CLOSE WINDOW

D3826
བོད་ཡིག

/ //[ @#/ /rgya gar skad du/ bai da l+yaM sU tra nA ma/ bod skad du/ zhib mo rnam par 'thag pa zhes bya ba'i mdo/ slob dpon 'phags pa klu sgrub la phyag 'tshal lo/ /rtog ge shes pa'i nga rgyal gyis/ /gang zhig rtsod par mngon 'dod pa//de yi nga rgyal spang ba'i phyir/ /zhib mo rnam 'thag bshad par bya/ /tshad ma dang gzhal bya ni gnyis ka 'dres pa yin no/ /rang las ma grub pa'i phyir ro/ /yod pa dang med pa dang gnyis ka dag ni ltos pa ma yin no/ /ma yin te thug pa med par thal bar 'gyur ba'i phyir ro/ / tshad ma rnams ni mar me bzhin/ /rang dang gzhan sgrub par byed pa yin no/ /tshad ma rnams la ni tshad ma med de mar me ni 'phrad pa'am ma 'phrad pa'i mun pa gsal bar byed pa ma yin no/ /gza'i gnod pa bzhin du 'dir yang 'gyur ro zhe na/ ma yin te/ dpe dang 'gal ba'i phyir ro/ /bstan bcos las 'jig rten pa'i spyod pa po de yang seng ge la sogs pa dang mtshungs par mngon par 'dod pa yin no/ /mar me ni rang gi bdag nyid gsal ba ma yin te/ mun pa med pa'i phyir ro/ /phyin ci log tu thal bar 'gyur ba'i phyir mun pa yang bdag nyid la sgrib par byed par 'gyur ro//tshad ma dang gzhal bya dag ni dus gsum du ma grub pa'o/ /dus gsum du ma grub pas tshad ma dang gzhal bya 'gag pa mi 'thad do/ /dgag pa grub na tshad ma dang gzhal bya'ang grub bo zhe na/ ma yin te/ sngar khas blangs pa'i phyir ro//gal te tshad ma dang gzhal bya ma grub par khas blangs pa yin na ni khas blangs pa dang dus mnyam kho nar rtsod pa rdzogs pa yin no/ /ma grub pa la rtog pa spang ba'i phyir ro/ /mngon sum la sogs pa ni yod pa ma yin te/ gang las she na/ yang dag par rtogs pa'i phyir ro//mngon sum la sogs pa grub na gzhal bya ni 'thad pa ma yin no/ /de'i rkyen can yin pa'i phyir shes pa ma yin zhing shes bya ma yin no/ /blo ni tshad ma ma yin te/ gzhal bya yin par brjod pa'i phyir ro/ /dmigs pa dang mi dmigs pa la the tshom med de/ yod pa yang med pa'i phyir ro//the tshom za ba ni yod pa ma yin te/ khyad par la ltos pa med pa'i phyir ro/ /khyad par la ltos pa ma yin no/ /sngar bkag zin pa'i phyir ro/ /dgos pa med de/ yod pa dang med pa nyid kyi phyir ro/ /bye ma la 'jug pa ma yin te/ dpe yod pa'i phyir ro/ /de yang snga ma dang mtshungs pa nyid do//mtha' mthong ba yang ma yin te/ thog ma dang dbus med pa'i phyir ro/ /me ni gzi brjid kyi dpe ma yin te/ chos mthun pa nyid kyi phyir ro/ /gzi brjid kyi dpe chu yang ma yin te/ chos mi mthun pa nyid kyi phyir ro/ /gzhan yang cung zad chos mthun pas yin no zhe na/ma yin te/ ri rab dang skra bzhin no/ /phal cher chos mthun pas ma yin te/ sngar bkag pa'i phyir ro/ /thog ma ma grub na tha ma grub pa ma yin no/ /gal te thog ma ma grub na dbus dang mtha' ma gnyis ma grub bo/ /yan lag can med pa'i phyir yan lag yod pa ma yin no//tshogs pa la yang ma grub ste/ re re la med pa'i phyir ro/ /yan lag can yang du mar 'gyur ro/ /yan lag can gcig yin pa'i phyir yan lag thams cad gcig tu thal bar 