CLOSE WINDOW

D3791
བོད་ཡིག

@##/ /rgya gar skad du/ Ar+ya pradz+nyA pA ra mi tA aSh+Ta sa ha sri kA byA khyA a b+hi sa ma yA laM ka ra A lo ka nA ma/ bod skad du/ 'phags pa shes rab kyi pha rol tu phyin pa brgyad stong pa'i bshad pa/mngon par rtogs pa'i rgyan gyi snang ba zhes bya ba/ bcom ldan 'das yum shes rab kyi pha rol tu phyin ma/ mos pa la byams pa / yon tan dpag tu med pa dang ldan pa la phyag 'tshal lo/ /bcom ldan 'das byang chub sems dpa' sems dpa' chen po 'phags pa 'jam dpal gzhon nur gyur pa la phyag 'tshal lo//'phags pa byams pa mi pham mgon po la phyag 'tshal lo/ /nyan thos zhi ba tshol rnams kun shes nyid kyis nyer zhir khrid mdzad gang yin dang //'gro la phan par byed rnams lam shes nyid kyis 'jig rten don sgrub mdzad pa gang / /gang dang yang dag ldan pas thub rnams rnam pa kun ldan sna tshogs 'di gsung ba / /nyan thos byang chub sems dpa'i tshogs bcas sangs rgyas kyi ni yum de la phyag 'tshal//dngos rnams sgyu ma'i rang bzhin dang mtshungs la mkhas rnal 'byor rnams kyi thar mchog tu/ /'khor ba'i khongs nas nyes pa'i tshogs su kun du rgyal bar gyur pa'i lus can rnams/ /bcom ldan brtse ldan byams pa rang nyid kyis ni rnam pa kun tu bkri bya'i phyir//shes rab pha rol phyin tshul shin tu gsal bar rgyas bshad tshig ler byas pa mdzad/ /'phags pa thogs med zhes bya grags pa gsal ldan shes rab ldan pa'i mchog gyur pas/ /de nyid rnam par nges par bshad pa rab tu sbyar mdzad des mdzad pa yi mthus//dngos dang dngos med rnam dbye'i phyogs la mkhas par shes pa'i mngon rlom gyis mtho ba/ /slob dpon dbyig gnyen gyis ni gzhung gi 'grel par don bshad pa la gnas thob gyur/ /rnal 'byor goms pas don gyi de nyid bsrubs las 'jig rten 'das pa'i shes rab ldan //skyes gyur blo bzangs 'phags pa rnam grol sde yis 'brel pa la ni cher 'bad la/ /mtha' gcig skyes bur mi mthun phyogs lta zhi byed bstan bcos la mkhas rtogs ldan gang / /rnam grol sde zhes tshig tu 'jig rten na grags gzhan pa des ni rnam 'grel mdzad//de la blo nyams bdag 'dras sngon chad med cing brjod par nus min gang gi phyir/ /mkhas mchog rnams kyis nyin dang nyin la ma dpyad dngos po'i tshul de gang zhig yod/ /ye shes thob byed chos kyi de nyid yul la bdag ni 'dod pa skyes gyur pa/ /des na dam pa'i don gyi yul mchog bshad pa byed la mngon par spro bar gyur//'di skad ces bya ba la sogs pa la/ thams cad kyi 'brel pa dang brjod par bya ba dang dgos pa dang dgos pa'i dgos pa rtogs pa sngon du song ba'i 'jug pa ni/ thams cad du don du 'gyur ba'i the tshom gyis yin te/ de na shes rab kyi pha rol tu phyin pa la 'brel pa la sogs pa rnams brjod par bya ba yin no//'di ltar gal te 'di'i 'brel pa dang brjod par bya ba ma smras na de'i tshe/ smyon tshig la sogs pa ltar 'brel pa med pa dang don med par dogs pas nyan pa la su yang 'jug par mi 'gyur ro/ /des na 'di'i 'brel pa dang brjod par bya ba ni gdon mi za bar brjod dgos so//de bzhin du 'brel pa dang brjod par bya ba yod du zin kyang bya ba rdzogs pa'i las la khyad par du sgrub par byed pa ma yin pa sgrub byed yin no zhes bya ba yang sgrub par byed pa'i tshul las 'das pa yin no zhes bya ba'i tshul gyis mdo sde gzhan dang ma 'brel pa 'jug pa'i yan lag khyad par can gyi dgos pa dang bral na/shes rab kyi pha rol tu phyin pa'i mdo sde rin po che la dad pas rjes su 'brang ba dag kyang mnyan pa tsam du yang gus pa mi skye'o/ /de bas na mdo sde la 'jug par 'dod pa rnams 'jug par bya ba'i phyir/ dang por bya ba'i 'bras bu thun mong ma yin pa der gtogs pa'i dgos pa nyid brjod par bya'i/gzhan du gtogs pa ni ma yin te/ gzhan du na ma 'brel pa brjod par 'gyur ro/ /mdo sde'i thog mar dgos pa brjod pa ni mdo sde la gzhan 'jug pa'i don du yin gyi/ phongs pas ni ma yin no/ /dgos pa'i ngag bstan pas gzhan dag mdo sde la 'jug par yang ji ltar 'gyur zhe na/gal te der gtogs pa'i dgos pa nyid brjod kyi gzhan du gtogs pa ni ma yin te/ gzhan gyi dgos pa brjod pas gzhan du 'jug par 'gyur ba ni su yang med do/ /mdo sde yang khyad par can gyi don gtsor ston pa'i tshig la brjod kyi/ brjod par bya ba'am don ston pa'i nus pas stong pa'i sgra tsam la ni ma yin no//de bas na brjod par bya ba la sogs par gtogs pa ni brjod par bya ba ma yin no/ /bya ba'i rang bzhin yang dgos pa ma yin te/ 'di ltar rang gi don du gyur pa'i brjod par bya ba ston par byed pa'i mtshan nyid kyi bya ba ni ngag thams cad la thun mong yin la/de yang shin tu grags pas dgos pa nyid du gzung bar 'os pa ma yin te/ de la ni bstan bcos 'khrul pa med pa'i phyir ro/ /brjod par bya ba med pa nyid du dogs pa bsal ba'i don du nye bar bstan par bya ba yin no/ /zhe na/ ma yin te brjod par bya ba bstan pa nyid kyis dogs pa de bsal ba'i phyir ro//brjod par bya ba'i khyad par bstan par 'dod pas de nye bar bzung ba yang ma yin te/ brjod par bya ba'i khyad par ston pa nyid kyis de bstan pa yin pa'i phyir ro/ /bya ba'i 'bras bu de'i yang 'bras bur gyur pa'i dgos pa nye bar bstan par bya ba yin te/ de med par bya ba'i 'bras bu tsam gyis mdo sde la 'jug pa mi srid pa'i phyir ro/ /'di ltar mngon par 'dod pa'i gtso bo'i 'bras bu don du gnyer ba'i rtogs pa dang ldan pa rnams ni de'i thabs la 'jug ste/ rgyu med pa'i 'bras bu mi 'thad pa'i phyir/ nad med pa'i sgrub byed ma tshar ba med pa rjes su bsgrubs pas nad med pa thob pa dang 'dra bar/shes par gyur pa'i thabs goms par byed pa na rang gi thabs las byung ba'i 'bras bu ster bar byed pa des na thabs rtogs par bya ba'i phyir mdo sde la 'jug go/ /de bas na 'jug pa'i yan lag gi gtso bo nyid yin pas na dgos pa'i yang dgos pa kho na nges par bstan par bya'o//de yang thabs su gyur pa 'brel pa la sogs pa med par bstan par mi nus pas mdo sde'i dgos pa'i yang dgos pa'i thabs bstan par bya ba'i don du 'brel pa la sogs pa brjod do/ /dgos pa'i yang dgos pa de yang / 'brel pa dang ni rjes mthun thabs/ /skyes bu'i don ni rjod byed ngag /yongs brtags dbang du byas pa ste/ /de las gzhan pa'i dbang byas min/ /zhes bya ba'i tshul gyis 'brel pa dang rjes su mthun pa'i thabs dang ldan par bstan par bya ba yin no/ /de'i thabs rjes su bsgrub par mi nus pa yang ma yin te/gzhan du na rims nad sel bar byed pa'i 'jog po'i gtsug gi nor bu rin po che rgyan gyi don du ltar su yang 'jug par mi 'gyur ro/ /thug pa med pa yang ma yin te/ 'di ltar skyes bu'i mngon par 'dod pa yongs su rdzogs par 'dod pa rgyun chad pa'i phyir de las gong du dgos pa gzhan tshol bar mi byed do//'di'i 'brel pa la sogs pa gang yin zhe na/ de la brjod par bya ste/ re zhig 'brel pa ni dgos pa la sogs pa shig tu bstan par mi bya ste/ 'bras bu med pa'i phyir ro/ /gang zhig gang brjod du zin kyang rtogs par ma gyur pa de ni logs shig tu bzung bar 'os te/dper na brjod par bya ba la sogs pa gang rung cig brjod pas cig shos rtogs par mi 'gyur ba lta bu yin na/ dgos pa brjod pas 'brel pa ma brjod pa ni mi srid do/ /'di ltar de rab tu ston pas ni bstan bcos dang dgos pa dag gi bsgrub par bya ba dang / sgrub par byed pa'i ngo bo'i phyir mtshan nyid bstan par bya'o//gzhan bla ma brgyud pa'i bya ba la sogs pa'i mtshan nyid ni ma yin te/ de ni don du gnyer ba 'jug pa'i yan lag ma yin pa'i phyir ro/ /bsgrub bya dang sgrub byed kyi ngo bo de yang dgos pa brjod pa nyid kyis bstan te/ 'di ltar 'di ni 'di'i dgos pa yin no zhes ston pas ni/'di ni 'di'i sgrub byed yin no zhes bstan pa yin no/ /gang zhig gang sgrub par mi byed pa de'i dgos pa ni de ma yin te/ ha cang thal ba'i phyir ro/ /de bas na don gyi shugs kyis go bas 'di ni dgos pa brjod pa la sogs pa shig tu brjod par bya'o/ /kha cig na re chos rnam par 'byed pa'i don du gzhi thams cad bsdus pa brjod par bya ba yin no zhes zer ro//gzhan dag ni mi mthun pa'i phyogs spang bar bya ba'i phyir gnyen po'i phyogs ma lus pa bstan par bya ba yin no zhes zer ro/ /la la ni shes bya ma lus pa yongs su shes par bya ba'i phyir rnam pa ma lus pa bstan par bya ba yin no//zhes zer ro/ /de dag gsum char yang bden pa ma yin te/ 'di ltar phyogs dang po gzhi ma lus par bsdus pa la ni shes rab kyi pha rol tu phyin pa 'dir/ chos mngon pa'i sde snod la sogs par phung po dang khams dang skye mched bstan pas ma bsdus pa gang yin pa snga na med pa'i dngos po'i rigs de yod pa ma yin te/des na zlos pa'i skyon du 'gyur ro/ /gnyis pa gnyen po'i phyogs thams cad bsdus pa la mi mthun pa'i phyogs kyi dngos po'i gang yin pa ma bsdus pas/ nyan thos kyi lam la sogs pa gnyen po'i nyid du bsgom par bya'o zhes brjod kyang /gang gi gnyen po yin zhes ma shes na/ mi mthun pa dang gnyen po'i phyogs so sor nges par rtogs pa med pas/ rtogs pa med pa'i nyes par 'gyur ro/ /gsum pa rnam pa ma lus par bsdus pa la yang / ci rnam pa bzhi las tha mi dad pa yin nam/'on te tha dad pa yin zhes rnam par rtog pa gnyis so/ /gal te rnam par rtog pa dang po ltar na de'i tshe rnam pa'i thabs kyi gzhi nyid bsdus pa yin pas gzhi bsdus pa la 'byung ba'i nyes pa nyid du 'gyur ro/ /'on te gnyis pa ltar na de'i tshe rnam par rtog pas bskyed pa gzhi med pa'i rnam pa tsam du bsdus pas/brgyud pa tsam gzhi gang la yang 'jug par mi 'gyur ba'i phyir/ rnam pa 'di bsgoms kyang skyes bu'i don du mi mkho ste/ des na skyes bu'i don la dgos pa'i don mi ston pas ma bshad pa'i nyes pa yod do/ /de bas na ji skad bshad pa'i don gsum char bsdus pas/phyogs re re las 'byung ba'i nyes pa mi 'thad pas/ nyan thos dang rang sangs rgyas dang byang chub sems dpa' dang de bzhin gshegs pas thugs su chud pa bsdus pa/ rnam pa thams cad mkhyen pa nyid la sogs pa mngon par rtogs pa brgyad kyi rim pa phyin ci ma log pa/mngon par mtho ba dang nges par legs pa'i chos rnams thob par byed pa'i lam ma lus pa/ cho 'phrul rnam pa sna tshogs kyis 'gro ba thams cad la ston par mdzad pa'i bcom ldan 'das thugs rje chen po'i rang bzhin gyis shes rab kyi pha rol tu phyin pa las bstan par mdzad pa ni brjod par bya ba yin no//ji skad du bshad pa'i brjod par bya ba 'phags pa shes rab kyi pha rol tu phyin pa stong phrag brgya pa la sogs pa'i mdo'i don byang chub kyi sems dang gdams ngag la sogs pa bsgrub pa'i rang bzhin/ gnas skabs brgyad kyi dbye ba phye ba thams cad/sems can mdor bsdus pa la dga' ba rnams kyis mdor bsdus nas bde blag tu rtogs par bya ba'i phyir/ bcom ldan 'das kyis bcom ldan 'das ma brgyad stong pa bstan pa yin no/ /de bas na bstan par bya ba'i rgyud du gtogs pa/ mdor bsdus pas don mtha' dag bde blag tu rtogs pa ni/thun mong ma yin pa'i phyir na bya ba'i 'bras bur gyur pa'i dgos pa yin no/ /ji skad du bshad pa'i brjod par bya ba rnam pa thams cad mkhyen pa nyid la sogs pa'i lam/ seng ge dang 'phrog byed dang dbyig gi snying po la sogs pa 'khor ba thog ma med pa nas dngos po la mngon par zhen pa'i dug gis bsam pa'i rgyud ma rungs par byas pa/dngos po ma lus pa bdag med par bsgom pa goms par ma byas pa rnams kyis rtogs par ma gyur pa ni/ shes rab kyi pha rol tu phyin pa thob pa las/ thos pa'i shes pas bde blag tu nges par bzung ste/shin tu gsal bar nyams su myong bas skyes pa'i bag chags las byung ba dran pa'i shes pa la bzhag nas bsam pa'i rang bzhin gyi shes rab kyis nges par byas te/ sgom pa'i rang bzhin gyis bsgoms pa na/ de'i phyir yang dag yang dag min/ /gang dag shin tu goms gyur pa//sgom pa yongs su rdzogs pa na/ /de gsal mi rtog blo 'bras bu/ /zhes bya ba'i tshul gyis kun rdzob dang don dam pa'i bden pa la brten nas/ sbyin pa la sogs pa dge ba bsags pa dang ldan pa/ bdag dang gzhan gyi don phun sum tshogs pa bsgrub pa'i blo bskyed pa rnams/nges par 'byed pa'i cha dang mthun pa la sogs pa thob pa'i rim gyis rnam pa thams cad mngon sum du byed pa zhes bya ba ni rjes su mthun pa'i thabs dang ldan pa/ bya ba'i 'bras bu'i 'bras bur gyur pa'i dgos pa yin no/ /de skad du yang mngon par rtogs pa'i rgyan las//rnam pa thams cad mkhyen nyid lam/ /ston pas 'di las bshad pa gang / /gzhan gyis myong ba ma yin te/ /chos spyod bcu yi bdag nyid kyi/ /mdo don dran pa la bzhag nas/ /blo dang ldan pas mthong 'gyur phyir/ /bde blag tu ni rtogs pa zhes/ /bya ba rtsom pa'i dgos pa yin//zhes gsungs pa yin no/ /de bzhin gshegs pa'i gsang ba bstan pa'i dbang du byas nas/ bskal pa bzang po'i de bzhin gshegs pa thams cad kyi gzugs kyi sku dang / dam pa'i chos kyi tshogs bsrung ba la rnam pa thams cad du bdag por byas pa yin pa'i phyir dang / phyag na rdo rje dbang bskur ba la sogs pa las bstan pa gtad pa yin pa'i phyir dang / gzhan rnams kyi khyad par brjod pa med pa'i phyir lcang lo can na bzhugs pa sa bcu'i dbang phyug rdo rje 'dzin pa chen pos/ 'jig rten thams cad rjes su gzung ba'i phyir shes rab kyi pha rol tu phyin pa'i mdo sde rin po che sdud par gsol ba 'debs pa/'phags pa byams pa la sogs pa byang chub sems dpa'i tshogs rnams la 'di skad ces bya ba la sogs pa gsungs pa yin no zhes sngon gyi slob dpon rnams 'chad do/ /gzhan dag ni 'di nyid kyi yongs su gtad pa'i le'u las/ ji ltar shes rab kyi pha rol tu phyin pa 'di 'dzam bu'i gling na spyod par 'gyur ba zhes bya ba la sogs pas/shes rab kyi pha rol tu phyin pa yongs su gtad pa yin pa'i phyir/ yang dag par sdud par byed pa ni 'phags pa kun dga' bo yin no snyam du sems so/ /de la 'di skad ces bya ba nges pa'i don rjod par byed pas/rang dang rjes su mthun pa'i shes pas nges par bzung ba'i mdo'i don ma lus pa nye bar ston pa lhur len pa'i tshig gis ni/ de ni 'di ltar yin no zhes phyin ci ma log pa nyid du brjod do/ /bdag gis zhes bya ba bdag nyid ston pa'i tshig gis ni bcom ldan 'das kyi thad nas mngon sum du mnyan par ro//thos pa zhes bya ba rna ba'i rnam par shes pas nyams su myong ba'i tshig gis kyang de bzhin gshegs pa ma gtogs pa gzhan dag gis 'di lta bu'i chos mtha' dag rtogs pa'i nus pa med pas rtogs pa med pa nyid du'o/ /tshig gsum po 'di dag ni bcom ldan 'das kyi bka' nyid kyis mdo sde rtsom pa'i dang por bstan pa yin no//'di ltar bcom ldan 'das yongs su mya ngan las 'das shing don sna tshogs pa la lhag par mos pas rab tu phye ba bde bar gshegs pa'i gsung gi rgyun rtogs par dka' zhing byang chub nyid thob par byed pa'i don rtogs par gyur pa med pa na/'ga' zhig gis ji ltar bsdu bar bya snyam du gdul bya'i skye bo rnams kyi som nyi sel bar byed pa/ de bzhin gshegs pa'i byin gyis brlabs pa'i nyan thos la sogs pa rnams kyis/ bcom ldan 'das ma 'ongs pa'i dus su dam pa'i chos ji ltar yang dag par bsdu bar bgyi zhes zhus pa na/phyin ci ma log par mngon sum du thos par byas par don ma rtogs su zin kyang dam pa'i chos yang dag par sdud par byed pa la nyes pa med do zhes dgongs nas/ bcom ldan 'das kyis chos yang dag par sdud pa'i mdo las dge slong dag 'di skad bdag gis thos pa zhes gyis la dam pa'i chos bsdu bar bya'o zhes bya ba dang /de bzhin du 'brel pa dang go rims bstan par bya'o zhes bya ba la sogs pa gsungs so/ /bka' 'di las kyang yul dang dus la sogs pa'i tshig dang / de bzhin du bcom ldan 'das la lha rnams kyi dbang po brgya byin gyis 'di skad ces gsol to zhes bya ba la sogs pa'i tshig ni bcom ldan 'das kyis rjes su gnang ba nyid kyis/yang dag par sdud par byed pa rnams kyis byas pa yin pa'i phyir sangs rgyas kyi bka' ma yin pa nyid du thal bar 'gyur ba med do/ /de lta yin dang sangs rgyas kyi bkar sangs rgyas kyi bka' ma yin pa bcug pa'i nyes pa 'di'i go skabs kyang rgyang bsrings pa nyid du byas so//de bas na ji ltar thos pa de bzhin du yang dag par bsdus pa yin no zhes 'thad do/ /de ltar byas na kha cig gis 'di skad bdag la bstan to zhes brjod par bya ba las 'di skad bdag gis thos pa zhes ci'i phyir brjod ces rtsod pa bkod nas/bcom ldan 'das kyis ston pa mi 'thad pa la sogs pa'i rigs pa gzhan dag kyang brjod pa gang yin pa/ de ni shin tu mdzes pa ma yin no zhes bstan par 'gyur ro/ /gal te 'phags pa kun dga' bos phyogs gzhan du/kho bos 'di skad thos pa'i tshig gis gzung ba gang yin pa/ bcom ldan 'das kyis bdag gis mngon sum du gsungs pa'i mdo yang yod/ lha yul du gsungs pa yang yod/ brgyud de 'ongs pa yang yod do zhes brjod pa/ de thams cad kyi dbang du byas nas/chos kyi 'khor lo bskor ba'i mdo/ /bcom ldan 'das kyis gang du gsungs/ /shes rab chen po khyed kyis smos / /bde gshegs sras po khyed smros shig /ces gsung chen pos smras pa'i tshig gi mthar/ 'phags pa kun dga' bos sangs rgyas kyi yon tan rjes su dran pas rgyud brlan par byas shing bzhin mchi ma can rnam par 'gyur ba dang bcas pas khyab pa'i sgra dbyangs kyis 'di skad bdag gis thos pa zhes smras pa ma yin nam/de ji ltar bdag gis zhes bya ba bdag nyid ston pa'i tshig gis mngon sum du thos par brjod ce na/ 'di la nyes pa med de /gang gi phyir de bzhin gshegs pa'i byin gyis brlabs kyis bstan pa ni des bstan pa yin pa ltar/ de'i mthus gzhan las thos pa yang bcom ldan 'das nyid kyi thad nas thos pa yin no/ /yang na gzhan dag las thos na yang chos 'dzin pa'i mchog yin pas don nges par bya ba'i phyir des bcom ldan 'das la zhus pa yin no//des na don nges pa'i dbang gis bcom ldan 'das las de skad thos pa yin pas na bdag gis zhes smras pa yin no/ /kho bos 'di skad thos pa'i tshig gis bstan par bya ba gang yin pa thams cad ces gang brjod pa de ni gzhung gi dbang du byas pa yin pas nyes pa med do//de ltar gleng bslang ba byas nas/ da ni gang gi tshe gang las gang du su zhig dang lhan cig khyod kyis 'di lta bu'i mdo sde rin po che thos zhes dris pa dang / bdag nyid tshad ma'i skyes bur bstan par bya ba'i phyir/lan 'debs pas yul dang dus dang ston pa po dang 'khor phun sum tshogs pa ni ston par byed pa'i rgyu yin no zhes gleng gzhi gsungs pa ni/ dus gcig na zhes bya ba ste/ dus gcig gi tshe na thos so/ /zhes snga ma dang sbyar ro/ /'dis ni 'di lta bu'i yid bzhin gyi nor bu rin po che'i rgyal po lta bu'i mdo sde ni dus thams cad du thos mi srid pa'i phyir brgya lam na yin par bstan par bstan pa yin pas 'di rnyed par dka' ba nyid du bstan to//yang na sdud pa pos dus gcig gi tshe na bdag gis mdo sde 'di thos kyi/ gzhan gyi tshe na gzhan yin no zhes zur gyis smos pas 'gro ba'i don gyi phyir/snying rje can gyi sman pa'i rgyal po'i tshul du sdud pa po rang nyid mang du thos par brjod pa yin no/ /yang na skad cig ma gcig la thos so zhes bya ba'i don te/ rmi lam du lha la sogs pa'i mthus dus cung zhig la yang lo brgya la sogs par dmigs pa dang 'dra bar/bcom ldan 'das kyi byin gyis brlabs kyis mtshungs pa de ma thag pa'i rkyen yid kyi rnam par shes pa las byung ba/ mdo'i don ma lus pa snang ba can gyi rna ba'i rnam par shes pa ni skad cig ma gcig las byung ba'i phyir ro/ /'dis ni rnam par thar pa'i sgo bsam gyis mi khyab pa thob pa'i phyir na/bdag gi mnyan par bya ba gang ji snyed pa de thams cad skad cig ma gcig la bdag gis thos shing / brjed pa yang med do zhes bdag nyid tshad ma'i skyes bu nyid yin par ston to/ /de nyid kyis na yang dag par sdud par byed pa gdul bya'i skye bo'i tshogs gzhan rjes su gzung ba'i don du/phyis rim gyis bstan pa la 'jug pa na/ rtag tu mnyam par gzhag pa yod pa ma yin pas/ ci zhig ltar bar du yul gzhan la dmigs pa'i sems lung du ma bstan pa 'byung du zin kyang / dus phyis mdo ma tshang ba med par sdud pa ni mi 'gal te/de bzhin gshegs pa'i byin gyis brlabs pa'i yongs su rdzogs par snang ba dang ldan pa'i shes pa sngar skyes pa nyid yin pa'i phyir ro/ /yang 'di nyan par byed pa na chos nyan pa'i bdud rtsi'i ros tshim pa med pa'i phyir ro/ /gdul bya'i tshogs lhag ma rnams kyang 'di lta bur ci'i phyir ma gyur zhe na/klu'i rgyal po rgya mtshos zhus pa'i rjes su 'brangs na/ byang chub sems dpa'i tshogs yongs su dag pa ni de ltar 'gyur ba nyid kyi yin gyi/ thams cad la ni ma yin te/ khyad par du 'phags pa'i skal ba nyid ma tshang bas de lta bur 'dzin pa'i nus pa nyid yod pa ma yin pa'i phyir ro//yang ji ltar na bstan pa gcig la rnam par dbye ba 'dir 'gyur zhe na/ bstan pa 'di ni kun rdzob tu yi ge dang tshig tu snang ba can gyi shes pa'i bdag nyid can yin la/ de ni stobs ji lta ba bzhin du lan gcig gam rim gyis skye ba yin pas nyes pa med do/ /yang na/ yul gzhan gdul bar bya phyir dang / /der gnas dkon pa bskyed phyir dang / /nyan thos gnas mang bya phyir dang / /chags pa med par bstan pa dang / /yul rnams mchod rten bya phyir dang / /'gro ba'i bsod nams don nyid dang / /yams la sogs pa zhi don du/ /sangs rgyas rgyu bar mdzad pa yin//zhes bya bas gzhan la phan pa la mchog tu gzhol ba'i thugs nyid kyis dus gcig gi tshe na bya rgod phung po'i ri la bzhugs so/ /zhes tshig 'og ma dang sbyar bar bya ste/ gzhan gyi tshe ni gzhan la bzhugs pa'i phyir ro/ /nyon mongs las dang de bzhin skye/ / nyon mongs shes bya'i sgrib de bzhin/ /gang yang mi mthun phyogs chos bcom/ /des 'dir bcom ldan 'das su bshad/ /ces don brjod pas nges pa'i tshig gi tshul gyis na/ nyon mongs pa la sogs pa bcom pa dang ldan pas na/ bcom ldan 'das so/ /yang na/ dbang phyug dang ni gzugs bzang dang //dpal dang grags dang ye shes dang / /brtson 'grus phun sum tshogs pa ste/ /drug po rnams la skal zhes bya/ /zhes bya ba de 'di la mnga' bas na/ dbang phyug la sogs pa phun sum tshogs pa dang ldan pa'i bcom ldan 'das bzhugs so zhes bya bar sbyar ro//don dang ldan pa'i ming can rab tu grags pa'i gnas kyi khyad par rgyal po'i khab na/ de bzhin gshegs pa rnams kyis rgyal ba'i yum ston pa la/ byang chub sems dpa'i tshogs chen po'i khur yul gzhan gyis 'debs par mi nus pa nyid kyis mngon par byang chub pa'i gnas dang 'dra bar 'dod par bya ba/rin po che sna tshogs kyi phung por gyur pa yod pa gang yin pa de ni bya rgod kyi phung po'o/ /lha la sogs pa bsod nams 'dod pa rnams tshes brgyad la sogs pa'i dus tshigs rnams su 'du ba rgya cher byed pa zhes bya ba'i nges pa'i tshig gi tshul gyis na ri'o//der bzhugs pa'i rdzu 'phrul gyi cho 'phrul rnam pa sna tshogs pas 'jig rten las 'das pa rmad du byung ba'i chos ston pas dad par mdzad de/ kun brjod pa'i cho 'phrul gyis bsam pa dang bag la nyal yongs su mkhyen pas yongs su smin par mdzad nas/ rjes su bstan pa'i cho 'phrul gyis theg pa gsum gyis 'dul ba'i sems can khyad par du dran pa la sogs par byed pa rnams grol bar mdzad pas mngon par 'dod pa'i don mdzad cing / sku dang gsung gi 'phrin las dang / chos dang sems can la dmigs pa'i thugs kyi ngo bo/ /spyod lam dang /chos 'chad pa dang / snyoms par 'jug pa dang / nang du yang dag 'jog ste/ rnam pa bzhis de ltar bzhugs par gyur pa yin no/ /gal te byung zin pa ma yin pa lkog tu gyur pa'i dus la tisma'i sgra'i sbyor ba byas pa ma yin nam/ 'dir ni dus de sdud par byed pa'i lkog tu gyur pa ma yin pa des na ji ltar na bzhugs te zhes sbyor zhe na/bden te 'on kyang de'i rjes thogs nyid du lkog tu ma gyur pa la yang ngo zhes brjod pa des na 'di legs pa nyid yin no/ /yang na sngon gyi byA ka ra Na'i dbang gis sam/ skye bo gzhan la ltos nas lkog tu gyur par nye bar mtshon pa yin pas nyes pa med do//de bzhin du bka' stsal par gyur to zhes bya ba la sogs pa la yang brjod par bya'o/ /dge slong zhes bya ba ni gsol ba dang bzhi'i las gzhag par mi 'os pas sam tshur shog ces bya bas bsnyen pa rdzogs pa nyon mongs pa'i tshogs bcom pa rnams so/ / dge 'dun ni sangs rgyas chos dang dge 'dun rnams/ /bdud rnams bye ba brgya yis kyang / /gang phyir dbye bar mi nus pa/ /de phyir dge 'dun zhes brjod do/ /zhes bya bas so/ /chen po zhes bya ba ni grangs dang / yon tan chen po nyid dang ldan pas mthu che bas so/ /thabs gcig pa ni lhan cig pa ste/yongs su bskor nas bzhugs te zhes bya bar sbyar ro/ /de la grangs che ba nyid ni stong nyis brgya zhes bya ba la sogs pas brjod de tshig gi don go sla'o/ /grangs brjod pa ni nyan thos kyi 'khor mtha' yas pa las grangs su nges par gzung ba'i don to/ /don mang po las grangs mdor bsdus pa smos pa ni mi brjed pas go sla bar bya ba'i don dang /mang du thos pa dang / 'dzin pas 'jigs pa rnams rna gtad pa'i don nam/ tshad yongs su shes par bya ba'i don du nye bar gzung ba yin no/ /yon tan che ba nyid ni thams cad kyang zhes bya ba la sogs pas smos pa yin te/ 'dir thams cad kyang mchod pa dang / yon dang tshogs su 'du ba la sogs par 'os pas na dgra bcom pa'o/ /srid pa'i rtse mo'i mthar thug pa'i 'khor bar zag par byed pa'i phyir zag pa ste/ 'dod pa dang srid pa dang ma rig pa'i zag pa gsum po rnams so/ /de'i gnyen po'i zag pa med pa'i tshul khrims la sogs pa'i phung po thob pas ci rigs par zad pa gang yin pa de dag ni zag pa zad pa'o//nyon mongs pa dang las dang skye ba'i kun nas nyon mongs pa dang bral ba gang yin pa de dag ni nyon mongs pa med pa'o/ /tshul khrims dang / ting nge 'dzin dang / shes rab dang / rnam par grol ba'i phung po yongs su rdzogs par thob pas go rims bzhin du nyes par spyod pa dang /sred pa dang / lta ba ngan pa dang / srid pa'i 'ching ba las rnam par grol ba'i phyir yang dag pa'i spyod lam dang / mngon par shes pas rnam par brtse ba dang / lha dang 'phags pa'i bzhugs pa thob pas/de rang nyid 'jig rten gyi dang 'jig rten dang sems dbang du gyur pa gang yin pa dang / rang nyid 'ching ba thams cad dang bral zhing rang dbang thob pa'i phyir dbang dang ldan par gyur pa gang yin pa de dag ni dbang du gyur pa'o/ /sred pa dang ma rig pa'i phyogs kyi nyon mongs pa dang nye ba'i nyon mongs pa spang ba'i phyir/ting nge 'dzin dang snyoms par 'jug pa ni sems rnam par grol ba yin la/ dgra bcom pa'i lam gyi ye shes ni/ shes rab rnam par grol ba yin no/ /de ltar byas na sred pa dang ma rig pa'i phyogs rnams med pas/ go rims bzhin du 'dod chags dang bral ba dang /ma rig pa'i chags pa dang bral ba'i phyir/ sems dang shes rab shin tu rnam par grol ba ni/ de las de thob pa'i phyir snyoms par 'jug pa dang nyon mongs pa'i sgrib pa las shin tu rnam par grol bas rnam pa thams cad du gnyi ga'i cha las rnam par grol ba dag ni sems shin tu rnam par grol ba/shes rab shin tu rnam par grol ba yin no/ /cang shes pa zhes bya ba ni mya ngan dang smre sngags 'don pa la sogs pa'i 'jigs pa rnams dang bdag gis smad pa dang gzhan gyis smad pa dang ngan 'gro dang 'tsho ba med pa dang chad pas gcad pa dang / tshigs su bcad pa med pa dang 'chi bas 'jigs pa rnams dang /rnyed pa dang ma rnyed pa la sogs pa 'jig rten gyi chos brgyad kyis gos pa'i 'jigs pa dang / rang gi rtogs pa'i gegs su gyur pa mi shes pa dang the tsom du gyur pa dang log par shes pa'i 'jigs pa rnams med pas/ go rims bzhin du sdug bsngal ba dang /'jigs pa dang / 'jig rten gyi chos dang / mi shes pa'i dogs pa dang bral ba'i phyir 'jigs pa med pa nyid kyis cang shes pa'o/ /rig pa gsum la sogs pa khyad par can gyi chos rtogs pa dang ldan pas gtso bo chen por gyur pa'i phyir glang po chen po'o/ /tshul khrims dang ting nge 'dzin dang shes rab yongs su rdzogs pas/sdug bsngal thams cad las thar pa la sogs pa nges par bya ba rnams byas pa dang / zhar la bya ba rang gi 'dod pa la rag las pas 'jug pa sbyangs pa'i yon tan la sogs pa'i bya bar 'os pa gang yin pa de ni/ bya ba byas pa byed pa byas pa'o/ / sdug bsngal la sogs pa 'phags pa'i bden pa bzhi po rtogs pa'i phyir bdag nyid ji lta ba'i yongs su shes par bya ba dang / spang bar bya ba dang / mngon sum du bya ba dang / bsgom par bya ba rnams med pas khur bor ba ste / phung po dang / nyon mongs pa dang / dam bcas pa dang / brtson pa'i khur rnams rnam pa thams cad du spangs pa gang yin pa de dag ni khur bor ba'o//rig pa dang ma rig pa thob pa dang spangs pa dag gis phan pa dang phan pa ma yin pa thob pa dang spang ba'i mtshan nyid can gyi rang gi don rnam pa gnyis po dang / bcom ldan 'das kyi rjes su thob pa gang yin pa de dag ni rang gi don rjes su thob pa'o//srid pa dang skyes bu lhan cig kun tu sbyor bar byed pa khong khro ba la sogs pa'i kun tu sbyor ba dgu po ji ltar srid pa'i 'phags pa'i lam gyis kun nas yongs su zad par byed pa gang yin pa de dag ni srid par kun tu sbyor ba yongs su zad pa'o/ /yang dag cing phyin ci ma log par kun nas shes pas na kun shes pa ste/de kho na nyid rtogs pa'o/ /des sems legs par rnam par grol zhing 'ching ba thams cad las shin tu rnam par grol ba gang yin pa de dag ni yang dag par kun shes pas sems shin tu rnam par grol ba'o/ /mthar gyis gnas pa'i snyoms par 'jug pa dgu'i mtshan nyid kyi sems can thams cad la rang dbang du gyur pa'i phyir/dbang yang yin la de ni dam pa'i pha rol te/ rang gi rigs rab kyi mthar phyin pa thob pa yang yin pas na de dag ni sems thams cad kyi dbang dam pa'i pha rol tu son pa'o/ /de bas na de lta bu'i dge slong dang zhes thams cad la gsum pa'i mthar sbyar ba'o//kha cig ni thams cad kyang dgra bcom pa'o/ / ci'i phyir zhe na/ zag pa zad pa'i phyir ro/ /zag pa zad pa ni nyon mongs pa med pa'i phyir ro/ /de bzhin du yang dag par kun shes pas sems shin tu rnam par grol ba ni sems thams cad kyi dbang dam pa'i pha rol tu son pa zhes bya ba'i bar du snga ma snga ma'i rgyu phyi ma phyi ma yin no//skyes bu'i don thams cad yongs su rdzogs pa yin pa'i phyir de las gzhan pa'i khyad par ni brjod par mi bya'o zhes zer ro/ /rnam 'grel byed pa ni dgra rnams bcom pas na dgra bcom pa'o/ /nyon mongs pa'i sgrib pa spangs pas na zag pa zad pa'o//yang zag pa zad par 'bad pa'i bdag nyid can gyi nyon mongs pa med pas na nyon mongs pa med pa'o/ /de ltar na tshig 'di dag gis ni nyes pa rnams shin tu spangs pa'i mtshan nyid can gyi yon tan brjod nas/ da ni gnyen po'i phyogs kyi mtshan nyid can gyi yon tan ni dbang du gyur pa zhes bya ba la sogs pas brjod do//mngon par shes pa la sogs pa khyad par can gyi yon tan mngon par sgrub par byed pa mi slob pa'i zhi gnas dang lhag mthong dag dang ldan pa'i phyir 'jig rten gsum la phan 'dogs par nus pa nyid kyis sems can gyi don gyi khur la bcom ldan 'das kyis nges par sbyar ba ni dbang du gyur pa'o//rnam pa thams cad du sred pa dang lta ba'i 'ching ba las rnam par grol bas go rims bzhin du sems shin tu rnam par grol ba/ shes rab shin tu rnam par grol ba'o/ /yon po ma yin zhing drang po'i lam gyis bgrod par bya ba ji srid par 'gro bas na cang shes pa'o//nyon mongs pa'i g.yul las rnam par rgyal ba'i phyir glang po chen po'o/ /yang rgyal bar bya ba med pas na bya ba byas pa'o/ /bya ba rnams rigs pa'i tshul gyis rdzogs par byas pas na byed pa byas pa'o/ /yang srid par skye ba'i sdug bsngal mi sogs pas na khur bor ba'o//mya ngan las 'das pa mngon du thob par byed pas / rang gi don rjes su thob pa'o/ /srid pa'i rgyu yang dag par bcom pas na srid pa kun tu sbyor ba yongs su zad pa'o/ /mthong ba dang bsgom pa'i lam gyis rab kyi mthar thug pas na yang dag pa'i shes pas sems shin tu rnam par grol ba'o//khyad par can gyi mngon par shes pa la sogs pa'i yon tan la dbang thob pa nyid dang / rang gi rigs kyi mchog tu gyur par 'gro bas na/ sems kyi dbang thams cad kyi dam pa'i pha rol tu son pa'o zhes de kho na ltar 'grel te snga ma snga ma'i rgyu ni phyi ma phyi ma yin no mthar thug pa brjod pa la yang khyad par brjod par mi bya ste/des na mthar phyin pa med pa'i nyes pa yod pa ma yin no zhes 'chad do/ /chos 'dzin pa'i mchog yin pa'i phyir ji skad du smos pa'i grangs kyi nang du gtogs su zin kyang / de lta bu'i yon tan dang ldan pa ni ma yin no zhes bstan pa'i phyir/gang zag gcig ma gtogs pa ni zhes bya ba la sogs pa gsungs so/ /gang zag ces bya ba rgyu dang 'bras bu'i mtshan nyid bsgo bar bya ba dang / sgo bar byed pa'i ngo bo rtag pa ni mi 'thad pas dge ba dang mi dge ba'i bag chags rnams kyis gang zhing mi rtag la/ de lta bu dang rjes su mthun pa'i 'gro ba len cing 'dzin par byed pa zhes bya ba'i nges pa'i tshig gi tshul gyis na rgyun nyid kyis gang zag gcig go//'di lta ste zhes bya ba'i sgra ni nye bar ston pa lhur len pa'i tshig phrad do/ /tshe 'dod par gyur pas tshe dang ldan pa ste/ phan pa dang bde ba dang mchod pa rjod par byed pa'o/ / lung thams cad 'dzin pa dang / sangs rgyas kyi bsnyen bkur gyis dga' ba thob pa nyid kyis na kun dga' bo'o/ /des na tshe dang ldan pa 'phags pa kun dga' bo 'di ston par mdzad pa'i dus na rgyun du zhugs pa yin pas 'di skad brjod pa'i yon tan dang mi ldan pas/ gang zag gcig po 'di ma gtogs te bzhag nas zhes brjod pa yin no//bya ba yongs su rdzogs pa dang / rang la phan par 'dod pa dang / de bzhin gshegs pa'i byin gyis brlabs kyis thams cad 'byor pa'i phyir/ nyes dmigs lnga dang ma 'byor dang / /mi dga' chags dang yid mi bde/ /'thab dang rnyed sogs sred dang mdza' / /brtse dang bla ma la gus dang //ngo mtshar khyad par don phyir dang / /lhung dang dkon mchog rgyu dang ni/ /mchod rten la sogs phyag bya'i phyir/ /dge slong rgyu bar byed pa yin/ /zhes bya ba rgyu bar byed pa'i rgyu bco lnga dang bral ba'i phyir rang nyid gar yang mi 'gro'i/ 'on kyang byas pa shes pa dang chos la gus pa la sogs pas bcom ldan 'das kyi thad na rtag tu gnas pas rang gi yin pa'i phyir/rang gi ba'i nyan thos chen po'i 'khor brjod pa yin no/ /mdo sde rin chen zab mo ni/ /dpag med nyan pa'i sred pa yis/ /mtha' yas 'jig rten khams rnams su/ /mkhas pa gang phyir rgyu byed pas/ / de yi theg pa bshad nyid kyis/ /de dag mang po 'ongs gyur te/ /des na mdo sde'i lung rnams su/ /rgyal ba'i sras rnams ma brjod do/ /zhes bya ba ni kha cig gi'o/ /tshig lhur len pa rgyas pa la dga' ba'i sems can rjes su gzung ba'i don du 'phags pa stong phrag brgya pa bstan to/ /bar ma la dga' ba spros te bshad pas go ba'i sems can rnams la rjes su brtse bas/don thams cad bsdus nas 'phags pa stong phrag nyi shu lnga pa bstan to/ /mgo smos pas go ba bsdus pa la dga' ba'i sems can la phan pa bskyed pa'i phyir de'i yang don thams cad bsdus nas 'phags pa brgyad stong pa gsungs pa yin no//des na de'i rjes su 'brangs nas chos mthong ba mdor bsdus pa la dga' ba'i dge slong dang dge slong ma dang dge bsnyen dang dge bsnyen ma'i 'khor rnams dang / de bzhin du lhag pa'i bsam pa rnam par dag pa dang / rtsol ba dang bcas pas mtshan ma med pa la gnas pa dang /lhun gyis grub pas mtshan ma med pa la gnas pa dang / nges pa'i spyod pa la yang dag par zhugs pa dang / skye ba gcig gis thogs pa rnams zhes de ltar byang chub sems dpa' chen po'i 'khor ni tshad med par shes par bya'o/ /zhes bya ba ni gzhan gyi'o//de skad du yang slob dpon phyogs kyi glang pos/ de ltar ji skad bshad rnams kyis/ /brgyad stong 'di don ma tshang med/ /'dir gzhung bsdus pa yin par 'dod/ /don de ji skad gsungs de nyid/ /ces bshad pa yin no/ /de ltar de'i rjes su 'brangs pa nyid kyis skal ba zhan pa rnams 'khor la sogs pa med pa na yid mi bde ba bzlog par bya ba'i phyir dang /'dod pa chung ba la dgyes pa'i phyir bcom ldan 'das nyid kyis chos kyi gdan bshams nas/ mdo sde rin po che 'di ni mnyam par gzhag pa nyid kyis rtogs par bya ba yin no/ /zhes bstan par bya ba'i phyir shin tu rkyong ba la sogs pa'i nyes pa dang bral ba nyid kyis rdo rje'i skyil mo krung du sku drang por bzhugs nas/chos kyi 'khor lo'i phyag rgya bcings pa sngon du 'gro bas/ shangs kyi rtse mor spyan gtad de dran pa rtse gcig tu mngon du phyogs par mdzad nas ting nge 'dzin thams cad bsdus pa'i phyir ting nge 'dzin gyi rgyal po zhes bya ba'i ting nge 'dzin la snyoms par zhugs te bzhengs so//de nas byams pa dang snying rje'i spyan dag gis 'jig rten 'di dag sdug bsngal gyis gzir ba la yang dag par gzigs te bstan pa 'di ni chung ngu dang / 'bring dang / chen po'i dbye bas skal ba ji lta ba bzhin du 'gro zhing sangs rgyas nyid kyi mthar thug par byed pa'i 'bras bu can yin no zhes gdul bya rnams kyis rtogs par mdzad pas/ci rigs par sku'i yan lag dang nying lag rnams dang / ba spu'i bu ga thams cad nas 'od zer bye ba khrag khrig brgya stong drug cu drug cu dang rang bzhin gyi 'od spro ba dang /phyogs bcu'i 'jig rten gyi khams gang gA'i klung gi bye ma snyed snang ba chen pos khyab par mdzad cing / sems can thams cad kyang bla na med pa yang dag par rdzogs pa'i byang chub tu nges par mdzad nas/ stong gsum gyi stong chen po'i 'jig rten gyi khams 'di ljags kyi dbang pos khebs par mdzad do //de las 'od zer gyi tshogs mang po spros pa la gnas pa'i pad+ma'i snying po la de bzhin gshegs pa'i sku mang po bzhugs pa sngon du 'gro bas pha rol tu phyin pa drug dang ldan pa'i chos ston par mdzad pas snga ma bzhin du sems can gyi don mdzad de/de don du gnyer ba'i skye bo bsdu ba'i phyir/ yum ston pa'i ltas thogs pa med pa ston par mdzad do/ /de'i 'og tu de bzhin du 'khor gyi 'jigs pa la sogs 'jigs pa thams cad dang bral bas/ seng ge rnam par bsgyings pa zhes bya ba'i ting nge 'dzin la snyoms par zhugs nas/ gnas mi gtsang ba dang / nyan pa po kun rdzob dang don dam pa'i dbye ba la mi mkhas pa la rgyal ba'i yum bstan par mi bya'o zhes chos smra ba rnams la go bar bya ba'i phyir/ de lta bu'i rdzu 'phrul mngon par 'du bya ba mngon par 'du mdzad de/ gang gis ltas chen po bcwa brgyad sngon du 'gro ba dang de bzhin du 'jig rten gyi khams thams cad la bsdus pa'i mi khom pa brgyad rnam par bsal bas gnas yongs su sbyangs pas/de na gnas pa'i sems can rnams lha dang mi dang skal ba mnyam par skyes nas skye ba dran te/ dga' ba dang rab tu dga' bas rang rang gi sangs rgyas kyi zhing du song ba sngon du 'gro bas sangs rgyas bcom ldan 'das la phyag 'tshal zhing 'dud par 'gyur ro //sems can thams cad kyang long bar gyur pa la sogs pa'i nyes pa dang bral zhing / dge ba bcu'i las kyi lam la gnas pa dang / tshangs pa'i gnas bzhi la mngon par dga' zhing / bsam gtan gsum pa la snyoms par zhugs pa lta bu'i bde ba thob pas/rgyal ba'i yum mnyan pa'i snod du gyur pas 'di lta bu'i rang bzhin gyi shes rab dang yang dag par ldan par gyur te/ 'di ltar sbyin pa ni legs pa'o/ /dul ba ni legs pa'o/ /zhi ba ni legs pa'o/ /yang dag par sdom pa ni legs pa'o//tshangs par spyad pa ni legs pa'o/ /srog chags su gyur pa rnams la mi 'tshe ba ni legs pa'o zhes bya ba'i ched du brjod do/ /zhes bya ba ni ting nge 'dzin gyi cho 'phrul rnam pa gnyis so/ /de'i rjes la bcom ldan 'das shes bya mtha' dag la mnga' brnyes pas shes rab kyi pha rol tu phyin pa 'di ston par spyod do zhes ston par mdzad pas/gdul bya rnams gus pa bskyed par bya ba'i phyir snga ma bzhin du 'od dang sku mdog dang gzi brjid dang dpal gyis 'jig rten thams cad zil gyis mnan nas/go rims bzhin du mdzes shing lham me lhan ne lhang nge ste/ dper na ri'i rgyal po ri rab kyis ri bo thams cad zil gyis mnan pa lta bur mdzad par gyur to/ /de bzhin du 'di lta bu nyid kyis 'di thugs su chud pa dang ston par spyod kyis bdag cag lta bus ni ma yin no zhes gdul bya rnams 'bad pa mi byed par 'gyur du 'ong bas /de'i phyir mir gyur pa kho nas thams cad bsgrubs par nus so zhes spro ba yang dag par bskyed pa'i don du/ 'jig rten gyi khams 'di'i sems can rnams kyi lus dang mnyam pa rang bzhin gyi sku tha mal pa bstan to/ /de nas rab tu dang ba khyad par can skyes par gyur pa'i lha dang mi yang dag pa'i don sgom pa goms pa las dus gzhan du 'di lta bu'i bdag nyid kyi chos rtogs par mthong ba rnams kyis bcom ldan 'das la me tog la sogs pas mchod pa na/ji ltar phul ba yongs su longs spyad pa dang /de bzhin du legs par sngos pa'i dngos po yongs su longs spyod pa las sems dang bas bsod nams mngon par spel ba dang / lus la sogs pa shin tu sbyangs pas gdul bya rnams la ye shes kyi tshogs bde bar bskyed par 'gyur ro snyam nas rjes su gzung ba'i don du/me tog la sogs pa de dag bcom ldan 'das kyi byin gyis brlabs kyis/ nyid kyi dbu'i steng du stong gsum gyi stong chen po'i 'jig rten gyi khams kyi tshad tsam pa'i khang pa brtsegs pa rgyan thams cad kyis mdzes shing 'jig rten gyi khams 'di shin tu mdzes par byed pa'i rang bzhin du byin gyis brlabs nas/bdag tu rlom pa'i bag chags ma spangs pa rnams la/ gcig la mngon par dmigs te chos ston par mdzad na/ yid mi bde ba la sogs pas yang dag par 'jug par mi 'gyur ro snyam pas snga ma bzhin du/ rnam pa thams cad du 'dzin pa la sogs pa'i don dang /de bzhin du sems can thams cad la mnyam pa nyid du 'jug kyang / phyis skal ba ji lta ba bzhin du myur ba dang / ring zhig lon pa'i dbye bas la la zhig rtogs par lung bstan pa la sogs pa la rjes su chags pa la sogs par sgro 'dogs pa sngon du 'gro ba can nged la sems gzhan du bya ba ma yin no zhes bstan par bya ba'i phyir/'jig rten gyi khams na gnas pa'i sems can thams cad kyi mdun du bde bar gshegs pa'i rgyal pos chos rnam pa thams cad ston pa lta bur mdzad pa'i bdag gi sku mnyam par bstan pa zhes bya ba ni rdzu 'phrul gyi cho 'phrul rnam pa gnyis so//de'i 'og tu kun nas nyon mongs pa'i 'jig rten gyi khams su 'khrungs pa'i phyir dang / shes rab la sogs pa phul du byung ba yang srid pa'i phyir bcom ldan 'das 'di ni sangs rgyas thams cad dang rnam pa thams cad du 'gro ba'i don mdzad pa la mnyam pa ma yin no//zhes skye bo dman pa rnams kyi dogs pa sel bas/ 'jug pa dang tshogs rdzogs pa mtshungs pa'i byang chub sems dpa' rnams so so'i sangs rgyas kyi zhing du/ bla na med pa yang dag par rdzogs par 'tshang rgya ba srid pas sangs rgyas thams cad dang lhan cig /tshogs dang chos sku dag dang ni/ /'gro ba'i don du spyod par ni/ /sangs rgyas thams cad mnyam pa ste/ /sku tshe rigs dang tshad kyis min/ /zhes bdag nyid mtshungs par bstan pa dang / de bzhin du 'jig rten gyi khams sna tshogs su skye bar smon lam btab pa'i rang gi gdul bya'i byang chub sems dpa' rnams la gsung rab mdo sde rin po che ma lus par phyin ci ma log par bstan pas/tshogs yongs su rdzogs par byed pa'i thabs bstan pa'i phyir/ bcom ldan 'das kyis de lta bu'i 'dzum pa mdzad de/ gang gis 'jig rten gyi khams na gnas pa'i sems can mi mnyam pa nyid kyi the tshom gyi sa bon rnam pa thams cad drungs phyung bar gyur pa thams cad kyi phan tshun nas phan tshun gyi 'jig rten gyi khams na bzhugs pa'i sangs rgyas bcom ldan 'das 'khor gyi dkyil 'khor gyi tshogs dang bcas pa rnams mthong nas mtshungs pa nyid du rtogs pa dang /de bzhin du snang ba chen po la sogs pa'i ltas mthong ba sngon du 'gro bas/ rang gi bla ma la ma zhus par bab chol du 'gro ba ni mi rigs so snyam nas/ de'i don du phyogs bcu'i 'jig rten gyi khams kyi byang chub sems dpa' rnams rang rang gi de bzhin gshegs pa rnams kyi thad du song ste zhabs la phyag 'tshal ba sngon du 'gro ba nyid kyis/bcom ldan 'das snang ba chen po 'jig rten du byung ba 'di dang zhes bya ba la sogs pa zhus pa'i lan gyi rjes thogs la/bsngags pa gsung ba thos pas rang gi bdag po'i thugs dgongs bzang po rig pa rnams kyis bcom ldan 'das bdag cag bcom ldan 'das 'khor dang bcas pa de lta bu de lta ba la sogs pa'i slad du 'jig rten gyi khams der mchi'o zhes gsol te snang ba thob nas/rang gi bdag pos chos la gus pas mchod pa'i don du rin po che sna tshogs kyi pad+ma'i skyes bskur ba dang / gnod pa chung ngam zhes bya ba la sogs pa snyun gsol ba'i tshig dang / 'jig rten gyi khams 'di snyigs ma lnga dang ldan pa yin pas bag yod par gnas par gyis shig ces bya ba'i rjes su bstan pa mnos nas/'khor dpag tu med pa dang bcas pas bar gyi de bzhin gshegs pa rnams la mchod pa byed cing 'ongs nas/ zhabs la phyag 'tshal ba sngon du 'gro bas mchod pa'i tshogs byin gyis brlabs te/rang rang gi gnas su 'khod nas rang rang gi de bzhin gshegs pa rnams kyi snyun gsol ba'i tshig dang pad+ma phul bar gyur to zhes bya ba ni chos snang ba'i cho 'phrul rnam pa gnyis yin no/ /de'i rjes la bcom ldan 'das yongs su ma dag pa'i 'jig rten gyi khams su 'khrungs su zin kyang de'i nyes pas ma gos pa shes par bya ba'i phyir dang /dam pa'i chos la mchod pa bya ba'i phyir/ pad+ma de rnams rang rang gi phyogs su gtor ba na/ pad+ma de rnams la de bzhin gshegs pa bzhugs pa sngon du 'gro ba can rgyal ba'i yum ston par mdzad pas/sems can rnams bla na med pa yang dag par rdzogs pa'i byang chub tu nges par mdzad pa'i don du dam pa'i chos la mchod pa phul nas/ skal ba ji lta ba'i byang chub sems dpa' chen po la sogs pa'i 'dus pa rnams 'ongs par thugs su chud nas/thog ma dang / bar ma dang / tha mar dge ba la sogs pa dang ldan pa'i shes rab kyi pha rol tu phyin pa ston par mdzad do zhes bya ba ni gleng gzhi yin par shes par bya'o/ /mgo smos pas go ba mdor bsdus pa la dga' ba'i sems can rnams rjes su 'dzin pa bstan pa'i dbang du mdzad pa yin pas 'dir ni de dag ma gsungs so//des ni gang gi tshe bcom ldan 'das rgyal po'i khab kyi grong khyer chen po na bya rgod kyi phung po'i ri la ji skad du bshad pa'i 'khor rnams kyis yongs su bskor te/ chos ston par mdzad cing bzhugs pa de'i tshe bcom ldan 'das las gnas de nyid du 'khor de rnams dang lhan cig 'di skad bdag gis mdo sde rin po che thos so//zhes brjod pa yin no/ /yul la sogs pa yang dag par bsgrags pa 'di thams cad kyis kyang / 'jig rten gyi tha snyad kyi rjes su 'brangs pa las yang dag par sdud par byed pas bdag nyid tshad mar bsgrubs pa yin pa'i phyir na/gdul bya rnams la gus pa dang bcas pas mnyan pa dang bsam pa la sogs par brjod pa yin no/ /de yang slob dpon phyogs kyi glang pos/ ston pa dbang po'i 'khor dang ni/ /yul dang dus kyang nges bstan pa/ /dad ldan 'jug pa'i yan lag tu//sdud po rang nyid tshad mar ni/ /rab grub phyir yin 'jig rten na/ /yul dang dus sogs kyis mtshon cing / /dbang por bcas tshig smra ba yi/ /smra po tshad mar rab tu rtogs/ /zhes bshad pa yin no/ /de la/ mdo don smra bar 'dod pa yis/ / dgos pa bsdus pa'i don bcas dang / /tshig don bcas dang mtshams sbyar bcas/ /brgal lan bcas pas bsnyad par bya/ /zhes rnam par bshad pa'i rigs pa las rnam pa lngas mdo sde bshad par bya'o/ /zhes nges par byas so/ /de la dgos pa ni bshad zin pa kho na'o//de bas na nyan pa po'i skye bo rnams kyis bde blag tu rtogs par bya ba'i phyir dang / bstan bcos don rnam par dbye ba byas pa ni 'chad pa po rnams kyis kyang bshad sla ba des na re zhig mdor bsdus pa'i don brjod par bya'o/ /de la 'bras bu bstan pas byang chub don du gnyer ba'i byang chub sems dpa' sems bskyed pa la sogs pa rnam pa thams cad yongs su shes par byed pa'i phyir na dang po rnam pa thams cad mkhyen pa nyid brjod do//de ni nyan thos kyi lam la sogs pa yongs su shes pa med par ma yin pas de'i rjes la lam gyi rnam pa shes pa nyid do//de yang gzhi thams cad yongs su shes pa med par ma yin pas de'i 'og tu thams cad shes pa nyid do/ /de nas de ltar thob pa'i thams cad mkhyen nyid gsum rnam pa thams cad du dbang du bya ba'i don du yang rnam pa thams cad dang lam dang dngos po'i bye brag bsdus nas kun mkhyen gsum sgom pas rtogs pa ni rnam pa kun mngon par rdzogs par rtogs pa'o//khyad par can gyi lam gyis rab kyi mthar thug pa rtogs pa thob pa rtse mo'i mngon par rtogs pa la brten nas/ so so ba dang bsdus pa'i dbye bas rnam par bsgoms pa'i don rnams nges par bya ba'i don du rim par bkod pas mngon du byed pa zhes bya ba mthar gyis pa'i mngon par rtogs pa rig nas/yang legs par goms par bya ba'i phyir rnam par bsgoms pa skad cig ma gcig la mngon par rdzogs par rtogs pa'i de ma thag tu/ skad cig gnyis pa la chos kyi sku mngon par rdzogs par byang chub pa phyin ci ma log par rtogs pa zhes bya ba ni/shes rab kyi pha rol tu phyin pa'i don bsdus pa mngon par rtogs pa brgyad mdor bsdus pa'o/ /de skad du yang / shes rab pha rol phyin pa ni/ /dngos po brgyad kyis yang dag bshad//rnam kun mkhyen nyid lam shes nyid/ /de nas thams cad shes pa nyid/ /rnam kun mngon rdzogs gtogs pa dang / /rtse mor phyin dang mthar gyis pa/ /skad cig gcig mngon rdzogs byang chub/ /chos kyi sku dang de rnam brgyad/ /ces gsungs pa yin no/ / mdor bstan pa ni rgyas par smras na legs par bshad pa nyid yin pas slar yang bsdus pa'i don rgyas par brjod par bya'o/ /de la yang dag par rdzogs pa'i byang chub tu mngon par 'gro bar 'dod pas dang por stong pa nyid dang snying rje'i snying po can gyi byang chub kyi sems smon pa dang 'jug pa'i rang bzhin can rnam pa gnyis po bskyed nas/sems bskyed pa dang des 'phangs pa'i chos rnams rdzogs par bya ba'i phyir yang dag par thob pa'i yon tan yongs su bsrung ba'i don gyis mngon par 'phel bar bya ba'i don du bsgrubs pa la sogs pa gdams ngag bzung ba'i rjes la/ thos pa la sogs pa rab tu mthar phyin pa thob pa thar pa'i cha dang mthun pa dad pa la sogs pa'i mtshan nyid can gyi dge ba'i rtsa ba'i 'og tu bden pa bzhi rtogs pa dang rjes su mthun pa nges par 'byed pa'i cha bzhi po 'jig rten pa'i sgom pa'i rang bzhin nges par byas te/ji skad bshad pa'i nges par 'byed pa'i cha dang mthun pa dang gzhan mthong ba'i lam la sogs pa yang sgrub pa dang ldan pa yin pas na sgrub pa'i rten du gyur pa chos kyi dbyings kyi rang bzhin can byang chub sems dpa' nyid kyi chos thams cad dmigs pa sngon du 'gro ba can/sems can thams cad kyi mchog nyid kyis sems chen po nyid dang spong ba chen po nyid dang rtogs pa chen po nyid kyi dbang du byas te/sgrub pa la 'jug pas dben gyi gnas su gyur pa'i ched du bya ba rnam pa gsum bsgom par bya'o/ /de'i rjes la de thob par bya ba'i phyir thams cad mkhyen pa nyid gsum gyi yul la spyir dge ba'i chos kyi rten can dang /rnam pa kun mngon par rdzogs par rtogs pa la sogs pa rnam pa bzhi la mngon par rtogs pa re re la pha rol tu phyin pa drug gi rten can gyi bya ba ni sgrub pa yin no/ /des na de ltar ji lta ba bzhin du sbyor ba dang mthong ba dang sgom pa dang khyad par gyi lam gyi ngo bo go cha la sogs pa'i sgrub pa rnams kyi nang nas/brtson 'grus kyi rang bzhin yin pas dang por go cha'i sgrub pas go bgos nas/ 'jug pa'i sgrub pas theg pa chen po'i chos ma lus pa la mngon par 'dzegs pa mngon du 'gro ba can/ tshogs kyi sgrub pas tshogs bsags pas ni/ nges par 'byung ba'i sgrub pa rtogs par bya'o/ /zhes de ltar sangs rgyas nyid thob par byed pa'i chos rtogs pa'i rim gyis bstan pa/ de bzhin gshegs pa rnams kyi rnam pa thams cad mkhyen pa nyid ni le'u dang pos bsdus pa yin no/ /de skad du yang /sems bskyed pa dang gdams ngag dang / /nges 'byed yan lag rnam bzhi dang / /sgrub pa yi ni rten gyur pa/ /chos kyi dbyings kyi rang bzhin dang / /dmigs pa dag dang ched dang ni/ /go cha 'jug pa'i bya ba dang / /tshogs ni nges par 'byung bcas rnams/ /thub pa'i rnam kun mkhyen pa nyid//ces gsungs pa yin no/ /de'i rjes la rnam pa thams cad mkhyen pa nyid rtogs pa ni lam thams cad yongs su shes pa med na ma yin pas lam thams cad shes pa nyid bstan par bya ba'i phyir/ de bzhin gshegs pa'i rang bzhin gyi 'od dag gis lha la sogs pa'i rnam par smin pa las byung ba'i 'od mog mog por mdzad pas 'jig rten skyong ba nyid la sogs pa'i mngon pa'i nga rgyal bsal ba'i phyir na gang zag nga rgyal bcom pa'i rgyud nyid la 'di rtogs pa'i skal ba yod pa yin no zhes tshig gi zur gyis bstan pas rten brjod pa'i rjes thogs la/yul so sor nges pa la sogs pa brjod nas/lam shes pa nyid kyi skabs su lam thams cad yongs su rdzogs par bya ba yin pas nyan thos dang rang sangs rgyas thams cad kyi lam bstan pa sngon du 'gro ba can/ 'jig rten 'di la sogs pa'i yon tan dang nye bar ldan pa'i byang chub sems dpa' rnams kyi mthong ba'i lam phan yon chen po can bcom ldan 'das kyis gsungs pa yin no//de'i rjes la bsgom pa'i lam brjod par bya ba yin pa lam bsdod par bya ba nyung ba nyid dang / gdul bya 'bras bu la gzhol ba nyid kyis 'jug pa'i phyir dang por de'i byed pa bstan nas/ zag pa dang bcas pa dang zag pa med pa'i rang bzhin gyi bsgom pa'i lam rnam pa gnyis yin pas na/mos pa dang bsngo ba dang rjes su yi rang ba'i yid la byed pa'i dbye bas zag pa dang bcas pa'i bsgom pa'i lam gsum yod pa'i nang nas 'byung khungs nas gser gyi ga'u ltar bsod nams mngon par 'du byed pa yin pa'i phyir/dang por mos pa yid la byed pa gsungs te/ de bsgom pa'i byang chub sems dpa' la spro ba bskyed par bya ba'i phyir/ de ltar lhag par mos pa la sangs rgyas la sogs pa bstod pa la sogs pa mdzad do zhes gong nas gong du mngon par dga' ba'i rang bzhin du bstod pa dang bkur ba dang bsngags pa gsungs so//de'i rjes la de gser mgar gyi rgyan bzhin du bsod nams de yang dag par rdzogs pa'i byang chub kyi yan lag tu byed pa bsngo ba yid la byed pa sngon du 'gro ba can/ rang dang gzhan gyi bsod nams bya ba mnyam pa nyid thob par bya ba'i don du rjes su yi rang ba yid la byed pa gsungs so//sbyor ba dang rnam par dag pa'i dbye bas bsgom pa'i lam zag pa med pa rnam pa gnyis yin pas na/ dang por mngon par sgrub pa'i mtshan nyid bstan nas/ gnyis pa shin tu rnam par dag pa'i mtshan nyid ston par mdzad pa yin pas/ le'u gnyis pa nas brtsams te le'u brgyad pa'i bar nas/gsol pa gang de ltar rtogs pa de ni byang chub sems dpa' sems dpa' chen po'i shes rab kyi pha rol tu phyin pa'o/ /bcom ldan 'das kyis bka' stsal pa/ shin tu rnam par dag pa'i phyir ro zhes bya ba 'di'i mthar thug pas ni byang chub sems dpa' rnams kyi lam shes pa nyid gsungs pa yin no//de skad du yang / mog mog por byed la sogs dang / /slob ma bse ru'i lam gang dang / /'di dang gzhan pa'i yon tan gyis/ /phan yon che ba mthong ba'i lam/ /byed pa dang ni mos pa dang / / bstod dang bkur dang bsngags pa dang / /bsngo dang rjes su yi rang ba/ /yid la byed pa bla med dag /sgrub dang shin tu dag pa zhes/ /bya ba 'di ni bsgom pa'i lam/ /byang chub sems dpa' mkhas rnams kyi / /lam shes nyid ni de 'drar bshad/ /ces gsungs pa yin no/ / de nas gzhi thams cad yongs su shes pa med par lam legs par yongs su shes par mi 'gyur bas na/ thams cad shes pa nyid bstan pa'i don du/ shes rab kyis 'khor ba'i skyon mthong ba dang snying rjes sems can gyi don byed pa'i gzhan gyi dbang du gyur pas byang chub sems dpa' rnams srid pa dang /zhi ba la mi gnas pa'i phyir na ldog pa ston pas nyan thos dang rang sangs rgyas rnams ni de lta ma yin no zhes bstan pa sngon du 'gro ba can de nyid gzhung gzugs pa'i don kho nar rjes su 'gro ba dang ldog pas mtshan mar 'dzin pa dang / mtshan ma med par 'dzin pa las rgyal ba'i yum ring ba dang cig shos su bstan te/ dmigs pa dang mi dmigs pa dag gis mi mthun pa dang gnyen po dag bstan nas/ byang chub sems dpa' rnams kyi de dag rnam par bsgom pa'i sbyor ba nyid [(]yang [,]kyang [)]rjes su 'gro ba nyid kyi sgo nas brjod pa'i de ma thag tu/de'i mnyam pa nyid bstan pa sngon du 'gro bas/ mthong ba'i lam bsgom par bya bar gsungs so de'i phyir le'u brgyad pa las/ tshe dang ldan pa rab 'byor gyis gsol pa zhes bya ba nas brtsams te/ le'u dgu pa nas/ rab 'byor chos gang yang bskor ba'am ldog pa med do//rab 'byor 'di yang byang chub sems dpa' sems dpa' chen po rnams kyi shes rab kyi pha rol tu phyin pa yin no zhes gsungs pa'i mthar thug pa'i bar gyis nyan thos dang / rang sangs rgyas rnams kyi thams cad shes pa nyid ni zlog pa'i sgo nas gsungs pa yin no//de skad du yang / shes pas srid la mi gnas shing / /snying rjes zhi la mi gnas dang / /thabs ma yin pas ring ba dang / /thabs kyis ring ba ma yin nyid/ /mi mthun gnyen po'i phyogs dag dang / /sbyor dang de yis mnyam nyid dang / /nyan thos la sogs mthong ba'i lam//de 'dra kun shes nyid du 'dod/ /ces gsungs pa yin no/ /de'i rjes la yongs su shes pa'i thams cad mkhyen pa nyid gsum/ dbang du bya ba'i phyir yang rnam pa thams cad dang lam dang gzhi shes pa'i bye brag bsdus nas thams cad mkhyen pa nyid gsum sgom par byed pas na rnam pa kun mngon par rdzogs par rtogs pa bstan pa'i don du rnam pa rnams sbyor ba khyad par can rnams kyis grangs ji lta ba bzhin du yon tan dang skyon blang ba dang dor bar 'dod nas mtshan nyid shes pa sngon du btang ste/thar pa'i cha mthun gyi dge ba skyes pas bsgom par bya'o zhes rnam pa la sogs pa bstan nas/thar pa'i cha mthun rnam par 'phel ba'i spro ba can nges par 'byed pa'i cha dang mthun pa la sogs pa rtogs pa'i rim gyis slob pa byang chub sems dpa' phyir mi ldog pa'i tshogs kyis chos thob pa ni/ sangs rgyas nyid kyi rgyu mtshan srid pa dang zhi ba mnyam pa nyid du bsgom pa sngon du song ba can/rang gi sangs rgyas kyi zhing yongs su dag pa grub pa/ thabs la mkhas pas skal ba ji lta bar lhun gyis grub par sangs rgyas kyi phrin las 'jug go zhes nges par 'byed pa'i cha dang mthun pa la sogs pa bstan to/ /de bas na le'u dgu pa las/de skad ces bka' stsal pa dang / bcom ldan 'das la tshe dang ldan pa rab 'byor gyis 'di skad ces gsol to/ /bcom ldan 'das nam mkha' mtha' yas pa'i slad du 'di ni mtha' yas pa'i pha rol tu phyin pa'o bya ba nas brtsams te/ le'u nyi shu pa nas/ byang chub sems dpa' sems dpa' chen po de dang de dag ni lha dang /mi dang / lha ma yin du bcas pa'i 'jig rten gyis mi 'phrogs pa'o zhes bya ba 'di'i mthar thug pas/ ji ltar srid par sangs rgyas la sogs pa rnams kyis rnam pa kun mngon par rdzogs par rtogs pa gsungs pa yin no//de skad du yang / rnam pa sbyor bar bcas rnams dang / /yon tan skyon ni mtshan nyid bcas/ /thar dang nges 'byed cha mthun dang / /slob pa phyir mi ldog pa'i tshogs/ /srid dang zhi ba mnyam nyid dang / /zhing dag bla na med pa ni/ /rnam kun mngon rdzogs rtogs pa ste//'di ni thabs mkhas bcas pa yin/ /zhes gsungs pa yin no/ /de'i rjes la rnam pa kun mngon par rdzogs par rtogs pa thob pa ni khyad par gyi lam gyi rtogs pa rab kyi mthar 'gro'o/ /zhes rtse mor mngon par rtogs pa bstan pa'i don du/ grangs ji lta ba bzhin drod la sogs pa nges par 'byed pa'i cha dang mthun pa bzhi'i ngo bo/rtags dang rnam par 'phel ba dang brtan pa dang sems kun tu gnas pa bstan pa sngon du song ba can/ 'jug pa dang ldog pa'i phyogs kyi rten can dag bdag dang skyes bu rdzas dang btags par yod pa'i rten can dag grangs ji lta ba bzhin gzung ba dang 'dzin pa'i rnam par rtog pa gnyis gnyis yin pa'i phyir/rnam par rtog pa rnam pa bzhi rnams mthong ba dang / bsgom pa'i lam so so la spang bar bya ba nyid du dang / de spong bar byed pa'i gnas skabs kyi khyad par gnyen po rnam pa bzhi blang bar bya ba nyid du bstan nas/sangs rgyas nyid thob pa la bar chad med pas bar chad med pa'i ting nge 'dzin bden pa gnyi ga la brten pa'i thabs la mkhas pas spang bar bya ba'i log par sgrub pa dang bcas pa bstan to/ /de nas le'u nyi shu pa las/ rab 'byor gal te byang chub sems dpa' sems dpa' chen po rmi lam gyi nang na yang zhes bya ba nas brtsams te/le'u nyi shu rtsa dgu pa las dge ba dang mi dge ba'i chos tshad med pa'i phyir shes rab kyi pha rol tu phyin par rjes su rig par bya'o zhes bya ba 'di'i mthar thug pas rtse mo'i mngon par rtogs pa rgyu dang bcas par gsungs so//de skad du yang / de yi rtags dang rnam 'phel dang / /brtan dang sems kun gnas pa dang / /mthong zhes bya dang bsgom pa zhes/ /bya ba'i lam ni so so la/ /rnam par rtog pa rnam bzhi yi/ /gnyen po rnam pa bzhi dang ni/ /bar chad med pa'i ting nge 'dzin/ /log par bsgrub dang bcas pa ni//rtse mo'i mngon rtogs/ zhes gsungs pa yin no/ /de'i rjes la rtse mo'i mngon par rtogs pa thob pa ni so so ba dang bsdus pa nyid du rtogs pa'i don rnams brtan par bya ba'i phyir rim par bkod nas rnam par sgom par byed pa yin no/ /zhes chos thams cad sdud par byed pa sbyin pa la sogs pa rnam pa bcu gsum du/le'u nyi shu rtsa dgu pa las seng ge'i sgra sgrogs pa'i phyir shes rab kyi pha rol tu phyin par rjes su rig par bya'o zhes bya ba'i tshig gcig po nyid kyis mthar gyis pa'i mngon par rtogs pa rgyu dang bcas par gsungs pa yin no/ /de skad du yang /mthar gyis pa/ rnam gsum rnam bcu zhes gsungs pa yin no/ /de'i 'og tu mthar gyis pa'i mngon par rtogs pa rnam par bsgoms pa ni shin tu goms par bya ba'i phyir/ rtogs pa'i chos de rnams nyid rnam par smin pa ma yin pa zag pa med pa'i chos thams cad skad cig ma gcig pa'i mtshan nyid la sogs pa dbye ba rnam pa bzhir skad cig ma gcig nyid kyis mngon du byed do zhes le'u de nyid las chos thams cad 'khrug pa med pa'i phyir shes rab kyi pha rol tu phyin pa 'khrug pa med par rjes su rig par bya'o zhes bya ba'i tshig gcig nyid kyis skad cig ma gcig gis mngon par byang chub pa sgom pa'i rnam pa ni skad cig ma gnyis pa la chos kyi sku mngon par rdzogs par byang chub par 'gyur bas na byang chub sems dpa' rnams kyi mngon par rdzogs par byang chub pa de ma thag pa rnam pa gsum bstan nas/sku lhag ma gsum po ni yang dag pa'i kun rdzob tu snang ba yin te/don dam par chos nyid kyi ngo bo la mos pa ji lta bas rab tu phye bas/ sangs rgyas dang byang chub sems dpa' dang / nyan thos la sogs pa'i spyod yul du rnam par gzhag pa yin no zhes bstan pa'i don du/ gang phyir dben par gyur pa las/ /dben pa tha mi dad par 'dod//ces bya ba'i tshul gyis ngo bo nyid kyi sku de las tha mi dad kyang 'jig rten las 'das pa'i lam gyis tha dad du 'thob pa yin gyi bcos bu ma yin pa'i don gyis na byas pa ni ma yin pa'i phyir chos thams cad sgyu ma ltar gnyis su med par rtogs pa'i ye shes kyis khong du chud pa yin no zhes de brjod pa sngon du song ba can/rnal 'byor pa'i kun rdzob tu don khyad par can du snang ba skyed pa'i sgo nas gdon mi za bar khas blang bar bya ba/ gnas yongs su gyur pas yongs su gyur pa/ chos ston pa la sogs pa'i don bya ba byed pa gnyis su med pa'i sems dang sems las byung ba/rnam pa thams cad de bzhin gshegs pa rnams nyid kyi spyod yul du gyur pa'i ye shes kyi tshogs las byung ba ni/ chos kyi sku mdzad pa dang bcas pa yin no/ zhes bstan pa'i de ma thag tu/ mdo sde rin po che sna tshogs nyan par 'dod pa sa bcu la rab tu gnas pa'i byang chub sems dpa' chen po rnams dang lhan cig tu/mchog tu kha na ma tho ba med pa theg pa chen po'i chos la rdzogs par longs spyod pa'i dga' ba dang bde ba la nye bar spyod pa'i phyir gzhal du med pa'i bsod nams kyi tshogs bsags pa mtshan dang dpe byad kyis rnam par mdzes pa'i sku ni longs spyod rdzogs pa'i sku yin par bstan nas/skal ba ji lta ba bzhin 'gro ba ma lus pa'i don bya ba byed pa srid pa ji srid kyi mthar thug par rnam pa thams cad du rgyun mi 'chad pa bsod nams dang ye shes kyi tshogs kyi cha las byung ba/ byis pa dang nyan thos la sogs pas dmigs par rung bar bya ba de bzhin gshegs pa shAkya thub pa la sogs pa'i gzugs ni sprul pa'i sku yin par bstan to//des na le'u nyi shu rtsa dgu pa las/ rab 'byor de ltar byang chub sems dpa' sems dpa' chen pos zhes bya ba nas brtsams te/ le'u de'i zhabs nas sangs rgyas kyi chos bla na med pa rnams yongs su rdzogs pa rnyed par dka' bar mi 'gyur ro zhes bya ba'i bar gyis sangs rgyas bcom ldan 'das rnams kyi sku mngon par byang chub pa gsungs pa yin no//de skad du yang / /ngo bo nyid longs rdzogs bcas dang / /de bzhin gzhan la sprul pa ni//chos sku mdzad pa dang bcas pa/ /rnam pa bzhir ni yang dag brjod/ /ces gsungs pa yin no/ /de'i 'og tu gdul bya'i skye bo rnams la byang chub sems dpa' rtag tu ngu ltar bsgrub par bya'o zhes khong du chud par bya ba'i phyir/ de'i sngon gyi gtam gyi sbyor ba brjod pa'i sgo nas dge ba'i bshes gnyen mnyes pa sngon du 'gro bas shes rab kyi pha rol tu phyin pa la sbyor ba'i phan yon bstan pa'i don du/mjug bsdu ba'i sgo nas/ ji skad gsungs pa'i mngon par rtogs pa'i rim pa nyid tshul lugs bar pas ston pa lhur byed pa nyid kyi le'u gsum bstan te/de yang go sla ba'i phyir mngon par rtogs pa'i rgyan gyi tshig le'ur byas par ma bsdus so/ /de ltar rnam pa gzhan gnyis kyis ni bsdus pa'i don 'chad par 'gyur ba'i phyir re zhig bsdus pa'i don ni gcig nyid yin no/ /da ni tshig don la sogs pa bshad pas mdo'i don brjod pa ni de nas zhes bya ba la sogs pa'o//de nas zhes bya ba ni tshig nye bar dgod pa'o/ /lha dang bcas pa'i 'jig rten na mchod pa la sogs pas gtso bor gyur pa'i phyir gnas brtan no / /nyon mongs pa med par gnas pa rnams kyi nang na mdzes shing mchog tu gyur pa dang /'byor pa sems kyis phun sum tshogs pa gang la yod pa de ni rab 'byor ro/ /'di na la lar ni de bzhin gshegs pa rnams kyi sku'i mdzad pa'i bdag nyid can phyag la sogs pas byin gyis rlob ste/ dper na sa bcu pa la sogs pa'i mdo ston par mdzad pa lta bu'o/ /la lar ni gsung gi byin gyis rlob ste/dper na ma skyes dgra'i 'gyod pa bsal ba'i mdo la sogs pa lta bu'o/ /la lar ni thugs kyis byin gyis rlob ste/ dper na kun tu bzang po'i spyod pa ston pa'i mdo la sogs pa lta bu'o/ /des na 'phags pa rab 'byor la lhag par mos pa rnams rjes su bzung ba dang /yongs su gtang gtad pa dag gis yang dag par yongs su bzung ba la sogs pa'i rim gyis theg pa chen por brtul ba las rang gi rigs rgyun mi 'chad par bya ba'i phyir ram/ de bzhin gshegs pa rnams kyi thabs mkhas pa'i mthu ni bsam gyis mi khyab ste/gang gi phyir rnam pa thams cad du mi nus pa yang ston to zhes mthu yang dag par mthong ba'i gdul bya rnams la phan gdags par bya ba'i phyir/ shes rab kyi pha rol tu phyin pa bshad pa la ngag byin gyis rlob pa'i sgo nas/ 'phags pa rab 'byor yid gzhan du yengs pa de la mngon du phyogs par bya ba'i phyir/bcom ldan 'das kyis bka' stsal pa ste/ bos par gyur pa'o/ /ji ltar zhe na/ rab 'byor byang chub sems dpa' sems dpa' chen po rnams kyi shes rab kyi pha rol tu phyin pa las brtsams te khyod spobs par gyis shig ces bya ba gsungs te/chos ston pa'i skabs yin pas/ yod pa nyid yin du zin kyang / kye rab 'byor deng khyod kyi chos dang don dang nges pa'i tshig dang spobs pa so so yang dag par rig pa khyad par du 'phags pa rnam pa thams cad mngon du gyis shig ces pa'o/ /byang chub ces bya ba chos thams cad la ma chags pa rang gi don phun sum tshogs pa la sems dpa' ste/bsam pa gang la yod pa de ni byang chub sems dpa' pa'o / /nyan thos kyang de ltar 'gyur ro zhe na/ sems dpa' chen po zhes gsungs te/ gzhan gyi don phun sum tshogs pa chen po la sems dpa' gang la yod pa de dag ni sems dpa' chen po'o//gzhan du 'gyur ba'i chen po nyid ni mu stegs pa'i skye bo dam pa la yang yod pas byang chub sems dpa' zhes smos pa yin no/ /de bas na/ byang chub sems dpa' sems dpa' chen po de rnams kyis shes rab kyi pha rol tu phyin pa las brtsams te zhes bya ba yin no//bskal pa grangs med pa dang po nges par 'byung zhing mos pas spyod pa rnam par 'phel ba bsod nams kyi tshogs bsags pa'i byang chub sems dpas sa phyogs gtsang mar skyil mo krung bcas te/ sangs rgyas dang byang chub sems dpa' la dmigs pa sngon du 'gro bas/shes rab kyi pha rol tu phyin pa'i tshul chos thams cad bdag med par ston par byed pa la rtsa ba'i sems kyis ming gi sgo nas yang dag par dmigs la/ rjes su dpyad pa'i sems kyis de nyid kyi tshig gi rab tu dbye ba le'u la sogs pa'i bye brag gis brtag par bya'o/de nas bgrang bas mngon par rtogs pa brgyad kyi gnas skabs kyi dbye bas grangs gzung ba'i phyir dang / gzhal bas mngon par rtogs pa so so'i rang bzhin nges pa'i phyir dang / rtog pas sgro 'dogs pa dang skur pa 'debs pa med pa'i phyir dang / nges par rtog pas mngon sum dang rjes su dpag pa'i tshad mas 'thad par byas pa nyid kyi phyir te/de ltar rnam pa bzhis shes rab kyi pha rol tu phyin pa'i don la dang / so so ba dang / bsdus pa go rims bzhin du don med pa dang don dang bcas pa yin no zhes bya bas yi ge la ste / rnam pa 'di dag gis rnam par dpyod pa'i sems kyis dpyad par bya'o//de'i 'og tu ji ltar rnam par dpyad pa'i mtshan ma de nges par 'dzin pa'i sems kyis bzung la/ ji ltar brtags pa'i don nyid ming la dmigs par byed pa'i rtsa ba'i sems nyid du sdom pa'i sems nyid kyis bcug la/ don gang la rab tu sbyor bar 'gyur ba de 'dun pa dang lhan cig pa'i re ba'i sems kyis bsgom par bya'o//de ltar na dang po thos pa dang bsam pa dang bsgom pa'i rang bzhin can gyi shes pa skye ba'i rim gyis/ rnam pa thams cad mkhyen pa'i ye shes rtogs pa'i phyir/ pha rol te rab kyi mthar 'gro ba yin pas na pha rol tu phyin pa'o//de yang shes rab ces bya ba chos rab tu rnam par 'byed pa'i mtshan nyid shes rab kyi pha rol tu phyin pa ni shes rab kyi pha rol tu phyin pa ste/ sangs rgyas bcom ldan 'das kyi gnyis su med pa'i ye shes sgyu ma lta bu ni dngos yin la/ de 'thob pa dang rjes su mthun pa nyid kyis na tshig dang ngag gi tshogs kyi gzhung dang /mthong ba la sogs pa'i mtshan nyid can gyi lam la yang shes rab kyi pha rol tu phyin pa zhes bya ba ni btags pa'o/ /de yang slob dpon phyogs kyi glang po'i zhal snga nas kyis/ shes rab pha rol phyin gnyis med/ /ye shes de ni de bzhin gshegs/ / bsgrub bya don de dang ldan pas/ /gzhung lam dag la de sgra yin/ /zhes bshad pa yin no/ /de'i phyir de dang 'brel pa gzugs brnyan dang bral ba rnam pa gsum ka yang shes rab kyi pha rol tu phyin pa nyid do zhes bya bar bzung ba yin te/ gtso bo las dbang du byas pas so/ /de rnams nyid kyi ni ma yin te/'di med na mi 'byung bas byang chub gsum ka'i dbang du byas pa'i phyir ro/ /de yang 'di nyid las nyan thos kyi sa la slob par 'dod pas kyang shes rab kyi pha rol tu phyin pa 'di mnyan par bya'o zhes bya ba la sogs pa 'chad par 'gyur ba yin no/ /skyes bu'i don mchog gi rnam pa thams cad dang ldan pa rtogs pa'i tshul bstan par bya ba yin pa'i phyir dang /de la yang rigs kyi bu byang chub kyi sems ni sa bon du gyur pa'o/ /de nyid ni 'bras bur gyur pa sangs rgyas kyi chos thams cad kyi snying po yin no zhes 'phags pa sdong po bkod pa las bstan pa'i phyir na/ji ltar te gang gis gzhan gyi don la dmigs nas yang dag par rdzogs pa'i byang chub 'dod pa'i mtshan nyid dbye ba nyi shu rtsa gnyis su phye ba'i byang chub kyi sems rtogs pa'i bye brag gis byang chub sems dpa' sems dpa' chen po rnams shes rab kyi pha rol tu phyin pa gsum char la yang nges par 'byung bar 'gyur zhing /nges par thob par 'gyur ba zhes bya ba ni sems bskyed pa dmigs pa dang bcas pa'i rang gi ngo bo dang rab tu dbye ba yin la/ de'i dbye ba nyid ni mdo'i don yin no zhes bstan par bya ba'i phyir/bcom ldan 'das nyid kyis rab 'byor la bka' stsal pa'i sgo nas/ shes rab kyi pha rol tu phyin pa mdor ston par mdzad pa yin no/ /'dir ngag gi don mdor bsdus pa ni 'di yin te/ byang chub sems dpa' sems dpa' chen po byang chub kyi sems kyi rnam pa thams cad ji lta ba bzhin du rtogs pa'i bye brag gis shes rab kyi pha rol tu phyin pa gsum char yang ji ltar rigs pa'i thos pa la sogs pa'i shes pa bskyed pa'i rim gyis/yang dag par thob par 'gyur ba de bzhin du de rnams dang 'brel pa'i shes rab kyi pha rol tu phyin pa nyid las brtsams te/ rgyas par bstan pa'i phyir/rab 'byor so so yang dag par rig pa bzhi mngon du gyis shig ces de ltar na bcom ldan 'das kyis gnas brtan tshe dang ldan pa rab 'byor la bka' stsal pa zhes bya ba yin no/ /rgya cher ni/ de la dang por rigs nus pas/ /snying rje'i sa bon rab sad cing / /sbyor dang bsam pa phun tshogs pas//byang chub sems ni yongs su bzung / /zhes bya ba'i tshul gyis rigs la sogs pa'i nus pas byang chub sems dpa'i sdom pa yang dag par blangs pa la sogs pas/ stong pa nyid dang snying rje'i snying po can gyi byang chub kyi sems bskyed la/ yang dag par rdzogs pa'i sangs rgyas su gyur nas skal ba ji lta ba bzhin du gzhan gyi don du theg gsum gyis chos bstan pa la sogs pas 'bad par bya'o zhes smon par byas nas/sgrub pa phun sum tshogs pas rdzogs par bya'o zhes bya ba ni gzhan gyi don la dmigs pa'i yang dag par rdzogs pa'i byang chub 'dod pa'i mtshan nyid rgyu dang 'bras bur bcas pa yin te/'gro bar 'dod dang 'gro ba yi/ /bye brag ji ltar shes pa bzhin/ /de bzhin mkhas pas 'di gnyis kyi/ /bye brag rim bzhin shes par bya/ /zhes bya bas smon pa dang 'jug pa'i ngo bo nyid kyis sems bskyed pa rnam pa gnyis so//spro ba che dang rtsom pa che/ /don che ba dang 'byung ba che/ /byang chub sems dpa'i sems pa ste/ /don gnyis ldan pa'i sems 'byung ba/ /zhes bshad pas sems pa dang mtshungs par ldan pa'i sems yul khyad par can du snang ba skye ba sems bskyed pa ma yin nam/ yang dag par rdzogs pa'i byang chub 'dod pa nyid ni de don du gnyer ba dge ba'i chos la 'dun pa'i sems las byung ba yin pa'i phyir ji ltar na de sems bskyed pa yin par 'gyur zhe na/de ni bden mod kyi/ 'on kyang 'gro ba mgon med pa sdug bsngal gyi rgya mtshor nub pa la mngon par bltas nas/ de gdon pa'i bsam pa'i dge bas chos la 'dun pa'i mtshan nyid can gyi don du gnyer ba yod na/'tshang rgya ba nyid kyi phyir byang chub kyi sems bskyed pa yin pas 'dir rgyus 'bras bu bstan pa yin no/ /de ltar 'dun cing don du gnyer ba'i byang chub sems dpa'i dge ba'i chos thams cad rnam par 'phel bar 'gyur ro zhes shes par bya ba'i phyir nye bar gdags pa la brten pa yang yin pas nyes pa med do//yang na smon lam ni don du gnyer ba ste/ yang dag par rdzogs pa'i byang chub 'dod pa nyid yin la/ de dang lhan cig spyod pa'i sems bskyed pa ni de'i sgrar bstan te/ don du gnyer ba gtso bor gyur pa ni sems bskyed pa'i gnas skabs yin pa'i phyir ro//de ltar yang byang chub sems dpa' rnams la smon lam dang ldan pa'i sems de skye'o zhes bya ba ni 'thad pa yin no/ /de nas gang 'dod pa'i bdag nyid dang / gang gi don du sems bskyed pa yang dag par rdzogs pa'i byang chub de dang /gzhan gyi don de gang zhig yin zhe na/ 'phags pa stong phrag nyi shu lnga pa'i mdo ji lta ba bzhin du brjod par bya'o/ /de la yang dag par rdzogs pa'i byang chub mdor bstan pa ni/ shA ri'i bu 'di la byang chub sems dpa' sems dpa' chen po chos thams cad rnam pa thams cad du mngon par rdzogs par 'tshang rgya bar 'dod pas shes rab kyi pha rol tu phyin pa la brtson par bya'o zhes gang gsungs pa yin no//de la 'di'i rgyas par bstan pa ni 'di yin te/ shA ri'i bu 'di la byang chub sems dpa' sems dpa' chen po mi gnas pa'i tshul gyis shes rab kyi pha rol tu phyin pa la gnas te/sbyin pa po dang sbyin par bya ba dang len pa po mi dmigs pa'i phyir yongs su btang ba med pa'i tshul gyis sbyin pa'i pha rol tu phyin pa yongs su rdzogs par bya'o zhes bya ba la sogs pa gang gsungs pa yin no/ / de la gzhan gyi don bsdus te bstan pa ni 'di yin te/ byang chub sems dpa' sems dpa' chen po phyogs bcu re re zhing gang gA'i klung gi bye ma snyed kyi 'jig rten gyi khams na sems can gang zhig yod pa de dag thams cad phung po lhag ma med pa'i mya ngan las 'das pa'i dbyings su mya ngan las 'da' bar 'dod pas shes rab kyi pha rol tu phyin pa la bslab par bya'o zhes gang gsungs pa yin no//de'i rgyas par bstan pa ni 'di yin te/ byang chub sems dpa' sems can ser sna can rnams ni sbyin pa la/ tshul khrims 'chal pa rnams ni tshul khrims la/ gnod sems mang ba rnams ni bzod pa la rab tu dgod par 'dod pas/shes rab kyi pha rol tu phyin pa la bslab par bya'o zhes bya ba la sogs pa gang gsungs pa yin no/ /de skad du yang / sems bskyed pa ni gzhan don phyir/ /yang dag rdzogs pa'i byang chub 'dod/ /de dang de ni mdo bzhin du/ /bsdus dang rgyas pa'i sgo nas brjod//ces bya ba gsungs pa yin no/ /de la de'i rab tu dbye ba ni 'di yin no/ /de la byang chub sems dpa' rnams kyi sems bskyed pa dang po 'dun pa dang ldan pa ni sa dang 'dra ste/ chos thams cad rnam pa thams cad du mngon par rdzogs par byang chub pa'i tshogs rab tu bskyed pa'i gzhir gyur pa'i phyir ro//gnyis pa bsam pa dang ldan pa ni gser bzang po lta bu yin te/ pha rol tu phyin pa drug gis bstan pa'i tshe 'di dang phyi ma dag la phan pa dang bde ba'i bsam pa ni yang dag par rdzogs pa'i byang chub kyi bar du 'gyur ba med pa'i phyir te/gnas pas na bsam pa zhes bya ba'i tshul gyis so/ /gsum pa lhag pa'i bsam pa dang ldan pa ni dkar po'i phyogs kyi zla ba tshes pa lta bu yin te/ dge ba'i chos thams cad gong nas gong du rnam par 'phel bar 'gyur ba'i phyir te/ lhag pa'i bsam pa zhes bya ba'i tshul gyis so//gsum po 'di dag ni chung ngu dang 'bring dang chen po nyid kyis las dang po pa tshogs kyi sas bsdus pa yin no/ /bzhi pa sbyor ba dang ldan pa ni me lta bu ste/ thams cad mkhyen pa nyid gsum gyi sbyor ba ni shing gzhan gyis me khyad par du 'gyur ba dang 'dra bar gong nas gong du 'gro ba'i phyir te mchog tu gyur pa'i sbyor ba yin pa'i phyir rab tu sbyor ba zhes bya ba'i tshul gyis so//'di ni sa dang po la 'jug pa'i sbyor ba'i lam gyis bsdus pa mos pas spyod pa'i sa dang 'brel pa yin no/ /lnga pa sbyin pa'i pha rol tu phyin pa dang ldan pa ni gter chen po dang 'dra ste/ zang zing gi longs spyod kyis rnam pa thams cad du tshad med pa'i sems can rnams yang dag par tshim par byed kyang mthar thug pa med pa'i phyir ro//drug pa tshul khrims kyi pha rol tu phyin pa dang ldan pa ni rin po che'i 'byung gnas dang 'dra ste/ rten gyi ngo bo nyid kyis yon tan rin po che thams cad de las skye ba yin pa'i phyir ro/ /bdun pa bzod pa'i pha rol tu phyin pa dang ldan pa ni rgya mtsho chen po dang 'dra ste/mi 'dod pa thog tu bab pa thams cad kyis mi 'khrugs pa'i phyir ro/ /brgyad pa brtson 'grus kyi pha rol tu phyin pa dang ldan pa ni rdo rje lta bu ste/ yid ches pa brtan pas mi phyed pa'i phyir ro/ /dgu pa bsam gtan gyi pha rol tu phyin pa dang ldan pa ni ri'i rgyal po lta bu ste/dmigs pa'i rnam par g.yeng bas rnam pa thams cad du bskyod par mi nus pa'i phyir ro/ /bcu pa shes rab kyi pha rol tu phyin pa dang ldan pa ni sman chen po lta bu ste/ nyon mongs pa dang shes bya'i sgrib pa'i nad thams cad rab tu zhi bar byed pa'i phyir ro//bcu gcig pa thabs kyi pha rol tu phyin pa dang ldan pa ni dge ba'i bshes gnyen lta bu ste/ gnas skabs thams cad du sems can gyi don yongs su mi gtong ba'i phyir ro/ /bcu gnyis pa smon lam gyi pha rol tu phyin pa dang ldan pa ni yid bzhin gyi nor bu dang 'dra ste/ ji ltar smon pa'i 'bras bu 'grub pa'i phyir ro//bcu gsum pa stobs kyi pha rol tu phyin pa dang ldan pa ni nyi ma lta bu ste/ gdul bya'i lo tog yongs su smin par byed pa'i phyir ro/ /bcu bzhi pa ye shes kyi pha rol tu phyin pa dang ldan pa ni glu snyan pa sgrogs pa dang 'dra ste/ gdul bya 'dun par byed pa'i chos ston par byed pa yin pa'i phyir ro//bcu po 'di dag ni go rims bzhin du rab tu dga' ba la sogs pa'i sa bcus bsdus te/ mthong ba dang bsgom pa'i lam gyi spyod yul can yin no/ /bco lnga pa mngon par shes pa dang ldan pa ni rgyal po chen po lta bu yin te/mthu thogs pa med par gzhan gyi don sgrub pa yin pa'i phyir ro/ /bcu drug pa bsod nams dang ye shes kyi tshogs dang ldan pa ni bang mdzod lta bu ste/ bsod nams dang ye shes kyi tshogs mang po'i mdzod lta bu yin pa'i phyir ro/ /bcu bdun pa byang chub kyi phyogs dang mthun pa'i chos sum cu rtsa bdun dang ldan pa ni lam chen po lta bu ste/'phags pa'i gang zag thams cad gshegs shing rjes su gshegs pa yin pa'i phyir ro/ /bco brgyad pa zhi gnas dang lhag mthong dang ldan pa ni bzhon pa lta bu ste/ zung 'jug tu 'gro bas na 'khor ba dang mya ngan las 'das pa gang du yang mi lhung bas bde blag tu 'gro ba'i phyir ro//bcu dgu pa gzungs dang spobs pa ldan pa ni bkod ma'i chu dang 'dra ste/ rnam pa thams cad du chu 'dzin par byed cing mi zad par 'byin pa dang 'dra bar thos pa dang ma thos pa'i chos 'dzin pa dang bstan pa mthar thug pa med par 'byin pa'i phyir ro//lnga po 'di dag ni byang chub sems dpa'i sa las khyad par gyi lam gyis bsdus pa yin no/ /nyi shu pa chos kyi dga' ston dang ldan pa ni sgra snyan pa lta bu ste/ thar pa 'dod pa'i gdul bya rnams la snyan par sgrogs pa'i phyir ro/ /'di ni byang chub sems dpa'i sa dang 'brel pa sangs rgyas kyi sa la 'jug pa'i sbyor ba'i lam gyis bsdus pa yin no//nyi shu rtsa gcig pa bgrod pa gcig pa'i lam dang ldan pa ni chu bo'i rgyun dang 'dra ste/ shes pa dang shes par bya ba mnyam pa nyid du rtogs pas snying rje chen po dang thabs dang shes rab kyi rgyun mi 'chad par gzhan gyi don byed pa nyid yin pa'i phyir ro//'di ni sangs rgyas kyi sas bsdus pa'i dngos gzhi'i gnas skabs thob pa yin no/ /nyi shu rtsa gnyis pa chos kyi sku dang ldan pa ni sprin chen po lta bu ste/ sprul pa'i skus dga' ldan gyi gnas na bzhugs pa la sogs pa kun tu ston pas sems can gyi don bya ba thams cad de la rag lus pa'i phyir ro//'di yang de bzhin gshegs pa rnam par mi rtog pa'i bdag po las zhus pas 'dul byas yongs su brtags pa'i sprul pa la sogs pa dmigs pa yin pa'i phyir/ dag pa 'jig rten pa'i ye shes kyi rjes la thob pa'i sangs rgyas kyi sas bsdus pa yin no//de ltar na las dang po pa'i sa nas brtsams te/ sangs rgyas kyi sa'i bar gyis bsdus pa yin no/ /de bas na don rtogs pa'i go rims gyis ji skad du bshad pa'i go rims dang rab tu dbye ba 'di dag nyid yin gyi lhag pa yang ma yin ma tshang ba yang ma yin/go rims gzhan du bstan par bya ba yang ma yin no zhes bstan par gyur pa yin no/ /de ltar rim gyis sems bskyed pa'i dbye ba nyi shu rtsa gnyis su phye ba rtog pa'i sgo nas ci nas byang chub sems dpa' sems dpa' chen po shes rab kyi pha rol tu phyin pa rnam pa gsum ka la zhes bya ba la sogs pa snga ma bzhin du sbyar ro//de skad du yang / de yang sa gser zla ba me/ /gter dang rin chen 'byung gnas mtsho/ /rdo rje ri sman bshes gnyen dang / /yid bzhin nor bu nyi ma glu/ /rgyal po mdzod dang lam po che/ /bzhon pa bkod ma'i chu dang ni/ /sgra snyan chu bo sprin rnams kyis//rnam pa nyi shu rtsa gnyis so/ /zhes gsungs pa yin no/ /'di ni nges par so so'i skye bo'i byang chub sems dpa' nas/ de bzhin gshegs pa'i sa'i bar du dbye bas rgyu dang 'bras bu'i bdag nyid can gyi dbye ba yin par shes par bya'o/ /de ltar yang mdo sde'i rgyan las/sems bskyed de ni sa rnams la/ /mos dang lhag bsam dag pa dang / /rnam par smin pa gzhan du 'dod/ /de bzhin sgrib pa spangs pa'o/ /de yi rtsa ba snying rjer 'dod/ /rtag tu sems can phan par sems/ /zhes bshad pas rgyu dang 'bras bu la dmigs pa'i bdag nyid can gyi sems bskyed pa nyid bskyed par bya ba yin par bshad do//de'i rab tu dbye ba byed na yang de bzhin du bya ba yin te/ gzhan du na rgyu'i rab tu dbye ba tsam gyis ni de'i dbye ba rnam pa thams cad byas par mi 'gyur bas na dbye ba yongs su rdzogs par mi 'gyur ro/ /zhes pa ni kha cig gi'o//gzhan dag ni rgyal po chen po dang 'dra ba la sogs pa sems brgyad po nyid byang chub sems dpa'i sa las khyad par can gyi lam gyis bsdus pa nyid yin no zhes zer ro/ /byang chub tu sems bskyed pa'i dbye ba rnam pa thams cad du ston pa'i gzhung ni stong phrag nyi shu lnga pa las bstan pa yin pas 'dir ni gzhungs mangs kyis dogs nas shes byed nyid du ma bris so//de ltar byas na 'dir ni mgo smos pa tsam gyis go ba mdor bsdus pa la dga' ba'i sems can rjes su bzung ba'i phyir ston par bya ba la zhugs pa yin pas ma gsungs pa yin no/ / ji ltar du bshad pa'i don gyi dbye ba ni nges pa kho nar khong du chud par bya ba yin te/ gang gi phyir mdo sde rin po che 'di ni shes rab kyi pha rol tu phyin pa stong phrag nyi shu lnga pa'i don nye bar bsdu ba la 'jug pa yin no zhes sngar bshad pa kho na'o/ /de skad du yang slob dpon phyogs kyi glang pos/ / de ltar ji skad bshad rnams kyis/ /brgyad stong 'di don ma tshang med/ /'dir gzhung bsdus pa yin 'dod de/ /don ni ji skad gsungs de nyid/ /ces bshad pa yin no/ /rnam pa thams cad ni de bzhin gshegs pa'i ye shes kyis rtogs par bya ba yin pas na/ shes rab kyi pha rol tu phyin pa zab mo la bdag nyid nus pa med pa ltar//shes bya'i sgrib pa ma spangs pa nyid kyis 'phags pa rab 'byor yang nus pa med par dogs pas 'phags pa shA ri'i bus bskul ba tsam rtogs pas de'i byin gyis brlabs kyi mthu ma rig nas rtogs par byed pa ni/ de nas zhes bya ba la sogs pa'o//'di snyam du zhes bya ba ni 'og nas bshad pa'i rtog pa skyes pa'o/ /de nyid brjod pa ni ci zhes bya ba la sogs pa'o/ /ci zhes bya ba'i sgra ni rnam par rtog pa'o/ /bdag nyid kyis ni rang dang 'brel par 'jug pa'i 'o/ /de'i yul de la de'i gzhan gyis byas pa'i bdag nyid kyis ma yin gyi/'on kyang rang gi ste rang nyid kyis byas pa'i 'o / /shes rab ni chos rnam par 'byed pa'i mtshan nyid do/ /spobs pa ni rigs pa dang grol bar smra ba'o/ /de gnyis kyi stobs ni thogs pa med pa'i nus pa'o/ /bskyed pa ni sngon med pa byas pas so//rnam pa gzhan gyi sgo nas kyang brjod pa ni rang gi zhes bya ba ste/ 'dir yang bdag nyid kyi zhes bya ba blta bar bya'o/ /shes rab kyi spobs pa'i stobs gnas pa la/ byin gyi rlabs kyis khyad par du byas pas ston par 'gyur ba'o/ /'on te zhes bya ba'i sgra ni phyogs gzhan ston par byed pa'i don to 'on te sangs rgyas kyi mthus zhes bya ba ni/'di snyam du sems pa yin te/ thabs kyi khyad par ni bsam gyis mi khyab pa yin pas/ brgya la 'dis sngon med pa'i ye shes zhig rtogs par gyur tam/ yang na sngar yod pa phul du byung bar byas sam/ de bzhin gshegs pa'i byin gyis brlabs thob par gyur/ gzhan du na bdag dang 'dra ba 'phags pa rab 'byor gyis kyang nus pa ma yin no/ /nyon mongs pa med par gnas pa rnams kyi mchog tu gyur pa nyid kyis khyad par du 'phags pa yin pa'i phyir ston pa yin no zhes kyang smra bar nus pa ma yin te/bdag kyang shes rab dang ldan pa'i mchog nyid yin pa'i khyad par yod pas smra bar nus pa nyid du 'gyur ro/ /nyon mongs pa med pa'i ting nge 'dzin gyi bya ba ni ston pa la yod pa ma yin no zhes bsams pa 'phags pa shA ri'i bu'i bsam pa'o/ /thabs la mkhas pa bsam gyis mi khyab pa srid pa yin yang /dbang po rtul po nyid kyis na sngon med pa'i ye shes la sogs pa 'phral du skyed par mi nus te/ des na rnam par rtog pa phyi ma nyid ston pas/ de nas zhes bya ba la sogs pa gsungs so/ /nyan thos rnams kyi sems gtad na gzhan gyi sems shes kyi/gzhan du ma yin pas sangs rgyas kyi mthus zhes bya ba'i tshig gis sems ma gtad par shes par brjod pa yin no/ /de lta bu'i tshul ni ji skad du bshad pa'i rnam par rtog pa gsum gyi rang bzhin te/ sems sam yang na shes rab la brten nas yongs su tshol ba'i yid kyi brjod pa'o//de yang sems rtsing ba yin pa'i phyir rtog pa yin no/ /de zhes bya ba ni brjod ma thag pa'o/ /kun rdzob tu de'i rjes su byed pa'i sems kyis shes nas 'chad par 'gyur ba 'di skad ces smras so/ /smras pa de nyid ni tshe dang ldan pa shA ri'i bu zhes bya ba la sogs pa'o//gang ci zhes bya ba ni/ mdo sde dbyangs bsnyad lung bstan dang / /tshigs bcad ched brjod rtogs pa brjod/ /de ltar byung dang gleng gzhi dang / /shin tu rgyas pa skyes rabs bcas/ /gtan phab rmad du byung smos te/ /de ltar yan lag bcu gnyis gsung //zhes bya ba'o/ /de la smra ba zhes bya ba ni thos pa'i rang bzhin gyi shes pa skyes pa las/ yongs su grol bar bya ba'i don du gang gis 'don par byed pa'o/ /ston pa ni bsam pa'i rang bzhin gyi shes pa skyes pa las yongs su smin par bya ba'i don du gang gis don 'chad par byed pa'o//nye bar ston pa ni sgom pa'i rang bzhin gyi shes pa skye la / yongs su grol bar bya ba'i don du gang gis gzhung dang don la nges pa skyes pas rab tu ston par byed pa'o/ /des na de ltar brjod pa dang zhes bya ba la sogs pa tshig gsum ni go rims bzhin du smra ba dang zhes bya ba la sogs pa'i bshad pa yin no//skyes bu'i mthu ni byin gyis brlabs te/ de'i rgyu can yin pa'i phyir smra ba la sogs pa de thams cad la nye bar brtags nas skyes bu'i mthu zhes bya ba'i sgras bshad do/ /nyan thos rnams kyis kyang rang gis rtogs pa'i chos nyid ni mngon sum du byas pa ma yin nam/ci'i phyir de rang gi nus pas smra ba la sogs pa thams cad byed pa ma yin zhes dogs pa bsu nas/ de ci'i phyir zhe na zhes rang nyid kyis dri ba byas pa yin no/ /kha cig ni gzhan gyis byas par gyur na snying mi tshim pa la sogs pa'i nyes par 'gyur ro zhes zer ro/ /gzhan dag ni de'i rjes thogs su rgyun chad pa'i nyes pa spang bar bya ba'i phyir dang /'jigs pas 'dri bar mi nus pa rnams la phan gdags pa'i phyir dang / sems rtse gcig par byas pa rnams tshig gi spyod lam las nyams pa'i phyir rnam par g.yengs pa'i nyes par 'gyur ba spang ba'i phyir yin no zhes zer ro//de bzhin gshegs pas chos gang bstan pa zhes bya ba la sogs pa ni lan yin no/ /nges par 'byed pa'i cha dang mthun pa rtogs pa'i sgo nas bstan pa'i chos brjod par bya ba'i don de la ste yod par gyur pa la slob pa na/ mthong ba'i lam thob pas rtogs pa'i chos nyid de mngon sum du byed pa'o//bsgom pa'i lam rtogs pas 'dzin par byed pa'o/ /rtogs pa'i don gyi yul can bshad pa'i chos mdo sde la sogs pa de thams cad rtogs pa'i chos nyid dang mi 'gal te/ de dang mi 'gal bar ston pa'i phyir ro/ /de'i phyir nyan thos de dag lung 'bogs par byed pa'i mdo sde la sogs pa lung gi chos gang yin pa de dag rtogs pa'i chos nyid dang mi 'gal ba'o//lung 'bogs pa nye bar ston pa ni nye bar mtshon pa ste/ smra ba dang ston par byed pa yang bzung ste/ de ltar skabs su bab pa'i phyir ro/ /'di ni de bzhin gshegs pas chos bstan pa'i rgyu mthun pa yin te/'di ni nye bar brtags nas skyes bu'i byed par bstan pa'i rang bzhin yin no/ /'dra bar 'byung ba ni rgyu mthun pa ste/ rjes su mthun pa'i 'bras bu'o/ /'dis ni 'di skad du ston te/ rtag tu mnyam par gzhag pa'i thabs mkhas pa dang bral bas rtogs pa'i don gyi yul la yang /rang gi rtogs pa dang mi 'gal bar ston par mi nus na/ ma rtogs pa'i don gyi yul la lta smos kyang ci dgos/ de bas na sangs rgyas kyi mthu nyid yin par bstan to zhes blta bar bya'o/ /de ltar yang / rang gi rtogs pa'i rjes 'brang bas / /ji tsam zhig ni dpag par nus/ / thabs byung de rgyu lkog gyur pa/ /de bshad par ni dka' ba yin/ /zhes bya ba'i tshul gyis dpags nas bstan par nus pa yang ma yin no zhes bya ba'o/ /zhar la 'ongs pa rdzogs nas/ da ni de ltar byang chub kyi sems dang po la sogs pa bskyed pa dus ji lta ba bzhin du don du gnyer bar byed pa'i byang chub sems dpa' sbyin pa la sogs pa'i dge ba'i chos la slob pas bsod nams kyi tshogs bsags pa na/bsam gtan la thob mngon par shes/ /mngon par sgrub pa'i sgo nas te/ /sangs rgyas dpag tu med pa la/ /mchod pa'i phyir dang mnyan pa'i phyir/ /'jig rten khams ni rnams su 'gro//'dis ni sangs rgyas dpag med la/ /bskal dpag med gyur bsnyen bkur byas/ /de la bsnyen bkur byas pa'i phyir/ /sems ni las rung mchog tu gyur/ /zhes bya bas sems las su rung ba nyid kyi stobs kyis gnas pa ni ting nge 'dzin gyi sgo nas/de tshe chos kyi rgyun la ni/ /sangs rgyas rnams la zhi gnas dang / /ye shes yangs pa thob bya'i phyir/ /gdams ngag rgya chen rnyed par 'gyur/ /zhes bya ba'i tshul gyis so / /de ltar 'jug pa'i byang chub sems dpa' dang 'brel ba'i don gyi gdams ngag ni/'phags pa rab 'byor gyis bcom ldan 'das kyi gsung sngon du 'gro bas/ byang chub sems dpa' zhes bya ba la sogs pa gsol ba yin te/ byang chub sems dpa' byang chub sems dpa' zhes bya ba'i don 'di la/ shes rab kyi stobs kyis byang chub la dmigs pa'i phyir byang chub kyang yin la/snying rje chen po'i bsam pas sems can la dmigs pa'i phyir sems dpa' yang yin pas na byang chub sems dpa' zhes bshad de/ dper na mi gtsang ba la dmigs pa'i ting nge 'dzin la mi gtsang ba zhes zer ba dang 'dra'o/ /gnas gzhan dag tu bshad pa'i byang chub sems dpa' zhes bya ba rnams kyang bsdu bar bya ba'i phyir bzlas te brjod pa yin no//chos gang gi tshig bla dgas zhes bya ba ni don dam par brtags pa la sogs pa'i ngo bo nyid gang gi tshig bla dgas te/ mngon du byas nas bstan pa lags/ 'on kyang gang gi yang ma yin no zhes bya ba'i tha tshig go//de nyid ni bcom ldan 'das 'di lta ste/ byang chub sems dpa' zhes bgyi ba'i chos de bdag gis yang dag par rjes su ma mthong ngo zhes smras pa yin te/ de kho na nyid du brtags pa la sogs pa'i ngo bo gdams par bya ba ma dmigs pa'i phyir ro/ /de lta na yang gdams ngag gi yul ni yod do zhe na/bcom ldan 'das 'di lta ste zhes bya ba la sogs pa smos te/ shes rab kyi pha rol tu phyin pa ni sgrub pa la sogs pa chos rnam pa bcu'i rang bzhin te/ 'di ltar gdams pa'i yul gyi dbang du mdzad nas/ stong phrag nyi shu lnga pa las/ bcom ldan 'das ji ltar byang chub sems dpa' sems dpa' chen po shes rab kyi pha rol tu phyin pa la bslab par bgyi/bcom ldan 'das kyis bka' stsal pa/ shA ri'i bu 'di la byang chub sems dpa' sems dpa' chen pos ming de yang dag par rjes su ma mthong ngo zhes bya ba la sogs pa gsungs pa yin no//byang chub sems dpa'i chos kyang zhes bya ba ni/ chos gang la byang chub sems dpa' zhes bya ba'i tshig bla dgas su byas pa'o/ /chos de ma 'tshal ba ni thos pas so/ /ma dmigs pa ni bsam pas so/ /yang dag par rjes su ma mthong ba ni bsgom pas so//yang na so sor nges pa'i don dang lhan cig nye ba'i rgyu med pas/ rnam pa med pa'i shes pas ma 'tshal ba'o/ /dngos po med du zin kyang rmi lam la sogs par 'byung ba srid pas rnam pa dang bcas pas ma dmigs pa'o/ /de nyid kyis na gnyi ga yang dag par rjes su ma mthong na shes rab kyi pha rol tu phyin pa sgrub pa la sogs pa rnam pa bcu po gang la dang po thob pa'i yon tan yongs su bsrung ba'i don gyis yongs su mi nyams par bya ba'i phyir bslab pas gdams par bgyi zhing /de nas phyis ma thob pa'i yon tan thob par bya ba'i phyir rjes su bstan par bgyi ste/ de kho na nyid du na rnam pa thams cad ma yin gyi/'on kyang gdams ngag ni brjod pa'i kun rdzob tu yin no zhes don gyis 'phangs pa yin no/ /de ltar yang 'di skad du 'di nyid gdams pa dang rjes su bstan pa lags so zhes bya ba la sogs pa de ma thag tu 'chad par 'gyur ro/ /de yang yul gyi dbye bas rnam pa bcur shes par bya'o//de la byang chub kyi sems kyi rab tu dbye ba ji skad bshad pa sgrub pa la mi dmigs pa'i tshul gyis nyan thos la sogs pa dang / thun mong ma yin pa kun rdzob dang don dam pa'i bden pa las mi 'da' ba mi dmigs pa'i tshul gyis 'jug par bya'o zhes slob pa ni sgrub pa la gdams pa'o//sdug bsngal la gzugs la sogs pa 'bras bur gyur pa'i stong pa nyid dang / shes rab kyi pha rol tu phyin pa dag de bzhin nyid kyi ngo bo yin pa'i phyir rang bzhin gcig go zhes bya ba dang / kun 'byung ba la stong pa nyid dang rgyur gyur pa'i gzugs la sogs pa dag tha mi dad pa nyid kyis/gzugs la sogs pa ni kun 'byung ba dang 'gog pa dang / kun nas nyon mongs pa dang rnam par byang ba'i chos can ma yin no zhes bya ba dang / 'gog pa la stong pa nyid skye ba dang 'gag pa dang / kun nas nyon mongs pa dang rnam par byang ba dang nyams pa dang 'phel ba la sogs pa dang bral ba la ni gzugs med pa nas ma rig pa skye ba yang med/ma rig pa 'gag pa yang med/ sangs rgyas kyang med/ byang chub kyi bar du yang med do zhes bya ba dang / lam la sbyin pa la sogs pa pha rol tu phyin pa rnams dang /bdag nyid dam nang stong pa la sogs pa ni phyi stong pa nyid la sogs pa dang lhan cig dang sngon gyi mtha' dang phyi ma'i mtha' dag phan tshun du ldan pa dang mi ldan pa ma yin pa nyid du bsgrub bo zhes ston pa bden pa la gdams pa dang / sangs rgyas la sangs rgyas dang byang chub dag mtshan nyid gcig la nyid kyis sangs rgyas su byed pa'i chos kyi mtshan nyid rnam pa thams cad mkhyen pa nyid mi dmigs pa la gzugs la sogs pa mi sbyor bas/dmigs par bya ba dang dmigs par byed pa mnyam pa nyid du shes pa zhes bya ba dang / chos la thams cad mkhyen pa nyid gsum gyis bsdus pa bzhi dang gnyen po dang rnam pa mtha' dag bsdus pas bsdus pa'i chos thams cad ngo bo nyid do zhes bya ba dang /dge 'dun la sangs rgyas dkon mchog gi khongs su gtogs pa nyid kyis dgra bcom pa ma gtogs pa 'bras bu la gnas pa dang zhugs pa'i bye brag gis/ skyes bu chen po bdun po rang sangs rgyas dang lhan cig brgyad po dbang po rtul po la sogs pa'i bye brag gis grangs nyi shur chad pa byang chub sems dpa' 'phags pa slob pa phyir mi ldog pa rnams la skye ba med par 'jug par bya'o//zhes lung 'bogs pa dkon mchog gsum la gdams pa dang /brtson 'grus brtsams pa nyid kyis ji skad bshad pa'i don la nan tan du byed pa la lus la sogs pa'i bsod nams nyid la mngon par zhen par 'gyur bas/ ma zhen pa la lus la sogs pa ngo bo nyid med par ston pa'i gdams pa dang / dus yun ring mo zhig tu goms par byas kyang 'dod pa'i don ma grub na dngang ba'i rang bzhin can yongs su skyo bar 'gyur bas/yongs su ngal ba med pa la sogs pa nas yang dag par rdzogs pa'i byang chub kyi bar la rlom pa med pa nyid du bstan pa'i gdams pa dang / phyogs bcu na bzhugs pa'i sangs rgyas la sogs pa la don re re'i phyir lam gyi lung mnos par bya na sems zhum par 'gyur bas/lam yongs su bzung ba la chos rnams rang bzhin gyis ma skyes pa nyid du slob pa'i gdams pa dang / sha'i spyan dang rnam par smin pa las byung ba lha'i dang / shes rab dang chos dang sangs rgyas kyi spyan grangs ji lta ba bzhin du/dngos po so sor nges pa thams cad dang / sems can thams cad kyi 'chi 'pho dang skye ba dang / chos thams cad la rnam par mi rtog pa dang / 'phags pa'i gang zag thams cad rtogs pa dang / chos thams cad rnam pa thams cad du mngon par byang chub pa'i yul can rnams de bzhin nyid du gcig pa nyid du bsgrub bo//zhes slob pa spyan lnga la gdams pa dang / rdzu 'phrul dang lha'i rna ba dang / gzhan gyi sems shes pa dang / sngon gyi gnas rjes su dran pa dang / mngon par 'du byed pa las byung ba lha'i mig dang zag pa zad pa'i mngon par shes pa/ rnam grangs bzhin du sa g.yo ba la sogs pa dang / 'jig rten gyi khams thams cad na gnas pa'i sgra chung ngu dang cig shos thos pa dang / gzhan gyi sems 'dod chags dang bcas pa la sogs pa yongs su shes pa dang / rang dang gzhan gyi tshe rabs snga ma rjes su dran pa dang /gzugs thams cad mthong ba dang / nyon mongs pa dang / shes bya'i sgrib pa spong bar byed pa rnams gzod ma nas zhi ba nyid du rtogs par bya'o zhes ston pa mngon par shes pa drug la gdams pa dang / mthong ba'i lam la bden pa bzhis bsdus pa skad cig ma bcu drug gi ngo bo nyid/chos dang rjes su shes pa'i bzod pa dang / shes pa'i bdag nyid can la chos thams cad ngo bo nyid med par rtogs pas sgyu ma mkhan bzhin du thams cad la mngon par zhen pa med pa'i lus can gyi rnal 'byor pa des spang bar bya ba'i dngos po'i gnyen po nyid du rnam par sgom par byed do//zhes ston pa mthong ba'i lam la gdams pa dang / 'dus byas dang 'dus ma byas dag ngo bo nyid gcig pa nyid kyis phan tshun tha dad par gdags par mi nus pa bzhin du/ ji skad du bshad pa'i mthong ba'i lam gyis mngon sum du byas pa'i dngos po dang tha mi dad pa la dmigs pa'i phyir/mthong ba dang bsgom pa'i lam dag tha dad du gyur pa med pas bsgom pa'i lam mtshan nyid pa rnam par gzhag pa ni med kyi/ 'on kyang de ni des spang bar bya ba'i dngos po'i gnyen po nyid du rten cing 'brel par 'byung ba'i chos nyid du rnam par bsgom pa'i lam la gdams pa ste/de ltar na gdams ngag bcu po 'di ni 'dir gzhung nyung ba nyid du 'dod pa nyid yin pa'i phyir shes rab kyi pha rol tu phyin pa'i sgras gsungs pa yin no/ /'di ltar shes rab kyi pha rol tu phyin pa stong phrag nyi shu lnga pa las/ gdams ngag re re'i gzhung gsal po kho nar bstan te/ gzhung mangs kyis 'jigs pas shes par byed pa nyid du ni ma bris so/ /de lta bu'i gdams ngag des ji lta bu'i byang chub sems dpa' la gdams par bya zhe na/ bcom ldan 'das 'on kyang zhes bya ba la sogs pa smos so/ /gal te zhes bya ba'i tshig phrad ni de ste zhes bya ba'i tha tshig go/ / 'di ltar zhes bya ba ni byang chub sems dpa' dang shes rab kyi pha rol tu phyin pa mi dmigs pa'o/ /gdams pa'i yul rnam bcur smras pa la sems mi 'gong zhing spa mi 'gong ste/ gang gi phyir bag mi tsha ba ste mi rmongs pas so/ /de nyid kyis na dad pa nyid kyis chos la bsten pa yin pa'i phyir de dang por gnas med pa'i 'jigs pas mi dngang ngo //bstan pa la kun tu zhum zhing snyom las mi byed de/ gang gi phyir bag 'khums par mi 'gyur ba ste/ sngar ma'i ngo bor mi 'gyur bas so/ /de nyid kyis na shes rab dang ldan pa nyid yin pa'i phyir/ de kho na nyid shes pa rnams kyi nang du kun tu 'jigs pas kun tu mi skrag go//nye bar bstan pa la de'i yid phyir phyogs par mi byed cing 'gyod par mi 'gyur te/ gang gi phyir sems nyid ni yid de bcom zhing phyir phyogs par mi 'gyur ba ste/ phyis sems bcom par mi 'gyur bas so/ /de nyid kyis na dad pa dang shes rab dag dang ldan pas tha mar kun tu skrag pa dang ldan par mi 'gyur ba ste/thams cad du ma nges pa'i skrag pas skrag par mi 'gyur ro/ /yang na smras pa la sogs pa'i dus su go rims bzhin du gzhung dang don gnyis ka nges par 'dzin pas/ mi 'gong kun tu mi zhum bag mi tsha'o/ /de ci'i phyir zhe na/gang gis mngon sum dang rjes su dpag pa dang lung gi tshad ma dang mi 'gal bar rang gi yul gyi don yongs su bcad pa las/ bag 'khums par mi 'gyur 'di'i yid phyir phyogs par mi bgyid/ bcom zhing phyir phyogs par mi 'gyur bas so/ /de nyid kyis na thog ma dang bar dang tha mar/mi dngang / mi skrag /kun tu skrag pa dang ldan par mi 'gyur ro zhes sbyar ro/ /'di nyid ces bya ba ni byang chub sems dpa' gang kun rdzob dang don dam pa'i dbye ba la mkhas pas ji skad du bshad pa'i gdams ngag la sems zhum pa la sogs pa dang bral ba de'i de kho na zhes bya ba'i don to//'di nyid ces bya bas mtshan nyid ma smras par shes rab kyi pha rol tu phyin pa ji ltar 'dzin zhe na/ brjod pa don gang smras pa la sogs pa na sems zhum pa la sogs par mi byed pa'i don de ni shes rab kyi pha rol tu phyin pa sgrub pa la sogs pa rnam pa bcu yin par brjod zin te/ des na don gyis 'phangs pa bzung ba yin pas nyes pa med do/ /nye bar bsdu ba ni gal te zhes bya ba la sogs pa smos pa yin te/ gal te byang chub sems dpa' de bshad ma thag pa'i gdams pas ji skad du bshad pa'i yul la gnas pa dang ldan par gyur na de'i tshe 'di nyid byang chub sems dpa' de'i don du gnyer ba'i don thob par byed pa'i nye bar bstan pa gdams pa dang rjes su bstan pa lags so zhes rig par bya'o//de ltar byas na byang chub kyi sems dang des 'phangs pa'i chos kyi ngo bo nyid kyi shes rab kyi pha rol tu phyin pa la sgrub pa gang yin pa yongs su mi ngal ba dang /theg pa gzhan gyis mi 'gro ba'i rgyu gang yin pa lam yongs su 'dzin pa dang / gzhan gyi dring mi 'jog par 'gro ba nyid kyi rgyu gang yin pa spyan lnga dang / rnam pa thams cad mkhyen pa nyid kyi tshogs yongs su rdzogs pa'i rgyu gang yin pa mngon par shes pa drug dang mthar thug par 'gro ba'i rgyu gang yin pa mthong ba dang bsgom pa'i lam dag ste/de dag thams cad gdams ngag gi skabs su bstan te/ 'di tsam kho nas don thams cad phun sum tshogs par 'gyur bas ji skad du bshad pa'i gdams ngag rnam pa bcu go rims bzhin du bstan pa yin no/ / de skad du yang / sgrub dang bden pa rnams dang ni/ /sangs rgyas la sogs dkon mchog gsum/ /ma zhen yongs su mi ngal dang / /lam ni yongs su 'dzin pa dang / /spyan lnga dang ni mngon shes kyi/ /yon tan drug dang mthong lam dang / /bsgom zhes bya ba gdams ngag ni//bcu yi bdag nyid shes par bya/ /zhes gsungs pa yin no/ /de lta mod kyi dge 'dun dkon mchog gi skabs su byang chub sems dpa' dbang po rtul po la sogs pa'i rab tu dbye ba 'di ltar gzung bar bya ste/ 'og nas bshad pa'i lam shes pa nyid kyis bsdus pa mthong ba'i lam gyi skad cig ma bcu drug la brten nas mthong ba'i lam gyi sems kyi skad cig ma bco lnga la dad pa dang chos kyi rjes su 'brang ba'i bye brag gi 'bras bu dang po la zhugs pa rnam pa gnyis so//de'i 'og tu 'dod pa'i khams kyi 'dod chags dang ma bral ba gang yin pa de mthong ba'i lam gyi sems kyi skad cig ma bcu drug pa la rgyun du zhugs pa'o//de'i 'og tu bsgom pa'i lam la nyon mongs pa rnam pa bzhi'i bar du spangs pa las de nyid lha dang mi'i rigs su skye ba nyid kyis gzhan rnam pa gnyis yin no/ /de'i 'og tu 'dod pa'i khams na spyod pa'i nyon mongs pa rnam pa lnga spangs pas 'bras bu gnyis pa la zhugs pa na/dbang po rtul po dang rnon po dad pa dang mthong bas thob pa dag ni gcig kho na yin no/ /de'i 'og tu 'dod pa na spyod pa'i nyon mongs pa rnam pa drug spangs pas lan cig phyir 'ong ba yin no/ /de'i 'og tu de nyid lha rnams su skye ba cig lhag ma lus pa'i phyir gzhan bar chad gcig pa yin no//de'i 'og tu 'dod pa na spyod pa'i nyon mongs pa bdun pa brgyad pa spangs pas snga ma bzhin du dad pa dang mthong bas thob pa 'bras bu gsum pa la zhugs pa gcig yin no/ /de'i 'og tu 'dod pa na spyod pa'i nyon mongs pa dgu pa spangs pas phyir mi 'ong ba zhes bya ste/de yang rnam pa lngar shes par bya'o/ /de la skye ba'i kun tu sbyor ba ni spangs/ mngon par 'grub pa'i kun tu sbyor ba ni ma spangs pa'i phyir srid pa bar ma dor mngon par sgrub pa byed pa na'am mngon par grub pa yang rung ste/ srid pa bar mar lam mngon du byas pas sdug bsngal gyi mthar byed pa thob pa ni bar ma dor yongs su mya ngan las 'da' ba'o//kun tu sbyor ba gnyi ga ma spangs pa'i phyir gzugs kyi khams su skyes nas sdug bsngal gyi mthar byed pa thob pa ni skyes nas yongs su mya ngan las 'da' ba'o/ /de bzhin du skyes nas mngon par 'du byed pa dang bcas pas lam mngon du byed pa thob pas sdug bsngal gyi mthar byed pa thob pa ni mngon par 'du byed pa dang bcas pas yongs su mya ngan las 'da' ba'o//de las go bzlog pas ni mngon par 'du byed pa med par yongs su mya ngan las 'da' ba'o/ /lnga pa ni gong du 'pho ba'o//de yang 'og min gyi mthar thug par 'gro ba dang / srid pa'i rtse mo'i mthar thug par 'gro ba'o/ /de la 'og min gyi mthar thug par 'gro ba ni 'phar ba dang phyed du 'phar ba dang / gnas thams cad du 'chi 'pho ba nyid kyis 'og min du 'jug pa rnam pa gsum mo/ /srid pa'i rtse mo'i mthar thug par 'gro ba ni gzugs kyi 'dod chags dang bral ba ste/mthong ba'i chos la zhi ba dang lus kyi mngon sum du byed pa gzhan rnam pa gnyis so/ /de'i 'og tu srid pa'i rtse mo'i nyon mongs pa rnam pa brgyad pa spangs pas ni dgra bcom pa'i 'bras bu la zhugs pa yin no/ /de'i 'og tu nyan thos kyi sde snod nyid la dmigs nas rang gi lam mngon du byed pa yin pa'i phyir sangs rgyas mi 'byung ba na rang sangs rgyas su 'gyur ba ste nyi shu'o//de ltar yang stong phrag nyi shu lnga pa las don 'di nyid rgya cher gsungs pa dang / phyir mi ldog pa'i 'khor lo'i mdo las/ byang chub sems dpa' dad pas rjes su 'brang ba nas brtsams te/byang chub sems dpa' rang sangs rgyas kyi bar du gang zag gi rnam par gzhag pa bcom ldan 'das kyis shin tu gsal bar gsungs pa yin pa'i phyir de dag las kyang blta bar bya'o/ /'dir ni gzhung mangs kyis dogs te kho bo cag gis ma bkod de btags zin pa la 'thag pas ci zhig bya/de yang 'bras bu dang po dang gnyis pa la gnas pa dang / 'bras bu bzhi pa la zhugs pa'i gang zag ni go sla ba nyid kyis na bsdus par ma bshad do/ /de skad du yang / dbang po rtul dang rnon po dag /dad dang mthong thob rigs nas rigs//bar chad gcig par skyes nas dang / /byed dang byed min 'og min 'gro/ /'phar gsum srid rtse'i mthar thug 'gro/ /gzugs kyi 'dod chags bcom mthong ba'i/ /chos la zhi lus mngon sum byed/ /bse ru dang ni nyi shu'o/ / zhes bya ba'o/ /las dang po pa de ltar gdams ngag thob pa la/ bsod nams tshogs ni yang dag rdzogs/ /de nas blo ldan bsam pa brtan/ /dad sogs dge ba'i chos rnams kyis/ /rgyud ni yongs su bsgos gyur pa/ /bskal pa grangs med nges 'byung bas/ /ye shes tshogs ni grub bya'i phyir//mngon shes gdams ngag bstan pa yis/ /spyod pa'i sa la rab tu 'jug /ces bshad pa de ltar byas na mos pas spyod pa'i sa yongs su sbyong ba'i phyir/ thos pa la sogs pa'i rab kyi mthar phyin pa thob pa thar pa'i cha dang mthun pa dad pa la sogs pa'i mtshan nyid kyi dge ba'i rtsa ba'i 'og tu bden pa bzhi rtogs pa dang rjes su mthun pa nges par 'byed pa'i cha dang mthun pa bzhi po 'jig rten pa'i bsgom pa las byung ba dro bar gyur pa zhes bya ba la sogs pa brjod par bya ba yin pa las/'di ni nyan thos la sogs pa'i dro ba la sogs pa las/ mi rtag pa nyid la sogs pa'i mtshan nyid kyi dngos po la dmigs pas khyad par du 'phags pa'i phyir dang chos su blta ba'i gnyen po'i phyogs su gyur pa nyid kyis mngon par zhen pa med pa la sogs pa'i rnam pas khyad par du 'phags pa'i phyir dang /theg pa gsum rtogs pa'i rgyu nyid kyis khyad par du 'phags pa'i phyir dang /dge ba'i bshes gnyen thabs la mkhas pa'i mtshan nyid yongs su 'dzin pa'i khyad par du 'phags pa'i phyir khyad zhugs pa yin par brjod par bya'o/ /de bzhin du kun nas nyon mongs pa'i dngos po la brten pa dang / gnyen po'i dngos po la brten pa'i gzung ba'i rnam par rtog pa gnyis dang /skyes bu rdzas su yod pa la brten pa dang / skyes bu btags par yod pa la brten pa 'dzin pa'i rnam par rtog pa gnyis te/ de ltar 'og nas 'chad pa'i rtse mo'i mngon par rtogs pas bsdus pa mthong ba dang bsgom pa'i lam gyis spang bar bya ba'i rnam par rtog pa bzhi po rnams kyis grangs ji lta ba bzhin du nges par 'byed pa'i cha dang mthun pa 'di dag kun nas nyon mongs pa la brten par brjod par bya'o//de bzhin du ji skad du bshad pa'i rnam par rtog pa dang ldan pa la brten pa 'di dag re re zhing chung ngu dang 'bring dang chen pos dbye bas khyad par du 'phags par yang brjod par bya ba yin pas khyad par rnam pa lnga'o//nyan thos la sogs pa'i dro ba la sogs pa'i dge ba'i rtsa ba bzhi po ni gzugs su rung ba la sogs pa'i mtshan nyid kyi dngos po bdag nyid can gyi bden pa bzhi dmigs pa bdag tu lta ba'i gnyen po nyid kyis mi rtag pa la sogs pa'i rnam par zhugs pa dang rang gi theg pa kho na rtogs pa'i rgyur gyur pa dang /yongs su 'dzin pa dang bral ba dang / rnam par rtog pa bzhi po ni rang gi byang chub kyi bgegs su gyur pa ma yin pas na gang gi phyir de dang 'dres par gyur kyang ma 'dres par skye ba yin no zhes rnam par gzhag go/ /de skad du yang / dmigs pa dang ni rnam pa dang / /rgyu dang yongs su 'dzin pa yis/ /byang chub sems dpa' skyob pa yi/ /drod sogs bdag nyid ji bzhin du/ /rnam rtog bzhi po ldan bsten pa/ /chung dang 'bring dang chen po rnams/ /nyan thos bse ru lta bu dang / /bcas pa dag las khyad par 'phags//zhes bya ba gsungs pa yin no/ /de la dro bar gyur pa la sogs pa chung ngur gtogs pa'i dge ba'i rtsa ba'i dmigs pa'i don gsungs pa ni/ bcom ldan 'das gzhan yang zhes bya ba la sogs pa ste/ gzhan yang zhes bya ba ni rnam pa gzhan gyis shes rab kyi pha rol tu phyin pa'i man ngag ston pa'o//shes rab kyi pha rol tu phyin pa la zhes bya ba spyir smos pa yin na yang mi rtag pa la sogs pa'i dngos po la dmigs pa'i mtshan nyid la zhes bya ba'i tha tshig go/ /'di ltar skabs gzhan dag tu bcom ldan 'das kyis dge slong dag mdo sde ni mdo sde gzhan gyi rjes su 'brangs nas bshad par bya'o zhes gsungs pa dang /stong phrag nyi shu lnga pa las/ dro bar gtogs pa chung ngu'i dbang du mdzad nas/ tshe dang ldan pa shA ri'i bu 'di la byang chub sems dpas gzugs mi rtag ces bya ba dang / gzugs sdug bsngal zhes bya ba dang / gzugs stong zhes bya ba dang /gzugs bdag med ces bya ba la sogs pa gsungs pa yin no/ /'dir ni khyad par 'di tsam yod de/ 'di lta ste mdor bsdus te bstan pa'o/ /der ni bden pa re re'i dbang du byas te rgyas par bstan pa yin pa des na the tshom mi bya'o/ /spyod cing zhes bya ba ni mnyam par ma bzhag pa'i shes pas so sgom pas zhes bya ba ni mnyam par gzhag pa'i shes pas so//'di skad du/ mi rtag pa la sogs pa'i rnam pa bcu drug sdug bsngal la sogs pa'i bden pa bzhi la brten pa'i dngos po la dmigs pa zhes brjod pa yin no/ /de rnam pa gang gis dmigs par bya zhe na/ji ltar zhes bya ba la sogs pa gsol to / /des kyang zhes bya ba la sogs pa ni shin tu lkog tu gyur pa'i phyir shes bya dmigs par bya bar mi rlom pa 'ba' zhig tu ni ma zad kyi/ mngon par zhen pa bkag pa la sogs pa'i bdag nyid kyi rnam pa gang zhig byang chub thob par byed pa'i ye shes kyis dmigs par bya ba'i rang bzhin gang yin pa des kyang rlom sems su mi bya ste/mngon par zhen par mi bya'o zhes bya ba'i don te/ chos nyid kyi sgo nas mngon par zhen pa med pa la sogs pa'i rnam pas kyang zhes bya ba'i tha tshig go/ /de ltar zhes bya ba la sogs pa ni sngar bshad pa'i tshul gyis so//'di skad du nyan thos ni gzugs su rung ba la sogs pa'i mtshan nyid can gyi dngos po la dmigs par byed pa na bdag tu lta ba'i gnyen po yin pa'i phyir/ de'i rnam pa la sogs pa yin no/ /byang chub sems dpa' ni mi rtag pa la sogs pa'i mtshan nyid can gyi dngos po la dmigs pa na chos su lta ba'i gnyen po yin pa'i phyir/de'i rnam pa mngon par zhen pa med pa la sogs pa yin no zhes brjod pa yin no/ /gal te mngon par zhen pa'i dngos po med pa yin na/ de lta na ni med pa yin pa'i phyir gnyen po yin par mi rigs so/ / 'on te gang