CLOSE WINDOW

D3842
བོད་ཡིག

@##/ /rgya gar skad du/ bud+d+ha pA li ta mU la ma d+h+ya ma ka br-it+ti/ bod skad du/ dbu ma rtsa ba'i 'grel pa bud+d+ha pA li ta/ bam po dang po/ dkon mchog gsum la phyag 'tshal lo/ /'jam dpal gzhon nur gyur pa la phyag 'tshal lo/ /slob dpon 'phags pa klu sgrub la phyag 'tshal lo//slob dpon btsun pa bud d+ha pA li ta la phyag 'tshal lo/ /'di ltar slob dpon rten cing 'brel par 'byung ba rjes su ston par bzhed pas/ rten cing 'brel par 'byung ba'i zab mo nyid yang dag pa ji lta ba bzhin du gzigs pas ngo mtshar du gyur pa'i thugs dang ldan pa/dad pa las byung ba'i mchi ma dkrug ces mdzad pa'i spyan mnga' ba/ sku'i spu zing zhes mdzad pa dang ldan pas thal mo sbyar ba dbur bzhag ste/ de bzhin gshegs pa rnams ni chos kyi sku'o zhes don dam pa ston pa'i tshigs su bcad pa 'di brjod pas mdun du 'dug pa dang 'dra bar bzhag nas/de bzhin gshegs pa bla ma dam pa la/ gang gis rten cing 'brel par 'byung / /'gag pa med pa skye med pa/ /chad pa med pa rtag med pa/ /'ong ba med pa 'gro med pa/ /tha dad don min don gcig min/ /spros pa nyer zhi zhi bstan pa/ /rdzogs pa'i sangs rgyas smra rnams kyi//dam pa de la phyag 'tshal lo/ /zhes rgyu snga na yod pa'i phyag bzhes pa mdzad de/ gang gis dbang phyug dang dus dang rdul phran dang rang bzhin dang ngo bo nyid la sogs par smra ba spros pa thibs por 'khyams pa'i 'jig rten la/ rten cing 'brel par 'byung ba zhes bya ba don dam pa'i bden pa mchog tu zab pa/'gag pa med pa skye ba med pa/ chad pa med pa rtag pa med pa/ 'ong ba med pa 'gro ba med pa don tha dad ma yin pa/ don gcig ma yin pa/ spros pa thams cad nye bar zhi ba mya ngan las 'das pa'i grong khyer du 'gro ba/zhi ba lam drang po 'di bstan pa/ yang dag par rdzogs pa'i sangs rgyas smra ba rnams kyi dam pa de la phyag 'tshal lo/ /zhes bya ba yin no/ /bcom ldan 'das kyis phyi rol pa phas kyi rgol ba thams cad byis pa bla ba 'dra bar thugs su chud nas 'gro ba long ba lag nom byed pa lta bu la rten cing 'brel par 'byung ba bstan par slob dpon gyis yang dag par gzigs pas smra ba rnams kyi dam pa zhes gsungs so//'gag pa med pa zhes bya ba ni 'di la 'gag pa yod pa ma yin pa'o/ /tshig lhag ma rnams la yang de bzhin du sbyar bar bya'o/ /tshigs su bcad pa de ni mdo lta bu ste/bstan bcos lhag mas de rnam par bshad pa byed par 'gyur ro/ /de yang brjod pa la mngon par zhen pa'i dbang gis sgo de dang des byed par 'gyur gyi go rims ji lta ba bzhin du ni mi byed do/ /ci ste rten cing 'brel par 'byung ba rjes su bstan pa la dgos pa ci yod ce na/bshad pa/ slob dpon thugs rje'i bdag nyid can gyis sems can rnams sdug bsngal sna tshogs kyis nyen par gzigs nas de dag rnam par grol bar bya ba'i phyir dngos po rnams kyi yang dag pa ji lta ba nyid rab tu bstan par bzhed pas rten cing 'brel par 'byung ba rjes su bstan pa brtsams te/yang dag ma yin mthong ba 'ching / /yang dag mthong ba rnam par grol/ /zhes gsungs pa'i phyir ro / /dngos po rnams kyi yang dag pa ji lta ba bzhin nyid gang yin/ bshad pa/ ngo bo nyid med pa nyid de/ mi mkhas pa gti mug gi mun pas blo gros kyi mig bsgribs pa ni dngos po rnams la ngo bo nyid du rnam par rtog na de dag la 'dod chags dang zhe sdang dag skyed par byed do//gang gi tshe rten cing 'brel par 'byung ba shes pa'i snang bas gti mug gi mun pa bsal cing / shes rab kyi mig gis dngos po rnams kyi ngo bo nyid med pa nyid mthong ba de'i tshe na gnas med pa la de'i 'dod chags dang zhe sdang dag mi skye'o//'di lta ste dper na la la zhig gzugs brnyan gyi bud med la bud med do snyam pa'i blo gros skyes nas kun tu 'dod chags skyed de de dang 'brel pa'i yid kyis de la rnam par rtog par byed do/ /gang gi tshe yang dag pa ji lta ba bzhin du rtogs pa de'i tshe na bud med kyi blo gros med par gyur cing 'dod chags dang bral nas shin tu ngo tsha ba skyes te/rang bzhin gyi sems gnas med pa la 'dod chags skye ba la 'phya ba de dang 'dra ste de ltar bcom ldan 'das kyis kyang dge slong dag bud med la nang gi bud med kyi dbang po yang dag par rjes su mi mthong ste/dge slong dag gal te bud med yin na nang gi bud med kyi dbang po yang dag par rjes su mi mthong ngo / /zhes rgya cher bka' stsal to/ /de'i phyir slob dpon 'phags pa lhas kyang / srid pa'i sa bon rnam shes te/ /yul rnams de yi spyod yul lo/ /yul la bdag med mthong na ni//srid pa'i sa bon 'gag par 'gyur/ /zhes gsungs so/ /de lta bas na slob dpon gyis dngos po rnams kyi ngo bo nyid med pa nyid rab tu bstan pa'i phyir 'di brtsam mo / /'dir smras pa/ gang gi tshe de bzhin gshegs pa thams cad mkhyen pa thams cad gzigs pa thugs rje chen po mnga' ba nyid kyis rten cing 'brel par 'byung ba de dang der de lta de ltar bshad cing rab tu bstan zin na/yang de rjes su rab tu bstan pa la dgos pa ci yod/ bshad pa/ de bzhin gshegs pa nyid kyis rten cing 'brel par 'byung ba bshad cing rab tu bstan pa bden mod kyi/ 'on kyang 'jig rten gyi tha snyad kyi dbang gis skye ba la sogs pa'i brjod pa dag gis bshad cing rab tu bstan pas/ de la da ltar nyid kyang brjod pa tsam la mngon par zhen pa'i blo can kha cig rten cing 'brel par 'byung ba mchog tu zab pa ma rtogs pa na/ dngos po rnams ni yod pa kho na yin te/gang gi phyir de dag gi skye ba dang 'gag pa dang 'gro ba dang 'ong ba dag brjod pa'i phyir ro/ /gang zhig yod pa las rtag pa dang chad pa dang de nyid dang gzhan nyid du sems pa dag byed kyi/ ri bong gi rwa la sogs pa med pa dag la de dag mi 'byung ngo snyam du sems pa de dag la rten cing 'brel par 'byung ba'i ngo bo nyid rab tu bstan pa'i phyir slob dpon gyis rigs pa dang lung sngon du btang ba 'di brtsams so//gzhan yang gang kho na'i phyir de bzhin gshegs pas rten cing 'brel par 'byung ba bshad cing rab tu bstan pa de kho na'i phyir slob dpon gyis rjes su rab tu bstan par 'thad kyi/ ma bshad cing rab tu ma bstan par rjes su rab tu ston par 'os pa de gang zhig yin/ 'di ltar 'jig rten pa'i bstan bcos dag kyang sngon gyi slob dpon rnams kyis bshad cing rab tu bstan pas da ltar nyid kyang de rnams kyi slob ma dag rjes su smra bar byed do/ /de'i phyir slob dpon gyis rjes su rab tu bstan par rigs so//'dir smras pa/ ci'i phyir 'gag pa la sogs pa brgyad po de dag 'gog par byed/ 'gag pa med pa skye med pa/ /chad pa med pa rtag med pa/ /zhes bya ba de tsam zhig byas pas mi chog gam/ bshad pa/ dngos po'i ngo bo nyid smra ba dag phal cher tha snyad kyi dbang gis bstan pa 'gag pa la sogs pa brjod pa brgyad po de dag gis dngos po yod pa nyid du ston par byed pas de'i phyir 'gag pa la sogs pa brgyad po de dag nyid dgag pa mdzad do//de bzhin du de kho na sems par byed pa'am/ 'gyed pa rtsom par byed pa gang dag ci yang rung ba de dag kyang 'gag pa la sogs pa'i don de dag la brten nas sems pa dang rtsom par byed de /'di lta ste/ re zhig kha cig na re dngos po thams cad ni skye ba dang 'gag pa'i chos can skad cig ma ste rgyun gyis rgyun du 'byung ngo / /zhes zer ro/ /gzhan dag na re sa la sogs pa rdzas dgu po dag rtag ces zer ro//yang gzhan dag ni chos dang chos ma yin pa dang / gang zag nam mkha' dang / dus dang gang zag dang srog ces bya ba rdzas drug po dag rtag ces brjod do/ /de bzhin du phal cher srog dang lus gnyis/ me dang bud shing gnyis/ rgyu dang 'bras bu gnyis/yon tan dang yon can gnyis/ yan lag dang yan lag can gnyis ni de nyid dang gzhan nyid ces bya ba 'gyed par byed do/ /de bzhin du kha cig na re yon tan bya ba dang ldan pa rnams dang rtag 'khor lo zhes zer ro/ /gzhan dag na re rdul phran dang yid gnyis ni mi 'gro'o zhes zer ro/ / gzhan dag ni srog dang gang zag gnyis 'gro ba dang ldan zhes brjod do/ /grub nas gang du 'gro bar yang 'dod do/ /de'i phyir de kho na sems pa dang 'gyed pa rtsom pa'i dbang gis 'gag pa la sogs pa brgyad po dgag par mdzad do/ /'dir smras pa/ 'o na ci'i phyir 'gag pa sngar bkag pa /skye ba phyis bkag /skye ba med pa sngar brjod par bya ba'i rigs snyam na/ bshad pa/ de ni klan kar mi rung ste/ /ci'i phyir zhe na/ yi ge la mkhas pa rnams ni bsdu ba la sbyor ba ltag 'og nges pa yod kyi/ gzhan la ni nges pa med pa'i phyir ro/ /'dir smras pa/ de lta na yang skye ba yod na 'gag par 'gyur gyi med na mi 'gyur ba go rims bzhin du sngar skye ba med pa zhes brjod par bya ba kho nar 'gyur ro//bshad pa/ grogs po 'di ltar skye ba snga la 'gag pa 'phyi'o/ /zhes bya bar gang gis kho bo cag yid ches par 'gyur ba'i dpe 'ga' zhig je gyis shig smras pa thams cad kyang dpe yin te/ji ltar zhe na/ re zhig skye 'di don med gang phyir skye ba yod na rga shi dang / /nad dang sdug bsngal bsad dang bcings la sogs pa'i dgra dag yod/ /ces bya ba bzhin no/ /bshad pa/ gang la 'chi ba yod pa'i skye ba gang yin pa de la yang 'chi ba sngon du 'gro ba kho na yin pa snyam/gal te de 'chi ba sngon du 'gro ba ma yin na ni 'khor ba la thog ma yod par thal bar 'gyur bas/ de yang mi 'dod de/ de'i phyir 'khor ba la thog ma dang tha ma med pa'i phyir skye ba snga la 'chi ba 'phyi ba'am 'chi ba snga la skye ba 'phyi'o zhes bya bar brjod par mi nus so//'og nas kyang / gal te skye ba snga gyur la/ /rga shi 'phyi ba yin na ni/ /rga shi med par skye ba dang / /ma shi bar yang skye bar 'gyur/ /zhes 'byung ngo / /smras pa 'o na/ gal te 'jig mang skye ba med na don med de mi 'byung / /shing skyes med na nags med rlung gis sgyel bar mi 'gyur bzhin//zhes bya ba 'dis ni dpe gzhan yin no/ /bshad pa/ 'di la khyad par ci yod/ smras pa/ khyad par ni 'di yin te/ gang gi phyir 'di la 'gag pa sngon du 'gro ba'i skye ba med do / /'di ltar shing ljon pa gzhan du 'gags la 'dir skyes pa med pa'i phyir ro/ / bshad pa/ 'di la yang sa bon 'gag pa sngon du 'gro ba las skye bas de yang 'gag pa sngon du 'gro ba kho na las skye ba yin no/ /'dir smras pa/ de ni mi 'dra ste/ ci'i phyir zhe na/ gzhan kho na 'gags la gzhan kho na skye ba'i phyir te/ 'di ltar 'di la sa bon 'gags la myu gu skye'i myu gu nyid 'gags la myu gu nyid mi skye bas de'i phyir de ni mi 'dra'o//bshad pa/ de ni 'dra ba kho na ste/ ci'i phyir zhe na/ 'di ltar skye ba dang 'chi ba gnyis kyang gang kho na shi ba de nyid skye ba ma yin pa'i phyir te/ gal te gang kho na 'chi ba de nyid skye bar 'gyur na ni de lta na rtag pa'i skyon du thal bar 'gyur te/lha gang yin pa de yang lha kho nar 'gyur la/ dud 'gro gang yin pa de yang dud 'gro kho nar 'gyur ro/ /de lta yin na las dang nyon mongs pas byas pa'i skye ba dang 'gro ba 'khrul pa med par 'gyur bas de yang mi 'dod de/ de nas gang kho na 'chi ba de nyid skye bar 'gyur ro//zhes bya ba de brjod par mi nus pas de'i phyir de'i 'dra ba kho na'o/ /'di la gzhan kho na 'gag /gzhan kho na skye'o zhes pa gang yin pa de yang mi rigs te/ gal te sa bon dang myu gu gnyis gzhan nyid yin par gyur na de gnyis la rgyu dang 'bras bu'i tha snyad kyang med par 'gyur ba zhig na tha snyad yod pas de'i phyir de gnyis gzhan nyid ma yin no//gzhan yang 'di na smra ba po dag sa bon btab nas bdag gis shing ljon pa 'di btsugs/ bdag gis bu 'di bskyed de/ shing ljon pa 'di ni bdag gi'o/ /bu 'di ni bdag gi'o zhes zer ro/ /de la gal te sa bon dang shing ljon pa dang bu dag gzhan nyid yin par gyur na 'jig rten gyi tha snyad de dag mi srid par 'gyur ba zhig na srid pas de'i phyir sa bon dang myu gu gnyis gzhan nyid du brjod par mi nus te/'og nas kyang / gzhan ni gzhan las brten te gzhan/ /gzhan med gzhan las gzhan mi 'gyur/ / gang las brten te gang yin pa/ /de ni de las gzhan mi 'thad/ /ces 'byung ngo / /'dir smras pa/ de lta na yang sa bon yod pa nyid yin na 'gag par 'gyur gyis med na mi 'gyur bas 'di yang skye ba snga la 'gag pa 'phyi bar 'gyur ro/ /bshad pa/ 'di ltar sa bon de la yang sa bon 'gag pa sngon du 'gro ba nyid yod de/ci'i phyir zhe na/ 'di ltar myu gu las kyang shing ljon pa gzhan ma yin la shing ljon pa las kyang sa bon gzhan ma yin pa'i phyir sa bon 'gag pa sngon du 'gro ba las myu gu skye la/ sa bon yang sa bon 'gag pa sngon du 'gro ba las skye ste/de ltar slob dpon 'phags pa lhas kyang / sa bon dpe ni ji lta bar/ /de la thog ma yod ma yin/ /de ltar rgyu dang mi ldan las/ /skye ba'ang srid par mi 'gyur ro/ /zhes gsungs so/ /de'i phyir skye ba dang 'gag pa gnyis la snga phyi'i rnam par bzhag pa med pas ci'i phyir 'gag pa sngar bkag la skye ba phyis bkag ces bya ba de klan kar mi rung ngo //de gnyis la snga phyi'i rnam par bzhag pa med pa de nyid rab tu bstan pa'i phyir slob dpon gyis 'dir 'gag pa sngar gzung ba mdzad la skye ba phyis brtags so/ /'dir smras pa/ re zhig ji ltar skye bar brjod pa tha snyad tsam yin pa de ltar rab tu ston cig /bshad pa te por bstan par bya'o/ /bdag las ma yin gzhan las min/ /gnyis las ma yin rgyu med min/ /dngos po gang dag gang na yang / /skye ba nam yang yod ma yin/ /'di la gal te dngos po 'ga' zhig skye bar gyur na/ dngos po de'i skye ba de bdag las sam/gzhan las sam/ bdag dang gzhan gnyis las sam/ rgyu med pa las 'gyur grang na/ brtags nas rnam pa thams cad las mi 'thad do/ /ji ltar zhe na/ bdag las zhes bya ba ni bdag nyid las zhes bya ba'i tha tshig go/ /de la re zhig dngos po rnams bdag gi bdag nyid las skye ba med de/de dag gi skye ba don med pa nyid du 'gyur ba'i phyir dang / skye ba thug pa med par 'gyur ba'i phyir ro/ /'di ltar dngos po bdag gi bdag nyid du yod pa rnams la yang skye ba dgos pa med do/ /gal te yod kyang yang skye na nam yang mi skye bar mi 'gyur bas de yang mi 'dod de/de'i phyir re zhig dngos po rnams bdag las skye ba med do/ /gzhan las kyang skye ba med de / ci'i phyir zhe na/ thams cad las thams cad skye bar thal bar 'gyur ba'i phyir ro/ /bdag dang gzhan gnyis las kyang skye ba med de/gnyi ga'i skyon du thal bar 'gyur ba'i phyir ro / /rgyu med pa las kyang skye ba med de/ rtag tu thams cad las thams cad skye bar thal bar 'gyur ba'i phyir dang / rtsom pa thams cad don med pa nyid kyi skyon du 'gyur ba'i phyir ro/ /de ltar gang gi phyir dngos po skye ba rnam pa thams cad du mi 'thad pas de'i phyir skye ba med pas skye bar brjod pa ni tha snyad tsam yin no//smras pa/ dngos po rnams bdag las skye ba med de/ 'di ltar myu gu de nyid las ji ltar skye zhes bshad pa gang yin pa dang / bdag las skye ba med na bdag dang gzhan gnyis las skye ba de yang mi rigs te/ phyogs gcig nyams pa'i phyir ro zhes bya ba dang / 'di ltar rgyu med pa las skye'o zhes bya ba'i phyogs de ni tha chad yin pas de dag ni re zhig khas mi len to/ /dngos po rnams gzhan las skye ba med pa kho na'o/ /zhes bya ba de nges par gzung ste bshad pa gang yin pa de la smra bar bya ste/rkyen rnams bzhi ste rgyu dang ni/ /dmigs pa dang ni de ma thag /bdag po yang ni de bzhin te/ /rkyen lnga pa ni yod ma yin/ /lnga pa yod pa ma yin zhes bya bas ni slob dpon kha cig gis rkyen bzhi po 'di las gzhan gang dag tha snyad du brjod pa de dag thams cad kyang rkyen bzhi po 'di dag tu 'dus so//zhes nges par 'dzin par byed do/ /de rab tu bstan pa'i phyir rgyu la sogs pa rkyen bzhi po de dag dngos po rnams skyed pa'i rkyen du bstan te/ rkyen bzhi po de dag las dngos po rnams skye bar 'gyur ro/ /gang gi phyir rkyen bzhi po gzhan du gyur pa de dag las dngos po rnams skye bar 'gyur ba de'i phyir dngos po rnams gzhan las skye ba med pa kho na'o//zhes bya ba de bzang po ma yin no/ /bshad pa/ gal te khyod kyis rgyu la sogs pa rkyen bzhi po gang dag gzhan yin par tha snyad btags pa de dag dngos po rnams las gzhan yin par gyur na ni dngos po rnams gzhan las skye bar yang 'gyur ba zhig na/de dag ni gzhan yin par mi 'thad do/ /ji ltar zhe na/ dngos po rnams kyi rang bzhin ni/ /rkyen la sogs la yod ma yin/ /bdag gi dngos po yod min na/ /gzhan gyi dngos po yod ma yin/ / 'di la dngos po yod pa rnams gcig la gcig ltos nas gzhan nyid du 'gyur ba ni dper na tsai tra las gub ta gzhan du 'gyur la/ gub ta las kyang tsai tra gzhan du 'gyur ba lta bu yin na/ gnas skabs gang na sa bon la sogs rkyen rnams yod pa'i gnas skabs de na myu gu la sogs pa dngos po rnams yod pa ma yin te/de'i phyir rgyu la sogs pa rkyen rnams yod pa na myu gu la sogs pa dngos po rnams kyi rang bzhin yod pa ma yin no/ /de rnams kyi bdag gi dngos po yod pa ma yin na rgyu la sogs pa dag ji ltar gzhan du 'gyur / de lta bas na rgyu la sogs pa rkyen rnams myu gu la sogs pa dngos po rnams las gzhan nyid yin par mi 'thad do//de'i phyir gzhan gyi dngos po med pa kho na'i phyir dngos po rnams gzhan las skye'o/ /zhes bya ba de 'thad pa ma yin no/ /rkyen la sogs la/ zhes bya ba la sogs pa smos pa ni gzhan gyi gzhung lugs kyang nges par gzung ba'i phyir te/des na gzhan gyi gzhung lugs dag la yang dngos po rnams skye ba mi 'thad par rab tu bstan pa yin no/ /'dir smras pa/ gzugs la sogs pa rkyen rnams yod na rnam par shes pa skye ba ma yin nam bshad pa/ ma yin te dngos po rnams kyi skye ba 'di brtag par bya'o//khyod rnam par shes pa ma skyes pa rkyen gzhan du gyur pa dag las skye bar 'dod na/ rnam par shes pa ma skyes pa la bdag gi dngos po ga la yod/ bdag gi dngos po med na gzhan gyi dngos po yang ga la yod/ gzhan gyi dngos po med na de myu gu la sogs pa dang mtshungs pa yin no//yang na 'di ni don gzhan yin te/ dngos po rnams kyi rang bzhin ni rkyen rnams la yang yod pa ma yin/ rkyen rnams las gzhan pa la yod pa ma yin/ gnyi ga la yang yod pa ma yin no/ /ci'i phyir zhe na/ skye ba'i rkyen du brtag pa don med pa nyid kyi skyon du 'gyur ba'i phyir te/'di ltar gal te dngos po rnams kyi rang bzhin rkyen rnams la'am rkyen rnams las gzhan pa la'am/ gnyi ga la yod par gyur na/ yod pa la skye ba ci zhig bya ste/ dngos po rang bzhin gyis yod pa rnams la yang skye bar brtag pa don med pa nyid du 'gyur ro//yod pa la rkyen rnams kyis kyang ci zhig bya ste/ rkyen du brtag pa yang don med pa nyid du 'gyur ro/ /de lta bas na/ dngos po rnams kyi rang bzhin ni/ /rkyen la sogs la yod ma yin/ /gang rkyen la sogs pa la yod pa ma yin pa de ni bdag gi dngos po yod pa ma yin pa ste/de dag las gzhan du yongs su brtag tu med pa'i phyir ro/ /bdag gi dngos po yod min na/ /gzhan gyi dngos po yod ma yin/ /gzhan gyi dngos po med na su zhig dngos po rnams gzhan las skye ba'o zhes smra bar rigs/ 'dir smras pa/ dngos po rnams bdag dang gzhan la sogs pa las skye'o zhes bya ba 'dis kho bo cag la ci bya ste/'di ltar mig la sogs pa ni rnam par shes pa skye bar bya ba'i rkyen yin no/ /de yang ji ltar zhe na/ 'di la skye ba'i bya ba ni skyed pa dang skye ba dang 'byung ba ste gtso cher rnam par shes pa la 'jug go//rnam par shes pa ni skye ba yin no/ /'di ltar mig la sogs pa ni rnam par shes pa skye ba'i bya ba de sgrub par byed pa yin te/ sgrub par byed pa yin pa'i phyir rkyen yin no/ /dper na btso ba'i bya ba ni 'tshed pa dang btsed pa ste gtso cher 'bras chan la 'jug cing /'bras chan ni btso ba yin la/ mi dang snod dang chu dang me dang thab la sogs pa rang rang gi bya ba byed pa dag ni btso ba'i bya ba de sgrub par byed pa'i rkyen dag yin par mthong ba bzhin no/ /'dir bshad pa/ bya ba rkyen dang ldan ma yin/ 'di la khyed na re mig la sogs pa ni rnam par shes pa skye ba'i bya ba sgrub par byed pa yin pa'i phyir rnam par shes pa'i rkyen yin la/de nyid kyang rnam par shes pa la 'jug go zhes zer ba ni bya ba brtags na mi 'thad pas mig la sogs pa dag de sgrub par byed pa yin par ga la 'gyur/ gal te ji ltar zhe na/ de'i phyir bshad pa 'di la skye ba'i bya ba ni rnam par shes pa ma skyes pa'am skyes pa la 'jug par 'gyur grang na/de la re zhig ma skyes pa la ni mi 'jug ste/ gnas pa med pa'i phyir ro/ /'di ltar skye ba'i bya ba ni rnam par shes pa'i gnas la 'jug gi /gnas med pa la mi 'jug pas rnam par shes pa ma skyes pa de yang med pa yin la/de med na skye ba'i bya ba de la gnas pa yod par ga la 'gyur/ rnam par shes pa skyes pa la yang skye ba'i bya ba mi 'jug ste/ ci'i phyir zhe na/ rnam par shes pa skyes zin pa'i phyir te/ 'di ltar skyes zin pa la ni yang skye ba med do//de la 'di snyam du rnam par shes pa skye bzhin pa la skye ba'i bya ba yod par sems na/ de yang mi rung ste/ ci'i phyir zhe na/ skyes pa dang ma skyes pa ma gtogs par skye bzhin pa med pa'i phyir ro/ /skye ba dang ma skyes pa gnyis la skye ba'i bya ba mi 'jug par ni bstan zin pas de'i phyir skye ba'i bya ba med do//'dis btso ba'i bya ba yang bsal te/ de lta bas na bya ba rkyen dang ldan pa mi 'thad do/ /de la 'di snyam du rkyen dang mi ldan pa'i bya ba yod par sems na/ bshad pa/ rkyen dang mi ldan bya ba med/ /'di ltar rkyen dang mi ldan pa'i bya ba med do//gal te yod par gyur na rtag tu thams cad las thams cad skye bar 'gyur ro/ /de lta yin na rtsom pa thams cad don med pa nyid du 'gyur bas de yang mi 'dod de/ de'i phyir rkyen dang mi ldan pa'i bya ba yang mi 'thad do/ /'dir smras pa/ re zhig rkyen rnams ni yod do //de dag yod pas dngos po 'grub bo/ /de grub pas skye ba 'grub bo/ /bshad pa/ bya ba mi ldan rkyen ma yin/ /gang dag la bya ba med pa de dag ni rkyen ma yin no/ /ji ltar zhe na/ mig la sogs pa ni skye ba'i bya ba sgrub par byed pas rnam par shes pa'i rkyen du 'gyur na/skye ba'i bya ba de mi 'thad par ni sngar rab tu bstan zin to/ /de med pa'i phyir de sgrub par byed pa yod par ga la 'gyur/ de sgrub par byed pa med pa'i phyir mig la sogs pa skye bar bya ba'i rkyen ma yin no/ /skye bar bya ba'i rkyen ma yin na ji ltar rkyen du 'gyur/ ci ste 'gyur na ni thams cad kyang thams cad kyi rkyen du 'gyur ro/ /de lta yin na thams cad las thams cad skye bar 'gyur ba zhig na/ de ltar yang mi 'gyur te/ de'i phyir bya ba dang mi ldan pa rnams rkyen ma yin no/ /smras pa/ ci kho bo rkyen rnams bya ba dang mi ldan no zhes smra'am/ 'di ltar rkyen rnams ni bya ba dang ldan pa kho na yin no/ /bshad pa/ bya ba ldan nam 'on te na ma yin zhes bya ba'i skabs de dang sbyar te rkyen rnams bya ba dang ldan pa ma yin no/ /bya ba rkyen dang ldan pa ma yin pa dang rkyen dang mi ldan pa med pa de ni sngar rab tu bstan pa kho na yin no/ /bya ba med na ji ltar rkyen rnams bya ba dang ldan par 'gyur/de ltar na gang gi phyir bya ba dang mi ldan pa'i rkyen kyang mi 'thad la/ bya ba dang ldan pa yang med pas de'i phyir rkyen du rnam par brtag pa ni don med pa nyid do/ /'dir smras pa/ ci'i rkyen rnams bya ba dang mi ldan no zhe'am/ bya ba dang ldan no zhes bya ba mi dgos pa bsam pa 'dis ci bya/gang gi phyir rnam pa thams cad du rgyu la sogs pa'i rkyen bzhi po de dag la brten nas dngos po rnams skye bas de'i phyir de dag dngos po'i rkyen yin no/ /bshad pa/ ci khyod nam mkha' la khu tshur dag gis brdeg gam/gang gi tshe skye ba'i bya ba med pa kho na ste de med pa'i phyir rkyen rnams mi 'thad do zhes sngar bstan pa'i tshe de dag la brten nas dngos po rnams skye ba zhes bya ba de ji ltar smra bar 'thad/ yang gzhan yang / 'di dag la brten skye bas na/ /de phyir 'di dag rkyen zhes grags / / ji srid mi skye de srid du/ /'di dag rkyen min ji ltar min/ /gal te 'di dag la brten nas skye bas rkyen yin no zhes de ltar rtog na/ ji srid du mi skye ba de srid du rkyen ma yin no zhes bya bar yang ci'i phyir mi brtag /ci ste sngar rkyen du ma gyur pa phyis rkyen du 'gyur bar sems na/ de yang mi 'thad de/ci'i phyir zhe na/ thams cad kyi rkyen du thal bar 'gyur ba'i phyir de yang mi 'dod do/ /ci ste rkyen ma yin pa dag kyang gzhan 'ga' zhig la ltos nas rkyen du 'gyur te/ des na thams cad kyi rkyen du thams cad thal bar mi 'gyur bar sems na/ de la yang de nyid do//gang yang rung ba la ltos nas rkyen ma yin pa yang rkyen nyid du 'gyur na/ rkyen nyid de la yang rkyen yod par 'gyur zhing / de la yang de ltar bsam dgos so/ /thug pa med pa'i skyon du yang 'gyur to / /gal te gzhan yang gzhan 'ga' zhig la ltos nas rkyen nyid du 'gyur na/de yang gzhan la ltos la de yang gzhan la ltos pas thug pa med par thal bar 'gyur bas de yang mi 'dod do/ /de'i phyir rkyen rnams mi 'thad pa kho na'o/ /yang gzhan yang / med dam yod pa'i don la yang / /rkyen ni rung ba ma yin no / /med na gang gi rkyen du 'gyur/ / yod na rkyen gyis ci zhig bya/ /'di la brten nas 'di skye'o zhes pa'i 'brel pa 'dis don 'di'i rkyen 'di'o zhes zer na/ 'di'o 'di'o zhes bya ba'i 'brel pa de yang don med pa'am yod pa'i rkyen nyid du brtag grang na/ don med pa dang yod pa'i rkyen 'di'o zhes bya bar mi rung ngo / / ji ltar zhe na/ med na gang gi rkyen du 'gyur/ /yod na rkyen gyis ci zhig bya/ /dngos po med pa'i rkyen du brtags na rkyen 'di gang gi zhes zer ba la ji skad brjod par bya/ 'di ltar snam bu med pa'i rkyen rgyu spun dag yin no zhes bstan par mi rigs so/ /smras pa/ rgyu spun dag las snam bu 'byung bas phyis 'byung ba'i tshul gyis rgyu spun dag snam bu'i rkyen yin par bstan du rung ngo //bshad pa/ ci khyod bu ma 'byung ba'i nor gyis bu'i ma kha drangs par 'dod dam/ dngos po med pa'i rkyen mi 'thad do zhes smras te/ rkyen mi 'thad pas dngos po skye ba bkag bzhin du khyod ma 'ongs pa'i dngos po skye bas rkyen nyid bsgrub par 'dod do //gang gi tshe gang du dus la lar yang / dngos po skye ba med pa la/ /med na gang gi rkyen du 'gyur/ /zhes bya ba 'di nye bar gnas pa de'i tshe dngos po phyis skye bar 'gyur ba de la ltos nas khyed kyi rkyen 'grub par 'gyur ba gang la yod/de lta bas na de ni gyi na'o/ /de la 'di snyam du yod pa'i rkyen du 'gyur sems na/ bshad pa/ yod na rkyen gyis ci zhig bya/ /dngos po yod pa la rkyen mi 'thad do/ /'di ltar yod pa la yang rkyen gyis ci zhig bya ste/ snam bu grub cing yod pa'i rkyen rgyu spun dag yin no//zhes bstan par mi rigs so/ /smras pa/ kho bo skyes pa la yang rkyen gyi bya ba yod do zhes mi smra ste 'on kyang snam bu yod pa'i rkyen rgyu spun yin par tha snyad 'dogs par byed pas snam bu de'i rkyen rgyu spun dag yin no/ /bshad pa/ ci khyod rang gi chung ma ma blangs par bu'i chung ma blang bar sems sam/dngos po yod pa skye ba'i rkyen mi 'thad pas dngos po skye ba bkag bzhin du khyod snam bu skyes pa'i rkyen ston par byed 'dod ko /'o na ni dngos po skye ba sgrub pa'i phyir je sgrims shig dang de'i 'og tu 'di'i rkyen 'di'o/ /zhes bya ba de 'thad par 'gyur ro//de lta bas na de yang gyi na'o/ /'dir smras pa/ 'di la dngos po rnams ni mtshan nyid la 'grub la/ rgyu ni sgrub par byed pa'o/ /zhes rgyu'i mtshan nyid kyang bstan pas de ltar mtshan nyid yod pa'i rgyu yod de/ bshad pa/ gang tshe chos ni yod pa dang / / med dang yod med mi 'grub pas / /ji ltar sgrub byed rgyu zhes bya/ /de ltar yin na mi rigs so/ /'di la chos gang rgyus sgrub par gyur na de yod pa'am med pa'am yod med cig sgrub par 'gyur grang na/ rnam pa thams cad mi 'thad do/ /de la re zhig yod pa ni sgrub par mi byed de/skyes zin pa'i phyir ro/ /'di ltar skyes pa la yang skye bas ci bya ste / ci ste yod kyang yang skye ba ni nam yang mi skye bar mi 'gyur bas de yang mi 'dod do/ /rgyur bstan du yang mi 'thad de/ 'di ltar yod pa la rgyus ci bya/ 'di ltar re zhig yod pa ni sgrub par mi byed do//da ni med pa yang sgrub par mi byed de med pa'i phyir ro/ /ci ste med kyang skye na ni ri bong gi rwa yang skye bar 'gyur ro/ /gal te dngos po ni rgyu las skye'o zhe na/ mi rung ste/ rgyu mi 'thad pa'i phyir ro/ /'di ltar dngos po med na gang gi rgyur ci 'gyur/ yang na ci zhig byas na rgyu'i rgyu nyid du 'gyur/'di ltar thams cad du dngos po med / de la 'di ni rgyu'o/ /'di ni ma yin no zhes bye brag bstan pa de yod par ga la 'gyur/ de lta bas na med pa yang sgrub par mi byed do/ /da ni yod med kyang sgrub par mi byed de/ yod pa dang med pa gnyis lhan cig 'byung ba 'gal ba'i phyir dang /skyon snga mar thal bar 'gyur ba'i phyir ro/ /de ltar na yod med kyang sgrub par mi byed do/ /de'i phyir de ltar brtags na gang gi tshe dngos po grub pa ji ltar yang mi 'thad pa de'i tshe/ ji ltar sgrub byed rgyu zhes bya/ /de ltar yin na mi rigs so//de ltar yin na sgrub par byed rgyu zhes bya ba de mi rigs so/ /'dir smras pa/ dmigs pa ni yod de/ rnam par shes pa la sogs pa'i gnas su gyur pa'i phyir ro/ /bshad pa/ yin pa'i chos ni dmigs pa ni/ /med pa kho nar nye bar bstan/ /'di la dmigs pa dang bcas par zhes bya ba'i tshig gi lhag ma'o//yin pa'i chos 'di dmigs pa kho na las dmigs pa dang bcas par nye bar bstan to/ /yin pa'i chos 'di dmigs pa med pa kho na las khyod kyis rang gi blo dmigs pa dang bcas pa zhes brjod do/ /ji lta zhe na 'di la dmigs pa dang bcas pa zhes bya ba ni dmigs pa yod pa zhes bya ba'i tha tshig go//chos yod pa ni dmigs pa dang bcas par 'gyur gyi med pa ni mi 'gyur ro/ /dmigs pa dang bcas pa'i sngon rol na dmigs pa med pas de ni dmigs pa med pa yin no/ /'di lta ste/ dper na nor yod pa ni nor dang bcas pa ste nor can zhes bya'o/ /'ga' zhig yod na nor dang bcas par 'gyur gyi/ med na mi 'gyur ro/ /nor dang bcas pa'i sngon rol na nor med pas de ni nor med pa yin pa bzhin no/ /de'i phyir dmigs pa med pa kho na yin pa'i chos 'di la khyed rang gi rnam par rtog pas dmigs pa dang bcas par rtog par byed do//de la kho bos bshad par bya ste/ de ltar chos ni dmigs med na/ /dmigs pa yod par ga la 'gyur/ /de ltar zhes bya ba'i sgra ni dri ba'o/ /ga la 'gyur zhes bya ba gtan tshigs bstan pa ste/ de ltar chos dmigs pa med par grub na ci'i phyir don med pa'i dmigs pa la rtog par byed/smras pa/ khyod nyid gzhung lugs khong du ma chud pa kho nas log par rtog gi /kho bo ni dmigs pa yod pa ni dmigs pa dang bcas pa ste nor dang bcas pa bzhin no zhes mi smra'o/ /de'i don ni 'di yin te chos grub pa ni gzhi gang gis sgrub par byed pa de ni de'i dmigs pa yin te/des na de dmigs pa dang bcas pa zhes nye bar ston to/ /bshad pa/ de mi 'thad de/ de la yang bshad par bya'o/ /de ltar chos ni dmigs med na/ /dmigs pa yod par ga la 'gyur/ / de ltar chos dmigs pa med de yod pa ma yin zhing mngon par ma grub na dmigs pa yod par 'thad par ga la 'gyur/ chos kyi dmigs pa zhes bya ba de yang mngon par ma grub pa kho na'o/ /mngon par ma grub cing med pa de la dmigs pa yod par ga la 'gyur/ dmigs pa med na ji ltar dmigs pas chos sgrub par byed/de'i phyir dmigs pa yang yod pa ma yin la/ chos kyang dmigs pa dang bcas pa ma yin pa kho na'o/ /'dir smras pa/ dngos po gzhan 'gags ma thag pa ni dngos po gzhan skye ba'i rkyen yin no/ /de ni de ma thag pa zhes bya ba ste de yod do//bshad pa/ chos rnams skyes pa ma yin na/ /'gag pa 'thad par mi 'gyur ro/ /de phyir de ma thag mi rigs/ /'gags na rkyen yang gang zhig yin/ /de la rtsa ba 'og ma gnyis/ /'gags na rkyen yang gang zhig yin/ /de phyir de ma thag mi rigs//zhes bsnor bar blta bar bya'o/ / zhes bya ba'i sgra ni 'dir ma skyes pa la ltos par blta bar bya'o/ /de yang ma skyes pa'i sgra la ltos nas/ 'gags na rkyen yang gang zhig yin/ /ma skyes pa'i rkyen gang zhig yin/ /zhes bya bar sbyar ro/ /de gnyis ni tshigs su bcad pa sbyar ba'i phyir go rims bzhin ma byas so//dngos po gzhan 'gag ma thag pa ni dngos po gzhan skye ba'i rkyen yin no zhes smras pa gang yin pa de mi 'thad do/ /ci'i phyir zhe na/ 'di ltar/ chos rnams skyes pa ma yin na/ /'gag pa 'thad par mi 'gyur ro/ /'gags na rkyen yang gang zhig yin//'gag pa zhes bya ba ni med pa ste/ de la gal te myu gu skye ba'i sngon rol du sa bon 'gag par 'gyur na ni sa bon 'gags te med na myu gu skye bar 'gyur ba gang yin pa de'i rkyen yang gang zhig yin/ yang na sa bon 'gag pa'i rkyen yang gang zhig yin/ sa bon 'gags te med pa yang ji ltar myu gu skye ba'i rkyen du 'gyur/myu gu ma skyes pa'i rkyen du sa bon 'gag pa ji ltar 'gyur/ de lta bas na sa bon 'gags nas myu gu skye bar rtog na de gnyi ga rgyu med par thal bar 'gyur te/ rgyu med par ni mi 'dod do/ /smras pa/ gal te myu gu skyes ma thag tu sa bon 'gag par 'gyur na/de lta na yang de ma thag 'grub ste/ 'di ltar myu gu skyes ma thag tu sa bon 'gag pa'i rkyen du 'gyur ba'i phyir ro/ /bshad pa/ de yang mi 'thad de/ ci'i phyir zhe na/ skyes na'ang rkyen du ji ltar 'gyur te/ gal te myu gu skye zhing myu gu skye ba'i bya ba mthar thug pa'i tshe sa bon 'gag par 'gyur na 'gag pa de'i rkyen yang gang zhig yin par 'gyur/myu gu skye ba'i rkyen yang gang zhig yin par 'gyur te/ de'i phyir de lta na yang de gnyi ga snga ma bzhin du rgyu med par thal bar 'gyur ro/ /ci ste sa bon 'gag bzhin pa na myu gu skye bas des na rgyu med pa'i rkyen du mi 'gyur bar sems na/de yang mi rigs te/ ci'i phyir zhe na/ gang 'gag pa dang gang skye ba de gnyi ga yang yod pa ma yin te/ ma 'gag pa'i phyir dang / skyes zin pa'i phyir ro/ /dngos po gnyis yod na/ de ma thag pa'i rkyen nyid du ji ltar 'gyur/ skye ba dang 'gag pa gnyis dus gcig tu rtog na yang de ma thag pa mi 'thad de/dus mnyam pa'i phyir ro/ /de'i phyir de ma thag mi rigs/ de ltar gang gi phyir rnam pa thams cad du brtags na de ma thag pa mi 'thad de / de'i phyir de ma thag pa'i rkyen yod do zhes smras pa gang yin pa de mi 'thad do/ / yang na 'di ni don gzhan yin te/ 'di la dngos po rnams ma skyes pa zhes bya ba de ni sngar bsgrubs zin te/ de'i phyir dngos po rnams skye ba med pa de grub par byas nas/ /bshad pa/ chos rnams skyes pa ma yin na/ /'gag pa 'thad par mi 'gyur ro/ /dngos po rnams skyes pa ma yin zhing med na 'gag pa 'thad par mi 'gyur te/med pa la ci zhig 'gag par 'gyur/ de phyir de ma thag mi rigs/ /de ltar gang gi phyir dngos po 'gag pa nyid mi 'thad pa de'i phyir de ma thag pa mi rigs so/ /de ni 'gag par rtog na yang de ma thag pa mi rigs te/ ji ltar zhe na/ 'gags na rkyen yang gang zhig yin/ skyes na'ang rkyen du ji ltar 'gyur te/ de'i don ni sngar rnam par bshad zin to/ /'dir smras pa/ bdag po nyid ni yod do/ /bdag po'i dngos po ni bdag po nyid de/ de yang mdor bsdu na gang yod na gang 'byung ba dang / gang med na gang mi 'byung ba de ni de'i bdag po nyid do//bshad pa/ dngos po rang bzhin med rnams kyi/ /yod pa gang phyir yod min na/ /'di yod pas na 'di 'byung zhes/ /bya ba de ni 'thad ma yin/ /'di la dngos po rnams kyi rang bzhin med pa nyid ni sngar yang kun tu bstan cing phyis kyang rgya cher ston to//de'i phyir de rab tu grub par byas nas dngos po rang bzhin med pa rnams kyis zhes bya ba gsungs so/ /de ltar gang gi phyir dngos po rang bzhin med pa rnams kyis yod pa zhes bya ba yod pa'i dngos po mi 'thad pa de'i phyir gang yod na 'di yod pas zhes brjod par nus pa'i dngos po de nyid med do//'di yod pas zhes bya ba 'di la med na 'di 'byung zhes bya ba de 'thad par ga la 'gyur/ 'di yod pas 'di 'byung zhes bya ba 'di la mi 'thad na gang gi bdag po nyid du ji zhig 'gyur/ de'i phyir bdag po nyid kyang mi 'thad do/ /'dir smras pa/rkyen gyi dngos po rnams 'di ltar grub par byed do zhes bya ba de smra bar mi nus mod kyi/ 'on kyang rkyen rnams ni yod pa kho na yin no/ /ci'i phyir zhe na/ de dag las 'bras bu skye ba'i phyir te/ 'di na sa bon la sogs pa rkyen rnams las myu gu la sogs pa 'bras bu skye bar mthong ste/de'i phyir de dag las 'bras bu skye bar mthong nas 'bras bu'i rkyen ni 'di dag go zhes bya bar shes so/ /bshad pa/ rkyen rnams so so 'dus pa las/ /'bras bu de ni med pa nyid/ /rkyen rnams la ni gang med pa/ /de ni rkyen las ji ltar skye/ /nyid ces bya ba'i sgra ni kho na zhes bya ba'i don to//so so ba dag la yang med pa kho na yin la/ 'dus pa dag la yang med pa kho na'o zhes bya'o/ /khyod kyis rkyen rab tu bsgrub pa'i phyir 'bras bu skye bar bstan pa gang yin pa de nyid mi 'thad na/ rkyen 'grub par ga la 'gyur ji ltar zhe na/ gang gi phyir rkyen rnams so so ba dang 'dus pa la 'bras bu de med pa nyid yin pa'i phyir te/rkyen rnams so so ba dang 'dus pa la med pa nyid gang yin pa de ji ltar de dag las skye bar 'gyur/ 'bras bu skye ba med na khyod kyis rkyen 'grub par ga la 'gyur/ de la 'di snyam du rkyen rnams las 'bras bu yod pa kho nar sems na/de lta na yang rkyen 'thad pa ma yin te/ 'di ltar yod pa la rkyen gyis bya ba med de skyes zin pa yang skyed mi dgos pa'i phyir ro/ /yang gzhan yang gal te rkyen rnams la 'bras bu de yod par gyur na/ rkyen du ma'i 'bras bu gang yin pa de rkyen re re la yongs su rdzogs par yod pa'am/cha shas cig yod par 'gyur grang na/ de la re zhig gal te re re la yongs su rdzogs par yod par brtags na ni rkyen du mar mi 'gyur te/ re re la yang yod pa'i phyir mi ltos par re re las kyang 'bras bu skye bar thal bar 'gyur ro/ /ci ste rkyen rnams la 'bras bu'i cha shas yod par brtags na ni/de lta na yang mi ltos par re re las 'bras bu'i cha shas skye bar thal bar 'gyur bas de yang mi 'dod de/ de'i phyir rkyen rnams so so ba dang 'dus pa la 'bras bu de yod par mi 'thad do/ /ci ste rkyen rnams la 'bras bu med kyang rkyen rnams las skye ste/'bras bu skye ba la ltos nas kho bo'i rkyen rab tu 'grub bo snyam du sems na/ de la bshad par bya ste/ ci ste de ni med par yang / /rkyen de dag las skye 'gyur na/ /rkyen min las kyang 'bras bu ni/ /ci'i phyir zhe na skye mi 'gyur/ /'di la 'bras bu yod pa las rkyen dang rkyen ma yin pa'i bye brag tu 'gyur na/'bras bu de yang rkyen dang rkyen ma yin pa dag la med do/ /de dag la med bzhin du gal te rkyen rnams las 'bras bu skye na ni rkyen ma yin pa rnams las kyang ci'i phyir mi skye ste/ 'di ltar rkyen dang rkyen ma yin pa rnams la 'bras bu med par mtshungs pa las/rkyen rnams las ni 'bras bu skye la rkyen ma yin pa rnams las ni mi skye ba zhes bya ba de ni yid la bsams pa tsam du zad do/ /de'i phyir 'bras bu skye ba mi 'thad de/ 'bras bu skye ba med na rkyen 'grub par ga la 'gyur/ 'dir smras pa/ rkyen rnams la 'bras bu yod pa dang med pa'i rkyen rnams las skye'o//zhes ni mi smra'o/ /'bras bu ni rkyen rnams las gyur pa'i rkyen gyi bdag nyid rkyen las byung ba yin no/ /zhes smra'o/ /de lta yin ni snam bu ni rgyu spun las gyur pa rgyu spun gyi bdag nyid las byung ba yin pas/ rgyu spun dag ni snam bu'i rkyen yin no/ / bshad pa/ 'bras bu rkyen las byung yin no / /rkyen rnams rang las byung ma yin/ /rang byung min las 'bras bu gang / /de ni ji ltar rkyen las byung / /'bras bu rkyen las gyur pa rkyen gyi bdag nyid las byung ba ma yin par brtags na/ rkyen de rnams ni rang las gyur pa ma yin/rang nyid rab tu grub pa ma yin/ rang nyid bdag nyid ma yin/ rang las byung ba ma yin te ngo bo nyid med pa yin no/ /rkyen rang las gyur pa ma yin pa/ rang nyid rab tu grub pa ma yin pa/ rang gi bdag nyid ma yin pa/ rang las byung ba ma yin pa ngo bo nyid med pa de dag las 'bras bu byung bar rtog na ji ltar rkyen las byung bar nye bar brtags na /'di ltar gal te rgyu spun dag rang nyid rab tu grub na ni rang las byung bar yang 'gyur bas/ des na snam bu rgyu spun dag las byung ba zhes bya ba de yang 'thad par 'gyur ba zhig na/ gang gi tshe rgyu dag rang nyid rab tu ma grub pa rang las byung ba ma yin pa ngo bo nyid med pa ste/rgyu dag las gyur pa rgyu dag gi bdag nyid rgyu las byung ba yin pa de'i tshe/ snam bu rgyu spun dag las byung ngo / /zhes bya ba de ji ltar 'thad par 'gyur/ slob dpon 'phags pa lhas kyang / snam bu rgyu las grub yin na//rgyu yang gzhan las grub pa yin/ /gang la rang las grub med pa/ /de yis gzhan ni ji ltar bskyed / /ces gsungs so/ /de ltar gang gi phyir rkyen rnams rang nyid rab tu ma grub rang las byung ba ma yin zhing ngo bo nyid med pa/ de'i phyir rkyen byung ma yin/ 'bras bu rkyen las byung ba ma yin no/ /de la 'di snyam du 'bras bu rkyen ma yin pa las byung bar sems na/ bshad pa/ rkyen min las byung 'bras bu ni/ /yod min/ gang gi tshe snam bu rgyu spun las byung bar mi 'thad pa de'i tshe snam bu rtsi rkyang las byung ngo / /zhes bya ba 'jig rten dang 'gal ba 'di ji ltar 'thad par 'gyur/de'i phyir 'bras bu rkyen ma yin pa las byung ba yang med do/ /smras pa/ rkyen rnams ni yod pa kho na yin te/ ci'i phyir zhe na/ rkyen dang rkyen ma yin pa nges pa'i phyir ro/ /'di na rkyen dang rkyen ma yin pa nges pa mthong ste/ 'bru dag las 'bru mar kho na 'byung gi mar mi 'byung ngo //zho las ni mar kho na 'byung gi 'bru mar mi 'byung ngo / /bye ma dag las ni de gnyi ga mi 'byung ngo / /'di ltar gang gi phyir 'di dag ni 'di'i rkyen yin no/ /'di dag ni 'di'i rkyen ma yin no zhes bya ba de yod pas de'i phyir rkyen 'grub bo//bshad pa/ 'bras bu med pas na/ /rkyen min rkyen du ga la 'gyur/ /'di la khyod kyis 'bru mar la sogs pa 'bras bu 'byung ba dang / mi 'byung ba rkyen dang rkyen ma yin par nges pa'i rgyur smras pa ni 'bras bu skye ba mi 'thad do zhes sngar bstan zin te/ 'bras bu de med na 'di dag ni 'di'i rkyen ma yin no//'di dag ni 'di'i rkyen yin no/ /zhes bya ba de 'thad par ga la 'gyur/ 'bras bu la ltos nas de gnyis su 'gyur na 'bras bu de yang med do/ /'bras bu med pas na rkyen ma yin pa dang rkyen du ga la 'gyur/ de lta bas na 'bras bu yang mi 'thad la rkyen dang rkyen ma yin pa dag kyang med do//'bras bu dang rkyen dang rkyen ma yin pa dag med pas skye bar brjod pa ni tha snyad tsam du grub bo/ /rkyen brtag pa zhes bya ba ste rab tu byed pa dang po'o// //smras pa/ khyed kyis skye ba med pa'i rigs pa 'di rjes su rab tu bstan pas kho bo'i yid stong pa nyid nyan pa la ngo mtshar snying po can du byas kyis/ji ltar 'jig rten gyis mngon sum gyi 'gro ba dang 'ong ba mi 'thad pa de je smros shig /bshad pa/ re zhig song la 'gro med de/ /ma song ba la'ang 'gro ba med/ /'di la gal te 'gro ba zhig yod par gyur na/ de song ba la'am/ma song ba la yod par 'gyur grang na/ de la re zhig song ba la ni 'gro ba med do/ /'gro ba'i bya ba 'das zin pa'i phyir ro/ /ma song ba la yang 'gro ba med de/ 'gro ba'i bya ba ma brtsams pa'i phyir ro/ /smras pa/ de ni de bzhin te/ song ba dang ma song ba la 'gro ba med mod kyi/'on kyang bgom pa la 'gro ba yod do/ /bshad pa/ song dang ma song ma gtogs par/ /bgom pa shes par mi 'gyur ro/ /song ba dang ma song ba ma gtogs par bgom pa ci zhig yod do / /shes par mi 'gyur ro/ /ji ltar zhe na/ 'di ltar/ shes par mi 'gyur ro//zhes bya ba ni/ gzung du med pas te mi 'thad do zhes bya ba'i tha tshig go/ /de ltar gang gi phyir song ba dang ma song ba ma gtogs par bgom pa gzung du med pa kho na ste mi 'thad pa de'i phyir med pa kho na yin pas 'gro ba med do/ /smras pa/ bgom pa kho na yin te/ de la 'gro ba yod do//ji ltar zhe na/ gang na g.yo ba de na 'gro/ /de yang gang gi bgom pa la/ /g.yo ba song min ma song min/ /de phyir bgom la 'gro ba yod/ /'di la khyod kyi 'gro ba med pa'i gtan tshigs su 'gro ba'i bya ba 'das zin pa dang ma brtsams pa bstan pa de'i phyir/ gang na g.yo ba de na 'gro//zhes bya ba 'di 'byung bar 'gyur te/ de yang gang gi bgom pa la g.yo ba de dmigs pa na'o/ /gang gi zhes bya ba ni 'gro ba po'i zhes bya ba'i tha tshig go/ /de ltar gang gi phyir g.yo ba ni song ba la med/ ma song ba la yang med kyi bgom pa la yod pa de'i phyir gang na g.yo ba yod pa de na 'gro ba yod do//de ltar 'gro ba yod pas bgom pa la 'gro ba yod do/ /bshad pa/ bgom la 'gro ba yod par ni/ /ji lta bur na 'thad par 'gyur/ /gang tshe 'gro ba med pa yi/ /bgom pa 'thad pa med phyir ro/ /'di la khyod 'gro ba dang ldan pas bgom par 'dod la de la 'gro ba yod do zhes zer na 'di la 'gro ba'i bya ba ni gcig tu zad la/de ni bgom pa zhes bya ba de la nye bar sbyar bas de'i phyir 'gro ba zhes bya ba de ni 'gro ba'i bya ba dang bral bas 'gro ba med par thal bar 'gyur ro/ /de yang mi 'thad de/ 'di ltar 'gro ba med par ji ltar 'gro bar 'gyur/ de la gang gi tshe 'gro ba zhes bya ba de 'gro ba'i bya ba dang bral bas mi 'thad pas de'i tshe bgom pa la 'gro ba yod par ji ltar 'thad par 'gyur/ yang gzhan yang / bshad pa/ gang gi bgom la 'gro yod pa/ /de yi bgom la 'gro med par//thal bar 'gyur te gang gi phyir / /bgom pa khong du chud phyir ro/ /gang gi blo la skyon der gyur na mi rung ngo snyam pas 'gro ba zhes bya ba de 'gro ba dang ldan pas 'gro bar sems pa de'i yang 'gro ba 'gro ba zhes bya ba de la nye bar sbyar ba byas pas bgom pa ni 'gro ba med pa 'gro ba dang bral ba grong dang grong khyer lta bur thal bar 'gyur te/dper na grong 'gro zhes bya ba de bzhin du bgom pa yang thal bar 'gyur bas de yang mi 'dod de/ de'i phyir bgom pa la 'gro ba yod do/ /zhes bya ba de ji ltar yang mi 'thad do/ /ci ste skyon der gyur na mi rung ngo snyam pas 'gro zhes bya ba de dang bgom pa zhes bya ba de gnyis ka yang 'gro ba dang ldan par sems na/de la skyon 'di yod de/ bshad pa/ bgom la 'gro ba yod na ni/ /'gro ba gnyis su thal 'gyur te/ /gang gis bgom pa de dang ni/ /de la 'gro ba gang yin pa'o/ /bgom pa 'gro ba dang ldan pa la 'gro bar brtags na/'gro ba gnyis su thal bar 'gyur te/ 'gro ba dang ldan pas bgom pa zhes bya bar 'gyur ba dang / de la 'gro ba zhes bya ba'i 'gro ba gnyis par brtag pa'o/ /'gro ba gnyis su ni mi 'dod pas de'i phyir de yang mi 'thad do/ /de la skyon gzhan 'di yang yod do //bshad pa/ 'gro ba gnyis su thal 'gyur na/ /'gro ba po yang gnyis su 'gyur/ /gang phyir 'gro po med par ni/ /'gro ba 'thad par mi 'gyur phyir/ /'gro ba gnyis su thal bar 'gyur na 'gro ba po yang gnyis su thal bar 'gyur te/ ci'i phyir zhe na/ gang phyir 'gro po med par ni//'gro ba 'thad par mi 'gyur phyir/ /gang gi phyir 'gro ba po yod na 'gro ba yang yod kyi/ 'gro ba po spangs na 'gro ba med pa de'i phyir 'gro ba gnyis su thal bar 'gyur na 'gro ba po yang gnyis su thal bar 'gyur bas de yang mi 'dod de/ de'i phyir de ltar skyon du ma yod pas bgom pa la 'gro ba med pa nyid do//gang gi phyir song ba dang ma song ba dang bgom pa la 'gro ba mi 'thad pa de'i phyir 'gro ba med pa kho na'o/ /'dir smras pa/ song ba dang ma song ba dang bgom pa la 'gro ba mi 'thad du zin kyang / 'gro ba po la brten pa'i 'gro ba yod pa nyid de/'di ltar 'gro ba po la 'gro ba dmigs pa'i phyir ro/ /bshad pa/ gal te 'gro po med gyur na/ /'gro ba 'thad par mi 'gyur te/ /'gro po med par gyur na 'gro ba 'thad par mi 'gyur bar ni sngar bstan zin to/ /gal te 'gro ba po med par gyur na 'gro ba 'thad par mi 'gyur na gang 'gro ba po la brten cing 'gro ba po la 'jug pa'i 'gro ba de gang yin/smras pa/ gang 'gro ba po la 'jug pa'i 'gro ba gzhan 'gro ba po las tha dad du gyur pa yod do zhes ni mi smra'o / /'di ltar 'gro ba gang dang ldan pas 'gro ba po zhes bya bar 'gyur ba de yod do zhes smra'o//'dir bshad pa/ 'gro ba med na 'gro ba po/ /yod pa nyid du ga la 'gyur/ /gal te rten cung zad kyang med pa'i 'gro ba zhig rab tu grub par gyur na ni de dang 'gro ba po'am/ 'gro ba po ma yin pa ldan par yang 'gyur grang na/ tha dad par gyur pa rten med pa'i 'gro ba ni 'ga' yang med de/des na tha dad par grub pa'i 'gro ba med par khyod kyis 'gro ba ldan pas 'gro ba por 'gyur ba yod pa nyid du ga la 'gyur 'gro ba po med na yang su yi 'gro bar 'gyur te/ de bas na 'gro ba med do/ /smras pa/ spros pa 'dis ci bya/ gang la ltos nas 'gro'o//zhes bya ba de 'gro ba yin no/ /'dir bshad pa/ gal te 'gro po zhes bya ba de nyid rab tu grub par gyur na ni des na 'gro ba yang rab tu 'grub par 'gyur grang na/ de rab tu mi 'grub pas 'gro ba rab tu 'grub par ga la 'gyur/ ji ltar zhe na/ 'di la 'gro ba zhig yod na 'gro ba po'am/'gro ba po ma yin pa 'gro grang na/ 'dir bshad pa/ re zhig 'gro po mi 'gro ste/ /'gro ba po min 'gro po min/ /'gro po 'gro po min las gzhan/ /gsum pa gang zhig 'gro bar 'gyur/ /de bas na 'gro'o zhes bya ba nyid mi 'grub bo/ /ci'i phyir zhe na/ mi 'thad pa'i phyir ro/ /ji ltar zhe na/re zhig 'gro po 'gro'o zhes/ /ji ltar 'thad pa nyid du 'gyur/ /'gro ba med na 'gro ba po/ /nam yang 'thad par mi 'gyur ro/ /'di la 'gro ba po 'gro'o/ /zhes bya ba la/ 'gro ba'i bya ba gcig pu zhig yod pa de ni 'gro zhes bya ba de la nye bar sbyar bas des na 'gro ba po ni 'gro ba dang bral te/gub ta dang tsai tra bzhin du ming tsam du gyur par thal bar 'gyur bas de yang mi 'dod do/ /de'i tshe gang gi tshe 'gro ba med na 'gro ba po nam yang 'thad par mi 'gyur ba de'i tshe 'gro ba po 'gro'o zhes bya ba de ji ltar 'thad pa nyid du 'gyur/ yang gzhan yang bshad pa/ gang gi phyogs la 'gro ba po//'gro ba de la 'gro med pa'i/ /'gro po yin par thal 'gyur te/ /'gro po 'gro bar 'dod phyir ro/ /gang gi phyogs la skyon der gyur na mi rung ngo snyam pas 'gro ba po 'gro ba dang ldan pas 'gro po snyam pa de la yang 'gro ba po zhes bya ba de la 'gro ba'i bya ba nye bar sbyar ba byas pas 'gro ba med pa'i 'gro ba po yin par thal bar 'gyur ba ste/'gro ba po 'gro bar 'dod pa'i phyir 'gro ba med par 'gro'o zhes bya ba der thal bar 'gyur ro/ /zhes bya ba'i tha tshig go/ /de ni mi 'thad de/ 'gro'o zhes bya ba de/ 'gro ba med par ji ltar 'gyur ro / /ci ste skyon der gyur na mi rung ngo snyam pas 'gro ba po zhes bya ba dang /'gro ba po zhes bya ba de gnyi ga yang 'gro ba dang ldan no zhe na/ de la yang skyon 'di yod de/ bshad pa/ gal te 'gro po 'gro 'gyur na/ /'gro ba gnyis su thal 'gyur te/ /gang gis 'gro por mngon pa dang / /'gro por gyur nas gang 'gro ba'o//'gro ba po 'gro ba dang ldan pa la 'gro bar brtags na 'gro ba gnyis su thal bar 'gyur te/ 'gro ba gang dag ldan pas 'gro ba po zhes bya bar mngon pa dang / de 'gro ba gang la ltos nas 'gro'o zhes bya bar 'gyur ba'o/ /'gro ba gnyis su ni mi 'thad de/ 'gro ba gnyis su thal bar gyur na snga ma bzhin du 'gro ba po yang gnyis su thal bar 'gyur bas de yang mi 'dod de de lta bas 'gro ba po 'gro'o zhes bya ba de mi 'thad do//da ni 'gro ba po ma yin pa yang mi 'gro ste/ gang gi tshe 'gro ba po 'gro po zhes bya ba de mi 'thad pa de tshe 'gro ba po ma yin pa 'gro ba dang bral ba'ang 'gro ba'o//zhes bya ba de ji ltar 'thad pa nyid du 'gyur/ de lta bas na 'gro ba po ma yin pa yang mi 'gro'o/ /de la 'di snyam du 'gro ba po yin pa dang 'gro ba po ma yin pa 'gro bar sems na/ bshad pa/ 'gro po 'gro po min las gzhan/ /gsum po gang zhig 'gro bar 'gyur//'gro ba po dang 'gro ba po ma yin pa las gzhan pa gsum pa/ 'gro ba po yin pa dang 'gro ba po ma yin pa gang 'gro'o zhes bya bar 'thad pa zhig gang zhig yin/ de lta bas na med pa'i kho na'i phyir 'gro ba po ma yin pa dang 'gro ba po ma yin pa yang mi 'gro'o/ /de ltar gang gi phyir 'gro ba po dang /'gro ba po ma yin pa dang / 'gro ba po yin pa dang / 'gro ba po ma yin pa 'gro'o/ /zhes bya ba de mi 'thad pa de'i phyir/ 'gro'o zhes bya ba de rab tu mi 'grub bo/ /'gro'o zhes bya ba de med na 'gro ba rab tu 'grub par ga la 'gyur/ 'dir smras pa/ 'gro ba po dang /'gro ba po yin pa dang / 'gro ba po ma yin pa 'gro'o/ /zhes bya ba mi 'thad du zin kyang / gub ta 'gro'o/ /tsai tra 'gro'o zhes bya ba de la 'gro'o zhes bya ba 'thad do/ /bshad pa/ des ni ci yang smras pa ma yin te/ gub ta la brten na ci gub ta 'gro ba por gyur nas 'gro'am/ 'on te 'gro ba po ma yin 'gro'am/ 'on te 'gro ba po yin pa dang / 'gro ba po ma yin pa zhig 'gro zhes bya ba 'di gsal ba ma byas sam/ de lta bas na 'di ni gyi na'o/ /'dir smras pa/ 'gro ba ni yod pa kho na'o/ /ci'i phyir zhe na/ 'gro ba'i bya ba rtsom pa yod pa'i phyir ro//'di la song ba dang ma song ba dang bgom pa la 'gro ba yod do/ /zhes bya ba de brjod par mi nus su zin kyang / gang gi tshe sdod pa las 'gro ba de'i tshe na sdod pa'i byas pa 'das ma thag tu 'gro ba'i bya ba 'jug par 'gyur bas de lta bas na bya ba rtsom pa yod pas 'gro ba yod pa kho na'o//bshad pa/ ci khyod ming gzhan du bsgyur bas sems rmongs nas rang gi bu ngo mi shes sam/ khyod don de nyid la blo phyi mas brjod pa gzhan gyis brjod ko 'gro ba'i bya ba rtsom pa yod par yongs su brtag pa gang yin pa de yang song ba'am ma song ba'am/ bgom pa la yod grang na/de la gtan tshigs sngar bstan pa dag nyid kyis bshad pa/ song la 'gro ba'i rtsom med de/ /ci'i phyir zhe na/ 'gro ba'i bya ba 'das zin pa'i phyir ro/ /ma song ba la'ang 'gro rtsom med/ /ci'i phyir zhe na/ 'gro ba'i bya ba ma brtsams pa'i phyir ro/ /bgom la rtsom pa yod min na//ci'i phyir zhe na/ bgom pa med pa'i phyir dang / 'gro ba gnyis su thal bar 'gyur ba'i phyir dang / 'gro ba po gnyis su thal bar 'gyur ba'i phyir ro/ /gang du 'gro ba rtsom par byed/ /ces bya ba'i lan de da smros shig /de lta bas na 'gro ba'i rtsom pa med do/ /rtsom pa med na 'gro ba yod par ga la 'gyur/'dir smras pa/ 'gro ba ni yod pa kho na'o/ /ci'i phyir zhe na/ bgom pa dang song ba dang ma song ba yod pa'i phyir te/ gang gi phyir 'gro ba dang ldan pa'i phyir bgom pa zhes bya ba yin la/ 'gro ba mthar phyin pa ni song ba zhes bya ba yin/ 'gro ba'i bya ba ma song ba la ltos nas ma song ba zhes bya ba yin pas na de lta bas na bgom pa dang song ba dang /ma song ba yod pa'i phyir 'gro ba yod do/ /bshad pa/ ci khyed nam mkha' 'di la ldang bar bskyod dam/ gang gi tshe/ 'gro ba rtsom pa'i snga rol na/ /gang du 'gro ba rtsom 'gyur ba/ / bgom pa med cing song ba med/ /'di la 'gro ba rtsom pa'i snga rol sdod par gyur pa na gang du 'gro ba rtsom par 'gyur ba'i bgom pa yang med cing / song ba yang med do/ /'gro ba rtsom pa med na bgom pa 'gro ba dang ldan par ga la 'gyur/ 'gro ba dang ldan pa med na 'gro ba mthar phyin pa yod par yang ga la 'gyur/'dir smras pa/ ma song ba ni yod de/ der 'gro ba rtsom par 'gyur ro/ /bshad pa/ ma song 'gro ba ga la yod/ /'di la sdod cing mi bskyod pa gang yin pa de ni ma song ba ste/ de la ni rtsom pa med do/ /gang gi tshe skyod par byed pa de'i tshe na ni go skabs gang du skyod par byed pa de ma song ba ma yin no//de'i tshe ma song ba'i go skabs gang yin pa de la ni bskyod pa med do/ /de lta bas na ma song ba la 'gro ba'i rtsom pa gang la yod/ de ltar brtags na/ 'gro rtsom rnam pa thams cad du/ /snang ba med pa nyid yin na/ /song ba ci zhig bgom pa ci//ma song ci zhes rnam par brtag /gang gi tshe de ltar rnam pa thams cad kyis rnam par brtag pa na 'gro ba'i rtsom pa snang ba med pa nyid yin pa de'i tshe khyod kyi song ba yang ci/ bgom pa yang ci/ ma song ba de yang ci/ zhes rnam par brtag /smras pa/ re zhig ma song ba ni yod do/ / bshad pa/ ci khyod bu ma btsas par 'chi ba'i mya ngan byed dam/ khyod song ba med par ma song ba la rtog go/ /'di ltar song ba'i gnyen po ni ma song ba yin na/ de la gal te song ba nyid med na khyod kyi ma song ba yod par ga la 'gyur/ smras pa/ gal te gnyen po med pas song ba med na 'o na/'gro ba 'grub bo/ /ci'i phyir zhe na/ mi mthun pa'i yod pa'i phyir te/ 'di ltar 'gro ba'i mi mthun pa sdod pa yod de / de bas na mi mthun pa yod pa'i phyir 'gro ba yod pa kho na'o/ /bshad pa / gal te sdod pa yod na ni 'gro ba yang yod par 'gyur grang na/ sdod pa mi 'thad pas 'gro ba yod par ga la 'gyur/ji ltar zhe na/ 'di la gal te sdod pa yod par gyur na/ 'gro ba po'i 'am/ 'gro ba po ma yin pa'i yin grang na/ de la/ re zhig 'gro bo mi sdod de / /'gro ba po min sdod pa min/ /'gro po 'gro po min las gzhan/ /gsum pa gang zhig sdod par 'gyur//de lta bas na sdod pa ni med pa kho na'o/ /ci'i phyir zhe na/ mi 'thad pa'i phyir ro/ /ji ltar zhe na/ bshad pa/ re zhig 'gro po sdod do zhes/ /ji ltar 'thad pa nyid du 'gyur/ /'gro ba med na 'gro ba po/ /nam yang 'thad par mi 'gyur ro/ / 'di la 'gro ba dang ldan pas 'gro ba por 'gyur bas 'gro ba med na/ 'gro ba por mi 'thad pa nyid do/ /'gro ba log pa ni sdod pa zhes bya ba na 'gro ba dang sdod pa mi mthun pa de gnyis gcig na lhan cig 'dug pa med do/ /de'i phyir de ltar re zhig 'gro ba po sdod do zhes bya ba de ji ltar 'thad pa nyid du 'gyur/de ni 'gro ba po ma yin pa yang mi sdod de/ ci'i phyir zhe na/ 'gro ba med pa'i phyir ro/ /'di la 'gro ba log pa ni sdod pa zhes bya ba na 'gro ba po ma yin pa ni 'gro ba dang bral ba'i phyir sdod pa nyid yin pas de la yang sdod pas ci zhig bya/ sdod pa de la yang sdod par brtag na/ sdod pa gnyis su thal bar 'gyur ba dang /sdod pa po yang gnyis su thal bar 'gyur bas de'i phyir 'gro ba po ma yin pa yang mi sdod do/ /de la 'di snyam du 'gro ba po yin pa dang / 'gro ba po ma yin pa sdod par sems na/ bshad pa/ 'gro po 'gro po min las gzhan/ /gsum pa gang zhig sdod par 'gyur/'gro bo dang 'gro ba po ma yin pa las gzhan pa gsum pa 'gro ba po yin pa dang / 'gro ba po ma yin pa gang sdod do zhes bya bar brtags pa de gang zhig yin/ de lta bas na med pa kho na'i phyir 'gro ba po yin pa dang / 'gro ba po ma yin pa yang mi sdod do/ /yang gzhan yang / 'gro ba log pa ni sdod pa zhes bya ba / ldog pa de yang bgom pa las sam/ song ba las sam ma song ba las ldog par 'gyur grang na/ de la/ bgom las ldog par mi 'gyur te/ /song dang ma song las kyang min/ /bgom pa las sdod pa mi 'gyur te/ ci'i phyir zhe na/ 'di ltar 'gro ba dang ldan pa'i phyir bgom pa yin la/'gro ba log pa ni sdod pa yin pas sdod pa dang 'gro ba mi mthun pa de gnyis cig na mi srid pas de'i phyir re zhig bgom pa las ldog par mi 'gyur te/ de ni song ba dang ma song ba las kyang sdod par mi 'gyur te/ ci'i phyir zhe na/ 'gro ba med pa'i phyir ro//'di ltar 'gro ba log pa ni sdod pa yin na / 'gro ba ni song ba dang ma song ba la med de/ 'gro ba med na 'gro ba ldog pa ga la yod/ 'gro ba ldog pa med na sdod pa ga la yod/ de lta bas na song ba dang ma song ba las kyang ldog par mi 'gyur ro/ /'gro ba dang ni 'jug pa dang / / ldog pa yang ni 'gro dang mtshungs/ /ji ltar 'gro ba po mi sdod de/ sdod pa dang / 'gro ba gnyis mi mthun pa'i phyir ro/ /zhes bshad pa de bzhin du sdod pa po yang mi 'gro ste/ sdod pa dang 'gro ba gnyis mi mthun pa'i phyir ro/ /ji ltar 'gro ba po ma yin pa mi sdod de/ sdod pa gnyis su thal bar 'gyur ba'i phyir ro zhes bshad pa de bzhin du sdod pa po ma yin pa yang mi 'gro ste/'gro ba gnyis su thal bar 'gyur ba'i phyir ro/ /ji ltar 'gro ba po yin pa dang / ji ltar 'gro ba po ma yin pa mi sdod de/ mi srid pa'i phyir ro zhes bshad pa de bzhin du sdod pa po yin pa dang /sdod pa po ma yin pa yang mi 'gro ste/ mi srid pa'i phyir ro/ /de ltar re zhig 'gro ba po'i sdod pa dang / sdod pa po'i 'gro ba mtshungs pa yin no/ /da ni ji ltar 'gro ba'i rtsom pa song ba dang / ma song ba dang / bgom pa la mi 'thad do zhes bshad pa de bzhin du sdod pa'i 'jug pa yang bsdad pa dang ma bsdad pa dang /sdod pa la mi 'thad de/ de ltar na 'gro ba'i rtsom pa dang sdod pa'i 'jug pa mtshungs pa yin no/ /da ni ji ltar 'gro ba'i ldog pa song ba dang / ma song ba dang / bgom pa las ldog par mi 'gyur zhes bshad pa de bzhin du sdod pa'i ldog pa yang gang du bsdad pa de nas mi 'gro ste/'gro ba med pa'i phyir ro/ /gang du ma bsdad pa de nas kyang mi 'gro ste/ 'gro ba med pa'i phyir ro/ /gang du bsdad pa de nas kyang mi 'gro ste/ sdod pa dang 'gro ba gnyis mi mthun pa'i phyir ro/ /de ltar na 'gro ba'i ldog pa dang / sdod pa'i ldog pa mtshungs pa yin no//'dir smras pa/ 'gro ba dang 'jug pa dang / ldog pa song ba dang ma song ba dang / bgom pa la yod do zhe'am 'gro ba po dang / 'gro ba po ma yin pa dang / de las gzhan pa la yod do zhes bya ba de la brjod par mi nus su zin kyang / tsai tra'i gom pa 'dor ba mthong nas/ tsai tra'i 'gro ba po zhes bya bar 'gyur bas de'i phyir 'gro ba po dang 'gro ba yod do//bshad pa/ re zhig brjod par mi nus su zin kyang zhes bya ba de ni phongs pa'i tshig yin no/ /'on kyang gang mthong nas tsai tra 'gro ba po zhes bya bar sems pa tsai tra'i gom pa 'dor ba gang yin pa 'dor / gom pa 'dor ba de dang tsai tra gcig pa nyid dam gzhan pa nyid du 'gyur grang na/de la/ 'gro ba de dang 'gro ba po/ /de nyid ces kyang byar mi rung / /'gro ba dang ni 'gro ba po/ /gzhan nyid ces kyang byar mi rung / /ji ltar zhe na/ gal te 'gro ba gang yin pa/ /de nyid 'gro bo yin gyur na/ /byed pa po dang las nyid kyang //gcig pa nyid du thal bar 'gyur/ /gal te 'gro ba gang yin pa de nyid 'gro ba po yin par gyur na/ de lta na byed pa po dang bya ba yang gcig pa nyid du thal bar 'gyur ro/ /de ni mi 'thad do / /byed pa po gang yin pa de nyid bya ba yin par ji ltar 'gyur/ ci ste skyon der gyur na mi rung ngo //snyam pas byed pa po dang bya ba gnyis gzhan pa nyid yin no zhe na/ de la bshad par bya ste/ gal te 'gro dang 'gro ba po/ /gzhan pa nyid du rnam brtags na/ /'gro po med pa'i 'gro ba dang / /'gro ba med pa'i 'gro por 'gyur/ /gal te byed pa po dang / bya ba gnyis gcig pa nyid kyi skyon mthong bas 'gro ba po dang /'gro ba gzhan pa nyid du rnam par brtags na/ de lta na 'gro ba po las tha dad par gyur pa'i 'gro ba gzhi med pa rang las rab tu grub par 'gyur ba dang / 'gro ba gzhi med pa rang las rab tu grub par gyur na 'gro ba po yang 'gro ba dang bral ba mi ltos pa rang las rab tu grub par 'gyur ba zhig na/de gnyis gang yang mi 'thad de 'gro ba po med par 'gro ba dang / 'gro ba med par 'gro ba por ji ltar 'gyur/ 'dir smras pa/ ci khyed gsod pa po nyid la dbang 'dzugs sam/ kho bo ni byed pa po dang bya ba gnyis tha dad par 'gyur grub pa med pa'i phyir/gzhan pa nyid du yang mi 'dod la/ byed pa po tha dad pa'i phyir gcig pa nyid du yang mi 'dod pas de'i phyir de gnyi ga med par yang de gnyis grub bo/ /bshad pa/ kho bo ni gsod pa po nyid la dbang mi 'dzugs kyi/ khyod nyid lag pa brkyang ste tshegs chen por g.yob cing khong pa dbugs kyis brdzangs bzhin du smig rgyu'i chu la rkyal bar byed dam/khyod de nyid dang gzhan ma gtogs pa med pa'i phyogs la yod pa'i blos gnas par byed ko / /gang dag dngos po gcig pa dang / /dngos po gzhan pa nyid du ni/ /grub par gyur pa yod min na / / de gnyis grub pa ji ltar yod/ /gal te byed pa po dang bya ba gnyis gcig pa nyid dang gzhan pa nyid du grub pa med de gnyis ma gtogs par rnam pa gzhan gang gis de gnyis grub pa yod pa de je smros shig /de lta bas na de ni brtags pa tsam du zad do/ /'dir smras pa/ 'jig rten mngon sum gyi don 'di gab gab kyis gnod par ji ltar nus/yong ni gang med pas 'gro ba po ma yin no/ /zhes bya ba dang / gang la ltos nas 'di 'gro ba po yin no zhes bya ba de ni 'gro ba yin la/ de yang 'gro ba po zhes bya'o/ /bshad pa/ ci khyod bu 'dod la ma ning la spyod dam/ khyod 'gro ba po med pa la 'gro ba por rtog go//'di ltar bgrod