CLOSE WINDOW

D3824
བོད་ཡིག

@#/ /dbu ma rtsa ba'i tshig le'ur byas pa shes rab ces bya ba bzhugs so/ / @##/ /rgya gar skad du/ pradz+nyA nA ma mU la ma d+h+yA ma ka kA ri ka /bod skad du/ dbu ma rtsa ba'i tshig le'ur byas pa shes rab ces bya ba / 'jam dpal gzhon nur gyur pa la phyag 'tshal lo// gang gis rten cing 'brel par 'byung / /'gag pa med pa skye med pa/ /chad pa med pa rtag med pa/ /'ong ba med pa 'gro med pa/ /tha dad don min don gcig min/ / spros pa nyer zhi zhi bstan pa/ /rdzogs pa'i sangs rgyas smra rnams kyi/ /dam pa de la phyag 'tshal lo/ /bdag las ma yin gzhan las min/ /gnyis las ma yin rgyu med min/ /dngos po gang dag gang na yang //skye ba nam yang yod ma yin/ /rkyen rnam bzhi ste rgyu dang ni/ /dmigs pa dang ni de ma thag /bdag po yang ni de bzhin te/ /rkyen lnga pa ni yod ma yin/ /dngos po rnams kyi rang bzhin ni//rkyen la sogs la yod ma yin/ /bdag gi dngos po yod min na/ /gzhan dngos yod pa ma yin no/ /bya ba rkyen dang ldan pa yin / /rkyen dang mi ldan bya ba med/ /bya ba mi ldan rkyen ma yin//bya ba ldan yod 'on te na/ /'di dag la brten skye bas na/ /de phyir 'di dag rkyen ces grag /ji srid mi skye de srid du/ /'di dag rkyen min ji ltar min/ /med dam yod pa'i don la yang / /rkyen ni rung ba ma yin te//med na gang gi rkyen du 'gyur/ /yod na rkyen gyis ci zhig bya/ /gang tshe chos ni yod pa dang / /med dang yod med mi 'grub pa / /ji ltar sgrub byed rgyu zhes bya/ /de lta yin na mi rigs so/ /yod pa'i chos 'di dmigs pa ni//med pa kho na nye bar bstan/ /ci ste chos ni dmigs med na/ /dmigs pa yod par ga la 'gyur/ /chos rnams skyes pa ma yin na/ /'gag pa 'thad par mi 'gyur ro/ /de phyir de ma thag mi rigs/ /'gags na rkyen yang gang zhig yin//dngos po rang bzhin med rnams kyi/ /yod pa gang phyir yod min na/ /'di yod pas na 'di 'byung zhes/ /bya ba 'di ni 'thad ma yin/ /rkyen rnams so so 'dus pa la/ /'bras bu de ni med pa nyid/ /rkyen rnams la ni gang med pa//de ni rkyen las ji ltar skye/ /ci ste de ni med par yang / /rkyen de dag las skye 'gyur na/ /rkyen ma yin pa dag las kyang / /ci yi phyir na skye mi 'gyur/ /'bras bu rkyen gyi rang bzhin na/ /rkyen rnams bdag gi rang bzhin min//bdag dngos min las 'bras bu gang / /de ni ji ltar rkyen rang bzhin/ /de phyir rkyen gyi rang bzhin min/ /rkyen min rang bzhin 'bras bu ni/ /yod min 'bras bu med pas na/ /rkyen min rkyen du ga la 'gyur/ /rkyen brtag pa zhes bya ba ste/ /rab tu byed pa dang po'o// // re zhig song la mi 'gro ste/ /ma song ba la'ang 'gro ba min/ /song dang ma song ma gtogs par/ /bgom pa shes par mi 'gyur ro/ /gang na g.yo ba de na 'gro/ /de yang gang gi bgom pa la/ /g.yo ba song min ma song min/ /de phyir bgom la 'gro ba yod/ /bgom la 'gro ba yin par ni//ji lta bur na 'thad par 'gyur/ /gang tshe 'gro ba med pa yi/ /bgom pa 'thad pa med phyir ro/ /gang gi bgom pa la 'gro ba/ /de yi bgom la 'gro med par/ /thal bar 'gyur te gang gi phyir/ /bgom la 'gro ba yin phyir ro/ /bgom la 'gro ba yod na ni/ / 'gro ba gnyis su thal 'gyur te/ /gang gis de bgom 'gyur ba dang / /de la 'gro ba gang yin pa'o/ /'gro ba gnyis su thal 'gyur na/ /'gro ba po yang gnyis su 'gyur/ /gang phyir 'gro po med par ni/ /'gro ba 'thad par mi 'gyur phyir/ /gal te 'gro po med gyur na/ /'gro ba 'thad par mi 'gyur te//'gro ba med na 'gro ba po/ /yod pa nyid du ga la 'gyur/ /re zhig 'gro po mi 'gro ste/ /'gro ba po min 'gro ba min/ /'gro po 'gro po min las gzhan/ /gsum pa gang zhig 'gro bar 'gyur/ /gang tshe 'gro ba med par ni/ /'gro po 'thad par mi 'gyur na/ / re zhig 'gro po 'gro'o zhes/ /ji ltar 'thad pa nyid du 'gyur/ /gang gi phyogs la 'gro ba po/ /'gro ba de la 'gro med pa'i/ /'gro po yin par thal 'gyur te/ /'gro po 'gro bar 'dod phyir ro/ /gal te 'gro po 'gro gyur na/ /'gro ba gnyis su thal 'gyur te/ /gang gis 'gro por mngon pa dang //'gro por gyur nas gang 'gro ba'o/ /song la 'gro ba'i rtsom med de/ /ma song ba la'ang 'gro rtsom med/ /bgom la rtsom pa yod min na/ /gang du 'gro ba rtsom par byed/ /'gro ba rtsom pa'i snga rol na/ /gang du 'gro ba rtsom 'gyur ba/ /bgom pa med cing song ba med/ /ma song 'gro ba ga la yod//'gro rtsom rnam pa thams cad du/ /snang ba med pa nyid yin na/ /song ba ci zhig bgom pa ci/ /ma song ci zhig rnam par brtag /re zhig 'gro po mi sdod de/ /'gro ba po min sdod pa min/ /'gro po 'gro po min las gzhan/ /gsum pa gang zhig sdod par 'gyur//gang tshe 'gro ba med par ni/ /'gro po 'thad par mi 'gyur na/ /re zhig 'gro po sdod do zhes/ /ji ltar 'thad pa nyid du 'gyur/ /bgom lam ldog par mi 'gyur te/ /song dang ma song las kyang min/ /'gro ba dang ni 'jug pa dang / /ldog pa yang ni 'gro dang mtshungs//'gro ba de dang 'gro ba po/ /de nyid ces kyang byar mi rung / /'gro ba dang ni 'gro ba po/ /gzhan nyid ces kyang byar mi rung / /gal te 'gro ba gang yin pa/ /de nyid 'gro po yin gyur na/ /byed pa po dang las nyid kyang / /gcig pa nyid du thal bar 'gyur/ /gal te 'gro dang 'gro ba po//gzhan pa nyid du rnam brtag na/ /'gro po med pa'i 'gro ba dang / /'gro ba med pa'i 'gro por 'gyur/ /gang dag dngos po gcig pa dang / /dngos po gzhan pa nyid du ni/ /grub par gyur pa yod min na/ /de gnyis grub pa ji ltar yod/ /'gro pa gang gis 'gro por mngon//'gro ba de ni de 'gro min/ /gang phyir 'gro ba'i snga rol med/ /gang zhig gang du 'gro bar 'gyur/ /'gro ba gang gi 'gro por mngon/ /de las gzhan pa de 'gro min/ /gang phyir 'gro po gcig pu la/ /'gro ba gnyis su mi 'thad do/ /'gro po yin par gyur pa ni//'gro rnam gsum du 'gro mi byed/ /ma yin par ni gyur de yang / /'gro rnam gsum du 'gro mi byed/ /yin dang ma yin gyur pa yang / /'gro rnam gsum du 'gro mi byed/ /de phyir 'gro dang 'gro po dang / /bgrod par bya ba'ang yod ma yin/ /'gro ba dang 'ong ba brtag pa zhes bya ba ste rab tu byed pa gnyis pa'o// //lta dang nyan dang snom pa dang / /myong bar byed dang reg byed yid/ /dbang po drug ste de dag gi/ /spyod yul blta bar bya la sogs/ /lta de rang gi bdag nyid ni/ /de la lta ba ma yin nyid/ /gang zhig bdag la mi lta ba/ /de dag gzhan la ji ltar lta/ / lta ba rab tu bsgrub pa'i phyir/ /me yi dpes ni nus ma yin/ /song dang ma song bsgom pa yis/ /de ni lta bcas lan btab bo/ /gang tshe cung zad mi lta ba/ /lta bar byed pa ma yin no/ /lta bas lta bar byed ces byar/ /de ni ji ltar rigs par 'gyur/ /lta ba lta nyid ma yin te//lta ba min pa mi lta nyid/ /lta ba nyid kyis lta ba po'ang / /rnam par bshad par shes par bya/ /ma spangs lta po yod min te/ /lta ba spangs par gyur kyang ngo / /lta po med na blta bya dang / /lta ba de dag ga la yod / /blta bya lta ba med pa'i phyir/ /rnam par shes pa la sogs bzhi//yod min nye bar len la sogs/ /ji lta bur na yod par 'gyur/ /lta bas nyan dang snom pa dang / /myong bar byed dang reg byed yid/ /nyan pa po dang mnyan la sogs/ /rnam par bshad par shes par bya/ /dbang po brtag pa zhes bya ba ste rab tu byed pa gsum pa'o// //gzugs kyi rgyu ni ma gtogs par/ /gzugs ni dmigs par mi 'gyur ro/ /gzugs zhes bya ba ma gtogs par/ /gzugs kyi rgyu yang mi snang ngo / /gzugs kyi rgyu ni ma gtogs par/ /gzugs na gzugs ni rgyu med par/ /thal bar gyur te don gang yang //rgyu med pa ni gang na'ang med/ /gal te gzugs ni ma gtogs par/ /gzugs kyi rgyu zhig yod na ni/ /'bras bu med pa'i rgyur 'gyur te/ /'bras bu med pa'i rgyu med do/ /gzugs yod na yang gzugs kyi ni/ /rgyu yang 'thad par mi 'gyur nyid/ /gzugs med na yang gzugs kyi ni//rgyu yang 'thad par mi 'gyur nyid/ /rgyu med pa yi gzugs dag ni/ /'thad par mi rung rung min nyid/ /de phyir gzugs kyi rnam par rtog /'ga' yang rnam par brtag mi bya/ /'bras bu rgyu dang 'dra ba zhes/ /bya ba 'thad pa ma yin te/ /'bras bu rgyu dang mi 'dra zhes//bya ba'ang 'thad pa ma yin no/ /tshor dang 'du shes 'du byed dang / /sems dang dngos po thams cad kyang / /rnam pa dag ni thams cad du/ /gzugs nyid kyis ni rim pa mtshungs/ /stong pa nyid kyis brtsad byas te / /gang zhig lan 'debs smra byed pa/ /de yis thams cad lan btab min//bsgrub par bya dang mtshungs par 'gyur / /stong pa nyid