CLOSE WINDOW

D3808
བོད་ཡིག

@##/ /'phags pa shes rab kyi pha rol tu phyin pa 'bum pa dang / nyi khri lnga stong pa dang / khri brgyad stong pa'i rgya cher bshad pa/ bam po dang po/ 'jam dpal gzhon nur gyur pa la phyag 'tshal lo//shes rab bdag nyid pha rol phyin pa'i gtso/ /rgyal ba'i yum la gus par phyag 'tshal te/ /bla ma'i lung gis bdag la phan pa'i phyir/ /'di yi gzhung 'grel gnod 'joms bya bar 'dod//de bzhin gshegs pa rnams kyi gzugs kyi sku dang / dam pa'i chos kyi tshogs srung bar gtogs pa'i phyir 'phags pa byang chub sems dpa' chen po lag na rdo rje la 'khor gyi nang du dris pa dang /'di skad bdag gis thos pa zhes bya bas shes rab kyi pha rol tu phyin pa bshad pa 'di skad bdag gis thos pa yin par 'phags pa byams pa la khas 'ches so/ / bcom ldan 'das kyis 'di skad bshad do zhes ci'i phyir ma brjod ce na/ bcom ldan 'das kyis bstan pa rngom brjid 'di rang gi yul ma yin pa'i phyir te/ 'di ltar bcom ldan 'das kyis 'jig rten gyi khams sna tshogs nas 'dus pa'i 'dul ba'i rigs dang /bsam pa dang / spyod pa dang / mos pa dang / dbang po tha dad pa rnams la skad cig gcig la yang mi rtag pa dang / sdug bsngal ba dang / stong pa dang /zhi ba dang / mi skye ba dang / mi 'gag pa dang / gzod ma nas zhi ba dang / rang bzhin gyis mya ngan las 'das pa la sogs pa'i bye brag dang / phung po dang / khams dang skye mched dang / rten cing 'brel par 'byung ba dang /'phags pa'i bden pa la sogs pa'i bye brag dang / dran pa nye bar gzhag pa dang / yang dag par spong ba dang / rdzu 'phrul gyi rkang pa dang / dbang po la sogs pa'i bye brag dang / stobs bcu dang / mi 'jigs pa dang /sangs rgyas kyi chos ma 'dres pa la sogs pa'i bye brag gis skad sna tshogs dang / sgo sna tshogs dang / sgra sna tshogs dang / cho 'phrul sna tshogs dang / 'jug pa sna tshogs dang / 'bras bu thob pa sna tshogs kyis skad cig de nyid la bshad pa mkhyen pa gcig gis ston pa ste/ji skad du zhi ba'i blo gros phyogs bcu'i 'jig rten gyi khams tshad med grangs med pa dag na/ sems can du bsdu bar bsdus pa'i sems can ji snyed yod pa sangs rgyas kyi ye shes kyis mkhyen pa'i sems can gyi khams ni ches mang gi/sa'i khams ni de lta ma yin no zhes bya ste/ zhi ba'i blo gros yongs su brtags pa nye bar bzung na sems can de dag thams cad snga phyi med par mi'i lus thob par gyur la/ zhi ba'i blo gros sems can de dag thams cad 'di lta ste/gnas brtan sha ra dwa ti'i bu'i shes rab dang / ye shes de lta bu dang ldan par gyur la/ sha ra dwa ti'i bu'i sems can de dag thams cad kyi shes rab dang ye shes gang yin pa'i shes rab dang / ye shes de sems can gcig dang ldan par gyur cing rnam grangs 'dis sems can thams cad/shes rab dang ye shes de lta bu dang ldan par gyur la/ zhi ba'i blo gros sems can de dag thams cad kyis bskal pa'am bskal pa las lhag par the tshom gyi dri ba bsams shing gzhal te yongs su btsal la sems can gcig gi the tshom gyi dri ba gang yin pa de ni gnyis pa'i ma yin zhing /zhi ba'i blo gros rnam grangs 'dis sems can thams cad kyis the tshom gyi dri ba tha dad pa bsams te/ bcom ldan 'das kyi gan du dong nas se gol gtogs pa srid la/ the tshom gyi dri ba de dag gsol kyang / des sems gcig gi rjes su zhugs pa'i dran pas thams cad bzung nas gsung rnam pa gcig gis de dag gi the tshom gyi dri ba thams cad gcod do//de dag thams cad kyang rang rang gi the tshom gyi dri ba chad par shes shing / bcom ldan 'das kyis zhus pa lung bstan pas thams cad kyang sems rangs par gyur to zhes bya ba la sogs pa gsungs pa lta bu'o//de bzhin gshegs pas gdul bya rnams la bstan pa'i rim pa de ni rnam pa thams cad du byang chub sems dpa' rnams kyi spyod yul ma yin no/ /spyod yul du gang gyur pa de yang yang dag par sdud par byed pa rnams kyi yan lag gi rim pas ston mi nus so/ /de bas na chos yang dag par sdud par byed pa rnams kyi bdag gi spyod yul du gyur pa gang yang rung ba'i chos bshad pa'i sgo bzung nas/'di skad bdag gis thos pa zhes bya ba bdag gi rna bas thos pa'i lam nas 'ongs pa'i rim pa bstan te/ bshad pa'i tha mar yang 'di bka' stsal to zhes mjug brtul gyi de skad bka' stsal to zhes ni ma brjod do//don dam pa ni brjod du med pas sangs rgyas bcom ldan 'das rnams ming gi tshogs dang / tshig gi tshogs dang / yi ge'i tshogs kyis gzhan dag la chos mi ston to/ /de bzhin gshegs pa ni rnam par mi rtog pa lhun gyis grub pa dang rtag tu mnyam par gzhag pa yin yang 'on kyang sngon gyi smon lam gyi mthu dang /sems can rnams kyi las kyi dbang gis gdul bya rnams bdag bdag gi skad rnams kyis chos bstan pa 'byung snyam du de lta de ltar shes so/ /ji skad du zhi ba'i blo gros gang gi nub mo de bzhin gshegs pas bla na med pa yang dag par rdzogs pa'i byang chub mngon par rdzogs par sangs rgyas pa dang /gang gi nub mo len pa mi mnga' bar yongs su mya ngan las 'da' bar 'gyur ba de'i bar du de bzhin gshegs pas tha na yi ge'i 'bru gcig kyang ma gsungs so/ /gsung bar mi 'gyur ro//de ci'i phyir zhe na/ zhi ba'i blo gros de bzhin gshegs pa ni rtag tu mnyam par gzhag pa ste/ de bzhin gshegs pa la dbugs dbyung ba'am rngub pa mi mnga'o/ /rnam par mi rtog go/ /rnam par mi dpyod do/ /rnam par rtog pa dang / rnam par dpyod pa med na ngag mi 'byung ste/de bzhin gshegs pa de yang rnam par mi rtog /rnam par mi dpyod/ rnam par rig par mi mdzad/ rnam par rtog par mi mdzad/ mi gsung / mi brjod/ gsung bar mi mdzad kyang sems can rnams 'di snyam du sems te/ de bzhin gshegs pa 'di gsung ngo snyam mo//de bzhin gshegs pa ni shin tu mnyam par gzhag pa ste/ yi ge rnam par rig pa thams cad kyi thams cad du rnam par rig par mi mdzad kyang / sems can yi ge lhur len pa rnams 'di snyam du sems te/ de bzhin gshegs pa ni bdag cag la chos ston no snyam mo//de bzhin gshegs pa'i gsung gi sgra 'byung ba de ni nam mkha' las 'byung na sems can rnams 'di snyam du sems te/ sgra 'di ni de bzhin gshegs pa'i zhal gyi sgo nas 'byung ngo snyam mo zhes bya ba la sogs pa gsungs pa lta bu'o/ /chos kyi sku'i dbang gis 'byung bas na dam pa'i chos la rim gro bskyed pa'i phyir de ltar 'byung ba'i brtan pa tha mar mjug bsdu bar/bcom ldan 'das kyis 'di skad ces bka' stsal zhes bstan to/ /dus gcig na zhes bya ba ni gang yang rung ba'i dus na zhes bya ba'i tha tshig go/ /ci'i phyir dus nges pa ma mdzad ce na/ dgos pa med pa'i phyir te/de la nyi ma 'di la/ tshes grangs 'di la/ zla ba 'di la/ dus 'di la zhes bya ba'i tshig ni gang du yang dgos pa med de/ mi dgos pa ni bshad par mi rigs so/ /mchod rten gyi gnas bstan pa ni/ sems can rnams kyi bsod nams kyi tshogs spel bar bya ba dang /rtsod pa med pa'i phyir gnas bstan pa ni rigs so/ /yang na rtsod pa med par bya ba'i phyir te/ 'di ltar de bzhin gshegs pa ni skad cig thang cig yud tsam de nyid kyi tshe 'jig rten gyi khams sna tshogs dang / gnas sna tshogs su gdul bya tha dad pa'i byang chub sems dpa' rnams sam/gzhan dag la yang bshad pa sna tshogs kyis bstan par snang ba'i phyir te/ gal te de dag thams cad gcig tu 'dus par gyur na byang chub sems dpa' 'am gzhan dag kyang rung ste/ 'di skad du de'i tshe na de bzhin gshegs pa ni 'jig rten gyi khams 'dir yul 'di zhes bya ba na bdag cag gi de na bzhugs so//bdag cag gi de na bzhugs so/ /zhes [#(]brtsod [,]ba rtsod [)]pa 'am yid gnyis su 'gyur te/ de lta bur 'gyur gyis dogs pa'i phyir thams cad du yang dag par sdud par byed pa rnams kyis dus nges pa ma mdzad do/ /yang na rgyal po'i khab tu lan mang du bzhugs pa'i phyir rgyal po'i khab na bzhugs pa'i dus gcig cig na zhes bshad par bzhed nas/gcig na zhes bya ba'i tshig smos par sbyar ro/ /bcom ldan 'das zhes bya ba ni bdud bzhi bcom pa dang ldan pa'am/ yang na 'di la legs pa mnga' bas na bcom ldan 'das zhes bya ste/legs pa zhes bya ba ni dbang phyug dang / ye shes dang / grags pa dang / dpal dang / bsod nams dang / brtson 'grus rnams la bya'o / /de dag thams cad kyang don dam par na de bzhin gshegs pa nyid la mnga' bas na/ bcom ldan 'das zhes bya'o/ / rgyal po'i khab na bzhugs zhes bya ba ni bzhugs pa rnam pa bzhi ste/ spyod lam gyis bzhugs pa dang / 'chad pas bzhugs pa dang / snyoms par 'jug pas bzhugs pa dang / nang du yang dag 'jog gis bzhugs pa'o/ / sku'i phrin las su bgrang ba gang ci yang rung ste/de dag thams cad ni spyod lam gyis bzhugs pa'o/ /gsung gi phrin las gang yin pa de dag ni 'chad pas bzhugs pa'o/ /thugs kyi phrin las gang yin pa de ni de dag las gzhan pa'i bzhugs pa gnyis te/ rtag tu mnyam par gzhag pa'i phyir te ting nge 'dzin dang snyoms par 'jug pa bzhi snyoms par 'jug pas bzhugs pa'o//thugs rje chen pos 'jig rten la gzigs pa dang / lha la sogs pa 'ong ba ni nang du yang dag 'jog gis bzhugs pa'o/ /rgyal po'i khab na bya rgod phung po'i ri la zhes bya ba ni/ khyim pa dang rab tu byung ba'i phyogs gnyis bsdu ba'i phyir dang /gzugs kyi sku dang / chos kyi tshogs kyis phan 'dogs par bstan pa'i phyir gnas gnyis smos so/ /zham 'bring ba phun sum tshogs par bstan pa'i phyir/ /dge slong gi dge 'dun chen po dang thabs cig ces bya ba la sogs pa gsungs te/ zham 'bring ba dge slong dang /zham 'bring ba byang chub sems dpa' la sogs pa'o / /gnyi ga yang shin tu sbyin gnas su gyur pa yin mod kyi 'jig rten na kun gyis bkur ba'i phyir dang / mi 'bral ba'i phyir dang / 'jig rten thams cad kyi thun mong yin pa'i phyir dang por zham 'bring ba dge slong smos so//de la dge slong gi dge 'dun chen po zhes ni sngar ni spyir smos la/ phyis dge slong lnga stong tsam dang zhes bya ba bye brag smos te/ spyi dang bye brag gis bstan pa byas na shin tu 'brel bar 'gyur ro/ /zham 'bring ba'i mang ba nyid bstan nas/ che ba nyid bstan par bya ba'i phyir/ thams cad kyang dgra bcom pa/zag pa zad pa zhes bya ba la sogs pa yon tan phun sum tshogs pa 'og ma rnams smos so/ /thams cad kyang dgra bcom pa zhes bya bas ni thams cad kyang dgra bcom pa kho na sha stag ste/ de na slob pa dang / so so'i skye bo dag med par bstan pa yin no/ / dgra bcom pa zhes bya ba ni dgra rnams bcom pa 'am/ 'khor bar phyir mi skye ba'i chos nyid dam/ rang gi don mtha' dag yongs su rdzogs pa'am gzhan dag la rjes su ston par byed par 'os te nus pa'am/ dge 'dun dkon mchog ces bya bar 'os pa'am/ khams gsum gyi gtso bo rnams kyis rnam pa du mas mchod par 'os pa'am/rgyun mi chad par de bzhin gshegs pa la sgrub pa'i mchod pas mchod cing rjed pas na dgra bcom pa sha stag go/ /zag pa zad pa zhes bya ba ni chos bzhis mi dge ba'i rtsa ba rnams zag par byed pa'am/ nyon mongs pa mi gtsang ba zag par byed pas na zag pa zhes bya ste/gzugs la sogs pa yul lnga dang / srid pa gsum dang / lhan cig skyes pa dang kun brtags pa'i ma rig pa dang / lta ba'i rnam pa drug cu rtsa gnyis po de dag ni 'dod pa'i zag pa dang / srid pa'i zag pa dang / ma rig pa'i zag pa dang /lta ba'i zag pa zhes bya'o/ /mi slob pa'i tshul khrims dang / ting nge 'dzin gyi phung pos ni 'dod pa'i zag pa zad do/ /mi slob pa'i shes rab kyi phung pos ni lta ba'i zag pa zad do/ /mi slob pa'i rnam par grol ba'i phung pos ni srid pa'i zag pa zad do/ /mi slob pa'i rnam par grol ba'i ye shes mthong ba'i phung pos ni ma rig pa'i zag pa zad do//yang na tshul khrims yongs su rdzogs pa'i sa mthong ba'i lam na yang dag pa'i lta bas ni lta ba'i zag pa zad do/ /ting nge 'dzin yongs su rdzogs pa'i sa phyir mi 'ong ba'i lam na yang dag pa'i ting nge 'dzin gyis ni 'dod pa'i zag pa zad do//shes rab yongs su rdzogs pa'i sa dgra bcom pa'i lam na yang dag pa'i shes pa rnam par grol bas ni ma rig pa'i zag pa zad do/ /rnam par grol ba yongs su rdzogs pa'i sar zad pa dang mi skye ba shes pa gnyis kyis ni srid pa'i zag pa zad do//yang na dgra bcom pa'i lam na 'dod pa'i rgyu yongs su shes pas 'dod pa'i zag pa zad do/ /ma rig pa'i rkyen gyis 'du byed rnams zhes 'byung bas na 'du byed kyi rgyu yongs su shes pas ma rig pa'i zag pa zad do/ /nyon mongs pa'i rgyu yongs su shes pas lta ba'i zag pa zad do//phung po'i rgyu yongs su shes pas srid pa'i zag pa zad do/ /yang na nye bar len pa'i phung po lnga la dmigs pa las lta ba thams cad 'byung bas sdug bsngal gyi bden pa yongs su shes pas lta ba'i zag pa zad do/ /kun 'byung ba'i bden pa spangs pas 'dod pa'i zag pa zad do//'gog pa mngon sum du byas pas srid pa'i zag pa zad do/ /lam gyi bden pa bsgoms pas ma rig pa'i zag pa zad do/ /'dod pa'i zag pa spangs pas lha'i bu'i bdud choms so/ /srid pa'i zag pa spangs pas 'chi ba'i bdud choms so/ /ma rig pa'i zag pa spangs pas nyon mongs pa'i bdud choms so//lta ba'i zag pa spangs pas phung po'i bdud choms so/ / bdud bzhi las rgyal ba las zag pa zad pa zhes bya'o/ /nyon mongs pa med pa zhes bya ba ni kun nas nyon mongs pa med do zhes bya ba'i tha tshig go/ /nyon mongs par byed pas nyon mongs pa ste/las kyi kun nas nyon mongs pa'o/ /'dis nyon mongs par byed pas na nyon mongs pa'i kun nas nyon mongs pa'o/ /nyon mongs par 'gyur bas nyon mongs pa ste rnam par smin pa'i phung po'i kun nas nyon mongs pa'o/ /rgyu 'di las nyon mongs par 'gyur bas skye ba'i kun nas nyon mongs pa'o//de lam rig pa 'gags pas 'du byed rnams 'gag go zhes bya bas ni las kyi kun nas nyon mongs pa med do/ /'du byed rnams 'gags pas rnam par shes pa dang ming dang gzugs dang / skye mched drug dang / reg pa dang / tshor ba 'gag go zhes bya bas ni/rnam par smin pa'i kun nas nyon mongs pa med do/ /srid pa 'gags pas skye ba dang rga shi 'gag go zhes bya bas ni skye ba'i kun nas nyon mongs pa med do/ / de lta bas na sdug bsngal bar byed pa gang yin pa dang / gang gis sdug bsngal bar byed pa dang / sdug bsngal ba gang yin pa dang /sdug bsngal gyi rgyu gang yin pa de dag spangs pa bstan to/ /gzhan yang las kyi kun nas nyon mongs pa spangs pas rdzogs pa'i byang chub kyi bde ba 'thob bo/ /nyon mongs pa'i kun nas nyon mongs pa spangs pas kha na ma tho ba med pa'i bde ba 'thob bo/ / rnam par smin pa'i kun nas nyon mongs pa spangs pas nye bar zhi ba'i bde ba 'thob bo/ /skye ba'i kun nas nyon mongs pa spangs pas phung po med pa'i bde ba 'thob ste/ bde bar byed pa gang yin pa dang / gang gis bde bar byed pa dang / bde ba gang yin pa dang / bde ba'i rgyu gang yin pa de dag thob pa ni nyon mongs pa med pa zhes bshad do//dgra bcom pa zhes bya bas ni sbyin gnas kyi yon tan bstan to/ /zag pa zad ces bya bas ni dag pa'i yon tan bstan to/ /nyon mongs pa med ces bya bas ni sdug bsngal med par bstan te/ 'di ni de gsum gyi bye brag go/ /dbang dang ldan par gyur pa zhes bya bas ni de dag gi dbang du 'jig rten rnams gyur pa'am/'jig rten rnams kyi dbang du bdag gyur te sdug par gyur pa'am/ de dag gi sems dbang du byas pa'am / dbang rnams thob pa'i phyir dbang dang ldan par gyur pa zhes bya'o/ /dbang ni bzhi ste/ rdzu 'phrul la dbang ba dang /dbang po la dbang ba dang / ting nge 'dzin la dbang ba dang / shes rab la dbang ba'o/ /de la rdzu 'phrul la dbang bas ni sems can gyi 'jig rten dang snod kyi 'jig rten de dag gi dbang du 'gyur ro/ /dbang po la dbang bas ni spyod lam nye bar zhi bas de dag la 'jig rten dga' ba skyes so//ting nge 'dzin la dbang bas ni de dag gi sems dbang du byas so/ /shes rab la dbang bas ni nyon mongs pa dang / las dang / rnam par smin pa thams cad bcad de/ 'ching ba las grol ba bzhin du rang dbang du gyur pa'i phyir dbang thob pa'o/ /de la dbang po la dbang bas ni spyod lam gyis bzhugs pa thob pa'o//ting nge 'dzin la dbang bas ni lha'i bzhugs pa dang / tshangs pa'i bzhugs pa thob po/ /rdzu 'phrul la dbang bas ni mngon par shes pas rnam par rol pa'i bzhugs pa thob po/ /shes rab la dbang bas ni 'phags pa'i bzhugs pa thob po//de la dbang po la dbang bas ni tshul khrims kyi phung po yongs su rdzogs so/ /rdzu 'phrul la dbang bas ni ting nge 'dzin gyi phung po yongs su rdzogs so/ /ting nge 'dzin la dbang bas ni shes rab kyi phung po yongs su rdzogs so/ /shes rab la dbang bas ni rnam par grol ba'i phung po yongs su rdzogs so//tshul khrims kyis ni nyes par spyod pa'i 'ching ba las rnam par grol lo/ /ting nge 'dzin gyis ni srid pa'i 'ching ba las rnam par grol lo/ /shes rab kyis ni lta ba ngan pa'i 'ching ba las rnam par grol lo/ / rnam par grol bas ni srid pa'i 'ching ba las rnam par grol lo/ /de bas na 'ching ba las rnam par grol ba'i phyir rang dbang grub po/ /rang dbang yod pas na rang nyams thob pa'i phyir dbang dang ldan par gyur pa zhes bya'o/ /sems shin tu rnam par grol ba zhes bya bas ni srid pa'i phyogs kyi kun nas nyon mongs pa'i chos thams cad med par bstan to//shes rab shin tu rnam par grol ba zhes bya bas ni ma rig pa'i phyogs rnams med par bstan to/ /'di ltar 'dod chags dang rnam par bral ba'i phyir sems shin tu rnam par grol bas sems shin tu rnam par grol ba zhes bya'o//ma rig pa dang rnam par bral ba'i phyir shes rab rnam par grol bas shes rab shin tu rnam par grol ba zhes bya'o/ /de la sred pa'i phyogs kyi nyon mongs pa dang / nye ba'i nyon mongs pa spangs pas 'thob par bya ba'i ting nge 'dzin dang snyoms par 'jug pa thob pa ni sems rnam par grol ba zhes bya'o//nyon mongs pa thams cad spangs pas 'thob par bya ba dgra bcom pa'i lam gyi shes pa ni shes rab rnam par grol ba zhes bya'o/ /de la sems rnam par grol ba thob pas ni snyoms par 'jug pa'i sgrib pa las rnam par grol lo/ / shes rab rnam par grol ba thob pas ni nyon mongs pa'i sgrib pa las rnam par grol lo/ /gnyi ga'i cha las rnam par grol ba dag ni sems shin tu rnam par grol ba dang / shes rab shin tu rnam par grol ba zhes bya'o/ /cang shes pa zhes bya ba ni mi 'jigs pa ste/ 'jigs pa med pa'i phyir mdo las cang shes lnga gsungs pa ste/lce 'bab pa la sogs pa'i bag tsha ba 'byung bar dogs pa med pas khyu mchog cang shes dang / 'thab mo'i 'jigs pa med pas glang po che dang / rta cang shes dang / gzhan gyi gnod pa byed pa'i 'jigs pa med pas seng ge cang shes dang /'chi ba'i 'jigs pa med pas dgra bcom pa cang shes so/ /mdor na bag tsha ba rnam pa bzhi ste/ sdug bsngal gyis bag tsha ba dang / 'jigs pas bag tsha ba dang / 'jig rten gyi chos kyis bag tsha ba dang / mi shes pas bag tsha ba'o/ /bag tsha ba de rnams med pas bde ba thob pa dang /mi skrag pa thob pa dang / mi 'jigs pa thob pa dang / dbugs dbyung ba thob pa zhes bya ste/ go rims bzhin no/ /de la mya ngan dang / smre sngags 'don pa dang / sdug bsngal ba dang / yid mi bde ba rnams med pas mya ngan med pa'i phyir sdug bsngal gyi bag tsha ba med do//bdag gis smad pa dang / gzhan gyis smad pa dang / ngan 'gro dang 'tshe ba med pa dang / chad pas gcod pa dang / tshigs su bcad pa med pa dang / 'chi bas 'jigs pa rnams med pas 'jigs pa'i bag tsha ba med do/ /rnyed pa dang / ma rnyed pa dang /grags pa dang / ma grags pa dang / bstod pa dang / smad pa dang / bde ba dang / sdug bsngal gyi gos pa med pas 'jig rten gyi chos kyis bag tshab med do/ /mi shes pas dang / the tshom gyi shes pa dang / log par shes pa bar du gcod pa rnams med pas mi shes pa'i bag tsha ba med do//de lta bas na bag tsha ba med pa'i phyir cang shes pa zhes bya'o/ /glang po chen po zhes bya ba ni gtso bo chen po zhes bya ba'i tha tshig ste kha cig ni rigs pa gsum dang ldan pa/ kha cig ni so so yang dag par rig pa thob pa/ kha cig ni mngon par shes pa drug thob po//kha cig ni shes pa brda sprod pa dang ldan pa/ kha cig ni gnas gcig thob pa dag ste/ khyad par du 'phags pa thob pa'i chos rnyed pa'i phyir glang po chen po zhes bya'o/ /bya ba byas pa byed pa byas pa zhes bya ba ni kun tu rdzogs pa nyid du bstan pa ste / bya bar nges pa la ni bya ba zhes bya'o//shar la bya ba la ni byed pa zhes bya'o / /de la tshul khrims dang / ting nge 'dzin dang / shes rab yongs su rdzogs pas sdug bsngal thams cad las rnam par thar pa ni las kyi gtso bo ste/ de dag yongs su rdzogs pas bya ba byas pa zhes bya'o/ / 'dod pa chung bas 'tsho ba dang / chog shes pas 'tsho ba dang / sbyangs pa'i yan lag gis 'tsho ba dang / yang dag par mgu bar byed pas 'tsho ba la sogs pas 'tsho ba'i bye brag rnams yongs su rdzogs par bya ba ni rang dga' dang 'brel pa'i phyir byed pa zhes bya ste/ de yongs su rdzogs pas byed pa byas pa zhes bya'o/ /de bas na bya ba byas pa/ byed pa byas pa zhes bya bas ni bsgrub pa'i rnam pa thams cad kun tu rdzogs pa nyid du bstan to/ /khur bor ba zhes bya ba la/ khur ni rnam pa bzhi ste/ phung po'i khur dang / nyon mongs pa'i khur dang /dam bcas pa'i khur dang / brtson pa'i khur rnams te/ khur bor bar bya ba dang / spang bar bya ba dang / bsgrub par bya ba dang / yongs su rdzogs par bya ba'i phyir khur te/ go rims bzhin no/ /de la sdug bsngal yongs su shes pas ni phung po'i khur bor ro/ / kun 'byung ba spangs pas ni nyon mongs pa'i khur bor ro/ /lam bsgoms pas ni dam bcas pa'i khur bor ro/ /'gog pa mngon sum du byas pas ni brtson 'grus kyi khur bor ro/ /de la phung po'i khur spangs pas phung po med pa'i bde ba thob po/ /nyon mongs pa'i khur spangs pas rnam par grol ba'i bde ba thob po//dam bcas pa'i khur mthar phyin par byas pas rdzogs pa'i byang chub kyi bde ba 'thob po/ /brtson pa'i khur yongs su rdzogs par byas pas nye bar zhi ba'i bde ba thob ste/ khur bor ba zhes bya bas ni khur bor ba'i bde ba thob par bstan pa yin no//bdag gi don rjes su thob pa zhes bya ba la/ bdag gi don rjes su thob pa ni rnam pa gnyis te/ gnod pa spangs pa dang / don thob pa'o/ /ma rig pa spangs pas nyon mongs pa'i sgrib pa thams cad spangs par gyur pa gang yin pa de ni gnod pa spangs pa zhes bya'o//rigs pa bskyed nas mya ngan las 'das pa thob pa gang yin pa de ni don thob pa zhes bya'o/ /srid par kun du sbyor ba yongs su zad pa zhes bya ba la/ srid par skye bar byed pa'i kun tu sbyor ba rnams ni srid par kun du sbyor ba ste/ srid pa dang / mir kun tu sbyor bar byed pa'am/'ching bar byed pas srid par kun tu sbyor ba'o/ / dgu po 'di dag las lta ba'i kun tu sbyor ba dang / mchog tu 'dzin pa'i kun tu sbyor ba dang / the tshom gyi kun tu sbyor ba dang gsum ni zag pa med pa'i yang dag par lta bas spong ngo / /phrag dog gi kun tu sbyor ba dang / ser sna'i kun du sbyor ba dang /khong khro ba'i kun tu sbyor ba gsum dang / srid pa'i 'dod chags kyi kun tu sbyor ba'i phyogs gcig 'dod pa'i khams kyi phyogs su gtogs pa dang / 'di rnams ni zag pa med pa'i ting nge 'dzin la snyoms par 'jug pa thob pas spong ngo / /nga rgyal gyi kun du sbyor ba dang /ma rig pa'i kun du sbyor ba dang / srid pa'i 'dod chags kyi kun tu sbyor ba dang / 'di rnams ni dgra bcom pa'i lam gyi shes pas spang ste/ de'i phyir srid par kun tu sbyor ba yongs su zad pa zhes bya ba gsungs so/ /yang dag pa'i shes pas sems shin tu rnam par grol ba zhes bya ba la shes pa zhes bya ba ni kun tu shes pa dang /rtogs pa ste yang dag par rtogs pas sems shin du rnam par grol ba zhes bya'o/ /yang na rnam par grol ba zhes bya ba ni 'dir mos pa la bya ste/ yang dag par rtogs pas 'di lta ste/ dkon mchog gsum gyi yon tan dang theg pa gsum dang ldan pa'i chos bstan pa rnams dang /'phags pa'i bden pa bzhi dang / byang chub kyi phyogs dang mthun pa'i chos rnams la mos pa ni sems shin tu rnam par grol ba zhes bya ba'am / yang na rnam par thar pa brgyad kyis sems shin tu rnam par grol ba zhes bya ba'i tha tshig go//sems thams cad kyi dbang gis dam pa'i pha rol tu son pa zhes bya ba ni snyoms par 'jug pa thams cad la dbang dam pa mthar phyin par gyur pa'o / /yang na 'gog pa dang / ting nge 'dzin la snyoms par 'jug pa dang / gnas pa dang / ldang ba dang / btang snyoms su bzhag pa rnams la dbang thob pa ste/gang du 'dod pa dang / gang 'dod pa dang / ji srid du 'dod pa dang / lugs dang mthun pa dang / lugs dang mi mthun pa dang / lugs dang lugs ma yin pa dang / 'gro ba dang / slar ldog pa dang / yan lag sdud pa dang / dmigs pa sdud pa dang /yan lag dang dmigs pa sdud pa dang / yan lag zung du byed pa dang / dmigs pa zung du byed pa dang / yan lag dang dmigs pa zung du byed pa dang / gcig spel ba dang / gnyis ka spel ba dang / gnyis ka mi spel ba la sogs pa'i rim gyis mthar gyis gnas pa'i snyoms par 'jug pa dgu po dag la dbang ba'i pha rol tu son pa la sems can thams cad kyi dbang dam pa'i pha rol tu son pa zhes bya ba'o//thams cad kyang dgra bcom pa sha stag go/ /ci'i phyir zhe na/ zag pa zad pa'i phyir ro/ /zag pa zad pa ni nyon mongs pa med pa'i phyir ro//nyon mongs pa med pa ni dbang dang ldan par gyur pa'i phyir ro/ /dbang dang ldan par gyur pa ni sems shin tu rnam par grol ba'i phyir ro/ /sems shin tu rnam par grol ba ni/ shes rab shin tu rnam par grol ba'i phyir ro/ /shes rab shin tu rnam par grol ba ni cang shes kyi phyir ro//cang shes pa ni glang po chen po'i phyir ro/ /glang po chen po ni bya ba byas pa'i phyir ro/ /bya ba byas pa ni byed pa byas pa'i phyir ro/ /byed pa byas pa ni khur bor ba'i phyir ro/ /khur bor ba ni bdag gi don rjes su thob pa'i phyir ro/ /bdag gi don rjes su thob pa ni srid pa kun du sbyor ba yongs su zad pa'i phyir ro//srid pa kun tu sbyor ba yongs su zad pa ni yang dag pa'i shes pas sems shin tu rnam par grol ba'i phyir ro/ /yang dag pa'i shes pas sems shin tu rnam par grol ba ni sems can thams cad kyi dbang dam pa'i pha rol du son pa'i phyir ro zhes yon tan rnams kyi 'grel pa sbyar bar bya'o//de ltar zhab 'bring ba dge slong rnams bstan nas/ dge slong ma lnga brgya tsam zhes bya ba la sogs pas ni 'khor dge slong ma dang / dge bsnyen dang / dge bsnyen ma rnams ston to/ /chos mthong ba zhes bya ba ni mya ngan las 'das pa mngon sum du byas pa ste/des ni dge bsnyen dang / dge bsnyen ma rnams slob pa yin par bstan no/ /da ni zhab 'bring ba byang chub sems dpa' rnams ston te/ byang chub sems dpa' sems dpa' chen po tshad med grangs med pa zhes bya ba ni 'jig rten gyi khams gzhan thams cad nas 'dus pa'i phyir byang chub sems dpa' rnams 'di snyed do zhes grangs chad par ma smos so//gzungs thob pa zhes bya ba la sogs pas ni de dag gi yon tan bstan to/ /byang chub sems dpa' ni rnam pa lnga ste/ lhag pa'i bsam pa dag pa dang /rtsol ba dang bcas par mtshan ma med pa la gnas pa dang mtshan ma med pa la lhun gyis grub par gnas pa dang / spyod pa nges pa la zhugs pa dang / skye ba gcig gis thogs pa rnams te/ de dag ni 'dir gtogs so/ /sa dang po la gnas pa rnams ni lhag pa'i bsam pa dag pa'o//sa bdun pa'i bar du ni rtsol ba dang bcas par mtshan ma med pa la gnas pa dag go/ /sa brgyad pa ni mtshan ma med pa la lhun gyis grub par gnas pa dag go/ /de nas sa bcu pa'i bar du ni spyod pa nges pa la zhugs pa dag go/ /de yan chad ni skye ba gcig gis thogs pa dag go//de la gzungs thob pa zhes bya ba ni 'dzin par byed pas na gzungs zhes bya'o/ /gzungs de yang rnam pa bzhi ste/ byang chub sems dpa' bzod pa 'thob pa'i rgyur gyur pa'i gzungs dang / gsang sngags kyi gzungs dang / chos kyi gzungs dang /don gyi gzungs so/ /de la byang chub sems dpa' bzod pa thob pa'i rgyur gyur pa'i gzungs gang zhe na/ 'di la sngon gyi rgyu phun sum tshogs pa'i byang chub sems dpa' mos pas spyod pa'i sa la rab tu dben par spyod pa/ zas kyi tshod shes pa/ dbang po bsdams pa su dang yang lhan cig gtam mi zer ba/mi nyal bar brtson pas byang chub sems dpa' rnams kyi bzod pa bskyed par bya ba'i phyir gsang sngags kyi gzhi / tad+ya thA/ i Ti mi Ti/ ki Ti bi k+ShAn+ti / pA da ni swAhA/ zhes bya ba gang dag gsungs pa de dag las yi ge rnams bzung ste/ gsang sngags kyi gzhi 'di dag gi don gang yin zhes brjod pa dang brjod par bya ba'i dngos por don sems par byed do/ /de ltar yun ring du bsams kyang brjod par bya ba de'i don mi mthong ngo / /don ma mthong ba dang 'di snyam du sems te gsang sngags kyi gzhi 'di dag gi brjod par bya ba'i don ni gang yang med kyi/brjod par bya ba'i don med pa nyid gsang sngags kyi gzhi dag gi don yin du nges te/ brjod par bya ba'i don med pa'i rang bzhin ni 'di dag gi don yin no snyam du yang dag par gtan la 'bebs shing / gsang sngags kyi gzhi 'di dag ni brjod pa dang brjod par bya ba'i rang bzhin dang bral ba yin par sgom par byed do//de ltar brjod pa dang brjod par bya ba'i rang bzhin dang bral ba'i gsang sngags kyi gzhi legs par bsgoms nas yang de'i tshul gyis chos thams cad kyang brjod pa dang brjod par bya ba'i rang bzhin dang bral ba yin par yang dag par gtan la 'bebs par byed de//ji ltar gsang sngags kyi gzhi 'di rnams brjod du med pa'i rang bzhin yin pa'i phyir brjod par bya ba'i don gang yang med par de bzhin du chos 'di dag thams cad kyang brjod du med pas de dag gi rang bzhin ni brjod du med pa nyid do snyam nas chos thams cad ni brjod pa dang brjod par bya ba'i rang bzhin dang bral ba nyid de brjod du med pa'i bdag nyid du nges par byed de//de ltar nges par byas pa dang / chos thams cad ni kun brtags pa'i bdag nyid kyis stong pa nyid du mthong ngo / /des da ltar mthong ba na chos thams cad brjod du med pa'i rang bzhin du rab tu rtogs pas dga' ba dang /mchog tu dga' ba chen po skyes te/ de'i tshe na des gzungs thob pa zhes bya bar 'gyur ro/ /de nas gzungs thob pa'i rgyu de nyid kyis byang chub sems dpa' la de ma thag tu sa rab tu dga' ba'i ye shes skye ba dang mthun pa'i bzod pa chen po skyes te/don dam pa'i chos rnams la bzod pas na bzod pa zhes bya'o/ /de ltar bzod pa skyes pa la gzungs kyi ye shes zhes bya'o/ /gzungs kyi bzod pa de skyes nas ring po mi thogs par lhag pa'i bsam pa dag pa'i sa rab tu dga' ba zhes bya ba thob par 'gyur ro//de lta bas na gzungs kyi bzod pa 'di ni mos pas spyod pa'i sar gtogs par rig par bya'o/ /de la byang chub sems dpa' rnams kyi gsang sngags kyi gzungs gang zhe na/ byin gyis rlob par nus pa'i ting nge 'dzin gyi dbang gang yin pa de ni gsang sngags kyi gzungs zhes bya ste/'di ltar byang chub sems dpa' bskal pa grangs med pa dang po la ye shes kyi tshogs shin tu yongs su rdzogs par bya ste / bskal pa grangs med pa de 'das nas sa dang po thob ste/ sa de la ye shes shin tu rnam par sbyangs pas shin tu yongs su sbyangs pa'i ting nge 'dzin dang /snyoms par 'jug pa la snyoms par zhugs nas de la dbang thob ste/ ting nge 'dzin gyi dbang gi stobs bskyed pa dang / sngon gyi smon lam gyi stobs bskyed pas gsang sngags kyi gzhi 'di dag sems can rnams kyi yams kyi nad dang /gnod pa dang / nad 'go ba dang / 'khrug pa thams cad zhi bar gyur cig ces ting nge 'dzin gyi dbang gi stobs kyis sems can rnams kyi yams kyi nad dang / gnod pa zhi bar byed pa'i gsang sngags kyi gzhi rnams byin gyis rlob ste / des de ltar byin gyis brlabs pa'i gsang sngags kyi gzhi de dag grub par 'gyur mchog tu grub par 'gyur zhing gtan du grub par 'gyur ro//de bzhin du sa gong ma la gnas pa'i byang chub sems dpa' sems dpa' chen po rnams kyi yang sems can gyi don de dang / de dag gi phyed du gsang sngags kyi tshig de dag ji lta ji ltar byin gyis brlabs pa de lta de ltar rnam pa thams cad du 'grub par 'gyur ro//de lta bas na ting nge 'dzin gyi dbang de lta bur gyur pas gsang sngags rnams 'dzin par byed pas na gsang sngags kyi gzungs zhes bya'o/ /gzungs kyi dbang de'i yul du gyur pa'i gsang sngags kyi gzhi/de dag kyang gzungs kyi yul du gyur pa'i phyir gzungs zhes bya'o/ /de la chos kyi gzungs gang zhe na/ 'di la sar chud pa'i byang chub sems dpa' rnams sangs rgyas dang / byang chub sems dpa' rnams las chos nyan pa na sngon mi shes shing sngon ma thob pa'i ming gi tshogs dang /tshig gi tshogs dang yi ge'i tshogs su gtogs pa'i chos tshad med grangs med/ dpag tu med pa rnams rim pa de nyid kyis yun ring por yang mi brjed par 'dzin par dran pa dang / shes rab la chos kyi gzungs [(]zhas [,]zhes [)]bya'o/ / de la don gyi gzungs gang zhe na/ byang chub sems dpa'i de dag nyid kyis de ltar bzung ba'i chos rnams kyi don tshad med/ grangs med/ dpag tu med pa gang yin pa de dag dus dpag tu med pa'i bar rab tu yang mi brjed par 'dzin pa'i dran pa dang / shes rab gcig tu byas pa la don gyi gzungs zhes bya'o//de dag las bzod pa'i rang bzhin du gyur pa'i gzungs sngar bshad pa de ni sngon gyi rgyu phun sum tshogs pa rnams kyi ste/ mos pas spyod pa'i sa nyid la 'thob po/ /gzhan gzungs gsum po ni bskal pa grangs med pa dang po 'das nas sa dang po la sogs pa la 'thob po//de la mdo las kyang / chos bzhi dang ldan pa'i byang chub sems dpa' sems dpa' chen po ni gzungs phun sum tshogs pa yin no/ /zhes gsungs pa'i phyir te/ chos bzhi ni gzungs 'thob par 'gyur ba'o/ /chos bzhi ni bdag dang gzhan mnyam pa nyid kyi mi mthun pa'i phyogs su gyur pa ste/'di ltar 'dod pa rnams la lhag par zhen pa dang / phrag dog dang ser sna dang chos kyi kun dga' la mi dga' ba'o/ /de las bzlog pa ni 'dod pa rnams la smod pa dang / phrag dog med pa dang / thams cad gtong ba dang /'di lta ste byang chub sems dpa'i sde snod la brtsams nas chos la dga' ba'o zhes bya'o/ /de la mdo gzhan las gsungs pa'i rim gyis sa dang po la ni gnas khyad par du 'phags pa zhes bya ba'i gzungs thob par 'gyur te/ de'i dbang gis dam pa khyad par can gyi chos thams cad kyi gnas su gyur pa yin no//gnyis pa la ni dri ma med pa zhes bya ba ste/ de'i dbang gis der tshul khrims rnam par dag par 'gyur ro/ /gsum pa la ni shin tu brtan pa zhes bya ste/ de'i dbang gis sems 'khrug pa thams cad dang bral ba bzod pa'i stobs phun sum tshogs pas shin tu bstan par 'gyur ro//bzhi pa la ni thub par dka' ba zhes bya ba ste/ de'i dbang gis bdud dang phyir rgol ba thams cad kyis mi thub par 'gyur ro/ /lnga pa la ni yon tan gyis sems brgyan pa zhes bya ba'o / /drug pa la ni ye shes kyi dkyil 'khor gyi sgron ma zhes bya ba'o//bdun pa la ni khyad par du 'gro ba zhes bya ba'o/ /brgyad pa la ni mi rtog pa zhes bya ba'o/ /dgu pa la ni sgo mtha' yas pa zhes bya ba'o/ /bcu pa la ni mi zad pa'i za ma tog ces bya ste/ de ltar sa dang sar so so'i gzungs la sogs pa gzungs tshad med grangs med pa stong phrag du ma thob pas na gzungs thob pa zhes bya ba ste/de'i phyir 'di ltar mos pas spyod pa'i sa dang yang thun mong du gyur pas yon tan 'di ltar smos so/ /rnam pa gzhan du yang 'di la yi ge thams cad goms par byas na chos thams cad rtogs pa'i rgyur 'gyur te/'di lta ste chos thams cad ni ma skyes pa'o zhes bya ba la yi ge'i dang po a zhes bya ba la skye ba med pa'i don sgro btags nas a zhes bya ba ni skye ba med pa'i don yin par yongs su btags te/ gang gi tshe zhi gnas dang lhag mthong gi sbyor bas yang dag par bsgoms par gyur pa de'i tshe/goms pa'i stobs kyis a zhes bya ba gcig gis chos thams cad skye ba med pa'i rnam par snang ste/ de ltar na a zhes bya ba ni chos thams cad rtogs par bya ba'i rgyu yin no/ /de ltar a zhes bya ba de nyid ma skyes pa dang / ma byung ba dang / dngos po med pa'i ngo bo nyid dang / 'gag pa med pa la sogs pa'i don la brten te bsgoms na chos thams cad so sor rtogs pa'i rgyur 'gyur ro/ /de'i phyir 'di skad du gzungs kyi sgo gang zhe na/ 'di lta ste/ yi ge mnyam pa nyid dang / skad mnyam pa nyid dang / yi ge sgo yin pa dang /yi ge 'jug pa'o/ /yi ge sgo dang / yi ge 'jug pa gang zhe na/ a zhes bya ba ni chos thams cad kyi sgo ste/ gzod ma nas ma skyes pa'i phyir ro/ /ra zhes bya ba ni chos thams cad kyi sgo ste/ rdul dang bral ba'i phyir ro zhes bya ba la sogs pa 'og nas gsungs so//de ltar yi ge de dag la brten nas chos thams cad rtogs par byed pa na dran pa dang / shes rab skye ste/ de dag gi don 'dzin pas na gzungs zhes bya'o/ /gzungs de'i rgyu de las skyes pa de ni chos thams cad kyi don dam pa la dmigs par bzod pa ste/ dran pa dang shes rab de gnyis la bzod pa'i gzungs zhes bya'o//yang yi ge de dag nyid sgrim pa thams cad kyis legs par goms par byas nas sangs rgyas dang byang chub sems dpa' rnams kyis rgyun chags par shin tu myur bar bshad pa'i chos kyi rgyun dang / de'i don rnams kyang yang dag par 'dzin pa'i rgyur 'gyur te/ ming gi tshogs dang / tshig gi tshogs dang / yi ge'i tshogs rnams la shin tu goms par 'gyur bas na dran pa dang shes rab de nyid la chos kyi gzungs dang / don gyi gzungs zhes bya'o/ /yang yi ge de dag nyid byang chub sems dpas yang dag par bsgoms nas yid bzhin gyi nor bu lta bur dngos po thams cad rab tu sbyin par 'gyur te/'di ltar de dag ni sngon gyi smon lam gyi mthu dang / ting nge 'dzin gyi mthus gnod pa thams cad zhi bar bya ba dang / sdig pa thams cad byang bar bya ba'i phyir zhes bya ba la sogs pa'i dgos par byin gyis brlabs na don thams cad sgrub par byed pa grub par 'gyur te/de'i tshe byin gyis rlob pa'i shes pa de nyid la gsang sngags kyi gzungs zhes bya'o/ /gzungs de'i dmigs par bya ba yin pas na yi ge de dag la yang gzungs zhes bya bar brjod do//man ni shes pa yin la/ tra zhes bya ba ni skyong ba yin par bshad pas shes pa dang / snying rje la sngags zhes bya bar brjod do/ /de nyid kyi rgyu mthun pa yin pa'i phyir yi ge de dag la yang sngags zhes bya'o/ /yang ma rig pa spong bar byed pa dang / rig pa skyed par byed pa'i phyir de nyid la rig pa zhes kyang bya'o/ /rnam pa thams cad mkhyen pa nyid kyi go 'phang gi gzhi yin pa'i phyir/ gzhi rnams zhes bya ste/ de lta bas na gzungs kyi gsang sngags kyi gzhi rnams rig pa'i gsang sngags gzha rnams zhes bya ba'i ming 'thob po/ / de la sngar bshad pa'i bzod pa'i gzungs gang yin pa de ni mos pas spyod pa'i sa yongs su rdzogs pa na mngon par brtson pa'i stobs kyis 'byung ngo / /gzungs lhag ma gsum ni smon lam gyi stobs kyis skye bar 'gyur te/ sa dang po la de dag chung yang brten par 'gyur ro/ / de yan chad ni gzungs de dag thams cad kyang gong nas gong du mchog tu cher skye bar 'gyur te/ de'i phyir gzungs thob pa zhes gsungs so/ /de ltar byang chub sems dpa' gzungs thob pa de ni 'phags pas bcu pa las bshad pa'i rim pas byang chub sems dpa'i sa dang po dang gnyis pa la sogs pa la 'phags pa'i bden pa rnams dang /rten cing 'brel par 'byung ba rnams legs par bsgoms pa'i rgyus gang zag stong pa nyid dang / chos stong pa nyid la yang dag par gnas par 'gyur te/ de 'di ltar stong pa nyid de yang kun tu 'gro ba la sogs pa'i mtshan nyid du bzung nas bsgoms na stong pa nyid kyi rnam par thar pa'i sgo skye bar 'gyur ro//de stong pa nyid yongs su 'dris na sa dang chu dang / rlung dang / me dang / zla ba dang / nyi ma dang / ri dang / rgya mtsho dang / mtshe'u dang / dgon pa dang / phyogs dang yul la sogs pa'i dngos po sngon chos kyi mtshan mar so sor snang bar gyur pa gang dag yin pa de dag thams cad so sor snang bar mi 'gyur gyi/mtshan ma med pa'i rnam par snang ste de'i tshe na mtshan ma med pa'i rnam par thar pa'i sgo skye bar 'gyur ro/ /de ltar mtshan ma thams cad dang bral nas mtshan ma med pa'i sgor gnas pa de la khams gsum pa thams cad khams gsum gyi rnam par mi snang ste/de ni de la 'dod pa ci yang mi skye'o/ /'dod pa med pa'i phyir de ni de la yid kyis gang du yang smon pa med do/ /de'i tshe de la smon pa med pa zhes bya ba'i rnam par thar pa'i sgo skye bar 'gyur ro//des de ltar stong pa nyid kyi rnam par thar pa'i sgo bzung ste bsgoms na stong pa nyid kyi ting nge 'dzin la gnas par 'gyur ro/ /mtshan ma med pa'i rnam par thar pa'i sgo bzung ste bsgoms na de las gzhan pa'i spyod yul dang bral bas mtshan ma med pa'i spyod yul du 'gyur ro//des smon pa med pa'i bdag nyid du mthong na khams gsum la smon du rung bar rtog par mi byed do/ / de bas na stong pa nyid la gnas pa/ mtshan ma med pa spyod yul ba / ma brtags pa'i smon lam dang ldan pa zhes bya ba'o/ /de ltar rnam par thar pa'i sgo gsum gyi ting nge 'dzin dag la legs par gnas pa de spros pa thams cad nye bar zhi ba'i phyir mnyam pa nyid kyi bzod pa bzhi 'byung bar 'gyur te/bdag dang gzhan du rnam par rtog pa med pa'i phyir sems can la mnyam pa nyid kyi bzod pa dang /rjes su chags pa dang khong khro ba med pa'i phyir 'du byed la mnyam pa nyid kyi bzod pa dang / de bzhin nyid tsam du zad pa'i phyir chos thams cad la mnyam pa nyid kyi bzod pa dang / 'khor ba dang mya ngan las 'das pa la sems mnyam pa'i phyir mi gnas pa mnyam pa nyid kyi bzod pa'o//de ltar des mnyam pa nyid kyi bzod pa bzhi bskyed nas yongs su 'dris par byas pa'i phyir sa bcu pa las bshad pa'i rim pa bzhin du gzhan yang mnyam pa nyid bcu 'byung ste/ 'di lta ste/ mtshan ma med par mnyam pa nyid dang / mtshan nyid med par mnyam pa nyid dang /ma skyes par mnyam pa nyid dang / 'byung ba med par mnyam pa nyid dang / dben par mnyam pa nyid dang / gzod ma nas zhi bar mnyam pa nyid dang / spros pa med par mnyam pa nyid dang / blang ba med pa dang dor ba med par mnyam pa nyid dang / sgyu ma dang / rmi lam dang / mig yor dang / brag ca dang / chu zla dang / gzugs brnyan dang / sprul par mnyam pa nyid dang / dngos po dang dngos po med pa nyid mnyam pa nyid do/ /kun brtags pa'i rnam pa dang bral ba spros pa med pa'i chos kyi dbyings gang yin pa de ni mtshan ma dang bcas pa thams cad dang / rnam par rtog pa dang bcas pa'i rnam par shes pa thams cad kyi spyod yul ma yin gyi rnam par mi rtog pa'i ye shes nyid kyi spyod yul yin te/ de'i phyir chos thams cad ni mtshan ma med pa zhes bya'o/ /de lta bas na yongs su grub pa'i bdag nyid kyis chos thams cad mtshan ma med par mnyam pa nyid do//kun brtags pa'i chos brjod par bya ba dang / rjod par byed pa dang / gzung ba dang 'dzin pa'i rnam pa'i chos gang dag yin pa de dag thams cad ni shin tu med pa'i phyir kun brtags pa'i mtshan nyid des mtshan nyid med de de bas na mtshan nyid med par mnyam pa nyid ces bya'o//don dam par yongs su grub pa'i ngo bo nyid gang yin pa de ni/ bdag nyid kyis skye ba yang med la rgyu dang rkyen rnams kyis bskyed pa yang med de/ de bas na ma skyes par mnyam pa nyid dang / 'byung ba med par mnyam pa nyid do/ /de bzhin nyid kyi ngo bo nyid de ni nyon mongs pa'i kun nas nyon mongs pa dang bral ba'i phyir dang skye ba'i kun nas nyon mongs pa dang bral ba'i phyir ro//chos thams cad ngo bo nyid kyis dben pa ste/ de bas na dben par mnyam pa nyid do/ /yongs su grub pa'i ngo bo nyid de ni sngon nas skye ba med pa'i phyir dang / tha mar 'gag pa med pa'i phyir/ chos thams cad skyes pa med pa dang / 'gags pa med pa ste/ de bas gzod ma nas zhi bar mnyam pa nyid do/ /don dam pa'i ngo bo nyid de la 'dzin pa ni yang dag pa'i ye shes spros pa med pa yin te/ de'i gzung ba yin pa'i phyir/ chos thams cad kyang spros pa med pa zhes bya ste/de lta bas na spros pa med par mnyam pa nyid do/ /don dam pa'i ngo bo nyid de ni byed pa med pa'i phyir don dam par na 'gro ba gzhan dang phung po gzhan pa gtong ba dang / phung po gzhan len pa med de/ don dam par de ltar len pa dang / yongs su 'dor ba med pa'i phyir blang ba med pa dang /dor ba med par mnyam pa nyid do/ /kun brtags pa de dag ni gnyis kyi bdag nyid kyis ngo bo nyid med pa'i phyir sgyu ma la sogs pa dang mtshungs pas sgyu ma la sogs par mnyam pa nyid do/ /yongs su grub pa'i ngo bo nyid ni kun brtags pa'i dngos po'i ngo bo nyid du yang med la/ri bong gi rwa la sogs pa bzhin du dngos po med pa'i ngo bo nyid du yang med de/ de bas na gnyis su med pa'i phyir dngos po dang dngos po med pa mnyam pa nyid yin par shes par bya ste/ de ltar mnyam pa nyid kyi mtshan nyid rnam pa bcu rtogs pas chos thams cad la mnyam pa nyid kyi bzod pa thob pa zhes bya'o //de ltar rnam par thar pa'i sgo gsum gyi ting nge 'dzin dag la legs par gnas shing mnyam pa nyid kyi chos bcu rtogs pa dang ldan pa de sems can rnams mgon med par mthong nas sems can rnams la snying rje chen po mngon par skyes te/de ltar don dam pa la mkhas pa de gang gi tshe mya ngan las 'das pa la gzhol bar gyur pa de'i tshe/ snying rjes zin pas 'khor ba la mngon du phyogs par mdzad do/ /'di ltar shes rab kyis 'khor ba mi len cing / mya ngan las 'das pa la mngon du phyogs pa'i sems su gyur la/snying rjes mya ngan las 'das pa mi len cing 'khor ba la mngon du phyogs par sbyor ba de la/ sa bcu pa las bshad pa'i rim pa bzhin du tshul bzhin yid la byed pa 'di 'byung bar 'gyur te/ rang bzhin gyis nyam chung ba bdag gi dang bral ba'i 'dus byas 'di ni nyon mongs pa dang ldan pa'i phyir dang /rkyen tshogs pa las 'byung gi nyon mongs pa dang mi ldan zhing rkyen tshogs pa med par ni 'byung bar mi nus so/ /de lta bas na bdag gis nyon mongs pa dang ldan pa dang / rkyen tshogs pa med par ni bya'i/ mgon med pa'i sems can rnams chud zos su 'ong bas sems can rnams la phan gdags pa'i phyir 'dus byas thams cad kyi thams cad du rnam par zhi bar ni mi bya'o snyam mo/ /de ltar shes rab dang / snying rje dang ldan zhing yid la byed pa 'di la gnas pa de la/ shes rab kyi pha rol tu phyin pa la gnas pa chags pa med pa zhes bya ba snang ba'i tshul du mngon du 'gyur te/shes pa 'di ni spyod pa dang rjes su mthun pa'i bzod pa zhes bya'o/ /de ltar shes rab kyi pha rol tu phyin pa la gnas pas snang bar bya ba chags pa med par gnas pa'i mtshan nyid gzungs shes pa 'di la shin tu gnas pa de sems can rnams kyi don du 'khor los sgyur ba'i rgyal srid kyang byed la/de la yang chags pa med par spyod do/ /'dod pa la kun tu spyod pa mang po yang ston la / de la yang chags pa med par spyod do/ /'jig rten pa'i yo byad phun sum tshogs pa thams cad kyang sems can gyi don du stsogs la de la yang chags pa med do//byang chub kyi phyogs kyi chos rnams kyang bsgoms la mya ngan las 'das pa la yang chags pa med par bsgom mo/ /de bzhin nyid 'dus ma byas kyang bsgoms la/ de la yang chags pa med par bsgom mo//de ltar thabs mkhas pa gtso bor byed pa de gzungs shes pa'i khyad par thob pas/ chags pa med pa'i gzungs thob pa zhes bya'o/ /de ltar chags pa med par gnas pa la gnas nas 'khor ba dang / mya ngan las 'das pa gnyis mnyam par sems pa de sems can gyi don 'ba' zhig la rnam pa thams cad du rtsol ba na sems can rnams la phan par bya ba'i phyir/bsam gtan dang / rnam par thar pa dang / ting nge 'dzin dang snyoms par 'jug pa rnams la mnyam par 'jog kyang de'i dbang gis skye ba mi len gyi/ bsam gtan dang / rnam par thar pa dang /ting nge 'dzin dang / snyoms par 'jug pa de dag sems can rnams la phan par bya ba'i don nyid du yongs su bsngo bar mdzad do/ /de ltar sems can rnams kyi don du de dag yongs su bsngos nas sems can rnams kyi don nyid du 'di lta ste/ rdzu 'phrul bya ba shes pa dang /lha'i mig dang / lha'i rna ba dang / sems kyi rnam grangs shes pa dang / sngon gyi gnas rjes su dran pa'i shes pa dang / zag pa zad pa shes pa mngon sum du byed pa'i shes pa dang / mngon par shes pa drug bskyed do/ /de la rdzu 'phrul bya ba shes pa ni rnam pa gnyis te yongs su bsgyur ba dang /sprul pa'o/ /de la yongs su bsgyur ba zhes bya ba ni/ g.yo bar bya ba dang / 'bar bar bya ba dang / char 'bab par bya ba dang / khyab par bya ba dang / dngos po gzhan du bsgyur bar bya ba dang / 'gro ba dang / 'ong ba dang / bsdu ba dang / rgyas par bya ba dang /gzugs thams cad lus kyi nang du zhugs pa dang / bskal pa mthun pa'i drung du 'gro ba dang / snang bar bya ba dang / mi snang bar bya ba dang / dbang du bya ba dang / pha rol po'i rdzu 'phrul zil gyis mnan pa dang / spobs pa sbyin pa dang / dran pa sbyin pa dang / bde ba sbyin pa dang / 'od gtong ba la sogs pa gzhan yang de dang 'dra ba dag ste/ sems can rnams la gang dang gang dgos pa de dang de byang chub sems dpa' des sgrub po/ /sprul pa zhes bya ba ni/ sprul pa rnam pa gsum ste/ lus sprul pa dang / ngag sprul pa dang / yul sprul pa'o//de la lus sprul pa ni gang byang chub sems dpa' sems can rnams kyi don gyi ched du/ lha dang / klu dang / gnod sbyin dang / lha ma yin dang / nam mkha' lding dang / dri za dang / mi 'am ci dang / lto 'phye chen po'i kha dog dang / mi'i kha dog dang /dud 'gro dang / yi dags dang / sems can dmyal ba'i kha dog dang / nyan thos kyi kha dog dang / rang sangs rgyas kyi kha dog dang / byang chub sems dpa'i kha dog dang / sangs rgyas kyi kha dog tu sprul pa rnam pa du ma ston cing / phyogs bcu'i 'jig rten gyi khams dpag tu med grangs med pa rnams su sems can dpag tu med grangs med pa rnams kyi don du skad cig gcig la cig car du kha dog sna tshogs pa'i sprul pa de dag gis bsgrubs pa'o//ngag sprul pa gang zhe na/ 'di la byang chub sems dpa' lha dang / klu dang / gnod sbyin dang /dri za dang / lha ma yin dang / nam mkha' lding dang / mi 'am ci dang / lto 'phye chen po dang / nyan thos dang / byang chub sems dpa'i 'khor 'dus shing 'khod pa dpag tshad kho ra khor yug gi dkyil 'khor nas/ stong spyi phud dang / stong gnyis dang / stong gsum dang /phyogs bcu'i 'jig rten gyi khams dpag tu med pa grangs med pa rnams kyi bar du sprul pa'i sgras go bar mdzad pa dang / sgra de dag las kyang sems can rnams la chos bstan pa rnam pa du ma mdzad pa'am/ sprul pa gzhan dag gis byed du 'jug par mdzad pa dang / nam mkha' las kyang chos ston pa'i sgra 'byin cing yul sna tshogs na mos pa rnams la bskul bar mdzad pa'o//yul sprul pa gang zhe na/ yo byad kyis phongs pa'i sems can rnams kyi don du byang chub sems dpa' bza' ba dang / btung ba dang / bzhon pa dang / gos dang / nor bu dang /mu tig dang / bai DUr+ya la sogs pa'i sprul pa sprul par mdzad de/ ji ste de'i tshe tsam zhig tu dgos par gyur na yang de'i tshe tsam nyid du 'gyur ro/ /ci ste gang gi tshe de bden pa nyid du byin gyis rlob na yang dus ji srid pa nyid du 'gyur ro/ /de ltar rdzu 'phrul bya ba shes pas phan 'dogs so//rdzu 'phrul gyi cho 'phrul gyis sems can rnams 'dun par mdzad nas/ sangs rgyas kyi bstan pa la 'jug par mdzad do/ /yang na sems can sdug bsngal ba rnam pa sna tshogs kyis phan 'dogs par mdzad pa'o// //bam po gnyis pa//sngon gyi gnas rjes su dran pa'i shes bzhes pas ni sems can rnams kyi sngon gyi spyod pa rnams rjes su dran nas de dang mthun pa mkhyen te/ chos bstan pa la sogs pa mdzad do/ /yang na byang chub sems dpa'i spyod pa mchog tu rmad du byung ba'i spyod pa dran nas/ sems can rnams dad pa yang dag par bskyed pa'i phyir yang dag par rab tu ston to//rtag par smra ba dang / chad par smra ba rnams la sngon gyi tshul nye bar bstan nas/ lta ba rnam par 'jig par byed do/ /de shes pa des bdag nyid kyi sngon gyi gnas kyang dran no/ /gzhan dag gi sngon gyi srid pa yang dran no//yang gzhan dag gi sngon gyi srid pa de dag nyid kyi rjes su dran par mdzad pa'o/ /lha'i rna bas ni sems can dmyal ba dang / dud 'gro dang / yi dwags dang / mi rnams kyi nang du sems can sdug bsngal ba rnams kyi nyam thag pa'i sgra gsan nas/de dag gi sdug bsngal bsal ba'i phyir 'bad par mdzad do/ /yang na sangs rgyas kyi zhing sna tshogs sam/ 'di nyid na chos bstan pa tha dad pa gang yin pa de dag gsan to/ /yang na yang dag par bskul ba'i sgra rnam pa du ma gsan to/ /lha'i mig gis ni byang chub sems dpa' phyogs bcu'i sems can rnams kyi dge ba dang mi dge ba'i spyod pa rnams sna tshogs pa gzigs nas ci rigs par sgrub par mdzad do//sangs rgyas kyi zhing de dang de dag na de bzhin gshegs pa 'khor mang po'i nang na chos ston pa yang gzigs so/ /pha rol gyi sems shes pas ni gzhan dag gi 'dod chags dang /zhe sdang la sogs pa dang mtshungs par ldan pa'i sems rnams mkhyen nas/ de dag la ci rigs par sgrub par mdzad do/ /sems can rnams kyi dbang po dang / spyod pa dang / khams dang / bag la nyal ba la sogs pa tha dad pa rnams mkhyen nas ci rigs par chos ston to//zag pa zad pa shes pas ni byang chub sems dpa' bdag gam gzhan dag gi nyon mongs pa zad pa yang dag pa ji lta ba bzhin du rab tu mkhyen te/ bdag gi nyon mongs pa zad pa thob pa 'am/ ma thob pa'am/ gzhan dag gi nyon mongs pa zad pa thob pa'am/ ma thob pa yang dag pa ji lta ba bzhin du rab tu mkhyen to/ /bdag dang gzhan dag gi nyon mongs pa zag pa zad par bya ba'i thabs dang / thabs ma yin pa yang rab tu mkhyen to/ /gzhan dag gi nyon mongs pa zad pa thob pa'i mngon pa'i nga rgyal dang /bden pa yang rab tu mkhyen to/ /byang chub sems dpa' de dag thams cad rab tu mkhyen nas/ de la bdag nyid kyis zag pa zad pa mngon sum du mdzad do/ /zag pa dang bcas pa'i dngos po dang / zag pa med pa yang rab tu mkhyen te/byang chub sems dpa' zag pa zad pa'i shes pa de nyid kyis zag pa dang bcas pa'i nyon mongs pa'i chos thams cad dang lhan cig gnas kyang bdag nyid kun nas nyon mongs par mi 'gyur ro/ /mngon par shes pa drug po de dag ni byang chub sems dpa' la tshe rabs tshe rabs su yod par gyur to// dud 'gro'i skye gnas su skyes pa na yang nyams par mi 'gyur bas na mngon par shes pa mnyams pa zhes bya'o/ /de ltar mngon par shes pa drug dang ldan pa'i byang chub sems dpa' ni sems can rnams la phan gdags pa nyid kyi phyir 'bad do/ / phan gdags pa'i sems can de dag kyang lhan cig skyes pa'i dga' bas byang chub sems dpa'i ngag nyan par 'gyur te/ des gdams pa dang / rjes su bstan pa las srog gi phyir yang 'gal bar mi byed do/ /gang gzhan yang de la gnod par sems pa dang ldan pa bdud kyi phyogs sam/mu stegs can la sogs pa de dag kyang / thabs kyis bdag gi gdams pa dang / rjes su bstan pa 'dzin du 'jug go/ /gang dag de'i ngag nyan du mi btub pa de dag kyang klad pa 'gas pa la sogs pa'i tshor bas bsnyad de / bsdigs nas bdag gi tshig nyan du 'jug go//byang chub sems dpa' dus dang dus ma yin pa la sogs pa la gzigs pa ma gtogs par byang chub sems dpa'i ngag las 'gal bar byed pa'i sems can ni sems can gyi ris na gang yang med de / 'di ni bsdu ba'i dngos po'i bsod nams yongs su bsngo ba dang /pha rol tu phyin pa'i bsod nams kyi stobs kyi chos nyid ces bya'o/ /de bas na gzung ba'i tshig dang ldan pa zhes bya'o/ /yon tan 'di dag dang ldan pa'i byang chub sems dpa' sbyor ba rnam par dag pa yin par bstan pa'i phyir/ tshul 'chos pa med pa zhes bya ba la sogs pa gsungs so//sngar sar chud pa rnams la yang log par 'tsho ba'i las rnams mi srid na khyad par du dri ma med pa'i sa la sogs pa la lta ga la zhig yod/ 'dir sa bdun pa la log par 'tsho ba'i las rnams med bzhin du ci'i phyir bstan zhe na/ 'di la nyes pa med de/'og ma rnams su spangs su zin kyang rtsol ba dang bcas pa'i spyod pa 'dir yongs su rdzogs pas tha mar bstan par bya ba yin no/ /sa bdun pa la gnas pa'i byang chub sems dpa' la ni nyon mongs pa zhes kyang mi bya/ nyon mongs pa med pa zhes kyang mi bya ste/ nyon mongs pa can gyi spyod pa rnams 'di nyid du shin tu spang ba'i phyir te/ 'di ltar lhag pa'i bsam pa yongs su dag pa'i lus kyi las dang ldan pa yin/ lhag pa'i bsam pa yongs su dag pa'i ngag dang / yid kyi las dang ldan pa yin te/ gang dag de bzhin gshegs pas smad pa'i lus dang /ngag dang yid kyi las de dag thams cad kyi thams cad du kun tu mi 'byung ba 'di ni sa bdun pa nyid kyi yon tan te/ de bas na de la log par 'tsho ba'i lus kyi las med par bstan pa'i phyir tshul 'chos pa med pa zhes bya ba gsungs so/ /rnyed pa 'dod pas ya mtshan du 'dzin du gzhug pa'i phyir gzhan dag la spyod lam du gtogs pa'i lus kyi sbyor ba bstan pa ni tshul 'chos pa zhes bya'o//ngag gi las yongs su ma dag pa med par bstan pa'i phyir/ kha gsag med pa zhes bya ba gsungs te/ rnyed pa dang 'brel pa'i tshig gi sbyor ba rnyed pa 'dod pa nyid kyi phyir smra ba ni kha gsag ces bya'o//yid kyi las yongs su ma dag pa med par bstan pa'i phyir shes kyi khe dang rnyed pa'i sems med pa zhes bya ba gsungs te/ snyan pa dang brjod pa dang grags pa dang / shes kyi khe zhes bya ba ni rnam grangs su gtogs pa'o//rnyed pa dang / bkur sti'i sems dang bral bas de skad ces bya'o/ /de ltar yongs su ma dag pa'i sbyor ba med par bstan nas/ yongs su dag pa'i sbyor ba yod par bstan pa'i phyir zang zing med pa'i phyir/ sems kyis chos ston pa zhes bya ba gsungs te/snying rjes yang dag par bskul cing / shes rab kyis sbyangs pa'i yid dang ldan pa ni/ sems can rnams la phan gdags pa'i phyir chos ston pas na de skad ces bya'o/ /de ltar rnam pa de dag gis sa bdun pa man chad rtsol ba dang bcas par mtshan ma med pa la spyod pa'i yon tan bstan nas/da ni chos zab mo la bzod pa'i pha rol du son pa zhes bya ba la sogs pas lhun gyis grub par mtshan ma med pa la gnas pa'i yon tan ston te/ 'di ltar byang chub sems dpa' rnams/ sa brgyad pa yan chad rtsol ba thams cad rgyun chad nas/ mtshan ma dang rnam par rtog pa thams cad las yang dag par 'das te/rang dgar byed pas rtsol ba ci yang med do/ /de dag ni shin tu zhi zhing rtsol ba med mod kyi sngon gyi smon lam gyi stobs kyis sems can gyi don spyad pa dang / byang chub kyi phyogs kyi spyod pa mngon du 'gyur ro/ /sa brgyad pa de la mi skye ba'i chos la bzod pa thob par bstan pa'i phyir/chos zab mo la bzod pa'i pha rol du son pa zhes bya ba gsungs te/ 'di ltar de rnam pa thams cad du sems dang / yid dang / rnam par shes pa'i rnam par rtog pa'i 'du shes dang bral zhing thogs pa med la /nam mkha' dang 'dra zhing bla gab med pa'i rang bzhin du khong du chud pas mi skye ba'i chos la bzod pa thob pa zhes bya'o/ /rgyal ba'i sras dag de la bzod pa de lta bu dang ldan pa'i byang chub sems dpa' ni sa mi g.yo ba thob ma thag tu/ byang chub sems dpa'i gnas zab mo shes par dga' ba tha mi dad pa/mtshan ma thams cad dang bral ba thob pa yin no zhes bya ba la sogs pa gsungs so/ /byang chub sems dpa'i gnas pa zab mo de lta bu de dag las lhag par zab pa gzhan med pa'i phyir chos zab mo la bzod pa'i pha rol du son pa zhes bya'o//de ltar bzod pa thob pa'i byang chub sems dpa' de ni rgyal rigs dang / bram ze dang / rje'u rigs dang / dmangs rigs dang / lha dang tshangs pa'i 'khor dang / dge slong dang / dge slong ma dang / mu stegs can dang bdud kyi 'khor gang dang / gang du 'gro ba de dag thams cad du 'jigs pa med cing bag tsha ba med par 'gro la 'dzem pa med par smra'o//de ci'i phyir zhe na/ de mi skye ba'i chos la bzod pa thob pas chos thams cad skye ba med pa'i rnam par rnam pa thams cad du rtogs pa'i phyir ro/ /de bas na 'di la 'khor gyi nang du mi shes pa las byung ba'i 'jigs pa med do//bag chags ma gtogs par nyon mongs pa thams cad spangs shing skye ba med pa nyid du mthong ngo / /de lta bas na 'di la 'khor gyi nang du nyon mongs pa las byung ba'i 'jigs pa med de de'i phyir mi 'jigs pa 'thob pa zhes bya ba gsungs so//mi rdzi ba yin par bstan pa'i phyir bdud kyi las thams cad las yang dag par 'das pa zhes bya ba gsungs te/ bdud kyi las gang 'og nas 'chad pa rnams dang / mdo gzhan dag las bdud kyi las bshad pa gang yin pa de dag thams cad las ring ba bas kyang ches ring bar yang dag par 'das pa yin no//las kyi sgrib pa rgyun bcad pa zhes bya ba ni/ byang chub sems dpa' rnams kyis/ ma 'ongs pa'i skye bo rnams la thugs brtse ba'i phyir/ de lta de ltar skye ba bstan pa ma gtogs par bzod pa de thob ma thag tu de'i bde 'gro dang /ngan 'gror rnam par smin par 'gyur ba'i las kyi sgrib pa gang yin pa de dag 'di la rgyun chad pa yin no/ /chos rab tu rnam par 'byed cing rnam par dbye ba ston pa la mkhas pa zhes bya ba la chos ni phung po dang khams la sogs pa lhag mthong gi chos rnams dang / dran pa nye bar gzhag pa dang / yang dag par spong ba la sogs pa byang chub kyi phyogs dang mthun pa'i chos rnams dang stobs bcu dang / mi 'jigs pa la sogs pa sangs rgyas kyi chos rnams dang / rgyun du zhugs pa'i lam gyi 'bras bu la sogs pa thob pa'i chos rnams so//de dag rab tu rnam par 'byed pa ni/ mtshan nyid dang / byed pa dang / rgyu dang / 'bras bu dang / grangs dang / ro myang ba dang / nyes dmigs dang / 'byung ba dang / kun nas nyon mongs pa dang / rnam par byang ba dang / yongs su shes pa dang /spang ba dang / mngon sum du bya ba dang / bsgom pa dang / gang dag yang phyi rol gyi chos 'jig rten gyi khams 'di ltar 'byung ngo / /'di ltar 'jig par 'gyur ro/ /'di ltar 'jig go/ /'di ltar chags so/ /dus 'di srid cig tu 'jig go/ / 'chags so/ /dus 'di srid cig tu gnas so/ /'di dag ni sems can dmyal ba'o/ /'di dag ni dud 'gro'i skye gnas so/ /'di dag ni yi dags so/ /'di dag ni mi'o/ /'di dag ni 'dod pa'i khams so/ /'di dag ni gzugs kyi khams so/ /'di dag ni gzugs med pa'i khams so//sa'i rdul phra rab kyi rdul ni 'di snyed cig go/ /chu'i ni 'di snyed cig go/ /me'i ni 'di snyed cig go/ /rlung gi ni 'di snyed cig go/ /khor yug la sogs pa'i rngams dang / rgya dang / 'phang dang / zabs kyi tshad ni 'di tsam mo/ /gling bzhi pa ni 'di tsam mo//stong gcig ni 'di tsam mo/ /stong gnyis ni 'di tsam mo/ /stong gsum gyi stong chen po ni 'di tsam mo zhes bya ba dang / de bzhin du 'jig rten thams cad kyi bsam pa dang / bag la nyal ba dang / spyod pa dang / mos pa dang / dbang po dang / skyon chung ba dang /skyon mang ba dang / rigs yod pa dang / rigs med pa dang / nges pa dang / ma nges pa dang / zhugs pa dang / ma zhugs pa dang / yongs su smin pa dang / yongs su ma smin pa dang / rnam par grol ba dang / rnam par ma grol ba dang / 'di lta bu'i tshul can dag rab tu rnam par 'byed pa ni chos rab tu rnam par 'byed pa zhes bya'o//rnam par 'byed pa ni chos rnams bye brag tu dbye ba ste/ 'di dag ni phung po rnams so/ /'di dag ni khams rnams so/ /'di dag ni skye mched rnams so zhes bya ba la sogs pa sngar smos pa'i chos de dag thams cad so sor yongs su dbye ba dang /mang po bye brag tu dbye ba la rnam par dbye ba zhes bya'o/ /ston pa ni de rnams gzhan dag la yang dag par ston cing shes par byed do/ /mkhas pa ni de la rab tu shes pa'o/ /de la chos rab tu rnam par 'byed pa ni chos so sor yang dag par rig pa'o//rnam par dbye ba ni don so sor yang dag par rig pa'o/ /ston pa ni nges pa'i tshig so sor yang dag par rig pa'o/ /ston pa la mkhas pa ni spobs pa so sor yang dag par rig pa'o/ /de'i phyir chos rab tu rnam par 'byed cing rnam par dbye ba ston pa la mkhas pa zhes bya ba gsungs so//de ltar sa brgyad pa'i yon tan bstan nas/ /sa gong ma dag la spyod pa nges pa'i sa'i yon tan bstan pa'i phyir bskal pa grangs med pa nas smon lam shin tu brtsams pa zhes bya ba gsungs so/ /bskal pa grangs med pa rnams su smon lam btab pa'i smon lam gang yin pa de dag gis shin tu brtsams pa'i byang chub sems dpa' dag go//'dis ci zhig bstan ce na/ mi skye ba'i chos la bzod pa thob phan cad gang nang gi gzugs kyi lus de ni thams cad kyi thams cad du snang bar mi 'gyur ro/ /ming gi tshogs kyang sems pa dang /yid dang rnam par shes pa'i rnam par mi 'jug ste/ stong pa'i rnam pa nyid du yang dag par gnas so/ /phyi'i chos khams gsum pa gang dag yin pa de dag kyang thams cad kyi thams cad du snang bar mi 'gyur to/ / mtshan ma med pa'i dbyings rnam par thar pa nyid du'o//de ltar de bzhin nyid tsam du zad par gnas pa de la/ rtsol ba thams cad dang / g.yo ba dang / rlom sems dang /[ (]spos [,]spros [)]pa thams cad 'byung bar mi 'gyur ro/ /sems dpa' chen po de de ltar shin tu yongs su mya ngan las 'das pa dang dngos po med pa'i ngo bo nyid dang /gzod ma nas zhi ba dang / chos kyi dbyings kyi ngo bo nyid du gnas na phyis sangs rgyas su byed pa'i chos rnams dang / sems can gyi don gang yin pa de dag yongs su nyams par 'gyur ro zhe na/ de yongs su mi nyams par bya ba'i phyir/bskal pa grangs med pa gnyis su yongs su rdzogs par byas pa'i smon lam gyi pha rol tu phyin pa thabs mkhas pa dang bcas pa snying rje'i rgyu mthun par 'gyur bas / de'i tshe rnam par smin par yongs su bsgyur na/ byang chub sems dpa' de yang kun rdzob la 'jug ste/ kun rdzob la zhugs pa'i byang chub sems dpa' la nang dang phyi'i 'jig rten thams cad sngon gyi dus bzhin du yang dmigs par 'gyur la/de'i tshe byang chub sems dpa' de spyod pa la sbyor ro/ /de lta na sa 'di la nyon mongs pa kun tu 'byung ba thams cad med pas phyi ma la skye ba gzhan 'byung bar 'gyur ba'i las bsags pa med la/sngon gyi dus na bsags pa'i las rnams ni/ dgra bcom pa rnams kyi bzhin du mthu zad par gyur na/ de la las med pas rnam par smin pa yang mi dmigs na/ yang skye ba gzhan len pa lta ji ltar 'gyur/ gong du shin tu myur bar ma brtsal du zin kyang gdon mi za bar bskal pa grangs med pa gcig gis de bzhin gshegs pa'i sa thob par 'gyur na/dus de srid kyi bar du de ji ltar gang gi bdag nyid du gnas par 'gyur zhe na/ 'di la nyes pa med de/ 'dir bstan bcos mdzad pa dag gis bshad pa/ sngon bskal pa grangs med pa gnyis kyi bar du pha rol tu phyin pa gang dag yongs su rdzogs par mdzad de/sngon thabs mkhas pa'i pha rol tu phyin pas mi zad pa'i rnam par yang dag par bsgrubs shing smon lam gyi pha rol tu phyin pas sems can la phan gdags pa'i don dang / yang dag par rdzogs pa'i byang chub tu yongs su bsngos pa de dag thams cad byang chub sems dpas bzod pa thob pa phan cad rnam par smin pa'i bdag nyid du yongs su bsgyur te/de ltar rnam par smin par gyur pa de dag gis 'khor ba ji srid par/ byang chub sems dpa' lhun gyis grub par sems can gyi don dang /yang dag par rdzogs pa'i byang chub bsgrub bo/ /dge ba'i rtsa ba rnam par smin pa'i bdag nyid du yongs su gyur pa de dag nyid kyis skye ba gzhan len par byed do/ /de yang dge ba'i rtsa ba rnam par smin pa de dag nyid kyis skyes pa'i rabs rnam pa du ma nye bar bstan te/sprul pa shin tu mang po rnam pa sna tshogs kyis sems can gyi don mdzad nas sangs rgyas kyi chos rnams yongs su smin par mdzad de/ de bzhin gshegs pa'i sa 'thob po zhes bshad do/ /de bas na spyod pa 'di ni nges pas spyod pa zhes bya ste/ smon lam gyi mthus mngon par grub pa'i phyir ro//spyod pa gnyis pa ni sems can gyi don du nges pa yin te/ rnam par smin pa'i bdag nyid yin pas de'i 'jug pa don med pa ma yin pa'i phyir ro/ /spyod pa 'dis sems can yongs su smin par byas pa'i sems can rnams ni/ theg pa gsum la nges par 'gyur te/de bas na nges par spyod pa la zhugs pa'i byang chub sems dpa' nyi ma gcig rangs par / sems can gyi don byas pa la sngon gyi spyod pa thams cad kyis brgya'i char yang mi phod / stong gi char yang mi phod do zhes bya ba la sogs pa gsungs so/ /de ltar smon lam gyi mthus yang dag par grub pa'i phyir bskal pa grangs med pa nas smin lam gyis shin tu brtsams pa zhes bya ba gsungs so//de ltar shin tu brtsams pa ni sems can rnams la tshad med pas gnas pa'i rgyu mthun pa dang / sangs rgyas kyi zhing du gshegs pa dag gis mngon par shes pa la gnas pa'i rgyu mthun pa zhes bya ba la sogs pa mdo gzhan dag las rgyu mthun pa'i yon tan bstan pa rnams ston te/de la byams pa'i rgyu mthun pa ni/ bzhin 'dzum pa dang ldan pa zhes bya ba ste/ 'di ni nges par spyod pa la zhugs pa rnams kyi chos nyid de tshe rabs tshe rabs su bzhin 'dzum pa dang ldan pa nyid du 'gyur ro//'di lta ste sems can mi bsrun pa rnams dga' zhing yid rton par bya ba'i phyir/ gnas skabs thams cad du nam yang bzhin 'gyur ba mi 'byung ngo / /snying rje'i rgyu mthun pa bstan pa'i phyir/ gsong por smra ba zhes bya ba gsungs so//byang chub sems dpa' ni glo bur du 'ongs pa ma 'dris pa la yang bdag nyid kyis kun dga' ba'i gtam gyis bsdu ba sngar ston gyi phyis ni ma yin no/ /rab tu dga' ba'i rgyu mthun pa bstan pa'i phyir bzhin khro gnyer med pa zhes bya ba gsungs so/ /'di ni chos nyid de gang gi bzhin khro gnyer can du 'gyur ba de lta bu'i yid mi bde ba med do//brtson 'grus brtsams pa la skyo bar 'gyur ba de lta bu med do/ /gzhan dag la mi bzod par 'gyur ba de lta bu med do/ /de lta bu'i yid 'khrug pa mi skyed do/ /da ni pha rol la tshigs su bcad pa'i dbyangs kyis brjod pa la mkhas pa zhes bya ba la sogs pas sangs rgyas kyi zhing du gshegs pa dag gis mngon par shes pa'i rgyu mthun pa'i yon tan rnams ston te/byang chub sems dpa' sangs rgyas kyi zhing du gshegs pa na lam gyi bar du bdag nyid dam/ sprul pas tshigs su bcad pa'i dbyangs kyis gzhan dag la chos ston cing yang dag par bskul lo//de bzhin gshegs pa'i drung du byon nas kyang tshigs su bcad pa'i dbyangs kyis bstod pa dang / dris pa'i lan ldon te/ 'dis ni ngag rnam par dag pa thob par ston to/ /sems rnam par dag pa thob par bstan pa'i phyir sems zhum pa med pa zhes bya ba gsungs te/sa 'og ma la gnas pa'i byang chub sems dpa' kha cig ni tshogs yongs su ma rdzogs pa dang / yid la byed pa rtog pa dang bcas pa'i phyir yon tan gyi lag pas gong ma la gnas pa'i byang chub sems dpa' rnams dang /de bzhin gshegs pa rnams kyi spyan sngar zhum pa'i sems skye'i 'di dag ni tshe la dbang ba dang / sems la dbang ba dang / yo byad la dbang ba dang / las la dbang ba dang / skye ba la dbang ba dang / smon lam la dbang ba dang / mos pa la dbang ba dang /rdzu 'phrul la dbang ba dang / ye shes la dbang ba dang / chos la dbang ba dang / shin tu yongs su dag pa'i dbang bcu po de rnams thob pas dus thams cad du sems la zhum pa'i sems med par bstan pa'i phyir/ sems zhum pa med pa zhes bya ba gsungs so//yang dag par rig pa rnams kyi rnam par smin pa'i so so yang dag par rig pa bzhi thob par bstan pa'i phyir/ spobs pa mi chod pa zhes bya ba gsungs te/ de bas na 'di ni chos smra ba chen po yin par brjod de/ ji skad du/ byang chub sems dpa'i sa blo gros legs pa zhes bya ba 'di la gnas pa de ni chos smra ba chen po byed do//de bzhin gshegs pa'i chos kyi mdzod kyang srung ngo / /chos smra ba'i go 'phang thob pa de ye shes la mkhas pa tshad med pa dang ldan pas so so yang dag par rig pa bzhi po dag gis mngon par bsgrubs pa'i tshig gis chos ston te/de la byang chub sems dpa'i so so yang dag par rig pa ma 'dres pa bzhi rtag tu rgyun mi 'chad par 'byung ngo zhes bya ba la sogs pa gsungs pa lta bu'o/ /dbyangs kyi yan lag grangs med pa 'bum phrag bcu dang ldan pa la mkhas pa dang / spobs pa'i rnam par dbye ba'i sgo tshad med pa dang ldan pa'i bar gyis chos ston to zhes kyang gsungs te/de'i phyir spobs pa mi chod pa zhes bya ba gsungs so/ /'khor gyi nang du 'gro ba la mkhas pa thob par bstan pa'i phyir/ 'khor mtha' yas pa zil gyis gnon pa'i mi 'jigs pa dang ldan pa zhes bya ba gsungs so//'di ltar sa bcu pa'i mdo las gsungs pa'i rim pas rdzu 'phrul bya ba la mkhas pa tshad med pa dang / ye shes la mkhas pa tshad med pa dang / spobs pa la mkhas pa tshad med pa dang / 'od zer bkod pa la mkhas pa tshad med pa dang / dris pa'i lan ldon pa la mkhas pa tshad med pa dang /dbyangs kyi yan lag brjod pa la mkhas pa tshad med pa dang / chos bstan pa la mkhas pa tshad med pa dang / ting nge 'dzin dang gzungs kyi sgo la mkhas pa tshad med pa dang / gsang ba spyod pa la mkhas pa tshad med pa dang / chos kyi sgo rnam par dbye ba la mkhas pa tshad med pa dang / cho 'phrul la mkhas pa tshad med pa dang / dbang la mkhas pa tshad med pa dang / sangs rgyas kyi yul byin gyis brlabs pa la mkhas pa tshad med pa dang / byang chub kyi phyogs kyi spyod pa brjod pa la mkhas pa tshad med pa dang /'jig rten gyi khams brjod pa la mkhas pa tshad med pa dang / sems can gyi khams brjod pa la mkhas pa tshad med pa dang / gdul ba'i khams brjod pa la mkhas pa tshad med pa dang / chos kyi dbyings brjod pa la mkhas pa tshad med pa dang / sangs rgyas kyi zhing yongs su sbyong ba la mkhas pa tshad med pa dang / sangs rgyas kyi spyod yul thams cad du 'jug par bya ba la mkhas pa tshad med pa dang / mkhas pa rnam pa nyi shu po 'di dag la shin tu mkhas pa'i byang chub sems dpa' ni 'khor gang dang gang du 'gro ba de thams cad du bag tsha ba thams cad med de/seng ge dang / tshangs pa dang / de bzhin gshegs pa dang / nam mkha' bzhin du 'jigs pa med pa dang / bsnyems pa dang bcas pa dang / khyu mchog tu gyur pa dang / gang du yang chags pa med pa dang bdun du byas te 'gro bar 'gyur ro//de la sus kyang zil gyis mi non la/ bdag gis ni gang yang zil gyis mi non pa med de/ de'i phyir 'khor mtha' yas pa zil gyis non pa'i mi 'jigs pa dang ldan pa zhes gsungs so/ /bskal pa bye ba mtha' yas pas nges par 'byung ba la mkhas pa zhes bya ba 'dis ni rnam par smin pa'i bdag nyid du gyur pa'i brtson 'grus kyi pha rol tu phyin pa'i rgyu mthun pa bstan te/'di ltar byang chub sems dpa' ni rnam par smin pa'i brtson 'grus kyi pha rol tu phyin pa thob pas bya dka' ba thams cad la bya dka' ba'i 'du shes mi bskyed do/ /sems can la phan pa bya ba dag la yongs su gdung ba mi 'byung ngo //de brtson 'grus shin tu cher brtsams pas 'bad pa na / bskal pa mang po yang 'da' bar 'gyur ba nas/ bskal pa bye ba khrag khrig brgya stong gi bar dag kyang 'da' bar 'gyur te/ ji skad du bdag cag gi bcom ldan 'das shAkya thub pa byang chub sems dpar gyur pa na/sangs rgyas skar rgyal zhes bya ba mnyes par byed pa na bskal pa dgu 'das par gyur to zhes 'byung ba lta bu ste/ de ltar shin tu brtson pa chen pos 'da' bar byas nas bskal pa bye ba khrag khrig brgya stong mang po rnams ni 'da' bar 'gyur gyi/bskal pa grangs med pa las ni sus kyang 'da' bar mi 'gyur ro/ /de bas na bskal pa bye ba mtha' yas pas nges par 'byung ba la mkhas pa zhes bya ba gsungs so/ /de ltar 'di dag gis spyod pa nges pa la sbyor ba'i yon tan bstan nas/ gong du mthar thug par 'gro ba'i sa'i yon tan bstan pa'i phyir / chos thams cad sgyu ma dang / smig rgyu dang / chu zla dang / rmi lam dang / brag ca dang / mig yor dang / gzugs brnyan dang / sprul pa lta bur khong du chud pa zhes bya ba gsungs te/ 'dis ni rnam par smin pa'i shes rab kyi pha rol tu phyin pa'i rgyu mthun par gyur pa/chos thams cad rnam par 'byed pa zhes bya ba'i ting nge 'dzin thob par bstan to/ /'di ltar sgyu ma la sogs pa ni shin tu med kyang dmigs par 'gyur ba ltar chos rnams thams cad kyang de dang 'dra bar rtogs pa'i phyir ro// gdul ba rnams kyi mos pa dang / bsam pa rnam pa sna tshogs kyi phyir la la la gang grags pa'am / dogs pa rnam pa brgyad brtsal ba'i phyir/ dpe rnam pa brgyad bstan te/ 'di ltar chos rnams med pa yin du zin na/ dbyibs la sogs pa'i dbang gis ji ltar dmigs par 'gyur/dmigs su med par chos rnams la dmigs nas sems dang sems las byung ba rnams ji ltar 'byung / chos rnams yod pa ma yin na/ ji ltar skye ba dang 'jig par snang / chos rnams med na ji ltar bza' ba dang / btung ba dang / sbyin pa dang /len pa dang / bde ba dang / sdug bsngal la sogs pa'i tha snyad 'dogs par 'gyur/ ji ltar na ming gi tshogs dang / tshig gi tshogs la sogs par 'gyur/ ji ltar na rgyu dang rkyen las 'byung bar 'gyur/ ji ltar na 'bras bu'i chos rnams rgyu dang 'dra bar 'gyur/ji ltar na 'gro ba dang 'ong ba la sogs pa'i byed pa 'byung snyam du dogs pa la/ chos rnams med na ji ltar dbyibs la sogs pa zhes bya ba 'di la/ sgyu ma'i dpe ste/ dper na sgyu ma mkhan gyi mis sgyu ma'i glang po che'i tshogs dang / rta'i tshogs dang / shing rta dang / dpung bu chung dang / ri dang / bza' ba dang / btung ba la sogs pa dbyibs kyi dbang gis ston kyang / de dag dngos su yod pa ma yin te/ chos thams cad kyang de bzhin no/ /ji ltar na sems dang sems las byung ba rnams de dag la dmigs nas 'byung bar 'gyur zhe na/dper na smig rgyu la dmigs nas/ sems can rnams kyi sems dang sems las byung ba phyin ci log tu 'jug pa ltar chos thams cad kyang de bzhin no/ /ji ltar na skye ba dang / 'jig par 'gyur zhe na/ 'di la nyes pa med de/ chos thams cad la skye ba dang /'gag pa med pa nyid kyi phyir te/ dper na nam mkha' la zla ba snang ba na/ chu zla yang snang bar 'gyur la/ mi snang na mi snang bar 'gyur yang / dngos po'i bdag nyid du de gang yang med pa de ltar chos thams cad kyang yang dag pa ma yin pa kun brtags pa'i bag chags 'byung na ni snang la/ma byung na mi snang ba de'i phyir/ chos thams cad skye ba med cing 'gag pa med do/ /ji ltar 'jig rten gyi tha snyad 'byung bar 'gyur zhe na/ dper na rmi lam na bza' ba dang / btung ba dang / bgo ba dang / sbyin pa dang / len pa dang / bde ba dang / sdug bsngal ba la sogs pa snang yang don dam par mi dmigs pa ltar tha snyad thams cad kyang de bzhin no/ /ji ltar na ming gi tshogs rnams dang / tshig gi tshogs rnams su 'gyur zhe na/ dper na brag ca la sgra'i dngos po med kyang / ri dang gcong rong smra ba med pa las sgrar dmigs pa ltar tshig rnams 'jug pa yang de bzhin no//ji ltar na rgyu dang rkyen rnams las 'byung bar 'gyur zhe na/ dper na dbang po nyams pas skra shad 'dzings pa med pa las snang ba dang / yul gyi khyad par las dri za'i grong khyer la sogs pa dang / bsgoms pa'i khyad par gyis zad par la sogs pa'i mtshan mar snang ba dang /'dod chags dang / mya ngan dang / 'jigs pa la sogs pas non pa'i sems kyi rtog pa'i khyad par gyis rnam par brtags pa'i gzugs la sogs pa so sor snang ba'i rgyu las 'byung yang yod pa ma yin pa de bzhin du chos thams cad rgyu las 'byung yang yod pa ma yin no//med du zin na ji ltar pha las bu 'byung ba dang / shing a mra la sogs pa'i sa bon las 'bras bu 'byung ba bzhin du ji ltar rgyu dang 'dra bar 'gyur zhe na/ dper na bzhin la sogs pa'i rgyu snang bar 'gyur ba las/ me long la sogs pa la gzugs brnyan dag 'dra bar dmigs kyang yod pa ma yin pa ltar chos thams cad kyang de bzhin no//ji ltar na byed pa 'byung bar 'gyur zhe na/ dper na sprul pa rnams la 'gro ba dang 'ong ba la sogs pa lus kyi las rnams dang / ngag gi las rnams rnam par snang yang de ltar yod pa ma yin pa de bzhin du chos thams cad la yang sbyar bar bya'o//yang na mtshan nyid rnam pa brgyad de/ stong pa nyid kyi mtshan nyid dang / mtshan ma med pa'i mtshan nyid dang / smon pa med pa'i mtshan nyid dang / ngo bo nyid med pa'i mtshan nyid dang / rten cing 'brel bar 'byung ba'i mtshan nyid dang /mig yor gyi mtshan nyid dang / kun brtags pa'i mtshan nyid dang / gzhan gyi dbang gi mtshan nyid de/ de la sgyu ma'i glang po che la sogs pa med pa ni stong pa nyid do/ /smig rgyu la sogs pa la chu la sogs par nor ba ni mtshan ma med pa'o/ /chu zla ni gang du yang gnas pa med pa ste smon pa med pa'o//rmi lam ni ngo bo nyid med pa'o/ /brag ca ni nam mkha' dang / ri dang / phug la sogs pa'i rkyen las 'byung ba nyid do/ /mig yor ni med pa nyid las snang ba dag go/ /gzugs brnyan dag ni bzhin la gnas pa kho na dag yin no //phyi rol gyi me long la gnas pa ltar snang ba de bzhin du kun brtags pa la yang rnam par shes pa las phyi rol na gnas pa bzhin du snang ngo / /gzhan gyi dbang ni rkyen gzhan gyi dbang las 'byung ba ste/ dper na sprul pa dag ni 'phrul byed pa'i dbang gis byung ba bzhin du sbyar bar bya'o//sems can thams cad kyi sems dang spyod pa dang mos pa dang / phra ba mkhyen pa khong du chud par bya ba la mkhas pa zhes bya ba ni ye shes kyi pha rol tu phyin pa'i rgyu mthun pas sems can thams cad kyi sems dang / spyod pa rjes su rtogs pa zhes bya ba dang / chos kyi dbyings la 'jug pa zhes bya ba'i ting nge 'dzin skye ste/ de la ting nge 'dzin snga mas ni 'jig rten gyi khams thams cad na sems can du bsdu bar bsdus pa'i sems can ji snyed yod pa de dag thams cad gcig tu bsdus par gyur la/ de dag gi sems dang spyod pa dang mos pa tha dad pa rnam pa sna tshogs pa rnams skad cig gcig la ye shes gcig gis khong du chud de/khong du chud nas kyang de dag gdul ba'i thabs skad cig gcig gis khong du chud de/ de dag la de bzhin du sgrub pa yang byed do / /gnyis pa chos kyi dbyings la 'jug pa'i ting nge 'dzin thob pas de bzhin gshegs pa dgra bcom pa yang dag par rdzogs pa'i sangs rgyas rnams kyi ye shes phra ba rnam pa du ma la 'jug pa ni 'di lta ste/spyod pa phra ba la 'jug pa'i mkhyen pa dang / 'chi 'pho dang skye ba phra ba la 'jug pa'i mkhyen pa dang / skye ba phra ba la 'jug pa'i mkhyen pa dang / rnam par 'phrul pa phra ba la 'jug pa'i mkhyen pa dang / mngon par 'byung ba phra ba la 'jug pa'i mkhyen pa dang / mngon par rdzogs par byang chub pa phra ba la 'jug pa'i mkhyen pa dang / chos kyi 'khor lo bskor ba phra ba la 'jug pa'i mkhyen pa dang /tshe'i tshad byin gyis rlob pa phra ba la 'jug pa'i mkhyen pa dang / yongs su mya ngan las 'das pa phra ba la 'jug pa'i mkhyen pa dang / bstan pa gnas pa phra ba la 'jug pa'i mkhyen pa dang / de bzhin gshegs pa'i gsang ba phra ba la 'jug pa'i mkhyen pa'o// de bzhin gshegs pa'i gsang ba ni 'di yin te/ sku'i gsang ba dang / gsung gi gsang ba dang / thugs kyi gsang ba dang / dus dang dus ma yin pa rnam par dpyad pa gsang ba dang / byang chub sems dpa' lung bstan pa gsang ba dang / sems can bsdu ba dang tshar bcad pa gsang ba dang / theg pa tha dad pa gsang ba dang / sems can gyi spyod pa dang dbang po rnam par dbye ba gsang ba dang / las su bya ba la 'jug pa gsang ba dang / spyod pa dang mngon par rdzogs par byang chub pa gsang ba dang / rang bzhin thugs su chud pa gsang ba dang /ye shes de gnyis ka gcig tu bsdus nas sems can thams cad kyi sems dang spyod pa dang / mos pa dang phra ba mkhyen pa khong du chud par bya ba la mkhas pa zhes bya ba gsungs so/ /sems thogs pa med pa zhes bya ba ni stobs kyi pha rol tu phyin pa'i rgyu mthun pa thob par bstan pa ste/'di ltar rnam par smin pa'i bdag nyid kyi stobs thob pas thams cad la sems thogs pa med par 'gyur te/ stobs de dag kyang gang zhe na/ nyon mongs pa kun du 'byung ba med pa'i phyir bsam pa'i stobs dang / sa'i ye shes yongs su spyad pa'i phyir/lhag pa'i bsam pa'i stobs dang / brjed ngas pa med pa'i chos can gyi phyir gzungs kyi stobs dang / rtag tu rnam par g.yeng ba med pa'i phyir ting nge 'dzin gyi stobs dang / mtha' yas mu med pa'i 'jig rten gyi khams kyi spyod pa rnam par dbye ba la mkhas pa'i phyir mngon par shes pa'i stobs dang /'dod pa thams cad yongs su rdzogs par thob pa'i phyir dbang gi stobs dang / sangs rgyas kyi chos thams cad rab tu rnam par 'byed pa dang rnam par dbye ba la mkhas pa'i phyir spobs pa'i stobs dang / sangs rgyas kyi chos thams cad kyi spyod pa la sbyor ba ma btang ba'i phyir smon lam gyi stobs dang /bdag nyid kyi sangs rgyas kyi chos yongs su smin par bya ba dang / sems can yongs su smin par bya ba dang / sems can thams cad la phan par bya ba'i spyod pa ma btang ba'i phyir pha rol tu phyin pa'i stobs dang /sems can thams cad yongs su bskyab pa la brtson pa ma btang ba'i phyir byams pa chen po'i stobs dang / sems can thams cad kyi sdug bsngal thams cad sel ba'i phyir snying rje chen po'i stobs dang / sgyu ma lta bu la sogs pa'i chos nyid mngon sum du byed pa'i phyir chos nyid kyi stobs dang /rnam pa thams cad du thams cad mkhyen pa'i ye shes mngon du gyur pa'i phyir/ de bzhin gshegs pa thams cad kyi byin gyi brlabs kyi stobs te/ mdo las bshad pa'i stobs de dag nyid dang ldan pa'i phyir/ thams cad du thogs pa med pa'i chos nyid thob pas na/sems thogs pa med pa zhes bya ba gsungs so/ /bzod pa rlabs po che dang ldan pa zhes bya ba ni chos kyi sprin zhes bya ba'i sa la gnas pa'i byang chub sems dpa' thams cad mkhyen pa'i ye shes khyad par can du dbang bskur ba dang ldan pa'i ting nge 'dzin thob ma thag tu rin po che'i rgyal po'i pad+ma chen po'i steng du/phyogs bcu'i de bzhin gshegs pa thams cad kyis 'od zer gyi dbang bskur ba thob ma thag tu sngar thob pa'i bzod pa de dag shin tu sbyangs par gyur te/ dpa' bar 'gro ba'i ting nge 'dzin la sogs pa ting nge 'dzin brgya phrag stong dang / mi zad pa'i za ma tog ces bya ba'i gzungs kyi sgo la sogs pa gzung brgya phrag stong dang / sangs rgyas kyi yul tshad med pa rnams la bzod pa rnams shin tu skye bar 'gyur ro/ /de dag skyes pa'i phyir thams cad mkhyen pa la dar las chod pa tsam zhes bya'o/ /bdag nyid ji lta ba bzhin du 'jug pa la mkhas pa zhes bya ba ni ye shes kyi pha rol tu phyin pa'i rgyu mthun pa nyid kyis gzud pa mkhyen pa bcu thob par bstan pa ste/ji skad du/ des de bzhin gshegs pa dgra bcom pa yang dag par rdzogs pa'i sangs rgyas rnams kyi gzud pa mkhyen pa gang dag 'di lta ste/byis pa'i lam gzud pa mkhyen pa dang / rdul phra rab kyi rdul gyi gzud pa mkhyen pa dang / zhing gi tshogs mngon par rdzogs par thugs su chud pas gzud pa mkhyen pa dang / sems can gyi tshogs kyi sems mngon par rdzogs par thugs su chud pas gzud pa mkhyen pa dang /thams cad kyi rjes su song ba mngon par rdzogs par thugs su chud pas gzud pa mkhyen pa dang / snrel zhir spyod pa kun tu bstan pas gzud pa mkhyen pa dang / mthun pa'i spyod pa kun tu bstan pas gzud pa mkhyen pa dang / mi mthun pa'i spyod pa kun tu bstan pas gzud pa mkhyen pa dang /'jig rten rnams kyis rnam par shes par bya ba'i spyod pa bsam gyis mi khyab pa dang bsam gyis mi khyab pa'i spyod pa kun tu bstan pas gzud pa mkhyen pa dang / nyan thos kyis rnam par shes par bya ba dang / rang sangs rgyas kyis rnam par shes par bya ba dang /byang chub sems dpas rnam par shes par bya ba dang / de bzhin gshegs pas rnam par mkhyen par bya ba'i spyod pa kun tu bstan nas gzud pa mkhyen pa de dag yang dag pa ji lta ba bzhin du rab tu shes so/ /kye rgyal ba'i sras de ltar na sangs rgyas bcom ldan 'das rnams kyi thams cad mkhyen pa yangs shing tshad med pas 'di la gnas pa'i gzud pa shes pa yang tshad med do zhes gsungs te /bla na med pa thams cad kyi bdag nyid ji lta ba bzhin du mkhas zhes bya ba'i tha tshig go/ /smon lam gyi pha rol tu phyin pa'i rgyu mthun par bstan pa'i phyir/sangs rgyas kyi zhing mtha' yas pa thams cad rnam par bkod pa'i smon lam dang 'jug pas yongs su zin pa zhes bya ba gsungs te/ sangs rgyas kyi zhing bde ba can dang / pad+ma can dang 'do can la sogs pa'i sangs rgyas kyi zhing rnams na bkod pa mtha' yas pa gang dag yod pa de lta bu'am/de las lhag par bdag gi yang gyur cig ces sngon smon lam btab pa gang yin pa dang / de'i phyir brtson 'grus chen pos 'jug par byas pa gang dag yin pa'i smon lam gyi 'jug pa de dag gis da ltar rnam par smin pa'i bdag nyid du yongs su zin par gyur to zhes bya ba'i tha tshig go//'jig rten gyi khams grangs med pa na bzhugs pa'i sangs rgyas rjes su dran pa'i ting nge 'dzin rtag tu rgyun mi chad pas mngon du gyur pa zhes bya ba ni bsam gtan gyi pha rol tu phyin pa'i rgyu mthun pa bstan pa ste/ sngon sangs rgyas rjes su dran pa'i ting nge 'dzin bsgoms pa'i dbang gis/da ltar 'jig rten gyi khams tshad med grangs med pa'i sangs rgyas de dag thams cad kyi spyan snga na thams cad du thams cad na skad cig tsam yang mi 'bral bar lhun gyis grub pa nyid du mngon du gyur zhes bya ba'i tha tshig go/ / sangs rgyas dpag tu med pa la gsol ba 'debs pa la mkhas pa zhes bya ba ni 'jig rten gyi khams tshad med grangs med pa dag na sangs rgyas bcom ldan 'das gang dag bzhugs pa de dag thams cad kyi drung du bzhud nas chos kyi 'khor lo bskor ba dang / yongs su mya ngan las 'da' bar bzhed pa rnams yun ring du bzhugs par bya ba'i phyir gsol ba 'debs pa la mkhas pa zhes bya ba'i tha tshig go//lta ba dang bag la nyal dang kun nas dkris pa dang nyon mongs pa sna tshogs rab tu zhi bar bya ba la mkhas pa zhes bya ba ni thabs kyi pha rol tu phyin pa'i rgyu mthun pa bstan pa ste/sems can rnams kyi bsam pa dang bag la nyal dang / spyod pa dang mos pa dang dbang po tha dad pa rnams la gzigs nas de dag gi lta ba la sogs pa ci rigs par nan tan gyis zhi bar bya ba la mkhas pa ste de bzhin gshegs pa'i stobs kyi yul yang mkhyen no zhes ston to//ting nge 'dzin gyis rnam par rtse ba brgya phrag stong mngon par sgrub pa la mkhas pa zhes bya ba ni mngon par shes pa'i rnam par smin pa la dbang thob par bstan pa ste/ ting nge 'dzin gyi stobs kyis mngon par shes pas rnam par rtse ba brgya phrag stong gang yin pa de dag la mkhas pa ste/ji skad du ye shes kyi dbang de lta bu thob cing shin tu rnam par brtags pa'i ye shes dang / mngon par shes pa dang ldan pa de 'dod na 'jig rten gyi khams dog pa ni yangs par byin gyis rlob po/ /'jig rten gyi khams yangs pa ni dog par byin gyis rlob po//'dod na 'jig rten gyi khams kun nas nyon mongs pa can ni yongs su dag par byin gyis rlob po/ /yongs su dag pa ni kun nas nyon mongs pa can du byin gyis rlob po/ /de bzhin du tha gru che ba dang cher gyur pa dang / tshad med pa dang / phra ba dang /rags ma dang / snrel zhi dang / spyi'u tshugs dang ngos phyal ba la sogs pa'i 'jig rten gyi khams thams cad kyang khyu mchog tu gyur pas mngon par bsgrub pa de dang der byin gyis rlob po/ / de 'dod na rdul phra rab kyi rdul gcig la 'jig rten gyi khams khor yug gi mtha' skor dang bcas pa thams cad dang ldan pa cig byin gyis rlob ste/rdul phra rab kyi rdul de yang mi 'phel la/ bya ba de dag kyang kun tu ston to/ /rdul phra rab kyi rdul gcig la 'jig rten gyi khams gnyis dang / gsum dang / bzhi dang / lnga nas brjod du med pa'i bar thams cad dang ldan pa'i khor yug gi 'obs dang bcas par byin gyis rlob ste/rdul phra rab kyi rdul de yang mi 'phel la/ bya ba de dag kyang kun tu ston to/ /rdul phra rab kyi rdul gcig la 'jig rten gyi khams gnyis dang gsum dang bzhi dang lnga nas brjod du med pa'i bar du thams cad dang ldan pa khor yug gi 'obs dang bcas par byin gyis rlob ste/rdul phra rab kyi rdul de yang mi 'phel la bya ba de dag kyang kun tu ston to/ / 'dod na 'jig rten gyi khams gcig tu 'jig rten gyi khams gnyis kyi bkod pa kun tu ston pa nas/ 'jig rten gyi khams brjod du med pa'i bar gyi bkod pa kun tu ston to//'dod na 'jig rten gyi khams gcig gi bkod pa 'jig rten gyi khams gnyis su kun tu ston pa nas/ 'jig rten gyi khams brjod du med pa'i bar dag tu kun tu ston to/ /'jig rten gyi khams brjod du med pa ji snyed yod pa de dag /'jig rten gyi khams gcig tu kun tu ston te/ sems can de dag la gnod pa yang med do/ /'jig rten gyi khams gcig na/ sems can gyi khams ji snyed yod pa de dag 'jig rten gyi khams brjod du med pa dag tu 'god de/ sems can rnams la gnod pa yang mi byed do//'dod na 'jig rten gyi khams brjod du med pa dag na 'khod pa'i sems can rnams skra tsam khyon gcig la 'god de/ sems can rnams la gnod par yang mi byed do/ /'dod na skra tsam gyi khyon gcig la sangs rgyas thams cad kyi yul bkod pa gcig kun tu ston to//'dod na sangs rgyas thams cad kyi yul bkod pa brjod du med pa'i bar dag kun tu ston to/ /'dod na 'jig rten gyi khams brjod du med pa dag rdul phra rab kyi rdul ji snyed yod pa de snyed kyi lus dang skad cig thang cig yud tsam gcig la sprul pa byed do/ /lus re re la yang de snyed kyi lag pa kun tu ston to//lag pa de dag gis phyogs bcu'i sangs rgyas rnams la mchod pa byed de/ lag pa re res kyang me tog gi skon bu gang gA'i klung gi bye ma snyed sangs rgyas bcom ldan 'das de dag la 'thor ro/ /me tog la ji lta bar spos dang / me tog phreng ba dang / byug pa dang / phye ma dang / na bza' dang / gdugs dang rgyal mtshan dang / ba dan rnams kyang de bzhin no/ /bkod pa thams cad kyang de bzhin no/ /lus re re la yang de snyed kyi mgo byin gyis rlob kyi / mgo re re la yang de snyed kyi lce byin gyis brlabs te/lce de dag gis sangs rgyas bcom ldan 'das de dag gis sngags pa brjod de/ sems bskyed pa re re la yang phyogs bcu khyab par 'gro ste/ des sems bskyed pa tsam gyis kyang mngon par rdzogs par byang chub pa tshad med pa nas/ yongs su mya ngan las 'das pa chen po'i bkod pa'i bar du byin gyis rlob po/ /dus gsum gyi lus tshad med pa yang byin gyis rlob po/ / rang gi lus la sangs rgyas bcom ldan 'das tshad med pa rnams kyi/ sangs rgyas kyi zhing gi bkod pa tshad med pa byin gyis rlob po/ /'jig rten gyi khams 'jig pa dang /'chags pa thams cad kyang rang gi lus la byin gyis rlob po/ /rlung gi dkyil 'khor thams cad kyang spu'i khung bu gcig nas 'byin te/ sems can rnams la gnod par yang mi byed do/ /'dod na 'jig rten gyi khams rgya mtsho'i mthar thug pa chu'i phung po gcig tu byin gyis rlob po//der yang pad+ma chen po byin gyis rlob po/ /pad+ma chen po de'i 'od kyi bkod pas kyang 'jig rten gyi khams mu med pa rgyas par gang bar byed de/ de la yang byang chub kyi shing chen po yal ga 'gel ba kun tu ston pa nas rnam pa'i mchog thams cad dang ldan pa'i thams cad mkhyen pa'i bar du yang kun tu ston to//rang gi lus la phyogs bcu'i nor bu dang / glog dang / zla ba dang nyi ma'i 'od byin gyis rlob pa nas/ 'od dang snang ba thams cad kyi bar du byin gyis rlob po/ /kha'i dbugs kyis kyang phyogs re re'i 'jig rten gyi khams mtha' yas pa g.yo bar byed de/sems can rnams 'jig par yang mi byed do/ /phyogs bcu rlung gis 'jig pa dang / mes 'jig pa dang / chus 'jig par yang byin gyis rlob po/ /'dod na sems can thams cad bsams pa bzhin du gzugs kyi lus kyi gnas rgyan gyis brgyan par byin gyis rlob po//rang gi lus de bzhin gshegs pa'i skur byin gyis rlob po/ /de bzhin gshegs pa'i sku rang gi lus su byin gyis rlob po/ /de bzhin gshegs pa'i sku la rang gi sangs rgyas kyi zhing byin gyis rlob po/ /rang gi sangs rgyas kyi zhing du de bzhin gshegs pa'i sku byin gyis rlob po zhes bya ba la sogs pa rnam par rol pa mtha' yas pa/tshad med pa grangs med pa brgya stong rnams ston to zhes bya ba la sogs pa gsungs pa lta bu'o/ /de bas na ting nge 'dzin gyis rnam par rtse ba brgya stong mngon par bsgrub pa la mkhas pa zhes bya'o//de ltar de bzhin gshegs pa'i sprul pa'i sku ni dge slong dang / dge slong ma dang / dge bsnyen dang / dge bsnyen ma rnams dang rgyal po'i khab na bzhugs so/ /de bzhin gshegs pa longs spyod rdzogs pa'i sku ni zhabs ring ba byang chub sems dpa' dang bzhugs par bstan pa'i phyir/de bzhin gshegs pa'i sku gnyis kyi 'khor nye bar bstan te/ mdo sde thams cad kyi spyi'i gleng gzhi rdzogs par bstan nas/ da ni shes rab kyi pha rol tu phyin pa 'di la bshad pa la/ gleng gzhi'i khyad par bstan pa'i phyir/ de nas de'i tshe bcom ldan 'das nyid kyis gdan seng ge'i khri bshams zhes bya ba la sogs pa gsungs so//gdan bshams pa 'di yang rnam pa gnyis te/ seng ge'i khri bshams pa dang / skyil mo krung du bzhugs pa bshams pa'o/ /de nas de'i tshe bcom ldan 'das nyid kyis gdan seng ge'i khri bshams nas zhes bya ba ni seng ge'i khri bstan to//sku drang por bsrang ste zhes bya ba la sogs pas ni skyil mo krung du bzhugs pa bstan to/ /ci'i phyir na nyid kyis seng ge'i khri bshams she na/ rnam pa gnyis kyi phyir te/ bshad pa thun mong ma yin pa'i mchod 'os chen por bstan pa dang /'khor rnams 'dul ba'i phyir te/ de ni 'di ltar ji skad du/ mdo sde mang po gzhan dag las/ bcom ldan 'das nyan thos kyi theg pa dang ldan pa ston na ni nyan thos kyis gdan bshams pa la bzhugs/ theg pa chen po dang ldan pa ston na ni/ byang chub sems dpas gdan bshams pa la bzhugs so zhes gsungs pa lta bu'o//chos 'di bshad pa ni nyid kyis gdan bshams pa ni bshad pa 'di thun mong ma yin pas/ 'di'i stan yang nga nyid kyis gding bar nus su zad na/ bshad pa lta ci smos zhes bstan pa'i phyir ro//gzhan yang 'dir 'dul ba mang du 'dul/ de dag gi mos pa dang / bsam pa yang tha dad de/ de bas na de dag thams cad dang mthun par gdan bsham par bya ba'i phyir yang nyid kyis gdan bshams so/ /chos kyi gdan la yang rnam pa gsum du bshad de/lus shin tu sbyangs pa bskyed par bya ba'i phyir lus bsgom pa dang mthun par skyil mo krung bcas pa dang / sems shin tu sbyangs pa bskyad pa'i phyir/ sems bsgom pa dang mthun par sku drang por bsrang ba dang / rtse gcig tu bya ba'i phyir ting nge 'dzin bsgom pa dang mthun par dran pa mngon du gzhag pa rnams so//ci'i phyir gus pa mdzad pa bstan zhe na/ 'di gus pa bstan pa ni ma yin gyi gang 'di lta bu nyid du bzhugs pa 'di ni de bzhin gshegs pa rnams kyi rang bzhin te/ gzhan du ni ma yin no/ /de bzhin gshegs pa rnams ni rtag tu mnyam par gzhag pa yin mod kyi spyod lam gyis 'dul ba rnams la 'di bstan pas don du 'gyur te/bcom ldan 'das kyang de lta bu'i spyod lam gyis bzhugs na/ bdag cag gis de ltar bya ba lta smos kyang ci dgos zhes gzhan dag kyang de bzhin du byed par 'gyur ro// //bam po gsum pa/ gleng gzhi 'di yang rnam pa gsum gyis ston te/ ting nge 'dzin gyi cho 'phrul dang / rdzu 'phrul gyi cho 'phrul dang / chos snang ba'i cho 'phrul gyis so/ /de la ting nge 'dzin gyi cho 'phrul ni ting nge 'dzin gnyis kyi dbang gis rnam pa gnyis te/ting nge 'dzin gyi rgyal po zhes bya ba'i ting nge 'dzin gyi cho 'phrul dang / ting nge 'dzin seng ge rnam par rol pa zhes bya ba'i cho 'phrul lo/ /rdzu 'phrul gyi cho 'phrul yang rnam pa gnyis te/ sprul pa'i cho 'phrul dang / byin gyi rlabs kyi cho 'phrul lo/ /chos snang ba'i cho 'phrul yang rnam pa gnyis te/'jig rten gyi khams rnam par bstan pa'i cho 'phrul dang / 'khor sdud pa'i cho 'phrul lo/ /de la ting nge 'dzin ting nge 'dzin gyi rgyal po zhes bya ba la snyoms par zhugs pa'i zhes bya ba nas bzung ste/ de'i tshe bcom ldan 'das gdan seng ge'i khri de nyid la bzhugs zhes bya ba'i bar gyis ni ting nge 'dzin gyi rgyal po zhes bya ba'i ting nge 'dzin gyi cho 'phrul bstan to//seng ge rnam par rol pa zhes bya ba'i ting nge 'dzin la snyoms par zhugs te zhes bya ba nas bzung ste/ de nas yang bcom ldan 'das kyis stong gsum gyi stong chen po'i 'jig rten gyi khams kyi sems can rnams kyi lus 'di ci 'dra ba de dang mthun par sku tha mal pa bstan to zhes bya ba'i bar gyis ni seng ge rnam par rol pa zhes bya ba'i ting nge 'dzin gyi cho 'phrul bstan to//sku ci 'dra ba de bzhin du bstan to zhes bya ba nas bzung ste gtor ro//mngon par gtor ro/ /rab tu gtor ro zhes bya ba'i bar gyis ni sprul pa'i cho 'phrul bstan to/ /khang pa brtsegs pa stong gsum gyi stong chen po'i 'jig rten gyi khams kyi tshad tsam der de gnas par gyur to zhes bya ba nas bzung ste de nas yang bcom ldan 'das gdan seng ge'i khri de nyid la bzhugs bzhin du zhes bya ba'i bar gyis ni byin gyi rlabs kyi rdzu 'phrul gyi cho 'phrul bstan to//de nas yang zhal 'dzum pa mdzad do/ /zhes bya ba nas bzung ste de bzhin gshegs pa shAkya thub pa dge slong gi dge [(]bdun [,]'dun [)]dang bcas pa/byang chub sems dpa'i 'khor dang thabs cig tu bzhugs pa mthong bar gyur zhes bya ba'i bar gyis ni 'jig rten gyi khams rnam par bstan pa'i cho 'phrul bstan to/ /de nas shar phyogs logs su 'jig rten gyi khams gang gA'i klung gi bye ma snyed 'das pa zhes bya ba nas bzung ste//de'i tshe de ltar bcom ldan 'das kyis lha dang bcas pa/ bdud dang bcas pa rnams thugs su chud nas zhes bya ba'i bar gyis ni 'khor sdud pa'i cho 'phrul bstan to/ /de la da ni ting nge 'dzin gyi rgyal po zhes bya ba'i ting nge 'dzin gyi cho 'phrul bstan te/de yang rnam pa bzhis bstan te/ yan lag dang nying lag nas 'od zer rnam par bkye ba dang / spu'i khung bu nas 'od zer rnam par bkye ba dang / rang bzhin gyi 'od zer rnam par bkye ba dang / ljags kyi dbang po las 'od zer rnam par bkye bas so// ting nge 'dzin gyi rgyal po zhes bya ba'i ting nge 'dzin la snyoms par zhugs so zhes bya ba la de bzhin gshegs pa ci'i phyir mnyam par 'jog /ci mnyam par ma bzhag par sgrub/ mi spyod dam zhe na mi spyod pa ni ma yin gyi/ 'di ltar de bzhin gshegs pa rnams ni g.yeng bar spyod pa la dgyes pa ma yin la mdzes pa yang ma yin pas/rtag tu mnyam par bzhag pa'i phyir/ 'di ltar ting nge 'dzin la mnyam par gzhag pa 'di ni de bzhin gshegs pa'i rang bzhin nyid do/ /ci'i phyir ting nge 'dzin de nyid la mnyam par gzhag la/ gzhan ma yin zhe na/ting nge 'dzin 'di ni don thams cad sgrub par byed pa yin te/ de'i phyir 'di skad du ting nge 'dzin gang du ting nge 'dzin thams cad chud pa dang zhes bya ba gsungs te/ ting nge 'dzin thams cad kyi so so'i bya ba gang yin pa de dag thams cad ting nge 'dzin 'di gcig pu kho nas sgrub par nus so zhes bya ba'i tha tshig go//'dus pa dang / 'ub kyis yang dag par gzhol ba zhes bya ba la ngo bo nyid kyis ni 'dus par 'gyur ro/ / bya bas ni yang dag par gzhol bar 'gyur ro/ /ting nge 'dzin de'i yon tan rgyas par ni ting nge 'dzin gyi rgyal po zhes bya ba'i mdo las rig par bya'o//de bas na ting nge 'dzin gyi rgyal po zhes bya bar nges pa'i tshig gis kyang bstan pa yin no/ /ting nge 'dzin 'di lta bu zhig /gang dang mtshungs par ldan/ mtshan nyid ji lta bu zhe na/ rnam par rtog pa dang / rnam par dpyod pa dang / dga' ba dang bde ba rnams dang bral ba'o//btang snyoms dang mtshungs par ldan pa'o/ /g.yo ba med pa'i mtshan nyid do/ /de lta na go bsam gtan bzhi pa'o zhes ci'i phyir ma brjod ce na/ dang po dang / gnyis pa dang / gsum pa rnams las ltos nas/ bzhi pa zhes brjod par zad kyi/de bzhin gshegs pa ni dgos pa bla skyes med par rim gyis mnyam par gzhag pa la snyoms par mi 'jug ste/ de nas dang po la sogs pa med pas bsam gtan bzhi pa zhes bya ba'i ming thob par mi 'gyur ro/ /ting nge 'dzin gyi rgyal po ni g.yo ba med pa'i nyi tshe tsam gyi mtshan nyid yin pas g.yo ba med pa zhes bya bar brjod do//ting nge 'dzin de ni gzugs na spyod pa ma yin/ 'dod pa na spyod pa yang ma yin/ gzugs med pa na spyod pa yang ma yin gyi/ de ni zag pa med pa btang snyoms dang ldan pa/ sems rtse gcig tu gyur pa la ting nge 'dzin ces bya'o//de yang bya ba'i bye brag nyid kyis dpa' bar 'gro ba dang / seng ge rnam par rol pa dang / ting nge 'dzin gyi rgyal po dang / chos thams cad las 'phags pa dang / spyi gtsug bltar mi snang ba zhes bya ba la sogs pa'i ming du brjod du zad kyi/rang bzhin tha dad par dbye ba ni med do/ /de ltar ting nge 'dzin la mnyam par gzhag pa bstan nas da ni yan lag dang nying lag nas 'od zer rnam par 'phro ba bstan pa'i phyir/ sku thams cad kyis 'dzum pa mdzad do zhes bya ba gsungs so/ /'dzum pa zhes bya ba ni 'dir kha 'bye ba la bya ste/yan lag dang nying lag thams cad nas 'od zer 'byung du rung bar mdzad nas rgyas par mdzad ces bya ba'i tha tshig go/ /de bzhin gshegs pa la ni ngas 'di ltar bya'o snyam du rtsol ba de lta bu de mi mnga' mod kyi/ dgos pa zhig yod na ting nge 'dzin gyi mthu las de lta de lta bu mngon par 'grub ste/ting nge 'dzin rnams ni sngon gyi smon lam gyi shugs kyis yongs su zin pa'i phyir ro/ /yang dag par sdud par byed pa rnams kyis de ltar shes nas tha snyad du rung bar bya ba'i phyir/ de bzhin gshegs pa de ltar mdzad do/ 'di skad bka' stsal to zhes tha snyad du btags par rig par bya'o/ /'od zer bye ba khrag khrig brgya stong phrag drug cu drug cu 'byung ngo zhes bya ba la zhabs kyi mthil gnyis yod pa'i phyir drug cu drug cu zhes lan gnyis su brjod do/ /'o na drug cu zhes bya ba'i nges pa ni ci dgos/'od zer mang ba dang / gdul ba mang ba dang / dgos pa mang ba'i phyir grangs bye ba khrag khrig brgya stong zhes bya ba ni 'os na/ ci'i phyir grangs drug cu zhes bya bar nges par byas she na de ni 'di ltar shes par bya ste/ de bzhin gshegs pa'i 'od zer gyi rang bzhin ni/kha dog rnam pa drug ste/ sngon po dang / ser po dang / dmar po dang / dkar po dang / le brgan dang / 'od gsal ba'o/ /'od zer kha dog drug po de dag phyogs bcur rnam par 'phros pas na/ phyogs bcu tha dad pas drug cur gyur pa'i phyir de skad ces bya'o//'o na 'od zer gcig byung bas don thams cad sgrub mi nus sam ci'i phyir yan lag dang nying lag thams cad nas 'od zer 'byung zhe na/ de yang bden mod kyi 'on kyang bshad pa la bsti stang cher mdzad par bstan pa'i phyir rtsol ba chen po mdzad pa bstan to/ /dpal be'u las zhes bya ba ni thugs ka'i phyogs nas dpal be'u dang /bkra shis la sogs pa'i mtshan rnams ni byang chub sems dpa' chen po dag pa rnams dang / de bzhin gshegs pa rnams la mnga'o/ /'od zer de dag gi las ni rnam pa gnyis te/ 'jig rten gyi khams kun tu snang bar byed pa'i las can dang /sems can rnams la phan 'dogs pa'i las can te/ de yang rim bzhin du mdo nyid las bstan to/ /'di dag thams cad kyang bla na med pa yang dag par rdzogs pa'i byang chub las phyir mi ldog par gyur to zhes bya ba la phyir mi ldog par 'gyur ba ni sangs rgyas bcom ldan 'das rnams kyi sngon gyi smon lam gyi dbang gis gyur par shes par bya'o//spu'i khung bu thams cad nas zhes bya ba 'di yang gus pa bstan pa nyid kyi phyir te/ dad pas rjes su 'brang ba phyis 'byung ba rnams 'di snyam du de bzhin gshegs pas spu'i khung bu re re nas 'od zer 'di lta bu dag phyung ste/gus pa cher mdzad nas 'di bshad do snyam nas des kyang dus phyi ma pa rnams dad pa skyes pa'i phyir phan btags par 'gyur ro/ /'od zer de dag gi las kyang rnam pa gnyis su rig par bya'o/ /de bzhin gshegs pa'i rang bzhin gyi 'od kyis zhes bya ba la 'od dang /'od zer gnyis la khyad par ci yod ce na/ nang nas byung ba la ni 'od zer ces bya'o/ /phyi'i pags pa las byung ba la ni 'od ces bya'o/ /yang na ye shes rnam par 'phro ba las byung ba la ni 'od zer ces bya'o/ /kha dog rnam par 'phro ba las byung ba ni 'od ces bya ste/gtsug lag las kyang sangs rgyas kyi 'od zer dag ni byang chub kyi snying por chos la yang dag par rig pa'i tshe byung ngo zhes gsungs so/ /sangs rgyas bcom ldan 'das rnams chos ston pa na/ phal cher snga nas 'di lta bu'i chos shig bshad do snyam du brtsal ma thag tu 'od zer rnams 'byung bar 'gyur ro zhes mdo las bshad do//de lta bas na nang nas ye shes kyi snang ba 'byung bas na 'od zer yang 'byung bar rig par bya'o/ /rang bzhin gyi 'od kyi las kyang rnam pa gnyis yod par shes par bya'o/ /ljags kyis snang bar mdzad pa'i cho 'phrul ni chos bstan pa'i phyir snga ltas nyid du bstan pa ste/ljags kyi dbang po las 'od zer byung ba yang chos bstan pa'i ltas yin no/ /'od zer de dag las pad+ma byung ba ni byang chub sems dpa' rnams skyon med pa la 'jug par nges pa'i rtags yin no/ /pad+ma de dag las sangs rgyas rnams byung ba dang /de dag chos ston pa yang byang chub sems dpa' pad+ma de dag thams cad kyang bla na med pa yang dag par rdzogs pa'i byang chub kha bye bas rgyas nas phyogs phyogs su 'di lta bu'i chos ston par 'gyur ba'i ltas yin no/ /ting nge 'dzin seng ge rnam par rol pa zhes bya ba la snyoms par zhugs te zhes bya ba la sogs pas ni ting nge 'dzin gyi cho 'phrul gnyis bstan to// cho 'phrul 'di yang snod kyi 'jig rten byi dor bya ba dang / sems can gyi 'jig rten la phan gdags pa dang rnam pa gnyis su bstan to/ / snod kyi 'jig rten byi dor bya ba ni bshad pa la mchod pa'i phyir ro/ /byi dor bya ba de la yang rnam pa lngas bstan te/ g.yo ba dang / 'gul ba dang / ldeg pa dang / mtho ba dang / dma' ba'o/ /de la g.yo ba ni mi rnams kyi lus mi g.yo ba yang rkang pa dang / lag pa la sogs pa 'gul ba bzhin du phyogs gcig g.yo bas na g.yo ba zhes bya'o//mi de nyid 'khor lo 'khor ba bzhin du dkyil 'khor yongs su 'khor ba la 'gul g.yo ba zhes bya'o/ /rlung gi shugs kyis shing ldeg pa bzhin du thams cad kyi bdag nyid kyis ldeg pa la ldeg pa zhes bya'o//de dag re re la yang rnam pa gsum ste/ chung ngu dang / 'bring dang / chen po'o/ /de la dang po ni dal bus g.yos so/ /de nas de bas drag tu rab tu g.yos so/ /de nas de bas kyang lhag par kun tu rab tu g.yos so//de nas de'i 'og tu ha cang mi myur bar 'gul to/ /de'i 'og tu myur bar myur du rab tu 'gul lo/ /de'i 'og tu shin tu myur bar rgyun ring bar kun tu rab tu 'gul lo/ /de ltar sbyar zhing bshad par bya'o/ /de nas gang gi tshe khor yug dang / khor yug chen po la sogs pa mtha'i ri rnams gyen du 'phags te/mthon por gyur cing dbus kyi so na gnas pa de'i tshe ni mtha' mtho na ni dbus dma' bar gyur to/ /gang gi tshe dbus gyen du mthon por gyur cing / ri rnams so na gnas par gyur pa de'i tshe ni/ dbus mthon ni mtha' dma' bar gyur to//'jam pa dang / snum pa dang sems can thams cad la bde ba bskyed par gyur to zhes bya ba ni ngo mtshar skyed pa'i phyir te/ ri chen po la sogs pa ni 'jam par gyur to/ /shing gi yan lag la sogs pa thams cad ni snum par gyur to/ /rlung ni sems can thams cad la bde ba bskyed par gyur to zhes bya bar sbyar ro//de nas 'jig rten thams cad la phan gdags pa'i phyir/ sems can dmyal ba la sogs pa rgyun chad par gyur ces bya ba la sogs pa gsungs so/ /mi khom pa thams cad kyang med par gyur to zhes bya ba la sogs pa dang /skabs yod pa dang dal ba rnams ni don tha dad pa ma yin te/ mngon par rtogs pa'i skabs med pas na mi khom pa zhes bya'o/ /de dag kyang rnam pa brgyad de/ sems can dmyal bar skyes pa dang / dud 'gro'i skye gnas su skyes pa dang yi dags su skyes pa dang /mtha' 'khob kyi kla klor skyes pa dang / gzugs med pa dang / 'du shes med pa'i srid par skyes pa dang / dmus long dang / 'on pa dang / lkugs pa la sogs par gyur pa dang / log par lta bar gyur pa dang / sangs rgyas med pa'i bskal pa la skyes pa rnams so//de la gzugs med pa dang / 'du shes med pa'i srid pa ji ltar med par gyur ce na/ der skye bar 'gyur ba rnams skad cig de nyid la skye ba mi len pa'i phyir de yang mi khom pa med pa zhes bya'i/ rgyun chad par gyur pa nyid ni ma yin no/ /'di ltar sems can thams cad kyis mig la sogs pa thob pa 'di ni sangs rgyas rnams kyi sngon gyi smon lam gyi stobs kyis gyur pa'o//sangs rgyas kyi zhing gzhan na bzhugs pa'i sangs rgyas bcom ldan 'das rnams kyis kyang ched du brjod pa ched du brjod do zhes bya ba la dgyes pas bskyod pa'i tshig ni ched du brjod pa zhes bya ste/dper na ched du 'byung ba'i rlung dbang med par 'byung ba de bzhin du chos mngon par 'phel ba'i shugs kyis dgyes pas bskyod pa'i tshig ni ched du 'byung ba dang 'dra bas ched du brjod pa zhes bya'o/ /sangs rgyas kyi zhing 'di ni shin tu mi brtson pa dang /dman pa dang / ngan 'gror skyes pa rnams la yang de lta bu'i shes rab mchog tu gyur pa yang dag par 'byung bar gzigs nas/ e ma'o/ /sangs rgyas rnams byang chub sems dpa' mdzad pa'i tshe na dul ba dang / zhi ba dang / yang dag par sdom pa dang /tshangs par spyod pa la gnas pa la sogs pa ni rmad du byung ba ste/ de dag yongs su bsngos pa'i stobs kyis 'di lta bur dman pa 'di dag kyang shes rab 'di lta bu dang ldan par gyur to zhes ched du brjod par gyur to/ /dul ba zhes bya ba ni dbang po bsdams pa'o/zhi ba zhes bya ba ni ting nge 'dzin la sogs pas nyon mongs rnams zhi bar bya'o/ /yang dag par sdom pa zhes bya ba ni gso sbyong la sogs pa'i sdom pa'o/ /tshangs par spyod pa la gnas pa zhes bya ba ni dge slong gi dngos po la sogs pa'i sdom pa'o/ / srog chags 'byung po rnams la rnam par mi 'tshe ba ni legs pa'o zhes bya ba ni byams pa la sogs pa sgom pa'o/ dbang po bsdams pa'i 'bras bu ni/ dmus long dang / 'on pa dang / lkugs pa la sogs pa med par gyur pa'o/ /ting nge 'dzin la sogs pa'i 'bras bu ni smyon pa rnams kyang dran pa thob par gyur to//sems 'khrugs pa rnams kyang 'khrug pa med pa'i sems thob par gyur to zhes bya ba la sogs pa'o/ /gso sbyong la sogs pa'i sdom pa'i 'bras bu ni gos med pa rnams kyang gos thob par gyur to//dbul po rnams kyang nor thob par gyur to/ /bkres pa rnams kyang zas thob par gyur to zhes bya ba la sogs pa'o/ /tshangs par spyod pa la gnas pa'i 'bras bu ni mi dge ba bcu'i las kyi lam spangs nas dge ba bcu'i las kyi lam yongs su rdzogs te/dri nga ba med pa la sogs pa'o/ /byams pa la sogs pa bsgoms pa'i 'bras bu ni pha ma dang mtshungs pa'i sems la sogs pa dang / tshogs pa'i bde ba thob pa dang / shes rab thob pa'o/ /'od dang / sku mdog dang / gzi brjid dang / dpal gyis zhes bya ba la / 'od ni snang ba dang / 'bar ba'o/ /sku mdog ni pags pa mdzes pa'o/ /gzi brjid ni mthu'o/ /dpal ni dbyibs la sogs pa sdug pa'o/ /zil gyis mnan te mdzes shing lham me lhan ne lhang nge'o zhes bya ba ci'i phyir brjod ce na/ de bzhin gshegs pas de'i tshe chos bshad pa la gus pa bskyed pa'i phyir de lta bu'i rgya chen po bstan du snyam du/de'i tshe sems can thams cad kyi blo de lta bu bskyed pa'i phyir de skad brjod do zhes dgongs pa'o/ /'od kyis zil gyis mnan pas mdzes so/ /sku mdog gis zil gyis mnan pas lham me'o//gzi brjid kyis zil gyis mnan pas lhan ne'o/ /dpal gyis zil gyis mnan pas lhang nge'o/ /'od kyis ni tshangs pa zil gyis mnan te/ de dag 'od snyems pa'i phyir ro/ /sku mdog gis ni lha rnams zil gyis mnan to/ /gzi brjid kyis ni bdud kyi ris dang mu stegs can rnams zil gyis mnan to//dpal gyis ni mi rnams zil gyis mnan to/ /de'i 'og tu rdzu 'phrul gyi cho 'phrul ston te/ de yang sprul pa'i rdzu 'phrul gyi cho 'phrul ston to/ /de dang mthun par sku tha mal pa bstan to zhes bya ba la/ 'khor yug bye ba phrag brgya'i nang 'di na tshangs pa'am/lha 'am/ bdud dam/ mi rnams gang yang rung ba'i mdun na de bzhin gshegs pa mi snang ba'i sems can skal ba dang mi ldan par gyur pa gcig kyang med de zhes bya ba'i tha tshig go/ /de dang mthun pa zhes bya ba ni bag phebs par bya ba'i phyir de dang de dag gi mdun du de dag gi lus kyi tshad bzhin du snang bar gyur to// sku tha mal pa zhes bya ba ni rang bzhin gyi sku zhes bya ba'i tha tshig go/ /rang bzhin gyi sku zhes bya ba 'di yang ji lta bu zhe na/ de bzhin gshegs pa'i sku blta bas chog mi shes pa'o/ /blta bas chog mi shes pa'i sku zhes bya ba ji lta bu zhe na/mi dang lha rnams kyi mdog dang yang mi 'dra la/ 'jig rten na yang de dang 'dra ba'i dngos po cung zad kyang med pa de lta bu'i sku mdog de bzhin gshegs pa'i rang bzhin gyi sku la mnga' ba'o/ /mdog tu snang yang bdag cag gi lus kyi mdog lta bu ni ma yin no zhes thams cad kyis shes shing /de bzhin du sha dang rus pa dang / skra dang sen mo rnams kyang yod la/ sems can gzhan thams cad dang 'dra ba ni ma yin te/ de lta de ltar snang yang / 'jig rten pa thams cad dogs pa yang skye'o//de ltar na sku de sku'i bdag nyid du yod la de ltar snang zhing 'jig rten pa dag dogs par gyur kyang dngos po ci yin pa sus kyang mi shes so/ /de ltar dbyibs dang gzugs la sogs pa thams cad kyi lus dang 'dra yang rang bzhin mi shes shing / shin tu 'bar ba'i shin tu rgya che ba'i sku ni blta bas chog mi shes pa zhes bya ste/yang na rdo rje'i rang bzhin nam/ gser dang / nor bu dang / mu tig dang / bai DUr+ya la sogs pa'i rang bzhin nam/ mi'i lus su gtogs pa 'am/ lha dang tshangs pa'i lus su gtogs pa'am/lus su gtogs pa ma yin pa shes kyang ji ltar yang shes par mi nus/ gang du yang bsdu ba 'am/ bgrang bar mi nus zhes bya ba'i tha tshig go/ /bcom ldan 'das kyi byin gyi rlabs kyis bcom ldan 'das kyi dbu'i steng gi nam mkha' la zhes bya ba la sogs pas ni byin gyi rlabs kyis rdzu 'phrul gyi cho 'phrul bstan to//yang 'dzum pa mdzad de zhes bya ba la sogs pas ni 'jig rten gyi khams na gnas pa rnams gcig la gcig snang bar bya ba dang / 'khor bsdu bar bya ba'i phyir chos snang ba'i cho 'phrul bstan te/dga' ba dang / mgu ba dang / dad pa thob par bya ba'i phyir ro/ /kun gyi pha rol na 'jig rten gyi khams rin chen can zhes bya ba ni 'jig rten gyi khams mtha' yas pa'i phyir 'dir lhags pa rnams kyi mtha' la kun gyi pha rol zhes bya bar gzung ngo / /'jig rten gyi khams thams cad kyi mtha' bstan pas de'i bar gyi 'jig rten gyi khams thams cad na bzhugs pa'i byang chub sems dpa' rnams gshegs par bstan pa yin no//thams cad ci'i phyir ma gshegs she na/ gang dag byon par bya ba'i dgos pa 'ga' yod par gyur pa de dag la ni sangs rgyas kyi 'od zer gyis snang bar mdzad kyis /gzhan dag la ni ma yin pa'i phyir ro/ /de dag kyang bdag cag gi de bzhin gshegs pa byang chub sems dpa' mdzad pa'i tshe na/ de bzhin gshegs pa dang lhan cig tu smon lam gyi bsdu ba la sogs pas bya ba byas pa de dag ni sangs rgyas kyi zhing gzhan du skyes su zin kyang /bdag cag gi de bzhin gshegs pas 'dul ba yin pas/ 'od zer gyi pho nya rnams kyis de dag yang dag par bskul ba byas par bstan pa yin no/ /bzhugs shing 'tsho gzhes te zhes bya ba la yongs su mya ngan las ma 'das pa'i phyir srog gi dbang po [(]rgyan [,]rgyun [)]la bzhugs pa zhes bya'o//sku las byung ba'i bsnyun mi mnga' ba'i phyir 'tsho zhes bya'o/ /glo bur gyi bsnyun mi mnga' zhing dus kyi bar du bzhugs pas na gzhes pa zhes bya'o/ /yang na chos kyi sku ni gnas pa yin pa'i phyir bzhugs pa zhes bya'o/ /longs spyod rdzogs pa'i sku ni 'tsho'o//sprul pa'i sku ni gzhes so/ /phal cher gzhon nur gyur pa zhes bya ba la gzhon nur gyur pa yang tshangs par spyod pa'i dbang dang / sa'i dbang gis rnam pa gnyis te/ byang chub sems dpa' gang dag rang bzhin gyis nyon mongs pa chung ba dag ni/ dang po sems bskyed pa nas bzung ste tshangs par spyod pa nyid kyis/ sa bcu pa'i bar la gnas par gyur pa de dag kyang gzhon nur gyur pa nyid do/ /sa brgyad pa yang gzhon nur gyur pa zhes bya ste/ sa de thob pas rtsol ba dang / rnam par rtog pa thams cad dang bral ba'i phyir gzhon nur gyur pa zhes bya'o//pad+ma bskur te zhes bya ba la ci'i phyir sangs rgyas rnams pad+ma'i mchod pa bskur zhing bsnyun kyang gsol zhe na/ 'di ni sangs rgyas rnams kyi kun rdzob kyi tha snyad de/ yang dad pa'i rjes su 'brang ba'i 'jig rten gyis de mthong ngam thos na/ e ma'o 'di ltar nga rgyal dang phrag dog mi mnga'o zhes rab tu dad par 'gyur ba dang / sangs rgyas kyi zhing gzhan dag na yang sangs rgyas rnams bzhugs par shes par bya ba'i phyir ro/ /slob dpon dag ni 'di skad du 'di dag ni gdul bar gyur pa yin gyi/ yongs su grub pa ma yin pas byang chub sems dpa' dang de'i 'khor rnams gdul ba nyid yin par shes par bya ba'i phyir pad+ma bskur ba yin no zhes 'chad do//de bas na 'di dag legs par yongs su grub pa ma yin pa'i phyir rigs kyi bu khyod sangs rgyas kyi zhing der bag yod par spyod cig ces rjes su bstan pa yin te de yang sangs rgyas kyi zhing 'di na nyon mongs pa'i snyigs ma dang /dus kyi snyigs ma dang / tshe'i snyigs ma dang / lta ba'i snyigs ma dang / sems can gyi snyigs ma dang / snyigs ma lnga yod pa'i phyir de skad du bka' stsal to/ / de la nyon mongs pa'i snyigs ma ni sangs rgyas kyi zhing 'di na 'dod chags dang zhe sdang dang /gti mug la sogs pa mang zhing cher 'byung ste/ chung ngu ni ma yin no/ /de lta bas na mi dge ba bcu'i las kyi lam dang / de las gzhan pa'i sdig pa shin tu mang po rnams kyang spyod de/ de'i rgyus sems can dmyal ba dang /dud 'gro dang / yi dags dang / lha ma yin gyi ris dang / mi rnams kyi nang na sdug bsngal mang bar snang ngo / /sangs rgyas kyi zhing dag ni phal cher de lta ma yin no/ /bskal pa yang ngan pa nyid de/ mu ge'i bskal pa bar ma'i dbang gis bar bar du mu ge'i sdug bsngal brnags mi nus pa 'jig rten du 'byung ngo / /nad kyi bskal pa bar ma'i dbang gis nad mang po 'byung ngo / /mtshon gyi bskal pa bar ma'i dbang gis gcig la gcig 'tshe ba mang po 'byung ngo / /chus 'jig pa'i dbang gis srid pa'i phyogs kyi nyon mongs pa shas cher gyur pa dang /mes 'jig pa'i dbang gis zhe sdang gi phyogs shas che ba dang / rlung gis 'jig pa'i dbang gis gti mug gi phyogs shas che ba la sogs pa dus kyi nyes pa mang du 'byung ngo / /tshe'i snyigs ma ni sems can rnams kyi tshe la nges pa med de/bar bar na tshe'i tshad dpag tu med/ bar bar ni tshe lo bcu bar 'gyur la/ de yang nges pa med de/ kha cig ni mngal nyid du 'chi bar 'gyur/ kha cig ni skyes ma thag tu 'am byis pa'i tshe 'am/ gzhon nu'i tshe 'am/ lang tsho'i tshe'am/ dar la bab pa'i tshe 'am/ na phyed zad kyi tshe 'am/ rgas pa la sogs pa nas 'chi ba'i nges pa med de/ de'i dbang gis mya ngan dang / smre sngags 'don pa dang / sdug bsngal ba dang / yid mi bde ba la sogs pa mang po rnams 'jig rten na yod pa'i phyir ro//lta ba'i snyigs ma yang dge ba thams cad 'joms par byed pa'i lta ba shin tu ngan pa so sor dbye bas phye na drug cu rtsa gnyis yod do/ / de la log par lta ba la nges par zhugs pa ni sangs rgyas stong gis kyang gso bar mi spyod do/ /yongs kyang mu stegs can thams cad ni skur pa 'debs pa'i ngang tshul can dang ma dad pa/tshogs par mi 'byung ba/ shin tu smad pa/ rang bzhin gyi snod du ma gyur pa dag ste/ sems kyi rgyud phal cher tsha sgo can lta bur gyur pa/ phal cher sems kyi rgyud sgog skya lta bur gyur pa sems la dam pa'i chos kyis bsgor mi btub pa rnams te/de lta bas na 'jig rten gyi khams 'di ni nyes pa de lngas sun phyung ba'i phyir 'jig rten gyi khams 'di na de las gzhan pa'i sangs rgyas bcom ldan 'das thams cad kyis yongs su spangs nas sangs rgyas kyi zhing gzhan du mngon par rdzogs par sangs rgyas so//bdag cag gi de bzhin gshegs pa ni sngon byang chub sems dpa'i spyad pa spyod pa'i tshe 'di skad du/ gzhan gyis yongs su spangs pa'i 'jig rten gyi khams gang yin pa de nyid du brtson 'grus chen po dang / bzod pa chen po dang / thabs mkhas pa chen pos sems can rnams btul nas de nyid du bla na med pa yang dag par rdzogs pa'i byang chub mngon par rdzogs par sangs rgyas par gyur cig ces smon lam btab ste/de bas na sangs rgyas bcom ldan 'das thams cad kyis yongs su btang ba yang bdag cag gi don du shin tu 'o brgyal ba sku nyams su bzhes pas na bdag cag gi sangs rgyas bcom ldan 'das ni thugs rje chen po dang ldan pa yin no//snyigs ma lnga zhes bya ba ni dper na bska ba'i ro dang ldan pa'i kha zas sdug bsngal gyi rgyur 'gyur zhing bza' ba'i 'os ma yin pa ltar 'di dag kyang de dang 'dra'o/ /yang na ji ltar sman gyi tshigs ma bska ba mar gyi nang nas phyung nas dor bar bya ba spyad du mi rung ba de dang 'dra'o//yang na ngur smrig tu btsos pa la sogs pa ji srid du ngur smrig gi mthu med par ma byas pa de srid du tshon gzhan [(]'jen [,]'dzin [)]du mi rung ba ltar sems can de dag kyang de dang 'dra bas na de dag gis snyigs ma zhes bya ba'i ming du brjod do//de lta bas na 'jig rten khams 'di ni skyon chen po 'di lta bu dang ldan pa'i phyir der 'dong ba'i byang chub sems dpa' yongs su ma grub pa rnams la sangs rgyas thams cad kyis rjes su bstan cing gdams pa mdzad do/ / dper na sa chen po gzhi mnyam la 'gro ba'i mi rnams gang gi tshe/ tsher ma dang / gyo mo dang / rdo la sogs pas nyam nga ba'i sa phyogs der nye bar 'gro ba 'di'i tshe rjes su ma bstan na sngon gyi sa la 'gro ba 'dris pa'i phyir de nyid kyi tshul gyis song na sdug bsngal chen po myong bar 'gyur ba de bzhin du byang chub sems dpa' 'di dag kyang de ltar 'gyur du dogs pa'i phyir rjes su bstan pa mdzad do//byang chub sems dpa' de dag ni bsnyen par dka' ba yin zhes bya ba'i tshig 'di ni byang chub sems dpa' la smad pa gtso cher mdzad pa ma yin gyi/'jig rten gyi khams la smad pa gtso cher mdzad pa nyid de/ 'jig rten gyi khams de lta bur ngan pa der ni byang chub sems dpa' la yang dogs pa skyes par 'gyur ro zhes de skad thos nas 'dir skyes pa rnams skyo bar 'gyur zhing de bzhin gshegs pa la yang dad pa cher skye bar bya ba'i phyir ro//rim gror byed/ bla mar byed/ bsti stang du byed/ mchod par byed cing zhes bya ba la tshig gis bstod pa byed pa ni bsti stang du byed pa'o/ /yid kyis gus shing phangs par byed pa ni bla mar byed pa'o/ /lus kyis thal mo sbyar zhing 'dud pa dang / skor ba byed pa ni ri mor byed pa'o/ /me tog dang bdug spos la sogs pa mchod pa'i yo byad rnams kyis mngon par brjod pa ni mchod pa byed pa'o/ /gnod pa chung ngam/ nyam nga ba nyung ngam/ bskyod pa yang ngam/ 'tsho 'am/ stobs dang ldan nam bde ba la reg par gnas sam zhes bsnyun gsol zhes bya ba la/glo bur gyi bsnyun mi mnga' bas na gnod pa chung zhes bya'o/ /rkyen bzhi shin tu brnyes pa'i phyir nyam nga ba nyung ba zhes bya'o/ /'gres pa la sogs pas khams nyam chung ba med pa'i phyir dgar bas na bskyod pa yang ba zhes bya'o//gnod pa chung ba'i 'bras bu ni 'tsho ba'o/ /nyam nga ba chung ba'i 'bras bu ni stobs dang ldan pa'o / /bskyod pa yang ba'i 'bras bu ni bde ba la reg par gnas pa'o/ /'dir phyogs lhag ma dgu po rnams kyang tshul 'di bzhin du brjod par bya ste/ brda phrad sla ba'i phyir 'dir ni ma smos so// de'i tshe bcom ldan 'das kyis tshe dang ldan pa sha ra dwa ti'i bu la bka' stsal pa zhes bya ba la/ der mang po thams cad lhags na gcig pu la ci'i phyir bka' stsal/ de bzhin gshegs pa ni bdag gi mdun na bzhugs te chos 'chad do snyam du sems so zhes gong du smos pa gang yin pa de dang yang 'gal lo//der 'dus pa thams cad bdag gcig pu'i ngor gzigs nas/ de bzhin gshegs pas chos bshad do snyam du yang sems na gal te bcom ldan 'das kyis de dag thams cad kyi nang nas dmigs kyis gcig la bka' stsal du zin na/de'i tshe 'khor gyi sems dang 'gal bar ji ltar mi 'gyur zhe na/ 'dir smras pa/ de bzhin gshegs pas ni thams cad las brtsams nas thams cad mngon du mdzad de bshad mod kyi 'on kyang shA ri'i bu la bka' stsal pa'i skad cig la thams cad la yang bka' stsal par 'gyur te/bshad pa'i skad cig de la thams cad la yang bshad pa tha dad pa rnam pa sna tshogs mdzad na / yang dag par sdud par byed pa rnams kyis rim pa de yang dag par sdud mi nus pa'i phyir bshad pa'i ye shes kyi mdzes brjid bzhag ste/skye bo thams cad la 'os pa'i rim pa gcig bzung nas yang dag par bsdus so/ /yang na de bzhin gshegs pas ni shA ri'i bu nyid las brtsams nas bstan pas tshul 'di nyid dam pa'i chos yun ring du gnas pa'i rgyu yin pa'i phyir de bzhin gshegs pas kyang rjes su gnang ngo //de bas na yang dag par sdud par byed pa rnams kyis kyang 'di nyid la brten nas yang dag par bsdus so/ /de lta yin du zin kyang byang chub sems dpa'i theg pa bshad pa mchog bstan pa la ci'i phyir byang chub sems dpa' rnams yongs su bzhag ste shA ri'i bu nyid la bka' stsal cing skabs phye zhe na/de ni 'di ltar gzung bar bya ste/ shes rab kyi pha rol tu phyin pa bshad pa ni spyir bshad pa yin gyi/ byang chub sems dpa' rnams nyid kyi don du bshad pa ni ma yin no/ /ci'i phyir zhe na/ shes rab kyi pha rol tu phyin pa ni thams cad shes pa nyid dang /lam gyi rnam pa shes pa nyid dang / rnam pa thams cad mkhyen pa nyid dang / sgo gsum du bzhugs pa'i phyir ro/ /de la gal te byang chub sems dpa' gang yang rung ba cig la bcom ldan 'das kyis bka' stsal te skabs phyer zin na 'khor gzhan dag zab mo 'di ni bdag cag gi spyod yul ma yin no snyam nas 'bad par mi byed kyang srid kyi/shA ri'i bu las brtsams te skabs phye na ni bshad pa 'di skye bo thams cad dang thun mong yin te/ shin tu zab pa ma yin no snyam du gzhan dag sems par 'gyur ro//de bas na shA ri'i bu nyid las brtsams te skabs phye'o/ /'di ltar 'og nas kyang dge slong rnams dang / 'khor gzhan dag gis kyang chos mngon par rtogs nas so sor thob po zhes 'byung ngo / /de la de lta yin du zin kyang gnas brtan shA ri'i bu ni bya ba byas pa yin pas bshad pa don chen po 'di las brtsams te skabs dbye ba mi rigs so zhe na yang de ltar gnas brtan shA ri'i bu bya ba byas pa yin no zhes zer ba de la bcom ldan 'das kyis dam pa'i chos pad+ma dkar po las/shA ri'i bu khyod ni ma 'ongs pa'i dus na bskal pa grangs med/bsam gyis mi khyab/ tshad med pa rnams su de bzhin gshegs pa bye ba khrag khrig brgya stong mang po rnams kyi dam pa'i chos bzung nas mchod pa rnam pa sna tshogs kyang byas te / byang chub sems dpa'i spyod pa 'di nyid yongs su rdzogs par byas nas/sangs rgyas kyi zhing rdul dang bral ba zhes bya ba'i 'jig rten du de bzhin gshegs pa dgra bcom pa yang dag par rdzogs pa'i sangs rgyas pad+ma'i 'od ces bya bar 'gyur zhing 'jig rten du 'byung ngo zhes gnas brtan shA ri'i bu sangs rgyas su 'gyur bar lung bstan to//ji ltar na dge slong zag pa zad pa las dang nyon mongs pa'i rgyun chad pa yang srid par nying mtshams sbyor zhing bskal pa bsam gyis mi khyab/ dpag tu med par byang chub sems dpa'i spyad pa spyod par 'gyur te/ 'di nyid kyang shes par mi rung ngo / /gal te dgra bcom pa rnams kyang yang srid par nying mtshams sbyor du zin na ni dgra bcom pa thams cad kyang yang srid pa so sor len par 'gyur bas thar pa mi 'grub pa nyid du 'gyur ro zhe na/yang 'di ni nges pa med de/ gal te dgra bcom pa rnams la las dang / nyon mongs pa yod du zin na ni las dang nyon mongs pa'i dbang gis srid par skye bar yang 'gyur te/thar pa mi 'grub po zhes bya ba smra ba de ni rigs na/ ngo bo ni dgra bcom pa rnams la las dang nyon mongs pa yod cing / des byas pa'i srid par skye bar 'gyur ro zhes ni mi smra'o/ / mdo gzhan las 'byung ba'i rim pas don rgya cher bstan par bya'o//'di la de bzhin gshegs pas sems can kha cig ni nges pa'i rigs can/ kha cig ni ma nges pa'i rigs can yin par yang dag par gzigs so/ /de la nges pa'i rigs can gang yin pa de dag ni rigs kyi bye brag nyid kyis de 'grub par brjod kyang mi dgos kyi/sems can ma nges pa'i rigs can gang yin pa de dag rkyen rnyed na rkyen ji lta ba bzhin du byang chub gsum gyi skal ba yod par de bzhin gshegs pas gzigs nas de dag rim gyis sangs rgyas su bsgral bar bzhed na/ de dag nyon mongs pa che ba dang /dbang po brtul bas byang chub sems dpa'i spyad pa bzang po spyod pa'i mthu dang mi ldan par gzigs nas de'i phyir sems can de dag dang por nyon mongs pa nye bar zhi ba'i rgyur gyur pa'i lam la 'jug par mdzad do/ /de bzhin nyid dang / mya ngan las 'das pa gnyis tha mi dad pa'i phyir de bzhin nyid mya ngan las 'das pa mngon sum du bya ba la 'dzud pa mdzad do//de dag de ltar btsud nas kyang tshul khrims dang / ting nge 'dzin dang shes rab la bslabs nas rim gyis de bzhin nyid mya ngan las 'das pa mngon sum du byed de/de ni mthong ba'i sa zhes kyang bya ba la/ rgyun tu zhugs pa'i lam zhes bya bar yang shes so/ /de nas yang 'dod pa la 'dod chags dang / gnod sems gnyis spong ba la 'dzud pa mdzad de/ 'phags pa de dag gis 'dod pa la 'dod chags dang / gnod sems bsrabs pas de bzhin nyid rtogs par 'gyur te/ de ni bsrabs pa'i sa zhes kyang bya la/ lan cig phyir 'ong ba'i lam zhes bya bar yang shes so/ /de nas de nyid ma lus par spangs pa la btsud pas de bzhin nyid rtogs nas 'dod chags dang bral ba'i sa gsum pa sgrub par byed do /de nyid la phyir mi 'ong ba'i lam zhes kyang brjod do/ /de nas yang gzugs kyi 'dod chags dang / gzugs med pa'i 'dod chags dang / nga rgyal dang / rgod pa dang / ma rig pa lhag ma rnams spangs pa la btsud nas de bzhin nyid rtogs pa de nyid kyis byas pa bsrung ba'i sa rtogs par 'gyur te/de nyid la dgra bcom pa'i lam zhes kyang brjod do/ /thams cad la yang de dag btsud nas ci nas kyang sangs rgyas nyid la 'dod pa chen po skye bar 'gyur ba de lta de ltar chos ston to/ / de nas sangs rgyas nyid 'dod pa de dag sangs rgyas nyid 'dod pas byas pa srung ba can gyi sa la nyon mongs pa thams cad spangs par gyur pa na ma rig pa'i bag chags ni ma spangs te/ de ma spangs pas nyon mongs pa'i bag chags thams cad kyang ma spangs so/ /de nas de dag la de bzhin gshegs pas byang chub sems dpa'i theg pa bshad pa mdzad do//bshad pa des kyang dbang po shin tu sbyangs nas byang chub sems dpa'i spyod pa yongs su rdzogs par byed nus pa'i bsam pa can du 'gyur te/ rim gyis zab mo'i chos la bzod pa yang thob par 'gyur ro//de ltar sangs rgyas kyi sa la bsam pa nges pa nyon mongs pa thams cad spangs pa/ chos kyi dbyings shin tu rtogs pa chos zab mo la bzod pa thob pa la de bzhin gshegs pas sangs rgyas su lung bstan te/ de'i tshe na sa brgyad pa la gnas pa rnam par mi rtog pa lhun gyis grub pa'i byang chub sems dpa' chen por 'gyur ro//de dag de ltar gyur pa dang yang srid pa gzhan len pas byang chub sems dpa'i spyad pa spyod cing sems can yongs su smin par bya ba dang / bdag nyid kyang sangs rgyas kyi chos yongs su smin par byed do//yang srid pa ji ltar len ce na/ rnam pa gnyis kyis te/ rkyen gyi stobs dang / rgyu'i stobs kyis so/ /de la nyon mongs pa'i bag chags ma spangs pa gang yin pa de ni yang srid par nying mtshams sbyor ba'i rkyen yin no/ /zag pa dang bcas pa'i dge ba'i rtsa ba'i rgyu las byung ba zag pa med pa'i dge ba'i rtsa ba de dag ni yang srid pa byed pa'i rgyu'o //de dag ni mdo las ji skad 'byung ba bzhin du rig par bya ste/ blo gros rgya mtsho 'khor ba'i rgyun byed pa dge ba'i rtsa ba dang mtshungs par ldan pa'i nyon mongs pa de dag gang zhe na/ 'di lta ste bsod nams kyi tshogs btsal bas yongs su mi ngoms pa dang / bsams bzhin du srid par skye ba yongs su 'dzin pa dang / sangs rgyas dang phrad par smon pa dang / sems can yongs su smin par bya ba la yongs su mi skyo ba dang / dam pa'i chos yongs su 'dzin pa la brtson pa dang /sems can gyi bya ba ci yod snyam pa la spro ba dang / chos 'dod pa'i bag la nyal mi 'dor ba dang / pha rol tu phyin pa la sbyor ba rnams yongs su mi gtong ba ste / blo gros rgya mtsho de dag ni dge ba'i rtsa ba dang mtshungs par ldan pa'i nyon mongs pa rnams so// byang chub sems dpa' ni de dag gis nyon mongs kyang nyon mongs pa'i skyon rnams kyis mi gos so/ /gsol pa/ bcom ldan 'das de dag dge ba'i rtsa ba lags na/ ci'i slad du nyon mongs pa rnams zhes bgyi/ bcom ldan 'das kyis bka' stsal pa/ blo gros rgya mtsho 'di ltar nyon mongs pa de lta bu de dag gis byang chub sems dpa' rnams khams gsum na nyon mongs la khams gsum pa ni nyon mongs pa las byung ba yin pas so// de la byang chub sems dpa' ni thabs mkhas pa dang dge ba'i rtsa ba'i stobs bskyed pas bsams bzhin du khams gsum na nyon mongs so //de'i phyir dge ba'i rtsa ba dang mtshungs par ldan pa'i nyon mongs pa zhes bya ste/ khams gsum na nyon mongs pas de skad bya'i sems nye bar nyon mongs pas ni ma yin no/ /blo gros rgya mtsho 'di lta ste dper na tshong dpon khyim bdag cig la bu sdug pa phangs pa yid du 'ong ba dang /lta ba dang mthun pa gcig pu zhig yod par gyur pa khye'u de yang byis par gyur pas gar byed pa las phyi sa khung btsog pa zhig tu lhung ba dang / de nas khye'u de'i ma dang mdza' bshes dang nye du dag gis khye'u de phyi sa khung btsog par lhung bar mthong ngo //mthong nas kyang shugs phab ste mya ngan byed cing smre sngags 'don gyis phyi sa khung btsog pa der zhugs te bu gcig pa de mi 'byin to/ / de nas khye'u de'i pha 'ongs te/ des bu gcig pa phyi sa khung btsog par lhung ba de mthong la/mthong nas kyang bu gcig pa la bsam pa thag pa nas byams shing rjes su chags pas mi smod par myur du skyen par la gor du phyi sa khung btsog pa der zhugs te/ bu gcig pa phyung ba 'di lta bu 'di ni blo gros rgya mtsho ji tsam du don shes par bya ba'i phyir dper byas pa yin no//'dir don du lta ba gang zhe na/ blo gros rgya mtsho phyis khung btsog pa zhes bya ba de ni khams gsum gyi tshig bla dgas so/ /bu gcig pa zhes bya ba de ni sems can thams cad kyi tshig bla dgas te/ de dag la byang chub sems dpa' bu gcig pa ltar 'du shes so//ma dang mdza' bshes dang nye du zhes bya ba de ni nyan thos dang rang sangs rgyas kyi theg pa pa'i gang zag rnams kyi tshig bla dgas te/ de dag ni 'khor bar lhung ba'i sems can rnams mthong na mya ngan byed cing smre sngags 'don gyi 'byin par mi nus so/ /tshong dpon khyim bdag ces bya ba 'di ni byang chub sems dpa'i tshig bla dgas so zhes bya ba la sogs pa gsungs pa lta bu ste/dge ba'i rtsa ba rnam par smin pa'i bdag nyid du yongs su bsgyur ba de dag ma rig pa'i bag chags kyi rkyen gyi dbang gis rgyas par gyur na lus 'grub pa'i rgyur 'gyur ro//yang mdo las 'di skad du/ bcom ldan 'das 'di lta ste dper na/ nye bar len pa'i rkyen dang / zag pa dang bcas pa'i las kyi rgyu las srid pa gsum 'byung bar 'gyur te/ bcom ldan 'das de bzhin du ma rig pa'i bag chags kyi sa'i rkyen dang /zag pa ma mchis pa'i las kyi rgyu las dgra bcom pa rnams dang / rang sangs rgyas rnams dang / dbang thob pa'i byang chub sems dpa' rnams kyi yid 'byung ba'i lus gsum du 'gyur ro zhes gsungs pa lta bu'o/ /da ni brjod par bya ste/ ci lus de 'jig rten 'di par bgrang ngam/'on te 'jig rten pha rol par bgrang / ci 'dod pa'i khams sam/ gzugs kyi khams sam/ gzugs med pa'i khams su bgrang zhe na/ 'gro ba'am/ skye gnas sam/ skye ba'am/ srid pa'am/ 'jig rten gang du 'ang mi bgrang ngo //'o na lus mngon par grub pa de ji 'dra ba zhig ce na/ yid las byung ba ste/ yid las byung ba'i sprul pa lta bur lta'i sprul pa nyid ni ma yin no/ /yang srid pa zhes bya ba ni 'chi 'pho dang skye ba'i dbang gis btags par brjod pa ste/ dbang thob pa rnams ni sems can gyi don du 'gyur ba yod na/skye gnas dang 'gro ba de dang de dag tu snang bar 'gyur la/ sems can gyi don du 'gyur ba med na ni bdag nyid mi snang bar 'gyur te/ 'chi 'pho dang skye ba yang de nyid yin la/ lus de nyid zag pa med pa'i dge ba'i rtsa ba'i rnam par smin pa yin pa'i phyir 'dus byas yin te/'khor ba zhes kyang bya'o/ /zag pa dang bcas pa'i las dang / nyon mongs pas mngon par 'dus ma byas pa'i phyir/ 'dus ma byas pa zhes kyang bya ste/ de nyid la mya ngan las 'das pa zhes kyang bya'o//'di ltar bcom ldan 'das de'i slad du 'dus byas dang 'dus ma byas pa'i 'khor ba yang mchis la/ 'dus byas dang 'dus ma byas pa'i mya ngan las 'das pa yang mchis so zhes 'byung ba lta bu ste/ de ltar na de bzhin gshegs pa thabs la mkhas pas nyan thos 'di dag sngar dgra bcom par mdzad pas nyon mongs pa spangs nas de'i 'og tu byang chub kyi lam la sbyor bar mdzad de/'di ni de bzhin gshegs pa don dam pa'i chos kyi dbang phyug rnams kyi phyir mi ldog pa'i thabs so/ /ji skad du bcom ldan 'das de bzhin gshegs pas nyan thos rnams bla na med pa yang dag par rdzogs pa'i byang chub tu lung bstan pa de dag ji ltar blta bar bgyi/bcom ldan 'das kyis bka' stsal pa/ rigs kyi bu ngas nyan thos rnams bla na med pa yang dag par rdzogs pa'i byang chub tu lung bstan pa gang yin pa de dag ni rigs las bltas te lung bstan pa'o//gsol pa bcom ldan 'das nyan thos zag pa ma mchis pa/ srid pa kun tu sbyor ba rgyun bcad pa rnams rigs mchis su lags kyang ji ltar bla na med pa yang dag par rdzogs pa'i byang chub mngon par rdzogs par 'tshang rgya bar 'gyur ba lags /bcom ldan 'das kyis bka' stsal pa/ rigs kyi bu de'i phyir dpe bstan gyi nyon cig /rigs kyi bu 'di lta ste/ dper na rgyal po rgyal rigs spyi bo nas dbang bskur ba la bu zhig yod do / de yang bzo'i gnas thams cad la slob pa las dbang po rtul zhing /dbang po rno ba ma yin pas de phyis bslab par bya ba gang yin pa de ni sngar slob/ sngar bslab par bya ba de ni phyis slob par byed pas na rigs kyi bu de ji snyam du sems/ ci rgyu des rgyal po'i bu ma yin zhes bya'am/gsol pa/ bcom ldan 'das de ni ma lags so/ /bde bar gshegs pa de ni ma lags te/ bcom ldan 'das de la rgyal po'i bu nyid lags so zhes bgyi'o/ /rigs kyi bu de bzhin du byang chub sems dpa' dbang po rtul po'i rigs dang ldan pa bsgom pa'i lam gyis sngar nyon mongs pa zad par byas nas phyis bla na med pa yang dag par rdzogs pa'i byang chub mngon par rdzogs par 'tshang rgya bar byed na/rigs kyi bu de ji snyam du sems/ rgyu des mngon par rdzogs par sangs ma rgyas zhes bya'am / gsol pa/ bcom ldan 'das de ni ma lags so//bde bar gshegs pa de ni ma lags so zhes bya ba la sogs pa gsungs pa lta bu'o/ /yang ji skad du byams pa gang thog ma nyid du dman pa'i bye brag don du gnyer te dman pa nyid thob la dman par shes nas de tsam gyis chog par mi 'dzin gyi/de'i gong du bzang po'i bye brag nyid tshol bas bzang po nyid thob par 'gyur ba'i rigs kyi bye brag de lta bu yang yod do/ /de skad ces bka' stsal pa dang / bcom ldan 'das la byang chub sems dpa' byams pas 'di skad ces gsol to/ /bcom ldan 'das sems can rnams kyi rigs kyi rnam pa gsum po gang lags pa de dgra bcom pa nyid thob nas bla na med pa yang dag par rdzogs pa'i byang chub don du gnyer kyang skye ba ma mchis par ji ltar thob par 'gyur/skye ba ma mchis par ni bcom ldan 'das kyis nges par bka' ma stsal to//bcom ldan 'das kyis bka' stsal pa/ byams pa de'i skye ba las dang nyon mongs pa'i dbang gis 'gyur bar ni mi dogs kyi / de'i skye ba bsam gyis mi khyab pa dang / sprul pa dang / yongs su gyur pa'o zhes pa 'dogs so zhes gsungs pa lta bu'o//gleng gzhi'i le'u'o// //bam po bzhi pa/ shA ri'i bu 'di la byang chub sems dpa' sems dpa' chen po chos thams cad rnam pa thams cad du mngon par rdzogs par byang chub par 'dod pas shes rab kyi pha rol tu phyin pa la brtson par bya'o zhes bya ba la/shes rab kyi pha rol tu phyin pa 'di bshad pa ni bcom ldan 'das kyis sgo gsum dang / rnam grangs bcu gcig gis bshad par rnam par gzhag ste/ shes rab kyi pha rol tu phyin pa 'di ni mgo smos pas go ba dang / rnam par spros na go ba dang / drang dgos pa'i 'dul ba rnam pa gsum las brtsams te/mdor bstan pa'i sgo dang / 'bring du bstan pa'i sgo dang / rgyas par bstan pa'i sgo dang sgo gsum gyis bshad do/ /'di ltar bcom ldan 'das kyis gleng gzhi'i le'u bstan pa'i rim pas brtsams pa chen pos bshad pa'i skabs phye ste chos bshad pa'i phyir gnas brtan shA ri'i bu la/shA ri'i bu 'di la byang chub sems dpa' sems dpa' chen po chos thams cad rnam pa thams cad du mngon par rdzogs par byang chub par 'dod pas shes rab kyi pha rol tu phyin pa la brtson par bya'o zhes bka' stsal to//der de tsam zhig bshad nas cang mi gsung bar gyur te/ de bas na 'di ni mdor bstan pa'i shes rab kyi pha rol tu phyin pa zhes bya'o/ /de ltar bcom ldan 'das cang mi gsung bar gyur pa dang / gnas brtan shA ri'i bus rnam par spros na go ba rnams kyi don zhu ba brtsams nas 'bring du bstan pa'i skabs phye ba bcom ldan 'das byang chub sems dpa' sems dpa' chen po chos thams cad rnam pa thams cad du mngon par rdzogs par byang chub par 'tshal bas ji ltar shes rab kyi pha rol tu phyin pa la brtson par bgyi zhes gsol to//de nas bcom ldan 'das kyis mdor bstan pa'i bshad pa de nyid bzung ste/ mdor bstan pa nyid du chos thams cad bstan nas spyod pa rnam pa bzhi yang bstan te / de'i 'og tu gang