CLOSE WINDOW

D3835
བོད་ཡིག

/[ ]@#/ /yi ge brgya pa zhes bya ba'i 'grel pa/ @##/ /rgya gar skad du/ ak+Sha ra sha ti ka nA ma br-it+ti / bod skad du/ yi ge brgya pa zhes bya ba'i 'grel pa/ 'jam pa'i rdo rje la phyag 'tshal lo/ /thams cad thams cad kyi bdag nyid do/ /zhes dam bca' ba gang ngam/ gang dag gam/gang rnams 'dod pa de dag gi gtan tshigs las grub par mi 'gyur gyi/ gtan tshigs nyid med par 'grub par 'gyur ro/ /'di snyam du thams cad thams cad kyi bdag nyid do zhes bya bar dam bca' ba ni/ gtan tshigs kho na las de yod par mtshungs pa'i phyir ro zhes bya ba ni gtan tshigs so//dpe gang zhe na/ bum pa dang snam bu la sogs pa bzhin no/ /ji ltar bum pa dang snam bu la sogs pa bzhin du dngos po thams cad kyang yod pa nyid du mtshungs par 'jug ste/ de lta bas na dngos po rnams gcig par grub par 'dod do zhe na/ smras pa/ dngos po rnams gcig pa ma yin no/ /'dir gtan tshigs gang yin pa de gcig nyid kyi mtshan nyid du gyur pa zhig gam/ 'on te ma yin/ gnyi ga ltar yang skyon yod do/ /gal te gcig pa nyid kyi mtshan nyid du gyur na ni de'i 'di'i gtan tshigs su 'gyur ba ma yin te/dam bca' ba las gzhan ma yin pa'i phyir ro/ /'on te 'di tha dad pa yin na de lta na 'di dam bca' ba nyams te/ gtan tshigs las gzhan yin pa'i phyir ro/ /de lta bas na dngos po rnams gcig ma yin no/ /'dir smras pa/ gcig pa nyid du 'dod pa de la skyon de yod kyi bdag cag ni gzhan nyid 'dod pa yin no zhe na/smras pa/ gzhan pa nyid kyang med do/ /'dir gzhan pa nyid la yang skyon 'di dag 'byung bar 'gyur te/ ji lta zhe na/ gal te re zhig khyed cag gtan tshigs med par gzhan pa nyid du 'dod na ni de'i tshe nga'i yang gtan tshigs med pa kho nar gcig pa nyid du 'gyur ro//'on te gtan tshigs kho na las dngos po rnams gzhan pa nyid du'o zhes dam bcas pa 'di la/ da ni gtan tshigs brjod par bya'o/ /smras pa/ mtshan nyid tha dad pa'i phyir ro zhes bya ba ni gtan tshigs so/ / dpe ni rta dang glang po la sogs pa bzhin te/ ji ltar rta dang glang po la sogs pa dag mtshan nyid tha dad pas tha dad pa bzhin du dngos po thams cad kyang yin te/ de bas na dngos po rnams gzhan pa nyid du grub po zhe na/ smras pa/ gal te gtan tshigs 'di yang mtshan nyid gzhan du gyur na ni de'i tshe gtan tshigs de bsgrub bya dang mtshungs par 'gyur ro//gang bsgrub bya dang mtshungs pa de ni gtan tshigs ma yin par 'gyur te/ dam bca' ba las gzhan ma yin pa'i phyir ro/ /'on te mtshan nyid gzhan pa nyid du gyur pa yin na ni de'i tshe dam bca' ba nyams pa nyid du 'gyur ro//'dir smras pa/ gal te dngos po rnams gcig pa nyid dam/ /gzhan pa nyid ces bya bar ma grub pa de lta na yang yod pa nyid du grub ste/ de grub pa na dngos po rnams gcig pa nyid dam gzhan pa nyid gdon mi za bar grub par 'gyur ro zhe na/ 'di la brjod pa yod pa nyid bsgrub par bya ba yin no//'dir gal te khyed cag gtan tshigs med pa las yod pa nyid yin na ni bdag cag gi med pa nyid kyang gtan tshigs med pa las 'grub par 'gyur te/ gtan tshigs med pa nyid du'o/ /'on te gtan tshigs las dngos po rnams yod pa'o zhes dam bcas pa'o //de'i tshe 'dir gtan tshigs brjod par bya dgos so/ /smras pa/ mngon du dmigs pa'i phyir ro/ /dpe ci zhe na/ smras pa/ chos mi mthun pa ni nam mkha'i me tog bzhin te/ ji ltar nam mkha'i me tog dngos po med pas mi dmigs te/gang gi phyir de dang chos mi mthun pas bum pa dang snam bu dag la sogs pa'i dngos po rnams yang dag par dmigs pa de'i phyir dngos po rnams yod pa ma yin no zhe na/ smras pa/ 'dir gtan tshigs gang yin pa de yod pa nyid kyi mtshan nyid du 'gyur ba zhig gam/'on te ma yin/ des cir 'gyur zhe na/ gal te yod pa nyid du 'gyur na de'i bsgrub bar bya ba dang mtshungs par 'gyur ro/ /'on te yod pa nyid las gzhan pa kho na yin pa de'i tshe yang dam