kyis bshad byas tshe/ /gang zhig skyon 'dogs smra byed pa/ /de yis thams cad skyon btags min/ /bsgrub par bya dang mtshungs par 'gyur/ /phung po brtag pa zhes bya ba ste rab tu byed pa bzhi pa'o// //nam mkha'i mtshan nyid snga rol na/ /nam mkha' cung zad yod ma yin/ /gal te mtshan las snga gyur na/ /mtshan nyid med par thal bar 'gyur/ /mtshan nyid med pa'i dngos po ni/ /'ga' yang gang na'ang yod ma yin/ /mtshan nyid med pa'i dngos med na/ /mtshan nyid gang du 'jug par 'gyur//mtshan nyid med la mtshan nyid ni/ /mi 'jug mtshan nyid bcas la min/ /mtshan bcas mtshan nyid med pa las/ /gzhan la'ang 'jug par mi 'gyur ro/ /mtshan nyid 'jug pa ma yin na/ /mtshan gzhi 'thad par mi 'gyur ro/ /mtshan gzhi 'thad pa ma yin na//mtshan nyid kyang ni yod ma yin/ /de phyir mtshan gzhi yod min te/ /mtshan nyid yod pa nyid ma yin/ /mtshan gzhi mtshan nyid ma gtogs pa'i / /dngos po yang ni yod ma yin/ /dngos po yod pa ma yin na/ /dngos med gang gi yin par 'gyur/ / dngos dang dngos med mi mthun chos/ /gang gis dngos dang dngos med shes/ /de phyir nam mkha' dngos po min/ /dngos med ma yin mtshan gzhi min/ /mtshan nyid ma yin khams lnga po/ /gzhan gang dag kyang nam mkha' mtshungs / /blo chung gang dag dngos rnams la/ /yod pa nyid dang med nyid du//lta ba de ni blta bya ba/ /nye bar zhi ba zhi mi mthong / /khams brtag pa zhes bya ba ste rab tu byed pa lnga pa'o// //gal te 'dod chags snga rol na/ /'dod chags med pa'i chags yod na/ /de la brtan nas 'dod chags yod/ /chags yod 'dod chags yod par 'gyur//chags pa yod par 'gyur na'ang / /'dod chags yod par ga la 'gyur/ /chags pa la yang 'dod chags ni/ /yod dam med kyang rim pa mtshungs/ /'dod chags dang ni chags pa dag /lhan cig nyid du skye mi rigs/ /'di ltar 'dod chags chags pa dag / phan tshun ltos pa med par 'gyur/ /gcig nyid lhan cig nyid med de / /de nyid de dang lhan cig min/ /ci ste tha dad nyid yin na/ /lhan cig nyid du ji ltar 'gyur/ /gal te gcig pu lhan cig na/ /grogs med pa yang de 'gyur ro/ /gal te tha dad lhan cig na/ /grogs med par yang der 'gyur ro//gal te tha dad lhan cig na/ /ci go 'dod chags chags pa dag /tha dad nyid du grub 'gyur ram/ /des na de gnyis lhan cig 'gyur/ /gal te 'dod chags chags pa dag /tha dad nyid du grub gyur na/ /de dag lhan cig nyid du ni/ /ci yi phyir na yongs su rtog /tha dad grub par ma gyur pas/ /de phyir lhan cig 'dod byed na/ /lhan cig rab tu grub pa'i phyir/ /tha dad nyid du yang 'dod dam/ /tha dad dngos po ma grub pas/ /lhan cig dngos po 'grub mi 'gyur/ /tha dad dngos po gang yod na/ /lhan cig dngos por 'dod par byed//de ltar 'dod chags chags pa dag /lhan cig lhan cig min mi 'grub/ /'dod chags bzhin du chos rnams kun/ /lhan cig lhan cig min mi 'grub/ /'dod chags dang chags pa brtag pa zhes bya ba ste rab tu byed pa drug pa'o// // gal te skye ba 'dus byas na/ /de la mtshan nyid gsum ldan 'gyur/ /ci ste skye ba 'dus ma byas/ /ji ltar 'dus byas mtshan nyid yin/ /skye la sogs gsum so so yis/ /'dus byas mtshan nyid bya bar ni/ /nus min gcig la dus gcig tu/ /'dus pa yang ni ji ltar rung //skye dang gnas dang 'jig rnams la/ /'dus byas mtshan nyid gzhan zhig ni/ /gal te yod na thug med 'gyur / /med na de dag 'dus byas min/ /skye ba'i skye bas rtsa ba yi / /skye ba 'ba' zhig skyed par byed/ /rtsa ba'i skye bas skye ba yi/ /skye ba'ang skyed par byed pa yin//gal te khyod kyi skye ba'i skyes/ /rtsa ba'i skye ba skyed byed na/ /khyod kyi rtsa bas ma bskyed des/ /de ni ji ltar skyed par byed/ /gal te khyod kyi rtsa ba yis/ /bskyed pa de yis rtsa skyed na/ /des ma bskyed pa'i rtsa ba des/ /de ni ji ltar skyed par byed/ /gal te ma skyes pa de yis/ /de skyed par ni byed nus na//khyod kyi skye bzhin pa de yis/ /de skyed par ni 'dod la rag /ji ltar mar me rang dang gzhan/ /snang bar byed pa de bzhin du/ /skye ba'ang rang dang gzhan gyi dngos/ /gnyis ka skyed par byed yin na / /mar me dang ni gang dag na / /de 'dug pa na mun pa med//mar mes ci zhig snang bar byed/ /mun pa sel bas snang byed yin/ /gang tshe mar me skye bzhin pa/ /mun pa dang ni phrad med na/ /ji ltar mar me skye bzhin pas/ /mun pa sel bar byed pa yin/ /mar me phrad pa med par yang / /gal te mun pa sel byed na/ /'jig rten kun na gnas pa'i mun//'di na gnas pa nges sel 'gyur/ /mar me rang dang gzhan gyi dngos/ /gal te snang bar byed 'gyur na/ /mun pa'ang rang dang gzhan gyi dngos/ /sgrib par 'gyur bar the tshom med/ /skye ba 'di ni ma skyes pas/ /rang gi bdag nyid ji ltar skyed / /ci ste skyes pas skyed byed na//skyes na ci zhig bskyed du yod/ /skyes dang ma skyes skye bzhin pa/ /ji lta bur yang mi skyed pa/ /de ni song dang ma song dang / /bgom pas rnam par bshad pa yin/ /gang tshe skye ba yod pa na/ /skye bzhin 'di 'byung med pa'i tshe/ /ji ltar skye la brtan nas ni/ / skye bzhin zhes ni brjod par bya/ /rten cing 'byung ba gang yin pa/ /de ni ngo bo nyid kyis zhi/ /de phyir skye bzhin nyid dang ni/ /skye ba yang ni zhi ba nyid/ /gal te dngos po ma skyes pa/ /'ga' zhig gang na yod gyur na/ /de ni skye 'gyur dngos po de/ /med na ci zhig skye bar 'gyur/ / gal te skye ba de yis ni/ /skye bzhin pa ni skyed byed na/ /skye ba de ni skye ba lta/ /gang zhig gis ni skyed par byed/ / gal te skye ba gzhan zhig gis/ /de skyed thug pa med par 'gyur/ /ci ste skye ba med skye na/ /thams cad de bzhin skye bar 'gyur/ /re shig yod dang med pa yang / /skye bar rigs pa ma yin zhing //yod med nyid kyang ma yin zhes/ /gong du bstan pa nyid yin no/ /dngos po 'gag bzhin nyid la ni/ /skye ba 'thad par mi 'gyur ro/ /gang zhig 'gag bzhin ma yin pa/ /de ni dngos por mi 'thad do/ /dngos po gnas pa mi gnas te/ /dngos po mi gnas gnas pa min//gnas bzhin pa yang mi gnas te/ /ma skyes gang zhig gnas par 'gyur/ /dngos po 'gag bzhin nyid la ni/ /gnas pa 'thad par mi 'gyur ro/ /gang zhig 'gag bzhin ma yin pa/ /de ni dngos por mi 'thad do/ /dngos po thams cad dus kun du//rga dang 'chi ba'i chos yin na/ /gang dag rga dang 'chi med par / /gnas pa'i dngos po gang zhig yod / /gnas pa gnas pa gzhan dang ni/ /de nyid kyis kyang gnas mi rigs/ /ji ltar skye ba rang dang ni/ /gzhan gyis bskyed pa ma yin bzhin/ /'gags pa 'gag par mi 'gyur te//ma 'gags pa yang 'gag mi 'gyur/ /'gag bzhin pa yang de bzhin min/ /ma skyes gang zhig 'gag par 'gyur/ /re zhig dngos po gnas pa la/ /'gag pa 'thad par mi 'gyur ro/ /dngos po mi gnas pa la yang / /'gag pa 'thad par mi 'gyur ro/ / gnas skabs de yis gnas skabs ni/ /de nyid 'gag pa nyid mi 'gyur/ /gnas skabs gzhan gyis gnas skabs ni/ /gzhan yang 'gag pa nyid mi 'gyur/ /gang tshe chos rnams thams cad kyi/ /skye ba 'thad par mi 'gyur pa/ /de tshe chos rnams thams cad kyi/ /'gag pa 'thad par mi 'gyur ro//re zhig dngos po yod pa la/ /'gag pa 'thad par mi 'gyur ro/ /gcig nyid na ni dngos po dang / /dngos po med pa 'thad pa med/ /dngos po med par gyur pa la'ang / /'gag pa 'thad par mi 'gyur ro/ /mgo gnyis pa la ji ltar ni/ /gcad du med pa de bzhin no//'gag pa rang gi bdag nyid kyis/ /yod min 'gag pa gzhan gyis min/ /ji ltar skye ba rang dang ni/ /gzhan gyis skyed pa ma yin bzhin/ /skye dang gnas dang 'jig pa dag /ma grub phyir na 'dus byas med/ /'dus byas rab tu ma grub pas / /'dus ma byas ni ji ltar 'grub //rmi lam ji bzhin sgyu ma bzhin/ /dri za'i grong khyer ji bzhin du/ /de bzhin skye dang de bzhin gnas/ /de bzhin du ni 'jig pa gsungs/ /skye ba dang gnas pa dang 'jig pa brtag pa zhes bya ba ste rab tu byed pa bdun pa'o// //byed po yin par gyur pa de/ /las su gyur pa mi byed do//byed po ma yin gyur pa yang / /las su ma gyur mi byed do/ /yin par gyur la bya ba med/ /byed po med pa'i las su'ang 'gyur/ /yin par gyur la bya ba med/ /las med byed pa por yang 'gyur/ /gal te byed por ma gyur pa / /las su ma gyur byed na ni//las la rgyu ni med par 'gyur/ /byed pa po yang rgyu med 'gyur/ /rgyu med na ni 'bras bu dang / /rgyu yang 'thad par mi 'gyur ro/ /de med na ni bya ba dang / /byed pa po dang byed mi rigs/ /bya ba la sogs mi rigs na/ /chos dang chos min yod ma