gi phyir brtson par bya ba dang /ji ltar brtson par bya ba dang / brtson par byed pa rnams kyi mtshan nyid gang yin pa dang / brtson par byed pa rnams kyi rab tu dbye ba dang / brtson pa la gdams pa gang yin pa dang / brtson pa'i phan yon gang yin pa dang / brtson pa'i rab tu dbye ba gang yin pa dang /bshad pa 'di'i gtan la dbab pa gang yin pa dang / rnam pa 'di brgyad bstan to/ /de la shA ri'i bu 'di la byang chub sems dpa' sems dpa' chen pos gnas pa med pa'i tshul du shes rab kyi pha rol tu phyin pa la gnas te zhes bya ba nas byams pa chen po dang snying rje chen po dang dga' ba chen po dang btang snyoms chen po bsgom par bya'o zhes bya ba'i bar du ni dkar po'i chos thams cad bstan pa'o//de'i 'og tu rnam pa thams cad mkhyen pa'i ye shes rnam pa thams cad kyi mchog dang ldan pa/ mngon par rdzogs par 'tshang rgya bar 'dod pas zhes bya ba nas shA ri'i bu de ltar byang chub sems dpa' sems dpa' chen pos sems can yongs su smin par bya ba'i phyir 'dod pa'i yon tan lnga nye bar len to zhes bya ba'i bar ni gang gi phyir brtson par bya zhes bya ba de'i bshad pa'o//de'i 'og tu bcom ldan 'das byang chub sems dpa' sems dpa' chen pos ji ltar shes rab kyi pha rol tu phyin pa la spyad par bgyi zhes bya ba nas yan lag brgyad dang ldan pa'i gso sbyong dang /bsam gtan bzhi nas sangs rgyas kyi chos ma 'dres pa bco brgyad sbyin par byed pa'o zhes bya ba'i bar du ni ji ltar brtson par bya zhes bya ba de'i bshad pa'o//de'i 'og tu bcom ldan 'das byang chub sems dpa' sems dpa' chen pos ji ltar shes rab kyi pha rol tu phyin pa la brtson par bgyis na brtson zhes bgyi ba lags zhes bya ba nas 'chal ba'i tshul khrims kyi sems dang /le lo'i sems dang / rnam par g.yeng ba'i sems dang / 'chal pa'i shes rab kyi sems mi bskyed do zhes bya ba'i bar du ni brtson par byed pa rnams kyi mtshan nyid gang yin pa zhes bya ba de bshad pa'o/ /de'i 'og tu bcom ldan 'das byang chub sems dpa' sems dpa' chen po gang shes rab kyi pha rol tu phyin pa la gnas pa 'dis gnas pa de gang nas shi 'phos te 'dir skyes pa lags zhes bya ba nas srog chags bye ba khrag khrig brgya stong sangs rgyas su lung bstan pa'i bar ni brtson par byed pa rnams kyi rab tu dbye ba bshad pa'o//de'i 'og tu rab 'byor khyod byang chub sems dpa' sems dpa' chen po rnams la shes rab kyi pha rol tu phyin pa rtsom ste/ ci nas kyang byang chub sems dpa' sems dpa' chen po rnams shes rab kyi pha rol tu phyin pa la nges par 'byung bar 'gyur ba de lta bu'i chos kyi gtam bya bar spobs par gyis shig ces bya ba nas 'di nyid byang chub sems dpa' sems dpa' chen po'i shes rab kyi pha rol tu phyin pa la gdams pa yin te/'di nyid rjes su bstan pa yin no zhes bya ba'i bar du ni brtson pa la gdams pa bstan pa'o/ /de'i 'og tu bcom ldan 'das gzugs yongs su rtogs par 'tshal ba'i byang chub sems dpa' sems dpa' chen pos shes rab kyi pha rol tu phyin pa la bslab par bgyi'o zhes bya ba nas/'di ltar byang chub sems dpa' sems dpa' chen po rnams kyis nyan thos dang / rang sangs rgyas dang / byang chub sems dpa' dang / sangs rgyas kyi sa gang dag la bslab par bya ba'i theg pa gsum po dag shes rab kyi pha rol tu phyin pa 'di las rgya cher bstan to zhes bya ba'i bar du ni brtson pa'i phan yon bstan pa'o/ /de'i 'og tu bcom ldan 'das bdag gis byang chub sems dpa' dang /shes rab kyi pha rol tu phyin pa ma 'tshal ma dmigs te yang dag par rjes su ma mthong zhes bya ba nas/ rab 'byor 'di yang byang chub sems dpa' sems dpa' chen po'i sdig pa'i grogs por rig par bya ste rig nas kyang yongs su spang bar bya'o zhes bya ba'i bar du ni/brtson pa'i rab tu dbye ba bstan pa'o/ /de'i 'og tu bcom ldan 'das byang chub sems dpa' sems dpa' chen po zhes bgyi na/ bcom ldan 'das byang chub sems dpa' zhes bgyi ba'i tshig gi don gang lags zhes bya ba nas/lha'i dbang pos zhus pa'i bar du ni dri ba nyi shu rtsa brgyad brtsams nas gnas brtan gnyis kyis dris pa dang / lan btab pa'i rim pas mdor bshad pa 'di'i tshig gi don dang mtshan nyid kyis gtan la dbab pa rnam pa gnyis su bstan te/de ltar rim pa 'dis shes rab kyi pha rol tu phyin pa 'bring du bshad pa yongs su rdzogs par byas so/ /'bring du bstan pa 'di yang rnam pa thams cad mkhyen pa nyid las te rnam par mi rtog pa'i shes rab kyi pha rol tu phyin pa nyid bzung nas don dam pa'i bden pa'i tshul du bshad do//de'i 'og tu rgyas par bshad pa 'di ni byang chub sems dpa'i lam gyi rnam pa shes pa nyid las brtsams te rnam par rtog pa dang bcas pa dang / rnam par mi rtog pa'i shes rab kyi pha rol tu phyin pa bzung nas drang dgos pa rnams kyi don du kun rdzob dang /don dam pa'i dbang gis rnam pa gnyis su rgyas par bshad do/ / de'i go rims ni 'og nas de nyid kyi skabs nas bstan to/ /de nas rnam grangs bcu gcig ces bya ba ni dang por shA ri'i bu la bka' stsal te bshad pa ni rnam grangs gcig go/ / de'i 'og tu gnas brtan rab 'byor gyis rgyas par bshad pa ni gnyis pa'o/ /de nas brgya byin la bka' stsal pa dang / de nas gnas brtan rab 'byor dang / de nas 'phags pa byams pa dang / de nas gnas brtan rab 'byor dang / de nas brgya byin dang / de nas gnas brtan rab 'byor dang / de nas byams pa dang / de nas gnas brtan rab 'byor la bka' stsal te/ rtag tu ngu dang / chos 'phags kyi gtam gyis yang gnas brtan kun dga' bo la bka' stsal nas yongs su gtad pa ste/ 'di dag ni rnam grangs bcu gcig go//da ni mdor bstan pa 'di'i tshig gi don bstan par bya'o/ /shA ri'i bu 'di la byang chub sems dpa' sems dpa' chen po chos thams cad rnam pa thams cad du mngon par rdzogs par byang chub par 'dod pas shes rab kyi pha rol tu phyin pa la brtson par bya'o zhes bya ba de la shA ri'i bu zhes bya ba ni gnas brtan gyi ma'i ming las dras te bos pa'o//'di la zhes bya ba ni theg pa chen po bstan pa la'am/ shes rab kyi pha rol tu phyin pa bstan pa la bya ste/ byang chub sems dpa' sems dpa' chen po theg pa chen po 'di la gnas te zhes bya ba'am/shes rab kyi pha rol tu phyin pa 'di la zhes bya bar sbyar ro/ /byang chub sems dpa' zhes bya ba la/ byang chub sems dpa' ni rnam pa gnyis te/ kun rdzob kyi byang chub sems dpa' dang / don dam pa'i byang chub sems dpa'o/ /gang gi phyir yang dag par rdzogs pa'i byang chub dang /sems can la dmigs nas skyes pa'i sems dang po ni byang chub dang / sems can la dmigs pa'i phyir byang chub sems dpa' zhes bya'o/ /sems de gang la yod pa de la yang byang chub sems dpa' zhes bya'o/ /e ma'o bdag bla na med pa yang dag par rdzogs pa'i byang chub mngon par rdzogs par sangs rgyas nas sems can thams cad shin tu mthar thug pa'i mya ngan las 'das pa la dgod par bya'o snyam du bsams te/byang chub dang sems can la dmigs nas kun rdzob dang don dam pa'i bden pa gnyis la gnas te shes rab dang snying rje gnyis kyi sems rin po che bskyed pa dang ldan pa'i phyir byang chub sems dpa' zhes bya'o//rab tu dga' ba la sogs pa sems bskyed pa bcu la don dam pa'i byang chub sems dpa' zhes bya'o/ /slob dpon gzhan dag 'chad pa ni sems can thams cad ni de bzhin gshegs pa'i snying po yin no zhes 'byung bas sems can thams cad ni de bzhin nyid kyis rab tu phye ba yin no de bzhin nyid de la yang gnas skabs gsum yod de/ma dag pa'i gnas skabs dang / dag pa dang ma dag pa'i gnas skabs dang /shin tu yongs su dag pa'i gnas skabs so/ /de la ma dag pa'i gnas skabs ni so so'i skye bo thams cad la byang chub kyi gnas skabs ni med kyi/ sems dpa'i gnas skabs 'ba' zhig tu zad pas ni de bzhin nyid de la sems dpa' zhes bya ba'i ming du brjod do//dag pa dang ma dag pa'i gnas skabs kyi 'phags pa rnams la ni byang chub pa'i gnas skabs dang / sems dpa'i gnas skabs gnyis ka yod de dag pa dang ma dag pa'i de bzhin nyid de la byang chub sems dpa' zhes bya ba'i ming du brjod do//yongs su dag pa'i gnas skabs na ni byang chub kyi gnas skabs 'ba' zhig tu zad pas/ de'i tshe de bzhin gshegs pa zhes bya ba'i ming du brjod de/ ji skad du rab 'byor de bzhin gshegs pa zhes bya ba de ni yang dag pa de bzhin nyid kyi tshig bla dwags so zhes gsungs pa lta bu'o//sems dpa' chen po zhes bya ba ni 'bras bu dang mthun pa'i rigs dang / rigs dang mthun pa'i mos pa dang / mos pa dang mthun pa'i bsam pa dang / bsam pa dang mthun pa'i smon lam dang / smon lam dang mthun pa'i spyod pa dang / spyod pa dang mthun pa'i brtson 'grus dang /brtson 'grus dang mthun pa'i dus dang / dus dang mthun pa'i tshogs dang / tshogs dang mthun pa'i yang dag par 'grub pa dang / yang dag par 'grub pa dang mthun pa'i 'bras bu dang / 'bras bu dang mthun pa'i sems can gyi don dang / chen po rnam pa bcu gcig yod pa 'di dag dang ldan pa'i phyir byang chub sems dpa' sems dpa' chen po zhes bya'o//chos thams cad ces bya ba 'dis ni ji snyed yod pa bstan to/ /rnam pa thams cad du zhes bya ba 'dis ji lta ba bzhin du yod pa bstan to/ /mngon par rdzogs par byang chub par 'dod pa zhes bya bas ni mngon par rdzogs pa'i byang chub la sems pa bstan to//de la chos thams cad ces bya ba la chos ni rnam pa gnyis te/ kun brtags pa'i chos rnams dang / yongs su grub pa'i chos rnams so/ /rnam pa thams cad du zhes bya ba la rnam pa gnyis te/ kun rdzob kyi rnam pa dang / don dam pa'i rnam pa'o/ /mngon par rdzogs par byang chub par 'dod pas zhes bya ba la mngon par rdzogs par byang chub pa ni rnam pa gnyis te/ thams cad shes pa nyid kyi ye shes dang / rnam pa thams cad mkhyen pa'i ye shes so/ /de la kun brtags pa'i chos 'jig rten gsum du gtogs pa dang /dus gsum du gtogs pa rnams ni 'jig rten pa'i kun rdzob kyi rnam pa thams cad shes pa nyid kyi ye shes kyis mngon par rdzogs par byang chub po / /yongs su grub pa'i chos rnams ni 'jig rten las 'das pa skye ba med pa dang /'gag pa med pa dang / gzod ma nas zhi ba dang / rang bzhin gyis yongs su mya ngan las 'das pa dang / dngos po med pa'i ngo bo nyid dang / stong pa nyid la sogs pa'i rnam par thar pa rnam pa thams cad mkhyen pa nyid kyi ye shes kyis mngon par rdzogs par byang chub pa ste/de bas na rnam pa thams cad du mngon par rdzogs par byang chub par 'dod pas zhes bya ba gsungs so/ /shes rab kyi pha rol tu phyin pa la zhes bya ba ni de la don dam par smon lam dang / brtson 'grus brtsams pa dang / nyon mongs pa dang / las dang / sdug bsngal dang / 'khor ba dang / rnam par rtog pa dang / yon tan dang / shes par bya ba dang / rnam pa 'di dgu'i pha rol du son pa'i phyir 'jig rten las 'das pa'i ye shes rnam par mi rtog pa'i rdo rje lta bu'i ting nge 'dzin gyis bsdus pa la shes rab kyi pha rol tu phyin pa zhes bya'o//de nas de'i rjes la thob pa rnam par rtog pa dang bcas pa dang / rnam par mi rtog pa'i ye shes me long lta bu dang / mnyam pa nyid dang / so sor rtog pa dang / bya ba sgrub pa'i ye shes rnams kyang de'i rgyu las byung ba'i phyir 'bras bu la rgyus btags te/shes rab kyi pha rol tu phyin pa zhes bya bar bstan to/ /nyan thos dang rang sangs rgyas rnams kyi mthar phyin pa'i sas bsdus pa dgra bcom pa'i lam gyi ye shes kyang shes rab kyi pha rol tu phyin pa'i rgyu mthun pa yin pas shes rab kyi pha rol tu phyin pa zhes bya ba 'thob par 'gyur ro//byang chub sems dpa' rnams kyi mos pas spyod pa'i sa nas nye bar bzung ste/ sa bcu chos kyi sprin gyi bar du mnyan pa dang bsams pa dang / bsgoms pa la sogs pa'i rim pas mngon par 'phel ba chos kyi dbyings dri ma med par byed pa'i thabs kyis zin pa kun tu 'gro ba'i don dang /mchog gi don la sogs par de bzhin nyid la 'jug pa'i khyad par mngon sum du byed pas sa dang sa dag la gnas dag pa'i ye shes je che je cher gyur pas lhag par rtog pa'i khyad par thob par byed pa'i ye shes gang yin pa de dag kyang shes rab kyi pha rol tu phyin pa zhes bya ba'i ming thob pa nyid du 'gyur ro//de nyid sgrub pa dang / rtogs pa dang / mthar phyin pa'i sa'i ting nge 'dzin la gnas pa'i tshig gi don ma lus pa'i khyad par rtogs par byed pa'i rgyu yin pa'i phyir/ ming gi tshogs dang /tshig gi tshogs dang / yi ge'i tshogs su gyur pa'i chos bstan pa gang yin pa de dag la yang shes rab kyi pha rol tu phyin pa zhes bya ba'i ming nyid du brjod do/ /de ltar ji tsam du rnam pa de dag nyid mngon par ston pa theg pa chen po'i tshul gang yin pa de dag thams cad la yang shes rab kyi pha rol tu phyin pa zhes bya'o//de ltar shes rab kyi pha rol tu phyin pa zhes bya bar brjod pa de dag las 'di ni sangs rgyas kyi sas bsdus pa'i shes rab 'jig rten las 'das pa rnam par mi rtog pa la shes rab kyi pha rol tu phyin pa zhes bya'o/ / de nas shes rab kyi pha rol tu phyin pa 'di la brtson par bya'o zhes bya ba ni rnam par rtog pa thams cad dang bral ba shin tu yongs su dag pa'i shes rab kyi pha rol tu phyin pa la brtson par bya'o zhes bya ba'i tha tshig go/ /kha cig na re 'dir shes rab kyi pha rol tu phyin pa zhes bya ba ni theg pa chen po la bya bas na/nyan thos kyi theg pa dang / rang sangs rgyas kyi theg pa spangs te/ theg pa chen po la brtson par bya'o zhes bya ba'i tha tshig go zhes zer ro/ /kha cig na re de la gang gi tshe shes rab kyi pha rol tu phyin pa zhes bya ba rnam pa thams cad mkhyen pa nyid la bya bar gyur pa de'i tshe ni don du zhes bya bar rig par bya ste/shes rab kyi pha rol tu phyin pa'i don du zhes bya ba ni rnam pa thams cad mkhyen pa nyid kyi don du brtson par bya'o zhes bya ba'i tha tshig go/ /gang gi tshe rnam par mi rtog pa'i shes rab bam/ theg pa chen po la shes rab kyi pha rol tu phyin pa zhes bya bar brjod par gyur pa de'i tshe ni la zhes bya bar brjod par rig par bya'o zhes zer ro//shes rab kyi pha rol tu phyin pa la brtson par bya'o zhes bya ba la brtson pa rnam pa gsum ste/ bslab pa la brtson pa dang / spyod pa la brtson pa dang /yang dag par 'grub pa la brtson pa'o/ /de la nyan pa dang / bsam pa la sogs pa'i dus ni bslab pa la brtson pa ste/ de yang shes rab kyi pha rol tu phyin pa la brtson par bya'o zhes bya ba 'og nas 'chad pa'o/ /sgrub pa'i dus na ni spyad pa la brtson par bya ba ste de yang shes rab kyi pha rol tu phyin pa la spyad par bya'o zhes 'og nas 'chad pa'o//rab tu rtogs pa'i dus na ni yang dag par 'grub pa la brtson pa ste/ de yang brtson par byed pa'o zhes 'og nas 'chad pa'o/ /bya'o zhes bya ba ni bya bar 'os pa ste bya bar rigs zhes bya ba'i tha tshig go//de dag gis ni gang gis bya ba dang / gang la bya ba dang / gang bya ba rnam pa de gsum bstan pa yin te/ nyan thos dang rang sangs rgyas kyi theg pa pa rnams la ni nges pa med pa'i phyir byang chub sems dpa' rnams nyid kyis bya ste/ de ni bsgrub par bya ba thams cad kyi rtsa ba yin pa'i phyir shes rab kyi pha rol tu phyin pa nyid la bya ste/rgyun du chud pa dang / gus pa dang 'grus pa la sogs pas brtson par bya'o/ /'dir 'bras bu phun sum tshogs pa dang / rgyu phun sum tshogs pa dang / sbyor ba phun sum tshogs pa ste/ chos thams cad rnam pa thams cad du mngon par rdzogs par byang chub pa zhes bya ba ni 'bras bu'o//shes rab kyi pha rol tu phyin pa zhes bya ba ni rgyu'o/ /brtson par bya'o zhes bya ba ni sbyor ba'o/ /sum brgya pa las gnas par bya ba dang / bsgrub par bya ba dang / sems rab tu gzung bar bya ba ji skad du bshad pa de bzhin du 'dir yang chos thams cad rnam pa thams cad du mngon par rdzogs par byang chub par 'dod pas zhes bya ba ni bsam pa phun sum tshogs par bstan pas gnas bstan pa yin no/ /brtson par bya'o zhes bya bas ni bsgrub pa bstan pa yin no//shes rab kyi pha rol tu phyin pa la zhes bya ba ni rnam par mi rtog pa'i shes rab kyi pha rol tu phyin pa la bya ba'i phyir sems rab tu bzung ba bstan pa yin no/ /de ltar mgo smos pas go ba rnams kyi don du shes rab kyi pha rol tu phyin pa mdor bshad pa yongs su rdzogs par byas nas bcom ldan 'das cang mi gsung bar gyur pa dang /de'i 'og tu gnas brtan shA ri'i bus rnam par spros na go ba rnams kyi don du 'bring du bshad pa'i skabs dbye ba'i phyir bcom ldan 'das byang chub sems dpa' sems dpa' chen po chos thams cad rnam pa thams cad du mngon par rdzogs par byang chub par 'tshal bas ji ltar shes rab kyi pha rol tu phyin pa la brtson par bgyi zhes bya ba ni zhub brtsams so//des ni chos rnam pa bzhis zhus pa yin te/ ji ltar chos thams cad rnam pa thams cad du mngon par rdzogs par byang chub par 'tshal zhes bya ba dang /ji ltar byang chub sems dpa' sems dpa' chen po zhes bya ba dang / ji ltar shes rab kyi pha rol tu phyin pa zhes bya ba dang / ji ltar brtson par bgyi zhes bya ba rnams te/ de bzhi yang 'og nas skabs ji lta ba bzhin du ston to/ /de skad zhus pa dang /bcom ldan 'das kyis bshad pa 'di la 'og nas mdo dang / rgyas par bshad pa rnam pa gnyis su mdzad do/ /de la shA ri'i bu 'di la byang chub sems dpa' sems dpa' chen pos gnas pa med pa'i tshul du shes rab kyi pha rol tu phyin pa la gnas te zhes bya ba nas byams pa chen po dang /snying rje chen po dang / dga' ba chen po dang / btang snyoms chen po bsgom par bya'o zhes bya ba la thug gi bar du mdor bshad pa'i sgo nas chos thams cad bsdus te bstan pa mdzad do/ /de'i 'og tu chos de dag nyid bzung nas rgyas par bshad pa mdzad do//shA ri'i bu 'di la byang chub sems dpa' sems dpa' chen pos gnas pa med pa'i tshul du shes rab kyi pha rol tu phyin pa la gnas te zhes bya ba la sogs pas spyod pa rnam pa bzhi ston to/ /de yang shes rab kyi pha rol tu phyin pa la brtson par bya'o zhes bya ba 'dis ni spyod pa bzhi bstan pa yin te/rnam par mi rtog pa'i pha rol tu phyin pa'i spyod pa dang / nye ba'i nyon mongs pa med pa'i byang chub kyi phyogs dang mthun pa'i spyod pa dang / gnod pa med par sems can yongs su smin par bya ba'i spyod pa dang / gos pa med par sangs rgyas kyi chos thams cad yongs su smin par byed pa'i spyod pa'o//de la thabs mkhas pas ni pha rol tu phyin pa'i spyod pa 'grub po/ /yongs su 'dris pa'i shes pas ni byang chub kyi phyogs dang mthun pa'i spyod pa 'grub po/ /snying rjes ni sems can yongs su smin par byed pa'i spyod pa 'grub po//shes rab kyis ni sangs rgyas kyi chos yongs su smin par byed pa'i spyod pa 'grub po/ /de la gnas pa med pa'i tshul du shes rab kyi pha rol tu phyin pa la gnas te zhes bya ba la sogs pas ni pha rol tu phyin pa'i spyod pa bstan to/ / shA ri'i bu byang chub sems dpa' sems dpa' chen pos shes rab kyi pha rol tu phyin pa la gnas te dran pa nye bar gzhag pa bzhis yongs su rdzogs par bya'o zhes bya ba la sogs pa nas smon pa med pa'i ting nge 'dzin yongs su rdzogs par bya'o zhes bya ba la thug gi bar du ni nyon mongs pa med pa'i byang chub kyi phyogs kyi spyod pa bstan to//bsam gtan bzhi dang zhes bya ba nas sems can gyi gnas dgu dang zhes bya ba la thug pa'i bar gyis ni gnod pa med par sems can yongs su smin par byed pa'i spyod pa bstan to/ /de bzhin gshegs pa'i stobs bcu dang zhes bya ba la sogs pa nas/btang snyoms chen po yongs su rdzogs par bya'o zhes bya ba la thug gi bar du ni gos pa med par sangs rgyas kyi chos yongs su smin par bya ba'i spyod pa bstan to/ /de la pha rol tu phyin pa'i spyod pa ni gnas pa med pa'i tshul du shes rab kyi pha rol tu phyin pa la gnas te zhes bya ba la sogs pas ston te/pha rol tu phyin pa'i spyod pa ni gnas pa dang / bsgrub pa dang / 'khor gsum dag pa dang / rnam pa gsum gyis bstan te/ sum brgya pa las gnas par bya ba dang bsgrub par bya ba dang /sems rab tu gzung bar bya ba bstan pa lta bu'o/ /de las gzhan pa'i 'bras bu'i khyad par 'dod pa yongs su btang ste/ snying rje'i dbang gis sems can thams cad la phan pa dang / bde ba bsgrub par bya ba'i bsam pa dang /shes rab kyi dbang gis khams gsum pa'am/ chos thams cad kyang rung ste gang la yang mi gnas pa ni 'dir shes rab kyi pha rol tu phyin pa la gnas pa zhes bya'o/ /de bas na gnas pa med pa'i tshul du shes rab kyi pha rol tu phyin pa la gnas te zhes bya ba gsungs te/mi gnas pa'i rigs pas zhes bya ba'i tha tshig go/ /thams cad la gnas pa med pa gang yin pa de nyid shes rab kyi pha rol tu phyin pa la gnas pa nyid yin no zhes dgongs pa'o/ /'dir yang shes rab kyi pha rol tu phyin pa zhes bya ba ni rnam pa thams cad mkhyen pa nyid dam/rnam par mi rtog pa'i shes rab bam/ theg pa chen po yin par bstan to/ /byang chub kyi lam dang mthun par yang dag par spyod pa ni sgrub pa ste/ de bas na sbyin pa'i pha rol tu phyin pa yongs su rdzogs par bya'o zhes gsungs so/ /don dam par chos rnams la yongs su btsal na 'khor gsum yongs su dag pa yin te/de bas na sbyin par bya ba dang / gtong ba po dang / len pa po mi dmigs pa'i phyir yongs su gtong ba med pa'i tshul gyis zhes bya ba gsungs so/ /byang chub sems dpa' ni snying rjes bskyod pas sems can thams cad la ci 'dod pa de thams cad sbyin par byed kyang de'i tshe ni sbyin pa zhes brjod par zad kyi sbyin pa'i pha rol tu phyin pa ma yin no//gang gi tshe sbyin par byed pa'am sbyin pa byin pa'i 'og tu yongs su btsal ba bzhis yongs su btsal cing yang dag pa ji lta ba bzhin yongs su shes par byed pa bzhis yongs su shes par byas nas shes rab kyi pha rol tu phyin pa yongs su sbyor bar byed pa de'i tshe na/de legs par sbyangs pas pha rol tu phyin pa zhes bya ba'i ming thob par 'gyur ro/ /byang chub sems dpa' ni dang por snying rjes las thams cad byas nas/phyis shes rab kyis yongs su sbyong ngo / /de bas na snying rjes ni sgrub par byed do/ /shes rab kyis ni dag par byed do/ /snying rjes ni bsam pa dag par byed do/ /shes rab kyis ni sbyor ba dag par byed do/ /snying rjes ni kun rdzob la gnas nas sgrub par byed do//shes rab kyis ni don dam pa la gnas te sbyor bar byed do/ /snying rjes ni las thams cad sems can gyi don du byas pa'i phyir bsod nams kyi tshogs su bgrang ngo / /shes rab kyis ni byang chub kyi don gyi phyir ye shes kyi tshogs su bgrang ngo / /de bas na yongs su gtong ba med pa'i tshul gyis sbyin pa'i pha rol tu phyin pa yongs su rdzogs par bya'o zhes gsungs so//'di la byang chub sems dpa' rnams sa dang po la de bzhin nyid rtogs pa nas bzung ste/ sbyor ba thams cad la don dam par btsal na mngon sum du mthong bas de bzhin nyid du gnas par 'gyur gyi gzhan du ni ma yin no//de bzhin nyid de yang sbyin pa byed pa'i tshe ni sus kyang sbyin pa'am blang bar mi nus te/ de bas na don dam par yongs su gtong ba zhes bya ba gang yang med do/ /bza' ba dang btung ba dang mal cha la sogs pa yongs su gtong ba gang yin pa de dag ni kun brtag pa'i chos la gnas pa'i phyir rmi lam dang sgyu ma bzhin du yod pa ma yin no//de ltar don dam par yongs su gtong ba'i mtshan nyid dang bral ba nyid la yongs su gtong ba med pa'i tshul zhes bya'o/ /yongs su gtong ba med pa'i tshul des dngos po la sbyin par bya ba dang /bdag la gtong ba po dang / slong ba la len par byed pa dang gsum mi dmigs te/ dmigs pa'i ngo bo nyid dang bral ba nyid do/ /phyir zhes bya ba ni brten cing bzung nas sbyin pa'i pha rol tu phyin pa yongs su rdzogs par bya ba'o//dang por ni snying rje'i stobs kyis kun rdzob kyi tshul la gnas te 'jig rten pa'i spyod pa'i dbang gis sbyin pa byed do/ /de nas shes rab kyi dbang gis don dam pa'i tshul la gnas te 'jig rten las 'das pa'i spyod pa'i dbang gis thams cad kyang shes rab kyis yongs su btsal na dmigs su med par gyur pa de'i tshe/sbyin pa'i pha rol tu phyin pa yongs su rdzogs pa zhes bya ba'i ming du 'gyur ro/ /de bas na dang po sems bskyed pa'i dmigs par gyur pa sems can dang / byang chub gnyis yongs su ma btang bar gyur te /de'i phyir byang chub sems dpa'i ming yang dag pa'i don dang ldan par 'gyur ro/ /de ltar na sbyin par bya ba dang / gtong ba po dang / len pa po rnams mi dmigs pa dang / sbyin pa dag shin tu 'gal ba yin na ji ltar na 'gal ba med pa lta bur 'gyur zhe na/thabs mkhas pa'i pha rol tu phyin pa'i stobs kyis 'gyur te/ thabs mkhas pa'i pha rol tu phyin pa ni kun rdzob 'dzin pa'i snying rje dang / don dam pa 'dzin pa'i shes rab gnyis kyis skam la rgyu ba dang / chu na rgyu ba'i srog chags kyi sbyor ba bzhin du sbyor ba'i khyad par shin tu 'gal ba yin du zin kyang sbyor ba'i rnam pas 'gal ba med par grogs byas nas cig car sgrub cing 'jug ste/byang chub kyi bar du bsod nams kyi tshogs dang / ye shes kyi tshogs thams cad sgrub pa ni byang chub dang sems can rnams la phan 'dogs pa'i mchog yin no zhes bstan to// 'og nas kyang skabs ji lta ba de bzhin du de dag 'chad do/ /ltung ba mi 'byung ba dang / lhag par ltung ba mi 'byung ba'i phyir tshul khrims kyi pha rol tu phyin pa yongs su rdzogs par bya'o zhes bya ba la byang chub sems dpa' khyim pa ni byang chub sems dpa'i sdom pa'i bslab pa yang dag par blangs te gnas/rab tu byung ba ni sdom pa'i bslab pa gnyis ka yang dag par blangs te gnas pa na ltung ba 'byung bar mi 'gyur ro/ /gal te ltung ba byung na yang dus las yol bar lhag par ltung ba mi 'byung gi myur zhing myur du mthol bar byed de/de bas na ltung ba mi 'byung ba dang / lhag par ltung ba mi 'byung ba'i phyir zhes bya ba gsungs so/ /'dir yang shes rab kyi pha rol tu phyin pa la gnas te zhes bya bar snyegs te/ bdag ni tshul khrims dang ldan pa'o/ /'di ni tshul khrims so//'di ni 'chal ba'i tshul khrims so zhes bya ba'i rnam par rtog pa gsum mi dmigs pas 'khor gsum yongs su dag par rig par bya ste/ 'di ltar 'og nas kyang bdag ni tshul khrims dang ldan pa'o/ /'di ni tshul khrims so/ /'di ni 'chal ba'i tshul khrims so zhes bya bas rlom sems su mi byed do zhes 'byung ngo //'khrug pa med pa'i phyir zhes bya ba ni bzod pa'i pha rol tu phyin pa'i ngo bo nyid bstan te/ de yang snying rje'i dbang gis sems can la 'khrug pa med pa dang / shes rab kyi dbang gis 'du byed rnams la bdag med par rtogs pa'i phyir ro//'dir yang bzod pa dang / bzod par bya ba dang / gnod sems rnams mi dmigs pas 'khor gsum yongs su dag pa ni 'og nas skabs ji lta ba nyid du 'chad do/ /lus dang sems kyi brtson 'grus nyams pa med pa'i phyir zhes bya ba 'dis ni brtson 'grus kyi pha rol tu phyin pa la 'jug pa bstan te/rgyun du chud pa dang gus pa dang nan tan du lus dang sems kyi brtson 'grus nyams par mi byed par brtson 'grus kyi pha rol tu phyin pa yongs su rdzogs par bya'o zhes bya ba'i tha tshig go/ /ma btang ba de yang shes rab dang /snying rje nyid kyi 'gyur ba nyid do/ /'dir yang brtson 'grus dang ldan pa dang / brtson 'grus dang le lo rnams mi dmigs pas pha rol tu phyin pa nyid du 'grub po/ /ro myang ba med pa'i phyir zhes bya ba ni gal te bdag gi don du bsam gtan la 'jug na ni bsam gtan gyi ro myong bar byed par 'gyur na 'di ltar yang byang chub sems dpa' ni bdag gi don 'ba' zhig la sbyor ba thams cad la sdig pa bzhin du rnam par smod par byed na/de la bsam gtan gyi ro myang ba'i yid la byed pa lta ga la yod/ de bas na nyon mongs pa can dang /dag pa dang zag pa med pa'i bsam gtan gsum las dag pa dang / zag pa med pa nyid la snyoms par 'jug gi nyon mongs pa can la mi 'jug go zhes bya ba'i tha tshig go/ /'dir yang ting nge 'dzin dang ldan pa dang / ting nge 'dzin dang g.yeng pa rnams mi dmigs pas pha rol tu phyin pa yongs su rdzogs par 'gyur ro//chos thams cad mi dmigs pa'i phyir zhes bya ba ni gang gi phyir de bzhin nyid tsam du mthong bas ni 'jig rten pa'i kun brtags pa'i chos thams cad mi dmigs la / 'jig rten las 'das pa rnams la yang rnam par mi rtog ste/de bas na shes rab kyi pha rol tu phyin pa yongs su rdzogs pa zhes bya bar 'gyur ro/ /ji ltar na shes rab kyi pha rol tu phyin pa la gnas te shes rab kyi pha rol tu phyin pa yongs su rdzogs par byed ce na/ gang gi tshe shes rab kyi pha rol tu phyin pa zhes bya ba rnam pa thams cad mkhyen pa nyid dang /theg pa chen po la bya ba de'i tshe na ni klan kar 'gyur ba med do/ /gang gi tshe rnam par mi rtog pa'i shes rab kyi pha rol tu phyin pa la bya bar gyur pa de'i tshe yang don dam pa shes rab kyi pha rol tu phyin pa'i chos gang yang med do snyam du shes rab kyi pha rol tu phyin pa rnam par rtog pa med pa'i bdag nyid rnam par mi rtog pa'i shes rab kyi pha rol tu phyin pa la gnas pa yin te/de'i tshe ni khams gsum pa la sogs pa de bzhin nyid tsam du zad do snyam du kun rdzob kyi rnam par skyes pa'i shes rab sbyor ba'i lam du rtogs pa ni rnam par rtog pa'i bdag nyid yin yang rnam par mi rtog pa'i shes rab kyis yongs su zin pa'i phyir shes rab kyi pha rol tu phyin pa zhes bya bar 'gyur te/de bas na shes rab kyi pha rol tu phyin pa la gnas te shes rab kyi pha rol tu phyin pa bsgom par dgongs pas klan kar 'gyur ba med do/ /'dir yang shes rab can dang /shes rab dang / 'chal ba'i shes rab rnams mi dmigs pas 'khor gsum yongs su dag pa yin par rig par bya'o/ /de'i 'og tu shA ri'i bu shes rab kyi pha rol tu phyin pa la gnas te dran pa nye bar gzhag pa bzhi yongs su rdzogs par bya'o zhes bya ba la sogs pas byang chub kyi phyogs kyi spyod pa ston to//byang chub kyi phyogs kyi chos rnams bsgom pa ni nyan thos dang rang sangs rgyas kyi theg pa pa mya ngan las 'das pa la gzhol bar byed pa rnams nyid la rigs kyi/ byang chub sems dpa' rnams la mi rigs so zhe na yang 'di la nyes pa med de/byang chub sems dpa' rnams ni chos thams cad rnam pa thams cad du rtogs par bzhed pa dang / chos thams cad mi dmigs par lhur len pas ci byang chub kyi chos rnams don dam par yod dam/ 'on te med ces de dag la yongs su tshol bas rigs so//'o na de ltar gyur na byang chub kyi phyogs kyi chos rnams bsgoms pa'i rgyur mya ngan las 'das pa mngon sum du mdzad par 'gyur te/ de'i phyir/ byang chub sems dpa' rnams kyis rgyun du zhugs pa nas dgra bcom pa nyid kyi bar du thob par 'gyur ro zhe na/ yang sngon gyi rtsol ba'i shugs kyi mthu nyid kyis de 'grub par 'di la nyes pa med de/ yang gang dag 'khor ba la nyes dmigs su mthong nas yid byung ba dang / mya ngan las 'das pa la yon tan du mthong nas de nyid don du gnyer cing sgrub pa de dag ni sngon gyi rtsol ba'i shugs kyis dran pa nye bar gzhag pa rnams bsgoms pa'i rgyus 'bad mi dgos par mya ngan las 'das pa mngon sum du byed par 'gyur gyi/byang chub sems dpa' gang dag 'khor ba dang mya ngan las 'das pa la sems mnyam pa sems can thams cad la phan pa dang bde ba bskyed pa lhur len pa dag ni sems can la phan pa'i rgyu yin pa'i phyir 'khor ba la yang mya ngan las 'das pa bzhin du yon tan du gzigs la sems can la phan 'dogs pa'i gnas pa ma yin pa'i phyir mya ngan las 'das pa la yang 'khor ba bzhin du mi mthun par gzigs pa dang /chos nyid tsam du zad pa'i phyir de gnyi ga yang mnyam pa nyid du gzigs pas dmigs su med pa'i ngo bo nyid du so sor rtog pa'i phyir byang chub kyi phyogs kyi chos rnams bsgoms te / de dag ni byang chub kyi phyogs kyi chos rnams mngon sum du mdzad pa kho na tsam du zad kyi rgyun du zhugs pa'i 'bras bu la sogs pa'am/mya ngan las 'das pa la mngon sum du mdzad pa'i phyir nye bar mdzad pa ma yin te/ de nyid la yongs su 'dris pa'i shes pa zhes bya'o/ /'di ltar 'og nas kyang byang chub kyi phyogs kyi chos rnams la gnas nas 'di ni yongs su 'dris par bya ba'i dus yin gyi mngon sum du bya ba'i dus ni ma yin par shes so zhes bya ba la sogs pa yongs su 'dris pa'i shes pa bstan pa las 'chad do//dran pa nye bar gzhag pa bzhi zhes bya ba ni de la lus dang / tshor ba dang / sems dang chos rnams dang /rnam pa bzhi rnams la rjes su lta ba rnam pa bzhi la dran pa nye bar gzhag pa bzhi zhes bya ste/ sngar yongs su shes par mdzad nas de'i 'og tu yang dag pa ji lta ba bzhin du yongs su tshol ba na/ lus dang / tshor ba dang / sems dang chos rnams dang / de dag la dmigs pa'i dran pa dang /shes rab gnyis dang / de dang mtshungs par ldan pa'i sems las byung ba'i chos rnams kun brtags pa'i mtshan nyid du thugs su chud pas yang dag pa'i don ma yin par yongs su shes par mdzad de/ don dam pa brjod du med pa ni dran pa dang / shes rab gnyis kyi spyod yul ma yin pas dran pa nye bar gzhag pa'i mtshan nyid ni don dam par yod pa ma yin par rtogs pa la shes rab kyi pha rol tu phyin pa la gnas te dran pa nye bar gzhag pa rnams yongs su rdzogs par mdzad ces bya'o//de bas na 'bum pa las kyang dran pa nye bar gzhag pa rnams dmigs su med pa'i phyir zhes bya ba gsungs so//byang chub kyi phyogs kyi chos bsgom pa 'di yang 'og nas theg pa chen po bstan pa las rgyas par ston to/ /de bzhin du yang dag pa'i spong ba rnams la yang sbyar bar bya ste/ yang dag pa'i spong ba la sogs pa'i mtshan nyid kun rdzob tsam du zad kyi/don dam par yang dag pa'i spong ba la sogs pa'i mtshan nyid dngos po med pa'i ngo bo nyid yin pas yang dag pa'i spong ba la sogs pa dmigs su med pa'i ngo bo nyid du yongs su mkhyen pa la shes rab kyi pha rol tu phyin pa la gnas te/ byang chub kyi phyogs rnams yongs su rdzogs par mdzad do zhes bshad do//stong pa nyid kyi ting nge 'dzin bsgom par bya'o zhes bya ba la rnam par thar pa'i sgo gsum ni mya ngan las 'das pa [(]thog [,]thob [)]par byed pa yin pa'i phyir/ byang chub kyi phyogs bsgom pa dang mthun pas na byang chub kyi phyogs nyid kyi nang du bgrang ngo //'di ni byang chub sems dpa'i skabs su gtogs pas ting nge 'dzin gsum zhes brjod do/ /de la stong pa nyid kyi ting nge 'dzin zhes bya ba ni yongs su grub pa'i mtshan nyid kun brtags pa'i mtshan nyid kyis stong pa la kun brtags pa'i rnam pa des stong ngo zhes stong pa'i rnam par bsgom pa na sems rtse gcig pa nyid du gyur pa la stong pa nyid kyi ting nge 'dzin zhes bya'o//brjod du med pa'i don dam pa de nyid nam mkha' bzhin du gzugs la sogs pa'i mtshan ma thams cad dang bral ba/ mtshan ma'i rnam pa med pa'i mtshan nyid spros pa thams cad nye bar zhi ba yin pas zhi ba'i rnam par bsgom pa na sems rtse gcig tu gyur pa la mtshan ma med pa'i ting nge 'dzin zhes bya'o//de bzhin du khams gsum pa rnams dngos po med pa ngo bo nyid kyi rnam par gzigs pas chos thams cad la mi mthun pa'i 'du shes nye bar bzhag nas/phyi ma la smon pa'i gnas su mi byed par yang dag par rjes su gzigs pa na sems rtse gcig tu gyur pa la smon pa med pa'i ting nge 'dzin zhes bya'o/ /de'i 'og tu bsam gtan bzhi dang zhes bya ba la sogs pas sems can rnams yongs su smin par byed pa'i spyod pa bstan te/sems can rnams yongs su smin par bya ba de yang 'jig rten pa dang / 'jig rten las 'das pa ste/ bsam gtan dang ting nge 'dzin gyi phyogs dang / mngon par shes pa'i phyogs dang / ye shes kyi phyogs kyi chos rnams kyis bya dgos pas phyogs kyi chos gsum char yang der 'dus te/de la bsam gtan la sogs pa'i chos thams cad dang por sems can la phan par bya ba'i phyir kun rdzob tu bzung ste/ phyis don dam par yongs su btsal nas bsam gtan la sogs pa'i ngo bo nyid du mngon par zhen par mi mdzad par snying rje dang thabs mkhas pa gnyis kyis yang kun rdzob nyid la dmigs nas sems can la phan par byed pa'i phyir sems can yongs su smin par mdzad pa'i spyod pa rnam par gzhag go//de la skyo ba rjes su dran pa zhes bya ba ni/skye ba dang / rga ba dang / na ba dang / 'chi ba dang / mya ngan dang / smre sngags 'don pa dang / sdug bsngal ba dang / yid mi bde ba dang / 'khrug pa dang / mi rtag pa dang / stong pa dang / bdag med ces bya ba la sogs pa yid byung bar 'gyur ba'i gnas rnams la dmigs nas nyes dmigs su mthong bas skyo ba yin la byed pa ni skyo ba rjes su dran pa zhes bya'o//byang chub sems dpa'i skyo ba rjes su dran pa ni chos thams cad bdag med cing dngos po med pa'i ngo bo nyid yin pa las/ byis pa rnams kyis snying po can du blo bskyed de 'jug par mthong nas de dag shes par bya ba myur du sngon du gtong ba'i yid la byed pa ni skyo ba rjes su dran pa zhes bya'o//sngar rjes su dran pa yid la byed pa'i dbang gis 'chi ba rjes su dran pa zhes bya ba gsungs so/ /phyis lhag mthong gi sgo nas 'chi ba'i chos nyid can du mthong ba la 'chi ba'i 'du shes zhes gsungs so//'jig rten pa'i rig pa dang / bzo'i gnas thams cad dang / sgyu rtsal rnam pa sna tshogs drug cu rtsa bzhi la sogs pa la yid mi rton pa'i dga' ba ni 'jig rten thams cad la mngon par mi dga' ba'i 'du shes so//khams gsum pa la chags su rung ba'i rgyu yang dag par rjes su ma gzigs pas de la 'dod pa med par gyur pa ni 'jig rten thams cad la yid mi rton pa'i 'du shes so/ /sdug bsngal shes pa bsgom par bya'o zhes bya ba ni phung po la sogs pa'i chos thams cad kun rdzob kyi sgo nas sdug bsngal nyid du mkhyen par mdzad nas de'i 'og tu de dag nyid don dam par shin tu dngos po med par mkhyen kyang sems can yongs su smin par bya ba'i phyir kun rdzob tu sdug bsngal gyi rnam pa nyid du mkhyen pa dang /gzhan dag la yang de bzhin du shes par mdzad pa'i mkhyen pa ni sdug bsngal shes pa ste/de bzhin du thams cad la yang sbyar bar bya'o/ /phung po dang khams dang skye mched la sogs pa de dag nyid rab tu skye bar mkhyen pa dang / de shes par byed pa'i mkhyen pa dang / kun mthun par mkhyen pa ni kun 'byung ba shes pa'o//bdag dang gzhan rnams kyi nyon mongs pa dang / nye ba'i nyon mongs pa dang / sdug bsngal thams cad dang / srid pa yongs su zad pa mkhyen pa dang / yongs su zad pa'i rgyu mkhyen pa ni byang chub sems dpa' rnams kyi zad pa shes pa'o/ / bdag dang gzhan dag gi srid pa'i skye bar skye ba thams cad mkhyen pa dang / mi skye ba'i rgyu mkhyen pa ni byang chub sems dpa' rnams kyi mi skye ba shes pa'o/ /kun rdzob tu chos thams cad mngon sum du mkhyen pa dang / don dam pa'i dbang gis de bzhin nyid du mkhyen pa ni chos shes pa'o//kun rdzob tu chos thams cad rjes su dpag pas shes pa dang / mi rtag pa la sogs pa mngon sum du ma gyur kyang de lta bur 'gyur bar mkhyen pa dang / byang chub sems dpa' rnams chos thams cad stong pa nyid du rjes su mthun par mkhyen pa ni rjes su rtogs pa'i shes pa'o//'phags pa thams cad kyis sems can dang bum pa la sogs pa mkhyen pa dang / byang chub sems dpa' rnams kyis gzugs la sogs pa kun brtags pa'i chos thams cad la dmigs pa'i mkhyen pa ni kun rdzob shes pa'o/ /yongs su 'dris pa shes pa zhes bya ba ni shes pa gang gis byang chub sems dpa' rnam par thar pa'i sgo stong pa nyid dang /mtshan ma med pa dang smon pa med pa dang / byang chub kyi phyogs kyi chos rnams sgom yang mya ngan las 'das pa mngon sum du mi mdzad kyi de dag nyid goms pa dang / rab tu byang ba 'ba' zhig mdzad pa'i mkhyen pa de la yongs su 'dris pa shes pa zhes bya'o//gal te mya ngan las 'das pa mngon sum du mdzad na ni de rgyun du zhugs pa la sogs pa nyid du 'gyur te/ des dogs pa'i phyir yang dag pa'i mtha' la reg par mi mdzad kyi/mkhyen pa des chos tsam du bsgom par mdzad do/ /'o na mya ngan las 'das pa thob par byed pa'i chos rnams bsgoms pas/ ji ltar yang dag pa'i mtha' mngon sum du mdzad par mi 'gyur zhe na/ skyo ba yid la byed pa dang mi ldan pa'i phyir ro zhes sngar yang bshad do//gzhan yang yang dag pa'i mtha' mngon sum du byed pa'i sngon du 'gro ba ni zhi gnas dang lhag mthong sgom pa yin na/ byang chub sems dpa' rnams ni de ltar yang dag pa'i mtha' 'thob par byed pa'i zhi gnas dang / lhag mthong bsgom pa la sbyor ba mi mdzad kyi chos thams cad dmigs su med par bsgom pa rgyas par bya ba 'ba' zhig gi phyir byang chub kyi phyogs kyi chos rnams la dmigs pa na mnyam par ma bzhag pa'i shes pa tha mal pas so sor rtog go//de bas na zhi gnas dang lhag mthong gi rkyan dang mi ldan pa'i phyir yang dag pa'i mtha' mngon sum du mdzad par mi 'gyur ro//'di ltar 'og nas kyang rab 'byor gang gi tshe byang chub sems dpa' sems dpa' chen po rnam pa thams cad kyi mchog dang ldan pa'i stong pa nyid la so sor rtog kyang mngon sum du bya'o snyam pas so sor rtog par mi byed kyi/'di ni yongs su 'dris par bya ba'i dus yin gyi mngon du bya ba'i dus ni ma yin no zhes so sor rtog cing mnyam par ma bzhag pa nyid du dmigs pa la sems nye bar 'dogs kyang byang chub sems dpa' sems dpa' chen po bar skabs der byang chub kyi phyogs kyi chos rnams las nyams par yang mi 'gyur la/zag pa zad pa mngon sum du yang mi byed do zhes bya ba la sogs pa 'chad do/ /sgra ji bzhin shes pa zhes bya ba ni sgra gang dang gang yin pa la sgra ji bzhin zhes bya'o/ /de shes pa ni sgra ji bzhin shes pa ste/ shes pa gang gis byang chub sems dpa' sems can dmyal ba dang /dud 'gro dang / yi dags dang / lha dang mi dang tshangs pa thams cad kyi sgra dang skad thams cad so sor rtogs shing mkhyen pa de ni sgra ji bzhin shes pa'o/ /thams cad la yang shes rab kyi pha rol tu phyin pa la gnas te zhes bya bar sbyar bas dmigs su med pa'i tshul gyis sgom par byed ces bya bar shes par bya'o//de bas na 'bum pa la sogs pa thams cad du yang de bzhin du ston to/ /ma nyams pa'i mngon par shes pa lnga zhes bya ba ni 'gro ba'i 'chi 'pho dang skye ba thams cad du mngon par shes pa lnga dang ldan pas mngon par shes pa nyams pa med pa'i phyir/ma nyams pa zhes bya'o/ /pha rol tu phyin pa drug ces bya ba ni pha rol tu phyin pa drug sngar bshad zin mod kyi 'on kyang 'dir sems can yongs su smin par bya ba'i skabs su gtogs par yang bshad do//yang dag par sdug par 'gyur ba'i chos drug ces bya ba ni 'bum pa las 'byung ste/ byams pa'i lus kyi las dang / byams pa'i ngag gi las dang / byams pa'i yid kyi las dang / tshul khrims mnyam pa nyid dang / lta ba mnyam pa nyid dang /'tsho ba mnyam pa nyid ni yang dag par sdug par 'gyur ba'i chos drug go/ /nor bdun zhes bya ba ni/ dad pa dang / tshul khrims dang / thos pa dang / gtong ba dang / shes rab dang / ngo tsha shes pa dang / khrel yod pa'i nor rnams so/ /skyes bu chen po'i rnam par rtog pa brgyad ces bya ba la nyan thos kyi rnam par rtog pa rnams ni ji skad du rnam 'grel las bshad pa bzhin no//byang chub sems dpa'i rnam par rtog pa ni nam zhig sems can thams cad kyi sdug bsngal thams cad sel nus snyam du rnam par rtog pa dang / nam zhig dbul bas nyen pa sems can 'byor pa chen po la 'jog nus snyam du rnam par rtog pa dang /nam zhig sha khrag dang bcas pa'i lus kyis sems can rnams kyi don byed nus snyam du rnam par rtog pa dang / sems can dmyal ba na yun ring por gnas pas kyang nam zhig sems can rnams la phan pa byed pa 'ba' zhig tu 'gyur snyam du rnam par rtog pa dang /nam zhig 'jig rten pa dang / 'jig rten las 'das pa'i 'byor pas 'jig rten thams cad kyi re ba yongs su rdzogs par mthong bar 'gyur snyam du rnam par rtog pa dang /nam zhig sangs rgyas su gyur nas/ sems can thams cad 'khor ba'i sdug bsngal thams cad las yang dag par 'byin par 'gyur snyam du rnam par rtog pa dang / sems can la phan 'dogs pa med pa'i skye ba dang / sems can gyi don du sbyor ba med pa'i sems dang /don dam pa'i ro gcig pu la spyod pa dang / skye bo thams cad sim par byed pa'i tshig ma yin pa dang / gzhan la mi phan pa'i 'tsho ba dang / gzhan la phan byed mi nus pa'i lus dang / gzhan la phan 'dogs pa la mi gsal ba'i blo dang / sems can la phan par mi spyod pa'i nor dang /'gro ba rnams kyi don spyod pa med pa'i dbang phyug dang / gzhan la gnod pa byed par dga' bar tshe rabs tshe rabs su ma gyur cig snyam du rnam par rtog pa dang / srog chags thams cad kyi sdig pa'i las thams cad kyi 'bras bu bdag la smin pa bdag gis legs par spyad pa'i 'bras bu thams cad sems can thams cad la smin par gyur cig snyam du rnam par rtog pa ste/'di dag ni skyes bu chen po'i rnam par rtog pa brgyad do/ /de ltar rnam par rtog pa na rnam par rtog pa de dag 'bras bu yod par bya ba'i phyir snying rjes 'jig rten pa rnams la bltas nas gzhan la phan pa bsgrub par bya ba'i phyir dang /shes rab kyis mi dmigs pa yid la byed pa bsgom par bya ba'i phyir dang / sems can gyi 'jig rten dang snod kyi 'jig rten yongs su btsal bar bya ba'i phyir sems can gyi gnas dgu bsgom par bya'o//kha cig las ni sems can la kun nas mnar sems kyi dngos po dgu zhes 'byung ngo / /kun nas mnar sems kyi dngos po dgu ni byang chub sems dpa'i sems la shin tu mi 'byung bas de las bzlog nas kun nas mnar sems med pa'i dngos po dgur 'gyur te/'dis bdag la gnod pa byas so snyam nas kun nas mnar sems mi 'byung ba dang / byed do snyam nas kun nas mnar sems mi 'byung ba dang / byed par 'gyur ro snyam nas kun nas mnar sems mi 'byung ba la sogs par sbyar ro/ /de'i 'og tu de bzhin gshegs pa'i stobs bcu zhes bya ba la sogs pas sangs rgyas kyi chos yongs su smin par byed pa'i spyod pa bstan to//tshad med pa bzhi zhes sngar sems can yongs su smin par bya ba'i skabs su bstan pa'i phyir sangs rgyas kyi chos yongs su smin par bya ba'i spyod pa bstan pa'i skabs su ni byams pa chen po zhes bya ba la sogs pa ming gzhan gyis bstan to//de ltar mdor bshad par chos thams cad bsdus te bstan nas da ni rgyas par bshad par bya ba la/ gang sngar chos thams cad rnam pa thams cad du mngon par rdzogs par byang chub par 'dod pas shes par bya ba smos pas ni byang chub sems dpa'i bsam pa bstan to// da ni bsam pa de nyid kyi rgyu dang / 'bras bu dang bsam pa dang bcas pa la sogs pas rgyas par rnam par phye ste bstan par bzhed nas/ bcom ldan 'das kyis yang thams cad mkhyen pa'i ye shes rnam pa thams cad kyi mchog dang ldan pa mngon par rdzogs par byang chub par 'dod pa zhes bya ba la sogs pas bsam pa rnam par dbye ba bstan to//sngar gang zhes bya ba bstan pa rnam pa brgyad bstan pa las gang gi phyir brtson par bya zhes bya ba'i gang zhes bya ba bstan pa de da bstan par bya ste/'di la rim pa ji lta bur zhe na/ byang chub sems dpa' rnams kyi 'dod pa ni rnam pa gsum du 'jug ste/ theg pa gsum bsgom par 'dod pa dang / byang chub sems dpa'i che ba'i bdag nyid 'dod pa dang / sangs rgyas kyi che ba'i bdag nyid 'dod pa'o/ /de la thams cad mkhyen pa'i ye shes rnam pa thams cad kyi mchog dang ldan pa mngon par rdzogs par byang chub par 'dod pas zhes bya ba nas thams cad shes pa nyid yongs su rdzogs par 'dod pa zhes bya ba'i bar gyi tshig lngas theg pa gsum 'bras bu dang bcas pa bstan to//byang chub sems dpa'i skyon med par 'jug par 'dod pas zhes bya ba nas/rgyun du zhugs pa'i 'bras bu dang lan cig phyir 'ong ba'i 'bras bu dang / phyir mi 'ong ba'i 'bras bu dang / dgra bcom pa nyid dang / rang sangs rgyas dang / bla na med pa yang dag par rdzogs pa'i byang chub la dgod par 'dod pa'i byang chub sems dpa' sems dpa' chen pos shes rab kyi pha rol tu phyin pa la bslab par bya'o zhes bya ba'i bar gyis ni byang chub sems dpa'i che ba'i bdag nyid bstan to//de'i 'og tu de bzhin gshegs pa'i spyod lam la slob par 'dod pa zhes bya ba nas 'dod pa'i yon tan lnga nye bar len pa'i bar gyis ni sangs rgyas kyi che ba'i bdag nyid bstan to//de la ye shes gsum zhes bya ba ni rnam pa thams cad mkhyen pa nyid dang / lam gyi rnam pa shes pa nyid dang / thams cad shes pa nyid do/ /de la sangs rgyas bcom ldan 'das rnams kyi gnas shin tu gyur pas rdo rje lta bu'i ting nge 'dzin gyis bsdus pa 'jig rten las 'das pa rnam par mi rtog pa'i ye shes la rnam pa thams cad mkhyen pa nyid ces bya'o//byang chub sems dpa' rnams kyi bsgrub pa'i sar gtogs pa sa bcu'i rim pas nges par byung ba/pha rol tu phyin pa'i spyod pa la sogs pa byang chub sems dpa'i lam gyi bdag nyid kyi ye shes la lam gyi rnam pa shes pa nyid ces bya'o/ /nyan thos dang rang sangs rgyas rnams kyi 'du byed thams cad ni mi rtag pa'o/ /zag pa dang bcas pa thams cad ni sdug bsngal ba'o//chos thams cad ni bdag med pa'o zhes bya ba thams cad mi rtag pa la sogs pa'i rnam par 'jug pa bsgom pa'i rgyu las byung ba/ 'jig rten las 'das pa'i lam gyi ye shes la thams cad shes pa nyid ces bya'o/ /de la thams cad mkhyen pa'i ye shes rnam pa thams cad kyi mchog dang ldan pa mngon par rdzogs par byang chub par 'dod pa zhes bya bas ni rnam pa thams cad mkhyen pa nyid mngon par rdzogs par byang chub par 'dod pa bstan to//bag chags dang / mtshams sbyor ba dang / nyon mongs pa thams cad yang dag par 'joms par 'dod pas zhes bya bas ni de'i 'bras bu bstan to//chos thams cad rnam pa thams cad du mngon par rdzogs par byang chub par 'dod pas zhes bya ba de nyid kyis rnam pa thams cad mkhyen pa nyid bstan zin na yang 'dir ci'i phyir bstan zhe na/ 'di la nyes pa med de sngar chos thams cad mngon par rdzogs par byang chub par 'dod pas zhes bya ba smos pas ni chos thams cad rtogs par bya ba bstan gyi/'dir thams cad mkhyen pa'i ye shes nyid mngon par rdzogs par byang chub par 'dod pas zhes bya bas ni thams cad mkhyen pa'i ye shes nyid mngon par rdzogs par byang chub par bstan to//'o na rnam pa thams cad kyi mchog dang ldan pa zhes bya ba'i bye brag brjod pa ci dgos she na/ 'di la thams cad mkhyen pa nyid kyi ye shes ni rnam pa gsum ste/ nyan thos dang / rang sangs rgyas rnams kyi thams cad shes pa nyid dang /sangs rgyas rnams kyi thams cad mkhyen pa'i ye shes chos thams cad la dmigs pa dang / sangs rgyas rnams kyi thams cad mkhyen pa'i ye shes rnam par mi rtog pa la yang thams cad mkhyen pa nyid kyi ye shes zhes bya ste/ de la thams cad mkhyen pa'i ye shes mngon par rdzogs par byang chub par 'dod pas zhes bya ba de tsam zhig bstan na ye shes gang la bya snyam nas the tshom za bar 'gyur ro//de bas na rnam pa thams cad kyi mchog dang ldan pa zhes bya ba'i bye brag smos te/ des ni rnam pa thams cad mkhyen pa nyid kyi ye shes zhes bya bar bstan pa yin no//de la rnam pa thams cad ni skye ba med pa dang / 'gag pa med pa dang / gzod ma nas zhi ba dang / rang bzhin gyis mya ngan las 'das pa dang / dngos po med pa'i ngo bo nyid dang / stong pa nyid dang / mtshan ma med pa dang / smon pa med pa la sogs pa ste/ rnam pa de dag thams cad kyi rnam pa'i mchog ni rnam pa'i gtso bo stong pa nyid kyi rnam pa ste/ de ni rnam pa gzhan dag gi rtsa bar gyur pa'i phyir ro/ /de bas na rnam pa thams cad kyi mchog gi rnam pa dang ldan pa/ rnam par mi rtog pa dmigs par bya ba dang / dmigs par byed pa'i dngos po mnyam pas mnyam pa nyid du 'jug pa ni rnam pa thams cad mkhyen pa nyid kyi ye shes yin par bstan to//yang na 'dis thams cad mkhyen pa'i ye shes nyid bstan te/ rnam pa thams cad ni dge ba dang / mi dge ba lung du ma bstan pa'i tshogs su gtogs pa dang /yang dag pa nyid du nges pa dang / log pa nyid du nges pa dang / ma nges pa'i tshogs su gtogs pa'i rnam pa dag ste/ de ltar sangs rgyas rnams kyi thams cad mkhyen pa'i ye shes ni mi dge ba dang lung du ma bstan pa dang / yang dag pa nyid du nges pa dang log pa nyid du nges pa dang /ma nges pa'i tshogs su gtogs pa rnams thugs su chud pas na/ rnam pa thams cad dang ldan par 'gyur ro/ /dge ba dang yang dag pa nyid du nges pa'i tshogs su gtogs pa rnams thugs su chud pas rnam pa thams cad kyi mchog gi rnam pa dang ldan par 'gyur ro zhes kyang bshad do// de lta bu mngon par byang chub par 'dod pa la thams cad mkhyen pa'i ye shes rnam pa thams cad kyi mchog dang ldan pa mngon par byang chub par 'dod pa zhes bya ba gsungs pa'o/ /bag chags dang / mtshams sbyor ba dang / nyon mongs pa thams cad yang dag par 'joms par 'dod pa zhes bya bas ni de'i 'bras bu bstan te/las kyi bag chags dang / nyon mongs pa'i bag chags dang / skye ba'i bag chags ni bag chags rnam pa gsum mo/ /las kyi mtshams sbyor ba dang / nyon mongs pa'i mtshams sbyor ba dang /skye ba'i mtshams sbyor ba ni mtshams sbyor ba gsum mo/ /rten cing 'brel par 'byung ba'i mtshams sbyor ba gsum yin pa'i phyir/ bag chags thams cad dang / mtshams sbyor ba thams cad dang / nyon mongs pa thams cad yang dag par 'joms par 'dod pas zhes bya ba'i tha tshig go//de'i 'og tu lam gyi rnam pa shes pa nyid yongs su rdzogs par 'dod pa dang / sems can thams cad kyi sems dang spyod pa'i rnam pa shes pa nyid yongs su rdzogs par 'dod pas zhes bya ba gnyis kyis ni lam gyi rnam pa shes pa 'bras bu dang bcas pa bstan te/byang chub sems dpa' rnams ni lam gyi rnam pa shes pa nyid yongs su rdzogs par byed cing sems can rnams kyi sems dang spyod pa rnams rtogs pas sems can la phan pa dag sgrub po/ /de'i 'og tu thams cad shes pa nyid yongs su rdzogs par 'dod pas zhes bya ba ni nyan thos dang /rang sangs rgyas rnams kyi ye shes bstan te/ byang chub sems dpa' thams cad shes pa nyid mngon sum mi mdzad du zin kyang sems can gyi don du thams cad shes pa nyid kyi rang bzhin dang / thams cad shes pa nyid thob par byed pa'i rgyu mkhyen nas sems can rnams rgyun du zhugs pa'i 'bras bu la sogs pa la so sor 'god de/de bas na thams cad shes pa nyid kyang des yongs su rdzogs par byas par 'gyur ro/ /thams cad shes pa nyid kyi grogs byed pa'i rkyen ma bstan pa ni byang chub sems dpa' de tsam gyis rtogs par 'gyur bas dgos pa med pa'i phyir ro// //bam po lnga pa/ de'i 'og tu byang chub sems dpa'i skyon med pa la 'jug par 'dod pas zhes bya ba la sogs pas byang chub sems dpa'i yon tan gyi che ba'i bdag nyid 'dod pa bstan to/ /de la byang chub sems dpa'i yon tan yang rnam pa bzhir bstan te/ma dag pa'i sa'i yon tan dang / dag pa'i sa'i yon tan dang / so so yang dag par rig pa'i sa'i yon tan dang / mthar thug pa la gnas pa'i sa'i yon tan rnams so/ /sa dang po nas sa bdun gyi bar du ni yid la byed pa rtsol ba dang bcas pa'i phyir ma dag pa'i sa rnams te/de la byang chub sems dpa'i skyon med pa la 'jug par 'dod pa zhes bya ba nas/ sangs rgyas kyi sku mngon par bsgrub par 'dod pa zhes bya ba'i bar du ni de dag gi yon tan yin par shes par bya'o/ /sangs rgyas kyi sku mngon par bsgrub pa zhes bya ba nas de bzhin nyid khong du chud pa zhes bya ba'i bar du ni sa brgyad pa la sa'i yon tan dag pa rnams so//rdul phra rab kyi rdul zhes bya ba nas pha rol tu phyin pa drug yongs su rdzogs pa'i bar du ni sa dgu pa la so so yang dag par rig pa'i sa'i yon tan rnams so/ / 'das pa dang / ma byon pa dang / da ltar byung ba'i sangs rgyas bcom ldan 'das rnams kyi sangs rgyas kyi yon tan rnams rjes su thob par 'dod pas zhes bya ba nas rgyun du zhugs pa la sogs pa'i 'bras bu la so sor 'god pa'i bar du ni sa bcu pa la mthar thug par gnas pa'i yon tan rnams so//de la byang chub sems dpa'i skyon med pa la 'jug par 'dod pas zhes bya ba ni nyan thos dang / rang sangs rgyas nyid las ldog pa la byang chub sems dpa'i skyon med pa zhes bya'o zhes zer ro/ /gzhan dag na re skyon med pa zhes bya ba ni de bzhin gshegs pa'i snying po la bya'o zhes so//de la yang gnas skabs ni gsum ste/ kun nas nyon mongs pa med pa'i skyon med pa nyid dang / byang chub sems dpa'i skyon med pa nyid dang / chos skyon med pa nyid do/ /de bzhin gshegs pa'i snying po zhes bya ba ni de bzhin nyid de la yang gnas skabs gsum ste/byis pa so so skye bo'i sa la ma dag pa'i gnas skabs dang / byang chub sems dpa'i sa la dag pa dang ma dag pa'i gnas skabs dang / de bzhin gshegs pa'i sa la dag pa'i gnas skabs rnams so//de la ma dag pa'i de bzhin nyid la ni sems can zhes bya ste/ de yang kun nas nyon mongs pa'i skyon med pa nyid ces bya'o/ /dag pa dang ma dag pa'i gnas skabs la ni byang chub sems dpa' zhes bya ste/ byang chub kyi gnas skabs dag pa dang / sems can gyi gnas skabs ma dag pa'i phyir ro//de nyid la byang chub sems dpa'i skyon med pa nyid ces bya'o/ /dag pa'i gnas skabs la ni de bzhin gshegs pa zhes bya ste/ rab 'byor de bzhin gshegs pa zhes bya ba ni yang dag pa de bzhin nyid kyi tshig bla dgas so zhes 'byung ba'i phyir ro//de nyid la chos skyon med pa nyid ces bya'o/ /de bzhin gshegs pa'i snying po sems can zhes bya ba ma dag pa kun nas nyon mongs pa'i skyon med pa'i gnas skabs gang yin pa de yongs su spangs nas/ byang chub sems dpa' zhes bya ba dag pa dang ma dag pa byang chub sems dpa'i skyon med pa nyid kyi gnas skabs thob pa la/byang chub sems dpa'i skyon med pa zhes bya ste/ byang chub sems dpa' zhes bya ba de bzhin nyid skyon med pa'i gnas skabs thob par 'dod pas zhes bya ba'i tha tshig go/ /nyan thos dang rang sangs rgyas kyi sa las 'da' bar 'dod pas zhes bya ba ni yon tan khyad zhugs pa'i phyir te/sa'i ye shes la zhugs pa'i byang chub sems dpa' ni yon tan rnam pa bzhis nyan thos dang rang sangs rgyas las 'das pa yin te/ dbang po'i khyad [(]pa [,]par [)]dang / sgrub pa'i khyad par dang / ye shes kyi khyad par dang /'bras bu'i khyad par gyis so/ /de la nyan thos ni rang bzhin gyis dbang po rtul po yin/ rang sangs rgyas ni dbang po bar ma yin/ byang chub sems dpa' ni dbang po rnon po yin no/ /nyan thos dang rang sangs rgyas rnams ni rang bzhin gyis bdag gi don lhur len pa bdag gi don nyid sgrub cing bdag la phan pa 'ba' zhig mthar phyin par byed do//byang chub sems dpa' rnams ni bdag dang gzhan gyi don gnyi ga lhur len la/ bdag dang gzhan gyi don nyid bsgrubs nas/ bdag dang gzhan la phan pa nyid mthar phyin par mdzad do//nyan thos dang rang sangs rgyas rnams ni chos rnams la mi rtag pa dang / sdug bsngal ba dang / stong pa dang / bdag med pa nyid du rtogs kyi/ byang chub sems dpa' rnams ni bdag dang gzhan la phan par mdzad pa la zhugs pa'i phyir rig pa'i gnas thams cad la mkhas pa dang /sems can gyi khams don rnam pa du ma bsgrubs nas de'i 'og tu chos thams cad dmigs su med pa'i mtshan nyid du rtogs par mdzad do/ /nyan thos dang rang sangs rgyas rnams ni nyon mongs pa'i sgrib pa rnam par dag pa nyid thob nas phung po'i lhag ma med pa'i mya ngan las 'das pa thob par byed do// byang chub sems dpa' rnams ni nyon mongs pa'i sgrib pa dang shes bya'i sgrib pa gnyis ka spangs nas mi gnas pa'i mya ngan las 'das pa bsgrubs te/ 'khor ba'i mtha'i bar du sems can la phan pa'i don nyid mdzad do/ / phyir mi ldog pa'i sa zhes bya ba ni byang chub tu sems bskyed pa dag phyis byang chub kyi sems las ldog pa ni rgyu rnam pa bzhis 'gyur te/ rigs dang mi ldan pa'am/ sdig pa'i grogs pos yongs su zin pa'am/ snying rje chung ba'am/ 'khor ba'i sdug bsngal shin tu yun ring zhing mi bzad pas 'jigs pa'i phyir te/rgyu de bzhi char yang sar chud pa'i byang chub sems dpa' la med do/ /de bas na sa rab tu dga' ba la sogs pa la phyir mi ldog pa'i sa zhes bya'o/ /nyan thos dang rang sangs rgyas thams cad la sbyin pa byin pa na rjes su yi rang ba dang ldan pa'i sems bskyed pa gcig gis zil gyis gnon par 'dod pas zhes bya ba ni nyan thos dang rang sangs rgyas dag gi sbyin pa byed pa'i sems ni sred pa dang bcas shing rnam par rtog pa dang bcas pa'i phyir srid pa'i 'bras bu 'am/bdag gi don du byed par 'gyur bas dag pa ma yin no//byang chub sems dpa'i rjes su yi rang ba'i sems ni srid pa med pa dang / rnam par mi rtog pa dang / mtshan ma'i spyod yul ma yin pa dang / bdag dang gzhan la phan pa sgrub pa ste/ yon tan de dag gis 'phags pa'i phyir zil gyis gnon to//de bzhin du tshul khrims kyi phung po la sogs pa la yang sbyar ro/ /sems can thams cad kyi don du sbyin pa chung ngu byin yang zhes bya ba la sems can thams cad kyi don du zhes bya ba ni sems can thams cad kyi phyir zhes bya ba'i tha tshig go/ / sbyin pa chung ngu zhes bya ba ni yo byad dang mi ldan pa'i phyir ro/ /sems can gyi don du yongs su bsngos pa dang / thams cad mkhyen pa nyid du yongs su bsngos pa dang / 'khor gsum yongs su dag pa'i phyir tshad med grangs med par 'gyur ro/ /sbyin pa'i pha rol tu phyin pa la spyod pas shes rab kyi pha rol tu phyin pa la bslab par bya'o zhes bya ba ni theg pa chen po'i bsgrub pa la ma bslabs pa'i sbyin pa la sogs pa ni don dam pa'i pha rol tu phyin par mi 'gyur ro//sangs rgyas kyi sku mngon par bsgrub par 'dod pas zhes bya ba ni sa bdun pa/ la sangs rgyas kyi sku bkod pa shes kyang de'i tshe bsgrub par ni mi nus kyi/ sangs rgyas kyi sku bkod pa shes nas sa de la mngon par bsgrub par 'dod pa ni skye'o/ /'di ltar sa bcu pa las kyang sangs rgyas thams cad kyi rang bzhin gyi chos kyi sku nyid la yang 'jug /gzugs kyi sku'i mtshan dang dpe byad bzang po rnam par brgyan pa'i rgyan kyang mngon par sgrub/de bzhin gshegs pa'i gsung sgra skad dang bral zhing brjod du med pa rang bzhin gyis zhi ba la yang mos par byed do zhes gsungs te/ des ni sku gsum ston to/ /sangs rgyas kyi rigs su skye bar 'dod pas zhes bya ba la de bzhin gshegs pa'i rigs ni 'dir yongs su grub pa'i de bzhin nyid la bya ste/sa brgyad pa la rnam par rtog pa thams cad dang / rtsol ba thams cad dang / mtshan ma thams cad rgyun chad pa'i phyir rnam par dag pa'i de bzhin nyid kyi bdag nyid du gnas par gyur pa la de bzhin gshegs pa'i rigs su skye ba zhes bya'o//gzhon nu'i sa zhes bya ba ni sa brgyad pa de nyid la bya ste/ 'di ltar shin tu kha na ma tho ba med pa'i phyir gzhon nu'i sa zhes bya'o/ /zhes gsungs pa'i phyir/ 'jig rten chos kyi dbyings kyis klas pa zhes bya ba ni sems can gyi 'jig rten la bya ste/sems can gyi 'jig rten la yang mtha' med pa'i phyir de bzhin gshegs pa'i snying pos klas pa zhes bya'o/ /nam mkha'i khams kyi mthas gtugs pa zhes bya ba ni snod kyi 'jig rten la bya'o/ /dge ba'i sems bskyed pa gcig kyang mi zad par bya bar 'dod pas zhes bya ba ni chu'i thigs pa gcig rgya mtsho'i nang du blugs pa zad par mi 'gyur ba bzhin du rnam pa thams cad mkhyen pa nyid du yongs su bsngos pa yang 'khor ba'i mtha'i bar du sems can gyi don byed pa'i phyir mi zad pa zhes bya'o//mi zad pa de yang blo gros mi zad pa'i mdo las bstan pa bzhin du shes par bya'o/ /sangs rgyas kyi rigs rgyun mi chad par bya ba'i phyir zhes bya ba ni sangs rgyas kyi gdung rgyun mi chad par bya ba'i phyir te/ sangs rgyas kyi rgyun mi chad par bya ba'i phyir ro zhes bya ba'i tha tshig go//nang stong pa nyid la gnas par 'dod pas zhes bya ba la sogs pas stong pa nyid bcu drug bstan to/ /stong pa nyid kyi ngo bo nyid ni gcig tu zad mod kyi 'on kyang byang chub sems dpa' rnams kyi sems dang yid la byed pa tha dad pas rnam pa mang por phye'o//'di la byang chub sems dpa' stong pa nyid yid la byed pa la brtson pa na 'di snyam du sems te/ gal te chos thams cad stong ste yod pa ma yin na dge slong dag bdag nyid bdag gi mgon yin no/ /bdag nyid kyis las byas pa bdag la smin no/ / bdag gling du gyur par gnas par gyis shig ces bya ba la sogs pa'i bdag ces bya ba ji lta bu zhig snyam du bsams nas/ dang por bdag gi nang gi chos gzugs dang / tshor ba la sogs pa gang yin pa de dag bzung ste/ bsams na bdag ces bya ba brjod par bya ba'i dngos po don dam par gang yang med kyi 'di dag ni tha snyad du brjod pa'i don 'ba' zhig tsam du zad de//glo bur du ming du btags pa yin no/ /zhes yang dag par rjes su mthong ngo / /de bas na nang stong pa nyid ces bya ba gsungs te/ 'dis ni phung po stong pa nyid du bstan pa yin no//de nas byang chub sems dpas gal te bdag med na gzhan yod dam med snyam du bsams pa dang / gzhan zhes bya ba brjod par bya ba'i don yang dag par rjes su ma mthong gi /skye mched tsam du zad par yang dag par rjes su mthong ngo / /de bas na phyi stong pa nyid gsungs te/'dis ni skye mched stong pa nyid du bstan to/ /de nas yang don de nyid legs par gtan la dbab pa'i phyir nang dang phyi'i chos gnyis gcig tu byas te bsgom zhing / 'di dag ni khams bco brgyad tsam du zad par mthong ngo / /de'i phyir phyi nang stong pa nyid ces bya ba gsungs te/'dis ni khams stong pa nyid du bstan pa yin no/ /yang na phyi rol pa dag na re zab po ni bdag yin no zhes zer te/ de'i phyir gang zag bdag med pa nyid bstan par dgos la/ chos 'di la zhugs pa dag na re zab po ni nang gi skye mched rnams so zhes zer te/de'i phyir nang gi skye mched rnams med pa nyid du bstan dgos te/ /de gnyis ka'i phyi nang stong pa nyid rnam par gzhag go/ /de la mig ni bdag dang bdag gis stong / rna ba ni bdag dang bdag gis stong zhes bya ba la sogs pas gang zag la bdag med pa'i sgo nas nang stong pa nyid bstan la/mig mig gis stong / rna ba rna bas stong zhes bya ba la sogs pas ni chos bdag med pa'i sgo nas nang stong pa nyid bstan te/ rnam pa gnyis ka ltar bshad do/ /de la mig la yang rnam par rtog pa bzhi 'byung ngo / /mig bdag go zhes bya ba dang /bdag mig dang ldan no zhes bya ba dang / mig la bdag gnas so zhes bya ba dang / bdag la mig gnas so zhes bya ba rnams te/ dper na gzugs bdag yin par yang dag par rjes su mthong ba dang / bdag gzugs dang ldan pa dang / bdag la gzugs gnas pa dang /gzugs la bdag gnas pa zhes bya ba lta bu'o/ /de la mig bdag yin no zhes bya ba 'di ni mig la bdag tu 'dzin pa'o/ /bdag ni mig dang ldan pa'o zhes bya ba dang / bdag la mig gnas so zhes bya ba dang / mig la bdag gnas so zhes bya ba 'di ni mig la bdag gir 'dzin pa'o//de la mig mi dmigs pa'i rnam par yang dag pa ji lta ba bzhin du shes pas 'dzin pa de bzhi spangs nas yang dag pa'i shes pas mig ni bdag dang bdag gis stong ngo zhes yang dag pa ji lta ba bzhin du mthong ngo / /rna ba la sogs pa la yang de bzhin du sbyar te/'di ni gang zag la bdag med pa'i sgo nas nang stong pa nyid bstan pa yin no/ /chos la bdag med pa'i sgo nas ni 'di ltar mig la rnam pa gsum ste/ kun brtags pa'i mig dang / rnam par brtags pa'i mig dang /chos nyid kyi mig go/ /de la brjod par bya ba dang / rjod pa'i rnam par bzung ba'i mig ces bya ba'i dngos po ni kun brtags pa'i mig go/ /gzung ba dang 'dzin pa'i bdag nyid du gnas pa mig gi rnam par so sor snang ba ni rnam par brtags pa'i mig go/ / brjod par bya ba dang / rjod pa'i rnam pa dang bral zhing brjod du med pa snang ba dang bcas par 'gyur ba dang bral te/ so so rang gis rig pa yongs su grub pa'i ngo bo nyid de ni chos kyi mig ces bya'o/ /de la mig mig gis stong zhes bya ba la mig ces bya ba ni chos nyid kyi mig go//mig gis zhes bya ba ni kun brtags pa dang / rnam par brtags pa'i mig gis so/ /stong zhes bya ba ni bral zhes bya ba'i tha tshig go/ /de bzhin du rna ba rna bas stong zhes bya ba la sogs pa la yang sbyar bar bya'o/ /'o na brjod du med pa'i don dam pa ni mig gi ngo bo nyid ma yin no//gal te mig gi ngo bo nyid yin na ni brjod du yod pa nyid du 'gyur na ci'i phyir chos nyid kyi mig ces bya zhe na/ de ni bden mod kyi 'on kyang mig la sogs pa dang / gzugs dang sgra la sogs pa 'dus byas kyi chos gang yin pa de thams cad gyur pa'i tshul gyis yongs su grub pa'i rnam pa la ni tha dad du dbye ba med de/rnam pa gcig pa yin du zin kyang gang gi tshe rab tu bstan par bya ba'i phyir rnam par phye ste/ smra bar 'dod par gyur pa de'i tshe thabs gzhan med pas gzugs kyi de bzhin nyid sgra'i de bzhin nyid/dri'i de bzhin nyid ces bya ba la sogs pa'i sgra rnams kyis so sor phye ste bstan pa tsam du zad kyi/ de bzhin nyid de ni de dag gi rnam pa dang / de dag tu brjod par gyur pa ma yin no/ /de ltar na chos nyid kyi mig la sogs pa gang yin pa de dag nang gi mig gi skye mched la sogs pa'i ngo bo nyid dang bral ba'i phyir nang stong pa nyid ces bya'o//de ltar nang gi dngos po la za ba por 'dzin pa bzlog nas phyi rol gyi dngos po la bza' bar 'dzin pa bzlog pa'i phyir phyi stong pa nyid rnam par gzhag ste/ bza' bar 'dzin pa yang phyi rol pa rnams ni gzugs la sogs pa la bdag gir lta bar 'dzin to//chos 'di pa rnams ni yul nyid du rnam par rtog pas 'dzin to/ /de la snga ma bzlog pa'i phyir gzugs bdag dang / bdag gis stong zhes bya ba dang sgra bdag dang bdag gis stong zhes bya ba la sogs pa bstan to//gnyis las bzlog pa'i phyir gzugs gzugs kyis stong / sgra sgras stong zhes bya ba la sogs pa gsungs te/ de yang snga ma bzhin du sbyar bar bya'o/ /de bzhin du phyi'i yul rnams kyang bdag dang bdag gi dang bral ba dang / kun brtags pa'i chos de dag gi rnam pa dang bral ba la phyi stong pa nyid ces bya'o//de ltar phyi dang nang gi za ba po dang / bza' ba'i rnam par rtog pa bstsal nas/ da ni nang dang phyi'i skye mched rnams 'dus pa'i bdag nyid kyi lus la yang bdag dang bdag gir lta ba dang / lus su rnam par rtog pa spangs pa'i phyir gnyi ga gcig tu bsdus nas phyi nang stong pa nyid du bstan te/lta ba spang ba'i phyir phyi dang nang gi skye mched 'dus pa gang yin pa de dag kyang bdag dang bdag gi dngos pos stong par yang dag par rjes su mthong ngo / /rnam par rtog pa spangs pa yang de dag gcig la gcig ltos te byed par stong pas 'du ba tshegs pa med pa las rnam par bzhag ste/'di ltar mig ni gzugs kyis stong pas de dang lhan cig phrad nas mthong ba la sogs pa'i bya ba mi byed de/ don dam par na zhes bya ba'i tha tshig go/ /de bzhin du gzugs mig gis stong ste/de dang lhan cig tu bya ba mi byed do zhes bya ba'i tha tshig go/ /de bzhin du rna ba sgras stong / sgra rna bas stong pas na tshogs pas byed pa med pa'i phyir 'dus pa la lus su rnam par rtog pa spang bar 'gyur ro/ /de lta bas na stong pa nyid bshad pa'i skabs su nang gi chos rnams phyi rol gyi chos rnams kyis stong /phyi rol gyi chos rnams kyang nang gi chos rnams kyis stong ste/ de la nang gi chos rnams phyi rol gyi chos rnams kyis stong gang zhe na/ mig dang rna ba dang / sna dang lce dang lus dang yid de/nang gi chos de rnams gzugs dang sgra dang dri dang ro dang reg bya dang chos rnams kyis stong ngo zhes bya bar bshad do/ /de ltar nang dang phyi'i chos rnams 'dus pa la bdag dang bdag gi zhes bya ba med pa dang / nang gi chos rnams phyi rol gyi chos rnams dang bral ba dang /phyi rol gyi chos rnams nang gi chos rnams dang bral ba ste/ 'dus pa med pas don dam par byed pa stong pa'i phyir phyi nang stong pa nyid ces bya'o/ /de ltar stong pa nyid rnam pa gsum yang dag par rnam par gzhag nas 'di snyam du sems te/ci stong pa nyid ces bya ba chos kyi rnam par yod dam/ 'on te med/ gal te stong pa nyid ces bya ba zhig yod na ni stong pa nyid yod pas/ stong pa ma yin pa nyid kyang yod par 'gyur te/ mi mthun pa'i phyogs med par gnyen po yod par mi 'thad pa'i phyir ro/ / gal te stong pa ma yin pa yod na yang chos thams cad stong pa ma yin par 'gyur ro zhes de snyam du bsams nas/ yang 'di ltar gtan la 'bebs te/ stong pa zhes bya ba ni ci yang med pa'o/ /gal te stong pa zhes bya ba'i chos gzhan 'ga' zhig yod par gyur na ni/ de lta na mi stong pa'i chos kyang yod par 'gyur na/ stong pa zhes bya ba'i chos gzhan du gyur pa ni gang yang med de/ 'di ltar 'ga' zhig gis dri za'i grong khyer mthong nas grong khyer gyi blo skyes la/ de nas grong khyer de nyid la legs par brtags te bltas na phyis ma mthong nas grong khyer gyi blo med par gyur te/stong pa'i blo skyes pa na/ de la stong pa'i blo skyes pa'i phyir grong khyer gyi blos zhes bya ba'i dngos po gzhan du gyur pa 'ga' zhig yod do zhes byar mi rung ngo / /de bzhin du 'dir yang sngar kun brtags pa'i gzugs la sogs pa la gzugs su mthong nas chos kyi blo skyes so//de'i 'og tu yang dag pa ji lta ba bzhin du yongs su btsal bas yongs su btsal na yang dag pa ji lta ba bzhin du shes pas ma mthong ba'i phyir chos kyi blo ni med kyi / stong pa'i blo skyes par zad de/ de la stong pa'i blo skyes pas de la stong pa zhes bya ba'i chos gzhan du gyur pa 'ga' zhig yod do zhes byar mi rung ngo //de bas na stong pa nyid med pas mi stong pa nyid kyang med do/ /mi stong pa med pas stong pa nyid kyang med do/ /'dir 'di skad du byang ni rung ste stong pa nyid med do zhes kyang brjod par mi bya ste/ / 'di ltar chos thams cad stong pa'i phyir ro/ /stong pa nyid yod do zhes kyang brjod par mi bya ste/ 'di ltar rnam par dpyad na stong pa nyid ces bya ba'i chos gzhan du gyur pa gang yang med pa'i phyir ro/ /de bas na 'di ni stong pa nyid stong pa nyid ces bya'o / /yang byang chub sems dpa' 'di snyam du sems te/gal te chos thams cad stong pa yin na g.yo ba dang mi g.yo ba'i 'gro ba 'di dag thams cad la ci'i phyir rten cing 'brel par 'byung ba zhes bya/ med pa la ni rten cing 'brel par 'byung ba mi srid do/ /gal te rten cing 'brel par 'byung ba'i chos yod na ni de ltar gyur na g.yo ba dang mi g.yo ba'i 'gro ba mtha' dag yod par 'gyur ro zhes de snyam bsams nas/yang 'di ltar gtan la 'bebs te/ rten cing 'brel bar 'byung ba zhes bya ba'i chos ni gang yang med de/ 'di ltar 'di dag ni shin tu med pa yin yang ji srid du yang dag pa ji lta ba bzhin du mthong ba dang /mngon par shes pa rtogs pa med pa de srid du las dang nyon mongs pa dang rnam par smin pa'i bdag nyid du gyur pas thog ma med pa nas rgyu dang 'bras bu'i dngos por gnas so/ /las dang nyon mongs pa dang rnam par smin pa de dag kyang thams cad kyi thams cad du stong pa nyid de/chos stong pa rnams la stong pa nyid kyi rgyu dang 'bras bu'i bdag nyid du 'jug pa gang yin pa de dag la rten cing 'brel par 'byung ba zhes bya'o/ /dper na sgyu ma mkhan 'ga' zhig gis sgyu ma'i sngags kyis sems can rnams kyi mig bslus nas glang po che dang /rta dang / shing rta dang / dpung bu chung dang / ri dang / 'bab chu dang / rgya mtsho la sogs pa'i dngos po nye bar ston par byed de/ sems can sngags kyis mig bslus pa de dag la yang sgyu ma'i glang po che la sogs pa rang snang ba'i rnam par shes pa skye ba'i rkyen du 'gyur la /rnam par shes pa de dag gis kyang sgyu ma'i glang po che la sogs pa de dag mthong bar 'gyur ro/ /de ltar sgyu ma'i glang po che la sogs pa dang / rnam par shes pa rnams rgyu dang 'bras bu'i dngos por 'jug pa gang yin pa 'di la rten cing 'brel par 'byung ba zhes bya ste/sgyu ma'i glang po che la sogs pa de dag dang / rnam par shes pa de dag gi rten cing 'brel bar 'byung ba ni don dam par yod par mi srid do/ /de bzhin du byis pa ma rig pas bslus pa'i lta ba can thams cad kyang las kyi bzos kun brtags pa'i chos sgyu ma'i glang po che la sogs pa mthong bar 'gyur ro//kun brtags pa'i chos de dag kyang rang snang ba'i rnam par shes pa skye ba'i rkyen du 'gyur la/ rnam par shes pa de dag gis kyang chos de dag mthong ngo / /de ltar kun brtags pa gzung ba'i chos rnams dang /'dzin pa'i chos rnams rgyu dang 'bras bu'i dngos por 'jug pa gang yin pa 'di la rten cing 'brel bar 'byung ba zhes bya ste/ gzung ba dang / 'dzin pa rten cing 'brel bar 'byung ba de dag ni don dam par yod mi srid pas de'i phyir chos rnams rang bzhin med pa zhes bya'o//gal te chos rnams bcos ma ma yin zhing rang bzhin can du gyur pa'i ngo bo nyid 'ga' zhig yod na de ltar na ni chos rnams rgyu dang rkyen gyi dbang gis gzhan la rag lus shing 'byung bar mi 'gyur gyi bdag nyid 'byung bar 'gyur ba zhig na 'di ltar chos rnams rkyen gzhan rnams la brten nas gzhan gyi dbang nyid kyis 'byung bar 'gyur gyi/rang gi dngos po bcos ma ma yin zhing rang bzhin gyis ni 'byung ba ma yin te/ de bas na de dag rang gi dngos po yod pa ma yin par shes par bya'o/ /gang gi phyir de ltar rang gi dngos po med pa de'i phyir de dag gi ngo bo nyid med pa zhes bya'o//gang gi phyir de dag ngo bo nyid med pa de nyid kyi phyir stong pa nyid do / /de bas na ngo bo nyid med pa'i don ni rten cing 'brel par 'byung ba'i don no/ /stong pa nyid kyi don ni rten cing 'brel bar 'byung ba'i don zhes bya'o//gang gi tshe yang dag pa ji lta ba bzhin du mthong ba skyes nas ma rig pa'i sngags kyi mthu rab tu bcom par gyur pa de'i tshe/ sgyu ma'i glang po che la sogs pa lta bur gyur pa kun brtag pa'i chos rnams dang / de la 'dzin pa'i rnam par shes pa'i chos rnams rgyu dang 'bras bu'i dngos po'i mtshan nyid du rten cing 'brel bar 'byung ba'i bdag nyid kyis mi snang zhing shin tu nub par gyur pa 'di ni chen po stong pa nyid ces bya'o//yang byang chub sems dpa' 'di snyam du sems te / gal te chos thams cad stong pa yin na ni don dam pa'i chos kyang stong par 'gyur ro//gal te de stong par gyur na de ltar dam pa'i don du 'gyur/ sangs rgyas rnams kyi rdo rje lta bu'i ting nge 'dzin kyang de la ji ltar dmigs par 'gyur/ gal te chos de yod na de bzhin du chos thams cad kyang yod pa nyid du 'gyur ro snyam du bsams nas yang 'di ltar gtan la 'bebs te/don dam pa zhes bya ba'i chos ni gang yang med de/ de bzhin gshegs pa'i snying po grub pa'i gnas skabs su gyur pa gang yin pa de ni chos kyi ngo bo nyid ma yin te/ de yod do zhes bya ba'am/ med do zhes bya bar brjod mi nus so//yongs su grub pa'i gnas skabs de ni yod do zhes byar yang mi rung ste/ 'di ltar kun brtags pa'i gzung ba dang / 'dzin pa gnyis med pa'i mtshan nyid du rnam par gzhag pa'i phyir te/ med pa'i mtshan nyid la ni yod do zhes brjod du mi rung ngo / /de med do zhes kyang brjod du mi rung ste/'di ltar gnyis dang bral ba'i ngo bo nyid du ni yod do/ /de ltar gyur pa de la gal te yod do zhes brjod na dngos po'i bdag nyid du yod par 'gyur te/ sgro btags pa'i mthar 'gyur ro/ /ji ste rdzas su med do zhes brjod na yang ri bong gi rwa la sogs pa bzhin du med pa nyid du 'gyur te/skur pa'i mthar 'gyur ro/ /de bas na gnyis ka ltar yang brjod du mi rung bas/ de ltar brtag par mi bya'o/ /rdo rje lta bu'i ting nge 'dzin de la dmigs so zhes gang smras pa de yang ma brtags par smras pa ste/ sangs rgyas rnams kyi ye shes rnam par mi rtog pa 'jig rten las 'das pa ni ci la yang mi dmigs te/de'i tshe gzung ba dang / 'dzin pa'i rnam pa med pa'i phyir shin tu rnam par dag pa'i bdag nyid du gnas par gyur pas ci la yang mi dmigs mod kyi/ 'on kyang thog ma med pa can gyi 'khor ba na sngon 'dzin pa'i bdag nyid du goms pas de'i tshe rnam par shes pa'i ngo bo nyid ma yin pa'i phyir rang nyid kyi gzung ba med du zin kyang /rang nyid kyi 'dzin pa bzhin du 'jug pa nye bar gdags so/ /de ni dmigs par bya ba dang / dmigs par byed pa'i dngos po mnyam pas mnyam pa zhes bya ste/ dmigs par bya ba dang / dmigs par byed pa yang de nyid yin pa'i phyir mnyam pas mnyam pa zhes bya'o/ /de ltar gyur pa'i don dam pa de chos gzhan du gyur pa'i bdag nyid med pa de ni don dam pa stong pa nyid ces bya'o//yang byang chub sems dpa' 'di snyam du sems te / gal te chos thams cad stong pa nyid yin na 'dus byas kyi chos dang / 'dus ma byas kyi chos rnams med par 'gyur te/ 'dus byas dang / 'dus ma byas su brjod pa'ang lung las gnas skabs su ma dag pa'i snang bas med ces bya bar mi rung ngo snyam nas yang 'di gtan la 'bebs te/'dus byas zhes bya ba'i chos gzhan du gyur pa ni gang yang med do/ /gal te yod par gyur na 'dus byas zhes bya ba nyid mi rigs te/ 'dus byas zhes bya ba ni rgyu rkyen rnams tshogs shing 'dus pas byas pa la bya ba'i phyir ro//gal te 'dus byas zhes bya ba'i chos shig don dam par yod na ni/ de gzhan gyis byas pa yin par 'gyur la/ don dam pa'i chos ni sus kyang bya mi nus so/ /'di ltar 'dus byas zhes bya ba'i chos gang yang med pas de'i phyir byis pa kun brtags pa las gyur pas de lta bu'i ming gis brjod do//'dus byas kyi mtshan nyid skye ba dang / gnas pa dang / 'jig pa zhes bya ba gang yin pa de dag kyang brtags pa'i yod pa'o/ /mtshan nyid brtags pa'i yod par bshad pas mtshan nyid kyi gzhi yang brtags pa'i yod pa nyid do zhes nges par gzung dgos te/don dam pa'i chos ni btags pa'i mtshan nyid du mi rigs so/ /gal te don dam par 'dus byas kyi chos zhes bya ba zhig yod na yang chos gcig la mtshan nyid gsum mi rigs so/ /de bas na 'di ni 'dus byas stong pa nyid do//yang byang chub sems dpa' 'di snyam du sems te/ 'dus byas rnams ni 'dus byas pa yin pa'i phyir stong par 'gyur gyi 'dus ma byas gang yin pa de dag 'dus byas pa ma yin pa'i phyir don dam pa'i ngo bo nyid do snyam nas yang 'di ltar gtan la 'bebs te/'dus ma byas zhes bya ba'i chos gzhan du gyur pa ni gang yang med do / 'dus ma byas zhes bya ba yang 'dus byas kyi dngos po med pa'i ngo bo nyid la bya'i/ don dam par yod pa ni ma yin te/ 'di ltar dper na nam mkha' ni 'dus byas kyi dngos po thams cad med pa'i mtshan nyid la bya'i de las gzhan pa shin tu grub pa'i mtshan nyid du yod pa ni ma yin no//so sor brtags pas 'gog pa yang 'dus byas kyi chos rnams thams cad med pa'i mtshan nyid kho na'o/ /de bzhin du so sor brtags pa ma yin pas 'gog pa yang 'du byed kyi chos rnams zhig pa'i mtshan nyid do//nyan thos kyi tshul gyis kyang 'di dag don dam par yod pa ma yin na stong pa nyid kyi tshul la lta smos kyang ci dgos te/ de dag stong pa nyid du rtogs pa 'di ni 'dus ma byas stong pa nyid ces bya'o/ /yang byang chub sems dpa' 'di snyam du sems te/gal te chos thams cad stong pa yin na gang sngon gyi mtha' las 'das pa'i chos zhes bya ba dang / phyi ma'i mtha' la ma 'ongs pa'i chos zhes bya ba dang / dbus kyi mtha' la da ltar byung ba'i chos zhes bya ba de dag mkhyen pas sangs rgyas bcom ldan 'das la thams cad mkhyen pa zhes bya bar 'gyur ba dang /sangs rgyas bcom ldan 'das de'i ye shes 'das pa'i dus la thogs pa med pa zhes bya ba la sogs pa sangs rgyas kyi chos ma 'dres pa zhes bya ba dang / lha'i mig ces bya ba la sogs pa dus gsum du gtogs pa de dag lung las kyang 'byung bar yod par rigs so snyam du bsams nas yang 'di ltar gtan la 'bebs te/sngon gyi mtha' dang phyi ma'i mtha' dang dbus kyi mtha' zhes bya ba'i chos ni gang yang yod par mi rigs te/ 'di ltar chos gcig kho na ni ma 'ongs pa dang /da ltar byung ba dang / 'das pa zhes bya ba mtha' gsum du brjod par mi 'gyur ro/ /gal te don dam pa'i chos shig yin na ni gcig tu brjod pa nyid du 'gyur ro/ /dus gsum du yang ji ltar 'thad de / gal te gcig kho na la phyi ma'i mthar ni ma 'ongs par gyur la/dbus kyi mthar da ltar byung bar gyur cing sngon gyi mthar 'das par 'gyur ro zhe na yang de lta na ni dus gcig kho nar 'gyur te/ dper na nag pa grong du ma phyin pa dang / grong nas byung ba yang gcig ste/ gzhan ma yin pa bzhin du 'gyur ro//gzhan yang ci dus 'di ltos pa las grub pa yin nam/ 'on te rang grub pa yin/ gal te rang grub pa yin no zhe na de ni mi 'thad de dngos po gnas pa rnams ni rang grub par 'thad kyi mi gnas pa rnams ni mi 'thad do/ /dus kyang gnas pa ma yin te 'di skad cig dang thang cig dang /yud tsam dang / nyin zhag gcig dang / zla ba phyed dang zla ba gcig dang / dus tshigs dang / klungs su 'jug pa dang / lo khyud 'khor dang / dus la sogs pa'i dngos por 'gyur ba'i tshul can yin pas/ dus ni skad cig kyang mi gnas so//de la 'das pa'i dus kyi cha dang ma 'ongs pa'i dus kyi cha gcig tu bsdus pa la yud tsam zhes bya bar gdags te/ de bzhin du 'das pa dang / ma 'ongs pa gcig tu bsdus pa la nyin mtshan zhes bya bar gdags so/ /de bas na 'das pa dang / ma 'ongs pa dang /da ltar byung ba mi gnas pa'i dngos po rnams la rang 'grub pa zhes bya ba'i dus med do/ /ji ste dus ni ltos pa las 'grub ste 'di lta ste/ 'das pa la ltos nas ma 'ongs pa dang / da ltar byung bar 'gyur ba la/ de bzhin du da ltar byung ba la ltos te/ de las gzhan pa'i dus gnyis su 'gyur ba la sogs pa yod do zhe na yang / gal te 'das pa la ltos nas da ltar byung ba dang / ma 'ongs pa'i dus gnyis su 'gyur na/ de lta na ni da ltar byung ba dang / ma 'ongs pa gnyis 'das pa'i dus na yang yod par 'gyur ro/ / ma 'ongs pa dang da ltar byung ba gnyis 'das pa la med na ni de la ltos par mi 'gyur ro/ /ji ste ma 'ongs pa dang / da ltar byung ba gnyis 'das pa'i dus na yod na ni de lta na de gnyis kyang de na yod pas 'das pa nyid du 'gyur ro/ /de bzhin du da ltar byung ba dang / 'das pa gnyis kyang gal te ma 'ongs pa la ltos te 'byung ba /de lta na ni da ltar byung ba dang / 'das pa gnyis ma 'ongs pa la yod par 'gyur te/ de na med pa dag ni de la ltos par yang mi 'gyur ro/ /ji ste ma 'ongs pa de la de gnyis yod par 'gyur na de lta na ni de gnyis kyang ma 'ongs pa nyid du 'gyur ro//de bzhin du gal te 'das pa dang / ma 'ongs pa gnyis da ltar byung ba la ltos te 'byung na de lta na ni 'das pa dang ma 'ongs pa gnyis da ltar byung ba la yod par 'gyur te/ de na med pa dag ni de la ltos par mi 'gyur ro/ /ji ste 'das pa dang ma 'ongs pa de gnyis da ltar byung ba'i dus na yod na ni de lta na de gnyis de na yod pa'i phyir da ltar byung bar 'gyur te/de lta na yang dus gcig kho nar 'gyur ro/ /de bas na rnam pa de dag la sogs pas don dam par sngon gyi mtha' dang / phyi ma'i mtha' dang / dbus kyi mtha' zhes bya ba'i chos ni gang yang med kyi/bcom ldan 'das kyis 'jig rten gyi tha snyad du de dag bstan to snyam pa 'di ni/ mtha' las 'das pa stong pa nyid ces bya'o/ /yang byang chub sems dpa' 'di snyam du sems te/ gal te chos thams cad stong pa nyid yin na ci'i phyir bcom ldan 'das kyis byis pa rnams kyi 'khor ba ni ring ngo //dge slong dag 'khor ba 'di la thog ma dang tha ma med do zhes 'khor ba yod pa nyid du gsungs te/ de bas na 'khor ba yod do/ /de yod pas 'khor ba po yang yod de/ de bas na chos thams cad kyang de'i sgo nas yod par 'gyur ro snyam du bsams nas/de yang 'di ltar gtan la 'bebs te/ 'khor ba zhes bya ba'i chos ni gang yang med do/ /ci'i phyir zhe na/ thog ma dang tha ma med do zhes 'byung ba'i phyir ro/ /gal te 'khor ba zhes bya ba'i chos 'ga' zhig yod par gyur na de'i thog ma yang yod la tha ma yang yod par 'gyur ro//thog ma dang tha ma dang yod pa'i chos ni gang yang yod par ma mthong ngo / /bcom ldan 'das kyis kyang sngon gyi mtha' mi snang ngo zhes gsungs so/ /ji ste thog ma dang tha ma gnyis ni bkag gi dbus ma ma bkag ste/de bas na dbus yod do zhe na yang de yang mi rigs te/ gang la thog ma dang tha ma med pa de la dbus ji ltar yod par 'gyur/ dbus zhes bya ba ni thog ma dang tha ma dag la ltos te 'byung ba'i phyir ro/ /ji ste 'khor ba'i zhes bya ba'i chos gzhan du gyur pa zhig med na sems can rnams gang du 'khor bar 'gyur bcom ldan 'das kyis kyang 'khor bar ni gsungs te/dge slong dag 'khor ba 'di thog ma dang tha ma med de thog ma'i mtha' mi snang ngo / /sems can ma rig pas bsgribs pa sred pa'i kun tu sbyor ba can rnams kun tu rgyug cing 'khor bar 'gyur ro zhes gsungs so zhe na yang 'di ltar lan btab pa 'khor bar 'gyur ba de nyid don dam par 'thad pa ma yin te/gal te 'ga' zhig 'khor bar 'gyur na yang brtag pa 'am mi rtag pa zhig 'khor grang na rtag pa ni 'khor bar 'gyur bar mi 'thad de / 'gyur ba med pa'i phyir ro//mi rtag pa yang 'khor bar 'gyur bar mi 'thad de / skad cig pa rnams ni de dang de nyid du zhig ste/ yang skad cig gnyis pa la gzhan kho na skye bas de la 'khor ba ga la yod/ de bas na 'khor ba zhes bya ba ni skye ba dang 'gag pa'i rgyun gyis dngos pos 'du byed rnams kyi rgyun ma chad pa la 'khor ba zhes bya bar btags te/'di ni thog ma dang tha ma med pa stong pa nyid do/ /yang byang chub sems dpa' 'di snyam du sems te / 'khor ba dmigs su med kyang mya ngan las 'das pa zhes bya ba chos gzhan du gyur pa ni yod do//'gogs pa'i bden pa ni med do zhes brjod par mi nus te/ bcom ldan 'das kyis kyang dge slong dag ma skyes pa ma byas pa ma byung ba/ 'dus ma byas pa ni yod do zhes bya ba la sogs pa mngon sum du bstan te/ de bas na dor ba med pa yod do/ /dor bar bya zhing med par bya ba'i phyir dor ba zhes bya ba ni phung po lnga la bya'o//de bzhin gshegs pa 'od srungs kyi gsung rab la ni phung po la dor ba zhes bya ba'i ming du btags so/ /da ltar yang dor bar bya ba'i srid pa gcig dang / dor bar bya ba'i srid pa lnga zhes kyang gsungs so/ /dor ba'i dngos po yod pa ma yin pa la dor ba med pa zhes bya ste/phung po gang du 'gags par gyur pa de la dor ba med pa zhes bya ste/ 'gog pa yin no snyam nas yang byang chub sems dpa' 'di ltar gtan la 'bebs te/ dor ba med pa zhes bya ba'i chos ni gang yang yod par mi rigs kyi/phung po med pa la ni dor ba med pa zhes bya ste/ phung po med pa de yang phung po'i lhag ma med pa'i mya ngan las 'das pa dngos po thams cad med pa'i mtshan nyid yin pas de ni gang gi bdag nyid du yang chos gzhan du gyur par rnam par gzhag mi nus so/ /de bas na dngos po med pa zhes brjod pa ni mya ngan las 'das pa dang /'gog pa dang / 'dus byas thams cad nye bar zhi ba dang / dor ba med pa la sogs pa'i rnam grangs rnams kyis brjod do/ /ji ste mya ngan las 'das pa med na ci'i phyir 'du byed rnams skye bar mi 'gyur/ de bas na phyis 'du byed rnams yang skye bar 'gyur ba'i gnyen por gyur pa'i chos ni mya ngan las 'das pa yin no zhe na/de yang 'thad pa ma yin te/ 'du byed rnams mya ngan las 'das pa ni ji ltar yang mi srid do/ /gal te 'du byed rnams mya ngan las 'da' bar 'gyur na yang rtag pa'am/mi rtag pa zhig mya ngan las 'da' grang na/ gal te rtag pa 'ga' zhig mya ngan las 'da'o zhes bya bar ni de yang mi 'thad de/ rtag pa ni dus thams cad du 'gyur ba med pa dang / de la mya ngan las 'das pa dgos pa med pa'i phyir ro/ /ji ste 'ga' zhig mya ngan las 'da'o zhes bya bar ni de mi rtag pa'i phyir zhig pa las phyis skye ba med de/skye ba med pa'i ngo bo nyid la ni mya ngan las 'da' bas ci yang byar med do/ /ji ste 'du byed gzhan dag de'i rgyu la skye ba'i gnyen por byed do zhe na yang / de yang yod pa ma yin te/ 'jig rten las 'das pa'i lam gyi mes nyon mongs pa'i shing gi sa bon sreg pa'i phyir yang mi skye ba'i ngo bo nyid de/ngo bo nyid kyis mi skye ba de la mya ngan las 'das pa'o zhes btags so/ /nyan thos kyi tshul la yang mya ngan las 'das pa zhes bya ba chos gzhan du gyur pa ci yang med na stong pa nyid kyi tshul la lta smos kyang ci dgos te 'di ni dor ba med pa stong pa nyid ces bya'o//yang byang chub sems dpa' 'di snyam du sems te/ gal te chos thams cad stong pa yin na/ gang sems can rnams kyi rang bzhin du gyur pa 'dod chags la sogs pa'i spyod pa dang /bsam pa dang / bag la nyal dang / mos pa dang / khams dang / rigs zhes bya ba la sogs pa gang dag gi dbang gis bsam pa dang / bag la nyal sna tshogs mkhyen pa dang / mos pa sna tshogs mkhyen pa dang / khams sna tshogs mkhyen pa zhes bya ba la sogs pa sangs rgyas kyi chos rnams 'jug par 'gyur ba'i chos gang yin pa de dag 'thad par mi 'gyur te/de bas na rang bzhin gyi chos de dag ni don dam par yod do snyam nas/ yang 'di ltar gtan la 'bebs te/ de dag ni chos gzhan du gyur par brjod par mi rigs kyi/'di ltar de dag ni sems can gyi rgyud du gyur pa'i gnas skabs kyi bye brag rnams te/ de dag ni sems can rnams las tha dad pa'am tha dad pa ma yin par rnam par gzhag mi nus so/ /de bas na chos gzhan du gyur pa de lta bu dag ni med do snyam pa 'di ni rang bzhin stong pa nyid ces bya'o//yang byang chub sems dpa' 'di snyam du sems te / gal te chos thams cad med pa yin na de dag gi mi rtag pa nyid dang / sdug bsngal ba nyid dang bdag med pa nyid la sogs pa'i chos de dag ji ltar yod par 'gyur/ chos can med par ni chos yod par mi rung ste/ 'di ltar 'dus byas kyi chos thams cad ni mi rtag pa'o/ /zag pa dang bcas pa'i chos thams cad ni sdug bsngal ba'o/ /chos thams cad ni bdag med pa'o/ /de lta bas na de dang de mthong na yang dag pa ji lta ba bzhin du shes pa thob pa dang /srid pa thams cad kyi sdug bsngal las rnam par thar pa 'grub po snyam nas/ yang 'di ltar gtan la 'bebs te/ mi rtag pa nyid kyi chos 'di ni don dam pa'i chos su mi rung ste/ don dam pa'i chos mi rtag pa dang / skye ba dang 'jig par ji ltar 'gyur/ 'gyur ba dang rnam par 'gyur ba'i chos ni don dam pa zhes byar mi rung gi /bden pa gang yin pa dang / phyin ci mi log pa gang yin pa de ni de dag gi don dam pa nyid do/ /de bas na don dam pa la 'gyur ba dang ldan pa med do/ /de bzhin du gal te sdug bsngal du gyur pa'i chos don dam par gyur pa zhig yod na ni de lta na sdug bsngal de rtag par 'gyur te/de ltar gyur na rtag par gyur pa'i sdug bsngal ni dus thams cad du yod pa'i phyir 'jig rten nam/ 'jig rten las 'das pa'i bde ba yang skye bar mi 'gyur ro/ /de bzhin du gal te bdag med pa zhes bya ba'i chos shig don dam par yod par 'gyur na/'o na ni chos thams cad bdag med pa nyid dang ldan pas rtag par 'gyur ro/ /de ltar gyur na thar pa zhes bya ba nyid 'grub par mi 'gyur ro/ /de bas na kun brtags pa'i chos rnams kyi rang bzhin 'di dag ni kun brtags pa nyid yin te/chos thams cad kyi stong pa nyid ni gzhig par mi nus so/ /de bas na 'di ni chos thams cad stong pa nyid ces bya'o/ /yang byang chub sems dpa' 'di snyam du sems te / gal te re zhig mi rtag pa nyid la sogs pa ni spyi'i mtshan nyid yin pa'i phyir med du zin kyang 'di dag ni chos rnams kyi rang gi mtshan nyid de gzugs kyi mtshan nyid ni gzugs su rung ba'o//tshor ba'i mtshan nyid ni myong ba'o zhes bya ba la sogs pa de dag ni yod do/ /de dag yod pas gzugs la sogs pa yang yod pa nyid do snyam nas/ yang bdag nyid kyis 'di ltar gtan la 'bebs te/ci mtshan nyid 'di dag mtshan nyid kyi gzhi rnams las tha dad dam/ 'on te tha dad pa ma yin/ gal te tha dad pa ma yin par gyur na de nyid mtshan nyid yin la/ de nyid mtshan nyid kyi gzhi yin zhes byar mi rung ste/ mtshan nyid kyi gzhi ma grub na mtshan nyid kyang de dang tha dad pa ma yin pas grub par mi 'gyur te/de'i mtshan nyid du ji ltar grub par 'gyur/ gal te tha dad par gyur na de lta na ni 'di dpyad dgos te/ ci mtshan nyid kyi gzhi'i sngon rol du mtshan nyid byung ngam/ 'on te phyis 'byung ngam 'on te dus gcig tu byung /gal te mtshan nyid kyi gzhi'i sngon rol du mtshan nyid byung na mtshan nyid kyi gzhi med par de gang gi mtshan nyid yin/ gzhi med par mtshan nyid 'ba' zhig sngar byung bar gyur na phyis kyang gzhi med pa nyid du 'byung bar 'gyur ro/ /ji ste mtshan nyid kyi gzhi ni sngar byung la mtshan nyid phyis byung bar gyur na de lta na ni mtshan nyid byung ba'i sngon rol du mtshan nyid kyi gzhi de mtshan nyid med par byung bas phyis kyang mtshan nyid med par ci'i phyir mi 'byung /mtshan nyid med par mtshan nyid kyi gzhi sngar byung du zin na phyis mtshan nyid 'byung ba'i tshe rgyu med par 'byung bar gyur pas mtshan nyid de ci yang mi byed par 'gyur ro//ji ste mtshan nyid kyi gzhi dang mtshan nyid dus gcig tu 'byung bar gyur na/ de lta na ni mtshan nyid las mtshan gyi gzhi tha dad par gyur pa dang / mtshan gyi gzhi las mtshan nyid tha dad par gyur pa sngar ma mthong ba'i phyir 'di ni mtshan nyid do//'di ni mtshan nyid kyi gzhi'o zhes gnyis su rnam par dbye ba ji ltar rigs par 'gyur/ de bas na kun brtags pa'i chos rnams kyi mtshan nyid rnams kyang kun brtags pa nyid yin pas don dam par rtag bzod pa ma yin no snyam pa 'di ni//rang gi mtshan nyid stong pa nyid do/ /yang byang chub sems dpa' 'di snyam du sems te / gal te chos thams cad dmigs su med pa yin na/ de lta na ni dmigs su med pa'i chos gzhan du gyur pa zhig yod do/ /gal te dmigs su med pa med du zin na chos rnams dmigs su yod par 'gyur te/de bas na dmigs su med pa ni yod do snyam nas yang 'di ltar gtan la 'bebs te/ 'di la dmigs su med pa zhes bya ba'i chos gzhan du gyur pa ni yod par mi rigs so/ /gal te dmigs su med pa zhes bya ba'i chos gzhan du gyur pa zhig yod na ni dmigs su med pa de las gud na dmigs pa yang yod par 'gyur ro//de'i phyir dmigs su med pa ni dmigs pa'i ngo bo nyid du 'gyur ro/ /de yang bkag pa'i phyir de ltar mi rung ste/ de nyid dmigs pa yin la de nyid dmigs su med pa yin no zhes bya ba 'di ni 'gal lo//ji ste yang 'di snyam du dmigs su med pa la ni dmigs pa yod pa ma yin no snyam du sems na yang / de lta na ni dmigs su med pa'i phyir dmigs su med pa yang med pa nyid du 'gyur ro/ /de'i phyir dmigs su med pa zhes bya ba'i chos gzhan du gyur pa yod do zhes bya ba mi dmigs kyi/chos rnams kyi dmigs pa med pa nyid la de dang der dmigs su med pa zhes tha snyad btags pa 'ba' zhig tu zad de/ de bas na 'di ni mi dmigs pa stong pa nyid ces bya'o/ /yang byang chub sems dpa' 'di snyam du sems te/chos thams cad na dngos po med pa'i ngo bo nyid do zhes bshad de/ de bas na chos thams cad kyi dngos po med pa zhes bya ba'i ngo bo nyid bcal bar bya'o/ /de bas na dngos po med pa'i ngo bo nyid du grub pa'i phyir dngos po med pa'i ngo bo nyid ces bya ba'i chos ni yod do/ / ji ste 'di snyam du gal te chos rnams dngos po med pa'i bdag nyid yin na/ de ltar na ni chos rnams med do zhes bya ba nyid du gsung bar 'gyur te/ 'di la rnyed pa ci zhig yod snyam sems na/ de lta yang ma yin te/ kun brtags pa'i chos thams cad rnam pa thams cad du thams cad med do zhes khas blangs na/kun brtags pa'i chos de dag nyid dngos po med pa'i ngo bo nyid du yod do zhes smras pas chos rnams kyi phyogs gcig yod par bstan par 'gyur bas rnyed pa cher yod do snyam nas yang 'di ltar gtan la 'bebs te/ chos thams cad ni dngos po med pa'i ngo bo nyid do zhes bya ba'i tshig 'di'i don gang yin zhe na/chos thams cad ces bya ba 'dis ni kun brtags pa'i chos rnams dang / yongs su grub pa'i chos rnams bstan to/ /de la kun brtags pa'i chos rnams ni med pa'i phyir shin tu dngos po med pa'i ngo bo nyid do zhes brjod do/ /yongs su grub pa'i chos rnams ni de bzhin nyid dngos po las bzlog pa'i rnam pa ste/dngos po med pa zhes bya ba'i don 'di bzung nas dngos po med pa'i ngo bo nyid ces bya'o/ /byung ba'i phyir dngos po zhes bya bas na 'dus byas kyi chos la dngos po zhes bya'o/ /de las bzlog pa brjod du med pa so so rang gis rig pa'i rnam pa gang yin pa de ni dngos po med pa'i ngo bo nyid de/de bzhin nyid ces bya bar bstan to/ /de ltar na 'di nyid kyis chos rnams kyi yod pa dang / med pa bstan pa yin te/ gang gi phyir bcom ldan 'das kyis kyang gang na gang med pa de na des stong par yang dag pa ji lta ba bzhin du rab tu shes te/de na lhag ma ma lus pa gang yin pa de ni 'dir yod pa'o zhes yang dag pa ji lta ba bzhin du rab tu shes so zhes gsungs pas chos thams cad kyi dngos po med pa'i ngo bo nyid kyi mtshan nyid shin tu rtogs pa ma yin te/ 'di ni dngos po med pa'i ngo bo nyid stong pa nyid ces bya'o//chos thams cad kyi de bzhin nyid dang / chos kyi dbyings kyi de bzhin nyid dang / yang dag pa'i mtha'i de bzhin nyid ces bya ba ni thams cad du yang de bzhin nyid ni gcig mod kyi 'on kyang de'i gzhi la 'jug pa tha dad pas rnam pa gsum du gzhag ste/lam gyi rnam pa shes pa nyid kyi sa pa dang / rnam pa thams cad mkhyen pa nyid kyi sa pa dang / thams cad shes pa nyid kyi sa pa'o/ /phyi dang nang gi chos gang yin pa de dag gi yongs su grub pa'i ngo bo nyid gang yin pa de ni chos thams cad kyi de bzhin nyid ces bya ste/'di lta ste/ gzugs kyi de bzhin nyid dang / sgra'i de bzhin nyid dang / dri'i de bzhin nyid ces bya ba la sogs pa lta bu'o/ /sangs rgyas thams cad kyi de bzhin gshegs pa'i snying po gnas gyur pa chos kyi sku ni gnyis pa chos kyi dbyings kyi de bzhin nyid ces bya ste/sangs rgyas kyi chos thams cad kyi gzhi yin pa'i phyir ro/ /nyan thos dang rang sangs rgyas rnams kyi phung po'i lhag ma med pa'i mya ngan las 'das pa ni yang dag pa'i mtha'i de bzhin nyid ces bya ste/ 'dis yang dag pa'i mtha' mngon sum du mi bya'o zhes bya ba dang / 'khor ba yang mi len to zhes bya ba dang /yang dag pa'i mtha' yang mngon sum du mi byed do zhes de dang de dag las bshad pa gang yin pa'o/ /yang chos thams cad kyi de bzhin nyid ces pa snga ma ni sa brgyad pa la lhun gyis grub par rnam par mi rtog pas rtog pa bstan pa'i phyir gsungs so/ / 'dir ni mthar phyin pa'i sa bstan pa'i phyir gsungs par rig par bya'o/ /sa'i rdul phra rab ji snyed yod pa de dag shes par 'dod pa zhes bya ba ni sa bcu pa las rdul phra rab kyi rdul la mkhyen pa 'jug pa la sogs pa yon tan khyad par can rnams bstan pa'o/ /sor mo gcig gi rtse mos gzhil bar bya bar 'dod pas zhes bya ba ni ji ltar rtsig pa la sogs pas rlung bcil ba de bzhin du/'jig rten gyi khams thams cad khyab par 'jig pa'i rlung yang sor mo'i rtse mo gcig gis rtsig pa la sogs pa bzhin du 'jil bar byed pa'o/ /skyil mo krung gcig gis rgyas par dgang bar 'dod pas zhes bya ba ni bdag gi stan gyis khebs par 'dod na nam mkha' rgyas par 'gengs pa'o//bsod snyoms gcig gis zhes bya ba ni dus gcig tu zas kyis te/ dus mthun par zas kyis zhes bya ba'i tha tshig go/ /bcom ldan 'das byang chub sems dpa' sems dpa' chen pos sbyin pa ji lta bus btsal na zhes bya ba ni sbyin pa'i pha rol tu phyin pa gcig pus ji ltar pha rol tu phyin pa drug yongs su rdzogs par byed ces bya'o//rnam par g.yeng ba dang kun tu rtog pa med pa'i phyir bsam gtan gyi pha rol tu phyin pa zhes bya ba ni gang gi phyir sbyin pa gtong ba na rnam par mi g.yeng la de la kun tu rtog pa yang med la de'i phyir bsam gtan gyi pha rol tu phyin pa yongs su rdzogs par byed do//chos thams cad rab tu shes pa mi dmigs pa'i tshul gyis zhes bya ba ni chos thams cad shes rab kyis shes so zhes bya bar mi dmigs pa'o//sha'i mig dang lha'i mig ces bya ba la sogs pa la/ gzugs kyi sku'i spyan ni sha'i mig go/ /ting nge 'dzin dang / snyoms par 'jug pa dang / mngon par shes pa'i ye shes thams cad ni lha'i mig go/ /thams cad mkhyen pa'i ye shes ni shes rab kyi mig go//thams cad du 'gro ba'i lam mkhyen pa dang / dbang po mchog dang mchog ma yin pa dang / mos pa sna tshogs dang khams sna tshogs mkhyen pa ni chos kyi mig go/ /rdo rje lta bu'i ting nge 'dzin gyis bsdus pa dgra bcom pa'i lam gyi ye shes ni sangs rgyas kyi mig go//shA ri'i bu gzhan yang byang chub sems dpa' sems dpa' chen pos sangs rgyas bcom ldan 'das gang dag phyogs bcu'i 'jig rten gyi khams thams cad na chos ston pa de dag thams cad thos nas dran pa'i stobs bskyed pas gcad du mi chod pas yang dag par gzung bar 'dod pa dang /bla na med pa yang dag par rdzogs pa'i byang chub mngon par rdzogs par sangs rgyas kyi bar du thams cad chud mi za bar bya bar 'dod pas shes rab kyi pha rol tu phyin pa la bslab par bya'o zhes bya ba ni gzhung las 'byung bar zad do//mun pa mun nag tu gyur pa zhes bya ba ni 'jig rten gyi bar dag ni mun pa'o/ /de bzhin gshegs pa'i spyod lam la bslab par 'dod pa zhes bya ba ni sku'i gsang ba sa bcu thob pa'i spyod yul yin pas de skad bshad do/ /glang po che'i lta stangs zhes bya ba ni dam pa rnams kyi lta stangs te de dag ni steng na 'dug pa la bskyed de mi lta/'og nas 'dug pa la btud de mi lta/ g.yas g.yon na 'dug pa la ni mig bzur te mi lta/ rgyab na 'dug pa la ni mjing pa bsgyur te mi lta/ thag ring po ni 'dug pa la bsgrims te mi lta/ thag nye ba na 'dug pa la bsgrims pa med par yang mi lta'i/ji ltar 'dug pa'i spyod lam dang / ji ltar lta ba'i mig gis 'jig rten gyi khams thams cad du sems can thams cad dang / chos thams cad la lta ba ni glang po che'i lta stangs zhes 'chad do/ /'gro ba dang 'greng ba dang 'dug pa zhes bya ba la byang chub kyi snying por ni spyod lam rnam pa gsum gyis bzhugs so//nyal zhes bya ba ni yongs su mya ngan las 'das pa chen po ste/ dus de gnyis ka yangs tha mal pas ldeg mi nus so zhes 'chad do/ /gal te de bzhin gshegs pa'i zhabs kyis bcags pa'i sa gzhi thams cad rdo rje lta bur gyur na ci nyes she na/'dod pa'i yon tan lnga 'byung bar mi 'gyur ba'i phyir ro/ /sems can yongs su smin par bya ba'i phyir 'dod pa'i yon tan lnga nye bar 'dzin zhes bya ba ni sa brgyad pa la byang chub sems dpa' rnams dgra bcom pa dang 'dra bar nyon mongs pa dang shin tu bral te de dag la nyon mongs pa kun tu 'byung ba shin tu phra mo yang med pas na 'dod pa'i yon tan lnga la yongs su spyod mi srid mod kyi/'on kyang bdag cag gi byang chub sems dpa' ni bsdu ba'i dngos po la mkhas pa ste/ don mthun pas sems can rnams bsdu ba'i phyir bud med nyi khri bzhi stong re re la yang bdag gi lus kyang de snyed du sprul te/de dag thams cad dga' bar mdzad do/ /de bas na sa 'tshom la sogs pa bud med nyi khri bzhi stong dang / gar mkhan mo dgu stong dang / de dag gi g.yog 'khor mang po dang / rga ba dang /na ba dang / 'chi ba bstan pa rnams dang / lha dang / tshangs pa rnams kyi nang na theg pa gsum gyis yongs su smin par ma mdzad pa gang yang med do/ /de bas na sems can yongs su smin par mdzad pa nyid kyi phyir 'dod pa la spyod pa bstan to/ /ji skad du byang chub sems dpa' 'di snyam du sems te/bdag gis 'dod pa dag gi skyon rnams mtha' yas pa/ /'chi dang khon bcas sdug bsngal can te mya ngan rtsa/ /'jig par byed cing dug dang 'khrul 'khor 'dra ba dang / /me 'bar 'dra zhing ral gri'i so 'drar shes pas na/ /'dod pa'i yon tan dag la bdag 'dun 'dod chags med//bud med khyim na gnas pa bdag la mi mdzes kyis/ /bdag ni nags kyi 'dab tu song ste mi smra bar/ /bsam gtan ting 'dzin sgo nas sems zhi gnas par bya/ /zhes gsungs pa lta bu'o/ /des yang de ltar brtags nas thabs mkhas pas mngon sum du mdzad de/sems can yongs su smin par mdzad pa'i phyir thugs rje chen po bskyed nas/ de'i tshe tshigs su bcad pa 'di gsungs so/ /ku mu da ni 'dam rdzab nang na skye/ /mi yis gang ba'i nang nas rgyal pos mchod pa thob/ /gang tshe byang chub sems dpa' g.yog 'khor mang brnyes pa//de tshe sems can bye ba khrag khrig bdud rtsis 'dul/ /byang chub sems dpa' mkhas pa gang dag sngon byung ba/ /kun gyis sras dang btsun mo bud med bsten gyur kyang / /'dod pas chags med bsam gtan bde las nyams ma gyur//de bas de dag yon tan rjes su bdag gis bslab/ /ces bya ba la sogs pa'o/ /gal te 'dod pa la spyod pa bden pa ma yin na sgra gcan zin sras yin no zhes bya ba yang brdzun par 'gyur ro zhe na yang brdzun ma yin te/ bu zhes bya ba ni 'dod pa la yongs su spyod pa'i rgyus mngal nas skyes pa 'ba' zhig la bya ba ma yin gyi/brdzus te skye ba de dag kyang yod do/ /sgra gcan zin bzang po yang byang chub sems dpa' sems dpa' chen po yin te/ dgos pa'i dbang gis mngal na gnas pa'i tshul bstan to/ /sems bskyed pa'i le'u ste gnyis pa'o// sems zhes bya ba ni 'dir mngon par 'dod pa la bya ste/ byang chub sems dpa'i chos thams cad dang / sangs rgyas kyi chos thams cad la mngon par 'dod pa skyes pa bstan pa la sems bskyed pa'i le'u zhes bya'o// //bam po drug pa/ de ltar gang gi phyir brtson par bya ba zhes bya ba la/ 'dir bslab pa'i brtson par bya ba bstan nas/ da ni ji ltar brtson par bya zhes bya ba la shA ri'i bu 'di la byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ byang chub sems dpar gyur bzhin du byang chub sems dpar yang dag par rjes su mi mthong ngo //byang chub sems dpa' mang yang dag par rjes su mi mthong ngo / /byang chub kyang yang dag par rjes su mi mthong ngo / /shes rab kyi pha rol tu phyin pa yang yang dag par rjes su mi mthong ngo / /spyod ces bya bar yang dag par rjes su mi mthong ngo //mi spyod ces bya bar yang dag par rjes su mi mthong ngo / /spyod kyang spyod la mi spyod kyang mi spyod do zhes bya bar yang dag par rjes su mi mthong ngo / /spyod pa yang ma yin mi spyod pa yang ma yin zhes bya bar yang yang dag par rjes su mi mthong ngo / /gzugs yang dag par rjes su mi mthong ngo //de bzhin du tshor ba dang / 'du shes dang / 'du byed dang / rnam par shes pa yang yang dag par rjes su mi mthong ngo zhes bya ba la sogs pa'i gzhung gis 'dir spyad pa'i brtson par bya ba ston to/ /shA ri'i bus bcom ldan 'das ji ltar byang chub sems dpas shes rab kyi pha rol tu phyin pa la spyad par bgyi zhes zhus pa ni chos rnam pa gsum dmigs pa dang bcas pa dang /mtshan ma dang bcas pa'i tshul gyis zhus te/ byang chub sems dpa' dang / shes rab kyi pha rol tu phyin pa dang / de la spyod pa'o/ /de nas bcom ldan 'das kyis dmigs pa de dag bsal ba'i phyir byang chub sems dpa' mi dmigs pa rnam pa gsum dang /shes rab kyi pha rol tu phyin pa mi dmigs pa dang / spyod pa mi dmigs pa rnam pa bzhi bstan pas mi dmigs pa stong pa nyid gsungs so/ /byang chub sems dpa'i mi dmigs pa gsum ni sems dpa' mi dmigs pa dang ming mi dmigs pa dang /byang chub mi dmigs pa'o/ / byang chub sems dpar gyur bzhin du zhes bya ba ni chos nyid kyi byang chub sems dpa' yod pa'i phyir te/ 'dis ni skur pa 'debs pa'i mtha' spangs so/ /byang chub sems dpa' yang dag par rjes su mi mthong zhes bya ba ni sems dpa' mi dmigs pa'i phyir ro//ming yang dag par rjes su mi mthong ngo zhes bya ba ni kun brtags pa'i bdag nyid kyis so/ /byang chub kyang yang dag par rjes su mi mthong ngo zhes bya bar ni gnas gyur pa ma gtogs par byang chub ces bya ba'i ming gi chos med pa'i phyir ro//shes rab kyi pha rol tu phyin pa yang dag par rjes su mi mthong ngo zhes bya ba ni chos kyi dbyings rnam par dag pa ma gtogs par shes rab kyi pha rol tu phyin pa zhes bya ba'i chos med pa'i phyir ro/ /spyod ces bya bar yang dag par rjes su mi mthong ngo zhes bya ba ni chos thams cad la bya ba med pa'i phyir ro//mi spyod ces bya bar yang dag par rjes su mi mthong ngo zhes bya ba ni byed pa med du zin kyang chos kyi dbyings sbyang bar bya bar yod pa'i phyir ro/ /spyod kyang spyod la mi spyod kyang mi spyod ces bya bar yang dag par rjes su mi mthong ngo zhes bya ba ni gnyis ka gcig tu bsdus nas yang dag par rjes su mi mthong ba ste/skyon gnyis po de nyid du 'gyur ba'i phyir ro/ /spyod pa yang ma yin mi spyod pa yang ma yin zhes bya bar yang dag par rjes su mi mthong ngo zhes bya ba ni de ltar gnyis su med par brjod mod kyi 'on kyang gnyis su med pa'i rnam pa de ni rnam pa med pa'i phyir de ltar yang dag par rjes su mi mthong ngo //de ltar sngar gang zag stong pa nyid kyis byang chub sems dpa' med par bstan nas/ da ni chos bdag med pas gzugs yang dag par rjes su mi mthong ba dang /tshor ba la sogs pa la yang yang dag par rjes su mi mthong ngo zhes bya ba la sogs pa bstan to/ /de bas na phung po lnga'i rnam pa yang med do/ /spyod pa'i rnam par rtog pa de ltar dmigs su med par bstan nas de ci'i phyir zhe na zhes bya bas gtan tshigs ston to//byang chub sems dpa'i ming la sogs pa dmigs su med pa dang / de'i stong pa nyid dmigs su yod pa bstan pa'i phyir/ byang chub sems dpa'i ming de ni ming gi ngo bo nyid kyis stong gi/ stong pa nyid kyis ni ma yin no zhes bya ba la sogs pa gsungs te/ 'di ltar byang chub sems dpa' zhes bya ba'i ming ni kun brtags pa ste/ de kun brtags pa'i ngo bo nyid kyis ni med kyi/ des na med pa'i stong pa nyid gang yin pa de ni yod do/ /de bas na stong pa nyid des ni stong pa nyid ma yin no zhes bya ba ste/ 'dis ni sgro 'dogs pa dang skur ba 'debs pa'i mtha' spangs so//de bas na byang chub sems dpa'i ming yang ming gi ngo bo nyid kyis yod pa ma yin no/ /shes rab kyi pha rol tu phyin pa yang kun brtags pa'i chos kyi rnam par ni med kyi/ chos kyi dbyings rnam par dag pa'i rnam par ni yod do/ /phung po rnams kyang phung po'i ngo bo nyid du ni med kyi/phung po med pa'i ngo bo nyid kyis ni yod do zhes bstan to/ /'di la yang the tshom yod do snyam pa la de ci'i phyir zhe na zhes bya bas gtan tshigs bstan to/ /the tshom yang gang zhe na/ gal te chos thams cad de dag chos kyi ngo bo nyid du med la/ stong pa nyid kyi ngo bo nyid du ni yod na/de lta na ni chos rnams yod do zhes bya ba nyid du 'gyur/ gang chos rnams yod do zhes bya ba de nyid kyis chog pas stong pa nyid dam gzhan gyis kyang rung ste zhes bya ba des ci zhig bya snyam pa la/ byang chub sems dpa'i ming stong pa nyid gang yin pa de ni byang chub sems dpa'i ming ma yin no zhes bya ba gsungs te/ji skad du bstan pa yin zhe na/ byang chub sems dpa'i ming yang gzhan la stong pa nyid kyang gzhan yin te/ de bas na stong pa nyid yod pa'i phyir/ byang chub sems dpa'i ming yang yod do zhes brjod par mi nus so/ / de bzhin du byang chub sems dpa' yang gzhan la/ stong pa nyid kyang gzhan yin te/ de bas na stong pa nyid yod pa'i phyir/ byang chub sems dpa' yang yod do zhes brjod du yang mi nus so/ /de bzhin du thams cad la yang sbyar bar bya'o/ /de skad bstan pa dang / gzhan dag the tshom za ste /gal te stong pa nyid kyang gzhan la chos kyang gzhan yin na/ da lta na ni chos las chos nyid gzhan yin par gyur na / chos nyid kyang chos las gzhan yin par gyur te/ de yang mi rigs so snyam pa la/ stong pa nyid las gud na yang byang chub sems dpa'i ming med do zhes bya ba gsungs te/byang chub sems dpa'i ming gi stong pa nyid gang yin pa de las byang chub sems dpa'i ming gzhan ma yin no/ /de bas na chos nyid las chos gzhan ma yin no zhes bya ba'i tha tshig go/ /de la gzhan the tshom za ste gal te stong pa nyid las chos gzhan ma yin la/stong pa nyid de yang yod na/ de ltar ni chos de yang yod par 'gyur ro snyam pa la/ de'i phyir byang chub sems dpa'i ming nyid stong pa nyid do zhes bya ba gsungs te/ kun brtags pa'i ngo bo nyid dang bral ba yongs su grub pa'i byang chub sems dpa'i ming gang yin pa de nyid stong pa nyid de/de las gzhan pa'i stong pa nyid ces bya ba ni med do/ /stong pa nyid byang chub sems dpa'i ming yin zhes bya ba yang mjug sdud de/ 'di ltar yongs su grub pa'i ngo bo nyid la 'dir byang chub sems dpa'i ming zhes bya'i/ kun brtags pa la ni mi bya'o/ / de bas na stong pa nyid kho na byang chub sems dpa'i ming yin no zhes bya ba'i tha tshig go/ /de bzhin du byang chub sems dpa' dang / byang chub ces bya ba der yang de ltar sbyar bar bya ste/ byang chub sems dpa'i stong pa nyid gang yin pa de ni byang chub sems dpa' ma yin no//stong pa nyid las gud na yang byang chub sems dpa' med do/ /byang chub sems dpa' nyid stong pa nyid do/ /stong pa nyid byang chub sems dpa'o zhes sbyar bar bya'o/ /de ltar bshad pa 'di la sngar byang chub sems dpa' ni byang chub sems dpa'i ngo bo nyid kyis stong gi /stong pa nyid kyis ni ma yin no zhes smras pas/ gal te byang chub sems dpa' stong pa nyid kyi ngo bo nyid du yod na/ de lta na ni byang chub sems dpa' yod pa nyid du 'gyur ro zhes smras pa la/ byang chub sems dpa'i stong pa nyid gang yin pa de ni byang chub sems dpa' ma yin no zhes bya ba gsungs te kun brtags pa'i byang chub sems dpa' ni stong pa nyid dang tha dad pa'i phyir de la nyes pa med do zhes bya ba'i tha tshig go//de skad smras pa dang / gzhan na re chos dang chos nyid tha dad na ni chos las chos nyid gzhan du 'gyur ro zhes smras pa de la stong pa nyid las gud na byang chub sems dpa' med do zhes bya ba gsungs te/yongs su grub pa'i byang chub sems dpa' ni stong pa nyid las gzhan ma yin no zhes bya ba'i tha tshig go/ /de nyid byang chub sems dpa' nyid stong pa nyid do zhes bya bas bstan te/ byang chub sems dpa' stong pa nyid do zhes bya ba'i tha tshig go//yang stong pa nyid byang chub sems dpa'o zhes bya bas ni mjug sdud de/ stong pa nyid dang / yongs su grub pa'i byang chub sems dpa' tha dad pa ma yin no zhes bya ba'i tha tshig go/ /de bzhin du thams cad la yang sbyar bar bya'o//de skad smras pa dang / gzhan dag the tshom du gyur pa la/ de ci'i phyir zhe na zhes bya bas gtan tshigs bstan to/ /gal te byang chub sems dpa' dang stong pa nyid la tha dad pa cung zad kyang med na ni byang chub sems dpa' stong pa nyid kyi ngo bo nyid du 'gyur te/ byang chub sems dpa' med do zhes bya bar 'gyur ro snyam pa de'i phyir/'di ltar 'di lta ste byang chub sems dpa' zhes bya ba 'di ni ming tsam mo zhes bya ba la sogs pa gsungs te/ de nyid nga 'dod pa nyid do/ /khyod kyis yod do zhes bya ba gang yin pa de de ltar yod na ni byang chub sems dpa' 'am/byang chub sems dpa'i ming ngam/ byang chub la sogs pa zhig yin grang na/ de dag thams cad ni yod pa ma yin te/ kun brtags pa rnams ni ming tsam du zad do zhes bya ba'i tha tshig go/ /'di lta ste stong pa nyid ces bya ba 'di ni ming tsam mo zhes bya ba ni gang gi tshe stong pa nyid yod do snyam du sems pa de'i tshe/de yang rnam par brtags na ming tsam du zad kyi/ ngo bo nyid du yod pa ma yin no zhes bstan pa'o/ /'dir yang gtan la dbab mi nus nas/ de ci'i phyir zhe na zhes bya ba'i gtan tshigs bstan to/ /gal te chos de dag med na med pa la skye ba dang 'gag pa dag kyang ji ltar snang /ji ltar ngan 'gro 'grib cing bde 'gro 'phel bar 'gyur/ ci'i phyir sngar kun nas nyon mongs la/ phyis rnam par byang bar 'gyur snyam pa la de'i phyir ngo bo nyid med pa la ni skye ba med 'gag pa med/ 'phel ba med/'grib pa med/ kun nas nyon mongs pa med/ rnam par byang ba med ces bya ba gsungs so/ /chos thams cad ni ngo bo nyid med pa yin na/ gang byang chub sems dpa'i ming la sogs pa nas/ gzugs dang / tshor ba dang / 'du shes dang / 'du byed dang / rnam par shes pa la sogs pa'i ngo bo nyid kyi bar la thug pa de dag don dam par yod pa ma yin na/ de dag la skye ba dang / 'gag pa dang / 'phel ba dang / 'grib pa dang / kun nas nyon mongs pa dang / rnam par byang ba zhes bya ba yod par ga la 'gyur/ 'di ltar ngo bo nyid gcig yod par gyur na/kun brtags pa'i ngo bo nyid dam/ yongs su grub pa'i ngo bo nyid du 'gyur grang na/ de la kun brtags pa'i ngo bo nyid ni sgyu ma la sogs pa bzhin du shin tu med pa nyid de/ ji ltar sgyu ma'i gzugs la sogs pa snang ba'i dus na skye ba yang med/mi snang ba'i dus na 'gag pa yang med cing / gcig tu gyur kyang 'grib pa med la/ mang por gyur kyang 'phel ba med de de dag la kun nas nyon mongs pa'am/ rnam par byang bar gyur pa cung zad kyang med pa de bzhin du kun brtags pa'i ngo bo nyid rnams kyang shin tu med pa'i phyir skye ba'am/'gag pa med la/ 'phel ba dang / 'grib pa dang / kun nas nyon mongs pa dang / rnam par byang ba med do/ /byang chub kyang yongs su grub pa'i ngo bo nyid de/ de yang shin tu dben pa yongs su rtog pa thams cad las 'das pa dang /nam mkha' lta bu yin pas skye ba yang med/ 'gag pa yang med do/ / 'phel ba dang / 'grib pa yang med do/ /shin tu rnam par dag pa nyid kyi phyir kun nas nyon mongs pa yang med/ ngo bo nyid kyis rnam par dag pa'i phyir rnam par byang ba yang med de/ ci'i phyir zhe na/gzugs ni sgyu ma lta bu tshor ba ni sgyu ma lta bu'o zhes bya ba la sogs pas ston te / de yang rnam pa gnyis su ston to/ / sgyu ma med pa dang / sgyu ma la 'dzin pa'i rnam par shes pa med par 'gyur ro/ sgyu ma ni ming tsam du zad de yul na gnas pa ma yin/ phyogs na gnas pa yang ma yin zhes bya bas ni sgyu ma kun brtags pa yin pas yod pa ma yin par bstan to//sgyu ma mthong ba ni log par gyur pa ste/ yod pa ma yin zhes bya bas ni rnam par shes pa yod pa ma yin par ston to/ /de la yul na mi gnas zhes bya bas ni sgyu ma gzugs can gyi mtshan nyid min par bstan te/gzugs can gyi chos rnams ni yul na mi gnas pa'i phyir ro/ /phyogs na mi gnas zhes bya bas ni gzugs med pa'i mtshan nyid ma yin par bstan te/ gzugs med pa'i mtshan nyid kyi chos rnam par shes pa la sogs pa ni yul na gnas pa ma yin du zin kyang mig la sogs pa'i phyogs na gnas pa'i nye bar gdags pa'i phyir/phyogs na gnas pa yin no/ /log par gyur pa zhes bya ba ni bden pa ma yin par bstan pa'o/ /yod pa ma yin zhes bya bas ni dngos po med pa'i mtshan nyid ston to/ / ngo bo nyid dang bral ba zhes bya bas ni ngo bo nyid du med pa ston to/ /byang chub sems dpa' ni sgyu ma lta bur so sor rtog pa zhes bya ste/ 'di ltar byang chub sems dpa' sems dpa' chen po shes rab kyi pha rol tu phyin pa la de ltar spyod pa'i tshe/ chos gang la yang skye bar yang dag par rjes su mi mthong ngo zhes bya ba la sogs pas ston to//de la kun brtags pa la ni skye ba dang / 'gag pa gnyis med de/ snang ba dang mi snang ba tsam du zad do/ /gzhan gyi dbang la ni 'phel ba dang / 'grib pa gnyis med de kun brtags pa tsam du zad do/ / yongs su grub pa la ni kun nas nyon mongs pa dang / rnam par byang ba gnyis med de rang bzhin gyis yongs su dag pa nyid du zad do/ /de ltar chos thams cad ngo bo nyid du med par gyur kyang / yang the tshom bsal bar bya ba'i phyir/ de ci'i phyir zhe na/ 'di ltar ming ni bcos ma ste zhes bya ba gsungs te/gzugs dang tshor ba dang / 'du shes zhes bya ba la sogs pa phung po la sogs pa'i ming dang / mtshan ma gang yin pa de dag ni bcos ma yin gyi ngo bo nyid kyis yod pa ni ma yin no/ /de'i phyir chos thams cad ngo bo nyid med par shes par bya ste/ngo bo nyid ni bcos ma ma yin pa'i phyir ro/ /bcos ma nyid ni rten cing 'brel ba'i chos de dag ni brtags pa ste zhes bya ba la sogs pas ston te/ rnam par brtags pa'i rgyu dang / rnam par brtags pa'i rkyen la brten pa'i chos de dag la de lta de ltar brtags pas rten cing 'brel bar 'byung ba zhes bya'o zhes bya ba'i tha tshig go//des ni 'di skad bstan par 'gyur te/ gal te gzhan la brten na ni des chos de dag gzhan gyi mthus 'byung gi rang gi mthus 'byung ba ni ma yin na/ de ji ltar ngo bo nyid du 'gyur/ de bas na rang gi dngos po med pas de gzhan gyi dngos por gyur pa'i phyir/chos thams cad ngo bo nyid med par grub po/ /de bas na ngo bo nyid med pa'i don ni rten cing 'brel par 'byung ba'i don to zhes bya'o/ /de'i 'og tu yang kun brtags pa'i ming gi rgyu las ming gi tha snyad 'byung / ming gi tha snyad kyi dbang gis de ltar mngon par zhen par 'gyur/de ltar mngon par zhen pa'i dbang gis yang ming gi rgyu la rtog pa 'byung / de'i dbang gis yang ming gi tha snyad 'byung / ming gi tha snyad kyi dbang gis kyang yang mngon par zhen pa 'byung ste/ rim pa 'di lta bur 'byung ba bstan pa'i phyir/ glo bur du btags pa'i ming gi rjes su tha snyad 'dogs zhes bya ba la sogs pa gsungs te/ ngo bo nyid ma yin pa glo bur la brten nas btags pa'i phyir gzhan gyi ming gi brdas rjes su tha snyad 'dogs shing mngon par brjod de 'dis ni ming gi tha snyad bstan to//yang ji lta ji ltar rjes su tha snyad 'dogs pa de lta de ltar mngon par zhen to zhes bya bas ni de mngon par zhen pa'i rgyu yin par ston to/ / mngon par brjod pa la 'dris pa'i stobs kyis byung ba'i ma rig pa la sogs pa'i dbang gis 'di nyid chos rnams kyi ngo bo nyid do zhes mngon par zhen pa 'byung ngo zhes bya ba'i tha tshig go//de ltar byis pa rnams kyi tshul bzhin ma yin pa yid la byed pa 'byung ba bstan nas/ byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ ming de dag thams cad ngo bo nyid du yang dag par rjes su mi mthong ngo zhes bya ba la sogs pas byang chub sems dpa' rnams kyi tshul bzhin yid la byed pa'i rim pa bstan te/ming thams cad ces bya ba ni kun brtags pa'i ming dang mtshan ma rnams te/ glo bur yin pa'i phyir ngo bo nyid du yang dag par rjes su mi mthong ngo //yang dag par rjes su ma mthong bas mngon par zhen par mi 'gyur te/ ngo bo nyid med pa'i phyir 'khrul pa tsam kho na'o/ /de'i 'og tu yang gzhan yang byang chub sems dpa' sems dpa' chen po shes rab kyi pha rol tu phyin pa la spyod pa'i tshe 'di ltar yongs su rtogs te zhes bya ba la sogs pas tshul bzhin yid la byed pa de nyid rgyas par ston to//gang zag byang chub sems dpa' dang / chos byang chub dang / gang zag sangs rgyas dang / chos shes rab kyi pha rol tu phyin pa dang / gzugs la sogs pa'i chos kyi ming dang /byang chub sems dpa' yang ming tsam nyid du so sor rtog go/ /de la yang dper bstan pa/ shA ri'i bu 'di lta ste dper na bdag bdag ces bya ba 'di ni tha snyad du brjod ces bya ba la sogs pa ste/ kun rdzob tu dmigs su yod kyang don dam par stong pa nyid kyi phyir dmigs su med de/dmigs su med pa'i mtshan nyid ni dngos po med pa'i ngo bo nyid kyi phyir ro zhes bya ba'i tha tshig go/ /de nas yang de bzhin du byang chub sems dpa' sems dpa' chen pos kyang zhes bya ba la sogs pas dpe dang bstun pa'i mjug sdud de/ byang chub sems dpa' la sogs pa'i chos rnam pa lnga yang dag par rjes su mi mthong ngo //de yang dag par rjes su ma mthong bas rgyu med pa'i phyir ming dang mtshan ma yang dag par rjes su mi mthong ngo / /de yang dag par rjes su ma mthong bas rgyu med pa'i phyir mngon par zhen par mi byed do/ / gang gis mngon par zhen par 'gyur ba de yang des yang dag par rjes su mi mthong ba'i phyir zhes bya bas ni mngon par zhen pa med pas mngon par zhen pa'i rgyu yang mi dmigs par ston to/ / mtshan ma'i brda gang yin pa dang / yang dag pa ma yin pa kun brtags pa'i sems gang gis mngon par zhen par byed pa'i mtshan ma de 'am sems de yang dag par rjes su ma mthong ngo //de ltar dmigs su med pa'i spyod pa bstan nas de'i 'og tu de bzhin gshegs pa'i shes rab ma gtogs par nyan thos dang rang sangs rgyas thams cad kyi shes rab zil gyis gnon te zhes bya bas ni de'i rgyu mthun pa ston to//de'i 'og tu dmigs su med pa'i spyod pa 'di la zhugs pa'i byang chub sems dpa'i che ba'i bdag nyid bstan pas gdul ba'i 'khor de dag spro ba bskyed pa'i phyir/ shA ri'i bu 'di lta ste dper na 'dzam bu'i gling 'di dge slong shA ri'i bu dang maud gal gyi bu lta bu sha stag gis yongs su gang bar gyur ces bya ba la sogs pas dmigs kyis dbye ba ston to//'dam bu'i tshal lam/ 'od ma'i tshal lam/ bu ram shing gi tshal lam/ smyig ma'i tshal lam/ 'bras kyi zhing ngam/ til gyi zhing ltar zhes bya ba ni/ / shing ljon pa dang / 'khri shing la sogs pa bas sman gyi rnam pa dag sdug pa'i phyir sman dag kho na bstan to/ /de dag la yang rnam pa gsum ste/ shin tu sdug cing shin tu mtho ba dang / /'bring du sdug cing 'bring du mtho ba dang / /tha mar sdug cing tha mar mtho ba rnams so//de la 'dam bu dang smyig ma gnyis ni shin tu sdug cing shin tu mtho'o/ /bu ram shing dang smyig ma dag ni de bas dma' ste 'bring yin pa'i phyir bar du smos so/ /'bras dang til dag ni de bas srab cing dma' bas tha ma par brjod do/ /de la yang smyig ma dang 'dam bu gnyis la yang /'dam bu khong stong du 'dug la tsher ma mang zhing de dag nyid rab tu sdug pa'i phyir sngar bstan te/ smyig ma ni phyis bstan to/ /bu ram shing dang smyig ma gnyis las kyang bu ram shing lo ma bzang zhing sdug ste/ smyig mas de tsam mi phod pas bu ram shing sngar bstan to//'bras dang til gnyis las kyang til bas 'bras che zhing sdug pas ni sngar smos so/ /brgya'i char yang nye bar mi 'gro'o/ /stong gi cha dang / brgya stong gi cha dang 'bum gyi cha dang / grangs dang / cha dang / bgrang ba dang / dpe dang rgyur yang nye bar mi 'gro'o zhes bya ba ni rnam pa de lta bu dag la yang gtan la phab na rnam pa bzhir 'gyur te/char yongs su bcad pa'am/ bgrang ba'am/ dpe'am/ rgyu dang 'bras bu'i dngos po rnams so/ /de la char yongs su bcad pa'i yul du yang mi 'gyur bar bstan pa ni brgya'i char yang zhes bya ba nas 'bum gyi char yang zhes bya ba'i bar du'o//grangs su bgrang du mi rung bar bstan pa ni grangs dang cha dang bgrang ba dang zhes bya'o/ /dper byar yang mi rung bar bstan pa ni dper yang zhes bya'o / /rgyu dang 'bras bu'i dngos por yang mi rung bar bstan pa ni rgyur yang zhes bya'o //de la brgya'i char yang zhes bya ba la cha dang cha shas dang yan lag ces bya ba ni don gcig go/ /dge slong de dag gi shes rab de ni byang chub sems dpa'i shes rab kyis brgyar byas pa'i cha'am/ stong du byas pa'am/ brgya stong du byas pa'i char yang mi phod do zhes bya ba'i tha tshig go//grangs su bgrang bar yang rnam pa gsum du 'gyur te/ gang la tshig gi spyod yul du gyur pa de la ni gcig dang gnyis dang gsum zhes pa nas/ brgya dang stong zhes bya ba'i bar du tshig gis bgrang ba las grangs zhes bya ste/ de yang grangs su yang zhes bya bas bstan to//gang la tshig gi yul du gyur pa de la ni brtsi ba dang / byung ba gdab pa dang / bsdom pa dang / cha la dbri ba la sogs pa'am/ shod dgod pa'am/ 'gron bu la sogs pa dgod pa'am/ lag rtsis kyis brtsi ba dag la ni cha zhes bya ba ste/ de yang char yang zhes bya bas bstan to/ /gang la de lta bur brtsi mi nus pa de la ni mngon par shes pa'i stobs 'ba' zhig gis bye ba khrag khrig phrag brgya'i cha dang zhes bya ba nas/ grangs med pa zhes bya ba'i bar du bgrang ba la ni bgrang ba zhes bya ste/ de yang bgrang bar yang zhes pas bstan to//de bzhin du kha cig tu bdag nyid thams cad kyis mtshungs pa ma yin du zin kyang cha shas 'ga' zhig 'ol byir 'dra ba yang yod do/ / de las nges par byar rung ba ni dper na smyig glang ni ba lang 'dra'o zhes bya ba lta bu ste/ de lta bu yang med pas dper yang zhes bya ba gsungs so//de bzhin du kha cig dngos po shin tu tha dad du zin kyang / du ba mthong nas rgyu'i dngos po las me'i blo 'byung ste/ rjes su dpag pa de lta bu yang med pas rgyur yang mi phod ces bya ba gsungs so/ /gling bzhi pa ni gling bzhi pa ste/ de dag stong la stong gcig ces bya'o//stong gcig pa stong la stong gnyis zhes bya'o/ /stong gnyis pa stong la stong gsum gyi stong chen po'i 'jig rten gyi khams te/ khor yug gi ri bye ba phrag brgya la stong gsum gyi stong chen po zhes bya'o/ /gang gA'i klung gi bye ma snyed ces bya ba ni grangs kyi bye brag yin no zhes 'chad do//de ltar byang chub sems dpa'i shes rab kyi che ba'i bdag nyid bstan pa dang / 'khor de dag gi nang na kha cig gi bsam pa shes nas the tshom bsal ba'i phyir gnas brtan shA ri'i bus zhu ba zhus pa / bcom ldan 'das gang 'di nyan thos rgyun du zhugs pa'i shes rab ces bya ba la sogs pa'o//shes rab de dag thams cad ni tha mi dad pa/ dben pa/ ma skyes pa/ ngo bo nyid kyis stong pa lags te zhes bya ba ni thams cad kyi shes rab kyang gnas gyur pa'i bdag nyid kyis rnam par mi rtog cing 'jig rten las 'das pa nyid yin no snyam nas sems can rnams the tshom skye bas so//tha mi dad ces bya ba ni gcig pa'i bdag nyid yin pa'i phyir / dben pa zhes bya ba ni rnam par dag pa'i bdag nyid yin pa'i phyir ro/ /ma skyes pa zhes bya ba ni 'dus ma byas pa'i bdag nyid yin pa'i phyir ro/ /ngo bo nyid kyis stong pa zhes bya ba ni yang dag pa ma yin pa kun brtags pa'i ngo bo nyid dang bral ba'i bdag nyid yin pa'i phyir ro//tha dad du dbye ba zhes bya ba ni rgyu dang rkyen gyi dbang gis glo bur ba dag ni tha dad do/ /khyad par zhes bya ba ni ngo bo nyid tha dad pa'o/ /bcom ldan 'das de la ji ltar zhes bya ba ni shes rab rang bzhin gcig pa rnams gcig la gcig zil gyis gnon pa mi rigs so zhes zhus pa'o//shA ri'i bu de ji snyam du sems zhes bya ba la sogs pas ni bcom ldan 'das kyis ngo bo nyid de la bye brag med du zin kyang sngon gyi smon lam gyi mthus rgyu tha dad pa dang /'bras bu tha dad pa yod do zhes bstan to/ /rgyu yang rnam pa gsum ste/ bsam pa dang / spyod pa dang / bya ba'o/ /'bras bu ni rnam pa gnyis te/ mngon par rdzogs par byang chub pa dang / chos kyi 'khor lo bskor ba'o/ /de la rnam pa thams cad kyi mchog dang ldan pa zhes bya bas ni bsam pa'i che ba'i bdag nyid bstan to//rnam pa thams cad mkhyen pa nyid la spyod pas zhes bya bas ni spyod pa'i che ba'i bdag nyid bstan to/ /sems can thams cad kyi don byed pa zhes bya bas ni bya ba'i che ba'i bdag nyid bstan to/ /chos thams cad rnam pa thams cad du mngon par rdzogs par byang chub par byas te zhes bya bas ni 'bras bu'i bye brag mngon par rdzogs par byang chub pa bstan to//sems can thams cad yongs su mya ngan las bzla'o zhes bya bas ni chos kyi 'khor lo bskor ba bstan to/ /de'i 'og tu 'gres gsum bstan te/nyan thos dang [(]ngar [,]rang[)] sangs rgyas rnams la byang chub sems dpa'i sngon gyi smon lam med pa'i 'gres dang / rgyu dang 'bras bu'i smon lam med pa'i 'gres dang / byang chub sems dpa' la de gnyi ga yod pa'i 'gres so/ /de la sngon gyi smon lam med pa'i 'gres ni/shA ri'i bu de ji snyam du sems/ ji ga nyan thos dang rang sangs rgyas thams cad 'di snyam du bdag cag gis bla na med pa yang dag par rdzogs pa'i byang chub mngon par rdzogs par sangs rgyas par byas te zhes bya ba la sogs pa nas/ nyan thos dang rang sangs rgyas rnams kyi shes rab zil gyis gnon to zhes bya ba'i bar gyi gzhung gis bstan to//byang chub sems dpa' rnams kyi sngon gyi smon lam ni shes rab dang snying rje'i bdag nyid yin pa'i phyir shes rab kyis ni mngon par rdzogs par byang chub pa bzung / snying rjes ni sems can rnams bzung nas bdag sangs rgyas te gzhan yang byang chub par bya'o zhes rnam pa gnyis kyi bdag nyid kyis 'jug ste/de bas na sngon gyi smon lam gyi 'gres 'di la mngon par rdzogs par byang chub pa dang / sems can yongs su mya ngan las bzla ba bstan to/ /de'i 'og tu rgyu dang 'bras bu'i smon lam med pa'i 'gres bstan pa/shA ri'i bu de ji snyam du sems/ ji ga nyan thos dang rang sangs rgyas thams cad 'di snyam du/ bdag cag gis pha rol tu phyin pa drug la spyod de zhes bya ba la sogs pa nas/ sems can rnams yongs su mya ngan las 'da'o snyam du sems snyam mam zhes bya ba'i bar gyi gzhung gis bstan te/'gres 'di la bdag nyid yongs su smin par bya ba dang / sems can yongs su smin par bya ba dang / sangs rgyas kyi zhing yongs su dag par bya ba dang / sangs rgyas kyi chos yongs su smin par bya ba ste rgyu bzhi dang /mngon par rdzogs par byang chub pa dang / sems can yongs su mya ngan las bzla ba zhes bya ba 'bras bu gnyis dang / chos drug bstan to/ /spyod pa'i dus kyi smon lam 'di ni 'og nas 'byung ngo / /byang chub sems dpa' la de gnyis ka yod par bstan pa'i 'gres ni shA ri'i bu byang chub sems dpa' ni 'di snyam du sems te zhes bya ba nas/sems can rnams yongs su mya ngan las bzla'o snyam du sems so zhes bya ba'i bar gyi gzhung gis bstan to/ /de'i 'og tu nyan thos dang rang sangs rgyas dag gi dpe srin bu me khyer gyis bstan pa dang /de'i 'og tu byang chub sems dpa'i dpe nyi ma 'char bas bstan pa ste/ dpe'i 'gres gnyis kyi don ni gsal bar bstan pas yang don bstan mi dgos so/ /yang de'i 'og tu gnas brtan gyis 'khor gyi the tshom bsal ba'i phyir/ bcom ldan 'das ji ltar byang chub sems dpa' sems dpa' chen po zhes bya ba la sogs pas/nyan thos dang rang sangs rgyas kyi sa las 'das pa'i gnas dang / phyir mi ldog pa'i sa thob pa'i gnas dang / byang chub kyi lam yongs su sbyong ba'i gnas gsum zhus pa dang / de'i 'og tu bcom ldan 'das kyis bskal pa grangs med pa dang po 'das nas sa dang po rab tu dga' ba zhes bya ba'i sems bskyed pa nas bzung ste/chos thams cad kyi mtshan nyid stong pa nyid dang / mtshan ma med pa dang / smon pa med pa rtog pa'i rgyus nyan thos dang rang sangs rgyas kyi sa las 'das par 'gyur zhing /de dag las 'das nas sa brgyad pa la phyir mi ldog par 'gyur te/ rnam par smin pa'i pha rol tu phyin pa rnams kyis byang chub kyi lam yongs su sbyong bar bstan to/ /yang ci nyan thos dang rang sangs rgyas kyi sa las 'das ma thag tu/ de dag gis mchod pa'i gnas su 'gyur ram/'on te dus gzhan zhig na 'gyur snyam du gnas brtan yid gnyis su gyur nas/ bcom ldan 'das gang la gnas na zhes bya ba la sogs pa zhus so/ /de nas bcom ldan 'das kyis thog ma sems dang po bskyed phyin chad ces bya ba la sogs pas sa rab tu dga' ba thob ma thag tu mchod pa'i gnas su 'gyur ro zhes bstan to//shA ri'i bu 'di ltar byang chub sems dpa' sems dpa' chen po la brten nas dge ba'i chos thams cad 'jig rten du 'byung bar 'gyur te zhes bya ba la sogs pas ni de'i gtan tshigs bstan to/ / de'i 'og tu chos de dag bstan pa la 'gres gsum ste zag pa dang bcas pa dang / zag pa med pa'i dge ba'i chos bstan pa'i 'gres dang / zag pa dang bcas pa'i dge ba'i rnam par smin pa bstan pa'i 'gres dang / zag pa med pa'i dge ba'i rnam par smin pa bstan pa'i 'gres so//de la zag pa dang bcas pa dang / zag pa med pa'i dge ba'i chos bstan pa'i 'gres la ni/ khyim pa dang / dge bsnyen dang / dge bsnyen ma'i chos bstan pa dang / nyan thos kyi chos bstan pa dang / sangs rgyas kyi chos bstan pa ste/ 'gres gsum bstan to//dge ba bcu'i las kyi lam rnams dang / yan lag lnga dang ldan pa'i tshul khrims dang / yan lag brgyad dang ldan pa'i tshul khrims dang zhes bya ba chos de gsum ni tshul khrims dang dge bsnyen dang dge bsnyen ma'i chos so/ /bsam gtan la sogs pa'i lam gyi mtha' la thug gi bar dag ni nyan thos kyi chos so//pha rol tu phyin pa la sogs pa dang sangs rgyas kyi chos ma 'dres pa'i mtha' la thug gi bar du sangs rgyas byed pa'i chos rnams ni sangs rgyas kyi chos so/ /de'i 'og tu dge ba'i chos de dag 'jig rten du byung bas rgyal rigs shing sA la chen po lta bu dag yod pa yin zhes bya ba la sogs pas 'dod pa dang gzugs dang gzugs med pa'i khams su gtogs pa'i sems can rnams bstan pas ni/zag pa dang bcas pa'i dge ba'i rnam par smin pa bstan to/ /rgyun tu zhugs pa rnams 'jig rten du 'byung ba yin zhes bya ba la sogs pas ni nyan thos dang rang sangs rgyas thams cad dang /yang dag par rdzogs pa'i sangs rgyas rnams bstan pas ni zag pa med pa'i dge ba'i rnam par smin pa bstan to/ /sbyin pa yongs su sbyong zhes bya ba ni gang de la sbyin pa byed pa de dag 'bras bu chen por 'gyur ba dang /rnam par dag par 'gyur ba la sbyin pa yongs su sbyong ba zhes bya'o/ /sbyin pa shin tu rnam par dag pa nyid kyi phyir zhes bya ba ni 'di ni byang chub sems dpa'i sbyin pa ni de lta bu'i chos nyid de/ sbyin pa po yin pa'i phyir ro zhes ston to/ /de ltar ji ltar brtson par bya ba bstan nas/de ni brtson par byed pa rnams kyi mtshan nyid gang yin pa zhes bya ba de bstan pa'i phyir/ bcom ldan 'das byang chub sems dpa' sems dpa' chen pos ji ltar shes rab kyi pha rol tu phyin pa la brtson par bgyis na brtson pa zhes bgyi ba lags zhes zhus pa dang /de nas phung po dang khams dang skye mched dang / 'phags pa'i bden pa dang / rten cing 'brel bar 'byung ba dang / chos thams cad 'dus byas dang / 'dus ma byas kyi dbang gis chos thams cad so sor phung po bdun du bsdus te/ rnam pa bdun gyis stong pa nyid la spyod pa na/de tsam gyis brtson par bya ba yongs su rdzogs pa ma yin pa'i phyir re zhig brtson pa zhes kyang mi bya'o/ /brtson par bya ba brtsams pa'i phyir brtson pa ma yin no zhes kyang brjod par mi bya'o zhes bstan pa'i phyir brtson zhe 'am mi brtson zhes mi brjod do zhes gsungs so/'o na ji ltar na brtson pa yin snyam du the tshom za ba la de ci'i phyir zhe na zhes bya ba gsungs so/ /de skad ces gsungs nas gzugs la sogs pa so so'i bye brag gi ngo bo nyid dmigs su med pa dang / 'dus pa'i ngo bo nyid dmigs su med pa dang / rang gi mtshan nyid dmigs su med pa dang /chos thams cad dmigs su med pa dang / rnam pa bzhis stong pa nyid la spyod na brtson pa zhes bya bar ston te/ 'di ltar des gzugs skye ba'i chos can nam 'gag pa'i chos can du yang dag par rjes su mi mthong ngo zhes bya ba nas/ rang byang chub dang / sangs rgyas dang / byang chub yang dag par rjes su mi mthong ngo zhes bya ba'i mtha' la thug gi bar gyis rgyas par bstan to/ /'di ltar des gzugs skye ba'i chos can nam 'gag pa'i chos can zhes bya ba ni skye ba'i ngo bo nyid dam 'gag pa'i ngo bo nyid ces bya ba'i tha tshig go/ / gal te gzugs skye ba'i ngo bo nyid yin na ni 'gag pa'i ngo bo nyid du mi 'gyur ro/ /gal te 'gag pa'i ngo bo nyid yin na skye ba'i ngo bo nyid du mi 'gyur te/ dngos po gcig la rang bzhin gnyis yod pa shin tu 'gal ba'i phyir ro/ /gal te gzugs la skye ba zhes bya ba'i chos shig yod na yang /bdag las skye ba'am/ gzhan las skye'am/ gnyis ka las skye'am/ rgyu med pa las skye bar 'gyur ram zhes rnam par rtog pa bzhir 'gyur ro/ /de la bdag las skye ba ni mi rigs te/ de'i tshe chos ma skyes pa'i phyir ro/ /med pa'i bdag nyid ni skye ba'i rgyur mi rung ba'i phyir ro//gal te skye ba'i sngon rol na chos de yod par 'gyur du ni de yang mi rigs te yod pa ni yang skye bar mi rigs pa'i phyir ro/ /yod pa las skye bar rtag na ni dus thams cad du skye bar 'gyur te/ nam yang mi skye bar mi 'gyur ro/ /de bas bdag la skye ba mi rigs so//gzhan las skye ba yang mi rigs te/ gal te gzhan las gzhan dag skye bar 'gyur na ni thams cad las thams cad skye bar 'gyur ro/ /gnyis ka las skye zhes bya bar yang skyon de gnyis las mi thar ro/ /rgyu med pa las skye bar yang mi rigs te/ thams cad du thams cad las skye bar 'gyur ba'i phyir ro/ /de ltar rnam par dpyad na don dam par skye ba med de/ ji skad du bdag las ma yin gzhan las min/ /gnyis las ma yin rgyu med min/ /dngos po gang dag gang na yang / /skye ba nam yang yod ma yin/ /zhes bya ba bshad pa lta bu'o//'gag pa'i chos can du 'ang mi rigs te/ skye ba med pa'i phyir ro/ /'di ltar skyes pa ni 'gag par 'gyur gyi ma skyes pa ni 'gag par mi 'gyur ro/ /gzhan yang gal te 'gag pa zhes bya ba'i chos shig yod par gyur na ni yod pa 'am med pa'i chos shig yin grang na/de la yod na ni 'gag par mi 'thad de/ /yod pa dang med pa gnyis dngos po gcig la mi srid pa'i phyir ro/ /med pa yang 'gag par mi 'thad de med pa nyid kyi phyir ro/ /'di ltar ri bong gi rwa la 'gag pa yod do zhes byar mi [(]dung [,]rung [)]ste/ dngos po kun gyi skye ba dag / mi 'thad pa ni gang yin pa/ /de nyid dngos po thams cad kyi/ /'gag pa 'thad pa ma yin pa'o/ /yod pa dang ni med pa gnyis/ /gcig la 'thad pa ma yin no/ /yod pa min pa'i dngos po la/ /'gag pa 'thad pa ma yin te/ /ji ltar mgo la lan gnyis su/ /bcad du med pa de bzhin no//zhes kyang bshad do/ /de bas na skye ba zhes bya ba dang / 'gag pa zhes bya ba de ni kun brtags pa yin te/ tha snyad tsam du zad kyi don dam par ni med do/ /de bas na gzugs skye ba'i chos can nam/ 'gag pa'i chos can du yang dag par rjes su mi mthong ngo zhes gsungs so//de bzhin du gzugs la sogs pa kun nas nyon mongs pa'am/ rnam par byang bar mi 'thad de/ gal te dngos po rnams kun nas nyon mongs pa'i ngo bo nyid yin na/ ngo bo nyid ni btang bar mi nus pa'i phyir nam yang rnam par byang bar ma 'gyur ro//gal te rnam par byang zhing yongs su dag pa'i ngo bo nyid yin na ni ngo bo nyid btang du mi rung ba'i phyir nam yang chos rnams kun nas nyon mongs par mi 'gyur ro/ /gzhan yang gal te chos rnams kun nas nyon mongs pa zhig yin na kun nas nyon mongs par gyur pa 'am/ /rnam par dag pa las 'gyur grang na/gal te kun nas nyon mongs par gyur pa rnams kun nas nyon mongs par 'gyur na ni kun nas nyon mongs pa don med par 'gyur te/ kun nas nyon mongs par gyur zin pa rnams la yang kun nas nyon mongs pa bskyed mi dgos pa'i phyir ro/ /yang gcig tu na kun nas nyon mongs pa yang dang yang skye ba nam yang rnam par byang bar mi 'gyur ro//rnam par dag pa rnams kyang kun nas nyon mongs par mi 'thad de 'gal ba'i phyir ro/ /dngos po gcig la kun nas nyon mongs pa dang / rnam par