CLOSE WINDOW

D3819
བོད་ཡིག

bod kyi zhu chen gyi lo tsA ba ban de nam mkha' dang ye shes snying po la sogs pas bsgyur cing zhus te gtan la phab pa'o//[ ]@##/ /rgya gar skad du/ Ar+ya pradz+nyA pA ra mi tA hr-i da ya byA khyA/ bod skad du/ 'phags pa shes rab kyi pha rol tu phyin pa'i snying po'i rnam par bshad pa/bcom ldan 'das ma shes rab kyi pha rol tu phyin ma la phyag 'tshal lo/ /de la bcom ldan 'das ma shes rab kyi pha rol tu phyin pa'i snying po'o zhes bya ba ni mdo'i mtshan nyid brjod pas na bcom ldan 'das ma shes rab kyi pha rol tu phyin pa'i snying po zhes bya'o//thog ma kho nar ming ma btags na mdo gang yin gtol med pa'i phyir ming smos so/ /ming btags pa 'ba' zhig tu ma zad kyi/ shes rab kyi pha rol tu phyin pa'i snying po 'di'i mdo thams cad kyang 'dir ma 'dus pa med pas mdo'i yang mdo zhes bya'o//de la bcom zhes bya ba ni bdud bzhi bcom pa ste/ phung po'i bdud la sogs pa shes rab kyi pha rol tu phyin pa'i don 'dis bdud btsal du mi rnyed cing bdud thams cad mi gnas pa'i phyir bcom pa'o/ /ldan zhes bya ba ni legs pa drug dang ldan pa ste/ mkhyen pa'i yon tan thams cad kyang shes rab kyi pha rol tu phyin pa'i byin gyi rlabs las byung bas na ldan pa'o//'das zhes bya ba ni mi gnas pa'i mya ngan las 'das pa ste/ shes rab kyi pha rol tu phyin pa'i don gyi sems dang yid dang rnam par shes pa thams cad bzlog ste/bag chags thams cad dang bral bas na 'das zhes bya'o//ma zhes bya ba ni dus gsum gyi sangs rgyas thams cad kyang shes rab kyi pha rol tu phyin pa'i don spyad pa las byung / shes rab kyi pha rol tu phyin pa'i don gyis bskyed pas na shes rab kyi pha rol tu phyin pa ni sangs rgyas thams cad kyi yum du gyur pas na ma zhes bya'o/ / shes rab ces bya ba ni thos pa dang / bsams pa dang / bsgoms pa'i shes rab rnam pa gsum gyis yang dag pa ji lta ba bzhin du shes pas na shes rab ces bya'o//pha rol tu phyin pa zhes bya ba ni shes rab kyis chos gang yang rjes su ma mthong ba'i phyir mtshan ma dang mtha' gnyis dang skye shi las 'das pa'i phyir pha rol tu phyin pa zhes bya'o//snying po zhes bya ba ni shes rab kyi pha rol tu phyin pa stong phrag brgya pa la sogs pa'i nang nas zab mo mchog thams cad mdo nyung ngu 'di'i nang du ma 'dus pa med pas na snying po zhes bya'o/ /bcom ldan 'das ma shes rab kyi pha rol tu phyin pa la phyag 'tshal lo zhes pa ni shes rab kyi pha rol tu phyin pa 'bum pa'i mdo las kyang shes rab kyi pha rol tu phyin pa la phyag 'tshal na/dus gsum gyi sangs rgyas thams cad la phyag 'tshal ba dang 'dra'o zhes 'byung ba'i phyir bsod nams kyi tshogs bsags pa dang / mchod pa'i phyir phyag 'tshal ba'o/ /da ni gzhung ste/ shes rab kyi pha rol tu phyin pa 'di la mgo mjug tu don rnam pa bdun gyis gsal bar bshad de/ de yang gang zhe na/ gleng gzhi dang / shes rab la 'jug pa dang / stong pa nyid kyi mtshan nyid dang / shes rab kyi spyod yul dang / shes rab kyi yon tan dang / shes rab kyi 'bras bu dang / shes rab kyi gzungs so/ /de la gleng