CLOSE WINDOW

D3822
བོད་ཡིག

/shes rab kyi pha rol tu phyin pa'i snying po rgya cher 'grel pa don bcus gsal bar bstan pa slob dpon pra shA s+t+ra se nas mdzad pa rdzogs so//[ ]@##/ /rgya gar skad du/ pradz+nyA pA ra mi tA hr-i da yA r+tha pa ri dz+nyA na/ bod skad du/ shes rab kyi pha rol tu phyin pa'i snying po'i don yongs su shes pa/'phags pa 'jam dpal gzhon nur gyur pa la phyag 'tshal lo/ /gzhan gyi bshad la ma ltos pa/ /rigs pas lam ni dbye bar bya/ /rtog pa sngon gtong 'bad pa ni/ /yi ge mkhan gyi rjes mi 'brang / / sngon gyi lo rgyus ni 'di ltar thos te/ de la dam pa'i chos 'jug pa'i rim pa ni/ dang po bA rA Na sIr bden pa bzhi'i chos kyi 'khor lo bskor nas/ chos kyi bdag tu 'dzin pa zlog pa'i don du bde bar gshegs pas rgyal ba'i yum mtshan ma med pa'i chos kyi 'khor lo bskor ro/ /sdud pa pos bsdus pa'i rim pa ni/bcom ldan 'das mya ngan las 'das nas gzhan 'phrul dbang byed kyi gnas su/ phyogs kyi glang po la sogs pa ni phyag na rdo rje dang / rnam par grol ba'i sde la sogs pa ni/ yongs su gtad pa'i le'u'i rjes su 'brangs nas 'phags pa kun dga' bo dang / rin chen 'byung gnas zhi ba la sogs pa ni/bcom ldan 'das kyis byin gyis brlabs pa can 'phags pa kun dga' bo sdud pa por 'dod de/ de ltar rang rang dang mthun pa'i sdud pa pos ni bstan pa yang dag par bsrung ba'i don du/ klu dga' bo dang / nye dga' bo la 'bum pa dang / lha'i dbang po brgya byin la nyi khri lnga stong pa dang /'phags pa mi pham mgon po la khri brgyad stong pa dang / khri pa dang / sdud pa dang / rnam thos sras la brgyad stong pa gtad pa yin no/ /de nas 'grel pa mdzad pa po rnams kyis/ 'grel pa mdzad pa'i rim pa ni/ /grong khyer seng ge gar gnas par/ /dge slong thogs med ces bya ba//bstan bcos de nyid don rig pa/ /mdo sde'i nges don drang don rnams/ /rnam pa du ma rnam par 'byed/ 'jig rten rnams kyis rig pa yi/ /bdag nyid ched du mngon par brjod/ /gzhung rtsom pa yi ngang tshul can/ de yi grub pa'i pho nya mo/ /sa la yin par brjod pa ste/ /de yi rig sngags mthu yis ni//nges pa de yi blo skyes nas/ /bstan pa ring du gnas bya'i phyir/ /mdo sde de nyid don sdud do/ /lo ni brgya dang lnga bcur 'tsho/ /lus bor nas ni lha yul 'gro/ /yun rings bde ba nyams su myong / /'khor bar yun rings 'khor 'khor nas/ /rim gyis bdag nyid chen po de//byang chub rab tu thob par 'gyur/ /zhes yang dag par rdzogs pa'i sangs rgyas kyis lung bstan pa/ chos kyi rgyun ni ting nge 'dzin thob pa 'phags pa thogs med dga' ldan du gshegs nas 'phags pa byams pa la gsol ba btab nas/ 'phags pa byams pas thun mong ma yin pa'i mdo sde dang 'dul ba dang /mngon pa'i rjes su 'brangs pa'i rab tu byed pa'i 'grel pa mngon par rtogs pa'i rgyan rtogs nas/ 'dzam bu'i gling pa rjes su bzung ba mdzad do/ /yang dus phyis 'phags pa klu sgrub klu'i yul du byon nas 'bum pa blangs te/ rang gi lta ba'i dbang gis dbu ma'i blos rab tu byed pa rnams kyis de'i 'grel pa mdzad do//de lta na yang rgyas pa dang bar ma dang / bsdus pa dang shin tu bsdus pa'i shes rab kyi pha rol tu phyin pa'i mdo rnams las/ shes rab snying po 'di ni blo dman pa'i 'khor gyi dbang du mdzad pa'o/ /de yang gsum ste/ gleng gzhi dang / dngos gzhi dang / yongs su 'dzin pa'o/ /gleng gzhi la gnyis te/ thun mong dang / thun mong ma yin pa'o/ /thun mong gi gleng gzhi la lnga ste/ sdud pa po sgro 'dogs pa spang ba gleng slong ba dang / dus dang ston pa dang / gnas dang 'khor phun sum tshogs pa'o/ /de la re zhig sgro 'dogs pa spang ba ni/ 'di skad bdag gis thos pa zhes smos pa ste/de yang yongs su sdud pa med par bstan pa mngon du byed pa mi nus pas na/ bsdu bar bya ba'i tshig la phyin ci log pa'i sgro 'dogs pa ni/ 'di skad ces smos pas dran pa mngon du byed pa'i don gyis sel to/ /yang shes bzhin med pa ni thos pa yang ma thos pa dang / ji lta ba bzhin shes na yang sdud pa'i dus na shes bzhin dang ldan pa'i spyod pa med na phyin ci ma log par 'gyur ba ma yin zhes/ sgro 'dogs pa de gnyis ni bdag gis zhes smos pas lus dang sems la so sor rtog pa'i shes bzhin gyi don gyis sel to/ /thos pa zhes bya ba ni rang gis yongs su brtags pa'i bdag nyid ma yin pa'o//yang bdag gis thos pa zhes bya ba ni brgyud nas thos pa yang ma yin pa'o/ /de ltar don bzhis ni gleng slong ba bstan to/ /de ltar na yang 'di nyid kyi ngag rdzogs pa ni de bzhin gshegs pa rnams kyi rjes su yi rang ba'o/ /'di skad bdag gis thos pa zhes sbyar ro//de yang nye bar mtshon pa ste/ 'dir gang dang gang sdud pa pos byas pa'i tshe nam rtog pa'i tshig gi tshogs de dang der 'brel par bya'o/ /gzhan du na rim pas 'brel ba na thabs cig tu bzhugs pa ste zhes bya ba la sogs pa mthong ba'i don yang thos par 'gyur ro/ /de lta na yang brgyud pas thos pa zhes bya bar thal bar 'gyur ro//de yang 'di ni grags pa dang 'gal lo/ /bdag cag gi 'dod pa ni grags pa dang 'gal ba 