mngon par zhen pa ma yin pa yin na ni de'i tshe mig la sogs pa yang yin par thal bar 'gyur ro zhe na brjod par bya ste/ ji ltar mi mthun pa'i phyogs yin pa de ltar mngon par zhen pa yin la/ ji ltar gnyen po'i phyogs yin pa de ltar ni mngon par zhen pa med pa yin no/ /yang ji ltar na mi mthun pa'i phyogs yin zhe na/ji ltar mi bden pa'i rtog pas kun nas bslang ba'i yod pa dang med par 'dzin pa dag go/ /ji ltar na gnyen po'i phyogs yin zhe na/ ci nas kyang de dag med pa'o/ /yang ji ltar na de dag med ce na/ gal te de gnyis de kho na nyid du na med pa yin no zhes shes par gyur pa'o//de ltar yang tshe dang ldan pa shA ri'i bu gal te sems med pa de la zhes bya ba la sogs pa de ma thag tu 'chad par 'gyur ro/ /mngon par zhen pa med pa la sogs pa'i rnam pa tshad mas 'thad pa ma yin nam rtogs pa dang ldan pa dag ji ltar mngon par zhen pa med pa yin snyam nas/de ci'i slad du zhe na zhes bya ba smos te/ gtan tshigs gang las zhes bya ba'o/ /yang na gang mngon par zhen pa gang yin pa 'di don gang gi rgyu yin te dgos pa gang yin zhes bya ba'i tha tshig go/ /lan bstan pa'i phyir 'di ltar zhes bya ba la sogs pa smos te/ gang gi phyir gcig dang du ma'i rang bzhin dang bral bas sems kyi rang bzhin ni ngo bo nyid kyis ma skyes pa nyid ni 'od gsal ba yin te/med par kun tu rtog pa'i mun pa thams cad rnam par bsal ba yin no/ /de bas na mngon par zhen pa med pa la sogs pa'i rnam pa dang tha mi dad pa'i sems ni yang dag pa nyid du na sems ma yin no//'di snyam du sems rang bzhin med pa yin pa'i phyir de dang tha mi dad pa mngon par zhen pa med pa la sogs pa'i rnam pa rnams ji ltar na de kho na nyid du mngon par zhen pa med pa'i gnas su gyur pa yin zhes bsams pa'o/ /sems ma yin pa zhes bya ba'i dgag pa 'di ni ma yin pa'am/med pa la sbyar yang rung ste/ yod pa dang med pa tsam du rlom pa dang rjes su 'brel pas na phyin ci log mi ldog par mthong nas/ ci sems gang sems med pa'i sems de yod dam zhes smras pa yin te/ sems gang mngon par zhen pa med pa la sogs pa'i rnam pa dang tha mi dad pa'i sems de kho na nyid du na sems med pa'o zhes gang brjod pa/ci sems med pa de yod dam zhes bya bar sbyar ro/ /rig pas dngos po nyid du na med pa yin pas ma yin pa la ni dgag pa ma yin gyi/ 'on kyang med pa la yin la de la yang yod pa dang med pa tsam du btags pa yang yod pa ma yin no zhes bya ba'i bsam pa can rab 'byor gyis de nyid lan 'debs su gzhug par 'dod nas/slar dris pa'i bya bas shA ri'i bu ci sems pa nyid ces bya ba la sogs pa smras pa yin te/ sems med pa'i ngo bo tsam ni sems med pa ste/de'i ngo bo nyid yin pas na sems med pa nyid gang yin pa'o/ /sems med pa de la dmigs pa'i mtshan nyid du ma gyur pa'i yod pa nyid yod pa'am/ yang na dmigs pa'i mtshan nyid du gyur pa dmigs par 'gyur ram/ de bzhin du med pa nyid la yang sbyar bar bya'o/ / 'am zhes bya ba'i sgra snga ma ni phyi ma la ltos pa yin la/ phyi ma ni snga ma la ltos pa yin par shes par bya'o/ /ma skyes ngo bo nyid la ni/ /rtag dang chad nyid ga la zhig /chos kyi bye brag rnam rtog pa/ /ngo bo nyid la rtog par byed/ /ji ltar sus kyang nam mkha' la/ /yig sogs dgod par mi nus ltar//dngos po rnams ni ma skyes la/ /chos su rnam rtog de bzhin no/ /zhes bya ba'i bsam pa dang ldan pas de ni med do zhes bya ba smras pa yin te/ bshad ma thag pa gnyi ga'o/ /da ni de'i tshig nyid lan du sbyor bas smras pa ni/ tshe dang ldan pa shA ri'i bu gal te zhes bya ba la sogs pa smos te/brgal ba gang yin pa de ci rigs par 'gyur ram zhes bya ba la/ brgal ba ni rgol ba'o/ /ci rigs par 'gyur ram zhes bya ba'i sgra ni bzlog pa spong ba ste/ mi rung ba'i tha tshig go/ /de nyid ni tshe dang ldan pa shA ri'i bu 'di skad du zhes bya ba la sogs pa smos pa yin no/ /'di snyam du sems med pa la yod pa nyid dam/med pa nyid med cing mi dmigs na de la ji ltar khyod kyis sems gang sems de yod dam zhes brgal bar rigs/ de la yang gang gi phyir sems med pa zhes bya ba ni/ sems med pa tsam nyid yin par 'dod do/ /de bas na dngos po dang dngos po med pa'i rang bzhin du yod par sgro 'dogs pa ni mi 'grig go zhes bsams pa'o//chos can gang sems med pa nyid yin na yul med pa la dgag pa'i sbyor ba med pa'i phyir sems med pa yang med do zhes brjod pa ni/ tshe dang ldan pa rab 'byor sems med pa nyid de yang gang yin zhes bya ba'o/ / yang dag kun rdzob rnams kyi skabs / /med par de nyid khang pa yi/ /steng du 'dzegs par bya ba ni/ /mkhas la rung ba ma yin no/ /zhes bya bas rnal 'byor pa'i kun rdzob tu lan bstan pa'i phyir/ tshe dang ldan pa shA ri'i bu sems med pa de ni 'gyur ba med pa zhes bya ba la sogs pa smras te/ sems med pa nyid 'di gcig nas gcig tu brgyud de goms par byas pa na/ sangs rgyas kyi sar 'gyur ba med pa'i yongs su grub pa'i rgyu nyid yin pa'i phyir 'gyur ba med pa'o/ /phyin ci ma log par yongs su grub pa'i rgyur gyur pa nyid kyang yin pa'i phyir/ rnam par rtog pa med pa'o/ /de lta na yang rtogs pa'i chos dang mi 'gal bar brjod pa yin no zhes smos pa ni/de nas zhes bya ba la sogs pa'o/ /ji ltar zhes bya ba ni rnam pa gang gis so/ /yang zhes bya ba'i sgra ni mchod par ston pa'i tshig go/ /nyon mongs pa med pa zhes bya ba ni ting nge 'dzin gang gi mthus gzhan rnams kyi rgyud la bdag dang gzhan la gdung bar byed pa'i don gyis sgra sgrogs pa'i nyon mongs pa 'di la mi skye ba de ni nyon mongs pa med pa'i ting nge 'dzin to//de la gnas pa rnams kyi nang na mchog tu gsungs pa ltar sems med pa nyid ston pas na zhes bya ba'i tshig rnam par bsgyur nas sbyar ro/ /legs so legs so zhes bya ba ni ngo mtshar bas lan gnyis brjod pa'o//gang gal te sangs rgyas kyi mthus thabs la mkhas pa dang bcas pas kyang shes rab kyi pha rol tu phyin pa ston pa ma yin nam/ gang gis shA ri'i bu de la mkhas pa yin du zin kyang 'phags pa rab 'byor la legs so zhes bya ba byin pa legs par 'gyur ba khyad par 'phags pa ci zhig yod ce na/ci yang med mod kyis / 'on kyang che ba'i bdag nyid bstan pas de dag gi gdul bya rnams la phan gdags pa'i phyir ram/ ma 'ongs gdul bya rnams kyi the tshom bsal ba'i phyir/ de bzhin gshegs pa'i byin gyis brlabs nyid kyis rtsod pa med pa sngon du 'gro ba'i legs so zhes smra ba la nyes pa med do//sems med pa nyid kyi che ba'i bdag nyid ston pa na/ la la rigs ma nges pa yin yang dbang po rno bas nges par 'byed pa'i cha dang mthun pa'i gnas skabs su yang thabs kyi khyad par bsam gyis mi khyab pas phyir mi ldog pa nyid du nges pa yin no zhes brjod pa ni/de bas na zhes bya ba la sogs pa'o/ /gang gi phyir byang chub kyi sems des kyang rlom sems su mi byed pa des na mngon par zhen pa med pa la sogs pa'i rnam pas yin no/ /yang zhes bya bas ni mi rtag pa la sogs pa'i mtshan nyid dngos po la dmigs pa'i phyir ro brtag par bya'o zhes bya ba ni nges par bya ba'o//sa brgyad pa la ni thams cad phyir mi ldog par nges pa nyid du bzhag pa yin pa'i phyir nyes pa med do/ /yongs su mi nyams pa dang ldan pa'i phyir nges par 'byed pa'i cha dang mthun pa'i rang bzhin gyi shes rab kyi pha rol tu phyin pa dang ma bral bar rig par bya'o//yang zhes bya ba ni phyir mi ldog par brtag par bya ba 'ba' zhig tu ma zad pa'o/ /de ltar dmigs pa dang rnam pa brjod nas dro ba chung ngu'i rgyu'i khyad par bstan pa'i phyir/ nyan thos kyi sa la zhes bya ba la sogs pa smos te/khyad par can gyi shes pa'i gnas skabs thob pa'i shes pa nyid ni sa'o/ /de la slob par 'dod pas te sgrub par byed par 'dod pas so/ /'di nyid ces bya ba ni gtsor nges par 'byed pa'i cha dang mthun pa mchog tu ston pa'o rna ba'i rnam par shes pa dang des drangs pa'i yid kyi rnam par shes pas gzhung dang don dag yongs su gcod pas mnyan par bya ba'o//bsam pa'i rang bzhin gyi yid la byed pas gzung bar bya ba'o/ /bsgom pa'i rang bzhin gyi sgrub pas rdzogs par byas pas bcang bar bya ba'o/ /dam bcas nas glegs bam klog pas na bklag par bya ba'o/ / lung dang rtogs pas kun chub par bya ba'o/ /bshad pa la sogs pas gzhan dag la rab tu ston pas rab tu gdon par bya ba'o/ /mnyan pa la sogs pa thams cad la sbyor ba dang mjug gi sems phun sum tshogs pas na bslab par bya ba'o/ /dngos gzhi'i sems la yang mnyam par gzhag par bya ba yin pas na rnal 'byor du bya ba'o//thabs mkhas pa dang ldan pas zhes bya ba ni/ sangs rgyas chos rnams rdzogs bya dang / /sems can yongs su smin bya dang / /myur 'thob bya ba 'grub pa dang / /lam rgyun mi gcod la mkhas dang / /byang chub sems dpa'i sa kun la//thabs ni mtshungs pa med pa ste/ /thabs mkhas de la brten nas ni/ /de dag kun tu sgrub par byed/ /ces bshad pas/ ji skad bshad pa'i don myur du yongs su thob par byed pa/ kun rdzob dang don dam pa la brten pa'i sems kyi bye brag nyid ni thabs te/ de dang ldan pa ni thabs mkhas pa dang bcas pa'o//byang chub sems dpa'i chos thams cad thob par bya ba'i phyir zhes pa ni byang chub sems dpa' rnams kho na'i chos nyan thos la sogs pa dang thun mong ma yin pa lam shes pa nyid kyi mtshan nyid de thob par bya ba'i phyir yongs su grub par bya ba'i phyir rnal 'byor zhes bya ba'i ting 'dzin du bya'o//'ga' zhig tu sangs rgyas kyi chos thams cad thob par bya ba'i phyir zhes 'don to/ /de ni mi rigs te gang phyir byang chub sems dpa'i chos thams cad rgyas par zhes bya ba la sogs pa de ma thag tu brjod par 'gyur ro/ /nyan thos kyi theg pa la yang byang chub sems dpa'i chos sbyin pa la sogs pa bstan pa nyid ma yin nam zhes dogs pa bsu nas/de ci'i phyir zhe na zhes smras so/ /lan ni shes rab kyi pha rol tu phyin pa 'di nyid la zhes bya ba la sogs pa'o/ /gang la zhes bya ba ni byang chub sems dpa'i chos gang la'o/ /'di snyam du nyan thos la sogs pa'i chos ni de'i sde snod las rgya cher gsungs la/byang chub sems dpa'i chos ni zhar la ston to/ /'dir ni byang chub sems dpa'i chos rnams nyid ni rgya cher bstan la/ nyan thos kyi chos rnams ni zhar la bstan snyam du bsam pa yin no/ /bla na med pa yang dag par rdzogs pa'i byang chub la zhes bya ba la/gang la gong na gtso bo gzhan med pa de ni bla na med pa'o/ /yang dag pa phyin ci ma log pa rnam pa thams cad du mngon par byang chub pa ni/ yang dag par rdzogs pa'i byang chub ste/ sangs rgyas kyis zhes bya ba'i don to/ /sangs rgyas kyi chos thams cad thob pa yongs su rdzogs par bya ba'i phyir zhes bya ba ni/rnam pa thams cad mkhyen pa nyid kyi mtshan nyid can sangs rgyas kyi chos thams cad rtogs par bya ba'i phyir/ nyan thos kyi theg par sangs rgyas kyi chos rnams bstan pa nyid do snyam du dogs pa bsu nas/ de ci'i phyir zhe na zhes gsungs so//de kho na bzhin du lan gyi don gsungs pa ni shes rab kyi pha rol tu phyin pa 'di nyid las zhes bya ba la sogs pa'o/ /nyan thos kyi sa la slob par 'dod pas kyang zhes bya ba nas brtsams te/ mthar rnal 'byor du bya'o zhes bya ba 'dis ni 'di skad du theg pa gsum rtogs pa thob par bya ba'i phyir dro ba chung ngur gtogs pa'i dge ba rgyu yin no zhes brjod pa yin no rgyu'i dngos po 'di ni drod la sogs pa thams cad kyi yin par shes par bya'o//'bring gi dmigs pa'i don gsungs pa ni bcom ldan 'das byang chub sems dpa'i ming gang lags pa 'di nyid ces bya ba la sogs pa'o//byang chub sems dpa'i ming zhes bya ba la sngar ni bcom ldan 'das byang chub sems dpa' zhes bgyi ba'i chos de bdag gis yang dag par rjes su ma mthong ngo zhes bya ba la sogs pas/ don gang la byang chub sems dpa' zhes bya ba'i ming don gang la yod pa de ma dmigs par brjod pa yin la/da lta ni/ 'di dag thams cad ming tsam ste/ /'du shes tsam la rab tu gnas/ /rjod par byed las ma gtogs pa/ /brjod par bya ba brtag mi bya/ /zhes bya ba'i tshul gyis/ byang chub sems dpa' zhes bya ba'i ming gi rang bzhin gdags par bya ba gang yin pa de ma dmigs par bstan pa yin no zhes bya ba ni khyad par ro//ma 'tshal zhes bya ba la sogs pa ni bshad zin to/ /yang na 'das pa ni ma 'tshal/ da ltar byung ba ni ma dmigs/ ma 'ongs pa ni yang dag par rjes su ma mthong ste/ chos thams cad dus gsum du stong pa nyid yin pa'i phyir ro zhes bya bar sbyar ro//'o na ni gdams pa'i yul gyi ming yod do zhe na/ shes rab kyi pha rol tu phyin pa yang zhes bya ba smos te/ ming tsam zhes bya bar bsams pa'o/ /byang chub sems dpa' zhes bya ba ni ming gi rang bzhin te/ ming gi skabs yin pa'i phyir ro/ /glo ba la gcags lags so zhes bya ba ni/ yul gnas pa ni nyams su myong ba'i mthar thug pa yin pa'i phyir dang ma dmigs pa yin pa'i phyir 'di ni glo ba la gcags te/ yid la gcags pa nyid yin no/ /de nyid ni gang bdag gi dngos po ma 'tshal zhes bya ba la sogs pa gsungs so //'du ba dang 'god pa zhes bya ba la sgrub pa ni 'du ba'o/ /dgag pa ni 'god pa'o/ /sgrub dang dgag pa ma gtogs pa/ /sgra las byung ba'i tha snyad gzhan/ /yod min zhes bya ba'i tshul gyis tshig gnyis kho nas thams cad bsdus pa'i phyir 'dir 'di ltar brjod pa yin no//'di skad du de kho na nyid du na 'du ba dang 'god pa dang bral ba nyid kyi khyad par can gyi gzugs la sogs pa dmigs pa zhes brjod pa yin no/ /de rnam pa gang gis dmigs par bya zhe na/ 'on kyang zhes bya ba la sogs pa smos te/ dmigs pa'i ming de yang rgyun gyi tshul gyis gnas pa ma lags pa'o//dgag bya yod pa ma yin pas/ /yang dag tu na bkag med gsal/ /yul med pa la dgag pa yi / /sbyor ba legs pa yod ma yin/ /rnam par rtog la brten na yang / /kun rdzob par 'gyur yang dag min/ /zhes bya ba'i tshul gyis mi gnas pa yang ma lags pa'o//rgyun mi 'dra ba nyid kyis na gnas pa dang bral ba yang ma lags pa'o/ /de kho na bzhin du gnas pa dang bral ba ma lags pa'o/ /ming du btags pa kun rdzob tu snang ba na ji ltar na rgyun dang de mi 'dra bar 'thad pa ma yin snyam du dogs pa bsu nas/de ci'i slad du zhe na zhes smos so/ /ming de ma mchis pa'i slad du zhes bya ba la sogs pa la/ de kho na nyid du zhes bya ba ni lhag ma ste/ kun rdzob tu ni nyes pa med do zhes bya bar dgongs so/ /nye bar bsdu ba'i phyir de ltar mi de zhes bya ba la sogs pa smos so/ / 'di skad du/ chos nyid kyi sgo nas rgyun dang de dang mi 'dra ba dang bral ba'i de kho na nyid ni rnam pa yin no zhes brjod pa yin no/ /chen po'i dmigs pa'i don gsungs pa ni/ gal te zhes bya ba la sogs pa'o/ /zab mo zhes bya ba ni ming tsam nyid kyis btags pa tsam gyi rang bzhin/ gzhan mu stegs pa rnams dang rang gi sde pa rten med pas 'jigs pa rnams kyis gting mi dpogs pa'o/ /'di skad du/ btags pa tsam nyid kyi khyad par can sdug bsngal la sogs pa'i bden pa dmigs pa yin no zhes brjod pa yin no/ /de rnam pa gang gis dmigs par bya zhe na/ lhag pa'i bsam pas zhes bya ba la sogs pa smos te/ btags pa de ni dge ba la sogs pa nyid kyi chos gang du yang brjod du med par zhes bya ba'i lhag pa'i bsam pas mos shing dmigs pa'o/ /yangs shing rgya che dga' ba dang / /dgos pa che la brtson pa dang //dge ba lhag pa'i bsam pa dang / /dag pa'i lhag pa'i bsam pa yin/ /zhes bya ba'i lhag pa'i bsam pas so/ /byang chub sems dpa' shes rab kyi pha rol tu phyin pa dang ma bral ba ni ldan pa ste gtsor drod chen po dang ma bral ba'o/ /de bzhin du gzhan dag tu yang shes rab kyi pha rol tu phyin pa'i don 'di skabs las rig par bya'o//phyir mi ldog pa'i byang chub sems dpa'i sa la gnas pa ni thob pa yongs su mi nyams pa sa brgyad pa la ste/ de'i 'bras bu phyir mi ldog pa nyid thob pa'i phyir ro/ /legs par gnas pa ni ma thob pa yongs su mi nyams pa ste de bskyed par rung ba nyid kyis gong nas gong du khyad par 'thob pa'i phyir ro//gnyis po 'di ni mngon par zhen pa med pa'i sbyor bas bya'o zhes gsungs pa ni mi gnas pa'i tshul gyis zhes bya ba yin no/ /'di skad du rnam pa ni chos nyid kyi sgo nas brjod du med pa yin zhes brjod pa yin no/ / stong phrag nyi shu lnga pa las kyang dro ba chen po'i dmigs pa dang rnam pa'i dbang du mdzad nas/ bcom ldan 'das gang yang 'di lta ste byang chub sems dpa' zhes bgyi ba 'di ni chos kyi brda las byung ba'i btags pa lags la zhes bya ba nas sangs rgyas kyi zhes bgyi ba de yang dge ba'am mi dge ba'am dngos po'i dngos po med pa'i chos gang du yang brjod par bya ba ma lags so//bcom ldan 'das 'di lta ste dper na rmi lam zhes bgyi ba'i ming ni zhes bya ba'i bar du rgya cher gsungs te de bas na som nyi mi bya'o/ /de ltar rnam par mi rtog pa'i ye shes kyi me'i snga ltas yin pa'i phyir dro bar gyur pa dang 'dra bas dro bar gyur pa'i dmigs pa dang /rnam pa dang ldan pa rnam pa gsum mo/ /bar chad med na mthong ba'i lam ches nye bar 'byung ba zhes bya ba ni thar pa'i cha dang mthun pa las 'di'i khyad par yin par rig par bya'o/ /de skad du yang / dmigs pa mi rtag pa sogs pa/ /bden pa'i rten can de yi ni/ /rnam pa mngon zhen la sogs 'gog /theg pa gsum char thob pa'i rgyu/ /gzugs sogs 'du 'god gnas bral dang / /gnas dang btags dang brjod du med/ /ces gsungs pa yin no/ /da ni dro ba'i rjes la rtse mor gtogs pa'i dge ba'i rtsa ba chung ngu'i dmigs pa'i don gsungs pa ni bcom ldan 'das gzhan yang zhes bya la sogs pa'o//shes rab kyi pha rol tu phyin pa zhes bya ba ni gtsor rtse mo'i rang bzhin la'o/ /spyod cing zhes bya ba dang sgom pas zhes bya ba ni bshad zin to/ /yang na sbyor ba dang mjug gi sems kyis spyod cing dngos gzhi'i sems kyis sgom pas zhes bya bar sbyar ro//gzugs la gnas par mi bgyi'o zhes bya ba la sogs pa la/ de la gzugs su rung ba'i mtshan nyid can ni gzugs so/ /nyams su myong ba'i mtshan nyid can ni tshor ba'o/ /mtshan mar 'dzin pa'i bdag nyid can ni 'du shes so//sems mngon par 'du byed pa'i mtshan nyid can ni 'du byed rnams so/ /rtogs pa'i mtshan nyid can ni rnam par shes pa'o/ /gzugs de yang rnam pa gsum ste/ kun brtags pa'i gzugs ni gzung ba dang 'dzin pa'i tshul gyis brtags pa nyid yin pa'i phyir ro//rnam par brtags pa'i gzugs ni yang dag pa ma yin pa'i kun tu rtog pa yin pas shes pa nyid de ltar snang ba ste/ de ltar rnam par brtags pa'i phyir ro/ /chos nyid kyi gzugs ni de kho na nyid du na gzugs nyid stong pa nyid kyi rang bzhin du yongs su grub pa yin pa'i phyir/ ro tshor ba la sogs pa la yang de bzhin du brjod par bya'o//gzugs la sogs pa'i go rims ni 'di yin te/ rim ni rags dang kun nyon mongs/ /snod sogs don khams ji bzhin no/ /de kho na nyid du med pa nyid kyis gzugs la sogs pa de la dngos por dmigs pa'i tshul gyis gnas par mi bya ste/sems kyi rten du mi bya'o zhes pa'i don to/ /'di skad du/ gang gi phyir rang bzhin stong pa nyid kyi gzugs la sogs pa ni gzugs la sogs pa'i rang bzhin dang bral ba'i ngo bo nyid yin pa de'i phyir gnas par mi 'os pa'i khyad par can gyi gzugs la sogs pa dmigs pa yin no zhes brjod pa yin no//ci'i phyir de lta bur dmigs snyam pa'i dogs pa de ci'i slad du zhe na zhes bsu nas/ ldog pa'i sgo nas rnam pa smras pa ni gal te gzugs la gnas na zhes bya ba la sogs pa yin no/ /'di snyam du dmigs pa la 'dzin pa'i bye brag nyid rnam pa yin la/yul gnas pa myong ba'i mthar thug pa yin pa des na dmigs pa ni rnam pa dang rjes su mthun pa kho na yin par gzung ngo snyam du bsams pa yin no/ /de bas gal te mi rtag pa la sogs pa'i rnam pas gzugs la gnas na de'i tshe gzugs mngon par 'du byed pa ste gzugs su rtsol ba'i rnam par rtog pa la spyod la/de ltar na yang rtse mo chung ngur gtsor gyur pa'i shes rab kyi pha rol tu phyin pa la spyod pa ma lags so/ /de bzhin du tshor ba la sogs pa la yang sbyar bar bya'o/ /'di skad du chos nyid kyi sgo nas rnam pa ni rnam pa 'di lta bu yin par gzung ste/ 'di lta ste don dam par gzugs la sogs pa'i chos thams cad dang stong pa nyid dag ni phan tshun ngo bo nyid gcig pa yin pa des na stong pa nyid de la mi rtag pa la sogs pa med pa nyid kyis na gzugs la sogs pa la rtag pa dang mi rtag pa la sogs pa'i rnam pas gnas par mi bya bas mi gnas pa zhes brjod pa yin no//'di ltar rtse mo chung ngu'i rnam pa'i dbang du mdzad nas stong phrag nyi shu lnga pa las/ gzugs nyid stong pa nyid stong pa nyid gzugs so zhes bya ba nas/ bcom ldan 'das gzugs mi rtag pa nyid kyang stong pa nyid stong pa nyid kyang gzugs mi rtag pa nyid do zhes bya ba la sogs pa'i bar du gsungs pa yin no//mngon par 'du byed pa med par sgom pa mi 'thad pas yang ji ltar na mngon par 'du byed pa la spyod na spyod pa ma yin no snyam du dogs pa de ci'i slad du zhe na zhes bya bas bsu nas mngon par 'du byed pa rnams la zhes bya ba smos so/ /'di snyam du mngon par 'du byed pa ni rnam par rtog pa yin la/shes rab kyi pha rol tu phyin pa ni rnam par mi rtog pa yin na/ de ji ltar na de kho na nyid la mngon par zhen pas rnam par rtog pa la spyod na shes rab kyi pha rol tu phyin pa la spyod pa yin te 'on kyang sgyu ma'i skyes bu ltar spyad par bya'o snyam du bsams pa yin no//yongs su 'dzin pa yang ma lags rnal 'byor du mi bgyid pa yang ma lags yongs su rdzogs par bgyid pa yang ma lags zhes bya ba'i tshig gsum gyis ni grangs ji lta ba bzhin du sbyor ba dang dngos gzhi dang mjug gi gnas skabs yin par blta bar bya'o/ /shes rab kyi pha rol tu phyin pa la zhes bya ba ni gtsor rtse mo chung ngu'i rang bzhin no//yongs su ma bzung ba zhes bya ba la sogs pa la/ yongs su ma bzung ba zhes bya ba ni gzung bar mi 'os pa'i mngon par 'du byed pa yongs su bzung zhing bdag gir byas pas thams cad mkhyen pa nyid la nges par 'byung bar mi 'gyur ro zhes bya bar sbyar ro//thams cad mkhyen pa nyid ni 'dir thams cad mkhyen pa nyid gsum la spyir thams cad mkhyen pa'i sgrar bshad do/ /gzhan dag tu yang ci rigs pa nyid du bya'o/ /mngon par 'du byed pa ji ltar gzung bar 'os pa yin snyam du dogs pa de ci'i slad du zhe na zhes bya bas bsu nas/ shes rab kyi pha rol tu phyin pa la gzugs yongs su gzung ba ma mchis so zhes bya ba la sogs pa smos so//'di snyam du mngon par 'du byed pa'i yul gyi rang bzhin gzugs la sogs pa ni rigs pas yod pa ma yin pa'i phyir shes rab kyi pha rol tu phyin pa la yongs su gzung ba med la/ gang gi phyir de'i yul can mngon par 'du byed pa ni log par snang ba nyid yin pa'i phyir gzung bar bya ba ma yin no zhes bsams pa yin no//de nyid ston pa ni gzugs yongs su gzung ba ma mchis pa gang lags pa de ni gzugs ma lags zhes bya ba la sogs pa smos te/ sgrub pa dang dgag pa dag ni yul tha dad pa yin pa'i phyir ro zhes bya bar dgongs so//phyin ci log tu thal bar 'gyur bas shes rab kyi pha rol tu phyin pa la yang mngon par zhen par mi bya'o zhes gsungs pa ni shes rab kyi pha rol tu phyin pa de yang yongs su gzung ba ma mchis so zhes bya ba smos so / /nye bar bsdu ba'i phyir de bzhin du zhes bya ba la sogs pa smos te/de bzhin du zhes bya ba ni de kho na ltar zhes nges par gzung ba'i don to/ /de lta bu'i dmigs pa dang rnam pa las skyes pa'i rtse mor gtogs pa chung ngu'i ting nge 'dzin ni 'di yang zhes bya ba la sogs pa smos pa yin te/ gzugs la sogs pa'i chos thams cad du yongs su gzung ba med pa'i ting nge 'dzin don dang ldan pa'i ming can gang yin pa de la de skad ces bya'o//chos kyi dbyings yangs pa nyid kyis na yangs pa'o/ /mdun du bgyis pa ni ji skad du bshad pa'i dmigs pa dang rnam pa'i khyad par dag gis sems kyi mdun na gnas pa'i phyir ro zhes 'phags pa rnam grol sdes bshad do//de nyid kyi phyir na/ la las mdun du ma bgyis pa zhes 'don pa ni gzung bar mi bya'o/ /tshad med par nges pa ni/ rnam pa thams cad mkhyen pa nyid so sor nges pa'i phyir ro/ /yang na thugs rje chen po dang shes rab kyi sbyor bas sems can tshad med pa'i don mdzad par nges pa yin pa'i phyir tshad med par nges pa'o//thun mong ma yin pa ni ji skad du bshad pa'i dmigs pa la sogs pa rnam pa lngas khyad par du 'phags pa'i phyir gzhan gyis mi rtogs pa'o/ /'bring gi dmigs pa'i don gsungs pa ni thams cad mkhyen pa nyid de yang zhes bya ba'o//yang gi sgras ni mi rtag pa la sogs pa dang stong pa nyid yongs su gzung ngo / /ci'i phyir yongs su gzung ba med ce na/ mtshan mar zhes bya ba la sogs pa smos te/ mtshan ma ni thun mong ma yin pa'i rang bzhin yin la/de kho na nyid du na phan tshun tshul gcig yin pas de'i phyir gzung ba med do zhes bya ba'i don to/ /'di skad du chos kyi dbyings kyi rang bzhin gyis mi rtag pa la sogs pa dang rnam pa thams cad mkhyen pa'i stong pa nyid dag ni rang rang gi ngo bo nyid dag gis ngo bo med pa'i phyir/ 'di dag phan tshun bdag nyid gcig pas mtshan ma med pa nyid kyi khyad par can gyi gzugs la sogs pa dmigs par bya'o zhes brjod pa yin no/ /mtshan mar bzung na nyes pa ci zhig yod ce na/ gal te zhes bya ba la sogs pa smos te/ mtshan mar gzung bar bya bar gyur na ni/de'i tshe rang gi bstan pa la mtshan mar bzung bas yun ring por thar pa ma mthong bas kun tu skyo bar gyur pa'i kun tu rgyu phreng ba can zhes bya ba'i ming can gyi dka' thub pa bstan pa 'di la dad par te mtshan ma med pa'i tshul la mngon par yid ches pa thob par mi 'gyur te/ mtshan mar 'dzin pa mtshungs pa nyid kyi phyir ro zhes bya bar dgongs so//de nyid ston pas kun tu rgyu zhes bya ba la sogs pa smos pa yin te/ 'dir mtshan ma med pa ni de bzhin gshegs pa nyid thob par byed pa yin pa'i phyir thams cad mkhyen pa'i ye shes 'di la zhes bya ba de'i rgyu mtshan ma med pa la mos na ste lhag par mos pa'i yid la byed pa bskyed nas dbang po rtul po nyid kyis dad pas lam gyi rjes su 'brangs nas dad pas rjes su 'brang zhing phyogs gcig la gang zag la bdag med pa'i shes pas zhugs so//de zhugs nas kyang dus phyis gzugs la sogs pa la mtshan mar yid la mi byed cing /mtshan ma med pa bsgom pa de la sgom par byed pa'i shes pa de la dga' ba dang bde ba skyes pa'i mtshan mar yang dag par rjes su mi mthong ngo / /de la dga' ba ni yid bde ba ste sems kyi'o/ /bde ba ni shin tu sbyangs te lus kyi'o/ /de yang btsun pa rnam par grol ba'i sdes 'jig rten pa'i 'dod chags dang bral ba bsam gtan dang po'am gnyis pa gang yang rung ba la brten pas zhugs pa yin no zhes bshad do//rnam pa gang gis dmigs par bya zhe na/ shes pa ste zhes bya ba la sogs pa smos te/ sgom par byed pa'i shes pa de nang gi gzugs zin pa'i 'byung ba dang 'byung ba las gyur pa nang gi skye mched kyi yin par nang stong pa nyid kyis na yang dag par rjes su mi mthong ste mtshan mar zhes bya ba ni lhag ma'o//phyi rol gyi gzugs ma zin pa'i 'byung ba dang 'byung ba las gyur pa'i phyi'i skye mched kyi yin par phyi stong pa nyid kyis na yang dag par rjes su mthong ngo //nang dang phyi rol gyi gzugs de gnyi ga tshogs pa'i yin par te phyi nang stong pa nyid kyis so/ /'o na gzugs las gzhan pa la mthong ngo zhe na/ shes pa de gzugs las gzhan na yang zhes bya ba la sogs pa smos so/ /de lta na 'di chos sgom pa la mngon par zhugs par ji ltar brjod par bya zhe na/tshig gi rnam grangs zhes bya ba la sogs pa smos te/ tshig gi rnam grangs nyid la zhes bya ba rnal 'byor gyi gnas kyi khyad par 'di la mos pas spyod pa'i sa la gnas pas kun tu rgyu phreng ba can mos so zhes brjod par bya'i rtogs pa ni ma yin no//gang gi phyir kun tu rgyu phreng ba can mtshan ma med pa'i thams cad mkhyen pa'i ye shes 'di la/ de kho na nyid ma rtogs pas dbang po rnon po ma yin pa nyid kyis dad pas rjes su 'brang ba zhes bya ste/ de kho na nyid rtogs na ni chos kyi rjes su 'brang bar gyur pa yin no zhes bya bar bsams so//yang ji ltar na dbang po rtul po yin du zin kyang de ltar mos zhe na/ chos nyid tshad mar bgyis te mos pa zhes bgyi'o zhes bya ba smos te/ sngon gyi 'phen pa'i shugs kyi dbang gis shes rab kyi pha rol tu phyin pa'i chos nyid mi bslu bas tshad mar byas na 'di ltar mtshan ma med pa nyid du mos pa zhes bya'o//de'i phyir des chos gang yang sgro btags pas yongs su ma bzung ngo / /chos gang blang bar bya ba nyid du dmigs shing chos gang blang bar bya ba nyid kyis gzung bar bya ba'am dor bar bya ba nyid kyis gtang bar bya ba dang yod pa nyid dmigs pa'i chos kyang med do/ /re zhig gzhan lta zhog ste de mya ngan las 'das par yang rlom sems su mi bgyid do zhes bya ba de kho na nyid du na mi rtogs so//'di la zhes bya ba rnal 'byor gyi gnas kyi 'di skad du rnam pa ni chos nyid kyi sgo nas ngo bo nyid bkag pas gzugs la sogs pa bdag gir mi byed pa yin no zhes brjod pa yin no/ / de la kun du rgyu phreng ba can dper byas pa ni mu stegs pa dang 'brel pas ting nge 'dzin las langs pa de lhag par mos pa'i stobs kyis don de mngon du bya ba'i dbang po nyid du shes par bya ba'i don yin no/ /chen po'i dmigs pa'i don gsungs pa ni bcom ldan 'das 'di yang zhes bya ba la sogs pa'o/ / 'di zhes bya ba ni 'og nas 'chad pa'o/ /yang zhes bya ba'i sgra ni sngar bshad pa 'ba' zhig tu ma zad do zhes bya ba'o/ /de nyid ston pa ni gang gzugs zhes bya ba la sogs pa smos te/ gang zhes bya ba ni gang gi phyir zhes bya ba'i don gyi tshig phrad de/ gzugs la sogs pa'i mtshan ma yang dag par ma mthong ba'i phyir ro zhes bya bar dgongs so//de lta na ma dmigs pas thams cad 'gog na 'o na byang chub sems dpa' nyan thos ltar na mya ngan las 'da' bar 'gyur ro zhe na/ de bzhin gshegs pa'i stobs bcu dang zhes bya ba la sogs pa smos te/ de bzhin gshegs pa'i stobs bcu la sogs pa ni 'og nas 'chad do//yongs su ma rdzogs pa zhes bya ba ni cung zad tsam zhig gzhan dag la yod pa'i phyir na sangs rgyas kyi chos ji snyed pa thams cad du mthar phyin par yongs su ma rdzogs par zhes bya bar sbyar ro/ /dang gi sgra ni nges par gzung ba'o/ /ma 'gags pa yi lus kyis ni//tshor ba nyams su myong byed pa/ /mar me shi bar gyur pa bzhin/ /de yi sems ni rnam par grol/ /zhes bya ba ni mya ngan las 'das pa ni theg pa chen por bkag pa yin pa'i phyir/ dam pa'i chos pad+ma dkar po'i mdo tshad mar byas nas dus re zhig sems can gyi don rgyun chad pa'i bar mdo ste/bar du nyan thos dang 'dra bar mtshan ma med pa nyid mngon du byas pa na/ thabs mkhas pa chen po'i stobs kyis mya ngan las 'da' ba ma yin no/ /nges par 'byed pa'i cha dang mthun pa'i skabs su nyan thos kyis mya ngan las 'da' ba mi srid pas rim gyis zhes bya ba ni lhag ma'o/ /de bas na zhes bya ba la sogs pa ni nye bar bsdu ba yin no//'di skad du/ ngo bo nyid med pa nyid kyis de kho na nyid du na sngon po la sogs pa'i mtshan mar mi mthong ba'i khyad par can gyi gzugs la sogs pa dmigs pa yin no zhes brjod pa yin no/ /rnam pa gang gis dmigs par bya zhe na/ bcom ldan 'das gzhan yang zhes bya ba la sogs pa gsungs so/ /'di ltar zhes bya ba ni 'og nas bshad pa'i rim pas so/ /nye bar brtags pa ni sgom pa'i dus su ji ltar nges par bzung ba'i don so sor brtags pa yin pa'i phyir ro/ /nges par bsams pa ni thos pa dang bsam pa'i dus su lung dang rigs pa nges par rtogs pa'i phyir ro//'di gang zhes bya ba ni gzugs la sogs pa'i phung po rnams kyi nang nas gang yin zhes pa'o/ /yang na ci rdzas dang yon tan nam/ las sam bya ba 'am/ 'du ba 'am/ spyi 'am/ khyad par yin zhes bya ba'i tha tshig go /'di gang gi yin zhes bya ba ni/ci bdag nyid dam chos dang 'brel pa yin te/ 'on kyang gzugs la sogs pa ni ma skyes pa yin pa'i phyir/ gang yang ma yin gang gi yang ma yin zhes bya ba'i tha tshig go/ /gal te de lta yin na med pa yin no zhe na/ ci chos gang med pa dang zhes bya ba la sogs pa smos te yul med pa la dgag pa'i sbyor ba med pas de kho na nyid du med pa ni shes rab kyi pha rol tu phyin pa ma yin no zhes bya bar dgongs so//gal te zhes bya ba ni nye bar bsdu ba'o/ /shes rab kyi pha rol tu phyin pa rtse mo chen po'i rang bzhin dang ma bral bar rig par bya ste rtogs pa'i phyir ro//'di skad du chos yang dag par rab tu rnam par 'byed pa nyid kyi shes rab kyis dngos po thams cad ma dmigs pa nyid du nges par brtags pa'i phyir/ dpyad pas shes rab kyi pha rol tu phyin pa'i rang bzhin med pa nyid chos nyid kyi sgo nas rnam pa yin no zhes brjod pa yin no/ /de ltar dge ba'i rtsa ba g.yo ba'i rtse mo yin pa'i phyir rtse mor gyur pa'i dmigs pa dang /rnam pa dang ldan pa rnam pa gsum yin no/ /de skad du yang / gzugs sogs mi gnas de dag ni/ /de yi ngo bor rang bzhin med/ /de dag gcig gi rang bzhin gcig /de mi rtag sogs par mi gnas/ /de rnams de yi ngo bos stong //de dag gcig gi rang bzhin gcig /chos rnams mi 'dzin gang yin dang / /de dag mtshan mar mi mthong phyir/ /thams cad dmigs su med par ni/ /shes rab kyis ni yongs rtogs pa/ /zhes gsungs pa yin no/ /da ni rtse mo'i 'og tu bzod par gtogs pa'i dge ba'i rtsa ba chung ngu'i dmigs pa'i don 'dri ba sngon du 'gro bas gsungs pa ni de nas tshe dang ldan pa shA ri'i bus zhes bya ba la sogs pa'o//ngo bo nyid dang bral ba yin na zhes bya ba ni lhag ma'o/ /'di skad du gang gi tshe gzugs la sogs pa'i ngo bo nyid dang bral ba dmigs pa yin na/ de'i tshe rgyu gang gis gtsor bzod pa chung ngu'i rang bzhin gyi shes rab kyi pha rol tu phyin pa dang ma bral bar rig par bya zhes brjod pa yin no/ /'di ni rten cing 'brel bar 'byung ba'i chos nyid yin te/ 'di lta ste 'di yod pas 'di 'byung zhes bya ba'i bsam pas gzugs nyid gzugs kyi ngo bo nyid dang bral ba'o zhes bya ba'i lan rig par byed pas smras pa yin te/gzhan du na gang gi tshe gzugs nyid gzugs kyi ngo bo nyid dang bral ba'o zhes dris pa na/ gzugs nyid gzugs kyi ngo bo nyid dang bral ba'o zhes bya ba'i lan mi rigs par 'gyur ro/ /yang ji ltar na gzugs la sogs pa ngo bo nyid dang bral ba yin zhes dogs pa bsu nas/shes rab kyi pha rol tu phyin pa ngo bo nyid dang bral ba nyid yin par bstan pa nyid kyis gzhan rnams kyi ngo bo nyid dang yang bral ba nyid du bstan pa yin zhes bya ba'i don de gsungs pa ni/ shes rab kyi pha rol tu phyin pa ni zhes bya ba la sogs pa smos te/shes rab kyi pha rol tu phyin pa'i mtshan nyid kyi spyi'i rang bzhin dang bral ba'o/ /yang zhes bya ba ni shes rab kyi pha rol tu phyin pa'i ngo bo nyid dang khyad par gyi mtshan nyid dang yang bral ba zhes bya ba ni yang gi sgras so/ /'o na ni bstan pa'i 'bras bu ni phyin ci log ldog pa yin pa'i phyir mtshan nyid dang mtshon bya yod do zhe na/mtshan nyid kyang zhes bya ba la sogs pa smos te/ mtshan nyid ni spyi yin la mtshan gzhi mtshon bya ni khyad par yin no/ /de lta na de gnyis kyi ngo bo nyid yod do zhe na/ ngo bo nyid kyang ngo bo nyid kyi mtshan nyid dang bral ba'o zhes smos te/ mtshon bya mtshan nyid rnam spangs shing //tshig tu brjod pa dang bral ni/ /de nyid mtshon bya mtshan nyid du/ /gnas pa btags pa yin par rigs/ /zhes bsams pa'o/ /'di skad du stong pa nyid kyis mtshon bya dang mtshan nyid gcig pa nyid kyis na rang bzhin med pa'i khyad par can gyi gzugs la sogs pa dmigs pa yin no zhes brjod pa yin no//rnam pa gang gis dmigs par bya zhes bya ba'i 'dri ba sngon du 'gro bas rnam pa'i don gsungs pa ni/ tshe dang ldan pa rab 'byor ci zhes bya ba la sogs pa'o/ /'di la zhes bya ba dmigs pa 'di la kun rdzob tu slob par 'gyur ba gang yin pa de ci thams cad mkhyen pa nyid la nges par 'byung bar 'gyur ram zhes bya ba ste/rgyu des bzod pa chung ngur gtogs pa'i dge ba'i rtsa ba thob par 'gyur ram zhes bya bar bsams pa'o/ /chos nyid dang mi 'gal ba nyid du smras so zhes khas blang ba'i don du/ tshe dang ldan pa shA ri'i bu de de bzhin no zhes bya ba la sogs pa gsungs so//nges par 'byung bar 'gyur ro zhes bya ba'i don dam pa dang / kun rdzob kyi sgo nas gzugs la sogs pa rnams dngos po med pa nyid kyi ngo bo nyid ni rnam pa yin te/ de bsgoms pas zhes bya ba'i don to/ /yang ji ltar na bzod pa chung ngu'i dge ba'i rtsa ba la slob pa na rnam pa thams cad mkhyen pa nyid du 'gro bar 'gyur zhes bya ba'i dogs pa de ci'i phyir zhe na zhes bya bas bsu nas/'bring gi dmigs pa'i don gsungs pa ni/ tshe dang ldan pa shA ri'i bu chos thams cad ni nges par 'byung ba med cing zhes bya ba la sogs pa'o//gong nas gong du dmigs pa'i khyad par la sogs pas rtogs pa'i khyad par du gyur pa na nges pa nyid du 'gro bar 'gyur ro zhes bya bar dgongs so/ /ni'i sgra ni nges par gzung ba la ste chos thams cad ni ma skyes pa nyid do zhes bya ba'i don to/ /ci'i phyir zhe na/ gang gi phyir chos rnams skad cig ma gcig gi mi rtag pa nyid kyis na skye ba'i chos bkag pas nges par 'byung ba med pa ste mya ngan las 'das pa'i yan lag ma yin pa nyid do//chos thams cad ces bya ba ni rang bzhin gyis ma skyes pa nyid kyis na skye ba dang 'gag pa med pa'i khyad par can gyi gzugs la sogs pa dmigs pa yin no zhes bya ba'i don to//rnam pa gang gis dmigs par bya zhe na/ de ltar spyod na zhes bya ba la sogs pa smos te/ bshad ma thag pa'i tshul gyis de ltar spyod cing bsgoms na ste/ 'gro ba'i don thams cad ni rtogs pa'i don yin pa'i phyir ro/ /nye ba yin no zhes bya ba ni myur du rtogs pa thob pa yin pa'i phyir nye bar gnas par 'gyur ba yin no//sems can yongs su smin pa'i phyir dang zhes bya ba ni dge ba'i chos la nges par sbyor ba la sems can yongs su smin pa'i phyir ro/ /lus dang zhes bya ba la sogs pa la chos thams cad kyi rang gi ngo bo nyid shes pas lus la sogs pa'i rnam pa thams cad rnam par dag pa zhes bya ba rnam par dag pa'i rgyur gyur pa'i phyir/rnam par dag pa'i rnam pa rgyu'i sgo nas bslabs pa las lus kyi las rnam pa gsum yongs su dag pas lus yongs su dag par 'gyur ro/ /sems rnam par dag pa ni yid kyi las rnam pa gsum yongs su dag pa'o//mtshan yongs su dag pa ni skyes bu chen po'i mtshan sum cu rtsa gnyis gnas na gnas pa dang / gsal ba dang / yongs su rdzogs pa nyid kyis so/ /sangs rgyas kyi zhing yongs su dag pa ni sems can dang snod kyi 'jig rten yongs su dag pa nyid do/ / nges par 'byed pa'i cha dang mthun pa'i gnas skabs su 'di dag rnam pa thams cad du med pa'i phyir na cung zad tsam gyis yin no zhes bya bar bsams pa'o/ /yang tshe dang ldan pa shA ri'i bu zhes bya ba ni de ltar nye bar bsdu ba yin no/ /chen po'i dmigs pa'i don gsungs pa ni gal te zhes bya ba la sogs pa smos pa'o//'di snyam du ji srid mngon par zhen pa'i tshul gyis mtshan mar 'dzin pa la spyod pa de srid du mtshan ma ni byang chub sems dpa'i nyon mongs pa'o zhes gsungs pas dmigs pa'i g.yang sa 'khor ba'i nyon mongs pa'i ltung bar gyur pa yin no/ / de la gzugs ni 'bras bur gyur pa'o//gzugs kyi mtshan ma ni lhan cig byed pa'i rgyu'o/ /gzugs mtshan ma'o snyam du zhes bya ba ni nye bar len pa'i rgyu'o/ /gzugs skye ba ni skye bar gyur pa'o/ /'gag pa ni skad cig ma'i mi rtag pas so/ / stong pa ni gnyi ga med pas te/ 'di ni phyin ci log la 'jug pa yin pas thabs la mi mkhas pa yin par rig par bya'o//ldog pa'i sgo nas bstan nas/ rjes su 'gro ba'i sgo nas gsungs pa ni ji ltar spyad na zhes bya ba la sogs pa'o/ /de ltar spyod na zhes bya ba ni nye bar bsdu ba yin te/ rang dang spyi'i mtshan nyid mi 'thad pas chos thams cad mtshan ma med pa nyid do zhes bya ba'i khyad par can gyi gzugs la sogs pa dmigs pa yin te/de ltar spyad pa'i byang chub sems dpa' ni shes rab kyi pha rol tu phyin pa bzod pa chen po'i rang bzhin la spyod pa yin no/ /rnam pa gang gis dmigs par bya zhe na/ de spyod kyang zhes bya ba la sogs pa smos te/sgrub pa dang ni dgag pa dang / /de dag nyid ni ldan pa dang / /de dag nyid ni dgag pa dag /rnam pa kun tu mi rtogs so/ /zhes bya bar bsams pa'o/ /yang mi rtogs na ji ltar na bsgom par bya ba yin snyam pa'i dogs pa de ci'i phyir zhe na zhes bya bas bsu nas/ chos thams cad ni zhes bya ba la sogs pa gsungs so//gang gi rang bzhin kho nas gzugs la sogs pa'i mtshan ma rnams kyi rten dang bral ba nyid kyis mos pa yid la byed pas mi mos shing / de kho na nyid yid la byed pas yongs su shes pa med pa zhes chos nyid kyi rnam pa'i sgo nas dmigs pa na lhag par mos pas bdag gir ma byas pa'i phyir nye bar ma rtogs pa dang /de kho na nyid yid la byed pas ma bzung ba yin pa'i phyir ma zin pa yin no/ /de ltar na ngan 'gro med pas chos chen po la bzod pa yin pa'i phyir/ bzod par gtogs pa'i dmigs pa dang rnam pa dang ldan pas rnam pa gsum mo//de skad du yang / gzugs sogs ngo bo nyid med nyid/ /de med pa nyid ngo bo nyid/ /de dag skye med nges 'byung med/ /dag dang de dag mtshan ma med/ /de yi mtshan mar mi rten pas/ /mos min 'du shes med pa yin/ /zhes bya ba gsungs te/de nyid kyi phyir bzod thob ngan song mi ltung ngo zhes bshad pas/ byang chub sems dpa' rnams bzod pa skyed par mi byed do zhes slob dpon gyi zhal snga nas kyis gsungs pa gang yin pa de ni bsam par bya ba yin te/ byang chub sems dpa' rnams kyi bzod pa rtogs pa gsungs pa'i phyir ro//bzod pa thob pa ngan song du mi 'gro'o zhes bya ba'i mdo dang yang mi 'gal te/ las kyi dbang gis snyam du dgongs pa'i phyir ro/ /'di ni nges par 'di ltar shes par bya ste/ 'di ltar bcom ldan 'das kyi bkas shA ri'i bu la sogs pa yang mdzes dga' khyer te dmyal bar rgyur song ngo zhes phyogs gzhan du bshad pa yin no//da ni bzod pa'i 'og tu chos kyi mchog tu gtogs pa'i dge ba'i rtsa ba chung ngu'i dmigs pa'i don gsungs pa ni 'di ni zhes bya ba la sogs pa'o/ /ting nge 'dzin gang gis chos thams cad nye bar len par mi byed pa de ni ting nge 'dzin chos thams cad len pa med pa zhes bya ste/'di ni de kho na nyid du ting nge 'dzin gyi rang gi ngo bor gyur pa'i gzugs la sogs pa la dmigs pas na yangs pa zhes bya ba la sogs pa brjod do zhes 'brel to/ /rnam pa gang gis dmigs par bya zhe na/ ting nge 'dzin 'dis gnas pa'i zhes bya ba la sogs pa smos te/rnam pa ni rang gi smon lam dang bsod nams dang ye shes dang chos kyi dbyings kyi stobs kyis lhun gyis grub par 'jig rten gyi khams thams cad du skal ba ji lta ba bzhin du ting nge 'dzin gyi bya ba 'jug go zhes 'bras bu'i sgo nas dmigs pa'i phyir myur du bla na med pa yang dag par rdzogs pa'i byang chub tu mngon par rdzogs par 'tshang rgya'o//'bring gi dmigs pa'i don gsungs pa ni de nas sangs rgyas kyi mthus zhes bya ba la sogs pa'o/ /sangs rgyas kyi mthu'i skabs yin yang tshig de yang smos pa ni spobs pa'i khyad par mngon par ston pa'i don yin no/ / yang na gdul bya rnams kyi de la dran pa brtan par bya ba'i phyir yin no/ /'di zhes bya ba ni chos kyi mchog tu gtogs pa'i 'bring la'o/ /de bzhin gshegs pa zhes bya ba la sogs pa la/ rnam pa thams cad du phyin ci ma log par chos ston par mdzad pa nyid kyis gzhan gyi don phun sum tshogs pas de bzhin gshegs pa'o//nyon mongs pa dang shes bya'i sgrib pa bag chags dang bcas par spangs pa dang ldan pas rang gi don phun sum tshogs pas dgra bcom pa'o/ /phun sum tshogs pa gnyis thob par byed pa'i lam thugs su chud pas na yang dag par rdzogs pa'i sangs rgyas so//lung bstan to zhes bya ba ni yang dag par zhugs pa'i ting nge 'dzin dang ldan pa la sangs rgyas rnams kyis lung bstan par mdzad pa 'di ni chos nyid yin no zhes lung bstan pa'i rgyu khyad par can gyi gzugs la sogs pa la dmigs pa'i phyir ro/ /rnam pa gang gis dmigs par bya zhe na/de ni zhes bya ba la sogs pa smos te/ yang dag par rjes su mi mthong zhes bya ba ni rnam par mi rtog pa'i sems kyis so/ /des kyang rlom sems su mi bgyid ces bya ba ni rnam par rtog pa dang bcas pa'i sems kyis so/ /de kho na nyid du med pa yin pa'i phyir ro/ /bdag ni mnyam par gzhag pa ste zhes bya ba ni ting nge 'dzin thob pa'o//snyoms par 'jug go zhes bya ba la sogs pa ni sbyor ba dang dngos gzhi dang mjug tu gyur pa'i rnam par rtog pa'am dus gsum du gyur pa'o/ /thams cad nas zhes bya ba la sogs pa la/ /thams cad ni 'di gnyis te dngos po thams cad dang rnam pa thams cad do zhes bshad pas 'das pa la sogs pa'i dngos po'i dbye bas thams cad nas so//phung po la sogs pa'i yul can rnam par rtog pa'i bye brag gi dngos po ni thams cad do/ /chung ngu'i chung ngu la sogs pa'i yang rnam pas rnam pa thams cad kyi'o/ /bag chags dang bcas pa'i rnam pa thams cad ni thams cad du'o//rnam par rtog pa thams cad mi 'thad pas byang chub sems dpa' ting nge 'dzin gyi ngo bos rtogs pa la bdag ni mnyam par gzhag pa'o snyam pa la sogs pa'i shes pa mi 'byung bas ma mchis te chos nyid kyi sgo nas rnam pa la bslab pa'i phyir mi 'byung ba'o//chen po'i dmigs pa'i don gsungs pa ni/ tshe dang ldan pa rab 'byor ting nge 'dzin gang gis 'das na zhes bya ba la sogs pa'o/ /chos kyi mchog chen por gtogs pa'i phyir ting nge 'dzin de bstan par nus sam zhes bya ba ni/ ci byang chub sems dpa' la sogs pa tha dad pa'i rang bzhin du zhes bya bar dgongs so//glegs bam la la las ni ting nge 'dzin gang la gnas na zhes 'don te/ de la ting nge 'dzin bstan par nus sam zhes bya ba dris pa'i tshig de nyid mi 'byor pa yin pas dpyad par bya'o/ /tshe dang ldan pa shA ri'i bu de lta ma yin no zhes bya ba ni lan yin te/chos nyid kyis ting nge 'dzin dang / byang chub sems dpa' dang / shes rab kyi pha rol tu phyin pa ste/ don gsum phan tshun ngo bo gcig pa yin no zhes so sor bstan par mi nus pa'i khyad par can gyi gzugs la sogs pa la dmigs pa'i phyir na mi nus so zhes bya ba'i don to//yang ji ltar na sgom bzhin pa yang bstan par mi nus snyam du dogs pa de ci'i phyir zhe na zhes bya bas bsu nas/ rnam pa ston pas lan gsungs pa ni rigs kyi bu des ting nge 'dzin de yang zhes bya ba la sogs pa'o/ /chos thams cad yod pa ma yin pa nyid kyis ting nge 'dzin du rnam par mi rtog pa ni thabs dam pa yin zhes chos nyid kyi rnam pa'i sgo nas dmigs pas/ting nge 'dzin de yang rnam pa med pa'i sems kyis mi shes te nye ba'i rgyu med pa'i phyir ro/ /rnam pa dang bcas pas yang dag par mi shes te/ dngos po yod pa ma yin yang rmi lam la sogs pa srid pa'i phyir ro//yang zhes bya ba'i sgra ni rnam pa 'ba' zhig tu ma zad pa'o/ /'di zhes bya bar mthong ba ni rnam par rtog pa la rag las pa'i phyir zhes bya bar bsams so/ /thams cad nye bar ma dmigs pa la bsgom par bya ba dang sgom pa po dang sgom pa mi 'thad do zhes bya bar dgongs pas/shA ri'i bu mi shes yang dag par mi shes zhes zer ram zhes smras so/ /kun rdzob tu nyes pa med do snyam du bsams nas/ rab 'byor gyis smras pa/ tshe dang ldan pa shA ri'i bu zhes bya ba la sogs pa smos so/ /bsam pa de nyid ni ci'i phyir zhe na zhes bya bas dogs pa bsu nas brjod pa ni/ting nge 'dzin de med pas na zhes bya ba'o/ /de kho na nyid du na zhes bya ba ni lhag ma'o/ /sbyor ba la sogs pa ni sgyu ma'i skyes bu bzhin du sngon gyi 'phen pa'i dbang gis yin no zhes bya bar bsams pa'o / /chos nyid dang mi 'gal bar ston pas legs so zhes bya ba'i don gsungs pa ni/ tshe dang ldan pa rab 'byor legs so zhes bya ba la sogs pa'o//spobs pa ni khyod la der snang ba'i shes pa skyes pas so/ /ston pa ni gzhan rnams la dmigs pa de ston pa'i phyir ro/ /byang chub sems dpa' zhes bya ba la sogs pa nye bar bsdu ba'o/ /ni'i sgra ni nges par gzung ba yin te/ nges par 'byed pa'i cha dang mthun pa 'di la de kho na ltar bslab par bya'o zhes bya ba'i tha tshig go//yang ji ltar na rim pa 'dis bslab par bya snyam pa'i dogs pa de ci'i phyir zhe na zhes bya bas bsu nas/ byang chub sems dpa' zhes bya ba la sogs pa gsungs so/ /shes rab kyi pha rol tu phyin pa la zhes bya ba ni nges par 'byed pa'i cha dang mthun pa'i rang bzhin la'o//de ltar na 'jig rten pa'i chos thams cad kyi mchog yin pa'i phyir/ chos kyi mchog ces bya ba'i dmigs pa dang rnam pa dang ldan pa rnam pa gsum mo/ /de skad du yang / ting 'dzin de yi byed pa nyid/ / lung ston pa dang rlom pa zad/ /gsum po phan tshun ngo bo gcig /ting 'dzin rnam par mi rtog pa/ /de ltar nges 'byed cha mthun ni/ /chung dang 'bring dang chen po yin/ /zhes gsungs pa yin no/ /'di skad ston te/ de ltar chos rnam par 'byed pa byas shing mnyam par gzhag pa'i sems kyis chos thams cad bdag med pa sgom pa na/gang gi tshe rim gyis don tha dad par gyur pa'i mngon par zhen pa med pa'i phyir ye shes kyi snang ba cung zad gsal bas yud tsam kho na mthong ba de'i tshe 'di'i dro bar gtogs pa'i gnas skabs yin la/ de nyid ni theg pa chen po 'dir snang ba thob pa zhes bya ba'i ting nge 'dzin du brjod do//gang gi tshe chos kyi snang ba de nyid 'phel bar bya ba'i phyir bdag med par sgom pa brtson 'grus rtsom pas ye shes kyi snang ba 'bring tsam du gsal bar gyur pa de'i tshe ni rtse mo'i gnas skabs te/ de nyid ni snang ba mched pa zhes bya ba'i ting nge 'dzin to//gang gi tshe na sems tsam du gnas pas phyi'i don la mngon par zhen pa med pa'i phyir shin tu gsal bar shes pa'i snang ba skyes pa de'i tshe bzod pa'i gnas skabs te/ gzung ba'i rnam pa med par rjes su zhugs pa'i phyir na de kho na nyid kyi don gyi phyogs gcig la zhugs pa'i ting nge 'dzin yin no//yang gang gi tshe don la 'dzin par byed pa'i rnam par g.yeng bar snang ba med pa'i ye shes kyi snang ba rdzogs par gyur pa de'i tshe 'jig rten chos kyi mchog gi gnas skabs te/ de nyid ni bar chad med pa'i ting nge 'dzin zhes bya'o/ / gnas skabs 'di dag thams cad ni lhag par mos pa brtan pa yin pas mos pas spyod pa'i sa zhes bya bar bshad do/ /sa 'di la gnas pa'i byang chub sems dpa' ni so so'i skye bo yin na yang byis pa'i rgud pa thams cad las yang dag par 'das shing / ting nge 'dzin dang / gzungs dang / rnam par thar pa dang / mngon par shes pa la sogs pa'i yon tan grangs med pa dang ldan pa yin no zhes dkon mchog sprin las gsungs so/ /de ltar nges par 'byed pa'i cha dang mthun pa rnams kyi dmigs pa dang rnam pa dang rgyu nyid kyi khyad par bstan nas/ rnam par rtog pa bzhi dang ldan pa'i don las gzung ba'i rnam par rtog pa dngos po thams cad kyi rten can dang por gsungs pa ni/bcom ldan 'das byang chub sems dpa' sems dpa' chen po de ltar slob na zhes bya ba la sogs pa ste ci zhes bsams pa'o/ /brjod pa'i kun rdzob tu slob po snyam du dgongs pas gsungs pa ni de ltar slob na zhes bya ba la sogs pa'o//shA ri'i bus bcom ldan 'das kyi dgongs pa ma shes nas dris pa ni de kho na nyid du na chos gang la slob pa lags zhes bya ba'o / /de la gzhi tsam la brten pa'i rnam par rtog pas phyin ci log dang 'brel par 'gyur ba'i phyir don dam par gang la yang ma yin no zhes bcom ldan 'das kyis gsungs pa ni chos gang la yang mi slob po zhes bya ba'o//slob bzhin pa na yang ji ltar mi slob pa yin zhes bya ba'i dogs pa de ci'i phyir zhe na zhes bya bas bsu nas/ shA ri'i bu chos de dag ni zhes bya ba la sogs pa gsungs so//kun nas nyon mongs pa'i chos rnams dang ldan pas na byis pa'o/ /rnam par byang ba'i chos rnams dang bral bas na so so'i skye bo'o/ /de dag nyid ni 'di lta bu'i chos la mos pa dang thos pa mang ba dang bral bas thos pa dang mi ldan pa yin no/ /'di snyam du ma rig pa'i rnam par rtog pa'i stobs kyis yod pa nyid du nye bar dmigs pas ji ltar mngon par chags pa de bzhin du yod pa ma yin te/de bas na kun rdzob tu slob kyi don dam par mi slob bo zhes gsungs pa'o / /gal te de ltar med na 'o na ni don gyis gzhan du yod pa ma yin la/ de lta na yang dngos por 'dzin pa'i phyir skyon du 'gyur ro zhes bya ba'i bsam pas smras pa ni bcom ldan 'das 'o na ji lta bur mchis zhes bya ba'o//'on te phyin ci log gi yul bsal ba'i phyir ji ltar mngon par chags pa de bzhin du yod pa ma yin no zhes de skad du gsungs pa yin mod/ de lta na yang yang dag par yod pa ma yin no zhes bya ba bka' stsal pa ni/ji ltar med pa zhes bya ba la sogs pa smos te/ ji ltar rigs pas dpyad na med pa de ltar ma brtags gcig tu na nyams dga' ba nyid kyis kun rdzob tu yod pa yin te/ med pa nyid du yod pa nyid do zhes bya ba'i don to/ /de ltar zhes bya ba la sogs pa ni nye bar bsdu ba yin te/gang gi phyir de ltar med pa'i gtan tshigs de'i phyir na nges pa'i tshig gi tshul gyis kun rdzob tu phyin ci log gi shes pa mi shes pa la ma rig pa zhes brjod do/ /de ltar na 'dis ni ma rig pa'i rnam par rtog pa brjod pa yin no/ /gzugs la sogs pa phung po'i rnam par rtog pa bstan pa'i phyir de dag la zhes bya ba la sogs pa gsungs so//dngos po tsam la brten pas na de la rag las pa'i rnam par rtog pa thams cad kyang 'brel par shes par bya ba'i don du snga ma dang 'brel par brjod do/ /'og ma rnams la yang shes par bya'o//ji ltar mngon par zhen pa yin snyam na/ de dag gis zhes bya ba la sogs pa gsungs te/ gzugs kyi phung po la sogs pa'i chos thams cad yang dag pa nyid du med pa la yang dag pa ma yin pa'i rtogs pa las der rtog pa'i sgo nas sgro btags shing brjod pa yin no//ming dang gzugs la mngon par zhen pa'i rnam par rtog pa bstan pa'i phyir de dag gis de la brtags na zhes bya ba la sogs pa smos so/ /rtag pa dang chad pa'i mtha' gnyis la mngon par zhen pa'i rnam par rtog pa las/ rtag pa ni don bya ba dang bral ba'i phyir na kun rdzob tu mi rtag pa kho na yin no zhes ming dang gzugs la sogs pa'i chos de dag /'jig rten pa'i thos pa las byung ba la sogs pa'i shes pas mi shes so/ /mi shes pas ni sngar brtags la/ /phyi nas de nyid don nges pa/ /gang tshe dngos nyid ma rnyed pa/ /de tshe dngos med ga la yod/ / ces bya bar sgom par 'jig rten las 'das pas mi mthong ste/ de'i phyir de ming dang gzugs la sogs pa'i chos thams cad de kho na nyid du na med bzhin du de la mngon par zhen pa'i stobs kyis rtog go/ /mtha' gnyis la chags pa'i rnam par rtog pa bstan pa'i phyir/ brtags nas mtha' gnyis la mngon par chags te zhes bya ba gsungs te/de la zhen pa'i rnam rtog pas/ /zhes bya bar dgongs so/ /kun nas nyon mongs pa dang rnam par byang ba mi shes pa'i rnam par rtog pa bstan pa'i phyir/ mngon par chags pa zhes bya ba la sogs pa gsungs te/ mngon par zhen pa'i rgyu de'i gzhi de'i dmigs pa la gnas te rgyu mtshan du byas nas kun nas nyon mongs pa dang rnam par byang ba'i chos rnams kyi rang gi ngo bo mi shes pa'i rnam par rtog pa'i stobs kyis 'das pa nas da ltar byung ba'i chos kyi bar la rtog go//'phags pa'i lam la mi gnas pa'i rnam par rtog pa bstan pa'i phyir/de dag gis brtags nas ming dang gzugs la mngon par zhen to zhes bya ba gsungs te/ mthong ba la sogs pa'i lam la gnas par mngon par zhen pa'i phyir zhes bya bar dgongs so/ /de la ming ni tshor ba la sogs pa gzugs can ma yin pa'i phung po rnams so/ /gzugs ni gzugs kyi phung po'o//dmigs pa'i rnam par rtog pa bstan pa'i phyir de dag gis med pa'i chos thams cad la brtags so zhes bya ba gsungs te/ dmigs pa de la mngon par zhen pas zhes bya bar dgongs so/ /bdag la sogs pa'i rnam par rtog pa bstan pa'i phyir de dag gis med pa'i chos de dag ces bya ba la sogs pa gsungs te/bdag yod na ni gzhan du shes/ /bdag gzhan cha las 'dzin dang sdang / /'di gnyis dang ni 'brel pa las/ /nyes pa thams cad 'byung bar 'gyur/ /zhes bya ba bdag la sogs pa la mngon par zhen pa las chos dang gang zag la bdag med pa'i mtshan nyid mthong ba'i lam la sogs pa'i lam yang dag pa ji lta ba bzhin du phyin ci ma log par snga ma bzhin du mi shes mi mthong ngo //rnam par dag pa skye ba la sogs pa'i rnam par rtog pa bstan pa'i phyir lam yang dag pa ji lta ba bzhin du ma shes ma mthong bas zhes bya ba la sogs pa gsungs te khams gsum pa 'khor ba las nges par mi 'byung ba ni mi 'da' ba'o//gang gi phyir rnam par dag pa skye ba la sogs pa la mngon par zhen pas mchog gi don gyis na yang dag pa'i mtha' zhes bya ba de kho na nyid khong du mi chud do/ /de'i phyir rgyu des na byis pa zhes bya bar btags pa'i grangs su 'gro zhing ming thob po//gzung ba'i rnam par rtog pa gnyis pa gnyen po'i rten can bstan pa'i phyir de dag chos bden pa la yid mi ches zhes bya ba la sogs pa gsungs te/ chos ni gnyen po'i phyogs kyi mtshan nyid do/ /bden pa zhes bya ba ni phyin ci ma log pa'i don yin pa'i phyir ro//yid mi ches so zhes bya ba ni de la mngon par zhen pa'i rnam par rtog pa dang ldan pas phyin ci log tu bsgrub pa'i phyir rang gi ngo bo nyams su myong ba med pas mi dad cing lhag par mi mos so/ /ldog pa'i sgo nas phyin ci log tu sgrub pa nyid gsungs pa ni yang shA ri'i bu zhes bya ba la sogs pa ste/gzung ba'i rnam par rtog pas rnam par byang ba'i chos gang la yang zhes bya ba lhag ma'o/ /de yang 'di ltar yul gyi dbye bas dgur 'gyur te/ 'di lta ste spungs pa'i don gyi rnam par rtog pa dang / skye ba'i sgo'i don gyi rnam par rtog pa dang / rigs kyi don gyi rnam par rtog pa dang /skye ba'i don gyi rnam par rtog pa dang / stong pa nyid kyi don gyi rnam par rtog pa dang / pha rol tu phyin pa'i don gyi rnam par rtog pa dang / mthong ba'i lam gyi rnam par rtog pa dang / bsgom pa'i lam gyi rnam par rtog pa dang / mi slob pa'i lam gyi rnam par rtog pa'o//de skad du yang / gzhi dang de yi gnyen po yis / /gzung bar rtog pa rnam pa gnyis/ /rmongs dang phung sogs bye brag gis/ /de ni so sor rnam pa dgu/ /zhes gsungs pa yin no/ /de la kha cig na re gzung ba'i rnam par rtog pa dang po ni gzhi thams cad pa kho na yin la/gnyis pa ni rnam par byang ba kho na'i gzhi can yin no zhes bya ba 'di ni gzung ba'i rnam par rtog pa 'di gnyis kyi khyad par ro/ /de ltar byas nas brjod pa ni gzung ba'i rnam par rtog pa dang po gang yin pa de ni gnyis pa yang yin no zhes tshig snga ma dang sbyar ro/ /re zhig dang po gang yin pa de ni gnyis pa yang yin te/dper na gzung ba'i rnam par rtog pa dang po gzhi thams cad pa bzhin no/ /gnyis pa kho nar 'gyur gyi dang po ma yin pa ni dper na rnam par byang ba tsam gyi rten can gzung ba'i rnam par rtog pa gnyis pa bzhin no zhes zer ro/ /gzhan dag na re kun nas nyon mongs pa'i gzhi la brten pa ni dang po yin la/rnam par byang ba'i gzhi la brten pa gnyis pa yin pas 'di gnyis phan tshun rnam par chad pa'i rang bzhin yin pa'i phyir 'di gnyis ni tha dad pa kho na'i zhes zer ro/ /'dzin pa'i rnam par rtog pa dang po gang zag rdzas su yod pa'i rten can gsungs pa ni/ bcom ldan 'das byang chub sems dpa' sems dpa' chen po de ltar slob na zhes bya ba la sogs pa smos so/ /de ltar bshad ma thag pa'i rim pas gzung ba'i rnam par rtog pa gnyis mi byed par 'dzin pa'i rnam par rtog pa dang pos slob na slob bam ci zhes bya bar bsams pa'o/ /rnam par rtog pa ni sgrib pa yin par mtshungs pa'i phyir ro zhes bcom ldan 'das kyis bka' stsal pa ni/mi slob ste zhes bya ba de kho na nyid du zhes bya ba ni lhag ma'o/ /gzhan du mi 'thad pa'i phyir kun rdzob tu ni las dang po pa 'di ltar slob po zhes gsungs pa ni/ shA ri'i bu zhes bya ba la sogs pa'o//thams cad mkhyen pa nyid la slob ces bya ba la sogs pa tshig gsum ni go rims bzhin du sbyor ba la sogs pa'i gnas skabs yin par shes par bya'o/ /de yang 'di ltar yul gyi dbye bas rnam pa dgur 'gyur te/ 'di lta ste rang dbang can gyi bdag tu rnam par rtog pa dang / gcig pu'i bdag tu rnam par rtog pa dang /rgyu'i bdag tu rnam par rtog pa dang / lta ba po la sogs pa'i bdag tu rnam par rtog pa dang / kun nas nyon mongs pa'i rten gyi bdag tu rnam par rtog pa dang / 'dod chags dang bral ba'i rten gyi bdag tu rnam par rtog pa dang / mthong ba'i lam gyi rten gyi bdag tu rnam par rtog pa dang /bsgom pa'i lam gyi rten gyi bdag tu rnam par rtog pa dang / don byas pa'i rten gyi bdag tu rnam par rtog pa'o/ /'dzin pa'i rnam par rtog pa gnyis ni skyes bu btags par yod pa'i rten can no/ /rnam par rtog pa de la rtsod pa ngan pa spang ba'i sgo nas gsungs pa ni bcom ldan 'das gang zhig ces bya ba la sogs pa'o//btags pa tsam kho na'i skyes bu ni 'dzin pa'o zhes mngon par zhen na log par snang ba yin pa'i phyir sgyu ma'i rang bzhin gyi skyes bu ni sgyu ma'i skyes bu ste btags pa tsam kho na de yang slob par 'gyur na de ltar yang ma yin te sems med pa'i phyir ro//yongs su ma shes pa yang slob na ni thams cad kyang slob par 'gyur bas thar pa 'bad pa med par 'grub bo zhes bya ba'i bsam pas gang zhig 'di skad du zhes bya ba la sogs pa de skad 'dri na de la lan ji skad bstan par bgyi zhes bya ba'i tha tshig go/ /gzugs la sogs pa ni log par snang ba'i rang bzhin du mnyam pa yin te/de bas na rten gzhan med pas sgyu ma'i skyes bu dang 'dra bas bslab par bya zhing thar pa 'bad pa med par 'grub pa yang ma yin no zhes bya bar dgongs nas bcom ldan 'das kyis bka' stsal pa ni/ rab 'byor de bas na zhes bya ba la sogs pa'o/ /gang gi phyir khyod de skad 'dri ba 'dir khyed nyid la dri bar byas zhes bya ba slar dri bar bya'o zhes pa'o//bcom ldan 'das legs so zhes bya ba la sogs pa la/ bcom ldan 'das legs so zhes khas blangs par bya ba nas de ltar bcom ldan 'das kyis ltar nyan pa dang zhes bya ba ni nyan par gyur pa'o/ / de ltar ci zhig nyan ce na bcom ldan 'das kyis zhes bya ba la sogs pa gsungs so/ /lan ni bcom ldan 'das sgyu ma de gzhan la zhes bya ba la sogs pa gsol to / /bcom ldan 'das 'di dag gzhan pa nyid ma lags te gang gi phyir sgyu ma de gzhan la gzugs la sogs pa de gzhan ma lags te/gzugs la sogs pa nyid sgyu ma lags so/ /sgyu ma nyid gzugs lags so zhes bya ba de kho na nyid du na gcig dang du ma'i ngo bo nyid dang bral bas 'di dag dngos po med pa nyid yin pas log par snang ba'i rang bzhin du mtshungs pa yin no zhes bsams pa'o/ /sgyu ma dang gzugs la sogs pa phan tshun gcig pa nyid du bstan pa na sgyu ma'i skyes bu dang 'dra bas bslab par bya'o zhes bstan par bya ba'i phyir/rab 'byor 'di ji snyam du sems zhes bya ba la sogs pa gsungs te/ 'dir 'phags pa rnam par grol sdes nye bar len pa'i phung po lnga po sgyu ma dang 'dra ba 'di la byang chub sems dpa' zhes bya ba la 'du shes te mtshan mar 'dzin pa'o//bdag po zhes dngos po dang bcas par shes pa ni kun shes pa'o/ /shes pa dang shes bya dag la gzung ba dang 'dzin pa'i rnam par mngon par zhen pa'i rnam par shes pa ni rnam par rig pa'o/ /gzhan gyis zin pa dang rnam par rig pa dngos po gzhan dang 'brel pa'i tha snyad sna tshogs pa ni tha snyad do zhes bshad do//btsun pa grol sdes ni rigs kyi gnas skabs su ni byang chub sems dpa' zhes bya ba'i ming yin te/ ming 'ba' zhig go/ /sems bskyed pa'i gnas skabs su ni shes pas na kun shes pa'o/ / mnyam par shes pa ni/ byang chub sems dpa' zhes bya ba'i ming gang la mnyam par shes pa'i sems 'jug pa'i rgyu mtshan yod pa de ni mnyam par shes pa yin te/ sems can thams cad mnyam par shes pa'i rgyu mtshan can yin no/ /sbyor ba'i sa bdun po la ni chos thams cad btags pa tsam du gtogs pas rnam par rig pa'o//brgyad pa la sogs par ni mtshan ma med pa lhun gyis grub pa'i lam thob pa'i phyir tha snyad tsam du mngon par brjod pas tha snyad ces bya ba yin no zhes 'chad do/ /byang chub sems dpa' ni gzugs la sogs pa logs shig na yod par mi 'thad par khas blang bar bya ba'i phyir de de bzhin no zhes bya ba la sogs pa gsol te/rig pa la lan gnyis smos so/ /bcom ldan 'das byang chub sems dpa' sems dpa' chen po zhes bya ba la sogs pa ni nye bar bsdu ba yin te/ /gang gi phyir de ltar yin pa'i rgyu des na rten gzhan med pas ji ltar 'khor ba'i las kyi sgyu ma las skyes pa de bzhin du 'jig rten las 'das pa'i chos rnams kyang ye shes kyi sgyu ma las byung ba yin pas mngon par zhen pa med pa'i sbyor bas sgyu ma'i skyes bu ltar bla na med pa yang dag par rdzogs pa'i byang chub la bslab par bya'o zhes bya ba ni 'thad pa yin no//thar pa 'bad pa med par 'grub pa yang ma yin te/ gang gi phyir de kho na nyid shes pa nyid ni thar pa thob par byed pa yin gyi/ ma shes par ni ma yin no zhes bya bar dgongs so/ /sgyu ma'i skyes bu nyid yin na kun nas nyon mongs pa dang rnam par byang ba'i gnas skabs su ji ltar 'gyur snyam du dogs pa de ci'i slad du zhe na zhes bya bas bsu nas/bcom ldan 'das 'di lta ste zhes bya ba la sogs pa gsungs so/ /nye bar len pa'i phung po lnga po de dag nyid ces bya ba la sogs pa la/ nye bar len pa'i phung po lnga po ni zag pa dang bcas pa'i gzugs la sogs pa'o/ / zag pa med pa'i phung po lnga yongs su bsdu ba'i phyir phung po lnga po de dag nyid kyang zhes bya ba de ni khong nas dbyung ngo / /ji ltar mthong ba'i kun nas nyon mongs pa dang rnam par byang ba'i gnas skabs nyid kyang sgyu ma'i skyes bu lta bu'o zhes bya bar bsams pa'o/ /yang ji ltar na sgyu ma'i skyes bu nyid yin snyam du dogs pa de ci'i slad du zhe na zhes bya bas bsu nas/'di ltar zhes bya ba la sogs pa smos te/ don smras zin pa yang rnam pa gzhan gyis dogs par byas pa ni zlos pa ma yin pa'i phyir zlos te bshad pa'i nyes pa yod par mi brtags te / thams cad du yang 'di bzhin du shes par bya'o/ / bcom ldan 'das kyis gzugs ni sgyu ma lta bur gsungs te zhes bya ba ni/ nye bar len pa'i phung po lnga po 'di la byang chub sems dpa' zhes bya bar 'du shes pa dang zhes bya ba la sogs pa gsungs pa'i phyir na/ de ma thag kho nar bcom ldan 'das kyis gzugs la sogs pa ni sgyu ma lta bur gsungs pa yin no//dbang po drug ni mig la sogs pa'o/ /rnam par shes pa yul dang bcas pa zhes bya ba ni lhag ma ste/ 'di ltar phung po lnga zhes de ma thag tu 'thad par 'gyur ro/ /rnam par shes pa gang yin pa de ni dbang po drug yin te/ shes pa nyid de lta bu'i rnam par snang ba'i phyir ro//dbang po drug kyang snga ma bzhin du gzung bar bya'o/ /'dzin par rtog pa skyes bu btags par yod pa'i rten can bstan pa yin no/ /de yang yul gyi dbye bas dgur 'gyur te/ 'di ltar phung po btags pa'i rnam par rtog pa dang / skye mched du btags pa'i rnam par rtog pa dang /khams su btags pa'i rnam par rtog pa dang / rten cing 'brel par 'byung bar btags pa'i rnam par rtog pa dang / rnam par byang bar btags pa'i rnam par rtog pa dang / mthong ba'i lam du btags pa'i rnam par rtog pa dang / bsgom pa'i lam du btags pa'i rnam par rtog pa dang /khyad par gyi lam du btags pa'i rnam par rtog pa dang / mi slob pa'i lam du btags pa'i rnam par rtog pa'o/ /de skad du yang / rdzas dang btags pa'i rten can gyi/ /'dzin pa'ang rnam pa gnyis su 'dod/ /rang dbang bdag sogs ngo bo dang / /phung sogs rten la de bzhin no//zhes gsungs pa yin no/ /rnam par rtog pa bzhi dang ldan pa bstan nas/ da ni thabs la mkhas pa'i dge ba'i bshes gnyen gyi rang bzhin yongs su 'dzin pa bstan par bya ba'i phyir theg pa la gsar du zhugs pa'i zhes bya ba la sogs pa gsungs pa yin te/ theg pa la gsar du zhugs pa zhes bya ba ni theg pa chen po la 'phral du zhugs pa'o//'di zhes bya ba ni zab pa dang rgya chen po dmigs pa la sogs pa'i khyad par gyis khyad zhugs pa'o/ /dngang zhing zhes bya ba la sogs pa la de la gnas ma yin pa la 'jigs pa ni dngang ba ste/ lam ngan pa dang 'dra ba'o//rgyun du 'jigs pa ni skrag pa ste 'jigs pa skyes pa slar ma ldog pa'i phyir ro/ /skrag pa nges par gyur pa ni kun tu skrag pa dang ldan pa ste/ zhum zhing 'gong la 'gyod par mi 'gyur ram zhes bya ba'i tha tshig go/ /sdig pa'i grogs po'i lag tu song bar gyur na ni zhes bya ba ni kun rdzob dang don dam pa'i dbye ba ma byas par thog ma med pa'i dus nas goms par byas pa'i dmigs pa bkag ste mdo kho nar las dang po pa la skye ba med pa la sogs pa ston par byed pa ni dmyal ba la sogs pa'i 'bras bu dang dam pa'i chos spong bar byed pa'i sdig pa'i rgyur 'gyur ba nyid yin pa'i phyir sdig pa'i grogs po'o//de'i lag tu song bar gyur pa ni gzung ba'i 'os su gyur pa zhes bya ba'i don to/ /ldog pa'i sgo nas rdzogs pa'i don rjes su 'gro ba'i sgo nas brjod na shin tu bstan par 'gyur ba yin pa'i phyir dge ba'i bshes gnyen gyi lag tu song bar gyur na ni zhes gsungs so//sems ma zhum zhing mi skrag pa la sogs pa'i thabs la mkhas pas bsam pa ji lta ba bzhin du sa bdag gi rgyal po'i btsun mo sdug pa shi ba brda'i sprod pa'i tshul du rim gyis dngos po ma lus pa bdag med pa la sogs pa ston par byed pa ser sna la sogs pa'i chos dang bral ba ni bde 'gro la sogs pa'i 'bras bu thob par byed pa nyid yin pa'i phyir dge ba'i bshes gnyen te/de'i lag tu song bar gyur pa ni snga ma bzhin no/ /gang de dag la zhes bya ba la sogs pa la gang zag gang lha sbyin la sogs pa'i gang zag de dag la sbyin pa la sogs pa'i pha rol tu phyin pa rnams kun rdzob dang don dam pa'i bden pa las mi 'da' ba'i tshul du phan pa thob par bya ba'i phyir snga ma bzhin du rjes su ston cing 'doms pa rnams dang /yang gang zhig lha sbyin la sogs pa la de dag la phan pa ma yin pa las bzlog pa'i phyir bdud kyi las rnams ston pa'o/ /ji lta bu zhe na/ bdud kyi nyes pa ni zhes bya ba la sogs pa gsungs so/ /bdud kyi nyes pa ni 'di lta bur rig par bya zhes pa ni bdud bar chod bya ba'i phyir sangs rgyas kyi cha lugs su 'ongs nas khyed la bla na med pa yang dag par rdzogs pa'i byang chub kyis ci zhig bya zhes ma 'ongs pa'i don dang 'byed par byed pa'o/ / bdud kyi nyes pa ni 'di dag yin zhes bya ba ni de bzhin du khyod la shes rab kyi pha rol tu phyin pa 'dri ba la sogs pa nyams su len pas ci zhig bya zhes da ltar byung ba'i don dang 'byed par byed pa'o/ /des phye ba'i stobs kyis go rims bzhin du bdag gis byas pa dang spangs pa'i las bstan pa'i phyir bdud kyi las ni 'di lta bu zhes bya ba la sogs pa gsungs so//shes nas gang zhig bya ba de ni 'di dag rtogs nas zhes bya ba la sogs pa'o/ /rab 'byor 'di ni zhes bya ba la sogs pa ni nye bar bsdu ba'o/ /go cha chen po bgos pa zhes bya ba ni 'og nas bshad pa'i go cha'i sgrub pa dang ldan pa'o//theg pa chen po la yang dag par zhugs pa zhes bya ba de ni de bzhin du 'jug pa'i sgrub pa dang ldan pa'o/ /theg pa chen po la yang dag par gnas pa zhes bya ba ni theg pa chen po de nyid la brtson pa'o/ /de ltar na dang po der zhugs pa yin la/ phyis ni gnas par 'dod do//de skad du yang / sems mi 'gong ba nyid la sogs/ /ngo bo nyid med sogs ston byed/ /de yi mi mthun phyogs bor ba/ /rnam pa kun tu yongs 'dzin yin/ /zhes gsungs so/ /mdo sde ni mdo gzhan gyi rjes su 'brangs nas bshad par bya'o zhes bya ba'i bcom ldan 'das kyi bka' nyid kyis stong phrag nyi shu lnga pa'i rjes su 'brangs pa dang /sngon gyi slob dpon dbyig gnyen la sogs pas bshad pa'i rim pa la brten cing / mngon par rtogs pa'i rgyan gyi tshig le'ur byas pa dang yang bstun nas dgongs pa can dang khong nas dbyung ba la sogs pa'i tshig byas nas bshad pa dang / de bzhin du thun mong gi sgra yang skabs la sogs pa'i stobs kyis khyad par la 'jug pa'i phyir dang / brjod par 'dod pa'i gzhan dbang nyid kyis ji skad du bshad pa'i don gsung rab dang mi 'gal ba la sgra 'jug pa'i phyir dang / de dgag pa'i tshig med pa'i phyir bshad pa 'di ni gzhung dang rjes su mthun pa nyid yin no//de bas na gzhung dang mi mthun pa kho nar ji ltar bshad ces brtag par mi bya'o/ /gzhan du na gal te tshul 'di la ma brten na de'i tshe gsung rab kyi bshad pa nyid du mi 'gyur te/ sgra ni brda las byung ba nyid kyis don du ma la 'jug pas so sor nges pa'i don yongs su 'dzin na som nyir 'gyur ba'i phyir ro//gzhan yang 'di ni 'phags pa thogs med la sogs pa rnams kyis bshad pa bris pa yin pa'i phyir tshad mar bya'o/ /de yang 'di skad du/ 'phags pa thogs med gsung rab ma lus pa'i don thugs su chud cing rtogs pa thob pa yin du zin kyang zlos te gsung mang ba dang /zlos te gsungs pa yin pa'i phyogs la yang tshig so so'i rnam par bcad pa ma gzigs pa dang / zab pa nyid kyis na shes rab kyi pha rol tu phyin pa'i don dpogs par ma dpyod nas yid mi bde ba rjes su thob par gyur to/ /de nas de'i don du bcom ldan 'das 'phags pa byams pas shes rab kyi pha rol tu phyin pa'i mdo bshad pa dang mngon par rtogs pa'i rgyan gyi tshig le'ur byas pa mdzad do//de gsan nas slob dpon 'phags pa thogs med dang dbyig gnyen la sogs pa rnams kyis kyang bshad pa yin no zhes rjes su thos te/ zhar la 'ongs pas chog go//sgrub pa dang ldan pa la nges par 'byed pa'i cha dang mthun pa ji skad du bshad pa dang mthong ba'i lam la sogs pa gzhan dag kyang 'byung bas/ nges par 'byed pa'i cha dang mthun pa'i de ma thag tu gyur pa chos kyi dbyings kyi rang bzhin bstan pa'i phyir/ bcom ldan 'das kyis gang 'di skad du zhes bya ba la sogs pa gsungs so//'di skad du/ bcom ldan 'das kyis gang 'di skad du 'di dag ni byang chub sems dpa' sems dpa' chen po'i zhes bya ba la sogs pa gsungs pa dang / gang yang mdo sde gzhan dag las byang chub sems dpa' sems dpa' chen po zhes gsungs pa de la/chos kyi dbyings kyi rang bzhin yin na tshig snga ma dang mdo sde gzhan dag gi byang chub sems dpa' zhes bya ba'i gzhi'i don gang yin te/ sangs rgyas kyi chos rnams kyi gzhi'i don gang yin zhes brjod pa yin no/ /lan bstan pa'i phyir rab 'byor zhes bya ba la sogs pa gsungs te/sangs rgyas kyi chos rnams kyi gzhi'i don byang chub sems dpa'i gang yin pa de ni de kho na nyid du na gzhi'i don med pa'i gnas kyi don med pa yin pas te/ rigs med pa yin no zhes bya ba'i don to/ /rtog pa med par ni grol ba yod par mi 'thad pas sangs rgyas kyi chos rnams rtogs bzhin du ji ltar byang chub sems dpa' zhes bya ba'i gzhi'i don med pa yin snyam du dogs pa de ci'i phyir zhe na zhes bya bas bsu nas/rab 'byor zhes bya ba la sogs pa gsungs so/ /chos thams cad chags pa med par zhes bya ba ni gang gi phyir gzhan du rtogs pa mi 'thad pas chos thams cad la gzhi dang de'i mtshan ma la mngon par zhen pa med pas chags pa med par gyur pa na sangs rgyas kyi chos rtogs par bya ba'i phyir sgyu ma'i skyes bu ltar slob pa de'i phyir de kho na nyid du na rten gyi don yod par ji ltar 'gyur zhes bya bar dgongs so// yang kun rdzob tu ni sgrub pa'i chos kyi gnas skabs kyi khyad par gyi dbye bas chos kyi dbyings kyi ngo bo nyid kho na sangs rgyas kyi chos rnams kyi gzhir gyur pa byang chub sems dpa' rnam pa bcu gsum la ni rigs zhes bya bar bshad do/ /de la re zhig dang por 'jig rten pa'i nges par 'byed pa'i cha dang mthun pa rnams kyi skye ba'i rten yin no//de'i 'og tu ni 'jig rten las 'das pa mthong ba'i lam dang bsgom pa'i lam dag gi'o/ /de'i 'og tu de dag skyes pa'i stobs kyis rkun po phyung ba dang sgo 'phar bcad pa dang 'dra bar dus mnyam du gnyen po mtha' dag skye ba dang mi mthun pa'i phyogs 'gag pa dag gis so//de'i 'og tu de dag mi dmigs pas mi mthun pa dang gnyen po'i phyogs gnyis 'gog pa dang skye ba dang ldan pa'i rnam par rtog pa spangs pa yin no/ /de'i 'og tu sngon gyi smon lam dang sbyin pa la sogs pa thabs la mkhas pa'i stobs kyis 'khor ba dang mya ngan las 'das pa la mi gnas pa'i mtshan nyid kyis shes rab dang thabs dag gi yin no//de'i 'og tu de dag skyes pas nyan thos la sogs pa dang thun mong ma yin pa'i chos kyi yin no/ /de'i 'og tu bsam pa ji lta ba bzhin du gzhug pa la sogs pa la ldem por dgongs pa'i sgo nas theg pa gsum gyi lam la dgod pa'i mtshan nyid kyis gzhan gyi don gyi go rims kyi yin no//de'i 'og tu 'khor ba ji srid par mtshan ma med cing lhun gyis grub par gzhan gyi don gyi ye shes 'byung ba'i rten yin no/ /de bas na de ltar rtogs pa'i go rims yin pa'i phyir 'di ni go rims yin no/ /'dis kyang rtogs pa'i chos thams cad bsdus pa yin pa'i phyir 'di dag kho na bstan gyi ma tshang ba dang lhag par yang ma yin no//de bzhin kun rdzob tu rten gyi dngos po 'phangs pa yin pa'i phyir shes rab kyi pha rol tu phyin pa 'dir don 'di thams cad 'phangs pa nyid yin par shes par bya'o/ /nyi khri lnga stong pa las rten gyi dbang du mdzad nas don re re zhing bstan pa'i shes par byed pa nyid kyi gzhung yod mod kyi/'dir ni gzhung mangs kyis 'jigs pas ma bris so/ /de skad du yang / rtogs pa yi ni chos drug dang / /gnyen po dang ni spong ba dang / /de dag yongs su gtugs pa dang / / shes rab snying brtser bcas pa dang / /slob ma thun mong min nyid dang / /gzhan gyi don gyi go rims dang / /ye shes rtsol ba mi mnga' bar/ /'jug pa'i rten la rigs zhes bya/ /zhes gsungs pa yin no/ /gal te chos kyi dbyings kho na 'phags pa'i chos rnams rtogs pa'i rgyu yin pa'i phyir de'i bdag nyid can gyi byang chub sems dpa' bla na med pa'i sangs rgyas kyi chos rnams kyi rang bzhin du gnas pa'i rigs chos nyid kyi ming can yin na/de'i tshe chos kyi dbyings kho na spyir gnas pa yin pa'i phyir 'di ni thog ma med pa'i dus nas 'ongs pa chos nyid kyis thob pa'i rang bzhin du gnas pa'i rigs so//'di ni sngon dge ba'i rtsa ba la goms pas thob pa yang dag par blangs pa'o/ /'di ni rkyen chen pos kyang mi 'phrogs pa'i phyir nyan thos dang rang sangs rgyas dang de bzhin gshegs pa'i rigs su nges pa yin no/ /'di ni rkyen gyis 'phrogs pa'i phyir nyan thos la sogs pa'i rigs su ma nges pa yin no zhes rigs kyi dbye ba tha dad par rung ba ma yin nam zhe na/ji ltar nyan thos la sogs pa'i theg pa rtogs pa'i rim gyis dmigs pa de bzhin du 'phags pa'i chos rtogs par bya ba'i phyir/ chos kyi dbyings rgyu'i ngo bor rnam par gzhag pa'i sgo nas rigs nyid du tha snyad 'dogs so zhes bya ba ni lan yin no//yang dper na 'jim pa gcig las mngon par grub cing me lce gcig gis so btang ba'i rten bum pa la sogs pa brten pa sbrang rtsi dang / kha ra la sogs pa'i snod du gyur pa nyid kyis tha dad pa de bzhin du rten pa'i chos theg pa gsum gyis bsdus pa rtogs par bya ba tha dad pa nyid yin pas rten tha dad pa nyid du btags pa la nyes pa med do//de skad du yang / chos kyi dbyings la dbyer med phyir/ /rigs ni tha dad rung ma yin/ /rten pa'i chos kyi bye brag gis/ /de yi dbye ba yongs su brjod//ces gsungs pa yin no/ /nges pa'i tshig ni yon tan sgrol ba'i don gyis na chos kyi dbyings la rigs zhes bya ste de las yon tan de dag skye zhing 'byung ba yin no zhes bya ba'i tha tshig go/ /de'i phyir 'phags pa'i gang zag thams cad ni 'dus ma byas kyis rab tu phye ba yin no zhes nges pa'i tshig ni sems bskyed pa dang thar pa dang nges par 'byed pa'i cha dang mthun pa la sogs pa rnams kyi sngon du 'gro ba de yin pas/dang po kho nar rigs bshad par bya ba ma yin nam/ ci'i phyir 'di ltar bshad ce na/ de ni bden mod kyi/ de ni don gyi go rims yin la/'di ni dang po 'bras bu bshad nas rgyu phyis bstan pa yin pas bshad pa'i go rims yin pa'i phyir nyes pa med do/ /rten gyi 'og tu ji skad du bshad pa'i sgrub pa'i rten du gyur pa'i byang chub sems dpa'i dmigs pa gang yin snyam pa la dmigs pa bstan pa'i phyir rab 'byor byang chub sems dpa' sems dpa' chen po ni chos thams cad ces bya ba la sogs pa gsungs pa yin te/gang gi phyir dmigs pa'i gnas su gyur pa'i chos thams cad khong du chud par bya ba'i phyir rjes su rtogs pa'i don du na bden pa gnyis las ma 'das par yang dag par dmigs pas na chags pa med pa der gyur pa na dmigs pa rnam par dag pa rtogs pas bla na med pa yang dag par rdzogs pa'i byang chub mngon par rdzogs par 'tshang rgya bar 'gyur gyi gzhan du ni ma yin pa de'i phyir byang chub la dmigs pa'i dgongs pas rang gi don rnam pa thams cad phun sum tshogs pa'i phyir byang chub sems dpa' zhes bya bar bshad do//de la re zhig dang por spyir dge ba dang mi dge ba dang lung du ma bstan pa'i chos thams cad de go rims bzhin du dge sbyong gi tshul nyid dang / srog gcod pa la sogs pa dang / lung du ma bstan pa'i lus kyi las la sogs pa ste/de ltar rnam pa gsum du phye ba la blang bar bya ba dang / spang bar bya ba dang / btang snyoms su bya ba'i gnas nyid du rnam par bsgom mo/ /de nas yang blang bar bya ba nas bzung ste 'jig rten pa'i lam gyis bsdus pa nye bar len pa'i phung po lnga la sogs pa ni 'jig rten pa dang yang dag pa'i 'phags pa'i lam gyis bsdus pa bsam gtan bzhi la sogs pa ni 'jig rten las 'das pa'i yin no zhes sems par byed do//de la bdag tu lta ba'i gnyen po ma yin pa nyid kyis nye bar len pa'i phung po lnga la sogs pa ni zag pa dang bcas pa yin la/bdag tu lta ba'i gnyen po nyid kyis dran pa nye bar gzhag pa la sogs pa 'jig rten las 'das pa rnams ni zag pa med pa yin no zhes spang ba dang blang bar bya ba nyid du nges par rtog par byed do/ /des na zag pa med pa nas brtsams te rgyu dang rkyen la rag las pa 'dod pa'i khams su gtogs pas bsdus pa dang byang chub kyi phyogs la sogs pa ni kun rdzob tu 'dus byas yin la/rgyu la mi ltos pa khams gsum par ma gtogs par de bzhin nyid la sogs pa ni don dam par 'dus ma byas yin no zhes rnam pa gnyis su sgom par byed do/ /de nas 'dus ma byas kyis rab tu phye ba 'phags pa'i skye bo thams cad kyi rgyud las 'byung ba'i bsam gtan bzhi la sogs pa ni thun mong gi chos yin la/yang dag par rdzogs pa'i sangs rgyas kyi rgyud las 'byung ba'i chos can stobs bcu la sogs pa ni thun mong ma yin pa'i chos rnams yin no zhes rnam pa gnyis su sgom par byed do//de lta bu'i rtogs pa'i rim gyis chos thams cad sgyu ma lta bur ji lta ba bzhin du dmigs pas na dmigs pa ni rnam pa bcu gcig po 'di kho na yin par shes par bya'o/ /ji skad du bshad pa'i dmigs pa'i rim pa ston pa'i gzhung yang / stong phrag nyi shu lnga pa la sogs pa las gsal ba kho nar 'byung ba las log par khong du chud par mi bya'o//de skad du yang / dmigs pa chos rnams thams cad de/ /de yang dge ba sogs pa yin/ /'jig rten pa yi rtogs pa dang / /gang dag 'jig rten 'das 'dod dang / /zag bcas zag pa med chos dang / /gang dag 'dus byas 'dus ma byas//slob ma thun mong chos rnams dang / /gang dag thub pa'i thun mong min/ /zhes gsungs pa yin no/ /gang yang chos kyi dbyings rtag tu rnam par dag pa gnyis su med pa'i ye shes nyid ni dmigs pa yin no snyam du sems pa de dag gis rtag tu rnam par dag pa nyid yin pa'i phyir gong nas gong du rnam par dag pa'i khyad par du 'gro bar ji ltar brjod par bya/chu khams gser dang nam mkha' rnams/ /dag pa bzhin du dag par 'dod/ /ces bya ba yin no zhe na/ de lta na ni dag pa ni de kho na nyid kyi ye shes yin no zhes gnyen po'i khyad par la mngon par zhen pa yin pa'i phyir mi mthun pa'i phyogs la mngon par zhen pa'i don gyis 'phangs pa yin no//de bas na mi mthun pa dang gnyen po'i phyogs kyi rnam par rtog pa spangs pa med pas phyogs gcig pa'i dag par thal bar 'gyur ro/ /khyed kyi phyogs ltar na yang rab 'byor rnam pa thams cad mkhyen pa nyid kyi dmigs pa ni dngos po med pa yin no zhes bya bas dmigs pa mthar thug pa ji ltar yin zhe na nyes pa med de/gang gi phyir rigs pa'i rjes su 'gro ba'i dngos po med pa'i phyir na dngos po med pa ni yang dag pa'i kun rdzob yin par brjod la/de kho na nyid kyi rang bzhin bsgribs pa de rim gyis sgyu ma lta bur rtogs pa ni rnam par dag pa yin no/ /de ltar byas na rang bzhin gtso bor gyur pa ni rigs yin la/ rnam par 'gyur ba gtso bor gyur pa ni dmigs pa yin pas/ gnyi ga yang gnyi ga yin pa la ni dgag pa med do zhes bya ba ni rten dang dmigs pa'i mtshan nyid kyi dbye ba yin no//dmigs pa rnam par gzhag pa la brjod par bya ba mang du yod mod kyi/ shin tu spros pas chog go zhes 'phags pa rnam grol sdes gsungs so/ /dmigs pa'i rjes thogs nyid la dmigs pa rtogs zer ba'i byang chub sems dpa'i ched du bya ba gang yin snyam na ched du bya ba bstan pa'i phyir bcom ldan 'das kyis gang 'di skad du zhes bya ba la sogs pa gsungs te/rgyu ci'i slad du zhes bya ba ni dgos pa ci zhig gis na byang chub sems dpar gyur pa la byang chub sems dpa' sems dpa' chen po zhes bgyi lan du bka' stsal pa ni/sems can gyi zhes bya ba la sogs pa'o/ /sems can gyi phung po chen po dang zhes bya ba ni/ sems can gyi tshogs tshad med pa zhes spyir brjod pa'o/ /'khor ba thog ma med par 'jug pa gcig kyang che ba nyid kyis chen por gyur pa yin pa'i phyir phung po zhes smos so//sems can gyi rigs chen po zhes bya ba ni zhugs pa dang 'bras bu la gnas pa'i ris la sogs pa'i dbye bas rigs mi mthun pa las bzlog pas/ sems can spyi las skal ba mnyam pas bsdus pa'i sems can gyi khyad par brjod pa yin no//mchog nyid du'o zhes bya ba ni/ de'i ched du byas nas zhugs pa'i phyir sems can thams cad kyi mchog nyid kyi sems che ba nyid rtogs nas spyir de thob par 'dod pa'i sems can rnams la chos ston pa la sogs pas mchog nyid rdzogs par byed pa'o/ / de'i phyir de zhes bya ba rgyu des na byang chub sems dpa' sems dpa' chen po ste/ 'di la sems che ba yod pa'i phyir sems dpa' chen po zhes bya'o/ /sems chen po yod pa la ni spong ba chen po nyid yod pas spong ba chen po bstan par bya ba'i phyir bla ma la rag las pas na gnang ba zhu ba'i don du/ shA ri'i bus bcom ldan 'das bdag kyang zhes bya ba la sogs pa gsol to//don gang gi slad du byang chub sems dpa' sems dpa' chen po zhes bgyi ba'i tshig gi don de'i don la bcom ldan 'das bdag kyang spobs par 'tshal lo/ /kyang zhes bya ba'i sgra'i don ni bcom ldan 'das 'ba' zhig tu ma zad kyi zhes bya ba'o//rjes su gnang ba nyid kyi don du shA ri'i bu da de'i dus la bab par shes na zhes bya ba la sogs pa gsungs pa yin te/ don gang smra bar bya ba'i phyir da zhes bya ba da ltar dus la bab pa ste/ skabs yin par shes na don de la spobs par byos shig ces bya ba yang dag par mngon du phyogs par gyis shig pa'o//gnang ba thob pa dang bdag tu lta ba chen po dang zhes bya ba la sogs pa gsol te/ de la nga rgyal gyi gzhir gyur pa'i don gyis na bdag ste 'di la nga rgyal skye ba'i phyir ro/ /'jig pa'i bdag nyid can yin pa'i phyir sems can no/ /srog gi dbang po'i dbang gis skal ba mnyam pa'i ris yongs su rdzogs kyi bar du gnas pas na srog go//'gro ba rnams su yang dang yang du gnas pas na gang zag go/ /'byung bar 'gyur bas na 'byung ba'o/ /med par 'gyur bas na 'jig pa'o/ sngon byung ba da ltar med pas na chad pa'o//ngo bo nyid kyi yod pa gang yin pa de med par mi 'gyur ba'i phyir rtag pa'o/ /bdag dang bdag gi ba'i rnam pas phung po lngar lta ba ni rang gi lus su lta ba'o/ /'di lta bu la sogs pa'i lta ba zhes bya ba ni ji skad du bshad pa'i lta ba la sogs pa log par lta ba dang tshul khrims dang brtul zhugs mchog tu 'dzin pa la sogs par lta ba bdag la sogs pa dang chos sgro btags pa'i rnam pa la mngon par zhen pa'i rang bzhin spang ba'i slad du zhes bya ba bag chags dang bcas pa yongs su dor bar bya ba'i phyir chos bstan to snyam pas na zhes bya ba spangs pa chen po dang rtogs pa chen po nyid thob pas zhes bya bar bsams pa ste/gzhan du na de kho na nyid lkog tu gyur pas de bshad par dka' ba yin pa'i phyir ro/ /de'i slad du zhes bya ba ni de'i phyir zhes bya ba'i don to/ /'dod chags la sogs pa ma lus par spangs pa la rtogs pa khyad par can yod pas de bzhin du rtogs pa chen po nyid bshad pa ni bcom ldan 'das bdag kyang don gang gi slad du byang chub sems dpa' sems dpa' chen po zhes bgyi bar spobs so zhes bya ba'o//kyang zhes bya ba'i sgra ni gzhan 'ba' zhig tu ma zad do zhes bya ba'o/ /byang chub kyi sems zhes bya ba ni byang chub don du gnyer ba'i sems te/smon pa dang 'jug pa'i bdag nyid can gyi sems zhes bya ba'i don to/ /thams cad mkhyen pa'i sems zhes bya ba ni thams cad mkhyen pa la gzhol ba'i sems te/ lhag par mos par byed pas mos pa spyod pa'i sas bsdus pa'o/ /rnam par mi rtog pa 'jig rten las 'das pa'i ye shes so sor rtogs pa'i phyir zag pa med pa'i sems te sbyor ba'i sa bdun pa la bsam pa rnam par dag pa'o//mnyam pa med pa'i sems zhes bya ba ni mtshan ma med cing lhun gyis grub par 'jug pa nyid kyis mnyam pa med pa'i sems te/ sa brgyad pa la sogs par smin pa las byung ba'o//mi mnyam pa'i sangs rgyas rnams dang mnyam zhing mtshungs pa'i sems ni mi mnyam pa dang mnyam pa'i sems te/ sgrib pa thams cad spangs pa sangs rgyas kyi sar gtogs pa'o/ /yang na byang chub kyi sems ni ma skyes pa'i ngo bo byang chub kyi rang bzhin du gyur pa'i sems so//de nyid du rnal 'byor pa'i kun rdzob tu me long lta bu la sogs pa'i ye shes dang 'brel pas ldog pa'i cha 'ga' zhig gis thams cad mkhyen pa'i sems la sogs pa rnam pa bzhir bshad do/ /'di dag thams cad kyang nyan thos dang rang sangs rgyas thams cad dang thun mong ma yin pa'o//sems de la yang zhes bya ba ni don che ba nyid yin pa'i phyir phyogs su lhung bar 'ongs pa'i sems de lta bu la ma chags pa ste mngon par ma zhen pa'o/ /yongs su ma zin pa ni mi gnas pa'o/ /de ltar na 'dis ni rtogs pa che ba nyid bstan pa yin no/ /yang gi sgra ni gzhan dag la ha cang yang ches bya ba yin no//mngon par zhen pa med pa dang gnas pa med pa la bsgom pa mi 'thad pas gnyis po 'di dag ji ltar yin snyam pa'i dogs pa de ci'i slad du zhe na zhes bya bas bsu nas 'di ltar zhes bya ba la sogs pa gsungs te/ gang gi phyir brjod ma thag pa'i thams cad mkhyen pa nyid kyi sems de ni sngar brjod pa'i sems thams cad nye bar mtshon pa lhur byed pa dang chags pa'i gnyen por gyur pas zag pa med pa dang /gnas pa'i gnyen por gyur pas mi gnas pa yin pa de'i phyir sgyu ma'i skyes bu lta bur sgom par byed do zhes bya bar bsams pa'o/ /sems gang yin pa'i sems de la yang zhes bya ba la sogs pa ni mjug bsdu ba yin no//zag pa med pa yin du zin kyang dngos po yod pas mngon par zhen pa med pa la sogs par mi rigs so zhes brjod pa ni tshe dang ldan pa rab 'byor ci'i phyir zhes bya ba la sogs pa'o/ / de kho na nyid du ma skyes pa'i phyir ro/ /shA ri'i bus smras pa zhes bya ba nas/nyon mongs pa med par gnas pa rnams kyi mchog tu gsungs pa ltar ston pa legs so legs so zhes bya ba'i bar ni bshad zin to/ /don gzhan gyi skabs las 'phros pa yin pa'i phyir zlos pa'i nyes pa yod pa ma yin no/ /de skad du yang slob dpon phyogs kyi glang pos/ / slar yang don gzhan la brten nas/ /don de nyid ni bzlas pa yin/ /zhes bshad pa yin no/ /des na de ltar rgyal ba ma pham pa'i ched du bya ba dang chos mthun par byang chub sems dpa'i sgrub pa'i ched du bya ba rnam pa gsum bstan pa yin par shes par bya'o/ /dmigs pa dang ched du bya ba la khyad par ci zhig yod ce na/'phags pa rnam par grol ba'i sdes mda' ltong sbyor ba dang 'bem la phog pa dang 'dra bar de'i tshe nye ba na gnas pa na dmigs pa yin la/ phyis kyi thag ring ba ni phyed du bya ba yin no zhes bshad do/ /de skad du yang / sems can kun mchog nyid sems dang //spangs dang rtogs dang gsum po la / /chen po gsum gyi rang byung gi/ /ched du bya ba 'di zhes bya/ /zhes bya ba gsungs pa yin no/ /ched du bya ba'i rjes la da ni rdzogs par bya ba'i phyir sgrub pa brjod par bya'o/ /de yang thams cad mkhyen pa nyid gsum gyi yul la spyir dge ba'i chos kyi rten can dang /rnam pa kun mngon par rdzogs par rtogs pa la sogs pa rnam pa bzhi la mngon par rtogs pa re re zhing pha rol tu phyin pa drug gi rten can gyi bya ba ni sgrub pa yin no/ /chos kyi sku'i mngon par rtogs pa la ni ma yin te 'bras bu nyid yin pas de la bya ba yod mi srid do/ /de la 'phags pa thogs med kyis go cha dang 'jug pa'i sgrub pa dag ni go rims bzhin du brgyud pa dang dngos su sbyor ba'i rang bzhin tshogs dang mos pas spyod pa'i sas bsdus pa yin no//tshogs kyi sgrub pa ni brtse ba nas brtsams te gzungs kyi bar ni mngon sum du sbyor ba'i lam gyi rang bzhin chos kyi mchog chen pos bsdus pa yin no//sa dang po rab tu dga' ba'i rang bzhin du gyur pa'i tshogs kyi sgrub pa ni bsgom pa'i lam la brten pa yin no zhes bshad do/ / gnyis pa la sogs pa'i rang bzhin ni bsgom pa'i lam gyi ngo bo yin zhing gnyen po'i phyogs kyi bdag nyid can gyi tshogs kyi sgrub pa ni lam gnyi ga'i spyod yul can yin no//nges par 'byung ba'i sgrub pa ni bsgom pa'i lam la brten pa yin no zhes bshad do/ /de ltar sbyor ba dang mthong ba dang bsgom pa dang khyad par gyi lam gyi rang bzhin sgrub pa'i mtshan nyid go cha dang 'jug pa dang tshogs dang nges par 'byung ba rnams kyi nang nas brtson 'grus kyi ngo bo nyid yin pas dang po go cha'i sgrub pa bstan pa'i phyir de nas bcom ldan 'das la tshe dang ldan pa gang pos zhes bya ba la sogs pa gsungs pa yin te/gang po byams ma'i bus zhes bya ba ni gang po nyid la ming gzhan du na byams ma'i bu zhes bya'o / /yang na rang gi ma byams ma zhes bya ba'i bu yin pas na byams ma'i bu'o//gang lags pa 'di ni zhes bya ba ni 'das ma thag pa'i dngos po gang yin pa'o/ /go cha chen po bgos pa zhes bya ba ni go cha'i sgrub pa 'di don gyis 'phangs pa yin te/ 'di ltar byang chub sems dpa' sbyin pa'i pha rol tu phyin pa la spyod pa na chos kyi sbyin pa la sogs pa sbyin par byed pas sbyin pa'i pha rol tu phyin pa'i go cha yin no//de nyid nyan thos la sogs pa'i yid la byed pa yongs su spangs pas tshul khrims kyi pha rol tu phyin pa'i go cha'o/ /de nyid rnam pa thams cad mkhyen pa nyid kyi chos rnams la bzod pa dang mos pa dang nye bar rtogs pa dang skye bo thams cad kyi mi snyan par smra ba nyid bzod pas na bzod pa'i pha rol tu phyin pa'i go cha'o//de nyid dge ba'i rtsa ba gong nas gong du mngon par 'phel bar bya ba'i phyir 'dun pa la sogs pa bskyed pas na brtson 'grus kyi pha rol tu phyin pa'i go cha'o/ /de nyid theg pa gzhan dang ma 'dres pa'i sems rtse gcig pa nyid kyis dge ba'i rtsa ba de bla na med pa yang dag par rdzogs pa'i byang chub tu sngo bar byed pa la dmigs pas bsam gtan gyi pha rol tu phyin pa'i go cha'o//de nyid sgyu ma'i rnam pa lta bu'i 'du shes la nye bar gnas pas sbyin par bya ba dang sbyin pa po dang len pa po nye bar ma dmigs pa ni shes rab kyi pha rol tu phyin pa'i go cha'o//de ltar na go cha'i sgrub pa dang po la sbyin pa'i pha rol tu phyin pa drug pa'o/ /de bzhin du de nyid kyis tshul khrims kyi pha rol tu phyin pa la spyod pa ni gnyis pa'o/ /bzod pa'i pha rol tu phyin pa la spyod pa ni gsum pa'o/ /brtson 'grus kyi pha rol tu phyin pa la spyod pa ni bzhi pa'o//bsam gtan gyi pha rol tu phyin pa la spyod pa ni lnga pa'o/ /de nyid kyis shes rab kyi pha rol tu phyin pa la spyod pa ni drug pa yin no/ /de ltar na de dag so sor drug tshan drug tu 'gyur mod kyi/ go cha drug chos mthun pa dang sbyin pa la sogs pa chos mthun pa'i phyir go cha'i sgrub pa ni rnam pa drug tu bshad do//stong phrag nyi shu rtsa lnga pa las kyang go cha'i sgrub pa bstan pa la sbyin pa la sogs pa drug tshan drug tu gsal po kho nar bstan pa nyid yin pas so / /de la dang por longs spyod la ltos pa med na tshul khrims yang dag par len par byed do/ / tshul khrims rjes su bsrungs na bzod par 'gyur ro/ /sdug bsngal bzod na brtson 'grus rtsom mo/ /le lo dang bral na bsam gtan rdzogs par byed do/ /bsam gtan phun sum tshogs pa ni 'jig rten las 'das pa'i shes rab thob par 'gyur ro/ /de lta bu la sogs pa ni rtogs pa'i rjes su 'brangs nas bstan par 'dod pa'i phyir na rim pa 'di nyid yin no//de skad du yang / de dag so sor sbyin la sogs/ /rnam pa drug tu bsdus pa yis / /go cha'i sgrub pa gang yin de/ /drug tshan drug gis ji bzhin bshad/ /ces gsungs pa yin no/ /de ltar go bgos pa la 'jug pa 'byung bas gnyis par 'jug pa'i sgrub pa bstan par bya ba'i phyir/sems dpa' chen po de theg pa chen po la yang dag par zhugs pa theg pa chen po la yang dag par gnas pa zhes bya ba gsungs te/ theg pa'i sgra ni las dang byed pa sgrub pa nyid yin pa'i phyir dang po 'jug pa'i sgrub pas theg pa chen po rgyu dang 'bras bu'i bdag nyid can gyi chos la 'jug pa yin la phyis gong nas gong du khyad par rtogs pas yang dag par gnas pa yin pas tshig gnyis smos so//de yang 'jug pa'i sgrub pa 'di don gyis 'phen pa yin te/ 'di lta ste dang po sems brtan par byas pas rang gi rnam pa dang rtags dang mtshan ma rnams kyis bsam gtan dang gzugs med pa la snyoms par 'jug pa dang ldan pa'i 'jug pa yin no//de'i 'og tu sems brtan par gyur pa ni bsod nams dang ye shes kyi tshogs la slob par bya ba'i phyir sbyin par bya ba dang sbyin pa po dang len pa po la sogs pa 'khor gsum yongs su dag pas pha rol tu phyin pa drug gi 'jug pa'o//de'i 'og tu bsod nams dang ye shes kyi tshogs bsags pa kho na la lhag par mos pa'i phyir mthong ba dang bsgom pa dang mi slob pa dang khyad par gyi lam gyi rang bzhin 'phags pa'i lam gyi 'jug pa'o//de'i 'og tu chos nyid la gzhol ba ni bsam pa ji lta ba bzhin du gzhan gyi don byed pa'i phyir byams pa la sogs pa tshad med pa bzhi'i 'jug pa'o/ /de'i 'og tu gzhan gyi don la 'jug pa'i 'ching ba ni dmigs pa yin pa'i phyir mi dmigs pa la sbyor ba'i 'jug pa'o/ / de'i 'og tu ngo bo nyid med pa'i rnal 'byor dang ldan pa ji ltar 'jug ces las dang byed pa po dang bya ba ma dmigs pas sgyu ma'i skyes bu bzhin du dngos po thams cad la 'khor gsum yongs su dag pa'i 'jug pa'o/ /de'i 'og tu de ltar yongs su dag par spyod pa rnams rang gi bsgrub par bya ba la 'bad pa'i phyir sems can kun gyi mchog nyid kyi sems chen po la sogs pa ched du bya ba rnam pa gsum gyi 'jug pa'o//de'i 'og tu ched du bya ba la 'bad pa byas pa rnams ni gzhan gyi sems shes pa la sogs pa la brtson par byed pa yin pa'i phyir lha'i mig la sogs pa mngon par shes pa drug gi 'jug pa'o//de'i 'og tu mngon par shes pa thob pa rnams ni 'tshang rgya ba nyid du spro ba yin pa'i phyir rnam pa thams cad mkhyen pa nyid kyi 'jug pa yin te/ de ltar na rtogs pa'i rim gyis yang dag par gnas pa'i mtshan nyid can theg pa chen po'i chos mtha' dag gnon pa'i ngo bo nyid 'jug pa'i sgrub pa ni rnam pa dgu nyid du 'gyur ba yin no//ji skad du bshad pa'i sgrub pa ston par byed pa'i gzhung stong phrag nyi shu lnga pa las gsungs pa ni gzhung mangs kyis dogs par 'gyur bas 'dir shes par byed par ma bris so/ /de skad du yang / bsam gtan gzugs med sbyin sogs dang //lam dang byams pa la sogs dang / /dmigs pa med dang ldan pa dang / /'khor gsum rnam par dag pa dang / /ched du bya dang mngon shes drug /rnam kun mkhyen pa'i tshul la ni/ /'jug pa'i sgrub pa theg chen la/ /'dzeg pa yin par shes par bya/ /zhes gsungs pa yin no//de'i slad du zhes bya ba ni cho ga dang 'jug pa'i sgrub pa dag dang ldan pa'i phyir ro/ /grangs su mchi'o zhes bya ba ni btags par ro/ /'di skad du gang gi phyir go cha dang 'jug pa'i sgrub pa gnyis dang ldan pa de'i phyir sems dpa' chen po zhes btags pa yin no zhes brjod pa yin no//de ltar 'jug pa byas pa la tshogs skye ba yin pa'i phyir gsum pa tshogs kyi sgrub pa ni bcu bdun du brjod par bya'o/ /de skad du yang / brtse dang sbyin la sogs pa drug /zhi gnas lhag mthong bcas pa dang / /zung du 'brel pa'i lam gang dang / /thabs la mkhas pa gang yin dang //ye shes dang ni bsod nams dang / /lam dang gzungs dang sa bcu dang / /gnyen po'i tshogs kyi sgrub pa yi/ /rim pa yin par shes par bya/ /zhes bya ba gsungs pa yin no/ /de lta bas na de bstan par bya ba'i phyir zhus pa ni/ go cha chen po bgos pa zhes bya ba la sogs pa smos so//ji tsam gyis na zhes bya ba ni grangs ji tsam du nges par 'chad pa'i don gyi chos gzhan dang ldan pas zhes khong nas dbyung ngo / /gang gi phyir go cha'i sgrub pa dang snying rje la sogs pa'i tshogs kyi sgrub pa dang ldan pa go cha chen po bgos pa yin no zhes bcom ldan 'das kyis stong phrag nyi shu lnga pa las gsungs pa de las don gyis 'phangs pa'i go cha'i sgrub pa dang ldan pa go cha chen po bgos pa yin no zhes ni bstan ma thag pa yin la da ltar ni snying rje la sogs pa'i tshogs dang ldan pa la yin pas nyes pa med do//khong nas phyung ba'i tshig gi lan btab pa ni rab 'byor 'di la zhes bya ba la sogs pa gsungs pa yin te/'di la zhes bya ba ni tshig gi nye bar dgod pa la'o/ /'di snyam du zhes bya ba ni sems 'di lta bur skye ba'o/ /de nyid ni bdag gi zhes bya ba la sogs pa gsungs pa'o/ /mngon sum la sogs pa'i tshad mas gzhal bar mi nus pa'i phyir gzhal du med pa'o//bsam pa ji lta ba bzhin du theg pa gsum gyi mya ngan las 'da' ba thob par byed pa'i phyir yongs su mya ngan las 'da' ba'o/ /grangs med pa zhes bya ba ni gcig nyid la sogs pa'i grangs dang bral ba'o/ /'di skad du ston te snying brtse ba dang bral zhing thabs dang mi ldan pas ni gzhan 'ga' zhig kyang mya ngan las zlo ba mi srid pa'i phyir te/snying rjes yid gdungs pa rnams sbyin pa'i pha rol tu phyin pas 'das pa'i dus kyi bde ba nye bar sgrub pa dang / tshul khrims kyi pha rol tu phyin pas ma 'ongs pa'i bde ba nye bar sgrub pa dang / bzod pa dang / spro ba dang sems rtse gcig pas 'bras bu gcig tu nges pa thob pa yin pa'i phyir bzod pa dang /brtson 'grus dang / bsam gtan gyi pha rol tu phyin pa rnams kyis gcig tu nges pa'i bde ba nye bar sgrub pa dang / shes rab kyi pha rol tu phyin pas gtan du ba'i bde ba nye bar bsgrubs pas na/ thabs su gyur pa sbyin pa la sogs pa pha rol tu phyin pa drug po rnams kyis rjes su bzung nas bdag nyid pha rol tu phyin pa drug la gnas pa dang 'dra bar/ de nyid la yang dag par sbyor ba dang 'jog pa dang rab tu 'jog pas mi g.yel bas rab tu gzhag par bya'o zhes bya ba ni don gyis 'phangs pa yin no zhes brjod pa yin no//de ltar na tshogs bdun bstan par gyur pa yin te/ 'di ltar snying rje'i tshogs dang / sbyin pa'i tshogs dang / tshul khrims kyi tshogs dang / bzod pa'i tshogs dang / brtson 'grus kyi tshogs dang / bsam gtan gyi tshogs dang / shes rab kyi tshogs so/ /de yang ting nge 'dzin thob pas byed pa po dang las su nye bar dmigs pa med do zhes gsungs pa ni/gang gis gang yongs su mya ngan las 'da' ba'i sems de dag kyang 'ga' yang yod pa ma yin no zhes bya ba'o/ /de lta na ni dmigs su med do zhe na/ des zhes bya ba la sogs pa gsungs so/ /snying rje la sogs pa'i tshogs dang ldan pa'i byang chub sems dpa' des sems can gzhal du med pa grangs med pa ji snyed pa de dag kun rdzob tu yongs su mya ngan las zlo bar byed pa'o//gal te de lta na ni dmigs par 'gyur ro zhe na/ gang gis gang yongs su mya ngan las 'das pa'i zhes bya ba la sogs pa gsungs te/don dam par dmigs su med pa'i phyir ro zhes bya bar dgongs so/ /dngos po gcig la dmigs pa dang / dmigs pa med par ji ltar rung snyam pa'i dogs pa de de ci'i phyir zhes bya bas bsu nas/ rab 'byor sgyu ma'i chos nyid ces bya ba la sogs pa gsungs so/ /dper na sgyu ma'i chos nyid ni mthong ba ji lta bar bden gyi rigs pas mi 'thad pa'i phyir mi bden pa yin te/des na rigs pa'i 'jug pas sun ma phyung la/ 'jig rten thams cad kyis snang ba tsam du gtogs pa ste dpe nyid du nye bar bzung zhing blangs pa de bzhin du gzugs la sogs pa chos rnams kyi chos nyid 'di yin pa'i phyir te/yul tha dad pa las ldog pa la ltos nas rab tu brtags pas na dmigs pa dang mi dmigs pa rang bzhin 'gal ba med pa yin pa'i phyir te 'gyur ba'i phyir ro/ /yul gcig la ldog pa la ltos te chos gnyi gar rtogs na ni nyes par 'gyur ro zhes dgongs pa'o/ /gnyis po 'di dag ni phan tshun du phyin ci log pa bsal bar bya ba'i phyir gsungs pa yin gyi/de kho na nyid du ni ma yin te/ sngar ji skad bshad pa bzhin no/ /'dis ni zhi gnas kyi tshogs bstan to/ /zhi gnas thob pa rnams la lhag mthong skye bas lhag mthong gi tshogs ni/rab 'byor dper na zhes bya ba la sogs pa gsungs te/ mkhas pa ni byang ba'o/ /sgyu ma byed pa'i nye gnas ni de'i slob ma'o/ /lam po che'i bzhi mdor zhes smos pa ni/ sgyu ma sprul pa'i gnas kyi gtso bo yin pa'i phyir ro/ /skye bo'i tshogs chen po ni sems can gyi tshogs rnams so/ / mngon par sprul te zhes bya ba ni sprul par byed pa'o/ /mi snang bar byas na zhes bya ba ni nye bar bsdus pa'o/ /de ji snyam du sems zhes bya ba ni 'das ma thag par gsungs pa'i don gyi tshogs de la ji snyam du sems shing khong du chud ces spyir dri ba mdzad nas/ 'on te 'di snyam du sems sam zhes gsungs pa ni de la chos gang yang zhes bya ba la sogs pa'o//de la zhes bya ba ni skye bo'i tshogs de'i nang nas so/ /gang gis zhes bya ba ni sgyu ma byed pa la sogs pas so/ /gang yang zhes bya ba ni lha sbyin la sogs pa'o/ /bsad pa 'am zhes bya ba ni tshe nyams pa'i sbyor bas so/ /shi ba ni thams cad du rgyun chad pas so//bshig pa ni lus ma tshang ba'i sbyor bas so/ /mi snang bar byas pa ni mi mthong bar byas pa'o/ /yod kyi sgra ni de lta bu'i don la yin la/ dam pa'i sgra ni srid pa la yin no/ /'di snyam du de kho na nyid du na chos can med pas 'di dag thams cad yod pa ma yin gyi/ ji ltar mthong ba ni srid pa nyid yin no zhes bya bar dgongs so//dgongs pa shes pa nyid kyis na bcom ldan 'das de ni ma mchis so zhes bya ba gsol to/ /de kho na nyid du na zhes bya ba ni lhag ma'o/ /dpe'i don rab tu bsgrub pa'i dngos po mngon par 'dod pa'i don la sbyor bar bya ba'i phyir/ rab 'byor de bzhin du zhes bya ba la sogs pa gsungs so//de la rgya cher bstan pa nye bar bsdu bar bya ba'i phyir gal te zhes bya ba la sogs pa gsungs te/ 'di lta bu zhes bya ba ni 'das ma thag pa'o/ /'di lta bu zhes bya ba ni kun rdzob dang don dam pa'i bden pa las ma 'das pas so/ /ji tsam gyis na zhes bya ba ni gang brjod pa de'i lan du 'di tsam gyis zhes gsungs pa yin no//'di skad ston te snying rje la sogs pa'i tshogs 'di tsam dang ldan pas kyang go cha chen po bgos pa zhes btags pa yin no zhes brjod pa yin no/ /lhag mthong gis stong pa nyid la dmigs pa na nyan thos la sogs pa'i byang chub tu ltung bar 'gyur bas de'i de ma thag tu zung du 'brel pa'i tshogs ni/kye ma bcom ldan 'das kyis ji ltar gsungs pa'i zhes bya ba la sogs pa gsol te / kye ma zhes bya ba'i sgra ni nges par bzung ba'o/ /bcom ldan 'das kyis ji ltar gsungs pa'i zhes bya ba ni sgyu ma'i chos nyid nye bar bzung na zhes bya ba la sogs pa'o//'di snyam du bcom ldan 'das kyis chos rnams kyi chos nyid ni 'di yin pa'i phyir zhes sgyu ma'i chos nyid khyab par byas pa'i rnam pa gang gis gsungs pa'i don bdag gis 'tshal ba'i rnam pa des na sgyu ma'i chos nyid las ma 'das pas byang chub sems dpa' sems dpa' chen po de ni go cha ma mchis pa'i go cha bgos pa lags pa'o snyam du bsams pa'o//phyin ci ma log pa nyid kyis zhal gyis bzhes pa'i phyir rab 'byor de de bzhin no zhes bya ba la sogs pa gsungs so/ /lhag mthong gis rnam pa thams cad mkhyen pa nyid dang / nam mkha' mdzod la sogs pa'i ting nge 'dzin gyis kyang sems can gyi don sgrub par go cha bgos pa ma yin nam/ji ltar na go cha med pa yin snyam du dogs pa de ci'i phyir zhe na zhes bya bas bsu nas/ rab 'byor zhes bya ba la sogs pa gsungs te/ ma byas pa zhes bya ba ni rig pas byed pa'i rgyu med pa'i phyir ro/ /rnam par ma bsgyur zhes bya ba ni 'jig pa'i rgyu med pa'i phyir ro//mngon par 'dus ma byas zhes bya ba ni lhan cig byed rkyen gnyi ga yod par mi 'thad pa'i phyir ro/ /yang na tshig gsum go rims bzhin du med pa las byung ba dang / de khyad par du 'gro ba dang / 'bras bu thob pa mngon du byed pa'i dbang du mdzad par shes par bya'o//rig pa ldan pa nyid kyis na khas blang ba'i phyir bcom ldan 'das de de bzhin no zhes bya ba la sogs pa gsol pa yin no/ /'ching ba dang grol ba yod na ma byas pa la sogs pa 'di ji ltar yin zhes 'ga' zhig rtsod pa'i dogs pa de ci'i slad du zhe na zhes bya bas bsu nas/bcom ldan 'das 'di ltar zhes bya ba la sogs pa smos pa yin te/ gzhan du khas blangs nas rnam par spyod pa mi 'thad pas 'di ma 'brel par 'gyur ro/ /de bzhin du gzhan dag la yang brjod par bya'o/ /lhag par sgro btags pa'i rnam pas 'jug pa sems dang sems las byung ba khams gsum pas bcings pa med pa'i phyir gzugs ni ma bcings pa'o//ji skad du brjod pa'i rtogs pa dang bral ba med pas grol ba med pa'i phyir ma grol ba ste/ gzugs la sogs pa de kho nar med pa'i phyir ro/ /'o na chos bcings pa dang grol bar 'gyur ro zhe na/bcom ldan 'das gzugs kyi zhes bya ba la sogs pa smos te/ chos can med na chos yod pa mi 'thad pas gzugs la sogs pa'i stong pa nyid ni ma bcings ma grol ba yin la/ ji ltar mthong ba ltar ni gzugs la sogs pa dang de'i de bzhin nyid dag bcings pa dang grol bar 'gyur ro zhes bya bar dgongs so//rab 'byor gyi bsam pa ma shes nas brgal ba'i sgo nas tshe dang ldan pa rab 'byor zhes bya ba la sogs pa brjod do/ /'dri ba'i bsam pa ni 'di yin te/ gzugs la sogs pa dang de'i de bzhin nyid ma bcings ma grol zhes zer na spyir ni de skad brjod par mi bya ste/mngon sum la sogs pa dang 'gal bar 'gyur ba'i phyir ro zhes bya ba'o/ /ji ste 'o na de khyad par du brjod pa yin no zhe na/ 'on te tshe dang ldan pa rab 'byor zhes bya ba la sogs pa smos so/ /rnam par brtag cing gzhig mi bzod pa nyid kyis na sangs rgyas dang byang chub sems dpa' la sogs pa nyid sgyu ma'i skyes bu yin no zhes bya ba'i bsam pa dang ldan pas spyi'i sgo nas/tshe dang ldan pa gang po sgyu ma'i skyes bu'i gzugs de zhes bya ba la sogs pa smras pa yin no/ /'di dag ji ltar na mngon sum la sogs pa dang 'gal bar thal bar mi 'gyur snyam pa'i dogs pa de ci'i phyir zhe na zhes bya bas bsu nas/yang dag pa ma yin pas na zhes bya ba la sogs pa smos so/ /kha cig na re rigs pas kun brtags pa'i gzugs la sogs pa ni yang dag pa ma yin pa'i phyir te brdzun pa nyid yin pa'i phyir dang / rnam par brtags pa ni dben pa'i phyir te/ rang gi ngo bo dang bral ba'i phyir dang / chos nyid kyi rang bzhin ni ma skyes pa yin pa'i phyir ma bcings ma grol ba zhes 'dod do/ /gzhan dag ni mngon sum dang rjes su dpag pa dang / lung gi tshad mas gzhigs na mi snang bas na/ de kho na nyid du skye ba la sogs pa rnam par bkag cing bsal bas yang dag pa ma yin pa la sogs pa'i tshig gsum yin no zhes zer ro//snang ba'i rang bzhin gang yin pa / /de ni dgag pa ma yin te/ /nyams su myong ba gang yin ni/ /dgag par rigs pa ma yin no/ /zhes bya ba'i tshul gyis ji ltar snang ba bzhin du bcings pa dang grol ba rnam par 'jog pa'i phyir mngon sum la sogs pa dang 'gal bar ga la 'gyur zhes bya bar bsams pa'o//'di dag ni zhes bya ba ni nye bar bsdu ba'o/ /go cha chen po ste go cha med pa'o zhes bya ba ni go rims bzhin du snying rje dang shes rab kyi stobs kyis kun rdzob dang don dam pa dag tu zhes bya ba ni lhag ma'o/ /lan med par cang mi smra bar gnas pa ni de skad ces smras pa dang zhes bya ba la sogs pa gsungs pa yin no//zhi gnas dang lhag mthong dag ni mi mthun pa yin pa'i phyir gcig la ji ltar srid ce na/ de lta ma yin te/ 'di ltar gang gi tshe zhi gnas kyis dmigs pa la sems brtan par gyur pa de'i tshe shes rab kyis rnam par dpyad pa la yang dag pa'i ye shes kyi snang ba skye bas snang ba byung bar gyur pa'i mun pa dang 'dra bar sgrib pa rnam par sel ba yin no//de bas na 'di gnyis ni mig dang snang ba dang 'dra bar yang dag pa'i ye shes skyed pa dang phan tshun rjes su mthun par gnas pa nyid yin pa'i phyir mun pa dang snang ba dang 'dra bar phan tshun 'gal ba ma yin no//ting nge 'dzin ni mun pa'i rang bzhin la yin gyi/ 'o na ji zhe na/ sems rtse gcig pa'i mtshan nyid yin la/ de yang mnyam par gzhag pas yang dag pa'i don ji lta ba bzhin du shes so zhes gsungs pas gcig tu shes rab dang rjes su mthun pa yin pa'i phyir 'gal ba med do//de ltar zung du 'jug pa'i lam gyi tshogs dang ldan pa la thabs mkhas pa la sogs pa 'byung bas thabs mkhas pa la sogs pa'i tshogs bstan par bya ba'i phyir zhu ba'i don du gleng slong ba ni/ bcom ldan 'das de ltar zhes bya ba la sogs pa smos pa yin no//sngar brjod pa'i tshul de ltar go cha chen po bgos par gyur pa ni theg pa chen po la yang dag par zhugs par 'gyur ro zhes gang gsungs pa de la theg pa chen po ma shes pa'i phyir na/ shes rab dang snying rje'i sbyor ba dang / de gnyis phan tshun tha mi dad pa dang /mi mthun pa'i phyogs las 'das pa dang gnas skabs nges pa dang / gnyen po'i phyogs kyi sbyor ba la shin tu sbyangs pa dang / rtogs pa po'i dbang du mdzad nas/ gang gang ltar gong nas gong du gang zhig nges par 'byung bar 'gyur zhes bya ba ni/ gang lags zhes bya ba la sogs pa ston pa'i dris pa drug yin no zhes 'phags pa rnam par grol ba'i sdes gsungs so//de la thabs mkhas pa la sogs pa'i tshogs bstan par bya ba'i phyir/ dris pa dang po'i lan ni/ rab 'byor theg pa chen po zhes bya ba la sogs pa gsungs pa yin te/ 'phags pa lang kar gshegs pa las/ /chos lnga dag dang rang bzhin dang //rnam par shes pa brgyad nyid dang / /bdag med gnyis kyi dngos por ni/ /theg pa chen po thams cad 'dus/ /zhes gsungs pa yin yang tshogs kyi skabs kyi stobs kyi thabs mkhas pa la sogs pa'i bdag nyid kyi tshogs gzhal du med pa la theg pa chen po zhes bya ba'i tshig bla dgas 'di gtsor btags pa yin no//yang ji ltar na thabs la mkhas pa la sogs pa'i tshogs la gzhal du med pa zhes bya zhe na/ 'di ni tshad ma med pa'i phyir ro zhes bya ba la sogs pa gsungs te/ ji skad du bshad pa'i dngos po nyid ni mngon sum la sogs pa'i tshad mas yongs su ma bcad pas na gzhal bar mi nus pa'o//'di skad ston te zung du 'jug pa'i lam gyi tshogs dang ldan pa ni rnam pa thams cad mkhyen pa nyid dang rab tu ldan pa'i yid la byed pas sems can gyi don byed pa'i phyir thabs la mkhas pa'i tshogs yin no/ /thabs la mkhas pa'i tshogs shes pa ni ye shes la slob pa yin pas ye shes kyi tshogs so//de yang nang stong pa nyid la sogs pa'i dbye bas rnam pa nyi shur shes par bya'o/ /de la stong pa nyid nyi shu ni 'di yin te/ 'di lta ste nang gi dngos po mig la sogs pa rnams kyi rang bzhin ther zug tu gnas pa dang 'jig pa ma yin pa'i phyir nang stong pa nyid do//phyi'i gzugs la sogs pa rnams kyi rang bzhin de lta bu yin pa'i phyir phyi stong pa nyid do/ /phyi dang nang gi bdag nyid can gyi skye mched rnams kyi rang bzhin de lta bu yin pa'i phyir phyi nang stong pa nyid do/ /de la nang gi skye mched