gzhi ni 'di skad bdag gis thos pa zhes bya ba nas/ thabs cig tu bzhugs te zhes bya ba'i bar du'o/ /shes rab la 'jug pa ni phung po lnga yang rang bzhin gyis stong par blta'o zhes bya ba'i bar du'o//stong pa nyid kyi mtshan nyid ni thob pa yang ma yin/ ma thob pa yang ma yin zhes bya ba'i bar du'o/ /shes rab kyi spyod yul ni thob pa med par shes rab kyi pha rol tu phyin pa la gnas shing spyod do zhes bya ba'i bar du'o/ /shes rab kyi yon tan ni mya ngan las 'das pa'i mthar phyin to zhes bya ba'i bar du'o//shes rab kyi 'bras bu ni byang chub tu mngon par rdzogs par sangs rgyas so zhes bya ba'i bar du'o/ /shes rab kyi gzungs ni mjug gi sngags yan chad do/ /da ni gleng gzhi'i don bshad de/ 'di skad bdag gis thos pa zhes bya ba ni theg pa chen po'i mdo sde thams cad 'phags pa 'jam dpal gyis gsan te/bsdus pas na bdag gis thos pa zhes bya'o/ /de la 'di skad ces bya ba ni shes rab kyi snying po'i rnam grangs ji snyed brjod pa nyid do/ /bdag gis thos pa zhes bya ba ni bcom ldan 'das kyi zhabs kyi drung nas mnyan te/ dpal gyi mgur nas gsungs pa mngon sum du rna ba'i dbang pos thos pa'o/ /dus gcig na zhes bya ba ni shes rab kyi snying po dus gzhan na bshad pa la mi bya'o/ /bcom ldan 'das kyis rgyal po'i khab na 'khor 'di rnams la lan cig kho na zhig bshad pa'i dus la bya'o/ /bcom ldan 'das zhes bya ba ni de la ston pa ni su zhig yin/yul ni gang zhig na/ 'khor ni gang gang yin/ 'dus nas don ci zhig mdzad de/ ston pa ni sangs rgyas bcom ldan 'das/ yul ni rgyal po'i khab kyi bya rgod phung po'i ri la/ 'khor ni dge slong gi dge 'dun chen po dang /byang chub sems dpa' sems dpa' chen po rnams so/ /'dus nas don ci zhig mdzad ce na/ shes rab kyi pha rol tu phyin pa'i snying po 'di ston to/ /de la tshig gnyer bshad pa ni gong ma dang 'dra/ rgyal po'i khab bya rgod kyi phung po'i ri la zhes bya ba ni rgyal po gzugs can snying po'i yon tan las grags te/yul ljongs kyi grong khyer spyi'i ming du btags pa'o/ /bya rgod kyi phung po'i ri zhes bya ba ni yul ljongs de rgya che bas bya rgod phung po'i ri ste mtho la bya mang po 'du ba'i phyir ming du btags pa'o/ /dge slong gi dge 'dun chen po zhes bya ba ni mthu che ba dang grangs mang ba'o/ / byang chub sems dpa'i dge 'dun chen po zhes pa ni thams cad kyang shes rab kyi pha rol tu phyin pa'i don phun sum tshogs pa mngon sum du chud cing gzhan yang shes rab kyi pha rol tu phyin pa la 'jog pa'i byang chub sems dpa' mang po'o/ /thabs cig tu bzhugs te zhes bya ba ni bcom ldan 'das 'khor mang pos bskor te bzhugs pa'o//'di yan chad ni gleng gzhi'o/ /da ni shes rab la 'jug pa'i don gyis bshad de/ de'i tshe bcom ldan 'das chos kyi rnam grangs zab mo snang ba zhes bya ba'i ting nge 'dzin la snyoms par zhugs so zhes bya ba ni/ de la bcom ldan 'das 'khor de dag dang /sems can thams cad la thugs brtse zhing byin gyis brlab pa'i phyir snyoms par zhugs pa'o/ /de la chos kyi rnam grangs zab mo snang ba zhes bya ba ni chos kyi gzhung 'dis chos