'ba' zhig spang par ma zad de tshig gi brjod pa'i gegs kyang spangs pa yin no/ /yang na sdud pa po dus su yang dag par rdzogs pa'i sangs rgyas kyis sdud pa'i tshigs su bcad pa thos pa na bar skabs kyi sdud pa'i tshig kyang sdud pa pos byas pa ni ma yin no zhes gdams ngag gis thams cad thos pa yin pas nyes pa med do//'di nyid kyang rin chen 'byung gnas zhi bas bcom ldan 'das kyis byin gyis brlabs pa can/ 'phags pa kun dga' bo sdud pa po yin no zhes brjod do//'o na sdud pa po ci'i don du yin zhe na/ 'dri ba po tsam du zad do/ /dus gcig na zhes bya ba ni phun sum tshogs pa'o/ /dus gzhan dang gzhan du ma yin te/ gang gi phyir yang dag par rdzogs pa'i sangs rgyas ni gdul bya gzhan la dgongs nas chos kyi 'khor lo bskor ba na/'phags pa spyan ras gzigs dbang phyug la shes rab kyi pha rol tu phyin pa'i snying po 'jug pa yin pas dus mnyam du thos pa phun sum tshogs pa 'grub pas so/ /gdul bya ma yin pa'i dbang du byas nas yang dag par rdzogs pa'i sangs rgyas ting nge 'dzin la snyoms par zhugs par snang la/don dam par ni ji ltar 'os par rgyun mi 'chad par chos kyi 'khor lo bskor ba'o/ /yang na dus gcig na zhes bya ba ni sangs rgyas kyis mi 'dul ba'i dus so/ /gzhan du na 'phags pa spyan ras gzigs dbang phyug la ston pa'i gnas skabs med par 'gyur ro/ /bcom ldan 'das zhes bya ba ni ston pa phun sum tshogs pa'o//gal te 'dir 'phags pa spyan ras gzigs dbang phyug ston pa yin na/ ji ltar bcom ldan 'das ston pa phun sum tshogs par brjod ce na/ smras pa/ bcom ldan 'das kyi mthus shA ri'i bus zhu ba dang / bcom ldan 'das nyid kyis ting nge 'dzin la snyoms par zhugs pa'i tshul gyis zhus pa dang /lan gyi skabs kyang 'byed pas na 'dir bcom ldan 'das nyid ston pa zhes bya ba la skyon cung zad kyang med do/ /rdzogs pa'i dbang phyug chos dang ni/ /grags dang dpal dang ye shes dang / /brtson 'grus phun sum tshogs pa ste//drug po de la bcom zhes bya/ /zhes bya ba'i don gyis 'di la bcom pa yod pas na bcom ldan no/ /de la dbang phyug ni gzhan zil gyis gnon par byed pa ste/ nyon mongs pa dang shes bya'i sgrib pa spangs pa ste/ gang gi stobs kyis bdud bzhi bcom pas dbang thob pa'o/ /chos kyang stobs bcu la sogs pa rang bzhin gyis dge ba'o//de gnyi ga yang shin tu rnam par dag pa chos kyi dbyings kyi ye shes kyi rang bzhin no/ /grags pa ni grags pa'i rgyu gzugs kyi sku'i yon tan te/ me long lta bu'i ye shes kyi rang bzhin no/ /dpal ni mnyam pa nyid kyi ye shes te/ chos thams cad ni nam mkha'i mdzod thob pas so//ye shes ni so sor rtog pa'o/ /brtson 'grus ni bya ba nan tan no/ /kha cig ni chos zhes bya ba'i gnas su gzugs bzang zhes brjod do/ /de ni me long lta bu'o/ /de ltar byas na dpal zhes bya ba ni chos ston pa'i rang bzhin yin pas bya ba nan tan no//rgyal po'i khab na bya rgod kyi phung po'i ri zhes bya ba ni/ gnas phun sum tshogs pa ste/ zas dang kun tu spyod pa nye bar mkho ba tha dad pas 'khor la ltos nas sprul pa'i sku'i gnas gnyis bstan pa'o/ /yang na rgyal po'i khab zhes bya ba ni spyi'i tshig yin pas bya rgod phung po'i ri zhes bya ba khyad par du byas pa'o//dngos po la ni sprul pa'i sku'i rten chos kyi sku nyid do/ /de la yang phan 'dogs pa dang / tshar gcod pa'i don ni rgyal po'i sgra ste/ chos can gyis chos mtshon pa'i phyir ro/ /des na rgyal po'i rig pa'i gnas lnga ste/ de'i khab ni chos kyi sku zhes bya ba'i don to/ /bya rgod ces bya ba ni chog mi shes pa nye bar mtshon pa ste/mtha' med pa la 'jug pa'o/ /phung po zhes bya ba ni mi zad pa'i don to/ /des na mtha' med pa'i yon tan gyi tshogs dang / 'grib pa med pa'i chos can zhes go rims bzhin du rig par bya'o/ /de ltar yang chos kyi dbyings la 'grib pa rab tu mi shes so/ / gang bar yang rab tu mi shes so gsungs pa lta bu'o/ /sa la gnas pa dang / sa la gnas par byed pa ni/ ri'i sgra nye bar mtshon pas na sa'i dbang phyug chos kyi sku'o/ shing ltar na sgra rnam pa gsum gyis nye bar mtshon po'i chos kyi sku nyid sprul pa'i gnas yin te/ de nyid du de bzhugs so/ /mi 'jigs pa dang ldan pa'i phyir kun tu gzigs pa dang bral bas bde bar 'jug pa ni thabs cig pa'o//bzhugs so zhes bya ba ni 'das pa'i sgra ni ji ltar bstan pa bsdus pa rnam pa gnyis pa'i mi slu bar rig par bya'o/ /dge slong gi dge 'dun chen po zhes bya ba la sogs pa ni 'khor phun sum tshogs pa'o/ /de yang tha ma dang /'bring dang / rab kyi dbye bas rig par bya'o/ /de la tha ma ni lha mi zhes bya ba la sogs pas rig par bya'o/ /'bring ni dge slong gi dge 'dun no/ /rab ni byang chub sems dpa'o/ /gsol ba dang bzhi'i las kyis bsnyen par rdzogs pas dge slong zhes bya ba yang 'dir dgos pa med pa'i phyir ram bstan pa'i rgyu mtshan pa nyid kyis rdzogs pa'i phyir dge ba slong ba na dge slong zhes gzhan las dge ba'i nor phun sum tshogs pa ched du gnyer ba'i don to//dge 'dun zhes bya ba ni sems bskyed pas bla na med pa