rnams ni dbang po'i rang bzhin gyis bsdus pa gang yin pa'o//phyi ni yul gyi rang bzhin gyis bsdus pa gang yin pa'o/ /phyi nang ni dbang po'i rten gyis bsdus pa gang yin pa'o/ /de ni sems kyis zin pa nyid kyis na nang yin la/ dbang pos ma bsdus pa nyid kyis na phyi'ang yin no/ /stong pa nyid 'di gsum ni mos pas spyod pa'i sa la yin no//chos thams cad stong pa nyid kyis nang stong pa nyid la sogs pa la dmigs pa'i shes pa'i rang bzhin gyi stong pa nyid kyang stong pa nyid yin pa'i phyir stong pa nyid stong pa nyid do/ /chos thams cad stong pa nyid du shes pa tsam nyid ni chos thams cad stong pa nyid yin la/ des kyang stong pa nyid stong pa yin te der 'dzin pa'i rnam par rtog pa spong ba'i phyir ro//'di ni sbyor ba'i lam la'o/ /phyogs bcu po ni phyogs kyis stong pa nyid yin pa'i phyir chen po stong pa nyid de/ de rnams ni dbyibs che ba yin pa'i phyir ro/ /'di ni kun tu 'gro ba'i don gyis na sa dang po la'o/ /don dam pa mya ngan las 'das pa ni mya ngan las 'das pa'i don gyi rang bzhin gyis stong pa nyid yin pa'i phyir don dam pa stong pa nyid de/de ni bral ba tsam yin pa'i phyir ro/ /'di ni mchog gi don nyid kyis na sa gnyis pa la'o/ /'dus byas pa khams gsum pa ni 'dod pa'i khams la sogs pas stong pa nyid yin pa'i phyir 'dus byas stong pa nyid de/de ni yongs su ma grub pa'i rang bzhin nyid kyis gnyen po'i phyogs nyid du bya bar nus pa nyid kyi phyir ro/ /'di ni rgyu mthun pa don gyi mchog nyid kyis sa gsum pa la'o/ /'dus ma byas skye ba med pa dang 'gag pa med pa dang gnas pa las gzhan du 'gyur ba med pa ni de nyid kyis stong pa yin pa'i phyir 'dus ma byas stong pa ste/skye ba med pa la sogs pa rnams kyi btags pa'i rgyu mtshan mi mthun pa'i zlas skye ba la sogs pa med pa'i phyir ro/ /'di ni yongs su 'dzin pa med pa'i don gyis na bzhi pa la'o/ /mtha' ni mthas stong pa nyid yin pa'i phyir mtha' las 'das pa nyid kyis na mtha' las 'das pa stong pa nyid do//mtha' ni cha ste de la chad pa dang rtag pa'i mtha' gnyis kyi dbus na de dag gi cha rnam par gcod pa'i rgyu mtshan gang gis de'i rang bzhin du rnam par 'jog pa de ni ci yang med do/ /'di ni rgyu tha dad pa med pa'i don gyis na lnga pa'o //thog ma dang dbus dang tha ma rnams kyi de rnams kyis stong pa nyid yin pas thog ma dang tha ma med pa stong pa nyid la sogs pa'i chos nyid kyi rjes su skyes pa nyid kyis mtha' nyid shin tu med pa'i phyir ro/ /'di ni kun nas nyon mongs pa med pas rnam par dag pa'i don gyis na drug pa la'o//bral zhing spangs la yongs su btang ba'i mtshan nyid can gyi dor ba las bzlog pa nyid kyis na dor ba med pa ste de ni des stong pa nyid yin pa'i phyir ro/ /dor ba med pa stong pa nyid ni dor ba la sogs pa'i bya ba'i ngo bo ma yin pa nyid kyis na spangs par btags pa'i rgyu mtshan du mi 'thad pa'i phyir ro//'di ni tha dad pa med pa'i don gyis na bdun pa la'o/ /'phags pa thams cad kyis ma mdzad pa ni rang bzhin te/ de ni des stong pa'i phyir rang bzhin stong pa nyid do/ /de la ni 'dus byas dang 'dus ma byas kyi rnam par 'gyur ba dang rnam par mi 'gyur ba'i gnod pa med pa'i phyir ro/ /chos rnams ni chos rnams kyis stong pa nyid yin pa'i phyir chos thams cad stong pa nyid de 'dus byas dang 'dus ma byas kyi chos kyi tshogs thams cad ni phan tshun ltos pa can yin pas na rang bzhin yongs su grub pa med pa'i phyir ro//stong pa nyid gnyis ni 'grib pa dang 'phel ba med pa'i don dang rnam par mi rtog pa dang zhing yongs su dag pa la dbang ba gnyis kyi rten nyid yin pa'i phyir 'bras bu'i sa nyid yin pas so sor rtog pa yongs su sbyong ba'i dbye bas sa brgyad pa la'o//gzugs la sogs pa ni de'i mtshan nyid gzugs su rung ba la sogs pa stong pa yin pa'i phyir rang gi mtshan nyid stong pa nyid de mtshan nyid du rnam par gzhag pa'i spyi dang khyad par ni btags pa tsam yin pa'i phyir ro//'das pa la sogs pa'i dus rnams ni 'das pa la sogs pa'i dus rnams la phan tshun bzlog na dmigs su med pa nyid kyis na mi dmigs pa stong pa nyid de dus rnams ni dngos po la btags pa tsam nyid yin pa'i phyir ro//stong pa nyid gnyis po 'di dag ni ye shes la dbang ba'i rten nyid yin pas na de bzhin du dgu pa la'o/ /sbyor ba las byung ba'i chos rnams ni ngo bo nyid med pa yin te rten cing 'brel par 'byung ba'i phyir ro zhes bya bas tshogs ni des stong pa nyid yin pa'i phyir dngos po med pa'i ngo bo nyid stong pa nyid de/dngos po rnams ni tshogs pa tsam yin pa'i phyir ro/ /dngos po nye bar len pa'i phung po'i mtshan nyid ni des stong pa yin pa'i phyir dngos po stong pa nyid de/ spungs pa'i don ni phung po'i don yin la spungs pa yang don med pa yin pa'i phyir nye bar len pa'i mtshan nyid can gyi dngos po'i rgyu mtshan du 'gyur bar 'os pa ma yin pa'i phyir ro//stong pa nyid gnyis po 'di dag ni las la dbang ba'i rten du gyur pa nyid kyis na snga ma bzhin du sa bcu pa la'o/ /dngos po med cing 'dus ma byas pa nam mkha' la sogs pa ni des stong pa'i phyir dngos po med pa stong pa nyid de/ dngos po'i chos sgrib par byed pa la sogs pa med pa las de btags pa yin pa'i phyir ro//rang bzhin stong pa nyid du grags pa ni 'phags pa rnams kyi shes pa dang mthong bas ma byas pa nyid yin pa'i phyir rang gi ngo bo stong pa nyid de/ shes pa dang mthong ba ni yang dag pa'i don ji lta ba bzhin du gsal bar byed pa nyid yin pa'i phyir ro//de bzhin gshegs pa rnams byung yang rung ma byung yang rung ste chos rnams kyi chos nyid 'di gnas pa'o zhes bya bas byed pa po gzhan gyis stong pa yin pa'i phyir gzhan gyi ngo bo stong pa nyid de stong pa nyid la brten pa'i skyes bu'i bya ba ni dub pa 'ga' zhig tu 'gyur ba'i phyir ro//stong pa nyid gsum po 'di dag ni go rims bzhin du nyon mongs pa'i sgrib pa bag chags dang bcas pa spangs pa'i don nyid yin pa'i phyir dang / shes bya'i sgrib pa bag chags dang bcas pa spangs pa'i rten nyid yin pa'i phyir dang / rang byung nyid yin pa'i don gyis na sangs rgyas kyi sa la yin par shes par bya'o//'phags pa rnam par grol sdes skabs don yang phyogs 'dis brjod par bya'o/ /gang dag gzhan dgag pa'i sgo nas stong pa nyid 'ba' zhig kho na rjod par byed pa yin gyi/ de dag la mngon par rtogs pa'i rim pa ni cung zad kyang yod pa ma yin no zhes zer ba de dag gi ltar na skabs kyi don kho na brjod par bya ba yin gyi bstan bcos kyi don ni gtso bo ma yin no//des na stong pa nyid kyi bye brag rnams sod zin pa dang bgrod par bya ba'i go rims dang bral ba'i phyir na ched du bya ba nyams par 'gyur ro zhes bshad do/ /yang rnam par mi rtog pa'i ye shes 'di'i dmigs pa ci yin zhe na/kha cig ni stong pa nyid yin no zhes 'dod do/ /gzhan dag ni de chos thams cad kyi ngo bo nyid stong pa nyid la dmigs par 'dod do/ /'di nyid rigs pa yin te/ gang dang gang zhes pa yin pa de dang de ni chos thams cad kyi rang bzhin stong pa nyid la dmigs pa yin te/dper na rmi lam du rta la sogs pa'i ngo bo nyid stong pa nyid la dmigs pa lta bu'o/ /rtsod pa'i gnas su gyur pa rnam par mi rtog pa'i yid 'di yang shes pa yin no zhes bya ba ni rang bzhin gyi gtan tshigs so/ /dmigs pa mngon sum ma yin na/ /don mthong rab tu 'grub ma yin/ /zhes bya bas gtan tshigs ma grub pa ma yin la/mthun pa'i phyogs la yod pas 'gal ba ma yin no/ /chos thams cad kyi rang bzhin de kho na nyid du yod pa ni phyis 'gog par 'gyur ba'i phyir ma nges pa nyid kyang ma yin no/ /gang dmigs pa de ni med pa ma yin nam/ dper na zla ba gnyis pa la sogs pa bzhin no/ / chos thams cad kyi ngo bo nyid stong pa nyid 'di yang dmigs pa yin pas med par 'gyur la/ des na chos thams cad yod pa nyid du 'gyur ro zhe na/ nyes pa 'di ni med de/ gang gi phyir dngos po med pa skur pa 'debs pa'i mtha' lha sbyin lta bur gyur pa de'i tshe sod par byed pa rang gi ngo bor sgro 'dogs pa'i mtha' mchod sbyin dang 'dra ba de stong pa nyid kyis bsad pa na slar 'byung ba ma yin pa'i phyir ro//gzhan yang dmigs pa ni de kho na nyid du mi 'grub kyi/ kun rdzob tu yul du gnas pa nyams su myong ba'i mthar thug pa yin pas 'gal ba yin no zhes bya ba de lta bu la sogs pa'i nyes pa brjod par mi bya'o/ / stong pa nyid la dmigs pa'i phyogs la ye shes stong pa'i spyod yul can dang stong pa nyid 'dus byas su thal bar 'gyur te/ go rims bzhin du ye shes dang de'i stong pa nyid dag dngos po dang dngos po med pa nyid kyis phan tshun tha dad pa dang tha dad pa yin par rnam par mi rtog pa'i phyir ro/ /me long lta bu'i ye shes la sogs pa'i dbye bas ni brjod par bya ba mang du yod de ye shes kyi tshogs rnam par gzhag pa ni phyogs tsam du zad do//rab tu dbye ba ni zhar la brjod pa yin gyi da lta kho na ye shes kyi tshogs ma lus par rtogs pa ni ma yin te/ mngon par rtogs pa'i go rims lhag ma ston pa'i phyir ro/ /de bzhin du gzhan dag la yang shes par bya'o//ye shes la goms pa dang ldan pa la ni shes rab rnam par dag pa dang yang dag pa'i ting nge 'dzin la sogs pas sems can gyi don byed pa las bsod nams 'byung bas na bsod nams kyi tshogs so/ /bsod nams dang ye shes kyi tshogs la goms par byas pas ni dngos po yongs su rtogs pa'i lam la sogs pa la 'bad pas na lam gyi tshogs so//lam dang ldan pa ni yi ge a ni chos thams cad kyi sgo yin te gzod ma nas ma skyes pa'i phyir ro zhes bya ba la sogs pa ni ri mor byed pa'i yi ge de des bskal pa mang por chos ston pa rgyu'i dran pa yongs su gtugs pa med par 'gyur ba'i phyir dang /'dzin par byed pa zhes bya ba'i tshul gyis na dran pas kyang gzhung dang don 'dzin pas na gzungs kyi tshogs so/ /de ltar thabs mkhas pa'i tshogs la sogs pa lnga po 'di dag stong phrag nyi shu lnga pa las theg pa chen po'i sgras rgya cher bstan pa yin pas som nyi mi bya'o//gzungs thob pa'i gnas skabs kyi khyad par nyid ni/ rtogs pa phyi ma phyi ma'i rten byed pa'i tshul gyis dang / de la brten pa'i yon tan gyi gzhi yin pa'i tshul gyis sa yin no zhes sa'i tshogs bstan pa'i don du/ rab 'byor gang yang 'di skad du theg pa chen po la ji ltar yang dag par 'jug par bgyi zhes bya ba la sogs pa'i rtsod pa'i tshig 'brel par bya ba'i don du brjod nas/lan gsungs pa ni pha rol tu phyin pa rnams kyi sgo nas yang dag par 'jug go zhes bya ba ste/ sbyin pa la sogs pa pha rol tu phyin pa lhag par shas che ba sa bcus bsdus pa bcu po rnams kyis rim gyis yang dag par 'jug go zhes 'bras bu bstan pa'i sgo nas sa'i tshogs brjod pa yin no//'di skad ston te/ de la gang gi tshe chos thams cad bdag med pa'o zhes bsgoms pas cha med pa nyid kyis chos kyi dbyings bdag nyid thams cad kyis rtogs su zin kyang nges pa bskyed pa la ltos nas kun tu 'gro ba'i don gyis so sor rtogs pa'i phyir chos thams cad ngo bo med par mngon sum du byed pa'i shes pa shin tu gsal bar skye bar 'gyur ba de'i tshe byang chub sems dpa'i skyon med pa la yang dag par zhugs pas mthong ba'i lam thob par 'gyur ro//'dir yang 'dod chags dang khong khro ba dang nga rgyal dang ma rig pa dang the tshom dang 'jig tshogs la lta ba dang mthar 'dzin par lta ba dang log par lta ba dang lta ba mchog tu 'dzin pa dang tshul khrims dang brtul zhugs mchog tu 'dzin pa rnams 'dod pa'i khams na bden pa bzhi'i dbye bas bzhi bcur 'gyur ro//de bzhin du gzugs dang gzugs med pa'i khams su ni de dag bden pa bzhi'i mthong bas spang bar bya ba khong khro ba brgyad bton na bdun cu rtsa gnyis so//spyir bsdoms na mthong bas spang bar bya ba'i nyon mongs pa brgya rtsa bcu gnyis spong ste/ bden pa rnams kyi mngon par rtogs pa ni gcig pa'i phyir ro/ /de bas na sa dang po'i skad cig ma dang po ni mthong ba'i lam yin no//de las gzhan pa skad cig ma gnyis pa la sogs pa nas rdo rje lta bur brjod pa'i bar chad med pa'i lam gang las de ma thag tu sangs rgyas kyis kun tu 'od 'thob pa'i bar 'di dag ni mchog gi don la sogs par chos kyi dbyings so sor rtogs pa'i phyir bsgom pa'i lam yin par bshad do//de la yang nyon mongs pa bcu drug ci rigs par rim gyis spong ngo / /'di lta ste 'dod chags dang / zhe sdang dang / nga rgyal dang / ma rig pa dang / 'jig tshogs la lta ba dang / mthar 'dzin par lta ba ste 'dod par spyod pa drug go/ /de dag nyid pas zhe sdang bton na gzugs dang gzugs med par spyod pa bcu yin no//mthong ba dang bsgom pa'i lam la yongs su sbyong ba'i chos kyi dbye bas rab tu dga' ba la sogs pa'i sa bcur rnam par gzhag go/ /de la yang sa gang gi yongs su sbyong bar gyur pa'i chos gang yin pa rnams ji srid ma rdzogs pa de srid du ni sa de yin la/ yongs su rdzogs nas ni sa gzhan yin par shes par bya'o/ /de la yongs su spyod par gyur pa'i chos 'di rnams ni stong phrag nyi shu lnga pa las bstan to/ /'di lta ste dge ba'i rtsa ba'i chos thams cad yang dag par sgrub pa dang / sems can gyi don du theg pa chen po'i chos yongs su 'dzin pa dang / tshad med pa bzhi sgrub pa dang / rnam par mi rtog pa'i sbyor bas bdog pa thams cad yongs su gtong ba dang / dge ba'i bshes gnyen mnyes par byed pa dang / nyan thos kyi theg pa la ltos pa med pas dam pa'i chos kyi dmigs pa ma lus pa yongs su tshol ba dang / rtag tu khyim gyi gnas la mngon par mi dga' ba dang /rnam pa thams cad du bla na med pa'i sangs rgyas kyi sku yid la byed pa dang mi 'bral ba dang / mdo la sogs pa'i dam pa'i chos ji lta ba bzhin du rab tu ston pa dang / dam bcas pa'i don rdzogs par byed pa ste/ rgyu'i khyad par yongs su sbyong ba'i chos bcu po 'di rnams kyis rnam pa thams cad du bskyed par bya ba yin pa'i phyir ngo bo nyid mi dmigs pas khyad par du byas pa'i mtshan nyid kyi yongs su sbyong ba rnams kho nas dang po sngon ma byung ba'i chos kyi de kho na nyid rtogs pas rab tu dga' ba 'thob pa'i phyir sa dang po rab tu dga' ba thob pa yin no//de skad du yang / yongs su sbyong ba rnam bcu yis//sa ni dang po 'thob 'gyur te/ /bsam dang phan pa'i dngos nyid dang / /sems can rnams la sems mnyam nyid/ /gtong dang bshes gnyen bsten pa dang / /dam chos dmigs pa tshol ba dang / /rtag tu nges 'byung sems nyid dang / /sangs rgyas bkur 'dod dga' ba dang / / chos ston pa dang bden pa yi/ /tshig ni bcu pa yin par 'dod/ /'di dag rang bzhin mi dmigs pas/ /yongs su sbyong bar shes par bya/ /zhes gsungs pa yin no/ /dge ba'i chos sdud pa dang / sems can gyi don bya ba dang sdom pa'i tshul khrims rnam pa thams cad du yongs su dag pa nyan thos dang rang sangs rgyas yid la byed pa rnam par spangs pa dang /gzhan gyi phan pa byas pa chud mi gzan pa dang / sems can rnams kyi thad du gnod pa la sogs pa'i sems med pa dang / sems can yongs su smin par bya ba la sogs pa la 'gyod pa med pa dang / sems can gcig gi don du yang dus ring por dmyal ba la sogs par gnas par spro ba dang /skye bo thams cad la 'dud pa nyid dang / bla ma'i thad nas des bstan pa'i tshig bsgrub cing ston par 'du shes pa dang / las gzhan med par sbyin pa la sogs pa'i pha rol tu phyin pa la brtson zhing spro ba ste/ de lta bu'i yongs su sbyong ba snga ma bzhin du yongs su sbyang ba byas pa'i khyad par can gyi chos rnam pa brgyad kyis tshul khrims 'chal ba'i dri ma thams cad dang bral bas sa gnyis pa dri ma med pa thob pa yin no//de skad du yang / tshul khrims byas pa gzo dang bzod/ /rab tu dga' dang snying brtse che//bkur sti bla ma la gus nyan/ /brgyad pa sbyin la sogs la brtson/ /zhes bya ba gsungs pa yin no/ /sangs rgyas thams cad kyis gsungs pa'i chos 'dzin pa'i bsam pa dang / rnyed pa la sogs pa la mi ltos par dam pa'i chos rab tu ston pa dang / sangs rgyas kyi zhing yongs su sbyong bar byed pa'i chos rnams de nyid du yongs su bsngo ba dang /sems can gyi don bya ba'i phyir nam yang sems skyo ba med pa dang / nyan thos dang rang sangs rgyas kyi yid la byed pa la sogs pa rang dang gzhan la ltos na ngo tsha dang khrel yod pa ste de lta bu'i yongs su sbyong ba rnam pa lnga po snga ma bzhin du ngo bo nyid du mi rtog par yongs su sbyang ba byas pas/'jig rten las 'das pa'i ye shes kyi snang ba byed pa'i phyir sa gsum pa 'od byed pa rtogs pa yin no/ /de skad du yang / thos pas mi ngoms nyid dang ni/ /zang zing med par chos sbyin dang / /sangs rgyas zhing kun sbyong ba dang / /'khor bas yongs su mi skyo dang //ngo tsha khrel yod ces bya ba/ /rlom med bdag nyid de rnam lnga/ /zhes gsungs pa yin no/ /nyan thos la sogs pa'i yid la byed pa las dben pa dang / dmigs pa'i sbyor bas thob par bya ba'i byang chub la yang 'dod pa med pa dang / dngos po khyad par can thob tu zin kyang rlom pa med pa dang /chos zab mo la bzod pa'i nges par rtog pa la sogs pa yongs su mi gtong ba dang / bslab pa blangs pa thams cad srog gi phyir yang yongs su mi gtong ba dang / 'dod pa la sems kyang mi bskyed pa dang / chos thams cad la mngon par 'du byed pa med pa dang / rang gi lus la sogs par yongs su 'dzin pa med pa nyid dang /dge ba'i chos la dmigs pa la sems mi zhum pa dang / dngos po thams cad yid la mi byed pa zhes bya ba ste/ de lta bu'i yongs su sbyong ba snga ma lta bu rnam pa bcus nyon mongs pa'i bud shing ma lus pa sreg pa'i 'bar ba dang nye bar ldan pa'i phyir sa bzhi pa 'od 'phro ba can gnon pa yin no//de skad du yang / nags gnas 'dod chung chog shes dang / /sbyangs pa yang dag sdom bsten dang / /bslab pa yongs su mi gtong dang / /'dod pa rnams la smod pa dang / /mya ngan 'das dang bdog kun gtong / /mi zhum pa dang lta ba med/ /ces bya ba gsungs pa yin no//rnyed pa la sogs pa'i don du khyim pa dang rab tu byung ba dang 'grogs pa dang / dad pa can gyi khyim nye bar mi rton pa dang / skye bo mang por 'gro ba la sogs pa dang / bdag la bstod pa dang gzhan la smod pa dang / mi dge ba bcu'i las kyi lam bcu dang / thos pa la sogs pas rlom zhing gzhan la mi 'dud pa dang /dge ba dang mi dge ba phyin ci log tu mngon par zhen pa dang / 'jig tshogs la lta ba la sogs pa'i blo gros ngan pa dang / 'dod chags la sogs pa'i nyon mongs pa thams cad mngon du phyogs par byed pa ste/ de lta bu'i mtshan nyid kyi chos bcu ni byang chub kyi bar du gcod par 'gyur ba nyid yin pa'i phyir spong zhing don gyis 'phangs pa go bzlog pa'i chos yongs su sbyong ba rnam pa bcus/snga ma bzhin du shin tu dka' bas rgyal ba'i phyir sa lnga pa sbyang dka' ba 'thob pa yin no/ /de skad du yang / 'dris dang khyim la 'khren pa dang / /'du 'dzir gyur pa'i gnas dang ni//bdag bstod gzhan la brnyas pa dang / /mi dge'i las kyi lam bcu dang / /rlom pas khengs dang phyin ci log /blo ngan dang ni nyon mongs bzod/ /bcu po 'di ni rnam spangs na/ /sa lnga pa ni yang dag 'thob/ /ces gsungs pa yin no/ /sbyin pa la sogs pa'i pha rol tu phyin pa drug yongs su rdzogs pas nyan thos dang rang sangs rgyas la mngon par 'dod pa dang /ngo bo nyid mi dmigs pa la skrag pa'i sems dang / slong mo pa'i skye bos bslangs na zhum pa'i sems dang / bdog pa thams cad rang gi ngang gis gtong bar zhugs pa la mi dga' ba dang / dbul bas slong mo ba'i skye bo spong ba'i sems 'dor ba ste/de lta bu'i snga ma bzhin du yongs su sbyor ba bcu gnyis kyis sangs rgyas kyi chos thams cad mngon sum du gyur pas sa drug pa mngon du gyur pa kun shes par 'gyur ba yin no/ /de skad du yang / sbyin dang tshul khrims bzod brtson 'grus/ /bsam gtan shes rab rab rdzogs pas//slob ma dang ni bse ru la/ /dga' dang skrag pa'i sems spangs dang / /bslangs na mi zhum bdog pa kun/ /btang yang mi dga' med pa dang / /dbul yang slong ba mi spong bas/ /sa ni drug pa yang dag 'thob/ /ces gsungs pa yin no/ /stong pa nyid dang /mtshan ma med pa dang / smon pa med pa ste/ rnam par thar pa'i sgo gsum yang dag par shes pas/ go rims bzhin du bdag dang / sems can dang / srog tu 'dzin pa med pa dang / 'khor gsum yongs su dag pa'i dge ba bcu'i las kyi lam yongs su rdzogs pa mi gtong bas/ gang zag gcig tu 'dzin pa spong ba dang / sdug bsngal gyis gdungs pa'i skye bo thams cad la dmigs pa'i snying brtse ba rtogs pas/ chad par 'dzin pa med pa dang / sangs rgyas kyi zhing yongs su rdzogs pa nas nye bar bzung ba ste/ dngos po thams cad la nye bar ma dmigs pas rtag par 'dzin pa las rnam par bzlog pa dang /chos thams cad mnyam pa nyid du rtogs pas/ mtshan mar 'dzin pa med pa dang / theg pa chen po nyid du theg pa gcig par gtogs pas rgyur 'dzin pa spangs pa dang / ming dang gzugs la sogs pa ma skyes par yongs su shes pas phung por 'dzin pa dang bral ba dang /chos zab mo la nges par rtogs pa'i bzod pa rtogs pas khams su 'dzin pa spangs pa dang / chos thams cad theg pa chen po'i sgo nas ston pa'i phyir skye mched du 'dzin pa dang bral ba dang / rtog pa thams cad gcod pas khams gsum pa la gnas pa'i 'dzin pa bcad pa dang / mtshan mar 'dzin pa dang /'jig tshogs la sogs pa'i lta ba rnams dang / 'dod chags la sogs pa'i nyon mongs pa spong bas/ chags par 'dzin pa dang bral ba dang / zhi gnas bsgoms pa'i stobs kyis sems kun tu zhum pa'i 'dzin pa las bral ba dang / shes rab dang thabs la mkhas pas/ sangs rgyas su lta ba la mngon par zhen pa ma yin pa dang / chos bdag med pa bsgoms pas sems nye bar zhi ba'i phyir chos su lta ba la mngon par zhen pa'i ngo bo nyid ma yin pa dang / bden pa gnyis la brten pa'i gzugs la sogs pa la thogs pa med pa'i ye shes skyes pas dge 'dun du lta ba la mngon par zhen pa bsal ba dang /mngon par zhen pa'i gnas ma yin pa'i ye shes thob pas tshul khrims su lta ba la mngon par zhen pa mi 'byung ba dang / chos yang dag par rab tu rnam par 'byed pa'i don du sangs rgyas kyi zhing thams cad du ji ltar 'dod pa bzhin du mnyam du 'gro bas na stong pa nyid la rtsod par 'dzin pa dang bral ba dang /dmigs pa la mngon par zhen pa'i sems can gyi khams rnams bsgral bar bya ba'i phyir thams cad du bdag gi lus ji ltar mthun par ston pas na/ stong pa nyid dang 'gal bar brjod pa'i 'dzin pa yongs su spangs pa ste/ de ltar na yongs su sbyong ba'i chos rnam pa nyi shu po snga ma bzhin du khyad par gyi mtshan nyid can gyi yongs su sbyong ba byas pa rtogs pas na ji skad du bshad pa'i chos rnam pa nyi shu dang bral ba'i phyir yang dag par lhun gyis grub pa'i lam dang 'brel pas shin tu ring du 'gro ba'i phyir sa bdun pa ring du song ba thob pa yin no//de skad du yang / spang bar bya ba'i chos kyi dbang du mdzad nas/ bdag dang sems can 'dzin pa dang / /srog dang gang zag chad rtag dang / /mtshan ma rgyu dang phung po dang / /khams dang skye mched dag pa ni/ /khams gsum pa la gnas dang chags/ /sems ni kun tu zhum pa dang //dkon mchog gsum dang tshul khrims la/ /der lta ba yi mngon zhen dang / /stong pa nyid la rtsod pa dang / /de dang 'gal ba'i nyes pa ni/ /nyi shu gang la rnam chad pa/ /de yis sa ni bdun pa 'thob/ /zhes gsungs pa yin la de bzhin du blang bar bya ba'i dbang du mdzad nas/ rnam thar sgo gsum shes pa dang //'khor gsum rnam par dag nyid dang / /snying rje dang ni rlom med dang / /chos mnyam nyid dang tshul gcig shes/ /mi skye ba dang zad shes dang / /chos rnams rnam pa gcig tu ston/ /rtog pa kun tu 'joms pa dang / /'du shes lta dang nyon mongs spong / /zhi gnas nges par sems pa dang //lhag mthong la ni mkhas pa dang / /sems dul ba dang thams cad la/ /thogs pa med pa'i ye shes dang / /chags pa'i sa min gar 'dod par/ /zhing gzhan du ni mnyam 'gro dang / /kun tu bdag gi ngo bo ni/ /ston pa nyid dang nyi shu'o/ /zhes gsungs pa yin no//sems can thams cad kyi sems kyi spyod pa ji lta ba bzhin du shes pa dang / 'jig rten gyi khams sna tshogs su sems can gyi don du rdzu 'phrul gyi mngon par shes pas rtse ba dang / rten gyi sangs rgyas kyi zhing gser la sogs pa'i ngo bor yongs su sgyur ba dang /rnam pa thams cad du chos yongs su brtag par bya ba'i phyir de bzhin gshegs pa mnyes par byed pa dang / lha'i mig skyed pa dang / rten pa sangs rgyas kyi zhing sems can yongs su sbyong ba dang / thams cad du sgyu ma lta bur gnas pa dang / sems can gyi don mthong nas blo sngon du btang ba'i skye ba yongs su 'dzin pa zhes bya ba ste/de lta bu'i yongs su sbyong ba'i chos rnam pa brgyad snga ma bzhin du yongs su sbyangs pas mtshan ma dang rtsol bas bskyod du med pa'i phyir sa brgyad pa mi g.yo ba nyams su myong bar 'gyur ba yin no/ /de skad du yang / sems can kun yid shes pa dang / / mngon par shes pas rtse ba dang / /sangs rgyas zhing bzang sgrub pa dang / /yongs su brtag phyir sangs rgyas bsten/ /dbang po shes dang rgyal ba yi/ /zhing sbyong sgyu ma ltar gnas dang / /bsams bzhin srid pa len pa dang / /las ni rnam pa 'di brgyad bshad/ /ces bya bar gsungs pa yin no/ / smon lam mtha' yas pa dang / lha la sogs pa sems can thams cad kyi skad shes pa dang / spobs pa chu bo ltar mi zad pa dang / skye bo thams cad kyis bsngags pa'i mngal du 'jug pa dang / rgyal po la sogs par gnas pa dang / nyi ma la sogs pa'i rus dang / ma la sogs pa dang legs par 'brel pa'i gnyen dang /rang dbang du 'gyur ba'i 'khor dang / brgya byin la sogs pas mngon par bstod par skye ba dang / sangs rgyas la sogs pas bskul te nges par 'byung ba dang / yid bzhin gyi nor bu dang 'dra ba'i shing a shwad tha la sogs pa dang / sangs rgyas kyi chos thams cad kyi ngo bo'i yon tan yongs su rdzogs par byed pa zhes bya ba ste/de lta bu'i phun sum tshogs pa'i mtshan nyid kyi yongs su sbyong ba bcu gnyis snga ma bzhin du yongs su sbyang ba byas pa'i khyad par dag gis chos ston pa la mkhas pa kha na ma tho ba med pa'i phyir sa dgu pa legs pa'i blo gros mngon du byed pa yin no//de skad du yang / smon lam dag ni mtha' yas dang / /lha la sogs pa'i skad shes dang / /spobs pa chu bo lta bu dang / /mngal du 'jug pa'i mchog dang ni/ /rigs dang rus dang cho 'brang dang / /'khor dang skye ba dag dang ni/ /nges 'byung byang chub shing rnams kyi/ /yon tan phun sum tshogs pa yin//zhes bya ba gsungs pa yin no/ /rigs kyi sa ni nyan thos la sogs pa'i rigs so/ /brgyad pa'i sa ni 'bras bu dang po la zhugs pa'o/ /mthong ba'i sa ni rgyun tu zhugs pa'o/ /bsrabs pa'i sa ni lan cig phyir 'ong ba'o/ /'dod chags dang bral ba'i sa ni phyir mi 'ong ba'o//byas pa rtogs pa'i sa ni dgra bcom pa'o/ /khyad par gyi tshig med pas zhugs pa gsum ni nyan thos kyi sa'o/ /rang sangs rgyas kyi sa ni rang sangs rgyas rnams kyi sa'o/ /byang chub sems dpa'i sa ni byang chub sems dpa' rnams kyi sa rnam pa dgu po ji skad du bshad zin pa rnams so/ / sa dgu zhes bya ba de lta bu'i sa dgu po rnams las 'das nas sa bcu pa'i byang chub sems dpa' la ni sangs rgyas nyid ces brjod par bya'i yang dag par rdzogs pa'i sangs rgyas ni ma yin no zhes stong phrag nyi shu lnga pa las gsungs pas/ sangs rgyas kyi sa gang yin pa la las la dbang ba'i rten nyid la sogs pa'i ye shes gang gis gnas pa ni des thob nas chos kyi char 'bebs pas byang chub sems dpa'i sa bcu pa chos kyi sprin zhes bya'o//de skad du yang / sa dgu 'das nas ye shes ni/ /gang gis sangs rgyas sar gnas pa/ /de ni byang chub sems dpa'i sa/ /bcu pa yin par shes par bya//zhes gsungs pa yin no/ /sa'i tshogs ni stong phrag nyi shu lnga pa las rgya cher gsungs pas de las gzung bar bya'i/ gzhung mangs kyis 'jigs pas bdag gis 'dir rgya cher ma bris so/ /zhar la 'ongs pas chog go/ /mthong ba dang bsgom pa'i lam gyi bdag nyid can kho na sa'i tshogs yin pas de'i rjes la de'i mi mthun pa'i phyogs spong ba'i gnas skabs kyi dbye bas gnyen po'i tshogs nyid bstan par bya ba'i phyir zhus pa gsum pa la sogs pa'i lan gdab pa'i sgo nas khams gsum nas zhes bya ba la sogs pa gsungs so//de la dang por dngos po tsam dang gnyen po'i rten can te gzung ba'i rnam par rtog pa gnyis dang /gang zag rdzas su yod pa dang skyes bu btags par yod pa'i rten can te/ 'dzin pa'i rnam par rtog pa gnyis ni mthong ba'i lam la spong ba yin pas mi mthun pa'i phyogs kyi dbye bas de'i gnyen po'i gnas skabs rtogs par 'gyur ba'i phyir/go rims bzhin gnyen po'i tshogs ston pa lhur byed pa/ khams gsum nas nges par 'byung bar 'gyur te zhes bya ba la sogs pa tshig bzhi ni kun rdzob kyi bden pa la brten nas sbyar bar bya'o/ /de'i 'og tu dngos po tsam dang gnyen po'i rnam pa la brten pa'i gzung ba'i rnam par rtog pa gnyis dang /gang zag rdzas su yod pa dang skyes bu btags par yod pa la brten pa 'dzin pa'i rnam par rtog pa gnyis bsgom pa'i lam la spong bas/ mi mthun pa'i phyogs kyi dbye bas de'i gnyen po'i gnas skabs su rtogs pa'i phyir gnyen po'i tshogs gzhan rnam pa bzhi grangs ji lta ba bzhin du sngar brjod pa'i bya ba bkag pas don dam pa'i bden pa la brten nas/ston par mdzad pa ni 'on kyang zhes bya ba la sogs pa gsungs so/ /gnas pa dgag pa nyid gsal bar byed pa ni gnas pa med pa'i tshul gyis thams cad mkhyen pa nyid la gnas par 'gyur ro zhes bya ba yin no//de la gnas pa ni dngos po la dmigs pa ste/ sems rab tu gnas pa'o/ /de bkag pas gnas pa med pa'o/ /'dir dpyad par bya ste/ gal te re zhig gnas pa med pa tsam yin na de lta na ni med pa yin pa'i phyir gnyen po'i phyogs su mi rung ngo / /'on te gnas pa ma yin na de'i tshe mig la sogs pa la yang thal bar 'gyur ro zhe na/mngon par zhen pa med pa la ji ltar bshad pa'i tshul ltar tshul 'di la yang blta bar bya ba yin pas rgyas par ma spros so/ /dus gsum pa'i dngos po rnams bkag pas gang yang nges par 'byung bar ma gyur zhes bya ba la sogs pa gsungs pa yin no//yang dag pa'i don la goms pa nges par 'byung ba'i phyir ji ste de ltar 'gyur snyam pa'i dogs pa de ci'i phyir zhe na zhes bya bas bsu nas/ gang nges par 'byung ba dang zhes bya ba la sogs pa gsungs so/ /gnyi ga yang zhes bya ba ni byang chub sems dpa' gang dang lam gang gis nges par 'byung ba de dag de kho na nyid du na med cing mi dmigs pa'o//nye bar bsdu ba ni de ltar zhes bya ba la sogs pa gsungs pa yin te/ kun rdzob tu ni yod do zhes bya bar dgongs so/ /de skad du yang / mthong dang bsgom pa'i lam dag la/ /gzung dang 'dzin pa'i rnam rtog brgyad//nye bar zhi bar bya ba'i phyir/ /gnyen po rnam pa brgyad ces bya/ /zhes gsungs pa yin no/ /ji skad du bshad pa'i go rims kyis kun rdzob dang don dam pa'i bden pa las mi 'da' bar theg pa chen po ma lus pa snying rje la sogs pa rnams kyis rjes su bsgrubs pas/ byang chub chen po thob par byed pa'i ngo bos sgrub par byed pa'i phyir na snying rje la sogs pa'i tshogs yin pa'i phyir tshogs kyi sgrub pa ni rnam pa bcu bdun yin no//de ltar tshogs bsags pa rnams ni ji ltar 'phags pa byams pas brnyes pa ltar nges par 'byung ba yin pas bzhi pa nges par 'byung ba'i sgrub pa brjod par bya'o//de yang yul gyi dbye bas rnam pa brgyad yod pa las dang po gtso bo yin pas ched du bya ba'i nges par 'byung ba'o/ /de yang sems can kun gyi mchog nyid kyi / sems chen po nyid kyis nges par 'byung ba dang / spong ba chen po nyid kyis nges par 'byung ba dang / rtogs pa chen po nyid kyis nges par 'byung ba ste/rnam pa gsum yod pa de bas na ched du bya ba'i nges par 'byung ba gsum gyi dbang du mdzad nas/ bcom ldan 'das theg pa chen po zhes bya ba la sogs pa gsungs so/ /dmigs pa chen po nyid dang ni/ /de bzhin sgrub pa gnyis dag dang / /ye shes brtson 'grus rtsom pa dang //thabs la mkhas par gyur pa dang / /yang dag 'grub pa chen po dang / /sangs rgyas phrin las chen po ste/ /chen po 'di rnams dang ldan pas/ /theg chen zhes ni nges par brjod/ /ces bya ba'i chen po nyid bdun dang ldan pas byang chub sems dpa'i lam 'bras bu dang bcas pa ni theg pa chen po yin no//theg pa chen po ni 'jig rten na rab tu grags pa tsam nyid kyi don ma yin par mngon par byang chub pa'i 'bras bu can yin te de nyid 'ching ba yin pa'i phyir ro/ /de lta ma yin na theg pa chen po'i gnyen po bsgom pa don med par 'gyur ro/ /de bas na yang dag pa ma yin pa'i kun tu rtog pa tsam nyid yin pa'i phyir log par snang ba'i rang bzhin lha dang mi dang lha ma yin du bcas pa'i 'jig rten rnams de'i gnyen por gyur pa nyid kyis mi bden pa'i don nyid du rang gi ngo bo yongs su shes pas zil gyis mnan te/gang gi phyir bgrod par bya ba'i gnas sems can thams cad kyi mchog nyid la sogs pa chen po nyid du nges pa kho nar 'byung ba de'i phyir theg pa chen po zhes brjod do zhes bya ba ni ngag gi don to/mnyam pa nyid rtogs pa med par ched du bya ba'i nges par 'byung bar mi 'byung bas/ de'i 'og tu mnyam pa nyid kyi nges par 'byung ba bstan par bya ba'i phyir nam mkha' ltar mnyam pa nyid kyis zhes bya ba la sogs pa gsungs te/nam mkha' lta bu'i mnyam pa nyid stong pa nyid kyis shes bya'i dkyil 'khor mtha' dag khyab pa'i ye shes dri ma med pa yin zhes bya ba'i phyir de ni theg pa chen po yin no/ /sems can gyi don bya ba med par bsod nams bsags pa mi srid pa'i phyir mnyam pa nyid yang dag par rtogs par mi 'gyur bas/de'i 'og tu sems can gyi don nges par 'byung ba ni ji ltar zhes bya ba la sogs pa gsungs so/ /theg pa chen po la sems can gyi go skabs yod do zhes brjod pa'i phyir na theg pa chen po des de dag gi don du nges par 'byung bar bya ba yin no zhes bstan te/de lta ma yin na don bya bas stong na go skabs yod par mi 'thad pa'i phyir ro/ /bcom ldan 'das grangs 'dis na zhes bya ba la sogs pa ni nye bar bsdu ba'o/ /rnam grangs 'dis zhes bya ba ni don gzhan 'dis so/ /'bad pa yod na sems can gyi don ma tshang ba med pa rdzogs par mi 'gyur bas/de'i 'og tu lhun gyis grub pa'i nges par 'byung ba bstan pa'i phyir 'di la 'ong ba ma mthong zhes bya ba la sogs pa gsungs te/ 'ong ba ni 'das pa nas so/ /'gro ba ni ma 'ongs par ro/ /gnas pa ni da ltar byung ba ste/ 'ong ba la sogs pa med pas lhun gyis grub pa'i nges par 'byung ba yin no zhes bya bar dgongs so//rtag pa dang chad pa dang bral ba'i gnas skabs rtogs pa med par 'bad pa med par nges par 'byung bar mi 'gyur bas/ de'i 'og tu mtha' las 'das pa'i nges par 'byung ba bstan pa'i phyir/ bcom ldan 'das 'di ltar zhes bya ba la sogs pa gsungs pa yin te/ 'di ltar zhes bya ba ni 'chad par 'gyur ba'i tshul gyis so//sngon gyi mtha' ni rtag pa'o/ /phyi ma'i mtha' ni chad pa'o/ /de las 'das pa yang med do zhes brjod pa ni dbus kyang mi dmigs te zhes bya ba'o/ /'di ltar zhes gang smras pa de bstan par bya ba'i phyir/ bcom ldan 'das theg pa de ni zhes bya ba la sogs pa gsungs pa yin te/gang gi phyir chos thams cad rang bzhin gyis yongs su mya ngan las 'das pa nyid kyis theg pa de ni dus gsum stong pa nyid yin pa de'i phyir theg pa chen po la sngon gyi mtha' la sogs pa med pa yin no zhes bya ba ni ngag gi don to/ /chos nyid dang mi 'gal ba'i don brjod pas legs so zhes shes par bya ba'i phyir rab 'byor zhes bya ba la sogs pa gsungs pa yin no//nye bar bsdu ba ni de ltar na 'di ni zhes bya ba la sogs pa gsungs pa yin no/ /mtha' las 'das pa'i nges par 'byung ba yang theg pa gsum so so'i khyad par can gyi gnas skabs thob pa med par rdzogs par mi 'gyur bas de'i 'og tu thob pa'i nges par 'byung ba gsungs pa ni/byang chub sems dpa' sems dpa' chen po 'di la bslabs pas zhes bya ba la sogs pa'o/ /'di la zhes bya ba ni theg pa chen po la'o/ /thams cad mkhyen pa nyid theg pa gsum gyi bdag nyid can 'phags pa'i gang zag thams cad kyi rtogs pa'i rgyu nyid du shes par bya ba'i phyir rjes su thob par gyur to zhes bya ba la sogs pa gsungs so//sgra gzhan du gyur pas 'phags pa gang bo 'khrul nas bcom ldan 'das zhes bya ba la sogs pa gsol to/ /shes rab kyi pha rol tu phyin pa'i don du ste ched du khyod spobs par gyis shig ces bya ba la sogs pa dang po rtsom pa na byin gyis brlabs pa'o//rtag tu mnyam par gzhag pa med par ye shes kyi mthong ba 'jug pa mi 'byung bas gzhan du yang gyur tam snyam nas/ 'phags pa rab 'byor gyis bcom ldan 'das ni zhes bya ba la sogs pa gsol to/ / 'gal ba ni 'das pa'o/ /de bzhin gshegs pas byin gyis brlabs pa ni log par ston pa mi 'thad pas rab 'byor de lta ma yin te zhes bya ba la sogs pa gsungs so/ /rjes su mthun par zhes bya ba ni lugs dang mthun pa te / shes rab kyi pha rol tu phyin pa'i don ni theg pa chen po'i rang bzhin yin no zhes bya bar dgongs so//chos zab mo rnam pa thams cad du ston pa'i nus pa bdag nyid la yod par ma mthong bas/ bcom ldan 'das sangs rgyas kyi mthus lags so zhes bya ba gsol to/ /thob pa'i nges par 'byung ba de yang thob par bya ba dang thob par byed pa dang de gnyi ga'i 'brel ba bkag pa'i mtshan nyid can te/des na thob par bya ba bkag pa'i dbang du byas nas/ gzhan yang zhes bya ba la sogs pa gsol te / gzhan yang zhes bya ba'i sgra'i don ni go rims kyi don to/ /mthar yang zhes bya ba ni bdun pa'o/ /nye bar ma rtogs zhes bya ba ni thob par bya ba gzugs la sogs pa'i rang bzhin gyi byang chub sems dpa' cung zad kyang zhes bya ba lhag ma ste/thob par bya ba'i byang chub sems dpa' de nyid yod pa ma yin pa'i phyir ro zhes bya bar bsams pa'o/ /byang chub sems dpa' gzugs la sogs par snang ba ma yin nam ji ltar yod pa ma yin snyam du dogs pa/ nye bar ma rtogs pa de ci'i slad du zhe na zhes bya bas bsu nas/ gzugs su ma mchis pas na zhes bya ba la sogs pa gsol to/ /chos kyi dbyings la ma gtogs pa/ /gang phyir chos yod ma yin pa/ /zhes bya ba'i tshul gyis gang gi phyir chos kyi dbyings bzhin du de'i rang bzhin du gyur pa'i gzugs la sogs pa mu med pas byang chub sems dpa' mu med pa nyid yin pa de'i phyir byang chub sems dpa' nye bar ma gtogs pa yin no zhes bsams pa'o//thob pa po dgag pa'i dbang du mdzad nas gsungs pa ni gzugs byang chub sems dpa'o zhes bya ba la sogs pa'o/ /gzugs la sogs pa ni rigs pas yod pa ma yin pas de'i bdag nyid can thob pa po'i byang chub sems dpa' nye bar mi dmigs so zhes bya bar bsams pa'o//gal te de ltar mi dmigs na de kho na nyid yin no zhe na/ 'di yang zhes bya ba la sogs pa gsol to/ /nye bar ma rtogs pa zhes bya ba 'di yang med de/ yul med pa la dgag pa'i sbyor ba med pa'i phyir ro/ /dngos po med pa de'i phyir mi dmigs so/ /de ltar spyir bstan nas bdag nyid kyi dbang du byas te/ bcom ldan 'das de ltar zhes bya ba la sogs pa gsol te/ de ltar zhes bya ba ni thob par bya ba dang thob pa po bkag pas so/ /thams cad 'di ni gnyis te dngos po thams cad dang rnam pa thams cad do zhes bya ba'i tshul gyis na/'dir thams cad nas zhes bya ba ni phung po la sogs pa dngos po'i rang bzhin gyis so/ /thams cad ces bya ba ni phyi dang nang gi bdag nyid can gyi dngos po'i rang bzhin [(]na[,]no[)]/ /rnam pa thams cad du zhes bya ba ni nang stong pa nyid la sogs pa'i rnam pa'i dbye bas so//yang thams cad ces bya ba ni spyi dang so so'i rnam pa'o/ /byang chub sems dpa' zhes bgyi ba'i chos zhes bya ba ni byang chub sems dpa' nyid thob par bya ba dang thob pa po'i mtshan nyid kyi chos gzugs la sogs pa'i rang bzhin te/ de dag ni mi dmigs par gyur pas de yang dag par rjes su ma mthong ngo //de gnyi ga'i 'brel pa dgag pa ni shes rab kyi pha rol tu phyin pa zhes bya ba la sogs pa gsol pa yin te/ rnam pa dang thabs dang rnam pa med pa'i shes pa dag gis sam/ mngon sum dang rjes su dpag pa dag gis grangs ji lta ba bzhin du yang dag par rjes su ma mthong zhing ma dmigs na'o//de nyid bstan pa'i phyir thams cad mkhyen pa nyid kyang zhes bya ba la sogs pa gsol to/ /nye bar bsdu ba'i phyir bcom ldan 'das bdag gi zhes bya ba la sogs pa gsol pa yin no/ /gang zhig ces bya ba ni thob pa po byang chub sems dpa'o//gang gis zhes bya ba ni thob par bya ba'i thabs kyi sgo nas so/ /gang la zhes bya ba ni 'brel pa rnam pa thams cad mkhyen pa nyid kyi mtshan nyid de / gang gi sgra ni spong ba ston par byed pa yin pas/ gang gang gis gang la yang ma yin no zhes bya ba'i tha tshig go/ /ci'i phyir zhe na/ gang gi phyir bcom ldan 'das sangs rgyas zhes bya ba 'di ni zhes bya ba la sogs pa ste/'dir thob par bya ba ni sangs rgyas kyi sgras brjod de/ thob pa po dang 'brel pa'i tshig lhag ma gnyis kyis ston pa'i phyir te/ gang gi phyir gang zhig skabs su bab pa de nyid nye bar bsdu ba yin no/ /dngos po ji lta ba bzhin sgra sbyor ba'i phyir na ming tsam du yod pa las don bden par 'gyur ro snyam na ming de yang zhes bya ba la sogs pa gsol te/de sngon mthong ba med pa'i phyir/ /sgra don khyad par brjod bya dang / /rjod byed du ni 'dod min gyi/ /spyi ni nye bar ston pa yin/ /zhes bya ba'i tshul gyis dngos po ji lta bar ming de mngon par grub pa med pa'i phyir ma skyes pa'o//ji lta bu zhe na/ ji ltar bdag ces bya ba la sogs pa gsol to/ /de nyid bshad pa ni bdag shin tu zhes bya ba la sogs pa yin te/ don gyi bya ba'i nus pa med pas bong bu'i rwa dang 'dra bar yang dag pa'i kun rdzob tu yang mngon par ma grub pa nyid kyis na bdag ni shin tu med mod kyi/de lta na yang bdag ces tha snyad 'dogs so/ /gal te de ltar chos thams cad rigs pas ngo bo nyid med pa yin na gzugs de gang yin zhes rtog pa la/gang gzung du ma mchis pa zhes bya ba la sogs pa smos te/ gang gi phyir mngon par ma grub pa de'i phyir de kho nar gzung ba dang 'dzin pa dang bral ba yin te/ des na gzugs la sogs pa ni kun rdzob tu ma brtags gcig pu na yid dga' bar byed pa yin no/ / de ltar gzung ba dang 'dzin pa'i dngos por ma grub na 'o na chos don dam pa yin no snyam na / de ltar zhes bya ba la sogs pa smos te/ rigs pas chos thams cad dngos po med pa gang yin pa de nyid mngon par ma grub pa yin la/ mngon par ma grub pa gang yin pa de ni rang gi mtshan nyid 'dzin pa dang bral bas de ni chos ma lags so//rab tu bsgrub pa'i don mjug bsdu ba'i phyir des na shes rab kyi pha rol tu phyin pa zhes bya ba la sogs pa smos te/ des na zhes pa ni de'i phyir ro/ /ci zhig ces bya ba'i sgra ni spong ba brjod pa nyid yin pa'i phyir ma yin no zhes bya ba'i tha tshig go//de lta na ni chos rnams mngon par grub pa yin no zhe na/ bcom ldan 'das zhes bya ba la sogs pa gsol te/ dngos po thams cad kyi mngon par grub pa rab tu dgag pa yin pa'i phyir/ mngon par ma grub pa las gzhan pa mngon par grub pa'i chos ni nye bar mi dmigs so//chos thams cad ni shes rab kyi pha rol tu phyin pa lam gyi rang bzhin no/ /sangs rgyas kyi chos ni thob par bya ba'i mtshan nyid rnams so/ /byang chub sems dpa'i chos ni thob pa po byang chub sems dpar btags pa'i rgyu mtshan gzugs la sogs pa'o//gang byang chub tu spyod pa mi dmigs so zhes bya ba ni/ byang chub pa'i don du spyod pa'i spyi'i chos gzhan gang yang rung ba gang yin pa de yang nye bar mi dmigs so zhes/ rnam par dbye ba bsgyur la zhes bya bar sbyar ro/ /de lta na shes rab kyi pha rol tu phyin pa la su zhig mngon par brtson par 'gyur zhe na/gal te de ltar zhes bya ba la sogs pa smos pa yin no/ /spyod pa'o zhes bya ba ni mnyam par gzhag pa'i shes pas so/ /sgom pa'o zhes bya ba ni mnyam par gzhag pa'i shes pas so/ /nye bar rtog pa ni rig pas rnam par 'jog pa'o//nges par sems pa ni dran pa'i shes pa la nges par 'jog pa yin pa'i phyir ro/ /gzugs la sogs pa mi dmigs na ji ltar shes rab kyi pha rol tu phyin pa la nye bar rtog ces pa'i dogs pa de ci'i slad du zhe na zhes bya bas bsu nas/ bcom ldan 'das gang gi tshe zhes bya ba la sogs pa gsol to//gang gi phyir dus gang gi tshe gzugs la sogs pa'i chos 'di dag shes rab kyi pha rol tu phyin pa la ste/ de'i rgyu mtshan du ngo bo nyid med pa'i rnam par yongs su rtogs par byed pa de'i tshe gzugs nye bar mi rtogs te mi rig go//de nyid kyi phyir nye bar mi 'dzin te bdag gir mi byed de/ gang gi phyir skye ba'am 'gag par yang yang dag par rjes su mi mthong ba'i phyir ro/ /skye ba dang 'jig pa ma gtogs pa gzhan ni yod pa ma yin pa'i phyir ro zhes bya bar bsams pa'o//bdag nyid gcig yin na skye ba med pa dang 'gag pa med pa dmigs pa kho na gzugs dmigs pa yin nam/ de'i phyir ji ltar gzugs nye bar ma gtogs pa'i dogs pa de ci'i slad du zhe na zhes bya bas bsu nas/ de ni 'di ltar zhes bya ba la sogs pa smos te/gang gi phyir skye ba med pa dang 'jig pa med pa gang dag yin pa de dag ni gzugs ma yin te/ kun rdzob tu gzugs lta bur snang ba'i phyir ro/ /de la dngos po kho na skad cig mar gnas pa'i chos mi rtag pa ni 'jig pa'o/ /de bkag pas 'jig pa ma mchis pa yin te/gang gi phyir kun rdzob tu sna tshogs pa nyid yin pa des na de'i phyir skye ba med pa dang 'jig pa med pa dang gzugs ni don dam par skye ba med pa dang 'jig pa med pa nyid du gnas pa'i phyir gnyis su med de/ 'di ni skye ba med pa la sogs pa dang rang bzhin gcig nyid yin no//gang gi phyir gnyis su byar med pa ste/ gnyis kyi dngos por byed pa'i tshad ma dang bral bas so/ /gal te de ltar yin na gzugs su ji ltar btags zhe na gang yang zhes bya ba la sogs pa smos te/ gzugs zhes bya ba 'di ni gzugs rigs pas mi 'thad pa la sogs pa gnyis su ma mchis pa la brjod pa'i kun rdzob tu ming du bgyis pa lags te brdar btags pa yin no//rnam pa thams cad mkhyen pa nyid rtogs pa med par thob pa'i nges par 'byung bar mi 'gyur bas de'i 'og tu rnam pa thams cad mkhyen pa nyid du nges par 'byung ba bstan pa'i phyir/bcom ldan 'das de ltar zhes bya ba la sogs pa gsungs te/ de ltar zhes bya ba ni rnam pa thams cad du zhes bya ba dang sbyar ro/ /shes rab kyi pha rol tu phyin pa la zhes bya ba ni/ rnam pa thams cad mkhyen pa nyid la ste/nges par 'byung ba'i don du zhes bya ba ni lhag ma'o/ /chos thams cad ni gzugs la sogs pa rnams so/ /rnam pa thams cad du zhes bya ba ni dngos po med pa la sogs pa'i rnam par ro/ /'di ni bya ba'i khyad par te / de ltar gzugs la sogs pa'i chos thams cad la yongs su rtog pa na'o//de'i tshe zhes bya ba ni mngon par rtogs pa'i dus na'o/ /gzugs la nye bar mi rtog go zhes bya ba la sogs pa ni/ skabs gzhan gyi sgo nas yang bzlas pa'i phyir zlos pa'i nyes pa yod pa ma yin no//de lta na ni sems can gyi don du dka' ba spyod pa la sogs pa mi 'thad do zhes bya ba'i bsam pa dang ldan pas de'i phyir zhes bya ba la sogs pa brjod do/ /gang gi phyir gzugs la sogs pa ni skye ba med pa dang 'gag pa med pa dag dang gnyis su med pa nyid yin pa'i rgyu de'i phyir gzugs la nye bar mi rtog ces bya ba la sogs pa ji skad smras pa'i don kho bos shes pa de ltar na byang chub sems dpa' yang skye ba med pa yin te/de yang gzugs la sogs pa'i rang bzhin yin pa'i phyir ro/ /de ltar yin du chug mod ces khas blangs na nyes pa bstan pa'i don du gal te zhes bya ba la sogs pa gsungs te/ci zhig ces bya ba'i sgra ni spong ba ste/ skye ba med pa dang 'gag pa med pa'i phyir mi spyod do zhes bya ba'i tha tshig go/ /sems can rnams kyi don gyis zhes bya ba bgos pas sdug bsngal ba yin pa de dag nyams su myong ba'i don du spro ba yang ci zhig yod cing ci'i don du yin no zhes pa'i don te/sems can la sogs pa med pa'i phyir ro zhes bya bar bsams pa'o/ /tshe dang ldan pa shA ri'i bu kho bo ni zhes bya ba la sogs pas ni lan smras pa yin no/ /'di snyam du sems te/ gal te byang chub sems dpa' yang skye ba med pa yin na don dam par dka' ba spyad pa spyod pa med par 'gyur ro zhes thal ba bsgrubs na ni de'i tshe de kho na nyid du na spyod pa mi 'thad pas grub pa la sgrub pa yin no/ /'on te kun rdzob tu yin na 'o na ni de'i tshe byang chub sems dpa' skye ba med pa ma yin te/skye bar snang ba'i phyir ro/ /des na spyod pa ji ltar 'gal zhes bsams pa yin no/ /kun rdzob tu yang dka' ba spyod pa ji ltar spyod pa yin zhes kyang bsam par mi bya'o zhes brjod pa ni gang zhig dka' ba spyod pa'i 'du shes kyis zhes bya ba la sogs pa'o/ / dka' ba'i 'du shes kyis spyod pa zhes bya ba 'dir spyad dka' ba la zhes bya ba ni lhag ma'o/ /mgo gtong ba la sogs pa'i spyad dka' ba rnams byang chub sems dpa' kho nas byed pa ma yin nam/ ji ltar na dka' ba'i 'du shes med pa yin snyam pa'i dogs pa de ci'i phyir zhe na zhes bya bas bsu nas/tshe dang ldan pa shA ri'i bu zhes bya ba la sogs pa smras so/ /gang gi phyir dka' ba'i 'du shes bskyed na sems can rnams kyi don bya bar mi nus te/ yang dag pa'i spyod pa mi rdzogs pa'i phyir ro/ /de bas na gang dka' ba'i 'du shes kyis sbyin pa la sogs pa la spyod par byed na de sems can gyi don mi byed pas byang chub sems dpar mi 'gyur ro zhes bya bar bsams pa'o//'o na ji ltar nus par 'gyur zhe na/ 'on kyang bde ba'i 'du shes pa nyid du byas nas zhes bya ba la sogs pa gsungs te/sbyin pa la sogs pa la ser sna la sogs pa med pas bya sla ba'i 'du shes ni bde ba'i 'du shes so/ /de bzhin du sems can thams cad la spyir ma la sogs par 'du shes bskyed pa'am/ khyad par du skyes pa dang bud med dag la na tshod che chung gi tshad kyis ci rigs par ma la sogs pa'i 'du shes su byas shing gang gi tshe byang chub sems dpa'i spyad pa spyod na de'i tshe don bya bar nus so zhes bya bar bsams pa'o//de nyid nye bar bsdu bar bya ba'i phyir de bas zhes bya ba la sogs pa gsungs te/ bar du yang zhes bya ba 'dis ni skyes pa dang bud med rnams la na tshod mnyam pa'i tshad kyis ming po dang sring mo'i 'du shes su nye bar bsdu ba'o//ji ltar na bdag nyid kyi 'du shes bskyed par bya zhe na/ ji ltar bdag ces bya ba la sogs pa gsungs te/ bdag tu nga rgyal skyed pa nyid kyis rang gi rgyud nyid bdag yin no/ / sdug bsngal thams cad las thar bar bya zhing bsal bar bya'o zhes bya ba ni/ 'du byed la sogs pa'i sdug bsngal rnams las thar bar bya zhing bsal bar bya'o / /rnam pa gzhan dag kyang bdag gis sems can thams cad la yang zhes bya ba la sogs pa gsungs pa yin te/yongs su mi gtong ngo zhes bya ba ni snying rje chen po'i bsam pa dang sbyor bas so/ /thar par bya'o zhes bya ba ni de lta bu'i bya ba rdzogs par bya bas so/ /gang gi tshe zhe na/ bdag gi lus zhes bya ba la sogs pa gsungs te/ bdag gi lus brgyar gtubs kyang zhes bya ba ni de rnams nyid kyis bya bar shugs kyis sbyar te/gzhan du na phul du byung ba ci zhig tu 'gyur / chung ngu na zhes bya ba tha ma na'o/ /gnod sems kyang mi bskyed do zhes bya ba ni zhe sdang bar mi bya ba'o/ /de nyid mjug bsdu ba ni de ltar zhes bya ba la sogs pa gsungs te/de ltar zhes bya ba ni bshad ma thag pa'i sems de ltar ro/ /spyod pa ni sbyin pa la sogs pa'o/ /gnas na zhes bya ba ni spyod lam rnam bzhi la'o/ /de ltar kun rdzob la brten pa'i spyod pas dka' ba'i 'du shes med pa bstan nas don dam pa'i bden pa brten pa bstan par bya ba'i phyir/tshe dang ldan pa shA ri'i bu gzhan yang zhes bya ba la sogs pa gsungs te/ thams cad nas bya ba ni mngon sum la sogs pa'i tshad mas so/ /thams cad ni khyab pa dang cig shos kyi tshul lo/ /rnam pa thams cad kyi zhes bya ba ni sems can dang srog la sogs par grags pa'i rnam pas so//yang thams cad du zhes bya ba ni byed pa po nyid la sogs pa'i tshul te/ gcig dang du ma'i rang bzhin dang bral bas ji ltar bdag med cing yod pa ma yin no/ /de nyid kyis na mi dmigs te/ chos thams cad kyang de bzhin no//de nyid bstan pa ni de bzhin du zhes pa la sogs pa'o/ /chos la ltos nas ni thams cad ces bya ba rang gi mtshan nyid la sogs pa'i tshul gyis so/ /thams cad ni spyi'i mtshan nyid la sogs pa'o/ /rnam pa thams cad kyi zhes bya ba ni nyon mongs pa la sogs pa'i rnam pas so//thams cad du ni rnam pa thams cad du ste/ de'i phyir rnam pa gzhan med pas sgyu ma'i skyes bu kho na ltar kun du spyod par bya zhing de la yang dka' ba spyod pa'i 'jigs pa ji ltar yod ces bya bar bsams pa'o/ /de ltar skye ba med pa la thal ba spangs nas khas len pa ni tshe dang ldan pa shA ri'i bus gang yang 'di skad du zhes bya ba la sogs pas brjod do//de de bzhin te zhes bya ba ni don dam par zhes bya bar bsams pa'o/ /byang chub sems dpa' skye ba med do zhes brjod pas phyogs gcig pa'i stong pa nyid du 'gyur ro zhes/ tshe dang ldan pa rab 'byor yang ci zhes bya ba la sogs pa gsungs te/ byang chub sems dpa'i chos ni byang chub sems dpar byed pa'i chos lam gyi rnam par shes pa nyid la sogs pa'i rang bzhin no/ /byang chub sems dpa'i chos kyang skye ba med de rigs pas mtshungs pa'i phyir ro//de nyid brjod pa ni byang chub sems dpa'i zhes bya ba la sogs pa'o/ /gang dris pa de kho na lan gdab par bya'i/ gzhan du na nyan pa po 'byung ba med pa'i ngag tu 'gyur ro/ /de bas na phyogs gcig pa'i stong pa nyid kyi lan gdab pa'i phyir/'on te thams cad mkhyen pa nyid kyang zhes bya ba la sogs pa gong nas gong du dris pa dang / lan smras pas stong pa nyid ni thams cad kyi yul yin par brjod pa yin no/ /de la thams cad mkhyen pa nyid ni sangs rgyas nyid do/ /sangs rgyas su byed pa'i chos rnam pa thams cad mkhyen pa nyid kyi mtshan nyid ni thams cad mkhyen pa nyid kyi chos so//'phags pa'i lam ma skyes pa'i byis pa ni so so'i skye bo'o/ /so so'i skye bo'i chos rnams ni de dang 'brel pa 'dod chags la sogs pa'o/ /de ltar rim gyis chos thams cad skye ba med par khas len du bcug nas nyes pa 'gal ba'i phyir brjod pa ni tshe dang ldan pa rab 'byor gal te zhes bya ba la sogs pa'o//'o na zhes bya ba ni mi bzod pa ste/ thams cad mkhyen pa nyid thob pa yin nam zhes bya ba ni lhag ma'o/ /glegs bam la la las thams cad mkhyen pa nyid 'bad pa med pas thob bam zer ba ni gsal ba kho nar zad do//'di skad du gus par byas pa dang rgyun mi 'chad pa dang yun ring por bsgoms pas skye ba med pa rtogs pa na sangs rgyas nyid rjes su thob pa yin no/ /gal te chos thams cad ma skyes pa kho na yin na ni de'i tshe rnam pa thams cad mkhyen pa nyid 'bad pa med par rjes su thob pa kho na yin la/de lta na ni lus can thams cad grol bar 'gyur ro zhes brjod pa yin no/ /gal te ma skyes pa la thob par bya ba dang thob pa po chos yod na ni de'i tshe 'bad pa med par thob pa zhes bya ba 'thad pa zhig na/ gang gi phyir de ltar ni ma yin no zhes bsams nas brjod pa ni/tshe dang ldan pa shA ri'i bu kho bo ni ma skyes pa'i chos la thob par mi 'dod do zhes bya ba la sogs pa'o/ /rigs pas ma skyes pa'i chos dad pas thob par bya ba dang thob pa po'i sbyor ba'i gnas skabs su thob par te 'dzin par mi 'dod la dngos gzhi'i gnas skabs su mngon par rtogs shing khong du chud par yang mi 'dod do//de nyid brjod pa ni ma skyes pa'i chos kyis zhes bya ba la sogs pa gsungs pa yin te/ thob pa po'i chos ma skyes pas thob par bya ba'i mtshan nyid kyi thob pa ma skyes pa 'thob par mi 'gyur te/ gnyi ga dngos po med pa nyid yin pa'i phyir ro//'o na gang rung zhig ma skyes pas na thob pa 'thob par 'gyur ro zhes smras pa ni/ tshe dang ldan pa rab 'byor yang ci ma skyes pa'i chos kyis zhes bya ba la sogs pa'o/ /'on te zhes bya ba'i sgra ni phyogs gzhan ston par byed pa'o/ /slar dris pa'i tshul gyis lan gyi don brjod pa ni/tshe dang ldan pa shA ri'i bu yang ci zhes bya ba la sogs pa'o/ /skye ba ni yod pa ma yin pa'i phyir ci ma skyes pa'i chos skyes so zhes brjod dam/ de lta'o zhe na/ brjod la rag ste ming gzhan du bya bas dngos po gzhan nyid du 'gyur ba ni ma yin no/ /de bas na skyes pa'i chos kyis thob pa ma skyes pa 'thob par ji ltar 'gyur/'on te ma skyes pa'i chos kho na ma skyes pa yin no zhes khyod kyis brjod pa yin na/ de lta na yang nyes pa kho na yin te/ ma skyes pa'i chos gang yin pa de ni ma skyes pa kho na yin te/ med pa kho na yin pa des na ma skyes pa'i chos kyis thob pa skyes pa 'thob par ci ltar 'gyur 'di skad du/de kho na nyid du na thob par bya ba dang thob pa po dag med pa'i phyir 'bad pa med par 'thob par 'gyur/ kun rdzob tu yang 'bad pa chen pos dus ring por rgyun mi 'chad par bsgoms pas sa brgyad pa la sogs par ye shes lhun gyis grub par 'jug pa 'thob pa'i phyir gang gis lus can thams cad grol bar 'gyur ba 'bad pa med par 'thob par ji ltar 'gyur zhes brjod pa yin no//gal te kun rdzob dang don dam pa'i bden pa la brten nas skye ba dang skye ba med pa rnam par gnas pa yin na khyod la yang brgal zhing brtag pa 'di nyid do snyam pa'i bsam pas brjod pa ni/skye ba'i chos nyid mi skye ba yin nam 'on te mi skye ba'i chos mi skye ba yin zhes bya ba'o/ /de kho na nyid ni brjod pa'i kun rdzob tu yang ngag tu brjod pa dang bral ba yin no snyam du bsams nas brjod pa ni/ tshe dang ldan pa shA ri'i bu skye ba'i chos sam zhes bya ba la sogs pa ste/ de gnyi ga brdzun pa nyid yin pa'i phyir de kho na nyid du smra bar mi spobs so zhes bya bar bsams pa'o/ /ma skyes pa ni don dam pa nyid yin pa'i phyir ro zhes bya ba'i bsam pas brjod pa ni/tshe dang ldan pa rab 'byor khyod kyis skye ba med pa'i chos la yang zhes bya ba'o/ /don dam pa dang rjes su mthun pa yin pa'i phyir skye ba med pa 'di la don dam pa zhes brjod do zhes smras pa ni/ tshe dang ldan pa shA ri'i bu skye ba med pa nyid brjod pa yin la zhes bya ba'o//skye ba med pa nyid yin na yang brjod par bya bas na brjod pa ni spros pa ste rnam par rtog pa zhes bya ba'i don to/ /de lta na mngon par rtogs pa'i dus su ci zhig tu snang zhe na/ nyid brjod pa yin la zhes bya ba'o/ /skye ba med pa yin na yang brjod par bya bas na brjod pa ni spros pa ste/rnam par rtog pa zhes bya ba'i don to/ /de ltar mngon par rtogs pa'i dus su ci zhig tu snang tshe dang ldan pa shA ri'i bu skye ba med pa nyid so sor snang ba yin pa yin no zhes bya ba gsungs te/ rtog pa thams cad las rnam par grol zhing gzung bar bya ba ma yin pa'i skye ba med pa nyid gzung bar snang zhing 'dzin pa ma yin pa nyid 'dzin par snang ngo //yang ji ltar na de lta bu'i ngo bo nyid ma yin du zin kyang de lta bu'i ngo bo nyid du so sor snang zhe na/ tshe dang ldan pa shA ri'i bu de kho na bzhin du shin tu so sor snang ba nyid do zhes bya ba gsungs te/ de kho na bzhin du ste ji ltar mthong ba bsnyon par mi nus pa'i phyir kun rdzob tu ji lta bu yin yang rung bar 'gyur ro//yang na de kho na bzhin du ste/ rnam par ma dpyad pa'i rang bzhin du brdzun pa kho na so sor snang ba yin no/ /shin tu so sor snang ba'o zhes bya ba ni rtag pa dang chad pa dang bral ba'i rang bzhin du so sor snang ba'o//chos kyi de kho na nyid yang dag par bshad pas bstod pa'i phyir brjod pa ni/ tshe dang ldan pa rab 'byor ni chos ston pa'i zhes bya ba la sogs pa'o/ /gzhag par bya'o zhes bya ba ni gzung ba bya ba'o / /nyan thos rnams kyang chos kyi sprin gyi rtogs pa med pa ma yin nam/ji ltar 'di ltar ston snyam pa'i dogs pa de ci'i slad du zhe na zhes bya bas bsu nas/ 'di ltar zhes bya ba la sogs pa brjod do/ /gang dang gang la zhes bya ba ni 'dun pa la'o / /de dang de la zhes bya ba yang de dang 'dra ste/gang dang gang la yongs su dris pa de dang de la lan btab pas nges par 'byung bas rang gi rtogs pa'i mtshan nyid kyi chos nyid las kyang mi g.yo ste gnas pa'i phyir ro/ /lung gi rang bzhin gyi chos nyid de rtogs pa'i chos dang 'gal bar mi byed do zhes bya ba rtag tu mnyam par gzhag pa'i shes pa med kyang zhes bya ba ni lhag ma'o//de bzhin gshegs pa'i byin rlabs yin par bstan pa'i phyir/ tshe dang ldan pa shA ri'i bu bcom ldan 'das kyi nyan thos zhes bya ba la sogs pa smras so/ /de bzhin gshegs pa'i nyan thos mi gnas pa'i chos can rnams kyi zhes bya ba mngon par zhen pa med pa'i chos can rnams kyi'o//chos nyid ni 'di yin te zhes bya ba ni rten cing 'brel par 'byung ba'i nges pa nyid do/ /chos nyid de gang yin zhe na/ de dag gang dang gang zhes bya ba la sogs pa'o//gzugs la sogs pa'i mtshan nyid kyi dngos po'i dmigs pa yod du zin kyang ji ltar na nyan thos mi gnas pa'i chos can yin snyam pa'i dogs pa de ci'i phyir zhe na zhes bya bas bsu nas brjod pa ni 'di ltar gang zhes bya ba la sogs pa'o/ / gcig dang du ma'i rang bzhin dang bral bas chos thams cad mi gnas pa'i phyir te/ gnas par 'os pa ma yin pa'i phyir/ mi gnas pa'i chos can gyi nyan thos ni shes rab kyi pha rol tu phyin pa bshad pa'i don du byin gyis brlabs pa kho na ste/ de lta ma yin na ston pa mi 'thad pa'i phyir ro//gang zag bdag med par rtogs pa tsam gyis ni rnam pa 'di lta bu'i chos la mos pa med pa'i phyir de bzhin gshegs pas byin gyis brlabs pa yin no zhes bya ba ni tshig gi lhag ma'o/ /rnam pa thams cad mkhyen pa'i nges par 'byung ba de yang khyad par gyi lam la sogs pa med par mi 'byung bas/de'i 'og tu lam gyi nges par 'byung ba bstan par bya ba'i phyir brjod pa ni/ tshe dang ldan pa rab 'byor legs so legs so/ /zhes bya ba la sogs pa'o//rab 'byor legs so legs so zhes bya ba ni/ don legs par smras pa nyid kyis so/ /'on kyang gang gis byang chub rtogs par 'gyur ba chos thams cad la mi gnas pa'i pha rol tu phyin pa 'di gang yin/ rang gi ngo bo bstan par bya ba'i phyir/ shA ri'i bu zhes bya ba la sogs pa yin te/sa dang / pha rol tu phyin pa dang / byang chub kyi phyogs kyi chos thams cad kyi ngo bo nyid kyis lam gyi mtshan nyid can gyi shes rab kyi pha rol tu phyin pa nyid ni chos thams cad la mi brten pa nyid kyis na/ chos thams cad la mi gnas pa'i pha rol tu phyin pa zhes bya bar brjod do//theg pa thams cad ni theg pa gsum gyis bsdus pa'o/ /de lta bu'i shes rab kyi pha rol tu phyin pa lam gyi bdag nyid can la su zhig nges par 'byung zhe na/ de ltar zhes bya ba la sogs pa gsungs pa ste/ de ltar zhes bya ba ni bshad ma thag pa'i rim pas so//sems zhum pa ni sems 'khums pa'o/ /de nyid ni nem nur zhes bya ba la sogs pas gsungs pa yin te/ nem nur du gyur pa ni the tshom du gyur pa'i shes pa ste/ ci 'di yin nam/ gzhan yin zhes lam gzhan 'dod par gyur pa'i phyir ro//rmongs pa ni mi shes pa ste/ de'i rang gi ngo bo mi rtogs pa'o/ /sems gzhan pa nyid du 'gyur ba ni log pa'i shes pa ste/ log par rtogs pa'o/ /'di thams cad ni ma rig pa yin pas na/ bsgoms pas spang bar bya bar bstan to//gnas pa 'di lta bus gnas shing zhes bya ba ni/ lam gyi rang bzhin gyi shes rab kyi pha rol tu phyin pa'i gnas pas spyod lam rnam pa bzhi'i sgo nas sems las su rung ba nyid rdzogs par byed pa'i phyir ro/ /yid la byed pa 'di dang ma bral ba yin no//zhes bya ba ni lam gyi bdag nyid can gyi nang du yang dag par 'jog pa'i gnas skabs su'o/ /yid la byed pa ni sems kyi 'bad pa dmigs pa la sems 'dzin pa'i las can ma yin nam/ shes rab kyi pha rol tu phyin pa la gnas pa ni/de las bzlog pa'i rang bzhin can yin na/ 'di gnyis lhan cig gnas par ga la rung / zhes bya ba'i bsam pas smras pa ni/ tshe dang ldan pa rab 'byor zhes bya ba la sogs pa'o/ /shes rab kyi pha rol tu phyin pa'i gnas pas gnas pa gang yin pa de ji ltar yid la byed pa dang ma bral bar 'gyur te/phan tshun 'gal ba yin pa'i phyir de ltar mi rung ngo / /zhes bya ba'i tha tshig go/ /de nyid bstan par bya ba'i phyir/ tshe dang ldan pa rab 'byor gal te zhes bya ba la sogs pa smras so/ /gal te yid la byed pa dang ma bral na de'i tshe shes rab kyi pha rol tu phyin pa dang bral ba yin la/'on te shes rab kyi pha rol tu phyin pas gnas pa dang ma bral na/ de'i tshe yid la byed pa dang bral ba yin no/ /'on te 'gal ba dag kyang gcig la lhan cig gnas par 'dod na/ de'i tshe ha cang thal bar 'gyur ro/ /zhes smras pa ni/ tshe dang ldan pa rab 'byor gal te zhes bya ba la sogs pa'o/ /gal te lam gyi nges par 'byung ba'i gnas skabs su yid la byed pa dang ma bral ba yin yang shes rab kyi pha rol tu phyin pa dang ma bral bar 'dod na/de ltar gyur na ni sems can thams cad shes rab kyi pha rol tu phyin pa'i gnas pa dang mi 'bral bar 'gyur te/ de rnams la yid la byed pa yod pa'i phyir ro/ /shes rab kyi pha rol tu phyin pa la gnas pa 'bad pa du mas bsgrub par bya ba ma yin nam/des na ji ltar na sems can thams cad de dang mi 'bral ba yin snyam pa'i dogs pa de ci'i phyir zhe na/ zhes bya bas bsu nas smras pa ni/ sems can thams cad kyang zhes bya ba la sogs pa'o/ /yid la byed pa dang zhes bya ba 'dir mi 'gal bas so//zhes bya ba ni lhag ma'o/ /'di snyam du shes rab kyi pha rol tu phyin pa dang ma bral ba yin du zin kyang / de dang 'gal ba'i phyin ci log tu 'jug pa'i yid la byed pa yod pas/ sems can thams cad la rnam par gzhag pa ma yin no//yang gang gi tshe khyod lam gyi nges par 'byung ba'i gnas skabs su gnyi ga lhan cig gnas pas 'gal bar khas mi len pa de'i tshe/ res 'ga' ba'i 'gal ba mi 'thad pas/ gang gi phyir sems can thams cad mi 'gal ba'i yid la byed pa dang ma bral ba yin pa de'i phyir/shes rab kyi pha rol tu phyin pa dang mi 'bral ba nyid du thal bar 'gyur ro/ /zhes bsams pa yin no/ /yid la byed pa sgra ji bzhin pa nyid yin na nyes pa 'dir 'gyur ro zhes brjod pa ni/ shA ri'i bu legs so legs so/ /zhes bya ba la sogs pa'o/ /'on kyang yid la mi byed pa nyid yid la byed pa yin par mngon par 'dod do/ /de la yang gal te sgra'i 'jug pa tsam gyis klan ka tshol bar byed na/ de'i tshe khyod la yang klan ka yod do/ / zhes bya ba la sogs pa smras so/ /gang gi phyir tshe dang ldan pa shA ri'i bus yid la byed pa'i mtshan nyid kyi don kho na yang dag par tshig tu brjod pa ste/ sgra ji bzhin pa'i don brjod pa kho nar yongs su bzung ba de'i phyir 'di lta bu'i rigs can gyi ngag phyi ma rnams su khyod la yang slar dri bar bya'o//'dis ni sgra'i don sgra ji bzhin par bzung na nyes pa mtshungs par 'gyur ro/ /zhes ston to/ /yang ji ltar na yid la byed pa med pa nyid yid la byed pa yin gyi/ sgra ji bzhin ma yin snyam pa'i dogs pa de ci'i phyir zhe na/zhes bya bas bsu nas smras pa ni/ tshe dang ldan pa shA ri'i bu sems can zhes bya ba la sogs pa'o/ /sems can zhes bya ba srog chags rnams ni sgyu ma dang 'dra ba nyid kyis ngo bo nyid med pa yin la/ rgyu des na de dang tha mi dad pa'i phyir/yid la byed pa ngo bo nyid med pa nyid do/ /sems can de kho na nyid du med pa ni/ sems can dngos po med pa nyid do/ /sems can de kho na nyid du skye ba med pa la sogs pas dben pa nyid ni sems can dben pa nyid do/ /sems can bsam las 'das pa nyid ni sems can bsam gyis mi khyab pa nyid do//sems can gyi rtog pa med pa nyid ni sems can mngon par rdzogs par byang chub pa nyid do/ /sems can yang dag pa ma yin pa'i don brdzun pa'o zhes mngon par byang chub pa nyid ni/ sems can yang dag pa ma yin par mngon par byang chub pa nyid do//tshig drug po 'di dag ni go rims bzhin du nges par 'byed pa'i cha bzhi dang mthong ba dang bsgom pa'i lam gyi gnas skabs su gzung bar bya'o/ /de ltar na rig pas yid la byed pa med pa nyid yid la byed pa yin no zhes brjod nas mjug bsdu bar bya ba'i phyir smras pa ni/tshe dang ldan pa shA ri'i bu zhes bya ba la sogs pa'o/ /byang chub sems dpa' 'di lta bu'i rang bzhin te/ bshad ma thag pa'i rang bzhin can gyi yid la byed pa 'di dang shes rab kyi pha rol tu phyin pa'i bdag nyid can lam gyis nges par 'byung ba'i mtshan nyid kyi gnas pa 'dis gnas par 'dod de /phyin ci ma log par 'jug pa'i phyir ro/ /des na de ltar nges par 'byung bar bya ba'i gzhi 'di rnams las khyad par du 'phags pa'i chos gzhan med pas chos thams cad dmigs su med pas nges par 'byung ba'i phyir de lta bu'i brgyad po 'di dag nyid kyis nges par 'byung ba ni nges par 'byung ba'i sgrub par shes par bya'o//de skad du yang / ched du bya dang mnyam nyid dang / /sems can don dang 'bad med dang / /mtha' las 'das par nges 'byung dang / /thob pa'i mtshan nyid nges 'byung dang //rnam pa thams cad mkhyen nyid dang / /lam gyi yul can nges 'byung ste/ /rnam pa brgyad kyi bdag nyid 'di/ /nges 'byung sgrub pa yin zhes bya/ /zhes gsungs pa yin no/ /rnam pa thams cad mkhyen pa nyid la spyod pa'i le'u zhes bya ba ni/ rnam pa ma lus pas dngos po mtha' dag yongs su shes pa'i phyir na de bzhin gshegs pa dang 'brel par rjes su bsgrub par bya ba nyid kyi spyod par gyur pa'i rnam pa thams cad mkhyen pa nyid kho na sems bskyed pa la sogs pa'i rang bzhin rgyu dang 'bras bu'i bdag nyid kyi sgo nas 'dir yang dang yang du bzlas pa'i phyir na gzhung 'di le'u yin no//shes rab kyi pha rol tu phyin pa'i bshad pa mngon par rtogs pa'i rgyan gyi snang ba las/ rnam pa thams cad mkhyen pa nyid kyi spyod pa'i le'u zhes bya ba ste dang po'o// //rnam pa thams cad mkhyen pa nyid rtogs pa ni lam shes pa nyid yongs su shes pa med na ma yin pas lam shes pa ni de'i tshe yang zhes bya ba la sogs pa gsungs pa yin te/de'i tshe zhes bya ba ni lam shes pa nyid ston pa'i dus su'o/ /yang zhes bya ba ni slar yang brgya byin 'khod par gyur te zhes bya bar sbyar ro/ /ji lta bu zhe na lha rnams kyi dbang po zhes bya ba smos te bdag po'o//ji skad du nye bar bshad pa'i 'khor de nyid du nye bar 'dus pa ni lus la sogs pa ma g.yengs par byas pas sam/ legs par phyag 'tshal ba byas nas 'khod par gyur pa ni rang gi stan la legs par 'dug pa'o/ /'jig rten skyong ba bzhi ni rnam thos sras dang /yul 'khor skyong dang / 'phags skyes po dang / mig mi bzang ngo / /mi mjed kyi 'jig rten gyi khams kyi kun nas bdag por gyur pa ni mi mjed kyi bdag po ste/ gtso bor gyur pa'i lha'i bu'o/ /tshangs pa yang kha cig na re bsam gtan bzhi par byung ba yin te/ 'jig pa'ang me dang chu dang ni/ /rlung gis rnam pa gsum du 'gyur/ /zhes bya ba'i tshul gyis go rims bzhin du dang po la sogs pa bsam gtan gsum ni 'jig pas de nyid ni yun ring por gnas pa'i phyir bdag nyid du mngon par rlom pa'i phyir ro zhes zer ro/ /gzhan dag ni gzhan du 'chad do //'od gsal gyi lha'i ris las sems can 'ga' zhig shi 'phos te tshangs pa'i gzhal med khang stong par gcig pu zhig skyes pa dang / kye ma'o sems can gzhan dag kyang 'dir skyes na ci ma rung snyam du smon pa'i rjes thogs la/ bsod nams la sogs pa zad pa gzhan zhig bya rog dang ta la'i tshul du der skyes pa dang /nga ni 'di'i dbang phyug yin no zhes mngon par rlom pas bsam gtan dang po'i sa gsum pa la mi mjed kyi bdag po tshangs pa'o zhes 'chad do/ /der de lta bu'i 'khor du 'dus pa rnams lam shes pa nyid skye bar rung ba nyid du bsgrub pa'i phyir/ de bzhin gshegs pa'i rang bzhin gyi 'od rnams kyis lha la sogs pa'i rang gi rnam par smin pa las skyes pa'i 'od dri ma can lta bur mog mog por mdzad pa ni nga rgyal bcom pa'i rgyud kho na la rtogs pa skye'o zhes shes par bya ba'i phyir mdzad do//de'i phyir tshig zur gyis rten brjod pa ni/ lha'i bu rnams kyi 'od gang yod pa zhes bya ba la sogs pa gsungs pa yin te/rang gi las kyi rnam par smin pa las skyes pa zhes bya ba ni rang gi dge ba'i las kyi bag chags las nges par byung ba'o/ /'od ni 'od zer gyi snang ba'o/ /kyang zhes bya ba'i sgra ni lus la sogs pa yang ngo / /sangs rgyas kyi mthu dang zhes bya ba la sogs pa la/kha cig na re mthu ni nus pa'i khyad par gyis so/ /gzi brjid ni 'od kyi tshul gyis so/ /byin gyi rlabs kyi zhes bya ba ni dgongs pas so zhes 'chad do/ /gzhan dag ni mthu la sogs pa'i tshig gsum po 'di dag sku dang gsung dang thugs kyi mdzad pa'i 'od zer gyi dbye ba las gyur pa yin no zhes 'chad do//zil gyis mnan te zhes bya ba ni mog mog por dri ma can du mdzad par gyur pa'o/ /de nas zhes bya ba la sogs pa la/ de nas bya ba'i sgra ni 'das ma thag pa ste/ de ltar mog mog por mdzad pas 'jig rten skyong ba la sogs pa mngon pa'i nga rgyal bsal ba'i rjes thogs la'o//'di rnams zhes bya ba ni mngon du gyur pa'i tshul lo/ /rab 'byor las zhes bya ba ni thad nas so/ /shes rab kyi pha rol tu phyin pa zhes bya ba ni lam shes pa nyid kyi bdag nyid can no/ /gang dang 'brel pa zhe na/ byang chub sems dpa' sems dpa' chen po rnams kyi zhes bya ba la sogs pa gsungs so//nye bar bstan pa dang zhes bya ba la sogs pa la mnyan pa'i skabs su gzhung 'dzin pa'i phyir slob pa ni nye bar bstan pa'o/ /bsam pa'i skabs su nges par gzung ba'i don mi brjed pa'i phyir gdams pa'o/ /sgom pa'i skabs su sngon med pa skyed pa'i phyir rjes su bstan pa'o//nyan par 'dod na zhes bya ba ni thos pa'i shes pas nges par bya 'dod pa'o/ /byang chub sems dpa' rnams kyis 'di dag ji ltar nyan par 'dod ce na/ byang chub sems dpa' sems dpa' chen pos zhes bya ba la sogs pa gsungs te/gnas par bgyi ba la sogs pa tshig gsum ni go rims bzhin du mnyan pa la sogs pa'i gnas skabs su shes par bya'o/ /de ltar gsol ba btab pa dang / 'phags pa rab 'byor gyis mngon pa'i nga rgyal med pa nyid dang byang chub tu sems bskyed pa ni lam shes pa nyid rtogs pa'i skal ba dang ldan pa yin no zhes bya ba'i yul nges pa bstan pa'i sgo nas/kau shi ka zhes bya ba la sogs pa gsungs pa yin te/ gang gi phyir de ltar nyan par 'dod pa'i rgyu de'i phyir bstan par bya zhing bshad par bya'o/ /sems zhes bya ba ni stong pa nyid dang snying rje'i snying po can no zhes bya bar bsams pa'o//theg pa gsum rnam par gzhag pa ni dgongs pa can yin gyi mtshan nyid pa ni ma yin no zhes bya ba'i tshul gyis skye bo thams cad bla na med pa yang dag par rdzogs pa'i byang chub kyi mthar thug pa kho na yin no/ /de'i phyir 'dod chags dang bral ba dang cig shos kyi rnal 'byor pas kyang sangs rgyas nyid thob par bya ba'i phyir lam shes pa nyid bsgom par bya ba yin no//zhes khyad par bstan pa'i phyir nyan thos kyi theg pa la sogs par zhugs pa rnams bla na med pa yang dag par rdzogs pa'i byang chub kyi snod du ma gyur pa nyid kyis rigs ma nges pa rnams thog ma nyid du byang chub chen por drang bar bya ba'i don dang /rab tu zhugs pa gzhan rnams kyang yang dag par gzung ba'i don yin no snyam pas dgongs pa can gyi tshig brjod pa ni gang dag zhes bya ba la sogs pa'o/ / zhes bya ba'i sgra ni nges par bzung ba ste gang dag yang dag pa nyid du nges pa la zhugs shing rang gi nyan thos kyi mthong ba la sogs pa'i lam la zhugs pa de dag ni 'gro la phan phyir sangs rgyas grub par shog /ces bla na med pa yang dag par rdzogs pa'i byang chub tu sems bskyed pa'i skal ba med cing snod du ma gyur pa yin no/ /gang du byis pa'i skye bo thams cad kyis kyang nus na 'phags pa'i lam rtogs pa'i nyan thos rnams kyis ji ltar mi nus snyam pa'i dogs pa de ci'i phyir zhe na zhes bya bas bsu nas/de dag gis ni 'khor ba'i rgyun gyi mtshams bcad pas zhes bya ba la sogs pa gsungs te/ gang gi phyir khams gsum par skye bar byed pa'i nyon mongs pa'i sgrib pa rang gi lam gyis ma lus par bsregs pas nyan thos chen po de dag ni 'khor ba'i rgyun las te/skye ba rjes su 'brel pa las mtshams bcad pa zhes bya ba mi skye ba'i nges pa byas pa de bas na de dag yang dang yang du ste/ bskyar zhing 'khor bar skye ba len pa yod pa ma yin no/ /de'i phyir bla na med pa yang dag par rdzogs pa'i byang chub tu sems bskyed pa'i skal ba med do//zhes bya bar sbyar ro/ /'di skad ston te/ ji srid 'khor ba'i gnas su ni/ /mkhas mchog 'dug par gyur pa'i tshe/ /de srid mtshungs med sems can don/ /mya ngan mi 'da' byed par nus/ /zhes gsungs pas yang skye ba blangs par gyur na ni sbyin pa la sogs pas sems can gyi don bya ba la bslabs pas/byang chub kyi sems rnam par dag pa de bzhin gshegs pa'i go 'phang thob par byed pa nye bar skye bar 'gyur ro/ /de bas na nyan thos chen po rnams kyis ni nyon mongs pa bcad pa nyid kyis yang skye ba zhes bya ba rtsa ba'i rgyu ldog pa'i phyir de lta bu'i sems kyi rin po che 'bras bu'i bdag nyid can skyed par mi nus te/rgyu med pa nyid du thal bar 'gyur ba'i phyir ro/ /yang byis pa'i skye bo ni ji skad du bshad pa'i rgyu ma tshang ba med pas nus pa nyid yin no/ /zhes brjod pa yin no/ /tshig 'di ni rig pa'i rang bzhin nyid yin pas ji ltar na dgongs pa can yin zhe na/'on kyang zhes bya ba la sogs pa smras so/ /'on kyang zhes bya ba'i tshig gi phrad ni gnas skabs kyis de nas kyi sgra'i don la 'jug go/ /de dag gis zhes bya ba ni nyan thos chen po rnams kyis so/ /rjes su yi rang bar bya'o zhes bya ba ni 'og nas bshad pa'i rjes su yi rang ba'i yid la byed pas rjes su yi rang bar bya'o//khyed ci zhig la rjes su yi rang zhe na/ gal te bla na med pa zhes bya ba la sogs pa gsungs te/ gal te nyan thos chen po rnams bla na med pa yang dag par rdzogs pa'i byang chub tu sems bskyed par gyur na de la bdag rjes su yi rang ngo zhes bya bar sbyar ro//khyed spangs nas ji ltar rjes su yi rang zhe na/ de dag gi dge ba'i phyogs la zhes bya ba la sogs pa gsungs so/ /gal te kho bos gdul bya'i khyad par la ltos te sngar dgongs pa can gyi tshig smras par gyur pa de lta na yang nyan thos rnams kyi dge ba'i rtsa ba byang chub kyi sems las byung ba'i 'tshang rgya bar 'gyur ba nyid la bar chod de mi srid pa de nyid du byas pas gegs su gyur pa mi byed do//ji ltar mi byed ce na/ khyad par du 'phags pa'i zhes bya ba la sogs pa gsungs te/ gang gi phyir khyad par du 'phags pa'i dge ba'i bshes gnyen la sogs pa rnams las shin tu ches khyad par du 'phags pa kho na'i byang chub kyi sems la sogs pa'i chos rnams lhag par dmigs par bya zhing re bar bya'o//yang srid pa'i nyon mongs pa bsregs pa'i nyan thos dang rang rgyal ba rnams kyang 'gro ba de dang der skye bar ji ltar mi 'gal zhes ni brjod par mi bya ste/gang gi phyir gang zhig skye bo gzhan gyis dkri bar bya ba ma yin pa mngon par dga' ba sngon du btang nas dman pa'i gnas yongs su 'dzin pa de ni bdag la chags pa dang ldan pas sdug bsngal dang bde ba 'dor ba dang thob par 'dod pa sngon du 'gro ba can yin te/dper na bud med kyi ro yongs su 'dzin pa'i 'dod pa can bzhin no/ /de bzhin du mngal gyi gnas 'dzin pa 'di yang skye ba'i dbang phyug la sogs pas byin gyis ma brlabs par mngon par dga' ba sngon du 'gro bas dman pa'i gnas yongs su 'dzin pa yin no/ /zhes bya ba'i rang bzhin gyi gtan tshigs kyis khams gsum pa bskyed par bya ba la nyon mongs pa rnams kyi nus pa bsgrubs pa yin no//nyan thos chen po phung po dang bcas pa dang / phung po med pa'i ming can gyi byang chub gnyis thob nas snying rje chen po dang shes rab dang bral bas srid pa las skrag pa'i yid can mya ngan las 'das pa med kyang sngon gyi shugs kyis 'phangs pa'i tshe zad pa na mar me shi ba lta bur mya ngan las 'das pa zhes ming du byas pa/khams gsum pa'i skye ba las 'das pa rnams ni 'chi 'pho ba'i sems kyi de ma thag tu zag pa med pa'i dbyings la mnyam par bzhag bzhin pa kho nar yongs su dag pa'i 'jig rten gyi khams rnams su pad+ma'i sbubs su skye'o //de nas de dag 'od dpag med la sogs pa yang dag par rdzogs pa'i sangs rgyas kyi nyi ma'i 'od zer rnams kyis nyon mongs pa can ma yin pa'i mun pa bsal ba'i don du sad par mdzad pas/ byang chub tu sems bskyed nas thar pa'i gnas skabs su dmyal ba la sogs par rgyu ba bzhin du 'gro bar 'gro ba'i rim gyis byang chub kyi tshogs bsags nas 'jig rten gyi bla mar 'gyur ro zhes lung las nges pa yin no//des na rgyu yang las dang srid pa'i nyon mongs pa log pas 'bras bu khams gsum pa'i skye ba ldog par 'gyur gyi/zag pa med pa'i dbyings su skye ba ni ma yin pa'i phyir ji ltar 'gal/ de bas na theg pa thams cad ni rnam pa thams cad du theg pa chen por gzhol bar bshad pa nyid rigs pa yin par shes so/ /de lta na yang dam pa'i chos pad+ma dkar po dang bden pa po'i le'u la sogs pa las gsungs pa legs par drangs par 'gyur te/shA ri'i bu khyed ma 'ongs pa'i dus su yang dag par rdzogs pa'i sangs rgyas su 'gyur ro zhes bya ba dang / de bzhin du theg pa ni gcig ste gnyis pa med do zhes bya ba la sogs pa gsungs so/ /'ga' zhig gi skrag pa yongs su spang ba'i phyir chos bcu pa dang dkon mchog sprin la sogs pa las theg pa gcig tu bstan pa'i don ni drang ba'i don yin no zhes bcom ldan 'das nyid kyis gsal bar mdzad do//lang kar gshegs pa las kyang blo gros chen po nyan thos kyi theg pas grol ba ma yin gyi/'on kyang de dag gi theg pa chen po'i mthar thug pa nyid yin no zhes bya ba gsungs so/ /de bzhin du 'phags pa nA gardzu na'i zhal snga nas dang / de'i lugs kyi rjes su 'brang ba theg pa gcig gi tshul du smra ba rnams kyis gsungs pa ni/ byang chub rnam pa gnyis thob nas//srid pas skrag yid de dag ni/ /tshe zad la dga' mya ngan las/ /'das thob 'du shes can du 'gyur / /de la mya ngan 'das yod min/ /'on kyang srid gsum khams su ni/ /skye ba de la yod ma yin/ /zag med dbyings gnas de dag kyang / /mi shes nyon mongs mi spang phyir//phyis ni sangs rgyas kyis bskul nas/ /byang chub kyi ni tshogs bsags te/ /de yang 'jig rten 'dren par 'gyur/ /zhes bshad pa yin no/ /de ltar rnam pa thams cad du yid du 'ong ba'i de kho na nyid 'di bstan pas 'phags pa rab 'byor la gus pa skyes pa rnams kyi rab tu dang ba 'phel bar bya ba'i phyir/bcom ldan 'das kyis legs so zhes bya ba la sogs pa gsungs te/ spyod yul yin na yang don 'di lta bu mngon sum bzhin du rnam par gsal ba'i tshig gis bshad do zhes ngo mtshar du gyur pas legs so legs so zhes lan gnyis gsungs pa yin no//brjod par 'dod pa gsal ba kho nar ston pas rab tu dgyes te/ yang legs so zhes bya ba gsungs te/ brjod pa gang yin pa 'di ni mdzes pa kho na'o zhes bya ba yin no/ /gang zhes bya ba'i sgra ni tshig gi phrad de gang gi phyir zhes bya ba'i don la 'jug pa'o//glegs bam la la las ni gang gi phyir zhes zer te/ gang gi phyir khyed theg pa gcig tu ston pas byang chub sems dpa' rnams la rang gi phyogs bstan par byed pas spro bar byed pa yang legs so zhes bya ba'o/ /'phags pa thogs med kyi zhal snga nas dang de'i gzhung gi rjes su 'brang ba theg pa sna tshogs su smra ba rnams ni gzhan du 'chad de gang dag yang dag pa nyid du nges pa la zhugs la zhes bya ba la sogs pa'i tshig ni nges pa'i don yin la/'on kyang zhes bya ba la sogs pa'i tshig ni drang ba'i don yin te/ de bas na khyab pa'i don ni sangs rgyas kyi rigs can gyi dbang du byas pa yin no//de bzhin du/ kha cig dag ni drang phyir dang / / rdzogs pa'i sangs rgyas rnams kyis ni/ /ma nges rnams la theg gcig bstan/ /zhes bya ba la sogs pa ni mdo sde gzhan dang 'gal ba yongs su bsal ba yin no zhes so/ / sngar gyi theg pa gcig tu ston pa'i phyogs la ni gang dag nyan thos la sogs pa'i byang chub rtogs pa sngon du 'gro bas byang chub chen po rtogs par 'gyur ba de dag ni dus de tsam la brten nas nyan thos la sogs pa'i rigs su bstan pa yin la/ dang po kho nar rab tu dga' ba la sogs pa'i sa rtogs pa'i rim gyis bla na med pa'i byang chub la brten pa rnams ni theg pa chen po'i rigs can yin pa'i phyir rigs kyi dbye ba dang 'gal ba med do//zhar la 'ongs pas chog go/ /da ni lam shes pa nyid kyi rang bzhin dang byed pa bstan par bya ba'i phyir/ bcom ldan 'das bdag cag gis ni zhes bya ba la sogs pa smras so//phan btags zin pa dran pa mkhas pa ni bka' drin gzo ba'o/ /khyad par gyi lam la sogs pas dgos pa yongs su ma rdzogs pa yin pa'i phyir phan pa mdzad bzhin pa ma yin nam/ ci'i phyir de ltar smras snyam pa'i dogs pa de ci'i slad du zhe na zhes bya bas bsu nas/brjod pa ni bcom ldan 'das sngon gyi zhes bya ba la sogs pa'o/ /bdag cag rnams kyi don du zhes bya ba ni bdag cag gi dgos pa'i phyir zhes bya ba'i tha tshig ste/ nyan thos kyi theg pa sngon du 'gro ba'i chos kyi 'khor lo bskor ba'i phyir ro zhes bya bar 'dod do//ji ltar zhes bya ba ni bdag cag rnams kyi don du zhes bya bar sbyar ro/ /yang na ji ltar gdams pa'o/ /byang chub kyi phyir zhes bya ba ni bla na med pa'i byang chub kyi rgyur ro/ /tshangs par spyad pa ni mi tshangs par spyod pa las ldog pa ste/ tshul gnas thos dang bsam ldan pas/ / sgom pa la ni rab tu sbyor/ /zhes bya ba'i tshul gyis so/ /'dis ni ci rigs par bslab pa'i gzhi lnga la sogs pa dang ldan pa nyid du ston to/ /spyod pa na zhes bya ba 'khor ba ji srid par sems can rnams kyi don bya ba la 'jug pa nyid kyis byang chub tu sems bskyed pa ni lam shes pa nyid kyis nyon mongs pa rnam pa thams cad du spong bar mi byed pa zhes bya ba ni 'di'i rang bzhin yin pas nyon mongs pa rnams dbang du byas nas dus yun ring por sgrub par byed pa na zhes bya ba 'dis ni rang bzhin ston pa yin te/gzhan du na byang chub kyi spyod pa yongs su rdzogs par mi 'gyur ro zhes bya bar 'dod do//pha rol tu phyin pa rnams la gdams shing zhes bya ba ni/ sbyin pa la sogs pa'i pha rol tu phyin pa rnams la gdams pa ji lta bas gdams pa byas nas te/ gdams shing gdams pa byas nas gdams pa byas pas zhes bye brag tu bshad pas so/ / mdo la la nas 'di skad ston te/ gdams pa phog cing zhes bya ba ni go sla'o/ /rjes su bstan te zhes bya ba ni rjes su bslabs nas so/ /de la zhes bya ba ni nyan thos de rnams la ste/ gnas skabs 'ga' zhig tu'o/ /spyad pas zhes bya ba ni ji skad du bshad pa'i rang bzhin can gyi yang dag pa'i mtha' mngon du mi byed pa dang /shes rab dang thabs la mkhas pas sbyin pa la sogs pa rnams kyis yongs su bzung ba dang / yang dag par 'dzin du ma bcug pa dang / yongs su ma grol ba'i sems can rnams go rims bzhin du yongs su bzung ba dang /yang dag par 'dzin du bcug pa dang / yongs su grol ba la sogs pa'i las mdzad cing tshogs bsags pa zhes byed pa bstan pa yin te/ de lta ma yin na rtogs pa mi 'thad pa'i phyir ro/ /kha cig las ni gdams pa phog cing zhes 'don pa ni go sla'o/ / bla na med pa'i de bzhin gshegs pa'i ye shes bskyed cing thugs su chud pa yin no/ /de ltar dpe bstan nas dpe can gyi don smras pa ni bcom ldan 'das de bzhin du zhes bya ba la sogs pa'o/ /de bzhin du zhes bya ba ni de dang 'dra bar zhes bya ba'i tha tshig go/ /kyang zhes bya ba'i sgra ni bcom ldan 'das 'ba' zhig tu ma zad kyi bdag cag nyan thos chen po rnams kyis kyang gdams pa dang rjes su bstan pa dag nyid kyis rjes su gzung ba dang yongs su gtad pa'i tshul gyis rjes su gzung bar bgyi zhing rjes su bskor bar bgyi'o//de bzhin du gong nas gong du yongs su smin par bya ba'i don du yang dag par yongs su gzung bar bgyi'o//yang dag par yongs su bskor ba yang bgyi'o/ /yang zhes bya ba'i sgra ni nges par bzung ba'i don to/ /ji ltar bcom ldan 'das sngon byang chub sems dpa'i gnas skabs su nyan thos rnams kyis rjes su bzung ba ltar nyan thos khyed rnams kyis kyang byang chub sems dpa' gzhan dag de bzhin du rjes su gzung bar bya'o zhes bya ba 'di la 'brel pa ci zhig yod snyam pa'i dogs pa de ci'i slad du zhe na/zhes bya bas bsu nas brjod pa ni bcom ldan 'das bdag cag gis kyang 'di la zhes bya ba la sogs pa'o/ /bsam pa ni 'di yin te/ji ltar nyan thos rnams kyis rang gi sangs rgyas rnams la byang chub sems dpa'i gnas skabs su bdag cag rnams kyi don du tshangs par spyad pa spyod do zhes sngar mdzad pa'i phan btags pa khong du chud pas de rnams la slar bka' drin du gzo ba'i bsam pas de rnams kyi drung du bcom ldan 'das byang chub sems dpa'i gnas skabs su bdag cag rnams kyi don du tshangs par spyad pa spyod pa na mchog tu byams pa'i shAkya thub pas rjes su bzung ba yin no//de bzhin du bdag cag nyan thos chen po rnams kyis kyang / shAkya'i rgyal po byang chub sems dpa'i gnas skabs su bdag cag rnams kyi don du tshangs par spyad pa spyod par gyur to zhes bgyi ba sngon gyi phan pa mdzad pa khong du chud pas bcom ldan 'das la bka' drin gzo ba'i bsam pas khyed kyi drung du ma 'ongs pa'i sems can rnams kyi don du tshangs par spyad pa spyod pa'i byang chub sems dpa' mchog tu byams pa rnams rjes su gzung bar bgyi'o//de ltar na bdag cag rnams bcom ldan 'das bka' drin gzo ba yin no/ /de ltar rjes su bzung bas cir 'gyur zhe na/ myur du bla na med pa zhes bya ba la sogs pa gsungs te/ mngon par 'tshang rgya bar 'gyur ro zhes bya ba ni rtogs par 'gyur ba'o//la la las mngon par rdzogs par 'tshang rgya'o zhes zer te/ de la kha cig de ni rjes su bzung bas de nyid kyi tshe kho na mngon par rdzogs par sangs rgyas pa ma yin pas dpyad par bya'o zhes zer ro/ /gzhan dag ni rgyu ma tshang ba med pa tshogs pas 'bras bu 'byung ba brjod par 'dod pa na da ltar ba brjod pa yin no zhes zer ro//mog mog por byed pa la sogs pa ni ji skad du brjod pa de kho na ltar rtogs par bya ste/ de skad du yang / lha rnams rung bar bya ba'i phyir/ /'od kyis mog mog par mdzad dang / /yul nges pa dang khyab pa dang / /rang bzhin dang ni de yi las//zhes bya ba gsungs pa yin no/ /de ltar rten la sogs pa brjod nas nyan thos kyi lam gyi don ni/ de nas tshe dang ldan pa rab 'byor gyis zhes bya ba la sogs pa gsungs pa yin te/ de'i phyir zhes bya ba ni gang gi phyir lam shes pa nyid kyi skabs su rang gi lam gyi mthar thug par phyin par byas nas theg pa gzhan gyis 'dul ba'i sems can rnams kyi don du mngon du ma byas par yang rgyu dang bcas pa'i lam ston pa dang /'dris par byas pa la mkhas pa yin pa'i phyir/ byang chub sems dpas lam thams cad rdzogs par bya dgos pa de'i phyir kho bos khyed la nyan thos kyi lam bshad par bya ste/kau shi ka nyon cig ces bya bar sbyar ro/ /slob dpon dbyig gnyen gyis legs par nyon la zhes gsungs pa ni/ ji ltar lha rnams kyis char phab kyang / snod kha sbub pa la cung zad kyang mi 'jug go//de bzhin du khyod kha thur du lta zhing khong du ma chud pas ma nyan cig ces bya ba yin no/ /rab tu zhes gsungs pas ni ji ltar snod mi gtsang ba zed pa la chu gang zhig chud pa de thams cad mi gtsang bar 'gyur zhing dgos pa mi byed do/ /de bzhin du khyed log par rtogs pas nyan cing mi gtsang bar byed pas ma nyan cig ces bya ba yin no//yid la zung shig ces gsungs pa ni ji ltar snod gtsang ma bu ga can zed par chu zhugs kyang gnas par mi byed do/ /de bzhin du khyed rtogs pa mi brtan pas ma nyan par ci nas kyang shin tu gsal bar khong du chud pa'i sgo nas sems brtan par gyur pa de ltar nyon ces bya ba yin te/de ltar na thos pa 'bras bu dang bcas pa yin no/ /zhes bshad do/ /'phags pa lhas ni gzu bor gnas pa dang don du gnyer bar gyur pas nyon cig ces bya ba ni go rims bzhin du legs pa dang rab tu zhes bya ba gsungs pa yin no//de bzhin du rnam par dpyad pa por gyur pas nges par rtogs shig ces bya ba ni yid la zung shig ces gsungs pa yin te/ 'dis ni nyan pa po'i mtshan nyid bstan pa yin no zhes 'chad do/ /kho bos khyed la bshad par bya'o zhes bya ba ni khyed la phan gdags par bya ba'i phyir bstan par bya'o//zhes bya ba'o/ /khyed ji ltar 'chad ce na/ ji ltar zhes bya ba la sogs pa gsungs te/ ji ltar rnam pa gang gis shes rab kyi pha rol tu phyin pa la zhes bya ba nyan thos kyi lam gyi rang bzhin la gnas par bya zhing bsgrub par bya'o/ /de ltar khas blangs nas da ni kau shi ka zhes bya ba la sogs pa gsungs pa la/stong pa nyid la zhes bya ba ni sdug bsngal la sogs pa'i 'phags pa'i bden pa bzhi dang 'brel pa'i rnam pa rnams mi dmigs pa la'o/ /spyir bshad pa yin du zin kyang khyad par du khong du chud pa ni sngon gyi slob dpon rnams kyi man ngag la sogs pa'i rjes su 'brangs pa yin pa'i phyir 'dir som nyi mi bya'o//de'i bsdus pa'i don ni 'di yin te/ de la skye ba dang 'jig pa'i chos nyid kyis na mi rtag pa nyid do/ /zag pa dang bcas pa'i dngos po rnams ni rjes su mi mthun pa nyid kyis na sdug bsngal ba nyid do/ /de ltar byas na 'phags pa'i lam yang mi rtag pa yin mod kyi/zag pa med pa nyid yin pa'i phyir 'phags pa rnams la mi mthun pa ma yin pas 'di sdug bsngal nyid du thal bar mi 'gyur ro/ /bdag gzhan gyi stong pa nyid yin pa'i phyir bdag med pa nyid do/ /rang nyid bdag ma yin pa nyid kyis na zhi ba nyid do zhes bya ba ni sdug bsngal gyi bden pa'i rnam pa'o//'bras bu'i sa bon dang 'dra bar rgyu'i rtsa bar gyur pa nyid yin pa'i phyir nad nyid do/ /sdug bsngal kun 'byung ba nyid yin pa'i phyir 'bras nyid do/ /sdug bsngal gyi rkyen yin pa'i phyir zug rngu nyid do/ /sdug bsngal brgyud mar rab tu 'byung ba nyid kyis na shin tu 'joms pa'i phyir sdig pa zhes bya ba ni kun 'byung gi bden pa'i rnam pa'o//phyir rgol bar gyur pa nyid yin pa'i phyir pha rol nyid do/ /phyir rgol ba'i dngos pos rab tu 'jig pa'i chos can yin pa'i phyir 'jig pa'i chos can nyid do zhes bya ba ni sdug bsngal dang kun 'byung ba de dag nyid la so sor yid 'byung ba'i rnam pa'o//rang gi ngo bor gnas pa med pa nyid kyi phyir g.yo ba nyid do/ /rgyu la ltos pa med par rang bzhin gyis 'jig pa nyid yin pa'i phyir rab tu 'jig pa nyid do zhes bya ba ni de dag nyid la so sor 'dod chags dang bral ba'i rnam pa'o/ / 'di dang gzhan gyi gnod pa'i gnas su gyur pa yin pa'i phyir 'jig pa'o/ /srin po la sogs pa'i 'tshe bas glags thob pa yin pa'i phyir 'go ba'i nad nyid do/ /'byung ba chen po 'khrugs pa dang thog 'bab pa la sogs pa'i gnod pa'i gnas su gyur pa nyid yin pa'i phyir nye bar 'tshe ba nyid do zhes bya ba ni de dag nyid la so sor 'gog pa'i rnam pa'o//de ltar byas na 'phags pa nyan thos rnams yid 'byung ba dang / 'dod chags dang bral ba dang / 'gog pa'i phyir zhugs par 'gyur ba yin no zhes bya ba'i lung gi don bshad par 'gyur ro//nyon mongs pa dang bral ba nyid kyis na bdag med pa nyid do/ /sdug bsngal rab tu zhi ba nyid kyis na zhi ba nyid do/ /bde ba dang gtsang ba'i dngos po nyid kyis na dben pa nyid do/ /rtag pa dang phan pa'i dngos po nyid kyis na stong pa nyid dang mtshan ma med pa dang smon pa med pa dang mngon par 'du bya ba med pa nyid do//zhes bya ba ni 'gog pa'i bden pa'i rnam pa'o/ /mya ngan las 'das pa'i grong khyer thob par byed pa nyid kyis na lam nyid do/ /nyon mongs pa ma lus pa'i gnyen po'i tshogs su gyur pas na rig pa nyid do/ /sems kyi phyin ci ma log pa nyid du sgrub pa'i don gyis na sgrub pa nyid do//mngon par zhen pa med pas rtag pa'i gnas su 'gro ba yin pa'i phyir nges par 'byin pa nyid do zhes bya ba ni lam gyi bden pa'i rnam pa'o/ /de ltar rim pa 'dis na theg pa chen por rnam pa la la ni rnam grangs kyis/ la la ni rang gi ngo bo nyid du bstan pa yin pas nyan thos kyi lam ma yin pa nyid du thal bar mi 'gyur ro//de bas na lam shes pa'i skabs su byang chub sems dpas 'phags pa'i bden pa dang 'brel pa 'di rnams kyi ngo bo nyid mi dmigs par bsgoms pas nyan thos kyi lam shes par bya ba yin no/ /mdor bsdus pa 'di'i don ni stong phrag nyi shu lnga pa las gsal ba kho nar 'byung ba nyid yin pa'i phyir log par khong du chud par mi bya'o//de skad du / lam shes nyid kyi tshul la ni/ /'phags pa'i bden pa bzhi dag gi /rnam pa mi dmigs sgo nas ni/ /nyan thos lam 'di shes par bya/ / zhes gsungs pa yin no/ /de ltar nyan thos kyi lam brjod nas dro ba'i don ston pa ni/ kau shi ka de'i phyir zhes bya ba la sogs pa gsungs pa yin te/ gang gi phyir bden pa bzhi yongs su shes pa ni nges par 'byed pa'i cha dang mthun pa rtogs pa sngon du 'gro ba can yin pa'i phyir byang chub sems dpas dro ba rtogs par bya ba'i don du gzugs kyi ngo bo nyid kyis stong pa dang /tshor ba la sogs pa yang de bzhin te/ gzugs kyi ngo bo nyid gang yin pa dang / tshor ba la sogs pa'i stong pa nyid gang yin pa de gnyis su med cing gnyis su byar med do zhes dbyer med par bsgom par bya'o//don 'di yang go cha chen po bgos par gyur pa zhes bya ba 'dis bstan pa yin no/ /de yang rgyal ba'i yum bar ma las/ ji tsam gyis na byang chub sems dpa' go cha chen po bgos pa lags/ rab 'byor 'di ni byang chub sems dpa' stong pa nyid kyi chos thams cad dbyer med pa nyid du rtogs pa zhes bya ba la sogs pa gang gsungs pa yin no//de skad du yang / 'phags pa nyan thos lam la ni/ / gzugs sogs phung po stong nyid phyir/ /stong pa nyid rnams dbyer med pas/ /dro ba/ zhes gsungs pa yin no/ /rtse mo bstan pa'i phyir gzugs la gnas par mi bya'o zhes bya ba la sogs pa smras te/dmigs pa'i tshul gyis zhes bya bar bsams pa'o/ /mig la gnas par mi bya'o zhes bya ba la sogs pa dang / dran pa nye bar gzhag pa la gnas par mi bya'o zhes bya ba la sogs pa dang / rgyun du zhugs pa'i 'bras bu la gnas par mi bya'o zhes bya ba la sogs pas ni/go rims bzhin du zag pa dang bcas pa dang / gnyi ga dang / zag pa med pa nyid kyi phung po lnga po 'di rnams kyi rab tu dbye ba bstan pa yin no zhes bya ba ni 'dres kyi don yin no/ /khams la sogs pa'i rang gi ngo bo'i mtshan nyid ni rab tu grags pa yin pa'i phyir ma bris so//yid kyi rnam par shes pa'i bar du zhes bya ba 'dir bar dang zhes smos pas ni rna ba la sogs pa'i rnam par shes pa la sogs pa la bsgre ba yin no/ /tha na sangs rgyas nyid la gnas par mi bya'o zhes bya ba ni bla na med pa yang dag par rdzogs pa'i sangs rgyas nyid la'o//gal te rten gyi bdag nyid can gyi gzugs la sogs pa la gnas par mi bya na/ de lta na ni 'o na tshig thams cad ni ldog pa'i 'bras bu can yin pa'i phyir gzugs la sogs pa'o/ /de'i bdag nyid kyis gnas pa 'thob par 'gyur ro zhes 'ga' zhig rtog pa dgag par bya ba'i phyir/de ltar na gzugs so zhes gnas par mi bya'o zhes bya ba la sogs pa gsungs pa yin te/ de ltar na zhes bya ba'i sgra ni de'i phyir zhes bya ba'i don to/ /na'i sgra ni snga ma bzhin no/ /ngag gi don ni 'di yin te/ gang gi phyir rigs pas dmigs su med par bsgom pa na gzugs la sogs par yod pa ma yin pas na rten du bsgom pa mi 'thad pa'i rgyu de'i phyir/rang gi ngo bo dang bral ba la de'i bdag nyid dang gzhan par khas blang ba'i ngo bor rigs pa ma yin no zhes so/ /gdul bya'i skye bo nyi ba rnams kyi phyin ci log bsal bar 'dod pas ci zhig ltar rten gyi ngo bor bstan pas na ldog pa'i 'bras bu can du yang khas blang bar mi bya'o//de bas na rtse mo gtogs par bya ba'i phyir gzugs la sogs pa rnam pa thams cad du mi dmigs par bsgom par bya'o/ /de skad du yang / de dag mi dmigs pas/ rtse mor gyur pa dag tu 'dod//ces gsungs pa yin no/ /yid kyi 'dus te reg pa las byung ba'i tshor ba zhes bya ba 'dir bar du zhes bya ba'i tshig gis ni mig gi rnam par shes pa la sogs pa bsdu'o/ /rnam par shes pa'i khams so zhes bya ba 'dir bar du zhes bya ba smos pas ni chu'i khams la sogs pa yongs su bsdu'o//bzod pa bstan par bya ba'i phyir/ gzugs rtag pa dang mi rtag pa'o zhes gnas par mi bya'o zhes bya ba la sogs pa gsungs pa yin te/ mi rtag pa la sogs pa'i tshig ni bshad zin to/ /de las bzlog pas rtag pa la sogs pa'i tshig tu brjod par bya'o/ / mi mthun pa dang gnyen po'i phyogs kyi dbye bas sdug bsngal gyi bden pa'i rnam pa nye bar bzung bar byas pa ni gtso bo yin pa'i phyir mngon par zhen pa thams cad las bzlog par bya ba'i phyir ro/ /gzugs sdug pa dang mi sdug pa zhes bya ba la/ sdug pa ni bsngags pa'o/ /mi sdug pa ni mi bsngags pa'o//'di dag kyang bden pa lhag ma rnams kyi rnam pa nye bar mtshon pa lhur byed pa yin no/ /gal te de ltar rnam pa thams cad dang bral na de lta na ni ngo bo nyid kyis stong pa kho nar 'gyur ro zhes dogs pa bsal bar bya ba'i phyir gzugs stong pa'o zhes dmigs pas zhes bya ba la sogs pa gsungs te/stong pa ma yin pa'i dngos po bkag pas stong pa zhes bya bar brjod do/ /de bas na ji skad du bshad pa'i tshul gyis dngos po med pa yin pa'i phyir/ yul med pa la dgag pa rigs pa ma yin no zhes bya bar bsams pa'o/ /'di skad du/ bzod pa rtogs par bya ba'i phyir gzugs la sogs pa la rtag pa dang mi rtag pa zhes bya ba la sogs pa'i rnam pas dmigs pa'i tshul gyis gnas skabs thams cad du gnas par mi bya'o zhes de ltar bsgom par bya'o zhes brjod pa yin no//de skad du yang / de la rtag la sogs tshul gyis/ /gnas pa bkag pas bzod pa rnams//zhes gsungs pa yin no/ /chos kyi mchog bstan pa'i phyir rgyun du zhugs pa'i 'bras bu zhes bya ba la sogs pa gsungs te/ 'dus ma byas kyis rab tu phye ba zhes bya ba ni 'bras bu ste/ de kho na nyid du skye ba med pa'i rang bzhin yin pa'i phyir lam ni 'dus ma byas las rab tu skyes pa 'bras bu nyid yin pa'o//de ltar spyir mngon par zhen pa bkag pa'i don bstan nas khyad par bstan pa'i phyir/ rgyun du zhugs pa sbyin pa'i gnas zhes bya ba la sogs pa gsungs te/ bsod nams kyi zhing khyad par can yin pa nyid kyis na gtsor sbyin par 'os pa nyid yin pa'i phyir sbyin pa'i gnas so//re ltar thogs na srid pa lan bdun pa'o zhes bya ba'i lhag ma lus pas re ltar te mchog tu thogs kyang 'khor ba'i gnas su lan bdun gyi bar du gzhol ba yin no/ /yongs su mthar ma phyin pa'i phyir zhes bya ba la sogs pa la/ bya ba yongs su ma rdzogs pa'i phyir mi'i 'jig rten 'dir lan cig 'ongs te phyin par gyur nas sdug bsngal te 'dod chags la sogs pa nyon mongs pa mthar byed cing rnam par 'jig par byed pa'o//de nyid du zhes bya ba ni srid pa bar ma'i gnas skabs su'o/ /'di nyid du zhes bya ba ni dgra bcom pa skye ba gang du skyes pa de nyid du zhes bya ba'i tha tshig go//phung po lhag ma ma lus pa'i mya ngan las 'das pa'i dbyings su zhes bya ba la/ phung po ni lus so/ /'dod chags la sogs pa thams cad spangs pa'i phyir lhag ma nyid du gyur pa'i lhag ma de mya ngan las 'das pa gang la med pa de la de skad ces bya'o/ /gang du rnam par rtog pa thams cad 'gags pa de ni mya ngan las 'das pa ste de bzhin nyid do//de nyid ni dbyings te/ de la dmigs pa'i dngos pos 'phags pa rnams skyed pa'i rgyu yin te/ de bas na dbyings der zhes bya bar sbyar ro/ /rgyun du zhugs pa zhes bya ba la sogs pas 'bras bu la gnas pa rnam pa bzhi smos pas med na mi 'byung ba'i phyir zhugs pa'i gnas skabs bzhi yang gzung bar bya'o//des na nyan thos kyi sa rnam pa brgyad du 'gyur ro/ /gang zag gang gis nyon mongs pa'i rnam pa ji tsam spangs pas zhugs pa nyid la sogs par rnam par gzhag pa ni sngar bshad pa nyid yin pa'i phyir slar nye bar bkod pa ma byas so//rang sangs rgyas zhes bya ba la sogs pa la mdor bstan pa'i tshig 'chad pa ni/ rang sangs rgyas zhes bya ba la sogs pa gsungs pa yin te / bdag nyid gcig pu'i rgyur gyur pa'i phyir rang gi byang chub rtogs pa rang nyid yin pas na rang sangs rgyas so//nyan thos kyang de ltar thal bar ni mi 'gyur te/ de ni gzhan gyis nye bar bstan pa la ltos pa'i phyir ro/ /yang dag par rdzogs pa'i sangs rgyas la yang thal bar 'gyur ba yang ma yin te/ de ni sems can thams cad kyi don du rnam pa thams cad mkhyen pa nyid ched du mdzad pas khyad par du 'phags pa'i phyir ro//'dis ni sa dgu pa rang sangs rgyas kyi sa bshad pa yin no/ /nyan thos kyi sa las 'das nas zhes bya ba ni gzung ba'i don gyi rnam par rtog pa spangs pas de la brgal nas so/ /sangs rgyas kyis ma thob pa ni 'dzin pa'i don gyi rnam par rtog pa ma spangs pas bla na med pa yang dag par rdzogs pa'i sangs rgyas kyi sa ma rtogs par ro//de bzhin du sangs rgyas sbyin pa'i gnas so zhes gnas par mi bya'o zhes bya ba'i tshig rnam par dbye ba'i phyir/ sangs rgyas ni zhes bya ba la sogs pa gsungs pa yin no/ /so so'i skye bo'i sa zhes bya ba ni mos pas spyod pa'i sa'o//gzhal du med par zhes bya ba la sogs pa la/ mngon sum la sogs pa'i tshad mas gzhal bar mi nus pa'i phyir gzhal du med pa'o/ /gcig nyid la sogs pa grangs dang bral ba'i phyir grangs med pa'o/ /'dis ni 'dul ba la sogs pa gang la la dag tu rab tu bzang gi mthar thug pa so sor nges pa'i sems can gyi don mdzad par la lar gsungs pa ni dgongs pa can yin par bstan to//yang na 'jig rten gyi khams 'dir don gyi bya ba mdzad pa'i dbang du byas nas de skad bshad pa yin gyi/ gzhan du na sprul pa'i sprin rnams kyis 'jig rten gyi khams thams cad du sems can gyi don mdzad pa yin pa'i phyir grangs med pa la sogs pa'i tshig dang mi 'gal ba yin no//yang na khyad par du 'phags pa theg pa chen po'i ming can gyi theg pa'i khyad par zab mo nyid la sogs pa dang ldan pa 'di ni gzhan kho na yin te/des na 'dir mi mthun pa kho nar bstan pa yin pa'i phyir theg pa gzhan dang lhan cig tu 'gal ba brjod par mi bya'o/ /de bzhin du 'di lta bu'i rigs can gyi don gzhan dag tu yang 'di nyid lan du gzung bar bya'o/ /sems can rnams kyi don mdzad de/ /zhes bya ba ni kha cig la sbyin pa la sogs pas mngon par mtho ba'i chos rdzogs par mdzad nas so//yongs su mya ngan las 'das nas zhes bya ba ni kha cig nyan thos kyi mya ngan las 'da' ba la sogs pa des nges par legs pa'i chos la bkod nas so/ /nyan thos dang rang sangs rgyas dang yang dag par rdzogs pa'i sangs rgyas su nges par mdzad cing zhes bya ba ni/nges par 'byed pa'i cha dang mthun pa la sogs pa'i dge ba gang zhig rtogs pas gdon mi za bar mngon par mtho ba dang nges par legs pa'i chos dag 'thob par 'gyur ba'i rgyu de la gzhan 'jog pa'i phyir na nges par te/ rigs nges pa la gnas par mdzad cing zhes bya ba'i don to/ /sangs rgyas kyi sa zhes bya ba 'dis ni kun tu 'od ces pa sa bcu pa ni sangs rgyas kyi sa yin par bshad do/ /sangs rgyas kyi mdzad pa zhes bya ba ni chos kyi 'khor lo bskor ba'o/ /sangs rgyas kyi yongs su mya ngan las 'da' bas zhes bya ba ni nyan thos la sogs pa dang thun mong ma yin pa'i yongs su mya ngan las 'da' bas so//mya ngan las 'das pa 'di ni sprul pa'i sku yin par 'dod do/ /'di ga las she na/ lung dang rigs pa las so/ /'di ltar gnas pa'i rgyu ma tshang ba med pa can gang yin pa de ni rtag tu gnas pa rgyun chad pa'i rang bzhin can ma yin te/dper na me dang shing la sogs pa gnas pa'i rgyu nus pa can yongs su rdzogs par yod pa can gyi du ba la sogs pa lta bu'o/ /sangs rgyas bcom ldan 'das kyang gnas pa'i rgyu ma tshang ba med pa can yin no/ /gnas pa rgyun chad pa'i khyab par byed pa gnas pa'i rgyu ma tshang ba med pa dang 'gal ba gnas pa'i rgyu ma tshang ba nyid 'dir bsgrub pa'i phyir na khyab par byed pa 'gal ba dmigs pa'o//chos mi mthun pa ni du ba la sogs pa'i rgyun chad pa la sogs pa dang 'dra'o/ /rgyu ma tshang ba med par yod pa las 'bras bu mi 'byung ba'i sbyor ba ni 'gal ba yin no//gtan tshigs 'di ji ltar 'grub ce na/ brjod pa/ gnas pa'i rgyu ma tshang ba ni sems can gyi don sgrub pa'i nus pa yongs su zad pas sam/ thugs rje chen po dang bral bas sam/ tshe'i 'du byed gnas pa la mnga' brnyes pa las nyams pas sam/ srog gi dbang po gnas pa'i las kyi rnam par smin pa mthar gtugs pas sam/sangs rgyas kyis 'dul ba'i gdul bya rnams med pa las yin grang / de la rtog pa dang po ni med de/ ston pa'i mkhyen pa nus pa thogs pa med pa can du khas blangs pa'i phyir ro/ /de lta ma yin na 'di bse ru la sogs pa rnams las khyad par ci zhig yod par 'gyur/dus yun ring por goms pas gtsang sbra can thod pa can la zhe mi btsog pa ltar brtse ba chen po'i bdag nyid du gyur par mdzad pa'i phyir 'bad pa med par nyams pa mi mnga' zhing rnam par 'phel ba de'i ro myang ba lhur mdzad pa ni de nyid phyogs su lhung bas na/skyon ma mthong ba'i phyir 'bad pa yang med pa'i phyir rnam par rtog pa gnyis pa yang med do/ /rdzu 'phrul gyi rkang pa goms pa rab kyi mthar phyin na rnam par rtog pa gsum pa yang rigs pa dang 'brel pa ma yin no/ /de skad du yang / 'di ltar kun dga' bo gang la la zhig rdzu 'phrul gyi rkang pa bzhi bsten cing bsgoms la lan mang du byas pa de ni 'dod na bskal pa'am bskal pa las lhag par gnas par 'gyur ro//kun dga' bo de bzhin gshegs pas ni rdzu 'phrul gyi rkang pa bzhi bsten cing bsgoms la lan mang du mdzad pas de bzhed na bskal pa 'am bskal pa las lhag par bzhugs so zhes gsungs pa'i phyir ro//srog gi 'bras bu can gyi zad pa yang srog gcod pa spangs pa dang / thabs dpag tu med pas goms par byas pa'i sbyin pa'i pha rol tu phyin pa skal ba mi nyung bar bsags pa'i bla ma la srid pa ma yin no/ /rgyu dang 'bras bu dag gi chos nyid ni 'di yin te/rgyu mchog tu gyur pa las ni 'bras bu mchog tu gyur pa 'byung la mchog ma yin pa las ni mchog yin pa zhes bya ba gang yin pa'o/ /de lta ma yin na rgyu phul du byung ba dang phul du byung ba ma yin pa dag la 'bras bu la de mi 'byung ba'i phyir na/ phan gdags par bya ba dang phan 'dogs par byed pa'i dngos por mi 'gyur te/de la brten pa'i tha dad pa la mi ltos pa'i phyir ro/ /ston pa la ni dpag tu med par 'tsho ba'i rgyu gzhan gsod pa spangs pa la sogs pa kha na ma tho ba med pa dpag tu med pa yod pa yin te/ des na lo brgya yang ji ste mi bzhugs/ 'di dag thams cad kyi 'bras bu ni thams cad mkhyen pa nyid yin no zhe na ma yin te/gtsor yun ring por 'tsho ba 'bras bu'i brjod pa'i phyir te/ srog gcod pa las ldog pa dang sbyin pa'i pha rol tu phyin pa gnyis kyi 'bras bus ni tshe ring bar rjes su 'gro ba dang / ldog pa'i sgo nas gsungs pa yin no//gang zhig gang gis gtso bo'i rgyu yin par brjod pa de ni yongs su rgyas par byed pa'i rten nye bar gnas pas de skyed pa nyid na gal te gzhan gyi yang rgyu mtshan du 'gyur ba ni nyes pa yod pa ma yin no/ /lan cig ma yin par rnam par nges pa'i 'bras bu bor nas gzhan skyed par byed pa ni ma yin te/lan cig kyang de skyed par byed pa nyid ma yin pa nyid du thal bar 'gyur ro/ /gzhan yang chos rnams kyi de kho na nyid la goms par mdzad pa'i dbang nyid las rnam pa thams cad mkhyen pa nyid du 'gyur ba yin la/ bsod nams kyi tshogs ni de'i rten khyad du 'phags pa bskyed pas na rjes su mthun par gyur pa yin no//de bas na bsod nams yongs su zad pas bcom ldan 'das 'chi bar brjod pa ni bab col yin no/ /gal te de bzhin gshegs pas gdul bar bya ba'i sems can med pas mya ngan las 'da' ba yin no zhes 'dod na de 'dir dpyad par bya ste/ ci sangs rgyas kyi skus 'dul ba'i sems can nyid med dam/'on te ci gzugs gzhan dag gis 'dul ba rnams kyang med/ gal te phyogs snga ma ltar yin na de'i tshe brgya byin la sogs pa'i gzugs su bstan pas 'dul ba'i skye bo rnams srid pas de'i gzugs ci ste mi bzhugs/thugs brtse ba'i dbang du gyur pa'i thugs dang ldan pa de dag ni skye bo rnams la phan pa bsgrub par bya ba'i phyir cha lugs gzhan dag gis kyang gnas par mdzad de/ dper na bcom ldan 'das nyid 'khor los sgyur ba'i gzugs su bzhugs pa lta bu'o/ /brgya byin la sogs pa'i gzugs kyis 'dul ba yang med pa ni ma yin te/shes par byed pa med pa'i phyir te/ brgya byin la sogs pas gzhan la phan 'dogs pa med par thal ba'i phyir ro/ /gzhan yang 'jig rten gyi khams gcig tu sangs rgyas kyi gzugs kyis 'dul ba'i skye bo rnams med kyang 'jig rten gyi khams dpag tu med pa gzhan rnams na de yod pa'i phyir 'di ji ste yongs su mya ngan las 'da'/'jig rten gyi khams gzhan na yang de med do zhe na de la de ltar shes par byed pa med do/ /'jig rten gyi khams thams cad na sangs rgyas kyi skus gdul ba'i sems can rnams med do zhes bya ba 'di ni gang nas kyang ma gsungs so//'on te nges pa med pa yin te/ yod na gzhan gyi don la 'jug pa ci'i phyir yongs su mya ngan las 'da' zhes bya bar 'dod na/ yongs su mya ngan las 'da'o zhes brjod na 'di nyid kyang grub pa ma yin te/ gang gi phyir 'jig rten gyi khams gcig nas sangs rgyas kyi sku bstan pas 'dul ba med pa na mya ngan las 'da' ba nye bar bstan pas 'dul ba'i skye bo rnams rjes su gzung bar bya ba'i phyir yongs su mya ngan las 'da' ba bstan kyang gzhan dag tu bltams pa dang /mngon par byang chub pa dang / chos kyi 'khor lo bskor ba ma tshang ba med pa nye bar ston pa mdzad pa yin no zhes bya ba ni grub pa'i mtha' yin no//de skad du yang / sangs rgyas mya ngan yong mi 'da'/ /chos kyang nub par mi 'gyur te/ /sems can rnams ni smin mdzad phyir/ /mya ngan 'da' bar ston pa mdzad/ /ces ji skad gsungs pa lta bu'o/ / gzhan yang re zhig srid par rgyu ba'i dam pa gzhan dag snying brtse bas dbul bar gyur kyang ngo tsha shes pa dang bden pa'i nor yongs su bskyang bar bya ba'i phyir nus pa thams cad zad kyang nges pa kho nar dam bcas pa'i don gyi sgrub pa rdzogs par byed pa mthong na/ skye bo dam pa mtha' dag gi gtsug gi nor bu/srid pa'i 'jig pa las yang dag par brgal ba/ ngo tsha shes pa dang bden pa dang brtse ba'i bdag nyid du mdzad pa'i chos can ye shes kyi mthu thogs pa med pa'i de bzhin gshegs pa rnams de rdzogs par mi mdzad do zhes bya ba la sems dang ldan pa su zhig dad par 'gyur//de dag gis dam bcas pa yang sems can thams cad sdug bsngal las shin tu nges par 'grol ba yin te/ 'di ltar bcom ldan 'das kyis sngon smon lam btab pa/ bsod nams 'di yis thams cad gzigs pa nyid/ /thob nas nyes pa'i dgra rnams pham byas te/ /rga nad 'chi ba'i dba' klong 'khrugs pa yi//srid pa'i mtsho las 'gro ba 'don par shog /ces bya ba yin no/ /'gro ba zhes bya ba'i sgras sems can nyung zad gcig gzung bar yang rigs pa ma yin te/ sems can thams cad la dmigs pa'i thugs rje chen por mi 'gyur ba'i phyir ro/ / de bas na ji srid du sems can gcig yod pa de srid du ni thugs rje'i dgongs pa can rnams mya ngan las 'da' bar rigs pa ma yin no/ /mtha' yas pa yin pas na sems can thams cad 'khor ba las nges par 'don pa mi srid do/ /de nyid kyis na thugs rje'i rang bzhin can de'i dgongs pa dang ldan pa rnams kyi gnas pa ni mtha' yas pa nyid yin te/gzhan du na dam bcas pa dang rjes su sgrub par mi 'gyur ro/ /thugs rje chen po dang rjes su mthun par yang mi 'gyur te/ 'di ltar thugs rje chen po ni 'di yin te/ sems can thams cad kyi sdug bsngal yongs su skyob par bzhed pa'i rnam pa can no//des na legs par bsgoms pa de gnas ma yin par glo bur du rgyun chad par ga la 'gyur/ gal te rgyun chad pa ni ma yin te/ 'on kyang dus de'i tshe byung ba'i sangs rgyas kyi gdul bya rab bzang gi mthar thug pa gang yin pa de dag thams cad ni btul zin la/ gzhan gang dag dus gzhan dag tu rgyud yongs su smin par 'gyur ba de'i don bya ba'i phyir de bzhin gshegs pa gzhan rnams kho na rim gyis 'byung bar 'gyur ba des na de rnams la phan pa bsgrub par bya ba'i phyir byang chub sems dpa' gzhan 'ga' zhig la dbang bskur nas yongs su mya ngan las 'da' ba