dag pa gnyis cig car 'byung ba mi 'thad de/ ngo bo nyid gnyis med pa'i phyir ro/ /de bzhin du rnam par byang ba yang kun nas nyon mongs par gyur pa'am/ rnam par dag pa las 'gyur grang na/ kun nas nyon mongs par gyur pa la ni rnam par byang ba med de/ chos de gnyis 'gal ba'i phyir ro/ /rnam par dag pa yang rnam par byang bar mi rigs te/rnam par dag pas don med pa'i phyir ro/ /de bas na kun nas nyon mongs pa dang / rnam par byang ba don dam par yod pa ma yin gyi/ ngo bo nyid kyis rnam par dag pa'i de bzhin nyid la so so'i skye bo'i gnas skabs na glo bur gyi kun nas nyon mongs pa la/kun nas nyon mongs pa zhes gdags shing rnam par dag pa'i gnas skabs na glo bur gyi kun nas nyon mongs pa med pa la rnam par byang ba zhes gdags par zad de/ gzugs la sogs pa'i chos nyid du ni mi rigs so/ /de'i phyir gzugs kun nas nyon mongs pa'i chos can nam/rnam par byang ba'i chos can du yang dag par rjes su mi mthong ngo zhes gsungs so/ /de ltar gzugs la sogs pa la ngo bo nyid med pa'i tshul bstan nas/ da ni gzugs ni tshor ba dang lhan cig yang dag par 'du zhes bya bar yang dag par rjes su mi mthong ngo zhes bya ba la sogs pas 'dus pa la phung po'i mtshan nyid med par ston te phung po zhes bya ba ni spungs pa zhes bya ba'i don yin la/spungs pa yang dag par 'du ba yod na srid par 'gyur na/ ji ltar chos rnams la yang dag par 'du ba med de/ de bas na phung po'i mtshan nyid kyang med do zhes bstan pa'o//chos rnams lhan cig yang dag par 'du na yang / 'khrul pa yod pa'am mtshan nyid gcig pa zhig tu 'gyur grang na/ gzugs ni tshor ba la sogs pa dang lhan cig 'khrul pa med pa ma yin zhing mtshan nyid tha dad do/ /de bzhin du tshor ba la sogs pa yang gzugs dang lhan cig yang dag par 'du ba mi rigs so//de bzhin du tshor ba dang / 'du shes dang / 'du byed dang / rnam par shes pa rnams kyang mtshan nyid so so tha dad de/ mtshan nyid so so zhing shin tu tha dad pa de dag ji ltar phung po'i ngo bo nyid gcig tu yang dag par 'du bar 'gyur/gzhan yang gzugs dang tshor ba la sogs pa las gzugs dang tshor ba la sogs pa'i bdag nyid gang yin pa de dag ni kun brtags pa ste/ sgyu ma lta bu yin par rang bzhin gyis stong ngo / /de la ji ltar sgyu ma'i dngos po rta dang glang po che la sogs pa don dam par gcig tu 'du ba med pa de bzhin du kun brtags pa'i gzugs la sogs pa yang gcig tu 'du ba med do//gzugs la sogs pa'i de bzhin nyid kyi bdag nyid gang yin pa de yang rang bzhin gyis stong pa nyid kho na'o/ /de la rang bzhin gyis stong pa nyid kyi phyir zhes bya bas ni ji ltar nam mkha' nam mkha' dang lhan cig 'du ba med pa ltar chos nyid kyi gzugs la sogs pa yang de bzhin no zhes ston to//'di ni sgo tsam zhig bstan par zad de/ 'di ltar gzugs ni tshor ba la sogs pa dang lhan cig 'du ba med/ tshor ba la sogs pa yang gzugs dang lhan cig 'du ba med/tshor ba ni 'du shes pa la sogs pa dang lhan cig 'du ba med 'du shes la sogs pa yang tshor ba dang lhan cig 'du ba med/ 'du shes ni 'du byed la sogs pa dang lhan cig 'du ba med/ 'du byed la sogs pa yang 'du shes dang lhan cig 'du ba med/'du byed ni rnam par shes pa dang lhan cig 'du ba med/ rnam par shes pa yang 'du byed dang lhan cig 'du ba med do zhes bya bar sbyar bar bya'o// //bam po bdun pa/ da ni gzugs la sogs pa de dag gi rang gi mtshan nyid bsal ba'i phyir/gzugs kyi stong pa nyid gang yin pa de ni gzugs ma yin zhes bya ba la sogs pa bstan to/ /de ltar stong pa nyid la brtson par byas na gzugs la sogs pa kun brtags pa rnams gzugs la sogs pa'i mtshan nyid du mi snang gi/ de dag stong pa nyid kyi mtshan nyid du snang ste/de'i tshe gzugs kyi stong pa nyid gang yin pa de dag gzugs ma yin no zhes bstan to/ /de ci'i phyir snyam pa la/ shA ri'i bu 'di ltar gzugs kyi stong pa nyid gang yin pa dang gzugs su yod pa ma yin no zhes gsungs te/ gzugs su yod pa'i mtshan nyid la ni gzugs zhes bya na/'di ltar stong pa nyid la ni gzugs su med de/ de'i phyir gzugs ma yin no/ 'di ltar tshor bar byed pa med de/ de'i phyir tshor ba ma yin no/ /'di ltar 'dus nas shes pa med de/ de'i phyir 'du shes ma yin no/ /'di ltar mngon par 'du byed pa med de/de'i phyir 'du byed rnams ma yin no/ /'di ltar stong pa nyid de la rnam par shes par byed pa med de/ de'i phyir rnam par shes pa ma yin no/ /'di ltar gzugs la sogs pa de dag gi rang gi mtshan nyid bsal te/ de skad ces bka' stsal pa dang / gal te gzugs la sogs pa gzugs su rung ba la sogs pa'i mtshan nyid du med na/'o na ni gzugs la sogs pa'i sgra yul med par 'gyur ro snyam du the tshom zos nas/ de ci'i slad du zhes zhus pa dang / gzugs la sogs pa'i sgra ni chos nyid kyi gzugs la sogs pa la bya ste/ de bas na stong pa nyid dang gzugs la sogs pa la tha dad pa med par gzugs kyang rang bzhin ma yin la/ stong pa nyid kyang gzhan ma yin no/ /stong pa nyid kyang gzhan ma yin la gzugs kyang gzhan ma yin no zhes bya bas bstan to/ /de bas na thams cad du yang gzugs la sogs pa'i sgra ni stong pa nyid la bya ste/stong pa nyid kyi sgra yang chos nyid kyi gzugs la sogs pa la bya bar gzugs nyid kyang stong pa nyid la stong pa nyid kyang gzugs so zhes bya bas bstan to/ /sngar smos pa'i stong pa nyid kyis rnam pa thams cad bstan to/ /shA ri'i bu stong pa nyid ni mi skye mi 'gag ces bya ba la sogs pa ni skye ba dang 'gag pa nyid kyi phyir/'grib pa med cing 'phel ba med pa ste/ 'das pa'ang ma yin/ ma 'ongs pa yang ma yin/ da ltar byung ba yang ma yin no/ /gzugs la sogs pa'i mtshan nyid med pa'i phyir chos thams cad kyang de la dmigs su med de/de bas na chos thams cad dmigs su med pa de la ni gzugs med do/ /tshor ba med do/ /'du shes med do zhes bya ba nas/ sangs rgyas med do/ /byang chub med do zhes bya ba'i bar gyis ston to/ /de ltar rnam pa bcu gcig gis brtson pa'i mtshan nyid bstan nas/de'i 'og tu bdag la brtson zhes bya ba dang / mi brtson zhes bya ba'i rnam par rtog pa yongs su spang ba dang / rnam par thar pa'i sgo rnams la brtson pa dang / mi brtson pa'i rnam par rtog pa yongs su spang ba dang / chos rnams kyi rang gi mtshan nyid la brtson pa dang /mi brtson pa'i rnam par rtog pa yongs su spang ba dang / chos rnams mtha' dang sbyor ba yongs su spang ba dang / mtha' rnams gcig la gcig sbyor ba yongs su spang ba dang / chos rnams dus gsum dang sbyor ba yongs su spang ba dang / chos rnams rnam pa thams cad mkhyen pa nyid dang /sbyor ba yongs su spang ba dang / chos thams cad 'byung ba dang / 'jig pa dang sbyor ba yongs su spang ba dang / chos thams cad rtag pa la sogs pa dang sbyor ba yongs su spang ba dang / de dag nyid rnam par thar pa'i sgo rnams dang sbyor ba yongs su spang ba dang /chos rnams 'dres par sbyor ba yongs su spang ba dang / mngon par shes pa dang sbyor ba yongs su spang ba dang / mngon par shes pa'i bya ba dang sbyor ba yongs su spang ba dang / 'du ba dang bral ba'i rnam par rtog pa yongs su spang ba dang /mngon par rdzogs par byang chub pa'i rnam par rtog pa yongs su spang ba dang / stong pa nyid la sbyor ba'i rnam par rtog pa yongs su spang ba ste/ de ltar rnam pa bcu drug gis stong pa nyid la spyod na shes rab kyi pha rol tu phyin pa la brtson par bstan to/ /de la gzugs la brtson zhes bya ba 'am/mi brtson zhes bya bar yang dag par rjes su mi mthong zhes bya ba ni bdag la byed pa po la sogs par rnam par rtog pa med pa dang / ngar 'dzin pa mi 'jug pa'i phyir ro/ /stong pa nyid dang stong pa nyid du mi sbyor zhes bya ba ni stong pa nyid kyi ting nge 'dzin bsgom pa na/ gal te stong pa nyid ces bya ba'i chos gzhan zhig yod do snyam du bsgoms na ni/ de'i tshe stong pa nyid kyi ngo bo nyid dang / stong pa nyid sbyor bar 'gyur na/ 'di ltar chos thams cad dmigs su med pa nyid de stong pa nyid kyi rnam par yang rnam pa med par bsgom pa ste/ de'i phyir stong pa nyid dang stong pa nyid du mi sbyor zhes bya'o//stong pa nyid kyi rnal 'byor dang yang ma yin no zhes bya ba la stong pa nyid kyi rnal 'byor ni stong pa nyid kyi ting nge 'dzin te/ stong pa nyid kyi rnal 'byor de yang stong pa nyid kyi rnal 'byor gyi ngo bo nyid gzhan dang mi sbyor ro zhes bya ba'i tha tshig go/ /de bzhin du mtshan ma med pa'i chos gzhan du rnam par rtog pa med pa dang /smon pa med pa'i chos gzhan du rnam par rtog pa med pa'i phyir zhes bya ba dang yang sbyar bar bya'o/ /de'i phyir stong pa nyid ni rnal 'byor yang ma yin/ rnal 'byor ma yin pa yang ma yin zhes gsungs te/ 'di ltar stong pa nyid ni gzugs la sogs pa kun brtags pa gzhan thams cad kyi rnal 'byor gyi rnam pa dang bral ba ste/de'i phyir rnal 'byor ma yin no/ /'di ltar bdag nyid kyis brjod du med cing mtshan ma med pa'i ting nge 'dzin gyi ngo bo nyid yin te/ de'i phyir rnal 'byor ma yin pa yang ma yin no/ / gzugs mi sbyor mi 'byed ces bya ba ni chos kyi gzugs la sogs pa la rang gi mtshan nyid stong pa nyid kyi gzugs su yod pa la sogs pa'i mtshan nyid rnam par ma mthong bas mi sbyor ro/ /chos nyid kyi bdag nyid du bsgom par bya ba yin pas mi 'byed do/ /de'i phyir chos rnams kyi rang gi mtshan nyid stong pa nyid la 'jug ste zhes bya ba la sogs pa gsungs so//gzugs dang sngon gyi mthar mi sbyor zhes bya ba bka' stsal nas/ 'di ltar sngon gyi mtha' nyid kyang yang dag par rjes su mi mthong ngo zhes gtan tshigs kyang nyid kyis gsungs so/ /sngon gyi mtha' la sogs pa dus gsum nyid yang dag par rjes su mi mthong ste/yang dag par rjes su ma mthong na ji ltar sbyar bar bya/ sngon gyi mtha' dang phyi ma'i mthar mi sbyor zhes bya ba ni sngon gyi mtha'i las de'i rnam par smin pa phyi ma'i mtha' 'di 'dra ba myong ngo zhes las dang 'bras bu dmigs pa'i tshul gyis spyod na sngon gyi mtha' dang phyi ma'i mthar sbyor ba dang /phyi ma'i mtha' dang yang sngon gyi mthar sbyor ro zhes bya'o/ /sngon gyi mtha'i las de'i rnam par smin pa ni da ltar byung ba na 'di yin no zhes rnam par rtog pa la spyod na sngon gyi mtha' dang da ltar byung bar sbyor ba dang / da ltar byung ba yang sngon gyi mthar sbyor ro zhes bya'o//da ltar byung ba na las byas pas phyi ma'i mthar rnam par smin par 'gyur ro zhes spyod na/ da ltar byung ba dang phyi ma'i mthar sbyor ba dang / phyi ma'i mtha' dang da ltar byung bar sbyor ro zhes bya'o/ /dus gsum mnyam pa nyid du mthong ba la ni dus tha dad pa med de/bdag nyid thams cad du dus mi dmigs pa'i phyir ro/ /de bas na dus gsum mnyam pa nyid kyi phyir zhes bya ba gsungs so/ /gzugs dang 'das par mi sbyor zhes bya ba bka' stsal nas 'di ltar 'das pa nyid kyang yang dag par rjes su mi mthong ngo zhes bya ba nyid kyis gtan tshigs gsungs te/'das pa na gzugs 'di lta bu zhig tu gyur to/ /ma 'ongs pa na gzugs 'di lta bu zhig tu 'gyur ro/ /da ltar byung ba na gzugs yod do zhes sbyor ba ni gzugs dus gsum du sbyor ba zhes bya'o/ /gzugs dang rnam pa thams cad mkhyen pa nyid dang mi sbyor zhes bya ba ni gzugs 'di rnam pa thams cad mkhyen pa nyid kyi yul yin no zhes dmigs pa'i dngos por ram gzugs 'di ni sbyin pa la sogs pa bsod nams bya ba'i dngos por yongs su bsngos nas rnam pa thams cad mkhyen pa nyid 'bras bur 'gyur ro zhes rgyu'i dngos por rtogs na rnam pa thams cad mkhyen pa nyid dang sbyor ba zhes bya'o//sangs rgyas dang rnam pa thams cad mkhyen pa nyid du mi sbyor zhes bya ba ni rnam pa thams cad mkhyen pa nyid sangs rgyas kyi rgyu yin no zhes bya ba dang / rnam pa thams cad mkhyen pa nyid kyis chos thams cad thugs su chud pas byang chub ces bya bar mi sbyor te/sangs rgyas dang / byang chub dang / rnam pa thams cad mkhyen pa nyid dag ni mtshan nyid gcig pas chos kyi sku'i bdag nyid du tha dad pa med do/ /de'i phyir rnam pa thams cad mkhyen pa nyid sangs rgyas so/ /sangs rgyas nyid rnam pa thams cad mkhyen pa'o zhes bya ba la sogs pa gsungs so//gzugs 'byung ngo zhes bya bar mi sbyor ro/ /gzugs 'jig go zhes bya bar mi sbyor zhes pa la 'byung bar lta ba dang / 'jig par lta ba dag ni rtag pa dang chad par lta ba ste de mi skyed do/ /rtag ces bya bar mi sbyor ro zhes bya ba ni lta ba'i dbang gis so//mi rtag ces bya ba ni rnam par rtog pa'i dbang gis so/ /de bzhin du gzhan dag la yang sbyar bar bya'o/ /gzugs zhi zhes bya bar mi sbyor ro zhes bya ba ni kun brtags pa'i gzugs la sogs pa la mya ngan las 'das pa'i mtshan nyid med pa'i phyir ro//gzugs ma zhi zhes bya bar mi sbyor ro zhes bya ba ni chos nyid kyi gzugs la sogs pa la 'khor ba'i mtshan nyid med pa'i phyir ro/ /rnam pa thams cad mkhyen pa nyid zhi zhes bya bar mi sbyor ro zhes bya ba de lta de lta bu'i rtog pa'i skabs med pa'i phyir ro/ /de bzhin du stong pa nyid dang /mtshan ma med pa dang / smon pa med pa rnams ni rnam par rtog pa rnams kyi skabs med pa nyid do/ /spyod ces bya ba la sogs pa'i rnam par rtog pa rnams la yang de bzhin du sbyar ro/ /sbyin pa'i pha rol tu phyin pa'i don du shes rab kyi pha rol tu phyin pa la mi spyod do zhes bya ba ni chos thams cad chos nyid du tha dad pa med pa la tha dad du 'dzin pa mi 'thad pa'i phyir te/thams cad kyang shes rab kyi pha rol tu phyin pa'i ngo bo nyid du tha mi dad do/ /de'i phyir tha dad pa'i phyir / chos gang yang yang dag par rjes su mi mthong ngo zhes gsungs so/ /shes rab kyi pha rol tu phyin pa nyid kyang yang dag par rjes su mi mthong na byang chub sems dpa' lta ci smos te/rnam pa thams cad du thams cad mngon par shes pa lta ga la yod ces bya ba ni mngon par shes pa rnams kun brtags pa'i ngo bo nyid yin pa dang / kun brtags pa'i dmigs pa yin pa'i phyir de skad bshad do//bya ba'i 'gres dang phan yon thob pa dag la yang de bzhin du sbyor ro/ /brtson pa'i mtshan nyid ces bya ba ni de'i phan yon thob pa ste / shA ri'i bu byang chub sems dpa' sems dpa' chen po shes rab kyi pha rol tu phyin pa la de ltar spyod pa'i tshe/ bdud sdig can zhes bya ba la sogs pas ston to/ /gang chos rnams dang lhan cig 'du ba zhes bya bas ni 'khor ba bstan to/ /'bral ba zhes bya bas ni mya ngan las 'das pa bstan to/ /phrad pa'am mi phrad par 'gyur ba zhes bya bas ni de gnyis kyi las bstan to/ /chos kyi dbyings kyis chos kyi dbyings mngon par rdzogs par 'tshang mi rgya'o zhes bya ba ni de bzhin nyid kyis de bzhin nyid mngon par rdzogs par 'tshang rgya bar mi byed do//gzugs dang stong pa nyid du mi sbyor zhes bya ba ni gzugs stong pa'i ngo bo nyid dang mi sbyor ba dang / gzugs zhes bya ba stong pa nyid ces bya ba'i ming du mi sbyor ba'o//stong pa nyid dang gzugs su mi sbyor zhes bya ba ni stong pa nyid gzugs kyi rang bzhin dang mi sbyor ba dang / stong pa nyid ces bya ba gzugs kyi ming yin no zhes mi sbyor ba'o/ /yang na gzugs dang stong pa nyid du mi sbyor zhes bya ba ni gzugs stong ngo zhes bya bar mi sbyor ba ste/ gzugs dang stong pa nyid dag tha dad du mi byed do zhes bya ba'i tha tshig go//shA ri'i bu de ltar brtson pa'i byang chub sems dpa' sems dpa' chen po ni lung bstan pa yin par gzung bar bya'o zhes bya ba ni sa brgyad pa thob pas lung bstan par gyur pa'am/ lung bstan par 'os pa'i phyir lung bstan pa nye bar gyur to//sa brgyad pa la ni skye ba med pa'i chos la bzod pa thob ste rnam par smin pa'i pha rol tu phyin pa rnams 'byung ngo / /rnam par smin pa'i pha rol tu phyin pa rnams 'byung bas pha rol tu phyin pa rnams la spyod pa dang / sems can yongs su smin par bya ba dang /sangs rgyas kyi chos yongs su smin par bya ba dang / sangs rgyas kyi zhing yongs su dag par bya ba dang / mngon par rdzogs par byang chub par bya ba dang / chos kyi 'khor lo bskor bar bya ba la rtsol ba dang bral zhing lhun gyis grub pa nyid du thams cad sgrub bo/ /de ltar rnam par smin pa'i spyod pa lhun gyis grub pa yang sems can grangs med tshad med dpag tu med pa rnams kyi don byed kyang /de 'di snyam du bdag la ni sangs rgyas bcom ldan 'das rnams lung ston par mdzad do/ /bdag ni lung bstan pa la nye bar gyur to snyam du mi sems so zhes bya ba la sogs pa bstan to//de la lhun gyis grub par gnas pa'i gtan tshigs kyang de ni 'di ltar chos kyi dbyings la mtshan mar mi byed do zhes gsungs te / de phan chad ni de la chos kyi dbyings ma gtogs par dmigs pa gzhan nye bar mi gnas la/ chos kyi dbyings de la yang mtshan mar byas te mi dmigs so//de'i 'og tu mi skye ba'i chos la bzod pa thob pa'i phan yon ni 'di ltar byang chub sems dpa' sems dpa' chen po de la sems can gyi 'du shes mi skye'o/ /de ci'i phyir zhe na/ 'di ltar sems can shin tu skye ba med cing / 'gag pa med pa'i phyir te/chos rnams kyi chos nyid ni skye ba dang 'gag pa med pa'i phyir ro zhes bya bas ston to/ /sems can skye ba med pa dang 'gag pa med par shes rab kyi pha rol tu phyin pa la spyod pa yin zhes bya ba ni de phan chad de'i spyod pa sems can dmigs pa med do zhes bstan pa ste/ snying rje'i mthus kun rdzob kyi shes pa skye ste/de'i tshe sems can rnams kyi don du sbyin pa la sogs pa yongs su rdzogs par byed du zin kyang sems can skye ba med pa dang / 'gag pa med pa dang / sems can stong pa nyid dang / sems can dmigs su med pa dang / sems can dben pa nyid la gnas pas de ltar gnas shing thams cad byed do zhes bya'o//de'i 'og tu de'i gnas pa shin tu khyad par can nyid yin par bstan pa'i phyir shA ri'i bu 'di ni byang chub sems dpa' sems dpa' chen po rnams kyi rnal 'byor dam pa zhes bya ba la sogs pas bstan to//de'i 'og tu sems can dmigs su med du zin kyang / byams pa dang snying rje la sogs pa dang / sbyin pa dang tshul khrims la sogs pa sems can gyi don du bya ba rnam par 'byed pa byams pa chen po dang / snying rje chen po mngon par sgrub po zhes bya ba la sogs pas bstan to/ / ser sna'i sems mi spyod do zhes bya ba la sogs pa tshig drug gis ni pha rol tu phyin pa drug po dag gi mi mthun pa'i phyogs med par bstan to/ /de'i 'og tu gnas brtan gyis 'khor rnams mgu bar bya ba dang / skabs de nyid las chos bshad pa chen por 'gyur bar bya ba'i phyir/ de gang nas shi 'phos te 'dir skyes pa lags zhes bya ba la sogs pa zhus so//de la mchog ni sangs rgyas kyi zhing nas lhags nas sangs rgyas kyi zhing du 'pho'o/ /bar ma ni dga' ldan nas lhags par 'gyur ro / /tha ma ni mi'i nang nyid nas lhags par gyur to zhes rnam pa gsum du bstan to//de'i 'og tu skabs de las byang chub sems dpa' la rnam pa mang du yod pa bstan pa'i phyir/ shA ri'i bu byang chub sems dpa' sems dpa' chen po thabs la mi mkhas pa dag kyang yod do zhes bya ba la sogs pas byang chub sems dpa' rnam pa bzhi bcu rtsa bzhir gtogs pa rnams bstan to//thabs mi mkhas pa dang po gnyis las thabs mi mkhas pa snga ma ni bsam gtan gyi spyod pa dang / pha rol tu phyin pa'i spyod pa la brtson yang thabs mi mkhas par gyur pa'i phyir lha tshe ring por skyes te/ dus de srid cig gi bar du pha rol tu phyin pa rnams la brtson par gyur nas phyis mi'i nang du skye ba'i tshe/sngon gyi pha rol tu phyin pa la spyod spyod pa'i mthus brtson par byed kyang dbang po rtul por gyur to/ /gnyis pa ni bsam gtan gyi spyod pa dang pha rol tu phyin pa'i spyod pa rnams la brtson pas bsam gtan gyi 'bras bu btang nas lha'i nang du ma skyes par mi'i nang du skyes kyang thabs mi mkhas pas dbang po rtul ba nyid du 'gyur ro//de'i 'og ma rnams ni thams cad kyang thabs mkhas pa rnams te/ de dag gi dang po bstan pa ni bskal pa bzang po 'di nyid la bla na med pa yang dag par rdzogs pa'i byang chub mngon par rdzogs par 'tshang rgya'o zhes bya ba ste/de dag gi ni bsam gtan gyi spyod pa dang byang chub sems dpa'i spyod pa la bslabs nas snying rje'i mthus bsam gtan gyi dbang gis skye ba yongs su spangs te sems can gyi don bya ba lhur len pa dang / sangs rgyas mnyes par bya ba lhur len pas bskal pa bzang po 'di nyid la mngon par rdzogs par 'tshang rgya'o//gnyis pa dag ni yon tan de dag dang ldan zhing / sngon sems can yongs su smin par ma byas pa'i sems can rnams yongs su smin par byed do/ /gsum pa dag ni yon tan de dag nyid dang ldan zhing 'dod pa na spyod pa'i lha'i ris drug gi nang du skyes te mthu phun sum tshogs pa la gnas nas sems can yongs su smin par bya ba dang /sangs rgyas kyi zhing yongs su dag par bya ba dang / sangs rgyas mnyes par bya ba rnams byed do/ /bzhi pa dag ni tshangs pa'i 'jig rten gyi nang du skyes nas rdzu 'phrul gyis sangs rgyas kyi zhing nas sangs rgyas kyi zhing du 'gro zhing chos nyan pa dang /sangs rgyas mnyes par bya ba lhur len cing gsol ba gdab pa'i phyir smon lam btab pas mngon par rdzogs par sangs rgyas nas ring por ma lon pa rnams la chos kyi 'khor [(]la [,]lo [)]bskor bar gsol ba 'debs so//lnga pa dag ni dper na bdag cag gi bcom ldan 'das byams pa lta bu'o/ /drug pa dag ni mngon par shes pa'i mthus sangs rgyas kyi zhing thams cad du song nas de bzhin gshegs pa thams cad la mchod pa byed do/ /bdun pa dag ni mngon par shes pa la gnas shing sangs rgyas kyi zhing yongs su dag pa nyid na gnas par 'dod pa skyed do//brgyad pa dag ni mngon par shes pa'i mthus sangs rgyas kyi zhing tshe dpag tu med par skyes nas tshe ji srid thub pa'i bar du gnas te/ sems can dang sangs rgyas kyi chos yongs su smin par bya ba nyid la brtson par byed do//dgu pa dag ni mngon par shes pa'i mthus sangs rgyas dang / chos dang / dge 'dun gyi sgra dang bral bas dkon mchog gsum gyi yon tan mi shes pa'i sems can gyi 'jig rten dman pa rnams la dkon mchog gsum gyi yon tan bsgrags te/ sgra gsum dang ldan pa'i chos bshad pas dga' ba bskyed de de nyid kyi mthus sangs rgyas kyi zhing rnams su skye bar byed do//bcu pa dag ni sangs rgyas kyi zhing yongs su dag pa skyes nas rang bzhin gyis nyon mongs pa chung ba rnams rtsol ba chung ngus sa dang po thob par byas te/ bsam gtan dang / ting nge 'dzin dang /snyoms par 'jug pa rnams thob nas/ byang chub kyi phyogs kyi chos rnams dang / sangs rgyas kyi chos rnams bsgoms te/ sangs rgyas kyi zhing yongs su dag pa nas shi 'phos te 'jig rten gyi khams yongs su ma dag par song nas sems can rnams kyi don byed do/ / bcu gcig pa dag ni byang chub sems dpa'i yon tan snga ma de dag nyid dang ldan zhing sangs rgyas kyi zhing yongs su dag par skyes te/ sa dang po thob par byas nas 'phral du byang chub sems dpa'i skyon med pa la zhugs te phyir mi ldog pa'i sa thob par byed do/ /bcu gnyis pa dag ni yon tan de dag nyid dang ldan zhing sangs rgyas kyi zhing gi stobs bskyed pas bdag nyid yon tan rnams kyis sems kyi rgyud yongs su dag par byas nas/rtsol ba chung ngus sa dang po thob par byas nas/ de ma thag tu chen po 'bad mi dgos par mngon par rdzogs par sangs rgyas nas chos kyi 'khor lo bskor te dus ji srid yod kyi bar du bstan pa gnas par byed do//bcu gsum pa dag ni yon tan de dag nyid dang ldan zhing sangs rgyas kyi zhing yongs su dag par skyes nas rtsol ba chung ngus sa dang po thob par byas te/ sa gong ma rnams ma skyes par shes rab kyi pha rol tu phyin pa'i rnal 'byor thams cad la snyoms par zhugs nas sangs rgyas kyi zhing yongs su dag par bya ba'i phyir sangs rgyas kyi zhing nas sangs rgyas kyi zhing du skye bar byed do//bcu bzhi pa dag ni rnam par mi rtog pa'i shes rab kyi pha rol tu phyin pa la gnas te thod rgal du snyoms par 'jug pa la mnyam par bzhag nas snyoms par 'jug pa de rnams kyis gnas par byed do//bco lnga pa dag ni byang chub kyi phyogs kyi chos rnams dang / sangs rgyas kyi chos rnams dang ldan zhing / yongs su 'dris pa'i shes pas rgyun du zhugs pa'i 'bras bu la sogs pa yongs su shes par byas kyang de dag mngon sum du mi byed par gzhan dag kyang lam dang 'bras bu de dag la so sor 'god do//yongs su dris pa'i shes pa de nyid la byang chub sems dpa'i bzod pa dam pa zhes bya'o/ /bcu drug pa dag ni bskal pa bzang po'i byang chub sems dpa' rnams te/gang bskal pa 'di nyid la mngon par rdzogs par sangs rgyas te/ de dag rnam par mi rtog pa'i pha rol tu phyin pa drug la gnas nas dga' ldan gyi gnas sbyong bar byed do/ /bcu bdun pa dag ni skye ba gcig gis thogs pa ste/ nyan thos dang rang sangs rgyas dang /sangs rgyas kyi chos thams cad dang ldan zhing / yongs su 'dris pa'i shes pas 'phags pa'i bden pa rnams tshol ba la gnas so/ /bco brgyad pa dag ni bskal pa grangs med pa bye ba brgya stong mang pos mngon par rdzogs par sangs rgyas par byas nas sems can gyi don bya ba la brtson par gnas te/dper na 'phags pa 'jam dpal gzhon nur gyur pa la sogs pa lta bu'o/ /bcu dgu pa dag ni de bzhin du mngon par rdzogs par 'tshang rgya ba la brtun nas sems can rnams la chos 'chad cing gnas so/ /nyi shu pa dag ni de bzhin du sems can gyi don byed cing sangs rgyas kyi zhing nas sangs rgyas kyi zhing du gnas so//nyi shu gcig pa dag ni pha rol tu phyin pa drug la gnas kyang sbyin pa nyid kyis sems can rnams tshim par byas te sems can rnams sbyin pa nyid la 'god do/ /nyi shu gnyis pa dag ni tshul khrims kyis bsdus te/tshul khrims la 'god do/ /nyi shu gsum pa dag ni bzod pa la 'god do/ /nyi shu bzhi pa dag ni brtson 'grus la 'god do/ /nyi shu lnga pa dag ni bsam gtan la 'god do/ /nyi shu drug pa dag ni shes rab la 'god do/ /nyi shu bdun pa dag ni sangs rgyas kyi cha byad kyis shar phyogs kyi sems can rnams yongs su smin par byas te/der sangs rgyas mnyes par bya ba lhur blangs nas sangs rgyas kyi zhing de nas mthong ba'i yon tan rnams bzung ste/ bdag gis sangs rgyas kyi zhing yongs su dag par byas nas skye ba gcig gis thogs par byas te gnas so//nyi shu brgyad pa dag ni lho phyogs su de bzhin du sangs rgyas kyi zhing rnams par dgod cing gnas so/ /nyi shu dgu pa dag ni nub phyogs su'o/ /sum cu pa dag ni byang phyogs su'o/ /sum cu gcig pa dag ni byang shar gyi mtshams su'o/ /sum cu gnyis pa dag ni shar lho'i mtshams su'o//sum cu gsum pa dag ni lho nub kyi mtshams su'o/ /sum cu bzhi pa dag ni nub byang gi mtshams su'o/ /sum cu lnga pa dag ni 'og gi phyogs su'o/ /sum cu drug pa dag ni steng gi phyogs su'o/ /sum cu bdun pa dag ni phyogs bcu'i sems can yongs su smin par byas nas/phyogs bcu'i sangs rgyas rnams la bsnyen bkur byas te/ de nas mthong ba'i sangs rgyas kyi zhing gi yon tan gyi khyad par rnams bzung nas bdag gis sangs rgyas kyi zhing du bsgrubs te de na skye ba gcig gis thogs par gnas so/ /sum cu brgyad pa dag ni sangs rgyas kyi chos thams cad dang ldan zhing /sngon gyi smon lam gyi mthus sangs rgyas kyi cha byad du rnam par sprul pa chen po dang / spyod lam zhi ba dang / dbang po gsal ba dang / skye bo mang po dga' bar byas nas/ dga' ba dang mgu ba'i mthu de nyid kyis sems can yongs su smin par byas te/mthar gyis theg pa gsum gyi rim gyis yongs su mya ngan las 'da' bar byed do/ /sum bcu dgu pa dag ni dbang po gsal ba de dag nyid dang ldan zhing de bzhin du sems can rnams kyi don byed kyang bdag la stod par mi byed pa dang / gzhan la smod par mi byed par btang snyoms su gnas pas lhur blangs te gnas so/ /bzhi bcu pa dag ni sa rab tu dag pa la gnas te/ sbyin pa dang tshul khrims kyi pha rol tu phyin pa la gnas nas/ dbul ba'i sdug bsngal dang / ngan 'gro'i sdug bsngal rnams mi myong bar phyir mi ldog pa'i sa la thug gi bar du/sems can gyi don lhur len cing gnas so/ /bzhi bcu gcig pa dag ni sbyin pa dang tshul khrims kyi pha rol tu phyin pa lhur len cing / tshe rabs kun du 'khor los sgyur bar gyur nas/ rdzu 'phrul gyi stobs des sems can rnams bsdus te sbyin pa dang tshul khrims la 'god do//bzhi bcu gnyis pa dag ni sbyin pa dang tshul khrims kyi pha rol tu phyin pa lhur len cing / de bzhin du tshe rabs kun du 'khor los sgyur bar gyur nas/ rdzu 'phrul gyi mthu chen po dang ldan pas phyogs bcu'i sangs rgyas rnams mnyes par byed pa dang /mchod par byed cing gnas so/ /bzhi bcu gsum pa dag ni pha rol tu phyin pa drug la gnas shing / sangs rgyas kyi chos kyi snang ba thams cad kyis sems can rnams yongs su smin par byas nas sangs rgyas kyi chos kyi snang ba nyid kyis bdag nyid kyang yongs su smin par byed cing mngon par rdzogs par sangs rgyas kyi bar du gnas so//de ltar byang chub sems dpa' rnams bstan nas/ shA ri'i bu 'di ni byang chub sems dpa' sems dpa' chen po rnams sangs rgyas kyi chos rnams la yang dag par byung ba yin no zhes bya ba gsungs te/'di ni byang chub sems dpa' rnams kyi myu gu sangs rgyas kyi chos la 'phel ba'i rim pa yin no zhes bya ba'i tha tshig go/ /de'i 'og tu bcom ldan 'das kyis bshad pa'i skabs dbye ba'i phyir/ byang chub sems dpa' de dag tshad mar mdzad de/shA ri'i bu de lta bas na byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ kha na ma tho ba dang bcas pa'i lus dang ngag dang yid kyi las rnams kyi go mi dbye'o zhes gsungs so/ /gnas brtan nyid kyis de nyid bzung ste/ bshad pa'i skabs dbye ba'i phyir/ bcom ldan 'das lus kyi las kha na ma tho ba dang bcas pa gang lags zhes bya ba la sogs pa zhus so/ /de'i 'og tu bcom ldan 'das kyis lus dang ngag dang yid du dmigs pa'i 'du shes pa bka' ma stsal bar lus gang gis lus kyi las brtsam par bya'o// ngag gang dang yid gang gis las brtsam par bya snyam du sems na/ 'di ni byang chub sems dpa'i rtsom pa'i skyon yin no zhes bstan to/ /de dag nyid lus dang ngag dang yid kyi gnas ngan len yin no/ /'di ltar lus dang ngag dang yid mi dmigs pas mi dmigs pa 'di nyid gnas ngan len sbyong ba yin no zhes bstan nas/de'i 'og tu gal te byang chub sems dpa' sa rab tu dga' ba la gnas nas kyang / dge ba bcu'i las kyi lam rnams la rjes su spyod cing / nyan thos kyi sems dang rang sangs rgyas kyi sems yongs su spangs nas dus thams cad du sems can thams cad la snying rje chen po'i sems nye bar gnas te/de lta bus kyang gnas ngan len sbyangs par 'gyur ro zhes bstan to/ /bcom ldan 'das byang chub sems dpa' sems dpa' chen po rnams kyi byang chub kyi lam gang lags zhes bya ba ni byang chub kyi lam yongs su sbyong ba zhes bya ba pha rol tu phyin pa las tha mi dad par brjod pa'i phyir zhus pa'o//de'i 'og tu shA ri'i bu byang chub kyi lam gang la spyod na zhes bya ba la sogs pas ni mi dmigs pa'i rnal 'byor byang chub kyi lam gang yin par ston to/ /de nas yang bar skabs su byang chub kyi lam rnam pa gnyis bstan te/mi dmigs par sbyor ba dang / rlom sems med par sbyor ba'o/ /'gres de gnyis ni mi dmigs pas rlom sems med pa'i phyir sbyor ba gong ma ni sbyor ba phyi ma'i rgyu yin no/ /rnam pa thams cad mkhyen pa nyid kyi ye shes ni de bzhin gshegs pa nyid kyi yin gyi/byang chub sems dpa'i ma yin no snyam du bsams nas/ gnas brtan gyis bcom ldan 'das byang chub sems dpa' sems dpa' chen po'i rnam pa thams cad mkhyen pa'i ye shes gang lags zhes zhus pa dang / bcom ldan 'das kyis ye shes de dang ldan pa ni zhes bya ba la sogs pas sa brgyad pa la byang chub sems dpa' rnams kyi ye shes de lta bu skye ba de ni rang bzhin yin te rnam par smin pa'i ye shes so zhes bstan to//rnam par smin pa'i ye shes kyis ni pha rol tu phyin pa la sogs pa thams cad yongs su rdzogs par byed kyang /de dag la rtsol ba'i yid la byed pa mi 'byung ste/ ye shes de rnam pa thams cad mkhyen pa nyid kyi rgyu yin pa'i phyir/ rgyu la 'bras bu btags nas rnam pa thams cad mkhyen pa nyid kyi ye shes zhes bya'o/ /de'i 'og tu gzugs thams cad la 'jug pa'i shes pa ni sha'i mig go//ting nge 'dzin dang snyoms par 'jug pa thams cad shes pa ni lha'i mig go/ /thams cad mkhyen pa'i ye shes ni shes rab kyi mig go/ /gnas dang gnas ma yin pa mkhyen pa ma gtogs pa'i shes pa dgu po dag ni chos kyi mig go/ /rdo rje lta bu'i ting nge 'dzin gyi ye shes ni sangs rgyas kyi spyan yin no zhes de dag gi rnam par dbye ba bstan to//de'i 'og tu mngon par shes pas gnas pa la/ mngon par shes pas thams cad la yang / sngar kun rdzob kyi shes pas mngon par shes pa la gnas pa bstan nas/ shin tu yongs su rdzogs pa yin par bstan pa'i phyir phyis don dam pa'i shes pas rnam par mi rtog pa yin par bstan to//shin tu rnam par dag pa nyid du bstan pa'i phyir/ byang chub sems dpa' rnams kyi gnas pa thams cad kyang kun rdzob kyi shes pa yongs su rdzogs par byas nas/ phyis don dam par mi dmigs par byed de/de'i phyir shin tu yongs su rdzogs pa dang / shin tu rnam par dag par 'gyur ro/ /de bas na thams cad kyi tha mar shA ri'i bu de ltar na byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ mngon par shes pa drug yongs su rdzogs par byed cing yongs su dag par byed de/mngon par shes pa rnams yongs su dag pas rnam pa thams cad mkhyen pa nyid thob par byed do zhes bya ba gsungs so/ /des gang gis rlom sems su 'gyur zhes bya ba ni rdzu 'phrul gyis so/ /gang rlom sems su byed ces bya ba ni rdzu 'phrul bya ba'i cho ga'o//gang gis rlom sems su byed ces bya ba ni rdzu 'phrul bya ba shes pa ste/ des rdzu 'phrul de dag mi dmigs so/ /rang bzhin stong pa nyid ces bya ba ni dngos po med pa'i ngo bo nyid do/ /rang bzhin dben pa zhes bya ba ni shin tu yongs su dag pa nyid do/ /rang bzhin gyis ma skyes pa zhes bya ba ni 'dus ma byas pa'i ngo bo nyid do//de rdzu 'phrul du sems pa yang mi bskyed do zhes bya ba ni de ni rdzu 'phrul yin no snyam du sems pa dang / rdzu 'phrul mngon par sgrub par sems pa'o zhes bya ba ni rdzu 'phrul 'di dag mngon par bsgrub par bya'o snyam du sems pa'o/ / shA ri'i bu byang chub sems dpa' sems dpa' chen po gang dag shes rab kyi pha rol tu phyin pa la spyod pa'i tshe/ gang dag mtha' las 'das pa stong pa nyid kyis yongs su 'dzin pa med pa'i phyir/ sbyin pa'i pha rol tu phyin pa la gnas te/ rnam pa thams cad mkhyen pa nyid kyi lam sbyong ba dag kyang yod do zhes bya bas ni rnam par mi rtog pa'i pha rol tu phyin pa drug car la gnas kyang rung pha rol tu phyin pa re re la gnas kyang rung ste/byang chub kyi lam sbyong bar byed do/ /shA ri'i bu yod do zhes bya ba la sogs pas ni de dag gi mos pa tha dad pa bstan to/ /mtha' las 'das pa stong pa nyid kyi phyir zhes bya bas ni sgro 'dogs pa dang /skur pa 'debs pa'i mtha' spangs so/ /yongs su 'dzin pa med pa'i phyir zhes bya ba ni 'khor gsum la mngon par zhen pa med do / /gang gi phyir de 'dzin pa med pa yin pa de'i phyir sbyin pa'i pha rol tu phyin pa la gnas nas byang chub kyi lam la sbyong bar byed do//'ong ba med pa dang 'gro ba med pa'i phyir zhes bya ba ni rnam pa thams cad mkhyen pa nyid kyi lam sbyong bar byed do zhes 'byung bas/ gal te lam yod na 'ong ba dang 'gro ba'i 'os kyang yod par 'gyur ro snyam du sems pa las dgongs nas/ de dag med pa nyid kyi phyir ro zhes gsungs te/nyan thos kyi theg pa las chos thams cad ni skye ba na yang gang nas kyang 'ong ba med la/ 'gag pa na yang gang du yang 'gro ba med do zhes 'byung ba dang / theg pa chen po las skye ba dang 'gag pa med pa'i phyir theg pa chen po la 'ong ba dang / 'gro ba las rnam par grol ba zhes bya'o//'dzin pa med pa'i phyir zhes bya ba ni chos rnams la chos su mngon par zhen pa ni yongs su 'dzin pa'o/ /sbyin pa ni yongs su 'dzin pa yod pa'i phyir yongs su gdags so zhes bya ba ni ser sna yongs su 'dzin pa'o/ /sbyin pa ni yongs su 'dzin pa nye bar bzung ba las gdags so zhes bya ba la sogs pa ci las dgongs she na/'jig rten na yang ser sna yod dang sbyin pa zhes bya ba'i ming 'byung la/ 'chal ba'i tshul khrims la sogs pa yod na/ tshul khrims la sogs pa'i ming du 'gyur ro/ / gang gi phyir byang chub sems dpa' la ser sna la sogs pa mi mthun pa'i phyogs kyi blo med pa de'i phyir sbyin pa la sogs pa'i blo yang med do zhes bstan pa'o/ /de ni brgal to zhes bya bar rlom sems med do/ /mi brgal to zhes bya bar rlom sems med do zhes bya ba ni ser sna la sogs pa las bdag brgal to zhes bya ba'am/ma brgal to zhes bya bar mi sems te/ de dag nyid shin tu med pa'i phyir ro/ /sbyin pa dang ser sna zhes bya bar rlom sems med do zhes bya ba la sogs pas ni de nyid bstan te/ mi mthun pa'i phyogs dang gnyen po gnyi gar yang mi sems so zhes bya ba'i tha tshig go//bdag la spyos so zhes bya ba'am/ bdag la phyag byas so zhes bya bar rlom sems med do zhes bya ba la sogs pas ni 'jig rten gyi chos brgyad kyi rlom sems med do zhes ston to/ /shA ri'i bu skye ba med do zhes bya ba ni yang dag pa'i mtha' zhes bya ba'i tha tshig go//sems can thams cad la mnyam pa nyid ces bya ba ni gang zag stong pa nyid kyi btang snyoms tshad med pa'o/ /chos thams cad mnyam pa nyid ces bya ba ni chos stong pa nyid kyis dbu mar gnas pa'i btang snyoms te/ 'di ni rjes su chags pa dang khong khro ba med pa'i btang snyoms zhes bya'o//de'i 'og tu 'khor rnams yongs su smin par gyur pa lung bstan pa dang / shes rab kyi pha rol tu phyin pa la bsngags pa dang / de la zhugs pa'i byang chub sems dpa' bsngags pa dang / 'od zer 'gyed pa dang / byang chub sems dpa' 'dus pa dang / mchod pa'i bkod pa dang / 'khor sa brgyad thob pa dang / smon lam dang / lung bstan pa dang / 'di dag thams cad ni gzhung las 'byung ba bzhin te/ don gsal lo/ /de ltar tshig dang pos mdor bstan pa bshad do/ /shA ri'i bu 'di la byang chub sems dpa' sems dpa' chen po chos thams cad rnam pa thams cad du mngon par rdzogs par byang chub par 'dod pas shes rab kyi pha rol tu phyin pa la brtson par bya'o zhes bya ba de la/gang gi phyir brtson par bya ba dang / ji ltar brtson par bya ba dang / brtson par byed pa'i mtshan nyid gang yin pa dang / brtson par byed pa gang yin pa rnams kyis rab tu dbye ba de dag bcom ldan 'das dang gnas brtan shA ri'i bus rgyas par bstan nas/da ni brtson pa la gdams pa gang yin pa dang / brtson pa'i phan yon gang yin pa la sogs pa bshad par bya ba rnam pa bzhi las/ gnas brtan rab 'byor gyis brtson pa la gdams pa bstan to//bcom ldan 'das kyis kyang thabs mkhas pas de ltar yongs su smin par bya ba'i 'dul ba las brtsams te bstan to/ / de nyid kyi phyir shA ri'i bus 'di ni de bzhin gshegs pa nyid kyi thabs la mkhas pa'i tshul gyis byang chub sems dpa' sems dpa' chen po rnams la shes rab kyi pha rol tu phyin pa bstan to zhes bya ba 'og nas 'chad do//ci tshe dang ldan pa rab 'byor 'di rang gi shes rab dang / spobs pa'i stobs bskyed pas zhes bya ba ni/ nyan thos rnams kyi yul ni nyan thos rnams kyis shes na/ ci'i phyir nyan thos rnams la the tshom 'di 'byung zhe na/de la nyes pa med de/ gnas brtan rab 'byor 'di ni byang chub sems dpa' sems dpa' chen po yin te/ bskal pa grangs med pa nas bsod nams dang ye shes kyi tshogs bsags la / chos zab mo la bzod pa thob par grags pa ste/ de bas na thams cad kyang de ltar the tshom du gyur to/ /de'i phyir rab 'byor gyis bdag nyid kyi tshig yin par bstan na gzung bar 'gyur ba ma yin pa'i skyon du 'gyur ba bsal ba'i phyir/ 'di ni bcom ldan 'das kyi bka' yin gyi/ bdag gi tshig ni ma yin no zhes bsal to/ /smra yang rung /lung ston kyang rung / brjod kyang rung zhes bya ba ni 'dul ba rnam pa gsum po rnams las / mdo dang 'bring dang / rgyas pa rnams su dbye ba'am/ yang na bdag gi lhag pa'i bsam pa dang / gzhan gyi lhag pa'i bsam pa'i skabs dang / skabs su bab pa dang /rnam pa gsum gyi phyir rnam pa gsum du bstan to/ /da ni byang chub sems dpa' sems dpa' chen pos shes rab kyi pha rol tu phyin pa la brtson par bya'o zhes bya ba'i tshig dang po la bstan pa gang yin pa de bstan pa'i phyir de nyid bzung nas/ bcom ldan 'das kyis rab 'byor khyod byang chub sems dpa' sems dpa' chen po rnams la shes rab kyi pha rol tu phyin pa rtsom ste/ci nas kyang byang chub sems dpa' sems dpa' chen po rnams shes rab kyi pha rol tu phyin pa la nges par 'byung bar 'gyur ba de lta bu'i spobs pa skyed cig ces skabs phye ba dang / gnas brtan rab 'byor gyis ming dang brdar gdags pas brtson pa la gdams pa dang /sems can mi dmigs pas brtson pa la gdams pa dang / tshig bla dgas mi dmigs pas brtson pa la gdams pa dang / chos thams cad dmigs su med pas brtson pa la gdams pa dang / gdams pa bzhi skabs dbye ba'i phyir/bcom ldan 'das byang chub sems dpa' sems dpa' chen po zhes bgyi ba chos gang gi tshig bla dgas lags zhes bya ba la sogs pa zhus so/ /de la mdor bstan pa las byang chub sems dpa' sems dpa' chen pos zhes gsungs la/ byang chub sems dpa' zhes bya ba'i chos ni gang yang med cing de nyid shes rab kyi pha rol tu phyin pa zhes kyang gsungs la/shes rab kyi pha rol tu phyin pa zhes bya ba'i chos kyang gang yang med na/ de la chos 'di gnyis dmigs su med bzhin du ci zhig su la gdams shing rjes su bstan par bya zhes zhus pa dang / bcom ldan 'das kyis rab 'byor khyod de skad du ma smra zhig/ gal te khyod de ltar na byang chub sems dpa' yang med/ shes rab kyi pha rol tu phyin pa yang med do snyam du bsams nas cang mi zer bar gyur na/ de lta na ni sems can gyi don nyams par 'gyur ro/ /don dam par yongs su grub pa'i bdag nyid du chos de gnyis su med du zin kyang /sems can yongs su smin par bya ba la sogs pa'i don de thabs mkhas pas kun brtags pa'i mtshan nyid yongs su bzung nas/ kun rdzob kyi tshul du sems can rnams la shes rab kyi pha rol tu phyin pa gdams par bya'o/ / gzhan du na ni sems can gyi don rab tu nyams par 'gyur ro zhes bstan nas/ dang por btags pa'i gdams pa bstan pa rab 'byor byang chub sems dpa' sems dpa' chen po shes rab kyi pha rol tu phyin pa la spyod pas ming dang brdar btags pa rnams de ltar khong du chud par bya'o zhes bya ba'i mthar thug pa'i bar gyi gzhung gis bstan to//de ltar btags pas gdams nas don dam par btags pa bstan dgos te/ bcom ldan 'das byang chub sems dpa' sems dpa' chen po zhes bgyi na zhes bya ba gnas brtan gyis zhus pa'i tshig bzung nas bcom ldan 'das kyis/rab 'byor de ji snyam du sems/ gzugs byang chub sems dpa' yin snyam mam/ gzugs ma yin pa gzhan zhig byang chub sems dpa' yin snyam mam zhes bya ba la sogs pas dri ba rim pa lnga nye bar btags nas/ bcom ldan 'das byang chub sems dpa' sems dpa' chen po shin tu ma mchis shing mi dmigs na/de la gzugs byang chub sems dpar 'gyur ba lta ga la mchis zhes bya ba la sogs pa gnas brtan rab 'byor gyi tshig rnams kyis sems can rnams dmigs su med pa'i gdams pa bstan to/ / rab 'byor byang chub sems dpa' sems dpa' chen pos sems can mi dmigs pas shes rab kyi pha rol tu phyin pa la de ltar bslab par bya'o zhes bya ba'i mthar thug pa'i bar gyi gzhung dag gis bstan to//de nas yang 'di lta ste byang chub sems dpa' zhes bgyi ba 'di chos gang gi tshig bla dgas lags zhes zhus pa'i tshig bzung nas/bcom ldan 'das kyis rab 'byor de ji snyam du sems/ byang chub sems dpa' zhes bya ba 'di gzugs kyi tshig bla dgas yin snyam mam zhes bya ba la sogs pa dris nas/ bcom ldan 'das gzugs shin tu ma mchis shing mi dmigs na/byang chub sems dpa' gzugs kyi tshig bla dgas su 'gyur ba lta ga la mchis zhes bya ba la sogs pa gnas brtan rab 'byor gyi tshig bla dgas mi dmigs par bstan nas/ rab 'byor byang chub sems dpa' sems dpa' chen po shes rab kyi pha rol tu phyin pa la de ltar spyod pa'i tshe/gzugs kyi tshig bla dgas mi dmigs pa zhes bya ba nas smon pa med pa'i tshig bla dgas mi dmigs par shes rab kyi pha rol tu phyin pa la bslab par bya'o zhes bya ba'i mthar thug pa'i bar gyi gzhung dag gis shes rab kyi pha rol tu phyin pa la gdams pa bstan to//de nas yang bcom ldan 'das kyis 'di ltar byang chub sems dpa' zhes bgyi ba'i chos de bdag gis yang dag par rjes su mi mthong ngo zhes zhus pa'i tshig bzung nas/ bcom ldan 'das kyis rab 'byor chos kyi dbyings yang dag par rjes su mi mthong ngo zhes bya ba la sogs pa nas/rab 'byor byang chub sems dpa' sems dpa' chen pos de ltar chos thams cad mi dmigs par shes rab kyi pha rol tu phyin pa la spyad par bya ste zhes bya ba'i mthar thug pa'i bar gyi gzhung dag gis chos thams cad mi dmigs par bstan nas de nyid kyis gdams pa mdzad do//de ni byang chub sems dpa' sems dpa' chen po shes rab kyi pha rol tu phyin pa la gdams pa'o/ /de nyid rjes su bstan pa yin no zhes bya bas gdams pa bzhi po de dag nyid kyis mjug bsdus so/ /de la ming dang brdar gdags pa'i gdams pa sngar smos pa las/'di ni ming tsam ste ming zhes bya ba'i chos gzhan du gyur pa med par bstan nas ming de ni nang na yang med/ phyi rol na yang med/ gnyis ka med par yang mi dmigs so zhes bya bas ming gi chos gzhan du gyur pa med pa'i gtan tshigs bshad do/ /gal te ming zhes bya ba'i chos gzhan du gyur pa 'ga' zhig yod na ni/nang ngam phyi rol lam de gnyis las gzhan pa gang yang rung ba gsum las 'ga' zhig gi nang nas dmigs par 'gyur ba zhig na/ 'di ltar de gsum car la yang rnam par dpyad na mi rigs te de bas na de yod pa ma yin no/ /'dir yang chos dang mthun pa'i dpe rab 'byor 'di lta ste dper na sems can sems can zhes bya bar ming du brjod kyang sems can gang yang mi dmigs te zhes bya ba la sogs pa bstan to//de nas yang ming las chos gzhan du gyur pa med pa'i gtan tshigs gnyis pa btags pa'i chos de ni ming dang brda tsam du tha snyad du gdags pa ma gtogs par skye ba 'am 'gag pa med de zhes bya ba la sogs pa gsungs so//gal te chos rnams kyi ming chos gzhan zhig tu gyur pa zhig yod na ni ming de skad ces bya ba'i chos skye bar gyur pa na de yang skye bar gyur pa zhig na skye bar yang mi 'gyur te/ 'di ltar tha snyad du gdags su rung bar bya ba'i phyir brda'i tshul gyis gzhan dag la 'di'i ming ni 'di zhes phyir rnam par 'jog go//gal te chos nyid skye ba'i dus nyid na ming skyes par gyur na ni/ gzhan dag gis mthong ma thag tu brdar mi shes pas kyang 'di'i ming 'di yin no zhes khong du chud par 'gyur ba zhig na/khong du yang mi chud de/ de bas na chos skyes kyang ming mi skye la chos 'gag kyang ming mi 'gag ste/ 'dir ming de skad ces bya ba'i dngos po 'gag kyang ming de skad tha snyad du 'dogs shing med par mi 'gyur te/ de'i phyir skye ba dang 'gag pa med par chos gzhan du gyur pa ni med kyi/bdag dang sems can zhes bya ba la sogs pa bzhin du tha snyad du zad do zhes bstan to/ /'dir yang dpe'i tshul gyis chos rnam pa bzhi bzung ste/ tha snyad tsam du zad pa'i phyir nyan thos kyi tshul la grags pa bdag dang sems can la sogs pa dang / kun brtags pa tsam du zad pa'i phyir byang chub sems dpa'i tshul la grags pa phung po dang /khams dang / skye mched rnams / nye bar bzung nas btags pa'i ming tsam du zad pa'i phyir/ gnyi ga la grags pa nang dang phyi'i bye brag las lus dang rtswa shing la sogs pa dang / shin tu med pa'i phyir 'jig rten thams cad la grags pa rmi lam dang brag ca dang /smig rgyu la sogs pa'o/ /de'i 'og tu ming du btags pa'i gdams pa mjug bsdus pa'i phyir/ rab 'byor de ltar byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ ming dang brdar btags pa dang /gdams ngag tu btags pa dang / chos su btags pa la bslab par bya'o zhes bya ba bstan te sgro btags pa dang / skur pa 'debs pa'i mtha' spang ba'i phyir ming dang brdar btags pa sngar smos so/ /de la gnas te chos bshad pas sems can yongs su smin par bya ba'i phyir dang gdams pa'i btags pa phyis smos so//de'i 'og tu de gnyi gas chos rnams tha snyad du 'dogs so zhes kun brtags pa'i chos su gsungs so/ /de nas yang btags pa de gsum gyi yon tan bstan pa'i phyir/ rab 'byor byang chub sems dpa' sems dpa' chen po shes rab kyi pha rol tu phyin pa la de ltar spyod pas ni gzugs mi rtag ces bya bar yang dag par rjes su mi mthong ngo zhes bya ba la sogs pa gsungs so//rnam par rtog pa thams cad spangs pa ni btags pa tsam du zad par slob pa'i 'bras bur bstan to// //bam po brgyad pa/ nyan thos dang rang sangs rgyas rnams kyi rnam par rtog pa de dag kyang rnam pa gsum ste/ lhag mthong gi spyod yul dang / rnam par thar pa'i sgo'i spyod yul dang / chos rnams la yang dag pa ji lta ba bzhin du so sor rtog pa'i spyod yul lo//de la lhag mthong gi spyod yul ni blang ba dang dor ba'i dbang gis nag po dang dkar po'i phyogs 'phags pa'i bden pa bzhi'i gnas su gyur pa chos kyi mdor rnam par rtog pa bzhi ste/ mi rtag pa dang sdug bsngal ba dang / bdag med pa dang / zhi bar rnam par rtog pa rnams dang /de dag gi mi mthun pa'i phyogs su gyur pa rtag pa dang / bde ba dang / bdag yod pa dang / ma zhi bar rnam par rtog pa rnams so/ /rnam par thar pa'i sgo'i spyod yul ni stong pa nyid dang / mtshan ma med pa dang / smon pa med par rnam par rtog pa rnams dang /des spang bar bya ba stong pa ma yin pa dang / mtshan ma dang smon pa'i rnam par rtog pa rnams so/ /chos rnams la yang dag pa ji lta ba bzhin du so sor rtog pa ni lhag ma rnams te/ 'dus byas dang / skye ba dang / mi dben pa rnams dang / mi dge ba dang / kha na ma tho ba dang bcas pa dang /zag pa dang bcas pa dang / nyon mongs pa dang bcas pa dang / 'jig rten pa dang / kun nas nyon mongs pa dang / 'khor bar rnam par rtog pa ste bcu dang / de dag gi gnyen por gyur pa 'dus ma byas dang / 'gog pa dang / dben pa dang / dge ba dang /kha na ma tho ba med pa dang / zag pa med pa dang / nyon mongs pa med pa dang / 'jig rten las 'das pa dang / rnam par byang ba dang / mya ngan las 'das par rtog pa ste/ rnam par rtog pa bcu po de dag thams cad kyang nyan thos dang rang sangs rgyas kyi spyod yul yin te/byang chub sems dpa' rnams kyis ni de dag thams cad kyi thams cad du spang bar bya'o/ /rnam par rtog pa sum cu rtsa bzhi po de dag spangs pa ni btags pa tsam du zad par slob pa'i phan yon du bstan to/ /'dus byas kyi khams na yod pa 'am/ 'dus ma byas kyi khams na yod par yang dag par rjes su mi mthong ngo zhes bya ba ni shes rab kyi pha rol tu phyin pa la sogs pa 'dus byas sam 'dus ma byas pa'i nang du mi 'grang ngo zhes bya ba'o//de nyid la dkar po dang nag po'i phyogs gnyis su brjod pa la mi rtog par bstan pa'i phyir/ chos thams cad la mi rtog go zhes bya ba gsungs te/mu stegs can la sogs pa ltar rtag pa dang bde ba dang / bdag yod pa la sogs pa'i bye brag tu rnam par mi rtog pa dang / nyan thos la sogs pa ltar lhag mthong la sogs pas mi rtag pa dang / sdug bsngal ba dang / bdag med pa la sogs pa'i bye brag tu mi rtog pa'o/ /de ltar rtog pa dang / rnam par rtog pa thams cad kyi gnyen por gyur pa/ byang chub sems dpa'i bslab pa bstan pa'i phyir/ de rnam par mi rtog pa'i chos la gnas shing / dran pa nye bar gzhag pa rnams bsgom zhes bya ba la sogs pa nas/sangs rgyas kyi chos ma 'dres pa'i mthar thug pa'i bar du gsungs so/ /rnam par mi rtog pa de'i yul du gyur pa chos rnams kyi yang dag pa ji lta ba nyid nyan thos rnams kyi yul gyi gnyen por gyur pa bstan pa'i phyir des shes rab kyi pha rol tu phyin pa la spyod pa'i tshe/chos rnams kyi mtshan nyid shin tu rtog pa yin te chos rnams kyi mtshan nyid gang yin pa de ni kun nas nyon mongs par mi 'gyur ro/ /rnam par byang bar mi 'gyur ro zhes gsungs so/ /de bzhin nyid ni rang bzhin gyis yongs su dag pa'i phyir dri ma dang bcas pa'i gnas skabs na kun nas nyon mongs pa yang med la/dri ma med pa'i gnas skabs na glo bur gyi rnam par byang ba yang med de/ dus thams cad du de bzhin nyid du gnas pa'i phyir/ de bzhin nyid do zhes bstan to/ /de bas na sngar bstan pa de dag thams cad kun brtags pa ste/de dag yang dag pa ji lta ba bzhin du ma yin pa bden pa ma yin pa'o zhes gsungs pa yin no/ /rab 'byor de ltar byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ ming dang brdar bya ba'i chos kyi gdags pa khong du chud par bya ste zhes bya bas brtags pa de dag nyid bstan nas chos thams cad la mngon par zhen pa med pa ni de'i 'bras bu yin pas/des ming dang brdar bya ba'i chos kyi gdags pa khong du chud na gzugs la mngon par zhen par 'gyur ba med do zhes bya ba la sogs pa phan yon gnyis pa ston to// de ltar chos thams cad btags pa tsam du zad par rig nas gzugs la sogs pa kun brtags pa'i chos rnams dang / sangs rgyas kyi chos yongs su dag par bya ba'i thabs mkhas pa'i mthar thug pa'i bar dag la mngon par zhen par mi byed do zhes bya ba'i tha tshig go/ / de bzhin nyid la mngon par zhen par 'gyur ba med do/ /yang dag pa'i mtha' la mngon par zhen par 'gyur ba med do/ /chos kyi dbyings la mngon par zhen par 'gyur ba med do zhes bya ba ni sngar smos pa'i rim pas lam gyi rnam pa shes pa nyid kyi spyod yul byang chub sems dpa'i sas bsdus pa ni de bzhin nyid ces bya'o//thams cad shes pa nyid kyi spyod yul nyan thos dang rang sangs rgyas kyi mya ngan las 'das pa ni yang dag pa'i mtha' zhes bya'o/ /rnam pa thams cad mkhyen pa nyid kyi spyod yul sangs rgyas kyi sar gtogs pa'i chos kyi sku ni chos kyi dbyings zhes bya'o//de nas yang mngon par zhen pa med par bsgom pa'i phan yon ni / rab 'byor de ltar byang chub sems dpa' sems dpa' chen po shes rab kyi pha rol tu phyin pa la spyod pa ni chos thams cad la mngon par zhen pa med pas sbyin pa'i pha rol tu phyin pa rnam par 'phel lo zhes bya ba la sogs pa nas/gzungs kyi sgo rnams dang / ting nge 'dzin gyi sgo rnams kyang thob par 'gyur ro zhes bya ba'i mthar thug pa'i bar gyi gzhung gis bstan to/ /de ltar brdar btags pa'i gdams pa yongs su rdzogs par byas nas/ sems can mi dmigs pa'i gdams pa gnyis pa bstan par bya ste/'di ltar gnas brtan rab 'byor gyis dang po zhus pa las/ bcom ldan 'das byang chub sems dpa' sems dpa' chen po zhes bgyi na zhes bya ba 'byung bas/ tshig de'i rgyus byang chub sems dpa' zhes bya ba'i chos 'ga' zhig yod do snyam pa'i bsam pas/ gnas brtan gyis de skad smras so snyam du kha cig the tshom de bsal ba'i phyir/ bcom ldan 'das kyis rab 'byor de ji snyam du sems/ gzugs byang chub sems dpa' yin snyam mam/ gzugs ma yin pa gzhan zhig byang chub sems dpa' yin snyam mam/ gzugs la byang chub sems dpa' yod snyam mam/byang chub sems dpa' la gzugs yod snyam mam/ gzugs med pa zhig byang chub sems dpa' yin snyam mam zhes bya ba dri ba rnam pa lnga dris so/ /byang chub sems dpa' la sems can du 'dzin cing / bdag la sogs pa bzhin du tha dad par rtog na rnam par rtog pa rnam pa gsum du 'gyur te/de nyid dang gzhan nyid kyi dbang dang gzhi dang / gnas pa'i dngos po dang / de las gzhan par ro/ /'di ltar byang chub sems dpa' la sems can nyid du mngon par zhen na/ ji ltar chad par smra ba rnams kyis bdag tu yongs su btags pa ltar phung po lnga'i ngo bo nyid dam/ji ltar rtag par smra ba rnams kyis bdag tu yongs su btags pa ltar/ phung po lnga las ma gtogs pa gzhan zhig yin grang na/ de la dang po gcig pa'i phyogs nye bar bzung ste/ gzugs byang chub sems dpa' yin snyam mam/tshor ba byang chub sems dpa' yin snyam mam/ 'du shes byang chub sems dpa' yin snyam mam zhes bya ba la sogs pa gsungs so/ /gnyis pa tha dad pa'i phyogs nye bar bzung ste/ gzugs ma yin pa gzhan zhig byang chub sems dpa' yin snyam mam/tshor ba ma yin pa gzhan zhig byang chub sems dpa' yin snyam mam zhes bya ba la sogs pa gsungs so/ /yang phyogs gnyis pa gzhi dang gnas pa'i dngos po nye bar bzung nas gzugs la byang chub sems dpa' yod snyam mam/ byang chub sems dpa' la gzugs yod snyam mam/tshor ba la byang chub sems dpa' yod snyam mam/ byang chub sems dpa' la tshor ba yod snyam mam zhes bya ba la sogs pa gsungs te/ gzugs dang tshor ba la sogs pa dang / byang chub sems dpa' ni rnam pa thams cad du 'brel pa med de/rnam pa thams cad du de dag las byang chub sems dpa' ni gzhan no zhes bya ba'i tha tshig go/ /phyogs gsum pa nye bar bzung nas/ gzugs med pa zhig byang chub sems dpa' yin snyam mam/ tshor ba med pa zhig byang chub sems dpa' yin snyam mam zhes bya ba la sogs pa gsungs te/'di ltar byang chub sems dpa' 'di la rnam par dpyad na/ gcig pa'am/ tha dad pa'am/ gzhi dang gnas pa'i dngos po'am/ de med pa'i dngos por yang dpyad du mi bzod de/ de bas na byang chub sems dpa' nyid med do snyam du dgongs nas/bcom ldan 'das de ni ma lags so zhes gsungs so/ /bdag tu smra ba'i nang nas kha cig rtog par byed pa mthong ba ni yul thams cad pa'o zhes 'byung bas sems can ni mig la sogs pa dbang po'i bdag nyid la sems can du rtog cing / gzugs kyi rang bzhin la sems can zhes bya ba bsams te/mthong ba po ni bdag yin no snyam du sems pa de'i phyir/ gzugs byang chub sems dpa' yin snyam mam zhes bya ba la sogs pa gsungs so/ /de bzhin du ba lang rdzi la sogs pa ltar za ba po ni sems can yin no snyam du rtog cing / tshor ba'i ngo bo nyid du bzung nas tshor ba po ni bdag yin no snyam du sems pa de'i phyir tshor ba byang chub sems dpa' yin snyam mam zhes bya ba gsungs so//de bzhin du gcer bu la sogs pa ltar byed pa po sems can yin par rtog cing / 'du shes dang 'du byed kyi ngo bo nyid du bzung ste/ byed pa po ni bdag yin no snyam du sems pa de'i phyir 'du shes byang chub sems dpa' yin snyam mam/'du byed rnams byang chub sems dpa' yin snyam mam zhes bya ba gsungs so/ /de bzhin du rig byed smra ba la sogs pa ltar shes pa po ni bdag yin no snyam du rtog cing / rnam par shes pa'i ngo bo nyid du bzung ste/shes par byed pa ni bdag yin no snyam du sems pa de'i phyir rnam par shes pa byang chub sems dpa' yin snyam mam zhes bya ba gsungs so/ /de bzhin du grangs can pa dag ltar shin tu phra zhing khyab la mi gsal ba'i skyes bur rtog cing gzugs la sogs pa las tha dad par gyur pa'i bdag cig yod par sems pa de'i phyir gzugs ma yin pa gzhan zhig byang chub sems dpa' yin snyam mam/tshor ba ma yin pa gzhan zhig byang chub sems dpa' yin snyam mam zhes bya ba la sogs pa gsungs so/ /de bzhin du kun tu rgyu la sogs pa ltar/ sems can mthe bo tsam mam/nas la sogs pa tsam zhig yod par rtog cing phung po bdag nyid kyi lus la skyes bu 'di gnas so snyam du rtog pa de'i phyir/ gzugs la byang chub sems dpa' yod snyam mam/ tshor ba la byang chub sems dpa' yod snyam mam zhes bya ba la sogs pa gsungs so//de de bzhin du 'ug pa pa la sogs pa ltar gzugs mi rtag pa la sogs pa ni skyes bu rtag pa la gnas pa yin par 'dod de/ gzugs la sogs pa bdag la gnas so snyam du sems shing gnas kyi dngos por rtog pa de'i phyir byang chub sems dpa' la gzugs yod snyam mam/byang chub sems dpa' la tshor ba yod snyam mam zhes bya ba la sogs pa gsungs so/ /de bzhin du dbang phyug tu smra ba la sogs pa kha cig ltar/ dbang phyug ces bya ba shin tu phra zhing rtogs par dka' ba zhig yod par rtog cing / gzugs la sogs pa'i ngo bo nyid las gzhan pa zhig yod par rtog pa de'i phyir gzugs med pa zhig byang chub sems dpa' yin snyam mam/tshor ba med pa zhig byang chub sems dpa' yin snyam mam zhes bya ba la sogs pa gsungs so/ /rnam par rtog pa de dag thams cad rigs pa dang mi mthun no snyam du dgongs nas/phung po lnga dang / khams drug dang / skye mched bcu gnyis dang / khams bco brgyad dang / rten cing 'brel bar 'byung ba'i yan lag bcu gnyis nye bar bzung ste/ so sor dris pa dang / gnas brtan rab 'byor gyis/ bcom ldan 'das de ni ma lags so zhes bkag go//de nas bcom ldan 'das kyis gal te byang chub sems dpa' 'dis chos gzhan du gyur pa zhig yod na 'dus byas sam 'dus ma byas pa zhig yin grang na/ gal te 'dus byas yin na ni phung po lnga la sogs pa 'di dag la dmigs par 'gyur ba zhig na dmigs par ma gyur to//gal te 'dus ma byas pa zhig yin pa khas len na yang / dogs pa de bsal ba'i phyir yang phung po la sogs pa de bzhin nyid bzung ste/ rab 'byor de ji snyam du sems gzugs kyi de bzhin nyid gang yin pa de byang chub sems dpa' yin snyam mam zhes bya ba la sogs pa dris so//de nas gnas brtan rab 'byor gyis/ phung po dang / khams dang / skye mched dang / rten cing 'brel bar 'byung ba'i de bzhin nyid tha dad pa dang / 'dus pa de dag bsdus te/ byang chub sems dpa' la yod na ni byang chub sems dpa' gcig nyid la ngo bo nyid tshad med grangs med par 'gyur te/de lta bu'i rigs pa yang med do snyam nas bcom ldan 'das de ni ma lags so zhes de yang bkag go/ /de nas yang bcom ldan 'das kyis rab 'byor khyod kyis don gyi dbang yin pa nye bar bzung nas de skad zer zhes gtan tshigs dris pa dang / de'i gtan tshigs bcom ldan 'das byang chub sems dpa' shin tu ma mchis shing mi dmigs na/de la gzugs byang chub sems dpa' 'gyur ba lta ga la mchis zhes bya ba la sogs pa gsungs te/ ri bong gi rwa dang / mo gsham gyi bu la sogs pa la/ ring ba dang / thung ba dang / dkar sham dang /sngo bsangs la sogs pa'i rnam par rtog pa bzhin du sems can shin tu med pa las/ gzugs la sogs pa 'dus byas kyi ngo bo nyid dam/ de bzhin nyid 'dus ma byas kyi ngo bo nyid du yod pa ma yin no zhes bya ba'i tha tshig go/ /'di la gzugs kyi de bzhin nyid dmigs par lta ga la 'gyur zhes bya ba ni gzugs kyi de bzhin nyid ngo bo nyid du ga la 'gyur zhes bya ba'i tha tshig go//de ltar ngo bo nyid thams cad bkag nas/ bcom ldan 'das kyis sems can mi dmigs pa'i gdams pa mjug bsdu ba'i phyir rab 'byor legs so legs so/ /rab 'byor byang chub sems dpa' sems dpa' chen pos sems can mi dmigs par shes rab kyi pha rol tu phyin pa la de ltar bslab par bya'o zhes bya ba gsungs so//de nas yang bcom ldan 'das byang chub sems dpa' zhes bgyi ba de chos gang gi tshig bla dgas lags zhes 'phags pa gnas brtan rab 'byor gyis sngar tshig bla dgas zhus pa'i sgo nas byang chub sems dpa' yod pa lta bur bstan pa la/kha cig 'di snyam du gal te byang chub sems dpa' don dam par phung po la sogs pa'i ngo bo nyid med du zin kyang / kun rdzob kyi sgo nas phung po la sogs par btags pa'i ngo bo nyid du yod do snyam du sems te/de'i phyir btags pa de yang yod pa ma yin par bstan te/ de'i 'og tu tshig bla dgas mi dmigs pa'i gdams pa bstan pa'i phyir bcom ldan 'das kyis zhus pa'i tshig de nyid bzung ste/ rab 'byor de ji snyam du sems byang chub sems dpa' zhes bya ba 'di gzugs kyi tshig bla dgas yin snyam mam/ci byang chub sems dpa' 'di tshor ba'i tshig bla dgas yin snyam mam zhes bya ba la sogs pa dris so/ /gal te byang chub sems dpa' tshig bla dgas kyi ngo bo nyid yin na/ gzugs la sogs pa lnga dang / de dag rtag pa dang mi rtag pa la sogs pa bcu bzhi'i tshig bla dgas rnams kyi ngo bo nyid du 'gyur te de'i phyir/ci byang chub sems dpa' zhes bya ba gzugs kyi tshig bla dgas yin snyam mam/ ci byang chub sems dpa' zhes bya ba tshor ba'i tshig bla dgas yin snyam mam zhes so so'i tshig bla dgas rnams bzung ste dris so/ / de nas gnas brtan rab 'byor gyis gzugs la sogs pa kun brtags pa yin pa'i phyir shin tu med pa nyid yin na de dag gi tshig bla dgas dmigs par lta ga la 'gyur/ tshig bla dgas mi dmigs na byang chub sems dpa' lta ga la 'gyur zhes tshig bla dgas med pa dang /byang chub sems dpa' tshig bla dgas kyi ngo bo nyid med par bstan to/ /de nas bcom ldan 'das kyis tshig bla dgas rnams mi dmigs pa nyid la brten nas rab 'byor legs so legs so/ /rab 'byor byang chub sems dpa' sems dpa' chen po de ltar gzugs kyi tshig bla dgas mi dmigs pa zhes bya ba nas rnam par shes pa bde ba dang /sdug bsngal ba dang / bdag yod pa dang / bdag med pa dang / zhi ba dang / ma zhi ba dang / stong pa dang / mi stong pa dang / mtshan ma yod pa dang / mtshan ma med pa dang / smon pa yod pa dang /smon pa med pa'i tshig bla dgas mi dmigs par shes rab kyi pha rol tu phyin pa la bslab par bya'o zhes bya ba'i bar gyi tshig bla dgas rnams kyis gdams so/ /de ltar byang chub sems dpa' zhes bya ba don dam pa dang / kun rdzob tu yang med par bstan nas/ byang chub sems dpa' 'ba' zhig med par ma zad kyi/chos thams cad kyang med do zhes chos thams cad mi dmigs pa'i gdams pa bstan pa'i phyir bcom ldan 'das kyis gnas brtan rab 'byor gyis sngar zhus pa'i tshig bzung nas/ rab 'byor gang yang khyod 'di skad du zhes bya bas skabs phyi'o//gnas brtan rab 'byor gyis sngar bcom ldan 'das 'di lta ste/ byang chub sems dpa' zhes bgyi ba'i chos bdag gis yang dag par rjes su mi mthong zhes/ byang chub sems dpa' zhes bya ba'i chos yang dag par rjes su ma mthong ngo zhes smras pas don dam par sus kyang ci'ang ma mthong ngo zhes bstan to//de nas bcom ldan 'das kyis kyang don dam par yongs su ma grub pa'i gnas skabs na sus kyang ci yang ma mthong la de yang gzhan gyis mi mthong ngo zhes bstan pa'i phyir/ rab 'byor chos kyis chos kyi dbyings yang dag par rjes su mi mthong ngo //chos kyi dbyings kyis chos yang dag par rjes su mi mthong ngo zhes bya ba la sogs pa gsungs so/ / kun brtags pa'i chos kyis yongs su grub pa'i chos kyi dbyings yang dag par rjes su mi mthong la/ yongs su grub pa'i chos kyi dbyings kyis kyang / kun brtags pa'i chos yang dag par rjes su mi mthong ngo zhes bya ba ste/de nyid bstan pa'i phyir gzugs kyi khams kyis chos kyi dbyings yang dag par rjes su mi mthong ngo zhes bya ba la sogs pa gsungs so/ /de nas yang tha dad pa de'i gtan tshigs su de ci'i phyir zhe na 'dus byas ma gtogs par 'dus ma byas gdags par mi nus so zhes gsungs so//gal te 'dus byas kyi chos dang 'dus ma byas pa'i chos tha dad par gyur na/ de lta na ni gcig gis gcig mthong bar yang 'gyur ba zhig na/ 'dus byas rnams la 'dus ma byas zhes bya ba tha dad pa ci yang med do/ /de yang 'di ltar de bzhin nyid de nyid ma dag pa'i gnas skabs na ni 'dus byas zhes bya la/de nyid dag pa'i gnas skabs na ni 'dus ma byas zhes bya'o/ /dper na chu sngar ma dngas pa las phyis rab tu dngas par gyur pa la yang chu de nyid ces bya ba dang / ji ltar nam mkha' sprin la sogs pas dri ma can du gyur pa la phyis dri ma med par gyur pa la yang /nam mkha' de nyid ces bya ba de bzhin du/ sngar ma dag pa'i de bzhin nyid phyis shin tu rnam par dag par gyur pa na yang de nyid de bzhin nyid yin pas 'dus byas kyi chos rnams dang / 'dus ma byas pa rnams la ngo bo nyid tha dad pa med do//de bas na ji ltar bdag nyid kyis bdag yang dag par rjes su mi mthong ngo zhes bya ba de bzhin du kun brtags pa'i chos kyis yongs su grub pa'i chos kyi dbyings mi mthong la/ yongs su grub pa'i chos kyi dbyings kyis kyang kun brtags pa'i chos mi mthong ngo zhes bya'o/ / de ci'i phyir zhe na gzhan gyis ni gzhan mthong bar 'gyur gyi bdag nyid kyis ni bdag nyid mi mthong ngo zhes bya ba'i tha tshig go/ /chos thams cad mi dmigs par sbyor ba 'di'i phan yon bstan pa'i phyir/ rab 'byor de ltar byang chub sems dpa' sems dpa' chen po shes rab kyi pha rol tu phyin pa la spyod pa'i tshe/chos gang yang yang dag par rjes su mi mthong ste/ yang dag par rjes su mi mthong bas/ mi skrag /mi dngang / dngang bar mi 'gyur zhing / de'i sems zhum par mi 'gyur/ kun tu zhum par mi 'gyur/ yid la 'gyod pa skye bar mi 'gyur ro zhes bya ba gsungs so//chos thams cad mi dmigs par sbyor ba 'di'i 'bras bu yang dad pa mngon par 'phel ba dang / shes rab mngon par 'phel ba ste/ dad pa mngon par 'phel ba ni skrag pa la sogs pa med do/ /shes rab mngon par 'phel ba ni sems 'gong ba dang /'bying ba med do/ /dad pa de yang gnas gsum la lhag par 'gyur te/ chos zab mo bshad pa dang / shin tu bya dka' ba bsgrub pa dang / sangs rgyas kyi chos shin tu ngo mtshar rmad du byung ba rnams la bya ste/ gnas de gsum la dad pa mngon par 'phel na de la ma dad pa las byung ba'i skrag pa skye bar mi 'gyur zhing /zab mo'i gnas gsum po de dag nyid la mi shes pa las byung ba'i sems zhum pa skye bar mi 'gyur ro zhes bya ba'i tha tshig go/ /de la dang po 'byung ba'i tshe chung ngu'i gnas skabs la ni skrag pa zhes bya'o/ /bar gyi gnas skabs la ni dngang ba zhes bya'o//chen por gyur pa'i gnas skabs la ni dngang bar 'gyur ba zhes bya'o/ /de bzhin du sems 'gong ba la yang gnas skabs gsum du sbyar bar bya'o/ /de nas gzugs yang dag par rjes su mi mthong ngo zhes bya ba la sogs pas chos thams cad mi dmigs pa de nyid rgyas par bstan to// phung po dang / khams dang / skye mched dang rten cing 'brel bar 'byung ba'i yan lag rnams dang / 'dod chags dang / zhe sdang dang / gti mug rnams dang / bdag dang / sems can dang / srog la sogs pa bcu gsum dang / 'dod pa'i khams dang / gzugs kyi khams dang / gzugs med pa'i khams dang / nyan thos dang / nyan thos kyi chos rnams dang / rang sangs rgyas dang / rang sangs rgyas kyi chos rnams dang / byang chub sems dpa' dang / byang chub sems dpa'i chos rnams dang / sangs rgyas dang / sangs rgyas kyi chos rnams dang / byang chub ces bya ba ste/ chos de dag thams cad bstan to/ /phung po dang / khams dang / skye mched dang / rten cing 'brel bar 'byung ba'i yan lag rnams kyis ni phyi dang nang gi chos thams cad bsdus so/ /'dod chags dang /zhe sdang dang / gti mug rnams kyis ni nyon mongs pa dang / gnas ngan len gyi phyogs thams cad bsdus so/ /bdag dang sems can la sogs pas ni shin tu med cing btags pa'i chos rnams bsdus so/ /khams gsum gyis ni 'khor ba'i chos thams cad bsdus so//nyan thos la sogs pas ni rnam par byang ba dkar po'i chos thams cad bsdus so/ /sems dang sems kyi chos rnams zhes bya ba des ni 'jug pa'i rnam par shes pa drug dang / kun gzhi rnam par shes pa dang / de dang mtshungs par ldan pa rnams bstan to/ /yid dang yid kyi chos rnams zhes bya ba des ni nyon mongs pa'i yid dang /de dang mtshungs par ldan pa rnams bstan to/ /de ltar brtson pa'i gdams pa lnga pa ste rdzogs par byas nas de'i 'og tu brtson pa'i yon tan zhes bya ba drug pa bstan pa'i phyir/ bcom ldan 'das gzugs yongs su rtogs par 'tshal ba'i byang chub sems dpa' sems dpa' chen pos shes rab kyi pha rol tu phyin pa la bslab par bgyi'o zhes bya ba la sogs pa nas/'di ltar shes rab kyi pha rol tu phyin pa 'di las gang la byang chub sems dpa' sems dpa' chen po rnams kyis nyan thos dang /rang sangs rgyas dang / byang chub sems dpa' dang / sangs rgyas kyi sa la bslab par bya ba'i theg pa gsum po dag rgya cher bstan to zhes bya ba'i gzhung gi tshig mang pos bstan to/ /'di la yang phan yon rnam pa bzhi ste/ yongs su shes par bya ba'i chos rnams yongs su shes pa dang /spang bar bya ba rnams spangs pa dang / yongs su rdzogs par bya ba rnams bsgoms pas yongs su rdzogs pa dang / mngon sum du bya ba rnams thob pas mngon sum du byas pa'o/ /de la bcom ldan 'das gzugs yongs su rtogs par 'tshal bas zhes bya ba la sogs pas ni yongs su shes pa'i phan yon bstan te/phung po dang / khams dang / skye mched dang / rten cing 'brel bar 'byung ba'i yan lag rnams yongs su shes par bya'o zhes 'byung ba'i phyir ro / /'dod chags dang / zhe sdang dang /gti mug spang bar 'tshal bas zhes bya ba la sogs pa yongs su spangs pa'i yon tan bstan te/ 'dod chags dang / zhe sdang dang / gti mug dang / lta ba dang mi dge ba bcu'i las kyi lam rnams spang bar bya zhes 'byung ba'i phyir ro / /yongs su rdzogs par bya ba'i phan yon ni dge ba bcu'i las kyi lam dang /pha rol tu phyin pa la sogs pa sangs rgyas kyi chos ma 'dres pa'i mthar thug pa'i bar rnams yongs su rdzogs pa'i tshig gis bstan to/ /mngon sum du bya ba'i phan yon ni gzungs kyi sgo dang ting nge 'dzin rnams thob pa zhes bya ba'i tshig gis bstan to//de nas yang tha mar sems can thams cad kyi bsam pa yongs su rdzogs pa'i phan yon dang / dge ba'i rtsa ba thams cad yongs su rdzogs pa'i phan yon bstan te/ de gnyis kyang yongs su rdzogs pa'i mtshan nyid sngar smos pa de dag nyid de/ skyon chen po'i skabs dbye ba'i phyir tha mar bstan to//skyon chen po zhes bya ba ni spyi bor gyur pa'am/ gtso bor gyur pa'i nyes pa'am/ lhag mthong gi mtshan nyid spyi bor gyur pa'i gnas skabs kyi skyon yin pas skyon chen po zhes bya'o/ /mthun pa'i chos la sred pa zhes bya ba ni phyin ci log spong ba'i rgyur gyur pa'i phyir mthun pa zhes bya'o//chos su rnam par rtog pa dang bcas pa'i phyir chos la sred pa zhes bya'o/ /mngon par zhen cing gnas te kun tu shes pa'o zhes bya ba ni chen por gyur pa'i gnas skabs na rnam par rtog pa dang bcas pa'i lta bas mngon par zhen par byed do/ /'bring gi gnas skabs na sems kyis gnas par byed do//chung ngu'i gnas skabs na 'du shes kyis kun tu shes par byed do/ /chos rnam pa gsum ni phyin ci log dang mthun pa ste/ 'du shes phyin ci log dang / sems phyin ci log dang / lta ba phyin ci log go/ /chos la sred pa yang rnam pa gnyis su bstan te/yang dag pa ji lta ba bzhin du rnam par lta ba'i chos nyid dang / sgrub pa'i chos nyid do/ /skyon med pa zhes bya ba'i sgra ni med pa'i don te/ skyon gyi dngos po yod pa ma yin pa la skyon med pa zhes bya'o/ /nang stong pa nyid la phyi stong pa nyid yang dag par rjes su mi mthong ngo zhes bya ba la nang stong pa nyid ni nang stong pa nyid kyi ngo bo nyid kyis stong gi phyi stong pa nyid la sogs pa stong pa nyid gzhan dag gis stong par byas pa ni ma yin te/de bas na nang stong pa nyid la de stong par bya ba'i phyir/ phyi stong pa nyid mi tshol lo zhes bya ba'i tha tshig go/ /de bzhin du phyi stong pa nyid la yang nang stong pa nyid do//stong par bya ba'i phyir mi tshol te/ ngo bo nyid kyis stong pa nyid yin pa'i phyir ro zhes bya ba'i tha tshig go/ /de ltar slob pa'i tshe gzugs shes par bya ste/ de la rlom sems su yang mi bya'o zhes bya ba ni chos thams cad ngo bo nyid kyis stong pa'i phyir ming tsam du zad par shes par byas te/ming tsam du zad par shes pa des kyang chos rnams la rlom sems su mi bya ba'i tha tshig go/ /de ltar sangs rgyas kyi chos ma 'dres pa'i bar du bstan nas/ de nas yang byang chub sems dpas byang chub kyi sems kyis kyang rlom sems su mi bya'o zhes bya bas byang chub kyi sems yon tan dang bcas pa bstan to//'di ltar sems de ni sems ma yin te zhes bya ba la sems zhes bya ba'i sgra ni kun brtags pa'i sems la bya'o/ /yongs su grub pa bla na med pa yang dag par rdzogs pa'i byang chub kyi sems chos kyi skur gyur pa ni/yongs su rtog pa dang rnam par rtog pa'i mtshan nyid thams cad las 'das pas sems kyi mtshan nyid med pa'i phyir sems ma yin pa zhes bya'o/ /de bas na sems kyi rang bzhin 'od gsal ba zhes bya ba gsungs te/ chos kyi sku'i sems kyi rang bzhin ni 'od gsal ba'o/ / de bas na sems ma yin zhes bya ba ni kun brtags pa'i sems ma yin no zhes bya ba'i tha tshig go/ /'dod chags dang ldan pa yang ma yin bral ba yang ma yin zhes bya ba ni rang bzhin 'od gsal ba nyid ston te / sngon so so'i skye bo'i gnas skabs na 'dod chags dang zhe sdang la sogs pa skye ba'i dus na yang nam mkha' bzhin du dri ma thams cad kyis ma gos pa'i phyir bden pa yang ma yin zhes bya'o//phyis sangs rgyas su gyur pa'i tshe yang sems de glo bur gyi nyon mongs pa dang bral bas rang bzhin gyis rnam par dag pa nyid la gnas pa'i phyir dri ma de dag shin tu mi skye bas/sprin la sogs pa de dag dang mi ldan pa'i nam mkha' bzhin du 'od gsal ba'i phyir bral ba yang ma yin no zhes bya'o/ /gal te sngon ldan par gyur na ni phyis bral bar yang 'gyur ba zhig na/ 'di ltar sngon dri ma dang bcas pa'i gnas skabs na yang /rang bzhin gyis yongs su dag pas de dag dang ldan pa yang ma yin/ de'i phyir phyis kyang de dag dang bral ba yang ma yin no zhes bya'o/ /tshe dang ldan pa rab 'byor sems gang la sems ma yin no zhes bya ba'i sems de yod dam zhes bya ba ci las dgongs she na/ 'di ltar sems de sems ma yin no zhes bya ba la gnas brtan rab 'byor gyis de'i gnas skabs na yang sems zhes bya ba'i sgrar brjod pas sems de sems ma yin pa'i mtshan nyid du yod par gyur to snyam nas dris pa'o/ /de nas gnas brtan rab 'byor gyis de la bdag ni sems kyi mtshan nyid dam/sems ma yin pa'i mtshan nyid yod do zhes ni mi smra'o/ / brjod du med pa'i bdag nyid du rnam par gnas pa shin tu yongs su dag pa la tha dad du brjod pa'i dus na rnam pa gzhan du brjod du mi rung ba'i phyir/ sngon gyi shugs kyi rjes su 'brang bas sems zhes bya ba dang / sems ma yin zhes bya bar smra'o snyam du dgongs nas/ tshe dang ldan pa shA ri'i bu gang sems ma yin pa de la yod pa'ang med pas dmigs pa'am yod par 'gyur ram zhes bya ba gsungs te/ sems ma yin pa'i gnas skabs na yod pa'am med pa gnyis kar yang brjod par mi bya ste/ mtha' gnyis la brten par 'gyur ba'i phyir ro snyam du dgongs pa'o/ /de'i phyir tshe dang ldan pa rab 'byor de ni ma yin no zhes gsungs so/ /de nas yang gnas brtan rab 'byor gyis gal te de'i gnas skabs na mtha' gnyis kyis 'jigs pas gnyi ga ltar yang brjod du mi rung na/ ci'i phyir khyod 'di skad du 'dri zhes khyod kyis brgal zhing brtags pa 'di ci ga rigs sam zhes bya ba gsungs so/ /de skad gsungs pa dang gnas brtan shA ri'i bus gal te yod pa dang med pa dag med na/ de lta na ni sems ma yin pa'i mtshan nyid kyang med par 'gyur na/ ci'i phyir sems ma yin pa zhes smra snyam du dgongs nas/tshe dang ldan pa rab 'byor sems ma yin pa zhes bya ba de gang yin zhes gsungs so/ /de nas gnas brtan rab 'byor gyis/ de la bdag ni sems ma yin pa'i mtshan nyid gzhan du gyur pas bsams te sems ma yin pa zhes bya ba mi smra'i/ sngon dri ma dang bcas pa'i gnas skabs na gang 'gyur ba dang / rnam par rtog pa can yin pa'i phyir de la sems zhes bya ba da ni de lta bu med pa'i phyir sems zhes bya ba'i dngos po med pa tsam zhig khas blangs nas sems ma yin zhes bya ba brjod par bya'o zhes bstan pa'i phyir/ tshe dang ldan pa shA ri'i bu sems ma yin pa ni 'gyur ba med cing rnam par rtog pa med pa'o zhes bya ba gsungs so//sngon sems kyi gnas skabs ltar 'gyur ba dang / rnam par rtog pa can gyi dngos po med pa la 'dir sems ma yin pa zhes bya'o zhes bya ba'i tha tshig go/ /de skad smras pa dang gnas brtan shA ri'i bus ci de'i gnas skabs na sems kho na 'gyur ba med cing /rnam par rtog pa med pa yin nam/ 'on te chos thams cad kyang 'gyur ba med cing rnam par rtog pa med pa yin snyam nas/ tshe dang ldan pa rab 'byor ji ltar sems la 'gyur ba med cing / rnam par rtog pa med pa de bzhin du/ gzugs la yang 'gyur ba med cing rnam par rtog pa med pa yin nam zhes bya ba la sogs pa dris so/ /de nas gnas brtan rab 'byor gyis sangs rgyas kyi chos rnams nas bla na med pa yang dag par rdzogs pa'i byang chub kyi bar dag la yang 'gyur ba med cing rnam par rtog pa med do zhes bstan to//bcom ldan 'das kyi sras thugs las skyes pa zhes bya ba ni brdzus te skyes pa'i bu dag ni pha'i snying las skyes pas na thugs las skyes pa'i sras zhes bya'o/ /yang na sras kyi thu bo la bya ste/ de bzhin du gnas brtan 'di yang thugs kyi sems las skyes pas na thugs las skyes pas zhes bya ste/zhi gnas dang lhag mthong yid la byed pa las byung ba'i phyir ro/ /zhal nas skyes pa zhes bya ba ni bshad pa'i chos las byung ba'i phyir ro/ /chos las skyes pa zhes bya ba ni sgrub pa'i chos las byung ba'i phyir ro//chos kyi sprul pa zhes bya ba ni lam dang 'bras bu dang rtog pa'i chos rnams las skyes pa'i phyir ro/ /chos kyi bgo skal la spyod pa zhes bya ba ni mya ngan las 'das pa'i chos kyi bdag por 'gyur ba'i phyir ro/ /zang zing gi bgo skal la spyod pa ma yin zhes bya ba ni sred pa spangs pa'i phyir ro//chos rnams la mngon sum gyi ming dang ldan pa zhes bya ba ni chos nyid las gzhan dag gis mi 'phrogs pa'i phyir ro/ /lus mngon sum du gyur pa zhes bya ba ni gzugs dang / gzugs med pa'i snyoms par 'jug pa thob pa dang / chos kyi sku mngon sum du byas pa'i phyir ro//nyon mongs pa med par gnas pa rnams kyi mchog ces bya ba ni nyan thos kyi tshul gyi nyon mongs pa'i sgra dang mi mthun pa'i phyogs kyi snyoms par 'jug pa la nyon mongs pa med pa'i snyoms par 'jug pa zhes bya ste/ des gnas pa'i phyir nyon mongs pa med par gnas pa zhes bya'o//'di ni rnam par rtog pa'i spros pa thams cad la nyon mongs pa zhes bya ste/ de dag med pa'i phyir rnam par mi rtog pa'i snyoms par 'jug pa la nyon mongs pa med pa zhes bya ste/ des gnas pa la nyon mongs pa med par gnas pa zhes bya'o/ /de nas gnas brtan shA ri'i bus legs so zhes bya ba'i bsngags pa la sogs pas mngon par dga' bar byas nas de ltar brtson pa'i byang chub sems dpa' phyir mi ldog pa yin par bstan te/nyan thos dang rang sangs rgyas dang / byang chub sems dpa'i sa la slob pa thams cad la yang shes rab kyi pha rol tu phyin pa 'di'i phan 'dogs pa yin par brjod nas 'di ltar shes rab kyi pha rol tu phyin pa 'di las theg pa gsum rgya cher bstan to zhes rjes su yi rang bar byas te/brtson pa'i phan yon gyi mjug bsdus so/ /de ltar brtson pa'i phan yon bstan nas/ brtson pa la rnam pa du yod snyam pa la brtson pa'i rab tu dbye ba bstan dgos te/'di man chad nges par 'byin pa sgrub pa drug bstan to/ /nges par 'byin pa'i sgrub pa drug ni mtha' gnyis dang bral ba sgrub pa dang / mi gnas par sgrub pa dang / yongs su 'dzin pa med par sgrub pa dang / yongs su brtags pa'i sgrub pa dang /thabs la sgrub pa dang / myur du mngon par rdzogs par byang chub par sgrub pa ste/ 'di ltar de dag nges par 'byin pa yin par yang mjug bsdus nas byang chub sems dpa' sems dpa' chen po 'di ni phyir mi ldog pa'i sa la mi gnas pa'i tshul gyis gnas te/ rnam pa thams cad mkhyen pa nyid du nges par 'byung zhing /rnam pa thams cad mkhyen pa nyid la nye bar 'gyur ro zhes bya ba la sogs pas bcom ldan 'das nyid kyis bstan to/ /drug po de dag kyang 'og nas go rims bzhin du so so'i gnas gnas nas ston to/ /da ni gnas brtan rab 'byor gyis sgrub pa de drug gi skabs dbye ba'i phyir/bcom ldan 'das bdag gis byang chub sems dpa' dang / shes rab kyi pha rol tu phyin pa ma 'tshal/ ma dmigs yang dag par rjes su ma mthong na/ byang chub sems dpa' gang zhig shes rab kyi pha rol tu phyin pa gang la gdams shing rjes su bstan par bgyi'o zhes bya ba la sogs pa gsungs so//'dis rnam pa bzhi bstan te/ byang chub sems dpa' dang / shes rab kyi pha rol tu phyin pa dag mngon sum dang / rjes su dpag pa dang / gtan la dbab par bstan pa'i dbang gis tshad ma gsum po dag gis mi dmigs par gdams par 'os pa'i gang zag dang /gdams su rung ba'i shes rab kyi pha rol tu phyin pa dag kyang yang dag par rjes su ma mthong nas gang zag la sbyor bar bya snyam ste/ shes rab kyi pha rol tu phyin pa gang la gdams shing rjes su bstan par bgyi zhes bya ba'i mthar thug pa'i bar gyi gzhung gis gsol to//de nas yang gdams su rung ba'i dngos po gang yang tshad ma gsum gyis mi dmigs pas dngos po med pa'i chos kyis dngos po med pa'i chos la gdams par bya ba de nyid bdag gis 'gyod par 'gyur te/ chos dmigs su med pa'i phyir gdams pa mi nus so snyam nas/bdag gis dngos po ma 'tshal/ ma dmigs/ yang dag par rjes su ma mthong ste/ bcom ldan 'das bdag gis dngos po ma 'tshal/ ma dmigs yang dag par rjes su ma mthong bzhin du chos gang gis/ chos gang la rjes su gdams shing bstan par bgyi zhes bya ba nas 'di nyid bdag 'gyod par 'gyur ro zhes bya ba la thug pa'i bar gyi gzhung gis bstan to/ /'dir 'gyod pa zhes bya ba ni yid la gcags pa la mi bya'i/ nyes par byas pa'i dngos po la 'gyod pa zhes bya ba ste/ mi shes par byas te skyon du 'gyur ro snyam du dgongs pa'o//de nas yang de ltar sngar bstan pa'i gdams pa gzhag pas gang zag dang chos rnams dngos po med na / ming tsam du zad par bzung ste/ ji ltar gang zag dang chos rnams la 'phel ba dang 'grib par bya snyam nas/ bcom ldan 'das de ltar bdag gis chos thams cad ma 'tshal/ma dmigs yang dag par rjes su ma mthong na/ byang chub sems dpa' zhes bgyi ba 'am/ shes rab kyi pha rol tu phyin pa zhes pa'i ming tsam gyis ji ltar 'phel ba dang / 'grib par bgyi zhes bya ba'i gzhung gis bstan to//yang dag par yod pa ma yin pa la sgro 'dogs pa ni 'phel ba zhes bya'o/ /yang dag par yod pa la skur pa 'debs pa ni 'grib pa zhes bya'o/ /de nas ming de nyid kyang dngos po med par bstan pa'i phyir/ /bcom ldan 'das ming de yang gnas pa ma mchis thug pa ma mchis te/de ci'i slad du zhe na/ ming de ma mchis pas zhes bya ba gsungs te/ gnas pa ma mchis zhes bya ba ni 'dus byas kyi chos de ltar gnas pa med pa'o/ /thug pa ma mchis zhes bya ba ni nam mkha' la sogs pa 'dus ma byas pa lta bur gnas pa med ces bya ba'i tha tshig go//de ltar bstan nas/ gnas brtan gyis chos gzhan re re la yang sgro btags pa dang skur pa btab pa'i mtha' spangs par yang dag par mthong nas byang chub sems dpa' dang shes rab kyi pha rol tu phyin pa zhes bya ba'i ming du gdags par 'os pa'i chos yang dag par rjes su ma mthong bar bstan pa'i phyir/bcom ldan 'das bdag gis gzugs kyi 'phel ba dang / 'grib pa ma dmigs/ yang dag par rjes su ma mthong zhes bya ba la sogs pa gsungs te/ phung po rnams dang khams rnams dang / skye mched rnams dang / reg pa drug dang / tshor ba'i tshogs drug dang / khams drug dang / rten cing 'brel bar 'byung ba'i yan lag rnams dang / 'dod chags dang / zhe sdang dang / gti mug dang / kun nas ldang ba rnams dang / sgrib pa rnams dang / bag la nyal ba rnams dang / kun tu sbyor ba rnams dang / lta bar gyur pa rnams dang /bdag dang / sems can dang / srog la sogs pa bcu gsum dang / pha rol tu phyin pa thams cad dang / stong pa nyid thams cad dang / byang chub kyi phyogs dang mthun pa'i chos rnams dang / rnam par thar pa'i sgo gsum dang / bsam gtan bzhi dang / tshad med pa bzhi dang / gzugs med pa'i snyoms par 'jug pa rnams dang / sangs rgyas dang / chos dang / dge 'dun dang / tshul khrims dang / gtong ba dang / lha dang lus su gyur pa la skyo ba dang / dbugs rngub pa dang / 'byung ba dang / 'chi ba rjes su dran pa dang / mig lnga dang / mngon par shes pa drug dang / stobs bcu dang / mi 'jigs pa rnams dang / so so yang dag par rig pa rnams dang / sangs rgyas kyi chos ma 'dres pa rnams dang / rmi lam dang / sgyu ma dang / smig rgyu dang / dri za'i grong khyer dang / brag ca dang / mig yor dang / gzugs brnyan dang / sprul pa lta bu'i nye bar [(]lin [,]len [)]pa'i phung po rnams dang / dben pa dang / zhi ba dang / skye ba med pa dang / 'gag pa med pa dang / 'byung ba med pa dang / mngon par 'du bya ba med pa dang / kun nas nyon mongs pa med pa dang / rnam par byang ba med pa dang / de bzhin nyid dang / ma nor ba de bzhin dang / gzhan ma yin pa de bzhin nyid dang / chos nyid dang / chos kyi dbyings dang / chos gnas pa nyid dang / chos skyon med pa nyid dang / yang dag pa'i mtha' dang / bsam gyis mi khyab pa'i dbyings dang / dge ba dang / mi dge ba dang kha na ma tho ba dang bcas pa dang /kha na ma tho ba med pa dang / zag pa dang bcas pa dang / zag pa med pa dang / nyon mongs pa dang / nyon mongs pa med pa dang / 'jig rten pa dang / 'jig rten las 'das pa dang / 'dus byas dang / 'dus ma byas dang / kun nas nyon mongs pa dang /rnam par byang ba dang / 'khor ba dang / mya ngan las 'das pa'i chos rnams dang / 'das pa dang / ma 'ongs pa dang / da ltar byung ba rnams ni/ bdag cag gi sangs rgyas bcom ldan 'das dang / phyogs bcu gang gA'i klung gi bye ma snyed kyi 'jig rten gyi khams kyi nyan thos dang /byang chub sems dpa'i dge 'dun dang bcas pa'i de bzhin gshegs pa rnams kyis kyang chos thams cad kyi de bzhin nyid so sor bstan to/ /de bzhin nyid dang ma nor ba de bzhin nyid ces bya ba la sogs pa'i tshig rnams la bye brag ci yod ce na/ yongs su grub pa'i 'jug pa tha dad pas tha dad de/'di la yongs su grub pa'i mtshan nyid ni rnam pa dgu ste/ 'jigs pa med par yongs su grub pa dang / phyin ci ma log par yongs su grub pa dang / 'gyur ba med par yongs su grub pa dang / ngo bo nyid du yongs su grub pa dang / rnam par byang ba'i chos thams cad kyi rgyu nyid yongs su grub pa dang /dus thams cad du yongs su grub pa dang / phyir mi ldog par yongs su grub pa dang / de kho na nyid du yongs su grub pa dang / rtog ge'i lam las 'das par yongs su grub pa dang / 'jigs pa med par yongs su grub pa ni de bzhin nyid ces gsungs pa ste/rtag tu de bzhin nyid du gnas shing mi 'jigs pa'i phyir ro/ /phyin ci ma log pa yongs su grub pa ni ma nor ba de bzhin nyid ces gsungs pa ste/ nor ba dang phyin ci log tu gyur pa med pa'i phyir ro/ /'gyur ba med par yongs su grub pa ni gzhan ma yin pa de bzhin nyid ces gsungs pa ste/gzhan du 'gyur ba med pa'i phyir ro/ /ngo bo nyid du yongs su grub pa ni chos nyid ces gsungs pa ste/ chos thams cad kyi spyi'i mtshan nyid stong pa nyid kyi ngo bo nyid yin pa'i phyir ro/ /rnam par byang ba'i chos thams cad kyi rgyu nyid yongs su grub pa ni chos kyi dbyings zhes gsungs pa ste/stobs bcu dang mi 'jigs pa la sogs pa sangs rgyas kyi chos rnams kyi dbyings dang / rgyu yin pa'i phyir ro/ /dus thams cad du yongs su grub pa'i mtshan nyid ni chos gnas pa nyid ces gsungs te / de bzhin gshegs pa rnams byung yang rung ma byung yang rung /chos rnams kyi chos nyid ni gnas pa nyid do zhes gsungs pas/ dus thams cad du gnas pa'i phyir ro/ /phyir mi ldog par yongs su grub pa ni chos skyon med pa nyid ces gsungs pa ste/ sa dang po yan chad de rab tu rtogs pas/ yang dag pa nyid du nges pa la zhugs par 'gyur te/yang dag par rdzogs pa'i byang chub skyon med pa la zhugs par gyur pa'i phyir ro/ /de kho na nyid du yongs su grub pa ni yang dag pa'i mtha' zhes gsungs pa ste/ yang dag pa nyid de kho na nyid phyin ci ma log pa'i mthar thug pa'i phyir ro/ / rtog ge'i lam las 'das par yongs su grub pa ni/ bsam gyis mi khyab pa'i dbyings zhes gsungs pa ste/ brjod du med pa dang / so sor rang gis rig pa yin pas rjes su dpag pa thams cad kyi spyod yul las 'das pa'i phyir ro/ /gzhan yang kun brtags pa'i chos thams cad ni rmi lam lta bu ste/rab tu rtogs par gyur pa rnams la/ de ltar mi 'gyur bas de las bzlog pa la ni de bzhin nyid ces bya ste/ dus thams cad du de bzhin nyid yod pa'i phyir ro/ /chos thams cad ni sgyu ma lta bu ste/ nor bar snang ba'i phyir ro/ /de las bzlog pa ni ma nor ba de bzhin nyid ces bya ste/ma nor ba'i ngo bo nyid yin pa'i phyir ro/ /chos thams cad ni smig rgyu lta bu ste/ gzhan du gnas la gzhan du snang ba'i phyir ro/ /de las bzlog pa ni gzhan ma yin pa de bzhin nyid ces bya ste/ dus thams cad du gzhan du 'gyur ba med pa'i phyir ro/ / chos thams cad ni chu zla lta bu ste/ chos de'i bdag nyid ma yin la/ chos de'i bdag nyid du so sor snang ba'i phyir ro/ /chu zla ni zla ba 'am yang dag pa ma yin te/ de las bzlog pa ni chos nyid ces bya ste/ don dam pa'i ngo bo nyid yin pa'i phyir ro/ /chos thams cad ni dri za'i grong khyer lta bu ste/don med pa'i phyir ro/ /de las bzlog pa ni chos kyi dbyings zhes bya ste/ sangs rgyas kyi chos rnams kyi rgyu yin zhing don yod pa'i phyir ro/ /chos thams cad ni brag ca lta bu ste/ yun thung ba'i phyir ro/ /de las bzlog pa ni chos gnas pa nyid ces bya ste/gnas pa'i mtshan nyid yin pa'i phyir ro/ /chos thams cad ni mig yor lta bu ste/ ma nges pa'i ngo bo nyid yin pa'i phyir ro/ /de las bzlog pa ni chos skyon med pa nyid ces bya ste/ nges pa'i ngo bo nyid yin pa'i phyir ro/ /chos thams cad ni gzugs brnyan lta bu ste/ rnam par shes pa'i rnam par 'phos pa'i phyir ro/ /de las bzlog pa ni yang dag pa'i mtha' zhes bya ste/ don dam pa yin pa'i phyir ro/ /chos thams cad ni sprul pa lta bu ste/ sems kyi 'du byed las byung ba'i phyir ro/ /de las bzlog pa ni bsam gyis mi khyab pa'i dbyings zhes bya ste/ yid kyi spyod yul thams cad las 'das pa'i phyir ro/ /don dam par ni thams cad kyang yongs su grub pa'i chos kyi rnam grangs so/ /de ltar chos thams cad la 'phel ba dang / 'grib pa dmigs su med pas/ sgro 'dogs pa dang skur pa 'debs pa'i mtha' yongs su spang bar bstan nas/da ni ming dmigs su med par bstan pa'i phyir bcom ldan 'das gang yang 'di lta ste/ byang chub sems dpa' zhes chos nyid kyi brdar gdags pa de yang / phung po rnams sam/ khams sam/ skye mched rnams gang du yang brjod du ma mchis so zhes bya ba la sogs pa gsungs te/'dis ni rnam pa gnyis bstan to/ /gang du yang brjod par bgyi ba ma lags zhes bgyi ba'i 'gres kyis ni ming dang phung po dang khams dang skye mched la sogs pa'i chos rnams kyi tshogs su bsdur med par bstan to/ /gang yang brjod du ma mchis zhes bya ba'i 'gres kyis dge ba dang mi dge ba dang /kha na ma tho ba dang bcas pa dang / kha na ma tho ba med pa la sogs pa'i chos nyid kyi nang du bsdur med par bstan to/ /gang gis kyang brjod du ma mchis pa lags so zhes bgyi ba'i 'gres kyis shin tu med kyang / 'jig rten na grags pa rmi lam dang /sgyu ma dang / smig rgyu dang / dri za'i grong khyer dang / brag ca dang / mig yor dang / gzugs brnyan dang / sprul pa rnams dang / kun brtags pa tsam gyi mtshan nyid du grags pa dang / sa dang / chu dang / me dang / rlung rnams dang / yongs su grub pa'i mtshan nyid du grags pa/ de bzhin nyid dang / ma nor ba de bzhin nyid dang / gzhan ma yin pa de bzhin nyid dang / chos nyid dang / chos kyi dbyings dang / chos gnas pa nyid dang / chos skyon med pa nyid dang / yang dag pa'i mtha' dang / byang chub sems dpa'i chos nyid du grags pa/ pha rol tu phyin pa thams cad dang /nyan thos kyi chos nyid du grags pa'i tshul khrims dang / ting nge 'dzin dang / shes rab dang / rnam par grol ba dang / rnam par grol ba'i ye shes mthong ba dang / rgyun tu zhugs pa dang / lan cig phyir 'ong ba dang / phyir mi 'ong ba dang / dgra bcom pa dang /rang sangs rgyas rnams dang / rgyun tu zhugs pa la sogs pa'i chos rnams dang / byang chub sems dpa' rnams dang / byang chub sems dpa'i chos rnams dang / sangs rgyas rnams dang / sangs rgyas kyi chos rnams kyi ming smos nas bstan to// // bam po dgu pa/ de nas yang mtha' gnyis dang bral bar sgrub pa de nyid tha mar mjug bsdus nas nges par 'byung ba bstan pa'i phyir/ byang chub sems dpa' sems dpa' chen po de ni phyir mi ldog pa'i sa la mi gnas pa'i tshul gyis gnas nas rnam pa thams cad mkhyen pa nyid du nges par 'byung bar rig par bgyi'o zhes bya ba'i mthar thug pa'i bar gyi gzhung gis bshad do//de ltar mtha' gnyis dang bral bar sgrub pa'i chos rnams dang / ming smos te bstan nas/ de'i 'og tu mi gnas par sgrub pa bstan pa'i phyir/ bcom ldan 'das gzhan yang byang chub sems dpa' sems dpa' chen po shes rab kyi pha rol tu phyin pa la spyod pa'i tshe/gzugs la gnas par mi bgyi'o zhes bya ba la sogs pa gsungs so/ /sgrub pa 'di yang rnam pa gnyis su bstan te/ chos rnams la mi gnas pa dang / chos nyid la mi gnas pa'o/ /de la chos rnams la mi gnas pa ni gzugs la gnas par mi bgyi'o zhes bya ba nas/bcom ldan 'das rnam grangs des na byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ yi ge rnams la gnas par mi bgyi'o zhes bya ba'i mthar thug pa'i bar gyi gzhung gis bshad do//chos nyid la mi gnas pa ni/ gzhan yang byang chub sems dpa' sems dpa' chen po shes rab kyi pha rol tu phyin pa la spyod pas gzugs mi rtag go zhes bgyi bar gnas par mi bgyi ste zhes bya ba nas/ shes rab kyi pha rol tu phyin pa yongs su rdzogs par ma gyur par rnam pa thams cad mkhyen pa nyid du nges par 'byung bar mi 'gyur ro zhes bya ba'i mthar thug pa'i bar gyi gzhung gis bshad do//mtha' gnyis dang bral bar sgrub pa'i 'gres kyis tha mar phyir mi ldog pa'i sa la mi gnas pa'i tshul gyis gnas te/ rnam pa thams cad mkhyen pa nyid du nges par 'byung ngo zhes bya ba las/mi gnas pa'i tshul gyis zhes smos pa'i phyir tshig tha ma'i gnas skabs su mi gnas par sgrub pa'i 'gres smos pa yin par sbyar bar bya'o/ /da ni mi gnas par sgrub pa thams cad kyi 'gres dang po bshad par bya ste/ gzugs la gnas par mi bgyi'o/ /tshor ba dang / 'du shes dang / 'du byed rnams dang / rnam par shes pa la gnas par mi bgyi'o zhes bya bas phung po lnga la gnas par mi bya ba bstan nas/ de nas yang so sor gnas par mi bya ba'i gtan tshigs bstan pa'i phyir gzugs las brtsams te/bcom ldan 'das 'di ltar gzugs ni gzugs kyis stong te / gzugs kyi stong pa nyid gang lags pa de yang gzugs ma lags/ stong pa nyid las gud na yang gzugs ma mchis te/ gzugs nyid kyang stong pa nyid/ stong pa nyid kyang gzugs so zhes bya ba gsungs so//dgongs pa ni 'di lta ste sngar gzugs la gnas par mi bgyi'o zhes bya ba gsungs nas/ 'di ltar gzugs ni gzugs kyis stong ngo zhes bya ba gsungs pa 'di la gzugs kyang rnam pa gsum ste/ kun brtags pa'i gzugs dang / rnam par brtags pa'i gzugs dang /chos nyid kyi gzugs so/ /de la byis pa so so'i skye bo rnams kyi gzugs su rung ba la sogs pa'i mtshan nyid du bzung ba dngos po'i gzugs gang yin pa de ni kun brtags pa'i gzugs zhes bya'o/ /de nyid rnam pa gang gi don du snang ba'i rnam par shes pa'i yul du gyur pa de ni rnam par brtags pa'i gzugs zhes bya'o//kun brtags pa dang / rnam par brtags pa de gnyis kyi rnam pa dang bral ba yongs su grub pa de bzhin nyid tsam du zad pa gang yin pa de ni chos nyid kyi gzugs zhes bya'o/ /de la yongs su grub pa chos nyid kyi gzugs gang yin pa de ni kun brtags pa'i gzugs su yod pa la sogs pa'i mtshan nyid dang /gzugs su rnam par brtags pa yul gyi rnam par snang ba'i gzugs kyis stong pas na/ stong pa zhes bya'o/ /de skad bshad pa dang / kun brtags pa dang rnam par brtags pa'i gzugs kyis stong pa'i chos nyid kyi gzugs gang yin pa de la ci gzugs kyi mtshan nyid gzhan zhig kyang yod dam/gang gi phyir de la yang gzugs zhes bya snyam du the tshom za ba de'i phyir gzugs kyi stong pa nyid gang lags pa de yang gzugs ma lags zhes bya ba bshad de/ kun brtags pa dang rnam par brtags pa'i gzugs kyis stong pa gang yin pa de nyid yongs su grub pa'i mtshan nyid chos kyi gzugs de ni gzugs kyi ngo bo nyid ma yin te/rnam pa thams cad du gzugs kyi rnam pa las dben pa'i phyir ro zhes bya ba'i tha tshig go/ /de skad bshad pa dang gal te gzugs rnam pa thams cad du med na/'o na gang gis stong na 'di la stong pa nyid ces bya/ yul med pa'i stong pa nyid kyang med la/ chos las chos nyid gzhan pa yang mi rigs pa dang / chos nyid las chos gzhan pa yang mi rigs so snyam du the tshom za ba de'i phyir stong pa nyid las gud nas yang gzugs ma mchis zhes bya ba gsungs te /ji skad bstan par 'gyur zhe na/ de ni 'di ltar chu ma dngas pa la/ ma dngas pa'i gnas skabs na ni rnyog pa zhes bya la/ dngas pa'i gnas skabs na ni chu dngas pa zhes bya ba dang / ji ltar nam mkha' ma dngas pa'i gnas skabs na ni rmugs pa zhes bya la/dngas pa'i gnas skabs na ni nam mkha' gsal ba zhes bya ba de bzhin du/ stong pa nyid 'di yang ma dag pa'i gnas skabs na ni byis pa so so'i skye bo dang tha dad par ma gyur pa'i phyir/ gzugs la sogs pa'i tshig tu brjod la dag pa'i gnas skabs na ni stong pa nyid ces bya'o//de bas na stong pa nyid las tha dad par gyur pa'i gzugs la sogs pa'i chos ni med do zhes bya ba'i tha tshig go/ /de ltar chos dang chos nyid dag la tha dad pa med par gyur pas/ gang gi tshe chos nyid kyis chos brjod pa de'i tshe gzugs nyid kyang stong pa nyid ces bya'o//gang gi tshe chos kyis chos nyid brjod par gyur pa de'i tshe stong pa nyid kyang gzugs so zhes bya'o/ /yang na gzugs nyid kyang stong pa nyid/ stong pa nyid kyang gzugs so zhes bya ba la stong pa nyid ni de bzhin nyid de chos nyid kyi gzugs la bya'o/ /de ltar kun brtags pa dang rnam par brtags pa'i gzugs de dag shin tu med pa dang /yongs su grub pa'i gzugs la yang gnas su mi rung ba'i phyir / gzugs la gnas par mi bgyi'o zhes bya ba gsungs te/ de bzhin du tshor ba la sogs pa la yang sbyar bar bya'o/ /yi ge rnams la gnas par mi bgyi zhes bya ba ni a zhes bya ba la sogs pa yi ge'i 'bru rnams la gnas par mi bya'o//yi ge mngon par sgrub pa la gnas par mi bgyi zhes bya ba ni a zhes bya ba la sogs pa'i yi ge'i 'bru rnams la brten nas skye ba med pa'i don gyi rjes su 'brang ba'i gzungs kyi shes pa skye ba gang yin pa de la yi ge mngon par sgrub pa zhes bya ba'i sgrar brjod de/de la yang gnas par mi bya'o zhes bstan to/ /gzungs kyi shes pa de yang gzod ma nas ma skyes pa'i phyir/ a zhes bya ba ni chos thams cad kyi sgo zhes bya ba de lta bur brjod pa las mngon par 'grub pa'o/ /tshig tu brjod pa de yang byang chub sems dpa' dbang po rab tu rno ba kha cig gis ni skye ba med pa'i don gcig la brten te zhugs na mngon par rdzogs par byang chub pa'i rkyen du 'gyur ro//dbang po bar ma rnams kyis ni yi ge gnyis la brten nas/ tshig tu brjod pa gnyis la goms par byas pa las 'gyur ro//dbang po rtul po rnams kyis ni tshig tu brjod pa du ma la brten nas goms par byas na mngon par rdzogs pa'i byang chub kyi rkyen du 'gyur te/ de bas na gcig brjod pa dang gnyis brjod pa dang mang po brjod pa la gnas par mi bya'o zhes bya ba gsungs so/ /chos nyid mi gnas pa'i 'gres la yang /gzugs mi rtag pa ni gzugs mi rtag pa'i ngo bo nyid kyis stong ste zhes bya ba la nyan thos dang rang sangs rgyas rnams kyi mi rtag pa ni skye ba dang / 'gag pa'i mtshan nyid de / kun brtags pa'i mtshan nyid do/ /byang chub sems dpa' rnams kyi mi rtag pa'i mtshan nyid la brten nas med pa'i don ni mi rtag pa'i don to zhes bshad de/'di ltar rtag tu yod pa la rtag pa zhes bya'o/ /de las brjod pa rtag tu med cing dus thams cad du med pa la ni byang chub sems dpa' rnams kyi mi rtag pa zhes bya'o/ /de bas na med pa'i mtshan nyid ni don dam par mi rtag pa nyid do//gzugs mi rtag pa ni gzugs mi rtag pa'i ngo bo nyid kyis stong ngo zhes bya ba ni byang chub sems dpa' rnams kyi don dam par mi rtag pa gang yin pa de nyan thos dang / rang sangs rgyas rnams kyis kun brtags pa'i skye ba dang 'gag pa'i mtshan nyid kyi mi rtag pa'i ngo bo nyid kyis stong pa'o//de ci'i phyir zhe na/ gzugs mi rtag pa'i stong pa nyid gang lags pa de yang gzugs mi rtag pa nyid ma lags so zhes bya ba gsungs te/ 'di ltar don dam par gzugs mi rtag pa nyid kyi de bzhin nyid gang yin pa de/ kun brtags pa'i gzugs mi rtag pa nyid kyi ngo bo nyid ma yin te/de bas na don dam pa'i gzugs mi rtag pa nyid ni kun brtags pa'i gzugs mi rtag pa nyid kyis stong ngo zhes bya ba'i tha tshig go/ /de lta na ni chos las chos nyid tha dad par 'gyur ro snyam pa la/ stong pa nyid las gud na yang gzugs mi rtag pa ma mchis zhes bya ba gsungs te/de bzhin nyid las gud na kun brtags pa'i gzugs mi rtag pa nyid yod pa ma yin te/ chu dngas pa dang / nam mkha' bzhin no zhes bya ba'i tha tshig go/ /gang gi phyir tha dad par gyur pa med pa de'i phyir stong pa nyid kyang gzugs mi rtag pa nyid do zhes bya ba gsungs te/gzugs mi rtag pa'i stong pa nyid la stong pa nyid kyi sgrar brjod ces bya ba'i tha tshig go/ /de bzhin du thams cad la yang sbyar bar bya'o/ /de ltar mi gnas par sgrub pa bstan nas/ gnas pa'i nyes dmigs bstan pa'i phyir/ bcom ldan 'das gzhan yang byang chub sems dpa' sems dpa' chen po shes rab kyi pha rol tu phyin pa la spyod pa'i tshe/gal te thabs mi mkhas pas bdag tu 'dzin pa dang / bdag gir 'dzin par lhung ba'i yid kyis gzugs la gnas na de gzugs mngon par 'du bgyi ba la spyod kyi/ shes rab kyi pha rol tu phyin pa la mi spyod do zhes bya ba la sogs pa gsungs te/gal te thabs mi mkhas pas/ tshul bzhin ma yin par bzung nas chos rnams dngos po med pa'i ngo bo nyid kyi mtshan nyid du mi shes pas bdag ni gzugs kyi ngo bo nyid yin no zhes bya ba'am/ gzugs 'di ni bdag yin no zhes bya ba'am/'di ni gzugs su rung ba'i mtshan nyid do zhes bya bar gzugs la gnas na de gzugs mngon par 'du byed pa ste gzugs su rnam par rtog pa'i rjes su song ba 'du byed kyi chos la spyod pa yin gyi/ stong pa nyid kyi mtshan nyid kyi rjes su 'brang ba shes rab kyi pha rol tu phyin pa la spyod pa ni ma yin no zhes bya ba'i tha tshig go//mngon par 'du byed pa la spyod pa'i nyes dmigs bstan pa'i phyir/ mngon par 'du bgyi ba la spyod pa ni shes rab kyi pha rol tu phyin pa la bsgom pa ma lags so zhes bya ba la sogs pa gsungs so/ /ci'i phyir de ltar thabs mi mkhas pas bdag tu 'dzin pa dang /bdag gir 'dzin par lhung bas mngon par 'du byed pa la spyod na/ shes rab kyi pha rol tu phyin pa la spyod pa dang / yongs su 'dzin pa med pa'i rnal 'byor la 'jug pa dang / yongs su rdzogs pas nges par 'byung ba rnams thob par mi 'gyur zhes bya snyam pa la/bcom ldan 'das 'di ltar gzugs ni yongs su gzung ba ma mchis zhes bya ba la sogs pa gsungs te/ 'di ni yongs su 'dzin pa med par sgrub pa zhes bya'o/ /sgrub pa 'di yang rnam pa gsum gyis bstan te/ chos yongs su mi 'dzin pa dang /mtshan ma yongs su mi 'dzin pa dang / shes pa yongs su mi 'dzin pa'o/ /de las chos yongs su mi 'dzin pa'i 'gres ni/ gzugs ni yongs su bzung ba ma mchis pa dang zhes bya ba nas bzung ste/ rnam pa thams cad mkhyen pa nyid de yang nang stong pa nyid nas/ dngos po med pa'i ngo bo nyid stong pa nyid kyi slad du yongs su gzung ba ma mchis pa zhes bya ba'i bar du'o//mtshan ma yongs su mi 'dzin pa'i 'gres ni de ci'i slad du zhe na/ de ni mtshan mar brjod pa ma lags te zhes bya ba nas bzung ste/ de de ltar zhugs nas gzugs yongs su ma bzung / tshor ba yongs su ma bzung ba nas/yang dag pa'i mtha' yongs su ma bzung zhes bya ba'i bar du'o/ /shes pa yongs su mi 'dzin pa'i 'gres ni/ de ci'i slad du zhe na/ 'di ltar des rang gi mtshan nyid kyis stong pa'i chos thams cad la yongs su 'dzin pa mi dmigs te zhes bya ba nas bzung ste/ bcom ldan 'das chos thams cad yongs su gzung ba ma mchis pa'i slad du/ 'di ni byang chub sems dpa' sems dpa' chen po'i shes rab kyi pha rol tu phyin pa'o zhes bya ba'i bar du'o/ /de la dang po chos yongs su mi 'dzin pa'i 'gres las / gzugs ni yongs su gzung ba ma mchis pa zhes bya ba ni/bdag gi phyir chos nyid kyi gzugs la ni bdag tu 'dzin pa dang / bdag gir 'dzin par lhung ba'i rgyu gang gis kyang / gzugs su gzung ba med de/ de'i phyir mngon par 'du byed pa la spyod na don dam pa'i shes rab kyi pha rol tu phyin pa'i spyad pa la spyod pa ma yin no zhes ston to//ci'i phyir gzugs yongs su gzung ba med ces bya zhe na/ 'di ltar gzugs kyi yongs su gzung ba ma mchis pa gang lags pa de yang rang bzhin stong pa nyid kyi slad du gzugs ma lags zhes bya ba gsungs so/ /'di la yongs su gzung ba med ces bya ba ni yongs su bsgrub pa'i mtshan nyid la bya ste/de skad brjod de chos nyid kyi gzugs kyis yongs su gzung ba med pa yongs su grub pa'i ngo bo nyid gang yin pa de ni kun brtags pa'i gzugs kyi ngo bo nyid ma yin te de'i phyir/ chos nyid kyi chos ni yongs su gzung ba med do zhes bya bar sbyar ro//rang bzhin stong pa nyid kyi slad du zhes bya ba ni gzugs la sogs pa'i chos kyi rnam pa gang yang sngar yongs su bzung nas phyis gnyen po gzhan gang gis kyang stong par bya ba ni med kyi/ de'i rang bzhin ni stong pa nyid do zhes bya ba'i tha tshig go/ /de bzhin du tshor ba la sogs pa dang yang dag pa'i mtha'i bar dag la yang sbyar bar bya'o//'di ni byang chub sems dpa' sems dpa' chen po ting nge 'dzin gyi dkyil 'khor chos thams cad yongs su ma bzung ba zhes bgyi ba ste/ rgya che ba phul du bgyi ba/ tshad ma mchis pa/ nges pa/ mi 'phrogs pa/ nyan thos dang / rang sangs rgyas thams cad dang thun mong ma lags pa zhes bya ba ni de'i chos bstan pa'o/ /ting nge 'dzin gyi dkyil 'khor de la gnas zhes bya ba la sogs pa ni phan yon bstan pa'o/ /rnam pa thams cad mkhyen pa nyid de yang / nang stong pa nyid nas/dngos po med pa ngo bo nyid stong pa nyid kyi slad du yongs su gzung ba ma mchis pa'o zhes bya ba ni gang gi phyir stong pa nyid thams cad kyi ye shes yongs su sbyangs pa chos thams cad dmigs su med pa'i mthar phyin pa ni rnam pa thams cad mkhyen pa nyid ces bya bar 'gyur te/ de bas na de yang yongs su ma bzung ba zhes bstan to//de'i phyir de ni mtshan mar brjod pa ma lags zhes bya ba gsungs te/ rnam pa thams cad mkhyen pa nyid kyang rnam pa thams cad mkhyen pa nyid kyi mtshan ma dang bral ba ste/ mtshan ma'i rnam pa yong ye med do zhes bya ba'i tha tshig go/ /'di ltar mtshan ma ni nyon mongs pa ma lags pa'i slad du zhes bya ba ni byang chub sems dpa' rnams kyi rnam par rtog pa'i mtshan ma nyid sems kyi rgyud nyon mongs par 'gyur bas na nyon mongs pa zhes bya bar bstan to//de dag gis kyang mtshan ma yongs su mi 'dzin pa'i 'gres bstan te/ mtshan ma gang zhe na/ gzugs ni mtshan ma'o zhes bya ba la sogs pa'o/ /de dag thams cad kyang don dam par byang chub sems dpa' rnams kyi nyon mongs pa yin pas spang bar bya ba yin te/ 'dod chags la sogs pa de lta ma yin no zhes bya ba'i tha tshig go/ /gal te shes rab kyi pha rol tu phyin pa mtshan mar bzung ba zhig lags na ni kun tu rgyu bzo sbyangs kyang zhes bya ba la sogs pa ni mtshan ma med par sgrub pa nyid gsal bar byed pa ste/rnam pa thams cad mkhyen pa'i ye shes 'di la kun tu rgyu bzo sbyangs kyang mos par 'gyur zhes bya ba ni kun tu rgyu de sngon mtshan ma med par sgrub pa ma gtogs pa de la dad pa bskyed de/dad pa de nyid kyis mtshan ma med pa'i shes pa skyes shing thob par gyur gyi/ chos thams cad yul du ma gyur pa'i phyir mtshan ma med pa'i shes pas ni ma yin no / /nyi tshe ba'i shes pa zhes bya ba ni chos rnams la so sor zhugs nas/ gzugs bzung ste so sor brtags na gzugs kyi mtshan ma ma dmigs so//de bzhin du tshor ba la sogs pa bzung ste/ so sor brtags na tshor ba la sogs pa'i chos kyi mtshan ma yang ma dmigs so/ /de bas na de de ltar zhugs nas gzugs yongs su ma bzung / de bzhin du tshor ba dang /'du shes dang / 'du byed rnams dang / rnam par shes pa yongs su ma bzung zhes bya ba nas/ yang dag pa'i mtha' yongs su ma bzung zhes bya ba'i bar du bshad de / de'i gtan tshigs bstan pa'i phyir des rang gi mtshan nyid kyis stong pa'i chos thams cad la yongs su 'dzin pa mi dmigs te zhes bya ba bshad de/mtshan ma med pa'i shes pa des re re la mtshan ma med pa'i rnam par zhugs pas/ chos thams cad rang gi mtshan nyid kyis stong par shes par 'gyur te/ de bas na yongs su 'dzin pa'i gang zag gam/ shes pa ma dmigs so/ / yang de'i gtan tshigs su 'di ltar des shes pa thob pa dang / mngon par rtogs pa'i tshul gyis shes pa de nang du yang dag par rjes su ma mthong / phyi rol tu yang dag par rjes su ma mthong / thos pa dang mngon par rtogs pa'i tshul gyis shes pa de phyi nang du yang dag par rjes su ma mthong /thos pa dang mngon par rtogs pa'i tshul gyis shes pa de bzhin du yang dag par rjes su ma mthong ba'i slad du'o zhes bya ba gsungs te/ kun tu rgyu des bdag gi shes pa bzung nas bdag gi shes pa 'dis chos kyi khyad par ma thob pa rnams thob po zhe 'am/ bdag shes pa 'dis mngon par ma rtogs pa'i chos rnams mngon par ma rtogs so zhes thob pa dang /mngon par rtogs pa yongs su brtags nas shes pa de bdag la gnas pa dang / phyi rol la gnas pa dang / gnyis ka la gnas pa dang / de las gzhan pa 'ga' zhig la gnas par yang dag par rjes su mi mthong ngo zhes bya ba'i tha tshig go//de bas na 'di ltar des gang gis rtogs par bgyi ba dang / gang rtogs par bgyi ba'i shes pa de mi dmigs te yang dag par rjes su ma mthong zhes bya ba gsungs te/ de la gang gis zhes bya ba ni shes pa des zhes bya bar ston to//gang zhes bya ba ni bdag gis thob po/ /mngon par rtogs so zhes bya bar ston to/ /gang zhes bya ba ni ma thob pa dang / mngon par ma rtogs pa'i chos rnams zhes bya bar ston to/ /de ltar thob pa dang / mngon par rtogs pa'i shes pa la rnam par rtog pa bzhi med par bstan nas/de'i 'og tu gzugs la sogs pa'i chos thams cad yul du gyur pa'i shes pa la yang rnam par rtog pa de bzhi mi 'jug par bstan pa'i phyir/ des shes pa de gzugs kyi nang du yang dag par rjes su mi mthong ngo zhes bya ba la sogs pa bshad de/ gzugs la sogs pa'i chos thams cad yul du gyur pa'i shes pa yang nang dang phyi rol dang / gnyi ga dang / de las gzhan pa la yang yang dag par rjes su mi mthong ngo zhes bya ba'i tha tshig go/ /de nyid yang gsal bar bya ba'i phyir rnam grangs 'di la kun tu rgyu bzo sbyangs kyang mos par 'gyur te zhes bya ba la sogs pa nas/mtshan ma ma mchis par yid la bgyid pa'i slad du zhes bya ba'i bar du bshad do/ /bcom ldan 'das 'di ni gzhan gyi pha rol du mchis pas byang chub sems dpa' sems dpa' chen po shes rab kyi pha rol tu phyin pa'o zhes bya ba ni yongs su 'dzin pa med par sgrub pa yongs su shes pa 'di'i phan yon bstan to// 'di ltar chos thams cad las gzhan pa'i pha rol ni rnam par rtog pa thams cad dang / mtshan ma thams cad las gzhan du gyur pa'o/ /rnam par mi rtog pa ni pha rol te/ mtshan ma med pa'i pha rol du zhes bya ba'i tha tshig go//gzhan gyi pha rol de gang yin snyam pa la/ gang la gzugs yongs su mi 'dzin pa zhes bya ba la sogs pa gsungs te/ gang gi phyir gzugs la sogs pa yongs su 'dzin pa med pa de'i phyir gzhan gyi pha rol zhes bya'o/ /bar ma dor yongs su mya ngan las mi 'da' zhes bya ba ni kun tu rgyu de sangs rgyas kyi rigs can yin pa'i phyir/bar ma dor yongs su mya ngan las mi 'da'o/ /bar du zhes bya ba smos pa ni smon lam de dag smon lam ma lags/ stobs de dag stobs ma lags/ mi 'jigs pa de dag mi 'jigs pa ma lags/ so so yang dag par rig pa de dag so so yang dag par rig pa ma lags zhes bya ba nas/sangs rgyas kyi chos rnams kyi bar du sangs rgyas kyi chos rnams ma lags zhes bya ba la/ bar du zhes bya ba smos pa 'dis gzhan gyi pha rol ston to/ /de ltar yongs su 'dzin pa med par sgrub pa yongs su rdzogs par byas nas/de'i 'og tu yongs su brtags pa'i sgrub pa brtsams te/ bcom ldan 'das gzhan yang byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ 'di ltar yongs su brtags par bgyi ste zhes bya ba la sogs pa bshad do//yongs su brtags pa'i sgrub pa 'di yang rnam pa bzhir bstan te/ 'di ni gang zhes bya ba dang / 'di ni gang gi zhes bya ba dang / 'di ni ci'i phyir zhes bya ba dang / 'di ci zhig na zhes bya ba'o/ /de de ltar yongs su rtog cing de ltar sems pa'i tshe zhes bya ba nas bzung ste/ shes rab kyi pha rol tu phyin pa la de ltar spyod na rnam pa thams cad mkhyen pa nyid dang ma bral ba zhes bya ba'i bar du ni 'di gang zhes bya ba ston to//tshe dang ldan pa shA ri'i bu gzugs ni gzugs kyi rang bzhin dang bral ba zhes bya ba nas/ yang dag pa'i mtha' ni yang dag pa'i mtha'i rang bzhin dang bral ba zhes bya'i bar du ni 'di gang zhes bya ba ston to//tshe dang ldan pa shA ri'i bu gzhan yang gzugs la gzugs kyi mtshan nyid med do zhes bya ba nas gang bslab pa 'di la slob pa de ni rnam pa thams cad mkhyen pa nyid du nges par 'byung bar 'gyur ro zhes bya ba'i bar du ni 'di ni ci'i phyir zhes bya ba ston to//chos thams cad ma skyes pa dang / nges par 'gyur ba med pa zhes bya ba nas/ tshe dang ldan pa shA ri'i bu/ byang chub sems dpa' sems dpa' chen po shes rab kyi pha rol tu phyin pa la de ltar spyod pa ni bla na med pa yang dag par rdzogs pa'i byang chub dang nye ba yin zhes bya ba'i bar du ni 'di ci zhig na zhes bya ba ston to//de la 'di gang zhes bya ba de'i rang bzhin 'dri ba ste/ de la shes rab kyi pha rol tu phyin pa ni rtogs pa'o zhes de skad brjod par bya'o/ /'di ni gang gi zhes bya ba ni 'brel ba 'dri ba ste/ de la chos thams cad kyi'o zhes de skad brjod par bya'o//'di ci'i phyir zhes bya ba ni/ ci'i phyir 'di shes rab kyi pha rol tu phyin pa zhes bya zhes gtan tshigs 'dri ba ste/ de la yang dag pa ji lta ba nyid kyi mtshan nyid rtogs pa'i phyir ro zhes brjod par bya'o/ /'di ci zhig na zhes bya ba ni byed pa 'dri ba ste/ de la nges par 'byin pa'i phyir ro zhes brjod par bya'o/ /de dag thams cad kyi re zhig lan gdab par bya ba la 'di gang yin zhes bya ba sngar dris pa'i lan du/ de de ltar yongs su rtog cing de ltar nges par sems pa'i tshe/ gal te 'di ltar chos med cing mi dmigs pa gang yin pa de/shes rab kyi pha rol tu phyin pa yin par yang dag par rjes su mthong na de yang yang dag par rjes su mthong ba ma yin no zhes bya ba gsungs te/ ci las dgongs she na/ de'i tshe chos thams cad dmigs su med pa de'i ngo bo nyid kyang nam mkha' bzhin du 'gyur te/ de bas na gang gis de la bltas na/rang bzhin med par mthong ba de yang dag par mthong ba'o zhes bya ba'i tha tshig go/ /de bas na bcom ldan 'das 'di ltar chos thams cad ma mchis shing mi dmigs so zhes bya ba gsungs te/ de'i gnas skabs na zhes bya ba'i tha tshig go/ /de ltar gzugs la sogs pa'i chos thams cad dngos po med par mthong na/gang la zhum pa dang / skrag pa la sogs pa med par gyur pa de rnam pa thams cad mkhyen pa nyid dang ma bral ba yin par shes par bya'o zhes gnas brtan rab 'byor gyis smras pa la/ gnas brtan shA ri'i bus ma bral ba'i mtshan nyid bstan par bya ba'i phyir/tshe dang ldan pa rab 'byor ci'i phyir rnam pa thams cad mkhyen pa nyid dang ma bral ba yin par rig par bya zhes dris so/ /de'i tshe gnas brtan rab 'byor gyis/ gang gi phyir chos thams cad ngo bo nyid dang bral ba de'i phyir de ltar mthong ba de ni rnam pa thams cad mkhyen pa nyid dang ma bral bar rig par bya'o zhes bstan to//tshe dang ldan pa shA ri'i bu rnam grangs des na 'di ltar gzugs la gzugs kyi rang bzhin med ces bya ba la sogs pas shes rab kyi pha rol tu phyin pa 'di gang gi yin zhes dris pa'i lan bshad pa yin te/ de ni 'di ltar chos thams cad rang gi ngo bo nyid dang bral bas dngos po med pa yin na/'o na chos gang rtogs pas shes rab kyi pha rol tu phyin pa zhes bya ba bstan pa yin/ tshe dang ldan pa shA ri'i bu gzhan yang gzugs la gzugs kyi mtshan nyid med do zhes bya ba la sogs pa nas gang 'di la slob pa de ni rnam pa thams cad mkhyen pa nyid du nges par 'byung bar 'gyur ro zhes bya ba'i bar du ni shes rab kyi pha rol tu phyin pa 'di ci'i phyir zhes bya ba bstan pa ste/chos thams cad kyi mtshan nyid rtogs pa'i phyir/ shes rab kyi pha rol tu phyin pa zhes bya bar rnam par gzhag go/ / gal te chos thams cad mtshan nyid med cing mtshan nyid dang bral ba yin na/ mtshan nyid gang dag rtogs par 'gyur zhes bstan pa yin te/ 'di ltar mtshan nyid thams cad ni kun brtags pa yod pa ma yin pas/ de'i phyir/ chos nyid ni gzugs la sogs pa'i mtshan nyid dang bral ba zhes bya'o//tshe dang ldan pa rab 'byor byang chub sems dpa' sems dpa' chen po shes rab gang bslab pa 'di la slob pa de rnam pa thams cad mkhyen pa nyid du nges par 'byung bar 'gyur ram zhes bya ba nas tshe dang ldan pa shA ri'i bus byang chub sems dpa' sems dpa' chen po de ltar shes rab kyi pha rol tu phyin pa la spyod pa ni de bla na med pa yang dag par rdzogs pa'i byang chub la nye bar gyur pa yin no zhes bya ba'i bar du ni shes rab kyi pha rol tu phyin pa 'di ci zhig na zhes bya ba de bstan pa ste/nges par 'byin pa'i phyir shes rab kyi pha rol tu phyin pa zhes bya'o//nges par 'byung ba de yang chos thams cad la med de/ 'di ltar chos thams cad skye ba med cing nges par 'byung ba med pas de'i phyir de yang de'i nges par 'byin par mi 'gyur ro zhes bstan pa yin no/ /tshe dang ldan pa shA ri'i bu gzugs ni gzugs kyi ngo bo nyid kyis stong ste/de la skye ba dang / nges par 'byung ba mi dmigs so zhes bya ba ni 'di ltar yongs su grub pa'i chos nyid kyi gzugs ni kun brtags pa'i gzugs kyi ngo bo nyid kyis stong ste/ de'i phyir chos nyid kyi gzugs la ni 'khor ba'i gnas skabs kyi kun nas nyon mongs pa'i ngo bo nyid skye ba dang /'byung ba med do/ /dag pa'i gnas skabs na rnam par byang ba'i bdag nyid la phyin ci log gi dngos po med pas glo bur gyis nges par 'byung ba med de/ ngo bo nyid kyi rnam par dag pa dang / chos nyid la 'gyur ba med pa'i phyir ro zhes bya ba'i tha tshig go//skye ba med ces bya ba ni dri ma dang bcas pa'i gnas skabs na'o/ /nges par 'byung ba med ces bya ba ni dri ma med pa'i gnas skabs na'o/ /de ltar yongs su brtags pa'i sgrub pa bstan nas/ de'i 'og tu brtson par sgrub pa bstan pa'i phyir/ bcom ldan 'das gal te byang chub sems dpa' sems dpa' chen po shes rab kyi pha rol tu phyin pa la spyod pa'i tshe thabs mi mkhas pas gzugs la spyod na zhes bya ba la sogs pa nas/tshe dang ldan pa shA ri'i bu byang chub sems dpa' sems dpa' chen po 'di ni rnam pa thams cad mkhyen pa nyid dang nye ba yin no zhes bya ba'i bar la thug pa'i gzhung gis bshad de/brtson par bsgrub pa 'di yang thabs ma yin pa spang bar bya ba dang / thabs la brten par bya ba dang / rnam pa gnyis su bstan to/ /thabs ma yin pa yang rnam pa gnyis kyis bstan te/ mtshan ma la spyod pa dang /mngon par 'du byed pa la spyod pa'o/ /thabs kyang rnam pa gnyis kyis bstan te/ chos la spyod pa med pa dang / chos kyi mtshan ma la spyod pa med pa'o/ /de la thabs ma yin pas mtshan ma la spyod pa ni gzugs la spyod pa na mtshan ma la spyod pa ste/ shes rab kyi pha rol tu phyin pa la spyod pa ma lags so zhes bya ba nas bzung ste de ni byang chub sems dpa'i thabs mi mkhas par rig par bgyi'o zhes bya ba'i bar gyis bshad do/ /thabs ma yin pas mngon par 'du byed pa la spyod pa ni/ gzugs la gnas shing kun tu shes te mos na zhes bya ba nas bzung ste/tshe dang ldan pa shA ri'i bu byang chub sems dpa' sems dpa' chen po shes rab kyi pha rol tu phyin pa la de ltar spyod na thabs mi mkhas par rig par bya'o zhes bya ba'i bar gyis bshad do/ /gnas zhes bya ba ni sems phyin ci log gis so/ / kun tu shes zhes bya ba'i 'du shes phyin ci log gis so/ /chos zhes bya ba ni lta ba phyin ci log gis so/ /thabs kyi sgrub pa la chos mi dmigs par spyod pa ni/ tshe dang ldan pa shA ri'i bu nam byang chub sems dpa' sems dpa' chen po shes rab kyi pha rol tu phyin pa la spyod cing gzugs la mi spyod ces bya ba nas bzung ste/tshe dang ldan pa shA ri'i bu byang chub sems dpa' sems dpa' chen po shes rab kyi pha rol tu phyin pa la de ltar spyod pa ni thabs la mkhas par rig par bya'o zhes bya ba'i bar gyis bshad do/ /'di la gzugs kyi stong pa nyid gang yin pa de gzugs ma yin zhes bya ba la sogs pa ni gong du bshad zin pas bzlas te bshad mi dgos so//thabs kyi sgrub pa la chos kyi mtshan ma mi dmigs par spyod pa ni/ de shes rab kyi pha rol tu phyin pa la spyod pa'i tshe/ gal te chos 'ga' zhig dmigs na shes rab kyi pha rol tu phyin pa la spyod pa ma yin no zhes bya ba nas bzung ste/byang chub sems dpa' sems dpa' chen po 'di ni rnam pa thams cad mkhyen pa nyid dang nye ba yin no zhes bya ba'i bar gyis bshad do/ /de la dmigs zhes bya ba dang / mi dmigs zhes bya ba dang /dmigs kyang dmigs la mi dmigs kyang mi dmigs zhes bya ba dang / dmigs pa yang ma yin mi dmigs pa yang ma yin zhes bya ba'i rnam par rtog pa bzhi yang mtshan ma yin pa dang / spyod do zhes bya ba dang / mi spyod do zhes bya ba dang / spyod kyang spyod la mi spyod kyang mi spyod do zhes bya ba dang /spyod pa yang ma yin mi spyod pa yang ma yin zhes bya ba bzhi yang mtshan ma'o zhes bya bar sbyar bar bya'o/ /shes rab kyi pha rol tu phyin pa ngo bo nyid med cing mi dmigs so zhes bya ba ni yongs su grub pa'i gnas skabs na chos thams cad dmigs su med pas/shes rab kyi pha rol tu phyin pa yang shes rab kyi pha rol tu phyin pa'i ngo bo nyid kyis med do/ /de ltar brtson pa'i sgrub pa bstan nas/ da ni rnam pa thams cad mkhyen pa nyid de yang gnyis su med cing gnyis su byar med ces bya ba la sogs pas myur du mngon par rdzogs par byang chub pa'i sgrub pa ston to//sgrub pa 'di yang rnam pa bzhir bstan te ting nge 'dzin gyi dkyil 'khor la slob pa dang / chos thams cad mi dmigs par slob pa dang / sgyu ma lta bu la sogs par slob pa dang / thabs la mkhas par slob pa'o/ /de la chos thams cad dngos po med pa'i ngo bo nyid kyi phyir/ rnam pa thams cad mkhyen pa nyid de yang gnyis su med cing gnyis su byar med do zhes bya ba nas bzung ste/ dran pa nye bar gzhag pa rnams la bslab par bya'o zhes bya ba'i bar du ni ting nge 'dzin la bslab po//shA ri'i bu byang chub sems dpa' sems dpa' chen po de ltar shes rab kyi pha rol tu phyin pa la slob pa'i tshe zhes bya ba dang / sangs rgyas kyi chos ma 'dres pa rnams la mi dmigs pa'i tshul gyis slob ces bya ba nas bzung ste/ shA ri'i bu stong pa nyid mi dmigs pa'i tshul gyis rnam pa thams cad mkhyen pa nyid du nges par 'byung bar rig par bya'o zhes bya ba'i mthar thug pa'i gzhung gis ni chos thams cad la mi dmigs par bslab pa bstan to//bcom ldan 'das la la zhig 'di skad du 'dri ste ci sgyu ma'i skyes bu 'di shes rab kyi pha rol tu phyin pa la bslabs nas rnam pa thams cad mkhyen pa nyid du nges par 'byung bar 'gyur ram/rnam pa thams cad mkhyen pa nyid thob par 'gyur ram zhes mchis nas zhes bya ba nas bzung ste/ bcom ldan 'das 'di ltar gzugs ni sgyu ma lta bu tshor ba dang /'du shes dang / 'du byed dang / rnam par shes pa ni sgyu ma lta bu ste/ rnam par shes pa gang lags pa de ni dbang po drug go/ /de dag ni phung po lnga'o zhes bya ba'i bar du ni sgyu ma lta bu la sogs par slob pa bstan to/ /rab 'byor gal te byang chub sems dpa' sems dpa' chen po theg pa la gsar du zhugs pa yin la/thabs kyang mi mkhas pa zhig ste dge ba'i bshes gnyen gyi lag tu yang ma song na zhes bya ba la sogs pa nas bzung ste/ rab 'byor 'di yang byang chub sems dpa' sems dpa' chen po'i sdig pa'i grogs po yin par rig par bya ste/rig nas kyang yongs su spang bar bya'o zhes bya ba'i bar la thug pa'i gzhung gis ni thabs mkhas pa bstan to/ /de la ting nge 'dzin la slob pa yang rnam pa gnyis su bstan te/ ming bshad pa dang / rnam par mi rtog pa bshad pa'o/ /de la ming bshad pa la ngo bo nyid skye ba med pa'i ting nge 'dzin sngar bstan pa ste/chos thams cad dngos po med pa'i ngo bo nyid kyi phyir rnam pa thams cad mkhyen pa nyid de yang gnyis su med cing gnyis su byar med do zhes bya ba la sogs pa bshad de rnam pa thams cad mkhyen pa nyid ces bya ba ni chos thams cad gnyis su med pa'i gnas skabs la bya ste/'di ltar kun brtags pa'i chos thams cad la/ gzung ba dang 'dzin pa gnyis su med pa dang / yod pa dang med pa dang / dngos po dang dngos po med pa dang / rtag pa dang chad pa dang / 'dus byas dang 'dus ma byas dang /chos dang chos ma yin pa zhes bya ba la sogs pa dang / gang yang rtag pa dang mi rtag pa dang / bde ba dang sdug bsngal ba dang / bdag dang bdag med pa dang / zhi ba dang ma zhi ba dang / stong pa dang mi stong pa dang / mtshan ma dang mtshan ma med pa dang /smon pa dang smon pa med pa la sogs pa gnyis po de dag thams cad ni kun brtags pa yin pas na/ rnam pa thams cad mkhyen pa nyid la med pa'i phyir/ rnam pa thams cad mkhyen pa nyid ni gnyis su med pa zhes bya'o/ /rtog pas byas pa'i dngos po rnam pa gnyis med pas gnyis su byar med pa zhes bya'o//ting nge 'dzin rnams kyi ming brjod pas/ ting nge 'dzin la gnas pa bstan nas/ de'i 'og tu rnam par mi rtog pa'i ting nge 'dzin la gnas pa bstan pa'i phyir/ des ni ting nge 'dzin kyang yang dag par rjes su mi mthong ngo //bdag ni ting nge 'dzin la snyoms par zhugs so zhes bya bar ting nge 'dzin des rlom sems su 'gyur ba yang med do zhes bya ba la sogs pa bshad do/ / ting nge 'dzin kyang yang dag par rjes su mi mthong ngo zhes bya ba ni yongs su grub pa'i gnas skabs na chos thams cad kyang de bzhin nyid tsam du 'gyur ba'i phyir 'di ni ting nge 'dzin to//bdag ni mnyam par gzhag pa'o zhes bya ba la sogs pa kun brtags pa rnams shin tu med pa'i phyir ting nge 'dzin du rnam par rtog pa dang / bdag mnyam par gzhag par rnam par rtog pa dus kyi dbang gis rnam pa gsum dang /snyoms par 'jug pa'i rnam par rtog pa dang / rnam par rtog pa de dag med do/ /de'i phyir de la rnam par rtog pa de dag med ces bya ba gsungs so/ /de nyid kyi phyir shes rab kyi pha rol tu phyin pa yang gzhan la/ ting nge 'dzin kyang gzhan zhing /byang chub sems dpa' yang gzhan zhes bya ba med kyi/ shes rab kyi pha rol tu phyin pa nyid kyang ting nge 'dzin to/ /ting nge 'dzin nyid kyang byang chub sems dpa'o zhes bya ba gsungs te/ chos thams cad ni de bzhin nyid tsam du bdag nyid gcig pa'i phyir de skad ces bya'o//de nyid kyi phyir chos thams cad mnyam pa nyid kyi phyir zhes bya ba gsungs so/ /ting nge 'dzin bstan par nus sam zhes bya ba ni tha dad du byas te/ brjod par nus sam zhes bya ba'i tha tshig ste/ byang chub sems dpa' nyid ting nge 'dzin yin no zhes 'byung ba'i phyir ro snyam nas dris pa dang /ting nge 'dzin gyi mtshan nyid tha dad pa med pa'i phyir/ tshe dang ldan pa shA ri'i bu de ni ma yin no zhes bya ba gsungs so/ /de nas gnas brtan shA ri'i bus gal te ting nge 'dzin rnams kyi ming med na ci'i phyir de dag gi ming brjod snyam du bsams nas/ting nge 'dzin de rnams la 'du shes su byed dam zhes bya ba dris te / ji ltar nyan thos bzhin du zhes dris pa'o/ /de nas gnas brtan rab 'byor gyis de lta bu'i rtog pa med pa'i phyir/ 'du shes su byed pa med do zhes bya ba gsungs so/ /de nas bshad pa gzhan gyi ting nge 'dzin bshad pa bstan pa dang /bya ba gzhan gyis bstan pa'i phyir ji ltar 'du shes su byed par mi 'gyur zhes bya ba gsungs pa dang / de nas ting nge 'dzin dag dang / de dag gi byed pa rnams kyang kun brtags pa'i bdag nyid kyi sa ni yod kyi kun brtags pa'i mtshan nyid spangs na mi dmigs te/de'i phyir ji ltar rnam par rtog pa med pa yin zhes bya ba gsungs so/ /de nas bdag gi bsam pa bsal bar bya ba'i phyir/ chos thams cad med pa'i phyir zhes bya ba gsungs so/ /'di ltar nyon mongs pa med par gnas pa rnams kyi nang na mchog tu bstan pa zhes bya ba la nyon mongs pa zhes bya ba ni rnam par rtog pa la bya ste/rnam par rtog pa thams cad dang bral ba rnam par mi rtog pa la snyoms par 'jug pa ni nyon mongs pa med pa la snyoms par 'jug pa zhes bya ste/ de bas na rnam par mi rtog pa nyid la legs so zhes bya ba byin no//de ltar ting nge 'dzin la bslab pa bstan nas dmigs su med par bslab pa bstan pa'i phyir/ shA ri'i bu de ltar slob pa ni sangs rgyas kyi chos ma 'dres pa rnams kyi bar la mi dmigs pa'i tshul gyis slob pa yin no zhes bya ba la sogs pa gsungs so/ /dmigs su med par bslab pa bstan pa'i phyir/shA ri'i bu shin tu rnam par dag pa'i phyir bdag mi dmigs so zhes bya ba la sogs pas gang zag mi dmigs par bstan nas/ de'i 'og tu phung po dang khams dang skye mched la sogs pa'i chos rnams dmigs su med pa bstan te/ rgyun du zhugs pa la sogs pa nas sangs rgyas kyi bar du mi dmigs pa bstan to//thams cad la yang shin tu rnam par dag pa'i phyir zhes bya ba ni mthar phyin pa'i rnam par dag pa'i rgyur gyur pa nye bar bzung nas de'i ngo bo nyid zhu ba'i phyir/ bcom ldan 'das rnam par dag pa gang lags zhes bya ba zhus pa dang de nas yongs su grub pa dri ma med pa de bzhin nyid la rnam par dag pa'o zhes bya ba bstan pa'i phyir/shA ri'i bu skye ba med pa dang / 'gag pa med pa dang / kun nas nyon mongs pa med pa dang / rnam par byang ba med pa dang / 'byung ba med pa dang /dmigs su med pa dang / mngon par 'du bya ba med pa ni rnam par dag pa zhes bya ste zhes bya ba gsungs te/ sngon de bzhin nyid dri ma dang bcas pa'i gnas skabs na ni kun brtags pas chos rnams skye ba dang / 'gag pa dang / kun nas nyon mongs pa dang / rnam par byang bar 'gyur te skyes pa rnams 'byung zhing byung nas kyang de lta de ltar dmigs par 'gyur la/ de lta de ltar mngon par 'du byed par 'gyur ro/ /dri ma med pa'i gnas skabs na ni de bzhin nyid de la chos thams cad kyi skye ba thams cad med de/ skye ba med pas 'gag pa yang med do//dri ma med pa'i phyir kun nas nyon mongs pa med pa dang rnam par byang ba med pa dang 'byung ba med par 'gyur ro/ /'byung ba med pas dmigs su med do/ /dmigs su med pa'i phyir mngon par 'du byed pa med de/ 'di ni shin tu rnam par dag pa zhes bya'o/ / chos gang la yang slob pa med do zhes bya ba ni de dri ma med pa'i gnas skabs na chos thams cad ma mthong ba'i phyir chos 'di dag ni de lta bur yod pa ma yin no zhes bya ba gsungs so/ /kun brtags pa'i mtshan nyid du yod pa ma yin par bstan pa'i phyir/ shA ri'i bu ji ltar med pa de ltar yod do zhes bya ba gsungs so//kun brtags pa'i dngos po med pa'i rnam pa brjod du med pa'i bdag nyid du yod par bstan pa'i phyir de ltar yod pa ma yin pas de'i phyir ma rig pa zhes bya'o zhes gsungs te/ rmi lam gyi rnam par shes pa bzhin du bdag nyid kyis yang dag pa ji lta ba nyid ma yin pa'i phyir med bzhin du yod pa ma yin pa'i don gzhan dag la yang 'dzin par byed do//yang na yang dag par ma rig pa ste/ yang dag pa ma yin par rig cing shes par byed pa ni ma rig pa'o zhes bya ba'i tha tshig go/ /bcom ldan 'das ci'i slad du mchis pa ma lags pa la ma rig pa zhes bgyi zhes zhus pa dang /shA ri'i bu gzugs yod pa ma yin no zhes bya ba la sogs pa gsungs so/ /dgongs pa ni 'di lta ste/ 'di ltar gzugs la sogs pa'i chos rnams med cing yang dag pa ma yin pa yang / yang dag yod pa bzhin du 'dzin te de'i phyir/de yang dag par ma rig pa ste/ yang dag par ma shes pas ma rig pa zhes bya'o zhes bstan pa'i phyir gzugs la sogs pa'i chos rnams bka' stsal to/ /don 'di nyid gsal bar bya ba'i phyir/ de la byis pa rnams ma rig pa dang / sred pa dag gis mngon par zhen nas mtha' gnyis la chags zhes bya ba gsungs te/ ma rig pa'i dbang gis yod pa'i rnam par mngon par zhen nas sred pa'i dbang gis ro myang bar bya ba'i sgo nas mngon par zhen te/ rtag pa dang chad pa'i mtha' gnyis la chags zhes bya ba'i tha tshig go//de dag mi shes mi mthong zhes bya ba ni rjes su dpag pa'am/ mngon sum mam/ yang na lung gi mthu'am/ rang gi mthus mi shes pa'o/ /'di la 'gres gsum ste/ ma rig pa'i rtsa ba las byung ba dang / rtog pa'i rtsa ba las byung ba dang / ma dad pa'i rtsa ba las byung ba'o//de la ma rig pa'i dbang gis ni med pa'i chos rnams la yod par bzung nas sred pas ro myong bar byed pa'i dbang gis mtha' gnyis su lhung ba'i byis pa rnams kyis mi shes ma mthong ngo zhes bya ba ni 'gres dang po'o/ /de ltar shes pa dang / mthong ba med pas rtog pa mang du gyur te yang dag pa ji lta ba bzhin du ma yin pas rtog cing chos thams cad la mngon par zhen nas/mtha' gnyis su rtog pa'i phyir mi shes mi mthong ngo / /de dag chos thams cad mi shes mi mthong bas byis pa so so'i skye bo zhes bya ba'i grangs su 'gro ste nges par 'byung ba ma yin no zhes bya ba ni 'gres gnyis pa'o//de bzhin du yang dag pa ji lta ba bzhin du thos kyang don de la ma dad pas dang ba la gnas pa med pa'i phyir pha rol tu phyin pa sgrub pa la mi gnas so/ /sgrub pa la mi gnas pas phyir mi ldog par 'gyur ba la sogs pa rtogs par bya ba'i chos rnams mi 'thob ste/de bas na chos thams cad la mngon par zhen pa'i skyon gyis byis pa so so'i skye bo rnams zhes bya ba'i grangs su 'gro'o zhes bya ba ni 'gres gsum pa'o/ /de ltar gyur pa de dag la slob pa dang / nges par 'byung ba yang med do zhes bstan nas ci'i phyir slob pa dang /nges par 'byung ba med ces zhus pa dang / gang gi phyir thabs mi mkhas pa pha rol tu phyin pa thams cad dang / sgrub pa'i chos rnams la rtog cing mngon par zhen par byed pa de'i phyir slob pa med do/ /gang gi phyir byang chub kyi phyogs kyi chos rnams la sogs pa nas rnam pa thams cad mkhyen pa nyid kyi bar dag la rtog cing mngon par zhen pa de'i phyir nges par 'byung ba med do zhes bstan nas/de nas yang pha rol tu phyin pa de dag nyid la sgrub pa'i chos rnams mi dmigs par slob pa la zhugs pa'i ming du 'gyur ba dang /rnam pa thams cad mkhyen pa nyid dang / chos rnams dang / chos thams cad stong pa nyid kyi bar du mi dmigs pa nyid nges par 'byung ba yin no zhes bya bas/ dmigs su med par slob pa bstan nas/ yang sgyu ma lta bu la sogs par slob pa bstan pa'i phyir/ bcom ldan 'das la la zhig 'di skad du 'dri ste zhes bya ba la sogs pa gsungs so/ /'di la yang gnas brtan rab 'byor gyi dgongs pa ni 'di yin te/ bcom ldan 'das gal te dmigs su ma mchis par sbyor bas/ chos rnams dngos po ma mchis pas/ dngos po ma mchis pa'i chos rnams la bslabs nas nges par 'byung bar 'gyur na ni /'o na ni shin tu ma mchis pa'i sgyu ma'i skyes bus kyang / sgyu mar bgyis pa rnams la dmigs su ma mchis pa'i yid la bgyid pas bslabs nas/ rnam pa thams cad mkhyen pa nyid du nges par 'byung bar 'gyur zhing /rjes su thob par 'gyur ro snyam pa'o/ /de nas bcom ldan 'das kyis sgyu ma'i chos rnams dang / gzugs la sogs pa tha dad pa ni ci yang med de/ ji ltar sgyu ma'i chos rnams la bslab pa'am/ nges par 'byung ba med pa de bzhin du byang chub sems dpa' la yang gzugs la sogs pa'i chos rnams la bslab pa'am/de dag la nges par 'byung ba'am/ rnam pa thams cad mkhyen pa nyid nges par thob par 'gyur ba med do/ /sgyu ma dang mtshungs par bstan pa'i phyir/ rab 'byor de ji snyam du sems/ sgyu ma yang gzhan la/gzugs kyang gzhan zhig yin snyam mam zhes bya ba la sogs pa gsungs te/ chos thams cad dngos po med pa'i ngo bo nyid la mkhas pa'i byang chub sems dpa' dmigs su med par mthong ba dag gis ni gzugs la sogs pa kun brtags pa'i chos rnams sgyu ma las logs shig na yod par ma mthong ste/de bstan pa'i phyir bcom ldan 'das sgyu ma yang gzhan ma lags rnam pa thams cad mkhyen pa nyid kyang gzhan ma lags te/ bcom ldan 'das rnam pa thams cad mkhyen pa nyid kyang sgyu ma/ sgyu ma nyid kyang rnam pa thams cad mkhyen pa nyid do zhes bya ba'i mthar thug pa'i gzhung gis gsungs te/thams cad kyang kun brtags pa'i ngo bo nyid yin pa'i phyir dngos po med pa'i ngo bo nyid du sgyu ma dang tha dad pa med do zhes bya ba ni sgyu ma'i 'gres dang po'o/ /de bzhin du skye ba dang / 'gag pa dang / kun nas nyon mongs pa dang /rnam par byang ba med pa'i phyir shin tu med pa'i sgyu ma dang / chos thams cad la bslab pa dang / nges par 'byung ba dang / rnam pa thams cad mkhyen pa nyid thob par 'gyur ba med do zhes bya ba ni sgyu ma'i 'gres gnyis pa'o/ /gal te phung po la sogs pa ma 'dres pa'i chos rnams la thug pa'i bar dag la byang chub sems dpa' zhes bya ba'i ming du mi brjod na/de lta na ni sgyu ma'i skyes bu bzhin du byang chub sems dpa' yang med do/ /phung po la sogs pa ma 'dres pa'i mtha' la thug pa'i bar gyi chos de dag kyang skye ba dang / 'gag pa la sogs pa med pa'i phyir sgyu ma bzhin du med pa nyid do/ /de lta na ni 'du shes dang brda la sogs pa med pa dang / shin tu med pa'i byang chub sems dpa' shin tu med pa'i chos rnams la ji ltar slob/ ji ltar nges par 'byung / ji ltar rnam pa thams cad mkhyen pa nyid thob par 'gyur zhes bstan nas de ltar mi dmigs pa'i tshul gyis slob pa de ni nges par 'byung zhing thob par 'gyur ro zhes mjug bsdus so//de ltar phung po lnga po de dag dngos po med pa'i ngo bo nyid yin pa'i phyir/ rmi lam dang / brag ca dang / mig yor dang / gzugs brnyan dang / sprul pa dang / smig rgyu lta bu yin la/ skye mched drug kyang de dag nyid yin pa'i phyir byang chub sems dpa' zhes bya ba ni gang yang med de/ dngos po med pa'i ngo bo nyid stong pa nyid la sogs pa'i phyir ro/ /de ltar sgyu ma lta bu la sogs par bslab pa bstan nas/yang thabs mkhas pa la sgrub pa'i skabs dbye ba'i phyir/ bcom ldan 'das byang chub sems dpa'i theg pa la gsar du zhugs pas bstan pa 'di thos nas skrag ste dngang shing dngang bar mi 'gyur lags grang zhes bya ba bstan nas/ thabs mi mkhas la dge ba'i bshes gnyen gyi lag tu yang ma song ba gang yin pa de ni de ltar skrag ste dngang bar 'gyur gyi/thabs la mkhas pa gang yin pa de ni skrag cing dngang bar mi 'gyur ro zhes bstan pa dang / bcom ldan 'das byang chub sems dpa' sems dpa' chen po thabs mkhas pa gang gis bstan pa 'di thos na mi skrag mi dngang dngang bar mi 'gyur ba'i thabs mkhas pa gang lags zhes bya ba la sogs pas thabs la mkhas pa bstan to//skrag pa dang / dngang ba la sogs pa'i don ni sngar bstan zin to/ /thabs la mkhas pa de yang rnam pa bzhir bstan te/chos thams cad la so sor rtog pa'i thabs la mkhas pa dang / pha rol tu phyin pa drug yongs su rdzogs par bya ba'i thabs la mkhas pa dang / dge ba'i bshes gnyen la brten pa'i thabs la mkhas pa dang / sdig pa'i grogs po spang ba'i thabs la mkhas pa'o//de la gzugs mi rtag pa'i rnam par so sor rtog ste de yang mi dmigs so zhes bya ba nas bzung ste/ 'di ni byang chub sems dpa' sems dpa' chen po shes rab kyi pha rol tu phyin pa la spyod pa'i thabs la mkhas par rig par bya'o zhes bya ba'i bar gyis ni chos thams cad la so sor rtog pa'i thabs la mkhas pa bstan to//rab 'byor gzhan yang byang chub sems dpa' sems dpa' chen po rnam pa thams cad mkhyen pa nyid dang ldan pa'i yid la byed pas zhes bya ba nas bzung ste/ rab 'byor 'di ni byang chub sems dpa' sems dpa' chen po shes rab kyi pha rol tu phyin pa la spyod pa'i thabs mkhas pa'o zhes bya ba'i bar gyis ni pha rol tu phyin pa drug po yongs su rdzogs par bya ba'i thabs la mkhas pa bstan to//de la mi dmigs pa'i tshul gyis chos 'chad pa ni sbyin pa'i pha rol tu phyin pa'o//mi dmigs pa'i tshul gyis nyan thos dang / rang sangs rgyas kyi sems yongs su spong ba ni tshul khrims kyi pha rol tu phyin pa'o/ /chos zab mo la bzod cing mos pa ni bzod pa'i pha rol tu phyin pa'o/ /mi dmigs pa'i yid la byed pas so sor rtog pa mi gtong ba ni brtson 'grus kyi pha rol tu phyin pa'o//byang chub kyi bar du gcod par byed pa mi dge ba'i chos rnams kyi go skabs mi 'byed pa ni bsam gtan gyi pha rol tu phyin pa'o/ /stong pa nyid la so sor rtog pa ni shes rab kyi pha rol tu phyin pa'o/ /gzugs kyi stong pa nyid kyis gzugs stong pa ma yin zhes bya ba ni chos nyid kyi gzugs kun brtags pa'i gzugs kyi stong pa nyid kyi rgyus glo bur du stong par gyur pa ma yin te/ngo bo nyid kyis stong pa'i phyir ro/ /de bas na gzugs nyid kyang stong pa nyid do/ /stong pa nyid kyang gzugs so zhes bya ba gsungs te/stong pa nyid dang chos nyid kyi gzugs dag ngo bo nyid gcig go zhes bya ba'i tha tshig go/ /rab 'byor 'di la byang chub sems dpa' sems dpa' chen po'i dge ba'i bshes gnyen ni zhes bya ba nas bzung ste/ rab 'byor 'di dag ni byang chub sems dpa' sems dpa' chen po'i dge ba'i bshes gnyen rnams te/de dag gis yongs su zin pa ni bstan pa 'di thos nas mi skrag mi dngang dngang bar mi 'gyur ro zhes bya ba'i bar gyis ni dge ba'i bshes gnyen la bsten pa'i thabs la mkhas pa bstan to/ /de'i 'og tu dmigs pa'i rlom sems kyi 'gres kyang dge ba'i bshes gnyen med pa las gyur pas 'di nyid du bsdu'o//bcom ldan 