bca' nyams par 'gyur te/ de bas na yod pa nyid mi 'grub bo/ /'dir smras pa/yod pa nyid la bkag pa nyid kyis med pa nyid khas blangs pa yin te/ dper na smra ba po bdag gis de ring zas zhim po myong ngo zhes zer na/ 'dir don gyi shugs kyis sngar mi zhim par rtogs pa bzhin no zhe na/ smras pa/ med pa nyid du bsgrub par bya ba'o/ / gal te khyed cag med pa nyid gtan tshigs med pa nyid du 'dod na/ bdag cag kyang gtan tshigs med pa nyid kho nar yod pa nyid du 'gyur ro/ /'di snyam du dngos po rnams med pa yin no zhes dam bca' ba 'di gtan tshigs nyid las yin par 'dod do/ /'dir gtan tshigs gang yin zhe na/rang bzhin med pa'i phyir ro zhes bya ba ni gtan tshigs so/ /dpe ci zhe na/ dpe ni smig rgyu ste/ ji ltar gang gi phyir smig rgyu rang bzhin med pa'i phyir yod pa ma yin pa las skad cig tsam yang ma yin pa de ltar snam bu la sogs pa rnams la yang snal ma la sogs pa'i yan lag rnams kyis phye zhing gzigs na yod pa ma dmigs te/de'i phyir dngos po rnams med pa zhes bya'o zhe na/ 'dir gtan tshigs su nye bar bkod pa gang yin pa de ni ci med pa nyid kyi mtshan nyid du 'gyur pa'am / 'on te ma yin te / gal te med pa nyid kyi mtshan nyid du gyur na ni/de lta na bsgrub par bya ba dang mtshungs par 'gyur ro/ /ci ste med pa las gzhan kho na yin na ni de'i tshe dam bca' ba nyams par 'gyur te/ de'i phyir med pa nyid kyang ma grub bo/ /'dir smras pa/ 'dir 'jim pa dang / snal ma dang thags bzangs la sogs pa dngos po rnams kyi rgyu ma bkag pa de bas na dngos po rnams med do/ /smras pa/ rgyu yod pa ma yin no/ /'di la 'bras bu yod pa gang dag yin pa de dag gi rgyu ni yod pa ma yin / ci'i phyir zhe na/ dngos po yod pa bum pa dang snam bu la sogs pa rnams kyi rgyu 'jim pa dang /snal ma dang / thags bzangs dang / thag pa la sogs la ma yin te yod pa'i phyir ro/ /gang dag 'bras bu med pa dag gi yang rgyu yod pa ma yin te/ med pa'i phyir ro/ /gang dag 'bras bu yod pa dang med pa dag gi yang rgyu yod pa dang med pa de dag gang yang rgyu yod par mi 'gyur te/gnyi ga'i skyon du thal ba'i phyir ro/ /de la gang yod pa de ni yod pa'i phyir dang / /gang med pa de ni med pa'i phyir ro/ /gcig la gnyi ga srid pa yang 'gal ba'i phyir ro/ /gang gis yod pa de'i mtshan nyid 'dzin pa des med pa ma yin no//gang gis med pa de'i mtshan nyid 'dzin pa des yod pa ma yin no/ /de'i phyir de rnams kyi rgyu yang yod pa ma yin no/ /gang dag rgyu med pa nyid las yin pa de dag gi yang rgyu yod pa yin te/ rgyu med pa nyid las grub pa'i phyir ro/ /rgyu med pa las grub pa yin no zhes bya ba ni de'i tshe yang 'di dag gi dam bca' ba nyams par 'gyur te/rgyu dang byed rgyu dang rgyu mtshan zhes bya ba'i don gzhan ma yin no/ /de lta bas na rgyu yod pa'i phyir dngos po rnams yod do zhes gang brjod pa de ni ma yin no/ /'dir smras pa/ 'di yang rgyu dgag pa byas pa nyid kyis 'bras bu bkag pa'i phyir ro //shugs kyis rgyu dang 'bras bu gnyi ga yang khas blangs par 'gyur te/ rab tu grub pa'i phyir dngos po thams cad grub bo zhes bya zhe na/ smras pa/ ma yin te ltos pa'i phyir ro/ /'dir khyed cag rnams kyis gnyi ga grub bo zhes gang brjod pa de ni ma yin no //ci'i phyir zhe na/ ltos pa'i phyir ro/ /rgyu ni rgyu nyid du 'bras bu la ltos nas dang / 'bras bu yang 'bras bu nyid du rgyu la ltos nas yongs su btags te/ de ltar na phan tshun ltos pa yin pa'i phyir gnyi ga'ang rgyu nyid du thal bar 'gyur la/ gnyi ga rgyu nyid du thal na yang 'bras bu med do//de med pa la rgyu med do/ /de bzhin du rang bzhin dang / dbang phyug dang / rdul phra rab dang / phyogs dang / dus la sogs pa thams cad rgyu ma yin te/ ltos pa'i phyir ro/ /'di rnams ni mi rtag pa nyid du yang 'gyur te/ ltos nas grub pa nyid kyi phyir ro//byas pa nyid du yang thal bar 'gyur te/ de