mchod par 'os pa'i phyir te/ de yang byams pa'i rnam par thar pa las/ ji skad du/ rdo rje rin po che 'bigs pa ni thams cad las khyad par 'phags pa'i gser gyi rgyan zil gyis gnon par byed pa la rdo rje rin po che 'bigs pa'i ming yang mi 'dor te/thams cad du dbul ba yang sel bar byed do/ /rigs kyi bu de lta bu nyid du thams cad mkhyen pa nyid du sems bskyed pa rdo rje rin po che ni 'jug pa ma tshang yang / nyan thos dang rang sangs rgyas thams cad kyi yon tan gser gyi rgyan zil gyis gnon par byed pa la/byang chub sems dpa'i ming yang 'dor bar byed pa ma yin te/ 'khor ba'i dbul ba yang zlog par byed do zhes 'byung ba'o/ /chen po'i sgra'i khyad par gyis ni dge slong gi dge 'dun zab pa thos pa dbang thob pa'i rgyu mtshan byang chub tu sems bskyed pas snod du rung ba zhes brjod pa'o//byang chub ni zad pa med pa dang / skye ba med pa'i ye shes so/ /de la sems pa ni 'dun pa ste/ sbyor ba la sogs pa la mngon du phyogs pa zhes brjod do/ /sems dpa' chen po'i sgras ni phyir mi ldog pa'i byang chub sems dpa' bstan to/ /dge slong gi dge 'dun 'bring po yin pa'i phyir/byang chub sems dpa'i dge 'dun gyi rjes su nye bar bstan par 'os pa yin na yang dang por nyer bar bstan pa ni/ theg pa la gsar du zhugs pa'i phyir lta ba yang dag par bstan par bya ba'i don du rig par bya ste/ byang chub sems dpa' ni rigs kyi stobs kyis sems bskyed par rab tu bstan pas shin tu nye bar gnas dgos pa ma yin te/ma'i tha snyad grub pa'i bu bzhin no/ /byang chub tu sems bskyed pa can gyi nyan thos ni btsas ma thag pa'i byis pa bzhin sems bskyed pa'i 'dun pa srung bas bskyang bar bya ba zhes ji ltar bstan pa bzhin du rigs so//grangs ma bstan pa nyid kyis 'dir 'khor ni grangs las 'das par rtogs so/ /gzhan du grangs bstan par rigs so/ /thun mong ma yin pa'i gleng gzhi ni gnyis te/ zhu ba'i skabs dang / zhu ba dngos so/ /zhu ba'i skabs la gnyis te/ bcom ldan 'das kyis mdzad pa dang /'phags pa spyan ras gzigs dbang phyug gis mdzad pa ste/ de la dang po'i dbang du byas nas gang gi phyir bcom ldan 'das snyoms par ma zhugs pa na/ de la ma ltos par gzhan la gsol ba 'debs pa 'thad pa ma yin pas so/ /bcom ldan 'das ni rtag tu mnyam par gzhag pa yin pa'i phyir dang /rang bzhin sku ni mnyam pa dang / /phra zhing de dag 'brel pa dang / /dgyes dgur longs spyod bstan pa dang / /longs spyod rdzogs 'byor rgyur 'dod do/ /zhes 'byung ba bzhin du mi 'thad pas sprul pa'i sku ye shes dang mi ldan pa'i phyir/ zab mo snang ba'i chos kyi rnam grangs bstan pa'i rjes su ting nge 'dzin la snyoms par zhugs pa yin pa mi 'thad pa yin na yang /nyid kyis chos kyi 'khor lo 'jug pa'i snod ma yin pa'i gdul bya'i khams ni 'phags pa spyan ras gzigs dbang phyug la yid ches pas de nyid kyis bstan pa'i gdul bya yin pas/ yang dag par rdzogs pa'i sangs rgyas kyi bstan pa la mi 'jug pa nyid ni/ting nge 'dzin la snyoms par zhugs pa'o/ /don 'di yang ting nge 'dzin gyi sgra ni/ 'jig rten la grags pa ste/ de 'dir ting nge 'dzin zhes bya'o/ /des na ting nge 'dzin gyi sgra ni 'dir spangs pa'i tshig gis bshad pa la 'jug pa spangs pa bstan to/ /yang na ting nge 'dzin la mnyam par gzhag pa ni cang mi gsung bar bzhugs so zhes mtshon pas tshig mi brjod pa'i don la 'jug pa'o//'dir zab mo snang ba zhes bya ba'i dngos po ni ting nge 'dzin gyi brjod bya ma yin zhes rig par bya'o/ /so so skye bo dang / nyan thos dang / stong pa nyid la sems rnam par g.yengs pa'i phyir theg pa la gsar du zhugs pa'i byang chub sems dpas mi rtogs pa'i phyir zab pa dang /ma rig pa'i mun pa sel ba nye bar gnas pa'i mtshan nyid can yin pa'i phyir snang ba zhes brjod do/ /chos kyi rnam grangs zhes bya ba ni/ bstan bcos kyi ming gi rnam grangs te/ de la chos ni dngos po'i gnas lugs brjod bya rjod byed dang bral ba'o//de'i rnam grangs ni rjes su bstan pa'i kun rdzob kyis ston pas na bstan bcos so/ /des na ming gi rnam grangs zhes bya'o/ /yang de'i tshe zhes bya ba ni/ sangs rgyas kyi bstan pa nye bar bsdus pas dbang po'i dus so/ /gzhan du na 'phags pa spyan ras gzigs dbang phyug la nyan pa ma gtogs par bsam pa ni 'thad pa ma yin no//de la 'phags pa zhes bya ba ni sgrib pa gnyis las ring du song ba'o/ /spyan ras gzigs zhes bya ba ni/ thugs rje chen pos sems can la gzigs pa'i phyir ro/ /dbang phyug ces bya ba ni nus pa chen pos thugs rje'i 'bras bu dang ldan pa'i phyir ro//shes pas ni 'jig rten pa'i dngos po rtogs pas so/ /rab ni skad cig ma la sogs pa'i gnas lugs rtogs pas so/ /pha rol ni bden pa gnyis rtogs pas so/ /phyin pa ni gong na med pas so/ /rnam par lta zhing zhes bya ba ni bsam pa'o/ / de ltar na bsam pa tsam la rab tu 'jug pa'i dam pas 'phags pa spyan ras gzigs dbang phyug gis gsol ba 'debs pa'i skabs byas so/ /gzhan du na 'di yang snyoms par zhugs pa la mngon du phyogs pas gsol ba 'debs pa'i skabs ma yin par 