CLOSE WINDOW

D3821
བོད་ཡིག

/[ ]@##/ /rgya gar skad du/ Ar+ya pradz+nyA pA ra mi tA hr-i da ya TI kA/ bod skad du/ 'phags pa shes rab kyi pha rol tu phyin pa'i snying po rgya cher 'grel pa/ 'jam dpal gzhon nur gyur pa dang / 'phags pa spyan ras gzigs dbang phyug la phyag 'tshal lo/ /mdo sde 'di bshad pa la don rnam pa bcus gsal bar bya ste/ shes rab kyi ming dang / gleng gzhi dang / snyoms par 'jug pa dang / gleng slong ba dang / shes rab la 'jug pa dang / shes rab kyi mtshan nyid dang / shes rab kyi spyod yul dang /shes rab kyi yon tan dang / shes rab kyi 'bras bu dang / shes rab kyi gzungs so/ /'di ni shes rab kyi ming ste/ ming med na dngos po rig par mi rung bas dngos po la dmigs pa'i phyir ming smos so/ /de bas na 'phags pa shes rab kyi pha rol tu phyin pa'i snying po zhes bya'o/ / shes pa de la 'di skad ces bya ste/ 'jig rten pa dang / 'jig rten las 'das pa dang / bla na med pa'i shes pa'o/ /'jig rten gyi shes pa ni bslad pa ste/ mi rtag pa la rtag pa dang / mi gtsang ba la gtsang ba dang / sdug bsngal ba la bde ba dang / bdag med pa la bdag tu 'du shes pa'o/ / 'jig rten las 'das pa ni nyan thos dang rang sangs rgyas kyis gang zag la bdag med par shes pa ste/ 'dus byas mi rtag pa dang / 'dus byas sdug bsngal ba dang / gang zag la bdag med pa dang / zhi ba mya ngan las 'das par shes pa'o/ /bla na med pa'i shes pa ni de bzhin gshegs pas gang zag dang chos la bdag med par mkhyen pa ste/mtshan ma med pa dang / smon pa med pa dang / stong pa nyid du mkhyen pa'o/ /shes pa 'di ni bla na med pa'i shes pa la bya'o/ /'phags pa zhes bya ba ni shes pa 'dis mya ngan dang sdug bsngal las ring du bral ba'o/ /rab ces bya ba ni 'jig rten dang / 'jig rten las 'das pa mchog gi shes rab ste/bla na med pas shes rab bo/ /pha rol tu phyin pa zhes bya ba ni skye 'chi sdug bsngal ni tshul rol/ mya ngan las 'das pa ni pha rol/ sems can 'khor ba'i 'dod pas ded pa rnams ni bar na ste/ shes rab 'dis gru dang gzings byas te mya ngan las 'das pa'i 'gram du phyung bas pha rol tu phyin pa'o//snying po zhes bya ba ni shes rab kyi pha rol tu phyin pa'i le'u 'bum pa'i mdo kun 'di'i nang du 'dus pas snying po zhes kyang bya/ gcig tu na de bzhin gshegs pas bstan pa'i nang du don dam pa shes rab kyi pha rol tu phyin pa 'di nyid du mchog tu gsungs pas snying po zhes bya'o//'di ni gleng gzhi ma bstan na gnas gang du gang dag la bshad pa mi shes pas gang du gang dag la bshad pa'i gnas bstan par bya ba'i phyir gleng gzhi smos so/ /'di skad ces bya ba ni 'og nas 'byung ba'i don rnams la bya ste/ 'dis ni sgro btags pa dang / skur pa spangs so/ /bdag gis zhes bya ba ni mngon sum du thos par bstan te/ chos mngon sum du thos par zad kyi/ don rtogs pa ni ma yin no zhes bstan to/ /thos pa zhes bya ba ni nyan nus pa'i rna ba'i dbang po rnam par shes pas bzung ngo zhes bya ba'i tha tshig go/ /dus gcig na zhes bya ba ni lan cig na thos pa ste/snga dro'am phyi dro'i dus na'o/ /bcom ldan 'das zhes bya ba ni mthong ba dang bsgom pas spang bar bya ba'i nyon mongs pa spangs pa'i phyir ro/ /gang du bshad ce na/ de'i phyir rgyal po'i khab ces smos te/ grong khyer gyi khyad par de ni rgyal po'i khab ces bya ba'i phyir ro/ /grong khyer de yang shin tu rgya che bas gang na bzhugs gtol med de de bas na/bya rgod phung po'i ri zhes bya ba smos te/ ri de lhun bya rgod kyi dbyibs 'dra ba'i phyir ro/ /nyon mongs pa thams cad bcom pa'i phyir dge slong ngo / /phyir rgol ba rnams kyis mi phyed pa'i phyir dge 'dun te chen po ni grangs dang yon tan che ba'i phyir ro//bdag nyid bla na med pa'i byang chub tu 'god pa'i phyir byang chub sems dpa'o/ /sems can thams cad mi gnas pa'i mya ngan las 'das pa'i sa la 'jog pa'i phyir sems dpa' chen po'o/ /bzhugs pa ni spyod lam gyis bzhugs par rig par bya'o/ /de dag gis ni gang gi tshe/gang gis gang du/ gang dag la bshad pa bstan te/ gang gi tshe zhe na/ dus gcig gi tshe na bshad do/ /gang gis she na bcom ldan 'das kyis te/ des ni ston pa phun sum tshogs pa bstan to/ /gang du zhe na/ rgyal po'i khab bya rgod phung po'i ri la ste/ 'dis ni gnas phun sum tshogs pa bston to//gang dag ce na/ dge slong dang byang chub sems dpa' rnams la ste/ des ni 'khor phun sum tshogs pa bstan to/ 'di ni snyoms par 'jug pa ste/ snyoms par ma zhugs na brtag pa'i dngos po gsal bar mi rtogs pas brtag pa'i dngos po gsal bar rtogs par bya ba'i phyir snyoms par 'jug pa smos so//de'i tshe zhes bya ba ni gang gi tshe bcom ldan 