bas na mi rtag pa nyid dang / rgyu med pa nyid dang / byas pa nyid du thal bar 'gyur te/ de bas na rang bzhin dang / dbang phyug dang / rdul phra rab dang / phyogs dang / dus la sogs pa rnams mi 'grub ste/ rgyu nyid la ltos pa'i phyir ro//'dir smras pa/ de ltar na ji ltar bdag cag rnams kyis brjod pa mi slu ba'i nye bar gdags pa las gzhan la ni ma yin te zhe na/ smras pa/ 'dod pas yod pa ma yin no/ /'dir gal te 'dod pas grub par 'gyur na ni / de'i rigs pa spang ba'i phyir nga'i 'dod pa las khyod kyi yang yod pa gang yin pa de nga'i med pa'o//ci'i phyir zhe na/ 'dod pa las grub pa'i phyir ro/ /ci ste khyed cag gi 'dod pa las grub kyi/ nga'i ni ma yin na de 'dir mi 'dra ba nyid la gtan tshigs khyad par can ma brjod pa'i phyir te/ de bas na 'dod pa grub pa ma yin no//'dir smras pa/ 'di ni bdag cag gi brda las so zhe na/ smras pa/ brda ma grub po/ /'di ltar gang khyed cag gis brda ma grub pa ste/ ma grub pa la yang ji ltar sgrub byed du 'gyur te/ ma grub pa ni rigs pa dang / rigs pa ma yin pa'i sgrub byed ma yin no//de'i phyir brda ma grub pa yin no/ /rigs pa dang bral ba nyid kyis bstan bcos rnams la brjod par bya ba yod par smra ba po ni mi rnyed do/ /gzhan yang smras pa/ kha cig tu rigs pa yang brjod par bya ste/ ji skad du/ med pa bya ba ma yin pa'i phyir dang / nye bar len pa gzung ba'i phyir dang / thams cad la 'byung ba med pa'i phyir dang / nus pa can ni nus pa med pa'i phyir dang / rgyu'i ngo bo yin pa'i phyir 'bras bu yod pa yin no zhes bya ba la sogs pa bshad pa lta bu'o/ /smras pa/ gtan tshigs dag don med do//'dir khyed cag gi gtan tshigs gang yin pa de gal te bsgrub pa'i mtshan nyid du gyur pa de'i tshe/ nged kyi phyogs kyang grub par 'gyur ro/ /ci ste sun 'byin pa'i mtshan nyid du gyur na ni de'i tshe gnyi ga la yang skyon du 'gyur te/ dper na me ni gnyi ga la sreg par byed kyi/gcig la ni ma yin no/ /gzhan yang / gal te gtan tshigs las gzhal bya grub na ni de'i tshe pha rol pos kyang gtan tshigs brjod par bya dgos te/ gnyi ga 'grub par yang mi 'dod de/ dper na khyed cag gi dam bca' ba ni sgra rtag ste/ lus can ma yin pa'i phyir nam mkha' bzhin no//ji ltar nam mkha' lus can ma yin pa'i phyir rtag pa de bzhin du sgra yang rtag ste/ de bas na sgra ni rtag par grub po zhes bya'o/ /de bzhin du gzhan yang brjod par bya ste/ bdag cag gi dam bca' ba 'di yin te/ sgra mi rtag ste byas pa'i phyir bum pa bzhin no//ji ltar bum pa ni 'jim gong la sogs pa dang / skyes bu'i rtsol ba las yang dag par skye bzhin pa ni byas pa'o/ /de bzhin du sgra yang rkan la sogs pa rnams las 'byung bzhin pa la ni byas pa zhes bya'o/ /de bas na gtan tshigs ming du zad de grub pa ni med do//'on kyang tshad ma las ming tsam las ma yin te/ mi slu ba'i phyir ro/ /'di'i phyir yang gtan tshigs rnams don med pa yin te/ dam bca' ba'i dus su ni gtan tshigs yod pa ma yin te/ ma skyes pa'i phyir ro/ /de bzhin du gtan tshigs kyis dus su yang dam bca' ba yod pa ma yin te/'gag pa'i chos yod pa'i phyir ro/ /de'i phyir dam bca' ba'i dngos po med pa la 'di gang gi gtan tshigs su 'gyur/ de bzhin du dam bca' ba la cig car med pa'i chos can gyi phyir te/ gang gi tshe yi ge phra yod pa de'i tshe yi ge he dang / yi ge ja yod pa ma yin no//de bzhin du dus gcig tu pa yig dang / ra yig dang / yi ge a la sogs pa rnams kyang cig car 'byung ba ma yin no/ /gtan tshigs kyi yang [(]yi ga [,]yi ge [)]rnams cig car 'byung ba ma yin no/ /ma skyes pa'i bu'am ma ning pa'i bus bu'i bya ba byed mi nus pa de bzhin du gtan tshigs rnams kyang don med do//'dir smras pa/ gal te rgyu dang 'bras bu zhes bya ba ma grub mod/ de lta na yang bdag ni grub ste/ de 'grub pa'i rgyu [(]dad [,]dang [)]'bras bu dag kyang 'grub par 'gyur