'das ji ltar na dge ba'i bshes gnyen rnams kyis yongs su zin par rig par bgyi zhes bya ba nas bzung ste/ rab 'byor 'di yang byang chub sems dpa' sems dpa' chen pos sdig pa'i grogs por rig par bya ste/rig nas kyang yongs su spang bar bya'o zhes bya ba'i bar gyis ni sdig pa'i grogs po yongs su spang ba'i thabs la mkhas pa bstan to// //bam po bcu pa/ de ltar brtson pa rnam pa du mchis zhes zhus pa'i tshig rnam par phye ste bstan nas/da ni bshad pa 'di'i gtan la dbab pa gang lags zhes zhus pa'i tshig rnams bstan par bya ste/ de la 'di la shA ri'i bu byang chub sems dpa' sems dpa' chen po chos thams cad rnam pa thams cad du mngon par rdzogs par byang chub par 'dod pas/shes rab kyi pha rol tu phyin pa la brtson par bya'o zhes mdor bshad pa dang por skabs phye ba gang yin pa de da 'dir skabs dbye'o/ /gtan la dbab pa de yang rnam pa gnyis te/ tshig gi don dang / mtshan nyid do/ /de la byang chub sems dpa' zhes bya ba'i tshig gi don gang yin pa dang /sems dpa' chen po zhes bya ba'i tshig gang yin pa dang / ji ltar na go cha chen po bgos pa dang / ji ltar na theg pa chen po la yang dag par zhugs pa dang / ji ltar na theg pa chen po la gnas pa dang / ji ltar na theg pa chen po yin pa dang /theg pa de gang la nges par 'byung ba dang / theg pa de gang du gnas par 'gyur ba dang / theg pa 'dis su zhig nges par 'byung bar 'gyur zhes bya ba dang / lha dang mi dang lha ma yin du bcas pa'i 'jig rten zil gyis mnan nas theg pa de nges par 'byung bar 'gyur ro zhes bya ba dang /theg pa de nam mkha' dang mtshungs so zhes bya ba dang / shes rab kyi pha rol tu phyin pa dang mthun pa'i theg pa chen po yin no zhes bya ba dang / sngon gyi mtha' dang phyi ma'i mtha' dang / dbus nas byang chub sems dpa' mi dmigs so zhes bya ba dang /gzugs dang / tshor ba dang / 'du shes dang / 'du byed dang / rnam par shes pa kun tu mtha' yas pa'i phyir/ byang chub sems dpa' kun tu mtha' yas par rig par bya'o zhes bya ba dang / gzugs dang / tshor ba dang / 'du shes dang /'du byed rnams dang / rnam par shes pa byang chub sems dpa' yin no zhes bya ba de lta bu yang med cing mi dmigs zhes bya ba dang / de ltar bdag gis thams cad kyi thams cad rnam pa thams cad kyi thams cad du byang chub sems dpa' mi dmigs shing yang dag par rjes su ma mthong na byang chub sems dpa' gang zhig shes rab kyi pha rol tu phyin pa gang la gdams shing rjes su bstan par bgyi zhes bya ba dang /'di lta ste byang chub sems dpa' zhes bgyi ba 'di ni ming tsam mo zhes bya ba dang / bdag bdag ces bgyi ba bdag ni shin tu mngon par ma grub pa'o zhes bya ba dang /de ltar chos thams cad dngos po med pa'i ngo bo nyid lags na/ gzugs de gang lags zhes bya ba nas/ rnam par shes pa de gang lags zhes bya ba'i bar dang / gzugs mngon par ma grub ces bya ba dang / mngon par ma grub pa gang lags pa de/shes rab kyi pha rol tu phyin pa mngon par ma grub pa la ji ltar gdams shing rjes su bstan par bgyi zhes bya ba dang / mngon par ma grub pa las gud na byang chub sems dpa' mi dmigs zhes bya ba dang / gal te de ltar bstan pa na byang chub sems dpa' sems dpa' chen po'i sems zhum par mi 'gyur dngang bar mi 'gyur ba'i byang chub sems dpa' sems dpa' chen po ni shes rab kyi pha rol tu phyin pa la spyod pa'o zhes bya ba dang /byang chub sems dpa' gang lags zhes bya ba dang / shes rab kyi pha rol tu phyin pa gang lags zhes bya ba dang /yongs su brtags pa gang lags zhes bya ba dang / ci'i slad du gzugs la sogs pa skye ba ma mchis pa gang lags pa de gzugs la sogs pa ma lags zhes bya ba dang / ci'i slad du gzugs la sogs pa 'grib pa gang lags pa de gzugs la sogs pa ma lags zhes bya ba dang /ci'i slad du gzugs la sogs pa de dag gnyis su ma mchis pa'i grangs su mi 'grang zhes bya ba ste/ zhu ba nyi shu rtsa brgyad po de rnams dang / 'og nas gnas brtan gnyis kyis dum bur dris pa dang /lan btab pa zhib mo 'byung ba'i don de dag nye bar bzung nas kau shi ka la dris pa'i le'u la thug gi bar du ni gtan la dbab pa yin par rig par bya'o/ /de la rab 'byor byang chub sems dpa'i tshig gi don ni gzhi med pa'i don te zhes bya ba la byang chub sems dpa' rnams la don rnam pa bzhi yod de/byang chub dang / sems dpa' dang / phung po'i bdag nyid du kun rdzob kyi byang chub sems dpa' dang / don dam pa'i byang chub sems dpa'o/ /de bzhi char yang dngos po med pa'i ngo bo nyid yin pa'i phyir byang chub sems dpa' zhes bya ba'i tshig gi don ni gzhi'i don med pa yin no// gzhi'i don med pa ni gnas med pa la bya'o/ /gal te byang chub sems dpa' zhes bya ba dngos po'i bdag nyid 'ga' zhig yod par gyur na de'i tshig gi don gzhi dang bcas shing gnas dang bcas par 'gyur ba zhig na/ 'di ltar byang chub dang /sems dpa' dang / byang chub sems dpa' gnyis kyang med de / de'i phyir byang chub sems dpa'i tshig gi don gyi gzhi med de/ gnas med ces bya ba'i tha tshig go/ /don de nyid rnam par dbye ba'i phyir byang chub kyang ma skyes la/ sems dpa' yang ma skyes pa'i phyir te/rab 'byor byang chub dang / sems dpa' la skye ba dang / yod pa nyid med cing mi dmigs so zhes pa la byang chub ni 'dus ma byas pa'i phyir skye ba med do/ /sems dpa' yang yod pa ma yin pa'i phyir skye ba med do/ / de bas na rab 'byor byang chub la skye ba med do zhes bya ba dang /sems dpa' la yang yod pa nyid mi dmigs so zhes bya ba so sor sbyar bar bya'o/ /de'i 'og tu tshig gi don gyi sgra rnam par dgrol ba'i phyir/ rab 'byor byang chub la yang gzhi med/ sems dpa' la yang gzhi med de zhes bya ba gsungs so//yang de lta bas na byang chub sems dpa'i tshig gi don ni gzhi dang don zhes bya ba bshad de/ des na de bas na gzhi'i don med pa ni gzhi'i don to zhes bya bas mjug bsdus so/ /de'i 'og tu rnam pa bcu gcig gis byang chub sems dpa'i tshig gi don la gzhi'i don med par bstan pa'i phyir/rab 'byor 'di lta ste dper na nam mkha' la bya'i rjes med cing mi dmigs so zhes bya ba la sogs pa gsungs te/ de la byang chub la rnam par brtags pa'i gzhi med pa dang / kun brtags pa'i sems dpa' zhes bya ba'i gzhi gang yang med pa dang / byang chub las gzhan gud na gzhi med pa dang / kun rdzob kyi byang chub sems dpa' las gud na gzhi med pa dang / chos nyid kyi byang chub sems dpa'i gzhi med pa dang / byang chub la sems dpa'i gzhi med pa dang / sems dpa' la byang chub kyi gzhi med pa dang / byang chub ces bya ba'i gzhi'i don med pa dang /kun brtags pa'i byang chub sems dpa' la chos nyid kyi byang chub sems dpa'i tshig gi don med pa dang / don med pa'i byang chub sems [(]dpal pa [,]dpa' [)]kun brtags pa'i byang chub sems dpa'i tshig gi don med pa dang / don dam pa'i byang chub sems dpa' la gzhi med pa'i phyir ro//de la byang chub la rnam par rtog pa'i gzhi med par bstan pa'i phyir/ rab 'byor 'di lta ste dper na nam mkha' la bya'i rjes med cing mi dmigs so zhes bya ba gsungs te / ji ltar na nam mkha' la bya rnams rgyu yang de dag gi rjes yod pa ma yin pa de bzhin du de bzhin nyid kyi bdag nyid byang chub la rnam par rtog pa dag rgyu yang de la gnas par 'gyur ba ma yin no zhes bya ba'i tha tshig go//de'i 'og tu kun brtags pa'i byang chub sems dpa'i gzhi'i don med pa bstan pa'i phyir/ rab 'byor 'di lta ste dper na/ rmi lam la gzhi med cing mi dmigs so zhes bya ba la sogs pa gsungs so//dper na rmi lam dang / sgyu ma dang / smig rgyu dang / brag ca dang / mig yor dang / gzugs brnyan dang / sprul pa rnams la gzhi med de/ de dag ni shin tu med pa'i phyir ro/ /de bzhin du byang chub sems dpa' la yang gzhi med de/de yang med pa'i phyir ro zhes bya ba'i tha tshig go/ /de'i 'og tu byang chub las gud na gang na yang mi gnas par bstan pa'i phyir/ rab 'byor 'di lta ste dper na de bzhin nyid la gzhi med do zhes bya ba la sogs pa gsungs te/ji ltar de bzhin nyid dang / ma nor ba de bzhin nyid la sogs pa las gud na gzhi med pa de bzhin du byang chub las gud na yang gzhi med do zhes bya ba'i tha tshig go/ /de'i 'og tu kun rdzob kyi byang chub sems dpa'i gzhi med par bstan pa'i phyir/ rab 'byor 'di lta ste dper na sgyu ma'i skyes bu'i gzugs dang /tshor ba dang / 'du shes dang / 'du byed dang / rnam par shes pa la gzhi med do zhes bya ba la sogs pa gsungs te/ ji ltar sgyu ma'i bdag nyid kyi skyes bu la phung po lnga la sogs pa med de/ de nyid shin tu med pa'i phyir ro//de bzhin du kun rdzob kyi byang chub sems dpa' la yang phung po lnga'i gzhi med do zhes bya ba'i tha tshig go/ /de'i 'og tu chos nyid kyi byang chub sems dpa' la phung po lnga la sogs pa med par bstan pa'i phyir/ rab 'byor 'di lta ste dper na de bzhin gshegs pa dgra bcom pa yang dag par rdzogs pa'i sangs rgyas la gzugs dang /tshor ba dang / 'du shes dang / 'du byed dang / rnam par shes pa'i gzhi med do zhes bya ba la sogs pa gsungs te/ ji ltar chos kyi sku'i de bzhin gshegs pa la phung po lnga la sogs pa med pa de bzhin du don dam pa'i byang chub sems dpa' la yang phung po lnga la sogs pa med do zhes bya ba'i tha tshig go//de'i 'og tu byang chub la byang chub sems dpa'i gzhi med par bstan pa'i phyir/ rab 'byor 'di lta ste dper na 'dus ma byas kyi khams la 'dus byas kyi khams kyi gzhi med cing mi dmigs so zhes bya ba la sogs pa gsungs te/ji ltar mya ngan las 'das pa la 'khor ba med pa de bzhin du byang chub la yang sems dpa'i gzhi med do zhes bya ba'i tha tshig go/ /de'i 'og tu sems dpa' la yang byang chub kyi gzhi med par bstan pa'i phyir / 'dus byas kyi khams la 'dus ma byas kyi khams kyi gzhi med do zhes bya ba la sogs pa gsungs te/ji ltar 'khor ba dang mya ngan las 'das pa'i gzhi med pa de bzhin du sems dpa' la yang byang chub kyi gzhi med do zhes bya ba'i tha tshig go/ /de'i 'og tu byang chub ces bya ba'i tshig gi don med par bstan pa'i phyir/ rab 'byor 'di lta ste dper na skye ba med pa dang / 'gag pa med pa dang / mngon par 'du bya ba med pa dang / 'byung ba med pa dang / dmigs su med pa dang / kun nas nyon mongs pa med pa dang / rnam par byang ba med pa la gzhi'i don med do zhes bya ba la sogs pa gsungs te/ ji ltar skye ba med pa la sogs pa la gzhi'i don med pa de bzhin du byang chub sems dpa' la yang gzhi'i don med do zhes bya ba'i tha tshig go/ /de'i 'og tu kun brtags pa'i byang chub sems dpa' la chos nyid kyi byang chub sems dpa'i tshig gi don med pa bstan pa'i phyir/ rab 'byor 'di lta ste dper na gzugs la skye ba med pa dang /'gag pa med pa dang / mngon par 'du bya ba med pa dang / 'byung ba med pa dang / dmigs su med pa dang / kun nas nyon mongs pa med pa dang / rnam par byang ba med pa la gzhi'i don med do zhes bya ba la sogs pa gsungs te/ji ltar phung po la sogs pa'i tshig gi don rnams la skye ba med pa la sogs pa 'dus ma byas kyi tshig gi don rnams med pa de bzhin du kun brtags pa'i phung po lnga'i bdag nyid kyi byang chub sems dpa' la chos nyid kyi byang chub sems dpa' med do zhes bya ba'i tha tshig go/ / de'i 'og tu don dam pa'i byang chub sems dpa' la kun brtags pa'i byang chub sems dpa'i tshig gi don med pa bstan pa'i phyir/ rab 'byor 'di lta ste dper na gzugs shin tu rnam par dag pa la mtshan ma'i gzhi med do zhes bya ba la sogs pa gsungs te/ ji ltar gzugs la sogs pa'i phung po lnga la sogs pa'i chos kyi dbyings shin tu rnam par dag pa la 'dus byas kyi mtshan ma rnams kyi gzhi med pa dang /rab 'byor 'di lta ste dper na bdag la sogs pa rnam par dag pa la mtshan ma'i gzhi med pa dang / nyi ma la mun pa'i gzhi med pa dang / sreg pa'i bskal pa la 'du byed kyi gzhi med pa dang / de bzhin gshegs pa'i tshul khrims dang / ting nge 'dzin dang / shes rab dang / rnam par grol ba dang / rnam par grol ba'i ye shes gzigs pa la/ mi mthun pa'i phyogs kyi gzhi med pa de bzhin du don dam pa'i byang chub sems dpa'i chos kyi dbyings kyi bdag nyid la kun brtags pa'i phung po lnga'i bdag nyid kyi byang chub sems dpa' med do zhes bya ba'i tha tshig go//de'i 'og tu don dam pa'i byang chub sems dpa' chos nyid kyi bdag nyid gang la yang gnas pa med pa'i phyir/ rab 'byor 'di lta ste dper na/ nyi ma dang / zla ba'i 'od la gzhi med do zhes bya ba la sogs pas gzhi med pa ston te/ dper na nyi ma dang / zla ba dang / gza' dang / skar ma dang / nor bu rin po che dang / glog gi 'od rnams dang / 'dod pa na spyod pa'i lha thams cad dang /gzugs kyi khams kyi tshangs pa rnams dang / gnas gtsang ma rnams dang / de bzhin gshegs pa rnams kyi 'od thams cad ni 'od tsam du zad pas gnas pa med do/ /de bzhin du don dam pa'i byang chub sems dpa' yang gnas pa med par 'gro ba dag tu rgyu'o zhes bya ba'i tha tshig go//de ltar rnam pa bcu gcig gis byang chub sems dpa'i tshig gi don gzhi med par bstan nas/ de'i 'og tu gzhi med pa'i gtan tshigs su/ rab 'byor 'di ltar byang chub gang yin pa dang / byang chub sems dpa' dang / byang chub sems dpa'i gzhi'i don gang yin pa'i chos de dag thams cad ni ldan pa yang ma yin mi ldan pa yang ma yin no zhes bya ba la sogs pa gsungs te/byang chub kyi don du rtsol ba'i byang chub sems dpa' byang chub gang gis brtson par byed pa'i byang chub de'am/ yang na byang chub gang gis byang chub sems dpa' zhes bya ba'i ming thob par 'gyur ba'am/byang chub ces bya ba gang yin pa'am/ byang chub sems dpa'i tshig gi don gang yin pa'am/ kun brtags pa'i byang chub sems dpa' zhes bya ba'i gzugs dang / tshor ba dang / 'du shes dang / 'du byed dang / rnam par shes pa la sogs pa gang yin pa dang / chos nyid kyis byang chub sems dpa' chos kyi dbyings gang yin pa zhes bya ba'i tha tshig ste / chos de dag thams cad ces bya ba ni byang chub ces bya ba 'dus ma byas kyi chos dang / byang chub sems dpa' zhes bya ba phung po dang / khams dang / skye mched dang / rten cing 'brel bar 'byung ba la sogs pa 'dus byas kyi chos rnams dang / chos nyid kyi ngo bo nyid rnams te / chos nyid kyi gnas skabs na kun nas nyon mongs pa'i ngo bo nyid ma yin pa'i phyir ldan pa yang ma yin no/ /rnam par byang ba'i mtshan nyid ma yin pa'i phyir mi ldan pa yang ma yin no//dpyod pa med ces bya ba ni 'di ltar rnam par mi rtog pas dpyod pa med pa ste/ 'dzin pa'i mtshan nyid med pa bstan to/ /bstan du med pa zhes bya ba ni 'di ltar brjod du med pa'i phyir gzhan dag la tshig gis bstan cing go bar byar mi rung ste/de gnyis kyis 'dzin pa'i mtshan nyid med pa dang / gzung ba'i mtshan nyid med pa bstan to/ / thogs pa med pa zhes bya ba ni dbang po'i yul bzhin du thogs pa'i mtshan nyid med pa'i phyir ro/ /'di ltar mtshan nyid med par mtshan nyid gcig pa zhes bya ba ni mtshan nyid thams cad dang bral ba ni mtshan nyid med pa'i mtshan nyid do zhes bya ba'i tha tshig go//chags pa med pa dang / yod pa ma yin pa la bslab par bya'o zhes bya ba ni byang chub la chags pa'i phyir ram/ byang chub la yod pa'i dngos por 'dzin pa'i phyir byang chub sems dpa' zhes bya ste/ rnam par rtog pa de gnyis bzlog pa'i phyir chos thams cad la chags pa med pa'i mtshan nyid dang / dngos po med pa'i mtshan nyid du bslab par bya'o zhes bya ba'i tha tshig go/ /rtog pa med pa dang / dpyod pa med pa'i phyir zhes bya ba ni brtags na rtog pa'i rgyus yod pa'i blo skye'o/ / dpyad na dad pa'i rgyus chags pa skye ste/ de bas na rtog pa med pa'i phyir yod pa ma yin par 'gyur ba dang / dpyod pa med pa'i phyir chags pa med par 'gyur ro zhes bya bar sbyar bar bya'o/ /gnyis su med pa'i tshul gyis chos thams cad khong du chud par bya'o zhes bya ba ni gzung ba dang 'dzin pa dang /rjod pa dang / brjod par bya ba dang / skye ba dang / 'gag pa dang / dngos po dang dngos po med pa dang / chos dang chos ma yin pa dang / 'dus byas dang 'dus ma byas dang / 'jig rten dang / 'jig rten las 'das pa zhes bya ba la sogs pa gnyis kyi don dang bral ba zhes bya ba'i tha tshig go//de ltar byang chub sems dpa'i tshig gi don bstan nas sems dpa' chen po'i tshig gi don bstan pa'i phyir/ bcom ldan 'das byang chub sems dpa' sems dpa' chen po zhes bgyi ba ci'i slad du byang chub sems dpa' sems dpa' chen po zhes bgyi zhes gsol te//byang chub sems dpa' la ci'i slad du sems dpa' chen po zhes bgyi zhes bya ba ni ci'i phyir sems dpa' chen po'i ming du brjod ces bya ba'i tha tshig go/ /'di la bcom ldan 'das dang / /gnas brtan shA ri'i bu dang /rab 'byor dang / gang po dang bzhi'i dgongs pa rnam pa bzhi ste/ de la re zhig bcom ldan 'das kyi dgongs pa ni sems can thams cad kyi nang na 'di sems dpa' chen po yin pa'i phyir/ sems dpa' chen po zhes bya ste de nyid kyi phyir/ sems can gyi tshogs chen po dang /sems can gyi ris mang po'i phul byed par 'gyur zhes bya ba bstan to/ /gnas brtan shA ri'i bu'i dgongs pa ni chos thams cad dngos po med de yod pa ma yin pa don rtogs pa'i phyir sems dpa' chen po zhes bya ste/ chos thams cad kyi ming med par mthong bas bdag tu lta ba la sogs pa dang /med par lta ba'i mtha' rnams dang / phung por lta ba la sogs pa dang / yongs su mya ngan las 'das par lta ba'i mthar thug pa'i bar gyi/ rnam par rtog pa lta ba rnams med par bya ba'i phyir gzhan dag la yang chos ston pa'o/ / gnas brtan rab 'byor gyi dgongs pa ni byang chub sems dpa' chen po zhes bya ba 'di la chags pa med pa dang / thogs pa med pa che ba'i phyir sems dpa' chen po zhes bya ste de nyid kyi phyir/ sems de la yang chags pa med ces bya ba la sogs pas de la chags pa med par gnas pa yin par bstan to//gnas brtan gang po'i dgongs pa ni go cha chen po bgos pa dang / sgrub pa chen po dang / 'bras bu chen po la zhugs pa'i phyir sems dpa' chen po zhes bya ba ste/ de nyid kyi phyir go cha chen po bgos pa/ theg pa chen po la yang dag par zhugs pa/theg pa chen po la yang dag par gnas par bstan to/ /de la dang por bcom ldan 'das kyis bshad pa la sems can gyi tshogs chen po zhes bya ba ni rigs kyi sa'i gang zag nas bzung ste/ rang sangs rgyas kyi sa'i bar gyi yon tan gyi dbang du byas nas sems can gyi tshogs zhes smos so//sems can gyi ris mang po zhes bya ba ni byang chub sems dpa'i ris smos pa ste/ de dag gi yul du gyur pa de yang bsam pa che ba dang / sgrub pa che ba'i phyir ro/ /de la bsam pa che ba ni rdo rje lta bu'i sems bskyed pa yon tan lngas brgyan pa ste/ nges par 'joms pa dang / rin che ba dang / skyon med pa dang / mi phyed pa dang / don sgrub par byed pa'o/ /de la nges par 'joms pa ni shes rab kyi dbang gis yon tan brgyad kyis nges par 'joms pa ste/ ser sna la sogs pa nges par 'joms pa'i phyir/ bdog pa thams cad yongs su gtong ba dang /rjes su chags pa dang / khong khro ba la sogs pa nges par 'joms pa'i phyir/ sems mnyam pa nyid dang / lta ba'i nyes pa thams cad nges par 'joms pa'i phyir ro/ theg pa gsum gyis yongs su mya ngan las bzla ba dang / sems can yongs su mya ngan las bzla ba'i 'du shes med pa dang / chos thams cad nges par gzhom pa'i phyir/ chos thams cad skye ba med pa dang / 'gag pa med pa bdag gis rtogs par bya'o zhes bya ba dang / theg pa dman pa nges par gzhom pa'i phyir/ rnam pa thams cad mkhyen pa nyid kyi sems ma 'dres pa dang /ngan 'gro thams cad nges par gzhom pa'i phyir/ thams cad kyi rjes su song ba'i chos su rtogs pa yongs su grub pa ste/ sa dang por de bzhin nyid la kun tu 'gro ba'i don du rtogs pa dang / 'khor ba'i rnam par rtog pa thams cad nges par gzhom pa'i phyir/bdag gi phung po nas bzung ste pha rol tu phyin pa'i bar gyi chos rnams la tshul gcig tu bsgrub pa rtogs par bya'o snyam pa ste/ phung po dang / khams dang / skye mched dang / rten cing 'brel par 'byung ba dang /pha rol tu phyin pa'i chos rnams stong pa nyid kyi tshul du rtogs pa dang / rnam par byang ba pa'i rnam par rtog pa thams cad nges par gzhom pa'i phyir/ byang chub kyi phyogs kyi chos rnams dang / tshad med pa la sogs pa sangs rgyas kyi chos kyi mtha' la thug pa'i bar du sgrub pa rtogs pa ni de dag bsgom pa yongs su rdzogs par bya ba rtogs pa ste/de ltar shes rab kyi yon tan rnam pa brgyad bstan nas/ sems de'i snying rje'i stobs rin che ba bstan pa'i phyir/ bdag gis sems can gcig gi don du yang zhes bya ba la sogs pa gsungs so//sems rin po che skyon med pa bstan pa'i phyir/ rlabs po che'i sems dang / 'dod chags dang / zhe sdang dang / gti mug dang / rnam par 'tshe ba dang / nyan thos dang / rang sangs rgyas kyi sems skyon med pa zhes gsungs so/ /sems rdo rje lta bu de mi phyed pa nyid ni/rnam pa thams cad mkhyen pa nyid dang ldan pa'i yid la byed pas kyang rlom sems su mi byed ces gsungs pa ste/ bdud la sogs pa mi mthun pa'i phyogs rnams kyis mi phyed pa'i phyir ro/ /don sgrub par byed pas rin po che dang 'dra ba ni phan pa dang / bde ba'i sems su bya'o zhes gsungs pa'o//de ltar bsam pa che ba bstan nas sgrub pa che ba bstan pa'i phyir/ chos la kun tu dga' ba gnas pa dang / stong pa nyid la gnas pa dang / ting nge 'dzin la gnas pa zhes gsungs te/ rnam pa gsum gyis bstan to/ /chos thams cad dbyer med pa ste zhes bya ba ni dkar po'i chos thams cad de na tha dad pa med pa'i phyir chos kyi sku la bya'o//de ni gnas brtan shA ri'i bu'i dgongs pa ston te/ sems can du lta ba la sogs pa spangs pas gang zag la bdag med pa bstan to/ /phung por lta ba la sogs pa spangs pas chos la bdag med pa bstan to//gzugs la mi dmigs shing dmigs pa'i tshul gyis lta ba bskyed do zhes bya ba ni gzugs kyi phung po la sogs pa la dmigs pa'i rgyus rnam par rtog pa skyed pa'o/ /gnas brtan rab 'byor gyi spobs pa ston te/ 'di ltar sems de ni sems med pa ste/ sems med pa'i phyir de la chags pa med do zhes bya ste/ don dam pa'i chos nyid kyi sems ni kun brtags pa'i sems kyi mtshan nyid thams cad dang bral ba'i phyir sems med pa zhes bya'o/ /de bas na sems med pa'i phyir byang chub kyi sems zhes bya ba ni sems kun brtags pa'i sems de la chags pa med do//tshe dang ldan pa rab 'byor sems mi mnyam pa dang / mnyam pa nyan thos dang / rang sangs rgyas thams cad dang thun mong ma yin pa'i sems de gang yin zhes bya ba ni byang chub kyi sems kyi mtshan nyid 'dri ba'o/ / tshe dang ldan pa shA ri'i bu 'di la byang chub sems dpa' sems dpa' chen po sems dang po bskyed phyin chad ces bya ba la sogs pas don dam pa'i sems kyi mtshan nyid ston to/ /sa rab tu dga' ba yan chad kyi rnam par mi rtog pa'i sems la byang chub kyi sems zhes bya'o/ /chos gang la yang skye ba 'am/'gag par yang dag par rjes su mi mthong zhes bya ba ni de bzhin nyid la kun tu 'gro ba la sogs pa'i don du rtogs pa'i phyir sems gnas gyur pa/ nam mkha' dang mtshungs pas chos thams cad nam mkha' dang mtshungs par mthong ngo / /dper na nam mkha' de bdag dang lhan cig tu gnas pa rtsig pa la sogs pa 'dus byas kyi chos rnams la skye ba dang 'gag pa dag snang yang /nam mkha' la ni skye ba dang / 'gag pa med la/ sprin la sogs pas khebs sam ma bral ba'i dus na yang 'phel ba dang /[ (]'grab [,]'grib [)]par mi 'gyur ro/ / bdag dang lhan cig tu gnas pa rdo dang shing la sogs pa la 'gro ba dang / 'ong ba yod kyang nam mkha' la ni 'gro ba dang 'ong ba med do/ /na bun dang / khug rna dang / du ba la sogs pa yod pa dang / med par gyur na yang kun nas nyon mongs par yang mi 'gyur la/ rnam par byang bar yang mi 'gyur ba de bzhin du chos thams cad kyang don dam par yongs su grub pa ste/skye ba med/ 'gag pa med/ 'phel ba med/ 'grib pa med/ 'ong ba med/ 'gro ba med/ kun nas nyon mongs pa med/ rnam par byang ba med la/kun brtags pa'i gnas skabs na sgyu ma lta bu'i chos de dag skye ba la sogs pa dang ldan pa 'dra bar snang ngo zhes sems gang gis rtogs pa de mi mnyam pa dang mnyam pa'i sems dang thun mong ma yin pa'i sems zhes bya'o/ /tshe dang ldan pa rab 'byor gang khyod kyis 'di skad du zhes bya ba la sogs pas gnas brtan shA ri'i bu de nyid la chags pa med pa 'ba' zhig tu ma zad kyi/chos thams cad la yang chags pa med pa'i mtshan nyid khyab par ston te/ tshe dang ldan pa rab 'byor gzugs kyang chags pa med do zhes bya ba la sogs pa bshad do/ / sems ni zag pa med pa/ khong du chud pa med pa zhes bya ba 'dis kyang chos thams cad la khyab pa'i mtshan nyid du bstan to/ /gzugs med pa yang / gzugs la chags pa med do zhes bya ba ni kun brtags pa'i sems kyi mtshan nyid dang bral ba'i phyir te/ 'di ltar yongs su grub pa'i sems la/sems ma yin zhes bya ba de bzhin du/ kun brtags pa'i gzugs kyi mtshan nyid dang bral ba'i phyir/ chos nyid kyi gzugs la gzugs med pa zhes bya'o/ /gzugs med par gyur pa chos nyid kyi ngo bo nyid de/ kun brtags pa'i gzugs la chags pa med do zhes bya ba dang /tshor ba'i bdag nyid ma yin pa'i chos nyid de yang kun brtags pa'i tshor ba la chags pa med do zhes bya bar sbyar bar bya'o/ /gnas brtan gang po'i bshad pa ni/ go cha chen po bgos pa zhes bya ba la sogs pa ste/ dang po'i sems nas bzung nas/bsam pa rgya che ba bstan to/ /theg pa chen po la yang dag par zhugs pa zhes bya ba ni mos pas spyod pa'i sa nas bzung ste sa bdun pa'i bar du rtsol ba dang bcas/ rnam par rtog pa dang bcas pa'i spyod pa'i gnas skabs yin par bstan to/ /theg pa chen po la yang dag par gnas pa zhes bya ba ni sa brgyad pa yan chad don dam pa'i spyod pa yin par bstan to//de la go cha bgos pa yang rnam pa gnyis su bstan te/ sems can thams cad kyi don la brtson pa'i phyir bsam pa rgya che ba dang / sgrub pa gcig gis sgrub pa thams cad yongs su rdzogs par byed pas sgrub pa rgya che ba'o//de la bsam pa rgya che ba ni/ sems can nyung zad nyi tshe zhig gi ched du byang chub kyi phyir spyod pa ni ma yin zhes bya ba nas bzung ste/ sems can thams cad kyang de dag la 'god par bya'o zhes bya ba dang / tshe dang ldan pa shA ri'i bu de'i phyir byang chub sems dpa' sems dpa' chen po go cha chen po bgos pa zhes bya'o zhes bya ba'i bar gyis bstan to//sgrub pa rgya che ba ni tshe dang ldan pa shA ri'i bu gzhan yang byang chub sems dpa' sems dpa' chen po shes rab kyi pha rol tu phyin pa la spyod pa'i tshe sbyin pa yongs su gtong ba na zhes bya ba nas/pha rol tu phyin pa drug gcig la gcig sbyor bas phyogs bcu'i sangs rgyas rnams kyang ched du gleng zhing ming yongs su bsgrags pa mdzad pa'i bar gyis bshad do/ /nyung zad nyi tshe zhig gi phyir ma yin zhes bya ba ni yul yongs su chad pa med pa zhes bya ba'i tha tshig ste/yul yongs su chad pa med pa dang / sems can yongs su chad pa med pa dang / sbyor ba yongs su chad pa med pa gsum gyis bsam pa rgya che ba bstan to/ /sgrub pa rgya che ba las sbyin pa'i pha rol tu phyin pa la spyod pa ni sbyin pa'i pha rol tu phyin pa'i go cha'o zhes bya ba ni rang bzhin gyis zang zing gi sbyin pa ni sbyin pa'i pha rol tu phyin pa ste/de yang sems can thams cad dang thun mong du byas pa'i phyir te/ bla na med pa yang dag par rdzogs pa'i byang chub dang / sems can thams cad kyi don du yongs su bsngos pa ni sbyin pa'i pha rol tu phyin pa'i go cha zhes bya'o//de bzhin du zang zing gi sbyin pa ni sbyin pa'i pha rol tu phyin pa yin la/ de la spyod pa ni nyan thos dang / rang sangs rgyas kyi yid la byed pa dang mi ldan pa ni tshul khrims kyi pha rol tu phyin pa'i go cha zhes bya ste/ 'di ltar yang dag par rdzogs pa'i byang chub tu sems bskyed la/ de nas yi dam blangs pa ste/ yongs su gtong ba ni tshul khrims dang 'gal ba'i phyir ro/ /de bzhin du zang zing gi sbyin pa ni sbyin pa'i pha rol tu phyin pa yin la/ de la brtson pa ni sbyin par bya ba dang /sbyin pa po dang / len pa po mi dmigs pa'i yid la byed pa rnams la bzod pa'i don ni chos la nges par sems pa'i bzod pa ste/ bzod pa'i go cha zhes bya'o/ /de bzhin du sbyin pa gtong ba na sems can thams cad kyi don du yongs su bsngos pa'i sbyin pa la brtson 'grus mngon par 'phel ba ni brtson 'grus kyi go cha'o//de bzhin du sbyin pa gtong ba ni sbyin pa'i gnas skabs dang / yongs su bsngo ba'i gnas skabs na yang rnam pa thams cad mkhyen pa nyid yid la byed pa / sems rtse gcig tu gyur pa ni bsam gtan gyi go cha'o//de gcig pu la dmigs pa'i phyir ro zhes bya ba ni rnam pa thams cad mkhyen pa gcig pu kho na la dmigs pa'i phyir ro zhes bya ba'i tha tshig go/ /de bzhin du sbyin pa gtong ba na sgyu ma lta bu la sogs par yid la byed pa rnams dang / rnam par mi rtog pa'i yid la byed pa rnams mi spong ba dang /kun rdzob yongs su ma btang bas byang chub tu yongs su bsngo ba dang / don dam pa yongs su ma btang bas dmigs su med pa'i sbyor ba'i yid la byed pa ni shes rab kyi go cha'o/ /de bzhin du sbyin pa yongs su gtong ba na mi dmigs par sbyor ba'i yid la byed pas pha rol tu phyin pa drug yongs su rdzogs par 'dod kyang sbyin pa dang /tshul khrims dang / bzod pa dang / brtson 'grus dang / bsam gtan dang / shes rab kyi mtshan ma rnams mi dmigs pa dang / sems can thams cad dang thun mong du byed pa la zhugs kyang mtshan ma de mi dmigs pa dang /yang dag par rdzogs pa'i byang chub tu yongs su bsngo yang byang chub kyi mtshan ma mi dmigs pa ste/ de ltar chos thams cad mi dmigs pa'i yid la byed pa 'di ni don dam pa'i pha rol tu phyin pa drug gis yongs su zin pa'i phyir pha rol tu phyin pa drug gi go cha zhes bya'o//don dam pa'i pha rol tu phyin pa rnams bstan pa nyid kyi phyir de dag so sor bstan to/ /gzhan yang byang chub sems dpa' tshul khrims bsrung ba na tshul khrims dang rjes su mthun par bya ba nyid kyi phyir/ sbyin pa gtong ba dang /tshul khrims dang rjes su mthun pa'i bsam pas sems can thams cad dang thun mong du byas nas byang chub tu yongs su sngo bar byed pa de ni tshul khrims kyi pha rol tu phyin pa la spyod pa ni sbyin pa'i go cha zhes bya'o zhes bya ba dang / de bzhin du bzod pa dang rjes su mthun pa'i bsam pas sbyin pa la sogs pa byed pa dang /brtson 'grus dang rjes su mthun par bya ba nyid dang / bsam gtan gyi rjes su mthun par bya ba nyid kyi phyir zhes bya bar thams cad la sbyar bar bya'o/ /ser sna dang 'chal ba'i tshul khrims dang / gnod sems la sogs pa mi mthun pa'i phyogs su gyur pa'i nyon mongs pa rnams tshar bcad pa dang /rjes su mthun pa nyid du zhes bya ba la sogs pa ste/ de ltar pha rol tu phyin pa thams cad la yang sbyar bar bya'o/ /dri ba gnyis pa brtsam pa'i phyir/ tshe dang ldan pa gang po ji tsam gyis na byang chub sems dpa' sems dpa' chen po theg pa chen po la yang dag par zhugs pa yin/byang chub sems dpa' sems dpa' chen po'i theg pa chen po ni gang yin zhes bya ba gsungs so/ /de skad gsungs pa dang / gnas brtan gang pos theg pa chen po rnam pa bcu dang /de la yang dag par zhugs pa rnam pa bcu bstan nas/ de bas na theg pa chen po la yang dag par zhugs pa yin no zhes bya ba bstan to/ /de la sngar gzugs kyi bsam gtan bzhi dang tshad med pa bzhi dang / gzugs med pa'i snyoms par 'jug pa bzhi dang / chos bcu gnyis po de dag dang pha rol tu phyin pa drug la bsgoms na theg pa chen po yin pa dang / de dag gi rnam pa dang / rtags dang mtshan ma yid la byed pa dang / sems can thams cad dang thun mong du byas te/ byang chub tu yongs su bsngo ba ni theg pa chen po de la yang dag par zhugs pa yin no zhes bstan nas/tshe dang ldan pa shA ri'i bu 'di ni byang chub sems dpa' sems dpa' chen po'i theg pa chen po yin te / de ltar na byang chub sems dpa' sems dpa' chen po theg pa chen po la yang dag par zhugs pa zhes bya'o zhes bya bas mjug bsdus so//de nas yang pha rol tu phyin pa drug dang / chos bcu gnyis po de dag nyid yongs su rdzogs par byas na theg pa chen po yin pa dang / mdo las 'byung ba bzhin du de la brtson pa yang dag par zhugs pa yin par bstan pa'i phyir/ tshe dang ldan pa shA ri'i bu 'di ni byang chub sems dpa' sems dpa' chen po'i pha rol tu phyin pa drug gi theg pa chen po yin te/de ltar na byang chub sems dpa' sems dpa' chen po theg pa chen po la yang dag par zhugs pa yin no zhes bya ba ni gnyis pa de dag bstan pa'o/ /sbyin pa zhes bya ba ni/'dir chos kyi sbyin pa la bya ste/ de yang rnam pa thams cad du bsgoms na/ dran pa nye bar gzhag pa la sogs pa sangs rgyas kyi chos ma 'dres pa'i mthar thug pa'i bar gyi chos rnams theg pa chen po yin pa dang / de dag la yang rnam pa thams cad du bsgom par brtson pa dag yang dag par zhugs pa yin no zhes bya ba ni gsum pa ste/de yang tshe dang ldan pa shA ri'i bu 'di ni byang chub sems dpa' sems dpa' chen po'i theg pa chen po'o/ /de ltar na byang chub sems dpa' sems dpa' chen po theg pa chen po la yang dag par zhugs pa yin no zhes bya ba gsungs pa'o//de nas yang tshad med pa bzhi la bsgoms pa dang / pha rol tu phyin pa drug po dag theg pa chen po yin pa dang / mdo las 'byung ba bzhin du de la brtson pa dag yang dag par zhugs pa yin no zhes bya ba ni bzhi pa'o/ /de nas yang stong pa nyid bcu drug ni theg pa chen po yin pa dang /de yang mi dmigs par yid la byed pa dag yang dag par zhugs pa yin no zhes bya ba ni lnga pa'o/ /de nas mi g.yeng zhing mnyam par gzhag pa dag theg pa chen po'i yin pa dang / de shes pa yang dag par zhugs pa yin no zhes bya ba ni drug pa'o//g.yeng ba dang ting nge 'dzin dang mtshan ma dang bcas par dmigs par gnas pa la yod kyi mtshan ma med pa la ni ma yin te/ rnam par mi rtog pa la gnas pa ni rtag tu mnyam par gzhag pa'i phyir ro zhes bya ba'i tha tshig go/ /de nas yang gnyis su med pa'i chos nyid theg pa chen po yin pa dang /de la shes pa dang mi shes pa med par gyur pa yang dag par zhugs pa yin no zhes bya ba ni bdun pa'o/ /de nas yang dus gsum mnyam pa nyid theg pa chen po yin pa dang / de la mi shes pa med pa dang / mi dmigs pa'i shes pa yang dag par zhugs pa yin no zhes bya ba ni brgyad pa'o//de nas yang khams gsum mnyam pa nyid theg pa chen po yin pa dang / de la mi shes pa med pa dang / shes pa mi dmigs pa yang dag par zhugs pa yin no zhes bya ba ni dgu pa'o/ /de nas yang chos thams cad theg pa chen po yin pa dang /de la shes pa mi dmigs pa yang dag par zhugs pa yin no zhes bya ba ni bcu pa'o/ /de dag yongs su rdzogs par byas nas/ tshe dang ldan pa shA ri'i bu 'di ni byang chub sems dpa' sems dpa' chen po'i theg pa chen po'o/ /de ltar na byang chub sems dpa' sems dpa' chen po theg pa chen po la yang dag par zhugs pa yin no zhes bya bas mjug bsdus so// //bam po bcu gcig pa/ da ni dri ba gsum pa brtsam par bya ba'i phyir/ tshe dang ldan pa gang po ji tsam gyis na byang chub sems dpa' sems dpa' chen po theg pa chen po la gnas zhes bya zhes bya ba bshad do//de nas gnas brtan gang pos sa brgyad pa yan chad rnam par mi rtog pa la spyod pa drug bstan la / tshe dang ldan pa shA ri'i bu 'di la byang chub sems dpa' sems dpa' chen po shes rab kyi pha rol tu phyin pa la spyod pa'i tshe/sbyin pa'i pha rol tu phyin pa la yang dag par gnas zhes bya ba la sogs pas rnam par mi rtog pa'i pha rol tu phyin pa'i gnas skabs dang po bstan to/ /rnam par mi rtog pa'i stong pa nyid bsgom pa ni gnyis pa'o/ /rnam par mi rtog par dkar po'i chos thams cad bsgoms pa ni gsum pa'o//chos thams cad mi dmigs pa ni bzhi pa'o/ /dbang gi gnas skabs ni lnga pa'o/ /mngon par rdzogs par byang chub pa ni drug pa'o/ /de la dang por sbyin pa'i pha rol tu phyin pa la gnas zhes bya ba ni rnam par rtog pa dang bcas par spyod pa'i sa nas rnam par mi rtog pa rnam par smin pa'i pha rol tu phyin pa'i gnas la gnas zhes bya ba'i tha tshig go//sa brgyad pa la ni rnam par rtog pa dang bcas pa dang / rtsol ba dang bcas pa'i bsod nams kyi tshogs sngon du yongs su rdzogs par byas pa'i 'bras bur gyur pa rnam par smin pa'i pha rol tu phyin pa rnams rtsol ba med par yang nye bar gnas te/'bras bu'i bdag nyid du gyur pa'i phyir rnam par mi rtog pa yin no/ /de dag dang thabs mkhas pa'i mthu dang / smon lam gyi mthus byang chub sems dpa' rnams sems can gyi don sgrub po//gnyis pa la ni/ bsgom pa rnam par gzhig pa'i phyir na stong pa nyid bsgom mo zhes bya ba la/ rnam par 'jig pa zhes bya ba ni 'dir stong par byed pa la bya ste/ rnam par 'jig pa bsgoms pas mi dmigs par bsgom zhes bya ba'i tha tshig go//dngos po med par byed pa nyid la 'dir bsgom pa zhes bya'o/ /lhag ma ni go sla'o/ /de ltar gnas brtan gang pos rang gi spobs pa bstan pa dang / gnas brtan rab 'byor gyis bcom ldan 'das kyi dgongs pa shes par 'dod nas/ bcom ldan 'das ji tsam gyis na byang chub sems dpa' sems dpa' chen po go cha chen po bgos zhes bgyi ba lags zhes bcom ldan 'das la zhus so//de skad ces gsol pa dang / bcom ldan 'das kyis go cha chen po rnam pa dgu bstan to/ /de'i 'og tu de nas gnas brtan rab 'byor gyis bdag gi spobs pa gnyis pa bstan pa dang 'gres bcu gcig gis bstan te/go cha thams cad bgos pa rnams kyi nang nas rnam par smin pa las byung ba'i rdzu 'phrul gyi ngan 'gro rab tu zhi bar byed pa'i 'gres sgyu ma lta bu dang bcas pa'i 'gres ni dang po'o/ /pha rol tu phyin pa drug gi 'gres sgyu ma lta bu drug go//phyogs bcu'i sems can rnams pha rol tu phyin pa drug la bkod pa sgyu ma lta bu ni brgyad pa'o/ /bsam pa rgya chen po ni dgu pa'o/ /de la gnas brtan gyis sgyu ma lta bu'i rgyus bdag gi spobs pa bskyed par bstan pa'i phyir/ bcom ldan 'das bdag gis bcom ldan 'das kyis gsungs pa'i don 'tshal ba ltar na zhes bya ba gsungs so//kye ma byang chub sems dpa' sems dpa' chen po ni go cha ma mchis pa'i go cha bgos par rig par bgyi'o zhes bya ba ni sngar bshad pa'i go cha thams cad kun brtags pa yin pa'i phyir go cha de dag kyang med pa'i rang bzhin de bzhin nyid kyi ngo bo nyid kyi go cha bgos pa'i byang chub sems dpa' zhes bya ba'i tha tshig go//de bas na chos thams cad rang gi mtshan nyid stong pa nyid kyi slad du sgyu ma'i chos nyid nye bar bzung nas zhes bya ba gsol to/ /sgyu ma'i chos de dag bsgrub pa'i phyir/gzugs ni gzugs kyis stong ngo zhes bya ba la sogs pa bshad de/ 'di ltar yongs su grub pa'i gzugs kun brtags pa'i gzugs kyis stong zhing / yongs su grub pa'i tshor ba kun brtags pa'i tshor bas stong ste/ de'i phyir don dam pa'i go cha yang kun brtags pa'i go chas stong ngo zhes bya bar sbyar ro//de bas na tha mar/ go cha chen po yang go cha chen pos stong ste/ bcom ldan 'das rnam grangs des na byang chub sems dpa' sems dpa' chen po go cha ma mchis pa'i go cha bgos par rig par bgyi'o zhes bya ba gsungs so//rab 'byor rnam pa thams cad mkhyen pa nyid ni ma byas ma bshig mngon par 'dus ma byas zhes bya ba ci las dgongs she na/ 'jig rten 'di na go cha ni rnam pa gsum du 'jug ste/ ci zhig bya'o snyam nas go cha gyon par byed de/ dper na bdag gi grong khyer brtsig go snyam mam/gtsug lag khang brtsig go zhes bya ba lta bu dang / ci zhig med par bya'o snyam nas/ go cha gyon par byed de/ dper na bdag gis grong khyer gzhig par bya'o zhes bya ba 'am/ grong khyer gzhig par bya'o zhes bya ba lta bu dang / ci zhig mngon par 'du bya'o snyam nas go cha gyon par byed de/dper na bdag gis grong nyams dga' bar bya'o snyam mam/ grong khyer legs par bya'o snyam du sems pa lta bu'o/ /de bzhin du rnam pa thams cad mkhyen pa nyid kyang gal te 'ga' zhig gis byas pa 'am/ gzhig pa'am/ mngon par 'du bya ba zhig yin na ni de lta na rnam pa thams cad mkhyen pa nyid kyi don du go cha chen po bgos par 'gyur ba zhig na/ 'di ltar rnam pa thams cad mkhyen pa nyid ma byas/ ma bshig mngon par 'dus ma byas pa yin te/ de bas na de'i don du go cha chen po bgos par mi rigs so//de bas na go cha med pa'i go cha bgos so zhes bya bar rigs so snyam du dgongs pa'o/ /de nyid kyi phyir byed pa po mi dmigs pas rnam pa thams cad mkhyen pa nyid ma byas/ ma bshig mngon par 'dus ma byas pa ste/ 'di ltar de dag shin tu med cing /mi dmigs pa'i phyir ro zhes bya ba gsungs so/ /de bzhin nyid kyang gang gi tshe gzugs kyi de bzhin nyid dang sgra'i de bzhin nyid ces bya ba la sogs pa kun brtags pa'i rnam par mi 'dzin pa de'i tshe yang de'i rnam par yod pa ma yin pas de skad ces bya'o/ /de nas yang gnas brtan gyis bdag gi bsam pa brtan pa'i phyir/bcom ldan 'das bdag gis bcom ldan 'das kyis gsungs pa'i don 'tshal ba ltar na zhes bya ba gsol to/ /gzugs ni ma bcings ma grol ba'o zhes bya ba ci las dgongs she na 'ga' zhig 'di snyam du 'di ltar zag pa dang bcas pa'i phung po lnga po dag ni kun tu sbyor ba la sogs pas bcings te/de dag kyang bcings par gyur nas/ las dang nyon mongs pa dag gis yang dang yang 'khor bar byed la/ zag pa med pa dag ni phyis grol bar 'gyur te/ de'i tshe bshig par gyur na ma byas ma bshig ces bya ba snyam du sems pa de'i phyir gzugs ni ma bcings ma grol zhes bya ba la sogs pa smos te/bcings pa dang grol ba gnyis ni yod pa las 'gyur na/ 'di ltar gzugs la sogs pa ni shin tu med pa yin pas yod pa ma yin pa de dag la bcings pa dang grol ba ga la yod de mi 'grub bo//kun brtags pa'i dbang gis ni bcings pa dang grol ba gnyis bstan gyi/ don dam par ni ma yin no zhes bya ba'i tha tshig go/ /de bas na tshe dang ldan pa gang po gzugs nyid med pa'i phyir/ gzugs de ma bcings ma grol ba'o zhes bya ba la sogs pa bshad do//rmi lam lta bu zhes bya ba la sogs pas ni yongs su grub pa'i gzugs kyang ma bcings ma grol ba nyid du bstan to/ /dben pa dang / zhi ba dang / stong pa'i phyir zhes bya ba ni nam mkha' bzhin du gnas pa la bcings pa dang / grol ba nyid mi rigs so zhes bya ba'i tha tshig go//lhag ma rnams ni go sla'o/ /de ltar go cha chen po brtan pa yongs su rdzogs par byas nas/ gnas brtan rab 'byor gyis theg pa chen po la yang dag par zhugs pa zhes bya ba'i tshig bzung ste/ bcom ldan 'das byang chub sems dpa' sems dpa' chen po'i theg pa chen po gang lags zhes bya ba la sogs pa zhu ba rnam pa lnga brtsams so//de la bcom ldan 'das kyis theg pa chen po zhes bya ba rnam pa nyi shu rtsa gcig tu phye ste/ bshad pa 'di lta ste/ pha rol tu phyin pa'i theg pa chen po dang / stong pa nyid thams cad kyi theg pa chen po dang /ting nge 'dzin thams cad kyi theg pa chen po dang / dran pa nye bar gzhag pa'i theg pa chen po dang / yang dag par spong ba'i theg pa chen po dang / rdzu 'phrul gyi rkang pa'i theg pa chen po dang / dbang po'i theg pa chen po dang / stobs kyi theg pa chen po dang / byang chub kyi yan lag gi theg pa chen po dang / lam gyi theg pa chen po dang / rnam par thar pa'i theg pa chen po dang / shes pa'i theg pa chen po dang / dbang po'i theg pa chen po dang / ting nge 'dzin gsum gyi theg pa chen po dang / rjes su dran pa'i theg pa chen po dang / snyoms par 'jug pa lnga'i theg pa chen po dang / stobs bcu'i theg pa chen po dang / mi 'jigs pa'i theg pa chen po dang / so so yang dag par rig pa'i theg pa chen po dang / sangs rgyas kyi chos ma 'dres pa'i theg pa chen po dang / gzungs kyi sgo'i theg pa chen po'o/ / de la gnyis pa stong pa nyid kyi theg pa chen po'i 'gres la mig ni mig gis stong ste/ ther zug tu gnas pa med pa dang / 'jig pa med pa'i phyir zhes bya ba ni kun brtags pa'i mig ni kun brtags pa'i mig gis stong ste/ stong pa ni med pa'i don yin pas mig la mig gi dngos po med do zhes bya ba'i tha tshig go//gal te yod pa zhig yin na rtag pa ther zug tu gnas pa zhig gam/ mi rtag pa 'jig pa zhig yin grang na/ 'di ltar ther zug tu gnas pa ma yin zhing 'jig pa med de/ de'i phyir ther zug tu gnas pa ma yin la 'jig pa med pas med do zhes bya ba'i tha tshig go//de'i rang bzhin de yin pa'i phyir ro zhes bya ba ni mig la mig gi dngos po med pa nyid de'i rang bzhin te/ ngo bo nyid ces bya ba'i tha tshig go/ /nang dang phyi'i chos rnams so sor med pa nyid de stong pa nyid gnyis so/ / nang gi chos rnams phyi'i chos rnams la 'dzin pa dang / phyi'i chos rnams nang gi chos rnams kyi yul du gyur pa ste/ yul can dang yul gyi dngos po stong pa nyid gang yin pa de ni phyi nang stong pa nyid de gsum pa'o/ /chos thams cad stong pa nyid gang yin pa'i stong pa nyid des stong pa nyid du gyur pa 'di ni stong pa nyid stong pa nyid ces bya ste/stong pa yang de yin la stong pa nyid kyang de yin pa'i phyir stong pa nyid stong pa nyid ces bya'o/ /gang gis stong zhe na/ chos thams cad kyi stong pa nyid gang yin pa ste/ stong pa nyid des stong ngo zhes bshad do/ /ji skad bstan par 'gyur zhe na/stong pa nyid la stong pa nyid gnyis pa gzhan ni yod pa ma yin gyi ngo bo nyid kho nas stong ngo zhes bya ba'i tha tshig go/ /shar phyogs ni shar phyogs kyis stong zhes bya ba'i chos chen po rnams kyi stong pa nyid ni che ba nyid yin pas chen po stong pa nyid ces bya ste/ phyogs thams cad du khyab pa zhes bya ba'i tha tshig go//ther zug tu gnas pa med pa dang / 'jig pa med pa'i phyir mya ngan las 'das pa de 'ang mya ngan las 'das pas stong ngo zhes bya ba ni don dam pa'i mya ngan las 'das pa'i ngo bo nyid kyis stong ngo / /mya ngan las 'das pa ther zug tu gnas pa zhes mi bya'am zhe na/nyan thos kyi theg pa pa rtogs pa dang bcas pa kha cig gi tshul ni de lta ma yin gyi/ don dam par ni mya ngan las 'das pa zhes bya ba'i chos gang yang med do/ /'dus byas zhes bya ba ni khams gsum pa'o zhes bya ba la 'dus byas thams cad khams gsum du gtogs pa'i phyir de skad ces bya'o//gang la skye ba med pa dang / 'gag pa med pa dang / 'jig pa med pa dang / gnas pa med pa dang / gzhan du 'gyur ba med pa zhes bya ba la chos rnams 'byung ba ni skye ba'o/ /rgyun chad pa ni 'gag pa'o/ /skad cig gcig la 'jig pa ni zhig pa'o//rgyun gyi rgyud ma chad pa ni gnas pa'o/ /rgyun rnams kyi snga phyi'i bye brag ni gzhan du gyur pa zhes bya'o/ /gang la chos de dag med pa'i chos de dag la 'dus ma byas pa zhes bya'o/ /nam mkha' dang / de bzhin nyid dang / 'gog pa gnyis dang /chos de dag 'dus ma byas pa'i dngos por yod pa ma yin pa'i phyir/ 'dus ma byas stong pa nyid ces bya'o/ /chad pa'i mtha' dang / rtag pa'i mtha'o zhes bstan pa tsam du zad pas dngos po dang / dngos po med pa dang / chos dang chos ma yin pa dang / yod pa dang med pa la sogs pa'i mtha' rnams kyang 'di nyid du 'dus so/ /gang la thog ma dang tha ma mi dmigs pa de la dbus med ces bya ba ni thog ma dang tha ma med pa zhes bya ba la sogs pa thog ma zhes bya ba ni sngon gyi mtha' la bya'o/ /tha ma zhes bya ba ni phyi ma'i mtha' la bya'o/ / yang na tha ma zhes bya ba ni dang po'i mtha' la bya'o/ /thog ma zhes bya ba ni phyi ma'i mtha' la bya ste/ mtha' de gnyis med pa'i phyir dbus kyang med par 'gyur te/ de bas na thog ma med pa dang / tha ma med pa dang / dbus med pa'i stong pa nyid la/ thog ma dang tha ma med pa stong pa nyid ces bya'o//yang na thog ma dang tha ma dang / dbus med pa de dag nyid thog ma dang tha ma dang dbus med pas stong pa'i phyir thog ma dang tha ma med pa stong pa nyid ces pa'o / /dor ba med pa stong pa nyid ces bya ba ni ji ltar sngar blangs pa'i chu bo zhing med par byas na bum pa stong par 'gyur ba de bzhin du/don dam pa'i rdzas sngon byung ba rnams phyis bor zhing btang ba 'di la stong pa nyid rnam par gzhag pa ni yin gyi/ chos rnams ngo bo nyid kyis med pa de stong pa nyid ces bya ba'i tha tshig go/ /de la dor ba med pa ni dor ba med pas stong ngo zhes bya ba ni dor ba med pa'i chos ni gang yang med do zhes bya ba'i tha tshig go//rang bzhin stong pa nyid ces bya ba ni 'dus byas dang / 'dus ma byas rnams kyi rang bzhin chos nyid stong pa nyid gang yin pa de ni nyan thos sam/ rang sangs rgyas sam/ de bzhin gshegs pa'am/ gang gis kyang ma byas ma mdzad de/ de bas na rang bzhin zhes bya ba'o / /chos thams cad kyi rang bzhin de yang rang bzhin gyis stong ste/ chos can yod na ni de'i rang bzhin yang 'grub par 'gyur ba zhig na/ 'di ltar chos can nyid med na de gang gi rang bzhin du brjod par 'os zhes bya ba'i tha tshig go//de bas na rang bzhin ni rang bzhin gyis stong ngo zhes bya ba gsungs so/ /chos thams cad ni chos thams cad kyis stong ngo zhes bya ba ni don dam par na chos thams cad la chos thams cad kyi ngo bo nyid med do zhes bya ba'i tha tshig go/ /rang gi mtshan nyid stong pa nyid ces bya ba ni chos rnams med na 'di dag gang gis rang gi mtshan nyid du 'gyur/de bas na chos rnams kun brtags pa tsam du zad pa'i phyir mtshan nyid 'di dag kyang kun brtags pa yin pas med do zhes bya ba'i tha tshig go/ /mi dmigs pa stong pa nyid ces bya ba ni dus gsum du rtogs pa'i chos rnams dus gsum gyi bdag nyid du med pa gang yin pa de mi dmigs pa ste/mi dmigs pa de yang mi dmigs pa'i bdag nyid kyis stong gi/ mi dmigs pa zhes bya ba'i chos gzhan du gyur pa ni gang la yang med do zhes bya ba'i tha tshig go/ /dngos po med pa'i ngo bo nyid stong pa nyid ces bya ba ni rnam pa gnyis su bshad de/de la bshad pa snga ma ni/ rab 'byor 'dus pa las byung ba'i chos kyi ngo bo nyid med ces bya ba ste/ ji skad bstan par 'gyur zhe na/ 'di la chos thams cad skye ba na/ rang gi stobs 'ba' zhig gis skye ba ni ma yin gyi/rgyu dang rkyen gyi stobs kyis skye ste/ dper na sa bon gyis myu gu skyed pa na rang gi mthu 'ba' zhig gis skyed pa ni ma yin gyi/ sa dang chu la sogs pa 'dus pa'i mthus bskyed pa de bzhin du chos thams cad kyang rgyu dang / rkyen tshogs pa'i mthus skye'o/ / rang gi mthu 'ba' zhig gis skye ba ma yin pa'i phyir rten cing 'brel bar 'byung ba kho na'o/ /chos gzhan la brten te skye ba'i chos gang yin pa de dag ni gzugs su rung ba dang / myong ba la sogs pa'i rang bzhin yin du zin kyang / rgyu dang rkyen tshogs pa nyid las skye bar 'gyur bas na 'dus pa las byung ba zhes bya'o//'dus pa las byung ba gang yin pa de rang gi ngo bo nyid ces brjod par ji ltar nus/ de bas na chos thams cad gzhan gyi dngos pos skye ba'i phyir rang gi dngos po med pas ngo bo nyid med pa nyid do/ /rang gi dngos po med pa nyid kyi phyir dngos po med pa'i ngo bo nyid ces bya'o//de bas na rab 'byor 'dus pa las byung ba'i chos kyi ngo bo nyid med de/ rten cing 'brel par 'byung ba'i phyir zhes bya ba gsungs so/ /'di nyid chos thams cad dngos po med pa'i ngo bo nyid de/ dngos po med pa'i ngo bo nyid stong pa nyid ces bya'o/ / bshad pa cig shos ni/ dngos po ni dngos pos stong ngo / /dngos po med pa ni dngos po med pas stong ngo zhes bya ba ste/ dngos po dang ngo bo nyid ni dngos po dang ngo bo nyid do/ /dngos po dang / ngo bo nyid med pa ni dngos po dang / ngo bo nyid med pa ste/ rnam par rtog pa 'di la dngos po med pa zhes bya ba'i sgras ni dngos po yod pa ma yin par rtogs pas dngos po dang /dngos po med pa yang bzung ba yin no/ /ngo bo nyid med do zhes bya ba'i sgras ni rang gi dngos po ma yin par rtogs pas gzhan gyi dngos po dang / rang gi dngos po yang bzung ba yin te/ stong pa bzhi po de dag la dngos po med pa'i ngo bo nyid stong pa nyid ces bya'o/ /de las byung bas na/ dngos po zhes bya ste/ dngos po zhes bya ba'i sgra ni 'dus byas kyi chos rnams la bya'o/ /de'i phyir dngos po ni dngos pos stong ngo zhes gsungs so/ /dngos po med pa'i sgras ni 'dus ma byas kyi chos rnams la bya ste/de'i phyir dngos po med pa ni dngos po med pas stong ngo zhes gsungs so/ /de la dngos po'i chos ni dngos po'i bdag nyid dang bral ba dang / dngos po med pa'i chos kyang dngos po med pa'i bdag nyid dang bral ba zhes bya ba'i tha tshig go//ngo bo nyid ces bya ba ni shes pa dang mthong ba ste/ chos rnams kyi kun brtags pa'i gnas skabs yongs su spangs pa'i lhag ma yongs su grub pa'i gnas skabs ni shes pa dang mthong ba'i ngo bo nyid yin pa'i phyir de skad ces bya'o/ /de la shes pa'i stong pa nyid gang yin pa de ni shes pas ma byas la/mthong ba'i stong pa nyid gang yin pa de yang mthong bas ma byas te/ de lta bas na/ ngo bo nyid de gnyis kyi stong pa nyid ni rang bzhin yin pas ngo bo nyid stong pa nyid ces bya'o/ /de bzhin gshegs pa rnams byung yang rung / ma byung rung ste zhes bya ba ni/gnas pa'i mtshan nyid de bzhin nyid chos nyid gang yin pa de/ de bzhin gshegs pa la sogs pa pha rol gzhan gyis byas pa ma yin pa'i phyir/ byed pa po gzhan med la/ gzhan gyi dngos po stong pa nyid ces bya'o/ /de nas yang ting nge 'dzin gyi theg pa chen po'i gnas skabs dbye ba'i phyir/dpa' bar 'gro ba zhes bya ba'i ting nge 'dzin zhes bya ba la sogs pa gsungs so/ / dpa' bo bzhin du ting nge 'dzin gyi bya ba byed pa dang / ting nge 'dzin thams cad kyi spyod yul nyams su myong bar byed pa dang / thams cad du khyab par byed pa gang yin pa de la dpa' bar 'gro ba zhes bya ste/ 'di la sangs rgyas dang byang chub sems dpa' rnams kyi rnam par mi rtog pa zag pa med pa 'jig rten las 'das pa'i sems ni rtog pa dang bcas pa'i bya ba mi byed pa dang / rnam par g.yeng ba med pa gtso bor byed pa'i phyir ting nge 'dzin zhes bya'o//ting nge 'dzin de yang bsam gtan gyi ngo bo nyid ma yin te/ bsam gtan ni gzugs yod pa na spyod par gtogs pa'i phyir ro/ /sems kyi bdag nyid du gcig tu zin kyang sngon gyi brtsal ba'i mthus so sor byed pa phan pas na/bya ba byed pa'i dbang gis tha dad du brjod do/ /de yang gzhan dag gis rtog pa'i spyod yul du mi 'gyur te/ so sor rang gis rig pa yin pa'i phyir ro/ /de dag kyang mdo las ji skad 'byung ba bzhin du gzung bar bya ste/ de la rigs pas dpyad par bya ba ni ma yin no//rab 'byor gzhan yang byang chub sems dpa' sems dpa' chen po'i theg pa chen po ni 'di lta ste/ dran pa nye bar gzhag pa bzhi ste zhes bya ba ni 'di la dran pa nye bar gnas pas na/ dran pa nye bar gzhag pa zhes bshad pa'i phyir/ dran pa nye bar gzhag pa ni lus dang / tshor ba dang / sems dang chos zhes bya ba dang bzhi la dran pa nye bar gzhag pa'i sgrar brjod do/ /de ni dran pa yang yin la/ dran pa nye bar gzhag pa yin pas dran pa nye bar gzhag pa'o zhes bshad pa'i phyir chos bzhi'i yul ma brjed pa dang / bsrung ba'i don du dran pa'i bzhi ste/ dmigs pa bzhir gyur pa'i phyir dran pa nye bar gzhag pa bzhi zhes bya'o//'di la dran pa nye bar gzhag pa 'di bzhi char theg pa chen po'i tshul du ni sngar bstan to/ /lus dran pa nye bar gzhag pa gcig pu ni phyis nyan thos kyi tshul dang mthun par rnam pa drug tu bstan te/ nang gi lus la lus kyi rjes su lta zhing gnas zhes bya ba ni gang gi tshe nang gi sems can du bgrangs pa'i lus kyi rjes su lta ba de'i tshe na/nang gi lus la lus kyi rjes su lta ba zhes bya'o/ /gang gi tshe phyi rol sems can du mi bgrang ba/ gzugs kyi lus kyi rjes su lta ba de'i tshe ni phyi'i lus la lus kyi rjes su lta ba zhes bya'o//gang gi tshe phyi'i sems can du bgrang ba/ gzhan gyi lus kyi rjes su lta ba de'i tshe na nang dang phyi'i lus la lus kyi rjes su lta ba zhes bya'o/ /gang gi tshe nang gi sems can du bgrang ba'i gzugs la dmigs nas tshor ba dang sems dang / chos rnams 'byung ba de'i tshe/nang gi tshor ba dang / nang gi sems dang / nang gi chos rnams la bya'o/ /gang gi tshe phyi rol sems can du mi bgrang ba'i gzugs la dmigs pa las 'byung ba de'i tshe na phyi'i tshor ba dang / phyi'i sems dang / phyi'i chos rnams la zhes bya'o/ /gang gi tshe sems can du bgrang ba gzhan gyi gzugs la dmigs pa las byung ba de'i tshe na phyi nang gi tshor ba dang /phyi nang gi sems dang / phyi nang gi chos rnams la zhes bya'o/ /yang na skye mched drug la dmigs par byed pa la ni nang gi lus la lus kyi rjes su lta ba zhes bya ba'o //dbang por ma gtogs shing ma zin pa phyi'i gzugs la dmigs par byed pa de la ni phyi'i lus la lus kyi rjes su lta ba zhes bya'o/ /skye mched drug ma gtogs par nang gi zin pa'i gzugs la dmigs par byed pa la ni phyi dang nang gi lus la lus kyi rjes su lta ba zhes bya'o//gzugs de gsum la dmigs pa las byung ba'i tshor ba dang / sems dang / chos rnams kyang rnam pa gsum du sbyar bar bya'o/ /yang na nang gi 'byung ba'i gzugs rang gi lus su gtogs pa la dmigs par byed pa la ni nang zhes bya'o/ / phyi'i gzhan gyi 'byung ba la dmigs par byed pa la ni phyi'i zhes bya'o/ /'byung ba'i gzugs de yang rgyur byas nas 'byung ba'i dbang po dang / yul gyi gzugs gang yin pa de la dmigs par byed pa de la ni phyi nang gi zhes bya'o/ /'di gsum la dmigs pa las byung ba'i tshor ba dang /sems dang / chos rnams la yang rnam pa gsum du rig par bya'o/ /yang na gang gi tshe rnam par shes pa dang bcas pa'i nang gi lus la lus kyi rjes su lta ba de'i tshe na nang gi lus dang / tshor ba dang sems dang chos kyi rjes su lta ba zhes bya'o/ /gang gi tshe rnam par shes pa med pa rnam par bsngos pa la sogs pa la rjes su lta ba de'i tshe na phyi'i lus dang /tshor ba dang / sems dang / chos kyi rjes su lta ba zhes bya'o/ /gang gi tshe rnam par shes pa med pa'i rnam par bsngos pa la sogs pa'i gzugs 'das pa'i dus na rnam par shes pa dang bcas pa ste/rnam par shes pa dang bcas pa'i lus 'di yang ma 'ongs pa'i dus na rnam par shes pa med par mtshungs pa'i chos nyid dang mthun pa'i chos nyid du rjes su lta ba de'i tshe na phyi nang gi lus dang / tshor ba dang / sems dang / chos kyi rjes su lta ba zhes bya'o/ /nang gi lus la lus kyi rjes su lta ba zhes bya ba ni nang gi lus la lus zhes btags pa yin par rjes su brtags nas lta zhing gnas pa ste/gang zag yod pa nyid dam/ chos yod pa nyid du yang dag par rjes su ma mthong bas mi dmigs par gnas pas gnas so zhes bya ba'i tha tshig go//mi dmigs par gnas pa de nyid bstan pa'i phyir/ lus dang ldan pa'i rnam par rtog pa rnams la rnam par mi rtog go zhes bya ba gsungs so/ /lus su 'du shes pa dang ldan pa'i rnam par rtog pa gang yin pa 'di ni lus so zhes bya ba'am/ rtag pa dang / mi rtag pa dang /sdug bsngal ba dang / bde ba dang / sdug pa dang / mi sdug pa dang / bdag dang / bdag med pa dang / stong pa dang / mi stong pa dang / mtshan ma dang / mtshan ma med pa dang / smon pa dang / smon pa med pa la sogs pa de dag tu rnam par mi rtog go zhes bya ba'i tha tshig go//de mi dmigs pa'i tshul gyis zhes bya ba ni de yang de la rjes su lta ba dang / rnam par mi rtog pa ni mi dmigs par yid la byed pa'i dbang gis zhes bya ba'i tha tshig go/ /brtun pa can shes bzhin dang / dran pa dang ldan zhing 'jig rten gyi brnab sems dang /yid mi bde ba rnam par bsal nas zhes bya ba la/ rgyun du sbyor ba dang / gus par sbyor bas yang dag par mngon par brtson pa'i phyir brtun pa zhes bya'o/ /rjes su lta ba'i shes rab dang / shes bzhin gyis yang dag par yid la byed pa'i phyir shes bzhin zhes bya'o/ / mi brjed pa'i bdag nyid dang / srung bar byed pa dang / g.yeng ba med par byed pa'i dran pa dang bcas pa la dran pa dang ldan pa zhes bya'o/ /de'i 'og tu brtson 'grus dang / shes rab dang / dran pa de dag gi phan yon bstan pa'i phyir 'jig rten gyi brnab sems dang / yid mi bde ba rnam par bsal nas zhes bya ba gsungs so//'jig rten gyi chos zhes bya ba ni 'jig rten gyi chos rnams la zhes bya ba'i tha tshig ste/ rnyed pa dang grags pa dang / bde ba dang / bstod pa zhes bya ba 'jig rten gyi chos bzhi la ni chags sems 'byung ngo / /ma rnyed pa dang /ma grags pa dang / sdug bsngal ba dang / smad pa rnams la ni yid mi bde ba zhes 'byung ste/ de ltar mi dmigs par bsgom pa la brtson pa ni 'jig rten gyi chos thams cad kyis mi gos par bstan pa'i phyir 'jig rten gyi brnab sems dang /yid mi bde ba rnam par bsal nas zhes bya ba gsungs so/ /yang na gang zag dang / chos rnams mi dmigs pa'i phyir sems can rnams dang / 'du byed rnams la rjes su chags pa dang / khong khro ba spangs par bstan pa'i phyir 'jig rten gyi brnab sems dang /yid mi bde ba rnam par bsal nas zhes bya ba gsungs so/ /yang na sgrib pa thams cad kyi nang na gtso bor gyur pa 'dod pa la 'dun pa dang / gnod sems gnyis spangs par bstan pa'i sgrib pa thams cad kyang spangs par bstan pa yin no/ /de bzhin du nang gi tshor ba rnams la tshor ba'i rjes su lta zhing zhes bya ba ni bde ba dang /sdug bsngal ba dang / btang snyoms kyi dbang gis tshor ba rnam pa gsum du gyur pa las lus kyi tshor ba dang / sems kyi tshor ba'i dbang gis drug tu gyur pa dang / zang zing dang bcas pa dang / zang zing med pa dang / zhen pa la brten pa dang / mngon par 'byung ba la brten pa rnams zhes bya bar tha dad du phye ba'i tshor ba rnams la tshor bar brtags pa bzung nas/ tshor ba po bdag gam/ chos yin par brten pa la bltas nas mi dmigs par gnas pas gnas so/ / de bzhin du sems la yang 'dod chags dang bcas pa dang / 'dod chags med pa dang / zhe sdang dang bcas pa dang / zhe sdang med pa dang / gti mug dang bcas pa dang / gti mug med pa dang / bsdus pa dang / rnam par 'phros pa zhes bya ba la sogs par dbye bas phye ba'i sems la brten nas bdag gam chos mi dmigs pa'i tshul gyis rjes su lta zhing gnas so//chos rnams la yang phung po dang khams dang / skye mched dang / sgrib pa dang / byang chub kyi yan lag dang / 'phags pa'i bden pa la sogs pa'i chos rnams la brten nas kun brtags pa'i chos thams cad mi dmigs par snyoms par 'jug pa la bsgom zhing gnas so zhes bya bar sbyar bar bya'o//de ltar byang chub sems dpa'i theg pa'i tshul du dran pa nye bar gzhag pa bzhi bstan nas/ nyan thos kyi tshul du bstan pa'i tshul gyis lus dran pa nye bar gzhag pa nyid rnam pa drug tu bstan par bzhed nas/de'i nang gi lus la lus kyi rjes su lta zhing gnas pa na/ spyod na spyod do zhes bya bar rab tu shes so zhes bya ba la sogs pa gsungs te/ spyod lam gyi sgo dang / shes bzhin gyi sgo dang / dbugs rngub pa dang 'byung ba'i sgo dang /khams rnams rnam par gzhag pa'i sgo dang / rnam pa sum cu rtsa gnyis kyi sgo dang / mi sdug pa'i sgo dang / sgo drug po dag gis bstan to/ /de la dang por spyod lam gyi sgo nas bstan pa ni spyod pa dang / 'greng ba dang 'dug pa dang nyal ba zhes bya'o //spyod lam 'di dag la rnam pa gsum bstan te / chen po dang 'bring dang chung ngu'o/ /gang gi tshe lam ring por 'gro ba de'i tshe spyod lam bzhi ni che ba zhes bya ste/ de'i dbang gis 'gres dang po bstan to/ /gang gi tshe bsod snyoms kyi phyir grong du 'jug pa'am/ gtsug lag khang nas gtsug lag khang gzhan dag tu don gnyer du 'gro ba de'i tshe spyod pa'i spyod lam bzhi ni 'bring po ste/ de'i dbang gis de'i dbang du 'gro 'am/ 'ong yang shes bzhin du spyod pa yin zhes bya bas ni gnyis pa bstan to/ /lus kyi nyam nga ba bsal ba'i phyir bshang gci la sogs pa'i gnas su 'gro ba la sogs par spyod pa'i spyod lam bzhi ni chung ngu ste/de'i dbang gis 'gro ba dang / 'greng ba dang / 'dug pa dang / nyal ba zhes bya bas bstan to/ /lhag ma kun tu lta 'am/ rnam par lta yang shes bzhin du spyod pa yin zhes bya ba la sogs pas chung ngu nyid do//de la bya ba byed pa thams cad la yang so sor rtog pa rnam pa lnga ste/ 'di dang 'di bya'o zhes bya ba dang / 'di ni bya'o 'di ni mi bya'o zhes bya ba dang / 'di ni dus yin no 'di ni dus ma yin no zhes bya ba dang / 'di ltar ni bya'o 'di ltar mi bya'o zhes bya ba de'i don du bya'o zhes bya ba ste/de yang spyod na spyod do zhes bya bar rab tu shes so zhes bya ba la sogs pas bshad do/ /de'i 'og tu spyod lam chung ngu'i 'gres la 'gro zhes bya ba ni phar la 'gro ba'o/ /'ong zhes bya ba ni slar log pa'o//blo sngon du ma btang bas ma brtags par gzugs la lta ba ni kun tu lta ba'o/ /blo sngon du btang bas bsgrims te gzugs la lta ba ni rnam par lta ba'o/ /yang na mdun du lta ba ni kun tu lta ba'o/ /phyogs gzhan du lta ba ni rnam par lta ba'o/ /dpung pa dang /lag pa dang / rkang pa dang / yan lag dang / nying lag rnams bya ba de dang de dag la bsdus pa ni bskum pa'o/ /bsrang ba ni brkyang ba'o/ /chos gos chen po ni snam sbyar ro/ /de las gzhan pa'i gos ni chos gos so/ /bslang ba'i snod ni lhung bzed do//zos pa ni 'bras chan la sogs pa'o/ /'thungs pa ni btung ba la sogs pa'o/ /'chos pa ni khur ba la sogs pa'o/ /myangs pa ni 'o ma dang / zho dang bu ram la sogs pa'o/ /lam du 'gro ba la sogs pa'am/ tsha bas gdungs pa la sogs pas dus ma yin pa'i gnyid kyis non pa la phyogs su lta ba dang chus gdab pa dang /gdong phyi ba la sogs pa ni gtsang ba'o/ /bcag pa la sogs pa ni 'gro ba'o/ /bla ma la bsnyen bkur bya ba la sogs pa ni 'greng ba'o/ /skyil mo krung la sogs pa ni 'dug pa'o//dus su seng ge'i nyal thabs su nyal ba ni nyal ba'o/ /mel tshe thun lnga ni gnyid kyis ma log pa'o/ /chos 'chad pa'i yang dag pa'i gtam la sogs pa ni smra ba'o/ /ji ltar thos shing bzung ba'i chos rnams kyi don sems shing 'jal ba la sogs pa ni mi smra ba'o//lhag mthong dang zhi gnas la mngon par brtson pa ni nang du yang dag par 'jog ces bya'o/ /dbugs rngub pa dang 'byung ba'i sgo gsum la dran bzhin du dbugs rngubs na dran bzhin du dbugs rngubs so snyam du yang dag pa ji lta ba bzhin du rab tu shes so zhes bya ba ni dran pa dang /shes bzhin gtso bor byas te/ legs par nan tan du dbugs rngubs so zhes bya ba'i tha tshig go/ /dbugs ring du rngubs na dbugs ring du rngubs so snyam du zhes bya ba ni gang gi tshe las dang po pa 'di dran pa dang / shes bzhin du dran pa la brtson par byed pa na de'i lus dang /sems shin tu sbyangs pa na dbugs rngub pa dang / 'byung ba dag rim gyis phra bar gyur cing rtogs par dka' bar gyur pa de'i tshe/ rnal 'byor pa dag gis dbugs ring du byas nas rtogs par byed do/ /kha cig na re ngal gso ba'i phyir bar bar thung ngu byas/ bar bar ring du byas te bsgom par bya'o zhes zer ro/ /gzhan dag na re dbugs ma thal bar rngub pa dang 'byung ba la ni ring po zhes bya/ skabs skabs su dbugs rngub pa dang / 'byung ba la ni thung ngu zhes bya'o zhes zer ro/ /rdza mkhan nam rdza mkhan gyi slob ma zhes bya ba la rdza mkhan zhes bya ba ni legs par lobs pa'o//rdza mkhan gyi slob ma zhes bya ba ni slob pa ste/ gnyis ka smos pa ni rnal 'byor spyod pa yongs su rdzogs pa dang / las dang po pa gnyis dang mthun par bstan pa'o/ /khams kyi sgo dang / lus kyi rjes su lta ba'i sgo ni go sla'o//mi sdug pa'i sgo la ni 'gres dgu ste/ shi nas zhag gcig lon pa ni rnam par bam pa'o/ /shi nas zhag gnyis lon pa ni rnam par bsngos pa'o/ /shi nas zhag gsum lon pa'am/ shi nas zhag bzhi lon pa ni rnam par rnags pa'o/ /shi nas zhag lnga lon pa ni rnam par 'bus gzhig pa ste 'bu zhugs zhes bya ba'i tha tshig go//'das pa'i dus thams cad kyang de lta bu'i chos can no/ /ma 'ongs pa yang de lta bu'i rang bzhin can no/ /da ltar byung ba yang chos nyid de las ma 'das pa'o/ /za ba zhes bya ba'i 'gres dang / rnam par zos pa zhes bya ba'i 'gres gnyis ni rnam par zos pa'i mi sdug pa ste/da ltar dang 'das pa'i bye brag gis phye ba'o/ /sha dang khrag ra ri chags pa rgyus pas brang breng du 'brel pa zhes bya ba'i 'gres dang / gsum char yang med pa'i 'gres dang / 'gres de gnyis ni rnam par dmar ba'i mi sdug pa'o//rus pa keng rus zungs med pa/ gyes pa dung gi mdog ltar gyur pa/ sa la rnam par 'thor ba zhes bya ba'i 'gres dang / rkang pa'i rus pa rnams kyang gzhan du 'thor/ byin pa'i rus pa rnams kyang gzhan du 'thor zhes bya ba'i 'gres dang /'gres de gnyis ni rnam par 'thor ba'i mi sdug pa ste/ phyogs gcig tu 'thor ba dang / phyogs thams cad du 'thor ba zhes bya ba de tsam gyis dbye'o/ /'gres 'og ma gnyis kyis rus gong gis mi sdug pa ste/ kha dog ma gyur cing /rus pa ma grugs pa dang / kha dog gyur la rus pa grugs pa zhes bya ba de tsam gyis dbye'o/ /de ltar rnam par bam pa dang / rnam par bsngos pa dang / rnam par rnags pa dang / rnam par 'bus gzhig pa dang / rnam par zos pa dang / rnam par dmar ba dang /rnam par 'thor ba dang / rus gong zhes bya ba mi sdug pa rnam pa brgyad yin no/ /rnam par 'bus gzhig pa zhes bya ba ni rnam par 'tshig pa zhes bya ba yang de nyid do/ /de la thams cad kyi dang po ni mi dmigs par yid la byed pa'o/ /rnam par shes pa dang bcas pa'i lus kyi rjes su lta ba lnga dang /rnam par shes pa med pa'i mi sdug pa brgyad dang / rnam pa bcu gsum gyis lus dran pa nye bar gzhag pa bshad de/ 'gres bco lnga pa'o // //bam po bcu gnyis pa/ gnyis pa la yang dag par spong ba bzhi zhes bya ba ni 'dis sems yang dag par 'jog pas na yang dag par 'jog pa zhes bya ste brtson 'grus so//brtson 'grus de yang sbyor ba'i bye brag gis rnam pa bzhir gyur pas na bzhi zhes bya'o/ /'dun pa bskyed do rtsol lo brtson 'grus rtsom mo sems rab tu 'dzin to yang dag par rab tu 'jog go zhes bya ba ni/brtson 'grus de yang rnam pa bzhir 'gyur te/ go cha'i brtson 'grus dang / sbyor ba'i brtson 'grus dang / mi skye ba'i brtson 'grus dang / thabs kyi brtson 'grus so/ /dang por 'di ltar bya'o zhes go cha bgo bar byed do/ / de ni 'dun pa bskyed do zhes gsungs pa'o//de'i 'og tu go cha bgos pa dang rjes su mthun par sbyor ba rtsom ste/ de ni rtsol lo zhes gsungs pa'o / /de'i 'og tu tshigs che bar gyur kyang skyo ba ma skyes par brtson 'grus nyid 'phel bar byed de/ de ni brtson 'grus rtsom mo zhes gsungs pa'o//de'i 'og tu thabs ma yin par bsgrub pa yongs su spangs nas yang dag pa'i thabs la gnas par byed de/ de ni sems rab tu 'dzin no/ /yang dag par rab tu 'jog go zhes bya ba 'di gnyis kyis bstan to/ / de la sems bying bar gyur na rab tu 'dzin pa yid la byed pas rab tu 'dzin pas na sems rab tu 'dzin pa zhes bya'o//sems rgod par gyur na mngon par sdud pa yid la byed pas yang dag par 'jog pa la yang dag par rab tu 'jog pa zhes bya'o/ /gsum pa la/ rdzu 'phrul gyi rkang pa bzhi zhes bya ba ni 'jig rten las 'das pa'i chos zhes bya ba rdzu 'phrul gyi gzhi dang /gnas su gyur pa'i phyir rdzu 'phrul gyi rkang pa zhes bya ste/ de dag kyang 'dun pa dang / brtson 'grus dang / sems dang / dpyod pa dang bzhi'o/ /'di ltar la la ni dge ba'i chos sgom pa la 'dod pa cher skyed par gyur pa na de 'dun pa'i stobs 'ba' zhig gis sbyor bar gyur pa/legs par nges par sems shing yid la byed pa gzhan med pas sems rtse gcig tu 'gyur te/ de'i 'dun pa'i dbang gis byung ba'i ting nge 'dzin la 'dun pa'i ting 'dzin zhes bya'o/ /la la ni yang dag par spong ba bzhi'i brtson 'grus kyis rab tu sbyor ba na dge ba la 'jog pa'i brtson 'grus kyis rab tu sbyor zhing /mi dge ba spong ba dang / dge ba skyed pa la rab tu zhugs pa na sems rtse gcig tu gyur te/ de'i brtson 'grus kyi dbang gis byung ba'i ting nge 'dzin la brtson 'grus kyi ting nge 'dzin zhes bya'o//la la ni sems sbyong ba la zhugs pa na zhi gnas dang rab tu 'dzin pa dang / btang snyoms kyi rgyu mtshan rnams kyis sems yang dag par 'jog pa la sems sbyong ba'i stobs kyis sems rtse gcig tu gnas par gyur te/ de'i sems kyi dbang gis byung ba'i ting nge 'dzin la sems kyi ting nge 'dzin zhes bya'o//la la ni gang gi tshe yang dag par sbyor ba na tshul bzhin ma yin pa spang ba dang / tshul bzhin yid la byed pa dang / kun nas dkris pa rnams mi skye ba dang / kun nas dkris pa'i gnyen po'i chos rnams goms par byas pas sdig pa mi dge ba'i chos rnams kun tu mi spyod par 'gyur te/de'i tshe de 'di snyam du sems so/ /ci bdag sdig pa mi dge ba'i chos rnams la kun tu mi spyod dam snyam du sems pa de'i tshe na yang de 'di snyam du sems te/ ci sdig pa mi dge ba'i chos rnams yod pa la/bdag kun tu mi spyod par gyur tam/ 'on te med pa nyid la kun tu mi spyod par gyur snyam pa de bdag gis yongs su dpyad par bya'o snyam nas dpyod pa yid la byed pa bskyed de/ yang dag par sems par 'gyur te/ de dpyod pa yid la byed pa de'i dbang du byas nas rtsol ba na ting nge 'dzin skyes pa de dpyod pa'i ting nge 'dzin zhes bya'o//de ltar ting nge 'dzin rnam pa bzhi byung zhing kun nas dkris pa thag ring du gyur nas bag la nyal ba rnams spang ba'i phyir gong du yang dag pa'i spong ba bzhi po dag gis brtson 'grus rtsom ste/ de brtson 'grus rtsom pa na spong ba'i 'du byed kyi chos brgyad mngon du 'gyur te/nam zhig na 'jig rten pa dang / 'jig rten las 'das pa'i snyoms par 'jug pa bskyed par bya snyam du sems pa'i 'dun pa dang / mi dge ba'i chos thams cad nges par 'joms pa'i brtson 'grus dang /gong du thob pa'i chos la dad pa dang / de sngon du btang ba'i shin tu sbyangs pa dang / de la dran pa dang shes bzhin gyi phyogs dang / lhag mthong gi phyogs kyi shes bzhin dang / de la sems mngon par 'du byed pa'i sems dang / sems kun nas nyams pa med pa'i bdag nyid kyi btang snyoms rnams te sngar smos pa'i 'dun pa'i ting nge 'dzin dang /'dun pa dang / brtson 'grus dang / dad pa dang / shin tu sbyangs pa dang / dran pa dang / shes bzhin dang / sems pa dang / btang snyoms zhes bya ba spong ba'i 'du byed brgyad po 'di dag dang ldan par 'jig rten las 'das pa'i rdzu 'phrul gyi rkang par 'gyur ba'i ting nge 'dzin sgom mo zhes bya ba'i tha tshig go//dben pa la gnas pa zhes bya ba ni nyon mongs pa dag las dben pa'o/ /srid pa las 'dod chags dang bral ba'o/ /sdug bsngal 'gog pa'o//phung po thams cad rnam par spong ba'o/ /yang na sdug bsngal gyi bden pa yongs su shes pa'i phyir dben pa la gnas pa'o/ /kun 'byung ba'i bden pa spang ba'i phyir/ 'dod chags dang bral ba la gnas pa'o/ /'gog pa'i bden pa mngon sum du byas pa'i phyir/ 'gog pa la gnas pa'o/ /lam gyi bden pa bsgom pa'i phyir/ rnam par spong bas yongs su bsgyur ba zhes sbyar bar bya'o/ /yang na tshul khrims kyi phung pos ni dben pa la gnas pa'o/ /ting nge 'dzin gyi phung pos ni 'dod chags dang bral ba la gnas pa'o/ / shes rab kyi phung pos 'gog pa la gnas pa'o/ /rnam par grol ba'i phung pos ni rnam par spong bas yongs su bsgyur ba'o/ /bzhi pa la ni de ltar bdag po bzhi po dag gis yang dag par sbyor ba khyad par gyi chos 'byung ba'i rtags mthong bas gong du khyad par gyi chos 'byung ba la nges pa skye ste/de'i tshe rnal 'byor pa de ston pa dang / nyan thos rnams kyi thob pa la yid ches pa skye'o/ /de de ltar yid ches pa na gong du 'jig rten las 'das pa'i chos 'byung ba la dbang byed pas dad pa'i dbang po zhes bya'o/ /dad pa'i stobs kyis kyang brtson 'grus shin tu lhag par skye ste/de yang de bzhin du 'jig rten las 'das pa'i chos 'byung ba la dbang byed pas brtson 'grus kyi dbang po zhes bya'o/ /dran pa la sogs pa la yang de bzhin du sbyar bar bya'o/ /lnga pa la ni de ltar dad pa de nyid mngon par 'phel bas lha'am bdud dam/tshangs pa yang rung / gang gis kyang chos dang mthun pas thub par ma nus shing nyon mongs pa kun nas dkris pas kyang mi tshugs par gyur pa de'i tshe de nyid la dad pa'i stobs zhes bya'o/ /gong du smos pa de dag nyid kyis mi brdzi ba'i phyir de bzhin du brtson 'grus la sogs pa yang thub dka' bar 'gyur ro//stobs de dag gis rnal 'byor pa de stobs dang ldan pas bdud kyi stobs thams cad las rgyal nas rab tu sbyor te/ de bas na stobs rnams zhes bya'o/ /dad pa'i dbang po la sogs pa lnga po de dag nyid bsgoms na nges par 'byed pa'i cha dang mthun pa'i dge ba'i rtsa ba bzhir 'gyur te/dro bar gyur pa dang / rtse mo dang / bzod pa dang / 'jig rten pa'i chos kyi mchog go/ /de la dro bar gyur pa dang / rtse mo'i gnas skabs na ni dbang po zhes bya'o/ /bzod pa dang 'jig rten pa'i chos kyi mchog gi gnas skabs na ni stobs rnams zhes bya'o//de la 'jig rten pa'i chos kyi mchog ces bya ba'i lnga po rnams shin tu yongs su 'phel na de ma thag tu mthong ba'i lam la yang dag pa ji lta ba bzhin rtogs pa'i yan lag tu 'gyur bas/ byang chub kyi yan lag ces bya ba'i chos bdun 'byung ste/ chos rnam par 'byed pa dang brtson 'grus dang / dga' ba zhes bya ba 'di gsum ni lhag mthong gi phyogs so/ /shin tu sbyangs pa dang / ting nge 'dzin dang / btang snyoms ni zhi gnas kyi phyogs so/ /dran pa ni gnyi ga'i phyogs so//des kyang de dag thob pas bdag gi nyon mongs pa mthong bas spang bar bya ba rnams ni spangs par mthong zhing / bsgoms pas spang bar bya ba rnams ni ma spangs par mthong nas de dag spang ba'i phyir/ 'phags pa'i lam yan lag brgyad pa phung po gsum bsgom mo//de la yang dag pa'i lta ba dang / yang dag pa'i rtog pa dang / yang dag pa'i rtsol ba rnams ni shes rab kyi phung po'o/ /yang dag pa'i ngag dang / las kyi mtha' dang / 'tsho ba ni tshul khrims kyi phung po'o/ /yang dag pa'i dran pa dang / yang dag pa'i ting nge 'dzin gnyis ni ting nge 'dzin gyi phung po'o//yan lag brgyad kyis bsdus pa'i lam de yang 'phags pa slob pa rnams kyi nyon mongs pa thams cad spangs pa dang / rnam par grol ba mngon sum du bya ba'i lam yin pa'i phyir/ 'phags pa'i lam yan lag brgyad pa zhes bya ste/de dag ni byang chub kyi phyogs kyi chos kyi theg pa chen po bstan pa yin no/ /rab 'byor gzhan yang byang chub sems dpa' sems dpa' chen po'i theg pa chen po ni 'di ltar rnam par thar pa'i sgo gsum gyi ting nge 'dzin gsum ste/ stong pa nyid kyi ting nge 'dzin dang /mtshan ma med pa'i ting nge 'dzin dang / smon pa med pa'i ting nge 'dzin to zhes bya ba ni de la byis pa'i spyod yul kun brtags pa'i mtshan nyid gang yin pa'i mtshan nyid de dang bral ba yongs su grub pa'i mtshan nyid brjod du med cing / stong pa'i rnam par yang dag par rjes su mthong ba'i sems rtse gcig tu gyur pa gang yin pa de ni stong pa nyid kyi ting nge 'dzin to//yongs su grub pa'i dngos po gang yin pa de nyid yongs su rtog pa dang / rnam par rtog pa'i spros pa thams cad kyi mtshan ma'i rnam pa dang bral ba nam mkha' bzhin du mtshan ma med pa'i rnam par zhi ba nyid du yid la byed pa'i sems rtse gcig tu gyur pa gang yin pa de ni mtshan ma med pa'i ting nge 'dzin to//yang gzhan gyi dbang gis yongs su grub pa'i dngos po de nyid bzung nas/ de ltar shin tu yongs su dag pa'i dngos po la gzhan gyi dbang gis yongs su rtog pa'i spros pa las byung ba'i nyon mongs pa rnams kyis nye bar nyon mongs pa ni smad pa yin no snyam nas de la mi mthun par 'du shes te/phyin chad khams gsum pa de la mi smon cing gnas par mi bya'o snyam du bsams nas/ de ltar yid la byed pa'i sems rtse gcig tu gyur pa gang yin pa de ni smon pa med pa'i ting nge 'dzin to//de la kun brtags pa rnams mtshan nyid med par mthong ba ni stong pa nyid kyi ting nge 'dzin to/ /yongs su grub pa la zhi ba'i mtshan nyid du mthong ba ni mtshan ma med pa'i ting nge 'dzin to/ /gzhan gyi dbang la mi mthun par mthong ba ni smon pa med pa'i ting nge 'dzin to//de la kun brtags pa'i mtshan nyid rnams shin tu med pa'i phyir/ chos thams cad kyi rang gi mtshan nyid stong pa nyid du so sor rtog pa'i tshe/ sems gnas pa gang yin pa de ni stong pa nyid kyi rnam par thar pa'i sgo ste/ 'di ni stong pa nyid kyi ting nge 'dzin zhes bya'o zhes gsungs so/ /yongs su grub pa'i mtshan nyid kyis chos thams cad mtshan ma med pa'i mtshan nyid yin pas/ chos thams cad mtshan ma med par so sor rtog pa'i tshe/ sems gnas pa gang yin pa ni mtshan ma med pa'i rnam par thar pa'i sgo ste/'di ni mtshan ma med pa'i ting nge 'dzin zhes bya'o zhes gsungs so/ /chos nyid rang bzhin gyis yongs su dag pa la glo bur gyi nyon mongs pa la sogs pa'i rgyus yod pa ma yin pa la mngon par 'du byed pa/ bsod nams dang / bsod nams ma yin pa dang /mi g.yo ba'i mtshan nyid gang yin pa de don dam par med pa'i phyir/ chos thams cad mngon par 'du byed pa med pas/ chos thams cad mngon par 'du byed pa med do zhes so sor rtog pa'i tshe/ sems gnas pa gang yin pa ni smon pa med pa'i rnam par thar pa'i sgo ste 'di ni smon pa med pa'i ting nge 'dzin zhes bya'o zhes gsungs so//shes pa'i theg pa chen po la shes pa bcu gcig po rnams ni theg pa chen po ste/ de la 'di ni sdug bsngal lo/ /'di ltar sdug bsngal kun 'byung ngo / /'di ltar sdug bsngal 'gog pa'o //'di ltar sdug bsngal phyis mi skye'o zhes bya ba ni sdug bsngal shes pa'o/ /rnam pa bzhir gyur du zin kyang tha ma bzung nas/ phyi ma la sdug bsngal mi skye zhing rgyun chad do zhes de ltar zhugs pa'i shes pa la/ 'dir sdug bsngal shes pa zhes bya ste/ de bas na gang sdug bsngal mi skye bar shes pa'o zhes gsungs so//kun 'byung ba spangs par shes pa'o zhes bya ba ni kun 'byung ba'i bdag nyid nyon mongs pa dang / nye ba'i nyon mongs pa thams cad dang las rnams spangs par shes pa zhes bya ba'i tha tshig go/ /gang sdug bsngal 'gog par shes pa'o zhes bya ba ni nye bar len pa'i phung po lnga po dag zad par shes pa'o//'phags pa'i lam yan lag brgyad pa shes pa'o zhes bya ba ni lam 'di dang rtogs pa 'dis sdug bsngal 'gags pas sdug bsngal 'gog pa'i rgyu shes pa'o/ /gang 'dod chags dang / zhe sdang dang gti mug zad par shes pa zhes bya ba ni byas pa srung ba can gyi sa la ste/de la shes pa ni mngon sum gyi shes pa'o/ /srid pa'i 'gro ba mi skye bar shes pa gang yin pa zhes bya ba ni srid pa'i 'gro bar skye ba med par rnam par shes pa ste/ mi skye ba shes pa ni rjes su dag pa'i shes pa'o//rnam par grol ba mngon sum du byed pas/ de la dmigs pa ni chos shes pa zhes bya'o/ /mi rtag pa la sogs pa ni rjes su dpag pa yin pa'i phyir de la dmigs pa'i shes pa ni rjes su rtogs pa'i shes pa zhes bya'o/ /kha cig kho nar kun brtags pa la dmigs pa'i phyir pha rol gyi sems shes pa la kun rdzob shes pa zhes bya'o//yongs su 'dris pa shes pa zhes bya ba la yongs su 'dris pa ni goms par byed pa ste/ sgom pa zhes bya ba dang don gcig go/ /yongs su 'dris pa yang sdig pa mi dge ba'i chos rnams thams cad du zil gyis gnon zhes bya ba dang don gcig go//de la don snga ma'i rnam par rtog pa la yang dag par sgrub pa shes pa ni yongs su 'dris pa zhes bya'o/ /don gnyis pa'i rnam par rtog pa la sdig pa thams cad zil gyis mnan cing zad par byas par shes pa ni yongs su 'dris pa shes pa ste/de'i phyir lam shes pa dang / yongs su zad pa shes pa'o zhes bya ba gsungs so/ /de la rnam pa snga ma yongs su 'dris pa shes pa 'og ma'i bshad pa mdor bsdu ste 'di nyid du bstan pas yang ma bshad do/ /sgra ji bzhin shes pa gang zhe na de bzhin gshegs pas sgra thams cad mkhyen pa ste zhes bya ba la/sgra ni brjod pa ste / 'du shes dang brtags pa zhes bya ba ni rnam grangs te/ sems can dmyal ba dang / dud 'gro dang mi dang lha la sogs pa'i skad gang yin pa dang / brjod pa gang yin pa de dag thams cad rtog pa la sgra ji bzhin shes pa zhes bya'o//dbang po gsum zhes bya ba ni dbang po gsum po dag theg pa chen po ste/ nyan thos dang rang sangs rgyas kyi theg pa ba rnams rnam par byang ba'i chos rnams la dbang byed pa rnam par gnas pa'i phyir ro/ /kun shes par byed pa'i dbang po ni mthong ba'i lam la'o //kun shes pa'i dbang po ni gnyis ka la'o/ /kun shes pa dang ldan pa'i dbang po ni mi slob pa'i lam la'o/ /snang ba med pa dregs pa 'dul ba zhes bya ba ni mthong ba'i lam la de bzhin nyid ma gtogs par byang chub sems dpa' rnams la chos thams cad snang bar mi 'gyur ba de'i phyir snang ba med pa zhes bya'o//nyon mongs pa spang ba'i phyir dregs pa 'dul ba zhes bya'o/ /rtog pa dang bcas dpyod pa dang bcas pa la sogs pa la / ting nge 'dzin gsum ni sems kyi rgyu ba rags pa nyid dang /'bring dang / phra mo rnams rtogs par bya ba'i phyir te/ rtog pa dang bcas shing / dpyod pa dang bcas pa ni chen po'o/ /rtog pa med la dpyod pa dang bcas pa ni 'bring ngo / /rtog pa med cing dpyod pa med pa ni phra mo'o/ /rjes su dran pa dang / bsam gtan dang /tshad med pa la sogs pa ni sems can yongs su smin par bya ba dang / bsdu ba dang / dbang thob par bya ba dang / sangs rgyas kyi chos yongs su smin par bya ba la sogs pa'i phyir ro/ /de la tshad med pa bzhi zhes bya ba ni/ sems can tshad med pa la dmigs pa dang /tshogs tshad med pa'i rgyur gyur pa dang / chos tshad med pa thob pa'i rgyur gyur pa dang / ye shes tshad med pa'i spyod yul du gyur pa'i phyir tshad med pa zhes bya'o/ /de la byams pa ni rnam pa gsum ste/ mos pas spyod pa'i sa la ni sems can la dmigs pa'o//sa dang po nas sa bdun pa'i bar du ni de bzhin nyid la dmigs pa'o/ /sa brgyad pa yan chad ni dmigs pa med pa'o/ /snying rje la yang rnam pa gsum ste/ sems can sdug bsngal ba la dmigs pa dang / nyes par spyod pa mang ba'i sems can la dmigs pa dang /rkyen dang mi ldan pas rnam par ma grol ba'i sems can la dmigs pa'o/ /dga' ba yang rnam pa gsum ste/ bde ba'i sems can la dmigs pa dang / bdag gi tshogs yongs su rdzogs pa la dmigs pa dang / dam pa'i chos kyi ro myang ba la dmigs pa'o//btang snyoms la yang rnam pa gsum ste/ sems can gyi don spyad pa dag la skal ba yod pa dang / skal ba med pa la dmigs pa dang / rnyed pa dang ma rnyed pa la sogs pa 'jig rten gyi chos rnams la mnyam pa nyid du dmigs pa dang / tshogs yongs su rdzogs par bya ba la dus dang dus ma yin pa la dmigs pa'o//de la byams pa dang ldan pa'i sems zhes bya bas ni yon tan can bstan to/ /yangs pa zhes bya ba la sogs pas ni yon tan nyid bstan pa'o/ /yon tan can yang rnam pa gsum ste/ che ba nyid dang / gcig pa'i bdag nyid dang /gnod pa spong ba'o/ /che ba yang rnam pa gsum gyis bstan te/ bsam pa dang / 'phel ba dang / dmigs pas so/ /de la bsam pas che ba ni yangs pa zhes gsungs pa'o/ /'phel bas che ba ni rgya chen por gyur pa zhes gsungs pa'o//dmigs pas che ba ni sems can tshad med pa la dmigs pa'i phyir tshad med pa zhes gsungs pa'o/ /rnam par mi rtog pa dang / byams pa'i rnam par gcig pa'i phyir bdag nyid gcig pa ni mi gnyis pa zhes gsungs pa'o/ /rnam par 'tshe ba'i gnyen por gyur pa'i phyir nang gi chos las gyur pa'i gnod pa med pa ni khon med pa zhes gsungs pa'o//phyi rol gyi sems can gyis byas pa'i gnod pa med pa ni 'gran zla med pa zhes gsungs pa'o/ /phyi rol dang 'du byed las gyur pa'i gnod pa med pa ni gnod pa med pa zhes gsungs pa ste/'dod chags dang / dug dang / me la sogs pa'i gnod pa med pa'i phyir ro/ /bsam gtan bzhi zhes bya ba de la/ 'dod pa dag las dben zhes bya ba ni nyon mongs pa'i 'dod pa dang / dngos po la 'dod pa dag las dben pa ste/ mtshungs par ldan pa las dben pa dang /dmigs pa las dben pa'i phyir ro/ /sdig pa mi dge ba'i chos rnams las dben pa zhes bya ba ni gang dag nyon mongs pa'i 'dod pa'i rgyu las byung ba'i lus dang ngag dang yid kyis nyes par spyod par gtogs pa/ chad pas gcod pa dang / mtshon gyis 'debs pa dang /'thab pa dang / rtsod pa dang / 'gyed pa dang / g.yo'i tshig dang / gnod pa dang / brdzun du smra ba la sogs pa de dag las dben pa'o/ /rnam par rtog pa dang / rnam par dpyod pa dag skyon du ma mthong bas/ 'dod pa'i gnyen po de gnyis dang mtshungs par ldan pa 'dod pa las dben pa'am/sgrib pa las dben pa skyes pa'i phyir dben pa las skyes pa'o/ /'dod pa'i don rnyed nas gnas ngan len thams cad dang bral bas lus dang sems shin tu sbyangs te/ las su rung ba'i phyir dga' ba dang bde ba dang ldan pa'o//bsam gtan gnyis pa la ni rnam par rtog pa dang bcas rnam par dpyod pa dang bcas pa'i ting nge 'dzin gyi mtshan ma dag la skyon du mthong nas de las sems bzlog [(]te[,]ste[)]/ rnam par rtog pa med pa dang rnam par dpyod pa med pa'i ting nge 'dzin gyi mtshan ma la sems nye bar 'dogs shing g.yeng bar spyod pa'i dmigs pa dang bral bar byas nas sems rtse gcig tu spyod pa'i dmigs pa la tshul gcig pas zhi ba dang rab tu dang ba'i sems su 'jog go//de bas na de rtog pa dang / dpyod pa dang bral zhing nang yongs su dang ste zhes bya ba gsungs so//de de ltar sems nye bar 'jog pas rnam par rtog pa dang bcas/ rnam par dpyod pa dang bcas pas glags dang bcas shing / bar chad dang bcas pa'i gnas skabs las 'das nas bsgom pa goms pas glags med cing bar chad med pa'i gnas skabs thob par 'gyur te/de bas na sems kyi rgyud gcig tu gyur pa sa zhes bya ba gsungs so/ /rnam par rtog pa dang bcas shing rnam par dpyod pa dang bcas pa thams cad kyis thams cad du spangs pas rtog pa med pa dpyod pa med pa'o/ /bsam gtan gsum pa la/de dga' ba'i 'dod chags dang bral bas btang snyoms la gnas shing dran pa dang / shes bzhin can yin te bde ba lus kyis myong la zhes bya ba la btang snyoms su gnas pa dang / bde ba myong ba dag 'gal lo snyam du sems pa la/ de gnyis mi 'gal bar sgrub pa ston te/bsam gtan pa de rnam par rtog pa dang bcas/ rnam par dpyod pa dang bcas pa de dag dang / dga' ba yang spangs pas/ bar chad med par btang snyoms dang ldan par gnas so/ /de yang dga' ba dang ldan pa'i 'du shes yid la byed pa rnams kyi go skabs mi dbye ba'i phyir dran pa nye bar gnas pa yin no//skyes pa rnams kyang nam yang ji ltar yang dang yang du mi blang ba'i phyir shes rab kyis mang du gnas so/ /de bas na dran pa dang ldan zhing shes bzhin can zhes bya'o/ /de ltar btang snyoms la mang du gnas pa de sems g.yeng bar byed pa'i dga' ba dang ldan pa'i tshor ba spangs nas/dga' ba med pa zhi ba rab tu zhi ba'i tshor ba skye ste/ de yang de'i tshe gzugs kyi lus dang / yid kyi lus kyi tshor ba'i bde ba dang / shin tu sbyangs pa'i bde ba myong bar byed do/ /de bas na bde ba lus kyis myong ba zhes bya'o/ /'phags pa rnams kyis gang de dran pa dang ldan pa bde ba la gnas pa btang snyoms pa'o zhes brjod pa ste zhes bya ba ni bsam gtan 'og ma gnyis la de lta bu'i bde ba dang /btang snyoms med do/ /gong ma la ni btang snyoms yod la bde ba med do/ /de bas na bsam gtan gsum pa 'di nyid bde ba dang btang snyoms kyi gnas yin pas 'phags pa sangs rgyas rnams dang /sangs rgyas kyi nyan thos rnams kyis bsam gtan pa 'di nyid la btang snyoms pa/ bde ba la gnas pa/ dran pa dang ldan pa'o zhes gtso bor gsungs so/ /bsam gtan bzhi pa la bde ba yang spangs zhes bya ba ni bsam gtan gsum pa dang ldan pa'i bde ba bsam gtan bzhi pa 'dis spangs par bstan pa'o//snga nas sdug bsngal yang spangs zhes bya ba ni bsam gtan gnyis pas spangs pa yang bsdus te bstan pa'o/ /snga nas zhes bya ba dang / yid bde ba nub pas zhes bya ba ni bsam gtan gsum pa la dga' ba spangs pa bstan pa'o//yid mi bde ba nub pas zhes bya ba ni bsam gtan gnyis pas spangs pa bstan pa'o/ /btang snyoms dang / dran pa dang / shes bzhin rnams 'dir shin tu rnam par dag pa thob pa'i phyir sngar spangs pa rnams kyang 'dir bsdu bar bya'o//tshor ba bzhi po 'di dag spangs pas sdug bsngal yang ma yin bde ba yang ma yin pa'i tshor ba phyi na yod pa'i phyir/ bde ba yang ma yin sdug bsngal yang ma yin zhes bya ba gsungs so/ /btang snyoms dang dran pa yongs su dag ces bya ba ni bsam gtan bzhi pa mi g.yo ba nyid yin pa'i rgyu bstan to//gzugs med pa'i snyoms par 'jug pa bstan pa la/ de rnam pa thams cad du gzugs kyi 'du shes rnams las yang dag par 'das zhes bya ba ni nam mkha' lta bur mos pa spel bas sngon po dang /ser po dang / dmar po dang / dkar po la sogs pa dang ldan pa'i kha dog gi 'du shes kyis skyo zhing 'dod chags dang bral ba'i dbang gis med par gyur pa bstan to/ /de bas na nam mkha' lta bur mos pa bsgom pa goms pas/ gzugs kyi 'du shes de dag las yang dag par 'das pas kha dog rnam pa du ma brtsegs pa'i rgyu las byung ba/ka ba dang / rtsig pa dang / shing leb la sogs pa sgrib pa'i 'du shes gang yin pa de dag thams cad snang bar mi 'gyur te/ de bas na thogs pa'i 'du shes rnams nub par gyur zhes bya ba gsungs so//de dag med par gyur pas gzugs rnam pa sna tshogs mang po la zhugs pa bza' ba dang btung ba dang / bzhon pa dang / gos dang / rgyan dang / khyim dang / skyed mos tshal dang ri la sogs pa'i 'du shes sna tshogs gang yin pa de dag la rtsol ba mi 'jug pa'i phyir/ sna tshogs kyi 'du shes rnams yid la mi byed pas zhes bya ba gsungs so/ /gzugs la dmigs pa'i 'du shes de dag thams cad rnam par bshig pas nam mkha' mtha' yas pa'i rnam par mos par 'gyur te/ de bas na/ nam mkha' mtha' yas so snyam nas nam mkha' mtha' yas skye mched rdzogs par byas te gnas so zhes bya ba gsungs so//de rnam pa thams cad du nam mkha' mtha' yas skye mched las yang dag par 'das te rnam par shes pa mtha' yas so snyam nas zhes bya ba ni de rnam par shes pa gang gis nam mkha' mtha' yas par mos pa'i rnam par shes pa nam mkha' mtha' yas pa'i rnam par mos pa de nyid mtha' yas pa nyid du bzung ste/rnam shes mtha' yas skye mched la snyoms par 'jug par 'dod nas/ nam mkha' mtha' yas skye mched kyi 'du shes rnam par bzlog ste/ rnam par shes pa nyid mtha' yas pa'i rnam par mos par byed do/ / de bas na rnam par shes pa mtha' yas so snyam nas zhes bya ba gsungs so/ /de rnam pa thams cad du rnam shes mtha' yas skye mched las yang dag par 'das te zhes bya ba ni des rnam shes mtha' yas skye mched las bskyod de rnam par shes pa las gud na dmigs pa gzhan btsal na gzugs can nam/gzugs med pa ci yang ma rnyed do/ /des dmigs pa de ma rnyed pas rnam shes mtha' yas skye mched las yang dag par 'das te/ ci yang med pa'i skye mched nyid la dmigs nas mos shing bsgoms te snyoms par 'jug go/ /de bas na ci yang med do snyam nas ci yang med pa'i skye mched rdzogs par byas te gnas so zhes bya ba gsungs so//de rnam pa thams cad du ci yang med pa'i skye mched las yang dag par 'das zhes bya ba ni des ci yang med pa'i skye mched kyi 'du shes de la rags pa'i nyes dmigs su mthong nas ci yang med pa'i skye mched kyi 'du shes las rnam par bzlog go//des sngar ci yang med pa'i skye mched la snyoms par 'jug pa'i dus na ci zhig yod pa'i 'du shes rnam par bzlog go/ /da ni ci yang med pa'i 'du shes las rnam par bzlog pas des na 'du shes med ces bya ste/ 'di lta ste/ sems med pa'i snyoms par 'jug pa ltar 'du shes thams cad kyi thams cad du 'gags pa ni ma yin gyi/ shin tu phra ba'i phyir mtshan ma med pa'i 'du shes gang yin pa de 'byung ste/ de bas na/ 'du shes med min zhes bya ba gsungs so/ /rnam par thar pa bstan pa la/gzugs can gzugs rnams la lta ba zhes bya ba ni nang gi gzugs la dmigs pa'i snyoms par 'jug pa thob pa'i phyi rol gyi gzugs rnams la dmigs nas snyoms par 'jug ces bya ba'i tha tshig go/ /'di la yang rnam par thar pa snga ma gnyis ni mi sdug pa nyid de/de dag kyang bsam gtan dang po dang / gnyis pa'i rang bzhin no/ /rnam par thar pa gsum pa ni bsam gtan bzhi pa'i rang bzhin te/ de yang chags pa med pa'i ngo bo nyid do zhes 'chad do/ /'di la yang bsam gtan dang po 'dod pa na spyod pa'i kha dog la 'dod chags pa'i gnyen por nang gi skra la sogs pa la dmigs pa'i snyoms par 'jug pa la snyoms par zhugs nas de'i 'og tu phyi rol gyi rnam par bsngos pa la sogs pa la dmigs te/bsam gtan dang po la snyoms par 'jug pa na gzugs can gzugs rnams la lta ba zhes bya'o/ /de bzhin du bsam gtan dang po'i sa pa'i kha dog la 'dod chags pa'i gnyen por bsam gtan gnyis pa la snyoms par 'jug pa na yang gzugs can gzugs rnams la lta ba zhes bya ste/nang gi gzugs la dmigs pa'i dbang gis ni gzugs can zhes bya'o/ /phyi rol gyi gzugs la dmigs pa'i snyoms par 'jug pa'i dbang gis ni gzugs rnams la lta ba zhes bya'o//'dir yang snyoms par 'jug pa'i dbang gis gzugs la lta ba zhes bya'o/ /gnyis pa la nang gzugs med par 'du shes pa phyi rol gyi gzugs rnams la lta ba zhes bya ba ni rnal 'byor spyod pa la la nang gi skra la sogs pa dmigs pa'i snyoms par 'jug pa la snyoms par mi 'jug ste/phyi rol gyi rnam par bsngos pa la sogs pa dmigs pa na 'dod pa na spyod pa'i kha dog la 'dod chags pa la sogs pa'i gnyen por bsam gtan dang po 'am/ bsam gtan dang po'i sa pa'i kha dog la 'dod chags pa la sogs pa'i gnyen por bsam gtan gnyis pa la snyoms par 'jug pa zhes bya ba'i tha tshig go//sdug par mos pa zhes bya ba 'di ni sdug pa'i rnam par thar pa'o/ /mi sdug pa'i rnam par bsgoms pas sems kyi rgyud zhum pa dga' bar bya ba 'am/ ci bdag yid du 'ong ba'i gzugs rnams sdug pa nyid du yid la byed na kha dog la 'dod chags pa la sogs pa'i dbang gis sems kyi rgyud gzhan du 'gyur ram/'on te mi 'gyur zhes sad pa'i phyir de bsgom ste/ yid du 'ong ba'i gzugs la sogs pa la dmigs nas/ bsam gtan bzhi pa la snyoms par 'jug pa na sdug par mos pa zhes bya'o/ /snyoms par 'jug pa'i skad cig la sdug pa la sogs pa'i rnam par rtog pa med du zin kyang sngon du 'jug pa'i dbang gis de skad bya'o zhes 'chad do//gzugs med pa'i rnam par thar pa rnams ni bshad zin to/ /bsam gtan dang / gzugs med pa brgyad dang / 'du shes dang tshor ba 'gog pa ni mthar gyis gnas pa'i snyoms par 'jug pa dgu'o// //bam po bcu gsum pa/ de bzhin gshegs pa'i stobs bcu ste zhes bya ba la gnas la yang gnas su yang dag pa ji lta ba bzhin du rab tu shes so/ /gnas ma yin pa la yang gnas ma yin par yang dag pa ji lta ba bzhin du rab tu shes so zhes bya ba de la gnas ni gang /gnas ma yin pa ni gang zhe na/ nyes par spyod pa rnams kyi rnam par smin pa yid du mi 'ong ba ni gnas so/ /rnam par smin pa yid du 'ong ba ni gnas ma yin pa'o/ /legs par spyod pa rnams kyi rnam par smin pa yid du 'ong ba ni gnas so/ /rnam par smin pa yid du mi 'ong ba ni gnas ma yin pa'o//ser snas dbul por 'gyur ba ni gnas so/ /longs spyod chen por 'gyur ba ni gnas ma yin pa'o/ /sbyin pas longs spyod chen por 'gyur ba ni gnas so/ /dbul por 'gyur ba ni gnas ma yin pa'o/ /'chal ba'i tshul khrims kyis ngan 'gror skye ba ni gnas so//bde 'gror skye ba ni gnas ma yin pa'o/ /tshul khrims kyis bde 'gror skye ba ni gnas so/ /ngan 'gror skye ba ni gnas ma yin pa'o/ /gnod sems kyis gzugs mi sdug par 'gyur ba ni gnas so/ /gzugs bzang por 'gyur ba ni gnas ma yin pa'o/ /bzod pas gzugs mdzes par 'gyur ba ni gnas so//gzugs mi sdug par 'gyur ba ni gnas ma yin pa'o/ /le los mngon par rtogs par mi 'gyur ba ni gnas so/ /mngon par rtogs par 'gyur ba ni gnas ma yin pa'o/ /brtson 'grus kyis bden pa mngon par rtogs pa ni gnas so/ / mngon par rtogs par mi 'gyur ba ni gnas ma yin pa'o/ /rnam par g.yeng bas skyon med pa la mi 'jug pa ni gnas so/ /skyon med pa la 'jug pa ni gnas ma yin pa'o/ /bsam gtan gyis yang dag pa nyid la 'jug pa ni gnas so/ /mi 'jug pa ni gnas ma yin pa'o/ /'chal ba'i shes rab kyis byang chub 'thob pa med pa ni gnas so//byang chub 'thob pa ni gnas ma yin pa'o/ /shes rab kyis byang chub thob pa ni gnas so/ /mi 'thob pa ni gnas ma yin pa'o/ /srog gcod pas tshe thung bar 'gyur ba ni gnas so/ /tshe ring por 'gyur ba ni gnas ma yin pa'o//de spangs pas tshe ring por 'gyur ba ni gnas so/ /tshe thung bar 'gyur ba ni gnas ma yin pa'o/ /ma byin par len pas longs spyod chen po 'thob pa ni gnas ma yin pa'o/ /dbul por 'gyur ba ni gnas so/ /de spangs pas longs spyod 'thob pa ni gnas so/ / dbul por 'gyur ba ni gnas ma yin pa'o/ /'dod pa la log par g.yem pas 'gran zla dang bcas pa'i chung ma rnyed pa ni gnas so/ /'gran zla med pa'i chung ma rnyed pa ni gnas ma yin pa'o/ /de spangs pas 'gran zla med pa'i chung ma rnyed pa ni gnas so/ /'gran zla dang bcas pa'i chung ma rnyed pa ni gnas ma yin pa'o//brdzun du smra bas skur pa 'debs pa thob pa ni gnas so/ /de mi 'thob pa ni gnas ma yin pa'o/ /de spangs pas de mi 'thob pa ni gnas so/ /de 'thob pa ni gnas ma yin pa'o/ /phra mas 'khor mi phyed pa mi rnyed pa ni gnas so/ /rnyed pa ni gnas ma yin pa'o//de spangs pas 'khor mi phyed pa rnyed pa ni gnas so/ /mi rnyed pa ni gnas ma yin pa'o/ /tshig rtsub pos rtag par mi snyan pa thos pa ni gnas so/ /mi thos pa ni gnas ma yin pa'o/ /de spangs pas rtag tu snyan pa thos pa ni gnas so/ /mi thos pa ni gnas ma yin pa'o/ / tshig 'khyal pas tshig btsun par mi 'gyur ba ni gnas so/ /tshig btsun par 'gyur ba ni gnas ma yin pa'o/ /de spangs pas tshig btsun par 'gyur ba ni gnas so/ /tshig btsun par mi 'gyur ba ni gnas ma yin pa'o/ /brnab sems kyis longs spyod rnam par 'jig pa ni gnas so//rnam par mi 'jig pa ni gnas ma yin pa'o/ / gnod sems kyis sems can dmyal bar 'gro ba ni gnas so/ /bde 'gror 'gro ba ni gnas ma yin pa'o/ /de spangs pas bde 'gror 'gro ba ni gnas so/ /log par lta bas 'phags pa'i lam thob par mi 'gyur ba ni gnas so//'thob pa ni gnas ma yin pa'o/ /yang dag pa'i lta bas 'phags pa'i lam 'thob pa ni gnas so/ /mi 'thob pa ni gnas ma yin pa'o/ /mtshams med pa byed pas ting nge 'dzin rnams mi 'thob pa ni gnas so/ /'thob pa ni gnas ma yin pa'o/ /tshul khrims dang ldan pas 'thob pa ni gnas so//mi 'thob pa ni gnas ma yin pa'o/ /dmigs pa'i lta bas rjes su mthun pa'i bzod pa mi 'thob pa ni gnas so/ /'thob pa ni gnas ma yin pa'o/ /stong pa nyid la gnas pas rjes su mthun pa'i bzod pa 'thob pa ni gnas so/ / mi 'thob pa ni gnas ma yin pa'o/ /'gyod pa dang ldan pas sems g.yeng ba ni gnas so/ /sems shin tu sbyangs par 'gyur ba ni gnas ma yin pa'o/ /'gyod pa med pas sems shin tu sbyangs par 'gyur ba ni gnas so/ /g.yeng bar 'gyur ba ni gnas ma yin pa'o/ / gang bud med 'khor los sgyur ba'am/ brgya byin nam/ tshangs pa 'am/ dbang sgyur ram/ sangs rgyas su 'gyur ba ni gnas ma yin pa'o/ /gang skyes pas de dag tu 'gyur ba ni gnas so/ /gang brgyad pa'i gang zag rgyun tu zhugs pa'i 'bras bu ma thob par stan las ldang ba ni gnas ma yin pa'o//gang rgyun tu zhugs pa'i 'bras bu thob nas ldang ba ni gnas so/ /gang rgyun tu zhugs pa'i srid pa brgyad pa len pa ni gnas ma yin pa'o/ /gang mi len pa ni gnas so/ /gang lan cig phyir 'ong ba srid pa gsum pa len pa ni gnas ma yin pa'o/ /gang mi len pa ni gnas so//gang phyir mi 'ong ba 'jig rten 'dir 'ong ba ni gnas ma yin pa'o/ /gang phyir mi 'ong ba ni gnas so/ /gang dgra bcom pa las dang nyon mongs pa'i dbang gis nying mtshams sbyor bar 'gyur ba ni gnas ma yin pa'o/ /gang mi 'gyur ba ni gnas so/ /gang 'phags pa'i gang zag ston pa gzhan tshol ba ni gnas ma yin pa'o//gang mi tshol ba ni gnas so/ /gang mi skye ba'i chos la bzod pa thob pa'i byang chub sems dpa' phyir mi ldog pa ni gnas so/ /phyir ldog pa ni gnas ma yin pa'o/ /gang byang chub sems dpa' byang chub kyi snying po la 'dug nas bla na med pa yang dag par rdzogs pa'i byang chub mngon par rdzogs par sangs ma rgyas par stan las ldang ba ni gnas ma yin pa'o//gang mngon par rdzogs par sangs rgyas nas ldang ba ni gnas so/ /gang sangs rgyas rnams la bag chags kyi gnas yod pa ni gnas ma yin pa'o//gang ma lus par spangs pa ni gnas so/ /gang de bzhin gshegs pa'i mkhyen pa gang la yang thogs par 'gyur ba ni gnas ma yin pa'o/ /gang thams cad du thogs pa med pa ni gnas so/ /gang de bzhin gshegs pa'i spyi gtsug sus kyang mthong bar 'gyur ba ni gnas ma yin pa'o//gang de bzhin gshegs pa'i spyi gtsug sus kyang mi mthong ba ni gnas so/ /gang de bzhin gshegs pa'i thugs 'gyur bar snang ba ni gnas ma yin pa'o/ /gang mi snang ba ni gnas so/ /gang de bzhin gshegs pa'i thugs rnam par g.yeng ba ni gnas ma yin pa'o//gang rtag tu mnyam par gzhag pa ni gnas so/ /gang de bzhin gshegs pa log par gsung ba ni gnas ma yin pa'o/ /gang log par mi gsung ba ni gnas so/ /gang sangs rgyas rnams kyi gsung la 'khrul pa yod pa ni gnas ma yin pa'o//gang med pa ni gnas so/ /gang de bzhin gshegs pa gang du yang bag tsha ba dang / bsnyengs par 'gyur ba ni gnas ma yin pa'o/ /gang thams cad du bag tsha ba dang / bsnyengs pa mi mnga' ba ni gnas so/ /de dag la sogs pa ni gnas dang gnas ma yin pa zhes bya ste/ de shes pa ni gnas dang gnas ma yin pa mkhyen pa'i stobs zhes bya'o/ /las kyi rnam par smin pa mkhyen pa'i stobs zhes bya ba ni bcom ldan 'das kyi mkhyen pa gang gis las rnams dang / las len pa rnams kyi rnam par smin pa rgyu dang gnas las mkhyen pa ste/ gang 'das pa'i las len pa/dge ba'i rgyu las byung ba/ mi dge ba dang bral ba/ ma 'ongs pa na dge ba'i rgyu 'byin pa de lta bu yang yod/ da ltar byung ba na khyad par la brten la/ las len pa gang mi dge ba'i rgyu las byung ba/ dge ba dang bral ba/ ma 'ongs pa na mi dge ba'i rgyu 'byin pa yang yod/ 'das pa na dman pa la brten la ma 'ongs pa ni khyad par la brten par 'gyur ba yang yod/da ltar byung ba na dman pa la brten la/ ma 'ongs pa na khyad par la brten par 'gyur ba yang yod/ da ltar byung ba na khyad par la brten la/ ma 'ongs pa na dman pa la brten par 'gyur ba yang yod/ da ltar byung ba dang /ma 'ongs pa na yang dman pa la brten par 'gyur ba yang yod/ da ltar byung ba dang / ma 'ongs pa na yang khyad par la brten par 'gyur ba yod/ 'das pa na sbyor ba chung la ma 'ongs pa na sbyor ba rgya chen por 'gyur ba dang / 'das pa na sbyor ba rgya che la/ ma 'ongs pa na sbyor ba chung ba dang /rtsom pa chung la khyad par chen por 'gyur ba dang / rtsom pa che la khyad par du chung ba dang / nyan thos su 'gyur ba'i rgyu dang / rang sangs rgyas su 'gyur ba'i rgyu dang / sangs rgyas su 'gyur ba'i rgyu dang / da ltar byung ba na sdug bsngal la/ ma 'ongs pa na rnam par smin pa bde ba dang /da ltar byung ba na bde la/ ma 'ongs pa na rnam par smin pa sdug bsngal ba dang / da ltar byung ba na sdug bsngal la/ ma 'ongs pa na yang rnam par smin pa sdug bsngal ba dang / da ltar byung ba na yang bde la/ ma 'ongs pa na yang rnam par smin pa bde ba yang yod do/ / da ltar 'das pa dang / ma 'ongs pa dang / da ltar byung ba'i dus rnams na sems can thams cad kyi las gang yin pa dang / rgyu gang yin pa dang / rnam par smin pa gang yin pa rnams de bzhin gshegs pas rab tu mkhyen to/ /'jig rten gyi khams sna tshogs dang / 'jig rten gyi khams du ma zhes bya ba ni lhag pa'i bsam pa'i khams gang dang gang gis 'jig rten bsod nams mngon par 'du byed pa sogs pa dang /mi g.yo ba mngon par 'du byed pa stsogs pa dang / skye ba stsogs pa dang / 'dod chags dang bral ba stsogs pa dang / nyon mongs pa rnams stsogs pa dang /lta ba rnams stsogs pa dang / nges par 'byung ba stsogs pa dang / nyan thos su 'gyur ba'i rgyu stsogs pa dang / rang sangs rgyas su 'gyur ba'i rgyu stsogs pa dang / sangs rgyas su 'gyur ba'i rgyu stsogs pa dang / 'byung ba'i rgyu stsogs pa dang / 'jig pa'i rgyu stsogs pa'i lhag pa'i bsam pa'i khams de yang mkhyen to/ /mig gi khams dang / gzugs kyi khams dang / mig gi rnam par shes pa'i khams nas/ yid kyi khams dang / chos kyi khams dang / yid kyi rnam par shes pa'i khams kyi bar dag ni nang stong pa nyid dang /phyi stong pa nyid dang / phyi nang stong pa nyid du rab tu mkhyen to/ /sa'i khams dang / chu'i khams dang / me'i khams dang / rlung gi khams dang / nam mkha'i khams dang / rnam par shes pa'i khams ni sgyu ma dang rmi lam lta bur rab tu mkhyen to//'dod pa'i khams dang / gzugs kyi khams dang / gzugs med pa'i khams dag ni yang dag pa ma yin pa kun brtags pa las byung bar rab tu mkhyen to/ /'dus byas kyi khams ni kun brtags pas mngon par 'dus byas pa'i mtshan nyid dang /'dus ma byas kyi khams ni mngon par 'du mi byed pa'i mtshan nyid du rab tu mkhyen to/ /nyon mongs pa'i khams ni glo bur gyi mtshan nyid dang / rnam par byang ba'i khams ni rang bzhin 'od gsal ba'i mtshan nyid du rab tu mkhyen to/ /'du byed kyi khams ni tshul bzhin ma yin pa ma rig pa'i mtshan nyid dang /mya ngan las 'das pa'i khams ni tshul bzhin te/ rig pa'i mtshan nyid du rab tu mkhyen to/ /mkhyen nas kyang de lta de lta bur chos ston te/ 'di ni khams sna tshogs mkhyen pa'i stobs so/ /sems can gzhan dag dang gang zag gzhan rnams kyi mos pa sna tshogs dang /mos pa du ma yang dag pa ji lta ba bzhin du rab tu shes so zhes bya ba ni 'dod chags la gnas la zhe sdang la mos pa dang / zhe sdang la gnas la 'dod chags la mos pa dang / 'dod chags la gnas la gti mug la mos pa dang / gti mug la gnas la 'dod chags la mos pa dang /zhe sdang la gnas la gti mug la mos pa dang / gti mug la gnas la zhe sdang la mos pa dang / 'dod chags la gnas la 'dod chags la mos pa dang / zhe sdang la gnas la zhe sdang la mos pa dang / gti mug la gnas la gti mug la mos pa dang /'dod chags dang zhe sdang la gnas la/ 'dod chags dang zhe sdang la mos pa dang / 'dod chags la gnas la 'dod chags dang gti mug la mos pa dang / 'dod chags la gnas la zhe sdang dang gti mug la mos pa dang / zhe sdang la gnas la/ 'dod chags dang gti mug la mos pa dang / zhe sdang la gnas la/ 'dod chags dang / zhe sdang la mos pa dang / 'dod chags dang gti mug la gnas la/ 'dod chags la mos pa dang / 'dod chags la gnas la/ 'dod chags dang gti mug la mos pa dang / zhe sdang la gnas la/ 'dod chags dang gti mug la mos pa dang / 'dod chags dang gti mug la gnas la zhe sdang la mos pa dang / 'dod chags dang zhe sdang la gnas la/ gti mug la mos pa dang / gti mug la gnas la/ 'dod chags dang zhe sdang la mos pa dang /'dod chags dang zhe sdang la gnas la/ 'dod chags dang zhe sdang la mos pa dang / 'dod chags dang gti mug la gnas la/ 'dod chags dang gti mug la mos pa dang / zhe sdang dang gti mug la gnas la/ zhe sdang dang gti mug la mos pa dang / 'dod chags dang zhe sdang dang gti mug la gnas la/'dod chags dang zhe sdang dang gti mug la mos pa dang / 'dod chags la gnas la nga rgyal la mos pa dang / zhe sdang la gnas la nga rgyal la mos pa dang / gti mug la gnas la nga rgyal la mos pa dang / nga rgyal la gnas la nga rgyal la mos pa dang /nga rgyal la gnas la 'dod chags la mos pa dang / nga rgyal la gnas la zhe sdang la mos pa dang / nga rgyal la gnas la gti mug la mos pa dang / nga rgyal la gnas la 'dod chags dang zhe sdang la mos pa dang / nga rgyal la gnas la 'dod chags dang gti mug la mos pa dang /nga rgyal la gnas la 'dod chags dang zhe sdang dang gti mug la mos pa dang / 'dod chags dang zhe sdang la gnas la nga rgyal la mos pa dang / 'dod chags dang gti mug la gnas la nga rgyal la mos pa dang / zhe sdang dang gti mug la gnas la nga rgyal la mos pa dang / 'dod chags la gnas la lta ba la mos pa dang / zhe sdang la gnas la lta ba la mos pa dang / gti mug la gnas la lta ba la mos pa dang / nga rgyal la gnas la lta ba la mos pa dang / lta ba la gnas la lta ba la mos pa dang / lta ba la gnas la 'dod chags la mos pa dang / lta ba la gnas la zhe sdang la mos pa dang / lta ba la gnas la gti mug la mos pa dang / lta ba la gnas la nga rgyal la mos pa dang / lta ba la gnas la 'dod chags dang zhe sdang la mos pa dang /lta ba la gnas la 'dod chags dang gti mug la mos pa dang / lta ba la gnas la 'dod chags dang nga rgyal la mos pa dang / lta ba la gnas la 'dod chags dang lta ba la mos pa dang / lta ba la gnas la zhe sdang dang gti mug la mos pa dang /lta ba la gnas la zhe sdang dang nga rgyal la mos pa dang / zhe sdang la gnas la zhe sdang dang lta ba la mos pa dang / lta ba la gnas la gti mug dang lta ba la mos pa dang / lta ba la gnas la gti mug dang nga rgyal la mos pa dang / lta ba la gnas la nga rgyal dang lta ba la mos pa dang /de lta bu'i tshul can mthun pa dag dang / de bzhin du mi dge ba la gnas la dge ba la mos pa dang / dge ba la gnas la mi dge ba la mos pa dang / mi dge ba la gnas la mi dge ba la mos pa dang / dge ba la gnas la dge ba la mos pa dang /sbyor ba chung la mos pa rgya che ba dang / sbyor ba rgya che la mos pa chung ba dang / sbyor ba yang rgya che la mos pa yang rgya che ba dang / sbyor ba yang chung la mos pa yang chung ba dang / log pa nyid du nges pa la mos pa dang / yang dag pa nyid du nges pa la mos pa dang / 'dod pa'i khams su 'pho bar mos pa dang /gzugs kyi khams su 'pho bar mos pa dang / gzugs med pa'i khams su 'pho bar mos pa dang / 'dod pa'i khams las shin tu yang dag par 'da' bar mos pa dang / gzugs kyi khams las shin tu yang dag par 'da' bar mos pa dang /gzugs med pa'i khams las shin tu yang dag par 'da' bar mos pa dang / khams gsum char las shin tu yang dag par 'da' bar mos pa dang / dman pa la brten pa las khyad par la brten par 'pho bar mos pa dang / khyad par la brten pa las dman pa la brten par 'pho bar mos pa dang /dman pa la brten pa las dman pa la brten par 'pho bar mos pa dang / khyad par la brten pa las khyad par la brten par 'pho bar mos pa dang / srid par mos pa dang / 'byung bar mos pa dang / nyan thos nyid du mos pa dang /rang sangs rgyas nyid du mos pa dang / de lta bu la sogs pa'i rnam par mkhyen te/ 'di ni mos pa sna tshogs mkhyen pa'i stobs so/ /sems can gzhan dag dang / gang zag gzhan rnams kyi dbang po dang brtson 'grus kyi rim pa yang dag pa ji lta ba bzhin du rab tu shes so zhes bya ba ni dbang po rtul po'o//'di ni dbang po bar ma'o/ /'di ni dbang po rnon po'o/ /'di ni dbang po med pa'o/ /'di ni dbang po dman pa'o/ /'di ni dbang po khyad par can no/ /kun brtags pa'i dbang po 'dis 'dod chags 'byung ngo //'dis zhe sdang ngo / /'dis gti mug go/ /'dis nga rgyal lo/ /'dis lta ba'o/ /'dis nyon mongs pa chung ngu 'byung ngo / /'dis nyon mongs pa 'bring ngo / /'dis nyon mongs pa chen po 'byung ngo / /'dis skal ba yod par 'gyur ro/ /'dis skal ba med par 'gyur ro//'dis yongs su smin par 'gyur ro/ /'di re zhig yongs su smin par 'gyur ro/ /'dis skyon chung ngur 'gyur ro/ /'dis re zhig skyon chung ngur 'gyur ro/ /'dis dge ba rnams la sogs par 'gyur ro/ /'dis 'dod pa rnams so//'dis gzugs su gtogs pa rnams so/ /'dis gzugs med par gtogs pa rnams so/ /'dis skyo ba'o/ /'dis 'dod chags dang bral ba'o/ /'dis zhi gnas so/ /'dis lhag mthong ngo / /'dis rgyun du zhugs pa'o/ /'dis re ltar thogs na srid pa bdun pa'o//'dis bar chad gcig pa'o/ /'dis rigs nas rigs su skye ba'o zhes bya ba la sogs pa de lta bu dang / 'dis mos pas spyod pa'i sa'o/ /'dis rab tu dga' ba'o/ /'dis dri ma med pa'o zhes bya ba la sogs pa dang /'dis pha rol tu phyin pa rnams yongs su rdzogs par byed do/ /'dis byang chub kyi phyogs kyi chos rnams sgom mo/ /'dis sems can yongs su smin par byed do/ /'dis sangs rgyas kyi zhing yongs su dag par byed do/ /'dis mi skye ba'i chos rnams la bzod do//'dis ting nge 'dzin rnam pa mang po thob po / /'dis gzungs kyi sgo rnams so/ /'dis mngon par shes pa rnams so/ /'dis dbang po rnams thob par 'gyur ro zhes bya ba la sogs pa dang / gang sbyin pa'i dbang po can la tshul khrims la sbyor ba dang /gang tshul khrims kyi dbang po can la sbyin pa la sbyor ba dang / gang sbyin pa'i dbang po can la bzod pa la sbyor ba dang / gang bzod pa'i dbang po can la sbyin pa la sbyor ba dang / gang tshul khrims kyi dbang po can la bzod pa la sbyor ba dang / gang bzod pa'i dbang po can la tshul khrims la sbyor ba dang /gang sbyin pa'i dbang po can la brtson 'grus la sbyor ba dang / gang brtson 'grus kyi dbang po can la sbyin pa la sbyor ba dang / gang tshul khrims kyi dbang po can la brtson 'grus la sbyor ba dang / gang brtson 'grus kyi dbang po can la tshul khrims la sbyor ba dang /gang bzod pa'i dbang po can la brtson 'grus la sbyor ba dang / gang brtson 'grus kyi dbang po can la bzod pa la sbyor ba dang / gang brtson 'grus kyi dbang po can la bsam gtan la sbyor ba dang / gang bsam gtan gyi dbang po can la brtson 'grus la sbyor ba dang /gang bsam gtan gyi dbang po can la sbyin pa la sbyor ba dang / gang sbyin pa'i dbang po can la bsam gtan la sbyor ba dang / gang bsam gtan gyi dbang po can la tshul khrims la sbyor ba dang / gang tshul khrims kyi dbang po can la bsam gtan la sbyor ba dang /gang bsam gtan gyi dbang po can la bzod pa la sbyor ba dang / gang bzod pa'i dbang po can la bsam gtan la sbyor ba dang / gang shes rab kyi dbang po can la sbyin pa la sbyor ba dang / gang sbyin pa'i dbang po can la shes rab la sbyor ba dang / gang shes rab kyi dbang po can la tshul khrims la sbyor ba dang /gang tshul khrims kyi dbang po can la shes rab la sbyor ba dang / gang shes rab kyi dbang po can la bzod pa la sbyor ba dang / gang bzod pa'i dbang po can la shes rab la sbyor ba dang / gang shes rab kyi dbang po can la brtson 'grus la sbyor ba dang /gang brtson 'grus kyi dbang po can la shes rab la sbyor ba dang / gang shes rab kyi dbang po can la bsam gtan la sbyor ba dang / gang bsam gtan gyi dbang po can la shes rab la sbyor ba de dag kyang mkhyen to/ /gang yang dran pa nye bar gzhag pa'i dbang po can la yang dag pa'i spong ba la sbyor ba dang /gang yang dag pa'i spong ba'i dbang po can la dran pa nye bar gzhag pa la sbyor ba zhes pa la sogs pa dang / byang chub kyi phyogs kyi chos rnams la yang sbyar bar bya'o/ /gang yang nang stong pa nyid kyi dbang po can la phyi stong pa nyid la gnas zhes bya ba la sogs pas/stong pa nyid thams cad la sbyar bar bya'o/ /gang yang nyan thos kyi dbang po can la rang byang chub la sbyor ba dang / gang rang byang chub kyi dbang po can la nyan thos su sbyor ba can dang / gang nyan thos kyi dbang po can la rang sangs rgyas su sbyor ba can dang / gang rang sangs rgyas kyi dbang po can la nyan thos su sbyor ba can dang / gang rang byang chub kyi dbang po can la sangs rgyas su sbyor ba can dang / gang sangs rgyas kyi dbang po can la rang byang chub la sbyor ba can dang /gang 'khor ba'i dbang po can la 'byung ba la sbyor ba can dang / gang 'byung ba'i dngos po can la 'khor bar sbyor ba can de dag thams cad mkhyen nas de dag dang 'tsham par chos ston to/ /'di ni dbang po mchog dang / mchog ma yin pa mkhyen pa'i stobs so/ / thams cad du 'gro ba'i lam yang dag pa ji ba bzhin rab tu shes so zhes bya ba ni 'di la de bzhin gshegs pas yang dag pa nyid du nges par shes pa'i sems can gyi khams dang / log pa nyid du nges pa dang / ma nges pa'i sems can gyi khams rab tu mkhyen to//de la yang dag pa nyid du nges pa dang ma nges pa rnams dang mthun pa'i lam yang mkhyen to/ /log pa nyid du nges pa rnams ni btang snyoms su bya ba dang mthun par mkhyen to/ /byang chub sems dpa' de dag gi don du go cha gyon to/ /'dod chags kyi lam rnam pa gsum yang mkhyen te//'dod chags kyi lam sdug pa'i rnam pa las byung ba yang yod/ 'dod chags kyi lam rjes su chags pa'i rnam pa las byung ba yang yod/ 'dod chags kyi lam sngon gyi tshe rabs la goms pa'i stobs las byung ba yang yod/ zhe sdang gi lam kun nas mnar sems kyi gzhi las byung ba yang yod/mtshan ma las byung ba'i khong khro ba de lta bu yang yod/ sngon gyi rgyu las byung ba yang yod/ gti mug gi lam la rig pa'i rgyu las byung ba yang yod/ 'jig tshogs la lta ba'i rgyu las byung ba yang yod/ the tshom gyi rgyu las byung ba yang yod par rab tu mkhyen to/ /de la mngon par shes pa sla la bul ba'i lam yang yod/ mngon par shes pa dka' la myur ba'i lam yang yod/ mngon par shes pa sla la myur ba'i lam yang yod/ mngon par shes pa dka' la bul ba'i lam yang yod/so sor brtags pa'i stobs rdzogs par byed la/ bsgom pa'i stobs ma yin pa'i lam yang yod/ bsgom pa'i stobs rdzogs par byed la so sor brtags pa'i stobs ma yin pa'i lam yang yod/ gnyi ga rdzogs par byed pa'i lam yang yod/ gnyi ga rdzogs par mi byed pa yang yod/bsam pa phun sum tshogs la sbyor ba phun sum tshogs pa ma yin pa'i lam yang yod/ sbyor ba phun sum tshogs la bsam pa phun sum tshogs pa ma yin pa'i lam yang yod/ gnyi ga phun sum tshogs pa yang yod/ gnyi ga phun sum tshogs pa ma yin pa'i lam yang yod/lus dag par byed la ngag dang sems dag par mi byed pa'i lam yang yod/ ngag dag par byed la lus dang sems dag par mi byed pa yang yod/ yid dag par byed la lus dang ngag dag par mi byed pa yang yod/ lus dang ngag dag par byed la sems dag par mi byed pa yang yod/gang dag sems dag par byed la lus dag par mi byed pa yang yod/ lus dang sems dag par byed la ngag dag par mi byed pa yang yod/ lus dang ngag dag par byed la yid dag par mi byed pa yang yod/ thams cad dag par mi byed pa yang yod/ 'dir sdug bsngal la pha rol du bde bar 'gyur ba'i lam yang yod/ 'dir bde ba la pha rol du sdug bsngal bar 'gyur ba yang yod/ gnyi gar sdug bsngal bar 'gyur ba yang yod/ gnyi gar bde bar 'gyur ba yang yod/ bdag la phan la gzhan la phan par mi 'gyur ba'i lam yang yod/ gzhan la phan la bdag la phan par mi 'gyur ba yang yod/ gnyi ga la phan par 'gyur ba yang yod/ gnyi ga la phan par mi 'gyur ba yang yod/ 'dod pa'i khams kyi 'bras bu'i lam yang yod/'dod pa la 'dod chags kyi gnyen po yang yod/ gzugs kyi khams kyi 'bras bu'i lam yang yod/ gzugs kyi 'dod chags kyi gnyen po yang yod/ gzugs med pa'i khams kyi 'bras bu'i lam yang yod/ gzugs med pa'i 'dod chags kyi gnyen po yang yod/srid pa'i 'bras bu yang yod/ 'byung ba'i 'bras bu yang yod/ nyan thos kyi 'bras bur 'gyur ba yang yod/ rang byang chub kyi 'bras bur 'gyur ba yang yod/ sangs rgyas kyi 'bras bur 'gyur ba yang yod/ nges pa yang yod/ ma nges pa yang yod/ nyes par spyod pa'i gnyen por 'gyur ba yang yod/ kun nas ldang ba'i gnyen por gyur pa yang yod/ bag la nyal gyi gnyen por gyur pa yang yod/ 'dod chags kyi gnyen por gyur pa yang yod/ zhe sdang gi gnyen por gyur pa yang yod/ gti mug gi gnyen por gyur pa yang yod/nga rgyal gyi gnyen por gyur pa yang yod/ lta ba'i gnyen por gyur pa yang yod/ zhi gnas sgrub pa yang yod/ lhag mthong sgrub pa yang yod/ pha rol tu phyin pa sgrub pa yang yod/ byang chub kyi phyogs bsgom pa sgrub pa yang yod/sems can yongs su smin par byed pa sgrub pa yang yod/ sangs rgyas kyi chos yongs su smin par byed pa sgrub pa yang yod/ sangs rgyas kyi zhing yongs su dag pa sgrub par byed pa yang yod/ sa yongs su sbyong ba sgrub pa yang yod/ mngon par shes pa sgrub pa yang yod/dbang sgrub pa yang yod/ bsod nams kyi tshogs yongs su sgrub pa yang yod/ ye shes kyi tshogs sgrub pa yang yod par rab tu mkhyen te / 'di ni thams cad du 'gro ba'i lam mkhyen pa'i stobs so/ /bsam gtan dang / rnam par thar pa dang /ting nge 'dzin dang snyoms par 'jug pa'i kun nas nyon mongs pa dang / rnam par byang ba dang ldan pa yang dag pa ji lta ba bzhin du rab tu shes so zhes bya ba ni de la bsam gtan dang po la sogs pa bsam gtan bzhi po dag dang / rnam par thar pa brgyad po dag dang /rtog pa dang bcas/ dpyod pa dang bcas pa la sogs pa'i ting nge 'dzin gsum po dag dang / gzugs med pa'i snyoms par 'jug pa bzhi po dag dang / mthar gyis gnas pa'i snyoms par 'jug pa dgu po dag dang / de dag gi kun nas nyon mongs pa gang yin pa dang /kun nas nyon mongs pa'i rgyu gang yin pa dang / rnam par byang ba gang yin pa dang / rnam par byang ba'i rgyu gang yin pa dang / de dag las ldang ba'i rgyu gang yin pa de dag thams cad rab tu mkhyen to/ /de la tshul bzhin ma yin pa yid la byed pa dang / srid pa'i don du yongs su bsngo ba dang /lta ba sna tshogs dang ldan pa dang / ro myong bar byed pa dang ldan pa dang / dmigs pa yid la byed pa'i dbang gis bsam gtan la sogs pa'i kun nas nyon mongs par 'gyur ro/ /bsam gtan gyi yan lag la snyoms par zhugs nas mthong ngam/sems can yongs su smin par byed pa'i phyir ram/ mngon par shes pa sgrub pa'am/ mi dmigs pa yid la byed pa bsam gtan la sogs pa rnam par byang bar 'gyur ro/ /ldang ba ni seng ge rnam par bsgyings pa'am/ thod rgal du snyoms par 'jug pas lugs dang mthun pa'am/lugs las bzlog pa la sogs pa'i dbang gis 'gyur te/ 'di la de bzhin gshegs pa ting nge 'dzin la yang snyoms par 'jug pa la rtag tu mnyam par gzhag pa yang yin no/ /ting nge 'dzin gcig tu yang ting nge 'dzin thams cad la snyoms par 'jug cing bzhengs so//ting nge 'dzin thams cad kyi nang du ting nge 'dzin gcig ston cing bzhengs te/ mdo las ji skad 'byung ba bzhin no/ /ting nge 'dzin gcig gis kyang ting nge 'dzin thams cad kyi bya ba rnams mdzad do/ /ting nge 'dzin mang pos ting nge 'dzin gcig gi bya ba mdzad do//ting nge 'dzin thams cad la bzhengs pa gcig ston to/ /ting nge 'dzin sna tshogs las bzhengs pa sna tshogs ston to/ /bzhengs pa sna tshogs las ting nge 'dzin gcig ston to zhes bya ba la sogs pa yang mdo las ji skad du 'byung ba bzhin du gzung bar bya ste/'di ni bsam gtan dang / rnam par thar pa dang / ting nge 'dzin dang snyoms par 'jug pa mkhyen pa'i stobs so/ /sngon gyi gnas rjes su dran pa mkhyen pa'i stobs dang / lha'i mig gis mngon par shes pa mkhyen pa'i stobs dang / zag pa zad pa mkhyen pa'i stobs kyang gzhung nyid las 'byung ba bzhin du gzung bar bya'o// //bam po bcu bzhi pa/ mi 'jigs pa bzhi ste zhes bya ba la/ dang po dang gnyis pa ni rang gi don las brtsams pa'o/ /gsum pa dang bzhi pa ni gzhan gyi don las brtsams pa'o//dge sbyong dang bram ze zhes bya ba la sogs pa la/ shes rab kyis mngon pa'i nga rgyal byed pa'i phyir/ dge sbyong dang bram ze smos so/ /lha'i mig dang pha rol gyi sems shes pa la sogs pa phun sum tshogs pa'i phyir lha dang / bdud smos so/ /rdzu 'phrul dang mthu che ba'i phyir tshangs pa rnams smos so//rgyu de yang dag par rjes su mi mthong ste zhes bya ba ni de dag gis brgal ba'i rgyur 'gyur ba 'gal ba de cung zad kyang mi mthong zhes bya ba'i tha tshig go/ /bde ba thob ces bya ba ni lus kyi spu zing zhes byed pa dang / bag 'khums pa la sogs pa med par bstan to//de'i dbang gis cang shes khyu mchog gi gnas su zhal gyis 'ches te/ sku'i phrin las rnam par dag pa'i phyir ro/ /bag tsha ba med par thob ces bya ba ni gsung la zhum pa dang / dman par gyur pa la sogs pa med par bstan to//de'i dbang gis seng ge bzhin du sgrog ste/ gsung gi phrin las rnam par dag pa'i phyir ro/ /mi 'jigs pa thob ces bya ba ni thugs la dogs pa dang / zhum pa la sogs pa med par bstan to/ /de'i dbang gis tshangs pa bzhin du 'khor lo bskor te/ thugs kyi phrin las rnam par dag pa'i phyir ro/ /de bzhin du thams cad la yang sbyar bar bya'o/ /chos so so yang dag par rig pa dang / don so so yang dag par rig pa zhes bya ba ni de bzhin gshegs pa'i gsung rab tu rtogs pa tshig gi tshogs dang / ming gi tshogs dang / yi ge'i tshogs kyi bdag nyid kyi gzhung mang po ste/ 'dis chos so so yang dag par rig par 'gyur ba'am/ chos so so yang dag par rig pa'i phyir so so yang dag par rig pa'o/ /don ces bya ba ni brjod par bya ba'i tshogs te/ de shes pa ni don so so yang dag par rig pa'o//yang na rgyu dang rkyen gyi chos thams cad ni chos te/ de dag shes pa ni chos so so yang dag par rig pa'o/ /rten cing 'brel par 'byung ba 'bras bu'i chos rnams shes pa ni/ don so so yang dag par rig pa'o/ /yang na rnam par smin pa dang bcas pa'i chos dge ba dang mi dge ba'i chos thams cad ni chos te/de dag shes pa ni chos so so yang dag par rig pa'o/ /sgrib pa dang mi sgrib pa dang / lung du ma bstan pa'i chos rnams ni don te/ don de dag shes pa ni don so so yang dag par rig pa'o/ /yang na kun 'byung ba dang / lam gyi bden par rtogs pa kun nas nyon mongs pa dang /rnam par byang ba'i chos phyogs kyi chos thams cad ni chos te/ de dag shes pa ni chos so so yang dag par rig pa'o/ /sdug bsngal gyi bden pa dang / 'gog pa'i bden par gtogs pa'i chos thams cad ni don te/ de dag shes pa ni don so so yang dag par rig pa'o//yang na gdul ba rnams kyi bsam pa dang / bag la nyal dang / spyod pa dang / mos pa dang / dbang po la sogs pa thams cad ni chos te/ de dag shes pa ni chos so so yang dag par rig pa'o/ /mgo smos pa dang / rnam par spros pa go ba dang / drang dgos pa dang / tshig lhur len pa dang / nyon mongs pa che ba dang / chung ba dang / dbang po rno ba dang / rtul ba dang / skal ba yod pa dang / skal ba med pa la sogs pa'i gdul ba rnams ni don te/ /de dag shes pa ni don so so yang dag par rig pa'o//nges pa'i tshig ces bya ba ni 'jig rten na grags pa ming gi tshogs la sogs pa rnam pa mang po de dag nyid kyi tshig nges pa la nges pa'i tshig ces bya'o/ /yang na gling chen po bcwa brgyad na gnas pa dang / yul chen po bcu drug dag na gnas pa dang / mtha' 'khob dgu bcu rtsa brgyad na gnas pa dang / yul gyi dbus su gtogs pa'i mi thams cad dang / dud 'gro'i skye gnas su gtogs pa dang / yi dags dang / sems can dmyal ba thams cad dang / lha ma yin dang / klu dang / dri za dang / mi 'am ci thams cad dang /grub pa dang / rig sngags 'chang dang / rol mo byed cing rgyu ba la sogs pa dang rgyal chen bzhi'i ris dang / sum cu rtsa gsum la sogs pa 'dod pa'i khams kyi lha rnams dang / bdud kyi ris thams cad dang / tshangs pa dang / gnas gtsang ma'i ris kyi lha thams cad kyi sngags 'chang dang /brjod pa gang yin pa thams cad ni nges pa'i tshig gi chos te/ de dag shes pa ni nges pa'i tshig so so yang dag par rig pa zhes bya'o/ /shes pa rnam pa gsum po de dag nyid shes pa gang yin pa de ni/ spobs pa so so yang dag par rig pa'o//gdul ba de dag nyid kyi bsam pa dang / bag la nyal dang mthun par chos rnams yang dag par ston pa dang / shes par byed pa dang / khong du chud par byed pa ni spobs pa so so yang dag par rig pa'o/ /byang chub sems dpa' ni 'jig rten gyi khams thams cad na sangs rgyas thams cad kyi chos kyi rgyun ma chad par 'byung ba dag chos so so yang dag par rig pas skad cig gcig kho na las yang dag par 'dzin to//don so so yang dag par rig pas ni skad cig de nyid la chos de dag gi don kyang 'dzin to//skad cig de nyid la/ 'jig rten gyi khams sna tshogs na/ gdul ba sna tshogs kyi nges pa'i tshig rnams sna tshogs kyis nges pa'i tshig so so yang dag par rig pas chos ston to/ /spobs pa so so yang dag par rig pas ni 'dul ba de rnams/ chos nyid mngon sum du 'dzin du 'dzud do //sangs rgyas kyi chos ma [(]'dras [,]'dres [)]pa bco brgyad ces bya ba la/ de bzhin gshegs pa la 'khrul ba mi mnga'o zhes bya ba ni sku dang gsung dang thugs kyi mdzad pa rnams la 'khrul pa mi mnga' ba ste/ ji ltar 'di ni dgra bcom pa rnams grong la sogs par bsod snyoms kyi phyir rgyu ba na/glang po che dang / rta dang / ba glang dang / khyi gtum po dang / tsher ma dang / sdig sbrul la sogs pa'i gdon pa rnams 'byung ba dang / dgon pa na chom rkun dang / stag dang / gzig gi 'jigs pa 'byung ba mi shes pa las gyur pa'i 'khrul pa de lta bu ni de bzhin gshegs pa la thams cad kyi thams cad du mi mnga'o//de bzhin gshegs pa ni bsnyel ba mi mnga' ba'i chos can te/ brtags na skyon mi mnga' ba nyid du sems can la mdzad pa rtsom mo/ /de bzhin gshegs pa rnams kyi spyod lam ni 'jig rten la mdzes so//kun tu gzigs pa dang / rnam par gzigs pa dang / bskum pa dang / brkyang ba la sogs pa ni mi dang / lha dang / tshangs pa thams cad dang / dud 'gro thams cad kyang tshim par byed pa ste/ 'di ltar de bzhin gshegs pa bzhud pa dang / byon pa la sogs pa thams cad na zhabs gnyis kyi mthil sa la mi reg go//'khor lo rtsibs stong dang ldan pa'i rjes sa la 'byung ngo / /gang du de bzhin gshegs pa'i zhabs bor ba der pad+mo yid du 'ong ba/ bsung dang ldan pa dag 'byung ngo / /zhabs kyis dud 'gro la reg na yang zhag bdun du bde ba mchog gis tshim par gyur te/shi 'phos na yang bde 'gro mtho ris su skye bar 'gyur ro/ /de bzhin gshegs pa'i sku la na bza' sor bzhir mi reg cing / rnam par 'thor rlung gis kyang bskyod par mi nus so/ /sku'i 'od kyis kyang mnar med pa la thug pa'i bar gyi sems can rnams bde ba dag thob par 'gyur te/de bas na de bzhin gshegs pa'i sku la 'khrul pa mi mnga'o zhes bya'o/ /gsung la yang 'khrul pa mi mnga' ste/ dus su gsung ba dang / bden par gsung ba dang / snyan par gsung ba dang / ma nor bar gsung ba'i phyir/gsung skyon thams cad dang bral ba ste/ zlos bur mi gsung ba dang / shin tu nges par gsung ba dang / rigs pa dang ldan par gsung ba dang / gsung gcig brjod pas skad cig gcig la sems can thams cad kyis go bar mdzad pa'i phyir ro/ /thugs la yang 'khrul pa mi mnga' ste/rtag tu mnyam par gzhag pa dang / bsnyel ba mi mnga' ba'i chos can dang / chos thams cad la chags pa dang / sgrib pa mi mnga' bar mkhyen cing gzigs pa dang mdzad pa thams cad la rtag tu lhun gyis grub cing rnam par mi rtog pa'i phyir ro/ / de bas na de bzhin gshegs pa la 'khrul pa mi mnga' ba zhes bya ste/ 'di ni ma 'dres pa'i chos dang po'o/ /ca co mi mnga'o zhes bya ba ni ji ltar dgra bcom pa dag dgon pa na lam stor nas ca co'i sgra 'byin pa 'am/ bag chags kyi dbang gis gad mo rta gad 'byin pa dang / tshig la yi ge log par 'byung ba de ltar sangs rgyas rnams la ca co mi mnga' ste/ sems can thams cad dang / chos thams cad la rjes su chags pa dang / khong khro ba mi mnga' ba dang / 'jig rten gyi chos thams cad las shin tu 'das pa dang / rtag tu mnyam par gzhag pa dang /nyon mongs pa mi mnga' bar bzhugs pa dang / bag chags thams cad yang dag par bcom pa'i phyir ro/ /de bas na ca co mi mnga' ba zhes bya ste/ 'di ni ma 'dres pa'i chos gnyis pa'o/ /bsnyel ba mi mnga'o zhes bya ba ni ji ltar dgra bcom pa rnams ma bsams nas brjed par bya ba shor ba dang /dus las yol bar 'gyur ba de lta bu de bzhin gshegs pa la mi mnga' ste/ de bzhin gshegs pa ni sems can thams cad kyi don thams cad dang / chos thams cad dang mdzad pa thams cad dang / dus thams cad du bsnyel ba mi mnga'o//de bas na bsnyel ba mi mnga' ba zhes bya ste/ 'di ni ma 'dres pa'i chos gsum pa'o/ /sems mnyam par ma bzhag pa mi mnga'o zhes bya ba ni 'di ltar dgra bcom pa dag gang gi tshe/ snyoms par 'jug pa de nyid kyi tshe na mnyam par gzhag par 'gyur gyi gzhan gyi tshe ni ma yin no//de bzhin gshegs pa ni snyoms par zhugs kyang rung / snyoms par ma zhugs kyang rung / dus thams cad du mnyam par gzhag pa nyid de/ de bzhin gshegs pa ni ting nge 'dzin zab mo dam pa'i pha rol tu phyin pa ste/ 'di ni ma 'dres pa'i chos bzhi pa'o/ /tha dad pa'i 'du shes mi mnga'o zhes bya ba ni 'di ltar dgra bcom pa dag ni 'khor ba dang mya ngan las 'das pa dag dang / kun nas nyon mongs pa dang / rnam par byang ba'i chos la sogs pa tha dad pa'i blo 'jug gi/ de bzhin gshegs pa rnams ni de lta ma yin no//de bzhin gshegs pa rnams ni rtag tu sems can mnyam pa nyid dang / chos mnyam pa nyid la 'jug ste/ thugs rje'i dbang dang / rnam par mi rtog pa'i ye shes kyi dbang gis/ 'khor ba dang / mya ngan las 'das pa 'am/ dkar po dang / nag po'i chos rnams sam/ tshul khrims dang ldan pa dang / tshul khrims 'chal pa'am/ phan 'dogs pa dang / gnod pa byed pa'am/ yang dag pa nyid du nges pa dang / log pa nyid du nges pa'am/ sems can mchog dang tha ma rnams la tha dad pa'i 'du shes mi 'jug ste/'di ni ma 'dres pa'i chos lnga pa'o/ /so sor ma brtags pa'i btang snyoms mi mnga'o zhes bya ba ni/ ji ltar dgra bcom pa rnams so so ma brtags par sems can gyi don yal bar 'dor ba de bzhin du/ de bzhin gshegs pa mi mdzad de/ de ni dus dang dus ma yin pa dang /skal ba yod pa dang skal ba med pa dang / don yod pa dang don med pa so sor brtags nas yal bar 'jog pa yin gyi gzhan du ma yin te/ 'di ni drug pa'o/ /'dun pa yongs su nyams pa mi mnga'o/ /brtson 'grus yongs su nyams pa mi mnga'o/ / dran pa yongs su nyams pa mi mnga'o/ /ting nge 'dzin yongs su nyams pa mi mnga'o/ /shes rab yongs su nyams pa mi mnga'o/ /rnam par grol ba yongs su nyams pa mi mnga'o/ /rnam par grol ba'i ye shes mthong ba yongs su nyams pa mi mnga'o zhes bya ba ni dgra bcom pa dag ni spyod yul gyi dbang gis rang bzhin gyis sangs rgyas kyi sa dang /rang bzhin gyis sangs rgyas kyi mdzad pa la 'dun pa mi skye'i/ nyan thos kyi bya ba nyid la 'dun par 'gyur ro/ /de bzhin du sangs rgyas kyi sa'i brtson 'grus dang / dran pa dang / ting nge 'dzin dang / shes rab dang /rnam par grol ba dang / rnam par grol ba'i ye shes mthong ba gang yin pa de dag ni nyan thos rnams la med de/ de bas na 'dun pa la sogs pa chos bdun po de dag ma thob par yongs su nyams pas yongs su nyams pa yin no/ /sangs rgyas rnams ni khyad par can gyi chos ma brnyes pa mi mnga' ste/chos thams cad thugs su chud par gyur pas yongs su nyams pa cung zad kyang mi mnga' ste/ 'di ltar sangs rgyas rnams ni dus thams cad du sems can gyi don mdzad pa la 'dun pa rgyun mi 'chad par 'byung ngo / /byams pa chen po dang / thugs rje chen po la sogs pa'i chos la 'dun pa dang /chos 'chad pa dang / sems can yongs su smin par byed pa dang / byang chub kyi sems yang dag par blangs nas dkon mchog gsum gyi rgyun mi bcad pa'i 'dun pa rgyun mi 'chad par 'byung ngo / /de bzhin gshegs pa ni brtson 'grus thams cad la sku bsnyel ba'am/thugs bsnyel ba nam yang mi 'byung ngo / /de bzhin gshegs pa ni sems can gcig gi don du yang bskal par yang bshos mi gsol bar chos ston to/ /de bzhin gshegs pa ni sangs rgyas kyi zhing gang gA'i klung gi bye ma snyed kyang 'das par mdzad nas gang na sangs rgyas kyis 'dul bar 'gyur ba sems can gcig yod pa der gshegs so//de bzhin gshegs pa'i dran pa la yang yongs su nyams pa mi mnga' ste/ 'di ltar de bzhin gshegs pas bla na med pa yang dag par rdzogs par sangs rgyas nas/'das pa dang / ma 'ongs pa dang / da ltar byung ba'i sems can thams cad kyi sems kyi spyod pa dang / g.ye ba thams cad dang / bsam pa dang / bag la nyal ba dang / nyon mongs pa dang / dbang po la sogs pa thams cad dang / sems can gdul ba'i thabs thams cad dang / sems can gyi don thams cad dang / sangs rgyas kyi mdzad pa thams cad dang / chos ji ltar dgongs pa dang / gzigs pa thams cad dran pa'i lam du gzhag pas/ de la phyis ye shes gtong ba mi mdzad de/ de bzhin gshegs pa'i dran pa ni dus thams cad du yongs su nyams pa mi mnga' ba nyid do//de bzhin gshegs pa'i ting nge 'dzin la yang yongs su nyams pa mi mnga' ste/ sems can thams cad dang / chos thams cad kyi de bzhin nyid la mnyam par gzhag pas de bzhin nyid mnyam pa nyid kyis chos thams cad mnyam par 'jog go//de bas na de bzhin nyid la ting nge 'dzin zhes bya'o/ /de bzhin nyid de yang nam mkha' dang mtshungs te/ de la 'phel ba 'am / yongs su 'grib pa med cing / dus thams cad du de bzhin bas na de bzhin nyid de/de bas na ting nge 'dzin la nyams pa mi mnga'o/ /shes rab la yongs su nyams pa mi mnga' ste/ 'di ltar sems can thams cad kyi sems kyi spyod pa mkhyen pa mi zad pa dang / chos bstan pa mkhyen pa mi zad pa dang / sems can yongs su smin par bya ba'i mkhyen pa mi zad pa dang /so so yang dag par rig pa la mkhas pa'i mkhyen pa mi zad pa zhes bya ba la sogs pa bshad pa'o/ /rnam par grol ba yang yongs su nyams pa mi mnga' ste/ rnam par grol ba zhes bya ba la nyan thos rnams kyi rnam par grol ba ni sgra'i rjes su 'gro ba'o//rang sangs rgyas rnams kyi rnam par grol ba ni rkyen gyi rjes su 'gro ba'o/ /sangs rgyas rnams kyi rnam par grol ba ni chos nyid kyi rjes su 'gro ba 'di yin te/ nyon mongs pa'i sgrib pa las rnam par grol ba dang / shes bya'i sgrib pa las rnam par grol ba dang / 'bras bu'i phyir snyoms par 'jug pas rnam par grol ba dang / mi gnas pa'i mya ngan las 'das pa'i rnam par grol ba ste/ de rnam par grol ba thams cad zad mi shes shing / nam mkha' lta bur gyur pas sems can gyi don mdzad pa la 'khor ba ji srid yod kyi bar du 'jug pas na rnam par grol ba la yongs su nyams pa mi mnga'o//ji ltar rnam par grol ba la yongs su nyams pa mi mnga' ba de bzhin du rnam par grol ba'i ye shes mthong ba la yang yongs su nyams pa mi mnga' ba ste/ 'di ni chos bcu gnyis pa'o/ /sku'i phrin las thams cad ye shes sngon du 'gro zhing ye shes kyi rjes su 'brang ngo zhes bya ba ni ji ltar dgra bcom pa gzhan dag lus dang ngag dang yid kyi las rnams bsams bzhin med par byed pa dang /nyes pa yang mthol ba dang / bag chags kyi ma tshor ba yang byed pa de ltar yang sangs rgyas rnams mi mdzad de/sangs rgyas rnams ni gzigs pas kyang sems can rnams 'dul lo/ /gsung ba dang / cang mi gsung ba dang / bshos gsol ba dang / mnal ba dang / bzhud pa dang / byon pa dang / bzhugs pa dang / 'phres pa dang / sku las 'od zer 'gyed pa dang /mtshan rnams dang / dpe byad bzang po rnams dang / zhabs gom pa 'dor ba dang / spyan 'byed pas kyang sems can rnams 'dul lo/ /sangs rgyas rnams kyi gsung thams cad kyang / sems can thams cad kyi don thams cad sgrub pa ste/ don dam par mi 'gyur zhing rnam pa du ma yan lag drug cu dang ldan pa sems can thams cad kyi bsam pa dang /bag la nyal dang mthun par 'byung ngo / /thugs kyi phrin las kyang nyon mongs pa'i bag chags thams cad dang / rtog pa'i bag chags thams cad dang / spros pa'i bag chags thams cad dang mi ldan pa ste/ byams pa chen po dang / thugs rje chen po'i ngang dang ldan zhing yang dag pa'i mtha' yongs su ma btang ba dang / don dam pa'i mtshan nyid kyi rjes su 'jug pa'o/ /phrin las gsum po de dag thams cad kyang ye shes lngar byung ba'i rgyu las byung ba'i phyir ye shes sngon du 'gro ba'o//ye shes dang lhan cig tu rgyu ba'i dbang gis chos gsum po 'di dag ni ye shes kyi rjes su 'brang ba'o/ /de bzhin gshegs pa'i ye shes mthong ba 'das pa'i dus la ma chags ma thogs par 'jug go zhes bya ba la sogs pa ni ji ltar dgra bcom pa dag /gang dang gang du rtsol ba gtong ba de dang de nyid shes kyi gzhan du ni shes pa chags shing thogs par gyur pa de lta bu de bzhin gshegs pa dag la mi mnga' ste/ de bzhin gshegs pa dag ni 'das pa'i dus na sangs rgyas kyi zhing byung ba ji snyed yod pa dang /sangs rgyas kyi zhing de dag na sa dang chu dang / me dang rlung gi rdul phra rab ji snyed yod pa rnams dang / rtsa dang / shing gel pa dang / sman dang / nags tshal ji snyed yod pa rnams dang / sems can gyi rigs ji snyed yod pa rnams dang / sems can de dag gi rigs dang /kha dog dang / na tshod dang / gzugs dang / byad lag dang / sems kyi spyod pa dang / bsam pa dang / dbang po dang / mos pa tha dad pa ji snyed yod pa rnams dang / de dag tu sangs rgyas ji snyed byung ba rnams dang / de dag gis chos bstan pa ji snyed yod pa rnams dang /theg pa gsum la 'dul ba'i sems can ji snyed yod pa rnams dang / de na nyan thos ji snyed yod pa rnams dang / rang sangs rgyas ji snyed yod pa rnams dang / byang chub sems dpa' ji snyed yod pa rnams dang / de dag thams cad kyi tshe'i tshad ji tsam thub pa dang / de dag gi zas kyi dus dang /gos dang yongs su spyod pa ji snyed yod pa rnams dang / 'jig rten gyi khams de dag tu sreg pa'i bskal pa ji snyed 'byung ba dang / chu dang me dang rlung gis 'jig pa ji snyed 'byung ba dang / nam mkha'i khams ji tsam pa dang / skar ma'i gzugs rnams ji snyed yod pa dang /ri dang ri sul dang / 'bab chu dang / mtsho dang rgya mtsho ji snyed yod pa dang / grong dang grong khyer dang / grong rdal dang / ljongs dang / yul 'khor dang / rgyal po'i pho brang 'khor ji snyed yod pa dang / tshong dus kyi rnam par dbye ba ji snyed yod pa dang / zhing dang / kun dga' ra ba dang / skyed mos tshal dang / nags tshal ji snyed