'das rgyal po'i khab na bzhugs par gyur pa nyid kyi tshe/ ting nge 'dzin la sogs pa la snyoms par zhugs pa dang sbyar ro/ /ting nge 'dzin ji skad ces bya ba'i ting nge 'dzin la snyoms par zhugs she na/ de'i phyir chos kyi rnam grangs zab mo zhes bya ba smos te/de la rang dang spyi'i mtshan nyid 'dzin pas na chos so/ /chos de dag gi rnam grangs ni chos kyi phung po ste phung po lnga dang khams dang skye mched rnams la bya'o/ /zab mo ni skye ba dang / 'gag pa med pas rang bzhin gyis stong pa nyid kyi don la bya ste/ ting nge 'dzin la snyoms par zhugs na phung po la sogs pa chos rnams skye ba dang /'gag pa med par rtogs par 'gyur bas na/ ting nge 'dzin de'i ming ni chos kyi rnam grangs zab mo snang ba zhes bya ste/ snang ba zhes bya ba ni rtogs pa la bya'o/ /snyoms par zhugs zhes bya ba ni ting nge 'dzin la rgyun du sems rtse gcig tu gzhag ces bya ba'i tha tshig go//'di ni gleng slong ba bstan pa ste/ gleng ma bslangs na tshig 'chal cing mi 'brel bar 'gyur bas tshig 'brel cing mi 'chal bar bya ba'i phyir gleng slong ba smos so/ /yang de'i tshe zhes bya ba ni gang gi tshe bcom ldan 'das rgyal po'i khab tu snyoms par zhugs pa'i dus de nyid kyi tshe/ 'phags pa spyan ras gzigs kyi dbang po phung po lnga rang bzhin gyis stong par lta zhes bya bar sbyor ro//byang chub ces bya ba ni sems kyi dbyings de bzhin nyid yang dag pa'i mtha' la bya'o/ /de thob par bya ba'i phyir rtsol zhing 'bad pa ni byang chub sems dpa'o/ /sgrib pa gnyis ring du spangs pas 'phags pa'o/ /spyan ras gzigs zhes bya ba la/snying rje rnam pa gsum las mi dmigs pa'i tshul gyi thugs rjes sems can thams cad la gzigs pas na spyan ras gzigs so/ /sems can gyi sdug bsngal bsal bar bya ba la rang dbang brnyes pas na dbang po'o/ /shes rab ces bya ba la/ shes rab la rnam pa gsum te/ lnga phung gi rgya mo gcod pas na shes rab kyi ral gri'o//sdug bsngal gyi phung po 'joms pas na shes rab kyi rdo rje zhes kyang bya/ ma rig pa'i mun pa sel bas shes rab kyi sgron ma zhes kyang bya ste/ mdor na rnam pa thams cad du mi rtog pa'i shes rab kyis chos thams cad stong par rtogs pa la shes rab ces bya'o/ /shes rab des pha rol tu phyin par byed pas na pha rol tu phyin pa'o//pha rol tu phyin pa la rnam pa gsum ste/ 'jig rten gyi pha rol tu phyin pa dang / 'jig rten las 'das pa'i pha rol tu phyin pa dang / 'jig rten las 'das pa'i don dam pa'i pha rol tu phyin pa'o/ /de la 'jig rten gyi pha rol tu phyin pa ni lam rgyud gsum gyi sdug bsngal spang ba'o//'jig rten las 'das pa'i pha rol tu phyin pa ni skye shi'i 'khor ba spangs nas/ zhi ba phyogs gcig pa'i mya ngan las 'das pa thob pa'o/ /'jig rten las 'das pa'i don dam pa'i pha rol tu phyin pa ni khams gsum rmi lam dang 'dra bas mya ngan las 'das pa la yang 'dod pa med/sems can sgyu ma dang 'dra bas sangs rgyas kyi 'bras bu la yang re ba med de/ chos thams cad rang bzhin gyis mya ngan las 'das pas na mi gnas pa'i mya ngan las 'das pa thob pa ni don dam pa'i pha rol tu phyin pa thob pa'o/ /shes rab kyi pha rol tu phyin pa de yang gang zhe na/ de'i phyir zab mo spyod pa zhes bya ba smos te/zab mo ni skye ba dang 'gag pa med pa'o/ /spyod pa ni don la bya ste/ skye ba dang 'gag pa med pa la shes rab kyi pha rol tu phyin pa zhes bya'o/ /rnam par rtog pa ni skye ba dang 'gag pa med pa'i don la dmigs pa'o/ /skye ba dang 'gag pa med pa'i don la dmigs par ma zad kyi/ gzugs la sogs pa'i phung po lnga rnams la yang stong par lta'o/ /de la stong pa rnam pa gnyis te 'dus ma byas nam mkha' stong pa dang don dam pa la 'phags pa'i ye shes kyis gzung 'dzin dang bral ba so so rang gis rig pa stong pa ste/ phung po lnga po dag la gzung 'dzin dang bral ba'i stong par lta'o zhes bya ba'i don to//lta ba rnam pa gsum ste/ so so'i skye bo dang / mu stegs kyi lta ba dang / nyan thos dang rang sangs rgyas kyi lta ba dang / byang chub sems dpa' dang de bzhin gshegs pa'i lta ba'o/ /de la so so'i skye bo dang mu stegs kyis ni phung po lnga la srog dang / bdag dang gang zag tu lta/ nyan thos dang rang sangs rgyas kyis ni phung po lnga la kun 'byung ba dang sdug bsngal bar lta/byang chub sems dpa' dang de bzhin gshegs pas ni phung po lnga la rang bzhin gyis stong par lta zhing gzigs so/ /'di ni shes rab la 'jug pa ste/ 'jug pa'i thabs mi shes pas 'dri ba'i tshig bstan te/ de yang gang zhe na/ de nas zhes bya ba la sogs pa'o//ci'i phyir 'phags pa shA ri'i sras pos/ byang chub sems dpa' gzhan la ma dris kyi/ byang chub sems