CLOSE WINDOW

D3823
བོད་ཡིག

rgya gar gyi mkhan po de nyid dang / sgra bsgyur gyi lo tsA ba dge slong seng ge rgyal mtshan gyis zhus te gtan la phab pa'o//[ ]@/ /shes rab snying po'i rnam par bshad pa bzhugs/ @##/ /shes rab kyi pha rol tu phyin pa la phyag 'tshal lo/ /bde bar gshegs pas gsungs pa'i chos kyi 'khor lo gnyis pa'i don thams cad bsdu na gnyis te/mngon par rtogs pa'i don dang / snying po'i don no/ /de la mdo rgyas 'bring gsum gyis ni gang zag gsum gyi dbang du byas nas/ mngon par rtogs pa gtso bor ston pa yin la/ bdun brgya pa la sogs pas ni snying po'i don gtso bor ston to//lam mngon par rtogs pa ye shes kyi dmigs pa gtso bor ston pa'o/ /de la rgyas 'bring gsum gyis gtso bor mngon rtogs bstan/ yang snying po'i don shugs la bstan/ bdun brgya pa la sogs pas gtsor snying po'i don bstan/ mngon rtogs zhar la bstan to/ /'dir yang snying po'i don bstan pa yin la 'di yang bi ma la mi tra ltar na don brgyad kyis mdo 'di'i don ma lus pa bstan pa yin no/ /don brgyad kyang gleng slong pa dang zhes bya ba la sogs pas lus rnam par gzhag pa yin no/ /de la slob dpon phyogs kyi glang po la sogs pas mdo'i don gzhan du yang bshad pa yod de/mdo 'byung ba'i rgyu dang / mdo dngos so/ /dang po la gnyis te / gleng slong ba dang gleng gzhi'o/ /'di gnyis kyi khyad par ni/ tshig 'byung ba'i rkyen dang / mdo 'byung ba'i rgyu'o/ /de yang sngon byung ba dang / rjes 'jug ste/ gleng bslang ba'o/ / gleng gzhi la gnyis te/ thun mong dang khyad par gyi gleng gzhi'o/ /'di gnyis kyi bye brag ni mdo thams cad la thun mong du yod pa dang / mdo 'di la yod pa gzhan la med pa'o/ /thun mong la bzhi ste/ dus dang ston pa dang / gnas dang 'khor ro/ /khyad par gyi gleng gzhi la gnyis te/ gtso bo dang 'khor ting nge 'dzin la zhugs pa'o//de ni bsdus don no/ /dgos pa'i don ni sdud pa po rang nyid tshad ma'i skyes bur 'gyur bar bya ba'i phyir te/ dus de tsam na ston pa 'di la 'khor 'di rnams dang gnas 'dir thos so zhes dpang po dang dan rtags dang bcas pa'i tshig brjod na/ 'o na 'di bshad pa 'di bden no zhes sdud pa po la yid ches par 'gyur te/'di lta ste/ 'jig rten na yang dbang dang dan rtags zhib pas kho'i de bden no zhes rtogs pa bzhin no/ /de skad du yang slob dpon phyogs kyi glang pos/ /dad ldan 'jug pa'i yan lag tu/ /rang nyid tshad mar rab bsgrub phyir/ /ston pa dang ni 'khor dbang po//yul dang dus sogs bstan pa yin/ /sdud par byed pas 'jig rten du/ /yul dang dus sogs bstan pa ni/ /dpang por bcas pa'i tshig brjod na/ /rang nyid tshad mar 'gro ba yin/ /zhes gsungs so/ /'di rnams kyi tshig don dang tshig rnam par sbyar ba ni gsal lo/ /des na mdo thams cad de ltar bshad par bya ba yin par brgyad stong pa'i bsdus don na bstan to//lhag ma ni mthun no/ /'dir dri ma med pa'i bshes gnyen gyis de bkag ste/ rang gi lugs gsal bar byed pa la dang po sun 'byin te/ de la skyon gnyis te/ mi nus pa dang dbang por mi 'gyur