thams cad dmigs pa dang mtha' thams cad las 'das par ston cing mkhyen pa'i phyir zab mo snang ba zhes bya'o//ting nge 'dzin la snyoms par zhugs zhes bya ba ni zab mo de nyid la mnyam par gzhag pa'o/ /yang de'i tshe byang chub sems dpa' sems dpa' chen po 'phags pa spyan ras gzigs kyi dbang po shes rab kyi pha rol tu phyin pa zab mo spyod pa 'di nyid la rnam par rtog cing /phung po lnga po de nyid la yang rang bzhin gyis stong par blta'o zhes pa la/ yang de'i tshe zhes pa ni 'khor 'dus pa dang snyoms par zhugs pa'i dus na'o/ /'phags pa spyan ras gzigs kyi dbang po rang bzhin gyis stong par blta'o zhes pa'i bar du ni 'phags pa spyan ras gzigs kyi dbang po 'khor de rnams dang /sems can thams cad la thugs brtse ba'i phyir shes rab kyi pha rol tu phyin pa zab mo nyid la rnam par rtog cing phung po de dag kyang mi dmigs pa'i rang bzhin stong pa nyid las gzhan du gyur pa gang yang med do zhes bya bar dgongs pa'o//phung po lnga zhes bya ba ni gzugs kyi phung po ni dbu ba'i gong bu lta bu'o/ /tshor ba ni chu bur lta bu'o/ /'du shes ni smig rgyu lta bu'o/ /'du byed ni chu shing lta bu'o/ /rnam par shes pa ni sgyu ma lta bu'o/ /rang bzhin gyis stong pa zhes pa ni phung po lnga po de dag rang bzhin gyi mtshan nyid kyis stong pa nyid de/mtha' thams cad las 'das shing mtshan nyid med pa'i phyir stong pa nyid do/ /de nas tshe dang ldan pa shA ri'i bus sangs rgyas kyi mthus byang chub sems dpa' sems dpa' chen po 'phags pa spyan ras gzigs kyi dbang po la 'di skad ces smras so zhes pa ni nyan thos chen po'i nang na shes rab kyi mchog tu gyur pa'i shA ri'i bus de bzhin gshegs pa'i byin gyi rlabs kyis 'phags pa spyan ras gzigs kyi dbang po la dris so//rigs kyi bu gang la la shes rab kyi pha rol tu phyin pa zab mo spyod pa spyad par 'dod pa des ji ltar bslab par bya zhes bya ba la/rigs kyi bu zhes bya ba ni theg pa chen po'i gsung rab las skyes te/ de bzhin gshegs pa'i sras su gyur pa'o/ /gang la la zhes pa ni theg pa chen po la zhugs pa gang su yang rung ba'o/ /shes rab kyi pha rol tu phyin pa la spyod pa zhes bya ba ni shes rab kyi pha rol tu phyin pa spyod pas chos thams cad kyi de bzhin nyid zab mo brjod du med par spyod pa'o//spyad par 'dod pa des ji ltar bslab par bya zhes pa ni shes rab kyi pha rol tu phyin pa'i don spyad par 'dod pa des ji lta bu zhig tu shes par bya zhing bslab par bya zhes dris pa'o/ /de skad ces smras pa dang / byang chub sems dpa' sems dpa' chen po 'phags pa spyan ras gzigs kyi dbang pos tshe dang ldan pa shA ri'i bu la 'di skad ces smras so zhes pa ni dris pa'i lan smras pa'o//shA ri'i bu rigs kyi bu'am rigs kyi bu mo gang la la shes rab kyi pha rol tu phyin pa zab mo spyad pa spyod par 'dod pa des 'di ltar brtag par bya ste zhes pa ni/shes rab kyi pha rol tu phyin pa la spyad par 'dod pa des 'og tu bshad pa'i don bzhin du brtag par bya'o zhes pa'o/ /phung po lnga po de dag kyang rang bzhin gyis stong par yang dag par rjes su blta'o zhes