dpa' kun tu spyan ras gzigs kyi dbang po la dris she na/ de la 'di skad ces bya ste/ shes rab kyi pha rol tu phyin pa 'di bshad pa'i tshe/ 'khor brgya stong grangs med pa tshogs pa'i nang na byang chub sems dpa' de ni gtso bo yin pas/sangs rgyas kyi mthus 'phags pa shA ri'i bus bdag dang gzhan gyi the tshom bsal ba'i phyir/ de la 'og nas 'byung ba'i don rnams dris so/ /de nas zhes bya ba ni gang du bshad pa rnams kyi 'og tu zhes bya ba'i don to/ /sangs rgyas kyi mthus zhes bya ba ni de bzhin gshegs pa rnams kyi byin gyi rlabs zhes bya ba'i don to//shA ri'i bu zhes bya ba la/ yum shA ri ka zhes bya ba'i mtshan las dras te btags pas shA ri'i bu zhes bya'o/ /'di skad ces smras so zhes bya ba ni 'og nas 'byung ba'i don rnams dris so zhes bya ba'i don to//gang la la zhes bya ba ni gang su yang rung zhes bya ba'i tha tshig go/ /shes rab kyi pha rol tu phyin pa zhes bya ba la/ shes rab ni gnyis te/ kun rdzob shes pa'i shes rab dang / don dam shes pa'i shes rab bo/ /de la kun rdzob shes pa'i shes rab ni chos thams cad sgyu ma dang smig rgyu dang rmi lam lta bur shes pa'o//don dam pa shes pa'i shes rab ni chos thams cad nam mkha'i ngos bzhin du brjod du med cing bsam du med par shes pa ste/ shes rab des mi gnas pa'i mya ngan las 'das par phyin par byed pas na shes rab kyi pha rol tu phyin pa zhes bya ste/ don du na skye ba dang 'gag pa med pa'i don zab mo la shes rab kyi pha rol tu phyin pa zhes bya'o//spyod pa ni gang zag ste byang chub sems dpa'o/ /spyad pa ni chos te shes rab kyi pha rol tu phyin pa'o/ /ji ltar bslab par bya zhe na zhes bya ba ni mnyan pa dang bsam pa dang / bsgom pa'i sgo nas shes rab kyi pha rol tu phyin pa'i don la ji ltar 'jug par bya zhes bya ba'i don to//rnam pa gnyis su na spyod pa rnam pa bzhi la bslab par bya ste/ spyod pa rnam pa bzhi ni rnam par mi rtog pa'i ye shes kyi don dam pa la spyod pa dang / nyon mongs pa med pas byang chub kyi phyogs kyi chos rnams la spyod pa dang / zhen pa med par sems can yongs su smin pa la spyod pa dang /chags pa med par sangs rgyas kyi chos yongs su smin pa la spyod pa'o/ /ji ltar bslab par bya zhes bya ba ni spyod pa de bzhi la ji ltar spyod par bya zhes bya ba'i tha tshig go/ /'di ni shes rab kyi mtshan nyid de/ mtshan nyid mi shes na don khong du chud par mi nus pas byang chub sems dpa' sems dpa' chen po zhes bya ba la sogs pa la lan glan pa'i tshig gis bstan to//shA ri'i bu la 'di skad smras so zhes bya ba ni 'og nas 'byung ba 'di skad du ces smras so zhes bya ba'i tha tshig go/ /'di ltar brtag par bya zhes bya ba ni 'di ltar shes rab kyi pha rol tu phyin pa la spyad par bya zhes bya ba'i tha tshig go//ji ltar bslab par bya zhe na de'i phyir/ phung po lnga po de dag kyang rang bzhin gyis stong par lta'o zhes bya ba smos te/ phung po lnga ni gzugs dang / tshor ba dang / 'du shes dang / 'du byed dang / rnam par shes pa'o/ /rang bzhin gyis stong pa zhes bya ba la/ stong pa la rnam pa lnga ste/ snga nas med pa'i stong pa dang /zhig nas med pa'i stong pa dang / shin tu med pa'i stong pa dang / gcig la gcig med pa'i stong pa dang / ngo bo nyid med pa'i stong pa'o/ /de la 'o ma la zho med pa ni snga nas med pa'i stong pa'o/ /zho la 'o ma med pa ni zhi gnas med pa'i stong pa'o/ /ri bong gi mgo'i cha shas dma' ba la rwa med pa ni shin tu med pa'i stong pa'o//ba lang rta la med pa ni gcig la gcig med pa'i stong pa'o/ /chos thams cad rang bzhin med pa ni ngo bo nyid med pa'i stong pa ste/ stong pa rnam pa lnga yod pa las phung po lnga po rnams ni ngo bo nyid med pa'i stong pas stong par brtag par bya'o zhes pa'i don to//gzugs stong pa zhes bya ba la/ gzugs zhes bya ba ni sa dang chu dang me dang rlung la bya'o/ /stong pa zhes bya ba ni don dam pa chos kyi dbyings stong pa nyid kyi mtshan nyid pas gzugs de dag stong pa nyid de/ stong pa nyid kyi mtshan nyid de ni gnyis su med pa grangs dang bgrang ba las 'das pa/ bdag dang bdag gir lta ba spangs pa/ gzung ba dang 'dzin pa dang bral ba yin pas na mi gnyis pa de bzhin nyid kyi mtshan nyid do/ /chos so cog kyang stong pa'i mtshan nyid du ma 'dus pa med pas/ sa chu me rlung bzhi yang mtshan nyid med pa ste/ dngos po med pa/ bdag med pa/ gtso bo med pa ste/rdul du bshig nas stong pa nyid du gyur pa ni ma yin gyi/ ngo bo nyid kyis stong pa yin pas na/ gzugs stong pa zhes bya'o/ /gzugs ngo bo nyid kyis stong pa nyid gang yin pa de nyid don dam pa'i stong pa de nyid yin te/ gzugs ngo