ba'o/ / de la mi nus pa ni dgos pa de sgrub par mi nus pa ste/ da lta ni dad pas rjes su 'brang ba rnams 'jug pa'i yan lag tu rang tshad ma'i skyes bur bsgrub pa'i phyir de smos so/ /dpang po'i dgos pa yang phyis de la the tshom za ba la sogs pa byung tsam na/ de la thug pa yin la/ de ltar na rdzu 'phrul dang mngon par shes pa thob pa rnams kyis mdo'i don gtan la 'bebs pa mi srid par 'gyur te/dpang po 'ga' zhig ni mya ngan las 'das la/ kha cig gzhan na bzhugs pa ste/ de yang / zab cing mtha' yas mdo sde yi/ /dkon mchog thos pa'i sred pa yis/ /'jig rten khams ni thams cad du//don byed par ni 'gro phyir te/ /zhes bya ba'i tshul gyis so/ /kha cig ni 'di na bzhugs kyang mthong ba'i skal ba med do / /'od srungs chen po la sogs pa lta bu'o/ /skyon gnyis pa de dgos pa de bsgrub par nus su chug kyang dpang po nyid du mi 'gyur te/ /dpang por 'gyur ba la 'di dang 'di dag ste zhes 'khor rnams kyi ming bstan pas dpang por 'gyur bar 'dod na/rab 'byor dang zhes bya ba la sogs pa dngos su ming bstan pas de ltar dpang du 'gyur ba la rag na/ mdo 'di bzhin du 'khor gyi ming med pa dang dpang du ji ltar 'gyur zhes zer ro/ /des na 'di ltar bshad de/sngon byung ba'i gleng gzhi dang bcas pa'i mdo bshad pa'i sngon rol du de'i gleng slong bar byed pa ni 'di skad bdag gis thos pa'i gsungs pa yin no/ /'dis ni dbri bskyungs med par yang dag par thos par bstan te/ des 'khor rnams kyis phyin ci ma log par bstan par shes pas sdud pa po la legs par rna ba gtod pa la sogs par 'gyur ba'i phyir ro//da ni gang la brten nas mdo 'di 'byung ba'i skabs su gyur pa'i gnas skabs de rtsom pa ste/ de la 'jug par byed pa ni dus gcig na bcom ldan 'das zhes bya ba la sogs pa'o/ /'o na skabs de lta bu la brten nas byung ba'i mdo'i dbang du byas pa'i gang zag ji lta bu yin snyam nas bstan par gtogs pa 'dus pa ste/dge slong gi dge 'dun chen po dang zhes bya ba la sogs pa ste/ chos nyan pa'i skal pa yod pa tshogs pa dang ldan par gtogs pa 'dus pa zhes bya'o/ /khyad par gyi gleng gzhi gang zhe na/de'i tshe zhes bya ba la sogs pa gtso bo dang 'khor ting nge 'dzin la snyoms par zhugs pa gnyis bstan to/ /'o na gleng gzhi de gnyis rgyur byas pa las rtsom pa 'byung ba'i mdo gang zhe na/ dris pa dang lan gnyis kyis ston pa ni de nas zhes bya ba nas de ltar bslab par bya ba'i bar gyis bstan to//'o na de de bzhin gshegs pas ma gsungs par spyan ras gzigs kyis bshad pa 'di cang yin nam snyam pa'i 'khor gyi log rtog bzlog pa'i phyir shAkya thub pa nyid kyis mthun 'gyur byin pa'o/ /'o na 'di yang snyigs ma lnga bdo ba'i dus su sangs rgyas pas/ sangs rgyas gzhan pas 'od la sogs pa chung bas de kho na ltar yin nam ma yin nam snyam pa la/de bzhin gshegs pa rnams kyang rjes su yi rang ngo zhes bya ba de kho na ltar zad do snyam du dgongs pa'o/ /'di gnyis ni mthun 'gyur ro/ /yang na de bzhin gshegs pa rnams kyang zhes bya bas ni rjes su yi rang ba