las/ /'das pa zab mo zhes bshad pa/ /chos kyi khud pa yin zhes gyis //zhes gsungs so/ /don dam pa mthong ba'i thabs su gyur pa nyid kyi phyir/ gdul bya'i skye bo rnam pa de lta bu rtog pa'i ngor/ bcom ldan 'das kyis thugs rje chen po'i gzhan gyi dbang nyid kyis mang po bkur pa'i gang zag tu smra ba ltar/ rnam par shes par smra ba drang ba'i don nyid du bstan gyi/nges pa'i don du ma yin no zhes shes par bya'o/ /ji skad du/ /'phags pa ting nge 'dzin gyi rgyal po'i mdo las/ /stong pa bde bar gshegs pas bshad pa ltar/ /nges don mdo sde dag gi bye brag shes/ /gang las sems can gang zag skyes bu bstan//chos de thams cad drang ba'i don du shes/ /zhes gsungs pa lta bu'o/ /'di ni blo gros mi zad pas bstan pa'i mdo la sogs pa dag las rgyas par khong du chud par bya'o/ /de'i phyir dam pa thar pa 'dod pa dag gis ji srid du dngos po dang dngos po med par lta ba gnyis kyi glags yod pa de srid du 'khor ba yin no zhes rtogs par byas nas/lta ba 'di gnyis bsal te/ dbu ma'i lam ji lta ba bzhin du bsgom par bya'o/ /bcom ldan 'das kyis/ thams cad bsam yas thams cad 'byung min pas/ /dngos dang dngos med shes pa rnam par bshig /byis pa gang dag sems kyi dbang song ba//de dag srid pa bye ba brgyar sdug bsngal/ /zhes bya ba dang / de bzhin du/ sngon 'das dus kyi bskal pa bsam yas na/ /mi yi gtso bo byung ba ngas dran te/ /drang srong chen po gzings kyi don mdzad pa/ /ming ni dngos po med las byung zhes bya/ /skyes ma thag tu mkha' la rab tu gnas//chos rnams thams cad dngos po med par bstan/ /de tshe de dang mthun par mtshan btags te/ /sgras ni 'jig rten kun tu grags par byas/ /lha rnams thams cad rab tu sgra 'byin pa/ /dngos po med ces bya ba'i rgyal bar gyur/ /skyes ma thag tu gom pa bdun bor te//rgyal bas chos rnams dngos po med par bshad/ /thub pa chos rnams thams cad stong pa yi/ /sangs rgyas chos kyi rgyal por nam gyur tshe/ /rtswa shing gel pa sman ri brag rnams las / chos rnams dngos po med ces sgra yang 'byung / /'jig rten de na ji snyed sgra yod pa//thams cad dngos med ci yang med pa zhes/ /de lta bur ni 'jig rten 'dren pa yi/ /sgra dbyangs rnam pa shin tu 'byung bar 'gyur/ /zhes gsungs so/ /dngos po'i rang bzhin mi 'thad pa yi phyir/ /chos rnams dngos po med ces sgra yang 'byung / /zhes bya ba la sogs pas mdo'i don khong du chud par bya ste/'jig rten de na ji snyed sgra yod pa/ /thams cad dngos med ci yang med pa ste/ /zhes bya ba la sogs pa 'byung bas na/ med par dgag pa brjod par 'dod pa'i phyir dngos po med pa'i don ni rang bzhin med pa'i don yin no/ /slob dpon zla ba grags pa'i zhal snga nas sbyar ba'i tshig gsal ba las/rang bzhin brtag pa zhes bya ba rab tu byed pa bco lnga pa'i 'grel pa'o// //'dir smras pa/ dngos po rnams kyi rang bzhin ni yod pa nyid de/ 'khor ba yod pa'i phyir ro/ /'di na 'khor bas na 'khor ba ste/ 'gro bas na 'gro ba gzhan du 'gro ba la 'khor ba zhes bya'o/ /gal te dngos po rnams kyi rang bzhin yod pa ma yin na/ de'i tshe su zhig 'gro ba nas 'gro ba gzhan du 'gro zhing 'khor bar 'gyur/ mo gsham gyi bu'i 'du byed yod pa ma yin pa dag ni 'khor bar ma mthong ngo / /de'i phyir 'khor ba yod pas dngos po rnams kyi rang bzhin yang yod pa nyid yin no//brjod par bya ste/ gal te 'khor ba nyid yod na dngos po rnams kyi rang bzhin yang yod par 'gyur ba zhig na/ yod pa ni ma yin no/ /'dir gal te 'khor ba yod na ni nges par 'du byed dag gam sems can zhig der 'gyur grang /gnyi ga ltar yang nyes pa yod do zhes gsungs pa/ gal te 'du byed 'khor zhe na/ /de dag rtag na mi 'khor te/ /mi rtag na yang 'khor mi 'gyur/ /sems can la yang rim 'di mtshungs/ /de la gal te 'du byed dag 'khor bar rtog na ni / ci rtag pa'am mi rtag pa dag cig 'khor grang /de la rtag pa dag ni mi 'khor te/ bya ba dang bral ba'i phyir te/ bum pa la sogs pa mi rtag pa rnams kho na bya ba dang bcas par dmigs pa'i phyir ro/ /'on te mi rtag pa dag yin na ni/ gang mi rtag pa de dag ni skyes ma thag tu 'jig pa yin la/gang dag zhig pa de dag ni yod pa ma yin pas mo gsham gyi bu'i 'du byed dag bzhin du/ 'gar yang 'phyan par ga la 'gyur/ de ltar na mi rtag pa rnams kyang 'khor ba ma yin no/ /ci ste 'du byed rgyu dang 'bras bu gcig nas gcig tu brgyud pas rim pa rgyun mi 'chad cing rgyun chags su 'jug pa mi rtag par gyur pa dag kho na 'khor ro snyam na/'di yang mi 'thad de/ re zhig 'bras bu skye ba gang yin pa de la ni 'khor ba yod pa ma yin te/ gang nas kyang mi 'ong ba'i phyir dang / gar yang mi 'gro ba'i phyir ro/ /rgyu zhig par gyur pa gang yin pa de la yang 'khor ba yod pa ma yin te/gang nas kyang mi 'ong ba'i phyir dang / gar yang mi 'gro ba'i phyir ro/ /'du byed tsam las ma gtogs par 'das pa dang ma 'ongs pa dag ma grub pa'i phyir dang / zhig pa dang ma skyes pa nyid kyis yod pa ma yin pa'i yang phyir ro/ /gal te skad cig ma phyi ma skyes pa na snga ma 'khor ba yin no zhe na/gal te skad cig ma snga ma dang phyi ma gnyis gcig nyid du 'gyur na ni/ de de ltar 'gyur na/ gcig nyid du ni yod pa ma yin te/ rgyu dang 'bras bu'i dngos po yin pa'i phyir/ mig dang gzugs dang mig gi rnam par shes pa dag bzhin no/ /gzhan yang gcig nyid yin na ni skad cig ma snga ma dang phyi mar brjod par bya ba nyid du yang mi 'gyur ro//dus gcig gi tshe lha mi rnams gcig snga ma dang phyi mar 'gyur ro zhes brjod pa ni med de/ de bzhin du/ 'dir yang gcig yin pa'i phyir skad cig ma snga ma dang phyi mar bsnyad pa nyid du mi 'gyur ro/ / gzhan yang skad cig ma snga ma zhig go zhes bya bar mi 'gyur te/ tha mi dad pa'i phyir skad cig ma phyi ma bzhin no/ /skad cig ma phyi ma skyes so zhes bya bar yang mi 'gyur te/ tha mi dad pa'i phyir skad cig ma snga ma bzhin no/ /ci ste gzhan nyid yin pa na 'khor ro zhe na/ de lta na ni gzhan so so'i skye bo 'khor bar skye ba yod pa'i phyir dgra bcom pa rnams kyang 'khor bar 'gyur la/mar me gzhan 'bar ba na shi ba'i mar me yang 'bar ro zhes bya bar yang 'gyur ro/ /gzhan yang skad cig ma phyi ma skad cig ma snga ma zhig pa'am ma zhig pa'am 'jig bzhin pa zhig las skye grang /de las gal te zhig pa las yin par 'dod na ni/ sa bon tshig pa las kyang myu gu skye bar 'gyur ro/ /de'i phyir rgyu med par 'gyur ro/ /ci ste ma zhig pa las so zhe na/ de lta na yang sa bon rnam par 'gyur ba med par yang myu gu skye bar 'gyur zhing / rgyu dang 'bras bu gnyis kyang dus gcig par 'gyur la/skye ba rgyu med par yang 'gyur ro/ /gal te 'gag bzhin pa las skye'o zhe na/ 'jig bzhin pa las kyang skye ba med de/ zhig pa dang ma zhig pa las ma gtogs pa'i 'jig bzhin pa med pa'i phyir dang / zhig pa dang ma zhig pa dag la yang nyes pa brjod zin pa'i phyir ro//de'i phyir rgyu dang 'bras bu'i rnam par gzhag pa dang / skad cig ma snga ma dang phyi ma'i rnam par gzhag pa yod par ga la 'gyur/ gang gi tshe skad cig ma snga ma dang phyi ma'i rnam par gzhag pa dang / rgyu dang 'bras bu'i rnam par gzhag pa yod pa ma yin pa de'i tshe rgyun yang yod pa ma yin la/de med pas 'khor ba yang med do/ /de'i phyir 'du byed mi rtag pa rnams la yang 'khor ba yod pa ma yin no/ /'dir kha cig 'thad pa dang 'gal ba'i phyir na 'du byed dag mi 'khor ba ni bden te/ 'o na ci zhe na/ bdag 'khor ro zhes smra bar byed do//brjod par bya ste/ sems can la yang rim 'di mtshungs/ /gang gi phyir sems can 'khor ro zhes smra na/ ci 'di rtag pa'am mi rtag pa zhig 'khor zhes rnam par dpyad pa na/ /'du byed dag 'khor bar mi 'thad pa'i rim pa gang yin pa de sems can la yang mtshungs par 'gyur ba de'i phyir sems can yang 'khor ba ma yin no//'dir smras pa/ 'du byed dag 'khor bar mi 'thad pa'i tshul ni sems can la yang mtshungs par 'gyur bar 'os pa ma yin te/ gang gi phyir 'du byed rtag pa dang mi rtag par gyur pa dag kho na la 'khor ba yod pa ma yin no/ /zhes bya bar smras na/bdag ni de ltar rtag pa dang mi rtag par 'gyur ba ma yin no/ /'di ltar phung po dag las de nyid dang gzhan du brjod du med pa ltar rtag pa dang mi rtag pa nyid du yang brjod du med par rnam par gzhag ste/ de'i phyir bdag kho na 'khor zhing sngar bstan pa'i nyes par yang thal bar mi 'gyur ro//brjod par bya ste/ /gal te gang zag 'khor zhe na/ /phung po skye mched khams rnams la/ /de ni rnam pa lngas btsal na/ /med na gang zhig 'khor bar 'gyur/ /gal te gang zag ces bya ba 'ga' zhig yod na ni de 'khor bar 'gyur ba zhig na/ yod pa ni ma yin te/gang gi phyir phung po dang skye mched dang khams rnams la rnam pa lngas btsal ba na yod pa ma yin pa'i phyir ro/ /ji ltar zhe na/ shing nyid me ni ma yin te/ /shing las gzhan la me yang med/ /me ni shing dang ldan ma yin/ /me la shing med der de med/ /me dang shing gis bdag dang ni//nye bar len pa'i rim pa kun/ /zhes bya ba de bzhin du bdag phung po dang skye mched dang khams kyi rang bzhin can ma yin zhing / de dag las tha dad pa yang ma yin la/ phung po dang skye mched dang khams dang ldan pa yang ma yin zhing / bdag la phung po dang skye mched dang khams med cing /phung po dang skye mched dang khams la yang bdag med do zhes de ltar sngar bshad pa'i tshul gyis rnam pa lngas btsal ba na bdag yod pa ma yin no/ /gang zhig de ltar phung po dang skye mched dang khams rnams la rnam pa lngas btsal ba na de ltar yod pa ma yin pa de ni de med pas ji ltar 'khor bar 'gyur/de lta na bdag la yang 'khor ba yod pa ma yin te/ mo gsham gyi bu ltar med pa'i phyir ro/ /gzhan yang bdag 'di/ nye bar len nas nyer len par/ /'khor na srid pa med par 'gyur/ /srid med nye bar len med na/ /de gang ci zhig 'khor bar 'gyur//gal te yod ni nye bar len pa med par yang 'di 'khor bar rung bar 'gyur na ni/ /bdag 'khor bar 'gyur la rag pa zhig go/ /ji ltar de la nye bar len pa med pa nyid du thal bar bstan pa'i phyir/ /nye bar len nas nyer len par/ /'khor na srid pa med par 'gyur/ / zhes bya ba gsungs so/ /'dir mi'i nye bar len pa nas lha'i nye bar len par 'gro ba na/ mi'i nye bar len pa btang nas lha'i nye bar len par 'gro'am/ ma btang bar yin grang / re zhig gal te yongs su btang nas 'gro'o zhes brjod na ni/ de'i tshe nye bar len pa sngar ma btang ba'i phyir dang phyi ma ma blangs pa'i phyir/de dag gi bar du srid pa med par 'gyur ro/ /'di la srid pa dang bral ba yod pas na srid pa med pa'o/ /srid pa ni nye bar len pa'i phung po lnga ste/ de dag dang bral bar 'gyur ro/ /srid pa med cing nye bar len pa med pa gang yin pa de ni phung po lnga dang bral bas gdags pa'i nye bar len pa'i rgyu dang bral ba'i phyir rgyu med par 'gyur la/gang zhig nye bar len pa med cing gsal byed dang bral ba mi gsal ba rgyu med pa de ni gang ste/ de ni ci yang ma yin zhing / de ni yod pa ma yin pa nyid do zhes bya ba'i don to/ /de med pas 'byung bar 'gyur ba lha'i nye bar len pa po med pa yang yod pa ma yin pa'i phyir ci zhig tu 'khor bar 'gyur te/gang du 'khor bar 'gyur ba de yang yod pa ma yin pa nyid do/ /yang na ci zhig ces bya ba 'di ni bya ba 'khor ba'i khyad par yin te/ de'i phyir yod pa ma yin pas 'khor ba'i bya ba byed par mi 'gyur ro//de ltar na re zhig nye bar len pa snga ma btang nas 'khor bar mi rigs pa yin no/ /ci ste ma btang bar yin no zhe na/ de ltar yang rigs pa ma yin no/ /ci'i phyir zhe na/ gang gi phyir snga ma ma btang ba'i phyir dang / phyi ma ma bzung ba'i phyir bdag gcig gnyis nyid du 'gyur na/'di ni 'dod pa yang ma yin no/ /de'i phyir ma btang bar 'khor ba yang yod pa ma yin no/ /ci ste srid pa snga phyi gnyis kyi bar na srid pa bar ma do'i phung po yod pas de dag gis de nye bar len pa dang bcas pa'i phyir nye bar len pa nas nye bar len par 'khor yang srid pa med par thal bar mi 'gyur ro zhe na/de yang mi rung ste/ srid pa bar ma do'i phung por 'khor ba la yang srid pa snga ma gtong ba dang / mi gtong ba dag gi sgo nas thal bar 'gyur ba mtshungs pa'i phyir ro/ /cig car gtong ba dang len par byed pa'i phyir nyes pa med do zhe na/ brjod par bya ste/ci phyogs gcig gis nye bar len pa snga ma gtong zhing phyogs gcig gis srid pa bar ma do'i nye bar len par rgyu'am/ 'on te bdag nyid thams cad kyis yin grang / de la gal te cha shas kyis so zhes bya bar rtog na ni/ de'i tshe bdag gnyis nyid du thal bar 'gyur ro zhes nyes pa bshad zin to//ci ste bdag nyid thams cad kyis yin no zhe na/ de lta na yang khyed cag la thal ba de nyid du 'gyur ro/ /khyad par ni 'di tsam zhig yod de/ srid pa bar ma dor rgyu ba na shin tu nye bas dus thung ngu zhig tu nye bar len pa med par 'gyur ba gang yin pa'o/ / bdag nyid thams cad kyis gtong ba dang len pa dngos po tha dad pa'i yul can dag ni dngos po gcig la cig car mthong ba yang ma yin te/ lha sbyin gcig pu khyim nas khyim du rgyu ba la dus gcig tu bdag nyid thams cad kyis gtong ba dang len pa'i bya ba gnyis yod pa ni ma yin no/ /ci ste rkang pa gcig gis gcig btang ba'i phyir dang /gzhan len pa'i phyir cig car gtong ba dang len par rtog go zhe na/ de lta yin na rkang pa gnyis bzhin du bdag kyang gnyis nyid du 'gyur te/ cha shas kyis snga ma la gnas pa'i phyir dang / cha shas kyis phyi ma la gnas pa'i phyir cha shas du ma nyid du thal bar 'gyur ro//de'i phyir cig car yang gtong ba dang len pa yod pa ma yin pas 'di ni lan ma yin pa nyid do/ /de'i phyir srid pa bar ma do len pa la yang nyes pa de nyid du thal bar 'gyur bas rnam pa thams cad du bdag la yang 'khor ba yod pa ma yin no/ /gang gi tshe 'du byed dag dang bdag 'khor ba yod pa ma yin pa de'i tshe 'khor ba med pa nyid do zhes bya bar gnas so//'dir smras pa/ 'khor ba ni yod pa nyid de/ 'gal zla yod pa'i phyir ro/ /'dir gang yod pa ma yin pa de la ni 'gal zla yod pa ma yin te/ dper na/ mo gsham gyi bu'i dgra bo bzhin no//'khor ba'i 'gal zla mya ngan las 'das pa ni yod na 'khor ba yod par 'gyur/ de'i phyir 'khor ba yang yod do/ /brjod par bya ste/ gal te de'i 'gal zla mya ngan las 'das pa yod na/ 'khor ba yod par 'gyur na/ yod pa ni ma yin no zhes gsungs pa/ 'du byed mya ngan 'da' bar ni//ji lta bur yang mi 'thad do/ /sems can mya ngan 'da' bar yang / /ji lta bur yang 'thad mi 'gyur/ /gal te mya ngan las 'da' ba zhes bya ba cung zad cig yod na ni/ de rtog pa na 'du byed rtag pa'am mi rtag pa dag cig la rtog grang / de la rtag pa 'gyur ba med pa dag la ni mya ngan las 'da' bas ci zhig byed par 'gyur//mi rtag pa yod pa ma yin pa rnams la yang mya ngan las 'das pas ci zhig byed de/ thams cad snga ma dang mtshungs so/ /ji lta bur yang zhes bya ba ni rnam pa gang gis kyang zhes bya ba'i don to/ /ci ste sems can la mya ngan las 'da' ba rtog go zhe na/de yang snga ma ltar rtag pa'am mi rtag pa las 'thad pa ma yin no/ /ci ste rtag pa dang mi rtag pa nyid du brjod du med pa zhig la rtog go zhe na de lta na ni brjod du med pa'i phyir 'khor ba ltar mya ngan las 'das pa na yang bdag yod do zhes khas blangs par gyur pa ma yin nam/gzhan yang brjod du med pa ni bdag nye bar len pa dang bcas pa kho na la rigs na/ mya ngan las 'das pa na ni nye bar len pa yod pa ma yin pas 'di la brjod du med pa nyid ga la yod/ yang na bdag de nyid dang gzhan du brjod du med par 'gyur mod / / 'on kyang 'di ni mya ngan las 'das pa yod dam 'on te med pa zhig yin/ gal te yod na ni de'i tshe thar bar gyur pa na yang de yod pas rtag pa nyid du 'gyur ro/ /'on te med na ni de'i tshe bdag mi rtag par 'gyur ro/ /de'i phyir bdag de nyid dang gzhan nyid du brjod du med pa ltar rtag pa dang mi rtag pa nyid du yang brjod du med do zhes bya bar mi 'gyur ro//ci ste mya ngan las 'das pa na bdag yod pa dang med pa nyid du yang brjod du med par 'dod do zhe na/ de lta na yang ci 'di de'i tshe shes par bya ba zhig yin nam/ 'on te ma yin/ gal te shes par bya ba yin no zhe na/ 'on te 'khor ba ltar mya ngan las 'das pa na yang shes par bya ba yin pa'i phyir bdag 'di nye bar len pa med pa ma yin no//'on te mi shes na ni de'i tshe 'di shes par bya ba ma yin pa'i rang bzhin yin pa'i phyir/ nam mkha'i me tog ltar med pas 'di brjod du med pa nyid du ga la yod/ /de'i phyir de ltar mya ngan las 'das pa yang yod pa ma yin la//de med pas 'khor ba yang med do/ /de nyid kyi phyir bcom ldan 'das ma las/ tshe dang ldan pa rab 'byor mya ngan las 'das pa yang sgyu ma lta bu rmi lam lta bu'o/ /tshe dang ldan pa rab 'byor sangs rgyas kyi chos rnams kyang rmi lam lta bu sgyu ma lta bu'o zhes bya ba la sogs pa nas/rigs kyi bu gal te mya ngan las 'das pa las ches lhag pa'i chos gzhan zhig yod na yang / de yang sgyu ma lta bu rmi lam lta bu'o zhes nga smra'o zhes bya ba dang / de bzhin du 'phags pa ting nge 'dzin gyi rgyal po las kyang / don dam bden pa rmi lam 'dra ba dang / /mya ngan 'das pa rmi lam mtshungs par 'jug/gang gis mkhas pa de ltar 'jug pa yang / /de ni yid kyi sdom pa'i mchog tu brjod/ /ces bya ba dang / de bzhin du/ 'gog pa'i bden pa rmi lam ji bzhin te/ /mya ngan 'das pa'ang rmi lam ji bzhin du/ /gang la byang chub sems dpa' gang 'jug pa//de ni ngag gi sdom pa de zhes bya/ /zhes gsungs so/ /'dir smras pa/ gal te yang khyod kyis 'khor ba dang mya ngan las 'das pa gnyis bkag mod kyi/ de lta na yang bcings pa dang thar pa dag ni yod pa yin no/ /yod pa ma yin pa'i dngos po'i rang bzhin la ni bcings pa dang /thar pa yod pa ma yin no/ /de'i phyir bcings pa dang thar pa yod pa'i phyir dngos po rnams kyi rang bzhin yod pa nyid do/ /brjod par bya ste/ gal te bcings pa dang thar pa gnyis nyid yod na dngos po rnams kyi rang bzhin yod par 'gyur na yod pa ni ma yin no/ /zhes gsungs pa/ skye 'jig chos can 'du byed rnams//mi 'ching grol bar mi 'gyur te/ /snga ma bzhin du sems can yang / /mi 'ching grol bar mi 'gyur ro/ /'di ni 'dod chags la sogs pa nyon mongs pa gang dag bcing bar bya ba rnams rang dbang med par byed pas 'ching ba'o zhes bya bar bsnyad cing / gang dag gis bcings pas so so'i skye bo rnams khams gsum las mi 'da'o zhes bya bar rnam par 'jog na/'dod chags la sogs pa 'ching ba nyid du brtags pa'i bcings pa de ni re zhig skye ba dang 'jig pa'i chos can 'du byed skad cig ma rnams la mi srid de/ skyes ma thag tu 'jig cing brlag pa rnams ni yod pa ma yin pa'i phyir ro//'dod chags la sogs pa'i 'ching ba rnam par chad pa'i mtshan nyid can gyi thar pa yang mi srid de/ 'du byed mi rtag pa rnams ni yod pa ma yin pa nyid kyi phyir ro/ /snga ma bzhin du zhes bya ba ni sngar bshad pa'i tshul gyis zhes bya ba'i don to/ /ji ltar sngar bshad pa'i rnam pas 'du byed rnams la bcings pa dang thar pa dag yod pa ma yin pa de ltar/snga ma bzhin du sems can yang mi 'ching zhing grol bar yang mi 'gyur ro/ /de ltar na bcings pa dang thar pa yang med do/ /'dir smras pa/ gal te yang 'du byed dag dang sems can la bcings pa yod pa ma yin pa de lta na yang 'dod chags la sogs pa nye bar len pa zhes bya ba 'ching bar gyur pa ni yod pa yin la/de yod pas bcings pa yang yod par 'gyur ro/ /brjod pa/ gal te dngos po 'ga' zhig 'ching na ni/ /nye bar len pa 'ching bar yang 'gyur na/ /'ching ba yang ma yin no//ji ltar mi 'ching ba de ltar bstan pa'i phyir bshad pa/ gal te nye bar len 'ching na/ /nye bar len bcas 'ching mi 'gyur/ /nye bar len med mi 'ching ste/ /gnas skabs gang zhig 'ching bar 'gyur/ /de la nye bar len bcas ni nye bar len pa yod pa ste/ re zhig dngos po de ni 'ching bar mi 'gyur ro//gang zhig nye bar len pa dang bcas pa de ni bcings par gyur pa nyid yin na/ de la yang 'ching ba dang 'brel pas ci zhig byed par 'gyur/ gang zhig nye bar len pa med pa nye bar len pa dang bral ba de yang mi 'ching ste/ 'ching ba dang bral ba'i phyir de bzhin gshegs pa bzhin no//nye bar len pa med pa 'ching ba dang bral ba 'ching ngo zhes bya ba ni phan tshun 'gal ba yin pa'i phyir yang 'di mi rigs so/ /gang zhig de ltar nges par brtags pa na nye bar len pa dang bcas pa'am nye bar len pa dang bral ba yin yang rung ste/ mi 'ching ba de ni da gnas skabs gang zhig tu gyur pa zhig 'ching bar 'gyur te/gang zhig 'ching bar 'gyur ba de'i gnas skabs gzhan de ni 'ga' yang yod pa ma yin no snyam du dgongs pa'o/ /gang gi tshe de ltar gzhigs pa na 'ching bas ci zhig ltar yang 'ching bar mi byed pa de'i tshe 'ga' yang 'ching bar mi byed pa nye bar len pa 'dod chags la sogs pa 'ching ba nyid du ga la 'gyur/de'i phyir bcings pa yang med do/ /gzhan yang / gal te bcing bya'i snga rol na/ /'ching ba yod na 'ching la rag/ de yang med de/ 'di na 'ching ba lcags la sogs pa bcing bar bya ba las tha dad par sngar grub par gyur pas bcing bar bya ba lha sbyin 'ching ngo zhes bya bar mthong ba de bzhin du bcing bar bya ba 'du byed rnams sam gang zag gi snga rol du 'ching ba 'dod chags la sogs pa grub par gyur na ni sngar grub pa des 'du byed rnams sam gang zag 'ching bar 'gyur la rag na/de ni yod pa yang ma yin te/ rten med pas 'dod chags la sogs pa ma grub pa'i phyir dang / sngar 'ching ba grub pa la phyis bcing bya dang lhan cig 'brel pa dgos pa med pa'i phyir dang / 'ching ba las tha dad par grub pa'i bcings pa la yang 'ching ba dgos pa med pa'i phyir bcing par bya ba'i snga rol du 'ching ba grub pa med do//de'i phyir 'ching bas ni 'ga' yang mi 'ching la/ 'ga' yang mi 'ching ba ni 'ching ba nyid du mi rigs pas 'ching ba yod pa ma yin zhing / 'ching ba med pas bcings pa yang med do zhes bya bar grub po/ /gang zhig 'dir sun 'byin pa 'phrog gyur pa/lhag ma ni tshigs su bcad pa'i 'don pa go bsnor te/ song dang ma song bgom pas bstan par rig par bya ste/ re zhig bcings pa mi 'ching ste/ /ma bcings pa yang 'ching mi 'gyur/ /bcings dang ma bcings ma gtogs par/ /'ching bzhin shes par mi 'gyur ro/ /zhes bya ba la sogs pas sbyar bar bya'o//'dir smras pa/ gal te khyod kyis 'ching ba bkag mod kyi/ /de lta na yang de bzhin gshegs pa thugs rje chen po mnga' ba rnams kyis sems can 'khor ba'i btson rar bsdams pa skyob pa med pa rnams la tshul khrims dang ting nge 'dzin dang shes rab kyi bdag nyid can phung po gsum nye bar bstan pa gang gi don du gsungs pa/thar pa de ni re zhig yod pa yin la/ ma bcings pa la ni thar pa med de/ de'i phyir bcings pa yang yod do/ /brjod par bya ste/ gal te thar pa nyid yod na bcing ba yod par gyur na/ yod pa ni ma yin te/ 'dir thar pa 'di rtog pa na/ bcings pa'am ma bcings pa/ zhig la rtog pa zhig go/ /de las cir 'gyur zhe na/ gnyi ga ltar yang mi rigs so zhes bshad pa/ re zhig bcings pa mi grol te/ /ma bcings pa yang grol mi 'gyur/ /bcings pa grol bzhin yin 'gyur na/ /bcings dang grol ba dus gcig 'gyur//de la bcings pa la ni thar pa yod pa ma yin te bcings pa'i phyir ro/ /ci ste bcings par gyur pa phyis thabs kyis thar par 'gyur ba'i phyir bcings pa nyid grol bar 'gyur ro zhe na/ 'o na ni bcings pa grol lo zhes bya bar brjod par mi bya ste/ 'o na ci zhe na/ grol ba grol bar 'gyur ro zhes bya bar 'gyur ro/ /gal te da ltar ba dang nye bas de skad du brjod do zhe na/ gal te res 'ga' zhig na thar pa yod na ni de'i tshe de dang nye bar yod par 'gyur na/ gang gi tshe gnas skabs gang rung du yang thar 'dod pa na bcings pa la thar pa mi srid pas thar pa med par ston par 'dod pa de'i tshe da ltar ba dang nye ba nyid ga la yod//de ltar na re zhig bcings pa mi grol lo zhes bya bar gnas so/ /da ni ma bcings pa yang grol bar mi 'gyur te/ de ni grol ba nyid yin na de la yang thar pas ci zhig byed par 'gyur/ yang thar pa la ltos pa'i phyir dgra bcom pa grol bar gyur pa rnams la yang 'ching ba nyid yod par 'gyur te/de'i phyir dgra bcom pa yang bcings par 'gyur ro/ /de'i phyir ma bcings pa yang mi grol lo/ /ci ste ma bcings pa la thar pa mi srid pa'i phyir bcings pa nyid grol bar 'gyur ro snyam na/ de lta yin na bcings pa la grol bzhin par rtog pa na/bcings pa yin pa'i phyir dang / grol bzhin pa yin pa'i phyir bcings pa dang grol ba dag dus gcig tu 'gyur na/ dus gcig tu bcings pa dang grol ba dag 'thad pa yang ma yin te/ phan tshun 'gal ba'i phyir snang ba dang mun pa bzhin no/ /de'i phyir de ltar bcings pa dang ma bcings pa dag la thar pa yod pa ma yin no//de'i phyir thar pa yang med la/ de med pa'i phyir bcings pa yang med do zhes bya bar grub po/ /'dir gal te de ltar khyod kyis 'khor ba dang mya ngan las 'das pa dag bkag cing / bcings pa dang thar pa dag kyang bkag pas/'khor ba'i 'brog dgon pa chen po ma rig pa'i mun pa mthug po can lta ba ngan pa sna tshogs pa'i 'khri shing shin tu sra bas lam dam par bkag pa/ phra rgyas kyi dug gi ljon shing rnam par smin pa'i 'bras bu skye ba la sogs pa'i sdug bsngal/ mtha' yas pa sna tshogs pa shin tu yid du mi 'ong ba rgya cher ster bas dkrigs pa 'jig tshogs la lta ba'i ri chen po rtse mo nyi shus ches mtho ba/te por brling bas phyogs kyi ngos kun nas bskor ba/ sred pa'i chu klung gi 'obs chen po/ yul gyi bde ba la re ba'i ngogs shin tu 'dred cing yangs pa dang ldan pa rgyun mi 'chad par 'bab pas bskor ba las brgal bar 'dod pa/thar pa 'dod pa rnams mchog tu dbugs 'byin par byed pa dge ba'i chos la 'dun pa chen po bdag nam len pa med par mya ngan las 'da' bar 'gyur/ /mya ngan las 'das pa bdag gir nam zhig na 'gyur snyam pa gang yin pa de don med pa kho nar 'gyur zhing de ltar dge ba'i chos la 'dun pa bskyed pa rnams kyi dge ba'i bshes gnyen bsten pa dang /sbyin pa dang tshul khrims dang thos pa dang bsam pa dang / bsgom pa la sogs pa'i rim pa mya ngan las 'das pa 'thob pa'i dgos pa can gang yin pa de yang don med par 'gyur ro zhes 'dzer to//brjod par bya ste/ gang zhig de ltar dngos po thams cad rang bzhin med de/ gzugs brnyan dang / smig rgyu'i chu dang / mgal me'i 'khor lo dang / rmi lam dang / sgyu ma dang / mig 'phrul dang mtshungs shing / bdag dang bdag gi ba dang bral bzhin du/phyin ci log gi rjes su song ba'i phyir nga dang nga'i zhes bdag tu 'dzin pa dang bdag gir 'dzin pa kun du spyod pa yongs su 'dzin pas/ 'jig tshogs la lta ba de nyid bskyod nas/ /bdag ni len med mya ngan 'da'/ /myang 'das bdag gir 'gyur ro zhes/ /rlom par byed de/ de ltar gang dag 'dzin de yi//nyer len 'dzin pa chen po yin/ /bdag ni nye bar len pa med cing len pa dang bral bar mya ngan las 'da'o/ /mya ngan las 'das pa ni de ltar zhugs par gyur pa bdag gi yin par 'gyur ro zhes de ltar thar pa 'dod pa gang dag 'dzin par 'gyur ba de dag la ni bdag tu 'dzin pa dang bdag gir 'dzin pa zhes bya ba'i 'jig tshogs la lta ba nye bar len pa de nyid 'dzin pa chen po yin la/rnam pa de lta bu'i 'dzin pa chen po mngon par zhen pa rnams la ni zhi ba yod pa ma yin te/ 'dzin pa ma lus pa spangs pa kho nas thar pa 'thob pa'i phyir ro/ /ji srid du bdag dang bdag gi'o snyam du 'dzin par mthong bar zhen pa dang /ji srid mya ngan las 'das pa zhes bya ba yod do zhes mngon par zhen pa dang / ji srid nye bar len pa btang ba la sogs par mngon par zhen pa de srid du ni thabs ma yin pas mya ngan las 'das pa don du gnyer ba rnams kyi rtsom pa thams cad nges par don med par 'gyur ro//de'i phyir thar pa 'dod pas 'di dag thams cad yongs su gtang bar bya'o/ /gang gi phyir rnam pa thams cad du don dam pa/ gang la mya ngan 'das bskyed med/ /'khor ba bsal ba'ang yod min pa/ /zhes bya ba/ de la 'khor ba ci zhig yin//mya ngan 'das pa'ang ci zhig brtag/ don dam pa'i bden pa gang la ma dmigs pas mya ngan las 'das pa bskyed pa ste/ mya ngan las 'das par sgro btags pa med cing / 'khor ba bsal ba ste/ 'khor ba yongs su zad pa yang yod pa ma yin pa de la gang zhig zad par bya ba'i phyir brtags pa 'khor ba ci zhig yin la/gang thob par bya ba'i phyir brtags pa mya ngan las 'das pa de yang gang zhig yin/ yang na 'khor ba dang mya ngan las 'das pa gnyi ga yang ma dmigs pa'i phyir sems can 'ga' yang mya ngan las 'das pa gang du 'khor ba nas bsal ba ste bkri ba dang /mya ngan las 'das pa bskyed par 'bad pa dang ldan pas kyang bya bar mi nus pa de la mya ngan las 'das pa'ang ci zhig brtag ste / cung zad kyang brtag pa mi rigs so/ /mi rtog pa ni nges par ji skad smras pa'i 'khor ba'i 'brog dgon pa las 'da' zhing / mya ngan las 'das pa'i grong khyer du yang phyin par 'gyur ro//de nyid kyi phyir 'phags pa bdud btul ba'i mdo las/ de nas de'i tshe 'jam dpal gzhon nur gyur pas ji ltar bdud sdig can sgo mo'i them pa'i 'ching bas bcings pa ltar sa steng du 'gyel nas/ nga ni 'ching pa dam pos bcings so//nga ni 'ching ba dam pos bcings so zhes ngu zhing cho nges 'debs par gyur pa de lta bu'i gzugs su bsams so/ /'jam dpal gyis smras pa/ sdig can gang gis khyod rtag tu bcings shing gzod bcings pa ma yin pa 'ching ba ches dam pa/ 'ching ba 'di las gzhan pa zhig yod de/de yang gang zhe na/ 'di lta ste/ nga rgyal phyin ci log gi 'ching ba dang / srid pa dang lta ba'i 'ching ba ste/ sdig can 'di ni 'ching ba yin gyi/ 'ching ba 'di las gzhan pa 'ching ba ches dam por gyur pa ni yod pa ma yin no/ /khyod ni des rtag tu bcings pa yin gyis gzod bcings pa ni ma yin no//gzhan yang sdig can ci khyod gal te slar bkrol na dga' bar 'gyur ram/ smras pa dga' bar 'gyur ro/ /de nas lha'i bu rab 'thab bral ba zhig gis/ 'jam dpal gzhon nur gyur pa la 'di skad ces smras so/ /'jam dpal bdud sdig can thong shig rang gi gnas su dong la rag go//de nas 'jam dpal gzhon nur gyur pas bdud sdig to can la 'di skad ces smras so/ /sdig can gang zhig btang ba khyod sus bcings/ /smras pa/ 'jam dpal bdag sus bcings pa mi shes so/ /smras pa/ sdig can ji ltar khyod ma bcings pa las bcings par 'du shes pa de bzhin du byis pa so so'i skye bo thams cad mi rtag pa la rtag par 'du shes pa/sdug bsngal ba la bde bar 'du shes pa/ bdag med pa la bdag tu 'du shes pa/ mi gtsang ba la gtsang bar 'du shes pa/ gzugs med pa la gzugs su 'du shes pa/ tshor ba dag med pa dang / 'du shes dag med pa dang / 'du byed dag med pa dang / rnam par shes pa med pa la/tshor ba dang 'du shes dang 'du byed dang rnam par shes par 'du shes pa yin no/ /gzhan yang sdig can gang khyod grol bar 'gyur na gang las grol bar 'gyur/ smras pa/ bdag ni gang las kyang grol bar mi 'gyur ro/ /smras pa/ sdig can de bzhin du gang dag grol bar 'gyur ba de dag kyang /yang dag pa ma yin pa'i 'du shes gang yin pa de yongs su shes pa ma gtogs par gang las kyang grol bar 'gyur ba med de / de yongs su shes nas grol ba zhes bya'o zhes gsungs te/ lung 'di las na yang dag pa ma yin pa'i phyin ci log tu rtog pa tsam gyis 'ching ba'i 'khri shing rnam par chad pa la thar pa mya ngan las 'das pa zhes bya ste/rmi lam du dmigs pa'i me 'bar ba chu dag gis bsad pa bzhin no/ /slob dpon zla ba grags pa'i zhal snga nas sbyar ba'i tshig gsal ba las/ bcings pa dang thar pa brtag pa zhes bya ba rab tu byed pa bcu drug pa'i 'grel pa'o// //'dir smras pa/ 'khor ba ni yod pa nyid de/ las dang 'bras bu 'brel ba'i rten yin pa'i phyir ro/ /'di ltar gal te rgyun rnam par chad pa med pa'i rim pas skye ba dang 'chi ba gcig nas gcig tu brgyud pa nyid kyis rgyu dang 'bras bu'i dngos po 'jug pas 'du byed rnams sam bdag 'khor bar gyur na ni//de'i tshe las dang 'bras bu 'brel bar 'gyur na/ ji skad smras pa'i 'khor ba med na ni/ sems ni skyes ma thag tu 'jig pa'i phyir dang / las 'phen pa'i dus na rnam par smin pa med pa'i phyir las dang 'bras bu'i 'brel ba med pa kho nar 'gyur 'bras ro//'khor ba yod na ni 'dir byas pa'i las tshe rabs gzhan du yang rnam par smin pa'i 'bras bu dang 'brel ba'i phyir las rnams bu dang 'brel ba mi 'gal bar 'gyur ro/ /de'i phyir las dang 'bras bu 'brel ba'i rten yin pa'i phyir 'khor ba yod pa nyid do//las de dag kyang gang yin zhing / de'i 'bras bu yang gang zhig yin zhe na/ de dag gi rab tu dbye ba brjod par 'dod pas 'di skad du brjod de/ bdag nyid legs par sdom pa dang / /gzhan la phan 'dogs byams sems gang / /de chos de ni 'di gzhan du/ /'bras bu dag gi sa bon yin//de la bdag tu nga rgyal ba 'di la gzhag cing bskyed pas bdag nyid de/ phung po la brten nas gdags pa'i gang zag la bdag ces bya'o/ /bdag nyid yang dag par sdom zhing / /yul dag la rang dbang med par byed cing 'dod chags la sogs pa'i dbang gis 'jug pa zlog par byed pas na bdag nyid legs par sdom pa'o//sog cing nye bar sogs la dge ba dang mi dge ba'i las rnam par smin pa 'byin par nus pa la nges par byed pas na sems te/ sems dang yid dang rnam par shes pa zhes bya ba ni de nyid kyi rnam grangs dag go/ /de'i phyir bdag nyid legs par sdom pa srog gcod pa la sogs pa la 'jug pa las bzlog pa dge ba'i sems de ni ngan 'gror 'gro ba las 'dzin par byed pas na chos zhes bya'o//chos kyi sgra 'di ni gsung rab las gsum du rnam par gzhag ste/ rang gi mtshan nyid 'dzin pa'i don dang / 'gro ba ngan par 'gro ba las 'dzin pa'i don dang /'gro ba lnga'i 'khor bar 'gro ba las 'dzin pa'i don gyis so/ /de la zag pa dang bcas pa dang zag pa med pa thams cad ni rang gi mtshan nyid 'dzin pa'i don gyis na chos zhes bya'o/ /dge ba bcu la sogs pa'i chos rnams ni/ 'jig rten 'di dang pha rol du/ /chos spyod pa ni bde bar nyal//zhes bya ba der 'gro ba ngan par 'gro ba las 'dzin pa'i don gyis na chos zhes bsnyad do/ /chos la skyabs su mchi'o zhes bya ba der ni 'gro ba lnga'i 'khor bar 'gro ba las 'dzin pa'i don gyis na mya ngan las 'das pa la chos zhes brjod do/ /'dir ni 'gro ba ngan par 'gro ba las 'dzin pa'i don nyid kyis chos kyi sgrar bzhed do//yang ci bdag nyid legs par sdom pa'i sems gcig pu zhig chos yin nam zhe na/ smras pa/ ma yin te/ 'o na ci zhe na/ gzhan la phan 'dogs pa dang byams pa'i sems gang yin pa de yang chos yin no/ /gzhan la phan 'dogs byams sems zhes bya ba 'dir rang gi sgra zhig mi mngon par byas shing bstan par rig par bya'o//de la gzhan rjes su 'dzin par byed pas na gzhan la phan 'dogs pa'i sems te/ bsdu ba'i dngos po bzhi la zhugs pa dang / 'jigs pa las skyob pa la sogs pa la zhugs pa'i sems gang yin pa de yang chos yin no/ / mdza' bshes las 'byung zhing sems can rnams dang 'gal ba med pa'i sems gang yin pa de ni byams pa'i sems so/ /yang na byams pa ni gnyen bshes nyid yin te/ bdag la phan 'dogs pa'i sems gang yin pa de nyid byams pa'i sems yin no/ /gang zhig sems rnam pa gsum bstan pa de ni chos zhes bya ste/bzlog pa ni chos ma yin par sbyar bar bya'o/ /de ltar rab tu dbye ba bstan pa'i sems gang yin pa de ni 'bras bu dag gi sa bon yin no/ /rgyu gang zhig 'bras bu 'grub pa la thun mong ma yin pa de la ni sa bon zhes bya ste/ dper na sA lu'i sa bon ni sA lu'i myu gu'i rgyu yin pa lta bu'o//sa la sogs pa thun mong ba gang yin pa de ni sa bon ma yin gyi/ de ni rgyu nyid yin par zad do/ /de ji ltar yin pa de bzhin du 'dir yang rnam par smin pa yid du 'ong ba mngon par 'grub pa la sems rnam pa gsum sa bon yin te/ skyes bu'i byed pa la sogs pa rnams ni rgyu tsam du zad do//yang dus gang gi tshe sa bon 'bras bu'i sgrub par byed pa yin zhe na/ 'di gzhan du 'bras bu dag gi zhes bya ba gsungs te/ /'di zhes bya ba ni mthong ba'i skye ba la yin la/ gzhan du zhes bya ba ni ma mthong ba'i skye ba la'o zhes bya ba'i tha tshig go/ /'di yang lung las rgyas par khong du chud par bya'o//de ltar re zhig sems kyi bdag nyid can gyi chos gcig nyid rnam par gzhag nas slar yang bcom ldan 'das/ drang srong mchog gi las rnams ni/ /sems pa dang ni bsams par te rnam pa gnyis su gsungs so/ /don dam pa thugs su chud pas na drang srong ngo / /drang srong yang yin la mchog kyang yin pas na drang srong mchog go//don dam pa rnam pa thams cad du thugs su chud pa'i phyir la/ nyan thos dang rang sangs rgyas dag las kyang mchog tu byung ba yin pa'i phyir na drang srong mchog ste sangs rgyas bcom ldan 'das so/ /drang srong mchog des mdo las/sems pa'i las dang bsams pa'i las so zhes gsungs so/ /gang zhig las rnam gnyis gsungs pa'i/ /las de dag gi bye brag ni/ /rnam pa du mar yongs su bsgrags/ /ji ltar zhe na/ /de la las gang sems pa zhes / /gsungs pa de ni yid kyir 'dod/ /bsams pa zhes ni gang gsungs pa//de ni lus dang ngag gir 'dod/ /yid la yod pa ni yid kyi ste/ yid kyi sgo nas de mthar thug par 'gro ba'i phyir dang / lus dang ngag 'jug pa la ltos pa med pa'i phyir yid kyi rnam par shes pa dang mtshungs par ldan pa'i sems pa kho na la yid kyi las zhes brjod do/ / de la zhes bya ba'i sgra ni dmigs kyis bkar ba'o/ /las gnyis pa bsams pa zhes gang gsungs pa de ni lus dang ngag gi yin par rig par bya ste/ lus dang ngag dag gis de lta de ltar 'jug par bya'o zhes de ltar sems kyis bsams nas gang zhig byed pa de ni bsams pa'i las zhes bya'o/ /yang de ni rnam pa gnyis te/lus dang ngag la yod pa'i phyir dang / de dag gi sgo nas mthar thug par 'gro ba'i phyir na lus kyi dang ngag gi'o/ /de ltar na lus kyi dang ngag gi dang yid kyi ste/ /rnam pa gsum du 'gyur ro/ /las rnam pa gsum po 'di dag kyang slar phye na rnam pa bdun du 'gyur ro/ /de ltar bcom ldan 'das kyis las de'i bye brag rnam pa mang por gsungs so //ci ltar zhe na/ ngag dang bskyod dang mi spong ba'i/ /rnam rig byed min zhes bya gang / /spong ba'i rnam rig byed min pa/ /gzhan dag kyang ni de bzhin 'dod/ /longs spyod las byung bsod nams dang / /bsod nams ma yin tshul de bzhin//sems pa dang ni chos de bdun/ /las su mngon par 'dod pa yin/ /de la ngag ni yi ge gsal por brjod pa'o/ /bskyod pa ni lus kyi g.yo ba'o/ /de la ngag ces bya bas ni dge ba dang mi dge ba'i ngag rnam par rig byed ma yin pa'i spong ba dang / mi spong ba'i mtshan nyid can kun nas slong bar byed pa thams cad spyir bzung ste/de bzhin du dge ba dang mi dge ba'i bskyod pa rnam par rig byed ma yin pa spong ba dang mi spong ba'i mtshan nyid can kun nas slong bar byed pa yang spyir bzung ngo / /ji ltar rnam par rig byed 'di'i dbye ba rnam pa gnyis su 'gyur ba de bzhin du/ rnam par rig byed ma yin pa'i yang yin te/mi spong ba'i mtshan nyid can gyi rnam par rig byed ma yin pa dag dang / spong ba'i mtshan nyid can gyi rnam par rig byed ma yin pa dag ces bya bar byas pa'i phyir ro/ /de la mi spong ba'i mtshan nyid can gyi rnam par rig byed ma yin pa dag ni 'di lta ste/ deng nas bzung nas bdag gis sems can bsad cing chom rkun byas la 'tsho bar bya'o zhes sdig pa'i las khas blangs pa'i dus nas bzung ste/de mi byed pa dag la yang rtag par rgyun mi 'chad par mi dge ba'i las khas blangs pa'i rgyu can gyi rnam par rig byed ma yin pa dag nye bar skye bar 'gyur ba dang / rgya'i las byed pa nas bzung ste nya pa la sogs pa rnams de mi byed pa la yang rnam par rig byed ma yin pa dag nye bar skye ba gang yin pa ste/'di dag ni mi spong ba'i mtshan nyid can zhes bya'o/ /'di dag ji ltar yin pa de bzhin du spong ba'i mtshan nyid can gyi rnam par rig byed ma yin pa dge ba'i rang bzhin can gzhan dag kyang yin no//'di lta ste/ deng nas bzung ste srog gcod pa la sogs pa dag spong ngo zhes lus dang ngag gi rnam par rig byed yongs su rdzogs pa'i dus nas bzung ste/ dus phyis myos pa la sogs pa'i gnas skabs su yang dge ba bsags pa'i rang bzhin gyi rnam par rig byed ma yin pa dag nye bar skye ba gang yin pa 'di dag ni spong ba'i mtshan nyid can gyi rnam par rig byed ma yin pa zhes bya'o//gzugs dang bya ba'i rang bzhin yin du zin kyang / rnam par rig byed bzhin du gzhan la rnam par rig par mi byed pas na rnam par rig byed ma yin pa dag go//de bzhin du longs spyod las byung bsod nams te/ dge ba zhes bya ba'i don to/ /longs spyad pas byung ba 'di la yod pas na longs spyod las byung ba'o/ /longs spyod ni yongs su btang ba'i dngos po dge 'dun la sogs pa rnams kyis nye bar longs spyod pa'o/ /byung ba ni rjes su byung ba ste/sbyin pa po'i rgyud la skyes pa'i dge ba 'phel bar 'gyur ro zhes bya ba'i don to/ /bsod nams ma yin tshul de bzhin te/ longs spyod las byung zhes bya ba'i don to/ /ji ltar gang du srog chags dag gsod pa'i lha khang la sogs pa brtsigs pa lta bu ste/ ji lta ji ltar lha khang der srog chags dag gsod pa de lta de ltar lha khang la sogs pa der longs spyad pa las byed pa po rnams kyi rgyud la longs spyad pa las byung ba'i bsod nams ma yin pa skye bar 'gyur ro//de ltar na bsod nams ma yin pa yang tshul de bzhin du 'gyur ro/ /yid kyi las kyi mtshan nyid can sems mngon par 'du byed pa sems pa zhes bya ba dang ste/mdor bsdu na las rnam pa bdun po 'di dag tu 'gyur ro/ /dge ba dang mi dge ba'i ngag dang bskyod pa gnyis dang / dge ba rnam par rig byed ma yin pa'i mtshan nyid can dang / mi dge ba rnam par rig byed ma yin pa mtshan nyid can dang / longs spyod las byung ba'i bsod nams dang / longs spyod las byung ba'i bsod nams ma yin pa dang / sems pa zhes bya ba ste/ chos de bdun las su mngon par te las nyid du gsal zhing las kyi mtshan nyid can du 'dod pa yin no/ /'di la kha cig rgol bar byed de/ las rnam pa mang po zhig bshad pa gang yin pa de ci rnam par smin pa'i dus kyi bar du gnas pa zhig gam/'on te skyes ma thag tu 'jig pa'i phyir/ mi gnas pa zhig yin grang / re zhig/ gal te smin pa'i dus bar du/ /gnas na las de rtag par 'gyur/ /gal te 'gags na 'gags gyur pa/ /ji ltar 'bras bu bskyed par 'gyur//gal te las 'di skyes nas rnam par smin pa'i dus kyi bar du rang gi ngo bos gnas so zhes bya bar rtog na ni/ de'i phyir de ltar na de dus 'di tsam gyi bar du rtag pa nyid du 'gyur te/ 'jig pa dang bral ba'i phyir ro/ /phyis 'jig par 'gyur ba'i phyir rtag pa ma yin no zhe na/ de ni de ltar ma yin te/sngar 'jig pa dang bral ba ni nam mkha' la sogs pa ltar phyis kyang 'jig pa dang 'brel ba med pa'i phyir dang / 'jig pa dang bral ba yang 'dus ma byas nyid du thal bar 'gyur ba'i phyir dang / 'dus ma byas rnams la ni rnam par smin pa ma mthong ba'i phyir dang / rnam par smin pa med pa nyid kyis rtag tu gnas par 'gyur ba'i phyir/las rnams rtag pa nyid du khas blangs pa kho nar 'gyur ro/ /de ltar na re zhig rtag pa nyid kyi skyon du 'gyur ro/ /ci ste las rnams skyes ma thag tu 'jig pa nyid du khas len no zhe na/ de lta yin na ni/ gal te 'gags na 'gags gyur pa / /ji ltar 'bras bu bskyed par 'gyur//las med par gyur pa ni yod pa ma yin pa'i rang bzhin yin pa'i phyir 'bras bu bskyed par mi 'gyur ro zhes bya bar bsams pa'o/ /'di la sde pa gzhan dag kha cig lan 'debs par byed pa ni/ re zhig kho bo cag la 'du byed rnams rtag pa nyid kyi nyes par ni mi 'gyur te/skyes ma thag tu 'jig pa'i phyir ro/ /gang yang / gal te 'gags na 'gags gyur pa/ /ji ltar 'bras bu bskyed par 'gyur/ /zhes smras pa de la yang lan brjod par bya ste/ myu gu la sogs rgyun gang ni/ /sa bon las ni mngon par 'byung / /de las 'bras bu sa bon ni/ / med na de yang 'byung mi 'gyur/ /'dir sa bon ni skad cig ma nyid yin du zin kyang / rgyun myu gu dang sdong bu dang sbubs 'chas pa dang / lo ma la sogs pa'i ming can 'byung bar 'gyur ba'i 'bras bu'i khyad par rang dang rigs mthun pa bskyed pa'i nus pa dang ldan pa kho na'i rgyu'i dngos por gyur nas 'gags pa yin la/gang yang myu gu la sogs pa'i rgyun sa bon las byung ba de las ni rgyu chung ngu yin du zin kyang rim gyis lhan cig byed pa'i rgyu ma tshang ba med pas 'bras bu'i tshogs rgya chen po skye bar 'gyur ro/ /sa bon ni med na ste/ sa bon mi bdog par 'gyur na ni myu gu la sogs pa'i rgyun de yang 'byung bar mi 'gyur ro//de'i phyir de ltar de yod na yod pa nyid dang / de med na med pa nyid kyis na myu gu la sogs pa'i rgyun gyi 'bras bu ni sa bon gyi rgyu can nyid yin par bstan par 'gyur ro/ /de'i phyir de ltar/ gang phyir sa bon las rgyun dang / /rgyun las 'bras bu 'byung 'gyur zhing //sa bon 'bras bu'i sngon 'gro ba/ /de phyir chad min rtag ma yin/ /gal te sa bon myu gu la sogs pa'i rgyun gyi rkyen du ma gyur par me lce dang me mdag la sogs pa 'gal ba'i rkyen nye bas 'gags par gyur na ni/ de'i tshe de'i 'bras bu'i rgyun 'byung bar ma mthong bas chad par lta bar 'gyur la//yang gal te sa bon mi 'gag cing myu gu la sogs pa'i rgyun 'byung bar 'gyur na ni/ de'i tshe sa bon mi 'gag par khas blangs pas rtag par lta bar 'gyur na/ 'di ni de ltar yang ma yin no/ /de'i phyir sa bon chad pa dang rtag par thal bar 'gyur ba yod pa ma yin no//ji ltar sa bon la tshul 'di smras pa de bzhin du/ sems kyi rgyun ni gang yin pa/ /sems las mngon par 'byung bar 'gyur/ /de las 'bras bu sems lta zhig/ med na de yang 'byung mi 'gyur/ /sems sems pa dge ba'i khyad par dang mtshungs par ldan pa de las ni de'i rgyu can sems kyi rgyun gang yin pa 'byung la/sems pa dge bas yongs su bsgos pa'i sems kyi rgyun de las ni lhan cig byed pa'i rgyu nye ba ma tshang ba med pa na 'bras bu yid du 'ong ba skye bar 'gyur ro/ /sems lta zhig med na ste/ sems mi bdog na rgyun de yang 'byung bar mi 'gyur ro/ /de'i phyir de ltar na/ gang phyir sems las rgyun dang ni//rgyu las 'bras bu 'byung 'gyur zhing / /las ni 'bras bu'i sngon 'gro ba/ /de'i phyir chad min rtag ma yin/ /gal te sems dge ba de dgra bcom pa'i sems tha ma ltar/ sems kyi rgyun rgyu dang 'bras bu gcig nas gcig tu brgyud pa'i rim pa rgyun ma chad pa 'byung bar 'gyur ba'i rgyu'i dngos por ma gyur par 'gags na ni/de'i phyir las de rgyun chad par 'gyur la/ ci ste yang ma 'ongs pa'i rgyun gyi rgyu'i dngos por gyur nas rang gi ngo bo las mi nyams par gyur na ni/ de'i tshe las rtag par 'gyur ba zhig na/ de ni de ltar yang ma yin no/ / de'i phyir las skad cig mar khas blangs su zin kyang chad pa dang rtag par lta bar thal ba yod pa ma yin no/ /de'i phyir ji skad bstan pa'i las kyi rab tu dbye ba rnam par bshad pa 'dir dge ba bcu'i las kyi lam yang bshad pa yin la/ dkar po las kyi lam bcu po'o / /de dag kyang chos sgrub pa'i thabs yin te/chos kyi 'bras bu 'di gzhan du 'dod pa'i yon tan rnam lnga'o/ /dge ba'i las kyi lam bcu po de dag ni chos sgrub pa'i thabs yin te 'grub pa'i rgyur gyur pa yin no zhes bya ba'i tha tshig go/ 'di dag gang gis sgrub pa'i thabs nyid du 'jog par 'gyur ba'i chos zhes bya ba dge ba'i las kyi lam las tha dad pa 'di gang zhig yin zhe na/brjod par bya ste/ chos kyi sgras ni sems kyi khyad par 'ga' zhig kho na brjod pa yin te/ bdag nyid legs par sdom pa dang / /gzhan la phan 'dogs byams sems gang / /de chos zhes brjod pa'i phyir ro/ /rnam pa gcig tu na dge ba bcu'i las kyi lam 'di dag yongs su mthar gtugs pa'i ngo bo ni chos kyi sgra'i brjod bya yin la/byed bzhin pa'i ngo bo ni dge ba'i las kyi lam gyi sgra'i brjod byar 'gyur ro/ /dge ba bcu'i las kyi lam 'di dag ni bshad zin pa'i mtshan nyid can de 'grub par bya ba la rgyu nyid du rnam par gzhag go//yang las kyi rnam par dbye ba'i skabs thal zin pa der dge ba bcu'i las kyi lam du ji ltar 'gyur zhe na/ brjod par bya ste/ lus kyi gsum dang / ngag gi bzhi ni/ ngag dang bskyod dang mi spong pa'i/ /rnam rig byed min zhes bya gang / /zhes bya ba la sogs pas bshad pa yin la/yid kyi gsum po brnab sems med pa dang / gnod sems med pa dang / yang dag par lta ba zhes bya ba ni/ sems pa dang ni zhes bya ba des rnam par bshad pa yin no/ /de ltar na der dge ba'i las kyi lam de dag bcu car yang rnam par bshad pa yin la/ de dag kyang ji skad bshad pa'i chos 'grub pa'i rgyur 'gyur ro/ /chos de'i 'bras bu ni gzugs dang sgra dang dri dang ro dang reg bya'i mtshan nyid can 'dod pa'i yon tan lnga nye bar longs spyod pa'o/ /'di zhes bya ba ni 'jig rten 'di zhes bya ba'i don to/ /gzhan du zhes bya ni ma mthong bar te 'jig rten pha rol du zhes bya ba'i tha tshig go//de ltar re zhig kha cig gis brtsad pa'i lan btab pa yin dang / gzhan dag gis de la skyon brjod nas/ brtsad pa'i lan gzhan gdab pa'i phyir smras pa/ gal te brtag pa der 'gyur na/ /nyes pa chen po mang por 'gyur/ /de lta bas na brtag pa ste/ / 'dir ni 'thad pa ma yin no/ /gal te sa bon dang myu gu dang chos mthun pa'i sgo nas sems kyi rgyun la chad pa dang rtag pa'i skyon du thal ba spong bar 'gyur na ni de'i tshe gzhan gyi phyogs la nyes pa chen po ste mthong ba dang ma mthong ba dang 'gal ba dang / grangs mang ba nyid kyis mang por 'gyur ro/ / ji ltar zhe na/ gal te sa bon gyi rgyun gyi dpe sa yin na ni sA lu'i sa bon las ni sA lu'i myu gu la sogs pa'i rgyun kho na 'byung bar 'gyur gyi/ rigs mi mthun pa ma yin la sA lu'i myu gu la sogs pa'i rgyun las kyang sA lu'i 'bras bu kho na skye'i/ rigs tha dad pa'i phyir ni pa'i 'bras bu ma yin pa de bzhin du/'dir yang rigs pa mtshungs pa'i phyir dge ba'i sems las dge ba'i sems kyi rgyun kho nar 'gyur gyi/ rigs mi mthun pa'i phyir mi dge ba dang lung du ma bstan pa'i rgyun ni ma yin no/ /de bzhin du mi dge ba dang lung du ma bstan pa'i sems las kyang mi dge ba dang lung du ma bstan pa'i sems kyi rgyun kho nar 'gyur te/rigs tha dad pa'i phyir gzhan ma yin no/ /'dod pa dang gzugs dang gzugs med pa na spyod pa dang / zag pa med pa'i sems rnams las kyang 'dra ba'i sems 'dod pa dang / gzugs dang / gzugs med pa pa na spyod pa dang /zag pa med pa'i sems rnams kho na 'byung bar 'gyur gyi/ rigs mi mthun pa rnams ni ma yin no/ /mi'i sems las kyang mi'i sems kho nar 'gyur gyi/ gzhan lha dang dmyal ba dang yi dags dang dud 'gro la sogs pa'i sems ni ma yin no/ /de'i phyir gang zhig lha yin pa de ni lha kho nar 'gyur la/gang zhig mi yin pa de ni mi kho nar 'gyur ro zhes bya ba la sogs pa gsungs so / /de'i phyir lha dang mi mi dge ba byed pa rnams kyi 'gro ba dang skye gnas dang rigs dang blo dang dbang po dang stobs dang gzugs dang longs spyod la sogs pa tha dad pa dang / ngan 'gror ltung ba yang yod par mi 'gyur ba zhig na/'di dag thams cad ni 'dod pa yang ma yin no/ /gang gi phyir de ltar sa bon gyi rgyun dang chos mthun par rtog na nyes pa chen po dang mang por thal bar 'gyur ba de'i phyir brtag pa de 'dir yang 'thad pa ma yin no/ /sangs rgyas rnams dang rang rgyal dang //nyan thos rnams kyis gang gsungs pa'i/ /brtag pa gang zhig 'dir 'thad pa/ /de ni rab tu brjod par byed / /brtag pa de yang gang zhig yin zhe na/ /smras pa/ dpang rgya ji lta de bzhin chud / /mi za las ni bu lon bzhin/ /de ni khams las rnam pa bzhi/ /de yang rang bzhin lung ma bstan//'dir dge ba'i las byas par gyur pa ni skyes ma thag tu 'gags pa yin la/ de 'gags pas 'bras bu med par thal bar 'gyur ba yang ma yin te/ gang gi phyir las de gang gi tshe skye ba de nyid kyi tshe byed pa po'i rgyud la las de'i chud mi za ba zhes bya ba ldan pa ma yin pa'i chos bu lon gyi dpang rgya 'dra ba zhig skye bar 'gyur ro//de'i phyir de ltar na dpang rgya ji lta ba de bzhin du chud mi za bar rig par bya la/ gang la chud mi za ba zhes bya ba'i chos de bskyed pa'i las de ni bu lon bzhin rig par bya'o/ /ji ltar bu lon gyi dpang rgya bzhag nas nor spyad kyang nor bdag gi nor chud za bar mi 'gyur bar dus gzhan gyi tshe skyed dang bcas pa'i nor gyi phung po dang 'brel ba nyid du 'gyur ba de bzhin du las zhig tu zin kyang chud mi za ba zhes bya ba'i chos gzhan gnas pas byed pa po de'i rgyu can gyi 'bras bu dang mngon par 'brel ba nyid du 'gyur ro//yang ji ltar bu lon gyi dpang rgyas gtong ba po la nor bkug nas ror gyur pa ni yod dam med kyang rung ste yang nor 'gugs par mi nus pa de bzhin du chud mi za ba yang rnam par smin pa phyung nas yod dam med kyang rung ste dpang rgya ror gyur pa ltar yang byed pa po rnam par smin pa dang 'brel par byed mi nus so// yang mdo gzhan las gsungs shing kho bo cag gis smras pa'i chud mi za ba gang yin pa/ de ni khams las rnam pa bzhi ste/ 'dod pa dang gzugs dang gzugs med pa na spyod pa dang / zag pa med pa'i dbye ba las so/ /de yang rang bzhin lung ma bstan/ /chud mi za ba ni dge ba dang mi dge ba nyid tu brda mi sprod pa'i phyir lung du ma bstan pa kho na yin no//gal te mi dge ba'i las rnams kyi de mi dge ba zhig yin na ni de'i tshe 'dod pa'i 'dod chags dang bral ba rnams la med par 'gyur ro/ /gal te dge ba rnams kyi dge ba zhig yin na ni dge ba'i rtsa ba chad pa rnams la de med par 'gyur ro//de'i phyir de ni rang bzhin gyis lung du ma bstan pa nyid yin no/ /gzhan yang / spong ba spang ba ma yin te/ /bsgoms pas spang ba nyid kyang min / /chud mi za ba de spong bas spang ba ni ma yin no/ /'phags pa yang so so skye ba'i las dang ldan par 'gyur du 'ong bas mthong ba'i lam gyis so so skye ba'i las dag kho na spong gi//chud mi za ba ni de'i las spangs kyang mthong ba'i lam gyis spong ba ma yin te/ 'on kyang de ni bsgom pa'i lam gyis kyang spong bar 'gyur ro/ /kyang gi sgras ni khams las yang dag par 'das pas kyang spang bar bya ba yin no zhes rnam par rtog pa'i don to//gang gi phyir de ltar las 'jig kyang chud mi za ba mi 'jig la/ las spangs kyang spang bar bya ba ma yin pa/ de phyir chud mi za ba yis/ /las kyi 'bras bu bskyod par 'gyur/ /yang gal te chud mi za ba 'di las spong bas te 'dor bas spong bar 'gyur la/las 'pho ba ste las 'jig cing las gzhan mngon du phyogs pa'i