par bya ba zhig yod na ni 'gro ba por brtag tu yang rung grang na/ gang gi tshe 'gro ba por brtags kyang bgrod par bya ba mi 'thad pa de'i tshe ci yang mi phan pa yongs su brtags pa 'dis ci zhig bya/ bgrod par bya ba ji ltar mi 'thad ce na/ de ni song ba yang ma yin ma song ba yang ma yin la/bgom pa ni shes par mi 'gyur ro zhes bstan zin to/ /de dag tsam du de 'gro bas 'gro ba po yin grang na/ de ni mi 'gro bas de'i phyir 'gro ba por brtags pa ni don med pa yin no/ /'dir smras pa/ 'gro ba po yin pas 'gro ba nyid 'gro ste/dper na smra po dag na re tshig smra'o/ /bya ba byed do zhes zer ba bzhin no/ /bshad pa/ 'gro ba po'i 'gro ba la brtag na yang 'gro ba gang gis de'i 'gro ba por mngon pa'i 'gro ba de nyid dam/ de las gzhan pa zhig 'gro grang na/ gnyi ga yang mi mthong ngo / /ji ltar zhe na/ 'gro ba gang gi 'gro por mngon//'gro ba de ni de 'gro min/ /'gro ba gang dang ldan na/ tsai tra 'gro ba po zhes bya bar mngon pa'i 'gro ba de ni 'gro ba po de 'gro bar byed pa ma yin no/ /ci'i phyir zhe na/ gang phyir 'gro ba'i snga rol med/ /gang zhig gang du 'gro bar 'gyur/ /gang gi phyir 'gro ba gang gis 'gro ba po zhes bya bar mngon pa'i 'gro ba 'di snga rol ni 'gro ba'i snga rol te de'i snga rol na 'gro ba po med do//de dang ldan pa kho na'i phyir 'gro ba po zhes brjod pa yin te/ gang zhig gang du dper na grong dang grong khyer lta bu tha dad par gyur pas 'gro bar 'gyur ba yin na 'gro ba por gyur nas gang 'gro bar 'gyur ba'i 'gro ba de ni 'gro ba po las grong dang grong khyer lta bur tha dad par gyur pa med do//de ltar re zhig 'gro ba gang gis 'gro ba po zhes bya bar mngon pa'i 'gro ba de ni 'gro ba po 'gro bar byed pa ma yin no/ /de la 'di snyam du de las gzhan pa zhig 'gro bar sems na/bshad pa/ 'gro ba gang gis 'gro por mngon/ /de las gzhan pa de 'gro min/ /'gro ba gang dang ldan na tsai tra 'gro ba po zhes bya bar mngon pa de las gzhan pa'i 'gro ba yang 'gro ba po de 'gro bar byed pa ma yin no/ /ci'i phyir zhe na/ gang phyir 'gro po gcig pu la//'gro ba gnyis su mi 'thad do/ /gang gi phyir 'gro ba po gcig pu la gang gi 'gro ba po zhes bya bar mngon pa dang 'gro por gyur nas gang 'gro bar 'gyur ba'i 'gro ba gnyis mi 'thad pa de'i phyir de las gzhan pa'i 'gro ba yang 'gro ba po 'gro bar byed pa ma yin no/ / des na tshig smra'o/ /bya ba byed do zhes bya ba yang lan btab pa yin no/ /'dir smras pa/ 'gro ba po'i bgrod par bya ba grong dang grong khyer la sogs pa yod pa ma yin nam / bshad pa/ de la ni lan btab zin te/ grong dang grong khyer la brten nas/ ci de grong du song ba la 'gro ba yod dam ma song ba la 'gro ba yod dam bgom pa la 'gro ba yod ces bsams zin pas de'i phyir de ni gyi na'o//yang gzhan yang / 'gro po yin par gyur pa ni/ /'gro rnam gsum du 'gro mi byed/ /ma yin par ni gyur de yang / /'gro rnam gsum du 'gro mi byed/ /yin dang ma yin gyur pa yang //'gro rnam gsum du 'gro mi byed/ /de phyir 'gro dang 'gro po dang / /bgrod par bya ba'ang yod ma yin/ /'gro ba po yin par gyur pa zhes bya ba ni 'gro ba po gang 'gro ba dang ldan pa'o/ /de ma yin par gyur pa yang zhes bya ba ni 'gro ba po gang 'gro ba dang bral ba'o/ /yin pa dang ma yin par gyur pa yang zhes bya ba ni 'gro ba po gang 'gro ba dang ldan pa yang yin la 'gro ba dang bral ba yang yin pa'o//'gro zhes bya ba ni bgrod par bya ba'i tha tshig go/ /rnam gsum du zhes bya ba ni song ba dang ma song ba dang bgom bar ro/ /de'i phyir de ltar yang dag pa'i rjes su 'brang ba'i blos yongs su brtags na/'gro ba po yin par gyur pa ni bgrod par bya ba rnam pa gsum du 'gro bar mi byed la/ 'gro ba po ma yin par gyur pa yang bgrod par bya ba rnam pa gsum du 'gro bar mi byed cing / 'gro ba po yin pa dang ma yin par gyur pa yang bgrod par bya ba rnam pa gsum du 'gro bar mi byed pa de'i phyir 'gro ba dang 'gro ba po dang bgrod par bya ba med do//bya ba rnams kyi nang na 'gro ba'i bya ba gtso bo yin pas/ 'gro ba'i bya ba yongs su brtags te/ ji ltar 'gro ba mi 'thad par rab tu sgrub pa de bzhin du bya ba thams cad kyang mi 'thad par grub bo//song ba dang ma song ba dang bgom pa brtag pa zhes bya ba ste rab tu byed pa gnyis pa'o// //dbu ma rtsa ba'i 'grel pa bud d+ha pA li ta/ bam po gnyis pa/ 'dir smras pa/ khyed kyis 'gro ba mi 'thad pa de rjes su rab tu bstan pas kho bo'i yid stong pa nyid nyan pa la spro bar byas kyis/de'i phyir da ni rang gi gzhung lugs la brten pa chung zhig rjes su rab tu bstan pa'i rigs so/ /bshad pa/ de ltar bya'o/ /smras pa/ lta dang nyan dang snom pa dang / /myong bar byed dang reg byed yid/ /dbang po drug po de dag gi/ /spyod yul blta bar bya la sogs//lta ba la sogs pa de dag ni dbang po drug tu bstan la/ de dag gi spyod yul ni gzugs la sogs pa drug po dag nyid yin par bstan to/ /de la gzugs la lta bar byed pas lta bar bstan la/ lhag ma rnams kyang rang rang gi yul 'dzin par byed pas bstan to/ /dngos po med na gzugs la lta bar byed pas lta ba zhes brjod par mi 'thad do//'di ltar med pas ji ltar lta bar 'gyur/ ci ste lta na ni ri bong gi rwas kyang rus sbal gyi spu sogs par 'gyur ba zhig na de ni mi 'thad pas de'i phyir skye mched rnams yod do/ /bshad pa/ gal te gzugs la lta bar byed pas lta'o zhes bya ba de 'thad na ni/skye mched rnams yod pa 'gyur ba zhig na de ni 'thad do/ /ci'i phyir zhe na/ 'di ltar/ lta de rang gi bdag nyid na/ /de ni de la mi lta nyid/ /gang zhig bdag la mi lta ba/ /de gzhan dag la ji ltar lta/ /'di la dngos po rnams kyi ngo bo nyid ni rang gi bdag nyid la mthong na de dang ldan pas gzhan gyi bdag nyid la yang dmigs par 'gyur te/dper na chu la rlan mthong na de dang ldan pas/ sa la yang dmigs pa dang / me la tsha ba mthong na de dang ldan pas chu la yang dmigs pa dang / sna ma'i me tog la dri zhim pa nyid mthong na de dang ldan pas gos la yang dmigs pa lta bu yin na dngos po gang rang gi bdag nyid la mi snang ba de gzhan gyi bdag nyid la ji ltar dmigs par 'gyur te/'di ltar sna ma'i me tog la dri nga ba nyid ma mthong na gos la yang dmigs par mi 'gyur ba lta bu'o/ / de'i phyir gal te lta ba rang gi bdag nyid la lta bar byed na ni des na gzugs la lta bar byed pas lta ba'o zhes bya ba de 'thad par 'gyur ba zhig na lta ba ni rang gi bdag nyid la lta bar mi byed do/ /de gang rang gi bdag nyid la lta bar mi byed pa de gzhan dag la ji ltar lta bar byed de/ des na gzugs la lta bar byed pas lta ba'o//zhes bya ba de mi 'thad do/ /slob dpon 'phags pa lhas kyang / /dngos po kun gyi rang bzhin ni/ /thog mar bdag la snang gyur na/ /mig nyid la yang mig gis ni/ /ci yi phyir na 'dzin mi 'gyur/ /zhes gsungs so/ /smras pa/ me bzhin du lta ba la sogs pa 'grub ste/ dper na me ni sreg par byed pa yin yang gzhan dag sreg par byed pa yin gyi/ rang gi bdag nyid sreg par byed pa ni ma yin no/ /de bzhin du lta ba yang lta bar byed pa yin yang gzhan dag la lta bar byed pa nyid yin gyi rang gi bdag nyid la lta bar byed pa ni ma yin no//bshad pa/ lta ba rab tu bsgrub pa'i phyir/ /me yi dpe ni nus ma yin/ /nus ma yin zhes bya ba ni mi chog pa dang / mi nus so zhes bya ba'i tha tshig ste/ khyod kyis lta ba rab tu bsgrub pa'i phyir me'i dpe byas pa gang yin pa des ni lta ba rab tu bsgrub par mi nus so//ci'i phyir zhe na/ 'di la bud shing bsreg go zhes bya mod kyi/ bud shing las me gud na med pa'i phyir te/ de bas na me ni rang gi bdag nyid sreg par byed pa nyid yin gyi gzhan dag sreg par byed pa ni ma yin no/ /ci ste gzhan pa nyid ma yin du zin kyang bud shing ni bsreg par bya ba'o//me ni sreg par byed pa'o zhes rtog na/ kho bos kyang bud shing ni sreg par byed pa'o/ /me ni bsreg par bya ba'o/ /zhes smra la rag go/ /yang na khyad par gyi gtan tshigs bstan pa brjod dgos so/ /slob dpon 'phags pa lhas kyang / mes ni tsha ba nyid bsreg ste//tsha ba la yin ji ltar bsreg /des na bud shing zhes bya med/ /de ma gtogs par me yang med/ /ces gsungs so/ /de lta bas na me'i dpes nus pa ma yin no/ /'di la kha cig me ni rang gzhan gyi bdag nyid dag snang bar byed do snyam du sems pa des kyang nus pa ma yin te/me ni ji ltar rang dang gzhan gyi bdag nyid dag snang bar byed pa de bzhin du rang gzhan gyi bdag nyid dag sreg par yang byed pa'i rigs so/ /'on kyang gzhan dag sreg par byed pa nyid yin gyi rang gi bdag nyid sreg par byed pa ni ma yin no zhe na/ de ltar na yang mes ji ltar gzhan dag sreg par byed kyi/rang gi bdag nyid sreg par mi byed pa de bzhin du lta ba yang gzhan dag la lta bar byed kyi/ rang gi bdag nyid la lta bar mi byed do zhes bya ba de ji ltar rung ste/ me ji ltar rang dang gzhan gyi bdag nyid dag snang bar byed pa de bzhin du lta ba yang ni gal te lta ba yin na/rang dang gzhan gyi bdag nyid dag la lta bar byed do/ /zhes bya ba de lta bur yang ci'i phyir mi 'gyur/ bdag nyid bdag nyid la lta'o zhes kyang zer la/ de bzhin du 'jig rten na smra ba po dag bdag nyid kyis bdag nyid 'dzin to zhes kyang zer bas/ de'i phyir rang gi bdag nyid la 'jug pa'i tshig gis na/ lta ba rab tu bsgrub pa'i phyir me'i dpes nus pa ma yin no/ /yang gzhan yang / song dang ma song bgom pa yis/ /de ni ltar bcas lan btab bo/ /ltar bcas zhes bya ba ni lta ba dang bcas pa'o/ /gang zhe na/ me'i dpe ste/dpe dang lta ba de gnyi ga mtshungs par lan btab zin to zhes bya ba'i tha tshig go/ /gang gis lan btab ce na/ song ba dang / ma song ba dang / bgom pa dag gis te/ ji ltar song ba dang / ma song ba dang / bgom pa brtag par song ba la yang 'gro ba med/ma song ba la yang med/ bgom pa la yang 'gro ba med do/ /zhes bshad pa de bzhin du mes kyang bsregs pa yang sreg par mi byed/ ma bsregs pa yang sreg par mi byed/ lta ba yang bltas pa la yang lta bar mi byed/ ma bltas pa la yang lta bar mi byed/ lta ba la yang lta bar mi byed do//de ltar me yang sreg par mi byed la/ lta ba yang lta bar mi byed na ci zhig gang gi dper 'gyur/ de'i phyir yang lta ba rab tu bsgrub pa'i phyir me'i dpes nus pa ma yin no/ /yang gzhan yang / gang tshe cung zad mi lta ba/ /lta bar byed pa ma yin no/ /lta bas lta bar byed ces byar //de ni ji ltar rigs par 'gyur/ /'di ltar khyod kyis gzugs la lta bar byed pas lta ba'o zhes smras pa ni byed pa po la bya ba'i rkyen brjod nas lta bar byed pas lta ba yin no/ /de'i phyir lta ba nyid na lta ba yin gyi mi lta ba ni ma yin no/ /de'i phyir gang gi tshe na lta ba nyid na lta ba yin gyi mi lta ba na ma yin pa de'i tshe lta bar byed pas lta ba'o zhes bya ba de smra ba ji ltar rigs par 'gyur te/'di la gang gis lta bar byed do/ /zhes bya ba de rigs par 'gyur ba lta ba'i bya ba gnyis pa de ga la yod/ ci ste 'di la lta ba'i bya ba gnyis pa med bzhin du yang rab tu rtog na/de lta bas na yang lta ba gnyis su thal ba dang / lta ba po yang gnyis su thal bar 'gyur bas de ni mi 'dod do/ /de lta bas na gzugs la lta bar byed pas lta ba'o/ /zhes bya ba de mi 'thad do/ /ci ste thal ba'i bya ba gnyis su thal bar 'gyur ba'i skyon der gyur na mi rung ngo //snyam nas lta ba nyid lta ba'i bya ba dang ldan pa'i phyir lta bar byed pas lta ba'o zhe na/ de la bshad pa/ lta ba lta nyid ma yin te/ /lta ba lta bar byed pa nyid do/ /zhes de ltar rtog na de yang mi rigs pa ma yin te lta bar byed do/ /zhes bya ba de la lta ba'i bya ba med pa'i phyir ro//de de la 'di snyam du skyon der gyur na mi rung bas lta bar byed do/ /zhes bya ba de nyid lta ba'i bya ba dang ldan par sems na/ de lta bshad pa/ lta ba min pa mi lta nyid/ /de lta na yang lta ba'i bya ba dang bral ba'i lta ba ni lta ba ma yin par 'gyur ro/ /de la lta ba ma yin pa ji ltar lta bar byed do//zhes byar ni mi rung ste/ 'di ltar lta ba ma yin pa ji ltar lta bar 'gyur/ ci ste lta na ni sor mo'i rtse mo yang lta bar 'gyur ba zhig na mi lta ste/ de lta bas na lta ba ma yin pa lta bar byed do zhes bya ba de yang mi rung ngo / /smras pa/ bya ba'i rkyen 'di ni byed pa la brjod pa yin gyi byed pa po la ma yin pas/'dis lta bar byed pas lta ba ste/ gang zhig lta bar byed ce na/ lta ba po'o/ /bshad pa/ lta ba nyid kyis lta ba po'ang / /rnam par bshad par shes par bya/ /'di la/ lta ba rang gi bdag nyid ni / /de ni de la mi lta nyid//gang zhig bdag la mi lta bar/ /de gzhan dag la ji ltar lta / /zhes bya ba la sogs pa dag gis lta bas lta bar byed do zhes bya ba de bsal zin te/ lta bas bsal ba de nyid kyis lta ba po yang bsal ba nyid du shes par bya'o/ /ci'i phyir zhe na/ 'dir don gzhan cung zad ma smras pa ste /mig lta ba po nyid yin no zhes bya ba btang ste bdag lta ba po yin no zhes smras pa 'ba' zhig tu zad pa'i phyir ro/ /de la lta ba la lta ba por rtog gam bdag la lta ba por rtog kyang rung ste bsal ba'i gtan tshigs dag ni mtshungs so/ /'dir skyon gzhan 'di yang yod de/lta ba pos lta bas lta bar byed na lta ba gsum du thal bar 'gyur ro/ /smras pa/ lta bas lta bar byed zhe'am lta ba pos lta bar byed do zhes bya ba 'dis kho bo la ci bya/ yong ni blta bar bya ba bum pa dang snam bu la sogs pa dag yod pa la gang gis lta bar byed pa'i lta ba de ni yod do//bshad pa/ ci khyod sa mkhan med par 'brog dgon par 'thom mam/ khyod lta ba po med par blta bar bya ba dang lta ba yod par 'dod ko/ /ma spangs lta po yod min te/ /lta ba spangs par gyur kyang ngo / /lta po med na blta bya dang / /lta ba de dag ga la yod//'di la lta ba nyid na lta ba po yin gyi mi lta na ma yin no/ /zhes sngar bstan pa des na lta ba dang ldan pa'i phyir lta ba po yin pas lta ba po lta bar byed do/ /zhes bya ba de mi 'thad do/ /lta ba'i bya ba gnyis la med pa'i phyir ro/ /de ltar re zhig lta ba ma spangs na lta ba po ma yin pas lta ba po med do//da ni lta ba po ma yin pa yang lta bar mi byed pa nyid de/ lta ba'i bya ba dang bral ba'i phyir ro zhes bstan pa de bzhin du lta ba spangs par gyur na yang lta ba po med do/ /de la lta ba spangs kyang rung ma spangs kyang rung ste lta ba po med na khyod kyi blta bar bya ba dang lta ba yod par ga la 'gyur/'di ltar gang gis lta bar byed pas blta bar bya ba yin na gang gis lta bar byed pas de ni med do/ /de med na gang gis lta bar 'gyur/ mi lta na blta bar bya bar ji ltar 'gyur/ 'ga' zhig gis gang gis lta bar byed pa de ni de'i lta ba yin na gang gis lta bar byed pa de ni med do//de med na gang gis lta bar 'gyur te/ de lta bas na lta ba po med na blta bar bya ba dang lta ba mi 'thad pa nyid do/ /de'i phyir skye mched rnams yod pa ma yin no/ /smras pa/ skye mched rnams ni yod pa nyid yin te/ ci'i phyir zhe na/ rnam par shes pa yod pa'i phyir ro//'di ltar rnam par shes pa dngos po rnams dmigs par byed pa ni yod do/ /de yod pa'i phyir skye mched rnams kyang yod do/ /bshad pa/ blta bya lta ba med pa'i phyir/ /rnam par shes la sogs pa bzhi/ /yod min nye bar len la sogs/ / ji lta bur na yod par 'gyur/ /gang gi tshe lta ba po med na blta bar bya ba dang lta ba mi 'thad do/ /zhes bshad pa de'i tshe gnas med par rnam par shes pa ji ltar yod par 'gyur te/ 'di ltar blta bar bya ba las gzhan ci zhig rnam par shes par 'gyur/ lta ba med na rnam par shes pa ltos pa med par ji ltar yod par 'gyur/ci ste 'gyur na ni long ba la yod par 'gyur ba zhig na mi 'gyur ro/ /de lta bas na blta bar bya ba dang lta ba med na gnas med par rnam par shes pa yod par mi 'thad do/ /rnam par shes pa med na reg pa ga la yod/ reg pa med na tshor ba ga la yod//tshor ba med na sred pa ga la yod/ /de bzhin du nye bar len pa dang srid pa dang / skye ba dang rga shi dag kyang yod par ga la 'gyur te/ de bas na skye mched rnams ni yod pa nyid ma yin no/ /de skad du/ bcom ldan 'das kyis kyang / de la 'phags pa nyan thos ni mig gi rnam par shes par bya ba'i gzugs gang dag 'das pa dang /ma 'ongs pa dang da ltar byung ba 'di dag la rtag pa nyid dam brtan pa nyid dam/ de bzhin nyid dam gzhan ma yin pa de bzhin nyid dam/ ma nor ba de bzhin nyid ni 'ga' yang med kyi sgyu ma de ni yod do/ /sgyu mar byas pa de ni yod do//sems rmongs par byed pa de ni yod de/ de ni gyi na zhig yod do/ /snyam du de ltar so sor rtog par byed do/ /zhes gsungs so/ /smras pa/ khyod kyis re zhig lta ba ni bkag na nyan pa la sogs pa ni ma bkag pas des na nyan pa la sogs pa yod pa'i phyir dngos po rnams yod do//bshad pa/ lta bas nyan dang snom pa dang / /myong bar byed dang reg byed yid/ /nyan pa po dang mnyan la sogs/ /rnam par bshad par shes par bya/ /nyan pa la sogs pa de dag ni rnam par bshad pa nyid du shes par bya'o/ /gang gis rnam par bshad ce na/lta ba nyid kyis te/ ji ltar lta ba rnam pa thams cad du brtags na mi 'thad pa de bzhin du nyan pa la sogs pa dag kyang shes par bya'o/ /ji ltar lta ba po mi 'thad pa de bzhin du nyan pa po la sogs pa dag kyang shes par bya'o/ /ji ltar blta bar bya ba bsal ba de bzhin du mnyan par bya ba la sogs pa dag kyang shes par bya'o//de lta bas na skye mched rnams kyang stong pa nyid du grub par shes par bya'o/ /skye mched brtag pa zhes bya ba ste rab tu byed pa gsum pa'o// //'dir smras pa/ 'di la gzugs la sogs pa phung po lnga po dag bstan to/ /de dag sdug bsngal lo zhes gsungs te/sdug bsngal 'phags pa'i bden par gsungs so/ /'phags pa'i bden pa gang yin pa de ni med par ji ltar 'gyur te/ de bas na phung po rnams ni yod do/ /bshad pa/ gzugs kyi rgyu ni ma gtogs par/ /gzugs ni dmigs par mi 'gyur ro//'di la 'byung ba chen po bzhi po dag ni gzugs kyi rgyur bstan/ gzugs ni de dag gi 'bras bur bstan na/ 'byung ba chen po bzhi po dag ma gtogs par 'byung ba chen po bzhi po de dag las don gzhan du gyur pa gzugs zhes bya bar 'bras bu ni ci yang med de/de lta bas na gzugs ni mi 'thad do/ /smras pa/ re zhig 'byung ba dag ni yod de/ de la rgyu yod pa'i phyir 'bras bu yang yod pas gzugs kyang rab tu grub pa nyid do/ /bshad pa/ gzugs zhes bya ba ma gtogs par/ /gzugs kyi rgyu yang mi snang ngo / /gzugs ma gtogs par yang 'di ni gzugs kyi rgyu'o//zhes bya ba mi snang ba nyid do/ /gzugs ni mi 'thad par smras zin te/ de ltar gzugs mi 'thad pa'i phyir gzugs kyi rgyu yang mi 'thad do/ /smras pa/ 'di la khyod rgyu la brten nas 'bras bu sel bar byed cing / 'bras bu la brten nas rgyu sel bar byed pas de la gang la brten nas gzhan zhig sel bar byed pa de ni re zhig yod do//de yod na gzhan yang rab tu 'grub par 'gyur ro/ /bshad pa/ gzhan yod pa nyid do/ /zhes brjod par mi nus so/ /ci'i phyir zhe na/ 'di ltar/ gzugs kyi rgyu ni ma gtogs par//gzugs na gzugs ni rgyu med par/ /thal bar 'gyur te don gang yang / /rgyu med pa ni gang na'ang med/ /gal te rgyu bas kyang 'bras bu yod na ni de'i tshe rgyu med pa can du 'gyur te/ don gang yang rgyu med pa can ni/ ma mthong zhing gang du yang ma bstan te/ rtag tu thams cad las thams cad 'byung bar thal bar 'gyur ba'i phyir dang / rtsom pa thams cad don med pa nyid kyi skyon du 'gyur ba'i phyir ro/ /de bzhin du/ gal te gzugs ni ma gtogs par/ /gzugs kyi rgyu zhig yod na ni/ /'bras bu med pa'i rgyur 'gyur te/ /'bras bu med pa'i rgyu med do//gal te 'bras bu bsal kyang rgyu yod na ni rgyu de 'bras bu med pa can du thal bar 'gyur ro/ /'bras bu med pa can gyi rgyu ni med de/ 'di ni 'di'i'o zhes bya ba'i tha snyad kyang mi 'thad pa'i phyir dang / thams cad kyi rgyu thams cad yin par thal bar 'gyur ba'i phyir te/ de lta bas na gzugs kyi rgyu dag kyang mi 'thad pa nyid yin la/gzugs kyang 'bras bur mi 'thad do/ /yang gzhan yang / gzugs yod na yang gzugs kyi ni/ /rgyu yang 'thad par mi 'gyur nyid/ /gzugs med na yang gzugs kyi ni/ /rgyu yang 'thad par mi 'gyur nyid/ /'di la gzugs kyi rgyu ci zhig brtags na gzugs yod pa la brtag gam/'on te gzugs med pa la brtag grang na/ gzugs yod pa la ni gzugs kyi rgyu mi 'thad de/ med pa la yang mi 'thad do/ /de la re zhig yod pa ni mi 'thad de/ 'di ltar yod pa la rgyus ci zhig bya/ ci ste yod pa la yang rgyu'i bya ba yod par 'gyur na ni nam yang mi bya bar mi 'gyur ro//de yang mi 'dod de/ de lta bas na gzugs yod pa la gzugs kyi rgyu mi 'thad do/ /gzugs med pa la yang gzugs kyi rgyu mi 'thad de/ 'di ltar gzugs med na de gang gi rgyur 'gyur/ de lta bas na gzugs med pa la yang gzugs kyi rgyu mi 'thad do//de ni rkyen dgag par yang med dam/ yod pa'i don la yang / rkyen ni rung ba ma yin te/ /zhes rab tu bstan zin mod kyi/ yang 'di yang skabs su bab pas bstan to/ /rgyu med pa yi gzugs dag ni/ /'thad par mi rung rung min nyid / /rgyu ma bstan pa glo bur gyi gzugs ni 'thad par mi rung ba nyid de rung ba ma yin pa nyid do//ci'i phyir zhe na/ rtag tu thams cad 'byung bar thal bar 'gyur ba'i phyir dang / rtsom pa thams cad don med pa nyid kyi skyon du 'gyur ba'i phyir ro/ /de bas na rgyu med pa can gyi phyogs ni thams cad kho na yin pa'i phyir 'thad par mi rung ba nyid de rung ba ma yin pa nyid do//zhes yang dang yang du nges par bzung ste bshad do/ /de phyir gzugs kyi rnam par rtog /'ga' yang rnam par brtag mi bya/ /gang gi phyir gzugs kyi rgyu ma gtogs par gzugs dmigs par mi 'gyur ba dang / gzugs yod pa dang med pa la yang gzugs kyi rgyu mi 'thad pa dang /rgyu med pa'i gzugs ni 'thad par mi rung ba nyid de rung ba ma yin pa nyid yin pa de'i phyir khyod lta bu mkhas pa'i rang bzhin can de kho na rtogs par 'dod pas gzugs kyi rnam par rtog pa 'ga' yang rnam par brtag par mi bya bar rigs te/'di ltar gnas med pa la bsam pa ji ltar rigs par 'gyur/ yang gzhan yang / 'bras bu rgyu dang 'dra ba zhes bya ba 'thad pa ma yin te/ 'bras bu rgyu dang mi 'dra zhes/ /bya ba'ang 'thad pa ma yin no/ /'bras bu dang rgyur brtags na/ 'bras bu rgyu dang 'dra ba'am/mi 'dra bar brtag grang na/ de la 'bras bu rgyu dang 'dra ba zhes bya ba ni phyogs de la ni gzugs 'byung ba rnams kyi 'bras bur mi 'thad pa nyid do/ /'bras bu rgyu dang mi 'dra ba zhes bya ba'i phyogs de la yang gzugs [(]'bang [,]'byung [)]ba rnams kyi 'bras bur mi 'thad pa nyid do/ /ji ltar zhe na/'di la 'byung ba rnams ni sra ba dang / gsher ba dang / tsha ba dang g.yo ba'i ngo bo nyid du bstan na 'byung ba'i yon tan de dag ni gzugs la dmigs su med de/ 'di ltar sa ni sra ba nyid/ chu ni gsher ba nyid/ me ni tsha ba nyid/ rlung ni g.yo ba nyid du dmigs pas de'i phyir de ltar 'bras bu rgyu dang 'dra ba yang med la/rgyu dang mi 'dra ba yang med pa de'i phyir gzugs 'bras bu'o/ /zhes bya bar mi 'thad pa nyid do/ /tshor ba 'du shes 'du byed dang / /sems dang dngos po thams cad kyang / /rnam pa dag ni thams cad du/ /gzugs nyid kyis ni rim pa mtshungs//tshor ba dang / 'du shes dang / 'du byed dang / rnam par shes pa de dag kyang gzugs mi 'thad pa nyid kyis mi 'thad par rim pa mtshungs te/ ji ltar 'byung ba ma gtogs par gzugs med pa de bzhin du reg pa ma gtogs par tshor ba med la/ ji ltar gzugs ma gtogs par gzugs kyi rgyu med pa de bzhin du tshor ba ma gtogs par yang reg pa med de/de ltar bcom ldan 'das kyis kyang / bde ba myong bar 'gyur ba'i reg pa la brten nas bde ba'i tshor ba skye'o zhes gsungs so/ /lhag ma rnams la yang de bzhin du sbyar bar bya ste de lta bas na phung po rnams yod do zhes bya ba de mi 'thad pa nyid do//bcom ldan 'das kyis kyang sgyu ma 'di ni byis pa 'drid pa'o/ /zhes gsungs so/ /de ltar yang / gzugs ni dbu ba rdos pa 'dra/ /tshor ba chu bur dag dang mtshungs/ /'du shes smig rgyu 'dra ba ste/ /'du byed rnams ni chu shing bzhin//rnam shes sgyu ma lta bu zhes/ /nyi ma'i gnyen gyis bka' stsal to/ /zhes kyang gsungs so/ /phung po rnams nyi tshe gzugs mi 'thad pa nyid kyis mi 'thad par rim pa mtshungs par ma zad kyi/ chos thams cad kyang gzugs mi 'thad pa nyid kyis mi 'thad par rim pa mtshungs so//de ltar gang gi phyir chos thams cad gzugs mi 'thad pa nyid kyis mi 'thad par rim pa mtshungs pa de'i phyir/ stong pa nyid kyis brtsad byas tshe/ /gang zhig lan 'debs smra byed pa/ /de yis thams cad lan btab min/ / bsgrub par bya dang mtshungs par 'gyur/ /stong pa nyid kyis brtsad cing 'gyed pa brtsams te yongs su gleng ba'i tshe gang zhig stong pa nyid ma yin pas lan 'debs shing smra bar byed pa de'i tshe de dag thams cad ni lan btab pa ma yin no/ /ci'i phyir zhe na/ bsgrub par bya ba dang mtshungs par 'gyur ba'i phyir dang /'di lta ste dper na dngos po thams cad ngo bo nyid stong pa'o/ /zhes dam bcas na dpe bstan pa'i phyir snam bu ngo bo nyid stong par sgrub par byed pa'i tshe gang zhig re zhig rgyu spun dag ni yod do zhes zer ba'i de ni bsgrub par bya ba dang mtshungs pa yin te/gtan tshigs gang dag nyid kyis snam bu ngo bo nyid stong par bstan pa de dag nyid rgyu spun dag stong pa nyid du rab tu sgrub par byed pa yang yin pas de'i phyir rgyu spun dag stong pa nyid ma yin par ston pa ni bsgrub par bya ba snam bu dang mtshungs pa yin no/ /de bzhin du skye bo chos kyi gnas skabs shes pa dag dge ba'i chos rnams kyi ngo bo nyid ni dge ba'o snyam pa dang /lhag ma rnams kyang de bzhin du rnam par nges so snyam du sems shing de dag la sogs pa smra na dge ba'i chos rnams kyang rten cing 'brel par 'byung ba yin pa'i phyir ngo bo nyid med pas na de yang bsgrub par bya ba dang mtshungs pa yin te/bsgrub par bya ba dang mtshungs pa'i phyir lan btab pa ma yin no/ /slob dpon 'phags pa lhas kyang / dngos po gcig la gang lta ba/ /de ni kun la'ang lta bar 'dod/ /gcig gi stong nyid gang yin pa/ /de nyid kun gyi stong pa nyid//ces gsungs so/ /stong pa nyid kyis bshad byas tshe/ /gang zhig skyon 'dogs smra byed pa/ /de yis thams cad skyon btags min/ /bsgrub par bya dang mtshungs par 'gyur/ /stong pa nyid kyi dngos po ngo bo nyid med pa nyid du rnam par bshad pa'i tshe gang zhig stong pa nyid ma yin pas skyon 'dogs shing smra bar byed pa de'i de dag thams cad kyang snga ma kho na bzhin du bsgrub par bya ba dang mtshungs pa'i phyir skyon btags pa ma yin te/de ni don gcig pa kho na yin mod kyi/ gnas skabs gzhan gyi bye brag gis yang bstan to//tshigs su bcad pa 'di gnyis ni rab tu byed pa thams cad kyi khongs su gtogs par blta bar bya ste/ thams cad du grub pa'i phyir ro/ /phung po brtag pa zhes bya ba ste rab tu byed pa bzhi pa'o// //'dir smras pa/ 'di la sogs pa khams drug po dag kyang bstan/de dag gi so so'i mtshan nyid kyang bstan to/ /de la nam mkha'i mtshan nyid ni mi sgrib pa'o/ /zhes bstan te/ dngos po med na ni mtshan nyid bstan par mi rigs pas de lta bas na mtshan nyid yod pa'i phyir nam mkha' yod do//ji ltar nam mkha' yod pa de bzhin du khams lhag ma rnams kyang rang gi mtshan nyid yod pa'i phyir yod do/ /bshad pa/ nam mkha'i mtshan nyid ni mi 'thad do/ /ci'i phyir zhe na/ 'di ltar/ nam mkha'i mtshan nyid snga rol na/ /nam mkha' cung zad yod ma yin//gal te nam mkha'i mtshan nyid kyi snga rol na nam mkha' zhes bya ba cung zad cig yod na ni de la nam mkha' 'di'i mtshan nyid ni 'di yin no zhes mtshan nyid bstan pa yang rigs pa zhig na nam mkha'i mtshan nyid kyi snga rol na nam mkha' med do/ /nam mkha' med na nam mkha'i mtshan nyid ces bya ba de ji ltar 'thad par 'gyur/ci ste nam mkha'i mtshan nyid kyi snga rol na nam mkha' yod do zhes de ltar rtog na/ de lta na/ gal te mtshan las snga gyur na/ mtshan nyid med par thal bar 'gyur/ 'dir smras pa/ mtshan nyid med pa yod do/ /zhes bshad pa/ mtshan nyid med pa'i dngos po ni/ /'ga' yang gang na yod ma yin/ /yang zhes bya ba'i sgra ni nyid ces bya ba'i don te/ mtshan nyid med pa'i dngos po ni 'ga' yang yod pa ma yin pa nyid de/ gzhung lugs gang du yang ma bstan to//'o na da/ mtshan nyid med pa'i dngos med na/ /mtshan nyid gang du 'jug par 'gyur/ /de bstan par rigs so/ /'di ltar/ mtshan nyid med la mtshan nyid ni/ /mi 'jug de ltar gang gi phyir mtshan nyid med pa'i dngos po 'ga' yang yod pa ma yin pa de'i phyir mtshan nyid med pa'i dngos po med na de gzhi med pa la mtshan nyid 'jug par mi 'thad do//'o na mtshan nyid dang bcas pa'i dngos po la mtshan nyid 'jug par 'gyur ro snyam na/ bshad pa/ mtshan nyid bcas la min/ mtshan nyid dang bcas pa'i dngos po la yang mtshan nyid 'jug par mi 'thad de/dgos pa med pa'i phyir ro/ /dngos po rang gi mtshan nyid dang bcas par rab tu grub pa la yang mtshan nyid kyis ci zhig bya/ de lta na thug pa med par thal bar 'gyur te/ de nam yang mtshan nyid dang bcas pa ma yin par mi 'gyur zhing /rtag tu mtshan nyid 'jug par thal bar 'gyur ro/ /de yang mi 'dod de/ de lta bas na mtshan nyid dang bcas pa'i dngos po la yang mtshan nyid 'jug par mi 'thad do/ /de la 'di snyam du mtshan nyid dang bcas pa dang mtshan nyid med pa dag las gzhan pa la 'jug par sems na/bshad pa/ mtshan bcas mtshan nyid med pa las/ /gzhan la'ang 'jug par mi 'gyur ro/ /ci'i phyir zhe na/ mi srid pa'i phyir te/ gal te mtshan nyid dang bcas na ni mtshan nyid med pa ma yin la/ ci ste mtshan nyid med na ni mtshan nyid dang bcas pa ma yin pas de'i phyir mtshan nyid dang bcas pa dang mtshan nyid med pa zhes bya ba de ni dgag par mi mthun pa yin te/de lta bas na mi srid pa kho na'i phyir mtshan nyid dang bcas pa dang mtshan nyid med pa gzhan la yang mtshan nyid 'jug par mi 'thad do//mtshan nyid 'jug pa ma yin na/ /mtshan gzhi 'thad par mi 'gyur ro/ /mtshan nyid 'jug pa ma yin na mtshan nyid kyi gzhi yang 'thad par mi 'gyur te/ 'di ltar khyod kyis mtshan nyid dang ldan pa las khams rab tu 'grub par bstan na mtshan nyid dang ldan pa de yang mtshan nyid mi 'jug pa'i phyir mi 'thad do//de med na khyod kyi mtshan nyid kyi gzhi gang gis 'grub par 'thad/ smras pa/ de re zhig mtshan nyid ni yod de/ mtshan nyid yod pas mtshan nyid kyi gzhi yang rab tu 'grub par 'gyur ro//bshad pa/ mtshan gzhi 'thad pa ma yin na/ /mtshan nyid kyang ni yod ma yin/ /'di la mtshan nyid kyi gzhi la brten nas mtshan nyid du 'gyur na mtshan nyid kyi gzhi de yang mi 'thad do/ /mtshan nyid kyi gzhi med na gzhi med pa'i mtshan nyid ji ltar 'thad/de lta bas na mtshan nyid kyang yod pa ma yin pa nyid do/ /de phyir mtshan gzhi yod min te/ /mtshan nyid yod pa nyid ma yin/ /de ltar gang gi phyir rnam pa thams cad du brtags na mtshan nyid 'jug par mi 'thad pa de'i phyir mtshan nyid kyi gzhi yod pa ma yin no/ / gang gi phyir mtshan nyid kyi gzhi yod pa ma yin pa de'i phyir gang zhig med pa'i mtshan nyid kyang yod pa nyid ma yin no/ /smras pa/ 'di ni mtshan nyid kyi gzhi'o/ /'di ni mtshan nyid do/ /zhes bya ba de brjod par mi nus mod kyi/ 'on kyang re zhig dngos po ni yod do/ /bshad pa/mtshan gzhi mtshan nyid ma gtogs pa'i/ /dngos po yang ni yod ma yin/ /gal te dngos po 'ga' zhig yod par 'gyur na mtshan nyid kyi gzhi'am mtshan nyid gcig tu 'gyur grang na/ gang mtshan nyid kyi gzhi yang ma yin la mtshan nyid kyang ma yin pa de ni yod pa nyid ma yin pa de'i phyir mtshan nyid kyi gzhi dang mtshan nyid ma gtogs pa'i dngos po 'ga' yang yod pa nyid ma yin no//smras pa/ dngos po ni yod pa nyid de/ ci'i phyir zhe na/ dngos po med pa yod pa'i phyir ro/ /'di la khyod na re mtshan nyid kyi gzhi dang mtshan nyid dag med do zhes zer ba de ni dngos po la ltos pa yin te/de'i phyir gang gi dngos po med do zhes brjod pa'i dngos po de ni 'ga' zhig yod pas de lta bas na dngos po med pa yod pa'i phyir dngos po yod pa nyid do/ /bshad pa legs par brjod do/ /gal te dngos po med pa yod na ni dngos po yang yod par 'gyur ba zhig na/dngos po med pa yod pa ma yin pas dngos po yod par ga la 'gyur/ ji ltar zhe na/ dngos po yod pa ma yin na/ /dngos med gang gi yin par 'gyur/ /sngar/ mtshan gzhi mtshan nyid ma gtogs pa'i//dngos po yang ni yod ma yin/ /zhes bstan pas dngos po de yod pa ma yin na khyod kyi dngos po med pa de gang gi yin par brtag /'di ltar dngos po'i dngos po med par 'gyur grang na/ dngos po de yang yod pa ma yin na dngos po med pa de gang gi yin par 'gyur/de lta bas na dngos po med pa'i phyir dngos po med pa yang med do/ /smras pa/ gang gi dngos po dang dngos po med pa de dag shes par byed cing dngos po dang dngos po med pa dag rtog par byed pa de ni re zhig yod do/ /de yod pas dngos po dang dngos po med pa dag kyang rab tu 'grub pa nyid do//bshad pa/ dngos dang dngos med mi mthun chos/ /gang gis dngos dang dngos med shes/ /mi mthun pa'i chos ni de dag mi bzlog pa'i chos te/ dngos po dang dngos po med pa dag gi mi mthun pa'i chos ni dngos po dang dngos po med pa mi mthun pa'i chos so//dngos po dang dngos po med pa dag gi mi mthun pa'i chos gang yin zhe na/ dngos po yang ma yin la dngos po med pa yang ma yin pa'o/ /de la gal te 'ga' zhig yod par 'gyur na dngos po'i chos sam/ dngos po med pa'i chos shin tu 'gyur grang na/gang dngos po'i chos kyang ma yin la dngos po med pa'i chos kyang ma yin pa de ni yod pa nyid ma yin no/ /dngos po dang dngos po med pa dag dang mi mthun pa'i chos de med na gang gis dngos po dang dngos po med pa de dag shes par brtag /de lta bas na dngos po dang dngos po med par shes pa yang med do//de phyir nam mkha' dngos po min/ /dngos med ma yin mtshan gzhi min/ /mtshan nyid ma yin/ /de ltar gang gi phyir brtags na mtshan nyid kyi gzhi dang mtshan nyid dag med cing / mtshan nyid kyi gzhi dang mtshan nyid dag ma gtogs pa'i dngos po gzhan yang med do/ /dngos po med na dngos po med pa yang med pa de'i phyir nam mkha' ni dngos po yang ma yin dngos po med pa yang ma yin/ mtshan nyid kyi gzhi yang ma yin mtshan nyid kyang ma yin no/ / 'di ltar gal te nam mkha' zhes bya ba cung zhig yod par gyur na de bzhi po de dag las gang yang rung ba zhig tu 'gyur grang na/ bzhi po de dag kyang med pas de'i phyir nam mkha' yod pa ma yin no/ /khams lnga po/ gzhan gang dag kyang nam mkha' mtshungs/ /nam mkha' mtshungs zhes bya ba ni//nam mkha' dang mtshungs pa ste/ ji ltar nam mkha' brtags na dngos po yang ma yin/ dngos po med pa yang ma yin/ mtshan nyid kyi gzhi yang ma yin mtshan nyid kyang ma yin te/ nam mkha' zhes bya ba ni ci yang ma yin pa de bzhin du sa la sogs pa khams lnga po gzhan dag gang yin pa de dag kyang dngos po yang ma yin/dngos po med pa yang ma yin/ mtshan nyid kyi gzhi yang ma yin/ mtshan nyid kyang ma yin te/ dngos po 'ga' yang yod pa ma yin pas de'i phyir khams rnams kyang yod pa ma yin no//smras pa/ 'di la sangs rgyas bcom ldan 'das rnams kyis chos bstan pa dag ni phal cher phung po dang khams dang skye mched dag la brten pa yin na de la gal te phung po dang khams dang skye mched dag med pa nyid yin pa de dag don med pa nyid du mi 'gyur ram de dag don med pa nyid du mi rigs na de ci lta bu zhig /bshad pa/ kho bos phung po dang khams dang skye mched dag med pa nyid du mi smra'i/ de dag yod pa nyid du smra ba sel bar byed do/ /de gnyi ga yang skyon du che ste/ 'di ltar 'og nas kyang / yod ces bya ba rtag par 'dzin//med ces bya ba chad par lta/ /de phyir yod dang med pa la/ /mkhas pas gnas par mi bya'o/ /zhes 'byung ngo / /bcom ldan 'das kyis kyang ka t+ya na 'jig rten 'di ni gnyis la gnas te/ phal cher yod pa nyid dang / med pa nyid la gnas so zhes bka' stsal to//de'i phyir kho bo ni rten cing 'brel bar 'byung bas yod pa nyid dang med pa nyid kyi skyon dang bral ba chad pa ma yin rtag pa ma yin pa rjes su rab tu ston pa med pa nyid du mi smra'o/ /de lta bas na kho bo cag la phung po dang / khams dang skye mched dag la brten pa'i chos ston pa dag don med pa nyid du mi 'gyur ro//blo chung gang dag dngos rnams la/ /yod pa nyid dang med nyid du/ /lta ba de ni blta bya ba/ /nye bar zhi ba zhi mi mthong / /blo chung ngu gang dag rten cing 'brel bar 'byung ba mchog tu zab pa ma rtogs pa na dngos po rnams la yod pa nyid dang /med pa nyid du rjes su lta ba chad pa dang rtag par lta bas blo gros kyi mig bsgribs pa de dag gis ni mya ngan las 'das pa lta bar bya ba nye bar zhi zhing zhi ba mi mthong ngo / /de'i phyir yang dag pa ji lta ba bzhin du ma mthong ba spros pa la mngon par dga' ba'i yid dang ldan pa de dag gi phung po dang khams dang skye mched dag la brten pa'i chos ston pa dag ni don med pa nyid du 'gyur ro//de lta bas na 'di ni don dam pa yin gyis ma 'jigs shig /smras pa/ ci'i phyir nam mkha'i khams gang yin pa de dang por brtags/khams bstan pa la dang por sa'i khams bstan pas sa'i khams nyid dang po brtag par bya ba'i rigs so/ /bshad pa/ grags pa'i don gyis ma grags pa'i don rab tu bsgrub par bya ste/ 'jig rten ni phal cher nam mkha' la ci yang ma yin par mos te/'di ltar smra ba po dag na re spros pa de dag thams cad ni nam mkha'o/ /zhes zer bas de dag thams cad ni ci yang ma yin no/ /zhes bya bar bsam mo / /de'i phyir khams lhag ma lnga po dag kyang nam mkha' dang mtshungs par brjod par bya'o zhes bya ba'i dpe bstan pa'i phyir nam mkha' stong pa nyid du grub pa dang por bstan to//khams brtag pa zhes bya ba ste rab tu byed pa lnga pa'o// //'dir smras pa/ khyod kyis phung po dang khams dang skye mched dag gi stong pa nyid rjes su rab tu bstan pas kho bo stong pa nyid nyan 'dod par gyur gyis/de'i phyir da ni 'dod chags dang chags pa brtag par bya ba'i rigs so/ /bshad pa de ltar bya'o/ /smras pa/ 'di la de dang der 'dod chags dang chags pa spangs pa bstan/ 'dod chags nye bar zhi bar bya ba'i phyir rigs pa yang bstan to/ / med na ni nye bar zhi bar bya ba'i rigs pa yang bstan pa'i mi rigs te/ 'di ltar sbrul gyis ma zin na gsang sngags dang sman gyi bya ba med do/ /de lta bas na 'dod chags dang chags pa dag ni yod do/ /bshad pa/ 'dod chags dang chags pa dag ni mi srid do/ /ji ltar zhe na/gal te 'dod chags snga rol na/ /'dod chags med pa'i chags yod na/ /de la brten nas 'dod chags yod/ /chags yod 'dod chags yod par 'gyur/ /gal te 'dod chags kyi snga rol na chags pa 'dod chags med pa 'dod chags las gzhan du gyur pa 'ga' zhig yod na ni de la brten nas 'dod chags yod par 'gyur ro//ci'i phyir zhe na/ chags yod 'dod chags yod par 'gyur/ /'di ltar chags pa yod na 'dod chags kyang 'di'o zhes 'thad par 'gyur ro/ /chags pa med na de su'i 'dod chags su 'gyur te/'di ltar gzhi med pa la 'dod chags mi 'thad pas de'i phyir chags pa med na 'dod chags mi 'thad do/ /smras pa/ chags pa yod na 'dod chags yod do/ /'dir bshad pa/ chags pa yod par gyur na yang / /'dod chags yod par ga la 'gyur/ / khyod kyi chags pa yod par gyur na yang / 'dod chags yod pa nyid du ga la 'gyur te/ 'di ltar chags pa la 'dod chags kyi bya ba ci yang med do/ /chags par mi byed na ni ji ltar 'dod chags yin par 'gyur/ ci ste 'gyur na ni gang yang 'dod chags ma yin pa nyid du mi 'gyur bas de ni mi 'dod de/de'i phyir chags pa yod par gyur na yang 'dod chags mi 'thad do/ /smras pa/ re zhig chags pa ni yod de/ de yang 'dod chags med na mi 'byung bas 'dod chags kyang rab tu grub pa nyid do/ /bshad pa/ chags pa la yang 'dod chags ni//yod dam med kyang rim pa mtshungs/ /chags pa yod par yongs brtags na/ /'dod chags yod dam med kyang rung ste chags pa la yang 'dod chags mi 'thad pa de nyid dang rim pa mtshungs so/ /ji ltar zhe na/ gal te chags pa'i snga rol na/ / chags med 'dod chags yod na ni/ /de la brten nas chags pa yod/ /'dod chags yod na chags yod 'gyur/ /gal te chags pa'i snga rol na 'dod chags chags pa med pa chags pa las gzhan du 'gyur ba 'ga' zhig yod na ni/ de la brten nas chags pa yod par 'gyur ro//ci'i phyir zhe na/ 'dod chags yod na chags yod 'gyur/ /'di ltar 'dod chags yod na chags pa yang 'dis 'di chags so zhes 'thad par 'gyur ro/ /'dod chags med na gang gis de chags par 'gyur/ ma chags pa na ni ji ltar chags par 'gyur/ci ste 'gyur na ni gang yang chags pa ma yin pa nyid du mi 'gyur bas de ni mi 'dod de/ de'i phyir 'dod chags med na chags pa mi 'thad do/ /de la 'di snyam du 'dod chags yod na chags pa yod par sems na/ bshad pa/ 'dod chags yod par gyur na yang //chags pa yod par ga la 'gyur/ /khyod kyi 'dod chags yod par gyur na yang chags pa med pa nyid du ga la 'gyur te/ 'di ltar gal te 'dod chags yod na chags par 'gyur na/ chags pa med de 'dod chags des chags par gyur pa ma yin no//chags pa ma yin na ni ji ltar chags par 'gyur/ ci ste 'gyur na ni nam yang chags pa ma yin pa nyid du mi 'gyur bas de ni mi 'dod de/ 'dod chags la yang chags pa ni/ /yod dam med kyang rim pa mtshungs/ /de'i phyir 'dod chags yod par gyur na yang chags pa mi 'thad do//smras pa/ 'dod chags dang chags pa gnyis la snga phyi med de/ 'di ltar de gnyis ni lhan cig nyid du skye ba yin no/ /bshad pa/ 'dod chags dang ni chags pa dag /lhan cig nyid du skye mi rigs/ /'dod chags dang chags pa dag lhan cig nyid du skye bar mi 'thad do//ci'i phyir zhe na/ 'di ltar 'dod chags chags pa dag /phan tshun ltos pa med par 'gyur/ /'di ltar gal te/ 'dod chags dang chags pa dag lhan cig nyid du skye bar gyur na 'dod chags dang chags pa dag phan tshun ltos pa med par 'gyur ro//de ltar gyur na 'di'i 'dod chags ni 'di'o/ /'dis ni 'di chags so zhes bya ba de dag mi 'thad do/ /de dag med na 'dod chags mi 'thad pa nyid la chags pa yang mi 'thad pa nyid de/ 'di ltar 'dod chags ni chags par byed pa yin la chags pa ni chags par bya ba yin na lhan cig nyid du skyes pa phan tshun ltos med pa dag la de dag mi 'thad pas de'i phyir 'dod chags dang chags pa dag lhan cig nyid du skye bar yang mi rigs so//yang gzhan yang / khyod na re gang dag lhan cig nyid do zhes zer ba'i 'dod chags dang /chags pa de dag gcig pa nyid dam tha dad pa nyid du 'gyur grang na/ de la/ gcig nyid lhan cig nyid med de/ /re zhig gcig pa nyid yin na lhan cig nyid mi 'thad do/ /ci'i phyir zhe na / de nyid de dang lhan cig min/ /'di na ba lang gcig pu zhes pa ni gcig pa nyid de ba lang gcig la snyegs so//de la ba lang gcig pu de nyid ba lang gcig pu de nyid dang / ji ltar lhan cig tu 'gyur te/ de'i phyir gcig pu nyid yin na lhan cig nyid mi 'thad do/ /smras pa/ 'o na tha dad pa nyid yin na lhan cig nyid du 'gyur ro//bshad pa/ ci ste tha dad nyid yin na/ /lhan cig nyid du ji ltar 'gyur/ /gal te gcig pa nyid yin na yang lhan cig nyid du mi 'thad na tha dad pa nyid yin na lhan cig nyid du ji ltar 'gyur/ 'di ltar tha dad pa nyid kyi mi mthun pa'i phyogs ni lhan cig nyid yin na mi mthun pa de gnyis gcig na ji ltar lhan cig gnas par 'gyur te/de'i phyir tha dad pa nyid yin na yang lhan cig nyid mi 'thad do/ /ci ste mi 'thad pa bzhin du yang 'dod chags dang chags pa dag la lhan cig nyid yod do/ /zhes rtog na/ de la yang bshad par bya ste/gal te gcig pu lhan cig na/ /grogs med par yang der 'gyur ro/ /gal te tha dad lhan cig na/ /grogs med par yang der 'gyur ro/ /gal te re zhig 'dod chags dang chags pa dag gcig pa nyid yin yang lhan cig nyid du 'gyur na ni de lta na grogs med par yang lhan cig nyid du 'gyur ro//ji ltar zhe na/ 'di la gcig ni gcig pu la snyegs te/ de na ba lang gcig dang rta gcig ces bya ba'i gcig nyid ni ba lang la yang snyegs rta la yang snyegs pas gang dang gang na gcig pa nyid yod pa de dang de na lhan cig nyid yod cing /ba lang gcig pu nyid dang / rta gcig pu nyid la grogs med par yang lhan cig nyid yod par thal bar 'gyur te/ de lta na lhan cig nyid du brtag pa don med par 'gyur ro/ /ci ste yang tha dad pa nyid yin yang / lhan cig nyid du 'gyur na ni de lta na yang grogs med par yang lhan cig nyid du 'gyur ro//ji ltar zhe na/ 'di la ba lang las kyang rta tha dad la/ rta las kyang ba lang tha dad pas gang dang gang na tha dad pa nyid yod pa de dang de na lhan cig nyid yod cing / ba lang tha dad pa nyid dang / rta tha dad pa nyid la grogs med par yang lhan cig nyid yod par thal bar 'gyur te/de lta na yang lhan cig nyid du brtag pa don med par 'gyur ro/ /smras pa/ tha dad pa nyid ni ba lang la yod pa yang ma yin la/ rta la yod pa yang ma yin gyi/ de gnyi ga lhan cig byung ba la yod pas de ni gnyi ga spyi'i 'bras bu yin te phrad pa bzhin no//gal te tha dad pa nyid so so la yod par gyur na ni tha dad pa nyid gnyis su 'gyur ba dang / dngos po phan tshun mi ltos par re re la yang yod par 'gyur bas don mi 'dod de/ de'i phyir tha dad pa nyid ni gnyi ga lhan cig byung ba la yod do//bshad pa/ gal te tha dad lhan cig na/ /'dod chags chags pa ci zhig yin/ /tha dad nyid du grub gyur na/ /des na de gnyis lhan cig 'gyur/ /tha dad pa nyid gnyi ga la yod par ni 'dod la rag go/ /gal te tha dad pa nyid gnyi ga la yod pa la lhan cig nyid du rtog na de ltar na 'dod chags dang chags pa dag la ci zhig rab tu bsgrub pa yin/gang gi tshe de ltar yang rtog na de gnyis tha dad pa nyid du grub pa kho nar 'gyur ro/ /des na tha dad pa nyid du rab tu grub pa'i phyir de gnyis lhan cig nyid du rtog par 'gyur ro//gal te 'dod chags chags pa dag /tha dad nyid du grub 'gyur na/ /de gnyis lhan cig nyid du ni/ /ci yi phyir na yongs su rtog /nyid du zhes bya ba'i sgra ni kho nar zhes bya ba'i don to/ /gal te 'di snyam du 'dod chags dang chags pa dag tha dad pa'i dngos por grub pa nyid du sems na/de gnyis la lhan cig gi dngos po tha dad pa'i dngos po dang mi mthun pa de ni med par ci'i phyir yongs su rtog par byed gang gi tshe tha dad pa'i dngos por grub na lhan cig gi dngos por brtags su zin kyang / 'dod chags dang chags pa dag ldog par 'gyur ba'am/'jug par 'gyur ba cung zad tsam yang med do/ /'di ltar chags pa la 'dod chags kyis yang ci zhig byar yod de/ de lta bas na lhan cig gi dngos por brtags su zin kyang tha dad pa nyid kyi skyon chags pa kho na'i phyir lhan cig gi dngos por brtag pa don med par 'gyur te/tshig zin pa la chus 'debs pa bzhin no/ /tha dad grub par ma gyur pas/ /de phyir lhan cig 'dod byed dam/ /lhan cig rab tu bsgrub pa'i phyir/ /tha dad nyid du yang 'dod dam/ /'dod chags dang chags pa dag tha dad pa nyid du ni dgos pa med pa'i phyir grub par ma gyur pas de rab tu bsgrub pa'i phyir lhan cig nyid du 'dod par byed la/lhan cig nyid du yang gcig pa nyid kyi skyon chags pa'i phyir ma grub pas de rab tu bsgrub pa'i phyir yang tha dad pa nyid du yang 'dod par byed pa khyod ni gos ngan pa lhags pa chen pos nyen pa bskums nas bskums pa yang brnags mi bzod pas yang skyong bar byed pa dang 'dra ba'o //tha dad dngos po ma grub pas/ /lhan cig dngos po 'grub mi 'gyur/ /tha dad dngos po gang zhig la/ /lhan cig dngos por 'dod par byed/ /'di la so so la tha dad pa'i dngos po yod dam de gnyis lhan cig 'byung ba la yod grang na/'dod chags dang chags pa tha dad du gyur pa dag la ni 'di ni 'dod chags so/ /'di ni 'dis chags so zhes bya ba de lta bu rnam pa thams cad du mi srid do/ /tha dad pa'i dngos por rab tu grub pa med na lhan cig gi dngos po 'grub par mi 'gyur ro//'di ltar khyod ni tha dad pa'i dngos po yod na de gnyis kyi lhan cig gi dngos po yod par 'dod na/ tha dad pa'i dngos po de yang rnam pa thams cad du mi 'grub bo/ /tha dad pa'i dngos po med na khyod kyi lhan cig gi dngos po yod par ga la 'gyur/'o na tha dad pa'i dngos po gang zhig yod na 'dod chags dang chags pa dag lhan cig gi dngos por 'dod pa ci re re la yod dam/ 'on te gnyi ga lhan cig byung ba la yod dam 'on te khyod kyis rang dgar tha dad pa'i dngos po gzhan zhig brtags kyang rung ste/ tha dad pa gang yod na 'dod chags dang chags pa dag lhan cig gi dngos por 'dod pa de smros shig /de ltar 'dod chags chags pa dag /lhan cig lhan cig min mi 'grub/ /'dod chags bzhin du chos rnams kun/ /lhan cig lhan cig min mi 'grub/ /gal te 'dod chags snga rol na//'dod chags med pa'i chags yod na/ /de la brten nas 'dod chags yod/ /chags yod 'dod chags yod par 'gyur/ /zhes bya ba la sogs pa gang dag sngar 'das pa'i rnam pa de dag gis de ltar 'dod chags rnams chags pa dang lhan cig gam chags pa med par yang 'grub pa med do//ji ltar 'dod chags chags pa dang lhan cig gam chags pa med pa yang 'grub pa med pa de bzhin du chos thams cad kyang 'ga' zhig dang lhan cig gam 'ga' yang med par yang 'grub pa med do/ /'dod chags dang chags pa brtag pa zhes bya ste rab tu byed pa drug pa'o// //'dir smras pa/ khyod kyis 'dod chags dang chags pa brtag pa de byas pas kho bo'i yid stong pa nyid nyan pa la spro bar byas kyi / de'i phyir de ni 'dus byas kyi mtshan nyid brtag par bya ba'i rigs so//bshad pa/ de ltar bya'o/ /'dir smras pa/ 'di la skye ba dang / gnas pa dang 'jig pa dag 'dus byas kyi spyi'i mtshan nyid du bstan te/ med pa la ni mtshan nyid bstan par mi rigs pas mtshan nyid yod pa'i phyir 'dus byas yod do//bshad pa/ 'dus byas kyi mtshan nyid mi 'thad pas de yod pa'i phyir 'dus byas yod par ga la 'gyur/ gal te ji ltar zhe na/ sngar/ mtshan nyid med la mtshan nyid ni/ /mi 'jug mtshan nyid bcas la min/ /zhes bstan pas bkag zin pa'i phyir ro//yang gzhan yang / gal te skye ba 'dus byas na/ /de la mtshan nyid gsum ldan 'gyur/ /ci ste skye ba 'dus ma byas/ /ji ltar 'dus byas mtshan nyid yin/ /zhes bya ba 'di ni/ gal te skye ba 'dus byas na / /ji ltar 'dus byas mtshan nyid yin/ /zhes phyogs gong ma dang yang sbyar ro//skye ba 'dus byas kyi mtshan nyid bstan pa gang yin pa de yang 'dus byas sam 'dus ma byas shig tu brtag grang na/ de la re zhig 'dus byas su yongs su rtog na/ skye ba de yang skye ba dang gnas pa dang 'jig pa'i mtshan nyid kyis mtshan nyid gsum dang ldan par 'gyur te/'dus byas yin pa'i phyir ro/ /mtshan nyid gsum dang ldan par 'gyur ba ni/ mtshan nyid gsum po dag tshogs par 'gyur ba'o/ /smras pa/ de yang mtshan nyid gsum dang ldan no/ /ji ltar 'dus byas mtshan nyid yin/ gal te skye ba yang skye ba dang gnas pa dang 'jig pa'i mtshan nyid dang ldan/gnas pa yang skye ba dang gnas pa dang 'jig pa'i mtshan nyid dang ldan/ 'jig pa yang skye ba dang gnas pa dang 'jig pa'i mtshan nyid dang ldan na mtshan nyid mtshungs pa'i phyir mtshan nyid rnams la khyad par yod par 'gyur ro/ / khyad par med na 'di ni skye ba'o/ /'di ni gnas pa'o/ /'di ni 'jig pa'o/ /zhes bya ba de dag yod par ga la 'gyur/ smras pa/ de ni nyes par mi 'gyur te/ ji ltar spyir 'dus byas kyi mtshan nyid yin du zin kyang khyad par gyi mtshan nyid la ltos nas 'di ni bum pa'o/ / 'di ni snam bu'o/ /zhes bya ba de dag yod pa de bzhin du 'dir yang khyad par gyi mtshan nyid la ltos nas skye ba dang gnas pa dang 'jig pa dag rab tu 'grub par 'gyur ro/ /khyad par de gang zhe na/ skyed par byed pa dang / gnas par byed pa dang / 'jig par byed pa dag go/ / bshad pa/ de ni mi 'thad do / /ci'i phyir zhe na/ 'di ltar bum pa skyed par byed pa dang / mngon par 'grub par byed pa gang yin pa des ni gzhan ci yang skyed par mi byed la/ bum pa gnas par byed pas kyang gzhan ci yang gnas par mi byed cing / bum pa 'jig par byed pas kyang gzhan ci yang 'jig par mi byed pa'i phyir ro//smras pa/ de dag gis bum pa nyid skye ba dang gnas pa dang / 'jig par byed pas nyes pa med do/ /bshad pa/ 'o na ni de dag bum pa'i mtshan nyid ma yin te/ byed pa po yin pa'i phyir ro/ /'di lta bu skyed par byed pa'i pha bu'i mtshan nyid ma yin la gzhi dang tho ba yang bum pa'i mtshan nyid ma yin pa'i phyir te/de lta bas na skye ba la sogs pa dag 'dus byas yin na 'dus byas kyi mtshan nyid du mi 'thad do/ /ci ste skye ba 'dus ma byas su yongs su rtog na de la yang bshad par bya ste/ 'di ltar 'dus byas mtshan nyid yin/ /'dus ma byas yin na ji ltar 'dus byas kyi mtshan nyid du 'gyur te/ 'dis mtshon par byed pas mtshan nyid yin na gang skye ba dang gnas pa dang 'jig pa dang bral ba des ni rang nyid la yang mtshan par mi byed do/ /gang rang nyid la mtshan par mi byed pa des gzhan ji ltar mtshon par byed/ci ste byed na ni mya ngan las 'das pa 'dus ma byas kyang 'dus byas kyi mtshan nyid yin par thal bar 'gyur bas de ni mi 'dod de/ de lta bas na skye ba dang gnas pa dang 'jig pa dag 'dus ma byas yin na yang 'dus byas kyi mtshan nyid du mi 'thad de /mtshan nyid du brtags na yang skye ba dang / gnas pa dang / 'jig pa dag so so ba'am/ 'dus pa zhig 'dus byas kyi mtshan nyid du 'gyur grang na/ de la/ skye sogs gsum po so so yis/ /'dus byas mtshan nyid 'dra bar ni/ /nus min 'dus pa yin na yang //gcig la dus gcig ji ltar rung / /skye ba dang gnas pa dang / 'jig pa dag re re la yang 'dus byas kyi mtshan nyid bya bar mi nus te/ nus min zhes bya ba ni mi chog pa dang / mi nus so zhes bya ba'i tha tshig go/ /ji ltar zhe na/ 'di la re zhig dngos po mngon par ma grub cing /med pa la ni skye ba dang gnas pa dang 'jig pa dag mi 'thad do/ /'di ltar skye ba dang gnas pa dang 'jig pa dag ni dngos po la brten pa yin te/ bum pa'i skye ba dang / bum pa'i gnas pa dang bum pa'i 'jig pa zhes bya ba yin na bum pa de mngon par ma grub na/ skye ba dang gnas pa dang 'jig pa dag gang gi mtshan nyid du 'gyur/ de ni 'jig pa zhes bya ba ni zhig pa dang med pa ste/ de gang la yod pa de ni med pa nyid do/ /de med na skye ba dang gnas pa dang 'jig pa dag gang gi mtshan nyid du 'gyur te/ de ltar re zhig skye ba dang gnas pa dang 'jig pa dag so so'am/'dus pa yang dngos po mngon par ma grub pa dang / zhig pa'i mtshan nyid ma yin no/ /de la 'di snyam du de dag dngos po mngon par grub pa dang ma zhig pa'i mtshan nyid yin par sems na/ de yang mi 'thad de/ ji ltar zhe na/ 'di la bum pa zhes bya ba'i dngos po yod pa la ni skye ba med de/'di ltar yod pa la yang skye ba'i bya ba med do/ /ci ste yod kyang skye bar gyur na ni nam yang mi skye bar mi 'gyur bas de ni mi 'dod do/ /de lta bas na yod pa la skye ba med de/ med pa gang yin pa de ji ltar mtshan nyid du 'gyur/ smras pa/ re zhig gnas pa ni yod do//bshad pa/ gnas pa yang mi 'thad de/ ci'i phyir zhe na/ 'jig pa dang rjes su 'brel pa'i phyir ro/ /'di ltar 'dus byas ni mi rtog pa dang khor zug tu rjes su 'brel pas khor zug tu mi rtag na ji ltar gnas par 'gyur te/ gnas pa dang 'jig pa gnyis 'gal ba'i phyir ro//'di ltar 'og nas kyang / dngos po 'gag par 'gyur na ni/ /gnas par 'thad pa ma yin no/ /gang yang 'gag par mi 'gyur ba/ /de ni dngos po mi 'thad do/ /zhes 'byung ngo / /slob dpon 'phags pa lhas kyang / gnas med dngos po ga la yod/ / mi rtag pas na gang la gnas/ /gal te dang po gnas gyur na/ /tha mar rnyings par mi 'gyur ro/ /gal te khor zug mi rtag yod/ /khor zug gnas par mi 'gyur ro/ /yang na rtag par gyur pa las/ /phyis na mi rtag par yang 'gyur/ /gal te dngos po mi rtag dang / /lhan cig gnas pa yod gyur na//mi rtag log par 'gyur ba'am/ /yang na gnas pa brdzun par 'gyur/ /zhes gsungs so/ /de lta bas na gnas pa yang med de/ med na gang yin pa ji ltar 'dus byas kyi mtshan nyid du 'gyur/ smras pa/ 'o na 'jig pa yod do/ /bshad pa/ gnas pa med par 'jig pa ga la yod de/'di ltar dngos po gnas pa yod na 'jig par 'gyur gyi gnas pa med na 'jig par ga la 'gyur/ de yang 'jig pa zhes bya ba ni zhig pa dang med pa ste de gang la yod pa de ni med pa nyid do/ /de med na skye ba dang gnas pa dang 'jig pa dag gang gi mtshan nyid du 'gyur zhes bstan zin pas de'i phyir 'jig pa yang 'dus byas kyi mtshan nyid du mi 'thad do//de'i phyir de ltar skye ba dang gnas pa dang / 'jig pa dag so so ba yang 'dus byas mngon par grub pa'i mtshan nyid du mi 'thad do/ /lhan cig tu skye'o zhes gsungs pa'i phyir chos kyi gnas skabs shes pa dag skye ba dang gnas pa dang 'jig pa dag lhan cig tu skye'o zhes brjod pas de'i phyir yang so so ba dag mtshan nyid du mi 'thad do//smras pa/ 'dus pa dag ni mtshan nyid yin no/ /bshad pa/ 'dus pa yin na yang / gcig la dus gcig ji ltar rung /so so ba gang dag mtshan nyid ma yin pa de dag 'dus pa phan tshun 'gal ba dag 'dus byas kyi dngos po gcig la dus gcig tu ji ltar rung / 'di ltar gang gi tshe na skye ba de'i tshe na gnas pa dang 'jig pa med la/ gang gi tshe gnas pa de'i tshe na skye ba dang 'jig pa med cing /gang gi tshe 'jig pa de'i tshe na yang skye ba dang gnas pa med pa de'i phyir skye ba dang gnas pa dang 'jig pa so so ba dang 'dus pa dag kyang 'dus byas kyi mtshan nyid du mi 'thad do/ /mtshan nyid mi 'thad pa'i phyir 'dus byas yod pa ma yin no/ /smras pa/ltag chod de lta bu 'ba' zhig gis ci bya/ yong ni gang gi skye ba dang / gnas pa dang / 'jig pa de 'dus byas yin no/ /bshad pa/ kho bo ltag chod kyi phyir mi rtsom gyis kho bo ni de kho na shes par bya ba'i phyir rtsom mo/ /skye ba zhes bya ba de gang yin pa smros shig / smras pa/ bum pa skye'o/ /bshad pa/ re zhig gnas skabs gang la bum pa zhes bya bar 'gyur ba legs par soms la smros shig /de la gang gi tshe ma skyes pa la ni bum pa zhes byar yang mi rung ste/ skyes pa nyid la bum pa zhes bya bar 'gyur zhing bum pa yang 'dus byas yin pa'i phyir mtshan nyid gsum dang ldan pa nyid yin pa de'i tshe skye ba bum pa'i mtshan nyid yin no//zhes bya ba de ji ltar 'thad/ ji ltar yod pa la yang skye bas ci bya/ mtshan nyid dang ldan pa la yang mtshan nyid kyis ci bya/ ci ste bum pa ma yin pa skye zhing skyes zin nas bum par 'gyur ro snyam na/ de yang rigs pa ma yin te/bum pa ma yin pa skye zhing zhes bya ba de re lde'am/ snam bu'am/ 'on te bum pa ma yin pa zhes bya ba ci yang med pa zhig gam ci yin/ de la re zhig gal te re lde'am/ snam bu zhig skye na ni de skyes zin nas ji ltar bum par 'gyur/ ci ste bum pa ma yin pa zhes bya ba ci'ang med pa zhig yin na ni ci yang med pa gang yin pa de ji ltar skye ci ste skye na ni ri bong gi rwa yang ci'i phyir mi skye/de'i phyir skye ba zhes bya ba de mi 'thad do/ /skye ba zhes bya ba de 'di la med na gang skye ba de 'dus byas yin no/ /zhes bya ba de ji ltar 'thad par 'gyur/ gang skye ba med pa ji ltar gnas pa dang 'jig par 'gyur/de lta na skye ba dang gnas pa dang 'jig pa zhes bya ba dag ni/ 'jig rten gyi tha snyad kho nar zad do/ /yang gzhan yang / skye dang gnas dang 'jig rnams la/ /'dus byas mtshan nyid gzhan zhig ni/ /gal te yod na thug pa med/ /med na de dag 'dus byas min//skye ba dang / gnas pa dang / 'jig pa gang dag 'dus byas kyi mtshan nyid du bstan pa de dag la 'dus byas kyi mtshan nyid gzhan zhig yod dam 'on te med/ de la re zhig gal te de dag las 'dus byas kyi mtshan nyid gzhan zhig yod na ni de lta na thug pa med par thal bar 'gyur te/skye ba la yang skye ba yod la de la yang gzhan zhig yod cing de la yang gzhan yod de/ mtha' med par 'gyur bas de ni mi 'dod do/ /ci ste thug pa med par gyur na mi rung ngo snyam pa de dag la 'dus byas kyi mtshan nyid gzhan med par sems na/ de lta na yang de dag 'dus byas ma yin par 'gyur te/'dus byas ma yin na ji ltar 'dus byas kyi mtshan nyid du 'gyur zhe na / sngar bstan zin to// //dbu ma rtsa ba'i 'grel pa bud d+ha pA li ta/ bam po gsum pa/ smras pa/ skye ba dang gnas pa dang 'jig pa dag 'dus byas kyang yin la/thug pa med par yang thal bar mi 'gyur te/ ji ltar zhe na/ skye ba'i skye bas rtsa ba yi/ /skye ba 'ba' zhig skyed par byed/ /rtsa ba'i skye bas skye ba yi/ /skye ba'ang skyed par byed pa yin/ /'di la rnam par shes pa la sogs pa chos rnams las chos gang yang rung ba zhig skye ba na de bdag nyid dang bco lnga ste/chos de dang / chos de'i skye ba dang / chos de'i gnas pa dang / chos de'i 'jig pa dang / chos de'i ldan pa dang / chos de'i rga ba dang / 'dir gal te chos de dkar po yin na chos de yang dag pa'i rnam par grol ba'am/ ci ste chos de nag po yin na chos de'i log pa'i rnam par grol ba dang /de bzhin du gal te chos de nges par 'byung ba yin na chos de'i nges par 'byung ba nyid dam/ ci ste chos de nges par 'byung ba ma yin na chos de'i nges par 'byung ba ma yin pa nyid skye ste/ de dag ni re zhig 'khor ces bya'o/ /de ni skye ba'i skye ba dang /gnas pa'i gnas pa dang / 'jig pa'i 'jig pa dang / ldan pa'i ldan pa dang / rga ba'i rga ba dang / yang dag pa'i rnam par grol ba'i yang dag pa'i rnam par grol ba'am/ log pa'i rnam par grol ba'i log pa'i rnam par grol ba dang / nges par 'byung ba nyid kyi nges par 'byung ba nyid dam/nges par 'byung ba ma yin pa nyid kyi nges par 'byung ba ma yin pa nyid kyang skye ste/ de dag ni 'khor gyi 'khor ces bya ste/ de ltar chos skye ba bdag nyid dang bco lnga skye'o/ /de la rtsa ba'i skye ba gang yin pa des ni bdag nyid ma gtogs par chos de'i bdag nyid dang bcu bzhi po ji skad bstan pa dag skyed par byed do//skye ba'i skye bas ni rtsa ba'i skye ba de 'ba' zhig skyed par byed de/ de ltar gcig gis gcig skyed par byed pas thug pa med par mi 'gyur ro/ /de bzhin du rtsa ba'i gnas pas kyang gnas pa'i gnas pa gnas par byed la/gnas pa'i gnas pas kyang rtsa ba'i gnas pa gnas par byed do/ /rtsa ba'i 'jig pas kyang 'jig pa'i 'jig pa 'jig par byed la/ 'jig pa'i 'jig pas kyang rtsa ba'i 'jig pa 'jig par byed pas de ltar na 'di la yang thug pa med par thal bar mi 'gyur ro/ /bshad pa/gal te khyod kyi skye ba'i skyes/ /rtsa ba'i skye ba skyed byed na/ /khyod kyi rtsa bas ma skyed des/ /de ni ji ltar skyed par byed/ /gal te khyod kyi skye ba'i skye bas rtsa ba'i skye ba skyed par byed na khyod kyi rtsa ba'i skyed pas ma skyes pa'i skye ba des rtsa ba'i skye ba de ji ltar skyed par byed de/ rang nyid ma skyes pa'i phyir ro//smras pa/ rtsa ba'i skye bas bskyed pa kho na'i skye ba skye bas rtsa ba'i skye ba skyed par byed kyi ma skyed pas mi byed do/ /bshad pa/ gal te khyod kyi rtsa ba yis/ /bskyed pa de yis rtsa skyed na/ /des ma skyed pa'i rtsa ba des/ /de ni ji ltar skyed par byed/ /gal te khyod kyi rtsa ba'i skye bas bskyed pa'i skye ba'i skye ba des rtsa ba'i skye ba de skyed par byed na skye ba'i skye ba des ma skyed pa'i rtsa ba'i skye ba des skye ba'i skye ba de ji ltar skyed par byed/de ltar na de ni gcig la gcig brten pa yin te/ gcig la gcig brten pa dag ni rab tu rtag tu mi rung ngo / /smras pa/ skye ba nyid skye bzhin pas skye ba'i skye ba skyed par byed kyi ma skyes pas ni mi byed do/ /bshad pa/ khyod kyi de ni skye bzhin pa/ /ma skyes de yis gal te ni/ /de ni skyes par byed nus na/ /de skyed par ni 'dod la rag /khyod kyi rtsa ba'i skye ba de skye bzhin pa rang nyid ma skyes pa des gal te skye ba'i skye ba gzhan de skyed par byed nus na ni skye ba'i skye ba de skyed par 'dod la rag go//yang na khyod kyi skye ba'i skye ba de skye bzhin pa rang nyid ma skyes pa des gal te rtsa ba'i skye ba gzhan de skyed par byed nus na ni rtsa ba'i skye ba