dang sbyar ro//de ltar na mdo sde rin po che bshad pa la dga' ba skyes nas rjes su yi rang bar byed pa ni bcom ldan 'das kyis zhes bya ba la sogs pa'o/ /de ni spyi'i don bsdus pa tsam mo/ /de la dris pa ni de nas zhes bya ba la sogs pa'o/ /'di'i don ni rten gyi gang zag gang la la 'dod pa ste/ bye brag sgrub pa dang sems bskyed pa'i byang chub sems dpa'o//ji ltar bslab par bya ba ste/ tshogs lam dang / sbyor lam dang / mthong lam dang / bsgom lam dang / mi slob pa la'o/ /'di lnga yang bsam pa dang / sbyor ba dang / mngon du bya ba dang / sgrub pa dang / rtogs pa zhes bya ba rnams kyi rang bzhin no//de la gdams ngag ni 'di yin te/ rigs dang ldan pa'i gang zag byang chub tu sems bskyed pas lam lnga la ji ltar bslab par bya zhes dris pa'i don to/ /lan ni lam rnam pa lnga la rnam par phye nas bstan pas bcu gcig tu 'gyur ro/ /de la yang gnyis te/ dbang po rtul po'i dbang du byas pa dang /rnon po'i dbang du byas pa'o/ /de la dbang po rtul po ni lam lnga la slob pa'i tshe/ lam re re'i dbang du byas nas kyang mtshan nyid thams cad yongs su rdzogs par bstan pa la ltos pa yin la/ de'i dbang du byas nas lam lnga la slob pa'i tshul rnam par phye na bcur 'gyur ro//dbang po rnon po ni mgo smos pas go ba yin la de'i don du sngar don bcur ston pa de nyid bsdus nas sngags kyi don du bstan pa ste/ de ltar na lan btab pa bcu gcig tu 'gyur ro/ /spyir na 'di gnyis ka yang dbang po rnon po yin mod kyi de la yang khyad par yod pas gnyis su phye ba yin no//'dir dbang po rtul po la bstan pa de yang dbang po rtul po gzhan la ltos nas gsang sngags su 'gyur ba yin te/ ma gsangs kyang gsangs te bstan pa bzhin du song ba'i phyir ro/ /de yang gsang ba dang mi gsang ba ni blo la yod pa yin gyi/ dngos po la ni bstan par bya ba la khyad par med la/ston pa la yang dpe mkhyud mi mnga' ba'i phyir ro/ /des na 'dir yang gsang sngags kyi don bshad pa de nyid snga ma la yang gsang ste bstan pa bzhin du 'jug pas gsang sngags kyi nges tshig dang ldan no/ /de la dang po mdo la rten rigs dang ldan pa'i gang zag gis byang chub mchog tu sems bskyed pa ni lam bskyed pa'i rten gyi gang zag yin pas de bshad pa ni/shA ri'i bu zhes bos nas rigs kyi bu 'am rigs kyi bu mo gang la la zhes bya bas rigs dang ldan pa'i gang zag bstan la/ shes rab kyi pha rol tu phyin pa zab mo zhes bya ba dang / spyad pa spyod par 'dod pa zhes bya ba gnyis kyis dmigs par bya ba'i yul dang /'dun pa'i mtshan nyid kyi sems bskyed pa gnyis bshad de go rims bzhin no/ /'dis ni dbang po rno rtul ma phye bar spyir bstan pa'o/ /dbang po rtul po'i dbang du byas pa'i lan bcu yang 'phags pa dgongs pa nges par 'grel pa las dmigs pa rnam pa bzhi bshad pa des don gyi khog dbub par bya ste/rnam par rtog pa dang bcas pa'i gzugs brnyan lhag mthong gi dmigs pa dang / rnam par mi rtogs pa'i gzugs brnyan zhi gnas kyi dmigs pa dang / dngos po mtha'i dmigs pa dang /dgos pa yongs