ro zhe na/ smras pa/ rang bzhin brjod par bya'o/ /'dir gal te bdag yod na de'i tshe de'i rang bzhin brjod dgos so//ci ste shes pa'i rang bzhin yin par smra na ni de'i tshe rtag pa ma yin par 'gyur te/ shes pa ni mi rtag pa yin pa'i phyir ro/ /'dir bum pa'i shes pa 'gags te/ snam bu'i shes pa skyes so/ /ci ste shes pa las gzhan yin pa de lta na ni mi shes par 'gyur ro//mi shes pa yin na yang sdug bsngal ba dang bde ba med par thal bar 'gyur ro/ /gnyi ga smra ba rnams la ni gnyi ga'i skyon du thal bar 'gyur te/ shes pa sems dang ldan par smra ba rnams kyi bdag med pa kho na yin no/ / gang gi tshe bdag sems pa can du skye ba de'i tshe sems pa dang bcas par 'gyur ro/ /de lta na yang bdag med par yang 'gyur te/ sems pa bdag med pa'i phyir ro/ /gal te yang sems pa de nyid dang ldan par 'gyur na ni de'i tshe bdag med pa nyid du yang 'gyur te/ de dang ldan pa'i phyir ro//'dir smras pa/ bdag yod de bdag gi ba'i dngos po yod pa'i phyir ro/ /'di ltar bdag gis bum pa dang snam bu la sogs pa bkag pa ma yin te/ de ma bkag pa'i phyir bdag yod do zhe na/ smras pa/ gcig nyid la skyon yod do/ /'dir gal te bum pa la sogs pa rnams ha sta dang /kar+Na dang phan bzhin du gcig nyid yin na ni de'i tshe thams cad bum pa nyid du thal bar 'gyur ro/ /gang dang gang yod pa de ni ming bum pa dang gcig yin no/ /bum pa zhig na thams cad du thams cad 'jig par 'gyur te ha sta zhig na kar+Na 'jig pa bzhin no//phyin ci log par thal bar 'gyur ba dang / gcig yin pa'i phyir zlos pa'i skyon du yang 'gyur te/ ji ltar ha sta zhes brjod na/ kar+Na dang pa na nyid brjod par 'gyur ba de bzhin du/ yod pa zhes brjod pas bum pa dang gcig nyid brjod par 'gyur te/de'i phyir dngos po rnams gcig pa ma yin te/ skyon dang bcas pa'i phyir ro/ /gang dag gi gcig pa nyid de dag la ni skyon 'di yod kyi bdag cag ni gzhan pa nyid du khas len pa'i phyir skyon 'di med do/ /gzhan pa nyid yin na yod pa dang gcig pa dang bum pa rnams ma 'dres pa yin te/rdzas dang / yon tan dang / las dang / spyi dang / khyad par dang / 'du ba rnams tha dad pa'i phyir ro/ /de la bum pa ni rdzas so/ /gcig pa ni yon tan no/ /yod pa zhes bya ba ni spyi bo'o zhe na/ smras pa/ gzhan nyid na dngos po med pa yin no/ / 'dir gzhan pa nyid yin na yod pa dang gcig pa dang bum pa rnams dngos po med par 'gyur ro/ /ci'i phyir zhe na/ yod pa las gzhan pa gang yin pa de ni med pa yin la/ bum pa yang yod pa las gzhan pa yin te/ de lta bas na bum pa med do/ /dper na bram ze las gzhan pa de ni bram ze ma yin pa bzhin no//bum pa la sogs pa'i tha dad pa'i yod pa nyid ni mi dmigs te/ shing la sogs pa bzhin no/ /de lta na gzhan pa nyid yin na yod pa dang gcig pa dang bum pa rnams dngos po med pa yin no/ /'dir smras pa/ gcig pa nyid dang gzhan pa nyid dag ma grub kyang / bum pa ni yod pa kho na yin te/ mngon sum du dmigs pa'i phyir ro/ /nam mkha'i me tog lta bu ni ma yin te/ ji ltar gang gi phyir nam mkha'i me tog dngos po med pas mi dmigs pa de lta bur bum pa ni ma yin te/de bas na bum pa yod pa yin no zhe na/ smras pa/ 'dzin par mi nus so/ /'dir dbang po dang dbang po don yod pa'i phyir bum pa yod pa'o zhes gang gsungs pa de ni ma yin no/ /ci'i phyir zhe na/ gang gi phyir 'di dag la 'dzin pa'i nus pa med de/ gal te yod na ni de long bas kyang mthong bar 'gyur ro//mig la ni sems pa yod pa ma yin no/ /gal te yod na ni yid la byed pa gzhan gyis kyang de mthong bar mi 'gyur ro/ /gzugs la ni mthong ba dang sems pa gnyi ga med do/ /de bas na gzung ba'i phyir dbang po dang dbang po'i don grub pa la dgos pa med do//'dir smras pa/ dbang po dang dbang po'i dngos po med kyang bum pa ni mthong ba kho na yin te/ gzugs su bstan pa'i phyir ro/ /ma mthong ba gzugs su bstan pa ni