ngo bos 'jig par 'gyur na nyes pa ci yod ce na/ brjod pa/ gal te spong bas spang ba dang / /las 'pho ba yis 'jig 'gyur na/ /de la las 'jig la sogs pa'i/ /skyon rnams su ni thal bar 'gyur/ /gal te so so skye bo'i las bzhin du mthong ba'i lam gyis chud mi za ba spong na ni//de'i tshe las 'jig pa kho nar 'gyur la/ las 'jig pa'i phyir 'phags pa rnams kyi las kyi 'bras bu rnam par smin pa yid du 'ong ba dang mi 'ong ba sngon gyi las kyi rgyu can du yang mi 'gyur ro/ /ma byas pa'i las las 'bras bu 'byung bar yang 'gyur ro//las dang 'bras bu med par lta ba'i phyir log par lta bar yang 'gyur ro/ /de ltar chud mi za bas spong bas spang bar bya ba nyid du khas len na las 'jig pa la sogs pa'i skyon rnams su thal bar 'gyur ro/ /de bzhin du las 'pho ba la yang sbyar bar bya'o//khams mtshungs las ni cha mtshungs dang / /cha mi mtshungs pa thams cad kyi/ /de ni nying mtshams sbyor ba'i tshe/ /gcig pu kho na skye bar 'gyur/ /cha mtshungs pa ni las rigs 'dra ba rnams so/ /cha mi mtshungs pa ni las rigs tha dad pa rnams so//las cha mtshungs pa dang / cha mi mtshungs pa de rnams thams cad kyi chud mi za ba ni 'dod pa dang / gzugs dang / gzugs med pa'i khams dag tu nying mtshams sbyor ba'i tshe las thams cad bshig nas gcig kho na skye bar 'gyur ro/ / de yang khams mtshungs te/ khams mnyam pa rnams kyi de kho na skye bar 'gyur gyi/ mi mtshungs pa rnams kyi ni mi 'gyur ro/ /mthong ba'i chos la rnam gnyis po/ /thams cad las dang las kyi de/ /tha dad par ni skye 'gyur zhing / /rnam par smin kyang gnas pa yin/ / chud mi za ba zhes bya ba'i chos de ni mthong ba'i chos la ste tshe 'di la zag pa dang bcas pa dang zag pa med pa'i dbye bas rnam pa gnyis te/ tshul gnyis po thams cad kyi ste sems pa dang bsams pa'i las kyi rang bzhin can gyi las dang las kyi chud mi za ba re re skye bar 'gyur ro/ /chud mi za ba de ni rnam par smin kyang ste rnam par smin pa na gdon mi za bar 'gag pa ma yin la/yod du zin kyang dpang rgya ror gyur pa ltar yang 'bras bu 'byin par ni byed mi nus so/ /de ni 'bras bu 'pho ba dang / /shi bar gyur na 'gag par 'gyur/ /de yi rnam dbye zag med dang / /zag dang bcas par shes par bya//de la 'bras bu 'pho ba na 'gag pa ni ji skad du/ bsgoms pas spang ba nyid kyang yin/ /zhes bshad pa lta bu'o/ /shi bar gyur pa na/ 'gag pa ni ji skad du/ de ni nying mtshams sbyor ba'i tshe/ /gcig pu kho na skye bar 'gyur/ /zhes bsnyad pa lta bu'o/ /de yang zag pa dang bcas pa rnams kyi ni zag pa dang bcas pa yin la/zag pa med pa rnams kyi ni zag pa med pa yin te/ de ltar de'i rnam par dbye ba shes par bya'o/ /de'i phyir da ltar na/ stong pa nyid dang chad med dang / /'khor ba dang ni rtag pa min/ /las rnams chud mi za ba'i chos/ /sangs rgyas kyis ni bstan pa yin//gang gi phyir las ni byas nas 'gag gi rang bzhin gyis gnas pa ma yin la/ las rang bzhin gyis gnas pa ma yin pa de'i phyir/ stong pa nyid du thal ba yin no/ /de ltar las mi gnas pas chad par lta bar thal bar 'gyur ba yang ma yin te/ chud mi za ba yongs su bzung bas las kyi 'bras bu yod pa'i phyir te/rnam par smin pa med na ni las chad par lta bar 'gyur ba zhig go/ /chud mi za ba'i chos yod pa'i phyir dang / sa bon gyi rgyun dang chos mthun pa'i rtag pa med pa'i phyir 'gro ba dang rigs dang skye gnas dang / khams sna tshogs pa'i dbye bas phye ba/'gro lnga'i 'khor ba bkra ba yang grub pa yin no/ /gang gi phyir las rang gi ngo bos mi gnas par khas blangs pas rtag par smra bar thal ba yang ma yin la/ chud mi za ba yod pa'i phyir las rnams kyang chud mi za ba zhes bya ba de lta bu'i chos 'di ma rig pa nyid ma lus pa dang bral bas sad par gyur pa/sangs rgyas bcom ldan 'das kyis bstan pa de'i phyir sngar gzhan gyis/ gal te smin pa'i dus bar du/ /gnas na las de rtag par 'gyur/ /gal te 'gags na 'gags gyur pa/ /ji ltar 'bras bu bskyed par 'gyur/ /zhes gang smras pa de kho bo cag gi phyogs la mi 'thad do//de'i phyir kho bo cag gis brjod pa'i brtag pa kho na rigs so zhe'o/ /'di la bshad par bya ste/ gang dag las nyid kyang mi 'thad pa de'i phyir 'bras bu'i rgyu can gyi rtsod pa byed pa khyed cag ci'i phyir dri za'i grong khyer gyi ra ba 'gyel gyis dogs pas ches yid byung bar gyur zhing de srung ba'i ngal bas tshegs su 'gyur /'di ltar gal te las rang gi ngo bos skye bar 'gyur na ni/ de rnam par ma smin gyi bar du gnas pas rtag pa nyid du 'gyur la/ 'jig pas chad bar 'gyur ba zhig na/ gang gi tshe rang bzhin gyis stong pas las skye ba med pa de'i tshe na gang las dpyad pa 'dir 'gyur ba de la gnas pa dang 'jig pa yod par ga la 'gyur//'dir/ /gang phyir las ni skye ba med/ /ces smras pa/ slob dpon gyis/ 'di ltar rang bzhin med de'i phyir/ /zhes gsungs te/ gang gi phyir las rang bzhin med pa de'i phyir skye ba med do/ /gal te de ltar las rang bzhin med pas mi skye na/ji ltar bcom ldan 'das kyis/ lus can rnams kyi las rnams ni/ /bskal pa brgyar yang chud mi za/ /tshogs shing dus la bab pa na/ /'bras bu nyid du smin par 'gyur/ /zhes de skad du gsungs she na/ brjod pa/ bcom ldan 'das kyis dgongs pa ni/ / gang phyir de ni ma skyes pa/ /de phyir chud zar mi 'gyur ro/ /zhes bya ba de ltar yin te/ de'i phyir tshul 'dis ni kho bo cag la gnod par byed pa ma yin no/ /las rang bzhin med do zhes bya ba de ni de ltar yin par gdon mi za bar shes par bya ste/ gzhan du na/ gal te las la rang bzhin yod/ /rtag par 'gyur bar the tshom med//las ni byas pa ma yin 'gyur/ /rtag la bya ba med phyir ro/ /gal te rang bzhin gyis las yod par gyur na ni the tshom med par de rtag par 'gyur te/ rang bzhin la gzhan du 'gyur ba med pa'i phyir ro/ /de'i phyir las ni byas pa ma yin pa nyid du 'gyur ro/ /ci'i phyir zhe na/gang gi phyir rtag la bya ba med phyir ro/ /rtag pa zhes bya ba ni gang zhig yod pa yin la/ gang yod pa de ni bya ba mi 'thad pas rgyu la mi ltos so/ /de'i phyir dge ba dang mi dge ba'i las ma byas par 'jig rten la rnam par smin par 'gyur ro/ /de'i phyir/ ci ste las ni ma byas na/ /ma byas pa dang phrad 'jig 'gyur//tshangs spyod gnas pa ma yin pa'ang / /de la skyon du thal bar 'gyur/ /gal te las byas pa ma yin par gyur na ni de'i tshe ma byas pa dang phrad pa'i 'jig par 'gyur te/ gang gi srog gcod pa'i las ma byas pa de la yang las de ma byas kyang yod pas 'di de dang 'brel pa'i phyir/ ma byas pa dang phrad pa'i 'jig par 'gyur ro/ /tshangs par spyod pa la gnas pa ma yin pa yang phyogs de la 'gyur ro/ /ci'i phyir zhe na/ tshangs par spyod pa la gnas pa yongs su dag pa rnams la yang mi tshangs par spyod pa ma byas par yod pas thams cad tshangs par spyod pa ma yin pa la gnas pa'i phyir 'ga' yang mya ngan las 'da' bar mi 'gyur ro//gzhan yang tha snyad thams cad nyid dang yang / /'gal bar 'gyur ba the tshom med/ /bsod nams dang ni sdig byed pa'i/ /rnam par dbye ba 'ang 'thad mi 'gyur/ /gang dag zhing rmo ba dang tshong dang ba lang 'tsho ba la sogs pa'i bya ba 'bras bu'i don du rtsom pa de dag thams cad kyis ma byas bzhin du yod pa'i phyir don med par 'gyur la/bum pa gyis shig snam bu thogs shig bya ba de lta bu la sogs pa'i 'jig rten pa'i tha snyad thams cad dang yang 'gal bar 'gyur te/ bum pa la sogs pa thams cad yod pa nyid kyi phyir ro/ /'di ni bsod nams byed pa'o//'di ni sdig pa byed pa'o/ /zhes bya ba'i rnam par dbye bar yang 'gyur ro / /bsod nams dang sdig pa byed pa gnyis po re re la yang ma byas kyang bsod nams dag yod pa'i phyir ro/ /gzhan yang / de ni rnam smin smin gyur pa/ /yang dang yang du rnam smin 'gyur/ /gal te rang bzhin yod na ni//gang phyir las gnas de yi phyir/ /las rnam par smin pa rnam par smin zin pas kyang yang dang yang du rnam par smin pa 'byin par 'gyur te/ /rnam par smin pa smin par ma gyur pa'i gnas skabs ltar rang gi ngo bo las ma nyams pa'i phyir ro/ /de'i phyir de ltar gal te las rang bzhin yod do snyam du sems na ni rang bzhin dang bcas pa nyid yin dang /gang gi phyir las rnam par gnas pa yod pa de'i phyir the tshom med par ji skad bshad pa'i nyes pa dag tu 'gyur ro/ /de'i phyir las rang bzhin med pa yin no / /gang gi phyir las rang bzhin med pa de'i tshe kho bo cag de skad du rnam par 'chad pa dag la rtag pa dang /chad par lta bar thal ba'i skyon du mi 'gyur ro/ /'dir smras pa/ las ni rang bzhin gyis yod pa nyid yin te de'i rgyu yod pa'i phyir ro/ /'dir gang yod pa ma yin pa de la ni rgyu med de/ rus sbal gyi spu'i gos bzhin no/ /las kyi rgyu nyon mongs pa rnams ni yod pa yang yin te/ma rig pa'i rkyen gyis 'du byed rnams so/ /len pa'i rkyen gyis srid pa'o zhes 'byung ba'i phyir ro/ /de'i phyir las yod pa nyid yin no/ /brjod par bya ste/ 'di ni mi rigs so/ /ci'i phyir zhe na gang gi phyir/ las 'di nyon mongs bdag nyid la/ /nyon mongs de dag yang dag min/ / gal te nyon mongs yang dag min/ /las ni yang dag ji ltar yin/ /'dir las 'di nyon mongs pa'i bdag nyid de nyon mongs pa'i rgyu can yin la nyon mongs pa de dag kyang yang dag par yod pa ma yin te/ gang dag sdug dang mi sdug dang / /phyin ci log la rten 'byung ba/ /de dag rang bzhin las med de//de phyir nyon mongs yang dag med/ /ces 'chad par 'gyur ba'i phyir ro/ /de'i phyir de ltar nyon mongs pa de dag yang dag pa ma yin na/ de'i tshe de dag gi rgyu can las gang yin pa de yang dag par ji ltar 'gyur/ de'i phyir las rang bzhin gyis yod pa ma yin no/ /'dir smras pa/ las dang nyon mongs pa dag ni yod pa nyid de/ de'i 'bras bu yod pa'i phyir ro/ /'dir las dang nyon mongs pa dag gi 'bras bu lus zhes bya ba dmigs pa yin la/ gang gi 'bras bu dmigs pa de ni yod pa yin te/ yod pa ma yin pa nam mkha'i me tog la sogs pa'i 'bras bu ni ma mthong ba'i phyir ro//brjod par bya ste/ gal te de dag gi 'bras bu lus zhes bya ba yod na ni/ las dang nyon mongs pa dag kyang yod par 'gyur na/ yod pa ni ma yin no zhes bstan pa'i phyir/ las dang nyon mongs pa dag ni/ /lus rnams kyi ni rkyen du bstan/ /gal te las dang nyon mongs pa/ / de stong lus la ji ltar brjod/ /ces gsungs so/ /ji ltar las dang nyon mongs pa dag stong pa de ltar ni bstan zin to/ /de'i phyir gang gi tshe las dang nyon mongs pa dag nyid yod pa ma yin pa de'i tshe de dag gi 'bras bu lus rnams yod pa ma yin pa la brjod pa ci zhig yod par 'gyur te/ gang gi phyir de dag yod pa ma yin pa nyid du sngar grub zin pa de'i phyir 'di la brjod par bya ba lhag ma cung zad kyang yod pa ma yin no snyam du dgongs pa yin no//'dir smras pa/ las ni rang bzhin gyis yod pa nyid yin te/ de'i 'bras bu za ba po yod pa'i phyir ro/ /gang yod pa ma yin pa de'i 'bras bu za ba po ni yod pa ma yin te/dper na/ nam mkha'i a mra'i shing thog bzhin no/ /las kyi 'bras bu za ba po ni yod pa yin te/ ma rig bsgribs pa'i skye bo gang / /sred ldan de ni za ba po/ /de yang byed las gzhan min zhing / de nyid de yang ma yin no/ /de la ma rig pa dang mi shes pa dang /mun pa dang rmongs pa zhes bya ba ni rnam grangs dag go/ /ma rig pas bsgribs pa ni g.yogs pa'o/ /'gro ba lnga'i 'khor bar yang dang yang du skye bas na skye ba ste/ sems can dang / gang zag dang / srog chags zhes bya ba ni de nyid kyi rnam grangs dag go/ /sred pa dang 'dod chags dang chags pa dang rnam par chags pa zhes bya ba'i sgra ni rnam grangs dag go//ldan pa ni 'ching ba'o/ /srid pa'i 'ching ba 'di la yod pas na sred ldan te/ /sred pa'i 'ching ba can zhes bya ba'i don to/ /ji skad du mdo las/ ma rig bsgribs pa'i sems can dag/ sred pa'i kun du sbyor ba can//zhes gsungs so/ /'on kyang sdig pa'i las 'di ni rang gis byas pa yin la/ 'di'i rnam par smin pa ni rang nyid kyis so sor nyams su myong bar bya ba yin no zhes 'byung ba las na de ni las kyi 'bras bu'i za ba po'o/ /de yang byed pa po las gzhan ma yin la/ de nyid de yang ma yin te/ de nyid dang gzhan du brjod du med pa'i phyir ro//de'i phyir 'bras bu za ba po yod pa'i phyir las yod pa nyid do zhe na/ 'di la brjod par bya ste/ gal te las nyid yod na las kyi byed pa po dang / 'bras bu za ba po yang yod par 'gyur na/ yod pa ni ma yin no/ /ji ltar zhe na/ gang gi phyir ni las 'di ni/ /rkyen las byung ba ma yin zhing / /rkyen min las byung yod min pa/ /de phyir byed pa po yang med/ /gal te las dang byed med na/ /las skyes 'bras bu ga la yod/ /ci ste 'bras bu yod min na/ /za ba po lta ga la yod/ /gal te las zhes bya ba 'ga' zhig yod na ni/ de rkyen las byung ba'am/rkyen ma yin pa las byung ba zhig tu 'gyur grang / re zhig gal te rkyen las byung bar 'dod na ni/ de ni mi rigs te/ rkyen brtag par bshad zin pa'i phyir ro/ /ci ste rkyen ma yin pa las byung ba ste/ rgyu med pa yin na ni de yang / rgyu med na ni 'bras bu dang / rgyu dang zhes bya ba la sogs pas byed pa po dang las brtag pa las rgyas par bstan zin to//gang gi phyir de ltar las 'di rkyen las byung ba'am/ rkyen ma yin pa las byung ba yod pa ma yin pa de'i phyir/ las 'di'i byed pa po yang yod pa ma yin no/ /gang gi tshe de ltar las dang byed pa po yod pa ma yin pa de'i tshe las las skyes pa'i 'bras bu med pa pa yod par ga la 'gyur/'bras bu yod pa ma yin na 'bras bu za ba po yod par yang lta ga la 'gyur te/ 'di dag thams cad ni rang bzhin gyis yod pa ma yin pa kho na'o zhes shes par bya'o/ /'dir smras pa/ gal te de ltar khyod kyis dngos po rnams rang bzhin med par rnam par gzhag na/'o na ni gang bcom ldan 'das kyis rang gis byas pa'i las kyi rnam par smin pa ni rang nyid kyis myong bar 'gyur ba yin no zhes gsungs pa de dag thams cad tshul 'dis bsal bar 'gyur la/ las dang 'bras bu la skur pa btab pa'i phyir na khyod med pa pa gtso bor gyur pa yin no//brjod par bya ste/ kho bo cag med pa pa ma yin te/ kho bo cag ni yod pa dang med pa gnyis su smra ba bkag nas gnyis med pa'i lam mya ngan las 'das pa'i grong khyer du 'gro ba gsal bar byed pa yin no/ /kho bo cag ni las dang byed pa po dang 'bras bu la sogs pa med do zhes smra ba yang ma yin te/'o na ci zhe na/ 'di dag rang bzhin med do zhes rnam par 'jog pa yin no/ /ci ste rang bzhin med pa rnams la bya ba byed pa mi 'thad pa'i phyir nyes pa po na 'dug pa nyid do snyam na/ de yang yod pa ma yin te/ rang bzhin dang bcas pa rnams kho na la bya ba ma mthong ba'i phyir dang /rang bzhin med pa rnams kho na la bya ba mthong ba'i phyir ro/ /'di ltar bum pa la sogs pa rang bzhin med par gyur pa dag kho na 'jig rten na rang gi bya ba byed par dmigs pa yin no/ /gzhan yang don 'di ni dpe ches gsal ba 'di las nges par bya'o/ /ji ltar ston pas sprul pa ni//rdzu 'phrul phun tshogs kyis sprul zhing / /sprul pa de yang sprul pa na / /slar yang gzhan ni sprul pa ltar/ /'di lta ste/ dper na/ /ston pa sangs rgyas bcom ldan 'das kyis rdzu 'phrul phun tshogs te/ rdzu 'phrul gyi mthus sprul pa sprul la/ sprul pa de yang ste gang sangs rgyas bcom ldan 'das kyis sprul pa de slar yang ste phyis gzhan te sprul pa gzhan po sprul pa yin no//de la sprul pa gang zhig sprul pa gzhan sprul pa po de ni stong zhing rang bzhin med de/ de bzhin gshegs pa'i rang bzhin dang bral ba zhes bya ba'i don to/ /yang gang zhig sprul pas sprul pa'i sprul pa gzhan gang yin pa de yang stong zhing rang bzhin med pa ste/de bzhin gshegs pa'i rang bzhin dang bral ba zhes bya ba'i tha tshig go/ /ji ltar der rang bzhin med pa rnams la rang bzhin med pa'i bya ba byed pa nyid dang las dang bya ba byed pa po'i brjod par 'gyur ba/ de bzhin byed po des las gang / /byas pa'ang sprul pa'i rnam pa bzhin//dper na sprul pas sprul gzhan zhig/ sprul pa mdzad pa de bzhin no/ /'dir las kyi byed pa po gang yin pa de ni sprul pa'i rnam pa bzhin te/ rang bzhin gyis stong pa yin la/ rang bzhin gyis stong pa'i byed pa po des las gang cung zad cig byed pa de yang rang bzhin gyis stong pa yin te/dper na/ sprul pas sprul pa gzhan sprul pa de bzhin du rig par bya'o/ /de'i phyir dbu ma pa gnyis su med par smra ba rnams la log par lta ba ga la yod/ ji skad du/ gang tshe bde gshegs gtam rnams ston pa na/ /mgon po srang bzhud mi la thugs brtse'i phyir/ /rgyal bas der ni sprul pa rnam sprul te//de dag la yang sangs rgyas chos bzang ston/ /srog chags brgya stong dag gis de thos nas/ /sangs rgyas ye shes mchog la smon lam 'debs/ /nam bdag 'di 'dra'i ye shes thob snyam ste/ /bsam pa mkhyen pas rgyal bas de lung ston//gang gis rgyal ba mi dbang spyan drangs pa/ /de yi sbyin pa mu mtha' med 'gyur te/ /rnyed mchog bsam gyis mi khyab de rnyed ces/ /la la dag ni de la mos pa bskyed/ /ces rgyas par gsungs pa lta bu'o/ /'dul ba las kyang / bcom ldan 'das kyis sdig pa can gyi dge slong mi mthun pa zhig sprul la/de'i tshig gis tshul khrims dang ldan pa la rnam par dag par khas 'ches pa dang 'grogs par yang bcas so zhes 'don to/ /de la sprul pa'i dpes rang bzhin med par lta ba 'thad pa'i ngo bo yin pa 'ba' zhig tu ma zad kyi/ gzhan yang dpe 'di dag gis kyang dngos po rnams rang bzhin med par gsal bar shes par bya'o zhes bstan pa'i phyir/nyon mongs las dang lus rnams dang / /byed pa po dang 'bras bu dag/ dri za'i grong khyer lta bu dang / /smig rgyu rmi lam 'dra ba yin/ /zhes gsungs so/ /de la nyon mongs pa ni 'dod chags la sogs pa dag ste/sems can gyi sems kyi rgyud dag nyon mongs par byed pa'i phyir ro/ /las ni dge ba dang mi dge ba dang mi g.yo ba dag go/ /lus ni khog pa dag go/ /byed pa po ni bdag rnams so/ /'bras bu ni rnam par smin pa dang bdag po dang rgyu mthun pa rnams te/nyon mongs pa la sogs pa'i don de dag ni dri za'i grong khyer gyi rnam pa la sogs pa ltar rang bzhin med par rig par bya'o/ /de'i phyir dngos po rnams kyi rang bzhin khas ma blangs pas dbu ma pa rnams kho na la rtag pa dang chad par lta ba gnyis su thal ba med pa yin no zhes shes par bya'o//las dang 'bras bu'i 'brel ba rnam par dpyod pa der brtsad pa ngan pa lhag ma'i brgal ba dang lan dag ni rgyas par dbu ma la 'jug pa las nges par bya'o/ /'dir sprul pa'i dge slong gnyis kyis dge slong dmigs pa pa lnga brgya btul ba 'phags pa dkon mchog brtsegs pa'i mdo las gsungs pa ma tshang ba med par dper brjod par bya'o//slob dpon zla ba grags pa'i zhal snga nas kyis sbyar ba'i tshig gsal ba las/ las dang 'bras bu brtag pa zhes bya ba rab tu byed pa bcu bdun pa'i 'grel pa'o// //'dir smras pa/ gal te nyon mongs pa rnams dang /las dag dang / lus rnams dang / byed pa po dag dang / 'bras bu rnams te/ 'di dag thams cad de kho na nyid ma yin gyi/ 'on kyang dri za'i grong khyer la sogs pa ltar de kho na nyid ma yin bzhin du/ byis pa rnams la de kho na nyid kyi rnam par snang ba yin na/ yang 'dir de kho na nyid ni gang zhig yin la/de kho na nyid la 'jug pa yang ji ltar yin/ brjod par bya ste/ nang dang phyi'i dngos po ma dmigs pas na / nang dang phyi la bdag tu 'dzin pa dang bdag gir 'dzin pa rnam pa thams cad du zad pa 'di ni 'dir de kho na nyid do/ /de kho na nyid la 'jug pa ni/ nyon mongs skyon rnams ma lus 'jig tshogs la//lta las byung bar blo yis mthong 'gyur zhing / /bdag ni 'di yi yul du rtogs byas nas/ /rnal 'byor pa yis bdag ni 'gog par byed/ /ces bya ba la sogs pas rgyas par dbu ma la 'jug pa las btsal bar bya'o/ /'dir ni gnas pa'i phyogs tsam nyid bshad par bya ste/'di na rnal 'byor pa de kho na nyid la 'jug par 'dod cing / nyon mongs pa dang skyon ma lus pa rab tu spong bar 'dod pa ni/ 'khor ba 'di ci'i rtsa ba can yin zhes de ltar nye bar rtog par byed la/ de de ltar nye bar rtog pa na/ 'khor ba 'jig tshogs la lta ba'i rtsa ba can nyid du mthong zhing bdag ni 'jig tshogs la lta ba de'i dmigs pa yin par mthong la bdag ma dmigs pas 'jig tshogs la lta ba spong zhing /de spangs pas nyon mongs pa dang skyon ma lus pa ldog par mthong bas/ gang zhig bdag tu 'dzin pa'i yul bdag ces bya ba 'di ci zhig ces ches thog mar bdag kho na la nye bar rtogs par bya'o //bdag tu 'dzin pa'i yul de yang brtags pa na phung po'i rang bzhin nam/ phung po las tha dad pa zhig tu 'gyur grang / de la rten dang brten pa dang de dang ldan pa'i phyogs rnams kyang gcig nyid dang gzhan nyid kyi phyogs kyi khongs su 'dus pa'i phyir dang /mdor bsdus nas brjod par 'dod pa'i phyir/ gcig nyid dang gzhan nyid kyi phyogs gnyis bkag pa nyid kyis bdag dgag par brtsam par bzhed na / /gal te phung po bdag yin na/ /skye dang 'jig pa can du 'gyur/ /gal te phung po rnams las gzhan//phung po'i mtshan nyid med par 'gyur/ /zhes bya ba gsungs so/ /yang gzhan de bzhin gshegs pa brtag pa dang / me dang bud shing brtag par phyogs lnga nye bar bkod la/ 'dir ni phyogs gnyis nyid yin pa ci'i phyir zhe na/ brjod par bya ste/ gang gi phyir/de dag tu phyogs lnga bstan pa de nyid kyi phyir/ gzhan du bstan pas yang 'dir ma bstan te/ mdor bsdus nas phyogs gnyis shig nye bar bkod de de la gal te phung po bdag yin no zhes rtog na ni des na skye dang 'jig pa can te bdag skye ba dang 'jig pa can du 'gyur te phung po rnams skye ba dang 'jig pa la brten pa'i phyir ro//bdag ni de ltar 'dod pa yang ma yin te nyes pa du mar thal bar 'gyur ba'i phyir ro/ /'di ltar/ ma byung ba las byung min te/ /'di la skyon du thal bar 'gyur/ /bdag ni byas par 'gyur ba dang / /'byung ba rgyu med can du'ang 'gyur/ /zhes bya ba dang /de bzhin du/ /nye bar len nyid bdag ma yin/ /de byung ba dang 'jig pa yin/ /nye bar blang ba ji lta bur/ /nye bar len po yin par 'gyur/ /zhes 'chad par 'gyur ro/ /gzhan yang phyogs 'di ni/ /gal te phung po bdag na de phyir de/ /mang bas bdag de dag kyang mang por 'gyur//bdag ni rdzas su 'gyur zhing der lta ba/ /rdzas la 'jug pas phyin ci log mi 'gyur/ /mya ngan 'das tshe nges par bdag chad 'gyur/ /mya ngan 'das sngon skad cig dag la ni/ /skye 'jig byed po med pas 'bras med nyid/ /gzhan gyis bsags las gzhan gyis za bar 'gyur//zhes bya ba la sogs pa dbu ma la 'jug pa las rgyas par rnam par dpyad pa byas pa las khong du chud par bya ste/ 'dir ni spros pa rgyas par mi brtsam mo/ /de ltar re zhig phung po bdag ma yin no/ /phung po las tha dad par yang mi rung ngo / /gal te phung po rnams las gzhan phung po'i mtshan nyid med par 'gyur/ji ltar ba glang las gzhan pa'i rta ba glang gi mtshan nyid can du mi 'gyur ba de bzhin du/ bdag kyang phung po las tha dad par rtog pa na/ phung po'i mtshan nyid med par 'gyur ro/ /de la phung po dag ni 'dus byas yin pa'i phyir/ skye ba dang gnas pa dang 'jig pa'i mtshan nyid can yin no/ /de la bdag phung po'i mtshan nyid du ma gyur pas skye ba dang gnas pa dang 'jig pa dang ldan par mi 'gyur ro/ /gang zhig de lta bu yin pa des ni yod pa ma yin pa'i phyir ram 'dus ma byas yin pa'i phyir nam mkha'i me tog gam mya ngan las 'das pa ltar//bdag tu brjod pa rnyed par mi 'gyur la/ bdag tu 'dzin pa'i yul de nyid du yang mi rigs so/ /de'i phyir bdag phung po las gzhan du yang rigs pa ma yin no/ /rnam pa gcig tu na 'di ni don gzhan yin no/ /gal te bdag phung po las tha dad na de phung po ma yin pa'i mtshan nyid can du 'gyur te/phung po lnga ni gzugs su rung ba dang / nyams su myong ba dang / mtshan mar 'dzin pa dang / mngon par 'du byed pa dang yul so sor rnam par rig pa'i mtshan nyid can yin na/ bdag ni gzugs las rnam par shes pa bzhin du phung po dag las tha dad par 'dod pa na mtshan nyid tha dad par grub par 'gyur la/mtshan nyid tha dad par grub pa ni gzugs las sems ltar gzung bar 'gyur na/ 'dzin pa yang ma yin no/ /de'i phyir phung po las tha dad pa yang yod pa ma yin no/ /gal te mu stegs pa dag gis bdag phung po las tha dad par rtogs shing /de'i mtshan nyid kyang tha dad par smra ba ma yin nam/ /de'i phyir tshul 'di ni de dag la gnod par byed pa ma yin no/ /ji ltar mu stegs pa dag bdag gi mtshan nyid tha dad par smra ba de ltar ni/ za po rtag dngos byed po min pa'i bdag/ yon tan bya med mu stegs rnams kyis brtags/ de dbye cung zad cung zad la brten nas/ /mu stegs can rnams lugs ni tha dad 'gyur/ /zhes dbu ma la 'jug pa las smras pa yin no zhe na/ brjod par bya ste/ mu stegs pa dag bdag phung po las tha dad pa de'i mtshan nyid smra ba bden mod kyi/ de dag bdag rang gi ngo bos dmigs nas de'i mtshan nyid smra ba ni ma yin te/'o na ci zhe na/ brten nas brtags pa'i don ji lta ba bzhin ma rtogs par skrag pas bdag ming tsam zhig tu ma rtogs shing kun rdzob kyi bden pa las kyang nyams te / log par rtog pa 'ba' zhig gi sgo nas rjes su dpag pa ltar snang ba tsam gyis bslus pas bdag yongs su rtog par byed la/de'i mtshan nyid kyang smra bar byed pa yin te/ las dang byed pa po brtag pa la sogs pa dag tu bdag dang nye bar len pa gnyis phan tshun ltos pa'i grub pa yin par gsungs pa na kun rdzob tu yang de dag gi dgag pa mdzad pa nyid yin no//ji ltar me long brten nas su/ /rang bzhin gzugs brnyan snang mod kyi/ /de ni yang dag nyid du na/ /cung zad kyang ni yod min pa/ /de bzhin phung po rnams brten nas/ /ngar 'dzin pa ni dmigs par 'gyur/ /rang gi bzhin gyi gzugs brnyan bzhin/ /yang dag tu na de 'ga' 'ang med//ji ltar me long ma brten par/ /rang bzhin gzugs brnyan mi snang ltar/ /phung po rnams la ma brten par/ /ngar 'dzin pa lang de dang 'dra/ /zhes gsungs so/ /de'i phyir de bstan pa'i phyir yang 'bad pa mi brtsam mo/ /brten nas btags pa ma rig pa'i phyin ci log dang ldan pa rnams bdag tu mngon par zhen pa'i gzhir gyur pa ni/phung po lnga po 'di gang gi nye bar len pa nyid du snang ba 'di ci phung po'i mtshan nyid yod pa zhig gam/ 'on te phung po'i mtshan nyid med pa zhig ces thar pa 'dod pa rnams kyis rnam par dpyod pa yin no/ /rnam pa thams cad du dpyad pa na thar pa 'dod pa rnams kyis ma dmigs pa de'i phyir de rnams la/bdag nyid yod pa ma yin na/ /bdag gi yod par ga la 'gyur/ /bdag ma dmigs pa'i phyir bdag tu gdags pa'i rgyu phung po lnga po dngos po bdag gi ba yang shin tu ches dmigs par mi 'gyur ro/ / ji ltar shing rta tshig na de'i yan lag kyang tshig pas mi dmigs pa de bzhin du rnal 'byor pa dag gis gang gi tshe bdag gi bdag med par rtogs pa de nyid kyi tshe phung po'i dngos po bdag gi ba yang bdag med par nges par rtogs par 'gyur ro/ /ji skad du/ ngar 'dzin las byung phung po rnams/ / ngar 'dzin de ni don du brdzun/ /gang gi sa bon brdzun pa de'i / /skye ba bden pa ga la zhig/ phung po de ltar mi bden par/ /mthong nas ngar 'dzin spong bar 'gyur/ /ngar 'dzin pa dag spangs nas ni/ /phyis ni phung po 'byung mi 'gyur/ /zhes bshad do/ /ji ltar nyi ma so ga'i zla ba tha ma dang 'tsham pa/nam mkha' sprin dang bral ba'i dkyil 'khor gyi phyogs gnon par byed cing cung zad nur bar gyur pa'i 'od zer me ches gsal ba'i me stag rgya chen po dang 'dra ba/ sa'i dkyil 'khor ches je rtsub tu gyur pa gdung bar byed pa lhur len pa dag la brten zhing sa phyogs ches je rtsub tu gyur pa dang phrad de/mthong ba phyin ci log la ltos nas chu dang 'dra ba'i smig rgyu dag dmigs pas skye bo yul thag ring ba na gnas pa rnams la shes pa chu shin tu dang ba'i rnam pa can skye bar byed kyi/ de dang nye bar gyur pa rnams la ma yin pa de bzhin du/ 'dir yang / ma rig pa'i phyin ci log dang ldan pas so so'i skye bo bdag dang bdag gi ba'i dngos po ji ltar gnas pa de nyid mthong ba las rgyang ring du gnas pa rnams la/bden par snang ba bdag dang phung por sgro btags pa brdzun pa'i don 'di nyid ni dngos po'i de nyid mthong ba dang nye bar gnas pa rnams la mi snang ngo / /ji skad du/ thag ring nas ni mthong ba'i gzugs/ /nye ba rnams kyis gsal bar mthong / /smig rgyu gal te chu yin no / /nye ba rnams kyis cis mi mthong / /ji ltar ring ba rnams kyis ni/ /'jig rten 'di ni yang dag mthong / /de ltar de dang nye rnams kyis/ /mi mthong mtshan med smig rgyu bzhin/ / ji ltar smig rgyu chu 'dra ba/ /chu min dong du ma yin pa/ /de bzhin phung po bdag 'dra ba/ /de dag bdag min don du min/ /zhes bshad do/ /bdag dang bdag gi ma dmigs pa de nyid kyi phyir don dam ma mthong ba dang nye ba'i rnal 'byor pa ni nges par/ bdag dang bdag gi zhi ba'i phyir/ /ngar 'dzin nga yir 'dzin med 'gyur//bdag la phan pa ni bdag gi ste/ bdag gi ba'i phung po lnga zhes bya ba'i don to/ /bdag ste ngar 'dzin pa'i yul dang nga yir 'dzin pa'i yul bdag gi ba phung po la sogs pa'i dngos po zhi ba ste/ ma skyes shing ma dmigs pa'i phyir rnal 'byor ba ngar 'dzin pa dang nga yir 'dzin pa med par 'gyur ro//gal te 'ga' zhig de ltar ngar 'dzin pa dang nga yir 'dzin pa med par 'gyur ba rnal 'byor pa de re zhig yod pa ma yin nam/ de yod na bdag dang phung po yang grub po zhe na/ de ni de ltar ma yin te/ gang gi phyir/ ngar 'dzin nga yir 'dzin med gang / /de yang yod pa ma yin te/ /ngar 'dzin nga yir 'dzin med par/ /gang gis mthong bas mi mthong ngo / /bdag dang phung po dag rnam pa thams cad du mi dmigs pa'i rang gi ngo bo yin dang / gang zhig ngar 'dzin pa dang nga yir 'dzin pa med par 'gyur bdag las tha dad pa'i dngos po gzhan yod par ga la 'gyur/gang gis de ltar yod pa ma yin pa'i rang gi ngo bo ngar 'dzin pa dang nga yir 'dzin pa med par mthong ba des/ de kho na nyid mi mthong ngo zhes shes par bya'o/ /ji skad du/ bcom ldan 'das kyis/ nang gi bdag nyid stong par ltos//phyi rol gyur pa'ang stong par ltos/ /gang zhig stong nyid sgom byed pa/ /de yang 'ga' zhig kyang yod min/ /zhes bya ba dang / de bzhin du/ /gang dag zhi zhing rab zhi'i chos sems pa'i/ /byis pa de dag lam ngan zhugs pa yin/ /chos rnams stong pa yi ge med pa yin/ /de dag yi ge med par yi ges bstan//gang dag zhi zhing rab zhi'i chos sems pa'i/ /sems pa de yang nam yang 'byung ma yin/ /spros kun sems kyi rnam par rtog pa ste/ /de phyir chos rnams bsam yas shes par gyis/ /zhes bya ba dang / de bzhin du/ phung pa'i rang bzhin dben zhing stong pa nyid//byang chub rang bzhin dben zhing stong pa nyid/ /gang spyod de yang rang bzhin stong pa ste/ /ye shes ldan pas shes kyi byis pas min/ /zhes gsungs so/ /de'i phyir de ltar/ nang dang phyi rol nyid dag la/ /bdag dang bdag gi snyam zad na/ /nye bar len pa 'gag 'gyur zhing //de zad pas na skye ba zad/ /nyon mongs pa thams cad ni 'jig tshogs la lta ba'i rtsa ba can no/ /'jig tshogs la lta ba'i kun 'byung ba can no/ /'jig tshogs la lta ba'i rgyu can no zhes mdo las gsungs la / /'jig tshogs la lta ba de yang bdag dang bdag gi ma dmigs pas spong bar 'gyur zhing de spangs pas kyang 'dod pa nye bar len pa dang lta ba dang tshul khrims dang brtul zhugs dang bdag tu smra ba nye bar len pa zhes bya ba ste nye bar len pa bzhi spong bar 'gyur ro//nye bar len pa zad pas ni yang srid pa'i mtshan nyid can skye ba zad par 'gyur ro//gang gi phyir skye ba ldog pa'i rim pa 'di de ltar rnam par gzhag pa de'i phyir/ las dang nyon mongs zad pas thar/ /zhes bya bar gnas so/ /'di ltar nye bar len pa zad na de'i rkyen can srid pa yang mi 'byung la/ nye bar len pa dang srid pa 'gags na skye ba dang rga shi la sogs pa yod par ga la 'gyur te/de ltar na las dang nyon mongs pa zad pas thar bar 'gyur ro zhes bya bar grub po/ /'o na ni las dang nyon mongs pa rnams gang zad pas zad par 'gyur brjod dgos so zhe na/ brjod pa/ las dang nyon mongs rnam rtog las/ /de dag spros las spros pa ni/ / stong pa nyid kyis 'gag par 'gyur/ /byis pa so so'i skye bo tshul bzhin ma yin par gzugs la sogs par rtog pa la ni 'dod chags la sogs pa'i nyon mongs pa skye bar 'gyur te/ /'dod chags zhe sdang gti mug rnams/ /kun du rtog las 'byung bar gsungs/ /sdug dang mi sdug phyin ci log/brten pa nyid las kun du 'byung / /zhes 'chad par 'gyur ro/ /mdo las kyang 'dod pa khyod kyi rtsa ba ni/ /shes te kun tu rtog las skye/ /khyod la rtog par mi 'gyur ba/ /de phyir nga la mi 'byung ngo / /zhes gsungs so/ /de ltar re zhig las dang nyon mongs pa ni rnam par rtog pa las byung la/rnam par rtog pa de dag kyang spros pa sna tshogs pa/ 'khor ba thog ma med pa nas goms pa/ shes pa dang shes bya dang / brjod bya dang / rjod byed dang / bum pa dang / snam bu dang / shing rta dang / gzugs dang / tshor ba dang / skyes pa dang / bud med dang /rnyed pa dang / ma rnyed pa dang / bde ba dang / sdug bsngal ba dang / grags pa dang / ma grags pa dang / bstod pa dang / smad pa la sogs pa'i mtshan nyid can las skye bar 'gyur ro/ /'jig rten pa'i spros pa de yang ma lus par stong pa nyid kyis te/ dngos po thams cad stong pa nyid du lta bas 'gag par 'gyur ro//ji ltar zhe na/ gang gi phyir dngos por dmigs pa yod na ni ji skad bshad pa'i spros pa yod par 'gyur gyi/ /mo gsham gyi bu mo ma dmigs par ni chags pa can dag de'i yul can spros pa 'jug par mi byed do//spros pa ma bcug par ni de'i yul can tshul bzhin ma yin par rnam par rtog pa 'jug par mi 'gyur ro/ /rnam par rtog pa ma bcug par yang nga dang nga yi zhes mngon par zhen pa las nyon mongs pa'i tshogs 'jig tshogs la lta ba'i rtsa ba can skyed par mi byed do/ /nyon mongs pa'i tshogs 'jig tshogs la lta ba'i rtsa ba can ma bskyed par ni las dag byed par mi 'gyur la/las dag mi byed pa rnams ni skye ba dang rga shi zhes bya ba'i 'khor ba nyams su myong bar yang mi 'gyur ro/ /gang gi phyir de ltar stong pa nyid spros pa ma lus pa nye bar zhi ba'i mtshan nyid can la brten nas spros pa dang bral bar 'gyur zhing spros pa dang bral bas kyang rnam par rtog pa ldog cing /rnam par rtog pa log pas las dang nyon mongs pa ldog la/ las dang nyon mongs pa ldog pas skye ba ldog pa de'i phyir/ stong pa nyid kho na spros pa thams cad log pa'i mtshan nyid can yin pas mya ngan las 'das pa zhes bya'o//ji skad du brgya pa las/ mdor na chos ni mi 'tshe bar/ /de bzhin gshegs pa rnams kyis gsungs/ /stong nyid mya ngan 'das pa ste/ /'dir ni de gnyis 'ba' zhig go/ zhes bshad do/ /slob dpon legs ldan byed ni nyan thos dang rang sangs rgyas rnams la ji skad du bshad pa'i stong pa nyid rtogs pa yod par khong du ma chud nas/ji skad du/ 'phags pa nyan thos 'du byed kyi tshogs gzhan dang gzhan skye ba'i skad cig ma re re la 'jig pa'i ngang can bdag dang bdag gi ba med pa la nges par lta ba la yang / bdag ces bya ba'i dngos po med pa'i phyir skye ba dang 'jig pa 'di dag ni chos tsam du zad do zhes bya bar lta ba skye ste/'di ltar bdag ni ngar 'dzin pa'i yul yin pas de med na de yang mi 'byung la/ de med pa kho na'i phyir 'ga' la yang nang dang phyi rol gyi dngos po med pas nga yir 'dzin pa mi 'thad pa'i phyir/ tha snyad kyi brdar bya ba ma gtogs par/nga la ni ngar 'dzin pa med cing nga yir 'dzin pa med do zhes bya bar rang gi ngo bo nges pa skye bar mi 'gyur na/ byang chub sems dpa' chen po 'du byed skye ba med par lta ba rnam par mi rtog pa'i shes rab kyi spyod yul la gnas pa rnams la lta smos kyang ci dgos pas/ de'i phyir/nga dang nga yir 'dzin med gang / /de yang yod pa ma yin te/ /zhes gsungs so/ /zhes de skad du smra'o/ /slob dpon 'di ji ltar rnam pa de lta bu'i yul la/ slob dpon gyi lugs kyi rjes su 'jug pa ma yin pa de ltar ni dbu ma la 'jug pa las/ ring du song bar de blo'ang lhag par 'gyur zhes bya ba der bstan zin pas/yang de sun dbyung ba la 'bad par mi bya'o/ /de nyid kyi phyir bcom ldan 'das kyis/ rab 'byor nyan thos kyi byang chub thob par 'dod pas kyang shes rab kyi pha rol tu phyin pa 'di nyid la bslab par bya'o/ /rab 'byor rang sangs rgyas kyi byang chub thob par 'dod pas kyang shes rab kyi pha rol tu phyin pa 'di nyid la bslab par bya'o//rab 'byor bla na med pa yang dag par rdzogs pa'i byang chub thob par 'dod pas kyang shes rab kyi pha rol tu phyin pa 'di nyid la bslab par bya'o zhes rgya cher gsungs shing / /gzhan yang / gang dag bde gshegs nyan thos 'gyur bar bya snyam dang //rang sangs rgyas dang de bzhin chos rgyal 'gyur 'dod pa / /bzod pa 'di la ma brten thob par mi 'gyur te/ /dper na tshu rol pha rol 'gro ngogs mi mthong bzhin/ /zhes gsungs so/ /'dir smras pa/ gal te de ltar nang dang phyi'i dngos po ma dmigs pa'i phyir nang dang phyi la nga dang nga'i snyam pa'i rtog pa rnams ma skyes pa de de kho na nyid yin no zhes rnam par gzhag na/'o na bcom ldan 'das kyis 'di skad du/ bdag nyid bdag gi mgon yin gyi/ /gzhan ni su zhig mgon du 'gyur/ /bdag nyid legs par dul bas ni//mkhas pas mtho ris thob par 'gyur/ /zhes bya ba dang / de bzhin du/ gnag dang dkar po'i las ni 'jig mi 'gyur/ /bdag gis byas pa myong bar 'gyur ba yin/ /las dang 'bras bu 'pho bar 'gyur ba'ang min/ /rgyu dang rkyen med par yang 'byung ba min//zhes rgya cher gsungs pa de dang ji ltar mi 'gal/ brjod par bya ste/ 'di na bdag gam sems can med/ /chos 'di dag ni rgyu dang bcas/ /zhes bya ba dang / de bzhin du/ bdag gzugs ma yin/ bdag gzugs dang ldan pa ma yin/gzugs la bdag med/ /bdag la gzugs med/ de bzhin du bdag rnam par shes pa ma yin/ bdag rnam par shes pa dang ldan pa ma yin/ rnam par shes pa la bdag med/ bdag la rnam par shes pa med ces bya ba'i bar dang / de bzhin du chos thams cad ni bdag med pa'o zhes bya ba de skad du yang /bcom ldan 'das kyis ci'i phyir ma gsungs/ de'i phyir da ji ltar lung gong ma lung 'di dang 'gal bar mi 'gyur/ de'i phyir 'dir bcom ldan 'das kyis bstan pa'i dgongs pa btsal bar bya'o/ /bcom ldan 'das kyis ni spyir gsung rab las/bdag go zhes kyang btags gyur cing / /bdag med ces kyang bstan par gyur/ /sangs rgyas rnams kyis bdag dang ni/ /bdag med 'ga' med ces kyang bstan / /'dir dgongs pa ni 'di yin te/ 'di na gang dag lta ba ngan pa'i rab rib kyi ling tog mthug pos blo'i mig ma lus par bkab pas dngos po'i rnam pa 'jig rten pa'i lta ba dri ma med pa'i yul las ma 'das kyang ma mthong bar gyur pa/tha snyad kyi bden pa la gnas pa kho na yin bzhin du sa dang chu dang me dang rlung zhes bya ba'i de kho na nyid tsam gyi rjes su 'jug pa lhur len pa/rtsa ba dang chan dang phabs dang chu dang drod la sogs pa rdzas kyi khyad par yongs su smin pa tsam gyi rkyen las byung zhing / myos pa dang brgyal ba la sogs pa'i nus pa'i khyad par dang ldan pa'i chang dmigs pa ltar/ blo nur nur po la sogs pa'i 'byung ba chen po yongs su smin pa tsam las 'byung ba nyid du smra ba/sngon gyi mtha' dang phyi ma'i mtha' la skur pa 'debs par zhugs pa/ 'jig rten 'di yang med legs par byas pa dang nyes par byas pa'i las rnams kyi 'bras bu rnam par smin pa yang med/ sems can rdzus te skye ba yang med do zhes bya ba la sogs pas 'jig rten pha rol dang bdag la skur pa 'debs par byed pa/de la skur pa 'debs pas 'bras bu khyad par du 'phags pa yid du 'ong ba mtho ris dang byang grol gyi khyad par 'phen pa la rgyab kyis phyogs pa/ rtag tu rgyun mi 'chad par mi dge ba'i las mngon par 'du byed pa la zhugs pas dmyal ba la sogs pa'i g.yang sa chen por ltung ba la mngon du phyogs pa de dag gi yang dag pa ma yin pa'i lta ba de dag bzlog par bya zhing gdul bya dman pa dang 'bring po dang mchog rjes su gzung bar bzhed pas gdul bya dman pa sdig pa mi dge ba byed pa rnams mi dge ba las bzlog par bya ba'i phyir/sangs rgyas bcom ldan 'das spyod pa brgyad khri bzhi stong gi dbye bas tha dad pa'i sems can gyi khams kyi bsam pa ji lta ba bzhin du rjes su gshegs pa/ sems can gyi khams ma lus pa bsgral bar thugs dam bcas pa/ sgrub pa lhur mdzad pa/thabs dang mkhyen rab dang thugs rje chen po dang ldan pa/ 'gro ba du ma'i dpe zla mi mnga' ba'i gnyen/ /nyon mongs pa'i nad ma lus pa gso bar mdzad pa/ sman pa'i rgyal po chen po rnams kyis 'ga' zhig tu bdag go zhes kyang btags gyur zhing ste/ bzhag par gyur to//rgyu med par smra ba dgag pa'i 'thad pa ni/ byed pa po dang las brtag pa dang / rgyu med las kyang min zhes bya ba des dbu ma la 'jug pa las rgyas par shes par bya ste/ de dgag pa'i phyir 'dir yang 'bad par mi bya'o/ /gang dag dag pa'i las byed cing mi dge ba'i las las log pa/bdag tu yang dag par lta ba mkhregs pa bya srad bu ches shin tu ring bas brtod pa ltar shin tu ring por phyin yang khams gsum las shin tu 'das nas/ mya ngan las 'das pa'i grong khyer zhi bar 'gro mi nus pa/ gdul bya bar ma de dag 'jig tshogs la lta bar mngon par zhen pa lhod par bya ba'i phyir dang /mya ngan las 'das pa la 'dun pa bskyed par bya ba'i phyir ni/ sangs rgyas bcom ldan 'das rnams kyis bdag med ces kyang bstan par gyur to/ /gang dag sngon goms pa'i khyad par gyis zab mo'i chos la lhag par mos pa rjes su 'brel ba'i sa bon yongs su smin par gyur pa thob pa mya ngan las 'das pa la nye bar gnas pa bdag la chags pa dang bral ba/thub pa'i dbang po'i gsung rab kyi don gyi de kho na nyid mchog tu zab pa'i gting dpog par nus pa/ gdul bya mchog tu gyur pa de dag la ni lhag par mos pa'i khyad par nges par bzung nas/sangs rgyas rnams kyis bdag dang ni/ /bdag med 'ga' med ces kyang bstan te/ ji ltar bdag tu lta ba yang dag pa ma yin pa de bzhin du/ de'i gnyen por gyur pa bdag med par lta ba yang / yang dag pa ma yin pa nyid do//de ltar na bdag 'ga' yang med la/ bdag med pa yang 'ga' yang med do zhes bstan pa yin no/ /ji skad du mdo las/ 'od srungs bdag ces bya ba 'di ni mtha' gcig go/ /bdag med ces bya ba 'di ni mtha' gnyis so/ /mtha' de gnyis kyi dbus gang yin pa de ni gzugs med pa bstan du med pa/rten med pa/ snang ba med pa/ rnam par rig pa med pa/ gnas med pa ste/ 'od srungs 'di ni dbu ma'i lam chos rnams la yang dag par so sor rtogs pa zhes bya'o zhes gsungs so/ /'phags pa rin po che'i phreng ba las kyang //de ltar bdag dang bdag med pa/ /yang dag ji bzhin dmigs su med/ /bdag dang bdag med lta ba ni/ /de phyir thub pa chen pos bzlog/ mthong dang thos sogs thub pa yis/ /bden min brdzun pa min par gsungs/ /phyogs las mi mthun phyogs gyur pas//de dag gnyi ga don du min / /zhes gsungs so/ /gang gi phyir de ltar gdul bya'i skye bo dman pa dang bar ma dang mchog gi bsam pa tha dad pa nyid kyis bdag dang bdag med pa dang / de gnyi ga dgag pa'i sgo nas sangs rgyas bcom ldan 'das rnams kyi chos bstan pa 'jug pa de'i phyir/dbu ma pa rnams la lung gis gnod pa med do/ /de nyid kyi phyir slob dpon 'phags pa'i lhas/ bsod nams min pa dang por bzlog/ bar du bdag ni bzlog pa dang / /phyi nas lta zhig kun bzlog pa/ /gang gis shes te mkhas pa yin/ /zhes bshad do/ / de bzhin du/ slob dpon gyi zhal snga nas kyang / brda sprod pa dag ji lta bur/ /yi ge'i phyi mo'ang klog 'jug ltar/ /de bzhin sangs rgyas gdul bya la/ /ji tsam bzod pa'i chos ston to/ /kha cig la ni sdig pa las/ /rnam par bzlog phyir chos ston to/ /kha cig bsod nams grub bya'i phyir//kha cig la ni gnyis brten pa/ /kha cig la ni gnyis mi brten/ /zab mo khu 'phrig can 'jigs pa/ /stong nyid snying rje'i snying po can/ /byang chub sgrub pa kha cig la'o/ /zhes gsungs so/ /yang na 'di'i don gzhan yin te/ 'du byed skad cig re re la 'jig pa'i ngang can rnams la las dang 'bras bu'i 'brel pa med par bltas nas grangs can pa la sogs pa dag gis bdag go zhes kyang btags gyur zhing /'thad pas 'khor ba po bdag ma mthong zhing 'jig rten rgyang phan pa dag gis/ ji tsam dbang po'i spyod yul ba/ /skyes bu'ang de tsam nyid du zad//bzang mo mang thos gang smra ba/ /de dag spyang ki'i rjes dang 'dra/ /zhes bya ba la sogs pas bdag med ces kyang bstan par 'gyur la/ rab rib can gyis dmigs pa'i skra shad dag la rab rib med pa dag ltar dngos po byis pa'i skye bos btags pa'i / bdag dang bdag med pa la sogs pa rang gi ngo bo rnam pa thams cad du ma gzigs pa/bcom ldan 'das/ sangs rgyas rnams kyis bdag dang ni/ /bdag med 'ga' med ces kyang bstan/ /zhes bya ba'o/ /'dir smras pa/ gal te sangs rgyas bcom ldan 'das rnams kyis bdag dang bdag med pa gnyi ga med par bstan na/de gnyis ma bstan pa yin dang / 'o na ci bstan/ brjod par bya ste/ brjod par bya ba bzlog pa ste/ /sems kyi spyod yul bzlog pas so/ /ma skyes pa dang ma 'gags pa/ /chos nyid mya ngan 'das dang mtshungs/ /'dir brjod par bya ba 'ga' zhig yod na ni/de ston par 'gyur ba zhig na/ gang gi tshe brjod par bya ba ldog cing / tshig dag gi yul yod pa ma yin pa de'i tshe sangs rgyas rnams kyis cung zad kyang ma bstan to/ /yang ci'i phyir brjod par bya ba med ce na/ sems kyi spyod yul ldog pas so/ / zhes gsungs te/ sems kyi spyod yul ni sems kyi spyod yul lo/ /spyod yul ni yul te/ dmigs pa zhes bya ba'i tha tshig go/ gal te sems kyi spyod yul 'ga' zhig yod par gyur na ni der rgyu mtshan 'ga' zhig sgro btags nas tshig dag 'jug par 'gyur na/gang gi tshe sems kyi spyod yul nyid mi 'thad pa de'i tshe/ rgyu mtshan sgro btags nas tshig gar 'jug par 'gyur/ yang ci'i phyir sems kyi spyod yul med ce na/ bstan pa'i phyir/ ma skyes pa dang ma 'gags pa/ /chos nyid mya ngan 'das dang mtshungs/ /zhes gsungs te//gang gi phyir ma skyes pa dang ma 'gags pa chos nyid de chos kyi ngo bo dang / chos kyi rang bzhin mya ngan las 'das pa dang mtshungs par gzhag pa de'i phyir de la sems mi 'jug go/ /sems mi 'jug na rgyu mtshan sgro 'dogs par ga la 'gyur la/ de med pa'i phyir tshig dag 'jug par ga la 'gyur te/de'i phyir sangs rgyas rnams kyis cung zad kyang ma bstan to zhes bya bar gnas so/ /de nyid kyi phyir/ dmigs pa thams cad nyer zhi zhing / /spros pa nye bar zhi ba ste/ /sangs rgyas rnams kyis gang du yang / /su la'ang chos 'ga' ma bstan to//zhes 'chad par 'gyur ro/ /'di ni de ltar ma yin pa'am/ yang na phyogs snga ma 'di ni gzhan yin te/ spros pa ni/ stong pa nyid kyis 'gag par 'gyur/ /zhes gang smras na/ ji ltar spros pa stong pa nyid kyis 'gag par 'gyur zhe na/ brjod pa/ gang gi phyir/ brjod par bya ba bzlog pa ste/ /sems kyi spyod yul ldog pas so/ /zhes bya ba la sogs pa ste/ snga ma bzhin du bshad par bya'o/ /rnam pa gcig tu na 'di skad du/ sngar nang dang phyi'i dngos po ma dmigs pas nang dang phyi rol la ngar 'dzin pa dang nga yir 'dzin pa zad pa gang yin pa de ni 'dir de kho na nyid yin no zhes gang bshad na/de ci 'dra ba zhig yin zhing / ci de brjod pa'am shes par bya bar nus sam zhe na/ 'di ltar/ brjod par bya ba ldog pa ste / /sems kyi spyod yul ldog pas so/ /de kho na nyid de la zhes bya ba ni tshig gi lhag ma'o/ / yang rgyu ci'i phyir de kho na nyid de brjod par bya ba ldog cing sems kyi spyod yul ldog par 'gyur zhe na/ ma skyes pa dang ma 'gags pa/ /chos nyid mya ngan 'das dang mtshungs/ /zhes gsungs te/ bshad pa ni snga ma kho na sbyar bar bya'o/ /de nyid kyi phyir mdo las/ zhi ba'i blo gros gang gi nub mo de bzhin gshegs pa bla na med pa yang dag par rdzogs pa'i byang chub mngon par rdzogs par sangs rgyas pa dang /gang gi nub mo len pa mi mnga' bar yongs su mya ngan las 'da' bar 'gyur ba de'i bar du de bzhin gshegs pas tha na yi ge 'bru gcig kyang ma gsungs so//gsung bar mi 'gyur ro zhes gsungs so/ /'khrul 'khor las byas sil snyan ni/ /ji ltar rlung bskul sgra 'byung ba/ /de la dkrol byed med mod kyi/ /'on kyang sgra dag 'byung 'gyur ba/ /de bzhin legs par sngar sbyangs shing / /sems can bsam pas bskul gyur pa//sangs rgyas gsung ni 'byung 'gyur yang / /'di la rtog pa yod mi mnga'/ /ji ltar brag ca'i sgra nang dang / /phyi rol gnas pa ma yin pa/ /de bzhin mi yi dbang po'i gsung / /nang dang phyi rol gnas pa min/ /zhes bya ba la sogs pa 'byung ngo / /'dir kha cig dbu ma pa ni med pa pa dang khyad par med pa yin te/gang gi phyir dge ba dang mi dge ba'i las dang / byed pa po dang / 'bras bu dang / 'jig rten thams cad rang bzhin gyis stong par smra ba yin la/ med pa pa dag kyang de dag med do zhes smra bar byed pa yin pa de'i phyir/ dbu ma pa ni med pa pa dang khyad par med do zhes rgol bar byed do//de ltar ni ma yin te/ dbu ma pa dag ni rten cing 'brel bar 'byung ba smra ba yin la/ rten cing 'brel bar 'byung ba'i phyir 'jig rten 'di dang / 'jig rten pha rol la sogs pa thams cad rang bzhin med par smra bar byed do/ /med pa pa dag gis ni de ltar rten cing 'brel par 'byung ba yin pa'i phyir rang bzhin gyis stong pa nyid kyi sgo nas 'jig rten pha rol la sogs pa dngos po med par rtog pa ma yin te/'o na ci zhe na/ 'jig rten 'di'i dngos po'i rnam pa rang bzhin gyis dmigs nas de 'jig rten pha rol nas 'dir 'ong ba dang /'jig rten 'di nas 'jig rten pha rol du 'gro bar ma mthong nas 'jig rten 'dir dmigs pa'i dngos po dang 'dra ba'i dngos po gzhan la skur pa 'debs par byed pa yin no/ /gal te de lta na yang de dag gis dngos po'i rang gi ngo bor yod pa ma yin pa nyid la med pa nyid du rtog pa'i phyir re zhig lta ba 'di'i sgo nas mtshungs pa yod do zhe na/med de/ dbu ma pa dag gis ni kun rdzob tu yod par khas blangs pa'i phyir la/ de dag gis khas ma blangs pa'i phyir mi mtshungs pa nyid do/ /gal te dngos po ma grub par mtshungs so zhe na/gal te yang dngos po ma grub pa mtshungs pa nyid yin pa de lta na yang rtogs pa po tha dad pas mi mtshungs pa nyid do/ /'di ltar dper na rku byas pa'i mi zhig la/ gcig gis ni yang dag par mi shes bzhin du de dang mi mdza' bas sbud nas 'dis brkus so zhes de la log par smra bar byed la/gzhan ni dngos su mthong nas sun 'byin par byed do/ /de la dngos po tha dad pa med mod kyang de lta na yang / rtogs pa po tha dad pas gcig la ni der brdzun du smra'o zhes brjod la/ gzhan la ni bden par smra'o zhes bya'o/ /gcig la ni yang dag par brtags pa na grags pa ma yin pa dang kha na ma tho bar 'gyur la/gzhan la ni ma yin pa de bzhin du 'dir yang dngos po'i rang gi ngo bo tha mi dad kyang dbu ma pa dngos po'i rang gi ngo bo ji lta ba bzhin rig pa rnams khong du chud pa dang smra ba na/ med pa pa dngos po'i rang gi ngo bo ji lta ba bzhin rig pa ma yin pa dag dang lhan cig shes pa dang brjod pa dag mtshungs par yod pa ma yin no//sngon gyi slob dpon dag ni ji ltar so so'i skye bo dang 'phags pa gnyis kyi so sor ma brtags pa dang so sor brtags pa'i btang snyoms dag btang snyoms su mtshungs pa dang / ji ltar dmus long dang mig dang ldan pa gnyis kyis yul phyogs nges par mtshungs kyang khyad par chen po yod pa de bzhin du med pa pa dag dang /dbu ma pa rnams la yang khyad par yod par 'gyur ro zhe'o/ /'dir smras pa/ gal te de ltar/ ma skyes pa dang ma 'gags pa/ chos nyid mya ngan 'das dang mtshungs pa yin la//de la ngag dang sems dag 'jug pa yod pa ma yin mod kyi/ de lta na yang / de ma bstan na gdul bya'i skye bo rnams kyis shes par mi nus pas/ gdul bya'i skye bo rnams de la 'jug par bya ba'i phyir gdon mi za bar kun rdzob kyi bden pa la ltos nas ji zhig ltar de bstan pa'i rim pa zhig yod dgos pas de brjod par bya'o//brjod pa/ 'dir sangs rgyas bcom ldan 'das rnams kyi de kho na nyid kyi bdud rtsi la 'jug pa'i bstan pa'i rim pa ni 'di yin par shes par bya ste/ gang 'di/ thams cad yang dag yang dag min//yang dag yang dag ma yin nyid/ /yang dag min min yang dag min/ /de ni sangs rgyas rjes bstan pa'o/ /zhes bya'o/ /de la/ gang zhig gang gang la dga' ba/ /de yi de de sngar bshad bya/ /nyams par gyur pa dam chos kyi/ /snod ni cis kyang ma yin no/ /zhes bya ba dang /ji ltar kla klo skad gzhan gyis/ /gzung bar mi nus de bzhin du/ /'jig rten pa yis ma gtogs pa/ /'jig rten gzung bar nus ma yin/ /zhes bya ba dang / de bzhin du bcom ldan 'das kyis kyang / 'jig rten nga dang lhan cig rtsod kyi/ nga ni 'jig rten dang mi rtsod de/gang 'jig rten na yod par 'dod pa de ni nga yang yod par bzhed do/ /gang 'jig rten na med par 'dod pa de ni nga yang med par bzhed do zhes bya ba'i lung las na thog ma kho nar re zhig bcom ldan 'das kyis gang gis na de ltar snod kyi 'jig rten dang / sems can gyi 'jig rten thog mar rlung gi dkyil 'khor nas srid pa'i rtse mo la thug pa/nam mkha'i khams kyi mtha' gtugs pa'i skye ba dang / gnas pa dang 'jig pa phyin ci ma log pa rab tu dbye ba sna tshogs pa dang bcas pa/ rgyu dang bcas pa/ 'bras bu dang bcas pa/ /ro myang ba dang bcas pa/nyes dmigs dang bcas pa/ nye bar bstan pa/ bcom ldan 'das thams cad mkhyen zhing thams cad gzigs pa 'di ni 'jig rten gyi byung tshul ma lus pa mkhyen pa yin no snyam du bdag nyid la 'jig rten gus pa bskyed par bya ba'i phyir de'i lta ba la ltos nas/ gdul bya'i skye bo rang la grags pa'i dngos po rab tu dbye ba dang / rang gi ngo bo'i rnam par phye ba thos nas mos pa mngon par 'dod pa skyes pa la/ phung po dang khams dang skye mched la sogs pa ma rig pa'i rab rib can dag gis bden par brtags pa gang yin pa de nyid bden no zhes gsungs so//de'i phyir de ltar gdul bya'i skye bo bcom ldan 'das la thams cad mkhyen pa yin no snyam du blo skyes pa la dus phyis/ de dag thams cad yang dag min/ /zhes bstan to/ /de la yang dag pa zhes bya ba ni gang la gzhan du 'gyur ba nyid med pa la bya na/ skad cig re re la 'jig pa'i phyir 'dus byas rnams la ni gzhan du 'gyur ba yod pa yin te/ de'i phyir gzhan du 'gyur ba yod pas yang dag pa ma yin no/ /'ang gi sgra ni dang gi don te/ thams cad yang dag pa dang yang dag pa ma yin pa zhes bstan pa sdud par blta bar bya'o/ /kha cig la ni 'di dag