yin te/de lta ma yin na bar du gzhan gyi don du bzhugs pa'i phyir gnas pa don med par 'gyur ro zhe na de ni rigs pa ma yin te/ sangs rgyas kyi gdul bya'i sems can med pa nyid ma grub pa'i phyir dang / 'jig rten gyi khams thams cad na bya ba gzhan gyi gdul bya dag srid pa'i phyir te/sngar ji skad du bshad pa bzhin no/ /bzhugs pa don med pa yang ma yin te/ de'i don mdzad pa'i ched du bzhugs pa'i phyir ro/ /ji ltar shAkya'i rgyal po nyid rab bzang la sdod pas dus cung zad bzhugs par gyur pa bzhin no/ /dus de ni shin tu thung ba yin no zhes bya ba yang dag pa ma yin te/gang gi phyir mngon par bzhed pa'i 'bras bu sgrub pa'i thugs dang ldan pa de dag dus yun ring ba 'am yun thung ba brtsi bar mi mdzad do/ /dus gzhan du rgyud yongs su smin pa rnams la ni nus pa dang ldan pa gzhan dag 'byung bar 'gyur ro zhes bya ba yang lan ma yin te/ gang gi phyir de lta na ni byang chub tu sems bskyed pa la yang 'bad pa med pa kho nar 'gyur te/'jig rten gdon pa'i bsam pa can mang po'i bya ba mthong bas de dag gis byas zin na 'dir bdag gis ci zhig bya snyam du sems par 'gyur ba'i phyir ro/ /thugs rje chen po dang ldan pas de ltar brtsi bar mi mdzad par 'jug go zhe na/mchog tu gyur pa'i gnas skabs su ci'i phyir de ltar brtsi ba mi rtsom/ gnas skabs der brtsi bar mi mdzad pa ni rigs pa yin te/ 'jug pa'i rgyu thugs rje chen po bdag nyid du mdzad pa'i phyir ro/ /de bas na/ bskal pa grangs med mang por ni/ /bsgom pa yongs su rdzogs byung ba'i//gang dag brtse ba chen po la/ /gzhan gyi ngor ni bzhugs pa yin/ /zhes bshad do/ /bcom ldan 'das yon tan gyi rang bzhin gyi sku can yang shin tu rgyun chad pa'i mtshan nyid can du yongs su mya ngan las 'da' bar 'dod na/ de ni da lta ba rnams kyi skyabs kyi don du yang mi 'thad de/skyabs kyi don ni skyob pa'i don yin par brjod do/ /gang zhig sangs rgyas bcom ldan 'das la skyabs su 'gro ba de ni sangs rgyas su byed pa'i chos mi slob pa la skyabs su 'gro ba yin na/ sangs rgyas su byed pa'i chos mi slob pa'i chos kyi bdag nyid can rgyal ba rnams mar me'i rgyun lta bur shin tu yang so sor nub par gyur na/de rnams skyob pa'i nus pa ga la yod/ nus pa yod na ni mya ngan las mi 'da' bar thal bar 'gyur te/ dngos po rnams ni nus pa'i mtshan nyid can yin pa'i phyir ro/ /'das pa'i dus na bzhugs pa'i nus pa nyams pa ma yin no zhe na/ ma yin te/'das pa de'i ngo bos yod pa yin na ni da ltar byung bar 'gyur ba'i phyir ro/ /de lta na yang de nyid mi gnas pa'i mya ngan las 'das par grub pa 'am/ nus pa'i don 'gags na yang nus pa'i don gang zhig yod par 'gyur/ 'on te des bstan pa'i gsung rab rin po che la skyob pa'i nus pa da dung yang yod pas de yang nus pa yin par brjod do zhes 'dod na/gal te de lta na ni 'o na skyabs de gtso bor mi 'gyur te/ rang bzhin tha dad pa'i phyir de'i 'bras bu'i nus pa de'i yin par mi 'gyur ro/ /de'i nus pa dang lhan cig tu nyams par 'dod pa'i phyir de la gtso bo yin pa'i skyabs kyi don yod pa ma yin no//rgyu mtshan med par dgrar gyur pa 'di dag rigs pa dang lung gzhan dang ldan pa yin yang lung gi don dgongs pa can yin pa las 'das nas/ bcom ldan 'das mya ngan las 'das par sgrub pa'i don du spro ba dang bcas par gnas pa lung 'dzin pa rnams kyi gnas ma yin pa la mngon par zhen pa 'dir yang ci zhig yin/bcom ldan 'das la mya ngan las 'das pa mi mnga' na sku gdung ji ltar snang bar 'gyur zhe na/ sku gdung mi 'thad pa yang ma yin te/ bcom ldan 'das kyi bdag po nyid las de'i skal ba can rnams kyi rab tu dang ba'i skye mched la sku gdung snang ba'i phyir ro/ /de kho nar ni sku gdung mi 'dod pa kho na ste/thub pa sgrib pa mi mnga' ba'i blo can rnams kyi sku ni sgyu ma lta bu'i ye shes kyi rang bzhin yin pa'i phyir dang / 'khor ba ji srid du bzhugs pa'i phyir ro/ /de skad du/ gser 'od dam pa'i mdo las/ mtho ris su ni 'dzeg pa'i phyir/ /nam zhig ri bong rwa rnams las/ / skas ni legs par byas gyur na/ /de tshe ring bsrel yod par 'gyur/ /sku la rus pa khrag med na/ /ring bsrel yod par ga la 'gyur/ /zhes bya ba lta bu'o/ /de lta na gtan tshigs ma grub pa ma yin no/ /mthun pa'i phyogs la yod pas 'gal ba yang ma yin no//rgyu ma tshang ba med pa yod na 'bras bu mi 'byung ba mi 'thad pas gnod par byed pa yin pa'i phyir bzlog pa la gnod par byed pa'i tshad ma yod pas ma nges pa yang ma yin no/ /gal te thogs pa med pa'i ye shes dang ldan pa'i thub pa chen po 'khor ba ji srid par gnas na/ de bzhin gshegs pa dang gzhan 'byung ba don med par 'gyur ro zhes bya ba'i nyes pa yang med de/gang gi phyir thogs pa med pa'i ye shes dang ldan pa nyid yin yang rgyu mtshungs par spyad pa'i phyir na sangs rgyas mang pos gdul ba'i sems can rnams kyi don du bcom ldan 'das de bzhin gshegs pa rnams cig car yang 'byung bar 'gyur ro//pha bong gis mnan pa'i sbal pa gdon pa'i phyir so so'i skye bo'i sa la gnas pa'i brtse ba can rnams bzhin no/ /de bzhin gshegs pa gzhan byung ba na de bzhin gshegs pa'i snga ma'i ye shes kyi nus pa nyams pa yin no zhes kyang brjod par mi bya ste/gcig tu 'dus pas kyang rang bzhin des 'dul ba'i skye bo yod na sems can gyi don mdzad pa'i phyir ro/ /'di ltar ye shes kyi nus pa thogs pa med pa can cig yod na rgyu mtshungs pa gzhan de ltar 'gyur ba ma yin no zhes bya bar ni mi rigs te/ cig mkhas par 'gyur zhes te de dang rgyu mtshan mtshungs pa gzhan mi 'gyur ba ni ma yin no//de bzhin gshegs pa gcig gi gdul bya ma yin na thams cad kyi gdul bya ma yin no/ /zhes 'dod na de ltar ma yin te/ gang gi phyir tshogs mtshungs pa'i phyir na bcom ldan 'das gcig gis gdul byar ma gyur pa nyid kyis/ de bzhin gshegs pa mang po rnams kyi yang so so'i gzugs re res gdul byar ma gyur pa yin yang sprul pa ma yin pa'i sangs rgyas mang po'i gzugs kyi gdul bar gyur cig ces rnam pa de lta bu'i smon lam la sogs pa'i rgyu'i 'phen pa las cig car byung bas mang po rnams kyi gdul byar 'gyur ro//de nyid kyi phyir nyan thos rnams dang mtshungs par brtag par bya ba yang ma yin te/rang gis yongs su smin par byas pa'i gdul bya'i sems can med pa ma yin pa'i phyir ro/ /de nyid kyis na rang bzhin de lta bu 'dus pas 'dul bar bya ba'i skye bo mi srid pa'i phyir na gcig tu mngon du gnas pa ma yin no/ / de nyid kyi phyir na 'jig rten gyi khams gcig tu cig car de bzhin gshegs pa mang po rnams 'byung ba yang ma yin no/ /srid na ni ser sna dang phrag dog la sogs pa'i dri ma dang bral ba rnams 'gal ba ma yin no/ /de dag gis ni smon lam 'di ltar btab ste/ ji lta ji ltar gdul bya yi/ /don rnams rdzogs par 'byung gyur pa//de lta de ltar snang ba yang / /bdag la brten de 'byung gyur cig /ces so/ /shin tu spros pas chog go/ /rigs pas 'thad pa'i de bzhin gshegs pa'i sprul pa'i sku yongs su mya ngan las 'das pa la yang mi gnas na/ rnam pa thams cad du gnas pa 'thad pa ma yin no snyam pa'i bsam pa dang ldan pas/gal te sangs rgyas zhes bya ba la sogs pa rjes su brjod pa sngon du 'gro bas brjod pa ni des ji ltar gnas par bya ba zhes bya ba la sogs pa'o/ /gal te de ltar gnas par mi bya na de'i phyir byang chub sems dpa' des ji ltar te rnam pa gang gis gnas par bya zhing rtogs par bya/ji ltar bslab par bya ste bsgrubs pas yongs su rdzogs par bya/ ci zhes bya ba'i sgra ni spang ba brjod pa nyid yin pa'i phyir rnam pa gang gis kyang ma yin no zhes bya ba'i tha tshig go/ /de nyid kyi lan gdab pa'i don du brjod pa ni/ tshe dang ldan pa shA ri'i bu de ji snyam du sems zhes bya ba la sogs pa'o//de bzhin gshegs pa'i gnas pa gang yin pa de la khyod ji snyam du sems shing rtogs/ gal te shes na smros shig ces brjod pa ni de bzhin gshegs pa zhes bya ba la sogs pa'o/ /'on kyang khyed nyid la klan ka btsal bar bya ste zhes le'u dang por brjod pa gang yin pa de 'dis bsgrubs pa yin no zhes gzung bar bya'o//gnas pa'i sgra ji lta ba bzhin yin na skyon du 'gyur ro snyam pa'i bsam pas lan smras pa ni tshe dang ldan pa rab 'byor ces bya ba la sogs pa'o/ /bcom ldan 'das rgyal po'i khab la sogs par bzhugs pa ma yin nam/ji ltar na gang du yang gnas pa ma yin snyam pa'i dogs pa de ci'i phyir zhe na zhes bya bas bsu nas tshe dang ldan pa rab 'byor zhes bya ba la sogs pa gsungs so/ /thugs ni mi gnas pa ste zhes bya ba ni gang gi phyir byang chub mngon par rdzogs par sangs rgyas nas chos rnams de kho na nyid du ma gzigs pas 'di la gnas pa'i thugs sems nyid mi mnga' bas de bzhin gshegs pa'i thugs ni mi gnas pa yin pa de'i phyir dmigs pa'i tshul gyis ci la yang gnas pa ma yin no zhes snga ma dang sbyar ro//de nyid bstan pa'i phyir de ni zhes bya ba la sogs pa gsungs pa yin te/'dus byas zhes bya ba ni 'dod pa'i khams la sogs par ro/ /'dus ma byas zhes bya ba ni de bzhin nyid la sogs par ro/ /de la mi gnas pa ni de kho na nyid du dngos po ma dmigs pa'i phyir ro/ /de las bzhengs pa yang ma yin no zhes bya ba ni der mi gnas pa yang yin te/yul med pa la dgag pa med pa'i phyir ro/ /kun rdzob tu ni bcom ldan 'das bzhugs pa'am mi bzhugs par btags pa yin no zhes 'dod do/ /de ltar na kho bo cag gis kyang don dam par mngon par zhen pa bkag nas kun rdzob tu ni ji ltar khyod kyis brjod pa ltar de la gnas pa thams cad brjod par bya ba yin pa des na rnam pa thams cad du gnas par mi 'thad pa ma yin no//zhes lan smras pa ni/ tshe dang ldan pa shA ri'i bu zhes bya ba la sogs pa'o/ /de bzhin du zhes bya ba ni bshad ma thag pa'i rim pas zhes bya ba'i tha tshig go//de nyid rnam par dbye ba'i phyir ci ltar zhes bya ba la sogs pa gsungs pa yin te/ gnas pa ma yin pa ni skad cig ma'i mi rtag pa'i dngos po med pa'i phyir ro/ /mi gnas pa yang ma yin pa ni yul med pa la dgag pa med pa'i phyir ro/ /mi mthun par gnas pa ni rgyun gyi mi rtag pa'i dngos po med pa'i phyir mi 'dra bar gnas pa rjes su thob pa ma yin pa'o//mi mthun par mi gnas pa ma yin pa ni de bzhin du dgag bya med pa'i phyir ro/ /'dis de ltar bslab par bya ste zhes bya ba ni sbyor ba'i gnas skabs su'o/ /de bzhin du gnas par bya'o de ltar bslab par bya'o zhes bya ba ni dngos gzhi'i skabs su ste/'dis de ltar bslab par bya'o zhes snga ma dang 'brel to/ /mi gnas pa'i tshul gyis legs par gnas par bya'o zhes bya ba ni sgyu ma'i skyes bu bzhin du mngon par zhen pa med pa'i tshul gyis khyad par can gyi rtogs pa thob par legs par gnas pa yin pa ste 'dis de ltar bslab par bya'o zhes de 'dir yang 'brel pa ni mjug gi gnas skabs su yin no//de ltar rtogs pa rgya cher bstan nas mjug bsdu ba brjod pa ni 'di la zhes bya ba la sogs pa'o/ /des cir 'gyur zhe na/ de ltar slob pa zhes bya ba la sogs pa smras te/ de ltar bsgoms pas rtogs pa'i chos kyi mchog gi bdag nyid can gyi shes rab kyi pha rol tu phyin pa'i gnas pas gnas pa yin la/de nyid kyis na yid la byed pa 'di dang mi 'bral bar 'gyur ba'o/ /yin no zhes bya ba ni rab tu byed pa rdzogs pa'i don to/ /ngag gi don ni 'di yin te/ gang gi phyir de bzhin gshegs pas byang chub mngon par rdzogs par sangs rgyas nas de kho na nyid du na chos gang yang ma dmigs pa de'i phyir dngos po 'di dag sgyu ma'i rang bzhin kho na snang ba yin no zhes tshad mar gyur pa'i skyes bus ma gzigs pa'i gtan tshigs kyis 'thad pa'i mi dmigs pa bsgoms pas rgyas pa rgyun du zhugs pa'i 'bras bu dang /zhugs pa la sogs pa bcu la mngon par zhen pa'i tshul gyis gnas par mi bya'o zhes de ltar bsgom par bya'o zhes bya ba yin no/ /de skad du yang / sa bcu dag las brtsams nas ni/ /mi gnas rgyas par bstan pa yis/ /chos kyi mchog tu 'gyur bshad de//ci'i phyir zhe na sangs rgyas kyis/ /mkhyen nas chos rnams ma gzigs phyir/ /zhes gsungs pa yin no/ /nyan thos kyi lam gyi 'og tu rang sangs rgyas kyi lam brjod par rigs pa yin na yang / gang gis de dag gi lam gzhan du 'gyur ba nyan thos rnams las de dag ci ltar khyad par du 'phags snyam pa'i dogs pa bsu nas/re zhig khyad par du 'phags par sgrub pa'i don du brjod pa ni/ de nas 'khor de'i nang nas zhes bya ba la sogs pa'o/ /gang yin pa de dag ces bya ba ni tshig phrad bsdus pa nyid kyis na sngon thos pa gang yang rung ba zhes bya ba'i tha tshig go//gnod sbyin gyi sgra zhes bya ba ni gnod sbyin de rnams kyi rang gi brdar grags pa'i sgra'o/ /tshig ni sgra bsdus pa'o/ /gtam du byas pa ni ji tsam gyis brjod par 'dod pa'i don yongs su rdzogs pa ste/ ngag chen po zhes bya ba'i tha tshig go//rab tu brjod pa ni gtam gyi sgo de dang de nas dris pa dang lan gyi tshig tu smra ba'o/ /de dag smra ba ni shes par rung gi zhes bya ba ni brda'i dbang gis brjod pa na de dag don dang bcas par rtogs pa'o/ /gnas brtan tshe dang ldan pa rab 'byor gang ci smra zhing brjod pa dang zhes bya ba la sogs pa la/lung las nyan thos rnams ni gzhan gyis bstan pa la ltos nas rang gi byang chub rtogs pa de zhes bya ba yin la / rang sangs rgyas ni sngon thos pa la sogs pa mngon par 'dus byas pas gzhan gyis bstan pa la mi ltos par rang gi byang chub mngon par rtogs par 'gyur te/de'i phyir de dag la sangs rgyas la sogs pas bstan mi dgos so zhes bya ba ni khyad zhugs pa nyid cig yin no/ /gang gi phyir de ltar yin pa'i rgyu des na rang sangs rgyas kyi dbang du byas nas bshad pa la sogs pa gang yin pa de ni don dang bcas par mi shes so zhes bya ba ni ngag gi don yin no//'chad cing zhes bya ba la sogs pa'i don ni bshad zin to/ /yang na gsol ba btab nas ston pa ni 'chad pa'o/ /dris nas lan du smra ba ni rab tu brjod pa'o/ /de gnyi ga gdul bya rmongs pa rnams kyi dbang du byas nas 'chad pa ni ston pa'o/ /bag med pa rnams kyi dbang du byas nas song ste ched du brjod pa ni nye bar ston pa'o//lha'i bu rnams ni rtog pa 'di ni de bzhin gshegs pa'i mthu las gyur pa yin par shes par bya ste/ gzhan du na rang sangs rgyas las brtsams te/ 'phags pa rab 'byor ci yang mi smra na de rnams rtog pa skye bar ji ltar 'gyur/ tshul bzhin du rtogs pa yin no zhes rjes su gnang ba'i don du lha'i bu dag shes par mi rung ngo zhes bya ba la sogs pa yin te/ shes par mi rung ngo zhes gang smras pa ni legs par smras so zhes bya ba ni lhag ma'o/ /lan gnyis smos pa ni/ ngo mtshar dang ni rtsod pa dang / /khro dang zhum dang nges gzung dang //dad dang dga' ba dag la ni/ /tshig gcig lan gnyis brjod par bya/ /zhes brjod pas ci rigs par ngo mtshar dang nges par gzung ba la sogs pa yin par gzung ngo / /ji ltar na legs par smras pa yin zhe na/ 'di ltar zhes bya ba la sogs pa gsungs te/ gang gi phyir nyan pa po 'byang ba med pa'i ngag smra na ji ltar smyon pa ma yin/zhes bya ba'i tshul gyis ni / rang rtogs pa'i chos rnams kyi don du brjod pa la sogs pa cung zad kyang 'dir thos pa med do/ /de bas na de dag gi don du bshad pa la sogs pa gang yin pa de ni don dang bcas par ma shes so zhes bya ba de legs par brjod pa yin no//nyan thos rnams ni tshig tu smra ba dang bcas pa'i chos ston pas gzhan dag dge ba la 'jug par byed pa yin pas nyan pa po rnams kyis sgras brjod pa'i sgo nas 'chad pa po'i rtsal rtogs par byed pa yin na rang sangs rgyas rnams ni shes bya'i sgrib pa'i phyogs gcig gzung ba'i rnam par rtog pa spangs pas rang gis 'thob pa'i ye shes la sogs pa'i mthus sgrar brjod pa med par chos ston pas gzhan dag dge ba bcu la sogs pa la 'jug par byed do//de'i phyir de dag gi ye shes gzhan gyis mi rtogs pa nyid kyis zab pas khyad zhugs pa gnyis pa yin no/ /de ltar byas pas 'di la de'i ye shes kyi rang bzhin bstan par bya ba'i phyir tshig gi bdag nyid can 'bras bu'i rtags bshad pa la sogs pa yang 'dir cung zad kyang smos pa ste/de min rang bzhin las ldog pa'i/ /dngos po tsam zhig rab bsgrub phyir/ /bshad pa med do/ /gang gi phyir de lta yin pa'i gtan tshigs de'i phyir na yang shes par mi nus so zhes bya ba legs par smras pa yin no//rang sangs rgyas rang byung rnams ni bdag nyid rtogs pa'i phyir gzhan gyis bstan pa don med do zhes bya ba de lta bu'i rang bzhin gyi rnam par rtog pa'i lan btab pa'i sgo nas 'phags pa rab 'byor 'dis spong ba nyid do snyam du kho bo cag sems pa yin na/'di ltar de ma bsal bar gzhan ye shes zab pa nyid rjod par byed do snyam du lha'i bu rnams brjod pa ni kye ma 'phags pa rab 'byor 'dis gsal bar byed par 'gyur ro zhes bya ba la sogs pa'o/ /e ma'i sgra ni nges par gzung ba la'o/ / gang zag la bdag med par rtogs pa las byung ba nyid kyis na mu stegs pa rnams kyi spyod yul ma yin pa'i phyir nyan thos kyi shes rab ni ring ba zhes bya'o/ /de las ches ring du zhes bya ba ni dbang po rtul po nyid yin pas na nyan thos rnams kyi spyod yul ma yin pa'i phyir rang sangs rgyas kyi ye shes so//phra ba zhes bya ba ni nyon mongs pa'i sgrib pa spangs pa'i 'bras bu nyid kyis na nyan thos kyi shes pa'o/ /de las kyang shes bya'i sgrib pa'i phyogs gcig gzung ba'i rnam par rtog pa spangs pas rang sangs rgyas kyi ye shes ni ches phra ba'o/ /gzhan gyis bstan pa'i rnam pa bcu drug gis rab tu phye ba nyid kyis na nyan thos kyi shes pa ni zab pa'o//de bas kyang ches zab pa ni rang gis rtogs pa'i rkyen nyid 'di pa tsam gyis rab tu phye ba 'di pa rang sangs rgyas kyi ye shes so/ /mdo sde gzhan dag las kyang dge ba bcu'i las kyi lam 'di dag nyid rang gis mngon par rtogs pa dang /rkyen nyid 'di pa zab mo khong du chud pas rang sangs rgyas kyi ye shes 'grub par byed pa yin no zhes gsungs so/ /phyogs de la gnas pa'i phyir 'jug pa yin no/ /de nyid brjod pa ni ston cing 'chad do snyam mo zhes bya ba'o/ /de skad du yang / rang byung bdag nyid rtogs pa'i phyir/ / gzhan gyis bstan yang mi dgos la/ /bse ru lta bu'i ye shes ni/ /zab pa nyid du mngon par brjod/ /ces bya ba gsungs so/ /'bras bu'i rtags tshig med pas gang gis ye shes zab mo 'grub par 'gyur ba/ chos ston par 'gyur ba yang yin la mi smra ba yang yin par ji ltar 'gyur zhes kyang brjod par mi bya ste/gang gi phyir rnam par ma brtags rnam par ma dpyad par tshig tu mi smra bas brjod pa ni rnam par g.yeng ba yin no/ /de bas na chos ston pa smra ba yang g.yeng ba sgrub par byed pa yin la/ rnam par g.yeng bas kyang rgyud shas cher 'khrug par byed do snyam du dgongs pas/sangs rgyas bcom ldan 'das sngon byang chub sems dpar gyur pa na 'di ltar bdag gis sangs rgyas nyid thob nas yid bzhin gyi nor bu ltar tshig tu smra ba med par yang sems can gyi don byed par nus par gyur cig ces smon lam btab pa yin la/ sangs rgyas dang mtshungs par yang rang sangs rgyas rnams kyis kyang de ltar btab pa yin no//des na de rnams kyang rang gi byang chub rtogs pa'i gnas skabs na sngon gyi smon lam la sogs pa'i mthus don gang la rnam pa gang ltar gang gis nyan par 'dod pa de'i rnam par shes pa la rnam pa de nyid kyis sgra med par yang don de snang bar 'gyur bas sgra med par chos ston pa zhes bya'o//mdo sde gzhan dag las kyang rang sangs rgyas rnams lus kyis chos ston pa dang / de bzhin du brgya byin la yang yid kyis tshigs su bcad pas lan btab pa zhes bya ba la sogs pa gsungs pa yin no//de skad du yang / gang gang don ni gang gang la/ /ji lta ji ltar nyan 'dod pa/ /de dang de la sgra med kyang / /don de de lta de ltar snang / /zhes bya ba gsungs pa yin no/ /de ltar khyad par bstan nas gzhan du na rgyu khyad par can ma yin na 'bras bu khyad par can mi 'thad pas na/khyad par du 'phags pa rnams kyi lam ni khyad par du 'phags pa kho na yin no zhes rang sangs rgyas kyi lam rnal ma nyid brjod pa la ni/ lha'i bu dag de lta bas na zhes bya ba la sogs pa'o/ /gang gi phyir lha'i bu khyed nyid kyis ring ba las kyang ches ring du 'jug go zhes bya ba la sogs pa smras pa'i gtan tshigs de nyid kyi phyir gzhan pa 'di dag kyang shes par gyis shig ces bya ba ni lhag ma ste/de ltar na kho bo shin tu ring bas kyang ring ba la sogs par 'jug par 'gyur ro zhes bya bar 'dod pa yin no/ /thob par 'dod pa ni mngon sum du byed par 'dod pa'o//gnas par 'dod pa ni mi g.yeng bar gyur par 'dod pa'o/ /des bzod pa 'di la ma brten par zhes bya ba ni gang zag des chos la nges par rtogs pa'i bzod pa'i yul can lam shes pa 'di la ma brten par srid pa ma yin te/ de lta ma yin na rtogs pa mi 'thad pa'i phyir ro//'dis kyang lam shes pa nyid lam thams cad kyi yul can du brjod pa yin no/ /rang sangs rgyas kyi lam gyi skabs yin pa las khyad par ston pa ni 'di skad ces rang sangs rgyas rnams kyi khyad par du 'phags pa'i lam gang yin pa de ni gzung ba'i rnam par rtog pa nyid spangs pas de'i rang bzhin can lam shes pa yin par ni ma zad kyi 'on kyang nyan thos la sogs pa'i lam gyi rang bzhin yang yin no zhes brjod pa yin no//de bzhin du sbyar ro zhes bya ba ni/ des bzod pa 'di la ma brten par mi 'grub po zhes bya ba'i tshig lan cig phyir 'ong ba'i 'bras bu thob par 'dod pa la sogs pa'i tshig gsum la bsgre bar bya'o zhes bya ba'i tha tshig go//gzung ba'i rnam par rtog pa kho na spangs pa zhes brjod pas 'dzin pa'i rnam par rtog pa ma spangs par bstan pa yin la de yang / gzung ba med na der 'dzin med/ / ces bya ba'i tshul gyis rigs pa ma yin no snyam du rtogs pa la/ gnas brtan rab 'byor 'di la chos nyan pa ji lta bu zhig ces bya ba la sogs pa smos pa yin te/ ji lta bu zhes pa'i sgra ni rnam par rtog pa ste/ ji lta bu'i 'dzin pa'i rnam par rtog pa dang ldan pa zhig rang sangs rgyas kyi theg pa'i chos kyi snod du gyur pa'i chos nyan pa po yin te/rang bzhin ji lta bu zhig rang sangs rgyas su gzung bar bya zhes bya ba'i don to/ /lan gdab pa'i phyir lha'i bu dag kho bo la chos nyan pa ni zhes bya ba la sogs pa smras so/ /bsam pa ni 'di yin te/ rang gi mtshan nyid kyi dngos po yod na de 'dzin par byed pa rnam par rtog pa med pa'i shes pa rang gi mtshan nyid skye zhing de med par ma yin pa zhes bya ba gang yin pa 'di ni dngos po'i chos nyid yin na/thog ma med pa'i dus can gyi gzugs la sogs pa 'dzin par byed pa'i rnam par rtog pa'i shes pa 'gags bzhin pas 'phangs pa'i rang gi rgyud kyi bag chags sad pa las skye ba'i phyir/'dzin pa'i rnam par rtog pa la ni gzung ba'i rnam par rtog pa yod pa kho na la skye ba yin no zhes bya ba'i nges pa 'di yod pa ma yin no/ /de bas na sgyu ma'i rang bzhin dang sprul pa'i dngos po dang mtshungs pa nyid du gyur pa de dag ni phyin ci log tu snang ba'i rang bzhin/'dzin pa'i rnam par rtog pa dang 'brel pa yin pa'i phyir rang sangs rgyas 'dzin par byed pa nyid du 'dod par bya ba yin no/ /'di lta bu'i rnam par rtog pas bzung ba'i yul 'dzin pa yin bzhin du yang ji ltar brdzun pa yin snyam pa'i dogs pa de ci'i phyir zhe na/zhes bya bas bsu nas/ 'di ltar zhes bya ba la sogs pa smras so/ /rang sangs rgyas de dag ni mnyam par ma bzhag pa dang mnyam par gzhag pa'i gnas skabs su go rims bzhin du nyams par mi 'gyur mngon du byed par mi 'gyur ro//rna 'dzin pa'i rnam par rtog pa'i rnam pas zhes bya ba ni lhag ma ste/ rnam rtog dngos mi snang phyir dang / /nye bar bslad pas slu ba'i phyir/ /zhes bsams pa'o/ /tshul 'dis ni 'dzin pa'i rnam par rtog pa ma spangs su zin kyang rang sangs rgyas rnams kyi lam gyi ngo bo yin par bshad do//sgyu ma dang sprul pa lta bu zhes bya bas rnam pa 'ga' zhig gis 'dra ba tsam du brjod pa'i phyir na sems can rnams sgyu ma'i rang bzhin nyid yin pa bsal ba yin no zhes zhar la byung ba'i rnam par rtog pa'i don smras pa ni/ 'phags pa rab 'byor yang ci zhes bya ba la sogs pa'o//ci sems can de dag sgyu ma lta bu yin gyi/ de dag phyin ci log gi rang bzhin sgyu ma ma yin nam/ de bas na sems can yang dag par yod par bshad pas legs par bstan pa ma yin no snyam pa la/ lha'i bu dag sems can de dag ni sgyu ma lta bu zhes bya ba la sogs pas lan brjod do//'di snyam du sgyu ma ni glang po che la sogs pa'i gzugs ji lta ba bzhin 'jim pa'i dum bu la sogs pa las tha dad par ma dmigs pa yin pa'i phyir gzhan ma yin no/ /gzhan ma yin pa yang ma yin te/ sngags la sogs pas ma bslad pa'i mig can rnams kyis 'jim pa'i dum bu la sogs pa rnams de lta bur ma dmigs pa'i phyir ro//des na de nyid dang gzhan dag tu brjod par bya ba ma yin pa nyid kyis dngos po'i chos las 'das pa'i phyir gang zag la sogs pa dang 'dra bar yang dag par yod do zhes smra bar nus pa ma yin no//byis pa'i bar la mngon sum du grub pas nyams su myong ba'i yul du gyur pa'i phyir rnam par rtog pa la sogs pa dang 'dra bar kun rdzob tu med do zhes bya bar nges par bya bar nus pa yang ma yin no/ /de bas na gang dang gang rten cing 'brel bar 'byung ba yin pa de ni don dam par yod pa dang med pa'i tha snyad las 'das pa'i rang bzhin yin te/dper na sgyu ma lta bu'o/ /sems can la sogs pa'i dngos po 'di dag kyang de lta bu nyid yin no zhes bya ba rang bzhin gyi gtan tshigs kyis rab tu grags pa'i don 'ga' zhig la brten nas/ ma grags pa'i don la bsgrub par bya ba yin pas sgyu ma'i dpe dang 'dra bar byas so//rigs pa ni sems can de dag kyang sgyu ma'i rang bzhin can kho na yin te/ de bas na yang dag par na sems yod par bshad pa ci yang med do/ /sgyu ma lta bu rmi lam lta bu zhes bya ba'i tshig gnyis ni sad pa dang ma sad pa'i gnas skabs kyi yul gyi dbye bas gsungs pa yin no//gnyis su med de zhes bya ba ni ngo bo nyid gcig pa'o/ /de nyid ci ltar yin zhe na/ gnyis su byar med do zhes bya ba gsungs te/ gnyis su bya ba du ma nyid gang la yod pa ma yin pa de la de skad ces brjod de/ thams cad nye bar bsdus pas khyab pa 'jug pa'i phyir ro/ /zhes 'dod do/ /de'i ngag gi don 'di yin te/ gang gi phyir brdzun pa'i ngo bo nyid yin pas sems can de dag sgyu ma lta bu yin pa des na sgyu ma dang sems can dag ni gnyis su med de gnyis su byar med do/ /de bzhin du gang gi phyir rmi lam lta bu yin pa de'i phyir/rmi lam dang sems can de dag ni gnyis su med de gnyis su byar med do/ /khyab pa de nyid bstan pa'i phyir/ lha'i bu dag chos thams cad kyang zhes bya ba la sogs pa smos te/ 'di ni bsdus pa'i ngag yin no/ /rnam par dbye ba'i phyir smras pa ni rgyun du zhugs pa yang zhes bya ba la sogs pa'o//de ltar khyab pa bstan pa na bcom ldan 'das sgyu ma lta bu yin na yon tan gyi rnam pa thams cad phun sum tshogs pa'i rgyu ji ltar yin zhes smras pa ni/ 'phags pa rab 'byor yang dag par rdzogs pa'i sangs rgyas kyang zhes bya ba la sogs pa ste/yang dag par rdzogs pa'i sangs rgyas ni sku'i de bzhin gshegs pa'o/ /lan smras pa ni/ lha'i bu dag mya ngan las 'das pa yang zhes bya ba la sogs pa'o/ /gang du mya ngan las 'das pa yang zhes bya ba khyad par du 'phags pa'i chos kyi sku gnyis su med pa'i ye shes kyi rang bzhin yang sgyu ma dang rmi lam lta bu yin no zhes smra ba der chos gzhan pa gzugs kyi sku la sogs pa mi smra 'am ci/'on kyang smra ba kho na'o zhes bya ba'i don te/ dgag pa gnyis kyis rnal ma'i don ston pa'i phyir ro/ /gang gi phyir ji skad du bshad pa'i rang bzhin can gyi bcom ldan 'das kho na mngon du phyogs par byas na yon tan thams cad phun sum tshogs pa'i rgyu yin gyi/gzhan du na tshad ma dang 'gal ba'i rang bzhin yin pa'i phyir phyin ci log yin no zhes bya bar bsams pa'o/ /dngos po la mngon par zhen pa shin tu tshabs che ba'i phyir bden pa'i chos la ma rtogs so zhes slar yang smras pa ni/'phags pa rab 'byor mya ngan las 'das pa yang zhes bya ba la sogs pa'o/ /gzhan du na mu stegs can dang 'dra bar phyogs gcig pa'i stong pa nyid yod pas dngos por khas blangs pa'i phyir grol ba mi 'thad do zhes bya ba'i bsam pa dang ldan pas lan smras pa ni lha'i bu dag kho bo ni zhes bya ba la sogs pa'o//gal te zhes bya ba ni khas len pa'o/ /de zhes bya ba'i sgra ni tshig gi phrad do/ /'di skad ston to / /mya ngan las 'das pa las ches khyad par du 'phags pa'i chos mi srid mod kyi/ de lta na yang khas blangs te smra ba ni/gal te mya ngan las 'das pa las khyad du 'phags pa'i chos gzhan zhig yod kyang de'i tshe chos de yang sgyu ma la sogs pa dang 'dra'o zhes smra'o/ /de yang 'phags pa klu sgrub kyi zhal snga nas kyis/ /dngos por khas len yod na ni/ /'dod chags zhe sdang mi bzad 'byung //lta ba ma rungs yongs su 'dzin/ /de las byung ba'i rtsod par gyur/ /de ni lta ba kun gyi rgyu/ /de med nyon mongs mi skye ste/ /de bas de ni yongs shes nas/ /lta dang nyon mongs yongs su 'byang / /gang gis de shes 'gyur zhe na/ /rten cing 'brel 'byung mthong ba ste//rten nas skye ba ma skyes zhes/ /yang dag mkhyen pa'i mchog gis gsungs/ /zhes bshad pa yin no/ /de ltar na zhes bya ba la sogs pa mjug bsdu ba ni don go bas ma bris so/ /zhar la 'ongs pa bstan nas/ da ni rten gyi sgo nas kyang rang sangs rgyas kyi lam khyad par du 'phags par bstan par bya ba'i phyir 'dri ba ni/tshe dang ldan pa rab 'byor ces bya ba la sogs pa gsungs pa yin te/ gzung ba dang 'dzin pa'i rnam par rtog pa dag go rims bzhin du spangs pa dang ma spangs pa de lta bu'i tshul gyis rang sangs rgyas kyi lam gyi bdag nyid can gyi shes rab kyi pha rol tu phyin pa 'di ltar bstan pa 'di dag la rigs ji lta bu dang ldan pa'i gang zag su dag yang dag par 'dzin par 'gyur de bzhin gshegs pa'i byin gyi rlabs kyis don rig pas na//'phags pa kun dga' bo 'chad par byed pas smras pa ni/tshe dang ldan pa dag ces bya ba la sogs pa'o/ /phyir mi ldog pa zhes bya ba ni nges par 'byed pa'i cha rtogs pas rang byang chub las phyir mi ldog pa'o/ /de nyid ni rang gi byang chub mngon par 'dod pa yin pas na byang chub sems dpa'o/ /lus kyis chos ston pas sangs rgyas mi 'byung ba'i sangs rgyas kyi zhing du sems can rnams kyi don byed pa'i bsam pa dang ldan pas na sems dpa' chen po'o//lta ba phun sum tshogs pa zhes bya ba ni shes rab kyi lta ba bar ma dang yang dag par ldan pa'o/ /dgra bcom pa zag pa zad pa zhes bya ba ni rang gi mthong ba'i lam gyi sgrib pa spangs pa nyid kyis na mchod par 'os pa'o//tshig 'di gsum gyis ni byang chub la go rims bzhin du yang dag par bsgrubs pa'i rigs dang / chos nyid kyis thob pa'i rigs dang / /de nyid la nges pa'i rigs kyi gang zag ces bshad pa yin no//sam zhes bya ba'i sgra ni thams cad du rnam par rtog pa phan tshun du ltos pa yin par blta'o/ /yang 'phags pa rab 'byor gyis rnam pa gzhan dag tu bstan par bya ba'i phyir tshe dang ldan pa dag ces bya ba la sogs pa smos so/ /rang sangs rgyas so sor byang chub rtogs pa ni rang gi lam nye bar bstan pa sngon du 'gro ba can yin na yang 'dzin pa su yang mi 'byung ba ji ltar yin snyam pa'i dogs pa de ci'i phyir zhe na zhes bya bas bsu nas/smras pa ni 'di la zhes bya ba la sogs pa'o/ /'di la zhes bya ba ni rang sangs rgyas kyi lam rtogs pa'i dus su ste/ gzhan gyis bstan mi dgos pa'i phyir rang nyid kyis rtogs pa'i rang sangs rgyas kyi zhes bya bar dgongs pa'o//mdor bsdus te brjod pas don rgya chen po bstan pa'i sgo nas don gang yang ma smos pa'o/ /rgya cher brjod pas don bsdus pa gsal bar byas pa'i sgo nas yongs su snang bar ma byas pa'o/ /ji ltar gnas pa'i rang bzhin bstan pa'i sgo nas rab tu ma bzhag pa'o//nye bar bsdu bar bya ba'i phyir de bas na zhes bya ba la sogs pa smras te/ /de'i phyir don med pa'i rgyu gang kho nas smos pa la sogs pa ma byas pa rgyu de kho nas yang dag par 'dzin pa su yang mi 'byung ste/ bstan bya nyid med pa'i phyir ro zhes bya bar bsams pa'o//ji ltar sprul pa'i me tog rnams rang bzhin med du zin kyang yul nges pa la sogs pa'i rang bzhin ma brtags na nyams dga' ba nyid song ba de bzhin du dngos por gyur pa'i gzhi med na yang rtogs pa'i chos so sor nges pa thob pa yin no zhes bstan par bya ba'i phyir gzhi'i dbang du byas pa sprul pa'i me tog gi rnam pa nye bar dgod par bya ba'i phyir/de nas lha'i dbang po brgya byin zhes bya ba la sogs pa gsungs te/ chos kyi rnam grangs 'di bstan pa la zhes bya ba ni/ rang sangs rgyas kyi lam dge ba bcu la sogs pa'i chos kyi rang bzhin can gyi rang sangs rgyas kyi chos kyi rnam grangs 'di'o//bdag gis kyang zhes bya ba ni nges par bzung ba ste/ mchod pa'i don kho nar zhes bya ba'i tha tshig go/ /mngon par sprul te zhes bya ba ni sgom pa'i stobs kyis bskyed pa'o/ /sems bskyed pa'i rjes thogs kho na la de bzhin du byas par gyur to zhes bya ba ni/ de nas lha'i dbang po brgya byin gyis zhes bya ba la sogs pa'o//mngon par gtor to zhes bya ba ni mngon par phyogs pas gtor bar gyur pa'o/ /lha'i dbang po brgya byin la rjes su brjod pa'i phyir zhes bya ba la/ rjes su zhes bya ba'i sgra ni mtshon pa'i don te/ de dang 'byor pas dbang po'i sgra la las kyi byed pa'i tshig tu byas pa'o//'di skad ston pa yin te/ brgya byin gyis smras pa'i dus kyi rjes la sprul pa'i me tog gi de kho na nyid bshad pa'i zur gyi rten gyi ngo bo bstan par bya ba'i phyir/ 'chad par 'gyur ba'i don gyi rjes su byed pas 'di snyam du sems par gyur to/ /'di dag ni zhes bya ba ni da ltar nyams su myong bar gyur pa'o//sum cu rtsa gsum smos pa ni rang gi gnas yin pa'i phyir te/ de yang rang gi dmigs pa rung ba'i yul nye bar mtshon pa yin no/ /sngon mthong ba ni sngon nyams su myong ba'o/ /ci me tog 'di dag thams cad sngon chad yod par ma mthong ngam zhe na/lha rnams kyi dbang po brgya byin gyis mngon par gtor ba'i zhes bya ba la sogs pas so/ /gal te de lta yin na 'o na rang bzhin ci zhig yin zhe na/ me tog 'di dag ni sprul pa'o zhes bya ba smras so/ /'di dag ston te ngas dmigs par rung ba'i yul rnams na yod par sngon chad mthong bar gyur pa ma yin no//mthong ba'i lam las 'das pa'i yul nas kyang khyer te 'ongs pa yang ma yin te/ de lta bu'i nus pa med pa'i phyir ro/ /de bas na me tog 'di dag ni yid kyis sprul pa'i rang bzhin no/ /de nyid bshad par bya ba'i phyir 'di ltar zhes bya ba la sogs pa smras te/de la shing zhes bya ba ni me tog dang 'bras bu dang ldan pa'o/ /gel pa ni ma li ka la sogs pa'o/ /'khri shing ni a ti mug ta ka la sogs pa'o/ /sangs rgyas kyi mthus rtogs pa skyes pa shes pa'i phyir lan smras pa ni/ 'phags pa rab 'byor zhes bya ba la sogs pa'o//yid la snang bar gyur zhing du yang ci ltar na ma skyes pa yin snyam pa'i dogs pa de ci'i phyir zhe na zhes bya bas bsu nas/ yid la skyes pa zhes bya ba la sogs pas/ gang gi phyir de kho na nyid du na yid las skyes pa'i me tog gang yang med de/ gzung ba dang 'dzin pa'i dngos po ni brdzun pa nyid yin pa'i phyir ro//zhes bya ba ni tshig lhag ma'o/ /shing la sogs pa las skyes par gyur pa ma yin te/ khyed nyid kyis bkag pa'i phyir ro/ /me tog 'di dag ni ma skyes pa ste zhes bya ba'i tshig gis ni me tog rnams kyi rang gi ngo bo ni ma bkag gi /skye ba bkag pa yin pas de lta na ni rtag pa nyid du khas blangs pa yin la/de yang rigs pa ma yin no zhe na/ kau shi ka zhes bya ba la sogs pa smras te/ 'khri shing las skyes pa zhes brjod kyang brjod par mi bya'o zhes bya ba ni lhag ma'o/ /ci'i phyir zhe na/ kau shi ka gang ma skyes pa ni zhes bya ba la sogs pa smras te/ gang gi phyir gang ma skyes pa de ni me tog kyang ma yin te/ rtag pa ni rim gyis sam cig car dag gis don gyi bya ba dang bral ba'i phyir rang gi ngo bo mi srid do zhes bya bar 'dod do/ /de la gzung ba'i rnam par rtog pa spangs pas ni rang sangs rgyas kyi rtogs pa nyan thos las khyad par byas pa yin no/ / 'dzin pa'i rnam par rtog pa ma spangs pas ni rang sangs rgyas rnams las bla na med pa'i sangs rgyas khyad par du byas pa yin no/ /rten gyis kyang rtogs pa'i rgyu yin pas na khyad par du 'phags pa'i rang sangs rgyas kyi lam na ji skad du bshad pa'i nyan thos kyi bden pa bzhi'i rnam pa mi dmigs par bsgoms pas dngos po ji lta ba bzhin du rten cing 'brel par 'byung ba dang rjes su mthun par byang chub sems dpas yongs su shes par bya ba ma yin no//de skad du yang / gzung ba'i rtog pa nyams phyir dang / /'dzin pa ma spangs phyir dang ni/ /rtan gyis bse ru lta bu'i lam//yang dag bsdus par shes par bya/ /zhes gsungs pa yin no/ /nges par 'byed pa'i cha dang mthun pa rtogs nas ji skad du bshad pa'i rang sangs rgyas kyi lam skye bas/ nges par 'byed pa'i cha dang mthun pa bstan pa'i phyir/ e ma'o 'phags pa rab 'byor ni zhes bya ba la sogs pa smos te/rten gyi de kho na nyid bstan pas dro ba'i don ston pa'i phyir shes rab zab pa'o/ /ming dang tshig tu btags pa ni rnam par shes pa la sogs pa'i phung por btags pa'o/ /thos pa las byung ba'i shes pa'i don du gzhung dang don brjod pas na ston pa'o//kun rdzob tu khas blangs pa dang mi 'gal bas chos nyid dang yang 'gal bar mi byed do/ /bsam pa'i rang bzhin gyi shes pa'i don du rigs pas brtan par byed pas na gsal bar byed pa'o/ /sgom pa'i rang bzhin gyi shes pa'i don du bsam gtan gyi rim pa nye bar ston pa'i phyir nye bar ston pa'o//'di skad du gzugs la sogs pa brda las byung ba'i chos btags pa dang mi 'gal bar chos nyid rtogs pa'i phyir na/ de ltar chos thams cad la dmigs par gyur na dro bar gyur pa skye bo zhes sprul pa'i me tog gi rang bzhin bshad pa nyid kyis ston par byed pa'i phyir shes rab zab pa yin no zhes brjod pa yin no//de skad du yang / btags pa'i chos nyid mi 'gal bar/ /ston pa'i rnam pa dro gyur pa/ /zhes gsungs pa yin no/ /rang gi rnam par rtog pa rang nyid kyis nges par byas nas khas blangs pa de ni 'phags pa rab 'byor de de bzhin no zhes bya ba la sogs pa smras pa yin te/de bzhin du 'di la bslab par bya'o zhes bya ba ni sprul pa las skyes pa'i me tog dang 'dra bar rang sangs rgyas kyi lam la bslab par bya'o/ /legs par smras pa nyid kyis rjes su 'dod par bya ba'i don du/ kau shi ka de de bzhin no zhes bya ba la sogs pa gsungs so//de las cir 'gyur zhe na/ kau shi ka de ltar slob na zhes bya ba la sogs pa smras te/ dmigs pa'i tshul gyis gang du yang mi slob bo zhes bya ba ni spyi'i don yin no/ /gangs 'di dag la zhes pa ni brgyad pa la sogs pa'i rnams la'o/ / sangs rgyas nyid dang thams cad mkhyen pa nyid ni nyon mongs pa dang shes bya'i sgrib pa spangs pa'i dbye bas tshig gnyis smos pa yin te/ de la slob pa ni phyin ci ma log pas slob na nges par de bzhin gshegs pa nyid thob pa'i phyir ro/ /sangs rgyas nyid la slob pa yang chos thams cad yongs su shes pa sngon du 'gro ba can yin pas/gang sangs rgyas nyid dang zhes bya ba la sogs pa gsungs pa yin no/ /zhar la 'ongs pa brjod nas/ dro ba'i 'og tu rtse mo'i don la slob pa yin no zhes brjod pa ni/ gang sangs rgyas kyi chos gzhal du med pa la zhes bya ba la sogs pa'o//'phel bar ni nye bar sogs pa'o/ /'grib pa ni bri ba'o/ /'di skad du/ gzugs la sogs pa la don dam par 'grib pa dang 'phel ba med pa la sogs pa'i don du slob pa'i phyir de bzhin du chos thams cad la dmigs na rtse mor gtogs pa skye bar 'gyur ro zhes brjod pa yin no//de skad du yang / rtse mor gyur pa gzugs la sogs/ /'grib pa med la sogs pas phye/ /zhes gsungs pa yin no/ /rtse mo'i 'og tu bzod pa'i don du bslab par bya ba yin pas/ gang gzugs 'phel bar bya ba dang 'grib pa zhes bya ba la sogs pas smras pa yin te/yongs su gzung ba ni bdag gir byas pa'o/ /dor ba ni spangs pa'o/ /de'i don du nang la sogs pa'i stong pa nyid kyi stobs kyis mi slob po zhes bya ba'i tha tshig go/ /stong phrag nyi shu lnga pa las kyang / gzugs nas rnam pa thams cad mkhyen pa nyid kyi bar du nang stong pa nyid nas dngos po med pa'i ngo bo nyid stong pa nyid kyi bar yin pa'i phyir yongs su mi gzung ba nyid do zhes gsungs pa yin no//de skad du gzugs la sogs pa nang dang phyi la sogs pa'i stong pa nyid yin pa'i phyir yongs su mi 'dzin pa la sogs pa'o zhes de ltar chos thams cad la dmigs na bzod pa skye bar 'gyur ro zhes brjod pa yin no//de skad du yang / nang stong nyid la sogs pa yis/ /gzugs sogs mi 'dzin phyir bzod pa/ /zhes gsungs pa yin no/ /bzod pa'i 'og tu chos kyi mchog gi don du slob pa yin pas/ /chos 'ga' zhig ces bya ba la sogs pa smras pa yin te/yongs su gzung ba zhes bya ba ni 'dis yongs su 'dzin pas na yongs su gzung ba ste/ sgrub pa dang dgag pa'o/ /de nyid bstan pa ni skye ba dang nub par bya ba'i phyir zhes gsungs pa yin no/ /chos 'ga' zhig ces bya ba ni spyir brjod du zin kyang skye ba spang bar bya ba'i rang bzhin kho na 'dzin pa yin no snyam du skye bo rmongs pa'i dogs pa bsal bar bya ba'i phyir/chos 'ga' zhig yongs su gzung ba zhes bya ba la sogs pa smos te/ thams cad mkhyen pa nyid kyang zhes bya ba ni sangs rgyas kyi sa la yang ste/ thams cad mngon par zhen pa ni 'ching ba yin no zhes bya bar bsams pa'o//ji skad du bshad pa la bslabs pa la yon tan ci zhig yod ce na/ de ltar zhes bya ba la sogs pa smras so/ /'di skad du/ gzugs la sogs pa la skye ba dang / med pa la sogs pa'i rnam pa rnams kyis slob pas/ de ltar chos thams cad la dmigs na chos kyi mchog tu 'gyur ro zhes brjod pa yin no//de skad du yang / gzugs sogs skye ba med sogs kyi/ /rnam pa can ni chos kyi mchog /ces gsungs pa yin no/ /de kho nar chos thams cad dmigs su med par ro gcig pas byang chub sems dpa'i thams cad mkhyen pa nyid ces bya ba gang yin zhes zur gyis 'dri ba ni tshe dang ldan pa rab 'byor byang chub sems dpa' sems dpa' chen po gang zhes bya ba la sogs pa smras pa yin te/ngag gi mthar sbyin pa la sogs pa pha rol tu phyin pa med par ji ltar 'gyur zhes bya ba ni lhag ma'o/ / yang dag kun rdzob rnams kyi skas/ /med par yang dag khang pa yi/ /steng du 'dzeg par byed pa ni/ /mkhas la rung ba ma yin no/ /zhes bya ba'i tshul gyis/ gtsug na rin po che las bshad pa'i chos thams cad stong pa nyid du sbyin pa la sogs pa'i 'khor dang bcas pa la goms par bya ba yin no snyam pa'i bsam pa dang ldan pas lan gdab pa'i don du brjod pa ni/tshe dang ldan pa shA ri'i bu de de bzhin no zhes bya ba la sogs pa'o/ /rang sangs rgyas kyi de ma thag tu byang chub sems dpa' rnams kyi mthong ba'i lam 'di dang phyi ma'i yon tan dang ldan pa brjod par bya ba yin pas/ tshe dang ldan pa shA ri'i bu zhes bya ba la sogs pa smras so/ /shes rab kyi pha rol tu phyin pa zhes bya ba ni/ byang chub sems dpa' rnams kyi mthong ba'i lam zhes bya ba'i tha tshig go/ /de yang mdor bsdu na 'dir 'jig rten pa'i chos kyi mchog gi rjes thogs nyid kyis mi dmigs pa'i ting nge 'dzin dang shes rab mtshungs par ldan pa dang bcas pa yin par shes par bya'o//rab tu dbye ba la ni de bzhin du sdug bsngal la chos shes pa'i bzod pa dang / chos shes pa dang / rjes su shes pa'i bzod pa dang / rjes su shes pa dang / de bzhin du kun 'byung ba dang / 'gog pa dang lam rnams la yang shes par bya ste/ de ltar sems kyi skad cig ma bcu drug ni mthong ba'i lam mo/ /sems kyi skad cig kyang shes bya la shes pa skye ba yongs su rdzogs pa yin par gzung ngo / /kha cig na re/ de la skad cig bco lnga ni/ ma mthong mthong phyir mthong ba'i lam//zhes zer ba de ni mi rigs te/ /'di ltar sbyor ba'i lam du sdug bsngal gyi bden pa'i dbang du byas pa'i chos la sngar rnam par dpyod pa'i dbang du byas nas sdug bsngal gyi bden pa la so so rang nyid sdug bsngal gyi bden pa mngon sum du nyams su myong ba'i shes pa zag pa med pa gang gis sdug bsngal mthong bas spang bar bya ba'i nyon mongs pa spong ba de ni sdug bsngal la chos shes pa'i bzod pa zhes bya'o//shes pa gang gis bzod pa'i rjes thogs la rnam par grol ba mngon sum du byed pa de ni sdug bsngal la chos shes pa zhes bya'o / /sdug bsngal la chos shes pa'i rjes thogs la sdug bsngal la chos shes pa'i bzod pa dang /sdug bsngal la chos shes pa la 'di ni 'phags pa'i chos rnams kyi rjes su 'gro ba yin no zhes so so rang gis mngon sum du nyams su myong ba'i shes pa zag pa med pa gang yin pa de ni sdug bsngal la rjes su shes pa'i bzod pa zhes bya'o//shes pa gang gis rjes su shes pa'i bzod pa de nges par 'dzin pa de ni sdug bsngal la rjes su shes pa zhes bya'o/ /de bzhin du bden pa lhag ma rnams la yang bzod pa dang shes pa dag ci rigs par shes par bya ste/ skad cig ma bcu drug po 'di nyid ni mthong ba'i lam yin par rigs te/skad cig ma bco lnga nyid yin na ni lam la rjes su shes pa'i bzod pa nges par 'dzin par mi 'gyur ro/ /ma mthong ba med pas tha ma lam rjes su shes pa'i skad cig ma ni mthong ba'i lam ma yin no zhe na/ gal te de lta ba yin na sdug bsngal la sogs pa'i bden pa gsum la yang sngon med pa'i mthong ba ma tshang bas rjes su shes pa'i skad cig ma mthong ba'i lam ma yin pa'i phyir skad cig ma bcu gnyis kho nar 'gyur na/de ltar ni khas ma blangs pas 'di ni gyi na'o/ /de skad du yang / bden dang bden la bzod pa dang //shes pa'i skad cig rnam bzhi yis / /lam shes nyid la mthong ba'i lam/ /phan yon bcas pa 'di bshad do/ /zhes gsungs pa yin no/ /de la chos shes pa'i bzod pa dang / chos shes pas ni gzung ba rtogs la/ rjes su shes pa'i bzod pa dang rjes su shes pas ni 'dzin pa rtogs pa yin no//bzod pa dang shes pa thams cad la rnal 'byor pa mtshan ma med pa'i mtshan mas gnas par rig par bya'o/ /kha cig na re rgyu ma tshang ba med par spang mi nus pa'i phyir sdug bsngal mthong bas spang bar bya ba'i dus su kun 'byung spong ngo / /de nyid kyis na 'gog pa mngon du byed do/ / de yang gzhan du mi 'thad pas lam bsgoms so/ /kun 'byung la sogs pa la yang de bzhin te/ de ltar 'bras bu'i mngon par rtogs pa la ltos nas theg pa chen po'i mthong ba'i lam la mngon par rtogs pa skad cig ma gcig yin no/ /bden pa re re la yang phyin ci log pa rnam par bsal bas so sor rtog pa'i mngon par rtogs pa'i lam skad cig ma bcu drug kho nas mngon par shes par byed pas des na zhugs pa la sogs pa'i rnam par gzhag pa legs par gnas pa yin no zhes zer ro//gzhan dag la 'jig tshogs la sogs pa'i lta ba'i tshogs dang 'dod chags la sogs pa'i nyon mongs pa'i tshogs ni dngos po rnams yang dag par khas len pa'i phyin ci log gis kun nas blang ba yin la/grol ba ni dmigs su med par mthong ba las yin pa'i phyir de'i yongs su sbyor bar gyur pa nyid kyis sgom pa lhag ma rnams de'i don du yin no zhes ji skad du bshad pa'i tshul du chos thams cad dngos po med pa'am stong pa zhes sgom par byed pa rnams kyi sgom pa yongs su rdzogs pa na/don gyi rang gi ngo bo gcig /bdag nyid mngon sum yin pa la/ /tshad ma rnams kyis brtag bya gang / /ma mthong cha gzhan ci zhig yod/ /ces bya ba'i tshul gyis rnam pa thams cad kyi rang gi ngo bo rtogs par byed pa'i shes pa zag pa med pa chos thams cad kyi yul can skye bar 'gyur ro//de bas na so sor rtog pa'i mngon par rtog pa las mthong ba'i lam gyi mngon par rtogs pa ni skad cig ma gcig yin no zhes zer ro/ /de lta na ni skad cig ma gcig kho na la rnam pa thams cad rtogs pa'i phyir rnam pa gzhan dag gis mthong ba'i lam la sgom pa gzhan pa mi 'thad pa'i phyir zhugs pa nyid la sogs pa'i gnas skabs su ji ltar 'gyur zhes nges par 'byung ba'i lam legs pa'i rjes su 'brang ba rnams 'dod do//gzugs chos mthun pa mthong ba las//nya phyis las dngul rnam pa ltar/ /gal te 'khrul pa'i rgyu mtshan phyir / /yon tan gzhan sbyor mi byed na/ /de ltar gyur pa zhig na/ gang gi tshe 'khrul pa'i rgyu mtshan 'ga' zhig las sgro btags pa'i rnam pa gzhan dag yod pa'i phyir/ de phyin ci log las byung ba'i nyon mongs pa dang bcas pa drungs nas dbyung ba'i phyir rnam pa gzhan dag gis sgom pa gzhan yang yod pas brgyad pa la sogs pa'i gnas skabs legs par gnas pa yin no//dgongs pa 'di nyid kyis na rigs pa'i stobs kyis mthong ba'i lam gyi mngon par rtogs pa skad cig ma gcig yin yang mngon par rtogs pa skad cig ma bcu drug nyid du bshad pa yin no//de bas na rnam par shes pas rang gi ngo bo'i rnam pa thams cad du bzung ba nyid yin na yang / cha gang la goms pa gsal bar gyur pa la sogs pas sgro btags pa'i rnam pa nges par sel nus pa de nyid la de'i gegs su gyur pa'i sgrib pa sel bas de tshad ma yin gyi/gzhan du ni ma yin te/ skad cig ma nyid la sogs pa dang 'dra'o/ /de ltar na 'phags pa rnams so so'i skye bo rnams las khyad par ci zhig yod ces kyang brjod par mi bya ste/ rnam pa tsam zhig bsal bas/ de dag gi shes pa 'khrul pa'i rgyu mtshan dang bral bar 'gyur ba de tsam gyis de dag khyad par du 'phags pa'i phyir te/shin tu spros pas chog go zhes bya ba ni/ gang gis bstan pa las rtogs par bya zhing bsgom par bya zhes bya ba'i tha tshig go/ /de bzhin gshegs pa'i byin gyis brlabs nyid kyis zhar la 'ongs pa'i tshig gi don nges par brtags pa la sogs pa'i sgo nas 'ga' zhig kyang la lar ston pa yod mod kyi/'on kyang gtso cher bcom ldan 'das kyis shes rab kyi pha rol tu phyin pa ston par 'phags pa rab 'byor kho na byin gyis brlabs pa yin no snyam pa'i bsam pa dang ldan pas/ kau shi ka byang chub sems dpa' sems dpa' chen pos zhes bya ba la sogs pa smos so//le'u las zhes bya ba ni rab 'byor gyis bstan pa las so/ /de bzhin gshegs pa'i byin gyis brlabs nyid yin pa brjed pa nyid kyis 'phags pa shA ri'i bu zhes bya ba la sogs pa smos so/ /gzhan du na 'phags pa rab 'byor gyis nus pa snga ma bzhin du ma mthong bas smras pa ni/kau shi ka zhes bya ba la sogs pa'o/ /de bzhin gshegs pa la gus pa skyed pa dang bdag nyid nga rgyal med pa gsal bar bya ba'i phyir/ kau shi ka gang 'di skad du zhes bya ba la sogs pa smras pa yin no/ /de ni rnam par bshad pas mthong ba'i lam bstan par bya ba'i phyir/kau shi ka gang yang 'di skad du zhes bya ba la sogs pa smras te/ shes rab pha rol phyin gnyis med/ /ye shes de ni de bzhin gshegs/ /zhes bshad pas 'dir shes rab kyi pha rol tu phyin pa ni de bzhin gshegs pa'o/ /rten cing 'brel 'byung gang yin pa//de nyid khyod ni stong par bzhed/ /ces bya ba'i tshul gyis na gzugs la sogs pa'i de bzhin nyid ni gzugs la sogs pa'i sgras bshad do/ /rten du gyur pa yin yang brjod par 'dod pa'i gzhan dbang gis lnga par gyur pa yin no/ /de bas na don ni 'di yin te/ rten du gyur pa'i gzugs la sogs pa'i de bzhin nyid la brten pa'i ngo bor de bzhin gshegs pa btsal bar mi bya zhing gzhan dag tu yang ma yin no//'di ni nye bar mtshon pa tsam yin pa'i phyir 'di ltar yang shes par bya ste/ de bzhin gshegs pa la gzugs la sogs pa'i de bzhin nyid ma yin la gzhan du yang ma yin no zhes so/ / 'di ni stong phrag nyi shu lnga pa las gsal ba kho nar gsungs te/ kau shi ka gzugs de bzhin nyid la de bzhin gshegs pa mi dmigs so/ /de bzhin gshegs pa la yang gzugs kyi de bzhin nyid mi dmigs so/ /gzugs kyi de bzhin nyid las gzhan na yang de bzhin gshegs pa mi dmigs so//de bzhin gshegs pa las gzhan na yang gzugs kyi de bzhin nyid mi dmigs so zhes bya ba la sogs pa'o/ /de gnyis las ma gtogs pa'i chos gzhan med pas gzugs la sogs pa dang gzhan du yang shes rab kyi pha rol tu phyin pa ji ltar btsal bar mi bya snyam pa'i dogs pa de ci'i phyir zhe na zhes bya bas bsu nas brjod pa ni/kau shi ka zhes bya ba la sogs pa'o/ /'dir ngag gi don ni 'di yin te/ gzugs la sogs pa yang dag pa nyid du rten du gyur pa ni shes rab kyi pha rol tu phyin pa rnam par dag pa ma yin te/ phyin ci log yin pa'i phyir ro/ /de bas na gzugs la sogs pa rnam par dag pa'i rten gyi bdag nyid can ni shin tu rnam par dag pa'i shes rab kyi pha rol tu phyin pa'i rgyu khyad par du 'phags pa ma yin pa'i phyir gzugs la sogs pa las shes rab kyi pha rol tu phyin pa btsal bar mi bya zhing /de las ldog pa'i chos gzhan de kho na ltar phyin ci log yin pa'i phyir gzhan du yang ma yin gyi/'on kyang gzugs la sogs pa rnams don ji lta ba bzhin ma yin par khong du chud pa nyid yin no zhes bya ba yin no/ /de bas na 'di skad du gzugs la sogs pa'i de bzhin nyid dang sangs rgyas dag don dam par rang bzhin gcig pa nyid kyis rten dang brten pa'i dngos por med pa de'i phyir de dag phan tshun rnam grangs kyi gnas par rjes su ma rtogs so zhes/de ltar chos thams cad la dmigs pa na sdug bsngal la chos shes pa'i bzod pa skye bar 'gyur ro zhes brjod pa yin no/ /rnam pa gcig thos pas mgo smos pas go ba yin pa'i phyir sdug bsngal la chos shes pa la sogs pa skad cig ma bzhi'i rnam pa bstan pa'i phyir brjod pa ni/'phags pa rab 'byor 'di lta ste zhes bya ba la sogs pa'o/ /yang dag par bstan pas rjes su 'dod pa'i don du smras pa ni/ de de bzhin no zhes bya ba la sogs pa'o/ /de dang de min rang bzhin can/ /de de min dngos rgyu las skyes//zhes bya ba'i rigs pas gzugs la sogs pa'i rgyu gang yin pa chen po nyid la sogs par mi 'thad na dmigs pa de las skyes pa'i shes rab kyi pha rol tu phyin pa gang yin pa chen po nyid la sogs par ji ltar 'gyur snyam pa'i dogs pa de ci'i phyir zhe na zhes bya bas bsu nas smras pa ni/kau shi ka zhes bya ba la sogs pa'o/ /de kho na nyid du na skye ba dang gnas pa dang 'jig pa med pa'i phyir gzugs la sogs pa ni chen po nyid do/ /rnam par 'gyur ba'i mtshan nyid can gyi gzugs la sogs pa med pa nyid kyis na yongs su gcod par byed pa'i tshad mas dmigs su med pa'i phyir tshad ma med pa nyid do//gzugs can rnams la ni rdul phra rab kyi bar gyi dbyibs tshad yin la gzugs can ma yin pa la ni mtshan nyid tshad yin no/ /gzugs la sogs pa rnams kyi de nam mkha' ltar ngo bo nyid med pa nyid kyis na dmigs pa'i phyir tshad med pa nyid do/ /sgyu ma dang 'dra ba nyid kyis na gzugs la sogs pa sngon gyi mtha' dang phyi ma'i mtha' med pa'i phyir mtha' yas pa nyid do//rgyu che ba nyid kyis 'bras bu che ba nyid la sogs pa bstan nas/ de la yang mngon par zhen pa bstan pa ni 'ching ba yin pas kau shi ka de bzhin du zhes bya ba la sogs pa smras te/ mngon par chags par mi byed do zhes bya ba ni kun la sbyar bar bya'o//de las cir 'gyur zhe na/ kau shi ka de lta bas na zhes bya ba la sogs pa gsungs so/ /'di skad du gzugs la sogs pa chos kyi dbyings kyi ngo bo nyid yin pas chen po nyid dang de bzhin du de rnams tshad ma med pa nyid dang / snga ma bzhin du nam mkha' tshad ltar med pa nyid kyis na de rnams med pa nyid dang /gzugs la sogs pa la ngo bo nyid med pa nyid kyis rtag pa dang chad pa'i mtha' gnyis la sogs pa med pas mtha' las 'das pa nyid do zhes de ltar chos thams cad la dmigs pa na/ go rims bzhin du sdug bsngal la chos su shes pa'i bzod pa dang /kun 'byung la chos su shes pa dang kun 'byung la chos shes pa'i bzod pa skye bar 'gyur ro zhes brjod pa yin no/ /mtha' yas pa'i don kho na kun 'byung gi rnam pa bzhi dgag pa'i sgo nas bstan pa ni/ kau shi ka dmigs pa mtha' yas pa'i phyir zhes bya ba la sogs pa yin no//mdor bstan pa'i ngag 'di nyid rnam par dgrol ba'i don du brjod pa ni/ kau shi ka ji ltar na zhes bya ba la sogs pa'o/ /thog ma ni sngon gyi mtha' ste rgyu'o/ /dbus ni yod pa'i dus su'o/ /tha ma ni phyi ma'i mtha' ste 'jig pa'o/ /de bas na zhes bya ba ni thog ma'i mtha' la sogs pa med pa'i phyir ro//nye bar bsdu ba ni kau shi ka rnam grangs 'dis zhes bya ba la sogs pa smras te/ rnam grangs ni bstan pa'o/ /de ltar dang po'i dmigs pa mtha' yas pa nyid kyis rgyu'i rnam pa bkag nas kun 'byung ba'i rnam pa dgag par bya ba'i phyir dmigs pa mtha' yas pa nyid brjod par bya ba'i don du kau shi ka gzhan yang zhes bya ba la sogs pa smras te/sngon gyi mtha' dang phyi ma'i mtha' dang bral ba nyid kyis mtha' yas pa'o/ /yod pa'i dus ni mtha' gnyis su gyur pas kun nas yongs su bcad pa'i phyir mur thug pa yin la/ de med pa ni mu med pa'o//de nyid brjod pa ni de rnams kyi thog pa'am zhes bya ba la sogs pa'o/ /'bras bu gang zhig gang gi ldog pa dang rjes su 'gro ba'i rjes su byed pa de de'i rgyu yin pa'i phyir sngon gyi mtha' mthong la/ skad cig ma tha ma mthong ba rnams kyis nges pa'i phyir phyi ma'i mtha' yang mthong zhing / yod pa nyid du shes pa nyid kyis na dbus su ni shin tu yod pa ma yin nam/thog ma dang dbus dang tha ma de ci ltar mi dmigs snyam pa'i dogs pa de ci'i phyir zhe na zhes bya bas bsu nas smras pa ni gzugs kyi zhes bya ba la sogs pa'o/ /mi dmigs so zhes bya ba ni rig pas rnam pa dang bcas pa dang rnam pa med pa'i shes pa zhes bya ba ni lhag ma'o//rnam grangs 'dis kyang zhes bya ba ni sngar gyi rnam grangs 'ba' zhig tu ma zad kyi zhes bya ba'i tha tshig go/ /de ltar dmigs pa mtha' yas pa rnam pa gnyis bstan nas/ sems can mtha' yas pa brjod par bya ba'i phyir/ sems can mtha' yas mu med do zhes bya ba smras so//snga ma bzhin du de ci'i phyir zhe na zhes dogs pa bsu nas smras pa ni/ sems can zhes bya ba la sogs pa'o/ /'dir yang snga ma bzhin du khong nas dbyung ngo / /sems can mtha' yas pa dang pos ni rab tu skye ba'i rnam pa bkag pas byas pa yin no/ /thog ma med pa nas bsags pa'i dngos po la mngon par zhen pas ji skad du bshad pa'i sems can mtha' yas pa nyid ma rtogs pa rnams la sems can mtha' yas pa gnyis pa bstan pa'i phyir smras pa ni/'phags pa rab 'byor ci ltar na zhes bya ba la sogs pa smras pa'o/ /ci ltar zhes bya ba ni spong ba ste sngon gyi mtha' la sogs pa med pas/sems can mtha' yas pas shes rab kyi pha rol tu phyin pa mtha' yas pa ma yin no/ /'o na ci zhe na/ grangs la sogs pa dang 'brel ba'i phyir zhes 'dod do/ /bsam pa shes pa nyid kyis smras pa ni/ kau shi ka bgrang ba zhes bya ba la sogs pa'o/ /bgrang ba dang mi ldan pa'am zhes bya ba ni gcig la sogs pa'i bgrang ba de dang lhan cig mi ldan pa 'brel ba'i ma yin pas na bgrang ba dang mi ldan pa zhes yi ge a khong nas gdon te/grangs las 'das pa nyid kyis zhes bya ba'i tha tshig go/ /bgrang ba mang pos zhes bya ba ni/ ji ltar tshig drug cur phyin pa'i grangs la grangs med pa zhes bya ba de bzhin du mtha' med pa'i grangs dang ldan pas grangs mang pos zhes bya ba'i don to//gal te de dang 'tsham pa'i rnam pa gnyis kyis kyang sems can mtha' yas pa nyid du ma gyur na/ 'o na rnam pa gang gis 'gyur zhes smras pa ni/ 'phags pa rab 'byor 'o na ji ltar zhes bya ba la sogs pa'o//de'i tshig gis bstan par bya ba'i phyir smras pa ni/ kau shi ka 'di ji snyam du sems/ zhes bya ba la sogs pa'o/ /de bzhin gshegs pa'i byin gyis rlabs kyis chos kyi de kho na nyid kyi rang gi ngo bo shes pas smras pa ni/ 'phags pa rab 'byor 'di lta ste zhes bya ba la sogs pa'o//chos ni rang gi ngo bo nyid 'dzin pa yin pa'i phyir sems can zhes bya ba ni rang gi ngo bo 'dzin pa'i chos kyi tshig bla dgas ni ma yin no/ /de kho na nyid du na rgyu dang ldan pa'i chos ni yod pa ma yin pa'i phyir ro/ /yul med pa la dgag pa med pa'i phyir chos ma yin pa'i tshig bla dgas kyang ma yin no//de ltar na sems can zhes bya bar ji ltar tha snyad grags she na/ ming du btags pa 'di ni zhes bya ba la sogs pa smras so/ /rgyu dang kun 'byung ba dang rab tu skye ba dang rkyen gyi rnam pa bkag pa ni glo bur du byung ba la sogs pa'i tshig bzhi yin no/ /btags pa zhes bya ba ni sgro btags pa ste kun rdzob tu tsam zhes bya ba'i don to//de ltar rgyu la sogs pa bkag na brgya la rgyu med pa can gyi sems can yod pa nyid du go bar 'gyur bas 'dri ba'i phyir smras pa ni/ kau shi ka 'di ji snyam du sems zhes bya ba la sogs pa'o/ /rgyu med gzhan la mi ltos phyir/ /rtag tu yod pa'i med par 'gyur//dngos po rnams ni res 'ga' zhig /'byung ba ltos pa las yin no/ /zhes bya ba'i rigs pas mi rtag pa'i dngos por yod par snang bas/ 'phags pa rab 'byor de lta ma yin no zhes bya ba smras so/ /da ni de'i tshig mtha' yas pa nyid kyi don la sbyor ba'i phyir smras pa ni kau shi ka gang la zhes bya ba la sogs pa'o//kun rdzob tsam gang la de kho na nyid kyi sems can 'ga' yang bstan pa ma byas pa de la sems can mtha' las 'das pa dang grangs med pa la sogs pa 'brel ba ci zhig yod de/ bgrang bar bya ba nyid 'ga' yang med pa'i phyir ro zhes 'dod pa yin no/ /de nyid bstan par bya ba'i phyir/kau shi ka gal te zhes bya ba la sogs pa gsungs te/ yang zhes bya ba'i sgra ni dus nyung zad cig 'ba' zhig tu ma zad kyi bskal pa rnyed du yang ngo / /mtha' las 'das pa rnam par rig par byed pa'i dbyangs dang zhes bya ba ni/ sems can gyi khams mtha' yas pa go bar mdzad pa'i sgras so//gsung dbyangs zab mos zhes bya ba ni dus ring por rjes su 'brel bas so/ /tshig 'di gnyis ni dbyangs zhes bya ba'i khyad par yin no/ /dbyangs kyang rkan la sogs pa'i bya ba yin par gzung ngo / /de la zhes bya ba ni kun rdzob tsam la 'am/ yang na yon du zin kyang zhes bya ba'i tha tshig go//brjod par 'dod pa'i gzhan dbang phyir/ /sgra rnams gang na'ang yod yin med ma yin/ /de yod pas ni don grub na/ /thams cad kyis ni thams cad 'grub/ /ces bya ba'i bsam pa dang ldan pas 'phags pa rab 'byor de ni ma yin no zhes bya ba smras so/ /sgra dngos po ji lta ba bzhin du sbyor ba'i brjod par 'dod pa'i gzhan dbang nyid ma grub pas na ji ltar na de ltar ma yin snyam pa'i dogs pa de ci'i phyir zhe na zhes bya bas bsu nas smras pa ni/sems can thog ma nas zhes bya ba la sogs pa'o/ /thog ma kho na rgyu dang 'brel pa la sogs pa'i nyes pas ma gos pa'i thog ma nas dag pa'o//rgyu med pa can gyi rang gi ngo bo 'dzin pa'i nyes pa dang bral ba'i phyir thog ma nas yongs su dag pa'o/ /'di skad du gang gis brjod par 'dod pa'i gzhan dbang nyid ma grub par 'gyur ba/ rgyu dang bcas pa dang rgyu med pa sems can med pa nyid yin na/ sgra dngos po ji lta ba bzhin du sbyor ba zhes bya ba ci ltar yin no zhes brjod pa yin no//gzhan dag ni gzhan du 'chad de/ tha snyad kyi don du brdar byas pa yin la zhen pas ni ma yin no/ /tha snyad kyang spyi'i mtshan nyid ni dngos po med pa yin pa'i phyir rang gi mtshan nyid du zhen pa las yin no/ /de bas na rang gi mtshan nyid gang la brdar byas pa des ni tha snyad du byed pa ma yin te/de ni de'i tshe nye bar rjes su sbyor ba 'gro ba med pa'i phyir ro/ /des na sgras brjod par bya ba'i rtog pa'i dri mas ma gos pa'i ngo bo yin pas na thog ma nas dag pa nyid do/ /gang gis tha snyad du byas pa de la yang brda byas pa ma yin te/ de ni sngar ma mthong ba yin pa'i phyir ro//des na de bzhin du nyes pas ma gos pa nyid kyis na thog ma nas yongs su dag pa nyid do/ /de'i phyir tha snyad kyi don du dngos po ji lta bar sgra'i sbyor ba mi srid pa'i phyir smra bar 'dod pa'i gzhan dbang nyid ma grub pa ma yin no zhes zer ro/ /gzhan dag ni de ltar na de kho na nyid du brjod bya yin pa nyid bkag pa yin gyi dngos po'i rang gi ngo bo ni ma yin no//de'i phyir brjod pa'i kun rdzob tu bgrang ba la sogs pa dang mi ldan pas sems can mtha' las 'das par bstan pa zhes bya bar 'gyur ro/ /brgya byin gyi bsam pa nyid de ltar bshad do brjod par 'gyur ro zhes bsams so/ /rnam grangs 'dis kyang zhes bya ba ni sngar bshad pa'i sems can mtha' las 'das pa nyid kyi rnam pa 'ba' zhig tu ma zad kyi zhes bya ba'i tha tshig go//rnam pa gzhan yod par nges par gzung ba mjug bsdu ba'i don du smras pa ni/ kau shi ka de ltar yang zhes bya ba la sogs pa'o/ /yang zhes bya ba ni nges par gzung ba'o //sems can mtha' yas pa gnyis pas rkyen gyi rnam pa dgag par byas pa yin no/ /bcom ldan 'das kyis chos bstan pa ni 'bras bu med pa ma yin zhes smras pa ni/ de nas dbang po dang bcas pa'i lha rnams zhes bya ba la sogs pa'o/ /tshangs pa ni mi mjed kyi 'jig rten gyi khams kyi gtso bo'o//skye dgu'i bdag po ni 'jig rten skyong ba'o/ /drang srong ni sna tshogs bshes gnyen la sogs pa'o/ /ji skad du brjod pa'i bstan pas ji tsam du gzung ba dang 'dzin pa'i bdag med pa rtogs pa na ched kar brjod pas ched du brjod pa ste/ rtogs pas dga' ba'i ched du brjod do zhes smras par gyur to//de nyid ni e ma'o chos zhes bya ba la sogs pa smos pa yin te/ dge ba'i bshes gnyen du gyur pas brgya byin la sogs pas 'phags pa rab 'byor la bstod pa ni/ de bzhin gshegs pa 'byung ba zhes bya ba sogs pa smos pa yin te/ 'di las 'byung ba'am 'dis 'byung bas 'byung ba ste mthong ba'i lam mo//legs par smras pas zhes pa nyes pa med par smra ba lhur byed pas/ 'brel pas brjod cing / rang gi mtshan nyid kyis bstan te/ spyi'i mtshan nyid kyis bshad la/ de gnyi gas rnam par gzhag go zhes bya ba'o/ /de bzhin gshegs pa'i byin gyis brlabs kyis kun 'byung gi skad cig ma gnyis pa'i rnam pa bsgom par gyur to zhes smras pa ni/bcom ldan 'das zhes bya ba la sogs pa'o/ /da slan chad ces bya ba ni deng nas brtsams te zhes bya ba'i tha tshig go/ /'di dang zhes bya ba ni mthong ba'i lam gyi bdag nyid can dang ngo / /ma bral ba zhes bya ba ni thob pa las ma nyams pas so//gnas pa ni ma rtogs pa'i don rtogs pa'i tshul gyis so/ /de bzhin gshegs pa lags par 'dzin to zhes bya ba ni/ nges pa kho nar de bzhin gshegs pa'i go 'phang 'thob pa yin no zhes 'dod pa'o/ /'di skad du shes rab kyi pha rol tu phyin pa la gnas pa ni don dam par chos kyi dbyings kyi rang bzhin can yin pa'i phyir gzugs la sogs pa la de bzhin gshegs pa nyid du nges par bzung ba'o zhes de ltar chos thams cad la dmigs na kun 'byung ba la chos shes pa skye bar 'gyur ro zhes brjod pa yin no//byang chub sems dpar gyur pa'i gnas skabs su sngon don 'di sku nyams su bstar ba nyid kyis rjes su bzhed pas de de bzhin no zhes bya ba la sogs pa gsungs pa yin no//sngon sku nyams su bstar ba nyid ni lha'i bu dag gang gi tshe zhes bya ba la sogs pa gsungs pa yin te/ rgyal po'i pho brang 'khor ni rgyal po'i bzhugs gnas so/ / tshong 'dus ni srang ngo / /bram ze'i khye'u zhes bya ba ni rigs kyi bu zhes bya ba dang 'dra bas na spyir bod pa'i tshig gam de'i tshe na bcom ldan 'das kyi mtshan de lta bu yin pa'o/ /ma 'ongs pa'i dus ni ma 'ongs pa'i tshe na'o/ /bskal pa grangs med pa na zhes bya ba ni grangs kyi tshigs drug cur phyin pa la grangs med pa zhes bya ste/grangs des bcad pa'i bskal pa la zhes bya ba'i tha tshig go/ /sten pa nyid phun sum tshogs pa'i khyad par ni shAkya thub pa zhes bya ba la sogs pa yin te/ shAkya'i rigs su skye ba bzhes pa'i phyir dang / sku dang gsung dang thugs mi dge ba rnams las rnam pa thams cad du bsdams pa'i bdag nyid can gyi thub pa dang ldan pas shAkya thub pa'o//thub pa dang ldan pa'i ston pa phun sum tshogs pa nyid kyi bar chad byed pa lha'i bu'i bdud bcom par ston te/ /dang por de bcom pas ston pa phun sum tshogs pa nyid brnyes pa yin pa'i phyir ro/ /de bzhin gshegs pa dgra bcom pa yang dag par rdzogs pa'i sangs rgyas zhes bya ba'i tshig gsum gyis ni ston pa nyid phun sum tshogs pa ston to//ston pa nyid phun sum tshogs pa de yang rnam pa gnyis te/ gsung ba po nyid kyi mtshan nyid dang / thugs su chud pa po nyid kyi mtshan nyid do/ /de la chos de rnams ji ltar gnas pa de bzhin du gsungs pas na de bzhin gshegs pa zhes bya ste/'dis ni phyin ci ma log par chos ston par mdzad pa nyid kyis gsung ba po phun sum tshogs pa ston to/ /rtogs pa po nyid phun sum tshogs pa'i mtshan nyid kyang ye shes dang spangs pa phun sum tshogs pa'i dbye bas rnam pa gnyis so//de rnams bcom pas na dgra bcom zhes bya ba 'dis ni spangs pa phun sum tshogs pa gsungs so/ /dgra yang dge ba'i chos thams cad 'joms pa'i don gyis na 'dod chags la sogs pa'i nyon mongs pa rnams so/ /spangs pa phun sum tshogs pa 'di sngar brjod pa ni ye shes phun sum tshogs pa de sngon du 'gro ba can yin pa'i phyir ro//yang dag par te phyin ci ma log par kun nas chos rnams thugs su chud pas yang dag par rdzogs pa'i sangs rgyas zhes bya ste/ 'dis ni ye shes phun sum tshogs pa gsungs pa yin te/ chos thams cad phyin ci ma log par mkhyen pa'i ye shes thugs su chud pa yin pa'i phyir ro//de ltar na chos thams cad phyin ci ma log par ston par mdzad pa nyid dang / nyon mongs pa thams cad spangs pa dang / chos thams cad rnam pa thams cad du thugs su chud pas ni bcom ldan 'das kyi ston pa phun sum tshogs pa thun mong ma yin pa yongs su rdzogs par brjod pa yin no//'di ltar nyon mongs pa thams cad ma spangs pas na phyi rol pa rnams la ni phyin ci ma log par chos ston pa nyid yod pa ma yin te/ de bas na 'di dag ni yang dag pa'i ston pa ma yin no/ /nyan thos dang rang sangs rgyas ni nyon mongs pa thams cad spangs pas yang dag pa'i ston pa yin du zin kyang chos thams cad rnam pa thams cad du khong du ma chud pa'i phyir rnam pa thams cad pa'i ston pa ma yin no//bcom ldan 'das ji skad du bshad pa'i tshul gyis yang dag pa'i ston pa dang rnam pa thams cad pa'i ston pa yin no zhes bstan pa yin no//ston pa nyid phun sum tshogs pa de gang gis thob pa de ston pa ni rig pa dang rkang par ldan pa zhes bya ba yin no/ /'dis ni ston pa nyid phun sum tshogs pa 'thob pa'i rgyu ston pa yin no/ /de la rig pa ni yang dag pa'i lta ba'o/ /yang dag pa'i rtog pa la sogs pa'i yan lag lhag ma rnams ni rkang pa ste gang gi phyir yang dag pa'i lta bas de kho na nyid gzigs nas yang dag pa'i rtog pa la sogs pa zhabs su gyur pas bzhud pa yin gyi/gzhan du na ma mthong ba dang rkang pa med pa ni 'gro bar mi nus so zhes bya bar dgongs so/ /de gnyis dang ldan pa ni bcas pa'o//yang na lhag pa'i shes rab kyi bslab pa ni rig pa'o/ /lhag pa'i sems dang lhag pa'i tshul khrims kyi bslab pa ni rkang pa ste/ shes rab kyi sngon du yongs su sbyong bar gyur pa nyid kyis rkang pa yin te 'gro bar byed pa yin pas so/ /rig pa sngar smos pa ni de yongs su dag pas tshul khrims dang ting nge 'dzin yongs su dag pa'i phyir ro//shes rab de mig dang 'dra ba des gzigs te tshul khrims dang ting nge 'dzin de gnyis kyis rkang pa ltar bzhud na/ bgrod par bya ba'i gnas su phyin pa yin pa'i phyir rig pa dang rkang pa'i phyir rig pa dang rkang pa'i sgras bslab pa gsum ston to//ston pa phun sum tshogs pa rnam pa gnyis po de yang ci 'dra ba zhig yin pa de ni bde bar gshegs pa zhes bya ba 'dis bstan to/ /'jig rten las 'das pa'i lam gyi ye shes dang spangs pa phun sum tshogs pa mdzes par gshegs pas na bde bar gshegs pa ste gzugs bzang po zhes bya ba dang 'dra'o//yang na slar mi ldog par legs par gshegs pas na bde bar gshegs pa ste rims nad legs par byang ba dang 'dra'o/ /yang na ma lus par gshegs pas na bde bar gshegs pa ste bum pa legs par gang ba dang 'dra'o/ /don gsum po 'di dag ni phyi rol pa'i 'dod chags dang bral ba dang /slob pa dang / mi slob pa rnams las khyad par du bya ba'i don du yin no/ /'di ltar phyi rol gyi 'dod chags dang bral ba rnams ni bdag tu phyin ci log pas mdzes par 'gro ba ma yin no/ /slob pa rnams ni 'khor bar yang skye ba len pas legs par 'gro ba ma yin no//mi slob pa rnams ni yang shes bya thams cad la shes pa'i gegs yod pas ma lus par 'gro ba ma yin no/ /ston pa nyid phun sum tshogs pa 'di'i phrin las ni rnam pa gnyis las/ dang po 'jig rten skal ba dang ldan pa dang skal ba med pa rnams la gzigs pa'i phrin las ston pa ni 'jig rten rig pa zhes bya ba yin te/skal ba dang ldan pa dang skal ba med pa'i 'jig rten yongs su mkhyen pa'i phyir na/ 'di la 'jig rten rig pa zhes brjod do/ /'di ltar ston pa bcom ldan 'das ni sangs rgyas kyi spyan gyis su ni rgud su ni dar zhes bya ba'i rnam pas nyin lan gsum mtshan lan gsum du gzigs pa yin no//gnyis pa skal ba dang ldan pa rnams 'dul ba'i phrin las ni skyes bu 'dul ba'i kha lo sgyur ba bla na med pa zhes bya ba yin te/ skal ba dang ldan pa dang skal ba med pa'i 'jig rten rnams la gzigs nas skyes bu gang kho na bcom ldan 'das gdul bya gdul bar 'os pa 'am 'dul bar nus pa skal ba dang ldan pa de 'dul bar mdzad cing /de rnams kyi kha lo sgyur bar gyur pa'i phyir ro/ /'dul ba ni 'khor los sgyur bar gyur pa ste lam ma yin pa las bzlog nas yang dag pa'i lam la 'jog par byed pa nyid dang yon tan gyi khyad par skyed pa nyid kyis na rta la sogs pa'i kha lo sgyur ba dang 'dra'o//bla na med pa smos pa ni kha lo sgyur ba khyad par du byed pa'i don to/ /'dod chags dang zhe sdang dang gti mug dang nga rgyal shas che ba 'phags pa mdzes dga' bo dang sor phreng dang steng rgyas 'od srung dang rgyal po chen po ka pi na la sogs pa gdul bya'i skye bo kha cig gdul dka' ba yin yang 'dul bar mdzad pa yin no zhes bstan par bya ba'i phyir ro//skal ba dang ldan pa'i phrin las de yang gang la gnas pa de ston pa ni lha dang mi rnams kyi ston pa zhes bya ba yin no//bcom ldan 'das mtho ris dang thar pa'i lam ston par mdzad pas khyad par med par sems can thams cad kyi ston pa yin mod kyi/ /de lta na yang gang la 'phags pa'i bden pa bstan pa dang dge sbyong gi 'bras bu 'thob par gdams pa de la bcom ldan 'das kyi ston pa'i phrin las don ji lta ba bzhin du ston pa gtso cher gnas pa yin la de'i snod kyang lha dang mi rnams yin pas de'i phyir lha dang mi rnams kyi ston pa zhes gsungs pa yin no//yon tan gyi bdag nyid che ba 'di dag gang la mnga' ba de ni sangs rgyas bcom ldan 'das zhes bya bas rang gi ngo bo bstan pa yin no//de la dngos po'i don ma lus par thugs su chud pas mchog tu gyur pa'i blo mnga' bas na sangs rgyas so/ /rnam pa dgus blo mchog tu gyur pa yin te thams cad mkhyen pa'i ye shes dang / lhun gyis grub pa'i ye shes dang / bstan mi dgos pa'i ye shes dang /nyon mongs pa'i sgrib pa bag chags dang bcas pa spangs pa'i ye shes dang / shes bya'i sgrib pa ma lus par spangs pa'i ye shes dang / sems can gyi don mdzad par rnam pa thams cad du spyod pa dang / thugs rje phun sum tshogs pa dang / mi zad pa phun sum tshogs pa dang /zla med pa nyid phun sum tshogs pa'o/ /dbang phyug phun sum tshogs pa dang ldan pas na bcom ldan 'das so/ /lha'i bu de rnams de bzhin gshegs pa'i mthus kun 'byung gi skad cig ma gsum pa'i rnam pa rtog par gyur to zhes brjod pa ni bcom ldan 'das zhes bya ba la sogs pa'o//thams cad mkhyen pa nyid ces bya ba ni kun 'byung la rjes su shes pa'i bzod pa'o/ /bar du zhes bya ba'i tshig gis ni sdug bsngal la chos shes pa'i bzod pa la sogs pa bsdus pa yin no/ /sgrub par byed pa dang zhes bya ba ni 'dzin pa dang spong ba med pa dag gi tshul gyis skyed par byed pa'o//rjes su 'dzin pa zhes bya ba ni bar du gcod par byed pa'i chos thams cad kyi skabs mi 'byed pa'i tshul gyis nye bar ston par byed pa'o/ /de yang rgyal ba'i yum bar ma las bcom ldan 'das de ltar rnam pa thams cad mkhyen pa nyid kyi bar du mi len mi 'dor ba'i tshul gyis byang chub sems dpa' sems dpa' chen po rnams kyi rnam pa thams cad mkhyen pa nyid mthun par yongs su 'dzin pa ni ngo mtshar che'o zhes bya ba la sogs pa gsungs pa yin no//ngo mtshar to zhes bya ba ni de kho na nyid du na skye ba med pa'i ngo bo nyid yin na yang kun rdzob tu shes rab kyi pha rol tu phyin pa ni rnam pa thams cad mkhyen pa nyid yang dag par skyed pa yin pas byis pa'i skye bo thams cad las shin tu 'das pa yin pa'i phyir ro//shin tu ngo mtshar to zhes bya ba ni nyan thos la sogs pa las khyad par 'phags pa'o/ /'di skad du byang chub sems dpa' shes rab kyi pha rol tu phyin pa la gnas pa ni chos kyi dbyings kyi ngo bo nyid kyis chos thams cad la mi len pa dang mi 'dor bar bsgom pa la sogs pa yin no zhes chos thams cad la dmigs pas kun 'byung la rjes su shes pa'i bzod pa skye bar 'gyur ro zhes brjod pa yin no//shes rab kyi pha rol tu phyin pa'i bshad pa mngon par rtogs pa'i rgyan gyi snang ba las brgya byin gyi le'u ste gnyis pa'o// //kun 'byung gi skad cig ma bzhi pa'i rnam pa bstan par bya ba'i phyir so so rang rig pa nyid kyis na 'dod pa'i khams na spyod pa la sogs pa'i lha'i bu la la ni dpang du bzhag nas kha cig la bka' stsal to zhes gsungs pa ni lha'i bu dag zhes bya ba la sogs pa'o//rigs kyi bu'am rigs kyi bu mo zhes bya ba'i sgra ni mchod pa'i tshig go/ /skyes pa dang bud med dag nye bar gzung ba ni ma ning dang mtshan gnyis pa ston pa la sogs pa rnams la rtogs pa med par bstan pa yin no/ /rigs kyi khyad par ma smos pa ni rigs bzhi char rnam par dag pa yin par shes par byed pa'i don yin no//rigs smos pa ni dam pa'i chos la rigs phun sum tshogs pa dbang du bya bar shes par bya ba'i don yin no/ /bu dang bu mo smos pa ni rab tu byung ba'i skye bo dang rjes su mthun pa'i tshul shes par bya ba'i don yin no//yang 'am zhes smos pa ni skyes nas myong ba dang lan grangs gzhan du myong ba'i skal ba can dag nyes pas rigs ngan pa yin yang 'dir skal ba dang ldan pa'i dbang du bya bar shes par bya ba'i don yin no zhes 'phags pa rnam par grol sdes gsungs so / /shes rab kyi pha rol tu phyin pa 'di zhes bya ba ni kun 'byung la rjes su shes pa'i bdag nyid can no//de la bdud ces bya ba ni lha'i bu'i bdud 'dod pa'i lha'o/ /bdud kyi rigs kyi lha ni de'i phyogs byed pa lha'i bu rnams so/ /glags lta ba zhes bya ba ni byung zin pa'i glags lta ba'o/ /glags tshol ba ni zhes bya ba ni phyis 'byung ba'i glags tshol ba'i phyir te/glags zhes bya ba ni nyes pa dang bu ga zhes bya ba'i don to/ /mi dang zhes bya ba ni mi'i 'gro bas bsdus pa'i sems can rnams so/ /mi ma yin pa rnams zhes bya ba ni srin po la sogs pa'i mi ma yin rnams so/ /yang mi 'gyur ro zhes bya ba la yang zhes bya ba'i sgra ni snga ma la ltos nas bsdu bar byas pa'o//yang ba ma spangs pas 'chi ba'i dus byed pa ni tshe'i lhag ma yod du zin kyang rkyen 'ga' zhig nye bas 'chi ba'o/ /'di dag thams cad 'byung bar mi 'gyur ba ni byams pa la sogs pas sems kyi rgyud legs par bsgos pa'i phyir ro zhes bya bar dgongs so//de yang rgyal ba'i yum bar ma las byams pa dang snying rje dang dga' ba dang btang snyoms mi dmigs pa'i sbyor bas shin tu bsgoms pa'i phyir de rnams la mi dang mi ma yin pa rnams kyis glags rnyed par mi 'gyur te zhes bya ba la sogs pa gsungs pa yin no/ /'di skad du ngo bo nyid med pa la lhag par mos pa sngon du 'gro bas tshad med pa bzhi bsgom par bya'o zhes de ltar chos thams cad la dmigs na kun 'byung la rjes su shes pa skye bar 'gyur ro zhes brjod pa yin no//de nyid kyi phyir 'phags pa rnam par grol ba'i sdes tshad med pa rnams kyis ni mthong ba'i lam gyi skad cig ma brgyad pa la byang chub sems dpa'i dgos pa byed do//gzhan du na skad cig ma dgu pa la sems can gyi khams la ltos pa med par 'gog par ltung bar 'gyur ro zhes bshad pa yin no/ /'gog pa'i skad cig ma dang po'i rnam pa bstan pa'i phyir/ lha'i bu dag gzhan yang zhes bya ba la sogs pa gsungs so//yang dag par zhugs pa ni smon lam la sogs pa'i bsam pas zhugs pa'o/ /'di zhes bya ba ni mthong ba'i lam ston par byed pa'o/ /rigs kyi bu de'i zhes bya ba ni mthong ba'i lam gyi skad cig ma dgu pa rtogs pa'i'o/ /nyan pa po sogs pa'i don tu drung du nye bar gyur par 'ong bar 'dod cing dga' bar gyur te/de nyid ni stong pa nyid thams cad shin tu bsgoms pa nyid yin pa'i phyir don rtogs pa nyid kyis na man ngag phyin ci ma log par ston par nus so zhes 'dod do/ /'dzin pa dang zhes bya ba la sogs pa ni gong nas gong du rtogs pa khyad par du rtogs pa'i rgyur gyur pa khyad par can gyi 'dzin pa la sogs pa byed pa zhes bya ba'i tha tshig go//nyan par 'gyur te zhes bya ba ni shes rab kyi pha rol tu phyin pa 'di zhes bya ba snga ma dang sbyar ro/ /nyan pa yang 'gog pa'i bden pa mngon par rtogs pa'i bdag po las kun rdzob tu ston pa dang nyan pa'i rnam par snang ba 'am/mngon par rtogs pa des bskyed pa'i nus pa dang ldan pas langs pa la sogs pa'i drung la sogs par rig par bya'o/ /phan yon gcig bstan pas rnam pa bstan nas/ phan yon gzhan dag bstan pas rnam pa de nyid bstan par bya ba'i phyir/lha'i bu dag gzhan yang rigs kyi bu 'am zhes bya ba la sogs pa gsungs te/ gzhan yang zhes bya ba'i sgra ni bsdu ba ste/ phan yon sngar bshad pa 'ba' zhig tu ma zad kyi gzhan pa 'di yang zhes bya ba'i tha tshig go/ /dgon pa ni grong las gzhu 'dom lnga brgyas thag bsrings pa'i gnas so//song ba ni phyin pa'o shing gcig pu nyid ni gnod sbyin la sogs pas gnas bcas pa nyid kyis na 'jigs pa'i rgyu yin pa de bas na de'i rtsa ba ni shing drung ngo / /khyim stong pa ni mi la sogs pa med pa'i khang pa'o/ /bla gab med pa ni steng g.yogs med pa'o/ /lam ni gang du skye bo chen po 'gro ba'o//lam gol ba ni ji skad du bshad pa las bzlog pa'i lam mo/ /'brog dgon pa ni dgon pa las phar 'das pa'o/ /de dang der song ba ni dgon pa la sogs pa de dang der nye bar bgrod cing 'gro ba'o/ /de nyid spyod lam rnam pa bzhis bstan pa ni/ 'gro ba'am zhes bya ba la sogs pa gsungs pa yin te/nyal ba ni glos phab pa'o/ /'jigs pa ni mi 'dod pa thog tu bab par dogs pa'o/ /rengs pa nyid ni de bzlog pa'i thabs mi shes pa nyid do/ /mi 'byung zhes bya ba ni med pa dag mi 'byung ba'o/ /mi skye'o zhes bya ba ni rgyun gyis 'jug pa mi skye'o zhes bya bar snga ma rnams sbyar te/thams cad stong pa nyid du shin tu bsgoms pa'i phyir ro zhes bya bar 'dod do/ /gzhan dag las kyang byang chub sems dpa'i stong pa nyid la yongs su rtog pa ni 'jigs pa thams cad dang bral bar 'gyur ro zhes bya ba la sogs pa gsungs pa yin no/ / 'di skad du gzugs la sogs pa'i rang gi ngo bo ni rang bzhin gyi stong pa nyid yin no zhes de ltar chos thams cad la dmigs pas 'gog pa la chos shes pa'i bzod pa skye bar 'gyur ro zhes brjod pa yin no/ /'gog pa'i skad cig ma gnyis pa bstan pa'i phyir/ de nas bcom ldan 'das la rgyal po chen po bzhis zhes bya ba la sogs pa gsungs pa yin no//rgyal po chen po bzhi ni yul 'khor skyong la sogs pa'o/ /de kho na nyid du na theg pa gsum dang sems can du dmigs pa med du zin kyang / kun rdzob tu nyan thos la sogs pa'i theg pa gsum gyis sems can 'dul ba ni ngo mtshar che'o//bden pa gnyis la brten nas rnam pa thams cad du sems can gyi don grub par byed pa'i nus pa'i rgyu bstan pa 'dis kyang shes rab kyi pha rol tu phyin pa 'dzin pa la sogs pa'i 'bras bu ni sangs rgyas nyid yin par bstan to/ /zhes gsang bar bya'o/ /de bas na 'di skad du chos kyi dbyings su bsngos pa'i dge ba'i rtsa ba'i 'bras bu ni de bzhin gshegs pa nyid thob pa yin no zhes de ltar chos thams cad la dmigs pas 'gog pa la chos shes pa skye bar 'gyur ro zhes brjod pa yin no//bcom ldan 'das bdag cag gis ni zhes bya ba la sogs pa la/'di ni shes rab kyi pha rol tu phyin pa'i che ba'i bdag nyid shes par bya ba'i phyir dang / bdag nyid bstan pa la phan 'dogs pa nyid shes par bya ba'i phyir dang / bcom ldan 'das kyi bka' drin gzo ba nyid du shes par bya ba'i phyir 'dir smras pa yin no/ /bsrung ba dang zhes bya ba la sogs pas mthong ba'i chos la myong bar 'gyur ba dang /skyes nas myong bar 'gyur ba dang / lan grangs gzhan la myong bar 'gyur ba'i mi dge ba'i las gsum yod pas na rim pa bzhin des byas pa'i nye bar 'tshe ba bzlog pa'i sgo nas bsrung ba dang bskyab pa dang sba bar bgyi'o zhes brjod do/ /yang na gang du mi dge ba kho na'i bya bar gtogs kyi gzhan du ma yin pa'i dper na dus ma yin par 'chi ba dang /mu ge dang / rdo rje'i me 'bab pa lta bu lhas byas pa'i rgud pa dang / gang du srog chags rnams kyi bya bar gtogs kyi gang gi phyir las med par 'bras bu 'ga' yang yod pa ma yin pas na yod du zin kyang lha'i byed par mi gtogs pa/dper na 'bru la sogs pa skyes su zin kyang pha rol gyi tshogs kyis gnod pa byas pas mu ge byung ba la sogs pa mis byas pa'i rgud pa dang / gang du gnyi ga'i byed par gtogs pa lha dang mis byas pa'i rgud pa'o/ /las ni 'di tsam du zad de lhas byas pa dang mis byas pa ste/ji skad du 'jig rten ni lha dang mi'i las kyis 'tshe ba yin no zhes gsungs pa lta bu'o/ /de las zlog par byed pas go rims bzhin du bsrung ba dang / bskyab pa dang / sba ba zhes bgyi ba zhes smos pa yin no/ /bgyi'o zhes pa ni bgyid do zhes pa'o//'gog pa'i skad cig ma gsum pa'i don du 'brel ba rtsom pas de nas bcom ldan 'das la zhes bya ba la sogs pa smos pa yin te/ /tshe 'di la zhes bya ba ni da ltar gyi skye bas bsdus pa'o/ /yon tan ni phan yon no/ /'di dag zhes bya ba ni bshad ma thag pa'i bsrung ba dang bskyab pa dang sba ba'i grangs kyi mchod pa 'di dag go//'thob cing zhes bya ba ni sbyor ba'i gnas skabs su'o/ /yongs su 'dzin par 'gyur ba zhes bya ba ni 'jug gi gnas skabs su'o/ /de ltar 'brel pa brjod nas rnam pa bstan pa'i phyir zhus pa ni bcom ldan 'das zhes bya ba la sogs pa gsol pa yin no//yang ci shes rab kyi pha rol tu phyin pa 'di bzung na sbyin pa la sogs pa'i pha rol tu phyin pa lnga yang dag par bzung bar 'gyur ram zhes brjod par bya ba las/ pha rol tu phyin pa drug po zhes smos pa ni gtso bo shes rab kyi pha rol tu phyin pas phal pa'i rang bzhin gyi shes rab kyi pha rol tu phyin pas yang bsdus pa'i phyir ro snyam du bsams nas smras pa yin no//chos thams cad phyin ci ma log par rtogs pa las ni gtso bo'i pha rol tu phyin pa skye ba de bas na des rnam par byang ba'i chos thams cad bsdus pa'i phyir ro zhes bya ba'i dgongs pa dang ldan pas bcom ldan 'das kyis kau shi ka de de bzhin no zhes bya ba la sogs pa gsungs pa yin no//'di skad du/ shes rab kyi pha rol tu phyin pa ni gnyen po'i phyogs rnam pa thams cad bsdus pa yin no zhes de ltar chos thams cad la dmigs na 'gog pa la rjes su shes pa'i bzod pa skye'o zhes brjod pa yin no/ /'gog pa'i skad cig ma bzhi pa'i rnam pa bstan pa'i phyir /kau shi ka gzhan yang zhes bya ba la sogs pa gsungs te/ legs par rab tu nyon la zhes bya ba la sogs pa ni bshad zin to/ /yang na thog ma kho nar re zhig dad pa'i rgyu yin pas dge ba de'i phyir legs par nyon cig pa'o/ /gang gi phyir bar du dge ba'i rgyu nyid kyi dge ba yin pa de'i phyir rab tu nyon cig pa'o//gang gis tha mar rnam par grol ba'i rgyu nyid kyis dge ba yin pa des na tshul bzhin du yid la zung shig pa'o/ /yang na nyes pa chung ngu dang bar ma dang chen po rnams kyi gnyen po yin pa'i phyir go rims bzhin du legs par nyon la zhes bya ba la sogs pa gsungs pa yin no//yang na tshig 'bru dang / don dang / gnyi ga nges par 'dzin pa yin pa'i phyir/ grangs ji lta ba bzhin du legs par zhes bya ba la sogs pa gsungs pa yin no/ /chos zhes bya ba la sogs pa la/ chos ni mdo sde la sogs pa'o/ / rtsod pa ni 'gal ba gzung bar sems pa'o/ /rgol ba ni de nas tshig 'gal bar go bar byed cing rtsod par byed pa'o/ /de ltar rnam pa gnyis kyis 'gal bar byed pa ste/ mi 'grig par byed pa'o/ /yang na yig 'bru dang / don dang / gnyi ga mi 'grig par byed pas na rtsod par 'dod pa la sogs pa'i tshig gsum gsungs pa yin no//'dod pa zhes bya ba'i de ma thag tu byang chub sems dpa' rgyal ba'i yum sgom pa la mngon par dga' ba las brtsams te zhes bya ba ni khong nas dbyung ste/ gang gi phyir de nyid kyi phan yon brjod pa'i dbang du mdzad de/ 'og nas de'i rtsod pa'i gzhi skyes pa dang ma skyes pa de dag nub par 'gyur zhing gnas par mi 'gyur ro zhes bya ba la sogs pa gsungs pa yin no//nub par 'gyur zhing zhes bya ba ni mi snang bar gyur pa'o/ /gang gi phyir gnas par mi 'gyur ro zhes bya ba rigs pas gnas pa thob par mi 'gyur ba'o/ /de nyid kyi phyir de dag gi bsam pa rdzogs par mi 'gyur te/yid la re ba yongs su rdzogs shing mthar phyin par mi 'gyur ro/ /rtog pa skyes pa gzhan gyi phyir lan btab pa med par ji ltar nub par 'gyur snyam du dogs pa de ci'i phyir zhe na zhes bya bas bsu nas/ kau shi ka de ni zhes bya ba la sogs pa gsungs so//'dis ni 'di skad du 'di lta ste shes rab kyi pha rol tu phyin pa sgom par byed pa'i gang zag gi byin gyis brlabs kyis rang nyid kho nas de rnams la lan 'byung bar 'gyur ba 'di ni chos nyid yin no zhes brjod pa yin no/ /'dzin pa la sogs pa ni bshad zin to/ /yang na bsdus pa nyan pa po 'dzin pa'o//yid la byed pa ni 'chang ba'o/ /glegs bam 'don pas na klog pa'o/ /gzhung don 'dzin pas na kun chub par byed pa'o/ /mngon sum dang rjes su dpag pa dang lung dang mi 'gal ba'i don ston pa'i phyir ram/ yang na kun brtags pa la sogs pa'i tshig gi don rnam pa gsum skye ba med par ston pas na/go rims bzhin du rab tu 'don pa dang nye bar ston par 'gyur ba yin no/ /lung 'bogs pa ni bklags pa tsam du nye bar bstan pa'i phyir ro/ /kha ton du byed pa ni nam gyi cha stod la sogs par byed pa'i phyir ro/ /'dzin pa la sogs pa ni byang chub tu yongs su bsngos pa la sogs pa'i bsam pa'i bye brag gis yang dag par bsgrub par bya ba yin no//rtsod pa'i gzhi zhes bya ba ni rgol ba'i gnas so/ /nye bar bsdu ba'i phyir kau shi ka rigs kyi bu'am zhes bya ba la sogs pa gsungs pa yin no/ /kyang zhes bya ba'i sgra ni 'og nas bshad pa'i yon tan 'ba' zhig tu ma zad pa'o//de ltar shes rab kyi pha rol tu phyin pa ni nye bar 'tshe ba thams cad rab tu zhi bar byed pa'i gzi brjid dang stobs dang ldan pa nyid du bstan nas/ dpes kyang legs par bstan par bya ba'i phyir/ kau shi ka 'di lta ste dper na zhes bya ba la sogs pa gsungs te/glegs bam la la las yongs su brtag pa bzung ba ste zhes gsungs pa ni rgyu'i khyad par las 'bras bu'i khyad par du 'phags pa srid pa'i dbang du mdzad pa yin te 'dis ni de rnyed dka' ba nyid du ston to/ /dug thams cad zhi bar byed pa'i zhes bya ba ni/ mi rgyu ba la sogs pa'i dug rnams sel ba yin pa'i phyir rang gi ngo bo bstan to//skye bo sbrul gdug pa zhes bya ba ni mche ba'i dug can gyi srog chags so/ /bkres shing zhes bya ba la sogs pa la bkres pa ni bkres pas yongs su gdungs kyang 'ga' zhig lha mchod pa la 'jug pa dang 'dra bar kha zas dgos pa med pa de rnam par dgar bar bya ba'i phyir zas 'dod de zhes smos pa yin no//de lta bu dag yin na yang rang bzhin bstan pa dag ni kha zas tshol bar mi byed pas de las dgar ba'i phyir zas tshol ba zhig gis zhes smos pa yin no/ /srog chags su gyur pa 'ga' zhig ces bya ba ni sems can gyi grangs su chud pa ste/sbal pa la sogs pa zhes bya ba'i tha tshig go/ /dri zhes bya ba ni srog chags su gtogs pa de'i dri bsku ba la sogs pa'o/ /phyogs su 'brang zhing zhes bya ba ni blos bza' ba nyid du bdag gir byas nas so/ /bsnyags pa dang zhes bya ba ni phyi bzhin du rjes su snyeg cing 'gro bas so//phyir ldog go zhes bya ba ni slar ldog par byed pa'o/ /gang du srog chags kyi dris mi ldog pa der sman gyi dris ci ltar phyir ldog pa yin snyam du dogs pa de ci'i phyir zhe na zhes bya bas bsu nas/ kau shi ka de ltar zhes bya ba la sogs pa gsungs te/ tshig gi don ni kun rdzob tu yang rgyu dang 'bras bur gyur pa nyid kyis na sman de nyid la sbrul gdug pa zil gyis gnon pa de lta bu'i sman gyi yon tan yod pas sbrul gdug pa zil gyis gnon pa yin gyi/gzhan gyis ni ma yin no/ /de ltar na sman de ni mthu chen po dang ldan pa yin te/ tha dad yin yang rang bzhin gyis/ /nges te dbang po la sogs bzhin/ /zhes bya ba 'di yin no//'di skad du shes rab kyi pha rol tu phyin pa nyid kyis phyi dang nang gi nye bar 'tshe ba zhi bar byed pa yin no zhes de ltar chos thams cad la dmigs pas 'gog pa la rjes su shes pa skye'o zhes brjod pa yin no/ /lam gyi skad cig ma dang po'i rnam pa bstan pa'i phyir/ kau shi ka de bzhin du zhes bya ba la sogs pa gsungs te/gang yin pa de dag ces bya ba ni tshig gi phrad phyir bsdu na gang yang rung ba zhes bya ba'i don la 'jug go/ /gzi brjid dang zhes bya ba la sogs pa la/ shes rab kyi pha rol tu phyin pa'i nus pa nyid du gyur pa'i gzi brjid dang stobs dang mthu dang stobs bskyed pa zhes bya bas go rims bzhin du sbyor ba dang mthong ba dang sgom pa dang khyad par gyi lam bstan to//de nyid nas zhes bya ba ni gang nas skye ba nyid nas zhes bya ba'i tha tshig go/ /med cing nye bar zhi bar 'gyur ba la 'phel bar mi 'gyur te zhes bya ba ni/ go rims bzhin du thos pa dang bsam pa dang sgom pa'i dus su rig par bya 'am/sbyor ba la sogs pa'i gnas skabs su gzung ngo / /de nyid bstan pa'i phyir gang dang zhes bya ba la sogs pa gsungs te/ gang dang gang nyid nas zhes bya ba ni rgol ba'i dbang du byas pa'i gnas gang dang gang yin pa nyid nas zhes bya ba'i tha tshig go/ /'gag cing nub par 'gyur la gnas par mi 'gyur ro zhes bya ba'i tshig gsum ni med par 'gyur zhes bya ba la sogs pa dang tha mi dad do//rnam par rtog pa skyes pa gzhan gyis bzlog pa med par ci ltar na mi 'byung snyam pa'i dogs pa de ci'i phyir zhe na/ zhes bya bas bsu nas snga ma bzhin du lan gdab par bya ba'i phyir/shes rab kyi pha rol tu phyin pa ni zhes bya ba la sogs pa gsungs te/ 'dod chags la sogs pa zhes bya ba'i sgras ni zhe sdang la sogs pa bsdu'o/ /bar zhes bya ba 'dis ni dran pa nye bar gzhag pa la mngon par zhen pa la sogs pa yongs su bsdu'o/ /mya ngan las 'das pa nyid du 'dzin pa zhes bya ba ni lhag ma dang bcas pa dang lhag ma med pa'i mya ngan las 'das par mngon par zhen pa'o//mya ngan las 'das pa la mngon par zhen pa la sogs pa mngon du rgyu ba rtsa nas 'byin pa na nye bar zhi bar byed pa'o/ /'dod chags la sogs pa'i bag chags ma lus par kun tu 'joms par byed pas 'phel bar byed pa ma yin no//'di skad du shes rab kyi pha rol tu phyin pa bsgoms pa nyid kyis 'dod chags la sogs pa dang mya ngan las 'das par mngon par zhen pa zhi ba yin no zhes de ltar chos thams cad la dmigs na lam la chos shes pa'i bzod pa skye bar 'gyur ro zhes brjod pa yin no//lam gyi skad cig ma gnyis pa'i rnam pa bstan pa'i phyir/ kau shi ka rgyal po chen po bzhi dang zhes bya ba la sogs pa gsungs pa yin te/ bsrung ba dang bskyab pa dang sba bar byed do zhes bya ba ni bshad zin to/ /yang na lhas byas pa dang / 'byung ba las gyur pa dang /nang gi bdag nyid can gyi bar du gcod pa'i dbang du mdzad nas go rims bzhin du bsrung ba dang bskyab pa dang sba bar byed pa dag shes par bya'o/ /yang na 'phangs pa rnam pa gsum ste/ rang gi rkyen las byung ba dang / sems can gzhan du bgrang ba'i rkyen las byung ba dang / pha rol sems can du bgrang ba ma yin pa'i rkyen las byung ba dang /de sel bar byed pas go rims bzhin du bsrung ba dang bskyab pa dang sba ba yin par shes par bya'o/ /'di skad du shes rab kyi pha rol tu phyin pa 'dzin pa la 'jug pa la/ de bzhin gshegs pa la sogs pas rnam pa thams cad du bsrung ba dang bskyab pa dang sba ba byed par 'gyur ro zhes/de ltar shes rab kyi pha rol tu phyin pas chos thams cad la dmigs na lam la chos shes pa skye bar 'gyur ro zhes brjod pa yin no/ /lam gyi skad cig ma gsum pa'i rnam pa bstan pa'i phyir/ kau shi ka gzhan yang zhes bya ba la sogs pa gsungs te/tshig gzung bar 'os par 'gyur zhes bya ba ni rang nyid brtse bas srog gcod pa la sogs pa las ldog pa las sngon du 'gro bas rnam pa thams cad mkhyen pa nyid la gnas nas gzhan dag de la rab tu 'jog pa'i phyir dang / rang nyid gnas pa rnams kyi bsngags pa brjod cing mthun pas dga' bar byed pa'i phyir tshig gzung bar 'os pa yin no//zhes bya ba'i don 'di yin par shes par bya ste gzhan du ni tshig gzung bar 'os pa mi srid pa'i phyir ro/ /stong phrag nyi shu lnga pa las kyang bdag kyang srog gcod pa spong bar 'gyur zhes bya ba nas brtsams te/ gzhan rnams la yang de'i bsngags pa brjod cing mthun pas dga' bar byed pa de ltar na tshig gzung bar 'os pa yin no//zhes bya ba la sogs pa'i bar du gsungs pa yin no/ /tshig 'jam par 'gyur zhes bya ba ni mnyan na bde bar byed pa yin pa'i phyir ro/ /tshig ran par 'gyur zhes bya ba ni ji tsam gyis don brda sprod par gyur pa de tsam zhig smra ba yin pa'i phyir ro//tshig 'chal pa med par 'gyur zhes bya ba ni mdor bsdus nas smra ba la mkhas pa yin pa'i phyir ro/ /khro bas zil gyis gnon par mi 'gyur/ nga rgyal gyis zil gyis gnon par mi 'gyur ro zhes bya ba ni gnod pa'i rgyu nye bar gnas pa la khong khro ba'i tha ba'i sems kyis mnar sems pa ni khro ba'o//'jig tshogs la lta ba la brten pa'i sems kyi dregs pa ni nga rgyal lo/ /gnyen po med par nyes pa dang bral bar mi 'gyur ba ma yin nam ji ltar de la 'di lta bu'i yon tan skye ba yin snyam pa'i dogs pa de ci'i phyir zhe na/ zhes bya bas bsu nas/ 'di ltar zhes bya ba la sogs pa gsungs te/ shes rab kyi pha rol tu phyin pa nyid nyes pa thams cad kyi gnyen po yin la/ de yang des sgoms so zhes bya bar 'dod do/ /yongs su dul bar byed do zhes bya ba ni srog gcod pa spangs pa la sogs pa la rab tu 'jog pa'i phyir ro//yongs su 'dud par byed ces bya ba ni tshig ran pa la sogs pas sems can gyi yul la yongs su 'dud par byed pa'i phyir ro/ /khon du 'dzin pa zhes bya ba ni/ dgra bor 'dzin pa'i bag la nyal mi 'dor ba ste/ gnod sems kyi cha nyid ni khon du 'dzin pa yin no//gnod sems zhes bya ba ni sems can rnams dang sdug bsngal dang sdug bsngal gyi gnas su gyur pa'i chos rnams la mnar sems par byed pa ni gnod sems so/ /bag la nyal zhes bya ba ni zhe sdang gi cha dgrar 'dzin pa'i sems kyi rgyun ni bag la nyal ba'o//'di skad du shes rab kyi pha rol tu phyin pas yongs su gzung ba'i stobs nyid kyis 'tshang rgya ba nyid du mngon par 'dod pas rang nyid srog gcod pa spong ba la sogs pa sngon du 'gro bas rnam pa thams cad mkhyen pa nyid la gnas nas/ /de nyid la gzhan dag gzhag par bya'o zhes de ltar chos thams cad la dmigs na lam la rjes su shes pa'i bzod pa skye bar 'gyur ro zhes brjod pa yin no//lam gyi skad cig ma bzhi pa'i rnam pa bstan pa'i phyir/ rigs kyi bu'am rigs kyi bu mo zhes bya ba la sogs pa gsungs te/ de ltar spyod pa zhes bya ba ni lam la rjes su shes pas gnas pa'o//dran pa dang zhes bya ba ni 'dris pa'i dngos po la sems kyis ma brjed pa'o/ /byams pa ni zhe sdang med pa ste/ sems can thams cad la bu gcig pa ltar shin tu gces par 'dzin pa nyid do/ /'di dag gis sbyin pa la sogs pa'i dge ba'i rtsa ba thams cad mi dmigs pa'i tshul gyis sems can thams cad dang thun mong du byas te bla na med pa yang dag par rdzogs pa'i byang chub tu yongs su bsngo bar bya ba yin pas gnyi ga smos so//byams pa'i bya ba nyid ni 'di snyam du sems te zhes bya ba la sogs pa gsungs pa yin te/ dbang po rnams 'khrugs shing zhes bya ba ni gnod sems kun tu spyod pas mig la sogs pa'i rnam par 'gyur ba bskyed pa yin pa'i phyir ro//bzhin gyi mdog kyang 'gyur na zhes bya ba ni rang gi ngo bo 'gyur zhing tshig par 'gyur ba'o/ /khro ba'i dbang du 'gro ba zhes bya ba ni de'i kha na las pa nyid do/ /'di skad du sbyin pa la sogs pa mi zad par byed pas dran pa la sogs pa'i stobs kyis yang dag par rdzogs pa'i byang chub tu bsngo bar bya'o zhes de ltar chos thams cad la dmigs na lam la rjes su shes pa skye bar 'gyur ro zhes brjod pa yin no//'di skad du bshad pa'i rnam pa tshig gzhan gyis bstan pa rnams kyis skad cig ma bcu drug skye bar 'gyur ro zhes bya ba 'di la som nyir mi bya'o//de skad du yang / de bzhin nyid dang sangs rgyas dag /phan tshun rten pa rten med phyir/ /rnam grangs khas mi len pa dang / /chen po tshad ma med bcas dang / /tshad med pa dang mtha' med dang / /der gnas gzugs la sogs pa la/ / sangs rgyas nyid du nges 'dzin dang / /blang med dor ba med sogs dang / /byams la sogs dang stong nyid dang / /sangs rgyas nyid ni thob pa dang / /rnam par byang kun yongs bsdus dang / /nyam nga ba dang nad kun sel/ /mya ngan 'das 'dzin zhi nyid dang / /sangs rgyas rnams kyis bsrungs la sogs//srog mi gcod pa la sogs pa/ /rnam pa kun mkhyen tshul la ni/ /bdag nyid gnas te sems can dag /'god dang sbyin pa la sogs pa/ /rdzogs pa'i byang chub tu bsngo ba/ /lam shes nyid kyi skad cig ma/ /zhes gsungs pa yin no/ /mthong ba'i lam de'i nges par 'byed pa'i cha dang mthun pa ni rnam pa thams cad mkhyen par bshad pa las gzung bar bya'o//gal te de lta yin na rab tu dga' ba la sogs pa'i sa rnams kyang der smos pas byang chub sems dpa' rnams kyi mthong ba la sogs pa'i lam bstan pa yin pa'i phyir yang ci'i phyir bstan ce na brjod par bya ste/rgyu dang 'bras bu ma lus par thugs su chud pa la ltos te/ de bzhin gshegs pa rnams kyi rnam pa thams cad mkhyen pa nyid ces brjod pa yin pas rgyal ba'i sras rnams kyi lam ni de las gsungs pa ma yin no zhes dogs pa bsal bar bya ba'i phyir/ de nyid las rgyu tsam zhig drangs nas byang chub sems dpa' rnams kyi mthong ba la sogs pa lam gyi bdag nyid can lam shes pa nyid logs shig tu bzhag pa yin no//tshig le'ur byas pa'i rjes su 'brangs te rnam pa'i gzhung dang mthun par sbyar ram ma sbyar zhes de ltar mkhas pa rnams kyis dpyad par bya'o//de la yang 'phags pa rnam par grol ba'i sde la sogs pa'i bshad pa bstan nas rang gi nus pas bstan pa nyid yin no/ /kha cig ni don gzhan la dgongs pa ji skad du brjod pa'i gzhung gi tshogs kyi rnam pa'i don ma bshad par 'dir mthong ba'i lam gyi skad cig ma bcu drug dag nye bar mtshon pa 'ba' zhig mdzad par zad de/bshad pa dang ma bshad pa'i nges par 'byed pa'i cha dang mthun pa la sogs pa'i don ston pa lhur len pa'i gzhung yang de bzhin du blta bar bya'o zhes zer ro/ /gzhan dag na re de dag gis ni sgom pa'i go rims la sogs pa ma bstan pa'i phyir mngon par rtogs pa'i rim pa cung zad kyang ma bstan la/mngon par rtogs pa'i rgyan gyi tshig le'ur byas pa'i don yang ji ltar bshad par bya zhes zer ro/ /'dod chags la sogs pa'i nyon mongs pa'i tshogs kyi rtsa ba ni dngos po la mngon par zhen pa yin la/de dang 'gal ba yang bdag med pa goms pa yin te/ de bas na de med par sdug bsngal la chos shes pa la sogs par ji ltar 'gyur zhe na/ de ni ma yin te/ gang gi phyir ji skad du bshad pa'i tshul gyis bdag med pa ston pa lhur byed pa rnam pa bcu drug po 'di dag thams cad gdul bya'i skye bo nye ba la phan pa skyed par bzhed pa nyid kyis de ltar ji skad du gsungs pa'i tshul rnam pa sna tshogs kyis bstan pa yin du zin kyang yang dag par goms par gyur pa na rten cing 'brel par 'byung ba'i chos nyid kyis mthong ba'i lam skyed par 'gyur ba yin no zhes nges par bya ste gzhan dag la yang de bzhin du shes par bya'o//mthong ba'i lam gyi mjug thogs su bsgom pa'i lam brjod par bya ba yin pa las brjod par bya ba nyung ba nyid dang gdul bya 'bras bu la gzhol ba nyid kyis 'jug pa'i phyir re zhig bsgom pa'i lam gyi byed pa bstan pa ni/ bcom ldan 'das zhes bya ba la sogs pa smos pa yin no//shes rab kyi pha rol tu phyin pa zhes bya ba ni 'og nas 'chad pa'i bsgom pa'i lam mo/ /yongs su dul ba'i slad du nye bar gnas pa zhes bya ba ni nyon mongs pa'i rnam pa thams cad rang dbang du byed pa'i phyir rnam pa thams cad dul ba'i don gyis na/ yongs su dul ba'i rgyu mtshan du mngon du phyogs par gyur pa zhes bya ba ni dang po dul ba'i byed pa yin no//khengs pa ma mchis pa'i zhes bya ba ni dul ba'i rjes la cung zad tsam gyi rtogs pas khyad zhugs par gyur pa la bdag tu rlom pa bkag pas bdag la bstod pa spong ba'i phyir thams cad nas 'dud pa'i don gyis yongs su 'dud pa zhes bya ba ni gnyis pa 'dud pa'i byed pa'o//de'i 'og tu 'dod chags la sogs pa nyon mongs pa rnams rnam pa thams cad du zil gyis gnon pa zhes bya ba gsum pa nyon mongs pa las rgyal ba'i byed pa bstan pa'i phyir kau shi ka gzhan yang zhes bya ba la sogs pa gsungs te/ 'di 'dzin par 'gyur zhes bya ba ni de bzhin du 'og nas bshad pa'i bsgom pa'i lam gyi rim gyis so//g.yul 'gyed pa'i tshe zhes bya ba la sogs pa la/ bsgom pas spang bar bya ba'i nyon mongs pa rnams dang lhan cig g.yul 'gyed pa la 'jug pa'i tshe chen po'i chen po la sogs pa mi mthun pa'i phyogs gsum tshan dang po'i chung ngu'i chung ngu la sogs pa'i gnyen po'i phyogs rnams kyi rnam pa dang po rnams rtog pas g.yul gyi thog mar zhugs par gyur na ste zhugs pa yin na'o//g.yul du 'jug pa la sogs pa'i tshig gsum ni grangs ji lta ba bzhin du 'bring gi chen po la sogs pa mi mthun pa'i phyogs sum tshan gnyis pa'i 'bring gi chung ngu la sogs gnyen po'i phyogs kyi rnam pa gnyis pa rnams rtogs pa dang sbyar te brjod par bya'o//g.yul gyi nang du 'gro ba'am zhes bya ba ni mi mthun pa'i phyogs chung ngu'i chen po gnyen po'i gnyen po'i phyogs chen po'i chung ngu thob pas so/ /'greng ngam zhes bya ba ni mi mthun pa'i phyogs chung ngu'i 'bring la gnyen po'i phyogs chen po'i 'bring mngon par rtogs pas g.yul du 'breng ba'o//'dug kyang rung ste zhes bya ba ni g.yul du 'dug ste/ mi mthun pa'i phyogs chung ngu'i chung ngu la gnyen po'i phyogs chen po'i chen po dang yang dag par ldan pas g.yul du legs par 'dug pa'o//'di dag thams cad kyis kyang mi mthun pa dang gnyen po'i phyogs rnam pa dgu po bsal ba dang bla bas bsgom pa'i lam du slar yang bya ba med pa nyid du brjod pa yin no/ /gnas ma yin pa ni mi srid pa'o/ /de nyid bshad pa ni skabs med de zhes bya ba yin no/ /ci'i phyir rnam grangs kyi tshig tu gsungs she na/de'i tshe dang phyis 'ga' zhig gis 'ga' zhig rnam pa 'ga' zhig ltar don rtogs par bya ba'i phyir dang / tshig de nyid bzlas te gsungs na ni sngar thos pa dag smad par 'gyur bas nyes pa de spangs nas sngar gyi dus su yengs pa dag gam phyis 'ongs pa rnams kyis don de thos par bya ba'i phyir dang /blo zhan pa rnams la don de yang dang yang du bzlas pas rtogs par bya ba'i phyir dang / sgra gcig don du mar gyur pas don gzhan du rtogs pa bsal ba'i phyir dang / gzhan las ming bshad pa dang 'dra bar ming de dag gis don de legs par rtogs par bya ba'i phyir dang /chos smra ba rnams don nye bar sbyor ba dang ston pa la mkhas par bya ba'i phyir dang / bdag nyid chos so so yang dag par rig pa la mnga' brnyes par bstan pa'i phyir dang / gzhan rnams la de'i sa bon bskyed pa'i phyir te/ rnam grangs bstan pa'i dgos pa ni de ltar rnam pa brgyas yod do//de bzhin du thams cad la brjod par bya'o/ /gang yin pa de'i las bya ba ni/ gang zhes bya ba tshig gi phrad kyi don la 'jug ste/ srog gi bar chad du 'gyur ba gang yin pa 'di ni skabs med do zhes bya ba ni ngag gi don to/ /srog gi bar chad du 'gyur ba zhes bya ba ni rnam par shes pa'i rgyun chad pa'o//nang gi bdag nyid can gyi nye bar 'tshe ba dang bral ba'i 'og tu phyi rol gyi nye bar 'tshe ba nye bar zhi ba yin pas gzhan gyi gnod pas mi brdzi ba'i byed pa bzhi pa ni/ gzhan gyis gnod par byed pas zhes bya ba la sogs pa gsungs pa yin te/ gzhan ni mi la sogs pa'o/ / de'i gnod pa ni ral gris bsnun pa la sogs pa'o/ /mdor bstan pa'i tshig ni rgyas par bstan pas rnam par dbye ba'i phyir/ yang gal te zhes bya ba la sogs pa gsungs so/ /mdor bstan pa'i tshig la rgyas par bstan pa las brjod par bya ba'i don tha dad pa med na ci'i phyir 'dir mdor ston pa'i tshig tu byed ce na/de brjod par bya ste/ mdor bsdus pas don rgyas par bshad pa nges par gzung ba'i phyir mdor byas pas 'grel pa'i don 'dzin pa dang 'dra'o/ /slob dpon dbyig gnyen gyis gdul bya mgo smos pas go ba rnams la phan gdags par bya ba'i phyir dang / gzhan rnams kyang ma 'ongs pa na mgo smos pas go ba'i rgyu bsags pa'i phyir dang /bdag nyid mdor bsdus pa dang rgyas par ston pa la mnga' brnyes par ston pa'i phyir dang / gzhan rnams de ltar bslabs pas de'i sa bon skyed pa'i phyir yin no zhes bshad do/ /lung las ni rnal 'byor pa mdor bsdus pa tsam la sems mnyam par 'jog pa rnams de'i don rgyas pas thams cad la mnyam par 'jog par ji ltar 'gyur zhes don de'i phyir bsdus te bstan to//de bzhin du rgyas pa tsam la sems mnyam par 'jog pa'i rnal 'byor pa rnams de bsdus pa'i don thams cad la ji ltar mnyam par 'jog par 'gyur zhes don de'i phyir rgyas par bshad pa bstan pa yin no//de ltar don 'dis bstan pa'i tshig gis ston to zhes bshad de/ de bzhin du thams cad la shes par bya'o zhes so/ /mtshon ni 'khor lo la sogs pa'o/ /gzhan dag ni rdo la sogs pa'o/ /yul der 'phen pa'i nus pa dang ldan pa'i skyes bus 'phangs pa'i mtshon la sogs pa rnams bar du 'gal ba zhugs pa med par lus la ji ste mi 'phog snyam pa'i dogs pa de ci'i phyir zhe na zhes bya bas bsu nas/kau shi ka 'di lta ste zhes bya ba la sogs pa gsungs so/ /dgongs pa ni 'di yin te/ goms par byas pa'i yum rig sngags chen mo la sogs pa'i rang bzhin gyi mthus lci ba nyid kyi chos 'gal ba bar du zhugs pa'i phyir mda' la sogs pa de'i lus la ma slebs pa yin no zhes bya ba yin no//rig sngags chen mo zhes bya ba la sogs pa'i tshig gsum ni chen po nyid la sogs pa'i yon tan dang ldan pa'i phyir sbyor ba la sogs pa'i gnas skabs su sbyar ro//lhag par mos pa la sogs pa'i yid la byed pas lhag par gyur pa'i phyir bla na med pa'o/ /bsgrub pa nyid kyis mnyam pa med pas na mi mnyam pa'o/ /shin tu rnam par dag pas mnyam pa med pa'i rgyud gzhan dang mnyam pa'i phyir mi mnyam pa dang mnyam pa'o//'di rig sngags chen mo la sogs pa ji ltar yin snyam pa'i dogs pa de ci'i phyir zhe na zhes bya bas bsu nas kau shi ka rig sngags 'di la zhes bya ba la sogs pa gsungs so/ /'di skad du gang gi phyir shes rab kyi pha rol tu phyin pa la byams pa la sogs pa sngon du 'gro bas slob pa na su la yang gnod pa la sogs pa'i don du mi slob pa de bas na 'tshe ba la sogs pa tshe thung bar 'gyur ba la sogs pa'i rgyu rnam par bsal bas rig sngags chen mo la sogs pa'i rang bzhin yin no zhes brjod pa yin no//bdag la gnod pa bya bar yang sems zhes bya ba ni bdag nyid 'chi ba la sogs pa'i rgyur 'bad par mi byed do//'tshe ba thams cad nye bar zhi ba'i 'og tu yang dag par rdzogs pa'i byang chub kyi byed pa lnga pa ni/ kau shi ka rig sngags 'di la zhes bya ba la sogs pa gsungs pa yin te/ bla na med pa yang dag par rdzogs pa'i byang chub tu mngon par rdzogs par 'tshang rgya bar 'gyur zhes bya ba ni/de kho na nyid rtogs pa mngon sum du 'gyur ba'o/ /thams cad mkhyen pa'i ye shes thob par 'gyur te zhes bya ba ni/ de kho na nyid rtogs pa'i 'og tu chos thams cad kyi yul shes pa rtogs par 'gyur ba'o/ /de nyid bstan pa ni bla na med pa yang dag par rdzogs pa'i zhes bya ba la sogs pa gsungs pa yin no//sems la zhes bya ba ni nye bar mtshon pa yin pas chos thams cad yongs su bsdu ba'o/ /rnam par lta bar 'gyur ro zhes bya ba ni shes par 'gyur ba'o/ /rnal 'byor pa'i ye shes thams cad ni dmigs su med pa nyid yin par 'dod pa ma yin nam/de ci ltar chos thams cad rnam par shes par 'gyur snyam pa'i dogs pa de ci'i phyir zhe na zhes bya bas bsu nas/ kau shi ka rig sngags 'di la zhes bya ba la sogs pa gsungs te/ thob pa ni bar chad med pa'i lam gyi sgrib pa gnyis po bag chags dang bcas pa spangs pa'i phyir ro//shes pa ni rnam par grol ba'i lam gyis rnam pa thams cad mkhyen pa'i ye shes thugs su chud pa dang ldan pa'i phyir ro/ /mngon sum du byas pa ni dag pa 'jig rten pa'i ye shes kyis nges pa'i phyir ro/ /'di skad ston te/ dper na rmi lam bden pa mthong ba'i shes pa ni don dam par yul med du zin kyang rtags dang lung la mi ltos par rten gyi khyad par gyi dbang gis yul so sor nges pa'i rnam par skye ba na nye bar bstan pa'i don thob par byed pa nyid kyis mi bslu bar 'gyur ro//de bzhin du rnal 'byor pa'i ye shes kyang shes rab kyi pha rol tu phyin pa'i rnal 'byor la goms pa'i stobs kyis/ ji ltar gzhan gyis byung zin pa dang byung ba dang 'byung bar 'gyur ba 'am 'das pa dang da ltar dang ma 'ongs pa na 'byung ba'i rnam par de ltar brtags pa de kho na ltar nye bar bstan pa/rnam pa sna tshogs kyi dbye bas rab tu spros pa phyi rol lta bur mngon zhing gsal bar snang ba'i rang bzhin can/ rtags dang lung la mi ltos par mi bslu ba nyid du skyes pa ni mngon sum gyi tshad ma yin par 'dod do//de bas na de ltar bcom ldan 'das ni thams cad mngon sum du gzigs pa nyid du khas len pa'i phyir/ gang ma thob pa 'am ma shes pa 'am mngon sum du ma byas pa de mi mnga' bas na thams cad mkhyen pa'i ye shes dang ldan pa zhes bya'o/ / gang gi phyir 'brel pa med pas 'khrul pa log kyang rnam pa ldog pa srid pa ma yin no zhes 'phags pa klu sgrub la sogs pas dbu ma'i tshul gyi rjes su 'brangs nas bshad pa yin no/ /dad pa phul du byung ba dang ldan pas bsod nams che ba nyid yin pa'i phyir gnas gang du de bzhin gshegs pa la sogs pa'i thugs su chud pa la sogs pa skyes pa de ni mchod par bya ba yin no zhes byang chub kyi byed pa'i 'og tu shes rab kyi pha rol tu phyin pa'i rten gyi yul la mchod pa nyid kyi byed pa drug pa bstan pa'i phyir/gzhan yang kau shi ka zhes bya ba la sogs pa gsungs so/ /chung ngu na zhes bya ba ni tha ma na'o sngon gyi las kyi rnam par smin pa zhes bya ba ni gnyen po'i phyogs la goms pa dang bral ba'i myong bar nges pa'i las so//don gyi de kho na nyid 'di nyid dpes bstan par bya ba'i phyir/ kau shi ka 'di lta ste dper na zhes bya ba la sogs pa gsungs te/ byang chub kyi snying po'i snying por gyur pa ste/ 'dir sa phyogs skyil krung gis non pa ni byang chub kyi snying po'o//der 'dug pa ni de'i mtha' la brten pa'o/ /byang chub kyi snying po'i khor yug ni mtshams na gnas pa'i rdo rje phur bu bzhi'i nang du chud pa'i sa'i cha'o/ /byang chub kyi snying po ni bshad zin to/ /de'i nang ni de'i dbus kyi nang ngo / /byang chub kyi shing rtsa ba na 'dug pa zhes bya ba ni/ sa'i nang du zhugs pa'i rtsa ba ni khor yug smos pas zin pa'i phyir de las byung ba'i shing gi cha ni rtsa ba'o//gtse ba zhes bya ba ni rnam par mtho 'tsham par ro/ /gnod pa zhes bya ba ni rnam par zhe sdang bar ro/ /'bebs par zhes bya ba ni 'byung po'i gdon la sogs pa 'jug par ro/ /mi nus so zhes bya ba ni de rnams la mi btub ste yul ma yin no zhes bya ba'i tha tshig go//gtse ba la sogs pa skye ba'i gegs byed pa'i bya ba med pa ma yin nam/ der gtse ba la sogs pa bya bar ji ltar mi nus snyam pa'i dogs pa de ci'i phyir zhe na zhes bya bas bsu nas/ gang dag ces bya ba la sogs pa gsungs pa yin no//ngag gi don ni 'di yin te/ gang dag sems can thams cad