yod pa dang / de na sems can gyi 'chi 'pho dang / skye ba dang / 'gro ba rab tu dbye ba ji snyed yod pa dang / de dag gi dbugs phyi nang du rgyu ba ji snyed yod pa dang / mig 'byed pa dang / 'dzums pa ji snyed yod pa de dag dang /de 'dra ba gzhan thams cad kyang de bzhin gshegs pas skad cig gcig la bgrang ba'i tshul du mngon sum gyis mkhyen pas yongs su bcad de rab tu mkhyen to/ /de bzhin du ma 'ongs pa dang / de bzhin du da ltar byung ba thams cad la yang de bzhin gshegs pa'i ye shes ma chags ma thogs par 'jug ste/'di dag ni sangs rgyas kyi chos ma 'dres pa bco brgyad do/ /gzungs kyi sgo theg pa chen po ni de la gzungs kyi sgo dag gang zhe na/ 'di lta ste/ yi ge'i tshul mnyam pa nyid dang / yi ge'i sgo dang / yi ge la 'jug pa zhes bya ba ste/gzungs zhes bya ba ni sngar byang chub sems dpa'i yon tan bstan par brjod pa'i rnam pas bzod pa'i gzungs dang / chos kyi gzungs dang / don gyi gzungs dang / sngags kyi gzungs dang bzhi la gzungs zhes bya'o/ /gzungs de dag gi sgo dag ni gzungs kyi sgo rnams te yi ge rnams so//yi ge nges par bsam pa'i stobs kyis gzungs 'di bzhi 'byung bar 'gyur ro/ /yi ge de dag gi tshul gang yin zhe na/ yi ge'i tshul ni yang dag pa'i don rab tu rtogs pa'o/ /yi ge'i tshul mnyam pa nyid ni yi ge'i tshul mnyam pa nyid de a zhes bya ba la sogs pa yi ge 'bru thams cad ni skye ba med pa la sogs pa de bzhin nyid kyi rang bzhin rab tu rtogs par byed pas yi ge'i tshul mnyam pa nyid ces bya'o//mnyam pa nyid de dag la dmigs nas ye shes byung ba la yang yi ge'i tshul mnyam pa nyid ces bya'o//yi ge rnams ni 'di'i sgo yin pas yi ge ni ye shes kyi sgo'o/ /yi ge rnams kyi 'jug pas na yi ge 'jug pa ste/ yi ge'i dbang gis ye shes de 'jug go/ /a zhes bya ba ni gzod ma nas ma skyes pa'i phyir chos thams cad kyi sgo'o zhes bya ba la a zhes bya ba ni chos thams cad yang dag pa ji lta ba bzhin du rab tu rtogs par 'gyur ba'i sgo ste/'jug par byed pa dang rgyu yin no/ /ci'i phyir zhe na/ gzod ma nas ma skyes pa'i phyir te/ 'di ltar chos thams cad ni gzod ma nas dri ma dang bcas pa'i gnas skabs nyid na/ ma skyes pa ste de bas na rnal 'byor spyod pas ma skyes pa'i don 'di a zhes bya ba la ma skyes pa'i don du sgro btags nas bsgom pa na goms pa'i stobs kyis a zhes bya ba tsam shin tu bsgoms pas chos thams cad skye ba med pa'i bzod pa 'thob po//de bzhin du ra zhes bya ba la rdul dang / bral ba'i don sgro btags nas shin tu bsgoms pas chos thams cad rdul dang bral ba'i bzod pa thob ste/ de las bzod pa'i gzungs su 'gyur ro/ /de ltar sngar gleng gzhi bstan par bshad pa'i tshul gyis phyogs bcu'i sangs rgyas rnams dang / byang chub sems dpa' sems dpa' chen po rnams kyis chos bshad pa rgya chen po shin tu myur bar 'byung ba'i tshogs 'dzin pa'i rgyur gyur pa ni chos kyi gzungs so//chos de rnams kyi don yang dag par 'dzin pa'i rgyur gyur pa ni don gyi gzungs so/ /sems can thams cad kyi yams kyi nad dang / gnod pa zhi bar byed pa'i gsang sngags kyi gzhi rnams ni gsang sngags kyi gzungs so//de dag thams cad kyang yi ge'i rgyu las byung ba nyid de/ de bas na gzungs kyi sgor gyur pa'i phyir yi ge rnams ni gzungs kyi sgo rnams te/ de dag la dmigs pa las byung ba'i ye shes la yang gzungs kyi sgo zhes bya'o//ma skyes pa'i phyir zhes bya ba la sogs pa ni de bzhin nyid kyi chos rnams te/ 'di ltar nam mkha' dang mtshungs so/ /'di ltar nam mkha' ma skyes pa bzhin du de bzhin nyid kyang ma skyes pa'o/ /'di ltar nam mkha' rdul gyis ma gos pa'i phyir rdul dang bral ba de bzhin du de bzhin nyid kyang rdul dang bral ba'o//don dam par khyad par med pa'i phyir ro zhes bya ba ni don dam par tha dad med pa'i phyir gcig go/ /'chi 'pho dang skye ba mi dmigs pa'i tshul gyis zhes bya ba ni de bzhin nyid la 'chi ba'i srid pa dang / skye ba'i srid pa dag mi dmigs pa'i srid pas zhes bya ba'i tha tshig go//ming mi dmigs pa'i tshul gyis zhes bya ba ni de bzhin nyid la ming du brjod pa med pa'i phyir ro/ /'jig rten las 'das shing zhes bya ba ni de bzhin nyid 'jig rten las 'das pa'i phyir ro/ /srid pa'i 'khri shing gi rgyu dang rkyen yang dag par bcom pa'i phyir zhes bya ba ni de bzhin nyid ni srid pa'i 'khri shing gi rgyu dang rkyen gang yin pa de dag yang dag par bcom pa'i ngo bo nyid yin pa'i phyir ro//dul ba dang dul bar gnas pa yongs su nges pa'i phyir zhes bya ba ni de bzhin nyid du dul bar byed pa nyon mongs pa rnams dang /ma dul bar gnas pa'i ngo bo nyid kyi las rnams med pa'i phyir dul ba dang dul bar gnas pa nyid du yongs su nges pa'o/ /bcings pa las rnam par grol ba'i phyir zhes bya ba ni 'dod chags dang / zhe sdang dang / gti mug gi bcing ba gsum po dag las grol ba'i phyir ro// khrag 'khrugs pa dang bral ba'i phyir zhes bya ba ni nyon mongs pa dang / las dang rnam par smin pa'i dbang gis khrag 'khrugs dang rnam par g.yeng bar gyur pa gang yin pa de dag dang bral bar gyur pa'i phyir ro/ /chags pa mi dmigs pa'i phyir zhes bya ba ni nyon mongs pa'i sgrib pa'i chags pa dang /las kyi sgrib pa'i chags pa dang / rnam par smin pa'i sgrib pa'i chags pa med pa'i phyir ro/ /ngag gi lam gyi sgra yang dag par chad pa'i phyir zhes bya ba ni ngag gi tha snyad kyi bdag nyid kyi sgra rnams yang dag par chad pa'i phyir ro/ /de bzhin nyid las ma g.yos pa'i phyir zhes bya ba ni de bzhin nyid kyi rang gi ngo bo nyid las rnam par ma g.yos pa'i phyir ro//ji lta ba bzhin du ma skyes pa'i phyir zhes bya ba ni ji ltar rigs par ma skyes pa'i phyir ro/ /khengs pa mi dmigs pa'i phyir zhes bya ba ni khengs pa zhes bya ba nye ba'i nyon mongs pa 'am/nyon mongs pa'i rnam par rtog pa las gyur pa'i khengs pa med pa'i phyir ro/ /byed pa po mi dmigs pa'i phyir zhes bya ba ni byed pa po zhes bya ba gang zag gam dbang phyug la sogs pa mi mthun pa'i rgyu rnams sam/ rgyu dang rkyen gyi chos rnams dmigs su med pa'i phyir ro//mnyam pa nyid las mi 'da' zhes bya ba ni chos thams cad la mnyam pa nyid las mi 'da' ba'i phyir ro zhes bya ba'i tha tshig go/ /nga yir 'dzin pa mi dmigs pa'i phyir zhes bya ba ni sred pas bdag gir 'dzin pa med pa'i phyir ro/ /'gro ba mi dmigs pa'i phyir zhes bya ba ni bde 'gro dang /ngan 'gro'i dbang gis skye ba gzhan du 'gro ba med pa'i phyir ro/ /gnas mi dmigs pa'i phyir zhes bya ba ni gnas pa'i mtshan nyid med pa'i phyir ro/ /skye ba mi dmigs pa'i phyir zhes bya ba ni med pa las byung ba'i mtshan nyid kyi skye ba med pa'i phyir ro//dbugs mi dmigs pa'i phyir zhes bya ba ni nyam chung ba'i phyir stobs med pa'o/ /chos mi dmigs pa'i phyir zhes bya ba ni chos kyi rnam par med pa'i phyir ro/ /nam mkha' dang mnyam pa nyid mi dmigs pa'i phyir zhes bya ba ni chos thams cad nam mkha' dang mnyam pas dmigs su med pa'i phyir ro//zad pa mi dmigs pa'i phyir zhes bya ba ni mi rtag pa nyid kyi mtshan nyid kyi zad pa mi dmigs pa'i phyir ro/ /ye shes mi dmigs pa'i phyir zhes bya ba ni shes bya'i dngos po med pas mtshan nyid med pa'i phyir ro/ /rgyu med pa mi dmigs pa'i phyir zhes bya ba ni rgyu'i mtshan nyid med pa'i phyir ro//'jigs pa mi dmigs pa'i phyir zhes bya ba ni rnam par 'jig pa'i mtshan nyid 'jigs pa mi dmigs pa'i phyir ro/ /mdog mi dmigs pa'i phyir zhes bya ba ni de bzhin nyid la mdog med cing 'od med pas mi snang ba'i phyir ro//dran pa mi dmigs pa'i phyir zhes bya ba ni de bzhin nyid dran par byed pa'i shes pa'i spyod yul ma yin pa'i phyir ro/ /bod pa mi dmigs pa'i phyir zhes bya ba ni ming gi spyod yul ma yin pa'i phyir te/ ming ni bod pa'o/ /chos rnams la spro ba mi dmigs pa'i phyir zhes bya ba ni chos thams cad g.yo ba med pa'i phyir ro//stug po mi dmigs pa'i phyir zhes bya ba ni stug por rnam par rtog pa log pa yin pa'i phyir ro/ /rnam par bsgrub pa mi dmigs pa'i phyir zhes bya ba ni 'du byed rnam par dgod pa la rnam par bsgrub pa zhes bya ba ste/de med pa'i phyir ro/ /nyon mongs pa med pa'i phyir zhes bya ba ni nyon mongs pa'i nyon mongs pa dang / rnam par rtog pa'i nyon mongs pa dang bral ba'i phyir ro/ /'bras bu mi dmigs pa'i phyir zhes bya ba ni 'bras bu'i chos rnams la 'bras bu'i rnam pa mi dmigs pa'i phyir ro//phung po mi dmigs pa'i phyir zhes bya ba ni nyon mongs pa dang / las dang rnam par smin pa'i phung po rnams med pa'i phyir ro/ /rga ba mi dmigs pa'i phyir zhes bya ba ni gnas pa las gzhan du 'gyur ba'i mtshan nyid kyi rga ba med pa'i phyir ro/ /spyod pa mi dmigs pa'i phyir zhes bya ba ni 'gro ba dang /'ong ba'i spyod pa mi dmigs pa'i phyir ro/ /sdigs pa mi dmigs pa'i phyir zhes bya ba ni rnam par 'tshe ba med pa'i phyir ro/ /ngar 'dzin pa mi dmigs pa'i phyir zhes bya ba ni lta ba'i bdag nyid dang / nga rgyal gyi bdag nyid kyi ngar 'dzin pa med pa'i phyir ro//gang gis tha snyad 'dogs pa dang / gang gis brjod pa dang / gang gis bstan pa zhes bya ba ni smra ba'i chos so/ /gang gis rtog par byed pa dang / gang gis mthong ba zhes bya ba ni nyan pa po'i chos so/ /gang gis tha snyad 'dogs zhes bya ba ni gang 'phags pa rnams dang /'phags pa ma yin pa rnams kyis mthong ba dang / thos pa dang / bye brag phyed pa dang / rnam par shes pa'i dbang dang / ma mthong ba dang / ma thos pa dang / bye brag ma phyed pa dang / rnam par ma shes pa'i dbang ste/ tha snyad bcu drug gi dbang gis brjod do/ / gang gis brjod ces bya ba ni bum pa dang / snam bu dang ba glang dang / rta la sogs pa'i ming brjod pa'i dbang gis brjod pa'o/ /gang gis ston pa zhes bya ba ni ring po dang thung ngu dang / dkar sham dang / sngo ba sangs dang / sngon po dang / ser po la sogs pa'i yon tan bstan pa'i dbang gis brjod do//nyan pa po yang rjes su dag pa'i dbang gis don rjes su rtogs par byed pa ste/ gang gis rtogs pa zhes bya ba ni rjes su dpag pa'i dbang gis brjod do/ /gang gis mthong ba zhes bya ba de ni mngon sum gyi don mthong ba'i dbang gis brjod do//sgra gang la yang thogs par mi 'gyur ro zhes bya ba ni brjod pa thams cad la don dam pa tshol bar 'gyur ba'o/ /chos thams cad mnyam pa nyid kyis yang dag par sgrub par 'gyur te zhes bya ba ni sgra thams cad de bzhin nyid du sbyor bar byed pa'o/ /sgra shes pa la mkhas pa yang zhes bya ba ni sems can thams cad kyi skad dang /bsam pa thams cad shes pa'o/ /dran pa ni mi brjed pa'o/ /blo gros zhes bya ba ni don dam pa'i rjes su 'brang ba'i shes rab ste/ blo gros dang / yid gzhungs pa dang / myur du mang po 'dzin pa'i bdag nyid de/ de'i dbang gis shes rab myur ba zhes bya'o/ /blo ni kun rdzob kyi spyod yul lo/ /lhag ma ni don gsal lo/ /'di ni theg pa chen po bstan pa ste/ de ltar theg pa chen po bstan pa yongs su rdzogs par byas nas/ da ni zhus pa gnyis pa skabs dbye ba ste/ ji ltar na byang chub sems dpa' sems dpa' chen po theg pa chen po la yang dag par zhugs pa yin zhes zer ba zhes bya ba ni 'og nas 'byung ba'i sa bcu po dag la zhugs pa ni theg pa chen po la yang dag par zhugs pa zhes bya ste/des na theg pa chen po la yang dag par zhugs pa yin no zhes bcom ldan 'das kyis bstan pa dang /byang chub sems dpa'i sa bcu dang / sa yongs su sbyang bar bya ba zhus so/ /chos thams cad 'pho ba med pas zhes bya ba ni de bzhin nyid ni nam mkha' dang mtshungs te/ 'pho ba med pas 'pho ba med pa'i ye shes ni sa gzhan du 'phar ba'i rgyu yin par bstan to//chos rnams kyi gang yin pa de la yang rlom sems su mi byed la sa yongs su sbyong bar yang byed do zhes bya bas sa gzhan du 'phar ba'i rgyu bstan to/ /'pho ba med pa dang / 'gro ba med pa dang / 'ong ba la sogs pa med pa'i phyir chos rnams kyi sa la rlom sems mi byed kyang las rnams mi byed pa ni ma yin no zhes bya ba'i tha tshig ste/'di ni byang chub sems dpa' rnams kyi thabs mkhas pa'i pha rol tu phyin pa'i bya ba bstan to/ /thabs mkhas pa ni kun rdzob dang / don dam pa'i tshul gnyis shin tu 'gal ba 'dra ba yang byang chub sems dpa' rnams dgos pa thams cad la 'gal ba med par bsgrub pa'o//sa yongs su sbyong ba de dag kyang sngar glengs te bstan nas/ phyis bshad pa'i 'gres la bcom ldan 'das byang chub sems dpa' sems dpa' chen po sa dang po la gnas pa'i lhag pa'i bsam pa yongs su sbyang bar bgyi ba gang lags zhes bya ba la sogs pas bshad do//sems can thams cad kyi don gyi phyir theg pa chen po'i ye shes yongs su tshol ba la 'jug pa zhes bya ba la/ theg pa chen po'i ye shes zhes bya ba ni rnam pa thams cad mkhyen pa nyid kyi ye shes so//de la tshol ba ni smon lam gdab pa dang / sems bskyed pa ste/ 'di ltar sems can thams cad kyi don du sangs rgyas kyi sa yongs su tshol ba'o/ /'di ni sems can thams cad la phan pa'i dngos po yongs su sbyong ba'o// //bam po bco lnga pa/ de las yongs su sbyong bar 'dod pas thog mar bsam pa yongs su sbyang bar bya'o/ /de'i 'og tu sgrub pa ni sems can thams cad la phan pa'i rtsa ba yin pa'i phyir phan pa'i sems su bya'o/ /de yang sems can thams cad la sems snyoms pa las 'byung ba'i phyir sems mnyam pa nyid du bya'o//dang po ni sbyin pa'i pha rol tu phyin pa'i sa yin pas na gtong ba yongs su sbyang bar bya'o/ /dag pa'i sa thob par bya ba la sngar bya ba yin pas dge ba'i bshes gnyen gdon mi za bar dgos pa'i phyir de la brten par bya'o//de'i 'og tu dge ba'i bshes gnyen las dam pa'i chos mnyan par bya dgos pas chos yongs su btsal bar bya'o/ /rgyud yongs su ma smin pa'i phyir mngon par 'byung ba la gnas pa nyid du bya'o/ /rtag tu rgyun mi chad par sangs rgyas kyi sku dang /sangs rgyas nyid la 'dod par bya'o/ /ci nus su sems can yongs su smin par bya dgos pas brtson 'grus la yongs su skyo ba mi 'byung bar bya ba'i phyir chos bshad par bya'o/ /dang po smon lam nas bzung nas bden pa'i tshig la gus par bya ste/ 'di dag ni yongs su sbyang ba bcu po dag gis mtshams sbyar ba'o//tshul khrims kyi pha rol tu phyin pa'i sa yin pa'i sa gnyis pa la yang tshul khrims yid la byed do/ /sems can thams cad la byams pa spel ba'i phyir byas pa gzo ba dang / byas pa tshor ba yid la byed do/ /sems can rnams kyi nyes pa la mi lta ba'i phyir bzod pa yid la byed do//sems can gyi rgyud snod du rung bar bya ba'i phyir mchog tu dga' ba yid la byed do/ /rtsom pa thams cad kyi rtsa ba ni de dag yin pas sems can yongs su mi gtong ba yid la byed do/ /bdag gi sdug bsngal gyi 'du shes rnam par bzlog pa'i phyir snying rje yid la byed do//gus pa bskyed pa'i phyir bla ma rnams la dad pas 'phangs par yid la byed do/ /byang chub kyi tshogs kyi phyir pha rol tu phyin pa yid la byed de/ yid la byed pa brgyad do/ /de bzhin du thams cad la yang sbyar bar bya'o/ / sangs rgyas kyi zhing yongs su dag par bya ba'i dge ba'i rtsa ba bskyed cing yongs su bsngo ba zhes bya ba ni sangs rgyas kyi zhing yongs su dag par 'gyur ba'i dge ba'i rtsa ba rnams bskyed nas dge ba'i rtsa ba 'dis sangs rgyas kyi zhing yongs su dag par gyur cig ces yongs su bsngo ba'o//sangs rgyas kyi zhing zhes bya ba'i dngos po ni gang yang med kyi/ bdag dang gzhan dag la/ de lta de lta bur snang ba tsam du zad pas/ sems can yongs su sbyang ba nyid la de skad ces bya'o/ /dgon pa la gnas pa yongs su mi gtang ba zhes bya ba la dgon pa la gnas pa zhes bya ba'i sgra ni 'dir nags tshal na gnas pa la ni mi bya'i/sems 'dre ba med par gnas pa dang / dben par gnas pa la 'dir dgon pa la gnas pa zhes bya'o/ /byang chub sems dpa' rnams kyi sems 'dre ba zhes bya ba ni nyan thos dang / rang byang chub yid la byed pa'i dbang gis 'gyur te/ji skad du rab 'byor gang byang chub sems dpa' sems dpa' chen po nyan thos dang / rang sangs rgyas kyi yid la byed pa dang mi ldan par dben par gnas pa 'di ni rab 'byor byang chub sems dpa' sems dpa' chen po dben pa yin par ngas rjes su gnang ste/gal te dben pa 'dis byang chub sems dpa' sems dpa' chen po nyin mtshan du gnas na dben pa nyid du gnas pa'o zhes 'og nas bshad pa lta bu'o/ /gzhan yang de dgon pa dang nags tshal gyi phyogs dang / bas mtha'i gnas na gnas so zhes bya ba la sogs pa'o//de bzhin du sbyangs pa'i yon tan zhes bya ba'i sgra yang rnam par rtog pa sbyong ba'i rgyur gyur pa'i yon tan rnams la bya'i/ phyag dar khrod pa la sogs pa ni ma yin no/ /gang la bslab pa thams cad rgyu ba med pa ste zhes bya ba ni rnam par mi rtog pa'i shes rab kyi pha rol tu phyin pa la spyod pa la bya'o//gang chos thams cad la mngon par 'du byed pa med pa zhes bya ba ni gang chos thams cad la g.yo ba yongs su btang ba'o/ /gang rnam par shes pa gnas pa la de'i sems mi sbyor ba ste zhes bya ba ni kun tu 'dre bar mi 'gyur zhing /bag la nyal du mi 'gyur zhes bya ba'i tha tshig go/ /sangs rgyas su lta ba la brten pas sangs rgyas mthong bar mi 'gyur te zhes bya ba ni sangs rgyas mthong ngo snyam nas sangs rgyas su dmigs pa'i lta bas sangs rgyas su lta ba la gnas pa'i phyir sangs rgyas mthong ba med de/mi dmigs pa'i ye shes nyid kyis sangs rgyas mthong ngo zhes bya ba'i tha tshig go/ /chos dang dge 'dun la yang de bzhin no/ /'di ltar chos thams cad stong pa nyid kyis stong pa ni ma yin gyi/ rang gi mtshan nyid kyis stong pa'i phyir zhes bya ba ni 'di ltar gzugs la sogs pa'i chos rnams gzugs la sogs pa kun brtags pa'i mtshan nyid du ni yod pa ma yin gyi/brjod du med pa'i mtshan nyid don dam pa stong pa nyid kyi ngo bo nyid du ni med pa ma yin te/ de'i phyir stong pa nyid la thams cad chad par lta ba'i rgyu las byung ba'i 'jigs par mi bya'o zhes bya ba'i tha tshig go//rang gi mtshan nyid kyis stong pa nyid stong pas/ stong pa nyid ni stong pa nyid dang 'gal bar mi byed pa'i phyir te zhes bya ba ni gal te stong pa nyid kyang stong pa nyid kyi mtshan nyid kyis stong pa ma yin na/ de lta na ni mi stong pa'i chos shig yod par gyur pas chos thams cad stong ngo zhes bya ba dang /stong pa nyid kyi mtshan nyid 'di 'gal ba'i phyir stong pa nyid 'gal bar 'gyur ba zhig na 'di ltar stong pa nyid kyang stong pa nyid ces bya ba'i chos gzhan du gyur pa gang yang med pas stong pa nyid kyi mtshan nyid kyis stong par khas len te/de bas na chos thams cad stong ngo zhes bya ba 'grub pa'i phyir stong pa nyid ni stong pa nyid kyi mtshan nyid dang 'gal bar mi byed do zhes bya ba'i tha tshig go/ /'di ltar stong pa nyid kyis stong pa nyid stong gi/ stong pa nyid la stong pa nyid rtogs par mi byed ces bya ba ni stong pa nyid la stong pa nyid gnyis pa med de/de bas na stong pa nyid gnyis pa med pa'i phyir stong pa nyid la stong pa nyid rtogs par mi byed do zhes bya bar shes pa gang yin pa de dag nyid kyis stong pa nyid rtogs pa'o/ /'khor gsum yongs su dag pa zhes bya ba ni lus dang /ngag dang / yid kyi 'khor gsum yongs su dag pa'o/ /sems can gyi zhing yongs su dag pa'i phyir zhes bya ba ni sems can thams cad de bzhin gshegs pa'i snying po nyid yin pa'i phyir sems can gyi zhing yongs su dag pa'o/ /bsnan pa med pa dang dbri ba med pa zhes bya ba la/yod pa skur pa mi 'debs pa ni dbri ba med pa'o/ /med pa sgro mi 'dogs pa ni bsnan pa med pa ste/ yang dag par yod pa la skur pa mi 'debs pa dang / yang dag par med pa la sgro mi 'dogs pas mnyam pa nyid du mthong zhes bya ba'i tha tshig go//gang chos thams cad rab tu rtogs pa med pa zhes bya ba ni rtogs par bya ba dang / rtogs par byed pa gnyi ga ma mthong ba'i phyir rtogs pa med pa nyid yang dag pa'i tshul rtogs pa'o/ /chos nyid la kun tu spyod pa med pa nyid de tshul gcig tu bstan pa'o zhes bya ba ni dper na nam mkha' gcig pu'i ngo bo yin pas/ngo bo nyid la tha dad du dbye ba med pa de bzhin du/ de bzhin nyid kyang rnam pa gcig pa'i phyir/ yod pa dang med pa dang / chos dang / chos ma yin pa dang / rtag pa dang / mi rtag pa la sogs pa'i chos gnyis la kun tu spyod pa med pas tshul gcig tu bstan to//nyan thos dang rang sangs rgyas rnams kyi lta ba rnams zhes bya ba ni nyan thos dang rang sangs rgyas rnams kyi lta ba ma spangs pa'i rnam par rtog pa gang yin pa de dag la bya'o/ /gang dbang po drug po dag rab tu mi 'phro ba gang yin pa zhes bya ba ni 'gro ba med cing 'du ba'o//shes pa thogs pa med pa'i ye shes kyis rjes su chags pa'i sa ma yin pa gang zhe na zhes bya ba ni gang rjes su chags pa dang / khong khro ba dang bral ba'i ye shes de gang zhe na zhes bya ba'i tha tshig go/ /gang chos la bsnyen bkur ba ste zhes bya ba ni/sus chos mthong ba des sangs rgyas mthong ngo zhes gsungs pa'i phyir ro/ /bdag dang gzhan gyi sems can gyi zhing yongs su sbyong bar byed pa'o zhes bya ba ni sems can gyi zhing ma gtogs par sangs rgyas kyi zhing zhes bya ba gzhan med de/ rnam par rig pa tsam du zad pa'i phyir ro//gang rnam par smin pa'i ting nge 'dzin zhes bya ba ni sa brgyad pa la rtsol ba med pa'i phyir don dam par rtsol ba dang bcas pa'i spyod pa'i sa thams cad yongs su rdzogs te/ dge ba'i chos rnams rnam par smin pa'i bdag nyid du gnas so/ /de bas na sngon ting nge 'dzin la snyoms par zhugs pa'i rnam par smin par gyur pa'i ting nge 'dzin rnams lhun gyis grub pa nyid du byang chub sems dpa' la nye bar 'du ste/de bas na mnyam par gzhag pa zhes bya'o/ /spobs pa'i klung ni spobs pa'i rgyun dang / tshul dang / spobs pa rgyun du 'byung zhes bya ba'i tha tshig go//rdzus shing skye ba ste zhes bya ba ni sa brgyad pa yan chad ni mngal na gnas pa med de/ sems can yongs su smin par bya ba'i don du ni de lta bur yang ston to/ /dkar po rnam par mthong ba'i sa zhes bya ba ni mos pas spyod pa'i sa'o//rigs kyi sa zhes bya ba ni bzod pa chen po'i sa'o/ /brgyad pa'i sa zhes bya ba ni rgyun du zhugs pa'i 'bras bu la 'jug pa'i sa ste/ de ni dgra bcom pa'i 'bras bu la gnas pa nas bzung ste bgrangs nas brgyad par 'gyur ro/ /mthong ba'i sa zhes bya ba ni rgyun du zhugs pa'i 'bras bu la gnas pa'i sa'o//bsrabs pa'i sa zhes bya ba ni lan cig phyir 'ong ba'i sa ste/ de'i 'dod pa'i 'dod chags la sogs pa srab mor byas pa tsam du zad do/ /'dod chags dang bral ba'i sa ni phyir mi 'ong ba ste / des 'dod pa la 'dun pa dang gnod sems yang dag par bcad pa dang 'dod pa'i 'dod chags dang bral ba yin no//byas pa rtogs pa can gyi sa ni dgra bcom pa nyid de/ bya ba byas so zhes khong du chud pa ni byas pa rtogs pa ste/ de 'di la yod pas na byas pa rtogs pa can zhes bya ste dgra bcom pa'o/ /yang na 'di byas pa khong du chud pa'i ngang tshul can yin pas byas pa rtogs pa can te/de'i sa ni byas pa rtogs pa can gyi sa'o/ /theg pa chen po la yang dag par zhugs pa bstan pa'o/ /de ltar theg pa chen po la yang dag par zhugs pa bstan nas/ de'i 'og tu theg pa de gang nas nges par 'byung bar 'gyur zhes bya ba zhus pas gsum pa brtsams te/khams gsum nas nges par 'byung bar 'gyur zhing / rnam pa thams cad mkhyen pa nyid gang na ba der gnas par 'gyur ro zhes bya ba ni nyan thos dang rang sangs rgyas kyi theg pa dag la yang khams gsum nas nges par 'byung ba yang yod pas de bsal ba'i phyir khams gsum nas byung nas rnam pa thams cad mkhyen pa nyid du gnas par 'gyur ro zhes bya bas theg pa chen po la bya ba gnyis yod par bstan te/theg pa chen po ni rnam pa thams cad mkhyen pa nyid la gnas par 'gyur zhes gsungs pa'i phyir ro//de yang gnyis su med pa'i tshul gyis zhes bya ba ni gnyis la tha dad pa yod do snyam du log par zhugs pa rnams la 'bras bu tha dad pa med par ston te/ theg pa chen po la 'bras bu'i gnas skabs na sangs rgyas nyid du zad pas theg pa chen po dang /rnam pa thams cad mkhyen pa nyid la tha dad pa med do/ /de bas na gnyis su med pa nyid de/ de'i phyir chos 'di gnyis ni ldan pa yang ma yin mi ldan pa yang ma yin zhes bya ba la sogs pa gsungs te/ gcig pa dang tha dad pa'i mtshan nyid med par bstan pa'o/ ldan pa yang ma yin mi ldan pa yang ma yin zhes bya ba la/ gcig pa med pa'i phyir ldan pa yang ma yin no/ /tha dad pa med pa'i phyir mi ldan pa yang ma yin no/ /'dzugs par mi byed pa'i phyir gzugs med pa'o/ /bstan par mi nus pas bstan du med pa'o/ / 'di gnyis kyis ni 'dzin pa dang / gzung ba med par bstan te/ gang gi phyir 'dzugs par mi byed pa de'i phyir 'dzin pa med pa'o/ /gang gi phyir bstan par mi nus pa de'i phyir gzung ba med pa'o/ /thogs pa med pa zhes bya ba 'dis ni dbang po dang / yul ltar thogs pa'i mtshan nyid med pa'i phyir yul dang /yul can med par bstan pa'o/ /de ltar mtshan nyid med pa'i phyir mtshan nyid med pa ste/ gnyi ga yang mtshan nyid med par mtshan nyid gcig pa'i phyir/ 'di ltar mtshan nyid med par mtshan nyid gcig pa'o zhes bya ba gsungs so//rab 'byor mtshan nyid med pa'i chos la ni 'byung ba'am/ 'byung bar 'gyur ba'am/ 'byung bar 'gyur ba med do zhes bya ba ni/ 'di ltar yongs su grub pa'i chos ni kun brtags pa'i mtshan nyid thams cad dang bral zhing rang bzhin gyis yongs su dag pa ste/de'i phyir rang bzhin gyis nges par 'byung zin pas de la glo bur gyi nges par 'byung ba med do/ /rab 'byor mtshan nyid med pa'i chos rnams las nges par 'byung bar 'dod pa gang yin pa de ni de bzhin nyid 'byung bar 'dod du zad do zhes bya ba la sogs pas glo bur gyi nges par 'byung ba med pa de nyid rgya cher bstan to//de bzhin nyid ni rang bzhin nyid kyis cis kyang ma gos shing nam mkha' lta bu la nges par 'byung ba med do/ /de bas na rab 'byor de bzhin nyid kyi ngo bo nyid ni khams gsum nas nges par 'byung ba med do zhes bya ba gsungs pa'o//de bzhin nyid ni de bzhin nyid kyi ngo bo nyid kyis stong pa'i phyir ro zhes bya ba ni de bzhin nyid la de bzhin nyid kyi ngo bo nyid ces bya ba kun brtags pa gang yang med na/ gang gi phyir de de las nges par 'byung bar 'gyur/ de bzhin nyid la sogs pa bsam gyis mi khyab pa'i dbyings kyi mthar thug pa'i bar 'og nas 'byung ba dag ni sngar bshad zin to//spong ba'i dbyings dang / 'dod chags dang bral ba'i dbyings dang / 'gog pa'i dbyings zhes bya ba ni de bzhin nyid de nyon mongs pa dang / shes bya'i sgrib pa'i spros pa thams cad spong ba'i rgyu yin pa'i phyir spong ba'i dbyings zhes bya'o//srid pa gsum gyi 'dod chags dang bral ba'i rgyu yin pa dang / 'jig rten thams cad las 'das pa'i phyir 'dod chags dang bral ba'i dbyings zhes bya'o/ /sdug bsngal thams cad 'gog pa'i rgyu yin pas 'gog pa'i dbyings zhes bya'o//ming dang mtshan ma dang brda dang / tha snyad dang / gdags pa zhes bya ba tshig lnga po dag gis ni kun brtags pa bsdu ste/ dper na ba lang gi rdzas la ba lang zhes bya ba ni ming ngo / /lkog shal dang mjug ma la sogs pa ni mtshan ma'o//zal mo'i bu dmar mo'i bu zhes bya ba la sogs pa ni brda'o/ /ba khrid de shog pa zhos shig ces bya ba la sogs pa ni tha snyad do/ /brjod pa thams cad ni gdags pa'o/ /skye ba med pa dang / 'gag pa med pa dang / kun nas nyon mongs pa med pa dang /rnam par byang ba med pa dang / mngon par 'du byed pa med pa dang zhes bya ba ni tshig lnga po dag gis yongs su grub pa bsdus te/ skye ba med pa'i phyir mi skye ba'o/ /'gag pa med pa'i phyir mi 'gag pa'o/ /gos pa med pa'i phyir kun nas nyon mongs pa med pa'o//rang bzhin gyis yongs su dag pa'i phyir rnam par byang ba med pa'o/ /rnam par dag pa'i rgyur mngon par 'du byed pa med pa'i phyir/ mngon par 'du bya ba med pa'o/ /da ni theg pa gang du gnas par 'gyur zhes bya ba ni zhus pa bzhi pa brtsams te/ rab 'byor theg pa de ni gang du yang gnas par 'gyur ba med do zhes bya ba ni ji ltar nam mkha' gang na yang mi gnas pa de bzhin du theg pa chen po yang mthar phyin cing chos kyi sku'i bdag nyid yin pas gang du yang gnas par mi 'gyur ro// theg pa chen po 'ba' zhig gnas par mi 'gyur bar ma zad kyi/kun brtags pa dang / yongs su grub pa'i chos thams cad kyang gang na yang mi gnas so zhes bya bar ston to/ /chos thams cad gnas pa med pa'i phyir ro zhes bya ba la/ kun brtags pa ni med pa'i phyir gang na yang mi gnas so/ /yongs su grub pa ni gzhi dang brten pa med pa'i phyir gang na yang mi gnas so//'on kyang theg pa chen po de ni mi gnas pa'i tshul gyis gnas par 'gyur ro zhes bya ba ni gnas pa med pa nyid de'i gnas pa yin par tha snyad gdags par bstan pa'o/ /de bas na de bzhin nyid ni gnas pa yang ma yin mi gnas pa yang ma yin no zhes bya ba gsungs te/don dam par brten pa'i mtshan nyid med pa'i phyir gnas pa yang ma yin no/ /mi gnas pa'i mtshan nyid du gnas pa'i phyir tha snyad du mi gnas pa yang ma yin no/ /de bzhin du gnas pa dang / mi gnas pa'i mtshan nyid thams cad la yang sbyar bar bya'o/ /mi gnas par gnas pa'i tshul dang / bskyod du med pa'i tshul gyis gang du yang gnas par 'gyur ba med do zhes bya ba ni rten gyi dngos por gang du yang gnas par 'gyur ba med de/ de bas na mi gnas pa zhes bya'o//mi gnas pa'i mtshan nyid kyis gnas pa dang / brtan pa dang / phyin ci log med pa'i phyir gnas pa zhes bya'o/ /des su zhig nges par 'byung bar 'gyur zhes bya ba ni zhus pa lnga pa ste/ theg pa de gang yin pa dang zhes bya ba ni theg pa chen po'o/ / gang nges par 'byung bar 'gyur ba zhes bya ba ni gang zag go//gang gis nges par 'byung bar 'gyur zhes bya ba ni lam gyi chos gang gis zhes bya ba ste/ rgyu gang gis nges par 'byung bar 'gyur ba'o/ /gang nas nges par 'byung bar 'gyur ba zhes bya ba ni srid pa las so//shin tu rnam par dag pa'i phyir bdag mi dmigs so zhes bya ba ni gal te bdag la sogs pa dang / gzugs la sogs pa yongs su zin na/ yongs su grub pa shin tu rnam par dag pa gang yin pa de nyams par 'gyur ro zhes ston to/ /bcom ldan 'das gang mi dmigs pas chos 'di dag thams cad dmigs su ma mchis pa lags zhes bya ba ni mi dmigs pa sngar smos pa thams cad kyi gtan tshigs zhus pa'o//de la 'gres gsum ste/ thog mar de bzhin nyid la sogs pa mi dmigs pa ni ches de dag dmigs su med pa'i gtan tshigs kyi 'gres dang po'o//de'i 'og tu de bzhin nyid la sogs pa ci'i phyir mi dmigs snyam du the tshom du gyur pa dang / de bzhin nyid la sogs pa de dag gi rang gi mtshan nyid mi dmigs pas/ dmigs su med do zhes bya ba ni 'gres gnyis pa'o/ /de nas stong pa nyid thams cad dang /sa la sogs pa'i chos rnams mi dmigs pa zhes bya ba ni 'gres gsum pa'o/ /dkar po rnam par mthong ba'i sa zhes bya ba ni lhag mthong gi gnas skabs 'ba' zhig la bya ste/ mos pa spyod pa'i sa la'o/ /rigs kyi sa zhes bya ba ni rigs kyi gnas skabs la sa zhes bya ste/rigs kyi sa zhes bya ba ni nges par 'byed pa'i cha dang mthun pa'i dge ba'i rtsa ba'i gnas skabs ma lus par bstan to/ /bcom ldan 'das theg pa chen po zhes bgyi ba 'di ni zhes bya ba theg pa chen po ni sngar bshad zin pa snyam na skabs gang yin zhe na/de yang bden mod kyi/ sngar ni theg pa chen po la yang dag par zhugs pa'i sgra bshad pa las/ 'jug pa'i skabs su pha rol tu phyin pa la sogs pa gzungs kyi sgo'i mtha' la thug gi bar du sgrub pa'i chos rnams theg pa chen po yin par bstan to/ /da ni theg pa de gang nas nges par 'byung bar 'gyur zhes bya ba la sogs pa nges par 'byung ba'i gnas skabs nas 'bras bu'i theg pa chen po sangs rgyas nyid du bstan to//de bas na da ni 'bras bu'i theg pa chen po 'di la/ theg pa chen po'i nges pa'i tshig dang / theg pa chen po'i chos rnams yang bstan par bya ste/'di ni gnas skabs so/ /lha dang mi dang / lha ma yin du bcas pa'i 'jig rten zil gyis mnan nas nges par 'byung bar 'gyur te/ de'i slad du theg pa chen po zhes bgyi'o zhes bya ba la/ 'gro ba ni 'dir theg pa chen po zhes bya'o/ /nges par 'byung ba che ba gang yin pa de theg pa chen po'o//gang gi phyir 'jig rten gsum po zil gyis mnan te thams cad las nges par 'byung ba de'i phyir/ 'di'i nges par 'byung ba che bas theg pa chen po zhes bya'o/ /theg pa chen po de ni nam mkha' dang mnyam pa ste zhes bya bas ni de nyid kyi che ba nyid sgrub ste skabs 'byed pa che ba dang /skye ba dang / 'gag pa la sogs pa med pa dang / dus kyis ma bsdus pa dang rgyu rnam pa gsum gyis nam mkha' dang 'dra bar bstan to/ /dper na nam mkha' la sems can thams cad skad cig gcig la ji ltar 'dod pa'i spyod lam thams cad kyis gnas kyang dogs pa med pas go skabs phye ba de bzhin du/theg pa chen po 'di la yang skad cig gcig la sems can thams cad cig car lhags nas thams cad shes pa nyid dang / lam gyi rnam pa shes pa nyid dang / rnam pa thams cad mkhyen pa nyid la 'khod nas gnas kyang go skabs yangs pa'i phyir gnod pa ci yang med do//dper na nam mkha' ni dus 'di la 'ongs so byung ngo zhes bya ba'am/ song ngo 'gags so zhes bya ba 'am/ gnas pa'i skad cig gi dbang gis gnas so zhes bya bar brjod du mi rung ste/theg pa chen po yang de bzhin no/ /dper na nam mkha' ni sngon gyi dus de na byung ngo / /phyi ma'i dus de na 'byung bar 'gyur ro/ /bar gyi dus de na yod do zhes brjod par mi nus te/ theg pa chen po yang de bzhin no zhes de'i rim gyis 'gres gsum gyis bstan to//de nas gnas brtan gyis smras pa'i 'gres nyid la/ bcom ldan 'das kyis mngon par dgyes par mdzad nas sngar bshad pa'i rim gyis pha rol tu phyin pa la sogs pa'i chos rnams rnam par smin pa'i bdag nyid du gyur pa chos kyi skus bsdus pa dang /theg pa chen po nyid du bstan to/ /pha rol tu phyin pa drug la sogs pas de ltar theg pa chen po bstan nas de'i 'og tu gnas brtan gyis lha dang / mi dang / lha ma yin du bcas pa'i 'jig rten zil gyis mnan nas/ theg pa de nges par 'byung bar 'gyur te zhes bya ba dang /theg pa de nam mkha' dang mnyam pa ste zhes bya ba dang / bcom ldan 'das 'di lta ste dper na nam mkha' ni sems can grangs ma mchis tshad ma mchis/ dpag tu ma mchis pa rnams kyi go 'byed do zhes bya ba dang / 'ong ba'am/ 'gro ba mi dmigs zhes bya ba dang /sngon gyi mtha' 'am / phyi ma'i mtha' mi dmigs zhes bya ba tshig lnga gsol pa dang / bcom ldan 'das kyis/ rab 'byor gang yang khyod kyis 'di skad du theg pa de ni lha dang mi dang / lha ma yin du bcas pa'i 'jig rten zil gyis mnan nas nges par 'byung bar 'gyur zhes smras pa ni zhes bya ba la sogs pas tshig de dag so sor smos te/de dag rgya cher bstan to/ /rab 'byor gal te 'dod pa'i khams de bzhin du gyur te/ ma nor ba dang zhes bya ba la sogs pas ji skad bstan par 'gyur zhe na/ gal te 'dod pa'i khams la sogs pa chos thams cad kun brtags pa dang yang dag pa ma yin pa ma yin te/yongs su grub pa de kho na nyid kyi ngo bo zhig yin du zin na theg pa chen po 'di de dag las nges par 'byung bar mi 'gyur zhing / de dag yongs su spong bar mi 'gyur ba zhig na 'di ltar chos de dag thams cad kun brtags pa ste/yang dag pa ma yin pas/ de'i phyir theg pa chen po 'di de dag yongs su spong bar 'gyur ro zhes bstan pa yin no/ /rab 'byor gal te 'dod pa'i khams de bzhin du gyur te/ ma nor ba dang / gzhan ma yin pa dang /phyin ci ma log pa dang / de kho na dang / yang dag pa zhes bya ba la sogs pa ni gal te 'dod pa'i khams dngos po yod par gyur te dngos po med pa ma yin na zhes bya bar sbyar te/ gal te 'dod pa'i khams yod par gyur te med pa ma yin na yongs su grub pa'i mtshan nyid dang /bden pa'i mtshan nyid dang / 'dus ma byas kyi mtshan nyid dang / rnam pa gsum gyis yod pa nyid du 'gyur te/ de la de bzhin du gyur pa dang / ma nor ba dang / gzhan ma yin pa zhes bya ba tshig gsum gyis ni yongs su grub pa'i mtshan nyid bstan to/ /phyin ci ma log pa dang /de kho na dang / yang dag pa dang / bden pa dang / ji lta ba bzhin du zhes bya ba tshig lngas ni bden pa bstan to/ /rtag pa dang / brtan pa dang / ther zug dang / mi 'gyur ba'i chos can zhes bya ba tshig bzhis ni 'dus ma byas kyi mtshan nyid bstan to/ / de la yongs su grub pa'i mtshan nyid ni rnam pa gsum ste/mi 'jigs par yongs su grub pa dang / phyin ci ma log par yongs su grub pa dang / mi 'gyur bar yongs su grub pa'o/ /de la de bzhin du gyur zhes bya bas ni mi 'jigs par yongs su grub pa bstan to/ /ma nor zhes bya bas ni phyin ci ma log par yongs su grub pa bstan to//gzhan ma yin zhes bya bas ni mi 'gyur bar yongs su grub pa bstan to/ /bden pa'i mtshan nyid kyang rnam pa lnga ste/ phyin ci ma log pa'i mtshan nyid ni dper na smig rgyu la chur phyin ci log tu gyur pa med pa lta bu ste/de ni phyin ci ma log pa zhes bya bas bstan to/ /ngo bo nyid kyi mtshan nyid ni dper na sgyu ma la ngo bo nyid med pa'i dngos po lta bu ste/ de ni de kho na zhes bya bas bstan to/ /yod pa'i mtshan nyid ni dper na skra shad 'dzings pa la sogs pa la yod pa ma yin pa'i mtshan nyid du gyur pa med pa lta bu ste/de ni yang dag pa zhes bya bas bstan to/ /mi slu ba'i mtshan nyid ni dper na zla ba gnyis su gyur pa la sogs par 'khrul pa'i mtshan nyid med pa lta bu ste/ de ni bden pa zhes bya bas bstan to/ /rigs pa'i mtshan nyid ni dper na rtag pa dang / bde ba dang / bdag la sogs pa 'thad pa dang bral bar gyur pa med pa lta bu ste/ de ni ji lta ba bzhin zhes bya bas bstan to/ /'dus ma byas kyi mtshan nyid ni rnam pa bzhi ste/ skye ba dang / 'gag pa med pa'i mtshan nyid ni 'di lta ste/ rtag pa zhes gsungs pa'o//rtag tu gnas pa'i mtshan nyid ni 'di lta ste/ brtan pa zhes gsungs pa'o/ /'chad pa med pa'i mtshan nyid ni 'di lta ste/ ther zug ces gsungs pa'o/ /'gyur ba med pa'i mtshan nyid ni 'di lta ste/ mi 'gyur ba'i chos can zhes gsungs pa'o/ / rab 'byor de'i phyir 'dod pa'i khams ni kun brtags pa/ rnam par bsgrub pa tshig gis bstan pa zhes bya ba la/ brtags pa zhes bya ba ni bden pa ma yin pa'i phyir kun brtags pa ma yin pa nyid du bstan to/ /rnam par bsgrubs pa zhes bya ba ni gzhan gyi dbang gis bkod pa'i phyir yang dag pa ma yin pa kun brtags pa nyid du bstan to//tshig gis bstan pa zhes bya bas ni kun rdzob yin pa'i phyir brjod par bya ba nyid du bstan to/ /dngos po med pa ste/ dngos po yod pa ma yin pa zhes bya ba ni med pa ste yod pa ma yin no zhes bya ba'i tha tshig go//lha dang / mi dang / lha ma yin du bcas pa'i 'jig rten zhes bya ba ni 'jig rten gsum ste/ lha ma yin smos pas ni 'og gi 'jig rten bstan to/ /mi smos pas ni bar gyi 'jig rten bstan to/ /lha smos pas ni gong ma'i 'jig rten bstan to/ /'gres 'di la yang khams gsum po dag dang /phung po rnams dang / skye mched rnams dang / rnam par shes pa'i tshogs drug dang / 'dus te reg pa'i tshogs drug dang / tshor ba'i tshogs drug dang / khams drug dang / rten cing 'brel bar 'byung ba yan lag bcu gnyis pa dang / de bzhin nyid dang / ma nor ba de bzhin nyid dang / gzhan ma yin pa'i de bzhin nyid dang / chos dang / chos kyi dbyings dang / chos gnas pa nyid dang / chos skyon med pa nyid dang / yang dag pa'i mtha' dang / bsam gyis mi khyab pa'i dbyings dang / pha rol tu phyin pa drug dang /stong pa nyid thams cad dang / byang chub kyi phyogs la sogs pa sangs rgyas kyi chos ma 'dres pa'i mtha' la thug pa rnams dang / rigs kyi sa'i chos la sogs pas sangs rgyas kyi chos kyi mtha' la thug pa rnams dang / rigs nyid la sogs pa sangs rgyas kyi mtha' la thug pa rnams dang /sems bskyed pa thams cad dang / rdo rje lta bu'i ye shes dang / skyes bu chen po'i mtshan rnams dang / 'od dang / yan lag drug cu dang ldan pa'i dbyangs dang / chos kyi 'khor lo dang / sems can rnams dang / 'di dag bstan to/ / de la yan lag drug cu dang ldan pa'i dbyangs zhes bya ba ni de bzhin gshegs pa'i gsang ba'i mdo las/ ji skad du zhi ba'i blo [(]glos [,]gros [)]gzhan yang de bzhin gshegs pa'i gsung yan lag rnam pa drug cu dang ldan pa 'byung ste/ mnyen pa dang / 'jam pa dang / yid du 'ong ba dang /yid du 'thad pa dang / dag pa dang / dri ma med pa dang / gsal ba dang / snyan cing 'jebs pa dang / mnyan par 'os pa dang / mi tshugs pa dang / snyan pa dang / dul ba dang / mi rtsub pa dang / mi brlang ba dang / rab tu dul ba dang / rnar snyan pa dang / lus sim par byed pa dang /sems tshim par byed pa dang / snying dga' bar byed pa dang / dga' ba skyed pa dang / yongs su gdung ba med pa dang / kun shes par byed pa dang / rnam par rig par bya ba dang / rnam par gsal ba dang / dga' bar byed pa dang / mngon par dga' bar byed pa dang /kun shes par byed pa dang / rnam par rig par byed pa dang / rigs pa dang / 'brel pa dang / zlos pa'i skyon med pa dang / seng ge'i sgra'i shugs dang / glang po che'i sgra skad dang / 'brug gi sgra dbyangs dang / klu'i dbang po'i sgra dang / dri [(]zi'i [,]za'i [)]glu dbyangs dang /bya ka la ping ka'i sgra dbyangs bsgrags pa dang / tshangs pa'i sgra dbyangs bsgrags pa dang / shang shang te'u'i sgra dbyangs su grags pa dang / lha'i dbang po'i sgra dbyangs ltar snyan pa dang / rnga'i sgra dang / ma khengs pa dang / mi dma' ba dang / sgra dbyangs thams cad kyi rjes su zhugs pa dang /tshig zur chag med pa dang / ma tshang ba med pa dang / ma zhum pa dang / mi zhan pa dang / rab tu dga' ba dang / khyab pa dang / chub pa dang / rgyun chags pa dang / 'brel pa dang / sgra thams cad rdzogs par byed pa dang /dbang po thams cad tshim par byed pa dang / ma smad pa dang / mi 'gyur ba dang / ma brtabs pa dang / 'khor kun tu grags pa dang / rnam pa thams cad kyi mchog dang ldan pa zhes gsungs pa lta bu'o/ /de la gnyen po ni khams dang / dge ba'i rtsa ba thams cad nye bar ston pa'i phyir ro//'jam pa ni tshe 'di nyid la bde ba la reg par byed pa'i phyir ro/ /yid du 'ong ba ni don bzang po'i phyir ro/ /yid du 'thad pa ni tshig 'bru bzang po'i phyir ro/ /dag pa ni 'jig rten las 'das pa bla na med pa'i rjes la byung ba'i phyir ro//dri ma med pa ni nyon mongs pa'i bag la nyal dang / bag chags thams cad dang bral ba'i phyir ro/ /gsal ba ni tshig dang yi ge grags pa'i phyir ro/ /snyan cing 'jebs pa ni mu stegs can thams cad kyi log pa'i blo gros dang / lta ba 'jig pa'i yon tan dang ldan pa'i phyir ro//mnyan par 'os pa ni sgrub pas nges par 'byin pa'i phyir ro/ /mi tshugs pa ni phas kyi rgol ba thams cad kyis bar mi chod pa'i phyir ro/ /snyan pa ni dga' bar byed pa'i phyir ro/ /dul ba ni 'dod chags kyi gnyen por gyur pa'i phyir ro/ / mi rtsub pa ni bslab pa bcas pa thabs sla ba'i phyir ro/ /mi brlang ba ni de las 'das pa dag yang dag par 'byung ba ston par byed pa'i phyir ro/ /rab tu dul ba ni theg pa gsum gyis 'dul ba ston pa'i phyir ro/ /rnar snyan pa ni g.yeng ba'i gnyen por gyur pa'i phyir ro/ / lus sim par byed pa ni ting nge 'dzin thob par byed pa'i phyir ro/ /sems tshim par byed pa ni lhag mthong gis mchog tu dga' ba thob par byed pa'i phyir ro/ /snying dga' bar byed pa ni the tshom gcod pa'i phyir ro/ /dga' bde bskyed pa ni log par nges pa sel ba'i phyir ro//yongs su gdung ba med pa ni bsgrub pa la 'gyod pa med pa'i phyir ro/ /kun du shes par bya ba ni thos pa las byung ba'i shes pa phun sum tshogs pa'i gzhir gyur pa'i phyir ro/ /rnam par rig par bya ba ni bsams pa las byung ba'i shes pa phun sum tshogs pa'i gzhir gyur pa'i phyir ro//rnam par gsal ba ni slob dpon gyi chos kyi dpe mkhyud med pa las byung ba'i phyir ro/ /dga' bar byed pa ni bdag gi don rjes su thob pa rnams dga' bar byed pa'i phyir ro/ /mngon par dga' bar byed pa ni bdag gi don ma thob pa rnams re bar byed pa'i phyir ro//kun shes par byed pa ni bsam gyis mi khyab pa'i chos yang dag par ston pa'i phyir ro/ /rnam par rig par byed pa ni bsam du yod pa'i chos yang dag par ston pa'i phyir ro/ /rigs pa ni tshad ma dang mi 'gal ba'i phyir ro/ /'brel ba ni ci rigs par 'dul ba la ston pa'i phyir ro//zlos pa'i skyon med pa ni don med pa ma yin pa'i phyir ro/ /seng ge'i sgra'i shugs ni mu stegs can gyi tshogs thams cad skrag par byed pa'i phyir ro/ /glang po che'i sgra skad ni sgra gsang mtho ba'i phyir ro/ /'brug gi sgra dbyangs ni zab pa'i phyir ro//klu'i dbang po'i sgra ni gzung bar 'os pa'i phyir ro/ /dri za'i glu dbyangs ni snyan pa'i phyir ro/ /bya ka la ping ka'i sgra dbyangs bsgrags pa ni myur du 'gyur ba'i ngang tshul can gyi phyir ro/ /tshangs pa'i sgra dbyangs bsgrags pa ni rgyang ring du grags pa'i phyir ro//shang shang te'u'i sgra dbyangs su grags pa ni thams cad du grub pa thog mar 'gro ba'i bkra shis yin pa'i phyir ro/ /lha'i dbang po'i dbyangs ltar snyan pa ni 'gal bar bya ba ma yin pa'i phyir ro/ /rnga'i sgra ni bdud phyir rgol ba thams cad pham par bya ba la thog mar 'gro ba'i phyir ro//ma khengs pa ni bstod pas kun nas nyon mongs pa med pa'i phyir ro/ /mi dma' ba ni smad pas kun nas nyon mongs pa med pa'i phyir ro/ /sgra thams cad kyi rjes su zhugs pa ni rnam par bsgrub pa thams cad dang / mtshan nyid rnam pa thams cad kyi rjes su zhugs pa'i phyir ro//tshig zur chag med pa ni brjed par de mi 'byin pa'i phyir ro/ /ma tshang ba med pa ni 'dul ba'i bya ba la dus thams cad du nye bar gnas pa'i phyir ro/ /ma zhum pa ni rnyed pa dang bkur sti la mi rtag pa'i phyir ro/ / mi zhan pa ni 'jigs pa med pa'i phyir ro/ /rab tu dga' ba ni bde ba byung ba'i phyir ro/ /khyab pa ni rig pa'i gnas thams cad la mkhas pa'i rjes su zhugs pa'i phyir ro/ /chub pa ni sems can rnams kyi don mtha' dag sgrub par byed pa'i phyir ro/ /rgyun chags pa ni rgyun mi 'chad pa'i phyir ro//'brel pa ni rnam pa sna tshogs su gnas pa'i phyir ro/ /sgra thams cad rdzogs par byed pa ni sgra gcig la sgra'i rnam par rig pa du ma nye bar gnas pa'i phyir ro/ /dbang po thams cad tshim par byed pa ni gcig gis don du ma'i rnam par rig pa nye bar gnas pa'i phyir ro//ma smad pa ni dam bcas pa bzhin du byed pa'i phyir ro/ /mi 'gyur ba ni ma 'ongs pa'i dus na rab tu sbyor ba'i phyir ro/ /ma brtabs pa ni rtab rtab por mi smra ba'i phyir ro/ /'khor kun tu grags pa ni 'khor nye ring la mtshungs par grags pa'i phyir ro//rnam pa thams cad kyi mchog dang ldan pa ni 'jig rten don dang / dpe'i chos thams cad kyi yongs su grub pa'i phyir ro zhes slob dpon gyi man ngag go/ //bam po bcu drug pa/ da ni rab 'byor gang yang khyod kyis 'di skad du theg pa de ni nam mkha' dang mnyam pa'o zhes smras pa ni zhes bya ba la sogs pas tshig gnyis pa bzung ste bstan to//kun brtags pa'i dngos po rnams ni rnam pa nyi shu rtsa gcig gis rnam par gzhag pa yin te/ theg pa chen po 'di la ni rnam par gzhag pa de dag med pa'i phyir nam mkha' dang mtshungs par rig par bya'o//rnam pa nyi shu rtsa gcig ni phyogs rnam par gzhag pa dang / dbyibs dang / kha dog dang / dus dang / 'grib cing 'phel ba la sogs pa dang / kun nas nyon mongs shing rnam par byang ba dang / skye zhing 'gag pa dang /dge ba la sogs pa dang / mthong zhing thos pa la sogs pa dang / shes par bya ba la sogs pa dang / rnam par smin cing rnam par smin pa'i chos can dang / 'dod chags la sogs pa dang / khams dang / rab tu dga' ba la sogs pa byang chub sems dpa'i sa bcu dang /dkar po rnam par mthong ba dang / rigs kyi sa la sogs pa sa bcu dang / 'phags pa'i gang zag gi sa dang / gnyis dang / chos kyi mdo dang / rnam par thar pa'i sgo dang / gsang ba dang / mi gsang ba la sogs pa dang / rnyed pa la sogs pa dang /rab tu brjod pa la sogs pa'o/ /de la 'grib pa dang 'phel ba ni rim gyis so/ /'bri ba ni chad pa'o/ /skye ba zhes bya ba ni dngos po rnams thog ma skye ba'o / /'gag pa ni skad cig gcig la 'jig pa'o/ /gnas pa ni de ltar skye zhing 'gag pa'i chos rnams kyi rgyun ma chad pa'o//mthar thug pa ni de'i rgyun chad cing bltar mi snang ba'o/ /gnas pa las gzhan du 'gyur ba zhes bya ba ni de'i rgyun snga ma dang / phyi ma bye brag can du gyur pa de mi 'dra bar gyur pa'o/ /shes par bya ba yang ma yin pa ni gzugs la sogs pa ltar shes pas rab tu rtogs par bya ba'i dngos po med pa'i phyir ro//kun brtags pa'i chos ni shes pas rtogs par 'gyur ba ma yin te/ de'i tshe na med pa'i phyir ro/ /shes par mi bya ba yang ma yin zhes bya ba ni ri bong gi rwa ltar shin tu med pa yang ma yin pa'i phyir ro/ / yongs su shes par bya ba la sogs pa yang ma yin zhes bya ba ni bden par rtogs pa ma yin pa'i phyir ro/ /'bras bu gang yin pa ni rnam par smin pa'o/ /rnam par smin par 'gyur ba gang yin pa de ni rnam par smin pa'i chos can no/ /rab tu dga' ba la sogs pa ni 'jig rten las 'das pa'i sems kyi ngo bo nyid du'o//'thob pa ma yin zhes bya ba ni rnyed par bya ba ma yin pa'i phyir ro/ /dmigs su yod pa ma yin zhes bya ba ni dbang po'i spyod yul ma yin pa'i phyir ro/ /brjod du yod pa ma yin pa zhes bya ba ni tshig gi lam du ma gtogs pa'i phyir ro// brjod du med pa yang ma yin no zhes bya ba ni kun rdzob kyi tshig gi lam gyis bstan par bya ba'i phyir ro zhes bya bar sbyar bar bya'o/ /de'i 'og tu/ rab 'byor gang yang khyod kyis 'di skad du ji ltar nam mkha' sems can tshad med grangs med pa'i go 'byed do zhes smras pa ni zhes bya ba la sogs pas tshig gsum bstan te/rab 'byor sems can med pa'i phyir nam mkha' med par rig par bya'o/ /nam mkha' med pa'i phyir theg pa chen po med par rig par bya'o zhes bya ba'i don gang yin zhe na/ gang zag la bdag med pas chos la bdag med pa 'jug par 'gyur ba'i phyir sngar sems can med pa la gnas nas nam mkha' med pa la gnas par 'gyur ro//nam mkha' med pas theg pa chen po med pa la gnas par 'gyur ro/ /de dag med pa'i phyir dpag tu med pa la sogs pa'i chos rnams kyang med pa nyid de chos thams cad kyang de bzhin du rig par bya'o//sems can med pa'i phyir de bzhin nyid med par rig par bya'o zhes bya ba ni sems can med pas kun brtags pa'i gzugs kyi de bzhin nyid dang / sgra'i de bzhin nyid la sogs pa med par rig par bya'o//de ltar chos thams cad med pa'i phyir nam mkha' dang mtshungs pas go skabs 'byed do zhes bya bar dgongs pa'o/ /med pa nyid kyi phyir dpag tu med pa la sogs par 'gyur ro/ /'gres 'di la nyi shu rtsa drug ste sems can med pa'i phyir nam mkha' med do//nam mkha' med pa'i phyir theg pa chen po med do zhes bya ba ni 'gres dang po'o/ /gsum po de dag nyid dpag tu med pa dang sbyar ba ni gnyis pa'o/ /grangs med pa dang sbyar ba ni gsum pa'o/ /tshad med pa dang sbyar ba ni bzhi pa'o/ /chos kyi dbyings dang sbyar ba ni lnga pa'o//de bzhin nyid dang sbyar ba ni drug pa'o/ /sems can dang srog la sogs pa bcu gsum gyis bsnan te/ tha ma yang dag pa'i mtha' dang sbyar ba ni bdun pa'o/ /de nyid la yang dag pa'i mtha' bkol te/ bsam gyis mi khyab pa'i dbyings dang sbyar ba ni brgyad pa'o//de dag nyid gzugs la sogs pa'i phung po'i chos dang sbyar ba ni dgu pa'o/ /de dag nyid nang gi skye mched drug dang sbyar ba ni bcu pa'o/ /phyi rol gyi drug dang sbyar ba ni bcu gcig pa'o/ /rnam par shes pa drug dang sbyar ba ni bcu gnyis pa'o/ / reg pa drug dang sbyar ba ni bcu gsum pa'o/ /tshor ba'i tshogs drug dang sbyar ba ni bcu bzhi pa'o/ /khams drug dang sbyar ba ni bco lnga pa'o/ /rten cing 'brel bar 'byung ba dang sbyar ba ni bcu drug pa'o/ /pha rol tu phyin pa drug dang sbyar ba ni bcu bdun pa'o/ /stong pa nyid thams cad dang sbyar ba ni bco brgyad pa'o//byang chub kyi phyogs kyi chos sum cu rtsa bdun dang sbyar ba ni bcu dgu pa'o/ /'phags pa'i bden pa nas gzungs kyi sgo'i bar dang sbyar ba ni nyi shu pa'o/ /stobs bcu nas/ ma 'dres pa'i bar dang sbyar ba ni nyi shu gcig pa'o//rigs kyi sa'i chos nas byas pa rtogs pa'i bar dang sbyar ba ni nyi shu gnyis pa'o/ /rgyun du zhugs pa nas dgra bcom pa'i bar gyi gang zag dang sbyar ba ni nyi shu gsum pa'o/ /rang sangs rgyas dang byang chub sems dpa' dang sangs rgyas dang sbyar ba ni nyi shu bzhi pa'o//theg pa gsum dang sbyar ba ni nyi shu lnga pa'o/ /mya ngan las 'das pa'i dpe bstan pa ni 'gres nyi shu rtsa drug pa ste/ de dag ni 'gres nyi shu rtsa drug go/ /theg pa 'di la 'ong ba'am/ 'gro ba zhes bya ba yang mi dmigs shing gnas pa zhes bya ba yang med do zhes bya ba la sogs pas tshig bzhi pa bstan te/rab 'byor chos thams cad ni dbye ba med pa ste/ de dag gang du yang 'dor ba med do/ /gang nas kyang 'ong ba med do/ /gar yang gnas pa med do zhes bya ba ni mthar thug pa'i theg pa chen po'i gnas skabs na chos thams cad de bzhin nyid tsam du zad pa'i phyir/skye ba dang / 'gag pa dang / gnas pa med pas mi g.yo bar snang ngo / /rang bzhin dang de bzhin nyid dang ngo bo nyid dang zhes bya ba ni mthar thug pa'i theg pa chen po'i sa la chos kyi dbyings de nyid rang bzhin nyid dang /de bzhin nyid dang / ngo bo nyid dang / mtshan nyid kho nar bzung ste/ de nyid rang bzhin yin gyi gzhan med do/ /de nyid de bzhin nyid yin gyi gzhan ma yin no/ /de nyid ngo bo nyid yin gyi gzhan ma yin no/ /de nyid mtshan nyid yin gyi gzhan ma yin te/de las phye ste ste smos pa tsam du zad do/ /de la mi g.yo ba'i 'gres ni dang po'o/ /de nas phung po rnams dang / skye mched rnams dang / rnam par shes pa rnams dang / reg pa rnams dang / tshor ba rnams dang / khams drug dang / rten cing 'brel par 'byung ba'i yan lag rnams dang /pha rol tu phyin pa rnams dang / stong pa nyid thams cad dang / dran pa nye bar gzhag pa la sogs pa ma 'dres pa'i mthar thug pa rnams dang / de bzhin nyid dang / ma nor ba de bzhin nyid dang / gzhan ma yin pa de bzhin nyid dang / chos nyid dang / chos kyi dbyings dang /chos gnas pa nyid dang / chos skyon med pa nyid dang / yang dag pa'i mtha' dang / bsam gyis mi khyab pa'i dbyings dang / byang chub dang / sangs rgyas dang / 'dus byas dang / 'dus ma byas rnams te/ de dag dang sbyar bar bya'o/ /de'i 'og tu theg pa de la sngon gyi mtha' yang mi dmigs/phyi ma'i mtha' yang mi dmigs/ dbus kyang mi dmigs te/ de ni dus gsum mnyam pa nyid kyi theg pa ste/ de bas na theg pa chen po zhes bya'o zhes bya ba'i tshig 'di la/ de ni dus gsum mnyam pa nyid kyi theg pa zhes pa zhes bya ba'i tshig bzung ste/dus zhes bya ba dang / gsum zhes bya ba dang / mnyam pa zhes bya ba dang / theg pa zhes bya ba so sor smos nas/ 'das pa'i dus kyang 'das pa'i dus kyis stong ngo zhes bya ba la sogs pas ni dus sel lo / /dus gsum mnyam pa nyid kyang dus gsum mnyam pa nyid kyis stong ngo zhes bya ba ni mnyam pa zhes bya bas sel to//theg pa chen po yang theg pa chen pos stong ngo zhes bya bas ni theg pa sel to/ /byang chub sems dpa' yang byang chub sems dpas stong ngo zhes bya bas ni/ skabs nas smos pa'i byang chub sems dpas sel to//rab 'byor stong pa nyid la gcig ces bya ba med do/ /gnyis sam gsum mam zhes bya ba nas/ bcu zhes bya ba'i bar du med do zhes bya bas ni grangs kyi tshig sel to/ /de bas na 'di ni dus gsum mnyam pa nyid kyi theg pa'o zhes bya bas mjug bsdus te bstan pa ci las dgongs she na/dus gsum mnyam pa nyid kyi theg pa zhes bya ba ni mthar thug pa'i theg pa chen po la bya'o/ /theg pa chen po yang tha dad du bya ba thams cad dang bral bas/ gcig pu'i bdag nyid de/ de la ni dus zhes bya ba dang / dus mnyam pa nyid ces bya ba dang /theg pa chen po zhes bya ba dang / byang chub sems dpa' zhes bya ba thams cad stong pa nyid tsam du zad pa'i theg pa'o/ / stong pa nyid tsam du zad pa de la ni kun brtags pa'i chos de dag med pa'i phyir thams cad sel to/ /de ltar bstsal nas kyang thams cad gcig gi bdag nyid du 'gyur ba'i phyir/de bas na 'di ni byang chub sems dpa' sems dpa' chen po rnams kyi dus gsum mnyam pa nyid kyi theg pa ste zhes bya ba thams cad kyi mjug bsdus so/ /de ltar mdor bsdus te bstan nas/ theg pa chen po 'di la mnyam pa dang /mi mnyam pa ni mi dmigs so zhes bya ba la sogs pas spros te yan lag thams cad sel to/ /mnyam pa dang mi mnyam pa nyid tha dad pa'o/ /'dod chags dang 'dod chags bral ba yang mi dmigs so zhes bya ba la sogs pa la / 'dod chags ni mi mnyam pa'o//'dod chags dang bral ba ni mnyam pa'o zhes bya bar sbyar ro/ /de ltar chos thams cad gnyis kyi ngo bor med par bstan nas/ rab 'byor 'das pa'i gzugs ni 'das pa'i gzugs kyis stong ngo zhes bya ba la sogs pas/ yang so so'i ming smos te med par bstan to//stong pa nyid kyang stong pa nyid kyis stong pas dmigs su med na/ stong pa nyid la 'das pa'i gzugs dmigs par lta ga la 'gyur zhes bya ba la gzugs stong pa zhes bya ba ni gang gi tshe gzugs dang 'brel ba'i stong pa nyid smos pa de'i tshe stong pa de nyid kyang kun brtags pa yin pa'i phyir yod pa ma yin na stong pa nyid de la gzugs yod par ga la 'gyur zhes bya ba'i tha tshig go//sbyin pa'i pha rol tu phyin pa la sogs pa'i chos rnams kyang / dus gsum mnyam pa nyid la mi dmigs par bstan nas/mnyam pa nyid kyang mnyam pa nyid la mi dmigs na zhes bya ba ci las dgongs she na/ mthar thug pa'i theg pa chen po'i sa la ni pha rol tu phyin pa la sogs pa chos thams cad rnam par smin pa'i bdag nyid du gyur nas/ stong pa nyid kyi ngo bo nyid kyi rjes su zhugs te/ de bas na de la dus gsum mnyam pa nyid ces bya ba yang med la/ dus gsum du gtogs pa'i sbyin pa'i pha rol tu phyin pa la sogs pa yang med do/ /de'i phyir/ mnyam pa nyid la 'das pa dang / ma 'ongs pa dang / da ltar byung ba'i sbyin pa'i pha rol tu phyin pa dmigs par ga la 'gyur zhes bya ba gsungs so//de bzhin du thams cad la yang sbyar bar bya'o/ /'gres ni dus gsum mnyam pa nyid bstsal ba'i 'gres dang / chos thams cad gnyis kyi sgo nas bstsal ba'i 'gres dang / phung po lnga'i chos rnams la dus gsum bstsal ba'i 'gres dang /stong pa nyid la dus gsum du gtogs pa'i phung po lnga'i chos rnams bstsal ba'i 'gres dang / dus gsum mnyam pa nyid la pha rol tu phyin pa drug bstsal ba'i 'gres dang / de dag la stong pa nyid bstsal ba'i 'gres dang / de dag nyid la dran pa nye bar gzhag pa la sogs pa ma 'dres pa'i mthar thug pa'i bar dag bstsal ba'i 'gres dang /so so skye bo bstsal ba'i 'gres dang / nyan thos dang / rang sangs rgyas dang / byang chub sems dpa' dang / de bzhin gshegs pa bstsal ba'i 'gres rnams su shes par bya'o/ / de bas na 'di ni byang chub sems dpa' sems dpa' chen po rnams kyi theg pa chen po zhes bya'o zhes bya ba ni chen po rnams kyi theg pa yin pas theg pa chen po zhes bya bar nges pa'i tshig gis bstan to/ /bcom ldan 'das gnas brtan rab 'byor 'di ni shes rab kyi pha rol tu phyin pa'i slad du bsgo ba mdzad pas 'di ni theg pa chen po bstan par sems so zhes bya ba ni gnas brtan gang pos 'og nas bshad pa'i skabs dbye ba'i phyir gsol pa'o//sngar gdams pa dang / rjes su bstan pa bshad pa rtsom pa las bcom ldan 'das kyis rab 'byor khyod byang chub sems dpa' sems dpa' chen po rnams kyi shes rab kyi pha rol tu phyin pa la brtsams te/ci nas kyang byang chub sems dpa' sems dpa' chen po rnams shes rab kyi pha rol tu phyin pa la nges par 'byung bar 'gyur bar spobs par gyis shig ces shes rab kyi pha rol tu phyin pa'i phyir bskos la/da ltar ni theg pa chen po bshad pa byas pa las zhus pa ni de'i sgo nas 'og nas bshad pa'i lam 'dod do/ /bcom ldan 'das bdag gis shes rab kyi pha rol tu phyin pa dang 'gal bar theg pa chen po bstan pa'am gcig tu ma gyur lags grang zhes bya ba ni shes rab kyi pha rol tu phyin pa dang /theg pa chen po gnyis tha mi dad pa'i phyir/ theg pa chen po bstan pas shes rab kyi pha rol tu phyin pa yang bstan pa yin par dgongs pa ste/ theg pa chen po bstan pas shes rab kyi pha rol tu phyin pa bstan par 'gyur ro//shes rab kyi pha rol tu phyin pa bstan pas theg pa chen po bstan par 'gyur ro zhes tha ma'i tshig bstan to/ /bcom ldan 'das 'di ltar yang byang chub sems dpa' ni sngon gyi mthar mi dmigs so zhes bya ba la sogs pa tshig bcus/ 'og nas bshad pa'i sa bon gyi tshig rnams bstan to//de la byang chub sems dpa' ni sngon gyi mthar mi dmigs so zhes bya ba la sogs pas ni byang chub sems dpa' sngon byung ba dang / phyis 'byung ba dang / da ltar yang yod do zhes dus gsum la byang chub sems dpa' mi dmigs par bstan to/ / gang gi phyir mtha' gsum po 'di dag la byang chub sems dpa' mi dmigs pa de'i phyir mtha' med pas byang chub sems dpa' la mtha' thug pa med par bstan nas/ de'i 'og tu bcom ldan 'das gzugs kun du mtha' yas pa'i slad du byang chub sems dpa' kun du mtha' yas par rig par bgyi'o zhes bya ba la sogs pa gsungs te/gzugs la sogs pa'i chos thams cad la mtha' gsum med pas kun du mtha' yas pa nyid de/ de bzhin du byang chub sems dpa' yang kun du mtha' yas par rig par bya'o/ / zhes bya ba'i tha tshig go/ /gal te gzugs la sogs pa kun du mtha' yas par byang chub sems dpa' kun du mtha' yas pa zhes bya na/ 'o na ni gzugs la sogs pa byang chub sems dpar 'gyur ro snyam pa la/ gzugs byang chub sems dpa' zhes bgyi ba de lta bu yang ma mchis/mi dmigs so zhes bya ba la sogs pa gsungs so/ /de ltar dus gsum la byang chub sems dpa' mi dmigs pas gzugs la sogs pa la yang byang chub sems dpa' ngo bor mi dmigs pa'i phyir byang chub sems dpa' dmigs su med do/ /de mi dmigs pas gdams pa dang /rjes su bstan pa gnyis kyang med do/ /bcom ldan 'das de ltar bdag gis byang chub sems dpa' thams cad kyi thams cad rnam pa thams cad kyi thams cad du ma dmigs na zhes bya ba la sogs pas sngar bstan pa'i don nyid bstan to/ /bcom ldan 'das 'di ltar byang chub sems dpa' zhes bgyi ba 'di ni ming tsam du bas so zhes bya bas ni de ltar dmigs su med pa'i phyir byang chub sems dpa' kun brtags pa tsam du zad par ston to//de ltar byang chub sems dpa' don dam par med par bstan nas dpe bstan pa'i phyir/bcom ldan 'das 'di lta ste dper na bdag bdag ces bgyi ba yang / bdag ni shin tu mngon par grub pa ma mchis pa'o zhes gsungs so/ /de ltar bstan nas de'i 'og tu gzugs la sogs pa mngon par 'grub pa'i mtshan nyid dang / mngon par 'grub pa med pa'i mtshan nyid de gnyi ga yang med par bstan te /de la mngon par 'grub pa'i mtshan nyid med pa ni bcom ldan 'das de ltar rang bzhin dngos po ma mchis pa'i chos rnams la gang mngon par 'grub pa'i gzugs de gang lags zhes bya ba la sogs pa gsungs pa ste/ gzugs la sogs pa ni sgyu ma lta bu yin pas dngos po med pa'i ngo bo nyid dang / ma skyes pa'i phyir mngon par 'grub pa'i mtshan nyid med do/ /de'i 'og tu mngon par 'grub pa med pa'i mtshan nyid med pa bstan pa'i phyir/ gang mngon par grub pa de ni gzugs ma lags zhes bya ba la sogs pa gsungs te/mngon par 'grub pa med pa'i mtshan nyid ni yongs su grub pa'i mtshan nyid yin gyi/ kun brtags pa'i gzugs la sogs pa ni ma yin no zhes bya ba'i tha tshig go/ /de ltar kun brtags pa'i byang chub sems dpa' med pa'i phyir gdams pa'i 'os ma yin par bstan nas/da ni don dam pa'i chos nyid kyi byang chub sems dpa'i dbang du byas te/ bcom ldan 'das mngon par ma grub pa las gud na byang chub kyi slad du spyod par 'gyur ba'i byang chub sems dpa' dmigs su ma mchis na/ mngon par ma grub pa mngon par grub pa'i shes rab kyi pha rol tu phyin pa la gdams shing rjes su bstan par bgyi'am zhes bya ba gsol te/don dam pa'i byang chub sems dpa' ni chos kyi dbyings kyi ngo bo nyid yin pas mngon par ma grub pa'i mtshan nyid yin te/ de yang spros pa thams cad las 'das pa'i phyir gdams pa dang rjes su bstan pa'i 'os ma yin no zhes bya ba'i tha tshig go//de ltar don dam pa'i byang chub sems dpa' bstan nas/ gal te de ltar bstan pa'i tshe byang chub sems dpa' sems dpa' chen po sems zhum par mi 'gyur na/ byang chub sems dpa' sems dpa' chen po de shes rab kyi pha rol tu phyin pa la spyod par rig par bgyi'o zhes bya bas ni don dam pa'i spyod pa bstan to/ /'di man chad ni sngar glengs pa nyi shu rtsa dgu bzhag pa'i nang nas/ rab 'byor khyod ni shes rab kyi pha rol tu phyin pa dang rjes su mthun par theg pa chen po ston to zhes bya ba nas bzung ste/gtan la dbab pa'i tshig bcu gnyis bkod pa gang yin pa de dag da bstan par bya'o/ /bstan nas kyang bshad par bya'o/ /tshe dang ldan pa shA ri'i bu sems can med pa'i phyir byang chub sems dpa' sngon gyi mtha' dang /phyi ma'i mtha' dang / dbus kyi mthar mi dmigs so zhes bya ba ni gang zag la bdag med pa'i phyir te/ byang chub sems dpa' 'das pa'i dus na byung ngo / /byang chub sems dpa' ma 'ongs pa na 'byung bar 'gyur ro/ /byang chub sems dpa' da ltar byung ba na yod do zhes bya ba dus gsum du nye bar 'gro ba med do zhes bya ba bstan to//de'i 'og tu gzugs med pa'i phyir zhes bya ba la sogs pas ni chos la bdag med pa bstan to/ /'di dag thams cad gnyis su med de gnyis su byar med do zhes bya ba ni thams cad yongs su grub pa'i mtshan nyid du thams cad gcig par dgongs pa'o//tshe dang ldan pa shA ri'i bu de bzhin nyid med pa'i phyir byang chub sems dpa' sngon gyi mthar mi dmigs so zhes bya ba la sogs pa ni dus gsum gyi de bzhin nyid dang / byang chub sems dpa'i de bzhin nyid kun brtags pa yin pa'i phyir med pa'o//tshe dang ldan pa shA ri'i bu ci'i phyir gzugs kun du mtha' yas pa'i phyir byang chub sems dpa' kun du mtha' yas par rig par bya zhes bya ba la sogs pas ni tshig gnyis pa bstan te/ kun du mtha' yas pa de dag gi sngon gyi mtha' la sogs pa med pa'i phyir ro//tshig gsum pa las/ tshe dang ldan pa shA ri'i bu gzugs ni gzugs kyis stong zhes bya ba ni yongs su grub pa chos nyid kyi gzugs ni kun brtags pa'i gzugs kyis stong ngo zhes bya ba'i tha tshig go/ / de bas na stong pa nyid la gzugs med ces bya ba gsungs te/ gzugs kyi stong pa nyid la kun brtags pa'i gzugs med ces bya ba'i tha tshig go/ /tshig bzhi pa la/ gzugs ni gzugs la mi dmigs/ gzugs ni tshor ba la mi dmigs zhes bya ba la sogs pas rang gi dngos po dang /gzhan gyi dngos po la btsal na chos thams cad mi dmigs par bstan pa ste/ 'dis ni thams cad kyi thams cad rnam pa thams cad du zhes bya ba bshad pa yin no/ /tshig lnga pa la 'di ltar byang chub sems dpa' zhes bya ba 'di ni glo bur du ming du btags pa zhes bya ba la/byang chub sems dpa' ni don dam pa stong pa nyid kyi rang bzhin yin na kun rdzob tu de la tha snyad du bya ba'i phyir/ byang chub sems dpa' zhes bya ba'i ming glo bur du btags pa ste/ glo bur zhes pa ni ngo bo nyid du yod pa ma yin no zhes bya ba'i tha tshig go/ / 'di ltar chos thams cad kyi ming ltar phyogs bcu gang nas kyang mi 'ong gang du yang mi 'gro zhes bya bas ni yod pa ma yin pa nyid ston to/ /yang dag par skye ba'i dus na yang gang nas kyang mi 'ong la/ 'gag pa'i dus na yang gang du yang mi 'gro'o/ /byang chub sems dpa'i ming 'ba' zhig de lta yin par ma zad kyi/chos thams cad kyi ming yang 'ong ba dang 'gro ba med pas med par bstan nas/ de bzhin du byang chub sems dpa'i ming yang gang nas kyang mi 'ong gang du yang mi 'gro'o zhes bya bas mjug bsdus te/ chos thams cad kyi ming dang /byang chub sems dpa' dang / byang chub sems dpa'i ming yang med do zhes bya ba'i tha tshig go/ /de ltar ming med par bstan nas/ 'di ltar gzugs zhes bya ba dang / tshor ba zhes bya ba dang / 'du shes zhes bya ba dang / 'du byed ces bya ba dang / rnam par shes pa zhes bya ba 'di dag ni ming du btags pa tsam du zad do zhes bya ba la sogs pas kun brtags pa'i chos thams cad ming du zad par bstan to//de'i 'og tu 'di ltar gzugs zhes bya ba'i ming du btags pa gang yin pa de ni gzugs ma yin no zhes bya ba la sogs pas ni chos nyid kyi gzugs la sogs pa dang /ming dag tha dad pa ma yin par bstan te/ gzugs zhes bya ba'i ming kun brtags pa gang yin pa de ni don dam pa'i gzugs zhes bya ba'i tha tshig go/ /de skad bstan nas de'i 'og tu 'di ltar ming ni ming gi ngo bo nyid kyis stong ste/ stong pa gang yin pa de ni ming ma yin no zhes bya bas ming dang / stong pa gnyis tha dad pa'i gtan tshigs bstan te kun brtags pa'i ming gang yin pa de ni ming gi ngo bo nyid kyis stong la/ de'i stong pa nyid gang yin pa de ni ming gi ngo bo nyid ma yin no zhes bya ba'i tha tshig go/ /de ltar ming yod pa ma yin pa dang /don dam pa'i chos rnams yod pa'i phyir chos de dag ming gi rang bzhin no/ /de bas na don dam pa'i byang chub sems dpa' yang ming gi ngo bo nyid ma yin no/ /de bas na byang chub sems dpa' zhes bya ba glo bur du btags pa yin par bstan pa'i phyir/de'i phyir 'di lta ste byang chub sems dpa' zhes bya ba 'di ni ming tsam mo zhes bya ba gsungs so/ /de bzhin du khams dang / skye mched dang / rten cing 'brel bar 'byung ba rnams la yang mthun par bsgre bar bya'o/ /pha rol tu phyin pa la sogs pa la ni tha dad de/sbyin pa'i pha rol tu phyin pa la yang ming med ming la yang sbyin pa'i pha rol tu phyin pa med do zhes bya ba ni sbyin pa'i pha rol tu phyin pa la sogs pa yang kun brtags pa nyid yin la/ ming yang kun brtags pa nyid do/ /de la sbyin pa'i pha rol tu phyin pa la ming gnas pa yang ma yin ming la yang sbyin pa'i pha rol tu phyin pa gnas pa ma yin te/gnyi ga yang sgyu ma dang mtshungs pas dngos po med pa'i phyir ro/ /de bas na 'di ltar ming gang yin pa dang / sbyin pa'i pha rol tu phyin pa gang yin pa de gnyi ga yang med cing / mi dmigs zhes bya ba gsungs te/de bzhin du thams cad la yang sbyar bar bya'o/ /tshig drug pa la/ tshe dang ldan pa sha ri'i bu 'di ltar bdag shin tu med pas mi dmigs na/ de mngon par grub par 'gyur ba lta ga la yod ces bya ba la sogs pas bdag la sogs pa gang zag rnams dang /gzugs la sogs pa chos rnams shin tu med la/ yod pa ma yin na mngon par 'grub pa dang / 'byung bar 'gyur ba lta ga la yod de/ de bas na chos thams cad mngon par 'grub pa shin tu med pa'i mtshan nyid du bstan to/ /mngon par 'grub pa med pa zhes bya ba ni stong pa nyid la bya'o//tshig bdun pa las byung ba'i ngo bo nyid med do zhes bya ba ni rang gi ngo bo la ngo bo nyid ces bya ste/ rang gi gang yin pa de nyid ngo bo nyid ces bya bar 'gyur gyi/ gzhan gyi ni ma yin no/ /gzugs la sogs pa'i chos thams cad ni brten nas 'byung gi/ma brten par ni ma yin no/ /gang zag gzhan las brten te 'byung ba de dag ni gzhan gyi nyid yin gyi/ rang gi ni ma yin no/ /de bas na/ chos thams cad ni dngos po med pa'i ngo bo nyid yin pas/ ngo bo nyid med pa zhes bya'o/ /de'i phyir gzugs la sogs pa kun brtags pa rnams nus par 'gyur ba'i stong pa nyid gang yin pa de/rten cing 'brel par 'byung ba ma yin zhing / gzhan la ltos pa ma yin pas de nyid chos thams cad kyi ngo bo nyid du rigs so/ /de bas na 'dus pa las byung ba'i ngo bo nyid med do zhes bshad de/'dus pa las byung ba ni ngo bo nyid ma yin no zhes bya ba'i tha tshig go/ /'dus nas 'byung bas na 'dus pa las 'byung ba zhes bya ste/ rgyu dang rkyen tshogs pa las 'byung zhes pa'i tha tshig go/ /de la 'gres rnam pa gsum du bstan te/ 'dus pa las byung ba'i phyir ngo bo nyid med do zhes bya ba ni gcig go//mi rtag pa la sogs pa yin pa'i phyir ngo bo nyid med do zhes bya ba yang gcig go/ /ther zug tu gnas pa ma yin zhing rnam par 'jig pa ma yin pa'i phyir ngo bo nyid med do zhes bya ba yang gcig go/ /chos thams cad ni mi rtag pa ste gang dang yang bral bas ma yin no zhes bya ba la/nyan thos kyi theg pa'i tshul gyis ni mi rtag pa zhes bya ba chos skyes pa gyes pa dang zhig pa la bya'o/ /'dir ni mi rtag pa'i mtshan nyid de lta ma yin par ston te/ gang dang yang bral bas ma yin no zhes bya ba ni theg pa chen po 'di la mi rtag pa'i don ni med pa'i don to zhes 'byung ba'i phyir mi rtag pa'i sgra ni med pa la bya'o//ji lta zhe na rtag pa las bzlog pa ni mi rtag pa zhes bya'o/ /rtag pa zhes bya ba ni gang rtag tu yod pa de la bya ste/ de bas na mi rtag pa zhes bya ba ni gang rtag tu med pa de la bya'o//gang rtag tu dus thams cad du med pa de la mi rtag ces bya'o/ /de'i phyir med pa'i don ni mi rtag pa'i don zhes bya'o/ /de ltar gzugs la sogs pa kun brtags pa'i chos thams cad mi rtag pa ste/ med pa'i phyir yod pa las gyur pa gang yang med ces bya ba'i tha tshig go//tshe dang ldan pa shA ri'i bu 'di ltar mi rtag pa gang yin pa de ni dngos po med pa dang zad pa ste zhes bya ba la mi rtag pa zhes bya ba'i sgra ni med pa dang / dngos po ma yin pa ste/ stong pa nyid la bya'o/ /zad ces bya ba'i sgra ni kun brtags pa'i chos rnams la bya'o//de ltar ni mi rtag pa gang yin pa de stong pa nyid dang / kun brtags pa'i chos zad pa dngos po med pa yin no zhes bya ba'i tha tshig go/ /de ltar chos thams cad ni mi rtag go zhes bya ba ni chos thams cad dngos po med pa'o zhes bya ba nyid du bstan pa yin no//de bas na chos thams cad kyi yongs su grub pa de bzhin nyid kyi mtshan nyid bstan pa yin te/ chos thams cad ni dngos po med pa'i ngo bo nyid do/ /de bzhin du chos thams cad ni sdug bsngal ba zhes bya ba ni gzugs la sogs pa kun brtags pa'i chos thams cad la dngos po'i rnam par mngon par zhen nas nye bar len na sdug bsngal gsum gyi rgyur 'gyur bas sdug bsngal zhes brjod do//gang gi tshe kun brtags pa'i rnam pa dngos po med pa'i bdag nyid du yongs su shes nas mngon par mi zhen cing spong ba de'i tshe/ sdug bsngal med pa'i rgyur gyur pas bde ba yin no//de bas na/ sdug bsngal ni kun brtags pa'i chos zhes bya'o/ /chos thams cad ni sdug bsngal ba zhes bya ba ni kun brtags pa rnams dngos po med pa'i mtshan nyid kho nar bstan pa yin te/ dngos po med pa'i bdag nyid yin pa'i phyir chos thams cad ni sdug bsngal ba'o//'dir yang sdug bsngal ni gang dang yang bral bas ma yin zhes bya bar sbyar te/ sdug bsngal ni bde ba'i rnam pa yod pa gang dang yang bral bas ni ma yin gyi dngos po med pa'i phyir sdug bsngal ba'o zhes bya ba'i tha tshig go/ /de bzhin du/ sdug bsngal ba gang yin pa de ni med pa dang zad pa zhes bya ste/kun brtags pa'i chos zad par gyur pa rnams dngos po ma yin pa dang / med pa la phyin ci log tu mngon par zhen par gyur pa la sdug bsngal zhes bya ba'o zhes bya ba'i tha tshig go/ /bdag med pa yang gang dang yang bral bas ma yin te/bdag med pa dang ngo bo nyid med pa'i phyir ro/ /bdag med pa gang yin pa de ni dngos po med pa dang / zad pa ste zhes bya ba ni zad pa'i chos rnams kyi dngos po med pa gang yin pa de nyid bdag med pa'o zhes bya ba'i tha tshig go/ /de bzhin du thams cad la yang sbyar bar bya'o//chos thams cad ni ther zug tu gnas pa ma yin 'jig pa ma yin no zhes bya ba 'di yang dngos po med pa'i ngo bo nyid kyi gtan tshigs yin no/ /gal te kun brtags pa rnams la ngo bo nyid 'ga' zhig yod na ni de ther zug tu gnas pa rtag pa'am/ 'jig pa mi rtag pa zhig tu 'gyur grang na/de ltar de ni sgyu ma'i gzugs bzhin du ngo bo nyid med pas/ rtag pa yang ma yin mi rtag pa yang ma yin te/ sgyu ma'i gzugs la rtag ces bya ba'am/ mi rtag ces bya bar brjod par mi nus pa de'i phyir chos thams cad ni ther zug tu gnas pa ma yin/'jig pa ma yin no/ /tshig brgyad pa la gzugs mngon par 'dus ma byas pa zhes bya ba ni mngon par 'du byed pa po gang yang med pa'i phyir gzugs la sogs pa mngon par 'dus ma byas pa'o/ /de bas na/ mngon par ma grub pa zhes bya'o zhes bya ba ni chos thams cad stong pa nyid kyi ngo bo nyid du bstan to//tshig dgu pa la/ gzugs ni rang bzhin gyis stong ste/ rang bzhin gyis stong pa gang yin pa de la skye ba med cing 'jig pa med de/ skye ba med cing 'jig pa med pa gang yin pa de la gzhan du 'gyur ba yang med do zhes bya ba la gzugs la sogs pa'i chos rnams kyi rang bzhin ni ngo bo nyid de stong pa nyid do// stong pa nyid ni chos thams cad kyi ngo bo nyid do/ /rang bzhin gyis stong pa gang yin pa de la/ skye ba med cing 'jig pa med do zhes bya ba ni stong pa'i bdag nyid can gyi chos yongs su grub pa rnams la skye ba dang /'gag pa gnyis med do/ /de gnyis med pas gzhan du 'gyur ba rga ba yang med do/ /de ltar ngo bo nyid kyis skye ba dang / 'gag pa dang / gzhan du 'gyur ba rnams med pa'i phyir skye ba dang / 'gag pa dang / gzhan du 'gyur ba dang ldan par kun brtags shing mngon par grub pa'i mtshan nyid can gyi gzugs la sogs pa gang yin pa de dag don dam par mngon par ma grub pas med pa'i phyir gang mngon par ma grub pa de gzugs ma yin no zhes bya ba nas/gang mngon par ma grub pa de rnam par shes pa'i bar du ma yin no zhes bya ba la sogs pa gsungs so//tshig bcu pa la/ mngon par ma grub pa gang yin pa de ni shes rab kyi pha rol tu phyin pa'o/ /shes rab kyi pha rol tu phyin pa gang yin pa de ni mngon par ma grub pa'o zhes bya ba la mngon par ma grub pa zhes bya ba'i sgra ni de bzhin nyid de/ stong pa nyid la bya'o/ /shes rab kyi pha rol tu phyin pa zhes bya ba'i sgra yang de bzhin nyid la bya'o/ /de bas na mngon par ma grub pa dang shes rab kyi pha rol tu phyin pa gnyis la tha dad pa med do/ /de'i phyir ci ma grub pa'i ngo bo nyid don dam pa'i byang chub sems dpa' mngon par ma grub pa'i ngo bo nyid kyis shes rab kyi pha rol tu phyin pa la ji ltar gdams shing rjes su gdams par bgyi zhes bya ba gsungs te/stong pa nyid la stong pa nyid ji ltar gdams par bya zhes bya ba'i tha tshig go/ /tshig bcu gcig pa la/ mngon par ma grub pa yang gzhan la byang chub sems dpa' yang gzhan zhes bya ba yin par yang dag par rjes su ma mthong ngo zhes bya ba ni byang chub sems dpa' stong pa nyid kyi ngo bo nyid yin par bstan pa'o//mngon par ma grub pa dang / gzugs la gnyis su med do zhes bya ba ni chos nyid kyi gzugs bzung nas bstan pa'o/ / tshig bcu gnyis pa la/ chos thams cad sgyu ma dang / smig rgyu la sogs pa dang mtshungs par so sor brtags na gang la bying ba'am skrag par mi 'gyur ro zhes bya ba'i tha tshig go// //bam po bcu bdun pa/ de ltar re zhig rnam par mi rtog pa yid la byed pa bstan nas/de'i 'og tu yid la byed pa de dag gi 'bras bu ston te/ de'i tshe 'di ni gzugs zhes bgyi bar gzugs la mi 'dzin cing mi len mi gnas te/ mngon par zhen par mi bgyid la/ 'dogs par mi bgyid do zhes bya ba ni 'dzin pa'i rigs pa bstan pa'i phyir tshig lnga smos te/ thog mar 'du shes kyis mi 'dzin to/ /de'i 'og tu yid kyis mi len to/ /de'i 'og tu shes rab kyis gnas par mi byed do/ /de'i 'og tu lta bas mngon par zhen par mi byed do/ /de'i 'og tu tshig gis gzhan dag la 'dogs par mi byed do/ /de ci'i slad du zhe na/ bcom ldan 'das 'di ltar gzugs ni ma skyes pa ste/gzugs kyi ma skyes pa gang lags pa de gzugs lags so/ /de ltar na gzugs dang ma skyes pa de gnyis su ma mchis te/ gnyis su bgyir ma mchis so/ /de ci'i slad du zhe na/ bcom ldan 'das 'di ltar ma skyes pa ni gcig pa ma lags mang po ma lags zhes bya ba la/gzugs ma skyes pa zhes bya ba ni chos nyid kyi gzugs ma skyes zhes bya ba'i tha tshig go/ /gzugs kyi ma skyes pa gang lags pa de gzugs ma lags zhes bya ba ni chos nyid kyi gzugs de'i ma skyes pa zhes bya ba de bzhin nyid gang yin pa de kun brtags pa'i gzugs kyi ngo bo nyid ma yin pa'o//de ltar na gzugs dang ma skyes pa de gnyis su ma mchis te/ gnyis su bgyir ma mchis pa lags so zhes bya bas ci bstan zhe na/ de la gzugs ma skyes pa zhes bya ba'i tshig gis ni yongs su grub pa ma skyes pa'i ngo bo nyid bstan pa yin no//gzugs kyi ma skyes pa gang lags pa de gzugs ma lags zhes bya ba 'dis ni mi skye ba la kun brtags pa'i mtshan nyid med par bstan pa yin te de ltar chos nyid kyi gzugs mi skye ba'i ngo bo nyid yin pa dang mi skye ba yang chos nyid kyi ngo bo nyid yin pa'i phyir gzugs zhes bya ba dang ma skyes pa zhes bya ba ni gcig pa nyid de tha dad pa ma yin no zhes bya ba'i tha tshig go//ma skyes pa ni gcig ma lags mang po ma lags zhes bya ba la ma skyes pa zhes bya ba ni de bzhin nyid de de la ni gcig gam gnyis she'am/gsum zhes bya ba'i grangs kyi bye brag yod pa ma yin te de bas na mi skye ba la bye brag med pa'i phyir yongs su grub pa'i tshe gzugs la sogs pa thams cad kyang rang bzhin gcig tu 'gyur ro zhes bya ba'i tha tshig go/ /de lta bas na/ gzugs kyi ma skyes pa gang lags pa de gzugs ma lags zhes bya ba ni chos nyid kyi gzugs kyi skye ba med pa'i chos nyid gang yin pa de kun brtags pa'i gzugs kyi ngo bo nyid ma yin no zhes bya ba'i tha tshig go//bcom ldan 'das 'di ltar de bzhin nyid ni ma skyes pa ste de bzhin nyid kyi ma skyes pa gang lags pa de de bzhin nyid ma lags te/de ltar na de bzhin nyid dang / ma skyes pa de gnyis su ma mchis te gnyis su bgyir ma mchis pa lags so zhes bya ba ni de bzhin nyid dri ma dang bcas pa dang dri ma med pa bzung nas sbyar bar bya'o/ /bcom ldan 'das 'di ltar gzugs ni mi rtag pa ste gzugs kyi 'grib pa gang lags pa de gzugs ma lags te/de ltar na gzugs dang 'grib pa de gnyis su ma mchis shing gnyis su dbyer ma mchis pa lags so/ /de ci'i slad du zhe na/ bcom ldan 'di ltar 'grib pa ni gcig ma lags mang po ma lags pa'i slad du ste /de'i slad du gzugs kyi 'grib pa gang lags pa de ni gzugs ma lags so zhes bya ba la med pa'i don ni mi rtag pa'i don to zhes 'byung ba'i phyir/ gzugs mi rtag pa zhes bya ba ni gzugs med ces bya ba'i tha tshig go/ / gzugs kyi 'grib pa gang lags pa de gzugs ma lags zhes bya ba ni 'di ltar gzugs med pa la kun brtags pa'i rnam pa ni 'gyur ba'i phyir 'grib pa zhes bya ste brtags pa'i gzugs kyi 'grib pa gang yin pa ni chos nyid kyi gzugs ma yin no/ /de ltar na gzugs dang 'grib pa de gnyis su ma mchis shing gnyis su bgyir ma mchis zhes bya ba ni gzugs dang 'grib pa gnyi ga yang brtags pa yin pas med pa'i phyir gcig kho na zhes bya ba'i tha tshig go//bcom ldan 'das 'di ltar 'grib pa ni gcig ma lags mang po ma lags zhes bya ba ni 'grib pa yod pa ma yin pa'i phyir/sgyu ma'i gzugs bzhin du don dam par grangs kyi bye brag med do/ /de bas na brtags pa'i rang bzhin thams cad ni dngos po med pa'i rang bzhin du gcig pa nyid do/ /de lta bas na gzugs kyi 'grib pa gang lags pa de gzugs ma lags zhes bya ba ni kun brtags pa'i gzugs kyi 'grib pa de chos nyid kyi gzugs kyi ngo bo nyid ma yin no zhes bya ba'i tha tshig go//bcom ldan 'das de bzhin nyid ni mi rtag pa ste/ de bzhin nyid kyi 'grib pa gang lags pa de de bzhin nyid ma lags zhes bya ba 'di la yang dri ma dang bcas pa dang /dri ma med pa'i bye brag gis sbyar bar bya'o/ /'di ltar sngar dri ma dang bcas par gyur pa las phyis dri ma med par 'gyur te de'i phyir mi rtag pa'o/ /de ltar mi rtag pa'i de bzhin nyid la gzugs kyi de bzhin nyid / tshor ba'i de bzhin nyid ces bya ba la sogs pa'i 'grib pa de yongs su grub pa'i de bzhin nyid ma yin no zhes sbyar bar bya'o//gang yang 'di skad du bcom ldan 'das gzugs zhes bgyi ba 'di ni gnyis su ma mchis pa'i grangs su bgyis pa'o zhes bya ba la gnyis su med pa zhes bya ba ni chos nyid de don dam pa'o/ /don dam pa de'i grangs su bya ba ni 'di lta ste gzugs dang tshor ba zhes bya ba la sogs pa byas pa'o//des ci bstan zhe na don dam pa gcig kho na ste gnyis su med pa la / chos nyid kyi gzugs/ chos nyid kyi tshor ba/ chos nyid kyi 'du shes/ chos nyid kyi 'du byed/ chos nyid kyi rnam par shes pa zhes bya ba la sogs pa'i tshig gis don dam pa gcig ste gnyis su med pa la rnam pa mang por phye nas bstan zhes bya ba'i tha tshig go//de nas tshe dang ldan pa shA ri'i bus tshe dang ldan pa rab 'byor la 'di skad ces smras so zhes pa 'di gang dang sbyar zhe na/ gang rnam par mi rtog pa yid la byed pa'i 'bras bu bstan ma thag pa la gnas brtan rab 'byor gyis 'gres bzhi bstan te/bcom ldan 'das gang gi tshe byang chub sems dpa' sems dpa' chen po shes rab kyi pha rol tu phyin pa la spyod cing chos de dag la 'di ltar nye bar rtog pa de'i tshe gzugs la mi 'dzin cing mi len mi gnas te mngon par zhen par mi bgyid ces bya ba ni gcig go//gzugs kyi ma skyes pa gang lags pa de gzugs ma lags zhes bya ba la sogs pa ni gnyis pa'o/ /gzugs kyi 'grib pa gang lags pa de gzugs ma lags zhes bya ba ni gsum pa'o//gzugs zhes bgyi ba 'di ni gnyis su ma mchis pa'i grangs su bgyis pa lags so zhes bya ba ni bzhi pa'o/ /'gres bzhi po 'di dag nye bar bzung nas de las rgya cher bstan pa nyan 'dod pa'i phyir gnas brtan shA ri'i bus dri ba dris so zhes bya ba de lta bur sbyar ro//de la 'gres dang po la/ byang chub sems dpa' sems dpa' chen po shes rab kyi pha rol tu phyin pa la spyod cing 'di ltar nye bar rtog ste zhes bya ba tshig gsum nye bar bzung nas dri ba gsum dris te/ byang chub sems dpa' ni gang / shes rab kyi pha rol tu phyin pa ni gang nye bar rtog pa ni gang zhes bya ba'o//de dag go rims bzhin du bshad par bya ste/ byang chub nyid sems dpa' ste de'i phyir byang chub sems dpa' zhes bya'o zhes bya ba la byang chub ces bya ba ni chos kyi sku la bya'o/ /sems can thams cad kyang chos kyi sku'i bdag nyid de de bas na byang chub sems dpa' yang byang chub kyi bdag nyid kho na'o//de lta bas na byang chub kyi ngo bo nyid ni sems dpa' yin pa'i phyir byang chub sems dpa' zhes bya ba'i tha tshig go/ /de ltar na sems can thams cad kyang byang chub sems dpar mi 'gyur ram zhe na/ spyir gleng ba la khyad par du brjod par 'dod pas khyad par du byang chub dang 'brel ba'i sems dpa' la byang chub sems dpa' zhes bya bas 'di la nyes pa med do/ /de las gzhan pa'i sems can rnam pa thams cad mkhyen pa nyid mi tshol zhing de'i don mi sgrub pa rnams ni byang chub dang 'brel ba gang yang med pa'i phyir 'di ni khyad par du byang chub dang 'brel ba'i sems dpa' la byang chub sems dpa' zhes bya'o//de bas na 'di'i spyod pa khyad par can yang ston te/ byang chub des kyang chos thams cad kyi rnam pa shes te chos de dag la mngon par zhen pa yang med do zhes bya ba ni kun rdzob kyi bden pas ni shes te don dam par ni mngon par zhen pa med do//rnam pa gang dag dang / rtags gang dag dang / mtshan ma gang dag gis zhes bya ba la rnam pa gang gis zhes bya ba ni bstan pa'o/ /rtags dang mtshan ma gnyis ni de'i bshad pa'o/ /ming dang /brda dang brtags pa la sogs pa ni rtags so/ /mtshan nyid dang / spyod pa ni mtshan ma'o/ /tshe dang ldan pa shA ri'i bus gang la shes rab kyi pha rol tu phyin pa zhes bya ba de ni ring du song ba ste zhes bya ba la/ chos thams cad kyi pha rol tu song ba'i shes rab ni chos de dag thams cad las ring du gyur pa'i phyir shes rab kyi pha rol tu phyin pa zhes bya'o//thabs dang rigs pas rtogs pa ni nye bar rtogs pa'o/ /de'i 'og tu 'gres gnyis pa ni/ tshe dang ldan pa rab 'byor ci'i phyir de skad du gzugs kyi ma skyes pa gang yin pa de ni gzugs ma yin zhes zer zhes bya ba la sogs pas ston to//tshe dang ldan pa sha ra dwa ti'i bu gzugs ni gzugs kyis stong zhes bya ba ni rnam par brtags pa'i gzugs de gzugs kyi dngos por yod pa ma yin no zhes bya ba'i tha tshig go/ /gzugs kyi stong pa nyid gang yin pa de gzugs ma yin te skye ba med do zhes bya ba ni chos nyid kyi gzugs kyi rang bzhin stong pa nyid gang yin pa de gzugs kyi ngo bo nyid ma yin zhing skye ba'i ngo bo nyid kyang ma yin no//tshe dang ldan pa sha ra dwa ti'i bu rnam grangs des na gzugs kyi ma skyes pa gang yin pa de gzugs ma yin no zhes bya ba ni 'di ltar kun brtags pa'i gzugs ni skye ba med pa ste skye ba'i ngo bo nyid kyang ma yin no//de bas na mi skye ba ni gzugs ma yin par de ltar grub po zhes bya ba'i tha tshig go/ /de'i 'og tu 'gres gsum pa'i skabs ni tshe dang ldan pa rab 'byor ci'i phyir na de skad du gzugs kyi 'grib pa gang yin pa de ni gzugs ma yin zhes zer zhes bya ba la sogs pas ston to//gzugs gang yin pa dang 'grib pa gang yin pa de gnyi ga yang ldan pa yang ma yin mi ldan pa yang ma yin zhes bya ba ni sngar bshad pa'i tshul gyis gzugs kyang brtags pa/ 'grib pa yang brtags pa ste/de bas na gnyi ga yang mtshan nyid med pa'o / /'gres bzhi pa la/ ma skyes pa yang gzhan ma yin gzugs kyang gzhan ma yin te/ ma skyes pa nyid kyang gzugs so / /gzugs nyid kyang ma skyes pa zhes bya ba ni sngar bshad pa'i tshul gyis gzugs zhes bya ba dang ma skyes pa zhes bya ba ni chos nyid la bya ste/de'i phyir gnyis su med do/ /gzugs kyi ma skyes pa mthong bar 'gyur zhes bya ba ni de bzhin nyid mngon sum du byed ces bya ba'i tha tshig go/ /gzugs ma skyes pa zhes bya ba ni/ snga ma bzhin du chos nyid kyi gzugs dang de bzhin nyid gcig pa'i phyir de skad bstan to//'di man chad ni gnas brtan gnyis kyis dris pa dang lan 'debs pa zhib mor 'byung ste/ tshe dang ldan pa rab 'byor gal te gzugs kyang skye ba med la sangs rgyas kyi chos rnams kyi bar du yang skye ba med pa yin na ni nyan thos kyis kyang nyan thos kyi byang chub thob zin par mi 'gyur ram zhes bya ba la sogs pas ci bstan zhe na/gal te gzugs la sogs pa dang / de bzhin nyid gcig pa yin na/ de lta na gzugs la sogs pa rtogs pas de bzhin nyid rtogs par 'gyur ro/ /sems can thams cad kyang don dam pa mthong bar 'gyur ro//de ltar gyur na sems can thams cad kyis bsgrim mi dgos pa nyid du so so'i byang chub ji lta ba bzhin du thob par 'gyur ro/ /'o na ni byang chub rnam pa lnga po dag kyang tha dad pa med par 'gyur ro/ /rgyun du zhugs pa dang / lan cig phyir 'ong ba dang /phyir mi 'ong ba dang / dgra bcom pa dang / rang byang chub dang / rnam pa thams cad mkhyen pa nyid rnams kyang 'dres par 'gyur ro/ /de ltar gyur na rgyun du zhugs pa la sogs pa yang sangs rgyas yin par 'gyur te/ nyon mongs pa lhag ma spong bar 'bad pa don med par 'gyur ro//byang chub sems dpa' rnams kyang byang chub thob zin pas dka' ba spyad pa la sogs pa don med par 'gyur ro/ /rnam pa thams cad mkhyen pa nyid mngon par rdzogs par byang chub pa dang / chos kyi 'khor lo bskor ba yang don med pa nyid du 'gyur ro//tshe dang ldan pa sha ra dwa ti'i bu bdag ni chos ma skyes pa la 'thob pa dang / mngon par rdzogs pa yod par mi 'dod do/ /bdag ni ma skyes pa la rgyun du zhugs pa yod par mi 'dod/ rgyun du zhugs pa'i 'bras bu yod par mi 'dod do zhes bya bas ci bstan zhe na/ chos ma skyes pa ni sus kyang thob pa'am/ mngon par rtogs par mi nus/ ma skyes pa la gang yang rgyun du zhugs par mi 'gyur gyi/ kun brtags pa'i sgrib pa tsam bstsal ba ni gzung ba dang 'dzin pa'i rnam par rtog pa med pa'i phyir thob pa dang mngon par rtogs par 'dod do/ /de bas na de bzhin nyid kyis de bzhin nyid rtogs pa ma yin no zhes bstan pa yin te/de bas na gzugs la sogs pa rtogs pas de bzhin nyid rtogs par 'gyur ro zhes bya ba sngar smras pa'i skyon de skyon du mi 'gyur te nyon mongs pa dang / shes bya'i sgrib pa rnams yod pa'i phyir ro/ / tshe dang ldan pa sha ra dwa ti'i bu bdag ni byang chub sems dpa' dka' ba spyad pa spyod par mi 'dod ces bya ba ni byang chub sems dpa' rnams la don dam par de lta bu'i rnam par rtog pa med pa'i phyir de skad bstan to/ /byang chub sems dpa' ni sa brgyad pa la mi skye ba'i chos la bzod pa thob pas gang gi tshe chos thams cad kyi thams cad du mi dmigs pa de'i tshe skye ba la sogs pa dang bral bar dka' ba spyad pa rtsom ste/de'i tshe byang chub sems dpa' mi dmigs pa yid la byed pa dang ldan pa la mgo bcad pa la sogs pa la dka' ba'i 'du shes sam/ sdug bsngal gyi 'du shes gang yang mi 'byung ngo zhes byang chub sems dpa' sems dpa' chen po thams cad rnam pa thams cad du chos gang yang mi len mi dmigs so zhes bya ba mjug gi tshig gis bstan to//tshe dang ldan pa sha ra dwa ti'i bu bdag ni ma skyes pa la de bzhin gshegs pa yod par mi 'dod do zhes bya ba la sogs pa ni ma skyes pa chos kyi sku la de bzhin gshegs pa gang gis ma skyes pa rtogs par 'gyur ba'i de bzhin gshegs pa gnyis pa yod par mi 'dod pa'o//de bas na ma skyes pa nyid de bzhin gshegs pa ma skyes pa nyid yang dag par rdzogs pa'i byang chub yin no zhes ston to//ma skyes pa'i chos kyis kyang ma skyes pa thob par mi 'dod do zhes bya ba ni de bzhin nyid kyis de bzhin nyid la rab tu rtogs par byed par mi 'dod do zhes bya ba'i tha tshig go/ /de skad smras pa dang gnas brtan shA ri'i bus/ gal te ma skyes pas ma skyes pa'i thob pa mi thob na ci ma skyes pas skyes pa'i thob pa 'thob bam/'on te skyes pas ma skyes pa'i thob pa 'thob ces rnam par rtog pa gnyis dris te/ tshe dang ldan pa rab 'byor ci chos ma skyes pas skyes pa'i thob pa 'thob bam 'on te chos skyes pas ma skyes pa'i thob pa 'thob ces bya ba ni gal te de bzhin nyid kyi bdag nyid 'ga' zhig gis rgyun du zhugs pa'i 'bras bu la sogs pa kun brtags pa rnams thob par 'gyur na/de lta na ni ma skyes pa'i chos kyis/ skyes pa'i thob pa thob par 'gyur ro/ /gal te kun brtags pa'i gang zag gis rgyun du zhugs pa'i 'bras bu la sogs pa de bzhin nyid kyi bdag nyid can rnams thob par 'gyur na de ltar gyur na ni skyes pa'i chos kyis ma skyes pa'i thob pa thob par 'gyur te/de gnyi ga yang ma bzod nas/ tshe dang ldan pa sha ra dwa ti'i bu bdag ni ma skyes pa'i chos kyis skyes pa thob par mi 'dod do zhes bya ba la sogs pa gsungs so//thob pa yang yod mngon par rtogs pa yang yod de gnyis kyi tshul gyis ni ma yin no zhes bya ba ni ma skyes pas skyes pa 'thob pa dang / skyes pas ma skyes pa 'thob pa 'di gnyis ni med kyi/'jig rten gyi tha snyad du ni nyon mongs pa dang / shes bya'i sgrib pa spong ba tsam la thob pa dang mngon par rtogs pa gdags pa dang / rgyun du zhugs pa dang / de bzhin gshegs pa la sogs pa gang zag tu gdags par bstan to/ /tshe dang ldan pa rab 'byor ji ltar 'jig rten gyi tha snyad du thob pa dang mngon par rtogs pa gzugs med pa/bstan du med pa thogs pa med pa ste/ 'di ltar mtshan nyid med par mtshan nyid gcig pa de bzhin du ma skyes pa yang de lta yin nam zhes bya ba ni/ ci thob pa dang mngon par rtogs pa bzhin du ma skyes pa yang don dam par yang med pa yin nam zhes 'dri'o//tshe dang ldan pa sha ra dwa ti'i bu de de bzhin te zhes bya ba ni don dam pa ni gzung du med cing brjod du med pa'i phyir ma skyes pa yang ma skyes pa'i rnam pa med do zhes bstan pa'o/ /da ni skye ba yang bstsal ba'i phyir/ tshe dang ldan pa sha ra dwa ti'i bu rnam grangs des na skye ba yang mi skye mi skye ba yang mi skye'o zhes bya ba gsungs te/ma skyes pa ni yongs su grub pa yin pas mi skye'o/ /skyes pa ni kun brtags pa yin te med pa'i phyir mi skye'o/ /de bas na rnam grangs 'di la skye ba yang med do zhes bya ba'i tha tshig go/ /tshe dang ldan pa rab 'byor ma skyes pa'i chos ma skyes pa'i chos zhes bya bar brjod par spobs sam/tshe dang ldan pa rab 'byor chos ma skyes pa rnams kyi skye ba med pa yang brjod par spobs sam zhes bya ba la ma skyes pa dang skye ba med pa zhes bya ba'i sgra gnyis ka yang de bzhin nyid kyi rnam grangs su grags te/gang gi tshe de gnyis chos kyi sgras bye brag tu phye nas ma skyes pa'i chos dang / skye ba med pa'i chos zhes brjod pa de'i tshe/ kun brtags pa'i chos kyi tshig tu 'gyur ro/ /ci de skad brjod du rung ngam zhes dris pa de'i tshe/ gnas brtan rab 'byor gyis ma skyes pa dang / skye ba med pa'i sgra gnyis kun brtags pa'i tshig tu yang grags pa yin nam snyam du bsams nas/ tshe dang ldan pa sha ra dwa ti'i bu ma skyes pa'i chos ma skyes pa'i chos zhes bya bar brjod pa'i spobs pa yang bdag la med do/ /chos ma skyes pa rnams kyi skye ba med pa brjod pa'i spobs pa yang bdag la med do gsungs so//de'i 'og tu ma skyes pa dang / skye ba med pa gnyi ga yang kun brtags pa nyid du ston te/ tshe dang ldan pa sha ra dwa ti'i bu de ci'i phyir zhe na/ 'di ltar ma skyes pa'i chos gang yin pa dang / skye ba med pa gang yin pa dang / spobs pa gang yin pa dang /brjod pa gang yin pa dang / mi skye ba gang yin pa'i chos de dag thams cad kyang ldan pa yang ma yin mi ldan pa yang ma yin/ gzugs med pa/ bstan du med pa/ thogs pa med pa ste/ 'di ltar mtshan nyid med par mtshan nyid gcig pa dag go zhes bya ba ni ma skyes pa'i chos dang /skye ba med par brjod par spobs so zhes bya ba'i tshig 'di la ma skyes pa dang / skye ba med pa dang / mi skye ba dang / chos dang spobs pa dang / brjod pa zhes bya ba'i chos 'di drug bstan to/ /de dag thams cad kyang kun brtags pa yin pas med pa'o zhes bya ba'i tha tshig go//chos yod pa ni sems las byung ba'am/ sems dang mi ldan pa'am/ gzugs can nam/ 'dus ma byas pa zhig yin grang na/ de la ldan pa yang ma yin zhes bya bas ni sems las byung ba'i dngos por yod pa ma yin par ston to/ / mi ldan pa yang ma yin zhes bya bas ni sems dang mi ldan pa'i dngos por yod pa ma yin par ston to/ /gzugs can ma yin zhes bya bas ni rnam par rig byed ma yin pa la sogs pa gzugs kyi chos bcu gcig po ltar gzugs can gyi dngos por yod pa ma yin par ston to/ /bstan du med pa zhes bya ba ni kha dog bzhin du bstan du yod pa'i dngos por yod pa ma yin par ston to//thogs pa med pa zhes bya bas ni dbang po'i gzugs kyi mtshan nyid du yod pa ma yin par ston to/ /'di ltar mtshan nyid med par mtshan nyid gcig pa dag go zhes bya bas ni 'dus ma byas pa'i mtshan nyid du yod pa ma yin par ston to// 'dus ma byas pa'i mtshan nyid ces bya ba'i chos ni gang yang med do/ /de med pas yod pa dang med pa'i mtshan nyid las rnam par grol ba'i phyir mtshan nyid med pa ste mtshan nyid med pa'i mtshan nyid du mtshan nyid gcig pa'o zhes bya ba'i tha tshig go//de nas yang gnas brtan shA ri'i bus ci brjod pa la sogs pa yang mi skye ba'i ngo bo nyid yin nam zhes 'dri ste/ tshe dang ldan pa rab 'byor ci brjod pa yang skye ba med/ spobs pa yang skye ba med/ chos kyang skye ba med pa gang dag las brtsams te brjod par spobs pa'i chos de dag kyang skye ba med pa yin nam zhes bya ba ni ci brjod pa dang /spobs pa dang / chos dang brjod par bya ba'i chos thams cad kyang skye ba med pa'i ngo bo nyid yin nam zhes bya ba'i tha tshig go/ /de nas gnas brtan rab 'byor gyis de de bzhin no zhes bya ba thams cad kyang skye ba med pa'i ngo bo nyid yin par khas len te/tshe dang ldan pa sha ra dwa ti'i bu de de bzhin te brjod pa ni skye ba med pa'o/ /spobs pa ni skye ba med pa'o/ /chos ni skye ba med pa'o/ /gang dag las brtsams te brjod par spobs pa'i chos de dag kyang skye ba med pa'o zhes de skad brjod nas /gzugs skye ba med do zhes bya ba la sogs pas thams cad kyang skye ba med pa'i ngo bo nyid du ston cing skye ba med pa'i 'gres sngar bstan pa nyid kyang ston to/ /bstan pa 'di la yang sngar smos pa'i skyon 'gro ba lnga po dag kyang tha mi dad par 'gyur ro zhes bya ba la sogs pa de dran par byas nas/tshe dang ldan pa sha ra dwa ti'i bu de ltar 'gro ba lnga po rnams kyang tha mi dad par 'gyur ro zhes zer ba ni zhes bya ba la sogs pas de la lan 'debs te/ tshe dang ldan pa sha ra dwa ti'i bu ji ltar 'thob pa dang / mngon par rtogs pa 'jig rten gyi tha snyad du yod pa de bzhin du zhes bya ba ni ji ltar don dam par thob pa dang mngon par rtogs pa gnyis med pa dang /rgyun du zhugs pa la sogs pa yang med pa de bzhin du theg pa gsum po dag kyang de bzhin nyid tsam du zad pa'i phyir don dam par 'bras bu la bye brag med do zhes bya ba'i tha tshig go//'o na sngon bskal pa grangs med pa gsum du tshogs yongs su rdzogs par byed pa'i tshe las kyi bye brag kyang yod la de dang rjes su mthun pa'i rnam par smin pa'i bye brag dang / de bzhin du 'bras bu'i tshe yang nyon mongs pa dang shes bya'i sgrib pa rnams skyes pa dang ma skyes pa las gyur pa'i bye brag dang /de dag nyid kyi dbang gis kun nas nyon mongs pa dang / rnam par byang ba las gyur pa'i bye brag kyang yod do zhes log par zhugs pa rnams kyi phyir tshe dang ldan pa sha ra dwa ti'i bu 'di ltar don dam par ni las kyang med/ las kyi rnam par smin pa yang med/skye ba yang med/ 'gag pa yang med/ kun nas nyon mongs pa yang med/ rnam par byang ba yang med do zhes gsungs te/ 'di dag thams cad ni kun brtags pa ste yod pa ma yin pa'o/ /de bas na de dag gi dbang gis de bzhin nyid tha dad du mi 'gyur ro zhes bya ba'i tha tshig go//de ltar ma skyes pa bstsal nas/ yang skye ba'i chos bstsal ba'i phyir dri ba brtsams te/ tshe dang ldan pa rab 'byor ci ma skyes pa'i chos skye bar 'gyur ram/ 'on te skyes pa'i chos skye bar 'gyur zhes bya ba smos so/ /de la 'di 'dri ste/ ci gang gi tshe sa bon las myu gu la sogs pa skye ba'i phyir/myu gu skye ba de ma byung ma skyes pa zhig skye'am/ 'on te byung zhing skyes zin pa zhig skye zhes bya ba'o/ /de skad ces smras pa dang / gal te myu gu ma skyes pa skye na ni ma skyes pa thams cad kyang nges pa med par skye bar 'gyur ro//gal te skyes zin pa zhig skye na ni yang dang yang du bzlas te/ skye bar 'gyur ba la sogs pa rigs pa dang 'gal bar 'gyur ba'i phyir gnyi ga ltar yang smrar mi rung nas/ tshe dang ldan pa sha ra dwa ti'i bu bdag ni ma skyes pa'i chos kyang skye bar mi 'dod / skyes pa'i chos kyang skye bar mi 'dod do zhes gnas brtan gyis smras te/ma skyes pa ni ma skyes pa nyid kyi phyir med de med pa nyid kyi phyir mi skye'o/ /skyes pa yang skyes zin pa nyid kyi phyir yang mi skye ste/ de bas na don dam par skye ba'i chos med pa nyid do zhes bya ba'i tha tshig go/ /de skad smras pa dang 'ga' zhig ma skyes pa'i chos ri bong gi rwa la skye ba med dam skyes pa 'das pa rnams la skye ba med dam zhes smrar 'ong zhes de'i phyir/tshe dang ldan pa rab 'byor khyod ma skyes pa'i chos skye bar mi 'dod pa gang yin zhes bya ba dang / skyes pa skye bar mi 'dod pa gang yin zhes bya ba'i 'gres gnyis dris so//yang skye ba bstsal ba'i phyir/ tshe dang ldan pa rab 'byor ci ma skyes pa'i chos skye bar 'gyur ram/ 'on te skyes pa'i chos skye bar 'gyur zhes de skad smras pa dang / mi skye ba ni 'dus ma byas pa'i phyir mi skye la/ skye ba yang kun brtags pa ste/ yod pa ma yin pa'i phyir mi skye bas gnas brtan gyis/tshe dang ldan pa sha ra dwi ti bu skye ba yang mi skye/ mi skye ba yang mi skye'o zhes bya ba gsungs pa de'i gtan tshigs su tshe dang ldan pa sha ra dwi ti'i bu 'di ltar skye ba gang yin pa dang mi skye ba gang yin pa de gnyis ka yang ldan pa yang ma yin mi ldan pa yang ma yin te/mi skye ba nyid do zhes bya ba yang gsungs te/ de lta yin yang gnyi ga yang don dam par de bzhin nyid tsam du zad do zhes bya bar dgongs pa'o/ /de skad bstan nas skye ba med pa'i 'gres sngar bstan pa nyid kyang bstan te/ de ltar na gzugs skye ba med do zhes bya ba nas rnam pa thams cad mkhyen pa nyid kyi bar du skye ba med do zhes bstan nas/tshe dang ldan pa sha ra dwa ti'i bu rnam grangs 'dis na brjod pa ni skye ba med pa ste/ spobs pa yang skye ba med la/ chos kyang skye ba med de gang dag las brtsams te brjod par spobs pa'i chos de dag kyang skye ba med pa'o zhes mjug bsdus so//tshe dang ldan pa sha ra dwa ti'i bu gzugs rang bzhin gyis stong pa ste zhes bya ba ni chos nyid kyi gzugs bstan pa ste/ de bas na de ni nang na yang mi gnas phyi rol na yang mi gnas/ gnyis ka med par yang mi dmigs so zhes bya ba gsungs so//gal te de 'ga' zhig la gnas na nang ngam phyi rol lam/ gnyi ga las gzhan 'ga' zhig la gnas grang na/ 'di ltar de gsum char la yang don dam par med de/ de bas na mi gnas pa'o/ /de skad bstan nas gnas pa dang mi gnas pa de nyid kyi mtshan nyid legs par rgya bskyed de byang chub kyi lam yongs su spyad pa'i thabs ston te/'jig rten pa yang yod 'jig rten las 'das pa yang yod ces bya ba la sogs pa'o/ /'jig rten las mi g.yo mi 'phags mi 'da' zhes pa bya de kun brtags pa las zhes bya ba'i tha tshig ste/ bzod pa chung ngu dang 'bring dang chen po'i dbang gis rnam pa gsum mo/ /lhag ma ni don gsal lo/ /gang dag gis 'jig rten du 'gyur ba zhes bya ba la sogs pa'i tshig bdun ni de la kha cig tu ni 'jig rten gyi sgra phung po lnga la bya/ kha cig tu ni sems can gyi 'jig rten/ kha cig tu ni snod kyi 'jig rten/ kha cig tu ni so so'i skye bo'i 'jig rten/ kha cig tu ni 'khor ba/ kha cig tu ni kun brtags pa'i chos rnams/ kha cig tu ni 'dod pa'i yon tan lnga rnams la bya ste/ gang dag gis 'jig rten du 'gyur ba zhes bya ba ni phung po'i 'jig rten no//gang dag 'jig rten 'grub par byed pa zhes bya ba ni snod kyi 'jig rten no/ /gang dag 'jig rten dang mnyam pa zhes bya ba ni kun brtags pa'i chos rnams dang mnyam pa'o/ /gang dag gis 'jig rten gyi phyir sbyin pa zhes bya ba ni 'dod pa'i yon tan lnga 'jig rten gyi phyir sbyin pa'o//gang dag gis 'jig rten las 'byung bar mi 'gyur ba zhes bya ba ni 'khor ba'i 'jig rten las so/ /gang dag 'jig rten 'byung bar 'gyur ba zhes bya ba ni so so'i skye bo'i 'jig rten te/ 'byung ba ni 'phel ba'i phyir ro/ /gang dag 'jig rten du 'byung bar 'gyur ba zhes bya ba ni snod kyi 'jig rten du sems can gyi 'jig rten 'byung ngo //gang dag gis 'jig rten sgrol ba zhes bya ba ni sems can gyi 'jig rten no/ /gang dag 'jig rten sel bar byed pa zhes bya ba ni 'dod pa'i yon tan lnga rnams so/ /'jig rten gyis gang dag gis sgrol bar byed pa zhes bya ba ni 'phags pa'i gang zag gi 'jig rten gyis so//gang dag 'jig rten ma yin par 'gyur zhes bya ba ni yongs su grub par 'gyur ba'o/ /gang dag gis 'jig rten las 'byung bar 'gyur ba zhes bya ba ni 'khor ba'i 'jig rten las 'byung ba'o//gang dag 'jig rten las sgrol ba zhes bya ba ni snod kyi 'jig rten las so/ /gang dag 'jig rten du sgrol bar byed pa zhes bya ba ni chos kyi 'jig rten rnams su'o/ /tshe dang ldan pa sha ra dwa ti'i bu legs so legs so/ /tshe dang ldan pa sha ra dwa ti'i bus yang dag pa'i tshig brjod pas don nyid yongs su bzung ba ni tshe dang ldan pa sha ra dwa ti'i bu dmigs su phebs so zhes bya ba ni shA ri'i bu'i tshig la tshig rnam pa gsum gyis rjes su yi rang ba'i tshig ste/legs shing rigs pas dmigs su phebs par don yongs su bzung ngo zhes ston to/ /sems can med pa'i phyir yid la byed pa med par rig par bya'o//sems can stong pa nyid kyi phyir yid la byed pa stong pa nyid du rig par bya'o/ /sems can dben pa nyid kyi phyir yid la byed pa dben pa nyid du rig par bya'o/ /sems can ngo bo nyid med pa'i phyir yid la byed pa ngo bo nyid med par rig par bya'o//sems can mngon par rdzogs par 'tshang rgya ba med pa'i phyir yid la byed pa mngon par rdzogs par 'tshang rgya ba med par rig par bya'o zhes bya ba yid la byed pa de lnga de las gzhan pa rnams la med de de bas na de dag byang chub sems dpa' ma yin no zhes bstan pa yin no//de bas na byang chub sems dpa' sems dpa' chen po ni gnas pa 'di dang / yid la byed pa 'di dang ma bral lo zhes bdag smra'o zhes bstan to/ /de ltar re zhig cho 'phrul bstan pa dang bcas/ 'bras bu bstan pa dang bcas par shes rab kyi pha rol tu phyin pa 'bring du bshad pa yongs su rdzogs par byas pa yin no//de bzhin gshegs pa shes rab kyi pha rol tu phyin pa 'dis mdo dang 'bring dang rgyas pa rnam pa gsum du bstan to zhes bshad de/ de la 'dul ba'i dbang gis mdo dang 'bring gi tshul gnyis ni bstan zin to/ / 'di man chad ni 'dul ba'i 'gro ba'i yongs su ma smin pa rnams kyi the tshom skyes shing skyes pa rnams bsal bas yongs su smin par byas nas yongs su smin pa rnams de kho na nyid kyi don rtogs par byed pa kun rdzob dang don dam pa'i tshul rnam par dbye bas rgyas pa rnam pa gnyis su bstan te/de nas stong gsum gyi stong chen po'i 'jig rten gyi khams 'di na rgyal po chen po gang dag 'khod pa de dag thams cad dang /lha'i bu bye ba khrag khrig 'bum phrag du ma lhan cig tu 'khor de nyid du 'dus par gyur to zhes bya ba la sogs pas ci'i phyir lha rnams 'dus par yang bstan la/de bzhin gshegs pa'i mthu brjod pa'i skabs ni gang yin zhe na/ shes rab kyi pha rol tu phyin pa bstan pa 'di sngon ma byung ba'i phyir sngon ma byung ba'i chos bstan pa'i ltas su 'khor 'dus pa yang mdor bstan dgos so/ /'od zer 'byin cing 'od bkod pa yang ston zhes 'byung bas na chos bshad pa'i ltas bstan pa'i phyir 'od bstan pa mdzad par rig par bya'o//ci'i phyir lha'i dbang po de bzhin gshegs pa la gsol ba mi 'debs par gnas brtan rab 'byor la gsol ba 'debs she na/ de'i tshe 'khor rnams nyan thos kyis bshad par 'dul ba'i phyir de ltar de la gsol ba btab pa'i sgo nas de bzhin gshegs pa la yang gsol ba btab par 'gyur ro//byang chub sems dpa' sems dpa' chen pos ji ltar shes rab kyi pha rol tu phyin pa la gnas par bya/ byang chub sems dpa' sems dpa' chen po'i shes rab kyi pha rol tu phyin pa ni gang yin/byang chub sems dpa' sems dpa' chen po shes rab kyi pha rol tu phyin pa la ni ji ltar bslab par bya zhes dris pa 'di gsum gyi lan ni 'og nas ston to/ /de la sngar ni rnam pa thams cad mkhyen pa nyid nas brtsams te/rnam par mi rtog pa'i shes rab kyi pha rol tu phyin pa bzung nas 'bring du bshad pa bstan to/ /'dir ni lam gyi rnam pa shes pa nyid nas brtsams te/ byang chub sems dpa' rnams kyi sgrub pa rnam par rtog pa dang bcas pa dang rnam par mi rtog pa'i pha rol tu phyin pa bstan to//gang dag skyon med pa la zhugs pa de dag ni bla na med pa yang dag par rdzogs pa'i byang chub tu sems bskyed pa'i mthu med de zhes bya ba ni gang dag log pa nyid du nges pa de dag ni re zhig skal ba med pa zhes bya'o/ /'on kyang gal te de dag bla na med pa yang dag par rdzogs pa'i byang chub tu sems bskyed pa de dag la yang rjes su yi rang ngo zhes bya ba ni bshad pa 'di de dag gi rna bar thos na yang don med par mi 'gyur bas bskal pa bye ba khrag khrig brgya stong dpag tu med grangs med pa'i pha rol du/de dag sangs rgyas nyid la 'jug par 'gyur ro zhes lung las 'byung ba'i phyir ro//kau shi ka de la byang chub sems dpa' sems dpa' chen po'i shes rab kyi pha rol tu phyin pa gang zhe na zhes bya ba la sogs pa ni dris pa rnam pa gsum las bar ma bstan pa yin yang dang por bstan pa ni de ltar bstan na go sla ba'i phyir ro//shes rab kyi pha rol tu phyin pa 'di ni nyan thos dang rang sangs rgyas kyi sa la thams cad mkhyen pa nyid kyi phyogs dang / byang chub sems dpa'i sa la lam gyi rnam pa shes pa'i phyogs yin mod kyi gnyi ga yang 'dir byang chub sems dpa' rnam pa thams cad mkhyen pa nyid thob par 'dod pa la lam gyi rnam pa shes pa bstan par bya'o//de la thams cad mkhyen pa nyid kyi phyogs ni/ kau shi ka 'di la byang chub sems dpa' sems dpa' chen po rnam pa thams cad mkhyen pa nyid dang ldan pa'i sems bskyed pas gzugs mi rtag par yid la bya'o//de bzhin du sdug bsngal ba dang / bdag med pa dang / stong pa dang / nad dang / 'bras dang zhes bya ba la sogs pa yid la byed pa bco lnga bstan pa dang / rten cing 'brel par 'byung ba 'gog pa la dmigs pa'i yid la byed pa bdun bstan pas bshad par rig par bya'o//lam gyi rnam pa shes pa nyid kyi phyogs ni pha rol tu phyin pa la sogs pa nas ma 'dres pa'i mtha'i bar du mi dmigs par yid la byed pa rnams dang / chos dang chos rnams sbyor ba zhes bya ba la sogs pas bstan to/ /de la nyan thos dang rang sangs rgyas kyi sa'i tshul gyis mi rtag pa la sogs pa'i tshig rnams kyi don bshad par bya ste/ma byung ba las 'byung ba dang byung nas kyang med par 'gyur ba'i phyir/ mi rtag par yid la byed do/ /bdag nyid sdug bsngal gsum dang ldan pa dang / gzhan dag gi sdug bsngal gyi rgyur 'gyur ba'i phyir /sdug bsngal ba'o/ /dbang sgyur ba med pa la sogs pas bdag rang la bdag gi mtshan nyid dang mi ldan pa'i phyir bdag med pa'o/ /chu shing gi sdong bo ltar nang gi snying po med pas nang bdag gis stong pa'i phyir stong pa'o/ /rkyen du mas gso dgos pa dang / lus dang yid kyi sdug bsngal gyi rtsa ba yin pa'i phyir nad dang 'dra bas nad do//zhen pa'i gnod pa dang ldan pa dang / nyon mongs pa'i mi gtsang ba zag pa dang / skye ba dang / rga ba dang / 'jig pas rim bzhin du skrangs pa dang smin pa dang / rdol ba'i phyir 'bras dang 'dra bas na 'bras so/ / phyi nang gi gnod pas zug par byed cing bcos dka' bas zug rngu dang 'dra ba'i phyir zug rngu'o/ /smad par bya ba yin pa dang / gnod par 'gyur ba'i phyir sdig to dang 'dra bas na sdig pa'o/ /rkyen gyi khar las pa dang / las bdag gir bya ba yin pas / gzhan las dbang bsgyur ba med pa'i phyir gzhan la rag las pa'o// nad dang rga ba dang / 'chi ba rnams kyis rab tu 'jig pa'i rang bzhin yin pa'i phyir/ 'jig pa'i chos can no/ /'dus byas kyi mtshan nyid gsum dang ldan zhing 'jig rten gyi chos mi brtan pa brgyad dang ldan pa'i phyir mi brtan pa'o/ /rang gi ngang dang /gnod pas kyang 'jig par 'gyur ba'i ngang tshul can yin pa'i phyir/ rab tu 'jig pa'o/ /mi 'jigs pa zhes bya ba nye bar zhi ba bde ba'i gnyen po yin pa dang / 'jigs pa thams cad kyi rgyu yin pa'i phyir 'jigs pa'o/ /ma tshor bzhin du gnod pa sna tshogs kyis 'tshe ba'i phyir/'tshe ba'o/ /gnod pa rnam pa mang po dang / 'dre ba dang / 'go ba'i nad dang 'dra ba'i phyir/ 'go ba'i nad do/ /bdag med pa dang / zhi bar yid la bya'o zhes bya ba la sogs pa la/ /ngag gi mtshan nyid dang bral ba'i phyir bdag med pa'o//sdug bsngal thams cad nye bar zhi ba'i phyir zhi ba'o/ /nyon mongs pa dang mi ldan pa'i phyir dben pa'o/ /bdag dang bdag gi bas stong pa nyid dang ldan pa'i phyir stong pa nyid do/ /'dus byas kyi mtshan ma thams cad dang bral ba'i phyir mtshan ma med pa'o/ /khams gsum du mi smon pas smon pa med pa'o//phyis las mngon par 'du byed pa med pa'i phyir/ mngon par 'du byed pa med pa zhes bya bar sbyar ro/ /chos dang chos rnams sbyor ba byed ces bya ba la sogs pa la/ byang chub kyi sems dang / dge ba'i rtsa ba'i sems dang / yongs su bsngo ba'i sems rnams phan tshun du 'grogs par yid la byed pa ni sbyor ba'o//gsum char yang bdag gi ngo bo dang / gzhan gyi ngo bo la yod pa ma yin par yid la byed pa ni dpyod par byed pa'o/ /gsum char yang sems ma yin pa'i phyir bsam gyis mi khyab pa'o/ /bsam gyis mi khyab pa'i phyir sems ma yin pa'o zhes yid la byed pa bshad zin pa'i don yongs su rdzogs pa'o//de ltar chos thams cad la yang so sor rtog la chos gang la yang mngon par zhen pa med pa zhes bya ba ni thams cad du rgyas pa ste/ 'di ni bdag med par so sor brtags pa bzhi pa'o//byang chub sems dpa' sems dpa' chen po'i dge ba'i rtsa ba'i sems gang yin pa de byang chub kyi sems dang 'grogs pa ma yin zhes bya ba la sogs pas ci bstan zhe na/ byang chub sems dpa' ni sngar kun rdzob kyi yid la byed pas dge ba'i rtsa ba 'di bla na med pa yang dag par rdzogs pa'i byang chub tu yongs su bsngo'o zhes spyir yongs su bsngo bar byas nas/don dam pa'i tshul du so sor brtags nas dge ba'i rtsa ba'i sems dang / byang chub kyi sems dang yongs su bsngo ba'i sems rnams phan tshun du 'grogs pa med de/ de ltar 'grogs pa med pas yongs su bsngo ba yod dam med ces so sor rtog go//'dir dga' zhig gal te sems rnam par 'grogs pa med kyang 'on kyang sems snga ma'i dbang gis bskyed pa'i 'du byed kyi bye brag ni sems phyi ma dang lhan cig tu 'grogs par 'gyur te/ thams cad kyi tha ma'i sems la ni 'du byed thams cad rdzogs par 'gyur ro//de bas na sgo 'dis sems rnam par 'grogs pa yod do zhes zer te/ de bas na de bstsal ba'i phyir/ dge ba'i rtsa ba'i sems gang yin pa de ni byang chub kyi sems la med ces bya ba la sogs pa gsungs te/ bag chags kyi 'du byed la sogs pa'i sgo nas sems de la sems gzhan med do zhes bya ba'i tha tshig ste/'di ltar sems nyid med par bstan pas bag chags kyi 'du byed la sogs pa ni ri bong gi rwa rno ba dang rtul ba'i dngos po lta bur mi snang ngo zhes bya ba'i phyir de skad du bshad do/ / de ltar gzhan gyi ngo bo la med par dpyad nas yang bdag gi ngo bo la dpyod do/ /dge ba'i rtsa ba'i sems gang yin pa de dge ba'i rtsa ba'i sems la med/ byang chub kyi sems gang yin pa de yang byang chub kyi sems la med ces bya ba la sogs pa ste/ de bzhin nyid tsam du mthong ba la ni de lta bu'i kun tu dpyod pa med pa'i phyir ro//kau shi ka dge ba'i rtsa ba'i sems gang yin pa de ni sems ma yin zhes bya ba la sogs pas ni de bzhin nyid tsam kho nar ston to/ /sems ni rang gi chos nyid kyi dbang gis sems kun brtags pa dang bral ba'i phyir sems med pa'i ngo bo nyid de chos nyid kyi sems su grag go //sems med pa ni sems med pa dang 'grogs par mi 'gyur zhes bya ba la sogs pa ni chos nyid kyi sems su grag pa las 'grogs pa'am yod pa'am yongs su bsngo ba thams cad kyi thams cad du ma grag go zhes ston to/ /de'i tshe ni de so so rang gis rig pa yin pas bsam pa'i lam las 'das pa'i phyir/bsam gyis mi khyab pa dang / sems ma yin no/ /kau shi ka 'di ni byang chub sems dpa' sems dpa' chen po'i shes rab kyi pha rol tu phyin pa'o zhes bya ba ni rnam par mi rtog pa'i pha rol tu phyin pa'i shes rab ces bya ba'i tha tshig go//gang de ltar chos thams cad la so sor rtog pa zhes bya ba ni kun rdzob tu'o/ /chos gang la yang mngon par zhen pa med cing mi dmigs zhes bya ba ni don dam par ro/ /bdag gis byas pa gzo bar bgyi ste/ byas pa mi gzo bar mi bgyi'o zhes bya bas ci bstan zhe na/sngon bdag gi bcom ldan 'das byang chub sems dpar gyur pa'i tshe sngon gyi de bzhin gshegs pa rnams kyi 'khor na nyan thos chen po rnams kyis gdams pa dang rjes su bstan pas yang dag par bstan pa dang / yang dag par 'dzin du bcug pa brnyes nas yang dag par sgrub pa la bcug ste/de dag gis bstan pa'i rim pas bsgrubs nas mngon par rdzogs par sangs rgyas so/ /de bas na bdag gis kyang 'khor 'dir byang chub sems dpa' 'di rnams la gdams pa dang rjes su bstan pas yang dag pa'i sgrub pa la dgod par bgyi'o//sngon gyi des bdag cag gis bstan pa'i rim pas bsgrubs na mngon par rdzogs par 'tshang rgya bar 'gyur te/ de bas na sngon gyi nyan thos rnams kyis byas pa bdag gis shes par bya'o zhes ston to/ /gdams shing rjes su bstan pa zhes bya ba la sogs pa'i tshig rnams la bye brag ci yod ce na 'di la thog ma dang bar ma dang tha ma'i gnas skabs gsum ste//thog mar ni gdams shing rjes su bstan par bya'o/ /bar du ni sgrub pa'o/ /tha mar ni 'bras bu'o/ /de la thog ma'i gnas skabs su 'di dag ma byed cig ces bya ba ma yin pa las bzlog pa ni gdams pa'o//'di dag byos shig ces bya ba la sbyor ba ni rjes su bstan pa'o/ /bar du ni mi sgrub pa dang / log par sgrub pa dang / cung zad sgrub pa dang / yang dag par sgrub pa ste gnas skabs bzhi'o/ /de la mi shes pas mi sgrub pa la sgrub tu 'jug pa ni yang dag par bstan pa'o//log par shes pas log par zhugs pa dag yang dag par sgrub la sbyor ba ni yang dag par 'dzin du bcug pa'o/ /le lo la sogs pa'i skyon gyis cung zad sgrub pa dag legs par brtson 'grus rtsom du 'jug pa ni yang dag par gzengs stod pa'o//shes rab kyis yang dag par zhugs pa dag legs so zhes rjes su yi rangs nas de nyid la sbyor ba ni yang dag par rab tu dgyes par bgyid pa'o/ /tha mar ni lam la bcug cing 'bras bu la gzhag ces bya bar sbyar bar bya'o/ /de'i 'og tu ji ltar gnas par bya zhes dris pa la gnas par mi bya ba yongs su spangs te gnas par bya bas gnas pa ni shes rab kyi pha rol tu phyin pa la gnas pa zhes bya bar ston to//gzugs ni gzugs kyis stong ngo zhes bya ba la sogs pas stong pa nyid rtogs pa ni gnas pa'o/ /dmigs pa'i tshul ni gnas pa ma yin no zhes ston te/des ni 'di skad du gang gi phyir gzugs la sogs pa kun brtags pa'i chos 'di dag gzugs la sogs pa'i ngo bo nyid kyis yod pa ma yin la/ byang chub sems dpa' yang byang chub sems dpa'i ngo bo nyid kyis med pa ste/ de dag gi stong pa nyid gang yin pa de tha mi dad de gcig go//de bas na chos nyid kyi gzugs la sogs pa ni yongs su grub pa yin la byang chub sems dpa' yang gnyis su med pa ste/ gcig pa'i chos nyid du gnas pa ni shes rab kyi pha rol tu phyin pa la gnas pa'o zhes bstan to/ /gnas par mi bya ba'i 'gres la yang rnam pa gsum du bstan te/chos la gnas par mi bya zhes bya ba ni gcig pa'o/ /chos nyid la gnas par mi bya zhes bya ba ni gnyis pa'o/ /gang zag rnams la gnas par mi bya zhes bya ba ni gsum pa'o/ /de la chos kyi 'gres la yang rnam pa gnyis su bstan te/chos bstan pa dang / chos kyi mtshan nyid bstan pa'o/ /de la gzugs la dmigs pa'i tshul gyis gnas par mi bya'o zhes bya ba nas/ sangs rgyas nyid la dmigs pa'i tshul gyis gnas par mi bya'o zhes bya ba'i bar du ni chos bstan pa'o/ / kau shi ka de ltar na gzugs zhes bya bar gnas par mi bya'o zhes bya ba la sogs pa nas/ de ltar na sangs rgyas nyid ces bya bar dmigs pa'i tshul gyis gnas par mi bya'o zhes bya ba'i bar ni chos nyid kyi mtshan nyid bstan pa'o/ /chos nyid kyi 'gres la yang rnam pa gsum du bstan te/thams cad shes pa nyid kyi phyogs kyi chos nyid bstan pa dang / lam gyi rnam pa shes pa nyid kyi phyogs kyi chos nyid bstan pa dang / rnam pa thams cad mkhyen pa nyid kyi phyogs kyi chos nyid bstan pa'o/ /gzugs rtag go zhes gnas par mi bya/mi rtag go zhes kyang gnas par mi bya'o zhes bya ba nas de bzhin gshegs pa dgra bcom pa yang dag par rdzogs pa'i sangs rgyas ni sbyin gnas so zhes bya bar dmigs pa'i tshul gyis gnas par mi bya'o zhes bya ba'i bar du ni thams cad shes pa nyid kyi phyogs kyi chos nyid bstan pa'o//sa dang po nas sa bcu pa'i bar la gnas par mi bya'o zhes bya ba nas/ sems can tshad med grangs med dpag tu med pa dag bla na med pa yang dag par rdzogs pa'i byang chub la rab tu dgod par bya'o zhes bya bar dmigs pa'i tshul gyis gnas par mi bya'o zhes bya ba'i bar du ni lam gyi rnam pa shes pa nyid kyi phyogs dang mthun pa'i chos nyid bstan pa'o//mig lnga bsgrub par bya ste zhes bya ba nas bzung ste / dpe byad bzang po brgyad cu lus la bsgrub par bya'o zhes bya bar gnas par mi bya'o zhes bya ba'i bar du ni rnam pa thams cad mkhyen pa nyid kyi phyogs kyi chos nyid bstan pa'o//gang zag bstan pa'i 'gres la yang thams cad shes pa nyid kyi phyogs la sogs pa'i dbang gis rnam pa gsum du sbyar bar bya ste/ rdzu 'phrul gyi rkang pa bzhi la gnas te/ ting nge 'dzin gang la snyoms par zhugs pas zhes bya ba la sogs pa yang rnam pa thams cad mkhyen pa nyid kyi sa'i phyogs kyi chos so//'o na ji ltar byang chub sems dpa' sems dpa' chen pos shes rab kyi pha rol tu phyin pa la gnas par bya snyam zhes bya ba gnas brtan rab 'byor ci las sems par gyur ce na/ chos thams cad la gnas par mi bya'o zhes bshad cing stong pa nyid la ni gnas par mi nus la gnas par mi bya'o zhes kyang bshad na de ji ltar rigs par 'gyur snyam du sems par gyur to/ /de nas gnas brtan rab 'byor gyis mi gnas par sgrub pa nyid/ shes rab kyi pha rol tu phyin pa la gnas pa yin par bstan pa/de bzhin gshegs pa'i thugs ni ci la'ang gnas pa ma yin no zhes bya ba ste mi gnas pa'i mya ngan las 'das pa la bzhugs par bstan to/ /de ltar mi gnas pa la gnas pa'i bsgrub pa bshad pas gdul ba las brtsams te bshad pa la brjod du med par bshad pas 'dul ba gang yin pa de dag the tshom zos par gyur te/de bas na de dag la brtsams nas bshad pa gzhan skabs phye ste/ lha'i bu dag gang smras pa shes par mi rung ngam zhes bya ba la sogs pas gang brjod pa de dag ci'i phyir mi shes sam zhes lha'i bu rnams la dris pa dang /de'i phyir de dag gis/ 'phags pa rab 'byor shes par mi rung ngo zhes smras te/ de nas shes rab kyi pha rol tu phyin pa brjod du med pa yin pa'i phyir gnas brtan gyis yi ge gcig kyang ma brjod de zhes bya ba gsungs te/ 'di ltar de na bshad par snang ba dang / mnyan par snang ba de ni kun brtags pa yin no zhes sprul pa dang / rmi lam dang / brag ca dang / sgyu ma lta bur bstan pas lha'i bu de rnams dga' bar byas so/ /sangs rgyas kyi sprul pa zhes bya ba ni de bzhin gshegs pa'i sprul pa'o/ / lha'i bu dag gzugs ni zab pa ma yin phra ba ma yin zhes bya ba ni kun brtags pa'i gzugs yang dag pa ma yin pa'i phyir zab pa ma yin phra ba ma yin no/ yang lha'i bu dag 'di ltar gzugs kyi rang bzhin ni zab pa ma yin phra ba ma yin zhes bya ba la sogs pas chos nyid kyi gzugs ni ngo bo nyid kyis mi g.yo ba'i phyir zab pa ma yin/phra ba ma yin no zhes bstan to/ /de bas na 'dir ni 'gres rnam pa gnyis te/ chos kyi 'gres dang rang bzhin gyi 'gres so/ /'o na chos bstan pa 'di la gzugs su brtags pa yang med dam zhes bya ba la sogs pa ni gal te chos thams cad brjod du med na de lta na ni gzugs la sogs pa la ma brtags sam/ma bshad dam zhes lha'i bu rnams kyis dris pa dang / de nas gnas brtan rab 'byor gyis lha'i bu dag de de bzhin no de de bzhin te zhes brtags pa med pa dang / bshad pa med pa nyid du bstan to/ /bzod pa 'di la mi brten du mi rung zhes bya ba ni brjod du med pa'i bshad pa 'di la'o/ /gnas brtan rab 'byor la chos nyan pa rnam pa ji lta bu dag tu 'dod par bya snyam mo zhes bya ba ni/ gal te don dam par brjod du med pa yin na/ 'chad pa po dang nyan pa po med pas/ chos nyan pa yang med par 'gyur ro zhes ston to/ /de na gnas brtan rab 'byor gyis lha'i bu dag bdag la chos nyan pa ni sgyu ma lta bur 'dod par bya'o zhes bya ba la sogs pas don dam par 'chad pa po dang / nyan pa po med pa nyid du ston to//btsun pa rab 'byor shes rab kyi pha rol tu phyin pa 'di ltar zab pa/ 'di ltar mthong bar dka' ba zhes bya ba la/ gting dpag dka' bas na zab pa'o/ /rnam par shes pa'i tshogs lnga'i yul ma yin pa'i phyir mthong bar dka' ba'o/ /yid kyi rnam par shes pa'i yul ma yin pa'i phyir rtogs par dka' ba'o//nyon mongs pa dang nye ba'i nyon mongs pa thams cad nye bar zhi ba'i phyir zhi ba'o/ /sdug bsngal thams cad kyi bar dag nye bar zhi ba'i phyir gya nom pa'o/ /rnam par rtog pa'i spros pa thams cad nye bar zhi ba'i phyir phra ba'o//so so rang gis rig pa yin pa'i phyir gzhan ma yin pa'o/ /bsam pa'i lam las 'das pa'i phyir/ rtog ge'i spyod yul ma yin pa'o/ /chos thams cad yang dag pa ji lta ba bzhin du rtogs pa la mkhas pa'i rgyu yin pa'i phyir mkhas pa'o/ /'jig rten las 'das pa'i chos rtogs pa'i gnas kyi mchog yin pas shin tu 'phags pa'o//nyan thos dang / rang sangs rgyas rnams kyi spyod yul ma yin pa dang / phyir mi ldog pa rnams nyid kyis rig par bya ba ma yin pa'i phyir mkhas pa dang mdzangs pas rig par bya'o/ / len par byed par 'gyur zhes bya ba ni 'dzin pa'o/ /bden pa mthong ba'i gang zag gam/ dgra bcom pa zag pa zad pa'am zhes bya ba la sogs pas sngar kun rdzob tu tshol bar byed pa bstan to/ /de la don dam par na byang chub sems dpa' la bden pa mthong ba zhes gsungs so/ / byang chub tu 'gyur ba ni dgra bcom pa zhes bya ba'o / /de ltar kun rdzob tu bstan nas yang don dam par bstan pa de dag ni gzugs stong ngo zhes bya bar rnam par rtog par mi 'gyur zhes bya ba nas/ len par byed pa su yang med do zhes bya ba'i bar du ste/ 'dis ni gang dag de ltar rnam par mi rtog pa'i shes rab kyi pha rol tu phyin pa mngon sum du byas par gyur pa de dag nyid tshol bar byed pa yin te/de dag kyang don dam par btsal bar bya ba med pa'i phyir tshol bar byed pa ma yin no zhes ston to/ /de skad smras pa dang / gnas brtan sha ra dwa ti'i bus 'chad pa po dang /nyan pa po med par dam bcas pa lung dang 'gal bar bstan pas/ tshe dang ldan pa rab 'byor shes rab kyi pha rol tu phyin pa las theg pa gsum rgya cher ma bstan tam zhes bya ba la sogs pa ste/ theg pa gsum bshad pa dang / sa bcu yongs su bzung ba dang pha rol tu phyin pa la sogs pa byang chub sems dpa'i lam dang /de bzhin gshegs pa'i rigs su skye ba dang / mngon par shes pas rnam par rtse bas gnas pa dang / chos nyan pa dang / mi brjed pa dang / sems 'khrugs pa med pa dang / spobs pa'i yon tan bdun la sogs pa chos 'di rnams bstan te/bdag cag gis kyang thos so zhes ston to/ /de'i 'og tu gnas brtan rab 'byor gyis chos 'di rnams mi dmigs pa'i tshul gyis bshad kyi/ don dam par ni yod pa ma yin te/ de bas na bshad pa yang 'khrul pa tsam mo zhes bstan pa'i phyir/tshe dang ldan pa sha ra dwa ti'i bu de de bzhin no de de bzhin te zhes bya ba la sogs pa gsungs so/ /de dag stong pa yin pa'i gtan tshigs nang stong pa nyid dang zhes bya ba nas dngos po med pa'i ngo bo nyid stong pa nyid kyi bar gyi phyir zhes bya ba la sogs pa gsungs so/ / lha'i bu rnams la ye shes kyi snang ba 'byung ba'i mtshan ma bstan pa'i phyir me tog gi mchod pa bstan te/ me tog 'di dag sprul pa'o zhes bya ba la sogs pa ni bsams pa 'og nas bstan pa'i skabs dbye ba'i phyir ro/ /kau shi ka me tog 'di dag ma byung ba zhes bya ba ni yongs su grub pa'i mtshan nyid ma skyes pa ste/stong pa nyid kyi ngo bo nyid yin gyi/ me tog gi ngo bo nyid ma yin no zhes ston to/ /kau shi ka gzugs kyang ma byung ba ste/ gang ma byung ba de ni gzugs ma yin no zhes bya ba ni don dam pa'i gzugs la 'dus byas kyi skye ba med pa'i phyir gzugs ma byung ba'o zhes bstan pa'o//de ltar 'dus ma byas pa/ ma skyes pa la kun brtags pa'i gzugs kyi mtshan nyid med pa'i phyir ma skyes pa gang yin pa de gzugs ma yin no zhes bstan pa'o/ /btags pa dang yang mi 'gal la/ chos nyid kyang ston te zhes bya ba ni kun rdzob dang don dam par mi 'gal bar bstan to zhes bya ba'i tha tshig go// //bam po bco brgyad pa/ kau shi ka byang chub sems dpa' sems dpa' chen po'i de ltar chos thams cad brtags pa tsam du rig par byas te/ shes rab kyi pha rol tu phyin pa la bslab par bya'o zhes bya ba ni gang sngar rnam pa gsum du zhus pa las byang chub sems dpa' sems dpa' chen pos shes rab kyi pha rol tu phyin pa la ji ltar bslab par bgyi zhes tha mar zhus pa de ston to//gzugs la mi slob ces bya ba la sogs pa ni mi slob pa nyid slob pa ste dper na gnas pa med pa nyid gnas pa'o zhes bya ba lta bur ston to//gzugs la sogs pa dngos po med par mthong bas gzugs la sogs pa la mi slob ces bya'o zhes bstan pa'i phyir/ 'di ltar gang la bslab par bya ba'i gzugs de yang dag par rjes su mi mthong ngo zhes bya ba la sogs pa gsungs so//gzugs la sogs pa ci'i phyir yang dag par rjes su mi mthong zhes brgya byin gyis dris pa dang / stong pa yin pas yang dag par rjes su mi mthong ngo zhes bstan pa'i phyir/ gzugs gzugs kyis stong ngo zhes bya ba gsungs so//mi slob pa'i gtan tshigs su/ kau shi ka gzugs stong pa nyid ni gzugs stong pa nyid la mi slob po zhes bya ba la sogs pa gsungs te/ slob pa gang yin pa dang gang la slob pa de gnyis ka yang med pa'i phyir slob pa med do zhes bya ba'i tha tshig go/ /de'i 'og tu kau shi ka gang gzugs stong pa nyid la mi slob ces bya ba nas rnam pa thams cad mkhyen pa nyid stong pa nyid kyi bar la mi slob pa de ni gnyis su byar med par gzugs stong pa nyid la slob po zhes bya ba nas gnyis su byar med par rnam pa thams cad mkhyen pa stong pa nyid la slob po zhes bya ba ni gang mi slob pa de nyid slob pa yin par ston to//gnyis su byar med par zhes bya ba ni stong pa nyid du gcig pa'i phyir gcig gi stong pa nyid la bslabs na chos thams cad kyi stong pa nyid la bslab pa yin no zhes bya ba'i tha tshig go/ /de bas na/ gcig gi stong pa nyid gang yin pa de ni kun gyi stong pa nyid [(]cas [,]ces [)]bshad do//de'i 'og tu kau shi ka gang gnyis su byar med pa gzugs stong pa nyid la slob pa zhes bya ba nas gnyis su byar med par rnam pa thams cad mkhyen pa nyid la slob pa de ni sangs rgyas kyi chos grangs med/ dpag tu med pa rnams la bslab pa yin no zhes bya ba ni gang de ltar chos thams cad kyi stong pa nyid la bslab pa de pha rol tu phyin pa la sogs pa nas/sangs rgyas kyi chos rnams kyi bar dag la bslab pa yin no zhes ston to/ /de'i 'og tu de ni gzugs 'phel bar bya ba dang 'grib par bya ba'i phyir mi slob po zhes bya ba ni pha rol tu phyin pa la sogs pa rnams sangs rgyas kyi chos rnams kyi bar dag la slob pa de gzugs la sogs pa la 'phel bar bya ba'am/'grib par bya ba med par ston te/ dkar po'i phyogs 'phel bar bya ba'am/ nag po'i phyogs 'grib par bya ba'i phyir mi slob po zhes bya ba'i tha tshig go//de'i 'og tu de ni gzugs yongs su gzung ba dang med par bya ba'i phyir mi slob po zhes bya ba ni gang la de ltar 'phel bar bya ba dang / 'grib par bya ba'i chos rnams med pa de la khyad par du 'phags pa'i chos rnams yongs su bzung zhing chos ngan pa rnams chud gsan par bya ba med par ston to//de skad smras pa dang / tshe dang ldan pa rab 'byor ci'i phyir de yongs su 'dzin pa dang med par bya ba'i phyir mi slob ces gsungs pa ni gnas brtan shA ri'i bus de la byang chub sems dpa' chos ngan pa rnams yongs su spong zhing khyad par du 'phags pa'i chos rnams thob par byed na de la ci'i phyir yongs su 'dzin pa dang /med par bya ba med ces 'dri ba'o/ /de skad ces smras pa dang / gnas brtan rab 'byor gyis gzugs la gzugs yongs su mi 'dzin to zhes bya ba gsungs te/ gzung ba dang 'dzin pa rnams med par ston to//de'i gtan tshigs su stong pa nyid kyi phyir zhes bya ba gsungs so/ /gzugs kyi skye ba yang dag par rjes su mi mthong zhes bya ba la sogs pa ni glo bur la ni skye ba med do/ /gnas pa ni mi 'gyur ba'i ngo bo nyid yin pas 'gag pa med do//de bzhin nyid la skye ba med pa'i sngon ma byung ba blang ba med do/ /'gag pa med pas bzung ba las dor ba med do/ /gzung bar bya ba med pas sngon ma byung ba'i rnam par byang ba med do/ /dor bar bya ba med pas spang bar bya ba'i kun nas nyon mongs pa med do/ /rnam par byang ba med pas 'phel ba med do//kun nas nyon mongs pa med pas 'grib pa med do/ /btsun pa shes rab kyi pha rol tu phyin pa gang nas btsal bar bya zhes bya ba ni 'dir shes rab kyi pha rol tu phyin pa nyid las lam gyi rnam pa shes pa nyid dang / rnam pa thams cad mkhyen pa nyid bstan pa'i phyir shes rab kyi pha rol tu phyin pa dris so//rab 'byor gyi le'u las zhes bya ba ni gang shes rab kyi pha rol tu phyin pa la 'bring du bshad pa de dag thams cad ni rab 'byor gyi le'u zhes bya'o/ /rnam pa thams cad mkhyen pa nyid shes rab kyi pha rol tu phyin pa las brtsams te byung ba'i phyir/de bshad pa yang de ni de las gzung bar bya'o zhes bstan to/ /chos zab mo bshad pa ni de bzhin gshegs pa'i spyod yul yin na rab 'byor smos pa lha'i dbang pos ma bzod nas 'phags pa rab 'byor 'di ltar bshad pa'i skabs phye ba de khyod kyi byin gyi rlabs sam /de khyod kyi mthu'am zhes dris so/ /de skad smras pa dang / gnas brtan rab 'byor gyis/ dang por kun rdzob kyi tshul gyis 'di dag de bzhin gshegs pa'i byin gyi rlabs yin te de bzhin gshegs pa'i byin gyi rlabs kyis dgra bcom pa dag chos 'chad do zhes bstan to/de nas brgya byin gyis de yang ma bzod nas/ btsun pa rab 'byor chos thams cad ni byin gyi rlabs med na ci'i phyir de skad du 'di ni de bzhin gshegs pa'i mthu'o/ /'di ni de bzhin gshegs pa'i byin gyi rlabs so zhes smra zhes bya ba gsungs so//de nas gnas brtan gyis tshig de la rjes su yi rang nas/ don dam pa'i tshul du na de bzhin gshegs pa zhes bya ba de bzhin nyid la bya ba bstan pa'i phyir byin gyi rlabs med pa'i chos nyid la de bzhin gshegs pa mi dmigs zhes bya ba la sogs pas de bzhin gshegs pa zhes bya ba'i chos gang yang med do zhes ston to//chos nyid la kun brtags pa'i chos med pa'i phyir byin gyi rlabs med pa'i chos thams cad kyi chos nyid gang yin pa de la de bzhin gshegs pa med do/ /chos nyid las ma gtogs pa'i chos rnams med pa'i phyir byin gyi rlabs med pa'i chos nyid las gud na yang de bzhin gshegs pa mi dmigs so//kun brtags pa la chos nyid mi gnas pa'i phyir/ de bzhin gshegs pa la yang byin gyi rlabs med pa'i chos mi dmigs so/ /chos las gud na chos nyid med pa'i phyir/ de bzhin gshegs pa las gud na yang byin gyi rlabs med pa'i chos nyid mi dmigs so//de bzhin du de bzhin nyid kyi 'gres la yang sbyar ro/ /de bzhin du gzugs la sogs pa nas rnam pa thams cad mkhyen pa nyid kyi mthar thug pa'i chos nyid dang / de bzhin nyid kyi 'gres la yang sbyar bar bya'o//de bzhin gshegs pa'i chos nyid gang yin pa de ni gzugs kyi chos nyid dang ldan pa yang ma yin/ bral ba yang ma yin no/ /gzugs kyi chos nyid ma yin pa gzhan dang ldan pa yang ma yin/ bral ba yang ma yin no zhes bya ba ni tha dad pa med de gcig pa'i phyir de skad bstan to//gnas dang gnas pa'i dngos po dang / gzhan gyi dngos po dang ldan pa dang bral ba'i rnam par rtog pa dag ni tha dad pa yod na rigs kyi med na mi rigs so/ /de bzhin du de bzhin nyid kyi 'gres la yang / kau shi ka 'di ni de ltar gang chos thams cad dang ldan pa yang ma yin/bral ba yang ma yin pa de'i mthu'o/ /'di ni de'i byin gyi rlabs so zhes sbyar bar bya ste/ stong pa nyid kyi mthu dang stong pa nyid kyi byin gyi rlabs te/ bshad pa de stong pa nyid las brtsams nas byung ba'i phyir ro zhes bya ba'i tha tshig go//gzugs las kyang btsal bar mi bya zhes bya ba ni gzugs la sogs pa med pa'i phyir de skad bstan to/ gzugs las gzhan du yang btsal bar mi bya'o zhes bya ba ni shes rab kyi pha rol tu phyin pa yang yod pa ma yin pa'i phyir tha dad pa med do zhes tha dad pa med par bstan to//de'i phyir yod pa ma yin tha dad pa ma yin par bstan pa'i phyir ro/ /chos de dag thams cad ni ldan pa yang ma yin/ bral ba yang ma yin te/ 'di ltar mtshan nyid med pa'o zhes bya ba gsungs so/ /gzugs kyang shes rab kyi pha rol tu phyin pa ma yin zhes bya ba ni gzugs dang /shes rab kyi pha rol tu phyin pa gnyis ka yang yod pa ma yin par bstan pa'o/ /gzugs las gud na yang shes rab kyi pha rol tu phyin pa med do zhes bya ba ni yod pa ma yin pa nyid kyi phyir tha dad par brjod du mi rung ngo zhes bya ba'i tha tshig go/ / de bas na/ kau shi ka 'di ltar chos 'di dag thams cad ni yod pa ma yin te dmigs su med do zhes bya ba gsungs so/ /de nas yang chos bshad pa 'di ngo mtshar du gzung bar bstan pa'i phyir brgya byin gyis tshig rnam pa bzhi bkod de/ pha rol tu phyin pa 'di ni che ba ste zhes bya ba dang /pha rol tu phyin pa 'di ni tshad med pa ste zhes bya ba dang / pha rol tu phyin pa 'di ni dpag tu med pa ste zhes bya ba dang / pha rol tu phyin pa 'di ni mtha' yas pa ste zhes bya ba'o / /gzugs kyi sngon gyi mtha' mi dmigs zhes bya ba ni de'i tshe byung ngo zhes bya ba'am ma byung ngo zhes bya bar sbyar ro//phyi ma'i mtha' mi dmigs zhes bya ba ni de'i tshe 'byung bar 'gyur ro zhes bya ba'am/ 'byung bar mi 'gyur ro zhes bya bar ro/ /dbus mi dmigs zhes bya ba ni yod do zhes bya ba'am/ med do zhes bya bar mi dmigs pa ste/ de ltar dus gsum du dbyer med pas che ba'o//gzugs kyi tshad ni dmigs su med do zhes bya ba ni don dam pa'i gzugs la 'di tsam mo zhes yongs su bcad pa med pa'i phyir tshad med pa nyid do/ /grangs kyis dpag tu med pa'i phyir dpag tu med pa'o/ /skad cig yongs su chad pa med pa'i phyir mtha' yas pa'o//sngon gyi mtha' zhes bya ba ni skye ba'i mtha'o/ /phyi ma'i mtha' zhes bya ba ni 'gag pa'i mtha'o/ /dbus zhes bya ba ni skad cig pa'i gnas so/ /de ltar pha rol tu phyin pa mtha' yas pa gcig gis bstan nas/ de'i 'og tu mtha' yas pa rnam pa bzhis ston te/rnam pa thams cad mkhyen pa nyid mtha' yas pa dang / chos kyi sku mtha' yas pa dang / de bzhin nyid mtha' yas pa dang / sems can mtha' yas pa'o/ /de la sems can mtha' yas pa zhes bya ba gang yin zhe na/ de mtha' zhes bya ba ni mtha' gnyis te/ rtag pa'i mtha' dang chad pa'i mtha'o/ /mtha' de gnyis med pa ni mtha' yas pa nyid de sems can gyi mtha' med pa ni sems can mtha' yas pa'o/ /gal te sems can yod na ni de ltar gyur na mtha' dang ldan par 'gyur ba zhig na 'di ltar sems can ngo bo nyid kyis med pa kho na ste/de'i phyir ngo bo nyid kyi sems can mtha' yas pa yod pa ma yin no/ /sems can mtha' yas pa de yang chos bshad pa 'di la yod pa ma yin no/ /gal te chos bshad pa 'di la sems can 'ga' zhig bstan na ni de ltar gyur na sems can mtha' yas pa yang bstan par 'gyur ba zhig na/'di ltar sems can ma bstan pas de'i phyir 'di la sems can mtha' yas pa yang med do/ /de bas na kau shi ka gang la sems can du bshad pa gang yang med pa de sems can mtha' yas pa gang yang med de zhes bya ba gsungs te/ sems can ma bstan pa'i phyir sems can mtha' yas pa yang ma bstan to zhes bya ba'i tha tshig go/ /de'i 'og tu kau shi ka gal te de bzhin gshegs pa dgra bcom pa yang dag par rdzogs pa'i sangs rgyas bskal pa gang gA'i klung gi bye ma snyed du bzhugs te/ sems can sems can zhes gsung du brjod na zhes bya ba la sogs pas ni sems can mtha' yas pa tshig gi kha na las pa ma yin gyi/ sems can med pa nyid kyi phyir ngo bo nyid kyis mtha' yas pa'o zhes ston to/ /gal te sems can mtha' yas pa tshig gi khar las pa zhig yin na ni de bzhin gshegs pa'i gsung las sems can skye ba'am/'gag par 'gyur ba zhig na/ 'di ltar de ltar yang ma gyur te de'i phyir sems can mtha' yas pa tshig las gyur pa ma yin no zhes bya ba'i tha tshig go/ /kau shi ka rnam grangs des na sems can mtha' yas pa'i phyir shes rab kyi pha rol tu phyin pa mtha' yas par rig par bya'o zhes bya ba ni gal te bshad pa 'di la sems can zhig bstan na ni de na de yod pa'i phyir mtha' gnyis kyang yod par 'gyur na de gnyis kyang ma bstan pas pha rol tu phyin pa 'di mtha' yas par 'gyur ro//gang gi phyir sems can ma bstan pa de'i phyir sems can med do/ /de med pas mtha' gnyis kyang med do/ /de bas na sems can ma bstan pa'i phyir pha rol tu phyin pa 'di mtha' yas pa zhes bya'o zhes bya ba'i tha tshig go/ /chos gang la yang dmigs su ma mchis kyang /theg pa gsum rnam par dgod pa yang mchis te zhes bya ba ni don dam pa dang kun rdzob tu'o/ /sbyin pa'i pha rol tu phyin pa las gud na yang de bzhin gshegs pa dmigs su med ces bya ba ni chos kyi sku'i de bzhin gshegs pa ni sangs rgyas kyi chos kyi ngo bo nyid do//byang chub sems dpa' rnams kyang de la slob pa ni don dam par sangs rgyas kyi chos kyi ngo bo nyid yin pas de'i phyir byang chub sems dpa' dang de bzhin gshegs pa la bye brag med pas de bzhin gshegs pa nyid do zhes brjod par bya'o zhes bya ba'i tha tshig go/ /byang chub sems dpa' sangs rgyas kyi chos rnams la gsar du slob pa rnams sangs rgyas kyi chos kyi ngo bo nyid yin pas bstan pa'i phyir de bzhin gshegs pa mar me mdzad kyis kyang sangs rgyas kyi chos dang ma bral bar gzigs nas/de bzhin gshegs par lung bstan to zhes mar me mdzad kyi dpe bstan to//de nas lha'i bu de dag gis bcom ldan 'das la 'di skad ces gsol to zhes bya ba ni mar me mdzad kyis lung bstan pa thob pas/ bcom ldan 'das byang chub sems dpa' sems dpa' chen po rnams kyi shes rab kyi pha rol tu phyin pa 'di gzugs mi len mi 'dor ba'i tshul dang zhes bya ba nas rnam pa thams cad mkhyen pa nyid dang mthun par yongs su 'dzin pa ni ngo mtshar to zhes bya ba smras te/gzugs la sogs pa'i chos rnams la khyad par du 'phags pa dang / ngan pa'i dngos po med pa'i phyir len pa dang 'dor ba gnyis kyang med do//'on kyang rnam pa thams cad mkhyen pa nyid sngon ma byung ba yongs su 'dzin pa de ngo mtshar to zhes bya ba'i tha tshig go/ /de nas bcom ldan 'das kyis 'khor bzhi po dge slong dang dge slong ma dang zhes bya ba la sogs pa ni bshad par bya ba'i shes rab kyi pha rol tu phyin pa las brtsams pa'o//'di man chad ni don gyi bdag nyid kyi chos bshad pa 'di'i yon tan gyi