de skyed par byed la rag na mi nus te/ 'di ltar rang nyid ma skyes shing med pas gzhan ji ltar skyed par byed de/de'i phyir de ni rtog pa tsam du zad do/ /smras pa/ skye ba gzhan gyis skyed par mi byed kyang skye ba nyid kyis rang dang gzhan dag bskyed par bya'o / /ji ltar zhe na/ ji ltar mar me rang dang gzhan/ /snang bar byed pa de bzhin du/ /skye ba'ang rang dang gzhan gyi dngos//gnyi ga skyed par byed pa yin/ /ji ltar mar mes rang gi bdag nyid kyang snang bar byed la bum pa dang / snam bu la sogs pa dngos po gzhan dag kyang snang bar byed pa de bzhin du skye bas kyang rang gi bdag nyid kyang skyed par byed la bum pa dang snam bu la sogs pa dngos po gzhan dag kyang skyed par byed do//bshad pa/ gal te mar mes rang dang gzhan gyi bdag nyid dag snang bar byed na ni skye bas kyang mar me bzhin du rang dang gzhan gyi bdag nyid dag skyed par byed la rag na/ mar mes ni rang dang gzhan gyi bdag nyid dag snang bar mi byed do/ /ci'i phyir zhe na/ 'di ltar/ mar me dang ni gang dag na/ /de 'dug pa na mun pa med/ /'di na gang mi snang ba de snang bar bya ba yin la/ mun pas bsgribs pas mi snang ba nyid yin na mar me la ni mun pas de'i phyir mar me la mi snang ba med do/ /gzhan dag snang bar byed do zhes gang smras pa de yang rigs pa ma yin te/ mar me gzhan bdag nyid dag la 'jug pa de yang mun pa med de/ mun pa med pa'i phyir de dag la yang mi snang ba med do/ /'o na rang dang gzhan gyi bdag nyid dag la mi snang ba med na/ mar mes ci zhig snang bar byed/ de smros shig /smras pa/ mun pa sel bas snang byed yin/ 'di na mar me skye bzhin pas mun pa sel cing snang bar byed pas snang bar byed pa yin te/de la mun pa sel bar byed pa gang yin pa de mar me rang dang gzhan gyi bdag nyid dag snang bar byed pa yin no zhes smras pa de'i phyir/ mar me dang ni gang dag na/ /'du byed pa na mun pa med/ /ces kyang bshad pas mar me skye bzhin pas mun pa sel ba'i phyir des na mar me rang dang gzhan gyi bdag nyid dag la mun pa med do //mun pa med pa'i phyir snang bar byed pa nyid yin no/ /de ltar mun pa sel bar byed pa'i phyir mar mes ni rang dang gzhan gyi bdag nyid dag snang bar byed do/ / mar me ji lta ba de bzhin du skye bas kyang rang dang gzhan gyi bdag nyid de dag skyed par byed do zhes bya ba de rigs pa yin no/ /bshad pa/ mar me skye bzhin pas mun pa sel bar byed do/ /zhes zer ba de smros shig /ji ltar mar me skye bzhin pas/ /mun pa sel bar byed pa yin/ /gang tshe mar me skye bzhin pa//mun pa dang ni phrad pa med/ /gang tshe mar me dang mun pa dag gcig ni mi srid pa'i phyir mar me skye bzhin pa mun pa dang phrad pa med pa de'i phyir ji ltar mar me skye bzhin pa mun pa dang ma phrad pa des mun pa sel bar byed/ mar me phrad pa med par yang / /gal te mun pa sel byed na//'jig rten kun na gnas pa'i mun/ /'di na 'dug pa des sel 'gyur/ /ci ste mar me phrad pa nyid du yang mun pa sel bar byed na ni de ltar na 'jig rten kun na gnas pa'i mun pa dag kyang mar me 'di na 'dug pa des bsal bar 'gyur te/ ma phrad pa 'dra ba las la la ni sel bar byed la/la la ni sel bar mi byed pa de la khyad par ci yod/ yang gzhan yang / mar me rang dang gzhan gyi dngos/ /gal te snang bar byed gyur na/ /mun pa'ang rang dang gzhan gyi dngos/ /sgrib par 'gyur bar the tshom med/ /'di na mar me ni mun pa'i gnyen por gnas pa yin pas des na gal te mar mes rang dang gzhan gyi dngos po dag snang bar byed par gyur na/mun pas kyang rang dang gzhan gyi dngos po dag sgrib par thal bar 'gyur ba 'di la the tshom med pa zhig na mun pas ni rang dang gzhan gyi dngos po dag sgrib par mi byed do/ /gal te sgrib par byed na ni gzhan bzhin du mun pa nyid kyang mi dmigs par 'gyur ro//mun pa mi dmigs na ni dngos po rnams rtag tu snang bar 'gyur ba zhig na/ dngos po rnams rtag tu mi snang bas de'i phyir mun pas ni rang dang gzhan gyi dngos po dag sgrib par mi byed do/ /de lta yin na mun pa'i gnyen por mar mes kyang rang dang gzhan gyi dngos po dag snang bar mi byed pas de la mar me bzhin du skye bas kyang rang dang gzhan gyi bdag nyid dag kyang skyed par byed do//zhes gang smras pa de rigs pa ma yin no/ /yang gzhan yang / gal te skye bas rang gi bdag nyid skyed par byed na skyes pas sam/ ma skyes pa zhig gis skyed par skyed grang na/ gnyi gas kyang mi 'thad do/ /ji ltar zhe na/ skye ba 'di ni ma skyes pas/ /rang gi bdag nyid ji ltar skyed / /skye ba 'di ma skyes shing med pas rang gi bdag nyid ji ltar skyed par byed/ yang na 'di ma skyes shing med pa'i bdag nyid su zhig gis skyed par byed/ ci ste med pas kyang bdag nyid med pa skyes na ni ri bong gi rwas kyang bdag nyid skyed par byed pa zhig na skyed par mi byed do//de lta bas na skye ba ma skyes pas bdag nyid skyed par mi byed do/ /de la 'di snyam du skye ba skyes pas bdag nyid skyed par sems na/ de la bshad par bya ste/ ci ste skyes pas skyed byed na/ /skyes na ci zhig bskyed du yod//gal te skye ba skyes pa nyid yin na skye ba skyes pas bdag nyid skyed par byed do/ /zhes bya ba 'thad pa'i don med pa 'di ci'i phyir byed de/ skyes zin pa la yang skye bas ci bya/ de ltar na re zhig skyes pas bdag nyid skyed par mi byed do/ /skye bas gzhan skyed par byed do/ /zhes gang smras pa de yang mi 'thad de/'di ltar gal te skye bas gzhan skyed par byed na skye bas bskyed par bya ba gzhan de skyes pa'am ma skyes pa'am/ skye bzhin pa zhig skyed par byed grang na/ de la/ skyes dang ma skyes skye bzhin pa/ /ji lta bur yang skyed mi byed/ /skye ba ni ji ltar yang skyed par mi 'thad do//ma skyes pa yang skyed par mi byed la/ skye bzhin pa yang skyed par mi byed do/ /ji ltar zhe na/ bshad pa/ song dang ma song bgom pa yis/ /de dag rnam par bshad pa yin/ /ji ltar song ba la 'gro ba med de/ 'gro ba'i bya ba 'das zin pa'i phyir ro/ /zhes bya ba de bzhin du skyes pa yang skyed par mi byed de skye ba'i bya ba 'das zin pa'i phyir ro//skyes pa la yang skye ba'i bya ba med de/ ci ste yang skyes par 'gyur na ni nam yang mi skyed par mi 'gyur bas de ni mi 'dod de/ de'i phyir skyes pa skyed par mi byed do/ /ma skyes pa yang skyed par mi byed de/ ci'i phyir zhe na/ med pa'i phyir ro//ma skyes pa la gang skyed par 'gyur ba ci zhig yod/ ci ste med kyang skyed par 'gyur na ni ri bong gi rwa yang skyed par 'gyur ba zhig na skyed par mi 'gyur te/ de lta bas na skyes pa yang skyed par mi byed do/ /de ni skye bzhin pa yang skyed par mi byed de/ skyes pa dang ma skyes pa ma gtogs par skye bzhin pa med pa'i phyir dang /skye ba gnyis su thal bar 'gyur ba'i phyir te/ gang dang ldan pas skye bzhin pa zhes bya bar 'gyur ba dang / gang dang ldan pas skyed par byed do/ /zhes brjod par / yang gzhan yang / 'di la skye bzhin pa zhes bya ba ni gang gi cung zad ni skyes cung zad ni ma skyes pa'am/yang na de las gzhan pa skyes pa'am/ ma skyes pa zhig yin gang na/ de la gal te skyes pa dang ma skyes pa de skye bas skyed par byed na re zhig de'i gang cung zad skyed pa de ni skye ba des bskyed pa ma yin la/ skyes pa de skye bzhin pa ma yin te/ ci'i phyir zhe na/ de skyes na skye bzhin pa ma yin zhing skye bzhin pa skyed par byed do/ /zhes kyang brjod pa'i phyir ro/ /gal te cung zad skyes pa de skye ba med pa kho nar skyes na ni/ de'i lhag ma yang de bzhin du skye ba med pa kho nar skye bar 'gyur bar nges so/ /yang na de'i gang cung zad ni skye ba med pa kho nar skyes la cung zad ni skye bas skyed par byed pa la khyad par ci yod pa brjod dgos so//ci ste de'i gang cung zad skyes pa de yang skye ba kho nas bskyed na ni de lta na ma skyes pa skye bas skyed par byed kyi/ skye bzhin pa skyed par byed pa ma yin no/ /yang gzhan yang / de'i gang cung zad skyes pa de ni skye bas skyed par mi byed de/skyes zin pa'i phyir ro/ /des na de'i lhag ma ma skyes pa gang zhig yin pa de skye bas skyed par byed do/ /zhes bya bar 'gyur te/ de la skye bzhin pa skyed par byed do zhes gang smras pa de nyams par gyur to/ /ci ste de'i cung zad skyes pa de yang skyed par byed na ni de la skye ba gnyis kyis byas pa'i khyad par can du 'gyur ba zhig na mi 'gyur te/skyes zin pa de la ni yang skyed pa'i phyir bya ba 'ga' yang rtsom par mi byed pas de'i phyir de ni yang skyed par mi byed do/ /de lta bas na skye bzhin pa skyed par byed do/ /zhes bya ba de ni snying po med pa la blos snying por bzung bar zad de gyi na'o//smras pa/ bum pa la sogs pa skye ba dag kyang dmigs shing / bum pa la sogs pa'i don du bya ba dag la 'jug pa yang snang bas de'i phyir skye ba yod na skye ba la brten cing skye ba la ltos nas skye bzhin pa skyed do zhes brjod par bya'o/ /bshad pa/ gang tshe skye ba yod pas ni/ /skye bzhin 'di 'byung med pa'i tshe/ /ji ltar skye la brten nas ni/ /skye bzhin zhes ni brjod par bya/ /gang gi tshe skye ba 'di yod pas skye bzhin pa 'di 'byung ngo zhes bya ba de med cing mi srid pa de'i tshe ji ltar skye ba la brten nas skye bzhin pa skyed do/ /zhes brjod par bya/smras pa/ ji ltar mi srid pa/ bshad pa/ re zhig snam bu skye ba la brten nas ci zhig skye bzhin pa yin/ smras pa/ snam bu nyid skye bzhin pa yin no/ /bshad pa/ gal te snam bu skye bzhin pa'i gnas skabs nyid na snam bu yin na/ de la skye ba la brten nas skye bzhin pa skyed do zhes gang brjod pa'i skye bas yang ci bya/de ni mi 'thad de/ skyes pa dang skye bzhin pa gnyis la khyad par med pa'i phyir ro/ /de'i phyir skye bzhin pa snam bu ma yin no/ /smras pa/ re zhig skyes pa ni snam bu yin te/ skyes pa de la brten nas ji srid du brtag pa'i bya ba ma zin pa de srid du skye bzhin pa yin no//bshad pa/ drang ngo / /gang skye bzhin pa na snam bu ma yin pa de skyes na ji ltar snam bur 'gyur/ 'di ltar gzhan byed bzhin pa na gzhan du mi 'gyur ro/ /ci ste 'gyur na ni re lde byed bzhin pa na snam bur 'gyur ba zhig na mi 'gyur bas de'i phyir skyes pa yang snam bu ma yin no//snam bu de med na gang gi skye ba la brten nas ci zhig skye bzhin par 'gyur/ smras pa/ ci khyod mtshon thabs la mkhas zhes te ma nyid la 'debs par byed dam/ khyod 'gyed pa la chags pas rten cing 'brel par 'byung ba'i rigs pa nyid sun 'byin ko/ /bshad pa/de ni rten cing 'brel par 'byung ba'i rigs pa ma yin te/ rten cing 'brel par 'byung ba smra ba rnams la ni dngos po skye bzhin pa yang yod pa ma yin la/ dngos po skye bzhin pa'i skye ba yang yod pa ma yin no/ /rten cing 'brel par 'byung ba'i don ni 'di yin te/ rten cing 'byung ba gang yin pa//de ni ngo bo nyid kyis ni/ /rten cing zhes bya ba gang yin pa dang / 'byung ba zhes bya ba gang yin pa dang / gnyi ga ngo bo nyid kyis zhi ba ngo bo nyid dang bral ba ngo bo nyid stong pa yin no/ /de phyir skye bzhin nyid dang ni/ /skye ba yang ni zhi ba nyid/ /de ltar gang gi phyir rten cing zhes bya ba gang yin pa dang 'byung ba zhes bya ba gang yin pa de dang de gnyi ga ngo bo nyid kyis zhi ba ngo bo nyid dang bral ba ngo bo nyid stong pa/de'i phyir rten cing 'brel par 'byung ba smra ba rnams la skye bzhin pa dang skye ba gnyi ga yang ngo bo nyid kyis zhi ba ngo bo nyid kyis bral ba ngo bo nyid stong pa yin no/ / de gnyi ga ngo bo nyid stong pa yin pa skye ba 'di la brten nas skye bzhin pa 'di skyed do/ /zhes bya ba de ji lta bur srid par 'gyur/ smras pa/ rgyu dang rkyen rnams la brten nas ji srid na skyes par 'gyur ba de srid du dngos po skyed pa'i phyir bya ba rtsom ste/ des na dngos po gang kho na skye ba de nyid la brten nas bya ba rtsom par yang mi byed la/gzhi med par yang bya ba rtsom par mi byed pas bya ba dang ldan pa'i rgyu dang rkyen de dag la brten nas dngos po skye zhing de'i skye ba de la brten nas skye bar 'gyur ro/ /bshad pa/ gang gi rgyu dang rkyen dag la brten nas bya ba rtsom par byed/ smras pa/snam bu'o / /bshad pa/ ci khyod nam mkha'i me tog sogs par byed dam/ khyod snam bu med pa'i rgyu dang rkyen dag la brten nas bya ba rtsom par byed ko/ /gal te dngos po ma skyes pa/ /'ga' zhig gang na yod gyur na/ /de ni ci phyir der skye 'gyur/ /yod na skye bar mi 'gyur ro/ / gal te skye ba'i snga rol na dngos po ma skyes pa 'ga' zhig ga shed na yod par 'gyur ba de lta bu srid na ni des na dngos po yod pa de'i rgyu dang rkyen dang de la brten pa'i bya ba dag kyang tha snyad gdags su rung grang na/ gang gi tshe dngos po ma skyes pa ji ltar yang mi 'thad pa de'i tshe dngos po skye ba dang bral ba de yod pa de ma yin na gang gi rgyu dang rkyen du 'gyur/rgyu dang rkyen gang zhig la brten nas bya ba rtsom par byed cing gang zhig skyed par byed/ gang rtsom par mi byed skye bar mi byed pa de la skye ba ga la yod/ gang la skye ba med pa ji ltar skye ba la brten nas skye bar 'gyur/ de lta bas na rten cing 'brel par 'byung ba smra ba rnams kyi lta ba ni skye bzhin pa dang skye ba zhi ba yin no//yang gzhan yang / gal te skye ba de yis ni/ /skye bzhin pa ni skyed byed na/ /skye ba de ni skyed byed pa/ /skye ba yang ni gang zhig yin/ /gal te skye ba des skye bzhin pa gzhan pa skyed par byed na/ 'o na da skye ba de skyed par byed pa'i skye ba yang gang zhig yin/de la/ 'di snyam du de ni skye ba gzhan zhig gis skyed par sems na/ de la bshad par bya ste/ gal te skye ba gzhan zhig gis/ /de skyed thug pa med par 'gyur/ /gal te skye ba gzhan zhig gis skye bzhin pa gzhan skyed par byed na de lta na thug pa med par thal bar 'gyur te/de yang gzhan gyis skyed cing de yang gzhan gyis skyed de mtha' med par 'gyur bas de ni mi 'dod do/ /ci ste gzhan skyed pa ni skye ba med pa kho nar skyes so snyam na/ de la bshad par bya ste/ ci ste skye ba med skye na/ /thams cad de bzhin skye bar 'gyur//ji ltar gzhan skyed par byed pa de skyed pa gzhan med par skyes na ni thams cad kyang de bzhin du skye ba gzhan med par skye bar 'gyur te/ skyes pas gzhan skyed par byed do/ /zhes bya ba don med pa'i rtog pa med pa 'dis ci bya/ yang na 'di ltar skye ba nyid ni skyed pa gzhan med par skye la dngos po gzhan dag ni skyed pa gzhan med par mi skye'o//zhes khyad par gyi gtan tshigs bstan par bya dgos na de yang mi byed pas de'i skye bas skye bzhin pa gzhan skyed do/ /zhes bya ba de gyi na'o/ /yang gzhan yang / 'di la dngos po 'ga' zhig skye bar 'gyur na de yod pa'am med pa zhig skye bar 'gyur grang na/de la/ re zhig yod dang med pa yang / /skye bar rigs pa ma yin no/ /re zhig yod pa ni skye bar rigs pa ma yin te/ skye bar brtag pa don med pa nyid yin pa'i phyir ro/ /'di ltar yod pa la yang skye bas ci zhig bya/ med pa yang skye bar rigs pa ma yin te/ci'i phyir zhe na/ med pa nyid kyi phyir te/ de la ci zhig skye bar 'gyur/ ci ste med pa skye bar 'gyur na ni ri bong gi rwa yang skye bar 'gyur la/ nyes pa zad pa rnams la yang nyes pa skye bar 'gyur bas de ni mi 'dod de/ de lta bas na med pa yang skye bar rigs pa ma yin no//de la 'di snyam du yod med gcig skye bar sems na/ bshad pa/ yod med nyid kyang ma yin te/ yod med kyang skye bar rigs pa ma yin no/ /gal te ji ltar zhe na/ bshad pa/ gong du bstan pa nyid yin no/ /de ni gong du/ re zhig yod dang med pa yang //skye bar rigs pa ma yin no/ /zhes bstan pa yin te/ yod med ni gnyis la snyegs pas de gnyis ni dgag pa snga mas bkag pa nyid yin no/ /yang na yod pa dang med pa dang yod med dag ji ltar skye bar rigs pa ma yin pa de ni/ dang po kho na bstan zin to / /gang du zhe na/gang tshe chos ni yod pa dang / /med dang yod med mi bsgrub pa/ /ji ltar sgrub byed rgyu zhes bya/ /de lta yin na mi rigs so/ /zhes bya ba der ro/ /yang gzhan yang / dngos po 'gag bzhin nyid la ni/ /skye ba 'thad par mi 'gyur ro/ /'di la khyod kyis dngos po skye bzhin pa skyed par byed do zhes smras pas dngos po skye bzhin pa la 'gag pa yang yod par 'gyur ro//ci'i phyir zhe na/ dngos po ni 'jig pa'i mtshan nyid can yin pa'i phyir ro/ /dngos po 'gag bzhin pa la ni/ /skye ba 'thad par mi 'gyur te/ /'di ltar skye bzhin pa mngon par 'phel ba la skye ba yin la/de yang 'jig pa zad par 'gyur bas zad pa ni skye bar mi 'gyur ba'i phyir ro/ /ci ste skye bzhin pa'i gnas skabs na 'gag par mi 'gyur ba nyid do snyam na/ de la bshad par bya ste/ gang zhig 'gag bzhin ma yin pa/ /de ni dngos por mi 'thad do/ / gal te dngos po skye bzhin pa nyid na 'gag par mi 'gyur ba skye bzhin pa nyid dngos po nyid ma yin par 'gyur te/ ci'i phyir zhe na/ dngos po'i mtshan nyid med pa'i phyir ro/ /'di ltar 'jig pa ni dngos po'i mtshan nyid du bstan pas de med na ji ltar dngos po yin par 'gyur/ de ltar yin na dngos po skye bzhin pa skyed par byed do zhes gang smras pa de nyams pa dang /dngos po med pa skye bzhin pa skyed par byed do zhes bya bar yang thal bar 'gyur te/ de lta bas na skye bas gzhan skyed par byed do zhes bya ba de yang mi 'thad do/ /gang rang gi bdag nyid kyang skyed par mi byed la/ / gzhan gyi bdag nyid kyang skyed par mi byed pa de skye ba yin par ji ltar 'gyur te/ de lta bas na skye ba ni yod pa ma yin no/ /'dir smras pa/ gnas pa ni yod de/ de yang dngos po ma skyes pa la mi 'thad pas skye ba yang rab tu grub pa nyid do/ /bshad pa/ 'di la dngos po gang zhig gnas par 'gyur na de gnas pa gnas sam/ma gnas pa gnas sam/ gnas bzhin pa gnas grang na/ de la/ dngos po gnas pa mi gnas te/ /dngos po ma gnas gnas pa min/ /gnas bzhin pa yang mi gnas te/ /re zhig dngos po gnas pa ni gnas par mi byed de / gnas pa la yang gnas pas ci bya/ gnas pa gnyis su thal bar 'gyur te/ gang dang ldan pas gnas par byed do zhes bya bar 'gyur ba'o/ /de ltar gyur na gnas pa po yang gnyis su thal bar 'gyur bas de ni mi 'dod do/ /dngos po ma gnas pa yang gnas par mi byed de/ ci'i phyir zhe na/ gnas pa dang gnas pa ma yin pa gnyis mi mthun pa'i phyir ro/ /gnas bzhin yang gnas par mi byed de/ ci'i phyir zhe na/ gnas pa dang ma gnas pa ma gtogs par gnas bzhin pa mi srid pa'i phyir dang / gnas pa gnyis su thal bar 'gyur ba dang / gnas pa po yang gnyis su thal bar 'gyur ba'i phyir ro//yang gzhan yang / ma skyes gang zhig gnas par byed/ /gang gi tshe rigs pa sngon du btong bas skye ba med pa nyid do zhes bya ba bstan zin pa de'i tshe ma skyes pa gzhan gang zhig gnas par byed ces bya ba / yang gzhan yang / dngos po 'gag bzhin nyid la ni//gnas pa 'thad par mi 'gyur ro/ /dngos po 'gag bzhin pa la gnas pa 'thad par mi 'gyur ro/ /ci'i phyir zhe na/ gnas pa dang 'gag pa gnyis su mi mthun pa'i phyir ro/ /de la 'di snyam du gnas pa'i gnas skabs na 'gag par mi 'gyur ba nyid du sems na de bshad par bya ste/gang zhig 'gag bzhin ma yin pa/ /de ni dngos por mi 'thad do/ /gang gnas pa'i gnas skabs na 'gag par mi 'gyur ba de ni gnas pa'i gnas skabs na dngos po nyid ma yin par 'gyur te/ ci'i phyir zhe na/ dngos po'i mtshan nyid med pa'i phyir ro//'di ltar 'jig pa ni dngos po'i mtshan nyid du bstan pas de med na ji ltar dngos po yin par 'gyur/ dngos po med na gang gis gnas par 'gyur/ de lta bas na 'gag bzhin pa nyid yin pa'i phyir yang dngos po'i gnas pa mi 'thad do/ /yang gzhan yang / dngos po thams cad dus kun du/ /rga dang 'chi ba'i chos yin na/ /gang dag rga dang 'chi med par/ /gnas pa'i dngos po gang zhig yin/ /gang gi tshe dngos po thams cad mi rtag pa dang rjes su 'brel ba'i phyir/ mi rtag pa nyid kyis rga ba dang 'chi ba'i chos can yin pa de khas blang bar bya ba de'i tshe gang dag la ltos nas gnas pa yod par brjod pa gang dag rga ba dang 'chi ba med par gnas pa'i dngos po de dag gang zhig yin de lta bas na gnas pa yang mi 'thad do//gnas pa'i gnas pa zhes gang smras pa de la bshad par bya ste/ gnas pa gnas pa gzhan dang ni/ /de nyid kyis kyang gnas mi rigs //gnas pa ni gnas pa gzhan gyis kyang gnas par byed pa mi rigs pa nyid yin la/ gnas pa de nyid gnas pa de nyid kyis kyang gnas par byed par mi rigs pa nyid do/ /ji ltar zhe na/ ji ltar skye ba rang dang ni/ /gzhan gyis bskyed pa ma yin nyid/ /ji skad du/ skye ba 'di ni ma skyes pas/ /rang gi bdag nyid ji ltar bskyed/ /ci ste skyes pas skyed byed na/ /skye na ci zhig skyed du yod/ /ces smras pa de bzhin du gnas pa yang mi gnas pas rang gi bdag nyid gnas par byed dam/ gnas pa rang gi bdag nyid gnas par byed grang na/ de la re zhig ma gnas pas ni rang gi bdag nyid gnas par mi byed do//ci'i phyir zhe na/ med pa'i phyir te/ 'di ltar ma gnas pa la ni gnas pa mi 'thad do/ /gang med pa des rang gi bdag nyid gang zhig ji ltar gnas par byed/ ci ste gnas par byed na ni ri bong gi rwas kyang rang gi bdag nyid gnas par byed pa zhig na de ni mi 'dod de/de lta bas na gnas pa ma gnas pas rang gi bdag nyid gnas par mi byed do/ /gnas pa gnas pas kyang rang gi bdag nyid gnas par mi byed de/ ci'i phyir zhe na/ gnas pa nyid kyi phyir te/ gnas pa la yang gnas pas ci zhig bya/ de lta bas na gnas pa gnas pas kyang rang gi bdag nyid gnas par mi byed de/gang gnas par mi byed pa de gnas pa yin par ji ltar 'gyur/ de ltar re zhig gnas pa de nyid gnas pa de nyid kyis gnas par mi byed do/ /ji ltar gnas pa de gnas pa gzhan gyis gnas par byed par mi rigs she na/ji skad du/ gal te skye ba gzhan zhig gis/ /de skyed thug pa med par 'gyur/ /ci ste skye ba med skye na/ /thams cad de bzhin skye bar 'gyur/ /zhes smras pa de bzhin du/ gnas pa yang gnas pa gzhan zhig gis gnas par byed dam/ gnas pa gzhan med par gnas par byed grang na/de la re zhig gnas pa ni gnas pa gzhan gyis gnas par mi byed do/ /gal te gnas pa gnas pa gzhan gyis gnas par byed na/ de lta na thug pa med par thal bar 'gyur te/ de yang gzhan gyis gnas par byed cing / de yang gzhan gyis gnas par byed pa de mtha' med par 'gyur bas de ni mi 'dod de /de lta bas na gnas pa ni gzhan pa gzhan gyis gnas par mi rigs so/ /ci ste gnas pa de gnas pa gzhan med par gnas par byed do snyam na de la bshad par bya ste/ ji ltar gzhan gnas par byed pa de gnas pa gzhan med par gnas pa de bzhin du thams cad kyang gnas pa gzhan med par gnas par 'gyur te/gnas pas gzhan gnas par byed do zhes bya ba don med pa'i rtog pa 'dis ci bya/ yang na 'di ltar gnas pa nyid ni gnas pa gzhan med par gnas pa la dngos po gzhan dag ni gnas pa gzhan med par mi gnas so zhes khyad par gyi gtan tshigs bstan par bya dgos na de yang mi byed pas de'i phyir gnas pa ni gnas pa gzhan gyis gnas par mi byed do//gang gnas par mi byed pa de ni gnas pa nyid kyang ma yin pas de'i phyir gnas pa yang yod pa ma yin no/ /'dir smras pa/'gag pa ni yod de/ de yang dngos po ma skyes pa dang mi gnas pa dag la mi 'thad pas skye ba dang gnas pa dag kyang rab tu grub pa nyid do/ /bshad pa/ gal te 'gag bzhin pa yod par gyur na/ de dngos po 'gag pa'am/ ma 'gag pa'am/ 'gag bzhin pa'i yin grang na/rnam pa thams cad mi 'thad do/ /ci'i phyir zhe na/ 'di ltar/ 'gags pa 'gag par mi byed de/ /ma 'gags pa yang 'gag mi byed/ /'gag bzhin pa yang de bzhin min/ /de la re zhig 'gags pa ni 'gag par mi byed de/ ci'i phyir zhe na/ med pa'i phyir te/ med pa la ci zhig 'gag par 'gyur/ /ma 'gags pa yang 'gag par mi byed de/ ci'i phyir zhe na/ 'gags pa dang ma 'gags pa gnyis mi mthun pa'i phyir ro/ /'gag bzhin pa yang de bzhin du 'gag par mi byed de/ ji ltar zhe na/ ji skad du/ skye bzhin pa skyed par mi byed do zhes smras pa de bzhin te/des na 'gags pa dang / ma 'gags pa ma gtogs par 'gag bzhin pa mi srid pa'i phyir dang / 'gag pa gnyis su thal bar 'gyur ba dang / 'gag bzhin pa gnyis su thal bar yang 'gyur ba'i phyir 'gag bzhin pa 'gag par mi byed do//yang gzhan yang / 'di la 'gag bzhin pa zhes bya ba ni gang gi cung zad ni 'gags cung zad ni ma 'gags pa'am/ yang na de la gzhan 'gags pa'am/ ma 'gags pa zhig yin grang na/ de la gal te 'gags pa dang ma 'gags pa de 'gag pas de 'gog par byed na ni re zhig de'i cung zad 'gag pa des ni bkag pa ma yin la/'gag pa de 'gag bzhin pa ma yin te/ ci'i phyir zhe na/ de 'gags na 'gag bzhin pa ma yin zhing 'gag bzhin pa 'gog par byed do zhes kyang brjod pa'i phyir ro/ /gal te cung zad 'gags pa de 'gag pa med pa kho nar 'gags na ni de'i lhag ma yang de bzhin du 'gag pa med pa kho nar 'gag par 'gyur bar nges so//yang na de'i gang cung zad ni 'gag pa med pa kho nar 'gags la/ cung zad ni 'gags pas 'gag par byed pa la khyad par ci yod pa brjod dgos so//ci ste de'i gang du cung zad 'gags pa de yang 'gag pa kho nar bkag pa ni de lta na ma 'gags pa 'gags pas 'gag par byed kyi 'gag bzhin pa 'gag par byed pa ma yin no/ /gzhan yang / de'i phyir cung zad 'gags pa de ni 'gags pas 'gag par mi byed de/ 'gags zin pa'i phyir ro//des na/ de'i lhag ma ma 'gags pa gang yin pa de 'gags pas 'gag par byed do zhes bya bar 'gyur te/ de la 'gag bzhin pa 'gag par byed do/ /zhes gang smras pa de nyams par gyur to/ /ci ste de'i gang cung zad 'gags pas 'gag par byed na ni de la 'gag pa gnyis kyis byas pa'i khyad par can du 'gyur ba zhig na mi 'gyur te/'gag pa zin pa de la ni yang 'gag par bya ba'i phyir bya ba 'ga' yang rtsom par mi byed par de'i phyir de ni yang 'gag par mi byed do/ /de lta bas na 'gag bzhin pa 'gag par byed do zhes bya ba de yang snying po med pa la blos snying por bzung bar zad de gyi na'o//yang gzhan yang / ma skyes gang zhig 'gag par byed/ /gang gi tshe cung zad kyang skye ba med do/ /zhes bya ba de sngar bstan zin pa de'i phyir ma skyes pa gzhan gang zhig 'gag par byed ces bya ba dang / de lta bas na 'gag pa yang yod pa ma yin no//yang gzhan yang / 'gag pa ni gnas pa'am/ ma gnas pa la brtag grang na/ de ni gnyi ga la yang mi rung ste/ de la/ re zhig dngos po gnas pa la/ /'gag pa 'thad par mi 'gyur ro/ /gnas pa'i bya ba skyes pa la gnas pa dang mi mthun pa'i 'gag pa mi 'thad de/gnas pa'i phyir de ni grags pa yin no/ /gal te mi gnas pa la 'gag pa yod pas nyes pa med do/ /zhe na/ dngos po mi gnas pa la yang / /'gag pa mi 'thad par mi 'gyur ro/ /mi gnas pa'i phyir dper na 'gags pa bzhin no zhes bya bar dgongs so//smras pa/ mngon sum la gtan tshigs kyi tshig don med pa de ni 'jig rten la grags pa yin te/ ji ltar dngos po ma 'gags par gnas pa rgyu 'ga' zhig kho nas 'jig par 'gyur ba de ni gzhon nu yan chad kyi mngon sum du yin pas/ de'i phyir 'gag pa ni yod pa kho na yin no//bshad pa/ de lta bas na/ 'di yang khyod kyi blo'i mngon sum du bya ba'i rigs te/ gnas skabs de yi gnas pa ni/ /de yis 'gag pa nyid mi 'gyur/ /gnas skabs gzhan gyis gnas skabs ni/ /gzhan gyis 'gag pa nyid mi 'gyur/ /dngos po gnas skabs gang du 'jug par rtag par de'i gnas skabs de ni gnas skabs des 'gag pa nyid du mi 'gyur te/ci'i phyir zhe na/ gnas skabs de yod pa'i phyir ro/ /'di ltar 'o ma'i gnas skabs nyid kyis 'o ma 'gag par mi 'gyur te/ 'o ma'i gnas skabs yod pa'i phyir ro//gnas skabs gzhan gyis kyang gnas skabs gzhan 'gag pa nyid du mi 'gyur te/ ci'i phyir zhe na/ gzhan ni gnas skabs gzhan na med pa'i phyir ro/ /'di ltar zho'i gnas skabs su 'o ma'i gnas skabs 'gag par mi 'gyur te/ zho'i gnas skabs na 'o ma'i gnas skabs med pa'i phyir ro//ci ste yod na ni/ 'o ma dang zho gnyis lhan cig na gnas pa dang / zho rgyu med pa las 'byung bar yang 'gyur bas de ni mi 'dod de/ de lta bas na 'gag pa mi 'thad pa yang blo'i mngon sum yin pa'i phyir 'gag pa zhes bya ba ci yang med pa de ltar khong du chud par bya'o//smras pa/ 'gag pa ni yod pa kho na yin te/ ci'i phyir zhe na/ sngar khas blangs pa'i phyir te/ 'di ltar khyod kyis sngar dngos po 'gag bzhin pa la skye ba mi 'thad do zhes smras pa de'i phyir 'gag pa de yod de/ gang gi rgyu las byung ba'i skye ba dgag par byas pa'i phyir ro//'di ltar med pa ni rgyur mi 'thad do/ /bshad pa/ ci khyod ri mo'i me gsod par byed dam/ khyod skye ba med pa la 'gag pa 'dod ko/ /gang tshe chos rnams thams cad kyi/ /skye ba 'thad par mi 'gyur ba/ /de tshe chos rnams thams cad kyi/ / 'gag pa 'thad par mi 'gyur ro/ /gang gi tshe kho bos dngos po thams cad kyi skye ba mi 'thad do zhes smras pa de'i tshe dngos po thams cad kyi 'gag pa yang mi 'thad do zhes smras pa ma yin nam/ 'di ltar dngos por skyes shing med pa la 'gag pa yod par ji ltar 'gyur/ de lta bas na skye ba bkag pa kho nas 'gag pa mi 'thad par yang rab tu bsten pa yin no//yang gzhan yang / 'di la gal te re zhig 'gag pa zhig yod par gyur na/ de dngos po yod pa'am/ med pa brtag grang na/ de la/ re zhig dngos po yod pa la/ /'gag pa 'thad par mi 'gyur ro//re zhig dngos po yod pa gnas pa la ni 'gag pa 'thad par mi 'gyur te/ ci'i phyir zhe na/ 'di ltar/ dngos dang dngos po med pa dag /gcig nyid na ni 'thad pa med/ /dngos po yod pa'i yod pa nyid gang yin pa ni dngos po yod pa'o/ /dngos po 'gags pa'i med pa nyid gang yin pa ni dngos po med pa ste/dngos po dang dngos po med pa phan tshun mi mthun pa de gnyis ji ltar gcig pa nyid ni 'thad par 'gyur te/ de lta bas na/ dngos po yod pa la 'gag pa 'thad par mi 'gyur te/ dngos po med par gyur pa la'ang / /'gag pa 'thad par mi 'gyur ro//ji ltar zhe na/ mgo gnyis pa la ji ltar ni/ /bcad du med pa de bzhin no/ /med pa la ci zhig 'gag par 'gyur te/ 'di ltar mgo gnyis pa med par bcad par mi nus pa bzhin no/ /'gag pa'i 'gag pa zhes gang smras pa de la bshad par bya ste/'gag pa 'gag pa gzhan dang ni/ /de nyid kyis kyang 'gag mi rigs/ /'di la gal te 'gag pa la 'gag pa zhig yod par gyur na de gzhan gyi bdag nyid dam rang gi bdag nyid kyis 'gag par 'gyur grang na/ gnyi gas kyang 'gag par mi rigs so/ /ji ltar zhe na/ ji ltar skye ba rang dang ni/ /gzhan gyis bskyed pa ma yin bzhin/ /ji skad du/ skye ba 'di ni ma skyes pas/ /rang gi bdag nyid ji ltar skyed/ /ci ste skyed pas skyed byed na/ /skyes na ci zhig bskyed du yod/ /ces smras pa de bzhin du 'gag pa yang ma 'gags pas rang gi bdag nyid 'gag par byed dam/'gags pas rang gi bdag nyid 'gag par byed grang na/ de la gal te 'gag pa ma 'gags pas rang gi bdag nyid 'gag par byed pa rtog na/ de ji ltar 'thad par 'gyur te/ gang gi tshe ma 'gags pa ni 'gag pa nyid ma yin pas med pas bdag nyid med pa ji ltar 'gag par byed/ci ste 'gag pa 'gags pas rang gi bdag nyid 'gag par byed par rtog na/ de yang ji ltar 'thad par gyur te/ 'gags pa la gang 'gag pa 'gag par 'gyur ba'i rang gi bdag nyid yang 'gag par bya ba de ci yang med do/ /de ltar re zhig 'gag pa rang gi bdag nyid kyis 'gag par byed par mi 'thad de /gzhan gyi bdag nyid kyis kyang mi 'thad de/ ji skad du/ gal te skye ba gzhan zhig gis/ /de skyed thug pa med par 'gyur/ /ci ste skye ba med skye na/ /thams cad de bzhin skye bar 'gyur/ /zhes smras pa de bzhin du 'gag pa yang 'gag pa gzhan zhig gis 'gag par byed dam/'gag pa gzhan med par 'gag par byed grang na/ de la gal te 'gag pa de 'gag pa gzhan gyis 'gag par byed na de lta na thug pa med par thal bar 'gyur te/ de yang gzhan gyis 'gag par byed cing de yang gzhan gyis 'gag par byed de mtha' med par 'gyur bas de ni mi 'dod de /de lta bas na 'gag pa'i 'gag pa mi 'thad do/ /ci ste 'gag pa de 'gag pa gzhan med par 'gag go snyam na/ de la bshad par bya ste/ ci ste 'gag pa med 'gags na/ /thams cad de bzhin 'gag par 'gyur//ji ltar 'gag pa de 'gag pa gzhan med par 'gags pa de bzhin du 'dus byas thams cad kyang 'gag pa gzhan med par 'gag par 'gyur te/ 'gags pas gzhan 'gag par byed do/ /zhes bya ba med pa'i rtog pa 'dis ci bya/ yang na 'di ltar 'gag pa nyid ni 'gag pa gzhan med par 'gag pa la dngos po gzhan dag ni 'gag pa med par mi 'gag go//zhes khyad par gyi gtan tshigs bstan par bya dgos na mi byed pas de'i phyir 'gag pa ni 'gag pa gzhan gyis 'gag par mi 'thad do/ /de'i phyir de ltar brtags na skye ba dang gnas pa dang 'jig pa dag ji ltar yang mi 'thad de /mi 'thad na ji ltar 'dus byas kyi mtshan nyid du 'gyur/ de lta bas na/ skye ba dang / gnas pa dang / 'jig pa dag 'dus byas kyi mtshan nyid yin no/ /zhes bya ba de ni rtog pa tsam du zad do/ / smras pa/ 'dus byas kyi spyi'i mtshan nyid de dag mi rung du zin kyang rang rang gi mtshan nyid kho nas 'dus byas yod de/ dper na lkog shal dang mjug ma dang rngog dang rmig pa dang rwa'i mtshan nyid kyis ba lang yod pa lta bu'o/ /bshad pa/ ci khyod la log rtog ma skyes par legs so zhes sgrogs sam/khyod skye ba dang gnas pa dang 'jig pa med pa la 'dus byas kyi mtshan nyid ston par byed ko/ /skyes dang gnas dang 'jig pa dag /ma grub par na 'dus byas med/ /'di ltar skyes pa dag dang gnas pa dang 'jig pa rab tu grub na ni 'dus byas kyang rab tu grub par 'gyur grang na/de dag rab tu mi 'grub pas skye ba dang gnas pa dang 'jig pa dag ma grub pa'i phyir 'dus byas med na gang gi mtshan nyid du 'gyur/ mtshan nyid med pa'i phyir 'dus byas mi 'thad do/ /smras pa/ dngos po rnams mtshan nyid kho na las rab tu 'grub par ma nges kyi/dngos po rnams ni gnyen po las kyang rab tu 'grub par 'gyur bas 'dus byas kyi gnyen por 'dus ma byas yod pas de yod pa'i phyir 'dus byas kyang rab tu 'grub pa nyid do/ /bshad pa/ ci khyod sgron mes nyi ma tshol lam/ khyod 'dus ma byas kyis 'dus byas 'grub par 'dod ko//'dus byas rab tu ma grub pas/ /'dus ma byas ni ji ltar 'grub/ /gal te khyod gnyen po las 'grub par sems na 'dus ma byas kyi gnyen po 'dus byas te/ ma grub par bstan zin pas ji ltar 'dus byas rab tu grub na 'dus ma byas rab tu grub par 'gyur ba dang /'dus ma byas las 'dus byas rab tu 'grub par 'dod pa gang yin pa de je smros shig /smras pa/ gal te khyod la skye ba dang / gnas pa dang 'jig pa dag med pa yin na ni 'dus byas yod pa ma yin par 'gyur ba zhig na/ kye ma 'du byed mi rtag ste//skye zhing 'jig pa'i chos can yin/ /zhes gsungs pa de ji lta bu/ bshad pa/ rmi lam ji bzhin sgyu ma bzhin/ /dri za'i grong khyer ji bzhin du/ /de bzhin skye dang de bzhin gnas/ /de bzhin du ni 'jig pa gsungs/ /ji ltar rmi lam mthong ba dang / sgyu ma byas pa dang dri za'i grong khyer dag skyes pa dang gnas pa dang zhig par brjod kyang de dag la skyes pa dang /gnas pa dang zhig pa ci yang med pa de bzhin du bcom ldan 'das kyis 'dus byas kyi skye ba dang gnas pa dang 'jig pa dag bka' stsal mod kyi/ 'on kyang de dag la skye bar byed pa dang / gnas par byed pa dang /'jig par byed pa ci yang med do/ /de bzhin du bcom ldan 'das kyis 'du byed rnams bdag med pa'i dper sgyu ma dang / brag cha dang / gzugs brnyan dang / smig rgyu dang / rmi lam dang / dbu ba rdos pa dang / chu'i chu bur dang / chu shing gi sdong po dag bstan te/'di la de bzhin nyid dam ma nor ba de bzhin nyid ni 'ga' yang med kyi/ 'di dag ni spros pa yang ma yin/ 'di dag ni brdzun pa'ang yin no zhes kyang gsungs so/ /chos thams cad bdag med do zhes gsungs pa dang bdag med pa zhes bya ba ni ngo bo nyid med pa'i don te/ bdag ces bya ba'i sgra ni ngo bo nyid kyi tshig yin pa'i phyir ro//de lta bas na 'dus byas kyi skye ba dang gnas pa dang 'jig pa'i tshig ni kun rdzob kyi bden par grub bo/ /skye ba dang gnas pa dang 'jig pa brtag pa zhes bya ba ste rab tu byed pa bdun pa'o// //smras pa/ khyod kyis skye ba dang / gnas pa dang /'jig pa brtag pa de byas pas kho bo'i yid stong pa nyid nyan pa la 'bab par byas kyis/ de'i phyir da ni byed pa po dang las brtag par bya ba'i rigs so/ /bshad pa/ 'dun pa bzhin bya'o/ /smras pa/ 'di la thams cad du las dge ba dang mi dge ba yang bstan/ de'i 'bras bu yid du 'ong ba dang /mi 'ong ba yang bstan/ de bzhin du las dge ba dang mi dge ba'i byed pa po yang bstan/ de nyid kyang de'i 'bras bu zab por bstan te/ byed pa po med na yang las mi 'thad la/ las med na yang 'bras bu mi 'thad do/ /de ltar byed pa po dang las yod pas de yod pa'i phyir dngos po thams cad kyang rab tu 'grub pa 'thad do//bshad pa/ gal te byed pa po zhig las byed par gyur na de yin par 'gyur ba'am/ ma yin par gyur pa zhig byed par 'gyur zhing / las kyang yin par gyur pa'am/ ma yin par gyur pa zhig bya bar 'gyur grang na/ de la/ byed po yin par gyur pa de / / las su gyur pa mi byed do/ /byed po ma yin gyur pa yang / /las su ma gyur mi byed do/ /byed pa po yin par gyur pa ni/ las yin par gyur pa mi byed do/ /byed pa po ma yin par gyur pa yang las ma yin par gyur pa mi byed do/ /ci'i phyir zhe na/ 'di ltar/ yin par gyur la bya ba med/ /las kyang byed pa med par 'gyur//yin par gyur la bya ba med/ /byed pa po yang las med 'gyur/ /'di la bya ba dang ldan pa kho nas byed pa po yin par 'gyur te/ 'di ltar byed pa po kho na ni byed pa po yin gyi/ mi byed pa ni ma yin pa'i phyir ro/ /de'i phyir byed pa po gang bya ba dang ldan pa de byed pa po yin par gyur pa zhes bya ste/byed pa po yin par gyur pa de la ni yang gang gis las byed do/ /zhes bya ba'i bya ba gzhan med do/ /ci ste yod na ni bya ba gnyis su 'gyur te/ byed pa po gcig la bya ba gnyis ni med do/ /yang gzhan yang / las kyang byed po med par 'gyur/ /byed pa po gzhan ci yang mi byed pa de la las yod par yongs su brtag pa gang yin pa de la yang byed pa po med par 'gyur ro//ci'i phyir zhe na/ byed pa po las byed na las de'i byed pa por 'gyur zhing / byed pa po byed pa des kyang las de byed pa po dang bcas par 'gyur ba yin na bya ba dang bral na byed pa po las de mi byed pa'i phyir te/de lta bas na las de byed pa po med par thal bar 'gyur ro/ /de bzhin du las yin par gyur pa la bya ba med de/ 'di la yang bya ba dang ldan pa kho na las yin par 'gyur te/ 'di ltar bya ba kho na las yin gyi/ mi bya ba ma yin pa'i phyir ro/ /de'i phyir las gang bya ba dang ldan pa de las yin par 'gyur zhes bya ste/las yin par gyur pa de la ni/ gang gis bya ba yin no/ /zhes bya ba'i bya ba gzhan med do/ /ci ste yod na ni/ bya ba gnyis su 'gyur te/ las gcig la bya ba gnyis ni med do/ /yang gzhan yang / byed pa po yang las med gyur / /las mi bya ba de la byed pa po yod par yongs su brtag pa gang yin pa de la yang las med par 'gyur ro//ci'i phyir zhe na/ byed pa po'i bya ba yin na byed pa po de'i las su 'gyur zhing / las bya ba des kyang byed pa po de las dang bcas par 'gyur ba yin na bya ba dang bral na las de byed pa po'i bya ba ma yin pa'i phyir te/ de lta bas na byed pa po de las med par thal bar 'gyur ro//de lta bas na bya ba med pa'i phyir las kyang byed pa po med par thal bar 'gyur la/ byed pa po yang las med par thal bar 'gyur bas byed pa po yin par gyur pa las yin pa mi byed do/ /byed pa po ma yin par gyur pa yang las ma yin par gyur pa mi byed do/ / ji ltar zhe na/ gal te byed por ma gyur pa/ /las su ma gyur byed na ni/ /las la rgyu med thal bar 'gyur/ /byed pa po yang rgyu med 'gyur/ /byed pa po dang las dag ma yin par gyur pa zhes bya ba ni gang dag bya ba dang bral ba dag go/ /de la gal te byed pa po ma yin par gyur pa bya ba dang bral ba las ma yin par gyur pa bya ba dang bral ba byed na byed pa po dang las rgyu med par thal bar 'gyur ro//ci'i phyir zhe na/ 'di ltar byed pa po bya ba dang ldan pa'i rgyu las byung ba byed pa po nyid yin la/ las kyang las nyid yin pa'i phyir ro/ /de lta bas na byed pa po dang las dag ma yin par gyur pa bya ba dang bral ba yongs su rtog na rgyu med pa nyid du thal bar 'gyur ro//de la 'ga' yang byed pa po ma yin par mi 'gyur la gang yang las ma yin par mi 'gyur te/ de lta na 'di ni byed pa po yin no/ /'di ni las yin no zhes bya ba dag mi srid par 'gyur ro/ /de dag mi srid na 'di ni bsod nams byed pa yin no//'di ni ma yin no/ /'di ni sdig pa byed pa yin no/ /'di ni ma yin no zhes bya ba dag kyang mi 'thad par 'gyur ro/ /de dag mi 'thad na 'chol ba'i nyes pa chen por 'gyur bas de'i byed pa po ma yin par gyur pa las ma yin par gyur pa mi byed de / yang na/ rgyu med na ni 'bras bu dang / /rgyu yang 'thad par mi 'gyur ro/ /rgyu med na 'bras bu cung zad kyang 'thad par mi 'gyur te/ rgyu med pa la 'bras bu ji ltar 'thad par 'gyur/ ci ste 'thad na ni glo bur du thams cad 'byung bar 'gyur zhing / rtsom pa thams cad don med pa nyid du yang 'gyur bas de ni mi 'dod de/de lta bas na rgyu med na 'bras bu cung zad kyang 'thad par mi 'gyur ro/ /rgyu yang 'thad par mi 'gyur ro/ /zhes bya ba ni rgyu med na rkyen kyang 'thad par mi 'gyur ro zhes bya ba'i tha tshig go/ /de yang ji ltar 'thad ce na/ dngos po rgyu las byung ba rnams la rkyen kyang phan 'dogs par byed pa yin na rgyu med cing de nyid mi 'byung na rkyen rnams kyis gang la phan 'dogs par 'gyur ro//phan 'dogs par mi byed na ni ji ltar rkyen rnams su 'gyur/ de lta bas na rgyu med na 'bras bu yang 'thad par mi 'gyur la/ rgyu yang 'thad par mi 'gyur ro/ /de med na ni bya ba dang / /byed pa po dang byed mi rigs//de med na ni zhes bya ba ni de med na ste/ 'bras bu de med na bya ba dang byed pa po dang / byed pa dag kyang mi rigs so/ /ji ltar zhe na/ 'di na gcad par bya ba gcod pa na gcod pa pos gcad pas gcod par byed de/ de la gcad par bya ba 'bras bu yod na gcad pa'i bya ba yod cing gcad pa'i bya ba'i byed pa po gcod pa po yang yod la/gcod pa po de yang gcad pa'i byed pas gcod par byed de/ gcad par bya ba 'bras bu med na gzhi med pa la gcad pa'i bya ba ji ltar yod par 'gyur/ gcad pa'i bya ba med na de'i byed pa po gcod pa po yod par ga la 'gyur/ gcod pa po med na gcad pa'i byed pa ga la yod/bya ba la sogs mi rigs na/ /chos dang chos min yod ma yin/ /bya ba la sogs pa mi rigs par thal bar gyur na chos dang chos ma yin pa dag kyang yod pa ma yin no/ /ci'i phyir zhe na/ 'di la chos dang chos ma yin pa lus dang ngag dang yid kyi bya ba'i khyad par can dag ni byed pa po dang bya ba la brten par 'dod pa'i phyir te/de lta bas na/ bya ba dang byed pa po dang byed pa dag mi rigs na de dag la brten pa'i chos dang chos ma yin pa dag yod pa ma yin no/ /chos dang chos min med na ni/ /de las byung ba'i 'bras bu med/ /de ltar chos dang chos ma yin pa dag med na chos dang chos ma yin pa de dag las byung ba'i 'bras bu yang med par thal bar 'gyur/ci'i phyir zhe na/ sa bon la sogs pa las lo tog skye ba bzhin du chos dang chos ma yin pa dag las 'bras bu 'grub par 'dod pa'i phyir ro/ /bya ba la sogs pa mi rigs pa'i phyir ro //chos dang chos ma yin pa de dag med do/ /de dag med pas de las byung ba'i 'bras bu yod par ga la 'gyur/ 'bras bu med na thar pa dang / /mtho ris 'gyur ba'i lam mi 'thad/ /'bras bu med par thal bar gyur na/ /mtho ris su 'gyur ba dang thal bar 'gyur ba'i lam yang mi 'thad par 'gyur ro//ci'i phyir zhe na/ mtho ris dang byang grol dag ni chos kyi 'bras bu yin la de dag 'thob pa'i thabs ni lam yin na mtho ris dang byang grol zhes bya ba 'bras bu de dag med na lam de gang gis 'thob pa'i thabs su 'gyur/ bya ba dag ni thams cad kyang / /don med nyid du thal bar 'gyur//'bras bu med pas mtho ris dang byang grol gyi lam mi 'thad par thal bar 'gyur ba 'ba' zhig tu yang ma zad kyi/ 'jig rten na zhing las la sogs pa'i bya ba gang dag yin pa de dag kyang don med pa nyid du thal bar 'gyur te/ 'jig rten ni 'bras bu'i don du bya ba de dang de dag rtsom par byed pa yin na 'bras bu de dang de dag mi 'thad cing 'bras bu med na bya ba sgrub pa dag dub pa'i snod du zad pas don med pa nyid du thal bar 'gyur ro//de'i phyir de ltar rgyu med na nyes pa mang po dang chen po dag tu thal bar 'gyur bas byed pa po ma yin par 'gyur bas las ma yin par gyur pa byed do//zhes bya ba de ni shin tu tshig ngan pa yin no/ /de la 'di snyam du byed pa po yin pa dang ma yin par gyur pa las yin pa dang ma yin par gyur pa byed par sems na/ de la bshad par bya ste/ byed pa por gyur ma gyur pa/ /gyur ma gyur de mi byed de//byed pa po yin pa dang ma yin par gyur pa ni bya ba dang ldan pa dang bya ba dang mi ldan pa'o/ /las yin pa dang ma yin par gyur pa yang bya ba dang ldan pa dang bya ba dang mi ldan pa'o/ /byed pa po yin pa dang ma yin par gyur pa las yin pa dang ma yin par gyur pa mi byed do/ /ci'i phyir zhe na/ yin dang ma yin gyur pa ni//phan tshun 'gal bas ga la gcig /gal te byed pa po dang las de lta bu dag srid par gyur na ni byed pa po de las de byed par yang 'gyur grang na/ yin pa dang ma yin par gyur pa ni phan tshun 'gal ba yin pas/ gcig na yod par ga la 'gyur te/ de lta bas na mi srid pa'i phyir dang / gnyi ga'i skyon ji skad bstan par thal bar 'gyur ba'i phyir byed pa po yin pa dang / ma yin par gyur pa mi byed do/ /de ltar re zhig phyogs mthun pa gsum gyis byed pa po dang las mi 'thad de/ byed pa po yin par gyur pa las yin par gyur pa mi byed pa dang / byed pa po ma yin par gyur pa las ma yin par gyur pa mi byed pa dang /byed pa po yin pa dang / ma yin par gyur pa las yin par gyur pa las yin pa dang / ma yin par gyur pa mi byed do/ /mi mthun pas kyang mi 'thad de/ /'di ltar/ byed pa po dang las dag ni/ /gyur pa ma gyur mi byed do/ /ma gyur pa yang gyur mi byed //re zhig byed pa po yin par gyur pa las/ ma yin par gyur pa mi byed do/ /byed pa po ma yin par gyur pa las yin par gyur pa mi byed do/ /ci'i phyir zhe na/ 'di ltar/ 'dir yang skyon der thal bar 'gyur/ /byed pa po dang las rnam pa de lta bu dag yongs su rtog na 'dir yang gang gi phyir sngar bstan pa'i skyon byed pa po yin par gyur pa la bya ba med pa dang /las la byed pa po med pa dang / las yin par gyur pa la bya ba med pa dang / byed pa po las med pa dang / byed pa po dang las ma yin par gyur pa dag la rgyu med par 'gyur ba de'i phyir byed pa po yin par gyur pa las ma yin par gyur pa mi byed la /byed pa po ma yin par gyur pa las yin par gyur pa mi byed do/ /byed pa po dang las dag ni/ /gyur dang bcas pa ma gyur dang / /gyur ma gyur pa mi byed de/ /byed pa po yin par gyur pa las ma yin par gyur pa dang yin pa dang ma yin par gyur pa mi byed do/ /ci'i phyir zhe na/ gtan tshigs gong du bstan phyir ro/ /byed pa po yin par gyur pa la bya ba med pa dang / las ma yin par gyur pa la rgyu med pa dang / las yin pa dang ma yin par gyur pa phan tshun 'gal bas ga la gcig ces bstan pa'i phyir ro/ /byed pa po dang las dag ni/ /ma gyur pa ni gyur bcas dang / / gyur ma gyur pa mi byed de/ /byed pa po ma yin par gyur pa las yin par gyur pa dang / yin pa dang ma yin par gyur pa mi byed do/ /ci'i phyir zhe na/ gtan tshigs gong du bstan phyir ro/ /byed pa po ma yin par gyur pa las rgyu med pa byed / las ma yin par gyur pa la bya ba med pa dang / las yin pa dang ma yin par gyur pa phan tshun 'gal bas ga la gcig ces bstan pa'i phyir ro//byed pa por gyur ma gyur ni/ /las su gyur dang ma gyur pa/ /mi byed/ byed pa po yin pa dang ma yin par gyur pa las yin par gyur pa dang / ma yin par gyur pa mi byed do/ /ci'i phyir zhe na/ 'dir yang gtan tshigs ni/ gong du bstan pas shes par bya/ /byed pa po yin pa dang ma yin par gyur pa las/ phan tshun 'gal bas ga la gcig ces bya ba dang / las yin par gyur pa la bya ba med pa dang / las ma yin par gyur pa la rgyu med par 'gyur ro zhes bstan pa dag gis shes par bya'o//de ltar phyogs mi mthun pa drug gis kyang byed pa po dang las mi 'thad de/ yin par gyur pa ma yin par gyur pa dang / ma yin par gyur pa yin par gyur pa mi byed pa dang / yin par gyur pa ma yin par gyur pa dang / yin pa dang ma yin par gyur pa mi byed pa dang /ma yin par gyur pas yin par gyur pa dang / yin pa dang ma yin par gyur pa mi byed pa dang / yin pa dang ma yin par gyur pa yin par gyur pa dang / ma yin par gyur pa mi byed de/ de lta bas na byed pa po 'di las 'di byed do zhes bya ba de ji ltar yang mi 'thad do//smras pa/ byed pa po 'di las 'di byed do zhe'am/ mi byed do zhes bya ba des kho bo la ci bya/ yod na ni re zhig byed pa po dang las yod do/ /bshad pa/ ci khyod til mar 'dod la dgon pa'i til ka tshol lam/ khyod byed pa po dang las zhes bya ba'i ming tsam gyis dga' zhing ci yang mi byed pa byed por 'dod la mi bya ba las su 'dod ko//bya ba gzhan mi 'thad pas de dag yod par brtag pa don med par 'gyur du nges te/ de lta bu'i rang bzhin can ni byed pa po yang ma yin la de lta bu'i rang bzhin can ni las kyang ma yin pas 'dir gang bden par gyur pa de nyid gzung bar bya ba'i rigs pa snyam/smras pa/ gal te de ltar byed pa po yang med la/ las kyang med na khyod kyis rgyu med pa'i skyon du thal bar 'gyur ro/ /zhes gang dag bstan pa de dag thams cad khyod la rjes su 'brel bar mi 'gyur ram/ bshad pa/ mi 'gyur te/kho bo ni byed pa po dang las dag med pa nyid du mi smra'i/ kho bos de dag gi bya ba yin par gyur pa dang / ma yin par gyur pa yongs su rtogs pa spangs pa de byas te/ kho bo ni byed pa po dang las dag brten nas gdags par 'dod de/ de yang ji ltar zhe na/ byed po las la brten byas shing //las kyang byed po de nyid la/ /brten nas 'byung ba ma gtogs par/ /'grub pa'i rgyu ni ma mthong ngo / /byed pa po ni las la brten cing las la gnas/ las la ltos nas byed pa po zhes gdags shing brjod do/ /de'i las kyang byed pa po de nyid la brten nas 'byung zhing de'i las zhes gdags shing brjod do//de'i phyir de gnyis ni ltos pa can du gdags pa yin gyi/ ngo bo nyid du grub pa dang ma grub pa med do/ /de'i phyir de ltar de gnyis yod pa nyid dang med pa nyid du khas ma blangs pas dbu ma'i lam du gdags pa yin no/ /gdags pa de ma gtogs par de gnyis 'grub pa'i mtshan nyid gzhan ma mthong ngo //de bzhin nyer len shes par bya/ /nyer len zhes bya ba ni dngos por lta ste/ gang la dngos po yod pa de la byed pa po du ma yod pas 'dir nye bar blangs pa dang nye bar len pa po gzung bar 'dod par bya'o/ /de la ji ltar byed pa po la brten nas gdags pa de bzhin du/nye bar len pa po yang nye bar blang ba la brten nas gdags so/ /ji ltar las byed pa po de nyid la brten nas gdags pa de bzhin du nye bar blang ba yang nye bar len pa po de nyid la brten nas gdags te/ de gnyis la yang de ma gtogs par 'grub pa'i mtshan nyid ma mthong ngo //de yang / ji ltar zhe na/ las dang byed po bsal phyir ro/ /bsal zhes bya ba ni bkag pa'o/ /phyir ro zhes bya ba ni gtan tshigs kyi don te/ byed pa po dang las de dag sngar rnam pa du mar gsal bar byas pas de dag gsal ba kho nas nye bar len pa po dang nye bar blang ba dag gis 'grub pa'i mtshan nyid gzhan yang bsal bar shes par bya'o//de la ji ltar byed pa po yin par gyur pa las yin par gyur pa mi byed la / byed pa po ma yin par gyur pa las ma yin par gyur pa mi byed/ byed pa po yin pa dang ma yin par gyur pa las yin pa dang ma yin par gyur pa mi byed de/skyon du mar thal bar 'gyur ba'i phyir ro zhes bya ba de bzhin du nye bar len pa po yang nye bar len pa po yin par gyur pa nye bar blang ba yin par gyur pa nye bar len par mi byed/ nye bar len pa po ma yin par gyur pa nye bar blang ba ma yin pa dang ma yin par gyur pa nye bar len par mi byed de/skyon du mar thal bar 'gyur ba'i phyir ro/ /phyogs mi mthun pa dag la yang de bzhin du sbyar ro/ /byed pa po dang las dag gis/ /dngos po lhag ma shes par bya/ /byed pa po las dag dang dngos po lhag ma rnams mtshungs par shes par bya'o/ /nye bar len pa logs shig tu smos pa ni gtso bo yin pa'i phyir dang /don 'og ma dag gi phyir te/ de la dngos po lhag ma rnams ni rgyu dang 'bras bu dang yan lag dang yan lag can dang / me dang bud shing dang / yon tan dang yon tan can dang / mtshan nyid dang / mtshan nyid kyi gzhi dang /rnam pa de lta bu dag go/ /de rgyu yin par gyur pa 'bras bu yin par gyur pa mi skyed / rgyu ma yin par gyur pa 'bras bu ma yin par gyur pa mi skyed / rgyu yin pa dang / ma yin par gyur pa 'bras bu yin pa dang / ma yin par gyur pa mi skyed de/ phyogs thams cad la yang de bzhin du sbyar bar bya zhing /skyon du thal bar 'gyur ba ji skad smos pa dag kyang bstan par bya'o/ /rgyu yang 'bras bu skyed par byed pa na yin par gyur pa zhes bya'o/ /de las gzhan pa ni ma yin par gyur pa'o/ /'bras bu yang skyed par bya ba na yin par gyur pa zhes bya'o/ /de las gzhan pa ni ma yin par gyur pa'o //de bzhin du yan lag dang yan lag can dag la yang blta bar bya ste/ yan lag yin par gyur pa yan lag can yin par gyur pa dag la mi 'jug /ma yin par gyur pa yang ma yin par gyur pa dag la mi 'jug /yin pa dang ma yin par gyur pa yang yin pa dang ma yin par gyur pa dag la mi 'jug go//me yin par gyur pa yang bud shing yin par gyur pa mi sreg /ma yin par gyur pa yang ma yin par gyur pa mi sreg /yin pa dang ma yin par gyur pa yang yin pa dang ma yin par gyur pa mi sreg go/ /yon tan yin par gyur pa yang yon tan can yin par gyur pa la mi 'jug /ma yin par gyur pa yang ma yin par gyur pa la mi 'jug /yin pa dang ma yin par gyur pa yang yin pa dang ma yin par gyur pa la mi 'jug go/ /mtshan nyid yin par gyur pa yang mtshan nyid kyi gzhi yin par gyur pa mtshon par mi byed/ ma yin par gyur pa yang ma yin par gyur pa mtshon par mi byed/yin pa dang ma yin par gyur pa yang yin pa dang / ma yin par gyur pa mtshon par mi byed do/ /ji ltar byed pa po las la brten nas gdags la/ las kyang byed pa po nyid la brten nas gdags pa de bzhin du 'bras bu yang rgyu la brten nas gdags la/rgyu yang 'bras bu de nyid la brten nas gdags so/ /yan lag can yang yan lag la brten nas gdags la/ yan lag kyang yan lag can de nyid la brten nas gdags so/ /me yang bud shing la brten nas gdags la/ /bud shing yang me de nyid la brten nas gdags so//yon tan can yang yon tan la brten nas gdags la/ yon tan yang yon tan can de nyid la brten nas gdags so/ /mtshan nyid kyi gzhi yang mtshan nyid la brten nas gdags la/ mtshan nyid kyang mtshan nyid kyi gzhi de nyid la brten nas gdags so//de ltar de dag la ltos te gdags pa ma gtogs par rnam pa gzhan gang gis kyang de dag 'grub par mi 'thad do/ /byed pa po dang las brtag pa zhes bya ba ste rab tu byed pa brgyad pa'o// //dbu ma rtsa ba'i 'grel pa bud d+ha pA li ta / bam po bzhi pa/ smras pa/ de bzhin nyer len shes par bya//zhes gang bshad pa de la smra bar bya ste/ lta dang nyan la sogs pa dang / /tshor sogs dang yang dbang byas pa/ /gang gi yin pa de dag gi/ /snga rol de yod kha cig smra/ /lta dang nyan la sogs pa dang / /zhes bya ba ni lta ba dang nyan pa la sogs pa'o/ / lta ba dang nyan pa la sogs pa dang / tshor ba la sogs pa dag gang gi nye bar blang ba yin pa'i dngos po de lta ba dang nyan pa la sogs pa dang / tshor ba la sogs pa de dag gi snga rol na yod do zhes kha cig de skad ces smra'o/ /de ci'i phyir zhe na/ dngos po yod pa ma yin na/ /lta la sogs pa ji ltar 'gyur//de phyir de dag snga rol na/ /dngos po gnas pa de yod de / /dngos po yod pa ma yin na/ /lta ba la sogs pa dag ji ltar nye bar blang ba yin par 'gyur/ de'i phyir mi 'thad pas lta ba la sogs pa de dag gi snga rol na lta ba la sogs pa dag gang gi nye bar blang ba yin pa'i dngos po gnas pa de yod do//nye bar len pa po de yod na nye bar blang ba yang ltos pas gdags su yod pa yin na de la khyod ci zer/ bshad pa/ lta dang nyan la sogs pa dang / /tshor ba la sogs nyid kyi ni/ /snga rol dngos po gang gnas pa/ /de ni gang gis gdags par bya//'di la lta ba dang nyan pa la sogs pa dang / tshor ba la sogs pa dag gis lta ba po dang / nyan pa po dang / tshor ba po zhes dngos po gdags par bya ba yin na lta ba la sogs pa dang / tshor ba la sogs pa dag gi snga rol na lta ba la sogs pa dag gang gi nye bar blang ba zhes brjod pa'i dngos po yod do//zhes brtag pa'i dngos po de 'di ltar gnas te/ yod do zhes gang gis gdags par bya/ smras pa/ de ni lta ba la sogs pa dag med par yang rang nyid kyis rab tu grub par yod do/ /bshad pa/ lta la sogs pa med par yang / /gal te de ni gnas gyur na//de med par yang de dag ni/ /yod par 'gyur bar the tshom med/ /lta ba la sogs pa dag med par yang gal te dngos po de rang nyid kyis rab tu grub cing gnas pa yod do/ /zhes brjod na/ dngos po de med par yang lta ba la sogs pa de dag rang nyid kyis rab tu grub cing gnas pa yod par 'gyur bar the tshom med do//smras pa/ lta ba la sogs pa dag kyang de med par gnas par gyur na skyon ci yod/ bshad pa/ thams cad skyon nyid du 'gyur te/ ci'i phyir zhe na/ lta ba la sogs pa dag med pa'i dngos po gsal bar byed pa med par gnas pa med par 'gyur ba dang /de med na lta ba la sogs pa dag kyang gsal bar byed pa med par gnas par 'gyur ba'i phyir ro / /gang gi phyir de dag ni/ ci yis gang zhig gsal bar byed/ /gang gis ci zhig gsal bar byed/ /lta ba la sogs pa ci zhig po dag gis dngos po gang zhig lta ba po dang nyan pa po dang tshor ba po dang zhes gsal bar byed de/gsal bar byed ces bya ba ni/ mngon par byed pa dang / gzung bar byed pa dang / shes par byed ces bya ba'i tha tshig go/ /dngos po gang zhig pos kyang lta ba la sogs pa ci zhig po dag 'di ni lta ba'o/ /'di ni nyan pa'o/ / 'di ni tshor ba'o/ /zhes gsal bar byed do/ /de ltar gang gi phyir lta ba la sogs pa dag gis dngos po gsal bar byed pa / dngos pos kyang lta ba la sogs pa dag gsal bar byed pa de'i phyir/ ci med gang zhig ga la yod/ /gang med ci zhig ga la yod/ /lta ba la sogs pa ci zhig po dag med na gsal bar byed pa med pa'i dngos po gang zhig po gnas pas gnas par 'gyur ba ga la yod/dngos po gang zhig po med na yang gsal bar byed pa med pa'i lta ba la sogs pa ci zhig po dag gnas par 'gyur ba ga la yod de/ de lta bas na/ lta ba la sogs pa ci zhig po dag gi snga rol na dngos po gang zhig po gnas pa med do//smras pa/ lta la sogs pa thams cad kyi/ /snga rol gang zhig yod pa min/ /lta ba la sogs pa ci zhig po thams cad kyi snga rol na dngos po gang zhig po yod do/ /zhes ni mi smra'i/ 'di lta ba la sogs pa'i ci zhig po dag re re'i snga rol na dngos po gang zhig po yod pas de'i phyir de ni/lta la sogs pa gzhan dag gis/ /gzhan gyi tshe na gsal bar byed/ /gang gi phyir de lta ba la sogs pa thams cad kyi snga rol na yod pa ma yin gyi/ lta ba la sogs pa dag re re'i snga rol na yod pa de'i phyir de ni lta ba la sogs pa gzhan dang gzhan gyis dus gzhan gyi tshe na lta ba po dang nyan pa po dang /tshor ba po zhes gsal bar byed do/ /de lta bas na de ni lta ba la sogs pa dag gi snga rol na med pa yang ma yin la/ gsal bar byed pa med pa yang ma yin no/ /bshad pa/ rang gi blo gros yang bar ston par zad de gyi na zhig smras so//lta la sogs pa thams cad kyi/ /snga rol gal te yod min na/ /lta la sogs pa re re yi/ /snga rol de ni ji ltar yod/ /lta ba la sogs pa thams cad kyi snga rol na gal te yod pa ma yin na/ lta ba la sogs pa re re'i snga rol na yang de yod pa ma yin par nges so//ci ste re re'i snga rol na yod na ni thams cad kyi snga rol na yang de yod par gsal lo/ /ci ste de gang gi tshe lta ba'i snga rol na yod pa de'i tshe na nyan pa la sogs pa dag gi snga rol na med pa yin na de dag gi snga rol na med pa gang yin pa de ji ltar nyan pa'i snga rol na med pa bzhin du lta ba spangs te/nyan pa'i snga rol na yod par 'gyur/ de lta bas na re re'i snga rol na yod kyi/ thams cad kyi snga rol na med do zhes bya ba de ni gyi na'o/ /yang gzhan yang / gal te re re'i snga rol na/ /lta po de nyid nyan po de/ /tshor ba po yang de nyid 'gyur/ / de ni de ltar mi rigs so/ /gal te de lta ba la sogs pa re re'i snga rol na yod par gyur na de lta ba po yang de nyid yin la/ nyan pa po yang de nyid yin/ tshor ba po yang de nyid yin par 'gyur te/ de de ltar na mi rigs so/ /ci'i phyir zhe na/ skyes bu skar khung tha dad par 'gro ba bzhin du bdag dbang po gzhan du 'gro bar thal bar 'gyur ba'i phyir te/bdag ni dbang po gzhan gang du 'gro bar mi 'dod do/ /ci ste bdag dbang po gzhan du 'gro bar thal ba der gyur na mi rung ngo snyam pas lta ba po yang gzhan nyid yin la/ nyan pa po yang gzhan nyid yin/ tshor ba po yang gzhan nyid yin par rtog na/de la yang bshad par bya ste/ gal te lta po gzhan nyid la/ /nyan pa po gzhan tshor gzhan na/ /lta po'i tshe na nyan po yod/ /bdag kyang mang po nyid du 'gyur/ /gal te lta ba po yang gzhan nyid yin la/ nyan pa po yang gzhan nyid yin/ tshor ba po yang gzhan nyid yin par gyur na de lta na lta ba po'i tshe na nyan pa po dang tshor ba po yang yod par 'gyur te/ji ltar zhe na/ gang gi tshe lta ba la sogs pa re re'i snga rol na de dag yod par 'dod pa'i phyir ro/ /kho bo'i lta ba po yang gzhan nyid yin la/ nyan pa po yang gzhan nyid yin/ /tshor ba po yang gzhan nyid yin no zhes zer bas/de lta na bdag kyang mang po nyid du thal bar 'gyur ro/ /ci ste gzhan nyid kyang yin la/ lta ba po'i tshe na nyan pa po dang / tshor ba po med na de lta na yang bdag mi rtag pa nyid dang / bdag mang po nyid du yang thal bar 'gyur bas de yang mi 'dod do/ /de lta bas na lta ba la sogs pa re re'i snga rol na yod pa dang /lta ba la sogs pa gzhan dang gzhan gyis gsal bar byed do zhes gang smras pa de ni rigs pa ma yin no/ /smras pa/ lta la sogs pa dag gi snga rol na bdag yod pa nyid do/ /ci'i phyir zhe na/ 'di la ming dang gzugs kyi rkyen gyis skye mched drug ces gsungs la/gzugs zhes bya ba ni 'byung ba chen po bzhi po dag yin pas de'i phyir 'byung ba'i rkyen gyis skye mched drug 'byung la/ 'byung ba de dag kyang bdag gi nye bar blang ba yin no/ /de lta bas na/ 'byung ba nye bar len pa po 'byung bas gsal bar byas pa'i bdag gnas pa yod na skye mched drug 'byung zhing rim gyis tshor ba la sogs pa dag kyang 'byung bas des na lta ba la sogs pa dag gi snga rol na dngos po gnas pa yod do zhes bya ba de 'thad do//bshad pa/ lta dang nyan la sogs pa dang / /tshor ba dag la sogs pa yang / /gang las 'gyur ba'i 'byung de la'ang //de ni yod pa ma yin no/ /lta dang nyan la sogs pa dang / /tshor ba la sogs pa dag rim gyis gang dag las 'gyur ba'i 'byung ba de dag la yang khyod kyis brtags pa'i dngos po de ni yod pa ma yin no/ /ci'i phyir zhe na/ 'byung ba nye bar len pa po yin pa'i phyir te/ 'byung ba nye bar len pa po de yang 'byung ba dag gi snga rol na gsal bar byed pa med pas mi 'thad do//gang 'byung ba dag gi snga rol na yod pa ma yin pa de ji ltar 'byung ba dag gi nye bar len pa por 'gyur/ de lta bas na 'byung ba dag la yang de yod pa ma yin na lta ba la sogs pa dag gi snga rol na yod par ga la 'gyur/smras pa/ lta ba la sogs pa dag gi snga rol na de yod kyang rung med kyang rung ste/ yod ni re zhig lta ba la sogs pa dag ni yod de/ khyod kyis sngar/ ci med gang zhig ga la yod/ /gang med ci zhig ga la yod/ /ces smras pas/ de'i phyir lta ba la sogs pa ci zhig po dag yod do//gang zhig med na ci