bo nyid kyis stong pa de las don dam pa'i stong pa gud na med pas na stong pa nyid kyang gzugs zhes bya ste/don dam pa'i stong pa de nyid gzugs kyi stong pa'i rang bzhin zhes bya ba'i tha tshig go/ /gzugs kyi stong pa don dam pa'i stong pa yin par ci mngon zhe na/ 'phags pa blo gros mi zad pas bstan pa las kyang / byang chub sems dpa' chos kyi dbyings la 'jug pa'i ye shes kyi chos kyi dbyings ni sa dang chu dang me dang rlung gi khams yin yang chos kyi dbyings sra ba dang /rlan pa dang / dro ba dang / g.yo ba'i mtshan nyid ni ma yin no/ /chos kyi dbyings dang chos thams cad mtshungs so/ /de ci'i phyir zhe na/ stong pa nyid du mtshungs pas na mtshungs zhes bshad de/ de bas na gzugs stong pa nyid don dam pa'i stong pa nyid du rig par bya'o//rnam pa gnyis su na gzugs stong pa zhes bya ba la/ gzugs rnam pa gsum ste/ yongs su brtags pa'i gzugs dang / rnam par brtags pa'i gzugs dang / chos nyid kyi gzugs so/ /de la byis pa so so'i skye bo rnams kyis sa la sogs pa sra ba'i mtshan nyid du brtags pa ni yongs su brtags pa'i gzugs so//don dang ldan pa'i rnam par shes pa'i spyod yul gyi gzugs ni rnam par brtags pa'i gzugs so/ /yongs su brtags pa'i gzugs dang / rnam par brtags pa'i gzugs dang bral ba de bzhin nyid kyi mtshan nyid ni chos nyid kyi gzugs te/chos nyid kyi gzugs de la yongs su brtags pa'i gzugs dang / rnam par brtags pa'i gzugs med pas na gzugs stong pa'o zhes bya'o/ /chos nyid kyi gzugs stong pa nyid de rnam par brtags pa'i gzugs dang / kun brtags kyi gzugs las logs shig na yod pa yin nam snyam pa la stong pa nyid gzugs zhes smos te/chos nyid kyi gzugs stong pa de nyid rnam par brtags pa dang / kun brtags pa'i gzugs dang mtshan nyid gcig ces bya ba'i don to/ /gzugs gang yin pa de nyid stong pa nyid do/ /stong pa nyid kyang gzugs so//gzugs las stong pa nyid gud na med do zhes bya ba la/ gzugs kyi mtshan nyid kyi stong pa dang / don dam pa'i stong pa gnyis tha mi dad de gcig pas na gzugs las stong pa nyid gud na med ces bya ste/ cis tha mi dad ce na/ bsnan pa dang / phri ba dang bral ba dang / mtha' gnyis spangs pa'i ngo bo nyid stong pa'i mtshan nyid du tha mi dad pa'i phyir ro/ /gang gzugs de nyid stong pa zhes bya ba la/ gzugs kyi mtshan nyid gang yin pa stong pa nyid kyi mtshan nyid kyang de yin no zhes bya ba'i tha tshig go/ /gang stong pa nyid de gzugs so zhes bya ba ni stong pa nyid kyi mtshan nyid gang yin pa gzugs kyi mtshan nyid kyang de yin no zhes bya ba'i tha tshig go//des ni 'di skad bstan pa yin te/ sems can ma rabs byis par gyur pa rnams thog ma med pa tshun chad skye shi'i 'khor ba'i nang na lam rgyud lngar 'khor te/ phung po lnga ni 'dris/ khams bco brgyad la ni goms pas de dag la chags zhing shen nas dngos po dang gong bur 'dzin pa la/de bzhin gshegs pas ngo bo nyid kyis stong par bstan pas gzugs kyi mtshan nyid ni stong par shigs na/ gnyen po stong pa gcig gud na yod par 'dzin pa ni nyan thos zhi ba phyogs gcig gi mya ngan las 'das pa la chags pa'o//'di lta ste/ gang gzugs de stong pa nyid ces bya ba ni gang gzugs la chags pas 'khor ba'i mur ltung ba dang 'bral ba'i gnyen por gsungs so/ /gang stong pa nyid de gzugs so zhes bya ba ni nyan thos gang zag la bdag med par chud nas gzugs stong par bshig pa'i rjes su stong pa'i mtshan ma skyes te mya ngan las 'das pa'i mur ltung ba'i gnyen por gsungs so//gzugs stong pa nyid de ni med pas spong bar 'gyur ba yin na/ de la gzugs la mtshan mar 'dzin pa spang ba'i phyir stong pa nyid bstan na stong pa la mtshan mar 'dzin pa'i sems gcig skyes pas stong pa dang gzugs gnyis rjes su spong ste/mtshan ma ni mtshan ma gang la dmigs pas kyang de kho na rtogs par bya ba la sgrib par 'gyur bas stong pa nyid la dngos por 'dzin pa yang mtshan ma yin te/ de yang dper bya na mi mig rab rib can cig mgron du 'gro ba las lam g.yas rol gyi 'gram na ni tsher ma dang dong yod/lam g.yon rol gyi 'gram na ni ngam grog dang g.yang sa yod de/ mi mig skyon med pa zhig gis tsher ma dang dong yod do zhes byas na ni ngam grog dang g.yang sa'i mur ltung / ngam grog dang g.yang sa yod do zhes byas na ni tsher ma dang dong gi mur ltung ba las/ lam dbus ma bde ba nyid ci la yang mi thogs pa bstan te/rang gi gnas su phyin par byas so/ /dpe de dang 'dra ste/ rab rib can zhes bya ba ni so so'i skye bo nyon mongs pa'i sgrib pas bsgribs pa dang / nyan thos shes bya'i sgrib pas bsgribs pa la bya'o/ /tsher ma dang dong ni gang zag gzugs la sogs pa'i mtshan