'gyur ro/ /de nyid kyi phyir smos pa/ de nas zhes bya ba ni 'phags pa spyan ras gzigs dbang phyug gis bsam pa'i bdag nyid dal ba'i rjes su'o//ni'i sgra ni mi 'gal ba'i bdag nyid du grags pa'i brjod bya ste/ ston pa dal ba'i tshe/ zhu ba dang 'gal ba ma yin zhes bya ba'i don to/ /tshe dang ldan pa zhes bya ba ni/ gzhon pa la 'bod par grags so//byang chub sems dpa' spobs pa chen po can sems can gyi don la 'bad pa dang / rjes su mthun pa'i mdzad pa dang / gzhan yang yod mod kyi 'on kyang de dag ma rtogs par shA ri'i bu kho na sangs rgyas kyi mthus zhu ba la dbang 'byor pa'i bdag gi yul yin te/ gang gi phyir gdul bya'i khams ni nyan thos la mos pas dman par rtogs pas des zhus pa dang rjes su mthun pa'i lan gyis rang la yang phan pa'i rgyur yid ches pas na 'thob pa la rab tu 'jug pa/zhu ba po byang chub sems dpa' yin na spobs pa chen po dang rjes su mthun pa'i lan du rtogs pas phan pa'i rgyu yin yang mos par mi byed do//bcom ldan 'das kyi mthu ma gtogs par shA ri'i bus kyang sems can gyi spyod pa'i gting mi dpogs pas de dag gi bsam pa shes nas de dag yongs su 'dzin pa'i don du 'di rang dga' bar 'bad par mi byed de/ des na sangs rgyas kyi byin gyi rlabs kyis gzhan gyi sems rtogs nas 'di zhu ba por 'thad pa'o//'jig rten pa ni shA ri'i bu la zab mo'i dgongs pa grol ba'i yid mi ches te/ de nyan thos yin pas blo dman par rtogs pa'i phyir ro/ /de nas bcom ldan 'das kyis shA ri'i bu nyid ston pa por byin gyis brlabs pa ma yin no/ /'jig rten pas kyang 'phags pa spyan ras gzigs dbang phyug kho na blo gros chen po dang /snying rje chen po dang ldan pas na dman pa'i shes rab dang rjes su mthun par rgyal ba'i yum bstan par nus so zhes yid ches pa'i 'phags pa spyan ras gzigs dbang phyug zhu ba'i yul lo/ /gang la la zhes bya ba ni tshogs kyi lam la gnas pa 'am/ sbyor ba la sogs pa'i lam la gnas pa'o/ /yang na dus gsum gyi zhes rig par bya ste/ khyad par med par slong ba'i don du dri zhes bya ba'i don to/ /bu dang bu mo'i tshogs dag gis snod du rung ba'i khyad par bud med dang skyes pa'i bdag nyid rtogs na yang rigs kyi khyad par gyi tshig gis ni tshogs kyi lam la zhugs pa nyid du bstan pa'i phyir/'di lta ste rigs ni byang chub sems dpa'i rigs de bzhin gshegs pa'i snying po can de'i bu'am bu mo'am ni de las thos pa'i bdag nyid de/ rigs kyi stobs kyis sdug bsngal las skyob pa dang / mya ngan las 'das pa 'thob par 'dod pa'i 'dun pa dang ldan pa ni/dran pa nye bar gzhag pa la sogs pa'i rim pas yongs su bsgom pa sdug bsngal las skyob pa dang / rjes su mthun par sdug bsngal spong ba'i rgyu theg pa chen po'i rjes su 'brangs nas skyabs la 'jug pa dang / mya ngan las 'das pa thob par 'dod pa'i 'dun pas shes rab dang snying rje'i bdag nyid byang chub tu sems bskyed pa dang /snying rje bsod nams kyi pha rol tu phyin pa lnga la goms pa dang ldan pa dang / shes rab kyis kyang thos pa dang / bsam pa la goms pa las su rung ba'i shes rab la/ rigs kyi bu dang rigs kyi bu mo zhes brjod do//de nyid kyang sngon du tshogs kyi lam rtogs par lan btab pa'o/ /de yang de nyid kyi 'khor gyi nang na nye bar gyur pa'i gdul bya la sogs pa gtso bor ltos nas ston pa 'di 'jug go/ /tshogs ma bsags pa'i las dang po pa lta bu bde bar gshegs pa'i 'khor gyi nang na gnas pa'i dbang thob pa'i rim pa ma yin no//'di la zhes bya ba ni stong phrag brgya pa la sogs pa'i rim pas bstan na yang ma rtogs pa la'o/ /de nyid kyis kyang zab mo zhes bya'o/ /spyod pa zhes bya ba ni/ /yi ge 'dri mchod sbyin pa dang / /nyan dang klog dang len pa dang / /'chad dang kha ton byed pa dang //de sems pa dang bsgom pa'o/ /zhes lus dang ngag dang yid kyi bya bas bsdus pa'i chos spyod kyi sgo nas spyod par 'dod pa'o/ /'dir yang chos spyod ni yan lag brgyad kyi bsod nams kyi tshogs kyi rang bzhin no/ /ye shes kyi tshogs kyis rnam par dag par byed pa ni bsam pa dang bsgom pa ni rang bzhin no zhes smos pa ni/ji ltar bslab par bya zhes bya ba ste/ ye shes kyi tshogs dang / bsod nams kyi tshogs las gang dngos gzhi la/ gang ni rjes las thob pa la bslab par bya zhes bya ba'i don to/ /'dir yang gtso bor shes rab kyi rjes su 'brang ba nyid kyis dang por lan gdab par bya ba ste/ phyis ni bsod nams kyi tshogs dang rjes su mthun pa zhes bya ba yin pas de bzhin lan gdab par bya ba la dngos gzhi ni gnyis te/ dngos gzhi la sbyor ba dang / rjes su thob pa la sbyor ba'o/ /dngos gzhi la sbyor ba la yang bdun te/ skabs dbye ba dang / sbyor ba'i lam dang / mthong ba'i lam dang / bsgom pa'i lam dang / khyad par gyi lam dang / mi slob pa'i rdo rje lta bu'i ting nge 'dzin dang / de'i 'bras bu'o/ /de la skabs ni/ shA ri'i bu rigs kyi bu'am zhes bya ba la sogs pa'o/ /sbyar ba'i lam ni phung po lnga po de dag ces bya ba nas/ rnam par shes pa rnams stong pa'o zhes bya ba'i bar gyis so/ / de la sbyor