thams cad/yang dag yang dag ma yin nyid/ /ces bstan to/ /de la byis pa'i skye bo la ltos nas ni 'di dag thams cad yang dag pa yin la/ 'phags pa'i ye shes la ltos nas ni 'di dag thams cad brdzun pa ste/ 'di dag gis de ltar ma gzigs pa'i phyir ro/ / de kho na nyid lta ba la yun ring po nas goms pa sgrib pa cung zad tsam ma bkrol ba kha cig la ni/ de dag yang dag min min yang dag min zhes bstan te/ sgrib pa cung zad tsam po de yang spang bar bya ba'i phyir mo gsham gyi bu'i sngo bsangs dang dkar sham bkag pa ltar de gnyi ga yang bkag pa yin no//'di ni sangs rgyas bcom ldan 'das kyis rjes su bstan pa ste/ lam gol pa nas bzlog nas lam bzang po la 'god pa ni bstan pa'o/ /de ltar mthar gyis ston pa ni rjes su ston pa'o/ /yang na gdul bya'i skye bo dang 'tsham par ston pa ni rjes su ston pa'o/ / sangs rgyas bcom ldan 'das rnams kyis bstan pa de dag thams cad ni de kho na nyid kyi bdud rtsi la 'jug pa'i thabs nyid du rnam par gnas so/ / de bzhin gshegs pa rnams ni gsung de kho na nyid kyi bdud rtsi la 'jug pa'i thabs su ma gyur pa mi gsung ste/ nad dang rjes su mthun pa'i sman nye bar sogs pa ltar 'dul ba'i skye bo rjes su gzung bar bzhed pas ji ltar 'tsham pa ltar ston par mdzad pa yin no//ji skad du brgya pa las/ yod dang med dang yod med dang / /gnyi ga min zhes kyang bstan te/ /nad kyi dbang gis thams cad ni/ /sman zhes bya bar 'gyur min nam//zhes bshad do/ /gang la 'jug par bya ba'i phyir bstan pa 'di dag ston pa'i de kho na nyid de mtshan nyid ci dang ldan pa zhig ce na/ brjod par bya ba bzlog pa ste/ /sems kyi spyod yul bzlog pas so/ /zhes 'di ni kho bo cag gis bshad zin to/ /gang gi tshe 'di de lta bu yin pa de'i tshe gzhan yang ci zhig drir yod/de lta yin mod kyi/ 'on kyang 'jig rten pa'i tha snyad khas blangs pa ltar tha snyad kyi bden pa'i ngor sgro btags nas de'i mtshan nyid kyang brjod par bya dgos so zhe na/ de brjod par bya ste/ gzhan las shes min zhi ba dang / /spros pa rnams kyis ma spros pa//rnam rtog med don tha dad min/ /de ni de nyid mtshan nyid do/ /de la 'di la gzhan las shes pa yod pa ma yin pas na gzhan las shes min te/ /gzhan gyis bstan pas rtogs par bya ba ma yin gyi/ rang nyid kyis rtogs par bya ba yin no zhes bya ba'i don to//ji ltar rab rib can dag gis skra shad la sogs pa'i ngo bo phyin ci log mthong ba na/ rab rib med pas bstan du zin kyang / rab rib med pa ltar skra shad la sogs pa'i rang gi ngo bo ma mthong ba'i tshul gyis rtogs par bya ba ji ltar gnas pa bzhin rtogs par mi nus kyi / 'o na ci zhe na/ rab rib med pas bstan pa las 'di ni phyin ci log yin no zhes bya ba 'di tsam zhig tu ni rtogs par 'gyur la/ gang gi tshe rab rib sel ba'i mig sman bskus pas rab rib med par gyur pa de'i tshe ni skra shad la sogs pa'i rang gi ngo bo de ma rtogs pa'i tshul gyis rtogs par 'gyur ba de bzhin du/'phags pa rnams sgro btags pa'i sgo nas de kho na nyid ston mod kyi de lta na yang de tsam gyis 'phags pa ma yin pa rnams kyis de'i rang gi ngo bo rtogs par mi 'gyur la/ gang gi tshe stong pa nyid phyin ci ma log par lta ba ma rig pa'i rab rib sel bar byed pa'i mig sman gyis blo'i mig dag la bskus par gyur pa na/de kho na nyid kyi ye shes skyes par gyur pa de'i tshe de kho na nyid de ma rtogs pa'i tshul gyis rang nyid kyis rtogs par 'gyur te/ de ltar na dngos po rnams kyi rang gi ngo bo gzhan las shes pa ma yin pa de ni de kho na nyid do//de ni zhi ba'i rang bzhin te/ rab rib med pas skra shad ma mthong ba ltar rang bzhin dang bral ba yin no zhes bya ba'i don to/ /de nyid kyi phyir de ni spros pa rnams kyis ma spros pa'o/ /spros pa ni ngag ste don rnams spro bar byed pa'i phyir ro/ /spros pa rnams kyis ma spros pa ni ngag dag gis ma brjod pa'o zhes bya ba'i tha tshig go /de ni rnam par rtog pa med pa yang yin te/ rnam par rtog pa ni sems kyi rgyu ba yin na/ de dang bral ba'i phyir de kho na nyid de ni rnam par rtog pa med pa yin no/ /ji skad du mdo las/ don dam pa'i bden pa gang zhe na/gang la sems kyi rgyu ba yang med na/ yi ge rnams la lta smos kyang ci dgos zhes gsungs so/ /de ltar na rnam par rtog pa med pa yin no/ /'di la don tha dad pa yod pas na/ don tha dad pas te don so so ba'o/ /don tha dad pa med pa ni don tha dad pa min pa ste/ /don so so ba ma yin pa zhes bya ba'i don to//ji skad du 'phags pa bden pa gnyis la 'jug pa'i mdo las/ /lha'i bus smras pa/ 'jam dpal don dam pa'i sbyor ba ni gang yin/ 'jam dpal gyis smras pa/ lha'i bu dag don dam par na de bzhin nyid dang chos kyi dbyings dang / gtan ma skyes pa gang du mtshungs pa der don dam par mtshams med pa rnams kyang mtshungs so//mtshams med pa rnams don dam par gang du mtshungs pa der ni lta bar gyur pa rnams kyang mtshungs so/ /lta bar gyur pa rnams gang du mtshungs pa der ni so so skye bo'i chos rnams kyang mtshungs so//so so skye bo'i chos rnams gang du mtshungs pa der ni slob pa'i chos rnams kyang mtshungs so/ /slob pa'i chos rnams gang du mtshungs pa der ni mi slob pa'i chos rnams kyang mtshungs so/ /mi slob pa'i chos rnams gang du mtshungs pa der ni yang dag par rdzogs pa'i sangs rgyas kyi chos rnams kyang mtshungs so//yang dag par rdzogs pa'i sangs rgyas kyi chos rnams gang du mtshungs pa der ni mya ngan las 'das pa yang mtshungs so/ /mya ngan las 'das pa gang du mtshungs pa der ni 'khor ba yang mtshungs so/ /don dam par 'khor ba gang du mtshungs pa der ni don dam par kun nas nyon mongs pa yang mtshungs so//don dam par kun nas nyon mongs pa gang du mtshungs pa der ni don dam par rnam par byang ba yang mtshungs so/ /don dam par rnam par byang ba gang du mtshungs pa der ni chos thams cad kyang mtshungs so/ / lha'i bu chos thams cad mnyam pa nyid la yang dag par sbyor ba'i dge slong ni don dam par yang dag par sbyor ba zhes bya ste/ ji skad brjod pa bzhin du ma yin no/ /lha'i bus smras pa/ mnyam pa nyid gang du don dam par na rnam par byang ba'i bar du mnyam pa gang yin pa der don dam par chos thams cad kyang mnyam pa zhes bya zhe na /'jam dpal gyis smras pa/ don dam par ni chos thams cad ma skyes par mnyam pa dang / don dam par na chos thams cad ma byung bar mnyam pa dang / don dam par na chos thams cad gtan du ma skyes par mnyam pa dang / don dam par na chos thams cad dngos po med par mnyam pas /lha'i bu don dam par chos thams cad mtshungs so/ /de ci'i phyir zhe na/ lha'i bu don dam par ni gtan ma skyes pa nye bar bzung nas chos thams cad la tha dad du bya ba med do/ /lha'i bu 'di lta ste dper na/ kham pa'i snod kyi nang gi nam mkha' gang yin pa dang /rin po che'i snod kyi nang gi nam mkha' gang yin pa 'di gnyis nam mkha'i khams nyid yin te/ de la don dam par tha dad du bya ba cung zad kyang med do/ /lha'i bu de bzhin du don dam par gang kun nas nyon mongs pa de gtan mi skye ba nyid do/ / gang rnam par byang ba de yang don dam par gtan mi skye ba nyid do/ /don dam par na 'khor ba yang gtan mi skye ba nyid do/ /don dam par na mya ngan las 'das pa'i bar du yang gtan mi skye ba nyid de/ de la don dam par na tha dad du bya ba cung zad kyang med do/ /de ci'i phyir zhe na/ don dam par na chos thams cad gtan mi skye ba'i phyir ro zhes gsungs so//de'i phyir de ltar na don tha dad pa ma yin pa ni de kho na'i mtshan nyid yin par rig par bya ste/ stong pa nyid du ro gcig pa'i phyir ro/ /'dir phyi ma phyi mas bshad par yang rig par bya'o/ /de ltar na re zhig 'phags pa rnams kyi de kho na nyid kyi mtshan nyid yin no//'jig rten pa'i de kho na nyid kyi mtshan nyid kyi dbang du byas nas brjod par bya ste/ gang la brten te gang 'byung ba/ /de ni re zhig de nyid min/ /de las gzhan pa'ang ma yin phyir/ /de phyir chad min rtag ma yin//ji ltar sA lu'i sa bon la brten nas sA lu'i myu gu 'byung ba ltar rgyu gang la brten te 'bras bu gang zhig 'byung ba/ de ni re zhig de nyid do zhes brjod par ni mi nus so/ /sa bon gang yin pa de ni myu gu ma yin te/ bskyed par bya ba dang skyed par byed pa dag gcig nyid du thal bar 'gyur ba'i phyir ro//de'i phyir pha dang bu gnyis kyang gcig nyid du 'gyur ro/ /gcig yin pa'i phyir myu gu ltar myu gu'i gnas skabs su sa bon 'dzin par yang 'gyur ro/ /yang na sa bon ltar myu gu yang 'dzin par mi 'gyur ro/ /de ltar na sa bon rtag pa nyid du yang 'gyur te/mi 'jig par khas blangs pa'i phyir ro/ /de'i phyir rtag par smra bar thal bar 'gyur bas nyes pa chen por 'gyur te/ las dang 'bras bu la sogs pa med par thal bar 'gyur ba'i phyir ro/ /de ltar na re zhig sa bon gang yin pa de nyid myu gu yin no zhes bya bar mi rigs so//de las gzhan pa yang ma yin no/ /sa bon las myu gu gzhan pa nyid kyang ma yin te/ sa bon med par yang myu gu skye bar yang thal bar 'gyur ba'i phyir te/ gal te gzhan ni gzhan las gzhan/ /de tshe gzhan med par gzhan 'gyur/ /zhes bya ba la sogs pa 'byung ba'i phyir ro/ / myu gu'i gnas skabs na yang sa bon rgyun chad pa med par thal bar 'gyur la/ de'i phyir 'chol ba'i skyon du 'gyur ro/ /gang gi phyir de ltar rgyu gang zhig la brten nas 'bras bu gang zhig 'byung bar 'gyur la/ rgyu de 'bras bu yang ma yin zhing / rgyu de las 'bras bu de gzhan pa yang ma yin pa de'i phyir rgyu ni chad pa yang ma yin zhing rtag pa yang ma yin no zhes bya bar gzhag par yang nus pa yin no//ji skad du 'phags pa'i lhas/ gang phyir dngos po 'jug 'gyur ba/ /des na chad par mi 'gyur zhing / /gang phyir dngos po ldog 'gyur ba/ /des na rtag par mi 'gyur ro//zhes bshad do/ /mdo las kyang / sa bon yod na myu gu ji bzhin te/ /sa bon gang yin myu gu de nyid min/ /de las gzhan min de yang ma yin te/ /de phyir rtag min chad min chos nyid do/ /zhes gsungs so/ /de'i phyir de ltar ji skad bshad pa'i tshul gyis/ sangs rgyas 'jig rten mgon rnams kyi//bstan pa bdud rtsir gyur pa de/ /don gcig ma yin tha dad min/ /chad pa ma yin rtag ma yin/ /yang dag par rdzogs pa'i sangs rgyas klu chen po thugs rje chen po'i sprin chen po'i tshogs kyis phyogs kyi dkyil 'khor nam mkha'i khams kyi mtha' gtugs pa bar mtshams med par khebs par mdzad pa/'gro ba 'dod chags la sogs pa nyon mongs pa'i tshogs mngon du rgyu'i nyi ma'i dkyil 'khor shin tu ches tsha bas gdungs pa'i gdung ba nye bar zhi ba lhur mdzad pa/ rtag par rgyun mi 'chad par ji ltar 'tsham par spyod pa rnams kyi gnyen por gyur pa/dam pa'i chos ston pa'i bdud rtsi'i rgyun dag 'bebs pas ji ltar 'os par gdul ba'i skye bo'i dge ba'i rtsa ba'i lo tog gi myu gu skyes pa spel bas rjes su bzung bar bzhed pa/ rtag tu dam pa'i chos kyi bdud rtsi'i char 'bebs pa/ 'jig rten pa skyob pa med pa'i skyob pa/mgon med pa'i mgon/ 'jig rten mgon po rnams kyi dam pa'i chos kyi bdud rtsi rga ba dang 'chi ba gtan gcod pa de ni/ ji skad bstan pa'i tshul gyis gcig dang tha dad pa nyid dang bral ba dang / chad pa dang rtag par smra ba dang bral bar shes par bya'o/ / nyan thos kyi chos kyi de kho na nyid bdud rtsi 'di la zhugs pa/ thos pa dang bsam pa dang sgom pa'i rim gyis rab tu zhugs pa rnams kyis ni/ tshul khrims dang ting nge 'dzin dang shes rab kyi phung po gsum gyi bdud rtsi nye bar spyad pa'i phyir nges pa kho nar rga shi zad pa'i ngo bo mya ngan las 'das pa 'thob par 'gyur ro//ci ste yang ji zhig ltar 'dir dge ba'i rtsa ba ma smin pa nyid kyis dam pa'i chos kyi bdud rtsi 'di thos su zin kyang thar pa ma thob na ni/ de lta na'ang de dag skye ba gzhan du'ang sngon gyi rgyu'i stobs nyid las grub pa nges par gdon mi za bar 'grub par 'gyur ro//ji skad du brgya pa las/ de nyid shes pas gal te 'dir/ /mya ngan 'das pa ma thob kyang / /skye ba phyi mar 'bad med par/ /nges par thob 'gyur las bzhin no/ /zhes bshad do/ /ci ste yang ji zhig ltar/ rdzogs sangs rgyas rnams ma byung zhing //nyan thos rnams kyang zad pa na ste/ gyur pa'i tshe 'phags pa'i lam ston par byed pa'i rkyen ma tshang bas de kho na nyid kyi bdud rtsi ma thob par gyur pa/ de lta na yang sngon tshe rabs gzhan du de kho na nyid thos pa'i rgyu'i stobs kho na las 'jig rten 'di'i nye bar bstan pa la ltos pa dang bral yang rkyen rnam par dben pa rten pa tsam thob pa/rang 'byung rang sangs rgyas kyi ye shes ni/ /rten pa med las rab tu skye ba yin no/ /rten pa med pa ni lus dang sems dag dben pa'am/ dge ba'i bshes gnyen yongs su mi tshol ba ste/ rten med pa'i rgyu de las so//gang gi phyir sangs rgyas mi 'byung ba'i dus su rang sangs rgyas rnams kyis de kho na nyid rtogs par 'gyur ba de'i phyir/ /yang dag par rdzogs pa'i sangs rgyas sman pa'i rgyal pos gsungs pa dam pa'i chos de kho na nyid kyi bdud rtsi ji skad du bshad pa de 'bras bu yod par grub par shes par bya'o//gang gi phyir 'di de ltar yin pa de'i phyir/ shes rab can rnams kyis srog dag kyang btang ste de kho na nyid btsal bar 'os pa yin te/ /byang chub sems dpa' rtag tu ngus bcom ldan 'das ma ji ltar btsal ba bzhin no/ /ji skad du/ bcom ldan 'das ma yum shes rab kyi pha rol tu phyin pa brgyad stong pa las/bcom ldan 'das byang chub sems dpa' sems dpa' chen po rtag tu ngus/ shes rab kyi pha rol tu phyin pa 'di ji ltar yongs su btsal ba lags/ de skad ces gsol ba dang / bcom ldan 'das kyis tshe dang ldan pa rab 'byor la 'di skad ces bka' stsal to//rab 'byor byang chub sems dpa' sems dpa' chen po rtag tu ngus/ sngon shes rab kyi pha rol tu phyin pa 'di yongs su tshol ba na/ lus la ched cher mi byed/ srog la mi lta/ rnyed pa dang bkur sti dang tshigs su bcad pa dag la mi gnas par yongs su btsal to//de shes rab kyi pha rol tu phyin pa yongs su tshol zhing 'brog dgon pa zhig tu phyin pa na bar snang las sgra thos par gyur te/ rigs kyi bu shar phyogs su song shig dang / shes rab kyi pha rol tu phyin pa thos par 'gyur gyi ci nas lus ngal ba yid la byed pa mi skyed pa dang /gnyid dang rmugs pa yid la byed pa mi skyed pa dang / bza' ba yid la byed pa mi skyed pa dang zhes bya ba nas nang ngam phyi rol gang la yang sems smon par ma byed cig/ rigs kyi bu g.yon du ma lta bar song shig / g.yas su ma yin/ shar du ma yin/ nub tu ma yin/ byang du ma yin/ steng du ma yin/ 'og tu ma yin/ phyogs mtshams su yang ma lta bar song shig / /rigs kyi bu ji ltar bdag las ma yin 'jig tshogs las kyang ma g.yos pa dang / ji ltar gzugs las kyang ma g.yos pa dang /ji ltar tshor ba dang / 'du shes dang / 'du byed rnams dang / ji ltar rnam par shes pa las kyang ma g.yos pa de ltar song shig / gang 'di las g.yos pa de ni rnam par nyams par 'gyur ro/ /ci las nyams par 'gyur zhe na/ sangs rgyas kyi chos rnams las nyams par 'gyur ro//gang sangs rgyas kyi chos rnams las nyams par gyur pa de ni 'khor ba la spyod do/ /gang 'khor ba la spyod pa de ni shes rab kyi pha rol tu phyin pa la mi spyod de/ /des shes rab kyi pha rol tu phyin pa rjes su mi 'thob bo zhes bya ba'i bar nas//chu de dag mi snang bar byas nas kun tu chu btsal na chu ma rnyed do/ /de nas byang chub sems dpa' sems dpa' chen po rtag tu ngus 'di snyam du sems te/ bdag gi lus phug la khrag gis sa phyogs 'di chag chag gdab bo/ /de ci'i phyir zhe na/ sa phyogs 'di ni rdul che ste/sa phyogs 'di nas rdul gyi khams byung bas byang chub sems dpa' sems dpa' chen po chos 'phags kyi lus la phog na mi rung na/ bdag gi lus gdon mi za bar 'jig pa 'dis ci zhig bya/ bdag gi lus 'di lta bu'i bya ba la 'jig pa ni bla'i/nus pa med pa'i bya ba la 'dod pa'i phyir dang / 'dod pa'i gzhis 'khor ba dag na 'khor ba na bdag gi lus brgya stong mang po de lta bu'i gnas su zhig pa ni cir yang ma rung ngo snyam mo/ /de nas byang chub sems dpa' sems dpa' chen po rtag tu ngus mtshon rnon po blangs te/ bdag gi lus kun tu phug nas rang gi khrag gis sa phyogs de kho ra khor yug tu chag chag btab po zhes bya ba la sogs pa dang / de nas byang chub sems dpa' sems dpa' chen po rtag tu ngus/ byang chub sems dpa' sems dpa' chen po chos 'phags mthong ma thag tu 'di lta ste/dper na dge slong bsam gtan dang po la snyoms par zhugs pa'i dge slong rtse gcig tu yid la byed pa de bzhin du bde ba de lta bu thob bo/ /de nas byang chub sems dpa' sems dpa' chen po chos 'phags shes rab kyi pha rol tu phyin pa ston pa ni 'di lta ste/ chos thams cad mnyam pa nyid pas shes rab kyi pha rol tu phyin pa mnyam pa nyid do//chos thams cad dben pa nyid pas shes rab kyi pha rol tu phyin pa dben pa nyid do/ /chos thams cad g.yo ba med pa nyid pas shes rab kyi pha rol tu phyin pa g.yo ba med pa nyid do/ /chos thams cad rlom sems med pa nyid pas shes rab kyi pha rol tu phyin pa rlom sems med pa nyid do//chos thams cad khengs pa med pa nyid pas shes rab kyi pha rol tu phyin pa khengs pa med pa nyid do/ /chos thams cad ro gcig pa nyid pas shes rab kyi pha rol tu phyin pa ro gcig pa nyid do/ /chos thams cad mu med pa nyid pas shes rab kyi pha rol tu phyin pa mu med pa nyid do//chos thams cad skye ba med pa nyid pas shes rab kyi pha rol tu phyin pa skye ba med pa nyid do/ /chos thams cad 'gag pa med pa nyid pas shes rab kyi pha rol tu phyin pa 'gag pa med pa nyid do/ / nam mkha' mu med pa nyid pas shes rab kyi pha rol tu phyin pa mu med pa nyid do zhes bya ba'i bar dang / chos thams cad ma 'dres pa nyid pas shes rab kyi pha rol tu phyin pa ma 'dres pa nyid do/ /chos thams cad dmigs su med pa nyid pas shes rab kyi pha rol tu phyin pa dmigs su med pa nyid do//chos thams cad rnam par 'jig pa mnyam pa nyid pas shes rab kyi pha rol tu phyin pa rnam par 'jig pa mnyam pa nyid do/ /chos thams cad byed pa med pa nyid pas shes rab kyi pha rol tu phyin pa byed pa med pa nyid do/ /chos thams cad bsam gyis mi khyab pa nyid pas shes rab kyi pha rol tu phyin pa bsam gyis mi khyab pa nyid du rig par bya'o zhes bya ba'i bar du gsungs pa lta bu'o//slob dpon zla ba grags pa'i zhal snga nas sbyar ba'i tshig gsal ba las/ bdag brtag pa zhes bya ba rab tu byed pa bco brgyad pa'i 'grel pa'o// //'dir smras pa/dngos po rnams kyi rang bzhin ni yod pa nyid de / de dus gsum du gdags pa'i rgyu yin pa'i phyir ro/ /'dir dus gsum po 'das pa dang ma 'ongs pa dang da ltar byung ba dag ni bcom ldan 'das kyis bstan la/ de dag kyang dngos po'i rten can yin te/ gang gi phyir dngos po'i rang bzhin skyes nas 'gags pa la ni 'das pa zhes bsnyad la//skyes la ma 'gags pa ni da ltar ba yin zhing / bdag gi dngos po ma rnyed pa ni ma 'ongs pa yin no/ /de ltar na dngos po'i rang bzhin gyi rgyu can dus gsum ltar na / /de dag kyang yod pa yin te/ de'i phyir de'i rgyu dngos po'i rang bzhin yang yod do/ /brjod par bya ste/ gal te dus gsum nyid yod na/ /dus gsum du gdags pa'i rgyu dngos po'i rang bzhin yang yod par 'gyur na/ yod pa ni ma yin no/ /ji ltar yod pa ma yin pa de ltar bstan pa'i phyir/ da ltar byung dang ma 'ongs pa//gal te 'das la ltos gyur na/ /da ltar byung dang ma 'ongs pa/ /'das pa'i dus na yod par 'gyur zhes gsungs te/ /'dir gal te re zhig da ltar dang ma 'ongs pa'i dus dag yod na/ de dag 'das pa'i dus la ltos pa'am ma ltos pa yod par 'gyur grang / de la gal te 'das pa la ltos nas grub na ni/de'i tshe nges par dag 'das pa'i dus na yod par 'gyur te/ gang gi phyir gang zhig gang na yod pa ma yin pa de ni de la ltos pa ma yin te/ dper na rang gi bu mo mo gsham dang / rang gi me tog nam mkha' dang rang gi til mar bye ma dag la mi ltos pa bzhin no//gal te sgron ma'i rang gi ngo bo la mun pa med kyang 'gal zla nyid du ltos pa yin no zhe na/ de ni de lta ma yin te/ de yang bsgrub par bya ba dang mtshungs pa'i phyir ro/ /de'i phyir 'dir gal te ltos pa grub par bya ba'i phyir da ltar dang ma 'ongs pa'i dus dag 'das pa'i dus na yod par 'dod na ni/de ltar na/ 'das pa'i dus na yod pa'i phyir 'das pa'i dus kyi rang gi bdag nyid ltar/ de dag kyang 'das pa'i dus nyid du 'gyur ro/ /de'i phyir 'das par yang mi 'gyur te/ gang gi phyir da ltar las 'das pa ni 'das pa yin la/ma thob pa ni ma 'ongs pa yin no zhes bya ba yin na/ gang gi tshe da ltar dang ma 'ongs pa dag yod pa ma yin pa nyid du gyur pa de'i tshe gang zhig 'das pa nyid du 'gyur ba ga la yod/ de'i phyir 'das par yang mi 'gyur ro/ /ci ste ji skad du bshad pa'i skyon spang bar 'dod na /da ltar byung dang ma 'ongs pa/ /gal te de na med gyur na/ /da ltar byung dang ma 'ongs pa/ /ji ltar de la ltos par 'gyur/ /gal te da ltar ba dang ma 'ongs pa'i dus de dag 'das pa'i dus de na med par rtog na/ de lta na yang de na yod pa ma yin pas/ nam mkha'i ut+pa la ltar ltos pa yod pa ma yin no//ci ste yang dus smra ba rnams kyi ltar na dus yod pa nyid yin na/ de la ltos pas dgos pa ci yod snyam na/ brjod pa de lta na yang / 'das pa la ni ma ltos par/ /de gnyis grub pa yod ma yin/ /de phyir da ltar byung ba dang / /ma 'ongs dus kyang yod ma yin//da ltar byung ba dang ma 'ongs pa dag yod pa ma yin te/ 'das pa la mi ltos pa'i phyir bong bu'i rwa bzhin no/ /gang gi phyir de lta yin pa de'i phyir da ltar byung ba dang ma 'ongs pa'i dus yod pa ma yin no zhes shes par bya'o/ /de ltar na ji ltar 'das pa la ltos pa'am ma ltos pa yang rung ste/da ltar byung ba dang ma 'ongs pa dag grub pa yod pa ma yin pa de bzhin du/ da ltar byung ba la ltos sam ma ltos kyang rung ste/ 'das pa dang ma 'ongs pa dag gam/ ma 'ongs pa la ltos sam ma ltos kyang rung ste/ /'das pa dang da ltar byung ba dag ma grub par shes pa na/da ltar byung ba dang ma 'ongs pa dag 'das pa la ltos sam ma ltos kyang rung ste ma grub pa'i rim pa'i tshul 'di nyid dang sun dbyung ba mtshungs par bsgre ba'i phyir/ rim pa'i tshul ni 'di nyid kyi / /lhag ma gnyis po bsnor ba dang / /mchog dang tha ma 'bring la sogs//gcig la sogs pa'ang shes par bya/ /zhes gsungs so/ /ji ltar zhe na/ 'das pa dang ni ma 'ongs pa/ /gal te da ltar byung ltos na/ /'das pa dang ni ma 'ongs pa/ /da ltar byung dus yod par 'gyur/ /'das pa dang ni ma 'ongs dus/ /gal te de ni med gyur na//'das pa dang ni ma 'ongs dus/ /ji ltar de la ltos par gyur / /da ltar la ni ma ltos par/ /de gnyis grub pa yod ma yin/ /de yi phyir na 'das pa dang / /ma 'ongs dus kyang yod ma yin/ /zhes bya ste/ re zhig 'di ni dus bsnor ba gcig yin no//'das dang da ltar byung ba ni/ /gal te ma 'ongs ltos gyur na/ /'das pa dang ni da ltar byung / /ma 'ongs dus na yod par 'gyur/ /'das dang da ltar byung ba ni/ /gal te de na med gyur na/ /'das pa dang ni da ltar byung / /ji ltar de la ltos par 'gyur/ /ma 'ongs pa la ma ltos par//de gnyis grub pa yod ma yin/ /de yi phyir na 'das pa dang / /da ltar dus kyang yod ma yin/ /zhes bya ba 'di ni dus bsnor ba gnyis pa ste/ de ltar dus bsnor ba gnyis khong du chud par bya'o/ /gang gi phyir rnam par dpyad pa na/ dus gsum med pa de'i phyir dus yod pa ma yin la/dus med pas dngos po'i rang bzhin yang yod pa ma yin no zhes bya bar grub bo/ /ji ltar dus gsum po 'di rnam par dpyad pa de bzhin du/ mchog dang tha ma 'bring la sogs/ /gcig la sogs pa'ang shes par bya ste/ mchog dang tha ma 'bring la sogs//zhes bya ba la sogs pa'i sgras ni/ dge ba dang mi dge ba dang lung du ma bstan pa rnams dang / skye ba dang gnas pa dang mi rtag pa rnams dang / sngon gyi mtha' dang dbus kyi mtha' dang phyi ma'i mtha' rnams dang / 'dod pa dang gzugs dang gzugs med pa'i khams dag dang /slob pa dang mi slob pa dang / slob pa yang ma yin mi slob pa yang ma yin pa la sogs pa dngos po gsum dang 'brel par gnas pa ji snyed cig yod pa de dag thams cad bsdu'o/ /gcig la sogs pa'ang zhes bya ba'i sogs pa'i sgra 'dis ni gnyis pa dang mang po dag sdud do//mchog la sogs pa dag dang / /gcig la sogs pa de rnams ni/ /dus gsum rnam par bshad pas bshad par rig par bya'o/ /'dir smras pa/ dus ni yod pa nyid de/ tshad dang ldan pa nyid kyi phyir ro/ /'dir gang med pa de la ni tshad dang ldan pa nyid yod pa ma yin te/dper na ri bong gi rwa bzhin no/ /dus la ni skad cig dang / thang cig dang / yud tsam dang / nyin mo dang / mtshan mo dang / nyin mtshan dang / zla ba phyed pa dang / zla ba dang / nyi ma nur pa dang / lo la sogs pa'i dbye bas tshad dang ldan pa nyid yod pa yang yin te/de'i phyir tshad dang ldan pa nyid kyi phyir dus yod pa nyid do/ /brjod par bya ste/ gal te dus zhes bya ba 'ga' zhig yod na ni/ de tshad dang ldan pa nyid du yang 'gyur na/ yod pa ni ma yin te/ gang gi phyir/ /mi gnas dus ni 'dzin mi byed//gang zhig gzung bar bya ba'i dus/ /gnas pa yod pa ma yin pas/ /ma bzung dus ni ji ltar gdags/ /gal te 'di na dus zhes bya ba skad cig ma la sogs pa la tha dad pa gnas pa 'ga' zhig yod na ni de skad cig la sogs pa dag gi sgo nas tshad dang ldan par 'dzin pa zhig na/dus zhes bya ba gang zhig skad cig ma la sogs pa dag gi sgo nas 'dzin pa ther zug par gnas pa ni yod pa yang ma yin no/ /de'i phyir de ltar na mi gnas dus ni 'dzin mi byed de/ mi gnas pa'i phyir 'dzin par mi 'gyur ro zhes bya ba'i don to / / ci ste yang dus rtag par gnas pa'i rang bzhin can kho na yod pa yin la/ de skad cig la sogs pa dag gis mngon par gsal bar byed pa yin te/ de skad du yang / dus kyis 'byung ba smin par byed/ /dus kyis skye dgu sdud par byed/ /dus kyis gnyid log sad par byed/ /dus las 'da' bar shin tu bka'//zhes 'byung ba de lta bu'i mtshan nyid can gnas pa'i rang bzhin gang yin pa de ni yod pa yin no snyam na/ brjod par bya ste/ de ltar na yang gang zhig skad cig la sogs pa dag gis mngon par gsal zhing gzung ba dus gnas pa yod pa ma yin no/ /yang ci'i phyir dus gnas pa yod pa ma yin no zhe na/skad cig la sogs pa las tha dad par ma bzung ba'i phyir ro/ /gzhan yang dus 'di 'dus byas kyi rang bzhin du gyur pa zhig gam/ 'dus ma byas kyi rang bzhin du gyur pa zhig yod par rtog grang na/ gnyi ga yang / skye dang gnas dang 'jig pa dag/ma grub phyir na 'dus byas med/ /'dus byas rab tu ma grub pas/ /'dus ma byas ni ji ltar 'grub/ /ces bya ba des 'dus byas brtag par bkag zin to/ /de'i phyir de ltar na gang zhig gzung bar bya ba dus gnas pa yod pa ma yin no/ / dus gang zhig de ltar mi gnas shing yod pa ma yin pa'i phyir gzung ba ma yin pa de ni ma bzung ba yin dang ji ltar skad cig la sogs pa dag gis gdags par nus zhes gsungs pa ni/ ma bzung dus ni ji ltar gdags/ /zhes bya ba'o/ /de'i phyir dus med pa nyid do/ / 'dir smras pa/ dus zhes bya ba gzugs la sogs pa las tha dad pa'i rang bzhin du grub pa rtag pa 'ga' zhig med pa ni bden te/ 'o na ci zhe na/ 'du byed gzugs la sogs pa dag la brten na brtags pa'i dus ni skad cig la sogs pa'i sgras brjod par bya bar 'gyur te/de'i phyir nyes pa med do/ /brjod par bya ste/ de lta na yang / gal te dus ni dngos brten te/ /dngos med dus ni ga la yod/ /gal te de ltar dngos po la brten nas dus su 'gyur ro zhes rnam par 'jog na'o / /gang gi tshe dngos po nyid yod pa ma yin pa de'i tshe nges par de'i rgyu can gyi dus kyang yod pa ma yin no zhes bstan pa'i phyir//dngos po 'ga' yang yod min na/ /zhes gsungs te/ gong du rgyas par bstan pa'i phyir dang / dgag pa 'chad par 'gyur ba'i yang phyir ro/ /gang gi tshe de ltar dngos po 'ga' yang yod pa ma yin pa de'i tshe/dus lta yod par ga la 'gyur/ dus med pas de'i tshad du gyur pa dus kyi bye brag skad cig la sogs pa yang med do/ /de'i phyir tshad dang ldan pa nyid kyis dus grub par ga la 'gyur te/ de'i phyir dngos po rnams kyi rang bzhin yod pa ma yin pa nyid do/ / bcom ldan 'das kyis kyang 'phags pa glang po'i rtsal gyi mdo las/ gal te chos rnams rang bzhin 'ga' yod na/ /rgyal ba nyan thos bcas pas de mkhyen 'gyur/ /ther zug chos rnams mya ngan 'das mi 'gyur/ /mkhas rnams nam yang spyod pa med mi 'gyur/ /zhes gsungs la /de bzhin du/ chos ni stong phrag brgya dag bstan gyur nas/ /sangs rgyas 'bum phrag gang dag 'das gyur kyang / /chos dang yi ge dag la zad med de/ /skye ba yod min des na zad pa med/ /ces bya ba dang / de bzhin du/ /de bzhin gshegs pa 'byung ba'i dus kyi tshe//byams pa zhes bya'i rgyal ba 'byung 'gyur zhing / /sa 'di gser gyis bdal ba 'byung 'gyur ba/ /de tshe de yi 'byung de ga la yod/ /ces bya ba la sogs pa gsungs so/ /slob dpon zla ba grags pa'i zhal snga nas sbyar ba'i tshig gsal ba las/ dus brtag pa zhes bya ba rab tu byed pa bcu dgu pa'i 'grel pa'o// //'dir smras pa/ dus ni yod pa nyid de/ 'bras bu 'byung ba la lhan cig byed pa'i rkyen yin pa'i phyir ro/ /gang med pa de ni lhan cig byed pa'i ngo bo ma yin te mo gsham gyi bu bzhin no/ /de'i phyir dus ni yod pa nyid de/lhan cig byed pa'i rkyen yin pa'i phyir ro/ /'di na myu gu gang zhig sa bon dang sa dang chu dang me dang rlung dang nam mkha' dang dus zhes bya ba rgyu dang rkyen tshogs pa la brten nas skye ba ni/ sa bon la sogs pa'i rgyu dang rkyen tshogs pa yod kyang dus kyi khyad par nye bas mi skye ba yin no//phyi rol dag la ji lta ba de bzhin du nang gi bdag nyid la yang yin te/ bcom ldan 'das kyis/ lus can rnams kyi las rnams ni/ /bskal pa brgyar yang chud mi za/ /tshogs shing dus la bab pa na/ /'bras bu nyid du smin par 'gyur/ /zhes ji skad du gsungs pa lta bu'o//gang gi phyir de ltar dus de la ltos pa yod pa de'i phyir gang zhig myu gu la sogs pa byung ba la lhan cig byed pa'i rkyen du 'gyur ba dus zhes bya ba de yod pa yin no/ /brjod par bya ste/ gal te myu gu la sogs pa 'bras bu 'byung ba nyid yod na ni/ dus lhan cig byed pa'i rgyu nyid du 'gyur ba zhig na/yod pa ni ma yin no/ /ji ltar zhe na/ 'dir sa bon la sogs pa rgyu dang rkyen gyi tshogs pa las myu gu la sogs pa 'bras bu skye bar rtog pa na/ 'bras bu tshogs pa la rnam par gnas pa zhig gam/ mi gnas pa zhig de las skye bar rtog grang / de las cir 'gyur zhe na/gal te rnam par gnas pa zhig la rtog na ni/ de ni mi rung ngo zhes bstan pa'i phyir/ /gal te rgyu dang rkyen rnams kyi/ /tshogs pa nyid las skye 'gyur zhing / /tshogs la 'bras bu yod na ni/ /ji ltar tshogs pa nyid las skye/ /zhes gsungs te/gal te rgyu dang rkyen gyi tshogs pa las 'bras bu yod na ni/ de lta na gang zhig tshogs pa la yod pa de ji ltar des bskyed par 'gyur te/ khar gzhong na yod pa'i zho ni khar gzhong gis bskyed pa ma yin no/ /gzhan yang gang yod pa de ni grub zin pa'i phyir/ /grub zin pa'i bum pa mdun na gnas pa ltar yang skye ba la ltos pa med pa yin no//gal te mngon par gsal ba'am rags par byed pa yin no zhe na/ /ma yin te/ phyogs 'di la gong du lan btab zin pa'i phyir ro / /me ni gzhan las mi 'ong ste/ /shing la'ang me ni yod ma yin/ / de bzhin zhes bya ba der lan brjod zin to/ /ci ste tshogs pa la 'bras bu med do zhes rtog na/ de yang mi 'thad do zhes bstan pa'i phyir/ gal te rgyu dang rkyen rnams kyi/ /tshogs pa nyid las skye 'gyur zhing / /tshogs la 'bras bu med na ni/ /ji ltar tshogs pa nyid las skye//zhes gsungs te/ gal te rgyu dang rkyen rnams kyi tshogs pa la 'bras bu de med na ni/ 'o na ji ltar rgyu dang rkyen tshogs pas 'bras bu bskyed de/ de na yod pa ma yin pa'i phyir bye ma dag gi til mar bzhin no/ /de nyid kyi phyir mi srid pas/ /tshogs la 'bras bu med na ni/ /ji ltar tshogs pa nyid las skye//zhes gsungs te/ 'bras bu de tshogs pa nyid las mi skye ba nyid do snyam du dgongs pa yin no/ /gzhan yang / gal te rgyu dang rkyen rnams kyi/ /tshogs la 'bras bu yod na ni/ /tshogs la gzung du yod rigs na/ /tshogs pa nyid la gzung du med/ /gang zhig gang na yod pa de ni der gzung du yod de/dper na khar gzhong gi zho bzhin la/ gang zhig gang na yod pa ma yin pa de ni der gzung du yod pa ma yin te/ dper na bye ma dag la 'bru mar lta bu'o/ /ci ste dngos po rnams yod kyang / shin tu phra ba dang / shin tu nye ba dang / shin tu ring ba dang / dbang po la rnyog pa chags pa dang / dbang po la gnod pa byas pa dang / lus can gyi rdzas kyis chod pa dang / lus mi snang bar 'gyur ba dang / yid la ma bzung ba'i phyir phra rab dang / mig la gnas pa'i mig sman gyi thur ma dang / nyi ma'i 'gros dang / rab rib can gyi skra re re dang / / long ba dang 'on pa la sogs pa'i gzugs dang / sgra la sogs pa dang / rtsig pa la sogs pas bar du bcad pa'i bum pa dang / grub pa dang lha dang sha za la sogs pa'i lus dang / yul gzhan yid la byed pa dang bcas pa'i yul gzhan ltar gzung du med pa yin no zhe na/ 'o na gang gis na 'di dag yod bzhin du mi dmigs par 'gyur ba/ma bzung ba 'di dag yod pa nyid la rtag cing yod/ rjes su dpag pa dang / nye bar 'jal ba dang / lung rnams kyis 'dzin pa'i phyir de dag yod pa nyid do zhe na/ 'o na de dag ma dmigs so/ /zhes brjod par mi bya ste/ rjes su dpag pa la sogs pa dag gis dmigs pa'i phyir ro//gal te dbang po gzugs can gyis gzung bar bya ba de gang yin pa de yod kyang byed pa dag gis ma bzung ba yin no zhe na/ brjod pa/ ci kho bo cag gis yod bzhin par gyur pa dbang po gzugs can dag gis gzung du med do zhes de skad du smras sam/'o na ci zhe na/ kho bo cag ni/ tshogs la gzung du yod rigs na/ /zhes spyir smra'o/ /ci ste yang gang zhig gang na med pa de ni de las skye ba ma yin te/ bye ma dag las 'bru mar bzhin no/ /'bras bu ni tshogs pa las skye ba yang yin te/ /de'i phyir tshogs pa la 'bras bu yod pa nyid ni rjes su dpag pa las yin no snyam du sems na/brjod pa/ gang zhig gang na yod pa de ni de las skye ba ma yin te/ dper na khar gzhong las zho mi skye ba bzhin no zhes rjes su dpag pa 'di las de yod par mi rigs pa'i phyir tshogs pa 'bras bu med pa nyid do zhes ci ste mi gzung / ci ste yang phyogs gnyi ga yang rjes su dpag pa dang 'gal ba'i phyir na ji ltar yod pa nyid mi rigs pa de bzhin du med pa nyid kyang mi rigs so snyam na/brjod par bya ste/ kho bo cag ni 'di med par sgrub pa ma yin gyi/ 'o na ci zhe na/ 'di gzhan gyis yod pa nyid du yongs su brtags pa 'gog pa yin no//de bzhin du kho bo cag ni 'di yod pa nyid du sgrub pa ma yin te/ 'o na ci zhe na/ 'di gzhan gyis med pa nyid du brtags pa sel ba yin te/ mtha' gnyis bsal nas dbu ma'i lam sgrub par 'dod pa'i phyir ro/ /brgya pa las kyang / 'bras bu yod nyid gang 'dod dang / /'bras bu med nyid gang 'dod la//khyim gyi don du ka ba la / /sogs pa'i rgyan ni don med 'gyur/ /zhes bshad do/ /de'i phyir de ltar na tshogs pa las 'bras bu skye ba ma yin te/ yod pa ni gzung du yod par thal bar 'gyur ba'i phyir ro zhes bya bar rnam par gzhag pa yin no/ /ci ste tshogs pa la 'bras bu med pa nyid do snyam du sems na de lta na yang /gal te rgyu dang rkyen rnams kyi/ /tshogs la 'bras bu med na ni/ /rgyu rnams dang ni rkyen dag kyang / /rgyu rkyen ma yin mtshungs par 'gyur/ /ji ltar me dang sol ba la sogs pa dag la myu gu med pa'i phyir na/ de dag de'i rgyur mi 'gyur ba de bzhin du/sa bon la sogs pa brjod par 'dod pa rnams kyang rgyu dang rkyen nyid du mi 'gyur te/ de dag la myu gu med pa'i phyir ro/ /rgyu dang rkyen ma yin pa dag las ni 'bras bu 'byung bar rigs pa yang ma yin te/ de'i phyir 'bras bu 'byung ba med do/ /'dir smras pa/ gang las ci tshogs pa las 'bras bu yod dam 'on te med ces bya ba'i bsam pa 'dir 'gyur ba/tshogs pa la ni 'bras bu bskyed pa'i nus pa med do/ /'o na ci zhe na/ rgyu la 'bras bu bskyed pa'i nus pa yod la/ tshogs pas ni rgyu la phan 'dogs pa tsam zhig byed pa yin no/ /rgyu de ni 'bras bu bskyed par bya ba'i phyir rgyu byin nas 'gag par 'gyur la/rgyu des phan btags pa'i 'bras bu yang skye ba yin no/ /brjod par bya ste/ 'bras bu ma skyes pa'i rgyu la ni phan 'dogs pa yod pa ma yin la/ ma skyes pa la ni mo gsham gyi bu ltar sus kyang cung zad tsam yang byed par mi nus pas rtog pa 'di ni mi rigs so//gzhan yang / gal te rgyus ni 'bras bu la/ /rgyu byin nas ni 'gag 'gyur na/ /gang byin pa dang gang 'gag pa'i/ /rgyu yi bdag nyid gnyis su 'gyur/ /gal te rgyu des 'bras bu skyed pa'i phyir rgyu de byed rgyu byin nas 'gag par 'gyur ro zhes rtog na ni/de lta na rgyu'i bdag nyid gang byin pa dang gang 'gag pa de gnyis su 'gyur na/ de ni rigs pa yang ma yin te/ phyed rtag par thal bar 'gyur ba'i phyir dang / phyed mi rtag par 'gyur ba'i phyir ro/ /rtag pa dang mi rtag pa phan tshun 'gal ba dag kyang gcig la med pa'i phyir ro/ / ci ste rgyu'i bdag nyid gnyis su thal ba spang bar bya ba'i don du 'bras bu skyed par byed pa'i phyir cung zad kyang ma byin par bdag nyid thams cad kyi rgyu'i 'gag par 'dod na ni/ de lta na yang / gal te rgyus ni 'bras bu la/ /rgyu ma byin par 'gag 'gyur na/ /rgyu 'gags nas ni skyes pa yi//'bras bu de ni rgyu med 'gyur/ /gal te 'bras bu la cung zad kyang ma byin par bdag nyid thams cad kyis rgyu 'gags na ni/ de ltar rgyu de 'gags nas skyes pa'i 'bras bu gang yin pa de rgyu med pa kho nar 'gyur na / rgyu med pa ni yod pa ma yin pas rtog pa 'di ni mi rigs so/ / 'dir smras pa/ gal te 'bras bu rgyu las skye bas nyes pa 'dir 'gyur na ni/ de ltar na tshogs pa dang lhan cig skyes pa kho na 'bras bu skyed par byed pa yin par 'gyur te/ dper na sgron ma 'od kyis skyed par byed pa yin pa bzhin no/ /rtog pa 'di yang 'thad pa ma yin no zhes bstan pa'i phyir/gal te tshogs dang lhan cig tu/ /'bras bu yang ni skye 'gyur na/ /skyed par byed dang bskyed bya gang / /dus gcig par ni thal bar 'gyur/ /zhes gsungs te/ ba glang gi rwa g.yas g.yon dus gcig pa dag ni bskyed par bya ba dang skyed par byed pa nyid du yang ma mthong bas/ 'di ni mi rigs so//'dir kha cig na re/ dngos po rnams ma byung ba las skye ba ni med de/ glo bur bar thal bar 'gyur ba'i phyir ro/ /de'i phyir 'bras bu de ni rgyu dang rkyen gyis tshogs pa'i snga rol ma 'ongs pa'i gnas skabs na gnas pa yin la/ rgyu dang rkyen gyi tshogs pas ni de da ltar ba'i gnas skabs su bskyed pa yin gyi/rdzas ni gnas pa nyid do zhes zer ro/ /de dag la brjod pa ni/ gal te tshogs pa'i snga rol du/ /'bras bu skyes par gyur na ni/ /rgyu dang rkyen rnams med pa yi/ /'bras bu rgyu med 'byung bar 'gyur/ /zhes bya ba ste/ gal te tshogs pa'i snga rol na 'bras bu rang gi ngo bos yod par gyur na ni/de rgyu dang rkyen la ltos pa med par 'gyur la/ de'i phyir rgyu med par 'byung bar 'gyur na/ dngos po rgyu med par 'byung ba dag ni yod pa nyid kyang ma yin te bong bu'i rwa la sogs pa rnams kyang yod par thal bar 'gyur ba'i phyir ro//sngar grub zin pa la yang rgyu dang rkyen la ltos pas dgos pa med pa'i phyir yang 'di rigs pa ma yin no/ /yang gzhan dag ni/ 'bras bu ni rgyu kho nas skyed par byed kyi/ tshogs pas ni ma yin la/ bshad zin pa'i nyes par thal ba yang ma yin te/ 'di ltar gang las ci rgyus 'bras bu la rgyu byin nas 'gag par 'gyur ram/'on te ma byin par yin zhes rnam par dpyod par 'gyur ba/ rgyu yang gzhan la 'bras bu yang gzhan pa ni ma yin gyi/ 'on kyang rgyu nyid 'gags nas 'bras bu'i bdag nyid du rnam par gnas pa yin no zhes 'dzer to/ /de lta na yang //la te rgyu 'gags 'bras bu na / /rgyu ni kun du 'pho bar 'gyur/ /sngon skyes pa yi rgyu yang ni/ /yang skye bar ni thal bar 'gyur/ /gal te rgyu 'gags pa na 'bras bu skye la 'bras bu de yang rgyu'i bdag nyid can kho na yin no zhes rtog na/ de lta yin na ni/ rgyu ni kun du 'pho bar 'gyur te/zlos gar mkhan cha byad gzhan btang nas cha byad gzhan len pa ltar rgyu 'pho ba tsam zhig tu 'gyur gyi/ 'bras bu snga na med pa skye ba ni ma yin no/ /de'i phyir rgyu rtag pa nyid du 'gyur na/ rtag pa dag ni yod pa nyid kyang ma yin no/ /ji skad du brgya pa las/gang zhig gang na nam gyi tshe'ang / /ma bsten par ni yod nyid med/ /des na nam yang gang zhig tu/ /rtag pa 'ga' yang yod ma yin/ /zhes bshad do/ /gzhan yang rtog pa 'di la ni/ sngon skyes pa'i rgyu yang skye bar 'gyur na/ skyes pa ni slar yang skye bar mi rigs te/dgos pa med pa'i phyir dang / thug pa med par thal bar 'gyur ba'i phyir ro/ /ci ste bdag nyid gang gis yod pa'i bdag nyid de skye ba ni ma yin gyi/ bdag nyid gang gis yod pa ma yin pa de kho na skye ba yin no snyam na/ 'di yang mi rung ste/ rgyu'i rang gi ngo bo rgyu'i rang bzhin ma spangs pa la 'bras bu yin no zhes bya bar ming tsam zhig tha dad pa yin pa'i phyir dang /gnas skabs tha dad na yang rdzas tha mi dad par sgrub par mi nus pa'i phyir dang / 'bras bu'i gnas skabs na rgyu'i rang bzhin yongs su spangs pa ni 'bras bu'i sgras brjod par bya ba yin pa'i phyir na rgyu 'bras bu'i bdag nyid du gnas so zhes bya ba 'di ni gyi na'o//gzhan yang / gal te rgyus 'bras bu skyed par byed na/ de 'gags pa'am ma 'gags pa zhig gis skyed par byed/ 'bras bu yang skyes pa'am ma skyes pa zhig bskyed grang na/ gnyi ga ltar yang mi 'thad do zhes bstan pa'i phyir/'gags pa nub par gyur pa zhig / /'bras bu skyes pa ji ltar skyed/ /'bras bu dang ni 'brel ba'i rgyu/ /gnas pas kyang ni ji ltar skyed / /ces gsungs te/ /gal te re zhig 'gags pa nub cing zhig par gyur pa'i rgyus 'bras bu skyes pa ste yod cing bdog pa bskyed do zhes bya bar rtog na ni de ni mi 'thad do//ci'i phyir zhe na/ ji ltar 'gags pa yod pa ma yin pa'i rgyus 'bras bu skyed par byed par 'gyur/ gal te 'bras bu skyed na ni mo gsham gyi bus kyang bu skyed par 'gyur ro/ /'bras bu yod cing bdog pa yang skye ba la ltos pa med pa yang rgyus ji ltar bskyed par 'gyur/ci ste yang nus pa med pa'i phyir 'gags pas ni mi bskyed de/ 'o na ci zhe na/ rgyu gnas pa kho nas 'bras bu bskyed par 'gyur ro snyam na/ brjod pa/ 'bras bu dang ni 'brel ba'i rgyu/ /gnas pas kyang ni ji ltar bskyed/ /'bras bu yod pa dang 'brel pa ste yang dag par 'brel ba'i rgyu 'gyur ba med pa'i rang bzhin can gnas pas kyang ji ltar bskyed par 'gyur/'dir/ rgyu ni rnam par 'gyur ba na/ /gzhan gyi rgyu ru 'gyur ba yin / /zhes bya ba'i rgyu rgyu'i dngos por rtogs bzhin pa ni gdon mi za bar rnam par 'gyur ba yin dgos la/gang zhig rnam par mi 'gyur ba de ni rgyu'i mtshan nyid dang ldan pa ma yin pas 'bras bu dang 'brel pas ji ltar bskyed par 'gyur te/ 'bras bu yod pa nyid kyi phyir ro/ /'on te 'bras bu yod pa yang bskyed par mi nus pa'i phyir 'bras bu dang ma 'brel zhing / yang dag par 'brel ba med pa'i rgyu kho nas 'bras bu bskyed par 'gyur ro snyam na/'di yang mi rigs so zhes gsungs pa ni/ ci ste rgyu 'bras ma 'brel na/ /'bras bu gang zhig skyed par byed/ /ces bya ste/ gal te rgyu 'bras bu dang ma 'brel par 'dod na/ da ni 'bras bu gang zhig skyed par byed de//ma 'brel pa'i phyir 'bras bu'o cog skyed par byed pa'am yang na cung zad kyang skyed par byed par mi 'gyur te/ 'brel ba med pa'i phyir ro zhes bya bar dgongs pa'o/ /gzhan yang / 'dir gal te rgyus 'bras bu skyed par byed na/ des 'bras bu de mthong nas sam ma mthong bar skyed par byed grang na/gnyi ga ltar na yang mi rung ngo zhes gsungs pa ni/ rgyus ni mthong dang ma mthong bar/ /'bras bu skyed par mi byed do/ /zhes bya ba'o/ /de la gal te mthong nas skyed par byed do zhes rtog na/ de ni mi rigs te/ gang gi phyir yod pa kho na mthong bar nus kyi/yod pa ma yin pa ni ma yin no/ /yod pa yin no zhe na ni/ de bskyed par bya ba ma yin te/ yod pa'i phyir ro/ /de ltar na re zhig rgyus 'bras bu mthong nas skyed par mi byed do/ /ma mthong bar yang skyed par mi byed de/ 'bras bu thams cad kyi skyed par byed pa nyid du thal bar 'gyur ba'i phyir ro//ci ste mthong ba 'di go ci zhig yin zhe na/ brjod par bya ste/ mthong ba ni dmigs pa'o zhes bya ba 'di ni 'jig rten du grags pa yin no/ /gal te dbang po med pas sa bon la sogs pa dag la 'di mi srid pa ma yin nam zhe na/ srid dam mi srid kyang rung ste/kho bo cag la ni brgal zhing brtag par ni mi bya ste/ 'o na su la zhe na/ skye bar smra ba de la'o/ /de la gal te skye bar smra ba po mthong nas skyed par byed do zhes smra na/ sa bon la sogs pas mthong ngo zhes bya ba gang yin pa 'di ni 'jig rten du ma mthong ngo zhes de la brjod par bya'o//de'i phyir rtog pa 'di mi rigs so/ /ci ste ma mthong bar zhes rtog par byed na/ de lta na yang gang ma mthong ba gang cung zad cig yod pa de thams cad skyed par byed par 'gyur na/ bskyed pa yang ma yin no/ /de'i phyir ma mthong bar yang skyed par byed pa ma yin no/ /kho bo cag ni mi 'dod pa bsgrubs pas gzhan gyis brtags pa 'gog par byed pa yin te/skyes bu la sogs pa rgyur smra ba 'gro ba blo sngon du gtong ba'i byed pa po can du khas len pa rnams dang / gcer bu pa sa bon la sogs pa dbang po gcig par rdzogs pa rnams la ni thal bar 'gyur ba ldog pa ma yin te/de'i phyir nyes pa med do/ /gzhan yang gal te rgyu dang 'bras bu la phan tshun tshogs pa'i mtshan nyid kyi phrad pa yod na ni de'i tshe de gnyis bskyed bya skyed byed kyi dngos por 'gyur te/ gang gi phyir phan tshun phrad pa med par snang ba dang mun pa dag gam/ /'khor ba dang mya ngan las 'das pa dag la ni bskyed bya skyed byed kyi dngos po ma mthong ngo //de'i phyir rgyu dang 'bras bu gnyis bskyed par bya ba dang skyed par byed pa'i dngos por 'dod pa na/ gzhan gyis phrad pa gdon mi za bar khas blang dgos na/ de yang rnam par dpyad pa na dus gsum char du yang yod pa ma yin te/'di'i phyir yang rgyus 'bras bu bskyed pa ma yin no/ /ji ltar phrad pa yod pa ma yin pa de ltar bstan pa'i phyir/ 'bras bu 'das pa rgyu 'das dang / /ma skyes pa dang skyes pa dang / /lhan cig phrad par 'gyur ba ni/ /nam yang yod pa ma yin no/ /zhes gsungs so/ /re zhig 'bras bu 'das pa ni rgyu 'das pa dang /lhan cig phrad pa nam yang ste gzhar yang yod pa ma yin te/ dus gnyi ga yang 'das pa nyid kyis yod pa ma yin pa'i phyir ro/ /'bras bu 'das pa ni rgyu ma skyes pa dang yang phrad pa nam yang yod pa ma yin te/ zhig pa dang ma skyes pa nyid kyis gnyi ga yang yod pa ma yin pa'i phyir dang dus tha dad pa'i phyir ro//'bras bu 'das pa yang rgyu skyes pa da ltar ba dang yang phrad pa yod pa ma yin te dus tha dad pa'i phyir dang / 'bras bu zhig pa ni yod pa ma yin pa'i phyir mo gsham gyi bu dang lha sbyin bzhin no snyam du dgongs pa'o/ /ji ltar 'bras bu 'di rgyu 'das pa dang ma 'ongs pa dang da ltar ba dang lhan cig phrad pa nam yang yod pa ma yin pa de bzhin du/'bras bu da ltar ba rgyu dus gsum pa dang lhan cig phrad pa yod pa ma yin no zhes bstan pa'i phyir/ 'bras bu skyes pa rgyu ma skyes/ /'das pa dang ni skyes pa dang / /lhan cig phrad par 'gyur ba ni//nam yang yod pa ma yin no/ /zhes bya ba gsungs pa la/ 'bras bu skyes pa ni rgyu ma skyes pa 'das pa dang lhan cig phrad pa yod pa ma yin te/ dus tha dad pa'i phyir ro/ /'bras bu da ltar ba ni rgyu da ltar ba dang yang lhan cig phrad pa yod pa ma yin te/ rgyu dang 'bras bu dag cig car med pa'i phyir dang /yod zin pa la phrad pa don med pa'i phyir ro/ /yod pa phan tshun ltos pa med pa dag la ni yang phrad pas dgos pa ci zhig yod de/ de'i phyir phrad pa med do/ /da ni ji ltar 'bras bu ma 'ongs pa yang rgyu 'das pa dang ma 'ongs pa dang da ltar byung ba dang lhan cig phrad pa yod pa ma yin pa de ltar bstan pa'i phyir/'bras bu ma skyes rgyu skyes dang / /ma skyes pa dang 'das pa dang / /lhan cig phrad par 'gyur ba ni/ /nam yang yod pa ma yin no/ /zhes bya ba gsungs te/ 'bras bu ma skyes pa ni med pa yin la/ de ni rgyu dus tha dad pa dang / da ltar ba dang 'das pa dang lhan cig phrad pa yod pa ma yin te/dus tha dad pa'i phyir ro/ /rgyu ma 'ongs pa dang yang lhan cig phrad pa yod pa ma yin te/ gnyi ga yang med pa'i phyir ro/ /gang gi tshe de ltar rnam pa thams cad du rgyu dang 'bras bu gnyis phrad pa yod pa ma yin pa de'i tshe/ phrad pa yod pa ma yin na/ / rgyus ni 'bras bu ji ltar bskyed/ /phrad pa yod pa ma yin pa'i phyir rgyus 'bras bu mi bskyed pa nyid de/ mo gsham gyi bu bzhin no snyam du dgongs pa'o/ /ci ste yang phrad pa yod pa nyid yin dang / rgyus 'bras bu bskyed do snyam na/ de yang mi rigs te/ dus gsum char du yang phrad pa ma dmigs pa'i phyir ro//ci ste yang rgyu dang 'bras bu gnyis ci zhig ltar phrad par rtog na/ de lta na yang / phrad pa yod pa yin na yang / rgyus ni 'bras bu ji ltar bskyed de/ 'bras bu lhan cig pa yang skye ba don med pa'i phyir dang /lhan cig ma yin pa rnams kyang phrad par mi rigs pa'i phyir ro zhes bya bar dgongs pa'o/ /gzhan yang / gal te 'bras bus stong pa'i rgyus/ /ji ltar 'bras bu skyed par byed/ /gal te 'bras bus mi stong rgyus/ /ji ltar 'bras bu skyed par byed/ / rgyu gang zhig 'bras bu skyed par byed par 'dod pa de des stong pa zhig gam mi stong pa zhig gis 'bras bu skyed par byed grang / de la 'bras bus stong zhing bral ba'i rgyus ni 'bras bu skyed par mi byed de/ rgyu ma yin pa ltar 'bras bus stong pa'i phyir ro/ /'bras bus mi stong ba'i rgyus kyang 'bras bu skyed par mi byed de/yod pa'i phyir bu yod pa'i lha sbyin bzhin no/ /de ltar na/ re zhig 'bras bus stong pa'am mi stong pa'i rgyus 'bras bu skyed par byed pa ma yin no/ /'bras bu gang zhig skye ba de yang mi stong pa'am stong pa zhig bskyed grang / de la/ 'bras bu mi stong skye mi 'gyur//mi stong 'gag par mi 'gyur ro/ /mi stong de ni ma 'gags dang / /ma skyes par yang 'gyur ba yin/ /'bras bu mi stong pa ni rten cing 'brel bar ma byung zhing rang bzhin gyis rnam par gnas pa yin la/ 'bras bu rnam par gnas pa de lta bu de ni skye bar mi 'gyur zhing / rang bzhin la ldog pa med pas 'gag par mi 'gyur ro/ /de'i phyir de mi stong par 'dod pa na mi skye ba dang mi 'gag par gyur na/ de ltar ni 'dod pa ma yin no/ /de'i phyir 'bras bu de mi stong pa ma yin te/ skye ba dang 'gag par khas blangs pa'i phyir ro/ /da ni 'bras bu stong pa de yang yod pa ma yin te/skye ba dang 'gag pa med pa nyid du thal bar 'gyur ba'i phyir ro zhes bstan pa'i phyir/ /stong pa ji ltar skye 'gyur zhing / /stong pa ji ltar 'gag par 'gyur/ /stong pa de yang ma 'gags dang / /ma skyes par yang thal bar 'gyur/ /zhes bya ba gsungs te/ de la stong pa ni gang rang bzhin gyis med pa la brjod la/gang rang bzhin gyis med pa de ni ji ltar skye ba'am 'gag par 'gyur te/ nam mkha' la sogs pa rang bzhin gyis med pa la ni skye ba'am 'jig pa ma mthong ngo / /de'i phyir 'bras bu de stong par 'dod pa na yang ma skyes pa dang ma 'gags par thal bar 'gyur ro//gzhan yang / gal te rgyu gang zhig 'bras bu skyed par byed pa na/ de 'bras bu las tha dad pa'am/ /tha mi dad pa zhig gis bskyed grang na/ gnyi ga ltar yang mi 'thad do/ /zhes gsungs pa ni/ rgyu dang 'bras bu gcig nyid du/ /nam yang 'thad par mi 'gyur ro/ /rgyu dang 'brad bu gzhan nyid du//nam yang 'thad par mi 'gyur ro/ /zhes bya ba'o/ /'di ni dam bca' ba tsam zhig yin te/ ji ltar grub ce na/ bstan pa'i phyir/ rgyu dang 'bras bu gcig nyid na/ /bskyed bya skyed byed gcig tu 'gyur/ /rgyu dang 'bras bu gzhan nyid na/ /rgyu dang rgyu min mtshungs par 'gyur//zhes gsungs te/ gal te rgyu dang 'bras bu gcig nyid yin na ni/ de'i tshe bskyed par bya ba dang skyed par byed pa gnyis gcig pa nyid du khas blangs par 'gyur na/ de gnyis ni gcig pa nyid kyang ma yin te pha dang bu dang mig dang mig gi rnam par shes pa dag kyang gcig tu thal bar 'gyur ba'i phyir ro//de lta na re zhig rgyu dang 'bras bu la gcig nyid yod pa ma yin no/ /da ni gzhan nyid kyang yod pa ma yin te/ ci'i phyir zhe na/ gal te rgyu dang 'bras bu gzhan nyid yin na ni/ de'i tshe gzhan la ltos pa med pa'i phyir 'bras bu rgyu la ltos pa med pa nyid du 'gyur na/de ni de ltar yang ma yin te/ de'i phyir rgyu dang 'bras bu la gzhan nyid kyang yod pa ma yin no/ /gang dag la de ltar rnam par dpyad pa na/ de nyid dang gzhan nyid yod pa ma yin pa de dag ni nam yang bskyed par bya ba dang skyed par byed pa'i dngos po ma yin te/ de'i phyir rgyus 'bras bu bskyed pa ma yin no//gzhan yang gal te rgyus 'bras bu skyed par byed na/ des 'bras bu de ngo bo nyid kyis yod pa'am/ med pa zhig bskyed/ de las cir 'gyur zhe na/ gnyi ga ltar yang mi rigs so zhes gsungs pa ni 'bras bu ngo bo nyid yod na rgyus ni ci zhig bskyed par 'gyur/'bras bu ngo bo nyid med na/ /rgyus ni ci zhig bskyed par 'gyur/ /zhes bya ba'o/ /de la 'bras bu gang zhig ngo bo nyid kyis yod pa rang bzhin gyis bdog pa de ni yang mi skye ste/ yod pa'i phyir bum pa yod pa bzhin no/ /'bras bu ngo bo nyid kyis med pa gang yin pa de yang rgyus bskyed pa ma yin te/ngo bo nyid kyis yod pa ma yin pa'i phyir bong bu'i rwa bzhin no/ /gal te gzugs brnyan gyis ma nges pa nyid do zhe na/ ma nges pa nyid du 'gyur mod/ /dngos po rnams rang bzhin med par ni grub bo/ /de'i phyir rang bzhin du smra ba btang bar 'gyur zhing / kho bo cag smra ba'i rjes su smra ba nyid du 'gyur ro//dngos po rang bzhin dang bcas pa 'ga' yang med pas 'gal zla med pa'i phyir dngos po rang bzhin med pa yang med de/ de'i phyir ma nges pa nyid du ga la 'gyur/ 'di ltar kho bo cag gi ltar na ni gzugs brnyan rang bzhin dang bcas pa ma yin zhing / rang bzhin med pa yang ma yin te/ chos can med na de'i chos dag kyang med pa'i phyir ro/ /'phags pa rnams kyis ni gzugs brnyan zhes bya ba cung zad cig rang bzhin dang rang bzhin med par gzigs pa ma yin no/ /de la sngar ni/ 'bras bu mi stong skye mi 'gyur/ /zhes bya ba la sogs