pa ni phung po lnga po de dag ni rang bzhin gyis stong pa nyid do//mtshan nyid med pas sngon gyi dus nas ma skyes/ da ltar gyi dus na mi gnas/ ma 'ongs pa'i dus na mi 'gag ste/ dus thams cad du skye ba dang / gnas pa dang / 'gag par ma gyur pas mi gnas pa'i rang bzhin brjod du med pas na stong nyid do/ / blta'o zhes pa ni yang dag pa ji lta ba bzhin du blta'i/ de las gzhan pa gang du yang mi blta'o zhes pa'o/ /'di yan chad ni shes rab la 'jug pa'o/ /da ni stong pa nyid kyi mtshan nyid kyi don gyis bshad de/ gzugs stong pa'o/ /stong pa nyid kyang gzugs so zhes pa la/ de la gzugs so zhes pa ni stong pa nyid kyi rang bzhin khong du ma chud pas 'khrul pa'i sems kyis gzugs su mthong zhing rtog pa'am/tshig gis tha snyad du 'dogs pa'o/ /stong pa'o zhes bya ba ni gzugs kyi rang bzhin stong pa nyid yin pas snga ma 'das pa'i dus na yang mtshan nyid med pas dmigs su med/da ltar dang ma 'ongs pa'i dus na yang mtshan nyid med de/ dmigs su med pas mtha' thams cad dang dngos po thams cad mi gnas pa'i phyir stong pa nyid ces bya'o/ /stong pa nyid kyang gzugs so zhes bya ba ni stong pa nyid kyang dmigs su med pa'i rang bzhin la gzugs so zhes tshig gi tha snyad du btags la/de gud na mi gnas pa'i phyir stong pa nyid kyang gzugs so/ /gzugs las stong pa nyid gzhan ma yin/stong pa nyid las kyang gzugs gzhan ma yin no zhes pa ni gzugs gang yin pa de nyid brjod du med pa'i stong pa nyid yin gyi/gzugs spangs te stong pa nyid btsal du mi rnyed pas na gzugs las stong pa nyid gzhan ma yin zhes bya'o/ /brjod du med pa'i stong pa nyid gang yin pa de nyid la gzugs so zhes tshig gi tha snyad du btags pa gud na mi 'dug cing mi rnyed pa'i phyir stong pa nyid las kyang gzugs gzhan ma yin zhes bya'o//de bzhin du tshor ba dang / 'du shes dang / 'du byed dang / rnam par shes pa rnams stong pa'o zhes pa ni gzugs la ji ltar bshad pa bzhin du phung po lhag ma rnams kyang de dang 'dra bar blta'o/ /shA ri'i bu de bzhin du chos thams cad kyang stong pa nyid de zhes bya ba la/ shA ri'i bu zhes pa ni ma yengs par legs par nyon cig ces bod pa'i tshig go/ de bzhin du chos thams cad stong pa nyid ni phung po lnga la ji ltar bshad pa ltar gzhan yang skye mched drug nas/ rnam pa thams cad mkhyen pa'i bar du 'jig rten las 'das pa'i chos thams cad kyang stong pa nyid du shes par gyis shig pa'o//mtshan nyid med pa zhes pa ni nam mkha' la mtshan nyid med pa ltar nyon mongs pa'i mtshan nyid kyang med rnam par byang ba'i mtshan nyid kyang med pa'o/ /mi skye mi 'gag pa zhes pa ni da ltar skyes pa ni sngon med pa las phyis yod par gyur pa'o/ /'gag pa ni sngon yod pa las phyis med par gyur pa'o//stong pa nyid ni dmigs su med pas sngon nas ma skyes pa'o/ /ma skyes pas na phyis mi 'gag pa'o/ /dri ma med pa dang / dri ma dang bral ba med pa zhes bya ba la/ dri ma zhes bya ba ni rnam par shes pa rnams kyis gzung 'dzin du spyod pa'o/ /stong pa nyid ni rnam par shes pa las 'das pas dri ma med pa'o//dri ma dang