kyi don gyi phyir gnod sems chung ngu dang 'bring dang chen po'i gnyen po'i byams pa'i dbye ba mi 'jigs pa kho na med pa dang mi skrag pa bdag nyid kyis gus par mdzad de/ dus yun ring por rgyun du bsgoms pa dang gzhan dag gi dbang du mdzad nas ston par byed cing brjod pa'i dus gsum gyi sangs rgyas de rnams der 'khrungs pas gnas de khyad par can du gyur pa yin no//de bas na rgyu rkyen gyi tshogs pa ni bsam gyis mi khyab pa yin pa'i phyir/ sa'i cha'i bdag nyid kyis na rgyu'i nyes pa las byung ba'i gtse ba la sogs pa'i 'bras bu de der byed par mi nus pa ni rten cing 'brel par 'byung ba'i chos nyid kyi stobs pa'i phyir ro zhes bya ba 'di yin no//de ltar dpe bstan nas/ dpes bshad pa'i don bstan pa'i phyir/ de bzhin du zhes bya ba la sogs pa gsungs so/ /snga ma dang 'dra ba'i bsam pas de ci'i phyir zhe na zhes rtog pa la/ de bzhin du gnas kyi che ba'i bdag nyid bstan pa'i sgo nas lan gdab pa ni/kau shi ka zhes bya ba la sogs pa gsungs pa yin te/ mchod rten du gyur pa ni phyag bya ba la sogs pas bsod nams bsags pa'i rgyur 'gyur ba'i phyir te/ pha dang 'dra ba la phar gyur pa zhes 'dra bar ston pa'i tshig la gyur pa'i sgras smos pa'i phyir mchod rten gzhan dang mnyam pa la gyur pa nyid kyis na sa phyogs de mchod rten du gyur pa yin no zhes bya ba ni kha cig gi'o//gang du gang zag la bdag med pa ston par byed pa/ chos gang rgyus byung de dag gi /zhes bya ba la sogs pa'i tshigs su bcad pas byin gyis brlabs pa'i sa'i cha mchod rten yin par 'dod pa der dngos po mtha' dag rang bzhin med par ston par mdzad pa'i rgyal ba'i yum 'dzin pa la sogs pa dang ldan pa ni shin tu gsal bar mchod rten du gyur pa nyid yin no//de bas na dbang po nyid la dbang por gyur pa zhes bya ba dang 'dra bar de'i rang bzhin nyid kyi mchod rten nyid la mchod rten du gyur pa yin no zhes bya ba ni btsun pa zla ba'i yin no//phyag bya ba ni 'dud par bya ba yin pa'i phyir ro/ /rjed par bya ba ni yon tan rjes su dran pas mang du phu dud byed pa'i phyir ro/ /mchod par bya ba dang / ri mor bya ba dang / bsnyen bkur bya ba ni/ go rims bzhin du mchod pa chung ngu dang / 'bring dang / chen po rnams kyis so/ /bkur sti bya ba ni dpal gyi dar dpyangs bcing ba la sogs pas khyad par du 'phags pa'i gnas la 'jog pa'i phyir ro/ /bla mar bya ba zhes bya ba ni rnam pa thams cad du 'da' bar bya ba ma yin pa nyid kyis so/ /skyob pa ni nye bar 'tshe ba thams cad bzlog pa nyid kyis so/ / skyabs ni de la brten pa'i sbyor bas don med pa nyid du mi 'jog pa nyid kyis so/ /gnas ni kha na ma tho ba med pa'i dga' ba'i dbang po nyid kyis so/ /dpung gnyen ni mchog tu 'phags pa nyid du 'gro ba'i gnas la 'jog pa nyid kyis so/ /ji skad du bshad pa'i tshul gyis na byed pa ni rnam pa drug kho nar shes par bya'o//de skad du yang / kun nas dul dang thams cad nas/ /'dud dang nyon mongs las rgyal dang / /gnod pas brdzi ba med nyid dang / /byang chub nyid dang rten mchog nyid/ /ces gsungs pa yin no/ /byed pa'i 'og tu bsgom pa'i lam brjod par bya ba yin la/ de yang zag pa dang bcas pa dang zag pa med pa'i bye brag gis rnam pa gnyis so//de la zag pa dang bcas pa ni mos pa dang / bsngo ba dang / rjes su yi rang ba yid la byed pa'i mtshan nyid kyis rnam pa gsum mo/ /zag pa med pa yang mngon par sgrub pa dang / shin tu rnam par dag pa'i rang bzhin gyis rnam pa gnyis yin no/ /de bas na ji ltar mos pa bzhin du mthong ba'i dge ba'i chos kyi rten bsgom pa'i lam gyi dbang du byas pa yin pas/dang po mngon du mi byed pa'i ngo bo mos pa brjod par bya'o/ /de yang rang gi don dang / rang dang gzhan gyi don dang / gzhan gyi don zhes bya ba rtsa ba'i dbye bas rnam pa gsum yod pa la/ re re zhing chung ngu dang 'bring dang chen po'i dbye bas tha dad pa'i phyir na gsum tshan gsum gyis rnam pa dgur 'gyur ba ni 'di lta ste/rang gi don gyi mos pa chung ngu dang 'bring dang chen po dang / rang dang gzhan gyi don gyi mos pa dang / gzhan gyi don gyi mos pa la yang de bzhin no/ /de ltar rnam pa dgu po de dag kyang re re zhing chung ngu'i chung ngu la sogs pa'i bye brag gis so sor phye na mos pa dgu tshan gsum gyi rnam pa nyi shu rtsa bdun du 'gyur ba ni/'di lta ste chung ngu'i chung ngu dang chung ngu'i 'bring dang chung ngu'i chen po dang / 'bring gi chung ngu dang 'bring gi 'bring dang 'bring gi chen po dang / chen po'i chung ngu dang chen po'i 'bring dang chen po'i chen po dang /de ltar rang gi don gyi mos pa dgu'o/ /rang dang gzhan gyi don gyi mos pa dang / gzhan gyi don gyi mos pa la yang de bzhin du shes par bya'o/ /de la rang gi don gyi mos pa'i rnam pa chung ngu'i dbang du mdzad nas de skad ces bka' stsal pa dang zhes bya ba la sogs pa smos pa yin no/ /lha'i zhes bya ba ni yid du 'ong ba rnams kyis so//me tog ni sil mar gnas pa'o/ /bdug spos ni lhan cig skyes pa dang / sbyar ba la sogs pa'o/ /dri ni tsan+dan la sogs pa'o/ /phreng ba ni dus thams cad pa'i me tog spel te brgyus pa'o/ /byug pa ni sku'i dril phyis kyi rnam pa'o/ /phye ma ni gser la sogs pa'i phye ma'o//na bza' ni gos kyi rnam pa'o/ /gdugs ni gdugs dkar po la sogs pa'o/ /rgyal mtshan ni nam mkha' lding la sogs pas mtshon pa'o/ /dril bu ni rdo rje la sogs pas mtshon pa'o/ /ba dan ni mtshan ma la sogs pa med pa'o/ /mchod pa rnam pa mang po dag gis zhes bya ba ni/bza' ba dang bca' ba la sogs pa'i rnam pa mang pos so/ /sku ni kha cig ni gzugs kyi sku la bya'o zhes zer ro/ /gzhan dag ni sku gdung la bya'o zhes zer ro/ /nang du btsal te zhes bya ba ni gzhag ste'o/ /yongs su 'dzin cing zhes bya ba ni nga yi nyid kyis bdag gir byas pa'o//'chang la zhes bya ba ni yun ring du gnas par byed pa'o/ /de dag la yang zhes bya ba ni mchod rten te/ yang zhes bya ba'i sgras ni de 'ba' zhig tu ma zad kyi sku la yang ngo / /de'i tshig nyid kyis rgyal ba'i yum la mchod pa ni bsod nams lhag par che ba nyid du bstan par bya ba'i phyir brgya byin la slar 'dri bar mdzad pa ni kau shi ka de'i phyir zhes bya ba la sogs pa gsungs so//thams cad mkhyen pa nyid kyi bdag gi dngos po sku mngon par grub pa zhes bya ba ni thams cad mkhyen pa'i ye shes thugs su chud par rung gi sku'i dngos po bskyed pa'o/ /lam gang la zhes bya ba ni bgrod par bya ba gang zhig la zhes bya ba'i tha tshig go//shes rab kyi pha rol tu phyin pa med par phyin ci ldog mi ldog pas na grol ba mi 'thad pa'i phyir ro snyam pa'i bsam pa dang ldan pas/ bcom ldan 'das shes rab kyi pha rol tu phyin pa 'di nyid ces bya ba la sogs pa gsol te/ rdo rje lta bu la thog mar skye ba thob du rung ba nyid kyis rang bzhin gyis ni brnyes pa yin la/de'i 'og tu mngon par rdzogs par sangs rgyas pa yin no/ /yang na bla na med pa yang dag par rdzogs pa'i byang chub tu mngon par rdzogs par sangs rgyas te de nas thams cad mkhyen pa nyid brnyes so zhes bya bar sbyar ro/ /de la bla na med pa'i byang chub ni nyid kyi don phun sum tshogs pa'o//thams cad mkhyen pa nyid ni gzhan gyi don phun sum tshogs pa'o/ /da ni de'i tshig nyid kyis lan gsungs pa ni kau shi ka de lta bas na zhes bya ba la sogs pa'o/ /bdag gi dngos po'i sku zhes bya ba la bdag gi dngos po nyid sku yin pa'am mchi gu'i lus zhes bya ba ltar bdag gi dngos po'i sku zhes bya ba'i don to//'di brnyes pas ni zhes bya ba ni thob pas so/ /de bzhin gshegs pa zhes bya ba'i grangs su mi 'gro'o zhes bya ba ni/ /thams cad kyis de bzhin gshegs pa thob par gyur pa'i phyir ro zhes 'dod pa'o/ /de lta na ji ltar de bzhin gshegs pa yin zhe na/ thams cad mkhyen pa nyid brnyes pas ni zhes bya ba la sogs pa gsungs so/ /yon tan na gzhan dag kyang bstan pa ni kau shi ka de bzhin gshegs pa dgra bcom pa zhes bya ba la sogs pa gsungs pa yin no/ /thams cad mkhyen pa'i ye shes kyi rten gnas su gyur pa yin no zhes bya ba ni/ gzhan rnams kyis thams cad mkhyen pa'i ye shes sgrub par byed pa'i rgyur gyur pa'o//de nyid bstan pa'i phyir rten 'di la brten nas ni zhes bya ba la sogs pa gsungs te/ 'di la zhes bya ba ni bdag gi dngos po'i sku brnyes pa'o/ /rab tu 'byed pa ni gsal bar byed pa'o/ /sangs rgyas ni gzugs kyi sku la sogs pa'i rang bzhin no//chos ni mdo la sogs pa'i bdag nyid can no/ /dge 'dun ni 'phags pa phyir mi ldog pa la sogs pa'i byang chub sems dpa'i tshogs so/ /nga yongs su mya ngan las 'das par gyur kyang zhes bya ba'i kyang gi sgras ni bzhugs pa bsdu'o/ /de ltar rgya cher bstan nas nye bar bsdu ba'i phyir de bas na kau shi ka zhes bya ba la sogs pa gsungs so//de bzhin gshegs pa ni thams cad las khyad par du 'phags pa yin na rgyu yin du zin kyang yum la mchod pas bsod nams ches mang du ji ltar skye snyam pa'i dogs pa de ci'i phyir zhe na zhes bya bas bsu nas/ kau shi ka rigs kyi bu 'am zhes bya ba la sogs pa gsungs so//ngag gi don ni 'di yin te/ shes rab pha rol phyin gnyis med/ /ye shes de ni de bzhin gshegs/ /zhes bya ba'i tshul gyis gtsor chos kyi sku'i de bzhin gshegs pa nyid shes rab kyi pha rol tu phyin pa yin no/ /de bas na de ston par byed pa'i rgyal ba'i yum la mchod na thams cad mkhyen pa'i ye shes kyi chos kyi sku la mchod pa'i phyir bsod nams mang du skye ba yin no//gzugs brnyan gyi de bzhin gshegs pa la mchod na ni khyad par du 'phags pa'i chos kyi skus ma bsdus pa yin pa'i phyir bsod nams ches mang du mi bskyed pa yin no/ /bris nas mchod na bsod nams mang du bskyed par bstan nas/'dri bzhin pa na yang de dang 'dra'o zhes bstan par bya ba'i phyir/ yang rigs kyi bu 'am zhes bya ba la sogs pa gsungs so/ /snga ma bzhin du dogs pa de ci'i phyir zhe na zhes bya bas bsu nas/ de bzhin du lan gdab pa'i phyir/ kau shi ka gang shes rab kyi pha rol tu phyin pa la zhes bya ba la sogs pa gsungs so//chung ngu'i 'bring gi rnam pa bstan par bya ba'i phyir zhu bar byed pa ni/ bcom ldan 'das 'dzam bu'i gling gi mi gang dag ces bya ba la sogs pa gsol pa yin no/ /don chen po can du zhes pa la/ bsod nams kyi tshogs ni don chen po yin la de rdzogs par byed pas na don chen po can no//ma 'tshal lags sam zhes bya ba ni bsod nams kyi tshogs ma shes pa'i phyir ro/ /phan yon chen po ni ye shes kyi tshogs te de'i rgyur gyur pa nyid kyis na phan yon chen po dang ldan pa'o/ /rtogs par ma gyur lags sam zhes bya ba ni ye shes kyi tshogs ma shes pa'i phyir ro//'bras bu che ba dang rnam par smin pa che bar zhes bya ba ni bsod nams kyi tshogs dang ye shes kyi tshogs dag ni go rims bzhin du rnam par smin pa rgyu mthun pa'i 'bras bu gzugs kyi sku dang chos kyi sku dag skyed par byed pa yin pas de skad ces smras pa yin no/ /rig par ma gyur lags sam zhes bya ba ni bsod nams dang ye shes kyi 'bras bu ma rtogs pa'i phyir ro//slar zhing dad par ma gyur lags zhes bya ba ni las kyi 'bras bu la sogs pa la yang yid ma ches pa'i phyir ro/ /de'i tshig nyid kyis dris pa'i lan btab nas chung ngu'i 'bring gi rnam pa bstan pa'i phyir slar dri ba mdzad pa ni kau shi ka 'di ji snyam du sems 'dzam bu'i gling gi mi de dag las zhes bya ba la sogs pa gsungs so//rtogs nas dad pa dang ldan pa zhes bya ba ni yon tan srid par rtogs pa sngon du 'gro ba'i dad pa'o/ /kha cig ni the tsom spangs pa'i phyir rtogs nas dad pa dang ldan pa zhes bya'o zer ro/ /gzhan dag ni de kho na nyid rtogs pa dag dkon mchog gsum dang bzhi pa 'phags pa dgyes pa'i tshul khrims la dad pa ni rtogs nas dad pa dang ldan pa'o zhes 'dod do//brtson 'grus phul du byung ba la sogs pa dang ldan pas gong nas gong du bsod nams dang po nyid la sogs pa'i 'bras bu khyad par can du 'gyur ba yin no snyam du dgongs nas legs par smras pa nyid kyis blo mthun pa ni kau shi ka de de bzhin no zhes bya ba la sogs pa gsungs pa'o//'dis ni don 'di skad ston te/ ji ltar brtson 'grus phul du byung ba la sogs pa dang bral bar rtogs nas dad pa dang ldan pa thob cing rtogs pa chen po khong du chud pa yang nyung ba yin pa de bzhin du shes rab kyi pha rol tu phyin pa la mchod pa la sogs pa byed pa ni nyung ngo zhes de'i tshig gis bstan pa yin no zhes bya bar gzung ste/gzhan du brgya byin gyis zhus pa'i tshig la ci yang ma gsungs par 'gyur ro/ /ches nyung ba dang ches shin tu nyung ba la sogs pa bstan pas brjod ma thag pa'i don rgyas par bshad pa'i phyir/kau shi ka gang dag rgyun du zhugs pa zhes bya ba la sogs pa gsungs so/ /sems bskyed pa rgyas par byed nas zhes bya ba ni/ blo ldan sems mchog bskyed ma thag tu yang / /mtha' yas nyes pa byed las sems rab bsdams/ / 'byor pa'i dus dang rgud pa'i dus dag tu/ /nyon mongs sdug bsngal dag gis 'di mi 'jigs/ /zhes bya ba la sogs pa'i yon tan rjes su dran nas sgrub pa rgyas shing bstan par byed pa'o/ /brtson 'grus brtsams shing zhes bya ba ni brtson 'grus 'bar ba'o/ /rnal 'byor du byed pa zhes bya ba ni bsam gtan gyi stobs kyis sems rtse gcig pa nyid do//spyod pa zhes bya ba ni de kho na nyid rtogs pas rjes su gnas pa'o/ /phyir mi ldog pa'i sa la gnas pa zhes bya ba ni mi g.yo ba la'o/ /lhag pa'i bsam pa phun sum tshogs pa zhes bya ba ni/ yangs shing rgya che dga' ba dang //dgos pa che la brtson pa dang / /dge ba nyid ni lhag pa yis/ /bsam pa dam pa'i lhag bsam yin/ /zhes bya ba'i khyad par can gyi bsam pa dang ldan pa'o/ /de dag la yang zhes bya ba ni nyan pa po de dag go/ /gzhan yang ches shin tu nyung ba nyid bstan par bya ba'i phyir kau shi ka yang gang dag byang chub kyi sems bskyed pa dang zhes bya ba la sogs pa gsungs pa yin no//thams cad bsam pa mnyam pa la 'jug pa ma yin nam/ ji ltar na gcig gam gnyis shig gnas par 'gyur snyam pa'i dogs pa de ci'i phyir zhe na zhes bya bas bsu nas/ kau shi ka bla na med pa yang dag par rdzogs pa'i byang chub ni zhes bya ba la sogs pa gsungs te/ nges par 'byed pa'i cha dang mthun pa bzhi dang / mthong ba dang sgom pa dang khyad par gyi lam rnams la brtson 'grus phul du byung ba dang bral ba'i phyir/ brtson 'grus zhan pa zhes bya ba la sogs pa tshig bdun gyi don go rims bzhin du brjod par bya'o//'di skad du brtson 'grus phul du byung ba med pas dang por bsam pa mtshungs pas zhugs pa yin du zin kyang thams cad bla na med pa yang dag par rdzogs pa'i byang chub kyi snod ma yin no zhes brjod pa yin no/ /bsgrub par dka' ba zhes bya ba ni bgrod par dka' ba'o//chung ngu'i chen po'i rnam pa bstan pa'i phyir/ kau shi ka de bas na de ltar zhes bya ba la sogs pa gsungs te/ myur du zhes bya ba ni rings par ro/ /bde bar zhes bya ba ni nyon mongs pa med par ro/ /rgyun mi 'chad par zhes bya ba ni yang dang yang du'o/ / de bzhin gshegs pa nyid don du gnyer bas byang chub kyi spyod pa la bslab par bya ba ma yin nam/ de ni ci ltar shes rab kyi pha rol tu phyin pa la bslab par bya snyam pa'i dogs pa de ci'i phyir zhe na zhes bya bas bsu nas/ kau shi ka 'di ltar zhes bya ba la sogs pa gsungs so/ /ngag gi don ni 'di yin te/gang gi phyir sngon bcom ldan 'das byang chub sems dpa'i spyad pa spyod pa na spyod pa yongs su rdzogs par bya ba'i phyir mi dmigs pa'i tshul gyis shes rab kyi pha rol tu phyin pa la bslab pa de bzhin du bdag cag gis kyang sangs rgyas kyi yon tan thams cad thob pa'i rgyu ni shes rab kyi pha rol tu phyin pa la brten par bya'o//gzhan du na dmigs pas ni byang chub sems dpa'i spyod pa rdzogs par mi 'gyur zhing byang chub rtogs par mi 'gyur ro zhes byang chub sems dpa' des shes pa yin no zhes bya ba'o/ /'bring gi chung ngu'i rnam pa bstan pa'i phyir kau shi ka de bas na de ltar zhes bya ba la sogs pa gsungs te/rin po che sna bdun gyi rang bzhin zhes bya ba ni/ mu sar gal ba bai DUr+ya/ /dngul dang shel dang gser dang ni/ /mu tig dmar bcas rdo snying rnams/ /kun las gtso phyir rin po che/ /sna bdun brjod pa yang na ni/ /mdog dang dbyibs kyi cha tsam las//de las tha dad rin po che/ /gzhan pa dag ni yin par brjod/ /ces bshad pas na rin po che sna bdun po de dag gi rang bzhin no/ /rang bzhin zhes bya ba ni de'i ngo bo'o/ /de bzhin gshegs pa'i ring bsrel gyi snying po can zhes bya ba ni de bzhin gshegs pa'i sku gdung dbus na yod pa'o//bye ba mang po zhes bya ba ni bye ba dang bye ba ni bye ba du ma yin no/ /de'i gzhi las zhes bya ba ni rgyu de las so/ /la la las ni de las gzhi'i bsod nams zhes 'don to/ /de'i don ni 'di yin te/ ring bsrel gyi snying po can gyi mchod rten la mchod pa de la ltos nas gzhi des sangs rgyas nyid 'thob pa'i rgyu'i bsod nams mang du bskyed dam zhes bya ba yin no//bsod nams zhes bya ba ni mngon pa kun las btus pa las/ 'dod pa dang rab tu ldan pa'i dge ba gang yin pa ni bsod nams zhes bya ba la/ gzugs dang gzugs med pa dang rab tu ldan pa ni mi g.yo ba zhes bya ba'o zhes ming tha dad par byas mod kyi/'dir spyir dge ba la bsod nams zhes bya bar shes par bya ste/ gzugs kyi khams na yang don 'di srid pa'i phyir ro/ /bcom ldan 'das mang ngo bde bar gshegs pa mang ngo zhes bya ba ni/ shin tu rgya che grub bya'i phyir//mang po zhes bya yang bstan to/ /rings bag la sogs khyad par las/ /bde gshegs zhes kyang shes par bya/ /zhes bya ba'o/ /mngon par dad de zhes bya ba ni mngon par yid ches par byed pa'o/ /rtog cing zhes bya ba ni yid la 'jog pa'o//mos la zhes bya ba ni lhag par mos pa'i yid la byed pas dmigs pa'o/ /sems dang bas zhes bya ba ni bzang po nyid du mthong bas sems mngon par phyogs pa'o/ /byang chub tu sems bskyed nas zhes bya ba ni bla na med pa yang dag par rdzogs pa'i byang chub kyi rgyur byang chub sems dpa'i sdom pa len cing sems khyad par can du byas pa'o//don rnam par 'grel pa dang zhes bya ba ni don kho na 'ba' zhig blangs te ston pa'o/ /yid kyi rjes su rtog pa dang zhes bya ba ni phan tshun mi 'gal bar nges par rtogs pa'o/ /ji lta bur grub pa'i zhes bya ba la sogs pa la/'bring gi chung ngu la sogs pa'i rnam pa'i mos pa grub pa gang dang yang dag par ldan pa dang / shes rab gang yin pa de yang ji ltar grub pa yin te/ des shes rab kyi pha rol tu phyin pa 'dir yongs su dpyod par byed cing zhes bya ba yongs su rtog par byed pa'o/ /dam pa'i chos yun ring du gnas par bya ba ni de'i rgyu mtshan no//de nyid ni sangs rgyas kyi tshul zhes bya ba la sogs pa gsungs pa yin te/ sangs rgyas rnams kyi tshul ni gtso mo ste yum shes rab kyi pha rol tu phyin pa nyid yin la/ 'di ni glegs bam du bris pa med na klag pa dang kha ton la sogs pa med pa 'gyur bas de rgyun chad par ma gyur pa'o//de bzhin du yum mi bzhugs te rtogs pa dang lung gi dam pa'i chos nub par ma gyur cig ces pa'o/ /byang chub sems dpa' rnams kyi yang yum yin pas glegs bam du bzhugs pas nyan pa la sogs pa'i mtshan gyi phan gdags pa bsgrub pa byas par 'gyur ba yin no//tshul dang ma bral bas zhes bya ba la gang gi phyir zhes bya ba ni lhag ma yin la/ bas zhes bya ba ni de'i phyir yin pas te gzhag par bya'o zhes bya bar sbyar ro/ /bzhag pa 'ba' zhig tu ma zad kyi gzhan yang ji skad du bshad pa'i bsam pas bkur stir bya ba la sogs pa yang bya'o zhes gsungs pa ni shes rab kyi pha rol tu phyin pa de la zhes bya ba la sogs pa'o//nyan pa la sogs pa 'di dag thams cad kyis ni chos spyod rnam pa bcu bshad pa yin te / yi ge 'dri mchod sbyin pa dang / /nyan dang klog dang len pa dang / /'chad dang kha ton byed pa dang / /de sems pa dang sgom pa'o//chos spyod de bcu'i bdag nyid ni/ /bsod nams phung po dpag tu med/ /khyad par phyir dang mi zad phyir/ /gzhan la phan 'dogs ma zhi phyir/ /zhes bya ba yin par shes par bya'o/ /'bring gi rnam pa'i dbang du mdzad nas/ kau shi ka rin po che sna bdun gyi mchod rten gyi de bzhin gshegs pa'i ring bsrel gyi snying po can bye ba du ma lta zhog gi zhes bya ba la sogs pa gsungs so//'dzam bu gling zhes bya ba ni/ /'dzam bu gling ste ngos gsum la/ /stong phrag gnyis so shing rta'i dbyibs/ /gcig la sogs tshad phyed dang bzhi/ /zhes bya'o//'bring gi chen po gsungs pa ni/ kau shi ka 'dzam bu'i gling 'di rin po che sna bdun gyi mchod rten zhes bya ba la sogs gsungs pa yin te/ gling bzhi pa'i 'jig rten gyi khams na zhes bya ba ni/ de la snod kyi 'jig rten gyi/ /gnas par 'od pa'i 'og dag gi/ rlung gi dkyil 'khor rngams su ni//sa ya drug 'bum grangs med do/ /chu rngams 'bum phrag bcu gcig dang / /stong phrag dag ni nyi shu'o/ /phyis ni rngams su 'bum phrag brgyad/ /lhag ma dag ni gser du 'gyur/ /lhun po rin chen bzhi'i rang bzhin/ /gser gyi ri ni bdun po ste//dang po nyid ni gnya' shing 'dzin/ /gshol mda' 'dzin dang seng ldeng can/ /blta na sdug dang rta rna dang / rnam par 'dud dang mu khyud 'dzin/ /de nas gling ni rnam pa bzhi/ /lho la sogs pa'i phyogs la brten / /'dzam bu gling ste ngos gsum la/ stong phrag gnyis so shing rta'i dbyibs//gcig la dpag tshad phyed dang bzhi/ /shar gyi lus 'phags zla gam 'dra/ /ngos gsum 'di dang 'dra gcig la/ /dpag tshad sum brgya lnga bcu'o/ /ba lang spyod gling zlum po ste/ /stong phrag phyed dang brgyad yin no/ /sgra mi snyan ni gru bzhir mnyam/ /dpag tshad stong phrag brgyad yin no//de yi bar gyi gling brgyad ni/ /lus dang lus 'phags sgra mi snyan/ /sgra mi snyan gyi zla dang ni/ /rnga yab dang ni rnga yab gzhan/ /g.yo ldan dang ni lam mchog 'gro/ /de dag grangs ni ji bzhin 'dod/ /gling bzhi po ni de dag gi/ phyi rol na ni khor yug ste//mtshams bcad dang 'drar lcags las ni/ /byung ba'i ri ni nag por bcas/ /'di kun chu'i nang brgyad khri dag /nub po chu yi steng du yang / /dpag tshad dag ni brgyad khri'o/ /brgyad po 'phang du phyed phyed 'bri/ /de dag rngams su'ang 'phang dang mnyam/ /de yi bar bdun rol mtsho yin//dang po stong phrag brgyad cu'o/ /de ni nang gi rgya mtsho yin/ /de yi ngos la sum 'gyur ro/ /rol mtsho gzhan ni phyed phyed do/ /lhag ma phyi yi mtsho chen yin/ /ri rab kyi steng yan chad yin/ /lha yi gzhal med khang yin no/ /zhes bshad do/ /gling bzhi pa nyid ni gling bzhi pa'i 'jig rten gyi khams zhes bshad do//chen po'i chung ngu ni kau shi ka gling bzhi pa'i 'jig rten gyi khams kyi sems can thams cad lta zhog gi ces bya ba la sogs pa gsungs pa yin te/ stong spyi phud kyi 'jig rten gyi khams na zhes bya ba ni/ gling bzhi pa dang nyi zla dang //ri rab dang ni 'dod lha dang / /tshangs pa'i 'jig rten stong la ni/ /stong ni spyi phud yin par 'dod/ /chen po'i 'bring bstan pa ni/ kau shi ka stong spyi phud kyi 'jig rten gyi khams zhes bya ba la sogs pa gsungs pa yin te/ stong gnyis pa bar ma'i 'jig rten gyi khams ni zhes bya ba ni/de stong la ni stong gnyis pa/ /bar ma'i 'jig rten khams yin no/ /chen po'i chen po bstan pa'i phyir/ /kau shi ka stong gnyis pa bar ma'i 'jig rten gyi khams zhes bya ba la sogs pa gsungs pa yin te/ stong gsum gyi stong chen po'i 'jig rten gyi khams na zhes bya ba ni/de stong la ni stong gsum gyi/ /'jig rten khams ni bla na med/ /khor yug chen pos yongs su bskor/ /mnyam du 'jig cing 'byung ba yin/ /bdag tu nga rgyal gyi sa bon ma zad pa nyid kyis dang po kho nar rang gi don gyi mos pa rnam pa dgur bstan nas/ rang dang gzhan gyi don gyi mos pa chung ngu'i chung ngu'i don bstan pa'i phyir/kau shi ka stong gsum gyi stong chen po'i 'jig rten gyi khams zhes bya ba la sogs pa gsungs te/ snga phyi med par zhes bya ba ni snga ma med par phyi ma yang med par dus gcig tu zhes bya ba'i tha tshig go/ /de lta bu'i rang bzhin gyi bsod nams bya ba des zhes bya ba ni bshad ma thag pa'i rin po che sna bdun gyi mchod rten ring bsrel gyi snying po can byas nas bkur stir byed pa la sogs pa'i rang bzhin can gyi bsod nams kyi sems che bas so//sangs rgyas rnams ni chos kyi sku/ /'dran pa rnams ni chos nyid lta/ / zhes gsungs pas chos nyid kyi rang bzhin shes rab kyi pha rol tu phyin pa la mchod na sangs rgyas thams cad la mchod pa yin pas bsod nams ches mang du skye'o snyam du bsams nas 'ga' zhig gi don bya ba'i phyir rang gi rtogs pa gsal ba ni bcom ldan 'das de de bzhin no/ /bde bar gshegs pa de de bzhin te zhes bya ba'o//de nyid bstan pa'i phyir bcom ldan 'das shes rab kyi pha rol tu phyin pa 'di la zhes bya ba la sogs pa gsol to/ /ji skad du bshad pa'i dbye ba chung ngu'i chung ngu nyid rnam pa gzhan dag gis gsal bar bya ba'i phyir/ bcom ldan 'das rnam grangs 'di lta bu zhes bya ba la sogs pa gsol te/rnam grangs zhes bya ba ni rgyas par bstan pas so/ /sil snyan thams cad dang zhes bya ba ni pi bang dang gling bu la sogs pa sil snyan stong phrag bcu rnams kyis so/ /glu blangs thams cad dang zhes bya ba ni legs par sbyar ba dang tha mal pa'i glu la sogs pa rnams kyis so//gar thabs dang zhes bya ba ni/ sgeg pa dang / dpa' ba dang / 'jigs su rung ba la sogs pa rnams kyis so/ /rol mo dang pheg rdob pa dang thams cad kyis zhes bya ba ni/ dung la sogs pa'i sgra skad ni rol mo thams cad do/ / lag mthil gyi rol mo'i khyad par ni pheg rdob pa'o/ /legs par smras pa nyid kyis na rjes su dgyes pa'i don du kau shi ka de de bzhin no zhes bya ba la sogs pa gsungs te/ mang po zhes bya ba la sogs pa'i tshig gsum ni/ sbyor ba la sogs pa'i gnas skabs su sbyar ro/ /bsam gyis mi khyab par bskyed do zhes bya ba la sogs pa'i tshig gsum ni/chos dang longs spyod rdzogs pa dang sprul pa'i sku bskyed pa'i phyir rim pa bzhin brjod par bya'o/ /de bzhin gshegs pa ni thams cad las khyad par du 'phags pa nyid ma yin nam/ yum la mchod pas ji ltar na bsod nams lhag par che ba yin snyam pa'i dgos pa de ci'i phyir zhe na zhes bya bas bsu nas/de bzhin gshegs pa dgra bcom pa zhes bya ba la sogs pa gsungs so/ /don 'di ni sngar gsungs pa nyid yin pas 'dir sngar ma byung bar brjod pa cung zad kyang med pa ma yin nam/ci'i phyir 'di nye bar dgod pa mdzad ce na/ brjod par bya ste/ de lta yin du chug na yang 'on kyang rnam pa gang gis nyan pa po'i skye bo gzhan gyi sems dogs pa dang bcas par skye ba de la sngar brjod pa'i tshul gyis kyang dogs pa med pa kho na ste/ gang gi phyir gcig la gzhan du brjod pa'i brgal ba dang lan de nyid ni gzhan la brgal ba dang lan du mi 'gyur ro zhes bya ba'i nges pa 'di ni yod pa ma yin no//de'i phyir bzlos te gsungs par dogs par mi bya ste/ gzhan dag la yang de bzhin du brjod par bya'o/ /char yang mi 'gro zhes bya ba ni gnas skabs kyi char mi 'gyur ba'i mthu cha phra mo yang ngo //grangs su yang zhes bya ba ni grangs la tha dad pa'i grangs nyung ngur ro/ /char yang zhes bya ba ni mthu cha phra mor yang ngo / /bgrang bar yang zhes bya ba ni rigs ma brjod pa'o / /dper bya ba yang zhes bya ba ni 'dra ba'i gnas skabs su'o//dpes bstan par yang zhes bya ba ni/ yon tan gang yod pas rdzas la sgra 'jug pa de brjod pa na ta dang tal dag tu 'gyur ro zhes brjod pa'i phyir na dpe'i yon tan ni dpes bstan pa yin no/ /rten du yang zhes bya ba ni shin tu chung ba snyad rten tsam du'o/ /rgyur yang zhes bya ba ni rgyu'i ngo bor yang ngo //mi bzod do zhes bya ba ni mi rtogs par ro/ /cha la sogs pa'i rang bzhin du ston pa ni tshig 'di dag gis ni shes rab kyi pha rol tu phyin pa dang de bzhin gshegs pa'i ring bsrel gyi snying po can gyi mchod rten mchod pa'i bsod nams dag par thag ring bar bstan pa yin te/ cha shas can dang rdul phra rab kyi gzugs dag la gcig dang cha nyid du rnam par gzhag pa'i phyir ro zhes gzung bar bya'o/ /chung ngu'i 'bring gi rnam pa'i don du grogs po shes rab kyi pha rol du phyin pa gzung bar bgyi'o zhes bya ba la sogs pa smras pa yin te/ mthu chen po dang ldan pa nyid kyis bzod pa phun sum tshogs pa ni brgya byin yin pa'i phyir de la bod pa ni grogs po zhes bya ba yin no//lha'i bu rnams kyis legs par smras pa nyid kyis na de nyid bcom ldan 'das kyis kau shi ka khyod kyis zhes bya ba la sogs pa gsungs pa yin no/ /mthong ba'i dgos pa med par shes rab kyi pha rol tu phyin pa ci'i phyir gzung snyam du 'ga' zhig rtog pa'i dogs pa de ci'i phyir zhe na zhes bya bas bsu nas/gang gi tshe lha ma yin rnams zhes bya ba la sogs pa gsungs so/ /'di lta bur sems kyi rgyu ba 'byung ste zhes bya ba ni 'og nas 'chad pa'i rnam par rtog pa'o/ /'thab par bya'o zhes bya ba de nyid bshad pa ni g.yul 'gyed par bya'o zhes bya ba yin no//dran par byos shig ces bya ba ni yid kyis so/ /kha ton du byos shig ces bya ba ni tshig gis so/ /mthong ba'i chos kyi phan yon mthong bas rab tu dang ba nyid skyes te bstod par bya ba'i phyir bcom ldan 'das 'di lta ste zhes bya ba la sogs pa gsol to//legs par smras pa nyid kyis na rjes su brjod pa'i don du kau shi ka de de bzhin no zhes bya ba la sogs pa gsungs pa yin no/ /ci'i phyir bcom ldan 'das ma rig sngags chen mo la sogs pa nyid yin snyam pa'i dogs pa de ci'i phyir zhe na zhes bya bas bsu nas/ 'di lta ste zhes bya ba la sogs pa gsungs so/ /'dir mdor bsdus pa'i don gyi de kho na nyid ni 'di yin te sgrib pa'i dug thams cad zhi bar byed pas 'das pa'i de bzhin gshegs pa rnams kyis don mdzad pa'i phyir rig sngags chen mo'o/ /ma 'ongs pa'i de bzhin gshegs pa tshad med pa rnams mngon par byang chub pa'i rgyur gyur pa nyid kyis na tshad med pa'i rig sngags so//dpag tu med pa'i bya ba mdzad par spyod pa da ltar gyi de bzhin gshegs pa thams cad mngon par byang chub pa'i rgyu mtshan du gyur pa nyid yin pa'i phyir dpag tu med pa'i rig sngags so/ /snyigs ma lngas khyab pa'i dus su nyon mongs pa'i 'jig rten gyi khams su shAkya'i rgyal po de kho na nyid thugs su chud pa'i rgyur gyur pa nyid kyis 'khor ba las sgrol ba'i don gyis na gong na med pa'i rig sngags so//dge ba bcu la sogs pa nas bsam gyis mi khyab pa'i ye shes kyi mthar thug pa'i 'jig rten la rab tu 'byed pa'i phyir thams cad las mchog tu khyad par du gyur pa'i rgyud nyid kyis na bla na med pa'i rig sngags so//rgyal ba'i yum gyi rgyu mthun pa bshad pa'i stobs kyis byang chub sems dpa' rnams de bzhin gshegs pa mi 'byung ba na yang / shes rab dang thabs la mkhas pas dge ba bcu la sogs pa 'jig rten la rab tu 'byed pas na mi mnyam pa'i phyir mnyam pa med pa'i rig sngags so/ /de bzhin gshegs pa'i dam pa'i chos nub pa na rgyal ba'i yum gyi mthu stobs kyis 'jig rten du chos spyod pa la sogs pa 'jug pas na mnyam pa med pa'i de bzhin gshegs pa rnams dang lhan cig mnyam pa nyid yin pa'i phyir mi mnyam pa dang mnyam pa'i rig sngags so//ji skad du bshad pa'i tshul nyid rig pa yin te/ de lta ma yin na bcom ldan 'das ma'i rig sngags chen mo nyid la sogs pa gang yin pa de ci'i phyir zhe na zhes bya bas dogs pa bsu nas/'di lta ste shes rab kyi pha rol du phyin pa'i rig sngags 'di la bstan nas zhes bya ba la sogs pa'i gzhung gi lan btab pa'i phyir ci yang ma brjod par 'gyur ro/ /de bas na gang dag lha ma yin chen po la sogs pa las rgyal zhing don chen po grub pa'i 'bras bu rab tu stsol ba nyid yin pa'i phyir/bcom ldan 'das 'di lta ste shes rab kyi pha rol tu phyin pa 'di ni rig sngags chen mo zhes bya ba la sogs pa'i gzhung dang po kho nar bshad pa de rnams kyi skabs kyi don chen po med do zhes rtogs te/ rig sngags chen mo la sogs pa nyid gzhan du bshad pa'o //de'i phyir ji skad du smras pa'i bshad pa ni gzhung dang rjes su mthun par yang 'byor pa ma yin no zhes bsam par mi bya ste/ sgra'i don ni brda bas byung ba yin pa'i phyir ro/ /zhar la 'ongs pas chog go/ /dkyus ma nyid kyis tshig bshad pa brjod par bya ste/rig sngags 'di la brten nas zhes bya ba ni shes rab kyi pha rol tu phyin pa thob nas so/ /da ltar zhes bya ba ni deng sang ste da ltar gyi dus zhes bya ba'i tha tshig go/ /dge ba bcu'i las kyi lam rnams zhes bya ba ni srog gcod pa dang / ma byin par len pa dang / 'dod pas log par g.yem pa dang /brdzun du smra ba dang / phra ma dang / tshig rtsub po dang / ngag 'khyal pa dang / brnab sems dang / gnod sems dang / log par lta ba las ldog pa ni dge ba bcu'i las kyi lam yin no/ /bsam gtan bzhi pa ni snyoms par 'jug pa las byung ba'i gzugs kyi khams kyi rang bzhin gyi bsam gtan bzhi rnams so//de la bsam gtan dang po ni rtog pa dang dpyod pa dang dga' ba dang bde ba dang sems rtse gcig pa ste yan lag lnga dang ldan pa'o/ /gnyis pa ni nang rab tu dang ba dang dga' ba dang bde ba dang sems rtse gcig pa ste/yan lag bzhi pa dang ldan pa'o/ /gsum pa ni btang snyoms dang dran pa dang shes bzhin dang bde ba dang sems rtse gcig pa ste yan lag lnga dang ldan pa'o/ /bsam gtan bzhi pa ni btang snyoms yongs su dag pa dang / dran pa yongs su dag pa dang / sdug bsngal yang ma yin bde ba yang ma yin pa'i tshor ba dang /sems rtse gcig pa ste/ yan lag bzhi dang ldan pa'o/ /byang chub kyi yan lag dang ldan pa zhes bya ba la/ kha cig ni zag pa med pa gtsor gyur pas so zhes zer ro/ /gzhan dag ni thabs kyi shes rab kyis yongs su zin pa'i stobs kyis zag pa dang bcas pa nyid byang chub kyi yan lag ste rgyur gyur pa dang ldan pa mtshungs par 'jug pa yin no zhes 'chad do//rab tu 'byed do zhes bya ba ni rab tu shes pa'o/ /tshad med pa bzhi zhes bya ba la/ byams pa dang snying rje ni thams cad du zhe sdang med pa'i rang bzhin te/sems can rnams la bde ba dang sdug bsngal go rims bzhin du ldan pa dang bral bar 'dod pa'o/ /dga' ba ni yang dag par sgrub pa'i sems can rnams la yid bde ba'i mtshan nyid can gyi dga' ba'o/ /btang snyoms ni mdza' bo dang dgra bo rnams la rjes su chags pa dang khong khro ba dang bral ba'o//de lta na 'di dag sems can tshad med pa la dmigs pa yin pa'i phyir tshad med pa zhes bya'o/ /gzugs med pa'i snyoms par 'jug pa bzhi zhes bya ba ni nam mkha' mtha' yas so snyam pa dang / rnam shes mtha' yas so snyam pa dang / ci yang med do snyam pa dang /'du shes ni 'bras dang zug rngu'o/ /'du shes med pa ni rmongs pa'o/ /'di ni zhi ba pa / 'di ni gya nom pa ste/ 'di lta ste 'du shes med 'du shes med pa ma yin pa'o snyam du de ltar yid la byed pas/ go rims bzhin du nam mkha' dang / rnam par shes pa dang /ci yang med pa dang / 'du shes med 'du shes med min skye mched ces bya ba gzugs kyi 'du shes zil gyis mnan pa nyid kyis na gzugs med pa yin pa'i phyir gzugs med pa nyid ni gzugs med pa ste/ lus dang sems mnyam pa nyid sgrub par byed pas na snyoms par 'jug pa bzhi zhes bya'o //mngon par shes pa drug ces bya ba ni rdzu 'phrul dang / lha'i mig dang / lha'i rna ba dang / gzhan gyi sems shes pa dang / sngon gyi gnas rjes su dran pa dang / zag pa zad pa shes pa zhes bya ba ni mngon par shes pa drug go/ /byang chub kyi phyogs kyi chos sum cu rtsa bdun ni 'og nas bshad par bya'o//mdor na zhes bya ba la sogs pa la mdor bsdu na 'dod chags la sogs pa'i spyod pa brgyad khri bzhi stong las spyod pa re re'i gnyen po gzhung ji tsam gyi yongs su rdzogs par gyur pa de tsam gyi gzhung gi tshogs la chos kyi phung po zhes bya ba'i chos kyi phung po brgyad khri bzhi stong ngo //sangs rgyas kyi ye shes dang zhes bya ba la sogs pa la shes bya thams cad thugs su chud pas phul du byung ba'i blo mnga' ba'i phyir sangs rgyas so/ /gzhan gyis bstan pa med par rang nyid kyis thugs su chud pas na rang byung ste/ de rnams kyis ye shes yin pas de skad ces bya'o//de yang bsam pa'i yul thams cad las 'das pa'i nub pa'i rang bzhin yin pas bsam gyis mi khyab pa'i ye shes so/ /sngon thos pa'i ye shes zhes bya ba la sogs pa la/ bstan pa'i chos 'di dag thams cad ni chos kyi dbyings kyi rgyu mthun pa yin pas na shes rab kyi pha rol tu phyin pa'i rgyu mthun pa sngon sangs rgyas byung ba na thos pa'o//rjes su brtse ba dang ldan pa zhes bya ba ni snying rje dang ldan pa'o/ /'di la zhes bya ba ni mi mjed kyi 'jig rten gyi khams te/ 'di ni sangs rgyas mi 'byung ba'i 'jig rten gyi khams nye bar mtshon pa yin no//byang chub kyi yan lag dang mi ldan pa zhes bya ba ni/ kha cig de bzhin gshegs pa ma byung ba ni de na yod pa rnams la byang chub rtogs pa'i skal ba med pa'i phyir ro zhes 'chad do/ /gzhan ni shes rab dang thabs la mkhas pa dang bral ba nyid kyis ni zhes zer ro/ / mngon par shes pa lnga smos pa ni de'i tshe zag pa zad pa mi srid pa'i phyir 'dir de skad smos so/ /rgyal ba'i yum gyi che ba'i bdag nyid dpes kyang bstan par bya ba'i phyir kau shi ka 'di lta ste dper na zhes bya ba la sogs pa gsungs te/ sman dang skar ma rnams zhes bya ba la sman ni 'bru la sogs pa'o//skar ma ni pa ba sangs dang phur bu la sogs pa yin pas de skad ces bya'o/ /yang na sman la la nyid mtshan mo skar ma ltar kun tu snang bas de skad ces bshad do/ /de rnams ni zla ba'i 'od zer rnams kyis brtas par byas pa lus yongs su rgyas pa dang / mthu khyad par can skye bas na go rims bzhin du stobs ji lta ba dang mthu ji lta bar zhes bya bar gsungs pa yin no//kun tu snang bar zhes bya ba ni/ rang gi mthu ston pa yin no/ /rgyu skar rnams kyang zhes bya ba ni rgyal la sogs pa'o/ /dpe bstan pa'i don bstan pa ni kau shi ka de bzhin du zhes bya ba la sogs pa gsungs pa yin te/'das nas zhes bya ba ni yongs su mya ngan las 'das nas so/ /chos spyod pa zhes bya ba la sogs pa la mdo sde la sogs pa'i chos 'bri ba la sogs pa la mngon par brtson pa ni chos spyod pa'o/ /rang dang gzhan gyi bdag nyid mnyam pa nyid du slob pa ni mtshungs par spyod pa'o//'dod chags la sogs pas nye bar bslad pa spang bar bya ba'i phyir gnyen po'i phyogs sgom pa ni zhi bar spyod pa'o/ /bsdu ba'i dngos po bzhi la sogs pa la bsten pa ni dge bar spyod pa'o/ /rab tu 'dogs pa ni 'jug pa'o/ /rab tu bsgom pa'i slob pa'o//byang chub sems dpa' las skye zhing zhes bya ba la sogs pa'i tshig gsum ni sbyor ba la sogs pa'i dbye bas yin no/ /thabs la mkhas pa zhes bya ba ni bshad zin to/ /yang na stong pa nyid dang snying rje chen po dag dang de las byung ba'i las rnams la mkhas pa'o//yum gyi che ba'i bdag nyid rnam pa gzhan gyis kyang bstan pa'i phyir kau shi ka gzhan yang zhes bya ba la sogs pa gsungs te/ yid la byed pa dang zhes bya ba ni mdor bsdus pas spyi'i tshul la dmigs pa'i phyir ro/ /dran par byed pas zhes bya ba ni rgya cher yan lag re re nas mngon sum du byed pa'i phyir ro//slar yang don gzhan la brten nas/ don de nyid ni bzlas pa yin zhes gsungs pa'i phyir yang ba spangs pas 'chi ba'i dus byed par mi 'gyur ro zhes bya ba la sogs pa gsungs pa la zlos pa'i skyon yod par dogs pa mi bya'o/ /'di ltar sngar ni mthong ba'i lam gyi dbang du mdzad nas gsungs la/da ltar ni bsgom pa'i lam gyi dbang du mdzad pa yin pas khyad par yod do/ /rgyal po'i blon po chen po zhes bya ba ni 'du shes kyi lam phyin ci ma log par ston par byed pa'i blon po chen po'i / blon po zhes bya ba ni glang po che'i 'dul sbyong byed pa'i blon po'o//nye bar 'ongs par gyur na zhes bya ba ni gan du nye bar 'ongs par gyur pa'o/ /'di ltar zhes bya ba'i tshig gi phrad ni gang gi phyir zhes bya ba'i don la 'jug ste/ skad kyi dbyings dang nye bar gyur pa rnams kyis don nges par bstan pa su zhig gis nus zhes bshad pa yin pa'i phyir ro//'di skad du gang gi phyir shes rab kyi pha rol tu phyin pa gzung ba de'i phyir des yongs su bzung ba nyid yin pas na de dag gis glags rnyed par mi 'gyur ro zhes brjod pa yin no/ /smra bar 'dod cing zhes bya ba ni mdo kho na la tshig 'dre bar 'dod pa'o/ / gtam zer bar 'dod de zhes bya ba ni gong nas gong du gtam gyi rgyun zer 'dod pa'o/ /yang dag par dga' bar bya'o snyam du sems par 'gyur ro zhes bya ba ni rgyal po la sogs pa de dag chos gos dang bsod nams la sogs pa nye bar ston par rgyal ba'i yum la mngon par brtson pa de mngon par dga' bar bya bar sems pa'o//nga rgyal gyi bag chags ma spangs pa rnams de bzhin du smra bar 'dod pa la sogs pa'i rgyu ci zhig yin snyam pa'i dogs pa de ci'i phyir zhe na zhes bya bas bsu nas/ shes rab kyi pha rol tu phyin pa 'di ni zhes bya ba la sogs pa gsungs te/ shes rab kyi pha rol tu phyin pa la zhes bya ba ni sgom par byed pa'i byang chub sems dpa' la shes rab kyi pha rol tu phyin pa'i sgrar gsungs te/de'i phan yon ston pa'i skabs yin pa'i phyir ro/ /byams pa nye bar sgrub pa zhes bya ba ni/ 'di ni mdza' ba po'i bya ba yin pas na byams pa de stobs pa ni nye bar bsgrub pa'o//de yang rgyu la sogs pas byed pa yang srid pas byams pa'i sems kyis zhes bya ba gsungs te phan pa'i sems kyis zhes bya ba'i don to/ /snying rje nye bar sgrub pas zhes bya ba'i snying rje'i 'bras bu tsam la snying rjer nyams par brtag pa ni snying rje ste/ de stobs pa ni snying rje bsgrub pa'o//de bzhin du byed pa yang srid pas snying rje'i sems zhes bya ba gsungs te/ sdug bsngal bsal ba'i sems nyid kyis so/ /de yang 'phags pa gtsug na rin po che'i mdo las kyang shes rab kyi pha rol tu phyin pa snying rje chen po la sogs pa'i 'khor dang ldan par bsgom par bya'o zhes gsungs pas de sgom pa po ni byams pa la sogs pa bsgom pa la brtson pa yin te/de bas na byams pa la sogs pa'i mthus rgyal po la sogs 'dud pa la sogs pa yin no/ /de bzhin du gzhan dag las kyang byang chub sems dpa' byams pa la mngon par brtson pa la ni lha dang mi thams cad rab tu dad par 'gyur ro zhes bya ba la sogs pa gsungs pa yin no//de nyid kyi phyir zhes bya ba nyid kyi sgra ni nges par bzung ba ste/ gang gi phyir shes rab kyi pha rol tu phyin pa la phan yon mang po'i rgyu de nyid kyi phyir zhes bya ba'i don to/ /gdug pa dang zhes bya ba la sogs pa la/gdug pa ni gnod sbyin la sogs pa gdon mi bsrun pa'o/ /sdig sbrul ni sbrul te de mang ba'o/ /dgon pa ni bgrod par dka' ba'i gnas so/ /nang du song ba ni phyin pa'o/ /sngon gyi las kyi rnam par smin pa ma gtogs par zhes bya ba ni gnyis po med na myong bar nges pa'i las kyi rnam par smin pas tshugs pa'o//ma gtogs zhes bya ba ni bor nas te/ glags rnyed par 'gyur te snga ma dang sbyar ro/ /da ni dus gzhan dag gi phan yon bstan pa la the tshom dang bcas pa dag yid ches pa bskyed par bya ba'i phyir de nas mu stegs can zhes bya ba la sogs pa gsungs te//mu stegs pa'i rab tu 'byung bas rab tu phyung ba ni kun du rgyu'o/ /klan ka tshol ba'i bsam pas zhes bya ba ni rnam par 'tshe ba'i bsam pas so/ /de'i tshe zhes bya ba ni de'i dus su zhes bya ba'i tha tshig go/ /de dag gi sems la kun du brtags zhes bya ba ni bcom ldan 'das kyis rjes su gnang ba de nyid kyis de rnams kyi 'tshe ba'i sems yod pa shes nas ldog par bya ba'i phyir brgya byin shes rab kyi pha rol tu phyin pa rab tu ston pa zhes bya bar shes par bya'o//de yang rjes thogs nyid nas 'og nas lha'i dbang po brgya byin ji ltar ngas kyang gnang ngo zhes gsungs pa yin no//ji snyed ces bya ba ni phyogs gcig tsam bzung bas zhes bya bar sbyar ro/ /sgo de nyid dang zhes bya ba la sogs pa la shing la sogs pa legs par sbyar ba'i sgo gang yin pa nyid dang / sa'i khyad par gyi phyogs kyi lam gang nas 'ongs pa de nyid nas phyir ldog ste dong ngo zhes bya ba'i tha tshig go//bcom ldan 'das kyis byin gyi brlabs yin par ma shes par nyid kyis 'dir ci'i phyir 'di ltar zhes bya ba la sogs pa gsungs so/ /sangs rgyas bcom ldan 'das la mi mkhyen pa ci yang mi mnga' bas de nas bcom ldan 'das zhes bya ba la sogs pa gsungs so//ldog pa'i don du zhes bya ba ni slar ldog par bya ba'i phyir ro/ /brgya byin la rtag tu mnyam par gzhag pa med par ji ltar na 'di lta bu'i dran pa yod ces rtog pa la lha'i dbang po brgya byin ji ltar ngas kyang gnang ngo zhes bya ba gsungs so/ /'di rnams slar ldog par bya ba'i phyir shes rab kyi pha rol tu phyin pa rab tu 'don pa brgya byin la ngas rjes su gnang ba byas pa yin no//bcom ldan 'das ni thugs rje chen po dang ldan pa ma yin nam ci'i phyir zhe na 'gras pa'i sems dang ldan pa rjes su gzung bar mi mdzad snyam pa'i dogs pa de ci'i phyir zhe na zhes bya bas bsu nas/shA ri'i bu mu stegs can zhes bya ba la sogs pa gsungs te/ chos dkar po zhes bya ba ni de rnams kyi nang nas gang yang rung ba gcig la yang dam pa'i chos nyan pa la 'jug pa'i dge ba'i las yod par ngas ma mthong ste/ de bas na 'dogs par mi byed pa yin gyi/khong khro ba'i dbang gis ma yin no zhes bya bar dgongs so/ /zhe 'gras pa'i bsam pa zhes bya ba ni sems rnam par sdang ba'o/ /yang yid ches pa bskyod par bya ba'i phyir de nas bdud sdig can zhes bya ba la sogs pa gsungs te/ de la bdud ni lha'i bdud do/ /'khor bzhi po zhes bya ba ni/ dge slong dang / dge slong ma dang / dge bsnyen ma rnams so/ /'dir nges par zhes bya ba ni 'khor 'dir nges pa kho nar ro/ /mig gis mi rtsol bar bya ba'i phyir zhes bya ba ni/ bgegs bya ba'i phyir ro/ /yan lag bzhi'i dpung gi tshogs zhes bya ba ni rta pa gcig ni rkang pa bsrung ba bzhi dang bcas pa 'di ni dpung gi tshogs gcig go//glang po che srung ma brgyad dang bcas pa snga ma dang bcas pa 'di ni yan lag gnyis so/ /shing rta srung ma bcu drug dang snga ma gnyis dang bcas pa 'di ni yan lag gsum mo//rkang thang bcu drug snga ma dang bcas pa 'di ni dpung gi tshogs yan lag bzhi pa'o/ /de yang nyung zad yin te yang 'di lta bu'i rim gyis bdud kyi dpung gi tshogs chen po yin par shes par bya'o/ /bkod pa zhes bya ba ni tshogs so/ /yun ring po nas zhes bya ba ni dus ring por ro//yid ches pa thob par gyur pa na mchod pa la sogs pa byed do zhes smras pa de nas sum cu rtsa gsum pa'i ris kyi lha'i bu rnams kyis zhes bya ba la sogs pa'o/ /nam mkha' la zhes bya ba ni nam mkhar ro/ /yun ring mo zhig ni zhes bya ba ni dus yun ring po zhig na zhes bya ba'i tha tshig go//byung ngo zhes bya ba ni nye bar gyur pa'o/ /ngan ngon zhes bya ba ni nyung zad de tsam gyi tshod ces bya ba'i tha tshig go/ /sngon gyi rgyal ba rnams la bgyi ba bgyis pa zhes bya ba ni sngon gyi sangs rgyas rnams la nyan pa la sogs pa'i mtshan nyid can pha rol tu phyin pa'i bya ba lhag par gang yin pa de la de skad ces bya ba'o //yang na sngon gyi sangs rgyas kyis nyan pa la sogs pa'i rang bzhin can gyis nges par sbyor ba dbang du bya ba gnang ba gang yin pa de la de skad ces bya'o/ /lta ci smos te zhes bya ba ni rna lam du grag pa rtogs pa las khyad par du 'phags pa nyid kyis 'dzin pa la sogs pa la lta yang the tshom cig yod ces bya bar dgongs so//de bzhin nyid du slob pa dang zhes bya ba la sogs pa la/ gzhan ma yin pa'i don gyis na de bzhin pa'i ngo bo ni de bzhin nyid do/ /de'i rgyu nyid du slob pa dang zhes bya ba la sogs pa'i tshigs gsum sbyor ba la sogs pa'i gnas skabs yin par brjod par bya'o//de bzhin gshegs pa la bsnyen bkur bgyid pa lags so zhes bya ba ni de bzhin gshegs pa rnams la 'khor rab tu phul ba dang / des gsungs pa mnyan pa dang mchod pa la sogs pas kyang bsnyen bkur byed pa gang yin pa de la de skad ces bya'o//de bzhin gshegs pa la bsnyen bkur bya ba la sogs pa dang rgyal ba'i yum mnyan pa la sogs pa ni 'brel pa gzung ba med pa ma yin nam/ ji ltar na des 'di rjes su dpog snyam pa'i dogs pa de ci'i slad du zhe na zhes bya bas bsu nas/'di lta ste zhes bya ba la sogs pa gsol pa yin te/ shes rab kyi pha rol tu phyin pa las thams cad mkhyen pa ste/ sangs rgyas nyid rab tu 'byed cing yang dag par bskyed pa yin no/ /de nyid kyi phyir 'di las brtsal bar bya ste/ rgyu med par 'bras bu mi 'byung ba'i phyir ro/ / de nyid dpes bstan par bya ba'i phyir bcom ldan 'das 'di lta ste dper na zhes bya ba la sogs pa gsol to/ /'di skad ston te rgyu med par 'bras bu mi skye bas shes rab kyi pha rol tu phyin pa las byung ba nyid yin pa'i phyir de gang gi phyir de bzhin gshegs pa nyid 'tshol na yul de mnyan pa la sogs pa las nges par bag chags yongs su rgyas pa'i sa bon btab pas de bzhin gshegs pa'i go 'phang thob par 'gyur ro//de lta bu'i mnyam pa la sogs pa 'di la lar lan 'ga' zhig khyad par can gyi rgyu la rag las par skye bas rang gi rgyu khyad par can de bzhin gshegs pa la bsnyen bkur byas pa la sogs pa nyid yin par rjes su dpogs te /gang phyir rgyu 'bras dag las ni/ /chos nyid 'di ni rnam par gnas/ /de de min tshul rgyu can ni/ /de de min tshul rgyu las byung / /zhes bya ba yin no/ /bdag por gyur pa nyid kyis legs par smras pa gnang zhing brgya byin gyi rjes su gsungs pa ni kau shi ka de de bzhin no zhes bya ba la sogs pa gsungs pa yin no//chung ngu'i chen po bstan par bya ba'i phyir/ bcom ldan 'das ni sbyin pa'i pha rol tu phyin pa'i bsngags pa mi gsung zhes bya ba la sogs pa gsol pa yin no/ /bsngags pa zhes bya ba ni phan yon bsdus pa dang rgyas pa'i dbye bas gsungs par mi mdzad ces bya bar sbyar ro//yongs su mi sgrogs so zhes bya ba ni ming tsam du brjod pas zhes bya bar shes par bya'o/ /gcig pu'i ming yongs su sgrogs par mdzad do zhes bya ba ni ming lan mang du brjod pas so/ /'phags pa thogs med kyis sbyin pa la sogs pa'i pha rol tu phyin pa'i re re'i mtshan nyid ni byang chub kyi sems la brten pa nyid kyis rten dam pa nyid dang /dngos po ma lus pa'i kun tu spyod pas dngos po dam pa nyid dang / sems can thams cad la phan pa dang bde ba'i dbang du byas pas ched du bya ba dam pa nyid dang / rnam par mi rtog pa'i ye shes kyis yongs su bzung bas thabs la mkhas pa dam pa nyid dang /bla na med pa yang dag par rdzogs pa'i byang chub tu yongs su bsngo bas yongs su bsngo ba dam pa nyid dang / nyon mongs pa dang shes bya'i sgrib pa bzlog pa yang dag par bsgrubs pas rnam par dag pa dam pa nyid yin no zhes bshad do//zhal gyis bzhes par bya ba'i phyir kun dga' bo de de bzhin no zhes bya ba la sogs pa gsungs so/ /pha rol tu phyin pa drug car 'tshang rgya ba nyid kyi rgyu yin na/ gcig gtso bor bstan pa de ji ltar yin snyam pa'i dogs pa de ci'i phyir zhe na zhes bya bas bsu nas/shes rab kyi pha rol tu phyin pa ni zhes bya ba la sogs pa gsungs so/ /gang gi phyir 'khor gsum yongs su dag pas sbyin pa la sogs pa thams cad mkhyen pa nyid du yongs su bsngo bas thog mar 'jug pa'i phyir sngon du 'gro ba yin pa de'i phyir de'i bsngags pa gsung zhing ming yongs su sgrogs par mdzad do zhes snga ma dang sbyar ro//ji skad du bshad pa'i don de'i tshig nyid las bstan par bya ba'i phyir kun dga' bo de ji snyam du sems zhes bya ba la sogs pa gsungs te/ thams cad mkhyen pa nyid du yongs su ma bsngos pa'i sbyin pa la zhes bya ba ni/mi dmigs pa'i sbyor bas sems can thams cad kyi don du sangs rgyas nyid du ma bsngos pa ste/ shes rab kyi pha rol tu phyin pa zhes bya ba ni lhag ma'o/ /de lta bu'i sbyin pa ni 'bras bu longs spyod pas zad par 'gyur ba'i phyir phul du phyin par 'gyur ba ma yin no zhes so/ / ston dngos rjes 'jug blo can gyis/ /dris pa nyid las bzung ba'i don de ma lags so zhes brjod pas bstan pa yin no/ /tshul khrims la sogs pa yang bsgre bar bya ba'i phyir/ /de bzhin du yongs su ma bsngos pa'i tshul khrims dang zhes bya ba la sogs pa gsungs so/ / de ltar ldon pa'i sgo nas shes rab kyis yongs su zin pa'i stobs las sbyin pa la sogs pa rnams pha rol tu phyin pa'i rang bzhin yin par bstan nas/ shes rab kyi pha rol tu phyin pa'i rang bzhin bstan pa'i phyir kun dga' bo 'di ji snyam du sems dge ba'i rtsa ba thams cad mkhyen pa nyid du zhes bya ba la sogs pa gsungs so//dngos po dmigs su med pas 'bras bu bsam gyis mi khyab pa nyid do/ /bcom ldan 'das de de bzhin te zhes bya ba la sogs pa gsol te/ dmigs pa can gyi so so'i skye bo rnams kyis bsam par mi nus pa'i phyir bsam gyis mi khyab pa'o//nyan thos la sogs pa rnams kyi yul ma yin pa'i phyir mchog tu bsam gyis mi khyab pa'o/ /yum pha rol tu phyin pa yin pa'i don nye bar bsdu ba'i phyir kun dga' bo de lta bas na dam pa yin pa'i phyir zhes bya ba la sogs pa gsungs so/ /sngon du 'gro ba'i mjug sdud par byed pas kun dga' bo de lta bas na dge ba'i rtsa ba thams cad mkhyen pa nyid du yongs su bsngos pa'i phyir zhes bya ba la sogs pa gsungs so//'dren pa zhes bya ba ni sbyin pa la sogs pa 'tshang rgya ba nyid du 'dren pa yin pa'i phyir ro/ /yongs su 'dren pa zhes bya ba ni nye bar 'tshe ba thams cad bzlog pa yin pa'i phyir ro//tshul 'dis zhes bya ba la sogs pa ji skad du gsungs pa'i tshul gyis sbyin pa la sogs pa lnga ni shes rab kyi pha rol tu phyin pa'i nang du 'dus pas de sgrogs na pha rol tu phyin pa drug po thams cad sgrogs par 'gyur bas rgyal ba'i yum gcig pu kho na bstan pa ni ma yin no zhes bya ba'i tha tshig go//gang yang nga ni shes rab kyi pha rol tu phyin pa'i bsngags pa brjod cing smra ste zhes bya ba la sogs pa sngar gsungs pa de ni gtsor bya ba yin pas nyes pa med do/ /'di nyid dpes bstan par bya ba'i phyir kun dga' bo 'di lta ste dper na sa chen po la zhes bya ba la sogs pa gsungs te/skye bar 'gyur te zhes bya ba ni 'phel bar 'gyur ba'o/ /dpes bstan pa'i don ni kun dga' bo de bzhin du zhes bya ba la sogs pa gsungs so/ /'bring gi chung ngu'i dbang du byas nas bcom ldan 'das re zhig ces bya ba la sogs pa gsol to//shes rab kyi pha rol tu phyin pa'i yon tan 'di dag thams cad ces bya ba ni/ 'di dag ni yum mtha' dag pa'i yon tan thams cad ni ma yin te/ de'i yon tan ni shin tu mang ba'i phyir ro zhes 'dod pa'o/ /de lta na yon tan 'di su zhig gi yin zhe na/ 'on kyang gang zhig ces bya ba la sogs pa gsungs te/bcom ldan 'das kyi thad nas 'di'i phyogs gcig blangs pa gang yin pa ste / de yang 'das ma thag pa'i mu stegs can gzhan la sogs pa bzlog par bya ba'i phyir rab tu ston pa de'i yon tan yin no zhes bya ba'i tha tshig go/ /yang dag par smras pas lags so zhes bya ba byin pa ni kau shi ka legs so legs so zhes bya ba gsungs so//de lta mod kyi de tsam gyi phyogs gcig gi bdag nyid can gyi shes rab kyi pha rol tu phyin pa de tsam yang gang zhig 'dzin pa nas de bzhin du kha ton byed pa'i bar nyi tshe la yon tan 'di dag 'byung ba 'ba' zhig tu ni ma zad kyi/'on kyang gang gis bris nas mchod pa sngon du 'gro bas glegs bam tsam du chud par byas te bzhag pa de la yang yon tan mtha' yas pa 'thob par 'gyur ro zhes ston par mdzad pa ni kau shi ka gang shes rab kyi pha rol tu phyin pa 'di zhes bya ba la sogs pa gsungs pa yin no//phan yon thos pas mang du gces par byed pa skyed pa nyid kyis na bcom ldan 'das bdag gis kyang zhes bya ba la sogs pa gsol te/ smos kyang ci dgos zhes bya ba ni dris nas khyad par du 'phags pa'i 'dzin pa la sogs pa byed pa la bdag gis srung ba la sogs pa bgyid pa la ni som nyi ci zhig mchis zhes bya ba'i tha tshig go//de bzhin du kau shi ka legs so legs so zhes bya ba byin nas/ 'bring gi 'bring bstan par bya ba'i phyir rigs kyi bu'am rigs kyi bu mo zhes bya ba la sogs pa gsungs te/ spobs pa nye bar sgrub po zhes bya ba ni rigs pa dang grol ba smra bar bskyed par bya'o//'dun pa zhes bya ba ni smra bar dga' ba'o/ /phan yon gyi rnam pa gzhan dag kyang bstan par bya ba'i phyir gzhan yang kau shi ka zhes bya ba la sogs pa gsungs te/ klan ka tshol ba la zhes bya ba la sogs pa la 'ga' zhig rnam par 'tshe ba'i bsam pas rgol zhing rtsod par byed na mi rung ngo snyam du sems zhum par mi 'gyur ro//sems zhum pa ni sems rmongs shing 'khums pa nyid do/ /shes rab la sogs pa phul du byung ba srid pa na skyes bus sems kyi yon tan mi shes pas ji ste de ltar mi 'gyur snyam du dgongs pa de ci'i phyir zhe na zhes bya bas bsu nas/'di ltar de la zhes bya ba la sogs pa gsungs te/ 'di skad du 'khor gyi 'jigs pa la sogs pa'i 'jigs pa ni dngos por 'dzin pa las byung ba yin zhing de la ni shes rab kyi pha rol tu phyin pa yongs su 'dzin pa'i stobs kyis las dbye ba po dang bya ba la sogs pa'i nye bar dmigs pa med pas 'byung bar mi 'gyur ro zhes brjod pa yin no//'bring gi chen po bstan pa'i phyir kau shi ka gzhan yang zhes bya ba la sogs pa gsungs te/ de la mdza' bo ni phan pa dang bde ba byed pa'o//blon po ni gros mkhan gyi gtso bo'o/ /gnyen bshes ni pha dang ma las gcig nas gcig tu brgyud pa'i skye bo'o/ snag gi gnyen mtshams ni ma dang pha gcig las skyes pa'i spun zla la sogs pa'o/ /dge sbyong ni shAkya'i sras rnams so/ /chen po'i chung ngu bstan pa'i phyir de la pha rol rgol ba byung zhing zhes bya ba la sogs pa gsungs te/chos dang ldan pas tshar gcod pa zhes bya ba la/ kha cig ni de rnams tshig gis zil gyis gnon pa yin no zhes zer ro/ /gzhan dag ni des smras pa'i bsgrub pa'i chos sun phyung bas bsgrub par bya ba'i chos dang lhan cig tu de rnams sel ba yin no zhes 'dod do//stobs yod pa ni thos pa dang po la sogs pa dang ldan pa'i phyir ro/ /nus pa yod pa ni shes rab phun sum tshogs pa dang ldan pas so/ /brgal ba na zhes bya ba ni rgol ba la'o/ /de la lung ston pa ni legs par lan thebs pa'o/ / der nus pa ni rung ba zhes bya ba'i tha tshig go//chen po'i 'bring bstan pa'i phyir kau shi ka yang sa phyogs gang du zhes bya ba la sogs pa gsungs pa yin te/ de la thag ring po nas lta bas na lta bar 'gyur ba'o/ /thal mo sbyor bar byed pas na phyag 'tshal bar 'gyur ba'o/ /gang du lhags nas dkyil 'khor lnga pas rab tu 'dud par byed pas 'dud par 'gyur ba'o//so sor nges pa smos pas brgya la 'di tsam phyed pa kho na yin no snyam du blo skye bar 'gyur ba dag srid pas kau shi ka khyod 'di snyam du tshangs pa'i zhes bya ba la sogs pa gsungs so/ /snga ma bzhin du sbyar te zhes bya ba ni bla na med pa yang dag par rdzogs pa'i byang chub tu yang dag par zhugs pa de dag der 'ongs par sems te zhes bya ba la sogs pa'i tshig bsgre bar bya'o zhes bya ba'i tha tshig go//de la tshangs rigs la sogs pa gsum ni bsam gtan dang pos bsdus pa yin no//'od chung la sogs pa gsum yang bsam gtan gnyis pa las skyes pa yin no/ /dge chung la sogs pa gsum ni bsam gtan gsum pa la gnas pa yin no/ /sprin med pa la sogs pa brgyad ni bsam gtan bzhi pa'i sa pa yin no/ /'du shes med pa'i sems can ni 'bras bu che ba'i phyogs gcig na yod do//bsod nams lhag pa skye bar bya ba'i phyir thabs la mkhas pa la bslab pa ni/ kau shi ka rigs kyi bu'am rigs kyi bu mo des 'di ltar sems bskyed par bya ba la sogs pa gsungs te/ 'di las zhes bya ba ni glegs bam 'di las zhes bya ba'i tha tshig go//de bzhin du blo dman pa 'ga' zhig rtog pa skye bar dogs nas kau shi ka khyod 'di snyam du zhes bya ba la sogs pa gsungs te/ de nyid kyi 'dres kyi zhabs su brjod pas ni kau shi ka de ltar mi blta'o zhes gsungs so/ /de la 'dod pa na spyod pa'i bag ni 'dod pa'i 'dod chags kyi bag la nyal ma spangs pa 'dod pa'i khams su skyes pa rnams so//gzugs na spyod pa ni 'dod pa'i 'dod chags kyi phra rgyas ni spangs/ gzugs kyi 'dod chags kyi mngon par zhen pa gzugs kyi khams su skyes pa rnams so/ /chen po'i chen po bstan pa'i phyir yang kau shi ka rigs kyi bu 'am rigs kyi bu mo de'i khyim dang zhes bya ba la sogs pa gsungs so//de la khyim ni skye bo tha mal pa'i gnas so/ /gnas khang ni dge slong rnams gnas pa'i khang pa'o/ /khang bzangs ni so phag la sogs pa las byas pa'i gnas khyad par can phyug po'i khyim mo//shin tu bsrung bar 'gyur ba ni mi la sogs pa'i 'tshe ba med pa'i phyir ro/ /ci'i phyir khyim la sogs pa shin tu bsrung bar 'gyur zhes rtog pa la/ kau shi ka de ltar gang du zhes bya ba la sogs pa gsungs te/ de ltar gzi brjid che ba zhes bya ba ni mthu che ba'o//de ltar zhes bya ba ni rab tu grags pa'o/ /'di skad du gang gi phyir de ltar rab tu grags pa'i gzi brjid che ba khyim gang du 'ong bar bya'o snyam du sems pa de'i phyir khyim la sogs pa de rnams la mthus legs par bsrung bar 'gyur ro zhes brjod pa yin no//sems can gyi khams yid ches par dka' ba rnams shin tu yid ches pa bskyed par bya ba'i phyir zhus pa ni bcom ldan 'das rigs kyi bu 'am rigs kyi bu mo des zhes bya ba la sogs pa gsol pa yin no/ /skal ba ji lta ba bzhin du mtshan ma 'byung ba gsungs pa ni kau shi ka gal te zhes bya ba la sogs pa'o//der snang ba chen po dag mthong nas zhes bya ba ni khyim der 'od kyi snang ba chen po 'byung bar mthong na zhes bya ba'i don to/ /nges par zhes bya ba ni gdon mi za bar ro/ /mi ma yin pa'i dri sngon chad ma bsnams pa bro bar gyur na zhes bya ba ni/ mi ma yin pa'i dri mi'i 'jig rten las 'das pa khyad par can gyi dri sna'i rnam par shes pas nyams su myong ba'o//sngon chad ma bsnams pa zhes bya ba ni sngon ma myangs pa'o / /'ongs zhes bya ba ni nye bar phyin pa'o/ /lhags pa'i zhes bya ba ni khang pa la sogs pa'i nang du zhugs pas so/ / kun tu spyod pa gzob par byed par 'gyur zhes bya ba ni sdig pa thams cad mi byed pas nang yongs su dag pa'o/ /kun tu spyod pa gtsang sbra byed par 'gyur zhes bya ba ni gos la sogs pa gtsang ma la nye bar longs spyod pas phyi yongs su dag pa'o/ /yi rangs shing zhes bya ba la sogs pa ni yid bde ba chung ngu dang 'bring dang chen po dang ldan pa yin par shes par bya'o//mgu ba nyid ni yid bde ba yin la de skye bar 'gyur ba gang yin pa de la de skad ces bya'o/ /gnas pa zhes bya ba ni sngar gnas pa'o/ /'byol bar zhes bya ba ni 'gro bar bya'o snyam pa'o/ /ji ltar na sngar gnas pa 'bad pa med par 'jol bar 'gyur snyam pa'i dogs pa de ci'i phyir zhe na zhes bya bas bsu nas/lha dang klu dang zhes bya ba la sogs pa gsungs pa yin no/ /dpal dang zhes bya ba la sogs pa'i tshig gsum ni mthu chung ngu dang 'bring dang chen po nyid bstan par bya ba'i phyir gsungs pa yin no//'di skad du gzi brjid chen po de dag gi mthu nyid kyis 'gro ba yin pas 'bad pa la ltos mi dgos so zhes brjod pa yin no/ /rtag tu zhes bya ba ni yang dang yang du'o/ /dad pa mang bar 'gyur te zhes bya ba ni mngon par yid ches su rung ba mthong bas dad pa mngon par 'phel ba'o//sngar spyir thams cad du kun tu spyod pa gzob par byed pa dang gtsang sbra byed par 'gyur ba'i kun tu spyod pa bstan nas khyad par du lhur bya ba'i don gsungs pa ni yang kau shi ka rigs kyi bu 'am rigs kyi bu mo zhes bya ba la sogs pa'o/ /de'i khor yug tu zhes bya ba ni kun nas yongs su 'khor bar zhes bya ba'i tha tshig go//lus ngal bar mi 'gyur ba dang zhes bya ba ni yul gzhan du 'gro ba la sogs pas lus dub par mi 'gyur ba'o/ /sems ngal bar mi 'gyur zhes bya ba ni bsod snyoms la sogs pa ma rnyed pas sems skyo bar mi 'gyur ba'o//de bde bar nyal bar byed par 'gyur zhes bya ba ni/ lus tshab la sogs pa'i nye bar 'tshe ba dang bral ba'i phyir ro/ /bde bar 'gro bar 'gyur zhes bya ba ni/ 'chag pa la sogs pa'i dus su tsher ma la sogs pas ma gtses pa'i phyir ro/ /bgro ba byed pa zhes bya ba ni phan tshun gzhung dang don gtan la 'bebs pa'i phyir ro//'di ltar thams cad mkhyen pa nyid ces bya ba ni chos thams cad dmigs su med pas 'tshang rgya ba nyid do/ /'di ltar sangs rgyas kyi zhing zhes bya ba ni sems can dang snod kyi 'jig rten gyi khams rnam pa gnyis po go rims bzhin du bkres pa dang skom pa la sogs pa dang /rdo dang tsher ma la sogs pa dang bral ba'o/ /lus kyi nang du mdangs bcug pas shin tu bde ba myong bar 'gyur zhes bya ba ni/ lus la stobs gang yin pa dang / tshig la gzi brjid gang yin pa dang / blo la shin tu rno ba gang yin pa de lta bu'i mdangs gsum gang du rab tu bcug pa de la de skad ces bya'o//gang yang lus zhes smos pa des gtso bor lus brjod pa na ngag dang blo dag phal par brtag pas rig par bya ba yin no/ /yang zhing yang ba nyid ces bya ba ni lci ba dang bral ba nyid lus kyi bde ba yin no zhes snga ma dang sbyar ro//kha zas la brkam pa zhes bya ba ni kha zas 'dod pa dang ldan pa zhes bya ba ni lhag ma'o/ /rnal 'byor spyod pa zhes bya ba ni ting nge 'dzin sgom pa bde ba nyams su len pa brtson pa'o/ /yid la byed pas yongs su brlan pas zhes bya ba ni byams pa la sogs pa bsgoms pa nye bar rgyas pa'o//rnal 'byor la spyod pa ni bsam gtan gyi zas kyis 'tsho ba yin pa'i phyir kham gyi zas la brkam pa drag po mi 'byung ba ma yin nam/ yum bris nas mchod pa sngon du 'gro bas 'jog pa 'di go ji ltar snyam pa'i dogs pa de ci'i phyir zhe na zhes bya bas bsu nas kau shi ka de ni 'di ltar zhes bya ba la sogs pa gsungs so//'di ltar zhes bya ba ni tshig gi phrad de gang gi phyir zhes bya ba'i don to/ /'di skad du shes rab kyi pha rol tu phyin pa bsam gtan gyi pha rol tu phyin pa rdzogs par bya ba'i phyir shes rab kyi pha rol du phyin pa bri ba la sogs pa la brtson pa nyid kyis de'i lus la mi ma yin pa dag mdangs nye bar bsgrub par bya'o snyam du sems par 'gyur ro zhes bya ba 'di ni gang gi phyir chos nyid yin pa de bas na mdangs bcug pa nyid kyi kha zas kyi bya ba byas pa nyid yin pa'i phyir 'di kha zas la brkam pa chung bar 'gyur ro zhes brjod pa yin no// rang dang gzhan mnyam pa nyid kyis rang dang gzhan gyi don gyi mos pa rnam pa dgu ste de ltar bstan nas gzhan gyi don gyi mos pa'i rnam pa chung ngu'i don gsungs pa ni/ shes rab kyi pha rol du phyin pa 'di bris te glegs bam du chud par byas te mchod pa sngon du 'gro bas 'jog cing mchod par byed cing 'dzin par mi byed 'chang bar mi byed ces bya ba la sogs pa'o//de bas na ste 'dzin pa la sogs pa mi byed pa de la ltos nas/ kau shi ka rigs kyi bu 'am rigs kyi bu mo 'di nyid ces bya ba 'chad par 'gyur ba'i gang zag yin pa 'di'o zhes bya ba'i don to/ /nye bar sdud pa ni kau shi ka rigs kyi bu 'am rigs kyi bu mo 'di nyid de bas zhes bya ba la sogs pa gsungs so//byang chub tu sems bskyed nas zhes bya ba la/ shes rab kyi pha rol du phyin pa'i skabs su 'dis ci zhig bya zhes brjod par ni mi bya ste/ gang gi phyir stong pa nyid dang snying rje'i snying po can gyi byang chub kyi sems nyid ni gtsor shes rab kyi pha rol du phyin pa yin no//lhag pa'i bsam pas mnyan par bya zhes bya ba ni thod pa la sogs pa bor la stan dma' ba la 'dug ste/ /rnam par g.yeng ba'i nyes pa bsal la thar bar 'dod pa'i bsam pas dam pa'i chos mnyan par bya'o/ / chung ngu na glegs bam du chud par byas te gzhag par bya'o zhes bya ba la/ /don 'di dang po kho na rang gi don la mos pa'i 'gres rtsom pa na gsungs zin pas yang ci'i phyir smos zhes bsam par mi bya ste/ gang gi phyir der ni rang gi don lhur len pa 'jog pa gsungs pa yin la 'dir ni gzhan gyi don lhur len pa'o zhes bya ba ni khyad par yin no//de ltar yang dam pa'i chos yun ring du gnas pa dang zhes bya ba la sogs pa de ma thag tu gsungs pa yin no/ /shes rab kyi pha rol du phyin pa'i bshad pa mngon par rtogs pa'i rgyan gyi snang ba las/ pha rol phyin pa dang / mchod rten la ri mor bya ba dang /gzhal du med pa'i yon tan 'dzin pa'i le'u ste gsum pa'o// //chung ngu'i 'bring gi dbang du mdzad nas kau shi ka gal te 'dzam bu'i gling 'di zhes bya ba la sogs pa gsungs te/ de bzhin gshegs pa'i sku gdung gis zhes bya ba ni byed pa po'i gsum pa ste/de rnams kyis zhes bya ba'i tha tshig go/ /byur bu zhes bya ba ni rtse mo'i mthar thug pa'i bar du byed pa'i phyir ro/ /yongs su bkang zhes bya ba ni sa'i cha thams cad khyab par byas pa'i phyir / /bstabs na zhes bya ba ni gang 'dod pa'i cha de long shig ces smras pa na'o/ / gzugs kyi sku khyad par can gyi de bzhin gshegs pa yongs su dor nas ci'i phyir shes rab kyi pha rol du phyin pa len pa'i dogs pa de ci'i slad du zhe na zhes bya bas bsu nas/ 'di lta ste zhes bya ba la sogs pa gsol to/ /gang gi phyir de bzhin gshegs pa'i tshul ni shes rab kyi pha rol du phyin pa la ri mor bgyi ba ste/gus pa'i khyad par yod pa de na shes rab kyi pha rol du phyin pa 'di nyid len to zhes snga ma dang sbyar ro/ /'di la ci'i phyir ri mo byed ce na/ 'di ni zhes bya ba la sogs pa gsol to/ /gang gi phyir 'di ni yang dag pa'i don gyi sku'o zhes bya ba don dam pa'i sku ste chos kyi sku yin la/de gtso cher ston pas na shes rab kyi pha rol du phyin pa la de skad ces bya'o/ /de bas na 'di nyid la ri mor bgyid do zhes 'dod do/ /gang zhig gsal bar byed pas shes rab kyi pha rol du phyin pa la ri mor byed pa/ chos kyi sku yang dag pa'i don gyi sku yin pa nyid ga las zhes bya ba'i dogs pa de ci'i slad du zhe na zhes bya bas bsu nas/bcom ldan 'das kyi zhes bya ba la sogs pa gsol to/ /gang gi phyir phyogs gzhan dag tu bcom ldan 'das kyis sangs rgyas bcom ldan 'das rnams ni sgyu ma lta bu gnyis su med pa'i ye shes kyi rang bzhin shes rab kyi pha rol du phyin pa'i bdag nyid can gyi chos kyi sku can yin te zhes gsungs pa 'dis ni dpe bstan pa yin no//'on te rang rig nyid kyis skad cig ma snga mar byung ba'i shes pa'i bdag nyid yongs su gcod pa kho na yin la/ phyis byung ba la yang 'di'i de ma thag tu ni 'di 'byung ngo zhes rig nas 'di ni rgyu dang 'bras bu yin no zhes rtogs te/de lta ma yin na mjug thogs nges pa mi rung ba 'am/ rung na yang ha cang thal ba'i nyes par 'gyur ba'i phyir ro/ /de bas na rgyu 'bras kyi dngos po'i rang bzhin du nges par byas pa'i phyir na sangs rgyas bcom ldan 'das rnams sgyu ma lta bu gnyis su med pa'i ye shes kyi bdag nyid ji ltar yin zhes 'dod na/de na mi rigs te/ gang gi phyir 'di'i mjug thogs su 'di yin no zhes bya ba rang rig pa'i shes pa las ni mi 'grub ste/ 'di'i yul ni brtags pa ma yin pa'i phyir ro/ / shes pa gzhan gyis 'grub par brtags pa yang rigs pa ma yin te/ rnam pa med pa dang / rnam pa dang bcas pas yongs su gcod pa mi rigs pa'i phyir ro/ /yongs su gcod na yang shes pa'i yul don gzhan yin par 'gyur na de ni khyed mi 'dod de gzung ba mi 'thad pa'i phyir ro/ / shes pa gnyis po de nyid kyis mjug thogs nges pa gcod pa yang ma yin te/ de gnyi ga yang 'gags pa'i phyir ro/ /'di snyam du rang rig pa nyid kyis shes pa snga ma 'dzin pa na 'bras bu la ltos nas rgyu'i bdag nyid can gyi de ma thag pa 'dzin pa yin la de bzhin du shes pa phyi pa 'dzin pa na yang 'bras bu'i bdag nyid can gyi de ma thag pa 'dzin pa yin te/rgyu dang 'bras bu'i bdag nyid can gyi de ma thag pa na rang bzhin tha mi dad pa nyid yin pa'i phyir ro snyam na/ de ni de lta ma yin te/ gang gi phyir bskyed par bya ba dang skyed par byed pa'i rang bzhin 'brel bar snang bas dngos po gnyis bzung na 'bras bu dang rgyu'i dngos por nges pa yin gyi/de ma thag tsam du bzung bas ni ma yin te/ gzhan du na bum pa bzung ba'i rjes thogs la snam bu bzung bar gyur pa na der gtogs pa'i de ma thag tsam yongs su bcad pas rgyu dang 'bras bu'i dngos por 'gyur ro//rnam par rtog pa med pa nyid kyis rang rig pa la ni sngon dang phyi mar gyur pa'i dngos po 'brel par snang ba'i 'dzin pa yang yod pa ma yin no/ /de bas na 'di'i rjes thogs la 'di 'byung ngo zhes bya ba'i yongs su gcod pa med pas rgyu dang 'bras bu'i dngos por nges par rig pa ma yin no//de nyid kyi phyir 'di'i rjes la 'di 'byung ngo zhes bya ba'i rnam par rtog pa yang skye bar mi 'gyur ro/ /nyams su myong ba'i nges pa med pa'i phyir skad cig ma nyid la sogs pa'i rnam par rtog pa bzhin no/ /kye dge slong dag mtshan dang dpe byad kyis 'bar ba 'di la ni sku dam pa yang dag pa'i sku rdul phra rab bsags pa'i rang bzhin bden pa nyid du ma 'dzin par zhes bya bas na sgrub par bya ba'i chos gsungs pa yin no//dge slong dag nga ni chos kyi skus yongs su rdzogs par te/ sgyu ma lta bu gnyis su med pa'i ye shes mngon sum du byas pa'i sgrub par byed pas yongs sa su rdzogs par ltos shig ces bya ba 'di ni gtan tshigs so//de bzhin gshegs pa'i sku 'di ni yang dag pa'i mthas rab tu phye ba de bzhin gshegs pa'i skur/ chos kyi skur yongs su rdzogs par byed pas rdzogs par byas pa yin te/ 'di lta ste shes rab kyi pha rol tu phyin pa'o zhes bya ba de'i rang bzhin te/'dis ni phyogs kyi chos nye bar bsdus byas so/ /'dis ni 'di skad du gang zhig sgyu ma lta bu'i gnyis su med pa'i ye shes sgom pa'i sgrub par byed pas yongs su rdzogs par byas pa de ni chos kyi sku yin te/ /dper na sngon gyi sangs rgyas bcom ldan 'das rnams kyi lta bu'o//de bzhin gshegs pa'i sku 'di yang ji skad du brjod pa'i ye shes sgom pa'i sgrub par byed pas yongs su rdzogs par byas pa yin no zhes rang bzhin gyis gtan tshigs rjod pa yin no/ /don ni shin tu lkog tu gyur pa nyid yin pas rnam pa dang bcas pa'i shes pa la sogs pas gzung bar mi nus pa nyid yin pa'i phyir gnyis su med pa'i ye shes rig pa'i mngon sum du grub ste//rmi lam la sogs pa'i shes pa dang 'dra bar don gyi rnam pas nye bar bsgyur bar bsgom par bya'o zhes bya bar gnas so/ /de yang brjod zin pa'i tshul gyis gcig dang du ma'i rang bzhin dang bral bas de kho na nyid du dngos po med pa nyid kyis na sgyu ma lta bu nyid du nges so//de bas na 'di yid kyis sgom pa'i stobs kyis gsal bar snang ba gang yin pa de nyid de bzhin gshegs pa nyid yin pas gtan tshigs ma grub pa ma yin no/ /mthun pa'i phyogs la yod pas 'gal ba yang ma yin te/sngon gyi sangs rgyas rnams kyi chos kyi sku khas len pa la 'di dper byas pa yin no/ /gzhan dag la yang chos kyi sku med na tshad ma'i gnod pa dang bral ba can ji skad du bshad pa'i ye shes sgom pa'i sgrub par byed pas yongs su rdzogs par byas pa dang bral ba'i phyir 'khor los sgyur ba la sogs pa dang 'dra bar phyin ci log dang ldan par thal bar 'gyur na/de bzhin gshegs pa ni phyin ci ma log par 'dod pa yin no zhes bya ba ni bzlog na gnod pa can gyi tshad ma yin no/ /rdul phra rab rnams mi 'thad pa'i phyir gtan tshigs ma nges pa nyid kyang ma yin no//de bas ni de bzhin gshegs pa'i gzugs kyi sku mtshan dang dpe byad 'bar ba dang ldan pa sems can skal ba can rnams kyis mthong ba 'di ni ston pa'i de kho na nyid kyi chos kyi sku ma yin mod kyi 'on kyang mchog tu dri ma med pa'i yon [(]ta [,]tan [)]mtha' yas pa'i tshogs dang ldan pa chos kyi sku'i dbang gis de rnams kyi rang gi shes pa de lta bu'i gzugs kyi sku'i rnam par so sor snang te/gang gis rang gi shes pa de bzhin gshegs par snang ba'i ngo bor mi shes pa dag 'di ni phyi rol gyi bcom ldan 'das yin no zhes ston pa'i blos rnam par rtog cing lta ba dang phyag 'tshal ba la sogs pas mngon par mtho ba dang nges par legs pa'i snod du 'gyur ba'i rim gyis log par so sor snang ba yin yang mi rtag pa la sogs pa'i rnam par rtog pa bzhin du dngos po dang 'brel bas rnam par rtog pa gcig tu brgyud pas phan pa'i rgyu nyid du 'gyur ba mthong ba kho na ste myur du ni ma yin no//gang gi phyir ji srid dngos po la mngon par zhen pas shes bya la shes pa kun tu 'byung bar 'gyur ba de srid du de ma yin la der 'dzin pas shes pa 'khrul pa de kho na mthong ba las thag ring ba yin no/ /de bas na ji ltar sgyu ma mkhan rnams rang gis sprul pa'i glang po che la sogs pa dngos po lta bur snang ba rnams la dngos po'i rang bzhin du mi rtogs pas mngon par zhen pa med pa de bzhin 'di dag ni bden pa nyid do zhes mngon par zhen par mi byed do//de bzhin du lan mang du thabs mang pos dus yun ring por theg pa chen po'i rang gi ngo bo lam bslabs pa'i las dang po par gyur pa/myur du de bzhin gshegs pa'i gnas skabs thob par 'dod pas kyang de bzhin gshegs pa'i dbang gis byung ba rang gi shes pa'i gzugs brnyan gzugs kyi sku'i de bzhin gshegs pa 'gro ba'i bla ma la mngon par zhen pa'i tshul gyis sgrub pa snying por gyur pas dad par bya'o//de nyid bstan pa ni bcom ldan 'das bdag ces bya ba la sogs pa gsol ba yin no/ /chung ngu'i chen po'i dbang du byas nas/ 'on kyang bcom ldan 'das zhes bya ba la sogs pa gsol to/ / 'on kyang zhes bya ba'i sgra ni tshig gi phrad de gang gi phyir zhes bya ba'i don la 'jug go/ /tha dad pa yin na yum la mchod pas de bzhin gshegs pa mchod pa ji ltar 'gyur snyam pa'i dogs pa de ci'i slad du zhe na zhes bya bas bsu nas/ de bzhin gshegs pa'i sku rnams shes rab kyi pha rol tu phyin pa las byung ba'i slad du'o zhes bya ba gsol to//'dir don gyi de kho na nyid ni 'di yin te/ gang gi phyir 'jig rten thams cad las mngon par 'phags pa'i sangs rgyas bcom ldan 'das kyi sku 'di lta bu ni shes rab kyi pha rol tu phyin pa las grub pa yin te/ de bas na mthu che ba nyid kyis mchod par bya ba yin pa'i phyir de bzhin gshegs pa skyed pa'i 'brel pas 'di la mchod nas tha dad pa yin yang de bzhin gshegs pa mchod pa yin no zhes bya ba yin no//gang la brten nas gang mchod par 'gyur ba de mchod na de nyid la mchod pa yin no zhes bya ba'i don 'di nyid dpe sngon du 'gro bas gsal bar byed pa ni/bcom ldan 'das 'di lta ste dper na gang gi tshe zhes bya ba la sogs pa gsol pa yin no/ /de la bdag chos bzangs lha'i 'dun sa zhes bya ba ni ri rab la gnas pa grong khyer blta na sdug gi phyi rol gyi lho nub na gnas pa ste/gang la 'jug nas lha rnams kyi bya ba dang bya ba ma yin pa sems pa'o/ /yang ci ltar na gzhan dag la gus pas gzhan la phyag 'tshal ba la sogs pa byed snyam pa'i dogs pa de ci'i slad du zhe na zhes bya bas bsu nas/ lha'i dbang po brgya byin stan 'di la zhes bya ba la sogs pa smras pa yin no zhes bya ba'i sgra ni rjes su dran pa la yin no//de dang 'brel pas stan la mchod na brgya byin la mchod pa yin no zhes so/ /dbang che bar grags pa rgyu dang rkyen du gyur pa zhes bya ba la/ rim pa ji lta ba bzhin nye bar len pa dang lhan cig byed pa'i rgyu'i dbye bas rgyu dang rkyen du gyur pa yang 'di yin la//mthu che ba nyid kyis dbang che bar grags pa yang yin pa de la de skad ces bya'o/ /sgrub par byed pa zhes bya ba ni skyed par byed pas so/ /de bzhin gshegs pa'i sku nyid gnas pa'i rgyu yin pa nyid kyis sangs rgyas skyed par byed pa nyid yin no snyam du 'ga' zhig dogs na de bzhin gshegs pa'i sku rnams ni zhes bya ba la sogs pa smras so//'di skad du thams cad mkhyen pa 'dzin pa nyid kyis de bzhin gshegs pa'i sku zhes brjod de/ /de bas na de ni sngon ma byung ba'i thams cad mkhyen pa skyed pa'i phyir rgyur gyur pa dang rkyen du gyur pa ni ma yin gyi/'on kyang grub zin pa dus phyis gnas pa'i rgyur gyur pas na rten du gyur pa yin no zhes brjod par 'gyur ro/ /thams cad mkhyen pa'i ye shes kyi rgyu can zhes bya ba ni de bzhin gshegs pa'i ye shes kyi rgyu can te/ shes rab kyi pha rol du phyin pa la mchod pas zhes bya ba ni lhag ma'o//nye bar bsdu ba'i don du de lta ba na bcom ldan 'das zhes bya ba la sogs pa gsol pa yin no/ /'bring gi chung ngu bstan pa'i phyir yang bcom ldan 'das 'dzam bu'i gling zhes bya ba la sogs pa smos pa yin no/ /'on kyang zhes bya ba la sogs pa gtan tshigs rjod pa ni don thal zin pa yin yang gnas skabs gzhan gyi dbang gis smras pas zlos pa'i nyes pa yod pa ma yin no//shes rab kyi pha rol du phyin pas yongs su bsgos pa nyid na / de bzhin gshegs pa'i sku rnams ni zhes bya ba la sogs pa smos pa yin no//bcom ldan 'das de lta bas na zhes bya ba la sogs pa nye bar bsdu ba yin no/ /'bring gi 'bring bstan pa'i phyir 'on kyang bcom ldan 'das zhes bya ba la sogs pa gsol te/ 'di las zhes bya ba ni phyin ci log dang bral ba'i shes rab kyi pha rol du phyin pa las mnyan pa la sogs pa'i rim gyis skyes pa'i phyir sku gdung mchod par 'os pa yin no zhes bya ba'i tha tshig go//de las skyes pa yin na yang ci'i phyir mchod pa brnyes she na/ 'di lta ste shes rab kyi pha rol du phyin pas yongs su bsgos pa'i phyir ro zhes bya ba smos te/ shin tu rnam par dag pa'i rgyu las yang dag par byung ba'i 'bras bu ni shin tu rnam par dag pas kho na skye ba yin no zhes bya bas gang gi phyir shes rab kyi pha rol du phyin pa mthu che ba nyid skyed pas de bzhin gshegs pa yongs su bsgos shing rnam pa thams cad du bsgos pa yin pa de'i phyir de las skyes pas mchod pa brnyes pa yin no//'di nyid dpes gsal bar bya ba'i phyir/ bcom ldan 'das 'di lta ste dper na rin thang ma mchis pa'i nor bu rin po che zhes bya ba'i phyir zhes bya ba la sogs pa gsol pa yin te/ de la phul du byung ba nyid yin pas na rin thang med de rin thang tshad med par 'os pa yin no//'di lta bu 'di dag dang zhes pa ni 'chad par 'gyur ba 'di lta bu dang ngo / /rgyas pa zhes bya ba ni bkang ba'o/ /tshar gcod do zhes bya ba ni zhan par byed pa'o/ /mi 'phel ba dang zhes bya ba ni rnam par 'phel bar mi byed pa'o/ /nye bar zhi bar bgyid ces bya ba ni rtsa nas 'byin pa'o//tsha bar gyur pa zhes bya ba ni gdungs par gyur pa'o/ /yongs su rgyas shing zhes bya ba ni khyab pa'o/ /gzir ba ni gdungs pa'o/ /mun pa mun nag ces bya ba ni mun nag thibs pa'o/ /gzung zhes bya ba ni bar snang la 'dzin pa'i phyir ro/ /bzhag pa zhes bya ba ni sa la bzhag pa'i phyir ro//zhan par byed pa'i phyir bcom pa'o/ /rnam pa thams cad du bsal bas ma mchis par gyur pa'o/ /de dag dang de lta bu'i ngo bo gzhan dag dang zhes bya ba la sogs pa la bshad ma thag pas de dag dang 'og nas 'chad pa de lta bu'i rang bzhin dag dang yang ldan pa yin no zhes bya ba'i tha tshig go//chu bur zhes bya ba ni mngon par 'phel bar 'gyur ba'i 'brum bu'o/ /rab rib ni nyams par byed par ro / /mig nad ni gzer ba la sogs pa'o/ /ling tog ni mthug par khebs pa nyid de kun tu spyod pa'i rang bzhin dang sa bon gyi gnas skabs su yod pa sel bas go rims bzhin du byang zhing zhi bar 'gyur ro zhes bya bar sbyar ro//de'i rang gi mdog gang yin zhe na/ gal te ras dkar pos dkris te zhes bya ba la sogs pa smos te/ /gzhan dag kyang rung ste zhes bya ba ni ljang gu la sogs pa'o/ /dkris sam bcings te zhes bya ba ni gos kyis kun nas yongs su dkris pa 'am de'i phyogs gcig tu bcings te zhes bya bar shes par bya'o//rnyog par gyur pa ni rdul mang ba ste/ de dag kyang dang bar 'gyur zhing 'og tu 'gro bar 'gyur ro/ /'dzam bu'i gling na mthu che bar grags pa zas gtsang ma la yang 'di lta bu'i rin po che med pas 'ga' zhig dpe 'di grub pa ma yin no snyam sems pa'i dogs pa bzlog par bya ba'i phyir kau shi ka ci nor bu rin po che de dag ces bya ba la sogs pa smras pa yin no//bsod nams shin tu khyad par 'phags pa yin pas 'phags pa kun dga' bo nor bu rin po che de dag ni zhes bya ba la sogs pa lan smras pa yin no//grangs dang mthu dag gis go rims bzhin du chung zhing phra la zhes bya ba gnyis smos pa yin no/ /nor bu rin po che de'i yon tan de dag gis zhes bya ba 'dir yongs su bsgos pa'i phyir zhes bya ba ni lhag ma'o//yongs su mya ngan las 'das kyang zhes bya ba'i kyang gi sgras ni bzhugs pa yang ngo / /rnam pa gzhan dag gis kyang shes rab kyi pha rol du phyin pa rgyud nyid du gyur pas mchod pa bstan par bya ba'i phyir bcom ldan 'das yang ji ltar zhes bya ba la sogs pa smos te/ sangs rgyas rnams kyis chos bstan pa/ /zhes bya ba ni gang gi phyir rnam par rtog pa rang gi rnam pa la phyi rol gyi rang bzhin du sgro btags nas 'jug pa'i phyir de ma yin la der 'dzin pas rang nyid ma rig pa'i rang bzhin yod na sgrib pa ma lus pa spangs pa mi srid pa de bas na rtag tu mnyam par gzhag pa'i sangs rgyas bcom ldan 'das rnams kyi shes rab kyi pha rol du phyin pa'i ye shes kyi mthus mos pa ji lta ba bzhin du skal ba dang ldan pa rnams la ma 'tshol bar rang rang gi shes pa'i snang ba nye bar skye ba ste/de bas rnam pa de lta bu'i rtogs pa'i rjes su 'brangs pas de rnams la bcom ldan 'das kyi bstan par rnam par gzhag go//des na dag pa 'jig rten pa'i shes pa sngon du mdzad nas thub pas 'di skad bstan to zhes bya ba la sogs pa ni/ gdul bya'i skye bo la phan pa'i bsam pas la lar sdud par byed pa rnams kyis rjod pa yin no//de bas ni ji ltar gdul bya'i shes pa sgrar snang ba'i rang bzhin nyid yin pas bstan pa nyan pa po'i skye bo dang 'brel pa yin yang shes rab kyi pha rol du phyin pa'i ye shes kyi bdag po las skyes pa'i phyir/ sangs rgyas rnams kyis chos bstan pa yin no zhes bya ba'i don to//'bring gi chen po bstan par bya ba'i phyir bcom ldan 'das dper na rgyal po'i skyes bu ni zhes bya ba la sogs pa smos te/ sus kyang mi 'jigs par zhes bya ba ni/ 'di la gang las kyang 'jigs pa med pa'i phyir de skad ces brjod do//chos kyi sku'i mthus zhes bya ba ni chos kyi dbyings kyi rgyu mthun pa shes rab kyi pha rol du phyin pa'i mthus zhes bya ba'i don to/ /chen po'i chung ngu bstan pa'i phyir bcom ldan 'das de lta bas na stong gsum gyi stong chen po'i 'jig rten gyi khams zhes bya ba la sogs pa smos pa yin no//chen po'i 'bring bstan pa'i phyir gzhan yang bcom ldan 'das 'jig rten gyi khams gzhal du ma mchis pa dag na zhes bya ba la sogs pa smos pa yin no/ /rang dang gzhan dang gnyi ga'i don gyi phun sum tshogs pa'i dbye bas go rims bzhin du bzhugs te 'tsho zhing gzhes pa zhes bya ba'i tshig gsum dang sbyar bar bya'o//yang na chos kyi skus 'khor ba ji srid par bzhugs pa'i phyir bzhugs te'o/ /longs spyod rdzogs pa'i skus byang chub sems dpa' rnams kyi don yang dag par 'dzin pa'i phyir 'tsho zhing zhes bya'o//sprul pa'i skus nyin zhag ji snyed cig bzhugs pa'i phyir gzhes pa'o/ /shes rab kyi pha rol du phyin pa la spyad par bya'o zhes bya ba la sogs pa ni/ sbyor ba la sogs pa'i gnas skabs kyi dbye bas smras pa ste/ snga ma bzhin du rjes su snang ba kau shi ka de de bzhin no de de bzhin te zhes gsungs nas/yum gyi che ba'i bdag nyid bstan pa'i phyir kau shi ka 'das pa'i dus na zhes bya ba la sogs pa yin no/ /chen po'i chen po bstan pa'i phyir bcom ldan 'das 'di lta ste zhes bya ba la sogs pa gsol te/ chen po nyid gzhung gzugs pa'i phyir bcom ldan 'das de bzhin gshegs pa zhes bya ba la sogs pa gsol to//'di skad du gang gi phyir bcom ldan 'das kyis sbyor ba'i gnas skabs su sems can thams cad kyi sems kyi spyod pa rab tu mkhyen cing 'jug gi gnas skabs su yang dag par gzigs pa de bas na 'di ni chen po nyid yin no zhes rjod pa yin no//de nyid gzhung gzugs pa'i don du gsungs pa ni kau shi ka 'di ltar zhes bya ba la sogs pa'o/ /yun ring po zhes bya ba dus ring por ro/ /shes rab kyi pha rol du phyin pa la spyad na zhes gsungs pas gzhan rnam par gcod do snyam du bsam pas bcom ldan 'das ci zhes bya ba la sogs pa gsol to//gzhan dag la zhes bya ba ni sbyin pa la sogs pa'i bdag nyid can rnams la'o/ /thams cad la bslab pa nyid ni kau shi ka byang chub sems dpa' zhes bya ba la sogs pa gsungs pa yin te/re ba med pa'i sbyin pa dang / /yang srid mi 'dod tshul khrims dang / /thams cad la ni bzod pa dang / /yon tan kun 'byung brtson 'grus dang / /de bzhin bsam gtan gzugs med min/ /shes rab thabs dang ldan pa ni/ /pha rol phyin pa drug po la//bstan pa rnams kyis yang dag sbyor/ /zhes bshad pas yang dag pa'i sbyor ba 'dis byang chub sems dpa' thams cad la spyad par bya'o zhes bya ba'i tha tshig go/ /'o na shes rab kyi pha rol tu phyin pa zhes ci'i phyir gsungs she na/ 'on kyang kau shi ka zhes bya ba la sogs pa gsungs so//ji ltar sngon du 'gro ba de ltar sngar bshad pa nyid yin no/ /'di nyid bstan pa'i phyir/ sbyin pa sbyin par byed pa dang / /zhes bya ba la sogs pa gsungs pa yin te/ rnam par blta ba'i zhes bya ba ni sgom pa'o/ /nye bar bsags pa'i phyir kau shi ka zhes bya ba la sogs pa gsungs te/shes rab kyi pha rol du phyin pas yongs su bsgos pa zhes bya ba ni 'khor gsum yongs su dag pas yongs su bsgoms pa rnams so/ /thams cad mkhyen pa nyid du yongs su bsngos pa zhes bya ba ni de bzhin gshegs pa nyid du bstabs pa rnams so//pha rol du phyin pa ma yin pa rnam par gcad pa'i phyir pha rol du phyin pa'i rang bzhin du bye brag med cing zhes snga ma dang sbyar ro/ /pha rol du phyin pa'i sgras brjod pas tha dad du bya ba med do/ /kha dog tha dad pa ni sngon po dang ser po la sogs pa'i dbye bas so//dbyibs tha dad pa ni mnyam pa dang mi mnyam pa la sogs pa'i tshul gyis so/ /chu zheng phun sum tshogs pa tha dad kyang zhes bya ba la chu ni dpangs su'o/ /zheng ni 'khor zlum mo/ /grib ma'i bye brag zhes bya ba ni de'i rang bzhin ma yin pa las ldog pas so/ /de nyid du sgra gcig gis brjod pa'i phyir tha dad du bya ba mi mngon no//de nyid ni gzhan du na grib ma zhes bya ba la sogs pa gsungs pa yin te/ grangs su zhes bya ba ni tha snyad du'o/ /mos pa yid la byed pa gsum char nye bar bsdu bar bya ba'i phyir bcom ldan 'das shes rab kyi pha rol du phyin pa 'di ni zhes bya ba la sogs pa gsol te/rang gi don la mos pa'i phan yon mang po skyed pas na phan yon chen po dang ldan no zhes bya ba yin no/ /rang dang gzhan gyi don la mos pa grangs dang tshad kyi yul ma yin pa dang ldan pas gzhal du ma mchis pa'i yon tan dang ldan pa yin no//gzhan gyi don la mos pa sems can gyi khams mthar thug pa med pa'i ched du 'byung bas na mu ma mchis pa'i yon tan dang ldan pa yin no/ / mos pa rang gi don dang ni/ /rang gzhan don dang gzhan don dang / /rnam gsum shes bya de yang ni/ /chung dang 'bring dang chen po ste//so sor rnam pa gsum du 'dod/ /chung ngu'i chung sogs dbye ba yis/ /de yang rnam gsum de ltar na/ /rnam pa nyi shu bdun du 'dod/ /ces gsungs pa yin no/ /ji skad du gsungs pa'i gzhung rgyas pa'i rim gyis phan yon gong nas gong du ston pa lhur byed pa tshig gzhan du ston pas ni mos pa yid la byed pa 'di thams cad dang ldan pa kho na'o//rang gi don gyi mos pa'i rnam pa chung ngu'i chung ngu la sogs pa gnyen po'i phyogs kyi bdag nyid thams cad la yang chen po'i chen po la sogs pa mi mthun pa'i phyogs su don gyis bstan pa yin no//rang gi don gyi mos par ni gzhan gyi don gyi phyed du bya ba tsam yin la/ /gnyis par ni sbyor ba bar dang bcas pa dang / gsum par ni bar med pa yin par rtogs par bya'o/ /de lta ma yin te phan yon tsam zhig brjod par khas len na//phan yon ji snyed srid pa de snyed cig car kho na brjod par 'gyur ba'i phyir gzhung rgya chen po don med par 'gyur ro zhes bya ba ni sngon gyi slob dpon rnams kyi yin no/ /shes rab kyi pha rol du phyin pa'i bshad pa mngon par rtogs pa'i rgyan gyi snang ba las/ yon tan yongs su brjod pa'i le'u ste bzhi pa'o// //ji ltar mos pa bzhin du mthong ba'i chos kyi mtshan nyid kyi shes rab kyi pha rol du phyin pa de la zhugs pa'i mos pa yid la byed pa dgu'i gnas skabs dang po dang gnyis pa dang gsum pa sgom par byed pa'i byang chub sems dpa' la go rims bzhin du spro ba bskyed par bya ba'i phyir so so la rnam pa dgus gong du mngon par dga' bar byed pa bstod pa dang bkur ba dang bsngags pa sangs rgyas la sogs pa rnams kyi mdzad pa yin pas mos pa yid la byed pa'i 'og tu dang po bstod pa tsam bstan pa de nas bcom ldan 'das la lha rnams kyi dbang po brgya byin gyis zhes bya ba la sogs pa smos pa yin te/mi gtang ngo zhes bya ba ni dor zhing btang ba dang bsam pas mi 'dor ba'i phyir ro/ /bsrung bar bya'o zhes bya ba ni phyi rol gyi sa dang chu la sogs pa'i 'tshe ba zlog pa'i phyir ro/ /sba bar bya'o zhes bya ba ni nang gi bdag nyid can yi ge la sogs pa nyams pa bsal ba'i phyir ro//lhag par mos shing zhes bya ba ni yongs su mi gtang ba'i blos bdag gir byas pas so/ /don du gnyer zhing zhes bya ba ni sbyor ba las so/ /'dun pas zhes bya ba ni bsam pas so//sbyin zhing zhes bya ba ni gzhung dang don gyi rang bzhin 'bras bu dang bcas pa bdog pa thams cad ster ba'i phyir ro/ /'di nyid sbyor ba dang dngos gzhi dang mjug gi gnas skabs kyi dbye bas sam/ sbyin par bya ba dang sbyin pa po dang len pa po mi dmigs pa'i dbye bas/go rims bzhin du bstan pa'i phyir stobs shing 'bul la yongs su gtong na zhes bya ba tshig gsum smos pa yin no/ /de nyid tshig gis bstan par bya ba'i phyir kau shi ka de'i phyir zhes bya ba la sogs pa gsungs te/ sku la zhes bya ba ni sku gzugs la sogs pa la'o// 'ged par byed pa ni dus de srid cig nyid du sbyin pa'i phyir ro/ /'di gnyis kyi nang nas snying brtse ba sngon du 'gro ba dang / sbyin pa'i bsam pa lhag pas gang gi bkur sti la sogs pa sngon du 'gro bas de bzhin gshegs pa'i sku sbyin par byed pa gang yin pa de ni bsod nams che'o zhes bya ba'i don to //da ni de nyid tshig gi lan btab pa ni kau shi ka de de bzhin no zhes bya ba la sogs pa gsungs pa yin no/ /gnyis pa ni kau shi ka gzhan yang rigs kyi bu 'am rigs kyi bu mo gang dag ces bya ba gsungs so/ /snod du gyur pa zhes bya ba ni dad pa'i dbang po la sogs pa shin tu gsal ba dang ldan pas skal ba can yin pa'i phyir ro//ga na 'dug pa zhes bya ba ni yul ma ga d+hA la sogs pa gang na gnas pa'o/ /de bas na zhes bya ba ni ma song bar ster ba lngar bshad pa'i gang zag las zhes bya ba'i tha tshig go/ / gsum pa ni kau shi ka gzhan yang rigs kyi bu 'am rigs kyi bu mo gang gis 'dzam+bu'i gling zhes bya ba la sogs pa gsungs pa yin te/ yang dag par bkod cing zhes bya ba ni yang dag par 'dzin pa'i phyir 'bad par byed pas so/ /gzhan nas zhes bya ba ni bzung ba rnams ni bstan par bya ba'i phyir ro//de bas zhes bya ba ni 'das ma thag pa'i don byed pa'i gang zag pas so/ /snyom las med par zhes bya ba ni le lo med pas so/ /sgrub cing zhes bya ba ni rang nyid sgrub pa nyams su len pa yin pa'i phyir ro/ /brtson pas zhes bya ba spro ba dang ldan par byed pa'o/ /de la zhes bya ba ni sems bskyed pa'i byang chub sems dpa' la'o//'dzin du 'jug pa dang zhes bya ba mdor bsdus nas gzhung dang don bslab pa'i phyir te/ shes rab kyi pha rol tu phyin pa 'di zhes snga ma dang sbyar ro/ /yang dag par ston pa dang zhes bya ba ni/ mi shes pa dang the tshom dang log pa'i shes pa dang ldan pas rmongs pa rnams la don yang dag par ston pa'i phyir ro//yang dag par 'god pa ni le lo can dang 'dun pa med pa dang rnam par g.yeng ba dang ldan pas bag med pa rnams dge ba'i don la 'jug par byed pa'i phyir ro/ /yang dag par gzengs stod pa dang zhes bya ba ni dman pa la mos pa dang /bdag nyid nus pa med pas brnyas pa dang / 'gyod pa dang / bya ba mang bas 'jigs pa dang ldan pas kun du zhum pa rnams la khyad par can gyi brtson 'grus kyi phan yon ston pas gzengs stod par byed pa'o/ /yang dag par rab tu dga' bar byed pa ni phyin ci ma log pa dang mnyam pa dang chog mi shes pa'i brtson 'grus sgrub pa dang ldan pas yang dag par zhugs pa rnams la yang dag pa'i yon tan rnams kyis mngon par dga' bar byed pa'i phyir ro//tshig gis mtshon pa dang zhes bya ba ni rang dbang du byed pa'i phyir tshig gis rjes su ston cing shes rab kyi pha rol tu phyin pa ston par thob par byed pa'o//de la yang shes bzhin gyis yang dag par mtshon pa nyid kyis bying ba dang rgod pa'i nyes pa sel bas ni rim pa ji lta ba bzhin du rnam par mtshon pa dang rjes su mtshon par byed pa yin no//don zhes bya ba ni 'bras bu'i phan yon no/ /khyed tshur shog ces bya ba ni khyed tshur shog ces bod pa'o/ /byang chub sems dpa'i lam zhes bya ba ni shes rab kyi pha rol tu phyin pa'o/ /bslabs shing spyad de 'bad na zhes bya ba ni go rims bzhin du go cha dang / sbyor ba dang /mi ldog pa'i brtson 'grus kyi dbye bas tshig gsum gsungs pa yin no/ /phung po yang dag par zad pa zhes bya ba ni dri ma dang bcas pa'i phung po med pa'i chos kyi sku zhes bya ba'i tha tshig go/ /de ltar zhes bya ba ni bshad ma thag pa'i tshul gyis so/ /mi shes pa dang log par shes pa sel bas sems rnam par sbyong bar byed pa'o//som nyi'i sems sel bas na the tshom med par byed pa'o/ /yang kau shi ka 'dzam bu'i gling gi sems can thams cad ces bya ba dang / /de bzhin du gling bzhi pa'i 'jig rten gyi khams dang / stong spyi phud kyi 'jig rten gyi khams dang /stong gnyis pa bar ma'i 'jig rten gyi khams zhes bya ba'i 'gres bzhis ni go rims bzhin du bstod pa tsam bzhi pa dang / lnga pa dang / drug pa dang / bdun pa bstan pa yin no/ /'on kyang thams cad la bkod cing bzhag nas zhes mthar bstan pa'i rjes thogs su sngar brjod pa'i 'grel las kau shi ka de ji snyam du sems zhes bya ba la sogs pa nas bsod nams mang du bskyed do zhes bya ba rjes su 'jug par bya'o//bstod pa tsam brgyad pa ni kau shi ka stong gsum gyi stong chen po'i 'jig rten gyi khams can lta zhog zhes bya ba la sogs pa yin te/kau shi ka de bas kyang zhes bya ba ni dge ba bcu'i las kyi lam la yang dag par bkod cing bzhag pa bas zhes bya ba'i tha tshig go/ /bstod pa tsam dgu pa ni kau shi ka gzhan yang zhes bya ba la sogs pa nas ji srid du gang gA'i klung gi bye ma snyed du stong gsum gyi stong chen po'i 'jig rten gyi khams kyi sems can rnams bsam gtan bzhi la bkod pa las bsod nams lhag pa ston pas gsungs pa yin no//bkur pa tsam dang po gzhan yang kau shi ka 'dzam bu'i gling na sems can ji snyed yod pa zhes bya ba la sogs pa gsungs pa yin no//gling chen po bzhi pa dang / stong spyi phud dang / stong gnyis dang / stong gsum gyi 'jig rten gyi khams kyi sems can thams cad bsam gtan dang / tshad med pa dang gzugs med pa'i snyoms par 'jug pa dang mngon par shes pa dag la bkod pa zhes bya ba'i 'gres bzhis go rims bzhin du bkur ba tsam gnyis pa dang /gsum pa dang / bzhi pa dang / lnga pa bstan pa yin no/ /'gres bzhi po thams cad la yang bkod pa zhes bya ba'i tshig gi rjes thogs la sngar gyi 'gres las kau shi ka de ji snyam du sems zhes bya ba nas brtsams te/yang dag pa'i mthar rab tu 'byed pa la bkod par 'gyur ro zhes smra zhing de ltar de'i sems rnam par sbyong zhing the tshom med par byed pa'o zhes bya ba 'di'i rjes su 'jug par bya'o/ /bkur pa tsam drug pa ni yang kau shi ka stong gsum gyi stong chen po'i 'jig rten gyi khams kyi zhes bya ba la sogs pa gsungs pa yin no//bkur pa tsam bdun pa ni kau shi ka gzhan yang zhes bya ba la sogs pa gsungs pa yin no/ /bkur pa tsam brgyad pa ni kau shi ka gzhan yang zhes bya ba la sogs pa gsungs pa yin te/ don la mkhas pas zhes bya ba ni don rtogs pa la rnam par mkhas pa'i phyir te/rten cing 'brel 'byung gang yin pa/ /de nyid khyod ni stong par bzhed/ /chos kyi dbyings las ma gtogs par/ /'di ltar chos yod ma yin te/ /zhes gsungs pas tshig don dang bcas pa khong du chud pa nyid ni shes rab kyi pha rol tu phyin pa yin no//ci'i phyir bstan par bya snyam pa'i dogs pas gsol pa ni bcom ldan 'das shes rab kyi pha rol tu phyin pa 'di yang bstan par bgyi ba lags sam zhes bya ba'o/ /dngos po'i rang bzhin ni stong pa nyid du mngon par mi shes pa la bstan par bya'o zhes gsungs pa ni kau shi ka rigs kyi bu 'am zhes bya ba la sogs pa'o//dngos po rtogs na de'i rang bzhin stong pa nyid mi rtogs par ji ltar 'gyur snyam pa'i dogs pa de ci'i phyir zhe na zhes bya bas bsu nas/ kau shi ka ma 'ongs pa'i dus na zhes bya ba la sogs pa gsungs so//'di skad du gang gi phyir ma 'ongs pa'i dus na 'dra ba'i don gyis na shes rab kyi pha rol tu phyin pa'i gzugs brnyan 'byung bar 'gyur ba de bas na de thos nas log par bstan bcos nas goms pas rtogs bzhin pa'i dngos po sgyu ma lta bu'i rang bzhin yin pa bsgribs shing ma rtogs pa'i phyir byang chub sems dpa' bla na med pa yang dag par rdzogs pa'i byang chub don du gnyer bas yang dag pa'i shes rab kyi pha rol tu phyin pa ma rtogs na mngon par 'dod pa'i don las nyams pas chud zos par gyur na mi rung ba de bas na de bstan par bya ba yin no zhes brjod pa yin no//gang gis de'i rgyu dang rang bzhin spangs pas spong bar 'gyur ba de rgyu dang rang bzhin ji lta bu dang ldan pa yin zhes gsol pa ni bcom ldan 'das zhes bya ba la sogs pa'o/ /shes rab kyi pha rol tu phyin pa'i gzugs brnyan zhes bya ba ni slob dpon phyogs kyi glang pos/skabs kyi don dang mi mthun pas/ /gang yang don gzhan la rtog pa/ /shes rab pha rol phyin smra ba/ /de ni gzugs brnyan zhes bya'o / /zhes bshad do/ /dge slong kha cig ces bya ba ni theg pa chen po pa kho na las rnam par shes pa tsam du smra ba zhes bya ba'i tha tshig go//lus ma goms pas zhes bya ba ni gcig dang du ma'i rang bzhin dang bral bas rang bzhin med pa nyid du goms par ma byas pa'i rnam par shes pa'i tshogs drug yul dang bcas pa'i rang bzhin can nyid kyis na lus ma bsgoms pa'o/ / de nyid bstan par bya ba'i phyir tshul khrims ma bsgoms pa zhes bya ba la sogs pa gsungs te/ tshig 'di gsum gyis go [(]rims [,]rim [)]bzhin du lhag pa'i tshul khrims dang / lhag pa'i sems dang / lhag pa'i shes rab kyi bslab pa gsum dang bral ba nyid du gsungs pa yin no//de dag gis don nges par bya ba'i phyir dang / shes rab 'chal pa zhes bya ba la sogs gsungs pa yin te/ gang gi phyir mi shes pa dang ldan pas shes rab 'chal pa'o/ /som nyi'i shes rab can yin pas lug ltar lkugs pa'i rang bzhin can no/ / log pa'i shes pas shes rab yongs su mnyam pa'o/ /gzugs 'jig pa ni gzugs mi rtag pa nyid do zhes bya ba ni kun brtags pa'i gzugs med pa'i 'jig pa ni gzugs mi rtag pa nyid do/ /rnam par brtags pa'i gzugs kyi mtshan nyid skad cig ma phan chad mi gnas pa'i 'jig pa ni gzugs mi rtag pa nyid do//chos nyid kyi bdag nyid can gyi gzugs kyi kun brtags pa'i gzugs dang bral ba nyid kyi 'jig pa ni gzugs mi rtag pa nyid de/ shes rab kyi pha rol tu phyin pa yin no zhes nye bar ston to/ /don gsum po 'di dag ni zlos pa'i tshul gyis blta bar bya'o//log pa'i shes pa bcom pa ni nyid kyis bdag nyid kyis bdag nyid stod par byed do zhes gsungs pa ni 'di skad du gang de ltar ston pa dang de ltar tshol ba de ni shes rab kyi pha rol tu phyin pa la spyod par 'gyur te zhes kyang nye bar ston to zhes bya ba'o//ji skad du smras pa'i bshad pa ni chos dang chos can rnam par ma gsal bas phyin ci log tu dngos po la mngon par zhen pas grol bar mi 'gyur ro zhes bya ba'i dgongs pa dang ldan pas yang kau shi ka gzugs 'jig pa gzugs mi rtag pa nyid du mi blta'o zhes bya ba la sogs pa gsungs so//'on kyang gzugs la sogs pa sgyu ma lta bu'i rang bzhin nyid kyi shes rab kyi pha rol tu phyin pa ni/ dngos po dang dngos po med pa la sogs par phyin ci log tu mngon par zhen pa'i rtsa ba can/ nyon mongs pa dang shes bya'i sgrib pa bag chags dang bcas par yang dag par spong ba'i rgyu yin pa nyid kyi de bzhin gshegs pa nyid kyi go 'phang thob par byed pa'i phyir bsgrub par bya ba yin no zhes bya bar dgongs so//bkur ba tsam dgu pa ni gzhan yang kau shi ka rigs kyi bu 'am rigs kyi bu mo 'dzam bu'i gling zhes bya ba nas brtsams nas ji srid du gang gA'i klung gi bye ma snyed kyi 'jig rten gyi khams na sems can ji snyed yod pa de dag thams cad rgyun tu zhugs pa'i 'bras bu la 'god par byed pa la bsod nams mang du skyed pa nyid du bstan pas gsungs pa yin no//rgyun tu zhugs pa'i 'bras bu la bkod pa ni zag pa med pa'i dbyings la gzhag pa yin la/mngon par dad pa la sogs pa sngon du 'gro bas shes rab kyi pha rol tu phyin pa'i glegs bam sbyin pa dang de yang dag par ston pa la sogs pa ni zag pa dang bcas pa ma yin nam/ ji ltar na don byed pa snga ma bas phyi ma bsod nams mang po skyed pa yin snyam pa'i dogs pa de ci'i phyir zhe na zhes bya bas bsu nas/kau shi ka 'di las rgyun tu zhugs pa'i 'bras bu rab tu byed do zhes bya ba la sogs pa gsungs so/ /'di skad du gang gi phyir rgya che zhing dri ma med la mtha' yas pa'i yon tan gyi tshogs dang ldan pa de bzhin gshegs pa nyid la sogs pa 'phags pa'i chos thams cad kyi rgyu ni rgyal ba'i yum nyid yin pas rgyun tu zhugs pa'i 'bras bu shes rab kyi pha rol tu phyin pa 'di las 'byung ba ni shin tu yang gsal ba yin pa de'i phyir 'di'i glegs bam byin pa la sogs pa ni rgyu ma tshang ba med pa'i rang bzhin nyid yin pas rgyun tu zhugs pa'i 'bras bu dang gzhan mchog tu khyad par du 'phags pa'i rang bzhin sangs rgyas nyid la sogs pa 'byin pa yin pa'i phyir bsod nams ches mang ba yin no zhes brjod pa yin no//bsngags pa tsam dang po ni gzhan yang kau shi ka rigs kyi bu 'am rigs kyi bu mo gang gis 'dzam bu'i gling gi sems can ji snyed yod pa de dag thams cad lan cig phyir 'ong ba'i 'bras bu la bkod na zhes bya ba la sogs pa gsungs pa yin no//snga ma bzhin de'i phyir zhe na zhes rtogs pa de bzhin du lan thob pa ni kau shi ka 'di las lan cig phyir 'ong ba'i zhes bya ba la sogs pa gsungs so//gnyis pa ni gzhan yang kau shi ka 'dzam bu'i gling gi sems can thams cad phyir mi 'ong ba'i 'bras bu la bkod na zhes bya ba la sogs pa gsungs pa yin no/ /sngar bshad pa'i dgongs pa nyid kyis de ci'i phyir zhe na zhes rtogs pa la/ de bzhin du lan btab pa la kau shi ka 'di las phyir mi 'ong ba'i 'bras bu zhes bya ba la sogs pa gsungs pa yin no//gsum pa ni gzhan yang kau shi ka 'dzam bu'i gling gi sems can ji snyed yod pa de dag thams cad rigs kyi bu'am rigs kyi bu mo gang la la zhig gis dgra bcom pa nyid la bkod na zhes bya ba la sogs pa gsungs pa yin no//'di skad du smras pa'i rnam pas de ci'i phyir zhe na zhes dgongs pa la snga ma bzhin du kau shi ka 'di las dgra bcom pa nyid ces bya ba la sogs pa gsungs pa yin no/ /bzhi pa ni gzhan yang kau shi ka 'dzam bu'i gling gi sems can thams cad rigs kyi bu 'am rigs kyi bu mo gang la la zhig gis rang sangs rgyas nyid la bkod na zhes bya ba la sogs pa gsungs pa yin no//ji skad du brjod pa'i tshul du de ci'i phyir zhe na zhes dgongs pa la de bzhin du kau shi ka rang sangs rgyas nyid ces bya ba la sogs pa gsungs pa yin no//lnga pa ni yang kau shi ka 'dzam bu'i gling gi sems can thams cad rigs kyi bu 'am rigs kyi bu mo gang la la zhig gis bla na med pa yang dag par rdzogs pa'i byang chub tu sems bskyed du bcug pa dang zhes bya ba la sogs pa gsungs pa yin te/ nye bar gtad na zhes bya ba ni byin pa'o//bsam pa gang gis she na shes rab kyi pha rol tu phyin pa 'di la zhes bya ba la sogs pa gsungs te/ sbyor ba'i lam gyis shes rab kyi pha rol tu phyin pa sgom pa dang / mthong ba'i lam gyis 'phel ba dang / bsgom pa'i lam gyis rgyas pa dang / byang chub sems dpa'i khyad par gyi lam gyis spang bar 'gyur ro//de bzhin gshegs pa'i sa yongs su rdzogs par 'gyur ba ni sangs rgyas kyi chos rnams yongs su rdzogs par byed par 'gyur ro/ /don gyi dbye bas gsungs pa yin no/ /snga ma de bas zhes bya ba ni gang la la zhig gis byang chub tu sems bskyed du bcug pa dang gang gzhan byang chub tu sems bskyed du bcug nas glegs bam sbyin par byed pa'i gang zag de gnyis las zhes bya ba'i tha tshig go//byang chub kyi sems bskyed pa sngon du 'gro bas glegs bam sbyin par byed pa ma yin nam/ glegs bam 'ba' zhig sbyin par byed pa ji ltar bsod nams che ba yin snyam nas/de ci'i phyir zhe na zhes dogs pa la/ 'di ni nges pa kho nar zhes bya ba la sogs pa gsungs pa yin te/ 'di ni nges pa ste gdon mi za bar mi ldog pa yin no zhes bya ba'i tha tshig go/ /'di skad du gang gi phyir byang chub sems dpa'i phyir mi ldog par nges par mngon par rdzogs par sangs rgyas nas sems can rnams kyi sdug bsngal mthar phyin par byed pa nyid yin pas bsod nams kyi zhing khyad par can yin no//de bas na glegs bam byin pa ni bsod nams ches mang ba yin gyi/ byang chub kyi sems bskyed pa sngon du 'gro ba can gyi rigs ma nges pa'i gang zag la glegs bam byin pa ni de lta ma yin no zhes brjod pa yin no//drug pa ni yang kau shi ka 'dzam bu'i gling gi sems can zhes bya ba la sogs pa gsungs pa yin te/ 'gres 'di'i zhabs su bla na med pa yang dag par rdzogs pa'i byang chub tu sems bskyed pa dang zhes bya ba'i 'og tu kau shi ka rigs kyi bu 'am rigs kyi bu mo gang gis zhes bya ba la sogs pa'i gzhung sngar gsungs pa nyid rjes su bzla bar bya'o//bdun pa ni yang kau shi ka gling chen po bzhi pa'i 'jig rten gyi khams zhes bya ba la sogs pa gsungs pa yin te/'dir yang de bzhin du 'gres kyi zhabs su gzhung rjes su bzlas par bya'o/ /brgyad pa ni yang kau shi ka stong spyi phud kyi 'jig rten gyi khams zhes bya ba la sogs pa gsungs pa yin te/ de ltar lhag par zhes bya ba ni ches lhag pa'i bsam pas zhes bya ba'i tha tshig go//de ci'i phyir zhe na zhes bya ba 'dir yang zhus pa dang lan gyi don snga ma bzhin du brjod par bya'o/ /bsngags pa tsam dgu pa ni kau shi ka gzhan yang 'dzam+bu'i gling gi sems can ji snyed yod pa de dag thams cad ces bya ba la sogs pa gsungs pa yin no//mngon par rdzogs par sangs rgyas nas gzhan gyi don byed pa yin pa'i phyir mngon par shes pa shin tu myur ba'i phyir byang chub sems dpa' la gdams pa dang rjes su bstan pas bsod nams ches mang ba 'ba' zhig tu ni ma zad kyi 'on kyang mngon par rdzogs par sangs rgyas kyang sems can gyi don byed do zhes bstan par bya ba'i phyir/bcom ldan 'das byang chub sems dpa' sems dpa' chen po ji lta ji ltar zhes bya ba la sogs pa gsol to/ /de la gos zhes bya ba ni chos gos so/ /bsod snyoms ni snum khur la sogs pa'o//mal cha ni stan nang tshangs can la sogs pa'o/ /stan ni khri stan la sogs pa'o/ /bro 'tshal ba ni nad kyis gdungs pa'o/ /gso sman ni de bsal ba dang rjes su mthun pa ni sman a ru ra la sogs pa'o/ /yo byad rnams ni chu tshags la sogs pa'o/ /de bya ba byas pa de dag ces bya ba ni gos la sogs pa byin pa rnams zhes bya ba'i tha tshig go//'bras bu chen por bgyid ces bya ba ni 'phral du mthong ba'i 'bras bu bskyed par nus pa'i phyir ro/ /phan yon chen por bgyid de zhes bya ba ni skye ba gzhan du 'bras bu smin par byed pa'i phyir ro zhes snga ma rnams dang sbyar te/de bzhin gshegs pa rnams dang byang chub sems dpa' rnams ni sbyin gnas kyi mchog nyid du khyad par med pa'i phyir ro zhes bya bar bsams pa'o/ /'di ga las shes she na/ gang gi phyir las byed kyi bu tsun da'i bsod snyoms la yongs su longs spyod par mdzad nas bcom ldan 'das yongs su mya ngan las 'das pa'i dus bcom ldan 'das nyid kyi lung las/rgyu 'dis las byed kyi bu tsun da 'gyod par gyur na mi rung bas kun dga' bo khyod kyis las byed kyi bu tsun da'i 'gyod pa de bsal bar bya'o/ /de las 'di skad du bsod snyoms yongs su longs spyod par mdzad nas/de bzhin gshegs pa bla na med pa yang dag par rdzogs pa'i byang chub tu mngon par rdzogs par sangs rgyas pa dang bsod snyoms gang la yongs su longs spyod pa mdzad nas phung po lhag ma med pa'i mya ngan las 'das pa'i dbyings su yongs su mya ngan las 'das pa'i bsod snyoms gnyis po 'di dag ni 'bras bu mi mnyam par mnyam pa rnam par smin pa mi mnyam par mnyam pa'o zhes kyang brjod par bya'o zhes gsungs te/'bras bu mnyam pa nyid du bstan pas de dag ni sbyin gnas 'dra ba nyid du bstan pa yin no/ /sgom pa goms pas byas pas nye bar 'gyur ba ma yin nam/gdams pa dang rjes su bstan pa dag gis ji ltar nye bar 'gyur zhes bstan snyam nas de ci'i slad du zhe na zhes dogs pa la/ bcom ldan 'das byang chub sems dpa' sems dpa' chen po zhes bya ba la sogs pa gsol te/ 'di snyam du gang gi phyir gdams pa dang /rjes su bstan pa dag gis khyad par can gyi sems kyis skad cig ma bskyed pas nye bar 'gyur ba 'di ni rten cing 'brel par 'byung ba'i chos nyid yin la/ bsgoms pa'i stobs kyis ni shin tu yang 'gyur ba nyid do snyam du bsams pa'o/ /'phags pa rnam par grol ba'i sdes byang chub sems dpa' la spro ba skyed par byed pa la legs so legs so zhes bya ba byin pas bstod pa dang bkur ba dang bsngags pa'i don nye bar sdud pa yin no zhes bshad do//spro ba sbyin zhing zhes bya ba ni shin tu myur bar 'gyur bar bstan pas so/ /yongs su 'dzin pa zhes bya ba ni gdams pa'i sgo nas so//rjes su bstan par byed pa zhes bya ba ni rjes su bstan pa'i sgo nas so/ /ji ltar gzhan dag la spro ba bskyed pa'i tshig gis gzhan la phan 'dogs pa yin snyam nas de ci'i phyir zhe na zhes rtogs pa la/ byang chub sems dpa' sems dpa' chen po rnams kyi zhes bya ba la sogs pa'o//'di skad du gang gi phyir bla na med pa yang dag par rdzogs pa'i byang chub kyi sems la spro ba 'phel ba byas pas/ byang chub sems dpa' sems dpa' chen po rnams kyis 'gro ba'i don bla na med pa yang dag par rdzogs pa'i byang chub skyed par byed pas/de bas na de rnams kyi spro ba 'phel bar byas pas sems can rnams rjes su gzung ba yin no zhes brjod pa yin no/ /'di dag ldog pa'i sgo nas bstan pa'i phyir gal te zhes bya ba la sogs pa smos te/ mngon par 'tshang rgya bar mi 'gyur ba zhig na zhes bya ba la des na 'gro ba'i don byed par mi 'gyur ro zhes bya ba ni lhag ma'o//rjes su 'gro ba'i sgo nas kyang gsungs pa ni gang phyir zhes bya ba la sogs pa'o/ /mngon par 'tshang rgya ba de'i phyir 'gro ba'i don mdzad do zhes 'dod do/ /bstod pa la sogs pa 'di dag gong nas gong du bsod nams che ba nyid du bstan pas de'i rang bzhin ston pa ni don yang dag pa ji lta ba bzhin du rtogs pa tsam gyi mtshan nyid can yin gyi/gcam gsag tsam du smra ba la sogs pa ni ma yin pas ji skad du bshad pa'i rab tu dbye ba kho na ltar khong du chud par bya'o/ /de skad du yang / shes rab pha rol phyin pa la/ /mos pa'i gnas skabs rnams la ni/ /dgu tshan gsum gyis bstod pa dang / bkur ba dang ni bsngags par 'dod/ /ces gsungs pa yin no/ /de ltar byas na mdo sde dang de dag gi gleng gzhi dag las bcom ldan 'das sangs rgyas thams cad kyis bstod cing bkur la bsngags pa'i byang chub sems dpa' thams cad dang thabs cig tu bzhugs so zhes bya ba 'di 'thad par 'gyur ba yin no// shes rab kyi pha rol tu phyin pa'i bshad pa mngon par rtogs pa'i rgyan gyi snang ba las/ bsod nams kyi rnam grangs kyi le'u zhes bya ba ste lnga pa'o// //sangs rgyas thams cad kyi bstod pa dang bkur ba dang bsngags pa'i mos pa yid la byed pa ni bla na med pa yang dag par rdzogs pa'i byang chub tu yongs su bsngo bar bya ba yin pas de'i 'og tu bsngo ba yid la byed pa brjod par bya'o/ /de yang ldog pa'i yul gyi dbye bas rnam pa du ma yod pa las/dang por khyad par gyi yongs su bsngo ba'i yid la byed pa bstan pa'i phyir/ de nas byang chub sems dpa' sems dpa' chen po byams pa zhes bya ba la sogs pa