CLOSE WINDOW

D3849
བོད་ཡིག

@##/ /rgya gar skad du/ hastA b+ha ba brat+ti / bod skad du/ lag pa'i tshad kyi 'grel pa/ 'phags pa 'jam dpal ye shes sems dpa' la phyag 'tshal lo/ /khams gsum pa tha snyad tsam la yang dag pa'i don du kun tu rtog pa'i phyir de kho na nyid kyi don khong du ma chud pa'i sems can rnams la/dngos po'i rang bzhin rab tu rnam par dbye ba'i sgo nas phyin ci ma log pa'i sems yang dag par bsgrub pa'i phyir 'di brtsam mo/ /thag pa la ni sbrul snyam 'dzin/ /thag par mthong na don med do/ /'di na yul ha cang bskal pa ma yin pa'ang 'od tsam snang ba zhig na thag pa'i gzugs spyi'i chos tsam zhig dmigs pas 'khrul pas thag pa la 'di ni sbrul kho na'o zhes nges par 'dzin pa'i ngo bo'i shes pa skye ste/khyad par gyi rang gi ngo bo khong du ma chud pa'i phyir ro/ /de'i khyad par nges par 'dzin pa na ji lta ba bzhin du ma yin par kun tu rtog pas rab tu spro ba nyid kyi phyir shes pa de yang 'khrul pa'i shes pa don med pa kho nar 'gyur ro//de yi cha mthong de la yang / /sbrul bzhin shes pa 'khrul pa yin/ /thag pa de la yang cha shas su phye nas brtags pa na thag pa'i rang gi ngo bo mi dmigs te/ de ma dmigs na thag par dmigs pa yang sbrul lo snyam pa'i blo bzhin du 'khrul pa tsam 'ba' zhig tu zad do//yang ji ltar thag pa'i shes pa 'khrul pa yin pa de bzhin du cha shas de yang dum bu dang nyag ma la sogs pa de dag la brtags na de'i rang gi ngo bo nges par mi zin to/ /de nges par ma zin pas de la dmigs pa'i rnam pa can gyi blo yang thag pa'i blo bzhin du 'khrul pa tsam kho na'o//brtags pa'i dngos po thams cad la/ /rang gi ngo bo brtags pa na/ /kun rdzob shes pa'i spyod yul ni/ /ji snyed yod pa gzhan las brtags / /ji ltar cha shas la sogs pa'i dbye bas tha dad pa'i thag pa la sogs pa la brtags na rang gi ngo bo mi dmigs pas thag pa la sogs pa'i blo yang sbrul lo snyam pa'i blo bzhin du 'khrul pa tsam du zad pa de bzhin du rdza ma dang phor bu la sogs pa brtags pa'i yod pa thams cad kyang ngos cha la sogs pa la ltos pa yin pas tha snyad pa'i shes pa'i yul bum pa la sogs pa rab tu dbye ba'i mthar thug pa dang bcas pa ji snyed pa 'di dag ni gzhan las tha snyad btags pa kho na yin gyi don dam par ni ma yin no//cha med brtag par bya med phyir/ /tha ma yang ni med par mtshungs/ /gang yang brtags pa'i dngos po thams cad kyi tha ma rdul phra rab kyi rdzas cha med pa gcig pu de yang dmigs par bya bar mi nus pa'i phyir nam mkha'i me tog gi phreng ba dang /ri bong gi rwa la sogs pa brtag par bya ba ma yin pa'i rang gi ngo bo dag dang mtshungs pas de yang dngos po med pa nyid du 'grub bo/ /ji ste yang ji ltar na brtag par bya ba ma yin pa'i mtshan nyid kyi gtan tshigs de rdul phra rab kyi rdzas yod pa de nyid gcig tu med do zhes shes par nus she na/gang gi phyir yod pa ni phyogs cha tha dad pa'i phyir/ dper na yod pa bum pa dang snam bu dang / shing rta la sogs pa'i rdzas rnams ni shar dang nub dang byang dang steng la sogs pa phyogs cha tha dad pa'i phyir cha shas tha dad pa dag snang ba ltar rdul phra rab kyi rdzas kyang yod par 'gyur ba gdon mi za bar phyogs cha tha dad pa'i phyir/shar dang nub dang steng la sogs pa'i cha shas tha