pa tshigs su bcad pa gnyis kyis dngos su 'bras bu skye ba'i byed pa po nyid yin pa bkag pa yin la/de lta ni rgyus 'bras bu skye ba'i bya ba'i rab tu sbyor bar byed pa po nyid yin pa bkag pa yin no zhes bya ba 'di ni gong ma las 'di'i khyad par yin no zhes bya bar shes par bya'o/ / 'dir smras pa/ gal te yang rgyu 'bras bu skye ba'i bya ba'i rab tu sbyor bar byed pa nyid yin pa bkag mod kyi/ de lta na yang re zhig rgyu ni rang bzhin gyis yod pa yin la/ 'bras bu med na ni rgyu'i rgyu nyid kyang mi 'grub ste/ de'i phyir 'bras bu yang yod par 'gyur ro/ /brjod par bya ste/ gal te'ang skyed par byed pa ma yin bzhin du rgyu nyid yin par 'gyur na ni rgyur gyur pa zhig na/skyed par byed pa ma yin na/ /rgyu nyid 'thad par mi 'gyur ro/ /ci ste de ltar rgyu'i rgyu nyid yod pa ma yin mod kyi/ de lta na yang 'bras bu ni re zhig yod pa yin la/ rgyu med par ni 'bras bu rigs pa yang ma yin te/ de'i phyir 'bras bu yod pas rgyu yang yod par 'gyur ro snyam na/brjod par bya ste/ gang gi tshe skyed par mi byed pa la rgyu'i rgyu nyid yod pa ma yin par bshad pa/ de'i tshe/ rgyu nyid 'thad pa yod min na/ /'bras bu gang gi yin par 'gyur/ /de'i phyir 'bras bu yang med do/ /'dir smras pa/ rgyu 'ba' zhig 'bras bu skye ba'i bya ba'i rab tu sbyor bar byed pa nyid ma yin gyi/'o na ci zhe na/ rgyu dang rkyen tshogs pas 'bras bu skyed do zhe na/ de ni mi rigs te/ nyes pa brjod zin pa'i phyir ro/ /gzhan yang rgyu dang rkyen gyi tshogs pa 'di gal te 'bras bu skyed par byed par rtog na/ /ci ste bdag nyid kyis bdag nyid skyed par byed pa zhig gam/'on te ma yin pa zhig yin grang / gal te skyed par byed pa zhig yin no zhes rtog na ni de mi rung ste/ bdag gi dngos po ma rnyed pa ni rab tu sbyor bar byed pa nyid du ma mthong ba de'i phyir gdon mi za bar tshogs pas bdag gi dngos po rnyed par 'gyur dgos na/bdag gi dngos po rnyed pa ni yang bdag nyid bskyed pa la rab tu sbyor bar byed pa nyid du mi rigs te/ de'i phyir tshogs pas rang gi bdag nyid mi skyed la/ gang zhig bdag nyid mi skyed pa des ni ji ltar 'bras bu skyed par nus zhes bstan pa'i phyir/ rgyu rnams dang ni rkyen dag gis//tshogs pa gang yin de yi ni/ /bdag gis bdag nyid mi skyed na/ /'bras bu ji ltar skyed par byed/ /de phyir tshogs pas byas pa med/ /ces gsungs te/ rgyu rnams dang rkyen dag gi tshogs pa gang yin pa de re zhig bdag gis bdag nyid mi skyed de/ bdag nyid la byed pa 'gal ba'i phyir dang / bdag nyid skye ba don med pa'i phyir ro/ /gang zhig re zhig bdag nyid mi skyed pa des 'bras bu ji ltar skyed par byed de/ mo gsham gyi bu bdag nyid skyed par mi nus pas bu skyed par byed do zhes bya bar mi rigs so/ /de ltar tshogs pa yang rang gi bdag nyid skyed par byed pa ma yin par 'bras bu bskyed pa mi rigs te/de'i phyir tshogs pas byas pa'i 'bras bu med do/ /ci ste yang gal te tshogs pas byas pa'i 'bras bu med na/ de lta na 'o na tshogs pa ma yin pas byas pa yod do snyam na/ brjod pa/ tshogs min byas pa'i 'bras bu med/ /gang gi tshe tshogs pas byas pa'i 'bras bu yod pa ma yin pa de'i tshe ji ltar tshogs pa ma yin pas byas pa shin tu 'gal ba yod par ga la 'gyur te/ tshogs pa ma yin pas byas pa'i 'bras bu yang yod pa ma yin no/ /ci ste yang 'bras bu med mod kyi/de lta na yang re zhig rgyu dang rkyen gyi tshogs pa ni yod pa yin la/ 'bras bu med par ni rgyu dang rkyen gyi tshogs pa srid pa yang ma yin te/ de'i phyir 'bras bu yang yod par 'gyur ro snyam na/ brjod par bya ste/ gal te 'bras bu nyid yod na/ rgyu dang rkyen gyi tshogs pa yang yod par 'gyur na/gang gi tshe ji skad bshad pa'i rigs pas 'bras bu nyid yod pa ma yin pa de'i tshe/ 'bras bu yod pa ma yin na/ /rkyen gyi tshogs pa ga la yod/ /'bras bu med pa nyid yin na rgyu mtshan med pas rkyen gyi tshogs pa dag kyang yod pa ma yin no snyam du dgongs pa yin no//'phags pa rgya cher rol pa'i mdo las kyang / mchu dang lkog ma rkan la brten nas ni/ /lce bsgyur ba las yi ge'i sgra 'byung yang / /lkog mar brten nas ma yin rkan las min/ /re re la ni yi ge dmigs su med/ /tshogs pa de la brten nas ngag de ni/ / yid kyi blo yi dbang gis 'byung mod kyi/ /yid dang ngag ni mi snang gzugs med de/ /nang dang phyi rol dag na'ang dmigs su med/ /mkhas pas ngag skad sgra dang dbyangs rnams kyi/ /skye dang 'jig la rnam par brtags byas na/ /de tshe ngag kun brag ca lta bu dang / /skad cig pa dang snying po med par mthong //zhes gsungs pa dang / de bzhin du 'phags pa nye bar 'khor gyis zhus pa las kyang / bcom ldan 'das kyis/ /shin tu dga' ba'i bstan pa 'di la ni/ /khyim pa'i rtags spangs rab tu byung gyis la/ /'bras bu yod pa'i mchog tu 'gyur gyis zhes//thugs rje can gyis de skad bstan pa'ang mdzad/ /khyim pa'i rtags spangs rab tu byung gyur nas/ /'bras bu thams cad thob par gyur yang ni/ /chos kyi rang bzhin dag la gzhal byas na/ /'bras bu kun med 'bras bu thob pa'ang med/ /'on kyang 'bras bu thob pa thob 'gyur ba//kye ma mi mchog thugs rje ldan pa yis / /rgyal bas rigs pa shin tu legs bshad ces/ /de dag ngo mtshar che ba skye bar 'gyur/ /zhes gsungs pa dang / de bzhin du 'phags pa shes rab kyi pha rol tu phyin pa las kyang / kau shi ka byang chub sems dpa' sems dpa' chen po go cha chen po bgos pa des/gzugs la gnas par mi bya'o/ /tshor ba la ma yin/ /'du shes la ma yin/ 'du byed rnams la ma yin/ rnam par shes pa la gnas par mi bya'o/ /rgyun du zhugs pa'i 'bras bu la ma yin/ lan cig phyir 'ong ba'i 'bras bu la ma yin/ phyir mi 'ong ba'i 'bras bu la ma yin/dgra bcom pa nyid kyi 'bras bu la ma yin/ rang sangs rgyas nyid la ma yin/ yang dag par rdzogs pa'i sangs rgyas nyid la gnas par mi bya'o zhes gsungs so/ /slob dpon zla ba grags pa'i zhal snga nas sbyar ba'i tshig gsal ba las/ tshogs pa brtag pa zhes bya ba rab tu byed pa nyi shu ba'i 'grel pa'o// //'dir smras pa/ dus ni rang bzhin gyis yod pa nyid de/ 'byung ba dang 'jig pa'i rgyu yin pa'i phyir ro/ /'di na myu gu la sogs pa dag dus 'ga' zhig la ltos nas ni 'byung zhing skye bar 'gyur la/dus kyi khyad par 'ga' zhig la ltos nas ni 'jig cing rnam par 'jig par 'gyur gyi/ rgyu dang rkyen gyi tshogs pa yod kyang thams cad kyi tshe ni ma yin no/ /de'i phyir dus yod pa nyid de/ 'byung ba dang 'jig pa'i rgyu yin pa'i phyir ro/ /brjod par bya ste/ gal te 'byung ba dang 'jig pa dag nyid yod na ni/dus 'byung ba dang 'jig pa'i rgyu nyid du 'gyur na/ yod pa ni ma yin no/ /ji ltar med pa de ltar bstan pa'i phyir/ /'jig pa 'byung ba med par ram/ /lhan cig yod pa nyid ma yin/ /'byung ba 'jig pa med par ram/ / lhan cig yod pa nyid ma yin/ /zhes gsungs te/ 'dir gal te 'byung ba dang 'jig pa dag yod par gyur na / phan tshun med par yod pa'am/ lhan cig yod par 'gyur ba zhig na/ rnam par dpyad pa na gnyi ga ltar yang yod pa ma yin no/ /ji ltar zhe na/de la 'jig pa rnam par 'jig pa ji ltar 'byung ba ste skye ba med par yod pa ma yin pa de ltar bstan pa'i phyir/ 'jig pa 'byung ba med par ni/ /ji lta bur na yod par 'gyur/ /skye ba med par 'chi bar 'gyur/ /'jig pa 'byung ba med par med/ /ces gsungs te/ 'jig pa rnam par 'jig pa ni 'byung ba med par ji lta bur na yod par 'gyur/ ji lta bur na zhes bya ba 'dis ni gtan mi srid par grags pa ston par byed pa'o/ /ji lta bur na yod par 'gyur te/ de ni yod pa ma yin no zhes bya bar dgongs pa yin no/ /yang gal te 'byung ba med par 'jig pa yod par 'gyur na nyes pa cir 'gyur zhe na/brjod pa/ skye ba med par 'chi bar 'gyur te/ ma skyes pa 'chi bar 'gyur na/ ma skyes par ni 'chi bar yang ma mthong ngo / /de'i phyir 'jig pa 'byung ba med par yod par mi 'os so/ /'dir tshigs su bcad pa'i phyed gong mas ni dam bcas pa yin la/rkang pa bar mas ni thal ba bsgrubs pa yin zhing / tha mas ni mjug bsdus pa yin no zhes bya bar shes par bya'o/ /de ltar re zhig 'byung ba med par 'jig par mi rigs so zhes bstan nas/ da ni 'jig pa 'byung ba dang lhan cig tu yang ji ltar yod pa ma yin pa de ltar bstan pa'i phyir/'jig pa 'byung dang lhan cig tu/ /ji ltar yod pa nyid du 'gyur/ /'chi ba skye dang dus gcig tu/ /yod pa nyid ni ma yin no/ /zhes gsungs te/ gal te 'jig pa 'byung ba dang lhan cig tu ste dus gcig tu cig car yod par 'gyur na ni/de ltar na 'chi ba dang skye ba dus gcig par 'gyur na/ phan tshun 'gal ba de gnyis ni snang ba dang mun pa ltar dus gcig gi tshe yang yod pa ma yin no/ /de'i phyir 'jig pa ni 'byung ba dang lhan cig tu yang grub pa yod pa ma yin no zhes bya bar gnas so//gang gi tshe de ltar 'jig pa 'byung ba med par ram/ lhan cig tu yang grub pa yod pa ma yin pa de bzhin du 'byung ba yang 'jig pa med par ram/ lhan cig tu grub pa yod pa ma yin no zhes bstan pa'i phyir/ 'byung ba 'jig pa med par ni/ / ji ltar yod pa nyid du 'gyur/ /dngos po rnams la mi rtag nyid/ /nam yang med pa ma yin no/ /zhes gsungs so/ /'byung ba ni 'jig pa med par mi rigs pa nyid de/ gang gi phyir dngos po 'byung ba'i chos can skye ba'i chos can rnams la mi rtag pa nyid nam yang med pa ma yin gyi/'o na ci zhe na/ thams cad kyi tshe yod pa yin te/ dngos po thams cad dus kun du/ /rga dang 'chi ba'i chos yin na/ /gang dag rga dang 'chi med par/ /gnas pa'i dngos po gang zhig yin/ /zhes bshad do/ /gang gi tshe de ltar dngos po thams cad rtag tu mi rtag pa dang rjes su 'brel pa de'i tshe gang 'jig pa dang bral bar gyur pa'i/gnas skabs de 'ga' yang yod par ga la 'gyur/ de'i phyir 'jig pa med par 'byung ba srid pa yod pa ma yin no/ /de ltar na re zhig 'byung ba 'jig pa med par yod pa ma yin no//'di dag gi dpyad pa lhag ma ni 'dus byas brtag par dpyad zin pa'i phyir yang rnam par mi dpyad do/ /gang zhig 'jig pa ni rgyu dang bcas pa yin te/ 'dus byas kyi mtshan nyid yin pa'i phyir skye ba bzhin no zhes sgrub byed bkod pa rjes su brjod nas/ tha ma'i sems dang sems las byung ba'i mtshan nyid dag gis ma nges par smra ba des ni mi rigs pa smras pa yin te/de'i 'jig pa yang skye ba'i rkyen can yin pa nyid kyis rgyu dang bcas pa'i phyir dang / bsgrub par bya ba dang mtshungs pa'i phyir na/ ma nges pa nyid med pa'i phyir ro//gang yang dngos po'i bdag nyid kyi ngo bo nyid ni ma byung ba las byung ba skye ba zhes bya ste/ de'i phyir rdzas su yod pa rnams ni skye bar grub pa'i phyir tha snyad du yang dpe med pa yin no zhes bstan pa de yang mi rigs te/ gzugs brnyan la sogs pa rdzas su med pa rnams rgyu dang bcas pa nyid du khas blangs pa'i phyir ro//slob dpon gyi zhal snga nas ji skad du/ /gang dag rgyu las 'byung 'gyur zhing / /gang dag de med pas med pa/ /de dag gzugs brnyan dang mtshungs par/ /gsal ba ji lta bur mi bzhed//ces gsungs so/ /de'i phyir tha snyad du dpe ma grub pa ga la yod/ gal te yang gang dngos po las de nyid dang gzhan nyid du brjod par mi nus pa de ni kun rdzob tu yang yod pa ma yin no zhes smra na ni/ sngon po la sogs pa yang yod pa ma yin no zhes brjod par bya ste/ji skad du/ gzugs kyi dngos po ming tsam phyir/ /nam mkha' yang ni ming tsam mo/ /'byung med gzugs lta ga la yod/ /de'i phyir ming tsam nyid kyang yin/ /zhes gsungs so/ /gzhan yang gang gi gnas skabs kyi khyad par skye bar 'gyur ba/dbu ma pa rnams la ni dngos po'i rang gi ngo bo yod par ga la 'gyur/ de'i phyir dpe ma grub par brjod pa ni mi rigs pa nyid do/ /gang yang 'jig pa ni rgyu dang bcas pa ma yin te/ 'jig pa dang mi ldan pa nyid kyi phyir dper na 'dus ma byas bzhin no zhes smra ste/de skad smra ba de la ni gtan tshigs 'dis 'gal ba chen po 'dren pa yin no/ /ji ltar gtan tshigs 'dis 'jig pa la rgyu med par sgrub par byed pa de ltar 'dus byas kyi mtshan nyid ma yin pa yang sgrub par byed do/ /de bzhin du 'du byed kyi phung pos bsdus pa dang / rten cing 'brel par 'byung ba'i yan lag gis bsdus pa la sogs pa thams cad kyang 'gal bar byed pas 'di ni mi rigs so/ /de bzhin du rnam par shes pa ni yul gyi rang gi ngo bo yongs su gcod par byed pa ma yin te/ rnam par shes pa dang mi ldan pa'i phyir 'dus ma byas bzhin no zhes bya ba la sogs pas thams cad bkag pa'i phyir 'di la mi 'dod pa chen po grub par 'gyur bas 'di gzung bar mi bya'o//da ni ji ltar 'byung ba 'jig pa dang lhan cig grub pa yod pa ma yin pa de ltar bstan pa'i phyir/ 'byung ba 'jig dang lhan cig tu//ji ltar yod pa nyid du 'gyur/ /skye ba 'chi dang dus gcig tu/ /yod pa nyid ni ma yin no/ /zhes gsungs te/ gal te 'byung ba 'jig pa dang lhan cig yod par gyur na ni/ de'i tshe skye ba dang 'chi ba dag dus gcig pa nyid du 'gyur na srid pa yang ma yin no//de'i phyir 'byung ba dang 'jig pa dag lhan cig pa nyid du grub pa yang yod pa ma yin no/ /ci ste skye ba dang 'chi ba dag lhan cig gi ngo bo 'am tha dad pa'i ngo bor grub pa yod pa ma yin pa de lta na yang 'byung ba dang 'jig pa dag yod de/ brjod par bya ba yin pa'i phyir rnam par shes pa bzhin no snyam na/brjod par bya ste/ gal te brjod par bya ba nyid kyis de dag grub par 'dod na ni/ mo gsham gyi bu yang 'dod par bya'o/ /gzhan yang / gang dag phan tshun lhan cig gam/ /phan tshun lhan cig ma yin par/ /grub pa yod pa ma yin pa //de dag grub pa ji ltar yod / /gang las 'byung ba dang 'jig pa dag 'grub par 'gyur ba lhan cig pa nyid dang lhan cig pa nyid ma yin pa las ma gtogs pa phyogs gzhan ni med do/ /brjod du med pa nyid du grub par 'gyur ro snyam na/ brjod du med pa zhes bya ba 'di ci zhig gal te 'dres par gyur pa yin na de ni mi 'thad de/so sor ma grub pa dag la 'dres par gyur pa med pa'i phyir ro/ /brjod du med pa ni nges par gzung du med pa'i rang bzhin nyid yin no zhe na/ de lta na ni nges par gzung du med pa'i rang gi ngo bo yin pa'i phyir mo gsham gyi bu'i sngo bsangs dang dkar sham nyid la sogs pa ltar 'byung ba dang 'jig pa dag yod pa ma yin no zhes bya bar 'gyur ro//gang gi tshe de ltar 'byung ba dang 'jig pa dag yod pa ma yin pa de'i tshe de dag gi rgyu dus kyang med do zhes bya bar grub bo//gzhan yang 'di na 'byung ba dang 'jig pa de dag rtog pa na dngos po zad pa'i chos can nam/ ma zad pa'i chos can zhig la rtog grang na/ gnyi ga ltar yang mi 'thad do zhes bya bar bstan pa'i phyir/ zad la 'byung ba yod ma yin/ /ma zad pa la'ang 'byung ba med//zad la 'jig pa yod ma yin/ /ma zad pa la'ang 'jig pa med/ /ces bya ba gsungs so/ /de la zad pa ste dngos po zad pa'i chos can la ni 'gal ba'i chos yod pas 'byung ba rigs pa ma yin no/ /dngos po'i mtshan nyid dang mi ldan pa'i phyir ma zad pa la yang 'byung ba rigs pa ma yin te/bong bu'i rwa bzhin no/ /de bzhin du/ zad pa la 'jig pa yod pa ma yin te zad pa'i chos can ni med pa yin te/ de la rten med pa'i phyir 'jig pa mi rigs so/ /de bzhin du ma zad pa la'ang 'jig pa med de/ma zad pa'i chos can gyi dngos po ni dngos po'i mtshan nyid dang mi mthun pa yin na/ yod pa ma yin pa de la 'jig pa yod par ga la 'gyur/ 'byung ba dang 'jig pa gang dag dngos po zad pa dang / ma zad pa'i chos can la mi srid pa de dag ni/ yod pa ma yin pa nyid de/ de'i phyir 'byung ba dang /'jig pa dag med do/ /'dir smras pa/ /dngos po rnams kyi 'byung ba dang / 'jig pa ni yod pa nyid de/ de dag gi rten chos can yod pa'i phyir ro/ /'dir 'byung ba dang / 'jig pa dag ni dngos po la brten pa yin la/ dngos po de yang re zhig yod pa yin no//de yod pas de la brten pa'i chos dag kyang yod par 'gyur ro/ /brjod par bya ste/ /gal te dngos po yod na ni/ /dngos po la brten pa'i chos de gnyis yod par 'gyur na/ gang gi tshe dngos po yod pa ma yin pa de'i tshe/ dngos po yod pa ma yin par//'byung dang 'jig pa yod ma yin / /yang ci'i phyir dngos po yod pa ma yin zhe na/ 'di ltar/ 'byung dang 'jig pa med par ni/ /dngos po yod pa ma yin no/ /'byung ba dang 'jig pa dag ni dngos po'i mtshan nyid du gyur pa yin na / de dag ni bkag pa yin no//gang gi tshe bkag pa de'i tshe dngos po'i mtshan nyid 'byung ba dang 'jig pa med par dngos po'i mtshan nyid dang mi mthun pa yod par ga la 'gyur/ dngos po med na ni 'byung ba dang / 'jig pa dag kyang yod pa ma yin no/ /gzhan dag ni 'byung ba dang 'jig pa dag yod pa yin te/dngos po'i chos yod pa'i phyir ro/ /'dir gang yod pa ma yin pa de la ni dngos po'i chos med de/ dper na sbal pa'i ral pa bzhin no/ /'byung ba dang 'jig pa gnyis ni dngos po'i chos kyang yin no/ /de'i phyir de dag yod do zhe na/ 'di la brjod par bya ste/gal te 'ga' zhig la don dam par 'byung ba dang 'jig pa dag yod na ni/ de dngos po zhes bya bar brjod par rigs par 'gyur na/ de dag ni med de/ de'i phyir/ 'byung dang 'jig pa med na ni/ /dngos po yod pa ma yin no ste/ dngos po ni 'byung ba dang 'jig pa yod na yod pa nyid yin pa'i phyir ro snyam du dgongs pa'o//de med na ni gtan tshigs ma grub pa'i don nyid yin no/ /de bzhin du/ dngos po yod pa ma yin par/ /'byung dang 'jig pa yod ma yin te/ rten med pas brten pa ma grub bo zhes bya bar dgongs pa yin no zhes phyed gong ma phyed 'og mar byas nas rnam par 'chad do//gzhan yang 'dir 'byung ba dang 'jig pa de dag rtog pa na dngos po stong pa'am/ mi stong pa la rtog grang na/ /gnyi ga ltar yang mi 'thad do/ /zhes bstan pa'i phyir ro / /stong la 'byung dang 'jig pa dag / 'thad pa nyid ni ma yin no/ /zhes bya ba gsungs te/ rten med pa'i phyir nam mkha'i ri mo bzhin no snyam du dgongs pa yin no/ /de bzhin du/ mi stong la yang 'byung 'jig dag/ 'thad pa nyid ni ma yin no/ /mi stong pa la yod pa'i rang bzhin can yin pa'i phyir/ rten med pas 'byung ba dang 'jig pa 'thad pa yin no//gzhan yang / gal te 'byung ba dang 'jig pa dag yod na/ de dag gcig nyid dam gzhan nyid du yod pa zhig na/ gnyi ga ltar yang mi 'thad do zhes gsungs pa ni/ 'byung ba dang ni 'jig pa dag/ gcig pa nyid ni mi 'thad do//snang ba dang mun pa ltar phan tshun 'gal ba dag ni gcig nyid du mi 'thad pa'i phyir ro/ /'byung ba dang ni 'jig pa dag/ gzhan nyid du yang mi 'thad do/ /gnyi ga phan tshun mi 'khrul pa'i phyir ro/ /'byung ba dang bral ba la ni 'jig pa mi rigs la/ 'jig pa dang bral ba la ni 'byung ba ma mthong ste/de ltar na gnyi ga phan tshun mi 'khrul ba'i phyir ro / /'byung ba dang ni 'jig pa dag/ /gzhan nyid du yang mi 'thad do/ /ci ste zhib mor brtags pa 'dis ci zhig bya/ /gang gi phyir skye bo ba glang rdzi dang bud med yan chad kyis 'byung ba dang 'jig pa mthong ba de'i phyir 'byung ba dang 'jig pa dag yod pa yin te/yod pa ma yin pa'i mo gsham gyi bu ni blta bar mi nus so snyam na/ gal te de ltar/ 'byung ba dang ni 'jig pa dag/ mthong ngo snyam du khyod sems na/ /'di ni ma nges pa yin te/gang dang gang 'jig rten pas mthong ba de dang de yod pa nyid ni ma yin no/ /'di ltar skye bo ba glang rdzi dang bud med yan chad kyis yod pa ma yin yang / dri za'i grong khyer dang / sgyu ma dang / rmi lam dang / mgal me'i 'khor lo dang / smig rgyu'i chu la sogs pa mthong zhing /dbang po la gnod par gyur pa las rab rib can gyi skra shad dang / sbrang ma dang sbrang bu mchu rings dag mthong ba yin te/ de bzhin du 'byung ba dang 'jig pa dag kyang med bzhin du mi shes pa'i gti mug gi rab rib can gyi blo'i mig ldongs par byas pas mthong ba yin no zhes bshad pa/'byung ba dang ni 'jig pa dag/ gti mug nyid kyis mthong ba yin/ /zhes bya ba'o/ / ci ste 'byung ba dang 'jig pa dag yod pa ma yin pa'i rang gi ngo bo can 'di dag gti mug kho nas mthong ba yin no zhes bya ba 'di de ltar cis nges she na/ 'di ni de ltar rigs pas nges pa yin no//'dir rigs pa gang yin zhe na/ 'dir gal te dngos po zhes bya ba 'ga' zhig yod na ni/ de nges par dngos po'am dngos po med pa las skye ba zhig yin/ de bzhin du gal te dngos po med pa zhes bya ba 'ga' zhig yod na ni/ de yang dngos po'am dngos po med pa las skye ba zhig yin grang na/gnyis char gnyi ga ltar yang yod pa ma yin no zhes gsungs pa/ dngos po dngos las mi skye ste/ /dngos po dngos med las mi skye/ /dngos med dngos med mi skye ste/ /dngos med dngos las mi skye'o/ /re zhig dngos po ste yang dag par 'byung ba zhes bya ba ni dngos po ste yang dag par 'byung ba las skye ba yod pa ma yin te/rgyu dang 'bras bu gnyis dus gcig pa med pa'i phyir dang / skye ba rnyed zin pa'i skye ba la yang skye ba don med pa'i phyir ro/ /dngos po ni dngos po med pa las kyang mi skye'o//ci'i phyir zhe na/ dngos po med pa zhes bya ba ni 'jig cing rnam par 'jig pa yin la/ de yang dngos po dang 'gal ba yin te/ dngos po dang 'gal ba de'i phyir de las dngos po ji ltar 'byung bar 'gyur/ gal te 'gyur na ni mo gsham gyi bu mo las kyang bu skye bar 'gyur ro//de'i phyir dngos po ni dngos po med pa las kyang 'byung ba ma yin no/ /da ni dngos po med pa yang dngos po med pa las mi 'byung ste/ dngos po med pa ni dngos po log pa'i rang bzhin can yin te/ de'i phyir de la 'bras bu skyed pa'i nus pa ga la yod/gal te yod na ni mya ngan las 'das pa la yang 'bras bu skyed pa'i mthu yod par 'gyur ro/ /gal te dngos po med pa las dngos po med pa 'byung bar 'gyur na ni/ de'i tshe mo gsham gyi bu mo las kyang bu skye bar 'gyur na/ de ni de ltar yang ma yin te/ de'i phyir dngos po med pa ni/ dngos po med pa las kyang 'byung ba ma yin no/ /da ni dngos po med pa dngos po las kyang mi 'byung ste/ dngos po med pa ni dngos po dang 'gal ba yin na/ de ji ltar dngos po las 'byung bar 'gyur/ gal te 'gyur na ni sgron ma las kyang mun pa 'byung bar 'gyur ro//gang gi phyir de ltar rnam par dpyad na 'byung ba dang 'jig pa dag yod pa ma yin pa de'i phyir gti mug nyid kyis mthong ba yin no zhes bya bar shes par bya'o/ /rnam pa gcig tu na phyogs snga ma 'di gzhan yin no/ /'di ltar 'dir gal te 'byung ba dang 'jig pa dag yod na ni/de dag dngos po la brten pa'am/ dngos po med pa la brten par 'gyur ba zhig na/ dngos po dang dngos po med pa de gnyis ni rnam par dpyad pa na/ thams cad du yod pa ma yin te de'i phyir rten med pas 'byung ba dang 'jig pa dag ga la yod/de'i phyir/ 'byung ba dang ni 'jig pa dag/ gti mug nyid kyis mthong ma yin/ /zhes bya bar shes par bya'o/ /dngos po dang dngos po med pa gnyis ji ltar yod pa ma yin pa de ltar bstan pa'i phyir/ dngos po dngos las mi skye ste//dngos po dngos med las mi skye/ /dngos med dngos med mi skye ste/ /dngos med dngos las mi skye'o/ /zhes gsungs te/ 'di'i don ni gong ma bzhin no/ /gzhan yang gal te dngos po zhes bya ba 'ga' zhig yod na ni/ de skye zhing zad pa dang ldan pas 'byung ba dang 'jig par 'gyur na/dngos po 'ga' yang yod pa ma yin te/ bong bu'i rwa ltar rang bzhin gyis ma skyes pa'i phyir ro/ /ma skyes pa nyid ma grub po zhe na/ /ma grub pa ma yin te/ 'di ltar/ dngos po bdag las mi skye ste/ /gzhan las skye ba nyid ma yin//bdag dang gzhan las skye ba na / /yod min ji ltar skye bar 'gyur/ /'di ni rab tu byed pa dang por rnam par bshad zin pa'i phyir yang mi bshad do/ /gang gi phyir de ltar ji skad bshad pa'i rnam pa dag gis skye ba yod pa ma yin pa de'i phyir de ji ltar skye bar 'gyur te/ji ltar yang skye bar mi 'gyur ba nyid do snyam du dgongs pa yin no/ /dngos po skye ba rnam pa thams cad du yod pa ma yin no zhes bya ba 'di ni de ltar gdon mi za bar khas blang bar bya'o/ /de lta ma yin na ni/ dngos po yod par khas blangs na/ /rtag dang chad par lta bar ni//thal bar 'gyur te/ gang gi phyir/ /dngos po de ni/ rtag dang mi rtag 'gyur phyir ro/ /gang zhig dngos po'i rnam par gzhag pa ji skad bshad pa las 'das nas dngos por lta ba khas len pa de ni gdon mi za bar gsung rab dang shin tu 'gal ba rtag pa dang chad par lta bar 'gyur ro//ci'i phyir zhe na/ gang gi phyir dngos po de brtags pa na rtag pa'am mi rtag pa zhig tu 'gyur grang / gal te rtag pa yin na ni de'i tshe nges par rtag par smra bar 'gyur la/ 'on te mi rtag pa yin na ni de'i tshe nges par chad par smra bar 'gyur ro/ /'dir smras pa/dngos po yod par khas blangs kyang / /chad par mi 'gyur rtag mi 'gyur/ /ci'i phyir zhe na/ gang gi phyir/ 'bras bu rgyu yi 'byung 'jig gi/ /rgyun de srid pa yin phyir ro/ /rgyu dang 'bras bu'i 'byung ba dang 'jig pa'i rgyun gang yin pa de ni kho bo cag gi srid pa ste 'khor ba yin no//de la gal te rgyu 'gags shing de'i rgyu can gyi 'bras bu mi skye na ni/ de'i tshe chad par 'gyur la/ gal te rgyu mi 'gag cing rang gi ngo bos gnas na ni/ de'i tshe rtag par thal bar yang 'gyur na de ni de ltar yang ma yin no/ /de'i phyir dngos po khas blangs su zin kyang rtag pa dang chad par lta bar thal ba yod pa ma yin no//'du byed rnams kyi 'byung ba dang / 'jig pa'i rgyun rgyu dang 'bras bu rnam par ma chad par rim par 'byung ba gang yin pa de nyid 'khor ba yin te/ de'i phyir kho bo cag la nyes pa 'di yod pa ma yin no/ /brjod par bya ste/gal te 'bras rgyu'i 'byung 'jig gi/ /rgyun de srid pa yin gyur na/ /de lta na yang / 'jig la yang skye med pa'i phyir/ /rgyu ni chad par thal bar 'gyur/ /ma yin nam/ gang rgyu'i skad cig ma 'bras bu bskyed par bya ba la rgyur gyur nas 'gag pa/ rgyu'i skad cig ma 'jig pa dang ldan pa de yang mi skye ba'i phyir chad par lta bar 'gyur ro//khyod la skyon 'dir ji ltar mi 'gyur zhe na/ dngos po khas len pa la nyes pa 'dir 'gyur gyi/ ngas ni dngos po khas ma blangs te/ chos thams cad skye ba med pa'i phyir ro/ /gang du/ gang la brten te gang 'byung ba/ /de ni re zhig de nyid min/ /de las gzhan pa'ang ma yin phyir/ /de phyir chad min rtag ma yin/ /zhes bshad pa der yang kho bos tshul 'dis dngos po rnams rang bzhin med par bstan pa yin te/ de lta ma yin te/ dngos po rang gi ngo bo yod na ni sa bon dang myu gu dag gzhan nyid du ji ltar mi 'gyur//de'i phyir thal ba 'di kho bo cag la gnod par byed pa ma yin no/ /de ltar re zhig dngos po yod par khas len na rgyu yang skye ba med pa'i phyir chad par lta bar thal bar 'gyur ba brjod nas/ da ni rtag pa'i nyes par thal bar brjod pa'i phyir/dngos po ngo bo nyid yod na/ /dngos med 'gyur bar mi rigs so/ /zhes bya ba smos te/ gal te rgyu rang bzhin gyis yod par gyur na ni/ /de phyis yod pa ma yin par mi 'gyur te/ rang bzhin la ldog pa med pa'i phyir ro// de'i phyir rtag par lta bar thal ba so na 'dug go/ /gzhan yang / mya ngan 'das pa'i dus na chad/ /srid rgyun rab tu zhi phyir ro/ /gal te yang rgyu dang 'bras bu dag gi 'byung ba dang 'jig pa'i rgyun 'jug pas rtag pa dang chad par lta bar thal ba spong bar byed mod kyi/de lta na yang gang du rgyun de yang 'byung bar mi 'gyur ba mya ngan las 'das pa der ni nges par chad par lta bar 'gyur na / bcom ldan 'das kyis ni chad par lta ba spang bar bya ba gsungs so/ /rnam pa de lta bu ni chad par lta ba yin par mi 'gyur ro zhe na/khyod la gzhan yang ci'i phyir yin par 'gyur te/ mya ngan las 'das pa'i dus su dngos po rnam par chad pa la dmigs pa ltar/ dngos po rnam par chad pa la dmigs pa'i phyir ro snyam du bsams pa'o/ /gang yang / 'bras bu rgyu yi 'byung 'jig gi / rgyun de srid pa yin phyir ro/ /zhes smras pa de yang mi 'thad de/ ji ltar zhe na/ 'dir srid pa tha ma ni ldog pa'i mtshan nyid can yin la/ dang po ni 'gro ba nying mtshams sbyor ba'i mtshan nyid can no/ /de la srid pa tha ma 'gag bzhin pa ni rgyu nyid du gnas pa yin la/ skye ba'i mtshan nyid can srid pa dang po ni 'bras bu'i ngo bor gnas pa yin te/srid pa de gnyis la 'khor ba zhes ming du btags pa yin no/ /'dir 'di dpyad par bya ba ste/ gang las rgyu dang 'bras bu'i rgyun gyis 'khor bar 'gyur ba/ srid pa dang po 'bras bu'i ngo bo nyid du rnam par gnas pa gang yin pa de ci srid pa tha ma 'gags pa'am/'on te ma 'gags pa'am de ste 'gag bzhin pa na skye grang / rnam par dpyad na rnam pa thams cad du yod pa ma yin no zhes bstan pa'i phyir/ tha ma 'gags par gyur pa na/ /srid pa dang po rigs mi 'gyur/ /tha ma 'gags par ma gyur tshe//srid pa dang po rigs mi 'gyur/ /zhes gsungs so/ /de la gal te srid pa tha ma 'gags pa ni srid pa dang po skye'o zhes rtog na ni/ de'i tshe rgyu med par 'gyur zhing / sa bon tshig pa las kyang myu gu skye bar 'gyur na/ de ni 'dod pa yang ma yin no/ /de'i phyir tha ma 'gags pa na srid pa dang po mi rigs so//da ni srid pa tha ma ma 'gags pa na yang srid pa dang po rigs par mi 'gyur te/ gal te 'gyur na ni rgyu med pa dang / sems can gcig la ngo bo gnyis yod pa dang / sngon med pa'i sems can 'byung ba dang / snga ma rtag pa nyid dang / sa bon ma zhig pa la myu gu skye bar 'gyur na/ de dag ni de ltar yang ma yin no/ /de'i phyir/ tha ma 'gags par ma gyur tshe/ /srid pa dang po rigs mi 'gyur ro/ /da ni srid pa tha ma 'gag bzhin pa na yang ji ltar srid pa dang po mi 'thad pa de ltar bstan pa'i phyir/ gal te tha ma 'gag bzhin na//dang po skye bar 'gyur na ni/ /'gag bzhin pa ni gcig 'gyur zhing / /skye bzhin pa yang gzhan du 'gyur/ /zhes gsungs so/ /de la 'gag bzhin pa ni da ltar ba ste/ da ltar ba'i rkyen gyi mtha' can gyis brjod par bya ba yin pa'i phyir ro / /skye bar 'gyur ba zhes bya bas kyang da ltar ba nyid brjod de/da ltar ba'i sgra'i brjod bya yin pa'i phyir ro/ /yang na 'gag bzhin pa ni 'gag pa'i bya ba byed pa po yin la/ skye bar 'gyur ba gang yin pa de yang skye ba'i bya ba byed pa po yin te/ de dag dus gcig par 'dod pa na cig car du yod par 'gyur ro//de'i phyir 'gag bzhin pa ni srid pa gcig tu 'gyur zhing / skye bzhin pa yang gzhan du 'gyur bas/ srid pa gnyis dus gcig pa nyid du 'gyur na/ gcig la cig car gnyis yod pa yang ma yin pas 'di ni mi rigs so/ /de'i phyir de ltar ji skad bshad pa'i rnam par dpyad pa'i tshul gyis/gal te 'gag bzhin skye bzhin dag/ lhan cig tu yang rigs min na/ /phung po gang la 'chi 'gyur ba/ /de la skye ba'ang 'byung 'gyur ram/ /'ang gi sgra ni bsdu ba'i don du ste/ de dag so so so sor 'jog par byed pa'i phyir ro//gang gi tshe de ltar ji skad bshad pa'i tshul gyis tha ma 'gags pa na srid pa dang po 'byung ba ma yin zhing / tha ma ma 'gags par srid pa dang po 'byung ba ma yin la/ srid pa tha ma dang lhan cig ste dus gcig tu yang srid pa dang po 'byung ba ma yin no/ da ni / phung po gang la 'chi 'gyur ba/ /de la skye ba'ang 'byung 'gyur ram/ /phung po gang dag la gnas pa 'chi bar 'gyur ba de dag nyid la skye ba zhes bya ba 'di ni shin tu 'gal ba yin no/ /'di ltar 'chi bzhin pa ni skye bar ma mthong ngo / /de'i phyir/ de ltar dus gsum dag tu yang //srid pa'i rgyun ni mi rigs na/ /gang gi phyir srid pa tha ma 'gags pa dang ma 'gags pa dang / 'gag bzhin pa ni srid pa dang po yod pa ma yin pa de'i phyir/ dus gsum char du yang srid pa'i rgyun yod pa ma yin no/ /dus gsum dag tu gang med pa/ /de ni ji ltar srid pa'i rgyun//gang zhig dus gsum dag tu yod pa ma yin pa de bdag nyid gzhan gyis yod par ga la 'gyur/ de'i phyir rnam pa thams cad du srid pa'i rgyun yod pa ma yin no/ /de'i phyir/ 'bras bu rgyu yi 'byung 'jig gi/ /rgyu de srid pa yin phyir ro/ /zhes gang smras pa de ni mi rigs pa smras pa yin no//de'i phyir dngos po yod par khas len na rtag pa dang chad par lta bar thal ba de nyid bzlog par dka' ba yin no/ /de'i phyir dngos po rnams skye ba med do zhes bya bar grub bo/ /bcom ldan 'das kyis kyang / srid gsum rmi lam dang 'dra snying po med//myur du 'jig cing mi rtag sgyu ma bzhin/ /'ong ba med cing 'di nas 'gro ba'ang med/ /rgyun rnams rtag tu stong zhing mtshan ma med/ /ces bya ba dang / de bzhin du/ skye ba dang ni 'chi 'gyur yang / /skye ba med cing 'chi med par/ /gang gis shes par gyur pa yis//ting 'dzin 'di ni rnyed mi dka'/ /zhes gsungs pa dang / de bzhin du/ gang dag bsam yas chos rnams 'di shes pa/ /mi rnams de dag rtag tu bde ba yin/ /chos dang chos min rnam rtog med pa ste/ /thams cad sems kyi spros pas phye ba yin/ /thams cad bsam yas thams cad 'byung min pas//dngos dang dngos med shes pa rnam par bshig /byis pa gang dag sems kyi dbang song ba/ /de dag srid pa bye ba brgyar sdug bsngal/ /zhes gsungs so/ /slob dpon zla ba grags pa'i zhal snga nas sbyar ba'i tshig gsal ba las/'byung ba dang 'jig pa brtag pa zhes bya ba rab tu byed pa nyi shu rtsa gcig pa'i 'grel pa'o// //'dir smras pa / srid pa'i rgyun ni yod pa nyid de/ de bzhin gshegs pa yod pa'i phyir ro/ /'di na bcom ldan 'das bskal pa grangs med pa gsum mam bdun du bar chad med pa'i tshul gyis brtson pa/bsod nams bya ba rtsom pa phul du dbyung du med pa/ 'gro ba la phan pa 'byung ba'i bya ba gcig pu'i mtshan nyid can rnam pa sna tshogs pa de dang de dag gis 'gro ba/ bu gcig pa phangs pa bas kyang ches lhag pa ma lus pa rjes su 'dzin pa lhur mdzad pa/thugs rje chen po'i gzhan gyi dbang du gyur pa/ 'khrungs pa'i gnas de dang der sa dang chu dang me dang rlung dang / sman gyi ljon shing thun mong ba ltar bdag nyid kyang 'gro ba rnams kyi rang gi 'dod pas longs spyad par bya bar gyur par mdzad pas dus ring mo zhig gis thams cad mkhyen pa'i go 'phang brnyes pa yin la/thams cad mkhyen pa'i ye shes brnyes pa bcom ldan 'das de nyid chos rnams kyi de kho na nyid ji ltar gnas pa de ltar ma lus par mkhyen zhing thugs su chud pa nyid kyis na de bzhin gshegs pa zhes brjod do/ /de'i phyir gal te srid pa'i rgyun med na ni/de'i tshe de bzhin gshegs pa yang yod par mi 'gyur te/ skye ba gcig gis ni de bzhin gshegs pa nyid brnyes par mi dpyod do/ /de'i phyir srid pa'i rgyun yod pa nyid de/ de bzhin gshegs pa yod pa'i phyir ro zhes smra'o/ / brjod par bya ste/ gang gi mi shes pa shin tu chen po 'thas pa'i snang ba rnam pa sna tshogs pa de lta bu dag gis bzlog tu zin kyang shin tu yun ring por goms pas da rung yang mi zlog cing mi 'jig pa/ khyod kyis mi shes pa shin tu chen po 'di nyid srid pa'i rgyun rnam par chad pa med par 'jug pa dang /ches ring bar go bar byed pa yin no/ /gal te 'dir de bzhin gshegs pa zhes bya ba 'ga' zhig rang bzhin gyis yod na ni/ de'i tshe dus ring pos mngon par grub pa'i phyir srid pa'i rgyun yod par 'gyur na/ de bzhin gshegs pa zhes bya ba 'ga' zhig dngos po'i rang bzhin du dmigs pa yang ma yin te/khyod kyi ma rig pa'i rab rib chen pos blo gros kyi mig nyams pa nyid kyis zla ba gnyis la sogs pa ltar log par de bzhin gshegs pa zhes bya bar dmigs pa 'ba' zhig tu zad do//gang gi tshe de ltar de bzhin gshegs pa nyid rang bzhin gyis yod pa ma yin pa de'i tshe de'i srid pa'i rgyun yod par ga la 'gyur/ /ji ltar de bzhin gshegs pa rang bzhin gyis med pa de ltar bstan pa'i phyir/ phung min phung po las gzhan min/ /de la phung med der de med//de bzhin gshegs pa phung ldan min/ /de bzhin gshegs pa gang zhig yin/ /zhes bya ba gsungs te/ gal te de bzhin gshegs pa zhes bya ba dngos po 'ga' zhig yod na ni/ de phung po'i rang bzhin te/ gzugs dang / tshor ba dang / 'du shes dang / 'du byed dang / rnam par shes pa zhes bya ba phung po lnga'i rang bzhin nam/ tshul khrims dang / ting nge 'dzin dang / shes rab dang / rnam par grol ba dang / rnam par grol ba'i ye shes mthong ba zhes bya ba'i phung po lnga'i rang bzhin nam/ de gnyis las tha dad par 'gyur ba zhig na/snga ma'i phung po lnga po nyid/ sems can du gdags pa'i rgyu yin pas rnam par dpyad pa 'dir bzung gi/ /phyi ma dag ni ma yin te/ 'di dag khyab par byed pa ma yin pa'i phyir dang / snga ma'i khongs su 'dus pa'i phyir ro/ /gal te phung po lnga las tha dad pa yin na ni/ de bzhin gshegs pa de la phung po yod pa'am//phung po de dag la de yod pa'am/ lha sbyin nor dang ldan pa ltar de bzhin gshegs pa de phung po dang ldan par 'gyur grang na/ rnam pa thams cad du dpyad pa na yod pa ma yin no/ /ji ltar zhe na/ de la re zhig phung po nyid ni de bzhin gshegs pa ma yin te/ci'i phyir zhe na/ bud shing gang de me yin na/ /byed pa po dang las gcig 'gyur/ /zhes bshad pa dang / nyer len gang de sangs rgyas na/ /byed pa po dang las gcig 'gyur/ /zhes bya ba 'dir yang sbyar bar bya la/ de bzhin du/ gal te phung po bdag yin na//skye dang 'jig pa can du 'gyur/ /zhes bshad pa dang / gal te phung po sangs rgyas na/ /skye dang 'jig pa can du 'gyur/ /zhes 'dir yang sbyar bar bya'o/ /de ltar na re zhig phung po de bzhin gshegs pa ma yin no/ /da ni de bzhin gshegs pa la phung po dag las gzhan pa yang ma yin te/ci'i phyir zhe na/ gal te shing las me gzhan na/ /shing med par yang 'byung bar 'gyur/ /zhes bya ba dang / de bzhin du/ gzhan la ltos pa med pa'i phyir/ /'bar bar byed rgyu las mi 'byung / /rtsom pa don med nyid du 'gyur/ / de lta yin na las kyang med/ /ces bshad pa de bzhin du/ 'dir yang / gal te nyer len sangs rgyas gzhan/ /nyer len med par 'byung bar 'gyur/ /zhes bya ba dang / de bzhin du/ gzhan la ltos pa med pa'i phyir/ /nye bar len rgyu las mi 'byung / /rtsom pa don med nyid du 'gyur//de lta yin na las kyang med/ /ces bya bar sbyar bar bya'o/ /de bzhin du/ gal te phung po rnams las gzhan/ /phung po'i mtshan nyid med par 'gyur/ /zhes bya bar yang sbyar bar bya'o/ /phung po la sogs pa dag dang / de bzhin gshegs pa la gzhan nyid med pa'i phyir na/de bzhin gshegs pa la phung po dag yod pa mi 'thad cing / phung po dag la de bzhin gshegs pa yod pa zhes bya ba yang 'thad pa ma yin no/ /phyogs gnyis kyi rnam par bshad pa 'di ni/ 'dir bdag phung po la med phung 'di dag/ bdag la yod pa ma yin gang gi phyir//gzhan nyid yod na rtog pa 'dir 'gyur na/ /gzhan nyid de med de phyir 'di rtog go / /zhes dbu ma la 'jug pa las bshad pa yin no/ /de bzhin gshegs pa phung po dang ldan pa yang ji ltar ma yin pa de ltar ni/ bdag 'dod gzugs ldan ma yin gang gi phyir//bdag med de phyir ldan don dang 'brel min/ /tha dad phyugs ldan tha mi dad gzugs ldan/ /de nyid gzhan du bdag med dngos med phyir/ /zhes de nyid du bshad zin to/ /dngos su na phyogs lnga po de dag de nyid dang gzhan nyid kyi phyogs nyid kyi nang du 'dus mod kyi/'jig tshogs la lta ba'i 'jug pa la ltos nas phyogs lnga po slob dpon gyis gsungs so zhes shes par bya'o/ /de bzhin gshegs pa gang zhig de ltar phung po dag la rnam pa lngas dpyad pa na yod pa ma yin pa de bdag nyid gang gis yod par 'gyur te/de'i phyir de bzhin gshegs pa rnam pa thams cad du yod pa ma yin par gzigs shing / slob dpon gyis/ de bzhin gshegs pa gang zhig yin/ /zhes gsungs te/ de ni 'ga' yang med do zhes bya bar dgongs so/ /de bzhin gshegs pa med pa'i phyir na srid pa'i rgyun yang med do zhes bya bar grub bo//'dir kha cig na re/ /ji skad bshad pa'i nyes par thal bar 'gyur bas de phung po de bzhin gshegs pa yin no zhes kyang mi smra la/ phung po las tha dad par yang ma yin zhing / ri gangs can la shing gi tshogs ltar de bzhin gshegs pa la phung po dag yod par yang mi smra la/nags khrod na seng ge ltar phung po dag la de bzhin gshegs pa yod pa yang ma yin zhing / 'khor los sgyur ba'i rgyal po mtshan dang ldan pa ltar/ de bzhin gshegs pa phung po dang ldan par yang mi smra ste/gcig nyid dang gzhan nyid khas blangs pa nyid kyi phyir ro/ /'o na ci zhe na/ phung po la brten nas de bzhin gshegs pa de nyid dang gzhan nyid du brjod du med pa zhig rnam par 'jog pa yin te/ de'i phyir tshul 'di ni kho bo cag la gnod par byed pa ma yin no zhes smra'o//'di la brjod par bya ste/ gal te sangs rgyas phung po la/ /brten nas rang bzhin las yod min/ /rang bzhin las ni gang med pa/ /de gzhan dngos las ga la yod/ /gal te sangs rgyas bcom ldan 'das de nyid dang gzhan nyid du brjod du med pa zhig phung po la brten nas 'dogs na/'o na ni phung po la brten nas brtags pa'i gzugs brnyan ltar rang bzhin gyis yod pa ma yin pa zhes bya bar 'gyur ro/ /gang zhig de ltar rang bzhin las te rang gi ngo bos med cing / rang bzhin las yod pa ma yin pa de ji ltar phung po la brten nas gzhan gyi dngos po las yod par 'gyur/yod pa ma yin pa'i rang gi ngo bo can gyi mo gsham gyi bu ni/ gzhan gyi dngos po la ltos nas yod par mi rigs so/ /ci ste ji ltar gzugs brnyan rang bzhin las yod pa ma yin yang / bzhin dang me long la sogs pa gzhan gyi dngos po la ltos nas yod par 'gyur ba de bzhin du/de bzhin gshegs pa rang bzhin las yod pa ma yin yang phung po la brten nas gzhan gyi dngos po las yod par 'gyur ro snyam na/ de lta na yang / gang zhig gzhan gyi dngos brten nas/ /de bdag nyid du mi 'thad do/ / gang zhig bdag nyid med pa de/ /ji ltar de bzhin gshegs par 'gyur/ /gal te gzugs brnyan ltar gzhan gyi dngos po la brten nas de bzhin gshegs par 'dod na ni/ de lta na de bzhin gshegs pa de gzugs brnyan ltar bdag nyid ces bya bar mi 'thad cing / rang bzhin zhes bya bar mi rigs te/bdag nyid kyi sgra 'di ni rang bzhin gyi rnam grangs yin no/ /gang zhig gzugs brnyan ltar bdag nyid med cing rang bzhin med pa de ji ltar de bzhin gshegs par 'gyur te/ /phyin ci ma log pa'i lam nas gshegs par ji ltar 'gyur zhes bya bar dgongs pa'o//gzhan yang / gal te 'di ni de bzhin gshegs pa la rang bzhin 'ga' zhig yod na ni/ de'i tshe de'i rang bzhin la ltos nas phung po'i rang bzhin gzhan gyi dngos por 'gyur la/ gzhan gyi dngos po de la brten nas de bzhin gshegs par 'gyur ba zhig na/ gang gi tshe de bzhin gshegs pa la rang bzhin nyid yod pa ma yin pa de'i tshe phung po rnams gzhan nyid du ga la 'gyur zhes bstan pa'i phyir gsungs pa/gal te rang bzhin yod min na/ /gzhan dngos yod par ji ltar 'gyur/ /gang gi tshe de ltar rang bzhin dang gzhan gyi dngos po dag med pa de'i tshe/rang bzhin dang ni gzhan dngos dag /ma gtogs de bzhin gshegs de gang / /dngos po yin na rang bzhin gzhan gyi dngos por 'gyur gyi/ gang zhig de bzhin gshegs pa zhes bya bar rnam par gzhag pa de gnyis las ma gtogs pa'i dngos po gzhan de gang zhig yod//de'i phyir de bzhin gshegs pa rang bzhin gyis med do/ /gzhan yang / gal te phung po ma brten par/ /de bzhin gshegs pa 'ga' yod na/ /de ni da gdod brten 'gyur zhing / /brten nas de las 'gyur la rag/ gal te de bzhin gshegs pa phung po dag las de nyid dang gzhan nyid du brjod du med pa zhig phung po dag la brten nas 'dogs so snyam du sems na ni/de la gal te phung po rnams la ma brten par te ma bzung bar sngar de bzhin gshegs pa zhes bya ba 'ga' zhig yod cing phung po la brten nas gyur pa de'i tshe rigs te/'di ltar sngar nor las tha dad par grub pa'i lha sbyin ni nor len par byed pa yin no/ /de bzhin du gal te phung po la ma brten par de bzhin gshegs pa 'ga' zhig yod na ni/ de da gzod phung po dag la brten par 'gyur zhing / phung po de dag la brten nas 'gyur la rag na/rnam pa thams cad du dpyad pa na/ phung po rnams la ma brten par/ de bzhin gshegs pa 'ga' yang med de rgyu med pa nyid du thal bar 'gyur ba'i phyir ro/ /gang zhig ma brten yod min na/ /de ni ji ltar nyer len 'gyur/ /yod pa ma yin pa'i phyir ro snyam du dgongs pa yin no//gang gi tshe de ltar phung po cung zad kyang mi len pa de'i tshe/ phung po la brten nas de bzhin gshegs par 'gyur ro zhes bya bar mi 'thad do/ /gang gi tshe de bzhin gshegs pa de nye bar len pa'i snga rol du med pas cung zad kyang mi len pa de'i tshe sus kyang nye bar ma blangs pas de'i nye bar len pa yang nye bar len pa nyid du 'gyur ba ma yin no zhes bstan pa'i phyir/nye bar blangs pa ma yin par/ /nye bar len par cis mi 'gyur/ /zhes bya ba gsungs so/ /gang gi tshe de ltar sus kyang ma blangs pa'i phyir nye bar len pa nye bar len par mi 'gyur ba de'i tshe nye bar len pa med pas nye bar len pa po 'ga' yang yod pa ma yin no zhes bstan pa'i phyir/nye bar len pa med pa yi/ /de bzhin gshegs pa ci yang med/ /ces bya ba gsungs so/ /de'i phyir de ltar/ ji skad bshad pa'i tshul gyis/ rnam pa lngas ni btsal byas nas //gang zhig de nyid gzhan nyid du/ /med pa'i de bzhin gshegs pa de/ /nye bar len par ji ltar gdags/ /de bzhin gshegs pa gang zhig dpyad cing btsal bar byas pa na/ gang zhig phung po dag las de nyid de gcig tu med cing / phung po dag las gzhan nyid du ste tha dad pa nyid du med la/gang zhig de nyid dang gzhan nyid du med pas rten dang brten pa dang de dang ldan pa'i phyogs rnam pa lngas btsal ba na med cing gtan yod pa ma yin pa'i de bzhin gshegs pa de nye bar len pas ji ltar gdags par nus/ de'i phyir yang de bzhin gshegs pa rang bzhin gyis med do//rnam par dpyad pa 'dis de bzhin gshegs pa kho na med pa 'ba' zhig tu ma zad kyi/ 'on kyang / gang zhig nye bar blangs pa de/ /de ni rang bzhin las yod min/ /gang zhig nye bar blangs pa gzugs dang / tshor ba dang /'du shes dang / 'du byed dang / rnam par shes pa zhes bya ba phung po lnga po de yang rang bzhin gyis yod pa ma yin te/ rten cing 'brel bar 'byung ba'i phyir dang / phung po brtag par rgyas par bgag pa'i phyir ro/ /ci ste yang nye bar blang ba'i rang bzhin las yod pa ma yin pa de lta na yang /rgyu dang rkyen gyi bdag nyid can gzhan gyi dngos po las yod par 'gyur ro snyam na/ de yang mi 'thad do zhes bstan pa'i phyir/ bdag gi dngos las gang med pa/ /de gzhan dngos las yod re skan/ /zhes gsungs te/ mo gsham gyi bu bdag gi dngos po las yod pa ma yin pa de ni gzhan gyi dngos pos gdags par nus pa ma yin no//de'i phyir nye bar blangs pa yang med do/ /rnam pa gcig tu na/ gang zhig nye bar blangs pa de/ /de ni rang bzhin las yod min te/ nye bar len pa po la ltos pa'i phyir dang /nye bar len pa po la ma ltos pa la nye bar blang pa nyid med pa'i phyir rang gi ngo bos grub pa'i nye bar blang ba yod pa ma yin no/ /ci ste gal te nye bar blang ba nye bar len pa po la ma ltos pa'i rang bzhin gyis grub pa yod pa ma yin na/ 'o na ni de lta na nye bar len pa po la ltos pa dang bcas pa nyid du 'gyur ro zhe na/de lta na yang / bdag gi dngos las gang med pa/ /de gzhan dngos las yod re skan/ /nye bar blang ba gang zhig bdag gi dngos po las ma grub cing yod pa ma yin pa'i rang bzhin de nye bar len pa po gzhan gyi dngos po las yod par ji ltar 'gyur/de'i phyir nye bar blang ba yang med do zhes bya ba'o/ /da ni ji ltar rab tu bsgrubs pa'i don nyid nye bar bstan pa'i phyir/ de ltar nyer blangs nyer len po/ /rnam pa kun gyis stong pa yin/ /zhes gsungs te/ rnam pa thams cad kyis dpyad pa na/nye bar blangs pa stong pa ste rang bzhin med cing nye bar len pa po stong zhing rang bzhin dang bral ba yin no/ /da ni nye bar blangs pa de/ /stong pas de bzhin gshegs stong pa/ /ji lta bur na 'thad par 'gyur/ /yod pa ma yin pa'i nye bar blangs pas yod pa ma yin pa'i de bzhin gshegs pa 'dogs so zhes bya ba gang yin pa de ni srid pa ma yin no//de'i phyir phung po dag la brten nas de bzhin gshegs pa 'dogs so zhes bya ba ni 'thad pa ma yin no/ /'dir smras pa/ e ma ma la kho bo cag gi re thag bcad do/ /'di ltar gang kho bo cag ni gzegs zan dang rkang mig dang / phyogs kyi gos can dang /rgyal dpog pa la sogs pa rang gi rnam par rtog pas brtags pa'i lta ba ngan pa'i lcug ma shin tu srin te'i dra bas gtums pa/ mya ngan las 'das pa'i grong khyer du 'gro ba'i lam phyin ci ma log pa las nyams pa/ 'khor ba'i 'brog dgon pa'i lam shin tu bgrod par dka' bas ma brgal ba/mtho ris dang byang grol gyi lam phyin ci ma log par bstan par mngon par rlom pa dag la dga' ba spangs nas/ de bzhin gshegs pa'i nyi ma gzhan mu stegs pa'i gzhung lugs kyi mun pa ma lus par sel bar mdzad pa/ mtho ris dang byang grol dang mthun pa'i lam phyin ci ma log par ston par mdzad pa/dam pa'i chos ston pa'i 'od zer shin tu gsal bas phyogs kyi ngos ma lus par khyab par mdzad pa/ /gdul bya rnam pa sna tshogs pa'i blo'i pad+ma'i tshogs kha 'byed pa lhur mdzad pa/ dngos po'i de kho na nyid kyi don ji ltar gnas pa bzhin bstan pa'i snod du gyur pa rnams kyi dri ma med pa'i mig gcig pur gyur pa/'gro ba mtha' dag gi zla med pa'i skyabs su gyur pa/ stobs bcu dang mi 'jigs pa dang / sangs rgyas kyi chos ma 'dres pa'i dkyil 'khor dri ma med pa mnga' ba la skyabs su song zhing thar pa don du gnyer ba yin na/da lta ni/ de ltar nyer blang nyer len po/ /rnam pa kun gyis stong pa yin/ /stong pas de bzhin gshegs stong pa/ /ji lta bur na 'dogs par 'gyur/ /zhes bya ba la sogs pas de bzhin gshegs pa rang bzhin gyis med par smras pas kho bo cag gi thar pa'i re thag bcad pa yin no//de phyir de bzhin gshegs pa'i rtsi sman chen po'i ljon shing rtsad nas 'don pa khyod dang brtsad pas chog go/ /brjod par bya ste/ 'dir khyod lta bu'i skye bo la kho bo cag gi re thag chad pa yin no/ /'di ltar gang khyod ni thar pa 'dod pas gzhan mu stegs pa'i gzhung lugs dag dor nas phyin ci ma log par ston pa po bcom ldan 'das de bzhin gshegs pa la skyabs su song yang bdag med pa'i seng ge'i sgra mchog tu zab pa mu stegs can gyi smra ba thams cad dang thun mong ma yin pa mi bzod pa na/rang gi lhag par mos pas bkren pa nyid kyis lam lta ba ngan pa sna tshogs pa'i sbrul gyis dkrugs pa/skye bo phyin ci log tu gyur pas rjes su bgrod pa/ 'khor ba'i 'brog dgon pa mi zad pa dang rjes su mthun pa de nyid nas song ba yin no/ /de bzhin gshegs pa ni nam yang bdag dang phung po rnams yod pa nyid du mi gsung ngo //ji skad du/ tshe dang ldan pa rab 'byor sangs rgyas kyang sgyu ma lta bu rmi lam lta bu'o/ /tshe dang ldan pa rab 'byor sangs rgyas kyi chos rnams kyang sgyu ma lta bu rmi lam lta bu'o zhes gsungs so/ /kho bo cag ni gang las kho bo cag la de skad du skur pa btab pas byas pa'i nyes par 'gyur ba rnam pa thams cad du de bzhin gshegs pa spros pa med pa dag nyid du mi smra'o// //gzhan yang de bzhin gshegs pa rang bzhin med par ston zhing phyin ci ma log pa'i don brjod par 'dod pas ni/stong ngo zhes kyang mi brjod de/ /mi stong zhes kyang mi bya zhing / /gnyis dang gnyis min mi bya ste/ /'di dag thams cad brjod par bya ba ma yin mod kyi/ 'on kyang ma brjod na rtogs pa po rnams kyis ji lta ba bzhin du gnas pa'i rang bzhin rtogs par mi nus te/ de'i phyir kho bo cag tha snyad kyi bden pa la gnas nas tha snyad kyi don du gdul bya'i skye bo'i ngor ltag par sgro btags nas stong pa zhes kyang smra la mi stong pa zhes bya ba dang /stong pa yang yin la mi stong pa yang yin zhes bya ba dang / stong pa yang ma yin la mi stong pa yang ma yin pa zhes kyang smra'o//de nyid kyi phyir/ gdags pa'i don du brjod par bya/ /zhes gsungs te/ bcom ldan 'das kyis dgongs pa gang gis stong pa nyid la sogs pa bstan pa de ni bdag brtags pa las khong du chud par bya'o/ /ji skad du mdo las/ khyod kyis 'gro 'di sgyu ma lta bu dang //zlog gar lta dang rmi lam lta bu dang / /bdag med sems can med cing srog 'gro med/ /chos rnams smig rgyu chu zla lta bur mkhyen/ /stong pa zhi ba skye ba med pa'i tshul/ /mi shes pas na 'gro ba 'khyam 'gyur ba/ /de dag thugs rje/ mnga' bas thabs tshul dang //rigs pa brgya dag gis ni 'dzud par mdzad/ /ces bya ba la sogs pa gsungs so/ /rtogs pa 'di dag thams cad ni de bzhin gshegs pa spros pa med pa la mnga' ba yin no/ /de bzhin gshegs pa la stong pa nyid la sogs pa bzhi po mi mnga' ba 'ba' zhig tu ma zad kyi/gzhan yang / rtag dang mi rtag la sogs bzhi/ /zhi ba 'di la ga la yod/ /mtha' dang mtha' med la sogs bzhi/ /zhi ba 'di la ga la yod/ /'dir/ bcom ldan 'das kyis lung du ma bstan pa'i dngos po bcu bzhi bstan pa yin no/ / 'di lta ste/ /'jig rten rtag go/ /'jig rten mi rtag go/ /'jig rten rtag kyang rtag la mi rtag kyang mi rtag go/ /'jig rten rtag pa yang ma yin mi rtag pa yang ma yin zhes bya ba ni bzhi tshan dang po'o/ /'jig rten mtha' dang ldan pa dang / 'jig rten mtha' dang mi ldan pa dang /'jig rten mtha' dang ldan pa yang yin la mtha' dang mi ldan pa yang yin / 'jig rten mtha' dang ldan pa yang ma yin mtha' dang mi ldan pa yang ma yin zhes bya ba ni gnyis pa'o/ /de bzhin gshegs pa grongs phan chad yod do/ /de bzhin gshegs pa grongs phan chad med do//de bzhin gshegs pa grongs phan chad yod pa yang yin la med pa yang yin no/ /de bzhin gshegs pa grongs phan chad yod pa yang ma yin med pa yang ma yin zhes bya ba ni gsum pa'o/ /lus de srog yin/ srog de lus yin/ srog kyang gzhan la lus kyang gzhan yin zhes bya ba ste/dngos po bcu bzhi po 'di dag ni brda sprad par bya ba ma yin pas lung du ma bstan pa'i dngos po zhes bya'o/ /de la ji skad bshad pa'i tshul gyis stong pa nyid la sogs pa bzhi po de bzhin gshegs pa rang bzhin gyis zhi zhing ngo bo nyid kyis stong pa la ji ltar mi mnga' ba de bzhin du/rtag pa dang mi rtag pa la sogs pa bzhi yang de la mi mnga'o/ /mi mnga' ba nyid kyi phyir mo gsham bu'i sngo bsangs dang dkar sham nyid ltar 'jig rten la bzhi po dag kyang bcom ldan 'das kyis lung du ma bstan pa yin no//bzhi po 'di dag de bzhin gshegs pa la ji ltar mi mnga' ba de bzhin du mtha' yod pa dang mtha' med pa la sogs pa yang de bzhin gshegs pa la mi mnga'o/ /da ni de bzhin gshegs pa grongs phan chad yod do zhes bya ba la sogs pa'i rtog pa bzhi po yang 'jug pa yod pa ma yin par bstan pa'i phyir/gang gis de bzhin gshegs yod ces/ /'dzin pa stug pos gzung gyur pa/ /de ni mya ngan 'das pa la/ /med ces rnam rtog rtog par byed/ /ces gsungs te/ gang gis mngon par zhen pa chen pos de bzhin gshegs pa yod do zhes bya bar 'dzin pa chen pos stug pos bzung zhing