CLOSE WINDOW

D3825
བོད་ཡིག

@##/ /rgya gar skad du/ yug+ti ShaSh+ThakA kA ri kA nA ma/ bod skad du/ rigs pa drug cu pa'i tshig le'ur byas pa zhes bya ba/ 'jam dpal gzhon nur gyur pa la phyag 'tshal lo/ /gang gi skye dang 'jig pa dag /tshul 'di yis ni spangs gyur pa/ /rten cing 'byung ba gsungs pa yi//thub dbang de la phyag 'tshal lo/ /gang gis blo gros yod med las/ /rnam par 'das shing mi gnas pa/ /de dag gis ni rkyen gyi don/ /zab mo dmigs med rnam par rtogs/ /re zhig nyes kun 'byung ba'i gnas/ /med nyid rnam par bzlog zin gyis/ /rigs pa gang gis yod nyid kyang //bzlog par 'gyur ba mnyan par gyis/ /ji ltar byis pas rnam brtags bzhin/ /dngos po gal te bden 'gyur na/ /de dngos med pas rnam thar du/ /gang gis mi 'dod rgyu ci zhig /yod pas rnam par mi grol te/ /med pas srid pa 'di las min/ / dngos dang dngos med yongs shes pas/ /bdag nyid chen po rnam par grol/ /de nyid ma mthong 'jig rten dang / /mya ngan 'das par rlom sems te/ /de nyid gzigs rnams 'jig rten dang / /mya ngan 'das par rlom sems med/ /srid pa dang ni mya ngan 'das/ /gnyis po 'di ni yod ma yin//srid pa yongs su shes pa nyid/ /mya ngan 'das shes bya bar brjod/ /dngos po byung ba zhig pa la/ /ji ltar 'gog par brtags pa bzhin/ /de bzhin dam pa rnams kyis kyang / /sgyu ma byas lta'i 'gog pa bzhed/ /rnam par 'jig pas 'gog 'gyur gyi/ /'dus byas yongs su shes pas min//de ni su la mngon sum 'gyur/ /zhig shes pa der ji ltar 'gyur/ /gal te phung po ma 'gags na/ /nyon mongs zad kyang 'das mi 'gyur/ /gang tshe 'dir ni 'gags gyur pa/ /de yi tshe na grol bar 'gyur/ /ma rig rkyen gyis byung ba la/ /yang dag ye shes kyis gzigs nas //skye ba dang ni 'gags pa'ang rung / /'ga' yang dmigs par mi 'gyur ro/ /de nyid mthong chos mya ngan las / /'das shing bya ba byas pa'ang yin/ /gal te chos shes mjug thogs su/ /'di la bye brag yod na ni/ /dngos po shin tu phra ba la'ang / /gang gis skye bar rnam brtags pa//rnam par mi mkhas de yi ni/ /rkyen las byung ba'i don ma mthong / /nyon mongs zad pa'i dge slong gi /gal te 'khor ba rnam ldog na/ /ci phyir rdzogs sangs rgyas rnams kyis/ /de yi rtsom pa rnam mi bshad/ /rtsom pa yod na nges par yang //lta bar 'gyur ba yongs su 'dzin/ /rten cing 'brel par 'byung ba gang / /de la sngon dang tha ma ci/ /sngon skyes pa ni ji ltar na/ /phyi nas slar yang bzlog par 'gyur/ /sngon dang phyi ma'i mtha' bral ba/ /'gro ba sgyu ma bzhin du snang / /gang tshe sgyu ma 'byung zhe'am/ / gang tshe 'jig par 'gyur snyam du/ /sgyu ma shes pa der mi rmongs/ /sgyu ma mi shes yongs su sred/ /srid pa smig rgyu sgyu 'dra bar/ /blo yis mthong bar gyur pa ni/ /sngon gyi mtha' 'am phyi ma'i mtha'/ /lta bas yongs su slad mi 'gyur/ /gang dag gis ni 'dus byas la/ /skye dang 'jig pa rnam brtags pa//de dag rten 'byung 'khor lo yis/ /'khor lo'i 'gro ba rnam mi rtog /de dang de brten gang 'byung de/ /rang gi dngos por skyes ma yin/ /rang gi dngos po gang ma skyes/ /de ni skye zhes ji ltar bya/ /rgyu zad nyid las zhi ba ni/ /zad ces bya bar rtog pa ste/ / rang bzhin gyis ni gang ma zad/ /de la zad ces ji ltar brjod/ /de ltar ci yang skye ba med/ /ci yang 'gag par mi 'gyur ro/ /skye ba dang ni 'jig pa'i las/ /dgos pa'i don du bstan pa'o/ /skye ba shes pas 'jig pa shes/ /'jig pa shes pas mi rtag shes/ /mi rtag nyid la 'jug shes pas//dam pa'i chos kyang rtog par 'gyur/ /gang dag rten cing 'brel 'byung ba/ /skye dang 'jig pa rnam spangs par/ /shes par gyur pa de dag ni/ /ltar gyur srid pa'i rgya mtsho brgal/ /so so'i skye bo dngos bdag can/ /yod dang med par phyin ci log /nyes pas nyon mongs dbang gyur rnams/ / rang gi sems kyis bslus par 'gyur/ /dngos la mkhas pa rnams kyis ni/ /dngos po mi rtag bslu ba'i chos/ /gsog dang stong pa bdag med pa/ /rnam par dben zhes bya bar mthong / /gnas med dmigs pa yod ma yin/ /rtsa ba med cing gnas pa med/ /ma rig rgyu las shin du byung / / thog ma dbus mtha' rnam par spangs/ /chu shing bzhin du snying po med/ /dri za'i grong khyer 'dra ba ste/ /rmongs pa'i grong khyer mi bzad pa'i/ /'gro ba sgyu ma bzhin du snang / /tshangs sogs 'jig rten 'di la ni/ /bden pa rab tu gang snang ba/ /de ni 'phags la brdzun zhes gsungs/ / 'di las gzhan lta ci zhig lus/ /'jig rten ma rig ldongs gyur pa/ /sred pa rgyun gyis rjes 'brang dang / /mkhas pa sred pa dang bral ba/ /dge ba rnams lta ga la mnyam/ /de nyid tshol la thog mar ni/ /thams cad yod ces brjod par bya/ /don rnams rtogs shing chags med la//phyis ni rnam par dben pa'o/ /rnam par dben don mi shes la/ /thos pa tsam la 'jug byed cing / /gang dag bsod nams mi byed pa/ /skyes bu tha shal de dag brlag /las rnams 'bras bu bcas nyid dang / /'gro ba dag kyang yang dag bshad/ /de yi rang bzhin yongs shes dang //skye ba med pa dag kyang bstan/ /dgos pa'i dbang gis rgyal ba rnams/ /nga dang nga yi zhes gsungs ltar/ /phung po khams dang skye mched rnams/ /de bzhin dgos pa'i dbang gis gsungs/ /'byung ba che la sogs bshad pa/ /rnam par shes su yang dag 'du/ / de shes pas ni 'bral 'gyur na/ /log par rnam brtags ma yin nam/ /mya ngan 'das pa bden gcig pur/ /rgyal ba rnams kyis gang gsungs pa/ /de tshe lhag ma log min zhes/ /mkhas pa su zhig rtog par byed/ /ji srid yid kyi rnam g.yo ba/ /de srid bdud kyi spyod yul de //de lta yin na 'di la ni/ /nyes pa med par cis mi 'thad/ /'jig rten ma rig rkyen can du/ /gang phyir sangs rgyas rnams gsungs pa/ /'di yi phyir na 'jig rten 'di/ /rnam rtog yin zhes cis mi 'thad/ /ma rig 'gags par gyur pa na/ /gang zhig 'gag par 'gyur ba de//mi shes pa las kun brtags par/ /ji lta bur na gsal mi 'gyur/ /gang zhig rgyu dang bcas 'byung zhing / /rkyen med par ni gnas pa med/ /rkyen med phyir yang 'jig 'gyur ba/ /de ni yod ces ji ltar rtogs/ /gal te yod par smra ba rnams/ / dngos mchog zhen nas gnas pa ni/ /lam de nyid la gnas pa ste/ /de la ngo mtshar cung zad med/ /sangs rgyas lam la brten nas ni/ /kun la mi rtag smra ba rnams/ /rtsod pas