zhig kyang med pas de'i phyir ga gang gi yin pa'i dngos po gang zhig po de yang yod do/ /bshad pa/ gang med ci zhig ga la yod/ /ces bya ba des de'i lan btab zin to/ /ji ltar zhe na/ lta dang nyan la sogs pa dang //tshor ba dag la sogs pa yang / /gang gi yin pa gal te med/ /de dag kyang ni yod ma yin/ /lta ba la sogs pa ci zhig po dag gi snga rol na dngos po gang zhig po med do zhes bya ba de ni sngar bstan zin to/ /gang med ci zhig ga la yod ces bya ba de yang bstan zin te/ de'i phyir gal te lta ba la sogs pa ci zhig po dag rab tu sgrub par byed cing lta ba la sogs pa dag gang gi yin par 'gyur ba gang zhig po de nyid med na/lta ba la sogs pa dag rab tu 'grub par ga la 'gyur te/ gang gi lta ba la sogs par 'gyur/ de lta bas na dngos po gang zhig po med pa'i phyir/ lta ba la sogs pa ci zhig po dag kyang med la/ lta ba la sogs pa ci zhig po dag med na khyod kyi dngos po gang zhig yod par ga la 'gyur/ smras pa/ ci khyod kyi dngos po gang zhig po med pa de shin tu nges pa yin nam/ bshad pa/ gang zhig lta la sogs pa yi/ /snga rol da ltar phyi na med//de la yod do med do zhes/ /rtog pa dag ni ldog par 'gyur/ /gang zhig po lta ba la sogs pa dag gi snga rol dang lta ba la sogs pa dag dang / da ltar lhan cig dang / lta ba la sogs pa dag gi phyi dus rnam pa thams cad du btsal na/ de 'di'o zhes rang gis rab tu grub pa med pa de la lta ba la sogs pa dag gis yod do med do zhes gdags pa'i rtog pa dag ldog par 'gyur te/re zhig rang nyid rab tu ma grub pa'i phyir de yod do zhes ji skad brjod par nus/ lta ba la sogs pa dag gis gsal bar byed pa'i phyir de med do zhes kyang ji skad brjod par nus te/de'i phyir de la yod do med do zhes rtog pa dag mi 'thad do/ /de lta bas na byed pa po dang las dag bzhin du nye bar len pa de yang gdags par zad kyi/ de ma gtogs par 'grub pa gzhan mi 'thad do/ /nye bar len pa po dang nye bar blang ba brtag pa zhes bya ba ste rab tu byed pa dgu pa'o// //smras pa/ me dang bud shing dag bzhin du/ nye bar len pa po dang nye bar blang ba dag rab tu 'grub kyi/ byed pa po dang las dag bzhin du rab tu mi 'grub pa ni ma yin no/ /bshad pa/ gal te me bud shing rab tu grub na ni de dag kyang rab tu 'grub par 'gyur grang na/ gang gi tshe me dang bud shing dag byed pa po dang las dag kho na bzhin du rab tu mi 'grub pa de'i tshe nye bar len pa po dang / nye bar blang ba dag ji ltar rab tu 'grub par 'gyur/ gal te me dang bud shing dag ngo bo nyid kyis rab tu grub par gyur na/ gcig pa nyid dam gzhan nyid du rab tu 'grub par 'gyur grang na/gnyi ga ltar yang mi 'thad do/ /ji ltar zhe na/ bud shing gang de me yin na/ /byed pa po dang las gcig 'gyur/ /gal te re zhig bud shing gang kho na yin pa de nyid me yin par rab tu rtog na/ de lta na byed pa po dang las gcig pa nyid du thal bar 'gyur te/ de la me ni sreg par byed pa'o zhes bya ba dag mi srid par 'gyur ro//ci ste gcig pa nyid yin yang de dag srid na ni me ni sreg par byed pa'o/ /bud shing ni bsreg par bya ba'o zhes bya ba dag kyang srid par 'gyur ba zhig na mi srid pas de lta bas na de gnyis gcig pa nyid mi 'thad do/ /de la bud shing las me gzhan nyid yin par sems na/de la bshad par bya ste/ gal te shing las me gzhan na/ /shing med par yang 'byung bar 'gyur/ /gal te bud shing las me gzhan nyid yin par gyur na/ bud shing med cing bud shing ma gtogs par kho nar yang mi 'byung bar 'gyur ba zhig na/ bud shing med par me 'byung bas de lta bas na de nyid gzhan nyid du yang mi 'thad do/ /yang gzhan yang / rtag tu 'bar ba nyid du 'gyur/ /'bar byed med pa'i rgyu las byung / /rtsom pa don med nyid du 'gyur/ /de ltar yin na las kyang med/ /gal te bud shing las me gzhan nyid yin par gyur na rtag tu 'bar na nyid du 'gyur te/'di ltar 'bar byed med pa'i rgyu las byung ba'i phyir ro/ /de'i 'bar bar byed pa'i rgyu gang yin pa de ni 'bar byed kyi rgyu'o/ /'bar bar byed pa'i rgyu med pa ni 'bar byed med pa'i rgyu las byung ba ste/ 'bar bar byed pa med pa kho nar me 'byung bar 'gyur ro zhes bya ba'i tha tshig go//rtsom pa don med pa nyid du yang 'gyur ro/ /de lta yin na las med pa'i mer yang 'gyur te/ me zhes bya ba 'di ni sreg par byed pa'o zhes bya ba de lta bu'i las bstan du med par yang 'gyur ro/ /smras pa/ me 'bar byed med pa'i rgyu las byung bar 'gyur ro zhes gang bshad pa de ji lta bu/bshad pa/ gzhan la ltos pa med pa'i phyir/ /'bar byed med pa'i rgyu las byung / /gang gi phyir bud shing las me gzhan nyid yin par gyur na bud shing med par yang 'byung bar thal bar 'gyur ba de'i phyir gzhan la ltos pa med pa yin te/ 'di ltar me bud shing la ltos na ni gzhan la ltos pa dang bcas par gyur na de yang de la bud shing med pas gzhan la ltos pa med pa yin la/ gzhan la ltos pa med pa'i phyir 'bar byed med pa'i rgyu las byung bar 'gyur ro/ /'bar byed med pa'i rgyu las byung bar gyur na rtag tu 'bar ba nyid du thal bar 'gyur te/'di ltar me 'bar byed la ltos na ni 'bar byed med na de 'chi bar 'gyur ba zhig na/ de la 'bar byed de yang med pas rtag tu 'bar ba nyid du yang thal bar 'gyur ro/ /rtag tu 'bar ba nyid yin na/ /rtsom pa don med nyid du 'gyur/ /me rtag tu 'bar ba nyid yin na ni byung ba dang sbar ba la sogs pa rtsom pa dag don med pa nyid du'ang 'gyur ro//de lta na las med par yang thal bar 'gyur zhing / rnam pa de lta bu ni mi 'thad pas me med pa nyid du yang thal bar 'gyur ro/ /de la gal te 'di snyam du/ /sreg shing bud shing yin sems na/ /de la gal te la las 'di snyam du gang gi phyir mes khyab cing mes bsreg bzhin pa bud shing yin pa de'i phyir gzhan nyid yin yang me la bud shing med pa ma yin gyi/bud shing dang bcas pa nyid yin pas de la bud shing med par thal bar gyur na skyon gang dag bstan pa de dag tu mi 'gyur bar sems na/de la bshad par bya ste/ gang tshe de tsam de yin na/ /gang gis bud shing de sreg byed/ /gang gi tshe bsreg bzhin pa de tsam na de nyid yin zhing gzhan gang dang ldan pas kyang bsreg bzhin pa ma yin na bud shing gi gnas skabs kyi snga rol na me zhes bya ba gang gis khyab cing gang gis bsreg bzhin pa na bud shing yin par 'gyur ba gzhan de gang yin/bsreg bzhin pa'i gnas skabs nyid la yang ci bud shing gang kho na yin pa de nyid me yin nam/ 'on te me yang gzhan la bud shing kyang gzhan zhes bsam pa 'di 'byung la/ khyod kyis kyang bsreg bzhin pa'i gnas skabs nyid la mes khyab cing mes bsreg bzhin pa bud shing yin no zhes smras pa de'i tshe gang gi phyir mes khyab cing mes bsreg bzhin pa bud shing yin pa de'i phyir me la bud shing med pa ma yin no zhes bya ba de ji ltar smra ba rigs so //de lta bas na gzhan nyid yin na yang skyon du thal bar 'gyur ba de dag so na gnas bzhin no//yang gzhan yang / gzhan na mi phrad phrad med na/ /sreg par mi 'gyur mi sreg na/ /'chi bar mi 'gyur mi 'chi na/ /rang gi brtags dang ldan par gnas/ /me gzhan yin na bud shing dang mi phrad par 'gyur ro/ /phrad pa med na de sreg par mi 'gyur ro/ /ci ste phrad pa med kyang sreg par 'gyur na ni/phyogs gcig na 'dug pas 'gro ba mtha' dag sreg par 'gyur bas de'i phyir phrad pa de mi 'thad pas gzhan nyid yin yang bsreg bzhin pa na bud shing yin no zhes gang smras pa de mi 'thad do/ /mi sreg na 'chi bar mi 'gyur ro/ /ci'i phyir zhe na/ 'di ltar mes bud shing bsregs na ni bud shing zad pas 'chi bar yang 'gyur ba zhig na/mi sreg pa la 'chi ba rgyu med pa las byung ba ji ltar 'byung bar 'gyur/ mi 'chi na ni gzhan la mi ltos pa 'bar byed med pa'i rgyu las byung ba rtag tu 'bar ba dang / gang gi rtags dang ldan pa ther zug tu gnas nyid du gnas par 'gyur ro//yang na ni de bud shing las gzhan ma yin par 'gyur ro/ /smras pa/ me gzhan yin na bud shing dang mi phrad par 'gyur ro zhes gang bshad pa de la smra bar bya ste/ gal te shing las me gzhan yang / /shing dang phrad du rung bar 'gyur/ /gal te bud shing las me gzhan yin na yang bud shing dang phrad du rung bar 'gyur ro//ji ltar zhe na/ ji ltar bud med skyes pa dang / /skyes pa'ang bud med phrad pa bzhin/ /bshad pa/ gal te me dang shing dag ni/ /gcig gis gcig ni bsal gyur na/ /shing las me gzhan nyid yin yang / /shing dang phrad par 'dod la rag /gal te me dang bud shing dag skyes pa dang bud med dag bzhin du gcig gis gcig bsal bar gyur na ni bud shing las me gzhan nyid yin yang khyod kyi yid la bsams pa bzhin du/ji ltar bud med skyes pa dang phrad pa dang / skyes pa bud med dang phrad pa bzhin du bud shing dang phrad par yang 'dod la rag na/ gang gi tshe bsreg bzhin pa'i gnas skabs nyid la bsam pa 'di 'byung ba de'i tshe me dang bud shing phrad par 'gyur ro zhes bya ba de 'thad par ga la 'gyur/ smras pa/ 'dir de gnyis gcig pa nyid kyang ma yin la/ gzhan nyid kyang ma yin pa de nyid rigs pas de gnyis gcig pa nyid dam/ gzhan nyid du ma gyur kyang go sla ste/ re zhig me dang bud shing dag ni rab tu grub pa yin no/ /bshad pa/ de ni bzhad gad kho nar 'gyur te/ gang dag dngos po gcig pa dang / /dngos po gzhan pa nyid du ni/ /grub par gyur pa yod min pa/ /de gnyis grub pa ji ltar yod/ /smras pa/ phan tshun ltos pa las bud shing la ltos nas me yin la/me la ltos nas bud shing yin no/ /bshad pa/ gal te shing ltos me yin la/ /gal te me ltos shing yin na/ /gang la ltos pa'i me dang shing / /dang por grub pa gang zhig yin/ /gal te bud shing la ltos nas me yin la/me la ltos nas kyang shing yin na/ gang la ltos nas me yin par 'gyur ba'am/ bud shing yin par 'gyur ba de gnyis las dang por grub pa gang yin/ de la 'di snyam du bud shing dang por grub pa de la ltos nas me yin par sems na/ de la bshad par bya ste/ gal te shing ltos me yin na//me grub pa la sgrub par 'gyur/ /gal te bud shing dang por grub pa la de ltos nas me yin par 'gyur na de ltar na me grub zin pa la yang sgrub par 'gyur ba yin no/ /ci'i phyir zhe na/ 'di ltar me grub na bud shing la ltos par 'thad kyi/ me ma grub cing med na ji ltar bud shing la ltos par byed do //de'i phyir bud shing med par yang me rang gis grub pa ltos par nus pa la khyod yang bud shing la ltos nas rab tu 'grub par 'gyur ba don med pa yod dam/ yang gzhan yang / bud par bya ba'i shing la yang / /me med par ni 'gyur ba yin/ /de lta na bud shing la yang me med par 'gyur ba yin no//'di ltar bud shing yang grub pa na me la ltos par 'thad kyi/ bud shing ma grub cing med na ji ltar me la ltos par byed do/ /de'i phyir bud shing de nyid kyang me med par rang gis rab tu grub par thal bar 'gyur ba la khyod yang me la ltos nas rab tu 'grub pa don med pa la rtog par byed dam/de lta bas na/ de gnyis ni phan tshun ltos te 'grub par mi 'thad do/ /de bzhin du me sngar grub pa la ltos nas bud shing 'grub par rtog na yang skyon dang ldan par 'gyur ro/ /smras pa/ ci ma smras pa la skyon de lta bu 'dogs par byed dam/ gang gi tshe kho bos de dag phan tshun ltos te 'grub bo zhes smras pa de'i tshe de dag la dang por grub pa gang yin zhes bya ba dang /gal te de dag las gang yang rung ba dang por grub par gyur na phan tshun ltos pa nyid mi 'grub bo zhes bya ba de dag gang gi lan yin/ bshad pa/ phan tshun ltos te 'grub par rtog na gang yang rung ba dang por 'grub par mi 'dod du zin kyang de lta na phan tshun ltos pa 'grub par mi 'thad do//ji ltar zhe na/ gal te dngos po gang ltos 'grub/ /de nyid la yang ltos nas ni/ /ltos bya gang yin de 'grub na/ /gang la ltos nas gang zhig 'grub/ /gal te bsgrub par bya ba'i dngos po gang yin pa ni dngos po gzhan la ltos nas 'grub cing bsgrub par bya ba'i dngos po de nyid la yang ltos nas bsgrub par bya grub par bya ba'i phyir ltos par bya ba'i dngos po gzhan gang yin pa de 'grub na/'o na grub par 'dod pa gang la ltos nas gang zhig 'grub pa de smros shig /ci khyod kyi rna lam du skye bo mkhas pa'i kha nas brjod pa'i tshig de dag ni phan tshun ltos pa dag yin la/phan tshun ltos pa dag ni mi 'grub bo zhes bya ba de sngon chad ma grags sam/ dper na gru la bstod pa gcig gi skyabs su gcig mi 'gyur ba bzhin no/ /gang gi phyir de lta yin na khyod ngo tsha bor te de dag phan tshun ltos te 'grub bo zhes gsang bstod de smra'am/re zhig mnyam par gzhag pa'i yid kyis legs par soms la de smros shig /dngos po ltos 'grub gang yin pa/ /de ma grub na ji ltar ltos / /dngos po gang dngos po gzhan la ltos te 'grub bo zhes brjod pa'i dngos po de ma grub cing / med na ji ltar ltos par byed/ / de ma grub cing med pa la yang ji ltar ltos par bya/ ci ste grub pa ltos she na/ /ci ste yang khyod grub pa nyid gzhan la ltos kyi/ ma grub pa la ni mi ltos la grub pa la yang ci zhig ltos par sems na/ de la bshad par bya ste/ de ni ltos par mi rigs so/ /dngos po grub cing yod pa yang grub par bya ba'i phyir gzhan la ltos pa ni don med pa'i phyir mi rigs so//dngos po grub cing yod pa la gzhan la ltos pas ci bya/ grub cing yod pa la gzhan ltos pas kyang ji ltar 'gyur/ de lta bas na grub pa dang ma grub pa dag ltos par mi 'thad pa'i phyir me dang bud shing dag la ltos te 'grub par mi 'thad do//me dang bud shing gi skabs su dngos po'i tshig smos pa ni me dang bud shing dag kyang dngos po yin pa'i phyir te/ 'og nas kyang / bum snam la sogs lhan cig tu/ /zhes 'byung ngo / /de'i phyir 'di ni dngos po thams cad brtag pa nyid yin pa'i phyir dngos po zhes smos so/ /shing la ltos pa'i me med de//shing la ma ltos me yang med/ /me la ltos pa'i shing med de/ /me la ma ltos shing yang med/ /de'i phyir de ltar rigs pa sngon du btang ste yang dag pa ji lta ba bzhin du brtags na bud shing la ltos pa'i me med de/ me dang bud shing grub pa dang / /ma grub pa dag ltos par mi 'thad pa'i phyir ro//bud shing la ma ltos pa'i me yang med de/ gzhan la ltos pa med pa dang / 'bar byed med pa'i rgyu las byung ba dang / rtag tu 'bar bar thal bar 'gyur ba'i phyir ro/ /da ni me la ltos pa'i bud shing yang med de/ me dang bud shing grub pa dang ma grub pa dag ltos par mi 'thad pa'i phyir ro//me la ma ltos pa'i bud shing yang med de/ 'di ltar me med cing bsreg bzhin pa ma yin pa bud shing du ji ltar 'gyur/ ci ste 'gyur na ni bud shing ma yin par 'gyur ba ci yang med de/ de ni mi 'dod pas de'i phyir me la ma ltos pa'i bud shing yang med do/ /me ni gzhan las mi 'ong ste//shing la'ang me ni yod ma yin/ /me ni gzhan gang las kyang mi 'ong ste/ ci'i phyir zhe na/ 'di ltar de gzhan las 'ong bar rnam par brtag pa gang yin pa de yang bud shing dang bcas par ram/ bud shing med par ro grang na/ /de lta na de la yang bsam pa dang skyon du thal ba de dag nyid du 'gyur bas gzhan las 'ong bar brtag pa don med par 'gyur ro//bud shing la yang me yod pa ma yin te/ ci'i phyir zhe na/ mi dmigs pa'i phyir dang / rtsom pa don med pa nyid du 'gyur ba'i phyir ro/ /gsal ba dang chen po nyid kyang snga na med pa'i phyir 'bras bu snga na med par thal bar 'gyur ro//gal te til dag la til bar bzhin no zhe na/ de yang mi rung ste/ til ni brdung ba dang snum pa dag yin pa'i phyir dang / til bar ni gzhan du dmigs pa'i phyir ro/ /song dang ma song bgom pa yis/ /de bzhin shing la lhag ma bstan/ /rnam pa de dag gis de bzhin du bud shing la yang brjod pa lhag ma dag bstan par khong du chud par bya'o//rnam pa gang gis she na/ song ba dang ma song ba dang bgom pa'i rnam pa dag gis te/ ji ltar song ba la 'gro ba med pa dang / ma song ba la med pa dang / bgom pa la 'gro ba med pa de bzhin du bud shing bsregs pa la yang sreg pa med/ ma bsregs pa la yang med bsreg bzhin pa la yang sreg pa med do/ /ji ltar song ba la 'gro ba'i rtsom pa don med pa dang / ma song ba la med pa dang / bgom pa la 'gro ba'i rtsom pa med pa de bzhin du bsregs pa la yang sreg pa'i rtsom pa med/ ma bsregs pa la yang med/ bsreg bzhin pa la yang sreg pa'i rtsom pa med do//ji ltar 'gro ba po 'gro bar mi byed pa dang / 'gro ba po ma yin pa mi byed pa dang / 'gro ba po yin pa dang / 'gro ba po ma yin par 'gro bar mi byed de/ med pa nyid kyi phyir ro zhes bya ba de bzhin du me yang sreg pa po yang sreg par mi byed/ sreg pa po ma yin pa yang mi byed/ sreg pa po yin pa yang sreg par mi byed de/med pa nyid kyi phyir / de bzhin du lhag ma rnams kyang drang bar bya'o/ /shing nyid me ni ma yin te/ /shing las gzhan la me yang med/ /me ni shing dang ldan ma yin/ /me la shing med der de med/ /re zhig bud shing gang kho na yin pa de nyid me ma yin te/ byed pa po dang las dag gcig pa nyid kyi skyon du thal bar 'gyur ba'i phyir ro//bud shing las gzhan la yang med de/ gzhan la mi ltos pa nyid la sogs pa'i skyon du thal bar 'gyur ba'i phyir ro/ /me bud shing dang ldan pa yang ma yin te/ ci'i phyir zhe na/ ldan pa'i rkyen 'di me dang bud shing dag gcig pa nyid dam/gzhan nyid la yod grang na/ de dag gis de gnyi ga bsal zin pa'i phyir ro/ /smras pa/ mi rung ste/ 'jig rten na mthong ba'i phyir ro/ /'di ltar de ni 'jig rten na me 'di ni bud shing dang ldan no/ /me 'di ni bud shing med pa'o zhes bya bar mthong / bshad pa/ 'di ni de kho na bsam pa yin pas 'di la 'jig rten pa'i brjod pa gang la 'di ni bdag dang ldan no zhes kyang zer ba dag gis ci bya/me la bud shing dag rdza bo na rgya shug ltar yod pa yang ma yin la/ bud shing dag la me chu na pad ma dag ltar yod pa yang ma yin te/ ci'i phyir med ce na/ gzhan nyid kyi skyon du 'gyur ba'i phyir ro/ / me dang shing gis bdag dang ni/ /nye bar blang ba'i rim pa kun/ /bum snam sogs dang lhan cig tu/ /ma lus par ni rnam par bshad/ /me dang bud shing dag gis bdag dang nye bar blang ba dag gi gcig pa nyid dang / gzhan nyid dang phan tshun ltos par mi 'thad pa'i rim pa thams cad bum pa dang snam bu la sogs pa dag dang lhan cig tu ma lus par rnam par bshad pa khong du chud par bya ste/'di lta ste/ ji ltar me bud shing dang gcig pa nyid kyang ma yin gzhan nyid du yang mi 'thad phan tshun ltos te grub pa yang mi 'thad pa de bzhin du bdag kyang nye bar blang ba dang gcig pa nyid kyang ma yin/gzhan nyid du yang mi 'thad/ phan tshun ltos te 'grub par yang mi 'thad do/ /ji ltar me gzhan las kyang mi 'ong bud shing la yang yod pa ma yin pa de bzhin du bdag kyang gzhan las kyang mi 'ong / nye bar blang ba la yang yod pa ma yin no/ /ji ltar bud shing nyid kyang me ma yin/ /bud shing las gzhan la yang me med/me bud shing dang ldan pa yang ma yin / me la bud shing dag yod pa yang ma yin/ bud shing dag la me yod pa yang ma yin pa de bzhin du nye bar blang ba dag kyang bdag ma yin/ nye bar blang ba las gzhan pa yang bdag med/ bdag nye bar blang ba dang ldan pa yang ma yin/ bdag la nye bar blang ba dag yod pa yang ma yin/ nye bar blang ba dag la bdag yod pa'ang ma yin no/ /ji ltar mes bud shing bsregs pa la yang sreg pa med ma bsregs pa la yang med/ bsreg bzhin pa la yang sreg pa med pa dang / ji ltar mes bsreg pa la yang sreg pa'i rtsom pa med ma bsregs pa la yang med/bsreg bzhin pa la yang sreg pa'i rtsom pa med pa dang / ji ltar mes sreg pa po yang sreg par mi byed/ sreg pa po ma yin pa yang mi byed/ sreg pa po yin pa dang / sreg pa po ma yin pa yang sreg par mi byed de/ med pa nyid kyi phyir ro zhes bya ba de bzhin du bdag gis nye bar blang ba la yang nye bar len pa med/nye bar ma blangs pa la yang med/ nye bar len bzhin pa la yang nye bar len pa med cing / de bzhin du bdag gis nye bar blangs pa la yang nye bar len pa'i rtsom pa med/ nye bar ma blangs pa la yang med/ nye bar len bzhin pa la yang nye bar len pa'i rtsom pa med la/de bzhin du bdag gis nye bar len pa po yang nye bar len par mi byed/ nye bar len pa po ma yin pa yang mi byed/ nye bar len pa po yin pa dang / nye bar len pa po ma yin pa yang nye bar len par mi byed de / med pa nyid kyi phyir ro/ /bum snam la sogs pa lhan cig tu zhes bya ba ni/me dang bud shing dag gis bdag dang nye bar blang ba dag gi rim pa gang dag rnam par bshad pa de dag bum pa dang snam bu la sogs pa dag dang yang lhan cig tu rnam par bshad de/ bdag dang nye bar blang ba dag dang bum pa dang / snam bu la sogs pa dag gi rim pa thams cad ma lus par rnam par bshad do zhes bya ba'i tha tshig go//de la bum pa dang snam bu la sogs pa dag ni/ rgyu dang 'bras bur gyur pa dang / yan lag dang / yan lag can du gyur pa dang / yon tan dang / yon tan can du gyur pa dang / mtshan nyid dang / mtshan nyid kyi gzhir gyur pa rnam pa de lta bu dag tu shes par bya'o//'di lta ste/ 'jim pa nyid bum pa ma yin te/ 'jim pas 'bras bu bum pa byed pa med par 'gyur ba'i phyir ro/ /'jim pa las bum pa gzhan nyid kyang ma yin te/ gzhan la ltos pa med pa rtag pa nyid du thal bar 'gyur ba'i phyir ro/ /de dag phan tshun ltos par yang mi 'grub ste/ grub pa dang ma grub pa dag ltos par mi 'thad pa'i phyir ro//lo ma nyid shing ljon pa ma yin te/ lo ma lhags na shing ljon pa 'jig par thal bar 'gyur ba'i phyir ro/ /lo ma las shing ljon pa gzhan nyid kyang ma yin te/ gzhan la ltos pa med pa rtag pa nyid du thal bar 'gyur ba'i phyir ro/ /de dag la phan tshun ltos par yang mi 'grub ste/grub pa dang ma grub pa dag ltos par mi 'thad pa'i phyir ro/ /sngon po nyid lo ma ma yin te/ sngon po yal na lo ma yin par thal bar 'gyur ba'i phyir ro/ /sngon po las lo ma gzhan nyid kyang ma yin te/ lo ma lhags kyang sngon po gnas par thal bar 'gyur ba'i phyir ro//de dag phan tshun ltos par yang mi 'grub ste/ grub pa dang ma grub pa dag ltos par yang mi 'thad pa'i phyir ro/ /mtshan nyid mtshan nyid kyi gzhi ma yin te/ sgrub pa dang bsgrub par bya ba tha dad pa'i phyir dang / grangs tha dad pa'i phyir ro/ /mtshan nyid las mtshan nyid kyi gzhi gzhan nyid kyang ma yin te/dngos po mtshon par bya ba ma yin pa rab tu mi 'grub pa'i phyir ro/ /de dag phan tshun ltos par yang mi 'grub ste/ grub pa dang ma grub pa dag ltos par mi 'thad pa'i phyir ro/ /ji ltar me gzhan las mi 'ong ba dang / bud shing yang me yod pa ma yin pa dang / bud shing nyid me ma yin pa dang /bud shing las gzhan la yang me med pa dang / me bud shing dang ldan pa yang ma yin pa dang / me la bud shing dag med pa dang / bud shing dag la me med par bstan pa de bzhin du 'bras bu yang gzhan las mi 'ong ba dang / rgyu la yang 'bras bu yod pa ma yin pa dang / rgyu nyid 'bras bu ma yin pa dang /rgyu las gzhan la yang 'bras bu med pa dang / 'bras bu rgyu dang ldan pa ma yin pa dang / 'bras bu la rgyu dag med pa dang / rgyu dag la 'bras bu med pa'o/ /de bzhin du thams cad la yang ji ltar ji srid pa bzhin du sbyar bar bya'o/ /de'i phyir de ltar ngo bo nyid kyis bdag dang dngos po rnams rnam pa du mar mi 'thad pa na rtog pa'i rang bzhin can ma yin pa mkhas pa'i nga rgyal can/gang dag bdag dang dngos po rnams/ /de bcas nyid dang tha dad par/ /ston pa de dag bstan don la/ /mkhas so snyam du mi sems so/ /gang dag pa de dang bcas pa nyid dang tha dad pa dang / dngos po rnams de dang bcas pa nyid dang /tha dad par ston pa de dag bstan pa'i don la mkhas pa yin par kho bo mi sems so/ /de bcas zhes bya ba ni de dang bcas pa'o/ /de dang bcas pa'i dngos po ni de dang bcas pa nyid do/ /bdag de dang bcas pa'i dngos po ni bdag de dang bcas pa nyid do/ /dngos po rnams de dang bcas pa'i dngos po yang dngos po rnams de dang bcas pa nyid do //gang gis bdag gam dngos po rnams su gdags pa de dang bcas pa nyid de ni bdag nyid dam dngos po rnams yin te/ tha dad par gyur pa ma yin zhes bya ba'i tha tshig go/ /'di lta ste nye bar blang ba gang gis bdag tu gdags pa'i nye bar blang ba de nyid dang bcas pa de ni bdag nyid yin gyi/'ba' zhig ni ma yin te/ gang dag bdag nye bar blang ba dang bcas pa'i dngos po de de dang bcas pa nyid du ston par byed pa dang / gang dag bdag tha dad par gyur pa lta ba la sogs pa dag gi snga rol na dngos po 'ga' zhig gnas pa yod do zhes ston par byed pa dang /de bzhin du dngos po rnams la yang bud shing gang gis mer gdags pa'i bud shing de nyid dang bcas pa de ni me nyid yin gyi/ 'ba' zhig ni ma yin te/ gang dag me bud shing dang bcas pa'i dngos po de de dang bcas pa nyid du ston par byed pa dang / de bzhin du gang dag yon tan can lo ma yang yon tan sngon po la sogs pa de dag dang bcas pa nyid na lo ma yin gyi/'ba' zhig ni ma yin no zhes ston par byed pa dang / de bzhin du gang dag 'bras bu snam bu yang rgyu spun de dag dang bcas pa nyid na 'bras bu yin gyi/ 'ba' zhig ni ma yin no zhes ston par byed pa dang /de bzhin du gang dag yan lag can lus kyang yan lag lag pa la sogs pa de dag dang bcas pa nyid na yan lag can yin gyi 'ba' zhig ni ma yin no zhes ston par byed pa dang / de bzhin du gang dag mtshan nyid kyi gzhi ba lang yang mtshan nyid rwa la sogs pa de dag dang bcas pa nyid na mtshan nyid kyi gzhi yin gyi/'ba' zhig ni ma yin no zhes ston par byed pa dang / gang dag dngos po rnams tha dad pa nyid du ston te/ me yang gzhan nyid la bud shing yang gzhan nyid yin/ yon tan can lo ma yang gzhan nyid la yon tan sngon po la sogs pa dag kyang gzhan nyid yin/ 'bras bu snam bu yang gzhan nyid la rgyu spun dag kyang gzhan nyid yin/yan lag can lus kyang gzhan nyid la yan lag lag pa la sogs pa dag kyang gzhan nyid yin/ mtshan nyid kyi gzhi ba lang yang gzhan nyid la mtshan nyid rwa la sogs pa dag kyang gzhan nyid yin no zhes ston par byed pa de dag ni bstan pa'i don la mkhas pa yin no snyam du kho bo mi sems so//ci'i phyir zhe na/ de dang bcas pa'i dngos po ni de dang bcas pa nyid do zhes bya ba gang yin pa de yang gcig pa nyid dam gzhan nyid dang bcas pa'i dngos po zhig yin grang na/ gnyi ga ltar yang mi 'thad de tshigs su bcad pa gong mar bstan zin pa'i phyir dang /'dod chags dang chags pa brtag pa'i rab tu byed par yang gcig na lhan cig yod min te zhes rgyas par bstan pas lhan cig nyid dgag pa grub pa'i phyir ro/ /me dang bud shing brtag pa zhes bya ba ste rab tu byed pa bcu pa'o// //smras pa/ bdag ni yod pa kho na yin no/ / ci'i phyir zhe na/ 'khor ba yod pa'i phyir te/ 'di la bcom ldan 'das kyis/ dam chos rnam par mi shes pa'i/ /byis pa la ni 'khor ba ring / /zhes gsungs so/ /de bzhin du dge slong dag de lta bas na khyod kyis 'khor ba zad par bya ba'i phyir nan tan bya zhing de ltar bslab par bya'o zhes kyang bka' stsal to//de'i phyir/ gang ring bar bstan pa dang / gang zad par bya ba'i phyir nan tan bya ba bstan pa'i 'khor ba de yod do/ /med du zin kyang ji lta ring ba dang zad par 'gyur/ de lta bas na/ ring ba dang zad par gsungs pas 'khor ba yod do/ /'khor ba na yod na 'khor ba po yang yod par mngon no//ci'i phyir zhe na/ 'ongs shing 'ongs shing yang dang yang der 'gro bas na/ 'khor ba zhes bya ba'i phyir te/ gang 'ongs shing 'ongs shing 'gro ba de ni bdag yin no/ /de'i phyir bdag ni yod pa kho na yin no/ /bshad pa/ ci khyod kyis sbrang rtsi mthong la g.yang sa ma mthong ngam/khyod kyis 'khor ba ring ba dang zad par gsungs pa mthong la/ gang gi phyir bcom ldan 'das kyis bka' stsal pa/ gzhan 'di ma mthong go/ /sngon mtha' mngon nam zhes zhus tshe/ /thub pa chen pos min zhes gsungs/ /'khor ba thog ma tha med de/ /de la sngon med phyi ma med/ / bcom ldan 'das thams cad mkhyen pa/thams cad gzigs pa/ thub pa chen pos dge slong dag 'khor ba la thog ma dang tha ma med do / /sngon gyi mtha' mi mngon no zhes bka' stsal pas de'i phyir thog ma dang tha ma med par gsungs pas bcom ldan 'das kyis 'khor ba yang ngo bo nyid stong par bstan to/ /'di ltar gal te 'khor ba pa zhes bya ba dngos po 'ga' zhig yod par gyur pa na de la thog ma yang yod/tha ma yang yod par 'gyur bar the tshom med do / /'di ltar dngos po yod pa la thog ma med pa dang tha ma med par ji ltar 'gyur/ de lta bas na 'jig rten gyi tha snyad kyi dbang gis 'khor ba ring ba dang / zad par gsungs kyi bcom ldan 'das kyis don dam pa bstan pa'i dbang gis ni/de la sngon med phyi ma med/ /ces gsungs so/ /de lta bas na thog ma dang tha ma med par gsungs pas 'khor ba zhes bya ba dngos po 'ga' yang mi 'thad do/ /de med na 'khor ba po ji lta bu zhig 'thad par 'gyur/ smras pa/ de ltar 'khor ba'i thog ma dang tha ma bkag tu zin kyang /dbus ma bkag pas de yod pa'i 'khor ba yod pa kho na ste/ 'di ltar dngos po med pa la dbus yod par ji ltar 'gyur/ de lta bas na dbus yod pa'i phyir 'khor ba yod pa kho na'o/ /'khor ba yod pa'i phyir 'khor ba po yang yod pa kho na'o/ /bshad pa/ gal te dbus nyid yod par gyur na ni dbus yod pa'i phyir 'khor ba yang yod par 'gyur grang na/ de'i dbus nyid mi 'thad pas de yod pa'i phyir 'khor ba yod par ga la 'gyur/ gang la thog med tha med pa/ /de la dbus ni ga la yod/ /gang la thog ma dang tha ma med pa de la dbus yod par ji ltar 'gyur/'di ltar thog ma dang tha ma la ltos nas dbus 'grub par 'gyur ba yin na/ de la thog ma dang tha ma de yang med de/ de med pa'i phyir de'i dbus yod par ga la 'gyur/ slob dpon 'phags pa lhas kyang / thog ma dbus dang tha ma med / /skye ba'i snga rol mi srid de/ /gnyis gnyis dag ni ma gtogs par//re res rtsom par ji ltar 'gyur/ /zhes gsungs so/ /de phyir de la snga phyi dang / /lhan cig rim pa mi 'thad do/ /de'i phyir de la snga phyi dang lhan cig gi go rims dag mi srid do/ /de ltar gang gi phyir 'khor ba la thog ma dang dbus dang tha ma dag med pa de'i phyir 'dir 'khor ba po'i skye ba dang rga shi dag la yang snga phyi lhan cig gi rim pa dag med do//de dag ji ltar zhe na/ gal te skye ba sngar gyur pa/ /rga shi 'phyi ba yin na ni/ /skye ba rga shi med pa dang / /ma shi bar yang skye bar 'gyur/ /gal te skye ba snga bar gyur la/ de'i 'og tu phyis rga shi dag la yang snga phyi 'byung ba yin na de lta na skye ba de la rga shi med par 'gyur ro//de la rga shi med par gyur na phyis rga shi ga las 'ong bar 'gyur/ ci ste 'ong na ni rga shi gzhi med par thal bar 'gyur ro/ /de dang phrad du zin na yang de la cir yang mi 'gyur te/ ngo bo nyid kyis rga shi med pa'i phyir ro/ /yang gzhan yang / ma shi ba yang skye bar 'gyur te/'di ltar skye ba snga bar brtags na de sngar gzhan du ma shi bar 'dir skye bar thal bar 'gyur ro/ /de lta na 'khor ba thog ma dang ldan par 'gyur te/ de yang mi 'dod pas de'i phyir skye ba snga la rga shi 'phyi bar mi 'thad do/ /ci ste skyon de gyur na mi rung ngo snyam pas rga shi snga ma kho na yin la/ skye ba 'phyi'o zhe na/de la bshad par bya ste/ gal te skye ba 'phyi gyur la/ /rga shi snga ba yin na ni/ /skye ba med pa'i rga shi ni/ /rgyu med par ni ji ltar 'gyur/ /gal te de'i rga shi snga bar gyur la/ skye ba 'phyi bar gyur na de lta na gzhi med pa'i rga shi rgyu med par thal bar 'gyur bas de yang mi 'dod do/ / 'di ltar ma skyes shing med pa'i rga shi gzhi med cing rgyu med par ji ltar 'byung bar 'gyur/ skyes shing yod pa la rga shi bstan par rigs so/ /de lta bas na skye ba 'phyi la rga shi snga bar yang mi 'thad do/ /smras pa/ de dag la snga phyi med de/ de ni rga shi dang rjes su 'brel bzhin pa kho nar skye'o//bshad pa/ skye ba dang ni rga shi dag /lhan cig rung ba ma yin no/ /skye ba dang rga shi dag lhan cig nyid du 'gyur bar mi 'thad do/ /ci ste 'gyur na ni/ skye bzhin pa na 'chi 'gyur zhing / /gnyi ga rgyu med can du 'gyur/ /gal te skye ba dang rga shi dag lhan cig nyid du gyur na de lta na skye bzhin pa nyid na/'chi bar 'gyur bas de yang mi 'thad de/ 'di ltar skye ba dang 'gag pa mi mthun pa gnyis gnyis gcig la dus gcig tu ji ltar 'byung bar 'gyur/ yang gzhan yang / gnyi ga rgyu med pa can du 'gyur te/ gal te skye ba dang rga shi dag lhan cig nyid du 'byung bar gyur na de'i skye ba 'chi ba sngon du 'gro ba ma yin cing /de'i skye ba snga bar thal bar 'gyur ro/ /skye ba snga bar gyur na rgyu med pa can du thal bar 'gyur te/ slob dpon 'phags pa 'jigs med kyis kyang / gal te las la lus skye la/ /lus ma gtogs par las med na/ /sngon lus las las ma skyes pa/ /gang gi rgyus ni skyes par gyur//zhes gsungs so/ /de ltar lhan cig tu skye na de'i rga shi skye ba la mi ltos par rang las rab tu grub pa dang / rga shi gzhi med pa dang / rgyu med pa can du thal bar 'gyur bas de yang mi 'dod de/ skyon du mar thal bar 'gyur ba'i phyir ro/ /de lta bas na/ skye ba dang rga shi dag lhan cig tu yang mi 'thad do//de'i phyir de ltar 'dir khyod kyis brtags pa'i 'khor ba la skye ba dang rga shi dag gi snga phyi dang lhan cig gi rim pa dag ni srid de/ de med na skye ba dang rga shi med pa'i bdag ces bya ba gang yang 'khor bar 'gyur ba de gang yin/ smras pa/ de dag la snga phyi dang lhan cig gi rim pa dag yod kyang rung med kyang rung ste/yod na skye ba dang rga shi dag ni re zhig yod do/ /de dag kyang gzhi med pa ma yin pas 'ga' zhig kho na'i yin te/ 'ga' zhig yod pa nyid de ni bdag yin pas bdag ni yod pa kho na'o/ /bshad pa/ gang la snga phyi lhan cig gi /rim pa de dag mi srid pa'i/ /skye ba de dang rga shi de//ci yi phyir na spros par byed/ /de ltar rigs pa sngon du btang ste brtags na skye ba gang dang rga shi gang la snga phyi dang lhan cig gi rim pa dag mi srid cing med pa de la khyod skye ba ni de yin rga shi ni de yin zhes ci'i phyir spros par byed cing rjod par byed/ gal te skye ba'am/ rga shi 'ga' zhig yod par gyur na de snga ba'am/'phyi ba'am/ lhan cig tu 'byung bar nges na/ skye ba dang rga shi yod do zhes bya ba de dag la snga phyi dang lhan cig gi rim pa dag med pa rang bzhin du gnas pa su zhig de skad rjod par byed/ sems pa dang bcas pa su zhig 'dzin par byed/ de lta bas na skye ba dang rga shi dag mi 'thad do//de med na bdag yod par ji ltar 'thad par 'gyur de'i phyir bdag tu smra bar rigs pa dang 'gal ba de thong shig / /rgyu dang 'bras bu nyid dang ni/ /mtshan nyid dang ni mtshan gzhi nyid/ /tshor dang tshor po nyid dang ni/ /don yod gang dag ci yang rung / /ji ltar brtags na skye ba dang / /rga shi dag gi snga phyi dang lhan cig gi rim pa dag mi 'thad pa de bzhin du rgyu dang 'bras bu dang mtshan nyid dang /mtshan nyid kyi gzhi dang / tshor ba dang / tshor ba po dang / don gzhan gang dag ci yang rung ba rnam par grol ba dang / mya ngan las 'das pa dang / shes pa dang / shes bya dang / tshad ma dang / gzhal bya la sogs pa yod par brtags pa de dag thams cad la yang snga phyi dang lhan cig gi rim pa dag mi 'thad do/ /ji ltar zhe na/ re zhig gal te 'bras bu snga bar gyur la/ rgyu 'phyi bar gyur na de lta na 'bras bu rgyu med pa can du 'gyur ro/ /'bras bu yod na yang rgyus ci bya ste rgyur brtags pa don med pa nyid du yang thal bar 'gyur ro//ci ste rgyu snga bar gyur la 'bras bu 'phyi bar gyur na yang rgyu 'bras bu med pa can du 'gyur bas de yang mi 'thad de/ 'di ltar 'bras bu med na ji ltar rgyur 'gyur/ ci ste 'gyur na ni de lta na rgyu ma yin par gang yang mi 'gyur ro/ /ci ste rgyu dang 'bras bu dag lhan cig tu gyur na de lta na yang skyon de nyid de/gnyi ga rgyu med pa can du 'gyur ba dang / 'bras bu la mi ltos pa kho nar rang las rab tu grub par 'gyur bas de yang mi 'thad do/ /de bzhin du gal te mtshan nyid snga bar gyur la/ mtshan nyid kyi gzhi 'phyi bar gyur na de lta na yang mtshan nyid kyi gzhi ma skyes na de gang gi mtshan nyid du 'gyur/'dis mtshon par byed pas mtshan nyid ces bya na/ 'dis gang mtshon par bya ba'i mtshan nyid kyi gzhi de yang ma skyes pas med de/ de med na mtshon par mi byed pa de ci ltar mtshan nyid du 'gyur/ ci ste yang mtshan nyid kyi gzhi snga bar gyur la mtshan nyid 'phyi bar gyur na de lta na yang mtshan nyid kyi gzhi mtshan nyid med pa can du thal bar 'gyur bas de yang mi 'thad de/'di ltar mtshan nyid med pa'i dngos po ji ltar yod par 'gyur/ ci ste 'gyur na ni ri bong gi rwa la sogs pa yang yod par 'gyur ro/ /mtshan nyid du brtag pa don med pa nyid du yang 'gyur te/mtshan nyid kyi gzhi rab tu sgrub pa'i phyir mtshan nyid du 'dod pa yin na de gal te mtshan nyid de med pa nyid du yang mtshan nyid kyi gzhi grub na de la yang mtshan nyid kyis ci bya/ ci ste yang mtshan nyid dang mtshan nyid kyi gzhi dag lhan cig tu gyur na/ de lta na yang skyon de nyid de gnyi ga rgyu med pa can nyid du 'gyur ba dang /mtshan nyid kyi gzhi yang mtshan nyid la mi ltos pa kho nar rang las rab tu grub par 'gyur bas de yang mi 'thad do/ /de bzhin du gal te tshor ba po snga bar gyur la tshor ba 'phyi bar gyur na/ de lta na yang tshor ba med cing ma skyes na de gang gi tshor ba por 'gyur/tshor bar byed pa na tshor ba po yin na tshor ba de nyid ni ma skyes te/ de med na des ci zhig tshor bar byed pa / tshor bar mi byed na ni ji ltar tshor ba por 'gyur/ ci ste 'gyur na ni thams cad kyang bde ba dang sdug bsngal thams cad dang ma phrad par tshor ba por 'gyur bas de yang mi 'thad do//ci ste yang tshor ba snga bar gyur la tshor ba po 'phyi bar gyur na de lta na yang tshor bar mi byed bzhin du tshor bar 'gyur bas de yang mi 'thad de/ 'di ltar tshor bar mi byed pa ji ltar tshor bar 'gyur/ ci ste 'gyur na ni gang yang gang gi tshe gang du yang tshor ba dang bral bar mi 'gyur bas de yang mi 'dod do//ci ste yang tshor ba dang tshor ba po dag lhan cig nyid du rtog na/ de lta na yang skyon de nyid de gnyi ga rgyu med pa can du 'gyur ba dang / tshor ba po tshor ba la mi ltos pa kho na tshor bar mi byed bzhin du rang las rab tu grub par 'gyur ba dang / tshor ba yang tshor ba po la mi ltos pa kho na sus kyang tshor bar mi byed bzhin du rang las rab tu grub par 'gyur bas de yang mi 'thad do//de bzhin du gal te rnam par grol bas de yang mi 'thad mya ngan las 'das pa snga bar gyur na kun nas nyon mongs pa dang bcas pa yang mya ngan las 'das par 'gyur te/ de lta na su yang mya ngan las ma 'das par mi 'gyur bas de yang mi 'thad do //ci ste rnam par grol bas mya ngan las 'das pa 'phyi bar gyur na ni mya ngan las 'das pa ma thob pa nyid du yang rnam par grol bar 'gyur te/ de lta na yang mya ngan las 'das pa ma thob pa thams cad rnam par grol bar 'gyur zhing / rnam par grol nas phyis mya ngan las 'da' ba don med pa nyid du yang 'gyur ro//mya ngan las 'das pa ni ma skyes pa ma byung ba zhes bya na/ sngon ma byung la phyis byung bar gyur na skye ba can dang mtshungs par yang 'gyur bas de yang mi 'dod do/ /ci ste yang rnam par grol ba dang / mya ngan las 'das pa gnyis lhan cig nyid du yang gyur na de lta na yang skyon de nyid de gnyi ga rgyu med pa can nyid du 'gyur ba dang /rnam par grol ba mya ngan las 'das pa la mi ltos pa kho nar rang las rab tu grub par 'gyur ba dang / mya ngan las 'das pa yang rnam par grol ba la mi ltos pa kho nar rang las rab tu grub par 'gyur bas de yang mi 'thad do/ /de bzhin du shes pa dang / shes bya dang / tshad ma dang / gzhal bya la sogs pa dag la yang blta bar bya'o/ /'khor ba 'ba' zhig sngon gyi mtha'/ /yod ma yin par ma zad kyi/ /dngos rnams thams cad nyid la yang / /sngon gyi mtha' ni yod ma yin/ /gang gi phyir de ltar yang dag pa ji lta ba bzhin du brtags na dngos po thams cad la snga phyi dang /lhan cig gi rim pa dag mi 'thad pa de'i phyir 'khor ba 'ba' zhig la sngon gyi mtha' yod pa ma yin par ma zad kyi/ dngos por 'dod pa thams cad la yang sngon gyi mtha' yod pa ma yin pas dngos por snang ba ni sgyu ma dang / smig rgyu dang / dri za'i grong khyer dang /gzugs brnyan bzhin du grub bo/ /'khor ba brtag pa zhes bya ba ste rab tu byed pa bcu gcig pa'o// //dbu ma'i rtsa ba'i 'grel pa bud d+ha pA li ta / bam po lnga pa/ smras pa/ bdag ni yod pa kho na yin te/ ci'i phyir zhe na/ sdug bsngal yod pa'i phyir ro/ / 'di na lus dang dbang po 'byung ba ni sdug bsngal yin no zhes bya bar thams cad kyis shes la/ bcom ldan 'das kyis kyang / mdor na nye bar len pa'i phung po lnga sdug bsngal lo zhes gsungs pas de'i phyir sdug bsngal yod do/ /gzhi med par sdug bsngal yod par mi rigs pas sdug bsngal de dag gi yin pa de 'ga' zhig kyang yod de/sdug bsngal de dag gi yin pa de ni bdag yin pas de'i phyir bdag ni yod pa kho na yin no/ /bshad pa/ gal te sdug bsngal nyid 'thad na ni bdag kyang yod pa zhig na/ sdug bsngal nyid mi 'thad pas bdag yod par ga la 'gyur/ji ltar zhe na/ kha cig sdug bsngal bdag gis byas/ /gzhan gyis byas dang gnyi gas byas/ /rgyu med pa las byung bar 'dod/ /de ni bya bar mi rung ngo / /'di la sdug bsngal du smra ba rnams la kha cig ni sdug bsngal bdag gis byas par 'dod/ /kha cig ni sdug bsngal gzhan gyis byas par 'dod//kha cig ni sdug bsngal bdag dang gzhan gyis byas par 'dod / /kha cig ni sdug bsngal rgyu med pa las glo bur kho nar byung bar 'dod do/ /de ltar sdug bsngal bdag dang / gzhan dang / gnyi gas byas par smra ba rnams kyi sdug bsngal de ni bdag dang / gzhan dang / gnyi gas byas pa'i phyir bdag dang gzhan dang gnyi ga'i bya ba yin par thal bar 'gyur te/de ni bya bar mi rung ngo / /sdug bsngal de ni de dag gi bya ba yin par mi rigs so/ /ci'i phyir zhe na/ gal te sdug bsngal bdag nyid kyis byed par gyur na yod pa'am/ med pa zhig byed par 'gyur grang na/ de la re zhig gal te sdug bsngal yod pa bdag nyid kyis byed do zhes rtog na/de ni mi rigs te/ 'di ltar sdug bsngal yod pa yang ci bya dgos/ ci ste byed na ni yod pa ma yin no/ /sdug bsngal yod pa bdag nyid kyis byed pa gang yin pa de ni rgyu med pa las byung bar 'gyur ba'am/ de yang bdag nyid kyis byas na/de lta na thug pa med par thal bar 'gyur bas de ni mi 'dod do/ /ci ste sdug bsngal med pa bdag nyid kyis byed do zhes bya bar rtog na/ ji ltar med pa bdag nyid kyis bdag nyid byed par 'gyur/ ci ste byed na ni ri bong gi rwas kyang bdag nyid byed par 'gyur ro/ / de ltar re zhig sdug bsngal bdag gis byas par mi rigs so/ /sdug bsngal ma byas shing med pa la gzhan yod par ga la 'gyur te/ gzhan med pa kho na'i phyir sdug bsngal gzhan gyis byas par mi rigs so/ /'di nyid kyis bdag dang gzhan gyis byas par mi rigs pa kho nar yang rnam par bshad pa yin no//yang gzhan yang / gal te bdag gis byas gyur na/ /de phyir brten nas 'byung mi 'gyur/ /gang phyir phung po 'di dag la/ /brten nas phung po de dag 'byung / /gal te sdug bsngal bdag gis byas par gyur na de lta na brten nas 'byung bar mi 'gyur ba zhig na/brten nas kyang 'byung ste/ gang gi phyir da ltar gyi phung po 'di dag la brten nas ma 'ongs pa'i phung po de dag 'byung bar 'gyur te/ bcom ldan 'das kyis kyang rnam par shes pa'i rkyen gyis ming dang gzugs zhes gsungs te/ sdug bsngal bdag gis byas par gyur na sdug bsngal rgyu dang rkyen gyi dbang gis 'byung bar mi 'gyur bas de'i phyir sdug bsngal bdag gis byas par mi rigs so//smras pa/ de de bzhin te sdug bsngal bdag gis ma byas te/ 'di ltar sdug bsngal gzhan gyis byas so/ /ji ltar zhe na/ gang gi phyir phung po gzhan du gyur pa 'di dag la brten nas phung po de dag 'byung ba'i phyir ro//bshad pa/ sdug bsngal gzhan gyis byas pa ma yin pa nyid de/ ci'i phyir zhe na/ gal te de las 'di gzhan zhing / /gal te 'di las de gzhan na/ /gzhan de dag gis 'di byas pas/ /sdug bsngal gzhan gyis byas par 'gyur/ /gal te ma 'ongs pa'i phung po de dag las da ltar gyi phung po gang dag yin pa 'di dag gzhan yin par gyur cing da ltar gyi phung po 'di las kyang ma 'ongs pa'i phung po gang dag yin pa de dag gzhan yin par gyur na ni de lta na da ltar gyi phung po gzhan de dag gis ma 'ongs pa'i phung po gzhan 'di dag byas pas sdug bsngal gzhan gyis byas par yang 'gyur ba zhig na/de dag las kyang 'di dag gzhan ma yin la/ 'di dag las kyang de dag gzhan ma yin no/ /gzhan nyid med na ji ltar sdug bsngal gzhan gyis byas pas 'thad/ de la 'di snyam du ji ltar de dag gzhan nyid ma yin snyam na de ni 'og nas/ gang la brten te gang yin pa//de ni de las gzhan mi 'thad/ /ces 'byung bas de'i phyir sdug bsngal gzhan gyis byas par yang mi 'thad do/ /smras pa/ sdug bsngal nyid kyis sdug bsngal byas pas de'i phyir sdug bsngal bdag gis byas so zhes kyang mi smra'i / sdug bsngal rgyu dang rkyen las byung bas de'i phyir sdug bsngal gzhan gyis byas so zhes kyang mi smra'o //sdug bsngal gang zag bdag gis byas pas de'i phyir re zhig sdug bsngal bdag gis byas so zhes kyang smra la/ sdug bsngal gang zag bdag gis byas pas de'i phyir/ re zhig sdug bsngal bdag gis byas so zhes kyang smra la /sdug bsngal gang zag gzhan gyis byas pas de'i phyir sdug bsngal gzhan gyis byas so zhes kyang smra'o/ /bshad pa/ gal te gang zag bdag gis ni/ /sdug bsngal byas na gang bdag gis/ /sdug bsngal byas pa'i gang zag ni/ /sdug bsngal med pa de dag yin/ /gal te gang zag bdag gis phung po sdug bsngal byas so zhes zer na/khyod kyi gang phung po sdug bsngal med pa gsal bar byed pa med pas bdag gis phung po sdug bsngal de byas pa'i gang zag sdug bsngal med pa de gang yin pa de ji smros shig /'di ltar phung po sdug bsngal med pa gsal bar byed pa med pa'i gang zag 'ba' zhig pa gang yin pa la gdags pa yang med na des ji ltar sdug bsngal byed par 'gyur te/de'i phyir gang zag bdag gis sdug bsngal byas zhes bya ba yang mi rigs so/ /gang zag gzhan gyis sdug bsngal byas so zhes gang smras pa de la'ang bshad par bya ste/gal te gang zag gzhan las ni/ /sdug bsngal byung na gzhan zhig gis/ /sdug bsngal de byas gang sbyin de / /sdug bsngal med par ji ltar rung / /gal te gang zag gzhan gyis phung po 'di sdug bsngal byas shing des de byas nas gzhan la sbyin par byed na gzhan gyis de byas nas gang la sbyin par bya ba de sdug bsngal med cing /sdug bsngal dang bral ba gsal bar byed pa med pa 'ba' zhig par ji ltar rung bar 'gyur ba de ji smros shig /'di ltar nye bar len pa med pa 'ba' zhig pa gang la gdags pa yang med na gsal bar byed pa med de gzhan yin du zin kyang ji ltar sdug bsngal byed par 'gyur/nye bar len pa med pa 'ba' zhig pa de ni/ rnam pa thams cad du mi srid pa yin na de'i sdug bsngal byed pa gzhan ga la yod na sdug bsngal gzhan gyis byas so zhes bag tsha ba med par smra/ yang gzhan yang / bdag gis byas par ma grub pas/ /sdug bsngal gzhan gyis ga la byas//'di la gal te sdug bsngal bdag gis byas so zhes bya ba de rab tu grub par gyur na ni des na sdug bsngal gzhan gyis byas so zhes bya ba de yang 'thad par 'gyur ba zhig na/ sdug bsngal bdag gis byas so zhes bya ba de ni rab tu ma grub ste/ de sdug bsngal bdag gis byas pas rab tu ma grub pas sdug bsngal gzhan gyis byas par ga la 'gyur/ci'i phyir zhe na/ gzhan gyis sdug bsngal gang byed pa/ /de ni de yi bdag byas 'gyur/ /gal te gzhan gyis sdug bsngal gang byed pa de gzhan de'i bdag gis byas pa nyid du gyur na gzhan gyis byas pa ma yin no/ / ci ste de des bdag gis byas pa ma yin na ji ltar/ cig shos kyi de gzhan gyis byas par 'gyur/ de'i phyir bdag gis byas pa de gzhan gyi thal bar 'gyur te/ sdug bsngal gzhan gyis byas par mi 'thad pa de ni bstan zin to/ /de'i phyir sdug bsngal bdag gis byas par rab tu ma grub pas sdug bsngal bdag gis byas pa med na sdug bsngal gzhan gyis byas par ga la 'gyur bas sdug bsngal gang gzhan gyis byas par 'gyur ba gang yin/de'i phyir gang zag gzhan gyis sdug bsngal byas so zhes bya bar yang mi rigs so/ /smras pa/ ci khyod smra ba po'i bsam pa ma rtogs par rang gi blo gros kyi rtogs pas sbyar ba'i don la tshig gis skyon 'dogs par byed dam/'di ltar kho bo ni sdug bsngal bdag gis byas so zhe'am/ gzhan gyis byas so zhes mi smra'i/ 'di ltar gang gi phyir re zhig gang zag bdag gis de byas pas de'i phyir gang zag bdag gis byas so zhes smra ste /sdug bsngal de las gang zag da gzhan ma yin pas sdug bsngal gyis sdug bsngal de byas pa'i phyir rnam grangs las sdug bsngal bdag gis byas so zhes kyang smra zhing / sdug bsngal gang yin pa de nyid gang zag ma yin pas rnam grangs las sdug bsngal gzhan gyis byas so zhes kyang smra'o//bshad pa/ ci khyod shing ljon pa rtsa ba rul ba la chu ldugs par byed dam/ khyod gang zag nye bar len pa med pa 'ba' zhig pa rnam pa thams cad du mi 'thad pa la sdug bsngal gang zag bdag gis byas so smra'am/ 'di ltar gal te gang zag nye bar len pa med pa 'ba' zhig pa 'ga' zhig rab tu grub par gyur na ni/des na sdug bsngal gang zag bdag gis byas so zhes de skad smra bar yang rigs par 'gyur ba zhig na/ gang zag nye bar len pa med pa 'ba' zhig pa ni ji ltar yang mi rigs so/ /de med na/ re zhig sdug bsngal bdag byas min//gang zag nye bar len pa med pa 'ba' zhig pa de med na sdug bsngal bdag gis byas pa ma yin pas re zhig sdug bsngal gang zag bdag gis ma byas so/ /sdug bsngal de las gang zag de gzhan ma yin pas sdug bsngal gyis sdug bsngal de byas pa'i phyir rnam grangs las sdug bsngal bdag gis byas so zhes kyang smra'o zhes gang smras pa de la bshad par bya ste/de nyid kyis ni de ma byas/ /de lta na sdug bsngal de nyid kyis sdug bsngal de ma byas so/ /ci'i phyir zhe na/ 'di ltar zin pa'i sdug bsngal las de gzhan ma yin par brjod pa'i phyir te/nye bar len pa las gzhan ma yin par gyur pa 'dis ci yang ma byas te/ des nye bar len pa'i sdug bsngal de nyid byas grang na/ gang gi phyir byas pa las de gzhan ma yin no zhes bya ba de'i phyir gang zag nye bar len pa med pa 'ba' zhig pa des ni ma byas pas de'i phyir sdug bsngal de nyid kyis sdug bsngal de byas so zhes gang smras pa de rigs pa ma yin no//sdug bsngal gang yin pa de nyid gang zag ma yin pas rnam grangs las sdug bsngal gzhan gyis byas so zhes gang smras pa de la yang bshad par bya ste/ gal te gzhan bdag ma byas na/ /sdug bsngal gzhan byas ga la 'gyur//gal te gang zag de bdag nyid kyis ma byas shing bdag nyid rab tu ma grub ste / sdug bsngal med pa 'ba' zhig pa yod pa nyid ma yin na rang gi bdag nyid rab tu ma grub pa gzhan du gyur pa de med pas sdug bsngal de gzhan gyis byas par ga la 'gyur/ nye bar len pa de ma skyes shing /med na gang zag de yod du zin kyang gzhan du ga la 'gyur/ de lta bas na de dag thams cad sngar lan btab zin pa la khyod tshig gzhan gyis don gzhan du bsams shing de dag nyid yang smras par gyur to/ /smras pa/ sdug bsngal bdag dang gzhan so so byas par mi rigs su zin kyang /sdug bsngal bdag dang gzhan nyid gnyi ga 'dus pas byas pa ni yod do/ /bshad pa/ gal te re res byas gyur na/ /sdug bsngal gnyi gas byas par 'gyur/ /gal te re res byas pa yod par gyur na ni sdug bsngal gnyi gas byas pa de nyid kyang yod par 'gyur ba zhig na/ sdug bsngal re res byas par mi rigs pa de ni bstan zin te/sdug bsngal re res byas pa med na sdug bsngal gnyi gas byas pas 'thad par ji ltar 'gyur/ gang gi tshe bdag dang gzhan gnyi ga sdug bsngal med pa 'ba' zhig par mi srid pa de'i tshe ji ltar de nyid kyis sdug bsngal byed par 'gyur te/ de'i phyir bdag dang gzhan gnyi gas sdug bsngal byas so zhes bya ba yang mi 'thad do/ /smras pa/ gal te sdug bsngal re res kyang ma byas la gnyi gas byas par yang mi rigs na/ 'o na de lta na sdug bsngal bdag dang gzhan dang gnyi gas ma byas pas rgyu med pa las byung ba yin no/ /bshad pa/ gzhan gyis ma byas bdag ma byas/ /sdug bsngal rgyu med ga la 'gyur/ /gzhan gyis byas pa ni gzhan gyis de byas pa ste/ gzhan gyis de byed ces bya ba'i tha tshig go/ /gzhan gyis ma byas pa ni gzhan gyis mi byed pa'o/ /bdag gis byas pa ni bdag gis de byas pa ste bdag gis de byed ces bya ba'i tha tshig go//bdag gis ma byas pa ni bdag gis mi byed pa'o/ /gzhan gyis ma byas pa dang bdag gis ma byas pa ni gzhan gyis mi byed pa dang bdag gis mi byed pa'o/ /de ltar gzhan gyis kyang ma byas na sdug bsngal glo bur bar 'thad par ga la 'gyur/ ci ste 'gyur na ni rtag tu thams cad 'byung bar 'gyur ro//de lta yin na ni rtsom pa thams cad don med pa nyid dang / 'dres pa'i skyon chen por yang 'gyur bas de ni mi 'dod do/ /de bas na sdug bsngal rgyu med pa las byung ba zhes bya ba de ni bzang po ma yin pa nyid do/ /smras pa/ gal te de ltar sdug bsngal med na/bcom ldan 'das kyis 'od srungs sdug bsngal yod de/ ngas sdug bsngal shes so/ /mthong ngo zhes gsungs pa ji lta bu/ bshad pa/ sdug bsngal med do zhes de skad du ma zer/ kho bos/ de phyir brten nas 'byung mi 'gyur/ /zhes ma smras sam/de'i phyir kho bo ni sdug bsngal brten nas 'byung bar smra'i/ bdag gis byas pa dang / gzhan gyis byas pa dang / gnyi gas byas pa dang / rgyu med pa las byung zhes ni mi smra'o/ /sdug bsngal 'ba' zhig rnam pa bzhi/ /yod ma yin pa ma yin gyi/ /phyi rol dngos po rnams la yang //rnam pa bzhi po yod ma yin/ /phung po sdug bsngal 'ba' zhig la bdag gis byas pa dang / gzhan gyis byas pa dang / gnyi gas byas pa dang / rgyu med pa las byung ba rnam pa bzhi po dag yod pa ma yin pa de ltar gzung bar mi bya'i/ phyi rol gyi dngos po gzugs la sogs pa rnams la yang rnam pa bzhi po yod pa ma yin no//de yang ji ltar zhe na/ re zhig gzugs nyid kyis gzugs bdag nyid ma byas so/ /gal te gzugs kyis bdag nyid byed na yod pa'am/ med pa zhig byed grang na/ de la re zhig gal te gzugs su yod pa nyid yin na de la yang bya ci dgos/ci ste gzugs med na ni ji ltar med pa dag nyid kyis bdag nyid byed par 'gyur/ ci ste byed na ni dri za'i grong khyer gyis kyang rang gi ra ba rtsig par byed par 'gyur ro/ /gzugs bdag gis byas pa yin na/ gzugs brten nas 'byung ngo zhes bya bar mi 'thad pas de yang mi 'dod do/ / de la gzugs de 'byung ba gzhan du gyur pa dag gis byas so snyam na/ de yang mi rung ste/ ci'i phyir zhe na/ gzugs kyi rgyu 'byung ba dag las gzugs gzhan nyid ma yin pa'i phyir te/ de ni 'og nas kyang / gang la brten te gang yin pa/ /de ni de las gzhan mi 'thad/ /ces 'byung ste/gzugs ma byas pa ma skyes pa med pa las byung ba rnams ji ltar gzhan du 'gyur/ gzugs ni gnyi gas byas pa yang ma yin te/ re res byas par mi 'thad pa'i phyir ro/ /gzugs rgyu med pa las byung ba yang ma yin te/ gzhan gyis ma byas pa dang / bdag gis ma byas pa rgyu med pa las ji ltar 'byung bar 'gyur te/skyon du mar thal bar 'gyur ba'i phyir ro/ /de bzhin du sgra la sogs pa dngos po thams cad la yang rnam pa bzhi po dag mi 'thad pas 'grub par blta bar bya'o/ /sdug bsngal brtag pa zhes bya ba ste rab tu byed pa bcu gnyis pa'o// //smras pa/ sdug bsngal yang yod phyi rol gyi dngos po rnams kyang yod de/ de dag yod pa la rnam pa bzhi po 'ba' zhig mi 'thad do/ /rnam pa bzhi po dag med du zin kyang re zhig /dngos po rnams ni rab tu grub bo/ /bshad pa/ ci khyod sgyu ma'i glang po ches 'gro bar 'dod dam/khyod rnam pa bzhi po dag gis ma byas pa'i dngos po rnams yang dag par yod par rtog go/ /'dir yang dag pa gang yin pa de nyid gzung bar bya ba'i rigs pa snyam/ smras pa/ 'dir yang dag pa gang yin/ bshad pa/ chos gang slu ba de brdzun zhes/ / bcom ldan 'das kyis de skad gsungs/ /'du byed thams cad slu ba'i chos/ /des na de dag brdzun pa yin/ /'di la bcom ldan 'das kyis mdo sde gzhan las chos gang slu ba de ni brdzun pa'o/ /dge slong dag 'di lta ste/ mi slu ba'i chos mya ngan las 'das pa de ni bden pa'i mchog go zhes gsungs so//de bzhin du bden pa gcig ste/ gnyis pa med ces tshigs su bcad pa yang gsungs so/ /de bzhin du gzhan nas kyang 'dus byas de ni slu ba'i chos kyang yin/ de ni rab tu 'jig pa'i chos kyang yin no zhes 'du byed thams cad slu ba'i chos can yin par gsungs so//de'i phyir 'du byed thams cad slu ba'i chos nyid des/ thams cad brdzun pa nyid yin te/ gang dag brdzun pa de dag ji ltar rab tu 'grub par 'gyur/ khyod kyis dngos po rnams ni rab tu grub bo zhes gang smras pa de ni sred pas bskyod par zad do/ /smras pa/ gal te 'du byed thams cad brdzun pa yin na 'dzin bzhin du yang dngos po thams cad med do zhes de dag mi gsal bar byas par mi 'gyur ram/bshad pa mi 'gyur te/ gal te slu chos gang yin pa/ /de brdzun de la ci zhig slu / /bcom ldan 'das kyis de gsungs pa/ / stong nyid yongs su bstan pa yin/ /gal te slu ba'i chos zhes gsungs pa gang yin pa de brdzun pa yin na/ slu ba'i chos ni med pa nyid do zhes smra ba yin pas slu ba'i chos med pa de la ci zhig slu bar 'gyur ba de je smros shig /'di ltar med pa la ci zhig slu bar 'gyur/ci ste slu bar 'gyur na ni/ phyugs bdag pa dang gcer bu pa'i nor la yang chom rkun pa dag 'tshe bar 'gyur ro/ /de lta bas na brdzun pa zhes gsungs pas dngos po rnams med par bstan pa ma yin no/ /bcom ldan 'das sgrib pa mi mnga' ba'i mkhyen pa dang rnam par thar pa brnyes pa yang dag pa ji lta ba bzhin du gzigs pas slu ba'i chos gang yin pa de ni brdzun pa'o zhes bya ba de gsungs pas ni dngos po rnams kyi ngo bo nyid stong pa nyid mu stegs byed thams cad kyis mi rtogs pa yod pa nyid dang med pa nyid kyi skyon dang bral ba yongs su bstan pa yin no//smras pa/ brdzun pa zhes gsungs pa ni/ dngos po rnams kyi ngo bo nyid stong pa nyid yongs su ston pa yin par ma gsungs kyi / bcom ldan 'das kyis de skad gsungs pa ni/ dngos rnams ngo bo nyid med de/ /gzhan du 'gyur ba snang phyir ro/ /brdzun pa zhes gsungs pa nyid gang yin pa des ni dngos po rnams la ngo bo nyid med pa kho nar yongs su bstan pa ma yin gyi/de ni dngos po rnams gzhan du 'gyur ba snang ba'i phyir dang / rnam par 'gyur ba snang ba'i phyir dang / nges par mi gnas pa'i ngo bo nyid du snang ba'i phyir yongs su bstan pa yin no//gal te ji ltar zhe na/ ngo bo nyid med dngos med de/ /gang phyir dngos rnams stong pa nyid/ /gang gi phyir ngo bo nyid med pa'i dngos po med la dngos po rnams kyi stong pa nyid kyang bstan pa/ de'i phyir dngos po rnams kyi ngo bo nyid nges par mi gnas pa'i phyir dang / gzhan du 'gyur ba snang ba'i phyir/dngos po rnams ngo bo nyid med pa nyid ces gsungs par khong du chud par bya'o/ /de ni nges pa kho nar de ltar khong du chud par bya'o / /gzhan du na/ gal te ngo bo nyid med na/ /gzhan du 'gyur ba gang gi yin/ /gal te dngos po rnams la ngo bo nyid med pa kho na yin na/gzhan du 'gyur ba de gang gi yin par 'gyur/ gzhan du 'gyur ba zhes bya ba ni ngo bo nyid las bzlog pa yin na/ de la gal te ngo bo nyid med pa kho na yin na gzhan du 'gyur ba yang med par 'gyur bar the tshom med pa zhig na/ gzhan du 'gyur ba ni yod pas de'i phyir ngo bo nyid kyang yod pa kho na'o//bshad pa/ gal te ngo bo nyid yod na/ /gzhan du 'gyur ba gang gi yin/ /zhes gang smras pa de la bshad par bya ste/ gal te ngo bo nyid yod na/ /ji lta bur na gzhan du 'gyur/ /gal te dngos po rnams la ngo bo nyid yod na/ gzhan la mi ltos par rang las rab tu grub pa rtag pa mi 'gyur ba yod pa de la ji ltar gzhan du yang 'gyur ba yod par 'gyur te/gzhan du 'gyur ba ni gzhan la rag las pa'i phyir 'gyur ba yin gyi ngo bo nyid ni ma yin pas/ de'i phyir ngo bo nyid la gzhan du 'gyur ba mi 'thad pa'o / /smras pa/ gal te ngo bo nyid la gzhan du 'gyur ba mi 'thad na/'o na ngo bo nyid las gzhan pa de ji ltar gzhan du 'gyur/ bshad pa/ de nyid la ni gzhan 'gyur med/ /gzhan nyid la yang yod ma yin/ /dngos por yongs su brtag pa gang yin pa de nyid la yang gzhan du 'gyur ba yod par mi 'thad la/ de las gzhan pa nyid gang yin pa de la yang gzhan du 'gyur ba yod par mi 'thad do//ci'i phyir zhe na/ gang phyir gzhon nu mi rga ste/ /gang phyir rgas pa'ang mi rga'o/ /'di las gzhan du 'gyur ba zhes bya ba ni rga ba ste/ rga ba de yang gang gi phyir gzhon nu'i gnas skabs nyid du rga bar bab pa la yang med la/gzhon nu las gzhan pa rgas pa'i gnas skabs la bab pa la yang med pas/ de'i phyir de nyid la yang gzhan du 'gyur ba med la gzhan nyid la yang yod pa ma yin no/ /gal te gzhon nu gzhon nu'i gnas skabs nyid du rga bar 'gyur na/ de lta na rgas pa dang gzhon pa gnyis gcig la lhan cig gnas par yang 'gyur ro//de yang mi 'thad de/ 'di ltar mi mthun pa gnyis gcig la lhan cig ji ltar gnas par 'gyur/ ci ste yang rgas pa rgas pa'i gnas skabs na rga bar 'gyur na/ de lta na yang rga bar brtag pa don med par 'gyur te/ 'di ltar rgas pa la rga bar bya bar ci dgos/ rga ba gang zhig rgas pa de yang rga bar 'gyur na/ de'i de gnas skabs ji lta bur 'gyur zhes de la yang bsam pa de nyid dang rjes su 'brel par 'gyur ro/ /smras pa/ de nyid gzhan du 'gyur gyi gzhan ni mi 'gyur te/dper na 'o ma gzhan du gyur pa'i dngos po zho nyid yin pa lta bu'o/ /bshad pa/ gal te de nyid gzhan 'gyur na/ /'o ma nyid ni zhor 'gyur ro/ /gal te de nyid gzhan du 'gyur bar sems na/ de ltar na khyod kyi 'o ma nyid zho yin par thal bar 'gyur ro//ci'i phyir zhe na/ de nyid kyi yin gyi/ gzhan gyi ma yin pa'i phyir te/ khyod kyis 'o ma'i gnas skabs nyid du gyur pa zho'i dngos por brjod pas/ des na 'o ma de nyid zho de nyid yin par thal bar 'gyur ro/ /smras pa/ 'o ma nyid kyi dngos po zho yin pas 'o ma nyid zho yin no zhes ni mi smra'o//bshad pa/ 'o ma las gzhan gang gi ni/ /dngos po zho ni yin par 'gyur / /gal te 'o ma nyid kyi dngos po zho yin pas 'o ma nyid zho yin no zhes mi smra na/ 'o na 'o ma las gzhan gang gi dngos po zho yin par 'gyur/ ci zho nyid kyi dngos po zhor 'gyur zhing zho nyid yin nam/'on te chu'i dngos po zhor 'gyur zhing chu zho yin no zhes smras / de lta bas na de nyid dang gzhan yang gzhan du 'gyur bar mi 'thad do/ /gang gi phyir de nyid dang / gzhan yang gzhan du 'gyur ba mi 'thad pa de'i phyir gzhan du 'gyur ba nyid yod pa ma yin no//de'i phyir brdzun pa zhes gsungs pa ni dngos po rnams kyi ngo bo nyid stong pa nyid yongs su ston par byed pa yin gyi / ngo bo nyid nges par mi gnas pa ston par byed pa ni ma yin no/ /smras pa/ yang re zhig stong pa nyid ni yod de/ gnyen po med pas cung zad kyang yod pa ma yin pas stong pa nyid yod pa'i phyir stong pa nyid ma yin pa yang yod par 'gyur ro//bshad pa/ gnyen po las dngos po rab tu yang 'grub par 'dod na yang stong pa yin pa mi 'thad de/ ci'i phyir zhe na/ stong pa med pa'i phyir ro/ /gal te stong min cung zad yod/ /stong pa'ang cung zad yod par 'gyur//mi stong cung zad yod min na/ /stong pa'ang yod par ga la 'gyur/ /gal te mi stong pa cung zad cig rab tu 'grub par gyur na ni/ de'i gnyen po stong pa yang cung zad yod par 'gyur ba zhig na/ gang gi tshe rnam pa thams cad du brtags na mi stong pa cung zad kyang yod par mi 'thad pa de'i tshe mi gtong ba med na stong pa yod par ga la 'gyur/da stong pa yod pa ma yin na de'i gnyen po stong pa ma yin pa yod par ji ltar brtag /smras pa/ khyod gang smra ba de nyid yang mi 'dod de sngar/ bcom ldan 'das kyis de gsungs pa//stong nyid yongs su bstan pa yin/ /zhes smras la/ de ni gal te