yongs su rtog pa bskyed pa de ni nges par de bzhin gshegs pa yongs su mya ngan las 'das pa la/de bzhin gshegs pa grongs phan chad de grongs nas dus phyis med cing de bzhin gshegs pa rgyun chad la de bzhin gshegs pa mi bdog pa yin no zhes rtog par byed do//de ltar rtog pa de la ni lta bar byas par 'gyur ro/ /gang gi ltar na rang bzhin gyis stong pa'i phyir gnas skabs 'ga' yang de bzhin gshegs pa yod pa nyid ma yin pa de'i phyogs la ni/rang bzhin gyis ni stong de la/ /sangs rgyas mya ngan 'das nas ni/ /yod do zhe'am med do zhes/ /bsam pa 'thad pa nyid mi 'gyur/ /nam mkha' la ri mo'i gzugs rtog pa ltar rtogs pa yod pa ma yin no zhes bya bar dgongs pa'o/ /de'i phyir de ltar de bzhin gshegs pa rang bzhin gyis zhi zhing /rang bzhin med pa spros pa thams cad las 'das pa las blo zhan pa nyid kyis rtag pa dang mi rtag pa la sogs pa ste/ rtag pa dang mi rtag pa dang / yod pa dang med pa dang / stong pa dang mi stong pa dang / thams cad mkhyen pa dang / thams cad mi mkhyen pa la sogs par rtog pa dang /gang dag sangs rgyas spros 'das shing / /zad pa med la spros byed pa/ /spros pas nyams pa de kun gyis/ /de bzhin gshegs pa mthong mi 'gyur/ /spros pa ni dngos po'i rgyu can yin na/ de bzhin gshegs pa dngos po med pa la spros pa rnams 'jug pa ga la yod de/de'i phyir de bzhin gshegs pa spros pa las 'das pa yin no/ /skye ba med pa'i rang bzhin yin pas rang bzhin gzhan du mi 'gro ba'i phyir zad pa med pa'o/ /gang dag rnam par rtog pa log pa de rang gis brtags pa'i dri mas sems dri ma can du byas pas yang dag pa ma yin pa'i kun tu rtog pa'i khyad par rnam pa sna tshogs pa dag gis de bzhin gshegs pa sangs rgyas bcom ldan 'das rnam pa de lta bu de spros par byed pa de dag la ni rang gi spros pa dag gis nyams par gyur pas/de bzhin gshegs pa'i yon tan phun sum tshogs pa lkog tu gyur par gnas par 'gyur ro//de'i phyir ro dang 'dra ba de dag gis gsung rab 'di la de bzhin gshegs pa mthong bar mi 'gyur te/ dmus long gis nyi ma bzhin no/ /de nyid kyi phyir bcom ldan 'das kyis/ /gang dag nga la gzugs su mthong //gang dag nga la sgrar shes pa/ /log par spong bar zhugs pa ste/ /skye bo de dag nga mi mthong / /sangs rgyas rnams ni chos nyid blta/ /'dren pa rnams ni chos kyi sku/ /chos nyid shes bya ma yin te/ /de ni shes par nus ma yin/ /zhes gsungs so//de'i phyir de bzhin gshegs pa brtag pa 'dir sems can gyi 'jig rten brtag pa byas pa yin no/ /sems can gyi 'jig rten 'di ji ltar rang bzhin med pa de ltar/ snod kyi 'jig rten yang rang bzhin med pa yin no zhes bsgre ba'i phyir/ de bzhin gshegs pa'i rang bzhin gang //de ni 'gro 'di'i rang bzhin yin/ /de bzhin gshegs pa rang bzhin med/ /'gro ba 'di yis rang bzhin med/ /ces bya ba gsungs te/ 'gro ba ji ltar rang bzhin med pa yin pa de ltar ni rkyen brtags pa la sogs pa dag gis bstan to/ de nyid kyi phyir mdo las/rtag tu skye med chos ni de bzhin gshegs/ /chos rnams kun kyang bde bar gshegs dang 'dra/ /byis pa'i blo can mtshan mar 'dzin pa rnams/ /'jig rten na ni med pa'i chos la spyod/ /de bzhin gshegs pa zag pa med pa yi/ /dge ba'i chos kyi gzugs brnyan lta bu yin//'di ni de bzhin dang de gshegs pa med/ /'jig rten thams cad kyis ni gzugs brnyan mthong / /zhes gsungs so/ /bcom ldan 'das ma las kyang / de nas lha'i bu de dag gis gnas brtan tshe dang ldan pa rab 'byor la 'di skad ces smras so//'phags pa rab 'byor ci sems can de dag sgyu ma lta bu yin gyi sgyu ma ma yin nam/ de skad ces smras pa dang / tshe dang ldan pa rab 'byor gyis lha'i bu de dag la 'di skad ces smras so/ /lha'i bu dag sems can de dag ni sgyu ma lta bu'o/ /lha'i bu dag sems can de dag ni rmi lam lta bu ste/lha'i bu dag de ltar na sgyu ma dang sems can de dag ni gnyis su med de gnyis su byar med do/ /de ltar na rmi lam dang sems can de dag ni gnyis su med de gnyis su byar med do/ /lha'i bu dag chos thams cad kyang sgyu ma lta bu rmi lam lta bu'o//rgyun du zhugs pa yang sgyu ma lta bu rmi lam lta bu'o/ /rgyun du zhugs pa'i 'bras bu yang rmi lam lta bu sgyu ma lta bu'o/ /de bzhin du lan cig phyir 'ong ba dang / lan cig phyir mi 'ong ba'i 'bras bu dang / phyir mi 'ong ba dang / phyir mi 'ong ba'i 'bras bu dang / dgra bcom pa yang sgyu ma lta bu rmi lam lta bu'o//dgra bcom pa'i 'bras bu yang sgyu ma lta bu rmi lam lta bu'o/ /rang sangs rgyas kyang sgyu ma lta bu rmi lam lta bu'o/ /rang sangs rgyas nyid kyang sgyu ma lta bu rmi lam lta bu'o/ /yang dag par rdzogs pa'i sangs rgyas kyang sgyu ma lta bu rmi lam lta bu'o//yang dag par rdzogs pa'i sangs rgyas nyid kyang sgyu ma lta bu rmi lam lta bu'o/ /de nas lha'i bu de dag gis gnas brtan tshe dang ldan pa rab 'byor la 'di skad ces smras so/ /'phags pa rab 'byor yang dag par rdzogs pa'i sangs rgyas kyang sgyu ma lta bu rmi lam lta bu'o zhes smra'am/yang dag par rdzogs pa'i sangs rgyas nyid kyang sgyu ma lta bu rmi lam lta bu'o zhes smra'am/ rab 'byor gyis smras pa/ lha'i bu dag mya ngan las 'das pa yang sgyu ma lta bu rmi lam lta bur smra na/ chos gzhan lta ci smos/ lha'i bu dag gis smras pa/'phags pa rab 'byor mya ngan las 'das pa yang sgyu ma lta bu rmi lam lta bu zhes smra'am/ rab 'byor gyis smras pa/ lha'i bu dag kho bo ni gal te mya ngan las 'das pa bas ches khyad par du 'phags pa'i chos gzhan 'ga' zhig yod na yang / de yang bdag sgyu ma lta bu rmi lam lta bu'o zhes smra'o//de ltar na rmi lam dang mya ngan las 'das pa 'di dag ni gnyis su med de gnyis su byar med do zhes gsungs so/ /slob dpon zla ba grags pa'i zhal snga nas sbyar ba'i tshig gsal ba las/ de bzhin gshegs pa brtag pa zhes bya ba rab tu byed pa nyi shu gnyis pa'i 'grel pa'o// //'dir smras pa/ /srid pa'i rgyun ni yod pa nyid de/ de'i rgyu yod pa'i phyir ro/ /'di na nyon mongs pa rnams las ni las 'byung zhing / las dang nyon mongs pa'i rgyu can skye ba dang 'chi ba gcig nas gcig tu brgyud pa yang nye bar zhi ba skye bar 'byung la/ de yang srid pa'i rgyu nyid du rtog go/ / rgyun du bsnyad do/ /de'i gtso bo'i rgyu ni nyon mongs pa rnams yin te/ nyon mongs pa spangs pa dag la de med pa'i phyir ro/ /nyon mongs pa 'dod chags la sogs pa de rnams ni yod pa yin te/ de'i phyir 'bras bur 'gyur ba srid pa'i rgyun yang yod par 'gyur ro//brjod par bya ste/ gal te de'i rgyur gyur pa nyon mongs pa dag yod na ni/ srid pa'i rgyun yang yod par 'gyur na/ yod pa ni ma yin no/ /ji ltar zhe na/ 'dir sangs rgyas bcom ldan 'das rnams kyis/ 'dod chags zhe sdang gti mug rnams/ /kun tu rtog las 'byung bar gsungs//sdug dang mi sdug phyin ci log/ brten pa nyid las kun du 'byung / /kun tu rtog pa ni rtog pa'o/ /kun tu rtog pa las 'byung bas na kun tu rtog pa las 'byung ba'o/ /'dod pa khyod kyi rtsa ba ni/ /shes te kun tu rtog las skye/ /zhes tshigs su bcad de 'byung ba'i phyir//'dod chags zhe sdang gti mug rnams/ /kun tu rtog las 'byung bar gsungs so/ /'di dag kho na nye bar bzung bas ni/ /nyon mongs pa gzhan rnams 'di dag gi rgyu can yin pas gtso bor gyur pa'i phyir ro/ /nyon mongs pa gsum po de dag ni/ sdug dang mi sdug phyin ci log/brten pa nyid las kun tu 'byung ste/ de la yul sdug pa'i rnam pa la brten nas ni 'dod chags 'byung la/ mi sdug pa la brten nas zhe sdang 'byung ngo / /phyin ci log la brten nas ni gti mug 'byung ngo / /kun tu rtog pa ni de dag gsum char yang bskyed par bya ba la rgyu thun mong ba yin no//yang ji ltar gti mug kun tu rtog pa las 'byung zhe na/ brjod par bya ste bcom ldan 'das kyis rten cing 'brel bar 'byung ba las dge slong dag ma rig pa ni rgyu dang bcas pa gzhi dang bcas pa rkyen dang bcas pa'o/ /dge slong dag ma rig pa'i rgyu gang zhe na/tshul bzhin ma yin pa'i yid la byed pa'o zhes bya ba dang / de bzhin du yid la byed pa rnyog pa can ni gti mug las skye ba yin no zhes gsungs so/ /de'i phyir ma rig pa dang kun tu rtog pa las 'byung bar 'gyur ro/ /de'i phyir/ gang dag sdug dang mi sdug dang //phyin ci log la brten 'byung ba/ /de dag rang bzhin las med de/ /de phyir nyon mongs yang dag med/ /gal te 'dod chags la sogs pa nyon mongs pa rnams rang bzhin gyis grub pa yin na ni/ rang bzhin ni bcos ma ma yin pa'i phyir dang / gzhan la ltos pa med pa'i phyir//de rnams sdug pa dang mi sdug pa dang phyin ci log la brten nas mi 'byung ba zhig na/ sdug pa dang mi sdug pa dang phyin ci log la brten nas 'byung ba yang yin te/ de'i phyir de dag rang bzhin med pa nyid yin gyi/ yang dag par yod pa ni ma yin te/ don dam par rang bzhin gyis yod pa ma yin no zhes bya ba'i don to//gzhan yang / bdag gi yod nyid med nyid ni/ /ji lta bur yang 'grub pa med/ /de med nyon mongs rnams kyi ni/ /yod nyid med nyid ji ltar 'grub/ /bdag gi yod pa nyid dang med pa nyid dag ji ltar yod pa ma yin pa de ltar ni rgyas par bshad zin to//de'i phyir de la brten pa'i chos kyi yod pa nyid dang med pa nyid yod par ga la 'gyur/ ci ste gal te bdag gi yod pa nyid dang med pa nyid med pa de'i tshe gang las de rnams kyi yod pa nyid dang med pa nyid dag med par 'gyur ba/ 'dir nyon mongs pa rnams las ci zhig 'byung snyam na/brjod pa/ nyon mongs 'di dag gang gi yin/ /de yang 'grub pa yod pa yin / /'ga' med pa ni gang gi yang / /nyon mongs pa dag yod ma yin / /'dir nyon mongs pa 'di dag rtsig ngos kyi ri mo dang 'bras bu smin pa nyid bzhin du bskyed par bya ba brten pa la ltos pa yin no//de'i phyir 'di dag gang zhig gi yin par 'gyur gyi rten 'ga' zhig med par ni ma yin no/ /rten de yang brtags pa na bdag gam sems shig yin pa zhig na/ de dag gi rten de ni sngar bkag zin pa'i phyir yod pa ma yin no/ / rten de 'ga' yang med par ni gang gi nyon mongs pa yin par 'gyur/ de med pa nyid kyi phyir gang gi phyir yang ma yin no zhes bshad pa/ 'ga' med par ni gang gi yang / /nyon mongs pa dag yod ma yin/ /'dir nyon mongs pa rnams kyi rten sngar grub pa ni 'ga' yang khas mi len la/gang zhig rten nyid du rnam par gzhag pa bdag ces bya ba 'ga' yang yod pa ma yin te/ rgyu med pa'i phyir nam mkha'i a mra'i shing bzhin no/ /'o na ci zhe na/ nyon mongs pa can gyi sems la brten nas nyon mongs pa rnams skye bar 'gyur la/ sems de yang nyon mongs pa rnams dang lhan cig skye'o zhes zer ro//'di yang mi rigs so zhes bshad pa/ rang lus lta zhing nyon mongs rnams/ /nyon mongs can la rnam lngar med/ /rang lus lta zhig nyon mongs can/ /nyon mongs pa la rnam lngar med/ /rang lus zhes bya ba ni gzugs la sogs pa'i mtshan nyid kyi tshogs so//rang gi lus la lta ba ni rang lus lta ste/ bdag dang bdag gi ba'i rnam par 'dzin par zhugs so/ /ji ltar 'di/ phung min phung po las gzhan min/ /de la phung med der de med/ /de bzhin gshegs pa phung ldan min/ /zhes bya ba 'dis rnam pa lngar dpyad pa na//rang gi lus la yod pa ma yin pa de bzhin du nyon mongs pa rnams kyang rnam pa lngar dpyad pa na nyon mongs pa can la yod pa ma yin no/ /de la nyon mongs par byed pas ni nyon mongs pa rnams so/ /nyon mongs par bya bas na nyon mongs pa can no//de la nyon mongs pa can gang yin pa de nyid nyon mongs pa rnams yin no zhes bya bar ni mi rigs te/ sreg pa po dang bsreg par bya ba dag kyang gcig nyid du thal ba'i phyir ro/ /nyon mongs pa can yang gzhan la nyon mongs rnams kyang gzhan yin no zhes bya bar yang mi rigs te/gzhan la ltos pa med pa'i phyir nyon mongs pa rnams nyon mongs pa can gyi rgyu las ma byung bar thal bar 'gyur ba'i phyir ro/ /de nyid dang gzhan nyid med pa de nyid kyi phyir/ rten dang brten pa dang de dang ldan pa'i phyogs rnams med pas nyon mongs pa rnams la nyon mongs pa can med la/nyon mongs pa can la nyon mongs pa rnams med cing / nyon mongs pa can nyon mongs pa rnams dang ldan pa yang ma yin no/ /de ltar na rnam pa lngas dpyad pa na/ nyon mongs pa rnams nyon mongs pa can la yod pa ma yin no//ji ltar nyon mongs pa can gyi rgyu can nyon mongs pa rnams yod pa ma yin pa de bzhin du/ nyon mongs pa'i rgyu can gyi nyon mongs pa can yang rnam pa lngas dpyad pa na nyon mongs pa rnams la yod pa ma yin no/ /'di ltar nyon mongs pa rnams nyid nyon mongs pa can ni ma yin te/byed pa po dang las dag gcig pa nyid du thal ba'i phyir ro/ /nyon mongs pa rnams kyang gzhan la/ nyon mongs pa can gzhan pa yang ma yin te/ ltos pa med pa nyid du thal bar 'gyur ba'i phyir ro/ /nyon mongs pa can la nyon mongs pa rnams med la/ nyon mongs pa rnams la nyon mongs pa can med cing /nyon mongs pa rnams nyon mongs pa can dang ldan pa yang ma yin no/ /de ltar na rang gi lus la lta ba bzhin du nyon mongs pa can yang nyon mongs pa rnams la rnam pa lngar yod pa ma yin no/ /gang gi phyir de lta yin pa de'i phyir nyon mongs pa dang nyon mongs pa can dag phan tshun ltos nas grub pa yang yod pa ma yin no//'dir smras pa/ gal te yang khyod kyis nyon mongs pa rnams bkag mod kyi/ /de lta na yang nyon mongs pa'i rgyu sdug pa dang mi sdug pa dang phyin ci log dag ni re zhig yod pa yin no/ /de yod pas nyon mongs pa rnams kyang yod par 'gyur ro//brjod par bya ste/ gal te sdug pa dang mi sdug pa dang phyin ci log dag nyid yod na/ nyon mongs pa rnams yod par 'gyur na/ gang gi phyir/ sdug dang mi sdug phyin ci log/ de dag kyang rang bzhin las ni yod min na ste/rten cing 'brel bar 'byung ba'i phyir dang / dgag pa chad par 'gyur ba'i phyir ro/ /gang gi tshe de ltar rang bzhin gyis yod pa ma yin pa de'i tshe/ sdug dang mi sdug phyin ci log/ brten nas nyon mongs gang dag yin/ /de'i rgyu sdug pa dang mi sdug pa dang phyin ci log rnams med pas nyon mongs pa rnams yod pa ma yin pa nyid do snyam du dgongs pa'o//'dir smras pa/ nyon mongs pa rnams ni yod pa nyid de/ de dag gi dmigs pa yod pa'i phyir ro / /'dir yang gang med pa de la ni dmigs pa yod pa ma yin te/ dper na mo gsham gyi bu bzhin no//gzugs dang / sgra dang dri dang ro dang reg dang chos zhes bya ba dmigs pa rnam pa drug ni yod pa yin te/ de'i phyir dmigs pa yod pas nyon mongs pa rnams yod pa nyid du brjod par bya ste khyed cag gis/ gzugs sgra ro dang reg pa dang / /dri dang chos dag rnam drug ni//bzhi ste 'dod chags zhe sdang dang / /gti mug gis ni yin par brtags pa gang yin pa de ni yod do/ /de la de las skye ba'i phyir 'dod chags la sogs pa 'dir gnas pas bzhi ste dmigs pa'o/ /dmigs pa de yang gzugs dang sgra dang dri dang ro dang reg bya dang chos zhes bya ba dang drug tu 'gyur te/yongs su gcod par byed pa dbang po drug phan tshun tha dad pa'i phyir ro/ /de la 'di ni 'di na'o/ /pha gi ni pha gi na'o zhes nges par brtag tu rung ba'i phyir dang / gzugs su rung bas na gzugs so/ /'dis don sgrogs shing ston par byed pas na sgra'o//brngub cing bsnam par bya bas ni dri dag ste/ gang du phyin pa de las gzhan du mi 'gro ba'i phyir ro/ /bro zhing ro myang bar bya bas na ro'o/ /reg par bya bas na reg pa'o/ /rang gi mtshan nyid 'dzin pa'i phyir ram/ chos kyi mchog mya ngan las 'das pa 'dzin pas na chos so//rnam pa drug po de dag gzhi yin no/ /gang gi zhe na/ 'dod chags dang zhe sdang dang gti mug gi'o/ /de la 'gal bas na 'dod chags te/ chags pa dang lhag par zhen pa'o/ /yang na 'dis sems dga' bar byed pas na 'dod chags so/ /sun 'byin pas na zhe sdang ste/kun nas mnar sems pa'o/ /yang na 'dis sems sun 'byin par byed pas na zhe sdang ngo / /gti mug pas na gti mug ste/ kun nas gti mug pa'o/ /yang na 'dis sems gti mug tu byed pas ni gti mug go/ /de'i phyir gzugs la sogs pa rnam pa drug ni nyon mongs pa 'di dag gi gzhi ste/dmigs pa yin no/ /de la gzugs la sogs pa dag la sdug pa'i rnam par sgro btags pas ni 'dod chags skye'o/ /mi sdug pa'i rnam par sgro btags pas ni zhe sdang ngo / /rtag pa dang bdag la log par sgro btags pas ni gti mug skye bar 'gyur ro//rnam pa drug po 'di dag gzhir btags pa bden mod kyi/ 'on kyang rab rib can dag gis yod pa ma yin pa'i skra shad la sogs pa ltar/ de dag yod pa ma yin pa'i rang bzhin du gyur pa zhig khyod kyis 'dod chags la sogs pa rnams kyi dmigs par yongs su btags pa yin no zhes bstan pa'i phyir/gzugs sgra ro dang reg pa dang / /dri dang chos dag 'ba' zhig ste/ /zhes gsungs so/ /'ba' zhig ste zhes bya ba ni btags pa tsam zhig tu zad de/ rang bzhin med do zhes bya ba'i tha tshig go//gal te rang bzhin med na/ 'o na ji ltar dmigs pa yin zhe na/ brjod par bya ste/ /dmigs pa de dag ni/ /dri za'i grong khyer lta bu dang / /smig rgyu rmi lam 'dra ba yin/ /gang gi tshe de dag dri za'i grong khyer la sogs pa ltar phyin ci log las dmigs pa 'ba' zhig tu zad pa de'i tshe//sgyu ma'i skyes bu lta bu dang / /gzugs brnyan 'dra ba de dag la/ /sdug pa dang ni mi sdug pa/ /'byung bar yang ni ga la 'gyur/ /'dis ni rten log pa las byung ba dang sdug pa dang mi sdug pa'i mtshan ma dag kyang brdzun pa nyid du 'gyur ro/ / ji skad du/ ngar 'dzin las byung phung po rnams/ /ngar 'dzin de ni don du brdzun/ /gang gi sa bon brdzun pa de'i/ /skye ba bden pa ga la zhig/ ces gsungs so/ /rten log pa nyid yin pas sdug pa dang mi sdug pa'i mtshan ma dag brdzun pa 'ba' zhig tu ma zad kyi 'on kyang 'thad pa 'dis kyang 'di gnyis brdzun pa nyid yin no zhes bstan pa'i phyir/gang la brten nas sdug pa zhes/ /gdags par bya ba mi sdug pa/ /sdug la ma ltos yod min pas / /de phyir sdug pa 'thad ma yin/ /zhes gsungs te/ 'di na gal te sdug pa zhes bya ba 'ga' zhig yod na ni/sdug pa dang 'brel pa can gzhan la ltos pa dang bcas pa'i phyir nges par ring thung ngam pha rol dang tshu rol ltar mi sdug pa la ltos par 'gyur na/ mi sdug pa gang la brten zhing mi sdug pa gang la ltos nas sdug pa zhes gdags par bya zhing rnam par gzhag par bya ba ltos par bya ba mi sdug pa de yang /sdug pa med par yod pa ma yin zhing / sdug pa la ma ltos par mi sdug pa yod pa ma yin te/ sdug pa la ltos pa med par mi sdug pa med pa yin no zhes bya ba'i don to/ /gang la'i sgras ni mjug thogs kyi mi sdug pa gzung ngo //gdags par bya ba zhes bya ba ni gong gi sdug pa dang sbyar ro/ /gang gi phyir de ltar na sdug par gdags pa la/ mi sdug pa zhes bya bar ltos par bya ba dngos po 'brel ba can gzhan yod pa ma yin pa de'i phyir sdug pa 'thad ma yin/ thung ngu med pas ring po'am/ /pha rol med pas tshu rol mi 'thad pa bzhin no zhes dgongs pa yin no//da ni mi sdug pa ni ji ltar yod pa ma yin pa de ltar bstan pa'i phyir/ gang la brten nas mi sdug par/ /gdags par bya ba sdug pa ni/ /mi sdug ma ltos yod min pas/ /de phyir mi sdug 'thad ma yin/ /zhes gsungs te/gal te mi sdug pa zhes bya ba 'ga' zhig yod na ni/ mi sdug pa dngos po 'brel pa can gzhan la ltos pa'i phyir de nges par ring thung ngam pha rol dang tshu rol ltar sdug pa la ltos par 'gyur na/ sdug pa gang la brten zhing sdug pa gang la ltos nas mi sdug pa zhes gdags par bya zhing /rnam par gzhag par bya ba ltos par bya ba sdug pa de yang mi sdug pa med par yod pa ma yin zhing / mi sdug pa la ma ltos par sdug par yod pa ma yin te/ mi sdug pa la ltos pa med par/ sdug pa med pa yin no zhes bya ba'i don to/ /'di yang gang la'i sgras ni mjug thogs kyi sdug pa gzung ngo //gdags par bya ba zhes bya ba ni gong gi mi sdug pa dang sbyar ro/ /gang gi phyir de ltar na mi sdug par gdags pa la sdug pa zhes bya ba ltos par bya ba dngos po 'brel pa can gzhan yod pa ma yin pa/ de'i phyir mi sdug 'thad ma yin/ /zhes bya'o/ /gang gi phyir de ltar sdug pa dang mi sdug pa dag yod pa ma yin pa de'i phyir/sdug pa yod pa ma yin na/ /'dod chags yod par ga la 'gyur/ /mi sdug yod pa ma yin na/ /zhe sdang 'byung bar ga la 'gyur/ /sdug pa dang mi sdug pa'i mtshan ma med na rgyu med pa'i phyir sdug pa dang mi sdug pa'i mtshan ma'i rgyu can gyi 'dod chags dang zhe sdang dag kyang yod pa ma yin no zhes bya bar dgongs pa'o//de'i phyir de ltar sdug pa dang mi sdug pa'i mtshan ma med pas 'dod chags dang zhe sdang gnyis med par bstan nas/ da ni phyin ci log med par bstan pa'i sgo nas gti mug kyang med par bstan pa'i phyir/gal te mi rtag rtag pa zhes/ /de ltar 'dzin pa log yin na/ /stong la mi rtag yod min pas/ /'dzin pa ji ltar log ma yin/ /zhes gsungs te/ 'dir phyin ci log ni bzhir brjod do/ /'di lta ste phung po lnga po skad cig re re la 'jig cing mi rtag pa la rtag go snyam du 'dzin pa gang yin pa de ni phyin ci log yin no//de bzhin du/ mi rtag pa la nges par gnod/ /gang la gnod yod de bde min/ /de phyir gang zhig mi rtag pa/ /de ni thams cad sdug bsngal 'gyur/ /zhes bya ba'i tshul 'dis mi rtag pa gang yin pa de ni sdug bsngal ba yin la/ 'du byed thams cad kyang mi rtag pa yin te/de'i phyir phung po lnga po sdug bsngal gyi bdag nyid can la/ bde ba'o snyam du log par 'dzin pa gang yin pa de ni phyin ci log gzhan yin no/ /de bzhin du/ khu khrag phrad pa'i sa bon can/ /bshad dang gci bas bskyed gyur zhing / /mi gtsang rang bzhin shes bzhin du//'dod pa gang gis de la chags/ /zhes bya ba de ltar rtag tu lus 'di bdag nyid thams cad du mi gtsang ba yin bzhin du rmongs pas de la gtsang ba nyid du 'dzin pa gang yin pa de ni phyin ci log yin no/ /de bzhin du phung po lnga po bdag gi mtshan nyid dang mi mthun pa mi rtag pa'i phyir dang /skye zhing 'jig pa'i chos can yin pa'i phyir/ bdag med cing bdag gi rang bzhin gyis stong bzhin du/ de la rtag tu 'dzin pa de ni bdag med pa la bdag tu mngon par zhen pa'i phyin ci log yin no/ /de ltar na phyin ci log bzhi po de dag ni gti mug gi rgyur gyur pa yin no//da ni 'dir 'di dpyad par bya ste/ gal te phung po rtag pa nyid kyis stong pa dag la rtag par 'dzin pa log pa ste/ phyin ci log yin no zhes de ltar rnam par 'jog na/ phung po rang bzhin gyis stong pa la mi rtag pa yang med pa ma yin nam/ de'i phyir/ stong la mi rtag yod min pas//'dzin pa ji ltar log pa yin / /'di ltar phyin ci ma log pa'i mi rtag pa nyid la ltos nas rtag pa phyin ci log yin no zhes bya bar gzhag pa yin na/ gang gi tshe stong pa la mi rtag pa nyid yod pa ma yin pa de'i tshe mi rtag pa nyid med pas de dang 'gal ba'i rtag pa nyid phyin ci log tu ga la 'gyur/de'i phyir phyin ci log med do/ /ji ltar rang bzhin dang bral zhing rang bzhin gyis ma skyes pa'i stong pa la mi rtag pa nyid med pa de bzhin du sdug bsngal ba yang med cing mi gtsang ba yang med la bdag med pa yang yod pa ma yin no/ /gang gi tshe rang bzhin gyis stong pas sdug bsngal la sogs pa med pa de'i tshe de dag gi mi mthun pa'i phyogs su gyur pa'i rtag pa dang bde ba dang gtsang ba dang bdag kyang phyin ci log tu lta ga la 'gyur/de'i phyir phyin ci log rang bzhin gyis med do/ /de med pa'i phyir na ma rig pa yod par ga la 'gyur te/ rgyu med pa'i phyir ro//ji skad du bcom ldan 'das kyis/ ma rig pa dang ma rig rkyen byung gang / /nam yod yod par 'gyur ba ma yin te/ /ma rig pa de 'jig rten yod min pa/ /de yi phyir na ngas 'di ma rig gsungs/ /zhes bya ba dang / de bzhin du/ /bcom ldan 'das ji ltar na gti mug gzungs kyi tshig lags/bcom ldan 'das kyis bka' stsal pa/ 'jam dpal gti mug ni rab tu grol ba ste/ des na gti mug ces bya'o zhes bya ba la sogs pa gsungs so/ /gzhan yang gal te yang dag pa ma yin pa nyid kyi phyir/ mi rtag pa la rtag go zhes bya ba de ltar 'dzin pa phyin ci log yin no zhes bya bar rnam par 'jog na/de lta na dngos po rang bzhin gyis yod pa ma yin pa la mi rtag pa'o snyam du 'dzin pa yang yod pa ma yin pas 'di yang ci'i phyir phyin ci log ma yin par rnam par gzhag ces bstan pa'i phyir/ gal te mi rtag rtag go zhes//de ltar 'dzin pa log yin na/ /stong la mi rtag pa'o zhes/ /'dzin pa'ang ji ltar log ma yin/ /zhes gsungs te/ gang gi tshe rtag pa nyid dang mi rtag pa nyid gnyi ga yang phyin ci log yin pa de'i tshe/ gang gi tshe phyin ci ma log par 'gyur ba/ / de dag las tha dad pa gsum las gzhan yod pa ma yin la/ gang gi tshe phyin ci ma log pa yod pa ma yin pa de'i tshe ci la ltos nas phyin ci log tu 'gyur/ de'i phyir rigs pa 'dis kyang phyin ci log yod pa ma yin no/ /de med pa'i phyir ma rig pa med do/ /ji ltar mi rtag pa la rtag pa'o zhes bya bar 'dzin pa 'di phyin ci log tu mi 'gyur ba de bzhin du phyin ci log lhag ma yod pa ma yin pa la yang sbyar bar bya'o//de nyid kyi phyir bcom ldan 'das kyis 'phags pa lhag pa'i bsam pa brtan pas zhus pa las/ bcom ldan 'das kyis bka' stsal pa/ rigs kyi bu gang lam gyi nges par 'byung ba yongs su tshol ba de ni de bzhin te/rigs kyi bu de bzhin gshegs pas ni chags par 'gyur pa'i chos rnams spangs pas 'dod chags spangs par ma gsungs so/ /de bzhin du zhe sdang bar 'gyur ba dang / gti mug par 'gyur pa'i chos rnams spangs nas de bzhin gshegs pas zhe sdang dang gti mug spang bar ma gsungs so//de ci'i phyir zhe na/ rigs kyi bu de bzhin gshegs pas ni chos gang yang dor bar bya ba'am thob par bya ba'i phyir chos mi ston to/ /yongs su shes par bya ba dang / yongs su spang bar bya ba dang / bsgom par bya ba dang /mngon sum du bya ba dang / mngon par rtogs par bya ba dang / 'khor ba las bskyod par bya ba dang / mya ngan las 'das par 'gro bar bya ba dang / bsal bar bya ba dang / gzhag par bya ba dang / dbye bar bya ba'i phyir chos mi ston to/ /rigs kyi bu gnyis su dbye ba ni de bzhin gshegs pa rnams kyi chos nyid ma yin no//gnyis la spyod pa gang yin pa de dag ni yang dag pa la zhugs pa ma yin no/ /rigs kyi bu gnyis gang zhe na/ bdag gis 'dod chags spang bar bya'o snyam pa 'di ni gnyis so/ /bdag gis zhe sdang spang bar bya'o snyam pa 'di ni gnyis so//bdag gis gti mug spang bar bya'o snyam pa 'di ni gnyis so/ /de ltar sbyor ba gang yin pa de dag ni yang dag pa la zhugs pa ma yin te/ de dag ni log par zhugs pa rig par bya'o/ /rigs kyi bu 'di lta ste/ dper na mi la la zhig gis sgyu ma mkhan gyi rol mo byung ba'i tshe/sgyu ma mkhan gyis sprul pa'i bud med mthong nas 'dod chags kyi sems bskyed de/ de 'dod chags kyis sems dkris nas 'khor gyis 'jigs nas bag tsha ste/ stan las langs nas song ste de song nas bud med de nyid la mi sdug par yid la byed cing / mi rtag pa dang /sdug bsngal ba dang / stong pa dang bdag med par yid la byed na/ /rigs kyi bu de ji snyam du sems/ mi de yang dag par zhugs pa yin nam/ 'on te log par zhugs pa yin/ gsol pa/ bcom ldan 'das gang bud med ma mchis pa la mi sdug par yid la bgyid cing /mi rtag pa dang / sdug bsngal ba dang / stong pa dang bdag med par yid la bgyid pa'i mi de'i mngon par brtson pa de ni log pa lags so/ /bcom ldan 'das kyis bka' stsal pa/ rigs kyi bu 'di na dge slong dang dge slong ma dang dge bsnyen dang dge bsnyen ma kha cig ma skyes shing ma byung ba'i chos rnams la mi sdug par yid la byed cing mi rtag pa dang sdug bsngal ba dang /stong pa dang bdag med par yid la byed pa gang yin pa de dag kyang de dang 'dra bar blta bar bya'o/ /nga ni mi blun po de dag lam sgom pa yin no zhes mi smra ste/ de dag ni log par zhugs pa zhes bya'o//rigs kyi bu 'di lta ste/ dper na mi la la zhig gnyid log pa'i rmi lam du bdag gi khyim du rgyal po'i btsun mo 'ong ba mthong nas de dang lhan cig nyal bar byed de/ dran pa nyams pa'i phyir bdag nyid ni sad do snyam du de ltar sems nas/ rgyal pos ma tshor grang /des bdag bsad du 'ong ngo snyam nas 'jigs shing skrag ste bros na/ 'di ji snyam du sems/ ci mi de 'jigs shing skrag ste bros pas rgyal po'i btsun mo'i 'jigs pa de las thar bar 'gyur ram/ gsol ba bcom ldan 'das de ni de ltar ma lags so/ / de ci'i slad du zhe na/ bcom ldan 'das 'di ltar mi des bud med ma mchis par bud med kyi 'du shes bskyed de yang dag pa ma lags par kun brtags pa'i slad du'o/ /bcom ldan 'das kyis bka' stsal pa/ rigs kyi bu 'di na dge slong dang dge slong ma dang dge bsnyen dang dge bsnyen ma kha cig 'dod chags med pa la 'dod chags kyi 'du shes bskyed nas/'dod chags kyi 'jigs pas skrag ste 'dod chags las nges par 'byung ba yongs su tshol ba dang / de bzhin du zhe sdang med par zhe sdang gi 'du shes bskyed gti mug med par gti mug gi 'du shes bskyed nas gti mug gi 'jigs pas skrag ste/gti mug las nges par 'byung ba yongs su tshol ba rnams kyang de dang 'dra bar blta bar bya'o/ /nga ni mi blun po de dag la lam sgom pa yin no zhes mi smra ste/ de dag ni log par zhugs pa zhes bya'o/ / rigs kyi bu 'di lta ste dper na mi des med bzhin du sgro btags pas 'jigs pa med pa la 'jigs pa'i 'du shes bskyed pa de bzhin du/ /rigs kyi bu byis pa so so'i skye bo rnams ni 'dod chags kyi mtha' ma shes nas 'dod chags kyi yod pa'i mtha'i 'jigs pas skrag ste/'dod chags kyi mtha' las nges par 'byung ba tshol lo/ /zhe sdang gi mtha' ci yang med pa'i mtha' ma shes nas zhe sdang gi mtha'i 'jigs pas skrag cing ci yang med pa'i mtha' la nges par 'byung bar yongs su tshol lo/ /gti mug gi mtha' stong pa nyid kyi mtha' ma shes nas gti mug gi mtha'i 'jigs pas skrag ste/stong pa nyid kyi mtha' las nges par 'byung ba yongs su tshol bar byed do/ /nga ni mi blun po de dag la lam sgom pa yin no zhes mi smra ste/ de dag ni log par zhugs pa zhes bya'o zhes rgya cher gsungs so/ / 'dir smras pa/ gal te yang rtag pa'o zhes bya ba de ltar 'dzin pa'i phyin ci log yod pa ma yin pa de ltar na yang re zhig 'dzin pa de ni yod pa ma yin no/ /'dzin pa zhes bya ba ni 'dzin pa ste/ dngos po bya ba'i rang bzhin can yin no/ /de la yang gdon mi za bar sgrub byed rtag pa nyid la sogs pa byed pa yod par 'gyur dgos la/bdag gam sems can kyang rung ste byed pa po yang yod dgos shing / gzugs la sogs pa'i yul las kyang yod dgos so/ /dngos po bya ba dang byed pa dang / byed pa po dang las rnams grub pa yin na ni thams cad grub pas kho bo cag gi 'dod pa grub bo//brjod par bya ste/ khyod kyi reg pa 'di ni brdzun pa yin te/ ji skad bshad pa'i tshul gyis/ gang gis 'dzin dang 'dzin gang dang / /'dzin pa po dang gang gzung ba/ /thams cad nye bar zhi ba ste/ /de phyir 'dzin pa yod ma yin/ /'dir 'dzin pa po 'ga' zhig rtag pa nyid la sogs pa'i khyad par byed par 'gyur ba gang zhig gzugs dang sgra la sogs pa'i dngos po las su gyur pa cung zad cig 'dzin par byed pa de ji ltar yod pa ma yin pa de ltar ni sngar bstan zin to//ji ltar zhe na/ ji ltar rtag pa nyid la sogs pa'i byed pa po yod pa ma yin pa de ltar ni/gal te mi rtag rtag pa zhes/ /de ltar 'dzin pa log yin na/ /zhes bya ba la sogs pas bstan la/ ji ltar 'dzin pa po med pa de ltar ni/ bdag gi yod nyid med nyid ni/ /ji lta bur yang grub pa med/ /ces bya ba 'dis bstan pa yin zhing / gang gzung bar bya ba de yang ji ltar med pa de ltar ni/gzugs sgra ro dang reg pa dang / /dri dang chos dag 'ba' zhig ste/ /zhes bya bas bstan pa yin no/ /gang gi tshe de ltar byed pa po dang byed pa dang las dag ma grub pa de'i tshe go rgyu med pa'i 'dzin pa yod par ga la 'gyur/ /de'i phyir/ gang gis 'dzin dang 'dzin gang dang //'dzin pa po dang gang gzung ba/ /thams cad nye bar zhi ba ste/ /rang bzhin gyis ma skyes pa'i phyir thams cad mya ngan las 'das pa yin no zhes bya ba'i don to/ /gang gi phyir 'di de ltar yin pa/ de phyir 'dzin pa yod pa ma yin no/ /rnam pa gcig tu na gang gi phyir rkyen brtag pa la sogs pa'i rab tu byed pa rnams kyi byed pa dang dngos po dang byed pa po dang las thams cad rnam pa thams cad du ma skyes par bstan pa de'i phyir/'di dag thams cad nye bar zhi ba yin te/ de'i phyir 'dzin pa yod pa ma yin no zhes bya ba'o/ /'dir smras pa/phyin ci log dag ni yod pa nyid de/ phyin ci log dang ldan pa yod pa'i phyir ro/ /'di na phyin ci log dang ldan pa'i lha sbyin yod pa ma yin la/ phyin ci log dag med par ni phyin ci log dang ldan pa srid pa ma yin no/ /de'i phyir phyin ci log yod pa ma yin no//brjod par bya ste/ 'dir byed pa dang byed pa po dang las rnams ni med pas 'dzin pa nyid rnam pa thams cad du yod pa ma yin no zhes ni kho bo cag gis bshad zin to/ /de'i phyir/ /log pa'am yang dag nyid du ni/ /'dzin pa yod pa ma yin na/ /gang la phyin ci log yod cing //gang la phyin ci ma log yod/ /'ga' zhig cung zad kyang log pa'am yang dag par mi 'dzin pa la phyin ci log nyid dang / phyin ci ma log pa nyid ces bya ba ga la yod/ de'i phyir phyin ci log dag med do/ /gzhan yang phyin ci log 'di dag 'ga' zhig la 'dod na ni / phyin ci log tu gyur pa zhig la brtag gam/ phyin ci log tu ma gyur pa zhig gam/ phyin ci log tu 'gyur bzhin pa zhig la brtag grang na/ rnam pa thams cad du 'thad pa ma yin no zhes bstan pa'i phyir/ phyin ci log tu 'gyur ba la/ /phyin ci log dag mi srid de/ /phyin ci log tu ma gyur la//phyin ci log dag mi srid do/ /phyin ci log tu 'gyur bzhin la'ang / /phyin ci log dag mi srid do/ /gang la phyin ci log srid pa/ /bdag nyid kyis ni rnam par dpyod/ /ces bya ba gsungs so/ /de la/ re zhig phyin ci log tu gyur pa la/ /phyin ci log dag mi srid do//ci'i phyir zhe na/ 'di ltar/ gang zhig phyin ci log tu gyur pa de ni phyin ci log tu gyur zin pa nyid yin na/ de la yang phyin ci log dang 'brel pas ci zhig bya ste/ dgos pa med pa'i phyir ro/ /phyin ci log tu gyur pa la yang phyin ci log dag mi rigs te/ mi shes pa'i gnyid dang bral bas blo gros kyi spyan rgyas pa sangs rgyas rnams la yang phyin ci log yod par thal bar 'gyur ba'i phyir ro//de bzhin du phyin ci log tu 'gyur bzhin pa la yang phyin ci log dag yod pa ma yin te/ phyin ci log par 'gyur bzhin pa med pa'i phyir te/ gang zhig phyin ci log tu gyur pa dang /phyin ci log tu ma gyur pa las ma gtogs pa phyin ci log bzhin pa zhes bya ba'i dngos po gzhan po de gang zhig yod par 'gyur/ phyin ci log tu 'gyur bzhin pa ni phyed phyin ci log pa yin no zhe na/ phyed phyin ci log ba zhes bya ba ni gang zhig cung zad cig phyin ci log tu gyur cing /cung zad cig phyin ci log tu ma gyur pa yin na/ de la 'di'i cung zad cig phyin ci log tu gyur pa gang yin pa de la ni phyin ci log gis phyin ci log tu byed pa ma yin te/ phyin ci log tu gyur zin pa'i phyir ro/ /'di'i cung zad cig phyin ci log tu ma gyur pa gang yin pa de yang phyin ci log gis phyin ci log tu byed pa ma yin te/phyin ci log tu ma gyur pa'i phyir ro/ /de'i phyir phyin ci log tu gyur bzhin pa 'ga' zhig la yang phyin ci log dag srid pa ma yin no/ /phyin ci log tu gyur pa dang / phyin ci log tu ma gyur pa dang / phyin ci log tu 'gyur bzhin pa gang dag la de lta mi srid la mi srid pas da gang dag la phyin ci log dag srid ces bdag nyid gzu bor gyur pas shes rab kyis rnam par dpyod cig/de'i phyir de ltar na rten med pas kyang phyin ci log dag yod pa ma yin no/ /gzhan yang / phyin ci log rnams ma skyes na //ji lta bur na yod par 'gyur/ /phyin ci log rnams skye med na/ /phyin ci log can ga la yod/ /de la/ dngos po bdag las mi skye ste/ /gzhan las skyes pa nyid ma yin/ /bdag dang gzhan las kyang min na/ /phyin ci log can ga la yod/ / phyin ci log dang ldan pa ga la yod ces bya ba'i tha tshig go//de'i phyir phyin ci log dag ni yod pa nyid de/ phyin ci log dang ldan pa yod pa'i phyir ro zhes gang smras pa de mi rigs so/ /ci ste yang phyin ci log bzhi po cung zad cig yod pa nyid du khas len na/ de lta na yang / phyin ci log nyid du gzhag par mi nus so//ci'i phyir zhe na/ 'di ltar/ gal te bdag dang gtsang ba dang / /rtag dang bde ba yod na ni/ /bdag dang gtsang dang rtag pa dang / /bde ba phyin ci log ma yin/ /gal te bdag dang gtsang ba dang rtag pa dang bde ba de dag phyin ci log yin no zhes bya bar rnam par 'jog na ni/ci de dag yod dam 'on te med/ /gal te yod na ni 'o na phyin ci log ma yin te/ yod pa'i phyir bdag med pa la sogs pa bzhin no/ /ci ste med na ni de'i tshe de dag med pa'i phyir phyin ci log nyid yod pa ma yin pa 'ba' zhig tu ma zad kyi/ 'gal zla phyin ci log med pa'i phyir bdag med pa la sogs pa phyin ci log pa rnams kyang yod pa ma yin no zhes bstan pa'i phyir/gal te bdag dang gtsang ba dang / /rtag dang bde ba med na ni/ /bdag med mi gtsang mi rtag dang / /sdug bsngal yod pa ma yin no/ /zhes gsungs te/ gal te yod pa ma yin pa phyin ci log nyid du mi srid pas bdag dang gtsang ba dang rtag pa dang bde ba med do snyam du sems na/ de lta yin na 'o na bdag la sogs pa rnams yod pa ma yin pa'i phyir gang bdag med pa la sogs pa phyin ci ma log pa nyid du gzung ba de yang dor bar bya ste/ dgag bya med na bkag pa med pa'i phyir ro//gang gi tshe de ltar bdag med pa la sogs pa yod pa ma yin pa de'i tshe de yang rang gi ngo bos grub pa med pa'i phyir bdag la sogs pa ltar ji ltar phyin ci log tu mi 'gyur/ de'i phyir thar pa 'dod pa rnams phyin ci log de dag brgyad char yang spang bar bya'o//phyin ci log rnam par dpyod pa 'di dag ji skad du bshad pa 'di ni ma rig pa la sogs pa spang ba'i rgyu nyid yin pas don chen po can nyid yin par bstan pa'i phyir/ de ltar phyin ci log 'gags pas/ /ma rig pa ni 'gag par 'gyur/ /ma rig 'gags par gyur na ni/ /'du byed la sogs 'gag par 'gyur//zhes gsungs te/ gang gi tshe rnal 'byor pa des ji skad bshad pa'i rigs pas phyin ci log ma dmigs pa de'i tshe/ de ltar phyin ci log ma dmigs pas de'i rgyu can gyi ma rig pa 'gag par 'gyur ro/ /de 'gags pas ma rig pa'i rgyu can 'du byed la sogs pa rga shi'i mthar thug pa'i chos rnams 'gag par 'gyur te/ma rig pa ni nyon mongs pa'i tshogs mtha' dag dang / skye ba la sogs pa sdug bsngal gyi rgyur 'gyur ba'i phyir ro/ /ji ltar lus kyi dbang po'i rgyu can dbang po gzugs can thams cad ni lus kyi dbang po 'gags pa na 'gag par 'gyur ba de bzhin du/'du byed la sogs pa ma rig pa'i rgyu can srid pa'i yan lag 'byung ba rnams ni nges par ma rig pa 'gags pa na 'gag par 'gyur ro zhes bstan pa'i phyir/ ma rig 'gags par gyur na ni/ /'du byed la sogs 'gag par 'gyur//zhes gsungs pa yin no/ /'dir smras pa/ gal te phyin ci log 'gags pas ma rig pa 'gag na/ 'o na ni gang zhig de ltar phyin ci log 'gags pas 'gag par 'gyur ba/ ma rig pa yod pa yin te/ nam mkha'i a mra'i lcug ma yod pa ma yin pa spang ba'i thabs tshol ba ni yod pa ma yin no//de'i phyir ma rig pa yod pa yin te/ de 'gag pa'i thabs tshol ba yod pa'i phyir ro/ /de'i phyir 'dod chags la sogs pa'i nyon mongs pa de'i rgyu can rnams yod pa yin la/ /nyon mongs pa yod pa'i phyir srid pa'i rgyun yang yod pa nyid do//brjod par bya ste/ kye ma gang zhig dam pa gzhan gyi don 'byung ba la ci la yang rag ma las par chas pa rnams thabs dang shes rab kyi stobs kyis nyon mongs pa'i dug gi ljon shing chen po bdag nyid thams cad du sdug bsngal shin tu stobs pa ma lus pa drungs 'byin par mdzad pa la/stobs 'debs par mi gnas pa 'ba' zhig tu ma zad kyi 'on kyang de drungs 'byin par mdzad pa rnams dang shin tu 'gal bar gnas shing gzu lums kyi nyon mongs pa'i dug gi ljon shing chen po de 'dzugs pa la ches shin tu gus pa ni/pha rol po don ma yin pa la mkhas pa shin tu chen po nyid yin no/ /gzhan yang gal te nyon mongs pa ma rig pa la sogs pa rnams spong ba yod na ni/ de spong ba'i thabs tshol bar 'gyur na/ de dag spong ba ni yod pa ma yin no/ /ci'i phyir zhe na/ 'di na gal te yod na ni/de'i tshe rang gi ngo bos yod pa rnams la 'am / yod pa ma yin pa rnams la yod par 'gyur ba zhig go/ /de las cir 'gyur zhe na/ gal te nyon mongs pa rang bzhin ngo bos yod par gyur pa rnams spong bar 'dod na ni/ de mi 'thad do/ /ci'i phyir zhe na/ 'di ltar/ gal te la la'i nyon mongs pa/ /gang dag rang bzhin gyis yod na/ /ji lta bur na spang bar 'gyur/ /yod pa su zhig spong bar byed/ /dngos po rang gi ngo bos yod pa rnams kyi rang bzhin ni bzlog par mi nus te/ sa la sogs pa rnams kyi rang bzhin sra ba la sogs pa rnams ni ldog pa ma yin no//de bzhin du gal te la la ste gang zag gi gang dag ste ma rig pa la sogs pa'i nyon mongs pa 'di dag kyang rang bzhin gyis yod na ni ji lta bur na spong bar 'gyur te/ gang gis kyang spong bar mi 'gyur ba nyid do//yang ci'i phyir de dag ni spong zhe na/ yod pa su zhig spong bar byed/ /ces gsungs te/ rang bzhin bzlog par mi nus pa'i phyir/ nam mkha'i mi sgrib pa nyid bzlog tu med pa bzhin no snyam du dgongs pa yin no/ /ci ste rang bzhin gyis med pa zhig yin na zhes bya bar rtog na/de ltar na yang spong ba yod pa ma yin pa nyid do zhes gsungs pa/ gal te la la'i nyon mongs pa/ /gang dag rang bzhin gyis med pa/ /ji lta bur na spong bar 'gyur/ /med pa su zhig spong bar byed/ /nyon mongs pa rang bzhin gyis med pa ste mi bdog pa rnams kyang spang bar mi nus pa nyid do//me'i grang ba yod pa ma yin pa ni bzlog par nus pa ma yin no/ /de bzhin du nyon mongs pa 'di dag kyang su la yang gang dag kyang rang bzhin gyis med pas/ de dag sus spong bar byed de sus kyang spong bar byed pa ma yin no/ /de'i phyir de ltar phyogs gnyi ga ltar yang spong ba yod pa ma yin pas nyon mongs pa rnams spong ba med do//spong ba med pa'i phyir na nyon mongs pa spong ba'i thabs tshol ba lta yod par ga la 'gyur/ /de'i phyir ji skad du/ ma rig pa la sogs pa rnams ni yod pa nyid de/ de spong ba'i thabs tshol ba yod pa'i phyir ro zhes gang smras pa de mi 'thad do//ji skad du/ 'phags pa ting nge 'dzin gyi rgyal po las kyang / gzugs kyis kyang ni byang chub bstan/ /byang chub kyis kyang gzugs bstan te/ /mi mtshungs pa yi sgra rnams kyis/ /chos kyi bla ma rab tu bstan/ / sgra yis gzugs kyi bla ma ste/ /ngo bo nyid kyis zab pa dag/ gzugs dang byang chub mnyam pa ste/ /tha dad bya ba de mi rnyed/ /mya ngan 'das pa zab par yang / /sgra yis rab tu bstan pa ltar/ /mya ngan 'das pa de mi rnyed/ /de yi sgra yang mi rnyed do/ /sgra dang mya ngan 'das pa ni//gnyi ga'ang rnyed par mi 'gyur te/ /de bzhin stong pa'i chos rnams la/ /mya ngan 'das pa rab tu bstan/ /mya ngan 'das dang 'da' ba ni/ /mya ngan 'das pa mi rnyed de/ /'di ni chos rnams 'jug pa med/ /phyis ni ci 'dra de bzhin sngon/ /chos rnams thams cad rang bzhin gyis//mya ngan 'das dang mtshungs mnyam par/ /sangs rgyas bstan la brtson pa yi/ /'byung ba de dag rnams kyis rig/ ces gsungs pa dang / de bzhin du/ ye shes kyis ni phung po stong nyid mkhyen/ /mkhyen nas nyon mongs rnams dang mi 'grogs te//brjod pa tsam gyi sgo nas brjod bya zhing / /mya ngan 'das bzhin 'jig rten 'dir dpyad bya/ /zhes bya ba gsungs so/ /slob dpon zla ba grags pa'i zhal snga nas sbyar ba'i tshig gsal ba las/ phyin ci log brtag pa zhes bya ba rab tu byed pa'i nyi shu rtsa gsum pa'i 'grel pa'o// //'dir/ gal te 'di dag kun stong na/ /'byung ba med cing 'jig pa med/ /'phags pa'i bden pa bzhi po rnams/ /khyed la med par thal bar 'gyur/ /gal te rigs pas mi 'thad pa'i phyir phyi dang nang gi dngos po'i rnam pa 'di dag thams cad stong pa nyid do zhes sgrub na/de lta na khyod la nyes pa chen po dang mang por 'gyur ba ma yin nam/ ji ltar zhe na/ gal te 'di dag thams cad stong pa nyid yin na de'i tshe gang stong pa de ni med pa yin la/ gang med pa de ni yod pa ma yin pa'i phyir mo gsham gyi bu bzhin du skye ba med cing 'gag pa med pas dngos po gang yang 'byung ba med cing 'jig pa med par 'gyur ro//de med pas 'phags pa'i bden pa bzhi po rnams stong par smra ba khyod la med par thal bar 'gyur ro/ /ji ltar zhe na/ 'di ltar/ 'di na nye bar len pa'i phung po lnga po sngar gyi rgyus bskyed cing rten cing 'brel bar 'byung ba ni/sdug bsngal gyi sdug bsngal nyid dang / 'gyur ba'i sdug bsngal nyid dang / 'du byed kyi sdug bsngal nyid kyis mi mthun par gyur pa'i phyir gnod pa'i bdag nyid can nyid kyis na sdug bsngal zhes bya'o/ /sdug bsngal de yang phyin ci log spangs pas 'phags pa rnams kho nas sdug bsngal lo snyam du shes kyi//phyin ci log dang rjes su 'brel ba'i phyir dang / ji ltar mthong ba bzhin dngos po'i rang bzhin rnam par 'jog pa'i phyir 'phags pa ma yin pa dag gis ni ma yin no/ /de ltar dngos po de dag gis dngos po de dag nyid der dmigs pa'i phyir rims la sogs pa'i nad kyis btab pas dbang po phyin ci log tu gyur pa bu ram mngar ba'i rang bzhin yang kha ba nyid du dmigs pa rnams la de dag gi shes pa la ltos nas kha ba nyid du bden gyi/mngar ba nyid du ni ma yin pa de bzhin du 'dir yang nye bar len pa'i phung po lnga sdug bsngal gyi rang bzhin yin mod kyi/de lta na yang gang dag gis 'di dag sdug bsngal gyi bdag nyid du mthong ba de dag nyid la de dag sdug bsngal yin par bzhag gi/ phyin ci log dang rjes su 'brel pas rnam pa gzhan du dmigs pa rnams la ni ma yin no//de'i phyir 'phags pa rnams kho na la de sdug bsngal gyi bdag nyid du bden pa de'i phyir sdug bsngal 'phags pa'i bden pa zhes bya'o/ /gal te 'phags pa ma yin pa rnams kyis kyang tshor ba sdug bsngal la sdug bsngal lo zhes bya bar yongs su gcod pa nyid ma yin nam/de'i phyir ji ltar sdug bsngal 'phags pa rnams kho na la bden pa yin zhe na/ tshor ba sdug bsngal nyid 'ba' zhig sdug bsngal gyi bden pa ma yin te/ 'o na ci zhe na/ nye bar len pa'i phung po lnga char yin no/ /de'i phyir 'phags pa rnams kho na la de bden pa'i phyir 'phags pa'i bden pa'o zhes rnam par gzhag ste/ji skad du/ lag 'thil spu nyag gcig 'dug pa/ /mi rnams kyis ni mi rtogs la/ /de nyid mig tu song na yang / /mi bde ba dang gnod bskyed ltar/ /byis pa lag mthil 'dra ba yis/ /'du byed sdug bsngal spu mi rtogs//'phags pa mig dang 'dra bas ni/ /de yis shin tu yid kyang 'byung / /zhes bshad do/ /de'i phyir sdug bsngal de ni 'phags pa rnams kho na la bden pas sdug bsngal 'phags pa'i bden pa'o zhes rnam par gzhag go/ /nam zhig gi tshe na 'di sdug bsngal 'phags pa'i bden par rigs she na/gang gi tshe 'dus byas rnams la 'byung ba dang 'jig pa yod pa yin na/ gang gi tshe stong pa'i phyir cung zad kyang skye ba med cing cung zad kyang 'gag pa med pa de'i tshe ni sdug bsngal yod pa ma yin no/ /sdug bsngal med pa na yang kun 'byung gi bden pa yod par ga la 'gyur//'di ltar rgyu gang las sdug bsngal kun 'byung zhing skye ba sred pa dang las dang nyon mongs pa'i mtshan nyid can gyi rgyu de la ni kun 'byung zhes bya na/ gang gi tshe 'bras bur gyur pa sdug bsngal gyi bden pa yod pa ma yin pa de'i tshe 'bras bu dang bral ba rgyu nyid du mi 'thad pa'i phyir kun 'byung yang med do//sdug bsngal dang bral zhing yid mi skye ba la ni 'gog pa zhes bya na/ gang gi tshe sdug bsngal nyid med pa de'i tshe gang gang gis 'gog par 'gyur/ de'i phyir sdug bsngal 'gog pa yang med do/ /de'i phyir sdug bsngal med na 'gog pa'i bden pa yang med do//sdug bsngal 'gog pa med na yang sdug bsngal 'gog par 'gro ba'i lam 'phags pa'i lam yan lag brgyad kyang yod par ga la 'gyur/ de'i phyir lam gyi bden pa yang med do/ /de'i phyir de ltar dngos po rnams stong par smra bar khyod la 'phags pa'i bden pa bzhi po dag med par thal bar 'gyur ro//de las nyes pa cir 'gyur zhe na/ brjod par bya ste/ 'phags pa'i bden pa bzhi med pas/ /yongs su shes dang spang ba dang / /sgom dang mngon du bya ba dag /'thad par 'gyur ba ma yin no/ /'phags pa'i bden pa bzhi po rnams med par thal ba yin dang /mi rtag pa la sogs pa ni rnam pa dag gis sdug bsngal gyi bden pa yongs su shes pa de dang / sdug bsngal kun 'byung gi bden pa spang ba dang / sdug bsngal 'gog par 'gro ba'i lam sgom pa dang / /sdug bsngal 'gog pa mngon du bya ba ste mngon sum du bya ba mi 'thad do//gal te sdug bsngal la sogs pa 'phags pa'i bden pa rnams med pas yongs su shes pa la sogs pa med pa de'i tshe/ nyes pa ci yod ce na/ brjod par bya ste/ de dag yod pa ma yin pas/ /'bras bu bzhi yang yod ma yin//'bras bu med na 'bras gnas med/ /zhugs pa dag kyang yod ma yin/ /gal te skyes bu gang zag brgyad/ /de dag med na dge 'dun med/ /'phags pa'i bden pa rnams med phyir/ /dam pa'i chos kyang yod ma yin/ /chos dang dge 'dun yod min na//sangs rgyas ji ltar yod par 'gyur/ /gang gi tshe de ltar sdug bsngal yongs su shes pa la sogs pa med pa de'i tshe/ de med pas rgyun du zhugs pa dang / lan cig phyir 'ong ba dang / phyir mi 'ong ba dang / dgra bcom pa'i 'bras bu dang / bzhi yang 'thad pa ma yin no//ji ltar zhe na/ 'dir nyon mongs pa rnams kyi spang pa bsdoms pas ni/ 'bras bu'i ming 'thob ste/ 'di lta ste/ kun tu sbyor ba gsum spangs pas skad cig ma bcu drug pa lam la rjes su shes pa la sogs pa nyon mongs pa'i spangs pa gang yod pa de ni rgyun du zhugs pa'i 'bras bu'o//'dod pa na spyod pa'i nyon mongs pa bsgom pas spang bar bya ba rnams kyi chen po dang 'bring dang chung ngu'i rnam pa rnams la yang re re zhing chen po dang 'bring dang chung ngu'i dbye bas phye ba na rnam pa dgur 'gyur ro/ /de la 'dod pa na spyod pa'i rnam pa drug pa zad pas rnam par grol ba'i lam la spangs pa gang yod pa de ni lan cig phyir 'ong ba'i 'bras bu'o//'dod pa na spyod pa'i nyon mongs pa de dag gi nyon mongs pa rnam pa dgu pa zad pas rnam par grol ba'i lam la spangs pa gang zhig yod pa de ni phyir mi 'ong ba'i 'bras bu'o/ /gzugs dang gzugs med pa na spyod pa'i nyon mongs pa bsgom pas spang bar bya ba/sa dang sa la rnam pa dgu'i dbye bas phye ba rnams las 'du shes med 'du shes med min skye mched kyi sa pa'i nyon mongs pa rnam pa dgu zad par zad pas rnam par grol ba'i lam la spangs pa gang zhig yod pa de ni dgra bcom pa'i 'bras bu zhes bya ste/'di dag ni 'bras bu bzhi'o/ /'di dag ji ltar rigs she na/ gal te sdug bsngal yongs su shes pa yod cing kun 'byung spang ba dang / 'gog pa mngon sum du bya ba dang lam sgom pa yod par 'gyur ba yin na/ gang gi tshe sdug bsngal la sogs pa 'phags pa'i bden pa rnams med pas sdug bsngal yongs su shes pa la sogs pa med pa de'i tshe ni 'bras bu bzhi po de dag yod pa ma yin no//'bras bu bzhi po de dag med na de dag la gnas pa'i 'phags pa'i gang zag 'bras bu la gnas pa bzhi po gang dag yin pa de dag kyang yod pa ma yin no/ /de nyid kyi phyir na 'phags pa'i gang zag zhugs pa bzhi po dag kyang yod pa ma yin no//'dir skad cig ma bcu drug pa lam la rjes su shes pa'i snga rol gyi shes pa dang / bzod pa'i skad cig ma bcwa lnga gang dag yin pa 'di lta ste/ khams gsum gyi sdug bsngal mngon par rtogs pa de'i tshe sdug bsngal la dmigs pa'i bzod pa dang /shes pa'i skad cig ma bzhir 'gyur ro/ /de la khams gsum gyi sdug bsngal mngon par rtogs pa'i dus kyi bzod pa dang shes pa'i skad cig ma bzhi gang zhe na/ 'di lta ste/ /'dod pa na spyod pa'i sdug bsngal mthong bas spang bar bya ba 'jig tshogs dang mthar 'dzin pa dang log par lta ba dang /lta ba mchog tu 'dzin pa dang / tshul khrims dang brtul zhugs mchog tu 'dzin pa dang / the tshom dang / 'dod chags dang / khong khro ba dang / nga rgyal dang / ma rig pa zhes bya ba phra rgyas bcu'i gnyen por gyur cing /mi rtag pa dang / sdug bsngal ba dang / stong pa dang / bdag med pa'i rnam par skyes pa/ 'dod pa na spyod pa'i sdug bsngal gyi bden pa la dmigs pa bar chad med pa'i lam gyi mtshan nyid can/ sdug bsngal la chos shes pa'i bzod pa'i skad cig ma ni gcig go//dmigs pa dang rnam pa de kho na dang ldan pa rnam par grol ba'i lam gyi mtshan nyid can sdug bsngal la chos shes pa'i skad cig ma ni gnyis pa'o/ /de bzhin du gzugs dang gzugs med pa na spyod pa'i sdug bsngal la dmigs pa/ khong khro ma gtogs pa bshad ma thag pa'i phra rgyas bco brgyad kyi gnyen por gyur cing /sdug bsngal la sogs pa'i rnam par skyes pa bar chad med pa'i lam gyi mtshan nyid can/ /sdug bsngal la rjes su shes pa'i bzod pa'i skad cig ma ni gsum pa'o/ / dmigs pa dang rnam pa de kho na dang ldan pa'i rnam par grol ba'i lam gyi mtshan nyid can/ sdug bsngal la rjes su shes pa'i bzod pa'i [# skad cig ma ni bzhi pa'o/ /khams gsum na spyod pa'i sdug bsngal gyi bden pa mngon par rtogs pa dang / bzod pa dang shes pa'i skad cig ma bzhi po de dag ji lta ba de bzhin du/'dod pa na spyod pa'i kun 'byung mthong bas spang bar bya ba log par lta ba dang / lta ba mchog tu 'dzin pa dang / the tshom dang / 'dod chags dang / khong khro dang / nga rgyal dang / ma rig pa zhes bya ba phra rgyas bdun gyi gnyen por gyur cing / rgyu dang kun 'byung ba dang rab tu skye ba dang rkyen gyis rnam par skyes pa dang / 'dod pa na spyod pa'i kun 'byung gi bden pa la dmigs pa bar chad med pa'i lam gyi mtshan nyid can kun 'byung la chos shes pa'i bzod pa'i skad cig ma ni gcig go/ /dmigs pa dang rnam pa de kho na dang ldan pa rnam par grol ba'i lam gyi mtshan nyid can kun 'byung la chos shes pa'i skad cig ma ni gnyis pa'o//de bzhin du gzugs dang gzugs med pa na spyod pa'i kun 'byung gi bden pa la dmigs pa khong khro ba ma gtogs pa bshad ma thag pa'i phra rgyas bcu gnyis kyi gnyen por gyur cing /kun 'byung gi bden pa'i rnam par skyes pa/ bar chad med pa'i lam gyi mtshan nyid can kun 'byung la rjes su shes pa'i bzod pa'i skad cig ma ni gsum pa'o/ /dmigs pa dang rnam pa de kho na dang ldan pa rnam par grol ba'i lam gyi mtshan nyid can kun 'byung la rjes su shes pa'i skad cig ma ni bzhi pa ste/de dag ni khams gsum na spyod pa'i sdug bsngal kun 'byung gi bden pa mngon par rtogs pa'i skad cig ma bzhi yin no/ /khams gsum gyi sdug bsngal kun 'byung gi bden pa mngon par rtogs pa'i skad