phan yon tshe 'di dang tshe phyi ma la 'byung ba dang / bsod nams mang po 'phel ba'i rgyur gyur pa ston to/ /stong pa nyid shin tu byin gyis brlabs par 'gyur ro zhes bya ba ni stong pa nyid kyi byin gyi rlabs kyis rgyu mthun pa nyid ston te /de la 'jig rten pa thams cad stong par snang la / bdag kyang stong par snang ngo / /'dir ji ltar na stong pa nyid kyis stong pa nyid la glags rnyed par mi 'gyur ba ston to/ / gang gis glags rnyed par 'gyur ba zhes bya ba ni sdig pa'i las kyis so//gang du glags rnyed par 'gyur ba zhes bya ba ni sa'i steng ngam/ lha yul du'o/ /gang la glags rnyed par 'gyur ba zhes bya ba ni byang chub sems dpa' la ste/ 'di ltar de dag thams cad med pa'i phyir ro/ /'dir ni gzhung brda phrad sla bas ma bris so//bsrung ba dang bskyab pa dang sba bar bgyi'o zhes bya ba la lus kyi bde ba thams cad sgrub pa ni srung ba'o/ /phyi rol gyi gnod pa las skyob pa ni bskyab pa'o/ /nang gi nad la sogs pa bzlog pa ni sba ba'o/ /'dir yang glags mi rnyed pa dang / dus ma yin par 'chi ba med pa dang / 'jigs pa la sogs pa mi 'byung ba dang / lha rnams kyis bsrung ba ste/ phan yon rnam pa bzhi bstan to/ /nyan thos dang rang sangs rgyas sha stag gis 'di lta ste dper na bu ram shing gi tshal ltar yongs su gang bar gyur zhes bya ba'i dpe bstan pas ni rin che ba bstan to//tshe 'di'i yon tan gyi phan yon dang / tshe phyi ma'i phan yon du ma dang / rigs phun sum tshogs pa la sogs pa bcu dang / sprul pas chos ston pa dang / sangs rgyas kyi chos thams cad yongs su bzung ba dang / 'thab pa dang rgal ba la sogs pa nye bar zhi ba dang /de'i rgyu dang / pha rol tu phyin pa yang dag par 'thob pa dang / sems 'khrugs pa la sogs pa med pa dang / sman gyi dpe dang / dkar po ma yin pa'i chos thams cad spong ba dang / srung ba dang dge ba'i chos mngon par 'phel ba dang /tshig btsun pa la sogs pa dang / dge ba bcu'i las kyi lam mngon par sbyor ba dang / sangs rgyas kyi chos thams cad la mngon par sbyor ba dang / pha rol tu phyin pa drug la so sor yang dag par slob pa ston to/ /yongs su 'dul ba dang nga rgyal med par bya ba'i phyir nye bar gnas pa yin zhes bya ba ni 'jig rten pa'i spyad pa la spyod pa'i byang chub sems dpa' spyad pa spyod par yongs su 'dul bar nye bar gnas par 'gyur ro//thabs mi mkhas pas khengs par 'gyur ba las khengs pa med par byed par yang nye bar gnas pa yin no//mi dmigs par spyod pa la spyod pa'i tshe ni shes rab kyi pha rol tu phyin pa 'di rnam pa thams cad du 'dul bas na yongs su 'dul ba'i phyir nye bar gnas pa yin no/ /khengs par 'gyur ba med pa'i phyir khengs par mi byed par nye bar gnas pa yin no/ /de'i 'og tu g.yul ngor mtshon cha las srung ba dang /de'i rgyu dang de'i phyi rol gyi gnod pa las srung ba dang / de'i rgyu dang / glags mi thod pa dang / byang chub kyi snying po'i dpe dang bris nas glegs bam du byas te 'dzin zhes bya bas tshig gi tshogs dang yi ge'i tshogs kyis shes rab kyi pha rol tu phyin pa'i yon tan bstan pa dang /sa phyogs mchod rten du 'gyur ba dang / der yang de bzhin gshegs pa'i sku gdung gis yongs su gang ba'i mchod rten mchod pa bas kyang shes rab kyi pha rol tu phyin pa la mchod pa lhag pa dang / de'i rgyu dang / sems can dman pa mang ba dang /sems can dge ba shin tu nyung ba dang / de'i rgyu dang / phyogs bcu dag na yang theg pa dman pa'i sems can mang ba dang de'i rgyu dang / bshad pa 'di rgyun mi 'chad par mnyan pa la sogs pa la 'jug par bya ba dang / rin po che sna bdun gyi mchod rten la mchod pa bas kyang lhag pa dang /'dzam bu'i gling tsam dang / stong gnyis tsam dang stong gsum gyi stong chen po tsam dang / sems can thams cad de snyed kyi mchod rten la mchod pa byas pa bas bsod nams che ba bstan pa dang / de bzhin du phyogs bcu so sor yang 'jig rten gyi khams gang gA'i klung gi bye ma snyed du gtogs pa'i sems can thams cad kyis re res kyang rin po che sna bdun gyi mchod rten byas te/de la mchod pa byas pa bas kyang bsod nams che ba dang de'i rgyu dang / shes rab kyi pha rol tu phyin pa 'jig rten na gnas na 'jig rten dang /'jig rten las 'das pa'i chos khyad par can rnams kyi rgyur 'gyur ba dang / brgya byin la gtad pa dang / lha dang lha ma yin g.yul sprod pa'i dpe brjod pa la sogs pa'i yon tan gyi phan yon bstan pa dang / rig sngags chen mo dang / rig sngags bla na med pa dang /rig sngags mi mnyam pa dang mnyam pa'i ming smos pa dang / de dag gi rgyu ston te/ de la 'jig rten dang / 'jig rten las 'das pa'i chos thams cad pas lhag par che ba'i phyir rig sngags chen mo'o/ /bdag gi gong na gzhan med pa'i phyir rig sngags bla na med pa'o//bdag dang mnyam pa med pa'i phyir rig sngags mi mnyam pa dang mnyam pa'o/ /zla ba'i dkyil 'khor gyi dpe brjod pas dkar po'i chos thams cad rab tu 'byung ba'i rgyur gyur pa dang / thabs mkhas pa'i rgyur gyur pa dang /yang tshe 'di'i yon tan rnams dang / dug dang / me dang / mtshon dang / chu dang nad kyi dbang gis 'chi ba'i dus mi byed pa dang / rgyal po'i pho brang 'khor gyi 'tshe ba med pa dang / dkar po'i chos thams cad dang mi 'bral ba dang / sems can dmyal ba dang /dud 'gro'i skye gnas dang / yi dags su skye ba dang / dbang po ma tshang ba dang / yan lag ma tshang ba dang / rigs dma' bar skye ba med pa dang / mtshan dang dpe byad kyis brgyan pa'i lus su 'gyur ba dang / sangs rgyas kyi zhing du skye ba dang / sangs rgyas kyi zhing du 'gro ba dang /sems can yongs su smin par byed pa dang / sangs rgyas kyi zhing yongs su dag par byed pa la sogs pa'i yon tan gyi phan yon de dag bstan to/ /de nas yang kun tu rgyu ba brgya phyir dong ba dang / de'i rgyu dang / bdud phyir log pa dang / de nas yang lha thams cad kyis mchod cing bsngags pa dang /bsrung zhing bskyab par dam bcas pa dang / 'dzin pa rnams dge ba'i rtsa ba mchog dang ldan par 'gyur ba rnams bstan to/ /skabs 'dir shes rab kyi pha rol tu phyin pa las nges par 'byung ba ni rnam pa thams cad mkhyen pa nyid do//rnam pa thams cad mkhyen pa las nges par byung ba zhes bya ba ni shes rab kyi pha rol tu phyin pa'o zhes bya ba ni kun rdzob tu tha dad par bstan pa'o/ /rnam pa thams cad mkhyen pa nyid kyang gzhan ma yin/ shes rab kyi pha rol tu phyin pa yang gzhan ma yin zhes bya ba ni don dam par tha dad pa med par bstan pa'o//de la shes rab kyi pha rol tu phyin pa las nges par byung ba ni rnam pa thams cad mkhyen pa nyid do zhes bya ba ni sgrub pa'i sa la'o / /rnam pa thams cad mkhyen pa nyid las nges par byung ba ni shes rab kyi pha rol tu phyin pa'o zhes bya ba ni 'bras bu'i sa la'o//rnam pa thams cad mkhyen pa nyid kyang gzhan ma yin/ shes rab kyi pha rol tu phyin pa yang gzhan ma yin zhes bya ba ni gnyi gar yang chos kyi sku'i bdag nyid yin pa'i phyir ro/ /de'i 'og tu kun dga' bos zhus pa dang / shes rab kyi pha rol tu phyin pa sangs rgyas kyi chos thams cad kyi thog mar 'gro ba zhes bya ba nas/kun dga' bo gnyis su med pa'i tshul gyis rnam pa thams cad mkhyen pa nyid du bsngos pa zhes bya ba ni gang gi tshe sbyin pa rnam pa thams cad mkhyen pa nyid du yongs su bsngo ba de'i tshe sbyin pa'i pha rol tu phyin pa dang /rnam pa thams cad mkhyen pa nyid 'bras bu'i sa la tha dad pa med cing / gnyis su med par so sor brtags te/ sbyin pa byed pa de'i tshe sbyin pa'i pha rol tu phyin pa zhes bya ba'i ming 'thob po/ /kun dga' bo gzugs gnyis su med pa'i tshul dang dmigs su med pa'i tshul dang /len pa med pa'i tshul gyis zhes bya ba dang chos nyid kyi gzugs ni gnyis su med pa'i tshul gyis so/ /kun brtags pa'i gzugs ni dmigs su med pa'i tshul gyis so/ /rnam par brtags pa'i gzugs ni len pa'i tshul gyis so//gnyis su med pa gang yin pa de dmigs su med pa'o zhes bya ba la gnyis su med pa ni yongs su grub pa ste/ dmigs shing kun brtags pas mngon par zhen par mi 'gyur ro/ /gang dmigs su med pa de len pa med pa'o zhes bya ba ni/ gang dmigs pa'i tshul gyis mngon par zhen par mi 'gyur ba de rnam par rtog pa'i yid la byed pas nye bar len par mi 'gyur ro zhes bya ba'i tha tshig go//de nas yang shes rab kyi pha rol tu phyin pa'i yon tan dpag tu med pa dang / tshul khrims kyi phung po la sogs pa tshad med pa'i rgyur gyur pa dang /nyan thos dang rang sangs rgyas kyi tshul khrims kyi phung po la sogs pa zil gyis gnon pa dang / brgya byin gyis bsrung zhing bskyab pa dang sba bar dam bcas pa dang / lha rnams spobs pa bsgrub pa dang / 'khor gyi nang du sems zhum pa med pa dang / klan ka tshol ba med pa dang / sems zhum pa la sogs pa med pa dang / 'jig rten thams cad dga' ba dang / chos nyid rgyun mi 'chad pa dang / lha thams cad shes rab kyi pha rol tu phyin pa 'dzin pa dang / de dag la chos sbyin pa dang / lha de dag rnams kyis bsrung ba dang /lha rnams 'ong ba'i rtags dang / lha ngan pa rnams 'dong ba dang / rgya chen po la mos pa dang / sa phyogs mchod par 'gyur ba dang / lus bde ba la sogs pa 'byung ba dang / snyom pa la sogs pa med pa dang / /rmi lam bzang po rmi ba dang /lus la gzi mdangs 'jug pa dang / rkyen rnams pa bzhi la ma chags pa dang / phyogs bcu'i 'jig rten gyi khams rnams su sangs rgyas thams cad la rkyen rnam pa bzhis mchod pa dang / rin po che sna bdun gyi mchod rten byas te mchod pa bas kyang shes rab kyi pha rol tu phyin pa 'di bzung ba la sogs pa ma byas par rim gro tsam 'ga' zhig byas pa'i bsod nams che ba dang /lha'i dbang po brgya byin gyis 'dzam bu'i gling de bzhin gshegs pa'i sku gdung gis yongs su bkang ba bas kyang shes rab kyi pha rol tu phyin pa 'dzin pa bsod nams che ba dang /de'i rgyu bstan to/ /skabs 'dir/ kau shi ka shes rab kyi pha rol tu phyin pa 'di ni gzung du med pa zhes bya ba ni yid kyi rnam par shes pas gzung du med pa'i phyir ro/ /bstan du med pa zhes bya ba ni tshig gis bstan mi nus pa'i phyir ro/ /thogs pa med pa zhes bya ba ni dbang po'i rnam par shes pa'i yul ma yin pas yul gyi thogs pa med pa'i phyir ro//'di ltar mtshan nyid med par mtshan nyid gcig pa zhes bya ba ni kun brtags pa'i mtshan nyid thams cad kyi mtshan ma dang bral ba'i phyir ro/ /'dzin pa'i phyir ram mi 'dzin pa'i phyir yang gnas pa ma yin zhes bya ba ni gzung bar bya ba dang /gzung bar mi bya bar rnam par brtags pa'i 'os ma yin pa'i phyir ro/ /'grib pa'i phyir ma yin 'phel ba'i phyir ma yin zhes bya ba ni nag po'i phyogs kyi chos spang ba'am/ dkar po'i phyogs kyi chos spel ba'i phyir gnas pa ma yin pa'o//dbri ba'i phyir ma yin/ bsnan pa'i phyir ma yin zhes bya ba ni 'khor ba'i chos bsal ba'am mya ngan las 'das pa'i chos bsgrub pa'i phyir gnas pa ma yin pa ste/ ci'i phyir zhe na/ de na de lta bu'i rnam par rtog pa la mngon par zhen pa thams cad med pa'i phyir ste /de bzhin du thams cad la sbyar bar bya'o/ /shes rab kyi pha rol tu phyin pa ni gnyis su nye bar gnas pa ma yin zhes bya ba ni gal te 'dzin pa dang mi 'dzin pa la sogs pa'i tshul du gnas par gyur na/ de lta na ni gnyis kyi bdag nyid dang /tha dad pa'i bdag nyid du gnas par 'gyur na/ 'di ltar shes rab kyi pha rol tu phyin pa de don dam par gcig cing tha dad pa med pa'o/ /de bas na de la 'di lta bur spyod pa'i spros pa med do zhes bya ba'i tha tshig go/ /de bzhin du sbyin pa dang / tshul khrims la sogs pa yang don dam pa'i gnas skabs su gcig pa'i ngo bo nyid de tha dad pa med pas gnyis su med do//de bas na/ kau shi ka de bzhin nyid la gnyis su 'dod du zad do zhes bya ba la sogs pa gsungs te/ shes rab kyi pha rol tu phyin pa la sogs pa de dag thams cad ni de bzhin nyid kyi bdag nyid du gcig ste gnyis su med par gnas pa'o//chos bzang lha'i 'dun sa'i dpe brjod pa dang / shes rab kyi pha rol tu phyin pa las byung ba / de bzhin gshegs pa thams cad kyi sku gdung bstan to/ /shes rab kyi pha rol tu phyin pa ni rtags med pa dang /brjod du med pa la sogs pas spros pa thams cad dang bral ba'i phyir/ mtshan ma med pa'o/ /rang gi mtshan nyid dang bral ba'i phyir rtags med pa'o/ /tshig gi spyod yul ma yin pa'i phyir brjod du med pa'o/ /sgra'i bdag nyid ma yin pa'i phyir smos su med par ro / / so so rang gis rig pa'i phyir bsam gyis mi khyab pa'o/ /de'i 'og tu ngan 'gro thams cad dang theg pa dman pa'i bsam pa la sogs pa med pa dang / stong gsum gyi stong chen po'i 'jig rten gyi khams de bzhin gshegs pa'i sku gdung gis yongs su bkang ba bas kyang shes rab kyi pha rol tu phyin pa 'dzin pa bsod nams che ba dang /de'i rgyu dang / de bzhin gshegs pa dang shes rab kyi pha rol tu phyin pa gnyis su med pa dang / phyogs bcu'i sangs rgyas thams cad kyis chos rnam pa bcu gnyis bshad pa dang / shes rab kyi pha rol tu phyin pa klog pa gnyis mtshungs pa dang / phyogs bcu'i de bzhin gshegs pa thams cad la mchod pa dang shes rab kyi pha rol tu phyin pa la mchod pa mtshungs pa dang / phyir mi ldog pa'i sa la gnas pa dang / skyes bu nor gyi bdag po bu lon pa'i 'jigs skrag pa'i dpe brjod pa dang /yongs su mya ngan las 'da' ba'i chos nyid 'thob pa dang / nor bu rin po che chen po'i dpe brjod pa dang / yang 'jig rten gyi khams gang gA'i klung gi bye ma snyed de bzhin gshegs pa'i sku gdung gis yongs su bkang ba bas kyang shes rab kyi pha rol tu phyin pa 'dzin pa bsod nams che ba dang /de'i rgyu dang / chos kyi sku dang gzugs kyi sku dang ye shes kyi sku rnams mthong ba ston te/ ye shes kyi sku ni ye shes kyi tshogs so/ /'dus byas kyi chos nyid ces bya ba ni rnam par rtog pa dang / bcas pa'i ye shes kyi ngo bo nyid do/ /'dus ma byas kyi chos nyid ces bya ba ni brjod du med pa don dam pa'i ngo bo nyid ni 'dus ma byas kyi chos nyid do/ /theg pa gsum rgya cher bstan te de dag mtshan ma med pa'i tshul dang skye ba med pa dang / 'gag pa med pa'i tshul dang zhes bya ba la sogs pa la nyan thos rnams kyis 'bras bu'i gnas skabs su mya ngan las 'das pa las dgongs te gsungs so//don dam par shes rab kyi pha rol tu phyin pa ni pha rol lam / tshu rol ma yin thang ma yin/ gshong ma yin zhes bya ba la sogs pa don dam par yang yongs su grub pa'i gnas skabs na de lta bu'i rnam par rtog pa dang mtshan ma med pa'i phyir de skad bshad do//brgya byin gyis gsol pa bcom ldan 'das 'di ltar shes rab kyi pha rol tu phyin pa 'di ni pha rol tu phyin pa chen mo ste zhes bya ba ni shes rab kyi ngo bo nyid kyi pha rol tu phyin pa la bsams te smras pa'o//de ni chos thams cad mi dmigs pa yid la byed pas mi mthong ste yul che bas nam mkha' dang mtshungs so/ /shing ljon pa'i dpe la shes rab kyi pha rol tu phyin pa ni shing lta bu'o/ /de las gzhan pa rnams ni grib ma lta bu'o/ bdag gis mchod pa bas kyang gzhan la byin pa 'bras bu che ba ston to/ /rdo rje lta bu'i sku bshig ste de bzhin gshegs pa'i sku gdung du byin gyis brlabs so zhes bya ba 'dis ni bgo bsha' byas pa 'bras bu che ba bstan to/ /gzhan dag gi drung du song ste bshad ces bya bas ni ston pa'i byed pa bstan to//chos gang zhig la bdag gis rim gro dang bkur sti dang bsti stang dang mchod pa byas te bsten cing gnas par bya snyam na zhes bya ba ni de bzhin gshegs pa yang shes rab kyi pha rol tu phyin pa 'di la mchod pa mdzad na/ de las gzhan pa lta ci smos zhes bya bar ston to//kau shi ka rigs kyi bu'am rigs kyi bu mo nyan thos kyi theg pa la yang dag par zhugs pa'am/ rang sangs rgyas kyi theg pa la yang dag par zhugs pas zhes bya ba'i 'gres 'dis shes rab kyi pha rol tu phyin pa ni thams cad kyi rgyu'i gtso bo yin te/de bas na mchod par bya'o zhes bstan pa'o/ /de'i 'og tu 'dzam bu'i gling gi sems can thams cad dge ba bcu'i las kyi lam la bkod pa bas sems can gcig rgyun du zhugs pa'i 'bras bu la gzhag pa bsod nams kyi 'bras bu che bar bstan pa'i 'gres dang /des yang 'dzam bu'i gling gi sems can thams cad dgra bcom pa dang rang byang chub kyi bar la bkod pa bas shes rab kyi pha rol tu phyin pa glegs bam du byas te byin pa bsod nams che ba'i 'gres kyis bsod nams mang du bstan pa 'phel ba bstan nas/de'i rgyus zag pa med pa'i chos bstan pa dang / 'jig rten pa'i gang zag khyad par du 'phags pa thams cad mngon pa'i rgyur gyur pa dang / 'phags pa'i gang zag mngon pa'i rgyur gyur pa dang / de nas yang gling bzhi pa dang / stong gcig dang / stong gnyis dang /stong gsum gyi stong chen po dang / phyogs bcu'i 'jig rten gyi khams kyi sems can thams cad dgra bcom pa dang / rang byang chub kyi bar la bkod pa'i bsod nams pas shes rab kyi pha rol tu phyin pa glegs bam du byas te byin pa bsod nams che ba'i 'gres dang /de'i rgyus zag pa med pa'i chos bstan pa'i 'gres dang / 'jig rten pa'i gang zag khyad par du 'phags pa thams cad mngon pa'i rgyur gyur pa dang / 'phags pa'i gang zag mngon pa'i rgyur gyur pa bstan pa'i 'gres dang / de'i 'og tu bsod nams mang du bstan pa dang /tshul bzhin yid la byed pa gtso bor bstan pa'o/ /de la tshul bzhin yid la byed pa ni 'di yin te/ gnyis la spyod pa ma yin pa'i blos shes rab kyi pha rol tu phyin pa 'dzin pa zhes bya ba ni gnyis su med par kun tu spyod pa'i blos 'jug pa ni/tshul bzhin yid la byed pa zhes bya'o zhes bya ba'i tha tshig go/ /de'i 'og tu bsod nams mang du 'phel ba'i 'gres dang / don bstan pa gtso bo yin par ston te/ de la shes rab kyi pha rol tu phyin pa'i don ni 'di yin te/ shes rab kyi pha rol tu phyin pa ni gnyis su blta ba ma yin/gnyis su med par blta ba ma yin zhes bya ba ni rnam par mi rtog pa'i shes rab kyi pha rol tu phyin pa chos thams cad la rnam par rtog pa dang bral ba'i phyir gnyis su med pa'i ngo bo nyid do zhes bya bar yang mi rtog na/ gnyis kyi ngo bo nyid du lta ci smos te/de bas na shes rab kyi pha rol tu phyin pa de gnyis kyi tshul du yang mi blta/ gnyis su med pa'i tshul du yang mi blta zhes bya ba'i tha tshig go/ /de la mtshan mar ma yin/ mtshan ma med par ma yin zhes bya ba la sogs pas gnas skabs bcu bzhir rnam par rtog pa bcu bzhi med par ston te/dmigs pa dang / las kyi rnam par smin pa dang / shes bya'i don rab tu dbye ba dang / gnas gyur pa dang / de kho na'i don 'dzin pa dang / sa nas sa gzhan du 'phar ba dang / sa gzhan dang sgrub pa dang / yid la byed pa dang /spong ba dang / rab tu rtogs pa dang / chos nyid mngon sum du byed pa dang / de bzhin nyid sgom pa dang / mya ngan las 'das pa la ste/ de la dmigs pa 'dzin pa'i tshe gzugs la sogs pa kun brtags pa'i mtshan ma rnams mi 'dzin pa dang / mtshan ma med pa'o zhes rnam par rtog pa yang med pa'i phyir/mtshan mar ma yin/ mtshan ma med par ma yin zhes bya ba gsungs so/ /de bzhin du las kyi dus na yang srid par bya ba'i phyir blang ba'i rnam par rtog pa med la/ rnam par smin pa'i dus na yang 'gro ba rnams su dor ba'i rnam par rtog pa yang med pa'i phyir blang bar ma yin/dor bar ma yin zhes bya ba gsungs so/ /de bzhin du shes par bya ba'i chos rnams rab tu 'byed pa'i tshe yang yod pa'i dngos po la skur pa 'debs pa med pas dbri ba med la med pa'i dngos po la sgro 'dogs pa med pas bsnan pa med pa'i phyir dbri bar ma yin/bsnan par ma yin zhes bya ba gsungs so/ /de bzhin du so so skye bo'i gnas kyi tshe/ de bzhin gshegs pa'i snying po rang bzhin gyis yongs su dag pa'i phyir/ kun nas nyon mongs pa med la/ gnas gyur pa'i tshe yang nam mkha' bzhin du sngon ma byung ba'i rnam par byang ba med pa'i phyir/kun nas nyon mongs par ma yin/ rnam par byang bar ma yin zhes bya ba gsungs so/ /de bzhin du shes bya'i de kho na nyid yongs su brtags pa'i tshe dang / chos thams cad ma skyes pa dang / ma 'gags pa'i phyir chos nyid la skye ba dang / 'gag pa ma mthong bas/ skye bar ma yin 'gag par ma yin zhes bya ba gsungs so/ /sa 'og ma nas sa gong mar 'phar ba'i tshe yang don dam par sa gong mar rtogs pa'i chos khyad par du 'phags pa yang mi 'dzin la/ sa 'og mar rtogs pa'i chos ngan pa yongs su gtong ba yang med pa'i phyir/ gzung bar ma yin mi gzung bar ma yin zhes bya ba gsungs so/ /de bzhin du sa gong ma la gnas par bya ba'i rnam par rtog pa med cing / sa 'og ma la gnas par mi bya ba'i rnam par rtog pa med pa'i phyir/gnas pa dang mi gnas pa gnyi ga yang kun brtags pa tsam du zad pas/ de'i phyir gnas par ma yin mi gnas par ma yin zhes bya ba gsungs so/ /de bzhin du zhi gnas dang lhag mthong sgrub pa la sbyor ba na sgrub pa de la 'di ni yang dag par sgrub pa'o//'di ni yang dag pa ma yin pa'i sgrub pa'o zhes rnam par rtog pa med pa'i phyir/ yang dag par ma yin log par ma yin zhes bya ba gsungs so/ /de bzhin du de nyid la yang dag pa'i yid la byed pas mngon par brtson pa'i tshe yang 'di ni rigs pas bskyed pa'i yid la byed pa'o//'di ni mi rigs pas bskyed pa'o zhes bya ba'i rnam par rtog pa mi 'byung ba'i phyir/ rigs par ma yin/ mi rigs par ma yin no zhes bya ba gsungs so/ /de bzhin du nyon mongs pa'i sgrib pa dang / shes bya'i sgrib pa'i phyogs kyi gnas ngan len rnams spong ba na nyon mongs pa'i rnam par rtog pa phra mo rim gyis spong yang de lta bu'i rnam par rtog pa mi 'byung ba'i phyir/bag tsam ma yin par ma yin zhes bya ba gsungs so/ /de bzhin du rab tu rtogs pa'i tshe yang don dam pa de bzhin nyid kyi bdag nyid las sa'i rim kun tu 'gro ba'i don dang mchog gi don dang rgyu mthun pa'i don dang /kun nas nyon mongs pa dang / rnam par dag pa med pa'i don dang / dman pa med pa dang / lhag ma med pa'i don ces bya ba la sogs pa'i rim pas cha shas kyis rab tu rtogs par byed pa'i tshe yang de lta bu'i rnam par rtog pa med pa'i phyir/cha shas su ma yin/ cha shas med par ma yin zhes bya ba gsungs so/ /chos nyid mngon sum du byed pa'i tshe yang chos nyid rab tu rdzogs par byed pa na chos kyi rnam pa dang chos ma yin par rnam par brtags na gtan gyi dngos po'i bdag nyid du mi snang ba'i phyir/chos su ma yin/ chos ma yin par ma yin zhes bya ba gsungs so/ /de bzhin nyid sgom pa'i tshe yang de bzhin no zhes bya ba 'am gzhan no zhes bya ba'i rnam par rtog pa med pa'i phyir/ de bzhin nyid du ma yin de bzhin nyid ma yin par ma yin zhes bya ba gsungs so//mya ngan las 'das pa'i tshe yang yang dag pa'i don gyi mtha'o zhes bya ba de las bzlog pa'o zhes bya bar 'dzin pa med pa'i phyir/ yang dag pa'i mtha' ma yin yang dag pa'i mtha' ma yin par ma yin zhes bya ba gsungs so//'di ni gnyis su med pa'i don to zhes bya ba la/ don ces bya ba 'di ni brjod par bya ba'i rnam grangs dang / dmigs pa'i rnam grangs te/ gnyis su med pa 'di ni bshad pa'i shes rab kyi pha rol tu phyin pa'i brjod par bya ba'i don dang rnam par mi rtog pa'i shes rab kyi pha rol tu phyin pa la dmigs pa'i tshe shes rab kyi pha rol tu phyin pa'i don ni dmigs pa'o zhes bshad pa'o//de'i 'og tu don dang ldan la tshig 'bru dang ldan par zhes bya ba'i 'gres kyis ni bdag gis bzung ba'i bsod nams pas bshad pa'i bsod nams che bar ston to//de'i 'og tu phyogs bcu'i sangs rgyas thams cad la bde ba'i yo byad thams cad kyis mchod pa byas pa'i bsod nams pas 'di bshad pa'i bsod nams che ba'i 'gres dang / bskal pa tshad med grangs med dpag tu med par dmigs pa'i tshul gyis pha rol tu phyin pa drug la spyad pa bas dmigs pa med pa'i tshul du bshad pa bsod nams che ba'i 'gres dang /dmigs pa dang bcas pa'i pha rol tu phyin pa'i 'gres so/ /shes rab kyi pha rol tu phyin pa ltar bcos pa'i 'gres bzhi ste/ dmigs pa dang bcas pa'i sgom pa bstan pa'i 'gres ni dang po'o//'bras bu dang bcas pa'i pha rol tu phyin pa bstan pa'i 'gres ni gnyis pa'o/ /bsod nams kyi phung po dpag tu med pa 'thob pa'i 'gres ni gsum pa'o/ /rjes su yi rang ba dang yongs su bsngo ba bstan pa'i 'gres ni bzhi pa'o//shes rab kyi pha rol tu phyin pa yongs su dag pa bstan pa'i 'gres kyang rnam pa gnyis te/ mi dmigs par gdams pa'i 'gres ni dang po'o/ /chos thams cad la mi lta ba dang / mchog tu 'dzin pa las yang dag par gnas pa'i 'gres ni gnyis pa'o//de'i 'og tu 'dzam bu'i gling dang / gling bzhi pa dang / stong gcig dang / stong gnyis dang / stong gsum dang / phyogs bcu'i 'jig rten gyi khams kyi sems can rnams rgyun du zhugs pa'i 'bras bu la bkod pa bsod nams pas gzhan dag la bshad pa'i bsod nams che bar bstan pa'i 'gres drug dang /de bzhin du lan cig phyir 'ong ba'i 'bras bu nas rang byang chub kyi bar la bkod pa'i bsod nams pas/ gzhan dag la bshad pa'i bsod nams che bar bstan pa yang 'dzam bu'i gling dang / gling bzhi pa la sogs pa'i dbang gis 'gres drug go//de bzhin du bla na med pa yang dag par rdzogs pa'i byang chub yang dag par 'dzin du 'jug pa'i bsod nams pas bshad pa'i bsod nams che bar bstan pa yang 'dzam bu'i gling dang / gling bzhi pa la sogs pa'i dbang gis 'gres drug go//de bzhin du phyir mi ldog pa'i sa la bkod pa'i yang 'gres drug go/ /de nas yang phyir mi ldog pa'i sa la bkod pa de dag la bshad pa'i bsod nams pas kyang gcig gcig la myur du mngon par shes par bya ba'i phyir bshad pa'i bsod nams che ba bstan pa la yang 'gres drug go//brgya byin gyis bstan pa'i 'gres dang / gnas brtan rab 'byor rjes su yi rang ba'i 'gres te 'dir ni 'gres de rnams bstan to/ /de nas yang bsod nams che bar bstan pa'i skabs 'di nyid du rjes su yi rang ba'i bsod nams kyang mchog tu 'gyur bar bstan nas/de'i 'og tu bshad pa'i skabs dbye ba'i phyir byang chub sems dpa' byams pas/ btsun pa rab 'byor zhes bya ba la sogs pa gsungs te/ sems can thams cad dang nyan thos dang / rang sangs rgyas kyi theg pa pa rnams kyi sbyin pa dang /tshul khrims dang / sgom pa la rjes su yi rang ba'i bsod nams bya ba'i dngos po dag pas byang chub sems dpa' mi dmigs pa'i yid la byed pa la zhugs pa'i rjes su yi rang ba dang / yongs su bsngo ba'i bsod nams gcig mchog nyid do zhes bya ba'i tha tshig go//de'i 'og tu de'i rgyu gsungs pa/ 'di ltar nyan thos dang rang sangs rgyas kyi theg pa pa rnams kyi sbyin pa las byung ba'i bsod nams bya ba'i dngos po la sogs pa ni bdag 'dul ba'i phyir nye bar gnas par zad kyi/ byang chub sems dpa' ni sems can thams cad gdul ba'i phyir ro//de skad smras pa dang / gnas brtan rab 'byor gyis 'di la gal bzung ste smras pa/ phyogs bcu'i sangs rgyas thams cad kyi dge ba'i rtsa ba thams cad sems can bsdu ba dang / yongs su smin par bya ba dang / rnam par grol bar bya ba la sogs pa dang /phung po lnga dang / sangs rgyas kyi chos thams cad dang / bstan pa'i chos kyi phyogs dang / thob pa'i chos kyi sku dang byang chub sems dpa'i dge ba'i rtsa ba rnams dang / yang dag par rdzogs pa'i byang chub la dmigs te 'byung ba yin na/ byang chub sems dpa' rnams kyi rjes su yi rang ba'i dge ba'i rtsa ba de dngos po med cing dmigs pa med pa la 'jug pas phyin ci log bzhi dang mtshungs par 'gyur ro//gal te dngos po ji lta ba dang / dmigs pa ji lta ba bzhin du 'ga' zhig yod na ni de ltar 'gyur na/ gzugs dang tshor ba la sogs pa chos thams cad kyang yod la/ byang chub kyi sems dang / pha rol tu phyin pa rnams dang / phung po dang / khams dang skye mched la sogs pa nas sangs rgyas kyi chos ma 'dres pa'i bar du yang yod par 'gyur ro/ /ji ste dngos po ji lta ba dang / dmigs pa ji lta ba bzhin du yod pa ma yin na de ltar gyur na ni thams cad med pas dngos po dang dmigs pa dang / dge ba'i rtsa ba dang / rjes su yi rang ba dang / bsod nams bya ba'i dngos po rnams med par yongs su bsngo ba ji ltar grub par 'gyur ba de bsnyad dgos so zhes dris pa ste/ji ste dngos po dang dmigs pa ji lta bar byang chub kyang de bzhin sems kyang de bzhin zhes bya ba ni ji ltar dngos po dang dmigs pa dag yod pa ma yin pa de bzhin du byang chub kyi sems la sogs pa yang gal te med na zhes bya ba'i tha tshig go// // bam po bcu dgu pa/ de skad ces smras pa dang / byang chub sems dpa' byams pas gal te stong pa nyid shes pa yongs su smin pa'i mtshan nyid byang chub sems dpa' yin na ni de lta bu mtshan ma byas te yongs su bsngo bas de la ni klan ka med do//ji ste byang chub sems dpa' yongs su ma smin pa legs par ma bslabs pa gsar bu zhig yin na de dag la ni klan ka de rigs so zhes smras te/ stong pa nyid shes pa dag ni mtshan mar byas te/ yongs su mi bsngo'o/ /btsun pa rab 'byor gal te byang chub sems dpa' sems dpa' chen po pha rol tu phyin pa drug la spyod spyod pa zhes bya ba la sogs pas ni de gsar bu yin pas phyin ci log dang mtshungs pa'i skyon med par ston to//de'i 'og tu btsun pa rab 'byor de ltar bstan pa 'di ni theg pa la gsar du zhugs pa'i byang chub sems dpa'i mdun du mi bshad do zhes bya ba la sogs pas ni byang chub sems dpa' gsar bu ni stong pa nyid 'di bshad pa'i snod ma yin par ston to//gal te de la dad pa tsam mam zhes bya ba la sogs pas ni bshad na thob pa yongs su nyams par 'gyur ba dang / ma thod pa yongs su nyams par 'gyur ba'i skyon to//byang chub sems dpa' phyir mi ldog pa'i mdun du bshad par bya'o zhes bya bas ni yongs su smin pa rnams la bshad na nyes pa med par ro / /de nas btsun pa rab 'byor byang chub sems dpa' sems dpa' chen pos rjes su yi rang ba dang ldan pa'i bsod nams bya ba'i dngos po yang bla na med pa yang dag par rdzogs pa'i byang chub tu de ltar yongs su bsngo bar bya'o zhes bya ba la sogs pas ni don dam pa'i yongs su bsngo ba ston to// mtshan mar byas te/ yongs su bsngo ba ni rnam pa bzhis mi rigs te/rjes su yi rang ba'i sems dang yongs su bsngo ba'i sems gnyis phrad pa med pa dang / dngos po la dmigs pa dang / dge ba'i rtsa ba dang / bsod nams bya ba'i dngos po rnams phrad pa med pa dang / bsngo ba dang / yongs su bsngo bar bya ba gnyis phrad pa med pa dang /yongs su bsngo ba yang med pa'i phyir te/ sems gang gis rjes su yi rang zhing dge ba'i rtsa ba de dag bla na med pa yang dag par rdzogs pa'i byang chub tu yongs su sngo bar byed pa'i sems de ni zad cing 'gags la med de rnam par 'gyur zhes bya bas ni sems gnyis phrad pa med par ston to//dngos po de dag dang / dmigs pa de dag dang / dge ba'i rtsa ba de dag dang / rjes su yi rang ba dang ldan pa'i bsod nams byas pa'i dngos po de yang zad cing 'gag pa med de/ rnam par gyur pa yin na zhes bya ba la sogs pa ni dngos po la sogs pa med par ston to//ci sems kyis sems yongs su bsngo'am/ gal te sems kyis sems yongs su bsngor ni sems phrad par 'gyur ba med de zhes bya ba ni yongs su bsngo ba dang / yongs su bsngo bar bya ba gnyis med par ston to//sems kyi rang bzhin gang yin pa de ni yongs su bsngo bar mi nus so zhes bya bas ni yongs su bsngo ba'i sems med par ston te/ sems de dngos po med pa'i ngo bo nyid yin pas brtags pa ste dngos po med pa ni yongs su bsngo bar mi nus so zhes bya bar ston to/ gal te byang chub sems dpa' sems dpa' chen po shes rab kyi pha rol tu phyin pa la spyod pa'i tshe 'di ltar shes rab kyi pha rol tu phyin pa ni dngos po med pa'o zhes bya bar shes na zhes bya bar la sogs pa ni dngos po med pa'i mtshan nyid ston to/ /de nas yang byang chub sems dpa' byams pas btsun pa rab 'byor ji ltar theg pa la gsar du zhugs pa'i byang chub sems dpa' sems dpa' chen pos zhes bya ba la sogs pas theg pa la gsar du zhugs pa'i rjes su yi rang ba dang /yongs su bsngo ba gnyis kyi ngo bo nyid dris so/ /yang byams pa gal te theg pa la gsar du zhugs pa'i byang chub sems dpa' zhes bya ba la sogs pas ni rab 'byor gyis/des kyang bslab pa'i dbang gis mi dmigs pa nyid kyi tshul gyis bya'o zhes ston to/ /des bdud kyi las de dag thos nas 'grib pa'am 'phel ba med par 'gyur ro zhes bya ba ni de dag tu rnam par mi rtog pa'i phyir ro//byang chub sems dpa'i rigs yongs su gzung bar 'gyur ro zhes bya ba ni de bzhin nyid yid la byed pa'o/ /de'i 'og tu spyir rjes su yi rang ba'i rnam grangs bstan nas / de'i 'og tu byams pa gzhan yang byang chub sems dpa' sems dpa' chen po theg pa la gsar du zhugs pas sangs rgyas bcom ldan 'das lam gyi rgyun bcad pa/spros pa dang srid pa'i tshul gyis rgyun bcad pa zhes bya ba la sogs pas don dam par bshad pa'i skabs 'byed do/ /de'i 'og tu byang chub sems dpa' byams pas de la ji ltar phyin ci log tu mi 'gyur ba dris pa dang /de nas gnas brtan rab 'byor gyis yongs su bsngo ba kha na ma tho ba med pa 'gres rnam pa dgu bstan te/ de la 'du shes rnam pa drug med pas/ phyin ci log tu mi 'gyur gyi de las gzhan du na phyin ci log tu 'gyur ro zhes bya ba ni 'gres dang po'o//sangs rgyas la sogs pa la sems pa'i sems dang yongs su bsngo ba'i sems kyang zad pa dang / byang chub kyang med pa dang / chos rnams kyang ngo bo nyid kyi stong pa nyid dang / yongs su bsngo ba yang med pa'i phyir/don dam par yongs su bsngo ba med do zhes de ltar sems na mthun par yongs su bsngo ba yin no zhes bya ba ni 'gres gnyis pa'o/ /de nas yang 'das pa dang ma 'ongs pa dang / da ltar byung ba'i nyan thos rnams dang / byang chub sems dpa' rnams dang /sangs rgyas rnams dang / so so skye bo thams cad kyi bsod nams gang yin pa de dag la rjes su yi rang nas yongs su bsngo ba na/ de dag zad par yid la byed pa dang / yongs su bsngo ba med par yid la byed pa dang / ngo bo nyid kyis stong pa nyid yin par yid la byed pa na bla na med pa'i yongs su bsngo bas yongs su bsngo zhing zhes bya ba ni gsum pa'o//de nas yang yongs su bsngo ba'i bsod nams mngon par 'du byed pa de/ chos thams cad kyis dben pa nyid dang chos thams cad kyang ngo bo nyid kyis dben par shes shing mchog nas mi mnyam pa dang / mnyam pa'i bar gyis yongs su bsngo bas yongs su bsngo na zhes bya ba ni bzhi pa'o/ /de nas yang snga ma bzhin du dge ba'i rtsa ba thams cad la rjes su yi rang nas byang chub tu yongs su bsngo ba na/ sangs rgyas rnams dang / nyan thos dang / rang sangs rgyas dang / byang chub sems dpa' rnams dang /dge ba'i rtsa ba rnams dang / yongs su bsngo ba dang / byang chub dang yongs su bsngo ba'i sems de dag gis ngo bo nyid mtshungs par shes nas yongs su bsngo na zhes bya ba ni lnga pa'o/ /de'i 'og tu dge ba'i rtsa ba rnams la mtshan mar byas te/ yongs su bsngo zhing 'das pa'i sangs rgyas rnams la yang 'das pa'i yid la byed pas mtshan mar byed cing yul yin par yid la byed na phyin ci log tu 'gyur ro//gal te dge ba'i rtsa ba de dag dang / mngon par 'du byed pa de dag dang / sems bskyed pa de dag shes par mi byed cing tshad mar mi byed na de yang dag par bsngo ba yin no zhes bya ba ni drug pa'o//de nas byang chub sems dpa' byams pas mtshan mar mi byed pa dang / yongs su bsngo ba gnyis mi 'gal bar ji ltar rung snyam nas dris pa dang / de nas gnas brtan rab 'byor gyis de ni byang chub sems dpa' thabs la mkhas pa rnams kyi yin no zhes bya ba bstan to//de nas byang chub sems dpa' byams pas 'di skad bstan te/ de la yang dag par yongs su bsngo bar 'dod pa'i byang chub sems dpas 'di ltar yongs su brtag par bya ste/ sangs rgyas de dag dang /dge ba'i rtsa ba de dag dang / mngon par 'du bya ba de dag dang / sems de dag kyang yod pa ma yin na/ 'on kyang bdag ni de dag thams cad mtshan mar byas nas rnam par rtog pa lta zhig/ /de ltar mtshan mar byas shing rnam par rtog pas yongs su bsngo ba ni de bzhin gshegs pas rjes su gnang ba ma mdzad de/de ni kha zas zhim po dug dang mtshungs so/ /de bas na de ltar yongs su bsngo bar mi bya zhing de la bslab par yang mi bya'o/ /de bas na sangs rgyas nyid tshad mar byas la sangs rgyas bcom ldan 'das de dag gis de dag thams cad ji ltar mkhyen pa de bzhin du bdag gis kyang yongs su bsngo'o zhes yongs su sngo bar byed pa dug med pa'i yongs su bsngo ba'i 'gres ni bdun pa'o//de nas chos thams cad khams gsum dang dus gsum du ma gtogs par yid la byed pas yongs su bsngo ba ni dug med pa'o//de las gzhan du yongs su bsngo ba ni dug dang bcas pa'o zhes bya ba ni brgyad pa'o/ /de nas yang sangs rgyas kyi ye shes kyi spyod yul gyi chos nyid kyis bdag yongs su bsngo bar bya'o zhes bya ba ni dgu pa'o/ / de nas bcom ldan 'das kyis de'i tshig las rnam pa mang du rjes su yi rang bar mdzad nas rnam pa gsum gyis bsod nams mang du 'phel bar bstan pa stong gsum gyi stong chen po'i 'jig rten gyi khams kyi sems can thams cad kyis dge ba bcu'i las kyi lam dang / bsam gtan dang /tshad med pa dang / gzugs med pa'i snyoms par 'jug pa dang / mngon par shes pa thob pa rnams kyi bsod nams pas chags pa med pa'i yongs su bsngo ba 'di bsod nams ches mang ngo zhes bya ba ni gcig go/ /de la sems can de dag thams cad rgyun du zhugs pa la sogs pa nas/dgra bcom pa dang / rang byang chub kyi bar du gyur pa rnams la rkyen bzhis ji srid 'tsho'i bar du bsnyen bkur byas pa'i bsod nams pas lhag pa zhes bya ba ni gnyis pa'o/ /de nyid la sems can de dag thams cad byang chub sems dpar gyur pa rnams la phyogs bcu'i sems can thams cad kyis de dag re re la yang rkyen bzhi dang bde ba'i yo byad thams cad kyis bskal pa gang gA'i klung gi bye ma skyed du bsnyen bkur byas pa'i bsod nams kyi phung po de lta bu de dag pas kyang lhag go zhes bya ba ni gsum pa'o//bcom ldan 'das gal te bsod nams bgyi ba'i dngos po de la gzugs mchis su lags na ni 'jig rten gyi khams gang gA'i klung gi bye ma snyed du yang mi shong bar 'gyur ro zhes bya ba ni der kun mi chud do zhes bya ba'i tha tshig go//de'i 'og tu bsod nams snga ma rnams ni mtshan ma'i 'du shes dang /dmigs pa'i 'du shes can yin pas dman pa yin gyi yongs su bsngo ba'i bsod nams kyi phung po la ni de dag med pa'i phyir de bas lhag go zhes bya ba'i 'gres dang / de'i 'og tu 'dod pa na spyod pa lha'i bdag po thams cad dang / lha rnams dang / tshangs pa thams cad kyis mchod pa byas pa dang / rab tu bsngags pa brjod pa'i 'gres gnyis dang / de'i 'og tu stong gsum gyi stong chen po'i 'jig rten gyi khams kyi sems can thams cad byang chub sems dpar gyur pa rnams kyi dmigs pa dang bcas par yongs su bsngo ba'i bsod nams kyi phung po bas byang chub sems dpa' gcig gi mi dmigs par yongs su bsngo ba'i bsod nams kyi phung po lhag par che ba bstan pa'i 'gres so//mi len mi gtong / mi rlom mi brnyas shing dmigs pa yang ma yin zhes bya ba ni sangs rgyas de rnams dang dge ba'i rtsa ba rnams de bzhin nyid du dman pa dang lhag pa med pa'i don gyi dbang gis mnyam pa nyid du bstan pa'o//de bzhin du skye ba dang / 'gag pa dang / kun nas nyon mongs pa dang / rnam par byang ba la sogs pa med pa'i phyir ji ltar sangs rgyas rnams dang / nyan thos dang / rang sangs rgyas dang / byang chub sems dpa' rnams dang / so so'i skye bo de dag dang / dge ba'i rtsa ba rnams dang / yongs su bsngo ba'i sems kyang de bzhin nyid la sogs pa la gnas pa de bzhin du bdag kyang rjes su yi rang ngo zhes bya ba ni rjes su yi rang ba gcig pa'o//de nas yang chos thams cad ni rnam par grol bar mtshungs te/ de dang mtshungs pas chos thams cad mnyam pa'o/ /chos thams cad ngo bo nyid kyis dben pa'i phyir sngon so so'i skye bo'i tshe ma bcings ma grol ba'o/ /chos thams cad rang bzhin gyis rnam par dag pa'i phyir sngar kun nas nyon mongs pa med pa dang /phyis rnam par byang ba med pa'o/ /chos thams cad gzod ma nas zhi ba'i phyir sngar rgyu dang rkyen gyi dbang gis skye ba med do/ /ngo bo nyid med pas 'byung ba med do/ /phyis 'gag pa med cing 'pho ba med pa dang 'jig pa med do//de ltar bcings pa dang grol ba med pa dang / kun nas nyon mongs pa med pa dang / rnam par byang ba med pa dang / skye ba dang 'byung ba dang 'gag pa med pa dang / 'pho ba dang 'jig pa med pas chos thams cad mnyam mo zhes so sor rtog cing rjes su yi rang ba ni gnyis pa'o//de nas yang phyogs bcu'i sangs rgyas thams cad la bde ba'i yo byad thams cad kyis bsnyen bkur byas pa dang / dmigs pa dang bcas pa'i pha rol tu phyin pa drug gis bsod nams bsags pas mi dmigs pa'i tshul gyis pha rol tu phyin pa spyad pa'i bsod nams kyi phung po yongs su bsngo ba'i bsod nams che bar bstan pa'i 'gres te/'di dag ni rjes su yi rang ba'i 'gres so/ /de ltar shes rab kyi pha rol tu phyin pa mchod pa dang bklags pa dang sbyin pa la sogs pa la rjes su yi rang ba dang / yongs su bsngos pa'i bsod nams rgya chen po thos nas gnas brtan shA ri'i bu dad pa skyes te 'khor gzhan rnams dad pa bskyed pa'i phyir bcom ldan 'das shes rab kyi pha rol tu phyin pa ni shin tu rnam par dag pa'i slad du snang bar bgyid pa'o zhes bya ba la sogs pa tshig bcu bdun gyis shes rab kyi pha rol tu phyin pa 'di bstod pa la brtsams so//lan gsum du bzlas te chos kyi 'khor lo rnam pa bcu gnyis su bskor ba'o zhes bya ba ni bcom ldan 'das kyis bden pa bzhi'i chos kyi 'khor lo lan gsum du bzlas te rnam pa bcu gnyis su bskor zhes bya'o/ / de la 'di ni lan gsum du bzlas nas bskor ba ste/ 'di ni bden pa bzhi'o zhes bya bar bden pa bzhi'i ngo bo nyid kyi le'u tshig ni gcig go/ /bden pa bzhi po de dag nyid yongs su shes par bya ba dang / spang bar bya ba dang / mngon sum du bya ba dang / bsgom par bya ba'i le'u tshig ni bskor ba gnyis so//bden pa bzhi po de dag nyid bdag gis yongs su shes so/ /spangs so/ /mngon sum du byas so/ /bsgoms so zhes bya ba'i le'u tshig ni bskor ba gsum ste/ de dag ni lan gsum du bzlas te bskor ba'o/ /de la sdug bsngal gyi bden pa la sdug bsngal gyi ngo bo nyid dang yongs su shes par bya ba dang /yongs su shes so zhes bya ba ni rnam pa gsum mo/ /kun 'byung ba'i bden pa la yang kun 'byung ba'i ngo bo nyid dang / spang bar bya ba dang spangs so zhes bya ba ni rnam pa gsum mo/ /'gog pa'i bden pa la yang 'gog pa'i ngo bo nyid dang /mngon sum du bya ba dang / mngon sum du byas so zhes bya ba ni rnam pa gsum mo/ /lam gyi bden pa la yang lam gyi ngo bo nyid dang / bsgom par bya ba dang / bsgoms so zhes bya ba ni rnam pa gsum ste/ de ltar na rnam pa bcu gnyis so//bcom ldan 'das shes rab kyi pha rol tu phyin pa la ji ltar gnas par bgyi zhes bya ba shes rab kyi pha rol tu phyin pa la gnas pa'i thabs sngar brgya byin gyis dris zin la/ bshad kyang zin pas shes rab kyi pha rol tu phyin pa la gnas pa'i thabs dris pa ni ma yin gyi/'dir ni ji ltar gnas par bgyi zhes bya ba ji ltar gus shing 'jar bas gnas par bya zhes bya ba'i tha tshig go/ /shes rab kyi pha rol tu phyin pa nyid ston pa/ ston pa nyid shes rab kyi pha rol tu phyin pa'o zhes bya ba ni sangs rgyas kyi bya ba byed pa'i phyir tha dad pa med par brtags te bstan pa'o//shA ri'i bus dris pa 'di ci las byung gleng gzhi gang yin zhe na/ dgos pa de tsam gyis ma mgu nas rnam par rtog pa ste/ de bas shA ri'i bus 'og nas kau shi ka shes rab kyi pha rol tu phyin pas yongs su bzung ba rnams ni zhes bya ba la sogs pas de gtso bo yin par bstan te/de las gzhan pa'i pha rol tu phyin pa thams cad bla na med pa yang dag par rdzogs pa'i byang chub kyi rgyur gyur pa yang shes rab kyi pha rol tu phyin pa'i dbang gis gyur te/ de bas na 'di la rab tu gus par bya'o zhes bstan pa'o//de dag thams cad rnam pa thams cad mkhyen pa nyid du yongs su bsngo bas na zhes bya ba ni rjes su yi rang bas so/ /pha rol tu phyin pa lnga rnams sbyin pa'i pha rol tu phyin pas yongs su bzung na / pha rol tu phyin pa'i ming mi 'thob po zhes bya ba ni pha rol tu phyin pa drug po dag gcig la gcig gnas shing gcig gi rgyu gcig yin par sngar bstan pa'i phyir smos so//de ni de ltar ma yin te kau shi ka de ni de ltar ma yin no zhes bya ba ni pha rol tu phyin pa drug po dag las gcig yongs su rdzogs par byed pa'i tshe yang drug car yongs su rdzogs par 'gyur bas/phan tshun gcig gi rgyur gcig 'gyur ba tsam du zad kyi/ shes rab kyi pha rol tu phyin pa ltar thams cad kyi bdag nyid kyis rnam pa thams cad du rgyur 'gyur ba ni ma yin par ston to/ /bcom ldan 'das shes rab kyi pha rol tu phyin pa de ji ltar mngon par bsgrub par bgyi zhes bya ba 'dir yang shes rab kyi pha rol tu phyin pa mngon par bsgrub pa'i rnam pa dris pa ni ma yin gyi shes rab kyi pha rol tu phyin pa mngon par bsgrub pa'i 'bras bu dris pa'o//gzugs mngon par bsgrub pa med pa'i phyir zhes bya ba ni gzugs dngos po med pa'i phyir zhes bya ba'i tha tshig go//bcom ldan 'das ji ltar gzugs mngon par bsgrub pa ma mchis pa'i slad du shes rab kyi pha rol tu phyin pa mngon par bsgrub par bgyi zhes bya ba ni zhus pa gnyis pa ste/ shes rab kyi pha rol tu phyin pa rnam pa gang gis mngon par bsgrub pa na gzugs la sogs pa med par rigs zhes bya ba'i tha tshig go//shA ri'i bu gzugs mngon par 'du bya ba med pa dang / skye ba med pa dang / 'gag pa med pa dang 'byung ba med pa dang / 'jig pa med pa dang / dmigs pa med pas shes rab kyi pha rol tu phyin pa mngon par bsgrub par bya'o zhes bya ba ni yongs su grub pa'i gnas skabs na kun brtags pa'i gzugs mngon par 'du byed pa med do//skye ba dang / 'gag pa gnyis kyang rgyun gyi dbang gis med do/ /skad cig re re la yang 'byung ba dang 'jig pa gnyis med do//rnam pa thams cad skye ba med pas dmigs pa med do zhes sems shing yid la byed pa des gang gi tshe shes rab kyi pha rol tu phyin pa sgom pa de'i tshe chos gang yang thob par mi byed ces bya ste/ de'i tshe ni chos gang yang med do/ /shes rab kyi pha rol tu phyin pa'i grangs su 'gro'o zhes bya ba ni chos thams cad kyi dngos po med pa'i pha rol tu son pa rnam par mi rtog pa rtsol ba med pa ni shes rab kyi pha rol tu phyin pa zhes bya'o//shes rab kyi pha rol tu phyin pa ni rnam pa thams cad mkhyen pa nyid kyang thob par mi byed/ dmigs par mi byed do zhes bya ba ni chos kyi sku'i gnas skabs na de nyid shes rab kyi pha rol tu phyin pa de nyid rnam pa thams cad mkhyen pa nyid ces bya ste/ rnam pa thams cad mkhyen pa nyid kyang gzhan la/ shes rab kyi pha rol tu phyin pa yang gzhan zhes bya ba mi dmigs so//kau shi ka shes rab kyi pha rol tu phyin pa ni ming ji lta ba dang mtshan ma ji lta ba dang / mngon par 'du byed pa ji lta ba bzhin du thob par mi byed pa yin no zhes bya ba ni chos nyid rnam par mi rtog pa ste/ shes rab kyi pha rol tu phyin pa chos gang yang ming dang mtshan ma dang mngon par 'du byed pas mi 'dzin to//de bas na rnam pa thams cad mkhyen pa nyid ni ming de yang mtshan ma de dang / mngon par 'du byed pa des dmigs su med do/ /bcom ldan 'das 'o na ji ltar thob par bgyid pa lags zhes bya ba ni/ shes rab kyi pha rol tu phyin pa ni rnam pa thams cad mkhyen pa nyid thob par byed do zhes bya ba kun rdzob tu yod pas ji ltar thob par byed ces zhus pa'o//ci nas kyang mi dmigs pa dang mi len pa dang mi gnas pa dang mi 'dor ba dang mngon par zhen pa med pa dang / mi 'dzin pa dang / mi gtong ba de ltar shes rab kyi pha rol tu phyin pa rnam pa thams cad mkhyen pa nyid thob par byed pa med de chos gang yang thob par byed pa med do zhes bya ba ni gang gi tshe shes rab 'di dmigs par bya ba dang /dmigs par byed pa'i dngos po mnyam pas mnyam par gyur pa na chos gang yang bdag gis gzung bar bya bar mi dmigs pa dang /bdag rang 'dzin pa po'i bdag nyid du mi len pa dang / mig la sogs pa ltar gnas kyi dngos por yang dag par rjes su mi mthong ba dang / nyon mongs pa'i rnam par rtog pa dor bar bya ba gang yang dag par rjes su mi mthong ba dang /'di ni bden pa'o zhes bden pa'i bdag nyid du yang cung zad kyang mngon par zhen pa med pa dang / gzung ba dang sbyar bar bya ba dkar po dang nag po'i phyogs su gyur pa yang ma mthong bas mi 'dzin mi gtong ba de'i tshe bdag nyid rnam pa thams cad mkhyen pa nyid kyi ngo bor gnas pa'i phyir/rnam pa thams cad mkhyen pa nyid thob par byed ces kyang bshad/ gang yang thob par mi byed ces kyang bshad do/ /bcom ldan 'das shes rab kyi pha rol tu phyin pa 'di ngo mtshar che'o zhes bya ba ni de'i chos thams cad med pas mi skye ba dang /mi 'gag pa dang / mngon par 'du mi byed pa dang / mi dmigs pa dang / 'jig par mi 'gyur ba'i phyir gnas skabs de na mi skye ba la sogs pa'i ming gis brjod do/ /shes rab kyi pha rol tu phyin pa ni chos thams cad thob par bgyid pa'o/ /shes rab kyi pha rol tu phyin pa ni chos thams cad thob par mi bgyid pa'o zhes de lta bu'i 'du shes su gyur na zhes bya ba ni dngos po dang /dngos po med pa gnyi gar rnam par rtog pa'i phyir de skad bshad do/ /gzugs la yid ches par mi 'gyur ro zhes bya ba ni gzugs dngos po med pa'i mtshan nyid du yid ches shing khong du chud par gyur to zhes bya ba'i tha tshig go//de bzhin du gzhan dag la yang sbyar ro/ /rab 'byor gzugs mi dmigs pas shes rab kyi pha rol tu phyin pa la yid ches par 'gyur zhes bya ba la sogs pa ni gzugs la sogs pa'i chos thams cad ni dngos po med pa'i ngo bo nyid du khong du chud pas/shes rab kyi pha rol tu phyin pa la yid ches te/ mngon sum du byas par 'gyur ro zhes bya ba'i tha tshig go/ /gzugs che bar mi bgyid chung bar mi bgyid ces bya ba na yongs su grub pa'i chos nyid kyi gzugs che bar mi byed la/kun brtags pa'i gzugs kyang chung bar yang mi byed pa'o/ /de bzhin du thams cad la sbyar bar bya'o/ /bcom ldan 'das de ltar 'du shes su gyur pa'i byang chub sems dpa' sems dpa' chen po ni shes rab kyi pha rol tu phyin pa la spyod pa ma lags so zhes bya ba ni gal te shes rab kyi pha rol tu phyin pa 'ga' zhig byed na ni de ltar gyur na/shes rab kyi pha rol tu phyin pa 'di mi byed do zhes de skad brjod du rung na/ gang gi phyir shes rab kyi pha rol tu phyin pa ni yongs su rtog pa thams cad las 'das te ci yang mi byed pas de'i phyir shes rab kyi pha rol tu phyin pa gzugs che bar mi byed chung bar mi byed ces bya ba la sogs pa 'di dag brjod par mi rigs so//bcom ldan 'das 'di ltar de ni shes rab kyi pha rol tu phyin pa'i rgyu mthun pa ma lags so zhes bya ba ni chos thams cad ngo bo nyid kyis rang gi ngo bo nyid ji lta ba bzhin du gnas pas de la gang yang shes rab kyi pha rol tu phyin pa'i rgyu mthun pa ma yin no zhes bya ba'i tha tshig go//da ni shes rab kyi pha rol tu phyin pa yang gzugs la sogs pa bzhin du rnam grangs bcu gnyis kyis bstan te/ sems can skye ba ma mchis pa'i slad du zhes bya ba ni sems can skye ba med pa'i mtshan nyid kyis shes rab kyi pha rol tu phyin pa yang mtshan nyid med par blta bar bya'o/ /de la sems can skye ba ma mchis pa'i slad du zhes bya ba nas/ mthong ba po skye ba ma mchis pa'i slad du zhes bya ba'i bar du ni gang zag la bdag med pa la dgongs pa'o//gzugs skye ba ma mchis pa'i slad du zhes bya ba nas sangs rgyas kyi chos skye ba ma mchis pa'i slad du zhes bya ba'i bar du ni chos la bdag med pa la dgongs pa'o/ /mngon par rdzogs par byang chub pa ma mchis pa ni rtogs pa med pa'o//sems can stobs dang mi ldan pa'i slad du zhes bya ba ni nyam chung ba'am shes rab kyi stobs med pa'o/ /chos blun pa nyid kyi phyir ro zhes bya ba ni chos rnams dngos po med pa'i ngo bo nyid yin pa'i phyir zhes bya ba'i tha tshig go/ /de ltar shes rab kyi pha rol tu phyin pa 'di bdag nyid che zhing rgya che ba thos nas gnas brtan shA ri'i bu dad pa skyes te/byang chub sems dpa' rnams kyi phyir zhu ba rnam pa bzhi brtsams pa/ byang chub sems dpa'i 'chi 'pho dang skye ba dang / yang dag par zhugs pa'i dus kyi tshad dang /bsnyen bkur byas pa'i de bzhin gshegs pa'i tshad dang / pha rol tu phyin pa spyad pa'i dus kyi tshad do/ /skabs de nyid du dam pa'i chos spong ba'i gtam gyi skabs dbye'o / /de nas yang skabs de nyid du shes rab kyi pha rol tu phyin pa la mos par dka' ba'i skabs phye'o//de nas yang mos par dka' ba de bstan pa'i phyir bcom ldan 'das gang de ltar mos par dka' ba'i shes rab kyi pha rol tu phyin pa de ji tsam du zab pa lags zhes bya bas zab pa'i zhu ba zhus nas/ bcom ldan 'das kyis ma bcings ma grol bar bshad pa dang /rnam par dag pa bshad pa dang / kun du mtha' yas pa bshad pa dang / chags pa dang ma chags pa bshad pa ste/ bshad pa rnam pa bzhi'i skabs phye'o/ /de la rab 'byor gzugs ma bcings ma grol zhes bya ba ni rnam par mi rtog pa'i shes rab kyi pha rol tu phyin pa'i gnas skabs gang yongs su grub pa'i chos nyid kyi gzugs su snang ba de 'khor ba'i gnas skabs na/dus de srid du las dang nyon mongs pa dang / rnam par smin pa'i bcing ba thams cad kyis ma bcings pas ma bcings zhes bya'o/ / phyis kyang yongs su grub pa'i gnas skabs na grol ba med pa'i phyir ma grol ba zhes bya'o/ /kun brtags pa nyid la ni bcings pa dang grol ba zhes brjod kyi nam mkha' bzhin du cis kyang ma gos pa 'gyur ba med pa'i chos nyid kyi gzugs la ni ma yin no/ /de bas na gzugs dngos po med pa'i rang bzhin ni gzugs so zhes bya ba gsungs te/kun brtags pa'i gzugs dngos po med pa'i ngo bo nyid ni chos nyid kyi gzugs zhes bya ba'i tha tshig go/ /de bzhin du rnam pa thams cad mkhyen pa nyid kyi bar gyi chos thams cad la yang sbyar bar bya'o//yang ma bcings ma grol ba 'di nyid gsal bar bya ba'i phyir dus gsum dang sbyar te bstan pa/ rab 'byor gzugs kyi sngon gyi mtha' ma bcings ma grol ba zhes bya ba ni chos nyid kyi gzugs 'khor ba na dri ma dang bcas pa ma dag pa'i gnas skabs la sngon gyi mtha' zhes bya'o//da ltar dag pa dang ma dag pa'i gnas skabs la da ltar byung ba zhes bya'o/ /phyis dag pa'i gnas skabs la phyi ma'i mtha' zhes bya'o/ /sngon gyi mtha' dngos po med pa'i rang bzhin ni gzugs so zhes bya bas ni dus gsum char du yang mi 'gyur bar gnas pa'i mtshan nyid ni de bzhin nyid yin no zhes ston te /chos nyid ni dus las rnam par grol ba'i mtshan nyid ma yin par bstan to/ /de ltar ma bcings ma grol bar bshad pas 'khor ba dang mya ngan las 'das pa dngos po med par bstan nas yang kun nas nyon mongs pa dang /rnam par byang ba med par bstan pa'i phyir rnam par dag pa bshad par brtsams pa/ gzugs rnam par dag pa gang yin pa de ni 'bras bu rnam par dag pa'o zhes bya ba ni / de la gzugs la sogs pa rnam pa thams cad mkhyen pa nyid kyi mthar thug pa'i chos rnams la bcings pa med pas kun nas nyon mongs pa med do//kun nas nyon mongs pa med pa'i phyir ngo bo nyid kyis rnam par dag pa'o/ /ngo bo nyid kyis rnam par dag pa'i phyir rnam par byang ba'i chos rnams kyang med de/ rang bzhin gyis rnam par dag pa la ni don dam par rnam par byang ba'i chos rnams ci yang mi byed do//de bas na kun nas nyon mongs pa dang / rnam par byang ba rnam par mi rtog pa yang byis pa rnams kyis brtags pa nyid de yongs su grub pa ma yin no/ /de ltar rnam pa gcig gis mos par dka' ba bstan nas/ yang rnam par dag pa'i phyir mos par dka' ba bstan pa/de la gzugs rnam par dag pa gang yin pa de nyid 'bras bu rnam par dag pa'o zhes bya ba ni pha rol tu phyin pa dang / byang chub kyi phyogs la sogs pa rnam par byang ba'i chos rnams kyi 'bras bur gyur pa rnam par dag pa zhes bya ba gud na gang yang med kyi gang chos nyid kyi gzugs yongs su grub pa ngo bo nyid du gyur pa rtag tu gnas pa rnam par dag pa de nyid 'bras bur gyur pa'i rnam par dag pa'o zhes bya ba'i tha tshig go//de bzhin du chos thams cad la yang sbyar bar bya'o/ /de ltar rnam par dag pa'i ngo bo nyid bstan nas/de'i 'og tu chos thams cad kyi rnam par dag pa yang gcig pa'i bdag nyid de tha dad pa ma yin par bstan pa/ gzugs rnam par dag pa gang yin pa de nyid 'bras bu rnam par dag pa'o/ /'bras bu rnam par dag pa gang yin pa de shes rab kyi pha rol tu phyin pa rnam par dag pa'o//shes rab kyi pha rol tu phyin pa rnam par dag pa gang yin pa de gzugs rnam par dag pa'o zhes bya ba ste/ de la gzugs kyi chos nyid kyi gnas skabs la ni gzugs rnam par dag pa zhes bya'o/ / mya ngan las 'das pa zhes bya ba yang dag pa'i gnas skabs la ni 'bras bu rnam par dag pa zhes bya'o/ /chos kyi sku'i gnas skabs la ni shes rab kyi pha rol tu phyin pa rnam par dag pa zhes bya'o/ /de la gzugs rnam par dag pa'i de bzhin nyid gang yin pa de 'bras bu rnam par dag pa ste/rnam par grol ba'o/ /rnam par grol ba gang yin pa de nyid shes rab kyi pha rol tu phyin pa rnam par dag pa ste chos kyi sku'o/ /chos kyi sku gang yin pa de nyid gzugs rnam par dag pa ste/ de bzhin nyid ces bya ba'i tha tshig go/ /de bas na de bzhin nyid dang /rnam par grol ba dang chos kyi sku ni don dam par tha dad pa med de gcig go/ /de bzhin du rnam pa thams cad mkhyen pa nyid rnam par dag pa'i bar du yang sbyar bar bya'o/ /de ltar chos thams cad kyi rnam par dag pa gcig go zhes mjug bsdus te bstan pa/de ltar na gzugs rnam par dag pa dang / 'bras bu rnam par dag pa dang / shes rab kyi pha rol tu phyin pa rnam par dag pa nas rnam pa thams cad mkhyen pa nyid kyi bar du rnam par dag pa 'di dag ni gnyis su med de gnyis su byar med so so ma yin tha mi dad do zhes bya ba ste/gcig pa'i phyir gnyis su med pa'o/ /tha dad du dbye mi nus pa'i phyir gnyis su byar med pa'o/ /bye brag med pa'i phyir so so ma yin pa'o/ /bar chad med pa'i phyir ram rtag pa'i phyir tha mi dad pa'o/ /de ltar nyan thos dang rang sangs rgyas rnams dang thun mong ba'i 'bras bu rnam par dag pa bstan to//da ni byang chub sems dpa' rnams kyi rnam par dag pa thun mong ma yin pa bstan pa'i phyir/ 'bras bu rnam par dag pa bor te/ shes rab kyi pha rol tu phyin pa rnam par dag pa 'ga' zhig bzung nas bstan te/ de ltar 'gres 'di gnyis kyis nyan thos dang /rang sangs rgyas rnams kyi rnam par dag pa dang / de bzhin gshegs pa'i rnam par dag pa gcig go zhes bstan pa yin no/ /da ni rnam par dag pa de gang zag la bdag med pa'i rnam par dag pa dang / nye ba'i nyon mongs pa dngos po med pa'i rnam par dag pa dang /chos la bdag med pa'i rnam par dag pa gsum gyis de dag rim bzhin du bstan te/ bdag rnam par dag pas gzugs rnam par dag pa zhes bya ba ni bdag dngos po med par shes pa nyid bdag rnam par dag pa'o/ /de la 'gres kyi rim pa bzhin du bstan par bya ste/bdag rnam par dag pas gzugs rnam par dag pa gzugs rnam par dag pas bdag rnam par dag pa ste/ de ltar na bdag rnam par dag pa dang gzugs rnam par dag pa 'di la gnyis su med de/ gnyis su byar med so so ma yin tha mi dad do//de bzhin du tshor ba dang 'du shes dang 'du byed rnam par dag pa dang bdag rnam par dag pas rnam par shes pa dag pa/ rnam par shes pa rnam par dag pas bdag rnam par dag pa zhes bya ba la sogs pas bdag rnam par dag pa dang / rnam pa thams cad mkhyen pa nyid kyi mthar thug pa'i bar gyi chos rnams kyi rnam par dag pa yang gnyis su med par bstan to//de'i 'og tu nyon mongs pa dngos po med pa rnam par dag pa'i 'gres la yang 'dod chags rnam par dag pas gzugs rnam par dag pa/ gzugs rnam par dag pas 'dod chags rnam par dag pa ste/de ltar na 'dod chags rnam par dag pa dang gzugs rnam par dag pa 'di la gnyis su med cing zhes bya ba la sogs pas rnam pa thams cad mkhyen pa nyid kyi mthar thug pa'i bar gyi chos rnams kyi rnam par dag pa dang / 'dod chags rnam par dag pa gnyis su med par bshad do//de bzhin du zhe sdang dang gti mug dag la yang sbyar ro/ /de'i 'og tu chos bdag med pa rnam par dag pa'i 'gres la/ rten cing 'brel par 'byung ba la sogs pa rnams rnam pa thams cad mkhyen pa nyid kyi mthar thug pa'i chos rnams kyi rnam par dag pa bzung nas chos gnyis kyi rnam par dag pa gnyis su med pa bshad pa'i 'gres ni/ji ltar ma rig pa rnam par dag pas 'du byed rnam par dag pa/ 'du byed rnam par dag pas ma rig pa rnam par dag pa ste de ltar na ma rig pa rnam par dag pa dang /'du byed rnam par dag pa 'di la gnyis su med ces bya ba la sogs pa 'byung ba de bzhin du pha rol tu phyin pa rnams la yang sbyin pa'i pha rol tu phyin pa rnam par dag pas tshul khrims kyi pha rol tu phyin pa rnam par dag pa/ tshul khrims kyi pha rol tu phyin pa rnam par dag pas sbyin pa'i pha rol tu phyin pa rnam par dag pa ste/de ltar na sbyin pa'i pha rol tu phyin pa rnam par dag pa dang / tshul khrims kyi pha rol tu phyin pa rnam par dag pa 'di la gnyis su med ces bya ba dang de bzhin du thams cad la'ang sbyar ste/rnam pa thams cad mkhyen pa nyid rnam par dag pas lam gyi rnam pa shes pa nyid rnam par dag pa lam gyi rnam pa shes pa nyid rnam par dag pas rnam pa thams cad mkhyen pa nyid rnam par dag pa ste/ de ltar na rnam pa thams cad mkhyen pa nyid rnam par dag pa dang /lam gyi rnam pa shes pa nyid rnam par dag pa 'di la gnyis su med ces bya bar sbyar bar bya'o/ /de nas yang chos thams cad rnam par dag pa bsdus pa'i 'gres la yang thog mar pha rol tu phyin pa drug rnams la/ shes rab kyi pha rol tu phyin pa rnam par dag pa dang / phung po la sogs pa tshor ba'i tshogs drug po rnams kyi mthar thug pa'i rnam par dag pa dang / rnam pa thams cad mkhyen pa nyid kyi rnam par dag pa bzung nas de dag gnyis su med par bstan pa'i 'gres te/ ji ltar rab 'byor gzhan yang shes rab kyi pha rol tu phyin pa rnam par dag pa gang yin pa de gzugs rnam par dag pa/gzugs rnam par dag pa gang yin pa de rnam pa thams cad mkhyen pa nyid rnam par dag pa ste/ de ltar shes rab kyi pha rol tu phyin pa rnam par dag pa dang / gzugs rnam par dag pa dang / rnam pa thams cad mkhyen pa nyid rnam par dag pa 'di la gnyis su med de gnyis su byar med so so ma yin tha mi dad do zhes bya ba de bzhin du tshor ba rnams dang /'du shes dang / 'du byed dang / rnam par shes pa nas shes rab kyi pha rol tu phyin pa'i bar du rnam par dag pa gang yin pa de/ yid kyi 'dus te reg pa'i rkyen gyis tshor ba rnam par dag pa yid kyi 'dus te reg pa'i rkyen gyis tshor ba rnam par dag pa gang yin pa de rnam pa thams cad mkhyen pa nyid rnam par dag pa ste/ de ltar shes rab kyi pha rol tu phyin pa rnam par dag pa dang / yid kyi 'dus te reg pa'i rkyen gyis tshor ba rnam par dag pa dang /rnam pa thams cad mkhyen pa nyid rnam par dag pa 'di la gnyis su med ces bya ba la sogs pa la yang sbyar bar bya'o/ /de nas yang bsam gtan gyi pha rol tu phyin pa rnam par dag pa nas/ phung po la sogs pa tshor ba'i mthar thug pa'i bar gyi chos rnams kyi rnam par dag pa dang /rnam pa thams cad mkhyen pa nyid kyi rnam par dag pa bzung nas de dag gnyis su med pa bstan pa dang / de bzhin du pha rol tu phyin pa thams cad dang / stong pa nyid thams cad rnam par dag pa dang / tshor ba'i mthar thug pa'i bar gyi chos rnams kyi rnam par dag pa dang /rnam pa thams cad mkhyen pa nyid rnam par dag pa 'di la gnyis su med par bstan pa dang / de bzhin du dran pa nye bar gzhag pa la sogs pa thams cad mkhyen pa nyid kyi mthar thug pa'i chos rnams dang gzugs la sogs pa tshor ba'i tshogs drug gi mthar thug pa'i chos rnams dang /rnam pa thams cad mkhyen pa nyid rnam par dag pa de dag gcig tu bshad par sbyar bar bya'o/ /de nas yang 'dus byas dang / 'dus ma byas rnam par dag pa'i 'gres dang / dus gsum rnam par dag pa'i 'gres bstan te /'di man chad gnas brtan shA ri'i bus rnam par dag pa bshad pa thos nas spobs pa skyes te 'khor bsdu ba'i phyir/ bcom ldan 'das rnam par dag pa 'di ni zab po zhes bya ba la sogs pas rnam par dag pa'i tshig bcu gsum rim gyis bstan par brtsams so//shA ri'i bu shin tu rnam par dag pa'i phyir zab po zhes bya ba ni nyon mongs pa dang nye ba'i nyon mongs pa dang rnam par rtog pa du ma'i dri mas brtsams pa 'khor ba'i chos de dag dang tha dad par ma gyur pa'i chos nyid ni dri ma de dag gis dri ma can du ma gyur pa ste/dus thams cad du shin tu rnam par dag pa yin par byis pa rnams kyi yid ches par dka' bas shin tu rnam par dag pa'i phyir zab ces bya'o/ /shA ri'i bu shin tu rnam par dag pa'i phyir rnam par dag pa ni snang ba'o zhes bya ba ni 'di lta ste dper na sprin dang /na bun dang khug rna la sogs pa med na nyi ma dang zla ba la sogs pa shin tu rnam par dag pa ste/ rab tu snang bar 'gyur ro/ /de bzhin du chos nyid kyi gzugs la sogs pa yang shin tu rnam par dag pa'i phyir snang ba zhes bya'o / /de bas na gzugs shin tu rnam par dag pa'i phyir rnam par dag pa snang ba'o zhes bya ba gsungs so//bcom ldan 'das rnam par dag pa ni nying mtshams sbyor ba ma mchis pa'o zhes bya ba ni nyon mongs pa dang / rnam par rtog pa'i spros pa'i dri ma rnams spangs pa ni slar nying mtshams mi sbyar ba'i phyir/dri ma med cing rnam par dag pas na nying mtshams sbyor ba med pa zhes bya'o/ /shA ri'i bu gzugs la 'pho ba med pas nying mtshams sbyor ba med pa ni rnam par dag pa'o zhes bya ba ni kun brtags pa'i gzugs la sogs pa yongs su spangs pa rnams ni yang 'pho ba med pa'i phyir ro zhes bya ba'i tha tshig go//bcom ldan 'das rnam par dag pa ni kun nas nyon mongs pa ma mchis pa'o zhes bya ba ni sprin dang na bun dang khug rna la sogs pa yod du zin kyang nam mkha' ltar rnam pa thams cad du rang bzhin gyis yongs su dag pa'o zhes bshad pa'o//bcom ldan 'das rnam par dag pa ni 'thob pa dang mngon par rtogs pa ma mchis pa'o zhes bya ba ni thob par bya ba dang thob par byed pa'i chos gnyis yod na/ 'thob pa yang yod par 'gyur la/ mngon par rtogs par bya ba dang / mngon par rtogs par byed pa gnyis yod na mngon par rtogs pa zhes bya ba yod par 'gyur na de la kun rtog pa dang /rnam par rtog pa rnams med pa tsam la yongs su grub pa'i chos nyid rnam par dag pa zhes rnam par gzhag pa'i phyir rnam par dag pa de la 'thob pa'am/ mngon par rtogs pa zhes bya ba gang yang med do//bcom ldan 'das rnam par dag pa ni mngon par ma grub pa'o zhes bya ba ni kun brtags pa dang / rnam par brtags pa'i gzugs la sogs pa'i chos rnams mngon par grub pa med pa la rnam par dag pa zhes bya bar rnam par gzhag pa'i phyir mngon par grub pa med pa'i mtshan nyid ces bya'o//rnam par dag pa ni 'dod pa dang / gzugs dang gzugs med pa'i khams su skye ba ma lags so zhes bya ba ni 'dod pa dang gzugs dang gzugs med pa'i khams rnams kun brtags pa ste/ gang gi tshe de rnams su mi skye zhing mi 'byung ba de la rnam par dag pa zhes bya ste/de bas 'dod pa'i khams kyi rang bzhin mi dmigs pa'i phyir ro zhes bya ba gsungs so/ /bcom ldan 'das rnam par dag pa ni 'tshal ba ma mchis pa'o zhes bya ba ni bdag rang shes pa'i ngo bo nyid ma yin zhes bya ba'i tha tshig go//chos blun pa nyid kyi phyir zhes bya ba ni rtog pa dang bral ba'i phyir chos blun pa zhes bshad do/ /bcom ldan 'das rnam par dag pas gzugs ma 'tshal to zhes bya ba ni gzugs la sogs pa'i chos thams cad kyang mi mthong ngo zhes bya ba'i tha tshig go/ / rang gi mtshan nyid stong pa nyid kyi phyir zhes bya ba ni gzugs la sogs pa'i chos rnams mtshan nyid med pa'i phyir ro zhes bya ba'i tha tshig go/ /'tshal ba ma mchis pa zhes bya ba 'dis ni rnam par dag pa rnam par mi rtog pa'i mtshan nyid yin par bstan/ rnam par dag pas gzugs mi shes so zhes bya ba 'dis ni chos rnams dngos po med pa'i mtshan nyid yin par bstan te/gnyis kyis ni dmigs par bya ba dang / dmigs par byed pa dngos po med pa'i mtshan nyid bstan to/ /bcom ldan 'das shes rab kyi pha rol tu phyin pa ni rnam pa thams cad mkhyen pa nyid la sman par mi bgyid gnod par mi bgyid ces bya ba ni gang gi phyir de gnyis ka yang de bzhin nyid kyi mtshan nyid kyis shin tu rnam par dag pa'i phyir te/de bzhin nyid ni de bzhin nyid la phan pa'am gnod par mi byed de/ nam mkha' la nam mkha' bzhin no//de bas na chos kyi dbyings 'dug pa nyid kyi phyir zhes bya ba bshad de/ chos kyi sku ni dus thams cad du gnas pa'i mtshan nyid yin na de la su zhig phan pa dang / gnod pa byed pa yod ces bstan pa'o/ /bcom ldan 'das shes rab kyi pha rol tu phyin pa rnam par dag pa ni chos gang yongs su len pa ma mchis so zhes bya ba ni shes rab kyi pha rol tu phyin pa shin tu rnam par dag pa yongs su 'dzin pa thams cad med pa'i mtshan nyid yin pa'i phyir te/gal te chos 'ga' zhig yongs su 'dzin na rnam par dag par mi 'gyur ro/ /de'i 'og tu gnas brtan rab 'byor gyis bcom ldan 'das bdag rnam par dag pa'i slad du gzugs rnam par dag pa'o zhes bya ba la sogs pa gsungs pa ni bdag dngos po med pa nyid kyi phyir/gzugs la sogs pa dngos po med pa'o zhes bya ba'i tha tshig go/ /'dir ni rnam par dag pa zhes bya ba dngos po med pa la bya ba'i phyir ro//de bas na rab 'byor bdag med pa'i phyir gzugs med pa ni shin tu rnam par dag pa'o zhes gsungs so/ /sngar ni shes rab kyi pha rol tu phyin pa rnam par dag pa bstan to/ /da ni bdag med pa rnam par dag pa bstan te/ rab 'byor shes pa ma rnyed ma stor ba'i phyir ro zhes bya ba ni sngon ma byung ba'i ye shes thob cing rnyed pa med la/ye shes rnyed pa yang chud zos pa med de/ de ltar gnyis ka med pas byang chub kyang med do/ /byang chub ces bya ba yang kun brtags pa nyid do/ /gnyis su ma mchis shing rnam par dag pa zhes bya ba ni kun nas nyon mongs pa dang /rnam par byang ba gnyis med pa'i phyir sngon gyi tshe yang ngo bo nyid kyis rnam par dag pas nam mkha' bzhin du kun nas nyon mongs pa med do/ /yongs su grub pa'i gnas skabs na yang nam mkha' bzhin du sngon ma byung ba'i rnam par byang ba med do// //bam po nyi shu pa/ de ltar rnam par dag pa bshad pa yongs su rdzogs par byas nas/ de'i 'og tu zab par yid ches par bya ba'i phyir kun du mtha' yas pa bshad par brtsams pa/ gzugs kun tu mtha' yas pa'i phyir zhes bya ba ste rtag pa dang chad pa med pa dang /sngon gyi mtha' dang phyi ma'i mtha' dang dbus kyi mtha' med pa'i phyir kun tu mtha' yas pa'o/ /de bas na rab 'byor mtha' las 'das pa stong pa nyid dang thog ma dang tha ma med pa'i stong pa nyid kyi phyir ro zhes bya ba gsungs so//rab 'byor gyis gsol pa/ bcom ldan 'das ci'i slad du de ltar rtog pa gang lags pa shes rab kyi pha rol tu phyin pa 'di la byang chub sems dpa' lags zhes bya ba gnas brtan rab 'byor gyis ci'i phyir zhus she na/ de ltar shes rab kyi pha rol tu phyin pa'i yul don zab pa de ci'i slad du byang chub sems dpa' nyid kyi lags sangs rgyas rnams kyi ma lags zhes zhus pa'o//rab 'byor lam gyi rnam pa shes pa nyid kyi phyir ro zhes bya ba ni shes rab kyi pha rol tu phyin pa 'di mthar phyin cing / bya ba byas pa ma yin gyi rnam pa thams cad mkhyen pa nyid kyi lam gyi rnam pa ste/de bas na byang chub sems dpa' nyid kyis zhes bya'o/ /bcom ldan 'das byang chub sems dpa' sems dpa' chen po rnams kyi shes rab kyi pha rol tu phyin pa ni tshu rol gyi 'gram mam/ pha rol 'gram mam/ gnyis ka ma mchis pa la yang mi dmigs so zhes bya ba ci las dgongs she na pha rol tu son pa'am/ pha rol gyi mthar phyin pa'am/ pha rol gyi ngo bo nyid la pha rol tu phyin pa zhes bya grang na/ byang chub sems dpa' rnams kyi shes rab kyi pha rol tu phyin pa yin du zin kyang /tshu rol gyi 'gram na yang mi gnas pha rol gyi 'gram na yang mi gnas 'gram 'di gnyis las ma gtogs pa gzhan du 'ang mi dmigs pa'i phyir de skad gsungs te/ tshu rol gyi 'gram zhes bya ba ni 'dus byas su gtogs pa'o/ /pha rol gyi 'gram zhes bya ba ni 'dus ma byas su gtogs pa'o//de skad gsol pa dang bcom ldan 'das kyis shin tu rnam par dag pa'i phyir ro zhes gsungs te/ gal te 'gram 'ga' zhig dmigs na de lta na ni rnam par dag pa nyid du mi 'gyur te/ gang gi phyir gang yang med pa de'i phyir shin tu rnam par dag pa ste/shin tu rnam par dag pa nyid kyi phyir 'gram gnyis dang / gzhan na yang mi gnas zhes bya ba'i tha tshig go/ /rab 'byor dus gsum mnyam pa nyid kyi phyir ro zhes bya ba ni thog ma dang tha ma med pa'i stong pa nyid kyi phyir dus gsum mnyam pa nyid du yongs su shes pas tshu rol gyi 'du shes sam pha rol gyi 'du shes med de/de bas na tshu rol gyi 'gram na yang mi gnas pha rol gyi 'gram na yang mi gnas zhes bya ba'i tha tshig go/ /dmigs pa dang mi dmigs par spyod pa'i dbang gis zab par yid ches par bya ba'i phyir/ de'i 'og tu chags pa dang / ma chags pa bshad pa'i skabs phye ba yang ming du yang chags pa yin/ mtshan mar yang chags pa yin no zhes bya ba la sogs pa ste/ gzugs la sogs pa'i chos rnams la ming du 'dzin pa ni kun brtags pa'o/ /brda la mtshan mar 'dzin pa ni rnam par brtags pa ste/gnyi ga yang sgrib pa'i bdag nyid yin pas chags pa zhes bya'o/ /rab 'byor chos thams cad ni mtshan ma med pa ste/ ming med pa'o zhes bya ba ni shes rab kyi pha rol tu phyin pa'i spyod yul yin par bstan pa'o/ /bcom ldan 'das byang chub sems dpa' rnams la shes rab kyi pha rol tu phyin pa 'di de ltar legs par bshad cing legs par mthar gtugs pa ni ngo mtshar che'o zhes bya ba ni lam gyi rnam pa shes pa nyid bstan pa'o//gzugs stong zhes bya bar 'du shes na chags pa'o zhes bya ba ni dmigs pa'i tshul gyis de ltar sems pa'o //gzugs la gzugs zhes bya bar 'du shes med do zhes bya ba ni byang chub sems dpa'i lam gyi rnam pa shes pa nyid do/ /chos rnams la chos zhes bya bar 'du shes 'du shes med do zhes bya ba ni mi snang ba'o/ /kau shi ka gzugs kyi rang bzhin yongs su bsngo bar mi nus so zhes bya ba ni chos rnams gnas pa'i mtshan nyid yin pa'i phyir yongs su 'gyur ba med pas dmigs pa'i tshul gyis byang chub tu yongs su bsngo bar mi bya'o zhes bya ba'i tha tshig go//rab 'byor khyod la chags pa'i rnam pa de bas kyang phra ba gzhan dag kyang bstan par bya zhes bya ba ni lam gyi rnam pa shes pa nyid la sgrib par 'gyur ba'o//bcom ldan 'das shes rab kyi pha rol tu phyin pa ni zab po zhes bya ba ni sngar gnas brtan shA ri'i bus shes rab kyi pha rol tu phyin pa zab pa dang / mos par dka' bar yid ches par bya ba'i phyir bshad pa'i skabs phye bas/da ni gnas brtan rab 'byor gyis bdag nyid kyis zab mo khong du chud pa bstan pa'i phyir/ bcom ldan 'das zab po zhes bya ba gsungs so/ /rab 'byor chos thams cad rang bzhin gyis rnam par dben pa'i phyir ro zhes bya ba ni 'di ltar chos thams cad ni dus thams cad du chags pa thams cad yongs su spangs pa/rang bzhin yongs su spangs pa rang bzhin gyis dben pa yin na/ 'on kyang kun brtags pa'i chags pa yang dmigs la kun brtags pa'i chags pa dmigs kyang chos thams cad ni ngo bo nyid kyis gos pa med pa ste dben pa'i phyir zab pa'o//shes rab kyi pha rol tu phyin pa ni ma byas pa mngon par 'dus ma byas pa zhes bya ba ni/ chos kyi sku'i ngo bo nyid yin pa'i phyir de la bsgrub par bya ba 'am mngon par 'du bya ba med do/ /chos kyi rang bzhin ni gnyis ma yin te/gcig tu zad do zhes bya ba ni de bzhin nyid kyi ngo bo nyid du chos thams cad ngo bo nyid gcig na 'on kyang bdag nyid tha dad par snang ba'i phyir/ mngon par rtogs par dka' ba'o/ /de bzhin nyid chos rnams kyi ngo bo nyid yin pa'i phyir rang bzhin zhes bya'o//de bzhin nyid de yang chos nyid gzhan gang gi rgyu yang ma yin pa'i phyir rang bzhin ma yin no zhes bya'o/ /de bzhin nyid de 'dus ma byas pa'i phyir sus kyang ma byas pas ma byas pa zhes bya'o/ /de nyid bsod nams dang bsod nams ma yin pa mngon par 'du byed pa gang gis kyang mngon par 'du ma byas pa'i phyir/mngon par 'du ma byas pa zhes bya'o/ /shes rab kyi pha rol tu phyin pa ni sus kyang ma mthong ma thos ma rtogs rnam par ma shes zhes bya ba ni shes rab kyi pha rol tu phyin pa ni dmigs pa dang / dmigs par bya ba mnyam pa'i ngo bo nyid yin pa'i phyir mthong ba la sogs pa'i rnam par shes pa rnam par rtog pa dang bcas pa de lta bu dag gi spyod yul du gyur pa ma yin pa'i phyir ro/ /shes rab kyi pha rol tu phyin pa ni bsam gyis mi khyab pa'o zhes bya ba ni du bas me mtshon pa ltar/ chos gzhan gyis bsam du mi nus zhes bya ba'i tha tshig go/ /de bas na gzugs kyis ma shes so zhes bya ba la sogs pa gsungs so/ /chos thams cad dmigs su med par byed pa'o zhes bya ba ni chos thams cad dmigs su med pa'i mtshan nyid du shes par byed pa'o/ /shes rab kyi pha rol tu phyin pa la ji ltar spyad par bgyi zhes bya ba ni lam gyi rnam pa shes pa nyid la'o//rang bzhin shes pas chos thams cad la spyod na shes rab kyi pha rol tu phyin pa la spyod pa ma yin no zhes bstan pa'i phyir/ gzugs la mi spyod na zhes bya ba'i 'gres so/ /lhag mthong gi shes pas chos kyi mtshan nyid la spyod na spyod pa ma yin no zhes bya ba bstan pa'i phyir 'gres gnyis pa'o//gzugs yongs su rdzogs pa'am yongs su ma rdzogs pa zhes bya ba ni sgom pa yongs su rdzogs pa las dgongs te gsungs pa'o/ /gzugs ma chags pa zhes bya ba ni chos nyid kyi gzugs sgrib pa med pa'o//de ltar spyod na gzugs chags pa med pa zhes bya bar 'du shes pa med do zhes bya ba ni sgrub pa'i tshe de ltar zhugs na rnam pa thams cad mkhyen pa nyid khong du chud pa'i tshe de ltar rab tu rtogs pa zhes bya ba'i tha tshig go/ /rab 'byor ngo mtshar du gyur pa'i tshig dang /dge slong zhig gi tshig dang / brgya byin gyi tshig dang / bsrung ba dang bskyab pa dang / sba ba dang / mi nus pa'i tshig rnams ni thams cad kyang 'dra'o/ /gzugs rlom sems su mi byed ces bya ba ni byed pa dang / mtshan nyid la sogs pa'i dngos por ro//gzugs bdag gi zhes bya bar rlom sems su mi byed do zhes bya ba ni rje khol gyi dngos por ro/ /gzugs la rlom sems su mi byed ces bya ba ni gnas dang rten pa'i dngos por ro/ /gzugs kyi mtshan mar yang rlom sems su mi byed ces bya ba ni brdar btags pa'i dngos por ro//sangs rgyas stong bstan pa ni de dag de la dad pa'i phyir ro/ /byams pas chos bshad pa zhus pa'i dus gsum char du yun 'di nyid bshad par shes par bya ba'i phyir ro/ /de'i 'og tu rab 'byor gzugs yongs su dag pa'i phyir shes rab kyi pha rol tu phyin pa yongs su dag pa'o zhes bya ba ni gzugs la sogs pa'i chos dmigs par gyur pa rnams dri ma med par gyur pas lam gyi rnam pa shes pa nyid de yang rnam par dag par 'gyur ro//rab 'byor gzugs la skye ba med pa dang / 'gag pa med pa dang kun nas nyon mongs pa med pa dang / rnam par byang ba med pa zhes bya ba ni gang gi tshe gzugs chos nyid kyi rang bzhin du gnas gyur nas skye ba dang 'gag pa dang kun nas nyon mongs pa dang / rnam par byang bar mi snang ba de'i tshe gzugs de yongs su dag pa zhes bya'i gzhan du ni ma yin no//nam mkha' yongs su dag pa'i phyir zhes bya ba ni ji ltar nam mkha' la glo bur gyi sprin dang khug rna yod kyang de rang bzhin gyis dag pa'i phyir yongs su dag pa ma yin par mi 'gyur te/ shes rab kyi pha rol tu phyin pa yang de bzhin no zhes bstan pa'o//yongs su dag pa dang gos pa med pa dang / 'dzin pa med pa dang / smra ba med pa dang / rab tu brjod pa med pa dang / dmigs su med pa'i phyir rnam pa drug gis nam mkha' dang mtshungs par bstan to/ /nam mkha' smra ba med pa'i phyir zhes byang ni nam mkha' la de las gzhan pa rnams smra yang /nam mkha' la ni smra ba'am/ mngon par brjod pa med do/ /dper na nam mkha' la brag ca gnyis kyi sgra grag kyang / nam mkha' ni smra ba dang bcas pa'o zhes brjod du mi rung ba lta bu'o/ /nam mkha' rab tu brjod pa med pa'i phyir zhes bya ba ni nam mkha' la ngo bo nyid kyis rab tu brjod pa med do zhes bya ba'i tha tshig go//yang sgra tsam ni smra ba'o/ /mngon par brjod pa'i rab tu brjod pa'o/ /rab 'byor gzugs shin tu rnam par dag pa dang / dmigs su med pa dang /skye ba med pa dang / 'gag pa med pa dang / kun nas nyon mongs pa med pa dang / rnam par byang ba med pa'i phyir zhes bya ba ni gang gi tshe shes rab kyi pha rol tu phyin pa 'dis chos thams cad mthong ste/ gzugs la sogs pa'i kun brtags pa'i nyon mongs pa dang /rnam par rtog pa spros pa'i dri ma med pa'i phyir/ rnam par dag pa'i rnam pa dang / dmigs pa thams cad dang bral ba'i phyir/ dmigs su med pa'i rnam pa dang / yongs su grub pa'i phyir skye ba med pa dang / 'gag pa med pa'i rnam pa dang / rang bzhin gyis dben pa'i phyir kun nas nyon mongs pa med pa dang / rnam par byang ba med pa'i rnam par mthong ba de'i tshe bdag nyid yongs su dag pa zhes bya ba'i ming du 'gyur ro/ /de ltar shes rab kyi pha rol tu phyin pa shin tu yongs su dag par bstan nas/ de'i 'og tu 'di la dad pa bskyed pa'i phyir de la mig gi nad 'byung bar mi 'gyur ro zhes bya ba la sogs pas tshe 'di dang tshe phyi ma la 'byung ba'i phan yon rnams bstan to//shes rab kyi pha rol tu phyin pa la ni skye ba'am 'gag pa'am kun nas nyon mongs pa'am/ rnam par byang ba'am/ yongs su bzung ba 'am dor ba'i chos gang yang med do zhes bya ba ni skye ba dang 'gag pa la sogs pa shes rab kyi pha rol tu phyin pa la mi snang ngo zhes bstan pa'o/ /de ltar 'du shes par yang mi byed la de ltar mi rtog cing zhes bya ba ni de ltar pha rol tu phyin pa 'di rin po che yon tan mang po dang ldan pa yin no snyam du yang mi rtog pa'o//rab 'byor shes rab kyi pha rol tu phyin pa 'di ni chos gang yang sgrub pa'am rnam par ston pa ma yin zhes bya ba ni chos thams cad mi 'gyur bar yongs su 'grub pas yongs su grub pa de'i tshe/ shes rab kyi pha rol tu phyin pa 'di de ltar snang ste/chos khyad par can gang yang bsgrub par bya'o snyam pa'i rlom sems kyang med/ chos khyad par can rnams kyang bzung ngo snyam mam / sbyin no snyam pa'i rlom sems kyang med/ zag pa med pa'i chos rnams bskyed do snyam mam chos ngan pa rnams dag go snyam pa'i rlom sems kyang med/'khor ba'i chos rnams rgyun bcad do snyam mam/ rnam par byang ba rnams brtag par bya'o snyam pa'i rlom sems kyang med/ bdag ni gcig go snyam pa'am tha dad do snyam pa'i rlom sems kyang med/ bdag ni sngon ma byung ba las byang chub sems dpa'i spyod pa'i stobs kyis byung ba ste/sgrib pa thams cad bral ba'o snyam pa'i rlom sems kyang med/ sngon nyon mongs pa dang nye ba'i nyon mongs pa la sogs pas kun nas nyon mongs par gyur pa las/ phyis rnam par dag go snyam pa'i rlom sems kyang med/nag po'i chos rnams 'grib par bya zhing dkar po'i chos rnams rnam par 'phel bar bya'o snyam pa'i rlom sems kyang med/ dus gsum du gtogs so snyam pa'i rlom sems kyang med/ khams gsum du dgod do snyam pa'am/ yang dag par bzla bar bya'o snyam pa'i rlom sems kyang med/bdag ni sbyin pa'i pha rol tu phyin pa la sogs pa sbyin par byed pa'am/ de'i mi mthun pa'i phyogs ser sna la sogs pa spong bar byed pa'o snyam pa'i rlom sems kyang med do/ /rab 'byor de bzhin gshegs pa rnams byung yang rung ma byung yang rung zhes bya ba ni chos thams cad gnas pa'i mtshan nyid de/gang yang ci yang mi byed do zhes bstan pa'o/ /chos gnas pa 'di nyid mkhyen pas/ de bzhin gshegs pa zhes bya ba dag 'jig rten na snang ste/ 'di nyid de dag gi mngon par rtogs pa dang /'di nyid chos kyi 'khor lo zhes bya ba'i tha tshig go/ /rab 'byor 'di ni chos kyi 'khor lo gnyis su bskor ba yang ma yin/ gcig tu bskor ba yang ma yin no zhes bya ba ni don dam par chos thams cad grangs las 'das pa'i phyir de skad bstan to//chos gang yang bskor ba'am mi bskor bar bya ba'i phyir nye bar gnas pa ma yin no zhes bya ba ni chos kyi 'khor lo bskor ro zhes bya ba'i 'du shes sam/ rnam par rtog pa sel bar byed pa'o/ /dngos po med pa'i ngo bo nyid stong pa nyid kyi phyir ro zhes bya ba ni shes rab kyi pha rol tu phyin pa ni chos thams cad dngos po med pa'i ngo bo nyid kyi mtshan nyid du 'dzin to zhes bya ba'i tha tshig go//pha rol tu phyin pa 'di ni chen mo ste zhes bya ba la sogs pa tshig dgu bcu rtsa lngas gnas brtan rab 'byor gyis shes rab kyi pha rol tu phyin pa 'di chos thams cad la 'jug pa rgya cher ston te /de la pha rol tu phyin pa 'di ni chen po zhes bya ba ni yul che ba dang / gsang ba chen po yul du gyur pa ston te/ 'di ltar gsang ba ni gsum ste chos 'jug pa gsang ba dang / mngon par byang chub pa gsang ba dang /chos nyid kyi 'khor lo bskor ba gsang ba'o/ /de la chos rnams la kun rdzob dang don dam pa'i dbang gis chos su 'du shes pa yang 'jug chos ma yin par 'du shes pa yang 'jug ste/ de bas na chos thams cad kyang chos thams cad kyi rang bzhin gyis yongs su stong zhes bya ba gsungs so//mngon par byang chub pa yang ston la mngon par byang chub pa med par yang mthong ste/ de bas na byang chub sems dpa' sems dpa' chen po rnams kyang shes rab kyi pha rol tu phyin pa la gnas shing bla na med pa yang dag par rdzogs pa'i byang chub mngon par rdzogs par 'tshang rgya yang /chos gang yang mngon par rdzogs par mtshang rgya ba ma mchis zhes bya ba gsungs so/ /chos kyi 'khor lo yang bskor la chos gang yang bskor ba'am mi bskor bar bgyid pa yang ma mchis te zhes bya bas ni chos kyi 'khor lo bskor ba gsang ba bstan to//de'i 'og tu chos kyi 'khor lo bskor ba rnam pa brgyad kyis 'grel te/ chos med pa dang 'khor lo med pa dang / bskor ba med pa dang bshad pa'i ngo bo nyid med pa dang / 'chad pa po med pa dang nyan pa po med pa dang rtog pa med pa dang /'phags pa'i gang zag med pa'o/ /de la chos med pa ni chos gang yang yongs su mthong ba yang ma mchis la chos gang yang yongs su ma mthong ba yang ma mchis pa lags so zhes bya ba gsungs pa'o/ /'khor lo med pa ni 'di ltar gang bskor bar bgyi'am mi bskor bar bgyi ba'i chos de lta bu dmigs pa ma mchis te zhes bya ba gsungs pa'o//bskor ba med pa ni stong pa nyid ni bskor bar bgyid pa'am mi bskor bar bgyid pa ma lags so/ /mtshan ma ma mchis pa dang smon pa ma mchis pa ni bskor bar bgyid pa 'am mi bskor bar bgyid pa ma lags so zhes bya ba gsungs pa'o//bshad pa med pa ni de ltar na gang shes rab kyi pha rol tu phyin pa bstan pa dang / rab tu bstan pa dang zhes bya ba nas 'di ni shes rab kyi pha rol tu phyin pa bstan pa yongs su dag pa'o zhes bya ba'i bar du gsungs pa'o//'chad pa med pa ni shes rab kyi pha rol tu phyin pa bstan pa de yang sus kyang ma bstan zhes bya ba gsungs pa'o/ /nyan pa med pa ni sus kyang ma bzung ngo zhes bya ba gsungs pa'o/ /rtogs pa med pa de ni sus kyang mngon sum du ma bgyis so zhes bya ba gsungs pa'o//'phags pa'i gang zag med pa ni de la ni yongs su mya ngan las 'das pa su yang ma mchis te/ chos bstan pa 'di la su 'ang sbyin gnas su 'gyur ba ma mchis so zhes bya ba gsungs pa'o/ /rab 'byor nam mkha' med pa'i phyir ro zhes bya ba ni nam mkha' ltar dmigs pa'i bdag nyid du med pa yin gyi/dmigs pa med pa'i bdag nyid du med pa ma yin no/ /chos thams cad dmigs pa med par mnyam pa nyid kyi phyir ro zhes bya ba ni chos thams cad ni kun brtags pa ste dmigs su med pa'i bdag nyid du mnyam pa'o//ming med pa dang lus med pa'i phyir ro zhes bya ba ni gzugs med pa'i chos dang / gzugs kyi chos rnams tshig tu gyur pa med do zhes bya ba'i tha tshig go/ /dbugs phyi nang du rgyu ba dmigs su med pa'i phyir ro zhes bya ba ni de ltar lus stong pa nam mkha' lta bu la dbugs phyi nang du rgyu ba yang med do zhes so sor rtog pa'i phyir ro//rnam par rtog pa dang rnam par dpyod pa dmigs su med pa'i phyir ro zhes bya ba ni rnam par rtog pa dang rnam par dpyod pa gnyis tshig mngon par 'du byed pa yin pa'i phyir de skad gsungs te sngar rnam par brtags rnam par dpyad nas phyis tshig 'byin to zhes 'byung ba'i phyir ro//tshor ba dang 'du shes dang 'du byed dang rnam par shes pa'i phung po dmigs su med pa'i phyir ro zhes bya ba ni de dag gzugs med pas ming gi tshogs kyi ngo bo nyid yin pa'i phyir ro//chos thams cad 'gro ba med pa'i phyir ro zhes bya ba ni chos thams cad 'gro ba dang bral ba'i phyir ro/ /chos thams cad gzung du med pa'i phyir ro zhes bya ba la chos rnams ni chos rnams mi 'dzin te/ de bas na mi 'phrogs pa'o/ /chos thams cad shin tu byang zhing zad pa'i phyir ro zhes bya ba ni chos thams cad shin tu byang bas skye ba med pa dang / 'gag pa med pa'i bdag nyid kyis zad par snang ba'o/ /chos thams cad skye ba med pa dang 'gag pa med pa'i phyir ro zhes bya ba ni chos thams cad stong pa ste skye ba yang med 'gag pa yang med par snang ba'o//'chi 'pho dang skye ba dmigs su med pa'i phyir ro zhes bya ba ni de'i tshe 'chi 'pho ba dang / skye ba dag kun brtags pa'i dbang gis snang gi / don dam par ni ma yin par shes pa'o/ / chos thams cad rang bzhin gyis 'jig pa med pa'i phyir ro zhes bya ba ni 'di ltar chos thams cad kyi rang bzhin ni de bzhin nyid de/ /de yang 'gyur ba med pa'i phyir mi 'jig pa'o/ /rmi lam mthong ba dmigs su med pa'i phyir ro zhes bya ba ni rmi lam gyi mthong ba'i mi'i rmi lam gyi dngos po gang yin pa de mi dmigs shing med pa de bzhin du chos thams cad kyang dngos po med par gnas pa'o//'di ni rnam par byang ba ma mchis pa'i pha rol tu phyin pa ste/ kun nas nyon mongs pa yod par mi dmigs pa'i phyir ro zhes bya ba ni kun nas nyon mongs pa yod na ni rnam par byang zhing yongs su dag par 'gyur na 'di ltar chos thams cad ngo bo nyid kyis yongs su dag pa ste/de bas na kun nas nyon mongs pa yang med/ rnam par byang ba yang med do/ /'di ni gnas ma mchis pa'i pha rol tu phyin pa ste/ chos thams cad dmigs su med pa'i phyir ro zhes bya ba ni gang gi phyir chos thams cad dmigs su med pa de'i phyir gang na yang gnas par mi dmigs pa'o//chos thams cad ma nor ba de bzhin nyid du mngon par rdzogs par 'tshang rgya bar byed pa'i phyir ro zhes bya ba ni chos thams cad ni ma nor ba de bzhin nyid kyi ngo bo nyid de ma nor ba'i ngo bo nyid mngon sum du byed pa'i phyir chos thams cad zhi ba'o zhes shes rab nye bar gnas so//'dod chags kyi mtshan ma dmigs su med pa'i phyir ro zhes bya ba ni chags par bya ba'i dngos po'i mtshan ma med pa'o/ / zhe sdang yod pa ma yin pa'i phyir ro zhes bya ba ni zhe sdang gi rgyur gyur pa'i mtshan ma med pa'o/ /'di ni tshad ma mchis pa'i pha rol tu phyin pa ste/ chos thams cad kun nas ldang ba med pa'i phyir ro zhes bya ba la chos thams cad ni tshad ma'i dbang gis kun nas bslang ba yin na 'di ltar shes rab kyi pha rol tu phyin pa 'di ni chos thams cad kyi tshad kun du 'byung ba'i gzhi mi mthong ste de bas na tshad med pa'o//chos thams cad 'dres pa med pa'i phyir ro zhes bya ba ni chos thams cad dben pa'i phyir ro/ /chos thams cad tshad ma dmigs su med pa'i phyir ro zhes bya ba ni gzhal bya yod na tshad ma yang yod na gzhal bya yang yod par 'gyur na 'di ltar chos thams cad kyi tshad ma mi dmigs shing med pas de bas na gzhal bya med do//chos thams cad nam mkha' ltar chags pa med pa'i phyir ro zhes bya ba ni chos thams cad nam mkha' dang 'dra bar chags pa med pa'o//'di ni mi rtag pa'i pha rol tu phyin pa ste/ chos thams cad 'jig pa med pa'i phyir ro zhes bya ba ni 'di ltar chos thams cad ri bong gi rwa la sogs pa bzhin du ma skyes pa'i phyir mi 'jig pa ste de bas na med do //yod pa ma yin pa'i phyir mi rtag pa ste med pa'i don ni mi rtag pa'i don to zhes 'byung ba'i phyir ro/ /chos thams cad lhag par zhen par bya ba'i 'os ma yin pa'i phyir ro zhes bya ba ni 'di ltar chos thams cad lhag par zhen par bya ba'am/ gnas par bya ba'am/ nye bar spyad par bya ba'i 'os ma yin te de bas na sdug bsngal ba'o/ /'di ni stong pa'i pha rol tu phyin pa ste/ chos thams cad kyi rang bzhin dmigs su med pa'i phyir ro zhes bya ba ni chos rnams kyi ngo bo nyid gzugs su rung ba dang / myong ba la sogs pa'i ngo bo nyid gang yin pa de don dam par yod pa ma yin te/de bas na chos de dag ngo bo nyid des stong ngo / /'di ni bdag ma mchis pa'i pha rol tu phyin pa ste/ chos thams cad mngon par zhen pa med pa'i phyir ro zhes bya ba ni 'di ltar gzugs la sogs pa'i chos rnams med do//de'i phyir de dag mngon par zhen par bya ba'i 'os ma yin te/ de ltar na chos thams cad med pa ni bdag med pa'o/ /stong pa nyid dang bdag med pa gnyis la don tha dad pa med du zin kyang brtags pa'i dbang gis tha dad pa yod do/ /stong pa ni gzhan bral ba ste/dper na chu dang bral ba'i phyir bum pa stong pa zhes bya ba lta bu'o/ /de bzhin du rang gi mtshan nyid la sogs pa'i ngo bo nyid dang bral ba'i phyir chos de dag nyid la stong pa zhes kun tu rtog go/ /bdag med pa zhes bya ba ni chos rnams med pa nyid de/ dper na sgyu ma'i glang po che la sogs pa lta bu'o/ /chos de dag nyid/ rang gi mtshan nyid la sogs pa dang bral bar brjod par 'dod pa la stong pa zhes bya'o/ /yod pa ma yin no zhes dngos po med par brjod par 'dod pa la ni bdag med pa zhes bya'o/ /chos thams cad mtshan ma med pa'i phyir ro zhes bya ba la mtshan ma ni mtshan nyid yin na 'di ltar mtshan ma med pas de'i phyir mtshan nyid med pa'o//stong pa stong pa nyid dmigs su med pa'i phyir ro zhes bya ba ni stong pa nyid la stong pa nyid gnyis pa med pa tsam la/ stong pa stong pa nyid ces bya'i/ stong pa stong pa nyid ces bya ba'i chos gzhan ni gang yang med do zhes bya ba'i tha tshig go//chen po stong pa nyid dmigs su med pa'i phyir ro zhes bya ba ni phyogs thams cad na yang gzugs rnams med pa tsam gyi che ba la chen po stong pa nyid ces bya'o/ /chen po stong pa nyid ces bya ba'i chos gzhan ni gang yang med do zhes bya ba'i tha tshig go//de bzhin du thams cad la yang sbyar bar bya'o/ /'di ni rang bzhin stong pa nyid kyi pha rol tu phyin pa ste/ 'dus byas dang 'dus ma byas kyi chos dmigs su med pa'i phyir ro zhes bya ba ni gal te 'dus byas dang 'dus ma byas pa'i chos rnams dmigs su yod na ni de dag gi rang bzhin stong pa ma yin par 'gyur ba zhig na/'di ltar chos thams cad stong pa ste/ de bas na de dag gi rang bzhin stong pa yin no zhes bya ba'i tha tshig go/ /'di ni sbyin pa'i pha rol tu phyin pa ste/ ser sna dmigs su med pa'i phyir ro zhes bya ba ni shes rab kyi pha rol tu phyin pa la ser sna dmigs su med pa gang yin pa de yang sbyin pa'i mtshan nyid do//de bzhin du gzhan dag la yang sbyar ro/ /'di ni stobs bcu'i pha rol tu phyin pa ste/ chos thams cad kyi rnam pa thams cad dmigs su med pa'i phyir ro zhes bya ba ni chos thams cad kyi rnam pa thams cad ni gnas dang gnas ma yin pa mkhyen pa'i stobs la sogs pa ye shes bcu'i spyod yul yin na de dag gi spyod yul du ma gyur pa ni rnam pa yod pa ma yin te/'di ltar rnam pa de dag don dam par med pas de'i phyir stobs bcu'i yul du gyur pa rnam pa rnams med par mthong ba'i phyir stobs bcu'i pha rol tu phyin pa'o//lam gyi rnam pa shes pa nyid zhum pa med pa'i phyir ro zhes bya ba ni byang chub sems dpa' rnams kyi lam gyi rnam pa shes pa nyid ni chos gang yang zhum pa med de de bas na thams cad du zhum pa med pa'i rang bzhin lam gyi rnam pa shes pa nyid la mi 'jigs pa'i pha rol tu phyin pa zhes bya'o//thams cad du ye shes chags pa med cing thogs pa med pa'i phyir ro zhes bya ba ni 'di ltar byang chub sems dpa'i ye shes ni thams cad du chags pa med pa dang /thogs pa med pa ste/ de bas na de so so yang dag par rig pa'i pha rol tu phyin pa zhes bya'o/ /nyan thos dang rang sangs rgyas kyi chos thams cad las yang dag par 'das pa'i phyir ro zhes bya ba 'di ltar shes rab kyi pha rol tu phyin pa de nyan thos la sogs pa la med pas de'i phyir de sangs rgyas kyi chos ma 'dres pa zhes bya bar bgrang ngo //'di ni de bzhin gshegs pa'i pha rol tu phyin pa ste/ sangs rgyas thams cad kyis gsungs pa de bzhin gshegs pa nyid yin pa'i phyir ro zhes bya ba ni nges pa'i tshig gis ni de bzhin du gsung ba'i phyir de bzhin gshegs pa zhes bya ste/sangs rgyas kyis gsungs pa thams cad la de bzhin du dmigs pa'i shes rab kyi pha rol tu phyin pa la de bzhin gshegs pa'i pha rol tu phyin pa zhes bya'o/ / 'di ni rang byung gi pha rol tu phyin pa ste/ chos thams cad la dbang bsgyur ba'i phyir ro zhes bya ba ni 'di ltar chos thams cad de'i dbang du 'gyur te / de'i phyir rang gis chos thams cad zil gyi gnon pas rang byung gi pha rol tu phyin pa zhes bya'o/ /brgya byin gyis bsngags pa'i tshig dang /gnas brtan shA ri'i bu'i tshig dang / bcom ldan 'das rjes su yi rang ba'i tshig rnams ni brda phrad par sla bas mdo las ji skad 'byung ba bzhin no/ /shes rab kyi pha rol tu phyin pa la spyod pa'i tshe gzugs la mi gnas pa de'i tshe gzugs la brtson par byed pa yin zhes bya ba ni byang chub sems dpa'i lam gyi rnam pa shes pa nyid kyi ye shes ni chos gang la yang mi gnas te/de bas na mi gnas pa nyid de'i brtson par byed pa zhes bya'o/ /kau shi ka gzhan yang byang chub sems dpa'i gzugs la brtson par mi byed de 'di ltar gzugs la brtson par mi byed pa 'di lta bu ni gzugs la brtson par byed pa yin no zhes bya ba la 'gres snga mar ni gnas pa bkag go//'dir ni bsgrub pa bkag go/ /gzugs sngon gyi mthar mi dmigs so zhes bya ba la sogs pas dus gsum char du yang mi dmigs par ston to//shA ri'i bu 'di ltar gzugs kyi zab pa gang yin pa de gzugs ma yin no zhes bya ba ni zab pa zhes bya ba kun brtags pa yin pa'i phyir don dam par gzugs nyid med pas de skad ces bya'o/ /zab pa'i 'gres dang / gting dpag dka' ba'i 'gres dang / tshad med pa'i 'gres dang /brgya byin gyi tshig dang / lung bstan pa thob pa dang / 'brog dgon pa'i dpe dang / rgya mtsho chen po'i dpe dang / dpyid kyi dpe dang / sbrum ma'i dpe dang / rjes su bzung zhing yongs su bstan pa'i tshig 'di rnams ni brda phrad par sla'o/ /shes rab kyi pha rol tu phyin pa bsgom pa yongs su rdzogs pa'i rtags rnam pa gnyis te/chos thams cad 'phel ba dang / 'grib par mi mthong ba dang / chos rnams kyi mtshan nyid mthong ba'o/ /bsam gyis mi khyab pa bstan pa dang / bsam gyis mi khyab pa la rnam par rtog pa mi 'byung ba yang /bsgom pa yongs su rdzogs pa'i rtags so/ /pha rol tu phyin pa drug la spyod pa'i rtags ni gzugs su mi rtog rnam par mi rtog go/ /gzugs kyi mtshan mar mi rtog/ rnam par mi rtog go/ /gzugs kyi rang bzhin du mi rtog /rnam par mi rtog go zhes bya ba ste/stong pa nyid kyi ting nge 'dzin gyis chos rnams su mi rtog go/ /mtshan ma med pa'i ting nge 'dzin gyis mtshan mar mi rtog go/ /smon pa med pa'i ting nge 'dzin gyis rang bzhin du mi rtog go/ /kun brtags pa la rnam par mi rtog go/ /gzhan gyi dbang la rnam par mi rtog go//sngar ni de bzhin nyid zab pas zab pa nyid du gsungs so/ /da ni de bzhin nyid kyi mtshan nyid gzugs la sogs pa la sgro btags nas zab pa bshad pa ni gdul ba'i bsam pa sna tshogs kyi phyir ro/ /bcom ldan 'das chos thams cad kyi dag pa'i phung po zhes bya ba ni chos thams cad kyi phung po dag pa zhes bya ba'i tha tshig go//bcom ldan 'das bar chad mang du mi 'byung ba ni ngo mtshar che'o zhes bya ba ni legs par 'gyur ba la bgegs mang ngo snyam du bsams nas gsungs pa'o/ /de'i 'og tu dam pa'i chos klog pa'i bsod nams bstan pa ni brda phrad sla'o//lnga brgya tha ma zhes bya ba ni brgya phrag lnga bsdus pa la lnga brgya zhes bya'o/ /de bzhin gshegs pa'i dam pa'i chos gnas pa'i dus ni lo lnga stong ngo zhes gsungs so/ /lo lnga stong la lo lnga brgya lnga brgya'i dbang du byas la phyed phyed du bcad na lnga brgya phrag bcur 'gyur ro//de la le'u bcu ste thog mar khong du chud pa'i le'u dang / sgrub pa'i le'u dang / lung gi le'u ste/ le'u gsum mo/ /de la khong du chud pa'i le'u la yang rnam pa gsum du dbye ste/ dgra bcom pa'i le'u dang /phyir mi 'ong ba'i le'u dang / rgyun du zhugs pa'i le'u'o/ /bsgrub pa'i le'u la yang rnam pa gsum du dbye ste/ lhag mthong gi le'u dang / ting nge 'dzin gyi le'u dang / tshul khrims kyi le'u'o/ /lung gi le'u yang rnam pa gsum du dbye ste/ chos mngon pa'i sde snod dang / mdo sde'i sde snod dang / 'dul ba'i sde snod de le'u dgu dang / rtags tsam 'jigs pa'i le'u dang bcur 'gyur ro/ /de la le'u re re la yang lo lnga brgya lnga brgya thogs te/ de ltar le'u bcu po dag gis lnga brgya phrag bcu la lo lnga stong du 'gyur ro//de la lnga brgya thams cad kyi dang po la dgra bcom pa/ lnga brgya gnyis pa la phyir mi 'ong ba/ lnga brgya gsum pa la rgyun tu zhugs pa/ lnga brgya bzhi pa la lhag mthong / lnga pa la ting nge 'dzin/ drug pa la tshul khrims/ bdun pa la chos mngon pa/brgyad pa la mdo sde/ dgu pa la 'dul ba/ lnga brgya bcu pa la rtags tsam ste/ 'di nyid la brgya pa tha ma zhes bya'o/ /kha cig na re mi rnams kyi tshe'i tshad mi lo lnga brgya thub ste de la lo lnga bcu pa snga ma la ni mi rnams kha dog dang gzugs dang stobs dang / shes rab la sogs pa mngon par 'phel ba yin la lnga bcu pa phyi ma la ni 'grib pa yin no/ /de bzhin du dus kyi mtha' bstan pa 'grib pa'i dus kyang lnga bcu pa phyi ma dang 'dra bas lnga brgya pa tha ma zhes gdags so zhes zer ro/ / yon tan gyi phan yon thams cad bstan pa ni brda phrad sla'o/ / bdud kyi las rnams ni spobs pa phyis te skyes na thogs par 'gyur ba dang / spobs pa ha cang myur bar skyes na nga rgyal can du 'gyur ba dang / ma gus par byed pa dang / glal ba dang / dregs pa'o/ /rgod ces bya ba ni chos 'chad pa'i tshe rgod pa'am phan tshun kyal ka byed pa'o//phan tshun steg cing zhes bya ba ni gcig la gcig dgod bro bar byed pa'o/ /phan tshun bshes gnyen pa la chags zhes bya ba ni phan tshun sems bsrung ba'i phyir byed kyi dad pas byed pa ma yin no/ /yi ge gzhan la chags shing tshig gi don mi shes pa zhes kyang 'byung ngo //glal zhing 'dzin na zhes bya ba la glal ba la sogs pa 'di lnga las snga ma ni yi ger 'bri ba'i tshe na'o/ /'dir ni 'dzin pa'i tshe'o/ /'gro ba'i sems bskyed pa ji snyed byung ba/ de snyed kyi bskal pa yongs su 'dzin par 'gyur zhes bya ba ni slar 'gro ba'i sems bskyed pa snyed kyi bskal par shes rab kyi pha rol tu phyin pa 'di la brtson par bya dgos te 'chal ba'i shes rab yin pas de snyed kyi bskal pas yongs su smin par 'gyur ro//de dag ni rnam pa thams cad mkhyen pa nyid kyi shing gi rtsa ba spangs te zhes bya ba ni dper na shing gi rtsa ba spangs te yal ga dang 'dab ma dang /lo ma la sgrub pa dag don ji lta ba bzhin du mi 'grub pa de bzhin du/ rnam pa thams cad mkhyen pa nyid kyi shing ljon pa med par nyan thos dang rang sangs rgyas kyi yal ga dang lo ma la sogs pa lta bu yang thob par mi 'gyur ro zhes bya ba'i tha tshig go/ / ji ltar khyi rje bo'i zan zhim po rnyed sla ba bor te mi'i zan btsal na mi rnyed pa'am/ cung zad cig rnyed par 'gyur ba de bzhin du 'dir yang sbyar bar bya'o/ /ji ltar la la zhig glang po che rnyed kyang bor te/ bdag ni glang po che'i rjes 'dod kyi glang po che ni mi 'dod do zhes zer ba de dpyas su 'gyur ba de bzhin du sbyar bar bya'o//ba lang gi rjes kyi dpe dang shing mkhan rnam par rgyal ba'i khang pa dbub par 'dod pa nyi ma dang zla ba'i gzhal med khang gi dkyil 'khor tshol zhing rnam par rgyal ba'i khang pa yang 'di tsam mo zhes bya ba'i dpe yang de bzhin no//rab 'byor shes rab kyi pha rol tu phyin pa ni spobs pa med pas zhes bya ba ni rnam par mi rtog pa'i phyir ro/ /bsam gyis mi khyab pa'o zhes bya ba ni rtog ge'i spyod yul las yang dag par 'das pa'i phyir ro/ /skye ba med cing 'gag pa med pa'o zhes bya ba ni mi 'gyur bar yongs su 'grub par yongs su grub pa'i phyir ro//kun nas nyon mongs pa med cing / rnam par byang ba med pa'o zhes bya ba ni rang bzhin gyis yongs su dag pa'i phyir ro/ /'khrugs pa med pa'o zhes bya ba ni rtag tu mnyam par gzhag pa'i phyir ro/ /brjod du med pa ni so so rang gis rig pa'i phyir ro//smrar med pa ni/ sgra las yang dag par 'das pa'i phyir ro/ /rab tu brjod du med pa ni rnam par rtog pa dang / rnam par dpyod pa las yang dag par 'das pa'i phyir ro/ /dmigs su med pa ni dngos por dmigs pa thams cad dang bral ba'i phyir ro//shes rab kyi pha rol tu phyin pa zab mo 'di dngos po med ces bya bar 'du shes na de yang bdud kyi las so zhes bya ba ni dngos po med pa'i 'du shes kyi shes rab kyi pha rol tu phyin pa bshad pa la rim gror mi byed pa'i nyes pa'o/ /shes rab kyi pha rol tu phyin pa 'di yi ge ma mchis pa'o zhes bya ba ni brjod du med pa dang /mnyan du med pa'i phyir ro/ /bdud kyi las lhag ma rnams ni brda phrad par sla'o/ /rab 'byor shes rab kyi pha rol tu phyin pa 'dis de bzhin gshegs pa'i stobs bcu bskyed do zhes bya ba la sogs pas sangs rgyas kyi chos rnams bskyed pa'i phyir don dam pa'i de bzhin gshegs pa bskyed pa yin no zhes ston to// 'jig rten ston pa zhes bya ba ni rnam pa bcu gcig gis 'jig rten ston par bshad de/ phung po'i 'jig rten ston pa dang / chos thams cad kyi rang bzhin brtags pa dmigs su med par ston pa dang /sems can thams cad kyi sems kyi spyod pa dang / dbye ba la sogs pa ston pa dang / chos thams cad kyi de bzhin nyid ston pa dang / chos thams cad mtshan nyid med pa'i mtshan nyid du ston pa dang / byas pa gzo zhing byas pa tshor ba'i dbang dang / chos thams cad shes pa po med cing /mthong ba po med par ston pa dang / ma mthong ba'i chos thams cad ston pa dang / 'jig rten stong pa nyid du brjod pa rig par byed shes par byed/ rnam par shes par byed ston par byed pa'i dbang dang / 'jig rten 'di bsam gyis mi khyab cing dben la/nang la sogs pa stong zhing zhi bar ston pa dang / 'jig rten 'di dang 'jig rten pha rol po'i 'du shes med pas so/ /de la rab 'byor phung po lnga ni de bzhin gshegs pas 'jig rten du gsungs so/ /shes rab kyi pha rol tu phyin pa ni phung po lnga po 'di dag 'jig par ston pa ma yin/rab tu 'jig par ston pa ma yin te zhes bya ba la shes rab kyi pha rol tu phyin pa ni phung po'i de bzhin nyid 'ba' zhig mthong gi kun brtags pa'i phung po ni ma yin no/ /'jig pa dang rab tu 'jig pa zhes bya ba ni chud za ba dang ma rung bar 'gyur ba la bya'o// shes rab kyi pha rol tu phyin pa nyid kyang / shes rab kyi pha rol tu phyin pa zab mo 'di nyid la med cing mi dmigs na shes rab kyi pha rol tu phyin pa gzugs yod pa'am dmigs par lta ga la 'gyur zhes bya ba ni dmigs par bya ba dang / dmigs par byed pas mnyam pas mnyam par gyur pa'i tshe/rnam par mi rtog pa'i shes rab kyi pha rol tu phyin pa la/ shes rab kyi pha rol tu phyin pa nyid kyang mi snang na gzugs la sogs pa lta ci smos zhes bya ba'i tha tshig go/ /rab 'byor de bzhin gshegs pas sems can de dag gi sems bsdus pa dang /spros pa ni chos nyid kyis yang dag pa ji lta ba nyid du rab tu mkhyen to zhes bya ba ni sems kyi chos nyid gzigs pas/ sems bsdus pa dang / spros pa rnams yang dag pa ji lta ba nyid ma yin zhing med par mkhyen pa la sems bsdus pa dang / spros pa mkhyen pa zhes bya'o//de nas yang sems bsdus pa dang spros pa de dag ji ltar mkhyen zhes gsol pa dang / zad pa dang 'dod chags dang bral ba dang 'gag pa zhes bya ba la sogs pas ston te/ sems can zad pa'i chos nyid dang / 'dod chags dang bral ba'i chos nyid dang 'gag pa'i chos nyid dang spong ba'i chos nyid dang /ngo bo nyid kyis dben par mkhyen pa la sems de dag mkhyen zhes bshad do / /de'i 'og tu rab 'byor sems 'dod chags dang bcas pa gang yin pa de ni sems kyi yang dag pa ji lta ba nyid ma yin no zhes bya bas 'dod chags dang bcas pa'i sems la sogs pa mkhyen par ston to//'di la 'dod chags dang bcas pa'i sems la 'dod chags dang bcas pa'i sems su yang dag pa ji lta ba bzhin du rab tu mkhyen zhes bya ba la 'dir gal te 'dod chags dang / sems dang / 'dod chags dang bcas pa nyid kyang de ltar shes na 'dod chags dang bcas pa zhes bya ba'i sems kyi chos yang dag pa ji lta ba bzhin du yod pa ma yin gyi yang dag pa ji lta ba nyid ces bya ba'i chos ngo bo nyid kyis dben pa la sems kyi chos yang dag pa ji lta ba nyid ces bya'o//de bzhin gshegs pa shes rab shin tu rnam par dag pa ni sems sam/ 'dod chags sam/ sems las byung ba'i chos sam/ 'dod chags dang bcas pa la sogs par mi bzung ste/ 'dod chags dang bcas pa la sogs pa'i gnas skabs kyi kun brtags pa de shin tu med pa'i phyir ro//de bas na 'dir tshig gi don ni 'di yin par shes par bya ste/ 'dod chags bcas pa'i sems yang dag pa ji lta ba nyid ma yin zhing de bden pa ma yin pas de spangs te/ yang dag pa ji lta ba nyid kyi rnam par rab tu mkhyen to zhes bya ba'i tha tshig go//de bas yang 'dod chags dang bral ba'i sems yang dag pa ji lta ba nyid du rab tu mkhyen pa ston te/ rab 'byor sems 'dod chags dang bral ba gang yin pa de sems 'dod chags dang bcas pa ma yin zhes bya bas ci bstan zhe na sems 'dod chags dang bral ba dang /'dod chags dang bcas pa nyid don dam par med pa 'ba' zhig tu ma zad kyi/ 'on kyang kun brtags pa'i bdag nyid du yang 'dod chags dang bral ba'i gnas skabs na/ 'dod chags dang bcas pa zhes brjod par mi nus te/ 'dod chags dang bcas pa dang 'dod chags dang bral ba gnyis sems gcig la mi srid pa dang /sems gnyis cig car mi skye ba'i phyir ro/ /de bas na yang dag pa ma yin par yang ma zad kyi/ kun brtags pa'i rnam par yang 'dod chags dang bral ba la 'dod chags dang bcas pa zhes byar mi rung bas/'dod chags dang bral ba nyid ces bshad do/ /de bzhin du zhe sdang dang bral ba dang / gti mug dang bral ba yang sbyar bar bya'o/ /sems rgya che ba la rgya che zhes bya ba dang / rab 'byor 'di la de bzhin gshegs pas sems can de dag gi sems rgya che ba ma yin zhum pa ma yin par rab tu mkhyen to zhes bya ba la sogs pas 'di skad bstan par 'gyur te/'di'i sems ni rgya che ba'o/ /gzhan gyi sems ni zhum pa'o/ /'di'i sems ni 'phel ba'o/ /gzhan gyi sems ni 'grib pa'o/ / 'di'i sems ni khyab par 'gro ba'o/ /gzhan gyi sems ni khyab par 'gro ba ma yin pa'o zhes bya bar mi gzigs kyi/ shes rab kyi pha rol tu phyin pa 'di la brten nas/ sems rgya che ba de dngos po med cing yod pa ma yin pa/ ngo bo nyid med par rab tu mkhyen pa ni sems rgya che ba la sems rgya che bar yongs su mkhyen nas/de yang dag pa ji lta ba nyid du dngos po med par rab tu mkhyen to zhes bstan pa yin no/ /de bzhin du chen por gyur pa zhes bya ba 'dir yang rab 'byor 'di la de bzhin gshegs pas sems can gzhan dang gang zag gzhan dag gi sems 'ong ba med pa dang /'gro ba med pa dang gnas pa med pa dang / skye ba med pa dang / 'gag pa med par gzigs so zhes bya ba la sogs pas 'di ston te/ chen po zhes bya ba 'di la chen po ni skye ba'i dbang dang / yang dag par gnas pa'i dbang dang gnas shing yangs pa'i mtshan nyid gzhan du gyur pas 'gyur ro//gyur pa zhes bya ba de ni 'ong ba dang 'gro ba'i dbang gis 'gyur te/ de bzhin gshegs pa'i shes rab kyis ni de lta bur mi gzigs kyi dngos po med par ngo bo nyid kho nar gzigs so//de ltar na sems chen por gyur pa la sems chen por 'gyur ba med pas 'di'i dngos po med par rab tu mkhyen pa la de skad ces bya'o/ /sems tshad med pa zhes bya bas 'di ston te/ sems can de bdag gi sems de gnas pa ma yin pa dang rgyun chad pa ma yin pa dang /yongs su gnas pa ma yin pa dang / yongs su mi gnas pa ma yin par yang dag par rjes su gzigs so zhes bya ba la sogs pa 'di skad bstan te/ tshad med pa ni khyab par gnas pa'am/ dbyibs kyi dbang gis 'gyur grang na/ de bzhin gshegs pa ni de lta bu'i tshad med pa 'di sems mi gzigs kyi sems thams cad mi gnas pa dang /rten med par gzigs te/ de ltar gzigs pa na tshad med pa'i sems yang dag pa ji lta ba nyid du rab tu mkhyen to zhes bya'o/ /sems de mtshan nyid med pa/ ngo bo nyid dang bral bar gzigs zhes bya ba ni ngo bo nyid med pa dang /mtshan nyid med pa'i phyir bstan par mi nus pas bstan du med par gzigs so/ /spyan lnga la sems de dag snang bar mi 'gyur zhes bya ba ni bsags pa'i phyir sems te/ kun brtags pa la bya'o/ /de yang de'i bdag nyid kyis yod pa ma yin te/med pa nyid kyi phyir de kho na gzigs pa rnams kyi spyan la snang bar mi 'gyur ro/ /de bas na sems ni bltar med pa'o zhes bya ba'i tha tshig go/ //bam po nyi shu gcig pa/ sems gsal ba dang / bying ba dang btsums pa dang / bkram pa zhes bya ba ni mu stegs can lta ba phyin ci log pa rnams sems rtag par 'dzin pa'i dbang gis ni gsal ba'o//chad par 'dzin pa'i dbang gis ni bying ba'o/ /skur pa 'debs pa'i dbang gis ni btsums pa'o/ /sgro 'dogs pa'i dbang gis ni bkram pa ste yang dag pa ji lta ba bzhin du mkhyen to//gzugs la brten ces bya ba ni phung po lnga las brtsams te skye'o zhes bya bar bstan pa'o/ /de ni gzugs la gnas pa'o zhes bya ba ni gzugs la gnas te sems 'phro ba dang / gzugs bdag go zhes mngon par zhen nas smra'o zhes bya ba'i tha tshig go/ /de bzhin du de ni tshor ba la gnas pa zhes bya ba la sogs pa la yang sbyar bar bya'o//de bzhin du lta bar gyur pa las sems 'phro ba la sogs pa yang bstan nas/ da ni rnam par rtog pa'i spros pa'i 'phro ba la sogs pas bstan pa'i phyir gsungs pa/ rab 'byor gzhan yang de bzhin gshegs pas shes rab kyi pha rol tu phyin pa 'di la brten nas gzugs mkhyen to//gzugs ji ltar mkhyen zhe na ji ltar de bzhin nyid du 'gyur ba med cing rnam par rtog pa med la/ mtshan ma med cing zhes bya ba la sogs pa rnam pa drug gis chos thams cad de bzhin nyid du bdag nyid du mkhyen to//de la 'gyur ba med pa zhes bya ba ni gzhan ma yin pa de bzhin nyid kyi phyir ro/ /rnam par rtog pa med ces bya ba ni ma nor ba de bzhin nyid kyi phyir ro/ /mtshan ma med pa ni yang dag pa'i mtha'i phyir ro/ /lhun gyis grub pa ni gsal bar byed pa med pa'i phyir ro//spros pa med pa ni ngo bo nyid kyis dben pa'i phyir ro/ /de dmigs su med pa ni dngos po med pa'i ngo bo nyid kyi phyir ro/ /da ni zag pa dang bcas pa dang / zag pa med pa dang / 'jig rten pa dang / 'jig rten las 'das pa'i chos thams cad dang /'phags pa'i gang zag thams cad dang / 'phags pa'i chos thams cad dang / de bzhin gshegs pa yang de bzhin nyid du tha mi dad pa'i phyir/ de bzhin nyid kyi ngo bo nyid du chos thams cad gnyis su med par ston te / rab 'byor de ltar na sems kyi gsal ba dang /bying ba dang / bkram pa dang / btsums pa'i de bzhin nyid gang yin pa de ni phung po dang khams dang / skye mched dang / rten cing 'brel bar 'byung ba'i de bzhin nyid do zhes bya ba la sogs pas so/ /lha'i bu dag shes rab kyi pha rol tu phyin pa zab mo 'di ni stong pa nyid kyi mtshan nyid de zhes bya ba ni byis pa'i spyod yul du gyur pa kun brtags pa'i chos rnams dang /bral ba nyid la stong pa nyid kyi mtshan nyid ces bya'o / /rtog pa dang rnam par rtog pa'i spros pa thams cad kyi mtshan ma med cing shin tu zhi ba'i phyir mtshan ma med pa'i mtshan nyid ces bya'o//rnam par rtog pa'i smon pa thams cad yongs su btang ba'i phyir phyis smon pa'i mtshams mi sbyor ba ni smon pa med pa'i mtshan nyid ces bya'o/ /rgyu dang rkyen dang 'bras bur rnam par rtog pa'i spros pa thams cad rgyun chad cing skye ba la sogs pa dang bral ba'i phyir 'dus ma byas pa'i gnas skabs ni skye ba med pa dang /'gag pa med pa'i mtshan nyid ces bya'o/ /gyur pa rnam pa bzhis gnas gyur cing shin tu yongs su dag pa nyid la kun nas nyon mongs pa med pa dang / rnam par byang ba med pa'i mtshan nyid ces bya'o//sgyu ma dang rmi lam dang mig yor la sogs pa bzhin du yongs su ma grub cing dngos po med pa'i ngo bo nyid kyi mtshan nyid ces bya'o/ /yongs su rtog pa dang rnam par rtog pa thams cad dang bral zhing don dam par brjod du med pas nam mkha' bzhin du gang du yang gnas pa med pa la mi gnas pa'i mtshan nyid ces bya'o//sngon gyi mtha' dang phyi ma'i mtha' dang / dbus kyi mtha' rnam par spangs pa'i phyir yod pa dang med pa'i dngos po dang bral ba rang bzhin gyis yongs su mya ngan las 'das pa nyid la chad pa med pa dang /rnam par rtag pa med pa'i mtshan nyid ces bya'o/ /tha dad pa'i rnam par rtog pa thams cad spangs pas gnyis su med pa tha dad pa dang gcig pa dang bral ba nyid ni don gcig pa ma yin pa dang / don tha dad pa ma yin pa'i mtshan nyid ces bya'o/ /rtsol ba thams cad spangs pas gsal bar byed pa med pa la byed pa med pa'i phyir/'gro ba dang 'ong ba dang bral ba nyid ni 'ong ba med pa dang 'gro ba med pa'i mtshan nyid ces bya'o/ /rnam pa thams cad du thams cad rang gi mtshan nyid thams cad dang bral bas mtshan nyid med pa'i bdag nyid du gnas pa ni nam mkha'i mtshan nyid ces bya'o//de yang de bzhin gshegs pas 'jig rten gyi brdar bka' stsal te don dam par ni ma yin no zhes bya ba ni brjod du med pa'i mtshan nyid du gsungs pa'o/ /lha'i bu dag mtshan nyid de dag ni lha dang mi dang lha ma yin du bcas pa'i 'jig rten gyis gzhan du bya bar mi nus so zhes bya ba ni mi 'gyur bar yongs su grub pa dang /phyin ci ma log par yongs su grub pas yongs su grub pa'i mtshan nyid du gsungs pa'o / /lha'i bu dag mtshan nyid ni mtshan nyid gzhan du mi byed do zhes bya ba ni de bzhin nyid kyis de bzhin nyid rnam par 'khrug par mi byed ces bya ba'i tha tshig go//mtshan nyid ni mtshan nyid mi shes so zhes bya ba ni de bzhin nyid kyis de bzhin nyid mi shes te ji ltar nam mkhas nam mkha' mi shes pa bzhin no/ /mtshan nyid ni mtshan nyid med pa mi shes so zhes bya ba ni de bzhin nyid kyis kun brtags pa mi shes te/ji ltar nam mkha' ri bong gi rwa mi shes pa bzhin no/ /mtshan nyid med pa ni mtshan nyid mi shes so zhes bya ba ni kun brtags pas de bzhin nyid mi shes te/ ji ltar ri bong gi rwas nam mkha' mi shes pa bzhin no/ / mtshan nyid med pas mtshan nyid mi shes so zhes bya ba kun brtags pas kun brtags pa mi shes te/ ji ltar ri bong gi rwas ri bong gi rwa mi shes pa bzhin no/ /mtshan nyid gang yin pa dang mtshan nyid med pa gang yin pa gnyis ka la yang gang gis shes par byed pa'i ngo bo nyid med do zhes bya ba ni de bzhin nyid rnam par mi rtog pa dang lhun gyis grub pa nyid dang spyod pa med pa'i phyir rab tu shes pa'i ngo bo nyid med de kun brtags pa rnams med pa'i phyir ro//gang gis shes par byed ces bya ba ni shes pa la sogs pas so/ /gang shes par byed ces bya ba ni gang zag gam chos so//gang la shes par byed ces bya ba ni gang zag gam chos gzhan la'o/ /lha'i bu dag mtshan nyid 'di dag ni gzugs kyis mngon par 'dus byas pa ma yin no zhes bya ba la sogs pas ni mngon par 'du byed pa med pa'i mtshan nyid ston to/ / mtshan nyid thams cad ni mtshan nyid med pa'i phyir zhes bya ba ni stong pa nyid dang / mtshan ma med pa la sogs pa sngar smos pa rnams dang / 'dus byas dang / 'dus ma byas pa thams cad dang kun brtags pa'i mtshan nyid kyis zhes bya ba'i tha tshig go/ / de bzhin gshegs pa rnams byung yang rung ma byung yang rung zhes bya ba la sogs pas chos gnas pa'i mtshan nyid gsungs pa'o/ /mtshan nyid kyi dbyings ni mtshan nyid med pa'i dbyings ji lta ba bzhin du gnas pa nyid de / de ni de bzhin gshegs pas yang dag par mngon par rdzogs par sangs rgyas zhes bya ba ni mtshan nyid kyi rnam par rtog pa thams cad med pa'i phyir mtshan nyid med pa'i dbyings zhes bya'o//de'i phyir de bzhin gshegs pa de bzhin gshegs pa zhes bya'o zhes bya ba ni de bzhin nyid du thugs su chud pa'am/ de bzhin nyid thugs su chud pa la nges pa'i tshig gis de bzhin gshegs pa zhes bya'o//de bzhin gshegs pas shes rab kyi pha rol tu phyin pa yang dag par rab tu bstan pas mtshan nyid thams cad yang dag par rab tu mkhyen zhes bya ba ni/ lha'i bu dag stong pa nyid kyang mtshan nyid dang mtshan ma med pa'i mtshan nyid yin pa'i phyir/'di ni zab pa'o zhes bya ba la sogs pa sngar smos pa ston to/ /bla na med pa yang dag par rdzogs pa'i byang chub mngon par rdzogs par sangs rgyas nas kyang mtshan nyid thams cad rab tu dbye ba mdzad de zhes bya ba ni don dam pa rnam par mi rtog pa de lta bu mngon par rdzogs par sangs rgyas nas kyang sems can rnams la phan gdags pa'i phyir kun rdzob kyi mtshan nyid rnams bshad do zhes bya ba'i tha tshig go//gzugs ni gzugs su rung ba'i mtshan nyid de zhes bya ba la sogs pas ni kun rdzob kyi mtshan nyid rnams ston to//'di la byas pa gzo ba dang byas pa tshor ba ni bdag gis 'di byas so/ /bdag gis 'di khas blangs so zhes bya bar bdag gis byas pa dang / bsgrub par rtogs pa'i phyir ro/ /ma byas pa dang 'gyur ba med par mngon par rdzogs par sangs rgyas zhes bya ba ni sus kyang ma byas pa'i chos rnams ma byas pa'i bdag nyid du mngon par rdzogs par sangs rgyas pa'o//'gyur ba med pa ni mi 'gyur ba med par mngon par rdzogs par sangs rgyas zhes bya ba ni mi 'gyur ba'i bdag nyid du mkhyen pa'o/ /lus med pa'i phyir zhes bya ba ni lus med pa khog pa med pa gzugs med pa nyid do//rab 'byor de ltar na lus med cing khog pa 'di ni de bzhin gshegs pas ma byas pa mkhyen pa dang / ma byas pa rig pa'o zhes bya ba ni 'dus ma byas kyi mtshan nyid mkhyen pas ma byas pa mkhyen pa'o/ /don dam par 'byung ba med pa'i mthus ye shes byas pa med pa chos thams cad la zhugs so zhes bya ba la don dam pa byung ba med pa'i mthus zhes bya ba ni don dam pa/ma skyes ma byung ba'i dbang gis zhes bya ba'i tha tshig go/ /de bzhin gshegs pa'i ye shes ni yongs su grub pa'i chos kyi sku'i mtshan nyid yin pas ma byas pa ste/de bas na de bzhin gshegs pa ni ma byas pa mkhyen pa'o zhes bya bar ston to/ /bcom ldan 'das gang gi tshe chos thams cad skyed pa po ma mchis shing mthong ba po ma mchis pa zhes bya ba ni mi skyed pas na skyed pa po med pa ste/de bas na shes rab kyi pha rol tu phyin pa skyed pa'o zhes bya ba ni mi mthong ngo / /mthong bar mi byed pas mthong ba po med pa ste/ de bas na 'jig rten ston pa'o zhes bya ba mi mthong ngo zhes ston to/ /rab 'byor de de bzhin no zhes bya ba la sogs pas chos thams cad stong pa dang /gsob dang gsog yin pa'i phyir skyed pa po med pa dang / mthong ba po med pa bden mod kyi/ don 'di lta bu shes pa 'jig rten na su yang med de/ ngas ni shes rab kyi pha rol tu phyin pa 'di la brtan nas/ don ji lta ba bzhin du mngon par rdzogs par sangs rgyas te/ de lta bas na der bskyed pa yin zhing ston pa yin no zhes de skad ston te/'di ni bstod pa'i tshig ces bya ba'i tha tshig go/ /gzugs mthong ba med pa'i phyir ston pa'o zhes bya ba ni gang gi phyir gzugs ngas ma mthong ba de'i phyir de ston pa'o/ /gal te gzugs mthong bar gyur na ni rab rib can bzhin du yang dag pa ma yin pa'i don mthong bas de ston par yang mi 'gyur ro//rab 'byor nam gzugs la dmigs pa'i rnam par shes pa mi 'byung ba'i tshe zhes bya ba ni ji ltar rab rib can la skra shad 'dzings pa la sogs pa la dmigs pa'i rnam par shes pa 'byung ba de phyis mi 'byung bar gyur pa de nas mthong ba yongs su dag pa zhes bya bar 'gyur te/de bzhin du 'dir yang gzugs la sogs pa la dmigs pa'i rnam par shes pa rnams mi 'byung ba'i phyir ston pa zhes bya ba'i ming du 'gyur ro/ /bsam gyis mi khyab ces bya bar ston to zhes bya ba ni de bzhin nyid rtog ge'i spyod yul las yang dag par 'das pa'i phyir ro//rab 'byor gzugs ni bsam gyis mi khyab/ gzhal du med/ dpag tu med/ grangs med cing mi mnyam pa dang mnyam pa ste snang ba med pa'o zhes bya ba ni gzugs na snang ba med pa ste ci'i phyir zhe na kun brtags pa'i gzugs ni ri bong gi rwa bzhin du med pa'i phyir snang ba med do//chos nyid kyi gzugs ni rnam par shes pa gang gis kyang gzung bar mi nus pa'i phyir snang ba med de/ gang gi phyir de ltar snang ba med pa de'i phyir bsam gyis mi khyab ces bya gzhal du med ces bya/dpag tu med ces bya ba la sogs pa'o/ /bsam gyis mi khyab pa la sogs pa bstan pa ni gzhung las 'byung ba bzhin du brda phrad sla'o/ /de la ni sems dang sems las byung ba'i chos rnams kyang mi dmigs so zhes bya ba ni sems dang sems las byung ba'i chos rnams kyis gzung du med ces bya ba'i tha tshig ste/de bas na snang ba med pa zhes bya ba gsungs so/ /ci'i phyir gnas brtan rab 'byor don chen po'i slad du nye bar gnas pa'o zhes bya ba la sogs pa bshad zin pa'i skabs yang slar glengs te bstan zhe na 'khor bsdu ba'i phyir 'di nyid glengs nas rgya cher spro bar 'dod pa'i phyir yang bstan te/sngar ni sangs rgyas rnams kyi sngon gyi spyod pa la phan 'dogs pa yin par bstan to/ /da ni sangs rgyas kyi bya ba byed do zhes bstan pa'o/ /shes rab kyi pha rol tu phyin pa ni gzugs la yongs su 'dzin pa med pa dang /mngon par zhen pa med par nye bar gnas pa'o zhes bya ba ni gang gi phyir shes rab kyi pha rol tu phyin pa mthong bas gzugs la sogs pa'i chos rnams la sred pas yongs su 'dzin pa dang / lta bas mngon par zhen pa mi 'byung ba de'i phyir/shes rab kyi pha rol tu phyin pa de yongs su 'dzin pa med pa dang / mngon par zhen pa med par nye bar gnas pa'o zhes bya ba'i ming du 'gyur te don chen po nyid du ston to/ /rab 'byor ngas kyang zhes bya ba ni bdag nyid dbang du gyur par gsungs pa'o/ / dad pas rjes su 'brang ba dang chos kyi rjes su 'brang ba dang / dgra bcom pa dang rang sangs rgyas kyi bar gyi shes pa dang / spros pa gang yin pa de ni byang chub sems dpa' mi skye ba'i chos la bzod pa thob pa'i bzod pa'o zhes bya ba ni byang chub sems dpa'i shes rab ni che bar bstan te/nyan thos dang rang sangs rgyas thams cad kyi dgra bcom pa'i lam gyi 'bras bu'i shes pa rnams dang nyon mongs pa thams cad spangs pa rnams ni sa brgyad pa la zhugs pa'i mi skye ba'i chos la bzod pa thob pa tsam nyid kyis mthar gtugs par 'gyur te/ de dag gi shes pa dang spang ba ni bzod pa de las lhag pa med do//de phan chad ni byang chub sems dpa' rnams rnam pa thams cad du nyon mongs pa med pa'o/ /de dag shin tu yang mi ring ba zhig tu phyin nas mi snang bar gyur te zhes bya ba ni bshad pa 'dis de dag gi bya ba yongs su rdzogs par bstan to//de nas gnas brtan rab 'byor gyis bshad pa 'di la mos pa la sogs pa phun sum tshogs pa'i gang zag rnams gus pa skyed pa'i phyir de dag gi skye ba zhus pa/ gang shes rab kyi pha rol tu phyin pa zab mo 'di thos ma thag tu mos par 'gyur ba de gang nas shi 'phos te 'dir skyes par gyur pa lags zhes bya ba la sogs pa'o//'dir yang byang chub sems dpa' dkar po'i phyogs su gtogs pa gsum dang nag po'i phyogs su gtogs pa gsum bstan te mi rnams nyid kyi nang nas shi 'phos te mi rnams nyid kyi nang du skyes pa ni dge ba ste gcig go//sangs rgyas kyi zhing gzhan dag nas shi 'phos te mi rnams kyi nang du skyes pa yang dge ba ste gnyis pa'o/ /dga' ldan nas shi 'phos te 'dir skyes pa yang dge ba ste gsum pa'o/ /nag po'i phyogs gsum ni sngon gyi mthar mnyan pa dang yongs su dris pa dang mi ldan pas 'dir skyes na yang bshad pa lam mos pa ni gcig go//sngon gyi mthar mnyan pa la sogs pa dang mi ldan pa 'dir dad pa tsam gyis thos na yang 'phrogs par 'gyur zhing ldam ldem du 'gyur ba ni gnyis pa'o/ /gang sngon gyi mthar bshad pa 'di dad pa tsam gyis dris na yang 'dzin pa la sogs pa dang mi ldan na phyis nyan thos dang rang sangs rgyas kyi theg pa dag tu lhung bar 'gyur ro zhes bya ba ni gsum pa'o//'dir yang rgya mtsho'i gru'i dpe dang / bum pa'i dpe dang / de nas yang gru'i dpe dang mi rgad po'i dpe dag ni gzhung nyid las brda phrad sla'o//de ltar shes rab kyi pha rol tu phyin pa dang thabs mkhas pa dang mi ldan na theg pa gnyis su ltung gi ldan na bla na med pa yang dag par rdzogs pa'i byang chub thob par 'gyur bar bstan pa'i phyir gnas brtan rab 'byor gyis ji ltar de gnyis dang mi ldan par 'gyur ba dang /ji ltar de gnyis dang mi ldan par mi 'gyur ba zhus pa dang / de'i tshe bcom ldan 'das kyis pha rol tu phyin pa drug la dmigs pa'i dbang dang nga rgyal gyi dbang gis mi ldan pa'i ming du 'gyur te/ de ni sa gnyis las sa gang yang rung ba gcig tu ltung bar 'gyur ro//gang pha rol tu phyin pa drug la dmigs pa dang / nga rgyal med pa de ni bla na med pa yang dag par rdzogs pa'i byang chub thob par byed do zhes bstan to/ /'di ltar sbyin pa'i pha rol tu phyin pa de ni tshu rol du phyin pa'o zhes bya ba ni byang chub sems dpa' rnams kyi lam gyi rnam pa shes pa nyid kyi phyogs rnam par mi rtog pa la tshu rol tu phyin pa zhes bya'o//sangs rgyas rnams kyi rnam pa thams cad mkhyen pa nyid kyi phyogs ni pha rol tu phyin pa zhes bya ste rnam par mi rtog pa'i pha rol tu phyin pa'o//de bas na tshu rol yang shes pha rol yang shes zhes bya ba gsungs so/ /de'i 'og tu thabs mkhas pa'i 'gres la yang rim pa de nyid do/ /de ltar shes rab kyi pha rol tu phyin pa dang / thabs mkhas pa dang mi ldan pa dag theg pa gnyis su ltung bar 'gyur ba thos nas 'o na theg pa la gsar du zhugs pa las dang po pa dag ji ltar 'gyur snyam nas/bcom ldan 'das las dang po pa'i byang chub sems dpa' sems dpa' chen pos ji ltar shes rab kyi pha rol tu phyin pa la bslab par bgyi zhes zhus pa dang bcom ldan 'das kyis las dang po pa dag la dge ba'i bshes gnyen nges par dgos te/de bas na dge ba'i bshes gnyen la brten par bya zhes bya ba bstan to/ /mchog tu 'dzin par ma byed cig ces bya ba dang / 'dod pa ma skyed cig ces bya ba ni rnam par rtog pa'i lta ba dang / don dam pa la chags pas smon pa ma byed cig ces bya ba'i tha tshig go//de nas gnas brtan rab 'byor gyis de ltar chos thams cad rang gi mtshan nyid kyis stong pa la bla na med pa yang dag par rdzogs pa'i byang chub tshol ba'i byang chub sems dpa' ni dka' ba bgyid pa'o zhes gsol pa dang /bcom ldan 'das kyis skabs der 'jig rten la phan pa dang / bde ba dang mgon dang skyabs dang gnas dang dpung gnyen dang gling dang / yongs su 'dren pa dang / rten du 'gyur bar bya'o zhes bya ba tshig dgus bstan nas de nas yang tshig de dag re re nas smos te/rgya cher bshad pa mdzad do/ /'gro ba rnams las yongs su thar par byas la/ 'jig pa med pa'i gnas su dgod pa'i bsam pa ni phan pa'o/ /sdug bsngal rnams las yongs su thar par byas la/ bde ba la dgod pa'i bsam pa ni bde ba'o//sdug bsngal rnams las yongs su bsrung ba'i phyir chos bshad pa'i bsam pa ni mgon no/ /sdug bsngal gyis nyam thag pa rnams sdug bsngal las yongs su thar par byas la/ phung po med pa'i mya ngan las 'das par dgod pa'i bsam pa ni skyabs so/ / chags pa med par bya ba'i phyir/ chos 'chad pa'i bsam pa ni gnas so/ /gzugs la sogs pa'i chos thams cad kyis pha rol gyi chos 'chad pa'i bsam pa ni dpung gnyen no/ /gling bzhin du kho ra khor yug tu yongs su chad pa'i rnam par chos 'chad pa'i bsam pa ni gling ngo //sems can rnams la snying rje chen pos mya ngan las 'das par 'dren pa'i chos 'chad pa'i bsam pa ni yongs su 'dren pa'o/ /mdor na 'gro ba'i gnas brgyad cu rtsa lnga nye bar gzung nas so sor rtog pa'i bsam pa ni rten du 'gyur ro zhes gzhung gi go rims so //bcom ldan 'das ji ltar na chos thams cad 'dre ba ma mchis pa lags zhes bya ba ni 'khor ba'i dus na kun brtags pa dang / yongs su grub pa gnyis gang gi tshe gcig tu gyur te tha dad pa ma yin par gnas pa de'i tshe de gnyis tha dad pa med par gnas pa ni 'dres pa zhes bya'o//gang gi tshe chos kyi dbyings shin tu rnam par dag pa'i rgyu mthun pa nyan pa dang bsam pa dang sgom pa la sogs pa'i mthus rim gyis gnas gyur pa na/ yongs su grub pa dang kun brtags pa gnyis tha dad par gyur cing shin tu rnam par dag pa dri ma med pa'i ngo bo nyid du gnas par gyur pa de'i tshe/'dres pa med pa zhes bya'o/ /'brel pa med pa dang / skye ba med pa dang / 'gag pa med pa la sogs pa yang de nyid kyi rnam grangs su gtogs pa'o/ /gzugs kyi pha rol gang yin pa de ni gzugs ma yin no zhes bya ba ni de bzhin nyid gzugs kyi mtshan nyid spangs pa'i phyir gzugs kyi pha rol du gyur pa yin te/de bas na gzugs kyi pha rol du gyur pa de bzhin nyid gang yin pa de kun brtags pa'i gzugs kyi ngo bo nyid ma yin no zhes bya'o/ /rab 'byor gzugs ji lta bar chos thams cad kyang de bzhin no zhes bya ba thams cad kyang de bzhin nyid kyi ngo bo nyid yin pa'i phyir de skad gsungs kyi/mngon par 'brel ba'i phyir ni ma yin no/ /byang chub sems dpa' sems dpa' chen pos rnam pa thams cad mkhyen pa nyid mngon par rdzogs par sangs rgyas pa nyid du mi 'gyur lags sam zhes bya ba ni ci las dgongs she na/gal te chos thams cad gzugs ji lta ba bzhin no/ /'o na ni gzugs mngon par rtogs pa nyid kyis chos thams cad mngon par rtogs par 'gyur te rnam pa thams cad mkhyen pa nyid thob par 'gyur ro zhes dgongs pa'o//bcom ldan 'das gzugs kyi pha rol na rnam par rtog pa gang yang ma mchis so zhes bya ba ni gal te gzugs kyi pha rol du gyur pa de bzhin nyid la gzugs su rnam par rtog par gyur na/ gzugs kyi pha rol rtogs pas chos thams cad rtogs par mi 'gyur gyi/gzugs rtogs pa tsam du zad par 'gyur ba zhig na/ 'di ltar de bzhin nyid yin pas/ gzugs kyi pha rol la gzugs su rnam par rtog pa med de / de'i phyir de tsam zhig rtogs pas chos thams cad rtog par 'grub bo/ /gling lta bu'i chos rnams mthong ba'i phyir gling ngo //gzugs ni sngon gyi mtha' dang phyi ma'i mtha' yongs su chad pa'o zhes bya ba ni gzugs ni sngon gyi mthar don dam par nam yang ma byung / phyi ma'i mthar yang don dam par nam yang 'byung bar 'gyur ba ma yin te/ dus thams cad du med pa'i phyir ro//rab 'byor chos thams cad kyi sngon gyi mtha' dang phyi ma'i mtha' yongs su chad pa gang yin pa de ni zhi ba'o/ /de ni gya nom pa'o zhes bya ba ni dus stong pa nyid kyi phyir chos thams cad dmigs su med pa gang yin pa de ni don dam pa ste de rigs pa'o zhes ston to//gzugs ni nam mkha'i tshul can no zhes bya ba ni don dam pa'i gzugs ni nam mkha' bzhin du gos pa med cing 'gyur ba med ces bya ba'i tha tshig go/ /gzugs kyi stong pa nyid ni 'gro ba dang / 'ong ba med pa'o zhes bya ba ni gzugs kyi stong pa nyid rnam par rtog pa dang bcas pa'i tshe yang gar yang mi 'gro'o//phyis rnam par mi rtog pa'i tshe yang gang nas kyang ma 'ongs so zhes bya ba'i tha tshig go/ /rab 'byor chos thams cad ni stong pa nyid kyi tshul can te zhes bya ba ni stong pa nyid kyi ngo bo nyid do zhes bya ba'i tha tshig go/ /de dag ni tshul de las mi 'da'o zhes bya ba ni chos de dag ngo bo nyid de mi 'dor zhes bya ba'o//skye ba med pa dang dngos po med pa'i tshul can no zhes bya ba ni rgyu dang rkyen gyi mthus ma skyes shing ma byung ba dang / ngo bo nyid kyis skye ba med pa'i phyir dngos po med pa'o/ /chos thams cad ni mtha' yas pa zhes bya ba ni 'jig pa med pa'i phyir mtha' yas pa'o//tshad med pa'i phyir kun du mtha' yas pa'o/ /yang na rtag pa dang chad pa med pa'i phyir mtha' yas pa'o/ /lus med pa'i phyir kun du mtha' yas pa'o/ /dbri ba dang bsnan pa med pa'i tshul can zhes bya ba ni yod pa la skur pa mi 'debs pa'i phyir dbri ba med pa'o//med pa la sgro mi 'dogs pa'i phyir bsnan pa med pa'o/ /'ong ba dang 'gro ba med pa zhes bya ba ni gang nas kyang ma 'ongs pa'i phyir 'ong ba med pa'o/ /gang du yang mi 'gro ba'i phyir 'gro ba med pa'o//blang ba dang dor ba med pa'i tshul can zhes bya ba ni las kyi tshe ni blang ba med pa'o/ /rnam par smin pa'i tshe ni dor ba med pa'o/ /phrad pa med pa dang 'bral ba med pa dang / 'dre ba med pa dang / mi 'dre ba med pa'i tshul can zhes bya ba ni rnam par rtog pa'i tshe yang kun brtags pa de bzhin nyid dang lhan cig phrad pa med la/rnam par mi rtog pa'i tshe yang phyis 'bral ba med pa'o/ /de bzhin du 'dre ba dang mi 'dre ba yang sbyar ro/ /'dod chags brtsal bas dben pa'i rang bzhin no zhes bya ba ni ngo bo nyid kyis dben pa'i phyir/ 'dod chags la sogs pa brtsal ba med pa ste/ 'dod chags la sogs pa'i rtags rnams dang / 'dod chags la sogs pa spyod pa'i rtags rnams dang / 'dod chags la sogs pa'i rgyu rnams dang / 'dod chags la sogs pa'i dmigs pa rnams dang / 'dod chags dang 'dod chags med pa la sogs pa'i chos rnams ni sems las byung ba yin te/ de'i phyir go cha de ni gzugs dang 'brel pa ma yin te zhes bya ba gsungs so/ /gzugs la sogs pa'i chos rnams shin tu med pa'i phyir chos de rnams mtshan mar bzung ste go cha 'dis bgos pa ni ma yin gyi/mtshan ma med pa'i go cha yin no zhes bstan pa'o/ /bcom ldan 'das byang chub sems dpa' sems dpa' chen pos sa mtshams bcad de sems can gyi don du go cha btsal ba ma lags so zhes bya ba ni sems can 'di snyed cig mya ngan las 'da'a'o zhes bya bar yongs su nges pa'i mtshams bcad pa gang yang med do//sus kyang bsgom par mi bgyi'o zhes bya ba ni byed pa po med pa'i phyir ro/ /gang du bsgom par mi bgyi zhes bya ba ni chos gang las bsgom par bya ba ma mthong ba'i phyir ro/ /ji ltar yang bsgom par mi bgyi zhes bya ba ni bsgom pa'i yid la byed pa yang ma mthong ba'i phyir ro//de ni bsgom pa rnam par 'jig pa'o zhes bya ba ni bsgom pa med par byed ces bya ba'i tha tshig go/ /rab 'byor shes rab kyi pha rol tu phyin pa zab mo 'di la phyir mi ldog pa'i byang chub sems dpa' sems dpa' chen po yongs su brtag par bya'o zhes bya ba ni shes rab kyi pha rol tu phyin pa 'dis/'di phyir mi ldog pa yin nam/ 'on te ma yin zhes phyir mi ldog pa'i byang chub sems dpa' chen po brtag par bya ba'o/ /de'i 'og tu byang chub sems dpa' sems dpa' chen po shes rab kyi pha rol tu phyin pa zab mo 'di la mngon par zhen pa med dam zhes bya ba ni brtags pa'i mtshan ma ston ste/byang chub sems dpa' shes rab kyi pha rol tu phyin pa 'di la zhes bya ba nas sbyin pa'i pha rol tu phyin pa'i bar dang / stong pa nyid thams cad dang sangs rgyas kyi chos ma 'dres pa'i mthar thug pa'i bar dang /rnam pa thams cad mkhyen pa nyid kyi bar du bshad pa na de la mngon par zhen pa mi skyed cing mi gnas na byang chub sems dpa' ni phyir mi ldog pa yin no zhes yongs su brtag par bya'o/ /la la rang bzhin gyis gzhan gyis smras pa la snying por 'du shes mi skyed do//la la dad par mi 'gyur ro/ /la la de la chags par mi 'gyur ro/ /zhe sdang bar mi 'gyur gyi btang snyoms su gnas par 'gyur ro/ /la la rang bzhin gyis pha rol tu phyin pa drug dang ma bral ba yin no/ / la la chos zab mo thos na skrag pa la sogs par mi 'gyur gyi gong nas gong du mngon par dga' zhing nyan par 'gyur ba dang 'dzin pa dang / 'chang bar 'gyur te/ yon tan de rnams dang ldan na phyir mi ldog pa yin par rig par bya'o/ /shes rab kyi pha rol tu phyin pa zab mo 'di rnam par brtag par bya'o zhes bya ba ni mngon par rtogs pa'i dus na lhag mthong gis rnam par brtag pa'o//stong pa nyid la gzhol ba dang / stong pa nyid la 'bab pa dang / stong pa nyid la bab pas zhes bya ba ni chung ngu dang 'bring po dang chen po'i dbang gis tshig gsum mo//stong pa nyid dang mtshan ma med pa dang smon pa med pa dang / skye ba med pa dang / 'gag pa med pa dang / kun nas nyon mongs pa med pa dang / rnam par byang ba med pa la sogs pa'i chos nyid kyis mngon par rtogs par byas nas rnam par brtag par bya'o zhes bya ba'i tha tshig go//de skad ces bka' stsal pa dang / gnas brtan rab 'byor gyis/ bcom ldan 'das de ltar stong pa nyid la gzhol ba'i bsam pas shes rab kyi pha rol tu phyin pa zab mo 'di la rtog par 'gyur ba de bzhin du gzugs dang tshor ba dang 'du shes la sogs pa'i chos rnams kyang de ltar brtag par bgyi 'am/'on te mi bgyi zhes zhus pa/ bcom ldan 'das ci gzugs la rtog pa lags sam zhes bya ba la sogs pa'o/ /de nas bcom ldan 'das kyis/ rab 'byor byang chub sems dpa' sems dpa' chen po ni gzugs la rtog pa ma yin no zhes bya ba la sogs pas 'di ston te mngon par rtogs pa'i tshe gzugs la sogs pa'i chos rnams med pa'i phyir snang bar mi 'gyur ro//de bas na gzugs dang tshor ba la sogs pa'i chos rnams dang / rnam pa thams cad mkhyen pa nyid kyis mthar thug pa rnams kyis mngon par rdzogs par byang chub pa ni med kyi/de dag gi de bzhin nyid mngon par rtogs par 'gyur ro/ /de bzhin nyid de yang tha dad pa ma yin te/ gzugs la sogs pa chos thams cad kyi de bzhin nyid dang / rnam pa thams cad mkhyen pa nyid kyang gcig go/ /de bas na de bzhin nyid gcig pa'i phyir gzugs la sogs pa'i chos rnams la brtag pa med do zhes bya ba'i tha tshig go/ /rnam pa thams cad mkhyen pa nyid ni sus kyang ma byas/ 'gyur bar ma byas/ gang nas kyang ma 'ongs/ gang du yang ma song zhes bya ba la sogs pas 'di ston te/ gal te rnam pa thams cad mkhyen pa nyid bya ba dang 'gyur ba'i chos sam/ 'ong ba dang 'gro ba dang / gnas pa dang ldan pa'am/ nyi tshe ba'am/ grangs la sogs pa dang ldan na ni/ kun brtags pa'i rnam par 'gyur te/'o na ni gzugs la sogs pa'i chos rnams su mngon par rdzogs par byang chub par 'gyur ba zhig na gang gi phyir de'i rnam pa dang bral te/ nam mkha'i chos can yin pa de'i phyir de gzugs la sogs par mngon par rdzogs par 'tshang rgya bar mi nus so/ / lha rnams kyis chos zab mo de lta bu thos nas/ bcom ldan 'das shes rab kyi pha rol tu phyin pa zab po zhes bya ba la sogs pas mngon par bsngags nas de bzhin nyid de nyid don tha dad pa med par smras so/ /gang la gnyis kun du rgyu ba med pa de ni chos rnams kyi zab pa nyid do zhes bya ba ni chos thams cad de bzhin nyid kyi bdag nyid yin la/de bzhin nyid kyang gcig pa'i phyir gcig rgyu bar 'gyur gyi/ gnyis su rgyu bar mi 'gyur ro/ /nam mkha' zab pa'i phyir zhes bya ba la sogs pa ni sngar bstan pa nyid do/ /chos 'di ni gzugs gzung ba'i slad du bstan pa ma lags/mi gzung ba'i slad du yang ma lags zhes bya ba ni/ 'di gzugs so zhes mtshan mar 'dzin pa ni gzung ba'o/ /gzugs med do zhes rnam pa thams cad du skur pa 'debs pa ni mi gzung ba'o/ /gzugs la thogs pa ma mchis so zhes bya ba la sogs pas chos thams cad dang rjes su mthun pa nyid rnam par byed de gzugs la sogs pa'i chos thams cad la sgro 'dogs pa dang skur pa 'debs pa'i mtha' med pa'i phyir thogs pa med pa 'di ltar kun brtags pa'i gzugs ni yod pa ma yin pas sgro 'dogs pa'i mtha' med do//chos nyid kyi gzugs ni yod pa'i phyir skur pa 'debs pa med de/ de bas na gzugs dang rjes su mthun pa'o/ /de bzhin du thams cad la yang sbyar bar bya'o/ / gzugs kyi de bzhin nyid gang yin pa de ni ma 'ongs ma song ba ste/de bzhin du rab 'byor gyi de bzhin nyid kyang ma 'ongs ma song zhes bya ba la sogs pas de de bzhin gshegs pa'i de bzhin nyid dang / rab 'byor gyi de bzhin nyid mnyam pa nyid du ston te / rjes su skyes pa yin par bsgrub pa'i phyir ma 'ongs ma song zhes bya smos te/gang nas kyang ma 'ongs/ gang du yang ma song ba'o/ /de bzhin gshegs pa'i de bzhin nyid gang yin pa de nyid chos thams cad kyi de bzhin nyid kyang de'o/ /chos thams cad kyi de bzhin nyid gang yin pa de ni rab 'byor de bzhin nyid kyang de'o zhes bya ba ni de bzhin nyid gcig pa'i phyir gcig go zhes bya ba'i tha tshig go//de bzhin gshegs pa'i de bzhin nyid gnas pa zhes bya ba ni chos gnas pa'i mtshan nyid du yang gcig go zhes ston to/ /'gyur ba med cing rnam par rtog pa med ces bya ba la/ 'gyur ba med ces bya ba 'dis ni mi 'gyur ba'i yongs su grub pas yongs su grub par ston to//rnam par rtog pa med ces bya ba 'dis ni phyin ci ma log par yongs su grub pas yongs su grub par ston to/ /ci la 'ang thogs pa med pa zhes bya ba ni chos thams cad la khyab pa ste/ gang na yang yod pa ma yin no/ / de bas na gang gi de bzhin nyid du ma gyur pa yang med de zhes bya ba gsungs te/ chos thams cad kyi de bzhin nyid kyang yin no zhes bya ba'i tha tshig go/ /nam yang de bzhin nyid du ma gyur pa ma yin zhes bya ba ni dus thams cad du yang de bzhin nyid do/ /gnyis su med ces bya ba ni ngo bo nyid gcig pa'o//de gnyis su byar med ces bya ba ni rnam pa gnyis su dbyer mi nus pa'o/ /ji ltar de