yin/ /chos dang chos min med na ni//de las byung ba'i 'bras bu med/ /'bras bu med na thar pa dang / /mtho ris 'gyur ba'i lam mi 'thad/ /bya ba dag ni thams cad kyang / /don med nyid du thal bar 'gyur/ /byed pa por gyur ma gyur pa / /gyur ma gyur de mi byed de / /yin dang ma yin gyur cig la//phan tshun 'gal bas ga la yod/ /byed pa por ni gyur pa yis/ /ma gyur las ni mi byed de/ /ma gyur pas kyang gyur mi byed/ /'dir yang skyon der thal bar 'gyur/ /byed pa por ni gyur pa dang / /bcas pa las ni ma gyur dang / /gyur ma gyur pa mi byed de/ /gtan tshigs gong du bstan phyir ro//byed pa por ni ma gyur pas/ /las ni gyur dang bcas pa dang / /gyur ma gyur pa mi byed de/ /gtan tshigs gong du bstan phyir ro/ /byed pa por gyur ma gyur ni/ /las su gyur dang ma gyur pa/ /mi byed 'di yang gtan tshigs ni/ /gong du bstan pas shes par bya//byed pa po las brten byas shing / /las kyang byed po de nyid la/ /brten nas 'byung ba ma gtogs pa/ /'grub pa'i rgyu ni ma mthong ngo / /de bzhin nyer len shes par bya/ /las dang byed po bsal phyir ro/ /byed pa po dang las dag gis/ /dngos po lhag ma shes par bya//byed pa po dang las brtag pa zhes bya ba ste rab tu byed pa brgyad pa'o// //lta dang nyan la sogs pa dang / /tshor sogs dang yang dbang byas pa/ /gang gi yin pa de dag gi /snga rol de yod kha cig smra/ /dngos po yod pa ma yin na/ /lta ba la sogs ji ltar 'gyur/ / de phyir de dag snga rol na/ /dngos po gnas pa de yod do/ /lta dang nyan la sogs pa dang / /tshor ba la sogs nyid kyi ni/ /snga rol dngos po gang gnas pa/ /de ni gang gis gdags par bya/ /lta ba la sogs med par yang / /gal te de ni gnas gyur na/ /de med par yang de dag ni//yod par 'gyur bar the tshom med/ /ci yis gang zhig gsal bar byed/ /gang gis ci zhig gsal bar byed/ /ci med gang zhig ga la yod/ /gang med ci zhig ga la yod/ /lta la sogs pa thams cad kyi/ /snga rol gang zhig yod pa min/ /lta sogs nang nas gzhan zhig gis//gzhan gyi tshe na gsal bar byed/ /lta la sogs pa thams cad kyi/ /snga rol gal te yod min na/ /lta la sogs pa re re yi / /snga rol de ni ji ltar yod/ /lta po de nyid nyan po de/ /gal te tshor po'ang de nyid na / /re re'i snga rol yod gyur na/ /de ni de ltar mi rigs so//gal te lta po gzhan nyid la/ /nyan pa po gzhan tshor gzhan na/ /lta po yod tshe nyan por 'gyur/ /bdag kyang mang po nyid du 'gyur/ /lta dang nyan la sogs pa dang / /tshor ba dag la sogs pa yang / /gang las 'gyur ba'i 'byung de la'ang / /de ni yod pa ma yin no//lta dang nyan la sogs pa dang / /tshor ba dag la sogs pa yang / /gang gi yin pa gal te med/ /de dag kyang ni yod ma yin/ /gang zhig lta la sogs pa yi/ /snga rol da lta phyi na med/ /de la yod do med do zhes/ /rtog pa dag ni ldog par 'gyur/ /snga rol na gnas pa brtag pa zhes bya ba ste rab tu byed pa dgu pa'o// //bud shing gang de me yin na/ /byed pa po dang las gcig 'gyur/ /gal te shing las me gzhan na/ /shing med par yang 'byung bar 'gyur/ /rtag tu 'bar ba nyid du 'gyur/ /'bar byed rgyu las mi 'byung zhing / /rtsom pa don med nyid du 'gyur//de lta yin na las kyang med/ /gzhan la ltos pa med pa'i phyir/ /'bar bar byed rgyu las mi 'byung / /rtag tu 'bar ba yin na ni/ /rtsom pa don med nyid du 'gyur/ /de la gal te 'di snyam du/ /sreg bzhin bud shing yin sems na/ /gang tshe de tsam de yin na/ /gang gis bud shing de sreg byed//gzhan phyir mi phrad phrad med na/ /sreg par mi 'gyur mi sreg na/ /'chi bar mi 'gyur mi 'chi na/ /rang rtags dang yang ldan par gnas/ /ji ltar bud med skyes pa dang / /skyes pa'ang bud med phrad pa bzhin/ /gal te shing las me gzhan na//shing dang phrad du rung bar 'gyur/ /gal te me dang shing dag ni/ /gcig gis gcig ni bsal gyur na/ /shing las me gzhan nyid yin yang / /shing dang phrad par 'dod la rag /gal te shing ltos me yin la/ /gal te me ltos shing yin na/ /gang ltos med dang shing 'gyur ba//dang por grub pa gang zhig yin/ /gal te shing ltos me yin na/ /me grub pa la sgrub par 'gyur/ /bud par bya ba'i shing la yang / /me med par ni 'gyur pa yin/ /gal te dngos po gang ltos 'grub / /de nyid la yang ltos nas ni/ /ltos bya gang yin de 'grub na//gang la ltos nas gang zhig 'grub/ /dngos po ltos grub gang yin pa/ /de ma grub na ji ltar ltos/ /ci ste grub pa ltos she na/ /de ni ltos par mi rigs so/ /shing la ltos pa'i me med de/ /shing la ma ltos me yang med/ /me la ltos pa'i shing med de/ / me la ma ltos shing yang med/ /me ni gzhan las mi 'ong ste/ /shing la'ang me ni yod ma yin/ /de bzhin shing gi lhag ma ni/ /song dang ma song bgom pas bstan/ /shing nyid me ni ma yin te/ /shing las gzhan la me yang med/ /me ni shing dang ldan ma yin/ /me la shing med der de med//me dang shing gis bdag dang ni/ /nye bar len pa'i rim pa kun/ /bum rnam sogs dang lhan cig tu/ /ma lus par ni rnam par bshad/ /gang dag bdag dang dngos po rnams/ /de bcas nyid dang tha dad par/ /ston pa de dag bstan don la/ /mkhas so snyam du mi sems so//me dang bud shing brtag pa zhes bya ba ste rab tu byed pa bcu pa'o// //sngon mtha' mngon nam zhes zhus tshe/ /thub pa chen pos min zhes gsungs/ /'khor ba thog ma mtha' med de / /de la sngon med phyi ma med/ /gang la thog med mtha' med par / / de la dbus ni ga la yod/ /de phyir de la snga phyi dang / /lhan cig rim pa mi 'thad do/ /gal te skye ba snga gyur la/ /rga shi phyi ma yin na ni/ /skye ba rga shi med pa dang / /ma shi bar yang skye bar 'gyur/ /gal te skye ba 'phyi 'gyur la/ /rga shi snga ba yin na ni/ /skye ba med pa'i rga shi ni//rgyu med par ni ji ltar 'gyur/ /skye ba dang ni rga shi dag /lhan cig rung ba ma yin te/ /skye bzhin pa na 'chi 'gyur zhing / /gnyis ka rgyu med can du 'gyur/ /gang la snga phyi lhan cig gi/ /rim pa de dag mi srid pa'i/ /skye ba re dang rga shi de/ /ci yi phyir na spro bar byed//'khor ba 'ba' zhig sngon gyi mtha'/ /yod ma yin par ma zad kyi / /rgyu dang 'bras bu nyid dang ni/ /mtshan nyid dang ni mtshan gzhi nyid/ /tshor dang tshor po nyid dang ni/ /don yod gang dag ci yang rung / /dngos rnams thams cad nyid la yang / /sngon gyi mtha' ni yod ma yin//sngon dang phyi ma'i mtha' brtag pa zhes bya ba ste rab tu byed pa bcu gcig pa'o// /kha cig sdug bsngal bdag gis byas/ /gzhan gyis byas dang gnyi gas byas/ /rgyu med pa las 'byung bar 'dod/ /de ni bya bar mi rung ngo / /gal te bdag gis byas gyur na/ / de phyir brten nas 'byung mi 'gyur/ /gang phyir phung po 'di dag la/ /brten nas phung po de dag 'byung / /gal te 'di las de gzhan zhing / /gal te de las 'di gzhan na/ /sdug bsngal gzhan gyis byas 'gyur zhing / /gzhan de dag gis de byas 'gyur/ /gal te gang zag bdag gis ni/ / sdug bsngal byas na gang bdag gis/ /sdug bsngal byas pa'i gang zag ni / /sdug bsngal ma gtogs gang zhig yin/ /gal te gang zag gzhan las ni/ /sdug bsngal 'byung na gzhan zhig gis/ /sdug bsngal de byas gang sbyin de / /sdug bsngal ma gtogs ji ltar rung / /gal te gang zag gzhan sdug bsngal//'byung na gang gis de byas nas/ /gzhan la ster ba'i gang zag gzhan / /sdug bsngal ma gtogs gang zhig yin/ /bdag gis byas par ma grub pas/ /sdug bsngal gzhan gyis ga la byas/ /gzhan gyis sdug bsngal gang byed pa/ /de ni de yi bdag byas 'gyur//re zhig sdug bsngal bdag byas min/ /de nyid kyis ni de ma byas/ /gal te gzhan bdag ma byas na/ /sdug bsngal gzhan byas ga la 'gyur/ /gal te re res byas gyur na/ /sdug bsngal gnyis kas byas par 'gyur/ /bdag gis ma byas gzhan ma byas//sdug bsngal rgyu med ga la 'gyur/ /sdug bsngal 'ba' zhig rnam pa bzhi/ /yod ma yin par ma zad kyi/ /phyi rol dngos po dag la yang / /rnam pa bzhi po yod ma yin/ /bdag gis byas pa dang gzhan gyis byas pa brtag pa zhes bya ba ste rab tu byed pa bcu gnyis pa'o// //bcom ldan 'das kyis chos gang zhig /slu ba de ni brdzun zhes gsungs/ /'du byed thams cad slu ba'i chos/ /des na de dag brdzun pa yin/ /gal te slu chos gang yin pa/ /de brdzun de la ci zhig slu / /bcom ldan 'das kyis de gsungs pa//stong nyid yongs su bstan pa yin/ /dngos rnams ngo bo nyid med de/ /gzhan du 'gyur ba snang phyir ro/ /dngos po ngo bo nyid med med/ /gang phyir dngos rnams stong pa nyid/ /gal te ngo bo nyid med na/ /gzhan du 'gyur ba gang gi yin/ /gal te ngo bo nyid yod na/ / gzhan du 'gyur bar ji ltar rung / /de nyid la ni gzhan 'gyur med/ /gzhan nyid la yang yod ma yin/ /gang phyir gzhon nu mi rga ste/ /gang phyir rgas pa'ang mi rga'o/ /gal te de nyid gzhan 'gyur na/ /'o ma nyid ni zhor 'gyur ro/ /'o ma las gzhan gang zhig ni/ /zho yi dngos po yin par 'gyur//gal te stong min cung zad yod/ /stong pa cung zad yod par 'gyur/ /mi stong cung zad yod min na/ /stong pa yod par ga la 'gyur/ /rgyal ba rnams kyis stong pa nyid/ /lta kun nges par 'byung bar gsungs/ /gang dag stong pa nyid lta ba/ /de dag bsgrub tu med par gsungs//'du byed brtag pa zhes bya ba ste rab tu byed pa bcu gsum pa'o// //blta bya lta ba lta ba po/ /gsum po de dag gnyis gnyis dang / /thams cad kyang ni phan tshun du/ /phrad par 'gyur pa yod ma yin/ /de bzhin 'dod chags chags pa dang //chags par bya ba nyon mongs pa/ /lhag ma rnams dang skye mched kyi/ /lhag ma'ang rnam pa gsum nyid kyis / /gzhan dang gzhan du phrad 'gyur na/ /gang phyir blta bya la sogs la/ /gzhan de yod pa ma yin pa/ /de phyir phrad par mi 'gyur ro/ /blta bya la sogs 'ba' zhig la//gzhan nyid med par ma zad kyi/ /gang yang gang dang lhan cig tu/ /gzhan pa nyid du mi 'thad do/ /gzhan ni gzhan la brten te gzhan/ /gzhan med par gzhan gzhan mi 'gyur/ /gang la brten te gang yin pa/ /de ni de las gzhan mi 'thad/ / gal te gzhan ni gzhan las gzhan/ /de tshe gzhan med par gzhan 'gyur/ /gzhan med par ni gzhan 'gyur pa/ /yod min de yi phyir na med/ /gzhan nyid gzhan la yod ma yin/ /gzhan ma yin la'ang yod ma yin/ /gzhan nyid yod pa ma yin na/ / gzhan nam de nyid yod ma yin/ /de ni de dang phrad pa med/ /gzhan dang gzhan yang phrad mi 'gyur/ /phrad bzhin pa dang phrad pa dang / /phrad pa po yang yod ma yin/ /phrad pa brtag pa zhes bya ba ste rab tu byed pa bcu bzhi pa'o// //rang bzhin rgyu dang rkyen las ni/ / 'byung bar rigs pa ma yin no/ /rgyu dang rkyen las byung ba yi/ /rang bzhin byas pa can du 'gyur/ /rang bzhin byas pa can zhes byar/ /ji lta bur na rung bar 'gyur/ /rang bzhin dag ni bcos min dang / /gzhan la ltos pa med pa yin/ /rang bzhin yod pa ma yin na//gzhan gyi dngos po ga la yod/ /gzhan gyi dngos po'i rang bzhin ni/ /gzhan gyi dngos po yin zhes brjod/ /rang bzhin dang ni gzhan dngos dag /ma gtogs dngos po ga la yod/ /rang bzhin dang ni dngos po dag /yod na dngos po 'grub par 'gyur/ / gal te dngos po ma grub na/ /dngos med 'grub par mi 'gyur ro/ /dngos po gzhan du gyur pa ni/ /dngos med yin par skye bo smra/ /gang dag rang bzhin gzhan dngos dang / /dngos dang dngos med nyid lta ba/ /de dag sangs rgyas bstan pa la/ /de nyid mthong ba ma yin no//bcom ldan dngos dang dngos med pa/ /mkhyen pas ka ta ya na yi/ /gdams ngag las ni yod pa dang / /med pa gnyis ka'ang dgag pa mdzad / /gal te rang bzhin gyis yod na/ /de ni med nyid mi 'gyur ro/ /rang bzhin gzhan du 'gyur ba ni//nam yang 'thad par mi 'gyur ro/ /rang bzhin yod pa ma yin na/ /gzhan du 'gyur pa gang gi yin/ /rang bzhin yod pa yin na yang / /gzhan du 'gyur ba ji ltar rung / /yod ces bya ba rtag par 'dzin/ /med ces bya ba chad par lta/ /de phyir yod dang med pa la//mkhas pas gnas par mi bya'o/ /gang zhig rang bzhin gyis yod pa/ /de ni med pa min pas rtag /sngon byung da ltar med ces pa/ /des na chad par thal bar 'gyur/ /rang bzhin brtag pa zhes bya ba ste rab tu byed pa bco lnga pa'o// //gal te 'du byed 'khor zhe na//de dag rtag na mi 'khor te/ /mi rtag na yang 'khor mi 'gyur/ /sems can la yang rim 'di mtshungs/ /gal te gang zag 'khor zhe na/ /phung po skye mched khams rnams la/ /de ni rnam pa lngas btsal na/ /med na gang zhig 'khor bar 'gyur/ /nye bar len nas nyer len par//'khor na srid pa med par 'gyur/ /srid med nye bar len med na/ /de gang ci zhig 'khor bar 'gyur/ /'du byed mya ngan 'da' bar ni/ /ji lta bur yang mi 'thad do/ /sems can mya ngan 'da' bar yang / /ji lta bur yang 'thad mi 'gyur/ /skye 'jig chos can 'du byed rnams//mi 'ching grol bar mi 'gyur te/ /snga ma bzhin du sems can yang / /mi 'ching grol bar mi 'gyur ro/ /gal te nye bar len 'ching na/ /nye bar len bcas 'ching mi 'gyur/ /nye bar len med mi 'ching ste/ /gnas skabs gang zhig 'ching bar 'gyur/ / gal te bcing bya'i snga rol na/ /'ching ba yod na 'ching la rag/ /de yang med de lhag ma ni/ /song dang ma song bgom pas bstan/ /re zhig bcings pa mi grol te/ /ma bcings pa yang grol mi 'gyur/ /bcings pa grol bzhin yin 'gyur na/ /bcings dang grol ba dus gcig 'gyur//bdag ni len med mya ngan 'da'/ /myang 'das bdag gir 'gyur ro zhes/ /de ltar gang dag 'dzin de yi/ /nyer len 'dzin pa chen po yin/ /gang la mya ngan 'das bskyed med/ /'khor ba bsal ba'ang yod min pa/ /de la 'khor ba ci zhig yin/ /mya ngan 'das pa'ang ci zhig brtag /bcings pa dang thar pa brtag pa zhes bya ba ste rab tu byed pa bcu drug pa'o/ /bdag nyid legs par sdom pa dang / /gzhan la phan 'dogs byams sems gang / /de chos de ni 'di gzhan du/ /'bras bu dag gi sa bon yin/ /drang srong mchog gis las rnams ni//sems pa dang ni bsam par gsungs/ /las de bdag gi bye brag ni/ /rnam pa du mar yongs su bsgrags/ /de la las gang sems pa zhes/ /gsungs pa de ni yid kyir 'dod/ /bsams pa zhes ni gang gsungs pa/ /de ni lus dang ngag gir yin/ / ngag dang bskyod dang mi spong ba'i/ /rnam rig byed min zhes bya gang / /spong ba'i rnam rig byed min pa/ /gzhan dag kyang ni de bzhin 'dod / /longs spyod las byung bsod nams dang / /bsod nams ma yin tshul de bzhin/ /sems pa dang ni chos de bdun/ /las su mngon par 'dod pa yin//gal te smin pa'i dus bar du/ /gnas na las de rtag par 'gyur/ /gal te 'gags na 'gags gyur pa/ /ji ltar 'bras bu skyed par 'gyur/ /myu gu la sogs rgyun gang ni/ /sa bon las ni mngon par 'byung / /de las 'bras bu sa bon ni/ / med na de yang 'byung mi 'gyur/ /gang phyir sa bon las rgyun dang / /rgyun las 'bras bu 'byung 'gyur zhing / /sa bon 'bras bu'i sngon 'gro ba/ /de phyir chad min rtag ma yin/ /sems kyi rgyun ni gang yin pa/ /sems las mngon par 'byung bar 'gyur/ /de las 'bras bu sems lta zhig /med na de yang 'byung mi 'gyur/ /gang phyir sems las rgyun dang ni/ /rgyun las 'bras bu 'byung 'gyur zhing / /las ni 'bras bu'i sngon 'gro ba/ /de phyir chad min rtag ma yin/ /dkar po'i las kyi lam bcu po/ /chos sgrub pa yi thabs yin te/ / chos kyi 'bras bu 'di gzhan du/ /'dod pa'i yon tan rnam lnga'o/ /gal te brtag pa der 'gyur na/ /nyes pa chen po mang por 'gyur/ /de lta bas na brtag pa de/ /'dir ni 'thad pa ma yin no/ /sangs rgyas rnams dang rang rgyal dang / /nyan thos rnams kyis gang gsungs pa'i//brtag pa gang zhig 'dir 'thad pa/ /de ni rab tu brjod par bya/ /ji ltar dbang rgya de bzhin chung / /mi za las ni bu lon bzhin/ /de ni khams las rnam pa bzhi/ /de yang rang bzhin lung ma bstan/ /spong bas spang ba ma yin te/ / bsgom pas spang ba nyid kyang yin/ /de phyir chud mi za ba yis/ /las kyi 'bras bu skyed par 'gyur/ /gal te spong bas spang ba dang / /las 'pho ba yis 'jig 'gyur na/ /de la las 'jig la sogs pa'i/ /skyon rnams su ni thal bar 'gyur/ /khams mtshungs las ni cha mtshungs dang //cha mi mtshungs pa thams cad kyi/ /de ni nying mtshams sbyor ba'i tshe/ /gcig po kho na skye bar 'gyur/ /mthong ba'i chos la rnam gnyis po/ /kun gyi las dang las kyi de/ /tha dad par ni skye 'gyur zhing / /rnam par smin kyang gnas pa yin//de ni 'bras bu 'pho ba dang / /shi bar gyur na 'gag par 'gyur/ /de yi rnam dbye zag med dang / /zag dang bcas par shes par bya/ /stong pa nyid dang tshad med dang / /'khor ba dang ni rtag pa min/ /las rnams chud mi za ba'i chos/ /sangs rgyas kyis ni bstan pa yin//gang phyir las ni skye ba med/ /'di ltar rang bzhin med de'i phyir/ /gang phyir de ni ma skyes pa/ /de phyir chud zar mi 'gyur ro/ /gal te las la rang bzhin yod/ /rtag par 'gyur bar the tshom med/ /las ni byas pa ma yin 'gyur/ /rtag la bya ba med phyir ro//ci ste las ni ma byas na/ /ma byas pa dang phrad 'jigs 'gyur/ /tshangs spyod