cig ma bzhi po 'di dag/ ji ltar yin pa de bzhin du 'dod pa na spyod pa'i sdug bsngal 'gog pa mthong bas spang bar bya ba kun 'byung la bshad pa phra rgyas bdun gyi gnyen por gyur zhing 'gog pa dang /zhi ba dang gya nom pa dang nges par 'byung ba'i rnam par skyes pa/ 'dod pa na spyod pa'i sdug bsngal 'gog pa la dmigs pa bar chad med pa'i lam gyi mtshan nyid can 'gog pa la chos shes pa'i bzod pa'i skad cig ma ni gcig go//dmigs pa dang rnam pa de kho na dang ldan pa rnam par grol ba'i lam gyi mtshan nyid can/ sdug bsngal 'gog pa la chos shes pa'i skad cig ma ni gnyis pa'o/ /rnam pa de dang de dag nyid kyis gzugs dang gzugs med pa na spyod pa'i sdug bsngal 'gog pa'i bden pa la dmigs pa khong khro ma gtogs pa phra rgyas bcu gnyis kyi gnyen por gyur pa bar chad med pa'i lam gyi mtshan nyid can/gzugs dang gzugs med pa na spyod pa'i sdug bsngal 'gog pa la rjes su shes pa'i bzod pa'i skad cig ma ni gsum pa'o//dmigs pa dang rnam pa de kho na dang ldan pa/ rnam par grol ba'i lam gyi mtshan nyid can/ gzugs dang gzugs med pa na spyod pa'i sdug bsngal 'gog pa la rjes su shes pa'i skad cig ma ni bzhi pa'o//de dag ni khams gsum gyi sdug bsngal 'gog pa'i bden pa mngon par rtogs pa'i skad cig ma bzhi'o/ /khams gsum na spyod pa'i sdug bsngal 'gog pa'i bden pa mngon par rtogs pa'i skad cig ma bzhi po 'di dag ji ltar yin pa de bzhin du 'dod pa na spyod pa'i sdug bsngal 'gog par 'gro ba'i lam mthong pas spang bar bya ba 'gog pa la bshad pa dag la/brgyad pa tshul khrims dang brtul zhugs mchog tu 'dzin pa bsnan te/ phra rgyas brgyad kyi gnyen por gyur cing lam dang rigs pa dang sgrub pa dang / nges par 'byin pa'i rnam par skyes pa/'dod pa na spyod pa'i sdug bsngal 'gog par 'gro ba'i lam la dmigs pa/ bar chad med pa'i lam gyi mtshan nyid can/ lam la chos shes pa'i bzod pa'i skad cig ma ni gcig go/ /dmigs pa dang rnam pa de kho na dang ldan pa/ rnam par grol ba'i lam gyi mtshan nyid can /lam la chos shes pa'i skad cig ma ni gnyis pa'o/ /rnam pa de dag nyid kyis gzugs dang gzugs med pa na spyod pa'i sdug bsngal 'gog par 'gro ba'i lam la dmigs pa/ khong khro ma gtogs pa phra rgyas bcu bzhi'i gnyen por gyur pa/bar chad med pa'i lam gyi mtshan nyid can/ lam la rjes su shes pa'i bzod pa'i skad cig ma ni gsum pa ste/ skad cig ma bco lnga po de dag ni/ mthong ba'i lam zhes bya bar gyur to/ /de dag la rnam par gnas pa'i 'phags pa ni rgyun du zhugs pa'i 'bras bu mngon sum du bya ba'i phyir//zhugs par zhes bya ba la/ bcu drug pa lam la rjes su shes pa la gnas pa de dag rgyun du zhugs pa zhes bya'o/ /phra rgyas brgyad cu rtsa brgyad po de dag ni/ sgom pa la ltos pa med par bden pa rnams mthong ba tsam gyis spong ba'i phyir/mthong bas spang ba zhes bya bar brjod do/ /gang dag bden pa'i rnam pa ji ltar mthong ba bzhin/ phyis bsgom pas spong bar 'gyur ba de dag ni bsgom pas spang bar bya ba ste/ de dag ni phra rgyas bcur 'gyur te/ 'dod pa na spyod pa'i 'dod chags dang / khong khro ba dang /nga rgyal dang / ma rig pa dag dang / gzugs na spyod pa khong khro spangs pa gsum po de dag nyid dang / gzugs med pa na spyod pa gsum po de dag nyid de bcur 'gyur ro/ /de dag ni ji skad bshad pa'i tshul gyis sa dang sa las rnam pa dgur phye ba yin te/ 'dod pa'i khams dang /bsam gtan bzhi dang / gzugs med pa bzhi de dag tu'o/ /nyon mongs pa'i rnam pa re re spang bar bya ba'i phyir/ bar chad med pa dang / rnam par grol ba'i dbye bas shes pa'i skad cig ma gnyis gnyis nyon mongs pa'i skad cig las bzlog nas rnam par gzhag go//'di ltar nyon mongs pa'i rnam pa chen po'i chen po ni/ bar chad med pa dang rnam par grol ba'i lam chung ngu'i chung ngu dag gis spong ba nas nyon mongs pa'i rnam pa chung ngu'i chung ngu ni shes pa'i skad cig ma chen po'i chen po'i bar dag gis spong ste/ dri ma rags pa ni 'bad pa chung dus bsgrub par bya la/phra mo ni 'bad pa chen pos bsgrub par bya ba yin te/ khrus mkhan gos 'khru ba dang chos mtshungs par shes par bya'o/ /de la mthong ba'i lam gyi 'og rol du/ 'phags pa 'dod pa na spyod pa'i nyon mongs pa na bsgom pas spang bar bya ba rnam pa drug po'i gnyen po/rnam par grol ba'i lam zhes bya ba'i ye shes kyi skad cig ma'i snga rol gyi shes pa'i skad cig la gnas pa ni/ lan cig phyir 'ong ba'i 'bras bu la zhugs pa zhes bya ste/ 'jig rten 'dir lan cig phyir 'ongs nas yongs su mya ngan las 'da' bas na/lan cig phyir 'ong ba zhes brjod la/ de'i 'bras bu'i don du zhugs shing sbyor ba la gnas pa ni lan cig phyir 'ong ba'i 'bras bu la zhugs pa zhes bya'o/ /skad cig ma drug pa la ni lan cig phyir 'ong ba'o/ /skad cig ma drug pa'i 'og rol du 'phags pa nyon mongs pa dgu pa spong ba rnam par grol ba'i lam gyi ye shes kyi skad cig gi snga rol gyi ye shes kyi skad cig la gnas pa ni/phyir mi 'ong ba'i 'bras bu la zhugs pa zhes bya ste/ 'jig rten 'dir phyir mi 'ong bar de nyid du yongs su mya ngan las 'da' bas phyir mi 'ong ba zhes brjod la/ de'i 'bras bu'i don du zhugs shing sbyor ba la gnas pa ni/ phyir mi 'ong ba'i 'bras bu la zhugs pa zhes bya'o/ /skad cig ma dgu pa la ni phyir mi 'ong ba zhes bya'o/ /skad cig ma dgu pa'i 'og rol tu 'phags pa rnam par grol ba'i lam zhes bya ba'i ye shes kyi snga rol gyi skad cig srid pa'i rtse mo'i nyon mongs pa dgu'i gnyen po la gnas pa ni dgra bcom pa'i 'bras bu la zhugs pa zhes bya ste/lha dang mi dang lha ma yin du bcas pa'i 'jig rten gyis mchod par 'os pas dgra bcom pa zhes brjod la/ de'i 'bras bu'i don du zhugs shing sbyor ba la gnas pa ni/dgra bcom pa'i 'bras bu la zhugs pa zhes bya'o/ /srid pa'i rtse mo'i nyon mongs pa rnam pa dgu pa spangs pa las rnam par grol ba'i lam dgu pa la gnas pa ni/ dgra bcom pa zhes bya'o/ /zhugs pa'i gang zag bzhi dang 'bras bu la gnas pa bzhi zhes bya ba gang zag skyes bu chen po brgyad po yon gnas su 'os pa dam pa de dag ni/bcom ldan 'das kyis dge 'dun yin no zhes gsungs te/ ji skad du/ de la brgya byin lha yi rgyal/ /dbang bsgyur gyis ni zhus pa dang / /srog chags zhing pa rgyal 'gyur zhing //dad ldan bsod nams dag 'dod pa/ /rdzas las byung ba'i bsod nams ni/ /rtag tu byed pa rnams kyis zhing / /gang la phul na 'bras che ba/ /bzang po rab tu bshad bya ste/ /rig dang zhabs su ldan pa yis/ /sbyin gnas gyur zhing dge 'dun che//zhugs pa rnam pa bzhi dang ni/ /'bras la gnas pa bzhi rnams so/ /zhes gsungs so/ /de'i phyir gal te 'phags pa'i bden pa bzhi dang / de dag yongs su shes pa la sogs pa med na de'i tshe bden pa mthong ba med pas 'bras bu rnams mthong ba'i phyir zhugs pa dang /'bras bu la gnas pa'i gang zag rnams med pas na/ dge 'dun yod pa ma yin no/ /de la rtogs pa'i chos kyi chos mngon sum du gyur pa nyid kyis bdud thams cad kyis kyang / bcom ldan 'das las mi phyed pas dge 'dun yin te/ de yod par mi 'gyur ro//gal te 'phags pa'i bden pa rnams med pa'i phyir/ skyes bu gang zag brgyad po de dag nyid med na/ 'phags pa dam pa rnams kyi chos su gyur pa dam pa'i chos kyang yod pa ma yin no/ /de la 'gog pa'i bden pa ni 'bras bu'i chos so/ /lam gyi bden pa ni 'bras bu la 'jug pa'i chos te 'di ni re zhig rtogs pa'i chos yin no//de la gsal bar byed pa bstan pa ni/ lung gi chos yin na 'phags pa'i bden pa rnams med na ni / 'di dag thams cad yod pa ma yin no/ /'phags pa'i bden rnams med pa'i phyir/ /dam pa'i chos kyang yod ma yin//chos dang dge 'dun yod min na/ /sangs rgyas ji ltar yod par 'gyur/ /gal te ji skad bshad pa'i chos yod na ni/ chos dang rjes su mthun pa'i chos kyi nan tan gyis chos thams cad rnam pa thams cad du mngon par rdzogs par thugs su chud pa'i phyir/sangs rgyas yod do zhes bya bar rigs par 'gyur zhing / gal te dge 'dun yod na ni de'i tshe de'i nye bar bstan pa de dag gis ye shes kyi tshogs bsags shing de la dbul ba dang / rim gro dang skyabs su 'gro ba la sogs pa dag gis bsod nams kyi tshogs bsags pa na/rim gyis sangs rgyas su 'gyur ro/ /yang na dge 'dun med na rgyun du zhugs pa'i 'bras bu la zhugs pa la sogs pa rnams med do/ /zhugs pa la sogs pa rnams ma thob par ni sangs rgyas nyid thob pa ma yin te/ bcom ldan 'das kyis kyang sngon gdon mi za bar 'bras bu 'ga' zhig la zhugs par 'gyur ro //'bras bu de la zhugs pas/ bcom ldan 'das dge 'dun gyi khongs su gtogs pa yin no / /dge 'dun med na ni nges par sangs rgyas bcom ldan 'das yod pa ma yin no/ /yang na bcom ldan 'das kyang mi slob pa'i khongs su gtogs pa'i dge 'dun gyi khongs su 'du ba nyid yin na//de lta yin dang kha cig na re/ sangs rgyas bcom ldan 'das la sogs pa dge slong gi dge 'dun zhes brjod pa'i phyir/ bcom ldan 'das dge 'dun gyi khongs su 'du ba nyid do zhes smas te /de dag gi lugs ltar na/ chos dang dge 'dun yod min na/ /sangs rgyas ji ltar yod par 'gyur/ /zhes bya ba de chos gsal ba yin no/ /bar ma 'don par byed pa dag ni/ gzhi chen po las sa'i rnam par gzhag pa bstan pa las/ byang chub sems dpa' sa dang po la gnas pa mthong ba'i lam skyes pa yin par smras pa na/dge 'dun gyi khongs su gtogs par rjod par byed do zhes bya'o / /de lta na ni/ dge 'dun yod pa ma yin na/ /byang chub sems dpa' yang med pas/ /sangs rgyas ji ltar yod par 'gyur/ / zhes bya ba 'di gsal ba kho na yin no/ /de'i phyir/ /de skad stong pa nyid smra na/ /dkon mchog gsum la gnod pa ni/ / byed cing ste/ stong pa nyid kyi don de skad smra na/ rnyed par dka' ba'i phyir dang / res 'ga' zhig na 'byung ba'i phyir dang / bsod nams chung ba rnams kyis de dang mi phrad pa'i phyir dang /rin thang che ba'i phyir na/ dkon mchog gsum po sangs rgyas dang chos dang dge 'dun zhes bya ba dag la yang gnod pa byed pa yin no/ /gzhan yang 'bras bu yod pa dang / /chos ma yin pa chos nyid dang / /'jig rten pa yi tha snyad ni//kun la gnod pa byed pa yin/ /stong pa nyid smra na zhes bya ba de dang sbyar ro/ /gal te 'di dag thams cad stong zhing gang gi tshe 'di dag thams cad med na/ de'i tshe thams cad kyi nang du 'dus pa'i phyir/ chos dang chos ma yin pa gnyis po de dag gi rgyu can 'bras bu 'dod pa dang /mi 'dod pa dang bcas pa med par 'gyur la/ 'jig rten pa'i tha snyad gyis shig/ 'chos shig/ zo shig / 'dug shig / song shig / shog shig ces bya ba de lta bu la sogs pa 'di dag thams cad kyang thams cad kyi khongs su 'dus pa'i phyir dang /chos thams cad kyang stong pa nyid yin pa'i phyir mi rigs pa nyid do/ /de'i phyir de skad bstan pa'i tshul 'di ni mi legs so zhes 'dzer to/ /de la bshad pa khyod kyis ni/ /stong nyid dgongs dang stong nyid dang / /stong nyid don ni ma rtogs pas/ /de phyir de ltar gnod pa yin//khyod ni rang gi rnam par rtog pa kho nas med pa nyid ni stong pa nyid kyi don yin no zhes de ltar don phyin ci log tu sgro btags nas/ //gal te 'di dag kun stong na/ /'byung ba med cing 'jig pa med/ /ces bya ba la sogs pas klan ka smra zhing / kho bo cag la cher yid byung bar gyur pa ni/shin tu gnod pa yin te/ yang dag pa ma yin pa'i kun du rtog pa rnam pa sna tshogs pa dag gis nyams pa yin no zhes bya ba'i tha tshig go/ /khyod kyis yongs su bzung ba gang yin pa 'di ni kho bo cag gis bstan bcos 'dir stong pa nyid kyi don du ma smras la/khyod kyis ni stong pa nyid kyi don ma shes pas stong pa nyid kyang mi shes shing / stong pa nyid kyi dgos pa gang yin pa de yang mi shes pa yin no/ /de'i phyir dngos po'i rang gi ngo bo ji ltar gnas pa'i don ma shes pas khyod kyis kho bo cag gis bshad pa dang ma 'brel zhing mi rigs pa rnam pa mang po 'di smras pa yin no//de nas stong pa nyid kyi dgos pa ci zhe na/ 'di ni/ las dang nyon mongs zad pas thar/ /las dang nyon mongs rnam rtog las/ /de dag spros las spros pa ni/ /stong pa nyid kyis 'gag par 'gyur//zhes bdag brtag par bshad zin to/ /de'i phyir spros pa ma lus pa nye bar zhi bar bya ba'i phyir stong pa nyid nye bar ston pa yin te/ de'i phyir stong pa nyid kyi dgos pa ni spros pa thams cad nye bar zhi ba yin na/ khyod kyis ni stong pa nyid kyi don med pa yin par rtog cing spros pa'i dra ba khan spel bar byed pa na/stong pa nyid kyi dgos pa ma rtogs pa yin no/ /de nas stong pa nyid gang yin zhe na/ de yang / gzhan las shes min zhi ba dang / /spros pa rnams kyis ma spros pa/ /rnam rtog med don tha dad min/ /de ni de nyid mtshan nyid do//zhes de nyid du bshad zin to/ /de'i phyir stong pa nyid spros pa thams cad log pa'i rang bzhin la med pa nyid du ga la yod/ de'i phyir khyod kyis stong pa nyid kyang mi shes pa yin no/ /don gang nye bar bzung nas stong pa nyid kyi sgra 'jug pa de yang / rten cing 'brel bar 'byung ba gang //de nyid stong pa nyid du bshad/ /de ni brten nas gdags pa ste/ /de nyid dbu ma'i lam yin no/ /zhes 'di nyid du ston par 'gyur te/ bcom ldan 'das kyis kyang / gang zhig rkyen las skyes pa de ma skyes/ /de la skye ba'i rang bzhin yod ma yin//rkyen la rag las gang de stong par bshad/ /gang zhig stong nyid shes de bag yod min/ /zhes tshigs su bcad de gsungs pa'i phyir ro/ /de ltar na rten cing 'brel bar 'byung ba'i sgra'i don gang yin pa de nyid stong pa nyid kyi sgra'i don yin gyi dngos po med pa'i sgra'i don gang yin pa de ni stong pa nyid kyi sgra'i don ma yin no//khyod ni dngos po med pa'i sgra'i don stong pa nyid kyi sgra'i don du sgro btags nas/ kho bo cag la klan ka tshol ba yin no/ /de'i phyir stong pa nyid kyi sgra'i don yang mi shes pa yin no/ /mi shes bzhin du klan ka tshol ba ni nges par khyod nyid la gnod pa yin no//kho bo cag la ji skad smras pa'i klan ka tshol ba de su zhig ce na/ gang zhig bcom ldan 'das kyi gsung rab las/ /bstan pa bden pa gnyis kyis rnam par dbye ba phyin ci ma log par ma shes par gzhung tsam 'ba' zhig 'don pa lhur len pa'o//de'i phyir slob dpon gyis gzhan gyi gsung rab kyi don log par rtog pa bzlog par bya ba'i phyir/ re zhig bcom ldan 'das kyi gsung rab las bstan pa'i bden pa gnyis kyis phyin ci ma log par rnam par gzhag pa'i dbang du mdzad nas/sangs rgyas rnams kyis chos bstan pa/ /bden pa gnyis la yang dag brten/ /'jig rten kun rdzob bden pa dang / /dam pa'i don gyi bden pa'o/ /zhes gsungs so/ /'di ni sangs rgyas bcom ldan 'das rnams kyis chos bstan pa ni/bden pa gnyis la brten nas 'jug go/ /bden pa gnyis gang zhe na/ 'jig rten kun rdzob kyi bden pa dang / /don dam pa'i bden pa'o/ /de la/ 'jig rten phung por rab grags pa/ /de la 'jig rten nges par brten/ /zhes 'byung ba las na phung po la brten nas brtags pa'i gang zag la 'jig rten zhes brjod do//kun nas sgrib pas na kun rdzob ste/ mi shes pa ni dngos po'i de kho na nyid la kun nas 'gegs par byed pa'i phyir kun rdzob ces bya'o/ /yang na phan tshun brten pas na kun rdzob ste/ phan tshun brten pa nyid kyis na zhes bya ba'i don to//yang na kun rdzob ni brda ste/ 'jig rten gyi tha snyad ces bya ba'i tha tshig go/ /de yang brjod pa dang / brjod bya dang / shes pa dang shes bya la sogs pa'i mtshan nyid can no/ /'jig rten gyi kun rdzob ni 'jig rten gyi kun rdzob bo zhes 'jig rten kun rdzob ces gang las de ltar khyad par du byed pa 'jig rten ma yin pa'i kun rdzob kyang yod dam zhe na/'di ni dngos po ji ltar gnas pa rjes su brjod pa yin gyi/ 'dir dpyad pa de mi 'jug go/ /rnam pa gcig tu na/ rab rib dang ling tog sngon po dang / mig ser la sogs pas dbang po nyams pas mthong ba phyin ci log la gnas pa de dag ni 'jig rten ma yin te/de dag gi kun rdzob gang yin pa de ni/ 'jig rten kun rdzob bden pa ma yin pas/ /'jig rten kun rdzob bden pa dang / /zhes de las khyad par du byas so/ /'di yang dbu ma la 'jug pa las rgyas par bshad pas de las khong du chud par bya'o//'jig rten gyi kun rdzob tu bden pa ni/ /'jig rten kun rdzob bden pa ste/ /brjod bya dang / rjod byed dang / shes pa dang / shes bya la sogs pa'i tha snyad ma lus pa 'di dag thams cad ni/'jig rten gyi kun rdzob kyi bden pa zhes bya'o/ /don dam pa la ni 'di dag yod pa ma yin te/ der ni brjod par bya ba bzlog pa ste/ sems kyi spyod yul bzlog pas so/ /ma skyes pa dang ma 'gags pa/ /chos nyid mya ngan 'das dang mtshungs pa yin pa de'i phyir don dam pa de la tshig gam shes pa 'jug pa ga la yod/don dam pa de ni gzhan las shes pa ma yin zhing zhi ba dang / 'phags pa rnams kyis so so rang gis rig par bya ba dang / spros pa thams cad las 'das pa yin gyi/ de ni bstan par bya ba ma yin zhing /shes pa yang ma yin te/ gzhan las shes min zhi ba dang / /spros pa rnams kyis ma spros pa/ /rnam rtog med don tha dad min/ /de ni de nyid mtshan nyid do/ /zhes sngar bshad zin to/ /don yang de yin la dam pa yang de yin pas na don dam pa'o/ /de nyid bden pa yin pas don dam pa'i bden pa'o//bden pa 'di gnyis kyi rnam par dbye ba ni/ rgyas par dbu ma la 'jug pa las shes par bya'o/ /sangs rgyas bcom ldan 'das rnams kyis chos bstan pa ni/ bden pa gnyis po 'di la brten nas 'jug pa yin no/ /bstan pa'i tshul de ltar rnam par gnas pa yin dang /gang dag bden pa gnyis kyis ni/ /rnam dbye rnam par mi shes pa/ /de dag sangs rgyas bstan pa ni/ /zab mo'i de nyid rnam mi shes/ /zhes bya'o/ /'dir smras pa/ gal te don dam pa spros pa dang bral ba'i rang bzhin yin na/'o na de nyid yin la rag mod/ phung po dang / khams dang / skye mched dang / 'phags pa'i bden pa dang / rten cing 'brel bar 'byung ba la sogs pa ston pa don dam pa ma yin pa gzhan 'dis ci zhig dgos/ de nyid ma yin pa ni yongs su spang bar bya ba yin na/gang yongs su spang bar bya ba yin pa bstan pa des ci zhig bya/ brjod par bya ste/ de ni de ltar bden mod kyi/ 'on kyang brjod par bya ba dang / rjod par byed pa dang / shes pa dang / shes bya la sogs pa'i mtshan nyid can 'jig rten pa'i don dam pa khas ma blangs par don dam pa bstan par mi nus la/ma bstan na yang rtogs par mi nus shing / don dam pa ma rtogs par yang mya ngan las 'das pa'i grong khyer du phyin par mi nus so zhes bstan pa'i phyir/ tha snyad la ni ma brten par/ /dam pa'i don ni bstan mi nus//dam pa'i don ni ma rtogs par/ /mya ngan 'das pa 'thob mi 'gyur/ /zhes gsungs te/ de'i phyir mya ngan las 'das pa thob pa'i thabs yin pa'i phyir/ chu 'dod pas snod ltar thog mar gdon mi za bar kun rdzob ji ltar gnas pa khas blang bar bya'o/ / de'i phyir de ltar/ gang zhig kun rdzob dang / don dam pa'i bden pa'i mtshan nyid can bden pa gnyis kyis rnam par gzhag pa ma byas par stong pa nyid smra bar byed pa'i gang zag rnam pa de lta bu ni/ stong pa nyid la lta nyes na/ /shes rab chung rnams phung bar byed/ /ji ltar sbrul la bzung nyes dang //rig sngags nyes par bsgrub pa bzhin/ /rnal 'byor pa kun rdzob kyi bden pa mi shes pa tsam gyis bskyed pa rang bzhin med par rtogs nas de'i stong pa nyid do/ / don dam pa'i mtshan nyid rtogs pa ni mtha' gnyis su lhung bar mi 'gyur te/ gang zhig da lta med par gyur pa de'i tshe na/ ci zhig yod par 'gyur zhes de ltar sngar dngos po'i rang bzhin ma dmigs pas phyis kyang med pa nyid du mi rtogs la/ 'jig rten gyi kun rdzob gzugs brnyan dang 'dra ba la gnod pa ma byas pas/ las dang las kyi 'bras bu dang chos dang chos ma yin pa la yang gnod pa la ma yin no//don dam pa dngos po nyid du sgro 'dogs par byed pa yang ma yin te/ dngos po rang bzhin dang bcas pa ma yin pa rnams kho na la las kyi 'bras bu la sogs pa mthong ba'i phyir dang / dngos po rang bzhin dang bcas pa yod pa ma yin pa'i phyir dang /dngos po rang bzhin dang bcas par smra ba rnams kyi ltar yang / las dang las kyi 'bras bu ma mthong ba dang / rten cing 'brel bar 'byung ba la sogs pa thams cad ma mthong ba'i phyir ro/ /gang gis de ltar bden pa gnyis kyi rnam par dbye ba ma mthong bar 'du byed rnams stong pa nyid du mthong ba des ni stong pa nyid mthong bas 'du byed rnams yod pa ma yin pa nyid du rtog par byed la/yang na stong pa nyid 'ga' zhig dngos por brtags nas/ de'i rten gyi ched du dngos po'i rang bzhin yang rtog par byed de/ de ni gnyi ga ltar yang stong pa nyid la lta nyes pas nges par phung bar byed pa yin no/ /ji ltar zhe na/ re zhig/ gal te thams cad stong pa ste/ /thams cad yod pa ma yin no/ /zhes rtog na ni de'i tshe/ 'di log par lta bar 'gyur te/ ji skad du/ chos 'di log par bzung gyur na//mi mkhas rnams ni chud kyang za/ /'di ltar med par lta ba yi/ /mi gtsang der ni bying bar 'gyur/ /zhes bshad do/ /ci ste yang thams cad la skur pa 'debs par mi 'dod na ni de'i tshe/ ji ltar dngos po 'di dag dmigs su zin kyang stong pa nyid du ji ltar 'gyur te/de'i phyir rang bzhin med pa'i don ni stong pa nyid kyi don ma yin no zhes 'di nges par stong pa nyid spong bar 'gyur te/ de ltar spangs nas chos kyis phongs par 'gyur ba'i las kyis nges par ngan 'gror 'gro bar 'gyur ro/ /ji skad du rin po che'i phreng ba las/ gzhan yang 'di ni log bzung na / /blun po mkhas pa'i nga rgyal can/ /spong bas ma rung bdag nyid can/ /mnar med par ni spyi tshugs 'gro/ /zhes bshad do/ /de ltar na re zhig stong pa nyid la dngos po med par bzung bas na/ 'dzin pa po phung bar byed pa yin no//ci ste bcom ldan 'das rnams kyi stong pa nyid dang / de'i rten 'du byed rnams yod pa nyid du rtog par byed pa de lta na yang mya ngan las 'das par 'gro ba'i lam la log par zhugs pa'i phyir/ stong pa nyid bstan pa 'bras bu med pa nyid du 'gyur ro//de'i phyir de ltar na stong pa nyid dngos po'i ngo bor gzung ba na yang 'dzin pa po phung bar byed do/ /gal te phan 'dogs pa gang yin pa de rnam pa gzhan du gzung na/ phan 'dogs par ma gyur mod/ gnod par byed par ni ji ltar 'gyur te/ 'bru dag go rim las nyams par btab pa na//'debs pa po brlag par byed pa ni ma yin no zhe na/ de'i phyir slob dpon gyis brjod par bzhed pa'i don ston pa'i dpe gsungs pa ni/ ji ltar sbrul la bzung nyes dang / /rig sngags nyes par bsgrubs pa bzhin/ /zhes bya ba ste/ji ltar sbrul sman dang sngags kyi stobs kyis man ngag ji lta ba bzhin bzung na nor gyi phung po chen po 'gugs par byed la/ ji ltar nye bar bstan pa bor nas 'dzin na ni 'dzin pa po nyid phung bar byed pa yin no/ /yang ji ltar man ngag ji lta ba bzhin rab tu bsgrubs pa'i rigs sngags kyis ni sgrub pa po la phan 'dogs par byed la/man ngag las nyams par bsgrubs na ni sgrub pa po nyid brlag par byed pa yin no/ /de bzhin du 'dir yang nye bar bstan pa ji lta ba bzhin du stong pa nyid bzung na ni/ 'dzin pa po mya ngan las 'das pa'i bde ba mchog la sbyor bar byed la/ji ltar nye bar bstan par spangs nas bzung na ni/ nges par ji skad bshad pa'i tshul gyis 'dzin pa po nyid phung bar byed pa yin no/ /gang gi phyir de ltar stong pa nyid la bzung nyes pas 'dzin pa po phung bar byed la/ shes rab zhan pa dag gis kyang yang dag par 'dzin par mi nus pa/de phyir zhan pas chos 'di yi/ /gting rtogs dka' bar mkhyen gyur nas/ /thub pa'i thugs ni chos bstan las/ /rab tu log par gyur pa yin/ /gang gi phyir phyin ci log tu bzung bas/ /stong pa nyid kyi mtshan nyid kyi chos 'dis shes rab chung ba ste/sems can spobs pa chung ba phung bar byed pa de nyid kyi phyir/ bla na med pa yang dag par rdzogs pa'i byang chub tu mngon par rdzogs par sangs rgyas nas/ sems can thams cad kyi khams dang chos shin tu zab pa la gzigs te/zhan pa dag gis chos 'di'i don rtogs par dka' bar mkhyen par gyur nas thub pa bcom ldan 'das kyi thugs chos ston pa las log par gyur pa yin no/ /ji skad du/ mdo las/ de nas bcom ldan 'das mngon par rdzogs par sangs rgyas nas ring por ma lon par 'di snyam du dgongs te/ngas chos zab mo zab par snang ba brtag par bya ba ma yin zhing / rtog ge'i spyod yul ma yin pa/ zhib mo mkhas shing mdzangs par rig par bya ba thugs su chud de/ de gal te ngas gzhan dag la bstan na/ gzhan gyis nga'i de rtogs par mi 'gyur/des nga la gnod par 'gyur zhing zhum par 'gyur/ thugs mi spro bar 'gyur bas gang bdag nyid gcig pu dgon pa rab tu dben pa mthong ba'i chos la/ bde ba la reg par gnas par rab tu thob pas gnas par bya'o zhes bya ba rgyas par gsungs pa lta bu'o//de'i phyir de ltar bden pa gnyis phyin ci ma log par rnam par gnas pa ma shes par/ skyon du thal bar 'gyur ba ni / /stong la 'thad pa ma yin pas/ /khyed ni stong nyid spong byed pa/ /gang de nga la mi 'thad do/ /gang gi phyir khyod kyis kho bo cag la/ gal te 'di dag kun stong la / /'byung ba med cing 'jig pa med/ /ces bya ba la sogs pas skyon chen por thal bar nye bar bkod pa gang yin pa de ni/ bden pa gnyis kyi rnam par gzhag pa mngon par ma shes pas/ stong pa nyid dang / stong pa nyid kyi don dang / stong pa nyid kyi dgos pa ji lta ba bzhin khong du ma chud pas bkod pa yin pas/kho bo cag gi stong pa la ste/ stong pa nyid du smra ba la de'i 'thad pa ma yin no/ /gang gi phyir mi 'thad pa de'i phyir khyod stong pa nyid la nye bar thal bar brjod cing / stong pa nyid spong bar byed pa ste/ 'dor zhing sel la zlog par byed pa gang yin pa'i spong ba de nged cag la mi 'thad do//'di ltar khyed kyis ni dngos po med pa'i don stong pa nyid kyi don du sgro btags nas thal ba brjod pa yin na/ kho bo cag ni stong pa nyid kyi don dngos po med pa'i don du mi 'chad cing /'o na ci zhe na/ rten cing 'brel bar 'byung ba'i don to/ /de'i phyir stong pa nyid du lta ba la sun 'byin pa 'di mi rigs so/ /kho bo cag gi phyogs la ji skad smras pa'i skyon du thal ba mi 'jug pa 'ba' zhig tu ma zad kyi/ 'on kyang bden pa la sogs pa rnam par gzhag pa thams cad ches shin tu 'thad pa yin no zhes bstan pa'i phyir gsungs pa/gang la stong pa nyid rung ba/ /de la thams cad rung bar 'gyur/ /gang la stong nyid mi rung ba/ /de la thams cad mi rung 'gyur/ /gang la dngos po thams cad rang bzhin gyis stong pa nyid 'di rung ba de la ji skad smras pa de dag thams cad rung bar 'gyur ro//ji ltar zhe na/ gang gi phyir kho bo cag ni rten cing 'brel bar 'byung ba la stong pa nyid ces smra ste/ de'i phyir/ gang la stong pa nyid 'di rung ba de la rten cing 'brel bar 'byung ba rung la/ gang la rten cing 'brel bar 'byung ba rung ba de la 'phags pa'i bden pa bzhi rnams rung bar 'gyur ro//ji ltar zhe na/ gang gi phyir rten cing 'brel bar 'byung ba nyid sdug bsngal du 'gyur gyi/ rten cing 'brel bar mi 'byung ba ni ma yin no/ /de ni rang bzhin med pas stong par 'gyur ro//sdug bsngal yod na ni sdug bsngal kun 'byung ba dang / sdug bsngal 'gog pa dang / sdug bsngal 'gog par 'gro ba'i lam rung bar 'gyur ro/ /de'i phyir sdug bsngal yongs su shes pa dang / kun 'byung spang ba dang / 'gog pa mngon du bya ba dang /lam bsgom par yang rung ngo / /sdug bsngal la sogs pa'i bden pa yongs su shes pa la sogs pa yod na ni 'bras bu rnams rung bar 'gyur ro/ /'bras bu rnams yod na 'bras bu la gnas pa dag rung ngo / /'bras bu la gnas pa dag yod na ni zhugs pa dag kyang rung bar 'gyur ro//'bras bu la gnas pa dang zhugs pa dag yod na ni dge 'dun rung ngo / /'phags pa'i bden pa rnams yod na/ dam pa'i chos kyang rung bar 'gyur ro/ /dam pa'i chos dang dge 'dun yod na ni sangs rgyas kyang rung bar 'gyur ro/ / de'i phyir dkon mchog gsum yang rung bar 'gyur ro/ /'jig rten pa dang 'jig rten las 'das pa'i chos thams cad khyad par du rtogs pa thams cad kyang rung la/ chos dang chos ma yin pa dag dang / de'i 'bras bu dang / 'jig rten pa'i tha snyad dag kyang rung bar 'gyur ro//de'i phyir de ltar na/ gang la stong pa nyid rung ba de la thams cad rung bar 'gyur ro/ /gang la stong pa nyid mi rung ba de la ni rten cing 'brel bar 'byung ba nyid med pas/ thams cad mi rung bar 'gyur ro/ /ji ltar mi rung ba de ltar ni rgyas par ston par 'gyur ro//de'i phyir de ltar kho bo cag gi phyogs chos yongs su dag cing / rnam par gzhag pa thams cad dang mi 'gal bar rnam par gnas pa yin pa dang / rang gi phyogs rags pa shin tu nyes pa'i skyon dang bral bar de dag dang 'gal ba la shin tu blun pas/ yon tan dang skyon ji ltar gnas pa dag ma mthong ba/khyod ni rang gi skyon rnams ni/ /nga la yongs su sgyur byed pa/ /rta la mngon par zhon bzhin du/ /rta nyid brjed par gyur pa bzhin/ /ji ltar 'ga' zhig rta gang la zhon pa de nyid brjed nas de phrogs pa'i nyes pas gzhan la klan ka tshol ba de bzhin du/khyod kyang stong pa nyid rten cing 'brel bar 'byung ba'i mtshan nyid can gyi rta la zhon pa kho na yin bzhin du/ shin tu rnam par g.yengs pas de ma dmigs pas kho bo cag la yongs su rtsod pa yin no/ /gang dag mi dmigs pas stong pa nyid du smras pa kho na la klan ka tshol ba/gzhan gyi skyon de dag kyang gang zhe na/ de dag rgyas par bstan pa'i phyir/ /gal te dngos rnams rang bzhin la / /yod par rjes su lta byed na/ /de lta yod na dngos po rnams/ /rgyu rkyen med par khyod lta'o/ /zhes gsungs te/ gal te khyod dngos po rnams rang bzhin gyis yod par lta bar byed na/de'i tshe rang bzhin ni rgyu dang rkyen la mi ltos pa'i phyir/ dngos po rnams rgyu rkyen med pa ste/ rgyu dang rkyen yod pa ma yin zhing / rgyu med par khyod lta ba ma yin no/ /rgyu med par lta ba khas len pa ma yin na yang /'bras bu dang ni rgyu nyid dang / /byed pa po dang byed dang bya/ /skye ba dang ni 'gag pa dang / /'bras bu la yang gnod pa byed pa yin no/ /ji ltar zhe na/ gal te bum pa rang bzhin gyis yod do zhes rtogs na ni/ de'i tshe rang bzhin gyis yod pa de la 'jim pa la sogs pa rgyu dang rkyen dag gis ci dgos te/de'i phyir de dag med la/ bum pa zhes bya ba'i 'bras bu rgyu med pa yang 'thad pa ma yin no/ /de med na ni byed pa po rdza mkhan dang / byed pa po 'khor lo la sogs pa dang / bum pa byed pa'i bya ba yang med do/ /de dag med pas skye ba dang 'gag pa dag kyang med la/skye ba dang 'gag pa dag yod pa ma yin na/ 'bras bu yang yod par ga la 'gyur/ de'i phyir dngos po rang bzhin dang bcas par khas len na/ 'bras bu la sogs pa de dag thams cad la gnod pa byed pa yin no/ /de'i phyir de ltar dngos po rang bzhin dang bcas par khas len na/khyod la thams cad mi rung ba yin no/ /kho bo cag stong pa nyid du smras pa rnams la 'di dag thams cad 'thad pa ma yin no/ / ci'i phyir zhe na/ 'di ltar kho bo cag gis ni/ /rten cing 'brel bar 'byung ba gang / / de ni stong pa nyid du bshad/ /de ni brten nas gdags pa ste/ /de nyid dbu ma'i lam yin no/ /rten cing 'brel bar 'byung ba ste/ /rgyu dang rkyen dag la ltos nas/ /myu gu dang rnam par shes pa la sogs pa rnams 'byung ba gang yin pa de ni/ rang bzhin gyis ma skyes pa yin na/gang rang bzhin gyis ma skyes pa de ni stong pa nyid yin te/ ji skad du/ bcom ldan 'das kyis/ gang zhig rkyen las skyes pa de ma skyes/ /de las skye ba'i rang bzhin yod ma yin/ /rkyen la rag las gang de stong par bshad/ /gang zhig stong nyid shes de bag yod yin//zhes gsungs pa dang / ji skad du 'phags pa lang kar gshegs pa las/ blo gros chen po rang bzhin gyis ma skyes pa la dgongs nas/ ngas chos thams cad skye ba med par gsungs so zhes rgyas par gsungs pa dang / de bzhin du 'phags pa brgya lnga bcu pa las kyang /chos thams cad stong pa ste rang bzhin med pa'i tshul gyis so zhes gsungs pa lta bu'o/ /stong pa nyid gang yin pa de ni brten nas gdags pa ste/ stong pa nyid de nyid ni brten nas gdags pa zhes bya bar rnam par gzhag go/ /'khor lo la sogs pa shing rta'i yan lag la brten nas shing rtar 'dogs la/de'i rang gi yan lag la brten nas btags pa gang yin pa de ni/ rang bzhin gyis ma skyes pa yin la/ gang rang bzhin gyis ma skyes pa de ni stong pa nyid yin zhing / rang bzhin gyis ma skyes pa'i mtshan nyid can gyi stong pa nyid de nyid ni dbu ma'i lam yin zhes bya bar rnam par gzhag ste/'di ltar gang zhig rang bzhin gyis ma skyes pa de la ni/ yod pa nyid med la/ rang bzhin gyis ma skyes pa la 'jig pa med pas med pa nyid med pa de'i phyir/ yod pa dang med pa'i mtha' gnyis dang bral ba de'i phyir/rang bzhin gyis ma skyes pa'i mtshan nyid can gyi stong pa nyid de nyid ni dbu ma'i lam ste/ dbu ma'i shul zhes bya'o/ /de'i phyir de ltar na stong pa nyid dang / brten nas gdags pa dang / dbu ma'i lam zhes bya ba 'di dag ni rten cing 'brel bar 'byung ba nyid kyi ming gi bye brag yin no//rnam par dpyad na ni rnam pa thams cad du/ gang phyir rten 'byung ma yin pa'i/ /chos 'ga' yod pa ma yin la/ /de phyir stong pa ma yin pa'i/ /chos 'ga' yod pa ma yin no / /gang zhig rten cing 'brel bar 'byung ba ma yin pa'i chos de ni yod pa ma yin te/ji skad du brgya pa las/ gang zhig gang na nam gyi tshe'ang / /ma brten bar ni yod nyid med/ /des na nam yang 'ga' zhig tu/ /rtag pa 'ga' yang yod ma yin/ /nam mkha' la sogs rtag go zhes/ /so so'i skye bo dag gis rtogs//mkhas pa rnams kyis de dag la/ /'jig rten pas kyang don ma mthong / /zhes bshad do/ /bcom ldan 'das kyis kyang / mkhas pas rten 'byung chos rnams rtogs 'gyur te/ /mthar lta ba la brten par yod mi byed/ /rgyu dang bcas shing rkyen bcas chos shes kyi //rgyu med rkyen med chos nyid yod ma yin/ /zhes gsungs so/ /de ltar rten cing 'brel bar 'byung ba ma yin pa'i chos 'ga' yang yod pa ma yin la rten cing 'brel bar 'byung ba yang stong pa yin pa de'i phyir stong pa ma yin pa'i chos 'ga' yang yod pa ma yin no//gang gi phyir 'di de ltar yin pa de'i phyir/ kho bo cag gi ltar na chos thams cad stong pa yin zhing / gzhan gyis smras pa'i skyon du thal bar 'gyur ba yang ma yin no/ /dngos po rang bzhin dang bcas par smra ba khyod kyi ltar na ni/ gal te 'di kun mi stong na//'byung ba med cing 'jig pa med pa yin no/ /'byung ba dang 'jig pa med na de'i tshe nges par/ 'phags pa'i bden pa bzhi po rnams/ /khyod la med par thal bar 'gyur ro/ /ci'i phyir zhe na/ gang gi phyir/ rten cing 'brel 'byung ma yin na/ /sdug bsngal yod par ga la 'gyur//mi rtag sdug bsngal gsungs pa de/ /rang bzhin nyid la yod ma yin/ /gang zhig rang bzhin dang bcas pa de ni brten nas 'byung ba ma yin zhing / gang zhig rten cing 'brel bar 'byung ba ma yin pa de ni mi rtag pa ma yin te nam mkha'i me tog ni mi rtag pa ma yin no//sdug bsngal yang mi rtag pa yin par ni/ gang mi rtag pa de ni sdug bsngal lo zhes bcom ldan 'das kyis gsungs so/ /de bzhin du brgya pa las kyang / mi rtag pa la nges par gnod/ /gang la gnod yod de bde min/ /de phyir gang zhig mi rtag pa//de ni thams cad sdug bsngal 'gyur/ /zhes bshad do/ /mi rtag pa de yang rang bzhin nyid la ste/ rang bzhin dang bcas pa nyid du khas len na dngos po rnams la yod pa ma yin no/ /de ltar na re zhig dngos po rnams rang bzhin dang bcas pa nyid yin na/ sdug bsngal mi rung ba yin no/ /sdug bsngal nyid mi rung ba 'ba' zhig tu ma zad kyi/ rang bzhin dang bcas par khas blangs na/ kun 'byung ba yang mi rung ngo zhes bstan pa'i phyir/ rang bzhin las ni yod yin na/ /ci zhig kun du 'byung bar 'gyur/ /de phyir stong nyid gnod byed la//kun 'byung yod pa ma yin no/ /zhes gsungs te/ 'dir 'di las sdug bsngal kun 'byung bas na/ sdug bsngal gyi rgyu las kun 'byung zhes bya'o/ /de'i phyir sdug bsngal stong pa nyid la gnod pa byed cing / sdug bsngal rang bzhin dang bcas par khas len pa de'i ltar na/de yang skye ba don med pa'i phyir/ de'i rgyu rtog pa don med pa nyid do/ /de ltar na stong pa nyid la gnod pa byed pa khyod la kun 'byung yang mi rung ngo / /sdug bsngal rang bzhin gyis yod pa nyid du khas len pa la/ sdug bsngal 'gog pa yang mi rung ngo zhes bstan pa'i phyir/sdug bsngal rang bzhin gyis yod la/ /'gog pa yod pa ma yin no/ /rang bzhin nyid ni yongs gnas phyir/ /'gog la gnod pa byed pa yin/ /zhes gsungs te/ gal te sdug bsngal rang bzhin gyis yod na/ de'i tshe rang bzhin la ldog pa med pa'i phyir 'gog pa ga la yod /de ltar na rang bzhin yongs su gnas pa'i phyir/ rang bzhin yongs su bzung nas phyir ldog par byed pa ni/ sdug bsngal 'gog pa la yang gnod par byed pa yin no/ /da ni dngos po rang bzhin dang bcas par smra ba la/ 'phags pa'i lam yang ji ltar mi 'thad pa de ltar bstan pa'i phyir//lam la rang bzhin yod na ni/ /sgom pa 'thad par mi 'gyur ro/ /ci ste lam de bsgom bya na/ /khyed kyi rang bzhin yod ma yin / /gal te dngos po rnams rang bzhin yod par gyur na ni/ de'i tshe lam yang rang bzhin dang bcas pa nyid yin pa'i phyir ma bsgoms pa nyid du de yod pas/de la yang bsgoms pas ci zhig bya/ de ltar na rang bzhin yod na lam sgom pa mi 'thad do/ /ci ste khyod lam de sgom par khas len na/ de ltar na 'o na khyod kyi 'phags pa'i lam rang bzhin dang bcas pa nyid du mi 'gyur te/bya ba yin pa nyid kyi phyir ro snyam du dgongs pa yin no/ /gzhan yang sdug bsngal 'gog pa thob par bya ba'i phyir dang / kun 'byung ba spang bar bya ba'i phyir lam sgom par 'dod pa zhig na/ dngos po rang bzhin dang bcas par smra ba ltar na ni/sngar bshad pa'i tshul gyis/ gang tshe sdug bsngal kun 'byung dang / /'gog pa yod pa ma yin na/ /lam gyi sdug bsngal 'gog pa ni/ /gang zhig 'thob par 'gyur bar 'dod/ /lam bsgoms pas 'gog pa gang zhig 'thob par 'gyur ba sdug bsngal 'gog pa de ni yod pa ma yin no//de'i phyir de ltar na/ 'phags pa'i lam yang mi 'thad do/ /de ltar na dngos po rang bzhin dang bcas par smra ba la 'phags pa'i bden pa bzhi po rnams med par 'gyur ro/ /da ni gzhan la sdug bsngal la sogs pa shes pa la sogs pa yang ji skad mi srid pa de ltar bstan pa'i phyir//gal te rang bzhin nyid kyis ni/ /yongs su shes pa ma yin na/ /de ni ji ltar yongs shes 'gyur/ /rang bzhin gnas pa ma yin nam/ /zhes gsungs te/ gal te sdug bsngal sngar yongs su ma shes pa'i rang bzhin du gyur pa las/de phyis yongs su shes pa yin no zhes rtogs na/ /de ni mi rigs so/ /ci'i phyir zhe na/ 'di ltar rang bzhin gnas pa ma yin nam ste/ rang bzhin gang yin pa de ni/ 'jig rten na yang dag par gnas shing me'i tsha ba ltar gzhan du mi 'gyur ba yin no//gang gi tshe rang bzhin la gzhan du 'gyur ba nyid yod pa ma yin pa de'i tshe/ sdug bsngal sngar yongs su shes pa ma yin pa'i rang bzhin ni phyis kyang yongs su shes par mi 'thad do/ /de'i phyir sdug bsngal yongs su shes pa yang mi srid do/ /gang gi tshe sdug bsngal yongs su shes pa yod pa ma yin pa de'i tshe//de bzhin du ni khyod nyid kyi/ /spang dang mngon du bya ba dang / /sgom dang 'bras bu bzhi dag kyang / /yongs shes bzhin du mi rung ngo / /sdug bsngal yongs su shes pa mi srid pa de bzhin du gang kun 'byung ba spang ba dang / 'gog pa mngon du bya ba ste spang ba dang mngon du bya ba ste gnyis dang /gang yang lam sgom pa 'di dang de rnams mi rung ngo / kun 'byung ba rang bzhin gyis ma spangs pa'i rang bzhin ni/ phyis kyang spang bar mi 'thad do / /ldog pa med pa'i phyir ro/ /de bzhin du mngon du bya ba dang / sgom pa gnyis la yang sbyar bar bya'o//dngos po rang bzhin dang bcas par smra na/ yongs su shes pa la sogs pa mi rung ba 'ba' zhig tu ma zad kyi/ 'on kyang 'bras bu bzhi dag kyang / /yongs su shes pa bzhin du mi rung ngo / /ji ltar sdug bsngal rang bzhin gyis yongs su shes pa ma yin pa yongs su shes par mi rung ba de bzhin du/rgyun du zhugs pa'i 'bras bu sngar rang bzhin gyis yod pa ma yin pa yang phyis yod par mi srid do/ /rgyun du zhugs pa'i 'bras bu ji lta ba de bzhin du/ lan cig phyir 'ong ba dang / phyir mi 'ong ba dang / dgra bcom pa'i 'bras bu rnams mi srid pa yang khong du chud par bya'o//yongs su shes pa bzhin du 'bras bu de dag mi rung ba/ 'ba' zhig tu ma zad de 'o na ci zhe na/ de dag 'thob pa yang mi rung ngo zhes bstan pa'i phyir/ rang bzhin yongs su 'dzin pa yis/ /'bras bu rang bzhin nyid kyi ni/ /thob pa yin pa gang yin des//ji ltar thob par nus par 'gyur/ /zhes bya ba gsungs te/ rang bzhin du smra ba khas len pas/ sngar thob pa ma yin pa'i rang bzhin du gyur pa rnams phyis kyang thob pa mi 'thad de/ rang bzhin ldog pa med pa'i phyir ro/ /de'i phyir/ 'bras bu med na 'bras gnas med/ /zhugs pa dag kyang yod ma yin/ /gal te skyes bu gang zag brgyad/ /de dag med na dge 'dun med/ /'phags pa'i bden rnams med pa'i phyir/ /dam pa'i chos kyang yod ma yin/ /chos dang dge 'dun yod min na/ /sangs rgyas ji ltar yod par 'gyur//zhes bya ste/ tshigs su bcad pa 'di gnyis kyi don ni gong ma bzhin du rig par bya'o/ /gzhan yang rang bzhin du smra ba khas len na/ khyed kyis sangs rgyas byang chub la/ /ma brten par yang thal bar 'gyur/ /khyed kyis byang chub sangs rgyas la//ma brten par yang thal bar 'gyur/ /gal te sangs rgyas zhes bya ba dngos po 'ga' zhig rang bzhin gyis yod par gyur na ni byang chub ste/ thams cad mkhyen pa'i ye shes la ma brten par te/ ma ltos par yang 'gyur te/rang bzhin dag ni bcos min dang / /gzhan la ltos pa med pa yin/ /zhes 'byung ba'i phyir ro/ /de bzhin du byang chub kyang sangs rgyas med par 'gyur te/ sangs rgyas la ma ltos par yang rten med pa'i byang chub tu 'gyur te/ rang bzhin gyis grub pa'i phyir ro/ / gzhan yang / khyod kyi rang bzhin nyid kyis ni/ /sangs rgyas min pa gang yin des/ /byang chub spyod la byang chub phyir/ /btsal kyang byang chub 'thob mi 'gyur/ /'dir sangs rgyas nyid kyang snga rol du sangs rgyas ma yin pa'i rang bzhin gyis gang zag gis byang chub sems dpa'i spyod pa spyad cing byang chub kyi don du btsal kyang byang chub thob par mi 'gyur ba nyid de/sangs rgyas ma yin pa'i rang bzhin bzlog par mi rung ba'i phyir ro/ /gzhan yang / 'ga' yang chos dang chos min pa/ /nam yang byed par mi 'gyur te/ /mi stong pa la ci zhes bya//rang bzhin la ni bya ba med/ /rang bzhin du smra ba khas len na/ chos dang chos ma yin pa dag byed par mi 'thad do/ /stong pa ma yin pa la bya ba ci zhig yod de/ yod pa'i phyir stong pa ma yin pa'i rang bzhin la ni bya ba 'thad pa ma yin no/ /gzhan yang / chos dang chos min med par yang / /'bras bu khyed la yod par 'gyur/ /chos dang chos min rgyus byung ba'i/ /'bras bu khyod la yod ma yin/ /yid du 'ong ba dang yid du mi 'ong ba'i 'bras bu chos dang chos ma yin pa'i rgyu can gang yin pa de/ gal te rang bzhin gyis yod na ni/chos dang chos ma yin pa dag med par yang de khyod la yod par 'gyur ro/ /gang gi tshe chos dang chos ma yin pa dag med par khyod la 'bras bu yod na de'i tshe/ chos dang chos ma yin pa dag las skyes pa'i 'bras bu khyod la yod pa ma yin te/ chos dang chos ma yin pa la sogs pa don med par 'gyur bas/chos dang chos ma yin pa'i rgyus 'byung ba'i 'bras bu khyod la yod pa ma yin no zhes bshad pa yin no/ /ci ste chos dang chos ma yin pa'i rgyus 'byung ba'i 'bras bu yod pa ma yin no zhes rtog na/ 'o na 'bras bu de mi stong pa ma yin no zhes bstan pa'i phyir/chos dang chos min rgyus 'byung ba'i/ /'bras bu gal te khyod la yod/ /chos dang chos min las byung ba'i/ /'bras bu ci phyir stong ma yin/ /zhes gsungs pa dang / 'di ni stong pa yin te/ /rten cing 'brel bar 'byung ba'i phyir gzugs brnyan bzhin no snyam du dgongs pa yin no//gzhan yang song shig / byos shig tshos shig /ltos shig 'dug shig /ces bya ba la sogs pa 'jig rten pa'i tha snyad rten cing 'brel bar 'byung ba de dag gal te khyod rang bzhin dang bcas par 'dod na/ /de'i tshe khyod kyis rten cing 'brel bar 'byung ba la gnod pa byas pa yin la/de la gnod pa byas pas 'jig rten pa'i tha snyad do cog la gnod pa yin no zhes bstan pa'i phyir/ rten cing 'brel bar 'byung ba yi/ /stong pa nyid la gnod byed gang / /'jig rten pa yi tha snyad ni//kun la'ang gnod pa byed pa yin/ /zhes gsungs pa la/ gang gi sgra ni bya ba'i khyad par te/ gnod byed ces bya ba 'di dang sbyar ro/ /gzhan yang / stong pa nyid la gnod byed na/ /bya ba ci yang med 'gyur zhing / /rtsom pa med pa'i bya bar 'gyur/ /mi byed pa yang byed par 'gyur/ / gal te dngos po rnams stong pa nyid ma yin zhing rang bzhin dang bcas pa nyid du gyur na/ de'i tshe rang bzhin ni yod pa ma yin pa'i phyir/ /sus kyang bya ba ci yang med par 'gyur te/ nam mkha'i mi sgrib pa ni sus kyang byed pa ma yin pa bzhin no//byed bzhin pa ma yin pa yang bya bar 'gyur la/ bya ba mi byed pa yang byed pa por 'gyur na/ de dag ni de ltar yang ma yin te/ de'i phyir dngos po rnams mi stong pa ma yin no/ /gzhan yang / rang bzhin yod na 'gro ba rnams/ /ma skyes pa dang ma 'gags dang //ther zug tu ni gnas 'gyur zhing / /gnas skabs sna tshogs bral bar 'gyur/ /gal te dngos po rnams rang bzhin dang bcas par gyur na/ de'i tshe/ rang bzhin bcos ma ma yin pa'i phyir dang / ldog pa med pa'i phyir 'gro ba 'di dag thams cad skye ba med pa dang 'gag pa med par 'gyur ro//skye ba med pa dang 'gag pa med pa nyid kyi phyir na/ 'gro ba ther zug tu gnas par 'gyur ro/ /rgyu dang rkyen la mi ltos pas na/ stong pa ma yin par smra ba rnams la/ 'gro ba rten cing 'brel bar mi 'byung zhing gnas skabs sna tshogs pa dang bral bar 'gyur ro//ji skad du/ bcom ldan 'das kyis/ mi stong cung zhig yod na rgyal ba yis/ /'ga' yang lung ston mi gsung 'gyur med par/ /rang rang dngos la ther zug gnas de la/ /'phel ba med cing yongs su nyams pa med//ces gsungs pa dang / de bzhin du 'phags pa glang po rtsal las kyang / gal te chos rnams rang bzhin 'ga' yod na/ /rgyal ba nyan thos bcas pas de mkhyen 'gyur/ /ther zug chos rnams mya ngan 'da' mi 'gyur/ /mkhas rnams nam yang spros pa med mi 'gyur//zhes gsungs pa lta bu'o/ /dngos po rang bzhin dang bcas par khas len na 'jig rten pa'i tha snyad dag mi 'thad pa 'ba' zhig tu ma zad kyi/ 'o na ci zhe na/ 'jig rten las 'das pa dag kyang yin no zhes bstan pa'i phyir/ gal te stong pa yod min na//ma thob thob par bya ba dang / /sdug bsngal mthar byed las dang ni/ /nyon mongs thams cad spong ba'ang med/ /ces gsungs te/ gal te stong pa yod pa ma yin zhing / 'di dag thams cad rang bzhin dang bcas par 'gyur na/ de'i tshe gang ma thob pa de ni mi thob pa kho na yin pas/'bras bu ma thob pa 'thob par mi 'gyur ro/ /de bzhin du sngar sdug bsngal mthar byed par ma gyur pas da ltar yang mi 'gyur ro/ /sngar nyon mongs pa thams cad spangs par ma gyur pas phyis kyang spong bar mi 'gyur ro/ /de ltar na gang gi phyir dngos po rang bzhin dang bcas par smra bar khas blangs par gyur na/thams cad mi rung ba de'i phyir/ /gang gis rten cing 'brel bar 'byung / /mthong ba de ni sdug bsngal dang / /kun 'byung dang ni 'gog pa dang / /lam nyid de dag mthong ba yin/ /gang gis stong pa nyid rten cing 'brel bar 'byung ba'i mtshan nyid can yang dag par 'byung ba des ni/'phags pa'i bden pa bzhi po rnams de kho na nyid du yang dag pa ji lta ba bzhin mthong ba yin no/ /ji skad du 'phags pa chos thams cad 'jug pa med par bstan pa'i mdo las/ 'jam dpal gang gis chos thams cad skye ba med par mthong ba des ni sdug bsngal yongs su shes pa yin no//gang gis chos thams cad med pa nyid du mthong ba des ni kun 'byung ba spangs pa yin no/ /gang gis chos thams cad shin tu mya ngan las 'das par mthong ba des ni 'gog pa mngon du byas pa yin no//'jam dpal gang gis chos thams cad dngos po med par mthong ba des ni lam bsgoms pa yin no zhes bya ba rgya cher gsungs pa lta bu'o/ /'phags pa bsam gtan pa'i dpe mkhyud kyi mdo las kyang / /de nas bcom ldan 'das kyis 'jam dpal gzhon nur gyur pa la 'di skad ces bka' stsal to//'jam dpal 'phags pa'i bden pa rnams yang dag pa ji lta ba bzhin ma mthong bas/ sems can phyin ci log pa zhes sems phyin ci log tu gyur pa rnams 'khor ba yang dag pa ma yin pa 'di las 'da' bar mi 'gyur ro/ /de skad ces bka' stsal pa dang /bcom ldan 'das la 'jam dpal gzhon nur gyur pas 'di skad ces gsol to/ /bcom ldan 'das gang la nye bar dmigs pas sems can rnams 'khor ba las 'das par mi 'gyur ba bstan du gsol/ bcom ldan 'das kyis bka' stsal pa/'jam dpal bdag dang bdag gi bar dmigs pas sems can rnams 'khor ba las mi 'da'o/ /de ci'i phyir zhe na/ 'jam dpal bdag dang gzhan du yang dag par mthong ba gang yin pa de ni las mngon par 'du byed par 'gyur ro/ /'jam dpal byis pa so so'i skye bo thos pa dang mi ldan pa ni chos thams cad shin tu mya ngan las 'das par mi shes pas bdag dang gzhan du dmigs par byed do//dmigs nas mngon par zhen par 'gyur ro/ /mngon par zhen pas chags par 'gyur ro/ /sdang bar 'gyur ro/ /rmongs par 'gyur ro/ /de chags pa dang sdang ba dang rmongs par gyur pas/lus dang ngag dang yid kyi las rnam pa gsum mngon par 'du byed do/ /de yod pa ma yin pa la sgro 'dogs pas bdag ni chags so/ /bdag ni sdang ngo / /bdag ni rmongs so snyam du rnam par rtog par byed do/ /de de bzhin gshegs pa'i bstan pa la rab tu byung nas 'di snyam du sems te/bdag ni tshul khrims dang ldan pa'o/ /bdag ni tshangs par spyod pa'o/ /bdag ni 'khor ba las yang dag par 'da' bar 'gyur ro/ /bdag gis mya ngan las 'das pa thob par 'gyur ro/ /bdag ni sdug bsngal rnams las thar bar 'gyur ro snyam du rtog par byed cing /de chos 'di dag ni dge ba'o/ /chos 'di dag ni mi dge ba'o/ /chos 'di dag ni spang bar bya ba'o/ /chos 'di dag ni mngon du bya ba'o/ /sdug bsngal yongs su shes par bya'o/ /kun 'byung spang bar bya'o / /'gog pa mngon du bya'o / / lam bsgom par bya'o snyam du rtog go/ /de nas de gang zhig 'du byed thams cad las 'byol bar 'gyur ro / /'du byed thams cad ni mi rtag pa'o/ /'du byed thams cad ni kun tu 'bar ba'o snyam du rtog par byed do/ /de ltar rtog pa de la skyo ba dang lhan cig tu gyur pa yid la byed pa mtshan ma med pa sngon du 'gro ba skye bar 'gyur ro//de 'di snyam du chos 'di dag yongs su shes pa gang yin pa de ni sdug bsngal yongs su shes pa'o snyam du sems so/ /de 'di snyam du gang bdag gis kun 'byung spang bar bya'o snyam du sems par 'gyur zhing / chos 'di dag gis nyen par 'gyur/ches ngo tsha bar 'gyur/ mi dga' bar 'gyur/ smod par 'gyur/ skrag cing dngang la kun tu dngang bar 'gyur ro/ /de 'di snyam du gang chos 'di dag gis nyen po de ni chos 'di dag mngon du byas pa yin zhing / 'di ni kun 'byung spang ba'o snyam du sems par 'gyur ro//de 'di snyam du 'gog pa mngon du bya'o snyam du sems te/ de gnyis su brtags nas 'gog pa mngon du shes pa yin no/ /de 'di snyam du 'gog pa mngon du byas pa de ni 'di yin no snyam du sems so/ /de 'di snyam du gang bdag gis lam sgom mo snyam du sems shing /de gcig pu dben par song nas chos de dag yid la byed pa na zhi gnas 'thob par 'gyur ro/ /skyo ba dang lhan cig tu gyur pa'i yid la byed pa de de la zhi gnas skye bar 'gyur ro/ /de chos thams cad la sems phyir 'byung bar 'gyur te/ phyir 'dren zhing phyir ldog par 'gyur ro//de dag gis nyen par 'gyur/ ches ngo tsha bar 'gyur/ /mngon par mi dga' ba'i sems skye bar 'gyur ro/ /de 'di snyam du bdag sdug bsngal thams cad las grol bar 'gyur te/ yang phyis bya ba ci yang med cing bdag ni dgra bcom par gyur to zhes bya bar bdag nyid shes so//de 'chi ba'i dus byed pa'i tshe bdag nyid skye bar mthong bas/ de sangs rgyas kyi byang chub la the tshom dang som nyi za bar 'gyur ro/ /de som nyir lhung ste 'chi ba'i dus byas nas dmyal ba chen po dag tu lhung bar 'gyur ro/ /de ci'i phyir zhe na/ ji ltar skye ba med pa'i chos rnams la brtags nas/ de bzhin gshegs pa la som nyi dang yid gnyis skyed par byed pa'i phyir ro/ /de nas bcom ldan 'das la 'jam dpal gzhon nur gyur pas 'di skad ces gsol to/ /bcom ldan 'das 'phags pa'i bden pa bzhi po rnams la ji ltar 'khums par bgyi//bcom ldan 'das kyis bka' stsal pa/ 'jam dpal gang gis chos thams cad ma skyes par mthong ba des ni/ sdug bsngal yongs su shes pa yin no/ /gang gis chos thams cad 'byung ba med par mthong ba des ni kun 'byung ba spangs pa yin no//gang gis chos thams cad gtan mya ngan las 'das par mthong ba des ni 'gog pa mngon du byas pa yin no/ /gang gis chos thams cad shin tu ma skyes par mthong ba des ni lam bsgoms pa yin no/ /'jam dpal gang gis de ltar 'phags pa'i bden pa bzhi po mthong ba des ni chos 'di dag ni dge ba'o//chos 'di dag ni mi dge ba'o/ /chos 'di dag ni spang bar bya'o/ /chos 'di dag ni mngon du bya'o/ /sdug bsngal yongs su shes par bya/ kun 'byung spang bar bya/ 'gog pa mngon du bya/lam bsgom par bya'o zhes mi rtog rnam par rtog par mi byed de/ 'di ltar gang brtag par bya ba'i chos de des ma mthong ba'i phyir ro/ /byis pa so so'i skye bo rnams ni chos de dag la rtog pa na chags par 'gyur ro/ /sdang bar 'gyur ro/ /rmongs par 'gyur ro/ /de chos 'ga' yang mi len mi 'dor de ltar mi len mi 'dor ba de ni/khams gsum la sems chags par mi 'gyur ro/ /khams gsum thams cad ma skyes pa dang / sgyu ma lta bu dang / rmi lam lta bu dang / brag ca lta bur mthong ngo / /chos thams cad de lta bu'i rang bzhin can du mthong bas sems can thams cad la rjes su chags pa dang /khong khro ba dang bral bar 'gyur ro/ /de ci'i phyir zhe na/ 'di ltar des gang la rjes su chags pa dang / khong khro bar 'gyur ba'i chos de ma dmigs pa'i phyir ro/ /des sems nam mkha' dang mnyam pas sangs rgyas kyang yang dag par rjes su mi mthong /chos kyang yang dag par rjes su mi mthong / dge 'dun yang yang dag par rjes su mi mthong zhing / chos thams cad stong pa'o zhes bya bar mthong bas chos gang la yang som nyi skyed par mi byed do//som nyi med pas nye bar len pa med par 'gyur ro/ /nye bar len pa med pas nye bar len