dngos rnams mchog bzung bas/ /gnas pa gang yin de smad do/ /'di 'am de'o zhes gang du//rnam par dpyad nas mi dmigs na/ /rtsod pa 'di'am de bden zhes/ /mkhas pa su zhig smra bar 'gyur/ /de dag gis ni ma brten par/ /bdag gam 'jig rten mngon zhen pa/ /de dag kye ma rtag mi rtag /la sogs lta bas 'phrogs pa yin/ /gang dag brten nas dngos po rnams//de nyid du ni grub 'dod pa/ /de dag la yang rtags stsogs skyon/ /de dag ji ltar 'byung mi 'gyur/ /gang dag brten nas dngos po rnams/ /chu yi zla ba lta bur ni/ /yang dag ma yin log min par/ /'dod pa de dag ltas mi 'phrogs / /dngos por khas len yod na ni//'dod chags zhe sdang 'byung ba yi / /lta ba mi bzad ma rungs 'byung / /de las byung ba'i spyod par 'gyur/ /de ni lta ba kun gyi rgyu/ /de med nyon mongs mi skye ste/ /de phyir de ni yongs shes na/ /lta dang nyon mongs yongs su 'byang / /dngos por khas len yod na ni// gang gis de shes 'gyur snyam na/ /brten nas 'byung ba mthong ba de/ /brten nas skye ba ma skyes pas / /de nyid mkhyen pa mchog gis gsungs/ /log pa'i shes pa zil gnon pa/ /bden pa min la bden rdzun pa'i/ /yongs su 'dzin dang rtsod stsogs kyi/ /rim pa chags las 'byung bar 'gyur//che ba'i bdag nyid can de dag /rnams la phyogs med rtsod pa med/ /gang rnams la ni phyogs med pa/ /de la gzhan phyogs ga la yod/ /gang yang rung ba'i gnas rnyed nas/ /nyon mongs sbrul gdug g.yo can gyis/ /zin par 'gyur te gang gi sems//gnas med de dag zin mi 'gyur/ /gnas bcas sems dang ldan rnams la/ /nyon mongs dug chen cis mi 'gyur / /nyon mongs sbrul gyis zin par 'gyur/ /byis pa bden par 'du shes pas/ /gzugs brnyan la ni chags pa bzhin/ /de ltar 'jig rten rmongs pa'i phyir//yul gyi gzeb la thogs par 'gyur/ /bdag nyid che rnams dngos po dag /gzugs brnyan lta bur ye shes kyi / /mig gis mthong nas yul zhes ni/ /bya ba'i 'dam la mi thogs so/ /byis pa rnams ni gzugs la chags/ /bar ma dag ni chags bral 'gyur//gzugs kyi rang bzhin shes pa yi/ /blo mchog ldan pa rnam par grol/ /sdug snyam pa las chags par 'gyur/ /de las bzlog pas 'dod chags bral/ /sgyu ma'i skyes bu ltar dben par/ /mthong nas mya ngan 'da' bar 'gyur/ /log pa'i shes pas mngon gdung ba'i//nyon mongs skyon rnams gang yin de / /dngos dang dngos med rnam rtog pa/ /don shes 'gyur la mi 'byung ngo / /gnas yod na ni 'dod chags dang / /'dod chags bral bar 'gyur zhig na/ /gnas med bdag nyid chen po rnams/ /chags pa med cing chags bral min//gang dag rnam par dben snyam du/ /g.yo ba'i yid kyang mi g.yo ba/ /nyon mongs sbrul gyis dkrugs gyur pa/ /mi zad srid pa'i rgya mtsho brgal/ /dge ba 'di yis skye bo kun/ /bsod nams ye shes tshogs bsags te/ /bsod nams ye shes las byung ba'i//dam pa gnyis ni thob par shog /rigs pa drug cu pa'i tshig le'ur byas pa zhes bya ba slob dpon 'phags pa klu sgrub kyi zhal snga nas mdzad pa rdzogs so// //rgya gar gyi mkhan po mu ti ta shrI'i zhal snga nas dang / bod kyi lo ts+tsha ba pa tshab nyi ma grags kyis bcos te gtan la phab pa'o/