gnas pa ma yin pa'ang / /de la skyon du thal bar 'gyur/ /tha snyad thams cad nyid dang yang / /'gal bar 'gyur bar the tshom med/ /bsod nams dang ni sdig byed pa'i/ / rnam par dbye ba'ang 'thad mi 'gyur/ /de ni rnam smin smin gyur pa/ /yang dang yang du rnam smin 'gyur/ /gal te rang bzhin yod na ni/ /gang phyir las gnas de yi phyir/ /las 'di nyon mongs bdag nyid la/ /nyon mongs de dag yang dag min/ /gal te nyon mongs yang dag min//las ni yang dag ji ltar yin/ /las dang nyon mongs pa dag ni/ /lus rnams kyi ni rkyen du bstan/ /gal te las dang nyon mongs pa/ /de stong lus la ji ltar brjod/ /ma rig bsgribs pa'i skye bo gang / /sred ldan de mi za ba po/ /de yang byed las gzhan min zhing //de nyid de yang ma yin no/ /gang gi phyir na las 'di ni/ /rkyen las byung ba ma yin zhing / /rkyen min las byung yod min pa/ /de phyir byed pa po yang med/ /gal te las dang byed med na/ /las skyes 'bras bu ga la yod/ /ci ste 'bras bu yod min na//za ba po lta ga la yod/ /ji ltar ston pas sprul pa ni/ /rdzu 'phrul phun tshogs kyis sprul zhing / /sprul pa de yang sprul pa na / /slar yang gzhan ni sprul pa ltar/ /de bzhin byed po de las gang / /byas pa'ang sprul pa'i rnam pa bzhin/ /dper na sprul pas sprul gzhan zhig /sprul pa mdzad pa de bzhin no/ /nyon mongs las dang lus rnams dang / /byed pa po dang 'bras bu dag /dri za'i grong khyer lta bu dang / /smig rgyu rmi lam 'dra ba yin/ /las brtag pa zhes bya ba ste rab tu byed pa bcu bdun pa'o// // gal te phung po bdag yin na/ /skye dang 'jig pa can du 'gyur/ /gal te phung po rnams las gzhan/ /phung po'i mtshan nyid med par 'gyur/ /bdag nyid yod pa ma yin na/ /bdag gi yod par ga la 'gyur/ /bdag dang bdag gi zhi ba'i phyir/ /ngar 'dzin nga yir 'dzin med 'gyur//ngar 'dzin nga yir 'dzin med gang / /de yang yod pa ma yin te/ /ngar 'dzin nga yir 'dzin med par/ /gang gis mthong bas mi mthong ngo / /nang dang phyi rol nyid dag la/ /bdag dang bdag gi snyam zad na/ /nye bar len pa 'gag 'gyur zhing / /de zad pas na skye ba zad//las dang nyon mongs zad pas thar/ /las dang nyon mongs rnam rtog las/ /de dag spros las spros pa ni/ /stong pa nyid kyis 'gag par 'gyur/ /bdag go zhes kyang btags gyur cing / /bdag med ces kyang bstan par gyur//sangs rgyas rnams kyis bdag dang ni/ /bdag med 'ga' med ces kyang bstan/ /brjod par bya ba ldog pa ste/ /sems kyi spyod yul ldog pas so/ /ma skyes pa dang ma 'gags pa/ /chos nyid mya ngan 'das dang mtshungs/ /thams cad yang dag yang dag min//yang dag yang dag ma yin nyid/ /yang dag min min yang dag min/ /de ni sangs rgyas rjes bstan pa'o/ /gzhan las shes min zhi ba dang / /spros pa rnams kyis ma spos pa/ /rnam rtog med don tha dad med / /de ni de nyid mtshan nyid do//gang la brten te gang 'byung ba/ /de ni re zhig de nyid min/ /de las gzhan pa'ang ma yin phyir / /de phyir chad min rtag ma yin/ /sangs rgyas 'jig rten mgon rnams kyi/ /bstan pa bdud rtsir gyur pa de / /don gcig ma yin tha dad min/ / chad pa ma yin rtag ma yin/ /rdzogs sangs rgyas rnams ma byung zhing / /nyan thos rnams ni zad gyur kyang / /rang sangs rgyas kyi ye shes ni/ /ston pa med las rab tu skye/ /bdag dang chos brtag pa zhes bya ba ste rab tu byed pa bcwa brgyad pa'o// //da ltar byung dang ma 'ongs pa//gal te 'das la ltos gyur na/ /da ltar byung dang ma 'ongs pa/ /'das pa'i dus na yod par 'gyur/ /da ltar byung dang ma 'ongs pa/ /gal te de na med gyur na/ /da ltar byung dang ma 'ongs pa/ /ji ltar de la ltos par 'gyur/ /'das pa la ni ma ltos par//de gnyis grub pa yod ma yin/ /de phyir da ltar byung ba dang / /ma 'ongs dus kyang yod ma yin/ /rim pa'i tshul ni 'di nyid kyis/ /lhag ma gnyis po bsnor ba dang / /mchog dang tha ma 'bring la sogs/ /gcig la sogs pa'ang shes par bya//mi gnas dus ni 'dzin mi byed/ /gang zhig gzung bar bya ba'i dus/ /gnas pa yod pa ma yin pas/ /ma bzung dus ni ji ltar gdags/ /gal te dus ni dngos brten te/ /dngos med dus ni ga la yod/ /dngos po 'ga' yang yod min na/ /dus lta yod par ga la 'gyur//dus brtag pa zhes bya ba ste rab tu byed pa bcu dgu pa'o// //gal te rgyu dang rkyen rnams kyi/ /tshogs pa nyid las skye 'gyur zhing / /tshogs la 'bras bu yod na ni/ /ji ltar tshogs pa nyid las skye/ /gal te rgyu dang rkyen rnams kyi/ /tshogs pa nyid las skye 'gyur zhing //tshogs la 'bras bu med na ni/ /ji ltar tshogs pa nyid las skye/ /gal te rgyu dang rkyen rnams kyi/ /tshogs la 'bras bu yod na ni/ /tshogs la gzung du yod rigs na/ /tshogs pa nyid la gzung du med/ /gal te rgyu dang rkyen rnams kyi/ /tshogs la 'bras bu med na ni//rgyu rnams dang ni rkyen dag kyang / /rgyu rkyen ma yin mtshungs par 'gyur/ /gal te rgyus ni 'bras bu la/ /rgyu byin nas ni 'gag 'gyur na/ /gang byin pa dang gang 'gags pa'i/ /rgyu yi bdag nyid gnyis su 'gyur/ /gal te rgyus ni 'bras bu la/ / rgyu ma byin par 'gag 'gyur na/ /rgyu 'gags nas ni skyes pa yi/ /'bras bu de dag rgyu med 'gyur/ /gal te tshogs dang lhan cig tu/ /'bras bu yang ni skye 'gyur na/ /skyed par byed dang bskyed bya gang / /dus gcig par ni thal bar 'gyur/ /gal te tshogs pa'i snga rol du//'bras bu skyes par gyur na ni/ /rgyu dang rkyen rnams med pa yi/ /'bras bu rgyu med 'byung bar 'gyur/ /gal te rgyu 'gags 'bras bu na/ /rgyu ni kun tu 'pho bar 'gyur/ /sngon skyes pa yi rgyu yang ni/ /yang skye bar ni thal bar 'gyur/ /'gags pa nub par gyur pa yis/ / 'bras bu skyes pa ji ltar skyed / /'bras bu dang ni 'brel ba'i rgyu/ /gnas pas kyang ni ji ltar skyed/ /ci ste rgyu 'bras ma 'brel na/ /'bras bu gang zhig skyed par byed/ /rgyus ni mthong dang ma mthong bar/ /'bras bu skyed par mi byed do/ /'bras bu 'das pa rgyu 'das dang / /ma skyes pa dang skyes pa dang //lhan cig phrad par 'gyur pa ni/ /nam yang yod pa ma yin no/ /'bras bu skyes pa rgyu ma skyes/ /'das pa dang ni skyes pa dang / /lhan cig phrad par 'gyur ba ni/ /nam yang yod pa ma yin no/ /'bras bu ma skyes rgyu skyes dang / /ma skyes pa dang 'das pa dang / / lhan cig phrad par 'gyur ba ni/ /nam yang yod pa ma yin no/ /phrad pa yod pa ma yin na/ /rgyus ni 'bras bu ji ltar skyed / /phrad pa yod pa yin na yang / /rgyus ni 'bras bu ji ltar skyed / /gal te 'bras bus stong pa'i rgyus/ /ji ltar 'bras bu skyed par byed/ /gal te 'bras bus mi stong rgyus//ji ltar 'bras bu skyed par byed/ /'bras bu mi stong skye mi 'gyur/ /mi stong 'gag par mi 'gyur ro/ /mi stong de ni ma 'gags dang / /ma skyes par yang 'gyur pa yin/ /stong pa ji ltar skye 'gyur zhing / /stong pa ji ltar 'gag par 'gyur/ /stong pa de yang ma 'gags dang / /ma skyes par yang thal bar 'gyur//rgyu dang 'bras bu gcig nyid du/ /nam yang 'thad par mi 'gyur ro/ /rgyu dang 'bras bu gzhan nyid du/ /nam yang 'thad par mi 'gyur ro/ /rgyu dang 'bras bu gcig nyid na/ /bskyed bya skyed byed gcig tu 'gyur/ /rgyu dang 'bras bu gzhan nyid na/ /rgyu dang rgyu min mtshungs par 'gyur//'bras bu ngo bo nyid yod na/ /rgyus ni ci zhig skyed par byed / /'bras bu ngo bo nyid med na/ /rgyus ni ci zhig skyed par byed/ /skyed par byed pa ma yin na/ /rgyu nyid 'thad par mi 'gyur ro/ /rgyu nyid 'thad pa yod min na/ /'bras bu gang gi yin par 'gyur/ /rgyu rnams dang ni rkyen dag gi//tshogs pa gang yin de yin ni/ /bdag gis bdag nyid mi skyed na/ /'bras bu ji ltar skyed par byed/ /de phyir tshogs pas byas pa med/ /tshogs min byas pa'i 'bras bu med/ /'bras bu yod pa ma yin na/ /rkyen gyi tshogs pa ga la yod/ /tshogs pa brtag pa zhes bya ba ste rab tu byed pa nyi shu pa'o// //'jig pa 'byung ba med par ram/ /lhan cig yod pa nyid ma yin/ /'byung ba 'jig pa med par ram/ /lhan cig yod pa nyid ma yin/ /'jig pa 'byung ba med par ni/ /ji lta bur na yod par 'gyur/ /skye ba med par 'chi bar 'gyur/ /'jig pa 'byung ba med par med//'jig pa 'byung dang lhan cig tu/ /ji ltar yod pa nyid du 'gyur/ /'chi ba skye dang dus gcig tu/ /yod pa nyid ni ma yin no/ /'byung ba 'jig pa med par ni/ /ji lta bur na yod par 'gyur/ /dngos po rnams la mi rtag nyid/ /nam yang med pa ma yin no//'byung ba 'jig dang lhan cig tu/ /ji ltar yod pa nyid du 'gyur/ /skye ba 'chi dang dus gcig tu/ /yod pa nyid ni ma yin no/ /gang dag phan tshun lhan cig gam/ /phan tshun lhan cig ma yin par/ /grub pa yod pa ma yin pa/ /de dag grub pa ji ltar yod/ /zad la 'byung ba yod ma yin//ma zad pa la'ang 'byung ba med/ /zad la 'jig pa yod ma yin/ /ma zad pa la'ang 'jig pa med/ /dngos po yod pa ma yin par/ /'byung dang 'jig pa yod ma yin/ /'byung dang 'jig pa med par ni/ /dngos po yod pa ma yin no/ /stong la 'byung dang 'jig pa dag /'thad pa nyid ni ma yin no/ /mi stong pa la'ang 'byung 'jig dag /'thad pa nyid ni ma yin no/ /'byung ba dang ni 'jig pa dag /gcig pa nyid du mi 'thad do/ /'byung ba dang ni 'jig pa dag /gzhan nyid du yang mi 'thad do/ /'byung ba dang ni 'jig pa dag /mthong ngo snyam du khyod sems na//'byung ba dang ni 'jig pa dag /gti mug nyid kyis mthong ba yin/ /dngos po dngos las mi skye ste/ /dngos po dngos med las mi skye/ /dngos med dngos med mi skye ste/ /dngos med dngos las mi skye'o/ /dngos po bdag las mi skye ste/ /gzhan las skye ba nyid ma yin//bdag dang gzhan las skye ba ni/ /yod min ji ltar skye bar 'gyur/ /dngos po yod par khas blangs na / /rtag dang chad par lta bar ni/ /thal bar 'gyur te dngos de ni/ /rtag dang mi rtag 'gyur phyir ro/ /dngos po yod par khas blangs kyang / /chad par mi 'gyur rtag mi 'gyur//'bras bu rgyu yi 'byung 'jig gi /rgyun de srid pa yin phyir ro/ /'bras bu rgyu yi 'byung 'jig gi /rgyun de srid pa yin 'gyur na/ /'jig la yang skye med pa'i phyir/ /rgyu ni chad par thal bar 'gyur/ /dngos po ngo bo nyid yod na/ /dngos med 'gyur bar mi rigs so/ / mya ngan 'das pa'i dus na chad/ /srid rgyun rab tu zhi phyir ro/ /tha ma 'gags par gyur pa na/ /srid pa dang po rigs mi 'gyur/ /tha ma 'gags par ma gyur tshe/ /srid pa dang po rigs mi 'gyur/ /gal te tha ma 'gag bzhin na/ /dang po skye bar 'gyur na ni//'gag bzhin pa ni gcig 'gyur zhing / /skye bzhin pa yang gzhan du 'gyur/ /gal te 'gag bzhin skye bzhin dag /lhan cig tu yang rigs min na/ /phung po gang la 'chi 'gyur ba/ /de la skye ba 'byung 'gyur ram/ /de ltar dus gsum dag tu yang //srid pa'i rgyun ni mi rigs na/ /dus gsum dag tu gang med pa/ /de ni ji ltar srid pa'i rgyun/ /'byung ba dang 'jig pa brtag pa zhes bya ba ste rab tu byed pa nyi shu gcig pa'o// //phung min phung po las gzhan min/ /de la phung med de der med/ /de bzhin gshegs pa phung ldan min//de bzhin gshegs pa gang zhig yin/ /gal te sangs rgyas phung po la/ /brten nas rang bzhin las yod min/ /rang bzhin las ni gang med pa/ /de gzhan dngos las ga la yod/ /gang zhig gzhan gyi dngos brten nas/ /de bdag nyid du mi 'thad do//gang zhig bdag nyid med pa de/ /ji ltar de bzhin gshegs par 'gyur/ /gal te rang bzhin yod min na/ /gzhan dngos yod par ji ltar 'gyur/ /rang bzhin dang ni gzhan dngos dag /ma gtogs de bzhin gshegs de gang / /gal te phung po ma brten par/ / de bzhin gshegs pa 'ga' yod na/ /de ni da gdod rten 'gyur zhing / /brten nas de nas 'gyur la rag /phung po rnams la ma brten par/ /de bzhin gshegs pa 'ga' yang med/ /gang zhig ma brten yod min na / /des ni ji ltar nyer len 'gyur/ /nye bar blangs pa ma yin pa//nye bar len par cis mi 'gyur/ /nye bar len pa med pa yi / /de bzhin gshegs pa ci yang med/ /rnam pa lngas ni btsal byas na/ /gang zhig de nyid gzhan nyid du/ /med pa'i de bzhin gshegs pa de/ /nye bar len pas ji ltar gdags/ /gang zhig nye bar blang ba de/ /de ni rang bzhin las yod min//bdag gi dngos las gang med pa/ /de gzhan dngos las yod re skan/ /de ltar nyer blang nyer len po/ /rnam pa kun gyis stong pa yin/ /stong pas de bzhin gshegs stong pa / /ji lta bur na 'dogs par 'gyur/ /stong ngo zhes kyang mi brjod de/ /mi stong zhes kyang mi bya zhing //gnyis dang gnyis min mi bya ste/ /gdags pa'i don du brjod par bya/ /rtag dang mi rtag la sogs bzhi/ /zhi ba 'di la ga la yod/ /mtha' dang mtha' med la sogs bzhi/ /zhi ba 'di la ga la yod/ /gang gis de bzhin gshegs yod ces/ / 'dzin pa stug po bzung gyur pa/ /de ni mya ngan 'das pa la/ /med ces rnam rtog rtog par byed/ /rang bzhin gyis ni stong de la/ /sangs rgyas mya ngan 'das nas ni/ /yod do zhe'am med do zhes/ /bsam pa 'thad pa nyid mi 'gyur/ /gang dag sangs rgyas spros 'das shing / /zad pa med la spros byed pa//spros pas nyams pa de kun gyis/ /de bzhin gshegs pa mthong mi 'gyur/ /de bzhin gshegs pa'i rang bzhin gang / /de ni 'gro 'di'i rang bzhin yin/ /de bzhin gshegs pa rang bzhin med/ /'gro ba 'di yi rang bzhin med/ /de bzhin gshegs pa brtag pa zhes bya ba ste rab tu byed pa nyi shu gnyis pa'o// //'dod chags zhe sdang gti mug rnams/ /kun tu rtog las 'byung bar gsungs/ /sdug dang mi sdug phyin ci log /brten pa nyid las kun tu 'byung / /gang dag sdug dang mi sdug dang / /phyin ci log las brten 'byung ba/ / de dag rang bzhin las med de/ /de phyir nyon mongs yang dag med/ /bdag gi yod nyid med nyid ni/ /ji lta bur yang grub pa med/ /de med nyon mongs rnams kyi ni/ /yod nyid med nyid ji ltar 'grub/ /nyon mongs de dag gang gi yin/ /de yang grub pa yod ma yin/ /'ga' med par ni gang gi yang //nyon mongs pa dag yod ma yin/ /rang lus lta bzhin nyon mongs rnams/ /nyon mongs can la rnam lngar med/ /rang lus lta bzhin nyon mongs can/ /nyon mongs pa la rnam lngar med/ /sdug dang mi sdug phyin ci log /rang bzhin las ni yod min na/ / sdug dang mi sdug phyin ci log /brten nas nyon mongs gang dag yin/ /gzugs sgra ro dang reg pa dang / /dri dang chos dag rnam drug ni/ /gzhi ste 'dod chags zhe sdang dang / /gti mug gi ni yin par brtags/ /gzugs sgra ro dang reg pa dang / /dri dang chos dag 'ba' zhig ste//dri za'i grong khyer lta bu dang / /smig rgyu rmi lam 'dra ba yin/ /sgyu ma'i skyes bu lta bu dang / /gzugs brnyan 'dra ba de dag la/ /sdug pa dang ni mi sdug pa/ /'byung bar yang ni ga la 'gyur/ /gang la brten nas sdug pa zhes/ /gdags par bya ba mi sdug pa/ /sdug la mi ltos yod min pas//de phyir sdug pa 'thad ma yin/ /gang la brten nas mi sdug par/ /gdags par bya ba sdug pa ni/ /mi sdug mi ltos yod min pas/ /de phyir mi sdug 'thad ma yin/ /sdug pa yod pa ma yin na/ /'dod chags yod par ga la 'gyur/ /mi sdug yod pa ma yin na//zhe sdang yod par ga la 'gyur/ /gal te mi rtag rtag pa zhes/ /de ltar 'dzin pa log yin na/ /stong la mi rtag yod min pas/ /'dzin pa ji ltar log pa yin/ /gal te mi rtag rtag go zhes/ /de ltar 'dzin pa log yin na/ /stong la mi rtag pa'o zhes//'dzin pa'ang ji ltar log ma yin/ /gang gis 'dzin dang 'dzin gang dang / /'dzin pa po dang gang gzung ba/ /thams cad nye bar zhi ba ste/ /de phyir 'dzin pa yod ma yin/ /log pa'am yang dag nyid du ni/ /'dzin pa yod pa ma yin na/ /gang la phyin ci log yod cing / / gang la phyin ci ma log yod/ /phyin ci log tu gyur pa la/ /phyin ci log dag mi srid de / /phyin ci log tu ma gyur la/ /phyin ci log dag mi srid de / /phyin ci log tu gyur bzhin la / /phyin ci log dag mi srid de / /gang la phyin ci log srid pa/ /bdag nyid kyis ni rnam par dpyod//phyin ci log rnams ma skyes na/ /ji lta bur na yod par 'gyur/ /phyin ci log rnams skye med na/ /phyin ci log can ga la yod/ /dngos po bdag las mi skye ste / /gzhan las skye ba nyid ma yin/ /bdag dang gzhan las kyang min na/ /phyin ci log can ga la yod//gal te bdag dang gtsang ba dang / /rtag dang bde ba yod na ni/ /bdag dang gtsang dang rtag pa dang / /bde ba phyin ci log ma yin/ /gal te bdag dang gtsang ba dang / /rtag dang bde ba med na ni/ /bdag med mi gtsang mi rtag dang / /sdug bsngal yod pa ma yin no//de ltar phyin ci log 'gags pas/ /ma rig pa ni 'gag par 'gyur/ /ma rig 'gags par gyur na ni/ /'du byed la sogs 'gag par 'gyur/ /gal te la la'i nyon mongs pa/ / gang dag rang bzhin gyis yod na/ /ji lta bur na spong bar 'gyur//yod pa su zhig spong bar byed/ /gal te la la'i nyon mongs pa/ /gang dag rang bzhin gyis med na/ /ji lta bur na spong bar 'gyur/ /med pa su zhig spong bar byed/ /phyin ci log brtag pa zhes bya ba ste rab tu byed pa nyi shu gsum pa'o// // gal te 'di dag kun stong na/ /'byung ba med cing 'jig pa med/ /'phags pa'i bden pa bzhi po rnams/ /khyod