ma la chags pa ste 'khor ba'i mur ltung ba'o//ngam grog dang g.yang sa ni nyan thos mya ngan 'das pa la chags pa ste stong pa'i mur ltung ba'o/ /mig can gyi skyes bu ni de bzhin gshegs pa ste/ shes rab kyi spyan gsal bas gzugs ngo bo nyid kyis stong par gzigs pas na skye shi sgyu ma dang 'dra ba'i phyir 'khor ba yang mi spong /khams gsum rmi lam dang 'dra bas na mya ngan las 'das pa'i yon tan yang mi tshol te/ lam dbu ma mtshan ma med pa dang / smon pa med pa dang / stong pa nyid kyi lam du zhugs pas na mi gnas pa'i mya ngan las 'das pa'i gnas su phyin to/ /de bas na mtshan mar 'dzin pa ni g.yang sa ste skyon yin no zhes bstan pa'i phyir yod pa dang /med pa gang yang mtshan mar mi gzung bar bya'o/ /de bzhin du tshor ba dang / 'du shes dang / 'du byed dang / rnam par shes pa rnams stong pa'o zhes bya ba la de skad ces bya ste/ gong du phung po lnga po stong par lta zhes bya ba la/ gzugs kyi stong pa smos te/ gzugs stong par bstan pa dang / stong pa dang gzugs tha mi dad par bstan pa'i tshig zur smos pa de bshad pa rnam pa gsum dang sbyar bas rnam pa drug tu 'gyur ba la/ bshad pa rnam pa gsum ni dang por rang bzhin gyis stong ste gcig par bshad pa dang / bar du btags pa rnam pa gsum dang sbyar te ro gcig par bshad pa dang /tha mar 'khor ba'i so so skye bo dngos po'i mtha' la gnas pa dang / nyan thos mya ngan las 'das pa stong pa'i mtha' la gnas pa de gnyis spangs te/ dbu ma'i lam du 'jug pa bsgrubs te/ gsum po re re la yang gzugs stong pa stong pa nyid gzugs zhes pa phrugs re rer sbyar ba dang drug tu 'gyur ba bzhin du phung po lnga'am bzhi la yang tshul 'di bshad do//phan tshun stong pa rnam pa lngas bshad pa de bzhin du lhag ma tshor ba dang / 'du shes dang 'du byed dang rnam par shes pa rnams la yang phan tshun stong pa rnam pa lngas bshad par bya'o/ /chos de rnams ni rang gi sems kyi rgyud yin la/sems ni gzugs med pa stong pa nyid kyi mtshan nyid du bag chags rnam par smin nas gzugs kyi phung po de la brten to/ /de yang dper na snod stong pa dang 'dra ste snod la brten to/ /snod de bshig na brten pa'i gnas med de/ stong pa chen po dang tha mi dad do/ /de dang 'dra ste 'di gzugs kyi phung po stong par brtags pas sems kyi phung po de yang gnas med de/don dam pa chos kyi dbyings dang tha mi dad do/ /phung po lnga rang bzhin gyis stong pa yin par ci mngon zhe na/ de yang 'phags pa blo gros mi zad pas bstan pa las bshad pa/ gzugs kyi phung po ni dbu ba'i gong bu dang 'dra ste/gzung zhing bcad mi bzod pa'o/ /tshor ba'i phung po ni chu'i chu bur dang 'dra ste/ skad cig las mi rtag pa'o/ /'du shes kyi phung po ni smig rgyu dang 'dra ste/ sred pa'i skom pas ni nor bar 'dzin pa'i phyir ro/ /'du byed kyi phung po ni chu skyes kyi ldum bu dang 'dra ste/ bshig na snying po med pa'o//rnam par shes pa'i phung po ni rmi lam dang 'dra ste/ 'khrul par 'dzin pa'o/ /de bas na phung po lnga ni bdag ma yin/ gang zag ma yin/ sems can ma yin/ srog ma yin/ gso ba ma yin/ skyes bu ma yin/ phung po lnga'i rang bzhin gyis 'di lta bu ste/ bdag dang bdag gis stong pa'o//ma skyes pa'o/ /ma byung ba'o/ /med pa'o/ /nam mkha'i dbyings so/ /'dus ma byas so/ /rang bzhin gyis mya ngan las 'das pa'o zhes bshad do/ /de ltar phyi rol gyi chen po bzhi stong par shes pas gzugs stong pa yin no/ /nang ni sems bzhi stong par shes pas ni stong pas stong pa zhes bya ste/gzugs dang stong pa gcig pa'i mtshan ma spang bas/ gzung ba dang 'dzin pa gnyis dang bral bas rnam par grol ba'i sku zhes bya'o/ /'di ni shes rab kyi spyod yul te/ spyod yul mi shes na bsgom du mi rung bas rnal 'byor bsgom du gzhug pa'i phyir bshad do/ /shA ri'i bu de ltar zhes bya ba ni gong du bshad pa ltar na'o//chos thams cad ni stong pa nyid ces bya ba la/ chos thams cad ces bya ba ni phung po lnga la brten pa ste/ dbang po lnga dang yul dang / khams dang / skye mched dang / rten cing 'brel par 'byung ba la sogs pa la bya ste/ phung po lnga po de stong par rtogs pas na de'i yan lag rnams kyang stong pa'i mtshan nyid du rig par bya'o//dper na lus kyi gtso bo stong par rtogs pas na rkang lag la sogs pa zhar gyis rig par bya'o/ /mtshan nyid med pa zhes bya ba la/ chos thams cad ni mtshan ma dang mtshan ma las 'das pas na mtshan nyid med pa zhes bya'o/ / ma skyes pa/ ma 'gags pa zhes bya ba la/ snga na med pa las phyis yod pa ni skyes pa zhes bya'o/ /sngon yod pa las phyis med par gyur pa ni 'gags pa zhes bya'o/ /sangs rgyas kyi ngo bo nyid chos