pa med par yongs su mya ngan las 'da'o zhes rgya cher gsungs so/ /slob dpon zla ba grags pa'i zhal snga nas sbyar ba'i tshigs gsal ba las/ 'phags pa'i bden pa brtag pa zhes bya ba rab tu byed pa nyi shu bzhi pa'i 'grel pa'o// //'dir smras pa/ gal te 'di dag kun stong na/ /'byung ba med cing 'jig pa med/ /gang zhig spong dang 'gog pa las/ /mya ngan 'da' bar 'gyur bar 'dod/ /'di na bcom ldan 'das kyis gang zag tshangs par spyod pa bsten zhing /de bzhin gshegs pa'i bstan pa la zhugs pa chos rjes su mthun pa'i chos kyi nan tan dang ldan pa rnams la/ mya ngan las 'das pa rnam pa gnyis su gsungs te/ phung po lhag ma dang bcas pa dang / phung po lhag ma med pa'o/ / de la ma rig pa dang 'dod chags la sogs pa nyon mongs pa'i tshogs ma lus par spangs pa las phung po lhag ma dang bcas pa'i mya ngan las 'das par 'dod do/ /de la 'di la bdag la chags pa bsten pas na phung po ste/ /bdag tu gdags pa'i rgyu nye bar len pa'i phung po lnga la phung po'i sgras brjod do//lhag ma lus pas na lhag ma'o/ /phung po nyid lhag ma yin pas na phung po lhag ma'o/ /phung po lhag ma dang lhan cig gnas pas na phung po lhag ma dang bcas pa'o/ /de ci yin zhe na/ mya ngan las 'das pa'o/ /de yang chom rkun gyi tshogs ma lus par bsad de grang tsam 'dug pa dang chos mthun par 'jig tshogs la lta ba la sogs pa nyon mongs pa'i chom rkun dang bral ba phung po tsam 'ba' zhig lus pa ste/de ni phung po lhag ma dang bcas pa'i mya ngan las 'das pa'o/ /chom rkun gyi tshogs ma lus par bsad de grong tsam po yang zhig pa dang chos mtshungs par mya ngan las 'das pa gang la phung po tsam yang yod pa ma yin pa de ni phung po lhag ma med pa'i mya ngan las 'das pa ste/'di phung po'i lhag ma dang bral ba'i phyir ro/ /de nyid kyi dbang du mdzad nas/ gang na lus zhig 'du shes 'gags //tshor ba thams cad bral gyur zhing / /'du byed nye bar zhi ba dang / /rnam par shes pa nub gyur pa/ /zhes bya ba dang / de bzhin du/ ma zhum pa yi lus kyis ni/ /tshor ba dang du len pa na/ /de yi sems ni rnam par grol/ /mar me shi bar gyur pa bzhin/ / zhes bshad do/ /de'i phyir phung po lhag ma med pa'i mya ngan las 'das pa de ni phung po 'gags pa las 'thob bo/ /mya ngan las 'das pa rnam pa gnyis po de ji ltar rung bar 'gyur zhe na/ gal te nyon mongs pa rnams dang phung po rnams 'gags par gyur pa yin na/ gang gi tshe 'di dag thams cad stong pa yin zhing /cung zad kyang skye ba med la cung zad kyang 'gag pa yang med pa de'i tshe/ gang dag 'gags pa las mya ngan las 'da' bar 'gyur ba nyon mongs pa'ang phung po rnams yod par ga la 'gyur/ de'i phyir dngos po rnams kyi rang bzhin yod pa nyid do zhes 'dzer to//brjod par bya ste/ de ltar rang bzhin khas len na yang / gal te 'di kun mi stong na/ /'byung ba med cing 'jig pa med/ /gang zhig spong dang 'gags pa las/ /mya ngan 'das par 'gyur bar 'dod/ /gang las de dag log pas mya ngan las 'da' bar 'gyur ba/nyon mongs pa rnams dang phung po rang bzhin gyis rnam par gnas pa ldog par ga la 'gyur te/ rang bzhin la ldog pa med pa'i phyir ro/ /de'i phyir rang bzhin dang bcas par smra ba la mya ngan las 'das pa mi 'thad pa nyid do/ /gang las de dag la nyes pa 'dir 'gyur ba/stong pa nyid du smra ba rnams kyis ni mya ngan las 'das pa nyon mongs pa ldog pa'i mtshan nyid can nam phung po ldog pa'i mtshan nyid can 'dod pa ma yin no/ /de'i phyir stong pa nyid du smra ba rnams la klan ka 'dir mi 'gyur ba nyid do/ /gal te stong pa nyid du smra ba rnams mya ngan las 'das pa phung po rnams sam/nyon mongs pa rnams log pa'i mtshan nyid can mi 'dod na/ mtshan nyid gang dang ldan pa zhig 'dod ce na/ brjod pa/ spangs pa med pa 'thob med pa/ /chad pa med pa rtag med pa/ /'gag pa med pa skye med pa//de ni mya ngan 'das par brjod/ /gang zhig 'dod chags la sogs pa ltar spangs pa med cing / dge sbyong gi 'bras bu ltar 'thob pa med pa/ phung po la sogs pa ltar chad pa yang med la/ gang yang mi stong pa ltar rtag pa ma yin pa/ /rang bzhin gyis 'gag pa med pa skye ba med pa spros pa thams cad nye bar zhi ba'i mtshan nyid can de ni mya ngan las 'das par bshad do//de'i phyir rnam pa de lta bu de la nyon mongs pa gang dag spangs pas de mya ngan las 'da' bar 'gyur ba/ nyon mongs par rtog pa ga la yod cing / phung po gang dag 'gags pas de 'thob par 'gyur ba phung por rtog pa yang ga la yod/ji srid du rtog pa 'di dag 'byung ba de srid du mya ngan las 'das pa thob pa yod pa ma yin te/ spros pa thams cad zad pa nyid las de 'thob pa'i phyir ro/ /ci ste mya ngan las 'das pa la nyon mongs pa rnams med cing phung po rnams kyang med mod kyi/de lta na yang mya ngan las 'das pa'i snga rol na yod pa yin no/ /de'i phyir de dag 'gags pa ni spros pa zad pa las mya ngan las 'das pa yin par 'gyur ro snyam na/ brjod pa/ 'dzin pa 'di ni dor bar bya'o/ /gang gi phyir mya ngan las 'das pa'i snga rol na rang bzhin gyis yod pa rnams ni yang dngos po med par bya bar mi nus te/de'i phyir mya ngan las 'das pa 'dod pas rtog pa 'di dor bar bya'o/ /mya ngan 'das mtha' gang yin pa/ /de ni 'khor ba'i mtha' yin te/ /de gnyis khyad par cung zad ni/ /shin tu phra ba'ang yod ma yin//zhes 'chad par 'gyur ro/ /bcom ldan 'das kyis kyang / /mya ngan 'das la chos rnams yod nyid med/ /chos gang der med de dag gzhar yang med/ /yod dang med ces rtog pa dang ldan zhing / /de ltar spyod rnams sdug bsngal nyer mi zhi/ /zhes gsungs pa yin pas so//tshigs su bcad pa 'di'i don ni 'di yin te/ mya ngan las 'das pa ste phung po lhag ma med pa'i mya ngan las 'das pa'i dbyings na'o/ /chos rnams ni nyon mongs pa dang las dang skye ba'i mtshan nyid can rnams sam phung po rnams te/ rnam pa thams cad du bral ba'i phyir yod pa nyid med do//'di ni rgol ba thams cad kyi 'dod pa yin no/ /mar me gtang bas mun par thag pa la sbrul du dmigs pa ltar chos gang dag mya ngan las 'das pa 'di la yod pa ma yin pa de dag ni gzhar yang med do / /nyon mongs pa dang las dang skye ba'i mtshan nyid can gyi chos de dag ni 'khor ba'i gnas skabs kyi dus 'ga' zhig na yang de kho na nyid du yod pa ma yin no//'di ltar mun pa'i gnas skabs na thag pa la sbrul rang gi ngo bos yod pa ni ma yin te/ yod par gyur pa'i sbrul ltar mun pa dang snang bar yang 'dzin par 'gyur ba'i phyir ro//'o na ji ltar 'khor ba yin zhe na/ brjod pa/ rab rib can rnams la skra shad dang sbrang bu mchu rings la sogs pa snang ba ltar dngos po yod pa ma yin pa'i rang bzhin can dag kyang byis pa bdag dang bdag gi bar yang dag pa ma yin pa'i phyin ci log gi gdon gyis bzung ba rnams bden par snang ba yin no zhes gsungs pa ni/yod dang med ces rtog pa dang ldan zhing / /de ltar spyod rnams sdug bsngal nyer mi zhi/ /zhes bya'o/ /yod do zhes dngos po yod par rtog pa dang ldan pa rgyal dpog pa dang / gzegs zan dang ser skya la sogs pa bye brag tu smra ba rnams la thug pa rnams dang /med ces rtog pa dang ldan pa med pa pa rnams dang / de dag las gzhan 'du byed 'das pa dang ma 'ongs pa dang / rnam par rig byed ma yin pa dang / mi ldan pa'i 'du byed med par smra zhing de las gzhan yod par smra ba rnams dang /kun du brtags pa'i ngo bo nyid med par smra zhing / gzhan gyi dbang dang yongs su grub pa'i ngo bo nyid yod par smra ba rnams te/ de ltar yod pa dang med par smra ba rnams kyi sdug bsngal te 'khor ba zhi bar mi 'gyur ro zhes bya'o/ /de bzhin du/ ji ltar dogs pa'i 'du shes kyis ni dug langs pa//dug de khong du song ba med kyang brgyal bar 'gyur/ /de bzhin byis pa bdag dang bdag gir khas len pa/ /bdag der 'du shes yang dag min rtag skye zhing 'chi/ /zhes kyang gsungs so/ /de'i phyir de lta bas na/ /mya ngan las 'das pa la 'ga' yang spangs pa med la/'ga' yang 'gag pa med do zhes shes par bya'o/ /de'i phyir rtog pa thams cad zad pa nyid mya ngan las 'das pa yin no/ /ji skad du 'phags pa rin po che'i phreng ba las kyang / mya ngan 'das pa dngos med pa'ang / /min na de dngos ga la yin//dngos dang dngos po med 'dzin pa/ /zad pa mya ngan 'das zhes bya/ /zhes bshad do/ /gang dag mya ngan las 'das pa kun du rtog pa thams cad nye bar zhi ba'i ngo bo ma rtogs shing / mya ngan las 'das pa dngos po dang dngos po med pa dang de gnyi ga dang / gnyi ga ma yin pa'i ngo bor yongs su rtog par byed pa/de dag la brjod pa/ re zhig mya ngan 'das dngos min/ /rga shi'i mtshan nyid thal bar 'gyur/ /rga dang 'chi ba med pa yi/ /dngos po yod pa ma yin no/ /de la mya ngan las 'das pa dngos por mngon par zhen pa kha cig ni 'di skad du/ 'dir mya ngan las 'das pa ni nyon mongs pa dang las dang skye ba'i rgyun 'jug pa nges par 'gog par 'gyur ba/ chu'i rgyun 'gog pa'i chu lon dang 'dra ba'i don dngos po'i bdag nyid can yin te/ yod pa ma yin pa'i rang bzhin gyi chos ni de ltar 'bras bu byed par yang ma mthong ngo / / gal te 'di dga' ba'i 'dod chags dang lhan cig tu 'gyur ba'i sred pa zad cing 'dod chags dang bral ba 'gog pa gang yin pa de ni mya ngan las 'das pa'o zhes gsungs pa ma yin nam/ zad pa tsam ni dngos po yin par 'os pa yang ma yin no/ /de bzhin du/ mar me shi bar gyur pa ltar//de yi sems ni rnam par thar/ /zhes gsungs te/ mar me shi ba ni dngos po yin no zhes bya bar yang mi 'thad do zhe na/ smras pa/ sred pa zad pa ni sred pa zad pa'o zhes de ltar ni shes par mi bya'o/ /'o na ci zhe na/ mya ngan las 'das pa zhes bya ba'i chos de yod na sred pa zad par 'gyur ba de ni sred pa zad pa'o zhes bya bar rig par bya'o//mar me ni dpe tsam du zad do/ /der yang gang yod na sems thar par 'gyur ba yin no zhes bya bar rig par bya'o zhes smra'o/ /de ltar mya ngan las 'das pa dngos po rnam par gnas pa yin dang /re zhig mya ngan 'das dngos min/ /zhes slob dpon nges par rtog par mdzad do/ /de ci'i phyir zhe na/ gang gi phyir/ /rga shi'i mtshan nyid thal bar 'gyur te/ dngos po ni rga shi'i mtshan nyid la mi 'khrul ba'i phyir ro/ /de'i phyir de mya ngan las 'das pa nyid du yang mi 'gyur te/rga shi'i mtshan nyid can yin pa'i phyir/ rnam par shes pa la sogs pa bzhin no zhes bya bar dgongs pa yin no/ /rga shi'i mtshan nyid la mi 'khrul ba de nyid bsal bar bya ba'i phyir/ rga dang 'chi ba med pa yi//dngos po yod pa ma yin no/ /zhes bshad de/ rga shi dang bral ba gang yin pa de ni dngos po nyid ma yin te/ rga shi dang bral ba'i phyir nam mkha'i me tog bzhin no/ /gzhan yang / gal te mya ngan 'das dngos na/ /mya ngan 'das pa 'dus byas 'gyur/ / dngos po 'dus byas ma yin pa/ /'ga' yang gang na'ang yod ma yin / /gal te mya ngan las 'das pa dngos po yin na ni de'i tshe mya ngan las 'das pa de 'dus byas su 'gyur te/ dngos po yin pa'i phyir rnam par shes pa bzhin no/ /gang 'dus byas ma yin pa de ni dngos por mi 'gyur te/ dper na bong bu'i rwa bzhin no/ /ldog pa bshad pa'i phyir/ /dngos po 'dus byas ma yin pa/ /'ga' yang gang na'ang yod ma yin/ /zhes bya ba gsungs te/ 'ga' yang zhes bya ba ni brten pa ste/ nang ngam phyi'i bdag nyid do zhes bya ba'i don to/ /gang na'ang zhes bya ba ni rten te/ yul lam dus sam grub pa'i mthar ro/ /gzhan yang / gal te mya ngan 'das dngos na/ /ji ltar myang 'das de brten min/ /dngos po brten nas ma yin pa/ //'ga' yang yod pa ma yin no/ /gal te khyod kyi lugs kyis mya ngan las 'das pa dngos po yin na ni/ de brten nas yin par 'gyur te/rang gi rgyu'i tshogs pa la brten nas yin no zhes bya ba'i don to/ /de ltar brten nas mya ngan las 'das pa 'dod pa yang ma yin te/ 'o na ci zhe na de ni ma brten par ro/ /gal te mya ngan las 'das pa dngos po yin na/ ji ltar mya ngan las 'das pa de brten nas ma yin par 'gyur te/mi brten pa yin par mi 'gyur ba nyid de/ dngos po yin pa'i phyir rnam par shes pa la sogs pa bzhin no/ /ldog pa bshad pa ni/ dngos po brten nas ma yin pa/ /'ga' yang yod pa ma yin no/ /zhes bya ba'o/ /'dir smras pa/ ji skad bshad pa'i nyes par thal bar 'gyur ba'i phyir/mya ngan las 'das pa dngos po ma yin pa de ni bden te/ 'o na ci zhe na/ nyon mongs pa dang skye ba log pa'i phyir/ /mya ngan las 'das pa dngos po med pa kho na yin no/ /brjod pa/ 'di yang mi rigs te/ gang gi phyir/ gal te mya ngan 'das dngos min//dngos med ji ltar rung bar 'gyur/ /gang la mya ngan 'das dngos min / /de la dngos med yod ma yin/ /gal te mya ngan las 'das pa dngos por mi 'dod cing mya ngan las 'das pa dngos po'o snyam du mi 'dod na/ de'i tshe mya ngan las 'das pa dngos po med par ji ltar rung bar 'gyur te/dngos po med par yang rung bar mi 'gyur ba nyid do snyam du dgongs pa yin no/ /ci'i phyir zhe na/ gang gi phyir/ gang la mya ngan 'das dngos min/ /de la dngos med yod ma yin/ /zhes gsungs te/ 'dir dngos po'i rang bzhin btang nas gzhan du gyur pa la dngos po med pa zhes bsnyad na/bstan zin pa'i nyes pas phyogs gang la mya ngan las 'das pa dngos po ma yin pa'i phyogs de la mya ngan las 'das pa dngos po med pa yang ma yin te/ dngos po'i rang bzhin du ma grub pa'i ngo bo la dngos po med pa'i ngo bo nyid mi 'thad pa'i phyir ro snyam du dgongs pa yin no//gal te mya ngan las 'das pa ni nyon mongs pa dang skye ba med pa yin no zhe na/ de lta na 'o na nyon mongs pa dang skye ba'i mi rtag pa nyid mya ngan las 'das pa yin par 'gyur te/ gang gi phyir nyon mongs pa dang skye ba med pa ni mi rtag pa nyid yin gyi gzhan ni ma yin te/de'i phyir mi rtag pa nyid mya ngan las 'das pa yin par 'gyur na/ de ni 'dod pa yang ma yin te/ sgrib pa med par thal bar 'gyur ba'i phyir ro/ /de'i phyir 'di ni mi rigs so/ /gzhan yang / gal te mya ngan 'das dngos min/ /ji ltar myang 'das de brten min//gang zhig brten nas ma yin pa'i/ /dngos med yod pa ma yin no/ /de la mi rtag pa nyid dngos po med pa nyid yin zhing dngos po la brten nas 'dogs pa ma yin te/ /bong bu'i rwa la sogs pa rnams la mi rtag pa nyid ma dmigs pa'i phyir ro/ /mtshan nyid la brten nas mtshan gzhi 'jug la/mtshan gzhi la brten nas mtshan nyid 'jug pa de'i phyir mtshan nyid dang / mtshan gzhi 'jug pa phan tshun ltos pas mtshan gzhi'i dngos po la ma ltos par mi rtag pa nyid yod par ga la 'gyur/ de'i phyir dngos po med pa yang brten nas 'dogs pa yin no//de'i phyir gal te mya ngan las 'das pa dngos po med pa 'ga' zhig yin na ni/ ji ltar mya ngan las 'das pa de brten nas ma yin par 'gyur/ de ni brten nas kho na yin te/ dngos po med pa yin pa'i phyir 'jig pa bzhin no/ / de nyid gsal bar bya ba'i phyir/ gang zhig brten nas ma yin pa'i/ /dngos med yod pa ma yin no/ /zhes bshad do/ /gal te ma brten par dngos po med pa yod pa ma yin na/ 'o na da ci la brten nas mo gsham gyi bu la sogs pa dag dngos po med par 'gyur zhe na/ /mo gsham gyi bu la sogs pa dngos po med pa yin no zhes de skad sus smras/'di ltar/ gal te dngos po ma grub na/ /dngos med 'grub par mi 'gyur ro/ /dngos po gzhan du gyur pa ni/ /dngos med yin par skye bo smra/ /zhes sngar bshad zin to/ /de'i phyir mo gsham gyi bu la sogs pa rnams dngos po med pa nyid ma yin no//yang gang du/ nam mkha'i ri bong rwa dag dang / /mo gsham gyi ni bu dag kyang / /med bzhin tshig tu brjod pa ltar/ /dngos la rtog pa'ang de bzhin no/ /zhes gsungs pa der yang / dngos por rtog pa bkag pa tsam zhig yin gyi/ dngos po med par rtog pa ni ma yin te/dngos po nyid ma grub pa'i phyir ro zhes shes par bya'o/ /mo gsham gyi bu zhes bya ba 'di ni sgra tsam zhig tu zad kyi/ don gang zhig dngos po 'am dngos po med pa nyid du 'gyur ba 'di'i don ma dmigs so/ /de'i phyir dmigs pa med pa'i rang bzhin la dngos po dang dngos po med par brtags par ga la rigs/de'i phyir mo gsham gyi bu dngos po med pa ma yin no zhes shes par bya'o/ /de'i phyir/ gang zhig brten nas ma yin pa'i/ /dngos med yod pa ma yin no/ /zhes bya ba 'di ni gnas so/ /'dir gal te mya ngan las 'das pa dngos po ma yin zhing dngos po med pa yang ma yin no //'o na mya ngan las 'das pa gang yin zhes zer na/ brjod pa/ 'dir bcom ldan 'das de bzhin gshegs pa rnams kyis/ /'ong ba dang ni 'gro ba'i dngos/ /brten tam rgyur byas gang yin pa/ /de ni brten min rgyur byas min//mya ngan 'das pa yin par bstan/ /de la 'ong ba dang 'gro ba'i dngos po ni 'ong ba dang 'gro ba'i dngos po ste/ skye ba dang 'chi ba gcig nas gcig tu brgyud pa zhes bya ba'i tha tshig go/ /'ong ba dang 'gro ba'i dngos po de yang res 'ga' rgyu dang rkyen gyi tshogs pa la brten nas yod do zhes bya bar 'dogs te ring po dang thung ngu bzhin no//res 'ga' ni rgyur byas nas 'dogs te mar me'i 'od bzhin no/ /gal te 'dir rgyur byas nas 'dogs sam/ brten nas skye'o zhes rnam par 'jog kyang rung ste/ rnam pa thams cad du skye ba dang 'chi ba'i rgyun de ma brten pa'am rgyur byas pa ma yin par mi 'jug pa gang yin pa de mya ngan las 'das pa yin par rnam par gzhag go//mi 'jug pa tsam ni dngos po'am dngos po med pa yin no zhes bya bar brtag par yang mi nus te/ de ltar na mya ngan las 'das pa ni dngos po dang dngos po med pa yang ma yin no/ / yang na 'du byed 'khor ba yin no zhes bya ba gang dag gi phyogs yin pa de dag gi ltar na rten cing brten nas skye ba dang 'jig pa gang yin pa de brten pa ma yin par mi 'jug pa la mya ngan las 'das pa zhes bya bar brjod pa'am/ gang dag gi ltar na gang zag 'khor ba yin pa de dag gi rtag pa dang mi rtag pa nyid du brjod du med pa de'i 'ong ba dang 'gro ba'i dngos po med par nye bar len pa de dang de la brten nas gang yin pa de ni rgyur byas nas 'jug pa yin la/rgyur byas shing rgyur byas nas 'jug pa de nyid da ltar rgyur byas pa ma yin par mi 'jug pa ni mya ngan las 'das pa zhes bya bar bsnyad do//'du byed rnams dang gang zag gi mi 'jug pa tsam ni dngos po 'am dngos po med pa yin no zhes bya bar brtag par nus pa yang ma yin no/ /de'i phyir yang mya ngan las 'das pa dngos po dang dngos po med par mi rigs so zhes bya ba'o/ /gzhan yang /'byung ba dang ni 'jig pa dag/ spang bar ston pas bka' stsal to/ /de phyir mya ngan 'das pa ni/ /dngos min dngos med min par rigs/ /de la mdo las dge slong dag gang dag 'byung ba 'am 'jig pas srid pa las nges par 'byung ba tshol ba de ni de dag gi yongs su mi shes pa chen po yin no zhes gsungs so//'byung ba'i sred pa dang 'jig pa'i sred pa de ni gnyi ga yang yongs su spang bar bya ba yin na/ mya ngan las 'das pa ni de ltar bcom ldan 'das kyis spang bar bya ba ma gsungs te/ 'o na ci zhe na/ spang bar bya ba ma yin par ro//de'i phyir gal te mya ngan las 'das pa dngos po'i rang bzhin can nam/ dngos po med pa'i rang bzhin du gyur na ni/ de yang spang bar bya ba kho nar 'gyur na/ spang bar bya ba yang ma yin te/ de'i phyir mya ngan las 'das pa dngos po ma yin zhing dngos po med pa yang ma yin par mi rigs so//gang dag gi ltar na nyon mongs pa dang skye ba gnyis de la med pas/ mya ngan las 'das pa dngos po med pa'i rang bzhin yin la/ rang nyid dngos po'i ngo bo yin pas dngos po'i rang bzhin yin no zhes gnyis ka'i rang bzhin yin pa de dag gi / gnyi ga'i rang bzhin can gyi mya ngan las 'das pa yang mi 'thad do zhes bstan pa'i phyir gsungs pa/ gal te mya ngan 'das pa ni/ /dngos dang dngos med gnyis yin na/ /dngos dang dngos po med pa dag/ thar par 'gyur na de mi rigs/ /gal te mya ngan las 'das pa dngos po dang dngos po med pa gnyi ga'i rang bzhin du gyur na ni///de'i tshe dngos po dang dngos po med par thar par 'gyur ro/ /de'i phyir 'du byed rnams kyi bdag nyid 'thob pa dang / de dang bral ba gang yin pa de nyid thar par 'gyur na/ 'du byed dag ni thar pa zhes bya bar rigs pa yang ma yin no//de nyid kyi phyir/ de mi rigs so zhes bshad do/ /gzhan yang / gal te mya ngan 'das pa ni/ /dngos dang dngos med gnyis yin na / /mya ngan 'das pa ma brten min/ /de gnyis brten nas yin phyir ro/ /gal te mya ngan las 'das pa dngos po dang dngos po med pa'i rang bzhin yin na ni/de'i tshe rgyu dang rkyen gyi tshogs pa la brten cing ltos nas yin gyi/ ma brten par ni ma yin no/ /ci'i phyir zhe na/ gang gi phyir/ de gnyis brten nas yin phyir ro ste/ dngos po la brten nas dngos po med pa yin zhing / dngos po med pa la brten nas dngos po yod pa'i phyir/dngos po dang dngos po med pa de gnyi ga brten nas yin gyi ma brten par ni ma yin no/ /mya ngan las 'das pa dngos po dang dngos po med pa'i rang bzhin yin pa'i phyir de ltar 'gyur ba zhig na/ de ni de ltar yang ma yin te/ de'i phyir 'di ni mi rigs so/ / gzhan yang / ji ltar mya ngan 'das pa ni/ /dngos dang dngos med gnyis yin te/ /mya ngan 'das pa 'dus ma byas/ /dngos dang dngos med 'dus byas yin/ /dngos po ni rang gi rgyu dang rkyen gyi tshogs pa las byung ba'i phyir 'dus byas yin la/ dngos po med pa yang dngos po la brten nas 'byung ba'i phyir dang /skye ba'i rkyen gyis rga shi zhes 'byung ba'i phyir 'dus byas yin no/ /de'i phyir gal te mya ngan las 'das pa dngos po dang dngos po med pa'i rang bzhin yin na ni/ /de'i tshe de 'dus ma byas yin gyi/ 'dus byas nyid du 'gyur na/ /'dus byas su ni 'dod pa yang ma yin no/ / de'i phyir mya ngan las 'das pa dngos po dang dngos po med par mi rigs so/ /ci ste yang mya ngan las 'das pa ni dngos po dang dngos po med pa'i rang bzhin ma yin te/ 'o na ci zhe na/ mya ngan las 'das pa la dngos po dang dngos po med pa de dag yod pa ma yin no snyam na/ de yang mi rigs so//gang las she na/ gang gi phyir/ /ji ltar mya ngan 'das pa la/ /dngos dang dngos med gnyis yod de/ /dngos dang dngos po med pa phan tshun 'gal ba dag kyang mya ngan las 'das pa gcig la yod pa ma yin te/ de'i phyir/ ji ltar mya ngan 'das pa la/ /dngos dang dngos med gnyis yod de//yod pa ma yin pa nyid do snyam du dgongs pa yin no/ /ji lta bur zhe na/ de gnyis gcig la yod min te/ /snang ba dang ni mun pa bzhin/ /ji ltar khyim gcig tu dus gcig gi tshe/ phan tshun 'gal bas/ snang ba dang mun pa dag yod pa ma yin pa de bzhin du/ de gnyis kyang mya ngan las 'das pa la yod pa ma yin no/ /da ni mya ngan las 'das pa dngos po ma yin zhing dngos po med pa yang ma yin pa yang ji ltar mi rigs pa de ltar bstan pa'i phyir/ dngos min dngos po med min pa/ /mya ngan 'das par gang ston pa/ /dngos po med dang dngos po dag/grub na de ni 'grub par 'gyur/ /zhes gsungs te/ gal te dngos po zhes bya ba 'ba' zhig yod na ni/ de'i tshe de bkag pa'i sgo nas mya ngan las 'das pa dngos po ma yin pa zhes bya ba'i rtog pa 'dir 'gyur la/ gal te dngos po med pa 'ga' zhig yod na ni/de'i tshe de bkag pas mya ngan las 'das pa dngos po med pa ma yin par 'gyur ba zhig na/ gang gi tshe dngos po dang dngos po med pa dag nyid yod pa ma yin pa de'i tshe de dag bkag pa yang yod pa ma yin no/ /de'i phyir mya ngan las 'das pa dngos po ma yin zhing / dngos po med pa yang ma yin no snyam du rtog pa gang yin pa de yang mi 'thad pas 'di ni rigs pa ma yin no//gzhan yang / gal te mya ngan 'das pa ni/ /dngos min dngos po med min na/ /dngos min dngos po med min zhes/ /gang zhig gis ni de mngon byed/ /gal te mya ngan las 'das pa dngos po ma yin zhing dngos po med pa yang ma yin pa'i rang bzhin du yod do zhes rtog na/da ni gang zhig gis rnam pa de lta bur gyur pa mya ngan las 'das pa gnyi ga'i ngo bo ma yin pa de yod do zhes bya bar mngon par byed de/ 'dzin pa'am gsal bar byed/ ci mya ngan las 'das pa de la rnam pa de lta bu'i rtogs pa po 'ga' zhig yod dam 'on te med/gal te yod na ni de ltar na mya ngan las 'das par yang bdag yod par 'gyur na/ 'dod pa ni ma yin te/ nye bar len pa med par bdag yod pa nyid ma yin pa'i phyir ro/ /ci ste med na ni de'i tshe rnam pa de lta bu'i mya ngan las 'das pa de yod par gang gis gcod par byed/gal te 'khor ba na gnas pas yongs su gcod par byed do zhe na/ 'khor ba na gnas pas yongs su gcod par byed na de ci rnam par shes pas gcod par byed dam/ 'on te ye shes kyis yin grang na/ gal te rnam par shes pas yin par rtog na/ de ni mi rigs so//ci'i phyir zhe na/ 'di ltar rnam par shes pa 'di ni mtshan ma la dmigs pa yin no / mya ngan las 'das pa la ni mtshan ma cung zad kyang yod pa ma yin te/ de'i phyir re zhig de ni rnam par shes pas dmigs par byed pa ma yin no/ /ye shes kyis kyang spyod par byed pa ma yin te/ye shes kyis ni stong pa nyid la dmigs par 'gyur dgos la de yang ma skyes pa'i rang bzhin nyid yin pas/ ji ltar yod pa ma yin pa'i rang bzhin des mya ngan las 'das pa dngos po ma yin zhing / dngos po med pa ma yin pa zhes bya bar 'dzin par byed/ ye shes ni spros pa thams cad las 'das pa'i rang bzhin yin pa'i phyir ro//de'i phyir mya ngan las 'das pa ni gang gis kyang dngos po ma yin zhing / dngos po med pa ma yin no zhes bya bar mngon par mi byed la/ mngon par ma byas shing gsal bar ma byas la/ ma bzung ba de ni de ltar yod do zhes bya bar mi rigs so//ji ltar mya ngan las 'das pa la rtog pa bzhi po 'di dag rnam pa thams cad du mi srid pa de bzhin du/ mya ngan las 'das pa thugs su chud pa po de bzhin gshegs pa la yang rtog pa 'di dag srid pa ma yin zhes bstan pa'i phyir/ bcom ldan mya ngan 'das gyur nas//yod par mi mngon de bzhin du/ /med do zhe 'am gnyi ga 'am/ /gnyis min zhes kyang mi mngon no/ /zhes gsungs te/ 'di ltar/ /gang gis 'dzin stug bzung gyur pa/ /de ni mya ngan 'das pa la/ /de bzhin gshegs pa yod ce 'am/ /med ces rnam rtog rtog par byed//ces gong du bshad zin to/ /de ltar na re zhig de bzhin gshegs pa mya ngan las 'das phan chad yod pa'am med do zhes bya bar mi mngon no/ /'di gnyis med pas gnyi ga'o zhes bya bar yang mi mngon no/ /gnyi ga med pa nyid kyis na gnyi ga ma yin pa zhes bya bar yang mi mngon zhing mi 'dzin pa yin no//bcom ldan 'das mya ngan las 'das nas/ rnam pa bzhir mi mngon pa 'ba' zhig tu ma zad kyi/ gzhan yang / bcom ldan bzhugs par gyur na yang / /yod par mi mngon de bzhin du/ /med do zhe 'am gnyi ga dang / /gnyis min zhes kyang mi mngon no//ji ltar mi mngon pa de ltar ni de bzhin gshegs pa brtag par bstan zin pa nyid do/ /de nyid kyi phyir/ 'khor ba mya ngan 'das pa las/ /khyad par cung zad yod ma yin/ /mya ngan 'das pa'ang 'khor ba las/ /khyad par cung zad yod ma yin/ /gang gi phyir bcom ldan 'das zhugs pa na yang yod do zhes bya ba la sogs pa mi mngon la/mya ngan las 'das pa na yang yod do zhes bya ba la sogs par mi mngon pa de nyid kyi phyir 'khor ba dang mya ngan las 'das pa gnyis la phan tshun khyad par 'ga' yang yod pa ma yin te/ rnam par dpyad na rang bzhin mtshungs pa'i phyir ro/ /gang yang bcom ldan 'das kyis 'di skad du/ dge slong dag skye ba dang rga shi'i 'khor ba ni thog ma dang tha ma med do zhes gsungs pa de yang 'di nyid kyi phyir 'thad pa yin to/ /'khor ba dang mya ngan las 'das pa gnyis la khyad par med pa'i phyir ro//'di ltar/ myang 'das mtha' dag gang yin pa/ /de ni 'khor ba'i mtha' yin te/ /de gnyis khyad par cud zad ni/ /shin tu phra ba'ang yod ma yin/ /mya ngan las 'das pa dang 'khor ba la khyad par med pa'i phyir/ sngon dang phyi ma'i mthar rtog pa yod pa ma yin pa 'ba' zhig tu ma zad kyi/gang 'das phan chad mtha' sogs dang / /rtag la sogs par lta ba dag /mya ngan 'das dang phyi mtha' dang / /sngon gyi mtha' la brten pa yin / /de dag kyang de nyid kyi phyir mi 'thad pa yin te/ 'khor ba dang mya ngan las 'das pa de gnyis ka yang rang bzhin gyis zhi ba nyid du ro gcig pa'i phyir ro//de la 'das phan chad ces bya ba'i nye bar mtshon pa 'dis ni lta ba bzhin bzung ngo / /'di lta ste/ de bzhin gshegs pa grongs phan chad pa yod pa dang / de bzhin gshegs pa grongs phan chad med pa dang / de bzhin gshegs pa grongs phan chad yod kyang yod la med kyang med pa dang /de bzhin gshegs pa grongs phan chad yod pa yang ma yin med pa yang ma yin no zhes bya ba ste/ lta ba bzhi po 'di dag ni mya ngan las 'das pa la mchog tu 'dzin par zhugs so / /mtha' la sogs pa yang lta ba bzhi'o//'di lta ste/ 'jig rten mtha' dang ldan no/ /'jig rten mtha' dang mi ldan no/ /'jig rten mtha' dang ldan pa yang yin la mtha' dang mi ldan pa yang yin no/ /mtha' dang ldan pa yang ma yin la mtha' dang mi ldan pa yang ma yin no zhes bya ba ste/ /lta ba bzhi po 'di dag ni phyi ma'i mtha' la brten te 'jug pa yin no//de la bdag dang 'jig rten la ma 'ongs pa'i skye ba ma mthong bas 'jig rten mtha' dang ldan no zhes de ltar na rtog pa na / phyi ma'i mtha' la brten nas 'jug par 'gyur ro/ /de bzhin du ma 'ongs pa'i skye ba mthong bas 'jig rten mtha' dang mi ldan no zhes 'jug cing /mthong ba dang ma mthong bas ni gnyi gar rtogs par 'gyur la/ gnyi ga bkag pas ni mtha' dang ldan pa yang ma yin mtha' dang mi ldan pa yang ma yin no zhes bya bar rtogs par 'gyur ro/ /'jig rten rtag go/ /'jig rten mi rtag go//'jig rten rtag kyang rtag la mi rtag kyang mi rtag go/ /rtag pa yang ma yin mi rtag pa yang ma yin no zhes bya ba lta ba bzhi po 'di dag ni sngon gyi mtha' la brten nas 'byung ba yin no/ /de la bdag dang 'jig rten las 'das par skyes pa mthong bas 'jig rten rtag go snyam du rtogs par 'gyur la/ma mthong bas ni mi rtag go snyam du rtogs par 'gyur ro/ /mthong ba dang ma mthong bas ni rtag kyang rtag la mi rtag kyang mi rtag go snyam du rtogs par 'gyur la/ mthong ba yang ma yin ma mthong ba yang ma yin pas ni rtag pa yang ma yin mi rtag pa yang ma yin no snyam du rtogs par 'gyur ro//lta ba 'di dag ji ltar rung bar 'gyur zhe na/ gal te dngos po gang zhig la rang bzhin 'ga' zhig yod na ni/ de la dngos po dang dngos po med par brtags pas lta ba 'di dag yod par 'gyur ba zhig na/ gang gi tshe 'khor ba dang mya ngan las 'das pa gnyis la khyad par med par bstan pa de'i tshe/dngos po thams cad stong pa la/ /mtha' yod ci zhig mtha' med ci/ /mtha' dang mtha' med ci zhig yin/ /mtha' dang mtha' med min pa ci/ /de nyid ci zhig gzhan ci yin/ /rtag pa ci zhig mi rtag ci/ /rtag dang mi rtag gnyi ga ci/ / gnyi ga min pa'ang ci zhig yin/ /lung du ma bstan pa'i dngos po bcu bzhi po 'di dag kyang dngos po'i rang gi ngo bo med na mi rigs pa nyid do/ /gang zhig dngos po'i rang gi ngo bo sgro btags te/ de dang bral ba dang ma bral ba las lta ba 'di dag bskyed nas/ mngon par zhen pa de'i mngon par zhen pa 'dis mya ngan las 'das pa'i grong khyer du 'gro ba'i lam 'gog cing /'khor ba'i sdug bsngal dag la sbyor bar byed pa yin no zhes shes par bya'o/ /'dir smras pa/ gal te de ltar khyod kyis mya ngan las 'das pa yang bkag na/ de ltar yin na/ bcom ldan 'das sems can gyi phung po spyod pa mtha' yas pa'i rjes su 'jug pa/'gro ba'i bsam pa'i rang bzhin phyin ci ma log par thugs su chud pa/ thugs rje chen po'i gzhan dbang du gyur pas/ 'jig rten gyi mya ngan las 'das pa thob par mdzad pa'i slad du/ spyod pa'i gnyen por rjes su mthun pa'i chos bstan pa gang yin pa de don med par 'gyur ro//brjod par bya ste/ gal te chos zhes bya ba 'ga' zhig gam/ chos de'i nyan pa po'i sems can 'ga' zhig gam/ sangs rgyas bcom ldan 'das zhes bya ba ston pa po 'ga' zhig yod na ni de'i tshe 'di de ltar 'gyur na/gang gi tshe/ dmigs pa thams cad nyer zhi zhing / /spros pa nyer zhi zhi ba ste/ /sangs rgyas kyis ni gang du yang / /su la'ang chos 'ga' ma bstan to / /ma gsungs pa de'i tshe kho bo cag la ji skad smras pa'i nyes par thal bar ga la 'gyur/ 'dir spros pa ste mtshan ma rnams gang nye bar zhi ba ste/mi 'jug pa gang yin pa de mya ngan las 'das pa yin la/ nye bar zhi ba de nyid ni nye bar zhi ba ste rang bzhin gyis nye bar zhi ba'i phyir ro/ /yang na tshig mi 'jug pas spros pa nyer zhi yin la/ sems mi 'jug pas zhi ba'o/ /yang na nyon mongs pa rnams mi 'byung bas spros pa nyer zhi yin la skye ba mi 'byung pas zhi ba'o//yang na nyon mongs pa spangs pas spros pa nyer zhi yin la/ bag chags ma lus par spangs pas zhi ba'o/ /yang na shes bya ma dmigs pas spros pa nyer zhi yin la/ shes pa ma dmigs pas zhi ba'o//gang gi tshe de ltar sangs rgyas bcom ldan 'das rnams nam mkha' la ngang pa'i rgyal po dag rang gi gshog pa brdabs pa'i rlung la gnas pa'am/ nam mkha' ci yang ma yin pa nyid kyi phyir rlung nam mkha' la gnas pa ltar/ mya ngan las 'das pa spros pa thams cad nye bar zhi zhing /zhi ba'i ngo bo la mi gnas pa'i tshul gyis gnas pa/ de'i tshe mtshan ma thams cad nye bar ma dmigs pa'i phyir/ gang du yang rung ste lha yul lam mi yul dag tu/ /lha'am mi su la yang kun nas nyon mongs pa'am rnam par byang ba'i chos 'ga' yang ma bstan to zhes bya bar shes par bya'o//ji skad du/ 'phags pa de bzhin gshegs pa'i gsang ba'i mdo las/ zhi ba'i blo gros gang gi nub mo de bzhin gshegs pa bla na med pa yang dag par rdzogs pa'i byang chub mngon par rdzogs par sangs rgyas pa dang / gang gi nub mo len pa mi mnga' bar yongs su mya ngan las 'das par 'gyur ba de'i bar du/de bzhin gshegs pas tha na yi ge 'bru gcig kyang ma gsungs so/ / gsung bar mi 'gyur ro zhes gsungs so/ /de bzhin du/ thams cad tshig med yi ge med/ /gdod nas zhi zhing dri med stong / / chos rnams de ltar sus shes pa/ /de ni gzhon nu sangs rgyas brjod/ /ces gsungs so/ /gal te de ltar sangs rgyas kyis gang du yang su la yang chos 'ga' ma bstan na/ 'o na ji ltar gsung rab kyi tha snyad shin tu sna tshogs pa de dag mngon par 'gyur zhe na/ brjod par bya ste/bcom ldan 'das 'dis kho bo cag la chos 'di dag bstan to zhes bya ba 'di ni/ lus can ma rig pa'i gnyid dang ldan zhing rmi lam rmi bzhin pa rnams kyi rang gi rnam par rtog pa las byung ba yin no/ /ji skad du/ bcom ldan 'das kyis/ de bzhin gshegs pa zag pa med pa yin //dge ba'i chos kyi gzugs brnyan lta bu yin/ /de bzhin nyid dang de bzhin gshegs pa med/ /'jig rten thams cad kyi ni gzugs brnyan mthong / /zhes gsungs pa lta bu'o/ /de bzhin du 'di ni de bzhin gshegs pa'i gsang ba bstan pa'i le'u las rgya cher bstan pa yin te/de'i phyir mya ngan las 'das pa'i slad du chos bstan pa med pas chos bstan pa yod pa'i phyir/ mya ngan las 'das pa yod pa nyid du ga la 'gyur/ /de'i phyir mya ngan las 'das pa yang med do zhes bya ba grub po/ /bcom ldan 'das kyis kyang / mya ngan 'das med myang 'das su//'jig rten mgon gyis bstan pa ste/ /nam mkha' mdud ba bor ba ni/ /nam mkha' nyid kyis bkrol ba yin/ /zhes gsungs pa yin no/ /de bzhin du/ bcom ldan 'das gang dag chos 'ga' zhig skye ba 'am 'gag par 'tshal ba de dag la ni sangs rgyas 'byung ba ma lags so//bcom ldan 'das gang dag 'khor ba dngos por 'tshal ba de dag ni/ 'khor ba las 'da' ba ma lags so/ /de ci'i slad du zhe na/ bcom ldan 'das mya ngan las 'das pa zhes bgyi ba ni/ gang mtshan ma thams cad rab tu zhi ba/ rnam par rtog pa thams cad 'gags pa lags na/bcom ldan 'das skyes bu blun po legs par gsungs pa'i chos 'dul ba la rab tu byung nas/ mu stegs kyi lta bar lhung ba de dag ni/ 'di lta ste/ til las til mar dang / 'o ma las mar gsar ltar mya ngan las 'das pa dngos po las tshol bar bgyid do//bcom ldan 'das gang dag chos thams cad shin tu mya ngan las 'das pa la/ mya ngan las 'das pa tshol ba mngon pa'i nga rgyal can de dag ni/ mu stegs can yin no zhes kho bo gleng ste/ bcom ldan 'das rnal 'byor spyod pa yang dag par zhugs pa ni/ chos gang yang skye ba 'am 'gag par mi bgyid la/chos gang yang 'thob pa dang / mngon par rtogs par mi 'tshal lo zhes rgya cher gsungs so/ /slob dpon zla ba grags pa'i zhal snga nas sbyar ba'i tshig gsal ba las/ mya ngan las 'das pa brtag pa zhes bya ba rab tu byed pa nyi shu rtsa lnga pa'i 'grel ba'o// //'dir/ rten cing 'brel bar 'byung ba gang / /de ni stong pa nyid du bshad/ /de ni brten nas gdags pa ste/ /de nyid dbu ma'i lam yin no/ /zhes gang bshad na gang zhig stong pa nyid ces bya bar brjod pa rten cing 'brel bar 'byung ba de gang yin zhes smra'o//rnam pa gcig tu na/ gang 'di skad du/ gang gi rten cing 'brel bar 'byung / /mthong ba des ni sdug bsngal dang / /kun 'byung dang ni 'gog pa dang / /lam nyid de dag mthong ba yin/ /zhes bshad pa/ rten cing 'brel bar 'byung ba de go gang yin zhe'o/ /de'i phyir de'i yan lag gi rab tu dbye ba brjod par bzhed nas 'di skad du/ma rig bsgribs pas yang srid phyir/ /'du byed rnam pa gsum po dag/ mngon par 'du byed gang yin pa'i/ /las de dag gis 'gro bar 'gro/ /zhes gsungs so/ /de la ma rig pa ni mi shes pa ste/ mun pa dang yang dag pa ji lta ba la sgrib par byed pa'o//ma rig pa des bsgribs shing bkab pa'i gang zag gis yang srid pa'i phyir te yang srid pa'i don dang / yang srid pa 'byung bar bya ba'i phyir gang dge ba la sogs pa'i sems pa dag mngon par 'du byed cing skyed par byed do/ /'du byed de dag ni yang srid pa mngon par 'du byed pas 'du byed do//de dag kyang rnam pa gsum ste/ dge ba dang mi dge ba dang mi g.yo ba'o/ /yang na lus kyi dang ngag gi dang yid kyi'o/ /gang zag ma rig pas bsgribs pas las kyi mtshan nyid can 'du byed rnam pa gsum byed la/ mngon par 'du byed pas 'du byed las te las kyi ming can de dag gis ni de'i rgyus byung ba 'gro bar 'gro bar 'gyur ro/ /de nas de'i/ 'du byed rkyen can rnam par shes/ /'gro ba rnams su 'jug par 'gyur/ /gang zag 'du byed byas shing bsags pa de'i rnam par shes pa 'du byed kyi rgyu can 'khor ba don ma yin pa'i sa bon du gyur pa ni 'gro ba 'du byed dang mthun par lha la sogs pa rnams su 'jug pa ste rab tu 'jug cing skye bar 'gyur ro//de nas dus phyis/ rnam par shes pa zhugs gyur na/ /ming dang gzugs ni chags par 'gyur/ / de las dang nyon mongs pas bsgos pas skye ba'i gnas de dang der bkri bas na ming yin pa'am/ yang na don dag la ming gi dbang gis rgyug pas na ming ste/ gzugs can ma yin pa'i phung po bzhi la ming zhes bsnyad do/ /gzhig tu rung bas na gzugs te gnod par byar rung zhes bya ba'i tha tshig go//gzugs 'di dang sngar gyi ming gnyis po 'di dag bsdoms te ming dang gzugs zhes rnam par gzhag go/ /de la gzugs dang gzugs brnyan gyi tshul gyis tha ma 'chi ba'i phung po rnams 'gags pa na skad cig ma gcig kho na la srang mda'i mthon dman gyi tshul du skye ba'i cha'i phung po rnams las kyis ji ltar 'phangs pa ltar skye bar 'gyur ro//de'i phyir de ltar ma'i mngal du rnam par shes pa brgyal bar gyur na/ rnam par shes pa'i rkyen can gyi ming dang gzugs chags par 'gyur te/ /red cing 'byung bar 'gyur ro zhes bya ba'i don to//gal te 'gro bar rnam par shes pa brgyal bar mi 'gyur na ni de'i tshe ming dang gzugs 'byung bar mi 'gyur te/ dga' bo rnam par shes pa de gal te ma'i mngal du zhugs par ma gyur na ni/ de'i tshe nur nur po de nur nur po nyid du 'grub par mi 'gyur ro zhes 'byung ba'i phyir ro//de'i phyir de ltar na/ ming dang gzugs ni chags gyur na/ /skye mched drug ni 'byung bar 'gyur/ /sdug bsngal 'byung ba la skyed par byed pa nyid du gyur pa'i phyir/ /skye ba'i sgo'i dngos po nyid kyis na mig dang rna ba dang sna dang lce dang lus dang yid ces bya ba skye mched drug po ming dang gzugs kyi rgyu can skye bar 'gyur ro//des mig gis gzugs rnams mthong nas yid bde ba'i gnas su mngon par zhen par 'gyur ro zhes bya ba la sogs pas na/ skye mched drug ni sdug bsngal 'byung ba'i skye ba'i sgo nyid yin no de'i phyir de ltar skye mched drug 'byung ba yin dang /dus phyis/ skye mched drug la brten nas ni/ /reg pa yang dag 'byung bar 'gyur / /reg pa 'di yang gang zhig yin zhing / ji ltar skye bar 'gyur zhe na/ bstan pa'i phyir/ mig dang gzugs dang dran byed la/ /brten nas skye ba kho na ste//de ltar mig gzugs brten nas ni/ /rnam par shes pa skye bar 'gyur/ /mig dang gzugs dang rnam par shes/ /gsum po 'dus pa gang yin pa/ /de ni reg pa'o/ /zhes gsungs so/ /de la mig dang gzugs dag dang dran byed de/ /yid la byed pa yul la sogs pa dang mi mthun pa rnam par shes pa'i sa bon du gyur pa mtshungs pa de ma thag pa'i rkyen la brten nas mig gi rnam par shes pa skye ba yin no//de la mig dang gzugs kyi skye mched ni gzugs so/ /dran byed phung po bzhi'i mtshan nyid can ni ming ste/ de'i phyir gsum po 'di la brten nas skye ba'i mig gi rnam par shes pa de ni ming dang gzugs la brten nas skye ba yin no//de'i phyir dbang po dang yul dang rnam par shes pa gsum po 'di dag 'dus pa gang yin pa ste/ lhan cig skye zhing phan tshun phan 'dogs pas 'dra bar zhugs pa gang yin pa de ni reg pa'i mtshan nyid kyi reg pa'o//de nas dus phyis/ reg de las/ tshor ba kun du 'byung bar 'gyur/ /yul yid du 'ong ba dang yid du mi 'ong ba dang gnyi ga las bzlog pa nyams su myong ba yul gyi myong ba rig pas na/ tshor ba yin pa ni tshor ba zhes bya ste/ bde ba dang sdug bsngal dang /bde ba yang ma yin sdug bsngal ba yang ma yin pa'o/ /gzugs dang rnam par shes pa dang / mig dang gsum po 'di dag 'dus pa'i mtshan nyid can reg pa la brten nas tshor ba yin par ji skad du bshad pa de bzhin du/ dbang po dang yul dang rnam par shes pa lhag ma dag gsum 'dus pa'i mtshan nyid kyi reg pa'i rgyu can gyi tshor ba yang bshad par rig par bya'o//de nas dus phyis/ tshor ba'i rkyen gyis sred pa ste/ /kun du 'byung bar 'gyur zhes bsnyegs so/ /sred pa gang la tshor ba'i rkyen yod pa de ni tshor ba'i rkyen gyis so/ /sred pa de yang ci'i yul can zhig yin zhe na/tshor ba'i yul can nyid do/ /ci'i phyir zhe na/ gang gi phyir sred pa can de/ /tshor ba'i don du sred par 'gyur/ /tshor ba'i ched du mngon par 'dod pa skyed do zhes bya ba'i don to/ /ji ltar zhe na/ re zhig gal te de la tshor ba bde ba skyes na ni de yang dang yang du de dang mi 'bral bar bya ba'i phyir sred par 'gyur ro//ci ste sdug bsngal skyes na ni de'i tshe de dang bral bar bya ba'i phyir sred par 'gyur ro/ /'on te bde ba yang ma yin sdug bsngal ba yang ma yin pa skyes na ni/ de mi nyams par bya ba'i phyir srid par 'gyur te/de ltar na tshor ba'i don du sred par 'gyur ro/ /de de ltar/ sred par 'gyur na nye bar len/ /rnam pa bzhi po nyer len 'gyur/ /de ltar tshor ba dag la mngon par zhen zhing chags pa de ni srid pa'i rkyen can las 'phel ba'i rgyu 'dod pa dang / lta ba dang tshul khrims dang brtul zhugs dang bdag tu smra ba zhes bya ba rnam pa bzhi po yongs su 'dzin par 'gyur te/de ni de'i srid pa'i rkyen gyis len pa yin no/ /de nas dus phyis/ nyer len yod na len pa po'i/ /srid pa rab tu 'byung bar 'gyur/ /gal te nye bar len med na//grol bar 'gyur te srid mi 'gyur/ /srid pa de yang phung po lnga/ /nye bar len pa ji skad du bshad pa rnam pa bzhi'i len pa po ste/ 'dzin pa po skyed par byed pa'o/ /nye bar len pa po de'i nye bar len pa'i rkyen gyis srid pa skyes par 'gyur ro/ /ci'i phyir zhe na/ gang gi phyir gal te nye bar len pa po gang gis tshor ba la sred pa ma skyed cing /so sor rtog pa'i stobs kyis sred pa bdag gir ma byas par len pa rnam pa bzhi po spangs nas gnyis su med pa'i ye shes dri ma med pa mngon du byas pa las nye bar len pa med par gyur na ni/ de grol bar 'gyur zhing de'i tshe de'i srid pa yod par mi 'gyur ro//sred pa de yang gang zhig ce na/ srid pa de yang phung po lnga ste/ gang zhig nye bar len pa las rab tu 'byung ba de ni phung po lnga'i rang bzhin du rig par bya'o/ /lus dang ngag dang yid kyi las rnam pa gsum char yang 'di las ma 'ongs pa'i phung po lnga 'byung bas na srid pa zhes bya bar bsnyad do//de la lus dang ngag gi las ni gzugs kyi phung po'i rang bzhin yin la/ yid kyi las ni phung po lnga'i rang bzhin yin te/ de ltar na srid pa de phung po lnga yin no zhes shes par bya'o/ /srid pa de las skye ba 'byung ste/ma 'ongs pa'i phung po 'byung ba ni skye ba yin la/ de yang srid pa las rab tu 'byung ngo / /de nas dus phyis/ /rga shi dang ni mya ngan dang / /smre sngags 'don bcas sdug bsngal dang / /yid mi bde dang 'khrug pa rnams/ /de dag skye las rab tu 'byung / /skye ba'i rgyu can rga shi la sogs pa de dag 'byung bar 'gyur ro//de dag gi bshad pa ni mdo ji lta ba bzhin rig par bya ste/ de la rga ba ni phung po yongs su smin pa'o/ /'chi ba ni rgas pa'i phung po 'jig pa'o/ /mya ngan ni 'gro zhing 'chi bzhin pa'i kun du rmongs pa'i mngon par chags pa dang bcas pa'i snying gi gdung ba'o//smre sngags 'don pa ni mya ngan gyis kun nas bslang pa'i ngag gi brjod pa'o/ /sdug bsngal ni dbang po lnga la gnod pa'o/ /yid mi bde ba ni yid du mi 'ong ba 'bab pa'o/ /'khrug pa ni sdug bsngal ba dang yid mi bde ba mang po 'byung ba'o zhes bya'o//de'i phyir de ltar ji skad bshad pa'i tshul gyis/ /da ltar sdug bsngal phung po ni/ /'ba' zhig po 'di 'byung bar 'gyur / /de ltar zhes bya ba ni rgyu dang rkyen tsam gyi stobs kyis zhes bya ba'i don to/ /sdug bsngal phung po ni zhes bya ba ni sdug bsngal gyi tshogs dang khyu ste//sdug bsngal spungs pa zhes bya ba'i tha tshig go/ /'ba' zhig pa zhes bya ba ni bdag dang bdag gi ba'i rang bzhin dang bral ba zhes bya ba'i don dang / byis pa'i skye bos brtags pa tsam sdug bsngal gyi bdag nyid bde ba dang ma 'dres pa zhes bya ba'i tha tshig go//gang gi phyir de ltar ma rig pa la sogs pa las srid pa'i yan lag rnams 'byung ba de'i phyir/ 'khor ba'i rtsa ba 'du byed de/ /de phyir mkhas rnams 'du mi byed/ /de phyir mi mkhas byed po yin/ /mkhas pas de nyid mthong phyir ro/ /de la 'khor ba rnam par shes pa la sogs pa 'jug pa'i mtshan nyid can gyi rtsa ba ste/rgyu'i gtso bo ni 'du byed rnams yin te/ de'i phyir mi mkhas pa ni 'khor ba'i rtsa ba 'du byed rnams 'du byed de/ dge slong dag ma rig pa dang rjes su 'brel bar skyes bu gang zag ni bsod nams mngon par 'du bya ba yang mngon par 'du byed do//bsod nams ma yin pa mngon par 'du bya ba yang mngon par 'du byed do/ /mi g.yo ba mngon par 'du bya ba yang mngon par 'du byed do zhes bcom ldan 'das kyis gsungs pa'i phyir ro/ /gang gi phyir de ltar na/mi mkhas pa byed pa po yin pa de'i phyir/ ma rig pa dang ldan pa'i gang zag kho na 'du byed rnams kyi byed pa por 'gyur gyi/ mkhas pa de nyid mthong ba ma rig pa spangs pa de ni ma yin no/ /ci'i phyir zhe na/ de nyid mthong phyir ro ste de nyid mthong na ni dngos po thams cad mi dmigs pas gang la dmigs nas las byed par 'gyur ba de/cung zad kyang yod pa ma yin no/ /de'i phyir de nyid mthong ba'i phyir mkhas pa byed pa po ma yin no/ /gang gi phyir de ltar ma rig pa yod na 'du byed rnams 'byung la med na mi 'byung ba de'i phyir/ma rig 'gags par gyur na ni/ /'du byed rnams kun 'byung mi 'gyur te/ /rgyu ma tshang ba'i phyir ro/ /ma rig pa de gang las 'gag par 'gyur zhe na/ ma rig 'gags par gyur na ni/ /shes pas de nyid bsgoms pas so/ /rten cing 'brel bar 'byung ba de nyid phyin ci ma log pa ji lta ba bzhin bsgoms pas ma rig pa rab tu spong bar 'gyur ro//'di ltar gang gis rten cing 'brel bar 'byung ba yang dag par mthong ba des ni dngos po phra mo'i yang rang gi ngo bo dmigs pa ma yin te/ gzugs brnyan ltar dngos po rnams rang bzhin gyis stong pa nyid du 'jug par 'gyur ro//de de ltar dngos po thams cad rang bzhin gyis stong pa nyid du zhugs pas chos cung zad kyang dmigs par mi 'gyur ro/ /de ma dmigs pas 'gar yang mi rmongs so/ /ma rmongs pas las mi byed do/ /de ltar na rten cing 'brel bar 'byung ba bsgoms pas de kho na nyid la 'jug par 'gyur la/de nyid mthong ba'i rnal 'byor pa'i ma rig pa nges par spong bar 'gyur ro/ /ma rig pa spangs pas 'du byed 'gag par 'gyur ro/ /de ltar ma rig pa 'gags pas 'du byed rnams ji ltar 'gag pa de bzhin du/de dang de ni 'gags gyur pas/ /de dang de ni mngon mi 'byung / /sdug bsngal phung po 'ba' zhig po / /de ni de ltar yang dag 'gag /yan lag snga ma snga ma 'gags pas yan lag phyi ma phyi ma 'gag par 'gyur ro zhes shes par bya'o/ /rim pa 'dis ni rnal 'byor pa'i sdug bsngal gyi phung po sdug bsngal gyi tshogs bdag dang bdag gi ba la sogs pa yang dag pa ma yin par lta ba dang bral ba/byed pa po dang tshor ba po dang bral ba rang bzhin gyis stong pa slar mi 'byung bas yang dag par 'gag par 'gyur ro/ /ji skad du 'phags pa sA lu ljang pa'i mdo las/de bzhin du nang gi rten cing 'brel bar 'byung ba gnyis kyi phyir 'byung ste/ gnyis gang zhe na/ 'di lta ste/ rgyu dang 'brel pa dang rkyen dang 'brel pa'o/ /de la nang gi rten cing 'brel par 'byung ba rgyu dang 'brel bar 'byung ba gang zhe na/ gang 'di ma rig pa'i rkyen gyis 'du byed rnams/'du byed kyi rkyen gyis rnam par shes pa/ rnam par shes pa'i rkyen gyis ming dang gzugs/ ming dang gzugs kyi rkyen gyis skye mched drug /skye mched drug gi rkyen gyis reg pa/ reg pa'i rkyen gyis tshor ba/ tshor ba'i rkyen gyis sred pa/sred pa'i rkyen gyis len pa/ len pa'i rkyen gyis srid pa/ srid pa'i rkyen gyis skye ba/ skye ba'i rkyen gyis rga shi dang mya ngan dang smre sngags 'don pa dang / sdug bsngal ba dang yid mi bde ba dang / 'khrug pa rnams 'byung ste/ de ltar na sdug bsngal gyi phung po chen po 'ba' zhig po 'byung bar 'gyur ro//gal te ma rig pa ma byung na 'du byed rnams kyang mi mngon pa zhig go/ /de bzhin du skye ba ma byung du zin na rga shi'i bar du mi mngon pa zhig na/ 'on kyang ma rig pa yod pa las 'du byed rnams mngon par 'grub par 'gyur ba nas/ de bzhin du skye ba yod pa las rga shi'i bar du mngon par 'grub par 'gyur ro/ /de la yang ma rig pa yang 'di snyam du bdag gis 'du byed rnams mngon par sgrub bo snyam du mi sems so/ /'du byed rnams kyang 'di snyam du bdag cag ni ma rig pas mngon par sgrub po snyam du mi sems pa nas de bzhin du skye ba yang 'di snyam du bdag gis rga shi mngon par sgrub po snyam du mi sems shing /rga shi yang 'di snyam du bdag ni skye bas mngon par bsgrubs so snyam du mi sems pa'i bar du ste/ 'on kyang ma rig pa yod pa las 'du byed rnams mngon par sgrub pa'i 'byung bar 'gyur ba nas/de bzhin du skye ba yod pa las rga shi'i bar du mngon par sgrub cing 'byung bar 'gyur te/ de ltar na nang gi rten cing 'brel bar 'byung ba rgyu dang 'brel bar blta'o / /nang gi rten cing 'brel bar 'byung ba rkyen dang 'brel bar ji ltar blta zhe na/khams drug 'dus pa'i phyir te/ khams drug po gang dag 'dus pa yin zhe na/ 'di lta ste/ sa dang chu dang me dang rlung dang nam mkha' dang / rnam par shes pa'i khams 'dus pa las nang gi rten cing 'brel bar 'byung ba rkyen dang 'brel bar blta'o //de la nang gi rten cing 'brel bar 'byung ba'i sa'i khams gang zhe na/ gang 'di 'dus nas lus kyi sra ba'i dngos po mngon par grub par byed pa 'di ni sa'i khams zhes bya'o/ /gang lus sdud pa'i bya ba byed pa 'di ni chu'i khams zhes bya'o/ / gang lus kyi zos pa dang 'thungs pa dang 'chos pa dang myangs pa rnams 'ju bar byed pa 'di ni me'i khams zhes bya'o/ /gang lus kyi dbugs phyi nang du rgyu ba'i bya ba byed pa de ni rlung gi khams zhes bya'o/ /gang lus kyi nang sbubs yod par byed pa 'di ni nam mkha'i khams zhes bya'o//gang mdung khyim gyi tshul du ming dang gzugs mngon par 'grub par byed pa rnam par shes pa'i tshogs lnga 'dus pa dang / zag pa dang bcas pa'i yid kyi rnam par shes pa 'di ni rnam par shes pa'i khams zhes bya'o/ /rkyen de dag med par lus skye bar mi 'gyur gyi/nang gi sa'i khams tshang zhing / de bzhin du sa dang chu dang me dang rlung dang nam mkha' dang rnam par shes pa'i khams rnams kyang tshang bar gyur la/ thams cad 'dus pa de las lus mngon par 'grub par 'gyur ro/ /de la sa'i khams kyang 'di snyam du bdag gis 'dus nas lus kyi sra ba'i dngos po mngon par sgrub bo snyam du mi sems so//chu'i khams kyang 'di snyam du bdag gis lus kyi sdud pa'i bya ba bya'o snyam du mi dmigs so/ /me'i khams kyang 'di snyam du bdag gis lus kyi zos pa dang 'thungs pa dang 'chos pa dang myangs ba rnams 'ju bar bya'o snyam du mi sems so//rlung gi khams kyang 'di snyam du bdag gis lus kyi dbugs phyi nang du rgyu ba'i bya ba bya'o snyam du mi sems so/ /nam mkha'i khams kyang 'di snyam du bdag gis lus kyi nang sbubs yod par bya'o snyam du mi sems so/ /rnam par shes pa'i khams kyang 'di snyam du bdag gis lus kyi ming dang gzugs mngon par sgrub po snyam du mi sems so//lus kyang 'di snyam du bdag ni rkyen 'di dag gis bskyed do snyam du mi sems mod kyi/ 'on kyang rkyen 'di dag yod na lus skye bar 'gyur ro/ /de la sa'i khams ni bdag ma yin sems can ma yin srog ma yin skye ba po ma yin shed las skyes pa ma yin/shed bu ma yin/ bud med ma yin/ skyes pa ma yin/ /ma ning ma yin/ nga'i ma yin/ bdag gi ma yin te/ gzhan su'i yang ma yin no/ /de bzhin du chu'i khams dang / me'i khams dang / rlung gi khams dang / nam mkha'i khams dang / rnam par shes pa'i khams kyang bdag ma yin/ sems can ma yin/ srog ma yin/ skye ba po ma yin/ shed las skyes ma yin/ shed bu ma yin/ bud med ma yin/ skyes pa ma yin/ ma ning ma yin/nga ma yin/ bdag gi ma yin/ gzhan su'i yang ma yin no/ /de la ma rig pa gang zhe na/ khams drug po 'di dag nyid la gang gcig pur 'du shes pa dang / ril por 'du shes pa dang / rtag par 'du shes pa dang / brtan par 'du shes pa dang / ther zug tu 'du shes pa dang / bde bar 'du shes pa dang / bdag tu 'du shes pa dang / sems can du 'du shes pa dang / srog tu 'du shes pa dang / skye ba po dang / gso ba dang / skyes bu dang / gang zag tu 'du shes pa dang / shed las skyes pa dang / shed bur 'du shes pa dang /nga zhes bya ba dang / bdag go zhes bya bar 'du shes pa ste/ 'di lta bu la sogs pa mi shes pa rnam pa sna tshogs pa 'di ni ma rig pa zhes bya'o/ /de ltar ma rig pa yod pas yul rnams la 'dod chags dang zhe sdang dang gti mug 'jug ste/ de la yul rnams la 'dod chags dang zhe sdang dang gti mug gang yin pa 'di ni ma rig pa'i rkyen gyis 'du byed rnams zhes bya'o//dngos po so sor rnam par rig pa ni rnam par shes pa'o/ /rnam par shes pa dang lhan cig 'byung ba gzugs can ma yin pa nye bar len pa'i phung po bzhi po de dag ni ming yin la/'byung ba chen po bzhi dang / de dag rgyur byas pa ni gzugs te/ ming de dang gzugs de gcig tu bsdus pa de ni ming dang gzugs so/ /ming dang gzugs la brten pa'i dbang po rnams ni skye mched drug go/ /gsum 'dus pa ni reg pa'o//reg pa myong ba ni tshor ba'o/ /tshor ba la zhen pa ni sred pa'o/ /sred pa'i 'phel ba ni len pa'o/ /len pa las skyes pa yang sred pa skyed pa'i las ni srid pa'o/ /rgyu de las phung po byung ba ni skye ba'o/ /skyes nas phung po smin pa ni rga ba'o/ /rgas nas phung po 'jig pa ni 'chi ba'o//'chi zhing myos te mngon par chags pa dang bcas pa'i nang gi yongs su gdung ba ni mya ngan no/ /mya ngan las byung ba'i tshig tu smra ba ni sme sngags 'don pa'o/ /rnam par shes pa'i tshogs lnga dang mtshungs par ldan pa'i yid mi bde ba myong ba ni sdug bsngal lo/ / yid dang mtshungs par ldan pa'i yid kyi sdug bsngal ni yid mi bde ba'o/ /gzhan yang 'di lta bu la sogs pa nye ba'i nyon mongs pa gang yin pa de dag ni 'khrug pa zhes bya'o/ /de la mun pa chen po'i phyir ma rig pa'o/ /mngon par 'du byed pa'i phyir 'du byed rnams so/ /rnam par rig pa'i phyir rnam par shes pa'o//phan tshun brten pa'i phyir ming dang gzugs so/ /skye ba'i sgo'i phyir skye mched drug go/ /reg pa'i phyir reg pa'o/ /myong ba'i phyir tshor ba'o/ /skom pa'i phyir sred pa'o/ /nye bar len pa'i phyir len pa'o/ /yang srid pa skyed pa'i phyir srid pa'o//phung po 'byung ba'i phyir skye ba'o/ /phung po smin pa'i phyir rga ba'o/ /'jig pa'i phyir 'chi ba'o/ /mya ngan byed pa'i phyir mya ngan no/ /tshig gis smra ba'i phyir smre sngags 'don pa'o/ /lus la gnod pa'i phyir sdug bsngal lo/ /sems la gnod pa'i phyir yid mi bde ba'o//nyon mongs pa'i phyir 'khrug pa'o/ /yang na de kho na nyid mi rtogs shing log par shes te mi shes pa ni ma rig pa'o/ /de ltar ma rig pa yod na 'du byed rnam pa gsum mngon par 'grub ste/ bsod nams su nye bar 'gro ba dang / bsod nams ma yin par nye bar 'gro ba dang / mi g.yo bar nye bar 'gro ba'o/ /de la bsod nams su nye bar 'gro ba'i 'du byed rnams las bsod nams su nye bar 'gro ba'i rnam par shes pa nyid du 'gyur ba dang / bsod nams ma yin par nye bar 'gro ba'i 'du byed rnams las bsod nams ma yin par nye bar 'gro ba'i rnam par shes pa nyid du 'gyur ba dang /mi g.yo bar nye bar 'gro ba'i 'du byed rnams las mi g.yo bar nye bar 'gro ba'i rnam par shes pa nyid du 'gyur ba 'di ni rnam par shes pa zhes bya'o/ /rnam par shes pa'i rkyen gyis ming dang gzugs zhes bya ba la / tshor ba la sogs pa gzugs can ma yin pa'i phung po bzhi ni srid pa de dang der gzhol bas na ming yin no//gzugs kyi phung po dang / lhan cig tu ming dang gzugs zhes bya ba yin pas na ming dang gzugs zhes bya ba yin no / /ming dang gzugs rnam par 'phel bas skye mched drug gi sgo nas bya ba byed pa rnams 'byung ste/de ni ming dang gzugs kyi rkyen gyis skye mched drug ces bya'o/ /skye mched drug po dag las reg pa'i tshogs drug 'byung ste/ /de ni skye mched drug gi rkyen gyis reg pa'i zhes bya'o/ /ji lta bur reg pa 'byung ba de lta bur tshor ba 'byung ste/ de ni reg pa'i rkyen gyis tshor ba zhes bya'o//tshor ba'i bye brag de dag myang ba dang mngon par dga' ba dang / lhag par zhen pa dang / lhag par zhen nas 'jug pa de ni tshor ba'i rkyen gyis sred pa zhes bya'o/ /myong ba dang mngon par dga' ba dang / lhag par zhen pa dang / lhag par zhen nas 'dug pa las bdag sdug pa'i ngo bo dang /bde ba'i ngo bo dang bral bar ma gyur cig snyam du mi gtong bar phyir zhing smon pa 'di ni sred pa'i rkyen gyis len pa zhes bya ste/ dngos po gang la sred pa dang bcas pa'i dngos po de bsag cing sgrub pa'i phyir nye bar len pa len zhing / de dang de la smon pa'o//de ltar smon zhing yang srid pa bskyed pa'i las lus dang ngag dang yid kyis kun nas slong ba de ni len pa'i rkyen gyis srid pa zhes bya'o/ /las de las skyes pa'i phung po rnams mngon par 'grub pa gang yin pa de ni srid pa'i rkyen gyis skye ba zhes bya'o/ /skye ba mngon par 'grub pa'i phung po rnams kyi 'phel ba yongs su smin pa dang /'jig par 'gyur ba de ni skye ba'i rkyen gyis rga shi zhes bya'o/ /de ltar rten cing 'brel bar 'byung ba'i yan lag bcu gnyis po 'di dag ni/ rgyu gzhan dang gzhan las byung ba/ rkyen gzhan dang gzhan las byung ba/rtag pa ma yin mi rtag pa ma yin/ 'dus byas ma yin 'dus ma byas ma yin/ rgyu med pa ma yin rkyen med pa ma yin/ myong ba po yod pa ma yin/ /zad pa'i chos ma yin/ 'jig pa'i chos ma yin/ 'gog pa'i chos ma yin te/ thog ma med pa'i dus nas zhugs pa rgyun ma chad par klung gi rgyun bzhin du rjes su zhugs pa'o//rten cing 'brel bar 'byung ba'i yan lag bcu gnyis po de dag ni rgyu gzhan dang gzhan las byung ba/ rkyen gzhan dang gzhan las byung ba/ rtag pa ma yin mi rtag pa ma yin/ 'dus byas ma yin 'dus ma byas ma yin/rgyu med pa ma yin rkyen med pa ma yin/ myong ba yod pa ma yin zad pa'i chos ma yin/ 'jig pa'i chos ma yin/ 'gog pa'i chos ma yin te/ thog ma med pa'i dus nas zhugs pa/ rgyun ma chad par klung gi rgyun bzhin du rjes su zhugs mod kyi/'on kyang yan lag bzhi po 'di dag ni rten cing 'brel bar 'byung ba'i yan lag bcu gnyis po de dag bsdu bar bya ba'i phyir rgyur 'gyur ro/ /bzhi po gang zhe na/ 'di lta ste/ ma rig pa dang sred pa dang / /las dang rnam par shes pa'o/ /de la rnam par shes pa ni sa bon gyi rang bzhin nyid kyi rgyu byed do//las ni zhing gi rang bzhin gyi rgyu byed do/ /ma rig pa dang / sred pa ni nyon mongs pa'i rang bzhin gyi rgyu byed do/ /las dang nyon mongs pa dag gis ni sa bon rnam par shes pa bskyed do/ /de la las ni sa bon rnam par shes pa'i zhing gi bya ba byed do//srid pas ni sa bon rnam par shes pa brlan pa'i bya ba byed do/ /ma rig pas ni sa bon rnam par shes pa 'debs te/ rkyen 'di dag med na sa bon rnam par shes pa mngon par 'grub par mi 'gyur ro/ /de la las kyang 'di snyam du bdag gis sa bon rnam par shes pa'i zhing gi bya ba bya'o snyam du mi sems so//sred pa yang 'di snyam du bdag gis sa bon rnam par shes pa brlan par bya'o snyam du mi sems so/ /ma rig pa yang 'di snyam du bdag gis sa bon rnam par shes pa gdab po snyam du mi sems so/ /sa bon rnam par shes pa yang 'di snyam du bdag ni rkyen 'di dag gis bskyed do snyam du mi sems so //'on kyang sa bon rnam par shes pa las kyi zhing la brten pa/ sred pa'i rlan gyis brlan pa ma rig pas legs par btab pa las skye ba na/ skye ba'i gnas de dang der nying mtshams sbyor ba ni ma'i mngal du ming dang gzugs kyi myu gu mngon par 'grub ste/ming dang gzugs kyi myu gu de yang bdag gis ma byas gzhan gyis ma byas/ gnyi gas ma byas/ /dbang phyug gis ma byas/ dus kyis ma bsgyur/ rang bzhin las ma byung / rgyu gcig la rag las pa ma yin/rgyu med pa las kyang ma skyes te/ 'on kyang pha dang ma phrad pa dang zla mtshan dang ldan pa dang rkyen gzhan yang 'tshogs na bdag po med pa'i chos bdag gi med pa 'dzin pa med pa nam mkha' dang mtshungs pa/ sgyu ma'i mtshan nyid kyi rang bzhin dag la rgyu dang rkyen rnams ma tshang ba med pa'i phyir/skye ba'i gnas de dang der nying mtshams sbyor ba na ma'i mngal du ro myang ba dang ldan pa'i sa bon rnam par shes pa ming dang gzugs kyi myu gu mngon par sgrub bo/ /'di lta ste/ mig gi rnam par shes pa ni rgyu lnga las 'byung ste/ lnga gang zhe na/'di lta ste/ mig la brten pa dang / gzugs dang / snang ba dang / nam mkha' dang / de bskyed pa'i yid la byed pa la yang brten nas mig gi rnam par shes pa 'byung ngo / /de la mig ni mig gi rnam par shes pa'i rten gyi bya ba byed do/ /gzugs ni mig gi rnam par shes pa'i dmigs pa'i bya ba byed do//snang ba ni mngon pa'i bya ba byed do/ /nam mkha' ni mi sgrib pa'i bya ba byed do/ /de skyed pa'i yid la byed pa ni bsam pa'i bya ba byed do / /rkyen de dag med na mig gi rnam par shes pa 'byung bar mi 'gyur gyi/ gang gi tshe mig gi nang gi skye mched mig ma tshang bar ma gyur la/de bzhin du gzugs dang / snang ba dang / nam mkha' dang / de skyed pa'i yid la byed pa dag ma tshang bar mi 'gyur te/ thams cad 'dus pa de las mig gi rnam par shes pa 'byung bar 'gyur ro/ / de la mig ni 'di snyam du bdag gis mig gi rnam par shes pa'i rten gyi bya ba bya'o snyam du mi sems so/ /gzugs kyang 'di snyam du bdag gis mig gi rnam par shes pa'i dmigs pa'i bya ba bya'o snyam du mi sems so/ /snang ba yang 'di snyam du bdag gis mig gi rnam par shes pa'i mngon pa'i bya ba bya'o snyam du mi sems so//nam mkha' yang 'di snyam du bdag gis mig gi rnam par shes pa'i mi sgrib pa'i bya ba bya'o snyam du mi sems so/ /de skyed pa'i yid la byed pa yang 'di snyam du bdag gis mig gi rnam par shes pa'i sems pa'i bya ba bya'o snyam du mi sems so//mig gi rnam par shes pa yang 'di snyam du/ /bdag ni rkyen 'di dag gis skyed do snyam du mi sems te/ 'on kyang rkyen 'di dag yod pa las mig gis rnam par shes pa skye bar 'gyur ro/ /de bzhin du dbang po lhag ma dang bcas pa rnams la yang ci rigs su sbyar ro//de la chos gang yang 'jig rten 'di nas 'jig rten pha rol du mi 'pho mod kyi rgyu dang rkyen rnams ma tshang ba med pa'i phyir las kyi 'bras bur mngon pa yang yod do/ /'di lta ste/ dper na rab tu phyis pa'i me long gi dkyil 'khor la bzhin gyi gzugs brnyan snang ba yang bzhin me long gi dkyil 'khor du ma 'phos mod kyi/rgyu dang rkyen ma tshang ba med pa'i phyir bzhin du mngon pa yang yod do/ /de bzhin du 'di nas kyang su yang shi 'phos pa med la/ gzhan du yang ma skyes te/ rgyu dang rkyen rnams ma tshang ba med pa'i phyir las kyi 'bras bur mngon pa yang med do//'di lta ste/ dper na zla ba'i dkyil 'khor ni dpag tshad bzhi khri'i steng nas 'gro ste/ 'on kyang snod chung ngu chus gang bar zla ba'i dkyil 'khor gyi gzugs brnyan snang ba yang / zla ba'i dkyil 'khor ni gnas de nas ma 'phos te/snod chung ngu chus gang ba'i nang du son pa yang med mod kyi/ rgyu dang rkyen rnams ma tshang ba med pa'i phyir/ zla ba'i dkyil 'khor du mngon pa yang yod do/ /de bzhin du 'di nas kyang su yang shi 'phos pa med la/ gzhan du ma skyes mod kyi/ rgyu dang rkyen rnams ma tshang ba med pa'i phyir las kyi 'bras bur mngon par yang yod do//'di lta ste/ dper na me de rgyu dang rkyen ma tshang na mi 'bar gyi/ rgyu dang rkyen tshogs pa las 'bar ro/ /de bzhin du chos rnams ni bdag po med pa'i chos bdag gi med pa 'dzin pa med pa nam mkha' dang mtshungs pa/ sgyu ma'i mtshan nyid kyi rang bzhin dag la rgyu dang rkyen rnams ma tshang ba med pa'i phyir ro / /skye ba'i gnas de dang der nying mtshams sbyor ba na ma'i mngal du sa bon rnam par shes pa las dang nyon mongs pa rnams kyis bskyed pa'i ming dang gzugs kyi myu gu mngon par grub ste/ de la nang gi rten cing 'brel bar 'byung ba lngar blta bar bya ste/ lnga gang zhe na/ rtag par ma yin pa dang / chad par ma yin pa dang / 'pho bar ma yin pa dang / rgyu chung ngu las 'bras bu chen po 'byung ba dang / de dang 'dra ba'i rgyud du'o/ /ji ltar rtag par ma yin zhe na/ gang gi phyir tha ma 'chi ba'i phung po rnams kyang gzhan la/ skye ba'i char gtogs pa'i phung po rnams kyang gzhan te/ tha ma 'chi ba'i phung po gang yin pa de nyid skye ba'i char gtogs pa rnams ma yin gyis / tha ma 'chi ba'i phung po rnams kyang 'gags la de nyid kyi tshe skye ba'i char gtogs pa'i phung po rnams 'byung bas de'i phyir rtag par ma yin no//ji ltar chad par ma yin zhe na/ tha ma 'chi ba'i dus kyi phung po rnams sngon 'gags pa las skye ba'i char gtogs pa'i phung po rnams 'byung ba ma yin la/ ma 'gags pa las kyang ma yin gyi/tha ma 'chi ba'i phung po rnams kyang 'gags la/ de nyid kyi tshe skye ba'i char gtogs pa'i phung po rnams srang mda'i mthon dman bzhin 'byung bar 'gyur te/ de'i phyir chad par yang ma yin no/ /ji ltar 'pho ba ma yin zhe na/ sems can rigs mi 'dra ba rnams skal ba mnyam pa'i skye bar skye ba mngon par 'grub par mi byed pa'o//de'i phyir 'pho bar yang ma yin no/ /ji ltar rgyu chung ngu las 'bras bu chen po 'byung zhe na/ las chung ngu byas pa las 'bras bu chen po rnam par smin pa myong ste/ de'i phyir rgyu chung ngu las 'bras bu chen por 'byung ba yin no//ji ltar myong bar 'gyur ba'i las byas pa de ltar myong bar 'gyur ba'i rnam par smin pa myong ba de'i phyir/ de dang 'dra ba'i rgyud du'o zhes bya bar rgya cher gsungs pa lta bu'o/ /slob dpon zla ba grags pa'i zhal snga nas sbyar ba'i tshig gsal ba las/srid pa'i yan lag bcu gnyis brtag pa zhes bya ba rab tu byed pa nyi shu drug pa'i 'grel pa'o// //gang gis de lta bu'i rten cing 'brel bar 'byung ba ji lta bur gyur pa yang dag par mthong ba de ni sngon gyi mtha' la rten par mi byed/ phyi ma'i mtha' la rten par mi byed do zhes mdo las 'don pa yin na/de la sngon gyi mtha' la rten pa ni gang zhig yin zhing / phyi ma'i mtha' yang gang zhig yin la/ ji ltar na rten par mi byed pa yin zhe na/ de dag bstan pa'i phyir 'di brjod do/ /de la da ltar gyi bdag gi dngos po la ltos te 'das pa'i dus dag la sngon gyi mtha' zhes bya ste/skye ba gcig nas gcig tu brgyud pa'i cha snga ma ni sngon gyi mtha'o/ /de la rten par mi byed pa ni lta ba'i rnam pa dag gis dmigs par mi byed pa rten cing 'brel par 'byung ba'i de nyid ji ltar gnas pa bzhin mthong ba'i phyir rnam pa gzhan du gnas pa'i dngos po la rnam pa gzhan du mngon par zhen par mi byed pa'o//de la lta ba brgyad ni sngon gyi mtha' la dmigs nas rnam pa gzhan du 'jug ste/ 'di lta ste/ 'das dus byung ma byung zhes dang / /'jig rten rtag pa la sogs par/ /lta ba gang yin de dag ni/ /sngon gyi mtha' la brten pa yin//de la zhes kyi sgra ni sogs pa'i don la'o/ /yang na lta ba gnyis nye bar bkod pa ni nye bar mtshon pa'i don du yin no/ /lta ba 'di dag ni bzhi ste/ 'di lta ste/ ci bdag 'das pa'i dus na byung ba zhig gam/ /ma byung ba zhig gam/ byung yang byung la ma byung yang ma byung ba zhig gam/byung ba yang ma yin la ma byung ba yang ma yin pa zhig ces bya ba lta ba bzhi po 'di dag ni sngon gyi mtha' la brten pa yin no/ /gzhan yang bzhi ste zhes sngar zhar la bshad la / 'jig rten rtag pa la sogs par/ /lta ba gang yin de dag kyang //sngon gyi mtha' la brten pa ma yin no/ /de la lta ba bzhi tshan gong ma las mjug thogs kyi lta ba bzhi tshan la tha dad pa cher med mod kyi/ de lta na yang khyad par cung zad tsam la brten nas logs shig tu nye bar bkod de/ de yang phyi nas bshad par bya'o/ /de la 'jig rten rtag go zhes bya ba 'di ni 'das pa'i dus na byung ba zhig gam zhes bya ba 'di las tha dad pa cher med do/rnam pa gcig tu na khyad par ni 'di yin te/ 'jig rten rtag go zhes bya ba'i lta ba bzhi po gang yin pa de ni spyir sngon gyi mtha' la brten pa yin la/ 'das pa'i dus na byung ba zhig gam zhes bya ba 'di ni bdag kho na la sngon gyi mtha' bzung nas zhugs pa yin gyi/phyir ni ma yin no zhes bya ba'o/ /de bzhin du lta ba gzhan dag la yang khyad par brjod par bya'o/ /de ltar na re zhig lta ba brgyad po de dag ni sngon gyi mtha' la brten pa yin no/ / sngon gyi mtha' de ni de la dmigs par byed pa'i lta ba dag dang lhan cig bshad zin to/ /da ni phyi ma'i mtha' brjod par bya ste/ de la da ltar ba'i bdag gi dngos po la ltos nas 'byung bar 'gyur ba'i lus la phyi ma'i mtha' zhes bya ste/ skye ba gcig nas gcig tu brgyud pa'i cha phyi ma ni phyi ma'i mtha'o//de la rten par mi byed pa ni lta ba'i rnam pa dag gi dmigs par mi byed pa ste/ rten cing 'brel bar 'byung ba'i de nyid ji ltar gnas pa ltar mthong ba'i phyir rnam pa gzhan du gnas pa'i dngos po la rnam pa gzhan du mngon par zhen par mi byed pa'o//de la lta ba brgyad ni phyi ma'i mtha' la dmigs pa nas rnam pa gzhan du 'jug ste/ /'di lta ste/ ma 'ongs dus gzhan 'byung 'gyur dang / /mi 'byung 'jig rten mtha' sogs par/ /lta ba gang yin de dag ni/ /phyi ma'i mtha' la brten pa yin/ /'dir yang lta ba gnyis nye bar bkod pa ni nye bar mtshon pa'i don du yin no//lta ba 'di dag ni bzhi ste/ 'di lta ste/ ci bdag ma 'ongs pa'i dus na 'byung bar 'gyur ba zhig gam mi 'byung bar 'gyur ba zhig gam/ 'byung yang 'byung la mi 'byung yang mi 'byung bar 'gyur ba zhig gam/ma 'ongs pa'i dus na 'byung ba yang ma yin mi 'byung ba yang ma yin pa zhig ces bya ba lta ba bzhi po 'di dag ni phyi ma'i mtha' la brten pa yin no/ /ci lta ba bzhi po de dag kho na zhig phyi ma'i mtha' la brten tam zhe na/ bshad pa/ ma yin no/ /'o na ci zhe na/ 'jig rten mtha' la sogs par lta ba phyi ma'i mtha' la brten pa gzhan bzhi yang yod pa yin no//de la mtha' yod pa la sogs pa lta ba bzhi ni spyir phyi ma'i mtha' la brten nas 'jug pa yin la/ ci bdag ma 'ongs pa'i dus na 'byung bar 'gyur ba zhig gam zhes bya ba de dag ni bdag kho na la phyi ma'i mtha' la brten nas zhugs pa yin te/de ni lta ba bzhi tshan gnyis kyi khyad par yin par khong du chud par bya'o/ /de la re zhig sngon gyi mtha' la dmigs pa'i lta ba bzhi tshan dang po ji ltar mi srid pa de ltar bstan pa'i phyir/ 'das pa'i dus na byung gyur zhes / /bya ba de ni mi 'thad do/ /sngon tshe rnams su gang byung ba//de nyid 'di ni ma yin no/ /zhes bya ba gsungs so/ /de la gal te 'das pa'i tshe rabs rnams su gang byung ba de nyid da ltar yod par gyur na ni de'i tshe 'di 'das pa'i dus na bdag byung ba zhig gam zhes bya bar bzung bar rigs pa zhig na/ de ni de ltar srid pa yang ma yin te/ rtag par thal bar 'gyur ba'i phyir ro/ /rtag pa ni 'khor bar mi rigs pa'i phyir te/ 'gro ba gcig la gnas pa yang 'gro ba sna tshogs kyis bzung ba nyid du thal bar 'gyur ba'i phyir ro/ /'dir gal te sngar dmyal ba la sogs pa'i 'gro bar gyur nas da lta mi dag tu skyes pas bdag kho na dmyal ba la sogs par gyur to zhes de ltar rtog par byed na de ni de ltar mi rigs te/ji ltar na/ mi yin bzhin du dmyal ba la sogs pa yang yin par 'gyur/ 'o na gang mdo las 'di skad du nga nyid de'i tshe de'i dus na 'khor los sgyur ba'i rgyal po mang pos bkur ba zhes bya bar gyur to zhes 'don pa de ji ltar rig par bya zhe na/bka' 'di ni gzhan nyid yin pa 'gog pa lhur byed pa yin gyi gcig nyid du ston par byed pa ni ma yin no zhes shes par bya'o/ /de nyid kyi phyir de'i tshe de'i dus na de gzhan ni ma yin no zhes 'don pa yin no/ /gal te de nyid 'di yin no// zhes sngar gyi dang da ltar ba gcig nyid du 'gyur na nyes pa cir 'gyur zhe na/ rtag pa nyid du 'gyur ro zhes de la nyes pa bshad zin to/ /de lta mod kyi gzhan yang brjod par bya ste/ de nyid bdag tu 'gyur snyam na/ /nye bar len pa tha dad 'gyur/ /gal te sngon gyi de nyid da ltar gyi bdag 'dir 'byung na ni de'i tshe sngar gyi gnas skabs ltar nye bar len pa po tha dad pa med pa'i phyir phung po lnga'i mtshan nyid kyi nye bar len pa tha dad par mi 'gyur ba zhig na//bdag gi nye bar len pa ni de ltar tha dad pa med pa ma yin te/ 'o na ci zhe na/ nye bar len pa ni tha dad pa kho na ste/nye bar len pa'i rgyu tha dad pa'i phyir dang / dus tha dad pa'i phyir ro/ /de'i phyir nye bar len pa tha dad pa'i phyir de nyid bdag 'di yin no zhes mi rigs so/ /ci ste nye bar len pa la tha dad pa yod mod bdag ni gcig nyid yin te/ de'i phyir bdag la tha dad pa med pa'i phyir 'das pa'i dus na byung ba zhig gam zhes bya ba der yang 'byung ba nyid do snyam na/brjod pa/ nye bar len pa ma gtogs par/ /khyod kyi bdag ni gang zhig yin/ /gal te nye bar len pa gzhan la bdag kyang gzhan yin na ni de'i tshe nye bar len pa tha dad kyang bdag la tha dad pa med pas de de ltar 'gyur na/'di ni bdag go/ /'di ni bdag gi nye bar len pa'o zhes de dag ni tha dad par bstan par mi nus te/ nye bar len pa las tha dad pa'i rang bzhin yin pa nyid kyis bdag rgyu med par thal ba'i phyir dang / so sor gzung du yod par thal bar 'gyur ba'i phyir ro//gang gi tshe de ltar nye bar len pa ma gtogs par bdag bstan par mi nus pa de'i tshe/ nye bar len pa tha dad kyang bdag la tha dad med do zhes brtag par mi nus so/ /ci ste yang nye bar len pa ma gtogs par bdag yod pa ma yin pa bden mod kyi/'on kyang nye bar len pa nyid bdag tu brtag go zhes kha cig rtog par byed na/ de yang rigs pa ma yin no zhes bstan pa'i phyir/ nye bar len pa ma gtogs pa'i/ /bdag yod ma yin byas pa'i tshe/ /nye bar len nyid bdag yin na/ /khyod kyi bdag ni med pa yin//zhes gsungs so/ /re zhig nye bar len pa nyid bdag ji ltar ma yin pa de ltar bstan pa'i phyir gsungs pa/ /nye bar len nyid bdag ma yin/ /de 'byung ba dang 'jig pa yin/ /nye bar blang ba ji lta bur/ /nye bar len po yin par 'gyur/ /de la nye bar len pa'i phung po lnga zhes bya ba nye bar len pa gang yin pa de ni skad cig re re la 'byung ba dang 'jig pa yin la/bdag ni de ltar skad cig re re la 'byung ba dang 'jig pa ma yin no/ /bdag ni phung po dag las de nyid dang gzhan nyid la sogs pa dang / rtag pa dang mi rtag pa nyid du yang brjod par mi nus te/nyes pa du mar thal bar 'gyur ba'i phyir ro/ /bdag rtag pa nyid yin pas ni rtag par smra bar 'gyur la/ mi rtag pa nyid yin pas ni chad par smra bar thal bar 'gyur te/ rtag pa dang chad pa zhes bya ba 'di ni gnyi ga yang don ma yin pa chen po byed pa yin pas khas blang bar mi bya'o//de'i phyir re zhig nye bar len pa de nyid bdag yin no zhes bya bar mi rigs so/ /gzhan yang nye bar blang ba ji lta bur/ /nye bar len pa yin par 'gyur te/ 'dir nye bar blang bar bya ba yin pas ni nye bar blang ba ste las yin la/ de la ni gdon mi za bar nye bar len pa po nye bar sogs pa po yod par 'gyur dgos so//nye bar len pa de gal te bdag nyid yin par 'dod na ni/ de'i tshe nye bar blang ba nyid nye bar len pa po yin par 'gyur ro/ /de'i phyir las dang byed pa po dag gcig yin pas gcod pa po dang gcad par bya ba dang /bum pa dang rdza mkhan dang / me dang bud shing la sogs pa rnams kyang gcig nyid du 'gyur na/ de ni mthong ba'am rigs pa'ang ma yin no zhes bstan pa'i phyir/ nye bar blang ba ji lta bur/ /nye bar len po yin par 'gyur/ /zhes bshad de/ phyogs de ni gtan mi srid pa nyid do/ / zhes bya bar dgongs pa yin no/ /'dir nye bar len pa tsam yang bdag yin par mi rigs pa ni bden mod kyi 'on kyang nye bar len pa po nye bar len pa las tha dad pa nyid yin par 'gyur ro zhes zer ro/ /'di yang mi rung ste/ /gang gi phyir/ bdag ni nye bar len pa las/ /gzhan du 'thad pa nyid ma yin//gal te gzhan na len med par/ /gzung yod rigs na gzung du med/ /gal te nye bar len pa las bdag tha dad pa yin na ni bum pa las snam bu ltar de nye bar len pa las tha dad par gzung du yod par 'gyur na/ /de ltar gzung du ni med do/ /de'i phyir nye bar len pa las tha dad par nye bar len pa po yang yod pa ma yin te/nam mkha'i me tog ltar nye bar len pa las tha dad par gzung du med pa'i phyir ro snyam du dgongs pa yin no/ /da ni ji skad bstan pa'i don gyi mjug bsdu ba'i phyir/ de ltar len las gzhan ma yin/ / de ni nyer len nyid kyang min/ /bdag ni nye bar len med min/ /zhes bya ba gsungs so/ /ci ste nye bar blang ba dang nye bar len pa po gcig tu thal bar 'gyur ba'i phyir dang / 'byung ba dang 'jig pa nyid du thal bar 'gyur ba'i phyir bdag nye bar len pa'i rang bzhin can ma yin la/nye bar len pa la ma ltos par tha dad par gzung du yod par thal bar 'gyur ba'i phyir gzhan pa yang ma yin zhing / nye bar len pa la ma ltos par gzung du yod par thal par 'gyur ba'i phyir nye bar len pa med pa yang ma yin na/ de lta na 'o na bdag med do zhes bya ba yin la rag go snyam na/brjod pa/ med pa nyid du 'ang de ma nges/ /gang zhig phung po la brten nas gdags pa med do zhes bya bar ji ltar 'gyur/ yod pa ma yin pa'i mo gsham gyi bu ni phung po dag la brten nas 'dogs pa ma yin no/ /nye bar len pa yod bzhin du nye bar len pa po med do zhes bya bar ji ltar rigs par 'gyur te/de'i phyir de ni med pa nyid du yang mi rigs so/ /de'i phyir bdag med do snyam pa'i nges pa 'di yang mi 'thad do/ /bdag de'i rnam par gzhag pa ni rgyas par dbu ma la 'jug pa las nges par bya'o//'dir yang sngar skabs skabs dag tu rnam par gzhag pa byas zin pa'i phyir yang 'dir de rnam par gzhag pa'i 'bad pa mi bya'o/ /de ltar na re zhig 'das pa'i dus na byung bar gyur pa zhig gam zhes bya ba de mi 'thad do/ /da ni 'das pa'i dus na ma byung ba zhig gam zhes bya ba de yang ji ltar mi 'thad pa de ltar bstan pa'i phyir gsungs pa/'das pa'i dus na ma byung zhes/ /bya ba de yang mi 'thad do/ /sngon tshe rnams su gang byung la / /de las 'di gzhan ma yin no/ /gal te da ltar gyi 'di sngon gyi bdag las gzhan nyid yin na ni de'i tshe 'das pa'i dus na ma byung ba zhig gam zhes bya bar 'gyur ba zhig na/de ni de ltar srid pa yang ma yin no/ /de'i phyir 'das pa'i dus na ma byung zhes bya ba de yang mi 'thad do/ /gal te 'di sngon gyi bdag las gzhan nyid du gyur na nyes pa ci yod ce na/brjod pa/ gal te 'di ni gzhan 'gyur na/ /de med par yang 'byung bar 'gyur/ /de bzhin de ni gnas 'gyur zhing / /der ma shi bar skye bar 'gyur/ /gal te da ltar gyi bdag 'di sngar gyi bdag las gzhan yin na ni de'i tshe sngar gyi bdag de med par de spangs nas kyang de la ltos pa med cing de'i rgyu can ma yin par 'byung bar 'gyur ro//gzhan yang / de bzhin de ni gnas 'gyur zhing ste/ de la gal te 'di sngar gyi bdag las gzhan nyid yin na ni/ de'i tshe gzhan nyid yin pa'i phyir bum pa byas pa'i tshe snam bu mi 'jig pa ltar bdag phyi ma skyes pa na yang sngar gyi bdag mi 'gag par 'gyur ro//ma 'gags pa nyid kyi phyir na sngar lha dang mi la sogs par skye ba gang dang gang du skyes pa de sngar gyi kha dog dang dbyibs la sogs pa gang du dmigs pa'i rnam pa de nyid kyis de bzhin du de der gnas par 'gyur zhing / sngar ma shi ba kho nar 'dir skye bar 'gyur na/ mir 'gyur ba 'di'i sngar gyi lha la sogs pa'i bdag de bzhin du gnas par 'gyur ba zhes bya ba gang yin pa 'di ni yod pa ma yin no/ /de'i phyir 'das pa'i dus na ma byung ba zhig gam zhes bya ba 'di ni 'thad pa ma yin no//'dir smras pa/ gal te 'di ni gzhan 'gyur na/ /de med par yang 'byung bar 'gyur/ /zhes brjod na/ gal te sngar gyi bdag med pa 'di 'dir 'byung bar 'gyur na nyes pa cir 'gyur/ de la nyes pa mang por 'gyur ro/ /ji ltar zhe na/ gang gi phyir de ltar yin na//chad dang las rnams chud za dang / /gzhan gyis byas pa'i las rnams kyi / /gzhan gyis so sor myong ba dang / /de la sogs par thal bar 'gyur/ /gal te bdag 'di sngar gyi bdag med par 'byung bar 'gyur na ni/ de'i tshe sngar gyi bdag de der zhig pa'i phyir dang / 'dir gzhan zhig kho na skyes pa'i phyir sngar gyi bdag chad par 'gyur ro/ /bdag de chad na ni las kyi 'bras bu mjug thogs pa rnams rten chad pas rnam par chad pa'i phyir dang / za ba po yang med pa'i phyir 'bras bu chud za ba kho nar 'gyur ro/ /ci ste sngar gyi bdag gis byas pa'i las kyi 'bras bu bdag phyi mas yongs su longs spyod par rtog na/de lta na yang gzhan gyis byas pa'i las kyi 'bras bu gzhan gyis longs spyod par 'gyur ro/ /de'i phyir/ ci ste las ni ma byas na/ /ma byas pa dang phrad 'jigs 'gyur/ /zhes bya ba de lta bu la sogs pa'i mi 'dod par 'gyur ro//gzhan yang gal te bdag 'di ni sngar gyi bdag las gzhan du gyur pa 'dir skyes pa yin na ni/ de'i tshe sngar ma byung ba las phyis 'byung ba zhes bya bar 'gyur na/ de ni rigs pa yang ma yin no zhes bstan pa'i phyir/ ma byung ba las byung min te //'di la skyon du thal bar 'gyur/ /bdag ni byas par 'gyur ba dang / /'byung ba'ang rgyu med can du 'gyur/ /zhes gsungs te/ gal te bdag sngar ma byung ba las phyis 'byung bar 'gyur na ni de'i tshe bdag ni byas par 'gyur na/ bdag ni byas par 'dod pa yang ma yin te/mi rtag pa nyid du thal bar 'gyur ba'i phyir ro/ /de sgrub par byed pa de las tha dad pa'i byed pa po med pa'i phyir bdag gi byas pa nyid du rigs par ga la 'gyur/ bdag byas par rtog na ni 'khor ba thog ma dang ldan pa dang / snga na med pa'i sems can 'byung bar yang 'gyur na/de ni de ltar yang ma yin te/ de'i phyir bdag byas pa yang ma yin no/ /gzhan yang / 'byung ba'ang rgyu med can du 'gyur/ /bdag ma byung ba las byung na rgyu med can kho nar 'gyur te/ sngar bdag med pas byed pa po med pa ni rgyu med pa can du 'gyur ro//'ang gi sgra ni rnam par rtog pa ste/ bdag ni byas par 'gyur ba'am/ yang na 'das pa'i dus na ma byung ba zhig gam zhes bya ba 'di ni khas mi blang ngo zhes bya ba dang / bdag 'byung ba rgyu med pa can du 'gyur ba'am/ yang na 'das pa'i dus na ma byung ba zhig gam zhes bya ba de mi 'thad do zhes bya ba 'di khas blang bar bya'o zhes bya ba'o//da ni ji skad bstan pa'i don de nyid mjug bsdu ba'i phyir/ de ltar bdag byung bdag ma byung / /gnyi ga gnyi ga ma yin par/ /'das la lta ba gang yin pa/ /de ni 'thad pa ma yin no//zhes gsungs te/ de ltar ji skad bstan pa'i tshul du 'das pa'i dus na byung ba zhig gam zhes bya bar lta ba gang yin pa dang / 'das pa'i dus na ma byung ba zhig gam zhes bya ba lta ba gang yin pa de 'thad pa ma yin pa nyid do/ /de gnyis med pa'i phyir na gnyi ga yang mi 'thad do//ci'i phyir zhe na/ 'di ltar/ de gnyis 'dus pa la gnyi ga zhes bya bar brtag par bya na/ re re so so so sor med pas de dag 'dus pa ga la yod de/ de'i phyir gnyi ga yang yod pa ma yin no/ /gnyi ga med pa'i phyir na de dag bkag pa'i sgo nas gnyis ka ma yin pa yang yod par ga la 'gyur/de'i phyir byung ba yang ma yin ma byung ba yang ma yin pa zhig gam zhes bya ba de yang 'thad pa ma yin no/ /de'i phyir de ltar sngon gyi mtha' la brten pa'i lta ba bzhi mi srid par bstan nas/ da ni phyi ma'i mtha' la brten pa dgag pa gsungs pa/ ma 'ongs dus gzhan 'byung 'gyur dang //'byung bar mi 'gyur zhes bya bar/ /lta ba gang yin de dag ni/ /'das pa'i dus dang mtshungs pa yin/ /ji ltar 'das pa'i dus la lta ba bzhi bkag pa de ltar ma 'ongs pa'i dus la bkag pa bzhi yang bshad zin pa'i 'don pa go bsnor bas dgag par bya'o//'di lta ste/ ma 'ongs dus na 'byung 'gyur zhes/ /bya ba de ni mi 'thad do/ /ma 'ongs tshe la gang 'byung la / /de nyid 'di ni ma yin no/ /zhes bya ba la sogs pas gcig nyid dgag pa'i sgo nas thams cad mtshungs par sbyar bar bya'o/ /de bzhin du/ma 'ongs dus na mi 'byung zhes/ /bya ba de yang mi 'thad do/ /ma 'ongs tshe la gang 'byung ba/ /de las 'di gzhan ma yin no/ /zhes bya ba la sogs pas tshigs su bcad pa snga ma'i 'don pa bsnor te gzhan nyid dgag pa la yang mtshungs par sbyar bar bya'o/ /da ni rtag pa la sogs par lta ba sngon gyi mtha' la brten pa bzhi yang dgag pa'i phyir/gal te lha de mi de na/ /de lta na ni rtag par 'gyur/ /lha ni ma skyes nyid 'gyur te/ /rtag la skye ba med phyir ro/ /zhes gsungs te/ 'di na mi'i 'gro bar gnas pa kha cig dge ba'i las byas nas lha'i 'gro bar 'gro bar 'gyur ro//de la gal te lha de nyid mi de nyid yin no zhes de ltar gnyi ga gcig nyid du 'gyur na ni/ de'i tshe rtag par 'gyur na/ gang lha nyid mi yin pa zhes bya ba 'di ni de ltar yang ma yin no/ /de'i phyir rtag pa med do/ /gzhan yang rtag par smra ba yin na/ lha ni ma skyes nyid 'gyur te/ ci'i phyir zhe na/ gang gi phyir/ rtag pa skye ba med phyir ro/ /zhes gsungs te/ /rtag pa gang yin pa de ni yod pa yin pa'i phyir skye ba med pa nyid do/ /de'i phyir lha ni ma skyes pa nyid du 'gyur na/ lha ma skyes par ni rigs pa yang ma yin no//de ltar re zhig rtag pa mi rigs so/ /da ni mi rtag pa yang ji ltar mi srid pa de ltar bstan pa'i phyir gsungs pa/ gal te lha las mi gzhan na / /de ltar na ni mi rtag 'gyur/ /gal te lha mi gzhan yin na/ /rgyud ni 'thad par mi 'gyur ro/ /gal te lha las mi gzhan yin na ni de'i tshe a mra'i shing nim pa'i rgyur ma yin pa de bzhin du lha yang mi'i rgyud gcig tu gtogs par mi 'gyur ro//de'i phyir sngar gyi 'jig pas mi rtag pa nyid du 'gyur ba zhig go/ /ci ste lha las mi gzhan yin na ni de'i tshe rgyud rjes su 'jug par mi 'gyur ba zhig na/lha ni mi dang rgyud gcig tu gtogs pa yin no zhes rgyud rjes su 'jug pa 'di ni yod pa yin no/ /de'i phyir rgyu med par thal bar 'gyur ba'i phyir na/ lha las mi gzhan ma yin no/ /gang gi phyir de ltar yin pa de'i phyir mi rtag pa yang yod pa ma yin no//da ni rtag pa yang yin la mi rtag pa yang yin pa dgag par bya ba'i phyir/ gal te phyogs gcig lha yin la/ /phyogs gcig mi ni yin gyur na/ /rtag dang mi rtag 'gyur ba yin/ /de yang rigs pa ma yin no/ /zhes gsungs te/ gal te mi 'di cha shas kyis mi nyid btang la/mi btang nas cha shas kyis lha'i lus len na ni/ de'i tshe phyogs gcig zhig pas mi rtag par 'gyur la/ phyogs gcig gnas pas rtag par 'gyur ba zhig na/ gang gi phyir / phyogs gcig lha'i 'gro bas yang dag par bsdus shing /phyogs gcig mi yin par 'gyur ba de ni rigs pa ma yin no/ /de'i phyir rtag pa dang mi rtag pa gnyi ga yin pa 'di ni 'thad pa ma yin no/ /da ni rtag pa yang ma yin mi rtag pa yang ma yin par lta ba dgag pa gsungs pa/ gal te rtag dang mi rtag pa/ / gnyi ga grub par 'gyur na ni/ /rtag pa ma yin mi rtag min/ /grub par 'gyur bar 'dod la rag/ gal te rtag pa cung zad cig yod na ni de phyis mi rtag par mthong ba las rtag pa ma yin pa zhes bya bar 'gyur la/ de bzhin du gal te mi rtag pa cung zad cig yod na ni de'i tshe de phyis rtag par 'gyur ba las mi rtag pa ma yin par 'gyur ba zhig na/gang gi tshe rtag pa dang mi rtag pa nyid ma grub pa de'i tshe/ de dag bkag pa'i sgo nas rtag pa yang ma yin mi rtag pa yang ma yin pa ga la yod/ de'i phyir de yang mi rigs so/ /ci ste 'khor ba'i rgyun thog ma med pa nas skye ba dang 'chi ba gcig nas gcig tu brgyud par 'jug pa'i rim pa rnam par chad pa med par dmigs nas//gang zhig de ltar thog ma dang mi ldan pa'i 'khor bar yongs su 'khyams shing da rung du yang dmigs pa dngos po rtag pa de ni 'ga' zhig yod pa yin no zhes bdag rtag pa gzhan brtag par bya'o snyam na /de yang mi 'thad do/ /de ci'i phyir zhe na/ 'di ltar/ gal te gang zhig gang nas gar/ /'ongs shing gang du'ang 'gro 'gyur na/ /de phyir 'khor ba thog med pa / / 'gyur na de ni yod ma yin/ /gal te bdag gam 'du byed rnams 'gyur ba gzhan gang nas gar 'gro ste 'gro ba gzhan du 'ong bar 'gyur zhing / 'gro ba gzhan de nas slar yang gang du 'gro bar 'gyur na ni de'i tshe 'khor ba thog ma med par 'gyur ba zhig na/ gang zhig gang nas gar 'ong ba ni yod pa ma yin te/rtag pa dang mi rtag pa 'ong bar 'ang mi 'thad pa'i phyir ro/ /gang zhig 'di nas yang gang zhig tu 'gro ba yang yod pa ma yin te/ rtag pa'am mi rtag pa 'gro bar mi 'thad pa'i phyir ro/ /gang gi tshe de yod pa ma yin pa de'i tshe/skye ba dang 'chi ba gcig nas gcig tu brgyud nas yun shin tu ring ba nyid kyis thog ma ma dmigs pa las 'khor ba thog ma med par ga la 'gyur/ 'khor ba po med pa'i phyir na 'khor ba thog ma dang mi ldan pa'am/ thog ma dang ldan par ga la 'gyur/ / gang gi tshe mi 'gyur ba de'i tshe gang zhig de ltar thog ma dang mi ldan pa'i 'khor bar yongs su 'khyams zhing da dung du yang dmigs pa'i dngos po rtag pa de ni 'ga' zhig yod pa yin no zhes gang smras pa de rigs pa ma yin no/ /gang gi phyir de ltar ji skad bshad pa'i tshul gyis/gal te rtag pa 'ga' med na/ /mi rtag gang zhig yin par 'gyur/ /rtag pa dang ni mi rtag dang / /de gnyis bsal bar 'gyur ba'o/ /gang gi tshe de ltar dngos po rtag pa nyid yod pa ma yin pa de'i tshe gang zhig rtag pas mi rtag par 'gyur/ rtag pa dang mi rtag pa ma dmigs pas na gnyis ka dang gnyis ka ma yin pa de yang ga la yod/de'i phyir de ltar na rtag pa la sogs par lta ba bzhi sngon gyi mtha' la srid pa ma yin no/ /da ni mtha' dang ldan pa dang mtha' dang mi ldan pa la sogs pa bzhi yang phyi ma'i mtha' la ji ltar mi srid pa de ltar bstan pa'i phyir gsungs pa/gal te 'jig rten mtha' yod na/ /'jig rten pha rol ji ltar 'gyur/ /gal te 'jig rten mtha' med na/ /'jig rten pha rol ji ltar 'gyur/ /gal te 'jig rten mtha' yod pa ste zhig nas phyis med par 'gyur na ni de'i tshe 'jig rten pha rol med par 'gyur na/'jig rten pha rol ni yod pa yang yin te/ de'i phyir 'jig rten mtha' yod ces bya ba 'thad pa ma yin no/ /ci ste yang 'jig rten mtha' med par 'gyur na ni/ de'i tshe yang 'jig rten pha rol ji ltar 'gyur te/'jig rten pha rol med par 'gyur ro snyam du dgongs so/ /'jig rten pha rol ni med pa yang ma yin te/ de'i phyir 'jig rten pha rol yod pas 'jig rten mtha' med par yang mi 'gyur ro / /da ni 'jig rten mtha' yod pa nyid dang mtha' med pa nyid 'di gnyi ga yang ji ltar 'jig rten la mi srid pa de ltar bstan pa'i phyir/gang phyir phung po rnams kyi rgyun/ /'di ni mar me'i 'od dang mtshungs/ /de phyir mtha' yod nyid dang ni/ /mtha' med nyid kyang mi rigs so/ /zhes gsungs te/ gang gi phyir phung po rnams kyi rgyun rgyu dang 'bras bu'i dngos po snga phyi 'brel zhing bar mtshams med pas/rim pa rnam par chad pa med par 'jug pa skad cig re re la 'jig pa 'di ni mar me dang 'dra bar 'jug pa yin te/ de'i phyir rgyu dang 'bras bu'i 'jug pa mthong bas mtha' yod pa nyid dang mtha' med pa nyid kyang mi rigs so//ji ltar zhe na/ gal te snga ma 'jig 'gyur zhing / /phung po 'di la brten byas nas/ /phung po de ni mi 'byung na/ /des na 'jig rten mtha' yod 'gyur/ /gal te snga ma mi'i phung po 'jig cing / de la brten nas lha'i 'gro bar skye bas bsdus pa phyi ma mi 'byung na/de'i tshe til mar dang snying po zad pas 'gags pa'i mar me ltar 'jig rten mtha' yod par 'gyur na/ lus phyi ma mi 'byung ba'i phyir na mtha' yod pa nyid ma yin no/ /gal te snga ma mi 'jig cing / /phung po 'di la brten byas nas/ /phung po de ni mi 'byung na/ /des na 'jig rten mtha' med 'gyur//ci ste phung po snga ma 'jig par mi 'gyur zhing / de la brten nas phung po 'bras bur 'gyur ba phyi ma mi 'byung na/ de'i tshe rang gi ngo bo las ma nyams pa'i phyir 'jig rten mtha' med pa ste/ mi 'jig par 'gyur ba zhig na/ /gang gi tshe phung po snga ma rnams 'gag cing de'i rgyu can phung po phyi ma rnams skyes pa de'i tshe snga ma rnams mi gnas pas 'khor ba mtha' med pa nyid du ga la 'gyur/da ni gsum pa gnyis ka'i phyogs med par bstan pa'i phyir/ gal te phyogs gcig mtha' yod la/ /phyogs gcig mtha' ni med gyur na/ /'jig rten mtha' yod mtha' med 'gyur/ / de yang rigs pa ma yin no/ /zhes gsungs te/ gal te 'ga' zhig gi phyogs gcig 'jig par 'gyur la/ phyogs gcig 'gro ba gzhan du 'gro bar 'gyur na ni/ de'i tshe 'jig rten 'di'i mtha' yod pa yang yin la/ mtha' med pa yang yin par 'gyur na/ gang zhig phyogs gcig 'jig cing phyogs gcig mi 'jig pa zhes bya ba 'di ni de ltar yod pa yang ma yin no//de'i phyir 'jig rten mtha' yod pa yang yin la/ mtha' med pa yang yin zhes bya ba 'di ni mi rigs so/ /yang ci'i phyir phyogs gcig 'jig la phyogs gcig gnas par mi rigs she na/ de bstan pa'i phyir/ ji lta bur na nyer len po//phyogs gcig rnam par 'jig 'gyur la/ /phyogs gcig rnam par mi 'jig 'gyur/ /de ltar de ni mi rigs so/ /zhes gsungs te/ 'dir phyogs gcig 'jig cing phyogs gcig gnas par rtog pa na/ gal te nye bar len pa po la phyogs gcig 'jig cing phyogs gcig gnas par rtog gam/yang na nye bar len pa la yin grang / de la re zhig nye bar len pa po la phyogs gcig 'jig cing phyogs gcig gnas par rtog na ni de ni mi rigs so/ /de ci'i phyir zhe na/ gang gi phyir de/ ji lta bur na nyer len po/ /phyogs gcig rnam par 'jig 'gyur la//phyogs gcig rnam par 'jig mi 'gyur/ /'dir gang gi phyogs gcig rnam par 'jig la/ phyogs gcig rnam par 'jig par mi 'gyur bar rtog par 'gyur ba 'thad pa ni 'ga' yang yod pa ma yin no/ /de nyid kyi phyir na 'thad pa 'ga' yang ma gzigs shing / slob dpon gyis de ltar de ni mi rigs so zhes gsungs so/ /yang na nye bar len pa po zhes bya ba ni bdag yin la/ de la phung po dag la rnam pa lngas btsal ba ni yod pa ma yin la/ gang zhig yod pa ma yin pa de ji ltar phyogs gcig 'jig cing / phyogs gcig mi 'jig par 'gyur/de nyid kyi phyir/ de ltar de ni mi rigs so zhes gsungs so/ /rnam pa gcig tu na/ gal te nye bar len pa po phyogs gcig 'jig la/ /phyogs gcig mi 'jig na de'i tshe nye bar len pa po gcig/ cha gcig gis lha nyid du 'gyur zhing / cha gcig gis mir 'gyur na/de ni 'dod pa yang ma yin no zhes gsungs pa/ de ltar de ni mi rigs so zhes bya ba'o/ /de ltar na re zhig nye bar len pa po mtha' yod pa yang yin la/ mtha' med pa yang yin pa ni mi rigs so/ /da ni nye bar blang ba la yang ji ltar yod pa ma yin pa de ltar bstan pa'i phyir/ ji lta bur na nyer blang ba //phyogs gcig rnam par 'jig 'gyur la/ /phyogs gcig rnam par 'jig mi 'gyur/ /de ltar de yang mi rigs so/ /zhes gsungs te/ 'di yang nye bar len pa po ltar rnam par bshad par bya'o/ /de'i phyir de ltar gnyis ka ltar yod pa ma yin par bstan nas/ da ni gnyis ka ma yin pa yang ji ltar yod pa ma yin pa de ltar bstan pa'i phyir/gal te mtha' yod mtha' med pa/ /gnyi ga grub par gyur na ni/ /mtha' yod ma yin mtha' med min/ /grub par 'gyur bar 'dod la rag/ ces gsungs te/ dgag par bya bar yod pa ma yin pas bkag pa yang med de/de'i phyir mtha' yod pa dang mtha' med pa gnyis ka yang ma grub par/ gang zhig bkag nas 'jig rten mtha' yod pa yang ma yin/ mtha' med pa yang ma yin zhes bya bar lta yod par ga la 'gyur/ de ltar na re zhig nye bar len pa po dang nye bar len pa kun rdzob pa gzugs brnyan lta bu'i rnam pa can zhal gyis bzhes nas kyang /rtag pa la sogs par lta ba mi srid par bstan nas/ da ni rnam pa thams cad du dngos po'i rang bzhin ma dmigs pas mo gsham gyi bu'i sngo bsangs dang dkar sham nyid ltar rtag pa la sogs par lta ba rnams mi srid par bstan par bzhed nas/yang na dngos po thams cad dag/ stong phyir rtag la sogs lta ba/ /gang dag gang du gang las ni/ /ci las kun du 'byung bar 'gyur/ /zhes gsungs te/ /'dir dngos po thams cad ni rten cing 'brel bar 'byung ba'i phyir/ stong pa nyid yin par bstan bcos mtha' dag gis bstan to//de'i phyir dngos po thams cad stong pa nyid yin pa gang dag su zhig gis 'dzin par 'gyur zhing / gang las kho bo cag de dag dgag pa rtsom par 'gyur ba/ rtag pa la sogs par lta ba/ dngos po thams cad las phyi rol du gyur pa de dag gang zhig yod par 'gyur/ de bzhin du gang du lta ba de dag 'byung zhing lta ba de dag gang du bzlog par bya ba gang zhig dmigs pa rtag pa la sogs pa dngos po thams cad kyi khongs su ma chud pa de dag gang zhig yod/gang la lta ba de dag skye bar 'gyur zhing / gang zhig kho bo cag gis lta ba de dag las bzlog par bya ba dngos po'am gang zag gi dngos po thams cad la phyi rol du gyur pa de yang gang zhig yod//rgyu mtshan gang las rtag pa la sogs par lta ba skyes pas na/ bzlog par bya ba lta ba rnams skye ba'i rgyu dmigs pa'i rgyu mtshan dngos po thams cad las phyi rol du gyur pa/ de yang gang zhig yod de/ don thams cad dngos po thams cad kyi khongs su gtogs pa'i phyir/stong pa nyid yin la stong pa nyid yin pa'i phyir don de dag thams cad mi dmigs pas/ lta ba/ gang dag gang du gang la ni/ /ci las kun du 'byung bar 'gyur te/ gang dag kyang ma yin la/ gang du yang ma yin zhing /gang la yang ma yin la/ rgyu gang las kyang 'byung ba ma yin no zhes bya ba'i tha tshig go/ /de dag yod pa ma yin na ni rtag pa nyid 'thad pa ma yin te/ de'i phyir lta ba de dag ni mi rigs pa nyid do/ /ji skad du mdo las gang la la zhig gis yang dag pa'i shes rab kyis/de ltar rten cing 'brel par 'byung ba yang dag pa ji lta ba bzhin du rtag par rgyun du srog med pa dang ji lta bu nyid dang ma nor ba nyid dang ma skyes pa dang ma byung ba dang / ma byas pa dang / 'dus ma byas pa dang / thogs pa med pa dang / sgrib pa med pa dang /zhi ba dang 'jig pa med pa dang mi 'phrogs pa dang zad pa med pa dang / rnam par zhi ba ma yin pa'i rang bzhin du mthong ba dang / med pa dang gsog dang gsob dang snying po med pa dang / nad dang 'bras dang zug rngu dang / sdig pa dang mi rtag pa dang sdug bsngal ba dang /stong pa dang / bdag med par yang dag par rjes su mthong ba de ni ci bdag 'das pa'i dus na byung ba zhig gam/ 'on te 'das pa'i dus na ma byung ba zhig gam/ bdag 'das pa'i dus na cir gyur pa zhig/ bdag 'das pa'i dus na ji lta bur gyur pa zhig snyam du sngon gyi mtha' la rten par mi byed do//ci bdag ma 'ongs pa'i dus na 'byung bar 'gyur ram/ 'on te ma 'ongs pa'i dus na 'byung bar mi 'gyur/ ma 'ongs pa'i dus na cir 'gyur/ ma 'ongs pa'i dus na ji lta bu zhig tu 'gyur snyam du phyi ma'i mtha' la rten par mi byed do//'di ci zhig/ 'di ji lta bu zhig/ ci zhig/ cir 'gyur/ sems can 'di dag gang nas 'ongs/ /de 'di nas shi 'phos nas gang du 'gro bar 'gyur zhes de ltar byung ba la yang rten par mi byed do/ /'jig rten na dge sbyong dang bram ze dag gi lta bar song ba gang dag yod pa 'di lta ste/bdag tu smra ba dang ldan pa'am/ /sems can du smra ba dang ldan pa'am/ srog tu smra ba dang ldan pa'am / /gang zag tu smra ba dang ldan pa'am/ dge mtshan dang bkra shis su smra ba dang ldan pa dag kyang rung ste/ lhag par g.yo ba dang bral bar g.yo ba de dag/de'i tshe na des spang bar 'gyur te/ yongs su shes nas/ rtsa ba nas bcad de ta la'i mgo bzhin mi snang ba'i rang bzhin du/ phyis mi skye mi 'gag pa'i chos can du 'gyur ro/ /de nas tshe dang ldan pa shA ri'i bu/ byang chub sems dpa' sems dpa' chen po byams pas bshad pa la mngon par bstod cing rjes su yi rang ste/stan las langs te dong ngo zhes gsungs pa lta bu'o/ /de'i phyir de ltar/ /gang gis thugs brtse nyer bzung nas/ /lta ba thams cad spang pa'i phyir/ /dam pa'i chos ni bstan mdzad pa//gau tam de la phyag 'tshal lo/ /de la 'khor ba dang mya ngan las 'das pa spang ba dang 'thab pa'i dmigs pa'i g.yang sa las 'dzin pas na chos so/ /'phags pa dam pa rnams kyi chos ni dam pa'i chos te/ 'khor ba'i sdug bsngal mtha' dag zad par byed pa nyid kyis bsngags par 'os pa'i phyir ro//yang na chos bzang po ni dam pa'i chos te/ dam pa'i chos rten cing 'brel bar 'byung ba zhes bya ba 'gag pa med pa/ skye ba med pa/ rtag pa med pa/ chad pa med pa/ 'ong ba med pa/ 'gro ba med pa don tha dad pa ma yin pa/don gcig pa ma yin pa/ spros pa nye bar zhi zhing zhi ba / gang gis 'gro ba rnams la thugs brtse ba nye bar bzung nas te/ rnyed pa dang bkur sti bzhed pa dang / lan du phan 'dogs pa bzhed pas ma yin gyi/ thugs rje chen po kho na la brten nas/lta ba thams cad spang ba'i phyir bstan par 'gyur ba / ston pa bla na med pa zla med pa de la phyag 'tshal lo/ /mtshan ci zhig ce na/ gau ta ma ste/ drang srong gau ta ma'i rigs su 'khrungs zhes bya ba'i tha tshig go/ slob dpon zla ba grags pa'i zhal snga nas sbyar ba tshig gsal ba las/lta ba brtag pa zhes bya ba rab tu byed pa'i nyi shu rtsa bdun pa'i 'grel pa'o/ /sangs rgyas rnams kyi mdo sde la sogs bden pa gnyis brten bstan pa rnam pa dgu/ 'jig rten rnams kyi spyod ngor rgya cher gang zhig 'dir ni yang dag bsgrags gyur pa//der ni 'dod chags bsal bar bya phyir gsungs pas zhe sdang zad par byed mi 'gyur/ /zhe sdang bsal bar bya phyir gsungs pas kyang ni 'dod chags zad par byed 'gyur min/ /gang phyir nga rgyal sogs zad bya phyir gsungs pa des kyang dri ma gzhan mi 'joms//de phyir de ni chos khyab ma yin gsung de dag dang de dag don chen min/ /gti mug zad par bya phyir gsungs pa gang yin des ni nyon mongs ma lus 'joms/ /nyon mongs mtha' dag gti mug la ni yang dag brten par rgyal ba rnams kyis bshad//gang phyir rten 'byung gti mug de zad byed par mthong ste de ni de nyid yin/ /de nyid bde bar gshegs pa rnams kyis dbu ma'i lam du yang dag bsgrags par gyur//de ni thub pa'i chos kyi rang bzhin skur 'dod de ni stong pa nyid du brjod/ /sangs rgyas rnams kyi thugs yin de ni rigs pa chen po yin no zhes kyang bsgrags/ /gang phyir yon tan kun gyi 'byung gnas 'di ni sangs rgyas rnams kyis bstan gyur pa/ /de phyir de'i gtam shin tu rgyas par thugs rjes brlan pa'i thugs mnga' zhing //sangs rgyas rnams kyis sras po blo bzang klu sgrub de yi gsung rab ji lta bar/ /gnas pa bzhin du mkhyen nas gus pas bstan bcos dbu mar gtso bo'i ngo bor bstan/ /skye bo gang gis rgyal ba'i bstan pa zab mo ma rtogs pa des rtogs phyir dang //gang dag thub pa'i dbang po'i gsung las gzhan du de nyid bstan par 'dod pa dang / /blo gros ngan pa gzhan gang gsung rab rnam pa gzhan du 'chad par byed gyur pa/ /de dag kyang ni bzlog par bya phyir mtha' gnyis sel ba'i bstan bcos 'di mdzad do//klu sgrub sgra gcan 'dzin ni bzang po'i zhal snga nas bcos lhas kyang gsung rjes su/ /'brangs pas de yi tshul lugs dus ni yun ring zhig tu gsal bar bstan par mdzad/ /de yi slob ma bstan bcos de la rnam par 'byed pas rnam nges blo ldan pa//rnams kyis kyang ni mu stegs ma lus pham byas thub mchog bstan pa yun ring bshad/ /dbu ni don du gnyer ba 'ongs la thugs rjes dbu ni bcad de stsal mdzad nas/ /bde ba can du rgyal ba'i sras po klu sgrub gshegs par gyur pa des mdzad pa'i//gzhung rnams dang ni de yi slob ma'i tshogs de dag kyang dus mang zhig na nyams par gyur/ /de nyid nyi ma nub pas deng sang gzhung lugs gsal po de ni gang na'ang med/ /de ltar 'jig rten phal cher rtog pas sbyar ba'i don tsam la ni mkhas gyur la/ / dam pa'i lam las ring zhing rtog ge'i chang 'thungs pa yis myos pa dang / /sangs rgyas gzhung lugs thams cad mkhyen pas gsungs pa'i de nyid bral zhing 'khrugs pa'i tshe/ /gang zhig skad cig tsam yang yid gnyis bsal nas stong nyid rtogs te skal par ldan/ /dngos po'i 'ching bas nyer sbyar bstan bcos zhags pas dkris shing 'jigs pas bcad byas nas//dngos po'i ra bar mchongs te 'gro ba'i ri dgas mkhas gang de ni chen po ste/ /de ltos brtsams pas bdag la yon tan 'di med deng sang mi mkhas gang yin pa/ /de ched kho nar de las gzhan pa'i bstan bcos 'joms pa'i 'grel 'di bdag gis byas//mdo sde kun las btus dang gtam bya rin chen phreng dang yang dag bstod pa dang / /'bad pas shin tu yun ring 'phags pa'i bstan bcos las bstan tshig ler byas de dang / /rigs pa drug cu zhes bya rnam par 'thag bcas stong nyid bdun cu pa de dang //gang yang rtsod pa rnam par bzlog pa bkod pa de dag kyang ni mthong gyur zhing / /brgya pa la sogs de dag dang ni de bzhin mdo sde zab mo rnam mang dang / /sangs rgyas bskyangs kyis mdzad pa'i 'grel pa mthong nas legs ldan byed kyis legs bshad gang //gcig nas gcig tu brgyud las 'ongs dang bdag gis rnam par phye las rnyed pa gang / /de dag bsdams te blo chen ldan rnams mgu bar bya phyir yang dag bstan pa yin/ /dpyod pa'i dkyil 'khor dang ldan rtog ge 'joms byed blo gsal rnams la tshig gi ni//'od zer dag gis 'di na gnas don yang dag ma dkrugs dngos su gsal byed cing / /'grel pa che gsal 'di yang byed pa'i zla ba grags ldan 'di deng shar ba yis/ /'jig rten rnams kyi yid gnyis mun pa stug po dag dang lhan cig sel ba yin//lung dang rigs pa la brten 'grel pa bsdebs legs ma dkrugs tshig dang ldan pa 'di/ /blo bzang dad ldan rnams la nges par bsgrub par bya phyir gus par byas nas ni/ /bdag gis bsod nams stong pa nyid ltar yangs par gyur pa gang zhig bsags pa des//'jig rten ma lus lta tshogs spangs nas spros kun chad pa'i go 'phang bgrod par shog/ ston pa gau tam dang ni de'i chos la zhugs rdzogs pa'i sangs rgyas mtha' dag dang //rgyal ba'i sras po'i tshogs dang de dag gis gsungs chos la phyag 'tshal nas/ /sangs rgyas gsung mtha' yas la blta phyir lus can rnams kyi mig gyur dbu ma ni/ /gang gi thugs rje'i sgo nas mdzad pa'i klu sgrub de la bdag ni phyag 'tshal lo// bstan bcos dbu ma rtsa ba'i 'grel pa tshig gsal ba zhes bya ba/ slob dpon zla ba grags pa theg pa mchog la thugs gzhol ba/ mi 'phrogs pa'i mkhyen rab dang thugs rje mnga' ba/ ri mor bris pa'i ba drus las 'o ma bzhos pas bden par zhen pa bzlog par mdzad pas sbyar ba yongs su rdzogs so//gsung rab rgya mtsho bsrubs byung de nyid bdud rtsi'i snod/ /shes rab ces bya snang byed tshig gsal rin chen sgron/ /bsgyur las dge ba gang bsags de yis nyi ma grags//lta thibs spangs te spros bral mkha' la 'gro bar shog/ kha che'i grong khyer dpe med kyi dbus / rin chen sbas pa'i gtsug lag khang gi 'dabs su/ rgya gar gyi mkhan po rtog ge ba chen po/ ma hA su ma ti'i zhal snga nas dang / bod kyi lo tsA ba pa tshab nyi ma grags kyis kha che'i dpe dang mthun pa ltar bsgyur/ phyis ra sa ra mo che'i gtsug lag khang du kha che'i mkhan po ka Na ka bar ma dang / bod kyi lo tsA ba de nyid kyis nyi 'og shar phyogs kyi dpe dang gtugs shing legs par bcos te gtan la phab pa'o// // khungs rnams ji ltar grags bzhin bris/ /phyin chad skad gnyis 'byung srid na/ /'grel pa sgra don bzhin bsgyur la/ / gzu bor byos la dpyad par rigs// //