stong min yod/ /stong pa'ang cung zad yod par 'gyur/ /zhes smra'am/ bshad pa/ 'di la ma khro bar rigs pa zung shig / /rgyal ba rnams kyis stong nyid ni/ /lta kun nges par 'byin par gsungs//gang dag stong pa nyid lta ba/ /de dag bsgrub tu med par gsungs/ /rgyal ba yang dag pa ji lta ba bzhin du gzigs pa/ thugs rje'i dam pa dang ldan pa rnams kyis 'gro ba rnams la phan gdags pa'i phyir/ stong pa nyid ces bya ba ni stong pa nyid lta ba kun gyi chu srin 'dzin khri thams cad las nges par 'byin pa yin par gsungs te/de ni lta ba'i chu srin 'dzin khri thams cad bzlog par gsungs pas/ lta ba'i chu srin 'dzin khri bzlog pa de ni dngos por mi 'thad do / /dper na sems rmongs pa 'ga' zhig dri za'i grong khyer la grong khyer ro snyam pa'i blo gros byung ba las kun tu rmongs pa dang bral nas yang dag pa ji lta ba bzhin du mthong ba'i tshe/grong khyer gyi blo log pa na grong khyer gyi blo log pa zhes bya ba'i dngos po 'ga' yang med de/ yod pa ma yin pa la rnam par rtog pa dang bral ba 'ba' zhig tu zad pa/ de bzhin du yang dag pa ji lta ba bzhin du mthong ba dngos por lta ba'i chu srin 'dzin khri gang yin pa las log pa'i stong pa nyid ces bya ba de ni stong pa nyid ces bya ba dngos po 'ga' yang med do//gang dag stong pa nyid ces brjod pa tsam ma gtogs pa'i phyir/ stong pa nyid la dngos por lta ba de dag ni ma rig pa'i mun pa chen pos blo gros kyi mig bsgribs pas bsgrub tu rung ba dang /bsgrub tu mi rung ba'i dpyad pa sman pa chen po rgyal ba rnams kyis de dag ni bsgrub tu mi rung ba nyid yin no zhes gsungs so/ /ci'i phyir zhe na/ gang dag dngos po rnams rang gi ngo bo nyid kyis yod pa ma yin no zhes mngon par zhen pa de dag la stong pa nyid ces brjod pa rten cing 'brel par 'byung ba 'dis rgyu dang rkyen gyi dbang gis dngos por brtags pa yin gyi/dngos po rnams ngo bo nyid kyis yod pa ma yin no zhes dngos po rnams kyi ngo bo nyid du rab tu bstan pa na mngon par zhen pa de bzlog par nus kyi/gang dag stong pa nyid la dngos po nyid du mngon par zhen pa de dag la ni/ gzhan gang gis kyang mngon par zhen pa de bzlog par mi nus te/ dper na ci yang med do zhes smras pa na ci yang med pa de nyid byin cig ces zer ba gang yin pa de la med pa nyid 'dzin du gzhug par ji ltar nus pa bzhin te/de lta bas na de bas ni rgyal ba stobs bcu dang ldan par gyur pa/ thugs rje chen po mnga' bas kyang bsgrub tu mi rung ba nyid du gsungs so/ /gang dag gis stong pa nyid kyang stong par mthong ba de kho na mthong ba de dag la ni stong pa nyid du grub bo//de kho na nyid brtag pa zhes bya ba ste rab tu byed pa bcu gsum pa'o// //smras pa/ dngos po rnams ngo bo nyid stong pa nyid ma yin gyi/ dngos po rnams ngo bo nyid yod pa kho na yin te/ ci'i phyir zhe na/ phrad pa bstan pa'i phyir ro//'di la bcom ldan 'das de dang der gzugs dang rnam par shes pa dang mig gsum phrad pa ni reg pa'o/ /sgra dang / rnam par shes pa dang rna ba la sogs pa dag kyang de bzhin no zhes gsungs so/ /de bzhin du rjes su chags pa dang / khong khro ba dang ma rig pa'i kun tu sbyor ba dag gis kun tu sbyar to zhes gsungs so//dngos po rnams la ngo bo nyid med na phrad par mi 'thad de/ 'di ltar dngos po ngo bo nyid med pa rnams ji ltar phrad par 'gyur te/ de lta bas na dngos po rnams ngo bo nyid yod pa kho na yin no/ / bshad pa/ gal te dngos po rnams kyis phrad pa nyid 'thad na ni/ dngos po rnams ngo bo nyid yod par 'gyur ba zhig na/ dngos po rnams kyi phrad pa nyid mi 'thad pas ngo bo nyid yod par ga la 'gyur/ ji ltar zhe na/ blta bya lta ba lta ba po/ /gsum po de dag gnyis gnyis dang //thams cad kyang ni phan tshun du/ /phrad par 'gyur ba yod ma yin/ /blta bar bya ba dang / lta ba dang / lta ba po gsum po de dag ni gnyis gnyis dang / thams cad kyang phan tshun du phrad par mi 'gyur te/ blta bar bya ba dang lta ba yang phrad par mi 'gyur la/blta bar bya ba dang lta ba po yang phrad par mi 'gyur/ lta ba dang lta ba po yang phrad par mi 'gyur/ blta bar bya ba dang lta ba dang lta ba po yang phrad par mi 'gyur ro/ /de bzhin 'dod chags chags pa dang / /chags par 'gyur dang nyon mongs pa//lhag ma rnams dang skye mched kyi/ /lhag ma'ang rnam pa gsum gyis lta / /ji ltar blta bar bya ba dang / lta ba dang / lta ba po dag gnyis gnyis dang phan tshun lhan cig tu phrad par mi 'gyur ba de bzhin du 'dod chags dang chags pa dang / chags par 'gyur ba dag kyang gnyis gnyis dang thams cad kyang phan tshun lhan cig tu phrad par mi 'gyur te/'dod chags dang chags pa dang phrad par mi 'gyur la/ 'dod chags dang chags par 'gyur ba yang phrad par mi 'gyur/ chags pa dang chags par 'gyur ba yang phrad par mi 'gyur/'dod chags dang chags pa dang chags par 'gyur ba yang phrad par mi 'gyur ro/ /de bzhin du nyon mongs pa lhag ma zhe sdang la sogs pa rnams dang / skye mched kyi lhag ma sgra dang rna ba dang / nyan pa po la sogs pa dag kyang gnyis gnyis dang /thams cad dag kyang phan tshun lhan cig tu phrad par mi 'gyur ro/ /smras pa/ ci'i phyir blta bar bya ba la sogs pa de dag phan tshun lhan cig phrad par mi 'gyur/ bshad pa/ gzhan ni gzhan dang phrad gyur na/ /gang phyir blta bya la sogs pa / /gzhan de yod pa ma yin pa//de phyir phrad par mi 'gyur ro/ /'di la gal te phrad pa zhes bya ba 'ga' zhig yod par gyur na de nges par gzhan dang gzhan lhan cig las 'gyur grang na/ gang gi phyir blta bar bya ba la sogs pa dag la gzhan de yod par mi rigs shing / de dag la phan tshun gzhan nyid yod pa ma yin pa de'i phyir phan tshun lhan cig phrad par mi 'gyur ro//blta bya la sogs 'ba' zhig la/ /gzhan nyid med par ma zad kyi/ /gang yang gang dang lhan cig tu/ /gzhan pa nyid du mi 'thad do/ /blta bar bya ba la sogs pa de dag 'ba' zhig la phan tshun gzhan nyid mi 'thad par ma zad kyi/'di ltar dngos po gang yang dngos po gang dang yang lhan cig tu gzhan nyid du mi 'thad do/ /gzhan nyid med na gang yang gang dang yang lhan cig phrad par mi 'thad do/ /smras pa/ dngos po rnams kyi gzhan nyid mngon sum du dmigs bzhin du med do zhes su zhig smra bar rigs/bshad pa/ khyod kyis gang kho na'i phyir dngos po rnams kyi gzhan nyid mngon sum du dmigs pa de kho na'i phyir kho bos khyod kyis dngos po rnams kyi gzhan nyid ma dmigs par legs par khong du chud de/ 'di ltar dngos po rnams kyi gzhan nyid med pa ni lha'i mig gis kyang dmigs par mi nus na khyod lta bu'i sha'i mig gis lta smos kyang ci dgos/ci'i phyir zhe na/ gzhan ni gzhan la brten te gzhan/ /gzhan med gzhan las gzhan mi 'gyur/ /gzhan zhes bya ba gang yin pa de ni de las gzhan pa 'ga' zhig la brten te gzhan du 'gyur ba ma yin na/gzhan med na gzhan ni rang las gzhan du mi 'gyur ro/ /gzhan gang yin pa ni gzhan la ltos nas gzhan zhes bya ba'i rang las gzhan du mi 'gyur bas de mngon sum du dmigs so zhes su zhig smra bar rigs/ smras pa/ de lta na yang gzhan nyid med par mi 'gyur te/ gzhan nyid rab tu 'grub par 'gyur ro/ /bshad pa/ mi mkhas pa la ni de ltar 'gyur gyi mkhas pa la ni mi 'gyur te/ gang la brten te gang yin pa/ /de ni de las gzhan mi 'thad/ /'di ltar gang la brten te gang 'byung ba de de las gzhan no zhes de skad smra bar mi rigs pa ma yin nam/ ci'i phyir zhe na/ gal te gzhan ni gzhan las gzhan/ /gzhan med par yang rung bar 'gyur/ /gal te gang la brten nas gzhan du 'gyur ba de de las gzhan yin par gyur na ni/ de med par yang de gzhan du 'gyur ba nyid de/ de ltar na re lde la ma ltos pa kho nar bum pa gzhan nyid du 'gyur ba zhig na/re lde la ma ltos par bum pa gzhan du yang mi 'gyur te/ de lta bas na re lde las bum pa gzhan ma yin no/ /smras pa/ de las gzhan du ma gyur du zin gyis kyang re zhig gzhan ni yod do/ /bshad pa/ ci khyod skrod par byed pa nyid kyi rjes su 'gro'am/ khyod gzhan nyid zlog par byed pa'i gtan tshigs kyis gzhan nyid sgrub par sems ko//gal te gang la brten te gzhan/ /zhes bya bar 'gyur ba de las de gzhan ma yin na/ 'o na ci de rang gi bdag nyid kho na las gzhan du 'gyur bar sems sam/ gzhan las gzhan pa'i gzhan pa ste /med na med pas de phyir med/ /gang gi phyir gzhan gang las gzhan pa'i gzhan pa de med na/ gzhan med pas rang nyid las gzhan du mi 'gyur ba'i phyir gzhan med pa kho nar shes par gyis shig /smras pa/ gang kho na'i phyir gzhan ni gzhan la brten te gzhan du 'gyur ro zhes bya ba de kho na'i phyir gzhan yod pa ma yin nam/ci ste brten nas kyang gzhan du yang mi 'gyur na gzhan yin no zhes ji skad du bya/ bshad pa/ rten cing 'brel par 'byung ba ni bdag nyid 'di lta bu yin te/ gang gi phyir re zhig gzhan la brten nas gzhan zhes bya ba de'i phyir 'jig rten gyi tha snyad kyi dbang gis gzhan yin no zhes smra'o//gang gi phyir yang dag pa ji lta ba bzhin du brtags na/ gzhan nyid gzhan la yod ma yin/ /gzhan ma yin la'ang yod pa min/ /gang gi phyir re lde la ltos te bum pa gzhan zhes bya ba ni re lde la ltos pa'i phyir dang / re lde la rag lus pa'i phyir dang /rang las rab tu ma grub pa'i phyir bum pa la gzhan nyid yod pa ma yin no/ /gang gi phyir re lde la mi ltos pa bum pa gzhan ma yin pa zhes bya ba 'ba' zhig la yang / gzhan ma yin pa dang mi mthun pa gzhan nyid med pa de'i phyir don dam pa'i dbang gis gzhan med do zhes smra'o//de'i phyir bcom ldan 'das kyis kyang chu shing gi phung po bstan te/ chu shing gi phung po ni khong stong zhing snying po rtogs par mi 'gyur ba'i phyir/ ci yang med do zhes kyang bstan to/ /smras pa/ gal te de ltar bum pa gzhan ma yin na/ de lta na bum pa de nyid gzhan ma yin par 'gyur te/gzhan med par gzhan ma yin par yang med pas gzhan yang yod par 'gyur ro/ /bshad pa/ gnyen po las kyang gzhan nyid mi 'thad do/ /ci'i phyir zhe na/ gzhan ma yin pa mi 'thad pa'i phyir te/ 'di ltar gzhan la ltos nas gzhan ma yin par 'gyur na gzhan nyid de yang brtags na mi 'thad do//gzhan nyid yod pa ma yin no / /gzhan nam de nyid yod ma yin/ /da gzhan nyid de yod pa ma yin na de'i gnyen po gzhan ma yin na de nyid kyang med la/ gzhan ma yin pa med na de'i gnyen po gzhan med do zhes de skad bstan par mi 'gyur ram/ gzhan yang smras pa/gzhan la ltos nas gzhan du 'gyur ba ma yin gyi/ gzhan nyid ces bya ba ni spyi yin te/ de dang ldan pas gzhan du 'gyur ro/ /bshad pa/ gal te gzhan nyid dang ldan pas gzhan du 'gyur na rang las rab tu ma grub pa'i phyir/ gzhan la ltos pa kho nas gzhan du 'gyur ba ma yin nam/smras pa/ gzhan nyid ni gzhan la nges par gnas pa kho na yin pas de la yang ltos ci dgos bshad pa/ gzhan nyid gzhan la yod ma yin/ gzhan nyid ni gzhan las nges par gnas pa kho na yin pas zhes gang smras pa/ de ni mi rigs te/ gzhan nyid ni gzhan la med do//ci'i phyir zhe na/ gang gi phyir/ gzhan ma yin la'ang yod pa min/ /'di la bum pa ni rang gi bdag nyid las gzhan ma yin pas de la gzhan ma yin pa nyid dang mi mthun pa'i gzhan nyid yod pa ma yin no/ / gal te gzhan nyid de gzhan la nges par gnas pa nyid du gyur na ni bum pa rang gi bdag nyid las kyang gzhan nyid du 'gyur zhing gzhan ma yin par mi 'gyur te/bum pa rang gi bdag nyid las gzhan nyid du gyur pa gang yin pa de ni mi 'dod do/ /de ltar na gang gi phyir bum pa gzhan ma yin pa la med pa de'i phyir gzhan la yang yod pa ma yin no//gal te yod par gyur na ni gnas skabs thams cad na yod par 'gyur ro/ /ci ste gang gi phyir bum pa snam bu la ltos na gzhan yin pa de'i tshe bum pa de la gzhan nyid de yod pa sems na/ de lta na gzhan nyid nges par mi gnas par bsten pa yin te/ de'i phyir dngos po ltos nas yod pa'i phyir ro/ / gzhan nyid la bzhag pa dang / btsal bar yod pa yang dam bcas par yang 'gyur bas de yang mi 'thad de/ rang gi gzhung lugs dang 'gal ba'i phyir ro/ /yang gzhan yang / dngos po gnyis yod na phrad par 'gyur gyi med pa ni mi 'gyur bas de la gal te re zhig pa ngo bo nyid kyis gzhan ma yin pa de gzhan nyid dang ldan pas ji ltar gzhan du 'gyur te/'o ma dang 'dres pa'i chu yang 'o mar mi 'gyur la 'o ma yang chur mi 'gyur ba bzhin no/ /ci ste bum pa ngo bo nyid kyis gzhan yin na ni gzhan la gzhan nyid dang ldan pa btsal ci dgos/ de lta bas na de gzhan nyid dang ldan pas gzhan du 'gyur zhes bya ba dang /gzhan nyid gzhan la nges par gnas so zhes bya ba de ni gyi na'o/ /smras pa/ gzhan nyid gzhan la nges par gnas kyang rung mi gnas kyang rung ste/ don gang la gzhan nyid du 'dod pa'i gzhan de ni re zhig yod do/ /bshad pa/ ci khyod 'jig rten rgyug par rtsom mam/khyod gzhan nyid med pas gzhan bsgrub par rtsom ko/ /gzhan nyid yod pa ma yin no/ /gzhan nam de nyid yod ma yin/ /gzhan gyi dngos po gzhan nyid yod pa ma yin na gzhan nam de nyid med do zhes bstan pa kho na ma yin nam/ ci ste gzhan gyi dngos po med par yang gzhan du 'gyur na ni khyod la glen pa'i dngos po med par yang glen par 'gyur ro//ci ste de mi 'dod na/ 'o na ni gzhan gyi dngos po med par gzhan du mi 'gyur ro/ /de'i phyir de ltar brtags na dngos po thams cad la gzhan nyid ji ltar yang mi 'thad do//gzhan nyid med na blta bar bya ba la sogs pa dang / 'dod chags la sogs pa dag ji ltar phan tshun lhan cig tu phrad par gyur/ phrad pa med na khyod kyi phrad pa'i gtan tshigs las byung ba'i dngos po'i ngo bo nyid 'thad par ga la 'gyur/ ci ste yang khyod kyi yid la bsam pas gzhan yang yin la/de nyid kyang yin no snyam du sems na de lta na yang phrad pa mi 'thad pa nyid do/ /ci'i phyir zhe na/ gang gi phyir/ de ni de dang phrad pa med/ /gzhan dang gzhan yang phrad mi 'gyur/ /de la re zhig de nyid ni de dang phrad par mi 'thad de/ ci'i phyir zhe na/ de tsam du zad pa'i phyir dang / lhan cig gi don du mi 'thad pa'i phyir ro/ /ci ste de lta na yang 'gyur na ni ci yang mi phrad par mi 'gyur bas de yang mi 'dod de/ de lta bas na de nyid dang phrad par mi 'thad do/ /de ni gang la 'di ni gzhan no 'di yang gzhan no zhes bya ba ste yod pa de la yang phrad par mi 'thad do//ci'i phyir zhe na/ gzhan nyid yin pa kho na'i phyir ro/ /ci ste gzhan nyid yin pa yang phrad na ni de lta na ci yang mi phrad par mi 'gyur bas de yang mi 'thad de/ de lta bas na gzhan nyid yin na yang phrad par mi 'thad do/ /smras pa/ gzhan du gyur pa gnyis gcig tu 'gyur ba gang yin pa de ni/dper na 'o ma dang chu gnyis phrad pa de bzhin du gzhan dang gzhan yang phrad par mi 'gyur ro/ /bshad pa/ de la yang de nyid gnas bzhin te/ /gang gi tshe re zhig 'o ma dang chu tha dad par gyur na de'i tshe na phrad pa med do/ / ci'i phyir zhe na/ tha dad par gyur pa nyid kyi phyir ro//gang gi tshe gcig nyid du gyur pa de'i tshe na yang / phrad pa med de/ ci'i phyir zhe na/ gcig pa nyid kyi phyir ro/ /smras pa/ gang gi tshe gcig nyid du gyur pa nyid phrad pa yin no/ /bshad pa/ gal te gcig pa nyid yin yang phrad par 'gyur na ni ci yang mi phrad par mi 'gyur ro zhes ma bshad dam/de lta bas na de yang bzang po ma yin no/ /smras pa/ gzhan du gyur pa dag phrad bzhin pa ni phrad pa yin no/ /bshad pa/ de la yang de nyid gnas bzhin te/ gal te phrad bzhin pa zhes bya ba'i dngos po dag gcig yod par gyur na de la yang 'di ni gzhan no//'di yang gzhan no zhes gzhan yin pa'i phyir phrad par mi 'thad do/ /ci ste phrad bzhin pa zhes bya ba de gcig pa nyid du brjod pa yin na ni phrad bzhin pa zhes bya ba'i tshig mi 'thad do/ /gcig pa nyid ni ji ltar phrad par 'gyur/smras pa/ phyed phrad pa'i dngos po dag phrad bzhin pa zhes bya ba de dag la phrad pa yod do/ /bshad pa/ de la yang de nyid yod do/ /gal te re zhig de dag phyed phrad pa na phyogs gcig phrad pas bdag nyid thams cad phrad do zhes bya bar brtags na ni gcig pa nyid yin pa'i phyir phrad par mi 'thad do//ci ste phyogs gcig phrad kyang bdag nyid tha dad pa nyid du 'gyur na ni tha dad pa'i phyir phrad par ga la 'gyur/ gal te de dag cung zad cig ni phrad cung zad/ cig ni ma phrad pa yin na ni bdag nyid gnyis su 'gyur te/de dag gi phrad pa gang yin pa de la ni gcig pa nyid ma yin pa'i phyir phrad pa med pa'o / /de dag gi ma phrad pa gang yin pa de la yang gzhan pa'i phyir phrad pa med do/ /smras pa/ phrad bzhin pa med kyang sla ste/ re zhig phrad pa gang yin pa de ni yod do/ /phrad pa yod na phrad pa yod pas phrad pa yang rab tu grub bo//bshad pa/ kye ma re ba ko re che/ /gang la phrad bzhin pa yang mi 'thad de/ phrad par rtsom pa yang mi 'thad pa de la phrad pa 'thad par 'gyur re skan/ gang gi tshe gcig tu 'gyur ro zhes smras pa de'i tshe gcig yin na phrad par ga la 'gyur/ ci ste phrad kyang gcig ma yin na ni de lta na yang gzhan ma yin pa'i phyir ma phrad pa nyid ma yin no//smras pa/ phrad pa med kyang sla ste re zhig gcig pa nyid kyi snga rol na gzhan du 'gyur ba'i dngos po gang yin pa yod pa de ni phrad pa po ste re zhig yod do/ /bshad pa/ ci khyod ma ning la phrag dog za'am/ khyod phrad pa med par phrad pa po yod pa nyid du 'dod ko//'di la phrad par byed pas phrad pa'i rgyu las byung ba ni phrad pa po yin na phrad pa de yang rnam pa thams cad du mi 'thad do/ /de med na phrad par byed pa med pa phrad pa po yod par ji ltar 'gyur/ de'i phyir de ltar rigs pa sngon du btang ste yang dag pa ji lta ba bzhin du brtags na/ phrad bzhin pa dang phrad pa dang / /phrad pa po yang yod ma yin/ /de dag med na khyod kyi phrad pa bstan pa'i gtan tshigs las byung ba'i dngos po'i ngo bo nyid 'grub par ga la 'gyur/ phrad pa brtags pa zhes bya ba ste/ rab tu byed pa bcu bzhi pa'o// // smras pa/ khyod dngos po yod pa mi dmigs pa'i phyir dngos po 'di dag ngo bo nyid med pa yin par sems shing / dngos po rnams rten cing 'brel par 'byung ba zhes bya bar yang yod la dngos po rnams ngo bo nyid med par yang smra na/ ji ltar dngos po byung ba yang yin la/ngo bo nyid med pa yang yin par 'gyur/ gal te rgyu dang rkyen rnams las dngos po rnams kyi ngo bo nyid kho na mi 'byung na/ de las gzhan ci zhig 'byung bar 'gyur / gal te rgyu spun dag las snam bu'i ngo bo nyid kho na mi 'byung na ci rgyu spun gyi ngo bo nyid dag kho na 'byung ngam/ ci ste ci yang mi 'byung na ni 'byung zhes kyang ji skad du brjod / bshad pa/ ci khyod rta la zhon bzhin nyid du rta ma mthong ngam/ khyod dngos po rnams rten cing 'brel par 'byung ba zhes kyang smra la/ de dag gang gi ngo bo nyid med pa nyid kyang ma mthong ko/ /de ni re zhig blo rtsing ba rnams kyis kyang bde blag tu shes par 'gyur te/ngo bo nyid ni rgyu rkyen las/ /'byung bar rigs pa ma yin no/ /'di la bdag gi dngos po ni ngo bo nyid ces bya ba ste/ bdag gi dngos po yod pa ni yang rgyu dang rkyen rnams las 'byung bar mi rigs te/ 'di ltar yod pa la yang bya ba ci yod bya ba med na rgyu dang rkyen rnams kyis ci bya/ci ste de rgyu dang rkyen rnams las 'byung na/ de lta na/ rgyu dang rkyen las byung ba yi / /ngo bo nyid ni byas par 'gyur/ /de yang mi 'thad do/ /smras pa/ ngo bo nyid ni byas pa kho na yin no/ /ci'i phyir zhe na/ 'di ltar snam bu'i dngos po sngon ma byung ba phyis byed pa'i phyir ro//bshad pa/ ngo bo nyid ni byas pa zhes/ /ji lta bur na rung bar 'gyur/ /ngo bo nyid byas pa zhes bya bar ji ltar rung bar 'gyur te/ smras pa / gang gi tshe don de dag dgag pa mi mthun pa yin te/ gal te ngo bo nyid yin na ni byas pa ma yin la ci ste byas pa yin na ni/ngo bo nyid ma yin pa de'i tshe ngo bo nyid kyang yin la byas pa yang yin no/ /zhes sems dang bcas pa su zhig de ltar 'dzin par 'gyur/ /smras pa/ khyod ngo bo nyid rigs pa gang dang ldan par sems/ bshad pa/ ngo bo nyid ni bcos min dang / /gzhan la ltos pa med pa yin/ / gang bya bas bsgrub par mi 'gyur ba dang / rgyu dang rkyen la yang ltos par mi 'gyur ba rang nyid kyi ngo bo nyid mi 'gyur bar 'jug pa de ni ngo bo nyid kyis rigs pa yin no/ /gang byas pas bsgrub par 'gyur ba dang rgyu dang rkyen la yang ltos par 'gyur ba de ni gzhan la rag las pas gzhan la ltos pa rang gi bdag nyid kyis rab tu ma grub pa yin pas ngo bo nyid ces bya bar ji ltar 'thad par 'gyur/smras pa/ gang la ltos nas de dngos por 'gyur ba'i gzhan gyi dngos po ni re zhig yod do/ /gzhan gyi dngos po rab tu grub na/ ngo bo nyid kyang rab tu 'grub par 'gyur ro/ /bshad pa/gnyen po la brten nas kyang ngo bo nyid mi 'thad do/ /ci'i phyir zhe na/ gzhan gyi dngos po mi 'thad pa'i phyir te/ ngo bo nyid ni yod min na/ /gzhan gyi dngos po ga la yod/ /gal te ngo bo nyid rab tu grub par gyur na ni des na de'i gnyen po gzhan gyi dngos po yang yod par 'gyur ba zhig na/ngo bo nyid mi 'thad de ngo bo nyid yod pa ma yin na gzhan gyi dngos po ga la yod/ de gzhan gyi dngos po med na de'i gnyen po ngo bo nyid 'thad par ga la 'gyur/ yang gzhan yang / ngo bo nyid kyang gzhan la gzhan gyi dngos po yang gzhan ni ma yin te/ ci'i phyir zhe na/ 'di ltar/ gzhan gyi dngos po'i ngo bo nyid/ /gzhan gyi dngos po yin zhes brjod/ /'di ltar gzhan gyi dngos po'i ngo bo nyid gang yin pa de gzhan gyi dngos po zhes brjod pa yin pas/ de'i phyir gal te gzhan gyi dngos po de'i ngo bo nyid med pa kho na yin na gang gis de yod par 'gyur/ de'i phyir ngo bo nyid kyang gzhan la gzhan gyi dngos po yang gzhan zhes bya bar mi 'thad do//de lta na gnyen po nyid med de/ gcig pa nyid yin pa'i phyir ro/ /gnyen po med na ji ltar gnyen po la brten nas 'grub par 'gyur/ smras pa/ dngos po'i ngo bo nyid yod do/ /med do/ /zhes bya ba 'dis/kho bo la ci byar yod re zhig dngos po yod do/ /bshad pa/ ngo bo nyid dang gzhan dngos dag /ma gtogs dngos po ga la yod/ /ngo bo nyid dang gzhan dngos dag /yod na dngos po 'grub par 'gyur/ /gal te dngos po 'ga' zhig yod par 'gyur na/ ngo bo nyid dang gzhan gyi dngos po zhig yin grang ste/de'i phyir ngo bo nyid dang gzhan gyi dngos po dag yod na dngos po 'grub par 'gyur na/ gang gi tshe ngo bo nyid kyang med la/ gzhan gyi dngos po yang med pa de'i tshe ngo bo nyid dang gzhan gyi dngos po dag ma gtogs pa'i dngos po brjod par bya ba ma yin pa rang dang gzhan du ma gyur pa 'ba' zhig pa de yod par ga la 'gyur/smras pa/ de lta na dngos po rnams kyi dngos po med pa yod de/ dngos po med pa yang ma ltos par byed pas gang gi phyir dngos po med par 'gyur ba'i dngos po yang yod de/ bshad pa/ de lta na yang dngos po rab tu 'grub par mi 'thad do/ /ci'i phyir zhe na/ dngos po med pa rab tu ma grub pa'i phyir te/ ngo bo nyid dang gzhan dngos dag /ma gtogs dngos po ga la yod/ /ces smras zin to/ /de'i phyir/ gal te dngos po ma grub na/ /dngos med 'grub par mi 'gyur ro//gal te dngos po nyid 'ga' yang rab tu ma grub na dngos po med pa 'grub par mi 'gyur ba nyid do zhes smras pa nyid ma yin nam/ ci'i phyir zhe na/ dngos po gzhan du 'gyur ba ni/ /dngos med yin par skye bo smra/ /'di ltar dngos po gzhan du 'gyur ba gang yin pa de dngos po med pa yin no//zhes skye bo dag smra na/ dngos po de yang med de/ de med na dngos po med pa de gang gi yin par 'gyur/ dngos po med pa na khyod kyi de'i gnyen po dngos po 'thad par ga la 'gyur/ smras pa/ 'di la de kho na mthong bas thar par 'gyur ro/ /zhes bya zhing / de kho na zhes bya ba yang de'i dngos po ni de kho na ste /dngos po'i ngo bo nyid ces bya ba'i tha tshig go/ /de la gal te dngos po'i ngo bo nyid med pa nyid yin na de lta na khyod la de kho na mthong ba mi 'thad par mi 'gyur ram/ de kho na mthong ba med na thar pa 'thad par ji ltar 'gyur/ de lta bas na dngos po rnams ngo bo nyid med pa zhes bya bar lta ba de ni bzang po ma yin no//bshad pa/ log par ma 'dzin cig /gang dag dngos nyid gzhan dngos dang / /dngos dang dngos med nyid lta ba/ /de dag sangs rgyas bstan pa la/ /de nyid mthong ba ma yin no/ /gang dag de ltar ngo bo nyid dang gzhan gyi dngos po dang dngos po med pa nyid lta ba de dag ni 'di ltar yang sangs rgyas kyi bstan pa mchog tu zab pa la de kho na mthong ba ma yin no//kho bo cag ni rten cing 'brel par 'byung ba'i nyi ma shar bas snang bar gyur pa'i dngos po rnams kyi ngo bo nyid med pa nyid yang dag pa ji lta ba bzhin du mthong bas de'i phyir kho bo cag nyid la de kho na mthong ba yod pas kho bo cag kho na la thar pa yang 'thad do//gal te de ci'i phyir zhe na/ 'di ltar/ bcom ldan dngos dang dngos med pa/ /ston pas ka ta ya na yi/ /gdams ngag las ni yod pa dang //med pa gnyi ga'ang dgag pa mdzad/ /gang gi phyir bcom ldan 'das don dam pa'i de kho na la mkhas pa dngos po dang dngos po med par rab tu ston pas ka ta ya na'i gdams ngag ces bya ba'i mdo las yod pa zhes bya ba dang med pa zhes bya ba gnyi ga yang dgag pa mdzad pa de'i phyir/gang dag dngos po rnams la yod pa nyid dang med pa nyid du rjes su lta ba de dag gis de kho na mi mthong bas de dag nyid la yang thar pa mi 'thad do/ /kho bo cag yod pa nyid med pa nyid la mngon par zhen pa med par tha snyad byed pa dag la ni mi 'thad pa med do//gal te dngos po dang dngos po med par mthong ba de kho na mthong ba yin na ni de kho na la ma mthong ba 'ga' yang med par 'gyur bas de ni kho na ma yin no/ /de lta bas na dngos po rnams kyi ngo bo nyid med pa nyid ni de kho na yin la de mthong ba kho nas thar bar 'gyur te/ slob dpon 'phags pa lhas kyang /srid pa'i sa bon rnam shes te/ /yul rnams de yi spyod yul lo/ /yul la bdag med mthong na ni/ /srid pa'i sa bon 'gag par 'gyur/ /zhes gsungs so/ /de ni de ltar nges pa kho nar shes par bya'o/ /gzhan du na / gal te rang bzhin yod nyid na//de ni med nyid mi 'gyur ro/ /gal te dngos po rnams rang bzhin gyis yod pa nyid yin par gyur na yod pa nyid rang bzhin gyis yod pa de ni phyis med pa nyid du mi 'gyur ro/ /ci'i phyir zhe na/ 'di ltar/ rang bzhin gzhan du 'gyur ba ni/ /nam yang 'thad par mi 'gyur ro//'di ltar 'gyur ba'i gnyen po ni rang bzhin yin pas de'i phyir rang bzhin ni mi 'gyur rtag pa yin pa'i rigs na/ dngos po rnams la ni gzhan du 'gyur ba snang bas de'i phyir de dag la ngo bo nyid kyis yod pa nyid mi 'thad do/ /'dir smras pa/ gal te dngos po med par mthong ba las dngos po rnams kyi ngo bo nyid yod pa ma yin par khong du chud pas na re zhig dngos po rnams kyi dngos po med par gyur pa yin no//bshad pa/ rang bzhin yod pa ma yin na/ /gzhan du 'gyur ba gang gi yin/ /gang gi tshe dngos po rnams la yod pa nyid rang bzhin gyis med do zhes smras pa de'i tshe/dngos po rnams kyi yod pa nyid rang bzhin yod pa ma yin na gzhan du 'gyur ba de nyid de gang gi yin par 'gyur/ smras pa/ gal te dngos po rnams kyi dngos po med pa snang la rang bzhin yang yod pa ma yin na dngos po med pa mi 'thad de gang gi dngos po med par 'gyur ba'i dngos po'i rang bzhin gdon mi za bar yod pa nyid do//bshad pa/ rang bzhin yod pa yin na yang / /gzhan du 'gyur ba ji ltar rung / /sngar yang rang bzhin gzhan du 'gyur ba ni/ nam yang 'thad par mi 'gyur ro/ /'di ltar 'gyur ba'i gnyen po ni rang bzhin yin pas de'i phyir rang bzhin ni mi 'gyur bar rtag par 'gyur ba'i rigs na/zhes ma bshad dam/ de'i phyir dngos po rnams kyi med pa nyid kyang mi 'thad do/ /dngos po rnams la yod pa dang med pa nyid du lta ba la skyon gzhan 'dir yang thal bar 'gyur te/ yod ces bya ba rtag par 'dzin//med ces bya ba chad par lta/ /de phyir yod dang med pa la/ /mkhas pas gnas par mi bya'o/ /dngos po yod do zhes dngos por lta ba de la ni rtag par 'dzin par thal bar 'gyur la/ dngos po med do zhes med par lta ba de la ni chad par lta bar thal bar 'gyur bas/de gnyi ga yang don med pa dang gnod par 'gyur ba yin no/ /de'i phyir yod pa dang med pa nyid du lta na rtag pa dang chad par lta bar thal bar 'gyur bas/ de yang don med pa dang gnod par 'gyur bas/ de'i phyir mkhas pa de kho na rtogs par 'dod pa 'khor ba'i dgon pa las rgal bar 'dod pas yod pa nyid dang med pa gnas par mi bya'o//smras pa/ yod pa nyid dang med pa nyid du lta na ji ltar rtag pa dang chad par lta ba'i skyon du thal bar 'gyur/ bshad pa/ gang zhig ngo bo nyid yod pa/ /de ni med pa min pas rtag /sngon byung da ltar med ces pa/ /des na chad par thal bar 'gyur//'di ltar gang zhig ngo bo nyid kyis yod pa de ni phyis med pa nyid du mi 'thad de/ rang bzhin ni mi 'gyur bas de'i phyir yod pa nyid du lta ba las rtag par lta bar 'gyur ro/ /dngos po de sngon du byung ba la da ltar med do zhes dngos po yod pa la 'jig par lta ba des na chad par lta bar 'gyur ro//de ltar gang gi phyir dngos po rnams la yod pa nyid dang med pa nyid du lta ba skyon du mar 'gyur ba de'i phyir dngos po rnams ngo bo nyid med pa zhes bya ba de ni de kho na mthong ba ste dbu ma'i lam yin la de nyid don dam pa 'grub pa yin no/ /dngos po dang dngos po med pa brtag pa zhes bya ba ste rab tu byed pa bco lnga pa'o// //dbu ma rtsa ba'i 'grel pa bud d+ha pA li ta / bam po drug pa/ 'dir smras pa/ dngos po dang dngos po med par mthong ba med pa gang la 'ga' yang 'khor ba dang mya ngan las 'das pa dang bcing ba dang thar par mi 'thad par de ji ltar de kho na yin/dngos po dang dngos po med par mthong ba yod na/ de dag thams cad 'thad pas dngos po dang dngos po med par mthong ba nyid de kho na mthong ba yin no/ /bshad pa/ gang la dngos po dang dngos po med par mthong ba de la de dag thams cad mi 'thad do/ /gal te ji ltar zhe na/'di la dngos por smra ba dag dngos po dag tu yongs su rtog pa na 'du byed rnams dang sems can la dngos por yongs su rtog grang na/ de dag la dngos por yongs su rtog pa na rtag pa'am/ mi rtag par thal bar 'gyur ro/ /de la/ gal te 'du byed 'khor zhe na/ /de dag rtag na mi 'khor te//mi rtag na yang 'khor mi 'gyur/ /sems can la yang rim 'di mtshungs/ /de la gal te re zhig 'du byed rnams 'khor bar yongs su rtog na de mi 'thad de / ci'i phyir zhe na/ 'di ltar/ de dag rtag na mi 'khor te/ /mi rtag na yang 'khor mi 'gyur/ /re zhig 'du byed rnams rtag na mi 'khor te/ci'i phyir zhe na/ rtag pa dag ni mi 'gyur ba'i phyir ro/ /'di la gang rgyud kyi rgyun gyis de dang der skye ba dang 'gag pa de ni 'khor ba zhes bya ba na/ 'du byed rtag pa mi 'gyur ba rnams ni 'byung ba dang 'jig pa'i chos can nyid du mi 'thad pas/de'i phyir 'du byed rnams mi rtag na mi 'khor ro/ /'du byed rnams mi rtag pa na yang mi 'khor te/ 'di ltar 'di na 'du byed gang kho na dag 'gag pa de dag kho na yang gzhan du mi skye bas/ de'i phyir gtan du 'gags pa rnams la 'khor ba mi 'thad pas de'i phyir 'du byed rnams mi rtag na yang mi 'khor te/de ltar re zhig 'du byed kyi ming can gyi dngos po rtag pa dang / mi rtag pa rnams 'khor bar mi 'thad do/ /de la 'di snyam du 'du byed rnams ni mi 'khor gyi sems can ni 'khor bar sems na/ de la bshad par bya ste/ sems can la yang rim 'di mtshungs//'du byed rnams la'ang 'khor ba mi 'thad par bstan pa'i rim pa gang yin pa de nyid sems can la yang mtshungs te/ 'di ltar sems can yang rtag pa'am mi rtag pa zhig 'khor bar 'gyur grang na/ de'i phyir de la yang rtag pa la ni 'khor ba mi 'thad de/ mi 'gyur ba'i phyir ro//mi rtag pa la yang 'khor ba mi 'thad de bsgrim mi dgos par gtan du 'gags pa'i phyir ro/ /'dir smras pa/ rim pa de ni sems can 'khor ba la mtshungs pa ma yin te/ 'di ltar sems can ni phung po dang skye mched dang khams rnams las de nyid dang / gzhan nyid du brjod par bya ba ma yin zhing rtag pa dang mi rtag pa nyid du yang brjod par bya ba ma yin pas/de'i phyir sems can rtag pa dang mi rtag pa'i skyon dang bral ba 'khor ro/ /bshad pa/ gal te gang zag 'khor zhe na/ /phung po skye mched khams rnams la/ /de ni rnam pa lngas btsal na/ / med na gang zhig 'khor bar 'gyur/ /gal te 'di ltar gang zag 'khor bar sems na/ de ni ches shin tu mi 'thad de/ ci'i phyir zhe na/ gang gi phyir phung po dang skye mched dang khams la de rnam pa lngas btsal na med pa'i phyir te/ khyod kyi rang dga' gang zag dgos pa med pa ri dwags bcos ma lta bu yongs su brtags pa gang yin pa de ni phung po dang skye mched dang khams la rnam pa lngas btsal na dmigs su med de/gang rnam pa lngas btsal na dmigs su med pa de rnams gzhan gang gis yod par bzung ste/ de'i phyir de ni med pa kho na yin no/ /de med na gang zhig 'khor bar 'khor ba de smros shig /yang gzhan yang / nye bar len nas nyer len par/ /'khor na srid pa med par 'gyur/ /srid med nye bar len med na/ /de gang ci zhig 'khor bar 'gyur/ /gal te gang zag 'khor ro zhes brtags na/ de lta na de nye bar len pa nas/nye bar len pa gzhan du 'khor ba na srid pa med par 'gyur ro/ /ci'i phyir zhe na/ 'di ltar nye bar len pa'i dbang gis srid par gdags pa yin na/ de'i nye bar len pa de yang nye bar len pa'i bar skabs su 'jug pa la de med na gang gis srid par gdags par 'gyur te/ de'i phyir de la nye bar len pa med pa'i phyir/srid pa med par thal bar 'gyur ro/ /gang srid pa med pa nye bar len pa med pa gsal bar byed pa med pa tha snyad gdags pa med pa de gang yin zhing nye bar len pa gang du 'khor bar 'gyur te/ gang gi tshe ma blangs pa la nye bar len pa nyid kyang med do//smras pa/ de ni bar ma do'i srid pas nye bar len pa dang bcas pa kho na yin pas/ de'i phyir nye bar len pa dang bcas pa kho nas srid pa gzhan len pas srid pa med par mi 'gyur ro/ /bshad pa/ gang nye bar len pa 'di bor nas bar ma do'i srid pa'i nye bar len pas 'pho ba dang bar ma do'i srid pa'i nye bar len pa yang bor nas de las gzhan pa'i nye bar len par 'pho ba de la yang de'i bar skabs na srid pa med pa dang /nye bar len pa med par 'gyur ba de nyid so na gnas bzhin pas/ de'i phyir sems can yang 'khor bar mi 'thad do/ /da ni/ 'du byed mya ngan 'da' bar ni/ /ji lta bur yang mi 'thad do/ /'du byed rnams mya ngan las 'da' bar ni ji lta bur yang mi 'thad de/ ci'i phyir zhe na/ rtag pa dang mi rtag par thal bar 'gyur ba'i phyir ro/ /de la re zhig gal te 'du byed rnams rtag par yongs su brtags na 'du byed rnams rtag par mi 'gyur ba rnams la mya ngan las 'das pa thob pas ci zhig khyad par du byed par 'gyur/ci ste byed na ni 'gyur ba'i phyir mi rtag par 'gyur ro/ /ci ste 'du byed rnams mi rtag na ni de lta na yang 'jig pa'i chos can yin pa'i phyir 'gags shing med pa rnams la mya ngan las 'da' bar gang gi yin par 'gyur te/de lta bas na 'du byed rnams mya ngan las 'da' bar yang mi 'thad do/ /de la 'di snyam du sems can mya ngan las 'da'o snyam na/ de la bshad par bya ste/ sems can mya ngan las 'da' bar / /ji lta bur yang 'thad mi 'gyur//sems can mya ngan las 'da' bar yang ji lta bur yang 'thad par mi 'gyur te/ ci'i phyir zhe na/ rtag pa dang mi rtag par thal bar 'gyur ba nyid kyi phyir ro/ /de la re zhig gal te sems can rtag par 'gyur na/ rtag par mi 'gyur ba rnams la mya ngan las 'das pa thob pas ci yang byar med pa dang /skyon du mar thal bar yang 'gyur ro/ /ci ste sems can mi rtag par 'gyur na/ de lta na yang mi rtag pa bsgrim mi dgos par 'gags pa la mya ngan las 'das pas yang ci zhig bya zhing mya ngan las 'da' ba gang gis yin par 'gyur/ de la 'di snyam du sems can rtag pa dang mi rtag pa nyid du brjod par bya ba ma yin pa mya ngan las 'das par 'thad par sems na de yang mi rung ste/ ci'i phyir zhe na/ rtag pa dang mi rtag pa nyid du brjod par bya ba ma yin pa de ni nye bar len pa dang bcas pa nyid la 'thad kyi nye bar len pa med pa la ni mi 'thad do//sems can nye bar len pa med pa mya ngan las 'da' bar bya ba yin na nye bar len pa med pa 'ba' zhig pa ci'i phyir rtag pa dang mi rtag pa nyid du brjod par bya ba ma yin par 'gyur/ de la 'di snyam du nye bar len pa med pa ni yod pa nyid dang med pa nyid du brjod par bya ba ma yin no snyam na de la bshad par bya ste/gang yod pa nyid dang med pa nyid du brjod par bya ba ma yin pa de la ji ltar mya ngan las 'da'o zhes brjod par bya/ smras pa/ nye bar len pa med pa gang yin pa de yod pa nyid dang med pa nyid du brjod par bya ba ma yin par 'gyur te/ji ltar nye bar len pa dang bcas pa yod na de nyid dang gzhan nyid du brjod par bya ba ma yin pa bzhin no/ /bshad pa/ gang nye bar len pa med pa gsal bar byed pa med pa de la yod pa nyid du gang gis shes par bya/ ci ste yod na ni gang gis de yod ces shes par bya ba de nyid de'i nye bar len pa yin pas/nye bar len pa dang bcas pa de la ni thar pa mi 'thad pa nyid do/ /de la 'di snyam du gang gi tshe nye bar len pa med pa ni yod pa nyid du brjod par bya ba ma yin no/ /zhes pa de'i tshe gang gis de yod par shes par bya/ zhes rgol ba de ji ltar rung snyam na/ bshad pa/ brjod par bya ba yang gzhan la rnam par shes par bya ba yang gzhan yin pas de'i phyir ji ltar shes par bya zhes smras kyi/ ji skad brjod par bya zhes ni ma smras te/ ri bong gi rwa med pa la ni khyod kyi brjod par bya ba dang brjod par bya ba ma yin pa'i bsam pa med pas/ de'i phyir blos de yod par bzung nas tshig gi skyon spang ba'i phyir brjod par bya ba ma yin no zhes smra grang / ci ste khyod kyi blos kyang de yod pa nyid dang med pa nyid du ma nges na ni/ ci'i phyir brjod par bya ba ma yin no zhes smra/ drang po kho nar rnam par shes par bya ba ma yin no/ /zhes brjod par bya ba'i rigs te/slob dpon 'phags pa lhas kyang / thar la gal te bdag yod rtag /gal te med na mi rtag 'gyur/ /skyes bu brjod par bya min yang / /mkhas pas shes par bya min min/ /zhes gsungs so/ /de lta bas na sems can yang ji ltar yang mya ngan las 'da' bar mi 'thad do//skye 'jig chos can 'du byed rnams/ /mi 'ching grol bar mi 'gyur te/ 'du byed rnams ni 'ching bar yang mi 'thad la thar pa yang mi 'thad do/ /ci'i phyir zhe na/ 'di ltar 'du byed skye ba dang 'jig pa'i chos can skad cig ma re re la skye zhing rang gi ngang gis 'gag pa nges par mi gnas pa rnams ji ltar yang 'ching ba dang thar par mi 'thad pa'i phyir ro//smras pa/ 'du byed rgyun la 'ching ba dang thar pa yod do/ /bshad pa/ gal te 'du byed kyi rgyun zhes bya ba'i dngos po 'ga' zhig yod par gyur na ni khyod 'dod pa ltar 'ching ba 'am/thar par yang 'gyur grang na/ gang gi tshe 'du byed skye ba dang 'gag pa'i rgyu nyid la rgyun zhes bya ba de'i tshe de la ci zhig 'ching zhing ci zhig thar par 'gyur/ ci ste rgyun gyi dngos po zhig yod par gyur na yang / de lta na yang 'du byed yin pa'i phyir dang / skye ba dang 'jig pa'i chos can yin pa'i phyir dang /nges par mi gnas pa'i phyir de la bcings pa dang thar pa 'thad par ga la 'gyur/ de la 'di snyam du 'du byed rnams ni 'ching bar yang mi 'gyur thar par yang mi 'gyur gyi/ sems can ni 'ching ba dang thar par 'gyur ro snyam na/ de la bshad par bya ste/snga ma bzhin du sems can yang / /mi 'ching grol bar mi 'gyur ro/ /sems can yang 'ching bar mi 'gyur/ thar par mi 'gyur ro/ /gal te ji ltar zhe na/ snga ma bzhin du ste/ ji ltar sngar sems can rtag pa la yang 'khor ba dang mya ngan las 'da' ba mi 'thad la/ mi rtag pa la yang mi 'thad par bstan pa de bzhin du 'dir yang sems can rtag par mi 'gyur ba yin na yang 'ching ba mi 'thad cing thar pa yang mi 'thad do//ci ste 'ching ba dang thar par gyur na ni 'gyur ba'i phyir mi rtag par 'gyur ro/ /sems can mi rtag pa la 'gog pa'i chos can nges par mi gnas pa yang bcing ba dang thar par byar mi nus te/'di ltar 'gags shing med pa la ci zhig bcing zhing thar par byar yod do / /'dir smras pa/ sems can gyi nye bar len pa gang yin pa de ni 'ching ba zhes bya la nye bar len pa gtan du nye bar zhi ba gang yin pa de ni thar pa zhes bya zhing /sems can yang rtag pa dang mi rtag pa nyid du brjod par bya ba ma yin pas de'i phyir sems can rtag pa dang mi rtag pa'i skyon dang bral ba la bcings pa dang thar ba 'thad do/ /bshad pa/ gal te nye bar len 'ching na/ /nye bar len bcas 'ching mi 'gyur/ /gal te nye bar len pa 'ching ba yin na de lta na re zhig sems can nye bar len pa dang bcas pa ni 'ching bar mi 'gyur ro//ci'i phyir zhe na/ bcings zin pa kho na'i phyir te/ 'di ltar bcings zin na yang bcing bar bya ci dgos/ de yang 'di snyam du nye bar len pa med pa kho na 'ching bar 'gyur ro snyam na/de la bshad par bya ste/ nye bar len med mi 'ching ste/ /nye bar len pa med na yang de la 'ching ba mi 'thad de/ 'di ltar yang nye bar len pa med pa gang gdags su med pa tha snyad gdags su med pa gsal bar byed pa med pa de ji ltar yod par 'gyur/ gang med pa de ji ltar nye bar len pas 'ching bar 'gyur te/de'i phyir sems can nye bar len pa med pa yang nye bar len pas 'ching bar mi 'thad do/ /'o na da khyod kyi sems can gnas skabs gang zhig 'ching bar 'gyur ba de da smros shig /'dir smras pa/ nye bar len pa 'ching ba ni re zhig gsal bar yod de/'dis 'ching bar byed pas na 'ching ba zhes bya'o/ /de ltar 'ching ba yod pa'i phyir gang des bcing bar bya ba yang yod pa kho na yin no/ /bshad pa/ gal te bcings pa'i snga rol na/ /'ching ba yod na 'ching la rag /de yang med de/ gal te bcings pa de bas snga rol na nye bar len pa 'ching ba de yod par gyur na ni khyod 'dod pa ltar nye bar len pas 'ching bas 'ching bar 'gyur la rag na/bcings pa'i snga rol na de yang med de/ 'di ltar nye bar ma blangs pa ji ltar nye bar len pa yin par 'gyur/ bcings pa'i snga rol na med pa gang yin pa des ji ltar 'ching bar 'gyur te/de lta bas na nye bar len pa yang 'ching ba ma yin no/ /lhag ma ni/ song dang ma song bgom pas bstan/ /'ching ba mi 'thad pa'i lhag ma gang dag yin pa de dag ni song ba dang ma song ba dang bgom pa dag gis bstan par khong du chud par bya ste/ji ltar song ba la 'gro ba med pa dang ma song ba la yang med bgom pa la yang med pa de bzhin du/ bcings pa yang mi 'ching ma bcings pa yang mi 'ching / 'ching bzhin pa yang mi 'ching ngo / /ji ltar song ba la yang 'gro ba'i rtsom pa mi 'thad ma song ba la yang mi 'thad bgom pa la yang mi 'thad pa de bzhin du/bcings pa la 'ching ba'i rtsom pa mi 'thad ma bcings pa la yang mi 'thad/ 'ching bzhin pa la yang mi 'thad do/ /'dir smras pa/ re zhig thar pa ni bcom ldan 'das kyis bstan pa'i dbang du byas pa ste 'gro ba rnam par thar par bya ba'i phyir de bzhin gshegs pa 'jig rten du 'byung bas/de'i phyir re zhig thar pa ni yod do/ /ma bcings pa la yang thar pa med pas bcings pa yang yod pa kho na yin no/ /bshad pa gal te/ thar pa nyid 'thad na ni bcings pa yang yod par 'gyur grang na/ thar pa mi 'thad pas bcings pa 'thad par ga la 'gyur/ ji ltar zhe na/ gang gi phyir/ re zhig bcings pa mi 'grol te/ /'di la re zhig bcings pa gang yin pa de ni mi 'grol lo/ /ci'i phyir zhe na/ 'di ltar bcings pa gang bcings pa'i gnas nyid la 'dug pa de ji ltar grol bar 'thad par 'gyur/ci ste bcings pa nyid 'grol bar 'gyur na ni de lta na 'ga' yang ma grol bar mi 'gyur bas de ni mi 'dod de/ de lta bas na re zhig bcings pa mi 'grol lo/ /smras pa/ bcings pa 'ching ba dang bral ba gang yin pa de grol ba yin no/ /bshad pa/ de la yang de nyid de bcings pa la ni 'ching ba dang bral ba mi 'thad de bcings pa kho na'i phyir ro//smras pa/ 'o na 'ching ba dang bral ba ni grol ba zhes bya'o/ /bshad pa/ ma bcings pa yang 'grol mi 'gyur/ /'di ltar 'ching ba dang bral ba gang yin pa de ni ma bcings pa kho na yin te/ gang ma bcings pa de ni grol ba nyid yin pas de la yang grol bar 'gyur bas ci bya ste/ de bas na ma bcings pa yang grol bar mi 'gyur ro/ /smras pa/ bcings pa ni 'grol te 'di ltar bcings pa grol bar 'gyur ro/ /zhes bya ba de ni 'jig rten na grags pa yin no/ /bshad pa/ de ni 'jig rten na grags pa yin no/ /zhes gang smras pa de ni legs par smras pa yin te/ 'di ltar gang gi phyir 'jig rten na grags pa yin pa de'i phyir don dam pa bsam pa la 'jug par mi 'gyur ro/ /ji ltar zhe na/ gang gi phyir/ bcings pa grol bzhin yin gyur na/ /bcings dang grol ba dus gcig 'gyur//gal te bcings pa 'grol bar 'gyur na/ de ltar 'ching ba gang dang ldan pas bcings pa zhes bya ba dang thar pa gang dang ldan pas grol ba zhes bya ba'i bcings pa dang grol ba gnyis dus gcig par thal bar 'gyur te/ bcings pa dang grol ba mi mthun pa gnyis gcig la gnas par mi 'thad pas de'i phyir bcings pa grol lo//zhes bya ba de ni 'brel pa med pa yin no/ /'dir smras pa/ gal te de ltar thar pa nyid mi 'thad pa yin na 'khor bas 'jigs pa rnams kyi ma yin la bsam pa nam zhig na bdag nye bar len pa med par yongs su mya ngan las 'das par 'gyur zhig gu/nam zhig na yongs su mya ngan las 'das pa bdag gir 'gyur zhig gu snyam pa gang yin pa dang / mya ngan las 'das pa thob pa'i gdams ngag gang yin pa dang / mya ngan las 'das pa thob par bya ba'i phyir yongs su bskyod pa gang yin pa de dag thams cad don med pa nyid du mi 'gyur ram/bshad pa/ thabs ma yin pas don du gnyer ba dang / gdams ngag ston pa dang rtsom pa dag don med pa nyid du 'gyur bar the tshom med de/ 'di ltar bdag nye bar len pa med par yongs su mya ngan las 'da' bar bya'o snyam pa dang /mya ngan las 'das pa bdag gir 'gyur ro snyam du sems pa dag ji ltar mya ngan las 'das pa yin par 'gyur/ gang gi tshe/ bdag ni len med mya ngan 'da'/ /myang 'das bdag gir gyur cig ces/ /gang dag 'dzin pa de dag gi/ /nyer len legs par zin ma yin/ /'di la nye bar len pa gtan du nye bar zhi ba gang yin pa de mya ngan las 'das pa zhes bya na/nye bar len pa thams cad kyi rtsa ba ni bdag dang bdag gir 'dzin pa yin pas/ gang dag bdag nye bar len pa med par yongs su mya ngan las 'da' bar bya'o/ /nye bar len pa med pa'i yongs su mya ngan las 'das pa bdag gir gyur cig snyam du rlom sems su byed pa de dag ni bdag dang bdag gir 'dzin pa yongs su bzung ste nges par gnas pa yin pas/de'i phyir de dag gi bdag dang bdag gir 'dzin pa de nyid nye bar len pa legs par ma zin pa yin no/ /nye bar len pa dang bcas pa la thar pa 'thad par ga la 'gyur te/nye bar len pa med par yongs su mya ngan las 'da' bar 'gyur ba de gang yin zhing yongs su mya ngan las 'da' ba gang gi yin par 'gyur te/ de dag thams cad ni de'i srid pa dang ma rig pas bskyed pa yin no/ /'dir smras pa/ re zhig 'khor ba dang mya ngan las 'das pa dag ni yang yod pa yin te/de dag kyang 'ga' zhig kho na'i yin gyi ci yang med pa'i ma yin pas/ 'khor ba po dang mya ngan las 'da' ba po yang yod de kho bo la ni de tsam gyis chog go/ /bshad pa/ ci khyod snod stong pa srung bar byed dam/ khyod bcings pa dang thar pa mi 'thad pa dag la/ 'khor ba dang mya ngan las 'da' ba yod pa 'dod ko/ /gang la mya ngan 'das bskyed med/ /'khor ba bsal ba'ang yod min pa/ /de la 'khor ba ci zhig yin/ /mya ngan 'das pa'ang ci zhig brtag /'di ltar 'khor ba gang la sems can dang 'du byed bcings pa rnams 'khor ba las bsal cing spang bar bya ste/mya ngan las 'da' ba la bskyed cing 'dzud par mi byed pa de la 'khor ba zhes bya ba ci zhig yin par brtag /gang las 'ga' yang bsal ba ma byas la/ gang la 'ga' yang bskyed pa ma byas pa de la mya ngan las 'das pa de yang ci zhig yin par brtag /yang na 'di ni don gzhan yin te/ 'di ltar gang la 'khor ba yongs su zad par bya ba'i phyir dang mya ngan las 'das pa 'ga' thob par bya ba'i phyir 'bad pa dang ldan pas kyang 'khor ba bsal zhing spang bar mi byed la/ mya ngan las 'das pa yang bskyed cing 'phel bar mi byed pa yang dag pa ma yin pa'i phyir rnam par rtog pa dang bral ba nyid kho nar 'gyur ba de la 'khor ba zhes ci zhig rnam par brtag cing mya ngan las 'das pa zhes kyang ci zhig rnam par bshad/de lta bas na dngos po dang dngos po med par mthong ba dag ni rtag pa dang chad par lta bar thal bar 'gyur ba'i phyir de dag la 'khor ba dang mya ngan las 'das pa dang bcings pa dang thar pa dag mi 'thad kyi/rten cing 'brel par 'byung ba smra ba nyid la ni 'khor ba dang mya ngan las 'das pa bcings pa dang thar pa zhes bya ba dag 'grub bo/ /bcings pa dang thar pa brtag pa zhes bya ba ste/rab tu byed pa bcu drug pa'o// //'dir smras pa/ dngos po dang dngos po med par lta na 'khor ba mi 'thad de/ rtag pa dang chad pa'i skyon du thal bar 'gyur ba'i phyir ro/ /zhes gang bshad pa de mi rung ste/ ci'i phyir zhe na/ las dang 'bras bur 'brel pa'i phyir ro / / las gang zhe na/ bdag nyid legs par sdom pa dang / /gzhan la phan 'dogs byams sems gang / /de chos de ni 'di gzhan du/ /'bras bu dag gi sa bon yin/ /bdag nyid legs par sdom pa ni/ /bdag nyid legs par sdom par byed pa'o/ /gzhan la phan 'dogs pa ni gzhan dag la phan 'dogs par byed pa'o//byams pa ni mdza' bshes la 'byung ba ste gcugs pa las byung ba zhes bya ba'i tha tshig go/ /yang na byams pa ni byams pa nyid de sems snum pa zhes bya ba'i tha tshig ste/ de ni bdag gi don gyi rkyen yin no/ /bdag nyid legs par sdom par byed pa dang /gzhan la phan 'dogs par byed pa dang / byams pa'i sems gang yin pa de ni chos yin no/ /de nyid 'bras bu dag gi sa bon te 'di dang gzhan dag tu 'bras bu dag gi rgyu yin no/ /'di ltar bcom ldan 'das kyis kyang byams pa bsgoms pa na phan yon brgyad yod de/mi rnams dga' bar 'gyur ro/ /zhes rgya cher bka' stsal to/ /las rnam pa gsum car yang chos kyi phyir ro/ /sems pa ni sa bon du bstan te lus dang ngag gnyis de la rag las pa'i phyir ro/ /'di ltar bcom ldan 'das kyis kyang / /yid ni chos kyi sngon du 'gro/ /zhes tshigs su bcad pa bka' stsal to//drang srong mchog gi las rnams ni/ /sems pa dang ni bsam par gsungs/ /las de dag gi bye brag ni/ /rnam pa du mar yongs su bsgrags/ /drang srong mchog sangs rgyas bcom ldan 'das kyis las rnams ni 'di ltar mdor bsdu ba las rnam pa gnyis su gsungs te/sems pa sa bon du gyur pa dang / bsam pa dus phyi ma la rtsom par byed pa gang yin pa'o/ /las rnam pa gnyis po de dag gi bye brag kyang rnam pa du ma yod par bcom ldan 'das kyis de dang der de ltar rnam pa mang por yongs su bsgrags shing bstan no/ /de la las gang sems pa zhes//gsungs pa de ni yid kyir 'dod/ /bsam pa zhes ni gang gsungs pa/ /de ni lus dang ngag gi yin/ /de la las gang sems pa zhes gsungs pa de ni yid kyi yin par 'dod do/ /las gang bsams pa zhes gsungs pa blos 'di bya'o snyam du gsungs nas lus sam ngag gi byed pa de ni lus dang ngag gi yin te gang ma bsams par byas pa ni ma yin no//ngag dang bskyod dang mi spong ba'i/ /rnam rig byed min zhes bya gang / /spong ba'i rnam rig byed min pa/ /gzhan dag kyang ni de bzhin 'dod/ /longs spyod las byung bsod nams dang //bsod nams ma yin tshul de bzhin/ /sems pa dang ni chos de bdun/ /las su mngon par 'dod pa yin/ /de la ngag ces bya ba ni yi ge gsal bar brjod pa'o/ /bskyod pa ni lus g.yo ba ste/ de gnyi ga yang las kyi dbang du byas pa'i phyir las kyi lam du gtogs pa ste/'dir yang las su bgrang ba yin par gzung bar bya'o/ /mi spang ba'i rnam par rig byed ma yin pa zhes bya ba ni mi dge ba'i las 'di zhes bya ba lus sam ngag gis bya'o snyam du mi dge ba'i sems yang dag par blangs pa de tshun chad nas mi dge ba de lus sam ngag gang dag gis mi byed du zin kyang mi dge ba'i sems yang dag par blangs pa'i rgyu las byung ba kho na'i mi dge ba dag skye bar 'gyur ba gang dag yin pa ste/de dag ni mi spong ba'i rnam par rig byed ma yin pa zhes bya ba'i ming 'thob bo/ /spong ba'i rnam par rig byed ma yin pa gzhan dag kyang de bzhin du 'dod de/dge ba'i las 'di zhes bya ba lus sam ngag gis bya'o/ /snyam du dge ba'i sems yang dag par blangs pa de tshun chad nas/ dge ba de lus sam ngag gang dag gis mi byed du zin kyang dge ba'i sems yang dag par blangs pa'i rgyu las byung ba kho na'i dge ba dag skye bar 'gyur ba gang dag yin pa ste/de dag ni spong ba'i rnam par rig byed ma yin pa zhes bya ba'i ming 'thob bo/ /longs spyod pa las byung ba'i bsod nams ni yongs su longs spyod pa'i rgyu las bsod nams byung ba ste/ rgyu las byung ba zhes bya ba ni/ rjes su 'gro ba dang rjes su 'brel pa dang rgyun 'phel ba ste bsod nams nyid do//longs spyod pa las byung ba'i bsod nams ma yin pa yang tshul de bzhin no/ /sems pa zhes bya ba ni sems mngon par 'du byed pa'o/ /de ltar las rnam pa du ma de dag kyang ngag la sogs pa'i chos rnams su 'dus pas de nyid kyi phyir ngag la sogs pa chos bdun po de dag ni las su mngon pa dang las kyi ming can dang /las kyi mtshan nyid dag tu 'dod pa yin no/ /de ltar las rnam pa bdun po de dag 'bras bu dang 'brel pa'i phyir 'khor ba yang 'thad la/ rtag pa dang chad pa'i skyon du yang mi 'gyur ro//bshad pa/ gal te las nyid rtag pa dang chad pa'i skyon du thal bar mi 'gyur na ni de yang skyon du mi 'gyur ba zhig na/ skyon du ni 'gyur bas de'i phyir las rnams nyid kyang mi 'thad pa las dang 'bras bur 'brel pa yang mi 'thad do/ /de ji ltar zhe na/ gal te smin pa'i dus bar du/ /gnas na las de rtag par 'gyur//re zhig gal te las smin pa'i dus kyi bar du gnas pa de bzhin du dus gzhan du yang gnas par 'gyur bas rtag par 'gyur te/ rtag pa ni 'thad pa de ji ltar rnam par smin par 'gyur/ ci ste skyon der gyur na mi rung ngo snyam nas las ni skad cig ma ste/ skad cig ma'i phyir 'gags pa'o snyam na/de la bshad par bya ste/ gal te 'gags na 'gags gyur pa/ /ji ltar 'bras bu bskyed par 'gyur/ /gal te las skad cig ma'i phyir 'gags shing zhig pa yin na des ji ltar 'bras bu skyed par 'gyur/ ci ste las med pas kyang 'bras bu skyed par 'gyur na ni shing pa Ta'i me tog gis kyang gos la dri bsung bsgo bar 'gyur ba zhig na med pa'i phyir bsgo bar mi byed pas/de lta na las 'gags pa dag gis kyang 'bras bu skyed par mi 'gyur ro/ /de lta bas na las rnams rtag pa dang chad pa'i skyon du thal bar 'gyur ba'i phyir/las rnams nyid kyang mi 'thad na/ las dang 'bras bur 'brel pa ltar 'thad par ga la 'gyur/ 'dir smras pa/ las dang 'bras bur 'brel pa ni 'thad pa kho na yin te/ ci'i phyir zhe na/ rgyud kyi rgyun la 'bras bu 'grub pa'i phyir te/ 'di lta ste dper na/ myu gu la sogs rgyun gang ni//sa bon las ni mngon par 'byung / /de las 'bras bu sa bon ni/ /med na de yang 'byung mi 'gyur/ /gang phyir sa bon las rgyun dang / /rgyun las 'bras bu 'byung 'gyur zhing / /sa bon 'bras bu'i sngon 'gro ba/ /de phyir chad min rtag ma yin/ /'di la sa bon ni myu gu'i rgyu bskyed nas 'gag go//myu gu la sogs pa'i rgyun gang yin pa de ni sa bon las mngon par 'byung zhing / rgyun de las 'bras bu mngon par 'byung ngo / /sa bon med na myu gu la sogs pa'i rgyun de yang mngon par 'byung bar mi 'gyur ro/ /gang gi phyir sa bon las rgyun mngon par 'byung la rgyu las 'bras bu mngon par 'byung bar 'gyur zhing /sa bon 'bras bu'i sngon du 'gro ba de'i phyir chad pa dang rtag pa ma yin te/ gang gi phyir sa bon rnam pa thams cad du chad nas rgyun du 'byung ba ma yin gyi rgyun rjes su 'jug pa de'i phyir chad pa ma yin la/ gang gi phyir sa bon 'gag cing nges par mi gnas pa de'i phyir rtag pa yang ma yin no//de ji lta ba de bzhin du/ /sems kyi rgyun ni gang yin pa/ /sems pa las ni mngon par 'byung / /de las 'bras bu sems pa ni/ /med na de yang 'byung mi 'gyur/ /gang phyir sems pa las rgyun dang / /rgyun las 'bras bu 'byung 'gyur zhing //las ni 'bras bu'i sngon 'gro ba/ /de phyir chad min rtag ma yin/ /sems kyi rgyun gang yin pa de ni sems pa las brjod pa gang yin pa 'gag bzhin pa de las mngon par 'byung zhing rgyu de las 'bras bu mngon par 'byung ngo / /sems pa med na sems kyi rgyun de la yang mngon par 'byung bar mi 'gyur ro//gang gi phyir sems pa las su brjod pa las sems kyi rgyun mngon par 'byung la / sems kyi rgyun las 'bras bu mngon par 'byung bar 'gyur zhing las de ni 'bras bu'i sngon du 'gro ba de'i phyir chad pa dang rtag pa ma yin te/ gang gi phyir sems pa 'gag bzhin pa las sems kyi rgyun 'byung gi sems pa rnam pa thams cad du 'gag par mi 'gyur ba de'i phyir chad pa ma yin la/ gang gi phyir sems pa 'gag cing nges par mi gnas pa de'i phyir rtag pa yang ma yin no/ /de'i phyir de ltar rgyun gyis 'bras bu 'grub pas na/'khor ba yang 'thad la rtag pa dang chad pa'i skyon du yang thal bar mi 'gyur ro/ /yang gzhan yang / chos sgrub pa yi thabs rnams ni/ /dkar po'i phyogs kyi lam bcu ste/ /chos kyi 'bras bu 'di gzhan du/ /'dod pa'i yon tan rnam lnga'o/ /'di la bcom ldan 'das kyis chos sgrub pa'i thabs ni dge ba bcu'i las kyi lam rnams yin par bstan la/de'i 'bras bu yang 'di dang gzhan du 'dod pa'i yon tan lnga po dag yin par bstan to/ /de la gal te las rnams dang 'bras bur 'brel pa med par gyur na chos sgrub pa'i thabs bstan par yang mi 'thad la/chos kyi 'bras bu bstan par yang mi 'thad pa zhig na/ bcom ldan 'das kyis de gnyi ga yang bstan pas de'i phyir las dang 'bras bur 'brel pa ni yod pa kho na yin no/ /gzhan dag gis smras pa/ gal te rtag pa der gyur na/ /nyes pa chen po mang por 'gyur//de lta bas na rtag pa de/ /'dir ni 'thad pa ma yin no/ /gal te sa bon dang myu gu'i rgyun 'brel pa bzhin du las dang 'bras bur 'brel par 'gyur ro/ /zhes khyod kyis rtag pa de ltar gyur na/ de lta na nyes pa'i skyon chen po mang du 'byung bar 'gyur ro/ /de la ji snyed cig kyang smra bar nus mod kyi/dpe tsam zhig brjod par bya ste/ 'di la sa bon dang rigs mthun pa'i myu gu'i rgyun 'byung bar 'gyur bas/ de lta na shing a mra'i sa bon las a mra nyid skye'i shing nim pa mi skye la/ shing nim pa'i sa bon las kyang nim pa nyid skye'i shing a mra mi skye ste/de'i phyir shing a mra las kyang / a mra'i 'bras bu nyid skye zhing shing nim pa'i 'bras bu mi skye la/ shing nim pa las kyang nim pa'i 'bras bu nyid skye zhing / shing a mra'i 'bras bu mi skye bas de lta na sa bon dang 'dra ba'i rgyun 'byung gi mi 'dra ba mi 'byung ngo //gal te sems kyi rgyun 'brel pa las 'bras bu 'byung ba yang de dang 'dra bar 'gyur na ni/ mi'i sems las kyang mi'i rgyun kho na 'byung la/ lha'i sems las kyang lha'i rgyun kho na 'byung / dud 'gro'i sems las kyang dud 'gro'i rgyun kho na 'byung bar 'gyur ro/ /de ltar gyur na 'gro ba 'khrug pa med pas rtsom pa thams cad don med pa nyid du 'gyur te/de la nyes pa'i skyon chen po mang du 'byung bar 'gyur bas de ni mi 'dod do/ /dge ba dang / mi dge ba dang / bsgribs pa dang ma bsgribs pa'i lung du ma bstan pa'i bye brag las sems sna tshogs nyid du 'gyur zhing /sems sna tshogs nyid las rgyun sna tshogs nyid du 'gyur/ rgyun sna tshogs nyid las las sna tshogs nyid dang / las sna tshogs nyid las 'gro ba dang rigs dang rus dang yul dang lus dang dbang po dang kha dog dang dbyibs dang stobs dang blo la sogs pa tha dad par 'gyur ba yin na/de yang rtag pa 'dis mi 'thad pas/ de'i phyir skyon chen po mang po du mar thal bar 'gyur bas rtag pa de ni 'dir 'thad pa ma yin no/ /'o na ji lta bur 'thad ce na/ sangs rgyas rnams dang rang rgyal dang / /nyan thos rnams kyis gsungs pa yi//rtag pa gang zhig 'dir 'thad pa/ /de ni rab tu brjod par bya/ /de yang gang zhe na/ ji ltar bu lon dpang rgya ltar/ /de ltar las dang chud mi za/ /'di la las ni skad cig ma ste/ las skad cig ma de'i chud mi za ba zhes bya ba skad cig ma ma yin pa'i chos skye ste/bu lon ji lta ba de ltar ni las blta bar bya la/ dpang rgya ji lta ba de ltar ni chud mi za ba de blta bar bya'o/ /de la dper na bu lon gyi nor de spyad kyang dpang rgya yod pas nor bdag de'i nor chud mi za zhing nor skyed dang bcas te 'ong bar 'gyur ba de bzhin du/ las skad cig ma 'gags su zin kyang /de'i rgyu las byung ba chud mi za'i chos skye ba de yod pas byed pa po'i las kyi 'bras bu chud mi za zhing 'ong bar 'gyur ro/ /ji ltar nor bdag gis nor phyir bkug ste/ 'bras bu spyad zin na dpang rgya yod kyang yang dang yang du nor 'da' bar mi nus pa de ltar/byed pa pos 'bras bu myong zin na chud mi za bas kyang yang dang yang 'bras bu bskyed par mi nus te / de ni khams las rnam pa bzhi/ chud mi za ba'i chos de ni khams las rnam pa bzhir 'gyur te/ 'dod pa gtogs pa dang / gzugs su gtogs pa dang / gzugs med par gtogs pa dang /zag pa med pa'o/ /de yang rang bzhin lung ma bstan/ /de yang rang bzhin gyis dge ba dang mi dge bar lung du ma bstan pa yin no/ /spong bas spang ba ma yin no / /bsgom pas spang ba nyid kyang yin/ /de ni sdug bsngal dang kun 'byung ba dang 'gog pa dang lam mthong bas spang bar bya ba spong bas spang ba ma yin te/de ni 'bras bu gzhan du 'pho ba na bsgom pas spang bar bya ba ma yin no/ /de phyir chud mi za ba yis/ /las kyi 'bras bu bskyed par 'gyur/ /de ltar gang gi phyir de sdug bsngal la sogs pa mthong bas spang bar bya ba dang spong bas spang ba ma yin pa de'i phyir 'bras bu thob zin na yang chud mi za bas las rnams kyi 'bras bu bskyed pa kho nar 'gyur ro//gal te spong bas spang ba dang / /las 'pho ba dang mthun gyur na/ /de la las 'jig la sogs pa'i/ /skyon rnams su ni thal bar 'gyur/ / gal te de sdug bsngal la sogs pa mthong bas spang bar bya ba spong ba dang las 'pho ba dang ris mthun pa yin par gyur na/ de lta na sdug bsngal la sogs pa mthong bas spang bar bya ba bzhin nam las bzhin du de yang spong bar 'gyur bas/ de las 'jig pa la sogs pa'i skyon rnams su thal bar 'gyur ro//'di ltar so so'i skye bos sdug bsngal la sogs pa mthong bas spang bar bya ba'i phra rgyas dag spangs pa na so so'i skye bo'i las gzhan gang dag yin pa de dag kyang spangs par 'gyur ro/ /gzhan du na mthong ba thob pa yang so so'i skye bo'i las dang ldan par 'gyur te/mthong ba thob pa so so'i skye bo'i las dang ldan par gyur pa gang yin pa de ni mi 'dod de/ de la da ni las de dag spangs su zin kyang chud mi za bas las de dag gi rnam par smin pa yongs su bzung ste gnas pas de'i phyir mthong ba thob pa so so'i skye bo'i las dang ldan pa yang ma yin la/las rnams chud za ba de nyid du yang mi 'gyur te rnam par smin par yod pa'i phyir ro/ /de lta bas na de'i sdug bsngal la sogs pa mthong bas spang bar bya ba spong ba las bzhin du spang bar bya ba ma yin te/ 'bras bu gzhan du 'phos na ni spong bar 'gyur ro/ / 'dod par gtogs pa'i chud mi za ba ni/ 'dod pa'i khams las yang dag par 'das pas spong la/ gzugs dang gzugs med par gtogs pa dag kyang gzugs dang gzugs med pa'i khams las yang dag par 'das pas spong ngo / /khams mtshungs las ni cha mtshungs dang //cha mi mtshungs pa thams cad kyi/ /de ni nying mtshams sbyor ba'i tshe/ /gcig pu kho na skye bar 'gyur/ /khams mtshungs pa'i las cha mtshungs pa dang cha mi mtshungs pa thams cad kyi chud mi za ba de'i tshe 'di la re re las skyes pa dag ni nying mtshams sbyor ba'i tshe de dag thams cad 'gag pa na yang gcig pu kho na skye bar 'gyur ro//tshe 'di la ni las dang las/ /rnam pa gnyis po thams cad kyi/ /de ni tha dad skye 'gyur zhing / /rnam par smin kyang gnas pa yin/ /tshe 'di la ni las dang las so so ba sems pa dang bsams pa dang dge ba dang mi