gsungs te/ de la byang chub sems dpa' zhes bya ba ni yang dag pa'i shes rab dang ldan pa'i phyir ro//sems dpa' chen po zhes bya ba ni thabs kyi rnam pa thams cad dang ldan pa'i phyir te/ don yod pa'i zhags pa'i mdo las byang chub sems dpa' sems dpa' chen po zhes bya ba'i sgra dag shes rab dang thabs ston pa yin pas gsungs pa'i phyir ro/ /byams pa zhes bya ba ni byams pa zhes bya ba'i ting nge 'dzin de thob pa'i phyir dang /ting nge 'dzin gang zhig gis 'bras bu byams pa nyid yin pa de thugs su chud pa'i phyir dang / sngon smon lam btab pa'i byams pa'i 'bras bu mngon par rtogs pa'i phyir dang / yang na gang gis de byams par 'gyur ba des byams pa'i rnam par thar pa'i sgo rab tu sgom pa las 'di 'dra ba'i yon tan sgrub pa ni byams pa yin no//rjes su yi rang ba yongs su bsngo ba dang ldan pa'i zhes bya ba ni rjes su yi rang ba sngon du 'gro ba can gyi yongs su bsngo ba ste/ de bzhin gshegs pa'i bla na med pa yang dag par rdzogs pa'i byang chub mi dmigs par dmigs pa yid la byed pas yongs su bsngo ba'i phyir yongs su bsngo ba yid la byed pa khyad par can yin te/de dang lhan cig ldan pa zhes bya ba bsdu bar bya'o/ /'di las gzhan gyi sbyin pa las byung ba la sogs pa'i bsod nams bya ba'i dngos po 'og nas 'chad pa'i rjes su yi rang ba'i yid la byed pas rjes su yi rang bar byas nas byang chub tu yongs su bsngo bar bya'o zhes bya ba'i rnam pa 'di yod pa yin te/de skad du yang de ma thag kho nar rjes su yi rang bas rjes su yi rang la/ rjes su yi rang ba dang ldan pa'i bsod nams bya ba'i dngos po de bla na med pa yang dag par rdzogs pa'i byang chub tu yongs su bsngo'o zhes 'di skad du bla na med pa yang dag par rdzogs pa'i byang chub yongs su sgrub par gyur cig ces ngag tu brjod par bya'o zhes gsungs pa yin te/de dag la zhes bya ba ni sems can thams cad kyi sbyin pa las byung ba la sogs pa'i bsod nams bya ba'i dngos po las zhes bya ba'i tha tshig go//mchog ces bya'o zhes bya ba ni mchog rnam pa gnyis dang ldan pa'i phyir ro/ /mchog nyid rnam pa gnyis ni 'bar bas dam pa nyid dang / zla med pas gtso bo nyid do zhes brjod pa ni dam pa zhes bya ba'o//gtso bo zhes bya'o zhes bya ba'o/ /dam pa'i mchog kyang rnam pa gnyis te/ thabs mkhas pas rab nyid dang shes rab kyi pha rol tu phyin pa nyid kyis mchog nyid yin pas so zhes brjod pa ni rab ces bya'o mchog rab ces bya'o zhes bya ba'o/ /gnyis po las phul du byung ba gzhan med do zhes bstan par bya ba'i phyir gya nom pa zhes bya'o zhes gsungs pa yin no//gtso bo'i mchog nyid kyang rnam pa gnyis te/ mnyam pa med pas bla ma nyid yin pa dang / lhag pa med pas bla na med pa nyid yin pas so zhes bstan par bya ba'i phyir bla ma zhes bya'o/ / bla na med pa zhes bya'o zhes gsungs pa yin no/ /'di gnyis las gong na med pa gzhan med pas gong na med pa zhes bya'o zhes gsungs so/ /ji skad du bshad pa'i tshul gyis nyan thos la sogs pa dang thun mong ma yin pa nyid mnyam pa med pa zhes bya'o/ /mnyam pa med pa'i sangs rgyas rnams dang mnyam pa nyid thob pa'i rgyur gyur pa nyid yin pa'i phyir mi mnyam pa dang mnyam pa zhes bya'o//mi dmigs pa'i rnam pa can gyi yongs su bsngo ba yid la byed pa bstan par bya ba'i phyir brjod pa ni/ de skad ces smras pa dang gnas brtan tshe dang ldan pa rab 'byor gyis zhes bya ba la sogs pa'o/ / thams cad nas thams cad du song ba zhes bya ba ni phyogs bcu'i 'jig rten gyi khams shar la sogs pa'i phyogs thams cad na zhes bya ba'i don to/ /shar dang lho dang nub dang byang gi phyogs la go rims bzhin du gzhal du med pa dang tshad med pa dang bsam gyis mi khyab par gyur pa rnams na gnas pa'i 'jig rten gyi khams rnams ni grangs ji lta bar gzhal du med pa'i gzhal du med pa zhes bya ba la sogs pas bstan pa yin no//de bzhin du steng dang 'og gi phyogs su gnas pa dag la mtha' yas mu med pa zhes don gyi dbye bas brjod do/ /gzhal du med pa'i gzhal du med pa zhes bya ba la sogs pa la/'jig rten pa'i 'dod chags dang bral ba dang / slob pa dang / mi slob pa dang / rang sangs rgyas dang / byang chub sems dpa' rim pa ji lta ba bzhin du gzhal du med pa dang / grangs med pa dang / tshad med pa dang / bsam gyis mi khyab pa dang / mtha' yas par gyur pa rnams kyi shes pa'i lam las 'das pas na gzhal du med pa la sogs par rig par bya'o//lam chad pa la sogs pa la/ dgra bcom pa nyid dang / zag pa zad pa nyid kyis lam chad pa'o/ /nyon mongs pa med pa dang dbang du gyur pa nyid kyis na 'jug pa chad pa'o/ / sems dang shes rab rnam par grol ba nyid kyis na spros pa dang srid pa len pa chad pa'o/ /glang po chen po cang shes pa nyid kyis na mchi ma zad pa'o/ /bya ba byas pa dang byed pa byas pa nyid kyis na tsher ma bcom pa'o/ /khur shin tu bor ba zhes bya ba la sogs pa ni bshad zin to/ /yang na lam chad pa la sogs pa'i tshig lnga ni rnam pa thams cad mkhyen pa nyid dang /lam shes pa nyid dang / thams cad shes pa nyid dang / rnam kun mngon par rdzogs par rtogs pa nyid dang / rtse mo'i mngon par rtogs pa ste/ mngon par rtogs pa rnam pa lngas spang ba'i dngos po spangs pa dang go rims bzhin du sbyar ro//khur shin tu bor ba la sogs pa'i tshig lnga ni mngon par rtogs pa lnga po de nyid kyis thob par bya ba'i chos rtogs pa dang ldan pa yin pa'i phyir grangs ji lta ba bzhin du sbyar ro/ /de dag gi bar gyi zhes bya ba'i bar du'o/ /tshul khrims kyi phung po dang / ting nge 'dzin gyi phung po dang /shes rab kyi phung po ni/ zag pa med pa'i tshul khrims dang / ting nge 'dzin dang / shes rab bo/ /rnam par grol ba'i phung po ni sgrib pa thams cad spangs pas so/ /rnam par grol ba'i ye shes gzigs pa'i phung po ni khyad par can gyi ye shes mngon sum du mdzad pa'o/ / 'di dag thams cad ni nyan thos la sogs pa dang thun mong pa yin pas/ thun mong ma yin pa bstan pa'i phyir/ pha rol tu phyin pa drug dang ldan pa'i zhes bya ba la sogs pa gsungs te/ de la rdzas su ni pha rol tu phyin pa drug yin no/ /pha rol tu phyin pa bzhi po shes rab kyi pha rol tu phyin pa'i rab tu dbye ba yin pas ming du ni bcur 'gyur ro//'di ltar 'jig rten las 'das pa'i rnam par rtog pa'i ye shes kyis rim gyis sgrib pa thams cad spong bar byed pa ni shes rab kyi pha rol tu phyin pa yin la 'jig rten las 'das pa'i lam gyi rjes las thob pa'i ye shes kyis bsdus pa ni thabs dang smon lam dang stobs dang ye shes kyi pha rol tu phyin par 'gyur ro//des na gtso bo yin pa'i phyir dang por pha rol tu phyin pa yin la 'jig rten las 'das pa'i lam gyi rjes las thob pa'i ye shes kyis bsdus pa ni thabs dang smon lam dang stobs dang ye shes kyi pha rol tu phyin par 'gyur ro//des na gtso bo yin pa'i phyir dang por pha rol tu phyin pa drug bstan nas/ pha rol tu phyin pa lhag ma rnams nye bar bsdu bar bya ba'i phyir sangs rgyas kyi yon tan phun sum tshogs pa dang ldan pas zhes bya ba la sogs pa gsungs te/ sangs rgyas kyi yon tan phun sum tshogs pa ni thabs kyi pha rol tu phyin pa'o/ /stobs kyi pha rol tu phyin pa zhes bya ba ni go sla'o/ /mngon par shes pa'i pha rol tu phyin pa zhes bya ba ni sangs rgyas kyi mngon par shes pa thams cad dam drug pa yin par gzung ngo / / yongs su shes pa'i pha rol tu phyin pa ni ye shes kyi pha rol tu phyin pa'o/ /khyad par du gyur pa yin du zin kyang ye shes kyi pha rol tu phyin pa rnam par mi rtog pa ji ltar ma yin zhe na/ de brjod par bya ste/ gang gi phyir rnam par mi rtog pa'i ye shes kyi rjes las thob pa'i ye shes ni ye shes kyi pha rol tu phyin pa yin te/ye shes gang gis rtogs pa yongs su gcad nas rang nyid chos kyi longs spyod rjes su myong bar gyur pa dang gzhan dag yongs su smin par byed pa yin la/ de ltar gnyis po 'di dag ni rnam par mi rtog pa'i ye shes la yod pa ma yin no/ /de bas na ye shes kyi pha rol du phyin pa ni rnam par mi rtog pa ma yin no//smon lam gyi pha rol tu phyin pa dang zhes bya ba ni go bar zad do/ /thams cad mkhyen pa'i ye shes phun sum tshogs pa dang zhes bya ba ni rab tu dga' ba la sogs pa'i sa rnams so/ /phan par bzhed pa gang yin pa dang zhes bya ba ni dga' ba dang btang snyoms dag go//sangs rgyas kyi yon tan zhes bya ba ni sangs rgyas kyi chos ma 'dres pa bco brgyad la sogs pa'o/ /bla na med pa yang dag par rdzogs pa'i byang chub kyi bde ba zhes bya ba ni/ nyon mongs pa dang shes bya'i sgrib pa'i bag chags kyis mtshams sbyor ba spangs pa'i 'bras bu'o//chos thams cad la dbang phyug gi pha rol tu phyin pa zhes bya ba ni rnam pa thams cad du 'gro ba'i don rdzogs par spyod pa nyid do/ /zil gyis mi gnon pa dang zil gyis gnon pa zhes bya ba ni bdud dang mu stegs la sogs pa rnams kyis mi thub cing de rnams zil gyis gnon par mdzad pa'o//rdzu 'phrul mngon par 'du mdzad pa zhes bya ba ni/ rdzu 'phrul gyi cho 'phrul gyis mgu bar mdzad pa sngon du 'gro ba can byang chub kyi sa bon bskyed pa'i rgyu'o/ /sgrib pa med cing zhes bya ba la sogs pa la nyon mongs pa dang shes bya'i sgrib pa med pas go rims bzhin du sgrib pa med cing ma chags pa'o//de nyid kyis na thogs pa med pa'o/ /mnyam pa med pas mi mnyam pa'o/ /bdag nyid dang mi mnyam pa nyid dang mnyam pas na mi mnyam pa nyid dang mnyam pa'o/ /dpe gzhan thams cad las 'das pas na dpe med pa'o/ /mtha' yas pa'i shes pas yongs su bcad par nus pa ma yin pa nyid kyis na dpag tu med pa'o//khyad par de dag gis khyad par du 'phags pa de su zhig yin zhe na/ de bzhin gshegs pa'i yang dag pa ji lta ba'i ye shes kyi stobs gang yin pa dang zhes bya ba smras te/ kun brjod pa la sogs pa'i cho 'phrul byed par nus pa nyid kyi ye shes ni thogs pa med pa yin pa'i phyir stobs su brjod pa'o//stobs kyi nang na sangs rgyas kyi ye shes kyi stobs gang yin pa dang zhes bya ba ni/ stobs kyi nang na zag pa zad pa mkhyen pa'i stobs nyid shin tu phul du byung ba yin no/ /sangs rgyas kyi ye shes dang gzigs pa gang yin pa dang zhes bya ba la/ye shes ni bden pa mngon par rtogs pa'o/ /gzigs pa ni mngon par shes pa lnga'o/ /stobs bcu'i pha rol tu phyin pa zhes bya ba ni gnas dang gnas ma yin pa mkhyen pa'i stobs la sogs pa bcu'o/ /mi 'jigs pa bzhi zhes bya ba ni/yang dag par rdzogs pa'i sangs rgyas so zhes bya ba la sogs pa dam 'cha' bar mdzad pa la phyir rgol bar byed pa med pas mi 'jigs pa nyid rnam pa bzhi'o/ /mi 'jigs pa bzhi po de dag mchog tu legs par khong du chud pa gang yin pa ni kun rdzob tu'o/ /de kho na nyid du ni gzhan yin no zhes chos thams cad ces bya ba la sogs pa gsungs so//don dam par mngon par sgrub pas zhes bya ba ni/ sgyu ma lta bu nyid mngon du mdzad pas so/ /chos kyi 'khor lo rab tu bskor ba zhes bya ba ni/ rang gi thugs su chud pa'i chos gsal bar mdzad pa shes rab kyi pha rol phyin pa ston pas 'khor lo dang 'dra bar yang dang yang du mngon sum du byed pa'i don gyis rab tu bskor zhing gdul ba rnams kyi rgyud la rab tu rgyas par mdzad pa'i phyir ro//de nyid mun pa sel bar byed pa yin pa'i phyir chos kyi sgron ma 'dzin pa zhes bya'o/ /yang dag par sad par byed pa'i phyir chos kyi rnga brdung ba'o//gdul bya'i yid 'gengs par byed pa'i phyir chos kyi dung 'bud pa'o/ /rgyas par byed pas na chos kyi dung sgrogs pa'o/ /sgrib pa brtan po thams cad 'joms pas na chos kyi ral gri 'debs pa'o/ /tshim par byed pas na chos kyi char 'bebs pa'o//rnam par gsal ba nyid du shes par bya bas na chos kyi mchod sbyin sbyin pa'o/ /yid la 'thad pa nyid kyis na sems can thams cad tshim par mdzad pa'o/ /mnyan par bya ba nyid kyis ji ltar bde bar mdzad pas na yang dag par stobs pa'o/ /gang yang chos bstan pa de dag dang zhes bya ba la sogs pa la/sangs rgyas kyi chos rnams la 'dul bas na btul ba'o/ /rang sangs rgyas kyi chos rnams kyi bslab pa la bslabs pas na bslabs pa'o/ /nyan thos kyi chos rnams la lhag par mos pas na mos pa'o zhes bya bar sbyar ro/ /rang gi byang chub rtogs par bya ba'i phyir rigs nges pa thob pas na nges par gyur pa'o//de nyid ni rdzogs pa'i byang chub la gzhol bar 'gyur ro / /slob pa'i zhes bya ba ni 'bras bu dang po la zhugs pa la sogs pa dang 'brel pa rnams kyi'o/ /mi slob pa'i zhes bya ba ni dgra bcom pa nyid do/ / de la dge slong ni brjod pa gsum la sogs pas bsnyen par rdzogs par byas pa'o/ /dge slong ma yang de bzhin no/ /dge bsnyen ni skyabs gsum yongs su 'dzin pa dang / bslab pa'i gzhi lnga yongs su 'dzin pa'o/ /dge bsnyen ma yang de bzhin yin pa'i phyir rnam pa gnyis te/ skyabs gsum 'dzin pa'i dge bsnyen du slob dpon gyis gzung du gsol zhes bya ba dang / de bzhin du gsum la skyabs su song nas bslab pa'i gzhi lnga yongs su 'dzin pa'i dge bsnyen du slob dpon gyis gzung du gsol zhes 'dul ba las gnyis su smos pa'i phyir ro/ /yid kyis sgom pa'i zhes bya ba ni/gang zag gcig gam gnyis sam gsum la yid dang bar byed pa'o/ /ma lus pa lus pa med par zhes bya ba ni go rims bzhin du rgyu mtha' yas pa las byung ba nyid yin pa'i phyir dang / 'bras bu gzhal du med pa rab tu ster ba'i phyir ro zhes brjod par bya'o//gcig tu bsdus te zhes bya ba la sogs pa la/ 'das pa'i de bzhin gshegs pa rnams dang 'brel pas bstan pa'i phyir gcig tu ste/ rnam pa gcig tu mngon par bsdus shing lhag par sgro btags nas tshad med pa nyid la sogs pa'i tshul gyis bsdoms shing brtsis nas/ byang chub sems dpa' la sogs pa nas dud 'gro'i skye gnas dang 'brel pa'i bar gyis gzhal zhing tshad du byas nas 'ongs nas 'chad pa'i rjes su yi rang ba mchog gis rjes su yi rang bar bya zhing / byed pa po'i bsam pa phul du byung ba'i dad pas shin tu dga' zhing bdag nyid kyis de dag thams cad rdzogs par bya'o zhes bya ba'i bsam pa khyad par can gyis bya'o zhes bya ba'i don to//mchog gi don nyid bstan pa'i phyir mchog ces bya ba la sogs pa gsungs pa yin te/ 'di dag ni bshad zin to/ /ngag tu rjod par byed pa na zhes bya ba ni de bzhin gshegs pa thams cad kyi tshul khrims kyi phung po la sogs pa mi dmigs pa'i yid la byed pas rjes su yi rang ba dang ldan pa'i bsod nams sems can thams cad kyi don du bla na med pa yang dag par rdzogs pa'i byang chub tu yongs su bsngo bar bya'o zhes brjod par bya'o zhes bya ba'i tha tshig go//yongs su sgrub par gyur cig ces bya ba ni/ skyed par byed pa ste/ bdag dang sems can thams cad kyi zhes bya ba ni lhag ma'o/ /mi dmigs pa'i yongs su bsngo ba'i yid la byed pa bstan nas/ da ni de la rgol ba ngan pa la lan gdab pa'i phyir 'dri ba ni de la gang zag byang chub sems dpa'i theg pa pa'i gang zag dag ces bya ba la sogs pa gsungs so//dngos po gang gis yongs su bsngo zhing zhes bya ba ni de bzhin gshegs pa nyid la sogs pa'i rigs kyi rgyu gang yin pa dag gis phul na zhes bya ba'i tha tshig go/ /glegs bam la la las rjes su yi rang zhing zhes smos te/der yang yongs su bsngo ba'i yid la byed pa'i gnas skabs yin pa'i phyir yongs su bsngo zhing zhes don gyis gzung bar bya'o/ /de ltar yang dngos po gang dag dang rnam pa gang dag gis sems gang zhig yongs su sngo bar byed pa dang zhes de ma thag tu 'chad par 'gyur ro/ / dmigs pa gang dag dang rnam pa gang gis zhes bya ba la/ dmigs pa'i tshul khrims la sogs pa'i phung po dang chos thams cad do/ /de 'dzin pa'i rab tu dbye ba nyid ni rnam pa'o/ /sems de zhes bya ba ni 'dzin pa'i rnam par rtog pa'o/ /gcig ces bya ba'i sgra ni tshig gi phrad de ci zhes bya ba'i sgra'i don la 'jug go//ji ltar mtshan mar byas pa de bzhin du dmigs sam zhes bya ba ni/ 'das pa nyid kyis dngos po la sogs pa ni mtshan mar ma byas par yongs su bsngo bar mi nus pa nyid yin te/ med pa'i phyir med bzhin du lhag par sgro btags nas brjod pa'i kun rdzob ji lta bar yul du byed dam/ci ste de kho na nyid la de bzhin du dmigs zhes bya ba'i tha tshig go/ /gal te dmigs so zhes 'dod na de lta na ni/ tshad ma'i gnod pa yod pas na/ /dngos por dmigs pa yod na ni/ /smig rgyu la sogs shes pa bzhin/ /phyin ci log par yongs su rtog /de phyir de'i mthus 'byung ba yi/ /yongs su bsngo ba'i bya ba kun/ /bdag dang bdag gir log pa las/ /byung ba bzhin du stobs chung ngo / /zhes 'dod do/ /rnam par rtog pa'i yul ni sgro btags pas brdzun pa yin pa'i phyir dang / rkyen la rag las pas 'jug pa yin pa'i phyir rmi lam dang sgyu ma dang smig rgyu dang 'dra bar de kho na nyid du dmigs su med do zhes bya ba ni/btsun pa rab 'byor dngos po de dag dang zhes bya ba la sogs pa smras so de lta na yang yongs su bsngo ba phyin ci log par thal bar 'gyur ro zhes bya ba ni/ gal te dngos po de med cing zhes bya ba la sogs pa smras pa yin te/rang gi mtshan nyid yul du byed pas na dmigs par byed pa'o/ /spyi'i tshul yongs su gcod pas na mtshan mar byed pa'o/ /'du shes phyin ci log pa zhes bya ba la sogs pa ni mtshan mar 'dzin pa'i bdag nyid can gyi 'du shes ni rang gi yul med pas phyin ci log tu de ma yin la der 'dzin pas/'du shes phyin ci log pa yin no / /sems phyin ci log pa zhes bya ba ni/ dmigs par 'dzin par byed pa'i rnam par shes pa'i sems de bzhin du phyin ci log pa yin no/ /lta ba phyin ci log pa zhes bya ba ni/ rnam pa yongs su gcod pa'i pa'i ngo bo'i rnam par dpyod pa'i bdag nyid can gyi shes rab kyi lta ba nyid snga ma bzhin du phyin ci log pa'o//mi 'gyur zhes bya ba ni ji ltar na 'di'i snga ma dang 'brel ba'i phyir 'on kyang 'gyur ba nyid do zhes bya ba'i tha tshig go/ /de lta na yang mi dmigs pa'i yongs su bsngo ba'i yid la byed pa ni 'du shes phyin ci log pa la sogs pa'i rang bzhin du 'gyur ro zhes bya ba ni lhag ma ste/gang gi phyir gzhan du na 'du shes la sogs pa phyin ci log pa nyid du bstan pas dkyus ma'i don dang mi 'gal ba'i phyir cung zad kyang ma smras par 'gyur ro/ /gal te gzhan la rang gi yul med pas 'du shes la sogs pa phyin ci log tu gyur pa na//de'i rang bzhin ma yin pa gzhan 'du shes phyin ci log la sogs pa'i rang bzhin du ji ltar 'gyur snyam pa'i dogs pa de ci'i phyir zhe na zhes bya bas bsu nas brjod pa ni 'di ltar zhes bya ba la sogs pa'o/ /'dod chags kyang zhes bya ba la/kyang zhes bya ba'i sgras ni zhe sdang la sogs pa bsdu'o/ /rnam par btags shing zhes bya ba ni sgro btags nas so/ /kun tu brtags nas zhes bya ba ni yang dang yang du dmigs nas so/ /'du shes phyin ci log pa la sogs pa las byung ba'i phyir 'dod chags kyang 'du shes phyin ci log pa yin no zhes bya ba sogs par sbyar ro//'di skad du gang gi phyir mi rtag pa nyid la sogs pa'i chos dang ldan pa'i dngos po la rtag pa la sogs pa yod pa ma yin pa sgro btags te de nyid la yang dang yang du dmigs nas 'dod chags la sogs pa 'du shes phyin ci log la sogs pa'i rgyu can du skye ba na 'du shes phyin ci log la sogs pa'i rang bzhin du skye ba yin pas de bas na mi dmigs par yongs su bsngo ba'i yid la byed pa yang de bzhin du skye bar 'gyur ro zhes brjod do//phyogs gzhan bstan pa'i don du brjod pa ni gzhan yang zhes bya ba la sogs pa'o//gzhan yang dngos po ji lta ba dang rnam pa med pa'i ji lta bar zhes pa ni lhag ma'o/ /byang chub kyang de bzhin sems kyang de bzhin du med pa yin nam ci zhes khong nas phyung la/ de lta'o zhes khas len par byed na/ de lta na zhes bya ba la sogs pa smos so/ /gzung ba dang 'dzin pa'i chos thams cad dang / de'i bag chags kyi khams thams cad kyang med pa nyid du 'gyur ro zhes bya bar 'dod pa'o/ /de ltar gyur na nyes pa ci zhig yod ce na gal te zhes bya ba la sogs pa smos so/ /'di snyam du gal te de ltar dngos po la sogs pa med pa de bzhin du byang chub dang sems la sogs pa yang yin na de'i dngos po la sogs pa gang dag gis sems la sogs pa gang zhig byang chub gang du yongs su sngo bar byed de/gang phyir gang gis kyang gang yang gang du yang yongs su sngo bar mi phyed do//des na rnam pa thams cad du yongs su bsngo ba mi 'thad na yongs su bsngo ba phyin ci log tu 'gyur ro zhes bsams pa yin no/ /de kho na nyid du phyin ci log yin yang mi rtag pa la sogs pa'i rnam par rtog pa dang 'dra bar brgyud nas yang dag pa'i don thob par byed pa na dngos po la sogs pa kun rdzob tu yod pa nyid kyis na yongs su bsngo ba'i yid la byed par 'dod pa yin te/de bas na khyed kyis lhag ma ci yang ma smras so zhes bya ba'i bsam pas 'phags pa rab 'byor 'di ni zhes bya ba la sogs pa smras so/ /yang na dngos po dang dmigs pa la sogs pa de la don dam par mngon par zhen pa dang bral bas kun rdzob tu sgyu ma'i skyes bu bzhin du yongs su bsngo ba ni phyin ci log ma yin no zhes bya ba'i bsam pa dang ldan pas/'phags pa rab 'byor 'di ni zhes bya ba la sogs pa smras pa yin no/ /rigs pa dang ldan pa yin na yang ci'i phyir las dang po pa la brjod par mi bya snyam pa'i dogs pa de ci'i phyir zhe na zhes bya bas bsu nas de la gang dad pa tsam dang zhes bya ba la sogs pa gsungs so//rtogs pa'i yid ches pa dang bral bas brtan pa ma yin pa nyid kyis na dad pa tsam mo/ /de nyid du chung ngu dang 'bring dang chen po'i dbye bas dga' ba tsam zhes bya ba la sogs pa tshigs gsum gyis brjod do//yang na dad pa tsam nyid yod pa nyid dang / yon tan dang ldan pa nyid dang / nus pa nyid la go rims bzhin du mngon par yid ches pa dang / dang ba dang / mngon par 'dod pa ni de bzhin du dga' ba tsam la sogs pa rnam pa gsum bstan pa yin no//med par 'gyur du 'ong zhes bya ba ni kun rdzob dang don dam pa'i dbye ba la mi mkhas pa'i phyir nub par 'gyur du 'ong zhes bsams pa'o/ /de lta na yang smra bar mi bya ba nyid yin par 'gyur ro zhe na/ 'phags pa rab 'byor phyir mi ldog pa'i zhes bya ba la sogs pa gsungs so//gang dge ba'i bshes gnyen gyis nye bar bstan pa zhes bya ba ni/ so so'i skye bo yin du zin kyang yang dge ba'i bshes gnyen gyis byin gyis brlabs kyi bden pa gnyis kyi rang gi ngo bo yongs su shes pas zhes bya bar dgongs so/ / nye bar bsdu bar bya ba'i phyir de ltar zhes bya ba la sogs pa gsungs te/ de ltar zhes bya ba ni kun rdzob kyi bden pa las mi 'da' bas so/ /gzhan yang kun rdzob kyi phyogs la brtan pa'i don bstan pa ni/ byams pa sems gang gis zhes bya ba la sogs pa smras pa yin te/ gang zhes bya ba ni rjes su yi rang ba dang ldan pa'i dge ba'i rtsa ba'o/ /sems de yang zhes bya ba ni rjes su yi rang bar byed pa ni yongs su sngo bar byed pa'i dus su nye bar bsags pa rnam par 'jig pas 'gags par 'gyur ba'o/ /rang bzhin gyi 'jig pas bral ba'o//rnam par 'gyur ba'i 'jig pas rnam par 'gyur ba yin no/ /des na zhes bya ba de'i phyir te/ yongs su bsngo ba'i dus su yi rang ba'i sems gang gis yongs su sngo bar byed pa/ rjes su yi rang bar byed pa'i sems de gang yin te/ 'ga' zhig kyang ma yin no zhes bya ba'i tha tshig go//'di snyam du/ 'di ltar 'dir byang chub sems dpa' sems dpa' chen pos rjes su yi rang bar byas nas rjes su yi rang ba dang ldan pa'i bsod nams bya ba'i dngos po thams cad mkhyen pa nyid du yongs su bsngo bar bya'o zhes bya ba'i tshig gis sngon dang phyi mar bstan pa'i phyir skad cig ma gcig la rjes su yi rang ba dang yongs su bsngo ba'i yid la byed pa gnyis mi 'byung bar bstan pa yin no//de bas na byed pa po mtshungs pa la twa'i rkyen brjod pa'i phyir sems gcig kho nas sngar rjes su yi rang bar byas nas phyis yongs su sngo bar byed pa yin no zhes brjod par gyur na/de ni mi rigs te gang gi phyir rtag pa ni rim dang cig car dag gis don byed par 'gal ba'i phyir skad cig ma nyid yin pas rjes su yi rang bar byed pa'i sems ni yongs su bsngo ba'i skad cig ma'i tshe med pa de bas na des ji ltar yongs su sngo bar byed ces bsams pa yin no//de ltar rjes su yi rang nas zhes bya ba'i tshig ma 'brel to zhes bstan nas/ da ni rjes su yi rang ba dang ldan pa'i bsod nams bya ba'i dngos po zhes bya ba'i tshig de mi rigs par bstan par bya ba'i phyir rjes su yi rang ba dang ldan pa zhes bya ba la sogs pa smras pa yin no/ /'di skad du gang gi phyir rjes su yi rang ba'i rnam par skyes pas rjes su yi rang bar byed pa'i sems nyid rjes su yi rang ba dang ldan pa'i bsod nams bya ba'i dngos po zhes brjod do//gang gi phyir de lta yin pa de bas na rjes su yi rang ba dang ldan pa'i bsod nams bya ba'i dngos po tha dad pa'i las su gyur pa gang zhig rjes su yi rang bar byed pa'i sems byed pa por gyur pas yongs su sngo bar byed pa'i sems de gang zhig yin/sems de nyid kyis sems de bsngo bar yang mi rigs te rang nyid la byed pa ni 'gal ba'i phyir zhes 'dod do/ /gal te rjes su yi rang ba'i sems kyi rjes thogs la sems kyi skad cig ma khyad par can skyes pa las rjes su yi rang ba dang ldan pa'i bsod nams bya ba'i dngos po thob pa'i sems gang yin pa de phyis yongs su bsngo ba'i sems kyis bsngo bar bya'o zhes bya ba 'di ni ngag de'i don yin par 'dod na/de lta na yang yongs su bsngo bar bya'o zhes bya ba'i tshig 'thad pa ma yin no zhes smras pa ni/gang gi tshe sems gnyis phrad pa med na sems kyi sems zhes bya ba la sogs pa'o/ /ngag gi don 'di ltar sbyar bar bya ste/ skad cig ma dang po byung ba'i rnam par shes pa ni skad cig ma nyid yin pas skad cig gnyis pa'i tshe na med la/de bzhin du skad cig gnyis par byung ba yang rgyu ma tshang ba'i phyir ma skyes pas skad cig ma dang po'i tshe na med do/ /de ltar na gang gi tshe bsngo bar bya ba dang sngo bar byed pa skad cig dang po dang gnyis par byung ba'i sems de gnyis 'grogs pa med pa des na dus mnyam du 'byung ba med na skad cig ma gnyis par byung ba'i yongs su bsngo ba'i sems kyis skad cig ma dang po byung ba'i rjes su yi rang ba dang ldan pa'i bsod nams bya ba'i dngos po'i sems de yongs su bsngo bar ji ltar nus pa zhes bya ba'o//'o na snga ma'i sems mi skye ba nyid de'i tshe yod pas yongs su bsngo'o zhe na/sems kyi rang bzhin ni yongs su bsngo bar yang mi nus na zhes smos te/ ngo bo nyid med pa'i phyir ro zhes bya bar dgongs so/ /bcom ldan 'das dang 'phags pa byams pa'i byin gyi rlabs kyis brgya byin lan 'debs pa ni/ de nas lha'i dbang po brgya byin gyis zhes bya ba la sogs pa smos pa yin no//bsam pa ni kun rdzob tu khas blangs pa'i rang bzhin rnams don gyi bya ba byed pa nyid kyis skad cig ma yin pas na khyad par can skye ba'i bya ba'i khongs su 'dus pa ma gtogs pa gzhan gyi khongs su gtogs par bya ba ni 'ga' yang mi srid do//de bas na rnal 'byor pa'i rjes su yi rang ba'i sems khyad par can gyi rjes thogs la rjes su yi rang ba dang ldan pa'i bsod nams bya ba'i dngos po'i sems shin tu khyad par can skye bar 'gyur zhing / de'i yang rjes thogs la dge ba'i rtsa ba de'i bag chags kyis bsgos pa ches shin tu khyad par du 'phags pa'i sems yongs su sngo ba'i rnam pa can du rten cing 'brel par 'byung ba'i chos nyid kyi stobs kyis skye bar 'gyur ba/skad cig gis tha snyad mi 'thad pas na byis pa'i skye bo'i ngor rgyun la ltos pa'i phyir dang / brda la ltos pas sgra 'jug pa'i phyir ro//dngos po'i de kho na nyid kyi gnas skabs 'di ni 'phags pa byams pas/ byang chub sems dpa' sems dpa' chen pos rjes su yi rang ba dang ldan pa'i bsod nams bya ba'i dngos po de bla na med pa yang dag par rdzogs pa'i byang chub tu yongs su bsngo bar bya'o zhes bya ba'i ngag 'dis las dang byed pa po dang bya ba la sogs pa'i tshul gyis gsungs pa yin la/de la yang dngos po'i cha tsam yongs su bor te/ sgra tsam kho na bzung ste byis pa'i skye bo skrag par byed pa'i rnam par rtog pa mi bya'o zhes bya ba 'di yin no/ /gzhan yang de ltar rjes su yi rang nas rjes su yi rang ba dang ldan pa'i bsod nams bya ba'i dngos po de bla na med pa yang dag par rdzogs pa'i byang chub tu yongs su bsngo'o zhes tshig tu brjod par bya ba yin te zhes sngar 'phags pa rab 'byor nyid kyis kyang rang gi tshig gis kun rdzob kyi phyogs la ji skad bshad pa'i dgongs pa khas blang bar bya'o zhes bya ba'i bsam pas 'phags pa rab 'byor ji ltar zhes bya ba la sogs pa smras so//gal te ji skad du bshad pa'i dgongs pas mi 'dzin na de'i tshe rnam pa gzhan med pas ji ltar yongs su bsngo bar bya ste/ ji ltar yang mi rung ba de bas na ji skad bshad pa'i dgongs pa nyid gzung bar bya'o zhes bya ba'i tha tshig go//de nyid bstan par bya ba'i phyir rjes su yi rang ba dang ldan pa'i zhes bya ba la sogs pa smos pa yin te/ yongs su 'dzin pas legs par yongs su gzung ba dang yongs su bsngo bas legs par yongs su sngo bar ji ltar 'gyur zhes bya ba dang sbyar ro//phyin ci ma log pa'i mtshan nyid kyi yongs su bsngo ba'i yid la byed pa'i don bstan pa ni de nas gnas brtan tshe dang ldan pa rab 'byor gyis zhes bya ba la sogs pa smos pa yin te/ brtsams shing zhes bya ba ni rnam par rtog pa'i shes pas sngon du byas pa'o//gzhir bcas te zhes bya ba ni mdun du yul gyi dngos por bzhag nas so/ /yongs su bsngo bar bya'o zhes bya ba'i tshig gis yongs su sngo ba yin pa'i phyir rnam par rtog pas yongs su bsngo bar byas pa yin no/ /de bas na rnam par rtog pa thams cad ni rang bzhin gyis rang gi ngo bo snang ba don med pa la don du zhen nas 'jug pa'i phyir 'khrul pa nyid yin no zhes bya ba'i bsam pas ji ltar 'du shes phyin ci log tu mi 'gyur zhes bya ba la sogs pa smras pa yin no//lan gdab pa'i phyir 'phags pa rab 'byor gal te zhes bya ba la sogs pa smras pa yin te/sems de la sems su 'du shes par ma gyur na zhes bya ba ni/ yongs su sngo bar byed pa'i sems de la don dam par sems su mngon par zhen par ma gyur na zhes bya bar dgongs so/ /de lta na yon tan ci yod ce na/ de ltar byang chub sems dpa' sems dpa' chen pos zhes bya ba la sogs pa smras pa yin no//nye bar bsdu bar bya ba'i phyir ji ltar sems de la zhes bya ba la sogs pa smos te/ de ltar yongs su sngo bar byed pa'i sems de ni 'di yin no zhes mngon par zhen pas de kho na nyid du ji ltar sems de mi shes te mi rtogs pa de ltar gal te yongs su sngo bar byed na de'i tshe de ltar yang dag par mi dmigs pa'i rgyu la zhugs pa yin pa'i phyir 'du shes phyin ci log la sogs pa ma yin no zhes bya bar sbyar ro//'di skad du gal te rnam par rtog pa'i yul med pa de la yul dang ldan par gzung na de'i tshe 'khrul par 'gyur ba zhig na/gang gi phyir 'dis sgyu ma mkhan dang 'dra bar shes pa'i yul med pa de la yul med pa nyid rtogs nas rnam par rtog pas yongs su bsngos pa yin na rang gi ngo bo yongs su shes pa yin pa'i phyir 'khrul par ji ltar 'gyur zhes brjod pa yin no/ /shugs kyis brjod pa'i don gsal bar byed pa ni/gal te sems gang gis zhes bya ba la sogs pa smos pa yin no/ /ji ltar sgyu ma mkhan gzhan 'ga' zhig/ sprul pa'i rta sogs spyod yul can/ /sems la yul med par shes pa/ /des na 'khrul pa skye mi 'gyur/ /zhes bya ba'i tshul gyis yongs su bsngo ba'i sems la sogs pa yang sgyu ma'i skyes bu ltar 'jug pas phyin ci log par mi 'gyur bas yang gal te zhes bya ba la sogs pa gsungs pa yin no//sems gang zhes bya ba ni yongs su bsngo bar bya ba'o/ /'di ltar shes shing zhes bya ba ni sbyor ba dang mjug gi gnas skabs su 'chad par 'gyur ba'i zad pa nyid la sogs pa rtogs pa'o//'di ltar sems te zhes bya ba ni dngos gzhi'i gnas skabs su'o/ /sems de'i chos nyid kyang de yin zhes bya ba ni/ yongs su sngo bar byed pa'i sems ni ngo bo nyid dang bral ba'i phyir zad pa nyid la sogs pa'i chos nyid yin no//chos gang dag gi zhes bya ba ni dngos po la sogs pa rnams kyis so/ /chos gang dag ces bya ba ni thams cad mkhyen pa nyid la sogs par ro/ /don 'di nyid ma 'ongs pa la sogs pa 'gres gsum gyi dbye bas bstan par bya ba'i phyir 'das pa rnams ji lta ba bzhin du zhes bya ba la sogs pa smos so//chos de ni mi zad pa'o zhes bya ba ni/ /chos nyid kyi rang bzhin gyis zad pa med pas na mi zad pa ste sangs rgyas pa nyid do/ /chos kyis ni chos yongs su mi bsngo'o zhes bya ba ni/ yongs su bsngo ba'i yid la byed pa'i chos kyis bsod nams bya ba'i dngos po'i chos so//yongs su bsngo bar bya'o zhes sgra'i rnam pas yongs su bsngos pa yin pa'i phyir rnam par rtog pa 'phangs pa yin la/ de yang rang bzhin gyis rang gi snang ba don med pa la don du zhen pas 'jug pa'i phyir 'khrul pa ma yin nam/ 'du shes phyin ci log la sogs par ji ltar mi 'gyur snyam pa'i dogs pa de ci'i phyir zhe na zhes bya bas bsu nas/'di ltar de ni yongs su bsngo ba de la mngon par zhen pa med do zhes smos so/ /'di skad du gang gi tshe sgro btags pa dang yang dag pa nyid kyis rang bzhin gyi dbye ba mi shes pa de'i tshe snang ba dang rnam par brtag par bya ba'i don dang gcig tu byas nas gang gi so sor snang ba don med pa la don du zhen nas 'jug pa yin pa'i phyir 'khrul par 'gyur ba zhig na/gang gi phyir rnam par rtog pa'i yul du sgro btags pa rnams la ni sgro btags pa'i bdag nyid can brdzun pa nyid du nges shing kun rdzob tu rang gi mtshan nyid rnam par mi rtog pa'i shes pa'i spyod yul/sgyu ma lta bu'i bdag nyid can la yang sgyu ma lta bu'i bdag nyid can phyin ci ma log pa'i rang bzhin du tha dad par mthong ba dang / gang gi tshe yongs su bsngo ba la mngon par mi chags pa dang / bsngo bar bya ba'i sems sngo bar byed pa'i sems kyis mi shes so zhes kyang rtogs pa dang /chos kyis ni yongs su mi bsngo'o snyam du yang rtogs / de'i tshe phyin ci ma log ces bya bar ji ltar 'gyur zhes brjod pa yin no/ /ji skad du bshad pa'i don nyid ldog pa'i sgo nas gsal bar bya ba'i phyir gal te zhes bya ba la sogs pa smos so/ /rtogs pa med par 'jug pa mi 'byung ba ma yin nam/shes pa nyid ji ltar yongs su bsngo ba ma yin snyam pa'i dogs pa de ci'i phyir zhe na zhes bya bas bsu nas/ 'di ltar bsngo ba de la mngon par zhen pa'i phyir ro zhes bya ba gsungs te/ de kho na nyid du na dngos po'i ngo bo ni tshad ma dang 'gal ba yin pa'i phyir ro zhes bya ba ni lhag ma'o//dben pa'i yongs su bsngo ba yid la byed pa'i don bstan pa ni gal te yang de 'di snyam du bsod nams mngon par 'du byed pa yang zhes bya ba la sogs pa gsungs te/ bsod nams mngon par 'du byed pa zhes bya ba la bsod nams ni ma chags pa'i dge ba'i rtsa ba la sogs pa'o//de'i mngon par 'du byed pa ni de kun nas slong bar byed pa'i sems pa'o/ /sgyu ma dang mtshungs pa nyid kyis nye bar 'tshe ba thams cad rab tu zhi ba'i rgyu nyid yin pa'i phyir zhi ba'o/ /zhi ba nyid la sogs pa'i rang bzhin du mngon par zhen pa yang phyin ci log yin no zhes smras pa ni/gal te 'du byed thams cad ni zhes bya ba la sogs pa'o/ /gal te zhi ba'o zhes bya ba la sogs pa de lta bu'i rang bzhin du yang dag par mi shes pa de'i tshe yang dag pa nyid du zhugs pa nyid yin pa'i phyir na de'i shes rab kyi pha rol tu phyin pa yin no zhes bya bar sbyar ro/ /sangs rgyas kyi dge ba'i rtsa ba'i rang bzhin rjes su dran pa'i yongs su bsngo ba yid la byed pa bstan pa'i phyir gang yang sangs rgyas bcom ldan 'das yongs su mya ngan las 'das pa zhes bya ba la sogs pa smos te/de yang bsngo ba ci 'dra ba bzhin du zhes bya ba ni sgyu ma lta bu'o/ /de yang zhes bya ba ni yongs su sngo bar byed pa'i sems te kun rdzob tu ma brtags na nyams dga' bar rang gi rgyu snga ma la brten nas dge ba'i rtsa ba nyid skyes pas na de'i rigs can no//rang dang spyi'i mtshan nyid kyi tshul gyis go rims bzhin du don bya ba dag la nus pa dang mi nus pa nyid kyis na de'i mtshan nyid can dang de'i rigs su gtogs pa'o//chos kyi dbyings kyi rang bzhin yin pas na de'i rang bzhin no/ /gal te de ltar shes na zhes bya ba ni mtshan ma nyid du zhes bya ba ni lhag ma'o/ /bya ba rnams ni blo sngon du 'gro ba yin pa'i phyir zhes pa nyid na ji ltar yongs su bsngo ba ma yin snyam pa'i dogs pa de ci'i phyir zhe na zhes bya bas bsu nas/sangs rgyas bcom ldan 'das rnams ni mtshan ma'i tshul gyis zhes bya ba la sogs pa'o / /dgag par bya ba med na dgag pa mi 'thad pas stong pa nyid la sogs pa de la de kho na nyid du mngon par zhen pa ni phyin ci log yin no zhes bya bar dgongs so//rnam pa gzhan dag kyang smras pa de ni gang 'das pa de ni zhes bya ba la sogs pa'o/ /ma thob pa zhes bya ba ni da ltar gyi dus nyid du ma chud pa'o/ /gnas par mi dmigs zhes bya ba ni/ ngo bo nyid dang bral bas gnas par mi 'thad pa'i phyir ro/ /mtshan ma yang ma yin zhes bya ba ni/ lhan cig byed pa'i rgyud kyis mtshan ma ma yin la/nye bar len pa'i rgyu nyid kyis yul ma yin no/ /gal te de ltar mtshan mar 'dzin zhing zhes bya ba ni/ ji skad du bshad pa'i tshul gyis dmigs pa'i phyir ro/ /mi sems na zhes bya ba ni de kho na bzhin du dgag pa la mngon par zhen par dngos po'i de kho na nyid yongs su mi rtog pa'i phyir ro//des phyin ci log pa yin pa'i phyir yongs su bsngos pa yin no/ /mtshan mar mi byed pas yongs su bsngo ba yin na 'o na ni shing la sogs pa yang yin par 'gyur ro zhes dogs pa bsu nas/ de ste dran pa dang bral bas zhes smos so/ /dran pa med pas shing la sogs pa'i dngos po stong pa nyid la sogs pa la mtshan mar mi byed pa de ltar na yang dngos po'i de kho na nyid yongs su ma shes pa yin pa'i phyir mi sems pa yin no//de bzhin du dran pa dang bral ba'am khong du ma chud pas lha sbyin la sogs pa ci yang yid la mi byed pa de lta na yang snga ma bzhin mi sems pa yin te/des na de bzhin du phyin ci log yin pa'i phyir yongs su bsngos pa ma yin no zhes bya ba ni ngag gi don yin no/ /gal te mtshan mar byed pa dang mtshan mar mi byed pas yongs su bsngo ba ma yin na de'i tshe 'o na ji ltar bya zhe na/ de ste mtshan ma de la zhes bya ba la sogs pa gsungs so//'di skad du mig btsums pa'am dmus long la sogs pa dang 'dra bar rkyen ma tshang bas yid la mi byed pa tsam gyis dngos po la sogs pa'i phyin ci log gi bag chags spong bar mi 'gyur te/ 'du shes med pa'i snyoms par 'jug pa la sogs pa las langs pa dang 'dra bar/rnal 'byor pa la slar yang dngos po la mngon par zhen pa'i rtsa ba can gyi 'dod chags la sogs pa'i nyon mongs pa'i tshogs skye ba'i phyir ro/ /phyin ci log spangs pa med par yang sngon nye bar dmigs pa'i gzugs la sogs pa la yang shin tu gsal bar nyams su myong bas bskyed pa'i yid la byed pa spong bar byed nus pa yang ma yin te/me yongs su ma spangs par tsha ba yongs su mi spong ba bzhin no/ /'di ltar gzugs la sogs pa'i log par rtogs pa 'di dag tsher ma la sogs pa bton pa dang 'dra bar sems las bsal bar bya ba ni ma yin te/ 'on kyang dngos po la sogs pa la yod pa nyid la sogs par phyin ci log pa'i sa bon dang bral bas yin no//de'i phyir de ma log par de mi spong bas skyes bu'i rab rib kyi skyon dang 'dra bar brdzun pa'i gzugs la sogs pa la mngon par zhen pa rab tu 'jug pa su zhig gis bzlog par nus/ phyin ci log gi sa bon de yang rnal 'byor pa'i shes rab kyi mig gis brtags na chos thams cad yang dag pa'i shes pa'i snang bas mthong ba'i phyir mi 'byung ngo //de ltar gyur na sa las rtsa ba drungs nas phyung ba'i shing bzhin du sa bon med pa nyid kyis rnam par rtog pa ngan pa sems la de kho na nyid phyis 'byung bar mi 'gyur ro//de lta na yang mtshan ma la ste/ de bzhin gshegs pa'i dge ba'i tshogs dang yongs su sngo bar byed pa'i sems la sgyu ma lta bur sems shing kho na nyid du de'i rang bzhin du mngon par zhen pa med pas mtshan mar byed do zhes brjod pa yin no/ /thabs la mkhas pa'i yongs su bsngo ba'i yid la byed pa'i bstan par bya ba'i phyir 'di ltar byang chub sems dpa' sems dpa' chen po zhes bya ba la sogs pa smos so//thabs la mkhas pa zhes bya ba sbyin pa la sogs pa rjes su sgrub kyang mi dmigs pa'o/ /tha dad pa'i phyir thabs la mkhas pa la slob pa rgyal ba'i yum mnyan pa la sogs pa dang 'brel pa ci zhig yod snyam pa'i dogs pa de ci'i phyir zhe na zhes bya bas bsu nas/shes rab kyi pha rol tu phyin pa la brten par zhes bya ba la sogs pa smos so/ /'di skad du gang gi phyir shes rab kyi pha rol tu phyin pas sbyin pa la sogs pa mi dmigs pa'i yongs su bsngo bar bya ba gang yin pa de nyid thabs la mkhas pa la slob pa de'i phyir rgyal ba'i yum mnyan pa la sogs pa med par mi 'byung ngo zhes brjod par bya'o//de nyid gsal bar bya ba'i phyir de la gang 'di skad du zhes bya ba la sogs pa smos so/ /de la de skad ma zer cig ces brjod par bya ba yin no zhes bya ba ni de skad ces smra bar 'os pa ma yin no zhes bya ba'i tha tshig go//tha dad pa'i phyir yongs su bsngo ba shes rab kyi pha rol tu phyin pa dang 'brel pa ci zhig yod snyam pa'i dogs pa de ci'i phyir zhe na zhes bya bas bsu nas/ bdag de dag kyang 'gags la zhes bya ba la sogs pa smos so//sngon gyi dge ba'i rtsa ba sogs par byed pa'i sems dang sems las byung ba'i chos rnams dang de'i bag chags rnams de kho na nyid du ma skyes pa yin pas/ bdag gi dngos po de dag gi dngos po 'gags pa dang 'du byed de dag 'gags pas te zhes bya ba'i tshig gnyis smos pa yin no//de nyid sbyor ba dngos gzhi dang mjug gi gnas skabs su dmigs su med pas go rims bzhin du zhi ba dben pa dmigs pa dang bral ba yin no zhes sbyar ro/ /yang na rnam pa dang bcas pa dang rnam pa med pa dang gzhan gyi rnam pa can gyi shes pas gzung bar mi nus pa'i phyir grangs ji lta ba bzhin du brjod par bya'o//bsam pa ni gang gi phyir bsngo bar bya ba'i chos rnams ni de kho na nyid du ma skyes pa yin pa'i phyir yongs su sngo bar byed pa'i shes pa'i lam las 'das pa nyid yin pas yongs su bsngo bar mi 'thad pa de'i phyir rnam par rtog pas lhag par sgro btags nas shes rab kyi pha rol tu phyin pa'i stobs kyis chos rnams sgyu ma lta bur lhag par mos pa'i phyir na yang dag pa'i thabs la mkhas pas phyin ci log par yongs su bsngo bar bya bar nus so zhes bya ba 'di yin no//mtshan ma med pa'i yongs su bsngo ba'i yid la byed pa bstan pa'i phyir/'on kyang gang zag de ni zhes bya ba la sogs pa smos so/ /dngos po dang dngos po med pa la sogs pa'i rang bzhin dang bral ba'i de kho na nyid yang dag pa ji lta ba nyid la/ stong pa nyid la sogs pa'i rang bzhin 'ga' zhig tu 'dzin pa'i phyir mtshan mar byas shing / yang dang yang du yid la byed pa rnam par brtags nas phyis rnam par rtog pa don med pa yang dag pa ji lta ba bzhin ma yin pa la don du zhen pas yang dag pa ji lta bar 'du shes shing don dam par 'du shes par gyur pas/rnam par rtog pa'i snang ba don med bzhin du dmigs pa la/ mi dmigs par 'tshang rgya ba nyid du yongs su sngo bar byed de zhes bya ba ni ngag gi don to//don du dmigs pa med pa'i phyir ji ltar de ltar yongs su bsngo ba mi gnang snyam pa'i dogs pa de ci'i phyir zhe na zhes bya bas bsu nas/ sangs rgyas bcom ldan 'das rnams kyi zhes bya ba la sogs pa smos te/ 'di skad du gang gi phyir gang zag de ni stong pa nyid la sogs pa'i rnam pas yongs su mya ngan las 'das pa bla na med pa'i byang chub la mtshan mar byed cing rnam par rtog par byed pa dang /gang gi rnam par rtog pa snang ba'i rnam pas de bzhin du nye bar dmigs pa de bas na sgro btags pa'i don gyi rang bzhin 'dzin pa'i phyir gsor mi rung ba nyid de'i dmigs pa chen po yin no zhes brjod pa yin no//nye bar dmigs pa ni yid dang ba la sogs par byed pa'i phyir de'i 'du shes can gyi yongs su bsngo ba don chen po byed pa ma yin snyam pa'i dogs pa de ci'i phyir zhe na zhes bya bas bsu nas/ yongs su bsngo ba de ni dug dang bcas pa zhes bya ba la sogs pa smos so//mngon par 'dod pa'i chos kyi de kho na nyid rtog pa las nyams pa'i rgyur gyur pa'i phyir dug dang bcas pa'o/ /'khor ba'i sdug bsngal gdon par dka' ba thams cad kyi rgyu nyid yin pas na zug rngu dang bcas pa ste/las dang po pa rnams kyi yid dang ba la sogs par byed pa yin yang tshad ma dang 'gal ba'i phyir na zhes bya ba ni lhag ma'o/ /'di dag gsal bar bya ba'i phyir 'di lta ste dper na zhes bya ba la sogs pa smos so/ /de la dug gi nyes pa'i tshul yongs su shes pa nyid yin pa'i phyir mkhas pa'o//dug gi rang gi ngo bo mi shes pas na byis pa'o/ /dug gi rang gi ngo bo shes na yang 'chi bar nus pa nyid du nges par mi 'dzin pas na shes rab 'chal ba'o/ /bde ba skyed par byed pa nyid kyis na bde ba thob par byed pa'o/ /tha mar sdug bsngal gyi 'bras bu can yin pas sdug bsngal bar smin par 'gyur ba'o//kha cig ces bya ba ni dmigs pa'i 'du shes can no/ /log par zin cing zhes bya ba la sogs pa'i tshig gsum ni go rims bzhin du thos pa dang bsam pa dang / sgom pa'i gnas skabs su log par 'dzin pa'i phyir ro//legs par smras pa'i don ma shes shing zhes bya ba ni sgyu ma lta bu'i don ni phyin ci log thams cad ldog pa'i dogs pa can du ma rtogs pa'i phyir ro/ /don yang dag pa ji lta ba bzhin du khong du ma chud pa dag ces bya ba ni dngos po'i rang gi ngo bo sgyu ma lta bu yin par nges par 'dzin pa'i nus pa dang bral ba'i phyir ro//las dang po pa rnams kyi yid dang bar byed pa'i phyir na gang gis de'i 'du shes can la yongs su bsngo bar 'gyur ba/ dmigs pa skyon dang bcas pa ji ltar yin snyam pa'i dogs pa de ci'i phyir zhe na zhes bya bas bsu nas/ dmigs pa ni dug dang bcas pa'o zhes bya ba gsungs te tshad ma dang 'gal ba'i phyir zhes bya bar 'dod do//de ltar bslab par mi bya'o zhes bya ba ni dmigs pa'i tshul gyis bslab par mi bya'o/ /sangs rgyas kyis rjes su snang ba'i yongs su bsngo ba'i yid la byed pa'i byed pa bstan par bya ba'i phyir/ yang des ji ltar bslab par bya zhing zhes bya ba la sogs pa smos so/ /skur pa mi gdab par 'dod pas zhes bya ba ni/ de bzhin gshegs pas bstan pa'i don nyams su blangs pas 'bras bu thob par mthong ba'i phyir spong bar byed par mi 'dod pas so/ /sangs rgyas kyi ye shes zhes bya ba ni shes rab kyi spyan chos thams cad rnam par mi rtog pa'i yul can gyis mkhyen cing /sangs rgyas kyi spyan zhes bya ba ni/ rnam pa thams cad du chos thams cad mngon par byang chub pa'i yul can gyis gzigs pa zhes bya bar sbyar ro/ /chos nyid gang gis zhes bya ba ni sgyu ma lta bu nyid kyis so//rjes su snang ba zhes bya ba ni ji ltar lam thams cad mi dmigs par dmigs pa'i yid la byed pas yongs su bsngo ba nyid kyis gnang ba'o/ /gnod par mi 'gyur zhes bya ba ni skyon med pa nyid kyis nyes pa ma byas pa'o/ /nye bar dmigs pa'i yul dang bral ba'i phyir dug med pa'i yongs su bsngo ba'o//gzugs kyi sku dang chos kyi sku thob pa'i rgyu nyid yin pa'i phyir go rims bzhin du yongs su bsngo ba chen po yin no/ /chos kyi dbyings su bsngo ba yin no zhes bya'o / /sbyor ba dang mjug gi gnas skabs su yongs su rgyas pa'i phyir yongs su rdzogs pa'o//dngos gzhi'i gnas skabs su yang dag par rab tu 'jug pa nyid yin pa'i phyir shin tu yongs su rdzogs pa yin no/ /khams gsum par ma gtogs pa'i bsngo ba yid la byed pa bstan pa'i phyir/ gzhan yang rigs kyi bu 'am rigs kyi bu mo zhes bya ba la sogs pa smos so//mi rtogs pa zhes bya ba ni/ 'dod pa la sogs pa khams gsum ni dmigs su med pa yin pa'i phyir mi gnas pa'o/ /de la 'dod pa'i khams ni lha'i ris drug dang / gling bzhi pa'i mi dang / yi dags dang / byol song dang / dmyal ba'i dbye bas nyi shu'o/ /gzugs kyi khams ni steng gi gnas bcu bdun te/bsam gtan gsum re re zhing gsum dang bsam gtan bzhi pa'i sa brgyad do/ /gzugs med pa'i khams ni gnas med de skye bas rnam pa bzhi'o/ /yang na bsam gtan gyi gong na dbyibs dang bcas pa'i gzugs med pa'i bsam pa ni drug yin no zhes 'dod do//'das pa la sogs pa'i dus gsum du mi gnas pa nyid kyis na 'das pa ma yin zhes bya ba la sogs pa gsungs so/ /'dod pa la sogs pa'i khams rnams dang 'das pa la sogs pa'i dus su gnas pa'i sems kyi skad cig ma yongs su sngo bar byed pa'i phyir ji ltar de la mi gnas snyam nas de ci'i phyir zhe na zhes rtog pa la/dus gsum dang khams gsum ma gtogs pa zhes bya ba la sogs pa gsungs so/ /'di skad du dus gsum dang khams gsum ni kho na nyid du ma skyes pa yin pa'i phyir ma gtogs pa nyid yin pas ji ltar de la gnas nas yongs su bsngo bar bya/chos gang du zhes bya ba ni 'tshang rgya ba nyid la'o/ /yongs su bsngo ba ni chud ma zos pa yin te zhes bya ba ni chos kyi dbyings dang 'dra bar zad pa med pa'i phyir ro/ /ma gtogs pa'o zhes mngon par zhen pa ni 'ching ba yin pas de la ste yongs su bsngo ba de la zhes bya ba la sogs pa smos so//nye bar bsdu bar bya ba'i phyir de la gang la zhes bya ba la sogs pa smos so/ /'dri ba'i sgo nas yang dag par ston par byed pa yin pa'i phyir 'phags pa rab 'byor legs so legs so zhes bya ba byin pa yin te/ gzhan du na 'phags pa byams pas bstan pa yin pa'i phyir gzhan dag la legs so zhes bya ba byin pa legs par ji ltar 'gyur/chos phyin ci ma log par bstan pa med pa ma yin nam/ ji ltar ston pa'i bya ba byas pa yin snyam pa'i dogs pa de ci'i phyir zhe na zhes bya bas bsu nas/ rab 'byor yongs su bsngo ba zhes bya ba la sogs pa gsungs so//'di skad du gang gi phyir yongs su bsngo ba 'di dag thams cad sgyu ma dang 'dra bas chos kyi dbyings su bsngo ba yin pas de bas na phyin ci log par ston pas sangs rgyas kyi bya ba byed pa yin no zhes brjod pa yin no/ /de bas na de'i 'og tu bsod nams chen po 'byung ba zhes bya ba'i bsngo ba yid la byed par bya ste/de yang chung ngu dang 'bring dang chen po'i dbye bas rnam pa gsum yod pa las/ chung ngu'i dbang du mdzad nas chos nyid 'di la sangs rgyas bcom ldan 'das rnams kyi zhes bya ba nas mngon par shes pa lnga thob par gyur kyang zhes bya ba'i bar du gsungs pa yin no//'di skad du sems can dge ba bcu'i las kyi lam la brten pa nas brtsams te/ mngon par shes pa lnga rnams kyi bsod nams mngon par 'du byed pa chung ngur gyur pa bas mi dmigs pa'i yid la byed pas rjes su yi rang ba sngon du 'gro ba'i yongs su bsngo ba bsod nams lhag pa nyid yin pa'i phyir chung ngu'i khyad par gyis phye ba'i bsod nams chen po 'byung ba'i yongs su bsngo ba'i yid la byed pa chung ngu yin no zhes brjod pa yin no//'bring bstan par bya ba'i phyir yang rab 'byor stong gsum gyi stong chen po'i zhes bya ba la sogs pa nas rang sangs rgyas su gyur kyang zhes bya ba'i bar du gsungs pa yang yin no//'di skad du 'bras bu dang po la gnas pa nas brtsams te rang sangs rgyas kyi bar du bsod nams mngon par 'du byed pa 'bring du 'gyur bas ni de mi dmigs pa'i dmigs pa yid la byed pas rjes su yi rang ba sngon du 'gro ba'i yongs su bsngo ba bsod nams chen po yin pa'i phyir 'bring gi khyad par gyi dbye ba bsod nams chen po 'byung ba'i yid la byed pa 'bring yin no zhes brjod pa yin no//chen po bstan pa'i phyir rab 'byor yang stong gsum gyi stong chen po'i zhes bya ba nas brtsams te/sbyin pa de yang dmigs pa'i 'du shes kyis byin la zhes bya ba'i bar du gsungs pa yin te/ stong gsum gyi stong chen po'i 'jig rten gyi khams gang gA'i klung gi bye ma snyed dag gi sems can bla na med pa yang dag par rdzogs pa'i byang chub tu zhugs pa rnams kyis dmigs pa dang bcas pas de snyed dam de bas lhag pa'i gos pa dang bsod snyoms la sogs pa thams cad kyis bskal pa de snyed cig tu bsnyen bskur byas pa'i bsod nams chen por gyur pa bas de mi dmigs pa'i yid la byed pas rjes su yi rang ba sngon du 'gro ba ni bsod nams ches lhag pa yin pa'i phyir chen po'i khyad par gyi bye brag gis bsod nams chen po 'byung ba'i yongs su bsngo ba'i yid la byed pa chen po yin no zhes bya ba ni spyi'i don yin no//yan lag gi don yang brjod par bya ste/ zhugs pa'i zhes bya ba ni smon pa dang / 'jug pa'i sems dag gis zhugs pa zhes bya ba'i tha tshig go//de dag thams cad kyis zhes bya ba ni dmigs pa'i 'du shes kyis byin la/ rnam grangs des na zhes 'og nas 'chad pa dang sbyar ro/ /de nyid bstan pa ni/ stong gsum gyi stong chen po'i zhes bya ba la sogs pa gsungs so//gzhan yang gzhan dag kho na na zhes bya ba ni de ni ma yin pa gzhan dag na'o/ /rim gro byas te zhes bya ba ni cig car bsnyen bkur byed pa'o/ /bde bar sbyar ba thams cad ces bya ba ni khrus dang dril phyis la sogs pa rnams kyis so/ /bde ba la sogs par gnas pa thams cad kyis zhes bya ba ni 'chag pa la sogs pa'i gnas pas ji ltar 'dod par nye bar gnas shing zhes phyi ma dang sbyar ro//rnam grangs des na zhes bya ba ni/ sems can de dag thams cad yang dag par rdzogs pa'i byang chub tu zhugs par gyur la/ ji skad bshad pa'i 'jig rten gyi khams gzhan dang gzhan gnas pa'i sems can thams cad la rnam grangs 'dis sems can re re'i don byed pa rim gyis bsnyen bkur byed la sbyin pa de dag yang dmigs pa'i tshul 'du shes kyis byin na zhes bya ba'i bar du'o//sems can de dag grangs de lta bu zhes bya ba la sogs pa la/ji skad bshad pa'i 'jig rten gyi khams na gnas pa'i sems can gzhan de dag thams cad las re res yongs su brtags te zhes bya ba byas nas yang byang chub sems dpa' de rnam pa thams cad nyid la byang chub sems dpa' re res bskal pa de snyed du rim gror byas pa zhes bya ba ni ngag gi don to//'gres snga ma las 'di'i khyad par ni rim gyis zhes bya ba yin par dgongs so/ /rnam grangs 'dis sbyin pa byin zhing zhes bya ba ni/ ji ltar bskal pa gang gA'i klung gi bye ma snyed du byang chub sems dpa' gcig la byang chub sems dpa' gcig cig bsnyen bkur byed la/de bzhin du byang chub sems dpa' gcig po de nyid bskal pa gang gA'i klung gi bye ma snyed du bsnyen bkur byed pa'i rim pa 'dis 'jig rten gyi khams gzhan dang gzhan gyis yang dag par bsdus pa'i byang chub sems dpa' de thams cad la bde bar sbyar ba'i don du sbyin pa byin zhing bshad ma thag pa'i rim pas yang dag par rdzogs pa'i byang chub sems dpa' de dag thams cad kyis kyang sbyin pa sbyin na'o//gzugs can zhig lags na zhes bya ba ni/ rdul phra rab kyi rang bzhin gyi gzugs kyi phung por gyur na'o/ /mi shong bar 'gyur ro zhes bya ba ni rab tu mang bas mi shong bar 'gyur ro //dmigs pa'i 'du shes can gyi sbyin pa'i rang bzhin gyi bsod nams mngon par 'du bya ba ni gzhal du med pa yin yang ji ltar na rgyu'i bar du mi bzod snyam pa'i dogs pa de ci'i phyir zhe na zhes bya bas bsu nas 'di ltar zhes bya ba la sogs pa gsungs so/ / 'di skad du gang gi phyir de rnams kyi sbyin pa shin tu mang bar byin pa gcig la sogs pa'i grangs dang bral ba yin na yang tshad med pa la sogs pa'i grangs dang ldan pas tshad med pa dang shin tu mang ba la sogs pa'i grangs kyis chod pa yin no/ /de bas na de'i rgyu can gyi bsod nams mngon par 'du bya ba yongs su bsngo ba'i bsod nams kyi phung po tshad la sogs pa'i grangs dang bral ba'i rgyu'i bar du yang mi bzod do zhes brjod pa yin no//bcom ldan 'das kyi byin gyi rlabs kyis lha'i bu rnams gus par byas te byed pa rjod pa ni/ bcom ldan 'das 'di lta ste zhes bya ba la sogs pa'o/ / theg pa gsum gyis 'dul ba'i sems can rnams la lam ston pa'i rgyur gyur pa'i bya ba dang ldan pa nyid kyis 'gro ba'i don byed pa nyid kyi phyir yongs su bsngo ba chen po lags te zhes bya'o / /ji ltar na de lta bu yin zhes rtogs pa la/ de ni 'di ltar zhes bya ba la sogs pa smras te/ gang gi phyir thabs la mkhas pa yod par gyur na de tsam du gzhal du med pa la sogs pa'i grangs dang ldan pa rab tu grags pa'i bsod nams kyi phung po de nyid zil gyis mnan pa de'i phyir yongs su bsngo ba chen po yin no zhes bya ba ni ngag gi don yin no//yang dag par brten pas dad pas phul du byung ba nges par skyes pa nyid kyis mchod pa sngon du 'gro ba can rab tu bsngags pa'i don smras pa ni de nas sum cu rtsa gsum gyi zhes bya ba la sogs pa'o//mdun dang kun du rab tu bkram pa dang gtor bas na go rims bzhin du mngon par rab tu gtor nas zhes bya ba'i don gyi dbye ba yin no/ / de bzhin du lha'i ris gzhan dag nas kyang zhes bya ba ni 'thab bral la sogs pa rnams nas so/ /de skad du zhes bya ba sum cu rtsa gsum pa ltar yongs su bsngo ba chen po lags te zhes bya ba la sogs pa'i sgra 'byin zhing yang dang yang du zlos pas dbyangs rjes su sgrogs pa'o//de bzhin du sbyar te zhes bya ba ni yongs su bsngo ba chen po lags te zhes bya ba la sogs pa'i 'gres kyi zhabs thams cad du de skad du sgra 'byin cing dbyangs rjes su sgrog go zhes bya ba'i tshig gnyis sbyar bar bya'o zhes bya ba'i tha tshig go/ /yun ring po de tsam du bsags pa dang zhes bya ba ni dus yun ring por nye bar bsgrubs pa'o//rgya cher yang dag par bsgrubs pa ni zhes bya ba ni/ sbyor ba du ma'i sgrub pa'o/ /gzhan yang yongs su bsngo ba'i che ba'i bdag nyid bstan pa'i phyir de nas bcom ldan 'das kyis gnas gtsang ma'i ris kyi lha'i bu zhes bya ba la sogs pa gsungs pa yin no//sbyin pa las byung ba'i bsod nams mngon par 'du bya ba sbyor ba la sogs pa chen po nyid yin yang / sbyor ba la sogs pa chung ngus bskyed pas yongs su bsngo ba'i bsod nams bya ba'i dngos po'i rgyu'i bar du yang ji ltar mi bzod snyam pa'i dogs pa de ci'i phyir zhe na zhes bya bas bsu nas/de ltar byang chub sems dpa' zhes bya ba la sogs pa gsungs te/ dmigs pa dang bcas pa ni tshad ma dang 'gal ba'i phyir phyin ci log yin no zhes dgongs so/ /rjes su yi rang ba sngon du 'gro ba yin yang mos pa yid la byed pas sgrub pa'i dge ba'i rtsa ba thams cad la sgyu ma'i skyes bu ltar chos thams cad mi dmigs par bsgoms pas sems can thams cad kyi don du bla na med pa yang dag par rdzogs pa'i byang chub tu yongs su bsngo bar bya ba yin pa'i phyir byang chub sems dpas sems can thams cad la theg pa gsum gyis nges par 'byung ba'i lam nye bar ston pa'i bya ba byed pa dang ldan pa'i yongs su bsngo ba yid la byed pa gcig kho na 'ga' zhig la mngon par zhen pa yin pas de'i gnyen po'i don du bshad pa'i tshul gyis skye bo blo dman pa rnams la phan gdags par bya ba'i phyir rab tu dbye ba rnam pa bcu gnyis su byas pa yin la/shes rab rno ba rnams kyi brnyas pa bzlog pa'i phyir ni shin tu rgyas par phye ba yin no/ /de skad du yang / yongs su bsngo ba khyad par can/ /de yis byed pa mchog yin no/ /de ni dmigs med rnam pa can/ /phyin ci ma log mtshan nyid do//dben dang sangs rgyas bsod nams tshogs/ /rang bzhin dran pa'i spyod yul can/ /thabs bcas mtshan ma med pa dang / /sangs rgyas rjes su yi rang dang / khams gsum gtogs pa ma yin dang / chung dang 'bring dang chen po yi/ /bsngo ba gzhan ni rnam pa gsum//bsod nams cher 'byung bdag nyid do/ /zhes gsungs pa yin no/ /rjes su yi rang ba'i yid la byed pas rang dang gzhan gyi bsod nams kyi bya ba mnyam pa nyid 'thob pas na de'i 'og tu rjes su yi rang ba yid la byed pa bsten par bya ba'i phyir de rnams bcom ldan 'das la zhes bya ba la sogs pa gsungs pa yin te/ji tsam gyis na zhes bya ba ni/ rnam pa ji tsam gyis so/ /mi 'dzin/ rlom sems su mi byed/ mi dmigs zhes bya ba ste / de kho na nyid du ste/ sbyor ba la sogs pa'i gnas skabs su zhes bya bar sbyar ro/ /mi rtog rnam par mi rtog yang dag par rjes su mi mthong zhes bya ba ni/go rims bzhin du 'das pa dang ma 'ongs pa dang ldan zhes bya bar sbyar ro/ /rtog pas rnam par bsgrubs te zhes bya ba ni/ yang dag pa ma yin pa'i kun tu rtogs pa las byung ba'i phyir ro/ /de ltar byung ba'i rang dang spyi'i ngo bo dang bral bas go rims bzhin du ma skyes pa nges par ma skyes pa zhes bya ba ni yin no//'das pa la sogs pa nas 'ong ba med pas na 'ong ba med pa'o/ /ma 'ongs par 'gro bar 'gyur ba med pas na 'gro ba med pa'o/ /chos nyid ces bya ba ni sgyu ma lta bu'i ngo bo nyid do/ / 'di tsam gyis na zhes bya ba ni bshad ma thag pa'i rnam pa 'di dag tsam gyis zhes bya ba'i tha tshig go/ /rnam par grol ba ci lta ba bzhin du zhes bya ba ni/ ji ltar nyon mongs pa dang shes bya'i sgrib pa dang bral zhing ma skyes pa'i mtshan nyid ji lta ba bzhin du'o/ /de kho na nyid du kun nas nyon mongs pa'i chos dang mi ldan pas de dag ma bcings pa'o//rnam par byang ba'i chos rnams dang bral bas ma grol ba'o/ /gang gi phyir ston pa gzigs pa'i snang ba thogs pa mi mnga' ba can gyis mkhyen pa'i bdag la las dang 'bras bu bdag gis bye brag gi cha ji ltar snang ba bzhin du 'gro ba la phan par bzhed pa thugs rje'i bdag nyid can gyi gzigs pa po bcom ldan 'das des bye brag tu gsungs pa de bas na dbang po las 'das pa yin na yang thams cad ji ltar mthong ba bzhin du gnas so zhes bya bar dgongs so//'khor ba dang mya ngan las 'das pa la mi gnas pa na ma chags pa dag gi'o//rjes su yi rang ba'i skabs su bsngo'o zhes rjes su yid la byed pa'i zhar la brjod pa yin no/ /sgyu ma lta bu nyid kyis 'khor ba chen po mi thob pa zhes bya ba la/ 'jig pa med pas mi 'jig pa'o zhes bya bar sbyar ro/ /lus kyis legs par spyod pa dang zhes bya ba ni/srog gcod pa la sogs pa'i lus kyi las rnam pa gsum med pa'i phyir ro/ /ngag gis legs par spyod pa dang zhes bya ba ni/ brdzun du smra ba la sogs pa'i ngag gi las rnam pa bzhi dang bral ba'i phyir / yid kyis legs par spyod pa zhes bya ba ni/brnab sems la sogs pa yid kyi rnam pa gsum dang bral ba'i phyir ro/ /snga ma bzhin du de ci'i phyir zhe na zhes dogs pa bsu nas dgongs pa de nyid kyis 'di ltar byang chub sems dpa' de dag thams cad ni dmigs pa can zhes bya ba la sogs pa gsungs so/ /mtshang 'bru ba zhes bya ba ni phra ma dang tshig rtsub po dang ngag kyal pa smra bas so//brdegs te zhes bya ba ni dbyig pa la sogs pas 'tshog pa'i phyir ro/ /spros kyang zhes bya ba ni nan gyis nges par byed pa'i phyir ro/ /nga rgyal dang bcas pa zhes bya ba ni kha cig dregs pa'i dngos po nga rgyal dang bcas pa'i phyir ro zhes 'dod do//la la ni nga rgyal dang bcas pa zhes bya ba ni sgra gyur pa zhes bya ba'i don la 'jug go zhes zer ro/ /de bzhin du de ci'i phyir zhe na zhes dogs pa bsu nas/ 'di ltar byang chub sems dpa' zhes bya ba la sogs pa gsungs so/ /brtson 'grus 'bar ba rtsom pa bstan pa'i phyir gnas pa dang nye bar gzung ba yin pas 'dug cing chags pas mngon par gnas na zhes bya ba gnyis gsungs pa yin no//spro ba med pa'i mtshan nyid can gyi zhum pa dang bral bas na yid mi gsod cing zhes bya'o/ /rmugs pa dang gnyid kyis zhes bya ba/gti mug gi cha sems las su mi rung ba nyid ni rmugs pa'o/ /zho la sogs pa la nye bar longs spyod pa'i rgyu la brten nas gti mug gi cha'i sems mngon par sdud pa'i mtshan nyid ni gnyid do/ /snga ma bzhin du de ci'i phyir zhe na zhes dogs pa bsu nas/ de bzhin du 'di ltar zhes bya ba la sogs pa gsungs so//bsam gtan bzhi la mnyam par gzhag pa la zhes bya ba ni/ gzugs kyi khams kyis bsdus pa'i 'jig rten pa'i bsam gtan bzhi bsgoms par gyur pa'o/ /de bzhin du de ci'i phyir zhe na zhes dogs pa bsu nas/ snga ma bzhin du de ltar byang chub sems dpa' zhes bya ba la sogs pa gsungs pa yin no//de la bsdus pa'i don ni 'di lta yin te/ rab tu dga' ba'i sems kyis kun rdzob kyi thabs kyis dge ba'i rtsa ba rnams la dmigs nas rjes su yi rang bar bya ba ni rjes su yid la byed pa yin no/ / de skad du yang / thabs dang mi dmigs pa dag gis/ dge ba'i rtsa la yi rang ba/ rjes su yi rang yid byed pa/ /bsgom pa yin par 'dir brjod do/ /zhes gsungs pa yin no/ /shes rab kyi pha rol tu phyin pa'i bshad pa mngon par rtogs pa'i rgyan gyi snang ba las/ rjes su yi rang ba dang yongs su bsngo ba'i le'u zhes bya ste drug pa'o// //zag pa dang bcas pa'i bsgom pa'i lam gyi 'og tu zag pa med pa'i bsgom pa'i lam brjod par bya'o/ /de yang rnam pa gnyis yod pa la / rang gi ngo bo nyid ston pas dang po sgrub pa'i mtshan nyid kyi bsgom pa'i lam bstan pa'i don du de nas bcom ldan 'das la tshe dang ldan pa shA ri'i bus zhes bya ba la sogs pa smos so//thams cad mkhyen pa nyid ye shes yongs su sgrub pa zhes bya ba ni/ de bzhin gshegs pa'i ye shes bskyed pa'i rgyur gyur pa'i phyir ro/ /thams cad mkhyen pa nyid ces bya ba ni/gzugs la sogs pa phyin ci ma log par gzigs pa'i rang bzhin yin no zhes bya ba'i tha tshig go/ /de de bzhin no zhes bya ba la sogs pa'i tshig gis ni dad pa phul du byung ba nyid yin pa'i phyir mngon par bsgrub pa ni ye shes kyi rang bzhin yin par rgya cher bstan par bya ba'i don du bcom ldan 'das zhes bya ba la sogs pa gsol te /dro bar gtogs pa'i ye shes kyi snang ba nyid yin pas na gsal bar snang bar bgyid pa lags so/ /lus dang ngag dang yid rab tu 'dud pas na phyag 'tshal ba'o/ /gang gi phyir sdud par 'os pa nyid la yin pas na phyag bgyi bar 'os pa lags so//rtse mo'i gnas skabs nyid thob pa nyid kyis na ma dad pa la sogs pa dang ma 'dres pa yin pas gos pa med pa lags so/ /bzod pa'i rang bzhin nyid kyis na ngan song du 'jug par byed pa'i las rnams dang bral bas 'jig rten thams cad kyis mi gos pa lags so//chos kyi mchog gi ngo bo nyid kyis na 'jig rten las 'das pa'i ye shes 'byung ba'i rgyu nyid yin pa'i phyir snang bar bgyid pa lags so/ /sdug bsngal la chos shes pa'i bzod pas rang gis mthong bas spang bar bya ba'i khams gsum pa'i nyon mongs pa spang bas na khams gsum pa thams cad kyi rab rib dang bral bar bgyid pa lags so//sdug bsngal la chos shes pas rnam par grol ba mngon sum du byed pas na nyon mongs pa dang lta ba'i mun pa thams cad sel ba lags so/ /sdug bsngal la sogs pa rjes su shes pa'i bzod pas 'phags pa'i chos kyi rigs rtogs par byed pas na brten par bgyid pa lags so//sdug bsngal la rjes su shes pas nges par 'dzin par byed pas na mchog tu bgyid pa lags so/ /kun 'byung ba la shes pa la sogs pa'i bzod pa la sogs skad cig ma bzhis snga ma bzhin du bya ba byed pas byang chub kyi phyogs kyi chos rnams kyis bde legs su bgyid pa lags so//snang bar bgyid pa lags so/ /'jigs pa dang nye bar 'tshe ba thams cad rab tu spang ba dang / snang bar bgyid pa lags so zhes bya ba'i tshig bzhi dang go rims bzhin du sbyar bar bya'o//sha dang lha dang shes rab dang sangs rgyas dang chos kyi spyan yongs su 'dzin pas na snga ba bzhin 'gog pa la chos shes pa'i bzod pas lam ston pa lags so/ /'gog pa la chos shes pas mig lags so/ /rjes su shes pa'i bzod pas mi mthun pa'i phyogs chung ngu dang 'bring dang chen po dang bral bas 'phags pa'i chos kyi ris rtogs pa'i phyir gti mug gi mun pa dang rab rib rnams ma mchis par bgyid pa lags so//'gog pa la rjes su shes pas gdon mi za bar nges par 'dzin pa'i phyir rab rib dang bral bar bgyid pa lags so//de bzhin du lam la chos shes pa'i bzod pas chos thams cad mi bgyid pa lags so/ /lam la chos shes pas lam du 'dzud pa lags so/ /lam la rjes su shes pa'i bzod pas thams cad mkhyen pa nyid lags so/ /lam la rjes su shes pas nyon mongs pa dang shes bya'i sgrib pa bag chags dang mtshams sbyor ba thams cad mi bskyed pa lags so//zag pa dang bcas pa'i bsgom pa'i lam gyis dge ba'i chos rnams bskyed pas na mi 'gog pa lags so/ /sgyu ma lta bu yin pa'i phyir grags pa mngon par sgrub pa'i bsgom pa'i lam gyis rang bzhin gyis rtag tu gnas pas na ma skyes pa dang ma 'gags pa lags so//shin tu rnam par dag pa'i bsgom pa'i lam gyis phul du byung ba'i phan pa mdzad pa nyid yin pa dang rang gi mtshan nyid stong pa nyid yin pa'i phyir yul lags so/ /de yang chung ngu dang 'bring dang chen po'i dbye bas stobs bcu bgyid pa dang /mi thul ba dang / mgon bgyid pa lags so zhes bya ba'i tshig gsum go rims bzhin du gsungs pa yin no/ /ther zug ni tshogs pa ste/ de la gnas pas na rgyu dang rkyen las byung ba'i dngos po de la de skad ces bya'o//de dag pas ther zug tu gnas pa ma mchis pa'i slad du ste/ bar chad med pa'i lam nyid kyis sgrib pa thams cad spong ba yin pas 'khor ba'i gnyen po lags so/ /rnam par grol ba'i lam gyis yon tan phun sum tshogs pa thams cad mngon par thob pa yin pa'i phyir chos thams cad kyi ngo bo nyid ston pa lags so//de ltar de kho na nyid yang dag par rtogs pa rnams phyis bsam pa ji lta ba bzhin du theg pa gsum gyis chos ston pas chos kyi 'khor lo lan gsum du bzlas te rnam pa bcu gnyis su bskor ba yongs su rdzogs pa lags so zhes de ltar 'di rnams kyi don ston par brjod par bya ba yin par sngon gyi slob dpon rnams 'chad do//de la chos kyi 'khor lo gang la lan gsum bzlas te rnam pa bcu gnyis su bskor ba yod pa zhes tshig rnam par sbyar ro/ / de la lan gsum du bzlas pa 'di yin te/ dge slong dag 'di lta ste/ 'di ni sdug bsngal 'phags pa'i bden pa'o/ /de mngon par shes nas yongs su shes par bya'o/ /yongs su shes so/ /'di ni sdug bsngal kun 'byung ba 'phags pa'i bden pa'o/ /de mngon par shes nas spong bar bya'o//spangs so/ /'di ni sdug bsngal 'gog pa 'phags pa'i bden pa'o/ /de mngon par shes nas mngon sum du bya'o/ /mngon sum du byas so/ /'di ni sdug bsngal 'gog par 'gro ba'i phyir lam gyi 'phags pa'i bden pa'o/ /de mngon par shes pa nas bsgom par bya'o//ngas bsgoms so zhes pa sngon ma thos pa'i chos rnams la tshul bzhin yid la byed pas mngon sum du byed pa'i don nyid kyis na zag pa med pa'i shes rab kyi mig skyes so/ /the tshom med pa nyid kyis na shes pa'o/ /yang dag pa'i don nyid yin pa'i phyir rig pa'o//rnam par dag pa nyid yin pa'i phyir blo skyes pa'o zhes bya ba'i tshig 'di bden pa gsum po re re la yang sbyar bar bya'o/ /de bas bden pa bzhi po re re zhing lan gsum bzlas pa yin pas lan gsum du bzlas pa'o/ /mig ces bya ba la sogs pa rnams bzhi yang lan gsum du bzlas pas bden pa re re la gsum yin pa de bas na rnam pa bcu gnyis so//'di dag tsam kho nas 'gro ba'i don rdzogs par byed pa yin pas lan gsum du bzlas te rnam pa gnyis su bskor ba'i chos nyid 'khor lo dang 'dra bar chos kyi 'khor lo ste/ dang po bA rA Na sIr gsungs pa'i mdo gang yin pa'o/ /ji ltar 'khor los sgyur ba'i rgyal po'i 'khor lo rin po che ni sngon du 'gro la/ de nyid kyi rjes su 'brang ba'i dpung gi tshogs thams cad ni phyi nas 'brang ngo / /de bzhin du khams gsum pa ma lus pa mtha' dag gi bdag po de bzhin gshegs pa'i mdo sde sngon du mdzad nas bstan pa'i chos thams cad rab tu 'byung ba yin no//de bas na de ni rgyal ba'i yum gyi bdag pos bskor ba yin pas bcom ldan 'das yum la de skad ces bya'o/ /mchog nyid bstan par bya ba'i phyir bcom ldan 'das ji ltar zhes bya ba la sogs pa gsungs so//lan btab pa ni shA ri'i bu ston pa la ji lta ba bzhin du zhes bya ba la sogs pa gsungs pa yin no/ /ston pa la byed pa dang 'dra bar nan tan la sogs pas sgrub pa'i phyir ro/ /gzhan du na sangs rgyas nyid yang dag par 'thob par mi 'gyur ro zhes mchog nyid bstan pa yin no// ci'i phyir zhe na zhes bya ba ni rgyu gang gi phyir zhes bya ba'i tha tshig go/ /de nyid ni de'i gzhi las zhes bya ba smos pa yin no/ /kho bo ni gzhi 'di las zhes bya ba ni bsod nams kyi phung po zil gyis gnon pa'i rgyu las so/ /mngon par sgrub pa'i mchog nyid kyi skabs su yongs su bsngo ba'i yid la byed pas bsod nams kyi phung po zil gyis gnon pa'i rgyu yin par ci'i phyir 'dri zhe na/brjod pa gang du/ zag pa dang bcas pa'i yongs su bsngo ba'i yid la byed pa la gang gi stobs kyis sbyin pa la sogs pa'i bsod nams kyi phung po tshad med pa zil gyis gnon par 'gyur ba de 'dra bar mchog nyid yod pa der zag pa med pa'i bsgom pa'i lam ni shin tu mchog nyid yod do zhes bstan par bya ba'i phyir bsod nams kyi phung po yongs su bsngo bas zil gyis gnon par byed pa'i rgyu 'dri ba yin no//phul du byung ba'i don nyid ni 'on kyang kau shi ka zhes bya ba la sogs pa gsungs pa yin te/sbyin pa dang zhes bya ba la sogs pa la/ de la sbyin pa ni chos dang mi 'jigs pa dang zang zing gi dbye bas rnam pa gsum mo/ /de bzhin du tshul khrims kyi ni mi dge ba las ldog pa dang dge ba la 'jug pa dang sems can gyi don byed pa'i dbye bas gsungs so //bzod pa ni chos la nges par rtog pa dang sdug bsngal nyams su len pa dang gzhan gyis gnod pa byed pa la ji mi snyam pa'i dbye bas rnam pa gsum mo/ /brtson 'grus kyang go cha dang dge ba dang sems can gyi don la sbyor bas rnam pa gsum mo//bsam gtan mngon par sgrub pa dang nyon mongs pa'i gnyen po dang bde bar gnas pa'i dbye bas rnam pa gsum mo/ /kun rdzob dang don dam pa'i bden pa dang / sems can ma lus pa'i don la dmigs pa'i dbye bas shes rab kyi mig rnam pa gsum yod pa dang bral ba'o//dmus long du gyur pa yin te zhes bya ba ni skye bzhin pa nyid na 'khor gsum yongs su dag pa'i shes rab kyi mig dang bral ba'o/ /yongs su 'dren pa med pa'i phyir zhes bya ba ni kha lo sgyur ba dang bral ba'i phyir ro//thams cad mkhyen pa nyid kyi lam du 'jug pa'i zhes bya ba ni/ sangs rgyas nyid thob par byed pa'i lam rab tu dga' ba la sogs pa'i sa rnams su 'jug pa'i yin pa'o/ /skal ba yang med na zhes bya ba ni skal ba med cing nus pa dang bral ba'o/ /lta ba yang ga la 'gyur zhes bya ba ni thob par ci'i phyir 'gyur te mi 'gyur ro zhes bya ba'i tha tshig go//pha rol tu phyin pa'i ming nyid bshad pa ni pha rol tu phyin pa'i sgra zhes bya ba yin no/ /mig rab tu thob pa yin no zhes bya ba ni/ sbyin pa la sogs pa'i pha rol tu phyin pa rnams chos nyid kyi mig dang ldan par 'gyur ba'o//chos thams cad la mngon par 'du mi byed pa bstan par bya ba'i phyir bcom ldan 'das byang chub sems dpa' sems dpa' chen pos zhes bya ba la sogs pa gsungs so/ /lan btab pa ni shA ri'i bu gzugs zhes bya ba la sogs pa gsungs pa yin te/gzugs la sogs pa sgyu ma lta bu nyid du rtogs pa ni yum mngon par bsgrub pa yin no zhes bya ba'i tha tshig go/ /nye bar bsdu bar bya ba'i phyir de ltar mngon par 'du byed pas zhes bya ba la sogs pa gsungs te/ de bzhin nyid kyi ngo bo nyid yin pa'i phyir chos thams cad kyi khyad par skye ba med par rtogs pa'i sbyor ba ni mngon par 'du byed pa ste/des phung po rnams rtogs na zhes bya ba'i don to/ /glegs bam la la las ni mngon par mi sgrub pas zhes bya ba smos te/ der yang don 'di nyid yin par bzung ngo / /chos thams cad mi dmigs par gtod par byed pa'i don du gsungs pa ni/shA ri'i bu shes rab kyi pha rol tu phyin pa de ltar mngon par bsgrubs pas zhes bya ba la sogs pa'o/ /chos gang yang gtod par byed pa med do zhes bya ba ni ci ltar dmigs pa la sogs pa phyin ci log pa yin pa de ltar na rnal 'byor pa'i rgyud la gtogs pa'i chos gang yang skyed par mi byed pa de'i tshe shes rab kyi pha rol tu phyin pa zhes bya ba'i grangs su 'gro ste phyin ci log pa'i phyir ro zhes bya bar dgongs so//thams cad mkhyen pa nyid thob par byed pa ni rigs te gzhan du na shes rab kyi pha rol tu phyin pa don med pa yin no zhes bya ba'i bsam pa dang ldan pas bcom ldan 'das ci zhes bya ba la sogs pa gsol to//phyin ci log gi sgo nas gtod par mi byed do zhes gsungs pa ni dmigs pa ji lta ba de ltar zhes bya ba la sogs pa'o/ /de la dmigs pa ni phyi'i don du dmigs pa'o//ming ni gzugs can ma yin pa'i phung po bzhi'o/ /mngon par 'du byed pa ni sgyu ma lta bu nyid 'di ni de kho na nyid yin no zhes bya ba la sogs pa'i sems kyi rtsol ba'o/ /rnam pa gzhan rnam par bcad pas gzhan du gtod par byed pa yin no zhes smras pa ni bcom ldan 'das 'o na ji ltar zhes bya ba la sogs pa'o//kau shi ka ji ltar gtod par mi byed do zhes bya ba ni sgyu ma lta bu'i rnam pa gang gis phyin ci log tu mngon par zhen pa ci yang gtod par mi byed pa de ltar thams cad mkhyen pa nyid gtod par byed do zhes bya ba'i tha tshig go//chos gang yang mi skyed ces bya ba ni rnam par byang ba rnams so/ /chos gang yang mi 'gog ces bya ba ni kun nas nyon mongs pa'o/ /nye bar gnas la zhes bya ba ni skye ba ma mchis pa'i slad du'o/ /gnas pa yang ma lags zhes bya ba ni 'gog pa ma mchis pa'i slad du'o zhes bya bar sbyar ro//de ltar mngon par zhen pa yang 'ching ba yin no zhes smras pa ni bcom ldan 'das gal te zhes bya ba la sogs pa smos te/ sbyor ba dang / mthong ba dang / sgom pa dang / khyad par gyi lam rnams su go rims bzhin du ring du bgyid/gsog tu bgyid do zhes bya ba'i tshig bzhi sbyar ro/ /rnam pa gzhan gyis kyang ring du byed pa la sogs pa gsungs pa ni rab 'byor rnam grangs gang gis zhes bya ba la sogs pa ste/ gzugs la sogs pa mngon par rtogs pa'i rnam grangs des ni 'gyur ba kho na'o zhes bya ba'i tshig go//chos nyid kyi gzugs la sogs pa nyid shes rab kyi pha rol tu phyin pa yin no zhes bya ba'i tshul gyis ji ltar gzugs la sogs pa rtogs pas yum ring du byed pa la sogs pa yin snyam pa'i dogs pa de ci'i phyir zhe na zhes bya bas bsu nas/rab 'byor shes rab kyi pha rol tu phyin pa 'di yongs su gsal bar byas nas zhes bya ba la sogs pa gsungs so/ /'di skad du gang gi phyir sgyu ma lta bu nyid kyis gzugs la sogs pa nyid rgyal ba'i yum yin no zhes rang bzhin gcig pa nyid du rigs pas shes rab kyi pha rol tu phyin pa 'di yongs su gsal bar byas nas gzugs la sogs pa tha dad par rtogs pa phyin ci log yin pa de bas na gzugs la sogs pa rtogs pas yum ring du byed pa la sogs pa yin no//don chen po nyid ni bcom ldan 'das 'di lta ste zhes bya ba la sogs pa gsungs pa yin te/don chen po sangs rgyas nyid sgrub pas na pha rol tu phyin pa chen po lags so/ /de la chen por mi bgyid ces bya ba ni lhag pa skyed par mi byed pa'i phyir ro/ /chung ngur mi bgyid ces bya ba ni gnas rnams 'grib par mi byed pa'i phyir ro//de nyid ci rigs par bshad pa ni sdud par mi byed g.yeng bar mi bgyid ces bya ba yin te/ grags pa tsam gang yin pa ni don ji lta ba bzhin ma yin pas/ de'i don du rdzogs pa'i byang chub kyi 'bras bu can gyi bstan pa yin no zhes dgongs so/ /stobs dang ldan par mi bgyid ces bya ba ni sngon med cing sgro 'dogs pa'i tshul gyis so//stobs ma mchis par yang mi bgyid do zhes bya ba ni yod bzhin pa la skur pa mi 'debs pa'i phyir ro/ /so so'i skye bo'i skabs su ni phyin ci log gi stobs kyis thams cad mkhyen pa nyid chung ngur 'gyur la/ grol ba'i skabs su ni yum gyi mthus phyin ci log dang bral bas chen por 'gyur ba yin nam des ji ste 'di skad brjod snyam pa'i dogs pa de ci'i slad du zhe na zhes bya bas bsu nas/ bcom ldan 'das thams cad mkhyen pa nyid ni zhes bya ba la sogs pa gsol to/ /'di skad du gang gi phyir phyin ci log dang bral na yum gyi mthu gnas pa nyid kyis thams cad mkhyen pa nyid ni ma bsdus pa ma g.yengs pa de bas na chen por mi byed chung ngur mi byed do zhes brjod pa yin no//de la yang mngon par zhen pa 'ching ba yin no zhes smras pa ni gal te de ltar zhes bya ba la sogs pa'o//de ltar 'tshal na yang zhes bya ba ni bshad ma thag pa ltar dmigs par rtog na'o/ /smos kyang ci 'tshal zhes bya ba ni shes rab kyi pha rol tu phyin pa yin [#(]ste[,]te[)]/ 'on kyang dmigs pa chen por 'gyur ba nyid kyis ma yin pa nyid do zhes bya ba'i tha tshig go/ / gang gis de yod pas spyod par mi 'gyur ba dmigs pa la nyes pa ci zhig yod snyam pa'i dogs pa de ci'i slad du zhe na zhes bya bas bsu nas/ sems can 'di dag ces bya ba la sogs pa smos so/ /'di skad du gang gi phyir sems can mya ngan las bzla'o snyam par dmigs pa 'di ni shes rab kyi pha rol tu phyin pa 'dra bar byung bas na rgyu mthun pa ste/de dang rjes su 'brel pa'i 'bras bur gyur pa ma yin pa de bas na dmigs pa yod pas de la spyod pa ma yin no zhes brjod pa yin no/ /yang 'di ji ltar yin snyam pa'i dogs pa de ci'i slad du zhe na zhes bya bas bsu nas/shes rab kyi pha rol tu phyin pa ni zhes bya ba la sogs pa smos so/ /sems can rnams kyi ngo bo nyid ma mchis pa nyid kyi rang bzhin te gang la yod pa de la de skad ces bya'o/ /'di snyam du sems can ma skyes pa'i rang bzhin can yum gyi rgyu mthun pa'i 'bras bu sems can du dmigs pa yin pa ji ltar 'gyur zhes bsams pa yin no//sems can skye ba med pa'i ngo bo nyid yin pa'i don 'di nyid sems can ngo bo nyid ma mchis pas na zhes bya ba la sogs pa gsungs so/ /de la ngo bo nyid ma mchis pa dang dben pa dang bsam gyis mi khyab pa ni go rims bzhin du brtags pa la sogs pa yin par shes par bya'o//sems can mi 'jig pa'i chos nyid ni rtag pa kho nar gnas pa'i de bzhin nyid do/ /sems can sgyu ma dang 'dra ba nyid du mthong ba'i lam gyis ma rtogs pa ni sems can mngon par rdzogs par 'tshang mi rgya ba nyid do//sems can snga ma bzhin du bsgom pa'i lam gyis ma rtogs pa ni sems can don ji lta ba bzhin du mngon par rdzogs par 'tshang mi rgya ba nyid do/ /sems can gyi stobs tshad mas mi gnod pa sgyu ma lta bu nyid du nus pa yod pa de thob pa ni yang dag par sgrub pa nyid do//des de bzhin gshegs pa'i stobs shes rab kyi pha rol tu phyin pa yang dag par bsgrub par rig par bgyi'o/ /ji skad du bshad pa'i ngo bo nyid la sogs pa'i mtshan nyid kho na mngon par bsgrub pa'i bsgom pa'i lam yin par shes par bya'o/ /de skad du yang /de yi ngo bo nyid mchog nyid/ /kun la mngon par 'du mi byed/ /chos rnams dmigs su med par ni/ /gtod par byed pa don chen nyid/ /ces gsungs pa yin no/ /de'i 'og tu gnyis pa shin tu rnam par dag pa'i mtshan nyid bsgom par bya ba yin la/ de ni skye ba dang mi skye ba'i rgyu go rims bzhin du yongs su gzung ba dang dor bas yin no//de bas na re zhig skyed pa'i rgyu bstan par bya ba'i phyir/ bcom ldan 'das byang chub sems dpa' sems dpa' chen po gang zhes bya ba la sogs pa smos so/ /nem nur mi bgyid ces bya ba ni lam gzhan mi 'dod pas so//the tshom mi 'tshal zhes bya ba ni yid gnyis med pas so/ /rmongs par mi 'gyur zhes bya ba ni mi shes pa dang bral ba'i phyir ro/ /rjes su 'gro bar bgyid pa ni chos kyis so/ /rjes su 'tshal bar bgyid pa ni don gyis so/ /de dag gi tshul nas ni gnyis ltar gzhan la rjes su rtogs par bgyid pa zhes go rims bzhin du de ltar don gyi dbye bas brjod par bya'o//yun ring po ji srid cig spyad cing bsrungs par rig par bgyi zhes bya ba la/ yun ring po ji srid cig ni dus ring po'o/ /spyad pa ni sbyin pa la sogs pa nyams su blangs pa ste/nyan thos la sogs pa'i byang chub tu ma bsngos par bsrungs shing bskyangs pa'i ngang tshul 'di la yod pas de skad ces bya'o/ /bsnyen bkur byas shing zhes bya ba ni 'khor la sogs pa yongs su phul bas so/ /yongs su dris nas zhes bya ba ni the tshom skyes pa'i don yongs su zhus pa ste/de dag gis ni sangs rgyas la bsten pa ston to/ /gang gis ni mos pa'i stobs las bsnyen bkur byas pa la sogs pa rtogs par byed pa mos pa dang bsnyen bkur byed pa la sogs pa la 'brel pa ci yod snyam pa'i dogs pa de ci'i phyir zhe na zhes bya bas bsu nas/shA ri'i bu zhes bya ba la sogs pa gsungs so/ /'di skad du khyad par can gyi rgyu med par de lta bu'i mos pa la sogs pa 'byung ba mi srid pas de bzhin gshegs pa la bsnyen bkur byas pa la sogs pa'i rgyu rjes su dpog pa yin no zhes brjod pa yin no//rna ba blags te zhes bya ba ni ma yengs par byed pa'i phyir ro/ /gus par nyan to zhes bya ba ni dkyil 'khor la sogs pa byas nas nyan pa'i phyir ro/ /gtam gyi bar chad mi byed de zhes bya ba ni skabs la ma bab pa'i don mi smra ba'i phyir ro/ /yun ring por spyad pa zhes pa gsungs pas ni sbyin pa la sogs par bshad do//sangs rgyas mang po la bsnyen bkur byas pa zhes bya ba ni sangs rgyas mang po bsten pa'i phyir ro/ /mnyan pa rgyu dang bcas pa la sogs pa la mngon par ma zhen pa bstan par bya ba'i phyir bcom ldan 'das shes rab kyi pha rol tu phyin pa 'di mnyan pa 'am zhes bya ba la sogs pa gsungs te/rtogs pa 'am zhes bya ba la sogs pa'i tshig bzhi ni de 'di'o zhes bya ba la sogs pa'i tshig bzhi dang go rims bzhin du sbyar bar bya'o/ /de la rnam pa dang rtags dang mtshan ma dag ni rang dang spyi dag dang gnyi ga'i tshul du go rims bzhin du shes par bya'o//rgyu'i stobs kyis mnyan pa yang kun rdzob tu yin gyi de kho na nyid du ni ma yin no zhes gsungs pa ni rab 'byor de lta ma yin te zhes bya ba'o/ /de nyid ni shes rab kyi pha rol tu phyin pa 'di ni zhes bya ba la sogs pa gsungs so//phung po la sogs pa rtogs bzhin pas kyang mnyan pa la sogs pa ji ltar mi nus snyam pa'i dogs pa de ci'i phyir zhe na zhes bya bas bsu nas/ rab 'byor chos thams cad ces bya ba la sogs pa gsungs so/ /de la da ltar byung ba'i phung po la sogs pa rang gi mtshan nyid stong pa nyid yin pa'i phyir chos thams cad dben pa nyid do//rgyu dang 'bras bu'i mtha' gnyis dang bral ba'i phyir chos thams cad shin tu dben pa nyid do/ /de bas dus gsum stong pa nyid yin pas phung po la sogs pa rnams su de kho na nyid du bstan par mi nus so zhes bya ba ni ngag gi don yin no//de lta na de las tha dad par bstan par bya ba yin no zhe na/ shes rab kyi pha rol tu phyin pa ni zhes bya ba la sogs pa gsungs so/ /rnam pa gzhan ma bkag na ni ji ste 'di ltar 'gyur snyam pa'i dogs pa de ci'i phyir zhe na zhes bya bas bsu nas/rab 'byor phung po dang zhes bya ba la sogs pa gsungs so/ /skye ba'i rgyu dang bral bas na stong pa'o/ /rang gi ngo bo nges par gzung du med pas na dben pa'o/ /'bras bu'i nus pa dang bral bas na zhi ba'o/ /'di skad du chos thams cad sdud par byed pa phung po la sogs pa ni de kho na nyid du ngo bo nyid med pa yin na de las tha dad par bstan par mi nus so zhes bya ba brjod pa yin no//de ltar zhes bya ba la sogs pa ni nye bar sdud pa yin no/ /'du shes pa dang kun shes pa dag ni go rims bzhin du rang dang spyi'i mtshan nyid do//btags pa ni de'i brda nye bar 'dzin pa'o/ /tha snyad ni btags pa sngon du 'gro bas phan pa dang gnod pa thob pa spang ba'o / /dbang po'i rim pa yod pas 'di rnam par phye ste lung bstan par bya ba yin zhes bya ba ni shes rab kyi pha rol tu phyin pa'i rnal 'byor gyi don du gang gis thabs mkhas pa chung ngu la sogs pa'i rim pa'i dbye bas bsgoms pas de rnal 'byor thob par 'gyur bas 'di ni phye ste brjod par bya ba yin no//'dis ni thabs la mkhas pa gsungs pa yin no/ /ji skad du brjod pa'i rten pa la sogs pa gsum ni skyed pa'i rgyu yin no/ /de skad du yang /sangs rgyas bstan dang sbyin sogs dang / /thabs la mkhas pa gang yin pa/ /'di la mos pa'i rgyu dag yin/ /zhes gsungs pa yin no/ /mi skye ba'i rgyu bstan par bya ba'i phyir/ rab 'byor yang rnam grangs gang gis zhes bya ba la sogs pa gsungs so/ /mi mos pa'i rgyu ci zhig yin snyam pa'i dogs pa de ci'i phyir zhe na zhes bya bas bsu nas/sngon yang zhes bya ba la sogs pa gsungs so/ /'khor de nas 'byol te zhes bya ba la spong ba'i sems kyis zhes bya ba ni lhag ma'o/ /bsags la zhes bya ba la sogs pa ni sbyor ba la sogs pa'i gnas skabs gsum du go rims bzhin du sbyar ro//lus kyis mthun par mi byed pa ni lus nye bar mi byed pas so/ /sems kyis mthun par mi byed pa ni sems rnam par g.yengs pas so/ /mi shes mi rig khong du mi chud ces bye ba ni go rims bzhin du mngon sum dang rjes su dpag pa dang lung gi tshad mas so//de nyid kyis na rig par mi byed de gzhan dag ces bya ba ni lhag ma'o/ /spong ba ni rang gi ngo bo 'dor ba'o/ /skur bar 'gyur ba ni mthu la snyon pa'i phyir ro/ /mi snyan par brjod pa ni yid du mi 'ong ba'i tshig smra ba'o/ /bcom zhing zhes bya ba ni dge ba'i rtsa ba ma bskyed pa'i phyir ro//bsregs pa ni mi dge ba'i bag chags bskyed pas so/ /bsod nams chung ba ni sbyin pa la sogs pa gsum chung ngu dang ldan pas so/ /dge ba'i rtsa ba chung ba zhes bya ba ni byams pa la sogs pa chung ngu yod pas so/ /phyir ldog cing zhes bya ba ni byed 'dod pa nyid med par byed pas so//'bral bar byed ces bya ba ni rang gi ngo bo 'dor bar byed pa'i phyir ro/ /ldog par byed de zhes bya ba ni yang 'jug pa las ldog pas so/ /de rnam pa thams cad nas zhes bya ba la sogs pa la/ thams cad nas ni sangs rgyas dkon mchog la sogs pa'i rang bzhin gyis so//thams cad nas ni de bzhin gshegs pa shAkya thub pa la sogs pa'i rang bzhin no/ /rnam pa thams cad ni chung ngu'i chung ngu la sogs pa'i dbye bas so/ /thams cad du ni lhag pa'i tshul khrims la sogs pa'i rnam pas so/ /nye bar gzhag pa ni bskyed pa yin pa'i phyir ro//kun nas bslang ba ni 'jig pa med pas so/ /dmyal ba chen po rnams su zhes bya ba ni 'dzam bu'i gling gi 'og gi stong phrag nyi shu na de'i tshad tsam gyi dmyal ba chen po mnar med pa'o/ /de'i steng na rab tu tsha ba dang / tsha ba dang / ngu 'bod chen po dang /ngu 'bod dang / bsdus 'joms pa dang / thig nag dang / yang sos te/ dmyal ba chen po brgyad do/ /mes 'jig pa'i bskal pa zhes bya ba ni dmyal ba'i 'gro ba nas bzung ste tshangs pa'i 'jig rten gyi bar gyi 'jig rten na sems can 'ga' yang lus par ma gyur pa de'i tshe snod kyi 'jig rten stong par nyi ma bdun byung nas rim gyis chu'i dkyil 'khor nas brtsams te bsam gtan dang po'i bar du sreg pa'o//'jig rten gyi khams gzhan na zhes bya ba ni stong gsum gyi stong chen po gzhan du'o/ /sdug bsngal mang po nyams su myong ba'i rgyu ci zhig yin snyam pa'i dogs pa de ci'i phyir zhe na zhes bya bas bsu nas/de dag de lta bur zhes bya ba la sogs pa gsungs te go sla'o/ /mtshams ma mchis pa lnga'i las ni ma bsad pa dang / pha bsad pa dang / dgra bcom pa bsad pa dang / dge 'dun gyi dbyen dang / de bzhin gshegs pa'i sku la ngan sems kyis khrag phyung ba ste/las lnga po 'di dag byas pa'i rjes thogs nyid la mnar med pa'i sems can dmyal ba chen por skye ba'i rgyu yin pa'i phyir mtshams med pa'o/ /'bras bu dang rgyu dang rang bzhin gsum gyi 'dra ba med pas na/ go rims bzhin du gzugs brnyan du'am/rjes su mthun pa'am/ tshul mthun pa tsam du yang 'dra ba ma lags so zhes bya bar sbyar ro/ /sdug bsngal ba rnams la snying rje 'jug pa yin nam/ de dag dang 'grogs pa la sogs pa ci'i phyir zhe na zhes bya bas bsu nas/ shA ri'i bu de lta bu'i gang zag de dag ni zhes bya ba la sogs pa gsungs so//gzhan dag la yang rang gi nyes pa dgod pas na lo 'dab rul ba lta bu'o/ /'bru ma rungs par byed pa'i rtswa'i rigs dang 'dra ba'i byang chub sems dpa'i 'bru ma rungs par byed pa'i phyir nag po'i rang bzhin can no/ /sbrul nag po dang 'dra bar zhe sdang mang ba'i phyir nag po nye bar bskyed pa'o//tshul ma yin pas brlag par 'gyur ro zhes bya ba ni gang gi phyir de lta bu'i sdig pa byed pa dang lhan cig snying rje'i yul yin pa nyid kyis 'grogs pa dang yul gyi bgo bsha' la sogs pa yongs su spongs bar bya ste/ tshul ma yin pa nye bar spyod pa 'di dang po pa 'grogs pa la sogs pas 'phongs shing brlag par 'gyur ba de bas na dam pa'i chos sun 'byin pa ni ring du spang bar bya'o zhes bya ba'i don to//chos la sun 'byin pa gang zhig la bya zhe na/ shA ri'i bu gang dag ces bya ba la sogs pa gsungs pa yin no/ /tshad yod bzhin du ci'i phyir mi gsung snyam pa'i dogs pa/de ci'i phyir zhe na zhes bya bas bsu nas/ gang zag de lta bu'i lus kyi tshad ces bya ba la sogs pa gsungs te/ gang gi phyir dmyal ba chen po'i lus kyi tshad thos na sdug bsngal che ba nyid du go bas 'jigs pa chen pos gnyen po kun tu spyod pa la sogs pa dang de 'gal bar de 'phral du khrag dron po kha nas skyug pa la sogs par 'gyur bas de bas na tshad ma bstan to zhes bya ba ni spyi'i don yin no//'chi ba tsam yang sdug bsngal mi bzad pa dang nad kyis reg cing zhes bya ba ni chung ngu 'bring dang chen po'i dbye bas tshig gsum gsungs pa yin no/ /phyi ma'i skye bo mang po la gdags pa snang bar bgyis par 'gyur gyi zhes bya ba ni mi dge ba'i las byed pa rnams skyo ba bskyed pas chos kyi snang ba yin no//skyo bar 'gyur ro zhes bya ba ni de'i rgyu yin pas de skad ces bya'o/ /lus kyi las dang ngag gi las dang yid kyi las shin tu bsdam par bgyi'o zhes bya ba ni go rims bzhin du dran pa dang shes bzhin la brten nas lus dang ngag dang yid kyi dge ba'i las nyams su blang bar gsungs pa yin no//go zlog par byed pa la nyes pa ci zhig yod snyam pa'i dogs pa de ci'i phyir zhe na zhes bya bas bsu nas/ bcom ldan 'das de ltar zhes bya ba la sogs pa smos so//de lta bus zhes bya ba ni sangs rgyas kyi bka' ma yin no zhes bya ba de lta bu'i rang bzhin gyis so/ /'di ni gtsor nye bar mtshon pa tsam du zad de lus dang yid kyi phyin ci log gis kyang zhes shes par bya'o/ /'das ma thag pa'i ngag gis nyes par smras pa'i skabs nye bar bsdu bar bya ba'i phyir bcom ldan 'das gang gis zhes bya ba la sogs pa smos so//gzhan du na de ma thag tu gsungs zin pa la zhu ba ji ltar 'gyur/ sun dbyung bar sems par 'gyur zhes bya ba ni phan tshun 'gal bar brjod pas so/ /skur par sems par 'gyur zhes bya ba snga ma dang 'dra'o//phyir gzhil bar sems par 'gyur zhes bya ba ni mngon sum la sogs pa'i tshad ma dang 'gal bas so/ /skyes bu gti mug can zhes bya ba ni/ rang gi nyid la 'jug pa dang / /rang gi 'dul la snang phyir dang / /zab pa'i phyir dang rgya che'i phyir/ / chos nyid dang ni 'gal ba med/ /ces gsungs pas sangs rgyas kyis gsungs pa'i mtshan nyid gang mdo sde la 'jug pa dang / 'dul ba la snang ba dang / chos nyid dang mi 'gal ba yin no zhes ma rtogs pas/ mdo sde la sogs pas yang dag par bsdus par rgyal ba'i yum gyi rang bzhin nges par mi 'dzin pas rmongs pa'o//'di snyam du sde pa'i gzhung gi mdo sde tshad nyung zad la mi 'jug pa'i phyir dang / de bzhin du tshad yongs su chad pa'i 'dul ba'i sde snod la mthong ba'i phyir dang / de bzhin du gang zag la bdag med pa la sogs pa'i chos nyid du gzhag pa dang / mi mthun pa'i phyir theg pa chen po sangs rgyas kyi bka' ma yin pa ni spangs pas rmongs par mi 'gyur ro bya bar sems na/ de lta yin na ni mdo sde lhug pa rnams kyang mdo sde'i sde snod rnams su ma gsungs pas sangs rgyas kyi bka' ma yin par khas blang bar bya bar 'gyur ro/ /de bzhin du mdo sde'i sde snod re rer mdo sde'i sde snod gzhan rnams rnam pa thams cad 'jug pa ma yin no//de bzhin du 'dul ba re re la 'dul ba gzhan rnams kyi rnam pa thams cad snang ba ma yin no/ /de bzhin du sde pa re re'i chos nyid du gzhag pa gang yin pa de sde pa gzhan rnams kyi chos nyid dang mthun pa ma yin no//de ltar na sde pa bco brgyad kyis phye ba'i mdo sde dang 'dul ba dang mngon pa'i sde snod phan tshun gcig la gcig gzhung dang don tha dad pa rnams sangs rgyas kyi bka' yin par ji ltar 'grub/ des na 'dis ni khyab pa ma yin pa la sangs rgyas kyi bka'i mtshan nyid yin no zhes khas 'che bas na rmongs pa nyid yin no//yang na yid kyi nyes pa rang bzhin stug pa ste/ /mi rig pa yi gzugs la'ang mi rig na/ /the tshom za ba'i chos la smos ci dgos/ /de'i phyir btang snyoms gzhag legs nyes pa med/ /ces bya ba'i don 'di ma shes pas na skyes bu gti mug ces bya'o//sun dbyung bar sems pa zhes bya ba ni phan tshun 'gal bar brjod pas so/ /spong bar sems zhes bya ba ni snga ma dang 'dra'o/ /phyir gzhil bar zhes bya ba la sogs pa ni mngon sum la sogs pa'i tshad ma dang 'gal bas so/ /dam pa'i chos spong bar byed pa 'di'i rgyu rnam pa bzhi bstan pa'i phyir/bcom ldan 'das rigs kyi bu 'am rigs kyi bu mo zhes bya ba la sogs pa smos te/ rnam pa bzhi po de dag ces bya ba ni bdud kyis byin gyis brlabs pa dang / zab pa'i chos la ma mos pa dang phung po la sogs pa la mngon par zhen pa dang / sdig pa'i grogs pos yongs su zin pa ste/spong ba'i rgyu bzhis zhes bya ba'i tha tshig go/ /de skad du yang / chos kyis phongs pa'i rgyu dag ni/ /bdud kyi thibs kyis non pa dang / /zab mo'i chos la ma mos dang / phung po la sogs mngon zhen dang / /sdig pa'i grogs pos yongs zin pa'o/ /zhes bya ba gsungs pa yin no//shes rab kyi pha rol tu phyin pa'i bshad pa mngon par rtogs pa rgyan gyi snang ba las/ sems can dmyal ba'i le'u zhes bya ste bdun pa'o// //de ltar rtogs pa dang ma rtogs pa'i rgyu thob pa dang yongs su spang ba'i yul gsungs nas/ skabs su bab pa shin tu rnam par dag pa'i mtshan nyid kyi bsgom pa'i lam gyi rnam par dag pa spyir bstan pa'i don du zab pa nyid ston par byed pas/bcom ldan 'das shes rab kyi pha rol tu phyin pa ni mngon par mi brtson pa dang zhes bya ba la sogs pa smos so/ /dka' zhing sdug bsngal bas lhag par mos pa yin pas na mos par dka' ba ste/lhag par mos par dka' ba zhes bya ba'i don to/ /so so'i skye bo dang 'phags pa'i dbye bas ni 'ching ba dang grol ba nyid yod pa ma yin nam/ ji ltar na gzugs ma bcings ma grol ba yin snyam pa'i dogs pa de ci'i phyir zhe na zhes bya bas bsu nas/ gzugs ngo bo nyid med pa'i phyir zhes bya ba gsungs te/dus gsum gyi gzugs ni rig pas rang bzhin nyid yin pa'i phyir ro/ /spyir bstan nas 'das pa la sogs pa'i dbye bas rab 'byor gzugs kyi sngon gyi mtha' zhes bya ba la sogs pa gsungs so/ /de bzhin du de ci'i phyir zhe na zhes dogs pa bsu nas/sngon gyi mtha' ngo bo nyid med pa'i phyir ro zhes bya ba gsungs te/ rgyu de kho nas ma skyes pa nyid kyis sngon gyi mtha'i ngo bo nyid da ltar byung ba'i gzugs gang la med pa de la de skad ces brjod do/ /snga ma bzhin du de ci'i phyir zhe na zhes dogs pa bsu nas/ phyi ma'i mtha' ngo bo nyid med pa'i phyir ro zhes bya ba gsungs te/rgyu de kho nas ma skyes pa nyid kyi mtha' 'bras bu ngo bo nyid 'di la med pas zhes tshig rnam par sbyar ro/ /de bzhin du de ci'i phyir zhe na zhes dogs pa bsu nas/ da ltar byung ba ngo bo nyid med pa'i phyir zhes bya ba gsungs te/ gzugs la sogs pa rang gi ngo bo stong pa nyid kyis da ltar byung ba mtshan nyid dang bral ba yin no//mos par dka' ba ni so so'i skye bo'i yul ma yin pa'i phyir ro/ /shin tu mos par dka' ba ni 'dzin pa'i 'dod chags dang bral ba rnams kyi yul ma yin pa'i phyir ro/ /gzugs la sogs pa dang shes rab kyi pha rol tu phyin pa'i ngo bo nyid dag ni kun rdzob dang don dam pa'i dbye bas tha dad par rtogs pa'i phyir ji ltar na shin tu mos par dka' ba yin snyam pa'i dogs pa de ci'i phyir zhe na zhes bya bas bsu nas/rab 'byor gzugs kyi rnam par dag pas zhes bya ba la sogs pa gsungs so/ /sna tshogs pa nyid kyi dbye ba med pas tha dad pa'o//rab tu dbye ba'i mtshan nyid kyis chod pa med pas na ma chad pa'o/ /yang na rang dang spyi'i mtshan nyid kyi sna tshogs pa dang bral bas go rims bzhin du gsungs so/ /rab 'byor de ltar na zhes bya ba la sogs pa la/ kun rdzob de bzhin nyid gang yin/ /de nyid dam pa'i don phyir bzhed/ / tha dad min phyir rigs de yang / /ji ltar snang ba bzhin du gnas/ /zhes bya ba'i tshul gyis bdag dang bdag gi la sogs par mngon par zhen pa dang bral bas gzugs la sogs pa sgyu ma lta bur gyur pa'i rnam par dag pa yin pa de nyid mi mthun pa'i phyogs thams cad dang bral ba nyid kyis na rgyun du zhugs pa la sogs pa'i 'bras bu dag shes rab kyi pha rol tu phyin pa'i rnam par dag pa yin la/de bzhin du 'bras bu rnam par dag pa gang yin pa de ni gzugs la sogs pa rnam par dag pa yin pas gnyis su byar med pa yin pa'i phyir tha dad de ma chad pa'o/ /de bas 'bras bu rnam par dag pas gzugs la sogs pa rnam par dag pa dang /de bzhin du gzugs la sogs pa rnam par dag pas 'bras bu rnam par dag pa'o zhes bya bar bstan to zhes bya ba'i don to/ /de skad du yang / 'bras bu dag pa gzugs la sogs/ /dag pa nyid de gang gi phyir/ /de gnyis tha dad ma yin zhing //gcad du med pas dag par brjod/ /ces bya ba gsungs pa yin no/ /de ltar rnam par dag pa spyir [(]brjon [,]brjod [)]nas/ khyad par du bstan pa'i phyir rab 'byor gzhan yang zhes bya ba la sogs pa gsungs te/ thams cad mkhyen pa nyid rnam par dag pa zhes bya ba ni/ thams cad mkhyen pa nyid gsum rnam par dag pa zhes bya ba'i tha tshig go//de bas na 'di skad du nyan thos rnams kyi nyon mongs pa'i sgrib pa spangs pa dang / rang sangs rgyas rnams kyi nyon mongs pa'i sgrib pa dang shes bya'i sgrib pa'i phyogs gcig gzung ba'i rnam par rtog pa spangs pas thams cad mkhyen pa nyid rnam par dag pa'o//byang chub sems dpa' rnams kyi theg pa gsum gyi lam gyi sgrib pa spangs pas lam shes pa nyid rnam par dag pa'o/ /de bzhin gshegs pa rnams kyi nyon mongs pa dang shes bya'i sgrib pa bag chags dang bcas pa rnam pa thams cad du spangs pa'i phyir shin tu rnam par dag pa chos kyi dbyings las byung ba nyid ni rnam pa thams cad mkhyen pa nyid rnam par dag pa yin no zhes brjod pa yin no//de skad du yang / nyon mongs shes bya lam gsum gyi/ /nyams phyir slob ma bse ru dang / /rgyal sras rnams kyi dag pa ste/ /sangs rgyas rnam kun shin tu ba//zhes gsungs pa yin no/ /lam shes nyid kyi skabs su rnam par dag pa bshad pa'i zhar la/ de bzhin gshegs pa rnams dang nyan thos la sogs pa'i rnam par dag pa go rims bzhin du shin tu ba dang / cig shos su bshad pa de ji lta bu zhe na/de nas bcom ldan 'das la tshe dang ldan pa shA ri'i bus zhes bya ba la sogs pa smos so/ /zab po zhes bya ba dang / gsal bar bgyid pa dang / snang bar bgyid pa dang / mtshams sbyor ba ma mchis pa dang / kun nas nyon mongs pa ma mchis pa dang / thob pa ma mchis pa dang /mngon par rtogs pa ma mchis pa dang / mngon par grub pa ma mchis pa dang / shin tu skye ba ma mchis pa ste / 'phags pa shA ri'i bus gsol pa'i tshig dgu ni go rims bzhin du chung ngu'i chung ngu la sogs pa bsgom pa'i lam rnam pa dgu'i rang bzhin du brjod par bya'o/ /tshig re re zhing bcom ldan 'das kyis rnam par dag pa'i phyir ro zhes gsungs pa ni/chen po'i chen po la sogs pa mi mthun pa'i phyogs rnam pa dgu spangs pa dang sbyar bar bya'o/ /'dod pa'i khams dang gzugs kyi khams dang gzugs med pa'i khams su zhes smos pas na 'dod pa'i khams la sogs pa'i sa dgu po bsgom pa'i lam gzung bar bya'o//gang yang 'dod pa'i khams dang srid rtse na/ /byang chub lam gyi yan lag spangs/ /zhes brjod pa de ni thabs la mi mkhas pa yin pa'i phyir/ nyan thos kyi dbang du byas pa yin pas de dang 'di la 'gal ba med do zhes bya ba ni kha cig go//gzhan dag ni mi lcogs pa med par gnas pa nas brtsams te/ ci yang med pa'i skye mched kyi mthar thug pa'i bar gyi sa dgu ni bsgom pa'i lam yin no zhes 'chad do/ /'dod pa'i khams la sogs pa smos pa ni der yum don dam par gnas pa med par ston pa lhur byed pa yin gyi sa dgu bshad pa ni ma yin no//de'i bsdus pa'i don ni 'di yin te/ ji skad du bshad pa'i sa dgu la so so 'am go rims bzhin du mi mthun pa'i phyogs chen po'i chen po la sogs pa rnam pa dgu'i gnyen po'i ngo bor go rims bzhin du lam chung ngu'i chung ngu la sogs pa rnam pa dgu 'byung ba ni rnam pa thams cad dang /cig shos su rnam par dag pa'i rgyu yin pa'i phyir rnam par dag pa shin tu ba dang cig shos zhes bya ba yin no/ /de skad du yang / sa dgu la ni chen po yi/ /chen po la sogs dri ma yi/ /gnyen po chung ngu'i chung ngu la/ /sogs pa'i lam ni dag pa yin//zhes gsungs pa yin no/ /ji ltar na nye bar ma btags pa'i shin tu ba'i rnam par dag pa yin zhe na/ gsol pa bcom ldan zhes bya ba la sogs pa smos so/ /ma 'tshal zhes bya ba ni rang gi ngo bo'o/ /yang dag par rab tu ma 'tshal zhes bya ba ni rab dbye ba'o/ /rnam par dag pa'i phyir ro zhes bya ba ni khams gsum pa'i gnyen po yin pa'i phyir ro//ci zhig ces bya ba ni 'di yul gang du gtogs pa zhus pa yin gyi spong ba ni ma yin no/ /de nyid ni gzugs mi shes zhes bya ba la sogs pa gsungs so/ /gzugs rtag tu gnas pa'i ci'i phyir mi shes snyam pa'i dogs pa de ci'i phyir zhe na zhes bya bas bsu nas/shA ri'i bu rnam par dag pa'i phyir ro zhes bya ba gsungs te/ de kho na nyid du na dngos po med pa nyid yin pa'i phyir ro/ /gnyen po'i phyogs ni chen po'i chen po la sogs pa yin zhing mi mthun pa'i phyogs ni chung ngu'i chung ngu la sogs par rigs pa ma yin nam de ci ltar na gzhan du bstan zhes rtog pa la/bcom ldan 'das shes rab kyi pha rol tu phyin pa ni thams cad mkhyen pa nyid la zhes bya ba la sogs pa smos so/ /gnod par mi bgyid ces bya ba ni chos kyi de kho na nyid gnas pa sel bar mi byed pa'i phyir ro/ /phan par mi bgyid ces bya ba ni sngon med pa mi skyed pa'i phyir ro zhes snga ma dang sbyar ro//chos gang yang yongs su mi 'dzin zhes bya ba ni gnyen po'i phyogs so/ /yongs su mi gtong ngo zhes bya ba ni mi mthun pa'i phyogs so/ /ma 'tshal zhes bya ba la sogs pa ni skabs kyi spyi'i don ni 'di yin te/gnyen po ni chen po la sogs pa yin la/ mi mthun pa'i phyogs ni chung ngu'i chung ngu la sogs pa yin par rigs pa ma yin nam/ ji ltar gzhan du bstan zhes rgol ba la/ don dam phan par byed pa dang gnod pa gang yang yod pa ma yin no zhes bya ba lan dang / de bzhin du kun rdzob tu dri ma phra mo bsal ba khrus mkhan 'bad pa chen po byed pa'i dpe dang /gnyen po'i phyogs chung ngu'i chung ngu la sogs pa rim pa skye ba don gyis 'phangs par lan btab pas khams gsum gyi rnam pa can gyi shes pa dang / shes bya dag mi dmigs pa'i phyir ji skad bstan pa'i bsgom pa'i lam skad cig ma tha ma de'i chos thams cad mnyam pa nyid sgyu ma lta bur rtogs pa gang yin pa de nyid mtha' dag gi gnyen po'i ngo bo nyid yin no//de lta yin dang dngos kyi shin tu rnam par dag pa ni sangs rgyas bcom ldan 'das kyi yin par rnam par gzhag go/ / de skad du yang / de la klan ka spangs pa yis/ /lam ni 'jal dang gzhal bya dag /mnyam pa nyid kyis khams gsum gyi/ /gnyen po nyid du 'dod pa yin/ /zhes gsungs pa yin no/ /bsgom pa'i lam yongs su rdzogs pa'i 'og tu de'i skabs su gzugs rnam par dag pa gang yin pa dang 'bras bu rnam par dag pa gang yin pa zhes sngar gsungs pa gang yin pa de bstan par bya ba'i phyir/bcom ldan 'das bdag rnam par dag pas gzugs rnam par dag pa'o zhes bya ba la sogs pa gsungs te/ ji ltar gzhan gyis yongs su brtags pa'i bdag don dam par skye ba med par rnam par dag pa yin pa de bzhin du gzugs la sogs pa nas thams cad mkhyen pa'i mthar thug pa'i bar gyi rnam par dag pa yin par shes par bya'o zhes bya ba ni 'dres gsum gyi don yin no gzugs la sogs pa dang bdag nyid ni kun rdzob 'ba' zhig tu don gyi bya ba la go rims bzhin du nus pa dang mi nus pa gnyis kyis bden pa dang brdzun pa'i dbye bas phye ba yin gyi don dam par ni ma yin no zhes bya bar dgongs par bcom ldan 'das kyis thams cad du shin tu rnam par dag pa'i phyir ro zhes gsungs pa yin no//ji skad du bshad pa'i bsgom pa'i lam la de kho na nyid du na rtog pa med do zhes bcom ldan 'das bdag rnam par dag par thob pa yang ma mchis mngon par rtogs pa yang ma mchis so zhes gsol ba yin no//de la 'thob pa ma mchis pa ni dang po skyes pas thob tu rung ba'i mtshan nyid can du'o/ /mngon par rtogs pa ma mchis pa ni rnam par grol ba'i lam gyis so//de ltar de kho na nyid du ma yin no zhes bya ba ni shin tu rnam par dag pa'i phyir ro zhes gsungs pa yin te/ stong pa nyid yin pa'i phyir zhes bya ba'i tha tshig go/ /kun rdzob tu thams cad yod do zhes smras pa ni bcom ldan 'das bdag mu ma mchis pas na zhes bya ba la sogs pa'o//ma brtags pa gcig pu na nyams dga' ba rgyu snga ma snga ma'i bdag nyid kyi rang bzhin mu med pas gzugs la sogs pa mu med par rig par bya'o zhes bya ba'i don to/ /shin tu rnam par dag pa'i phyir ro zhes bya ba ni rigs pa'i rjes su 'gro ba'i skye ba dang bral ba nyid yin pa'i phyir ro//lam shes pa nyid nye bar bsdu bar bya ba'i phyir bcom ldan 'das byang chub sems dpa' sems dpa' chen po de'i gang de ltar rtogs pa de ni zhes bya ba la sogs pa gsol te/ de ltar bshad ma thag pa'i mog mog por byed pa la sogs pa'i rim pas rtogs shing khong du chud pa gang yin pa de ni nyes pa med pa nyid kyis byang chub sems dpa' rnams kyi lam shes pa nyid kyi shes rab kyi pha rol tu phyin pa yin par khong du chud par bya'o//shes rab kyi pha rol tu phyin pa'i bshad pa mngon par rtogs pa rgyan gyi snang ba las lam shes pa ste skabs gnyis pa'o// //gzhi thams cad yongs su shes pa med par lam yang dag par yongs su shes par mi 'gyur bas thams cad shes pa nyid brjod pa'i don du 'khor ba dang mya ngan las 'das pa la mi gnas pa ni/ shes rab kyi pha rol tu phyin pa 'di ni zhes bya ba la sogs pa smras so//sangs rgyas dang byang chub sems dpa' rnams kyi shes rab kyi pha rol tu phyin pa dus gsum pa'i chos rnams skye ba med pa'i rnam par mnyam pa nyid du rtogs pas nyan thos la sogs pa'i yul ma yin pa'i phyir lkog tu gyur pa ste/ bskal pa'i rang bzhin can gang yin pa 'di ni tshu rol gyi 'gram 'khor bar ma yin te shes rab kyis nyes dmigs mthong ba'i phyir ro//pha rol gyi 'gram mya ngan las 'das par ma yin te brtse bas gzhan gyi don byed pa'i phyir ro/ /'khor ba dang mya ngan las 'das pa gnyis las ma gtogs par dbus su yang gnas pa ma yin te dngos po med pa'i phyir ro//shin tu rnam par dag pa'i phyir ro zhes bya ba ni shes rab dang snying rje dag yang dag par rtogs pas 'khor ba dang mya ngan las 'das pa gnyi gar dmigs pa dang bral ba'i phyir ro/ /de skad du yang / tshu rol pha rol mtha' la min/ / de dag bar na mi gnas pa/ /dus rnams mnyam pa nyid shes phyir/ /shes rab pha rol phyin par 'dod/ /ces gsungs pa yin no/ /kun shes pa nyid kyi skabs su bzlog ste bstan pas nyan thos la sogs pa la ni dus gsum mnyam pa nyid du shes pa med pa'i phyir yang dag pa'i shes rab kyi pha rol tu phyin pa dang ring bar gyur pa yin pas rang gi rtogs pa tsam gyis shes rab kyi pha rol tu phyin pa ni snying brtse ba dang shes rab dang bral ba yin pa'i phyir dngos po dang dngos po med par dmigs pa nyid kyis 'khor ba'am mya ngan las 'das pa la yin par shes par bya'o//de bzhin du 'og ma rnams la yang la lar ni rjes su 'gro ba'i sgo nas/ la lar ni ldog pa'i sgo nas/ la lar ni gnyi ga'i sgo nas kyang ston pa yin par shes par bya'o/ /rten cing 'brel 'byung gang yin pa/ /de nyid khyod ni stong par bzhed/ /ces bya ba'i tshul gyis na dus gsum mnyam pa nyid du shes pa ni dngos po'i don rtogs pa nyid yin la/de yang thams cad la yod pa nyid ma yin nam/ ci ltar na nyan thos la sogs pa yang dag pa'i shes rab kyi pha rol tu phyin pa las ring bar gyur pa yin zhe na/ bcom ldan 'das de ltar yang zhes bya ba la sogs pa gsol pa yin te/yang zhes bya ba'i sgras ni dngos po la sogs pa gzhan gyi rnam pa 'ba' zhig tu ma zad kyi/ 'on kyang de ltar gang du yang mi gnas so zhes mngon par zhen pa'i mtshan ma dang ldan pas kyang zhes bya ba'i tha tshig go/ /'dor bar 'gyur/ ring du bgyid par 'gyur ro zhes bya ba ni/ de'i tshe dang dus phyi ma dag tu go rims bzhin du brjod par bya'o/ /mtshan mar shes pas rgyal ba'i yum las ring bar 'gyur ba zhes bya ba 'di la rgyu ci zhig yod snyam du dogs pa de ci'i phyir zhe na zhes bya bas bsu nas/ rab 'byor ming las kyang zhes bya ba la sogs pa gsungs so//de la shes rab kyi pha rol tu phyin pa zhes bya ba la sogs pas btags pa tsam ni ming ngo / /kun brtags pa la sogs pa'i mtshan nyid kyi dngos po ni mtshan ma'o/ /zhen pa'i gnas su phyin ci log pa ni chags pa'o/ /'di skad du sgyu ma mkhan gyi sprul pa'i dngos po snang ba la de'i rang gi ngo bo mi shes pa dag dngos por mngon par zhen pa nyid kyis ngo bo nyid med par mi snang ba de bzhin du dge ba'i bshes gnyen la sogs pa thabs mkhas pa dang bral ba'i phyir mtshan ma dang ldan par rtogs na phyin ci log gi mtshan nyid dmigs pa la chags par gyur pas na dngos po'i rang bzhin ma shes pa'i nyan thos la sogs pa rnams la ni mnyam pa nyid du yongs su shes pa med pa de bas na de dag la rgyal ba'i yum ring bar gyur pa yin no zhes brjod pa yin no//byang chub sems dpa' la sogs pa dngos po la mngon par zhen pa'i 'khrul pa'i mtshan ma bsal ba rnams kyis ni gzugs la sogs pa'i chos yongs su shes pa nyid de'i mnyam pa nyid du yongs su shes pa yin te/de'i phyir de dag la yum 'di yang dag par nye bar gyur par don gyi shugs kyis bstan to zhes smras pa ni/ bcom ldan 'das 'di ltar zhes bya ba la sogs pa smras/ chags pa 'di dag kyang zhes bya ba ni ming la sogs pa'o//ji tsam du zhes smos pas ni shin tu rnam par dag pa la sogs bsdu'o/ /legs par bshad cing zhes bya ba ni nyan thos dang rang sangs rgyas rnams kyi lung dang rtogs pa las bzlog te gsungs pa'i phyir ro/ /legs par bstan te zhes bya ba ni theg pa chen po'i lung yongs su rdzogs pa yin pa'i phyir ro//shin tu mthar gtugs pa zhes bya ba ni yon tan ma lus pa'i rab kyi mthar thug pa rtogs pa yin no/ /'di dag nyid ni nyan thos dang byang chub sems dpa'i dbye ba las zhes bya'o/ /de skad du yang / de ni mtshan mar dmigs sgo nas/ /thabs ma yin pas ring ba ste//de ni thabs la mkhas pa yis/ /yang dag nye ba nyid du bshad/ /ces gsungs pa yin no/ /de ltar yum las ring bar rjes su bsgrub pa ni nyan thos la sogs pa rnams kyi gnyen po nyid yin yang dngos por dmigs pa phyin ci log tu 'jug pa nyid kyis spang bar bya ba yin pa'i phyir byang chub sems dpa' rnams kyi mi mthun pa'i phyogs yin par bstan pa'i phyir tshe dang ldan pa rab 'byor chags pa gang yin zhes bya ba la sogs pa gsungs so//stong pa'i zhes bya ba ni mu stegs kyis yongs su brtags pa'i bdag dang bral ba'o snyam du shes pa ni zhes 'og nas 'chad pa dang sbyar ro//sems dang po bskyed pas zhes bya ba la/ 'dir sems bskyed pas ni sbyin pa la sogs pa byang chub kyi phyogs kyi chos nye bar mtshon pa'o/ /'di tsam zhes bya ba ni tshad med pa la sogs pa grangs kyis mchod pa'o/ /ji ltar na sems bskyed pa chags pa yin zhes smras pa ni/'phags pa rab 'byor rnam grangs gang gis zhes bya ba la sogs pa'o/ /phyin ci log tu 'jug pas na kau shi ka gal te zhes bya ba la sogs pa smos so/ /'di ni byang chub sems dpa'i sems dang po'o zhes de ltar mngon par zhen pa'i tshul gyis gang gi tshe byang chub sems de yang dag par shes shing de bzhin du byang chub kyi sems dang po 'di yongs su bsngo bar bya'o zhes mngon par zhen pa'i tshul gyis gang gi tshe yongs su bsngo ba de'i tshe rnam grangs 'dis chags pa yin no zhes bya ba ni ngag gi don to//ci'i phyir de ltar phyin ci log yin zhe na/ rigs kyi bu 'am rigs kyi bu mo zhes bya ba la sogs pa smras so//yongs su bsngo bar mi nus so zhes bya ba ni sems kyi rang bzhin ma skyes pa nyid ni ji skad bshad pa'i dbye ba rnam pa bcu gnyis kyis phye ba'i yongs su bsngo ba'i yid la byed pas yongs su bsngo bar mi nus so/ /'di nye bar mtshon pa yin pa'i phyir gcig dang du ma'i rang bzhin gyis yang dag