bral ba med pa ni dri ma med pas bral ba yang med pa'o/ /bri ba med pa gang ba med pa'o zhes bya ba la/ bri ba zhes bya ba ni sems can no/ /gang ba zhes bya ba ni sangs rgyas so/ /med pa zhes pa ni sems can dang sangs rgyas btsal du yang mi rnyed pas bri ba dang gang ba med pa'o//de ltar na stong pa nyid ni gzugs ma yin zhes bya ba la/ gzugs ni gzhig par bya ba'i mtshan nyid yin gyi/ stong pa nyid la mtshan nyid med pa'i phyir stong pa nyid ni gzugs ma yin no/ /tshor ba ma yin/ de bzhin du tshor ba ni myong ba'i mtshan nyid 'du shes ma yin/'du shes ni 'dzin pa'i mtshan nyid/ 'du byed ma yin/ 'du byed ni mngon par 'du byed pa'i mtshan nyid/ rnam par shes pa rnams ma yin/ rnam par shes pa ni so sor bye brag 'dzin pa'i mtshan nyid yin gyi/ stong pa nyid ni dmigs su med pas rnam par shes pa rnams ma yin no//rnams ma yin zhes pa ni phung po lnga rnams ni zag pa dang bcas pa'i mtshan nyid yin gyi/ stong pa nyid ni phung po lnga rnams ma yin no/ /mig ma yin/ de la mig ni mthong ba'i mtshan nyid yin gyi/ stong pa nyid la mtshan nyid med pas stong pa nyid mig ma yin no//rna ba ma yin/ de bzhin du rna ba ni thos pa'i mtshan nyid do/ /sna ma yin/ sna ni snom pa'i mtshan nyid/ lce ma yin/ lce ni ro myang ba'i mtshan nyid/ lus ma yin/ lus ni reg pa'i mtshan nyid/ yid ma yin/ yid ni bye brag gcod pa'i mtshan nyid yin gyi/ stong pa nyid ni mtshan nyid med pas yid ma yin no//de ltar dbang po drug po ni 'dzin pa'i mtshan nyid yin gyi/ stong pa nyid ni mtshan nyid med pas dbang po drug rnams ma yin no/ /gzugs ma yin/ gzugs ni kha dog dang dbyibs kyi mtshan nyid yin gyi/ stong pa nyid ni mtshan nyid med pas gzugs ma yin no//sgra ma yin/ de bzhin du sgra ni snyan mi snyan gyi mtshan nyid/ dri ma yin/ dri ni snom pa'i mtshan nyid/ ro ma yin/ ro ni bro ba'i mtshan nyid/ reg bya ma yin/ reg bya ni reg pa 'jam rtsub kyi mtshan nyid/ chos ma yin/ chos ni bye brag gi rnam pa'i mtshan nyid yin gyi/ stong pa nyid ni mtshan nyid med pas chos ma yin no/ /de ltar na yul rnams ni dmigs par byed pa'i rkyen gyi mtshan nyid yin gyi/ stong pa nyid ni mtshan nyid med pas yul rnams ma yin no/ /mig gi khams ma yin pa nas/ yid kyi khams ma yin/ yid kyi rnam par shes pa'i khams kyi bar du yang ma yin no//de la khams bco brgyad ni gdug pa'i mtshan nyid yin gyi/ stong pa nyid ni mtshan nyid med pas khams bco brgyad ma yin no/ /ma rig pa ma yin pa nas rga shi ma yin/ ma rig pa zad pa nas rga shi zad pa'i bar du ma yin no/ /ma rig pa nas rga shi'i bar du rten 'brel bcu gnyis ni 'khor ba 'dzin pa'i mtshan nyid yin gyi/stong pa nyid ni mtshan nyid ma yin pas ma rig pa nas rga shi'i bar du ma yin no/ /ma rig pa zad pa nas/ rga shi zad pa'i bar du rnam par byang ba'i mtshan nyid yin gyi/ stong pa nyid ni mtshan nyid med pas ma rig pa zad pa nas rga shi zad pa'i bar du ma yin no//sdug bsngal ba dang / kun 'byung ba dang / 'gog pa dang lam yang ma yin no/ /sdug bsngal ni nyon mongs pa'i mtshan nyid/ kun 'byung ba ni nye bar len pa'i mtshan nyid/ 'gog pa ni zhi ba'i mtshan nyid/ lam ni shes pa'i mtshan nyid yin gyi/ stong pa nyid la mtshan nyid med pa'i phyir stong pa nyid bden pa bzhi ma yin no//ye shes ma yin/ ye shes ni chos thams cad mngon sum du gyur pa'i mtshan nyid yin gyi/ stong pa nyid la mtshan nyid med pas ye shes ma yin no/ /thob pa ma yin/ ma thob pa yang ma yin no/ /thob pa ni bla na med pa yang dag par rdzogs pa'i byang chub bo/ / ma thob pa ni sems can gyis bla na med pa ma thob pa'o/ /ma yin no zhes pa ni stong pa nyid kyi mtshan nyid la bla na med pa'i byang chub kyang med/ sems can yang med pas thob pa yang ma yin/ ma thob pa yang ma yin no/ /rnam grangs des na chos thams cad ni rang bzhin gyis stong pa nyid de/ stong pa nyid ni de lta bu yin no zhes bstan pa'i phyir ro/ /'di yan chad ni stong pa nyid kyi mtshan nyid do/ /da ni shes rab kyi spyod yul gyi don gyis bshad de/ shA ri'i bu de ltar byang chub sems dpa' thob pa med par shes rab kyi pha rol tu phyin pa la gnas shing spyod de zhes pa la/ ma chud pa la chud do snyam pa 'byung ba'i phyir shes rab kyi pha rol tu phyin pa'i spyod yul 'di tsam zhig dang ldan na stong pa nyid du spyod pa'i mtshan mar bshad pa de ltar zhes pa ni chos thams cad stong pa nyid du gyur pa'i phyir ro//byang chub sems dpa' rnams thob pa med par shes rab kyi pha rol tu phyin pa la spyod ces pa ni theg pa chen po la zhugs pa'i byang chub sems dpa' rnams kyis phung po lnga nas thams cad mkhyen pa'i bar du ci yang thob pa med par shes shing chos gang yang rdul tsam rjes su mi mthong bar shes rab kyi pha rol tu phyin pa la spyad par bya'o//chos thams cad stong pa ste/ mi gnas pa'i rang bzhin yin yang de ltar mi shes pa'i ma rig pa'i 'khrul pa'i sems kyis mun par gyur pas srid pa'i rgya mtshor 'khor zhing 'khyam mo//'khrul pa'i sems de nyid ci yin zhes shes rab rnam gsum gyis brtags na/ sems ni dmigs su med pas nyon mongs pa yang mi mthong /rnam par byang bar yang mi mthong / phung po lnga nas rnam pa thams cad mkhyen pa'i bar du yang mi mthong ngo / /stong pa nyid dang / mtshan nyid med pa dang / mi skye ba dang / mi 'gag pa la sogs pa yang mi mthong / shes rab nyid kyang yang dag par rjes su mi mthong / ci yang mthong ba med pa de ni sems kyi ngo bo nyid mthong ba'o//de ltar sems kyi ngo bo nyid mthong ba de ni byang chub mthong ngo / /gang byang chub mthong ba de ni chos nyid kyis sangs rgyas mthong ba'o/ /chos nyid kyis sangs rgyas mthong ba des ni bdag nyid bla na med pa'i byang chub tu mngon par rdzogs par sangs rgyas so//skabs 'dir ni the tshom pas smras pa/ de ltar ci yang med pa sha stag tu bshad pas mu stegs can chad par lta ba dang / nyan thos zhi ba'i 'gog pa'i nang du ltung bar mi 'gyur ram zhe na/ lan du smras pa/ de ltar mi 'gyur te mi dmigs pa'i tshul gyis sems can gyi don byed cing bla na med pa'i byang chub tu bsngo ba dang /pha rol tu phyin pa drug la sogs pa mi dmigs pa'i tshul