'gyur ro/ /dus gsum du ma grub pas yan lag can med do/ /'on te rtswa bal ba dza bzhin du 'grub pa yin no//ma yin te/ bsgrub bya dang mtshungs pas so/ /rigs pa med pa'i phyir ro/ /gzhan yang yan lag can la yan lag dgos pa ltar/ yan lag thams cad la yang yan lag yod par thal ba'i phyir ro/ /dam bca' ba las gtan tshigs gzhan dang gzhan ma yin pa'i phyir ro//gtan tshigs ma yin na/ gtan tshigs la gtan tshigs med pa'i phyir ro/ /dam bca' dang gtan tshigs med pa'i phyir nye bar sbyar ba dang mjug bsdu ba dag med pa yin no/ /lhag ma dag la yang gtan tshigs med do/ /gal te grub pa gtan tshigs byas pa yin no//ci zhig thob ce na/ dpe la sogs pa don med do/ /gtan tshigs don med pa nyid do/ /bdag med de/ ma grub pa'i phyir ro/ /gzhan dang gzhan brjod pa'i phyir gcig la gcig med do/ /yi ge dag la'ang de lta bu yin no/ /the tshom bzhin du rtog ge yang yin no//rdzas yod pa dang / gcig nyid la sogs pa dag ni/ gzhan dang gzhan ma yin pa gnyis ka mi 'thad pa'i phyir gtan la dbab pa med do/ /rtsod pa ni yod pa ma yin te/ brjod pa dang brjod par bya ba dag med pa'i phyir ro/ /don dam pa dpyod pa'i skabs yin pa'i phyir/ brda byas pa'i ming dag ni rnam pa du mar mthong ba'i phyir ro//'jig rten pa'i mkhas pa dag kyang rjod par byed pa dang brjod par bya ba du mar sbyor bar mthong ba'i phyir/ rjod par byed pa dang brjod par bya ba gcig nyid dang / gzhan nyid du ma grub bo/ /brjod pa dang sun ci phyin du rgol ba dag kyang de bzhin no/ /gtan tshigs ltar snang ba ni med do//chos mthun pa nyid dang mi mthun pa nyid med pa'i phyir ro/ /ma 'khrul pa ni 'khrul pa med pa'i phyir ro/ /'khrul pa dang bcas pa'i gtan tshigs yod do zhe na/ ma yin te/ de dag ni gzhan yin pa'i phyir ro/ /skad cig ma nyid kyi phyir ro/ / khyed kyi gtan tshigs thams cad 'gal ba brjod pa yin gyi/ 'khrul pa dang bcas pa yin no/ /ma yin te/ snga ma dang phyi mar 'byung bas 'gal ba med pa'i phyir ro/ /'das pa 'das par 'gyur ba yin na/ 'das pa ni 'das par 'gyur ba'o/ /rjod byed kyi rnam pa thams cad med par thal bar 'gyur ba'i yang phyir ro//'das pa'i gtan tshigs sam dus ni yod pa ma yin te/ mi srid pa'i phyir ro/ /khyod kyi thams cad tshig don du brjod pa yin gyi/ don dam pa ni ma yin no zhe na/ ma yin te/ lan thams cad la thal bar 'gyur ba'i phyir ro/ /skyes pa dang ma skyes pa dang / gnyis ka med pa'i phyir ltag chod ni med do/ /ma yin te/ snga ma dang phyi ma gcig dang gzhan nyid la med pa'i phyir ro/ /tshar gcad pa'i gnas kyang de bzhin no/ /tshar gcad pa'i gnas la ni/ tshar gcad pa med pa de bcings pa bzhin no/ /gnyis ka khas ma blangs pa'i phyir ro/ /de ma grub na ma grub tu zad do//de kho na bzhin du brjod pa ma yin te/ mngon par brjod pa ni med pa nyid yin no/ /zhib mo rnam par 'thag pa zhes bya ba'i mdo/ slob dpon 'phags pa klu sgrub kyi zhal snga nas mdzad pa rdzogs so// //kha che'i paN+Di ta a nan+ta dang / lots+tsha ba dge slong grags 'byor shes rab kyis bsgyur ba'o/