med do/ /de bas na gzugs ni mthong ba de'i bum pa mthong ba bzhin no zhe na/'di la brjod par bya ste/ dngos po mthong ba ma yin no/ /'dir bum pa mthong zhes gang brjod pa de ci mthong ba de nyid bum pa las gzhan nam/ 'on te gzhan ma yin/ gal te gzhan yin na de'i tshe mthong ba las gzhan gang yin pa de ni mi mthong bar 'gyur te/gzhan ma yin pa'i phyir ro/ /ji ltar rta las gzhan pa gang yin pa de ni rta ma yin pa de bzhin te/ de lta yin dang bum pa ni mi mthong bar 'gyur ro/ /gcig pa nyid yin na yang mthong ba nyid med na/ bum pa med par 'gyur te/ rtsig pa la sogs pa rnams kyis bsgribs pa'i phyir ro//de'i phyir gal te mthong ba nyid med na yang bum pa med par mi 'gyur na/ de'i tshe de dag gcig ma yin no/ /gcig pa nyid med pas kyang bum pa mthong ba ma yin no zhes bya ba'o/ /mthong ba zhig pas bum pa yang 'jig par 'gyur te/de la bum pa dang mthong ba ni gcig pa'o zhes gang brjod pa de ni ma yin no/ /'dir smras pa/ bdag cag gi yod pa'i phyir cung zad 'jig pa'am skye ba med do/ /de'i phyir mthong ba la 'jig pa dang skye ba med do zhes bya'o / /'on kyang gang 'di la skye ba zhes 'dzin pa ni rgyu las bra ba'i bdag nyid du yod pa'i phyir byed pa yin no//rgyu yod pa'i phyir yang 'bras bu yod pa yin te/ yod pas de'i phyir mthong ba la 'jig pa dang skye ba med pa zhes bya'o zhe na/ smras pa/ yod pa ni bya ba ma yin no/ /'dir gal te skye ba dang 'jig pa med pa yin na de'i tshe tha ga pa la sogs pa rnams med par 'gyur ro//gal te snam bu la sogs pa rnams yod pa yin na de'i ma 'ongs pa med par thal bar 'gyur te/ yod pa'i phyir na yod pa yang ma 'ongs pa nyid du ji ltar 'gyur/ 'jig pa med pa'i phyir yang chos dang chos ma yin pa dag med par 'gyur te/'dir chos ma yin pa zhig pa ni chos su 'gyur la chos med pa yang chos ma yin pa yin zhing bya ba yang med par 'gyur ro/ /de med na thams cad med par 'gyur te/ de'i phyir skye ba dang 'jig pa dag gdon mi za bar khas blang bar bya'o//de lta na bya ba yang yod de/ de'i phyir yod pa bya ba ma yin no/ /gzhan yang gal te rgyu las 'bras bu bya ba'i bdag nyid du yod pa de nyid kyi phyir 'bras bu med pa yin te/ rigs pa nyid med pa'i phyir ro/ /'di ltar phra ba'i gnas skabs na de'i phra ba nyid yod kyi 'di ltar de la rags pa nyid med de/de'i phyir med pa skye ba dang / chos zhig na yang chos ma yin par 'byung bar 'gyur/ gal te skye ba dang 'jig pa nyid med na/ de'i tshe 'das pa dang ma 'ongs pa yang med par 'gyur la/ de dag med pa'i phyir da ltar byung ba yang med do gal te 'das pa dang ma 'ongs pa med na da ltar byung ba 'di gang gi yin 'das pa dang ma 'ongs pa dang da ltar byung ba med pa'i phyir thams cad med par thal bar 'gyur ro//'di'i phyir yang 'bras bu med par smra ba yin no / /gal te 'o ma zhes bya ba'i rgyu las zho zhes bya ba'i 'bras bu yod pa zhes bya ba de lta na ni de skye bar mi 'gyur te yod pa'i phyir ro//de bas na zho ni med pa kho na skye bar 'gyur te/ de lta na med pa 'bras bur thal bar 'gyur ba de bas na yod pa ni bya ba ma yin no/ /'dir smras pa/ gang yang 'bras bu yod par smra ba de dag la skye 'jig med par thal bas nyes par 'gyur mod/gang yang 'bras bu yod pa dang / med pa smra ba de dag la skyon med la/ 'di khas blangs pa las don gnyi ga grub cing / de grub pa'i phyir yang 'bras bu yod pa dang med par 'gyur ro zhe na/ smras pa/ de dag la skye ba ma yin no//'dir yod pa ni skye ba ma yin te yod pa'i phyir ro / /'di ltar yod pa'i bum pa 'jim gong la sogs pa rnams kyis skyed par byed pa ma yin no/ /med pa yang skye bar byed pa ma yin te med pa'i phyir ro/ /thag pa la sogs pas rus sbal gyi spu'i gos skyed par byed pa ma yin te med pa'i phyir ro//de ltar yod pa dang med pa skye ba ma yin no/ /skyes pa ni skyes pa'i phyir mi