kyi dbyings don dam pa stong pa nyid 'di ni thog ma'i mtha' med pas na tha ma'i mtha' mi rnyed de/ de'i phyir ma skyes pa dang /ma 'gags pa zhes bya'o/ /sems can lam rgyud lnga'i nang na 'khor ba'i tshe yang / sangs rgyas kyi ngo bo nyid la dri ma can du gyur pa med pas rnam par dag pa zhes bya'o/ /bla na med pa yang dag par rdzogs pa'i byang chub tu sangs rgyas kyang sangs rgyas kyi ngo bo nyid las lhag par rnam par dag pa med pas/rnam par dag pa med pa zhes bya'o/ /grog ma dang sbur bu'i lus su gyur kyang sangs rgyas kyi ngo bo nyid la chung ngur gyur pa med pas bri ba med pa zhes bya'o/ /chos kyi skur gyur kyang 'phel ba med pas na gang ba med pa ste/ ci'i phyir zhe na/ bsam zhing brjod pa las 'das te dpag pas mi khyab pa'i phyir ro//rnam pa gnyis su na chos kyi dbyings de las dang nyon mongs pas ma skyes pas na ma skyes pa'o/ /ma skyes na 'jig pa med pas na ma 'gags pa'o/ /chos kyi dbyings rang bzhin gyis rnam par dag pas na rnam par dag pa med pa'i phyir rnam par dag pa med pa'o//rang bzhin gyis rnam par dag pa yin yang / glo bur gyi nyon mongs pa rnam par dag par mi 'gyur ba yang ma yin pas na rnam par dag pa'o/ /kun nas nyon mongs pa'i phyogs spangs pas na chos kyi dbyings la bri ba med pas na bri ba med pa'o/ /rnam par byang ba 'phel ba'i dus na chos kyi dbyings la 'phel ba med pas na 'phel ba med pa'o//gong du phung po lnga so sor phye ste stong par bstan pa las yang sems la mtshan mar rtog pa phung po lnga stong pa yin na/ stong pa la ni dbyer med pas gzugs la sogs pa'i ming du yang gdags pa mi rigs so zhes ming la rtog pa'i mtshan ma bsal bar bya ba'i phyir/de ltar na stong pa nyid ni gzugs ma yin/ tshor ba ma yin zhes bya ba la sogs pa smos so/ /phung po lnga ngo bo nyid kyis stong pa ste/ ming dang gdags pa las 'das pa dbyer med pa'i mtshan nyid yin pas/ gzugs la sogs par btags pa'i mtshan mar yang yod pa ma yin pa'i phyir gzugs ma yin/tshor ba ma yin zhes bya ste/ gzugs med/ tshor ba med ces bya ba'i tha tshig go/ /yang na stong pa nyid la ming du gzugs zhes kyang mi brjod/ tshor ba zhes kyang mi brjod ces bya ba'i tha tshig go/ /mig ma yin/ rna ba ma min/ sna ma yin/ lce ma yin/ lus ma yin/ yid ma yin zhes bya ba la/ de la 'di skad ces bya ste/ 'di ni dbang po drug ste/ dbang po drug kyang phung po lnga la brten pas phung po lnga med na/ dbang po drug kyang phung po lnga las gzhan ma yin pa'i phyir med pa zhes bya'o/ /gzugs ma yin/sgra ma yin/ dri ma yin/ ro ma yin/ reg ma yin/ chos ma yin zhes bya ba la/ 'di skad ces bya ste/ 'di ni yul drug ste/ ma rig pa'i dbang las bag chags rnam par smin te/ 'dus byas kyi 'bras bur grub pa la bslad pa'i sems kyis yod par 'dzin te/ don dam par ni ngo bo nyid kyis stong pa yin pa'i phyir med ces bya'o//mig gi khams ma yin pa nas yid kyi khams ma yin pa zhes bya ba la/ 'di skad ces bya ste/ 'di ni khams bco brgyad de nang gi dbang po drug med pas na rnam par shes pa drug gi rten med pa'i phyir/ phyi'i yul drug med pas na rnam par shes pa drug gi gnas med de/'ba' zhig mi 'byung bas rnam par shes pa drug kyang med pa yin pa'i phyir na/ de'i phyir khams bco brgyad kyang med pa zhes bya'o/ /ma rig pa ma yin/ ma rig pa zad pa ma yin/ rga shi ma yin/ rga shi zad pa ma yin zhes bya ba la/ 'di skad ces bya ste/ 'di ni rang sangs rgyas kyi theg pa la zhugs pa'i spyod yul te/ma rig pa glengs nas rga shi'i bar du bstan pa ni mdor gsungs te/ ma rig pa'i rkyen gyis 'du byed nas/ rnam par shes pa/ ming dang gzugs/ skye mched drug /reg pa/ tshor ba/ sred pa/ len pa/ srid pa/ skye ba/ rga shi'i bar du blta'o/ /ma rig pa zhes bya ba ni bdag tu lta ba las 'byung ngo / /bdag tu 'dzin pa ni dngos po med pa las 'byung ste/ de bas na ma rig pa yang dngos po med pa'o/ /de yang dper na/ khyim mun nag yun ring por 'dug pa la/ sgron ma gcig byung bas skad cig tu med par gyur te/med pa de'i dngos por yang mi snang ngo / /'di lta ste/ sems can thog ma med pa tshun chad kyi ma rig pa'i mun pa stug po la/ shes rab kyi sgron mas brtags pas skad cig tu med par 'gyur ro/ /med pa de'i dngos po yang mi snang ngo / /rig pa zhes bya ba yang ma rig pa'i zla las btags pa tsam du zad de/ma rig pa med pas rig pa'i ming yang mi 'grub pas na ma rig pa yang ma yin/ ma rig pa zad pa yang ma yin zhes bya'o/ /ma rig pa'i dngos po nyid med pas na ma rig pa med pa'o/ /med pa'i dngos po ltar mi snang bas na zad pa yang med ces bya'o/ sdug bsngal ba dang /kun 'byung ba dang / 'gog pa dang lam ma yin zhes bya ba la/ 'di skad ces bya ste/ 'di ni nyan thos kyi theg pa la zhugs pa'i spyod yul te/ bden pa bzhi zhes bya'o/ /bden pa la rnam pa gsum ste/ 'jig rten dang / 'jig rten las 'das pa dang / don dam pa'i 'jig rten las 'das pa'i bden pa'o//de la 'jig rten gyi bden pa ni phung po lnga la kun 'byung ba dang / rga shi'i sdug bsngal du shes pa'o/ /'jig rten las 'das pa'i bden pa ni sdug bsngal dang / kun 'byung dang / 'gog pa dang / lam du shes pa'o/ 'jig rten las 'das pa 'phags pa'i bden pa ni phung po lnga la skye ba med par shes pa ni/sdug bsngal gyi bden pa shes pa'o/ /gang gis srid pa 'joms pa ni kun 'byung gi bden pa shes pa'o/ /ma rig pa dang / bag la nyal ba rnams ngo bo nyid kyis med par shes pa ni 'gog pa'i bden pa shes pa'o/ /chos mnyam pa nyid du ring bas thams cad la sgro mi 'dogs pa de ni lam gyi bden pa shes pa zhes bya'o//de ltar bden pa rnams kyang don dam par na ngo bo nyid kyis med pas na med pa zhes bya'o/ /bden pa rnams ngo bo nyid kyi sa med par ci mngon zhe na/ 'phags pa blo gros mi zad pa'i mdo las bshad pa/byang chub sems dpa' bden pa la mkhas pa gang zhe na/ phung po 'di ni sdug bsngal ba ste/ gang gis sdug bsngal gyi mtshan ma stong pa nyid du ji lta ba bzhin du rtogs pa de ni sdug bsngal 'phags pa'i bden pa zhes bya'o/ /gang phung po lnga sred pa'i rgyu dang lta ba'i rgyu ni kun 'byung ste/ gang gis sred pa'i rgyu dang /lta ba'i rgyu de dag mi len cing sgro mi 'dogs pa de ni kun 'byung 'phags pa'i bden pa zhes bya'o/ /gang phung po sngon gyi mtha' yang mi 'byung / phyi ma'i mthar yang mi 'pho/ /da ltar yang mi gnas par shes pa ni 'gog pa 'phags pa'i bden pa zhes bya'o/ /gang mi gnyis pa'i ye shes la mnyam par bzhag nas bden pa bzhi stong pa nyid du shes pa de ni/lam 'phags pa'i bden pa zhes bshad do/ /ye shes ma yin thob pa ma yin/ ma thob pa yang ma yin zhes bya ba la/ de la 'di skad ces bya ste/ 'di ni byang chub sems dpa'i theg pa chen po la zhugs pa'i spyod yul lo//de nyon mongs pa'i sgrib pa dang / shes bya'i sgrib pa gnyis spangs pa'i ye shes gnyis su med pa'i ye shes zhes bya ste/ don dam par ye shes ma yin pas na ye shes de med ces bya'o/ /thob ces bya ba ni sngon med pa las thob pa'o/ /thob pa yod na stong pa yang yod la/ 'bras bu yod na 'jig par 'gyur bas na sangs rgyas kyi ngo bo nyid ni/sems can kun la mnyam par gnas pa de ni thog mar yang stong / tha mar yang thob pa med de/ sa bcu'i rim pa smos pa yang kun gzhi rnam par shes pa la ma rig pa'i bag chags rim gyis sbyang ba tsam du zad de/ ma rig pa'i bag chags byang nas sangs rgyas kyi ye shes me long dang 'dra ba'i chos kyi dbyings la ni thob pa dang /ma thob pa zhes gdags su med pas na thob pa yang med/ ma thob pa yang med ces bya'o/ /de bas na shes rab kyi pha rol tu phyin pa bdun brgya pa las kyang / mtshan ma thams cad la mi spyod pa de ni shes rab kyi pha rol tu phyin pa la spyod pa'o/ / ci yang thob pa med pa ni bla na med pa'i byang chub thob pa'o zhes gsungs so/ /'di ni shes rab kyi pha rol tu phyin pa'i yon tan te/ rnal 'byor pa bla na med pa'i byang chub ni stong pa nyid kyi rang bzhin yin mod kyi/ 'on kyang pha rol tu phyin pa'i 'bras bu med pa yang ma yin te/ yod do zhes spro ba bskyed pa'i phyir yon tan bshad do//shA ri'i bu de lta bas na byang chub sems dpa' thob pa med pas shes rab kyi pha rol tu phyin pa la gnas shing brten te zhes bya ba la/ 'di skad ces bya ste/ de lta bas na zhes bya ba ni gong du bshad pa ltar na'o/ /thob pa med pa zhes bya ba ni bla na med pa yang dag par rdzogs pa'i byang chub kyi 'bras bu thob pa med pa'i phyir ro//shes rab kyi pha rol tu phyin pa la gnas shing brten te zhes bya ba ni mtshan ma thams cad la mi gnas so/ /sems kyi sgrib pa med ces bya ba ni nang gi bag chags dang / phyi'i mtshan ma thams cad spangs te med pa'i phyir ro/ /skrag pa med pa zhes bya ba la/ de ltar sems kyi sgrib pa med pas na 'khor ba dang ngan song du skye ba'i 'jigs pa dang /chos zab mo skye ba dang 'gag pa med pa'i don la 'jigs pa med pa'i phyir ro/ /phyin ci log las shin tu 'das pa zhes bya ba la/ kun gzhi rnam par shes pa la ma rig pa'i bag chags kyi phyi rol yul dngos po med pa la rnam pa sna tshogs su lta ba ni phyin ci log ces bya ste/de la gang zag dang chos la bdag med par chud nas nyon mongs pa dang / shes bya'i sgrib pa spangs nas phyin ci log las 'das pa'o/ /mya ngan las 'das par phyin zhes bya ba la/ ma rig pa ni nyon mongs