ba'i lam ni drod dang rtse mo la dbang po'i bdag nyid dang / bzod pa'i dang / chos mchog la stobs kyi bdag nyid do/ /de la dbang po ni dad pa la sogs pa'i mi mthun pa'i phyogs spong ba'i dbang dang ldan pa'i phyir ro/ /stobs ni mi mthun pa'i phyogs spangs pas so/ /de dag nyid kyis rim pa bzhin du yul gyi dbye ba med par grogs kyi khyad par gyis/mos pa yid la byed pa dang / de kho na nyid yid la byed pa'o/ /kha cig ni drod la yang mos pa yid la byed pa dang / de kho na nyid yid la byed pa brjod pa gang yin pa de ni dad pa dang chos kyi rjes su 'brang ba'i gang zag gi dbye bas shes par bya'o/ / de la dad pa'i rjes su 'brang ba ni yid ches pa dang brtan pas dngos po la de dang de ma yin pa la 'jug go/ /chos kyi rjes su 'brang ba ni gang zag la ltos pa med par dngos po de nyid rtogs nas 'jug pa yin pas de dag gi khyad par ro/ /de bas na yang yul gyi khyad par med par mos pa yid la byed pas yul du byed pa dang /de kho na nyid yid la byed pas yul du byed pa de gsungs pa ni/ gzugs nyid stong pa'o/ /stong pa nyid kho na gzugs so zhes bya ba ni mdor bstan pa'o/ /gzugs las stong pa nyid gzhan ma yin no/ /stong pa nyid las gzugs gzhan ma yin no zhes bya ba ni rgyas par bshad pa'o/ /de la re zhig gzugs zhig pa la stong pa nyid du khas len te/de la lan ni gzugs nyid stong pa'o/ /gzugs las stong pa nyid gzhan ma yin no zhes bya ba ste/ gzhan dbang gi bdag nyid yang dag pa ma yin pa'i kun tu brtags pa ni/ btags pa'i gnyis kyis rang bzhin gyis stong pa'i phyir ro/ /ma yin par 'gags pa'i tshul gyis gnyis kyis stong pa zhes/gzugs nyid kyi bdag nyid do/ /gang yang smras pa/ chos kyi dbyings ni bdag nyid du 'gro ba'i gzugs la sogs pas 'gyur ba yin pas/ sgyu ma lta bu zhes de'i lan btab pa ni/ stong pa nyid kho na gzugs so/ /stong pa nyid las gzugs gzhan ma yin no zhes bya ba ste/gang gzhan gyi dbang du gyur pa'i gzugs de stong pa nyid kho na ste/ chos kyi dbyings kyi bdag nyid can no/ /de ni gal te/ chos kyi dbyings las lhag par gyur pa rang gi ngo bo ma dor ba'i bdag nyid sngon po la sogs pa yin na/ de'i tshe sngon po la sogs pa des dngos su de phan tshun 'gal bar/phye ma leb khra bo bzhin de la yod pa yin na chos kyi dbyings kyang gcig dang du ma'i 'gal bas gnod pas kun rdzob tu 'gyur te/ 'on kyang sngon po la sogs pa 'di ni ngo bo thob pa ma yin no/ /de smra ba ni/ stong pa nyid las gzugs gzhan ma yin no zhes bya ba ste/ gzhan zhes bya ba ni sems kyi rang bzhin 'od gsal bas rang gi ngo bo ma gtogs pa'i dngos po'i tshul can sngon po la sogs pa nyid kyis zhes bya ba'i don to//gang gi phyir rang gi ngo bo dor nas de dang 'dra bar snang bar 'gyur ba yin na/ rang gi ngo bo dang rjes su 'brel pa'i 'gal ba ni chos kyi dbyings la sbyor bar mi byed do//de brjod pa ni/ shes la sngo sogs sna tshogs pa/ /shes pa yin gyis gzhan dag min/ /mthong nus ma yin de dag ni/ /rnam 'byed don la 'jug par 'gyur/ /zhes 'di yang ji lta ba de ltar 'brel pa grub pa chung ngu'i yongs su shes pa dang / rnam par nges pa'i yongs su shes par dpyad pas 'dir rgyas par ma byas so//des na 'dis ni sgro 'dogs pa dang skur pa 'debs pas dben pa'i stong pa nyid kyi mtshan nyid mngon par bstan par 'gyur ro/ /de la 'di ni gzugs la yod par sgro 'dogs pa gang yin pa dang / yang stong pa nyid la de 'gog pa'i bdag nyid du sgro 'dogs pa/gzung ba'i rnam rtog gi rang bzhin gang yin pa de ni dang pos gzugs nyid stong pa'o/ /gzugs las stong pa nyid gzhan ma yin no zhes bya bas sel to/ /gang yang gzugs bzhin du chos kyi dbyings kyi kun rdzob tu khas blangs pas don dam par yod pa la skur pa btab pa'am/yang na rang gi ngo bo la kun rdzob kyi ngo bor mi 'thad pas mthar thug pa med de/ med par khas blangs pas skur pa btab pa de ni dngos po'i tshul can gyis gzugs su 'dzin pa'i sgro 'dogs pa 'jug pa de ni chos kyi dbyings la gzugs la sogs pa'i dngos po ma yin pa 'thad par byed pa phyi ma ni stong pa nyid kho na ni gzugs so//stong pa nyid las gzugs gzhan ma yin zhes bya bas sel to/ /des ni sgro 'dogs pa dang / skur pa 'debs pa'i gnyen po go rims bzhin du gzung ba dang 'dzin pa'i rnam par rtog pa spangs pa ni bdag nyid drod dang rtse mor mos pa yid la byed pas yul du byed cing bzod pa la gzung ba'i rnam par rtog pa spangs pa'i bdag nyid dang /chos mchog la ni 'dzin pa'i rnam par rtog pa spangs pa'i bdag nyid de kho na yid la byed pas yul du byed par shes par bya'o/ /gang gi phyir dbu ma pas rang gi rig pa la/ dngos su sngon po la sogs par 'dzin pa'i sgo nas gcig dang 'gal bas don dam par med par 'thad par byas so/ /gzhan du na rtags ma grub pas/ de dag gi mngon par 'dod pa ma grub par 'gyur ro/ /des na de dag gi don dam par med par 'dod na yang kun rdzob tu 'dzin par yod par 'dod pa'o//kha cig gis kyang kun rdzob nyid du rang rig pa la gzung ba dang 'dzin pa'i rnam