gyis spyod par byed pas de ltar skyon du mi 'gyur ro/ /'di yan chad ni shes rab kyi spyod yul lo/ /da ni shes rab kyi yon tan gyis bshad de/ sems la skrag pa med pas sgrib pa med de/phyin ci log las shin du 'das nas mya ngan las 'das pa'i mthar phyin to zhes bya ba la/ shes rab kyi pha rol tu phyin pa'i stong pa nyid don la thos pa dang / bsam pa dang / bsgom pa'i bar du mi skrag pas/ sems dang / yid dang / rnam par shes pa dang / bag chags thams cad zlog par byed pas na/sems kyi sgrib pa med ces bya'o/ /byis pa lta bu'i spyod pa mu stegs can dang / nyan thos dang / rang sangs rgyas kyi spyod yul las shin du 'das nas nyon mongs pa'i sgrib pa dang / shes bya'i sgrib pa thams cad zad de/ mya ngan las 'das pa chen por phyin to/ / 'di yan chad ni shes rab kyi yon tan no/ /da ni shes rab kyi 'bras bu'i don gyis bshad de/ dus gsum du rnam par gshegs pa'i sangs rgyas thams cad kyang shes rab kyi pha rol tu phyin pa la gnas nas/ bla na med pa yang dag par rdzogs pa'i sangs rgyas su mngon par sangs rgyas so zhes pa la/ phyogs bcu'i 'jig rten gyi khams nas dus gsum du gshegs pa'i sangs rgyas thams cad kyang shes rab kyi pha rol tu phyin pa zab mo 'di 'dzin/ klog /kha ton byed/ sgom/ gzhan la ston cing shes rab kyi pha rol tu phyin pa la spyod pas bla na med pa'i byang chub tu mngon par rdzogs par sangs rgyas so//dus gsum gyi sangs rgyas thams cad kyang / shes rab kyi pha rol tu phyin pas bskyed shes rab kyi pha rol tu phyin pa las byung bas na shes rab kyi pha rol tu phyin pa ni sangs rgyas thams cad kyi yum du gyur pa'o/ /'di yan chad ni shes rab kyi 'bras bu'o/ /da ni shes rab kyi gzungs kyi don gyis bshad de/de lta bas na shes rab kyi pha rol tu phyin pa'i sngags ni bden te ma nor ba'o zhes pa la/ de lta bas na zhes bya ba ni/ gong du gsungs pa yin pas na de lta bas na zhes bya'o/ /shes rab kyi pha rol tu phyin pa'i sngags bden te ma nor ba zhes bya ba ni shes rab kyi pha rol tu phyin pa'i don rig par spyod pa ni sngags zhes bya ste/'jig rten gyi chos thams cad kyang bla na med pa'i byang chub kyi theg pa chen por 'gyur zhing / bdag dang gzhan yang bla na med pa'i byang chub tu 'tshang rgya bas na bden te ma nor ba zhes bya'o/ /rig pa chen po'i sngags zhes bya ba ni shes rab kyi pha rol tu phyin pa'i don rig pa'i sngags ni 'dod chags zhe sdang tig mug dang /'khor ba'i sdug bsngal thams cad brjod pa med pa'i rang bzhin med par ston pas na shes rab kyi pha rol tu phyin pa ni rig pa chen po'i sngags so/ /bla na med pa'i sngags zhes pa ni/ shes rab kyi pha rol tu phyin pa ni bla na med pa'i byang chub tu 'grub par byed pas na/ bla na med pa'i sngags so/ /mi mnyam pa dang mnyam pa'i sngags zhes pa ni/ shes rab kyi pha rol tu phyin pa ni 'jig rten pa dang / nyan thos dang / rang sangs rgyas kyi spyod pa dang mi mnyam zhing / sangs rgyas thams cad kyi ye shes dang mnyam par byed pas na mi mnyam dang mnyam pa'i sngags so//sdug bsngal thams cad rab tu zhi bar byed