pa kun gyi gzhi ste/ rten 'brel yan lag bcu gnyis kyi nang na yang 'khor ba'i rgyur 'gyur bas na mtha' nas sdug bsngal gyi phung po 'ba' zhig kyang 'dus par 'gyur ro zhes gsungs so/ /ma rig pa med par shes na sdug bsngal ba dang / nyon mongs pa kun kyang med par 'gyur ro/ /de bas na mya ngan las 'das par phyin zhes bya'o//'di ni shes rab kyi pha rol tu phyin pa'i 'bras bu ste/ 'bras bu med na spyad pa yang don med pa'i phyir 'bras bu bshad do/ /dus gsum du rnam par bzhugs pa'i sangs rgyas thams cad shes rab kyi pha rol tu phyin pa la brten nas zhes bya ba la/ 'di skad ces bya ste/ dus 'di 'das pa dang /ma 'ongs pa dang / da ltar gyi dus tha dad pa rnams so/ /bzhugs pa ni dus gsum du gshegs pa rnams so/ /sangs rgyas zhes bya ba ni khams gsum gyi 'khor ba'i bslad pa las shes rab kyi mig thob pas sangs rgyas zhes bya ste/ don du na chos kyi skur gyur nas shes rab dang /ye shes dang / ting nge 'dzin dang / mtshan dang / dpe byad dang / ma 'dres pa'i chos la sogs pa ste/ yon tan grangs med pa phun sum tshogs pa de ni sangs rgyas zhes bya'o/ /shes rab kyi pha rol tu phyin pa la brten ces bya ba ni mtshan ma thams cad med pa la gnas pas so//dus gsum gyi sangs rgyas thams cad kyang mtshungs par shes rab kyi pha rol tu phyin pa las byung bas na/ shes rab kyi pha rol tu phyin pa 'di sangs rgyas thams cad kyi yum zhes bya'o/ /bla na med pa yang dag par rdzogs pa'i byang chub tu sangs rgyas so zhes bya ba ni/ 'di skad ces bya ste/ bla na med pa zhes bya ba ni khams gsum las 'das pa'o/ /yang dag par rdzogs pa zhes bya ba ni/ de bzhin nyid ma nor ba'i chos kyi mthar thug pa'o/ /byang chub ces bya ba ni de bzhin nyid chos kyi dbyings so/ /sangs rgyas so zhes bya ba ni shes rab kyi pha rol tu phyin pa la rnam par mi rtog pa'i tshul gyis spyad nas mngon par sangs rgyas te/'das pa'i sangs rgyas rnams dang yang mi 'dra ba med pa dang / yon tan mtshungs pa la bya'o/ /'di ni shes rab kyi gzungs te/ rnam par mi ltung bar bya ba'i phyir smos so/ /de bas na bden te ma nor ba zhes bya ba la/ 'di skad ces bya ste/tshig gis smra ba med pas smon pa med pas de ngag gir bden pa'o/ /lus kyi spyod pa med pas mtshan ma med pa ste/ lus kyi bden pa'o/ /sems kyi bsam pa med pas stong pa nyid las yid kyi bden pa ste/ de ltar 'phags pa'i rnam par thar pa'i sgo gsum dang yang mi 'gal la/ shes rab kyi pha rol tu phyin pas sems kyi mtshan ma thams cad bsal nas don dam par cig char 'jug pa'i sgo rnam par mi rtog pa'i don dang mthun pas na bden te ma nor ba'o/ /nang gi rnam par shes pa'i bag chags kun sel bas na shes rab kyi pha rol tu phyin pa'i sngags so/ /phyi'i mtshan ma thams cad ngo bo nyid kyis shes shing sel bas rig pa chen po'i sngags so//phyi nang gnyis ka'i mtshan ma thams cad sel bas bla na med pa'i sngags so/ /sangs rgyas kyi 'bras bu grub par byed pas na mi mnyam pa dang mnyam pa'i sngags so/ /ngan song thams cad spong zhing sems can gyi don byed pas na/ sdug bsngal thams cad zhi bar byed pa'i sngags so/ /shes par bya ste zhes bya ba la/ 'di skad ces bya ste/ shes rab kyi pha rol tu phyin pa 'di sangs rgyas su phyin par byed pa'i rgyur shes par bya zhes bya ba'i tha tshig go/ /shes rab kyi pha rol tu phyin pa'i sngags smras pa/ tad ya thA/ ga te ga te/ pA ra ga te/pA ra saM ga te/ bo d+hi swA hA/ /shes rab kyi pha rol tu phyin pa'i sngags 'di ni/ 'jig rten dang 'jig rten las 'das pa'i bsod nams kyi rgyur 'gyur te/ 'jig rten pa'i bsod nams ni don gyis nyon mongs pa dang / bdud dang / bgegs kyis mi tshugs shing bsrung nus pa'o/ /'jig rten las 'das pa'i bsod nams ni gzungs 'di la brten pas shes rab dang ye shes kyi rgyur 'gyur ba'o//de nas bcom ldan 'das kyis kyang ting nge 'dzin de las bzhengs te zhes bya ba la/ 'di skad ces bya ste/ de bzhin gshegs pa nyag gcig ma gtogs par/ shes rab kyi pha rol tu phyin pa'i don bshad cing mnyam par gzhan gyis mi nus pas/'phags pa spyan ras gzigs dbang pos bshad pa dang / shA ri'i bus mnyan pa yang ting nge 'dzin de'i byin rlabs yin te/ bshad pa dang / mnyan pa'i bya ba byas pas na ting nge 'dzin de las bzhengs so/ /rgyu rnam par dag pa dang / 'bras bu rnam par dag pa la gzigs nas/bcom ldan 'das kyis 'phags pa spyan ras gzigs kyi dbang po la legs so zhes bya ba byin no/ /sangs rgyas kyis rgyu dang 'bras bu rnam par dag pa la gzigs nas legs so zhes bya ba byin nas/ lha dang mi la sogs pa yang / bcom ldan 'das kyis gsungs pa la mngon par dga' ste rjes su yi rang ngo /