dge ba rnam pa gnyis po thams cad kyi chud mi za ba gang yin pa de ni tha dad par skye bar 'gyur ro//rnam par smin na yang gnas pa yin te/ de ni las rnam par smin pa'i rgyus 'gag pa ltar nges pa nyid ma yin no/ /las rnam par smin kyang brgya la ji srid du 'khrugs par ma gyur pa de srid kyi bar du gnas te/'khrugs par gyur na ni 'gag go de gnas su zin kyang yang 'bras bu skyed par ni mi nus te nges par spyad bzhin pa'i dpang rgya bzhin no/ /de ni 'bras bu 'phos pa dang / /shi bar gyur na 'gag par 'gyur//de yi rnam dbye zag med dang / /zag dang bcas par shes par bya/ /las de'i chud mi za ba de'i 'gag pa ni rnam pa gnyis su nges pa yin te/ 'bras bu 'phos par gyur pa dang / shi bar gyur pa'o/ /de la 'bras bu 'phos par gyur pa ni bsgom pas spang ba zhes bstan pa yin no//shi bar gyur pa ni 'gag pa dag na nying mtshams sbyor ba'i tshe gcig pu kho na skye bar 'gyur ro/ /zhes bstan pa yin no/ /de'i de yang rnam par dbye na rnam pa gnyis su shes par bya ste/ zag pa med pa dang zag pa dang bcas pa'i las kyi bye brag gis so//de'i phyir de ltar las rnams skad cig ma nyid yin yang chud mi za ba'i chos kyis yongs su 'dzin pas 'bras bu dang 'brel par 'gyur ro/ /'bras bu dang 'brel ba de yang las kyi bye brag las 'gro ba dang rigs dang / rus dang yul dang dus tha dad pa dag tu lus dang dbang po dang kha dog dang dbyibs dang stobs dang blo la sogs pa tha dad rnams kyis yul sna tshogs kyi bde ba dang /sdug bsngal nyams su myong bar 'gyur ro/ /de'i phyir/ stong pa nyid dang chad min dang / /'khor ba dang ni rtag pa min/ /las rnams chud mi za ba'i chos//sangs rgyas kyis ni bstan pa yin/ /de ltar gang gi phyir las dang 'bras bur 'brel pa de yod pa la sogs pa tha dad pas gnas skabs sna tshogs yin la/ gnas skabs sna tshogs yin yang de nyid dang gzhan nyid du brjod par bya ba ma yin pa de'i phyir ngo bo nyid nges par mi gnas pa dang brjod par bya ba ma yin pas/stong pa nyid kyang 'thad pa yin no/ /stong pa nyid yin yang chad pa'i skyon du yang thal bar mi 'gyur ro/ /'khor ba yang 'thad pa yin no/ /'khor ba yod kyang rtag pa'i skyon du yang thal bar mi 'gyur ro//sangs rgyas bcom ldan 'das sems can rnams kyi las dang rnam par smin pa mngon sum du gyur pa las rnams kyi chud mi za ba'i chos bstan pa gang yin pa de yang 'thad pa yin no/ /de lta bas na rtag pa de nyid 'dir 'thad kyi/ myu gu'i rgyu las 'bras bu 'grub pa bzhin du las kyi 'bras bu 'grub par rtogs pa de ni mi 'thad do//bshad pa/ ci khyod dri za'i grong khyer gyi ra ba 'chos pas g.yen spyo'am/ khyod las mi 'thad bzhin du las kyi 'bras bu'i phyir rtsod ko/ /'di ltar gal te khyed kyis las ngo bo nyid kyis cung zad cig rab tu bsgrubs par gyur na ni des na las yod pa de rgyun 'brel pas sam chud mi za bas 'bras bu dang 'brel par bsam pa yang rigs par 'gyur grang na/gang gi tshe las de nyid ngo bo nyid kyis mi 'thad pa de'i tshe gzhi med pa'i bsam pa 'dis ci zhig bya/de'i phyir stong pa nyid dang / smras pa/ las ji ltar mi 'thad/ bshad pa/ 'di ltar/ gang phyir las ni skye med pa/ /gang gi phyir las la skye ba med pa nyid yin pa de'i phyir mi 'thad de/ 'di ltar ma skyes na ji ltar 'thad par 'gyur ro / /smras pa/ ci'i phyir las skye ba med/ bshad pa/ gang phyir dngos nyid med de'i phyir/ /gang gi phyir las ngo bo nyid med pa de'i phyir skye ba med de/ 'di ltar las kyi ngo bo nyid yod na ni las kyi skye ba 'di yin no/ /zhes skye ba yang 'thad par 'gyur na/ las kyi ngo bo nyid med na ci zhig skye bar 'gyur/ ci ste skye na yang ngo bo nyid du ni skye bar mi 'gyur ro/ /gang ngo bo nyid du skye bar mi 'gyur ba de ni las nyid ma yin te/ las kyi ngo bo nyid med pa'i phyir ro/ /de'i las mi 'thad do/ /smras pa/ las ni skye ba yod pa nyid do/ /ci'i phyir zhe na/ las rnams chud mi za ba'i phyir te/ 'di ltar bcom ldan 'das kyis kyang las rnams chud za ba med do//zhes gsungs pas/ gal te las la skye ba med na chud mi za ba de gang yin par 'gyur/ de lta bas na las ni skye ba yod pa kho na yin no/ /bshad pa/ skye ba yod na chud mi za ba mi 'thad de/ gang phyir de ni ma skyes pa/ / de ni chud zar mi 'gyur ro/ /bcom ldan 'das kyis gang kho na'i phyir las de ma skyes pa de kho na'i phyir chud za bar mi 'gyur ro zhes gsungs so/ /gzhan du skye na ji ltar chud mi za bar 'gyur/ ci ste 'gyur na ni skyes pa yang mi 'chi bar 'gyur ba zhig na skyes pa mi 'chi bar ni mi 'gyur ro//de lta bas na las kyang skyes nas chud mi za bar mi 'gyur ro/ /smras pa/ gang gi tshe kho bos las skad cig ma nyid yin pa'i phyir 'gags kyang chud mi za ba'i chos kyis 'bras bu 'grub par 'gyur ro/ /zhes smras pa de'i tshe/ las skyes na ji ltar chud mi za bar 'gyur zhes bya ba 'di gang gi lan yin/bshad pa/ de ni 'di nyid kyi lan yin te/ gal te khyod kyis las de skad cig ma yin pa'i phyir 'gags na chud mi za ba de gang gi yin te/ gzhi med na chud mi za bar mi 'thad do/ /'di ltar las kyi chud mi za ba yin na/ las de yang 'gags te med na/de med pa'i phyir chud mi za ba yang med de/ de lta bas na 'gag pa'i chud mi za ba zhes bya ba de ni 'gal lo/ /smras pa/ las 'gags na yang rnam par smin pa chud mi za bas skyon med do/ /bshad pa/ de yang mi 'thad do/ /ci'i phyir zhe na/ 'di la las 'dod pa dang mi 'dod pa dag gi 'bras bu 'dod pa dang mi 'dod pa dag byed pa pos 'thob pa ni rnam par smin pa zhes bya ste/de yang tshe 'di'am skyes pa'am lan grangs gzhan la rkyen gyi bye brag de dag gis myong bar 'gyur ba yin na/ ma skyes pa rkyen la ltos pa rkyen la rag las pa de chud mi za bas ji ltar 'dzin par byed ci ste de skyes pa nyid yin na ni des byed pa po la 'bras bu bde ba dang sdug bsngal dag myong bar bya dgos te/de lta yin na ni de la chud mi za bas yang byar ci yod/ ci ste skyes kyang re zhig des byed pa po la bde ba dang sdug bsngal dag myong bar mi byed na ni gang gis de skyes so//zhes bya bar shes par 'gyur ba de'i skyes pa'i mtshan nyid gang yin/ gal te de skyes kyang byed pa po la bde ba dang sdug bsngal dag myong bar mi byed na ni phyis kyang des de la ci yang byed par mi 'gyur zhing / phyis byed pa po la de 'bul bar 'gyur ba yang su zhig yin par 'gyur/de lta bas na de kho na'i don rnam par ma shes nas chud mi za ba'i tshig tsam la dngos por mngon par zhi bar byas nas mang po dang sna tshogs pa dang snying po med pa de snyed cig smras so/ /'di ltar las ni ngo bo nyid med pa kho na yin te/ gang gi phyir ngo bo nyid med pa de'i phyir ma skyes pa yin la/gang gi phyir ma skyes pa de'i phyir chud za bar mi 'gyur te/ de ni de ltar nges par blta bar bya'o/ /gzhan du na/ gal te las la dngos nyid yod/ /rtag par 'gyur bar the tshom med/ /gal te las la ngo bo nyid yod par 'gyur na/ rtag par 'gyur bar the tshom med de/'di ltar rang bzhin ni mi 'gyur ba'i phyir gzhan du 'gyur bar mi 'thad do/ /de'i phyir/ las ni byas pa ma yin 'gyur/ /rtag la bya ba med phyir ro/ /las rtag pa nyid min na ma byas pa nyid du thal bar 'gyur ro/ /ci'i phyir zhe na/ rtag pa la bya ba med pa'i phyir te/ 'di ltar rtag pa mi 'gyur ba'i chos can la ni yang bya ba mi 'thad do/ /las ma byas pa rtag pa'i 'bras bur ji ltar rnam par smin par 'gyur te/ 'di ltar rtag pa la 'gyur ba mi 'thad do/ /ci ste las rtag pa mi 'gyur ba yin yang de'i rgyu las byung ba'i 'bras bu dang phrad par rtog na/de lta na yang / ci ste las ni ma byas na/ /ma byas pa dang phrad 'jigs 'gyur/ /ci ste las ma byas pa yin yang 'bras bu skyed par 'gyur na/ de lta na ma byas pa dang phrad pas 'jigs par 'gyur te/ 'di ltar de las mi dge ba ma byas su zin kyang de la yod pa kho na yin pas des na 'bras bu mi 'dod pa 'ong bar 'gyur bas de la 'jigs pa chen po 'byung bar 'gyur ro//gzhan yang / tshangs spyod gnas pa ma yin pa'ang / /de la skyon du thal bar 'gyur/ /las ma byas pa yin na de la skyon chen po gzhan 'dir yang thal bar 'gyur te/gang gis tshangs par spyod pa ma yin pa ma byas kyang yod pa'i phyir 'ga' yang tshangs par spyod par spyod pa la gnas par mi 'thad pa dang / gang gis tshangs par spyod pa ma yin pa de ma spyad kyang de la tshangs par spyod pa yod pa kho na'i phyir yang tshangs par spyod pa la gnas pa don med par 'gyur bas de'i phyir yang tshangs par spyod pa la gnas pa ma yin par thal bar 'gyur ro//de bzhin du/ tha snyad thams cad nyid dang yang / /'gal bar 'gyur bar the tsom med/ /de ltar las byas pa ma yin na 'jig rten pa 'bras bu'i don du tha snyad rtsom par byed pa zhing las dang nyo tshong dang phyugs btsal ba dang /rgyal po la brten pa la sogs pa dang / de bzhin du rigs pa dang / bzo dang / sgyu rtsal goms par byed pa dang / de dag gi lung 'bogs pa gang dag yin pa de dag thams cad nyid dang yang 'gal bar 'gyur ro//ci'i phyir zhe na/ byed pa dang mi byed pa dag la de dag gi 'bras bu 'ong bar thal bar 'gyur ba'i phyir ro/ /gzhan yang / bsod nams dang ni sdig byed pa'i/ /rnam par dbye ba'ang 'thad mi 'gyur/ /las ma byas pa yin na 'di ni bsod nams byed pa'o//'di ni sdig pa byed pa'o/ /zhes bya ba'i rnam par dbye ba de dag kyang 'thad pa nyid du mi 'gyur ro/ /ci'i phyir zhe na/ dge ba dang mi dge ba'i las ma byas pa thams cad kyang yod par thal bar 'gyur ba dang / de dag gi 'bras bu yang 'thob par thal bar 'gyur ba'i phyir ro//yang gzhan yang / de yi rnam smin smin par 'gyur/ /yang dang yang du rnam smin 'gyur/ /gal te gang phyir las gnas pa/ /de phyir ngo bo nyid yod phyir/ /gal te las de ngo bo nyid yod pa yang yin la 'bras bu skyes par 'gyur ba yang yin na/de lta na de'i rnam par smin pa smin zin par gyur kyang yang dang yang du rnam par smin par 'gyur ro/ /ci'i phyir zhe na/ gang gi phyir las nges par gnas pa yin na de'i phyir ngo bo nyid yod pas/ ji ltar de sngon ngo bo nyid nges par gnas pa na/ 'bras bu bskyed par gyur pa de bzhin du/da ltar yang nges par gnas pas/ de'i phyir des na yang 'di na gzhan du 'bras bu bskyed par bya dgos so/ /yang na ni nges par gnas par 'dra yang gang gis sngon ni 'bras bu bskyed par gyur pa la de ni yang dang yang du skyed par mi byed do/ /zhes bya ba'i khyad par gyi gtan tshigs bstan par bya dgos so//smras pa/ khyod ni las ngo bo nyid yod pa'i skyon yang dag par rdzogs pa 'ba' zhig byed par zad kyi/ 'di ltar na las ngo bo nyid med do/ /zhes bya ba ni cung zad kyang mi ston na/ de'i phyir gal te gang gis las de ngo bo nyid med do zhes kho bo yid ches par 'gyur ba las ngo bo nyid med du ston pa'i rigs pa 'ga' zhig yod pa lta na de ston cig /bshad pa nyon cig /las 'di nyon mongs bdag nyid na/ /nyon mongs de dag yang dag min/ /gal te nyon mongs yang dag min/ /las ni de yi ji ltar byas//las zhes bya ba gang yin pa 'di ni nyon mongs pa'i rgyu las byung ba ste/ 'di ltar nyon mongs pa can gyi sems dang ldan pa'i lus dang ngag dang yid kyis byed pa ni las zhes bya'o/ /de lta na nyon mongs pa'i rgyu las byung ba nyon mongs pa'i rang bzhin can nyon mongs pa'i bdag nyid can yin pas ngo bo nyid kyis yod pa ma yin no//nyon mongs de dag yang dag min/ /zhes bya ba'i las gang gi bdag nyid yin pa'i nyon mongs pa de dag kyang yang dag par yod pa ma yin no/ /de'i dngos po ni yang dag pa ste nyon mongs pa'i dngos po nyid du yod pa ma yin pas ngo bo nyid kyis yod pa ma yin no//zhes bya ba'i tha tshig ste/ 'og nas kyang / gang dag sdug dang mi sdug pa'i/ /phyin ci log la rten 'byung ba/ /de dag ngo bo nyid las med/ /de phyir nyon mongs yang dag med//ces 'byung ba'i phyir ro/ /gal te las gang gi bdag nyid yin pa'i nyon mongs pa de dag yang dag pa ma yin zhing / ngo bo nyid kyis yod pa ma yin na/ /'o na da las ci zhig gi bdag nyid du 'gyur te/ gang gi phyir las ni nyon mongs pa'i rgyu las byung ba yin la/nyon mongs pa rnams ni phyin ci log gi rgyu las byung ba yin pa de'i phyir las dang nyon mongs zhes smra'o/ /smras pa/ las dang nyon mongs pa dag ni ngo bo nyid yod pa kho na yin te/ ci'i phyir zhe na/ de dag gi 'bras bu ngo bo nyid yod pa nyid yin pa'i phyir ro//'di la las dang nyon mongs pa dag ni lus rnams kyi rkyen du bstan la lus rnams ni ngo bo nyid yod pa yin pas de phyir 'bras bu ngo bo nyid yod pa yin pa'i phyir las dang nyon mongs pa dag ngo bo nyid yod pa kho na yin no/ /bshad pa/ las dang nyon mongs pa dag ni//lus rnams kyi ni rkyen du bstan/ /gal te las dang nyon mongs pa/ /de stong lus la ji ltar brjod/ /'di la khyod kyi las dang nyon mongs pa dag ni lus rnams kyi rkyen du bstan la/ zhes smras pa/ 'bras bu grub pas rgyu 'grub par 'dod la rgyu 'grub pa'i rigs pa gzhan ni cung zad kyang mi ston te/kho bo cag gis lus kyi rgyu las de dang nyon mongs pa de dag rten cing 'brel par 'byung ba'i phyir/ ngo bo nyid stong ngo / /zhes bstan pas/ 'bras bu ni rgyu'i yon tan gyi bdag nyid can du 'dod par bya ba yin pas de'i phyir gal te lus kyi rgyu las dang nyon mongs pa dag nyid stong zhing de dag stong na lus ngo bo nyid yod do//zhes bya ba de ji ltar brjod de/ lus ngo bo nyid yod pa nyid do/ /zhes bya ba'i tshig de ni gtsigs pa ma yin pa nyid du nges so/ /smras pa/ las ni yod pa kho na yin te/ ci'i phyir zhe na/ las kyi 'bras bu la longs spyod pa'i za ba po yod pa'i phyir ro/ /'di la bcom ldan 'das kyis de dang de dag tu/ ma rig bsgribs pa'i sems can dag /sred pa'i kun tu sbyor dang ldan/ /zhes kyang gsungs la/ gzhan yang ci ste khyod rang nyid kyis sdig pa'i las 'di byas na/khyod rang nyid kyis de'i rnam par smin pa nyams su myong bar bya dgos so/ /zhes kyang gsungs pa/ de'i phyir/ ma rig bsgribs pa'i skye bo gang / /sred ldan de ni za ba po/ /ma rig pas bsgribs pa'i sems can sred pa'i kun tu sbyor ba dang ldan pa dang zhes gang gsungs pa dang /khyod rang nyid kyis de'i rnam par smin pa nyams su myong bar bya dgos so zhes gang gsungs pa de ni las kyi 'bras bu la longs spyod pa'i za ba po yin te/ de'i phyir re zhig las kyi 'bras bu la longs spyod pa'i za ba po 'thad pas med pa'i 'bras bu yang med la byed pa po med pa'i las kyang mi 'thad pas/za ba po yod pa'i phyir byed pa po dang las dag kyang rab tu grub pa yin no/ /de yang byed las gzhan min zhing / /de nyid de yang ma yin no//da ni las kyi 'bras bu la longs spyad pa'i za ba po de yang las de'i byed pa po las gzhan ma yin te/ rang gi rnam par smin pa nyams su myong bar 'gyur ro/ /zhes gsungs pa'i phyir ro/ /gzhan ma yin pa yang ma yin te/ nye bar len pa gzhan yin pa'i phyir ro//de lta na 'khor ba yang 'thad la rtag pa dang chad pa'i skyon du yang thal bar mi 'gyur ro/ /bshad pa/ ci khyod rtsig rmang ma bres par pu shu 'dogs par byed dam/ khyod byed pa po dang las dang 'bras bu dag rab tu ma grub bzhin du las kyi 'bras bu la longs spyod pa'i za ba po sgrub par byed ko//'di ltar byed pa po dang las dang 'bras bu dag nyid mi 'thad na za ba po 'thad par ga la 'gyur/ ji ltar zhe na/ gang gi phyir na las 'di ni/ /rkyen las byung ba ma yin zhing / /rkyen min las byung yod min pa//de phyir byed pa po yang med/ /gang gi phyir rten cing 'brel par 'byung ba smra ba rnams la las 'di zhes bya ba de rkyen las byung ngo zhes bya ba mi srid la/ rgyu med pa las byung bar smra ba rnams la yang las 'di zhes bya ba de rgyu med pa las byung ngo //zhes bya ba mi srid pa de'i phyir/ las ni re zhig rkyen las byung ba yang yod pa ma yin zhing / rkyen ma yin pa las byung ba yang yod pa ma yin no/ /gang gi phyir las yod pa ma yin pa de'i phyir las med pa'i byed pa po yang med do/ /gal te las dang byed med na//las skyes 'bras bu ga la yod/ /ci ste 'bras bu yod min na/ /za ba po lta ga la yod/ /gal te brtags na las kyang med la byed pa po yang med de/ de dag med na las las skyes pa'i 'bras bu lta yod par ga la 'gyur/ ci ste 'gyur na ni las las skyes pa'i 'bras bu ma yin pa dang /rgyu med pa las byung ba'i 'bras bur 'gyur bas de ni mi 'dod de skyon du mar thal bar 'gyur ba'i phyir ro/ /da ci ste 'bras bu med na za ba po yod par ga la 'gyur te/ 'di ltar 'bras bu'i za ba por 'gyur ba yin na 'bras bu de yang mi 'thad de/de med na de gang gi za ba por 'gyur/ de lta bas na byed pa po dang las dang 'bras bu dang za ba po yod do/ /zhes bya ba de ni slu ba'i tshig tsam du zad do/ /byed pa po dang las dang 'bras bu dang za ba po dag mi 'thad na/'khor ba ji ltar 'thad par 'gyur/ smras pa/ ci byed pa po dang las dang 'bras bu dang za ba po dang nyon mongs pa dag med do/ /zhes bya ba de shin tu nges pa yin nam/ bshad pa/ gang la rten cing 'brel par 'byung ba de la yod do zhe'am/ med do zhes smra bar ga la rigs/smras pa/ da 'dir dngos po yod pa gang yin/ bshad pa/ dngos po yod pa ga la yin te/ dngos po yod par 'dzin pa bzlog pa'i phyir dpe zung shig /ji ltar sprul pa ston byed pa/ /rdzu 'phrul phun sum tshogs pa yis/ /sprul zhing sprul pa'ang gzhan sprul byed//sprul pa des kyang gzhan dag ltar/ /de bzhin byed pos las gang byas/ /de yang sprul pa'i rnam pa bzhin/ /dper na sprul pas sprul gzhan zhig /sprul pa mdzad pa de bzhin no/ /nyon mongs las dang lus rnams dang / /byed pa po dang 'bras bu dag /dri za'i grong khyer lta bu dang / /smig rgyu rmi lam 'dra ba yin/ /de'i phyir de ltar sprul pa byed pa dang / sprul pa dang / dri za'i grong khyer dang / sgyu ma dang / smig rgyu dang / rmi lam lta bu'i las dang / nyon mongs pa dang lus dang byed pa po dang 'bras bu dang za ba po dag la/yongs su rtog pa dang ldan pa yang dag par smras pa yod do/ /zhe'am med do zhes ji ltar smra bar nus te/ 'di ltar dngos po dang dngos po med par rtog pa thams cad ni rtag pa dang chad pa'i skyon dang rjes su 'brel pa yin la/ rten cing 'brel par 'byung ba ni dngos po dang dngos po med par lta ba dag las phyi rol du gyur pa yin pas/de'i phyir rtag pa dang chad par lta ba'i skyon las rnam par grol ba yin no/ /de lta bas na kho bos dngos po brten nas gdags pa yin no/ /zhes shin tu nges par byas pa de gzung bar bya'o//de lta na byed pa po dang las dang 'bras bu dang za ba po dang nyon mongs pa dang lus bstan pa dag kyang 'thad la/ rtag pa dang chad pa'i skyon du yang thal bar mi 'gyur zhing 'khor ba yang 'grub bo/ /las dang 'bras bu brtag pa zhes bya ba ste/rab tu byed pa bcu bdun pa'o// //dbu ma rtsa ba'i 'grel pa bud d+ha pA li ta / bam po bdun pa/ smras pa/ gal te dngos po dang dngos po med par lta ba rtag pa dang chad pa'i skyon du thal bar 'gyur bas de kho na ma yin na/ khyod kyi de kho na gang yin pa dang ji ltar de kho na rtogs par 'gyur ba de smros shig /bshad pa/ dang po brtsams tshun chad nas de kho na rab tu bstan par byas so/ /mdor na phyi dang nang la bdag med pa bdag gi med pa nyid du lta ba gang yin pa de ni de kho na'i dam pa yin la/ de kho na'i lta ba bsgoms pas ni de kho na rtogs par 'gyur ro//smras pa/ ji ltar phyi dang nang la bdag med pa dang / bdag gi med pa nyid du lta bar 'gyur/ bshad pa/ 'di la de kho na mthong bar 'dod pa yongs su rtog pa dang ldan pas 'di ltar so sor yang dag par brtag par bya ste/bdag ces bya ba gang yin pa de ci phung po rnams nyid dam/ 'on te phung po rnams las gzhan zhig min / bdag de ni phung po rnams nyid dam/ phung po rnams las gzhan zhig tu 'gyur ba de tsam du zad de/ 'dir rnam pa gzhan du smra ba gang dag yin pa de dag thams cad kyang gzhan dang gzhan ma yin pa nyid du smra ba kho nar 'dus te/gnyi ga ltar yang mi 'thad do/ /ci'i phyir zhe na/ gal te phung po bdag yin na/ /skye dang 'jig pa can du 'gyur/ /gal te phung po rnams las gzhan//phung po'i mtshan nyid med par 'gyur/ /re zhig gal te phung po rnams nyid bdag nyid yin par gyur na/ de lta na skye ba dang 'jig pa'i chos can du 'gyur te/ phung po rnams skye ba dang 'jig pa'i chos can yin pa'i phyir ro/ /de la bdag mang po nyid du yang thal bar 'gyur la/bdag tu smra ba don med pa nyid du yang 'gyur te/ bdag ces bya ba ni phung po'i rnam grangs tsam du zad pa'i phyir ro/ /de lta bas na re zhig phung po rnams nyid bdag yin no/ /zhes bya ba mi 'thad do/ /ci ste yang phung po rnams las gzhan yin par gyur na/de lta na phung po'i mtshan nyid ma yin par 'gyur te/ phung po rnams ni skye ba dang 'jig pa'i mtshan nyid yin pas/ de bas na bdag phung po rnams las gzhan pa'i phyir skye ba dang 'jig pa'i mtshan nyid ma yin par 'gyur ro//de lta bas na rtag par 'gyur te/ bdag rtag pa yin na rtsom pa thams cad don med pa nyid du 'gyur te/ 'di ltar rtag pa mi 'gyur ba la ci zhig byar yod/ de lta na yang bdag yod par rtog pa don med pa nyid du 'gyur te/ de la cung zad kyang 'jug pa'am/ldog par mi 'gyur ro/ /de lta bas na bdag phung po rnams las gzhan par yang mi 'thad do/ /de de ltar blo gros nges nas kyang so so yang dag par rtog par byed de/ bdag nyid yod pa ma yin na/ /bdag gi yod par ga la 'gyur/ /brtags na gal te bdag nyid rnam pa thams cad du mi 'thad na bdag gi yod par ga la 'gyur/'di ltar bdag ces bya ba'i gang yin pa de bdag gi zhes bya na/ bdag de yang med de de med na de'i 'di yin no zhes bya bar ji ltar 'thad par 'gyur/ de lta bas na bdag gi yang mi 'thad do//de ltar phyi dang nang la bdag dang bdag gir mi lta ba de ni de kho na mthong ba yin te/ de de sgom par byed cing brtan par byed do/ /de sgom par byed cing brtan par byed pa de'i bdag dang bdag gir mngon par zhen pa nye bar zhi bar 'gyur bas/ bdag dang bdag gi zhi ba'i phyir//ngar 'dzin nga yir 'dzin med 'gyur/ /de ltar bdag dang bdag gir mngon par zhen pa nye bar zhi ba'i phyir de la ngar 'dzin pa dang / nga yir 'dzin pa med par 'gyur ro/ /smras pa/ gang gis de ltar yang dag pa ji lta ba bzhin du mthong ba na ngar 'dzin pa dang nga yir 'dzin pa med par 'gyur ro//zhes bya ba ste / de nyid bdag yin pas de yod pa'i phyir bdag dang bdag gi yang nges pa kho nar yod pa yin no/ /bshad pa/ ngar 'dzin nga yir 'dzin med gang / /de yang yod pa ma yin te/ /ngar 'dzin nga yir 'dzin med par/ / gang gis mthong bas mi mthong ngo / /de ltar ngar 'dzin pa med pa dang / nga yir 'dzin pa med pa zhes bya ba gang yin pa de yang yod pa ma yin te/ de ni nye bar len pa la brten nas gdags pa yin par ston te/ 'di ltar bcom ldan 'das kyis kyang tshe dang ldan pa 'di'i ming ni 'di zhes rus ni 'di zhes bya zhes bya ba gang yin pa de ni nye bar len pa ma gtogs par gang zag gi ming dang rus dag med do zhes gsungs so//de lta bas na nye bar len pa'i dbang kho nas brjod par zad kyi/ gang ngar 'dzin pa med pa dang nga yir 'dzin pa med par 'gyur ba gzhan de ni 'ga' yang med do//ci ste yod na ni de yod na ji ltar ngar 'dzin pa med pa dang nga yir 'dzin pa med par 'gyur/ ci ste de dag yod kyang 'gyur na ni de lta na de'i de dag log par lta ba kho nar 'gyur gyi de kho na mthong ba ma yin te/slob dpon 'phags pa lhas kyang / gal te bdag ces bya ba yod/ /bdag med ces bya de mi rigs/ /yang na de nyid rtogs pa 'am/ /mya ngan 'da' ba des brdzun 'gyur/ /zhes gsungs so/ /de lta bas na ngar 'dzin pa med pa dang / nga yir 'dzin pa med par gang gis mthong ba log par lta ba blo gros kyi mig nyams pa des ni de kho na mi mthong ba nyid do//nang dang phyi rol nyid dag la/ /bdag dang bdag gi zad gyur na/ /nye bar len pa 'gag 'gyur zhing / /de zad pas na skye ba zad/ /da nang dang phyi rol nyid dag la de'i bdag ces bya ba dang /bdag gi zhes bya bar de dag la log par 'dzin pa zad par gyur na nye bar len par byed pa gang yin pa de med cing nye bar blang bar bya ba gang yin pa de yang med pas/ nye bar len pa rnam pa bzhi yang 'gag par 'gyur zhing / nye bar len pa 'gags pas srid pa 'gag /srid pa 'gags pas skye ba zad par 'gyur ba de ni thar pa zhes bya'o/ /de ltar yang dag pa ji lta ba bzhin du mthong ba des de kho na rtogs pa yin la/ de kho na rtogs pas thar bar 'gyur ro/ /las dang nyon mongs zad pas thar/ /las dang nyon mongs rnam rtog las//de dag spros las spros pa ni/ /stong pa nyid kyis 'gag par 'gyur/ /'di la las dang nyon mongs pa dag ni skye ba'i rgyu yin pa'i phyir las dang nyon mongs pa zad pas thar pa zhes bya'o/ /las dang nyon mongs pa de dag kyang yang dag pa ma yin pa'i rnam par rtog pa las byung ba yin gyi ngo bo nyid kyis yod pa ni ma yin no//nyon mongs pa ni tshul bzhin ma yin par rnam par rtog pa las byung ba yin te/ ji ltar yul gcig kho na la yang la la ni chags par 'gyur/ la la ni sdang bar 'gyur/ la la ni rmongs par 'gyur bas/de'i phyir nyon mongs pa rnams ni rnam par rtog pa las byung ngo / /nyon mongs pa can gyi sems dang ldan pa'i lus dang ngag dang yid kyis mngon par 'du byed pa dag ni las zhes bya ste/ 'di ltar bcom ldan 'das kyis kyang gang zag mi rigs pa dang ldan pa 'di ni bsod nams las byung ba'i mngon par 'du bya ba dag kyang mngon par 'du byed do//zhes rgya cher bka' stsal to/ /de lta bas na las dang nyon mongs pa dag ni yang dag pa ma yin pa'i rnam par rtog pa'i rgyu las byung ba yin no/ /da yang dag pa ma yin pa'i rnam par rtog pa de dag ni spros pa las byung ba yin te 'jig rten pa'i spros pa las byung ngo //'jig rten pa'i rnyed pa dang / ma rnyed pa la sogs pa'i chos rnams la 'di bden no snyam du mngon par zhen pa'i blo can dag de dang de la rnam par rtog par byed pas de'i phyir rnam par rtog pa dag ni spros pa las byung ngo //spros pa ni stong pa nyid kyis 'gag par 'gyur te / de'i rnyed pa dang ma rnyed pa la sogs pa 'jig rten pa'i spros pa ni stong pa nyid kyis 'gag par 'gyur ro/ /dngos po'i ngo bo nyid stong pa nyid du rtogs par 'gags te/stong pa nyid rtogs nas 'gag go/ /de lta bas na stong pa nyid ni de kho na yin la stong pa nyid bsgoms pa kho nas ni de kho na rtogs par 'gyur zhing / de kho na rtogs pa nyid ni thar pa zhes bya ste/ slob dpon 'phags pa lhas kyang / mdor na chos ni mi 'tshe ste/ /mya ngan 'das pa stong pa nyid//'di la de gnyis 'ba' zhig ces/ /de bzhin gshegs pa rnams kyis gsungs/ /zhes gsungs so/ /smras pa/ gal te de ltar bdag dang bdag gi med na ji ltar sangs rgyas bcom ldan 'das rnams kyis de dang der bdag bstan pa mdzad /bshad pa/ bdag med pa kho na'o/ /zhes bya ba de yang mi smra ste/ 'og nas kyang / de ltar len las gzhan ma yin/ /de ni nyer len nyid kyang min/ /bdag ni nye bar len med min/ /med pa nyid du'ang de ma nges/ /zhes 'byung ngo / /'on kyang sangs rgyas bcom ldan 'das sems can rnams kyi bsam pa dang bag la nyal mkhyen pa la mkhas pa rnams kyis gdul bya rnams kyi mngon par zhen pa bzlog pa'i phyir/bdag go zhes kyang btags gyur cing / /bdag med ces kyang bstan par gyur//sangs rgyas rnams kyis bdag dang ni/ /bdag med 'ga' yang med par bstan/ /de la gdul bya gang dag la 'jig rten 'di med do/ /'jig rten pha rol med do/ /sems can rdzus te skye ba med do snyam pa'i lta ba de lta bu byung bar gyur pa/ log par 'dzin pa la mngon par zhen pas sems rmongs pa/'jig rten pha rol la mi ltos pa/ 'jig rten gyi tshul las 'da' bas mi 'dzem pa/ sems can dmyal ba'i g.yang sa chen po la mngon par phyogs pa de dag gi bdag med par lta ba bzlog pa'i phyir bdag go zhes kyang btags so//gdul bya gang dag la las dge ba dang mi dge ba rnams kyi byed pa po dang de dag gi 'bras bu 'dod pa dang mi 'dod pa dag za ba gang yin pa dang / gang gis bcings pa dang thar ba dag ston par byed pa'i bdag ces bya ba de ni 'ga' zhig yod do/ / gzhan du na bdag med na de dag thams cad don med pa nyid du 'gyur ro snyam pa'i lta ba de lta bu byung bar gyur pa/ 'khor ba'i rgya mtsho chen por ltung ba/ ngar 'dzin pa dang nga yir 'dzin pa'i chu srin 'dzin khris zin pa/ lta ba'i chu bos sems g.yengs pa/ srid pa'i bde ba la chags pa de dag gi bdag tu lta ba bzlog pa'i phyir bdag med do//zhes kyang bstan to/ /gdul ba bzang po gang dag dge ba'i tshogs yongs su smin pa/ srid pa'i chu bo las brgal bar nus pa/ don dam pa'i gtam gyi snod du gyur pa de dag la/ sangs rgyas bcom ldan 'das don dam pa'i de kho na ston pa rnam par 'dren pa chen po rnams kyis sgyu ma 'di ni byis pa 'drid pa ste/'di la bdag dang bdag med pa 'ga' yang med do/ /zhes ston te/ slob dpon 'phags pa lhas kyang / med dang yod dang gnyi ga dang //gnyi ga min pa'ang ston mdzad de/ /nad kyi dbang gis nges par ni/ /sman ni 'phrod par 'gyur ba bzhin/ /zhes gsungs so/ /yang na 'di ni gzhan te de kho na mthong ba la rgyab kyis phyogs pa/ thams cad shes pa ma yin par thams cad mkhyen par mngon pa'i nga rgyal can/rang gi rtog ge'i rjes su 'brang ba bdag med na 'di dag thams cad mi 'thad do/ /zhes skrag pa kha cig gis bdag go zhes kyang btags so/ /de bzhin du blo gros rnam par rmongs pa med pa dag gis 'jig rten na phung por byed pa/ las dang 'gro ba lkog tu gyur pa gzhan dag gis bdag med do zhes kyang bstan to//sangs rgyas bcom ldan 'das sgrib pa med pa'i rnam par thar pa'i mkhyen pa brnyes pa thams cad mkhyen pa thams cad gzigs pa rnams kyis ni/ 'gro ba la phan gdags par bzhed pas de gnyi ga yang med do//zhes nges par gsal te/ dbu ma'i lam bdag dang bdag med pa ma yin pa 'di yod pas 'di 'byung la/ 'di med na 'di mi 'byung ngo / /zhes bya ba nyid bstan to/ /'dir smras pa/ spros pa ni stong pa nyid kyis 'gag par 'gyur ro/ / zhes gang smras pa de la rigs pa gang yin/ 'dir bshad pa/ brjod par bya ba ldog pa ste/ gang gi phyir dngos po rnams stong par mthong na/ brjod par bya ba nyid ldog par 'gyur ba de'i phyir spros pa ni stong pa nyid kyis 'gag par 'gyur te/ 'di ltar brjod par bya ba yod na de la brten nas spros pa yod par 'gyur gyi/brjod par bya ba med na gzhi med pa'i spros pa ji ltar yod par 'gyur/ smras pa/ de'i brjod par bya ba ji ltar ldog par 'gyur/ bshad pa/ sems kyi spyod yul ldog pas so/ /sems kyi yul ni gzugs la sogs pa yul rnams te/gang gi phyir de'i sems kyi spyod yul gzugs la sogs pa dag log par gyur pa de'i phyir brjod par bya ba ldog par 'gyur te/ 'di ltar brjod par bya ba ni gzugs la sogs pa dag yin na de lta na ni ci zhig brjod par bya/ smras pa/ de'i sems kyi spyod yul gzugs la sogs pa dag ji ltar ldog par 'gyur/ bshad pa/ ma skyes pa dang ma 'gags pa/ /chos nyid mya ngan 'das dang mtshungs/ /gang gi phyir des yang dag pa ji lta ba bzhin du mthong ba ma skyes pa dang ma 'gags pa'i chos nyid mya ngan las 'das pa dang mtshungs par rab tu shes pa de'i phyir de'i sems kyi spyod yul ldog par 'gyur ro//de lta bas na spros pa ni stong pa nyid kyis 'gag par 'gyur te/ slob dpon 'phags pa lhas kyang / srid pa'i sa bon rnam shes te/ /yul rnams de yi spyod yul lo//yul la bdag med mthong na ni/ /srid pa'i sa bon 'gag par 'gyur/ /zhes gsungs so/ /smras pa/ gang 'jig rten 'di med do/ /'jig rten pha rol med do/ /sems can rdzus te skye ba med do/ /zhes bya ba la sogs par lta ba de dang /gang dngos po thams cad ma skyes pa dang ma 'gags pa zhes bya bar lta ba de gnyis la khyad par ci yod/ bshad pa/ de gnyis la khyad par shin tu che na/ khyod ni stong pa nyid kyi don rnam par mi shes nas de gnyis 'dra'o snyam du sems so/ /'di la so sor ma brtags par btang snyoms byed pa gang yin pa dang /so sor brtags nas btang snyoms byed pa gang yin pa de gnyis btang snyoms byed par ni 'dra mod kyi so sor ma brtags par btang snyoms byed pa ni ma rig pa'i kun tu sbyor ba dang ldan par bstan la/ btang snyoms byed pa cig shos ni sangs rgyas bcom ldan 'das rnams kyis kun tu bsten pa yin pas/de gnyis la khyad par shin tu che ba de bzhin du/ 'di la yang 'jig rten 'di med do zhes bya ba la sogs pa de ltar mthong ba ni ma rig pas kun tu rmongs pa'i sems dang ldan pa yin gyi/dngos po thams cad ngo bo nyid kyis stong pa'i phyir ma skyes pa dang ma 'gags par mthong ba cig shos ni shes pa sngon du btang ba yin pas/ de gnyis la khyad par shin tu che'o/ /gzhan yang med pa de nyid ma mthong ba bzhin du 'jig rten 'di med do/ / zhes tshig 'ba' zhig brjod pa de la ni/ dper na dmus long phyogs 'di la bde'o/ /zhes brjod kyang mig med pa'i phyir mi mthong bas der 'khrul ba dang / brdeg 'cha' bar 'gyur ba de bzhin du/ de yang 'jig rten 'di med do/ /zhes brjod kyang shes pa'i mig med pa'i phyir mi mthong bas/skyon de dag gis gos par 'gyur ro/ /gzhan yang dper na kha cig rtsod pa na don bden par 'gyur ba kho na la che bzhi gnyis ston par gyur la/ de na gcig ni don de mngon sum du mthong ba yin la gnyis pa ni don de mngon sum du mthong bar gyur pa ma yin zhing nor ngo'am mdza' ngos gnyer ba zhig yin te/de gnyi ga yang don de la smrar bcug pa na/ de la gcig gis don de ji ltar bden pa de ltar smras su zin kyang don de mngon sum du yang ma gyur pa'i phyir brdzun du yang 'gyur la chos ma yin pa dang mi snyan pa dang yang ldan par 'gyur ro//cig shos kyis ni don de smras pa na don de mngon sum du gyur pa'i phyir bden par smra ba yang yin la chos dang snyan pa dag dang yang ldan par 'gyur ba de bzhin du/ dngos po thams cad stong pa yin zhing stong pa'i phyir ma skyes pa dang ma 'gags pa de yin du zin kyang /de gang la mngon sum gyi shes pa yod pa de nyid legs pa dang ldan cing bsngags pa ma yin gyi/ cig shos ni stong pa nyid mngon sum du ma gyur pa'i phyir lta ba'i skyon gyis kyang gos la mkhas pa rnams kyis smad par yang 'gyur bas/ de'i phyir de gnyis ni khyad par shin tu che ste/ slob dpon sgra gcan zin bzang pos shes rab kyi pha rol tu phyin pa la bstod pa las kyang / khyod nyid mthong na 'ching 'gyur te/ /ma mthong na yang 'ching bar 'gyur/ /khyod nyid mthong na grol 'gyur te/ /ma mthong na yang grol bar 'gyur//zhes gsungs so/ /de lta na 'di ni de kho na nyid shes pa'i blo gros kyi mig dri ma med pa dang ldan pa'i yul yin gyi/ 'di ma rig pa'i mun pa chen pos blo gros kyi mig bsgribs pa dang ldan pa'i yul ni ma yin no/ /gzhan yang khyod mkhas par rlom pa nyid kyi blo sngon du btang ste lta ba sems par mtshungs shing kho bo la rgol bar byed kyi/yod pa nyid dang med pa nyid du smra ba rnams la ni mi byed pa de la yang khyad par yod par bshad par bya ste/ ji ltar zhe na/ yod pa dang med pa nyid du brjod pa ni lta ba'i dbang gis te/kho bo ni dngos po rnams ri bong gi rwa bzhin du med pa nyid du mthong la tshig gi skyon rnams yongs su spang ba'i phyir yod pa nyid kyang ma yin la med pa nyid kyang ma yin no zhes mi smra'i/ 'di ltar de dag rten cing 'brel par 'byung ba'i phyir ji ltar yod pa nyid dang / med pa nyid dag gzugs brnyan dag bzhin du mthong ba de ltar smra bas/khyod ni nor bu do zan an da rnyil gyi rin thang du 'tshong ba na/ yid la bsams pa dang mthun pa'i 'bras bu yang ma thob la rang gi blo yang bar yang bstan pa bzhin du gyur to/ /smras pa/ gal te de ltar dngos po thams cad mya ngan las 'das pa dang mtshungs pa yin na chos dang chos ma yin pa dag la khyad par med pa'i phyir rtsom pa thams cad don med pa nyid du mi 'gyur ram/bshad pa/ ci khyod yang dag pa ji lta ba bzhin du mthong ba la yang rtsom pa yod par lta'am/ gang gi tshe/ sngar brjod par bya ba ldog pa ste//sems kyi spyod yul ldog pas so/ /zhes bstan zin pas/ de'i phyir rnam par rmongs pa'i sems dang ldan pa la rtsom pa yod kyi/ de kho na mthong ba la ni bya ba ci yang med do/ /ji skad du bya ba byas so/ /'di las gzhan med do zhes gsungs pa dang / de bzhin du gang zag ma rig pa dang ldan pa 'di ni bsod nams las byung ba'i mngon par 'du bya ba dag kyang mngon par 'du byed do/ /zhes gsungs pa lta bu'o/ /slob dpon 'phags pa lhas kyang / kun med ci zhig byar yod ces/ /khyod ni 'jigs pa skye bar 'gyur/ / gal te bya ba yod na ni/ /chos 'di ldog pa ma yin no/ /zhes gsungs te/ de lta bas na/ chos nyid mya ngan 'das dang mtshungs/ /zhes pa 'di ni don dam pa'i phyir gsungs pa yin no/ /'jig rten gyi tha snyad kyi phyir/ thams cad yang dag yang dag min/ / yang dag yang dag ma yin nyid/ /'di ltar bcom ldan 'das kyis kyang gang 'jig rten la yod par grags pa de nga yang yod par smra'o/ /gang 'jig rten la med par grags pa de nga yang med par smra'o/ /zhes gsungs pas/ de'i phyir gang gi tshe 'jig rten gyi tha snyad bya ba de'i tshe na gang 'jig rten la yang dag pa nyid du grags pa/de bcom ldan 'das kyis kyang yang dag pa nyid do/ /zhes gsungs so/ /gang 'jig rten la yang dag pa nyid ma yin par grags pa de bcom ldan 'das kyis kyang yang dag pa ma yin no/ /zhes gsungs so/ /gang 'jig rten la yang dag pa nyid dang /yang dag pa nyid ma yin pa nyid du grags pa de bcom ldan 'das kyis kyang yang dag pa nyid dang / yang dag pa nyid ma yin pa nyid do/ /zhes gsungs so/ /'di lta ste dper na/ grong mi gnyis zhig bya ba 'ga' zhig la grong khyer du dong ba na ltad mo'i phyir lha khang du zhugs nas ri mo lta bar brtsams pa dang de na gcig gis smras pa/lag na mdung rtse gsum pa thogs pa gang yin pa 'di ni sred med kyi bu'o/ /lag na 'khor lo thogs pa gang yin pa 'di ni dbang phyug chen po'o/ /cig shos kyis smras pa khyod kyis log par bzung ste/lag na mdung rtse gsum pa thogs pa ni dbang phyug chen po'o/ /lag na 'khor lo thogs pa ni sred med kyi bu'o/ /zhes de gnyis rtsod pa na nye 'khor na kun tu rgyu zhig 'dug pa'i gan du dong ste phyag 'tshal nas de la rang rang gi bsam pa smras pa dang /des gcig la ni khyod zer ba bden no/ /zhes smras pa dang / cig shos la ni mi bden no/ /zhes gang smras na / de la kun tu rgyu des ji ltar 'di na dbang phyug chen po yang 'ga' yang med la/ sred med kyi bu yang med de/ 'di dag ni rtsig pa la brten pa'i ri mo bris pa'o//zhes bya ba de ltar shes mod kyi/ 'jig rten gyi tha snyad kyi dbang gis 'di ni bden no/ /'di ni mi bden no/ / zhes smras pa la brdzun gyi tshig gi skyon can du ma gyur pa de bzhin du bcom ldan 'das kyis kyang dngos po rnams ngo bo nyid stong par gzigs kyang / 'jig rten gyi tha snyad kyi dbang gis 'di ni yang dag pa nyid do/ /'di ni yang dag pa nyid ma yin no/ /'di ni yang dag pa nyid dang / /yang dag pa nyid ma yin no/ /zhes gsungs so/ /don dam par ni/ yang dag min min yang dag min/ /de ni sangs rgyas rjes bstan pa'o/ / dngos po ngo bo nyid stong pa sgyu ma dang / rmi lam dang / smig rgyu dang / gzugs brnyan dang / brag cha lta bu dag la ji ltar yang dag pa nyid dang / yang dag pa nyid ma yin par brjod do / /de'i phyir de ni sangs rgyas bcom ldan 'das rnams kyi bstan pa yod pa dang / med pa nyid kyi skyon dang bral ba/mu stegs byed thams cad dang thun mong ma yin pa don dam pa gsal bar byed pa yin no/ /yang na 'di ni don gzhan te kha cig na re thams cad yod pa nyid las skye'o/ /zhes zer ro/ /gzhan dag na re rgyu la 'bras bu snga na med pa dag las skye'o/ /zhes zer ro/ /kha cig na re yod pa dang med pa las skye'o//zhes zer ro/ /sangs rgyas bcom ldan 'das rnams kyi bstan pa ni dngos po rgyu dang rkyen las gdags par zad kyi yod pa dang med pa ni ma yin no / /de ltar yang kA t+yA ya na 'jig rten 'di ni gnyis la gnas te/ phal cher yod pa nyid la gnas pa dang / med pa nyid la gnas so//zhes gsungs so/ /de lta bas na sangs rgyas bcom ldan 'das rnams kyis 'jig rten gyi tha snyad kyi dbang gis kyang de dang de dag gsungs pas/ de'i phyir de kho na mthong bar 'dod pa rnams kyis 'jig rten gyi tha snyad kyi dbang gis gsungs pa dag la mngon par ma zhen par bya ste /de kho na gang yin pa de nyid gzung bar bya'o/ /smras pa/ de kho na'i mtshan nyid gang yin/ bshad pa/ gzhan las shes min zhi ba dang / /spros pa rnams kyis ma spros pa/ /rnam rtog med don tha dad min/ /de ni de nyid mtshan nyid do/ /gzhan las shes min zhes bya ba ni/'di la gzhan las shes pa med pa ste/ lung med par bdag gi mngon sum du 'gyur zhing / bdag nyid kyi mngon sum zhes bya ba'i tha tshig go/ /zhi ba zhes bya ba ni ngo bo nyid stong pa zhes bya ba'i tha tshig go/ /spros pa rnams kyis ma spros pa/ /zhes bya ba ni 'jig rten gyi chos rnams dang bral ba zhes bya ba'i tha tshig go//rnam par rtog pa med pa zhes bya ba ni 'di zhes bya ba dang 'di'o zhes rnam par ma brtags pa'o/ /don tha dad pa ma yin/ zhes bya ba ni 'di yang yin la/ 'di yang yin no/ /zhes don dbyer med pa'o/ /de la gang gi phyir rnam par rtog pa med pa de'i phyir spros pa rnams kyis ma spros pa'o//gang gi phyir 'jig rten pa'i chos rnams kyis ma spros pa de'i phyir zhi ba'o/ /gang gi phyir zhi ba de'i phyir don tha dad pa ma yin pa ste/ de'i phyir de lta bu'i rang bzhin shes pa rang rig pa gzhan las shes pa ma yin pa gang yin pa de ni de kho na'i mtshan nyid yin par shes par bya'o//'di yang de kho na'i mtshan nyid gzhan yin te/ gang la brten te gang 'byung ba/ /de ni re zhig de nyid min/ /de las gzhan pa'ang ma yin phyir/ /de phyir chad min rtag ma yin/ /'di ltar gang la brten te gang byung ba de ni re zhig de nyid ma yin no//de las gzhan pa'ang ma yin te/ gal te de de las gzhan yin par gyur na de med par yang 'byung bar 'gyur ba'i rigs na/ mi 'byung bas de'i phyir de las gzhan pa'ang ma yin no/ /dper na sa bon la brten te myu gu byung ba ni sa bon gang kho na yin pa de myu gu kho na ma yin la sa bon las gzhan pa myu gu'i ngo bo nyid med pa'i phyir sa bon las myu gu gzhan pa'ang ma yin pa bzhin te/de ltar gang gi phyir gang la brten te gang byung ba de de nyid kyang ma yin la de las gzhan pa'ang ma yin pa de'i phyir chad pa yang ma yin la rtag pa yang ma yin no//'di ltar sa bon nyid myu gu yin par gyur na/ sa bon rtag par 'gyur ro/ /gang gi phyir sa bon nyid myu gu ma yin pa de'i phyir sa bon rtag pa ma yin no/ /gal te sa bon yang gzhan nyid la myu gu yang gzhan yin par gyur na de lta na sa bon rnam pa thams cad du rgyun chad pas chad par 'gyur ro//gang gi phyir sa bon la myu gu gzhan ma yin pa de'i phyir sa bon chad pa ma yin te/ slob dpon 'phags pa lhas kyang / gang phyir dngos po 'jug 'gyur ba/ /des na chad par mi 'gyur ro/ /gang phyir dngos po ldog 'gyur ba/ / des na rtag par mi 'gyur ro/ /zhes gsungs so/ /de lta bas na/ de yang de nyid dang gzhan nyid du brjod par bya ba ma yin pa'i phyir/ rtag pa yang ma yin la chad pa yang ma yin pas de kho na'i mtshan nyid yin no/ /don gcig min don tha dad min/ /chad pa ma yin rtag min pa//de ni sangs rgyas 'jig rten gyi/ /mgon pos bstan pa bdud rtsi yin/ /de ltar mtho ris dang byang grol gyi lam rnam par 'byed pa don gcig pa nyid ma yin na don tha dad pa ma yin pa/ chad pa ma yin pa rtag pa ma yin pa/ gcig pa dang tha dad pa dang chad pa dang rtag pa'i skyon las phyi rol du gyur pa/mchog tu zab pa/ don dam pa'i de kho na gsal bar byed pa de ni 'jig rten dang 'jig rten las 'das pa'i bde ba thob par bya ba'i phyir/ sangs rgyas bcom ldan 'das thams cad mkhyen pa thams cad gzigs pa/stobs bcu'i stobs dang ldan pa/ rgyu med par byams pa rnams kyis bstan pa bdud rtsi yin te/ de bsgrub par bya'o/ /'di ltar der zhugs pa rnams kyi bdag nyid kyi mngon sum du gyur pa 'phral kho na la 'grub par 'gyur ro/ /gang dag tshogs ma byas pa nyid kyis 'phral la ma grub pa de dag la yang tshe rabs gzhan dag la nges par 'grub par 'gyur te/slob dpon 'phags pa lhas kyang / de nyid shes pas 'di la ni/ /'dod chags bral ba ma thob kyang / /tshe rabs gzhan la 'bad med par/ / nges par thob de las bzhin no/ /zhes gsungs so/ /rdzogs sangs rgyas rnams ma byung zhing / /nyan thos rnams ni zad gyur kyang / /rang sangs rgyas kyi ye shes ni/ /bsten pa med las rab tu skye/ /ci ste yang 'di la cung zad goms par byas pa rnams la brgya la rdzogs pa'i sangs rgyas rnams ma byung ngam/nyan thos rnams zad par gyur te/ rkyen dang mi ldan par gyur du zin na yang / de dag gi sngon goms pa'i rgyu las byung ba rang sangs rgyas kyi ye shes gzhan las shes pa ma yin pa bsten pa med pa tsam gyis rkyen las rab tu skye bar 'gyur ro//de'i de ltar bstan pa bdud rtsi 'di bsgrub pa la 'bras bu yod par 'gyur bas/ de lta bas na yongs su rtog pa dang ldan pa 'khor ba'i dgon pa spong bar 'dod pa/ bdud rtsi'i go 'phang thob par 'dod pa rnams kyis 'di nyid 'bad pas bsgrub par bya ste/'di kho na las don dam pa nges par 'grub bo/ /bdag dang chos brtag pa zhes bya ba ste rab tu byed pa bco brgyad pa'o// //smras pa/ 'di la khyod kyis byed pa po las brtag pa'i zhar la 'ongs pa de ga'i rigs pa rjes su bstan pas kho bo'i yid kyis dag la dngos po yod pa dang med par lta ba'i shing brtan po chen po yun ring po nas rab tu gnas pa'i rtsa ba yang legs par 'gul gyi /de'i phyir da yang kho bo la phan gdags par 'dod pas dus brtag par bya ba'i rigs so/ /bshad pa legs so/ /smras pa/ 'di la bcom ldan 'das kyis de dang der dus gsum bstan pa mdzad de/med na ni bstan par mi rigs pas dus gsum ni yod pa kho na yin no/ /bshad pa/ bcom ldan 'das kyis 'jig rten gyi tha snyad kyi dbang gis dus gsum bstan pa mdzad kyi/ de kho nar ni dus gsum mi 'thad do//de ji ltar zhe na/ 'di la re zhig gal te ma 'ongs pa'i dus su gyur nas rim gyis da ltar du 'gyur zhing / da ltar du gyur nas kyang rim gyis 'das par 'gyur ba ni/ de lta na dus gcig tu 'gyur te/ dper na tsai tra grong du phyin na yang tsai tra nyid yin la grong nas thal na yang tsai tra nyid yin te/de la ma phyin pa dang / phyin pa dang thal ba gsum nyid du dbyer med pa bzhin no/ /ci ste yang ma 'ongs pa yang gzhan nyid la da ltar yang gzhan 'das pa yang gzhan yin par gyur na ni/ de lta na yang gsum car yang rtag pa nyid du 'gyur ro//rtag pa nyid yin na dus su brtag pa don med pa nyid du 'gyur te dgos pa med pa'i phyir ro/ /yang gzhan yang / 'di la gal te dus zhes bya ba dngos po 'ga' zhig yod par gyur na/ de rang las sam/ ltos nas rab tu 'grub par 'gyur grang na/ de la re zhig gal te dus gsum du ltos nas rab tu 'grub par sems na/de la bshad par bya ste/ da ltar byung dang ma 'ongs pa/ /gal te 'das la ltos gyur na/ /da ltar byung dang ma 'ongs pa/ /'das pa'i dus na yod par 'gyur/ /da ltar byung ba dang / ma 'ongs pa'i dus dag gal te 'das pa'i dus la ltos nas yod par gyur na/de lta na da ltar ba dang ma 'ongs pa'i dus dag 'das pa'i dus na yod par 'gyur ro/ /'das pa na yod par gyur na de gnyis kyang 'das pa yin par 'gyur ro/ /de lta na dus gcig kho nar 'gyur ro/ /dus gcig kho na yin na ltos pa mi 'thad de 'di ltar de nyid de nyid la ji ltar ltos par 'gyur/ltos pa mi 'thad pa'i phyir dus kyang mi 'thad pa kho na yin no/ /ci ste 'das pa'i dus zhig cing 'gags te med pa kho na yin na ni/ de na 'di gnyis ji ltar yod par 'gyur/ ci ste 'das pa yang yod pa kho na yin par sems na ni yod pa'i phyir da ltar yin par 'gyur gyi 'das pa ma yin pas de ni mi 'dod do//smras pa/ gang gi tshe da ltar byung ba dang ma 'ongs pa dag 'das pa la ltos nas 'grub bo zhes smras pa de'i tshe ji ltar de gnyis 'das pa na yod par 'gyur/ bshad pa/ gang gi phyir de la ltos nas 'grub bo zhes smras pa de kho na'i phyir de gnyis de na yod par thal bar 'gyur ro//gzhan du na/ da ltar byung dang ma 'ongs pa/ /gal te de na med gyur na/ /da ltar byung dang ma 'ongs pa/ /ji ltar de la ltos par 'gyur/ /da ltar byung ba dang ma 'ongs pa'i dus dag gal te 'das pa'i dus de na med par gyur na/da ltar byung ba dang ma 'ongs pa'i dus de na med pa de dag ji ltar de la ltos par 'gyur te/ 'di ltar gsum char yang tshogs par gyur na ltos par 'thad pa'i phyir ro/ /ci ste yang de na yod par gyur na ni de gnyis yod pa la yang ltos pas ci zhig bya/de lta bas na re zhig da ltar byung ba dang ma 'ongs pa dag 'das pa la ltos nas rab tu 'grub par mi 'thad do/ /de la 'di snyam du da ltar byung ba dang ma 'ongs pa dag 'das pa la ma ltos pa kho nar 'grub par sems na/ de la bshad par bya ste/ 'das pa la ni ma ltos par//de gnyis 'grub pa yod ma yin/ /'das pa'i dus la ma ltos par yang de ltar byung ba dang / ma 'ongs pa'i dus da gnyis rang las rab tu 'grub pa yod pa ma yin no/ /de phyir da ltar byung ba dang / /ma 'ongs dus kyang yod ma yin/ /de ltar gang gi phyir da ltar byung ba dang ma 'ongs pa gnyis 'das pa'i dus na yod pa ma yin pas ltos par mi 'thad la/'das pa la ma ltos par yang de gnyis 'grub pa yod pa ma yin pa de'i phyir da ltar byung ba dang ma 'ongs pa'i dus kyang yod pa ma yin no/ /rim pa'i tshul ni 'di nyid kyis / /lhag ma gnyis po bsnor ba dang //mchog dang tha ma 'bring la sogs/ /gcig la sogs pa'ang shes par bya/ /rim pa'i tshul 'di nyid kyis dus lhag ma gnyis po bsnor ba dang / mchog dang tha ma dang 'bring dang gcig la sogs pa dag kyang shes par bya'o/ /da ltar byung ba dang 'das pa dag gal te ma 'ongs pa la ltos nas yod par gyur na de lta na de gnyis kyang yod par 'gyur ro//de lta na da ltar byung ba dang 'das pa dag kyang ma 'ongs pa yin par 'gyur te de na yod pa'i phyir ro / /de lta na dus gcig kho nar 'gyur bas de la ltos par mi 'thad do/ /ltos pa med pa'i phyir de dag kyang med do//ma 'ongs pa ma byung ba med pa kho na gang yin pa de la yang de gnyis ji ltar yod par 'gyur/ ci ste ma 'ongs pa yang yod pa kho na yin na ni yod pa'i phyir da ltar nyid yin par 'gyur gyi ma 'ongs pa ma yin pas de yang mi 'dod do/ /ci ste de gnyis de na med par gyur na ni de la ji ltar ltos par 'gyur/'on kyang ltos par gyur na ni de lta na yod pa'i phyir ltos par brtag pa don med pa nyid du 'gyur ro/ /ma 'ongs pa la ma ltos par yang de gnyis 'grub pa yod pa ma yin no/ /de bzhin du 'das pa dang ma 'ongs pa dag gal te da ltar la ltos nas yod par gyur na de lta na de gnyis kyang de na yod par 'gyur ro//de lta na 'das pa dang ma 'ongs pa dag kyang da ltar yin par 'gyur te de na yod pa'i phyir ro/ /de lta na dus gcig kho nar 'gyur bas de la de ltos pa mi 'thad do/ /ltos pa med pa'i phyir de dag kyang med do/ /'das pa dang ma 'ongs pa zhig pa'i phyir dang ma byung ba'i phyir med pa kho na gang dag yin pa de dag kyang da ltar gyi dus na ji ltar yod par 'gyur/ci ste yang yod pa yin na ni grub pa'i phyir de gnyis la yang ltos pas ci zhig bya/ ma ltos par yang de gnyis 'grub pa yod pa ma yin no/ / de lta bas na 'das pa yang yod pa ma yin la ma 'ongs pa la yang yod pa ma yin no / /da ltar yang yod pa ma yin no/ /mchog dang tha ma dag kyang gal te 'bring la ltos nas ni 'grub na/ de lta na mchog dang tha ma dag kyang 'bring yod na yod par 'gyur gyi rang las ma yin no/ / ci ste 'bring med na ni ji ltar de la ltos nas mchog dang tha ma dag yod par 'gyur/ 'bring la ma ltos par yang de gnyis 'grub pa yod pa ma yin no/ /de la 'di snyam du 'bring yod na mchog dang / tha ma de dag yod par sems na de la bshad par bya ste/ gsum char yang yod par gyur na yang ltos ci dgos/ltos pa med par yang de dag las gang yang rung ba rang las rab tu 'grub pa yod pa ma yin no/ /de lta bas na mchog dang tha ma dang 'bring dag ngo bo nyid las yod pa ma yin no/ /de bzhin du mchog dang 'bring dag la gal te tha ma la ltos nas yod par gyur tam/'bring dang tha ma dag gal te mchog la ltos nas yod par gyur tam/ thog ma dang tha ma dag gal te dbus la ltos nas sam/ thog ma dang dbus dag gal te mtha' la ltos nas sam/ mtha' dang dbus dag gal te thog ma la ltos nas sam/ thag nye ba gal te thag ring ba la ltos nas sam/thag ring ba gal te thag nye ba la ltos nas sam/ de bzhin du sngon dang phyi ma dang gcig pa nyid dang tha dad pa nyid dang / de nyid dang / gzhan nyid dang / 'bras bu dang / rgyu dang / thung ngu dang / ring po dang / chung ngu nyid dang / chen po nyid dang / bdag dang bdag med pa dang / 'dus byas dang 'dus ma byas dang / gcig dang gnyis dag gal te mang po la ltos nas sam/ gcig dang mang po dag gal te gnyis la ltos nas sam/ gnyis dang mang po dag gal te gcig la ltos nas / de dag la sogs pa gang cung zad ltos nas 'grub par 'gyur/brjod pa de dag thams cad de dag la yod par 'byung bar 'gyur te/ med na ltos par mi 'thad pa'i phyir ro/ /de lta bas na de dag thams cad kyang de kho nar rang las rab tu 'grub pa yod pa ma yin no/ /'jig rten gyi tha snyad kyi dbang gis ni brjod par bya'o//smras pa/ ma ltos par yang de dag 'grub pa yod pa ma yin no zhes gang smras pa/ de rigs pa ma yin te/ 'di na dus ni skad cig dang thang cig dang yud tsam dang / mtshan mo dang nyin mo dang zla ba phyed dang / zla ba dang dus tshigs dang nur ba dang lo la sogs pa dag gi tshad dang ldan par rab tu grub pas de la ltos pas ci zhig bya/bshad pa/ mi gnas dus su 'dzin mi byed/ /gang zhig gzung bar bya ba'i dus/ /gnas pa yod pa ma yin pas/ /ma bzung dus su ji ltar gdags/ /'di la dngos po nges par gnas pa rnams ni/tshad las gzung du rung ste/ dper na shing 'di ni mtho ba/ 'di ni chu ring ngo / /'di ni thung ngo / /glang po che 'di ni che'o zhes bya ba lta bu yin no / /dus la ni gang gi tshad las gzung bar bya ba ril po nges par gnas pa 'ga' yang yod pa ma yin no/ /'di ltar yud tsam yang cung zad 'das pa'am cung zad ma 'ongs pa la yud tsam zhes gdags pa yin gyi yud tsam zhes bya ba ril por nges par gnas pa ni 'ga' yang yod pa ma yin na/nyin mo la sogs pa dag lta smos kyang ci dgos/ de la 'di snyam du 'di na skad cig nges par gnas pa yod par sems pa na/de la bshad par bya ste/ skad cig nges par gnas pa zhes bya ba gang yin pa de ni 'das pa yang ma yin ma 'ongs pa yang ma yin te/ ci'i phyir zhe na/ nges par gnas pa'i phyir ro/ /nges par mi gnas pa kho na'i phyir de ni de ltar yang ma yin te/ 'jug pa'i phyir de ltar zhes brjod pa yin na/gal te de nges par gnas pa yin na de grub pa yin gyi 'jug pa ma yin pas 'jug pa ma yin pa ji ltar da ltar yin par 'gyur/ de lta bas na dus nges par gnas pa yod pa ma yin pa nyid de/ gang yod pa ma yin pa de ji ltar gzung bar bya/ gang gzung du med pa de dag skad cig dang thang cig dang yud tsam la sogs pa dag tu ji ltar gdags/de lta bas na dus zhes bya ba la dngos po 'ga' yang mi 'thad do/ /'dir smras pa/ dus ni yod pa kho na yin no/ /ci'i phyir zhe na/ rtags yod pa'i phyir te/ snga ma dang phyi ma dang cig car dang cig car ma yin pa dang /yun ring po dang myur ba zhes bya ba dag ni dus kyi rtags yin pas de ltar rtags yod pa'i phyir dus yod do/ /bshad pa/ gal te dus ni sngon brten na/ /gal te snga ma dang phyi ma la sogs pa de dag dus kyi rtags yin na/ de lta na dus ni dngos po kho na la brten nas gdags pa yin gyi rang las rab tu grub pa ma yin no//smras pa/ ma yin te dus ni rang kho na las rab tu grub bo/ /dus zhes bya ba ni snga ma dang phyi ma la sogs pa dag ni rgyu yin te/ gang las de dag tu 'gyur ba de ni dus yin no/ /bshad pa/ dngos med dus ni ga la yod//dngos po ma gtogs par khyod kyi dus rang las rab tu grub cing nges par gnas pa 'thad par ga la 'gyur/ rgyu dus mi 'gyur ba rtag pa nges par gnas pa yin na/ 'bras bu tha dad par ji ltar 'gyur/ gal te tsai tra snga mar gyur pa dang / gub ta phyi mar gyur pa dag la de rang bzhin tha mi dad par gnas na de gnyis tha dad pa dag des ji ltar byas par 'gyur/tsai tra dang gub ta gnyis rang gis snga ma dang phyi mar tha dad pa ma yin pa las dus snga phyi las snga ma dang phyi ma nyid du gyur la/ dus de nyid ni tha dad pa ma yin na de gnyis tha dad pa dus kyis ji ltar byas par 'gyur/slob dpon 'phags pa lhas kyang / 'bras bu rgyu ni tha dad pas/ /des na brtag pa yod ma yin/ /yang na gang na rgyu yod pa/ /de na 'bras bu yod ma yin/ /zhes gsungs so/ /ci ste de gnyis tha mi dad kyang dus kyi tha dad pa ma yin na ni/ de lta na tha dad pa'i tshig med pa'i phyir thams cad tha dad pa'am/thams cad tha dad pa ma yin par 'gyur ro/ /de lta bas na dngos po kho na la brten nas dus gdags par 'thad kyi/ dngos po ma gtogs par dus nges par gnas pa gzhan yod par mi 'thad do/ /smras pa/ dus ni dngos po la brten nas gdags pa kho na yin te/yud tsam zhig 'dug par gyur to/ /nyin gcig 'dug go/ /zla ba gcig 'dug par 'gyur ro zhes bya bas de'i phyir dus ni yod pa kho na yin no/ /bshad pa/ gal te dngos po nyid yod par gyur na ni/ dus dngos po la brten par yang 'gyur grang na/ dngos po 'ga' yang yod min na//dus lta yod par ga la 'gyur/ /dngos po 'ga' yang mi 'thad do/ /zhes bya ba de nyid sngar rab tu bsgrubs zin pas/ de'i phyir gal te dus dngos po la brten nas rab tu 'grub par sems na dngos po de ni 'ga' yang yod pa ma yin pas khyod kyi dus lta yod par ga la 'gyur/smras pa/ gal te dus yod pa ma yin na de lta na khyad par med pa'i phyir byas par gyur to/ /byed do byed par 'gyur ro zhes bya ba de dag la sogs pa'i brjod pa dag mi 'thad pa kho nar 'gyur ba zhig na 'thad pa yang yod pas de'i phyir dus ni yod pa kho na yin no/ /bshad pa/ gang gi tshe sngar/brjod par bya ba ldog pas te/ /zhes bstan pa de'i tshe/ de dag la sogs pa brjod pa dag mi 'thad do zhes bya ba de ni khyod kyis cung zad cig smras su zad kyi/ de dag la sogs pa 'ba' zhig tu ma zad de brjod pa thams cad kyang mi 'thad do/ /'jig rten gyi tha snyad kyi dbang gis ni de dag thams cad kyang 'thad de/der yang / thams cad yang dag yang dag min/ /zhes bstan pa yin no/ /de lta bas na dus zhes bya ba dngos po 'ga' yang med par shes par bya ste/ brten nas brtags par ni 'grub bo/ /dus brtag pa zhes bya ba ste rab tu byed pa bcu dgu pa'o// // smras pa/ dus ni yod pa kho na yin no/ /ci'i phyir zhe na/ dus dang tshogs pa nyid las 'bras bu 'grub pa'i phyir te/ 'di na sa dang sa bon dang chu dag yod du zin kyang / myu gu 'byung bar mi 'gyur gyi/ gang gi tshe de dag dus tshigs dang tshogs pa nyid du gyur pa de'i tshe na myu gu 'byung bar 'gyur bas de ltar gang gi phyir dus dang tshogs pa nyid med na myu gu 'byung bar mi 'gyur la yod na 'gyur ba de'i phyir dus ni yod pa kho na yin no//bshad pa/ gal te 'bras bu skye ba nyid 'thad par 'gyur na ni 'bras bu skye bas dus kyang yod par 'gyur grang na/ 'bras bu skye ba nyid mi 'thad pas 'bras bu'i rgyu can gyi dus yod par ga la 'gyur/'di ltar gal te tshogs pa nyid las 'bras bu skye bar 'gyur na/ 'bras bu'i de tshogs pa nyid de la yod pa'am/ med pa las skye bar 'gyur grang na/ gnyi ga las kyang de'i skye ba mi 'thad do//ji ltar zhe na/ gal te rgyu dang rkyen rnams kyi/ /tshogs pa nyid las skye 'gyur na/ /tshogs la 'bras bu yod na ni/ /ji ltar tshogs pa nyid las skye/ /tshogs pa'i dngos po ni tshogs pa nyid do/ /gal te rgyu dang rkyen rnams kyi tshogs pa nyid las 'bras bu skye bar gyur na/ tshogs pa nyid de la 'bras bu de yod pa nyid yin na ni 'bras bu yod pa de ji ltar tshogs pa nyid las skye bar 'gyur/ ci ste de yod kyang yang skye bar 'gyur na ni de lta na de'i skye bar rtag pa don med pa nyid du 'gyur te/ 'di ltar yod pa la yang skye bas ci bya/ thug pa med par thal bar yang 'gyur te/'di ltar nam yang mi skye bar mi 'gyur ba'i phyir ro/ /ci ste yang 'di snyam du rgyu dang rkyen rnams kyi tshogs pa nyid la 'bras bu med de rgyu dang rkyen rnams kyi tshogs pa nyid la 'bras bu med pa skye bar 'gyur bar sems na/ de la bshad par bya ste/ gal te rgyu dang rkyen rnams kyi/ / tshogs pa nyid las skye gyur na/ /tshogs la 'bras bu med na ni/ /ji ltar tshogs pa nyid las skye/ /gal te rgyu dang rkyen rnams kyi tshogs pa nyid las 'bras bu skye bar 'gyur na/ tshogs pa nyid de las 'bras bu de med pa nyid yin na ni 'bras bu med pa de ji ltar tshogs pa nyid de las skye bar 'gyur na/ci ste med kyang skye bar 'gyur na ni/ de lta na de skyes na yang med pa nyid du 'gyur te/ skye ba na med pa skyes na ji ltar yod par 'gyur/ 'di ltar ba lang skye ba ltar mi 'gyur ro/ /yang gzhan yang / gal te rgyu dang rkyen rnams kyi/ /tshogs la 'bras bu yod na ni/ /tshogs la gzung du yod rigs na//tshogs pa nyid la gzung du med/ /gal te rgyu dang rkyen rnams kyi tshogs pa nyid la 'bras bu de yod pa nyid yin par gyur na tshogs pa nyid de las nges par gnas pa de shing la bya bzhin du gzung du yod pa'i rigs na de la de yang yod kyang gzung du med de/ gzung du med pa de ji ltar yod ces bya/de lta bas na tshogs pa nyid la 'bras bu yod par mi 'thad do/ /gal te rgyu dang rkyen rnams kyi/ /tshogs la 'bras bu med na ni/ /rgyu rnams dang ni rkyen dag kyang / /rgyu rkyen ma yin mtshungs par 'gyur/ /gal te rgyu dang rkyen rnams kyi tshogs pa nyid la 'bras bu de med pa nyid yin par gyur na/rgyu rnams dang rkyen dag kyang rgyu dang rkyen ma yin pa rnams dang mtshungs par 'gyur / de lta na thams cad las thams cad 'byung bar 'gyur bas de yang mi 'dod de/ de lta bas na tshogs pa la 'bras bu med pa'i skye ba mi 'thad do/ /smras pa/ ma yin te rgyu dang rkyen nges pa'i phyir ro//gal te thams cad thams cad kyi rgyu dang rkyen dag yin par gyur na ni/ de lta na thams cad las thams cad 'byung bar 'gyur ro zhes smra bar rigs pa zhig na/ thams cad thams cad kyi rgyu dang rkyen dag ma yin te/ 'di ltar rgyu dang rkyen nges pa dag mthong ste/nas kyi sa bon las kyang nas kyi myu gu nyid skye'i/ 'bras kyi myu gu mi skye la/ rgyu spun dag las kyang snam bu nyid 'byung gi /bum pa mi 'byung bas/ de ltar gang gi phyir rgyu dang rkyen nges pa de'i phyir thams cad las thams cad 'byung bar mi 'gyur ro/ /bshad pa/ mi rung ste nges pa'i gtan tshigs ma bstan pa'i phyir ro//khyod kyis 'di ltar rgyu dang rkyen dag nges so zhes bya bar nges pa'i gtan tshigs ma bstan to/ /gal te med na ni de nges par gnas pa'i gtan tshigs med pa ji ltar rung bar 'gyur/ de lta bas na nges pa'i gtan tshigs med pas rgyu dang rkyen dag rgyu dang rkyen ma yin pa rnams dang mtshungs par thal bar 'gyur ro//de ltar thams cad las thams cad 'byung na/ nas kyi sa bon la yang nas kyi myu gu yang med la 'bras kyi sa bon la yang 'bras kyi myu gu med de/ de la gnyi ga yang med na nas kyi sa bon ni nas kyi myu gu kho na'i rgyu yin gyi/'bras kyi myu gu'i rgyu ma yin no zhes nges par gyur pa 'di ci las gyur/ rgyu dang rkyen rnams la 'bras bu yod na ni 'bras bu yod pas nges par gyur par yang 'thad na de yang med de/ de med na nges pa'i gtan tshigs med pa de ji ltar rung bar 'gyur/ de lta bas na nges pa'i gtan tshigs med pas rgyu dang rkyen dag rgyu dang rkyen ma yin pa rnams dang mtshungs par thal bar 'gyur ba nyid do//smras pa/ mngon sum la gtan tshigs kyi tshig gi don med de / gang gi tshe mngon sum nyid du nas kyi sa bon las nas kyi myu gu nyid skye'i 'bras kyi myu gu mi skye ba de'i tshe gtan tshigs gzhan btsal ci dgos/bshad pa/ gang nges par snang ba de yang rgyu dang rkyen rnams la 'bras bu yod na 'thad kyi med na mi 'thad pas/ de'i phyir med pa mi skye'o zhes smra'o/ /de lta bas na med pa skye ba'i gtan tshigs gzhan 'ga' zhig bstan par bya dgos te/des na gtan tshigs gzhan des med pa skye bar rab tu grub na nges par mthong bas thams cad las thams cad 'byung bar mi 'gyur ba zhig na/ med pa skye ba'i gtan tshigs med pas gzhan yang mi ston pas/ de'i phyir nges par mthong ba ni tshogs pa nyid la 'bras bu yod pa ston pa yin no//smras pa/ 'di la rgyus 'bras bu la rgyu byin nas 'gags pas de'i phyir rgyus 'bras bu 'grub par 'gyur zhing rkyen rnams ni de la phan 'dogs par byed pa yin pas/ de la tshogs pa nyid la 'bras bu yod dam med ces bsam pa des ci bya/ bshad pa/ gal te rgyus ni 'bras bu la//rgyu byin nas ni 'gag 'gyur na/ /gang byin pa dang gang 'gags pa'i/ /rgyu yi bdag nyid gnyis su 'gyur/ /gal te rgyus 'bras bu la rgyu byin nas 'gag par 'gyur na/ de lta na gang byin pa dang gang 'gags pa des rgyu'i bdag nyid gnyis su 'gyur ro/ /rgyu'i bdag nyid gnyis su ni mi 'thad de/'gags pa gang yin pa de ni bskyed pa ma yin pa'i phyir ro/ /rgyu byin pa yang mi 'thad de/ 'bras bu yod pa dang med pa la rgyu sbyin par mi 'thad pa'i phyir ro/ /'di ltar 'bras bu yod pa la ni yang rgyu byin pas ci bya/ med pa la ni su la sbyin par bya/ smras pa/ rgyus 'bras bu rgyu byin nas 'gag pa ma yin gyi/ 'di ltar rgyu 'gags ma thag tu 'bras bu skye'o/ /bshad pa/ gal te rgyus ni 'bras bu la/ /rgyu ma byin par 'gags gyur na/ /rgyu 'gags nas ni skyes pa yi/ /'bras bu de ni rgyu med 'gyur/ /gal te rgyus 'bras bu la rgyu ma byin par 'gags par gyur na/rgyu 'gags shing zhi gnas skyes pa'i 'bras bu de rgyu med pa las byung bar mi 'gyur ram/ rgyu med pa las byung bar ni mi 'dod de skyon du mar thal bar 'gyur ba'i phyir ro/ /smras pa/ 'bras bu ni rgyu dang tshogs pa dag dang lhan cig skye ste mar me dang 'od bzhin pa /de'i phyir tshogs pa dang 'bras bu dus gcig kho nar 'byung zhing mar me dang 'od bzhin pas/ de la ci tshogs pa nyid la 'bras bu yod dam/ med ces bsam pa de mi 'thad do/ /bshad pa/ gal te tshogs dang lhan cig tu/ /'bras bu yang ni skye 'gyur na/ /skyed pa dang ni gang bskyed pa//dus gcig par ni thal bar 'gyur/ /gal te tshogs pa dang 'bras bu lhan cig kho nar skye bar 'gyur na/ de lta na skyed pa rgyu gang yin pa dang bskyed pa don gang yin pa de dag dus gcig tu 'byung bar thal bar 'gyur bas de yang mi 'thad de/ 'di ltar pha dang bu dag dus gcig tu ji ltar skye bar 'gyur/ci ste yang skye bar 'gyur na ni de la 'di ni 'di'i rgyu'o/ /'di ni 'di'i 'bras bu'o zhes rnam par gzhag pa 'di ji ltar yod par 'gyur/ de lta bas na tshogs pa nyid dang 'bras bu lhan cig tu 'ong ma 'thad do/ /smras pa/ 'bras bu ni tshogs pa nyid kyi snga rol nyid na yang de de na phyis tshogs pa nyid skyes pas gsal bar byed de/mar mes bum pa bzhin no/ /bshad pa/ gal te tshogs pa'i snga rol na/ /'bras bu skyes par gyur na ni/ /rgyu dang rkyen rnams med pa yi/ /'bras bu rgyu med 'byung bar 'gyur/ /gal te 'bras bu snga na yod pa nyid yin la tshogs pa phyis 'byung bar 'gyur na/de lta na rgyu dang rkyen rnams med pa dang rgyu dang rkyen rnams ma gtogs pa'i 'bras bu rgyu med pa las byung bar 'gyur ro/ /'bras bu skyes pa la yang rgyu dang rkyen tshogs pa la yang skye bar brtags pas ci bya/ 'di ltar 'bras bu'i don du rgyu dang rkyen tshogs par 'dod na/'bras bu de yang skyes zin pa nyid do/ /de lta bas na de yang gyi na'o/ /smras pa/ rgyu yongs su 'gyur ba las 'bras bur 'grub ste/ de'i phyir gnas skabs snga ma 'gag pa las rgyu 'gags na 'bras bur 'gyur ro/ /de lta na rgyu ma 'gags par yang 'bras bur mi 'gyur la/'bras bu de rgyu med pa las byung bar yang mi 'gyur ro/ /bshad pa/ gal te rgyu 'gags 'bras bu na/ /rgyu ni kun tu 'pho bar 'gyur/ /sngon skyes pa yi rgyu yang ni/ /yang skye bar ni thal bar 'gyur/ /gal te rgyu'i dngos po sngar 'gags pa na gnas skabs gzhan thob pa 'bras bu zhes bya na/de lta na rgyu kun tu 'pho bar 'gyur gyi skye ba ma yin te/ dper na bro gar mkhan gyis cha lugs gzhan bor nas cha lugs gzhan du zhugs pa skye ba ma yin pa bzhin no/ /ci ste yang gnas skabs gzhan du kun tu 'pho ba nyid skye ba yin na ni/de lta na yang sngon skyes pa'i rgyu nyid kyang skye bar thal bar 'gyur ro/ /de lta na yang dngos po yongs su 'gyur ba'i chos can rnams nges par mi gnas pa'i phyir nam yang mi skye bar mi 'gyur ro/ /smras pa gang gi tshe rgyu 'gags pa na 'bras bur 'gyur ro zhes brjod pa de'i tshe ci'i phyir kun tu 'pho bar 'gyur ba dang yang skye bar thal bar 'gyur ro zhes brjod/bshad pa/ ci khyod lam du zhugs bzhin du lam 'dri'am/ khyod dngos po yongs su 'gyur ba 'bras bu zhes bya'o zhes zer bzhin du rang gi tshig gi don khong du ma chud do / /de'i phyir khyod tshegs che bas chog gi 'dug shig dang /da kho bo nyid kyis khyod kyis bstan pa'i lta ba rgyu dang 'bras bur 'brel par rnam par rtog pa dag tu bstan par byas/ khyod yid bsdus la de dag nyon cig /'di la gal te rgyus 'bras bu skyed par gyur na 'gags pas sam gnas pas skyed par byed grang /'bras bu yang skyed pa nyid dam ma skyes pa skyed par byed grang na/ rnam pa thams cad kyang mi 'thad do/ /ji ltar zhe na/ 'gags pa nub par gyur pa yis/ /'bras bu skyes pa ji ltar skyed / /'bras bu dang ni 'brel pa'i rgyu/ /gnas pas kyang ni ji ltar skyed/ /gal te re zhig rgyu rnam pa thams cad du 'gags pa nub par gyur pas 'bras bu skyes pa skyed par byed par rtog na/de ni rigs pa ma yin te/ 'di ltar rgyu 'gags pa nub par gyur pas 'bras bu skyes pa yod pa nyid ji ltar skyed par byed/ rgyu med pa gang gis skyed par byed par brtag pa de yang gang yin/ skyes pa nyid yang ci zhig bskyed par bya dgos/ ci ste yang 'di snyam du 'bras bu dang 'brel pa'i rgyu 'bras bu dang ldan pa gnas pa nyid kyis 'bras bu skyed par byed par sems na/ de yang mi 'thad de/ 'di ltar rgyu gnas pas 'bras bu yod pa nyid ji ltar skyed par byed/ de'i phyir gang gi tshe 'bras bu skyes pa nyid dang rgyur 'brel pa yin gyi ma skyes pa dang ni ma yin no//skyes pa la ni yang skyes pa'i rgyus ci bya/ de lta bas na de'ang mi 'thad pa'o/ /ci ste rgyu 'bras mi 'brel na/ /'bras bu gang zhig skyed par byed/ /ci ste rgyu de 'bras bu dang ma 'brel ba 'bras bu dang mi ldan pas 'bras bur skyed par byed par sems na//khyod kyi 'bras bu gang zhig rgyus skyed par byed pa de smros shig /gang gi tshe 'bras bu ma skyes pa'i phyir med pa la 'bras bu zhes bya ba nyid kyang med pa de'i tshe rgyus 'bras bu skyed par byed do zhes bya ba de ji ltar 'thad par 'gyur/ ci ste yang med kyang de la de skad ces skyed par byed pa'i mthu nyid yod par gyur na ni des ri bong gi rwa yang bskyed par 'gyur bar the tshom med do//yang gzhan yang / rgyus ni mthong dang ma mthong bar/ /'bras bu skyed par mi byed do/ /'di la gal te rgyus 'bras bu bskyed par gyur na mthong nas sam ma mthong bar skyed par 'gyur grang na/gnyi ga ltar yang mi 'thad do/ /ji ltar zhe na/ gal te re zhig mthong bas skyed par 'gyur na/ de ltar na skyes pa skyed par byed par 'gyur te/ 'di ltar ma skyes pa ni mthong bar mi 'gyur la/ skyes pa la ni yang bskyed par bya mi dgos so/ / ci ste yang rgyus ma mthong bar 'bras bu skyed par byed par rtog na/ de lta na yang rgyus gang dang gang ma mthong ba de dang de skyed par 'gyur ba zhig na skyed par yang mi byed de/ de lta bas na rgyus ma mthong bar yang 'bras bu skyed par mi byed do/ /yang gzhan yang / 'di la gal te rgyus 'bras bu bskyed par gyur na/phrad nas skyed par 'gyur grang na/ 'bras bu dang rgyu dag phrad pa ni ji ltar yang mi 'thad do/ /ji ltar zhe na/ 'bras bu 'das pa rgyu 'das dang / /ma skyes pa dang skyes pa dang / /lhan cig phrad par 'gyur ba ni/ /nam yang yod pa ma yin no/ /'bras bu 'das pa ni rgyu 'das pa dang ma skyes pa dang lhan cig phrad par 'gyur ba nam yang yod pa ma yin te/'das pa dang ma 'ongs pa dag gi 'bras bu dang rgyu dag med pa'i phyir ro/ /'bras bu 'das pa dang rgyu skyes pa yang lhan cig phrad par 'gyur ba nam yang yod pa ma yin te/ 'bras bu med pa'i phyir ro//'bras bu ma skyes rgyu ma skyes/ /'das pa dang ni skyes pa dang / /lhan cig phrad par 'gyur ba ni/ /nam yang yod pa ma yin no/ /'bras bu ma skyes pa ni rgyu ma skyes pa dang 'das pa dang lhan cig phrad par 'gyur ba nam yang yod pa ma yin te/ 'das pa dang ma 'ongs pa dag gi 'bras bu dang rgyu dag med pa'i phyir ro//'bras bu ma skyes pa dang rgyu skyes pa yang lhan cig phrad par 'gyur ba nam yang yod pa ma yin te/ 'bras bu med pa'i phyir ro/ /'bras bu skyes pa rgyu skyes dang / /ma skyes pa dang 'das pa dang / /lhan cig phrad par 'gyur ba ni//nam yang yod pa ma yin no/ /'bras bu skyes pa ni rgyu skyes pa dang lhan cig phrad par 'gyur ba nam yang yod pa ma yin te/ 'di ni 'di'i rgyu'o 'di ni 'di'i 'bras bu'o zhes bya ba de ltar rgyu dang 'bras bu dag tu mi 'thad pa'i phyir dang / de ltar gyur pa dag la phrad pa yang mi 'thad pa'i phyir ro//'bras bu skyes pa dang rgyu ma skyes pa dang 'das pa dang yang lhan cig phrad par 'gyur ba nam yang yod pa ma yin te/ 'das pa dang ma 'ongs pa dag gi rgyu dag med pa'i phyir ro/ /phrad pa yod pa ma yin na/ /rgyus ni 'bras bu ji ltar skyed / /de'i phyir de ltar 'bras bu 'das pa dang ma 'ongs pa dang da ltar dang rgyu 'das pa dang ma 'ongs pa dang da ltar du lhan cig phrad par 'gyur ba rnam pa thams cad du yang mi 'thad na/rgyus 'bras bu skyed par byed do zhes bya ba ji ltar 'thad par 'gyur na / phrad pa yod pa yin na yang / /rgyus ni 'bras bu ji ltar skyed //ci ste mi 'thad bzhin du yang rgyu dang 'bras bu phrad par rtog na/ de lta na yang rgyu yod pa nyid kyis 'bras bu de ji ltar skyed par 'gyur/ 'di ltar yod pa la ni yang bskyed par bya ba med de rgyu'i bya ba yang med do/ /yang gzhan yang / gal te 'bras bus stong pa'i rgyus / /ji ltar 'bras bu skyed par byed//'di la gal te rgyus 'bras bu skyed par byed na/ de 'bras bu'i bdag nyid kyis stong pa'am/ mi stong pas 'bras bu de skyed par byed grang na/ de la re zhig gal te 'bras bu'i bdag nyid kyis stong pa'i rgyus 'bras bu skyed par byed par rtog na de ni de ji ltar yang mi 'thad do//ci ste 'thad na ni bye mas kyang til mar dang / chus kyang mar skyed par 'gyur ro/ /yang na bye ma dang til dag la yang til mar med la/ chu dang zho dag la yang mar med par 'dra na/ til nyid las til mar 'byung la/ bye ma las mi 'byung ba dang / zho nyid las mar 'byung la/chu las mi 'byung ba la khyad par ci yod/ de lta bas na 'bras bu'i bdag nyid kyis stong pa'i rgyus 'bras bu skyed par byed do zhes bya ba de mi 'thad do/ /de la 'di snyam du 'bras bu'i bdag nyid kyis mi stong pa'i 'bras bu skyed par sems na/ de la bshad par bya ste/ gal te 'bras bu mi stong rgyus/ /ji ltar 'bras bu skyed par byed/ /gal te 'bras bu'i bdag nyid kyis mi stong pa'i rgyu nyid yin na/ des ji ltar 'bras bu de skyed par 'thad/ gang gi tshe 'bras bu yod pa nyid yin na de ngo bo nyid kyis stong pa ma yin pa / skyes zin pa la ni yang bskyed par bya ba med de/de lta bas na 'bras bu'i bdag nyid kyis mi stong ba'i rgyus 'bras bu skyed par byed do zhes bya ba de yang skye bo ngo bzlog mi phod pas gzung bar bya ba yin no// //dbu ma'i rtsa ba'i 'grel pa bud d+ha pA li ta / bam po brgyad pa/ yang gzhan yang / 'di la rgyus 'bras bu skyed do zhes bya ba gang yin pa de yang /ngo bo nyid kyis mi stong pa'am stong pa zhig skye ba dang 'gag par 'gyur grang na/ de la kho bos bshad par bya ste/ 'bras bu mi stong skye mi 'gyur/ /mi stong 'gag par mi 'gyur ro/ /mi stong de ni ma 'gags dang / /ma skyes par yang 'gyur ba yin//'bras bu ngo bo nyid kyis mi stong pa rang gi bdag nyid kyis nges par gnas pa gang yin pa de ni skye bar mi 'gyur 'gag par yang mi 'gyur te/ ci'i phyir zhe na/ rang gi bdag nyid kyis nges par gnas pa'i phyir ro/ /'di ltar rang bzhin la ni 'gyur ba mi 'thad pas/de'i phyir 'bras bu de mi stong bar yongs su rtog na/ rtag pa'i phyir khyod kyi de ni ma 'gags pa dang ma skyes par yang 'gyur ro/ /de lta bas na 'bras bu mi stong ba ni skye bar mi 'gyur zhing 'gag par yang mi 'gyur ro/ /de la 'di snyam du 'bras bu stong pa skye ba dang 'gag par 'gyur bar sems na/de la bshad par bya ste/ stong pa ji ltar skye 'gyur zhing / /stong pa ji ltar 'gag par 'gyur/ /stong pa de yang ma 'gags dang / /ma skyes pa yang thal bar 'gyur/ /'bras bu ngo bo nyid kyis stong pa bdag nyid kyis rab tu ma grub pa gang yin pa des ji ltar skye bar 'gyur zhing /ji ltar 'gag par 'gyur/ ci ste 'bras bu de ngo bo nyid med kyang skye ba dang 'gag par rnam par rtog na de la smra bar bya dgos te/ ci ste 'bras bu'i ngo bo ma gtogs pa gzhan zhig skye ba dang 'gag par 'gyur ram/ ci ste 'bras bu'i dngos po ma gtogs pa gzhan zhig skye bar 'gyur na ni des/'bras bu la cir 'gyur te/ 'di ltar 'bras bur yin pa skye ba 'bras bur mi 'gyur/ de lta bas na 'bras bu de stong par yongs su rtogs na yang med pa'i phyir ma 'gags pa dang ma skyes par yang thal bar 'gyur bas/ de yang mi 'dod do/ /de lta bas na 'bras bu stong pa yang skye bar mi 'gyur zhing 'gag par yang mi 'gyur ro//yang gzhan yang / gal te rgyu dang 'bras bu dag tu 'gyur na/ gcig pa nyid dam gzhan nyid du 'gyur grang na/ de yang yongs su brtags na/ rgyu dang 'bras bu gcig nyid du/ /nam yang 'thad par mi 'gyur ro/ /rgyu dang 'bras bu gzhan nyid du//nam yang 'thad par mi 'gyur ro/ /ci'i phyir zhe na/ 'di ltar/ rgyu dang 'bras bu gcig nyid na/ /skyed dang bskyed pa gcig tu 'gyur/ /rgyu dang 'bras bu gzhan nyid na/ /rgyu dang rgyu min mtshungs par 'gyur/ /'di ltar gal te rgyu dang 'bras bu dag gcig pa nyid yin par gyur na/de lta na skyed pa dang bskyed pa don dag gcig pa nyid du 'gyur bas de yang mi 'thad de/ 'di ltar pha dang bu dag ji ltar gcig pa nyid du 'gyur/ sa bon dang myu gu dag kyang gcig pa nyid du mi 'gyur ro/ /ci ste yang rgyu dang 'bras bu dag 'di ni rgyu'o/ /'di ni 'bras bu'o zhes gzhan nyid du gyur na/de lta na yang rgyu dang rgyu ma yin pa dag mtshungs par 'gyur ro/ /ji ltar nas kyi myu gu las 'bras kyi sa bon gzhan yin pa de bzhin du 'bras kyi myu gu las kyang nas kyi sa bon gzhan yin na/ de la nas kyi sa bon ni nas kyi myu gu'i rgyu yin gyi 'bras kyi sa bon ni ma yin no zhes bya ba de ci'i phyir de ltar 'gyur/de lta bas na rgyu dang 'bras bu dag gcig pa nyid kyang ma yin la gzhan nyid du yang mi 'thad do/ /gang dag la gcig pa nyid dang gzhan nyid du grub pa yod pa ma yin pa de dag la grub pa med de/ de dag las gzhan du 'grub la mi 'thad pa'i phyir ro//yang gzhan yang / gal te rgyus 'bras bu skyed par byed na de ngo bo nyid kyis yod par 'gyur ba zhig skyed par byed dam/ med par gyur pa zhig skyed par byed grang na/ de la kho bos bshad par bya ste/ 'bras bu ngo bo nyid yod na/ /rgyus ni ci zhig skyed par byed / / 'bras bu ngo bo nyid med na/ /rgyus ni ci zhig bskyed par 'gyur/ /gal te 'bras bu ngo bo nyid kyis yod par gyur na ma byas kyang rdzogs par yod pa nyid yin pas de yod na/ rgyus de la gzhan ci zhig skyed par 'gyur/ ci ste de nyid skyed par byed do zhes rtog na de ni mi rigs te/ skyes pa la yang skye ba'i bya ba med do//ci ste 'bras bu de ngo bo nyid kyis med par gyur pa yin na de rgyus ji ltar skyed par 'gyur/ ci ste 'bras bu ngo bo nyid kyis med kyang rgyus bskyed par 'gyur na ni/ shing ba Ta'i me tog gis kyang phreng ba 'ching bar the tshom med do/ /de lta bas na 'bras bu yod par 'gyur ba dang 'bras bu med par 'gyur ba yang rgyus bskyed par mi 'thad do//skyed par byed pa ma yin na/ /rgyu nyid 'thad par mi 'gyur ro/ /rgyu gang gis kyang 'bras bu skyed par mi byed na/ de rgyu nyid du 'thad par mi 'gyur ro/ /'di ltar skyed par byed pa'i rgyu zhes bya ba na ci ste skyed par byed pa ma yin yang rgyur 'gyur na ni/de lta na 'gar yang rgyu ma yin par mi 'gyur bas thams cad rgyu nyid du 'gyur ro zhes bya ba gang yin pa de yang mi 'dod do/ /de lta bas na rgyu nyid 'thad par mi 'gyur ro/ /rgyu nyid 'thad pa yod min na/ /'bras bu gang gi yin par 'gyur/ /gal te 'bras bu bskyed pa'i rgyu nyid yod pa ma yin na/rgyu med na 'bras bu de gang gi yin par 'gyur/ 'di ltar rgyu'i 'bras bu yin par 'dod na de yang med de / de med na 'bras bu zhes bya bar mi 'thad do/ /ci ste 'thad na ni pha med par yang bu yod par 'gyur bas de yang mi 'dod do//de lta bas na/ rgyu yod pa ma yin na 'bras bu yod pa yang ma yin no/ /rgyu rnams dang ni rkyen dag gi /tshogs pa gang yin de yis ni/ /bdag gis bdag nyid mi skyed na/ /'bras bu ji ltar skyed par byed/ /rgyu dang rkyen rnams kyi tshogs pa 'bras bu skyed par byed pa zhes bya bar brtag pa gang yin pa des re zhig bdag gis bdag nyid skyed par mi byed de/ci'i phyir zhe na/ tshogs pa ni du ma yin par shes pa'i phyir te/ slob dpon 'phags pa lhas kyang / tshogs pa gcig pu ma yin te/ /de bzhin dngos po 'ga' yang med/ /gal te de yang de las gzhan//de yang gcig pu 'ga' zhig yod/ /ces gsungs so/ /da tshogs pa gang yin pa bdag nyid ma skyes pa bdag nyid rab tu ma grub pa des 'bras bu ji ltar skyed par brtag /ci ste tshogs pa bdag nyid ma skyes pas kyang 'bras bu skyed par byed na ni ma ma skyes pas kyang bu skyed par mngon par 'gyur ro//de phyir tshogs pas byas pa dang / /tshogs min byas pa'i 'bras bu med/ /'bras bu yod pa ma yin na/ /rkyen gyi tshogs pa ga la yod/ /de ltar gang gi phyir tshogs pa de bdag nyid ma skyes shing rab tu ma grub pa de'i phyir tshogs pas byas pa'i 'bras bu med do/ /de la 'di snyam du tshogs pa ma yin pas byas pa'i 'bras bu yod par sems na/de la bshad par bya ste/ tshogs min byas pa'i 'bras bu med/ /gang gi tshe tshogs pas byas pa'i 'bras bu nyid mi 'thad pa de'i tshogs pa ma yin pas byas pa'i 'bras bu rgyu med pa las byung ba ji ltar 'thad par 'gyur/ci ste 'gyur na ni pha dang ma dag med par yang bu skye bar 'gyur ba zhig na skye bar yang mi 'gyur te/ de lta bas na tshogs pa ma yin pas byas pa'i 'bras bu yang med do/ /smras pa/ 'jig rten pa dang 'gal ba shin tu mang po zhig bshad pa 'dis ci bya/ yod na re zhig rgyu dang rkyen rnams kyi tshogs pa yod de de yod pas 'bras bu yang yod par 'gyur ro//bshad pa/ ci khyod grong stod du mkhar ldan 'bebs sam/ khyod 'bras bu yod pa ma yin na tshogs pa yod par 'dod ko /'bras bu skyed pa nyid tshogs pa zhes bya na 'bras bu de nyid kyang gang gi tshe ji ltar yang mi 'thad pa de'i tshe 'bras bu yod pa ma yin na rkyen gyi tshogs pa yod par ga la 'gyur/slob dpon 'phags pa lhas kyang / gang phyir 'jig rten ji snyed ming / /tshogs pa nyid la snang 'gyur ba/ /de phyir dngos po yod min te/ /dngos med tshogs pa'ang yod ma yin/ /zhes gsungs so/ /de lta bas na 'bras bu yod pa ma yin pa'i phyir tshogs pa yang yod pa ma yin pas/de la dus dang tshogs pa nyid kyi 'bras bu 'grub pa'i phyir dus ni yod pa kho na yin no zhes gang smras pa/ de mi 'thad do/ /smras pa/ gal te dus kyang med rgyu dang 'bras bu dang tshogs pa yang med na gzhan ci zhig yod de/ de lta bas na de ni med par smra ba nyid yin no/ /bshad pa/ ma yin te ji ltar khyod dus la sogs pa dag ngo bo nyid las yod par yongs su rtog par byed pa de ltar mi 'thad par zad kyi/ de dag brten nas gdags par ni 'grub bo/ /rgyu dang 'bras bu brtag pa zhes bya ba ste rab tu byed pa nyi shu pa'o// //smras pa/ dus la sogs pa dag ni yod pa kho na yin te/ ci'i phyir zhe na/ gang gi tshe gang na 'ga' zhig 'byung ba dang / 'jig pa dag dang ldan pa'i phyir ro/ /'di ltar gal te dus la sogs pa dag med par 'gyur na/ 'o na de lta na khyad par med pas dus thams cad du thams cad nas thams cad kyang /'byung ba dang 'jig pa dag tu 'gyur ba zhig na de ltar yang mi 'gyur bas/ de'i phyir dus la sogs pa dag ni yod pa kho na yin no/ /bshad pa/ gal te 'ga' zhig la 'byung ba dang 'jig pa dag nyid yod par gyur na ni/ dus la sogs pa dag kyang yod par 'gyur ba zhig na/gang gi tshe/ 'jig pa 'byung ba med par ram/ /lhan cig yod pa nyid ma yin/ /'byung ba 'jig pa med par ram/ /lhan cig yod pa nyid ma yin/ /de'i tshe gal te 'byung ba dang 'jig pa dag yod par gyur na/ phan tshun med par ram lhan cig tu 'gyur grang na/gang gi tshe gnyi ga ltar yang mi 'thad pa de'i tshe de dag gi rgyu can gyi dus la sogs pa dag ji ltar yod par gyur / de ji ltar zhe na/ mi 'thad pa'i phyir te/ 'jig pa 'byung ba med par ni/ /ji lta bur na yod par 'gyur/ /'chi ba skye ba med pa ltar/ /'jig pa 'byung ba med par med/ / 'di ltar 'jig pa 'byung ba med par ji ltar yod par 'gyur te/ gang gi tshe 'ga' zhig byung na 'jig par 'gyur gyi gzhi med par 'jig par mi 'gyur te/ dper na skye ba yod na 'chi bar 'gyur gyi ma skyes pa la 'chi ba med pa de bzhin du/ 'byung ba yod na 'jig par 'gyur gyi/ 'byung ba med par 'jig par mi 'gyur ro//de la 'di snyam du 'jig pa ni 'byung ba dang lhan cig yod pa nyid yin gyi 'byung ba med par ni ma yin par sems na/ de la bshad par bya ste/ 'jig pa 'byung dang lhan cig tu/ /ji ltar yod pa nyid du 'gyur/ /'chi ba skye dang dus gcig tu/ /yod pa nyid ni ma yin bzhin//'di ltar 'jig pa 'byung ba dang lhan cig ji ltar yod par 'gyur te/ gang gi tshe na don de gnyis phan tshun mi mthun pa dag yin pa de'i tshe de gnyis gcig la lhan cig yod par mi 'thad de/ dper na 'chi ba ni skye ba dang phan tshun mi mthun pa de'i phyir dus gcig na yod pa nyid ma yin pa de bzhin du/'jig pa yang 'byung ba dang mi mthun pa'i phyir lhan cig yod pa nyid ma yin no/ /smras pa/ gal te 'jig pa byung ba med par yang mi 'thad la lhan cig tu yang mi 'thad pas 'jig pa med du zin kyang / re zhig 'byung ba ni yod de/ de yod pa'i phyir dus la sogs pa dag kyang yod do//bshad pa/ 'byung ba 'jig pa med par ni/ /ji ltar yod pa nyid du 'gyur/ /dngos po rnams la mi rtag nyid/ /nam yang med pa ma yin no/ /'di ltar 'byung ba 'jig pa med par ji ltar yod pa nyid du 'gyur te/ dngos po rnams la mi rtag pa nyid nam yang med pa ma yin pas/ 'di ltar 'byung ba 'jig pa med par ji ltar yod pa nyid du 'gyur/ gang gi tshe dngos po thams cad mi rtag pa nyid kyis mi rtag pa dang rjes su 'brel pa de'i tshe dngos po rnams la mi rtag pa nyid nam yang med pa ma yin pa nyid do/ /'di ltar gal te dngos po skad cig tsam zhig mi rtag pa nyid dang bral bar 'gyur na ni de ltar na yun ring du bral bar 'gyur te/de ltar na yang rtag pa nyid du thal bar 'gyur bas de yang mi 'dod do/ /de lta bas na dngos po rnams ni rtag tu mi rtag pa nyid dang rjes su 'brel pas/ 'byung ba 'jig pa med par yod pa nyid ma yin no/ /de la 'di snyam du 'byung ba ni 'jig pa dang lhan cig yod pa nyid yin gyi 'jig pa med par ni ma yin par sems na/de la bshad par bya ste/ 'byung ba 'jig dang lhan cig tu/ /ji ltar yod pa nyid du 'gyur/ /skye ba 'chi dang dus gcig tu/ /yod pa nyid du mi rigs bzhin/ /'di ltar 'byung ba dang 'jig pa dang lhan cig ji ltar yod par 'gyur te/gang gi tshe don de gnyis phan tshun mi mthun pa dag yin pa de'i tshe de gnyis gcig la lhan cig yod pa mi 'thad de/ dper na skye ba ni 'chi ba dang phan tshun mi mthun pa'i phyir dus gcig na yod pa ma yin pa de bzhin du/ 'byung ba yang 'jig pa dang mi mthun pa'i phyir lhan cig yod pa ma yin no//de'i phyir de ltar yongs su brtags na 'byung ba dang 'jig pa dag phan tshun med par ram/ phan tshun lhan cig tu 'grub par mi 'thad pas/ gang dag phan tshun lhan cig gam/ /phan tshun lhan cig ma yin par/ /grub pa yod pa ma yin pa/ /de dag 'grub pa ji ltar yod//'byung ba dang 'jig pa gang dag phan tshun lhan cig gam/ phan tshun lhan cig ma yin par grub pa yod pa ma yin pa de dag dang rnam pa gzhan gang gis 'grub pa yod par sems/ de lta bas na 'byung ba dang 'jig pa dag yod pa ma yin no/ /de dag med na dus la sogs pa dag yod par ga la 'gyur/smras pa/ gnas pa yod pas skyon med de/ 'di la 'byung ba dang 'jig pa dag gi bar na gnas pa yod de/ gnas pa yod pas 'byung ba dang 'jig pa dag gang yang rung ba med par yang yod pa ma yin la/ 'byung ba dang 'jig pa dag dus gcig tu yang mi 'gyur bas de'i phyir skyon med do//bshad pa/ de yang mi 'thad de/ ci'i phyir zhe na/ dngos po rnams ni mi rtag pa nyid dang / rjes su 'brel pa yin pas dngos po 'ga' yang rang gi gnas na skad cig tsam yang mi sdod pa'i phyir ro/ /de'i phyir/ zad la 'byung ba yod ma yin/ gang gi phyir dngos po rnams mi rtag pa nyid dang nam yang ma 'brel te rtag tu mi rtag pa nyid dang rjes su 'brel pa de'i phyir dngos po zad par 'gyur ba la 'byung ba yod pa ma yin pa nyid de/'byung ba med na gnas pa yod par ga la 'gyur/ smras pa/ 'byung ba'i dus na zad par mi 'gyur bas de'i phyir 'byung ba yod do//'byung ba gnas par 'gyur zhing gnas pa phyis 'jig par 'gyur ro/ /bshad pa/ ma zad pa la'ang 'byung ba med/ /gang zad pa'i mtshan nyid dang bral ba de la yang 'byung ba med de/ ci'i phyir zhe na/ dngos po ma yin pa'i phyir ro/ /'di ltar dngos po ni zad pa'i mtshan nyid can yin pas de'i phyir gang zad pa'i mtshan nyid dang bral ba de dngos po nyid ma yin no//gang dngos po ma yin pa de la ji ltar 'byung bar 'gyur te/ de la de ltar 'byung bar 'gyur ro zhes bya ba'i tha snyad nyid kyang med pas/ de'i phyir ma zad pa la'ang 'byung ba med do/ /zad la 'jig pa yod ma yin/ /ma zad pa la 'ang 'jig pa med//de ltar gang gi phyir zad pa la 'byung ba mi 'thad la 'byung ba med na gnas pa nyid kyang med pa de'i phyir ma byung ba dang mi gnas pa 'di zad pa la 'jig pa yod pa ma yin la/ ma zad pa la yod pa ma yin no/ /'byung ba dang 'jig pa gang dag zad pa la yod pa ma yin la/ ma zad pa la yang yod pa ma yin pa de dag gzhan gang zhig la yod par 'gyur te/de lta bas na 'byung ba yang yod pa ma yin la/ 'jig pa yang yod pa ma yin no/ /smras pa/ re zhig dngos po rnams ni yod de ma byung ba ni dngos por mi 'thad pas 'byung ba yang rab tu grub pa nyid do/ /gang las byung ba yod pa de la 'jig pa yang nges par yod pas 'jig pa yang rab tu grub pa nyid do//bshad pa/ ci khyod shing bi du la'i shing tog dag 'dod dam/ khyod 'byung ba dang 'jig pa dag yod pa ma yin par dngos po yod par 'dod ko /'byung ba dang 'jig pa dag bsal bas dngos po yang bsal ba nyid ma yin nam/de ji ltar zhe na/ gang gi phyir/ 'byung dang 'jig pa med par ni/ /dngos po yod pa ma yin no/ /'di ltar gal te dngos po 'ga' zhig yod par gyur na de 'byung ba'i chos can nam/ 'jig pa'i chos can zhig yin grang na/ gang gi tshe 'byung ba dang 'jig pa dag mi 'thad pa yin pa de'i tshe/dngos po yod do zhes bya ba de ji ltar 'thad par 'gyur/ dngos po yod pa ma yin par/ /'byung dang 'jig pa yod ma yin/ /de ltar gang gi phyir yongs su brtags na dngos po nyid mi 'thad pa de'i phyir dngos po yod pa ma yin par gzhi med pa'i 'byung ba dang 'jig pa dag yod pa ma yin pas/de la dngos po yod na 'byung ba dang 'jig pa dag kyang rab tu grub pa nyid do zhes gang smras pa de rigs pa ma yin no/ /yang gzhan yang / 'di la gal te 'byung ba dang 'jig pa dag yod par gyur na/ de dag dngos po ngo bo nyid stong pa'am mi stong pa la yod par 'gyur grang na/ de la/ stong la 'byung dang 'jig pa dag /'thad pa nyid ni ma yin no/ /re zhig dngos po ngo bo nyid stong pa la 'byung ba dang 'jig pa dag yod par mi 'thad de/ ci'i phyir zhe na/ yod pa ma yin pa'i phyir ro/ /'di ltar ngo bo nyid yod pa ma yin pa la de dag gang gis yod par 'gyur/ ngo bo nyid yod pa ma yin pa'i phyir gang gi 'di'o zhes tha snyad gdags pa nyid kyang yod pa ma yin pa de la ci zhig 'byung ngo zhe'am/ci zhig 'jig go zhes ji skad du brjod par bya/ de lta bas na stong pa la 'byung ba dang 'jig pa dag 'thad pa nyid ma yin no/ /de la 'di snyam du dngos po ngo bo nyid mi stong ba la 'byung ba dang 'jig pa dag yod par sems na/de la bshad par bya ste/ mi stong pa la'ang 'byung 'jig dag /'thad pa nyid ni ma yin no/ /dngos po rang gi bdag nyid kyis yod par 'gyur ba med pa la 'byung ba dang 'jig pa dag yod par 'thad pa nyid ma yin te/ 'di ltar rang bzhin ni gzhan du mi 'gyur ba'i phyir ro//de lta bas na mi stong pa la yang 'byung ba dang 'jig pa dag 'thad pa nyid ma yin no/ /yang gzhan yang / 'di la gal te 'byung ba dang 'jig pa dag yod par gyur na/ gcig pa nyid dam gzhan nyid du 'gyur grang na/ de la/ 'byung ba dang ni 'jig pa dag /gcig pa nyid du mi 'thad do//'byung ba dang ni 'jig pa dag /gzhan nyid du yang mi 'thad do/ /re zhig 'byung ba dang 'jig pa dag gcig pa nyid du mi 'thad de/ ci'i phyir zhe na/ 'di ltar 'byung ba ni skye ba yin la 'jig pa ni 'gag pa ste/ don tha dad pa'i phyir mi mthun pa de gnyis ji ltar gcig pa nyid du 'gyur/'byung ba dang 'jig pa dag gzhan nyid du yang mi 'thad de/ ci'i phyir zhe na/ dngos po thams cad ni zad pa'i bdag nyid can yin pa'i phyir te/ 'di ltar dngos po 'ga' yang skad cig tsam yang mi rtag pa nyid dang bral ba med pa de'i phyir dngos po thams cad zad pa'i bdag nyid can yin no//dngos po ni ngo bo nyid las gzhan nyid du mi 'thad pas 'byung ba dang 'jig pa dag gzhan nyid du mi 'thad do/ /de ltar gang gi phyir 'byung ba dang 'jig pa dag gcig pa nyid dang gzhan nyid du mi 'thad pa'i phyir 'byung ba dang / 'jig pa dag mi 'thad pa nyid do/ /'byung ba dang ni 'jig pa dag /mthong ngo snyam du khyod sems na/ /khyod 'di snyam du dngos po rnams kyi 'byung ba dang 'jig pa dag mngon sum nyid du mthong bas de la 'thad pa gzhan ci dgos snyam du sems na'o/ /de ni rigs pa ma yin te/ ci'i phyir zhe na/ 'di ltar/ 'byung ba dang ni 'jig pa dag /gti mug nyid kyis mthong ba yin//gti mug gis sems bsgribs pa mi mkhas pa dag 'byung ba dang 'jig pa dag mthong ngo snyam du de ltar sems kyi 'byung ba dang 'jig pa dag mthong bar mi 'thad do/ /ci'i phyir zhe na/ 'di ltar gal te 'byung ba dang 'jig pa dag yod par 'gyur na dngos po'am dngos po med pa la brten grang na/dngos po dang dngos po med pa de dag ni yod pa ma yin te/ de dag med na gzhi med pa'i 'byung ba dang / 'jig pa dag mthong bar ga la rigs/ smras pa/ dngos po dang dngos po med pa dag ji ltar yod pa ma yin/ bshad pa/ 'di la gal te dngos po dang dngos po med pa dag yod par gyur na/de dag dngos po las sam/ dngos po med pa las skye grang na/ de la/ dngos po dngos las mi skye ste/ /dngos med dngos las mi skye'o/ /dngos po dngos yod mi skye ste/ /dngos med dngos med mi skye'o/ /de la re zhig dngos po dngos po las skye ba med de/ 'di ltar bum pa ni 'jim pa nges par gnas pa las mi skye'o//ci ste bum pa ni 'jim pa bcos pa las skye bar sems na/ de ltar na yang 'jim pa bcos shing 'gags pa na/ bum pa skye bas dngos po dngos po las skye ba ma yin te/ 'di ltar 'gags shing med pa ni dngos po ma yin te/ dngos po dang dngos po med pa dag don tha dad pa'i phyir ro/ /ci ste yang 'di snyam du 'jim pa'i dngos po nyid bum pa yin par sems na/de lta na yang dngos po dngos po las skye ba ma yin te/ 'jim pa las gzhan pa'i dngos po gzhan mi skye ba'i phyir te/ 'jim pa nyid bum par brjod pa'i phyir ro/ /de la 'di snyam du shing tog gi dngos po shing ljon pa'i dngos po las skye bar sems na/de yang mi rung ste/ ci'i phyir zhe na/ shing tog las shing ljon pa gzhan yin par mi 'thad pa'i phyir ro/ /de ltar re zhig dngos po dngos po las skye ba med do/ /dngos po med pa yang dngos po las skye ba med de/ 'di ltar bum pa chag pa ni bum pa nges par gnas pa las mi skye ste/ nges par gnas pa la chag pa med pa'i phyir ro/ /bum pa chag pa bum pa'i dngos po las kyang mi skye ste/ chag cing med pa ni dngos po med pa'i phyir ro/ /de la 'di snyam du bum pa dngos po med pa tho ba'i dngos po las skye bar sems na de yang mi rung ste/ 'di ltar gal te dngos po med pa tho ba las skye bar 'gyur na bum pa med par yang skye bar 'gyur ro//gal te dngos po med pa skye na dngos po med pa nyid du mi 'gyur te/ skye ba yod pa'i phyir ro/ /skye ba zhes bya ba ci yang med na ni skye'o/ /zhes bya ba de la su zhig yid ches par rigs/ de lta bas na dngos po med pa yang dngos po las skye ba med do/ / dngos po yang dngos po med pa las skye ba med de/ 'di ltar bum pa ni 'jim pa 'gags pa las mi skye ste/ 'gags pa ni med pa'i phyir ro/ /ci ste dngos po 'gags shing med pa las skye bar gyur na/ de lta na dngos po skye ba rgyu med pa can du 'gyur bas de mi 'dod de/ dus thams cad du thams cad las thams cad skye ba dang rtsom pa thams cad don med pa nyid du 'gyur ba'i phyir ro//de lta bas na dngos po yang dngos po med pa las skye ba med de/ dngos po med pa yang dngos po med pa las skye ba med do/ /'di ltar dngos po med pa bum pa'i dngos po med pa las mi skye ste/ bum pa'i dngos po med pa ni bum pa log pa tsam ste/ci yang med pa'i phyir dang bskyed par bya ba'i don ni ci zhig gang yin pa'i phyir ro/ /ci ste ci yang med pa ci yang med pa las skye bar 'gyur na ni de lta na ri bong gi rwa yang rta'i rwa las skye bar 'gyur ro/ /ci ste dngos po med pa ci zhig yin na ni ci zhig yin pa'i phyir dngos po nyid yin gyi dngos po med pa ma yin no//de lta bas na dngos po med pa yang dngos med pa las skye ba med do/ /yang gzhan yang / 'di ltar gal te dngos po skye bar 'gyur na de bdag las sam gzhan las sam gnyi ga las skye bar 'gyur grang na/ de la dngos po bdag las mi skye ste/ / gzhan las skye ba nyid ma yin/ /bdag dang gzhan las skye ba ni/ /yod min ji ltar skye bar 'gyur/ /re zhig dngos po ni bdag las skye ba med de/ rang gi bdag nyid kyis yod pa la ni yang skye bar brtag pa don med pa nyid du 'gyur ba'i phyir dang / thug pa med par thal ba'i skyon du 'gyur ba'i phyir ro//rang gi bdag nyid kyis med pa la ni bdag las zhes bya ba'i tshig kyang mi 'thad pa'i phyir te/ de lta bas na dngos po ni bdag las skye ba med do/ /dngos po ni gzhan las kyang skye ba med de/ dngos po ma skyes shing med pa la gzhan mi 'thad pa'i phyir ro/ /'di ltar 'ga' zhig yod na gzhan yang yod par 'gyur na de yang med de/de med na gzhan yod par ga la 'gyur/ ci ste 'gyur na ni de nyid dngos po yin pas yod pa de la yang skye bar ci bya ste/ skye bar brtags pa don med pa nyid du 'gyur ba'i phyir ro/ /de lta bas na ma skyes pas gzhan med pa kho na'i phyir/ dngos po ni bdag dang gzhan las kyang skye ba med de/ji skad bstan pa'i skyon gnyi gar thal bar 'gyur ba'i phyir ro/ /de lta bas na dngos po ni gnyi ga las kyang skye ba med do/ /dngos po gang bdag dang gzhan dang gnyi ga las skye ba med pa de dag gzhan gang las skye bar sems/ de lta bas na dngos po mi 'thad do/ /dngos po yod pa ma yin na gang gi dngos po med par 'gyur/dngos po dang dngos po med pa dag yod pa ma yin na gzhi med par 'byung ba dang 'jig pa dag ji ltar yod par gyur na/ yang gzhan yang / dngos po yod par khas blangs na/ /rtag dang chad par lta bar ni/ /thal bar 'gyur te dngos de ni/ /rtag dang mi rtag 'gyur phyir ro//dngos po lta ba yod na skyon chen po gzhan 'dir yang 'gyur te/ gang gi phyir dngos po de yod par khas blangs na rtag pa dang chad par lta bar thal bar 'gyur ro/ /ji ltar zhe na/ 'di ltar yod pa de ni rtag pa dang mi rtag pa'i phyir te/ dngos po gang yin pa de yod par khas len na de rtag pa'am/mi rtag par 'gyur te/ de las gzhan du mi 'thad pa'i phyir ro/ /de ltar re zhig gal te dngos po de rtag na ni rtag pa'i skyon du thal bar 'gyur la/ 'on te mi rtag na ni chad pa'i skyon du thal bar 'gyur bas de yang mi 'dod de skyon che ba'i phyir ro/ /smras pa/ dngos po yod par khas blangs kyang / / chad par mi 'gyur rtag mi 'gyur/ /'di ltar dngos po yod par khas blangs kyang / /rtag par lta bar thal bar yang mi 'gyur la/ chad par lta bar thal bar yang mi 'gyur te/ khyod gzhung lugs gsal bar mi shes pas de ltar sems par zad do/ /'di ltar gal te dngos po yod par khas blangs na/rtag pa dang chad pa'i skyon du thal bar 'gyur na/ de lta na srid pa mi 'thad par 'gyur te/ ci'i phyir zhe na/ rtag pa ni nges par gnas pa'i phyir dang / chad pa ni mi 'jug pa'i phyir ro/ /dngos por lta ba yod na yang srid pa 'thad pas de'i phyir rtag pa dang chad par lta ba'i skyon du thal bar mi 'gyur ro//de ji ltar zhe na/ 'bras bu rgyu yi 'byung 'jig gi /rgyun de srid pa yin phyir ro/ /'di ltar 'bras bu dang rgyu'i 'byung ba dang 'jig pa'i rgyun gang yin pa de ni srid pa yin te/ de la gang gi phyir rgyu 'jig par 'gyur ba de'i phyir rtag pa'i skyon du thal bar mi 'gyur la/ gang gi phyir rgyu 'gag bzhin pa las 'bras bu 'byung bar 'gyur ba de'i phyir chad pa'i skyon du thal bar mi 'gyur te/de'i phyir de ltar dngos po yod par khas blangs kyang srid pa yod pa'i phyir rtag pa dang chad pa'i skyon du thal bar mi 'gyur ro/ /bshad pa/ gal te 'bras bu'i 'byung 'jig gi /rgyun de srid pa yin gyur na/ / 'jig la yang skye med pa'i phyir/ /rgyu ni chad par thal bar 'gyur/ /gal te 'bras bu dang rgyu'i 'byung ba dang 'jig pa'i rgyun gang yin pa de srid pa yin par gyur na/ de lta na yang khyod la chad pa kho nar thal bar 'gyur te/ ci'i phyir zhe na/ 'jig pa la yang skye ba med pa'i phyir te/ 'di ltar rgyu 'gags pa la yang skye ba med pa'i phyir ro//de ltar rgyu 'gags pa la yang skye ba med pa'i phyir/ rgyu chad pa kho nar thal bar 'gyur ro/ /smras pa/ mi 'gyur te rgyu lam 'bras bu gzhan nyid ma yin pa'i phyir ro/ /'di ltar rgyu las 'bras bu gzhan nyid yin par mi 'thad do/ /khyod kyis kyang / gang la brten te gang 'byung ba//de ni re zhig de nyid min/ /de las gzhan pa'ang ma yin phyir/ /de phyir chad min rtag ma yin/ /zhes smras pas/ des na rgyu las 'bras bu gzhan nyid ma yin pa'i phyir rgyu chad par mi 'gyur ro/ /bshad pa/ kho bos de skad smra mod kyi khyod kyis de'i rten gyi de kho na khong du ma chud de/'di ltar gal te dngos po 'gag cing dngos po nyid skye bar 'gyur na/ de gnyis de nyid dam gzhan nyid du ji ltar mi 'gyur/ 'di ltar gal te re zhig rgyus rgyu'i gnas skabs spangs te 'bras bu'i gnas skabs su 'pho bar gyur na ni/ de lta na de nyid rgyu yin te/ de'i gnas skabs gzhan dang gzhan du gyur pa 'ba' zhig tu zad do//dper na bro gar mkhan gyis cha lugs gzhan spangs te/ cha lugs gzhan len par byed pa de la cha lugs tha dad pa nyid du 'gyur ba 'ba' zhig tu zad kyi bro gar mkhan la tha dad pa med pa de cha lugs tha dad par gyur kyang / de nyid bro gar mkhan yin pa de bzhin du/gnas skabs gzhan du 'phos su zin kyang / de nyid rgyu yin na ji ltar de nyid yin par mi 'gyur/ ci ste yang 'di snyam du rgyu ni gnas skabs gzhan du mi 'pho bar rgyu 'gag par 'gyur te/ rgyu 'gags pa na 'bras bu skye bar 'gyur bar sems na/ de lta na yang gang gi tshe gzhan 'gags pa la gzhan skyes pa de'i tshe ji ltar gzhan nyid du mi 'gyur/kho bo cag la ni dngos po la brten nas gdags pa ngo bo nyid stong pa sgyu ma dang smig rgyu dang gzugs brnyan lta bu rnams la dngos po de gang gir 'gyur te dngos po de gang las gzhan du 'gyur te de nyid dang gzhan nyid du 'gyur ba med do//de lta bas na dngos por lta ba yod na rgyu 'gags pa yang skye ba med pa'i phyir rgyun chad pa kho nar thal bar 'gyur ro/ /yang gzhan yang / dngos po ngo bo nyid yod na/ /dngos med 'gyur bar mi rigs so/ /dngos po ngo bo nyid kyis yod na ngo bo nyid yod pa ni dngos po med par 'gyur bar mi rigs te/ci'i phyir zhe na/ rang bzhin ni gzhan du mi 'gyur ba'i phyir ro/ /de'i phyir dngos por lta ba yod na rgyu yang 'gag par mi 'thad la 'bras bu yang skye bar mi 'thad de skye ba dang 'gag pa dag ni bkag par gyur pa yin pa'i phyir/ de la rtag pa kho na'i skyon du thal bar 'gyur ro/ /yang gzhan yang /mya ngan 'das pa'i dus na chad/ /srid rgyun rab tu zhi phyir ro/ /mya ngan las 'das pa'i dus na dgra bcom pa'i srid pa'i rgyun rab tu zhi ba'i phyir chad pa kho na'i skyon du yang thal bar 'gyur ro/ /de lta bas na srid pa'i rgyun de yod par rtog na yang rtag pa dang chad pa kho na'i skyon du thal bar 'gyur ro/ / smras pa/ re zhig srid pa'i rgyun ni rab tu grub bo/ /mya ngan las 'das pa'i dus na dgra bcom pa'i srid pa'i rgyun ldog pa ni kho bo cag la mi gnod pas mya ngan las 'das pa'i dus na de chad par 'gyur kyang sla'o / /bshad pa/ khyod kyi srid pa'i rgyun yod na rtag pa dang chad pa'i skyon du thal bar mi 'gyur ro zhes gang smras pa de nyid kyang kho bos srid pa'i rgyun yod kyang rtag pa dang chad pa kho na'i skyon du thal bar 'gyur ro zhes rab tu bstan zin to//re zhig srid pa'i rgyun ni rab tu grub po zhes gang smras pa de yang rigs pa ma yin te/ srid pa'i rgyun ni ji ltar yang mi 'thad pa kho na'o/ /ci'i phyir zhe na/'di ltar/ tha ma 'gags par gyur pa ni/ /srid pa dang por sbyor mi 'gyur/ /da ltar gyi srid pa'i mjug gi sems ni srid pa tha ma'o/ /ma 'ongs pa'i srid pa'i sems skye ba'i dang po ni srid pa dang po'o/ /de la re zhig srid pa tha ma 'gags pa ni srid pa dang po dang nying mtshams sbyor ba med de/srid pa tha ma 'gags pa yod pa ma yin pa'i phyir ro/ /'di ltar dngos po 'gags shing med pa las ji ltar dngos po skye bar 'gyur/ ci ste srid pa tha ma 'gags kyang srid pa dang po skye bar 'gyur na ni/ de lta na srid pa dang po rgyu med pa las 'byung bar 'gyur bas/ de ni mi 'dod de skyon du mar thal bar 'gyur ba'i phyir ro//de la 'di snyam du srid pa tha ma ma 'gags pa srid pa dang po dang nying mtshams sbyor bar sems na/ de la bshad par bya ste/ tha ma 'gags par ma gyur pa/ /srid pa dang por sbyor mi 'gyur/ /srid pa tha ma ma 'gags pa yang srid pa dang po dang nying mtshams sbyor ba med de /ci'i phyir zhe na/ srid pa gnyis su thal bar 'gyur ba'i phyir dang / rgyu med pa las byung ba'i skyon du thal bar 'gyur ba'i phyir ro/ /smras pa/ srid pa tha ma 'gags pa dang ma 'gags pa srid pa dang po dang nying mtshams sbyor ba med mod kyi 'on kyang 'gag bzhin pa nying mtshams sbyor ro//bshad pa/ gal te tha ma 'gag bzhin pa/ /dang po skye bar 'gyur na ni/ /'gag bzhin pa ni gcig 'gyur zhing / /skye bzhin pa yang gzhan du 'gyur/ /gal te srid pa tha ma 'gag bzhin pa srid pa dang po dang nying mtshams sbyor bar gyur na/ 'gag bzhin pa ni phyed 'gags pa'i phyir dang /skye bzhin pa yang phyed skyes pa'i phyir de gnyis srid pa gnyis su thal ba'i skyon du 'gyur te/ 'gag bzhin pa dang skye bzhin pa dag yod pa'i phyir ro/ /smras pa/ srid pa tha ma 'gags pa dang 'gag bzhin pa srid pa dang po dang nying mtshams sbyor ba med do zhes bya ba des kho bo la ci bya/ yod na re zhig srid pa dang po'i skye ba ni yod de/de yod pas srid pa'i rgyun yang 'thad do/ /bshad pa/ gal te 'gag bzhin skye bzhin dag / lhan cig sbyor ba'ang yod min na/ /phung po gang la 'chi 'gyur ba/ /der ni skye ba'ang 'byung bar 'gyur/ /lhan cig sbyor ba'ang zhes bya ba'i 'ang gi sgra ni srid pa tha ma 'gags pa dang ma 'gags pa yang bsdu ba'i don to//gal te srid pa tha ma 'gag bzhin pa srid pa dang po skye bzhin pa dang lhan cig nying mtshams sbyor ba'ang yod pa ma yin zhing srid pa tha ma 'gags pa yang srid pa dang po dang nying mtshams sbyor ba yod pa ma yin la/ srid pa tha ma 'gags pa yang srid pa dang po dang nying mtshams sbyor ba yod pa ma yin pa bzhin du/srid pa dang po'i skye ba ni yod do zhes zer na/ de lta na/ phung po gang dag kho na la 'chi bar 'gyur ba de dag kho na la skye ba yang 'byung bar thal bar 'gyur te/ skye ba gzhan mi 'thad pa'i phyir ro/ /de yang mi 'dod de de lta bas na de gsum ma gtogs par srid pa 'byung bar mi 'thad do//de ltar dus gsum dag tu yang / /srid pa'i rgyun ni mi rigs na/ /dus gsum dag tu gang med pa/ /de ni ji ltar srid pa'i rgyun/ /de'i phyir de ltar yongs su brtags na srid pa tha ma 'gags pa dang ma 'gags pa dang 'gag bzhin pa srid pa dang po dang nying mtshams sbyor bar mi 'thad pa'i phyir dus gsum dag tu yang srid pa'i rgyun mi rigs so //dus gsum dag tu srid pa'i rgyun gang med pa de dang ji ltar srid pa'i rgyun du 'thad/ srid pa'i rgyun yod pa ma yin na/ 'byung ba dang 'jig pa dag yod par ga la 'gyur/ 'byung ba dang 'jig pa dag yod pa ma yin na khyod kyi dus la sogs pa dag 'grub par ga la 'gyur/'byung ba dang 'jig pa brtag pa zhes bya ba ste rab tu byed pa nyi shu gcig pa'o// //smras pa/ srid pa'i rgyun ni yod pa kho na ste/ ci'i phyir zhe na/ de bzhin gshegs pa yod pa'i phyir ro/ /de bzhin gshegs pa ni bcom ldan 'das dgra bcom pa yang dag par rdzogs pa'i sangs rgyas yod do//des bskal pa grangs med pa dag gis byang chub yang dag par bsgrubs te/ de ltar yang mdo sde gzhan dag las de'i tshe de'i dus na nga bram ze'i khye'u mig bzang zhes bya bar gyur to/ /de'i tshe de'i dus na nga rgyal po nga las nu zhes bya bar gyur to zhes gsungs te/srid pa'i rgyun med na de mi 'thad pas de'i phyir srid pa'i rgyun ni yod pa kho na'o/ /bshad pa/ gal te de bzhin gshegs pa nyid 'thad na ni/ srid pa'i rgyun yang yod par 'gyur grang na/ de bzhin gshegs pa nyid mi 'thad pas de'i srid pa'i rgyun yod par ga la 'gyur/ji ltar zhe na/ 'di la gal te de bzhin gshegs pa zhes bya ba 'ga' zhig yod par gyur na/ de phung po rnams nyid dam/ phung po rnams las gzhan zhig yin grang na/ de la/ sku min sku las gzhan ma yin/ /de la sku med de der med/ /de bzhin gshegs pa sku ldan min//de bzhin gshegs pa gang zhig yin/ /re zhig phung po rnams nyid de bzhin gshegs pa ma yin te/ ci'i phyir zhe na/ phung po rnams 'byung ba dang 'jig pa'i chos can yin pa'i phyir de bzhin gshegs pa mi rtag pa nyid du thal bar 'gyur ba'i phyir dang / nye bar len pa po dang / nye bar len pa dag gcig pa nyid du mi 'thad pa'i phyir ro//phung po rnams las de bzhin gshegs pa gzhan pa phung po med pa'i chos logs shig na yang med de/ ci'i phyir zhe na/ phung po mi rtag pa rnams las chos mi mthun pa'i phyir rtag pa nyid du thal bar 'gyur ba'i phyir dang / gzhan nyid yin na gzung du yod par thal bar 'gyur ba'i phyir te/gzung du yang med pas de'i phyir phung po rnams las de bzhin gshegs pa gzhan yang ma yin no/ /de bzhin gshegs pa la phung po rnams gangs la shing ljon pa'i nags tshal bzhin du med de/ ci'i phyir zhe na/ rten dang brten pa gzhan ma yin pa'i phyir mi rtag pa nyid du thal bar 'gyur ba'i phyir ro//phung po rnams la yang de bzhin gshegs pa shing ljon pa'i nags tshal na seng ge bzhin du med de/ ci'i phyir zhe na/ skyon bstan ma thag pa nyid du 'gyur ba'i phyir ro/ /de bzhin gshegs pa phung po rnams dang shing ljon pa'i snying po dang ldan pa bzhin du ldan pa ma yin te/ci'i phyir zhe na/ phung po rnams las gzhan ma yin pa'i phyir mi rtag pa nyid kyi skyon du 'gyur ba'i phyir ro/ /de ltar rnam pa lngas btsal na de bzhin gshegs pa nye bar len pa la mi srid na/ khyod kyis gang gis srid pa'i rgyun yod par yongs su brtags pa'i de bzhin gshegs pa de gang zhig yin pa smros shig /smras pa/ ci kho bo phung po rnams nyid de bzhin gshegs pa'am/ phung po rnams las de bzhin gshegs pa gzhan no zhes smra'am/ ci'i phyir khyod kho bo la rtag pa'am mi rtag par thal bar 'gyur ba'i skyon 'dogs par byed/ kho bo ni phung po rnams la brten nas de bzhin gshegs pa gdags par bya ba yin par smra bas/brten nas gdags par bya ba ni/ /nye bar len pa las de nyid dam gzhan nyid du mi smra'o/ /de'i phyir de nyid du brjod par bya ba ma yin pa'i phyir mi rtag pa nyid kyi skyon du mi 'gyur la gzhan nyid du brjod par bya ba ma yin pa'i phyir rtag pa nyid kyi skyon du mi 'gyur ro//bshad pa/ ci khyod legs par sbyar ba'i phyed kyis gar byed dam/ khyod brten nas de bzhin gshegs pa gdags par yang smra la/ de bzhin gshegs pa ngo bo nyid las yang 'grub par yang 'dod ko/ /'o na/ gal te sangs rgyas phung po la/ /brten nas ngo bo nyid las med/ / gal te sangs rgyas phung po rnams la brten nas gdags par bya ba yin na/ de'i don ni sangs rgyas ngo bo nyid las med pa ma yin nam/ 'di ltar ngo bo nyid las yod pa la ni yang brten nas gdags pas ci bya ste/ de'i ngo bo nyid gang kho na yin pa de kho nas gdags par bya bar 'gyur ro/ /gang gi phyir de ngo bo nyid med pa de'i phyir nye bar len pas gang gdags par bya ba ste/de lta bas na de bzhin gshegs pa ngo bo nyid las yod pa ma yin no/ /ngo bo nyid las gang med pa/ /de gzhan dngos las ga la yod/ /de bzhin gshegs pa gang ngo bo nyid las med pa de dag gzhan gang las yod par sems na / smras pa/ gzhan gyi dngos po las te/ de bzhin gshegs pa ni nye bar len pa gzhan du gyur la brten nas gdags par bya ba yin pas de'i phyir de bzhin gshegs pa gzhan gyi dngos po las yod do/ /bshad pa/ gang zhig gzhan gyi dngos brten nas/ /de dag nyid du mi 'thad do/ /gang zhig gzhan gyi dngos po la brten nas gdags par bya ba de ni bdag nyid yod do zhes brjod par mi 'thad de/ci'i phyir zhe na/ rang las ma grub pa'i phyir ro/ /gang zhig bdag nyid med pa de/ /ji ltar de bzhin gshegs par 'gyur/ /de bzhin gshegs pa gang zhig rang gi bdag nyid med pa de nyid nye bar len pa gzhan du gyur pas gdags par bya na ji ltar de bzhin gshegs par 'gyur/gal te de rang gi bdag nyid med par nye bar len pa la brten nas bdag nyid yod par 'gyur na ni/ de lta na nye bar len pa la brten te skyes par 'gyur bas de yang mi 'dod de/ mi rtag pa nyid la sogs pa'i skyon du thal bar 'gyur ba'i phyir ro//yang gzhan yang / gal te ngo bo nyid med na/ /gzhan dngos yod par ji ltar 'gyur/ /ngo bo nyid dang gzhan dngos dag /ma gtogs de bzhin gshegs de gang / /gal te de bzhin gshegs pa ngo bo nyid med de/ ngo bo nyid yod pa ma yin na/ gzhan gyi dngos po yod par ga la 'gyur/'di ltar gang ngo bo nyid las gzhan yin pa de gzhan gyi dngos po zhes bya na/ ngo bo nyid med pa de gang las gzhan gyi dngos por 'gyur/ de lta bas na gzhan gyi dngos po yang yod pa ma yin pa nyid do/ /'o na ngo bo nyid dang gzhan gyi dngos po dag ma gtogs par de bzhin gshegs pa de gang yin pa dang gang gis gdags par bya ba de smros shig /smras pa/ khyod brten nas gdags par bya ba'i don rnam par mi shes par mi rigs pa mang po de snyed cig smra ste/ gzhan gyi tshig la co 'dri ba tsam gyis ni de kho na'i don yongs su shes par mi nus so/ /de bzhin gshegs pa rnams la brten nas gdags par bya ba gang yin pa de la ci de bzhin gshegs pa ngo bo nyid las yod dam 'on te gzhan gyi dngos po las yod ces bya ba'i tshig de'i glan kar mi 'gyur ro//bshad pa/ 'jig rten na/ 'dre yis bya ba gang yin pa/ /de ni byis pa dag byed do/ /zhes brjod pa de ni bden pa kho na ste /kho bo ni brten nas gdags par bya ba'i don rnam par mi shes pa yin la/ khyod ni ma yin pa lta zhig /khyod kyis gang dag la de bzhin gshegs pa yod pa nyid du yongs su brtags pa'i phung po rnams ni nye bar len pa nyid du mi 'thad do/ /de ji ltar zhe na/ gal te phung po ma brten par//de bzhin gshegs pa 'ga' yod na/ /de ni da gdod rten 'gyur zhing / /brten nas de las 'gyur la rag /gal te phung po rnams nye bar len pa po'i snga rol na/ de bzhin gshegs pa zhes bya ba 'ga' zhig yod cing / de phung po rnams nye bar len par 'gyur na ni/ de lta na ni de bzhin gshegs pa brten nas yod par 'gyur la rag go//de yang skyes par gyur la phung po rnams kyis de gsal ba tsam zhig byed par 'gyur du ni/ phung po rnams la ma brten par/ /de bzhin gshegs pa 'ga' yang med/ /gang zhig ma brten yod min pa/ /des ni ji ltar nyer len 'gyur/ / phung po rnams la ma brten par de bzhin gshegs pa 'ga' yang mi 'thad de/ gang phung po rnams la ma brten par med na/ med pa des ji ltar phung po rnams nye bar len par 'gyur/ smras pa/ gzhung lugs dang 'gal ba de bshad de ci rung / 'di ltar bcom ldan 'das kyis 'khor ba la thog ma dang tha ma med do zhes gsungs pas/de la nye bar len pa po dang nye bar blangs pa dag snga phyi yod par 'thad par ga la 'gyur te/ de ni rtag tu nye bar len pa dang bcas pas gdags par bya ba yin no/ /bshad pa/ gal te 'khor ba la thog ma dang tha ma med pas nye bar len pa po dang nye bar blangs pa dag snga phyi yod par mi 'thad na ni/de bzhin gshegs pa ni nye bar len pa po yin la phung po rnams ni nye bar blang ba yin no zhes bya ba 'di yang mi 'thad pa ma yin nam/ ci'i phyir zhe na/ 'di ltar/ nye bar blangs pa ma yin pa/ /nye bar len par cis mi 'gyur/ /nye bar len pa med pa yi//de bzhin gshegs pa ci yang med/ /'di la nye bar blangs pa yin pas nye bar len pa zhes bya la/ nye bar len par byed pas nye bar len pa po zhes bya bas/ de'i phyir nye bar len pa pos nye bar blangs pa ma yin pa ni nye bar len pa ma yin la/ nye bar blangs pa nye bar len par mi byed pa yang nye bar len pa po ma yin no//'khor ba la thog ma dang tha ma med na 'di ni nye bar blangs pa'o / /'di ni nye bar len par byed pa'o zhes bya ba de mi 'thad do/ /de ltar snga phyi med na khyod kyi phung po rnams ji ltar nye bar blang ba yin pa dang / khyod kyis yongs su brtags pa'i de bzhin gshegs pa de ji ltar nye bar len pa po yin pa de smros shig /de lta bas na snga phyi med na nye bar len pa po yang mi 'thad pa nyid yin la/ nye bar blang ba yang mi 'thad pa nyid do/ /smras pa/ de ni 'thad de/ ci'i phyir zhe na/ de nyid dang gzhan nyid du brjod par bya ba ma yin pa'i phyir te/ nye bar len pa po dang nye bar blang ba ni de nyid dang gzhan nyid du mi brjod do//re zhig de nyid du mi brjod de byed pa po'i tshig tha dad pa'i phyir ro/ /gzhan nyid du yang mi brjod dam so sor 'grub pa med pa'i phyir ro/ /de lta bas na de gnyi ga yang yod de de nyid dang gzhan nyid du ni brjod par mi nus so/ /bshad pa/ ci khyod mdza' bshes kyi blos dgra bo dpang du len tam / khyod gang kho nas nye bar len pa po dang nye bar blangs pa dag rab tu 'grub par mi 'thad pa de kho nas de dag rab tu bsgrub pa'i phyir rtsom par byed ko/ /'di ltar gal te nye bar blang ba dang nye bar len pa po zhig yod par gyur na gcig pa nyid dam/ gzhan nyid du 'gyur bar the tshom med do/ /gang dag gcig pa nyid du yang yod pa ma yin la gzhan nyid du yang yod pa ma yin pa de dag gzhan du ji ltar yod par 'gyur/de lta bas na nye bar blang ba yang yod pa ma yin pa nyid la nye bar len pa po yang yod pa ma yin pa nyid do/ /tha snyad kyi dbang gis nye bar len pa po dang nye bar blangs pa dag rjod par byed na yang de nyid kyang ma yin pa gzhan nyid kyang ma yin par brjod dgos te de ni nges pa kho nar de ltar blta'o//gzhan du na de bzhin gshegs pa bdag dang nye bar len pa bdag med pa dag ji ltar gzhan nyid du mi 'gyur/ slob dpon 'phags pa lhas kyang / gang phyir gzugs la bdag med pa/ / de phyir gzugs las bdag gzhan 'gyur/ /grang dang tsha ba tha dad nyid/ /med ces brjod par mi rung bzhin/ /zhes gsungs so/ /ci ste yang nye bar len pa po zhig yod par gyur na de lta na yang / rnam pa lngas ni btsal byas na/ /gang zhig de nyid gzhan nyid du/ /med pa'i de bzhin gshegs pa de/ / nye bar len pas ji ltar gdags/ /de bzhin gshegs pa gang nye bar len pa gang gis gdags par bya ba de nyid la rnam pa lngas btsal na de nyid dang gzhan nyid du brjod par bya ba ma yin pa nye bar len pa la med na ji ltar de bzhin gshegs pa yod do zhes brjod par bya/ de lta bas na brten nas gdags pa dang yod pa nyid kyang mi 'thad do//smras pa/ ji srid du nye bar len pa zhes bya ba phung po lnga po 'di/ sngon du dmigs par 'gyur ba de srid du ji ltar med par 'gyur te/ de'i phyir re zhig nye bar len pa ni yod do/ /kha lo sgyur ba med par shing rta mi 'gro bas 'di la nye bar len pa po yang yod par 'gyur ro//bshad pa/ ci khyod chu bo shugs drag pos khyer ba na rtsa drungs phyung la 'ju'am/ khyod nye bar blangs pas nye bar len pa po rab tu bsgrub par 'dod ko/ /gang gi tshe/ gang zhig nye bar blang ba de/ /de ni ngo bo nyid las med/ /nye bar blang ba gang yod do snyam du sems pa de yang rten cing 'brel par 'byung ba'i phyir ngo bo nyid med do//smras pa/ de ni re zhig yod de gal te bdag gi dngos po las yod pa ma yin yang gzhan gyi dngos po las yod do/ /bshad pa/ bdag gi dngos las gang med pa/ /de bzhin dngos las yod re skan/ /nye bar len pa gang bdag gi dngos po las med pa de gzhan gyi dngos po las yod par 'gyur re skan /gang gi tshe bdag gi dngos po 'ga' zhig yod na nye bar len pa ni bdag gi dngos po las yod pa ma yin pas/ de'i phyir de las gzhan yang yod pa ma yin pa nyid do / /gzhan med na ji ltar gzhan las yod par 'gyur/de lta bas na nye bar len pa ni/ gzhan gyi dngos po las kyang yod pa ma yin no/ /mngon sum du dmigs pa zhes gang smras pa de yang rang gi sems kun tu rmongs pa'i skyon gyis sgyu ma dang rmi lam mthong ba bzhin du mthong ba yin gyi/ 'di la yang dag par cung zad kyang med de/ 'di bden no snyam du mngon par zhen pa de spang ba'i phyir/bcom ldan 'das kyis dbu ba rdos pa dang chu'i chu bur dang smig rgyu dang chu shing gi phung po dang sgyu ma'i dpe dag bka' stsal cing / sgyu ma 'di ni byis pa 'drid pa'o zhes kyang gsungs te/ gang gi phyir de dag yod pa ma yin pa de'i phyir/ de ltar nyer blang nyer len po / /rnam pa kun gyis stong pa yin//stong pas de bzhin gshegs stong pa/ /ji lta bur na 'dogs par 'gyur/ /de ltar gang gi phyir nye bar len pa ngo bo nyid las kyang yod pa ma yin la gzhan gyi dngos po las kyang yod pa ma yin pa de'i phyir nye bar len pa stong pa yin no/ /gang gi phyir nye bar len pa po yang rnam pa kun gyis yongs su brtags na ngo bo nyid las kyang yod pa ma yin la gzhan gyi dngos po las kyang yod pa ma yin pa de'i phyir nye bar len pa po yang stong pa yin no//de'i phyir khyod dbu brdos pa dang / chu'i chu bur dang smig rgyu dang chu shing gi phung po dang sgyu ma ltar snying po med cing ngo bo nyid stong pa'i nye bar len pas/sgyu ma'i skyes bu dang rmi lam dang gzugs brnyan dang dri za'i grong khyer ltar snying po med cing ngo bo nyid stong pa'i de bzhin gshegs pa yod do zhes ji ltar 'dogs par byed pa je smros shig /de lta bas na re zhig rang gi phyogs la chags pa thong la ci gang brten nas yod par 'dogs pa dang /gang brten nas yod pa nyid dang med pa nyid spangs te dbu mar bsgrubs pa 'di yod pas 'di 'byung la/ 'di med pas 'di mi 'byung ngo zhes 'dogs par byed pa de gnyis las gang brten nas gdags par bya ba'i don rnam par mi shes pa yin pa de soms shig /de lta bas na brten nas gdags par bya ba'i don ni dngos po gang brten nas gdags par bya ba de ni rnam pa thams cad du ngo bo nyid stong pa'i phyir yod pa dang med par brjod par bya ba ma yin pa de nyid yin te/tha snyad kyi tshig la ni skyon med do/ /smras pa/ gal te de ltar de dag thams cad stong ngo zhes kyang brjod par mi bya ba yin na 'o na khyod bag tsha ba med par gsang bstod de/'di dag thams cad stong ngo zhes smra'am/ bshad pa/ stong ngo zhes brjod par mi bya ba yin na zhes bya ba ni shin tu nyung ngu zhig brjod pa yin te/ stong ngo zhes kyang mi brjod de / /mi stong zhes kyang mi bya zhing / /gnyis dang gnyis min mi bya ste//gdags pa'i don du brjod par bya/ /stong ngo zhes kyang brjod par mi bya/ mi stong ngo zhes kyang mi bya/ stong pa dang mi stong pa dang / stong pa yang ma yin mi stong pa yang ma yin no zhes kyang brjod par mi bya'o/ /yang dag pa ma yin pa'i kun tu rtog pa spang pa'i phyir dang / don dam pa'i de kho na gdags pa'i don du ni de dag brjod par bya ste 'og nas kyang / tha snyad la ni ma brten par/ /dam pa'i don ni bstan mi nus/ /dam pa'i don la ma brten par/ /mya ngan 'das pa 'thob mi 'gyur/ /zhes 'byung ngo / /slob dpon 'phags pa lhas kyang / gal te dngos po rang bzhin yod//stong mthong yon tan ci zhig yod/ /rtog pas bcings pa mthong bas na/ /'dir ni de nyid dgag par bya/ /zhes gsungs so/ /smras pa/ gal te de bzhin gshegs pa ngo bo nyid las kyang yod pa ma yin la gzhan gyi dngos po las kyang yod pa ma yin no/ / ci'i phyir rtag pa dang mi rtag pa la sogs pa dang / mtha' dang mtha' med pa la sogs par brjod par bya ba ma yin no zhes bshad/ de bzhin gshegs pa med pa nyid do/ /zhes gsal ba kho nar brjod par bya ba'i rigs pa snyam bshad pa/ de bzhin gshegs pa brten nas gdags par bya ba gang yin pa de/yod do zhe'am/ med do zhes ji ltar brjod par rigs/ 'di ltar gal te de bzhin gshegs pa zhig yod par gyur na/ nye bar len pa med pa yang yod pa kho nar 'gyur ba'i rigs na/ nye bar len pa med pa ni yod pa ma yin no/ /gang nye bar len pa med pa ni yod pa ma yin pa de ji ltar yod do zhes brjod par bya/de bzhin gshegs pa gang la brten nas/ gdags par bya ba de ji ltar med do zhes kyang brjod par bya ste/ 'di ltar u dum bA ra'i me tog med pa ni gdags su med do/ /de ltar gang gi phyir re zhig de bzhin gshegs pa ngo bo nyid las kyang yod pa ma yin la gzhan gyi dngos po las kyang yod pa ma yin pa de'i phyir bshad pa/rtag dang mi rtag la sogs bzhi / /zhi ba 'di la ga la yod/ /mtha' dang mtha' med la sogs bzhi/ /zhi ba 'di la ga la yod/ /de bzhin gshegs pa ngo bo nyid stong pa ngo bo nyid zhi ba gang yin pa de la rtag pa dang mi rtag pa la sogs pa bzhi po/de bzhin gshegs pa rtag pa dang / de bzhin gshegs pa mi rtag pa dang / de bzhin gshegs pa rtag kyang rtag la/ mi rtag kyang mi rtag pa dang / de bzhin gshegs pa rtag pa yang ma yin mi rtag pa yang ma yin pa zhes bya ba de dag 'thad par ga la 'gyur/mtha' dang mtha' med pa la sogs pa bzhi po/ de bzhin gshegs pa mtha' yod pa dang / de bzhin gshegs pa mtha' med pa dang / de bzhin gshegs pa mtha' yod kyang yod la/ mtha' med kyang med pa dang / de bzhin gshegs pa mtha' yod pa yang ma yin mtha' med pa yang ma yin pa zhes bya ba de dag 'thad par ga la 'gyur te/de bzhin gshegs pa zhes bya ba ngo bo nyid dang / gzhan gyi dngos po dang bral ba gang yin pa rtag pa dang mi rtag pa la sogs pa de dag las gang yang rung ba zhig tu 'gyur ba de gang yin/ gang gi phyir phung po rnams la brten nas gdags par bya ba yin pa de'i phyir de bzhin gshegs pa med do zhes kyang brjod par mi bya ste/'di ltar gang brten nas gdags par bya ba de/ ji ltar med par 'gyur/ 'og nas kyang / de ltar len las gzhan ma yin/ /de ni nyer len nyid kyang min/ /bdag ni nye bar len med min/ /med pa nyid du'ang de ma nges//zhes 'byung ngo / /de'i phyir de ltar de bzhin gshegs pa yod pa nyid dang med pa nyid kyi phyogs dang bral ba tshe 'di nyid la brten pa las de bzhin gshegs pa dmigs su med pa la gti mug gis kun nas dkris pa'i sems dang ldan pa de kho na mthong ba lkog tu gyur pa/ gang gis 'dzin sdug gzung gyur pa/ /de ni mya ngan 'das pa la/ /de bzhin gshegs pa yod ce 'am/ /med ces rnam rtog rtog par byed/ /gang gis 'dzin pa stug po gzung bar 'gyur ba 'di nyid bden gyi gzhan ni