la med par thal bar 'gyur/ /'phags pa'i bden pa bzhi med pas/ /yangs su shes dang spong ba dang / /sgom dang mngon du bya ba dag /'thad par 'gyur pa ma yin no//de dag yod pa ma yin pas/ /'bras bu bzhi yang yod ma yin/ /'bras bu med na 'bras gnas med/ /zhugs pa dag kyang yod ma yin/ /gal te skyes bu gang zag brgyad/ /de dag med na dge 'dun med/ /'phags pa'i bden rnams med pa'i phyir//dam pa'i chos kyang yod ma yin/ /chos dang dge 'dun yod min na/ /sangs rgyas ji ltar yod par 'gyur/ /de skad stong pa nyid smra na/ /dkon mchog gsum la gnod pa ni/ /byed cing 'bras bu yod pa dang / /chos ma yin pa chos nyid dang //'jig rten pa yi tha snyad ni/ /kun la'ang gnod pa byed pa yin/ /de la bshad pa khyod kyis ni/ /stong nyid dgos dang stong nyid dang / /stong nyid don ni ma rtogs pas/ /de phyir de ltar gnod pa yin/ /sangs rgyas rnams kyis chos bstan pa/ / bden pa gnyis la yang dag brten/ /'jig rten kun rdzob bden pa dang / /dam pa'i don gyi bden pa'o/ /gang dag bden pa de gnyis kyi / /rnam dbye rnam par mi shes pa/ /de dag sangs rgyas bstan pa ni/ /zab mo'i de nyid rnam mi shes/ / tha snyad la ni ma brten par/ /dam pa'i don ni bstan mi nus/ /dam pa'i don ni ma rtogs par/ /mya ngan 'das pa thob mi 'gyur/ /stong pa nyid la blta nyes na/ /shes rab chung rnams phung bar 'gyur / /ji ltar sprul la gzung nyes dang / /rig sngags nyes par bsgrubs pa bzhin//de phyir zhan pas chos 'di yi/ /gting rtogs dka' bar mkhyen gyur nas/ /thub pa'i thugs ni chos bstan las/ /rab tu log par gyur pa yin/ /skyon du thal bar 'gyur ba ni/ /stong la 'thad pa ma yin pas/ / khyod ni stong nyid spong byed pa / /gang de nga la mi 'thad do/ /gang la stong pa nyid rung ba/ /de la thams cad rung bar 'gyur/ /gang la stong nyid mi rung ba/ /de la thams cad rung mi 'gyur/ /khyod ni rang gi skyon rnams ni/ /nga la yongs su sgyur byed pa/ /rta la mngon par zhon bzhin du//rta nyid brjed par gyur pa bzhin/ /gal te dngos rnams rang bzhin las/ /yod par rjes su lta byed na/ /de lta yin na dngos po rnams/ /rgyu rkyen med par khyod lta'o / /'bras bu dang ni rgyu nyid dang / /byed pa po dang byed dang bya//skye ba dang ni 'gag pa dang / /'bras bu la yang gnod pa byed/ /rten cing 'brel bar 'byung ba gang / /de ni stong pa nyid du bshad/ /de ni brten nas gdags pa ste/ /de nyid dbu ma'i lam yin no/ /gang phyir rten 'byung ma yin pa'i/ /chos 'ga' yod pa ma yin pa//de phyir stong pa ma yin pa'i/ /chos 'ga' yod pa ma yin no/ /gal te 'di kun mi stong na/ /'byung ba med cing 'jig pa med/ /'phags pa'i bden pa bzhi po rnams/ /khyod la med par thal bar 'gyur/ /rten cing 'brel 'byung ma yin na/ / sdug bsngal yod par ga la 'gyur/ /mi rtag sdug bsngal gsungs pa de/ /rang bzhin nyid la yod ma yin/ /rang bzhin las ni yod yin na/ /ci zhig kun tu 'byung bar 'gyur/ /de phyir stong nyid gnod byed la/ /kun 'byung yod pa ma yin no/ /sdug bsngal rang bzhin gyis yod na //'gog pa yod pa ma yin no/ /rang bzhin gyis ni yongs gnas phyir/ /'gog la gnod pa byed pa yin/ /lam la rang bzhin yod na ni/ /sgom pa 'thad par mi 'gyur ro/ /ci ste lam de bsgom bya na/ /khyod kyi rang bzhin yod ma yin//gang tshe sdug bsngal kun 'byung dang / /'gog pa yod pa ma yin na/ /lam gyi sdug bsngal 'gog pa ni/ /gang zhig thob par 'gyur par 'dod/ /gal te rang bzhin nyid kyis ni/ /yongs su shes pa ma yin na/ /de ni ji ltar yongs shes 'gyur/ / rang bzhin gnas pa ma yin nam/ /de bzhin du ni khyod nyid kyi / /spang dang mngon du bya ba dang / /bsgom dang 'bras bu bzhi dag kyang / /yongs shes bzhin du mi rung ngo / /rang bzhin yongs su 'dzin pa yis/ /'bras bu rang bzhin nyid kyis ni/ /thob pa min pa gang yin de //ji ltar 'thob par nus par 'gyur/ /'bras bu med na 'bras gnas med/ /zhugs pa dag kyang yod ma yin/ /gal te skyes bu gang zag brgyad/ /de dag med na dge 'dun med/ /'phags pa'i bden rnams med pa'i phyir/ /dam pa'i chos kyang yod ma yin//chos dang dge 'dun yod min na/ /sangs rgyas ji ltar yod par 'gyur/ /khyod kyis sangs rgyas byang chub la/ /ma brten par yang thal bar 'gyur/ /khyod kyis byang chub sangs rgyas la/ /ma brten par yang thal bar 'gyur/ /khyod kyi rang bzhin nyid kyis ni//sangs rgyas min pa gang yin des/ /byang chub spyod la byang chub phyir/ /brtsal kyang byang chub thob mi 'gyur/ /'ga' yang chos dang chos min pa/ /nam yang byed par mi 'gyur te / /mi stong pa la ci zhig bya/ /rang bzhin la ni bya ba med//chos dang chos min med par yang / /'bras bu khyod la yod par 'gyur/ /chos dang chos min rgyus byung ba'i/ /'bras bu khyod la yod ma yin/ /chos dang chos min rgyus byung ba'i/ /'bras bu gal te khyod la yod//chos dang chos min las byung ba'i/ /'bras bu ci phyir stong ma yin/ /rten cing 'brel bar 'byung ba yi/ /stong pa nyid la gnod byed gang / /'jig rten pa yi tha snyad ni/ /kun la gnod pa byed pa yin/ /stong pa nyid la gnod byed na//bya ba ci yang med 'gyur zhing / /rtsom pa med pa bya bar 'gyur/ /mi byed pa yang byed por 'gyur/ /rang bzhin yod na 'gro ba rnams/ /ma skyes pa dang ma 'gags dang / /ther zug tu ni gnas 'gyur zhing / /gnas skabs sna tshogs bral bar 'gyur//gal te stong pa yod min na/ /ma thob thob par bya ba dang / /sdug bsngal mthar byed las dang ni/ /nyon mongs thams cad spong ba'ang med/ /gang gis rten cing 'brel par 'byung / /mthong ba de ni sdug bsngal dang //kun 'byung dang ni 'gog pa dang / /lam nyid de dag mthong ba yin/ /'phags pa'i bden pa brtag pa zhes bya ba ste rab tu byed pa nyi shu bzhi pa'o// //gal te 'di dag kun stong na/ /'byung ba med cing 'jig pa med/ /gang zhig spong dang 'gags pa las//mya ngan 'da' bar 'gyur bar 'dod/ /gal te 'di kun mi stong na/ /'byung ba med cing 'jig pa med/ /gang zhig spong dang 'gags pa las/ /mya ngan 'da' bar 'gyur bar 'dod/ /spangs pa med pa thob med pa/ / chad pa med pa rtag med pa/ /'gag pa med pa skye med pa/ /de ni mya ngan 'das par brjod / /re zhig mya ngan 'das dngos min/ /rga shi'i mtshan nyid thal bar 'gyur/ /rga dang 'chi ba med pa yi/ /dngos po yod pa ma yin no/ /gal te mya ngan 'das dngos na//mya ngan 'das pa 'dus byas 'gyur/ /dngos po 'dus byas ma yin pa/ /'ga' yang gang na yod ma yin/ /gal te mya ngan 'das dngos na/ /ji ltar myang 'das de brten min/ /dngos po brten nas ma yin pa/ /'ga' yang yod pa ma yin no//gal te mya ngan 'das dngos min/ /dngos med ji ltar rung bar 'gyur/ /gang la mya ngan 'das dngos min/ /de la dngos med yod ma yin/ /gal te mya ngan 'das dngos min/ /ji ltar myang 'das de brten min/ / gang zhig brten nas ma yin pa'i/ /dngos med yod pa ma yin no/ /'ong ba dang ni 'gro ba'i dngos/ /brten tam rgyur byas gang yin pa/ /de ni brten min rgyur byas min/ /mya ngan 'das pa yin par bstan/ /'byung ba dang ni 'jig pa dag / spang bar ston pas bka' stsal to/ /de phyir mya ngan 'das par ni/ /dngos min dngos med min par rigs/ /gal te mya ngan 'das pa ni/ /dngos dang dngos med gnyis yin na/ /dngos dang dngos po med pa dag /thal bar 'gyur na de mi rigs/ / gal te mya ngan 'das pa ni/ /dngos dang dngos med gnyis yin na/ /mya ngan 'das pa ma brten min/ /de gnyis brten nas yin phyir ro/ /ji ltar mya ngan 'das pa ni/ /dngos dang dngos med gnyis yin te/ /mya ngan 'das pa 'dus ma byas/ / dngos dang dngos med 'dus byas yin/ /ji ltar mya ngan 'das pa la / /dngos dang dngos med gnyis yod de/ /de gnyis gcig la yod min te/ /snang ba dang ni mun pa bzhin/ /dngos min dngos po med min pa/ /mya ngan 'das par gang ston pa/ / dngos po med dang dngos po dag /grub na de ni grub par 'gyur/ /gal te mya ngan 'das pa ni/ /dngos min dngos po med min na/ /dngos min dngos po med min zhes/ /gang zhig gis ni de mngon byed/ /bcom ldan mya ngan 'das gyur nas/ /yod par mi mngon de bzhin du//med do zhe'am gnyis ka dang / /gnyis min zhes kyang mi mngon no/ /bcom ldan bzhugs par gyur na yang / /yod par mi mngon de bzhin du/ /med do zhe'am gnyis ka dang / /gnyis min zhes kyang mi mngon no/ /'khor ba mya ngan 'das pa las//khyad par cung zad yod ma yin/ /mya ngan 'das pa 'khor ba las/ /khyad par cung zad yod ma yin/ /mya ngan 'das mtha' gang yin pa/ /de ni 'khor ba'i mtha' yin te/ /de gnyis khyad par cung zad ni/ /shin tu phra ba'ang yod ma yin/ /gang 'das phan chad mtha' sogs dang //rtag la sogs par lta ba dag /mya ngan 'das dang phyi mtha' dang / /sngon gyi mtha' la brten pa yin/ /dngos po thams cad stong pa la/ /mtha' yod ci zhig mtha' med ci/ /mtha' dang mtha' med ci zhig yin//mtha' dang mtha' med min pa ci/ /de nyid ci zhig gzhan ci yin / /rtag pa ci zhig mi rtag ci/ /rtag dang mi rtag gnyis ka ci/ /gnyis ka min pa ci zhig yin/ /dmigs pa thams cad nyer zhi zhing / /spros pa nyer zhi zhi ba ste//sangs rgyas kyis ni gang du yang / /su la'ang chos 'ga' ma bstan to/ /mya ngan las 'das pa brtag pa zhes bya ba ste rab tu byed pa nyi shu lnga pa'o// //ma rig bsgribs pas yang srid phyir/ /'du byed rnam pa gsum po dag/ mngon par 'du byed gang yin pa'i/ /las de dag gis 'gro bar 'gro/ /'du byed rkyen can rnam par shes/ /'gro ba rnams su 'jug par 'gyur/ /rnam par shes pa zhugs gyur na / /ming dang gzugs ni chags par 'gyur/ /ming dang gzugs ni chags gyur na//skye mched drug ni 'byung bar 'gyur/ /skye mched drug la brten nas ni/ /reg pa yang dag 'byung bar 'gyur/ /ming dang gzugs dang dran byed la/ /brten nas skye ba kho na ste/ /de ltar ming dang gzugs brten nas/ /rnam par shes pa skye bar 'gyur//mig dang gzugs dang rnam par shes/ /gsum po 'dus pa gang yin pa/ /de ni reg pa'o reg de las/ /tshor ba kun tu 'byung bar 'gyur/ /tshor ba'i rkyen gyis sred pa ste/ /tshor ba'i don du sred par 'gyur/ /sred par gyur na nye bar len//rnam pa bzhi po nyer len 'gyur/ /nyer len yod na len pa po'i/ /srid pa rab tu 'byung bar 'gyur/ /gal te nye bar len med na/ /grol bar 'gyur te srid mi 'gyur/ /srid pa de yang phung po lnga/ /srid pa las ni skye bar 'gyur //rga shi dang ni mya ngan dang / /smre sngags 'don bcas sdug bsngal dang / /yid mi bde dang 'khrug pa rnams/ de dag skye las rab tu 'byung / /de ltar sdug bsngal phung po ni/ /'ba' zhig pa 'di 'byung bar 'gyur/ /'khor ba'i rtsa ba 'du byed de//de phyir mkhas rnams 'du mi byed/ /de phyir mi mkhas byed po yin/ /mkhas min de nyid mthong phyir ro/ /ma rig 'gags par gyur na ni/ /'du byed rnams kyang 'byung mi 'gyur/ /ma rig 'gag par 'gyur ba ni/ /shes pas de nyid bsgoms pas so//de dang de ni 'gags gyur pas/ /de dang de ni mngon mi 'byung / /sdug bsngal phung po 'ba' zhig pa / /de ni de ltar yang dag 'gag /srid pa'i yan lag bcu gnyis brtag pa zhes bya ba ste rab tu byed pa nyi shu drug pa'o// //'das dus byung ma byung zhes dang / /'jig rten rtag pa la sogs par/ /lta ba gang yin de dag ni/ /mngon gyi mtha' la brten pa yin/ /ma 'ongs dus gzhan 'byung 'gyur dang / /mi 'byung 'jig rten mtha' sogs par/ /lta ba gang yin de dag ni//phyi ma'i mtha' la brten pa yin/ /'das pa'i dus na byung gyur zhes/ /bya ba de ni mi 'thad do/ /sngon tshe rnams su gang byung ba/ /de nyid 'di ni ma yin no/ /de nyid bdag tu 'gyur snyam na/ /nye bar len pa tha dad 'gyur/ /nye bar len pa ma gtogs par//khyod kyi bdag ni gang zhig yin/ /nye bar len pa ma gtogs pa'i/ /bdag yod ma yin byas pa'i tshe/ /nye bar len nyid bdag yin na/ /khyod kyi bdag ni med pa yin/ /nye bar len nyid bdag ma yin/ /de 'byung ba dang 'jig pa yin//nye bar blang ba ji lta bur / /nye bar len po yin par 'gyur/ /bdag ni nye bar len pa las/ /gzhan du 'thad pa nyid ma yin/ /gal te gzhan na len med par/ /gzung yod rigs na gzung du med/ /de ltar len las gzhan ma yin/ /de ni nyer len nyid kyang min//bdag ni nye bar len med min/ /med pa nyid du'ang de ma nges/ /'das pa'i dus na ma byung zhes/ /bya ba de yang mi 'thad do/ /sngon tshe rnams su gang byung ba/ /de las 'di gzhan ma yin no/ /gal te 'di ni gzhan gyur na/ /de med par yang 'byung bar 'gyur/ / de bzhin de ni gnas 'gyur zhing / /der ma shi bar skye bar 'gyur/ /chad dang las rnams chud za dang / /gzhan gyis byas pa'i las rnams ni/ /gzhan gyis so sor myong ba dang / /de la sogs par thal bar 'gyur/ /ma byung ba las 'byung min te/ /'di la skyon du thal bar 'gyur//bdag ni byas par 'gyur ba dang / /'byung ba'am rgyu med can du 'gyur/ /de ltar bdag byung bdag ma byung / /gnyis ka gnyis ka ma yin par/ /'das la lta ba gang yin pa/ /de dag 'thad pa ma yin no/ /ma 'ongs dus gzhan 'byung 'gyur dang / /'byung bar mi 'gyur zhes bya bar//lta ba gang yin de dag ni/ /'das pa'i dus dang mtshungs pa yin/ /gal te lha de mi de na/ /de lta na ni rtag par 'gyur/ /lha ni ma skyes nyid 'gyur te/ /rtag la skye ba med phyir ro/ /gal te lha las mi gzhan na/ /de lta na ni mi rtag 'gyur/ /gal te lha mi gzhan yin na//rgyud ni 'thad par mi 'gyur ro/ /gal te phyogs gcig lha yin la/ /phyogs gcig mi ni yin gyur na/ /rtag dang mi rtag 'gyur ba yin/ /de yang rigs pa ma yin no/ /gal te rtag dang mi rtag pa/ /gnyis ga grub par gyur na ni/ /rtag pa ma yin mi rtag min/ / 'grub par 'gyur bar 'dod la rag /gal te gang zhig gang nas gar / /'ong zhing gong du'ang 'gro 'gyur na/ /de phyir 'khor ba thog med par/ /'gyur na de ni yod ma yin/ /gal te rtag pa 'ga' med na/ /mi rtag gang zhig yin par 'gyur/ /rtag pa dang ni mi rtag dang / /de gnyis bsal bar gyur pa'o//gal te 'jig rten mtha' yod na/ /'jig rten pha rol ji ltar 'gyur/ /gal te 'jig rten mtha' med na/ /'jig rten pha rol ji ltar 'gyur/ /gang phyir phung po rnams kyi rgyun/ /'di ni mar me'i 'od dang mtshungs/ /de phyir mtha' yod nyid dang ni/ / mtha' med nyid kyang mi rigs so/ gal te snga ma 'jig 'gyur zhing / /phung po 'di la brten byas nas/ /phung po de ni mi 'byung na/ /des na 'jig rten mtha' yod 'gyur/ /gal te snga ma mi 'jig cing / /phung po 'di la brten byas nas/ /phung po de ni mi 'byung na/ / des na 'jig rten mtha' med 'gyur/ /gal te phyogs gcig mtha' yod la / /phyogs gcig mtha' ni med 'gyur na / /'jig rten mtha' yod mtha' med 'gyur/ /de yang rigs pa ma yin no/ /ji lta bur na nyer len po'i/ /phyogs gcig rnam par 'jig 'gyur la//phyogs gcig rnam par 'jig mi 'gyur/ /de ltar de ni mi rigs so/ /ji lta bur na nyer blang ba/ /phyogs gcig rnam par 'jig 'gyur la/ /phyogs gcig rnam par 'jig mi 'gyur/ /de ltar de yang mi rigs so/ /gal te mtha' yod mtha' med pa//gnyis ka grub par gyur na ni/ /mtha' yod ma yin mtha' med min/ /'grub par 'gyur bar 'dod la rag /yang na dngos po thams cad dag /stong phyir rtag la sogs lta ba/ /gang dag gang du gang la ni/ / ci las kun tu 'byung bar 'gyur/ /lta ba brtag pa zhes bya ba ste rab tu byed pa nyi shu bdun pa'o// // gang gis thugs brtse nyer bzung nas/ /lta ba thams cad spang ba'i phyir/ /dam pa'i chos ni ston mdzad pa/ /gau tam de la phyag 'tshal lo/ / dbu ma rtsa ba'i tshig le'ur byas pa shes rab ces bya ba theg pa chen po'i chos mngon pa rnam par gzhag pa/ don dam pa'i de kho na yang dag par ston pa/ shes rab kyi pha rol tu phyin pa'i tshul gsal bar byed pa/ slob dpon bdag nyid chen po 'phags pa klu sgrub mi 'phrogs pa'i mkhyen rab dang thugs rjer ldan pa/de bzhin gshegs pa'i theg pa bla na med pa'i tshul gsal bar byed pa/ rab tu dga' ba'i sa bsgrubs nas/ bde ba can gyi zhing du gshegs pa/'jig rten gyi khams dang ba'i 'od ces bya bar/ de bzhin gshegs pa ye shes 'byung gnas 'od ces bya bar 'gyur bas mdzad pa rdzogs so// //dbang phyug dam pa'i mnga' bdag rgyal po chen po dpal lha btsan po'i bka' lung gis/ rgya gar gyi mkhan po chen po dbu ma pa/ dz+nyA na gar+b+ha dang / zhu chen gyi lots+tsha ba dge slong cog ro klu'i rgyal mtshan gyis bsgyur cing zhus te gtan la phab pa/ 'di la rab tu byed pa nyi shu rtsa bdun/ sh+lau ka bzhi brgya bzhi bcu rtsa dgu yod/ bam po ni phyed dang gnyis su byas so//slad kyis kha che'i grong khyer dpe med kyi dbus / gtsug lag khang rin chen sbas pa'i dbus su/ kha che'i mkhan po ha su ma ti dang / bod kyi sgra bsgyur gyi lots+tsha ba pa tshab nyi ma grags kyis mi'i bdag po 'phags pa lha'i sku ring la 'grel pa tshig gsal ba dang bstun nas bcos pa'o// //slad kyis ra sa 'phrul snang gi gtsug lag khang du/ rgya gar gyi mkhan po ka na ka dang / lots+tsha ba de nyid kyis zhu chen bgyis pa'o// //