pa khas len to/ /des ni dbu ma las de ltar kun rdzob tu khas blangs pa'i gzung ba'i dngos po'i sun 'byin to/ /mthong ba'i lam ni shA ri'i bu de ltar zhes bya ba nas gang ba med pa'o zhes bya ba'i bar gyis bstan te/de la dngos gzhi ni zab mo rnam pa brgyad cig car rtogs par shes par bya'o/ /gang yang bden pa bzhi la dmigs pa'i bzod pa dang shes pa'i bdag nyid skad cig ma bcu drug las bzod pa brgyad ni bar chad med pa'i lam la rjes su 'gro ba'i phyir/ rnam par grol ba'i lam gyi rjes su 'gro bar shes pa'i skad cig ma nyid 'dir rgyas par bstan par rig par bya ste/'bras bus rgyu rtogs pa'i phyir ro/ /de la yang rim pa gzhan las ma byung ba thog mar shes pa gang yin pa de ni chos shes pa'o/ /gang yang chos shes pa'i stobs kyis mthar phyin pa de ni rjes su shes pa zhes brjod do/ / de la sdug bsngal gyi bden pa la rang bzhin gyis stong pa nyid du yongs su shes pa ni sdug bsngal la chos shes pa'o/ /de nyid la yang rang bzhin gyis stong pa nyid rtogs pa'i phyir mtshan ma med pa nyid rtogs pa ni/ sdug bsngal la rjes su shes pa'o/ /kun 'byung gi bden pa la yang rang bzhin gyis ma skyes pa nyid du shes pa ni kun 'byung la chos shes pa'o//de nyid la yang ma skyes pa gzhan du mi 'thad pas ma 'gags pa rtogs pa ni kun 'byung la rjes su shes pa'o/ /'gog pa ni bden pa la rang bzhin gyis dri ma dang ma 'brel ba nyid du yongs su shes pa ni 'gog pa la chos shes pa'o//rang bzhin gyis dri ma dang ma 'dres pa la dri ma dang bral ba'i rnam par dag pa glo bur ba yin pas dri ma dang bral ba med pa rtogs pa ni 'gog pa la rjes su shes pa'o/ /lam gyi bden pa la/ rang bzhin nyid kyis spang bya rnams glo bur ba yin pas med pa'i phyir gnyen po'i stobs kyis mi mthun pa'i phyogs bri ba med pa ni lam la chos shes pa'o//chos kyi dbyings la ma gtogs pa med pa nyid kyis bri ba med pa bzhin gnyen po 'phel ba'i bdag nyid gang ba yang 'thad pa ma yin no zhes bya ba ni lam la rjes su shes pa'o/ /des na 'dir bzod pa dang shes pa'i skad cig ma ni dngos po la sbyor ba la yang gnas la mthong ba'i lam gyi dngos gzhi la byang chub kyi yan lag bdun gyis bskor ba'i phyir dran pa yang dag byang chub kyi yan lag gi shes pa'i skad cig ma brgyad yul du byed pas rjes su thob pa la rim pa 'di shes par bya'o//de ltar mthong ba'i lam bstan nas bsgom pa'i lam ni mi mthun pa'i phyogs dang /gnyen po'i phyogs la brten pa'i dbye bas so sor rnam pa dgu dgu yis rnam pa sum cu rtsa drug can gyi gzung ba dang 'dzin pa'i rnam par rtog pa spong bar byed do/ /des na 'dir bsgom pa'i lam ni/ shA ri'i bu de lta bas na zhes bya ba nas/ ma thob pa yang med do zhes bya ba'i bar gyis spang bya spong ba'i rim pa bstan to//de lta bas na zhes bya ba ni mthong ba'i lam de nyid kyis mngon du byas pa'i don de nyid bsgom pa ste/ phung po la sogs pa'i rnam par rtog pa sum cu rtsa drug spong bar byed ces bya ba'i don to/ /de la yang brtags pa'i rten can gyi 'dzin pa'i rnam par rtog pa las re zhig phung po'i rnam par rtog pa'i gnyen po ni rnam par shes pa brgyad ces bya ba'i bar du'o//skye mched kyi rnam par rtog pa'i gnyen po ni chos med do zhes bya ba'i bar du'o/ /khams kyi rnam par rtog pa'i gnyen po ni yid kyi rnam par shes pa'i khams kyi bar du yang med do zhes bya ba'i bar du'o//rten cing 'brel par 'byung ba'i gnyen po ni rga shi zad pa'i bar du yang med do zhes bya ba'i bar du'o/ /rnam par rtog pa'i gnyen po ni lam med ces bya ba'i bar du'o/ /mthong ba'i lam gyi rnam par rtog pa'i gnyen po ni ye shes med ces bya ba ste/chos dang rjes su shes pa bsdus pa zhes bya ba'i don to/ /bsgom pa'i lam gyi rnam par rtog pa'i gnyen po ni thob pa med ces bya ba ste/ 'dis thob par byed pas na thob pa'o/ /'jig rten las 'das pa dang / 'jig rten pa'i ye shes kyis bsdus pa'i bsgom pa'i lam mo/ / khyad par gyi lam dang mi slob pa'i lam gyi rnam par rtog pa dag gi gnyen po ni/ ma thob pa yang med do zhes bya ba ste/ thob par bya ba dang / thob par byed pa'i rtog pa med pa'i phyir ma thob pa med do zhes bya ba'i khyad par gyi lam dang / mi slob pa'i lam dag brjod do/ /rdzas kyi rten can gyi 'dzin pa'i rnam par rtog pa'i gnyen po ni rnam par gcad pa'i sgo nas 'dir ston to//'on kyang khyad par ni bdag rang dbang can gyi rnam par rtog pa'i gnyen po ma gtogs par gzhan gcig pu dang byed pa po dang mthong ba po dang / nyon mongs pa dang rten dang 'dod chags dang bral ba'i rten dang mthong ba dang bsgom pa dang /don byas pa'i rten can du rnam par rtog pa'i gnyen po ni rim pa bzhin du phung po la sogs pas bstan to/ /de bzhin du yang 'jug pa'i rten can gyi gzung ba'i rnam par rtog pa'i gnyen po ni phung po la sogs pa rnams kyi rnam par rtog pas bstan to/ /khyad par ni stong pa nyid dang / pha rol tu phyin pa'i rnam par rtog pa ma tshang ba la/bden pa bzhi'i rnam par rtog pa ni lhag par gyur pa'o/ /ma