skye la/ ma skyes pa yang ma skyes pa'i phyir mi skye'o/ /gzhan yang skye ba gang yin pa 'di rang las sam gzhan las 'gyur grang na/ gnyi ga yang skyon yod do//ma skyes pa la rang gi bdag nyid med na ji ltar rang las skye bar 'gyur/ ci ste yod pa de lta na yang yod pa la ni skye ba yod pa ma yin no/ /de ltar re zhig rang las skye ba ma yin no/ /gzhan las kyang skye ba ma yin te/ skyes pa las gzhan du gyur na gang las gzhan las skye ba med pa las ci ste yod pa las gzhan mi skye'o//ci ste yod med gzhan las mi skye ste/ gnyi ga'i skyon du thal ba'i phyir ro/ /de ltar yod pa dang med pa dang yod med ni rang ngam/ gzhan las skye bar mi 'gyur te/ skye ba med pas thams cad med do/ /'dir smras pa/gal te skye bar mi 'gyur na de'i tshe 'dus byas kyi mtshan nyid med par 'gyur te/ 'dus byas ni skye ba dang gnas pa dang 'jig pa rnams kyis mngon par gsal bar byas pa'o/ /de'i phyir 'dus byas ni yod pa ste/ de yod pa'i phyir thams cad 'grub par 'gyur ro zhe na/smras pa/ 'dus byas med do/ /'dir khyed kyis 'dus byas su mngon par brjod pa gang yin pa de'i mtshan nyid skye ba dang gnas pa dang 'jig pa rnams ni rim gyis yod pa ma yin zhing cig car yang ma yin te/ 'di ltar gang gi tshe skye ba de'i tshe gnas pa dang 'jig pa med la /de dag med na skye ba gang zhig yin/ gang gi tshe gnas pa med pa de'i tshe skye bar 'gyur ro zhes bya bar mi rigs la/ skye ba med na gang gi gnas par 'gyur/ gal te skye ba med par gang gi gnas par 'gyur na de'i tshe mo gsham gyi bu la sogs pa rnams kyang gnas par 'gyur ro//rtsod pa po las brjod par bya ste/ mgo gnyis pa lag pa gsum pa dag ma skyes pa yang ci'i phyir gnas pa med/ 'di ni 'dod pa yang ma yin te de bas na skye ba dang gnas pa dang 'jig pa rnams rim gyis 'byung ba ma yin no/ /cig car yang ma yin te/'di ltar skye ba'i dus na 'jig pa dang gnas pa med la/ 'jig pa'i dus na yang skye ba dang gnas pa med cing / gnas pa'i dus na yang skye ba dang 'jig pa dag med pa de bas cig car 'byung ba ni yod pa ma yin no/ /dus gcig pa yin na skye ba dang 'chi ba dag gcig tu 'gyur te/'di ni 'dod pa yang ma yin no/ /de'i phyir 'di dag rim dang cig car du 'byung ba med do/ /gzhan yang / gal te 'dus byas kyi mtshan nyid gsum yin pa de lta na thug pa med par thal bar 'gyur te/ de la gzhan dang gzhan yin pas thams cad dus gsum nyid 'byung bar 'gyur ro//de'i phyir skye ba la skye ba dang gnas pa dang 'jig pa gsum du 'gyur la/ de bzhin du gnas pa dang 'jig pa dag la yang sbyar bar bya'o/ /thug pa med par thal bar 'gyur ba yang 'thob ste/ de rnams kyang gzhan dang /gzhan gyi nus pas skye ba dang / gnas pa dang 'jig par thal bar 'gyur ro/ /de bas na skye ba dang gnas pa dang 'jig pa rnams la re re la gsum gsum du 'gyur ro/ /de lta ma yin na 'dus byas ma yin par thal bar 'gyur ro/ /de las ma gtogs pa gzhan 'dus byas nyid ni yod pa ma yin te/de'i phyir 'dus byas mtshan nyid gsum pa'o zhes gang brjod pa 'di dam bca' ba nyams par thal bar 'gyur te / de bas na 'dus byas ni med do/ /'dir smras pa/ 'dus byas bkag pa'i phyir 'dus ma byas khas blangs la/ de khas blangs pa'i phyir 'dus byas 'grub ste/ thams cad ni zla yod par dmigs te/ ji ltar sdug bsngal dang / bde ba dang / chos dang / chos ma yin pa dang / grang ba dang dro ba bzhin te/ de bzhin du 'dus byas dang 'dus ma byas kyang yin par bya ste/ de bas na 'dus ma byas grub pa'i phyir gnyi ga grub bo//'dus ma byas kyang thams cad du 'gro ba dang / rtag pa dang / phyogs dang bral ba rnams so zhe na/ smras pa / phyogs gcig tsam mo/ /'dir gal te bdag dang / rdul phra rab dang / nam mkha' dang / dus dang / phyogs la sogs pa de dag gi thams cad du 'gro ba nyid de'i tshe 'di la dri bar bya ste ci khyed cag gi bdag 'di lus la phyogs