pa'i sngags su shes par bya ste zhes bya ba ni shes rab kyi pha rol tu phyin pa 'chang / klog /kha ton byed pa dang / tshul bzhin du yid la byed cing / gzhan la 'chad pa ni mig nad la sogs pa nad thams cad med par 'gyur zhing / phyogs bcu'i sangs rgyas dang / lha klu la sogs pas skyob par byed/ shes rab kyi pha rol tu phyin pa spyod pas ngan 'gro dang 'khor ba'i rgya mtsho thams cad zlog par byed pas na sdug bsngal thams cad rab tu zhi bar byed pa'i sngags so//shes rab kyi pha rol tu phyin pa'i sngags smras pa/ tad ya thA/ ga te/ ga te/ pa ra ga te/ pa ra saM ga te/ bo d+hi swA hA zhes pa la/ shes rab kyi pha rol tu phyin pa'i sngags 'di ni zab mo'i mchog thams cad kyi don bsdus pa rang bzhin gyis grub par byed pas byin gyis brlabs pa'i sngags su gsungs pa'o//shA ri'i bu byang chub sems dpa' sems dpa' chen pos de ltar shes rab kyi pha rol tu phyin pa zab mo la bslab par bya'o zhes pa ni dus gsum gyi sangs rgyas thams cad kyang shes rab kyi pha rol tu phyin pa spyad pa las sangs rgyas pas na theg pa chen po la 'jug pa'i byang chub sems dpa' rnams kyis kyang shes rab kyi pha rol tu phyin pa la bslab par bya'o//de nas bcom ldan 'das ting nge 'dzin de las bzhengs te zhes pa ni/ bcom ldan 'das zab mo'i ting nge 'dzin la bzhugs pa'i mthus shA ri'i bus dris te/ spyan ras gzigs kyis bshad nas de'i don rdzogs pa dang ting nge 'dzin las bzhengs so//byang chub sems dpa' sems dpa' chen po spyan ras gzigs kyi dbang po la legs so zhes bya ba byin nas/ legs so legs so zhes pa ni shes rab kyi pha rol tu phyin pa'i snying po'i don smras pa/ sangs rgyas thams cad kyis gsungs pa dang mthun te/ ma nor ba'i phyir legs so zhes bstod pa'o/ /rigs kyi bu de de bzhin no/ /rigs kyi bu de de bzhin te/ ji ltar khyod kyis shes rab kyi pha rol tu phyin pa zab mo bstan pa bzhin du spyad par bya ste zhes pa ni spyan ras gzigs kyis ji skad smras pa de sangs rgyas thams cad kyis gsungs pa dang mthun pas na de bzhin no//'phags pa spyan ras gzigs kyis shes rab kyi pha rol tu phyin pa bstan pa de bzhin du/ theg pa chen po la zhugs pa'i byang chub sems dpa' rnams kyis kyang spyad par bya'o/ /de bzhin gshegs pa yang rjes su yi rang ngo zhes pa ni/spyan ras gzigs kyis bshad pa la de bzhin gshegs pa rjes su yi rang bar mdzad na/ gzhan gyis the tshom mi za ba lta ci smos zhes pa'o/ /bcom ldan 'das dgyes shing de skad ces bka' stsal nas zhes pa ni shes rab kyi pha rol tu phyin pa smras pa des 'khor thams cad kyang shes rab kyi pha rol tu phyin pa'i don rtogs par gyur nas/theg pa chen po la sgrib pa med pa'i phyir dgyes shing de skad ces bka' stsal pa'o/ /tshe dang ldan pa shA ri'i bu dang / byang chub sems dpa' spyan ras gzigs kyi dbang po dang / lha dang / mi dang /lha ma yin dang / dri zar bcas pa'i 'khor thams cad bcom ldan 'das kyis gsungs pa la mngon par dga'o/ /bcom ldan 'das ma shes rab kyi pha rol tu phyin pa'i snying po'i 'grel pa slob dpon dz+nyA na mi tras mdzad pa rdzogs so// //