thob pa zhes pa ni mi slob pa'i lam nyid bshad pa'o/ /zlog pa'i rten can ni gzung ba'i rnam par rtog pa las ma rig pa dang / ming dang gzugs la mngon par zhen pa dang / mtha' gnyis la chags pa'i rnam par rtog pa rnams ni 'dir ma bsdus so//lhag ma rnams dngos su bstan pa ni 'di lta ste/ phung po'i don gyis phung po'i rnam par rtog pa'o/ /ye shes zhes bya bas ni rnam par rtog pa'o/ /thob pa zhes bya bas ni brtags pa'i don gyis ltos pa med pa'i rang bzhin gyis bdag la sogs pa'i rnam par rtog pa bsdus pa yin no//gzhan rnams ni gnyen po'i sgo nas bsdus pa la 'di lta ste/ ma thob pa zhes bya ba ni mi skye ba'i brjod byas skye ba med pa'i rnam par rtog pa'o/ /ma rig pa dang ma rig pa zad pa dang rga shi dang rga shi zad pa med pa rnams kyis ni kun nas nyon mongs pa dang /rnam par byang ba mi shes pa'i rnam par rtog pa'o/ /bden pa bzhi'i rnam par rtog pas ni 'phags pa'i lam la mi gnas pa'i rnam par rtog pa'o/ /khyad par gyi lam dang mi slob pa'i lam dang 'bras bu rnams ni shA ri'i bu de lta bas na zhes bya ba nas/ mngon par rdzogs par sangs rgyas so zhes bya ba'i bar gyis bstan to//de lta bas na zhes bya bas ni rnam rtog sum cu rtsa drug spangs pa'o/ /thob pa med pa'i phyir zhes bya ba thob pa dang / ma thob pa'i rnam par rtog pa 'khor gsum yongs su dag pa'o/ /shes rab kyi pha rol tu phyin pa la brten nas zhes bya ba ni khyad par gyi lam gyi tshogs so//spyod cing zhes bya ba ni khyad par gyi lam gyi sbyor ba'o/ /sems kyi dmigs pa la gnas te zhes bya ba ni khyad par gyi lam gyi dngos gzhi'o/ /khyad par gyi lam bstan nas mi slob pa'i lam bstan pa ni skrag pa med pas zhes bya ba la sogs pa ste/ sems kyi dmigs pa la mi dmigs par khyad par gyi lam gyi dngos gzhi la gnas nas/mi dmigs pa bstan pa la skrag pa ni nyon mongs pa'i bar chad byed pa yin pas de las bzlog nas skrag pa med pa zhes bya'o/ /skrag pa med pa las sa bcu la sbyor bas nyon mongs pa dang shes bya'i phyin ci log las shin tu 'das nas zhes bya ba ni phyir mi ldog pa'i phyir ro//dus gsum du rnam par bzhugs pa'i sangs rgyas thams cad kyang mya ngan las 'das pa'i mthar phyin pa shes rab kyi pha rol tu phyin pa la brten nas bla na med pa yang dag par rdzogs pa'i byang chub tu mngon par rdzogs par sangs rgyas so zhes bya bar 'brel to//mthar phyin pa'i rang bzhin dang mi slob pa yin pa'i phyir mya ngan las 'das pa dang / shes rab kyi pha rol tu phyin pa la brten nas zhes bya ba ni mi slob pa'i lam gyi rang bzhin la zhes bya ba'i don to/ /dus gsum du rnam par bzhugs pa'i sangs rgyas thams cad kyang zhes bya ba ni rten gyi gang zag go//'das pa la ma ltos na lam gzhan yod par dogs par 'gyur ro/ /da ltar ba med na mi slu bar 'grub pa med do/ /ma 'ongs pa med na 'jug pa'i rgyu med par 'gyur ro/ /des na dus gsum du rnam par bzhugs pa'i zhes brjod do/ /de ltar na 'dis ni theg pa gcig tu grub pa yang bstan to//mi slob pa'i lam bstan nas 'bras bu bstan pa ni bla na med pa zhes bya ba la sogs pa ste/ de la bla na med pa zhes bya ba ni rig pa pa dang / rnam par grol ba ro gcig pa'i phyir ro/ /yang dag par rdzogs pa zhes bya ba ni sangs rgyas pa la yang yongs su rdzogs pa ni byang chub ste/yang dag par rdzogs pa ni ma yin no/ /'di ni yang dag par rdzogs pa'i byang chub ces bya ba ni zad pa med pa dang / skye ba med pa'i ye shes so/ /kha cig ni skrag pa med pas zhes bya ba la sogs pas ni mi slob pa'i lam mo/ /mya ngan las 'das pa'i mthar phyin to zhes bya ba ni 'bras bu'o//dus gsum du rnam par bzhugs pa'i zhes bya ba la sogs pa ni lam gcig tu bsgrub pa'o zhes 'dod do/ /de ltar dngos gzhi ji ltar bslab par bya ba de bstan nas rjes su thob pa sbyor ba ni de lta bas na zhes bya ba'i bar du'o/ /de yang bzhi ste/gdon mi za bar 'jug pa'i rgyu bstan pa dang / bsod nams kyi tshogs kyi bdag nyid bzlas pa'i shes rab kyi pha rol tu phyin pa la spyod pa'i sbyor ba dang / bzlas pa'i shes rab kyi pha rol tu phyin pa'i dngos gzhi dang / nye bar bsdu ba'o/ /de lta bas na zhes bya ba ni spangs pa dang ye shes phun sum tshogs pa'i rgyu yin pas so//shes rab kyi pha rol tu phyin pa zhes bya ba ni tshogs lam la dran pa nye bar gzhag pa la sogs pa'i grogs kyis thar pa'i cha dang mthun pa zhes bya ba'i don to/ /rig pa chen po zhes bya ba ni dbang po dang stobs kyi nye bar spyod pas nges par 'byed pa'i cha dang mthun pa'o//bla na med pa'i zhes bya ba ni mthong ba'i lam la gnas pa'i dngos gzhi la gang khong du chud pa'i cha nyid kyis sangs rgyas dang mnyam pas so/ /mi mnyam pa dang mnyam pa zhes bya ba la/ mi mnyam pa zhes bya ba ni khyad par dang mi slob pa'i lam mo/ /de dag dang sgrib pa spong byed du mnyam pa ni bsgom pa'i lam mo//sdug bsngal thams cad rab tu zhi bar byed pa'i zhes bya ba ni khyad par dang mi slob pa'i lam dag la go rims bzhin du khyad par ring ba med pa'i phyir