gcig gis gnas sam 'on te bdag nyid thams cad kyi gal te phyogs gcig gis so zhe na/de'i tshe phyogs gcig pas rnam par gnas pa'i phyir phyogs gcig pa gzhan rnams kyis kyang 'gyur bar bya dgos so//phyogs dang bcas pa'i phyir yang mi rtag pa nyid de ltar gang phyogs su 'jug pa de dag ni mi rtag pa ste/ dper na bum pa la sogs pa lta bu'o/ /ci ste bdag nyid thams cad kyi lus la gnas na ni de'i tshe phyogs thams cad du 'gro ba nyid kho na'i lus yongs su rdzogs pas de'i phyir phyogs gcig tsam du thal bar 'gyur ro//de bzhin du thams cad bkag pas thams cad du 'gro ba dang / rdul phra rab la sogs pa gang dag yin pa de dag rtag pa dang / thams cad du 'gro ba dang / phyogs dang bral ba rnams phyogs gcig dang bcas pa nyid du 'gyur te/lus phyogs dang bcas pa'i phyir 'di rnams kyang phyogs dang bcas pa nyid du thal bar 'gyur ro/ /yang rtag pa rnams rgyu las sam/ rgyu med pa las 'grub par 'gyur/ des cir 'gyur zhe na/ gnyi ga la yang skyon yod de/ gal te rgyu las yin na de'i tshe mi rtag pa nyid du thal bar 'gyur te/rgyu las skye ba yin pa'i phyir bum pa la sogs pa bzhin no/ /ci ste rgyu med pa las so zhe na/ de lta na yang nges pa med pa nyid du thal bar 'gyur te/ rgyu med pa dag ni yul dang dus dang rang bzhin nges pa med pa'i phyir ro/ /dngos po med pa nyid du yang thal bar yang 'gyur te/mo gsham gyi bu la sogs pa bzhin no/ /ci ste khyed cag gi tshig tsam gyis grub kyi bdag gis ni ma yin na/ 'dir bye brag gis gtan tshigs brjod dgos so/ /ci ste rgyu ni rnams pa gnyis te/ byed pa dang / gsal ba'o/ /de la gang dag byed pa'i rgyus skyed pa de dag ni rtag pa ma yin te/ji ltar bum pa la sogs pa bzhin no/ /gang gi gnas bzhin pa de dag nyid kyis mngon par gsal bar byed kyi skyed pa ma yin pa de ni gsal bar byed pa'i rgyu ste/ ji ltar sgron ma dang nor bu la sogs pa'i 'od lta bu'o//de la byed pa'i rgyus ni mi rtag pa nyid du 'gyur la/ ma byas pa rnams mngon par gsal bar byed pa dag gis mngon par gsal ba 'ba' zhig tu zad kyi skyed pa ni ma yin no/ /yang gang dag skye ba de dag ni rtag pa ma yin te/ chos mi mthun pa ni gang dag mi skye ba rgyus mngon par gsal ba 'ba' zhig pa de dag ni rtag pa'o//de bas na chos mi mthun pa'i phyir ma byas pa rnams ni rtag pa ma yin no zhes smra'o/ /de lta na ni 'o na byas pa yod pa nyid du mthong bas/ chos mi mthun pas byas pa rnams med pa nyid du 'gyur bas rtag pa rnams don med do//de ltar 'dus byas dang / 'dus ma byas yongs su btang ba las ngar 'dzin pa dang nga yir 'dzin pa dag rab tu spangs pa yin la de'i phyir mya ngan las 'das so/ /de gsungs pa/ shes pa rten med mi 'jug ste/ /rnam shes 'gag par gyur pa yis/ /srid pa'i sa bon 'gag par 'gyur//'dus byas dngos po med pa'i tshe/ /'di ltar dngos po rnams 'di rnams dngos po nyid yin zhe na/ smras pa/ rmi lam dang mtshungs so/ /'dir ni tha snyad las dngos po rnams kyi dngos po nyid rmi lam dang mtshungs so/ /ji ltar rmi lam yod pa nyid kyi mtshan nyid du 'gyur ba ma yin/med pa nyid kyi mtshan nyid du 'gyur ba yang ma yin la/ rgyu med pa yang ma yin te/ de bzhin du tha snyad la sogs pa rnams yod pa nyid do/ /gal te don dam par khyim la sogs pa yod pa'i mtshan nyid du 'gyur na/ rtsig ngos med pa yang de dmigs par 'gyur te yod pa'i phyir ro//ci ste med pa'i mtshan nyid du gyur na de'i tshe byas pa na yang mi dmigs par 'gyur te / med pa'i phyir ro/ /ci ste gnyi ga'i mtshan nyid du gyur na/ de lta na byas pa dang ma byas pa gnyi ga yang dmigs par 'gyur ba zhig na/gnyi gar dmigs pa yang med do/ /rgyu med pa yang ma yin te/ rtsa la sogs pa rnams kyis grub pa nyid kyi phyir ro/ /de'i phyir na 'bras bu yod pa ma yin zhing 'bras bu med pa ma yin la/ 'bras bu yod pa dang med pa yang ma yin la/ rgyu med pa yang ma yin