su grub pa'i dmigs pa'o/ /'di bzhis tshogs lam dang / sbyor lam dang / mthong lam dang / mi slob pa'i lam bzhi rim bzhin bstan par shes par bya'o/ /'dir bsgom lam ni dmigs pa snga ma gsum nyid la dmigs pa ma gtogs pa dmigs pa lhag ma gzhan med pas logs su ma bstan te/de skad du yang mgon po byams pas/ nges 'byed yan lag dang mthong ba'i/ lam dang bsgom pa'i lam nyid la/ yang dang yang du sems pa dang / 'jal dang nges rtog bsgom pa'i lam/ /zhes bshad do/ /de la rnam par rtog pa dang bcas pa'i gzugs brnyan lhag mthong gi dmigs pa ni 'di ltar rnam par blta bar bya ste zhes bya bas bstan to//'dis ni tshogs kyi lam gyi gnas skabs na yod pa'i de kho na nyid la so sor rtog pa'i shes rab bstan to/ /mthong lam du ni dmigs pa thams cad mnyam pa nyid du rtogs pas dmigs pa rnam pa sna tshogs su lta ba med la/ 'dir ni stong pa nyid la sogs pa rnam pa sna tshogs su dngos po la yod par zhen cing rtog par byed pas na'o/ /rnam par rtog pa ni mi 'dra ba 'am sna tshogs su rtog par byed pa'o/ /de ltar rtog pa'i shes rab de nyid ting nge 'dzin med pas na lhag mthong tsam gyi rang bzhin yin la/ mthong lam du skye ba'i mi rtog pa'i gzugs brnyan tsam yin pas na/rnam par rtog pa dang bcas pa'i gzugs brnyan lhag mthong gi dmigs pa zhes bya'o/ /des na rnam par blta bar bya ste zhes 'byung ba ni rnam pa sna tshogs su so sor brtag par bya'o zhes bstan pa'o/ /dris pa'i skabs nas kyang bshad do/ /de ltar tshogs lam skyes pa la shes pa gzhan gyis bar ma chod par drod la sogs pa nges 'byed skye ba yin pas mdo'i tshig 'dis ni rnam par mi rtog pa'i gzugs brnyan zhi gnas kyi dmigs pa yang 'di nyid kyis bshad pa yin no//de la rnam par mi rtog pa ni gong du bstan pa'i thos bsam gyi shes pa kha phyir bltas nas dmigs pa sna tshogs la rtog pa de ltar mi rtog cing gcig tu nang nyid du rtog pa bsdus pa ste/de nyid kyang chos thams cad mnyam pa nyid du rtogs pa'i lhag mthong mthong lam du skye ba de lta bu med kyang zhi gnas kyi rang bzhin yod pas/ rnam par mi rtog pa'i gzugs brnyan zhi gnas kyi dmigs pa ste snga ma bzhin no//de ltar dmigs pa gnyis bshad nas/ da ni gsum pa dngos po'i mtha'i dmigs pa ston te/ /de la dngos po ni gzugs la sogs pa'o/ /de'i mtha' ni rang bzhin nam chos nyid de/ de la dmigs pa ni dngos po'i mtha' la dmigs pa'o//'di ni mthong lam mo/ /de la yang gsum te/ dmigs pa dang / dmigs pa de la 'jug pa'i rnam pa dang / rnam pa des rnam par bltas pa'i 'bras bu'o/ /de la phung po lnga po de dag la yang ngo bo nyid kyis stong par yang yang dag par rjes su blta'o zhes bya ba ni gong du bstan pa ltar dngos po dang /mtha' dang / de la dmigs pa gsum bstan pas mthong lam gyi dmigs pa bstan pa'o/ /tshig don ni 'grel pa nas gsal lo/ /dmigs pa de la rnam pa gang gis zhugs na yang dag par rjes su lta ba phyin ci ma log par lta bar 'gyur ba yin zhe na/gzugs stong pa'o zhes bya ba la sogs pa'o/ /'di la yang gsum ste/ rnam pa so so'i mtshan nyid dang / grangs nges pa dang / go rims nges pa'o/ /de la dang po ni gsal lo/ /grangs nges pa ni 'dir snying po'i don bshad pa yin la/ snying po'i don gyi gtso bo yang rnam par thar pa'i sgo gsum yin no//rnam par thar pa'i sgo gsum yang zab mo'i don brgyad kyis bsdus te/ dngos po rnams kyi ngo bo nyid stong pa nyid dang / rnam par thar pa'i sgo stong pa nyid yin la/ stong pa dang mtshan ma med pa gnyis kyis kyang rang gi ngo bos stong pa dang / spyi'i ngo bos stong pa gnyis bshad pas lta ba'i dbang du byas nas de gnyis su stong pa nyid kyi don thams cad 'dus pa yin pas de bshad do//mtshan nyid med pa ni rgyu mtshan dang bral ba ste/ rgyu yang 'bras bu la ltos nas rgyur 'jog pa yin la/ de yang kun nas nyon mongs pa rgyu 'bras dang / rnam par byang ba'i rgyu 'bras gnyis su 'dus pa yin pas ma skyes pa ma 'gags pa dri ma med pa dri ma dang bral ba med pa ste/rim pa bzhin no/ /smon pa med pa ni 'bras bu la smon pa'i yul gnyis te/ skyon dang bral ba dang yon tan dang ldan par smon pa'o/ /de gnyis dang bral ba ni smon pa med pa'o/ /des na rnam par thar pa'i sgo gsum gyi rang bzhin la/dgag bya brgyad bkag pa'i rnam pa yang brgyad kho nar nges so/ /de ni grangs nges pa'o/ /go rims nges pa ni mdo sde thams cad du bde bar gshegs pas stong pa nyid kyi rnam par thar pa sngon la bstan la/ de nas mtshan ma med pa tha mar smon pa med pa'o/ /'dir de nyid kyis nges pa yin no//sangs rgyas kyi lta ba dang / spyod pa dang 'bras bu gsum rim gyis skye la/ de gsum la zhen pa'i gnyen po gsum rim bzhin du bstan la grangs nges pa de nyid kyis go rims kyang nges so/ /des na mdo 'di'i bshad bya gtso bo yang zab pa'i don brgyad po 'di nyid yin no zhes dri ma med pa'i bshes gnyen gyis bshad do//da ni dmigs pa de la rnam pa 'di brgyad kyi sgo nas rnam par bltas pa'i 'bras bu shes pa'i snang ba ji lta bu skye ba de bstan pa'i phyir/ shA ri'i bu de lta bas na de'i tshe stong pa nyid la zhes bya ba la sogs pa ste/ de lta bas na zhes bya ba ni ji skad gsungs pa'i rnam pa rnams kyis dmigs pa de la rnam par bltas pa na'o//de'i tshe ni de'i dus na ste/ rnam par bltas pa'i dus na'o/ /'bras bu ci 'byung zhe na/ stong pa nyid la gzugs med ces bya ba la sogs pa ste/ stong pa nyid mthong ba la gzugs la sogs pa yang dag par mi dmigs pa'i shes pa skye ba'o/ /des na dmigs pa de la rnam pa 'di brgyad kyi sgo nas goms par byas pa la stong pa nyid du snang ba'i shes pa 'di 'dra ba skyes pa ni mthong ba'i lam gyi 'bras bu yin no zhes bstan pa'o//de ltar mthong lam skyes pa la/ bsgom lam skye bas de ston pa ni/ shA ri'i bu de lta bas na zhes bya ba la sogs pa ste/ 'grel pa na gsal lo//de'i rjes thogs su bar chad med pa'i lam rdo rje lta bu'i ting nge 'dzin skye ba yin pa las de ma bstan par sangs rgyas kyi sa'i spong ba che ba ston pa ni bsgom lam gyi sgrib pa gnyis spangs pa la spong ba che bar 'dod pa na/ de ni bsgom lam dang 'brel par shes par bya ba'i don du bsgom lam gyi rjes la bstan to//de yang 'dir spong pa ni lan cig yin no/ /de ni sems la sgrib pa med de zhes bya ba nas mthar phyin to'i bar go sla'o/ /bar chad med pa'i lam bstan pa'i phyir dus gsum du rnam par zhes bya ba nas brten nas zhes bya ba'i bar ro//sangs rgyas thams cad ces bya ba la 'dir sangs rgyas ni yin la yang dag par rdzogs pa'i sangs rgyas ni ma yin no zhes 'byung ba nas/ sa bcu'i khyad par gyi lam la gnas pa'i byang chub sems dpa'o/ /de'i lam na rdo rje lta bu'i ting nge 'dzin yin par 'grel pa nas gsal bar bshad do//'dir ni mdo las rtogs pa che ba dang sems dpa' che ba gnyis gtsor bstan pa'i zhar la bar ma chod pa'i rgyu 'di yang zhar byung du bstan pa yin no/ /de ltar spangs pa'i bdag nyid bstan nas/ rtogs pa'i bdag nyid rnam pa gnyis bstan pa'i phyir bla na med pa zhes bya ba la sogs pa la/de la gnyis te/ ji snyed yod pa mkhyen pa dang ji ltar mkhyen pa ste/ sems dpa' che ba dang rtogs pa che ba gnyis yin pas lan gnyis su gzhag pa yin no/ /de la bla na med pa zhes bya bas ni dmigs par bya ba'i yul dang / de rjes su sgrub pa'i rgyu dang /'bras bu thob pa bla na med pa ste/ de gsum gyis ni ji snyed mkhyen pa'i ye shes bstan pa yin te/ de gsum dang ldan pas shes bya'i dngos po thams cad skyu ru ra lag mthil du bzhag pa ltar mkhyen pa'o/ /yang dag par mnyam pa'i byang chub tu mngon par rdzogs par sangs rgyas so zhes bya bas ni ji lta ba bzhin mkhyen pa'i ye shes bstan pa ste/'grel pa nas gsal bar bstan to/ /de ltar na dbang po rtul po'i dbang du byas nas/ tshogs lam sbyor lam gnyis la lan re re dang / mthong lam la gsum/ bsgom lam la gcig /bar chad med pa'i lam la gcig /sangs rgyas kyi sa la gsum ste/ de ltar lan btab pa bcus lam lnga la slob pa'i tshul legs par bshad pa yin no/ /da ni dbang po rnon po'i dbang du byas nas shes rab kyi pha rol tu phyin pa'i don mdor bsdus nas gsang sngags kyi don du bshad pa ni/ shA ri'i bu de lta bas na zhes bya ba la sogs pa ste/lam lnga po de dag shes pa'i don dang skyob pa'i don dang / de gnyis kyi phan yon dang / sngags nyid kyi bshad pa dang / de ni lan bcu gcig pa yin no/ /de ni dri ba'i skabs ji ltar bslab par bya zhes dris pa'i lan yongs su rdzogs so zhes bstan pa'i phyir de ltar bslab par bya'o zhes bstan pa yin no//dge slong legs pa'i shes rab kyis/ /mar me mdzad dpal ye shes la/ /gsol btab legs par bshad pa yin/ /de don bdag gis gzhung du bris/ /deng sang bod kyi rgyal khams 'dir/ /sngar gyi lugs ngan la zhen pas/ /da dung dam pa'i gdams ngag la/ /legs bshad yin par mi shes kyang / / 'on kyang shes rab ldan pa la/ /phan snyam snying rje'i bsam pas bris/ /rgyal yum legs par rtogs byed cing / /sdang bas smra bar ma gyur cig/ /rgya gar gyi mkhan po dI paM ka ra shrI dz+nyA na dang / lo tsA ba dge slong tshul khrims rgyal bas bsgyur cing zhus te gtan la phab pa'o// //