bzhin gshegs pa'i de bzhin nyid tha mi dad pa dbyer med pa gnyis su med pa de bzhin du chos thams cad kyi de bzhin nyid kyang tha mi dad par dbyer med pa dmigs su med pa'o//de bzhin du gnas brtan rab 'byor gyi de bzhin nyid kyang tha mi dad pa dbyer med pa dmigs su med pa zhes bya ba ni de bzhin gshegs pa'i de bzhin nyid bzhin du chos thams cad kyi de bzhin nyid kyang dmigs su med pa'i ngo bo nyid kyis tha mi dad do/ /chos thams cad kyi de bzhin nyid bzhin du gnas brtan rab 'byor gyi de bzhin nyid kyang dmigs su med pa'i ngo bo nyid kyis tha mi dad do zhes ston te/ji ltar de bzhin gshegs pa'i de bzhin nyid gnyis su med pa'i phyir tha mi dad pa dang gnyis su byar med pa'i phyir dbyer med pa dang / dmigs su med pa'i phyir ngo bo nyid kyis dmigs su med de gcig pa dang /ji ltar chos thams cad kyi de bzhin nyid kyang tha mi dad dbyer med pa dmigs su med pa'i ngo bo nyid yin pa de bzhin du rab 'byor gyi de bzhin nyid kyang dmigs su med pa'i ngo bo nyid kyis tha mi dad de/ dbyer med do zhes bya ba'i tha tshig go//de bzhin gshegs pa'i de bzhin nyid gang yin pa de ni chos thams cad kyi de bzhin nyid las gud na yod pa ma yin te/ chos thams cad kyi de bzhin nyid las gud na yod pa ma yin pa de ni nam yang de bzhin nyid ma yin pa ma yin zhing / de ni rtag tu de bzhin nyid do//gnas brtan rab 'byor gyi de bzhin nyid kyang de lta bu ste/ de'i phyir rnam pa gzhan ma yin pas de bzhin gshegs pa'i rjes su skyes kyang gang du yang rjes su skyes pa med do zhes bya bas ni de bzhin gshegs pa'i de bzhin nyid du chos thams cad kyi de bzhin nyid kyang dmigs su med pa'i ngo bo nyid kyis tha mi dad do//chos thams cad kyi de bzhin nyid bzhin du gnas brtan rab 'byor gyi de bzhin nyid kyang dmigs su med pa'i ngo bo nyid kyis tha mi dad do zhes ston te/ de bzhin gshegs pa'i de bzhin nyid gang yin pa de chos thams cad kyi de bzhin nyid las gzhan ma yin la/gang chos thams cad kyi de bzhin nyid las gzhan pa ma yin pa de yang nam yang de bzhin nyid ma yin pa ma yin te/ chos thams cad kyi de bzhin nyid ni dus thams cad du yod pa'i phyir ro/ /de bzhin gshegs pa'i de bzhin nyid de las gzhan ma yin pa'i phyir/dus thams cad du yod do/ /de bzhin du gnas brtan rab 'byor gyi de bzhin nyid kyang chos thams cad kyi de bzhin nyid las gzhan pa ma yin pa'i phyir dus thams cad du yod do/ /de bas na dus thams cad du yod pa'i phyir/de bzhin gshegs pa'i de bzhin nyid kyi rjes su skyes pa zhes bya'o/ /skye ba'i mtshan nyid med pa'i phyir gang du yang rjes su skyes pa med pa zhes kyang bya'o/ /ji ltar de bzhin gshegs pa'i de bzhin nyid 'das pa ma yin ma 'ongs pa ma yin/ da ltar byung ba ma yin zhes bya ba la sogs pas 'di ston te/ji ltar de bzhin gshegs pa kun brtags pa'i bdag nyid kyis dus gsum du gtogs kyang de bzhin nyid ni dus kyis bsdus pa ma yin pa de bzhin du chos thams cad kyang kun brtags pa'i bdag nyid du dus gsum du gtogs kyang /de dag gis de bzhin nyid ni dus kyis bsdus pa ma yin no/ /de bzhin du gnas brtan rab 'byor gyi de bzhin nyid kyang dus kyis bsdus pa ma yin no/ /de'i phyir de bzhin gshegs pa'i rjes su skyes pa zhes bya'o/ /lha'i bu dag 'di la 'das pa'i de bzhin nyid kyi mnyam pa nyid kyis de bzhin gshegs pa'i de bzhin nyid mnyam pa nyid du rig par bya'o zhes bya ba la sogs pas 'di skad ston te/'di ltar 'das pa'i chos thams cad kyi 'das pa'i de bzhin nyid ngo bo nyid gcig pa'i phyir mnyam pas de'i phyir de bzhin gshegs pa thams cad kyang mnyam mo//de dag kyang de bzhin nyid de dang bdag nyid gcig pa'i phyir mnyam mo/ /gang gi phyir de bzhin gshegs pa thams cad kyi de bzhin nyid mnyam pa de nyid kyi phyir 'das pa'i chos rnams kyi de bzhin nyid kyang mnyam mo/ /ci'i phyir zhe na/de bzhin gshegs pa'i de bzhin nyid dang / chos thams cad kyi de bzhin nyid gcig pa'i phyir ro/ /chos thams cad kyi de bzhin nyid mnyam pa nyid kyis de bzhin gshegs pa'i de bzhin nyid kyang mnyam pa nyid du rig par bya'o/ /de bzhin gshegs pa'i de bzhin nyid mnyam pa nyid kyis 'das pa'i chos thams cad mnyam pa nyid du rig par bya'o//de bzhin du gzhan dag la yang sbyar bar bya'o/ /gzugs kyi chos mnyam pa nyid kyis zhes bya ba la sogs pas chos thams cad kyi de bzhin nyid de nyid rgya cher ston to/ / lha'i bu dag de bzhin gshegs pas yang dag pa'i de bzhin nyid 'di la brten nas de bzhin gshegs pa zhes bya ba'i mtshan thob par 'gyur ro zhes bya ba ni rab 'byor de bzhin gshegs pa zhes bya ba de ni yang dag pa'i de bzhin nyid kyi tshig bla dgas so zhes 'byung ba'i phyir ro//rnam pa drug tu g.yos zhes bya ba ni g.yo ba dang /'gul ba dang / ldeg pa dang / chem chem pa dang / 'ur 'ur dang / 'khrugs zhes bya ba rnam pa drug ste/ de dag las chung ngu dang 'bring po dang chen po'i dbang gis re re la yang rnam pa gsum du phye na/ mtshan ltas chen po rnam pa bco brgyad dang /phyogs drug rnams su mtho ba dang / dma' ba'i dbang gis phyogs su gyur pa rnam pa bcu gnyis te/ de dag kyang gleng gzhi'i le'u nyid du bshad zin to/ /de la g.yos pa la sogs pa 'di dag kyang rgyu rnam pa gnyis kyis 'byung ste lha mthu chen po rnams dam pa'i chos thos nas dga' zhing mgu ba skyes pa'i mthus phan tshun yongs su 'khor zhing 'khrugs pa dang /chos nyid kyi mthus gnas pa'i 'jig rten gyis kyang chos kyi che ba'i bdag nyid bstan pa'i phyir 'das pa'i de bzhin gshegs pa thams cad kyis bshad pa'i chos nyid kyis dbang du gyur pa nyid du ston pa lta bur gyur pa'o//de la phyogs gcig par rab tu ldeg pa ni g.yo ba'o/ /shing ljon pa bzhin bdag nyid thams cad 'gul ba ni 'gul ba'o/ /me mgal skor ba bzhin du 'khor ba ni ldeg pa'o/ /sgra skad ring du 'byung ba'i sgra ni chem chem mo//rnam par 'khrug pa ni 'khrug pa'o/ /sgra ber ber po ni 'ur 'ur ro/ /yang na sa ni g.yos so/ /shing thams cad ni 'gul lo/ /ri thams cad ni ldeg go/ /lha'i rnga bo che la sogs pa ni chem chem mo/ /rgya mtsho la sogs pa ni 'khrugs so/ / 'brug rnams ni 'ur 'ur ro/ /de dag kyang dang po rtsom pa'i tshe ni dal zhing mi drag par snang ngo / /de'i 'og tu ni de bas drag go/ /tha mar de bas kyang rab tu drag ste/ rnam pa gsum du [(]phyo [,]phye [)]bas bco brgyad du 'gyur te / phyogs rnams kyang cig car mtho ba la sogs par gyur na mugs shing rnam par zhigs pa bzhin du rab tu 'khrugs par 'gyur ba'i phyir mthar gyis mtho ba dang dma' bar gyur to//de la gang gi tshe shar phyogs kyi sa dang / shing dang ri la sogs pa rab tu 'khrugs par gyur pa de'i tshe shar phyogs mtho ba 'dra bar snang ngo //gang gi tshe shar phyogs mtho bar snang ba de'i tshe nub phyogs rang bzhin du gnas kyang dma' ba 'dra bar snang ba de'i tshe shar phyogs mtho na nub phyogs dma' zhes bya'o/ /gang gi tshe nub phyogs kyi sa dang shing dang ri la sogs pa rab tu 'khrugs par gyur pa de'i tshe nub phyogs mtho ba 'dra bar snang zhing shar phyogs rang bzhin du gnas kyang dma' ba 'dra bar snang ngo //de bzhin du thams cad la sbyar bar bya'o/ /gzugs kyi rjes su ma skyes/ gzugs las gzhan gyi rjes su ma skyes so zhes bya ba ni gzugs skye bar 'gyur ba'i dngos po med pas gnas brtan yang dngos po med pa'i phyir gzugs kyi rjes su skye ba'am/gzugs las gzhan pa gang du yang skye bar mi rigs so/ /de bzhin nyid kyang skye ba dang 'brel pa med pas de bzhin nyid kyi rjes su skye ba'am/ de bzhin nyid las gzhan pa gang du yang mi rigs so//bcom ldan 'das de bzhin nyid dang ma nor ba de bzhin nyid dang gzhan ma yin pa de bzhin nyid zab po zhes bya ba la sogs pa ni de bzhin gshegs pa'i dngos po ni de bzhin nyid do/ /ma nor ba'i dngos po ni ma nor ba'i de bzhin nyid do//gzhan ma yin pa'i dngos po ni gzhan ma yin pa de bzhin nyid de/ chos rnams kyi brjod du med pa'i mtshan nyid yongs su grub pa don dam pa'i dbyings gang yin pa de ni dus thams cad du de bzhin nyid du 'gyur zhing / nor bar mi 'gyur gzhan du mi 'gyur ba'i phyir de bzhin nyid dang ma nor ba de bzhin nyid dang gzhan ma yin pa de bzhin nyid ces bya'o//yongs su grub pa'i mtshan nyid ni rnam pa gsum ste/ mi 'jig par yongs su grub pa dang / phyin ci ma log par yongs su grub pa dang / mi 'gyur bar yongs su grub pa'o/ / de la mi 'jig par yongs su grub pa'i phyir de bzhin nyid do/ /phyin ci ma log par yongs su grub pa'i phyir ma nor ba de bzhin nyid do/ /mi 'gyur bar yongs su grub pa'i phyir gzhan ma yin pa de bzhin nyid do/ /chos nyid dang chos kyi dbyings dang chos gnas pa nyid ces bya ba tshig gsum gyis mtshan nyid rnam pa gsum bstan te/chos kyi mtshan nyid dang / 'byung gnas kyi mtshan nyid dang / gnas pa'i mtshan nyid do/ /chos kyi dngos po ni chos nyid de kun brtags pa dang / rnam par brtags pa'i chos thams cad las gzhan du gyur pa na de dang mi 'dra ba brjod du med pa chos kyi dngos por gnas pa gang yin pa de gnas pa'i phyir chos nyid kyi sgrar brjod do//chos kyi dbyings zhes bya ba ni 'byung gnas kyi mtshan nyid gsungs pa ste/ chos ni stobs bcu dang / mi 'jigs pa dang / ma 'dres pa la sogs pa sangs rgyas kyi chos rnams so//dbyings kyi sgra ni rgyu'i don te sangs rgyas kyi chos rnams kyi 'byung gnas yin pa'i phyir chos kyi dbyings zhes bya ste chos kyi sku zhes bya ba'i tha tshig go/ /chos gnas pa nyid ces bya ba ni gnas pa'i mtshan nyid gsungs pa ste/ de bzhin gshegs pa rnams byung yang rung ma byung yang rung chos nyid dang / chos gnas pa nyid 'di ni 'dug pa nyid do zhes ji skad du gsungs pa lta bu ste don dam pa brjod du med pas yongs su grub pa'i chos ni sngon dri ma dang bcas pa'i gnas skabs dang phyis dri ma med pa'i gnas skabs na yang dus thams cad du yod pa ni chos gnas pa nyid do//chos skyon med pa nyid dang / yang dag pa'i mtha' dang / bsam gyis mi khyab pa'i dbyings zhes bya ba tshig gsum gyis nges pa'i mtshan nyid gsungs te/ de la chos skyon med pa nyid ces bya ba la chos ni 'dir log pa'i chos las bzlog pa/yang dag pa nyid kyi chos te de dag la nges pa nyid dang / gcig tu chad pa nyid ni skyon med pa nyid des rab tu dga' ba'i ye shes kyis dang po nyid du de bzhin nyid rab tu rtogs pas bla na med pa yang dag par rdzogs pa'i byang chub tu nges par 'gyur gyi gzhan du ni ma yin no//de bas na pha rol tu phyin pa la sogs pa sangs rgyas byed pa yang dag pa nyid kyi chos rnams kyi nges pa'i rgyu yin pa'i phyir chos skyon med pa nyid ces bya ste 'di skad du yang dag pa nyid skyon med pa la zhugs pa yin no zhes gsungs pa'i phyir ro//yang na skyon zhes bya ba ni chos la sred pa ste/ skyon gyi dngos po med pa ni skyon med pa nyid do zhes sngar ji skad du bstan pa lta bu'o/ /chos rnams la skyon med pa nyid ni chos skyon med pa nyid de/ chos gang rab tu rtogs pas skyon gyi chos rnams rgyun bcad pa de la chos skyon med pa nyid ces bya'o//yang dag pa'i mtha' zhes bya ba ni yang dag pa de kho na nyid kyi don gyi mtha' ste/ mthar phyin pa'i phyir yang dag pa'i mtha' shin tu nges pa de kho na nyid ces bya ba'i tha tshig go/ /bsam gyis mi khyab pa'i dbyings zhes bya ba ni bsam gyis mi khyab pa'i ngo bo nyid de/'jig rten pa'i rtog pa thams cad kyi rjes su dpag pa'i spyod yul ma yin pas shin tu nges pa so so rang gis rig pa don dam pa la bsam gyis mi khyab pa'i dbyings shes bya'o/ /yang na ngo mtshar rmad du byung ba'i chos bsam gyis mi khyab pa rnams kyi rgyu yin pa'i phyir/bsam gyis mi khyab pa'i dbyings te/ sangs rgyas dang byang chub sems dpa' rnams kyi chos kyi sku'i dbang gis cho 'phrul ngo mtshar rnams 'jig rten du 'byung ba'o/ /de la gzugs mi dmigs gzugs kyi de bzhin nyid mi dmigs zhes bya ba ni gzugs la sogs pa'i chos rnams med pa'i phyir mi dmigs so//de bzhin nyid ni dmigs par bya ba dang / dmigs par byed pa mnyam pa nyid du gyur pa'i gnas skabs na/ gzung ba dang 'dzin pa'i dngos po med pas mi dmigs so/ /yang na dri ma dang bcas pa dang dri ma med pa'i gnas skabs nyid la gzugs kyi de bzhin nyid ces bya ba la sogs pa'i sgrar brjod pa'i phyir de skad ces bya'o//de'i 'og tu chos mngon par rtogs pa ni brda phrad sla bas ma bkrol lo/ /byang chub sems dpa' yongs su nyams pa'i chos can drug cu ni nye bar len pa med par zag pa rnams las sems rnam par grol zhes bya ba ni ci'i phyir byang chub sems dpa' de dag yongs su nyams pa'i chos can yin zhe na/'di ltar de dag ni shes rab kyi pha rol tu phyin pa dang / thabs mkhas pa dang bral bas pha rol tu phyin pa drug po dag la dmigs pa dang bcas pa'i spyod pa spyad pas/de'i phyir byang chub sems dpa' de dag skyon med par ma zhugs shing bla na med pa yang dag par rdzogs pa'i byang chub bsgrub par ma byas pa'o/ /de dag gis sngon stong pa nyid dang mtshan ma med pa dang smon pa med pa'i bsgom pa des rnam par grol ba'i sgo thob par gyur te/de'i phyir de dag gis yang dag pa'i mtha' mngon sum du byas nas dgra bcom pa thob par gyur to / /stong pa nyid dang / mtshan ma med pa dang / smon pa med pa sgom pa de nyid thabs mkhas pa dang bral ba rnams ni nyan thos su 'gyur gyi ma bral ba rnams ni bla na med pa yang dag par rdzogs pa'i byang chub thob par 'gyur ba 'di ci'i phyir zhes zhus pa dang /bya'i dpe bstan to/ /thabs mkhas pa bstan pa yang brda phrad sla'o/ /de nas gnas brtan shA ri'i bus/ bcom ldan 'das bdag gis bcom ldan 'das kyis gsungs pa'i don 'tshal ba ltar na zhes gsungs pa ni rigs kyi bye brag gis shes rab dang thabs la mkhas pa 'byung ste/ de las mi dmigs pa'i blo skye zhing / des de dag thams cad grub par 'gyur ro zhes bstan to/ / sems dang po bskyed pa nas nye bar bzung ste zhes bya ba ni sa dang po nye bar bzung ste zhes bya ba'i tha tshig go/ /lha'i bu dag ngas kyang chos thams cad rnam pa thams cad du mngon par rdzogs par sangs rgyas te ngas ni gang mngon par rdzogs par 'tshang rgya ba'am/ gang gis mngon par rdzogs par 'tshang rgya ba'am/gang mngon par rdzogs par 'tshang rgya bar bya ba'i chos gang ma dmigs so zhes bya ba ni ngas kun rdzob kyi shes pa rnam pa thams cad mkhyen pa'i ye shes kyis bsdus pas ni chos thams cad rnam pa thams cad du shes kyi don dam pa'i ye shes kyis rab tu rnam par phye na rmi lam na mthong ba'i don bzhin du shes par byed pa'am/shes par bya ba'i chos gang yang ma mthong ngo zhes bya ba'i tha tshig go/ /lha'i bu dag chos thams cad shin tu rnam par dag pa'i phyir ro zhes bya ba ni 'dir dngos po med pa nyid la rnam par dag pa zhes bya ste shin tu med pa zhes bya ba'i tha tshig go//bcom ldan 'das bla na med pa yang dag par rdzogs pa'i byang chub ni mngon par rdzogs par 'tshang rgya bar bgyi ba ni mi dka'o zhes bya ba ni/ chos thams cad med pa'i phyir te dngos po med pa la dngos po med par rtogs par bya ba ni mi dka'i /yod pa'i chos rnams kyi mtshan nyid yang dag pa ji lta ba nyid rtogs par bya ba ni dka'o/ /med pa la dngos po med pa tsam du shes shing sgrub pa ni mi dka' ste/ 'di ltar chos rnams yod pa la ni dkar po'i chos 'phel bar bya ba dang /nag po'i chos spang bar bya ba'i phyir pha rol tu phyin pa la sogs pa'i spyod pa bsgrub dgos par 'gyur na/ gang gi phyir chos 'di rnams med pa de'i phyir sgrub pa yang mi dka' 'o/ /de bas na mngon par rdzogs par 'tshang rgya bar mi dka' 'o zhes bya ba gsungs so//gnas brtan shA ri'i bus mngon par rdzogs par 'tshang rgya ba dka' bar gsungs pa de'i dgongs pa ni 'di lta ste/ chos thams cad dngos po med pa'i ngo bo nyid de nam mkha' lta bur dngos po med par rig nas/ gal te mi smra bar 'dug pas chog na de ltar na ni dka' ba ma yin par 'gyur na/'di ltar yang dag par na chos thams cad mngon par rdzogs par byang chub pa med par yang rig par byas la/ de'i 'og tu pha rol tu phyin pa'i spyod pa rnams la yang sbyor zhing / chos thams cad kyang mngon par rdzogs par 'tshang rgya bar byed na de lta bu na ni dka' 'o zhes bya bar dgongs pa'o//gal te byang chub sems dpa' sems dpa' chen po chos thams cad nam mkha' lta bur mos par mi byed kyang zhes bya ba la sogs pas ni 'di skad ston te/ /gal te chos thams cad shin tu med pa'i phyir nam mkha' lta bur mos par ma byas kyang byang chub 'thob par 'gyur na ni de lta na sla ste dka' ba ma yin no//gal te de ltar gyur na 'jig rten na yang byang chub sems dpa' pha rol tu phyin pa drug la spyad pa dag dmigs pa'i 'du shes ma spangs pas bla na med pa yang dag par rdzogs pa'i byang chub las phyir ldog par yang mi 'gyur la nyan thos dang rang sangs rgyas kyi sar lhung bar yang mi 'gyur ba zhig na/gang gi phyir de ltar dmigs pa can du spyod pa rnams bla na med pa yang dag par rdzogs pa'i byang chub mngon par rdzogs par 'tshang rgya ba med pas/de'i phyir chos de dag nyid shin tu dngos po med par mthong bas chos de dag nyid mngon par rdzogs par 'tshang rgya bar 'gyur ba de dka'o zhes bstan pa'o// // bam po nyi shu gnyis pa/ de skad smras pa dang / gnas brtan rab 'byor gyis byang chub sems dpa' yang dag par rdzogs pa'i byang chub las phyir ldog go zhes bya ba de ma bzod nas tshe dang ldan pa shA ri'i bu de ji snyam du sems gzugs bla na med pa yang dag par rdzogs pa'i byang chub las ldog gam zhes bya ba la sogs pa gsungs so//'dir yang rnam pa drug ston te/gzugs la sogs pa'i chos rnams phyir ldog gam/ gzugs la sogs pa las gzhan pa'i chos 'ga' zhig phyir ldog gam/ gzugs la sogs pa'i chos rnams kyi de bzhin nyid dri ma dang bcas pa'i chos 'ga' zhig phyir ldog gam/ gzugs la sogs pa'i de bzhin nyid las gzhan pa'i chos 'ga' zhig phyir ldog gam/ de bzhin nyid shin tu rnam par dag pa dri ma med pa gang yin pa de phyir ldog gam/ de las gzhan pa'i chos 'ga' zhig phyir ldog grang na/ de ltar chos rnams drug po de dag med na gang phyir ldog par 'gyur ba'i chos bden par gnas pa de gang zhig yod de/de bas na don dam par phyir ldog par 'gyur ba gang yang med do zhes bstan pa'o/ /gnas brtan rab 'byor gyis chos kyi tshul gyi rnam pa des bstan pa ltar na zhes bya ba la sogs pas ni gnas brtan shA ri'i bus 'di skad smras te/gal te byang chub sems dpa' phyir ldog pa med na/ de lta na ni byang chub sems dpa' thams cad sangs rgyas su 'gyur gyi/ phyir log nas nyan thos dang rang sangs rgyas su mi 'gyur ro/ /de ltar gyur na byang chub sems dpa' rnam pa gsum mo zhes bya ba byang chub sems dpa' rnams la rnam pa gsum du 'gyur ba med do zhes de snyam du bsams pa dang /gnas brtan gang po'i tshig gis rab 'byor la yang dris pa dang / de nas gnas brtan rab 'byor gyis byang chub sems dpa' rnam pa gsum zhes bya ba'i tshig de ma bzod nas/tshe dang ldan pa shA ri'i bus khyod de bzhin nyid la byang chub sems dpa' gsum 'dod dam zhes bya ba la sogs pa gsungs te/ byis pa so so'i skye bo thams cad dang 'phags pa'i gang zag thams cad dang / rang byang chub dang / byang chub sems dpa' dang / sangs rgyas kyang de bzhin nyid kyi dbang gis gcig kho nar 'gyur te/ de dag la tha dad pa med do zhes sngar yang bshad zin to/ /de ltar thams cad gcig tu zad pa la byang chub sems dpa' rnam pa gsum du 'dod na/ de bzhin nyid rnam pa thams cad du tha dad pa med pa la/ gcig gam gnyis sam gsum zhes tha dad du dbye ba ji ltar rigs par 'gyur zhes bstan pa'o/ /de nas gnas brtan rab 'byor la bcom ldan 'das kyis byang chub sems dpa' 'di ni bla na med pa yang dag par rdzogs pa'i byang chub tu nges par 'byung bar rig par bya'o zhes gsungs pa'i skabs las nges par 'byung ba bsgrub pa'i mtshan nyid shes par 'dod pa'i 'khor rnams kyi don du/bcom ldan 'das bla na med pa yang dag par rdzogs pa'i byang chub tu nges par 'byung bar 'tshal ba'i byang chub sems dpas ji ltar gnas par bgyi zhes zhus pa dang /de'i 'og tu bsam pa phun sum tshogs pa dang / sbyor ba phun sum tshogs pas gnas par bstan pa/ sems can thams cad la sems mnyam pa nyid du bskyed par bya'o zhes bya ba nas nye du dang snag gi gnyen mtshams kyi sems kyis dmigs par bya'o zhes bya ba'i bar du ni bsam pa phun sum tshogs pa'o//bdag gis kyang srog gcod pa spang bar bya zhes bya ba nas dam pa'i chos gnas pa mthun pas dga' bar bya'o zhes bya ba'i bar du ni sbyor ba phun sum tshogs pa'o//de'i 'og tu sbyor ba'i 'bras bu rnam pa gnyis te/ sgrib pa med pa dang / yongs su 'dzin pa med pa'o/ /sems can thams cad la mnyam pa'i sems bskyed par bya'o zhes bya ba ni chos thams cad kyi de bzhin nyid kyi dbang gis so/ /gzugs sgrib pa med par 'gyur ro zhes bya ba ni gzugs la sgrib par mi rtog go zhes bya ba'i tha tshig go//sngon gyi mtha' nas kyang gzugs yongs su ma bzung ngo zhes bya ba ni sngon gyi dus nas kyang gzugs la sogs pa'i sgrib par 'gyur ba yongs su mi gzung ngo / /de ltar yongs su ma bzung ngo zhes bya ba la sogs pa gsungs pa la /ji ltar gzugs yongs su ma bzung ba zhes bya bar 'gyur zhe na zhes bya ba ni the tshom za ba rnams kyi phyir gsungs so/ /rab 'byor 'di ltar gzugs yongs su gzung du med pa gang yin pa de ni gzugs ma yin zhes bya ba ni byang chub sems dpa' chos thams cad la yongs su 'dzin pa med pa nyid 'phel bar byed kyi yongs su 'dzin pa ni ma yin no//byang chub sems dpa'i yongs su mi 'dzin pa de yang gzugs la sogs pa'i ngo bo nyid ma yin no/ /de bas na yongs su 'dzin pa med pa spel na byang chub sems dpas gzugs la sogs pa yongs su ma bzung bar 'gyur ro//de nas gnas brtan rab 'byor gyis sngar don dam par phyir ldog pa yang med byang chub sems dpa' rnam pa gsum yang med do zhes smras pa'i phyir de ni skabs 'dir phyir mi ldog pa'i rtags rnams zhus pa dang /de nas bcom ldan 'das kyis phyir mi ldog pa'i rtags rnam pa sum cu rtsa lngas bstan te/ de bzhin nyid la gnyis su med par mthong ba dang / thams cad las phyir ldog pa dang / ston pa gzhan la rim gro byed pa la sogs pa chos ngan pa med pa dang /mi khom par skye ba med pa dang / mi dge ba'i las kyi lam spangs pa dang / dge ba'i las kyi lam yongs su rdzogs par byed pa dang / sems can thams cad kyi don du pha rol tu phyin pa thams cad yongs su rdzogs par byed pa dang / sems can thams cad kyi don du gsung rab yan lag bcu gnyis kyi chos kun chub par byed pa dang /chos zab mo la nem nur med pa dang / lus ngag dang / yid kyi las 'jam zhing byams par ldan pa dang / sgrib pa rnam pa lnga dang du mi len pa dang / bag la nyal ba rnam pa bdun med pa dang /dran pa dang shes bzhin du ldan pa'i spyod lam can dang / gtsang sbrar spyod pa la sogs pa dang ldan pa dang / lus la srin bu'i rigs stong mi 'byung ba dang / lus dang ngag dang sems yongs su dag pa dang / 'dod pa chung la chog shes shing sbyangs pa'i yon tan la brten pa dang /ser sna la sogs pa med pa dang / blo brtan zhing zab pa la sogs pa dang ldan pa dang / bdud la sogs pas mi 'phrogs pa dang / dring mi 'jog pa dang / shes rab kyi pha rol tu phyin pa la brten pa dang / bdud kyi las rtogs pa dang / mi skye ba'i chos la bzod pa thob pa dang /phyir ldog pa dang phyir mi ldog pa dang / bsam gtan dang ting nge 'dzin dang snyoms par 'jug pa'i 'bras bu la mi reg pa dang / gzugs la sogs pa'i chos thams cad lhur mi len pa dang / pha rol tu phyin pa rnams la sbyor ba rnam pa bzhi phun sum tshogs pa dang /sbyin pa'i 'bras bu gzhan mi dga' bar 'gyur ba la sogs pa la mi re ba dang / rdo rje'i rigs lnga phyi bzhin 'brang ba la sogs pa'i dbang dang / sngags dang bzo ngan pa la mi brten pa dang / gtam ngan pa'i sbyor ba las ldog cing yang dag pa'i las dang bsam pa la 'jug pa dang /rang gi sa la the tshom med pa dang / chos yongs su bzung ba'i phyir srog kyang yongs su gtong ba dang / chos bzung ba rnams chud mi gson pa'i phyir ro/ /de la de bzhin nyid gang yin pa de dag ni re re dang gnyis ka ma yin par the tshom za ba gang yang med do zhes bya bas ni gang zag thams cad kyi de bzhin nyid kyi dbang gis de bzhin gshegs pa gcig pa nyid du ston te//ngo bo nyid dam gnyi ga'i ngo bo nyid gang yin pa de ni de bzhin nyid kyi ngo bo nyid ma yin no zhes bya ba'i tha tshig go/ /chos thams cad ni rnam pa med pa mtshan ma med pa rtags med pa zhes bya ba ni de bzhin nyid la rnam pa med pa'i phyir ro//bcom ldan 'das gal te chos thams cad rnam pa ma mchis pa lags na zhes bya ba la sogs pas 'di skad ston te/ gal te rnam pa med cing mtshan ma med na/ ji ltar phyir mi ldog pa'i rnam pa dang mtshan ma bshad ces bya ba'i tha tshig go//rab 'byor byang chub sems dpa' sems dpa' chen po gang gzugs las phyir ldog pa zhes bya ba la sogs pas rnam pa med par shes pa nyid rtags yin no zhes ston te/ gzugs kyi rnam pa dang / gzugs kyi rtags las phyir ldog pa zhes bya'o//shes par bya ba shes pa'o zhes bya ba ni shes bya shes pa'o/ /blta bar bya ba mthong ba'o zhes bya ba ni lta ba mthong ba'o/ /ngo mtshar dang bkra shis kyis dag par mi 'dzin zhes bya ba la bkra shis dang ngo mtshar gyi bkra shis ni bsams pa tsam gyis byas pa ste/khrus dang smyung bar 'dug pa dang mngon par 'jug pa dang mu stegs dang / mchod sbyin la sogs pas zhes bya ba'i tha tshig go/ /phyir mi ldog pa'i mtshan ma thams cad ni brda phrad sla'o/ /sa dang po thob pa nyid kyis phyir mi ldog par 'gyur mod kyi 'on kyang sa brgyad pa la phyir ldog par 'gyur ba gnyis pa yang bstan to//phyir ldog pa dang phyir mi ldog pa zhes bya ba la nyan thos dang rang sangs rgyas kyi sa las phyir ldog pas phyir ldog pa'o/ /sangs rgyas kyi sa las phyir mi ldog pas phyir mi ldog pa zhes bya'o//de ltar phyir mi ldog pa'i yon tan rnams thos nas phyir mi ldog par 'dod pa'i byang chub sems dpa' rnams kyi don du gnas brtan rab 'byor gyis zab cing zab pa'i gnas rnams zhus pa/ bcom ldan 'das gnas zab mo rnams legs par bstan du gsol zhes bya'o//'di man chad ni gnas brtan rab 'byor gyis zhu ba nyis brgya bdun cu rtsa bdun gyis zab mo'i gnas zhus pa dang / bcom ldan 'das kyis kyang lan glan pa 'byung ste/ de la bcom ldan 'das gnas zab mo zab mo rnams legs par bstan du gsol zhes bya ba ni zhus pa dang po'o//bcom ldan 'das ci lags de mya ngan las 'das pa'i tshig bla dgas su bas kyi/ chos thams cad kyi tshig bla dgas ma lags sam zhes bya ba ni gnyis pa'o/ /bcom ldan 'das gzugs kyi de bzhin nyid ni ji lta bu lags zhes bya ba la sogs pas ni gsum pa'o//bcom ldan 'das ci lags mngon par 'du bgyid pa thams cad ni kun brtags pa'o zhes bcom ldan 'das kyis bka' stsal na zhes bya ba la sogs pa ni bzhi pa'o/ /bcom ldan 'das grangs ma mchis pa dang dpag tu ma mchis pa dang tshad ma mchis pa la bye brag ni ci zhig mchis zhes bya ba ni lnga pa'o//bcom ldan 'das rnam grangs gang gis gzugs kyang grangs ma mchis par 'gyur ba de lta bu mchis sam zhes bya ba la sogs pa ni drug pa'o/ /bcom ldan 'das ci lags gzugs 'ba' zhig stong du bas kyi zhes bya ba la sogs pa ni bdun pa'o//bcom ldan 'das brjod du ma mchis pa'i don la 'phel ba dang yongs su 'grib pa ma mchis sam zhes bya ba ni brgyad pa'o/ /bcom ldan 'das gal te brjod du ma mchis pa'i don la 'phel ba dang yongs su 'grib pa ma mchis na zhes bya ba la sogs pa ni dgu pa'o//bcom ldan 'das bla na med pa yang dag par rdzogs pa'i byang chub ji lta bu lags zhes bya ba ni bcu pa'o/ /bcom ldan 'das ji ltar na chos thams cad kyi de bzhin nyid ji lta bu zhig ces bya ba ni bcu gcig pa'o/ /bcom ldan 'das ci lags sems dang po bskyed pas zhes bya ba la sogs pa ni bcu gnyis pa'o//bcom ldan 'das bcu po gang dag yongs su rdzogs par bgyis nas/ byang chub sems dpa' sems dpa' chen po zhes bya ba la sogs pa ni bcu gsum pa'o/ /bcom ldan 'das ji ltar na byang chub sems dpa' sems dpa' chen po sems can rnams kyi don du ting nge 'dzin gsum la snyoms par 'jug cing zhes bya ba ni bcu bzhi pa'o//ji ltar na pha rol tu phyin pa drug yongs su rdzogs par bgyid cing zhes bya ba ni bco lnga pa'o/ /ji ltar stong pa nyid la yongs su 'dris par bgyi zhes bya ba ni bcu drug pa'o//ji ltar na stong pa nyid la gnas la stong pa nyid mngon sum du yang mi bgyid pa lags zhes bya ba ni bcu bdun pa'o/ /bcom ldan 'das shes rab kyi pha rol tu phyin pa'i mtshan nyid ji lta bu lags zhes bya ba ni bco brgyad pa'o/ /bcom ldan 'das gal te chos thams cad kyang chos thams cad kyis dben pa la zhes bya ba ni bcu dgu pa'o//bcom ldan 'das yid la bgyi ba de dag thams cad kyang rang bzhin dang bral ba ste zhes bya ba ni nyi shu pa'o/ /bcom ldan 'das gal te shes rab kyi pha rol tu phyin pa rang bzhin gyis dben zhing zhes bya ba ni nyi shu gcig pa'o//bcom ldan 'das shes rab kyi pha rol tu phyin pa'i stong pa nyid dang gsog nyid dang gsob nyid ces bya ba ni nyi shu gnyis pa'o/ /skabs 'dir bar skabs su zhus pa bcu'o/ /bcom ldan 'das ci lags chos thams cad skye ba'i slad du byang chub sems dpa' sems dpa' chen po bla na med pa yang dag par rdzogs pa'i byang chub tu lung bstan par 'gyur ram zhes bya ba ni nyi shu gsum pa'o//bcom ldan 'das byang chub sems dpa' rnams kyi mnyam pa nyid gang lags zhes bya ba ni nyi shu bzhi pa'o/ / bcom ldan 'das ci lags gzugs bas par bgyi ba'i slad du slob na rnam pa thams cad mkhyen pa nyid du slob pa lags sam zhes bya ba ni nyi shu lnga pa'o/ /bcom ldan 'das gal te chos thams cad rang bzhin gyis yongs su dag pa lags na zhes bya ba ni nyi shu drug pa'o//bcom ldan 'das ci nyan thos dang rang sangs rgyas kyi phun sum tshogs pa yang des thob par bgyi'am zhes bya ba ni nyi shu bdun pa'o/ /bcom ldan 'das ji ltar na sgyu ma lta bu'i sems bla na med pa yang dag par rdzogs pa'i byang chub mngon par rdzogs par 'tshang rgya bar 'gyur ba lags zhes bya ba ni nyi shu brgyad pa'o//ji ltar na dben pas dben pa rjes su rtogs par 'gyur zhes bya ba ni nyi shu dgu pa'o/ /bcom ldan 'das sangs rgyas bcom ldan 'das de dag byang chub sems dpa' sems dpa' chen po slar ldog pa 'am/slar mi ldog pa gang dag gi ming yongs su brjod cing dga' ba'i tshul gyis chos ston par mdzad ces bya ba ni sum cu pa'o/ /bcom ldan 'das de bzhin nyid du gnas nas de bzhin nyid du nan tan bgyis te zhes bya ba ni sum cu gcig pa'o/ /bcom ldan 'das gang de bzhin gshegs pa'i sprul pa zhes bgyi ba zhes bya ba ni sum cu gnyis pa'o//bcom ldan 'das ji ltar shes rab kyi pha rol tu phyin pa ji ltar mngon par bsgrub par bgyi zhes bya ba ni sum cu gsum pa'o/ /bcom ldan 'das ji ltar na byang chub sems dpa' sems dpa' chen po shes rab kyi pha rol tu phyin pa la spyod pa sbyin pa'i pha rol tu phyin pa zhes bya ba ni sum cu bzhi pa'o//bcom ldan 'das ji ltar byang chub sems dpa' sems dpa' chen po sbyin pa'i pha rol tu phyin pa la gnas shing tshul khrims kyi pha rol tu phyin pa zhes bya ba ni sum cu lnga pa'o//ji ltar na sbyin pa'i pha rol tu phyin pa la gnas shing bzod pa'i pha rol tu phyin pa zhes bya ba ni sum cu drug pa'o/ /ji ltar na brtson 'grus kyi pha rol tu phyin pa zhes bya ba ni sum cu bdun pa'o/ /ji ltar na bsam gtan gyi pha rol tu phyin pa zhes bya ba ni sum cu brgyad pa'o//ji ltar na shes rab kyi pha rol tu phyin pa zhes bya ba ni sum cu dgu pa'o/ /ji ltar na tshul khrims kyi pha rol tu phyin pa la gnas shing sbyin pa'i pha rol tu phyin pa zhes bya ba ni bzhi bcu pa'o/ /ji ltar na bzod pa'i pha rol tu phyin pa zhes bya ba ni bzhi bcu gcig pa'o//ji ltar na brtson 'grus kyi pha rol tu phyin pa zhes bya ba ni bzhi bcu gnyis pa'o/ /ji ltar na bsam gtan gyi pha rol tu phyin pa zhes bya ba ni bzhi bcu gsum pa'o/ /ji ltar na shes rab kyi pha rol tu phyin pa zhes bya ba ni bzhi bcu bzhi pa'o/ /ji ltar na bzod pa'i pha rol tu phyin pa la gnas shing sbyin pa'i pha rol tu phyin pa zhes bya ba ni bzhi bcu lnga pa'o//ji ltar na tshul khrims kyi pha rol tu phyin pa zhes bya ba ni bzhi bcu drug pa'o/ /ji ltar na brtson 'grus kyi pha rol tu phyin pa zhes bya ba ni bzhi bcu bdun pa'o/ /ji ltar na bsam gtan gyi pha rol tu phyin pa zhes bya ba ni bzhi bcu brgyad pa'o//ji ltar na shes rab kyi pha rol tu phyin pa zhes bya ba ni bzhi bcu dgu pa'o/ /ji ltar na brtson 'grus kyi pha rol tu phyin pa la gnas shing sbyin pa'i pha rol tu phyin pa zhes bya ba ni lnga bcu pa'o/ /ji ltar na tshul khrims kyi pha rol tu phyin pa zhes bya ba ni lnga bcu gcig pa'o//ji ltar na bzod pa'i pha rol tu phyin pa zhes bya ba ni lnga bcu gnyis pa'o/ /ji ltar na bsam gtan gyi pha rol tu phyin pa zhes bya ba ni lnga bcu gsum pa'o/ /ji ltar na shes rab kyi pha rol tu phyin pa zhes bya ba ni lnga bcu bzhi pa'o//ji ltar na bsam gtan gyi pha rol tu phyin pa la gnas shing sbyin pa'i pha rol tu phyin pa zhes bya ba ni lnga bcu lnga pa'o/ /ji ltar na tshul khrims kyi pha rol tu phyin pa zhes bya ba ni lnga bcu drug pa'o/ /ji ltar na bzod pa'i pha rol tu phyin pa zhes bya ba ni lnga bcu bdun pa'o//ji ltar na brtson 'grus kyi pha rol tu phyin pa zhes bya ba ni lnga bcu brgyad pa'o/ /ji ltar na shes rab kyi pha rol tu phyin pa zhes bya ba ni lnga bcu dgu pa'o/ /ji ltar na shes rab kyi pha rol tu phyin pa la gnas shing sbyin pa'i pha rol tu phyin pa zhes bya ba ni drug cu pa'o//ji ltar na tshul khrims kyi pha rol tu phyin pa zhes bya ba ni drug cu gcig pa'o/ /ji ltar na bzod pa'i pha rol tu phyin pa zhes bya ba ni drug cu gnyis pa'o/ /ji ltar na brtson 'grus kyi pha rol tu phyin pa zhes bya ba ni drug cu gsum pa'o/ / ji ltar na bsam gtan gyi pha rol tu phyin pa zhes bya ba ni drug cu bzhi pa'o/ /byang chub sems dpa' sems dpa' chen po gang thabs mkhas pa de lta bu dang ldan pa de yun ring po ji srid cig nas yang dag par zhugs pa lags zhes bya ba ni drug cu lnga pa'o//bcom ldan 'das byang chub sems dpa' sems dpa' chen po gang thabs mkhas pa de lta bu dang ldan pa des sangs rgyas ji snyed cig bsnyen bkur bgyis pa lags zhes bya ba ni drug cu drug pa'o/ /dge ba'i rtsa ba ji tsam zhig bskyed pa lags zhes bya ba ni drug cu bdun pa'o//bcom ldan 'das gal te chos thams cad rang bzhin gyis stong pa lags na ji ltar byang chub sems dpa' sems dpa' chen po zhes bya ba ni drug cu brgyad pa'o/ /bcom ldan 'das gal te don gyi rjes su zhugs pa'i chos gang yang bye brag gam tha dad du bgyi ba ma mchis na/ji ltar shes rab kyi pha rol tu phyin pa 'di pha rol tu phyin pa lnga po dag gi rab ces bya ba ni drug cu dgu pa'o/ /bcom ldan 'das ci lags shes rab kyi pha rol tu phyin pa chos gang yang yongs su 'dzin pa'am gtong ba ma mchis sam zhes bya ba ni bdun cu pa'o//bcom ldan 'das ji ltar na gzugs yongs su ma bzung ma btang ba lags zhes bya ba ni bdun cu gcig pa'o/ /bcom ldan 'das gal te gzugs yid la mi bgyi zhes bya ba ni bdun cu gnyis pa'o/ /bcom ldan 'das ci'i slad du 'di ltar gzugs yid la mi bgyi zhes bya ba ni bdun cu gsum pa'o//bcom ldan 'das byang chub sems dpa' sems dpa' chen po shes rab kyi pha rol tu phyin pa la de ltar spyod pa gang la gnas par mi 'gyur ba lags zhes bya ba ni bdun cu bzhi pa'o/ /bcom ldan 'das ci'i slad du byang chub sems dpa' gzugs la gnas par mi 'gyur zhes bya ba ni bdun cu lnga pa'o//bcom ldan 'das ji ltar na byang chub sems dpa' sems dpa' chen po shes rab kyi pha rol tu phyin pa la spyod pa'i skyon 'di dag ma mchis par 'gyur ba lags zhes bya ba ni bdun cu drug pa'o/ / bcom ldan 'das gal te shes rab kyi pha rol tu phyin pa shes rab kyi pha rol tu phyin pa dang ma bral ba lags sam zhes bya ba ni bdun cu bdun pa'o/ /bcom ldan 'das byang chub sems dpa' sems dpa' chen po rnams kyi lam ni gang lags lam ma lags pa ni gang lags zhes bya ba ni bdun cu brgyad pa'o//byang chub sems dpa' sems dpa' chen po shes rab kyi pha rol tu phyin pa la spyod pas ji ltar sbyin pa sbyin par bgyi zhes bya ba ni bdun cu dgu pa'o/ /bcom ldan 'das byang chub sems dpa' sems dpa' chen pos ji ltar pha rol tu phyin pa drug la brtson par bgyi zhes bya ba ni brgyad cu pa'o//bcom ldan 'das shes rab kyi pha rol tu phyin pas shes rab kyi pha rol tu phyin pa la bslab par bya'o zhes gsungs pa lags sam zhes bya ba ni brgyad cu gcig pa'o/ /bcom ldan 'das sangs rgyas bcom ldan 'das rnams ji ltar byang chub sems dpa' sems dpa' chen po sbyin pa'i pha rol tu phyin pa la spyod pa la dgongs pa mdzad ces bya ba ni brgyad cu gnyis pa'o//bcom ldan 'das ji ltar na byang chub sems dpa' sems dpa' chen po thams cad kyi mdo dang rgyas pa 'tshal bar 'gyur ba lags zhes bya ba ni brgyad cu gsum pa'o//bcom ldan 'das gzugs kyi de bzhin nyid ji lta bu lags zhes bya ba ni brgyad cu bzhi pa'o/ /bcom ldan 'das yang dag pa'i mtha' de gang lags zhes bgyi ba ni brgyad cu lnga pa'o/ /bcom ldan 'das ji ltar chos thams cad kyi mdo dang rgyas pa 'tshal bar bgyi zhes bya ba ni brgyad cu drug pa'o//bcom ldan 'das chos gang dag ldan pa yang ma lags mi ldan pa yang ma lags pa'i chos de dag kyang gang lags zhes bya ba ni brgyad cu bdun pa'o/ /bcom ldan 'das ji ltar shes rab kyi pha rol tu phyin pa la spyad par bgyi zhes bya ba ni brgyad cu brgyad pa'o//bcom ldan 'das byang chub sems dpa' sems dpa' chen pos shes rab kyi pha rol tu phyin pa la yun ring po ji srid cig tu spyad na zhes bya ba ni brgyad cu dgu pa'o/ /bcom ldan 'das ci lags sems kyi rgyun ma chad pa dang ma bral bar rjes su 'brel bas spyad par bgyi 'am zhes bya ba ni dgu bcu pa'o//bcom ldan 'das ci lags byang chub sems dpa' sems dpa' chen po shes rab kyi pha rol tu phyin pa la spyad pa dang zhes bya ba ni dgu bcu gcig pa'o//bcom ldan 'das ji ltar na byang chub sems dpa' zhes bya ba'i skabs 'dir bar skabs su zhus pa'i rnam pa bzhi'o/ /bcom ldan 'das ci lags shes rab kyi pha rol tu phyin pa gdags su ma mchis pa lags sam zhes bya ba ni dgu bcu gnyis pa'o/ / bcom ldan 'das ci'i slad du sems can dmyal ba gdags su ma mchis par gyur ces bya ba ni dgu bcu gsum pa'o/ /bcom ldan 'das 'o na byang chub sems dpa' sems dpa' chen po shes rab kyi pha rol tu phyin pa la spyod pas zhes bya ba ni dgu bcu bzhi pa'o/ /bcom ldan 'das skye ba ma mchis pa dang /'gag pa ma mchis pa la ji ltar bslab par bgyi zhes bya ba ni dgu bcu lnga pa'o/ /bcom ldan 'das chos thams cad rang gi mtshan nyid kyis stong par ji ltar bslab par bgyi zhes bya ba ni dgu bcu drug pa'o/ /bcom ldan 'das gal te gzugs ni gzugs kyis stong zhes bya ba ni dgu bcu bdun pa'o//bcom ldan 'das ci'i slad du spyod pa ma mchis pa shes rab kyi pha rol tu phyin pa la spyod pa lags zhes bya ba ni dgu bcu brgyad pa'o/ /bcom ldan 'das gal te spyod pa ma mchis pa shes rab kyi pha rol tu phyin pa la spyod pa lags na zhes bya ba ni dgu bcu dgu pa'o//bcom ldan 'das ji tsam gyis na mi dmigs par 'gyur zhes bya ba ni brgya pa'o/ /'di man chad ni brgya phrag gnyis pa la bab ste/ bcom ldan 'das gnyis zhes bgyi ba ji lta bu lags zhes bya ba ni dang pa'o/ / bcom ldan 'das gnyis su ma mchis pa gang lags zhes bya ba ni gnyis pa'o/ /bcom ldan 'das ci lags dmigs su ma mchis pa mi dmigs sam zhes bya ba ni gsum pa'o/ /bcom ldan 'das gal te byang chub sems dpa' sems dpa' chen po shes rab kyi pha rol tu phyin pa la spyod pa'i tshe dmigs pa la mi chags shing mi dmigs pa la yang mi chags pa lags na zhes bya ba ni bzhi pa'o//bcom ldan 'das gal te shes rab kyi pha rol tu phyin pa yang dmigs su ma mchis te zhes bya ba ni lnga pa'o/ /bcom ldan 'das gal te byang chub sems dpa' shes rab kyi pha rol tu phyin pa la spyod pa'i tshe gzugs kyang mi dmigs zhes bya ba ni drug pa'o//bcom ldan 'das 'o na su'i slad du byang chub sems dpa' sems dpa' chen po shes rab kyi pha rol tu phyin pa la spyod pa lags zhes bya ba ni bdun pa'o//bcom ldan 'das gal te chos thams cad ma bgyis pa ste/ mngon par 'dus ma bgyis pa lags na zhes bya ba ni brgyad pa'o/ /bcom ldan 'das gal te de bzhin gshegs pa dgra bcom pa yang dag par rdzogs pa'i sangs rgyas kyis spyan lngas kyang zhes pa ni dgu pa'o//bcom ldan 'das de bzhin gshegs pa don dam pa la bzhugs te zhes bya ba ni bcu pa'o/ /bcom ldan 'das gal te chos thams cad sprul pa lta bu lags na zhes bya ba ni bcu gcig pa'o/ /bcom ldan 'das ci lags de bzhin gshegs pa mi bzhugs na zhes bya ba ni bcu gnyis pa'o//bcom ldan 'das gal te sprul pa dang de bzhin gshegs pa la khyad par ma mchis na zhes bya ba ni bcu gsum pa'o/ /bcom ldan 'das gal te chos thams cad kyi chos nyid rnam par dkrug par mi bgyi ba lags na zhes bya ba ni bcu bzhi pa'o//bcom ldan 'das gal te gzhan rnams khong du chud par bgyi ba'i slad du/ bcom ldan 'das kyis ming dang mtshan mas zhes bya ba ni bcwa lnga pa'o/ /bcom ldan 'das gal te chos thams cad ming dang mtshan ma tsam du bas pa lags na zhes bya ba ni bcu drug pa'o//bcom ldan 'das rnam pa thams cad mkhyen pa nyid la rnam pa thams cad mkhyen pa nyid ces gsung ngam zhes bya ba ni bcu bdun pa'o/ /bcom ldan 'das thams cad mkhyen pa nyid 'di gsum khyad ci zhig mchis zhes bya ba ni bco brgyad pa'o/ /bcom ldan 'das ci'i slad du de bzhin gshegs pa rnams la ni rnam pa thams cad mkhyen pa nyid ces bgyi zhes bya ba ni bcu dgu pa'o//bcom ldan 'das ci'i slad du byang chub sems dpa' sems dpa' chen po rnams la ni lam gyi rnam pa shes pa nyid ces bgyi zhes bya ba ni nyi shu pa'o//ci'i slad du nyan thos dang rang sangs rgyas rnams la ni thams cad shes pa nyid ces bgyi zhes bya ba ni nyi shu gcig pa'o/ /bcom ldan 'das thams cad mkhyen pa nyid 'di gsum las 'di'i spong ba ni lhag ma dang bcas pa'o/ /'di'i spong ba ni lhag ma ma mchis pa'o zhes bgyi bar nyon mongs pa spong ba la tha dad du bgyi ba ma mchis sam zhes bgyi ba ni nyi shu gnyis pa'o//bcom ldan 'das ci lags nyan thos dang rang sangs rgyas de dag thams cad kyis 'dus ma bgyis ma thob par nyon mongs pa spangs sam zhes bya ba ni nyi shu gsum pa'o//bcom ldan 'das 'dus ma bgyis pa la bye brag dmigs su ma mchis sam zhes bya ba ni nyi shu bzhi pa'o/ /bcom ldan 'das gal te dmigs su ma mchis na ci'i slad du bcom ldan 'das kyis 'di skad du zhes bya ba ni nyi shu lnga pa'o/ /bcom ldan 'das ci lags byang chub sems dpa' sems dpa' chen pos lam la gnas te zhes bya ba ni nyi shu drug pa'o//skabs 'dir bar skabs su zhus pa bzhi'o/ /bcom ldan 'das gal te lam yang dngos po ma mchis la mya ngan las 'das pa yang dngos po ma mchis na zhes bya ba ni nyi shu bdun pa'o//bcom ldan 'das ci lags 'dus ma bgyis pa 'di ni rgyun du zhugs pa'o zhes rab tu byed pa lags so zhes bya ba ni nyi shu brgyad pa'o/ /bcom ldan 'das 'khor ba'i phyi ma'i mtha' ji lta bu lags zhes bya ba ni nyi shu dgu pa'o/ /bcom ldan 'das chos thams cad rang gi mtshan nyid kyis stong na zhes bya ba sum cu pa'o//bcom ldan 'das shes rab kyi pha rol tu phyin pa shes rab kyi pha rol tu phyin pa zhes bgyi zhes bya ba ni sum cu gcig pa'o/ /bcom ldan 'das gal te shes rab kyi pha rol tu phyin pa don dang tshul gyis zhes bya ba ni sum cu gnyis pa'o//bcom ldan 'das ci'i slad du don kyang mi bgyid don ma lags pa yang mi bgyid lags zhes bya ba ni sum cu gsum pa'o/ /bcom ldan 'das 'o na 'dus ma bgyis/ 'phags pa thams cad kyi don ma lags sam zhes bya ba ni sum cu bzhi pa'o/ / bcom ldan 'das 'o na byang chub sems dpa' sems dpa' chen pos 'dus ma bgyis kyi zhes bya ba ni sum cu lnga pa'o/ /bcom ldan 'das ci lags gnyis su ma mchis pa'i chos zhes bya ba ni sum cu drug pa'o/ /skabs 'dir bar skabs su zhus pa gsum pa'o/ /bcom ldan 'das byang chub sems dpa' sems dpa' chen po sems dang po bskyed pa dang ldan pa sems can thams cad kyi don du bla na med pa yang dag par rdzogs pa'i byang chub mngon par rdzogs par 'tshang rgya bar 'tshal ba de bsod nams ji tsam zhig bskyed par 'gyur zhes bya ba ni sum cu bdun pa'o//bcom ldan 'das sems dang po bskyed pas ci zhig yid la bgyi zhes bya ba ni sum cu brgyad pa'o/ /bcom ldan 'das rnam pa thams cad mkhyen pa nyid kyi dmigs pa ji lta bu lags zhes bya ba ni sum cu dgu pa'o/ /bcom ldan 'das ci lags rnam pa thams cad mkhyen pa nyid 'ba' zhig dngos po ma mchis pa lags sam zhes bya ba ni bzhi bcu pa'o//bcom ldan 'das ci'i slad du rnam pa thams cad mkhyen pa nyid ngo bo nyid ma mchis pa lags zhes bya ba ni bzhi bcu gcig pa'o/ /bcom ldan 'das gal te chos thams cad dngos po ma mchis pa'i ngo bo nyid lags na zhes bya ba ni bzhi bcu gnyis pa'o//bcom ldan 'das gal te chos rnams chos nyid dang bral ba lags sam zhes bya ba ni bzhi bcu gsum pa'o/ /bcom ldan 'das ci lags 'jig rten gyi kun rdzob kyang gzhan zhig la don dam pa yang gzhan zhig lags sam zhes bya ba ni bzhi bcu bzhi pa'o//bcom ldan 'das byang chub sems dpa'i spyod pa byang chub sems dpa'i spyod pa zhes bgyi na zhes bya ba ni bzhi bcu lnga pa'o/ /bcom ldan 'das sangs rgyas sangs rgyas zhes bgyi na zhes bya ba ni bzhi bcu drug pa'o//bcom ldan 'das byang chub byang chub ces bgyi na zhes bya ba ni bzhi bcu bdun pa'o/ /bcom ldan 'das byang chub sems dpa' sems dpa' chen po gang byang chub 'di la zhes bya ba ni bzhi bcu brgyad pa'o/ / bcom ldan 'das gal te byang chub sems dpa' sems dpa' chen po shes rab kyi pha rol tu phyin pa la spyod pa'i byang chub ces bya ba ni bzhi bcu dgu pa'o/ /bcom ldan 'das gal te gnyis kyi tshul gyis zhes bya ba ni lnga bcu pa'o/ /bcom ldan 'das ci lags byang chub sems dpa' sems dpa' chen pos dge ba'i rtsa ba rnams kyi slad du zhes bya ba ni lnga bcu gcig pa'o//bcom ldan 'das ji ltar sangs rgyas bcom ldan 'das rnams la bsnyen bkur ma bgyis pa zhes bya ba ni lnga bcu gnyis pa'o/ /bcom ldan 'das byang chub sems dpa' sems dpa' chen po rnam pa thams cad mkhyen pa nyid thob par mi 'gyur ram zhes bya ba ni lnga bcu gsum pa'o//bcom ldan 'das ci'i slad du byang chub sems dpa' sems dpa' chen pos sangs rgyas bcom ldan 'das la bsnyen bkur bgyis zhes bya ba ni lnga bcu bzhi pa'o/ /bcom ldan 'das thabs mkhas pa gang dang ldan pas zhes bya ba ni lnga bcu lnga pa'o//bcom ldan 'das ci lags dngos po ma mchis pas dngos po ma mchis par mngon par rdzogs par 'tshang rgya bar bgyi bar mi nus sam zhes bya ba ni lnga bcu drug pa'o/ /skabs 'dir bar skabs su zhus pa bzhi'o//bcom ldan 'das byang chub sems dpa' sems dpa' chen po'i spros pa gang lags zhes bya ba ni lnga bdun pa'o/ /bcom ldan 'das gal te chos gang yang ngo bo nyid dmigs su ma mchis na zhes bya ba ni lnga bcu brgyad pa'o/ /bcom ldan 'das gal te byang chub sems dpa' sems dpa' chen po lam thams cad yongs su rdzogs par bgyis shing zhes bya ba ni lnga bcu dgu pa'o//bcom ldan 'das ji ltar na bdag gi byang chub sems dpa' sems dpa' chen po lam 'di dag ma bskyed par rnam pa thams cad mkhyen pa nyid thob par bgyid ces bya ba ni drug cu pa'o//bcom ldan 'das byang chub sems dpa'i lam gyi rnam pa shes pa nyid kyi lam gang lags zhes bya ba ni drug cu gcig pa'o/ /bcom ldan 'das gal te byang chub kyi phyogs kyi chos rnams gang lags pa dang byang chub gang lags pa zhes bya ba ni drug cu gnyis pa'o//bcom ldan 'das chos rnams byang chub sems dpa' sems dpa' chen pos shes pa dang / mthong bas bslabs nas rtogs par bgyi ba'i chos rnams ni gang lags zhes bya ba ni drug cu gsum pa'o/ /bcom ldan 'das 'phags pa'i chos 'dul ba la zhes bya ba ni drug cu bzhi pa'o//bcom ldan 'das 'o na gzugs kyi mtshan nyid la bslab par mi bgyi'am zhes bya ba ni drug cu lnga pa'o/ /gal te chos 'di dag gi mtshan nyid la bslab par mi bgyi na bcom ldan 'das ji ltar byang chub sems dpa' sems dpa' chen pos zhes bya ba ni drug cu drug pa'o//bcom ldan 'das gal te chos thams cad la mtshan nyid ma mchis shing zhes bya ba ni drug cu bdun pa'o/ /bcom ldan 'das ji ltar na mtshan nyid ma mchis pa la sgom pa shes rab kyi pha rol tu phyin pa la bsgom par 'gyur zhes bya ba ni drug cu brgyad pa'o//bcom ldan 'das ji ltar na gzugs la bsgom pa rnam par 'jig pa ji ltar shes rab kyi pha rol tu phyin pa la bsgom pa lags zhes bya ba ni drug cu dgu pa'o/ /bcom ldan 'das gal te dngos po'i 'du shes can la mthun pa'i bzod pa yang ma mchis sam zhes bya ba ni bdun cu pa'o//bcom ldan 'das ci lags byang chub sems dpa' sems dpa' chen po shes rab kyi pha rol tu phyin pa la spyod pa'i tshe zhes bya ba ni bdun cu gcig pa'o/ /bcom ldan 'das dngos po zhes bgyi ba ni ci lags dngos po ma mchis pa zhes bgyi ba ni ci lags zhes bya ba ni bdun cu gnyis pa'o//bcom ldan 'das gnyis ni gang lags gnyis su ma mchis pa ni gang lags zhes bya ba ni bdun cu gsum pa'o/ /bcom ldan 'das gal te chos thams cad dngos po ma mchis pa'i ngo bo nyid lags na zhes bya ba ni bdun cu bzhi pa'o//bcom ldan 'das ji ltar na de bzhin gshegs pa dgra bcom pa yang dag par rdzogs pa'i sangs rgyas kyis dngos po ma mchis pa'i ngo bo nyid kyi bsam gtan bzhi bskyed par gyur zhes bya ba ni bdun cu lnga pa'o/ /ji ltar na chos thams cad dngos po ma mchis pa'i ngo bo nyid la byang chub sems dpa' sems dpa' chen po mthar gyis spyod pa dang zhes bya ba ni bdun cu drug pa'o//bcom ldan 'das gal te chos thams cad dngos po ma mchis pa'i ngo bo nyid lags na 'o na ni gzugs kyang ma mchis zhes bya ba ni bdun cu bdun pa'o//bcom ldan 'das gal te chos thams cad dngos po ma mchis pa'i ngo bo nyid lags na/ don ci zhig mthong na byang chub sems dpa' sems dpa' chen po sems can rnams kyi don gyi slad du zhes bya ba ni bdun cu brgyad pa'o/ /bcom ldan 'das ci lags dmigs su ma mchis pa la 'thob pa 'am mngon par rtogs pa 'am zhes bya ba ni bdun cu dgu pa'o//bcom ldan 'das gal te mi dmigs pa nyid 'thob pa lags mi dmigs pa mngon par rtogs pa lags zhes bya ba ni brgyad cu pa'o/ /bcom ldan 'das mi dmigs pa dang sbyin pa dang tshul khrims zhes bya ba ni brgyad cu gcig pa'o//bcom ldan 'das dmigs pa ma mchis pa'i sbyin pa dang tshul khrims dang bzod pa dang brtson 'grus dang / bsam gtan dang / shes rab dang mngon par shes pa rnams ji ltar tha dad du bgyi bar bstan zhes bya ba ni brgyad cu gnyis pa'o//ji ltar sems bskyed pa gcig gis pha rol tu phyin pa drug yongs su 'dzin pa lags zhes bya ba ni brgyad cu gsum pa'o/ /bcom ldan 'das ji ltar na sbyin pa'i sbyin pa yang gnyis kyi 'du shes su mi 'gyur ba lags zhes bya ba ni brgyad cu bzhi pa'o//bcom ldan 'das ji ltar na byang chub sems dpa' mtshan ma ma mchis pa dang mngon par 'du bgyid pa ma mchis pa lags zhes bya ba ni brgyad cu lnga pa'o/ /bcom ldan 'das de ltar chos thams cad dbyer ma mchis shing zhes bya ba ni brgyad cu drug pa'o//bcom ldan 'das mi skye ba'i chos la bzod pa zhes bgyi ba ni gang lags zhes bya ba ni brgyad cu bdun pa'o/ /bcom ldan 'das nyan thos rnams dang rang sangs rgyas rnams kyi zhes bya ba ni brgyad cu brgyad pa'o/ /bcom ldan 'das ji ltar na byang chub sems dpa' mtshan nyid ma mchis pa'i ting nge 'dzin gyi pha rol tu phyin pa yongs su rdzogs par bgyis shing zhes bya ba ni brgyad cu dgu pa'o//bcom ldan 'das skyon ni gang lags skyon ma mchis pa ni gang lags zhes bya ba ni dgu bcu pa'o/ /dmigs pa ni gang lags zhes bya ba ni dgu bcu gcig pa'o//bcom ldan 'das byang chub sems dpa' sems dpa' chen po shes rab kyi pha rol tu phyin pa la spyod pa'i tshe ji ltar na zhes bya ba ni dgu bcu gnyis pa'o/ /bcom ldan 'das gal te chos thams cad dbyer ma mchis pa lags na zhes bya ba ni dgu bcu gsum pa'o//bcom ldan 'das chos thams cad rmi lam lta bu zhes bya ba ni dgu bcu bzhi pa'o/ /bcom ldan 'das nyan thos dang rang sangs rgyas la ma mchis pa'i ngo mtshar rmad du byung ba'i chos byang chub sems dpa' sems dpa' chen po la mchis zhes bya ba ni dgu bcu lnga pa'o//rab 'byor ji ltar na byang chub sems dpa' sems dpa' chen po shes rab kyi pha rol tu phyin pa la spyod pa'i tshe sbyin pas sems can rnams sdud pa yin zhe na zhes bya ba ni dgu bcu drug pa'o/ /bcom ldan 'das ci lags byang chub sems dpa' sems dpa' chen pos rnam pa thams cad mkhyen pa nyid thob par 'gyur ram zhes bya ba ni dgu bcu bdun pa'o//bcom ldan 'das gal te byang chub sems dpa' sems dpa' chen pos rnam pa thams cad mkhyen pa nyid thob par 'gyur na zhes bya ba ni dgu bcu brgyad pa'o/ /bcom ldan 'das gal te mtha' las 'das pa dang /thog ma dang tha ma med pa'i stong pa nyid nye bar bzung ste sems can yang shin tu mi dmigs zhes bya ba ni dgu bcu dgu pa'o/ /bcom ldan 'das gal te de ltar chos kyi dbyings la yang 'da' ba ma mchis/ de bzhin nyid dang yang dag pa'i mtha' la yang 'da' ba ma mchis na ci lags 'o na gzugs kyang gzhan la chos kyi dbyings kyang gzhan zhes bya ba ni brgya pa'o//'di man chad ni brgya phrag gsum la bab ste/ bcom ldan 'das ci lags lam bsgoms pas 'bras bu 'byung zhing 'bras bu thob pa'am/thob par 'gyur ba ma mchis sam zhes bya ba ni zhu ba dang po'o/ /bcom ldan 'das gal te 'dus byas kyi khams sam 'dus ma byas kyi khams rigs su tshar bcad cing zhes bya ba ni gnyis pa'o/ /bcom ldan 'das ji ltar na byang chub sems dpa' sems dpa' chen pos chos rnams kyi chos kyi mtshan nyid rtogs pa lags zhes bya ba ni gsum pa'o//bcom ldan 'das sprul pas lam bsgom pa ji lta bu lags zhes bya ba ni bzhi pa'o/ /bcom ldan 'das ji ltar byang chub sems dpa' sems dpa' chen pos dngos po ma mchis pa'i chos rnams rtogs pa lags zhes bya ba ni lnga pa'o//bcom ldan 'das ci lags gzugs thams cad ces bya ba ni drug pa'o/ /bcom ldan 'das gal te byang chub sems dpa' sems dpa' chen pos chos thams cad sgyu ma lta bur 'tshal zhing zhes bya ba ni bdun pa'o//bcom ldan 'das gal te chos thams cad rmi lam lta bu zhes bya ba ni brgyad pa'o/ /bcom ldan 'das ming ni gang lags mtshan ma ni gang lags zhes bya ba ni dgu pa'o/ /bcom ldan 'das gal te chos 'di dag thams cad du de tsam du bas te zhes bya ba ni bcu pa'o//bcom ldan 'das gal te chos thams cad mtshan ma ma mchis shing dran pa ma mchis te zhes bya ba ni bcu gcig pa'o/ /bcom ldan 'das rnam pa gang gi tshul du ji ltar byang chub sems dpa' sems dpa' chen po zhes bya ba ni bcu gnyis pa'o//bcom ldan 'das gal te byang chub sems dpa' sems dpa' chen po shes rab kyi pha rol tu phyin pa la spyod pa'i tshe phan tshun tha dad pa'i chos de dag de ltar 'tshal na zhes bya ba ni bcu gsum pa'o/ /bcom ldan 'das byang chub sems dpa' sems dpa' chen po chos kyi dbyings la slob pas zhes bya ba ni bcu bzhi pa'o//bcom ldan 'das gal te chos thams cad chos kyi dbyings lags na zhes bya ba ni bco lnga pa'o/ /bcom ldan 'das gal te sems can shin tu dmigs su ma mchis la zhes bya ba ni bcu drug pa'o/ / bcom ldan 'das gal te yang dag pa'i mtha' yang gzhan ma lags sems can gyi mtha' yang gzhan ma lags na zhes bya ba ni bcu bdun pa'o/ /bcom ldan 'das byang chub sems dpa' sems dpa' chen po shes rab kyi pha rol tu phyin pa la spyod pa'i tshe thabs mkhas pa dang ldan pas zhes bya ba ni bco brgyad pa'o//bcom ldan 'das gal te chos thams cad kyi rang bzhin gyis stong pa lags na zhes bya ba ni bcu dgu pa'o/ /bcom ldan 'das gal te chos thams cad dbyer ma mchis pa lags na ci'i slad du zhes bya ba ni nyi shu pa'o//bcom ldan 'das gal te byang chub sems dpa' sems dpa' chen pos byang chub 'dzin pa la yang mi spyod/ mi 'dzin pa la yang mi spyod na zhes bya ba ni nyi shu gcig pa'o/ /bcom ldan 'das gal te byang chub sems dpa' sems dpa' chen po 'dzin pa la yang mi spyod/mi 'dzin pa la yang mi spyod gzugs la yang mi spyod ces bya ba ni nyi shu gnyis pa'o/ /bcom ldan 'das gal te byang chub sems dpa' byang chub sems dpa'i sa bcu la zhes bya ba ni nyi shu gsum pa'o/ /bcom ldan 'das byang chub sems dpa' sems dpa' chen pos gang la spyad de sems can rnams yongs su smin par bgyi ba dang /sangs rgyas kyi zhing yongs su dag par bgyi ba'i byang chub sems dpa' sems dpa' chen po'i lam gang lags zhes bya ba ni nyi shu bzhi pa'o/ /bcom ldan 'das ji ltar na byang chub sems dpa' sems dpa' chen po'i sbyin pa'i pha rol tu phyin pa la spyod cing zhes bya ba ni nyi shu lnga pa'o//byang chub sems dpa'i lam gang lags zhes bya ba ni nyi shu drug pa'o/ /bcom ldan 'das gal te chos thams cad stong pa lags na zhes bya ba ni nyi shu bdun pa'o//bcom ldan 'das ci'i slad du mi gnas pa lags zhes bya ba ni nyi shu brgyad pa'o/ /bcom ldan 'das gal te chos thams cad ma skyes na zhes bya ba ni nyi shu dgu pa'o/ /bcom ldan 'das 'o na de bzhin gshegs pa rnams byung yang rung ma byung yang rung zhes bya ba ni sum cu pa'o//bcom ldan 'das ci lags skyes par gyur pa'i lam gyis byang chub thob par 'gyur lags sam zhes bya ba ni sum cu gcig pa'o/ /'dir bar skabs su zhus pa lnga'o/ /bcom ldan 'das gal te byang chub nyid kyang lam lags la zhes bya ba ni sum cu gnyis pa'o//bcom ldan 'das gal te chos thams cad rang bzhin gyis dben pa lags na zhes bya ba ni sum cu gsum pa'o/ /bcom ldan 'das lus kyi gnas ngan len ni gang lags zhes bya ba ni sum cu bzhi pa'o/ /bcom ldan 'das ci lags byang chub sems dpa' sems dpa' chen po des shes bgyi'am zhes bya ba ni sum cu lnga pa'o//bcom ldan 'das phung po gang du nges pa lags zhes bya ba ni sum cu drug pa'o/ /bcom ldan 'das ci lags sems dang po'i bskyed pa zhes bya ba ni sum cu bdun pa'o//bcom ldan 'das ci lags nges pa'i byang chub sems dpa' sems dpa' chen po nges par ngan song rnams su skye bar 'gyur lags sam zhes bya ba ni sum cu brgyad pa'o/ /bcom ldan 'das gal te nges pa'i byang chub sems dpa' sems dpa' chen po zhes bya ba ni sum cu dgu pa'o//bcom ldan 'das dge ba'i chos dag gang la gnas shing zhes bya ba ni bzhi bcu pa'o/ /bcom ldan 'das ji ltar na byang chub sems dpa' sems dpa' chen po 'phags pa'i chos dkar po dang ldan pa zhes bya ba ni bzhi bcu gcig pa'o//bcom ldan 'das de bzhin gshegs pa ni 'phags shing zag pa mi mnga' zhes bya ba ni bzhi bcu gnyis pa'o/ /bcom ldan 'das dge ba'i chos gang dag la gnas te zhes bya ba ni bzhi bcu gsum pa'o/ /bcom ldan 'das ci lags byang chub sems dpa' sems dpa' chen po chos gzhan la mi gnas kyi shes rab kyi pha rol tu phyin pa 'ba' zhig la gnas shing zhes bya ba ni bzhi bcu bzhi pa'o//bcom ldan 'das gal te shes rab kyi pha rol tu phyin pa ngo bo nyid kyis stong pa nyid lags na zhes bya ba ni bzhi bcu lnga pa'o/ / bcom ldan 'das ji ltar na byang chub sems dpa' sems dpa' chen po zhes bya ba ni bzhi bcu drug pa'o/ /bcom ldan 'das bla na med pa yang dag par rdzogs pa'i byang chub mngon par rdzogs par 'tshang rgya bar 'gyur ba'i lam de gang lags zhes bya ba ni bzhi bcu bdun pa'o//gal te chos thams cad rang gi mtshan nyid kyis stong pa lags na zhes bya ba ni bzhi bcu brgyad pa'o/ /ci lags bcom ldan 'das kyis bla na med pa yang dag par rdzogs pa'i byang chub mngon par rdzogs par sangs rgyas nas zhes bya ba ni bzhi bcu dgu pa'o/ / bcom ldan 'das ci lags de bzhin gshegs pas chos nag po'am dkar po zhes bya ba ni lnga bcu pa'o/ /bcom ldan 'das gal te chos thams cad rang gi mtshan nyid kyis stong pa lags na ji ltar zhes bya ba ni lnga bcu gcig pa'o/ /bcom ldan 'das ci lags sdug bsngal 'tshal bas zhes bya ba ni lnga bcu gnyis pa'o//bcom ldan 'das byang chub sems dpa' sems dpa' chen po shes rab kyi pha rol tu phyin pa la ji ltar spyod na zhes bya ba ni lnga bcu gsum pa'o/ /bcom ldan 'das chos thams cad kyi yang dag pa ji lta ba bzhin zhes bgyi ba gang lags zhes bya ba ni lnga bcu bzhi pa'o//bcom ldan 'das de ltar lags na byang chub dngos po ma mchis na zhes bya ba ni lnga bcu lnga pa'o/ /bcom ldan 'das gal te chos thams cad dngos po ma mchis pa'i ngo bo nyid lags te de dag sangs rgyas kyis kyang ma mdzad ces bya ba ni lnga bcu drug pa'o//bcom ldan 'das byis pa so so'i skye bo rnams gang la dngos po'o zhes mngon par zhen par gyur pa de lta bu'i dngos po bzhin ma nor ba zhes bya ba ni lnga bcu bdun pa'o/ /bcom ldan 'das yang dag pa mthong ba la kun nas nyon mongs par 'gyur ba'am zhes bya ba ni lnga bcu brgyad pa'o//bcom ldan 'das chos thams cad kyi mnyam pa nyid de gang lags zhes bya ba ni lnga bcu dgu pa'o/ /bcom ldan 'das gal te chos thams cad sgyu ma lta bu zhes bya ba ni drug cu pa'o/ /bcom ldan 'das de bzhin gshegs pas chos gang mngon par rdzogs par sangs rgyas pa de zhes bya ba ni drug cu gcig pa'o//bcom ldan 'das chos dngos po ma mchis pa'i ngo bo nyid rnams la chos kyi mnyam pa nyid ces bgyi ba yang gang zhig mchis lags zhes bya ba ni drug cu gnyis pa'o//bcom ldan 'das ci lags chos mnyam pa nyid de zhes bya ba ni drug cu gsum pa'o/ /bcom ldan 'das de bzhin gshegs pa dgra bcom pa yang dag par rdzogs pa'i sangs rgyas chos thams cad kyi yul la mnga' bsgyur ba ma lags sam zhes bya ba ni drug cu bzhi pa'o//bcom ldan 'das gal te chos thams cad kyi mnyam pa nyid la zhes bya ba ni drug cu lnga pa'o/ /bcom ldan 'das gal te chos mnyam pa nyid la so so'i skye bo rnams dang zhes bya ba ni drug cu drug pa'o/ /bcom ldan 'das ci lags ji ltar de bzhin gshegs pa chos mnyam pa nyid las mi g.yo ba zhes bya ba ni drug cu bdun pa'o//bcom ldan 'das gal te de ltar chos rnams kyi chos nyid ces bya ba ni drug cu brgyad pa'o/ /bcom ldan 'das ci lags chos nyid 'dus bgyis lags sam zhes bya ba ni drug cu dgu pa'o//bcom ldan 'das gal te chos thams cad kyi mnyam pa nyid ni rang bzhin gyis stong pa ste zhes bya ba ni bdun cu pa'o/ /bcom ldan 'das ci zhig gis stong pa lags zhes bya ba ni bdun cu gcig pa'o/ /bcom ldan 'das gal te 'jig rten pa'i chos 'di dag sprul pa lags na zhes bya ba ni bdun cu gnyis pa'o//bcom ldan 'das gang spangs pa zhes bgyi ba zhes bya ba ni bdun cu gsum pa'o/ /bcom ldan 'das gang ma sprul pa'i chos de gang lags zhes bya ba ni bdun cu bzhi pa'o/ /bcom ldan 'das de gang lags zhes bya ba ni bdun cu lnga pa'o//bcom ldan 'das kyis 'di skad du zhes bya ba ni bdun cu drug pa'o/ /bcom ldan 'das las dang po pa'i gang zag gis ngo bo nyid kyis stong pa nyid yongs su btsal bar bgyi na ji ltar gdams shing rjes su bstan par bgyi zhes bya ba ni bdun cu bdun pa'o/ / zhus pa 'di dag thams cad kyi 'khor de na 'khod pa'i byang chub sems dpa' phyir mi ldog pa rnams kyi don dang / ma 'ongs pa'i skye bo rnams la phan gdags pa'i phyir zhus pa rig par bya'o// //bam po nyi shu gsum pa/ de la rab 'byor gzugs zab po zhes bya ba ni/'dir gzugs kyi de bzhin nyid la gzugs kyi tshig tu brjod do/ /de bas na ji ltar zab ces zhus pa dang / rab 'byor gzugs kyi de bzhin nyid ji lta ba de bzhin du gzugs zab po zhes bya bas de bzhin nyid kho na yin par bstan te/ rnam pa gang gis de bzhin nyid zab pa'i rnam pa des gzugs zab po zhes bya ba'i tha tshig go//bcom ldan 'das gzugs kyi de bzhin nyid ni ji lta bu lags zhes zhus pa ci las dgongs she na de bzhin nyid ces bya ba ni rnam pa med pa ste/ gzugs la sogs pa'i mtshan nyid dam/ gzugs la sogs pa la rag lus pa yang ma yin na/gzugs kyi de bzhin nyid dang tshor ba'i de bzhin nyid ces bya ba gzugs la sogs pa'i tshig tu ji ltar brjod ces zhus pa'o/ / rab 'byor gzugs kyi de bzhin nyid de la gzugs kyang med/ gzugs las gud na yang de bzhin nyid med de gzugs kyi de bzhin nyid ni de lta bu'o zhes bya ba ni/kun brtags pa spangs te/ kun brtags pa las gud na yod pa'i de bzhin nyid yongs su grub pa gang yin pa de ni rnam pa thams cad dang bral ba ste/ gzugs la sogs pa'i sgrar brjod du mi rung ngo //gang byis pa so so'i skye bo rnams kyis kun brtags pa'i gzugs la sogs pa dang de de nyid dang gzhan du brjod du mi rung ba dri ma dang bcas pa'i de bzhin nyid gang yin pa de/ de'i gnas skabs nye bar mtshon pa'i phyir gzugs la sogs pa'i sgrar sgro btags te tha snyad du byas so zhes bstan pa'o//gzugs las kyang bzlog mya ngan las 'das pa yang bstan zhes bya ba ni gzugs zab po zhes bya ba des kun brtags pa'i gzugs las ni bzlog /chos nyid kyi gzugs mya ngan las 'das pa ni bstan pa'o/ /skyes bu 'dod chags can gyi dpe ni go sla'o//nyin gcig la dge ba'i rtsa ba yongs su bzung ba des gang gA'i klung gi bye ma snyed kyi 'jig rten gyi khams rnams yongs su gang bar gyur kyang / des ni dge ba'i rtsa ba'i de'i lhag ma'i brgya'i char yang nye bar mi 'gro'o zhes bya ba ni nyin gcig la dge ba'i rtsa ba gang bstsags pa des gang gA'i klung gi bye ma snyed kyi 'jig rten gyi khams rnams yongs su gang bar gyur kyang gang gA'i klung bye ma snyed kyi 'jig rten gyi khams yongs su gang bar gyur pa'i dge ba'i rtsa ba de'i cha bas lhag ma lus pa'i cha mang du 'gyur la/'jig rten gyi khams yongs su gang ba'i cha ni lhag ma lus pa'i cha'i brgya'i char yang nye bar mi 'gro'o zhes bya ba'i tha tshig go//shes rab kyi pha rol tu phyin pa dang bral ba zhig gis shes rab sgom par byed na zhes bya ba ni dmigs su med pa mthong ba'i lam gyi rnam pa shes pa nyid kyi shes rab dang mi ldan par 'jig rten pa'i shes rab 'ba' zhig bsgom na zhes bya ba'i tha tshig go//'di lta ste shes rab kyi pha rol tu phyin pa 'di ni byang chub sems dpa' rnams kyi ma'o zhes bya ba ni lam gyi rnam pa shes pa nyid la bya'o/ /bcom ldan 'das gang mngon par 'du bgyid pa thams cad ni bcom ldan 'das kyis kun brtags pa'o zhes bka' stsal na ji ltar rigs kyi bu 'am/rigs kyi bu mo'i bsod nams ches mang du 'phel bar 'gyur ba lags zhes bya ba ni shes rab kyi pha rol tu phyin pa dang bral ba'i byang chub sems dpa' bsod nams kyi bdag nyid gang dang gang mngon par 'du byed pa de kun brtags pa yin te/de bas na bsod nams mang du 'phel bar mi 'gyur ro/ /mngon par 'du bgyid pa ma mchis pa ni dngos po ma mchis pa ste/ dngos po ma mchis pas ni yang dag pa'i lta ba dang /skyon ma mchis par 'jug pa la sogs pa bgyid par yang mi nus so zhes bya ba ni des ci yang byed mi nus na/ de ji ltar rigs par 'gyur zhes gsol pa'o/ /byang chub sems dpa'i mngon par 'du byed pa de yang stong pa nyid du snang ngo / /gsob nyid du snang ngo zhes bya ba 'dis 'di skad du nga ni mngon par 'du byed pas bsod nams 'phel bar yang mi smra/mngon par 'du byed pa med pas kyang bsod nams 'phel bar mi smra'o zhes gsungs pa'o/ /'o na ji lta bu zhe na byang chub sems dpa'i bsod nams mngon par 'du bya ba gang dang gang byung ba de dag rtag tu rnam pa thams cad du stong pa nyid dang gsog dang gsob tu ji ltar so sor brtag par bya zhe na/de ltar so sor rtog na shes rab kyi pha rol tu phyin pa dang ma bral ba'i phyir/ bsod nams dpag tu med grangs med pa 'phel bar 'gyur ro zhes smra'o zhes bya'o/ / bye brag ni ci zhig mchis zhes bya ba skabs su bab pa'i phyir zhar la dris pa ste/ rab 'byor grangs med pa zhes bya ba ni gang la bgrang du med pa'o zhes bya ba la tshig gis bgrang mi nus pa ni grangs med pa'o/ /dpag tu med pa zhes bya ba ni dpag par mi nus pa'o/ /grangs kyi dbang gis kyang 'di tsam mo zhes yongs su chad par tshad gzung du med pa ni tshad med pa ste/'di gsum char yang bgrang ba'i bye brag go/ /grangs kyi khams dang grangs med pa'i khams zhes bya ba ni 'dus byas kyi khams dang 'dus ma byas kyi khams zhes bya ba'i tha tshig go//gzugs kyang stong pa grangs med dpag tu med tshad med pa'o zhes bya ba ni grangs dang tshad la sogs pa ni kun brtags pa rnams la yod kyi/ stong pa nyid kyi dbyings la ni med de 'di ni rnam grangs su gtogs pa'o/ /de bas na gzugs kyang stong pa'o zhes bye brag yod par bya ba'i phyir yang zhes bya ba smos so//snying rje chen pos bshad pa'i rgyu mthun pa bstan pa'i nyid do zhes bya ba ni kun rdzob tu bshad pa ni thugs rje'i rgyu mthun pa zhes bya ba'i tha tshig go/ /bcom ldan 'das chos thams cad kyang brjod du ma mchis pa'o zhes bya ba ni sngar chos nyid 'ba' zhig brjod du med par bstan te/da ni chos nyid dang tha mi dad pa'i chos thams cad kyang brjod du med pa nyid do zhes ston to/ /bcom ldan 'das ci brjod du ma mchis pa'i don la 'phel ba'am/ yongs su 'grib pa ma mchis sam zhes bya ba la sogs pas 'di skad bstan to// brjod du med pas ni stong pa nyid du brjod pas stong pa nyid ni chos dkar po'i dbang gis 'phel ba yang med/ chos nag po'i dbang gis yongs su 'grib pa yang med do/ /pha rol tu phyin pa la sogs pa la yang 'phel ba dang 'grib pa gnyis med na 'o na rgyu gang gis rnam pa thams cad mkhyen pa nyid/bla na med pa yang dag par rdzogs pa'i byang chub mngon par rdzogs par byang chub pa'i skal ba can du 'gyur zhes zhus pa ste/ de skad zhus pa dang / bla na med pa yang dag par rdzogs pa'i byang chub ji lta ba de bzhin du yongs su bsngo'o zhes bya ba tshig tha ma'i gzhung gis thabs mkhas pas yongs su bsngos pa'i stobs kyis 'gyur bar ston to//bcom ldan 'das bla na med pa yang dag par rdzogs pa'i byang chub ji lta bu lags zhes bya ba ni gzugs la sogs pa dang tha dad pa ma yin pa'i stong pa nyid kyi ngo bo nyid de/yang bstan pa'i phyir zhus pa'o/ /'phel ba dang / yongs su 'grib pa med pa'i tshul gyis shes rab kyi pha rol tu phyin pa la spyad par bya'o zhes bya bas ni/ 'di gcig pu'i shes rab kyi pha rol tu phyin pa'i spyod pa yin par ston to//bcom ldan 'das ci lags byang chub sems dpa' sems dpa' chen po sems dang po bskyed pas bla na med pa yang dag par rdzogs pa'i byang chub mngon par rdzogs par 'tshang rgya'am/ 'on te sems slad ma bskyed pas mngon par rdzogs par 'tshang rgya zhes bya ba ni zab mo'i gnas kyi skabs zhus pa ste/dge ba'i rtsa ba bstsags pas bla na med pa yang dag par rdzogs pa'i byang chub mngon par rdzogs par 'tshang rgya na/ de la ji ltar dge ba'i rtsa ba bstsags par 'gyur/ /ci 'di la byang chub sems dpa' bskal pa grangs med pa gsum gyi sngon rol du gang thog mar sems bskyed pa de'i mthas mngon par rdzogs par 'tshang rgya'am 'on te gnyis pas sam/'on te gsum pas sam/ 'on te ci gang byang chub kyi snying por bzhugs pa na/ thams cad kyi tha mar sems bskyed pa de'i mthus mngon par rdzogs par 'tshang rgya/de la sems gcig gis mngon par rdzogs par 'tshang rgya bar mi 'gyur te/ de la de lta bu'i mthu med pa dang / bsod nams kyi tshogs lhag ma rnams don med par 'gyur ba'i phyir ro/ /thams cad kyis kyang ma yin te/ de dag skad cig re re la 'jigs pa'i ngang can yin pas bstsags su mi rung ba'i phyir ro zhes bstan pa ste/ de la bcom ldan 'das kyis mar me'i dpe bstan pa/ gang gi tshe mar me'i snying po tshig pa ni skad cig re re la 'jigs pa'i ngang can yin yang / mar me'i skad cig thams cad kyi stobs kyis tshig par gyur ces bya'o//de bzhin du mngon par rdzogs par byang chub pa yang sems thams cad kyi mthus 'gyur bar bstan pa ste/ skad cig pa yin du zin kyang / 'du byed kyi bag chags bstsags pa'i tshul gyis 'gyur ro zhes dgongs pa'o//dkar po rnam par mthong ba'i sa ni lhag mthong gi tshe'o/ /rigs kyi sa ni 'jig rten pa'i chos kyi mchog go/ /brgyad pa'i sa ni rgyun du zhugs pa'i lam mo/ /de nyid kyi 'bras bu ni mthong ba'i sa'o/ /bsrab pa'i sa ni lan cig phyir 'ong ba'i sa ste/des 'dod pa la 'dod chags dang / gnod sems bsrabs pa'i phyir ro/ /'dod chags dang bral ba'i sa ni phyir mi 'ong ba'i sa ste/ 'dod chags dang gnod sems gnyis spangs pa'i phyir ro/ /byas pa rtogs pa'i sa ni dgra bcom pa nyid de/ bya ba byas pa'i phyir ro//rang sangs rgyas kyi sa ni rang byang chub nyid do/ /byang chub sems dpa'i sa ni lam gyi rnam pa shes pa nyid do/ /sangs rgyas kyi sa ni rnam pa thams cad mkhyen pa nyid do/ / gzhan yang sems gang 'gags pa de'i phyir skye bar 'gyur ram zhes bya ba la sogs pas zab mo'i gnas skabs ston to//gang 'gags pa ni skye bar mi 'gyur ro/ /gang skyes pa ni 'gag pa'i chos can yin no/ /gang 'gag pa'i chos can de ni 'gag par mi 'gyur te/ de bzhin nyid ji lta ba de bzhin nyid du de gnas par yang 'gyur la/de ther zug tu gnas par yang mi 'gyur ro zhes bya ba de ni zab mo'i gnas so/ /gang 'gags pa de ni skye bar mi 'gyur zhes bya ba ni ngo bo nyid kyis 'gag pa ste 'dus ma byas pa la bya'o/ /gang skyes pa de ni 'gag pa'i chos can ma yin no zhes bya ba ni 'dus byas la bya'o//gang 'gag pa'i chos can de ni 'gag par mi 'gyur zhes bya ba ni 'gag pa gnyis pa med pa'i phyir de skad ces gsungs so/ /de bzhin du de gnas par yang 'gyur zhes bya ba ni de bzhin nyid la bya'o/ /de ther zug tu gnas par mi 'gyur zhes bya ba ni ngo bo nyid med pa'i phyir de skad bshad do//rab 'byor de ji snyam du sems/ sems de yang de bzhin nyid dam zhes bya ba ni/ ci 'dus byas kyi sems gang yin pa de/ de bzhin nyid kyi ngo bo nyid yin nam zhes dris pa'o/ /bcom ldan 'das de ni ma lags so zhes bya ba ni/dri ma dang bcas pa'i phyir de bzhin nyid kyi ngo bo nyid ma lags so zhes slar gsol pa'o/ /de bzhin nyid las sems de gud na yod dam zhes bya ba ni 'dus byas kyi sems de de bzhin nyid las gzhan nam zhes dris pa'o/ /bcom ldan 'das de ni ma lags so zhes bya ba ni kun brtags pa ni yongs su grub pa las de kho na nyid dam gzhan du bsnyad du mi rung ba'i phyir slar gsol pa'o//de bzhin nyid la sems yod dam zhes bya ba dang / sems la de bzhin nyid yod dam zhes bya ba ni/ ci phan tshun gnas dang brten pa'i dngos por yod dam zhes dris pa'o//bcom ldan 'das de ni ma lags so zhes bya ba ni kun brtags pa dang / yongs su grub pa gnyis gnas dang brten pa'i dngos por yod pa ma yin no zhes slar gsol pa'o/ /de bzhin nyid kyis de bzhin nyid yang dag par rjes su mthong ngam zhes bya ba ni/sems des chos thams cad yang dag par rjes su mthong ngo snyam du sems pa la dris pa'o/ /bcom ldan 'das de ni ma lags so zhes bya ba ni/ de bzhin nyid kyi gnas skabs de ni / dmigs par bya ba dang / dmigs par byed pa med pa'i phyir slar gsol pa'o//bcom ldan 'das gang de ltar spyod do zhes bya ba de ni/ ci la yang spyod pa med do zhes bstan pa'o/ /bcom ldan 'das de ni gang la gnyis kun 'byung ba ma mchis pa'i don dam pa la spyod do zhes bya ba ni/ spyod do zhe 'am med do zhes bya bas de ni gnyis pa'o //des mtshan mar 'du shes pa rnam par bshig pa yin nam zhes bya ba ni/ mtshan ma'i 'du shes med par byas pa yin nam zhes bya ba'i tha tshig go/ /bcom ldan 'das de ni ma lags so zhes bya ba ni/ mtshan ma'i 'du shes rnam par gzhig par bya'o snyam pa de lta bu'i rnam par rtog pa/kun tu 'byung ba med pa'i phyir slar gsol pa ste/ de lta bu'i rnam par rtog pa kun tu spyod pa med par yang stong pa nyid dang / mtshan ma med pa dang / smon pa med pa'i ting nge 'dzin bsgom pa'i mthus bdag nyid mtshan ma'i 'du shes kun tu mi spyod par 'gyur ro zhes bstan pa'o//ting nge 'dzin de dag gis sems can rnams yongs su smin par byed do zhes bya ba ni thabs mkhas pa'i mthus/ gang bdag kyang stong pa nyid la sogs par mthong bar 'gyur la/ sems can rnams kyang yongs su smin par byed pa ste/de ni thabs la mkhas pa'i mthu yin no/ / gang la la rmi lam du stong pa nyid dang / mtshan ma med pa dang / smon pa med pa'i ting nge 'dzin gsum la snyoms par zhugs na/ de shes rab kyi pha rol tu phyin pas rnam par 'phel lam zhes bya ba ni/zab mo'i gnas kyi skabs phye nas/ gnas brtan gnyis kyis sngar 'das pa'i ting nge 'dzin nyid bstan te/ gal te chos thams cad dmigs su med na/ byang chub sems dpa' gang rmi lam na ting nge 'dzin gsum la snyoms par zhugs pa de'i tshe/shes rab kyi pha rol tu phyin pas rnam par 'phel bar 'gyur ba'i rigs so/ /gal te rmi lam na pha rol tu phyin pa rnam par 'phel bar mi 'gyur la/ gnyid kyis ma log pa'i tshe ni 'gyur na/ de lta na ni rmi lam dang / gnyid kyis ma log pa gnyis la chos rnams la yod pa dang med pa'i bye brag 'ba' zhig yod do snyam du dgongs nas dris pa'o// tshe dang ldan pa shA ri'i bu gal te nyin par bsgoms pas rnam par 'phel na/ rmi lam na yang rnam par 'phel lo zhes dris pa'o / /de nas gnas brtan rab 'byor gyis/'di la byang chub sems dpa' la ni rmi lam dang / gnyid kyis ma log pa'i tshe yang / chos rnams dmigs su med par mtshungs te/ de bas na rmi lam zhes bya ba dang / nyin par zhes bya ba ni yang rnam par rtog pa tsam du zad do zhes rmi lam dang gnyid kyis ma log pa gnyis mtshungs par ston to//de ltar na nyin par dang rmi lam gnyis mtshungs na/ gal te gnyid kyis ma log pa'i ting nge 'dzin gyis shes rab rnam par 'phel bar 'gyur na/ rmi lam gyi ting nge 'dzin gyis kyang shes rab rnam par 'phel bar 'gyur ro zhes bstan pa'o//tshe dang ldan pa rab 'byor byang chub sems dpa' sems dpa' chen pos rmi lam du las shig byas na / las de sogs pa'am/ 'bri bar 'gyur ba yod dam zhes bya ba ste/ gnas brtan shA ri'i bu'i dgongs pa ji lta bu zhe na/ gal te nyin par dang rmi lam na yang chos rnams mtshungs na/ gang rmi lam na sbyin pa la sogs pa sbyin pa dang / gang yang rmi lam na rgyun du zhugs pa'i 'bras bu thob pa de gnyis las snga ma ni dge ba'i las sogs par 'gyur/ phyi ma ni las rnams zad par 'gyur ba lta yod dam/'on te med ces dris pa'o/ /de nas gnas brtan rab 'byor gyis/ gal te bcom ldan 'das kyis chos thams cad rmi lam lta bur gsungs na/ de la sogs pa'am 'bri bar 'gyur ba med do zhes gsungs pa la sogs pa dang 'bri ba zhes bya ba ni dngos po yod pa las 'gyur na 'di ltar chos thams cad ni rmi lam lta bu ste/de'i phyir rmi lam dang gnyid kyi ma log pa gnyi ga na yang / las de dang / byed pa po de rnam pa thams cad du med na/ de las sogs pa'am 'bri ba yod ces ci'i phyir zer zhes gsungs pa'o//de'i phyir rmi lam na chos gang yang sogs pa'am 'bri ba med do zhes bya ba gsungs te/ gal te 'ga' zhig gi rmi lam na klung chus yongs su gang ba zhig mthong ngam/ rgya mtsho skams pa mthong na/ de las sogs pa dang 'bri ba yod dam/ de la ji ltar rmi lam na sogs pa dang 'bri ba de gnyis med pa de bzhin du/nyin par gnyid kyis ma log pa'i tshe yang gang la yang sogs pa'am 'bri ba gang yang med do zhes bstan pa'o/ /de nas gnas brtan shA ri'i bus/ gal te sad nas rnam par rtog na ni las de las sogs pa'am 'bri ba'ang yod do zhes gsungs pa ni bdag ni dmigs su med par lta ba rnam par mi rtog pa'i byang chub sems dpa'i dbang du byas nas mi smra'i/gang da lta'i gsar bu rnam par rtog pa la spyod pa dag gal te rmi lam na byas pa'i las la sad pa'i tshe/ rjes su yi rang zhing sems pa de'i tshe mtshan mo byas pa'i las la sogs pa'am 'bri ba yod dam zhes 'dri ba'o //de bas na rmi lam dang gnyid kyis ma log pa'i tshe/ bye brag yod par 'gyur ro zhes gnas brtan shA ri'i bus dgongs pa'o/ /de nas gnas brtan rab 'byor gyis/ tshe dang ldan pa shA ri'i bu gang nyin par srog bcad pa dang /gang rmi lam na srog bcad pa de la/ 'di snyam du bdag gis de bsad do/ /de bdag gis bsad pa legs so zhes sad nas rnam par rtog na/ tshe dang ldan pa shA ri'i bu las de la khyod ci zer zhes bya bas/ 'khrul pa yod par gsungs te/ci las dgongs she na/ mi la las nyin par ram rmi lam na srog bcad pa las gang gi tshe de bsad par gyur pa de'i tshe/ las de gnyis yid kyis rjes su yi rang zhing bsams pa na/ ci nyin par srog bcad pa'i las la rjes su yi rang ba'i rnam par smin pa che'am/'on te rmi lam na byas pa'i las la rjes su yi rang ba'i rnam par smin pa che snyam pa'o/ /de nas shA ri'i bus/ tshe dang ldan pa rab 'byor dmigs pa med pa las mi 'byung / dmigs pa med par sems pa mi 'byung ngo zhes gsungs pa'i dgongs pa ni 'di yin te/rmi lam na srog bcad pa dngos po med pa'i bdag nyid yin pas/ de la dmigs pa'i sems ni dngos po med pa la dmigs pa yin te/ de bas na de la rnam par smin pa lhag pa med do zhes bya ba'o/ /de nas gnas brtan rab 'byor gyis/ de de bzhin no zhes shA ri'i bu'i tshig la rjes su yi rang bas ji skad bstan par 'gyur zhe na/gal te dmigs pa med par las mi 'byung na/ gang khyod kyis 'on te sad pa'i tshe rnam par rtog na/ las de las sogs pa'am 'bri ba yod do zhes sngar smras pa de mi rigs so zhes bstan pa yin no/ / 'dir klan ka lhag ma ni gal te dmigs pa med par las mi 'byung na/ de lta na ni rmi lam na byas pa dmigs pa med par 'gyur la/ gnyid kyis ma log par ni byas pa ni dmigs pa dang bcas par 'gyur ba'i phyir rmi lam dang gnyid kyis ma log pa gnyis bye brag yod par 'gyur te/de lta na ni chos thams cad rmi lam dang 'dra'o zhes bya ba nyams par 'gyur ro zhes bya ba'o/ /de bas na klan ka de bstsal ba'i phyir gnas brtan rab 'byor gyis/ mthong ba dang thos pa dang / bye brag phyed pa dang / rnam par rig pa'i chos rnams la blo 'jug ste ma mthong ma thos/bye brag ma phyed/ rnam par ma rig pa'i chos la ni blo mi 'jug go/ /de la blo la la ni kun nas nyon mongs pa yongs su 'dzin to/ /blo la la ni rnam par byang ba yongs su 'dzin to zhes bya ba gsungs te dmigs pa can du spyod pa gsar bu rnams/ dngos po dag la don dam par yod dam med pa ma brtags par rmi lam dang / gnyid kyis ma log pa'i tshe yang / mthong ba dang / thos pa dang / bye brag phyed pa dang / rnam par shes pa'i rjes su 'brang bas blo 'jug ste de de ltar blo 'jug pa na/ blo la la 'bras bu med/la la 'bras bu che/ la la 'bras bu chung / la la kun nas nyon mongs pa yongs su 'dzin/ la la yongs su mi 'dzin/ la la rnam par byang ba yongs su 'dzin/ la la mi 'dzin zhes bya bas ji skad bstan par 'gyur zhe na/ 'gro ba dang / dus dang sbyor ba dang / lus rnams kyi phun sum tshogs pa dang / rgud pa dang / gnyid la sogs pa dang / rkyen dang bral ba'i dbang las 'gyur bar shes par bya ba'o zhes bstan pa yin no/ /tshe dang ldan pa rab 'byor las thams cad dben pa dang sems pa thams cad dben pa'o zhes bcom ldan 'das kyis gsungs na zhes bya ba ci las dgongs she na/chos thams cad ngo bo nyid kyis dben pa'o zhes 'byung ba'i phyir las rnams dang / sems pa dag ngo bo nyid kyis dben pa yin na/ de la ji ltar dmigs pa dang bcas pa'am/ dmigs pa med pa'o zhes brtag par bya snyam du dgongs pa'o//de nas gnas brtan rab 'byor gyis smras pa/ tshe dang ldan pa shA ri'i bu byis pa so so'i skye bo rnams ni mtshan mar byas nas/ las rnams mngon par 'du byed do zhes bya ba 'di'i dgongs pa ni 'di yin te/ skabs 'dis dmigs pa med par gzigs pa'i byang chub sems dpa' sems dpa' chen po la ni mi bya'i dmigs pa can du spyod pa la bya'o//de bas na de dag gi blo'i rtog pa'i dbang gis dmigs pa dang bcas pa dang / dmigs pa med pa bstan to/ /de nas yang gnas brtan shA ri'i bus/tshe dang ldan pa rab 'byor gal te byang chub sems dpa' sems dpa' chen pos rmi lam na sbyin pa byin pa nas shes rab bsgoms zhes bya ba'i bar gyis klan ka gzhan dag smras te/ byang chub sems dpa' gsar bu lta re zhig zhog la byang chub sems dpa' gang rgyud yongs su smin pa zhig gal te rmi lam na sbyin pa sbyin na/de la ni rmi lam dang gnyid kyis ma log pa gnyis mtshungs te/ gnyid kyis ma log pa dang 'dra bar sbyin pa la sogs pa la rjes su yi rang ba dang / yongs su bsngo ba la sogs pa legs par byas par 'gyur ram zhes de skad bstan to//tshe dang ldan pa shA ri'i bu byang chub sems dpa' sems dpa' chen po byams pa 'di zhes bya ba la sogs pas/ de'i tshe tshogs pa'i 'dul ba'i skye bo rnams la phan gdags pa'am/ bdag dang bsam pa mthun par bstan pa'i phyir des klan ka de'i lan btab pa'o//btsun pa shA ri'i bu de ji snyam du sems/ gang 'di byang chub sems dpa' sems dpa' chen po byams pa zhes bya ba'i ming lan glon nam/ 'on te gzugs lan glon zhes bya ba la sogs pas/ gnas brtan shA ri'i bu'i klan ka dmigs pa dang bcas par sngar smras pa'i lan btab ste/'di ltar dmigs pa med par gzigs shing / rgyud yongs su smin pa'i byang chub sems dpa' la ni rmi lam dang gnyid kyis ma log pa gnyi ga na yang sbyin pa la sogs pa dang / rjes su yi rang ba dang /yongs su bsngo ba la sogs pa rmi lam gyi dngos po bzhin du yod pa ma yin na/ de yod pa ma yin par mi shes pa lta bur glan ka dris so zhes bya ba ste/ stong pa nyid du bstan pa'o/ /gang zag dang chos med na/ byams pa 'di ni lan ldon par 'gyur ro zhes bya ba ni ci las bsams te smra zhes bya ba ste/glo bur gyi ming tsam du bzung ste smra'am/ 'on te gzugs la sogs pa'am de dag gi stong pa nyid lan ldon par 'gyur zhes brjod pa'o/ /chos thams cad ni gnyis su med cing / gnyis su byar med de tha mi dad de gcig tu gnas pa yin na/'di la su zhig ci zhig su la lan ldon te/ su zhig gang gis lan ldon zhes bya ba'i tha tshig go/ /rigs kyi bu chos de dag ji skad du bshad pa de bzhin du chos de dag khyod kyis mngon sum du byas sam zhes bya ba ni gnas brtan shA ri'i bus 'di skad gsungs pa ste/gal te khyod kyis chos de dag de bzhin du mngon sum du byas na/ de lta na ni mngon sum du byed pa po dang / mngon sum du bya ba dang / mngon sum du byed pa tha dad du dmigs par 'gyur ro zhes bya ba'o/ /de bas na 'phags pa byams pas slar gsungs pa/chos de dag ji ltar bdag smras pa de ltar chos de dag mngon sum du byas pa med do zhes bya ba ni/ mngon sum du byed pa'i dus na/ chos de dag dmigs su med de/ de dag brjod du yang med na/ ji ltar smra bar bya zhes bstan pa'o/ /chos gang gis dgra bcom par brjod pa'i chos de khyod kyis yang dag par rjes su mthong ngam zhes bya ba zhes gsungs pa dang /gnas gyur pa ma gtogs par dgra bcom pa zhes bya ba'i chos gang yang med do snyam nas/ bcom ldan 'das de ni ma lags so zhes slar gsol to//bcom ldan 'das ji ltar na byang chub sems dpa' sems dpa' chen po pha rol tu phyin pa drug yongs su rdzogs par bgyid cing zhes zhus pa ci las dgongs she na/ gal te chos thams cad dmigs su med na/ gang dag gi don du su zhig ji ltar pha rol tu phyin pa drug yongs su rdzogs par byed ces zhus pa'o//de nas bcom ldan 'das kyis sems can yongs su 'dzin pa'i tshe/ snying rje'i dbang gis kun rdzob tu dmigs pa dang bcas pa'i 'du shes can du 'gyur bar bstan nas/ pha rol tu phyin pa drug yongs su rdzogs par bya ba'i thabs rab tu dbye ba dang /sangs rgyas kyi zhing yongs su sbyong ba dag bstan te/ de dag thams cad kyang don gsal bas rnam par ma phye'o/ /byang chub sems dpa'i smon lam 'di dag thams cad kyang thams cad la yod pa ni ma yin gyi/ so so'i bsam pa tha dad pa ji lta ba bzhin du smon lam dag 'byung ste/ kha cig ni rnam pa thams cad du smon lam btab kyang / phyis sems can rnams kyi las kyi dbang gis cung zad mi 'grub pa yang yod do/ /gang gA'i lha mo lung bstan pa yang go sla'o/ /de nas gnas brtan rab 'byor gyis rnam par thar pa'i sgo gsum sgom pa dang /byang chub kyi phyogs kyi chos sum cu rtsa bdun sgom pa la ji ltar byang chub sems dpas nyan thos dang / rang sangs rgyas kyi rnam par grol ba spangs te/ bsgom pa zhes bya ba zhus pa'o/ /de'i 'og tu bshad pa'i 'gres ni stong pa zhes bya bar so sor brtag par bya'o zhes bya'o//stong pa nyid kyi lhag mthong mngon par 'phel ba'i dus na ni ci nas kyang de ltar so sor brtags nas/ sems g.yeng bar mi 'gyur ba de ltar so sor brtag par bya ste zhes bya'o//stong pa nyid kyi ting nge 'dzin gyi dus na ni sems mi g.yeng ba dang ldan pas chos gang mngon sum du bya ba'i chos de yang dag par rjes su mi mthong ste zhes bya'o/ /de bzhin nyid thob pa'i dus na ni des yang dag par rjes su ma mthong bas mngon sum du mi byed do zhes bya ba la sogs pa nas ldan pa yang ma yin mi ldan pa yang ma yin par mthong ngo zhes bya ba'i mtha' la thug pa'i bar gyi gzhung gis bstan te/dmigs par bya ba dang / dmigs par byed pa mnyam pas mnyam pa rnam par mi rtog pa nyid du bstan pa'o/ / des chos de yang dag par rjes su ma mthong bas mngon sum du mi byed do zhes bya ba ni/ chos ma mthong ba nyid/ de'i mngon sum du mi byed pa'i rgyu'o/ /gal te mthong na de lta na ni mngon sum du byed do/ /'o na mngon sum byas na nyes pa cir 'gyur zhe na/ des nyan thos ltar yang dag pa'i mtha' mngon sum du byas par 'gyur ro//de lta na ni de'i rnam par grol ba la sbyor bar yang 'gyur ro/ /ji ltar na byang chub sems dpa' sems dpa' chen po stong pa nyid la gnas la stong pa nyid mngon sum du yang mi bgyid pa lags zhes bya ba la/ stong pa nyid ni chos gang mngon sum du bya ba de yang dag par rjes su mi mthong zhes bya ba'i gnas su bstan to/ /yang chos de yang dag par rjes su ma mthong bas mngon sum du mi byed do zhes bya ba ni stong pa nyid mngon sum du mi byed pa bstan to/ /de la gnas kyang de mngon sum du yang mi byed ces bya ba 'di ji ltar shes par rung zhes zhus pa dang /bcom ldan 'das kyis dgongs pa snga ma'i dbang gis 'gyur ba bstan pa/ rab 'byor gang gi tshe byang chub sems dpa' sems dpa' chen po rnam pa thams cad kyi mchog dang ldan pa'i stong pa nyid la so sor rtog pa na mngon sum du so sor mi rtog go zhes bya ba ste/stong pa nyid bsgom par bya'o zhes bya ba ni dgongs pa snga ma nyid kyis/ nyan thos 'gog pa mngon sum du bya'o snyam pa'i bsam pa lta bur/ stong pa nyid mngon sum du bya'o snyam pa'i dgongs pa ni byang chub sems dpa' de la mi mnga' ste/stong pa nyid bsgom par bya'o snyam pa ni rab tu mthun par bya'o snyam du dgongs pa nyid yin no/ /de bas na phyis kyang bsgom pa 'ba' zhig yin gyi mngon sum du byed pa ni ma yin no zhes bya ba'i tha tshig go/ /de bas na 'di ni yongs su 'dris par bya ba'i dus yin gyi 'di ni mngon sum du bya ba'i dus ma yin no zhes bya bar rtog go zhes bya ba gsungs te/gang stong pa nyid la yongs su 'dris par yang byed la/ mngon sum du yang mi byed pa de ni yongs su 'dris pa'i shes pa nyid kyi mthu yin no//mnyam par ma bzhag pa nyid du sems dmigs la 'dogs te zhes bya ba ni yongs su 'dris pa'i shes pa zhes bya ba rang bzhin gyi sems yin gyi/ de mnyam par bzhag pa ni ma yin te/ de bas na skad cig de'i tshe zhi gnas ni med do/ /zhi gnas med pas 'jig rten las 'das pa'i lam mi 'byung ngo zhes ston to//da ni yongs su 'dris pa'i shes pa/ dus dang dus ma yin pa shes pa ston te 'di ni sbyin pa'i pha rol tu phyin pa'i dus so zhes bya ba la sogs pa'o/ /skyes bu dpa' bo'i dpe dang / bya'i dpe dang / 'phong gi slob dpon gyi dpe dag kyang gzhung dang sbyar te gzung bar bya'o//bcom ldan 'das ngo mtshar to/ /bde bar gshegs pa ngo mtshar to zhes bya ba ni de ltar chos thams cad stong pa nyid du mthong ba rnams bar ma dor sems zhum pa'i rgyus/ ting nge 'dzin gsum bsgom zhing nyan thos dang rang byang chub tu ltung bar ma gyur pa ste/ngo mtshar che'o zhes gsol pa'o/ /rab 'byor 'di ltar byang chub sems dpa' sems dpa' chen pos sems can thams cad yongs su ma btang ste zhes bya ba la sogs pas/ bcom ldan 'das kyis 'dir sems zhum par mi 'gyur ba'i rgyu ston to//'di la yang 'gres bdun te/ dam pa ma yin pa'i chos la 'jug pa'i 'gres dang / dmigs par lta ba'i 'gres dang / sems phyin ci log gi 'gres dang / gang zag dang chos su rnam par rtog pa'i 'gres dang /mtshan ma'i 'gres dang / smon lam gyi 'gres dang / byang chub sems dpa' la dri ba'i 'gres so/ /de la sems can 'di dag ni dam pa ma yin pa'i chos la dam par 'du shes pas bslus par gyur pa dag ste/ bdag gis sems can mi shes pa de dag yongs su gtang bar mi bya'o zhes bya ba ni byang chub sems dpa' dag gis snying rje mngon par bskyed de/sems can thams cad mi gtong bar yid la byed pa'i rgyus/ bar ma dor zhum par mi 'gyur zhing / yang dag pa'i mtha' mngon sum du mi byed pa ni 'gres dang po'o//sems can 'di dag ni yun ring po nas bdag dang / sems can la sogs par dmigs par lta bar spyod spyod pa dag ste/ de dag gi lta ba de bdag gis mngon par rdzogs par sangs rgyas nas chos bshad pas spang bar bya'o snyam du sems bskyed pa'i dbang gis zhum par mi 'gyur ba ni 'gres gnyis pa'o//sems can 'di dag ni yun ring po nas rtag pa dang / bde ba dang sdug pa dang / bdag tu 'du shes pas phyin ci log rnam pa bzhis sems phyin ci log tu gyur pa dag ste/ bdag gis de dag de las bzlog par bya'o zhes bya ba ni 'gres gsum pa'o//sems can 'di dag ni yun ring po nas/ sems can du rnam par rtog pa dang / gzugs la sogs pa'i chos rnams su rnam par rtog pa la spyod spyod pa dag ste/ de dag gi don du bdag gis mngon par rdzogs par sangs rgyas nas/stong pa nyid kyi chos bshad par bya'o zhes bya ba ni bzhi pa'o/ /sems can 'di dag ni yun ring po nas mtshan ma la spyod spyod pa bud med dang / skyes pa la sogs pa'i mtshan ma dang / gzugs la sogs pa chos rnams kyi mtshan ma dag la spyod spyod pa dag ste/de dag gi don du bdag gis mngon par rdzogs par sangs rgyas nas/ mtshan ma med pa'i chos bshad par bya'o zhes bya ba ni lnga pa'o/ /de bzhin du sems can 'di dag ni yun ring po nas smon lam la spyod spyod pa/ brgya byin dang / tshangs pa dang / 'jig rten skyong ba la sogs pa'i don dang / gzugs bzang po la sogs pa'i chos rnams kyi don du smon lam 'debs pa dag ste/ de dag gi don du bdag gis mngon par rdzogs par sangs rgyas nas smon pa med pa'i chos bshad par bya'o zhes bya ba ni drug pa'o//byang chub sems dpa' la dri ba la yang / gal te de dag gis de skad dris pa la stong pa nyid dang / mtshan ma med pa dang / smon pa med pa dang / mngon par 'du bya ba med pa dang / skye ba med pa dang / dngos po med pa dag /de ltar khyod kyis legs par bsgom par bya'o zhes de dag nyid bzung nas lan 'debs na/lung bstan pa yin no zhes bya bar rig par bya ste/ yongs su 'dris pa shes pa'i mtshan nyid rab tu rtogs pa'i phyir ro/ /gal te de dag gis de skad du dris pa la stong pa nyid sgom pa la sogs pa spong zhing / de dag bsgom par mi bya ste/ de dag mthong la rnam pa gzhan du mi rtag pa la sogs par bsgom par bya'o zhes lan 'debs na/ lung bstan pa ma yin no zhes bya bar rig par bya'o/ / de ltar phyir mi ldog pa'i byang chub sems dpas phyir mi ldog pa'i sa non pa ltar zhes bya ba ni ji ltar sa brgyad pa thob pa phyir mi ldog par 'gyur te/sa brgyad pa thob pa de bzhin du de dag legs par yongs su 'dris par byas nas bsrabs pa'i sa non pa ma yin te/ de tsam du yongs su smin pa ma yin zhes bya ba'i tha tshig go/ /sa gnyis pa nas bzung nas sa bdun pa'i bar ni bsrabs pa'i sa'o//bcom ldan 'das gang gis slar mi ldog par 'gyur ba'i rnam grangs mchis sam zhes bya ba ni gal te/ de phyir mi ldog pa'i sa brgyad pa ma thob kyang / legs par yongs su 'dris par byas nas phyir mi ldog pa'i lan ldon na/phyir mi ldog pa'i mtshan nyid dang ldan pa'i phyir mi ldog par 'gyur ram zhes bstan pa'o/ /yongs su sbyong bar bgyis pa'i sa'am/ yongs su sbyong ba bgyid pa ma lags pa'i sa yang mi mngon te zhes bya ba ni sa 'og ma rnams bstan pa'o/ / byang chub sems dpa' sems dpa' chen po de dag ni nyung ngo zhes bya ba ni byang chub sems dpa' byang chub kyi phyir spyod pa mang du zin kyang / 'di ltar sa brgyad pa ma thob kyang yongs su 'dris pa legs par bsgoms pa'i byang chub sems dpa' phyir mi ldog pa'i lan ldon par 'gyur ba de dag ni nyung ngo zhes bya ba'i tha tshig go//yongs su sbyong ba'i sa yang rung / yongs su sbyong ba ma yin pa'i sa yang rung zhes bya ba ni sa 'og ma rnams bstan pa'o/ /de nas yang bar skabs nas byung ba phyir mi ldog pa'i mtshan nyid dang bdud kyi las rnams dang / dge ba'i bshes gnyen rnams kyang go sla'o/ /rab 'byor nam mkha' ltar chags pa med pa'i mtshan nyid ni shes rab kyi pha rol tu phyin pa'o zhes bya ba ni nam mkha' bzhin du thogs pa med pa'i mtshan nyid do zhes bya ba'i tha tshig go/ /sngar ni bdud kyi las la sogs pas thogs pa dang bcas pa bstan to//de ni rab 'byor shes rab kyi pha rol tu phyin pa ni mtshan nyid med pa ste/ shes rab kyi pha rol tu phyin pa'i mtshan nyid gang yang med do zhes bya bas thogs pa med pa'i mtshan nyid bka' stsal te/ shes rab kyi pha rol tu phyin pa gzhan gang gi mtshan nyid kyang ma yin la/shes rab kyi pha rol tu phyin pa'i mtshan nyid kyang ci yang yod pa ma yin te/ dngos po med pa'i ngo bo nyid ma yin no zhes ston to/ /rab 'byor chos thams cad ni rang bzhin gyis dben pa/ chos thams cad ni rang bzhin gyis stong pa'o zhes bya ba ni kun brtags pa'i chos rnams kyis dben zhing bral ba ni yongs su grub pa ste/chos thams cad kyi ngo bo nyid do/ /de bas na de dag ngo bo nyid kyis stong ngo zhes bya ba'i tha tshig go/ /bcom ldan 'das gal te chos thams cad ni chos thams cad kyis dben la/chos thams cad ni chos thams cad kyis stong na/ bcom ldan 'das sems can rnams kyi kun nas nyon mongs pa dang rnam par byang ba ji ltar mchis par 'gyur zhes bya ba la sogs pas 'di skad zhus te/ bcom ldan 'das gal te chos thams cad ngo bo nyid kyis dben la stong na phyis dben par byar yang med la stong par byar yang med de/de ltar gyur na dben pa dang stong pa de dag ji ltar kun nas nyon mongs par 'gyur/ ji ltar yang rnam par byang bar 'gyur zhes zhus pa'o/ /de skad ces zhus pa dang / rab 'byor 'di ji snyam du sems/sems can 'di dag yun ring po nas ngar 'dzin pa dang nga yir 'dzin pa la spyod dam zhes bya ba la sogs pas 'di skad bstan te/ chos thams cad ngo bo nyid kyis dben zhing ngo bo nyid kyis stong du zin kyang / byis pa rnams de dag dben pa dang / stong pa nyid du mi shes te/de dag gis mi shes pa'i nyes pas phung po lnga la sogs pa'i chos rnams la/ ngar 'dzin pa dang / nga yir 'dzin pas chags par 'gyur / chags pas bsod nams dang / bsod nams ma yin pa la sogs pa mngon par 'du byed pa rtsom mo/ / de'i dbang gis sems can rnams 'khor bar mtshams sbyor zhing 'khor te/ nyon mongs pa'i kun nas nyon mongs pa dang / las kyi kun nas nyon mongs pas kun nas nyon mongs par 'gyur te/ de ltar mi shes pa'i nyes pas kun nas nyon mongs pa yod par 'gyur ro/ / de dag kyang phyis gang gi tshe dge ba'i bshes gnyen rnyed nas mnyan pa dang / bsams pa la sogs pa'i dbang gis/ dben pa'i mtshan nyid stong pa'i mtshan nyid rtogs par 'gyur ba de'i tshe/ ji skad smos pa'i kun nas nyon mongs pa mi skye ba'i phyir rim gyis kun brtags pa'i chos rnams yongs su bzlog pas rnam par byang ba yang yod par 'gyur ro//de'i 'og tu gzugs la sogs pa'i chos thams cad la spyod pa med par brjod pas/ bshad pa 'di la spyad pa don med do snyam du sems pa rnams kyi dogs pa de bstsal ba'i phyir 'og nas bsod nams mang ba dang /de'i rgyu gsungs te/ bsod nams mang du 'phel ba de dang / de'i rgyu yang nor bu rin po che'i dpes gzhung nyid las rig par bya'o/ /bcom ldan 'das gang yid la bgyi ba thams cad rang bzhin dang bral ba ste/ yid la bgyi ba thams cad rang bzhin gyis stong pa lags na zhes bya ba 'dis 'di skad zhus te/ gal te yid la byed pa thams cad ngo bo nyid kyis dben zhing bral na/ rnam pa thams cad mkhyen pa nyid yid la byed pa dang ma bral ba yin no zhes bya ba ni ji ltar rig par 'gyur/ngo bo nyid kyis dben zhing stong pa la rnam pa thams cad mkhyen pa nyid dam/ yid la byed pa'am/ byang chub sems dpa' gang yang mi dmigs so zhes zhus pa'o/ /de nas bcom ldan 'das kyis rnam pa thams cad mkhyen pa nyid dang / byang chub sems dpa' dang /yid la byed pa rnams chos gzhan zhig tu yongs su brtags nas de skad gsungs pa ni ma yin gyi/ byang chub sems dpa' gang / chos thams cad ngo bo nyid kyis dben par shes pa de tsam gyis rnam pa thams cad mkhyen pa nyid dang ldan pa'i yid la byed pa dang ma bral ba'o zhes brtags pa tsam du zad kyi/don dam par ni de dag la tha dad pa med par/ rab 'byor gal te byang chub sems dpa' sems dpa' chen pos de ltar shes na zhes bya ba la sogs pas ston to/ /shes rab kyi pha rol tu phyin pa ni rang bzhin gyis stong pa ste zhes bya ba ni rang bzhin gyis yongs su dag pa/dri ma med pa'i shes rab chos thams cad kyis dben pa/ chos thams cad kyis stong pa'o/ /de la 'phel ba med do/ /yongs su 'grib pa med do zhes bya ba ni rab tu zhugs pa'i dbang gis glo bur du 'phel ba yang med/ma zhugs pa'i dbang gis 'grib pa yang med do zhes bya ba'i tha tshig go/ /bcom ldan 'das gal te shes rab kyi pha rol tu phyin pa rang bzhin gyis dben zhing / rang bzhin gyis stong pa lags na zhes zhus pa gnyis pa ni/ gal te shes rab kyi pha rol tu phyin pa dben pa'i ngo bo nyid yin na/shes rab kyi pha rol tu phyin pa dben zhing stong pas ji ltar yang dag par rdzogs pa'i byang chub mngon par rdzogs par byang chub par byed ces zhus pa'o/ /de nas bcom ldan 'das kyis/ byang chub sems dpa' yang chos kyi sku'i ngo bo nyid yin pa'i phyir dben pa nyid dang /stong pa nyid yin te/ de yang shes rab kyi pha rol tu phyin pa'i dbang gis mngon par rdzogs par byang chub par 'gyur zhes bya ba de lta bu med de/ chos kyi sku'i byang chub sems dpa' ni/ shes rab kyi pha rol tu phyin pa la brten nas 'phel bar 'gyur ba yang med la/de la ma brten na yongs su 'grib par 'gyur ba yang med de/ gnas pa'i mtshan nyid yin pa'i phyir ro zhes ston to/ / rab 'byor shes rab kyi pha rol tu phyin pa ni gcig kyang ma yin/ gnyis kyang ma yin no zhes bya bas ston te/rnam pa thams cad mkhyen pa nyid ces bya ba dang / byang chub sems dpa' zhes bya ba dang / shes rab kyi pha rol tu phyin pa zhes bya ba dang / de bzhin nyid ces bya ba de dag ni gcig ste/ gnyis su byar med cing grangs kyi bye brag gis tha dad pa med do zhes bya ba'i tha tshig go//bcom ldan 'das shes rab kyi pha rol tu phyin pa'i stong pa nyid dang / gsog nyid dang / gsob dang / ya ma brla nyid dang / snying po ma mchis pa nyid gang lags pa de zhes bya ba la sogs pa zhu ba gsum pa 'di skad zhus te/ ci shes rab kyi pha rol tu phyin pa'i stong pa nyid/shes rab kyi pha rol tu phyin pa la spyod dam/ ci shes rab kyi pha rol tu phyin pa las 'ba' zhig spyod dam/ 'on te shes rab kyi pha rol tu phyin pa la spyod dam/ 'on te stong pa nyid spyod dam/ 'on te stong pa nyid las gzhan pa zhig spyod dam zhes bya ba rnam par rtog pa lnga dang /de bzhin du ci gzugs la sogs pa spyod dam/ 'on te ci gzugs la sogs pa'i stong pa nyid spyod dam zhes bya ba rnam par rtog pa gnyis te/ de ltar rnam par rtog pa bdun nye bar bzung nas zhus pa dang / de nas bcom ldan 'das kyis rnam par rtog pa de dag nyid dngos po med pas spyod pa gang yin pa dang /shes rab kyi pha rol tu phyin pa gang yin pa dang / ji ltar spyod pa de dag mi dmigs pa dang / de nas yang mi snang ba dag mi dmigs pa dang / skye ba dang 'gag pa dag mi dmigs pa nye bar bzung nas/bcom ldan 'das kyis mi skye ba'i chos la bzod par lung bstan pa'i byang chub sems dpa' sems dpa' chen po dag bstan to/ /bcom ldan 'das ci lags/ chos thams cad skye ba'i slad du byang chub sems dpa' sems dpa' chen po bla na med pa yang dag par rdzogs pa'i byang chub tu lung bstan par 'gyur ram zhes bya ba ni sangs rgyas kyi chos thams cad skye ba'i phyir ro//chos thams cad mi skye ba'i slad du zhes bya ba ni gzugs la sogs pa'i chos sam kun nas nyon mongs pa'i chos kyang rung ste thams cad mi skye ba'i phyir ro//rab 'byor de ji snyam du sems/ gang bla na med pa yang dag par rdzogs pa'i byang chub tu lung bstan par 'gyur ba'i chos de lta bu khyod kyis yang dag par rjes su mthong ngam zhes bya ba ni lung bstan par bya ba dang / mngon par rdzogs par byang chub par byed pa dngos po med pas 'di dang /'di lta bu'i don du lung bstan par 'gyur zhes bya ba'i tha tshig go/ /de ltar zab cing zab pa'i gnas dag bstan pas/ bcom ldan 'das 'di ni zab po zhes bya ba la sogs pa gsol to/ /de nas yang bsod nams mang po bstan pa yang /dad pa rab tu skyed pa'i phyir ro/ /rab tu bsngags pa'i tshig thams cad dang / phan yon bstan pa dang / brgya byin dang / kun dga' bo'i tshig dang / bdud kyi gtam dang / bdud kyi las dang / de las byung ba'i gtam dang / byang chub sems dpa'i theg pa pa'i gang zag rnams kyi drung du ji ltar gnas par bya ba dang / mnyam pa nyid bshad pa gang yin pa dang / zad pa dang / 'dod chags dang bral ba dang / 'gog pa la sogs pa'i gtam dang / bslab pa'i phan yon bshad pa dang / sems can dang /sems can ma yin pa rnams zil gyis gnon pa dang / brgya byin gyi tshig dang / bsod nams tshad med pa dang / de nas yang brgya byin gyi tshig rnams ni gzhung nyid las go sla bas rnam par phye ste ma bshad do/ /ci nas kyang gnyis kyi 'du shes su 'gyur ba med pa dang gnyis ma yin pa'i 'du shes su 'gyur ba med pa de lta bur yongs su bsngo bar bya'o zhes bya ba ni de dag gi sems bskyed pa gang yin pa dang /bla na med pa yang dag par rdzogs pa'i byang chub gang yin pa de dag don dam par tha dad pa ma yin te/ de dag gi de bzhin nyid ni rnam par dag par rab tu phye ba yin pas de'i phyir gnyis kyi 'du shes su mi 'gyur ro//gnyis ni dri ma dang bcas pa dang / dri ma med pa'i bye brag las tha dad pa yod pas gnyis kyi 'du shes su yang 'gyur ro/ /de bas na gcig pa'i phyir gnyis kyi 'du shes su mi 'gyur zhes gsungs so//tha dad pa'i phyir gnyis su 'du shes so/ /yang na yod pa dang / med pa zhes bya ba ni gnyis su 'du shes pa'o/ /yod pa yang ma yin med pa yang ma yin pa ni gnyis su 'du shes med pa ste/ de yang 'og nas 'byung ba'i gzhung gis gsal bar bshad do//de nas yang 'og nas ci nas kyang sems de la yang ma yin zhing / sems gzhan la yang ma yin pa de ltar yongs su bsngo bar bya'o zhes bya ba ni gnas gyur pa'i dbang gis sems de la yang ma yin par 'gyur ro/ /don dam par ni tha dad pa med pas sems gzhan la yang ma yin par 'gyur ro//rab 'byor de ji snyam du sems sgyu ma lta bu'i sems de khyod kyis yang dag par rjes su mthong ngam zhes bya ba ci las dgongs she na/ gal te sems sgyu ma lta bu yin la/ byang chub sgyu ma lta bu ma yin na ni de lta na klan kar 'gyur na/'di ltar sems dang byang chub gnyi ga yang sgyu ma lta bu yin te/ de'i phyir klan ka med do/ /chos gang shin tu dben pa de ni mchis pa'am ma mchis par mi 'gyur ro zhes bya ba ni/ kun brtags pa'i chos gang yin pa de sgyu ma lta bu yin pa'i phyir/ /sgyu ma dang 'dra bar yod do zhes bya ba'am/med do zhes bya bar brjod du mi rung la/ yod pa yang ma yin med pa yang ma yin zhes kyang brjod du mi rung ngo / /yongs su grub pa'i chos gang yin pa de yang dngos po'i rnam pa thams cad kyis dben pa'i phyir yod do zhes brjod du mi rung ngo //brjod du med pa dben pa'i rang bzhin yod pa'i phyir med do zhes kyang brjod du mi rung ngo / /yod do zhes bya ba'i tha snyad yod pa'i phyir med do zhes kyang brjod du mi rung ngo / /med do zhes bya ba'i tha snyad yod pa'i phyir med pa ma yin no zhes kyang brjod du mi rung ngo //de bas na gnyis kyi 'du shes dang / gnyis su med pa'i 'du shes mi rigs so/ /bcom ldan 'das 'di ltar gang kun nas nyon mongs par 'gyur ba'am/ rnam par byang bar 'gyur ba'i chos de dag thams cad ni ma mchis shing mi dmigs so zhes bya ba ni kun nas nyon mongs par 'gyur ba dang /rnam par byang bar 'gyur ba'i chos rnams yod pa ma yin te/ dri ma dang bcas pa'i gnas skabs na yang / nam mkha' bzhin du rang bzhin gyis dben pa'i phyir kun nas nyon mongs pa med do/ /de med pa nyid kyi phyir sngon ma byung ba'i rnam par byang ba yang med do//'di ni sems de la yang ma yin/ sems gzhan la yang ma yin zhes bya ba bshad pa yin no/ /chos gang shin tu dben pa de ni bsgom par bgyi ba yang ma lags/ rnam par gzhig par bgyi ba yang ma lags zhes bya ba la bsgom pa zhes bya ba ni goms par bya ba ste/de dben pa'i phyir mi rigs so/ /rnam par gzhig pa zhes bya ba ni dri ma bstsal ba ste/ de yang shin tu dben pa'i phyir mi rigs so/ /bsgrub par bgyid pa'i chos kyang gang yang ma mchis zhes bya ba ni shin tu dben pa'i phyir byang chub thob par byed pa ma yin pa'o//dben pa nyid lags pa'i slad du ji ltar dben pas dben pa rjes su rtogs par 'gyur zhes bya ba ni gal te shes rab kyi pha rol tu phyin pa dang / yang dag par rdzogs pa'i byang chub dben pa yin na/ shes rab kyi pha rol tu phyin pa dben pas yang dag par rdzogs pa'i byang chub dben pa ji ltar rjes su rtog par 'gyur zhes zhus pa'o//rab 'byor de de bzhin no/ /de de bzhin te zhes bya ba la sogs pas bcom ldan 'das kyis 'di skad gsungs te/ gal te gcig ni dben la/ cig shos ni mi dben pa zhig yin na ni de lta na ni mi rigs par 'gyur na/'di ltar de gnyis ka yang dben pas de'i phyir nyes pa med de/ chos thams cad kyi dben pa'i mtshan nyid de nyid shes na mngon par rdzogs par 'tshang rgya bar 'gyur ro zhes ston to/ /bcom ldan 'das bdag gis bcom ldan 'das kyis gsungs pa'i don bdag gis 'tshal ba ltar na/byang chub sems dpa' sems dpa' chen po ni dka' ba bgyid pa ma lags so zhes bya ba ni/ gal te la la ni dmigs/ la la ni mi dmigs na ni de lta na mi mthun pas dka' bar 'gyur na/ 'di ltar chos thams cad ni yod pa ma yin te/med pa nyid kyi phyir mi dmigs so/ /med pa ni mi dmigs pa zhes bya bar shes par mi dka'o zhes bya ba'i tha tshig go/ /bcom ldan 'das mi dmigs par spyod pa 'di ni byang chub sems dpa'i spyod pa ste zhes bya ba ni mi dmigs par spyod pa ma gtogs pa spyod pa gzhan med do//de'i 'og tu shes rab kyi pha rol tu phyin pa rnam par mi rtog pa nyid du bstan pa ni go sla'o// //bam po nyi shu bzhi pa/ 'gro ba lngar 'khor ba zhes tha dad du dbye ba 'di ci las gyur rgyun du zhugs pa zhes bya ba la sogs pa'i dbye ba'ang ci las gyur ces bya ba la sogs pas 'di skad ston to//gal te chos thams cad rnam par mi rtog pa yin na 'khor ba dang / rnam par byang ba'i chos rnams ci las byung zhes dris pa'o/ /de nas bcom ldan 'das kyi bka' stsal pa/ 'di dag ni phyin ci log pa ste/ med pa la 'dzin pa/ yod pa sgrib par byed pa'i mtshan nyid do/ /de dag dang 'dres pa'i phyir/ 'dod chags dang zhe sdang la sogs pa'i rnam par rtog pa yang yod pa la ni sgrib po/ /med pa la ni 'dzin to/ /de dag gis bskyed pa'i phyir/ bsod nams dang / bsod nams ma yin pa la sogs pa'i las byed pa'i sems pa yang / phyin ci log tu 'dzin pa yin te las de dang rnam par rtog pa de dag gis bskyed pa'i phyir/ rnam par smin pa'i shes pa yang de kho na nyid 'dzin pa ma yin no/ /de bas na 'dun pa dang /'dod chags la sogs pa yang de kho na ma yin pa'i yul can te/ kun 'byung ba thams cad ni yang dag pa'i ngo bo nyid ma yin no/ /sems can dmyal ba dang / dud 'gro dang / yi dags dang / lha dang mi'i 'gro ba rnams zhes bya ba ni 'gro ba lnga po dag de kho na'i ngo bo nyid du ston te/de'i phyir chos rnams rnam par mi rtog pa yin yang de ltar 'khor bar rnam par gzhag go/ /rnam par byang ba'i chos rnams la yang / rgyun du zhugs pa la sogs pa rnam par gzhag cing / thams cad kyang rnam par mi rtog pa nyid de/ rgyun du zhugs pa la sogs pa nas/ de bzhin gshegs pa'i bar du ngo bo nyid kyis tha dad pa ni gang yang med de/ thams cad kyang chos kyi sku las ma 'das pa'i phyir ro zhes bstan pa'o/ /de ltar shes rab kyi pha rol tu phyin pa'i chos nyid thos pas shA ri'i bu'i blo rgya cher gyur nas/kye ma byang chub sems dpa' gang shes rab kyi pha rol tu phyin pa la spyod pa de ni snying po la spyod pa'o zhes gsungs pa dang / de nas rab 'byor gyis snying po med pa la spyod pa'o zhes gsungs te/ dngos po med pa dang / yod pa ma yin pa'i phyir snying po med pa nyid yin par de'i yid la bzhag nas/snying po med pa nyid kyang mi dmigs na snying po dmigs pa ltag la yod ces 'jig rten pa'i rigs pa gsungs te/ 'jig rten na yang snying po med pa ni rnyed sla'o/ / snying po can ni rnyed par dka'o zhes tha snyad du byed do/ /gang dag chos 'di dag mnyam pa nyid du mngon sum du mi byed pa zhes bya ba ni rgyun du zhugs pa la sogs pa dang /de bzhin gshegs pa mnyam pa nyid dang / chos kyi sku dang yang dag pa'i mtha' yang mnyam pa nyid do/ /nam mkha' dben pa'i phyir zhes bya ba ni nam mkha' dben pa'i rnam pas so//'di yang 'gres gsum ste/ nam mkha' dang sems can mthun pa'i 'gres dang / nam mkha' lta bu'i sems can gyi go cha'i 'gres dang / gzugs la sogs pa dang / sems can mthun pa'i 'gres so/ /dben pa bshad pa dang / shes rab kyi pha rol tu phyin pa la spyod pa'i phan yon yang go sla'o//bcom ldan 'das gang yang de bzhin nyid du gnas shing de bzhin nyid du nan tan bgyis te/ chos gang yang mi dmigs na de ji ltar rnam pa thams cad mkhyen pa nyid la gnas par 'gyur ba lags zhes bya ba ni de bzhin nyid la gnas pa dang /sgrub pa chos 'ga' zhig yod na ni rigs na/ gal te chos thams cad mi dmigs na ji ltar gnas par 'gyur zhes dris pa'o/ /rab 'byor de bzhin gshegs pa'i sprul pa ji lta ba bzhin du gnas so zhes bya ba ni/ ji ltar de bzhin gshegs pa'i sprul pa bya ba thams cad byed cing gnas pa de bzhin du/byang chub sems dpa' yang gnas so zhes bya ba'i tha tshig go/ /bcom ldan 'das gang de bzhin gshegs pa'i sprul pa zhes bgyi ba'i chos gang yang mi dmigs na zhes bya ba la sogs pas/ 'di skad du de bzhin gshegs pa'i sprul pa zhes bya ba'i chos gang yang med de/de med pa nyid kyi phyir de bzhin nyid la gnas pa dang / sgrub pa dang / mngon par rdzogs par byang chub pa dang / chos bstan pa yang med la/ byang chub sems dpa' thams cad ni yod do zhes bya ba ji ltar rigs par 'gyur zhes bstan pa'o//de bzhin nyid kyang mi dmigs na/ gang de bzhin nyid la gnas par 'gyur ba lta ci smos zhes bya ba 'dis kyang mi rigs pa gzhan dag ston to/ /de bzhin nyid kyang dri ma dang bcas pa'i gnas skabs na kun brtags pa dang mtshungs pa'i phyir de skad bshad do// de'i tshe de bzhin nyid kyang de bzhin nyid kyi bdag nyid du mi dmigs so/ /bcom ldan 'das kyis kyang rab 'byor de de bzhin no de de bzhin te zhes bka' stsal pa'i dgongs pa ni 'di yin te/ gal te kha cig dmigs la/ kha cig mi dmigs na ni klan kar yang 'gyur na/'di ltar byang chub sems dpa' dang / shes rab kyi pha rol tu phyin pa dang / byang chub dang / gnas pa dang / sgrub pa thams cad med na de la klan kar 'gyur ba ci zhig yod ces gsungs pa'o/ /de ci'i phyir zhe na/ rab 'byor de bzhin gshegs pa rnams byung yang rung / ma byung yang rung zhes bya ba ni bla na med pa yang dag par rdzogs pa'i byang chub ces bya ba gnas pa yin pa'i phyir de dus thams cad du yod de/ de'i phyir gnas pa zhes bya ba dang / sgrub pa zhes bya ba gang yang med de/ de bzhin nyid la ni gnas pa dang /sgrub pa dang / mngon par rdzogs par byang chub par byed pa gang yang med do zhes ston to/ /de'i 'og tu rab 'byor la bstod pa dang shes rab kyi pha rol tu phyin pa la gnas pa bstod pa dang / lha rnams kyis mchod pa dang / dge slong drug stong gi gtam dang /shes rab kyi pha rol tu phyin pa'i phan yon dang / kun dga' bo la yongs su gtad pa dang / rdzu 'phrul mngon par 'du mdzad pa dang / shes rab kyi pha rol tu phyin pa la bslab pa dang / rab tu bsngags pa dang / mi zad pa'i gtam mo/ kun dga' bo shes rab kyi pha rol tu phyin pa zab mo 'di ni yi ge thams cad la 'jug go/ /yi ge med pa thams cad la 'jug go/ /kun dga' bo shes rab kyi pha rol tu phyin pa zab mo 'di ni gzungs kyi sgo gang la byang chub sems dpa' sems dpa' chen pos bslab par bya ba'i gzungs thams cad kyi sgo yin te zhes bya ba ni gang dag yi ger gtogs pa'i dran pa dang /shes rab dang / ting nge 'dzin de dag la 'jug par 'gyur ba dang / gang dag gi yi ger ma gtogs pa'i dran pa dang / shes rab dang / ting nge 'dzin de dag la 'jug par 'gyur ba dang /gang yang chos kyi gzungs dang / don gyi gzungs dang / bzod pa'i gzungs dang / sngags kyi gzungs de dag gi sgor gyur pa'o/ /rab 'byor gzugs mi zad pas shes rab kyi pha rol tu phyin pa mngon par bsgrub par bya'o zhes bya ba la sogs pas gzugs la sogs pa'i chos rnams kyi mi zad pa nyid la dmigs nas shes rab bskyed par bya'o zhes bya ba'i tha tshig go//rab 'byor gzhan yang gzugs dang nam mkha' zad mi shes pas zhes bya ba ni gzugs la sogs pa'i de bzhin nyid dang / nam mkha' la dmigs nas yang de dag mi zad pa nyid du shes rab bskyed par bya'o//de'i 'og tu nam mkha' ltar zad mi shes pa bsgoms pa'i phan yon dang / pha rol tu phyin pa drug re re la sbyar bas ni go sla'o/ /nang stong pa nyid la nang stong pa nyid ces bya bar mi dmigs so zhes bya ba ni 'di nang stong pa nyid do zhes rnam par mi rtog go zhes bya ba'i tha tshig go//gzugs stong zhes bya ba'am/ mi stong zhes bya bar mi dmigs so zhes bya ba ni gnyi gar yang rnam par mi rtog pa'i phyir ro/ /pha rol tu phyin pa drug po dag gcig la gcig sbyar ba dang / de'i 'og tu thabs mkhas pa dang /tshogs yongs su rdzogs pa'i gtam dang 'khor los sgyur ba'i dpe dang / bud med kyi dpe dang / g.yul ngor 'gro ba'i skyes bu dpa' ba'i dpe dang / khams kyi rgyal po'i dpe dang / chu klung gi dpe dang / lag pa g.yas pa'i dpe dang / rgya mtsho'i chen po'i ro'i dpe dang /'khor lo rin po che'i dpe dang / de nas yang pha rol tu phyin pa drug bshad pa dag ni go sla'o/ /bcom ldan 'das gal te pha rol tu phyin pa thams cad tha dad pa ma mchis na ci'i slad du shes rab kyi pha rol tu phyin pa nyid pha rol tu phyin pa lnga'i rab ces bgyi zhes bya ba ni tha dad pa med pa'i phyir khyad par med de/gcig pa la rab ces bya ba mi rigs so zhes dgongs pa'o/ /rab 'byor de de bzhin no/ / de de bzhin te zhes bya ba dgongs pa ni 'di lta ste/ shes rab kyi pha rol tu phyin pas yongs su zin na pha rol tu phyin pa lnga po dag tha dad par mi 'gyur te/de bas na tha dad pa med pa de nyid la rag lus pa'i phyir de la rab ces bya ste/ 'dir yang ri rab kyi dpes bstan to/ /don gyi rjes su zhugs pa la ni chos gang la yang bye brag dang khyad par med de zhes bya ba ni don gyi rjes su zhugs pa'i gang zag la chos gang yang bye brag tu mi snang ngo //de bzhin du don gyi dbang gis chos rnams la bye brag gang yang med de/ de bas na shes rab kyi pha rol tu phyin pa kho na mchog ces brjod par mi bya'o zhes bya'o zhes gsungs pa'o/ /rab 'byor de de bzhin no//de de bzhin te zhes bya ba ni 'di skad bstan te/ don gyi rjes su zhugs pa de nyid shes rab kyi pha rol tu phyin pa'i dbang gis 'gyur te / de bas na de rab ces bya'o/ /'di ltar bye brag med kyang 'jig rten na brda'i rjes su 'brang bas 'di ni sbyin pas so/ /'di ni tshul khrims so//'di ni bzod pa'o zhes 'dogs par byed de/ 'dogs pa de yang shes rab kyi pha rol tu phyin pa'i rgyu las 'gyur gyi gzhan las ni ma yin te/ 'dir yang bud med rin po che'i dpes bstan to/ /shes rab kyi pha rol tu phyin pa ni chos gang yang yongs su 'dzin pa'am gtong ba med do zhes bya ba ni gal te byang chub sems dpa'i shes rab chos 'ga' zhig 'dzin na de nyid mngon par zhen pa'i skyon du 'gyur ro//gal te gtong na yang rnam pa thams cad mkhyen pa nyid kyi ye shes grub par ni 'gyur te/ de bas na mi 'dzin mi gtong ngo //yang na kun brtags pa'i dbang gis ni mi 'dzin/ chos nyid kyi dbang gis ni mi gtong ngo / /rab 'byor gang gzugs yid la mi byed pa 'di ni gzugs yongs su mi 'dzin pa'o zhes bya ba ni yongs su mi 'dzin zhes bya ba gang yang med kyi/ yang dag pa ma yin pa ni yod pa ma yin pa'i phyir yid la mi byed pa nyid yongs su mi 'dzin pa zhes bya'o//rab 'byor gang gi tshe byang chub sems dpa' gzugs yid la mi byed pa nas/ bla na med pa yang dag par rdzogs pa'i byang chub kyi bar du yid la mi byed pa de'i tshe byang chub sems dpa' sems dpa' chen po'i dge ba'i rtsa ba rnams rnam par 'phel bar 'gyur te zhes bya ba ni yod pa ma yin pa'i chos rnams med pas dngos po med pa'i bdag nyid du yongs su shes nas yid la mi byed pa nyid dge ba'i rtsa ba 'phel ba yin no zhes bstan pa'o// byang chub sems dpa' de shes rab kyi pha rol tu phyin pa las nyams par 'gyur te zhes bya ba ni mtshan mar dmigs pa'i nyes pas chags pa'o/ /chos thams cad yongs su ma bzung ba zhes bya ba ni shes rab kyi pha rol tu phyin pa la ma chags pa de nyid yongs su ma bzung ba ste/ byang chub sems dpa'i shes rab ni gang du yang chags pa med la/ gang yang yongs su mi 'dzin to/ /'di ltar shes rab kyi pha rol tu phyin pa ni shes rab kyi pha rol tu phyin pa dang ma bral ba zhes bya ba ni shes rab kyi pha rol tu phyin pa ni dus thams cad du shes rab kyi pha rol tu phyin pa'i ngo bo nyid dang ma bral ba'o zhes bya ba'i tha tshig go//de ltar chos thams cad kyang ji lta ji lta bu'i ngo bo nyid dang ma bral lags na/ 'o na ji ltar shes rab kyi pha rol tu phyin pa mngon par bsgrub par bgyi zhes bya ba ni gal te chos thams cad ngo bo nyid dang ma bral ba yin na/'o na ji ltar de dag dge ba'i rtsa ba la sogs pas nye bar gzung bar bya zhes zhus pa'o/ /gzugs la mngon par zhen pa med de 'di ni gzugs so/ /'di ni gzugs so zhes bya bar mngon par zhen pa med do zhes bya ba la sogs pas 'di skad ston te / chos ni chos mngon par mi sgrub ste/ chos thams cad la mngon par zhen pa med pa'i phyir ro/ /yang dag par rjes su ma mthong bas ji lta ji lta bur gnas pa'i mtshan nyid kyi chos kyi yang dag pa ji lta ba rtogs pa nyid mngon par sgrub pa zhes bya'i gzhan du ni ma yin no/ / zhes de skad ston to/ /'khor los sgyur ba'i dpe dang / kha lo sgyur ba'i dpes kyang shes par bya'o/ /bcom ldan 'das gal te shes rab kyi pha rol tu phyin pa chos gang skyed pa ma lags 'gog pa ma lags na zhes bya ba la sogs pas/ 'di skad zhus te/ gal te byang chub sems dpa'i shes rab chos gang yang mi skyed la/nag po'i chos kyang mi 'gog na pha rol tu phyin pa drug po dag gis ci zhig bya ste/ ji ltar pha rol tu phyin pa drug yongs su rdzogs par bya zhes zhus pa'o/ /rab 'byor rnam pa thams cad mkhyen pa nyid du dmigs te zhes bya ba la sogs pas/bcom ldan 'das kyis 'di skad gsungs te/ ci zhig bskyed par bya'o snyam mam/ ci zhig dgag par bya'o snyam du bsams te/ tshogs yongs su rdzogs par mi bya/ rnam pa thams cad mkhyen pa nyid 'ba' zhig tu yongs su bsngo zhing yongs su rdzogs par bstan pa'o//gzugs ldan pa yang ma yin mi ldan pa yang ma yin zhes bya ba ni pha rol tu phyin pa drug la spyod na/ gzugs la kun tu sbyor ba las dbral bar bya'o/ /mi ldan pa bskyed par bya'o zhes bya ba'i blo bskyed par mi bya ste/'di ltar bdag nyid rang bzhin gyis yongs su dag pa'i phyir ldan pa yang ma yin mi ldan pa yang ma yin no zhes bya ba'i tha tshig go/ /gzugs la gnas par bya'o zhes brtson par mi bya'o zhes bya ba la sogs pas/ rnam par smin pa yid du 'ong ba'i phung po la sogs pa la gnas par bya'o snyam pa'am/rnam pa thams cad mkhyen pa nyid la yang 'bras bu'i tshul du gnas par bya'o snyam du brtson par mi bya ba'o/ /gzugs ni gang la yang mi gnas so zhes bya ba ni chos nyid kyi gzugs la bya'o/ bza' shing gi dpe dang / thams cad kyi sgo dang / 'phong gi slob dpon gyi dpe'o/ /de'i 'og tu sangs rgyas kyi dgongs pa la ci nas kyang sbyin pa mi dmigs pa dang / tshul khrims dang bzod pa mi dmigs zhes bya ba ni ji ltar sbyin pa la sogs pa mi dmigs pas mi dmigs pa'i tshul du dgongs pa ste/ji ltar byang chub sems dpa' yang mi dmigs pa'i tshul gyis dgongs so zhes bya ba'i tha tshig go/ /de bzhin nyid shes na chos thams cad kyi mdo dang rgyas pa shes par 'gyur ro zhes bya ba ni gang gi tshe yongs su grub pa de bzhin nyid tsam du shes pa de'i tshe mdo shes par 'gyur ro//gang gi tshe gzugs kyi de bzhin nyid dang / tshor ba'i de bzhin nyid la sogs pa ma dag cing yongs su ma grub par shes pa de'i tshe rgyas pa shes par 'gyur ro/ /rab 'byor mtha' med pa ni yang dag pa'i mtha' ste zhes bya ba ni mtha' zhes bya ba'i sgra ni rtse mo'i don te/dper na ri'i rtse mo zhes bya ba lta bu'o/ /kha cig tu ni mtha' la bya ste dper na rgya mtsho'i mtha' zhes bya ba lta bu'o/ /mtha' de gnyi ga yang de la med de de la rtse mo'i mtha' med pa ni mtha' gang la chad pa yang ma yin zhes gsungs pa'o//mtha' med pa ni yongs su chad pa med ces gsungs pa ste/ de bas na yang dag pa'i mtha' zhes bya ba ni de kho na mi 'gyur ba zhes bya ba'i tha tshig go/ /rab 'byor ji ltar chos thams cad ldan pa yang ma yin mi ldan pa yang ma yin pa zhes bya ba ni dngos po med pa nyid kyi phyir gnyi gar yang mi 'gyur ro//gcig gi tshig bla dgas la mkhas pa zhes bya ba la sogs pas ni grangs shes pa bstan to/ /bud med kyi tshig bla dgas la mkhas pa zhes bya ba la sogs pas ni rtags shes pa bstan to/ /lam gyi rgyun bcad pa la mkhas pa zhes bya ba ni 'jig rten pa'i lam la mkhas pa'o/lam gyi rgyun ma bcad pa la mkhas pa zhes bya ba ni 'jig rten las 'das pa'i lam la mkhas pa'o/ /rab 'byor gzugs zhi bas shes rab kyi pha rol tu phyin pa la spyad par bya'o zhes bya ba ni zhi ba la sogs pa mtshan nyid bzung ste shes rab bskyed par bya ba'o//rab 'byor nam mkha' ltar stong pa nyid mngon par bsgrub pas/ shes rab kyi pha rol tu phyin pa mngon par bsgrub par bya'o zhes bya ba ni nam mkha' bzhin du stong pa nyid du rtogs par bya ba'o/ /nam mkha' stong pa nyid du bsgom pas shes rab kyi pha rol tu phyin pa bsgom par bya'o zhes bya ba ni nam mkha' bsgom pa nyid kyis stong pa nyid bsgom par bya ba'o//de la bye brag tu brjod par 'dod pa la / dang po ni rtsol ba dang bcas mtshan ma dang bcas pa'i gnas skabs kyi spyod pa'o/ /sa dang po yan chad ni rtsol ba dang bcas la/mtshan ma med pa'i gnas skabs kyi mngon par sgrub pa'o/ /sa brgyad pa yan chad ni lhun gyis grub cing mtshan ma med pa'i gnas skabs kyi sgom pa'o zhes bstan pa'o/ /sems kyi rgyun ma chad cing ma bral bar rjes su 'brel pas zhes bya ba ni sems rgyun ma chad pa dang /ma bral ba ste/ gang rjes su 'brel zhing rgyun chags pa des sems bar chad med cing so sor ma gyes pa dang / rjes su 'brel bar bya'o zhes bya ba'i tha tshig go/ /ci nas kyang sems dang sems las byung ba rnams mi rgyu ba de ltar bsgom par bya'o zhes bya ba ni gnas gyur gyi bar du zhes bya ba'i tha tshig go//ci lags bsgoms pas rnam pa thams cad mkhyen pa nyid thob par 'gyur ram zhes gsol pa dang / rab 'byor de ni ma yin no zhes bsal ba gsungs te/ rtsol ba dang bcas/ rnam par rtog pa dang bcas pa'i gnas skabs la bya'o//ma bsgoms pas sam zhes gsol nas/ cang mi gsung bar gyur pa dang / ma yin no zhes bsal ba gsungs pa'o/ /bsgoms kyang bsgoms la ma bsgoms kyang bsgoms pas sam zhes gsol pa dang / skyon gnyis ka bshad zin pas gsal ba gsungs so//bsgoms pa yang ma lags ma bsgoms pa yang ma lags pas sam zhes gsol pa dang / gal gnyis su smra ba'i gzhung gis 'khrugs su dogs pas bsal ba gsungs te/ rnam pa thams cad du brjod du med cing bsam gyis mi khyab pa'i gnas skabs yin par bstan to//rab 'byor de bzhin nyid ji lta ba bzhin zhes bya ba ni phyis chos thams cad mi dmigs pa'i gnas su bstan pa ste/ bdag gi khams ji lta ba bzhin zhes bya ba la sogs pa'o / /rab 'byor gdags su med pa'o zhes bya ba ni brjod du med ces bya ba'i tha tshig go//rab 'byor de ji snyam du sems sems can du gdags pa dmigs su yod dam zhes bya ba la sogs pas ni sems can dmyal ba la sogs pas kun brtags pa'i phyir med pa las kun rdzob tu btags pa ste/ byis pa so so'i skye bo rnams la phan gdags pa'i phyir ro zhes bstan pa'o/ /dbri ba med pa dang bsnan pa med par zhes bya ba ni yod pa la skur pa 'debs pa ni dbri ba'o/ /med pa la sgro 'dogs pa ni bsnan pa'o/ /skye ba med pa dang / 'gag pa med pa la bslab pa zhes bya ba skye ba med pa'i bslab pa ni gang sgro 'dogs pa med pa'o//'gag pa med pa'i bslab pa ni yod pa la gang skur pa 'debs pa med pa'o/ /bsgom par yang mi bgyi/ rnam par gzhig pa yang mi bgyi zhes bya ba ni mngon par 'du byed pa med pa la slob pa ste/bsgom par bya/ bskyed par bya snyam pa'i mngon par 'du byed pa med pas skye ba med pa'i bslab pa'o/ /rnam par gzhig par bya med par bya snyam pa'i mngon par 'du byed pa med pas 'gag pa med pa'i bslab pa'o/ /gzugs ni gzugs kyis stong zhes bya ba ni kun brtags pa'i gzugs ni gzugs nyid du med pa'o//gzugs kyi mtshan nyid kyis stong pa'i phyir ro/ /spyod pa med pa ni byang chub sems dpa'i shes rab kyi pha rol tu phyin pa la spyod pa'o zhes bya ba ni thams cad dmigs su med pa'i phyir gang la yang mi spyod pa nyid spyod pa'o//gal te spyod pa ma mchis pa byang chub sems dpa'i spyod pa lags na las dang po pa'i byang chub sems dpas shes rab kyi pha rol tu phyin pa la ji ltar spyad par bgyi zhes zhus pa dang / las dang po pa'i byang chub sems dpas zhes bya ba ni la sogs pas sems dang po bskyed pa nas bzung ste/mi dmigs pa'i tshul du chos thams cad la bslab par bya'o zhes bya ba ste/ las dang po pa la don dam pa'i spyod pa med du zin kyang de'i phyir bslab par bya ste/ bslab pa nyid spyad pa yin no zhes bstan to//bcom ldan 'das ci dmigs su mchis pa mi dmigs pa lags sam zhes bya ba ni mi dmigs pa dmigs su mchis sam zhes zhus pa'o/ /dmigs su med pa'i ngo bo nyid dmigs su med pas/ dmigs so zhes brjod du mi rung ba'i phyir dmigs su yod pa mi dmigs pa yang ma yin zhes bya bas bstsal ba gsungs te/dmigs su med pa'i mtshan nyid chos thams cad kyi mnyam pa nyid yod pa'i phyir mi dmigs pa dmigs su med pa ma yin no zhes bya ba'i tha tshig go/ /dmigs pa dang mi dmigs pa mnyam pa nyid ni mi dmigs pa ste zhes bya ba ni chos thams cad dmigs su yod pa dngos po gang yin pa dang /chos thams cad dmigs su med pa dngos po med pa gang yin pa de gnyi ga yang mtshungs so/ /de ci'i phyir zhe na/ ngo bo nyid med pa'i phyir te/dmigs su yod pa ni kun brtags pa yin pas ngo bo nyid med do/ /dmigs su med pa yang dngos po med pa'i bdag nyid yin pas ngo bo nyid med de/ de bas na gnyi ga yang ngo bo nyid med par mtshungs te/ dmigs su yod pa dang / dmigs su med pa de gnyis kyi mnyam pa nyid ngo bo nyid med pa/gang yin pa de ni dmigs su med pa'o zhes bya ba'i tha tshig go/ /ji ltar sa nas sa yongs su rdzogs par bgyi/ rnam pa thams cad mkhyen pa nyid ji ltar thob par bgyi zhes bya ba ni gal te dmigs pa la chags par ma gyur na/gong nas gong ma'i sa dang / rnam pa thams cad mkhyen pa nyid la ji ltar brtson par bya zhes dgongs pa'o/ /rab 'byor shes rab kyi pha rol tu phyin pa yang dmigs su med ces bya ba la sogs pas 'di skad bstan te/ dmigs pa dang bcas pa'i ngo bo nyid kyis/sa gong ma'am rnam pa thams cad mkhyen pa nyid thob par mi 'gyur gyi/ ji lta ji ltar dmigs su med pa mthu dang ldan par gyur pa de lta de ltar sa gzhan nas gzhan du 'phar ba dang / rnam pa thams cad mkhyen pa nyid thob par 'gyur te/ shes rab kyi pha rol tu phyin pa dang / byang chub dang / byang chub sems dpa' rnams dmigs su med pa'i ngo bo nyid kyi phyir ro zhes ston to/ /chos thams cad ngo bo nyid dang bral ba la ji ltar rab tu rnam par dbye bar bgyi zhes bya ba ni gal te chos thams cad ngo bo nyid dang bral ba yin na/'di ni gzugs so/ /'di ni tshor ba'o zhes bya ba la sogs par rab tu rnam par dbye bar ji ltar byed ces bya ba'o/ /rab 'byor byang chub sems dpa' ni ji ltar na byas pas gzugs dmigs par 'gyur ba de ltar chos rnams rab tu rnam par 'byed par mi byed do zhes bya ba la sogs pas 'di skad bstan te/byang chub sems dpas ni gzugs la sogs pa'i chos rnams mi dmigs te/ ji lta ji ltar sgrub pa de lta de ltar mi dmigs so/ /de bas na dmigs su med pa'i don la rab tu 'jug go / /bcom ldan 'das gal te gzugs kyang mi dmigs zhes bya ba la sogs pas 'di skad gsol te/gal te dmigs su med pa'i don la rab tu zhugs pa yin na/ pha rol tu phyin pa yongs su rdzogs par bya ba dang / skyon med par 'jug pa dang / zhing yongs su dag par bya ba dang / sems can yongs su smin par bya ba dang /mngon par byang chub pa dang / chos kyi 'khor lo bskor ba dang / sangs rgyas kyi mdzad pa dang / sems can rnam par grol bar bya ba la sogs pa dmigs pa'i sbyor ba rnams ji ltar grub par 'gyur zhes zhus pa'o/ /rab 'byor byang chub sems dpa' ni gzugs kyi don du shes rab kyi pha rol tu phyin pa la mi spyod do zhes bya ba la sogs pas 'di skad bstan te/byang chub sems dpas ni gzugs la sogs pa'i chos rnams la mi spyod kyi/ chos thams cad dmigs su med pa nyid kyi phyir ro spyod do zhes bya ba ste/sngar bshad pa'i dmigs su yod pa ni kun rdzob kyi tha snyad yin gyi/ don dam par ni ma yin no zhes bstan pa'o/ /ma byas pa 'gyur ba med pa zhes bya ba'i don ni sngar bshad zin to/ /theg pa gsum po dag ji ltar rnam par dgod par 'gyur zhes bya ba ni gal te chos thams cad ma byas pa/'gyur ba med pa yin na/ theg pa gsum du dbye ba med par 'gyur ro zhes bya ba'i tha tshig go/ /rab 'byor ma byas pa dang / 'gyur ba med pa'i chos rnams la ni rnam par dgod pa gang yang dmigs su med de zhes bya ba ni kun brtags pa'i theg pa rnam par dgod pa dag don dam par yod pa ma yin no zhes dgongs pa'o//'dir zhus pa dang lan btab pa dag go sla bas rnam par ma bkrol lo/ /ngas ni 'jig rten gyi tha snyad du yang dag pa ma yin pa las 'dzin pa las zlog gi don dam par ni ma yin no zhes bya ba ni don dam par phung po gsum du gtogs pa'i sems can gang yang dmigs su med kyi/de dag yang dag pa ma yin pa'i chos rnams la yang dag par 'dzin pa las 'jig rten gyi kun rdzob tu slar ldog par zad de/ ming des tha snyad du 'dogs kyi /don dam par ni ma yin no zhes bya ba'o/ /bcom ldan 'das de bzhin gshegs pa don dam pa la bzhugs te/ bla na med pa yang dag par rdzogs pa'i byang chub mngon par rdzogs par sangs rgyas sam zhes zhus pa la/ don dam par gnas med pa dang /mngon par rdzogs par 'tshang rgya bar bya ba med pa'i phyir rab 'byor de ni ma yin no zhes bstsal ba gsungs so/ /'o na rdzu 'phrul gyi rnam grangs la bzhugs te 'am zhes bya ba ni gal te don dam pa la ma yin na/ 'o na sprul pas sam zhes bya ba'i tha tshig go//de yang shin tu med pa'i phyir lan gsungs te/ brjod du med pa'i bdag nyid dang / so sor rang gis rig pa'i rnam pas chos thams cad rtogs pa ni mngon par rdzogs par byang chub pa'o/ /'dir yang ci khyod don dam pa la zhugs te 'am rdzu 'phrul gyi rnam grangs la zhugs te 'am zhes ci'i phyir khyod gnas 'dri bar byed ces dgongs pa'o// de ni 'dus byas kyi khams sam 'dus ma byas kyi khams gang la yang gnas pa ma yin no zhes bya ba la sogs pas byang chub kyang gang la yang gnas pa ma yin par bstan te/ de bzhin gshegs pas sprul pa'i dpes bstan to//rab 'byor de bzhin gshegs pa dang de bzhin gshegs pa'i sprul pa la khyad par med do zhes bya ba dang / de bzhin gshegs pa'i sprul pa las byed do zhes bya ba ni sangs rgyas bcom ldan 'das yongs su mya ngan las 'da' ba na/ gang gi tshe bdag cag gi bcom ldan 'das byams pa la/khyod kyis nga 'das pa'i 'og tu sangs rgyas kyi bya ba byas nas sems can rnams kyi don byos shig ces bya bar lung bstan du 'os pa lta bu'i byang chub sems dpa' ma gzigs pa de'i tshe/ nyid kyi sku dang mtshungs pa gzugs phun sum tshogs pa'i sprul pa sprul nas khyod sangs rgyas kyi bya ba byos shig ces bka' stsal te/yongs su mya ngan las 'das pa de'i tshe/ de bzhin gshegs pa'i sprul pa de 'jig rten gyi khams thams cad du sangs rgyas kyi mdzad pa mdzad de/ sems can rnams la phan 'dogs so//gang gi tshe lung bstan du 'os pa'i byang chub sems dpa' gzigs pa de'i tshe/ sems can rnams de'i lag tu gtad nas nyid yongs su mya ngan las 'da' ba ston te/ sprul pa de dang / de bzhin gshegs pa la bye brag cung zad kyang med do/ /chos nyid de nyid kyi sprul pa yang zhes bya ba ni gnyi ga yang dngos po med pa'i ngo bo nyid yin pa dang /sems can la phan pa nyid kyi phyir byung ba dang / de'i mdzad pa mdzad pa'i phyir de skad du bshad do/ /de'i slad du bcom ldan 'das kyis chos rnams kyi chos nyid dkrugs par ma gyur tam zhes bya ba ni med pa'i chos rnams yod pa nyid du bshad pa'i phyir ro//rab 'byor ngas ni ming dang mtshan mas chos rnams bstan te zhes bya ba ni 'jig rten gyi tha snyad du byis pa'i yongs su rtog pa zhal gyis bzhes kyi gzhan du sla ba ma yin pas de skad brjod do//ming dang mtshan ma la mngon par zhen pa med do zhes bya ba ni 'jig rten pa rnams la/ rnam pa gzhan gyis go bar bya mi nus shing dka' ba'i phyir de dang mthun pa'i kun rdzob kyi tha snyad du byas kyi/ mngon par zhen pa med pas nyes pa med do/ /gal te 'di ni bden pa'o zhes mngon par zhen pa de'i phyir nyes par 'gyur ro zhes bstan to//rab 'byor rnam pa gal te ming ming la mngon par zhen par 'gyur ram/ mtshan ma mtshan ma la mngon par zhen par 'gyur na ni zhes bya ba ni gal te ming ming la mngon par zhen par 'gyur ram/mtshan ma mtshan ma la mngon par zhen par 'gyur na/ de lta na ni stong pa nyid kyang stong pa nyid la mngon par zhen par 'gyur ro/ /de bzhin du mtshan ma med pa la sogs pa yang mngon par zhen par 'gyur ba zhig na/ 'di ltar stong pa nyid la sogs pa ni dngos po med pa'i ngo bo nyid yin pa'i phyir mngon par zhen par mi 'gyur ro//de bzhin du sangs rgyas dang / nyan thos rnams kyang mngon par zhen par mi 'gyur ro zhes gsungs pa'o/ /rab 'byor 'di ltar chos thams cad ming dang / mtshan ma tsam du zad do zhes bya ba ni 'di ltar chos thams cad ming dang /mtshan ma tsam du zad na/ 'jig rten rnams kyis de ltar mi shes te/ de bas na de dag gis rtogs par bya ba'i phyir byang chub sems dpa' rnams spyod par 'gyur ro/ /'di ltar chos thams cad ming dang mtshan ma tsam du zad de/de'i phyir de dag rtogs pas rnam pa thams cad mkhyen pa nyid thob par 'gyur ro/ /gal te chos 'ga' zhig dngos po yod na/ de lta na ni mngon par rdzogs par byang chub par mi 'gyur ro zhes bstan pa'o/ /rab 'byor thams cad shes pa nyid ces bya ba ni nyan thos dang /rang sangs rgyas thams cad kyi'o/ /lam gyi rnam pa shes pa nyid ni byang chub sems dpa' sems dpa' chen po rnams kyi'o/ /rnam pa thams cad mkhyen pa nyid ni de bzhin gshegs pa dgra bcom pa yang dag par rdzogs pa'i sangs rgyas rnams kyi'o zhes bya ba la/de la thams cad shes pa nyid ces bya ba ni 'dus byas thams cad mi rtag pa'o/ /zag pa dang bcas pa thams cad sdug bsngal ba'o/ /chos thams cad bdag med pa'o zhes thams cad shes pa nyid rnam pa gsum gyis zhugs nas chos dang rjes su rtog pa'i shes pa'i dbang gis chos thams cad kyi mthar gtugs pa'i shes pa ni thams cad shes pa zhes bya ste/shes pa de yang chos thams cad rnam pa thams cad du shes pa ni ma yin gyi/ mtshan nyid gsum dang / bden pa bzhi'i sgo nas chos thams cad la rmongs pa med pa'i phyir nyan thos dang /rang sangs rgyas rnams kyi shes pa la thams cad shes pa nyid ces bya'o/ /lam gyi rnam pa shes pa nyid ces bya ba 'di la byang chub sems dpa' dang po sems bskyed pa nas mos pas spyod pa'i sa nas bzung ste/ sa chos kyi sprin la thug gi bar du kun du 'gro ba'i don dang /mchog gi don la sogs pa rab tu rtogs pas de bzhin nyid rnam par spyod pa la zhugs pa gnas gyur pa'i rgyur gyur pa dang / sems can thams cad la phan pa dang / bde ba'i phyir zhugs pa'i ye shes rnam pa thams cad mkhyen pa nyid kyi grong khyer chen por phyin par byed pa ste/lam gyi rnam pa shes pa nyid ces bya'o/ /rnam pa thams cad mkhyen pa nyid ces bya ba ni/ sangs rgyas rnams kyi ye shes nam mkha'i khams kyi mthas gtugs pa'i sems can gyi don gyi rgyun ma bcad pa/ chos kyi sku rab tu rtogs pa/bag chags kyi mtshams sbyor ba rab tu spangs pa 'bras bu'i ye shes te/ chos thams cad la rnam pa thams cad du zhugs pa'i 'bras bu yin pa'i phyir rnam pa thams cad mkhyen pa nyid ces bya'o/ /rab 'byor rnam pa gcig gis rnam pa thams cad mkhyen pa nyid ces bya ste 'di ltar zhi ba'i rnam pas zhes bya ba ni gang de bzhin gshegs pa rnams kyis yongs su rtogs pa dang /rnam par rtog pa'i rnam pa thams cad rab tu nub cing sems can gyi 'jig rten dang / snod kyi 'jig rten mtha' dag dang / bral ba khams gsum du gtogs pa'i tshul khrims kyis rnam par rtog pa'i spros pa'i dra ba 'gags par gyur pa na/chos kyi dbyings shin tu rnam par dag pa mnyam pa nyid kyi rnam par zhugs pa lhun gyis grub pa'i chos kyi sku'i bdag nyid shin du zhi ba'i rnam pa gang yin pa de/ chos thams cad kyi rnam pa yin pa'i phyir rnam pa thams cad ces bya ste/rnam pa de lta bur zhugs pa'i ye shes kyi rang bzhin de lta bu la rnam pa thams cad mkhyen pa nyid ces bya'o/ /bag chags kyi mtshams sbyor ba spangs pa zhes bya ba ni las dang nyon mongs pa'i rnam par rtog pa'i bag chags rnams las/'dir sems can rnams kyi rgyu dang 'bras bu gcig nas gcig tu bar ma chad par 'byung ba gang yin pa de/ rgyun chad pa la bag chags kyi mtshams sbyor ba spangs pa zhes bya'o/ /rnam pa thams cad mkhyen pa nyid ma thob par nyon mongs pa spangs pa 'dus ma bgyis lags sam zhes bya ba ni 'gog pa'i bdag nyid yin pa'i phyir de skad gsungs te/'gog pa ni spong ba tsam du zad pas/ lus dang ngag gi 'gyur ba dag ni 'byung ngo / /de dag kyang byis pa so so'i skye bo rnams la gnod par 'gyur ba ni ma yin zhes bya ba ni me long la lta ba dang /mchong zhing 'gro ba la sogs pa dang / pi lin da bad sas dmangs mo'i tshig brjod pa bzhin te/ de dag kyang byis pa so so'i skye bo rnams sam 'phags pa rnams gang la yang gnod par ni mi 'gyur ro/ /ci lam la gnas te 'am/ lam ma yin pa la gnas te zhes bya ba la sogs pa'i rnam par rtog pa ni bcom ldan 'das kyis slar bka' stsal te / lam ni dngos po med pa'i ngo bo nyid yin pas gnas su mi rung ngo zhes bya ba'o/ /bcom ldan 'das gal te lam dngos po ma mchis la/ mya ngan las 'das pa yang dngos po ma mchis na/'o na ci'i slad du 'di skad du 'di ni rgyun du zhugs pa'o/ /'di ni lan cig phyir 'ong ba'o zhes bshad ces bya ba la sogs pas/ 'phags pa'i gang zag rnams dang sangs rgyas bshad pa/ lam gyi dbang gis bshad dam/ mya ngan las 'das pa thob pas bshad grang na/gal te gnyi ga med na 'phags pa'i gang zag ji ltar rnam par 'god ces dgongs pa'o/ /rab 'byor de dag thams cad kyang 'dus ma byas kyis rab tu phye ba'o zhes bya ba ni lam dang mya ngan las 'das pa gnyis med du zin kyang / 'dus byas med pa'i rang bzhin de bzhin nyid kyis rab tu phye ba'o zhes slar bka' stsal pa'o/ /bcom ldan 'das ci lags 'dus ma bgyis pa de 'di ni rgyun du zhugs pa'o zhes rab tu 'byed pa mchis sam zhes bya ba la sogs pas ni 'dus ma byas kyis rab tu phye bas 'dus ma byas kyis rab tu phye ba'o zhes dgongs na /ci 'dus ma byas pa de gang zag de dag rab tu 'byed dam/ skyed par 'gyur ram zhes zhus pa'o/ /rab 'byor 'dus ma byas ni rab tu 'byed pa med mod kyi zhes bya ba ni 'dus ma byas skyed par mi byed mod kyi/ 'on kyang gnas gyur pa'i dbang gis de bzhin nyid la 'jug pa'i bye brag dang /nyon mongs pa bag la nyal bar spong ba'i bye brag gis de dag de lta de lta bur 'gyur ba'i phyir 'dus ma byas kyis rab tu phye ba'o zhes bshad do zhes bstan pa'o/ /bcom ldan 'das 'o na ji ltar 'khor ba'i phyi ma'i mtha' mchis par 'gyur zhes bya ba ni sngar thog ma dang tha ma med pa stong pa nyid la sogs pa bshad pa las/'khor ba med do zhes 'khor ba'i thog ma dang / tha ma dang / dbus dmigs su med pa smos la/ da ni dgra bcom pa dag 'dus ma byas kyis rab tu phye bar 'gyur na/'khor ba'i phyi ma'i mtha' yod par 'gyur ro snyam du dgongs nas zhus pa'o/ /rab 'byor 'jig rten gyi tha snyad tshad mar byas kyi don dam par ni ma yin no zhes bya ba ni so so