no//'dir smras pa/ gal te dngos po rnams rmi lam dang mtshungs pa na de'i tshe ming bstan pas dngos po rnams las 'ga' yang rtogs par mi byed de/ 'dir ltar bum pa 'o na cig ces brjod pa na/ byis pa'am mkhas pa yang rung bum pa zhes bya ba'i ming 'dis ming can bum pa la rtogs par byas nas bum pa khyer nas 'ong gi snam bu ni ma yin te/de bas na ming bstan pa las dngos po yod do zhe na 'di la brjod pa/ ming ni dngos po ma yin no/ /'dir ming dngos po ma yin te/ /gal te ming dngos por gyur na de'i tshe bum pa zhes brjod pa ni yi ge gnyis po de dag nyid kyis sbrang rtsi dang chu la sogs pa 'dzin pa dang /'thung bar byed par 'gyur na/ de ltar yang ma yin te/ de'i phyir ming gzhan la dngos po gzhan no/ /gal te ming dngos por gyur na ni mi mkhas pa su zhig tshig tsam gyis yod pa'i bum pa rdza mkhan las rin gyis nyo bar byed/gal te ming dngos por gyur na ni de'i tshe gcig la rtags gsum mam/ bud med dang / skyes pa dang / ma ning rnams 'dres par thal bar 'gyur ro/ /ci'i phyir zhe na/ 'di ni d+ha d+ha zhes brjod pa ni skyes pa dang / ta ni zhes brjod pa na bud med dang / sha ri raM zhes brjod pa na/ ma ning zhes bstan te/ rtags gsum po 'di ni srog chags dang / srog chags ma yin pa thams cad la 'jug par 'gyur te/ de bas na gal te ming dngos por gyur na/ gcig la gsum du 'gyur te/ de'i phyir skyes bu la bud med dang skyes pa dang ma ning du 'gyur na de yang mi 'dod de//de'i phyir ming dngos po ma yin te/ gang gi phyir ming ni rna bas dang / bum pa ni mig la sogs pa rnams kyis 'dzin par byed do/ /gal te yang ming bum par gyur na de'i tshe g+ha Da dang kum b+ha dang / ka la sha zhes bya ba la sogs pa ming mang ba'i phyir dngos po mang ba nyid du 'gyur te/de ltar thams cad kyis bsal na ming ni dngos po ma yin no/ /bcom ldan 'das kyis/ 'jig rten zhes bya ming tsam ste/ /ming dang smig rgyu dang mtshungs pa'i/ /tshig tsam tshig gis stong pa ste/ /rgyud mangs rdza rnga sgra brnyan mtshungs//zhes gsungs pa / de bas na tha snyad rmi lam dang mtshungs so/ /de'i phyir dngos po ma yin no/ /'dir smras pa/ de ltar bkag pa gang yin pa de ci rang bzhin med pa zhig gam 'on te ma yin/ 'on te rang bzhin dang bcas pa yin na de'i tshe dam bca' ba nyams so//ci ste rang bzhin med na de'i tshe dgag par bya bar mi nus te/ rang bzhin med pa'i phyir ro zhe na/ smras pa/ bsgrub par bya ba dang mtshungs so/ /'dir khyed kyis dgag pa gang yin pa 'di brjod pa/ ci yod pa dang med pa zhes bya ba'i dgag par byed pa'i phyir mi srid do //dgag par bya ba med pa la ni 'di ci zhig 'gegs/ dgag par bya ba dang / dgag pa dag /'gegs pa rnams rim gyis mi srid la/ cig car yang ma yin no/ /'di ltar gal te dgag par bya ba med na gang gi dgag pa yin/ de bzhin du gal te dgag par med na ji ltar dgag par bya ba yin par 'gyur/de dag med na 'gegs pa por ji ltar 'gyur/ de dag med par yang de ji ltar 'gyur/ de ltar re zhig rim gyis ma yin no/ /dgag par bya ba dang / dgag pa dang / 'gegs pa po cig car yang yod pa ma yin te/cig car skye ba'i ba lang gi rwa dag la ni phan tshun dgag par bya ba dang / dgag pa dang 'gegs pa po dag med do/ /de bas na tshig 'di grub par bya ba dang mtshungs so/ /de ltar yin dang rten med pa'i nyon mongs pa rnams rab tu spong ba yin no//yang / /bdag nyid chen po chags pa yin / /chags bral ma yin rten med phyir/ /rten yod na ni chags pa dang / /chags bral nye bar skyed par byed/ /ces gsungs so/ /yi ge brgya pa zhes bya ba'i rab tu byed pa'i 'grel pa/ slob dpon 'phags pa klu sgrub kyi zhal snga nas mdzad pa rdzogs so// //dpal kha che'i grong khyer dpe med du ban+de gzhon nu shes rab kyis bsgyur ba'o// //slad kyis paN+Di ta a nan+ta dang / lo ts+tsha ba grags 'byor shes rab kyis zhu chen legs par byas so// //