dang gtsang ba dang bdag dang rtag pa dang bde ba'i pha rol tu phyin pa'i khong du chud pa'i rgyu yin pa'i phyir ro//mi brdzun pas na zhes bya ba ni spangs pa phun sum tshogs pas so/ /de gang zhe na/ shes rab kyi pha rol tu phyin pa dang ldan pa'i sngags so/ /sngags zhes bya ba ni skyob pa dang ye shes kyi don to/ /lam thams cad la rang rang gi mi mthun pa'i phyogs spong bar byed pa'i phyir dang /rang rang rtog pa dang ldan pa'i phyir ro/ /'di ni ji ltar shes par bya ba de bstan nas gang shes par bya ba de bstan pa ni/ tad ya thA zhes bya ba ste/ don 'di rnams mngon du byas nas bzlas par bya zhes bya ba'i don to/ /'dis ni nyams su len pa'i rim pa bstan to//ji bzhin yang dag mthong ba'i phyir/ /skye sogs rnams las 'das gyur kyang / /snying rje'i bdag nyid skye ba dang / /rga dang na dang 'chi ba ston/ /zhes bya ba'i tshul gyis mthong ba'i lam nyid la skye ba spang ba'i phyir ro/ /ga te ga te pA ra ga te zhes bya bas ni 'gro ba rigs drug spangs pa'i bdag nyid mthong ba'i lam ste/gang gi phyir 'dod chen po'i 'gro ba las tshogs kyi lam du 'gro ba nyid kyis pha rol tu phyin pa'o/ /tshogs lam pa'i 'gro ba las kyang sbyor ba'i lam du 'gro ba nyid kyis pha rol tu phyin pa'o/ /de bas na 'gro ba ni ga te ga te pA ra ga te zhes bya ba ni mthong ba'i lam mo//pA ra saM zhes bya bas ni bsgom pa'i lam la gnas pas so/ /ga te zhes bya ba ni khyad par dang mi slob pa'i lam la gnas pa zhes bya ba'i don to/ /bo d+hi zhes bya ba ni 'bras bu'o/ /oM dang swA hA zhes bya ba ni bzlas pa'i 'bras bu thob pa'i don du byin gyis brlabs pa'i sgra'o//de ltar dngos gzhi la ye shes kyi tshogs nyid la bslab par bya ba dang / rjes su thob pa la bsod nams kyi tshogs la zhes bshad do/ /'dir yang bzlas pa'i shes rab kyi pha rol tu phyin pa nye bar mtshon pa ste/ des na langs pa'i dus su yi ge la sogs pa'i bdag nyid bsod nams kyi tshogs brgyad po kun la yang bslab par bya'o zhes ston to//da ni gang ji ltar bslab par bya zhes brjod pa de'i lan nye bar bsdu ba smos pa ni/ shA ri'i bu zhes bya ba nas de ltar bslab par bya'o zhes bya ba'i bar gyis so/ /de ltar dngos gzhi gtan la phab nas yongs su 'dzin pa ni/ de nas zhes bya ba nas mngon par bstod do zhes bya ba'i bar gyis so//de yang gnyis te/ sangs rgyas kyis yongs su 'dzin pa dang / 'khor gyis yongs su 'dzin pa'o/ /de la sangs rgyas kyis yongs su 'dzin pa'i dbang du byas te smos pa ni de nas de'i tshe zhes bya ba la sogs pa ste/ de nas zhes bya ba ni 'phags pa spyan ras gzigs dbang phyug gis bstan pa yongs su rdzogs so nas de'i tshe zhes bya ba ni ma 'ongs pa'i sems can 'jug pa'i don du bstan pa ni bka' nyid du bsgrub pa'i dus su'o//da ltar ba'i sems can 'jug pa'i don du ni ma yin te/ de dag ni 'phags pa spyan ras gzigs dbang phyug nyid la yid ches pa na dogs pa med pa'i phyir ro//ting nge 'dzin de las bzhengs nas zhes bya ba ni/ gzhan la ltos nas 'jug pa'i las so/ /legs so legs so zhes bya ba ni/ smra ba po ni dga' ba dang / 'jigs la sogs pas yid 'khrugs dang / /bstod smad dag las bzlog pa'i tshig /smras kyang nyes pa yod ma yin/ / zhes bya ba'i tshul gyis legs so legs so zlos pa'i tshig ni/ bstod pa'i khyad par bstan pa'i 'bras bu can no/ /ma 'ongs pa rjes su yi rang ba ni bstan pa 'di la 'jug pa'i bdag nyid dang / 'bras bu thob pa na lam la mi slu ba'i bdag nyid do/ /des na de bzhin gshegs pa thams cad kyang rjes su yi rang ngo zhes bya'o//'khor gyis yongs su 'dzin pa las/ 'phags pa spyan ras gzigs dbang phyug gis mngon par bstod pa ni/ 'di'i spobs pa ni sangs rgyas kyi mthu nyid kyis bskyed pa'i phyir ro/ /lha mi'i rjes su lha ma yin la sogs pa smos pa ni bslab pa'i snod du rung ba khyad par can dang / dman pa bstan pa'i phyir ro//lha la sogs pas mngon par bstod pa ni bslab pa la 'jug par khas len pa'i bdag nyid du rig par bya'o/ /bstan pa 'di la shes rab kyi pha rol tu phyin pa'i snying po zhes bya ba ni/ shin tu rgyas par bshad pa las mdor bsdus pas mngon par rtogs pa'i rim pa bstan pa'i phyir ro//mdo tshogs bstan pa'i thabs kyis ni/ /yang dag spyod pa la 'jug pa'i/ /mya ngan 'das pa rnams 'byed pa/ /mngon phyogs khyod la phyag 'tshal lo/ /dpal ldan skye bo dam pa'i zhabs/ /pad+ma'i rdul tsam la brten nas/ /yid dga' ba yi dbang gis ni/ /bdag gis 'grel pa 'di byas te//gzhan la phan 'dogs byed min pa/ gang yin skyes bu chen po min/ 'on kyang skyes bu ngan stobs kyis/ gzhan gyi don du brtson pa med/ yul gyi mchog gyur dbus su ni/ /don du gnyer ba 'ga' zhig gis/ /mkhas pa 'ga' zhig yongs bskor zhing / 'grel pa 'di ni brtsams pa yin//yum gyi snying po sman lta bu'i/ /yongs shes sman pa lta bu 'dis/ /nyon mongs 'jig rten nad pa yi/ /sdug bsngal nad rnams sel bar shog /shes rab kyi pha rol tu phyin pa'i snying po yongs su shes pa paN+Di ta shrI ma hA dza nas mdzad pa rdzogs so// //