par shes par yang mi nus so zhes bya bar khong du chud par bya ste/yang dag par shes shing yongs su bsngo na zhes bya ba'i tshig gnyis kyi skabs su bab pa yin pa'i phyir ro/ /'di skad du gang gi phyir gzugs la sogs pa'i phung po rnams kyi stong pa nyid dang dus gsum pa'i chos zag pa dang bcas pa dang zag pa med pa gnyis ka'i gnas su gyur pa rnams kyi 'das pa la sogs pa'i ngo bo nyid dang /sbyin pa la sogs pa'i byang chub kyi phyogs rnams rjes su sgrub pa la/ de kho na nyid du dmigs pa'i 'du shes ni phyin ci log tu 'jug pas mi mthun pa'i phyogs yin pa de'i phyir 'di dag gi rang bzhin de nyid ni yang dag par shes par mi nus so zhes brjod pa yin no//de skad du yang / gzugs sogs phung po stong nyid dang / /dus gsum gtogs pa'i chos rnams dang / /sbyin sogs byang chub phyogs rnams la/ /spyod pa'i 'du shes mi mthun phyogs//zhes gsungs pa yin no/ /byang chub sems dpa' rnams kyi ni ji skad bshad pa'i don las bzlog pa gnyen po'i phyogs yin par ni kau shi ka de bas na zhes bya ba la sogs pa brjod do/ /gang gi phyir mi mthun pa'i phyogs spang bar bya ba yin la de bas na yang dag pa'i rjes su rtogs pas te/sbyin par bya ba dang sbyin pa po dang len pa la sogs pa mi dmigs pa'i tshul gyis sbyin pa la sogs pa gzhan dag la yang dag par bstan pa la sogs pa bya'o zhes bya ba'i tha tshig go/ /de ltar na bdag nyid la yang gnod pa mi byed cing zhes bya ba ni/ de bzhin du yang dag par rtogs pa'i tshul gyis sbyin pa la sogs pa yang rang nyid gnas pa'i phyir bdag nye bar dmigs pa'i phyin ci log gi khyad par gyis rnam par 'jig par mi byed pa'o//'di dag ces bya ba ni gzugs la sogs pa la dmigs pa sngar brjod pa'o/ /chags pa shin tu rags pa chos nyid dang mi 'gal bar ston pas legs so legs so zhes bya ba byin te/chags pa rab tu phra ba'i don du gsungs pa ni rab 'byor de'i phyir zhes bya ba la sogs pa'o/ /mtshan mar yid la byed na zhes bya ba ni gzugs kyi sku la sogs par dmigs pas mngon sum du phyogs par byed pa'i phyir ro/ /yang ji ltar na de lta bu chags pa yin par bshad ce na/rab 'byor mtshan ma ji srid pa zhes bya ba la sogs pa gsungs so/ /skabs kyi don ni 'di yin te/ bdag nyid la sogs pa med par rtogs pas 'khor gsum rnam par dag pas sbyin pa la sogs pa la rang gzhan nges par sbyor ba ni yang dag par zhugs pa yin pa'i phyir dang /chags pa'i tshogs kyi gnas thams cad bkag pas blang bar bya ba yin pa'i phyir rnam pa thams cad du gnyen po yin no/ /de bzhin gshegs pa la sogs pa yid la byed pa la sogs pa ni bsod nams kyi tshogs kyi rgyu yin pa nyid kyi gnyen po yin na yang chags pa phra mo'i ngo bo nyid kyis rnam pa thams cad du gnyen po'i phyogs ni ma yin no zhes bya ba'o//de skad du yang / sbyin la sogs la ngar 'dzin med/ /gzhan dag de la sbyor byed pa/ /da ni chags pa'i mtha' 'gog pas / /rgyal la sogs la chags pa phra//zhes gsungs so/ /yang ji ltar chags pa phra mo mi mthun pa'i phyogs yin snyam pa'i dogs pa de ci'i phyir zhe na zhes pas bsu nas/ rab 'byor mtshan ma las ni chags pa 'byung ste zhes bya ba gsungs so/ /de nyid bstan par bya ba'i phyir de ltar na zhes bya ba la sogs pa gsungs te/de kho na nyid ni 'di yin no zhes nges par gzung bas mtshan mar byar mi rung ngo / /yang dang yang du yul du byed pas dmigs par byar mi rung ngo zhes bya ba ni khyad par ro/ /de ni mthong ba dang thos pa dang rtogs pa dang rnam par rig pa ma yin no zhes bya ba ni mig gi rnam par shes pas blta bas mthong ba'o//rna ba'i rnam par shes pas nyan pas thos pa'o/ /sna dang lce dang lus kyi rnam par shes pas nyams su myong ba'i phyir rtogs pa'o/ /yid kyi rnam par shes pas nye bar dmigs pas rnam par rig pa nyid ni de ma yin no zhes re re dang sbyar bar bya'o/ /'di nyid shes bya dang shes pa zab pa'i dbye bas bcom ldan 'das zhes bya ba la sogs pa gsol ba yin te/rang bzhin zhes bya ba ni rang gi ngo bo ste de bzhin nyid ces bya ba'i don to/ /dben pa'i phyir ro zhes bya ba ni nye bar dmigs pa thams cad kyis stong pa'i phyir ro/ /rang bzhin zab pa'o zhes bya ba ni shes pa'i ngo bo nyid ni rang bzhin gyis ma skyes pa yin pas nyan thos la sogs pa'i yul ma yin pa'i phyir zab pa yin no//rang bzhin gyis rnam par dag pa'i phyir ro zhes bya ba dang rang bzhin dben pas na zhes bya ba ni/ go rims bzhin du mi 'gyur ba dang / phyin ci ma log par yongs su grub pa dang /yongs su ma grub pa'i phyir ro zhes bya ba'i tha tshig go/ /'di skad du/ gang gi phyir chos thams cad kyi rigs shes bya'i rang bzhin ni ngo bo nyid kho nas stong pa nyid yin pas de dag zab pa yin pa de'i phyir tshul 'ga' zhig gis dmigs pa ni chags pa phra mo yin pas mi mthun pa'i phyogs yin no zhes brjod pa yin no//de skad du yang / chos kyi lam ni rang bzhin gyis/ /dben pa'i phyir na de zab nyid/ /ces gsungs pa yin no/ /'o na de ji ltar spang zhe na/ rang bzhin dben pas na zhes bya ba smos te/ dngos por khas blangs pa'i nyes pa dang bral ba nyid kyis na gang gi phyir rang bzhin gyis dben pa nyid yin pa de bas na phyag 'tshal lo zhes bya ba'o//shes rab kyi pha rol tu phyin pa zhes smos pas na 'o na ni chos thams cad dang dben pa ma yin no zhes rtog pa la/ rab 'byor chos thams cad ni zhes bya ba la sogs pa gsungs so/ /rang rig pa'i ngo bo nyid yin pas na chos thams cad dben pa la rang rig pa'i rang bzhin du rtogs pa med pa'i phyir na ji ltar rang rig pa'i rang bzhin de shes rab kyi pha rol tu phyin pa yin snyam pa'i dogs pa de ci'i phyir zhe na zhes bya bas bsu nas/'di ltar rab 'byor zhes bya ba la sogs pa gsungs so/ /'di skad du/ gang gi tshe phyi'i dngos por yongs su grub pa med pas na rmi lam la sogs pa dang 'dra bar sos pa'i dbye ba rnam pa sna tshogs par nye bar ston pa'i phyi rol lta bur yongs su bsal ba'i ngo bor rnam par shes pa skye ba yin te de bas na ye shes ni kun rdzob tu sgyu ma dang 'dra bar thugs su chud pas de dang tha mi dad pa nyid kyis na chos thams cad ma byas pa stong zhing sgyu ma lta bu'o zhes bcom ldan 'das mngon par rdzogs par sangs rgyas pa'i phyir/de rnams dben pa nyid du yang thugs su chud do zhes 'phags pa lang kar gshegs pa'i mdo las/ dngos rnams skye ba kun rdzob tu/ /dam pa'i don du rang bzhin med/ /des na 'di kun bden pa ste//dam pa'i don du bden ma yin/ /zhes gsungs pa'i rjes su 'brangs nas brjod pa yin no/ /'das ma thag pa'i don gyi de kho na nyid gsal bar bya ba'i phyir bcom ldan 'das de lta bas na zhes bya ba la sogs pa smras te/ de kho na nyid du na mngon par rdzogs par sangs rgyas so zhes bya ba ni lhag ma'o//legs par smras pa nyid kyis gzhung 'dzugs par mdzad pa ni/ rab 'byor 'di ltar zhes bya ba la sogs pa gsungs pa yin no/ /rang bzhin ji lta bu yin zhe na/ rang bzhin gang yin pa zhes bya ba la sogs pa gsungs te/ rang bzhin te ngo bo nyid dam de bzhin nyid gang yin pa de nyid dang ni ngo bo nyid dang bral ba'i phyir rang bzhin med pa'o//rang bzhin med pa gang yin pa de ni chos thams cad kyi rang bzhin yin te/ 'di lta ste rang gi mtshan nyid med pas te ngo bo nyid pas mtshan nyid gcig pa'i phyir te/ rang bzhin gcig pa'i phyir ro zhes bya ba'i don to/ /'di nyid nye bar sdud pa ni rab 'byor de bas na zhes bya ba la sogs pa gsungs so/ /dngos po rnams ni rgyu tha dad pa nyid kyis bskyed pas rang bzhin tha dad pa nyid ma yin nam/ ji ltar na mtshan nyid gcig pa nyid yin snyam pa'i dogs pa de ci'i phyir zhe na zhes bya bas bsu nas/rab 'byor chos kyi rang bzhin ni zhes bya ba la sogs pa gsungs so/ /'di snyam du gang gi phyir dngos po 'di rnams kyi skye ba'i ngo bo nyid ni tshad mas gdon pa nyid yin pa'i phyir bskyed pa'i rgyu tha dad pa dang 'brel ba'i dngos po du ma'i rang bzhin nyid med pa ni 'di dag gi sna tshogs pa'i rang bzhin don dam pa ma yin pa de bas na rang bzhin gcig pa nyid yin no zhes dgongs pa'o//rab 'byor de ltar na zhes bya ba la sogs pa la/ ji skad du gsungs pa'i rim pas gzugs la sogs pa'i chos thams cad rang bzhin gcig pa kho na yin te/'di lta ste rang bzhin med pa'o zhes shes pa dang shes bya mnyam pa nyid gcig par yongs su shes pas ni sngar bshad pa'i chags pa phra mo'i rang bzhin gyis chags pa'i mtha' spong bar 'gyur ro/ /de skad du yang / chos rnams rang bzhin gcig par ni//shes pas chags pa spong bar 'gyur/ /zhes gsungs pa yin no/ /sngar brjod pa'i chos rang bzhin gyis zab pa yang ji ltar zhes smras pa ni/ bcom ldan 'das shes rab kyi pha rol tu phyin pa zab pa lags sam zhes bya ba ste/ zur gyis dris pa yin pas na ji ltar zab ces bya ba'i don to//nam mkha' zab pa'i phyir zhes bya ba ni gang gi phyir rnam par shes pa'i dmigs pa thams cad bsal ba'i mi dmigs pas shes bya mnyam pa nyid du ston par byed pas de'i rang bzhin rtogs par dka' ba nyid du brjod pa de'i phyir na nam mkha' ltar zab pa yin no zhes bya ba'i don to//de skad du yang / mthong ba la sogs bkag pa yis/ /de ni rtogs par dka' bar bshad/ /ces gsungs pa yin no/ /yang de'i rang bzhin de ltar rtogs dka' ba'i rgyu gang yin zhes gsol ba ni bcom ldan 'das shes rab kyi pha rol tu phyin pa ni rjes su rtogs par dka' ba lags sam zhes bya ba ste/'dir yang snga ma ltar zur gyis 'dri ba yin no/ /su yang mngon par rdzogs par 'tshang rgya ba med do zhes bya ba ni/ gang gi phyir gzugs la sogs pa nas sangs rgyas kyi chos ma 'dres pa'i rnam pa'i bar dag gi rang bzhin ni de bzhin nyid kyi ngo bo nyid yin pa'i phyir mngon par rdzogs pa'i sangs rgyas par bsam pa las 'das pa nyid du 'dod pa de bas na 'di ni rtogs par dka' ba'o zhes bya ba'i don to//de skad du yang / gzugs la sogs par mi shes phyir/ /de ni bsam mi khyab par 'dod/ /ces gsungs pa yin no//bsam gyis mi khyab pa nyid ci'i phyir zhes gsol pa ni bcom ldan 'das shes rab kyi pha rol tu phyin pa bsam gyis mi khyab pa nyid lags sam zhes bya ba ste/ ci zhes bya ba lhag ma yin no/ /sems kyis shes par bya ba ma yin sems kyis rtogs par bya ba ma yin zhes bya ba ni gang gi phyir ma byas pa nyid kyis ni mos pa'i yid la byed pas lhag par mos pa yin pas sems kyis shes par bya ba ma yin la/de kho na nyid yid la byed pas yongs su shes pa ma yin pas/ sems kyis rtogs par bya ba ma yin pa de bas na bsam gyis mi khyab pa yin no zhes bya ba'i don to//ma byas pa nyid ji ltar zhes gsol pa ni bcom ldan 'das shes rab kyi pha rol tu phyin pa ma bgyis pa lags sam zhes bya ba ste/ ci zhes pas kha bkang ngo / /byed pa po mi dmigs pa'i phyir zhes bya ba ni byed pa po'i rgyu mi dmigs pa'i phyir ro/ /'di ltar rgyu dang 'bras bu'i dngos po ni mngon sum dang mi dmigs pas sgrub byed can yin par brjod do//de la re zhig rnam pa med pas mi rtogs te/ sems can thams cad rig pa tsam du mtshungs pas na gang las sa bon shes pa las myu gu shes la/ de ma shes pas de mi shes pas na sa bon ni rgyu yin la myu gu ni 'bras bu yin no zhes bya bar 'gyur ba/'di ni 'di'i shes pa yin gyi 'di ni 'di'i shes pa ni ma yin no zhes gang las rnam par gnas/ sa bon las skyes pa'i phyir des sa bon shes pa yang ma yin te/ mig las skyes pa de las mig rtogs par 'gyur ba'i phyir ro//gang las rnam par gnas pa 'dir 'gyur ba/ rnam pa med pa'i sems la yang rgyu'i chos kyis bskyed pa bdag nyid kyi khyad par thun mong ma yin pa 'ga' zhig yod pa yin no zhe na/ bdag nyid kyi khyad par zhes bya ba ni rnam pa nyid la ming gzhan btags pa yin na/ming gzhan byas pas ni don gzhan du 'gyur bar 'os pa ma yin no/ /de rnam pa ma yin na 'o na de gang yin pa smros shig /nye bar mtshon par dka' ba nyid kyis de 'di'o zhes bstan par mi nus so zhe na/ gang kho na las 'di ni sa bon no 'di ni myu gu'o zhes rnam par gnas pa 'dir 'gyur ba de nye bar mtshon pa med na der ga la 'gyur te/dbyug pa dang rwa nye bar mtshon pa med par 'di ni dbyug pa can nam rwa can yin no zhes gnas pa ni yod pa ma yin no/ /rnam pa dang bcas pas kyang ma yin te/ rnam pa dngos pos khyab pa ma yin pa'i phyir te/zla ba gnyis la sogs pa de med kyang 'di yod pa'i phyir ro/ /de ltar ni ma yin te/ 'di ni 'khrul pa yin pa'i phyir ro/ /gang zhig ma 'khrul pa de ni dngos po med na 'byung ba ma yin no/ /gzhan 'khrul pas ni gzhan 'khrul pa yang ma yin no zhes bya ba yang legs par ma yin te/rgyu dang 'bras bu'i dngos po sgrub pa'i dus na/ 'di ni 'khrul pa'i rnam pa yin la 'di ni ma yin no zhes nges pa'i rgyu mtshan ni tshu rol mthong ba la yod pa ma yin la/ dbang po las 'das pa mthong ba la yang 'di brjod pa ma yin no/ /nges pa med par rgyu dang 'bras bu'i dngos po rnam par 'jog pa yang mdzes pa ma yin no//dngos po'i rnam par shes pa yin par yang mi 'thad de/ gal te phyogs gcig gis shes pa shes bya'i rnam pa can yin pas de yongs su gcod par byed na de'i tshe thams cad kyis thams cad rig par thal bar 'gyur te/shes pa thams cad dang shes bya nyid la sogs pa dngos po thams cad kyi thun mong gi rnam pa thams cad dang ldan pa'i phyir ro/ /shes pa bdag nyid thams cad kyis shes bya'i rnam pa can yin na yang shes bya dag gcig pa nyid kyis rnam par dbye ba mi 'thad pa'i phyir/tha snyad chad par 'gyur ro/ /bdag nyid thams cad kyi rig pa rig bya'i rnam pa can yin na ni de med par 'gyur ba'i phyir te shin tu spros pas chog go/ /skye bo blo dman pa rnams rjes su 'dzin pas sam gdul bya'i skye bo nye ba'i phyin ci log spong bar bzhed pas mi mthun pa dang gnyen po dag gi rnam par dbye ba ni ji skad du bshad pa 'di nyid rtogs par bya'o//de skad du yang / de ltar kun shes nyid lugs la/ /mi mthun gnyen po'i phyogs dag gi/ rnam par dbye ba ma lus pa/ /ji skad bshad pa 'dir shes bya/ /zhes gsungs pa yin no/ / de dag rnam par sgom pa'i sbyor ba gang yin zhes sbyor ba'i don du gsol pa ni/ de ltar na zhes bya ba la sogs pa'o/ /gang gi phyir de ltar mi mthun pa'i phyogs dang gnyen po spang bar bya ba dang / blang bar bya ba yin pa de bas na de'i don du ji ltar spyad par bgyi zhes bya ba'i tha tshig go/ /gzugs la sogs pa'i sbyor ba gsungs pa ni rab 'byor gal te gzugs la zhes bya ba la sogs pa'o//gang tshe gzugs la mngon par zhen pa'i tshul gyis mi spyod na de'i tshe shes rab kyi pha rol tu phyin pa la spyod do/ /de bzhin du 'og ma rnams la yang shes par bya'o/ /gzugs la sogs pa mi rtag pa la sogs pa'i sbyor ba'i don du gsungs pa ni gal te gzugs mi rtag pa'o zhes mi spyod na zhes bya ba la sogs pa'o//gzugs la sogs pa yongs su ma rdzogs pa dang yongs su rdzogs pa'i sbyor ba ni gal te gzugs la sogs pa ma rdzogs pa yin no zhes bya ba la sogs pa gsungs pa yin te/mtshan nyid kyis stong pa'i phyir brtags pa'i gzugs ni yongs su ma rdzogs pa'o/ /yon tan gyi tshogs dang ldan pa'i phyir chos nyid kyi gzugs ni rab tu rdzogs pa'o/ /de ni gzugs ma yin te zhes bya ba ni chos dang chos can dag ni blos rnam par brtags pas tha dad pa'i phyir ro//gal te de ltar yang mi spyod na shes rab kyi pha rol tu phyin pa la spyod do zhes 'og nas bshad pa dang sbyar bar bya'o/ /ji skad du gsungs pa'i chos bshad pas khyad par skyes pa nyid kyis bcom ldan 'das gang gi phyir zhes bya ba la sogs pa gsol to//don gzhan rjod pas rnam pa gzhan bstan pa'i phyir ngo mtshar ba yin te/ gang gi phyir de ltar sbyor ba brjod pas chags pa dang bcas pa gzugs la sogs pa dmigs pa'i rang bzhin dang chags pa med pa mi dmigs pa'i ngo bo nyid kyi yul brjod pas so//gzugs la sogs pa la chags pa med pa'i sbyor ba ni rab 'byor gzugs chags pa dang bcas pa dang zhes bya ba la sogs pa gsungs so/ /chags pa dang bcas pa dang chags pa med pa zhes bya ba ni dmigs pa med pa zhes bya ba'i tha tshig go//mngon par zhen par ma byas par ni bsgom par mi nus pa nyid ma yin nam/ ji ltar na 'di skad brjod snyam pa'i dogs pa de ci'i phyir zhe na zhes bya bas bsu nas/ rab 'byor thams cad mkhyen pa nyid ni zhes bya ba la sogs pa gsungs te ma chags pa zhes bya ba ni mngon par zhen pa dang bral ba'i phyir ma bcings ma grol ba zhes bya ba'i tshig gnyis ni bshad zin to//yang dag par ma 'das pa'o zhes bya ba ni rten cing 'brel par 'byung ba stong pa nyid kyi ngo bo nyid yin pa'i phyir ro/ /'di skad du gang gi phyir ji ltar mngon par zhen pa ni de kho na ma yin pa'i phyir dang de kho na nyid ji lta bar yang mngon par ma zhen pa'i phyir thams cad mkhyen pa nyid rnam par rtog pas yul du bya bar mi nus pa de'i phyir de la chags pa mi skyed do zhes brjod pa yin no//rab 'byor de ltar na zhes bya ba la sogs pa ni mjug sdud pa'o/ /mi 'gyur ba'i sbyor ba ni bcom ldan 'das 'di ltar zhes bya ba la sogs pa gsol to//gzhung gi bdag nyid can gyi yul ni bstan pa dang ma bstan pa dag gis mthar thug pa dang nub pa dag gi sgo nas 'grib par 'gyur ba dang / de bzhin du bstan pas rigs pa dang lung dang mi 'gal ba'i tshul gyis rgyud gzhan la bskyed pas na 'phel zhing ma bstan pas rgyun mi 'chad par nang du yang dag par 'jog pas rang gi rgyud la lhag pa'i don ston pas 'phel ba yin gyi/'gyur ba med pa'i rang bzhin can nyid yin pa'i phyir gtso bo'i yum la ni 'di dag thams cad med do gsol pa ni/ de ni bstan kyang mi 'grib ces bya ba la sogs pa'o/ /mi 'gal bar smras pa nyid kyis rab 'byor legs so zhes bya ba la sogs pa gsungs pa sngon du 'gro bas/ de nyid dpes gsal bar mdzad pa ni/ rab 'byor 'di lta ste dper na zhes bya ba la sogs pa gsungs so/ /byed pa po med pa'i sbyor ba'i don du/rab 'byor 'di lta ste sgyu ma'i skyes bu la zhes bya ba la sogs pa gsungs so/ /log par snang ba'i rang bzhin yin pas byed pa po ma yin pa'i phyir 'dod chags dang zhe sdang gi nyon mongs pa dag gis rjes su chags par mi 'gyur zhing khong khro bar mi 'gyur te/de nyid kyi phyir de'i nye ba'i nyon mongs par yang mi 'gyur ro zhes bya bar sbyar ro/ /sbyor ba dka' ba'i rnam pa gsum las rnam pa thams cad mkhyen pa nyid kyi sbyor ba ched du bya ba dka' ba'i sbyor ba'i sbyor ba dka' ba'i don du bcom ldan 'das byang chub sems dpa' sems dpa' chen po zhes bya ba la sogs pa gsol to//ya ya bor mi 'gyur ro zhes bya ba ni yeng yeng por mi 'gyur ba ste/ phyi rol du g.yeng bar mi 'gyur zhing dga' ba bskyed par mi 'gyur ro zhes bya ba'i don to/ /phyir mi ldog pa zhes bya ba ni phyir ldog pa nyid du mi byed pa'o//go cha 'di zhes bya ba ni 'og nas 'chad pa'i go cha'o/ /shes rab la sogs pa khyad par du 'gyur ba yin par rtogs nas 'bad pa byed pa'i phyir bya dka' ba bla lhag pa zhes bya ba gang yin snyam pa'i dogs pa de ci'i phyir zhe na zhes bya bas bsu nas/ gang sems can rnams kyi zhes bya ba la sogs pa smos so//'di skad du chos thams cad nam mkha' lta bur dmigs pas de kho nar shes rab la sogs pa khyad par du 'gyur ba yod pa ma yin yang / rnam pa thams cad mkhyen pa'i don du go cha gyon par byed pa'i phyir na lhag par bya dka' ba yin no zhes brjod pa yin no//nam mkha' dang mtshungs pa dang chos kyi dbyings dang mtshungs pa zhes bya ba ni 'jig rten dang 'jig rten las 'das par grags pa'i dbye bas gnyis smos pa yin no/ /lam shes pa nyid kyi sbyor ba dka' ba nyid kyi don du de ni bcom ldan 'das nam mkha' yongs su thar bar 'tshal lags so zhes smos te/gang lam shes pa nyid la rab tu sbyor bar 'dod pa zhes bya ba ni lhag ma'o/ /thams cad shes pa nyid kyi sbyor ba las bya dka' ba nyid kyi don du de ni bcom ldan 'das nam mkha' gdegs par 'tshal ba lags so zhes smos te/ gang thams cad shes pa nyid byed par 'dod pa zhes kha bskang ngo //go cha 'tshal ba zhes bya ba ni bya dka' ba gsum char la spro ba'o/ /brtson 'grus kyi pha rol tu phyin pa'i go cha chen po thob pa lags so zhes bya ba ni go cha'i sbyor ba'i byed pa rnams la stong pa nyid dang snying rje chen po'i snying po can gyi 'bad pa chen po phun sum tshogs pa'o//skal ba ji lta ba bzhin du 'bras bu thob pas 'bras bu yod pa'i sbyor ba ni de nas zhes bya ba la sogs pa smos so/ /dge slong gzhan zhig gis zhes bya ba ni gtan med pa'i skyes bu ste/ ming dang rus la sogs pas mtshon du med pa'i gang zag ces bya ba'i don to//phyag 'tshal lo zhes bya ba ni stong pa dang ma skyes pa la sogs pa'i sbyor bas rang dang rjes su mthun pa'i rtogs pa skyes pa'i phyir dad pa phul du byung bas 'khor gzhan rnams kyang skal ba ji lta ba bzhin du rtogs pa thob par yang dag par ston cing phyag 'tshal ba'o//sbyor ba nyid ni bcom ldan 'das 'di ltar zhes bya ba la sogs pa gsol pa yin no/ /nam mkha' la zhes bya ba nyid ni shes bya stong pa nyid la'o/ /bla gab med pa la zhes bya ba ni shes pa ngo bo nyid med pa la'o/ /gzhan la rag ma las pa'i sbyor ba'i don du bcom ldan 'das rigs kyi bu'am rigs kyi bu mo gang zhes bya ba la sogs pa gsol pa yin no//de ni ma yin no zhes bya bas ni gzhan la rag las pa ma yin pa nyid ston par byed de gzhan gyis bsrung ba la sogs pa gzhan la rag las pa nyid yod pa ma yin pa'i phyir ro//de nyid gsal bar bya ba ni kau shi ka gal te de ltar zhes bya ba la sogs pa gsungs pa yin te/ shes rab kyi pha rol tu phyin pa dang ma bral ba nyid kyis de la rang nyid kyis bsrung ba la sogs pa 'gyur ba yin gyi gzhan du ma yin no zhes bya ba ni ngag gi don yin no//ngo bo nyid med pa'i chos la lhag par mos pas kyang de la rang nyid kyis bsrung ba la sogs pa yin pa ni kau shi ka gzhan yang zhes bya ba la sogs pa gsungs pa yin no/ /rnam pa bdun du snang ba'i shes pa'i sbyor ba ni kau shi ka 'di ji snyam du sems zhes bya ba la sogs pa gsungs pa yin no//de la rnam par shes pa yongs su gyur pa nyid kyis yongs su gyur pa'i snang bas na rmi lam lta bu'o/ /sngags dang sman gyi tshogs pa nyid kyis na mnyam par sbyor ba'i snang bas ni sgyu ma lta bu'o/ /med pa nyid kyis na 'gal ba snang bas ni smig rgyu lta bu'o//sgra'i rkyen la rag las pas na rkyen gyi snang bas ni sgra brnyan lta bu'o/ /shes bya'i tshul las mi 'da' bas na mi 'da' bar snang bas ni mig yor lta bu'o/ /gzhi med pas na rten med pa'i snang bas ni dri za'i grong khyer lta bu'o/ /rgyu dang bral bas na byed pa po med pa'i snang bas ni sprul pa lta bu'o zhes dngos po rnams shes par gyur pa ste/de ltar stong phrag nyi shu lnga pa las gsungs la/ 'dir ni mdor bsdus par bzhed pa'i phyir chos thams cad brag ca lta bu'o zhes gsungs pa'i bar ma bstan pa las thog ma dang tha ma gsum gsum bstan pa yin par shes par bya'o//des na de ltar byang chub sems dpa' rnams kyi sbyor ba rnam pa bcu rjes su 'gro ba'i sgo nas bstan pas don gyis na nyan thos la sogs pa'i ni ji skad bstan pa las bzlog pa yin par shes par bya'o/ /de skad du yang / gzugs sogs de mi rtag sogs dang //de ma rdzogs dang rab rdzogs dang / /de la chags pa med nyid la/ /spyod pa bkag pa'i sbyor ba dang / /mi 'gyur byed po med nyid dang / /bya dka' rnams gsum sbyor ba dang / /skal ba ji bzhin 'bras 'thob pas/ /'bras yod 'dod pa de dang ni/ /gzhan la rag las med gang dang //snang ba rnam bdun shes byed do/ /zhes gsungs pa yin no/ /mnyam pa nyid kyi sgo nas sbyor ba bsgom dgos pas mnyam pa nyid ni de la yang rlom sems su mi byed ces bya ba la sogs pa smos so/ /de la mnyam par ma bzhag pa'i sems kyis de la rlom sems su mi byed de/gang gi phyir yang dag par rjes su mi mthong bas so/ /chos de dag kyang med pa ste gang gi phyir mi snang bas so/ /mnyam par ma bzhag pa'i sems kyis ni yongs su mi shes te/ gang gi phyir yang dag par mi shes pas so//shes pa des rtogs par bya ba'i chos de dag kyang yang dag par med pa yin te/ gang gi phyir mi dmigs pas so zhes bya bar sbyar ro/ /nye bar bsdu bar bya ba'i phyir gal te de ltar gnas na zhes bya ba la sogs pa gsungs so/ /des na de ltar gzugs la sogs pa'i dngos po'i don la rlom pa dang /sngon po la sogs pa'i mtshan ma la rlom pa dang / gzugs rnam pa gnyis sam rnam pa nyi shu zhes bya ba la sogs pa spros pa la rlom pa dang / nges par 'byed pa'i cha la sogs pa rtogs par rlom pa rnams bkag pas/ rtogs pa po dang shes bya'i chos rnam pa thams cad du mi dmigs pa rnam pa bzhi gsungs pa yin par shes par bya'o/ /de skad du yang / gzugs la sogs la rlom med pa/ /rnam bzhi de yi mnyam pa nyid/ /ces gsungs pa yin no/ /sbyor ba'i mnyam pa nyid rtogs nas mthong ba'i lam bsgom par bya ba yin pas na da ni de brjod par bya'o//de yang skad cig ma bcu drug yin pas skad cig ma gzhan med par shes par bya ba'i don du spang por gyur pa bstan par bya ba'i phyir dang / sangs rgyas thams cad kyis gsungs pa nyid du bstan par bya ba'i phyir de nas sangs rgyas kyi mthus zhes bya ba la sogs pa gsungs pa yin no// 'phags pa rnam par grol ba'i sdes bshad do/ /thabs la mkhas pa'i stobs kyis gzhan rnams kyis sgrub pa dang dgag pa med pa'i phyir 'jig rten gyi khams mi mdzad du bskal pa bzang po'i byang chub sems dpa' stong nges par sangs rgyas nyid brnyes pas sangs rgyas stong zhes gsungs pa yin no//ming zhes bya ba ni tshig bsdus pa'i ngag go/ /tshig ces bya ba ni su pa'i mtha' can dang ti 'i mtha' can gyi yi ge rnams bsdus pa'o/ /yi ge zhes bya ba ni 'di skad ces bya ba la sogs pa'i yi ge rnams kyis so//shes rab kyi pha rol tu phyin pa'i le'u 'di nyid ces bya ba ni rnam par dag pa'i le'u zhes bya ba'i tha tshig go/ /de la 'das pa'i de bzhin gshegs pa rnams dper byas pa ni des bstan pa'i mthar thug med par shes par bya ba'i don yin no/ /byams pa zhes ma 'ongs pa'i de bzhin gshegs pa dper byas pa ni ma 'ongs pa'i sems can gyi don gyi dogs pa bsal bar bstan pa'i don yin no//shes rab kyi pha rol tu phyin pa'i bshad pa mngon par rtogs pa rgyan gyi snang ba las rnam par dag pa'i le'u zhes bya ba ste brgyad pa'o// //da ni mthong ba'i lam gyi don du shes rab kyi pha rol tu phyin pa zhes bgyi ba la gsol pa yin te/bden pa re re zhing chos shes pa'i bzod pa dang / chos shes pa dang / rjes su shes pa'i bzod pa dang / rjes su shes pa zhes bya ba de ltar skad cig ma bcu drug gi bdag nyid can ni thams cad shes pa nyid kyi skabs su mthong ba'i lam zhes bya ba'i tha tshig go//de skad du yang / sdug bsngal la sogs bden pa la/ /chos shes rjes su shes pa dang / /bzod shes skad cig bdag nyid 'di/ /kun shes tshul la mthong ba'i lam/ /zhes gsungs pa yin no/ /'di ni ming tsam mo zhes bya ba 'di ni rnam par rtog pa'i gzugs brnyan tsam du zad do zhes bya ba'i tha tshig go//ming de yang 'di'o zhes mi dmigs te zhes bya ba ni de kho na nyid du na rang bzhin med pa'i phyir ro/ /ming zhes gang la bya zhe na/ ngag gi dngos po nyid ces bya ba smos te/ rnam par rtog pa'i gzugs brnyan no/ /rnam pa bstan par bya ba'i don du bden pa'i rnam pa gang yin zhes gsol pa ni/bcom ldan 'das ci'i slad du zhes bya ba la sogs pa'o/ /gzugs rtag pa ma yin mi rtag pa yang ma yin zhes bya ba ni ngo bo nyid med pa'i phyir gzugs rtag pa dang mi rtag pa la sogs pa dang bral bas rtag pa ma yin mi rtag pa yang ma yin zhes bya ba ni rnam pa dang po'o//gzugs bcings pa ma yin grol ba ma yin pas mtha' las 'das shing rnam par dag pa'o zhes bya ba ni sdug bsngal dang sdug bsngal ma yin pa dang bral ba nyid kyis bcings pa dang grol ba med pa'i phyir rnam par dag cing rtag pa dang chad pa'i mtha' dang bral ba zhes bya ba ni gnyis pa'o//rab 'byor rgyu des na zhes bya ba ni chos thams cad phyin ci ma log par mngon par byang chub pa'i rgyu des na chos kyi de kho na nyid ji lta ba bzhin du ston par byed pa'i shes rab kyi pha rol tu phyin pa 'di nyid 'chad par 'gyur te/ gzhan dag la ni de lta bu'i chos kyi de kho na nyid ston pa'i nus pa yod pa ma yin no zhes bya ba'i tha tshig go//gzugs yongs su dag pas zhes bya ba ni stong pa dang mi stong pa dang bral ba'i phyir yongs su dag pa zhes bya ba ni gsum pa'o/ /gzugs skye ba med pa dang 'gag pa med pa dang kun nas nyon mongs pa med pa dang rnam par byang ba med pa yongs su dag pas zhes bya ba ni/bdag dang bdag med pa'i ngo bo nyid ma yin pas ma skyes pa dang ma 'gags pa dang kun nas nyon mongs pa ma yin pa dang rnam par byang ba ma yin pa ste/ de ltar rnam par dag pa zhes bya ba ni bzhi pa'o/ /nam mkha' yongs su dag pas zhes bya ba ni rgyu dang rgyu ma yin pa gsog yin pa'i phyir nam mkha' dang 'dra bar rnam par dag pa zhes bya ba ni lnga pa'o//gzugs gos pa med cing yongs su mi 'dzin pas zhes bya ba ni kun 'byung ba dang kun 'byung ba med pa dang bral ba'i phyir nyon mongs pa dang nye ba'i nyon mongs pa thams cad kyis gos pa med pa zhes bya ba ni drug pa'o//rab tu skye ba dang rab tu mi skye ba med pas kun nas nyon mongs pa med pa'i phyir yongs su 'dzin pa med pa zhes bya ba ni bdun pa'o/ /nam mkha' dang brag ca sgrar med cing brjod du med la dmigs su med pa zhes bya ba ni rkyen dang rkyen ma yin pa las rnam par grol ba ma yin pa'i phyir nam mkha' dang brag ca dang 'dra bar rang gi ngo bos brjod du med pa zhes bya ba ni brgyad pa'o//gang gi phyir 'gog pa dang 'gog pa med pa dang ma 'dres pa de'i phyir 'gog pa'i bden pa'i don brjod pas bstan pa'i sgo nas rgyud gzhan la thob par byar med pa zhes bya ba ni dgu pa'o//zhi ba dang ma zhi ba med pas dmigs pa med par byed pa zhes bya ba ni bcu pa'o/ /nye bar gos pa dang ma gos pa'i chos thams cad kyis gos pa med pa'i phyir zhes bya ba ni gya nom pa ma yin pa dang bral ba'i phyir/ nye bar gos pa'i chos zag pa dang bcas pa dang gos pa med pa'i chos zag pa med pa thams cad kyis gos pa med pa'i phyir mtha' gnyis las 'das shing rnam par dag pa zhes bya ba ni bcu gcig pa'o//ci smos te zhes bya ba ni 'dzin pa la sogs par byed pa ni shin tu yang rnyed pa legs par rnyed pa yin pa ste/ rna ba'i rnam par shes pas nyams su myong bas 'dzin pa la sogs pa khyad par du 'phags pa yin no zhes bya ba'i don to//de dag la ni mig gi nad 'byung bar mi 'gyur zhes bya ba la sogs pa ni nges par 'byung ba dang nges par 'byung ba med pa dang bral ba'i phyir nad thams cad mi skye ba zhes bya ba ni bcu gnyis pa'o/ /mang du skyed par 'gyur ro zhes bya bya ba ni tshes brgyad la sogs par brgya byin la sogs pa skye dgu rnams rtog pa la zhugs pa'i nyan pa po shin tu mang ba'i phyir ro zhes bya ba'i tha tshig go//dgongs so/ /lam la chos shes pa'i bzod pa ni rab 'byor rigs kyi bu'am rigs kyi bu mo de zhes bya ba la sogs pa gsungs pa yin no/ / shes rab kyi pha rol tu phyin pas ni lha'i bu rnams la dgongs pa med pas de 'chad pa rnams la de rnams bsrung ba la sogs pa'i rgyu ci zhig yin snyam pa'i dogs pa de ci'i phyir zhe na zhes bya bas bsu nas/ rab 'byor shes rab kyi pha rol tu phyin pa ni zhes bya ba la sogs pa gsungs so/ /rin po che bla na med pa'o zhes bya ba ni sdig pa thams cad rab tu zhi ba'i rgyu nyid yin pas lam dang lam ma yin pa dang bral ba'i phyir bla na med pa'i dga' ba rgyas par byed pas lha'i bu la sogs pa la phan par gyur pa yin pa'i phyir rin po che bla na med pa yin te/ngan song gcod par byed pas so zhes bya ba ni bcu gsum pa'o//yang rab 'byor zhes bya ba la sogs pa la nyan pa po'i skye bo mang po yod pa dang bla na med pa'i dga' ba sbyin pa las bsod nams bskyed pa 'ba' zhig tu yang ma zad kyi/ chos 'dzin pa de nyid kyi rgyu las sangs rgyas nyid thob pa'i rgyur gyur pa'i gzhi bsod nams bskyed par 'gyur ro zhes bya ba'i tha tshig go//lam la chos shes pa ni gzhan yang 'on kyang rab 'byor zhes bya ba la sogs pa gsungs so/ /mthu che ba nyid yin bzhin du yang bar chad mang ba la rgyu ci zhig yod snyam pa'i dogs pa de ci'i phyir zhe na zhes bya bas bsu nas/ rab 'byor 'di ltar zhes bya ba la sogs pa gsungs so//dgra mang ste zhes bya ba ni mthu che ba nyid yin pa'i phyir mang po'i mngon par 'dod pa bya ba nyid kyis na'o/ /ji tsam du gtses par gyur pa zhes bya ba la sogs pa la rnam pa gang gis gong nas gong du gces pa nyid yin pa de ltar dgra mang ba yin no zhes bya ba'i tha tshig go//de ltar spyir bstan nas da ni khyad par du ston pas rab 'byor 'di lta ste zhes bya ba la sogs pa gsungs so/ /rin po che chen po 'di ni bla na med pa'i rin po che ste zhes bya ba ni/ sems can thams cad la phan pa dang bde ba'i don du nye bar gnas pa nyid kyis na chos thams cad la rnam par rtog pa med pas rnam par mi rtog pa'i dge ba'i rang bzhin gyi rin po che yin pa'i don gyis na rigs pa dang rigs pa ma yin pa dang ma 'dres pa'i phyir 'bras bu mngon sum du bya ba'i don du thams cad la thabs la rnam par mi rtog pa nyid kyi rin po che chen po yin no zhes bya ba ni bcu bzhi pa'o//lam la rjes su shes pa'i bzod pa ni rab 'byor shes rab kyi pha rol tu phyin pa ni chos gang la yang mi gnas zhes bya ba la sogs pa gsungs so/ /kun brtags pa'i dngos po la ni mi gnas gzhan dbang ni kun nas nyon mongs par mi byed yongs su grub par mi 'dzin to zhes bya ba ni don gyi dbye ba yin no//'di skad du sgrub pa dang sgrub pa ma yin pa las rnam par grol ba nyid kyis chos thams cad mtshan ma dag dang ma 'brel ba zhes bya ba ni bco lnga pa'o zhes brjod pa yin no/ /chos rnams yongs su zin kyang ji ltar yongs su mi 'dzin pa yin snyam pa'i dogs pa de ci'i phyir zhe na zhes bya bas bsu nas//rab 'byor 'di ltar zhes bya ba la sogs pa gsungs te/ don go bar zad do/ /lam la rjes su shes pa ni rab 'byor ma skyes pa'i phyir zhes bya ba la sogs pa gsungs te/ nges par 'byin pa dang nges par 'byin pa ma yin pa dang bral ba nyid kyis/ brjod par bya ba dang rjod par byed pa'i ngo bo mtshan nyid shes bya dang sgra gnyis las shes pa skye ba med pa zhes bya ba ni rnam pa bcu drug pa yin no//rnam pa gzhan gyis gos pa med pa'i don ston pa ni rab 'byor 'di ltar zhes bya ba la sogs gsungs pa yin no/ /'di ltar chos kyi de kho na nyid la mngon par zhen pa yang nyes pa nyid du gal te de ltar yang zhes bya ba la sogs pa gsungs pa yin no//ji skad du bshad pa'i tshul gyis rnam pa bcu drug po rnams ni thams cad shes pa nyid kyi skad cig ma yin no zhes byang chub sems dpa' rnams kyi mthong ba'i lam rjes su 'gro ba'i sgo nas bstan pas nyan thos la sogs pa rnams kyi mthong ba'i lam ni de las bzlog pas mi rtag pa la sogs pa'i rnam pa can du nges par bya ba yin no//de skad du yang / gzugs rtag ma yin mi rtag min/ /mtha' las 'das dang rnam dag dang / /ma skyes ma 'gags la sogs dang / /mkha' 'dra chags pa spangs pa dang //yongs su 'dzin las grol ba dang / /ngo bo nyid kyis brjod med dang / /gang phyir 'di don brjod pa yis/ /gzhan la sbyin du med pa dang / /dmigs pa med par byed pa dang / /shin tu rnam dag nad mi 'byung / /ngan song chang dang 'bras bu ni/ /mngon du bya la mi rtog nyid/ /mtshan ma dag dang ma 'brel dang //dngos dang ming dang gnyis po la/ /shes pa skye ba med pa ni/ /kun shes nyid kyi skad cig ma/ /zhes gsungs pa yin no/ /de ltar rgyas par bstan nas don thams cad sdud par byed pa nyid kyis thams cad mkhyen pa nyid gsum gyi nang nas rnam pa thams cad mkhyen pa nyid mjug bsdu bar bya ba'i phyir//rab 'byor yang shes rab kyi pha rol tu phyin pa 'di ni zhes bya ba la sogs pa gsungs te zhes bya ba ni thams cad la'o/ /de la 'jug par byed pa ni sems bskyed pa'i sgo nas skyed par byed pa'o/ /nges par 'jug par byed pa ni gdams pa la sogs pas rab tu 'jog par byed pa'o//yang dag par ston par byed pa ni go cha'i sgrub pas spyi'i tshul gyis so/ /nges par ston par byed pa ni 'jug pa'i sgrub pas khyad par gyi tshul gyis so/ /yongs su thob par byed pa ni tshogs kyi sgrub pas thob par byed pa'o/ /nges par thob par byed pa ni nges par 'byung ba'i sgrub pas mthar phyin par byed pa'o zhes sbyar bar bya'o//phyin ci ma log pa'i chos bdud rtsi'i ros tshim pas mchod par byed pa ni/ de nas lha'i bu zhes bya ba la sogs pa smos pa yin te/ ca co dang ga zha byed de zhes bya ba ni rab tu dga' ba 'phel ba las byung ba'i seng ge'i sgra la bya'o zhes kha cig zer ro//gzhan dag ni dga' ba las skyes pa'i ha ha zhes rgod pa ni ca co yin la de sngon du 'gro bas gar byed pa ni ga zha byed pa yin no zhes zer ro/ /chos kyi 'khor lo lan gnyis su zhes bya ba ni dang po bA rA Na sIr chos kyi 'khor lo bskor ba la ltos pa'o/ / de kho na nyid du mngon par zhen pa bsal bar bya ba yin pa'i phyir rab 'byor 'di ni zhes bya ba la sogs pa gsungs so/ /de nyid bstan par bya ba'i phyir chos gang la yang zhes bya ba la sogs pa gsungs so/ /lam shes pa nyid mjug bsdu bar bya ba'i phyir bcom ldan 'das 'di ni zhes bya ba la sogs pa gsungs te/chags pa ma mchis zhes bya ba ni mngon par zhen pa med pa'o/ /dmigs su zin kyang chos mi ston pa'i rgyu ci zhig yin snyam pa'i dogs pa de ci'i slad du zhe na zhes bya bas bsu nas/ chos gang zhes bya ba la sogs pa gsungs te go sla'o/ /rab tu bskor bar bya ba ni bskyed par bya'o //rgyu'i tshogs pa byas pa las chos skye bas na ci ste de skad smra snyam pa'i dogs pa de ci'i slad du zhe na zhes bya bas bsu nas/ bcom ldan 'das chos thams cad ni zhes bya ba la sogs pa gsungs te/ rgyu nyid yod pa ma yin pa'i phyir ro zhes bya bar dgongs so/ /ldog pa zhes bya ba ni tho ba la sogs pas 'jig par 'gyur ba'o//tho ba la sogs pa rgyun 'jug pa dang 'gal ba'i don skyed pa la zhig pa yin par lhag par zhen pa'i phyir ci ste de skad smra snyam pa'i dogs pa de ci'i slad du zhe na zhes bya bas bsu nas/ bcom ldan 'das chos thams cad ni thog ma nas mngon par ma grub pa'o zhes bya ba gsol te/gdod ma nyid nas skye ba'i rgyu med pa'i phyir ma skyes pa yin no/ /de nyid ston pa ni chos thams cad ni rang bzhin gyis dben pa'i phyir ro zhes bya ba gsol te/ rang bzhin gyis stong pa nyid yin pa'i phyir 'gag par ga la 'gyur zhes bya bar dgongs so//thams cad shes pa nyid mjug bsdu bar bya ba'i phyir rab 'byor stong pa nyid ni zhes bya ba la sogs pa gsungs te/ stong pa nyid la sogs pa ni ma skyes pa'i phyir ro zhes bya bar bzhed do/ /'di ni zhes bya ba ni thams cad shes pa nyid do/ /chos thams cad bstan pa yin te zhes bya ba nas brtsams te/su yang sbyin pa'i gnas su byas pa med do zhes bya ba'i bar du don dam pa'i bden pa'i dbang du mdzad nas gsungs pa yin pa'i phyir go sla'o/ /ji skad du bshad pa'i tshul gyis thams cad mkhyen pa nyid gsum mjug bsdu ba yin pa la som nyir mi bya'o/ /de skad du yang / de ltar 'di dang yang 'di dang / / yang 'di yin te rnam gsum po/ /'di ni gnas skabs gsum po dag /rdzogs par yongs su bstan pa yin/ /zhes gsungs pa yin no/ /ci'i phyir lam shes pa la ji skad bstan pa de bzhin du thams cad shes pa nyid la bsgom pa'i lam yang logs shig pa med ce na/ nyan thos dang rang sangs rgyas kyi phun sum tshogs pa ni byang chub sems dpa'i shes pa dang mthong bas bltas nas 'da' bar bya'o zhes gsungs pas mngon sum du bya ba ma yin pa'i phyir byang chub sems dpa' rnams la ma bstan to//nyan thos la sogs pa rnams la yang ji ltar yongs su mthong ba'i don nyid yang dang yang du mngon du byed pa bsgom pa'i lam yin pas go sla ba'i phyir ma gsungs so//byang chub sems dpa' rnams kyi nges par 'byed pa'i cha dang mthun pa ni sngar bshad pa nyid yin par shes par bya'o/ /nyan thos la sogs pa'i ni mi rtag pa la sogs pa'i rnam pa rnams kyi bden pa bzhi la dmigs par byed pa na zag pa dang bcas pa'i sgom pa'i rang bzhin gyi dro ba la sogs pa yin par gsal ba'i phyir ma gsungs so zhes gzung ngo //lam shes pa'i skabs su nyan thos la sogs pa'i lam yang bshad pas/ thams cad shes pa nyid kho na ma yin nam/ ci'i phyir thams cad shes pa nyid logs shig tu bstan zhe na/de brjod par bya ste/ de la lam shes nyid kyi tshul la ni/ 'phags pa'i bden pa bzhi dag gi /rnam pa mi dmigs sgo nas ni/ /nyan thos lam 'di shes par bya/ /zhes bya ba mi dmigs par bsgom pa la sogs pa'i rim gyis nyan thos la sogs pa'i lam byang chub sems dpas bsgom par bya'o zhes brjod pa yin no//de bas na mi rtag pa la sogs pa'i rnam pa 'phangs pa rnams kyis gzhi ma lus pa yongs su shes pa yin pa'i don du thams cad shes pa nyid logs shig tu bshad par gzung ngo / / 'di la brjod par bya ba mang du yod mod kyi/ shin tu spros pas chog go/ /shes rab kyi pha rol tu phyin pa'i bshad pa mngon par rtogs pa'i rgyan gyi snang ba las thams cad shes pa'i le'u ste skabs gsum pa'o// //yongs su shes par gyur pa'i thams cad mkhyen pa nyid gsum po dbang du bya ba'i phyir yang rnam pa dang lam dang gzhi shes pa thams cad bsdu ba'i sgo nas thams cad mkhyen pa nyid gsum sgom par byed pa yin pas/rnam pa kun mngon par rdzogs par rtogs pa brjod par bya'o/ /de la re zhig rtag pa la sogs par 'dzin pa mi mthun pa'i phyogs kyi gnyen po'i chos kyi ngo bo nyid mi rtag pa la sogs pa la dmigs pa'i shes pa'i bye brag rnams rnam pa nyid du rnam par gzhag pa ni spyi'i mtshan nyid yin par shes par bya ste/de bas na 'di la gzhi med pa'i nyes pa 'byung bar mi 'gyur ro/ /rnam pa de dag kyang thams cad mkhyen pa nyid gsum gyi bye brag gis rnam pa gsum kho nar bzhed do zhes gzung bar bya'o//de 'di skad du yang / gzhi shes pa yi bye brag rnams/ /rnam pa zhes bya mtshan nyid de/ /kun mkhyen nyid ni rnam gsum phyir/ /de ni rnam pa gsum du 'dod/ /ces gsungs pa yin no/ /de la 'phags pa'i bden pa rten du byas te/ thams cad mkhyen pa nyid gsum gyi dbang du byas nas bden pa gang la rnam pa ji snyed par 'gyur ba'i rnam pa de yongs su ston pa las/re zhig thams cad shes pa nyid kyi dbang du byas nas/ de skad ces bka' stsal pa dang / bcom ldan 'das la tshe dang ldan pa rab 'byor gyis 'di skad ces gsol to zhes bya ba la sogs pa yin no/ / 'di ni ma mchis pa'i pha rol tu phyin pa'o zhes bya ba ni nam mkha' dang 'dra bar rtag pa'i rang bzhin du ma mchis pa ste yod pa ma yin pa'i slad du ste/ rgyur byas nas ma mchis pa ni mi rtag pa'i rnam pa zhes bya ba'i tha tshig go/ /mi mnyam pa dang mnyam pa nyid kyi zhes bya ba ni chos thams cad mi dmigs pa dang 'dra bar mnyam pa nyid yin zhing ma skyes pa nyid yin pa'i slad du sdug bsngal ba'i rnam pa rnam pa gzhan dang mi 'dra ba nyid kyis na mi mnyam zhing 'dra ba med la/de ni de kho na nyid du mnyam nyid de ma skyes pa'o/ /dben pa'i zhes bya ba ni shin tu ste/ gtan nyid nas bdag stong pa'i slad du stong pa nyid kyi rnam pa'i yon tan thob par byed pa nyid kyis na dben pa'o//mi brdzi ba'i zhes bya ba ni chos thams cad ni bdag nyid du mi dmigs pa'i slad du mu stegs pa thams cad dang thun mong ma yin pa'i phyir mu stegs pa rnams kyis 'khrugs par mi byed pa nyid kyis na bdag med pa'i rnam pa ni mi brdzi ba yin no//de ltar na med pa dang / /mi skye ba dang / bden pa dang / mi brdzi ba'i rnam pa bzhi ni sdug bsngal gyi bden pa la grangs ji lta ba bzhin du mi rtag pa la sogs pa'i mtshan nyid du 'gyur ro/ /gnas pa ma mchis pa'i zhes bya ba ni de la gzugs can ma yin pa'i phung po bzhi ni ming ngo / / gzugs kyi phung po ni lus so/ /'di ni de rnams kyi rgyu yin pa de bas na/ rigs pas ming ma mchis shing lus ma mchis pa'i slad du rgyu'i rnam pa ni de kho na nyid du na bskyed pa'i gzhi ma yin pa'i don gyis na gnas med pa'o/ /ngo bo nyid ma mchis pa'i zhes bya ba ni skye ba med pa dang / 'gag pa med pa'i ngo bo nyid kyis 'gro ba dang 'ong ba ma mchis pa'i slad du kun 'byung ba'i rnam pa ste/rigs pas nam mkha' dang mnyam pa'o/ /brjod du ma mchis pa'i zhes bya ba ni chos thams cad med pa nyid kyis brjod pa'i kun rdzob tu yang sgras brjod pa med pa'i phyir rtog pa ma mchis pa'i slad du rab tu skye ba'i rnam pa ni brjod pa med pa yin no//ming ma mchis pa'i zhes bya ba ni phung po lnga dmigs su ma mchis pa'i slad du sems las byung ba med pa nyid kyis na/ rkyen gyi rnam pa ni ming med pa zhes bya ste/ de ltar na gnas med pa dang / nam mkha' dang / /brjod du med pa dang / ming med pa'i rnam pa bzhi ni kun 'byung gi bden pa la go rims bzhin du rgyu la sogs pa'i mtshan nyid du 'gyur ro//'gro ba ma mchis pa zhes bya ba ni 'gog pa'i ngo bo nyid kyi chos thams cad gang du yang 'gro ba med pa'i slad du 'gog pa'i rnam pa ni 'gro ba med pa'o/ /mi 'phrogs pa zhes bya ba ni gzod ma nas zhi ba nyid kyis na yul gyi ngo bo nyid nye bar 'dzin pa med pa'i phyir /chos thams cad gzung du ma mchis pa'i slad du zhi ba'i rnam pa ni mi 'phrogs pa'o/ /mi bas pa zhes bya ba ni chos kyi dbyings kyi rang bzhin gyis mi bas pa'i chos dang ldan pa'i slad du gya nom pa ni mi zad pa'o/ / mi skye ba zhes bya ba ni gcig dang du ma'i rgyu nyid dang bral ba nyid kyis chos thams cad mngon par ma grub pa'i slad du nges par 'byung ba'i rnam pa ni skye ba med pa'o/ /de ltar na 'gro ba med pa dang / mi 'phrogs pa dang mi zad pa dang skye ba med pa'i rnam pa ni 'gog pa'i bden pa la go rims bzhin du 'gog pa la sogs pa'i rang bzhin du 'gyur ro//byed pa po ma mchis pa zhes bya ba ni lan ni byed pa por 'dzin pa'i gnyen por yin pa'i phyir/ byed pa po mi dmigs pa'i slad du lam gyi rnam pa ni byed pa po med pa'o/ /shes pa po med pa ni tshad ma dang 'gal ba nyid kyis na/ chos thams cad bdag ma mchis shing bdag dmigs su med pa'i slad du rigs pa'i rnam pa ni shes pa po med pa'o//mi 'pho ba zhes bya ba ni chos kyi dbyings kyi rang bzhin gyis 'chi 'pho ba dang skye ba dang 'jig pa dang skye ba dag mi 'thad pa'i slad du sgrub pa'i rnam pa ni 'pho ba med pa'o/ /'dul ba med pa zhes bya ba ni sngon gyi mtha' dang phyi ma'i mtha' dang da ltar byung ba'i dus mi dmigs pa'i slad du nyon mongs pa dul ba mi srid pas nges par 'byin pa'i rnam pa ni 'dul ba med pa'o//de ltar na byed pa po med pa dang shes pa po med pa dang 'pho ba med pa dang 'dul ba med pa'i rnam pa bzhi ni lam gyi bden pa la go rims bzhin du lam la sogs pa'i rang bzhin gyi nyon mongs pa'i sgrib pa'i gnyen por gyur pa yin no//'di ni rmi lam dang sgra brnyan dang mig yor dang smig rgyu dang sgyu ma'i pha rol tu phyin pa'o zhes bya ba ni rigs pa'i rjes su 'gro ba'i skye ba med pa'i phyir skye ba ma mchis pa rnam par shes par bgyid pa'i slad du rmi lam dang sgra brnyan dang mig yor dang smig rgyu dang sgyu ma'i rnam pa lnga ste/go rims bzhin du ngo bo nyid med pa dang ma skyes pa dang ma 'gags pa dang gzod ma nas zhi ba dang rang bzhin gyis mya ngan las 'das pa'i mtshan nyid ni spyir shes bya'i sgrib pa'i gnyen por gyur pa dag yin te/ thams cad shes pa nyid kyis rang sangs rgyas kyang bsdus pa'i phyir de dag gi shes bya'i sgrib pa'i gnyen po'i bdag nyid can bsgom pa'i lam zag pa dang bcas pa dang zag pa med pa gnyis yin pas lam rnam pa gsum du 'gyur ba yin no//kun nas nyon mongs pa ma mchis pa zhes bya ba ni 'dod chags dang zhe sdang dang gti mug gi ngo bo nyid ma mchis pa'i slad du/nyon mongs pa med pa ni/ kun nas nyon mongs pa med pa'o/ /rnam par byang ba ma mchis pa zhes bya ba ni rten nyon mongs pa'i sems can mi dmigs pa'i slad du rnam par byang ba med pa ni/ rnam par byang ba ma mchis pa'o/ /gos pa ma mchis pa zhes bya ba ni nam mkha' ni rang bzhin gyis 'od gsal ba yin pas gos pa ma mchis pa'i slad du nyon mongs pa dang /nye ba'i nyon mongs pa med pa ni gos pa med pa'o/ /spros pa ma mchis pa zhes bya ba ni dmigs pa'i rang bzhin gyi rlom sems thams cad las 'das pa'i slad du/ spros pa yod pa ma yin pa ni spros pa med pa'o//rlom sems ma mchis pa zhes bya ba ni nye bar dmigs pa thams cad yang dag par bcom pas g.yo ba ma mchis shing 'gul ba med pa'i slad du rlom sems med pa ni rlom pa med pa'o/ /mi g.yo ba zhes bya ba ni 'khor ba ji srid par chos kyi dbyings gnas pa nyid kyi nyams pa med pas na mi g.yo ba'o//de ltar na kun nas nyon mongs pa med pa dang / rnam par byang ba med pa dang / gos pa med pa dang / spros pa med pa dang / rlom sems med pa dang / mi g.yo ba'i rnam pa ste/ drug ni go rims bzhin du shes bya'i sgrib pa'i kun nas nyon mongs pa dang rnam par byang ba dang nyon mongs pa'i bag chags dang gzugs la sogs pa'i spros pa dang /rang gi rtogs pa dang / yongs su nyams par rnam par rtog pa ste drug gi so sor nges pa'i gnyen por gyur pa rang sangs rgyas rnams kyi mthong ba'i lam zag pa med pa shes bya'i sgrib pa'i gnyen po'i bdag nyid can la 'gyur ba dag yin te/spyir bsdu na thams cad shes pa nyid kyi rnam pa nyi shu rtsa bdun yin no/ /de skad du yang / med pa'i rnam pa nas gzung ste/ /mi g.yo ba yi rnam pa'i bar/ /bden pa so so la bzhi dang / /lam la de ni bco lngar bshad/ /ces gsungs pa yin no//de'i 'og tu lam shes pa nyid kyi rnam par brjod par bya'o/ /de la kun nas nyon mongs pa dang / cig shos kyi phyogs la brten nas kun 'byung ba dang lam gyi bden pa dag ni rgyu yin la/ sdug bsngal dang 'gog pa'i bden pa dag ni 'bras bu yin no zhes don gyi sgo nas bstan pa/kun 'byung ba dang / lam dang / sdug bsngal dang / 'gog pa'i bden pa la go rims bzhin du rnam pa brgyad dang / bdun dang / lnga dang / bcu drug yin par khong du chud par bya'o/ /de la rgyu ni rnam pa gsum ste / 'dun pa dang 'dod chags dang yang srid can gyi srid pa dga' ba dang ldan pa zhes bya'o//'dun pa'i gnyen por ni 'dod chags dang bral ba zhes gsungs pa yin te/ chos thams cad ni stong pa nyid kyi rang bzhin gyis phyin ci ma log pa de bzhin nyid de/ bden pa nyid kyi slad du 'dod chags med pa ni 'dod chags dang bral ba yid la byed pa 'dod chags pa la dgongs pas bstan te/bdun pa'i skabs su 'dod chags ni gtso bo yin pas de med na 'dun par bstan pa'i phyir ro/ /yang na 'bras bu'i bdag nyid 'dod chags med pas de'i rgyu ma tshang ba med pa'i 'dun pa med par ston pa yin te gzhan du ma tshang ba med par gyur na 'bras bu mi skye bar mi 'gyur ro zhes bya ba'i rigs so//'dod chags kyi gnyen po'i ldang ba ma mchis pa zhes bya ba gang gsungs pa yin te/ sgyu ma dang 'dra ba nyid kyis ni chos thams cad rnam par mi rtog pa nyid kyi slad du ldang ba zhes bya ba 'dun pa med pas ldang ba med pa ste/ chos rnams la zhen pa med pa la dgongs nas gsungs pa yin no//de ltar byas na 'dod chags kyi gnas skabs su 'dun pa ni dngos su 'jug pa'i rgyu nyid kyi gtso bo yin pas na/ de med na 'dod chags med par bstan pa'i phyir ro/ /yang srid kyi rgyu mtshan gyi srid pa dga' ba dang ldang ba'i gnyen po brjod pa ni zhi ba zhes bya ba ste/ chos thams cad kyi sngon po dang ser po la sogs pa'i mtshan ma mi dmigs pa'i slad du/ sred pa gtso bor gyur pa'i nye bar ma zhi ba med pas zhi ba'o/ /kun 'byung ni gsum ste 'dod chags dang / zhe sdang dang / gti mug go/ /de'i gnyen po ni skyon ma mchis pa zhes smos te/ stobs bcu dang mi 'jigs pa la sogs pa'i yon tan gyi pha rol tu phyin pa'i slad du nyes pa med pa ni skyon med pa ste/'dod chags med pa/ zhe sdang med pa/ gti mug med pa zhes bya ba'i don to/ /rab tu skye ba ni yongs su rtog pa ste/ de las 'dod chags la sogs pa skye ba'i phyir ro/ /de'i [(]gnyan [,]gnyen[)] por ni nyon mongs pa ma mchis pa zhes bya ba smos te/gnyis pa la sogs pa mngon par zhen pa'i yongs su rtogs pa mchis pa'i slad du nyon mongs pa'i rgyu rab tu 'byung ba med pa ni nyon mongs pa med pa'o/ /'jig tshogs su lta ba ni nyes pa thams cad kyi rkyen nyid yin pa'i phyir/ rkyen ni sems can du mngon par zhen pa yin la/de'i gnyen por ni sems can ma mchis pa zhes smos te/ phyin ci ma log pa'i don gyis na yang dag pa'i mtha'i slad du rkyen med pa ni sems can med pa'o/ /de ltar na 'dod chags dang bral ba'i rnam pa nas brtsams te/ sems can med pa'i rnam pa zhes bya ba'i bar dag ni go rims bzhin du rgyu gang yin pa 'dun pa dang /'dod chags dang / dga' ba dang ldan pa dang / kun 'byung ba gang yin pa 'dod chags dang zhe sdang dang / gti mug dang / rab tu skye ba gang yin pa yongs su rtog pa dang rkyen gang yin pa sems can du mngon par zhen bya ba ste/ de rnams kyi gnyen por gyur pa gsum dang /gsum dang / gcig dang / gcig ste/ de ltar na kun 'byung gi bden pa la rnam pa brgyad du 'gyur ba yin no/ /tshad ma mchis pa zhes bya ba chos thams cad ldang ba zhes bya ba 'byung bar 'gyur ba'i ldang ba ma mchis pa'i slad du mi mthun pa'i phyogs ldog pa'i gnyen po thob pa nyid kyis na sems can tshad med pa'i go skabs 'byed pa'i phyir lam gyi rnam pa ni tshad med pa'o//yang ji ltar sems can tshad med pa'i go skabs 'byed pa yin zhe na/ mtha' gnyis mi rtog pa zhes bya ba gsungs te/ chos thams cad la mngon par ma chags pa'i slad du 'khor ba dang mya ngan las 'das pa'i mtha' gnyis spangs pa'i phyir mi rtog pa ni mi dmigs pa'o//tha mi dad pa zhes bya ba ni chos kyi dbyings kyi rang bzhin gyis chos thams cad dbyer med pa ste/ sna tshogs ma yin pa'i slad du rigs pa'i rnam pa ni dbyer med pa'o/ /yang ji ltar na rigs pa yin zhe na/mchog tu mi 'dzin pa'i zhes bya ba gsungs te/ nyan thos dang rang sangs rgyas kyis thams cad la 'dod pa med pa'i slad du/ de'i rnam par rtog pas ma gos pa ni mchog tu 'dzin pa med pa'o/ /mi rtog pa'i zhes bya ba ni rtog pa thams cad zhi ba nyid kyi slad du sgrub pa'i rnam pa ni rnam par mi rtog pa'o//ji ltar na sgrub pa yin zhe na gzhal du med pa zhes bya ba gsungs te/ chos nyid tshad ma mchis pa'i slad du thob pa yongs su nyams pa dang / ma thob pa thob pa dman pa dang gya nom pa'i rnam par rtog pa med pa sngon du 'gro bas shes bya'i mthar thug pa dang bral ba nyid kyis na gzhal du med pa'o//chags pa ma mchis pa zhes bya ba ni de dang der rtogs pa na nam mkha' dang 'dra bar chos thams cad la chags pa ma mchis pa'i slad du nges par 'byung ba'i rnam pa ni chags pa med pa'o/ /de ltar na tshad med pa dang mtha' gnyis mi rtog pa dang / tha mi dad pa dang / mchog tu 'dzin pa med pa dang / rnam par mi rtog pa dang / gzhal du med pa dang / chags pa med pa'i rnam pa dag las go rims bzhin du sems can thams cad la go skabs 'byed pa'i lam gang yin pa dang / ji ltar sems can thams cad go skabs 'byed pa dang / rigs pa gang yin pa dang / ji ltar rigs pa dang sgrub pa gang yin pa dang / ji ltar sgrub pa dang nges par 'byung ba gang yin pa de rnams kyi ngo bo nyid ni gnyis dang / gnyis dang / gnyis dang gcig ste/ de ltar na lam gyi bden pa la rnam pa bdun du 'gyur ro/ /mi rtag pa'i zhes bya ba ni chos thams cad med pa nyid kyis rgyu dang rkyen gyis 'dus ma bgyis pa'i slad du rtag pa ni yod pa yin pas med pa'i don ni rtag pa'i don no//sdug bsngal ba'i zhes bya ba ni nam mkha' dang 'dra bar chos thams cad mnyam pa nyid kyi slad du ste/ 'du byed kyi sdug bsngal gyi dngos po thams cad la khyab pa yin no//stong pa nyid kyi zhes bya ba ni gnas par byed pa'i bdag dang 'brel pa'i dri dang rjes su 'brel pa tsam du yang chos thams cad mi dmigs pa'i slad du gzhan gyis yongs su brtags pa'i bdag la sogs pa dang bral ba nyid kyis na stong pa'o/ /bdag ma mchis pa'i zhes bya ba ni rang nyid bdag ma yin pa nyid kyis thams cad la mngon par ma chags pa'i slad du gang zag la sogs pa'i rang bzhin ma yin pas bdag med pa'o//mtshan nyid ma mchis pa'i zhes bya ba ni chos thams cad mngon par ma grub pa'i slad du dngos po med pa ni mtshan nyid med pa'o/ /de ltar na de dag ni mi rtag pa dang /sdug bsngal ba dang / stong pa dang / bdag med pa'i rnam pa dang / lnga pa ni mtshan nyid med pa'i rnam pa'i ngo bo nyid ces bya ba ste/ sdug bsngal gyi bden pa la rnam pa lngar 'gyur ro/ /stong pa nyid thams cad kyi zhes bya ba ni sngon dang / phyi mar gyur pa'i mtshan nyid can gyi mtha' dang kun nas mtha' gnyis dang ldan pa'i phyir pa ri an ta zhes bya ba'i dbus med pa nyid kyis mtha' yas mu ma mchis pa'i slad du 'gog pa'i bden pa'i rnam pa stong pa nyid bcu drug ni stong pa nyid thams cad do//de la phyi dang nang gnyi ga'i dngos po rnams 'gog pas/ nang dang phyi rol dang gnyi ga'i stong pa nyid kyi rnam pa gsum ni 'gog pa'i rnam pa nyid kyi ngo bo nyid yin no//stong pa nyid dang / snod kyi 'jig rten dang / don dam pa dang / 'dus byas dang / 'dus ma byas dang / rtag pa dang / chad pa'i mtha' dang / 'khor ba thog ma dang tha ma med pa dang /rtogs pa'i chos dor ba med pa la btags pa'i bdag nyid can gyi mngon par zhen pa rnam pa brgyad 'gog pas go rims bzhin du stong pa nyid stong pa nyid dang / chen po stong pa nyid dang / don dam pa stong pa nyid dang / 'dus byas stong pa nyid dang / 'dus ma byas stong pa nyid dang / mtha' las 'das pa stong pa nyid dang / thog ma dang tha ma med pa stong pa nyid dang / dor ba med pa stong pa nyid de/ stong pa nyid kyi rnam pa brgyad ni zhi ba'i rnam pa'i ngo bo nyid yin no/ /gya nom pa'i rnam pa ni gzhan gyis yongs su brtags pa'i byed pa po 'gog pas rang bzhin stong pa nyid kyi rnam pa'o//yul du 'khrul pa'i bdag nyid can btags pa dang mtshan nyid dang dus su 'khrul pa rnams 'gog pas chos thams cad dang rang gi mtshan nyid dang mi dmigs pa stong pa nyid kyi rnam pa gsum ni nges par 'byung ba'i rnam pa'i ngo bo nyid do/ /ngo bo nyid 'gog pas dngos po med pa'i ngo bo nyid stong pa nyid kyi rnam pa kho na nges par 'byung ba'i bdag nyid can yin te/de ltar 'gog pa'i rnam pa dang / zhi ba'i rnam pa dang / gya nom pa'i rnam pa dang / nges par 'byung ba'i rnam pa'i dbang du byas nas nang gi bdag nyid can la sogs pa'i dngos po 'gog pa gang yin pa dang /mngon par zhen pa rnam pa brgyad dang bral bas ji ltar zhi ba yin pa dang / rang bzhin gyis ji ltar gya nom pa dang / 'khrul pa rnam pa gsum bsal bas ji ltar nges par 'byung ba dang / dngos po med pa'i ngo bo nyid ces bya bas nges par 'byung ba gang yin pa ni go rims bzhin du gsum dang /brgyad dang / gcig dang / gsum dang / gcig ste/ de ltar 'gog pa'i bden pa la rnam pa bcu drug tu 'gyur ro/ /spyir ni lam shes pa nyid kyi rnam pa sum cu rtsa drug yin te/ de skad du yang / rgyu dang lam dang sdug bsngal dang / /'gog pa la ni go rims bzhin//de dag brgyad dang bdun dang ni/ /lnga dang bcu drug ces bsgrags so/ /zhes gsungs pa yin no/ /de'i 'og tu rnam pa thams cad mkhyen pa nyid kyi rnam pa brjod par bya'o/ /de la yang 'phags pa'i gang zag thams cad kyi dbang du byas pas thams cad mkhyen pa nyid gsum gyi rnam pa bsdus par gyur pa yin pa de bas thams cad shes pa nyid kyi lam gyi dbye bas dran pa nye bar gzhag pa la sogs pa byang chub kyi phyogs kyi chos rnams kyi zhes bya ba smos te/byang chub kyi phyogs kyi chos de rnams nyid dmigs su ma mchis pa'i slad du/ dran pa nye bar gzhag pa la sogs pa nyid pha rol tu phyin pa yin no zhes bya ba'i tha tshig go//'di skad du thams cad shes pa nyid de la dang por bden pa bzhi la 'jug par bya ba'i phyir shes bya dang / shes pa rang dang spyi'i mtshan nyid du yongs su brtags pa lus dang / tshor ba dang / sems dang / chos rnams dran pa nye bar gzhag pa'i rnam pa bzhi ni dngos po la yongs su rtog pa'i lam yin te/des lus la sogs pa'i dngos po rnam pa bzhi la yongs su rtog pa'i phyir ro/ /de'i 'og tu zhugs pa la brtson 'grus 'byung bas mi dge ba skyes pa dang ma skyes pa dag go rims bzhin du rnam pa thams cad du spang ba dang mi bskyed pa'i don dang phyir zhing 'byung ba dang skyed pa'i don gyi rgyur gyur pa'i brtson 'grus kyi bdag nyid can yang dag par spong ba rnam pa bzhi ni rtsol ba'i lam yin te/de bzhin du sgrib pa spang ba la sogs pa'i sgo nas brtson 'grus rtsom pa'i phyir ro/ /brtson 'grus dang ldan pa ni sems las su rung ba nyid du byed pas 'dun pa dang brtson 'grus dang sems dang dpyod pa'i ting nge 'dzin spong ba'i 'du byed dang ldan pa'i rdzu 'phrul gyi rkang pa rnam pa bzhi ni ting nge 'dzin yongs su sbyang ba'i lam yin te/de bzhin du 'dun pa la sogs pa'i sgo nas sems las su rung ba nyid bskyed pa'i phyir ro//sems yongs su sbyang ba byas pa'i rjes thogs la dro ba dang rtse mo'i sbyor ba 'byung bas de'i ngo bo nyid dad pa dang / brtson 'grus dang / dran pa dang / ting nge 'dzin dang / shes rab kyi dbang po rnam pa lnga ni mngon par rtogs pa la sbyor ba'i lam yin te/ dad pa'i dbang po la sogs pas 'phags pa'i lam yang dag par 'grub pa'i bdag por gyur pa/dro ba dang rtse mo la sbyor ba'i phyir ro/ /dro ba la sogs pa thob pa la/ bzod pa dang / chos kyi mchog 'byung bas de dag gi ngo bo nyid dad pa dang / brtson 'grus dang / dran pa dang / ting nge 'dzin dang /shes rab kyi stobs rnam pa lnga ni/ rnam pa thams cad du mngon par rtogs pa dang 'brel pa'i lam yin te/ dad pa'i stobs la sogs pas de ma thag tu bden pa rtogs pa'i don du ma dad pa la sogs pa'i mi mthun pa'i phyogs zil gyis gnon pa bzod pa dang chos kyi mchog la sbyor ba'i phyir ro//dro ba la sogs pa bzhi po rtogs pa la bden pa mthong ba'i lam 'byung bas dran pa dang / chos rab tu rnam par 'byed pa dang / brtson 'grus dang / dga' ba dang / shin tu sbyangs pa dang / ting nge 'dzin dang / btang snyoms kyi rnam pa byang chub kyi yan lag bdun ni mngon par rtogs pa'i lam yin te/des thog mar so sor rang gis de kho na mngon par rtogs pa'i phyir ro/ /mthong ba'i lam yongs su shes pa la bsgom pa'i lam 'byung bas yang dag pa'i lta ba dang / rtog pa dang / ngag dang / las kyi mtha' dang / 'tsho ba dang / rtsol ba dang / dran pa dang / ting nge 'dzin te / 'phags pa'i lam yan lag brgyad kyi rnam pa ni rnam par dag pa nges par 'byin pa'i lam yin te/ mthong ba'i lam gyi steng du 'dis bsgom pas spong bar bya ba'i nyon mongs rnam par dag pa'i don du nges par 'byin pa'i phyir ro zhes brjod pa yin no//de nyid kyis na byang chub kyi phyogs kyi chos rnams kyi go rims ni 'di yin no/ /des na de ltar dngos por yongs su rtogs pa'i lam la sogs pa lam bdun gyi dbang du byas nas kun shes pa nyid kyi lam gyi rten can gyi rnam pa sum cu rtsa bdun du 'gyur ba yin no/ /de'i 'og tu lam shes pa nyid kyi lam gyi dbye ba ni stong pa nyid dang /mtshan ma med pa dang / smon pa med pa'i pha rol tu phyin pa'o zhes smos te/ stong pa nyid dang bdag med pa'i rnam pa'i ngo bo nyid ni rnam par thar pa'i sgo dang po stong pa nyid de/ lta bas byas pa'i gnyen po'o/ /mtshan ma med pa gang yin pa 'gog pa dang mtshan ma'i rnam par rtog pa dang bral ba'i lam gang gis zhes bya bas 'gog pa dang lam gyi bden pa'i rnam pa'i rang bzhin rnam par thar pa'i sgo gnyis pa mtshan ma med pa ni lta ba'i rgyu can gyi rnam par rtog pa'i gnyen po yin no//zhi ba'i rnam pas mtshan ma med pa yin par gang gsungs pa de ni dngos po'i mtshan ma dang 'brel pa nyan thos kyi lam gyi dbang du byas pa yin pas de dang 'di la 'gal ba med do//mi rtag pa dang / sdug bsngal ba dang / kun 'byung gi bden pa'i rnam pa'i ngo bo nyid ni rnam par thar pa'i sgo gsum pa smon pa med pa yin te/ khams gsum la smon pa'i gnyen po yin no/ / de ltar na rnam par thar pa'i sgo rnam pa gsum po rnams ni gnyen po'i lam yin no/ /'di rnam par thar pa brgyad kyi pha rol tu phyin pa'i zhes bya ba ni gzugs kyi 'du shes rnam par ma bshig pa dang rnam par bshig pa yin pa'i phyir go rims bzhin du nang gzugs can dang gzugs can ma yin pa'i bdag nyid bsam gtan nam gzugs med pa'i snyoms par 'jug pa la brten te/phyi rol gyi gzugs kha dog bzang ba dang kha dog ngan pa rnams la lta ba zhes bya ba 'di dag ni sprul pa'i sgrib pa'i gnyen por rnam par thar pa gnyis so/ /gzugs sdug pa dang mi sdug pa sprul pa la go rims bzhin du dga' ba dang mi dga' ba'i kun nas nyon mongs pa de dag gi gnyen por sdug pa'i rnam par thar pa'i sgo lus kyis mngon sum du byas nas rdzogs par byas te gnas pa zhes bya ba ni bdag nyid so sor gzugs sdug pa dang mi sdug pa rnams la phan tshun ltos pa'i 'du shes dang phan tshun rjes su zhugs pa'i 'du shes la brten nas phan tshun ro gcig pa'i 'du shes thob pa ji ltar 'dod pa bzhin du gzugs su mos pa dbang du gyur pa nyid thob pa'i phyir rnam par thar pa gcig yin te/de ltar na rnam par thar pa rnam pa gsum ni sprul pa'i lam yin no/ /thar pa dang mthun par gnas pa'i lam gyi rang bzhin gzugs med pa'i snyoms par 'jug pa rnam pa bzhi dang /zhi bar gnas pa'i lam gyi rang bzhin 'du shes dang tshor ba 'gog pa'i rnam pa gcig ste / de ltar na rnam pa lnga ni mthong ba'i chos la bde bar gnas pa'i lam yin no/ /'di ni mthar gyis gnas pa'i snyoms par 'jug pa dgu'i pha rol tu phyin pa'o zhes bya ba ni bsam gtan bzhi dang gzugs med pa'i snyoms par 'jug pa bzhi dang /'gog pa'i snyoms par 'jug pa rnam pa dgu ni 'jig rten las 'das pa'i lam mo/ /'di ni bden pa bzhi'i pha rol tu phyin pa zhes bya ba ni bden pa bzhis bsdus pa nyon mongs pa dang mi ldan pa'i mtshan nyid bar chad med pa'i lam bzhi ni spong ba'i lam yin no//'di ni sa bcu'i pha rol tu phyin pa'o zhes bya ba ni sbyin pa la sogs pa'i pha rol tu phyin pa rnam pa bcu ni sangs rgyas nyid kyi lam yin no/ /de bas na de ltar gnyen po'i lam la sogs pa lam drug gi dbang du byas nas lam shes pa nyid kyi lam gyi rten can gyi rnam pa sum cu rtsa bzhir 'gyur ro//de'i 'og tu rnam pa thams cad mkhyen pa nyid kyi rnam pa brjod par bya ba yin no/ /de la ni lam shin tu phul du byung ba yin pa'i phyir gcig pu kho na yin mod kyi khyad par gyi lam 'di'i stobs dang mi 'jigs pa la sogs pa'i dbye bas thun mong ma yin pa'i khyad par 'ba' zhig brjod par bya ba yin pas 'di ni stobs bcu'i pha rol tu phyin pa'o zhes bya ba gsungs te/gnas dang gnas ma yin pa mkhyen pa'i stobs dang / las kyi rnam par smin pa mkhyen pa'i stobs dang / mos pa sna tshogs mkhyen pa'i stobs dang / 'jig rten gyi khams du ma mkhyen pa'i stobs dang / dbang po mchog dang mchog ma yin pa mkhyen pa'i stobs dang /thams cad du 'gro ba'i lam mkhyen pa'i stobs dang / kun nas nyon mongs pa dang rnam par byang ba mkhyen pa'i stobs dang / sngon gyi gnas rjes su dran pa mkhyen pa'i stobs dang / 'chi 'pho ba dang skye ba mkhyen pa'i stobs dang / zag pa zad pa mkhyen pa'i stobs zhes bya ba ni mi mthun pa'i phyogs las nges par rgyal ba nyid kyis na mi brdzi ba'i slad du stobs kyi rnam pa bcu'o//'di ni mi 'jigs pa'i pha rol tu phyin pa'o zhes bya ba ni nga ni sangs rgyas so zhes bdag nyid zhal gyis 'ches pa dang 'dod chags la sogs pa bar chad byed pa nyid du brjod pa dang /thams cad mkhyen pa nyid la sogs pa'i lam la nges par 'byin pa nyid rab tu bstan pa dang / bdag nyid kyi zag pa zad pa nyid du zhal gyis bzhes pa la rgol ba po med pas shin tu ma zhum pa'i slad du mi 'jigs pa'i rnam pa bzhi 'di ni so so yang dag par rig pa'i pha rol tu phyin pa'o zhes bya ba ni rnam grangs dang chos kyi mtshan nyid dang yul gyi skad dang chos rab tu 'byed pa'i yul la go rims bzhin du thugs su chud pa'i ro myang ba dang /shes bya'i sgrib pa'i thogs pa mi mnga' bas ye shes thams cad chags pa med pa dang thogs pa ma mchis pa'i slad du chos dung / don dang / nges pa'i tshig dang / spobs pa so so yang dag par rig pa'i rnam pa bzhi'o//'di ni sangs rgyas kyi chos ma 'dres pa thams cad kyi pha rol tu phyin pa'o zhes bya ba ni 'khrul pa mi mnga' ba dang / ca co mi mnga' ba dang / dran pa nyams pa mi mnga' ba dang / thugs mnyam par ma bzhag pa mi mnga' ba dang / tha dad pa nyid kyi 'du shes mi mnga' ba dang /so sor ma brtags pa'i btang snyoms mi mnga' ba ste/ de ltar na rnam pa drug dang / shes bya'i sgrib pa rnam par dag pa las brtsams te/ 'dun pa dang / brtson 'grus dang / dran pa dang / ting nge 'dzin dang / shes rab dang / rnam par grol ba las nyams pa mi mnga' ba ste/ de ltar rnam pa drug dang / sku dang / gsung dang / thugs kyi phrin las rnams ye shes sngon du 'gro zhing ye shes kyi rjes su 'brang ba ste/ rnam pa gsum dang / 'das pa dang / ma 'ongs pa dang / da ltar byung ba la chags pa med pa dang / thogs pa med pa'i ye shes gsum ni nyan thos la sogs pa dang / thun mong ma yin pa nyid kyis na bgrang ba'i tshul las shin tu 'das pa'i slad du sangs rgyas kyi chos ma 'dres pa bco brgyad kyi rnam pa yin no//'di ni de bzhin gshegs pa'i de bzhin nyid kyi pha rol tu phyin pa'o zhes bya ba ni sangs rgyas bcom ldan 'das rnams kyis gsungs pa'i chos thams cad kyi mtshan nyid kyi don las mi 'gyur ba nyid kyis na phyin ci ma log pa de bzhin nyid kyi slad du sangs rgyas thams cad kyis gsungs pa'i de bzhin nyid kyi rnam pa ni gcig go//'di ni rang 'byung ba'i pha rol tu phyin pa'o zhes bya ba ni thams cad ngo bo nyid ma mchis pa'i slad du de'i thugs su chud pa ni gzhan la rag ma las pa'i phyir chos thams cad la mnga' sgyur ba'i rang byung gi rnam pa ni gcig go/ / 'di ni thams cad mkhyen pa'i ye shes kyi pha rol tu phyin pa'o zhes bya ba ni chos thams cad kyi ngo bo nyid kyi rnam pa thams cad yongs su mkhyen pa'i slad du rnam pa thams cad du mngon par rdzogs par byang chub pa'i sangs rgyas nyid kyi rnam pa ni gcig go/ /de ltar byas na rnam pa rnams ji ltar dbye ba stobs la sogs pa rnams kyi dang /'di dag gi rang gi ngo bo gang yin pa de bzhin nyid dang / de dag gang gi yin pa chos thams cad la mnga' sgyur ba'i rang byung dang / gang gi don du yin pa chos thams cad rnam pa thams cad du mngon par rdzogs par byang chub pa'i don du zhes bya ba ni go rims bzhin du bcu dang / bzhi dang / bzhi dang bco brgyad dang /gcig dang / gcig dang / gcig ste/ de ltar rnam pa thams cad mkhyen pa nyid kyi lam gyi rten can gyi rnam pa ni sum cu rtsa dgur 'gyur ro/ /rnam pa thams cad mkhyen pa nyid la nyan thos la sogs pa'i dbye bas lam tha dad pa'i phyir rnam pa 'di skad du brjod pa dag kho nar rtogs par bya'o/ /de skad du yang /dran pa nyer gzhag nas bzung ste/ /sangs rgyas rnam pa'i mthar thug rnams/ /lam gyi bden pa'i rjes mthun par/ /kun mkhyen gsum du phye bas na/ /slob ma byang chub sems dpa' dang / /sangs rgyas rnams la rim bzhin te/ /sum cu bdun dang sum cu bzhi/ /sum cu rtsa dgu dag tu bzhed/ /ces gsungs pa yin no//de la thams cad shes pa nyid kyi rnam pa ni/ nyan thos dang byang chub sems dpa'i bye brag gi go rims bzhin du zag pa med pa dang / zag pa dang bcas pa dag kyang yin no/ /lam shes pa nyid kyi rnam pa ni/ byang chub sems dpa' rnams kyi nyon mongs pa shin tu ma spangs pa'i phyir zag pa dang bcas pa kho na yin no/ / rnam pa thams cad mkhyen pa nyid kyi rnam pa ni yang dag par rdzogs pa'i sangs rgyas kyi nyon mongs pa dang shes bya'i sgrib pa bag chags dang bcas par rnam pa thams cad du spangs pas chos thams cad mkhyen pa nyid yin pa'i phyir zag pa med pa kho na dag yin te/ rnam pa rnams gcig tu bsdams na rnam pa brgya bdun cu rtsa gsum yin no//bcu drug las gzhan dri med kyi/ /rnam pa yod min zhes gang bshad pa de ni nyon mongs pa'i sgrib pa tsam gyi gnyen po'i rnam pas phye ba las dgongs pa yin pas de dang 'di la 'gal ba med do/ /shes rab kyi pha rol tu phyin pa'i bshad pa mngon par rtogs pa'i rgyan gyi snang ba las bstod pa'i le'u zhes bya ste dgu pa'o// //sbyor ba khyad par can dag gis rnam pa rnams bsgom dgos la/ de dag kyang sbyor ba po med par brjod par mi nus pas mnyan pa la sogs pa'i snod sbyor ba po bstan par bya ba'i phyir de nas lha rnams kyi dbang po brgya byin zhes bya ba la sogs pa smos te/ sngon gyi rgyal ba la lhag par bya ba byas pa ni de bzhin gshegs pa la dmigs te gtsug lag khang la sogs pa byed pas so//sangs rgyas mang po la dge ba'i rtsa ba bskrun pa ni bsod snyoms la sogs pa phul bas so/ /dge ba'i bshes gnyen gyis yongs su zin par gyur pa ni dge ba'i bshes gnyen gyis lhag par brton pa nyid kyis so//ji skad du bshad pa'i khyad par gsum dang ldan pa kho na rnam pa'i mtshan nyid can gyi yum 'di gtso bo cher mnyan pa la sogs pa'i snod du gyur pa yin no/ /de skad du yang / sangs rgyas rnams la lhag par byas/ /de las dge ba'i rtsa ba bskrun/ /dge ba'i bshes kyi mgon bcas pa/ /'di mnyan pa yi snod yin no//zhes gsungs pa yin no/ /ngan ngon tsam dang zhes bya ba nyung zad tsam dang ngo / /sangs rgyas mang po la bsnyen bkur byas pa yin zhes bya ba ni lus kyi bsnyen bkur bya ba la sogs pas mnyes par byas pa'o/ /yongs su zhus shing zhes bya ba ni the tshom skyes pa'i don gtan la dbab par bya ba'i phyir rang gi ngo bo yongs su zhus pas so//yongs su dri ba byas pa zhes bya ba ni gtan tshigs yongs su zhus pa'o/ /sangs rgyas mang po la dge ba'i rtsa ba bskrun pa ni sbyin pa la sogs pa pha rol tu phyin pa bcu'i sgrub pa nyams su len pa'i phyir ro/ /de bzhin gshegs pa la bsnyen bkur byas pa la sogs pa nyid kyis 'dzin pa la sogs pa'i snod du gyur pa yin no zhes par bya ste/de skad du yang / sangs rgyas bstan dang kun 'dri dang / /sbyin dang tshul khrims sogs spyod pas/ /len dang 'dzin pa la sogs pa'i/ /snod du dam pa rnams bzhed do/ /zhes gsungs pa yin no/ /brgya byin gyi rtog pa 'di ni rigs pa kho na yin te/ gang la ji skad du bshad pa'i rgyu yod pa de nyid lhag par mos par byed do zhes gsol pa ni bcom ldan 'das rigs kyi bu'am zhes gsol pa'o//de bzhin nyid du slob pa dang zhes bya ba la sogs pa'i tshig gsum ni sbyin pa dang dngos gzhi dang mjug gi gnas skabs su'am mthong ba dang bsgom pa dang khyad par gyi lam gyi dbye bas gzung bar bya'o/ /khyad par du 'phags pa'i don rtogs pa med na 'dzin pa la sogs pa tsam gyis phyir mi ldog pa dang 'dra bar ji ltar gzung snyam pa'i dogs pa de ci'i slad du zhe na zhes bya bas bsu nas bcom ldan 'das zhes bya ba la sogs pa gsol te/ji skad bshad pa'i de bzhin gshegs pa la bsnyen bkur byas pa dang yongs su 'dri ba dang / sbyin pa la sogs pa la spyod pa rgyu gsum las go bzlog pa ni/ dge ba'i rtsa ba chung ba dang / yongs su mi 'dri ba'i rang bzhin can dang sngon spyad pa dang mi ldan pa rnams kyis zhes bya ba'i tshig gsum dang sbyar ro/ /'di skad du gang gi phyir ji skad bstan pa'i sangs rgyas la brten pa la sogs pa'i rgyus shes rab kyi pha rol tu phyin pa la lhag pa'i bsam pa khyad par can gyis lhag par mos pa de bas na phyir mi ldog pa ji lta bar gzung bar bya'o zhes bzlog pa'i sgo nas brjod pa yin no//ji skad du bshad pa'i rgyu dang bral bas kyang spong bar 'gyur ba ni/ bcom ldan 'das gang dag 'di la mi mos shing ma rtogs pas zhes bya ba la sogs pa yin no//ji ltar na de ltar spong ba'i bsam pas sngon spangs pa yin par rtogs snyam pa'i dogs pa de ci'i slad du zhe na zhes bya bas bsu nas bcom ldan 'das gang bya ba la sogs pa gsol pa yin te/ gang gi phyir da ltar dge ba'i rtsa ba chung ba'i phyir na yum spong bar sems pa de'i phyir yang spong ba yin par shes te/gzhan du na dge ba'i rtsa ba chung ba nyid du mi 'thad do zhes bya ba'i tha tshig go/ /de nyid ni sngon gyi mtha' ma spyad pas zhes bya ba la sogs pa gsol pa yin no/ /shA ri'i bus rigs pa nyid du bshad do zhes smras pa ni 'phags pa shA ri'i bu zhes bya ba la sogs pa gsol pa'o//'di la ngo mtshar ci zhig yod/ cung zad kyang med pa nyid de 'bras bu ni rgyu dang rjes su mthun pa yin pa'i phyir ro/ /dad pa phul du byung ba yang dag par skyes pa nyid kyis na bcom ldan 'das zhes bya ba la sogs pa gsol to/ /ji ltar yum la phyag 'tshal bas gzhan la phyag 'tshal ba yin te/'brel pa med pa'i phyir ro snyam pa'i dogs pa de ci'i phyir zhe na zhes pas bsu nas kau shi ka zhes bya ba la sogs pa gsungs so/ /'di las skyes te zhes bya ba ni byang chub sems dpa'i gnas skabs su yum la goms par byas pas sangs rgyas nyid thob pa'i phyir 'di las ni thams cad mkhyen pa nyid skyes pa yin la sangs rgyas kyi gnas skabs su gdul bya rnams la shes rab kyi pha rol tu phyin pa ston pa'i phyir thams cad mkhyen pa'i ye shes kyis rab tu phye ba yang shes rab kyi pha rol tu phyin pa nyid yin pas de ltar rgyu dang 'bras bur 'brel pa'i phyir shes rab kyi pha rol tu phyin pa la phyag 'tshal ba ni thams cad mkhyen pa'i ye shes la phyag 'tshal ba yin no//de ltar zhes bya ba ni thams cad mkhyen pa'i ye shes kyi rgyu nyid dang 'bras bu nyid yin pas so zhes bya ba'i tha tshig go/ /shes rab kyi pha rol tu phyin pa 'di la spyad par bya zhes bya ba la sogs pa'i tshig gsum ni thos pa dang bsam pa dang bsgom pa'i rang bzhin gyi shes pa dang go rims bzhin du sbyar bar bya'o//sbyor ba po bstan pa'i 'og tu sbyor ba'i don zhus pa ni bcom ldan 'das ji ltar na zhes bya ba la sogs pa gsol pa yin no/ /zhus pa skabs la bab pa nyid yin pa'i phyir legs so legs so zhes bya ba phyin no/ /don 'di zhes bya ba la sogs pa la 'chad par 'gyur ba'i sbyor ba nyi shu po 'di las brtsams te de bzhin gshegs pa la rang gis rtogs par bya ba'i don du yongs su 'dri bar bya zhing gzhan gyis rtogs par bya ba'i don du yongs su 'dri bar sems shing rtogs par byed la/shes par byed pa zhes bya ba'i don to/ /de la gzugs la sogs pa la mi gnas pa'i sbyor ba ni kau shi ka byang chub sems dpa' zhes bya ba la sogs pa gsungs te/bzhi dang rang gi ngo bo'i dbye bas gzugs la zhes bya ba dang gzugs so zhes bya ba'i tshig gnyis smos pa yin no/ /de las cir 'gyur zhe na kau shi ka 'di ltar zhes bya ba la sogs pa gsungs so//'di skad du gang gi phyir ngo bo nyid med pa nyid kyis gzugs la sogs pa la gnas pa bkag pa de'i phyir de la mi gnas pa ni sbyor ba zhes brjod pa yin no/ /mi sbyor ba'i sbyor ba'i don du gsungs pa ni/ kau shi ka gzugs so zhes mi smos te zhes bya ba la sogs pa ste rnal 'byor du byed do zhes bya ba'i tha tshig go//de las cir 'gyur zhe na 'di ltar zhes bya ba la sogs pa gsungs so/ /rnal 'byor du byed par 'gyur ro zhes bya ba ni de ltar de kho nar sbyor ba med pas rnal 'byor du byed par 'gyur te/ mi sbyor ba nyid de nyid la sbyor ba yin no zhes bya ba'i don to/ /zab pa'i sbyor ba ni bcom ldan 'das zhes bya ba la sogs pa yin no//gnas pa mi dmigs pa'i don gyis na gzugs la sogs pa'i de bzhin nyid zab pas thams cad shes pa nyid kyi skabs su zab bo zhes rtogs pa'i phyir ro/ /gting dpag dka' ba'i sbyor ba ni bcom ldan 'das zhes bya ba la sogs pa gsungs pa yin te/ rang bzhin gyis rnyog pa med pa'i don gyis gzugs la sogs pa rtogs par dka' bas lam shes pa nyid kyi skabs su rtogs par dka'o zhes smos pa'i phyir ro//de nyid bstan par bya ba'i phyir gzung bar dka'o zhes gsungs te/ rna ba'i rnam par shes pa dang des drangs pa'i yid kyi rnam par shes pas gzung bar dka' ba'i phyir ro//tshad med pa'i sbyor ba ni/ bcom ldan 'das zhes bya ba la sogs pa gsungs pa yin te/ mtha' mi dmigs pa'i don gyis na gzugs la sogs pa tshad med pas na rnam pa thams cad mkhyen pa nyid kyi skabs su tshad med pa'o zhes dmigs pa'i phyir ro//yang na zab par mngon par byang chub pa dang thun mong ma yin par mngon par byang chub pa'i dbang du byas nas go rims bzhin du zab pa'i sbyor ba la sogs pa rnam pa gsum gsungs pa yin no/ /legs so zhes bya ba gsungs pa nyid kyis zab pa'i sbyor ba gsal bar bya ba ni shA ri'i bu de de bzhin no zhes gsungs pa yin no//bsdus pa'i don ni 'di yin te/ gang gi tshe gzugs la sogs pa zab bo snyam du mngon par ma zhen pa'i tshul gyis de kho na nyid du mi gnas pa de'i tshe phyin ci ma log pa yin pa'i phyir de la zab pa'i sbyor ba 'thob par 'gyur ro/ /yang gang gi tshe zab pa'o zhes bya bar yang rnal 'byor du mi byed pa de'i tshe gzugs la sogs pa zab pa zhes bya bar yang mi gnas te/de ltar gnas pa dang rnal 'byor bkag pas dang gnas pa zab mo'i sbyor ba'i don phyin ci log par bstan pa yin no zhes bya'o/ /de bzhin du gting dpag dka' ba dang tshad med pa'i sbyor ba'i don dag kyang 'di'i rjes su 'brangs nas brjod par bya'o//'phags pa rnam par grol ba'i sdes zab pa la sogs sbyor ba gsum po 'di dag ni re re zhing chung ngu dang 'bring dang chen po'i yin no zhes bshad do/ /tshegs chen pos yun ring po nas rtogs pa'i sbyor ba'i don du gsol pa ni / bcom ldan 'das shes rab kyi pha rol tu phyin pa zab ste zhes bya ba la sogs pa'o//la la ni rigs nges pa nyid kyis phyir mi ldog pa yin na yang ma bstan pa yod pas de las dgar bar bya ba'i phyir lus bstan pa zhes smos so/ /yum rnam pa thams cad du shes pa med pas yum la the tshom la sogs par 'gyur ba srid pa'i phyir de nyid kyi mdun du brjod pa'i rgyu gang zhig yin snyam pa'i dogs pa de ci'i slad du zhe na zhes bya bas bsu nas bcom ldan 'das de ni zhes bya ba la sogs pa gsol to//gang gi phyir de chos kyi dbyings rtogs pa rgyu mthun pa bstan pa'i chos mchog gis log pa'i shes pa med pas nem nur mi bgyid/ yid gnyis kyi shes pa dang bral bas the tshom 'tshal bar mi 'gyur zhing mi shes pa dang bral bas rmongs par mi 'gyur la/yang dag pa'i shes pa dang ldan pa nyid kyis na rtsod par mi 'gyur ba de bas na de nyid kyi mdun du bshad par bya'o/ /zhes 'dod do/ /skrag pa la sogs par 'gyur ba srid pas don gyi shugs kyis gzhan la ni tshegs chen po yun ring pos rtogs pa'i sbyor ba yin par bstan pa yin no//lung bstan pa thob pa'i sbyor ba ni/ 'phags pa shA ri'i bu yang gal te zhes bya ba la sogs pa smos so/ /nyes pa cir 'gyur zhes bya ba ni nem nur la sogs pa'i nyes pa cir 'gyur zhes bya'o/ /rigs kyi stobs kyis 'di las rjes su skrag pa la sogs pa 'gar yang mi 'gyur ro zhes smras pa ni/kau shi ka gang lung ma bstan pa gang zhig gis zhes bya ba la sogs pa smos so/ / rgyang ring po rnams zhes bya ba ni yun ring po nas te dus ring po nas zhes bya ba'i don to/ /de nyid brjod pa ni/ yun ring nas theg pa la yang dag par zhugs pa yin no zhes bya ba'o/ /yang na yun ring po nas te zab mo'i don la lhag par mos pas nyan thos la sogs pa dang thun mong ma yin pa nas so//shes rab kyi pha rol tu phyin pa zab mo 'di lta ba dang zhes bya ba la sogs pa la je dang po kho nar re zhig thag ring po nas mthong ngo / /de nas mthong bas dga' ste lus kyis phyag 'tshal lo/ /de nas rab tu dang ba'i shugs 'phel bas bskor ba la sogs pas bsnyen bkur byed do//de nas rim pa bzhin du byas la 'dug ste/ nyan par byed de de ltar lta ba la sogs pa'i don du shes rab kyi pha rol tu phyin pa thob par gyur pa yin no/ / 'dis ni ring po mi thogs par zhes bya ba ni lta ba la sogs pa'i dus da lta nyid nas ring po mi thogs par ro//de nyid brjod pa ni de ni lung bstan pa la bsnyen pa zhes bya ba la sogs pa'o/ /de bzhin gshegs pa gcig gam zhes bya ba la sogs pa la de bzhin gshegs pa gcig gam gnyis sam gsum las mi 'da' ste zhes bya ba ni de nas byang chub sems dpa' de phyis lung bstan pa thob par 'gyur ro zhes bya ba de ltar ni ma yin gyi 'on kyang de rnams las zhes bya ba'i tha tshig go//de nyid ston pas smras pa ni 'on kyang de bzhin gshegs pa dgra bcom pa yang dag par rdzogs pa'i sangs rgyas de rnams mnyes par byed par 'gyur te zhes bya ba la sogs pa ste/ gzhan yang de bzhin gshegs pa gcig gam/gnyis sam/ gsum po des yang dag par bcas pa'i bslab pa bsgrubs pas mnyes par byed par 'gyur ba'o/ /de bzhin gshegs pa mthong na yang lung bstan pas 'bras bu yod par byed par 'gyur ro zhes bya ba ni de bzhin gshegs pa gcig gam gnyis la sogs pa mthong ba ni lung bstan pas mi stong par byed par 'gyur te nges par lung ston pa thob pa'i phyir ro//de nyid brjod pa ni de bzhin gshegs pa mthong ba de lus kyang zhes bya ba la sogs pa'o/ /ji srid du lung bstan pa zhes bya ba la sogs pa ni nye bar bsdu ba yin te go sla'o/ /phyir mi ldog pa'i sbyor ba'i don bstan pa'i phyir de nas bcom ldan 'das la tshe dang ldan pa shA ri'i bus zhes bya ba la sogs pa smos so//smos kyang ci 'tshal zhes bya ba ni 'dir gang thos nas kyang yang dag par 'dzin pa la sogs par byed pa gang yin pa de phyir mi ldog pa'i sbyor ba dang ldan zhing dge ba'i rtsa ba yongs su smin pa yin no zhes bya ba 'di las brtsad du ci zhig yod de the tshom ci yang med do zhes bya ba'i tha tshig go//legs par smras pa nyid kyis na blo mthun pas gnas pa ni shA ri'i bu de de bzhin no zhes bya ba la sogs pa gsungs pa yin no/ /ji skad du bshad pa'i sbyor ba nyid bstan par bya ba'i phyir bcom ldan 'das dper gsol bar bdag spobs so zhes bya ba la sogs pa gsol pa yin te/dper gsol ba zhes bya ba ni mthun pa'i dpe'o/ /rnyed par 'gyur ba ni 'phrad par 'gyur ba'o/ /gzhan dag kyang de 'dzin pa la sogs pa srid pas shes rab kyi pha rol tu phyin pa 'dzin pa la sogs pas byang chub sems dpa'i dge ba'i rtsa ba yongs su smon pa yin par ji ltar shes snyam pa'i dogs pa de ci'i slad du zhe na zhes bya bas bsu nas bcom ldan 'das sems can zhes bya ba la sogs pa gsol te/gang gi phyir chos kyis phongs par 'gyur ba dang mthun pa'i las dang phal cher ma bral ba rnams ni shes rab kyi pha rol tu phyin pa 'di la yang dag par 'dzin pa la sogs pa la rgyab kyis phyogs pa nyid kyis na sems mi mthun par 'gyur zhing yongs su spong ba la brtson pa nyid kyis na sems ldog par 'gyur ba dang /gang gi phyir dge ba'i rtsa ba ma bsags pa ni shes rab kyi pha rol tu phyin pa'i don ma rtogs pas yang dag pa'i mtha' 'di la rab tu mi 'jug cing dad pa thob pas dga' bar yang mi 'gyur ba de bas na gang dag ji lta ba bzhin du 'dzin pa la sogs pa byed pa de dag ni dge ba'i rtsa ba bsags pa yin no zhes bya ba ni ngag gi don yin no//yang dag pa'i mtha' ni chos kyi dbyings yin la/ de ston par byed pa'i phyir shes rab kyi pha rol tu phyin pa la de skyed ces bya'o/ /nges par 'byung ba'i sbyor ba ni bcom ldan 'das 'di lta ste dper na zhes bya ba la sogs pa gsol to//bcom ldan 'das de bzhin du zhes bya ba la sogs pa la dpag tshad brgya phrag mang po'i 'brog dgon pa na gnas pa'i skyes bu dang 'dra bar bar du gcod pa'i chos spong ba la sogs sgrub pa dang ldan pa gang zhig mnyan pa la sogs pa'i don du rgyal ba'i yum dang phrad pa ni gdon mi za bar nges par 'byung bas bdag ni bla na med pa yang dag par rdzogs pa'i byang chub tu bsnyen pa yin no zhes shes par bya'o zhes bya ba'i tha tshig go//de nyid ni de yang nyan thos kyi sa'am zhes bya ba la sogs pa smos pa yin no/ /de dang mi mthun pa'i chos la nye bar mi gnas bzhin du ji ltar na nyan thos la sogs pa'i sar lhung ba'i 'jigs pa med pa yin snyam pa'i dogs pa de ci'i phyir zhe na zhes bya bas bsu nas 'di ltar des zhes bya ba la sogs pa smos pa yin no//'di skad du gang gi phyir gang zag la bdag med pa tsam gyis rab tu phye ba nyid kyis na nyan thos la sogs pa'i sa dang mi mthun pa'i chos ma lus pa thams cad dngos po med pa nyid du ston par byed pa'i shes rab kyi pha rol tu phyin pa blta ba la sogs pa'i don du bzod pa thob pa yin pa de bas na de dang mi mthun pa'i yum la dmigs pas nyan thos la sogs pa'i sar ltung ba'i dogs pa yod pa ma yin no zhes brjod pa yin no//legs par smras pa nyid kyis na shA ri'i bu de de bzhin no de de bzhin te zhes rjes su mthun pa gnang nas yang nus pa bskyed par bya ba'i phyir shA ri'i bu ji ltar zhes bya ba la sogs pa gsungs so/ /bar chad med pa'i sbyor ba'i don ni bcom ldan 'das 'di lta ste dper na 'di na skyes bu la la zhig ces bya ba la sogs pa gsol pa yin te/sdong po'am sdong po'i mtshan ma zhes bya ba ni shing ngam shing gi mtshan ma zhes bya ba'i tha tshig go/ /sdong po la sogs pa ma mthong bas ji ltar rgya mtsho chen po dang nye ba yin snyam pa'i dogs pa de ci'i slad du zhe na zhes bya bas bsu nas/ rgya mtsho chen po ni rim gyis dma' ba lags pas zhes bya ba la sogs pa gsol to//'di skad du gang gi phyir rgya mtsho chen po'i rang bzhin shing la sogs pa dang 'gal ba rim gyis dma' bar rang gi rgyus bskyed pa de'i phyir de dmigs pa'i rang bzhin kho nas shing la sogs pa ma dmigs pa yin pa'i phyir de dang nye ba yin no zhes brjod pa yin no//shes rab kyi pha rol tu phyin pa zab mo 'di nyid nyan pa na 'di snyam du rig par bgyi ste zhes bya ba ni rtag tu bsgom pa la sogs pa bsgrub pas bar chad med par sbyor ba'i stobs kyis de ltar shes par bya'o/ /ji ltar yum mnyan pa'i rgyus 'bras bu lung bstan pa dang nye bar rjes su dpag par bya snyam pa'i dogs pa de ci'i slad du zhe na zhes bya bas bsu nas de ni 'di ltar zhes bya ba la sogs pa smos pa yin no//de skad du rgyu don gzhan la ltos pa med pas 'bras bu skye bar rang bar rjes su dpog pa'i rang bzhin gyi gtan tshigs kyis lung bstan pa dang nye bar gyur pa yin par rjes su dpog pas nyes pa med do zhes brjod pa yin no//yang mngon par rdzogs pa'i byang chub dang nye ba'i sbyor ba ni/ bcom ldan 'das 'di lta ste dper na dpyid ka'i dus zhes bya ba la sogs pa smos pa yin te/ lo ma rnying pa rnams lhags pa las zhes bya ba ni lo ma rgan po rnams lhung ba na'o/ /snga ma bzhin du de ci'i slad du zhe na zhes dogs pa bsu nas de ni 'di ltar zhes bya ba la sogs pa smos so//sdong po las mtshan ma 'di lta bu dag ces bya ba la sogs pa la/ rgyu tshogs pa las 'bras bu skye bar rjes su dpog pa gang yin pa/ don gzhan la ni mi ltos phyir/ /de ni rang bzhin yin par brjod/ /ces bya ba'i rigs pas 'di'i don ni go bar zad do/ /nye bar bstabs pa lags so zhes bya ba ni zag pa med pa'i chos gsar gyi rten nyid la sogs pa bsgrubs pas mngon par rdzogs par byang chub pa dang nye ba'i sbyor ba'i mthus bstabs pa'o//myur du mngon par rdzogs pa byang chub pa'i sbyor ba'i don ni bcom ldan 'di lta ste dper na zhes bya ba la sogs pa gsol to/ / mngal chags pa yin pa'i phyir bud med sbrum ma'o/ /skye ba'i dus dang nye ba nyid kyi phyir mngal lci ba'o/ /yan lag rkyong ba la sogs pas na lus bskyod na'o/ /sngon gyi tshul bzhin ma lags pa'i yid la bgyid pa ni 'khrig pa'i chos dang rab tu ldan pa'o/ /rten cing nges par rten la bsgoms te zhes bya ba ni go rims bzhin du sbyor ba dang dngos gzhi dang mjug gi gnas skabs su'o//thams cad du yang dang yang du mngon du byed pas na mang du byas pas so/ /de ltar bsran dka' ba 'di lta bu'i tshul gyi sdug bsngal gyi tshor ba da ltar ba 'di lus kyis nyams su myong ngo snyam du sems par byed pa zhes bya ba ni lhag ma'o//nyan pa na de la dga' zhing zhes bya ba ni brten par gyur pa'i sgrub pa'i chos dang ldan pa 'bras bu chos kyi sku mngon par bsgrubs pa lags pa'i sgrub pa dang ldan pa ni/ ji skad bshad pa'i sbyor ba'i mthu las shes rab kyi pha rol tu phyin pa la nyan pa sngon du 'gro bas dga' zhing gus par byed do zhes bya ba'i don to//gzhan gyi don gyi sbyor ba ni bcom ldan 'das de bzhin gshegs pa zhes bya ba la sogs pa gsol to/ /bar zhes smos pa ni mgon dang bcas pa la sogs pa yongs su bsdu'o/ /gang gi phyir lung bstan pa la sogs pas sa dang pha rol tu phyin pa rnams la nges par bkod pas na legs par yongs su bzung ba legs par sbyangs pa dang bcom ldan 'das kyis byang chub sems dpa' dge ba'i bshes gnyen la rab tu gtad pa de'i phyir ngo mtshar te thugs rje'i yul thams cad yin du zin kyang /bsam pa khyad par can phun sum tshogs pas skal ba dang ldan pa nyid kyi stobs kyis so sor nges pa'i 'gro ba la phan 'dogs par mdzad pa ni ya mtshan che'o//bsam pa khyad par can phun sum tshogs pa nyid ni rab 'byor 'di ltar zhes bya ba la sogs pa gsungs so/ /skye bo mang po la phan pa'i phyir zhugs pa ni ma 'ongs pa dang 'brel pa'i don byed pa nyid yin pa'i phyir ro/ /skye bo mang po la bde ba ni da ltar gyi dus su tshe 'di'i don byed pa'i phyir ro//'jig rten la snying brtse ba zhes bya ba ni 'das pa'i dus dang 'brel pa'i dge ba dang mi dge ba byas pa'i bag chags rnams go rims bzhin du 'phel ba dang yongs su zad par bya ba'i phyir 'bad par byed pa ni 'jig rten la snying brtse ba'i phyir zhugs pa yin no zhes bya ba phyi ma dang sbyar ro/ / gzhan yang 'das pa dang ma 'ongs pa dang da ltar byung ba'i dus dang 'brel pa nyid kyis spyir gsungs pa ni skye bo phal po che'i don dang phan pa dang bde ba'i phyir zhugs pa zhes bya ba'o / /bla na med pa'i chos ston par 'dod pa'o zhes bya ba ni shes rab kyi pha rol tu phyin pa'i chos kyi 'khor lo bskor ba la sogs pa'i sgrub pa dang ldan pa rnams gzhan gyi don byed pa'i phyir chos smra bar 'dod pa'o//'phel ba dang 'grib pa med pa'i sbyor ba'i don ni bcom ldan 'das byang chub sems dpa' zhes bya ba la sogs pa smos pa yin te/ gzugs la sogs pa'i 'phel ba dang / 'grib pa ma mthong bas ni shes rab kyi pha rol tu phyin pa la spyod pa ni rjes su gnang ba yin pa'i phyir de'i sbyor ba yin par bshad do//chos dang chos ma yin pa la sogs pa mi dmigs par sbyor ba'i don du gsungs pa ni / chos yang dag par rjes su mi mthong na zhes bya ba la sogs pa ste/ chos dang chos ma yin pa la sogs pa mi dmigs par sgrub pas de la sbyor ba'i phyir/de ltar bsgom pa yongs su rdzogs par 'gyur ro/ /bsam gyis mi khyab pa'i rnam pa'i 'du shes 'gog pa'i sbyor ba'i don du brjod pa ni/ bcom ldan 'das bstan pa 'di ni bsam gyis mi khyab po zhes bya ba la sogs pa ste/ chos kyi dbyings rang bzhin nyid kyis bsam par mi nus pa yin pa'i phyir ro//gal te der 'dzin pa'i 'du shes bkag pas gzugs la sogs pa bsam gyis mi khyab pa'o zhes bya bar mi sems na/ de'i tshe ji skad du bshad pa'i sbyor bas shes rab kyi pha rol tu phyin pa la spyod pa yin no zhes bya ba'i tha tshig go//rnam par mi rtog pa'i sbyor ba'i don zhus pa ni bcom ldan 'das shes rab kyi pha rol tu phyin pa zhes bya ba la sogs pa gsol pa yin no/ /lan ni shA ri'i bu byang chub sems dpa' zhes bya ba la sogs pa gsungs pa yin no/ /bcom ldan 'das ji ltar na byang chub sems dpa' sems dpa' chen po spyad par 'gyur ba lags zhes bya ba ni rang gi ngo bo thob pa la zhus pa'o//ji ltar spyad par gyur pa zhes bgyi ba'i ming thob par 'gyur zhes bya ba ni don dang ldan pa'i ming thob pa las zhus pa'o/ /lan ni shA ri'i bu 'di la zhes bya ba la sogs pa gsungs pa yin no/ /stobs dang mi 'jigs pa la sogs pa la sems kyi yul yod pa yin na ji ltar mi rtog snyam pa'i dogs pa de ci'i phyir zhe na zhes bya bas bsu nas/shA ri'i bu stobs rnams bsam gyis mi khyab ces bya ba la sogs pa gsungs pa yin no/ /de kho na nyid du na chos kyi dbyings kyi rang bzhin yin pa'i phyir gzugs la sogs pa dang de'i mtshan ma dang de'i rang gi ngo bor mi rtog pa la sogs par bsgrub pa'i mthus rnam par mi rtog pa'i sbyor bas thob pa yin pa'i phyir bsam pa las 'das pa yin pa nyid kyis na stobs la sogs pa bsam du yod par mi rtog go zhes bya ba'i tha tshig go//'bras bu rin po che sbyin pa'i sbyor ba'i don ni bcom ldan 'das shes rab kyi pha rol tu phyin pa ni zab po/bcom ldan 'das shes rab kyi pha rol tu phyin pa ni rin po che'i phung po'o zhes gsol te/ /chos dang gang zag la bdag med pa gnyen po yin pas zab par gyur pa na/ 'bras bu dang po mthong ba la sogs pa'i sgrub pas 'bras bu rin po che sbyin pa'i sbyor ba dang ldan la/rgyun du zhugs pa la sogs pa nas bla na med pa yang dag par rdzogs pa'i byang chub kyi 'bras bu rin po che sbyin par byed pa nyid yin pa'i phyir rin po che'i phung po'o/ /rnam par dag pa'i sbyor ba'i don ni/ bcom ldan 'das nam mkha' dag pa'i slad du zhes bya ba la sogs pa gsol pa yin te/ nam mkha' ltar rnam par dag pa yin pa'i phyir gzugs la sogs pa rnam par dag par bsgom pas sbyor ba de dang ldan pa rnams kyi nyon mongs pa dang shes bya'i sgrib pa spong ba'i rgyur gyur pa nyid kyis na dag pa'i phung po'o//mu mtshams kyi sbyor ba'i don ni bcom ldan 'das rigs kyi bu'am rigs kyi bu mo zhes bya ba la sogs pa gsol pa yin te/ mthu chen po nyid yin yang bar chad byed pa mang po 'byung ba 'di ni ngo mtshar che'o/ /legs par smras pa yin pa ni/ rab 'byor de de bzhin no zhes bya ba la sogs pa gsungs pa yin no//'di nyid ni rigs pa dang mi ldan no snyam pa'i dogs pa de ci'i phyir zhe na zhes bya bas bsu nas/ rab 'byor de ni 'di ltar zhes bya ba la sogs pa gsungs pa yin no/ /gang gi phyir bdud sdig can bar chad bya bar te bya ba'i rgyu mtshan du brtson par byed cing spro bar byed pa de de bas na bar chad mang ba yin no zhes bya ba'i tha tshig go//gal te de ltar yin na ji ltar myur du bri bar bya zhe na/ der myur du zhes bya ba la sogs pa gsungs so/ /lo gcig gis zhes smos pa ni 'phags pa rnam par grol ba'i sdes de tsam gyis dus tshigs la sogs pa'i rkyen tshogs pa yin pas de las phyi rol na dus med do zhes shes par bya ba'i phyir ro zhes bshad do//de lta na yang rab 'byor zhes bya ba ni lor mngon par brtson pa'i sbyor ba ni / gtong ba la sogs pa'i sgrub pa dang ldan pa rnams mu mtshams kyi sbyor ba thob pa yin pas bgegs med par bri bar bya ste/myur du zhes bya ba ni lhag ma'o/ /gal te lor dris na ji ltar myur ba yin snyam pa'i dogs pa de ci'i phyir zhe na zhes bya bas bsu nas/ rab 'byor da ni 'di ltar zhes bya ba la sogs pa gsungs pa yin no/ /'di ni chos nyid yin te/ gang gi phyir rin po che chen po rnams la bar chad byed pa mang du 'byung ba 'di ni chos nyid yin pa de'i phyir rin po che dam pa'i rang bzhin gyi yum bar chad mang yang lo skor gyis bris na myur ba yin no snyam du dgongs pa yin no//sbyor ba ni ji skad du bshad pa kho nar gzung bar bya ste/ de skad du yang / gzugs la sogs par mi gnas phyir//de la sbyor ba bkag pa'i phyir/ /de yi de bzhin nyid zab phyir/ /de rnams gting dpag dka' ba'i phyir/ /de dag tshad ni med phyir dang / /tshegs chen yun rings rtogs pa'i phyir/ /lung bstan phyir mi ldog nyid dang / /nges 'byung bar chad med bcas dang //byang chub nye dang myur ba dang / /gzhan don 'phel med 'grib med phyir/ /chos dang chos min sogs mi mthong / /gzugs sogs bsam mi khyab mi mthong / /gzugs sogs de yi mtshan ma dang / /de yi ngo bor rnam mi rtog /'bras bu rin chen sbyin byed dang / /de ni dag pa mtshams dang bcas//zhes gsungs pa yin no/ /sbyor ba nyi shu po de dag gi go rims 'di ni rigs kho na yin te/ 'di ltar gzugs la sogs pa'i chos thams cad la mngon par zhen pa med pas gnas pa/ mi sbyor ba'i sbyor ba la mngon par brtson pa ni/ gzugs la sogs pa de dag gi zab pa nyid dang / gting dpag dka' ba nyid dang /tshad med pa nyid rtogs par 'gyur ro/ /de nas yang dag pa ma yin pa'i sbyor ba byed pa nyid kyis na las dang po pas ni tshegs chen pos 'thob bo/ /de las gzhan pa ni lung bstan pa dang / phyir mi ldog pa'i sa bde blag tu thob nas nges par 'byung ba dang / mi 'bral bar 'gyur zhing mngon par rdzogs par byang chub pa la nye bar 'gyur ba dang /myur du mngon par rdzogs par byang chub par 'gyur ba'o/ /de nas gzhan gyi don byed cing 'phel ba med pa dang 'grib pa med par 'gyur ro/ /de nas chos dang chos ma yin pa la sogs pa spyi dang / gzugs bsam gyis mi khyab pa la sogs pa'i khyad par la 'du shes thams cad spangs pa'i phyir rnam par mi rtog pa ni/'bras bu rin po che sbyin pas mchog tu rnam par dag pa'i mthar thug pa thob par 'gyur ba ni/ snga ma kho nar lo skor gyi sbyor bas sems kyi rgyud yongs su sbyangs pa yin pas sbyor ba'i go rims ni mngon par rtogs pas rab tu phye ba yin no//yon tan mthong ba sngon du btang na sbyor ba rnams la shin tu goms par byed pas sbyor ba'i 'og tu de dag gi yon tan brjod par bya'o/ /de las dang por bdud kyi mthu bcom pa'i yon tan brjod pa ni/ bcom ldan 'das shes rab kyi pha rol tu phyin pa 'di yi ger 'dri ba la zhes bya ba la sogs pa yin no//yi dam ma nyams pa'i zhes bya ba ni shes rab kyi pha rol tu phyin pa klog pa la sogs par yi dam bcas pa las ma nyams pa'o/ /bar chad byed mi nus so zhes bya ba ni mthu med par 'gyur ba'o/ / de srid tsam du bgegs mi nus pas na bcom ldan 'das gang gi tshe zhes bya ba la sogs pa gsol pa yin no/ /ji ltar na deng sang zhes bya ba ni de nyid rnam pa gang gis zhes bya ba'o/ /de ni gang gi mthus zhes bya ba ni gang gi nus pas so/ /yang dag par rdzogs pa'i sangs rgyas kyi mthus zhes bya ba ni rnam par rtog pas zhus pa gnyis byas pa'i phyir phyis de nyid kyi lan btab pa yin no//'di skad du sbyor ba bsgom pa'i skabs su de bzhin gshegs pa rnams kyi byin gyi rlabs thob pas bdud kyi mthu bcom pa'i yon tan 'byung ba'i phyir 'dzin par byed pa la sogs par 'gyur ba yin no zhes brjod pa yin no//de rnams la de bzhin gshegs pa'i mthu ji ltar yin snyam pa'i dogs pa de ci'i phyir zhe na zhes bya bas bsu nas/ shA ri'i bu 'di ni chos rnams kyi chos nyid de zhes bya ba gsungs pa ni go sla'o/ /de nyid gsal bar bya ba'i phyir gang 'jig rten gyi khams tshad med grangs med pa dag na zhes bya ba la sogs pa gsungs pa yin no//gnyis pa sangs rgyas kyis dgongs shing mkhyen pa'i yon tan brjod pa ni/ rigs kyi bu 'am rigs kyi bu mo gang dag ces bya ba la sogs pa gsungs pa yin te/ dgongs par 'gyur zhes bya ba ni nus pa bskyed pas gzigs pa'i phyir ro//yongs su gzung bar 'gyur te zhes bya ba ni mthu bskyed pa'i phyir ro/ /de nyid rgya cher bstan pa ni bcom ldan 'das byang chub sems dpa' sems dpa' chen po gang dag ces bya ba la sogs pa gsungs pa yin no/ /sbyor ba dang dngos gzhi dang mjug gi gnas skabs su de bzhin gshegs pas dgongs pa'i stobs kyis sangs rgyas kyis dgongs shing mkhyen pa nyid kyi yon tan 'byung bas mnyan pa la sogs pa byed par 'gyur ba ni/bcom ldan 'das sangs rgyas kyi mthu dang zhes bya ba la sogs pa'i tshig smos pa yin no/ /legs par smras pa nyid kyis na shA ri'i bu de de bzhin no zhes bya ba la sogs pa gsungs so//gsum pa sangs rgyas kyis mngon sum du mdzad pa'i yon tan bstan pa ni/ shA ri'i bu de dag ni de bzhin gshegs pas mkhyen to zhes bya ba la sogs pa gsungs pa yin te/ khyad par can gyi don bskyed pa'i dgongs pas lha'i spyan gyis mkhyen no //shes rab kyi spyan gyis byin gyis brlabs so/ /chos kyi spyan gyis gzigs so/ /sangs rgyas kyi spyan gyis rnam par gzigs so zhes bya ba ni gsal ba kho nar zad do/ /de gang zhig yin zhe na byang chub sems dpa' sems dpa' chen po gang dag ces bya ba la sogs pa gsungs pa yin no//de ni 'di skad du de bzhin gshegs pas mkhyen cing gzigs pa thob pas sangs rgyas kyis mngon sum du mdzad pa'i yon tan dang ldan pa mnyan pa la sogs pa byed pa gang yin pa de ni mkhyen to zhes brjod pa yin no/ /bzhi pa yang dag par rdzogs pa'i byang chub dang nye bar gyur pa'i yon tan bstan pa ni thos nas kyang bzung ba dang zhes bya ba la sogs pa gsungs pa yin no//nye bar 'gyur te zhes bya ba ni de bzhin gshegs pa dang nye bar gyur pa thob pas yang dag par rdzogs pa'i byang chub dang nye bar gyur pa'i yon tan 'byung ba'i phyir thag nye bar gnas par 'gyur ba'o/ /lnga pa don chen po nyid la sogs pa'i yon tan bstan pa ni/shA ri'i bu gang dag ces bya ba la sogs pa gsungs te/ gnas par mi 'gyur mod kyi zhes bya ba ni gzhan du mi 'gyur ba'i don gyis na de bzhin nyid dang bla na med pa yang dag par rdzogs pa'i byang chub la sgrub pa dang bral bas de nyid kyi tshe gnas par mi 'gyur mod kyi'o//de dag kyang zhes bya ba ni phan yon chen po thob pas don chen po la sogs pa'i yon tan 'byung ba'i phyir glegs bam du bris pa dang / 'chang ba dang klog par byed pa ni sangs rgyas dang mi 'bral ba nyid dang / bde 'gror gzhol ba nyid dang / yang dag par rdzogs par sangs rgyas pa nyid dang /mya ngan las 'das pa'i 'og tu yang gzhan gyi don la 'jug pa'i dbang du mdzad nas go rims bzhin du don che ba dang / phan yon che ba dang / 'bras bu che ba dang / rnam par smin pa che ba zhes bya ba'i tshig bzhi gsungs pa yin par shes par bya ste/ 'dir ni khyad par can du smin pa rnam par smin pa yin par blta'o//de dag gi 'bad pa dang zhes bya ba ni bri ba la'o/ /yongs su g.yo ba zhes bya ba ni 'dzin pa dang klog pa la'o/ /theg pa chen po ji lta bar/ /chos rnams btags pa mdzad pa dang / /byang chub sems dpa' rtag par yang / /shes rab gsum gyis yid byed la//khams brtas byed dang 'jug byed dang / /de ni don rnams 'byung bar 'gyur/ /zhes bya bas theg pa chen po'i chos thams cad kyi phan yon yin pas na rgyal ba'i yum kho na'i phan yon ji ltar yin snyam pa'i dogs pa de ci'i phyir zhe na zhes bya bas bsu nas/ 'di ltar zhes bya ba la sogs pa gsungs te/gang gi phyir chos thams cad ngo bo nyid med pa'i sgo nas thos pa la sogs pa'i rim gyis chos rnams kyi de kho na nyid rtogs par bya ba'i phyir nye bar gnas pa de bas na gtsor de nyid kyi phan yon yin no zhes bya ba'i tha tshig go/ /drug pa yul spyod pa'i yon tan ni shA ri'i bu pha rol tu phyin pa drug dang ldan pa zhes bya ba la sogs pa gsungs pa yin te/pha rol tu phyin pa drug smos pa ni pha rol tu phyin pa lhag ma rnams sbyin pa la sogs pa'i pha rol tu phyin pa rnams kyi grogs su gyur pa yin pa'i phyir ro/ /'di ltar sbyin pa la sogs pa pha rol tu phyin pa gsum gyis phan btags pa'i sems can rnams la bsdu ba'i dngos po bzhis bsdus pa'i thabs la mkhas pas dge ba la rab tu 'jog pa'i phyir thabs kyi pha rol tu phyin pa ni pha rol tu phyin pa gsum gyi grogs su gyur pa yin no//mthong ba'i chos la nyon mongs pa yang bas dge ba'i las la sbyor mi bzod pa nyid kyis na ma 'ongs pa na nyon mongs pa chung ba nyid du yid kyis smon par byed pa yin pa'i phyir smon lam gyi pha rol tu phyin pa ni brtson 'grus kyi pha rol tu phyin pa'i grogs su gyur pa yin no//skyes bu dam pa la brtan pa dang / dam pa'i chos mnyan pa la brten nas lhag pa'i bsam pa stobs chung ba nyid bzlog nas gya nom pa'i khams su bsam pa'i stobs thob nas nang du sems 'jog pa'i mthu thob pa'i phyir na/stobs kyi pha rol tu phyin pa ni bsam gtan gyi pha rol tu phyin pa'i grogs su gyur pa yin no/ /byang chub sems dpa' sde snod thos pa la dmigs pa sngon du 'gro bas 'jig rten las 'das pa'i shes rab bsgrub par nus pa yin pa'i phyir ye shes kyi pha rol tu phyin pa na shes rab kyi pha rol tu phyin pa'i grogs su gyur pa yin no//snying po gsar pa thob pa na zhes bya ba ni snying po gsar pa dang 'dra zhing mngon par gsar pa'i bcud lta bu'i brjod par bya ba'i don chos smra ba de dang de dag gis thos par gyur pa na mdo sde 'di dag dar bar 'gyur ro zhes phyi ma dang 'brel to//bar ta nir zhes bya ba ni shar phyogs kyi yul du'o/ /gzhung 'dis de bzhin gshegs pa'i mdzad pa byed pa'i yul spyod pa'i yon tan thob pa chos 'dzin pa rnams la sangs rgyas kyis dgongs pa la dogs pa la sogs pa dgag pa'i don yin par shes par bya'o//de nyid ni shA ri'i bu de'i dus na gang zhig ces bya ba la sogs pa gsungs pa yin no/ /snyigs ma lnga bdo ba nyid kyi sems can gyi khams rnams shin tu skal ba med pa yin pa'i phyir/chos rin po che mi dar bar dogs pas shA ri'i bus gsol pa bcom ldan 'das zhes bya ba la sogs pa smos pa yin no/ /phyi ma'i dus zhes bya ba de nyid smras pa ni phyi ma'i tshe na zhes bya ba yin no/ /gzeg zan la sogs pas yongs su brtags pa'i dus rtag pa ni yod pa ma yin te/rim dang cig shos kyis don bya ba byed pa dang bral ba nyid kyis na med pa'i phyir ro/ /de lta mod kyi dngos po'i gnas skabs su 'ga' zhig la phyi ma'i dus zhes bya bar brdar btags pa nyid phyi ma'i dus yin no/ /byang phyogs kyi yul thams cad du ni ma yin gyi/'on kyang byang phyogs kyi char te rgyal ba'i yum la sogs par ro/ /de ltar na gang du zhe na byang phyogs kyi rnam pa de lta bu'i dus su yang dge ba'i rtsa ba bsags pa 'ga' zhig 'byung bar 'gyur ba ni de la shA ri'i bu byang gi yul dang zhes bya ba la sogs pa gsungs pa yin no//de lta na yang mang po nyid ma mthong ba ni bcom ldan 'das byang gi yul dang byang gi phyogs kyi char zhes bya ba la sogs pa gsol pa yin no/ /dge ba'i bshes gnyen la sogs pa'i stobs kyis mang po yang 'byung srid pa ni shA ri'i bu byang gi yul dang zhes bya ba la sogs pa gsungs pa yin no//mang zhing zhes bya ba ni rang gi ngo bo mang ba nyid yin pa'i phyir ro/ /shin tu mang du zhes bya ba ni rigs mang ba'i phyir ro/ /bdun pa zag pa med pa'i chos thams cad yongs su rdzogs pa'i yon tan ston pa ni shA ri'i bu de dag mang mod kyi zhes bya ba la sogs pa gsungs pa yin no//mang po de dag las zhes bya ba ni nyan pa la sogs pa mang ba'i nang nas kyang gnyen po'i chos yongs su rdzogs pa thob pas zag pa med pa'i chos yongs su rdzogs pa'i yon tan mthar phyin pas zhum pa la sogs par mi byed pa ni nyung bar 'gyur ro zhes bya ba'i tha tshig go/ /brgyad pa smra ba'i skyes bu nyid kyi yon tan ston pa ni de dag ni sngon gyi de bzhin gshegs pa zhes bya ba la sogs pa gsungs pa yin te//rjes su 'brang zhing zhes bya ba ni gsum la skyabs su 'gro ba la sogs pa'i tshul gyis rten bcas pa'i phyir ro/ /kun brtags pa la sogs pa rang bzhin gsum yongs su shes pa'i don du 'am/ sgrub pa dang dmigs pa dang yang dag par grub pa gsum rtogs par bya ba'i phyir go rims bzhin du yongs su dris pa dang yongs su zhus pa dang yongs su dri ba byas pa'o zhes bya ba'i tshig gsum smos pa yin no//yongs su rdzogs par byed pa zhes bya ba ni nyes byas phra mo tsam mthong bas so/ /sangs rgyas kyi sa thob par byed pa'i chos thos pa brjed pa na ji ltar na bla na med pa'i byang chub nyid las brtsams te/don byed pa yin snyam pa'i dogs pa de ci'i phyir zhe na zhes bya bas bsu nas de ni 'di ltar zhes bya ba la sogs pa gsungs te/ 'di nyid la yang dag par spyod par 'gyur ro zhes bya ba ni rnam pa thams cad mkhyen pa nyid smra ba'i gtam rnyed pas smra ba'i skyes bu nyid kyi yon tan 'byung ba'i phyir shes rab kyi pha rol tu phyin pa dang rab tu ldan pa'i rnam par rtog pa las 'jug par 'gyur ro//dgu pa mi phyed pa nyid kyi yon tan ston pa ni de dag la legs par gnas shing zhes bya ba la sogs pa gsungs pa yin te/yang dag par spyod pa de dag la rab tu gnas pa'o/ /dbye bar mi nus na zhes bya ba ni de bzhin gshegs pas mgon dang bcas par mdzad pa thob pas na mi phyed pa nyid kyi yon tan skyes pas dbye zhing byang chub las bzlog par bya bar mi nus so/ /'dun pa 'am zhes zhes bya ba ni theg pa chen po'i mdo sde mngon par 'dod pa las so//sngags kyi sgo nas zhes bya ba ni kha cig na re/ lha yi sngags kyis srung byed cing / /dge ba la yang 'jug par byed/ /nad dang dus min 'chi ba dang / /skal ngan dag ni 'jig par 'gyur/ /zhes bya ba'i phan yon mang po dang ldan pa'i sngags kyi spyod pa las kyang dbye bar mi nus so zhes 'dod do//gzhan dag na re bdud sdig can gyi sman gyi mthu dang sngags kyi mthus rnam pa thams cad du shes rab kyi pha rol du phyin pa las bzlog par mi nus pa yin no zhes 'chad do/ /dus su cung zad kyis byang chub thob par mi nus pa ma yin nam/ji ltar na dbye bar mi nus snyam pa'i dogs pa de ci'i phyir zhe na zhes bya bas bsu nas/ de ni 'di ltar zhes bya ba la sogs pa gsungs pa yin te/ des bskal pa grangs med pa mang por brtson 'grus brtsams pa yin pa'i phyir/ byang chub mod la thob pa ma yin pas phyir mi ldog par mi 'gyur ro zhes bya ba'i tha tshig go//bcu pa dge ba'i rtsa ba thun mong ma yin pa skye ba'i yon tan bstan pa ni/ rigs kyi bu dang rigs kyi bu mo gang dag gis zhes bya ba la sogs pa gsungs so/ /de la dga' ba ni 'jig rten las 'das pa'i chos tshol ba gang yin pa'o/ / dang ba ni sangs rgyas dang chos dang dge 'dun la brten pa'o/ /rab tu dang ba ni dga' ba'i sems gang yin pa'o zhes bya ba ni lung yin no/ /yang na sngar smras pa bzhin du bshad par bya'o/ /'thob par 'gyur ro zhes bya ba ni dge ba'i rtsa ba thun mong ma yin pa yongs su bzung bas thob pa'o/ /bcu gcig pa dam bcas pa'i don ci lta ba bzhin du bsgrubs pa'i yon tan bstan pa ni/de dag gis ni zhes bya ba la sogs pa gsungs pa yin no/ /sngon gyi 'phen pa'i shugs med par ji ltar sems can gyi don byed pa yin snyam pa'i dogs pa de ci'i phyir zhe na zhes bya bas bsu nas/ rigs kyi bu dang zhes bya ba la sogs pa gsungs pa yin te/yang dag par gzhag par bya'o zhes bya ba ni byang chub chen por sems bskyed pa la sogs pa la nges par sbyor bas so/ /yang dag par bstan par bya'o zhes bya ba la sogs pa ni sngar bshad zin to/ /yang dag par rab tu dbye bar bya'o zhes bya ba ni dran pa nye bar gzhag pa la sogs pa bsgom pa la 'jug par byed pa yin pa'i phyir ro//rdzogs pa'i byang chub la gnas par bya'o zhes bya ba ni rab tu dga' ba la sogs pa'i sa bdun la 'jog pa'i phyir ro/ /smras so zhes bya ba ni smon lam gyi tshig tu brjod pa'o/ /slar mi ldog par bgyi'o zhes bya ba ni rnam par smin pa'i sa gsum la 'jog pa'i phyir ro//smras so zhes bya ba ni smon lam gyi tshig tu brjod do/ /tshig tu smras kyang don de rdzogs par mi 'gyur na ji ltar don bya ba byed pa nyid yin snyam pa'i dogs pa de ci'i phyir zhe na zhes bya bas bsu nas/ ngas gang dag gis tshig 'di skad ces bya ba la sogs pa gsungs so/ /gang gi phyir de rnams kyi bsam pa rnam par dag pa thugs kyis mkhyen nas/de bzhin gshegs pas gsung gi rjes su yi rang bar mdzad pa de bas na dam bcas pa la yi rang ba thob pa'i phyir rim gyis sbyor ba la bslab pa las/ dam bca'i don ji lta ba bzhin du bsgrubs pa'i yon tan 'byung bas sems can ma lus pa'i don byed pa yin no zhes bya ba'i tha tshig go//bcu gnyis pa 'bras bu rgya chen po yongs su 'dzin pa'i yon tan ston pa ni/ de ltar rigs kyi bu dang zhes bya ba la sogs pa gsungs pa yin te/ mos pa rgya chen po dang ldan pa yin no zhes bya ba ni zab pa dang rgya chen po'i don la lhag par mos pas 'bras bu rgya chen po yongs su 'dzin par byed pa'o//sems can gyi don byed pa'i nus pa thob pas bcu gsum pa sems can gyi don sgrub pa'i yon tan bstan pa ni sangs rgyas kyi zhing de dag tu yang de dag gis zhes bya ba la sogs pa gsungs pa yin no/ /rang gi shes pa'i yul las 'das pa ston pa ngo mtshar skyes pa'i phyir bcom ldan 'das de bzhin gshegs pa zhes bya ba la sogs pa gsol pa yin te/bcom ldan 'das ni 'das pa la sogs pa'i chos rnams la phyin