skye bo rnams dang / dgra bcom pa rnams kyi de bzhin nyid ni dus thams cad du 'jug pa'i phyir phyi ma'i mtha' med mod kyi/'on kyang gang phung po lnga zhes bya ba kun brtags pa'i chos de/ rgyun chad pa nye bar bzung nas 'jig rten gyi tha snyad du de lta bu dag bshad do zhes bstan pa'o / /de bas na gang dang gang gis mtha' chad pa zhes bya ba gsungs so/ /bcom ldan 'das chos thams cad rang gi mtshan nyid kyis stong pa la sngon gyi mtha' mi dmigs na/phyi ma'i mtha' smos kyang ci 'tshal zhes bya ba ni kun brtags pa phung po lnga'i chos dngos po med pa'i ngo bo nyid yin pa'i phyir rang gi mtshan nyid kyis stong ste/ sgyu ma lta bu yin pa'i phyir de dag skye ba'i 'du shes can rnams kyi sngon gyi mtha' yang med na/'gag pa'i 'du shes can rnams kyi phyi ma'i mtha' lta ga la yod ces gsungs pa'o/ /rab 'byor de de bzhin no/ /de de bzhin te zhes bya ba ni chos thams cad skye ba med cing 'gag pa med pa'i phyir de'i tshig la rjes su yi rang ba'o//rab 'byor shes rab kyi pha rol tu phyin pa 'di ni chos thams cad kyi pha rol dam pa ste/ de'i phyir shes rab kyi pha rol tu phyin pa zhes bya'o zhes bya ba la/ pha rol tu phyin pa zhes bya ba ni 'dir rnam par rtog pa'i don bzhi yod de re zhig dang por pha rol tu phyin pa zhes bya ba'i sgra dang don mtshungs pa pa mtha' zhes bya ba'i sgra yang yod de/pha mtha'i dngos po la ni pha rol nyid ces bya'o/ /chos thams cad kyi pha mthar gyur cing chos thams cad kyi mthar thug par gnas pa'i phyir pha rol nyid ces bya'o/ /lung las kyang /dngos po'i rkyen tha ma na yod kyang chos kho nar brjod de/ dper na chu'i khams gsher ba la chu'i khams gsher ba nyid do zhes bya ba lta bu ste/ de bas na rab 'byor 'di ni chos thams cad kyi pha rol nyid dam pa'o zhes gsungs te/ chos thams cad kyi shin tu pha rol nyid mthar thug pa'i pha rol nyid ces bya ba'i tha tshig go//yang na pha rol zhes bya ba ni mtha'o/ /phyin pa ni son pa ste/ de'i phyir pha rol tu phyin pa'o/ /de bas na nyan thos dang / rang sangs rgyas thams cad dang / byang chub sems dpa' dang / de bzhin gshegs pa thams cad 'dis pha rol du son zhes bya ba gsungs te/pha rol tu phyin pa 'gro bar byed pa'i phyir pha rol tu phyin pa zhes bya'o/ /yang na dam pa'i sgra ni don dam pa la bya ste/ dam pa las byung ba'i phyir pha rol tu phyin pa ste/ don dam pa la dmigs pa las byung ba'i phyir dam pa las byung ba zhes bya'o//mi gnas pa'i mya ngan las 'das pa'i mtshan nyid don dam pa chos thams cad mnyam pa nyid kyi rang bzhin la dmigs nas byung ba'i shes rab ni shes rab kyi pha rol tu phyin pa ste/ de bas na don dam par chos thams cad dbyer med pa'i don gang yin pa de shes rab kyi pha rol tu phyin pa 'dis de bzhin gshegs pa rnams kyi mngon par rdzogs par sangs rgyas zhes bya ba gsungs te/shes rab ni don dam pa la dmigs pa'i phyir de bzhin gshegs pa rnams kyis don dam pa mngon par rdzogs par sangs rgyas so//yang na pha rol gyi sgra ni de bzhin nyid la bya ste/ thams cad kyi pha rol tu gyur pa'i phyir ro/ /pha rol tu phyin par gyur pa de bzhin nyid thob pa la pha rol tu phyin pa zhes bya'o/ /de bas na shes rab kyi pha rol tu phyin pa 'dir de bzhin nyid kyang chud/ ma nor ba de bzhin nyid kyang chud ces gsungs so//de bzhin nyid la sogs pa 'dir chud pa'i phyir 'di ni de bzhin nyid la sogs pa la khyab par gyur pa zhes bya ba'i ming can yin no/ /ldan pa'am mi ldan pa zhes bya ba la sogs pa 'dis man chad ni shes rab kyi pha rol tu phyin pa'i ngo bo nyid 'ba' zhig ston to//shes rab kyi pha rol tu phyin pa 'di ni chos thams cad spyod par byed pa'o/ /spobs pa thams cad sbyin par byed pa'o zhes bya ba ni chos thams cad la spyod cing / shes pa thams cad skyed par byed ces bya ba'i tha tshig go/ /'di ltar spyod par byed pa gang yin pa dang /gang gi tshe spyod pa dang / ji ltar spyod pa de dag thams cad shes rab kyi pha rol tu phyin pa 'di la mi dmigs pa'i phyir ro zhes bya ba ni spyod pa po dang / spyod par 'os pa dang / spyad par bya ba shes rab kyi pha rol tu phyin pa 'di mi dmigs pa'i phyir de la spyod pa'i byang chub sems dpa' rnams la yang de dag spyod par mi 'gyur ro zhes bya ba'i tha tshig go//rab 'byor gzhan yang byang chub sems dpa' sems dpa' chen pos shes rab kyi pha rol tu phyin pa'i don la ji ltar spyad par bya ste/ 'di lta ste mi rtag pa'i don dang sdug bsngal ba'i don dang /bdag med pa'i don la spyad par bya'o zhes bya ba gsum gyis thams cad kyi thun mong gi don bstan nas/ sdug bsngal shes pa'i don dang / kun 'byung ba shes pa'i don nas/ yongs su 'dris pa shes pa dang / sgra ji bzhin shes pa'i don gyi bar shes pa bcu gcig po 'di rnams ni shes rab kyi pha rol tu phyin pa'i ngo bo nyid yin pa'i phyir de dag gi don gang yin pa de shes rab kyi pha rol tu phyin pa'i don yin no zhes bstan pa'o//don dang tshul gyis zhes bya ba la don ni mi rtag pa la sogs pa'i don de dag go/ / shes rab kyi pha rol tu phyin pa'i ngo bo nyid sngar bstan pa dang 'og nas 'byung ba gang yin pa de dag ni tshul lo/ /shes rab kyi pha rol tu phyin pa'i don la spyod pas na/ 'dod chags bdag gi don tam/ bdag gi don ma yin zhes spyad par mi bya'o zhes bya ba la sogs pas ni don dang don ma yin pa tha dad par rnam par rtog pa yang bsal bar bya'o zhes bya ba ste/de bzhin nyid la de lta bur 'jug pa med pa'i phyir ro zhes bstan pa'o/ /gzugs bdag gi don zhes spyad par mi bya'o/ /gzugs bdag gi don ma yin zhes spyad par mi bya'o zhes bya ba ni gzugs dmigs par lta ba ni don ma yin pa'o//gzugs dmigs su med par lta ba ni don yin no zhes bya ba'i tha tshig go/ /de bzhin gshegs pa rnams byung yang rung ma byung yang rung zhes bya ba 'dis 'di skad bstan te/ gang la yang don tam don ma yin pa mi byed do zhes bya ba ni chos gnas pa 'di ngo bo nyid kho na ste/'di ltar de ltar gnas pa'i phyir ro zhes bstan pa'o/ /shes rab kyi pha rol tu phyin pa 'di la 'dus byas dang 'dus ma byas kyi chos gang la yang mi byed ces bya ba 'dis ni 'di skad du shes rab kyi pha rol tu phyin pa mthong nas/'dus byas dang / 'dus ma byas kyi chos thams cad ma mthong bar 'gyur ba'i phyir chos thams cad byed pa ma yin pa ni shes rab kyi pha rol tu phyin pa yin no / de ji ltar don tam don ma yin pa 'ga' zhig byed par 'gyur zhes bstan pa'o/ /bcom ldan 'das 'du ma bgyis pa 'phags pa thams cad kyi don ma lags sam zhes bya ba ni shes rab kyi pha rol tu phyin pa 'di 'dus ma byas pa mya ngan las 'das pa thob par bgyid pa ma lags sam zhes dgongs nas gsol pa'o//phan pa'am gnod pa nye bar gnas pa ma yin no zhes bya ba ni shes rab kyi pha rol tu phyin pa'i rgyus mya ngan las 'das pa la phan pa'am/gnod pa gang yang med do zhes bya ba'i tha tshig ste/ /de la yang nam mkha'i de bzhin nyid kyi dpe bstan to/ /'dus ma bgyis kyi shes rab kyi pha rol tu phyin pa la bslabs nas rnam pa thams cad mkhyen pa nyid thob par mi bgyid dam zhes bya ba ni shes rab kyi pha rol tu phyin pa rnam pa thams cad mkhyen pa nyid skyed par byed pa ma yin nam snyam du dgongs nas gsol pa'o//de skad ces gsol pa dang / bcom ldan 'das kyis spyod pa'i tshe kun rdzob tu de lta yin no zhes de'i tshig la rjes su yi rang nas/gnyis kyi tshul gyis ni ma yin no zhes dgag pa mdzad do/ /shes rab kyi pha rol tu phyin pa dang / rnam pa thams cad mkhyen pa nyid gcig ste/ tha dad pa ma yin la/ gnyis su med pa de'i phyir phan gdags par bya ba dang / phan 'dogs pa med do zhes bya ba'i tha tshig go//bcom ldan 'das ci lags gnyis su ma mchis pa'i chos gnyis su ma mchis pa'i chos thob par bgyid dam zhes bya ba ci las dgongs she na/ shes rab kyi pha rol tu phyin pa'i rgyus byang chub sems dpa' rnam pa thams cad mkhyen pa nyid thob par 'gyur ro zhes grags pa de la/ci ngo bo nyid med pa'i byang chub sems dpa' 'dis gnyis su med pa'i ngo bo nyid kyi shes rab kyi pha rol tu phyin pa thob par 'gyur ram/ 'on te gnyis kyi ngo bo nyid kyi byang chub sems dpas gnyis su med pa'i ngo bo nyid kyi shes rab kyi pha rol tu phyin pa thob par 'gyur zhes rnam par rtog pa gnyis zhus pa dang /bcom ldan 'das kyis gnyi gar yang brjod du mi rung ba'i phyir ma gnang nas 'di skad du gnyis kyi chos sam gnyis su med pa'i chos kyang mi dmigs na de ltar dmigs su med pa'i tshul gyis rnam pa thams cad mkhyen pa nyid thob par 'gyur ro zhes gsungs te/ji ltar chos 'di dag thams cad gnyis kyi bdag nyid dam/ gnyis su med pa'i bdag nyid du yang dmigs su med pa de bzhin du/ gnyis kyi chos dmigs su med pa'i tshul dang / gnyis su med pa'i chos dmigs su med pa'i tshul gyis rnam pa thams cad mkhyen pa nyid thob ces bya'i de las gzhan pa ni cung zad kyang med do// //bam po nyi shu lnga pa/ de lta bu'i zab mo'i gnas thos nas/ bcom ldan 'das shes rab kyi pha rol tu phyin pa ni zab po zhes bya ba la sogs pa gsol te/dpe la yang de bzhin du sbyar bar bya'o/ /dper na mi des/ rtsa ba dang / shun pa dang yal ga dang / lo ma dang / me tog dang / 'bras bu 'dod par gyur na/ thog mar de dag mi dmigs pa de bzhin du/ byang chub sems dpas kyang chos thams cad mi dmigs so//ji ltar phyis mi des sdong bu bskyed na/ rtsa ba dang shun pa la sogs pa rnyed nas nye bar spyod pa de bzhin du/ bsod nams dang / ye shes kyi tshogs du ma bskyed na rnam pa thams cad mkhyen pa nyid thob nas sems can thams cad la phan pa dang /bde ba nye bar spyod par byed par shes par bya'o/ /rab 'byor de bzhin nyid gang gis de bzhin gshegs par gdags pa zhes bya ba ni de bzhin nyid du gshegs pas na de bzhin gshegs pa zhes bya'o/ /byang chub sems dpa' yang de bzhin nyid du gshegs pa yin te/de bas na de bzhin gshegs pa nyid du brjod par bya'o/ /byang chub sems dpa' sems dpa' chen po de bzhin nyid 'di la gnas te zhes bya ba 'gres gnyis pa la de bzhin nyid khong du chud cing rtogs pa'i phyir de bzhin gshegs pa zhes bya ste/de bzhin nyid 'di yang shes rab kyi pha rol tu phyin pa zhes bya'o/ /de'i 'og tu de bzhin nyid dang / shes rab kyi pha rol tu phyin pa la spyod pa'i phan yon dang bsod nams 'phel ba ni go sla'o/ /byang chub sems dpa' zhugs par gyur pa zhes bya ba ni yang dag par rdzogs pa'i byang chub kyi lam la gnas pa'o//rab 'byor rnam pa thams cad mkhyen pa nyid ces bya ba ni dngos po med pas/ mtshan nyid med pa zhes bya ba ni dngos po'i chos las 'das pa'i phyir dngos po med pa'o/ /rang dang spyi'i mtshan nyid dang bral ba'i phyir mtshan nyid med pa'o//ming dang mtshan ma thams cad dang bral ba'i phyir mtshan ma med pa'o/ /rtsol ba med pa'i phyir lhun gyis grub pa'o/ /'dus ma byas pa'i phyir skye ba med pa'o/ /gnas pa med pa'i mtshan nyid yin pa'i phyir 'byung ba med pa'o/ / rab 'byor rnam pa thams cad mkhyen pa nyid ni dngos po med pa la dmigs pa'o zhes bya ba ni dngos po med pa las brtsams nas 'jug ces bya ba'i tha tshig ste/ dmigs pa'i rkyen ni ma yin no/ /dran pas dbang bsgyur ba zhes bya ba ni sngon gyi rgyu'i dbang gis brjod kyi de'i tshe ni ma yin no//rab 'byor 'dus pa las byung ba'i ngo bo nyid med ces bya ba ni gzugs dang tshor ba la sogs pa kun brtags pa'i ngo bo nyid de/ rkyen gzhan gyi dbang las byung ba'i phyir 'dus pa las byung zhes bya ste/ gzhan gyi dbang bya ba'i phyir de lta bu'i ngo bo nyid kyi ming du 'gyur ro//gang la 'dus pa las byung ba'i ngo bo nyid med pa ste dngos po med pa'o zhes bya ba ni chos gang gzhan la rag las pa yin gyi/ ngo bo nyid ces bya ba ma yin pa de dngos po med pa zhes te / ri bong gi rwa la sogs pa ltar gtan med pa'i phyir med pa ni ma yin gyi dngos po yod pa'i chos las bzlog pa'i phyir dngos po med pa'o//dngos po med pa'i ngo bo nyid ces bya ba ni gzugs la sogs pa kun brtags pa'i chos rnams la dngos po med pa zhes bya'o/ /de la bzlog pa'i ngo bo nyid kyang dngos po med pa'i ngo bo nyid ces bya'o/ /de'i 'og tu shes rab kyi pha rol tu phyin pa dngos po med pa'i ngo bo nyid yin pa dang thabs mkhas pa dag bstan to//de la bcom ldan 'das chos rnams chos nyid dang bral ba lags sam zhes bya ba ni chos thams cad chos thams cad dang bral ba yin na de lta na ni shes par bya ba dang shes par byed pa yang med pas 'di ni shes par byas so zhes bya bar brjod du mi rung ngo zhes bya ba'i tha tshig go//dngos pos kyang dngos po 'tshal bar mi rung zhes bya ba ni kun brtags pas kun brtags pa shes par mi rung ste/ med pa'i phyir ji ltar sgyu ma'i glang po ches sgyu ma'i glang po che'i rjes lta bu'o//dngos po med pas kyang dngos po med pa shes par mi rung ste/ ji ltar nam mkhas nam mkha' lta bu'o/ /dngos pos kyang dngos po med pa shes par mi rung ste/ ji ltar sgyu ma'i mis nam mkha' lta bu'o/ /dngos po med pas kyang dngos po shes par mi rung ste/ji ltar nam mkhas sgyu ma'i mi bzhin te 'di ni dngos po yod pa dang dngos po med pa'i shes rab kyi pha rol tu phyin pa'o/ /bcom ldan 'das ci lags 'jig rten gyi kun rdzob kyang gzhan zhig la/ don dam pa yang gzhan lags sam zhes bya ba ni 'jig rten gyi kun rdzob dngos po med pa'i mtshan nyid yin pa'i phyir don dam pa zhus pa'o//'jig rten kun rdzob kyi de bzhin nyid gang yin pa de nyid don dam pa'i de bzhin nyid yin zhes bya ba ni 'jig rten gyi kun rdzob ces bya ba gzugs la sogs pa'i chos thams cad kyi de bzhin nyid gang yin pa de nyid don dam pa'i de bzhin nyid do zhes bya ba'i tha tshig go//rab 'byor yang dag pa'i don ni sangs rgyas zhes bya ste zhes bya ba ni sangs rgyas kyi ngo bo nyid kyi mtshan nyid gsungs pa ste yang dag pa'i don de bzhin nyid chos kyi sku la sangs rgyas zhes bya ba'i tha tshig go//des yang dag pa'i don mngon par rdzogs par sangs rgyas pas zhes bya ba la sogs pa rnam pa gsum gyis nges pa'i tshig gsungs pa ste/ bcom ldan 'das kyis ni dgra bcom pa'i lam gyi ye shes kyis yang dag pa'i chos mya ngan las 'das pa nyid sangs rgyas par 'gyur ba dang /de'i 'og tu rnam pa thams cad mkhyen pa nyid kyi ye shes kyis yang dag pa'i don stong pa dang zhi ba la sogs pa'i don du rtogs pa dang / de'i rjes la thob pa dang thams cad mkhyen pa nyid pa'i ye shes kyis thams cad kyi mtshan nyid ji lta ba bzhin du rjes su rtogs par 'gyur te/de ltar yang dag pa'i chos mngon par rdzogs par sangs rgyas pa dang / yang dag pa'i don rab tu rtogs pa dang / chos thams cad ji lta ba bzhin du mngon par rdzogs par sangs rgyas pa'i phyir sangs rgyas zhes bya'o/ / bcom ldan 'das byang chub ces bgyi ba de gang gi tshig bla dgas lags so zhes bya ba ni byang chub kyang rnam pa gsum du bstan te ngo bo nyid dang mtshan nyid dang nges pa'i tshig gis so/ /de la ngo bo nyid rnam pa gnyis te/ yongs su grub pa'i ngo bo nyid dang / kun brtags pa'i ngo bo nyid do//de la yongs su grub pa'i ngo bo nyid ni rab 'byor byang chub ces bya ba de ni stong pa nyid kyi tshig bla dgas so zhes gsungs pa'o/ /kun brtags pa'i ngo bo nyid ni rab 'byor 'di ltar yang / byang chub ces bya ba de ni ming tsam zhes gsungs pa'o/ /mtshan nyid ni yang dag pa'i don ni byang chub kyi don to zhes gsungs pa ste/don dam pa'i mtshan nyid ni yang dag par don dam pa'i don zhes bya'o/ /nges pa'i tshig ni de ni chos thams cad ming dang mtshan ma tsam du rtogs par byed pa zhes bya ba la sogs pa rnam pa gsum ste/ de la kun brtags pa'i mtshan nyid rtogs pa'i nges pa'i tshig ni de ni chos thams cad ming dang mtshan ma tsam du rtog par byed pa zhes gsungs pa'o//gzhan gyi dbang rtogs pas/ gnas gyur pa'i mtshan nyid chos kyi sku'i tshul ni de ni sangs rgyas bcom ldan 'das rnams kyi byang chub ste/de'i phyir byang chub ces bya'o zhes gsungs pa'o/ /yongs su grub pa'i mtshan nyid rtogs pa ni de ni sangs rgyas bcom ldan 'das rnams kyis mngon par rdzogs par sangs rgyas na de'i phyir byang chub ces bya'o zhes gsungs pa'o/ /shes rab kyi pha rol tu phyin pa la spyod pa'i byang chub ni chos gang yang bstsags pa'i phyir ram/'grib par bya ba'i phyir zhes bya ba ni sbyin pa la sogs pa'i dge ba'i rtsa ba rnams bstsags pa'i phyir ram/ ser sna dang 'chal pa'i tshul khrims la sogs pa 'grib par bya ba'i phyir ram/ nag po'i phyogs rnams nyams par bya ba'i phyir ram/dkar po'i phyogs rnams 'phel bar bya ba'i phyir ram/ sangs rgyas kyi chos ma skyes pa rnams bskyed par bya ba'i phyir ram/ kun nas nyon mongs pa skyes pa rnams dgag pa'i phyir ram/ dri ma dang bcas pa'i gnas skabs na kun nas nyon mongs par bya ba'i phyir ram/dri ma med pa'i gnas skabs na rnam par byang bar bya ba'i phyir dmigs pa'i tshul gyis nye bar gnas pa ma yin no zhes bya ba la/ byang chub ni dmigs pa thams cad sel ba'i rang bzhin yin pa'i phyir de skad ces gsungs so//gnyis kyi tshul gyis sbyin pa'i pha rol tu phyin pa la spyod ces bya ba ni dmigs par bya ba dang dmigs par byed pa'i dngos pos zhes bya ba'i tha tshig go/ /de ltar dge ba'i rtsa ba dang ldan pa'i phyir byang chub sems dpa' yang rnam pa thams cad mkhyen pa nyid thob par mi nus zhes bya ba ni dmigs pa'i dbang gis thabs mkhas pa dang mi ldan pa'i phyir ro zhes de ma thag tu 'og nas 'chad do//ji ltar sbyin pa'i pha rol tu phyin pa yongs su 'dzin zhes bya ba ni byang chub la dmigs nas sbyin pa byin na sbyin pa'i pha rol tu phyin pa'i ming du 'gyur ro snyam nas gsol pa'o//gnyis kyi tshul gyis sbyin pa'i pha rol tu phyin pa la mi spyod do zhes bya ba ni 'di byang chub kyi phyir bya'o zhes dmigs par bya ba dang dmigs par byed pa gnyis kyi dngos por rnam par brtags nas mi spyod do zhes bya ba'i tha tshig go//bcom ldan 'das gal te gnyis kyi tshul gyis sbyin pa'i pha rol tu phyin pa la mi spyod na zhes bya ba ni gal te gnyis kyi tshul gyis byang chub kyi phyir yongs su sngo zhing mi byed na ji ltar dge ba'i rtsa ba rnams mngon par 'phel bar 'gyur zhes zhus pa'o/ / rab 'byor gang gnyis la spyod pa de dag ni dge ba'i chos rnams rnam par 'phel bar 'gyur ro zhes bya ba ni gnyis su med par spyod pa nyid dge ba'i rtsa ba 'phel ba'i rgyu yin gyi gnyis su spyod pa ni ma yin no zhes bstan pa ste/ 'di ni gnyis su med par spyod pa'i shes rab kyi pha rol tu phyin pa zhes bya'o//de nas yang thabs mkhas pas pha rol tu phyin pa drug la spyod pa dang / byang chub kyi phyogs la spyod pa dang / sangs rgyas kyi chos la spyod pa dang / byang chub sems dpa' bsngags pa'i ngo bo nyid las mi g.yo ba rnams ni gzhung nyid las go sla'o//dngos po ma mchis pas dngos po ma mchis pa mngon par rdzogs par byang chub par bgyi bar nus sam zhes bya ba la sogs pa rnam par rtog pa bzhi ni mngon par rdzogs par byang chub pa la de lta bu'i rnam par rtog pas spror rung ba ma yin pa'i phyir 'di la shes par byed pa med do//ji ltar dngos po dang dngos po med pa yang ma yin pa de ltar mnyam pa nyid mthong ba ni mngon par rtogs pa zhes bya ba ni sgyu ma byas pa bzhin te kun brtags pa ni dngos po'i rnam pa ma yin la ri bong gi rwa ltar shin tu med pa'i rnam pa yang ma yin no//dngos po dang dngos po med pa mnyam pa nyid gang yin pa de ni dngos po dang dngos po med pa mnyam pa nyid mthong ba mngon par rtogs pa zhes bya ste/ 'di ni spros pa med pa'i pha rol tu phyin pa zhes bya'o/ /rab 'byor 'di lta ste dper na/ dgra bcom pas lam thams cad la bslabs nas zhes bya ba ni rgyun du zhugs pa dang /lan cig phyir 'ong ba dang phyir mi 'ong ba dang / dgra bcom pa'i lam la bslabs nas so/ /yang dag pa nyid skyon med pa la 'jug ste zhes bya ba ni dgra bcom pa nyid kyi skyon med pa 'jug pa'o//re zhig lam gyi skad cig la dgra bcom pa'i lam gyi 'bras bu ma thob kyi bar du zhes bya ba ni ji srid du tha ma la rnam par grol ba'i lam gyi skad cig mi skyed ces bya ba'i tha tshig go/ /skad cig gcig dang ldan pa'i shes rab kyis zhes bya ba ni rdo rje lta bu'i ting nge 'dzin gyi skad cig dang ldan pas so//shes pa dang mthong bas sa brgyad po dag la rnam par bltas nas yongs su 'da' ste zhes bya ba ni yongs su dris pa'i shes pa bstan pa'i skabs su sngar ji skad du bstan pa bzhin no/ /de la byang chub sems dpa' sems dpa' chen pos skad dang brda dang sgra thams cad yang dag par bsgrub par bya zhes bya ba ni sems can sna tshogs kyi skad dang mthun par ro//chos gang la yang sgrub pa'am/ 'jig par bgyid pa ma mchis so zhes bya ba ni byang chub kyi phyogs kyi chos mtshan nyid med pa/ dngos po med pa'i ngo bo nyid de dag byang chub sgrub pa ma lags sam zhes zhus pa dang /bcom ldan 'das kyis rab 'byor de de bzhin no de de bzhin te zhes bsngags pa mdzad de/ chos gang yang chos gang la yang sgrub par mi byed de/ chos rnams gnas pa'i mtshan nyid kyi phyir ro/de lta mod kyi byis pa rnams khong du chud par bya ba'i thabs su kun rdzob tu 'di mdzad de/ rim pa 'dis shes par gyur nas de bzhin du bsgrubs pas 'tshang rgya bar 'gyur ro/ /'phags pa'i chos 'dul ba zhes bya ba ni ngo bo nyid kyis 'dod chags la sogs pa 'dul ba dang /bsgrubs pas 'dul bar gnas pa'i mtshan nyid du ston to/ /'phags pa'i chos 'dul ba 'di ni shes rab kyi pha rol tu phyin pa zhes bya ba'o/ /'di ni chos thams cad sgom pa rnam par 'jig pa'o zhes bya ba ni/ gzugs la sogs pa'i chos thams cad sgom pa med par byed pa'o zhes bya ba'i tha tshig go//gzugs dngos po yod ces bya bar mi sgom mo zhes bya ba ni gzugs dngos po yod pa'i ngo bo nyid do snyam du mi sgom pa de ni dngos po la 'di ni bdag go zhes bya bar mtha' gnyis la chags te zhes bya ba ni dngos po'i 'du shes can te/'di ni bdag ste gud na yod do zhe'am/ bdag ni gzugs so/ /bdag ni tshor ba'o zhes bya ba la sogs pa chad pa dang / rtag pa'i mtha' gnyis la chags zhes bya ba'i tha tshig go/ /rab 'byor gzugs su 'du shes pa ni gnyis so zhes bya ba ni gang la gzugs so zhes bya ba'i 'du shes yod pa de la/yod pa dang med pa'am/ dngos po'am/ dngos po ma yin par rnam par rtog pa gdon mi za bar 'byung bar 'gyur ro/ /yang na gzung ba dang 'dzin pa'i dngos por 'gyur ba'i phyir gnyis zhes bya'o//ji tsam du dngos po yod pa de tsam du 'du byed do zhes bya ba ni/ dngos por rnam par rtog pas/ bsod nams dang / bsod nams ma yin pa la sogs pa'i 'du byed rnams skyes par 'gyur ro/ /dngos po yongs su 'dor ro zhes bya ba ni/ rnam par smin pa yongs su mi 'dor ba'o/ /chos thams cad la mnga' bsgyur ba zhes bya ba ni yang dag par rdzogs pa'i byang chub po/ /yul la mnga' brnyes par gyur ces bya ba ni mngon par shes pa dang dbang bcu'o/ /de nas bcom ldan 'das kyis rab 'byor 'di la nga sngon pha rol tu phyin pa drug po dag la/byang chub sems dpa'i spyad pa spyod pa'i tshe zhes bya ba la sogs pas de ston te/ nga pha rol tu phyin pa rnams la spyod cing mngon par shes pa la sogs pa la yang snyoms par 'jug pa de na/ mtshan ma la ro myang ba med par dmigs pa can gyi 'du shes bsal te/rang bzhin gyis yongs su dag pa'i 'du shes bskyed cing spyad nas/ nam mkha' yid la byed pa nyid kyis mngon par rdzogs par sangs rgyas nas/ phyis rjes la thob pa'i ye shes kyis kyang / 'phags pa'i bden pa bzhi mngon par rdzogs par sangs rgyas nas/sangs rgyas kyi chos rnams mngon sum du byas te/ kun rdzob yid la byed pas/ sems can rnams phung po gsum du lung bstan par gyur te/ de bas na mi dmigs pa nyid kyis spyod pa dang / mi dmigs pa nyid kyis byang chub par 'gyur bas/nyes pa med do zhes bya ba'i tha tshig go/ /bcom ldan 'das ji ltar de bzhin gshegs pa dgra bcom pa yang dag par rdzogs pa'i sangs rgyas kyis zhes bya ba la sogs pa ni gal te bsam gtan dang / mngon par shes pa dang / sems can rnams dngos po med pa'i ngo bo nyid yin na de dag ji ltar bskyed/sems can rnams kyang ji ltar lung bstan zhes gnas brtan gyis zhus pa'o/ /des na bcom ldan 'das kyis rab 'byor gal te 'dod pa rnams dang / sdig pa mi dge ba'i chos rnams zhes bya ba la sogs pas/dngos po med pa'i ngo bo nyid kyi phyir thams cad grub kyi/ gzhan du ni ma yin no zhes bstan te/ 'di ltar 'dod pa rnams dang / sdig pa mi dge ba'i chos rnams dngos po med pa'i ngo bo nyid yin te de'i phyir lung bstan to/ /bsam gtan rnams bskyed do//dngos po'am/ dngos po med pa'am/ rang gi dngos po'am/ gzhan gyi dngos po zhes bya ba ni kun brtags pa'i dngos po'i bdag nyid kyis ma yin gyi / ri bong gi rwa bzhin du shin tu dngos po med pa'i bdag nyid kyis ni ma yin la/ rang gi dngos po'i bdag nyid 'ga' zhig tu yang ma yin gyi/gzhan gyi dngos po'i bdag nyid 'ga' zhig tu ma yin no zhes bstan pa'o/ /ji ltar mthar gyis spyod pa dang / mthar gyis slob pa dang / mthar gyis nan tan du bgyi ba mchis par 'gyur zhes bya ba ni ji ltar sgyu ma'i glang po che la sogs par dmigs pa dang /mi dmigs pa dag 'phral kho na la 'gyur ba de bzhin du/ byang chub sems dpa' yang 'phral kho na la dmigs su med pa rtogs par 'gyur gyi rim gyis ni ma yin no zhes dgongs pa'o//rab 'byor 'di la byang chub sems dpas thog mar sangs rgyas bcom ldan 'das rnams dang zhes bya ba la sogs pas ni/ bcom ldan 'das kyis 'di skad bstan te/ byang chub sems dpa' ni bdag gi don du mthar gyi spyod pa mi rtsom gyi/ sems can thams cad kyi 'phral la shes par mi nus te/rim gyis shes par bya ba'i phyir rim gyis rtsom ste/ sems dang po bskyed pa nas nye bar bzung zhes bya ba la sogs pas/ de dag gi rim pa ston to/ /zhugs nas zhes bya ba ni sems skyed nas so/ /pha rol tu phyin pa drug gi ngo bo nyid dang /dngos po med pa'i ngo bo nyid kyi chos thams cad la yod pa'am med pa dmigs su yod snyam mam zhes bya ba ni gal te med par 'dzin par gyur na chad par 'gyur ro/ /dngos po med pa dang ngo bo nyid du smra ba rnams dngos po med par smra ba dang ngo bo nyid yod par smra bas/yod pa'am med pa nyid kyi mthar byar mi rung bas bstan pa'o/ /rab 'byor mi dmigs pa nyid thob pa'o/ /mi dmigs pa nyid mngon par rtogs pa'o zhes bya ba ni mi dmigs pa thob pa dang / mi dmigs pa'i mngon par rtogs pa zhes brjod na thob par bya ba dang /mngon par rtogs par bya ba'i phyir mi dmigs pa yod par 'gyur te/ de lta na ni dmigs pa nyid thob pa dang / mngon par rtogs pa dang / yang dag par rdzogs pa'i byang chub ces brjod par bstan to/ /rnam par smin pa las byung ba'i mngon par shes pa yang ga la mchis zhes bya ba ni sa brgyad pa yan chad la rnam par smin pa'i mngon par shes pa dang /rnam par smin pa'i pha rol tu phyin pa rnams nye bar gnas so/ /mthar gyis grub pa bstan pa thams cad ni go sla'o/ /bcom ldan 'das ji ltar na sems gcig gis pha rol tu phyin pa drug yongs su rdzogs par 'gyur ba lags zhes bya ba la sogs pa zhus pa ni shes rab kyi pha rol tu phyin pas yongs su zin par sbyin pa byin na zhes bya ba brjod pas/shes rab kyi pha rol tu phyin pas yongs su zin pa'i phyir sems can thams cad kyang gcig tu 'gyur ro zhes bstan pa'o//gzhan ma yin no zhes bya ba ni gcig kho nar ro zhes bya ba'i tha tshig go/ /de nas zhus pa gnyis pa la yang / sems gnyis su med pa'i phyir sems gcig go zhes ston to/ /gnyis kyi 'du shes med par pha rol tu phyin pa drug la sogs pa chos thams cad sgom pa ni go sla'o//mtshan ma dang bral ba'i sems zag pa med pas sbyin pa byin na rnam par smin pa'i pha rol tu phyin pa yongs su rdzogs par 'gyur zhes bya ba ni sa brgyad pa yan chad nyon mongs pa 'byung ba med pa dang /rnam par smin pa yin pa'i phyir de skad ces bstan to/ /sbyin pa des ci zhig bya ba zhes bya ba ni bdud kyi ris rnams smra ba'o/ /de'i 'og tu pha rol tu phyin pa drug rnam par smin pa'i mngon par shes pa dang bcas pa rnams yongs su rdzogs pa ni gzhung nyid las gzung bar bya'o//chos thams cad kyi mtshan nyid shes pa bstan pas rnam par smin pa las byung ba'i pha rol tu phyin pa bstan pa yang go sla ba nyid do/ /de'i 'og tu bcom ldan 'das chos thams cad rmi lam lta bu dngos po ma mchis pa'i ngo bo nyid kyi rang gi mtshan nyid kyis stong pa rnams la zhes bya ba la sogs pa zhus pa dang /lan dang ngo mtshar rmad du byung ba bstan pa dang / 'jig rten dang 'jig rten las 'das pa'i chos kyi sbyin pa dag kyang gzhung nyid las gzung bar bya'o/ /de la 'jig rten las 'das pa'i chos kyi sbyin pa bstan pa'i lhag ma ni sngar bstan zin te/sngar ma bstan pa dag bstan to/ /de la nyon mongs pa med pa gang zhe na zhes bya ba ni bdag gi phyir gzhan dag la nyon mongs pa skye bar ma gyur cig ces byin gyis brlabs nas ting nge 'dzin la snyoms par zhugs te/sngon gyi smon lam gyi stobs kyis gzhan gyi rgyud la nyon mongs pa skye ba'i skabs mi 'byed pa de ni nyon mongs pa med pa'i snyoms par 'jug pa zhes bya'o/ /de la smon lam gyi shes pa gang zhe na zhes bya ba ni dus gsum dang khams gsum gyi chos rnams las shes par bya bar bsdus pa'i chos/'jig rten dang 'jig rten las 'das par gtogs pa gang yang rung ba 'ga' zhig shes par bya ba'i phyir smon lam btab pas na de de ma thag tu shes pa gang gi shes par gyur pa de smon lam sngon du 'gro ba'i shes pa yin pas smon nas shes pa zhes bya'o//de la yongs su dag pa bzhi gang zhe na zhes bya ba la/ sems can thams cad kyi nyon mongs pa'i gnas ngan len thams cad gnas dang shin tu bral bar gyur pa dang / bdag gi lus kyang ji ltar 'dod pa bzhin len pa dang /gnas pa dang 'chi 'pho ba rnams la rang dbang du gyur pa ni gnas yongs su dag pa'o/ /sprul pa dang / yongs su bsgyur ba'i grangs su gtogs pa dang / dmigs pa thams cad la dbang du gyur pa ni dmigs pa yongs su dag pa'o/ / sems kyi gnas ngan len thams cad dang bral bas sems la rnam pa thams cad du dge ba 'phel ba ni sems yongs su dag pa'o/ /ma rig pa'i phyogs kyi gnas ngan len thams cad dang bral bas shes par bya ba thams cad la shes pa sgrib pa med pa dbang du gyur pa ni ye shes yongs su dag pa'o//de la dbang bcu gang zhe na zhes bya ba la ji srid 'dod pa de srid du 'dug pa ni tshe la dbang ba'o/ /bsam gtan dang tshad med pa dang / rnam par thar pa la sogs pa sems gnas pa gang gis gnas par 'dod pa des ji ltar 'dod pa bzhin gnas pa 'di ni sems la dbang ba'o//kun du brtags pa tsam gyis de ma thag tu/ de'i bza' ba la sogs pa yo byad thams cad ji ltar 'dod pa bzhin 'byor pa 'di ni yo byad la dbang ba'o/ /skye bar 'gyur ba'i las thams cad la ji ltar 'dod pa bzhin du bsgyur ba 'di ni las la dbang ba'o//skye ba'i gnas thams cad du/ gang du 'dod par ji ltar 'dod pa bzhin du skye ba 'di ni skye ba la dbang ba'o/ /dngos po gang dang gang ji ltar mos par byas pa de dag de bzhin du 'grub pa 'di ni mos pa la dbang ba'o/ /de'i smon lam thams cad ji ltar 'dod pa bzhin du 'grub pa 'di ni smon lam la dbang ba'o//rdzu 'phrul gyi dgos pa thams cad ji ltar 'dod pa bzhin du 'grub pa 'di ni rdzu 'phrul la dbang ba'o/ /gang yang shes par bya ba'i dngos por rab tu zab pa shes par 'dod pa de dag myur ba nyid du shes pa 'di ni ye shes la dbang ba'o//ming gi tshogs dang / tshig gi tshogs dang / yi ge'i tshogs rnams ji ltar 'dod pa bzhin thob pa dang / chos thams cad yang dag par rnam par dgod pa la mkhas pa 'di ni chos la dbang ba'o//de la de bzhin gshegs pa'i bsrung ba med pa gsum gang zhe na zhes bya ba la srung ba med pa gsum ni gzhung nyid las go sla'o/ /rjes su chags pa dang / khong khro ba med pas dran pa nye bar gzhag pa gsum ni go sla'o/ /bsnyel ba mi mnga' ba'i chos nyid ces bya ba ni gang dang gang gi tshe ji ltar sems can gyi don mdzad pa de'i tshe/de bzhin gshegs pa de bzhin du sgrub pa ni bsnyel ba mi mnga' ba'i chos nyid do/ /skyes bu chen po'i mtshan sum cu rtsa gnyis zhes bya ba ni gzugs tshad mar 'dzin pa'i gang zag rnams dad pa bskyed pa'i phyir rnam par dgod do//de la rigs dang bsam pa dang / mos pa dang / smon lam dang / brtson 'grus rtsom pa dang / 'jug pa dang / yang dag par 'grub pa dang / shes rab dang / thabs la sogs pa che bas skyes bu'i byed pa che ba'i phyir byang chub sems dpa' chen po rnams dang /sangs rgyas rnams la skyes bu chen po zhes bya ste/ de dag skyes bu chen po yin pas 'di dag gis brjod cing mngon par bsal bar byed pa'i phyir skyes bu'i chen po'i mtshan rnams so/ /'o na de dag gis yan lag dang /nying lag rnams la skyes bu chen por mngon par byed pa gang la yang bye brag med pa'i phyir/ 'di snyed cig go zhes bya bar mi rung bas sum cu rtsa gnyis zhes bya ba'i grangs don med par 'gyur ro zhe na/ de yang bden mod kyi 'on kyang thos pa dang /dran pa dag las de'i rjes su 'brang ba'i don de lta bu'i grangs nges par bstan te/ 'dir yang grangs 'di nyid kyis bstan to/ /mtshan 'di rnams kyang mdor bstan pa dang / bshad pa dang / rgyu dang / 'bras bu dang / rnam pa bzhis bstan te/dang po ni mdor bstan pa'o/ /de'i 'og tu mtshan de rnams 'grel pa ni bshad pa'o/ /sngon gyi las smos pa ni rgyu'o/ /snga ltas smos pa ni 'bras bu'o/ /phyag dang zhabs 'khor lo'i mtshan dang ldan pa zhes bya ba la 'khor lo ni 'jig rten na rnam pa gnyis te/ mtshon cha'i 'khor lo dang / 'gro ba 'jug pa'i 'khor lo shing rta la sogs pa'i 'phang lo lta bu'o/ /de yang phyag dang zhabs gnyis ka la 'byung ngo / /'di'i sngon gyi las kyang rnam pa gnyis te/ bla ma la skyel zhing bsu ba'i grangs su gtogs pa tshul khrims kyi pha rol tu phyin pas bsdus pa ni gcig ste/de'i 'bras bus 'gro bar 'jug pa'i 'khor lo zhabs kyi mthil du 'byung ngo / /chos nyan pa dang / phreng ba rgyud pa dang / gtsug lag khang dang / mchod rten gyi gan du 'gro ba dang / g.yog byin pa sbyin pa'i pha rol tu phyin pas bsdus pa de'i 'bras bus phyag gi mthil gnyis su 'byung ngo //'khor lo rtsibs stong dang ldan pa mu khyud can lte ba dang bcas pa zhes bya ba gang gi tshe 'di gsum yongs su ma rdzogs pa de'i tshe ni mtshan de dag gis 'khor los sgyur bar gyur nas rab tu 'byung bar 'gyur ro//de'i tshe ni mngon par rdzogs par 'tshang mi rgya ste/ dper na rgyal po shang ka zhes bya ba la sogs pa lta bu'o/ /gang gi tshe de dag thams cad rnam pa thams cad du yongs su rdzogs par gyur pa de'i tshe mngon par rdzogs par 'tshang rgya ste/de bas na rnam pa thams cad yongs su rdzogs pa de na zhes gsungs so/ /de la mdo sde gzhan dag las mtshan gzhan dang gzhan dpal be'u dang / bkra shis dang / sdong ris dang / bum pa gang ba dang nya sbrel ba dang rgyal mtshan dang / dung dang / khri bzang po dang / gdugs dkar po dang / rnga yab la sogs pa dag kyang ma bstan tam zhe na / de yang bden mod kyi gtso bor gyur pa 'khor lo'i mtshan dang ldan pa bstan na de dag kyang bstan par 'gyur ro/ /de bzhin gshegs pa'i zhabs gnyis la mi snang ba'i mtshan bzang po thams cad med pa yang ma yin gyi/mtshan gyis 'khor lo de dag nyid bsdu ba'i phyir/ rnam pa thams cad yongs su rdzogs pa'o zhes bya bar bstan to zhes kha cig smra'o/ /de ni g.yog 'khor shin tu mang ba'i snga ltas so zhes bya ba ni 'khor los sgyur ba dang / sangs rgyas rnams thun mong ste/'khor lo ni mu khyud nas bzung ste rtsibs dang ldan pa'i dbang gis g.yog 'khor shin tu mang ba dang mthun no/ /zhabs shin tu gnas pa zhes bya ba ni 'di ltar gzhan dag ni sa mi mnyam pa'am/ rkang pa'i mthil mi mnyam pa dang / 'dod chags la sogs pa spyod pa'i dbang ngam/rkang pa'i rtse mo'am/ rkang pa'i zur gnyis sam/ rting pas sa la 'dzugs shing 'gro/ /mchong zhing 'gro la dbus su yang skabs 'byung bar 'gyur gyi/ sangs rgyas bcom ldan 'das rnams kyi ni de lta ma yin te/ zhabs kyi mthil thams cad mnyam par sa la 'bab par gshegs pa dang mnyam par sa la reg pa la zhabs shin tu gnas pa zhes bya ste/sa chen po thams cad kyang mthon dman dang / gseg ma dang / rdo ba dang / chu dang / 'dam rdzab dang / tsher ma dang / khung la sogs pa med par mnyam pas gnas shing /'jig rten gyi khams brgya stong du ma'i dbang gis/ thag ring ba dag kyang nye bar 'gyur ro/ /sngon gyi las bstan pa la/ yi dam la brtan pas zhes bya ba ni bden pa dang / gtong ba dang / nye bar zhi ba dang / shes rab kyi byin gyi rlabs kyi dbang gis/ rtsom pa thams cad la sus kyang mi 'phrogs pa'i phyir de skad ces bya'o//de ni mi g.yo ba'i snga ltas so zhes bya ba ni bdud dang / phyir rgol ba dang / mu stegs can la sogs pa thams cad kyis mi g.yos pa'o/ /phyag dang zhabs dra bas 'brel ba zhes bya ba ni phyag gi sor mo'i tshigs dang po nas phyag sor gyi bar phra seng seng po med pa/sor gdub la sogs pa'i rgyan kyang gzhug tu rung ba ste/ rnam pa thams cad du mdzes pa'i dra bas 'brel ba'o/ /sngon gyi las dang / bsdu ba'i dngos po bzhi po dag kun du bsten pas zhes bya ba ni sbyin pas bsdu ba la sogs pa'i dbang gis ni phyag gnyis dra ba can du gyur to//de las gzhan pa don spyod pa la sogs pa'i dbang gis ni zhabs gnyis dra ba can du gyur to zhes 'chad do/ /yang na phyag gnyis kyis ni sdud par 'gyur ro/ /bsdus pa'i sems can rnams kyis zhabs gtugs pa las gyur to//sor mo'i rnam pa seng seng po med pa zhes bya bar gzung ngo / /legs par sdud cing 'jam par gyur pa'i phyir 'di dag bsdu ba'i dngos po dang mthun no/ /myur du 'du ba zhes bya ba ni 'khor brgyad chos bshad pa la myur du 'du'o zhes bya ba'i tha tshig go//kha cig ni phyag dang / zhabs dra bas 'brel ba la gzhan du 'chad de/ sangs rgyas bcom ldan 'das rnams kyi phyag mthe bo gnyis ma gtogs par/ sor mo thams cad kyi rtse mo mnyam pa yin te/ sor mo dag kyang nas dang nas su 'brel ba'i mtshan nyid can la/mnyam par gnas te/ skar khung gi dra ba dang / ka ba'i rtse mo mnyam pa bzhin du sor mo thams cad la/ nas kyi mtshan thams cad mnyam par snang zhing / dra ba bzhin du snang ba'i phyir phyag dang zhabs dra bas 'brel ba zhes 'chad do/ / sems can phra mo dag /de bzhin gshegs pa'i zhabs gnyis kyis reg na shin tu bde bar 'gyur zhing / shi 'phos na yang lha'i ris su skye bar 'gyur te/ zhabs dra ba can gyi mtshan de la mthu de lta bu dag kyang yod do zhes zer ro/ /phyag dang zhabs 'jam shing gzhon sha chags pa zhes bya ba la/'jam pa ni mnyen pa'o/ /gzhon sha chags pa ni mdog phun sum tshogs pa'i phyir ro/ /bdun mtho ba zhes bya ba ni phyag dang zhabs kyi bol gnyis dang / dpung mgo gnyis dang ltag pa ste/ de dag shas rgyas pa'i phyir ro/ /sngon gyi las ni bza' ba dang / btung ba dang / bldags pa dang / bca' ba gya nom pa rnams zhes bya ba ni gya nom pa byin pas phyag dang / zhabs 'jam zhing gzhon sha chags par 'gyur ro / /bza' ba'i dngos po mang du byin pas ni bdun mtho bar gyur to/ /yang na zhabs gnyis kyis gshegs nas/ phyag gnyis kyis byin pa'i phyir ro/ /yang na phyag gnyis kyis byin nas sems can rnams bdag gi zhabs la gzhol bar byas pa'i phyir phyag dang zhabs gnyis de lta bur gyur to/ /bdun mtho ba ni khams bdun tshim par byas pa dang mthun pa'i phyir ro/ /las gcig gis mtshan gnyis 'byung bar ji ltar shes par bya zhe na/las gcig yin du zin kyang shin tu cher byas shing bstsags pas mtshan gnyis sam gsum yang 'grub par 'gyur zhes bshad do/ /sor mo ring ba zhes bya ba ni ha cang ring ba dang / ha cang thung ba dang / ha cang sbom pa dang / ha cang phra ba dang yo ba la sogs pa sor mo'i skyon rnams spangs shing skyon med la/phyag gi mthil dang 'tsham pa/ tshad dang ldan pa sor mo mthar gyis shas rgyas te/ rtse mo phra ba gang yin pa de la sor mo ring ba zhes bya'o/ /rting pa'i skyon thams cad dang bral ba/ tshad dang ldan pa/ zhabs dang 'tsham pa'i rting pa dang ldan pa'i phyir/ rting pa yangs pa ste/ de la zhabs kyi mthil thams cad la cha bzhir byas pa las/ cha gsum ni zhabs/ cha gcig ni rting par gyur na tshad dang ldan pa zhes bya'o/ /chu zheng gab pa phun sum tshogs pa dang phang mtho ba'i phyir sku che ba'o//mi gzhan ltar phrag pa dang / rked pa dang pus mo rnams las gang yang rung ba 'am/ mdun dang rgyab dang glo gye gu dang ya yo med pa'i phyir sku drang ba'o/ /sor mo ring ba dang / rting pa yangs pa zhes bya ba 'di la ring ba dang yangs pa'i sgra ni ran pa dang rkyen du bab pa'i tshig yin gyi/ha cang ring ba dang ha cang yangs pa'i sgra ni ma yin no/ /sngon gyi las bshad pa yang / gsad pa las thar par byas pa dang / bza' ba dang btung ba la sogs pa byin pas srog gi rim gro byas pa dang / srog gcod pa spangs pa kun tu bsten pas zhes bya ba 'di la yang gsad par gyur pa'i mi rnams tshe thung ba las thar par byas pas tshe tha mal par gnas kyi/glo bur du tshe ring bar 'gyur ba ni ma yin no/ /de bzhin du 'tsho ba'i yo byad rnams byin pas kyang tshe thung ba med par byas pa yin gyi glo bur du tshe ring du byas pa ni ma yin no//de bzhin du 'dir yang rting pa dang / sor mo dag thung ba med pa nyid ring ba yin gyi/ lhag par ring ba ni ma yin no/ /khru bdun du 'phags par mtho ba zhes bya ba ni mi tha mal pa'i lus pas 'phags par mtho ba ste/ sku tha mal pa'i tshad la bya'o//spyi gtsug bltar mi mthong ba'i phyir bcom ldan 'das kyi gzugs kyi sku'i tshad nges par bya mi nus so/ /srog gcod pa spangs pas lus kyi las mi drang ba med pa'i phyir sku drang po dang mthun no/ /zhabs 'bar 'bur med pa zhes bya ba ni pus mo'i tshigs dang /long mo'i tshigs kyi rus pa mtho ba la 'bar 'bur can zhes bya ste/ de med cing shin tu mngon la rab tu nub pa gang yin pa de la zhabs 'bar 'bur med pa zhes bya'o/ /gzhan dag gi ni rus pa de gnyis che bas rkang pa dang / byin pa mi sdug pa yin no/ / mi mnyen pas 'gro na mi bde ste 'gros mi sdug par 'gyur ro/ /bcom ldan 'das kyi tshigs mi mngon pas byin pa mdzes so/ /mnyen pas 'gros sdug pa yin no/ /gzhan dag na re mi phal rnams kyi long bu'i rus pa ni rkang pa'i rgyab logs su 'byung ste/ de bas na de dag gi rkang pa gzer btab pa 'dra la/mi mnyen pas ci bder bsgyur du mi rung la 'gro ba na yang rkang pa'i mthil mi snang ngo zhes zer ro/ /skyes bu chen po rnams kyi long mo'i rus pa ni zhabs kyi gong bas mtho ba'i phyogs su 'byung ngo / /de dag gi sku yang ro smad 'ba' zhig g.yo'i/ ro stod g.yo bar mi mngon no//zhabs kyang bde blag tu bsgyur du rung la/ mdun rgyab dang / g.yas g.yos su 'dug ste bltas kyang zhabs kyi mthil snang zhing 'gros sdug go/ /sku'i spu gyen du phyogs pa zhes bya ba ni skyes bu chen po rnams kyi sku'i spu rnams spu'i khung bu nas skye ba na/ zhal bzang po la gyen du lta ba 'dra bar rtse mo gyen du lta zhing skye ba'o//sngon gyi las kyang dge ba'i chos blangs pa rnams ji ltar gong nas gong du 'phel bar 'gyur ba de bzhin du zhabs kyi phyogs mtho ba dang / spu kha gyen du lta zhing mthon por 'byung ba dang mthun no/ /byin pa ri dgas e na ya'i lta bu zhes bya ba ni ri dgas e na ya'i byin pa dang 'dra ba gang yin pa de la ri dgas e na ya'i lta bu zhes bya'o//mi phal gyi byin pa ni phyogs gcig tu sha rlo bor gyur pa'am/ yo ba'am/ ha cang sbom pa'am/ ha cang ring ba'am thung ba yin gyi/ skyes bu chen po rnams kyi ni sha mkhregs la byin gyis phra zhing dbyibs snyoms pa dang /shin tu zlum zhing chu zheng gab pa ste/ sor bco brgyad tsam gyi phyogs na yod do/ /sngon gyi las kyang bzo'i las dang rig pa'i gnas rnams gus par byas shing byin pas slob ma de rnams 'phel zhing rgyas par gyur pa dang / yo byad rnams byin pas de dag stobs dang ldan par gyur te/de dang mthun par sha skyes pa'i phyir byin pa ri dgas e na ya'i lta bur gyur to/ /de ni myur du 'dzin pa'i snga ltas so zhes bya ba ni skyes bu chen po de sangs rgyas kyis gsungs pa thams cad myur du 'dzin cing / de bzhin gshegs pa yang sems can thams cad kyis zhus pa'i rgyun rnams skad cig gcig gis 'dzin to//phyag sbom zhing ring ba zhes bya ba la/ sbom pa ni sbom lag che ba'i phyir ro/ /ring ba ni pus mor slebs pa'i phyir khrun ring ba'o/ /sngon gyi las kyang phyag brkyang ste ring du byas nas gzhan la sbyin pa byin pa dang /sbyin par bya ba'i chos rgya che ba'i phyir mthun no/ /mdoms kyi sba ba sbubs su nub pa zhes bya ba la/ mdoms kyi sba ba ni mdoms su sba ba yin pas mdoms kyi sba ba ste/ mdoms kyi sba ba sbubs su nub cing / mi mngon pa gang yin pa de la mdoms kyi sba ba sbubs su nub pa zhes bya ste/gser gyi pad+ma'i snying po sbubs su nub pa 'dra bar mdoms kyi sba ba'i phyogs sbubs kyi nang du mi mngon par gyur ces bya ba'i tha tshig go/ /sngon gyi las kyang mdza' bshes dang gnyen 'dab la sogs pa 'dum par byas pa dang / ma phye ba'i phyir sbubs dang sba ba dag de ltar mthun par gyur to/ /gsang thub par byas pas sba ba'i phyogs mi mngon par gyur te mthun no/ /mdog gser 'dra ba zhes bya ba 'dis ni sku mkhregs shing snum la kha dog rab tu gsal bar bstan to/ /pags pa srab ces bya ba 'dis ni phyi dang nang gi rdul dang dri ma la sogs pas sku la gos pa med par bstan to//phyag dang zhabs bkru ba dang khrus bya ba la sogs pa ni der rim gro pa rnams bsod nams thob par bya ba dang / dus su bde bar bya ba'i phyir kun rdzob kyi tha snyad kyi phyir mdzad do/ /spu re re nas skye zhing g.yas su 'khyil pa zhes bya ba ni spu'i khung bu gcig nas spu gcig kho na skye bas na spu re re skye ba'o//kyil kyil por 'khyil ba ni g.yas phyogs su 'khyil ba ste/ rgyan gdub kor sbrul 'khyil ba lta bu'am/ sbrul 'khyil ba'i zlum pa lta bu ste/ gnyis ka yang g.yas su 'khyil ba'o//zhal la mdzod spu'i mtshan mnga' ba zhes bya ba ni smin mtshams kyi thig le'i gnas na spu mnyen zhing 'jam la kha dog dkar zhing snum pa/ drangs na khru gang ngam khru do 'am khru gsum la sogs pa'i srid du 'byung la slar btang na/ g.yas su 'khyil ba rtse mo gyen du phyogs pa dang /shing tog skyu ru ra tsam la dngul gyi sgo nga 'dra ba gang gi zhal na mdzes par 'dug pa de la zhal la mdzod spu'i mtshan mnga' ba zhes bya'o/ /mtshan 'di gnyis kyi sngon gyi las kyang / 'du 'dzi spangs pas ni spu re re bar gyur to/ /pha ma la sogs pa ji ltar rigs pa'i gnas su bkod pa dang /rim gro byas pa dang / sbyin pa byin pa dang / ma mgu bar ma byas pa la sogs pas g.yas su 'khyil zhing ring ba dang / dbyibs legs par gyur to/ /ro stod seng ge'i lta bu zhes bya ba ni de'i ro stod seng ge'i ro stod 'dra ba'i phyir seng ge'i ro stod lta bu ste brang gi dbyes yangs shing che la sha rgyas pas spangs shing che ba phun sum tshogs pa'i phyir de skad ces bya'o//dpung mgo legs par grub pa zhes bya ba la/ legs pa'i sgra ni zlum pa la bya'o/ /grub pa'i sgra ni mgul pa rtsa'i dra ba mi mngon pa bstan pa ste/ gser gyi bum pa'i mgul pa ltar yongs su zlum zhing shin tu mkhregs zhes bya ba'i tha tshig go/ /sngon gyi las kyang mi snyan par mi zer ba ni seng ge'i tshul dang 'dra ba dang / mgul mdzes pa'i rgyu yin no/ /gzhan la mi smod pa ni seng ge ltar yangs pa'i rgyu'o/ /snyan par smra ba dang /legs par smra ba brjod pa dang / seng ge'i sgra dang mthun par smra ba ni lkog ma mdzes pa'i rgyu'o/ /thal gong rgyas pa zhes bya ba ni thal gong rgyas shing yangs pa'o/ /ro bro ba mkhyen pa zhes bya ba ni ro drug po dag gi ro bro ba mkhyen pa la ro bro ba mkhyen pa zhes bya'o//skabs 'dir mkhyen pa ni dga' ba la bya ste/ phar 'dzin mar 'dzin zhes bya ba la sogs pa bzhin du/ ro rnams kyis dga' zhing tshim par gyur pa'i phyir ro bro ba shes pa zhes bya ste skyes bu chen po rnams kyis mid pa na ni ro tshor bar byed pa'i rtsa bdun stong gyen du lta ba yod do//tha na til gyi 'brum bu tsam zhig gsol na yang sku thams cad du khyab par 'gyur ro/ /ro thams cad kyi zhal du bcug na/ bdud rtsi'i ro dang 'dra bar 'gyur te/ de ni mtshan gyi las so/ /sngon gyi las dang mthun pa ni go sla'o/ /shing n+ya gro d+ha ltar chu zheng gab pa zhes bya ba 'di la kha cig na re n+ya gro zhes bya ba ni ngan pa ste/ro smad la bya'o/ /ro d+ha zhes bya ba ni ro stod do/ /chu zheng gab pa zhes bya ba ni mthun pa la bya ste/ gang gi sku lte ba nas bzung ste/ ro stod dang ro smad tshad mnyam par gyur pa de la n+ya gro d+ha ltar chung zheng gab pa zhes bya ba'o zhes zer ro//gzhan dag na re n+ya gro zhes bya ba ni sku'i dbu nas zhabs kyi bar gyi tshad la bya'o/ /ro d+ha ni zheng la bya'o/ /chu zheng gab pa zhes bya ba ni 'dom la bya ste/ de la gang gi sku'i chu zheng 'dom dang mnyam par gyur pa de la n+ya gro d+ha ltar chu zheng gab ces bya'o zer ro//gzhan dag ni shing n+ya gro d+ha zhes bya ba sdong po dang yal ga rnams chu zheng mnyam pa zhig yod de/ de dang 'dra bar skyes bu chen po rnams kyi sku thams cad kyang 'dom gyi tshad dang mnyam pa ni shing n+ya gro d+ha ltar chu zheng gab pa zhes bya'o zhes smra'o / / dbu gtsug tor dang ldan pa zhes bya ba ni dbu ze'u ka bcings pa dang 'dra ba la bya ste/ gzhan dag gi mgo ni yongs su ma rgyas shing mtho dman can la/ mi mnyam pa dag yod kyi/ skyes bu chen po rnams kyi dbu ni gtsug tor bzhin du snyoms shing yongs su zlum pa dang / yongs su rdzogs shing dbyibs legs pa dang /legs par rgyas pa yin no zhes 'chad do/ /gzhan dag na re mtshan 'di ni 'phral ba'i dbyes yongs su rgyas pa bstan pa'i phyir te/ skyes bu chen po rnams kyi 'phral ba ni rna ba g.yas pa'i gong nas rna ba g.yon pa'i gong gi bar du sha'i dbyibs legs pa/'phral ba'i dbyes yongs su rdzogs pa/ rgyal po gser gyi gtsug tor bcings pa 'dra bar mdzes pa'o zhes smra'o/ /sngon gyi las kyang dge ba'i las byed pa thams cad kyi thog mar 'gro ba gtso bor gyur nas khor yug tu kun dga' ra ba dang /'dun khang dang / btung ba'i gnas la sogs pa byas pa ste/ de'i phyir n+ya gro d+ha ltar chu zheng gab pa'o/ /gang gi phyir tshogs kyi gtso bor gyur nas/ ma zhum par mgo bstod de 'jig pa med par sbyor ba de'i phyir dbu gtsug tor can du gyur to/ /de bas na mnga' dbang chen po mnga' ba'i snga ltas zhes bya'o//ljags ring zhing srab pa zhes bya ba ring ba ni che ba'am khrun ring ba'o/ /srab pa ni mnyen pa'o/ /tshangs pa'i dbyangs zhes bya ba ni tshangs pa'i dbyangs dang mtshungs pa'am/ dbyangs mchog yin pa'i phyir te/ bya ka la ping ka'i gsung zhes bya ba ni bya ku ra ba'i skad lta bu'o//zla ba'i dkyil 'khor ma nya ba tshes bcu gnyis kyi shas 'dra bar 'gram pa'i mtha' sha mkhregs shing legs par zlum pa'i phyir 'gram pa seng ge'i lta bu'o/ /skar ma pa ba sangs pas kyang lhag par 'od gsal zhing dkar ba'i phyir tshems shin tu dkar ba'o//mthon dman dang mi mnyam pa med pa'i phyir tshems mnyam pa'o/ /tshems kyi mtshams dod pa la sogs pa med cing sdug pa'i phyir tshems thags bzang ba'o/ /mi gzhan dag gi so ni sum cu rtsa gnyis sam nyi shu rtsa brgyad yod kyi/ de las bzlog pa ni grangs bzhi bcu tshang ba'i phyir tshems bzhi bcu mnga' ba'o//spyan mthon mthing zhes bya ba ni/ spyan gyi dkyil 'khor gyi nang gi 'bras bu snum zhing gnag pa ste/ 'bras bu nag po'i mtha' gnyis dkar la/ rdzi ma gnyis gnas pa'i skabs snum zhing mthing kar 'dug pa/grwa gnyis chung zad dmar ba/ rdzi ma dang spyan gyi bar gser gyi mdog lta bu ste/ de ltar dang ba rnam pa lnga dang ldan du zin gyis kyang spyan gyi dkyil gtso bo yin pa'i phyir spyan mthon mthing zhes bya'o/ /be'u 'brangs ma thag pa gzhon nu'i rdzi ma dang 'dra bar rdzi ma bla 'og gi mdog shin tu snum zhing ma 'dzings pa'i phyir ba'i rdzi ma lta bu'o// //bam po nyi shu drug pa/ dpe byad bzang po brgyad cu zhes bya ba ni mtshan rnams rjes su 'byed par byed pa'am/ mtshan dang rjes su mthun par phye ste/ skyes bu chen po yin par ston pa'am/rjes su mthun par mdzes par byed pa'i phyir dpe byad bzang po zhes bya'o/ /sangs rgyas bcom ldan 'das rnams sen mo zangs kyi mdog lta bu yin zhes bya bas dpe byad bzang po bstan to/ /'du byed thams cad las dben pa zhes bya ba ni de'i rgyu mthun pa ste/de bzhin du thams cad la yang sbyar bar bya'o/ /pha rol tu phyin pa drug po de dag gis byang chub sems dpa' sems dpa' chen pos snyan par smra bas sems can rnams sdud do zhes bya ba ni tshig snyan pa rnams kyis btsud nas/ pha rol tu phyin pa drug po dag gis sdud par byed pa ste/de bas na snyan par smra bar bgrang ngo / /pha rol tu phyin pa drug po de dag nyid kyis don spyad pas sems can rnams sdud do zhes bya ba ni don bya ba'i bsam pas de sngon du btang bas pha rol tu phyin pa drug po dag gis sdud pa ste/ de bzhin du phyi ma rnams la yang sbyar bar bya'o//yi ge gcig mngon par sgrub pa la mkhas par gyis shig ces bya ba ni gzod ma nas ma skyes pa'i phyir a ni chos thams cad kyi sgo'o zhes bya ba la sogs pa yi ge'i gzungs kyi sgo'i rim pas yi ge gcig gis mtshan ma med pa'i ting nge 'dzin mngon par sgrub pa la mkhas par bya ba'o//yi ge gcig gis thams cad 'grib pa dang ldan par rjes su gtogs par gyis shig ces bya ba ni 'grib pa dang ldan pas 'grib pa dang ldan pa ste/ 'dus byas kyi chos rnams yongs su 'gyur ba dang ldan pa zhes bya ba'i tha tshig go//yi ge gcig tu yi ge bzhi bcu rtsa lnga 'dus par sgoms shig ces bya ba ni skye ba med pa'i ting nge 'dzin sgrub pa a zhes bya ba'i nang du yi ge thams cad kyi ting nge 'dzin 'dus par sgoms shig ces bya ba'o/ /yi ge bzhi bcu rtsa lnga rnams su yi ge gcig 'dus par sgoms shig ces bya ba ni yi ge bzhi bcu rtsa lnga'i ting nge 'dzin a zhes bya ba nyid du sgoms shig ces bya'o//rab 'byor chos thams cad ni yi ge med pa'i rnam pas sprul pa'o zhes bya ba ni chos kyi dbyings brjod du med pa'i rnam pas bskyed ces bya ba'i tha tshig go//ji ltar byang chub sems dpa' sems dpa' chen po rnam par smin pa las byung ba'i shes rab kyi pha rol tu phyin pa la spyod pa dang zhes bya ba la sogs pas 'di skad gsol te/ gal te rnam par smin pa las byung ba la spyod na rnam par smin pa las byung ba rnam par mi rtog pa'i phyir sems can rnams dang /chos rnams mi dmigs te mi snang na chos bshad pa ji ltar 'byung / yod pa ma yin pa'i byang chub kyi phyogs kyi chos rnams la sbyor na ji ltar phyin ci log la sbyor bar mi 'gyur zhes zhus pa'o/ /de skad zhus pa dang /bcom ldan 'das kyis rab 'byor de de bzhin no de de bzhin te zhes bya ba la sogs pas de'i tshig la mngon par dgyes par mdzad nas/ de ltar chos de dag thams cad stong par mthong nas sems can rnams la chos ston te zhes bya ba la sogs pas ni rab 'byor sems can dang /chos rnams stong pa de ni bden mod kyi/ 'on kyang de dag stong pa nyid du sems can rnams kyis mi shes pas/ de shes par bya ba'i phyir bcom ldan 'das chos ston te chos ston pa na yang ci nas kyang stong pa nyid de 'khrug par mi 'gyur ba de ltar chos ston to zhes de skad bstan pa yin no//des chos thams cad sgrib pa med par yang dag par rjes su mthong zhes bya ba ni kun brtags pa'i sgrib pa rnams dang bral shing shin tu yongs su dag par mthong ngo zhes bya ba'i tha tshig go/ /de bzhin gshegs pa'i sprul pa'i dpe yang rjes su mthun par zad do//ma bcings ma grol ba zhes bya ba ni dri ma dang bcas pa'i gnas skabs na chos nyid kyi gzugs kun brtags pas rang bzhin gyis dben pa'i phyir ma bcings pa'o/ /dri ma med pa'i gnas skabs na yang glo bur gyi rnam par byang ba med pa'i phyir ma grol ba'o/ / gzugs kyi ma bcings ma grol ba nyid gang yin pa de gzugs ma yin no zhes bya ba ni ma bcings pa nyid dang ma grol ba nyid ces bya ba yongs su grub pa'i gnas skabs yin te/ de kun brtags pa'i gzugs kyi ngo bo nyid ma yin no zhes bya ba'i tha tshig go/ /shin tu rnam par dag pa zhes bya ba ni rang bzhin nyid kyis zhes bya bar dgongs pa'o//dngos po med pa yang dngos po med pa la mi gnas so zhes bya ba ni mi brten pa'i phyir te/ dper na nam mkha' la nam mkha' mi gnas pa lta bu'o/ /rang gi dngos po yang dngos po med pa la mi gnas te med pa'i phyir/dper na ri bong gi rwa la sogs pa rno ba mi gnas pa lta bu'o/ /gzhan dag gi dngos po yang dngos po med pa'am/ rang gi dngos po la mi gnas te/ gzhan gyi dngos po dang rang gi dngos po gnyis ka yang med pa'i phyir ro/ /de bzhin du gzhan dag la yang sbyar bar bya'o//'di ltar sangs rgyas bcom ldan 'das de dag dang / byang chub sems dpa' rnams dang / rang sangs rgyas rnams dang / nyan thos rnams kyis kyang chos rnams kyi chos nyid 'di nyid rtogs te zhes bya bas ni thams cad kyang chos mngon par rtogs pa gcig pa nyid do zhes ston to//chos rnams kyi chos nyid de las kyang mi 'da'o zhes bya ba ni chos 'chad pa'i tshe de dag las mi 'da' ba'o/ /rab 'byor chos kyi dbyings ni 'da' ba med do/ /de bzhin nyid dang / yang dag pa'i mtha' ni 'da' ba med do zhes bya ba ni sangs rgyas bcom ldan 'das rnams kyi chos kyi dbyings ni chos kyi sku ste 'da' ba med do//byang chub sems dpa' rnams kyi de bzhin nyid 'da' ba med do/ /rang sangs rgyas dang / nyan thos rnams kyi yang dag pa'i mtha' la 'da' ba med do zhes bya bar bye brag tu phye ste gzung bar bya'o//'di ltar de dag la gang 'da' bar 'gyur ba'i rang bzhin med do zhes bya ba ni 'da' bar bya ba'i ngo bo nyid med do zhes bya ba'i tha tshig go/ /bcom ldan 'das gal te chos kyi dbyings dang / de bzhin nyid dang / yang dag pa'i mtha' las 'da' ba ma mchis na zhes bya ba la sogs pas 'di skad zhus te/gzugs dang tshor ba la sogs pa ni rnam par 'gyur ba'i ngo bo nyid yin pas 'da' bar snang na/ 'di ltar gzugs la sogs pa la ni 'da' ba yod kyi/ chos kyi dbyings la sogs pa la ni med na de'i tshe ci gzugs la sogs pa dang /chos kyi dbyings la sogs pa la tha dad pa yod dam zhes zhus pa'o/ /de nas bcom ldan 'das kyis rab 'byor de ni ma yin no zhes bya ba la sogs pas gzugs dang tshor ba la sogs pa'i chos rnams dang / chos kyi dbyings la sogs pa gsum tha dad pa med par bstan to//de'i dgongs pa ni 'di yin te don dam pa'i gzugs la sogs pa la ni 'da' ba med do zhes bya ba'o/ /de nas gnas brtan rab 'byor gyis bcom ldan 'das gal te gzugs kyang gzhan ma lags/ chos kyi dbyings kyang gzhan ma lags na zhes bya ba la sogs pas 'di skad zhus te/gal te gzugs dang tshor ba la sogs pa dang / chos kyi dbyings la sogs pa la tha dad pa med na/ 'o na ni chos kyi dbyings la sogs pa bzhin du chos thams cad 'dus ma byas pa yin pa'i phyir dge ba dang mi dge ba'i las rnams kyi 'bras bu rnam par dgod pa med par 'gyur ro zhes zhus pa'o//de nas bcom ldan 'das kyis rab 'byor kun rdzob kyi bden pa nye bar bzung ste zhes bya ba la sogs pas 'di skad gsungs te/ chos thams cad 'dus ma byas pa'i ngo bo nyid yin du zin kyang /'on kyang byis pa kun brtags pa'i spyod yul du byed pa rnams la/ dge ba dang mi dge ba kun brtags pa rnams yod de/ de'i dbang gis rnam par smin pa dkar po dang nag po yang yod do/ /de'i dbang gis bcom ldan 'das kyis kun rdzob kyi bden pa'i tshul du de dag bshad kyi/don dam par ni chos thams cad de bzhin nyid kyi ngo bo nyid yin pas/ las dang rnam par smin pa rnam par dgod pa bstan par mi nus so zhes bya ba ni don dam par rnam par mi rtog pa'i phyir ro/ /chos de ni rnam par mi rtog pa brjod du mi rung bas brjod du med pa ste/ 'di ltar ming dang gzugs ni skye ba med pa dang / 'gag pa med pa dang kun nas nyon mongs pa med pa dang / rnam par byang ba med pa ste zhes bya ba ni gzugs med pa'i chos rnams dang gzugs kyi chos rnams kyi nang nas ming zhes bya ba dang / gzugs zhes bya ba smos pa ni kun rdzob kyi bden pa'i tshul lo//don dam par de bzhin nyid de ni yongs su grub pa yin pa'i phyir rnam par mi rtog pa'o/ /brjod du med pa'i phyir brjod du mi rung ba'o/ /'dus ma byas pa'i phyir skye ba med pa'o/ /skye ba med pa'i phyir 'gag pa med pa'o/ /rang bzhin gyis dben pa'i phyir kun nas nyon mongs pa med pa'o//rang bzhin gyis yongs su dag pa'i phyir rnam par byang ba med pa'o/ /'di ni mtha' las 'das pa stong pa nyid dang / thog ma dang tha ma med pa stong pa nyid do zhes bya ba ni rnam par mi rtog pa la sogs pa de dag nyid stong pa nyid rnam pa gnyis su brjod do zhes bstan pa'o//rab 'byor gyis gsol pa/ bcom ldan 'das gal te kun rdzob kyi bden pa nye bar bzung ste 'bras bu rnam par dgod pa mchis kyi zhes bya ba la sogs pas 'di skad zhus te/ gal te yang dag pa ma yin par 'bras bu rnam par dgod par bya na/byis pa so so'i skye bo la sogs pa yang rgyun du zhugs pa'i 'bras bu la sogs par ci'i phyir rnam par mi dgod ces bya'o/ /de nas bcom ldan 'das kyis/ rab 'byor ci byis pa so so'i skye bo rnams kyis kun rdzob kyi bden pa'am/don dam pa'i bden pa shes sam zhes bya ba la sogs pas 'di skad bka' stsal te/ 'bras bu rnam par dgod pa med du zin kyang kun brtags pa rnams yongs su shes pa nyid kyi phyir kun brtags pa'i rgyun du zhugs pa'i 'bras bu la sogs pa rnam par dgod pa yod do//byis pa so so'i skye bo rnams la ni de yongs su shes pa med de/ de'i phyir lam sgom pa yang med do/ /de bas na de dag la 'bras bu rnam par dgod pa yang mi bya'o/ /'phags pa'i gang zag rnams la ni yongs su shes pa yod pas de'i phyir de dag nyid la lam dang lam ma yin pa dang /'bras bu rnam par dgod par bya'o/ /gnas brtan rab 'byor gyis/ bcom ldan 'das ci lags lam la bsgoms pas 'bras bu 'byung bar 'gyur ram zhes bya ba la sogs pas ci lam bsgoms pa'i rgyus 'bras bu 'byung bar 'gyur ram/'bras bu thob par 'gyur ram zhes de skad zhus te/ de ltar gyur na de yang don dam pa nyid du 'gyur ro zhes bya'o/ /de nas bcom ldan 'das kyis/ rab 'byor de ni ma yin te/ lam bsgoms pas 'bras bu 'byung bar mi 'gyur/ 'bras bu thob par mi 'gyur te zhes bya ba ni/lam dang 'bras bu gnyis ka yang kun brtags pa yin pas bsal ba bka' stsal to/ /rab 'byor lam ma bsgoms pas kyang 'bras bu thob par mi 'gyur te zhes bya ba ni kun brtags pa yin du zin kyang nges pa bstan pa'o/ /lam gyis 'bras bu thob par bya ba yang med do//lam ma yin pas kyang thob par mi 'gyur/ lam la yod pa'ang ma yin zhes bya ba ni chos nges par gyur pa nyid bstan pa'o/ /chos kyi dbyings la char bcad pa'i tshul gyis 'bras bu rnam par dgod pa ni ma yin no zhes bya ba ni chos kyi dbyings la de ltar cha shas su bcad de rnam par dgod pa don dam par med do zhes bya ba'i tha tshig go//bcom ldan 'das gal te 'dus byas dang / 'dus ma byas kyi khams dag la char bcad pa ma mchis na zhes bya ba la sogs pas gnas brtan gyis 'di skad zhus te/ ci'i phyir spong ba dang /lam dang / 'bras bu dag ris su bcad de/ rnam par dgod par byas zhes bya'o/ /de nas bcom ldan 'das kyis/ rab 'byor ci rgyun du zhugs pa'i 'bras bu'am zhes bya ba la sogs pas 'di skad bka' stsal te/ de dag la ni don dam par yongs su shes pa dang /rab tu rtogs pa'i rim pa med pa nyid de/ 'di ltar rgyun du zhugs pa'i 'bras bu la sogs pa de dag ni 'dus ma byas pa ste/ de dag la rim par dbye ba nyid med do/ /de bas na de dag thams cad stong pa nyid du rab tu rtogs pa na char bcad pa med do/ /bcom ldan 'das ji ltar na chos rnams kyi chos kyi mtshan nyid rab tu rtogs pa lags zhes bya ba ni gal te don dam par char bcad pa de rab tu rtogs pa med na zhes bya ba'i tha tshig go//bcom ldan 'das sprul pa'i lam sgom pa ji lta bu lags zhes bya ba ni sprul pa dper bstan pa zhus pa'o//rab 'byor lam bsgoms pa gang la brten nas zhes bya ba la sogs pas sprul pa'i dpe nyid sgrub po/ /bcom ldan 'das ji ltar na byang chub sems dpa' sems dpa' chen pos chos thams cad dngos po ma mchis par rab tu rtogs par 'gyur zhes bya ba ni med pa la ji ltar rab tu rtogs te/ri bong gi rwa la sogs pa rab tu rtogs par mi 'grub po zhes bya ba'i tha tshig go/ /de bzhin gshegs pa'i sprul pa dngos po 'ga' zhig la brten te/ kun nas nyon mongs par 'gyur ba'am/ rnam par byang bar 'gyur ba'i dngos po gang yang dmigs su yod dam zhes bya ba 'dis de bzhin gshegs pa la kun nas nyon mongs pa med cing rnam par byang ba med pas 'gro ba dang thar pa mtshungs pa'i phyir rab tu rtogs pa yang med de/med pa nyid du gzhag pa tsam du zad pa'i phyir ci yang ma yin no zhes bstan to//bcom ldan 'das gang gis sems can rnams 'khor ba las thar bar bgyi ba'i 'gro ba lnga'i 'khor ba yang ma mchis lags na ji ltar byang chub sems dpa'i skyes bu'i mthar 'gyur zhes bya ba ni 'khor ba rang bzhin gyis yang dag par yod pa ma yin pa'i phyir ngo bo nyid kyis grol ba'o zhes bya ba'i tha tshig go//de nas bcom ldan 'das kyis/ rab 'byor de ji snyam du sems zhes bya ba la sogs pas 'di skad bka' stsal te byang chub sems dpa' ni sems can nam 'khor ba mi mthong ngo / /rmi lam la sogs pa'i dpe de dag gis sngon mthong mod kyi/'on kyang de dag med par sems can rnams kyis mi shes te/ de bas na de dag shes par byed pa ni de'i skyes bu'i mthu yin no zhes bstan te / de nyid rab 'byor gal te/ sems can rnams rang rang gis chos thams cad rmi lam lta bu nas/sprul pa lta bu'i bar du shes su zin na ni zhes bya ba la sogs pas ston to/ /chos thams cad kyi rang bzhin ni ming ste gzhol ba'i phyir ro zhes bya ba ni kun brtags pa'i chos thams cad kun brtags pa'i rang bzhin la ming zhes bya ste/ 'di ltar sems can rnams kyi blo de la/de bzhin du gzhol ba'am/ blo la rang bzhin de gzhol ba'o/ /mtshan ma med pa yang gzhan la/ nyan thos kyi chos rnams kyang gzhan nam zhes bya ba la sogs pas bcom ldan 'das kyis 'di skad du/ gal te chos thams cad mtshan ma med pa yin la/nyan thos kyi chos la sogs pa mtshan ma dang bcas par rnam par bkod par gyur na/ de lta na ni skyon du yang 'gyur na / 'di ltar de dag thams cad ni mtshan ma med pa ste/ de'i phyir nyes pa med do zhes ston to/ /des chos kyi dbyings rnam par dkrugs par mi 'gyur lags sam zhes bya ba ni mtshan nyid med pa rnams la/mtshan nyid du rtogs na/ de bzhin nyid kyi bdag nyid can la so sor tha dad du 'dzin pa'i phyir ro zhes bya ba'i tha tshig go/ /rab 'byor gal te/ chos kyi dbyings su ma gtogs pa'i chos 'ga' zhig yod na ni rnam par dkrugs par yang 'gyur na zhes bya ba la sogs pas/bcom ldan 'das kyis 'di skad du/ de ltar rtog tu zin kyang phyis shes rab kyis chos kyi dbyings kyi ngo bo nyid du chos thams cad tha dad pa med par rab tu rtog ste/ de bas na rnam par dkrugs par mi 'gyur ro zhes bstan to//rab 'byor gzugs kyi khams ni chos kyi dbyings so zhes bya ba ni gzugs kyi de bzhin nyid do/ /ci gzugs la bslab par bgyi'am zhes bya ba ni chos thams cad chos kyi dbyings tsam du zad nas / gzugs la sogs pa'i chos rnams shin tu med pas/de la slob na phyin ci log dang mtshungs par 'gyur ro zhes zhus pa'o/ /chos thams cad kyi chos kyi dbyings su yang dag pa ji lta ba nyid du rab tu shes zhes bya ba la sogs pas 'di skad du/ gzugs la sogs pa'i chos rnams kyang chos kyi dbyings tsam du yang dag par rjes su mthong gi gzhan du ni ma yin no//sems can rnams la rnam pa gzhan du 'dzin du gzhug mi nus pa'i phyir gzugs la sogs pa la mtshan ma med par btags te/ thabs mkhas pas chos kyi dbyings nyid bstan to/ /rab 'byor gal te chos kyi dbyings sngon ji lta bar phyis kyang de bzhin ma yin la/bar du yang de bzhin ma yin du zin na ni zhes bya ba la sogs pas 'di skad ces bstan te/ 'di la chos kyi dbyings sngon gyi byis pa so so'i skye bo'i dus na ni ma dag pa yin/ bar du byang chub sems dpa'i dus na ni dag pa dang ma dag pa yin/phyis tha mar ni shin tu rnam par dag pa yin te/ de la de tsam du zad kyi/ des de la bye brag yod par shes par mi bya ste/ ngo bo nyid kyis dus thams cad du shin tu rnam par dag pa'i ngo bo nyid du rnam par dag pa nyid do zhes bstan pa'o/ /rab 'byor yang dag pa'i mtha' tshad mar byas nas zhes bya bas ni 'di skad du/byang chub sems dpa' ni sems can rnams kyi don du shes rab kyi pha rol tu phyin pa la mi spyod kyi/ yang dag pa'i mtha'i don du spyod do/ /'di ltar yod pa ma yin pas med pa'i sems can yongs su btang nas/yang dag pa'i mtha'i ngo bo nyid la rab tu dgod de/ sems can gyi mtha' nyid yang dag pa'i mthar byed do zhes ston to/ /bcom ldan 'das gal te yang dag pa'i mtha' nyid sems can gyi mtha' lags na zhes bya ba 'dis ni 'di skad du/ gal te yang dag pa'i mtha' ma gtogs par sems can gyi mtha' zhes bya ba med na/'o na sems can rnams dang / yang dag pa'i mtha' gcig pa'i phyir/ gang 'di skad du sems can rnams yang dag pa'i mtha' la dgod do zhes bya ba de ni mi rigs te/ de nyid de la 'god na ni yang dag pa'i mtha' la yang dag pa'i mtha' rab tu 'jog go zhes bya bar 'gyur te/de yang mi rigs so zhes zhus pa dang / thabs mkhas pas sems can gyi mtha' yang dag pa'i mtha' la 'god de/ yang dag pa'i mtha' rnam par 'khrug par yang mi byed do zhes bcom ldan 'das kyis bka' stsal te/ngo bo nyid ni ngo bo nyid la rab tu mi 'jog gi kun brtags pa'i sems can gyi mtha' dang / kun brtags pa'i sems can gyi dngos po bstsal nas/ shin tu yongs su dag pa de bzhin nyid kyi ngo bo nyid la thabs mkhas pas 'god pa la/ yang dag pa'i mtha' la rab tu 'god pa zhes bya ste/de bas na sems can gyi mtha' dang / yang dag pa'i mtha' ni tha mi dad cing gcig ste/ gnyis su med ces bya ba'i tha tshig go/ /de'i 'og tu de lta bu'i thabs mkhas pa gang lags zhes zhus pa dang / chos thams cad yang dag pa'i mtha' yin par yongs su bsngos nas/pha rol tu phyin pa drug yongs su rdzogs par byed pa ni thabs mkhas pa yin par/ rab 'byor 'di la byang chub sems dpa' sems dpa' chen po sems dang po bskyed pa nas nye bar bzung ste zhes bya ba la sogs pas ston to//pha rol tu phyin pa la gdams pa de yang go sla'o/ /bcom ldan 'das gal te chos thams cad rang bzhin gyis stong pa lags na/ rang bzhin gyis stong pa nyid la ni sems can yang mi dmigs chos dang lam yang mi dmigs na zhes bya ba la sogs pas 'di skad du/ chos thams cad rang bzhin gyis stong pa yin na sems can dang / chos dang / lam rnams med par ji ltar byang chub sems dpa' sems can yongs su smin par bya ba dang / sangs rgyas kyi chos yongs su smin par bya ba byas nas lam gyi rnam pa shes pa nyid bsgoms te/ rnam pa thams cad mkhyen pa nyid la gnas par byed ces zhus pa'o//de nas bcom ldan 'das kyis/ rab 'byor gal te chos thams cad rang bzhin gyis stong pa ma yin na zhes bya ba la sogs pas 'di skad du/ gal te chos sam/ lam dag so so na yod na ni 'ga' zhig dmigs par 'gyur ba'i rigs te/de lta na ni de bzhin du sems can dang / srog la sogs pa thams cad kyang yod par 'gyur te/ de'i phyir byang chub sems dpa' stong pa nyid la gnas pas sangs rgyas su yang mi 'gyur la/ gzugs la sogs pa'i chos thams cad stong pa nyid du bshad par yang mi 'gyur ba zhig na/'di ltar rang bzhin stong pa nyid la ni chos sam/ lam dag med de/ de'i phyir stong pa nyid de grub par 'gyur te/ de bas na stong pa nyid de la gnas nas sangs rgyas su yang 'gyur la/ stong pa nyid chos bshad par yang 'gyur te/ de bas na rang bzhin stong pa nyid kyi dbang gis rnam pa thams cad mkhyen pa nyid la 'jug pa grub po zhes ston to//de skad bka' stsal nas yang gzugs la sogs pa'i chos rnams nyi tshe stong par ma zad kyi/ nang stong pa nyid la sogs pa stong pa nyid bcu drug po dag kyang rang bzhin stong pa nyid yin par/rab 'byor gal te nang stong pa nyid rang bzhin gyis stong pa nyid ma yin na ni zhes bya ba la sogs pas ston te/ gal te nang stong pa nyid la sogs pa yang / rang bzhin gyis stong pa ma yin du zin na/ chos thams cad stong pa nyid du bshad pa mi 'grub po/ / rang bzhin stong pa nyid kyang bshig par 'gyur na zhes bya ba ni nang stong pa nyid la sogs pa rang bzhin gyis stong pa ma yin du zin na chos thams cad rang bzhin gyis stong pa nyid ces bya ba las kyang nyams par 'gyur te/ zhig par 'gyur zhes bya ba'i tha tshig go/ /de'i 'og tu stong pa nyid chos gnas pa'i mtshan nyid yin par rang bzhin stong pa nyid ni 'jig par mi 'gyur ther zug tu gnas pa yang ma yin te/phyis med par 'gyur ba yang ma yin no zhes bya bas ston to/ /chos gnas pa'i mtshan nyid 'di yang rnam pa bzhis bstan te/rnam par 'jig pa la sogs pa med pa dang 'phel ba dang 'grib pa la sogs pa med pa dang / gnas dang yang dag par 'jug pa med pa dang / sgrib pa med pa'o/ /de la 'gres dang po ni 'dus ma byas pa'i phyir rnam par 'jig par mi 'gyur ba'o/ /dngos po med pa'i bdag nyid yin pas ther zug tu gnas pa ma yin pa'o//'gro ba las rnam par grol ba'i phyir med par mi 'gyur ba'o/ /de nas yang gsum po de dag nyid zhib tu ston to/ / yul na ni gnas zhes bya bas ni 'dus ma byas nyid du bstan to/ / 'dus byas ni yul na gnas pa'i phyir ro//phyogs na mi gnas pa ni dngos po med pas khyab pa'i phyir ro/ /gang nas kyang 'ong ba ma yin/ gang du yang 'gro ba ma yin pa ni 'gro ba las rnam par grol ba'i phyir ro/ /'phel ba la sogs pa med pa'i 'gres ni snga ma bzhin no/ /chos thams cad gnas pa med pa zhes bya ba ni mi gnas pa'i ngo bo nyid yin pa'i phyir ro//'jug pa med pa ni nges par 'byung ba med pa'i phyir ro/ /de dag gis ni chos 'di dag las gang la gnas te/ byang chub sems dpa' bla na med pa yang dag par rdzogs pa'i byang chub tu yang dag par 'jug ces gang smras pa de la gnas te zhes bya ba dang /'jug pa zhes bya ba 'dis gnyis nye bar brtags pa ston to/ /des chos gang la sgrib pa yang yang dag par rjes su mi mthong ste zhes bya ba ni stong pa nyid la chags pa'o/ /des chos thams cad sgrib pa med par yang dag par rjes su mthong ngo zhes bya ba ni chos thams cad stong par mthong zhes bya ba'i tha tshig go//de'i 'og tu gang la bdag mi dmigs pa zhes bya ba la sogs pas rang bzhin stong pa nyid kyi ngo bo nyid ston te/ de la 'di ni rang bzhin stong pa nyid do/ /rang bzhin stong pa nyid ces bya ba ni gang zag la bdag med pa dang /chos la bdag med pa yang bstan te/ bdag med pa de gnyis kyang de bzhin gshegs pas sprul pa'i dge slong dang / dge slong ma'i dpes bsgrub pa'o/ /phyin ci log gang yin pa de nyid phyin ci log ma yin pa zhes bya ba ni gnas de nyid sngon kun brtags pa'i gnas skabs na ni phyin ci log ces bya'o//yongs su dag pa'i gnas skabs na ni phyin ci ma log pa'o/ /rtog pa'i rgyu mthun pa'i phyir zhes bya ba ni kun rtog pa'i 'bras bu zhes bya ba'i tha tshig go/ /de yang de la don dam pa ji lta ba bzhin du ni ma yin zhes bya ba ni dran pa nye bar gzhag pa la sogs pa yang kun brtags pa yin gyi/don dam pa ni ma yin no zhes bya ba'i tha tshig ste/ rang bzhin stong pa nyid de yang pha rol tu phyin pa zhes bya'o/ /rang bzhin stong pa nyid de yang sngon gyi mthar yang rang bzhin stong pa nyid ces bya ba la sogs pas dus gsum car du yang stong pa nyid yin no zhes ston to//'di ltar rang bzhin stong pa nyid kyi chos rnams la yang spyod cing rang bzhin stong pa nyid de yang rnam par 'khrug par mi bgyid pa de ngo mtshar to zhes bya ba ni yod pa ma yin pa'i chos rnams la spyod na/ stong pa nyid rnam par 'khrug par 'gyur bar dgongs pa'o//de bas na gzugs kyang gzhan ma yin rang bzhin stong pa nyid kyang gzhan ma yin no zhes bya ba gsol te 'di ltar byang chub sems dpa' gzugs la sogs pa'i chos rnams la spyod pa na gzugs la sogs pa de dag gzhan la rang bzhin stong pa nyid kyang gzhan no zhes bya ba med kyi/gzugs la sogs pa de dag nyid stong pa nyid du mthong ba de ngo mtshar to zhes bya'o/ /gzugs nyid rnam pa thams cad mkhyen pa nyid du mngon par rdzogs par 'tshang rgya bar 'gyur zhes bya ba ni rnam pa thams cad mkhyen pa nyid kyi dus na gzugs la sogs pa'i chos rnams mngon par rdzogs par rtogs zhes bya ba'i tha tshig go//de dag la tha dad pa med pa'i phyir ro/ /gzhan du na lha dang bcas/ bdud dang bcas/ tshangs pa dang bcas pa'i 'jig rten zhes bya ba la/ gzhan du na zhes bya ba ni gcig kho nar te zhes bya ba ste/'jig rten pa rnams gcig kho nar yang dag pa ji lta ba bzhin du mi shes te/ mi shes pas/ de la mngon par zhen nas las bsags te/ gzugs la sogs pa'i rnam par smin pa yongs su 'dzin cing nye bar len to/ / nye bar len pa'i rgyus kyang srid par 'gyur te/ sdug bsngal las yongs su mi 'grol lo zhes bya ba'i tha tshig go/ /rang bzhin stong pa nyid ni stong pa'am mi stong pa zhes bya bar gzugs rnam par 'khrug par mi byed do zhes bya ba ni gnyis su 'du shes pas gzugs stong pa nyid rnam par 'khrug par mi byed do zhes bya ba ste/gnyis su med pa'i phyir ro/ /de dag la gang 'di ltar 'di ni gzugs so/ /'di ni stong pa'o zhes rnam par 'khrug par byed pa de lta bu'i rang bzhin med do zhes bya ba ni/ dngos po'i bdag nyid kyi ngo bo nyid med pa'o/ /byang chub sems dpa' sems dpa' chen po gnyis su dbye bas byang chub dang gzugs la mi spyod do zhes bya ba ni byang chub la gnyis su byas nas gzugs la mi spyod de/byang chub sems dpa' byang chub la spyod ces bya bar byang chub sems dpa' dang / byang chub kyang gnyis su byas nas gzugs la mi spyod do zhes bya ba'i tha tshig go//rab 'byor byang chub sems dpa' sems dpa' chen po ni bdag byang chub dang gzugs la spyod do snyam du mi sems so zhes bya ba ni bdag byang chub la spyod do snyam nas gnyis su byas te gzugs la mi spyod pa'o/ /'dzin pa la spyod ces bya ba ni mtshan ma la spyod pa'o//gzugs kyi rang bzhin la gnas te zhes bya ba ni gzugs kyi stong pa nyid la gnas pa'o/ /de yang 'jig rten gyi tha snyad du btags pa nye bar bzung nas zhes bya ba ni bla na med pa yang dag par rdzogs pa'i byang chub kyang don dam par med do zhes bstan pa'o//chos de dag nyid la spyod ces bya ba ni sbyin pa dang / sbyin bdag la sogs pa mi dmigs su zin kyang sbyin pa la sogs pa de dag nyid la spyod do zhes bya ba'i tha tshig go/ /bcom ldan 'das ji ltar na byang chub sems dpa' sems dpa' chen po shes rab kyi pha rol tu phyin pa la spyod pa'i tshe/byang chub kyi lam la brtson par bgyid pa lags zhes bya ba ni gal te byang chub kyi lam thams cad yod pa ma yin no zhes bya ba'i tha tshig go/ /gzugs mi sbyor mi 'byed de zhes bya ba ni gzugs la sogs pa med pa'i phyir ro/ /shes rab kyi pha rol tu phyin pa ji ltar mngon par 'grub par 'gyur zhes bya ba ni de med pa'i phyir ro//thabs mkhas pa bshad pa dang / gzung du med pa'i pha rol tu phyin pa bshad pa dag ni go sla'o/ /ji ltar byis pa so so'i skye bo mngon par zhen par gyur pa lta bu'i dngos po yod par gyur tam/ yod par 'gyur ram zhes smos pa ni dus gsum car gyi smos pa'o//gal te sngon dngos po yod par gyur la zhes bya ba ni sngon ni de dag thams cad yod par bzung la/ phyis med par bzung na ni nyes par 'gyur ro zhes bya ba'i tha tshig go/ /bcom ldan 'das byang chub sems dpa' sems dpa' chen po'i lam gang lags zhes bya ba ni sems can yongs su smin par bya ba dang /sangs rgyas kyi zhing yongs su dag par bya bas bsdus pa'i lam zhus pa'o/ /de'i 'og tu pha rol tu phyin pa drug bshad pa dang / lam bshad pa dang / chos thams cad la bslab par bshad pa dang /mi gnas bshad pa rnams ni gzhung gi rjes su bsnyags te gzung ngo / /bcom ldan 'das gal te chos thams cad skye ba ma mchis pa lags na/ 'o na ji ltar byang chub sems dpa' sems dpa' chen po byang chub kyi lam skyes par bgyid ces bya ba ni ma skyes pa rnams bskyed par bya zhes bya ba'i tshig mi rigs so snyam du dgongs pa'o//chos thams cad ni ma skyes pa ste/ de yang ji lta bu zhe na gang dag mngon par 'du mi byed pa de dag la ni chos thams cad ma skyes pa'o zhes bya ba gang dag rnam par mi rtog pa'i ting nge 'dzin la gnas nas bsod nams dang bsod nams ma yin pa la sogs pa ci yang mngon par 'du mi byed pa de dag nyid la ni ma skyes pa'o//byis pa so so'i skye bo gang dag yongs su mi shes pas mngon par 'du byed pa de dag la ni chos thams cad skyes pa nyid do zhes gsungs pa'o/ /bcom ldan 'das 'o na de bzhin gshegs pa rnams byung yang rung de bzhin gshegs pa rnams ma byung yang rung zhes bya ba la sogs pas gnas brtan gyis 'di skad zhus te/chos nyid ni dus thams cad du rnam pa thams cad du phyin ci ma log pa'i mtshan nyid yin na/ de byis pa rnams la ni skye ba'i chos can du 'gyur la/mkhas pa rnams la ni mi 'gyur ba de ji ltar rigs par 'gyur zhes bya'o/ /de skad gsol pa dang / bcom ldan 'das kyis rab 'byor de de bzhin no zhes bya ba la sogs pas 'di bstan te/ chos nyid la ni nam yang phyin ci log yod pa ma yin gyi/byis pa so so'i skye bo rnams kyis yongs su mi shes pa'i nyes pas kun brtags pa'i chos rnams skye bar 'gyur ro zhes kun brtags pa rnams kyi kun brtags pa nyid skye ba las dgongs te bshad kyi/ chos nyid las dgongs pa ni ma yin no/ /de skad bka' stsal pa dang / gnas brtan rab 'byor gyis/ bcom ldan 'das ci lags skyes par 'gyur ba'i lam gyis byang chub thob par 'gyur lags sam zhes bya ba la sogs pas zag pa med pa'i chos rnams kyi skye ba dang mi skye ba zhus so/ /byang chub nyid kyang lam mo lam nyid kyang byang chub po zhes bya ba ni bcom ldan 'das kyis 'di skad du/gnyi ga yang chos kyi dbyings rnam par dag pas rab tu phye ba'i phyir byang chub dang / lam dag la tha dad pa gang yang med mod kyi/ 'on kyang sngon gyi gnas skabs ni rgyu yin pa'i phyir lam zhes bya / phyi ma'i gnas skabs la ni byang chub ces bya'o//don dam par ni de gnyis tha dad pa ma yin pa'i phyir lam gyis byang chub thob par 'gyur zhe'am/ lam ma yin pas thob par 'gyur zhes brjod du mi rung bar bstan to/ /bcom ldan 'das gal te byang chub nyid kyang lam lags la/ lam nyid kyang byang chub lags na zhes bya ba la sogs pas gnas brtan gyis 'di skad zhus te/gal te byang chub dang lam dag la tha dad pa med na/ de lta na ni lam thob pa'i byang chub sems dpas byang chub nyid thob par 'gyur ro/ /de lta na ni gzugs kyi skur gtogs pa dang / chos kyi skur gtogs pa'i sangs rgyas kyi chos thams cad byang chub sems dpas kyang thob par 'gyur ro zhes bya ba'o//de skad zhus pa dang / bcom ldan 'das kyis/ sangs rgyas kyi byang chub thob ces bya ba'i tshig de ma bzhed nas/ rab 'byor de ji snyam du sems/ sangs rgyas kyi byang chub thob bam zhes bya ba la sogs pa bka' stsal te/sangs rgyas dang byang chub tha dad pa med pa'i phyir de'i tshig mi 'thad do zhes bya'o/ /ji ltar tshig de mi 'thad pa de bzhin du/ byang chub sems dpas byang chub thob pa nyid du 'gyur ro zhes bya ba'i tshig kyang mi 'thad do zhes bstan pa'o//de'i 'og tu byang chub sems dpa' dang / byang chub dag la tha dad pa med du zin kyang / byang chub sems dpas byang chub thob par 'gyur bar kun rdzob tu tha snyad yod par zhal gyis bzhes nas/ rab 'byor 'di la byang chub sems dpa' sems dpa' chen po ni pha rol tu phyin pa drug yongs su rdzogs par byas zhes bya ba la sogs pas byang chub 'thob pa'i rim pa bstan te/de bas na de ltar kun brtags pa'i rim pa yongs su ma btang bas byang chub thob par 'gyur gyi 'phral la thob pa ni ma yin no zhes bstan to/ / de'i 'og tu sangs rgyas kyi zhing yongs su dag par bya ba zhus pa dang / de'i dbye ba dag kyang go sla'o/ /bcom ldan 'das byang chub sems dpa' sems dpa' chen po'i nges zhes bgyi'am/ 'on te ma nges zhes bgyi zhes bya ba ni ci nges pa nyid la byang chub sems dpa' zhes bgyi 'am/'on te ma nges pa nyid la yang byang chub sems dpa' zhes bgyi zhes zhus pa'o/ /nyan thos kyi phung po'am/ rang sangs rgyas kyi phung po'am/ zhes bya ba ni ci nyan thos sam/ rang sangs rgyas su nges pa la yang byang chub sems dpa' zhes bya ba'am zhes zhus pa'o/ /de lta bu lus ched du bsams shing /thabs mkhas pas yongs su 'dzin zhes bya ba ni skye ba la dbang thob pas skye ba yongs su 'dzin gyi/ las kyi dbang gis mi 'dod pa bzhin du ma yin no/ /'phags pa zag pa med pa'i las kyis ngan song du skye bar 'gyur ram zhes bya ba ni sa brgyad pa yan chad ni de'i las thams cad 'phags pa med pa yin no//de la reg par 'gyur ba cung zad kyang med do zhes bya ba ni srid pa'i reg pa'am/ lta ba'i reg pa'am/ rnam par rtog pa'i reg pas so/ /ji ltar na chos thams cad shes rab kyi pha rol tu phyin par 'dus pa lags zhes bya ba ni ngo bo nyid kyis stong pa'i phyir khongs su gtogs pa'i tshig ma bzod nas zhus pa'o//rab 'byor chos thams cad ni chos thams cad kyis mi gtong ngam zhes bya ba la sogs pas/ bcom ldan 'das kyis 'di skad du gal te shes rab kyi pha rol tu phyin pa med na ni de'i tshe chos gzhan dag yod par 'gyur ro//de las gzhan pa med par 'gyur na ni shes rab kyi pha rol tu phyin pa yod par 'gyur ro/ /de lta na ni de mi rigs par 'gyur na/ 'di ltar na thams cad kyang stong ste/ de'i phyir stong pa nyid kyi mtshan nyid du 'dus par rigs so zhes ston to//ji ltar na chos thams cad stong pa nyid la gnas te mngon par shes pa'i pha rol tu phyin pa mngon par sgrub pa lags zhes bya ba ni stong pa nyid yin na rnam par smin pa'i mngon par shes pa mngon par sgrub pa ji ltar sgrub par 'gyur zhes zhus pa'o/ /stong pa nyid kyi sgo nas mngon par sgrub po zhes bstan pa'i phyir bcom ldan 'das kyis/rab 'byor 'di la byang chub sems dpa' sems dpa' chen po zhes bya ba la sogs pas mngon par shes par rnam par phye ste bstan pa dang / byang chub kyi yan lag tu gyur pa'i chos bshad pa dang /gang zag tha dad pa bstan pa dang / sems can yongs su thar par bya ba zhus pa dang / lan btab pa dang / dge ba bsten pa dag ni go sla'o/ /bcom ldan 'das sdug bsngal 'tshal bas sems can rnams yongs su mya ngan las 'da' bar 'gyur ram/ 'on te sdug bsngal gyis yongs su mya ngan las 'das par 'gyur zhes bya ba ni gal te sdug bsngal dang /kun 'byung ba la sogs pas yongs su mya ngan las 'da' bar 'gyur na ni byis pa so so'i skye bo thams cad kyang yongs su mya ngan las 'da' bar 'gyur te/ de dag la yang sdug bsngal dang /kun 'byung ba la sogs pa yod pa'i phyir ro/ /ji ste sdug bsngal shes pa dang / kun 'byung ba shes pas mya ngan las 'da' bar 'gyur na ni de lta na nyan thos bzhin du rgyun du zhugs pa'i 'bras bu la sogs pa thob par 'gyur ro snyam du dgongs nas zhus pa'o//de nas bcom ldan 'das kyis rnam pa gnyi ga ltar yang mya ngan las 'da' bar mi 'gyur gyi/ de bzhin nyid ces bya ba mnyam pa nyid rab tu rtogs pas mya ngan las 'da' bar 'gyur ba bstan to/ /gang dag bden par gtogs pa'am/ gang dag bden par ma gtogs pa zhes bya ba la/nang gi phung po rnams ni bden par gtogs pa'o/ /phyi rol gyi rnams ni bden par ma gtogs pa'o/ /rab 'byor chos gang la byang chub sems dpa' sems dpa' chen po rjes su lta ba'i chos de lta bu med do zhes bya ba ni yongs su grub pa'i gnas skabs nyid na chos thams cad med pa'o//de rigs kyi sa la gnas nas spyi bor ltung bar mi 'gyur te zhes bya ba ni de la chos la 'dun pa'i sred pa mi byed do zhes bya ba'i tha tshig go/ /de sdug bsngal rab tu shes pas kyang sdug bsngal la dmigs pa'i sems mi skyed do zhes bya ba ni sngar bshad pa'i tshul gyis yongs su 'dris pa'i shes pas yongs su 'dris pa 'ba' zhig tu byed kyi/nyan thos kyi sar ltung du dogs pa'i phyir sems bcu drug po dag gis de mngon sum du byas nas mngon par ni mi byed do zhes bya ba'i tha tshig go/ /dngos po med pa ni byang chub ste zhes bya ba la/dngos po ni 'dus byas dang 'dus ma byas dang / brtags pa dang / ma brtags pa'i chos rnams te/ de'i ngo bo nyid dang bral ba'i phyir brjod du med pa/ don dam par gnas pa'i byang chub la dngos po med pa zhes bya'o/ /de nas yang byis pa so so'i skye bo thos pa dang mi ldan pa zhes bya ba la sogs pas ni 'jig rten gsum gyi chos rnams kun brtags pa nyid du ston to//dngos po med pa gang yin pa de ni dngos po med pa nyid do zhes bya ba ni kun brtags pa yin pas dngos po med pa'i bdag nyid kho na zhes bya ba'i tha tshig go//lam ni dngos po ma mchis pa'o/ /rgyun du zhugs pa'i 'bras bu ni dngos po ma mchis pa'o zhes bya ba la sogs pas/ dngos po med pa'i ngo bo nyid yin pa'i phyir thos pa zhes bya ba gang yang med do zhes bstan to/ /bcom ldan 'das dngos po byung ba'am/ma byung ba de bzhin nyid dang / ma nor ba de bzhin nyid ces bgyi ba ma mchis sam zhes bya ba ni de bzhin nyid kyi ngo bo nyid dam/ ma nor ba de bzhin nyid kyi ngo bo nyid 'das pa'am phyis 'byung ba 'am da ltar byung ba/ 'dus byas pa don dam par gang yang mchis sam zhes zhus pa'o//rmi lam lta bu la sogs pa dpe drug po dag ni go sla'o/ /rab 'byor de ji snyam du sems/ chos de dag sgyu ma lta bu 'am rmi lam lta bu dag ma yin nam zhes bya ba la sogs pas sbyin pa'i pha rol tu phyin pa la sogs pa dang / tshangs pa'i dbyangs kyis de dag gi mthar thug pa'i chos thams cad kyang sgyu ma lta bu ste/de bas na thams cad sgyu ma lta bu yin pas nyes pa med do zhes bstan pa'o/ /rab 'byor 'di ltar chos de dag thams cad ni mngon par 'dus byas pa dang / bsam pa zhes bya ba ni sbyin pa'i pha rol tu phyin pa la sogs pa dge ba'i bdag nyid yin pa'i phyir mngon par 'dus byas pa'o//sems pa sngon du 'gro ba'i phyir bsams pa ste de bas na kun brtags pa'i zhes bstan to/ /rab 'byor 'on kyang chos de dag thams cad kyang lam bsgrub pa dang / lam skyed par byed pa yin gyi/ 'bras bu thob par byed pa ni ma yin no zhes bya ba ni sbyin pa'i pha rol tu phyin pa la sogs pa chos thams cad gnas rnam par dag par byed pa yin pas/gnas yongs su dag par byed na lam gyi rgyun 'gyur ro/ /gang skye ba med pa dang / 'gag pa med pa'i bdag nyid can dngos po med pa de dag phrad pa ni 'bras bu thob par byed pa med de/de ni ngo bo nyid de bcos ma ma yin pa gnas pa'i mtshan nyid yin no zhes bstan pa'o/ /sbyin pa'i pha rol tu phyin pa gzung du med do zhes bya ba ni dngos po'i tshul du'am/ dngos po med pa'i tshul du gzung du mi rung ba'o/ /rab 'byor gnyis kyis mngon par rtogs par 'gyur ba med/gnyis su med pas kyang mngon par rtogs par 'gyur ba med ces bya ba ni gal te 'dus byas sam/ 'dus ma byas kyi dngos po 'ga' zhig mthong na ni gnyis kyis mngon par rtogs par 'gyur ro/ /gal te ri bong gi rwa la sogs pa bzhin du shin tu dngos po med pa zhig yin na yang gnyis su med pas mngon par rtogs par 'gyur ro//de bas na rnam pa de gnyis las bzlog pa ni mnyam pa nyid rab tu rtogs pa ste/ mngon par rtogs pa'o zhes bstan pa yin no/ /yongs su brjod pa med pa zhes bya ba ni mngon par brjod par bya ba dang /rab tu brjod par bya ba ma yin pa la/ rab 'byor 'jig rten gyi tha snyad du bya'o zhes bya'o/ /de bzhin gshegs pas chos mngon par rdzogs par sangs rgyas zhes bya bas ni shin tu mthar thug pa gnas gyur pa/ rnam par rtog pa dang / spros pa thams cad spangs pa ni mnyam pa nyid la gnas pa'i phyir shes par bya ba nyid kyang med de shes par bya bar 'gyur ba'i don mi gzigs pas ci zhig mngon par rdzogs par sangs rgyas par 'gyur zhes bstan pa'o//bcom ldan 'das dngos po ma mchis pa'i ngo bo nyid kyi chos rnams la mnyam pa nyid ces bgyi ba gang zhig mchis zhes bya ba ni chos rnams yod na mnyam pa nyid ces bya ba yang yod do snyam du dgongs pa'o//rab 'byor 'dir ni de nyid mnyam pa nyid do zhes bya ba ni dngos po med pa'i ngo bo nyid kyi chos rnams kyi mnyam pa nyid ni dngos po med pa'i ngo bo nyid yin no zhes bya ba ste/ de'i dngos por rnam par rtog pa yang spangs pa'i phyir ro//rab 'byor chos mnyam pa nyid ni de bzhin gshegs pa'i yul yang ma yin no zhes bya ba ni chos mnyam pa nyid ni gang gi yul du yang mi 'gyur te/ de bzhin gshegs pa yang chos mnyam pa nyid kyi ngo bo nyid mi gzigs so/ /chos mnyam pa nyid la byis pa so so'i skye bo rnams dang zhes bya ba la sogs pa ni byis pa so so'i skye bo rnams dang /'phags pa thams cad dang / de bzhin gshegs pa'i chos mnyam pa nyid ni mtshungs so/ /chos mnyam pa nyid las kyang mi g.yo la/ chos rnams rnam par dgod pa yang mdzad ces bya ba ni don dam pa'i bden pas mi g.yo la/kun rdzob tu rnam par dgod pa mdzad do/ /bcom ldan 'das ci lags/ chos nyid 'dus bgyid lags sam/ 'on te 'dus ma bgyid lags zhes bya ba ci las dgongs she na/ gang gzugs la sogs pa'i chos 'di rnams kyi chos nyid de gal te 'dus ma byas yin na gzugs la sogs pa 'dus byas rnams kyi chos nyid du mi 'gyur ro//gal te 'dus byas yin na/ gzugs la sogs pa bzhin de yang kun brtags pa ste/ skye ba dang 'gag pa can du 'gyur ro snyam du dgongs nas zhus pa'o//bcom ldan 'das kyis/ rab 'byor de ni 'dus byas kyang ma yin/ 'dus ma byas kyang ma yin te zhes bya ba ni skyon gnyis su 'gyur du dogs pa'i phyir gnyis bsal ba gsungs pa'o/ /'dus byas las gud na yang 'dus ma byas dmigs su med la/ 'dus ma byas las gud na yang 'dus byas dmigs su med de zhes bya ba ni 'di la phung po dang /khams dang / skye mched la sogs pa'i de bzhin nyid ma dag pa gang yin pa de phung po la sogs pa de dag la logs shig na dmigs su med la/ phung po la sogs pa gang yin pa de dag kyang de bzhin nyid ma gtogs par gud na dmigs su med de/de bzhin nyid ma dag pa ni de las de nyid dang / gzhan zhes brjod du mi rung ngo / /gang gi phyir de ltar gnyi ga yang gnyi ga las gud na dmigs su med pa de'i phyir de gnyi ga yang gcig go zhes brjod du mi rung bas ldan pa yang ma yin no//tha dad do zhes kyang brjod du mi rung ba'i phyir mi ldan pa yang ma yin no/ /gzugs can ma yin zhing rnam par mi rtog pa'i phyir gzugs med pa'o/ /tshig la sogs pas bstan tu mi rung ba'i phyir bstan du med pa'o/ /dbang po'i yul gyi thogs pa med pa dang / gzung ba dang 'dzin pa med pa'i phyir thogs pa med pa'o//gnyi ga yang mtshan nyid med par mtshan nyid gcig pa'i phyir/ 'di ltar mtshan nyid med par mtshan nyid gcig pa'o/ /de la 'dus byas ni yod pa ma yin pa'i phyir mtshan nyid med pa'o/ /'dus ma byas ni mtshan ma med pas mtshan mar gzung du mi rung ba'i phyir mtshan nyid med pa'o//de dag kyang de bzhin gshegs pas 'jig rten gyi tha snyad du brjod kyi zhes bya ba ni 'dus byas yod pa ma yin du zin kyang 'jig rten gyi kun rdzob tu tha snyad 'dogs shing 'dus ma byas brjod du med pa yin yang tha snyad du brjod pa'o/ /de skad bka' stsal nas tha snyad de yod pa ma yin par/don dam par ni lus kyi 'du byed dam/ ngag gi 'du byed dam/ yid kyi 'du byed gang yang med do zhes bya bas ston te/ las rnam pa gsum char yang kun brtags pa yin pa'i phyir ro/ /rab 'byor stong pa nyid ni ci yang med/ cung zad kyang med ces bya ba ni ci yang mi byed pa'i phyir ci yang med pa'o/ /dngos po med pa'i ngo bo nyid yin pa'i phyir cung zad kyang med pa'o/ /'di ni de bzhin gshegs pa'i khyu mchog tu gyur pa ma yin no zhes bya ba ni de bzhin gshegs pa'i mdzad pa ni rnam par rig par bya ba tsam du zad de/gal te sems can rnams bdag nyid kyis shes par gyur na/ de bzhin gshegs pa mi dmigs so zhes ston to/ /bcom ldan 'das ci'i slad du stong pa lags zhes bya ba ni ci zhig med pas stong zhes bya ba'i tha tshig go/ /de la 'du byed pa gang yin pa des stong ngo zhes bya ba ni de la gang 'dus byas so zhes 'du byed pa mtshan mar 'dzin pa'i bdag nyid de med pas stong pa'o//rab 'byor la la zhig gi sprul pa sprul na zhes bya ba ni/ sprul pa 'di sprul pa gzhan pa gzhan dag sprul pa byed do zhes bya ba de stong pa ma yin pa'i dngos po cung zad kyang yod dam zhes bya ba ste/gang gi tshe sprul pa zhig sprul pa gzhan sprul par byed pa de'i tshe/ sprul pa de la stong pa ma yin pa'i ngo bo nyid ci yang yod dam zhes smras pa'o/ /rab 'byor de ji snyam du sems rnam par sbas sam zhes bya ba ni 'di ni sprul pa'o/ /'di ni stong pa nyid do zhes bya ba de ci stong pa nyid kyis rab tu bsgribs sam zhes bya ba'i tha tshig go//la la ni nyan thos kyis sprul pa'o zhes bya ba la sogs pa/ tshig rnam pa bzhis dran pa nye bar gzhag pa la sogs pa 'jig rten pa dang / 'jig rten las 'das pa'i chos rnams bstan to/ / nyon mongs pas sprul pa zhes bya ba ni sems can dang srog la sogs pa bstan pa'o/ /las kyis sprul pa zhes bya ba ni phung po dang / khams dang skye mched la sogs pa bstan pa'o/ /bskyed pa'am bkag pa zhes bya ba ni 'dus byas kyi chos rnams zhes bya ba'i tha tshig go//mi slu ba'i chos can mya ngan las 'das pa zhes bya ba la mya ngan las 'das pa ni bslu bar bya ba'am dor ba'am/ yongs su nyams par 'gyur ba'i chos rnams med cing / bsnan par bya ba yang med pa'i phyir mi slu ba'i chos can zhes bya ba'o / /gang yang bcom ldan 'das kyis stong pa nyid las kyang mi g.yo la gnyis kyis kyang mi gos zhes bka' stsal pa ltar na zhes bya bas 'di skad bstan par 'gyur te/stong pa nyid las mi g.yo zhes gsungs pas stong pa nyid ni mi g.yo'i/ de las gzhan pa dag ni g.yo'o zhes bstan par 'gyur ro/ /gnyis kyis kyang mi gos so zhes gsungs pas ni yod pa dang /med pa gnyis kyis mi gos so zhes bstan par 'gyur ro/ /de la gal te mya ngan las 'das pa zhes bya ba'i chos 'ga' zhig yod na ni stong pa nyid las ma gtogs pa gzhan zhig yod par 'gyur te/ yod pas gos par yang 'gyur ro/ / de bas na tshig de [(]brtsan [,]brtsam [)]par byas nas mya ngan las 'das pa yang sprul pa yin no zhes brjod par bya bar 'gyur ro/ /de nas bcom ldan 'das kyis mya ngan las 'das pa zhes bya ba'i chos gzhan dngos po'i bdag nyid du ni gang yang med pas de yang stong pa nyid yin par rab 'byor de de bzhin no//de de bzhin te zhes bya ba la sogs pas ston to/ /bcom ldan 'das las dang po pa la ji ltar gdams par bgyi zhes bya ba ni da ltar zab pa'i ngo bo nyid stong pa nyid yongs su shes par nus pa'i gdams pa zhus pa'o/ /bcom ldan 'das kyis kyang 'di skad bka' stsal te/ gal te sngon dngos po yod par gyur la phyis rnal 'byor pa dag gis shes pa'i mthus ngo bo nyid stong pa nyid kyis dngos po med par byas na ni de lta na/las dang po pa dka' ba spyod par 'gyur ba zhig na/ 'di ltar dngos po yang dngos po'i bdag nyid du kun brtags pa'i yin pas med do/ /dngos po med pa ri bong gi rwa lta bu yang ma yin no//rang gi dngos po yang gang yang rung ba'i rang dbang can med do/ /gzhan gyi dngos po yang rgyu dang rkyen la sogs pa'i dbang gis yod pa ma yin na/ de la ngo bo nyid ces bya ba'i chos gzhan gang yang yod par ga la 'gyur/ de bas na ngo bo nyid stong pa nyid kyang ngo bo nyid kyis so zhes shes pas nyes pa med do// //bam po nyi shu bdun pa ste tha ma / de ltar bcom ldan 'das ma 'bum pa'i bshad pa yongs su rdzogs par byas nas/ da ni nyi khri lnga stong pa las gang 'byung ba de bshad par bya'o/ /de nas 'phags pa byams pas ma 'ongs pa'i skye bo rnams kyi don dang /de'i tshe 'dus pa'i 'khor gyi 'dul ba rnams kyi don du bcom ldan 'das byang chub sems dpa' sems dpa' chen po shes rab kyi pha rol tu phyin pa la spyod pa/ byang chub sems dpa'i bslab pa la slob par 'tshal bas gzugs la ji ltar bslab par bgyi zhes bya ba la sogs pa zhus so//chos thams cad la tshul bzhin du yongs su shes pa ni byang chub sems dpa'i bslab pa ste/ de bas na byang chub sems dpa'i bslab pa la slob par 'dod pas gzugs la sogs pa nas/ sangs rgyas kyi chos kyi mthar thug pa'i bar dag la ji ltar bslab par bgyi zhes zhus pa'o//de nas bcom ldan 'das kyis stong pa nyid la slob pa ni byang chub sems dpa'i bslab pa'o zhes bstan pa'i phyir/ gzugs ming tsam zhes bya ba nas/ sangs rgyas kyi chos rnams kyi bar du ming tsam mo zhes bya bar bslab par bya'o zhes bya ba'i bar dag gis chos thams cad ming tsam du zad par gsungs so//bcom ldan 'das gang gi tshe/ 'di lta ste gzugs zhes bgyi ba'i ming 'di dngos po dang bcas par dmigs zhes bya ba la sogs pas 'di skad ston te/ gzugs dang tshor ba zhes bya ba la sogs pa'i ming brjod pa ni ming tsam 'ba' zhig ston pa ma yin gyi/ming smos pa sngon du btang bas dngos po'i rnam pa 'ba' zhig blo la gzhag nas dngos po ston na/ de la ji ltar gzugs la sogs pa ming tsam yin zhes zhus pa'o/ /ming de dngos po med pa zhig yin na ni ming tsam zhes bya ba de yang mi rigs par 'gyur ram/gzugs la sogs par dngos po med par mi 'ba' zhig yod du zin na ci la gnas shing gnas gang gis ming de 'jug par 'gyur te/ ming de yang med par 'gyur ro/ /de bas na ming tsam zhes bya ba yang mi rigs so zhes bya ba'i tha tshig go//'di lta ste/ gzugs zhes bya ba 'di ni 'du byed kyi mtshan ma'i dngos po de dang de la glo bur du ming btags pa'o zhes bya ba ni bcom ldan 'das kyis 'di skad bka' stsal pa ste gzugs la sogs pa ni ming gi ngo bo nyid ma yin no/ /gal te ming gi ngo bo nyid yin du zin na brjod pa tsam gyis 'brel pas mi shes pa rnams kyang dngos po de dag gi ngo bo nyid dang /khyad par rnam pa sna tshogs rtogs par gyur pa'i rigs na de dag rtogs pa yang ma yin te/ de bas ni ming yang gzhan la/ gzugs la sogs pa'i dngos po yang gzhan te/tha snyad du rung bar bya ba'i phyir dngos po de dang de dag la phyis ming de 'byung ba tsam du zad do/ / de bas na gzugs la sogs pa'i ming gi ngo bo nyid ma yin no/ /glo bur zhes bya ba ni phyis byung ba ste/ bcos ma'o zhes bya ba'i tha tshig go/ /'du byed kyi mtshan ma'i dngos po zhes bya ba ni rgyu dang rkyen las byung ba'i phyir 'du byed do//rnam par shes pa la snang ba'i phyir mtshan ma'o/ /dngos po'i rang bzhin yin pa'i phyir dngos po ste/ 'du byed kyi chos su snang ba'i gzhi la/ dngos po zhes bya'o zhes bya ba'i tha tshig go/ /de skad bka' stsal pa dang / 'phags pa byams pas ming glo bur nyid yin pa ma bzod nas/ bcom ldan 'das 'di ltar gzugs zhes bgyi ba'i ming ma mchis par ni 'du byed kyi mtshan ma'i dngos po des ming de rig pa dang rtogs pa dang / 'tshal bar yang mi 'gyur zhes bya ba la sogs pa gsol te/ /ming med pa'i dngos po tsam 'ba' zhig ma mthong bas 'di ni gzugs yin no zhes mi rig par mi 'gyur ro//dngos po ma mthong bar yang ming brjod pa tsam gyis ni dngos po rig par mi 'gyur ro/ /de la gal te gzugs zhes bya ba'i ming phyis byung ste/ de'i ngo bo nyid ma yin du zin na ming ma brjod par yang /ming dang 'brel pa mi shes pa rnams kyis gzugs so zhes khong du chud par 'gyur ba dang / ming brjod du zin kyang ming ni glo bur yin pa'i phyir dngos po'i rang bzhin la blo skye bar mi 'gyur ba'i rigs na/ 'di ltar de gnyi ga yang gnyi ga ltar 'gyur te/ de bas na gzugs la sogs pa ni ming gi ngo bo nyid ma yin no zhes bya ba'i tha tshig go//ming de med par ni 'du byed kyi mtshan ma'i dngos po des zhes bya ba la/ med par ni zhes bya ba ni ming bor na 'du byed kyi mtshan ma'i dngos po des dngos po de la/ gzugs so zhes bya bar rigs pa med do zhes sbyar bar bya'o//byams pa de'i phyir khyod nyid la dris zhes bya ba la sogs pas/ bcom ldan 'das kyis rnam pa gsum gyi ming glo bur nyid yin pa dang / dngos po rnams ming gi ngo bo nyid ma yin par bstan to/ /rnam pa gsum gyis ming glo bur yin par rig par byed ste/ ming ma brjod par dngos po tsam gyis shes par mi 'gyur ba dang / dngos po gcig la ming du ma yod par snang ba dang / mang po la ming gcig yod par snang ba'i phyir ro/ /de la rnam pa dang po ni/ byams pa de ji snyam du sems/ 'di lta ste/ khyod 'du byed kyi mtshan ma'i dngos po de dang de la gzugs zhes bya ba'i ming de la ma brten/ma gnas/ gnas ma bcas par zhes bya ba la sogs pa bka' stsal pa ste/ gal te gzugs de ming gi ngo bo nyid yin du zin na gzugs kyi dngos po de la gnas pa gzugs zhes bya ba'i ming gang yin pa de mi shes par yang brda mi shes pa rnams dngos po de tsam zhig mthong bas kyang /'di ni gzugs yin no zhes bya ba'i ming du rtogs par ci'i phyir mi 'gyur/ gal te ming de dngos po de'i ngo bo nyid yin du zin na dngos po ji lta bu yin pa mthong bas/ dngos po'i khyad par gyi mtshan nyid 'dzin pa'i rnam par shes pa skye ba de bzhin du ming shes pa'i rnam par shes pa yang skye bar 'gyur ba'i rigs na/skye ba yang ma yin te/ de bas na gzugs la sogs pa ni ming gi ngo bo nyid ma yin no/ /rnam pa gnyis pa ni/ byams pa de ji snyam du sems/ ming dang / brda dang / tha snyad dang / btags pa rnam pa sna tshogs kyis 'du byed kyi mtshan ma'i dngos po de la nye bar 'dogs pa'am/tha snyad dam/ 'dogs pa'am/ mngon par zhen pa yin nam zhes bya ba la sogs pa gsungs pa ste/ gal te dngos po ming gi ngo bo nyid yin du zin na/ dngos po gcig la ming mang du yod de//dper na tshor ba gcig la tshor ba dang / myong ba dang / rig pa dang / bde ba dang / sdug bsngal ba dang / btang snyoms zhes bya ba lta bu'o/ /de la gal te dngos po de ming gi ngo bo nyid yin du zin na/ tshor ba'i dngos po gcig la ming mang por brjod pa na ngo bo nyid du de las gzhan par 'gyur ba'i rigs na de lta yang ma yin te/de bas na gzugs la sogs pa ming ngo bo nyid ma yin par shes par bya'o/ /rnam pa gsum pa ni/ byams pa de ji snyam du sems/ 'di la 'ga' zhig 'du byed kyi mtshan ma'i dngos po de nyid la de las gzhan pa'i 'du byed kyi mtshan ma'i dngos por ming 'dogs sam zhes bya ba la sogs pa gsungs pa ste/gal te dngos po'i de ming gi ngo bo nyid yin du zin na gang gi tshe dngos po mang po la ming gcig tu brjod par gyur pa/ dper na phung po dang / khams dang skye mched rnams zhes bya ba lta bu ste/de'i tshe chos thams cad kyi ngo bo nyid gcig tu 'gyur ba zhig na/ de lta yang ma yin te/ de bas na gzugs la sogs pa ming gi ngo bo nyid ma yin par shes par bya'o/ /de skad bka' stsal pa dang / 'phags pa byams pas/ bcom ldan 'das de lta lags na ni gzugs kyi ngo bo nyid dmigs pa kho nar mi 'gyur lags sam zhes gsol pas ji skad bstan par 'gyur zhe na/bcom ldan 'das kyis ni 'du byed kyi mtshan ma'i dngos po la ming du btags te/ gzhi dang bcas pa dang / gnas dang bcas par bstan gyi/ gzhi med pa dang gnas med pa ni ma bstan to//de bas na 'du byed kyi mtshan ma'i dngos po la gnas pa'i phyir 'du byed kyi mtshan ma'i ngo bo nyid ming yin par mngon no zhes ston to/ /de nas bcom ldan 'das kyis/ byams pa de ji snyam du sems/ de gzugs kyi ngo bo nyid yin nam/ btags pa tsam du zad ces bya bas byams pa'i tshig de sel bar mdzad de 'di skad du dngos po de la gzugs zhes bya ba'i ming brjod pa dag la ci de'i mtshan nyid kyi ngo bo nyid brjod do zhes smra 'am/'on te de'i ming brjod do zhes smra zhes bstan par 'gyur ro/ /'di ltar ming brjod do zhes zer te/ de'i phyir de ni dngos po de'i ming brjod kyi ngo bo nyid ni ma yin par mngon te/dper na 'jig rten na lhas byin zhes bya ba la sogs pa'i ming lta bu'o/ /de bas na gzugs la sogs pa ming gi ngo bo nyid ma yin no zhes bstan to / /de skad bka' stsal pa dang 'phags pa byams pas/ bcom ldan ldan 'das gal te gzugs ming dang /'du shes dang / brda dang / btags pa tsam lags shing zhes bya ba la sogs pas/ gzugs la sogs pa dngos po rnams kyi ngo bo nyid dmigs par ston to/ / 'di skad du bcom ldan 'das kyis gzugs ni ming tsam tshor ba yang ming tsam zhes bka' stsal na de lta na/gzugs zhes bya ba'i ming gzugs kyi ngo bo nyid du 'gyur la/ tshor ba zhes bya ba'i ming yang tshor ba'i ngo bo nyid du 'gyur ro zhes bstan to/ /de skad gsol pa dang / bcom ldan 'das kyis de yang bsal ba'i phyir/ byams pa de ji snyam du sems/ gzugs zhes bya ba'i ming dang / 'du shes dang / brda dang / btags pa dang / tha snyad tsam kho na gang yin pa de la skye ba'am 'gag pa'am/ kun nas nyon mongs pa'am/ rnam par byang ba yod dam zhes bya ba la sogs pa gsungs te/ 'jig rten na ni gzugs la sogs pa'i chos 'di rnams skye ba dang 'jig pa'i chos can dang /kun nas nyon mongs pa dang / rnam par byang ba'i chos can yin par rtogs so/ /gal te gzugs la sogs pa'i chos rnams ming gi ngo bo nyid yin du zin na ming dang skye ba dang / 'jig pa yod pa dang / kun nas nyon mongs pa dang /rnam par byang ba yod par mi 'gyur ba zhig na/ de ltar yang 'gyur te/ de bas na ming ni chos rnams kyi ngo bo nyid ma yin par shes par bya'o/ /bcom ldan 'das ci lags/ rnam pa thams cad du mtshan nyid thams cad kyis gzugs ma mchis pa kho na lags sam zhes bya ba la sogs pas/byang chub sems dpa' 'di skad gsungs te/ gang bcom ldan 'das kyis sngar gzugs ni ming tsam mo/ /tshor ba ni ming tsam mo zhes gsungs pa de ci lags/ gzugs la sogs pa'i mtshan nyid thams cad kyi thams cad du ma mchis pa lags sam/gzugs la sogs pa nyid rnam pa thams cad du ma mchis pa la dgongs te gsungs zhes zhus pa'o/ /de skad gsol pa dang / bcom ldan 'das kyis chad par 'dzin du dogs nas/ byams pa rnam pa thams cad du mtshan nyid thams cad kyis gzugs med do zhes mi smra'o zhes bya ba la sogs pas bkag pa mdzad do//de nas byang chub sems dpas/ bcom ldan 'das ji ltar na gzugs mchis pa lags zhes bya ba la sogs pas de yod pa'i rnam pa zhus so/ /byams pa 'jig rten gyi brda dang tha snyad kyis gzugs yod kyi zhes bya ba la sogs pas/bcom ldan 'das kyis kun rdzob kyi bden pa'i dbang gis ni yod kyi/ don dam pa'i bden pa'i dbang gis ni med do zhes rnam par phye ste bstan to/ /de nas 'phags pa byams pas bcom ldan 'das ji ltar bcom ldan 'das kyis gsungs pa'i don bdag gis 'tshal ba ltar na zhes bya ba la sogs pas 'di skad gsungs te/gal te gzugs la sogs pa don dam par rnam pa thams cad du med do zhes bshad na/ de lta na chad par smra ba la sogs pa mthar phyin par 'gyur ro/ /de la don dam par med do zhes gsungs pa'i bcom ldan 'das kyi dgongs pa ni 'di yin te/gzugs zhes bya ba la sogs par ming gdags su rung ba'i dngos po ni don dam par med kyi/ ming du byar mi rung ba brjod du med pa'i dngos po ni don dam par yod pa nyid do zhes bya'o/ /de skad ces gsol pa nas/ bcom ldan 'das gal te brjod du ma mchis pa'i dbyings don dam par mchis su lags na/'o na 'du byed kyi mtshan ma'i dngos po gang la gzugs zhes bgyi bar glo bur du ming du 'dogs par ji ltar 'gyur zhes bya ba la sogs pa yang zhus so/ /gal te gzugs la sogs pa'i 'du shes dang / ming gi ngo bos don dam pa'i dbyings brjod du med pa yin na/gang la 'du shes gdags pa 'du byed kyi mtshan ma'i dngos po gang yin pa de la don dam par yod dam med ji lta bu zhig ces bya ba ga la yod/ de skad ces gsol nas yang bdag nyid kyis gal te don dam par ma mchis na ni 'o na brjod du ma mchis pa'i dbyings su yang ji ltar 'gyur zhes bya ba gsol te/des ji skad bstan par 'gyur zhe na / brjod du med pa don dam pa'i dbyings kyi gnas su gyur pa gzhan med pa'i phyir/ 'du byed kyi mtshan ma'i dngos po nyid de'i gnas yin par khas blang ngo / /gal te 'du byed kyi mtshan ma'i dngos po de/don dam par med na/ 'du byed kyi mtshan ma'i dngos po la brjod du med pa'i dbyings gnas so zhes byar ni mi rigs so zhes bstan pa ste/ de bas na 'du byed kyi mtshan ma'i dngos po ni brjod du ma mchis pa'i dbyings zhes bgyir mi rung ngo zhes gsol to/ / de nas bcom ldan 'das kyis ji ltar 'du byed kyi mtshan ma'i dngos po de med pa dang / ji ltar de med kyang gzhir 'gyur ba de bstan par bzhed nas/ byams pa de'i phyir don de khyod nyid la dris zhes bya ba la sogs pas de nyid la dris so/ /byams pa de ji snyam du sems gang gi tshe khyod brjod du med pa'i dbyings shes rab kyi pha rol tu phyin pa'i spyod pa la gnas pa de'i tshe zhes bya ba la sogs pas 'di skad bstan par 'gyur te/byams pa khyod gang gi tshe shes rab yongs su dag pa brjod du med pa'i dbyings 'dzin pa na/ ci de'i tshe 'du byed kyi mtshan ma'i dngos po de khyod la snang ngam/'on te de mi snang zhes bya ba'o/ /byang chub sems dpas gsol pa/ bcom ldan 'das de ni mi dmigs so zhes bya ba ste mi snang ngo zhes bya ba'i tha tshig go/ /de nas bcom ldan 'das kyis bka' stsal pa/ byams pa rnam grangs 'dis zhes bya bas ci bstan par 'gyur zhe na/ 'di ltar khyod don dam pa yid la byed pa bsgom pa'i tshe 'du byed kyi mtshan ma'i dngos po mi snang bas don dam par ni de med kyi/ kun rdzob tu yod par shes par gyis shig /kun rdzob de yang don dam par de nyid dam gzhan du brjod par mi nus so/ /de bas na 'du byed kyi mtshan ma'i dngos po gang yin pa de brjod du med pa'i dbyings kyang ma yin la/'du byed kyi mtshan ma'i dngos po de las brjod du med pa'i dbyings gzhan pa yang ma yin par rig par bya'o zhes bya ba gsungs so/ /de'i 'og tu de nyid kyi phyogs kyi nyes pa bstan pa'i phyir byams pa 'du byed kyi mtshan ma'i dngos po de gal te brjod du med pa'i dbyings yin du zin na 'o na ni byis pa so so'i skye bo thams cad kyang yongs su mya ngan las 'das par 'gyur ro zhes gsungs te/gal te kun rdzob nyid don dam pa yin na/ 'o na ni 'du byed kyi mtshan ma'i dngos po de nyid brjod du med pa'i dbyings su 'gyur ro/ / de lta na ni 'du byed kyi mtshan ma'i dngos po mngon sum du byas pas brjod du med pa'i dbyings mngon sum du byas par 'gyur te/ byis pa so so'i skye bo thams cad bla na med pa yang dag par rdzogs pa'i byang chub thob par 'gyur ro/ /de'i 'og tu gzhan pa'i phyogs kyi nyes pa bstan pa'i phyir byams pa gal te 'du byed kyi mtshan ma'i dngos po las brjod du med pa'i dbyings gzhan yin du zin na ni/'o na mtshan ma de yang mi dmigs pa na zhes bya ba la sogs pa gsungs te/ gal te kun rdzob las don dam pa gzhan zhig yin na ni 'du byed kyi mtshan ma'i dngos po las brjod du med pa'i dbyings gzhan te tha dad par 'gyur ro//de ltar gyur na chos las chos nyid gzhan du 'gyur ro/ /de la nyes pa ci yod ce na brjod du med pa'i don dam pa'i dbyings rab tu rtog pa mi 'grub po/ /ji lta zhe na/ don dam pa'i dbyings ni mtshan ma med pa yin na/ mtshan ma med pa de rnam pa gang gis rnam par shes pa la snang bar 'gyur/gang gi tshe 'du byed kyi mtshan ma'i dngos po de dang chos kyi dbyings tha dad pa ma yin par gyur pa de'i tshe/ 'du byed kyi dngos po de dang chos kyi dbyings de'i rgyur 'gyur ro zhes bya bar rigs so/ /sngar mtshan ma dang bcas pa'i dbyings dmigs pa'i dngos por byas nas/phyis shes rab kyis don dam pa rab tu rnam par 'byed pa'i tshe/ de dngos po med pa'i bdag nyid du don dam pa la dmigs so zhes brjod pa ni rigs so zhes dgongs pa'o/ /de ltar bcom ldan 'das kyis 'du byed kyi dngos po don dam par med pa dang /don dam pa yang de nyid gzhan las rnam par grol bar bstan pa dang / de'i 'og tu 'phags pa byams pas de 'khrul pa yod par dogs nas/ bcom ldan 'das gal te byang chub sems dpa' brjod du ma mchis pa'i dbyings dang 'brel ba'i shes rab kyi spyod pa la gnas pa na zhes bya ba la sogs pas yang zhus te/gang gi tshe byang chub sems dpa' brjod du med pa'i dbyings yid la byed pa sgom pa na 'du byed kyi dngos po mi dmigs pa de'i tshe/ dngos po de med pa'i phyir mi dmigs sam/ 'on te brjod du med pa'i dbyings dang / 'brel ba'i shes rab la spyod pas/dngos po la 'jug pa med pa'i phyir mi dmigs pa zhes zhus pa'o/ /de nas bcom ldan 'das kyis bka' stsal pa/ byams pa 'du byed kyi mtshan ma'i dngos po de la ni rang dbang nyid dam yod pa nyid gang yang med do zhes bya bas 'di skad bstan par 'gyur te/ 'du byed kyi mtshan ma'i dngos po ni yod pa ma yin yang byis pa so so'i skye bo rnams la don dam pa 'dzin pa'i mthu med de /ma rig pa'i phyin ci log dang / las rnam par smin pa la sogs pa'i rgyu dang rkyen gyi dbang gis/ gzhan gyi dbang du gyur pa'i dngos po dag rnam par shes pa la phyin ci log tu snang gi/rang dbang du ni ma yin no/ /de la gang gi tshe byang chub sems dpa' yid la byed pa sgom pa la brtson pa de'i tshe ni ma rig pa la sogs pa'i rgyu dang rkyen rnams med pas/ ji ltar sngon gzhan gyi dbang gis bdag nyid du snang ba de ltar mi snang ngo / /rgyu ma rig pa la sogs pa med par yang 'du byed kyi dngos po de rang dbang du 'byung ba'i mthu yang med do//de bas na dngos po de la rang dbang du yod pa gang yang med do zhes bya ba gsungs te/ de bas na med pa ni dmigs par mi 'gyur ro zhes bstan pa yin no/ /byams pa gang gi tshe khyod 'du byed kyi mtshan ma'i dngos po de la rnam par rtog pa de'i tshe zhes bya ba la sogs pas ni gzhan gyi dbang phyin ci ma log pa'i bdag nyid du 'byung ba de nyid dang /phyin ci log tu mi 'byung ba ston te/ gang gi tshe rnam par rtog pa de'i tshe rnam par rtog pa'i gzhan gyi dbang gis phyin ci log tu dmigs so/ / gang gi tshe rnam par mi rtog pa de'i tshe ni gzhan gyi dbang med pas phyin ci ma log pa/ don dam pa nyid la dmigs so zhes bya ba'i tha tshig go/ /de skad dris pa dang 'phags pa byams pas/ bcom ldan 'das de lta lags so zhes khas blangs so/ /de nas bcom ldan 'das kyis/byams pa de lta yin na de rnam par rtog pa tsam du ma zad dam zhes bya bas rnam par rtog pa tsam du rnam par gzhag nas/ de'i 'og tu dngos po yod pa bsal ba'i phyir de de ltar rnam par mi rtog pa'i dbyings la gnas te/ rnam par rtog pa rnams dang bral bar gyur pa na de la yod pa gang yin zhes bya ba la/de zhes bya ba ni byang chub sems dpa'o/ /de ltar zhes bya ba ni don dam par med na zhes bya'o / /rnam par mi rtog pa'i dbyings la zhes bya ba ni don dam pa'i dbyings la gnas pa na'o/ /de la yod pa gang yin zhes bya ba ni 'du byed kyi mtshan ma'i dngos po de la yod pa gang yin zhes bya ba ste/med pa nyid do zhes bya ba'i tha tshig go/ /gang yod pa ni dmigs par 'gyur ro zhes bya ba ni yod par gyur na dmigs par 'gyur ro/ /de ltar 'du byed kyi dngos po yod pa ma yin par yang dag par bstan pa dang / yang 'phags pa byams pas kun rdzob dang /don dam pa'i dbang gis gzugs la sogs pa chos thams cad kyi rab tu dbye ba bstan pa'i phyir de'i 'og tu/ bcom ldan 'das byang chub sems dpa' shes rab kyi pha rol tu phyin pa la spyod pa chos rab tu dbye ba mkhas pa la zhugs pas/ gzugs rab tu dbye ba'i brtags pa rnam pa du zhig tu rtogs par bgyi zhes bya ba la sogs pa zhus so//de nas bcom ldan 'das kyis/ byams pa rnam pa gsum du rtogs par bya zhes bya ba la sogs pas rab tu dbye ba bstan to/ /kun brtags pa'i gzugs dang / rnam par brtags pa'i gzugs dang /chos nyid kyi gzugs zhes bya ba nas/ kun brtags pa'i sangs rgyas kyi chos rnams dang / rnam par brtags pa'i sangs rgyas kyi chos rnams dang / chos nyid kyi sangs rgyas kyi chos rnams zhes bya ba'i bar gyis ni 'jig rten dang 'jig rten las 'das pa'i chos thams cad rnam pa gsum gyi nang du 'dus par bstan to//de nas yang 'phags pa byams pas/ kun brtags pa'i gzugs ni gang lags zhes bya ba la sogs pa zhus pa dang / bcom ldan 'das kyis/ byams pa gang 'du byed kyi mtshan ma'i dngos po de la gzugs zhes bya ba'i ming dang /'du shes dang / btags pa dang / tha snyad la brten nas gzugs kyi ngo bo nyid du yongs su rtogs pa 'di ni kun brtags pa'i gzugs so zhes bya ba la sogs pa gsungs te/ tha snyad la brten nas/ tha snyad kyi rgyu 'du byed kyi dngos po la gzugs kyi ngo bo nyid du brtags pa la gzugs zhes bya ba'i 'du shes dang brtags pa de ni kun brtags pa'i gzugs yin no zhes bya ba'i tha tshig go//chos rnams kyi ngo bo nyid ni gsum ste/ kun brtags pa'i ngo bo nyid dang / gzhan gyi dbang gi ngo bo nyid dang / yongs su grub pa'i ngo bo nyid de /de la gzugs la sogs pa chos rnams la gzugs zhes bya ba la sogs par mngon par brjod pa'i rnam pa gang yin pa de ni kun brtags pa'i ngo bo nyid do/ /ma rig pa la sogs pa'i dbang gis rnam par shes pa la chos rnams su phyin ci log tu snang ba'i rnam pa gang yin pa de ni gzhan gyi dbang gi ngo bo nyid do//gang ming de dang / phyin ci log tu snang ba'i rnam pa de dang bral ba brjod du med pa/ mtshan ma med pa'i rnam pa gang yin pa de ni don dam pa yongs su grub pa'i ngo bo nyid de/ 'di rgyas par ni rab tu byed pa las gzung bar bya'o/ / ngo bo nyid gsum po de dag dang / 'dir kun brtags pa'i gzugs dang / rnam par brtags pa'i gzugs dang / chos nyid kyi gzugs zhes bya ba de dag go rims bzhin du bstan par bya ste/ de la gzugs dang / tshor ba dang / 'du shes zhes bya ba la sogs pa'i ming gi kun brtags pa'i gzugs dang /kun brtags pa'i tshor ba dang / kun brtags pa'i 'du shes zhes bya ba la sogs par brjod de/ 'du byed kyi mtshan ma'i dngos po de dang de la gzugs so zhes bya ba'i ming dang / 'du shes dang / btags pa zhes bya ba la sogs pas ston to/ /de'i 'og tu rnam pa gnyis ni 'du byed kyi mtshan ma'i dngos po de rnam par rtog pa tsam gyi chos nyid la gnas pa'i rnam par rtog pa la brten nas mngon par brjod de zhes bya ba la sogs pas ston te/byis pa so so'i skye bo rnams kyi sems nyon mongs pa dang / las dang rnam par smin pa la sogs pa'i rgyu dang rkyen gyis phyin ci log tu gyur pa rnams la dngos po'i rnam par blo skye zhing snang ba ni rnam par brtags pa'i gzugs zhes bya'o//'du byed kyi mtshan ma'i dngos po de zhes bya ba la sogs pas de ston te/ rnam par rtog pa tsam gyi chos nyid la gnas pa zhes bya ba ni blos rnam par brtags pa'i rnam pa ma gtogs par ngo bo nyid gzhan med de/de bas na dngos po de rnam par brtags pa tsam gyi ngo bo nyid la gnas te/ de la gnas pa de nyid la rnam par rtog pa zhes bya'o/ /de ltar blos rnam par brtags pa'i rnam pa tsam gyi ngo bo nyid la gnas pa rnam par rtog pa de nyid la brten te nye bar bzung nas/gang mngon par brjod pa dang 'brel pa dngos po'i bdag nyid du kun tu g.yengs pa'i rnam pa la mngon par brjod pa zhes bya ste/ de ltar blos rnam par brtags pa'i rnam pa'i ngo bo nyid du gnas pa zhes bya ba'i rnam pa la brten nas blo la dngos po'i bdag nyid du snang ba ni rnam par brtags pa'i gzugs zhes bya ba'i tha tshig go//de bzhin du tshor ba la sogs pa la yang sbyar bar bya'o/ /de'i 'og tu chos nyid kyi gzugs ni de bzhin gshegs pa rnams byung yang rung ma byung yang rung zhes bya ba la sogs pa gsungs te/de bzhin gshegs pa rnams byung yang rung zhes bya ba 'dis chos nyid de ngo bo nyid yin gyi mi rtag pa ni ma yin no zhes bstan pa de / gang kun brtags pa'i gzugs des rnam par brtags pa'i gzugs de rtag pa rtag pa'i dus dang / ther zug ther zug gi dus su ngo bo nyid med pa kho na zhes bya ba de la/chos nyid kyi gzugs zhes bya ba ni gang gi tshe rnam par mi rtog pa'i blo la snang ba'i rnam pa de nyid sngar smos pa'i kun brtags pa brjod par bya ba dang / brjod par byed pa'i rnam pas 'du shes dang / gdags par 'os pa'i bdag nyid dang bral bar gyur pa de'i tshe/bdag nyid kyi brjod du med pa rnam par mi rtog pa'i bdag nyid du gnas pa'i rnam pa de la chos nyid kyi gzugs zhes bya'o/ /ngo bo nyid med pa zhes bya ba ni kun brtags pa'i ngo bo nyid med pa'i phyir ro/ /chos la bdag med pa zhes bya ba ni chos kyi bdag nyid kyi rnam pa med pa'o/ /de bzhin nyid ces bya ba ni phyin ci ma log pa'i rnam pa'o//yang dag pa'i mtha' zhes bya ba ni rnam pa de lta bu'i mthar thug pa'o/ /de bzhin du tshor ba la sogs pa la yang sbyar bar bya'o/ /byams pa gang kun brtags pa'i gzugs ni rdzas su med par blta bar bya'o zhes bya ba ni shin tu med pa'i phyir ro/ / rnam par brtags pa'i gzugs gang yin pa de ni rnam par rtog pa rdzas su yod pa'i phyir rdzas su yod par blta bar bya zhes bya ba ni kun rdzob tu yod pa'i phyir de yod pa'o/ /'dus byas kyi tshul gyi 'jig pa dang / gzugs su yod pa'i phyir rdzas yin te/ de bas rnam par brtags par yod pa nyid dang /rdzas yin pa'i phyir bshad do zhes bya ba'i tha tshig go/ /rang dbang du 'jug pa ni ma yin no zhes bya ba ni gzhan gyi dbang gi ngo bo nyid yin pa'i phyir de skad gsungs te/ chos nyid kyi gzugs gang yin pa de ni rdzas su med pa yang ma yin la/ rdzas su yod pa yang ma yin no/ /don dam pas rab tu bye ba zhes bya ba ni chos nyid gzugs so//de brjod du med pa'i bdag nyid du yod pa'i phyir med do zhes brjod du mi rung ste/ de bas na rdzas su med pa'ang ma yin no/ /rnam par brtags pa'i dngos po'i rnam par yod pa'i phyir yod do zhes brjod du yang mi rung ste/ de bas na rdzas su yod pa ma yin te/de'i phyir mtha' gnyis spangs nas dbu ma'i lam bstan pa yin no/ /don dam pas rab tu phye ba zhes bya ba ni don dam pa'i ngo bo nyid ces bya ba'i tha tshig go/ /rab tu phye zhes bya ba'i sgra ni ngo bo nyid kyi don to/ /de bzhin du sangs rgyas kyi chos kyi mtha'i bar yang sbyar bar bya'o/ /de ltar ngo bo nyid gsum gyi dbang gis mtshan nyid gsum smos nas/yang gnyis su med pa'i mtshan nyid bstan pa'i skabs dbye ba'i phyir 'phags pa byams pas gsol pa/ sngar shes rab kyi pha rol tu phyin pa mdor bsdus pa gtan la phab pa'i skabs su zhu ba rnam pa nyi shu rtsa brgyad bstan pa 'di lta ste/ gzugs zhes bya ba 'di ni gnyis su med pa'i grangs su byas pa'o zhes bcom ldan 'das kyis bka' stsal pa de zhes bya ba la sogs pa gsol to/ /byams pa de ji snyam du sems kun brtags pa'i gzugs la rdzas su med pa nyid gang yin pa de/ gzugs yin nam 'on te ma yin zhes bya ba la sogs pas ji skad bstan pa yin zhe na/kun brtags pa dang / rnam par brtags pa dang / chos nyid kyi gzugs 'di gsum la so sor gzugs sam gzugs ma yin zhes bya ba med pa de gnyis su med pa dang / de bzhin nyid dang / chos la bdag med pa'o//de bas na gzugs dang / tshor ba la sogs pa'i sgras/ de bzhin nyid gnyis su med pa'i grangs su bgrang bar byas so zhes bya ba'i tha tshig ste/ de nyid bstan par bzhed nas/ gzugs rnam pa gsum po de dag re re la yang / gzugs dang gzugs ma yin pa las rnam par grol ba'i mtshan nyid bstan pa'i phyir dang por kun brtags pa'i gzugs la brtsams nas/kun brtags pa'i gzugs la rdzas su med pa nyid gang yin pa de gzugs yin nam 'on te ma yin zhes bya ba gsungs te/ kun brtags pa'i gzugs ni gzugs kyi bdag nyid du yod pa ma yin pa'i phyir gzugs kyi ngo bo nyid do zhes brjod du mi rung ngo //gzugs kyi ming dang gzugs su gdags pa dag de la yod pa'i phyir gzugs kyi bdag nyid ma yin no zhes kyang brjod du mi rung ngo / /de bas na de la gzugs zhes bya ba ming dang 'du shes dang /btags pa dang tha snyad tsam nyid ces bya bar gsungs so/ /ji ga de ni gzugs yin nam zhes bya ba ni de ltar gzugs su btags pa'i dbang gis gzugs med pa yang ma yin la/ gzugs kyi ngo bo nyid med pa'i phyir gzugs kyang ma yin pas / gnyis su med do zhes bya ba'i tha tshig go//byams pa de ji snyam du sems rnam par brtags pa'i gzugs rdzas su yod pa nyid gang yin pa de ji ga gzugs ma yin pa yin nam zhes bya ba ni rnam par brtags pa'i de'i gzugs de yang gzugs kyi bdag nyid du snang ba'i phyir gzugs kyi ngo bo nyid med pa yang ma yin no//don dam par gzugs kyi 'du shes dang bral ba'i ngo bo nyid yin pa'i phyir gzugs kyi ngo bo nyid kyang ma yin no/ /de bas na rnam par brtags pa'i gzugs de nyid la kun brtags pa'i gzugs des de'i ngo bo nyid ma yin zhing de'i mtshan nyid ma yin pa gang yin pa de gzugs yin nam zhes bya ba gsungs so//de ltar rnam par brtags pa'i gzugs de gzugs su 'du shes su rung ba'i gzugs kyi ngo bo nyid du snang bas gzugs med pa yang ma yin la/ don dam par gzugs kyi mtshan nyid med pa'i phyir gzugs kyang ma yin pas gnyis su med ces bya ba'i tha tshig go//gang chos nyid kyi gzugs bdag med pas rab tu phye ba de ji ga gzugs yin nam zhes bya ba ni yongs su grub pa chos nyid kyi gzugs de mtshan ma thams cad dang bral ba'i ngo bo nyid yin pa'i phyir gzugs kyi ngo bo nyid kyang ma yin no/ /gzugs kyi chos nyid kyi ngo bo nyid yin pa'i phyir gzugs ma yin pa yang ma yin te/de bas na chos nyid kyi gzugs de nyid kyi gzugs kyi chos nyid gang yin pa de gzugs ma yin pa yin nam zhes bya ba gsungs te/ chos nyid med pa'i ngo bo nyid yin pa'i phyir gzugs kyang ma yin gzugs kyi chos nyid yin pa'i phyir gzugs ma yin pa yang ma yin zhes bya ba ni gnyis su med pa'i don to//de bas na de ni gnyis su med pa'i grangs su byas pa'o zhes bya ba ni/ de bzhin nyid kyi grangs su byas so zhes bya ba'i tha tshig go / /de bzhin du sangs rgyas kyi chos kyi mthar thug gi bar du gnyis su med par sbyar bar bya'o//de ltar gzugs la sogs pa sangs rgyas kyi chos kyi mthar thug gi bar du gnyis su med par bstan nas/ de'i 'og tu rnam pa gzhan gyis bden pa bzhi po dag la gnyis su med pa'i mtshan nyid bstan pa'i phyir gang yongs su shes pa yang ma yin/ yongs su mi shes pa yang ma yin pa de nyid de'i yongs su shes pa'o zhes bya ba gsungs te/ byang chub sems dpa' ni chos thams cad kyi mtshan nyid mnyam par gzhag pa'i yid la byed pas yongs su shes pa ma yin gyi/ nyan thos ltar mnyam par ma bzhag par yongs su 'dris pa'i shes pas ni yongs su shes te ji ltar sngar bstan pa bzhin no//de bas na de ltar shin tu yongs su shes pa ma yin pa 'di nyid de'i yongs su shes pa'o/ /de bzhin du spang ba dang / mngon sum du bya ba dang / bsgom pa rnams la yang sbyar bar bya'o/ / de ltar gnyis su med pa'i mtshan nyid la mkhas pa de 'byung ba la mkhas par bya ba bstan pa'i phyir/ byams pa byang chub sems dpa' rnams kyi mya ngan las 'das pa ni zab po mchog tu zab po zhes bya bas mya ngan las 'das pa ston to/ /ji ltar zab ces zhus pa dang / 'di ltar mya ngan las 'das pa yang ma yin/mya ngan las ma 'das pa yang ma yin te/ de'i phyir zab pa dang / mchog tu zab ces bya'o zhes bya bas bstan te/ byang chub sems dpa' rnams kyi mya ngan las 'das pa zhes bya ba ni shin tu yongs su dag pa gnas gyur pa la bya ste/ gnas gyur pa de yang /'di ltar nyon mongs pa dang shes bya'i sgrib pa thams cad yongs su mya ngan las 'das pa'i ngo bo nyid dang / las kyi rnam par smin pa yongs su mya ngan las 'das pa'i ngo bo nyid yin te/ de'i phyir mya ngan las 'das pa'o/ /'di ltar nyan thos dang / rang sangs rgyas dag lta bu ma yin gyi 'khor ba yod kyi bar du/sems can gyi don mdzad de/ de'i phyir mya ngan las 'das pa ma yin no/ /de nas byams pas gsol pa/ bcom ldan 'das gal te byang chub sems dpa' sems dpa' chen po gzhan gyi don las brtsams te/ 'khor ba yongs su mi gtong na/'dis ji ltar mya ngan las 'das pa yongs su btang bar mi 'gyur zhes bya ba ni/ gal te byang chub sems dpa' 'khor ba yod kyi bar du sems can gyi don rgyun mi gcod par rtag tu 'khor ba yongs su mi gtong na/ de lta na mya ngan las 'das par ji ltar 'gyur zhes zhus pa'o//de nas bcom ldan 'das kyis bka' stsal pa/ byams pa gzhan gyi don las brtsams te/ 'khor ba yongs su mi gtong bas mya ngan las 'das pa 'ang ma yin no/ /bdag gi don las brtsams te mya ngan las 'das pa yongs su mi gtong bas mya ngan las 'das pa 'ang ma yin no zhes bya ba ste/bcom ldan 'das kyis ni gzhan gyi don las brtsams nas/ 'khor ba yongs su mi gtong zhing phung po med pa'i mya ngan las 'das pa mi len te/ de bas na mya ngan las 'das pa 'ang ma yin no/ /bdag gi don las brtsams te/ bya ba byas pa'i phyir mya ngan las 'das pa yongs su mi gtong zhing 'khor ba yang mi len te/de bas na mya ngan las 'das pa'o zhes bya bas ji skad bstan par 'gyur zhe na/ chos kyi sku las brtsams te/ de bas na mya ngan las 'das pa'o zhes bya bas ji skad bstan par 'gyur zhe na/ chos kyi sku las brtsams te mya ngan las 'das pa'o//sprul pa'i sku dang longs spyod rdzogs pa'i sku'i dbang gis ni mya ngan las 'das pa ma yin no zhes bstan pa yin no/ /bcom ldan 'das gal te byang chub sems dpa' sems dpa' chen po gzhan gyi don las brtsams te 'khor ba yongs su mi gtong na 'khor ba yongs su ma btang bas 'dis ji ltar mya ngan las 'das pa yongs su btang bar mi 'gyur zhes bya ba la sogs pas 'di skad bstan te/gal te gzhan gyi don gyi phyir 'khor ba yongs su mi gtong na/ 'dis mya ngan las 'das pa yongs su btang bar 'gyur ro/ /gal te bdag gi don du mya ngan las 'das pa yongs su mi gtong na 'dis 'khor ba yongs su btang bar 'gyur ro//de bas na 'khor ba'i yongs su mi gtong ba dang / gtong ba dang / mya ngan las 'das pa dang / mya ngan las ma 'das pa zhes bya ba de dag 'gal ba yin na/ de ji ltar mi 'gal bar 'gyur zhes zhus pa'o/ /de nas bcom ldan 'das kyis 'khor ba la yang 'khor ba nyid du rnam par mi rtog ces bya ba la sogs pas mi 'gal bar ston to// byang chub sems dpa' ni chos thams cad la rnam par mi rtog cing mnyam pa nyid tsam du mthong bas/ 'khor ba la 'khor ba'o zhes spros pa dang / mya ngan las 'das pa yang mya ngan las 'das pa'o zhes spros pas spros par mi byed de/de bas na mnyam pa nyid la gnas so/ /mnyam pa nyid la gnas pas na gang la yang nyes dmigs su mthong bas blo zhum par 'gyur ba dang / gang la yang phan yon du mthong bas sbyor bar 'gyur ba de lta bu med do zhes bya ba'i tha tshig go//de nas 'phags pa byams pa des kyang ma mgu nas bcom ldan 'das 'o na byang chub sems dpa' rnam par mi rtog pa'i dbyings la gnas pas/ 'khor ba ji ltar ma btang ba de ltar blangs pa yang ma mchis shing mya ngan las 'das pa ji ltar ma btang ba de ltar blangs pa ma mchis par yang mi 'gyur lags sam/bcom ldan 'das gal te blangs pa ma mchis na/ ji ltar ma btang ba lags zhes bya ba zhus te/ gal te byang chub sems dpa' 'khor ba dang / mya ngan las 'das pa la rnam par mi rtog pas/ mnyam pa nyid dmigs na/de lta na ni 'khor ba dang mya ngan las 'das pa dag gtong ba yang med/ len pa yang med do zhes bya na/ de la gal te len pa med na ji ltar btang bar mi 'gyur zhes zhus pa'o/ /byams pa da ni 'di ltar 'khor ba len to zhe'am mi len to zhes mi smra'o zhes bya bas 'di skad gsungs te/nga ni 'khor ba spong ba dang / mi spong ba'i dbang gis len pa dang / 'dor bar mi smra'i/ dgos pa la ltos nas bya ba byed pa'i dbang gis smra ste/ 'di ltar mngon par shes pa'i mthus dus thams cad du 'jig rten gyi khams mtha' yas pa rnams su sems can gyi khams kyi don shin tu rgyun mi 'byed par byed de/de'i phyir 'khor ba yongs su mi gtong zhes smra'i/ 'khor ba mi spong ba'i phyir ni ma yin no/ /'di ltar stong pa nyid kyi dbyings dmigs su med pa'i dbyings nye bar bzung nas/ de la gnas te/ de'i phyir mya ngan las 'das pa len to zhes smra'o zhes bstan pa'o//bcom ldan 'das rnam par mi rtog pa'i mtshan nyid 'dus pa ji ltar blta bar bgyi zhes bya ba ni/ ji ltar rnam par mi rtog pa yongs su rdzogs shing mthar phyin pa lags zhes zhus pa'o/ /dngos po dang dngos po med pa gnyis su med pa zhes bya ba ni/ yod ces bya ba'am med ces bya ba'i gnyis su med pa'o//spros pa med pa zhes bya ba ni/ chos de rnams la rnam pa thams cad kyi thams cad du rnam par mi rtog pa'o/ /bcom ldan 'das ci lags nyan thos thams cad gcig tu nges par gtan du mya ngan las 'das pa la gnas pa lags sam zhes bya ba ni/ byang chub sems dpa' rnams 'khor ba mi len to zhes 'byung bas nyan thos rnams len pa med par shin tu mya ngan las 'das pa nyid du 'gyur ro snyam du dgongs nas zhus pa'o//sems can rnams kyi rigs dang / rang bzhin mang du dmigs zhes bya ba ni sems can rnams kyi rigs rnams dang / rang bzhin rnams mang ba ste rigs ni rnam pa gsum mo//rang bzhin yang bsam pa dang / bag la nyal dang / mos pa dang / dbang po la sogs pa'i bye brag gis tha dad pa rnams so/ /bzang po'i bye brag don du gnyer te/ bzang po'i bye brag nyid thob par 'gyur zhes bya ba ni/ dang po nyid nas rang bzhin gyis yang dag par rdzogs pa'i byang chub 'dod la /ji ltar 'dod pa bzhin du 'thob pa'o/ /dman pa zhes bya ba ni/ nyan thos dang rang sangs rgyas kyi byang chub po/ /dman par shes nas de tsam gyis chog par mi 'dzin ces bya ba ni 'phags pa'i gang zag tu 'gyur te/nyan thos nyid thob nas phyis sangs rgyas su 'gyur ro zhes bya ba'i tha tshig go/ /skye ba ma mchis pas ji ltar thob par 'gyur zhes bya ba ni 'khor bar skyes na ni byang chub kyi tshogs yongs su rdzogs par bya nus so snyam du dgongs pa'o/ / de'i skye ba lags par ni bcom ldan 'das kyis bka' ma stsal to zhes bya ba ni/rgyun du zhugs pa ni 'dir srid pa brgyad pa mi skyed do/ /lan cig phyir 'ong ba ni 'dir srid pa gcig len to/ /phyir mi 'ong ba ni 'dir srid pa gcig kyang mi len to/ /dgra bcom pa ni thams cad du yang srid pa mi len te de ltar skye ba bkag go/ /byams pa de'i skye ba las dang nyon mongs pa'i dbang gis 'gyur bar ni nga mi 'dogs kyi/de'i skye ba bsam gyis mi khyab pa dang / sprul pa dang yongs su bsngos pa'o zhes 'dogs so zhes bya ba la/ las dang nyon mongs pa'i dbang gis skye ba zhes bya ba de ni rgyun du zhugs pa la sogs pa la bya'o/ /skye ba rnam pa gsum po dag la ni dpyad pa med do//de dag la ni skye ba rnam pa gsum yod de/ bsam gyis mi khyab pa'i skye ba dang sprul pa'i skye ba dang / smon lam gyi skye ba'o/ /de la gang nyan thos kyi rigs ma nges pa de dag ni/ gal te de bzhin gshegs pa dang nye bar gyur na/ de'i tshe de bzhin gshegs pas de dag gi rigs kyi khyad par la gzigs nas/ji ltar de bla na med pa yang dag par rdzogs pa'i byang chub la 'dod pa bskyed pa de lta bu'i chos bshad pa mdzad nas/ de lta bu'i lam la sbyor te / 'dod pa de yongs su ma btang bar yang dag pa'i mtha' mngon sum du byas nas / rgyun du zhugs pa'i 'bras bu la sogs pa thob par byed do//de ltar sangs rgyas rnams thabs mkhas pa'i phyir shes rab kyi pha rol tu phyin pa'i tshul gyis de dag thams cad mkhyen pa nyid kyi lam la bkod nas/ slob pa'am mi slob par gyur pa la/ bla na med pa yang dag par rdzogs pa'i byang chub la 'dod pa ma btang bas mya ngan las 'das pa mngon du byed kyang nges pa'i nyan thos ltar/de la shin tu drag po'i mos pa mi skyed de/ dper na la la zhig grong ngam grong khyer la lta ba na/ de nyid du gnas par bya'o snyam du bsams te bltas na ni/ der mos par mos pa gzhan du 'gyur ro/ /gzhan du 'gro'o snyam du bsams te/bltas na ni blo gzhan du 'gyur ro/ /de bzhin du 'dir yang yang dag par rdzogs pa'i byang chub 'dod na ni/ mya ngan las 'das pa la 'dod pa rnam pa gzhan du 'gyur la/ nges pa'i nyan thos rnams kyang rnam pa gzhan du 'gyur ro/ /de bas na nyon mongs pa spangs kyang la la bag chags la sogs pa'i dbang gis khyad par du 'gyur te/snying rje'i bsam pa'i dbang gis kyang / de dag 'khor bas shin tu skyo bar mi 'gyur la/ sems can la phan pa byed par 'dod pa rnams ni bu gzhon nu mi gtsang ba'i dong du ltung ba 'byin par 'dod pas mi gtsang ba'i dong la blta yang / des skyo bar mi 'gyur ba bzhin no//slob pa'am mi slob pa de lta bur gyur pa de dag ni de bzhin gshegs pa'i man ngag gis 'jig rten las 'das pa zag pa med pa/ 'phags pa'i lam la sogs pa'i dge ba'i rtsa ba rnams 'di ltar yongs su sngo bar byed de/ gang bdag gi dge ba'i rtsa ba 'jig rten las 'das pa zag pa med pa de dag thams cad sems can la phan pa'i phyir 'khor bar skye ba la mngon du phyogs par gyur cig ces yongs su bsngo'o//de dag de ltar yongs su bsngos pa'i dbang gis lam la sogs pa zag pa med pa'i dge ba rnams kyis 'khor bar skye bar byed de/ de dag la yang lhan cig byed pa'i rkyen du gyur pa nyon mongs pa dang 'dra ba'i dge ba'i chos rnams yod de/'di ltar mdo sde gzhan dag las blo gros rgya mtsho 'khor ba'i rgyun byed la/ dge ba'i rtsa ba dang mtshungs par ldan pa'i nyon mongs pa de dag gang zhe na/ 'di lta ste bsod nams kyi tshogs btsal bas yongs su mi ngoms pa dang /bsams bzhin du srid par skye ba yongs su 'dzin pa dang / sangs rgyas dang phrad par smon pa dang / sems can yongs su smin par bya ba la yongs su mi skyo ba dang / dam pa'i chos yongs su 'dzin pa la brtson pa dang / sems can gyi bya ba ci yod snyam pa la spro ba dang /chos 'dod pa'i bag la nyal mi 'dor ba dang / pha rol tu phyin pa la sbyor ba rnams yongs su mi gtong ba'o/ /blo gros rgya mtsho de dag ni dge ba'i rtsa ba dang mtshungs par ldan pa'i nyon mongs pa rnams te/ byang chub sems dpa' de dag gis 'dre yang / nyon mongs pa'i skyon rnams kyis mi gos so//gsol pa bcom ldan 'das dge ba'i rtsa ba lags na ci'i slad du nyon mongs pa rnams zhes bgyi/ bka' stsal pa/ blo gros rgya mtsho 'di ltar nyon mongs pa de lta bu dag gis byang chub sems dpa' khams gsum dang 'dre zhing / khams gsum pa ni nyon mongs pa las byung ba yin pas de la byang chub sems dpa' ni thabs mkhas pa dang /dge ba'i rtsa ba'i stobs bskyed pas bsams bzhin du khams gsum du 'dre'o / /de'i phyir dge ba'i rtsa ba dang mtshungs par ldan pa'i nyon mongs pa zhes bya ste/ khams gsum du 'dres pas de skad bya'i sems nye bar nyon mongs pas ni ma yin no zhes gsungs pa lta bu'o//de bas na de ltar yongs su bsngos pa'i mthus zag pa med pa'i dge ba'i rtsa ba rnams kyis srid par skye'o zhes bya'o/ /phyir mi 'ong ba 'am/ dgra bcom pa la la ting nge 'dzin gyi stobs bskyed pas/ mngon par shes pa khyad par can dang ldan pa'i phyir sprul pa rnam pa sna tshogs kyis skye ba bstan nas/sems can rnams kyi don dpag tu med pa byed cing / byang chub kyi tshogs yongs su rdzogs par byed pa de ni sprul pa'i skye ba zhes bya'o/ /la la ni dge ba'i bshes gnyen la brten pa'i mthus/ de lta bu'i smon lam gyi khyad par dag thog ma nas bstsags par gyur te/de dag gi smon lam de dag rnam par smin pa'i bdag nyid du gyur nas yongs su bsngos pa'i skye ba dag sgrub par byed de/ de ni yongs su bsngos pa'i skye ba zhes bya'o/ /'o na de dag ci'i phyir rgyun du zhugs pa'i 'bras bu la sogs pa ma thob par/byang chub kyi phyogs yongs su rdzogs par mi byed ce na/ med pa'i phyir te/ 'di ltar de dag ni nyon mongs pa shas che la dbang po rtul te/ dbang po sbyang bar bya ba dang / nyon mongs pa spangs pa med par byang chub kyi tshogs yongs su rdzogs par byed mi nus te/de bas na de bzhin gshegs pa thabs mkhas pas de dag la de lta bu'i mthu mchog dang ldan par mdzad do/ /ji skad du mdo sde gzhan dag las/ bcom ldan 'das de bzhin gshegs pas nyan thos rnams bla na med pa yang dag par rdzogs pa'i byang chub tu lung bstan pa de dag ji ltar blta bar bgyi/bcom ldan 'das kyis bka' stsal pa/ rigs kyi bu ngas nyan thos rnams bla na med pa yang dag par rdzogs pa'i byang chub tu lung bstan pa gang yin pa de dag ni/ rigs la bltas te lung bstan pa'o/ /gsol pa bcom ldan 'das/ nyan thos zag pa ma mchis pa srid par kun du sbyor ba rgyun bcad pa rnams rigs mchis su lags kyang ji ltar bla na med pa yang dag par rdzogs pa'i byang chub mngon par rdzogs par 'tshang rgya bar 'gyur/bcom ldan 'das kyis bka' stsal pa/ rigs kyi bu de bas dpe bstan gyi nyon cig/ rigs kyi bu 'di lta ste dper na rgyal po rgyal rigs spyi bo nas dbang bskur ba la bu zhig yod de/de yang bzo'i gnas thams cad la slob pa las/ de dbang po rtul zhing dbang po rno ba ma yin pas/ phyis bslab par bya ba gang yin pa de ni sngar slob/ sngar bslab par bya ba gang yin pa de ni phyis slob par byed na/rigs kyi bu de ji snyam du sems/ ci'i rgyu des rgyal po'i bum yin zhes bya ba'am/ gsol pa bcom ldan 'das de ni ma lags so/ /bde bar gshegs pa de ni ma lags te/ bcom ldan 'das de rgyal po'i bu nyid lags so zhes bgyi'o/ /rigs kyi bu de de bzhin du byang chub sems dpa' dbang po rtul po rigs dang ldan pa rnam pa bsgom pa'i lam gyis sngar nyon mongs pa rnams zad par byas nas/phyis bla na med pa yang dag par rdzogs pa'i byang chub mngon par rdzogs par 'tshang rgya bar byed na/ rigs kyi bu de ji snyam du sems rgyu des mngon par rdzogs par sangs ma rgyas zhes bya ba'am/gsol pa bcom ldan 'das de ni ma lags so/ /bde bar gshegs pa de ni ma lags so zhes bya ba la sogs pa gsungs pa lta bu'o/ /de bas na de ltar skye ba rnam pa gsum gyi dbang gis skyes nas byang chub kyi tshogs yongs su rdzogs par byed do/ /'phags pa shes rab kyi pha rol tu phyin pa 'bum pa dang /nyi khri lnga stong pa dang / khri brgyad stong pa rgya cher bshad pa rdzogs so// //rgya gar gyi mkhan po su ren+d+ra bo d+hi dang / zhu chen gyi lo tsA ba ban de ye shes sdes zhus te gtan la phab pa'o // //