don med pa'o snyam du sems pa de ni de bzhin gshegs pa mya ngan las 'das pa la 'di lta ste/de bzhin gshegs pa yod pa nyid do zhe'am/ de bzhin gshegs pa med pa nyid do zhes bya bar rnam par rtog pa la de ltar rnam par rtog par byed do/ /de bzhin gshegs pa mya ngan las 'das nas yod ce'am/ de bzhin gshegs pa mya ngan las 'das nas med ce'am/ de bzhin gshegs pa mya ngan las 'das nas yod kyang yod la med kyang med ce'am/ de bzhin gshegs pa mya ngan las 'das nas yod pa yang ma yin med pa yang ma yin zhes bya ba de ltar rtog par byed do/ /gang dag bdag nyid che ba rten cing 'brel par 'byung ba shes pa'i sgron me'i snang bas blo'i mig la phan btags pa dang /dngos po rnams yang dag pa ji lta ba bzhin du mthong ba de dag la ni/ ngo bo nyid kyis stong de la/ /sangs rgyas mya ngan 'das nas ni/ /yod do zhe'am med do zhes/ /bsam pa 'thad pa nyid mi 'gyur/ /de bzhin gshegs pa ngo bo nyid dang gzhan gyi dngos pos stong pa sgyu ma dang gzugs brnyan dang sprul pa lta bu mya ngan las 'das pa de la sangs rgyas bcom ldan 'das mya ngan las 'das nas yod do zhe'am/sangs rgyas bcom ldan 'das mya ngan las 'das nas med do zhes bsam pa de dag 'thad pa nyid du mi 'gyur ro/ /de ltar yang bcom ldan 'das kyis dga' bo khyod 'di ltar tshe 'di la de bzhin gshegs pa yang dag par rjes su ma mthong na bde bar 'gyur ro zhes gsungs pa'i phyir ro//de bzhin gshegs pa mya ngan las 'das nas yod do zhe'am/ de bzhin gshegs pa mya ngan las 'das nas med do zhes pa dag gis/ gang dag sangs rgyas spros 'das shing //zad pa med la spros byed pa/ /spros pas nyams pa de kun gyis/ /de bzhin gshegs pa mthong mi 'gyur/ /de'i phyir de ltar gang dag sangs rgyas bcom ldan 'das 'jig rten pa'i spros pa thams cad las yang dag par 'das shing zad pa med pa la/ yod pa dang med pa dang rtag pa dang mi rtag pa la sogs pa'i spros pa rnams kyis spros par byed pa de dag thams cad ni spros pa de dag gis ye shes kyi mig nyams pas dmus long gis nyi ma bzhin du de bzhin gshegs pa mthong bar mi 'gyur te/de bzhin gshegs pa 'jig rten las 'das pa'i chos la gnas pa la yod pa la sogs pa 'jig rten pa'i spros pa rnams kyis ji ltar lta bar nus/zad pa med pa zhes bya ba ni 'gro ba med pa'i don te/ 'gro med gom pa gang gis bkri/ /zhes gsungs pa lta bu'o/ /de lta bas na de bzhin gshegs pa ni ngo bo nyid med pa nyid yin pas de la srid pa'i rgyun ni yod pa kho na yin te/de bzhin gshegs pa yod pa'i phyir ro zhes gang smras pa de rigs pa ma yin no/ /de la 'jig rten ni rnam pa gnyis te/ sems can gyi 'jig rten dang 'du byed kyi 'jig rten du 'dod do/ /de la de bzhin gshegs pa brtags pas ni sems can gyi 'jig rten yang brtags pa yin la/de bzhin gshegs pa brtags pa 'di nyid kyis 'du byed kyi 'jig rten yang brtags par khong du chud par bya'o/ /ci'i phyir zhe na/ 'di ltar/ de bzhin gshegs pa dngos nyid gang / /de ni 'gro 'di'i ngo bo nyid/ /gang gi phyir de bzhin gshegs pa'i ngo bo nyid gang yin pa de ni 'gro ba 'di'i ngo bo nyid kyang yin pa de'i phyir de bzhin gshegs pa brtags pa 'di nyid kyis 'gro ba 'di dag kyang brtags pa yin no//smras pa/ de bzhin gshegs pa'i ngo bo nyid gang yin/ bshad pa/ de bzhin gshegs pa dngos nyid med/ /'gro 'di ngo bo nyid med do/ /ji ltar zhe na/ gang gi phyir de bzhin gshegs pa phung po rnams la brten nas gdags par bya ba yin gyi rang las rab tu grub pa med pa de'i phyir ngo bo nyid med do//'gro ba 'di dag kyang de dang de dag la brten nas gdags par bya ba yin gyi 'di dag la rang las rab tu grub pa cung zad kyang med pas de'i phyir 'gro ba yang de bzhin gshegs pa bzhin du ngo bo nyid med do//ngo bo nyid med pa'i phyir 'di la yang / rtag dang mi rtag la sogs bzhi/ /zhi ba 'di la ga la yod/ /mtha' dang mtha' med la sogs bzhi/ /zhi ba 'di la ga la yod/ /ces bshad do/ /smras pa/ de lta ma yin te/ 'dus byas ni gcig tu mi rtag pa zhes brjod la/de bzhin gshegs pa ni mi rtag pa zhes mi brjod pas de la/ de bzhin gshegs pa'i dngos nyid gang / /de ni 'gro 'di'i ngo bo nyid/ /ces bya bar ji ltar 'thad/ bshad pa/ de ni 'og nas kyang / sangs rgyas rnams kyis chos bstan pa/ /bden pa gnyis la yang dag brten//'jig rten kun rdzob bden pa dang / /dam pa'i don gyi bden pa'o/ /zhes 'byung bas de la 'jig rten gyi kun rdzob kyi bden pa gang gis bum pa yod do sab ma yod do zhes brjod pa de nyid kyis bum pa chag go sab ma tshig go zhes de dag mi rtag par yang brjod do/ / gang gi tshe de kho na sab ma tsam pa de'i tshe ni bum pa dang sab ma dag brten nas gdags par bya ba yin pas mi 'thad na de dag chag pa dang tshig pa lta 'thad par ga la 'gyur/ gzhan yang de bzhin gshegs pa yang 'jig rten gyi kun rdzob kyi dbang gis de bzhin gshegs pa bgres so//de bzhin gshegs pa mya ngan las 'das so/ /zhes mi rtag par yang brjod do/ /gang gi tshe don dam par bsam pa de'i tshe ni de bzhin gshegs pa nyid mi 'thad na bgres pa dang mya ngan las 'das pa dag lta 'thad par ga la 'gyur te/ de'i phyir de bzhin gshegs pa'i ngo bo nyid gang yin pa de ni 'gro ba 'di'i ngo bo nyid kyang yin no//de lta bas na sems can gyi 'jig rten brtags pas 'du byed kyi 'jig rten yang brtags par grub bo/ /de bzhin gshegs pa brtag pa zhes bya ba ste rab tu byed pa nyi shu gnyis pa'o// //dbu ma'i rtsa ba'i 'grel pa bud d+ha pA li ta /bam po dgu pa/ 'dir smras pa/ 'dod chags zhe sdang gti mug rnams/ /kun tu rtog las 'byung bar gsungs/ /sdug dang mi sdug phyin ci log /brten pa 'di las kun tu 'byung / /'di la 'dod chags dang zhe sdang dang gti mug rnams ni kun tu rtog pa las 'byung bar mdo sde dag las rgya cher gsungs te/sdug pa dang mi sdug pa'i phyin ci log la brten pa nyid las kun tu 'byung bas/ de'i phyir 'dod chags dang zhe sdang dang gti mug rnams ni yod pa yin no/ /'dir bshad pa/ gang dag sdug dang mi sdug pa'i/ /phyin ci log la brten 'byung ba/ /de dag ngo bo nyid las med//de phyir nyon mongs yang dag med/ /gang dag da ltar sdug pa dang mi sdug pa'i phyin ci log la brten nas kun tu rtog pa las 'byung ba de dag ni ngo bo nyid las med pas de'i phyir nyon mongs pa rnams yang dag par yod pa ma yin no/ /yang gzhan yang / bdag gi yod nyid med nyid ni//ji lta bur yang 'grub pa med/ /de med nyon mongs rnams kyi ni/ /yod nyid med nyid ji ltar 'grub/ /bdag gi yod pa nyid dang med pa nyid ni rnam pa gang gis kyang ji lta bur yang 'grub pa med do/ /bdag de med na nyon mongs pa rnams kyi yod pa nyid dang med pa nyid ji ltar 'grub par 'gyur/ci'i phyir zhe na/ nyon mongs de dag gang gi yin/ /de yang 'grub pa yod ma yin/ /nyon mongs pa de dag ni 'ga' zhig gi yin te nyon mongs pa de dag gang gi yin pa de yang rnam pa thams cad du 'grub pa yod pa ma yin no/ /gal te gang med ci zhig yod//nyon mongs cung zad yod ma yin/ gal te nyon mongs pa de dag gang gi yin pa de yang 'grub pa yod pa ma yin na/ gang med na ci zhig yod de nyon mongs pa cung zad kyang yod pa ma yin no/ /ci ste gang yang med par nyon mongs pa rnams yod de de rnams ni su'i yang ma yin no snyam na de la bshad par bya ste/rang lus lta bzhin nyon mongs rnams/ /nyon mongs can la rnam lngar med/ /rang lus lta bzhin nyon mongs can/ /nyon mongs pa la rnam lngar med/ /ji ltar rang gi lus la lta ba phung po lnga po dag la rnam pa lngar yod pa ma yin pa de bzhin du nyon mongs pa rnams kyang nyon mongs pa can gyi sems la rnam pa lngar yod pa ma yin/ji ltar rang gi lus la lta ba phung po lnga po dag rnam pa lngar yod pa ma yin pa de bzhin du nyon mongs pa can gyi sems kyang nyon mongs pa rnams la rnam pa lngar yod pa ma yin no/ /yang gzhan yang / sdug dang mi sdug phyin ci log /ngo bo nyid las yod min pa//sdug dang mi sdug phyin ci log /brten nas nyon mongs gang dag yin/ /sdug pa dang mi sdug pa'i phyin ci log dag ngo bo nyid las yod pa ma yin pa de'i tshe/ sdug pa dang mi sdug pa'i phyin ci log dag ni yang dag pa ma yin no/ /gang yang dag pa ma yin pa de ni yod pa ma yin te/sdug pa dang mi sdug pa'i phyin ci log de dag yod pa ma yin na de dag la brten nas 'byung ba'i nyon mongs pa de dag ma yin te/ de dag gi rgyu can nyon mongs pa rnams ji ltar yod par 'gyur/ smras pa/ gzugs sgra ro dang reg bya dang / /dri dang chos dag rnam drug ni/ /gzhi ste 'dod chags zhe sdang dang //gti mug gi ni yin par brtags / /gzugs dang sgra dang ro dang reg pa dang dri dang chos dag rnam pa drug ni 'dod chags dang zhe sdang dang gti mug gi gzhi yin par rnam par brtags te / gzhi de dag yod na sdug pa dang mi sdug pa'i phyin ci log dag kun tu 'byung bas de'i phyir sdug pa dang mi sdug pa'i phyin ci log dag la brten nas 'dod chags dang zhe sdang dang gti mug rnams 'byung ngo //'dir bshad pa/ gzugs sgra ro dang reg pa dang / /dri dang chos dag 'ba' zhig pa/ /dri za'i grong khyer lta bu dang / /smig rgyu rmi lam 'dra ba yin/ / sgyu ma'i skyes bu lta bu dang / /gzugs brnyan 'dra ba de dag la/ /sdug pa dang ni mi sdug pa/ /'byung bar yang ni ga la 'gyur/ /gzugs dang / sgra dang / ro dang / reg pa dang / dri dang / chos dag ni 'ba' zhig pa bral ba ci yang med pa ma 'dres pa ngo bo nyid med pa ste/dri za'i grong khyer lta bu dang smig rgyu dang rmi lam 'dra ba yin pas/ sgyu ma'i skyes bu lta bu dang gzugs brnyan dang 'dra ba de dag la sdug pa dang mi sdug pa 'byung bar ga la 'gyur/ yang gzhan yang / gang la brten nas sdug pa zhes / /mi sdug par ni gdags bya ba/ /sdug pa mi ltos yod min pas//de phyir sdug pa 'thad ma yin/ /gang la brten nas mi sdug pa mi sdug par gdags par bya'i sdug pa mi sdug pa la ma ltos pa'i snga rol na yod pa ma yin pas de'i phyir sdug pa 'thad pa ma yin no/ /gang la brten nas mi sdug pa / /sdug pa zhes ni gdags bya ba/ /mi sdug mi ltos yod min pas//de phyir mi sdug 'thad ma yin/ /gang la brten nas sdug pa sdug par gdags par bya'i mi sdug pa sdug pa la ma ltos pa'i snga rol na yod pa ma yin pas de'i phyir mi sdug pa 'thad pa ma yin no/ /sdug pa yod pa ma yin na/ /'dod chags 'byung bar ga la 'gyur//mi sdug yod pa ma yin na/ /zhe sdang 'byung bar ga la 'gyur/ /sdug pa yod pa ma yin na 'dod chags 'byung bar ga la 'gyur zhing / mi sdug pa yod pa ma yin na zhe sdang 'byung bar ga la yang 'gyur/ 'dir smras pa/ mdo sde las rtag pa la sogs pa phyin ci log bzhi yod par gsungs pas de dag yod pa'i phyir phyin ci log tu gyur pa yang yod do//de la gang mi rtag pa la rtag pa zhes 'dzin pa de ni phyin ci log yin la/ gang mi rtag pa la mi rtag pa zhes bya bar 'dzin pa de ni phyin ci log ma yin te/ lhag ma rnams la yang de bzhin no/ /'dir bshad pa/gal te mi rtag rtag pa zhes/ /de ltar 'dzin pa log yin na/ /stong la rtag pa yod min pas/ /'dzin pa ji ltar log ma yin/ /gal te mi rtag pa la rtag pa zhes de ltar 'dzin pa phyin ci log ma yin no snyam du sems na de la bshad par bya ste/ ngo bo nyid stong pa la mi rtag pa cung zad kyang yod pa ma yin pas de med na de ltar 'dzin pa ji ltar phyin ci log ma yin par 'gyur/lhag ma rnams la yang de bzhin no/ /gal te mi rtag mi rtag ces/ /de ltar 'dzin pa log min pa/ /stong la mi rtag yod min pas/ /'dzin pa ji ltar log ma yin//gal te mi rtag pa la mi rtag pa zhes de ltar 'dzin pa phyin ci log ma yin no snyam du sems na/ de la bshad par bya ste/ ngo bo nyid stong pa la mi rtag pa cung zad kyang yod pa ma yin pas de med na de ltar 'dzin pa ji ltar phyin ci log ma yin par 'gyur/ lhag ma rnams la yang de bzhin no//gang gis 'dzin dang 'dzin gang dang / /'dzin pa po dang gang gzung ba/ /thams cad nye bar zhi ba ste/ /de phyir 'dzin pa yod ma yin/ /gang gis 'dzin pa ni byed par gyur pas so/ /'dzin pa gang yin pa ni dngos por gyur pa'o/ /'dzin pa po gang yin pa ni byed pa por gyur pa'o//gang gzung ba ni las su gyur pa'o/ /de dag thams cad nye bar zhi ba ni ngo bo nyid las nye bar zhi ba ste/ de dag ji lta ba de ltar song ba dang ma song ba dang bgom pa brtag pa rgyas par bshad zin pas/ de'i phyir 'dzin pa yod pa ma yin no/ /log pa'am yang dag nyid du ni//'dzin pa yod pa ma yin na/ /gang la phyin ci log yod cing / /gang la phyin ci ma log yod/ /log pa'am yang dag pa nyid du 'dzin pa de dag yod pa ma yin na gang la phyin ci log yod par 'gyur zhing gang la phyin ci ma log pa yod par 'gyur/ yang gzhan yang / phyin ci log tu gyur pa la//phyin ci log dag mi srid do/ /phyin ci log tu ma gyur la'ang / /phyin ci log dag mi srid do/ /phyin ci log tu 'gyur bzhin la'ang / /phyin ci log dag mi srid do/ /phyin ci log tu gyur pa la phyin ci log dag mi srid cing / phyin ci log tu ma gyur pa la yang mi srid/phyin ci log tu 'gyur bzhin pa la yang mi srid de/ ji ltar mi srid pa de ltar ni song ba dang / ma song ba dang bgom pa brtag pa'i rab tu byed par rgyas par bstan pa bzhin du khong du chud par bya'o/ /gang la phyin ci log srid pa/ /bdag nyid kyis ni rnam par dpyod//da gang la phyin ci log dag srid pa bdag nyid kyis rnam par dpyod cig /yang gzhan yang / phyin ci log rnams ma skyes na/ /ji lta bur na yod par 'gyur/ /phyin ci log rnams skye med na/ /phyin ci log can ga la yod/ /phyin ci log gang dag ngo bo nyid las ma skyes pa de dag ji lta bur na yod par 'gyur/da phyin ci log de rnams ngo bo nyid las skye ba med na phyin ci log can yod par ga la 'gyur/ dngos po bdag las mi skye ste/ /gzhan las skye ba nyid ma yin/ /bdag dang gzhan las kyang min na/ /phyin ci log can ga la yod //yang gzhan yang / gal te bdag dang sdug pa dag /rtag dang bde ba yod na ni/ /bdag shes sdug shes rtag shes dang / /bde shes phyin ci log ma yin/ /gal te bdag dang sdug pa dang rtag pa dang bde ba zhes bya ba bzhi po de dag yod na ni de dag yod pa'i phyir ro / / rtag tu shes pa dang / sdug par shes pa dang / rtag par shes pa dang / bde bar shes pa de dag phyin ci log ma yin par 'gyur ro/ /de la 'di snyam du bdag dang sdug pa dang rtag pa dang bde ba zhes bya ba bzhi po de dag ni yod pa ma yin gyi bdag med pa la sogs pa bzhi po dag ni yod de/de dag la phyin ci log tu 'dzin pas phyin ci log dag kyang yod par sems na/ de la bshad par bya ste/ gal te bdag dang sdug pa dang / /rtag dang bde ba med na ni/ /bdag med mi sdug mi rtag dang / /sdug bsngal yod pa ma yin no/ /gal te bdag dang sdug pa dang rtag pa dang bde ba zhes bya ba bzhi po de dag med na ni/de dag med pa'i phyir bdag med pa dang mi sdug pa dang mi rtag pa dang sdug bsngal zhes bya ba bzhi po dag kyang yod pa ma yin te/ ltos pa med pa'i phyir ro/ /de'i phyir rgyu'i khyad par 'dis kyang phyin ci log rnams yod pa ma yin no//de ltar phyin ci log 'gags pas/ /ma rig pa ni 'gag par 'gyur/ /ma rig 'gags par gyur na ni/ /'du byed la sogs 'gag par 'gyur/ /de ltar lam gyis phyin ci log rnams 'gag la/ phyin ci log 'gags pas ma rig pa 'gag /ma rig pa 'gags pas 'du byed la sogs pa'i don 'gag par 'gyur ro//gal te la la'i nyon mongs pa/ /gang dag ngo bo nyid yod na/ /ji lta bur na spong bar 'gyur/ /yod pa su zhig spong bar byed/ /gal te la la'i nyon mongs pa gang dag ngo bo nyid kyis yod cing yang dag pa dang de kho na dang bden pa yin na de dag ji ltar spang bar 'gyur/yod pa su zhig spong bar byed de spong bar mi 'thad pa'i phyir ro/ /de la 'di snyam du nyon mongs pa rnams ni ngo bo nyid kyis med pa nyid yin te/ ngo bo nyid kyis med pa de dag spong bar byed do snyam du sems na/ de la bshad par bya ste/gal te la la'i nyon mongs pa/ /gang dag ngo bo nyid med na/ /ji lta bur na spong bar 'gyur/ /med pa su zhig spong bar byed/ /gal te la la'i nyon mongs pa gang dag ngo bo nyid kyis med cing yang dag pa de dang de kho na dang bden pa ma yin na/ de dag ji ltar spong bar 'gyur/ med pa su zhig spong bar byed de spang bar mi 'thad pa'i phyir ro/ /phyin ci log brtag pa zhes bya ba ste rab tu byed pa nyi shu gsum pa'o// //'dir smras pa/ gal te 'di dag kun stong na/ /'byung ba med cing 'jig pa med/ /'phags pa'i bden pa bzhi po rnams/ /khyod la med par thal bar 'gyur//'phags pa'i bden pa bzhi med pas/ /yongs su shes dang spang ba dang / /bsgom dang mngon du bya ba dag /'thad par 'gyur ba ma yin no/ /de dag yod pa ma yin pas/ /'bras bu bzhi yang yod ma yin/ /'bras bu med na 'bras gnas med/ / zhugs pa dag kyang yod ma yin/ /gal te skyes bu gang zag brgyad/ /de dag med na dge 'dun med/ /'phags pa'i bden rnams med pa'i phyir/ /dam pa'i chos kyang yod ma yin/ /chos dag dge 'dun yod min na/ /sangs rgyas ji ltar yod par 'gyur/ /de skad smras na dkon mchog ni //gsum la gnod pa byed pa yin/ /gal te 'gro ba 'di dag kun stong na de'i phyir 'byung ba med cing 'jig pa med do/ /de dag med pas 'phags pa'i bden pa bzhi po rnams khyod la med par thal bar 'gyur ro/ /'phags pa'i bden pa bzhi med pas sdug bsngal yongs su shes pa dang kun 'byung ba spang ba dang lam bsgom pa dang 'gog pa mngon sum du bya ba dag 'thad par 'gyur ba ma yin no//sdug bsngal yongs su shes pa dang kun 'byung ba spang ba dang lam bsgom pa dang 'gog pa mngon sum du bya ba de dag yod pa ma yin pas dge sbyong gi 'bras bu bzhi yang yod pa ma yin no//dge sbyong gi 'bras bu med na/ 'bras bu la gnas pa dang zhugs pa skyes bu gang zag brgyad po dag kyang yod pa ma yin no/ /gal te skyes bu gang zag brgyad po de dag med na dge 'dun med de/ yang gzhan yang / 'phags pa'i bden pa rnams med pa'i phyir dam pa'i chos kyang yod pa ma yin no//dam pa'i chos dang dge 'dun yod pa ma yin na sangs rgyas ji ltar yod par 'gyur te/ de skad du stong pa nyid du smra na dkon mchog gsum la gnod pa byed pa yin no/ /yang gzhan yang / stong nyid 'bras bu yod pa dang //chos ma yin dang chos nyid dang / /'jig rten pa yi tha snyad ni/ /kun la gnod pa byed pa yin/ /stong pa nyid bzung na chos ma yin pa dang chos nyid dang de dag gis byas pa'i 'bras bu yod pa dang 'jig rten pa'i tha snyad kun la yang gnod pa byed pa yin pas de lta bas na dngos po thams cad stong pa ma yin no//de la bshad pa khyod kyis ni/ /stong nyid dgos dang stong nyid dang / /stong nyid don ni ma rtogs pas/ /de phyir de ltar gnod pa byed/ /khyod kyis ni stong pa nyid bstan pa'i dgos pa gang yin pa dang / stong pa nyid kyi mtshan nyid gang yin pa dang stong pa nyid kyi don gang yin pa de dag yang dag pa ji lta ba bzhin du ma rtogs pa de'i phyir de ltar gnod pa byed do//sangs rgyas rnams kyis chos bstan pa/ /bden pa gnyis la yang dag brten/ /'jig rten kun rdzob pa bden dang / /dam pa'i don gyi bden pa'o/ /gang dag bden pa de gnyis kyi//rnam dbye rnam par mi shes pa/ /de dag sangs rgyas bstan pa ni/ /zab mo'i de nyid rnam mi shes/ /sangs rgyas bcom ldan 'das rnams kyis chos bstan pa ni bden pa gnyis po 'di dag la brten nas 'byung ste/ 'jig rten pa'i kun rdzob kyi bden pa zhes bya ba ni chos rnams ngo bo nyid stong pa dag la 'jig rten gyis phyin ci log ma rtogs pas chos thams cad skye bar mthong ba gang yin pa ste/de ni de dag nyid la kun rdzob tu bden pa nyid yin pas kun rdzob kyi bden pa'o/ /don dam pa'i bden pa ni 'phags pa rnams kyis phyin ci log tu thugs su chud pas chos thams cad skye ba med par gzigs pa gang yin pa ste de ni de dag nyid la don dam par bden pa nyid yin pas don dam pa'i bden pa'o//de la gang dag kun rdzob kyi bden pa dang don dam pa'i bden pa de gnyis kyi rnam par dbye ba rnam par mi shes pa de dag ni sangs rgyas kyi bstan pa zab mo'i de nyid rnam par mi shes pa yin no//'di la 'di snyam du smra bar 'dod pa'i don ni chos thams cad skye ba med pa zhes bya ba'i don dam pa'i bden pa de nyid yin na/ tha snyad kyi bden pa gnyis pa 'di ci dgos snyam du sems na/ de la bshad par bya ste/ tha snyad la ni ma brten par//dam pa'i don ni bstan mi nus/ /dam pa'i don la ma brten par/ /mya ngan 'das pa thob mi 'gyur/ /gang gi phyir tha snyad la ma brten par don dam pa bstan par mi nus pa dang / gang gi phyir don dam pa la ma brten par mya ngan las 'das pa 'thob par mi 'gyur ba de'i phyir bden pa gnyis ka gdags dgos so//stong pa nyid la lta nyes na/ /shes rab chung rnams phung bar byed/ /ji ltar sbrul la bzung nyes dang / /rig sngags nyes par bsgrub pa bzhin/ /don dam pa stong pa nyid la lta nyes na shes rab chung ngu dang ldan pa phung bar byed cing de la gnod pa chen po 'byung bar 'gyur te/ji ltar dper na sbrul la bzung nyes na phung bar byed cing de la 'chi ba la thug pa'i nyen chen po skyed par byed pa dang / ji ltar dper na rig sngags dang gsang sngags bya ba dang cho ga nyams pas bsgrubs nyes na phung bar byed cing de la srog gi mthar thug pa'i nyen chen po skyed par byed pa de bzhin no//de phyir zhan pas chos 'di yi/ /gting rtogs dka' bar mkhyen gyur nas/ /thub pa'i thugs ni chos bstan las/ /rab tu log par gyur pa yin/ /rgyu de kho na'i phyir shes rab zhan pa rnams kyis chos 'di'i gting rtogs par dka' ba nyid du mkhyen par gyur nas bcom ldan 'das kyi thugs chos bstan pa las rab tu log par gyur pa yin no//khyod ni nga la stong pa nyid/ /skyon du thal bar 'gyur ba yis/ /spong bar byed pa gang yin pa/ /de ni stong la mi 'thad do/ /khyod nga la stong pa nyid skyon du thal bar 'gyur bas spong bar byed pa gang yin pa de ni ngo bo nyid stong pa la mi 'thad do//yang gzhan yang / gang la stong pa nyid rung ba/ /de la thams cad rung bar 'gyur/ /gang la stong nyid mi rung ba/ /de la thams cad rung mi 'gyur/ /gang la ngo bo nyid stong pa nyid rung ba de la 'jig rten pa dang 'jig rten las 'das pa thams cad rung bar 'gyur ro//gang la ngo bo nyid stong pa nyid mi rung ba de la 'jig rten pa dang 'jig rten las 'das pa thams cad mi rung bar 'gyur ro/ /khyod nyid rang gi skyon rnams ni/ /nga la yongs su sgyur byed pa/ /rta la mngon par zhon bzhin du//rta nyid brjed par gyur pa bzhin/ /khyod nyid rang gi skyon rnams nga la yongs su sgyur bar byed pa ni rta la mngon par zhon bzhin du rta de nyid brjed par 'gyur ba bzhin no/ /yang gzhan yang / gal te dngos rnams dngos nyid las/ /yod par rjes su lta byed na/ /de lta yin na dngos po rnams//rgyu rkyen med par khyod lta'o/ /'bras bu dang ni rgyu nyid dang / /byed pa po dang byed dang bya/ /skye ba dang ni 'gag pa dang / /'bras bu la yang gnod pa byed/ /gal te dngos po rnams ngo bo nyid la yod par rjes su lta bar byed na/ de lta na khyod dngos po rnams rgyu dang rkyen med par lta ba yin no//des na 'bras bu dang rgyu nyid dang byed pa po dang byed pa dang bya ba dang skye ba dang 'gag pa dang 'bras bu la yang gnod pa byed pa yin no/ /rten cing 'brel 'byung gang yin pa/ /de ni stong pa nyid du bshad/ /de ni brten nas gdags pa ste/ /de nyid dbu ma'i lam yin no//gang phyir rten 'byung ma yin pa'i/ /chos 'ga' yod pa ma yin pa/ /de phyir stong pa ma yin pa'i/ /chos 'ga' yod pa ma yin no/ /kho bo ni rten cing 'brel par 'byung ba gang yin pa de ni stong pa nyid du 'chad de / de ni brten nas gdags pa yin te/ / de nyid dbu ma'i lam yin no/ /de la dngos po 'ga' zhig yod pa nyid yin na/ de ni brten nas 'byung ba dang brten nas gdags pa yin pas/ gang gi phyir rten cing 'brel par 'byung ba ma yin pa'i chos 'ga' yang yod pa ma yin pa de'i phyir stong pa ma yin pa'i chos ni 'ga' yang yod pa ma yin no//gal te 'di kun mi stong na/ /'byung ba med cing 'jig pa med/ /'phags pa'i bden pa bzhi po rnams/ /khyod la med par thal bar 'gyur/ /gal te 'gro ba 'di kun mi stong na de'i phyir 'byung ba med cing 'jig pa med do/ /de dag med pa'i phyir 'phags pa'i bden pa bzhi po rnams khyod la med par thal bar 'gyur ro//gal te ji lta zhe na bshad pa/ rten cing 'brel 'byung ma yin na/ /sdug bsngal yod par ga la 'gyur/ /mi rtag sdug bsngal gsungs pa de/ /ngo bo nyid las yod ma yin/ /rten cing 'brel par 'byung ba ma yin na sdug bsngal yod par mi 'gyur te/ci'i phyir zhe na/ mdo sde dag las/ mi rtag pa ni sdug bsngal lo/ /zhes gsungs pa de ngo bo nyid las yod pa ma yin pa'i phyir ro/ /yang gzhan yang / ngo bo nyid las yod min na/ /ci zhig kun tu 'byung bar 'gyur/ /de phyir stong nyid gnod byed la/ /kun 'byung yod pa ma yin no//sdug bsngal de ngo bo nyid las yod pa ma yin na/ ci zhig kun tu 'byung bar 'gyur te/ ngo bo nyid las yod pa'i phyir ro/ /gang gi phyir de ltar yin pa de'i phyir stong pa nyid la gnod pa byed pa la kun 'byung yod pa ma yin no/ /sdug bsngal ngo bo nyid yod la/ /'gog pa yod pa ma yin no//ngo bo nyid ni yongs gnas phyir/ /'gog la gnod pa byed pa yin/ /sdug bsngal ngo bo nyid kyis yod pa la 'gog pa yod pa ma yin te mi 'jig pa'i phyir ro/ /des na ngo bo nyid yongs su gnas pa'i phyir 'gog pa la gnod pa byed pa yin no/ /lam ni ngo bo nyid yod na//bsgom pa 'thad par mi 'gyur ro/ /ci ste lam de bsgom bya na/ /khyod kyi dngos nyid yod ma yin/ /lam ngo bo nyid yod par 'dzin na bsgom pa 'thad par mi 'gyur te don med pa nyid kyi phyir ro/ /'di ltar rtag pa gang yin pa de la bsgom zhing sgrub pa'i thabs med pas de'i phyir lam bsgom pa 'thad par mi 'gyur ro//ci ste lam bsgom par bya ba yin na ni khyod kyi ngo bo nyid yod pa ma yin no/ /yang gzhan yang / gang tshe sdug bsngal kun 'byung dang / /'gog pa yod pa ma yin na/ /lam gyi sdug bsngal 'gog pa ni/ /gang zhig 'thob par 'gyur bar 'dod//gang gi tshe sdug bsngal dang kun 'byung ba dang 'gog pa'i chos gsum po dag yod pa ma yin pa de'i tshe khyod kyi sdug bsngal 'gog pa gang zhig lam gyis 'thob par 'gyur bar 'dod/ yang gzhan yang / gal te ngo bo nyid kyis ni/ /yongs su shes pa ma yin na/ /de ni ji ltar yongs shes 'gyur//dngos nyid gnas shes ma yin nam/ /gal te sdug bsngal gang ngo bo nyid kyis yongs su shes pa ma yin na/ de ji ltar yongs su shes par bya bar nus te/ ngo bo nyid kyis yongs su ma shes pa'i phyir ro / /khyod kyi ngo bo nyid kyis nges par gnas pa yin zhes ma yin nam/de bzhin du ni khyod nyid kyi/ /spang dang mngon sum bya ba dang / /bsgom dang 'bras bu bzhi dag kyang / /yongs su shes bzhin mi rung ngo / /de bzhin du khyod nyid kyis kun 'byung ba spang ba dang / 'gog pa mngon sum du bya ba dang / lam bsgom pa dang 'bras bu bzhi po dag kyang sdug bsngal yongs su shes pa bzhin du mi rung ste/kun 'byung ba ngo bo nyid kyis/ ma spangs pa gang yin pa de yang spang bar mi nus te/ ngo bo nyid kyis ma spangs pa'i phyir ro/ /'gog pa ngo bo nyid kyis mngon sum du ma byas pa gang yin pa de yang mngon sum du bya bar mi nus te/ngo bo nyid kyis mngon sum du ma byas pa'i phyir ro/ /lam ngo bo nyid kyis ma bsgoms pa nyid gang yin pa de yang bsgoms par mi nus te/ ngo bo nyid kyis ma bsgoms pa'i phyir ro/ /de ltar na 'phags pa'i bden pa bzhi po de dag yongs su shes pa dang spangs pa dang mngon sum du bya ba dang /bsgom pa'i bya ba bzhi po dag kyang mi 'thad do/ /yang gzhan yang / 'bras bu bzhi po rgyun tu zhugs pa dang / lan cig phyir 'ong ba dang / phyir mi 'ong ba dang / dgra bcom pa dag kyang bya ba bzhi po dag med pas mi rung ngo / /yang gzhan yang / ngo bo nyid ni yongs 'dzin pas//'bras bu ngo bo nyid kyis ni/ /thob pa min pa gang yin de/ /ji ltar thob par nus par 'gyur/ /ngo bo nyid yongs su 'dzin pas 'bras bu ngo bo nyid kyis thob pa ma yin pa gang yin pa de dag kyang thob par mi nus par 'gyur ro/ /'bras bu med na 'bras gnas med/ / zhugs pa dag kyang yod ma yin/ /gal te skyes bu gang zag brgyad/ /de dag med na dge 'dun med/ /dge sbyong gi 'bras bu rnams med na 'bras bu la gnas pa dang / zhugs pa'i skyes bu gang zag brgyad po dag kyang yod pa ma yin no/ /gal te skyes bu gang zag brgyad po de dag med na dge 'dun yang med do//yang gzhan yang / 'phags pa'i bden rnams med pa'i phyir/ /dam pa'i chos kyang yod ma yin/ /chos dang dge 'dun yod min na/ /sangs rgyas ji ltar yod par 'gyur/ /khyod kyis sangs rgyas byang chub la/ /ma brten par yang thal bar 'gyur/ / khyod kyis byang chub sangs rgyas la/ /ma brten par yang thal bar 'gyur/ / khyod kyi ngo bo nyid kyis ni/ /sangs rgyas min pa gang yin des/ /byang chub byang chub spyod pa la/ /brtsal kyang byang chub 'thob mi 'gyur/ /'ga' yang chos dang chos min pa/ /nam yang byed par mi 'gyur te/ / mi stong pa la ci zhig bya/ /ngo bo nyid la bya ba med/ /chos dang chos min rgyus byung ba'i/ /'bras bu khyod la yod ma yin/ /chos dang chos min med par yang / /'bras bu khyod la yod par 'gyur/ /chos dang chos min rgyus byung ba'i/ /'bras bu gal te khyod la yod/ /chos dang chos min las byung ba'i//'bras bu ci phyir stong ma yin/ /'jig rten pa yi tha snyad ni/ /kun la'ang gnod pa byed pa yin/ /rten cing 'brel 'byung gang yin pa'i/ /stong pa nyid la gnod pa byed/ /bya ba ci yang med 'gyur zhing / /bya ba rtsom pa'ang med par 'gyur/ /stong pa nyid la gnod byed na//mi byed pa yang byed par 'gyur/ /dngos nyid yod na'ang 'gro ba rnams/ /gnas skabs sna tshogs bral 'gyur zhing / /ma skyes pa dang ma 'gags dang / /ther zug tu yang gnas par 'gyur/ /ngo bo nyid yod pa ma yin na 'gro ba ma lus pa rnams gnas skabs sna tshogs dang bral bar 'gyur zhing ma skyes pa dang ma 'gags pa dang ther zug tu gnas par yang 'gyur ro//de lta bas nas de ltar ngo bo nyid du smra ba yongs su 'dzin na ji skad bstan pa'i skyon de dag thams cad du yang thal bar 'gyur ro/ /yang gzhan yang /gal te stong pa yod min na/ /ma thob thob par bya ba dang / /sdug bsngal mthar byed las dang ni/ /nyon mongs thams cad spong ba'ang med/ /gal te ngo bo nyid kyis stong pa nyid ma yin na/ de'i phyir 'jig rten pa dang 'jig rten las 'das pa'i khyad par ma thob pa thob par bya ba gang dag ji snyed yod pa de dag thams cad thob par bya ba yang med par 'gyur la/sdug bsngal mthar byed pa'i las kyang med par 'gyur zhing / nyon mongs pa thams cad spong ba'ang med par 'gyur ro/ /gang gis rten cing 'brel par 'byung / /mthong ba des ni sdug bsngal dang //kun 'byung dang ni 'gog pa dang / /lam nyid de dag mthong ba yin/ /gang gis rten cing 'brel par 'byung ba mthong ba des chos bzhi po sdug bsngal dang kun 'byung dang 'gog pa dang / lam nyid ces bya ba de dag mthong ba yin no/ /'phags pa'i bden pa brtag pa zhes bya ba ste rab tu byed pa nyi shu bzhi pa'o// //'dir smras pa/ gal te 'di dag kun stong na/ /'byung ba med cing 'jig pa med/ /gang zhig spong dang 'gag pa las/ /mya ngan 'da' bar 'gyur bar 'dod/ /gal te 'gro ba 'di dag kun stong na de lta na 'byung ba med cing 'jig pa med do/ / de dag med pa'i phyir gang zhig spong ba dang 'gag pa las mya ngan las 'das par 'gyur bar 'dod de/ spong ba dang 'gag pa mi 'thad pa'i phyir ro/ /de'i phyir de lta ma yin no/ /stong pa ma yin na ni nyon mongs pa spong ba dang phung po 'gag pa las mya ngan las 'das pa thob par yang 'gyur ro//'dir bshad pa/ gal te 'di kun mi stong na/ /'byung ba med cing 'jig pa med/ /gang zhig spong dang 'gag pa las/ /mya ngan 'da' bar 'gyur bar 'dod/ /gal te 'gro ba 'di dag kun mi stong na/ de lta na 'byung ba med cing 'jig pa med do/ /de dag med pa'i phyir gang zhig spong ba dang 'gag pa las mya ngan las 'da' bar 'gyur bar 'dod de/spong ba dang 'gag pa mi 'thad pa'i phyir ro/ /de lta bas na rim pa 'dis mya ngan las 'das pa mi 'thad par khong du chud par bya'o/ /'o na ji lta bu zhe na/ spangs pa med pa thob med pa/ /chad pa med pa rtag med pa//'gag pa med pa skye med pa/ /de ni mya ngan 'das par 'dod/ /de'i phyir mya ngan las 'das pa'i mtshan nyid ni de lta bu yin par gdags so/ /yang gzhan yang / mya ngan 'das pa dngos po min/ /rga shi'i mtshan nyid thal bar 'gyur/ /rga shi 'chi ba med pa yi/ / dngos po yod pa ma yin no/ /re zhig mya ngan las 'das pa ni rnam pa thams cad du yang dngos po ma yin no / /gal te dngos po yin par gyur na/ rga shi'i mtshan nyid can yin par thal bar 'gyur ro/ /ci'i phyir zhe na/ rga shi med pa'i dngos po yod pa ma yin pa'i phyir ro/ /yang gzhan yang /gal te mya ngan 'das dngos na/ /mya ngan 'das pa 'dus byas 'gyur/ /dngos po 'dus byas ma yin pa/ /'ga' yang ji ltar yod ma yin/ /gal te mya ngan las 'das pa dngos po yin na de'i phyir mya ngan las 'das pa 'dus byas su 'gyur te/ ci'i phyir zhe na/ dngos po 'dus byas ma yin pa ni 'ga' yang ji ltar yang yod pa ma yin pa'i phyir ro/ /yang gzhan yang / gal te mya ngan 'das dngos na/ /ji ltar myang 'das de brten min/ /dngos po brten pa ma yin pa/ /'ga' yang yod pa yin no/ /gal te mya ngan las 'das pa dngos po yin par 'dod na mya ngan las 'das pa la brten pa ma yin no zhes gang smras pa de mi 'thad de/ci'i phyir zhe na/ dngos po brten pa ma yin pa ni 'ga' yang yod pa ma yin pa'i phyir te/ de lta bas na/ mya ngan las 'das pa ni dngos po ma yin no/ /'dir smras pa/ 'o na mya ngan las 'das pa ni dngos po med pa yin no//'dir bshad pa/ gal te mya ngan 'das dngos min/ /dngos med ji ltar rung bar 'gyur/ /gal te mya ngan las 'das pa ji ltar dngos po yin par ma gyur pas na dngos po med pa ma yin te/ ci'i phyir zhe na/ dngos po rab tu grub par gyur na/ dngos po med pa yang rab tu 'grub par 'gyur ba'i phyir ro// //dbu ma'i rtsa ba'i 'grel pa bud+d+ha pA li ta / bam po bcu pa ste tha ma'o/ /yang gzhan yang / gang la mya ngan 'das dngos min/ /de la dngos med yod ma yin/ /gang la mya ngan las 'das pa dngos po yin par 'dod pa de la dngos po med pa yod pa ma yin te/'di ltar gang dngos po yod pa de dngos po med pa zhes bya bar mi rigs pa'i phyir te/ de lta bas na/ mya ngan las 'das pa ni dngos po med pa yang ma yin no/ /yang gzhan yang / gal te mya ngan 'das dngos min/ /ji ltar myang 'das de brten min//gang zhig brten pa ma yin pa'i/ /dngos med yod pa ma yin no/ /gal te mya ngan las 'das pa dngos po yod pa ma yin par 'dod na/ mya ngan las 'das pa de brten pa ma yin no zhes gang smras pa de mi 'thad de/ ci'i phyir zhe na/ gang brten pa ma yin pa'i dngos po med pa ni 'ga' yang yod pa ma yin pa'i phyir te/de lta bas na mya ngan las 'das pa ni dngos po med pa yang ma yin no/ /smras pa/ 'o na mya ngan las 'das pa ji lta bu yin par brjod par bya/ bshad pa/ 'ong ba dang ni 'gro ba'i dngos/ /rten tam rgyur byas gang yin pa//de ni brten min rgyur byas min/ /mya ngan 'das pa yin par bstan/ /phyin ci log ma rtogs pas 'ong ba dang 'gro ba'i dngos po phung po rnams rten tam rgyur byas pa gang yin pa de nyid phyin ci log pas brten pa ma yin zhing / rgyur byas pa ma yin pas phung po rnams mi 'byung ba ni/mya ngan las 'das pa yin par bstan to/ /yang gzhan yang / 'byung ba dang ni 'jig pa dag /spang bar ston pas bka' stsal to/ /de phyir mya ngan 'das pa ni/ /dngos min dngos med min par rigs/ /bcom ldan 'das kyis 'byung ba dang 'jig pa dag spang bar bka' stsal pas de'i phyir mya ngan las 'das pa ni dngos po yang ma yin dngos po med pa yang ma yin par rigs so//'dir smras pa/ 'o na mya ngan las 'das pa ni dngos po dang dngos po med pa gnyi ga yin no/ /'dir bshad pa/ gal te mya ngan 'das pa ni/ /dngos dang dngos med gnyis yin na//dngos dang dngos po med pa dag /thar par 'gyur ba de mi rigs/ /gal te mya ngan las 'das pa dngos po dang dngos po med pa gnyi ga yin na/ de lta na dngos po dang dngos po med pa dag thar pa yin par 'gyur bas de yang mi rigs te phan tshun 'gal ba gnyis dus gcig tu mi srid pa'i phyir ro//yang gzhan yang / gal te mya ngan 'das pa ni/ /dngos dang dngos med gnyis yin na/ /mya ngan 'das pa ma brten min/ /de ni gnyis la brten phyir ro/ /gal te mya ngan las 'das pa dngos po dang dngos po med pa gnyis yin na de lta na mya ngan las 'das pa ma brten pa ma yin par 'gyur te/mya ngan las 'das pa de dngos po dang dngos po med pa gnyis la brten pa'i phyir ro/ /de ni mi 'dod pas de'i phyir mya ngan las 'das pa dngos po dang dngos po med pa gnyi ga yin no zhes bya ba de rigs pa ma yin no/ / yang gzhan yang 'di'i phyir rigs pa ma yin te/ gal te mya ngan 'das pa ni/ /dngos dang dngos med gnyis yin na/ /mya ngan 'das pa 'dus ma byas/ /dngos dang dngos med 'dus byas yin/ /mya ngan las 'das pa ni dngos po dang dngos po med pa gnyi ga yin par mi 'thad do/ / ci'i phyir zhe na/ mya ngan las 'das pa ni 'dus ma byas yin la dngos po dang dngos po med pa gnyis ni 'dus byas pa'i phyir ro/ /de lta bas na rgyu'i khyad par 'dis kyang mya ngan las 'das pa ni dngos po dang dngos po med pa gnyi ga yin par mi rigs so/ /'dir smras pa/ mya ngan las 'das pa ni dngos po dang dngos po med pa gnyi ga yang ma yin gyi gang la de gnyis yod pa de ni mya ngan las 'das pa yin no//'dir bshad pa/ gal te mya ngan 'das pa la/ /dngos dang dngos med gnyis yod na/ /de gnyis gcig la yod min te/ /snang ba dang ni mun pa bzhin//mya ngan las 'das pa la dngos po dang dngos po med pa gnyis yod par yang mi 'thad de/ ci'i phyir zhe na/ phan tshun mi mthun pa de gnyis yul gcig na dus gcig tu lhan cig yod par mi rigs pa'i phyir te/ dper na snang ba dang mun pa bzhin pas de la gang la dngos po dang dngos po med pa de gnyis yod pa de mya ngan las 'das pa yin no zhes gang smras pa de mi rigs so//'dir smras pa/ mya ngan las 'das pa ni dngos po yang ma yin/ dngos po med pa yang ma yin no/ /'dir bshad pa/ dngos min dngos po med min pa/ /mya ngan 'das par gang ston pa//dngos po med dang dngos po dag /grub na de ni 'grub par 'gyur/ /khyod kyis mya ngan las 'das pa ni dngos po yang ma yin dngos po med pa yang ma yin no zhes gang smras pa de mi 'thad de/ ci'i phyir zhe na/ dngos po yang ma yin dngos po med pa yang ma yin pa zhes bya bar gsal ba dang /'dzin pa dang / rtsol ba'i blo gang yin pa de ni dngos po med pa dang dngos po dag grub na de yang 'grub par 'gyur ba yin na/ dngos po med pa dang dngos po de dag ma grub pas de'i phyir mya ngan las 'das pa dngos po yang ma yin dngos po med pa yang ma yin no zhes bya ba de mi 'thad do//yang gzhan yang / gal te mya ngan 'das pa ni/ /dngos min dngos po med min na/ /dngos min dngos po med min zhes/ /gang zhig gis ni de mngon byed/ /gal te mya ngan las 'das pa dngos po yang ma yin dngos po med pa yang ma yin pa yin na/ dngos po yang ma yin/dngos po med pa yang ma yin pa de dag ni med de de dag med pa'i phyir mya ngan las 'das pa dngos po yang ma yin dngos po med pa yang ma yin zhes gang zhig gis de mngon par byed cing mtshon par byed 'dzin par byed 'dogs par byed de/ de lta bas na mya ngan las 'das pa dngos po yang ma yin dngos po med pa yang ma yin no zhes bya ba de yang mi rigs so//'di'i phyir yang mya ngan las 'das pa mi 'thad de/ ji ltar zhe na/ bcom ldan mya ngan 'das gyur nas/ /yod par mi mngon de bzhin du/ /med do zhe'am gnyi ga dang / /gnyis min zhes bya mi mngon no//bcom ldan bzhugs par gyur na yang / /yod pa mi mngon de bzhin du/ /med do zhe'am gnyi ga dang / /gnyis min zhes kyang mi mngon no/ /gang gi phyir bcom ldan 'das mya ngan las 'das sam bzhugs par gyur kyang rung ste/ yod do zhe'am med do zhe'am/ yod kyang yod la med kyang med do zhe'am/ yod pa yang ma yin/ med pa yang ma yin no zhes bya bar mi mngon zhing mtshon du med gzung du med gdags su med pa de'i phyir mya ngan las 'das pa yang gdags su med de/ de med na mya ngan las 'das pa gang gi yin par 'gyur/ de lta bas na rnam pa thams cad kyis kyang mya ngan las 'das pa mi 'thad do//yang gzhan yang / 'khor ba mya ngan las 'das pas / /khyad par cung zad yod ma yin/ /mya ngan 'das pa 'khor ba las/ /khyad par cung zad yod ma yin/ /'di la phung po'i rgyun la brten nas 'khor ba zhes gdags na/ phung po de dag ni ngo bo nyid kyis stong pa'i phyir ji ltar gtan skye ba med pa dang /'gag pa med pa'i chos can yin pa de ltar kho bos dang po kho nar bstan zin pas/ de'i phyir chos thams cad skye ba med pa dang / 'gag pa med pa mnyam pa nyid kyis 'khor ba ni mya ngan las 'das pa las khyad par cung zad kyang yod pa ma yin no//ji ltar 'khor ba mya ngan las 'das pa las khyad par cung zad kyang yod pa ma yin pa de bzhin du mya ngan las 'das pa yang 'khor ba las khyad par cung zad kyang yod pa ma yin no/ /mya ngan 'das mtha' gang yin pa/ /de ni 'khor ba'i mtha' yin te/ / de gnyis khyad par cung zad ni/ /shin tu phra ba'ang yod ma yin/ /mya ngan las 'das pa dang / 'khor ba'i yang dag pa'i mtha' dang / skye ba med pa'i mtha' dang / yang dag pa'i mthar thug pa gang yin pa de dag ni dmigs su med par mnyam pa nyid kyis khyad par shin tu phra ba cung zad kyang yod pa ma yin no//'gags par gyur dang mtha' stsogs dang / /rtag la sogs par lta ba dag /mya ngan 'das dang phyi mtha' dang / /sngon gyi mtha' la brten pa yin/ /de bzhin gshegs pa 'gags par gyur nas yod pa dang med pa dang / yod kyang yod la med kyang med pa dang /yod pa yang ma yin med pa yang ma yin zhes bya bar lta ba gang dag yin pa dang / 'jig rten mtha' yod pa dang / 'jig rten mtha' med pa dang / mtha' yod kyang yod la mtha' med kyang med pa dang / mtha' yod pa yang ma yin mtha' med pa yang ma yin zhes bya bar lta ba gang dag yin pa dang /'jig rten rtag pa dang / 'jig rten mi rtag pa dang / rtag kyang rtag la/ mi rtag kyang mi rtag pa dang / rtag pa yang ma yin mi rtag pa yang ma yin no zhes bya bar lta ba gang dag yin pa de dag ni go rims bzhin du mya ngan las 'das pa dang phyi ma'i mtha' dang sngon gyi mtha' la brten pa yin no//de la/ dngos po thams cad stong pa la/ /mtha' yod ci zhig mtha' med ci/ /mtha' dang mtha' med ci zhig yin/ /mtha' min mtha' med min pa ci/ /de nyid ci zhig gzhan ci yin/ /rtag pa ci zhig mi rtag ci//rtag dang mi rtag gnyi ga ci/ /gnyi ga min pa'ang ci zhig yin/ /dmigs pa thams cad nyer zhi zhing / /spros pa nyer zhi zhi ba ste/ /sangs rgyas kyis ni gang du yang / /su la'ang chos 'ga' ma bstan to/ /mya ngan las 'das pa brtag pa zhes bya ba ste rab tu byed pa nyi shu lnga pa'o// //'dir smras pa/ khyod kyis theg pa chen po'i gzhung lugs kyis don dam pa la 'jug pa ni bstan zin na/ da khyod kyis nyan thos kyi gzhung lugs kyi don dam pa la 'jug pa ston cig /'dir bshad pa/ ma rig bsgribs pas yang srid phyir/ /'du byed rnam pa gsum po dag /mngon par 'du byed gang yin pa'i/ /las de dag gis 'gro bar 'gro/ /'du byed rkyen can rnam par shes/ /'gro ba rnams su 'jug par 'gyur/ /rnam par shes pa zhugs gyur na/ /ming dang gzugs ni chags par 'gyur/ /ming dang gzugs ni chags gyur na//skye mched drug ni 'byung bar 'gyur/ /skye mched drug la brten nas ni/ /de las reg pa 'byung bar 'gyur/ /ming dang gzugs dang dran byed la / /brten nas skye ba kho na yin/ /de ltar ming dang gzugs brten nas/ /rnam par shes pa skye bar 'gyur/ /ming dang gzugs dang rnam par shes//gsum po 'dus pa gang yin pa/ /de ni reg pa reg de las/ /tshor ba kun tu 'byung bar 'gyur/ /tshor ba'i rkyen gyis sred pa ste/ /tshor ba'i don la sred par 'gyur/ /sred par gyur na nye bar len/ /rnam pa bzhi po nyer len 'gyur/ /nyer len yod na len pa po'i//sred pa rab tu 'byung bar 'gyur/ /gal te nye bar len med na/ /grol bar 'gyur te srid mi 'gyur/ /srid pa de yang phung po lnga/ /srid pa las ni skye ba 'byung / /rga shi dang ni mya ngan dang / /smre sngags 'don bcas sdug bsngal dang / /yid mi bde dang 'khrug pa rnams//de dag skye las rab tu 'byung / /de ltar sdug bsngal phung po ni/ /'ba' zhig pa 'di 'byung bar 'gyur/ /de phyir mkhas rnams 'khor ba yi/ /rtsa ba'i 'du byed 'du mi byed/ /de phyir mi mkhas byed pa yin/ /mkhas min de nyid mthong phyir ro/ /ma rig 'gags par gyur na ni//'du byed rnams kyang 'byung mi 'gyur/ /ma rig 'gag par 'gyur ba ni/ /shes pa de nyid bsgoms pas so/ /de dang de ni 'gags gyur pas/ /de dang de ni mngon mi 'byung / /sdug bsngal phung po 'ba' zhig pa/ /de ni de ltar yang dag 'gag /byis pa ma rig pas bsgribs pas/ / yang srid pa'i phyir sems can dmyal ba la sogs pa 'du byed pa'i 'du byed rnam pa gsum po dag lus dang ngag dang yid dag gis mngon par 'du byed do/ /las dge ba dang mi dge ba ji ltar mngon par 'dus byas pa chen po dang 'bring dang chung ngu gang dag yin pa de dag gis sems can dmyal ba la sogs pa'i 'gro ba rnams su 'gro'o//de la 'du byed kyi rkyen can gyis rnam par shes pa ji ltar 'gro ba rnams su zhugs par gyur pas ming dang gzugs chags par 'gyur ro/ /ming dang gzugs chags par gyur na ming dang gzugs chags pa las skye mched drug 'byung bar 'gyur ro//skye mched drug la brten nas de las reg pa 'byung bar 'gyur te/ reg pa de skye ba'i rim pa ni 'di yin te/ ming dang gzugs dang yid la byed pa la brten nas skye ba kho na yin te/ de ltar ming dang gzugs la brten nas rnam par shes pa skye bar 'gyur zhing /de ltar ming dang gzugs dang rnam par shes pa gsum po 'dus pa gang yin pa de ni reg pa'o/ /reg pa las tshor ba kun tu 'byung bar 'gyur ro/ /tshor ba'i rkyen gyis sred pa ste/ tshor ba'i don la sred par 'gyur ro/ /sred par gyur na nye bar len pa rnam pa bzhi po dag nye bar len par 'gyur ro//nye bar len pa yod na len pa po'i srid pa rab tu 'byung bar 'gyur te/ gal te nye bar len pa med na des na grol bar 'gyur te/ de'i srid pa 'byung bar mi 'gyur ba 'ga' zhig na/ gang gi phyir nye bar len pa dang bcas pa de'i phyir srid pa 'byung bar 'gyur te/srid pa de yang phung po lnga yin par shes par bya'o/ /srid pa las ni skye ba 'byung ba yin no / /skye ba las rga shi dang mya ngan dang smre sngags 'don pa dang / sdug bsngal ba dang yid mi bde ba dang / 'khrug pa rnams 'byung ste/ de ltar sdug bsngal gyi phung po sdug bsngal gyi tshogs 'ba' zhig ma 'dres pa 'di 'byung bar 'gyur ro//de'i phyir mkhas pa rnams ni 'khor ba'i rtsa ba'i 'du byed rnams 'du mi byed do/ /de'i phyir mi mkhas pa rnams ni 'du byed rnams kyi byed pa po yin gyi mkhas pa rnams ni ma yin te/ de ci'i phyir zhe na/ de nyid mthong ba'i phyir te /de la ma rig pa ma 'gags par gyur na 'du byed rnams kyang 'byung bar mi 'gyur ro/ /ma rig pa 'gag par 'gyur ba ni yan lag bcu gnyis shes pa de nyid bsgom pa goms par bya ba dang / brtan po nyid du byas pas so/ /srid pa'i yan lag de dang de 'gags par gyur pas srid pa'i yan lag de dang de mngon par mi 'byung ste/de ltar sdug bsngal gyi phung po sdug bsngal gyi tshogs 'ba' zhig pa ma 'dres pa de yang dag par 'gag cing gtan 'gag par 'gyur ro/ /srid pa'i yan lag bcu gnyis po de dag la 'jug pa rgya cher mdo sde dang chos mngon pa dag las khong du chud par bya'o//mdor bsdus pa'i dbang gis 'di la'ang brjod do/ /srid pa'i yan lag bcu gnyis brtag pa zhes bya ba ste/ rab tu byed pa nyi shu rtsa drug pa'o// //'dir smras pa/ da khyod kyis nyan thos kyi theg pa dang mthun pa'i mdo sde'i mtha' la brten nas lta ba'i rnam pa rnams mi srid par ston cig /'dir bshad pa/ 'das pa'i dus na byung zhes dang / /ma byung 'jig rten rtag sogs par/ /lta ba gang yin de dag ni/ /sngon gyi mtha' la brten pa yin/ /ma 'ongs dus gzhan 'byung 'gyur dang / /mi 'byung 'jig rten mtha' stsogs par//lta ba gang yin de dag ni/ /phyi ma'i mtha' la brten pa yin/ /zag pa thams cad sdom pa'i rnam grangs zhes bya ba'i mdo sde las gsungs pa bdag sngon 'das pa'i dus na byung bar gyur ces bya ba dang / bdag sngon 'das pa'i dus na byung bar ma gyur ces bya ba'i rgyu 'dis 'jig rten rtag pa la sogs par lta ba gang yin pa de dag ni sngon gyi mtha' la brten pa yin no//bdag ma 'ongs pa'i dus gzhan du 'byung bar 'gyur zhes bya ba dang / bdag ma 'ongs pa'i dus gzhan du 'byung bar mi 'gyur zhes bya ba'i rgyu 'dis 'jig rten mtha' yod pa la sogs par lta ba gang yin pa de dag ni phyi ma'i mtha' la brten pa yin no//de dag ni mi 'thad de/ rigs pa gang gis she na/ bshad par bya ste/ 'das pa'i dus na byung gyur ces/ /bya ba de ni mi 'thad do/ /sngon tshe rnams su gang byung ba/ /de nyid 'di ni ma yin no/ /de nyid bdag tu 'gyur snyam na/ /nye bar len pa tha dad 'gyur//nye bar len pa ma gtogs par/ /khyod kyi bdag ni gang zhig yin/ /nye bar len pa ma gtogs pa'i/ /bdag yod ma yin byas pa'i tshe/ /nye bar len nyid bdag yin na/ /khyod kyi bdag ni med pa yin/ /nye bar len nyid bdag ma yin/ /de ni 'byung dang 'jig pa yin//nye bar blang ba ji lta bur/ /nye bar len po yin par 'gyur/ /bdag ni nye bar len pa las/ /gzhan du 'thad pa nyid ma yin/ /gal te gzhan na len med par/ /gzung yod rigs na gzung du med/ /de ltar len nas gzhan ma yin/ /de ni nyer len nyid kyang min/ /bdag ni nye bar len med min//med pa nyid du'ang de ma nges/ /bdag sngon 'das pa'i dus na byung bar gyur ces bya ba de ni mi 'thad do/ /ci'i phyir zhe na/ sngon gyi tshe rabs su gang byung bar gyur pa de nyid da ltar gyi bdag 'di ma yin pa'i phyir ro/ /de la 'di snyam du gal te sngon gyi tshe rabs rnams su gang byung bar gyur pa de nyid da ltar gyi bdag 'di yin par gyur na de'i phyir skyon cir 'gyur snyam du sems na de la bshad par bya ste/gal te sngon gyi tshe rabs rnams su gang byung bar gyur pa de nyid da ltar gyi bdag 'di yin par gyur na de lta na nye bar len pa tha dad par mi 'gyur ba zhig na nye bar len pa tha dad par yang 'gyur la/nye bar len pa ma gtogs par bdag yod par yang thal bar 'gyur ro/ /de la nye bar len pa ma gtogs pa khyod kyi bdag de gang zhig yin par smra bar nus sam/ kho bos ni rnam pa thams cad du yang mi 'thad par shes so/ /de la 'di snyam du nye bar len pa ma gtogs pa'i bdag yod pa ma yin no snyam du sems na ni/de'i phyir nye bar len pa nyid bdag yin par 'gyur ba'am/ yang na khyod kyi bdag med pa yin no/ /nye bar len pa nyid bdag yin no zhes bya ba de yang mi 'thad de/ ci'i phyir zhe na/ nye bar len pa de ni 'byung ba dang / 'jig pa yin pas skye ba dang 'gag par 'gyur ba'i phyir ro / /de lta bu ni bdag gi mtshan nyid ma yin no/ /yang gzhan yang / nye bar blang ba gang yin pa de nyid ji lta bur nye bar len pa po yin par 'gyur te/ skyon du mar thal bar 'gyur ba'i phyir ro/ /de la 'di snyam du nye bar blang ba las nye bar len pa po gzhan yin par sems na/de la bshad par bya ste/ bdag ni nye bar len pa las gzhan du 'thad pa nyid ma yin no/ /ci'i phyir zhe na/ gal te gzhan yin na nye bar len pa med par yang mig la sogs pa'i dbang po rnams kyis gzung du yod pa'i rigs na gzung du med pa'i phyir ro/ /de lta na bdag nyid nye bar len pa las gzhan yang ma yin la/de ni nye bar len pa nyid kyang ma yin/ nye bar len pa med pa yang ma yin/ 'ga' yang med pa nyid du nges pa yang ma yin no/ /de'i phyir rtag pa 'dis bdag sngon 'das pa'i dus na byung bar gyur zhes bya ba de ni mi 'thad do/ /da ni/ 'das pa'i dus na ma byung zhes//bya ba de yang mi 'thad do/ /sngon tshe rnams su gang byung ba/ /de las 'di gzhan ma yin no/ /gal te 'di ni gzhan gyur na/ /de med par yang 'byung bar 'gyur/ /de bzhin du ni gnas 'gyur zhing / /der ma shi bar skye bar 'gyur/ /chad dang las rnams chud za dang / /gzhan gyis byas pa'i las rnams ni//gzhan gyis so sor myong ba dang / /de la sogs par thal bar 'gyur/ /ma byung ba las byung min te / /'di la skyon du thal bar 'gyur/ /bdag ni byas par 'gyur ba dang / /'byung ba rgyu med can du 'gyur/ /da ni bdag sngon 'das pa'i dus na byung bar ma gyur ces bya ba de yang mi 'thad do//ci'i phyir zhe na/ sngon gyi tshe rabs rnams su gang byung bar gyur pa de las 'di gzhan ma yin pa'i phyir ro/ /gal te 'di gzhan yin par gyur na de'i phyir de med par yang 'di 'byung bar 'gyur ro/ /yang gzhan yang / snga ma de de bzhin du de na gnas par 'gyur zhing 'di yang der ma shi bar 'dir skye bar 'gyur ro//de lta na chad pa dang las rnams chud za ba dang gzhan gyis byas pa'i las rnams gzhan gyis so sor myong ba dang de la sogs pa skyon mang po dag tu thal bar 'gyur ro/ /yang gzhan yang / de lta na bdag ma byung ba las byung bar thal bar 'gyur te/bdag ma byung ba las byung ba ni ma yin pas/ de'i phyir 'di la yang bdag byas par 'gyur ba dang / 'byung ba rgyu med pa can du 'gyur ba'i skyon du thal bar 'gyur bas de ni mi 'dod do/ /de'i phyir rtag pa 'dis bdag sngon 'das pa'i dus na byung bar ma gyur ces bya ba de yang mi 'thad do/ / de ltar bdag byung bdag ma byung / /gnyi ga gnyi ga ma yin par/ /'das la lta ba gang yin pa/ /de dag 'thad pa ma yin no/ /de ltar yongs su brtags na bdag sngon 'das pa'i dus na byung bar gyur ces bya ba dang / bdag sngon 'das pa'i dus na byung bar ma gyur ces bya ba dang / sngon 'das pa'i dus na byung bar gyur kyang gyur la/byung bar ma gyur kyang ma gyur ces bya ba dang / sngon 'das pa'i dus na byung bar gyur pa yang ma yin/ byung bar ma gyur pa yang ma yin no zhes bya bar 'das pa'i dus la lta ba gang yin pa de dag 'thad pa ma yin no/ /da ni/ ma 'ongs dus gzhan 'byung 'gyur dang //'byung bar mi 'gyur zhes bya bar/ /lta ba gang yin de dag ni/ /'das pa'i dus dang mtshungs pa yin/ /da ni bdag ma 'ongs pa'i dus gzhan du 'byung bar 'gyur zhes bya ba dang / bdag ma 'ongs pa'i dus gzhan du 'byung bar mi 'gyur zhes bya bar ma 'ongs pa'i dus la lta ba gang yin pa de dag ni 'das pa'i dus dang mtshungs par bsam par bya ste/'das pa'i dus las brtsams pa'i skyon gang dag yin pa de dag nyid 'dir yang bye brag tu shes par bya'o/ /yang gzhan yang / gal te lha de mi de na/ /de lta na ni rtag par 'gyur/ /lha ni ma skyes nyid 'gyur te/ /rtag la skye ba med phyir ro//gal te lha de nyid mi de nyid du gyur na de lta na ni rtag par 'gyur ro/ /yang gzhan yang / lha ma skyes pa nyid du yang 'gyur te/ ci'i phyir zhe na/ rtag pa la skye ba med pa'i phyir ro/ /gang gi phyir lha gang yin pa de nyid mi ma yin zhing / lha ma skyes pa nyid kyang ma yin pa de'i phyir rtag pa ma yin no//gal te lha las mi gzhan na/ /de lta na ni mi rtag 'gyur/ /gal te lha mi gzhan yin no/ /rgyud ni 'thad par mi 'gyur ro/ /gal te lha las mi gzhan yin na de lta na ni mi rtag par 'gyur ro/ /rgyud kyi gtan tshigs kyis lha las mi gzhan yin par mi 'thad pas de'i phyir mi rtag pa ma yin no//gal te phyogs gcig lha yin la/ /phyogs gcig mi ni yin gyur na/ /rtag dang mi rtag 'gyur ba'i phyir/ /de yang rigs pa ma yin no/ /gal te phyogs gcig ni lha yin la phyogs gcig ni mi yin par gyur na de lta na rtag kyang rtag la mi rtag kyang mi rtag par 'gyur ba zhig na/gang gi phyir de ltar bdag nyid gnyis pa nyid mi rigs pa de'i phyir rtag kyang rtag la mi rtag kyang mi rtag pa ma yin no/ /gal te rtag dang mi rtag pa/ /gnyi ga grub par gyur na ni/ /rtag pa ma yin mi rtag min / /'grub par 'gyur ba 'dod la rag /gal te rtag pa dang mi rtag pa zhes bya ba de gnyi ga rab tu grub par gyur na ni/ de'i phyir rtag pa yang ma yin mi rtag pa yang ma yin pa zhes bya ba de yang rab tu 'grub par 'gyur ba 'dod la rag na/ gang gi phyir rtag pa dang mi rtag pa de gnyi ga rab tu ma grub pa de'i phyir rtag pa yang ma yin mi rtag pa yang ma yin pa zhes bya ba de yang rab tu mi 'grub bo//gal te gang zhig gang nas 'ongs/ /ci zhig gang du 'gro 'gyur na/ /de phyir de la thog med pas/ /rtag par gyur na de yang med/ /gal te dngos po gang zhig yul gang nas 'ongs shing ci zhig gcig tu gang du 'gro bar 'gyur na ni de'i phyir de la thog ma med pas rtag par 'gyur ba zhig na/shes rab kyis brtsal na dngos po gang zhig yul gang nas 'ongs shing / ji zhig gcig tu gang 'gro bar 'gyur ba de lta bu'i dngos po 'ga' yang med pas de'i phyir de la thog ma med pa yang med pas rtag pa ma yin no//gal te rtag pa 'ga' med na/ /mi rtag gang zhig yin par 'gyur/ /rtag pa dang ni mi rtag dang / /de gnyis bsal bar gyur pa'o/ /gal te de ltar shes rab kyis brtags na dngos po 'ga' yang med na mi rtag pa gang zhig yin par gyur/ rtag kyang rtag la mi rtag kyang mi rtag pa dang /rtag pa yang ma yin mi rtag pa yang ma yin pa yang gang zhig yin par 'gyur/ de lta bas na sngon gyi mtha' las brtsams pa'i rtag pa dang mi rtag pa la sogs pa bzhi po de dag mi 'thad do/ /da ni/ phyi ma'i mtha' las brtsams pa'i mtha' dang mtha' med pa la sogs pa bzhi po de dag ji ltar mi 'thad pa/de ltar bshad par bya ste/ gal te ji ltar zhe na/ bshad pa/ gal te 'jig rten mtha' yod na/ /'jig rten pha rol ji ltar 'gyur/ /gal te 'jig rten mtha' med na/ /'jig rten pha rol ji ltar 'gyur/ /'jig rten mtha' yod ces bya ba mi 'thad do //ci'i phyir zhe na/ gal te 'jig rten pha rol yod par gyur na/ de'i phyir 'jig rten pha rol yod par mi 'gyur ba'i phyir ro/ /'jig rten pha rol yang yod pas de'i phyir 'jig rten mtha' yod ces bya ba mi 'thad do / /'jig rten mtha' med ces bya ba yang mi 'thad do / /ci'i phyir zhe na/gal te 'jig rten mtha' med par gyur na de'i phyir 'jig rten pha rol med par 'gyur ba'i phyir ro/ /'jig rten pha rol yang yod pas de'i phyir 'jig rten mtha' med ces bya ba yang yod pas de'i phyir 'jig rten mtha' med ces bya ba yang mi 'thad do/ /de gnyis ci'i phyir mi 'thad ce na/ de la bshad par bya ste/gang phyir phung po rnams kyi rgyun/ /'di ni mar me'i 'od dang mtshungs/ /de phyir mtha' yod nyid dang ni/ /mtha' med nyid kyang mi rigs so/ /gang gi phyir phung po rnams kyi rgyun 'di ni mar me'i 'od dang mtshungs par rgyu dang rkyen gyi tshogs pa'i dbang gis 'byung ba de'i phyir 'jig rten mtha' yod pa nyid dang /mtha' med pa nyid ces bya ba yang mi rigs so/ /ci'i phyir mi rigs she na/ de la bshad par bya ste/ gal te snga ma 'jig 'gyur zhing / /phung po 'di la brten byas nas/ /phung po 'di ni mi 'byung na/ /des na 'jig rten mtha' yod 'gyur/ /gal te snga ma mi 'jig cing //phung po 'di la brten byas nas/ /phung po 'di ni mi 'byung na/ /des na 'jig rten mtha' med 'gyur/ /gal te phung po snga ma rnams 'jig par 'gyur zhing / phung po 'di dag la brten nas phung po gzhan de dag mi 'byung na ni des na 'jig rten mtha' yod par 'gyur ba zhig na gang gi phyir de lta ma yin pa de'i phyir 'jig rten mtha' yod ces bya ba mi 'thad do//gal te phung po snga ma rnams mi 'jig cing phung po de dag la brten nas phung po phyi ma de dag mi 'byung na ni des na 'jig rten mtha' med par 'gyur ba zhig na/ gang gi phyir de lta ma yin pa de'i phyir 'jig rten mtha' med pa zhes bya ba yang mi 'thad do//slob dpon 'phags pa lhas kyang / nyan pa po dang mnyan bya dang / /smra po 'byung ba shin tu dkon/ /de phyir mdor na 'khor ba ni/ /mtha' yod ma yin mtha' med min/ /zhes gsungs so/ /da ni 'jig rten mtha' yod kyang yod la mtha' med kyang med ces bya ba de yang mi 'thad de/ci'i phyir zhe na/ bshad par bya ste/ gal te phyogs gcig mtha' yod la/ /phyogs gcig mtha' ni med gyur na/ /'jig rten mtha' yod mtha' med 'gyur/ /de yang rigs pa ma yin no/ /gal te phyogs gcig mtha' yod par gyur la/ phyogs gcig mtha' med par gyur na ni de'i phyir 'jig rten mtha' yod kyang yod la/mtha' med kyang med par 'gyur ba zhig na/ de lta na dngos po bdag nyid gnyis pa nyid du gyur pa de ni mi 'thad do/ /ji lta bur na nyer len po/ /phyogs gcig rnam par 'jig 'gyur la/ /phyogs gcig rnam par 'jig mi 'gyur/ /de ltar de ni mi rigs so//ji lta bur na nyer blang ba/ /phyogs gcig rnam par 'jig 'gyur la/ /phyogs gcig rnam par 'jig mi 'gyur/ /de ltar de yang mi rigs so/ /re zhig nye bar len pa po rigs pa gang gis phyogs gcig rnam par 'jig par 'gyur la/ phyogs gcig rnam par 'jig par mi 'gyur te/rtag pa dang mi rtag pa nyid med pa'i phyir re zhig de ltar ni mi rigs so/ /nye bar blang ba yang rnam pa gang gis phyogs gcig rnam par 'jig par 'gyur la/ phyogs gcig rnam par 'jig par mi 'gyur te/ rtag pa dang mi rtag pa nyid mi 'thad pa kho na'i phyir de ltar yang mi rigs so//de ltar gang gi phyir dngos po bdag nyid gnyis pa nyid mi 'thad pa de'i phyir 'jig rten mtha' yod kyang yod la mtha' med kyang med ces bya ba mi 'thad do/ /da ni 'jig rten mtha' yod pa yang ma yin mtha' med pa yang ma yin zhes bya ba yang mi 'thad de/ ci'i phyir zhe na/bshad par bya ste/ gal te mtha' yod mtha' med pa/ /gnyi ga grub par gyur na ni/ /mtha' yod ma yin mtha' med min/ /'grub par 'gyur ba 'dod la rag /gal te mtha' yod pa dang mtha' med pa zhes bya ba de gnyi ga rab tu grub par gyur na ni de'i phyir mtha' yod pa yang ma yin mtha' med pa yang ma yin zhes bya ba 'di rab tu 'grub par 'gyur bar yang 'dod la rag na gang gi phyir mtha' yod pa dang /mtha' med pa zhes bya ba de gnyis rab tu ma grub pa de'i phyir mtha' yod pa yang ma yin/ mtha' med pa yang ma yin zhes bya ba 'di yang rab tu ma grub bo/ / de lta bas na brtag pa 'dis phyi ma'i mtha' las brtsams pa'i mtha' dang mtha' med pa la sogs pa bzhi mi 'thad do/ /yang na dngos po thams cad dag /stong phyir rtag la sogs lta ba/ /gang du gang la gang dag ni/ /ci'i phyir kun du 'byung bar 'gyur/ /yang na dngos po thams cad stong pa'i phyir/ rtag pa la sogs par lta ba dag yul dang dus gang du dngos po gang la/ lta ba gang dag /rgyu ci'i phyir kun du 'byung bar 'gyur/ /gang gis thugs brtse nyer bzung nas/ /lta ba thams cad spang ba'i phyir/ /dam pa'i chos ni ston mdzad pa/ /gau tam de la phyag 'tshal lo/ /gang gis thugs brtse bas nye bar bzung nas lta ba thams cad spang ba'i phyir/dam pa'i chos bstan par mdzad pa sangs rgyas bcom ldan 'das shin tu rmad du byung ba bsam gyis mi khyab pa mtshungs pa med pa gzhal du med pa gdung gau ta ma dang gcig pa de la phyag 'tshal lo/ /lta ba brtag pa zhes bya ba ste rab tu byed pa nyi shu bdun pa ste tha ma'o// //dbu ma rtsa ba'i tshig le'ur byas pa shes rab ces bya ba theg pa chen po'i chos mngon pa rnam par gzhag pa don dam pa'i de kho na yang dag par ston pa/ shes rab kyi pha rol tu phyin pa'i tshul gsal bar byed pa/ slob dpon bdag nyid chen po 'phags pa klu sgrub mi 'phrogs pa'i mkhyen rab dang /thugs rjer ldan pa de bzhin gshegs pa'i theg pa bla na med pa'i tshul rab tu 'byed pa rab tu dga' ba'i sa bsgrubs nas bde ba can gyi zhing du gshegs pa 'jig rten gyi khams dang ba'i 'od ces bya bar de bzhin gshegs pa ye shes 'byung gnas 'od ces bya bar 'gyur bas mdzad pa/de'i 'grel pa bud+d+ha pA li ta zhes bya ba theg pa chen po nges pa'i don ston pa/ lta ba ngan pa'i dri ma sel bar byed pa shes rab kyi pha rol tu phyin pa'i tshul gtan la 'bebs pa/ don dam pa'i bden pa gsal bar byed pa/ slob dpon btsun pa sangs rgyas bskyangs 'phags pa 'jam dpal gyi bka' grub pa bstan bcos du ma'i rnam par bshad pa mdzad pa/theg pa chen po la yang dag par zhugs pa/ rig sngags 'chang grub pa'i gnas khyad par can du gshegs pas mdzad pa rdzogs so// //rgya gar gyi mkhan po dz+nyA na gar+b+ha dang / /zhu chen gyi lo tsA ba cog ro klu'i rgyal mtshan gyis bsgyur cing zhus te gtan la phab pa'o/