dad par khas blang bar bya'o/ /cha shas tha dad pa yin na ni rdul phra rab kyi rdzas gcig tu mi 'grub bo//rdzas kyi dbye ba mang po snang ba'i phyir gcig nyid yod pa ma yin na ni rdul phra rab mi dmigs pas rdul phra rab rdzas su smra ba 'di thong shig /de phyir mkhas pas 'khrul pa tsam/ /yang dag don du min par brtag /gang gi phyir de ltar khams gsum pa 'khrul pa tsam yin pa de'i phyir mkhas pa legs pa thob par 'dod pas 'di la yang dag pa'i don du brtag par mi bya'o//gal te 'di snyam du bum pa la sogs pa phyi rol gyi dngos po de dag ni/ ngo bo nyid mi rtogs pa'i phyir med pa las kun tu brtags pa yin pa bden no//de dag la dmigs pa'i rnam pa can 'khrul pa'i shes pa 'di ni yod de / dper na sgyu ma'i skyes bu dang dri za'i grong khyer la sogs pa med kyang de dag la dmigs pa'i rnam pa can gyi shes pa lta bu'o zhes bya ba 'dod do zhe na/ 'khrul na de yang ma dag phyir/ /ji ltar snang ba de ltar med//don yod ma yin snang ba ni/ /ji ltar de yi bdag nyid 'gyur/ /'khrul pa de yang rdzas kyi rang gi ngo bo gang yin pa de shes pa yin na rdzas de ni rang gi ngo bo nyid de lta bur yod pa ma yin te / 'di ni bshad zin to/ /don med na yang rang gi ngo bos ni nus pa med pas ma dag par 'gyur ro//ma dag pa'i phyir 'khrul pa'i ngo bo nyid de lta bur yod do zhes bya bar ji ltar shes/ 'di ltar 'jig rten na yang sa bon la sogs pa skyed par byed pa med na/ bskyed par bya ba myu gu la sogs pa yod do zhes bya ba'i chos de lta bu yang ma mthong ngo / /de nyid kyi phyir bdag ni sgyu ma'i skyes bu'i dpe yang ma grub par 'chad do//gang zhig zhib mo'i blo yis ni/ /thams cad brtags pa kho nar shes/ /blo ldan des ni chags la sogs/ /bde bar sbrul gyis skrag bzhin spong / /'di skad bshad pa'i rnam pas brtags pa tsam du yod pa'i khams gsum pa 'di la gang zhig bum pa la sogs pa rags pa'i blo bsal te/zhib mo'i blos rdzas su med pa tha snyad tsam yin par nges par 'dzin pa de ni ji ltar thag pa la sbrul lo snyam pa'i shes pas kun nas bslang ba'i 'jigs pas de'i khyad par rnam par dpyad nas thag par nges pa ni /sbrul gyis skrag pa med pa bzhin du des kyang 'dod chags la sogs pa skyed par byed pa'i dngos po nyid dag la yongs su brtags pas/ 'dod chags la sogs pa nyon mongs pa'i dra ba rnams bde bar dka' ba med par ring por mi thogs pa kho nar spong bar 'gyur ro//'jig rten pa yi don rtogs pas/ /'jig rten bzhin du bsgrub par bya/ /kun nas nyon mongs spong 'dod pas/ /dam pa'i don gyis btsal bar bya/ /ji ltar 'jig rten pa'i bum pa la sogs pa'i don la yod pa'i ngo bor rtog pas 'di ni bum pa'o/ /snam bu'o/ /shing rta'o zhes tha snyad 'dogs pa de bzhin du sngon gyi sgrub pas tha snyad du bya'o //de'i 'og tu 'dod chags la sogs pa nyon mongs pa spong bar 'dod pa rnams kyis/ ji skad bshad pa'i don dam pa'i mtshan nyid kyi dngos po rnams la yongs su btsal bar bya ste/ de ltar dngos po rnams la yongs su tshol ba na 'di'i 'dod chags la sogs pa'i nyon mongs pa'i dri ma phyis mi skye bar 'gyur ro//rab tu byed pa lag pa'i tshad kyi 'grel pa slob dpon 'phags pa'i lhas mdzad pa rdzogs so// //rgya gar gyi mkhan po dA na shI la dang / lo tsA ba dge slong dpal 'byor snying pos bsgyur cing /