ci log gi bag chags ma lus par spangs pa yin du zin kyang kun rdzob tu rim pa ji lta bar ye shes 'jug par mdzad pa ni ngo mtshar che'o//bar zhes bya bas mthar thug pa bstan pa'i phyir na chos ma yin pa la sogs pa yongs su bzung ngo / /ma gzigs pa ni mig gi rnam par shes pas so/ /ma gsan pa ni rna ba'i rnam par shes pas so/ /mngon par mi mkhyen pa ni sna la sogs pa'i rnam par shes pas so/ /rnam par mi mkhyen pa ni yid kyi rnam par shes pas te/gang yang ma mchis so zhes par sbyar ro/ /dbang po rnams ni gnas ngan len gyi bag chags kyi rang bzhin yin no zhes gsungs pas sangs rgyas nyid kyi gnas skabs su mi shes pa'i rang bzhin gyi dbang po spangs pa yin pas yid kyi blo dang 'dra bar dbang po'i blos yul yongs su gcod pas gang gi phyir bcom ldan 'das rnams kyi rnam par shes pa thams cad yul thams cad pa yin par 'dod de/de bas na dri ma med pa'i spyan la sogs pa'i ye shes kyis ma gzigs pa la sogs pa gang yang ma mchis so zhes bya ba la nyes pa med do//de lta na yang dbang po dang blo ni sngon gyi rjes su 'brangs nas rnam par bzhag pa yin no zhes bya bar khong du chud par bya'o/ /yum mo rnyed pa dang ma tshang ba rnyed pa las bzlog pas bcu bzhi pa nges par rnyed pa'i yon tan bstan pa ni gang de'i tshe na zhes bya ba la sogs pa gsungs pa yin te/[ (]chol [,]tshol [)]ba zhes bya ba la sogs pa'i tshig gsum ni sbyor ba la sogs pa'i gnas skabs su sbyar bar bya'o/ /bcom ldan 'das zhes bya ba la sogs pa gang smras pa legs par smras pa yin pa ni shA ri'i bu de de bzhin no zhes bya ba la sogs pa gsungs pa yin no/ /gang sangs rgyas bcom ldan 'das kyis thams cad sgyu ma lta bur thugs su chud pa zhes bya ba 'di ni chos nyid yin na 'di'i rgyu gang lags zhes smras pa de'i lan ni/shA ri'i bu yang de'i tshe zhes bya ba la sogs pa gsungs pa yin no/ /bcom ldan 'das kyis gsungs pa 'di ni rigs pa dang ldan pa ma yin no snyam pa'i dogs pa de ci'i phyir zhe na zhes bya bas bsu nas/'di ltar byang chub sems dpa' de dag gis zhes bya ba la sogs pa gsungs pa yin te/ ma btsal bar yang rnyed par 'gyur ro zhes bya ba ni shes rab kyi pha rol tu phyin pa ma tshang ba med pa rnyed par byed pa'i sngon gyi dge ba'i rtsa ba dang ldan na sbyor ba la bslabs pas tshang ba rnyed pa'i yon tan bskyed pas nges par thob pa yin no//de las gzhan pa'i mdo sde zhes bya ba ni shes rab kyi pha rol tu phyin pa de las gzhan pa'i ting nge 'dzin gyi rgyal po la sogs pa'i mdo'o/ /rang nyid ces bya ba ni rjes su mthun pa nyid la brten nas las dang byed pa por brjod par 'dod pa'i dbang gis de skad brjod pa yin no//nye bar 'ong bar 'gyur zhes bya ba la sogs pa'i tshig gsum ni thos pa la sogs pa'i shes pa skye ba'i dbye bas sam/ brtags pa la sogs pa'i rang bzhin gsum rtog pas yin par go rims bzhin du sbyar bar bya'o/ / snga ma bzhin du de ci'i phyir zhe na zhes bya bas dogs pa bsu nas/ shA ri'i bu de ni 'di ltar yin te byang chub sems dpa' sems dpa' chen po gang zhig ces bya ba la sogs pa gsungs te/ gang da ltar gyi skye ba la brtson pa mngon par gzhung tshol zhing don yongs su tshol ba spyod pa de rang bzhin yongs su spangs pas skye ba 'phos shing sngon gyi lus dang bral bas tshe gzhan du tshe rabs brjes kyang de las gzhan pa'i skye ba gzhan yongs su bzung yang nges pa'i yon tan thob pas 'di rnyed par 'gyur ba 'di ni chos nyid do zhes bya ba'i tha tshig go//tshig lhur len pas zhus pa ni/bcom ldan 'das pha rol tu phyin pa drug dang ldan pa'i zhes bya ba la sogs pa'o/ /gzhan dag ni ma lags sam zhes bya ba ni pha rol tu phyin pa drug dang bral ba ste ma lags sam/ ci zhes zur gyis 'dri ba'o/ /thun mong gi dge ba'i rtsa ba la rag las pa yin pa'i phyir thams cad nye bar gnas par 'gyur ro zhes gsungs pa ni shA ri'i bu mdo sde zab mo zhes bya ba la sogs pa gsungs te/gzhan gang dag yin pa de dag kyang zhes bya ba ni pha rol tu phyin pa drug dang mi ldan pa'o/ /snga ma bzhin du de ci'i phyir zhe na zhes dogs pa bsu nas/ shA ri'i bu zhes bya ba la sogs pa gsungs te/mi dmigs pa dang ldan pa zhes bya ba ni gang zag la bdag med pa dang rab tu ldan pa'o/ /stong pa nyid dang ldan pa zhes bya ba ni chos la bdag med pa ston par byed pa'o/ /ji skad du bshad pa'i yon tan nyid du gzung bar bya ste/ de skad du yang / bdud kyi mthu bcom la sogs pa//yon tan rnam pa bcu bzhi'o/ /zhes gsungs pa yin no/ /shes rab kyi pha rol tu phyin pa'i bshad pa mngon par rtogs pa'i rgyan gyi snang ba las 'dzin pa'i phan yon yongs su brjod pa'i le'u zhes bya ba ste bcu pa'o// // yon tan gyi 'og tu yang gang zhig yongs su spangs pas/ sbyor ba rnams bsgom par bya ba'i sbyor ba'i bar chad byed pa'i skyon yang gang dag yin zhes de dag gi bar chad du 'gyur ba'i skyon bstan pa'i phyir/ bcom ldan 'das rigs kyi bu dang zhes bya ba la sogs pa gsol to//ci tsam dag ces bya ba ni ji snyed cig ces bya ba'i tha tshig go/ /lan btab pa ni rab 'byor bar chad byed pa'i zhes bya ba la sogs pa gsungs pa yin no/ /de lta na yang bdud kyi las ci tsam mang po yin pa mi shes pas/ bcom ldan 'das bar du gcod pa bgyid pa'i zhes bya ba la sogs pa gsol pa yin te/tshul ji lta bu dag ces bya ba ni grangs ji tsam du nges par chad pa'i rang bzhin gyis mang po 'byung bar 'gyur zhes bya'o / /nyes pa bzhi bcu rtsa drug yin no zhes bstan pa las re zhig tshegs chen pos thob pa ni/ rab 'byor rigs kyi bu dang zhes bya ba la sogs pa gsungs so/ /spobs pa ring mo zhig na zhes bya ba ni/dus ring mo zhig na yum la shes pa skye ba'o/ /spobs pa ha cang myur ba bstan pa ni rab 'byor spobs pa de zhes bya ba la sogs pa gsungs pa yin te/ shin tu myur du skyes pas sngon dang phyi ma'i mtha' nges par ma brtags pa'i phyir/ shes pa brtan po ma yin pa bskyed par 'gyur bas na yengs par 'gyur te/shes rab kyi pha rol tu phyin pa las nyams par 'gyur ro/ /lus kyi gnas ngan len bstan pa'i phyir/ rab 'byor de dag glal ba dang / zhes bya ba la sogs pa gsungs pa yin te/ de la lus rnam par 'gyur bar glal bar byed pa'o/ /ha ha zhes dgod pa la sogs pas dgod pa'o//rang gi lus kyis sam de dang 'brel bas gzhan la bzhad gad byed pas steg cing zhes bya'o/ /sems kyi gnas ngan len bstan par bya ba'i phyir rab 'byor sems rnam par g.yengs pa zhes bya ba la sogs pa gsungs so/ /rnam par shes pa phan tshun dang ldan pas zhes bya ba ni/chags par gyur pa'i dngos po'i rnam par shes pa phan tshun dmigs pa dang ldan pas so/ /rigs pa ma yin pas bskyed pa'i kha don byed pa la sogs pa ston pa ni/ rab 'byor phan tshun bzhad gad byed cing zhes bya ba la sogs pa gsungs pa yin te/ yi ger 'dri na zhes bya ba ni/ nye bar mtshon pa tsam du zad de/kha don byed pa la sogs pa yang gzung ngo / /phyir phyogs pa'i rgyu mtshan 'dzin pa nyid bstan pa ni/ rab 'byor bdag gis zhes bya ba la sogs pa gsungs pa yin te/ thos pa dang bsam pa'i shes pa'i yul ma yin pa nyid kyi phyir go rims bzhin du gting mi rnyed ro mi myang ngo zhes bya bar sbyar ro//rab 'byor bdag gong du skyes pa'i zhes bya ba la bdag ni kho bo'i ma dad pa'i sems bskyed pa mang po ji snyed kyis 'gro bar 'gyur ba de snyed kyi bskal par rnal 'byor du bya ba'i phyir 'khor ba yongs su 'dzin par 'gyur ro zhes bya ba'o/ /'dir rgyu ci zhig yin snyam pa'i dogs pa de ci'i phyir zhe na zhes bya bas bsu nas/rab 'byor ces bya ba la sogs pa gsungs so/ /rgyu la mngon par zhen pa nyams pa bstan pa ni/ rab 'byor gzhan yang zhes bya ba la sogs pa gsungs so/ /sgrub par byed pa zhes bya ba ni skyed par byed pa'o/ /spangs shing bor nas zhes bya ba ni sbyor ba dang bsam pa dag gis zhes brjod par bya'o//blo chung ba zhes bya ba ni blo gros chung ba'o/ /ji lta ba bzhin du yongs su shes pa'i rtsa ba zhes bya ba ni/ yang dag pa'i chos rtogs pa'i rgyu'i gtso bo yin pa'i phyir ro/ /yal ga la zhes bya ba ni nyan thos kyi theg pa la sogs pa'o//gya nom pa'i ro myang ba las nyams pa bstan pa ni/ rab 'byor 'di lta ste dper na zhes bya ba la sogs pa gsungs pa yin no/ /'di la ni rigs pa med do snyam pa'i dogs pa de ci'i phyir zhe na zhes bya bas bsu nas blo chung ba de dag ni zhes bya ba la sogs pa gsungs so/ /sangs rgyas kyi bka' yin du zin kyang ji ltar na nyan thos kyi theg pa la sogs pa sgrub pa smad pa yin snyam pa'i dogs pa de ci'i phyir zhe na zhes bya bas bsu nas/rab 'byor byang chub sems dpa' sems dpa' chen pos zhes bya ba la sogs pa gsungs te/ bkag pa la spyod pa'i phyir smad do zhes bya ba'i tha tshig go/ /dul bar bya'o//zhi bar bya'o/ /mya ngan las 'da' bar bya'o zhes bya ba'i tshig gsum ni sbyor ba dang mthong ba dang bsgom pa'i lam la go rims bzhin du shes par bya'o/ /nyan thos kyi sgrub pa bkag nas byang chub sems dpa'i sgrub pa'i don du gsungs pa ni/ rab 'byor 'on kyang zhes bya ba la sogs pa'o/ / des rlom sems su yang mi bya'o zhes bya ba ni sems can thams cad kyi don dang dge ba'i rtsa ba thams cad mngon par 'dus byas pa rnams kyis dregs par mi bya'o/ /theg pa mchog las nyams pa ston pas gsungs pa ni/ rab 'byor 'di lta ste dper na zhes bya ba la sogs pa'o//glang po che rnyed nas zhes bya ba ni reg pa la sogs pas rnyed pa'o/ /snang ba ga la bar zhes bya ba ni gsal ba'i gnas su'o/ /brtags te zhes bya ba ni nges par dpyad pa'o/ /de ma lags so zhes bya ba ni glang po che'i rjes las glang po che'i kha dog dang dbyibs gzung bar mi nus pa'i phyir de lta ma lags so zhes bya ba'i tha tshig go//ched du bya ba las nyams pa bstan pa'i don du rab 'byor 'di lta ste dper na skyes bu rin po che don du gnyer ba zhig ces bya ba la sogs pa gsungs so/ /mi dpyod cing zhes bya ba ni tshad ma rtogs pa'i phyir ro/ /de ni ma lags so zhes bya ba ni rin po che'i ched du bya ba rgya mtsho chen po las nyams pa'i phyir mkhas pa ma yin pa'o//nang du yang dag par gzhag ces bya ba ni lus la sogs pa dben pa'o/ /tshe 'di nyid la zhes bya ba la sogs pa la da ltar gyi skye ba la phyis skye bar 'gyur ba'i rgyu ma byas par sems nyon mongs pa dag las bsal te/ mar me ltar mya ngan las 'da' bar bya'o snyam pa'o/ /nye bar 'tshe ba thams cad kyi gnas skye ba bkag pa la 'jug pa ji ltar bzlog snyam pa'i dogs pa de ci'i phyir zhe na zhes bya bas bsu nas/ rab 'byor byang chub sems dpa' sems dpa' chen po zhes bya ba la sogs pa gsungs so/ /theg pa chen po la yang dag par zhugs shing zhes bya ba ni theg pa chen po la zhugs pa nyid kyis na/'gro ba'i don bya ba'i phyir go cha bgos pa rnams ni thabs la mkhas pa'i stobs kyis skye bar 'gyur ba yod du zin kyang / nye bar 'tshe ba med pa'i phyir ro zhes bya ba'i tha tshig go/ /spro ba chung ngu la zhes bya ba ni de tsam gyi tshod kyis mgu ba'o//rnyed pa dang bkur sti ni 'ching ba nyid yin pas de lta bu ji snyed pa dag gi snyam pa'i dogs pa de ci'i phyir zhes bya bas bsu nas/ skyes bu dam pa de dag ni zhes bya ba la sogs pa gsungs so/ /'di skad du yang / bdag tu mngon par zhen pas 'dzin na/ nyon mongs pa 'phel bas na snyed pa dang bkur sti 'ching ba yin gyi/yang gang gi tshe sbyin pa la sogs pas gzhan mgu bar byas nas/ pad+ma dang 'dra bar de la ma chags par kha lo sgyur bar gyur pas 'jig rten gyi don byed pa de'i tshe/ nyes pa ci yang yod pa ma yin no zhes brjod pa yin no/ /bcu tshan dang po'o/ /rgyu dang 'bras bu 'brel pa nyams pa bstan pa ni/rab 'byor yang gang zag ces bya ba la sogs pa gsungs pa yin no/ /'di nyid kho na gsal bar ston pa ni/ rab 'byor 'di lta ste dper na zhes bya ba la sogs pa gsungs pa yin te shing mkhan zhes bya ba ni shing bzo mkhan no/ /shing mkhan gyi slob ma zhes bya ba ni/de'i gan na gnas pa'i slob ma'o/ /rnam par rgyal ba'i khang bzangs kyi tshad du zhes bya ba ni ri'i rgyal po ri rab kyi steng gi dbus na grong khyer blta na sdug ces bya ba gser las byas pa/ ngos re re la chur dpag tshad nyis stong lnga brgya'i tshad la dpangs su dpag tshad phyed dang gsum yod pa'i grong khyer de'i dbus na/brgya byin gyi khang bzangs rnam par rgyal ba zhes bya ba ngos re re zhing chur dpag tshad gnyis brgya lnga bcu pa tshad las dpangs su ji ltar mdzes par byas pa ni khang bzangs rnam par rgyal ba'o/ /byed par 'dod/ sgrub par 'dod ces bya ba'i tshig gnyis ni ring zhig na dang myur bar bya ba'i dbye bas smos pa yin no//de ni ma lags so zhes bya ba ni / zla ba dang nyi ma'i gzhal med khang ni ci rigs par dpag tshad lnga bcu dang lnga bcu rtsa gcig gi tshad nyid yin la/ rnam par rgyal ba ni tshad de las lhag pa nyid kyis na rgyu dang 'bras bu rjes su mthun pa las bzlog pa ston pa ma yin no zhes bya ba'i tha tshig go//gang na med pa nyams pa bstan pa ni/ rab 'byor 'di lta ste dper na skyes bu la la zhig ces bya ba la sogs pa gsungs pa yin te/ de la kha dog ni ser po nyid la sogs pa'o/ /dbyibs ni ring po nyid la sogs pa'o/ /gzi brjid ni mtshan la sogs pa phun sum tshogs pa'o//rdzu 'phrul ni nam mkha' la 'gro ba la sogs pa'o/ /mtshan ma ni thun mong ma yin pa'i dngos po'i mtshan ma'o / /bye brag shes par ma nus pas zhes bya ba ni kha dog la sogs pa 'dra ba tsam du dmigs pas blo 'khrul pa nyid yin pa'i phyir ro/ /nyan thos kyi theg pa yang de bzhin gshegs pa nyid thob par byed pa'i snying rje la sogs pa bstan pa'i phyir/ji ltar na des rnam pa thams cad mkhyen pa nyid btsal bar mi bya'i snyam pa'i dogs pa/ de ci'i phyir zhe na zhes bya bas bsu nas mdo sde gzhan dag tu zhes bya ba la sogs pa gsungs te/ rnam pa thams cad ma bstan pa'i phyir na bstan kyang mi gsal ba yin no zhes bya ba'i don to/ /chos dang longs spyod rdzogs par sprul pa'i sku gsum las nyams pa ni go rims bzhin du 'khor los sgyur ba dang kha zas ro brgya pa dang / nor bu rin po che rin thang med pa'i dpes bstan pa yin no/ / yul rnams mang po la rnam par rtog pa'i spobs pa 'byung ba bstan pa ni/ /rab 'byor gzhan yang zhes bya ba la sogs pa gsungs pa yin no/ /nyes pa rnam pa bzhi bstan pa'i don du bcom ldan 'das shes rab kyi pha rol tu phyin pa zhes bya ba la sogs pa gsol to/ /de ni ma yin no zhes bya ba ni de kho na nyid du na ye shes sgyu ma lta bu yin pa'i phyir ro zhes bya bar dgongs so//bris par sems pa zhes bya ba ni/ yi ger mngon par zhen pa'o/ /med pa'o zhe 'am zhes bya ba ni/ dngos po med pa la mngon par zhen pa'o/ /yi ge dag la shes rab kyi pha rol tu phyin par mngon par chags pa 'am zhes bya ba ni yi ge la mngon par zhen pa'o//yi ge med pa'o snyam na zhes bya bas ni/ yi ge med pa la mngon par zhen pa bshad pa yin no/ /yul la sogs pa yid la byed pa bstan pa ni rab 'byor gzhan yang shes rab kyi pha rol tu phyin pa zhes bya ba la sogs pa gsungs pa yin no /de la yul ni nyams dga' ba la sogs pa'o/ /grong ni khyim gcig la sogs pa yod pa'o/ /grong khyer ni bzo'i bye brag bco brgyad yod pa'i gnas so/ /grong rdal ni tshong pa mang po yod pa'i gnas kyi khyad par ro/ /ljongs ni rigs bzhi gnas pa'i sa phyogs so/ /yul 'khor ni tsam la sogs pa'i yul chen po rnams so//rgyal po'i pho brang 'khor ni rgyal po'i pho brang dang bcas pa'i yul lo/ /kun du ston pa ni skyes pa'i rabs la sogs pa'o/ /la gcan ni 'phrang btsas kyi gnas so/ /bi shi kha ni yo byad kyi khyad par ro/ /shi bi ka ni khyogs la sogs pa'o//mdza' ba dang mi mdza' ba dang ldan pa ni sdug pa dang mi sdug pa dang bral ba'o/ /'phral gyi bya ba yid la byed pa ni rtag tu bya ba'o/ /la gcan gyi cho lo la lta ba ni la gcan gyi gnas su shugs la sogs pa rtse ba la blta ba'o/ /lhag ma ni go sla ba'i phyir rnam par ma phye ba'o/ / rnyed pa dang bkur sti dang / tshigs su bcad pa'i ro myang ba bstan pa ni/ rab 'byor gzhan yang byang chub sems dpa' zhes bya ba la sogs pa gsungs pa yin te/ rnyed pa dang bkur sti dang tshigs su bcad pa dag gi ro myang ba zhes bya ba la rnyed pa ni rin po che la sogs pa thob pa'o/ /bkur sti ni dpal gyi dar dpyangs bcing ba la sogs pa'o//tshigs su bcad pa ni snyan pa'o/ /de rnams nyams su myong bar byed pa ni ro myang ba'o/ /lam ma yin pas thabs la mkhas pa tshol ba bstan pa ni/ rab 'byor gzhan yang zhes bya ba la sogs pa gsungs pa yin no/ /stong pa nyid la sogs pa dang rab tu ldan pa dag la ji ltar 'dod pa mi bskyed snyam pa'i dogs pa de ci'i phyir zhe na zhes bya bas bsu nas/rab 'byor 'di ltar mdo sde de dag las zhes bya ba la sogs pa gsungs pa yin no/ /bcu tshan gnyis pa'o/ /'dis ni re zhig 'di la 'jug pa'i bar chad rnams bshad pa yin no//da ni 'jug pa'i dang po kho nar tshogs dang bral bar brjod par bya ba yin no/ /des na 'dun pa dang snyom las kyis bral ba'i don du rab 'byor gzhan yang chos nyan pa dag ces bya ba la sogs pa gsungs so/ /'dun pa dang ldan pa zhes bya ba mngon par 'dod pa phun sum tshogs pa'o//snyom las byed par 'gyur te/ zhes bya ba ni le lo dang ldan pa ste/ brtson 'grus dang bral ba zhes bya ba'i don to/ /'dun pa'i yul tha dad pas bral ba'i don du rab 'byor gzhan yang chos nyan pa dag ces bya ba la sogs pa gsungs pa yin no/ /de la rtogs pa dang ldan pa ni don lhag par rtogs pa dang ldan pas so//blo dang ldan pa ni don de tsam zhig rtogs pas so/ /dran pa dang ldan pa ni yid gzhungs pa dang ldan pas so/ /yul gzhan du 'gro bar 'gyur zhes pa 'dis ni/ nyan pa po 'dun pa'i yul las ston pa po'i 'dun pa'i yul gzhan yin par ston pa yin no//mgo smos pas go ba yin zhes bya ba ni/ gzugs zhes bya ba la sogs pa brjod pa na gzugs la sogs pa'i phung por yongs su mi shes pas so/ /rnam par spros te go ba ma yin pa ni gzugs ni gzugs su rung ba'i mtshan nyid do zhes bya ba la sogs pa brjod pa la/de'i don khong du ma chud pa'i phyir ro/ /mi shes pas ni gzugs rnam pa nyi shu'o zhes smras pa na de'i don khong du mi chud pa'i phyir ro/ / rab 'byor gzhan yang chos smra ba zhes bya ba la sogs pa gsungs pa yin te/ chos smra ba dang nyan pa po dag sbyin par 'dod pa dang /yul gzhan du 'gro bar 'dod pa nyid kyis 'dun pa'i yul tha dad pa'i phyir ro/ /rnyed pa lhur len pa dang / 'dod pa chung bas bral ba'i don du rab 'byor gzhan yang chos smra ba ni zang zing lhur byed ces bya ba la sogs pa gsungs so/ /'gres 'di nyid kyis ni sbyangs pa'i yon tan dang ldan pa dang mi ldan pa dag brjod pa yin te/'di ltar go rims bzhin du rnyed pa la sogs pa lhur len pa nyid kyis na/ sbyangs pa'i yon tan dang mi ldan pa dang 'dod chen chung ba la sogs pa nyid kyis na sbyangs pa'i yon tan dang ldan par ston to/ /dge ba dang dge ba ma yin pa'i chos nyid kyi don du rab 'byor gzhan yang zhes bya ba la sogs pa gsungs so//de la dge ba'i chos dang ldan pa nyid kyis na dad pa'o/ /de las bzlog pas ni ma dad pa'o/ /'gres su bstan pa 'di nyid kyis ni stong pa dang ser sna byed pa gsungs pa yin te/ 'di ltar nor yongs su gtong bar 'dod la zhes bya ba ni nyan pa po'i gtong ba dang smra bar mi 'dod na zhes bya bas ni 'chad pa po'i ser sna bshad pa yin no//'di nyid kyis ni sbyin pa dang mi len pa bshad pa yin te/ 'di ltar snga ma bzhin du nyan pa po'i sbyin pa dang 'chad pa po'i 'dod pa chung ba nyid kyis mi len pa ston to/ /mgo smos pa dang rnam par spros pas go ba nyid kyi don du/rab 'byor gzhan yang chos nyan pa ni zhes bya ba la sogs pa gsungs so/ /don khong du chud par 'dod pa zhes bya ba ni mgo smos pas go ba nyid yin pa'i phyir don rtogs par 'dod pa'o/ /chos kyi bar chad du gyur pas zhes bya ba ni dam pa'i chos spong bar byed pa la 'jug pas so//mdo sde de dag glegs bam la sogs pa'i tshul gyis med pa'o/ /mi 'jug na zhes bya ba ni rnam par spros pas go ba nyid yin pas de khong du chud pa'i lam du mi 'gro ba'o / /chos smra ba ma rnyed pa zhes bya ba ni chos 'chad pa dang ma phrad pa'o/ /mi mthun pa brjod par 'gyur ro zhes bya ba ni bdag gis mnyan par mi bya'o zhes mi mthun pa'i tshig go//mdo sde la sogs pa'i chos mngon par shes pa dang mngon par mi shes pa nyid kyi don du/ rab 'byor gzhan yang zhes bya ba la sogs pa gsungs so/ /'chad par 'dod pa zhes bya ba ni mdo sde la sogs pa'i chos mngon par shes pa nyid kyis smra bar 'dod pa'o//nyan mi 'dod na zhes bya ba ni mdo sde la sogs pa'i chos de dag nyid mngon par mi shes pa nyid kyis nyan thos par mngon par 'dod pa dang bral ba'o/ /pha rol tu phyin pa drug dang ldan pa dang mi ldan pa zhes bya ba'i bdud kyi las ni 'gres 'di nyid kyis gsungs pa yin te 'di ltar smra bar 'dod pa zhes bya ba 'dis ni sems can la phan gdags pa'i bsam pas pha rol tu phyin pa drug dang ldan pa'o//nyan mi 'dod pa zhes bya ba 'dis ni mi mthun pa la brten pas sbyin pa la sogs pa dang bral bar ston pa yin te/ bcu tshan gsum pa'o/ /thabs la mkhas pa dang thabs la mkhas pa ma yin pa dang /gzungs thob pa dang ma thob pa dag dang yi ge 'dri 'dod pa dang / yi ger 'dri mi 'dod pa dag dang / 'dod pa la sogs pa'i 'dun pa dang bral ba dang ma bral ba nyid nyan pa po thog mar byas te/ bstan pa ni rab 'byor gzhan yang chos nyan pa ni zhes bya ba la sogs pa gsungs pa yin te nyan pa po'i gnyid che ba la sogs pas lci bar gyur pa nyid kyis nyan mi 'dod pas ni bkag pa'i yul dang ldan pa la sogs pa dang /chos smra ba'i 'chad 'dod pa nyid kyis ni ma bkag pa'i yul dang ldan pa la sogs pa brjod par rig par bya'o/ /ji skad du bshad pa'i don nyid chos smra ba thog mar byas te bstan pa ni/rab 'byor gzhan yang chos smra ba gnyid che zhing zhes bya ba la sogs pa gsungs pa yin no/ /ngan song gi 'gro ba'i las phyir phyogs pa'i don du rab 'byor gzhan yang shes rab kyi pha rol tu phyin pa yi ger 'dri ba dang zhes bya ba la sogs pa gsungs pa yin te/'di ltar sdug bsngal ba'o zhes bya ba la dmyal ba'i sdug bsngal ni mnar med pa'i lus 'bar ba la sogs pa'o/ /byol song gi sdug bsngal ni gcig la gcig za ba la sogs pa'o/ /yi dags kyi sdug bsngal ni bkres pa dang skom pa la sogs pa'o/ /lha ma yin thams cad kyi sdug bsngal ni khyab 'jug gi 'khor lo la sogs pa'i 'jigs pa'o//'du byed kyi sdug bsngal ni skye ba la sogs pa'i 'du shes thams cad do/ /'di nyid du sdug bsngal mthar dbyung bar bya'o zhes bya ba'i rjes thogs nyid la de ltar thos nas sems can gyi don gyi phyir ngan song du 'gro ba las kyi phyir phyogs par bya'o zhes bya ba ni lhag ma'o/bde 'gror 'gro ba yid bde ba'i don ni/ /rab 'byor gzhan yang zhes bya ba la sogs pa gsungs so/ /de la mi brtan pa ni rgyun chad pas so/ /mi rtag pa ni skad cig ma'i mi rtag pas so/ /sdug bsngal ba ni 'du byed kyi sdug bsngal dang ldan pas so//'gyur ba'i chos can ni 'gyur ba'i sdug bsngal yod pa'i phyir ro/ /de ltar na de dag thams cad mi brtan pa zhes bya ba la sogs pa ni 'dus byas thams cad mi rtag pa zhes bya ba la sogs pa'i bshad pa yin par shes par bya'o/ /skyo bar byed par 'gyur te zhes bya ba ni 'bras bu dang po la sogs pa bde 'gro la mngon par 'dod pas byang chub kyi spyod pa byed pa las phyir phyogs par byed pa'o//phal cher dang por nyan pa po dang phyis 'chad pa po la nges par byas pa'i tshogs pa dang mi ldan pa bstan nas/ da ni yang dang por 'chad pa po phyis nyan pa pos nges par byas pa'i chags pa dang mi ldan pa brjod pa ni/bar du gcod pa'i go rims ma nges par shes par bya ba'i don yin no/ /de la gcig pu dang 'khor la mngon par dga' ba nyid kyi don ni/ rab 'byor gzhan yang dge slong chos smra ba gang yin pa de ni gcig pu mngon par dga' bar 'gyur la/ chos nyan pa gang yin pa de yang 'khor lhur len par byed par 'gyur ba dang zhes bya ba la sogs pa gsungs pa yin no//'brang bar 'dod pa dang go skabs mi 'byed pa nyid kyi don ni/ chos smra ba de yang 'di skad du zhes bya ba la sogs pa gsungs pa yin te / bsnyen par byed pa zhes bya ba ni rjes su 'brang bar byed pa'o/ /go skabs 'byed par mi 'gyur ba dang zhes bya ba ni/shes rab kyi pha rol tu phyin pa sbyin par bya'o zhes smras pa de sbyin pa'i go skabs 'byed par mi byed pa'o/ /zang zing cung zad tsam 'dod pa dang de sbyin par mi 'dod pa nyid kyi don ni chos smra ba de yang zhes bya ba la sogs pa gsungs te/ de yang sbyin par mi 'dod pa zhes bya ba ni chos nyan par byed pa nor sbyin par mi 'dod pa'o//srog gi bar chad du 'gyur ba dang bar chad du mi 'gyur ba'i phyogs su 'gro ba'i don de ni gang dang gang na mu ge dang grub pa dang bde ba med pa zhes bya ba la sogs pa gsungs pa yin te/ mu ge zhes bya ba ni kha zas dkon pa nyid kyis slong mo rnyed par dka' ba'o//grub pa dang bde ba med pa zhes bya ba la 'dod pa thob pa ni grub pa'o/ /'tshe ba med pa nyid ni bde ba ste/ de gnyi ga med pas grub pa dang bde ba med pa'o/ /srog gi bar chad du 'gyur ba zhes bya ba ni dbang po 'gag par byed pa'o/ /phyogs der srog gi bar chad du 'gyur ro zhes rig pa zhes bya ba ni khyed bar chad med pa'i phyogs su 'gro bar bya'o zhes bya ba ni lhag ma ste/bcu tshan bzhi pa'o/ /mu ge 'byung ba'i phyogs su 'gro ba dang mi 'gro ba'i don ni/ chos smra ba de yang rigs kyi bu de dag la zhes bya ba la sogs pa gsungs te/ gal te zhes bya ba ni brgya la na'o//bsnyen par mi byed do zhes bya ba ni rjes su 'gro bar mi byed do zhes bya'o/ /chom rkun la sogs pas dkrugs pa'i phyogs su 'gro ba dang mi 'gro ba'i don ni/ rab 'byor gzhan yang zhes bya ba la sogs pa gsungs pa yin no/ /de la srog chags ni sdig pa la sogs pa'o/ / gcan gzan ni gdon gdug pa can no/ /mi ma yin pa ni yi dags la sogs pa'o/ /sdig sbrul ni sbrul gdug pa'o/ /dgon pa ni 'jigs pa can no/ /sha za ni gnod sbyin la sogs pa sha rlon pa za ba'o/ /phyir ldog par 'gyur ro/ /zhes bya ba ni slar bzlog par bya'o / /khyim lta ba dang yid mi bde ba'i don ni/rab 'byor gzhan yang dge slong chos smra ba de mdza' bo'i khyim dang zhes bya ba la sogs pa gsungs pa yin no/ /nye bar bsdu ba'i don ni rab 'byor de ltar bdud sdig can ni zhes bya ba la sogs pa gsungs pa yin no/ /bdud kyis 'byed pa'i rgyu zhus pa ni bcom ldan 'das rgyu ci'i slad du zhes bya ba la sogs pa yin no//de lta de lta bur thabs su sbyor zhing zhes bya ba ni sngar bshad pa'i rnam pa las gzhan pa'i thabs kyis bgegs bya ba'i don du 'bad pa'o/ /'bad pa cher rtsol zhes bya ba ni theg pa chen po dang rnam par dbye ba la 'bad par bgyid pa'o//rgyu ston par mdzad pa'i phyir rab 'byor sangs rgyas bcom ldan 'das rnams kyi zhes bya ba la sogs pa gsungs pa yin no/ /bcos ma nye bar bsgrub pa'i don du rab 'byor gzhan yang bdud sdig can dge slong gi cha byad du 'ongs nas zhes bya ba la sogs pa gsungs te/ mdo sder gtogs pa zhes bya ba ni mdo sde gzhan dang rjes su mthun pa'i phyir ro//mdo sde'i nang du chud pa'i don rnam par nges pa la sogs pa rang gi mdo sde la snang ba'i phyir ro/ /blo chung ba/ blo zhan pa/ blo dman pa zhes bya ba ni go rims bzhin du brtags pa la sogs pa rang bzhin gsum yongs su ma shes pa yin par brjod par bya'o//yum dang 'dra ba'i mdo sde bsgrubs pas the tshom skyes pa'i phyir the tshom za bar 'jug pa'o/ /de nyid bstan par bya ba'i phyir 'dongs par gyur pa zhes bya ba gsungs pa yin no/ /yul ji lta ba bzhin ma yin pa dga' ba skyed pa bstan pa ni/ rab 'byor gzhan yang zhes bya ba la sogs pa gsungs pa yin te/yang dag pa'i mtha' mngon du byed cing zhes bya ba ni/ nges par 'dis de la mngon par dga' ba bskyed pas nyan thos kyi mya ngan las 'da' ba thob par byed pa'o/ /de ltar na nyes pa drug go/ /bdud kyi las kyi rnam pa nyung zad cig bstan nas/ gzhan dag bsgre bar bya ba'i phyir/ rab 'byor de ltar shes rab kyi pha rol tu phyin pa zhes bya ba la sogs pa gsungs so//nor bu rin po che la dgra mang ba'i dpes sngar gsungs pa nyid nges par bya ba'i phyir/ bcom ldan 'das de de bzhin te zhes bya ba la sogs pa gsol pa yin no/ /de ci'i phyir dgra mang ba nyid yin snyam pa'i dogs pa de ci'i phyir zhe na zhes bya bas bsu nas/'di lta ste rnyed par dka' zhing rin che ba'i slad du ste/ zhes bya ba la sogs pa gsol pa yin no/ /legs par smras so zhes bya ba ni/ rab 'byor de de bzhin te zhes bya ba la sogs pa gsungs pa yin no/ /bar du gcod pa mang ba nyid yin na yang de bzhin gshegs pa'i mthu nyid kyis rnyed par 'gyur ba ni/rab 'byor 'di ltar bdud kyi nyes pa dang zhes bya ba la sogs pa gsungs pa yin no/ /de bzhin gshegs pa'i mthur yongs su brtag pa'i rgyu ci zhig yin snyam pa'i dogs pa/ de ci'i phyir zhe na zhes bya bas bsu nas/ 'di la bdud sdig can yang zhes bya ba la sogs pa gsungs pa yin no//shes rab kyi pha rol tu phyin pa'i bshad pa mngon par rtogs pa'i rgyan gyi snang ba las/ bdud kyi las kyi le'u zhes bya ste bcu gcig pa'o// //de bzhin gshegs pa rnams brtson pa cher mdzad pa nyid dpes gsal bar bya ba'i phyir/ rab 'byor 'di lta ste dper na zhes bya ba la sogs pa gsungs so/ /mi bde bar reg pa la gnas pa zhes bya ba ni mi bde bar gnas pa'o/ /yid du mi 'ong ba zhes bya ba ni sems kyis mngon par mi 'dod pa'o/ /snga ma bzhin du de ci'i phyir zhe na zhes dogs pa bsu nas/ 'dis ni bdag cag bskyed de zhes bya ba la sogs pa gsungs pa yin no//de la kha cig gis kha zas la sogs pa nye bar ston pas legs par bzung ba la/ gzhan rnams kyang 'dzin pa dang / rkun po la sogs pa las bsrung ba byas pa nyid kyis legs par sbas pa las sbed pa dang lus kyi dri ma la sogs pa byi dor byas pas legs par bcos pa las 'chos pa'o//nyam thag pa ni thog 'bab pa la sogs pa'o/ /ye 'drog gam zhes bya ba ni 'go ba'i nad thams cad do/ /mi 'dod pa 'byung ba zhes bya ba ni yid du mi 'ong ba'i dngos po 'byung ba'o/ /dpes bstan pa'i don ni rab 'byor de bzhin du de bzhin gshegs pa zhes bya ba la sogs pa gsungs pa yin te/de bzhin gshegs pa ni 'jig rten gyi khams 'di na bzhugs pa nyid yin par bzung ste/ gang gi phyir rjes thogs su 'og nas 'jig rten gyi khams gzhan dag na zhes bya ba la sogs pa 'chad par 'gyur ba yin na / bar chad byed par mi 'gyur zhes bya ba ni sngar ji skad bshad pa'i skyon bzhi bcu rtsa drug gi tshul gyis bar chad byed par mi 'gyur ba de ltar brtson pa cher mdzad do zhes snga ma dang sbyar ro//de skad du yang / skyon ni bcu tshan bzhir bcas pa/ /drug tu nges par rtogs par bya / /zhes gsungs pa yin no/ /go rims bzhin du yon tan dang skyon dag blang ba dang dor ba'i sgo nas sbyor ba bsgom par bya ba ni mtshan nyid shes pa sngon du 'gro ba yin pa'i phyir skyon gyi 'og tu/sbyor ba rnams kyi mtshan nyid byed par sgrub pa bzung bas shes pa dang / khyad par dang / byed pa'i ngo bo nyid dang / las su sgrub pa bzung bas/ ngo bo nyid kyi bdag can brjod par bya'o//de skad du yang / gang gis mtshon te mtshan nyid du/ /shes bya de yang rnam pa gsum/ /shes dang khyad par byed pa ste/ ngo bo nyid gang mtshon bya yang / /zhes gsungs pa yin no/ /de la re zhig shes pa'i mtshan nyid thams cad mkhyen pa nyid gsum gyi dbye bas tha dad pa las thams cad shes pa nyid kyi sgo nas/de bzhin gshegs pa 'byung ba'i shes pa bstan pa ni/ rab 'byor de bzhin gshegs pa zhes bya ba la sogs pa gsungs so/ /'di ni rigs pa dang bral ba yin no snyam pa'i dogs pa/ de ci'i phyir zhe na zhes bya bas bsu nas/ 'di ni de bzhin gshegs pa zhes bya ba la sogs pa gsungs te/ de la bskyed par mdzad pas na yum mo/ /yang dag par gso ba mdzad pas na skyed pa'o/ /yang dag par skyed pas na thams cad mkhyen pa nyid ston pa'o/ /'jig rten kun tu ston pa'o zhes bya ba ni/ stong pa nyid la sogs pa'i tshul gyis thugs su chud par byed pa'i phyir ro//'dir rang gi sde pa kha cig na re gang gi tshe ye shes gcig gis shes bya'i dkyil 'khor ma lus pa la kun rdzob tu cig car khyab na/ de'i tshe dngos po rnams ni 'di tsam du zad do zhes yongs su bcad pas mtha' yas par khas blangs pa las gnod do/ /'di ltar shes pa gcig la zhugs pa'i dngos po las gzhan pa'i dngos po med do zhes de ltar yongs su gcod pa na mtha' dang ldan par ci ltar mi 'gyur zhes zer ro//'di la snying po med de/ gal te re zhig rnam par shes pa med pa la brten te/ rgol na de'i tshe thams cad 'brel pa med de/ 'di ltar dngos po'i rigs cung zad yod pa nyams su myong ba ji snyed pa de thams cad ni yod pa yin pa tsam gyis thams cad mkhyen pa'i thugs kyis gcod pa'i phyir des khyab pa yin no zhes bsnyad pa yin gyi /gzhan dag dang 'brel pas yul non pa'i phyir khyab pa ni ma yin no/ /gang gis de dag shes pa gcig gis yongs su bcad pa'i dbang gis rang gi rang bzhin mtha' med pa nyid nyams par 'gyur ba shes pa gcig gis yongs su bcad ces te/de tsam gyis dngos po rnams kyi bdag gi rang bzhin spang ba yang ma yin no/ /khra bo la sogs pa bkram pa na sngon po dang ser po la sogs pa'i dngos po mang po cig car shes pa gcig gis nges par bya ba'i lus can rnams du ma nyid 'dor ba ma yin la phan tshun rjes su 'jug pa yang ma yin gyi 'on kyang de dag ji ltar yod pa de kho na ltar shes pas yongs su bcad de rang bzhin gzhan gyis ni ma yin no//de bzhin du sems can dang snod kyi 'jig rten yang ji ltar yod pa nyid nyams su myong ba de kho na bzhin du thams cad mkhyen pa'i thugs kyis 'dzin to//phyogs dang mtshams rnams su sems can la sogs pa'i 'jig rten du gnas pa yang mtha' med pa yin pas na/ mtha' med pa nyid du 'dzin gyi mtha' dang ldan par gnas par ni ma yin pas mtha' dang ldan par thal bar ga la 'gyur/'di snyam du ma lus par khas len pa mtha' yod par ji ltar mi 'gyur snyam na/ de ni yod pa ma yin te/ gang du ma lus pa 'dzin pa der nges par mtha' yod par 'dzin to zhes bya ba'i 'brel par gyur pa ci zhig yod/ /'di ltar dngos po ci snyed yod pa de rnams kyi nang nas thams cad mkhyen pa'i ye shes kyis ma rig pa'i yod pa nyid nyams su myong ba ni gcig kyang yod pa ma yin te/'on kyang thams cad mkhyen pa'i ye shes kyis rig bzhin pa nyid nam skyes pa dang 'jig pa yin pas gcig kyang yongs su dor ba med do zhes bya ba 'di ni ma lus par 'dzin pa'i don yin no//'di ni de rnams kyi ye shes gcig gis khyab pa yin te gzhan du na de rnams kyi ma lus par sgrar brjod pa nyid kyang khas blang bar mi bya ste/ mtha' dang ldan par thal bar 'gyur bas so/ /des na 'di ni cir yang mi rung ngo / /shes pa gcig la zhugs pa'i dngos po las gzhan med do zhes de ltar yongs su bcad pa'i phyir mtha' dang ldan par ji ltar mi 'gyur zhes gang brjod pa de yang yang dag pa ma yin no//shes pa rnam pa med par smra ba'i phyogs la shes pa'i bdag nyid dngos po rnams zhugs pa ni ma yin no/ /'on kyang yod pa tsam gyis des rig pa yin no//dngos po rnams shes pas yongs su bcad pa'i ngo bo nyid kyis mtha' med pa nyid du khas len pa yang ma yin na/ gang gis shes pa nyid kyis de rnams mtha' dang ldan par thal bar 'gyur/ 'on kyang yul gyi bkod pa mtha' yas pa nyid kyis/snod kyi 'jig rten ni mtha' yas pa yin la/ sems can gyi 'jig rten ni grangs mtha' yas pa nyid kyis kyang yin no/ /gang gis gzung ba ma yin par 'gyur ba/ yul gnon pa la sogs pa mtha' med par 'gyur ba yin na/ gzung ba nyid du 'gal ba yod pa ma yin no/ / gal te mtha' yod pa nyid du mi 'dzin na/ thams cad mkhyen par ci ltar 'gyur zhe na/ de nyid kyi phyir te gang gi phyir 'di mtha' dang ldan pa nyid du mi 'dzin pa de nyid kyi phyir thams cad mkhyen par 'gyur te/ gzhan du na dngos po mtha' med pa la mtha' yod pa nyid du 'dzin na 'khrul par 'gyur ro/ / 'di ltar gang yod pa de ni yod pa nyid du gang med pa de ni med pa nyid du 'dzin pa de ni thams cad mkhyen pa zhes bya'o/ /sems can dang snod kyi 'jig rten gyi mtha' yang yod pa ma yin te/ de bas na gang zhig mtha' yod par rtogs par byas pa'i med pa ni med pa nyid du mkhyen la/ thams cad mkhyen pa'i ye shes kyis rtogs par byas pa'i mtha' med pa ni yod pa nyid du gzigs pa ni ji ltar thams cad mkhyen pa ma yin pa zhes bya/'di snyam du shes pa rnam pa med pa'i phyogs la yul 'dzin par mi 'thad de/ de ni thams cad du bye brag med pa yin pa'i phyir de las so sor rnam par 'byed pa mi 'thad pa'i phyir ro//de bas na rnam pa med pa'i phyogs ni dgod par bya ba ma yin pa nyid de de ni rnam pa thams cad du nyes pa dang bcas pa'i phyir ro snyam na 'di ni legs pa ma yin te/ thams cad mkhyen pa'i ye shes ni las so sor rnam par 'byed pa mi 'dod de de'i yul dngos po thams cad yin pa'i phyir ro/ /'di ltar de ni sngon po nyid kyi rig pa 'am ser po nyid kyi rig pa yin no zhes mi 'dod do//rnam pa med pa'i phyogs la tshu rol mthong ba'i shes pa so sor nges pa'i yul 'dzin pa de thams cad la khyad par med pa'i phyir las so sor rnam par 'byed pa med pa'i nyes pa yod par brjod de/ 'di ltar 'di ni sngon po nyams su myong ba yin gyi/ser po'i ma yin no zhes nges pa med pas/ so so'i skye bo thams cad kyang thams cad mkhyen par thal bar sgrub par byed do/ /thams cad mkhyen pa la ni de 'dod pa nyid yin na/ de la mi 'dod pa ji zhig sgrubs / de bas na thams cad mkhyen pa'i skabs su rnal 'byor gyi stobs kyis rnam pa med pa skye ba na 'gal ba med pa nyid yin no//blang ba dang dor ba'i dngos po rnam par phye nas yongs su shes par mi 'gyur ro zhe na ma yin te/ gal te dngos po mtha' yas pa cig car snang ba na blang ba dang dor ba'i dngos po rnams snang ba 'gal bar 'gyur ba'am mi 'gal na yang de gzhan dag dang lhan cig snang bar gyur pa na blang ba dang dor ba'i dngos po'i ngo bo las nyams par 'gyur ba'am ngo bo nyid las ma nyams na yang rnam par phye nas snang bar mi 'gyur ba'am rnam par phye bar snang yang gal te yongs su gcod par byed pa dag pa 'jig rten pa'i rnam par rtog pa'i shes pa rjes las thob par 'byung bar ma gyur pa yin na 'di dag thams cad brjod du rung bar 'gyur na/gang gi phyir 'gro ba sna tshogs pa snang ba blang ba dang dor ba'i dngos po de yang snang ba mi 'gal zhing / rang gi ngo bo nyid las ma nyams pa dang rnam par phye ba yang snang ba dang /phyis rnam pa thams cad mkhyen pa nyid kyi ye shes kyi stobs las skyes pa'i dag pa 'jig rten rnam par rtog pa'i shes pas rnam par gcod pa nyid yin pa des na de char phye bas/ yongs su mi shes pa ci ltar yin/de ltar de ni re zhig rnam pa med pa'i shes pa'i phyogs la brtsad du mi rung bar bstan to//'on te shes pa rnam pa dang bcas par smra ba'i phyogs la rgol na de lta na yang 'gal ba med pa nyid yin te/ 'di ltar ji ltar dngos po mtha' yas pa de rnam pa mtha' yas pa dang rjes su 'brel pa'i bdag nyid du yod par nyams su myong ba de bzhin du thams cad mkhyen pa'i thugs de dngos po dpag tu med par rtogs pa'i rnam pa nye bar 'dzin par skye ba na 'gal ba med pa nyid yin te/shes pa gcig dngos po du ma nye bar 'dzin par skye ba mi 'gal ba yin pa'i phyir ro/ /gcig la rnam pa du ma nyid 'gal ba kho na'o zhe na ma yin te/ rnam pa rnams ni bden pa ma yin pa'i phyir ro/ /gal te gcig gi rnam pa don dam pa yin par gyur na ni/de'i tshe gcig sna tshogs pa nyid du 'gyur bas 'gal ba yin na/ gang gi phyir rnam pa rnams ni bden pa ma yin pa kho na'o zhes 'dod pa yin no/ /gal te de lta yin na 'khrul pa'i shes pa dang ldan pas thams cad mkhyen pa 'khrul par 'gyur ro zhe na ma yin te yang dag pa ji lta ba bzhin du yongs su mkhyen pa'i phyir/nyes pa med pa kho na'o/ /gal te mi bden pa la bden pa nyid du 'dzin na de'i tshe 'khrul par 'gyur gyi gang gi tshe mi bden par gyur pa'i rnam pa la mi bden pa nyid du mkhyen pa de'i tshe 'khrul par ci ltar 'gyur/ don las tha dad par shes pa la gnas pa'i rnam pa 'dzin pa na don la mthong ba la sogs pa'i tha snyad du byed pa ji ltar 'khrul pa ma yin zhe na ma yin te yang dag pa'i thabs mkhyen pa'i phyir ro//gal te 'dzin pa'i thabs su rigs pa dor nas gtso bo ma yin pa'i thabs gzhan gyis 'dzin pa de'i tshe 'khrul par 'gyur ba zhig na/ gang gi phyir shes pa rnam pa dang bcas par smra ba'i phyogs la/rnam pa nyams su myong ba las ma gtogs par shes pa la don 'dzin pa'i byed pa gzhan med pa des na don gyi khyad par 'dzin pa'i byed pa rnam par rig pas don 'dzin pa 'khrul par ji ltar 'gyur/ de bas na shes pa dngos po mtha' yas pa'i rnam pa 'dzin par skye ba'i phyir na shes bya bzhin du sems gcig po des kyang dngos po mtha' yas pa la khyab po zhes brjod do//bdag nyid gang gis shes pa'i bdag nyid la dngos po 'jog pa de nyid du ni de'i rjes la 'byung ba nges par 'dzin pa'i sems kyis kyang yongs su rjod par byed do/ /thams cad mkhyen pa'i sems la tshad yod pa dang rjes su 'brel ba'i dngos po gnas pa ni ma yin te/'o na ji zhe na yod pa nyams su myong ba gang ji snyed pa de mtha' dag gnas pa kho na ste/ thams cad kyang thams cad mkhyen pa'i ye shes bskyed pa la dmigs pa'i dngos pos nus pa thogs pa med pa yin pa'i phyir/yid kyi rnam par shes pa'i yul yang thams cad yin pa'i phyir ro/ /de bas na thams cad mkhyen pa'i thugs ni dngos po'i rnam pa nyung zad nye bar 'dzin pa yin par mi skye ba'i phyir dang / rjes las thob pa'i dag pa 'dzin pa nges par 'dzin pa'i shes pas kyang yul gyi mthar thug par gnas pa nyid yongs su mi gcod pa'i phyir/gang gis mtha' can nyid du 'gyur ba 'di tsam zhig go zhes yongs su gcod par ji ltar 'gyur/ gang snang bzhin pa nyid las gzhan dag med do zhes de ltar nges par 'dzin par skyes su chug pa de lta na yang mtha' yod pa nyid du thal ba ma yin te/ 'di ltar gal te snang bzhin pa'i dngos po ni mtha' dang ldan pa nyid thams cad mkhyen pa'i thugs rnam par rtog pa med pa la snang ba yin na ni de'i tshe rjes thob pa nges par 'dzin pa'i sems kyis dngos po rnams la mtha' med pa nyid rnam par gcod pa dang /de rnam par gcad pas kyang mtha' med pa nyid nyams par 'gyur ba zhig na/gang gi phyir thams cad mkhyen pa'i sems la snang bzhin pa'i dngos po mtha' med pa kho nar snang ba yin ste / thams cad nus pa thogs pa med pa nyid yin pa'i phyir ro/ /de las gzhan mi snang ba ni mtha' dang ldan pa kho na yin la de nyid kyang nges par 'dzin pa'i sems kyis rnam par gcod par byed pa'i phyir na shin tu gsal bar khyed kyi dngos po rnams mtha' med pa nyid du sgrub pa'i phyir 'di ni gyi na'o//gang dag rnal 'byor pa'i shes pa thams cad dmigs pa med pa nyid yin na yang rmi lam bden pa mthong ba dang 'dra bar dngos po la mi slu ba nyid kyi tshad ma yin no zhes khas len pa de dag la ni mtha' dang ldan par rgol ba'i go skabs rgyang bsrings pa nyid yin no//'di snyam du rnal 'byor pa'i shes pa gang zag pa med pa nyid yin na/ bstan bcos las ni spyi'i yul can nyid du bshad kyi rang gi rang nyid yul can du ni ma yin na/ de ltar spyi'i yul can gyi rnam par shes pas/dngos po rnams kyi rang gi ngo bo nyid rtogs par 'gyur snyam na rigs mi mthun pa las ldog pa'i rang gi mtshan nyid ni tha mi dad pa'i rnam pa can gyis shes pa'i rgyu yin pas/ bstan bcos las spyi'i mtshan nyid du bshad do/ /de bas na de 'dzin par byed pa'i rnal 'byor pa'i ye shes bsgoms pa'i stobs kyis gsal bar snang ba skye ba ni rang gi mtshan nyid kyi spyod yul can yin pas ji ltar na spyi'i yul can des rang gi mtshan nyid 'dzin par 'gyur zhes bya ba'i 'gal ba med pa yin no//ji ltar na phan tshun 'gal ba shes pa gcig gis 'dzin pa yin zhe na de brjod par bya ste/gal te yang dngos po 'ga' zhig phan tshun 'gal bar yod pa de lta na yang de dag shes pa la lhan cig par mi 'gal ba nyid yin te/ mi mthun pa'i don du ma shes pa gcig gis kyang cig car 'dzin pa dmigs pa'i phyir ro/ /'di ltar gang phan tshun spangs te gnas pa'i mtshan nyid can de rnams gcig tu 'gyur ba 'gal ba dang gang yang lhan cig mi gnas pa na 'gal ba yin na/'di rnams shes pa gcig la snang bas gcig tu 'gyur ba'am/ phyogs gcig pa nyid du thal bar ni mi 'gyur te/ de bas na 'di rnams shes pa gcig la snang ba ni 'gal ba med do//'gal ba yin yang shes pa gcig la snang ba mthong ba yang yin te/ dper na phan tshun spangs te gnas pa'i mtshan nyid can gtsang ba dag dang lhan cig tu mi gnas pa sbrul dang rma bya dag mig gi rnam par shes pas cig car 'dzin pa lta bu'o//'di snyam du gal te 'gal ba rnams kyang shes pa gcig la snang bar mi 'gal na de ltar gyur na bde ba dang sdug bsngal lam 'dod chags dang zhe sdang dag shes pa gcig gis nyams su myong bar srog chags rnams kyi rgyud la ci'i phyir mi skye zhe na/ bde ba la sogs pa dus gcig tu ma myong ba gang yin pa de ni rgyu med pas ma skyes pas na bde ba la sogs pa nye bar mi gnas pa yin gyi 'gal ba'i phyir ni ma yin no zhes nges par bya'o//yang ji ltar 'das pa dang ma 'ongs pa'i dngos po 'dzin pa de ltar ni sngar bstan zin to/ /dngos dang brgyud pas des phan gdags par bya ba 'am/de la phan 'dogs par byed pa'i rang bzhin gyi da ltar ba nyid rtogs pa na 'das pa dang ma 'ongs pa dag shes pa yin te/ sa gzhi dben pa rtogs pa nyid bum pa med pa rtogs pa yin pa bzhin no/ /de ltar gyur na rjes su dpag par 'gyur ba yang ma yin te/ bcom ldan 'das la rtags med pa'i phyir dang /khyad par thams cad dang ldan pa'i da ltar byung ba nyid mngon sum du gyur pa nyid kyis de gnyis mngon sum yin pa'i phyir ro/ /shin tu spros pas chog go/ /skyed par mdzad pa nyid gsal bar byed pa ni/ rab 'byor de bzhin gshegs pa dgra bcom pa zhes bya ba la sogs pa gsungs so//de ltar thams cad mkhyen pa nyid skyed par mdzad pa nyid kyis thams cad mkhyen pa nyid ston par byed pa yin te/ thams cad mkhyen pa nyid rtogs par byed pa yang yin no/ /'jig rten mkhyen pa bstan par bya ba'i phyir bcom ldan 'das kyis gang 'di skad du zhes bya ba la sogs pa'o//mi 'jig rab tu mi 'jig pa/ /zhes bya ba ni skad cig ma dang rgyun mi rtag pa dag gis go rims bzhin du mi 'jig cing rab tu mi 'jig ces bya ba'i tha tshig go/ /dngos po'i chos kyi ngo bo nyid kyis na/ de dag tu ji ltar mi 'gyur snyam pa'i dogs pa de ci'i phyir mi 'jig rab tu mi 'jig ces bya bas bsu nas/rab 'byor stong pa nyid ni zhes bya ba la sogs pa gsungs te/ de kho na nyid du na phung po la sogs pa ni ngo bo nyid med pa'i phyir/ stong pa nyid la sogs pa nyid yin pas dngos po'i chos kyi rang bzhin med pa la skad cig ma dang /rgyun gyis mi rtag pa yod pa ma yin gyi/ kun rdzob tu ni de dag yod do zhes bya bar dgongs so/ /sems can thams cad kyi sems kyi spyod pa shes pa bstan pa ni/ rab 'byor gzhan yang zhes bya ba la sogs pa gsungs pa yin no/ / dam bcas pa'i don nges par bya ba'i don du dri bar mdzad pa ni/ rab 'byor ji ltar na de bzhin gshegs pas zhes bya ba la sogs pa gsungs so/ /lan btab pa ni sems can ngo bo nyid med pa'i phyir zhes bya ba la sogs pa gsungs pa yin te/ sems can rnams ni sgyu ma lta bu'i ngo bo nyid yin pa'i phyir ro //sems can grangs med pa la sogs pa'i tshul gyis rab tu mkhyen pa'o/ /nye bar bsdu ba ni rab 'byor de ltar zhes bya ba la sogs pa gsungs pa yin no/ /tshul 'di nyid kyis de rnams kyi sems kyi spyod pa yongs su mkhyen pa ni/ rab 'byor gzhan yang zhes bya ba la sogs pa gsungs pa yin te/sems can med pa nyid kyis zhes bya ba ni sems can yod pa ma yin zhing de kho na nyid du dmigs su med pas chos kyi dbyings kyi tshul gyis tshad med pa la sogs pa nyid du sems can rnams kyi spyod pa rab tu mkhyen to/ /sems bsdus pa mkhyen pa ni/ rab 'byor gzhan yang de bzhin gshegs pas sems bsdus pa rnams zhes bya ba la sogs pa gsungs pa yin te/bsdus pa dang bcas pa zad pa nyid du dang zad pa yang ma zad pa nyid du zhes bya ba ni/ de la dmigs pas chos nyid la zhugs pa yin pa'i phyir bsdus pa'i sems de kun rdzob tu zad pa ste/rnam par 'jig pa nyid du mkhyen la/ don dam par ni zad cing rnam par 'jig pa yang med pas na ma zad pa ste/ rnam par mi 'jig pa dag dag pa ji lta ba bzhin du rab tu mkhyen to / /sems rnam par g.yengs pa mkhyen pa bstan pa'i phyir rab 'byor gzhan yang de bzhin gshegs pas sems rnam par g.yengs pa rnams zhes bya ba la sogs pa gsungs te/chos nyid las zhes bya ba ni chos kyi dbyings skye ba med pa nyid las te/ de yid la mi byed pas kun rdzob tu phyi rol du 'jug pa'i sems ni rnam par g.yengs pa yin la don dam par ni mtshan nyid med pa ste/ngo bo nyid dang bral ba dang skad cig ma'i mi rtag pa nyid kyis mi zad pa dang rgyun gyis mi rtag pa dang bral bas na/ rnam par mi zad pa dang / phyi rol du 'gro bar mi srid pas ma g.yengs pa zhes bya bar yang dag pa ji lta ba bzhin du rab tu mkhyen to/ /sems mi zad pa'i rnam pa mkhyen pa bstan pa ni/rab 'byor gzhan yang sems can gzhal du med grangs med pa dag gi sems gzhal du med pa mi zad pa zhes bya ba la sogs pa gsungs pa yin no/ /sems gang gi nam mkha' bzhin du gzhal du med cing mi zad pa na/ sems can thams cad kyi sems gzhal du med cing mi zad par rang gi ting nge 'dzin gyi me long gi ngos la snang bas na yang dag pa ji lta ba bzhin shes par 'gyur ba'o//de bzhin gshegs pas byin gyis brlabs pa zhes bya ba ni thugs rje chen pos sems de 'khor ba ji srid kyi bar du byin gyis brlabs pa'o/ /'gag pa med pa/skye ba med pa gnas pa med pa zhes bya ba ni ci rigs par byas kyi mtshan nyid rnam pa gsum med pa'i phyir ro/ /de bas na chos can gyi ngo bo nyid dang mi ldan pa'i phyir rten med pa'o/ /gzhal bar mi nus pa nyid kyis na gzhal du med pa'o/ /chos kyi dbyings dang 'dra bar rnam par 'jig pa mi 'thad pas na mi zad pa'o//sems 'dod chags dang bcas pa la sogs pa mkhyen pa bstan pa ni/ kun nas nyon mongs par gyur pa'i sems rnams zhes bya ba la sogs pa gsungs pa yin te/ kun nas nyon mongs pas kun nas nyon mongs par gyur pa ma yin zhing zhes bya ba ni 'khrul pa tsam du yod pa'i phyir/de kho na nyid du nyon mongs pa dang las dang skye ba'i mtshan nyid kun nas nyon mongs pa rnams kyis kun nas snyon rmongs par gyur pa ma yin zhing / nyon mongs pa med pa yin la/ phyin ci log gi stobs kyis ni kun nas snyon rmongs shing nye bar bcom pa yin pa'o//brdar btags pa med pa zhes bya ba ni so sor nges pa la 'jug pa'o/ /sems 'dod chags dang bral ba la sogs pa mkhyen pa bstan pa ni/ sems kun nas snyon rmongs par ma gyur pa rnams zhes bya ba la sogs pa gsungs so/ /rang bzhin gyis 'od gsal ba ste/zhes bya ba ni so so'i skye bo'i gnas skabs su 'khrul pa'i rgyu las byung ba nyid kyis na de lta bur gyur pa'i rnam par ma dag pa'i sems kyang rang gi ngo bo tshad mas brtags na skye ba med pa la sogs pa'i ngo bo'i bdag nyid du rtogs pa la gzhol ba dang bcas pa nyid kyis na/ gnyen po skyes pa las slar mi bzlog cing 'dod chags la sogs glo bur ba bsal bar nus pa nyid yin pa'i phyir/rang bzhin gyis 'od gsal zhing yongs su dag pa'i rang gi ngo bo tsam yin no/ /de ltar sems 'dod chags dang bcas pa la sogs pa dang / sems 'dod chags dang bral ba la sogs pa spyir bstan nas de'i thabs go rims bzhin du bstan pa'i phyir/sems gnas pa la sogs pa'i 'gres gcig dang / sems rab tu gzung ba la sogs pa gnyis gsungs so/ /gzhi med pa la gnas pa zhes bya ba ni gnas par mi 'os pa gzhi med pa snyoms par 'jug pa'i ro myang ba la sogs pa la/'dod chags la sogs pa'i rgyur gyur pa nyid kyis na gnas shing mngon par zhen pa'o/ /rab 'byor sems de dag ni gzung ba med cing rab tu mi gzung bar bya ba yin te zhes bya ba ni de la sems rgod pa 'am rgod par dogs pa la skyo bar bya ba'i dngos po yid la byed pas/zhi gnas kyi rgyu mtshan dang sems zhum pa 'am/ zhum du dogs pa la mngon par dga' bar 'gyur ba'i dngos po yid la byed pa rab tu 'dzin pa'i rgyu mtshan dang sems mnyam pa thob pa la lhun gyis grub pa'i yid la byed pa/ btang snyoms kyi rgyu mtshan gzung bar bya'o//de ltar na 'dod chags dang bral ba la sogs pa'i rgyu nyid yin pa'i phyir/ sems rab tu gzung ba'o/ /yang na gzung bar 'os pa nyid kyis gzung ba ma yin zhing yang dang yang du rab tu gzung bar bya ba ma yin no/ /sems dang shes pa de dag nyid spyir rnam grangs kyis bstan pa ni go rims bzhin du zag pa dang bcas pa'i sems rnams zhes bya ba la sogs pa gcig dang zag pa med pa'i sems rnams zhes bya ba la sogs pa 'gres gnyis gsungs pa yin no//rab 'byor sems de dag ni ngo bo nyid med cing med pa dang 'dra ba yin te/ zhes bya ba ni zag pa dang bcas pa'i sems rnams ni gnyen po'i phyogs skyes pas bzlog par bya ba nyid kyis rang gi ngo bo nyid med pa yin la/de las kyang med pa dang mtshungs pa yin no/ /rab 'byor sems de dag ni dngos po med par gzhol ba zhes bya ba ni zag pa med pa'i sems rnams ni mthong ba dang bsgom pas spang bar bya ba'i nyon mongs pa med pa'i mthar thug pa yin no//de bas na rang gi ngang gis rgyud yongs su dag par 'jug pas na lhun gyis grub pa'o/ /yang de dag nyid kyi rab tu dbye ba drug ni 'dod chags dang bcas pa'i zhes bya ba la sogs pa'i 'gres kyis gsungs so/ /sems kyi 'dod chags dang bcas pa'i zhes bya ba la sogs pa la/sems kyi 'dod chags dang bcas pa 'di nyid gang yin pa so so'i skye bo'i yul la chags pa'i rang bzhin nyid de ni sems kyi yang dag pa ji lta ba nyid ma yin no/ /rang gsal ba'i rang bzhin ni rigs pas sgyu ma dang 'dra bar 'gyur ba yin te/ bsal bar nus pa dang mi nus pa nyid kyis 'di dag go rims bzhin g.yo ba dang mi g.yo ba yin pa'i rang bzhin yin pa'i phyir ro//de bzhin du 'phags pa rnams kyi gnyen po bsgoms pas sems kyi yang dag pa ji lta ba nyid zag pa med pa'i rang bzhin gang yin pa de ni/ 'dod chags dang bcas pa ma yin te/de ni gnyen po'i phyogs kyi ngo bo nyid yin pa'i phyir ro/ /de bas na ma dag pa'i gnas skabs su kun rdzob tu 'dod chags dang bcas pa'i sems ni/ rab 'byor sems kyi bral ba gang yin pa de ni zhes bya ba la sogs pa yin te/ sems kyi bral ba ste/ 'dod chags dang bral ba'i gnas skabs gang yin pa de ni so so'i skye bo'i 'dod chags dang bcas pa ste/chags pa'i gnas skabs ma yin te de gnyis ngo bo nyid tha dad pa yin pa'i phyir ro/ /de bzhin du 'dod chags dang bral ba'i rnam par rtse bcil ba la sogs pa'i spangs pas/ 'dod chags dang bral ba'i sems kyis yang dag pa ji lta ba nyid gang yin pa de ni dben pa'i bdag nyid du rtogs pa nyid kyis de sems kyi 'dod chags dang bcas pa nyid ma yin no//de bas na dben pa'i gnas skabs su sems 'dod chags dang bral ba yin no/ /de bzhin du zhe sdang dang bcas pa la sogs pa'i 'gres kyis gzhung lhag ma rnams kyang 'di nyid kyi rjes su 'brangs nas bshad par bya'o//sems rgya chen po mkhyen pa nyid bstan pa ldog pa dang 'jug pa'i sgo nas 'gres gnyis su 'gyur ba ni/ sems rgya chen po ma yin pa rnams zhes bya ba la sogs pa gsungs so/ /rab 'byor sems de dag ni kun nas slong ba dang mi ldan pa/kun nas slong ba med par rtogs pa ste/ zhes bya ba ni de kho na nyid du na skye ba med pas rgyu dang 'brel pa stong pa nyid yin pa'i phyir kun nas slong ba dang mi ldan pa'o/ /'byung ba dang bral ba yin pas 'dod pa la sogs pa'i khams dang ma 'brel ba nyid yin pa'i phyir/sems de dag ni kun nas slong ba med par rtogs pa'o/ /de ltar ma dmigs pas rgya chen po ma yin pa'o/ /rab 'byor sems de dag ni mi 'bri mi 'phel zhing zhes bya ba la sogs pa la/ rnam par 'jig pa med pas mi 'bri zhing skye ba med pas mi 'phel lo/ /de nyid kyis na 'ga' zhig tu 'gro bas bral ba med pa'i phyir rnam par bral ba med pa ste/de ltar chos kyi dbyings kyi ngo bo nyid yin pa'i phyir/ sems rgya chen po zhes bya'o/ /sems chen por gyur pa mkhyen pa ldog pa dang 'jug pa'i sgo nas 'gres gnyis kyis bstan pa ni/ sems chen por gyur pa ma yin pa rnams zhes bya ba la sogs pa gsungs pa yin te/rab 'byor sems de dag ni 'ong ba med pa/ 'gro ba med pa ma gtogs pa zhes bya ba ni 'bras bu yod pa bkag pas 'das pa'i dus de nas 'ongs pa dang bral ba yin pa'i phyir/ sems de dag ni 'ong ba med pa'o//rnam pa thams cad du 'jig pa ma yin pas ma 'ongs pa'i dus su yang 'gro bar mi 'thad pas 'gro ba med pa'o/ /da ltar gyi dus su yang gcig dang du ma'i ngo bo nyid dang bral bas ma gtogs pa ste/ de ltar na chen por gyur pa ma yin pa yin no/ /rab 'byor sems de dag ni mnyam pa nyid kyis mnyam pa ste ngo bo nyid mnyam pa'o zhes bya ba ni de kho na nyid du na ma skyes pa'i ngo bo nyid yin pa'i phyir/bdag la sogs pa dngos po med pa dang mnyam pa nyid kyis na sems de dag ni mnyam pa nyid kyis mnyam pa yin la/ yang dag pa'i kun rdzob tu ni yon tan thams cad thob pa'i tshul gyis rab tu snang bas sgyu ma'i ngo bo nyid kyis mnyam ste/de ltar na chen por gyur pa yin no/ /sems tshad ma med pa mkhyen pa bstan pa ni/ sems tshad ma med pa rnams zhes bya ba la sogs pa gsungs so/ /rten med pas zhes bya ba ni de rnams la so sor nges pa'i rten yod pa ma yin pas tshad med pa'o//sems bstan du yod pa mkhyen pas ston pas/ snga ma bzhin du 'gres gnyis gsungs pa ni/ sems bstan du yod pa rnams zhes bya ba la sogs pa'o/ /rab 'byor sems de dag dang sems kyi ngo bo nyid ni mnyam par bstan pa yin te zhes bya ba ni sgyu ma lta bu'i bdag nyid du yang dag par rig pas na mnyam par bstan pa ste/shes pa thams cad kyis mtshungs par dmigs pa'i ngo bo nyid yin te/ dge ba dang mi dge ba'i bag chags rnams kyis bsags pa yin pa'i phyir na/ sems kyi ngo bo nyid yin no/ /de ltar na bstan du yod pa yin no/ /rab 'byor mtshan nyid med cing zhes bya ba la sogs pa ni/de kho na nyid du na da ltar byung ba'i rang gi ngo bo dang bral bas/ mtshan nyid med pa nyid yin pa'i phyir dang / 'das pa dang ma 'ongs pa'i rang bzhin dag dang lhan cig go rims bzhin du 'bras bu dang rgyur 'brel pa mi 'thad pas/ don gyis dben pa nyid yin pa'i phyir sha la sogs pa'i spyan gsum po 'am thams cad la ste lnga po rnams kyi yul ma yin pa nyid kyis na/snang bar ma gyur pa'i sems bltar med pa nyid do/ /de ltar bstan du med pa yin no/ /ji skad du bshad pa'i shes pa nyid thogs pa dang bcas pa la sogs pa nyid kyis na rnam pa ci zhig ltar ldog par brjod do zhes bstan pa'i don du thogs pa dang bcas pa'i sems zhes bya ba la sogs pa 'gres brgyad gsungs pa ni sems de dag ni med pa la kun brtags pa ste/zhes bya ba la sogs pa'o/ /med pa ste skye ba la sogs pa'i tshul du yod pa ma yin pa'i tshul gyis na kun tu brtags shing sgro btags pa'i sems ni stong pa yin zhing /ngo bo nyid med pa yin la kun rdzob tu ni dmigs pa'i dbang du gyur pa ste/ dmigs pa'i gzhan dbang can yin no/ /de ltar tshad ma dang 'gal ba nyid yin pa'i phyir thogs pa dang bcas pa'o/ /rab 'byor sems de dag ni gnyis su med pa zhes bya ba la sogs pa la skye ba dang mi skye ba dang bral ba nyid kyis na gnyis su med par gyur pa'o//de kho na nyid du ma byung ba nyid kun rdzob tu byung ba yin pas ma byung ba kun tu byung ba'o/ /de ltar tshad mas 'thad pa nyid yin pa'i phyir thogs pa med pa'o/ /rab 'byor sems bla na yod pa yang dag pa zhes bya ba la sogs pa la bdag la sogs par mngon par zhen pas bla na yod cing dman pa'i gnas skabs thob pa'i sems/yang dag pa ji lta ba nyid de bdag med pa legs par rtogs pa nyid gang yin pa de la rlom sems med de 'jig tshogs la sogs pa'i lta ba la nye bar dmigs pa yod pa ma yin no//de bas 'di ltar de ni kun rdzob tu bla na yod pa dang bcas pa yin no/ /rab 'byor sems de dag ni rdul phra rab tsam yang zhes bya ba la sogs pas / gang gi phyir sems kyi rang bzhin dag ni don dam par dngos po rdul phra rab tsam yang mi dmigs pa yin la/ de bas na so so'i skye bo'i gnas skabs su 'tshang rgya ba nyid kyi gnas skabs dang 'dra bar rang bzhin gyis rnam par byang ba'i ngo bo nyid yin pas/gzugs la sogs pa'i mtshan ma thams cad dang bral ba'i phyir spros pa med pa yin te/ de ltar de kho na nyid du sems bla na med pa yin no/ /rab 'byor sems de dag ni mi mnyam pa dang mnyam pa zhes bya ba la sogs pa la skye ba la sogs pa'i nyes pa dag ni mi mnyam pa yin pas/mi mnyam pa'i gzung ba dang mnyam pa/ de 'dzin par byed pa nyid kyis phyi rol du 'jug pa'i sems ni rnam par g.yeng ba yin pas sems mnyam par gzhag par ma byas pa nyid kyis na/rtse gcig tu ma byas pa yin te/ de ltar sems mnyam par ma bzhag pa yin no/ /rab 'byor sems de dag ni mnyam pa dang mnyam zhing zhes bya ba la sogs pa la/ nyes pa'i mi mnyam pa thams cad 'thad pa ma yin pas mnyam pa ni/ chos kyi dbyings yin la/de dang lhan cig skye ba med la sogs pa las mtshungs pa'i phyir mnyam pa'o/ /rnam par g.yeng ba las phyir bcos pas na mnyam par bzhag pa ste/ de ltar mnyam par bzhag pa'i sems ni de kho na nyid du na yod pa ma yin pa'i ngo bo nyid yin pas/ nam mkha' dang mtshungs so//rab 'byor sems de dag ni rang bzhin gyis rnam par grol ba ste/ zhes bya ba la sogs pa la rigs pa'i rjes su 'gro ba'i skye ba dang bral ba nyid yin pa'i phyir/ sems de dag ni rang bzhin gyis rnam par grol ba'o/ /med par grub pa'i rang bzhin yin pa'i phyir/ ngo bo nyid med pa'i rang bzhin no/ /de bas na 'ching ba sngon du 'gro ba'i grol ba med pas na/ sems ma grol ba yin no/ /sems ni zhes bya ba la sogs pa gang gi phyir sems ni gcig dang du ma'i ngo bo nyid dang bral bas dus gsum pa'i sems med pa'i phyir/ de bzhin gshegs pas ma dmigs pa de bas na rang bzhin gyis sgrib pa gnyis dang bral ba'i phyir rnam par grol ba yin no//rab tu dbye ba bstan nas da ni sems bltar med pa bstan pa'i phyir sems bltar med pa rnams zhes bya ba la sogs pa gsungs so/ /rab 'byor med pa'i phyir sems de [(]bltar [,]ltar [)] med pa dang zhes bya ba ni/ kun brtags pa'i sems ni mtshan nyid stong pa nyid kyis na med pa'i bltar med pa'o/ /ma byung ba ni rnam par ma rig pa'o zhes bya ba ni gzhan gyi dbang ni rgyu med pas ma byung ba'i phyir/ rnam par rig par byar med pa'o/ /yongs su ma grub pas na gzung du med pa zhes bya ba ni/ yongs su grub pa'i sems ni ngo bo yod pa ma yin pa nyid kyis yongs su grub pa yin pa'i phyir gzung du med pa ste/re re zhing shes rab kyi mig la sogs pa gsum gyis zhes bya bar sbyar ba 'am sangs rgyas dang chos kyi spyan la sogs pa lnga po thams cad la mi snang ba'i phyir/ bltar med pa la sogs pa yin par khong du chud par bya'o//rab 'byor de ltar shes rab kyi pha rol tu phyin pa ni zhes bya ba la sogs pa gsungs pa ni nye bar bsdu ba'i tshig yin te/ sems bsdus pa mkhyen pa la sogs pa'i 'gres kyi zhabs su yang re re zhing yang kun la sbyar bar bya'o/ /sems g.yo ba la sogs pa mkhyen pa bstan pa ni/phye ba dang btsums pa rnams zhes bya ba la sogs pa yin te/ de la sgrub pa'i sgo nas rang gi yul la sems 'phro ba gang yin pa de ni 'dir phye ba yin no/ /dgag pa'i sgo nas yul gzhan la sems mi 'phro ba ni btsums pa yin te/ de ltar gyur pa ni phye ba dang btsums pa'o//sems can gzhan dang gang zag gzhan zhes bya ba ni 'jig rten dang 'jig rten las 'das pa'i dbye ba gnyis gsungs pa yin no/ /gzugs la gnas shing zhes bya ba la sogs pa sgrub dang dgag pa'i sgo nas sems can thams cad ni gzugs la sogs pa phung po lnga po la brten nas skye'o zhes bya ba'i tha tshig go//de nyid ston par mdzad pa ni/ de bzhin song ba shi phan chad ces bya ba la sogs par gsungs pa yin te/ shi ba'i dus kyi 'og tu de bzhin song ba 'byung ba ni/ nub par gyur pa'i tshul du gnas pa'i phyir yod dam ci zhes zur gyis 'dri bas grangs can la sogs pa gzugs la sogs par gtogs pa'i phye ba la rtog pa'o//de bzhin du bdag thams cad du rjes su 'gro ba med par 'jig pas mi 'byung ngo zhes bya ba ni/ 'jig rten rgyang pan pa rnams kyi btsums pa la rtog pa'o/ /gnas skabs can gcig pa nyid dang gnas skabs tha dad pa nyid kyis go rims bzhin du snga ma ltar de bzhin song ba shi phan chad 'byung yang 'byung la mi 'byung yang mi 'byung ngo zhes bya ba ni/gcer bu pa la sogs pa'i gnyi gar rnam par rtog pa'o/ /gcig pa nyid dang gzhan pa nyid kyi tshul gyis brjod du med pa nyid kyis na/ 'byung ba yang ma yin mi 'byung ba yang ma yin no zhes bya ba ni gang zag tu smra ba rnams kyi gnyi ga gdags pa la brten pa'i rnam par rtog pa'o//rnam par rtog pa 'di dag ni de kho na nyid du na ma skyes pa nyid yin pa'i phyir/ yang dag pa ma yin pa'i kun rdzob tu yod pa'i bdag gi rang bzhin gyi de bzhin gshegs pa la rnam pa 'ga' zhig ltar gnas thob pa ma yin no//de bzhin du stong pa nyid bstan pa na/ mi 'dul ba'i 'gro ba la ltos nas/ phyogs gzhan dag tu bzhag ste lung bstan pa'i dri ma nyid du rnam par bzhag pa yin no/ /de bzhin du bdag rtag pa la sogs pa la yang shes par bya'o/ / 'khor gyi dkyil 'khor der ji skad du bshad pa'i bdag tu lta ba'i bye brag dang ldan pa'i gdul bya'i skye bo nye ba rnams kyi bsam pa'i dbang du mdzad nas/ rab tu dbye ba ston par mdzad pa yin no/ /de bzhin nyid kyi rnam pa mkhyen pa bstan pa ni/ rab 'byor gzhan yang 'di ltar de bzhin gshegs pa zhes bya ba la sogs pa gsungs te/de bzhin du rab 'byor de bzhin gshegs pas de bzhin nyid ji lta ba bzhin du gzugs mkhyen to zhes bya ba ni/ rten cing 'brel 'byung gang yin pa/ /de nyid khyod ni stong par bzhed/ /ces bshad pas gzugs la sogs pa de bzhin nyid kyi rnam par yongs su mkhyen pas phye ba la sogs pa yang de bzhin nyid du yongs su mkhyen to zhes bya ba'i don to//yang dag par rdzogs pa'i sangs rgyas kyi thugs su chud pa'i de bzhin nyid de gzhan la ston cing 'dogs pa mkhyen pa ston pa ni/ rab 'byor de ltar na de bzhin gshegs pas de bzhin nyid la de bzhin gshegs pa'i de bzhin nyid du zhes bya ba la sogs pa gsungs so//de bzhin nyid du 'dogs par mdzad do zhes bya ba ni chos thams cad kyi rjes su 'gro ba'i de bzhin nyid tshul gcig tu rnam par 'jog par mdzad pa yin te/ 'dis ni de bzhin du 'dogs pa'i ye shes gsungs pa yin no//de bzhin nyid gsungs pa ni rab 'byor phung po'i de bzhin nyid ces bya ba la sogs pa yin no/ /chos thams cad tha dad pa nyid ma yin nam/ ji ltar de bzhin nyid tha mi dad snyam pa'i dogs pa de ci'i phyir zhe na zhes bya bas bsu nas/ rab 'byor de bzhin gshegs pas zhes bya ba la sogs pa gsungs te/gang gi phyir phung po lnga ni 'jig rten no zhes ming du mdzad cing grangs so zhes bcom ldan 'das kyis phung po lngas chos thams cad ston pa'i skabs su gsungs pa de bas na/ 'jig rten rtag pa la sogs pa'i mtshan nyid kyis tha dad pa gzhan ni yod pa ma yin gyi gdul bya nye bar gnas pa'i shes pa la ltos nas chos tha dad pa nyid du gsungs par zad do//de nyid bstan pa'i phyir gsungs pa ni rab 'byor de lta bas na zhes bya ba la sogs pa'o/ /de bzhin nyid 'di ni gcig pa dngos po dang dngos po med pa du ma dang bral ba ste zhes bya ba ni/ de kho na nyid du na ma skyes pa'i ngo bo nyid yin pas dngos po'i chos las yang dag par 'das pa yin pa'i phyir/ gcig pa ma yin zhing tha dad pa yang ma yin pa'i phyir stong pa nyid kyi tshul gyis de bzhin nyid 'di ni chos thams cad la gcig pa yin te/ bum pa dang snam bu la sogs pa'i dngos po dang sngon med pa la sogs pa'i mtshan nyid kyis med pa du ma dang bral ba ni sbyor ba'i lam du'o//de bzhin du mthong ba dang sgom pa dang khyad par dang mthar thug pa'i lam la go rims bzhin du mi zad pa'i phyir dang 'gyur ba med pa'i phyir dang / gnyis su med pa'i phyir dang / gnyis su byar med pa'i phyir de bzhin nyid 'di ni gcig pa'o zhes bya bar sbyar ro//shes rab kyi pha rol tu phyin pa 'di la brten nas/ de bzhin nyid 'di mngon par rdzogs par sangs rgyas so zhes bya ba 'dis ni de bzhin nyid thugs su chud pa'i shes pa ston pa yin no/ /'jig rten 'di la 'jig rten yang dag par ston pa yin te zhes bya ba ni dngos po la mngon par zhen pa'i 'jig rten la/'jig rten sgyu ma dang 'dra bar ston pa'o/ /de bzhin nyid mkhyen to/ /ma log pa'i de bzhin nyid mkhyen to/ /gzhan ma yin pa'i de bzhin nyid mkhyen to/ /zhes bya ba'i tshig gsum ni go rims bzhin du kun tu brtags pa dang /gzhan gyi dbang dang yongs su grub pa'i ngo bo sgyu ma lta bur gzigs pa yin par brjod do/ /de bzhin nyid mngon par rdzogs par sangs rgyas pas na de bzhin gshegs pa zhes bya'o zhes bya ba 'dis ni de bzhin nyid mchog tu mkhyen pa'i ye shes mkhyen pa ston to//su zhig 'di la mos par 'gyur zhes bya ba ni/ rigs ma nges pa la sogs pa gang yang mos par mi 'gyur gyi/ 'on kyang gang zag khyad par du 'phags pa kho na mos so zhes phyir mi ldog pa'i zhes bya ba la sogs pa gsol pa yin no/ /mngon par rdzogs par sangs rgyas nas gsungs so zhes bya ba 'dis ni de bzhin nyid yang dag par ston pa'i shes pa brjod do//mi zad pa la mi zad pa nyid du bstan no zhes bya ba ni/ de bzhin gshegs pa rnams byung yang rung de bzhin gshegs pa rnams ma byung yang rung / chos rnams kyi chos nyid 'di ni gnas pa'o zhes gsungs pas mi zad pa'i de bzhin nyid la mi zad pa nyid du bstan te/de bzhin nyid thugs su chud pa la sogs pa shes pa gzhi gcig tu byas nas/ de ltar bstan pa yin no/ /de bas na shes pa'i mtshan nyid thams cad shes pa nyid kyis bsdus pa ni rnam pa bcu drug tu gyur pa yin no//de skad du yang / de bzhin gshegs pa 'byung ba dang / /'jig rten 'jig med bdag nyid dang / /sems can sems kyi spyod pa dang / /de bsdus pa dang phyir bltas dang / /mi bzad pa yi rnam pa dang / /chags bcas sogs dang rgya chen dang //chen por gyur dang tshad med dang / /rnam shes bstan du med pa dang / /sems bltar med dang shes pa de/ /g.yo ba la sogs zhes bya dang / /de las gzhan yang de dag ni/ /de bzhin nyid kyi rnam par shes/ /thub pas de bzhin nyid rtogs nas/ /gzhan la bstan pa zhes bya 'di//thams cad shes pa nyid skabs kyi/ /shes pa'i mtshan nyid bsdus pa yin/ /zhes gsungs pa yin no/ /de'i 'og tu lam shes pa nyid bstan par bya ba'i phyir/ de nas lha rnams kyi dbang po brgya byin la sogs pa zhes bya ba la sogs pa smos pa yin no/ /bcom ldan 'das 'di la mtshan nyid ji ltar gzhag ces bya ba ni/lam shes pa nyid kyi skabs su shes pa'i mtshan nyid rnam pa gang gis bstan par bya zhes pa'o/ /stong pa'o zhes bya ba la sogs pa la stong pa nyid dang / mtshan ma med pa dang / smon pa med pa dang / skye ba med pa dang / 'gag pa med pa dang /kun nas nyon mongs pa med pa dang / rnam par byang ba med pa dang / dngos po med pa ste/ shes pa brgyad po ni rang gi sgras gsungs pa yin no/ /mya ngan las 'das pa'o zhes bya ba ni ngo bo nyid shes pa'o/ /chos kyi dbyings so zhes bya ba ni rten med pa'i shes pa'o/ / de bzhin nyid do zhes bya ba ni nam mkha'i mtshan shes pa ste/ de ltar shes pa gsum du rnam par gzhag pa yin no/ /'di ni rigs pa dang ldan pa ma yin no snyam pa'i dogs pa de ci'i phyir zhe na zhes bya bas bsu nas/ lha'i bu dag ces bya ba la sogs pa gsungs te/ gang gi phyir shes pa'i mtshan nyid 'di dag ni de kho na nyid du skye ba med pa'i ngo bo nyid yin pas/gang du yang thogs pa yod pa ma yin no/ /de bas na ji skad du bshad pa'i ngo bo nyid yin no zhes bya ba ni tshig gi don to/ /chos nyid rnam par 'khrugs pa med pa'i shes pa'i don ni/ lha'i bu dag mtshan nyid 'di dag ni zhes bya ba la sogs pa gsungs pa yin te/bskyod mi nus so zhes bya ba ni rnam par 'khrugs par mi nus pa'o/ /de bzhin du de ci'i phyir zhes rtog pa la lha dang mi dang lha ma yin du bcas pa'i zhes bya ba la sogs pa gsungs so/ /mtshan nyid 'di dag kho nar zad de zhes bya ba ni rnam par 'khrugs pa med pa sgyu ma'i chos nyid kyi ngo bo nyid do//'du mi byed pa shes pa'i don ni mtshan nyid 'di dag ni gang gis kyang lag gis bzhag pa ma yin no zhes bya ba gsungs pa yin te/ dngos po rnams ni 'dus ma byas pa nyid yin pa'i phyir ro zhes bya bar dgongs so/ /rnam par mi rtog pa'i shes pa bstan pa ni/lha'i bu dag gang zhig 'di skad du zhes bya ba la sogs pa gsungs pa yin no/ /'dus byas pa nyid yin pa'i phyir ji ltar gzhag pa ma yin snyam pa'i dogs pa/ de ci'i slad du zhe na zhes bya bas bsu nas/ bcom ldan 'das nam mkha' ni zhes bya ba la sogs pa gsol to/ /'dus ma bgyis pa lags te zhes bya ba ni/rgyu dang rkyen las ma byung ba'o zhes bya ba'i tha tshig go/ /rab tu dbye ba shes pa'i don ni de nas bcom ldan 'das kyis 'dod pa na spyod pa dang zhes bya ba sogs pa gsungs pa yin no de bzhin gshegs pas bstan par mdzad pa nyid yin pa'i phyir/ sngar gnas pa ji ltar yin snyam pa'i dogs pa de ci'i phyir zhe na zhes bya bas bsu nas/ji ltar 'di dag gnas pa zhes bya ba la sogs pa gsungs te/ stong pa nyid la sogs pa'i rang bzhin gyi rab tu dbye bas zhes bya ba ni lhag ma'o/ /mtshan nyid med pa shes pa bstan pa ni/bcom ldan 'das mtshan nyid zab mo 'di dag ces bya ba la sogs pa gsol pa yin no/ /chags pa ma mchis pa'i ye shes so zhes bya ba ni mngon par zhen pa thams cad dang bral ba 'di lta ste don dam par na yongs su rdzogs pa'i gnas skabs su shes rab kyi pha rol tu phyin pa ni de bzhin gshegs pa rnams kyi mtshan nyid med pa'i ye shes yin no//de nyid ni chags pa ma mchis pa'i ye shes kyi slad du zhes bya ba la sogs pa gsol pa yin te/ shin tu yongs su rdzogs pa'i gnas skabs na ni chags pa med pa'i ye shes kyi don du bsgom pa'i shes rab kyi pha rol tu phyin pa rnam pa thams cad du de bzhin gshegs pa kho na'i spyod yul te yul du gyur pa yin te/'di ni 'jig rten yang dag par ston pa yin no/ /zhes bya ba ni ji skad du bshad pa'i lam shes pa nyid kyi shes pa rnam pa bcu drug gis 'jig rten gyi de kho na nyid mngon sum du byed pas 'jig rten ston pa'o//de skad du yang / stong nyid mtshan ma med bcas dang / /smon pa rnam par spangs pa dang / /skye med 'gag pa med sogs dang / /chos nyid rnam par 'khrugs med dang / /'du mi byed dang rnam mi rtog /rab dbye mtshan nyid med nyid la/ /lam shes nyid kyi skabs kyis ni//shes pa'i mtshan nyid yin par bzhed/ /ces gsungs pa yin no/ /de'i 'og tu rnam pa thams cad mkhyen pa nyid kyi sgo nas shes pa'i mtshan nyid bstan pa'i don du rab 'byor ji ltar zhes bya ba la sogs pa gsungs so/ /de la yang dag par rdzogs pa'i sangs rgyas nyid kyi chos la yongs su brten nas gnas pa shes pa ston pa ni shes rab kyi pha rol tu phyin pa 'di la brten cing gnas pa zhes bya ba la sogs pa gsungs te/mi gnas pa zhes bya ba ni mngon par zhen pa mi mnga' ba nyid kyis so/ /gnas so zhes bya ba ni mthong ba'i chos la bde bar gnas pa'i don du thugs su chud pa'i don mngon sum du mdzad nas bzhugs pa'o//bkur stir bya ba dang / bla mar bya ba dang / ri mor bya ba dang / mchod pa shes pa bstan pa ni chos la bkur sti mdzad ces bya ba la sogs pa gsungs pa yin no/ /mchod par mdzad do zhes bya ba'i don sbyor ba dang mjug gi gnas skabs kyi dbye ba gsungs pa ni/ri mor mdzad do bsnyen bkur mdzad do zhes bya ba yin no/ /spyir bstan nas khyad par gyi don bstan pa ni/ rab 'byor shes rab kyi pha rol tu phyin pa 'di ni zhes bya ba la sogs pa gsungs pa yin no/ /khyad par du 'dzin par mdzad pa'i rgyu ci zhig yin snyam pa'i dogs pa de ci'i phyir zhe na zhes bya bas bsu nas/rab 'byor shes rab kyi pha rol tu phyin pa 'di las zhes bya ba la sogs pa gsungs pa yin te/ de la byas pa shes pa zhes bya ba ni slar phan pa mdzad pa'i phyir ro/ /byas pa tshor ba zhes bya ba ni phan pa chung ngu yang che ba nyid du dgongs par mdzad pa'i phyir ro//theg pa zhes bya ba ni theg pa chen po'o/ /sgrub pa zhes bya ba ni mthong ba la sogs pa'i lam rnams so/ /rjes su 'dzin cing rjes su skyong ste zhes bya ba ni/ go rims bzhin du de dag nyid kyi bsngags pa gsungs pa'i phyir ro/ /byed pa med pa nyid shes pa bstan pa ni/rab 'byor gzhan yang de bzhin gshegs pa zhes bya ba la sogs pa gsungs pa yin te/ de la byed pa po'i rgyu med pa'i phyir ma byas pa'o/ /rnam par 'jig pa'i rgyu med pas 'gyur ba med pa'o/ /'dus byas kyi rang gi ngo bo dang bral bas mngon par 'dus ma byas pa'o/ /thams cad du 'gro ba shes pa ston pa ni rab 'byor shes rab kyi pha rol tu phyin pa la brten nas zhes bya ba la sogs pa gsungs pa yin te/de bzhin du chos thams cad la ye shes 'jug ste zhes bya ba ni byed pa med pa la sogs par thugs su chud pas shes pa skyes pa'o/ /de kho na nyid du na dngos po rnams skye ba med pa nyid yin na/mthong bar bya ba dang mthong ba po dang mthong ba ji ltar yin zhes gsol pa ni / bcom ldan 'das gang gi tshe zhes bya ba la sogs pa'o/ /de la yid kyi rnam par shes pas yongs su bcad pa med pas na shes pa po med pa'o/ /mig la sogs pa'i rnam par shes pas nye bar dmigs pa dang bral bas mthong ba po med pa'o//rjes su brjod pa 'di ni rigs pa dang ldan pa nyid ma yin par gsungs pa ni/ ji ltar zhes bya ba la sogs pa'o/ /gang gi phyir chos thams cad yod pa nyid du skye ba med pas stong pa nyid yin zhing gzung ba dang 'dzin pa'i 'brel pa mi 'thad pas/mi gnas pa yin pa de bas na shes pa po med cing mthong ba po med pa yin no zhes bya ba'i tha tshig go/ /shes rab kyi pha rol tu phyin pa la brten nas de lta bu'i yang dag pa'i chos thugs su chud nas/ de kho na nyid du na 'jig rten mthong ba med pa nyid mthong ba yin la/kun rdzob tu ni ji ltar grags pa kho nar zad do zhes bya bar dgongs so/ /ma mthong ba'i don ston par mdzad pa ni gzugs mi mthong ba dang zhes bya ba la sogs pa gsungs pa yin te/ gzugs la sogs pa mi mthong ba nyid de kho na nyid du na 'jig rten mthong ba yin no zhes bya ba'i tha tshig go//de nyid ni bcom ldan 'das ji ltar zhes bya ba la sogs pa gsol pa yin no/ /gzugs la dmigs pa'i rnam par shes pa mi skye ba zhes bya ba ni/ gzugs la sogs par nyams su myong ba med pa nyid 'jig rten mthong ba yin te/ yod pa yang yod pa nyid du/ med pa yang med pa nyid du mkhyen to zhes gsungs pas/'jig rten med pa ma mthong ba nyid mthong ba yin no/ /shes pa lhag ma rnams bstan par bya ba'i phyir/ rab 'byor ji ltar na zhes bya ba la sogs pa gsungs pa yin te/ de ltar 'jig rten stong pa'o zhes bya ba ni 'jig rten stong pa nyid kyi rnam par shes pa gsungs pa yin no//de ltar 'jig rten brjod pa'o zhes bya ba ni 'jig rten stong pa nyid du brjod pa shes pa'o/ /de ltar 'jig rten shes par byed pa'o zhes bya ba ni 'jig rten stong pa nyid du ston par byed pa shes pa'o/ /de ltar 'jig rten mthong bar mdzad do zhes bya ba ni/'jig rten stong pa nyid du mthong ba nyid du mdzad pa shes pa yin te/ shes pa gsum po 'di dag ni go rims bzhin du gdul bya yang dag par sdud pa dang / yongs su smin pa dang / rnam par grol ba'i don yin par shes par bya ba 'am/ thams cad mkhyen pa nyid gsum las dgongs nas/'phags pa'i gang zag gsum gyi dbang du mdzad de/ go rims bzhin du phyogs gcig la zhugs pa dang / ched du bya ba la zhugs pa dang / mngon sum la zhugs pa'i dbang du mdzad pa yin par shes par bya'o zhes 'phags pa rnam par grol ba'i sdes bshad do//de ltar 'jig rten bsam gyis mi khyab po zhes bya ba ni bsam gyis mi khyab pa shes pa'o/ /de ltar 'jig rten zhi ba zhes bya ba ni zhi ba nyid du mkhyen pa'o/ /de ltar 'jig rten dben pa zhes bya ba ni 'jig rten 'gog par mkhyen pa'o/ /de ltar 'jig rten rnam par dag pas zhes bya ba la sogs pas ni 'du shes 'gog pa yang gsungs pa yin par shes par bya'o//rnam pa thams cad mkhyen pas bsdus pa ni ji skad du bshad pa'i shes pa'i rnam pa bcu drug kho na yin par shes par bya'o/ /de skad du yang / de ni nyid kyi chos bsten nas/ /gnas dang gus par bya ba dang //bla ma nyid dang mnyes pa dang / /de la mchod dang byed med dang / /kun tu 'jug mkhyen gang yin dang / /ma mthong ston par mdzad pa dang / /'jig rten stong nyid rnam pa dang / /brjod dang shes mdzad mngon sum mdzad/ /bsam mi khyab dang zhi nyid ston/ /'jig rten 'du shes 'gog pa la//rnam pa kun mkhyen tshul la ni/ /shes pa'i mtshan nyid ces bshad do/ /zhes gsungs pa yin no/ /shes rab kyi pha rol tu phyin pa'i bshad pa mngon par rtogs pa rgyan gyi snang ba las 'jig rten bstan pa'i le'u ste bcu gnyis pa'o// //spyi'i ngo bo nyid du shes pa'i rnam pa yongs su bcad pa rnams kyi khyad par shes par bya dgos pas/shes pa'i mtshan nyid kyi 'og tu khyad par gyi mtshan nyid spyir gleng bslang bar bya ba'i phyir/ de nas bcom ldan 'das la tshe dang ldan pa rab 'byor gyis 'di skad ces gsol to zhes bya ba la sogs pa smos pa yin te/kye ma zhes bya ba ni nges par gzung ba'o/ /bgyi ba chen pos zhes bya ba ni bsam gyis mi khyab pa dang mnyam pa ma mchis pa la sogs pa'i khyad par gyis khyad par du byas pa'i sdug bsngal la sogs pa'i bden pa'i yul can chos dang rjes su shes pa dang bzod pa'i khyad par gyi mtshan nyid kyi ngo bo nyid shes pa'i skad cig ma bcu drug gis/de bzhin gshegs pa nyid la sogs pa'i don du nye bar gnas pa'o zhes bya ba'i tha tshig go/ /de skad du yang / bsam mi khyab sogs khyad par gyis/ /khyad zhugs bden pa'i spyod yul can/ /skad cig ma ni bcu drug gis//khyad par mtshan nyid bshad pa yin/ /zhes gsungs pa yin no/ /yang bsam gyis mi khyab pa la sogs pa'i khyad par gang yin zhe na/ bgyi ba bsam gyis mi khyab pa zhes bya ba la sogs pa gsol pa yin te/ re zhig bsam gyis mi khyab pa dang / mnyam pa ma mchis pa dang / gzhal du ma mchis pa dang / grangs ma mchis pa dang zhes bya ba'i khyad par gyis ni/ go rims bzhin du sdug bsngal gyi bden pa skad cig ma bzhis bsdus pa'i khyad par gyi mtshan nyid bshad pa yin no/ /bgyi ba mi mnyam pa dang mnyam pas zhes bya bas ni 'di dag thams cad kyi khyad par yin no//'di rnams kyi bshad pa ni gzhung nyid las ston to/ /rjes su brjod pa 'di rigs pa dang ldan pa ma yin no zhes bstan pa'i don du rab 'byor ji ltar zhes bya ba la sogs pa gsungs pa yin te/ de la de bzhin gshegs pa nyid dang zhes bya ba la sogs pa'i tshig bzhi ni me long lta bu la sogs pa'i ye shes bzhi dbye bas sbyar ro zhes sngon gyi slob dpon rnams 'chad do//de bzhin gshegs pa nyid la sogs pa skyed par byed pas na bya ba bsam gyis mi khyab pa nyid de/ de bzhin nyid du 'di'i 'og ma bya ba mnyam pa med pa la sogs pa la yang sbyar ro//sems dang sems las byung ba la sogs pa'i 'jug pas bsam pa dang gzhal bar ji ltar mi nus snyam pa'i dogs pa de ci'i phyir zhe na zhes bya bas bsu nas/ 'di la zhes bya ba la sogs pa gsungs te/ sangs rgyas nyid la sogs pa la'o/ /sems ni yid kyi rnam par shes pa'o//sems pa ni yid kyi las sam des skyed pa lus dang ngag gi las so/ /sems las byung ba ni shes rab la sogs pa'o/ /mi 'jug pa ni dmigs par byed pa'i ngo bos mi 'jug pa ste/ phyin ci log thams cad dang bral ba'i phyir ro zhes bya bar dgongs so/ /mnyam par zhes bya ba ni blos rang gi ngo bo nges par gzung bar ro//gzhal du med par zhes bya ba ni gang gi phyir gzhal bar mi nus pa'o/ /grangs med pa'o zhes bya ba ni gang gi phyir gcig nyid la sogs pas bgrang bar mi nus pa'o/ /lhag pa lta ci smos zhes bya ba ni mnyam pa med pas mi mnyam pa la yang lhag par ches khyad par 'phags pa [(]'byur [,]'byung [)]bar ga la 'gyur/de bas na bdag nyid mi mnyam pa dang mnyam zhing mtshungs pa yin pas/ bcom ldan 'das mkhyen pa ni mi mnyam pa dang mnyam pa yin no/ /'di skad du de bzhin gshegs pa nyid la sogs pa 'di dag thams cad bsam gyis mi khyab pa la sogs pa ldog pa'i dbye bas gsungs so zhes ston to//tshig lhur len pa nyid kyis na de bzhin gshegs pa nyid la sogs pa kho na bsam gyis mi khyab pa la sogs pa khyad par du 'phags pa yin no zhes rtogs kyi gzugs la sogs pa la som nyir 'gyur bas / 'phags pa rab 'byor gyis bcom ldan 'das ci lags zhes bya ba la sogs pa gsol pa yin no/ /rigs pa mtshungs pa nyid yin no zhes dgongs nas/ rab 'byor de de bzhin no/ /de de bzhin te/ rab 'byor gzugs kyang bsam gyis mi khyab pa zhes bya ba la sogs pa gsungs pa yin no//snga ma bzhin du de ci'i phyir zhe na zhes rtog pa la/ re zhig bsam gyis mi khyab pa dang mnyam pa med pa nyid sngar bshad pa'i dgongs pas bstan pa ni/ rab 'byor gzugs kyi chos nyid gang yin pa zhes bya ba la sogs pa gsungs so/ /rab 'byor gzugs kyang gzhal du med pa'o zhes bya ba la sogs pas ni gzhal du med pa nyid bshad pa yin no//tshad ma yod pa la ji ltar gzhal du med pa yin snyam pa'i dogs pa de ci'i phyir zhe na zhes rtog pa la/ rab 'byor gzugs kyi tshad ma mi shes so zhes bya ba la sogs pa gsungs te/ tshad med pa nyid la sogs pa ni de kho na nyid du/ma skyes pa nyid kyis chos thams cad tshad ma med pa'i phyir/ tshad ma yod pa ma yin pa de bas na mi shes so zhes bya ba'i don to/ /gzugs kyang zhes bya ba la sogs pas ni grangs med pa nyid bshad pa yin no/ /bgrang ba las 'das pa'i phyir ro zhes bya ba ni sgyu ma lta bu nyid yin pas gcig nyid la sogs pa'i grangs kyis ma bsdus pa'i phyir ro//bsam gyis mi khyab pa la sogs pa nyid gsal bar bya ba'i phyir mi mnyam pa dang mnyam pa nyid bstan pa'i don du/ rab 'byor gzugs kyang mi mnyam pa dang mnyam pa'o zhes bya ba la sogs pa gsungs pa yin te/nam mkha' dang mnyam pa'i phyir ro zhes bya ba ni mnyam pa dang lhag pa med pas nam mkha' dang mtshungs pa'i phyir mi mnyam pa dang mnyam pa'o/ /slar yang spyir bstan pa ni rab 'byor de ji snyam du sems zhes bya ba la sogs pa gsungs pa yin no//de lta ma lags so zhes bya ba ni de kho na nyid du na dngos po med pa'i phyir ro zhes bya bar bsams pa'o/ /dpes bshad pa'i don bstan pa ni rab 'byor de kho na bzhin no zhes bya ba la sogs pa gsungs pa yin no/ /rnam grangs 'dis zhes bya ba ni nam mkha' dper bstan pas so//de bzhin gshegs pa'i chos zhes bya ba ni bsam gyis mi khyab pa la sogs pa nyid du de bzhin gshegs pa'i chos rnam pa thams cad du rtogs pa'i phyir ro/ /nye bar bsdu ba'i don ni rnam grangs 'dis kyang zhes bya ba la sogs pa gsungs pa yin no//de nyid gsal bar mdzad pa ni rab 'byor de bzhin gshegs pa'i chos 'di dag ces bya ba la sogs pa gsungs pa yin no/ /rnam par shes par gyur pa zhes bya ba ni sgyu ma lta bu snang ba'i don ni kun rdzob tu bsam gyis mi khyab pa la sogs par bstan pa yin no/ /nye bar bsdu ba'i don ni rab 'byor de bas na zhes bya ba la sogs pa gsungs pa yin no//zag pa med pa'i chos bstan pa rgyu phun sum tshogs pa dang ldan pa la 'bras bu med pa ma yin pa ni bcom ldan 'das kyis zhes bya ba la sogs pa gsungs pa yin te / len pa med par zag pa rnams las sems rnam par grol lo zhes bya ba ni nyon mongs pa'i bag chags kyi sa bon bskyed pa ma byas pas nyon mongs pa rnams las sems rnam par grol ba'o//chos rnams la chos kyi mig rdul med cing dri ma dang bral ba rnam par dag go zhes bya ba ni shes pa'i yul la 'chad pa'i skyon dang bral ba'i chos kyi mig sdug bsngal gyi bden pa la sogs pa la chos shes pa'i bzod pa la sogs pa rnams kyi rdul med cing /chos shes pa rnams kyi dri ma dang bral ba skyes pas rnam par dag pa'o/ /mi skye ba'i chos la bzod pa thob par gyur to zhes bya ba ni chos thams cad skye ba med pa'o zhes chos la nges par rtog pa'i bzod pa 'am/sdug bsngal la chos shes pa'i bzod pa thob pa'o/ /de dag kyang zhes bya ba ni byang chub sems dpa' nyi khri tsam mo/ /kha cig na re gang 'di sangs rgyas kyi rigs ni thog ma med pa yin pa 'am sangs rgyas re re 'byung ba na sems can grangs med pa yongs su mya ngan las 'das mod kyi/de lta na yang 'khor ba la zad pa med pas mtha' yas pa'i phyir nam mkha' dang 'dra ste/ ri bo la sogs pa'i sgrib g.yogs du ma yod na yang nam mkha' la ni yongs su zad pa med do zhes zer ro/ /gzhan dag na re gang gnyen po'i chos dang nye ba na 'bri ba'i chos can du snang ba de ni gnyen po'i phyogs shin tu 'phel pas shin tu 'grib par 'gyur ba srid pa yin ste /dper na gser gyi dri ma la sogs pa lta bu'o/ /'khor ba yang bdag med pa'i mtshan nyid gnyen po'i phyogs don du gyur pa na 'grib pa'i chos yin no zhes bya ba'i rang bzhin gyi gtan tshigs kyi stobs kyis 'khor ba rgyun 'chad pa yin no zhes 'dod do//'phags pa'i gang zag thams cad sdud pa'i khyad par kun 'byung ba'i skad cig ma dang pos bsdus pa bstan pa ni bcom ldan 'das shes rab kyi pha rol tu phyin pa ni zab ste zhes bya ba la sogs pa gsungs pa yin no/ /yum dang sangs rgyas nyid la sogs pa la 'brel pa med pa nyid yin pa'i phyir ji ltar na bya ba chen pos nye bar gnas pa yin pa'i dogs pa de ci'i phyir zhe na zhes bya bas bsu nas/rab 'byor 'di ni zhes bya ba la sogs pa gsungs so/ /thams cad mkhyen pa nyid dang yang dag par ldan no zhes bya ba ni rnam pa thams cad mkhyen pa nyid shes rab kyi pha rol tu phyin pa dang rab tu 'brel pa'o//yum 'bras bu thams cad dang 'brel par dpes bstan pa ni rab 'byor 'di lta ste dper na zhes bya ba la sogs pa gsungs pa yin te/ spyi bo nas dbang bskur ba zhes bya ba ni rigs che ba bco brgyad kyis dbang bskur ba 'am/ glang po'i rgyal po'i sna'i chus dbang bskur ba'o//yul gyi mi la mthu dang brtson 'grus thob pa'i zhes bya ba ni rang gi rgyal srid las nyams pa'i 'jigs pa med yul gyi mi la mthu thob pa yin la/ de rnams tshar gcod pa dang phan 'dogs par nus pa dang ldan pas brtson 'grus thob pa yin no/ / bya ba zhes bya ba ni las su bya ba'o/ /'brel pa zhes bya ba ni blon po chen po dang yang dag par ldan pa'o/ /de la lus dang ngag gi bya ba rnams med pas go rims bzhin du brtson 'grus chung zhing khur bor bar 'gyur ro zhes bya bar sbyar ro/ /yongs su 'dzin pa dang mngon par chags pa med par rtogs pa mi 'thad do zhes dogs pa ni bcom ldan 'das ji ltar na zhes bya ba la sogs pa gsol pa yin no//lan bstan pa'i phyir slar 'dri bar mdzad pa ni rab 'byor de ji snyam du sems zhes bya ba la sogs pa gsungs pa yin te/ yongs su 'dzin pa 'am mngon par chags par 'gyur ba zhes bya ba ni go rims bzhin du gzung ba dang 'dzin pa'i rnam par rtog pa dag tu 'dzin pa zhes bya ba'i tha tshig go//bcom ldan 'das de ni ma lags te zhes bya ba la 'dir bsdus pa'i don ni 'di yin te/ gang gi phyir 'phags pa'i gang zag gi rnam par mi rtog pa'i ye shes kyis mthong ba'i lam la sogs pa la gnas pa ni/'di ni gzung ba yin te 'bras bu'o/ /bdag ni 'dzin pa po yin no zhes bya ba la de lta bu'i tshul gyi rnam par rtog pa la kun du spyod pa ma yin te/ de lta bu'i ye shes ni/ rnam par rtog pa thams cad kyi gnyen po yin pa'i phyir ro/ /gzhan du na brjod pa dang bcas pa'i shes pas ji ltar gnas pa'i dngos po nyams su myong bar mi 'thad pas/shes pa bden pa dang bral ba nyid kyis lam mi 'byung ba'i phyir thos pa dang bsam pa'i gnas skabs dang 'dra bar nyon mongs pa spangs pa med pa na dgra bcom pa'i 'bras bu mi 'byung bar 'gyur ro/ /de bas na rnal 'byor pa lam las 'das pa nyid na nags la sogs pa la gcig pa nyid du mngon par zhen pa la sogs pa'i rnam par rtog pa dang bral ba dang 'dra bar gzung ba dang 'dzin par sgro btags pa'i rnam par rtog pa dang bral ba'i blo skye bar 'gyur ro//des kyang dngos po'i de kho na nyid ma 'dzin pas chos de lta bu ni bdag gis ma mthong ngo zhes bya ba yin no//'di nyid kho na rjes su gnas pa ni rab 'byor de de bzhin no zhes bya ba la sogs pa yin no/ /skye bo dmigs pa can la rjes su brtse ba ni bcom ldan 'das theg pa la gsar du zhugs pa'i zhes bya ba la sogs pa gsol pa yin te/ de bas na de rnams la bstan par mi bya'o zhes bya bar dgongs so//skyes bu khyad par can gyis rig par bya ba nyid kyi khyad par gyi mtshan nyid skad cig ma gnyis pas yang dag par bsdus pa bstan pa ni bcom ldan 'das 'on kyang zhes bya ba la sogs pa gsol pa yin no/ /de la rgyu phun sum tshogs pa dang yun ring po nas dge ba'i rtsa ba bskrun pa zhes bya ba ni go rims bzhin du/rang bzhin gyis gnas pa dang yang dag par bsgrubs pa zab mo'i chos la lhag par mos pa'i rigs nyid yin la/ rigs gnyis po ni de bzhin gshegs pa'i byin gyi rlabs kyis 'phel bar bstan pa'i phyir tshig gnyis par na/sngon gyi rgyal ba la bgyi ba bgyis pa zhes smos pa yin no/ /de la zab cing brta' dka' rtogs par dka' ba lags te zhes bya ba'i tshig gsum ni/ kun brtags pa la sogs pa'i ngo bo nyid gsum mi dmigs pa nyid du shes par bya'o/ /thun mong ma yin pa nyid kyi khyad par skad cig ma gsum pas bsdus pa bstan pa ni bcom ldan 'das gal te zhes bya ba la sogs pa gsol pa yin te/dad pa'i rjes su 'brang ba'i sa la zhes bya ba ni nges par 'byed pa'i gnas skabs las sngar tshogs kyi sa la sbyin pa la sogs pas kun nas bslang ba mi dmigs pa'i tshul gyis byed pa'o//bzod cing zhes bya ba ni chos la nges par rtog pa'i bzod pa'o/ /sred de tshol ba zhes bya ba ni mnyan pa'i gnas skabs su sbyor ba dang dngos gzhi'i dbye bas phye ba'o/ /sems pa dang 'jal ba zhes bya ba ni bsam pa'i gnas skabs su sbyor ba dang dngos gzhis phye ba'o/ /nye bar rtog pa dang nye bar sems pa'i bgyid na zhes bya ba ni bsgom pa'i gnas skabs su ste snga ma bzhin du brjod par bya'o//mngon par shes pa shin tu myur ba'i khyad par skad cig ma bzhi pas bsdus pa bstan pa ni de skad ces gsol pa dang zhes bya ba la sogs pa smos pa yin te/ bar du zhes smos pas byang chub sems dpa' la sogs pa yongs su gzung ngo //mya ngan las 'da' bar zhes bya ba ni de bzhin gshegs pa nyid do/ /nyung ba med pa dang mang ba med pa nyid kyi khyad par 'gog pa'i skad cig ma dang pos bsdus pa bstan pa ni de nas 'dod pa na spyod pa'i lha'i bu dang zhes bya ba la sogs pa smos pa yin no//pha rol tu phyin pa chen po'o zhes bya ba ni ma tshang ba dang yongs su rdzogs pa nyid med pas mthu chen po dang ldan pa'o/ /ha cang mi ring ba zhig tu phyin nas mi snang bar gyur te zhes bya ba ni ji srid bcom ldan 'das kyis tha mal pa'i gzigs pa'i spyod yul du gyur pa'i bar du rkang gis song nas de phan chad rang gi rdzu 'phrul gyis song ngo zhes bya ba'i tha tshig go//shes rab kyi pha rol tu phyin pa'i bshad pa mngon par rtogs pa'i rgyan gyi snang ba las/ bsam gyis mi khyab pa'i le'u ste bcu gsum pa'o// //drag tu rab tu sgrub pa'i khyad par skad cig ma gnyis pas bsdus pa bstan pa ni/bcom ldan 'das byang chub sems dpa' sems dpa' chen po zhes bya ba la sogs pa gsol pa yin te / thos pa dang lhan cig kho nar zhes bya ba ni thos pa tsam gyi rjes thogs nyid la'o/ /de la thos pa dang bsam pa dang bsgom pa'i bya ba 'gog pas go rims bzhin du mi 'gong mi zhum rnam par mi zhum rnam par mi gnas pa yin no zhes bya ba yin no//gang gi phyir mi shes pa dang the tshom dang log pa'i shes pa dang bral bas mi rmongs the tshom mi za som nyi mi za zhes tshig gi don brjod par bya'o/ /mngon par dga' bar 'gyur zhing zhes bya ba ni mngon par 'dod pa dang ldan pa'i phyir ro//yid kyis phyir phyogs par mi byed ces bya ba ni 'gyod pa'i sems bskyed par mi 'gyur ba'o/ /rjes su 'brang zhing zhes bya ba ni chos smra ba yongs su mi spong bas so/ /de nyid phyi bzhin 'gro bar 'gyur zhes gsungs pa yin te chos smra ba 'dor bar mi byed pa nyid kyis so//'di dag dpes bstan pa ni rab 'byor 'di lta ste dper na zhes bya ba la sogs pa gsungs pa yin te/ lus la thogs pa 'am zhes bya ba ni snying gar chud par byas pas so/ /glegs bam du chud pas zhes bya ba ni glegs bam thos pas so/ /yang dag par 'grub pa'i khyad par skad cig ma gsum pas bsdus pa bstan pa ni bcom ldan 'das zhes bya ba la sogs pa gsol pa yin te/yon tan 'di dag dang ldan pa'i zhes bya ba ni shes rab kyi pha rol tu phyin pa la mos shing zhum par mi 'gyur ba la sogs pa'o/ /mchis sam zhes bya ba ni ci zhes zur gyis 'dri ba'o/ /rjes su 'gro ba'i sgo nas lan btab pa ni rab 'byor byang chub sems dpa' sems dpa' chen po zhes bya ba la sogs pa gsungs pa yin no//ldog pa'i sgo nas kyang bstan pa ni rab 'byor yang zhes bya ba la sogs pa gsungs pa yin no/ /'di ni rigs pa dang ldan pa ma yin no snyam pa'i dogs pa de ci'i phyir zhe na zhes bya bas bsu nas/'di ltar de ni zhes bya ba la sogs pa gsungs pa yin no/ /'di skad du gang gi phyir yum gyi bag chags bskyed pa dang bral bas nem nur du gyur pa la sogs par gyur pa de bas na sngon yongs su 'dri ba la sogs pa'i ngang tshul can ma yin no zhes brjod pa yin no/ / de nyid gsal bar bya ba'i rab 'byor gzhan yang zhes bya ba la sogs pa gsungs pa yin no/ /re zhig ces bya ba ni nyin zhag nyung zad gcig dang rjes su 'brel ba'o/ /stor bar 'gyur ro zhes bya ba ni 'gal ba'i rkyen gyi stobs kyis nyams par 'gyur ba'o/ /'phrogs par 'gyur ro zhes bya ba ni 'dri ba po mang ba nyid kyis lan 'debs par mi nus pa'o//de bzhin du ci'i phyir zhe na zhes rtog pa la rab 'byor de ni 'di ltar yin te zhes bya ba la sogs pa gsungs pa yin te/ 'bras bu rgyu gang yin pa'i rjes su 'brang ba 'di ni chos nyid yin no zhes bya ba'i tha tshig go/ /gang gis snga ma bzhin du dus thams cad du yongs su dri ba byas pa ma yin no zhes bya bar dgongs pa yin te/'di ltar nyi ma gcig gam zhes bya ba la sogs pa de ma thag tu gsungs pa yin no/ /'gres 'ga' ni 'dun pas rjes su 'brang bar 'gyur zhes bya ba ni nyin zhag nyung zad gcig bslabs pa'i stobs kyis mngon par 'dod pa de tsam zhig tu 'gyur te/'bras bu ni rgyu'i rjes su mthun pa nyid yin pa'i phyir ro zhes 'dod pa yin no/ /de phyir zhing g.yengs pa dang zhes bya ba ni dad pa las nyams pa'o/ /zhum par 'gyur zhes bya ba ni dad pa dang ldan pa yin du zin na yang ngo / /blo rgod par 'gyur te zhes bya ba ni so sor nges pa'i chos dmigs pa ma rnyed pa'i phyir ro//de nyid ni ras bal gyi 'da' ba bzhin du 'gyur ro zhes gsungs pa yin te/ ras bal bkal ba'i phyir smal ba ni ras bal gyi 'da' ba ste/ de dang bstan par mi gnas par chos mthun zhing 'dra ba'i phyir de bzhin du 'gyur ba'o//gnyan pa la sogs pa'i gnas skabs su 'am sbyor ba la sogs pa'i gnas skabs su go rims bzhin du rjes su 'dzin par mi 'gyur rjes su 'jug par mi 'gyur rjes su bstan par mi 'gyur ro zhes brjod par bya'o/ /dmigs pa'i khyad par skad cig ma bzhi pas bsdus pa bstan pa ni rab 'byor 'di lta ste dper na zhes bya ba la sogs pa gsungs pa yin te/phyi dang nang gi gnod pa med pas bde bar pha rol gyi 'gram du zhes bya ba'i tshig gnyis smos pa yin no/ /de nyid ni ma rmas ma smad par zhes gsungs pa yin no/ /bar ma dor zhes bya ba ni bar nyid du rnam par 'jig cing nyams par 'gyur ro//dad pa yod pa zhes bya ba la sogs pa la de la dad pa yod pa ni yod pa nyid du mngon par yid ches pa'o/ /bzod pa yod pa ni mi skye ba'i chos la bzod pa'o/ /sred pa ni 'dzin pa nyid du'o/ /'dun pa ni byed 'dod pa nyid do/ /brtson 'grus ni dge ba la spro ba'o/ /bag byed pa ni dge ba dang mi dge ba dag go rims bzhin du bsten pa dang mi bsten pa la'o//mos pa ni nges pa kho nar 'dzin pa'o/ /lhag pa'i bsam pa ni gzhan gyi don byed pa la sogs pa la sems gzhol ba'o/ / gtong ba ni dngos po thams cad 'bras bu dang bcas par sbyin par byed pa'o/ /gus pa ni thams cad la 'dud pa nyid du'o//dga' ba ni yid bde ba'o/ /mgu ba ni dga' ba'i khyad par ro/ /dang ba ni yon tan dang ldan par mthong bas mos pa'i khyad par ro/ /rab tu dga' ba ni bsgrub par nus pa la mngon par 'dod pa'o/ /brtson pa mi 'dor ba ni dam bcas pa'i khur mi 'dor ba'o/ /'ju ba dang mi 'ju ba'i dpes ni bar chad dang bcas pa dang bar chad med par byed pa dag rnam pa thams cad mkhyen pa nyid kyi mi mthun pa'i phyogs dang /gnyen po'i dngos por gsal bar bstan par bya ba'i phyir ro/ /rten gyi khyad par gyi lam gyi skad cig ma dang pos bsdus pa bstan pa ni rab 'byor 'di lta ste dper na zhes bya ba la sogs pa gsungs pa yin no//'di ni rigs pa ma yin no snyam pa'i dogs pa de ci'i phyir zhe na zhes bya bas bsu nas/ dngos po'i chos nyid kyis lan btab pa ni 'di ltar bum pa zhes bya ba la sogs pa gsungs pa yin no/ /chu de khyer na zhes bya ba ni chu 'degs na'o/ /de bzhin du de ci'i phyir zhe na zhes rtog pa la snga ma bzhin du 'di ltar bum pa zhes bya ba la sogs pa gsungs pa yin te /shes rab kyi pha rol tu phyin pa dang thabs la mkhas pas zhes bya ba ni/ stong pa nyid dang snying rje chen po dag gis zhes bya ba'i tha tshig go/ /bum pa so btang ba dang ma btang ba dag ni sgrub pa'i chos kyi rten dang rten ma yin pa'i ngo bo bstan pa'i don du yin no//rgyu tshogs pa'i khyad par skad cig ma gnyis pas bsdus pa bstan pa ni rab 'byor 'di lta ste dper na skyes bu shes rab 'chal ba'i rang bzhin can zhig ces bya ba la sogs pa gsungs pa yin te/ mig tshags ma byas shing zhes bya ba ni chu 'dzag pa'i gnas su shing shun la sogs pas ma btsangs pas so//ma bcos pa zhes bya ba ni shing rul ba ma bsal ba'o/ /khal gyis non pa'i zhes bya ba ni/ khal lci bas non pa'i nang du zhugs par 'dod pa'o/ /pha rol du ma rgal bar de'i rdzas kyang gzhan du 'gyur la zhes bya ba ni skam sar ma phyin par rdzas rnams chud za bar 'gyur ba'o//yongs su nyams par 'gyur ro zhes bya ba ni ma thob par yongs su nyams pa'o/ /bar ma dor chud za bar zhes bya ba ni bar du nyams par 'gyur zhing sangs rgyas kyi sa las nyams par 'gyur ba'o/ /nges pa med par ma 'ongs par gnas par byed pa ji ltar snyam pa'i dogs pa de ci'i phyir zhe na zhes bya bas bsu nas/rgyu ma tshang ba med pa tsam dang rjes su 'brel pa rung ba nyid rjes su dpag pa ni rab 'byor de ni 'di ltar zhes bya ba la sogs pa gsungs so/ /gru mig tshags byas pa dang ma byas pa smos pa ni sgrub pa tshang ba dang ma tshang ba shes par bya ba'i don yin no//yongs su gzung ba'i khyad par skad cig ma gsum pas bsdus pa bstan pa ni rab 'byor 'di lta ste dper na skyes bu 'ga' zhig ces bya ba la sogs pa gsungs pa yin te/ de la lus rnyings pa nyid yin pas na rgan pa'o/ /na tshod du phyin pa nyid kyis ni rgas shing ngo / /legs par smras pa dang nyes par smras pa nyid dang bral bas na 'khogs pa'o//nad des bcom pas zhes bya ba ni nye bar bcom pa'o/ /de bzhin du de ci'i phyir zhe na zhes rtog pa la/ de ni 'di ltar zhes bya ba la sogs pa gsungs te/ skyes bu rgan po yongs su bzung ba dang ma bzung ba'i dpe bstan pa ni shes rab kyi pha rol tu phyin pa dang thabs la mkhas pas yongs su bzung ba dang yongs su ma zin pa dag gis ci rigs par 'khor ba dang mya ngan las 'das pa dag gi mthar ltung ba dang mi ltung ba gsal bar bstan pa'i don yin no//shes rab kyi pha rol tu phyin pa'i bshad pa mngon par rtogs pa'i rgyan gyi snang ba las dpe'i le'u zhes bya ste bcu bzhi pa'o// //ro myang ba med pa'i khyad par bstan pa ni lam gyi skad cig ma bzhi pas bsdus pa bstan pa ni bcom ldan 'das byang chub sems dpa' zhes bya ba la sogs pa gsol pa yin no/ /de la lus dang ngag dang 'khor la sogs pa phul bas mnyes par bya ba yin pa'i phyir go rims bzhin du bsnyen par bya bsten par bya bsnyen bkur bya'o zhes bya bar sbyar ro//rnal 'byor du gyis shig ces bya ba ni sbyin par bya ba dang sbyin pa dang len pa po la sogs pa mi dmigs pa'i tshul gyis bsgrub pa la 'bad par gyis shig ces pa'o//gzugs su ma bsnyems shig ces bya ba ni gzugs la mngon par zhen pa'i tshul gyis ma 'dzin cig ces bya ba'i tha tshig go/ /de bzhin du de ci'i phyir zhe na zhes rtog pa la/ rigs kyi bu thams cad mkhyen pa nyid ni zhes bya ba la sogs pa gsungs te/thams cad mkhyen pa nyid ni de kho na nyid du skye ba med pa'i ngo bo nyid yin pa'i phyir rnam pa gang gis kyang so sor brtag par mi bya'o/ /de bzhin du sbyar te zhes bya ba ni de thams cad bla na med pa yang dag par rdzogs pa'i byang chub tu yongs su sngos shig ces bya ba nas/ thams cad mkhyen pa nyid ni mi bsnyems pa ste zhes bya ba'i bar gyi gzhung tshul khrims kyi pha rol tu phyin pa la sogs pa bzhi la bsgre bar bya'o//mthar gyis zhes bya ba ni dang por bdag la sogs par nges pa gsal bas phyi'i don la bzhag pa de'i 'og tu kun brtags pa dang gzhan dbang dang yongs su grub pa'i ngo bo nyid du bshad pas khams gsum sems tsam du rtogs pa sbyar ro//de'i 'og tu yang dag pa'i don gyi bya ba la nus pa dang mi nus pa yang dag pa dang log pa'i dbye bas kun rdzob kyi bden pa gnyis su rnam par dpyad do/ /ma brtags na nyams dga' ba tsam du snga ma snga ma'i rgyu la ltos par bstan nas yang dag pa'i kun rdzob la gnas te/ji ltar mthong ba rnams sgyu ma'i skyes bu dang 'dra bar sbyin pa la sogs pa la spyad par bya zhing / don dam par skye ba med par bsgom par bya ste/ de ltar rim pa 'dis shes rab kyi pha rol tu phyin pa la gzhug par bya'o/ /de ltar na de dag ni khyad par gyi mtshan nyid rnam pa bcu drug bstan pa yin te/gang gis nyan thos la sogs pa'i lam las byang chub sems dpa' la sogs pa'i lam shes pa nyid la sogs pa nyid khyad par gyi lam yin par khyad par zhugs pa yin no/ /de'i phyir de dag ji skad du bshad pa'i khyad par dang bral ba ni mngon par zhen pa la sogs pa skye ba'i mtshan nyid kyis go sla ba'i phyir ma bshad do//de skad du yang / bsam mi khyab dang mi mnyam dang / /gzhal dang bgrang las yang dag 'das/ /'phags pa kun bsdus mkhas pa yis/ /rig bya thun mong min shes nyid/ /shes myur bri dang gang med dang / /bsgrub dang yang dag 'grub pa dang //dmigs pa rten dang bcas pa dang / /mtha' dag pa dang yongs 'dzin dang / /ro myang med dang khyad par ni/ /bcu drug bdag nyid ces bya ste/ /gang gis lam ni gzhan dag las/ /khyad par 'phags pas khyad par lam/ /zhes gsungs pa yin no/ /khyad par gyi mtshan nyid kyis rnam par bcad pa rnams kyi byed pa gang yin zhe na/byed pa'i mtshan nyid brjod par bya'o/ /de las phan pa dang bde ba'i byed pa bstan pa ni bcom ldan 'das byang chub sems dpa' sems dpa' chen po gang dag ces bya ba la sogs pa gsol pa yin te/ de lta bu'i zhes bya ba ni sangs rgyas nyid skyed par byed pa'i rgyu ma tshang ba med pa zhes bya ba'i tha tshig go//de la ma 'ongs pa dang tshe 'di'i bde ba nye bar bsgrub pa la dgongs nas/ phan pa'i phyir dang bde ba'i phyir zhes tshig gnyis gsungs pa yin no/ /gnyis po 'di dag kyang snying brtse ba las 'byung bar gyur pas/ 'jig rten la snying brtse ba'i phyir zhugs pa zhes gsungs pa yin no//skyob pa la sogs pa'i byed pa bshad pa'i phyir mdor bstan pa ni/ 'jig rten gyi skyob par 'gyur bar bya'o zhes bya ba la sogs pa gsungs pa yin no/ /de la skyob pa'i byed pa bshad pa ni rab 'byor ji ltar na zhes bya ba la sogs pa gsungs pa yin te/de la 'bad par byed cing brtson 'grus rtsom te zhes bya ba ni/ sbyor ba dang chog mi shes pa'i brtson 'grus dag dang go rims bzhin du sbyar bar bya'o/ /skyob par 'gyur ro zhes bya ba ni/ rnam par smin pa med pa'i chos nyid la 'jog pa yin pa'i phyir ro/ / skyabs kyi byed pa bstan pa ni rab 'byor ji ltar na zhes bya ba la sogs pa gsungs pa yin te/ de la skye ba ni ma byung ba nyid byung ba'o/ /rga ba ni rnyings par gyur pa'o/ /na ba ni bde bar mi gnas pa'o/ /'chi ba ni sngon gyi las kyis 'phangs pa'i ris mthun pa yongs su spangs pa'o/ /mya ngan ni yid kyi sdug bsngal lo//smre sngags 'don pa ni sdug pa'i yon tan rjes su dran pa dang bcas par smre ba'o/ /sdug bsngal ba ni lus kyis mi bde ba myong ba'o/ /yid mi bde ba ni snga ma bzhin du sems kyis so / /'khrug pa ni khur khur ba la sogs pa'o/ /skyabs zhes bya ba ni gtan du phan pa nye bar sgrub pa'i don gyis so//gnas kyi byed pa bstan pa ni rab 'byor ji ltar na 'jig rten gyi gnas su zhes bya ba la sogs pa gsungs pa yin te/ sbyor ba med par bya ba'i phyir zhes bya ba ni/ gzugs la sogs pa skye ba med par bya ba'i phyir ro/ /gnas su 'gyur ro zhes bya ba ni sdug bsngal las bzlog pa'i don gyis so//sbyor ba med pa'i don nyid gsal bar bya ba ni/ bcom ldan 'das ji ltar na sbyor ba ma mchis lags zhes bya ba la sogs pa gsol pa yin no/ /shes pas mthong bas zhes bya ba ni skabs 'dir ji skad bstan pa'i don mngon sum du byed pas ni shes pas mthong ba'o/ /dpung gnyen gyi byed pa bstan pa ni rab 'byor ji ltar na zhes bya ba la sogs pa gsungs pa yin te/rab 'byor gzugs kyi pha rol gang yin pa de gzugs ma yin zhes bya ba ni/ rab kyi mthar thug par 'gro ba'i don gyis na gzugs kyi pha rol skye ba med cing dngos po med pa gang yin pa de ni kun rdzob tu gzugs su gyur pa ma yin no//don dam par ni pha rol te stong pa nyid ji lta bar gzugs kyang de bzhin te gang gi phyir/ chos kyi dbyings las ma gtogs pa'i 'di ltar chos yod pa ma yin pas zhes bya bas/ rab 'byor pha rol ji ltar gzugs kyang de bzhin te zhes bya ba gsungs pa yin no/ /mngon par rdzogs par sangs rgyas pa ma lags sam zhes bya ba ni da ltar yang stong pa nyid kyi ngo bo nyid yin pas sangs rgyas pa nyid kyi gnas skabs dang 'dra bar chos thams cad rtogs pa yin no//de bas na mdo 'di la mngon par brtson pa ni don med do snyam du bsams pa'o/ /'khrul pa'i bdag nyid kyi rnam par rtog pa yod bzhin du ji ltar mngon par rdzogs par sangs rgyas pa yin snyam pa'i dogs pa de ci'i phyir zhe na zhes bya bas bsu nas//bcom ldan 'das 'di la zhes bya ba la sogs pa gsol te/ rnam par rtog pa yang skye ba med pa'i ngo bo nyid yin pa'i phyir gzugs la sogs pa'i pha rol na rnam par rtog pa yod pa ma yin no zhes bya ba'i tha tshig go//chos thams cad mngon par rdzogs par sangs rgyas pa yin te zhes bya ba ni de kho na nyid du zhes bya ba ni tshig lhag ma'o/ /yang kun rdzob tu ni thog ma med pa'i dus can gyi sgro btags pa sel ba yin pa'i phyir mdo sde 'di la mngon par brtson pa 'bras bu dang bcas pa yin no zhes bya bar dgongs so//kun rdzob tu rtogs pa yod pa nyid du bstan par bya ba'i phyir gang de ltar chos thams cad la zhes bya ba la sogs pa gsungs pa yin te/ thabs mang pos lan mang du bsgom pa la nges par sems shing mngon du yang mi byed pa 'di ni mchog tu dka' ba byed pa yin te mod la bya bar nus pa ma yin no//zhum par mi 'gyur te zhes bya ba ni sbyin pa la sogs pa'i pha rol tu phyin pa yongs su rdzogs pa la yang le los mi sgrub par mi byed do/ /chos 'di dag ces bya ba ni rang bzhin gyis yongs su mya ngan las 'da' ba nyid la sogs pa'i mtshan nyid rnams so/ /dpung gnyen du 'gyur zhes bya ba ni chos bstan pas 'khor ba dang mya ngan las 'das pa mnyam pa nyid du nye bar sgrub pa'i don gyis skyob pa por 'gyur ba'o//gling du 'gyur ba'i byed pa bstan pa ni rab 'byor ji ltar na zhes bya ba la sogs pa gsungs pa yin te/ chus yongs su bskor ba zhes bya ba ni chu'i dbus na gnas pa'i skam sa'i cha'o//sngon gyi mtha' dang phyi ma'i mtha' yongs su chad pa'o zhes bya ba la sngon gyi mtha' ni rgyu'o/ /phyi ma'i mtha' ni 'bras bu ste de gnyis kyis yongs su bcad par dbus na gnas pa sgyu ma lta bu'i ngo bo'o/ /rab 'byor yongs su chad pa 'dis zhes bya ba ni de kho na nyid du skye ba med pas so //'di ni zhi ba'o zhes bya ba la sogs pa tshig lngas ni sbyor ba dang / mthong ba dang / bsgom pa dang / mi slob pa dang / khyad par gyi lam rnams la go rims bzhin du lam gyi bden pa yin par bshad do/ /'jig rten gyi gling du 'gyur ro zhes bya ba ni chus yongs su bcad pa'i skam sa dang chos mthun par sngon gyi mtha' dang phyi ma'i mtha' yongs su chad par chos thams cad rtogs pas sred pa zad pa 'dod chags dang bral ba dang /'gog pa mya ngan las 'das pa ston par byed pa nyid kyis na/ rang dang gzhan gyi don rtogs pa'i rten gyi ngo bos nye bar bsgrub pa'i rten te gnas su 'gyur ba yin no//rab 'byor ji ltar na zhes bya ba la sogs pa la snang ba'i byed pa yang snang ba dang bcas pa'i rin po che'i gling dang chos mthun pa dang ma rig pa'i mun pa zad pa ni sred pa la sogs pa zad pa'i nang du 'du bas na gling gi byed pa nyid yin pa'i logs shig tu byas pa ni/ye shes kyi snang ba mi shes pa zad pa gtso bo yin pa'i phyir ro zhes blta bar bya'o/ /ma rig pa'i sgo nga'i sbubs zhes bya ba la sogs pa la ma rig pa nyid sgo nga'i sbubs yin te/ gzung ba dang 'dzin pa'i rnam pa la sogs pa rnam par snang ba yin la des yongs su khebs pa ste phyi rol kun nas mi shes pa dang ldan pa sems can mun pas zil gyis non cing /nang nas ma rig pa'i bag chags kyi sa bon gyis zil gyis non pa rnams kyi mi shes pa'i mun nag thams cad sel bar byed do zhes bya ba phyi rol dang nang gi mi shes pa spong bar byed do zhes 'brel to/ /ci zhig byed pas she na shes rab kyis snang bar byed cing zhes bya ba gsungs te/ye shes kyis snang ba byed pas zhes bya ba'i don to/ /yongs su 'dren pa'i byed pa ston pa ni rab 'byor ji ltar na zhes bya ba la sogs pa gsungs pa yin te/ yongs su 'dren par 'gyur ro zhes bya ba ni gzugs la sogs pa'i chos thams cad rang bzhin gyis skye ba med pa dang 'gag pa med par chos ston pa'i phyir kha lo sgyur bar gyur pas gzhan gyi don sgrub pas nye bar bsdus pa yin pa'i phyir 'dren pa yin no//lhun gyis grub pa la sogs pa'i byed pa gsum gyi don 'dri bar mdzad cing gsungs pa ni rab 'byor ji ltar na zhes bya ba la sogs pa yin te/ 'jig rten gyi rten du 'gyur zhe na zhes bya ba ni byed pa gsum char gyi bya ba nye bar sgrub pas rten du 'gyur ba yin no//de la thams cad shes pa nyid kyi skabs kyi chos ston par mdzad pa nyid kyis lhun gyis grub par 'jug pas sems can gyi don byed pa'i phyir na rten du gyur pa yin pa'i phyir lhun gyis grub pa'i byed pa re zhig bstan par bya ba'i phyir/rab 'byor 'di la zhes bya ba la sogs pa gsungs pa yin te/ nam mkha'i rten can no zhes bya ba ni/ nam mkha'i mthar thug pa'i ngang tshul can no/ /'di dag nyid bstan par bya ba'i phyir ji ltar nam mkha' 'ong ba med pa dang zhes bya ba la sogs pa gsungs pa yin te/de la rjes su med pa tsam ni nam mkha' ste/ 'das pa'i dus nas ma 'ongs pas na 'ong ba med pa'o/ /ma 'ongs pa'i dus su 'gro ba dang bral bas na 'gro ba med pa'o/ /byed pa'i rgyu med pas na ma byas pa'o/ /'jig pa'i rgyu dang bral bas na rnam par mi 'gyur ba'o/ /gnas par byed pa'i 'du byed mi 'thad pas na mngon par 'dus ma byas pa'o//dus gsum du rang gi ngo bo dang bral bas na go rims bzhin du mi gnas pa/ yang dag par mi gnas pa rnam par mi 'gyur ba zhes bya ba yin no/ /de nyid kyis na ma skyes pa ma 'gags pa'o/ /nye bar bsdu ba'i don ni nam mkha' dang 'dra'o//rnam par mi rtog pa'o zhes gsungs pa yin te/ nam mkha' dang mtshungs pa nyid yin pa'i phyir rnam par mi rtog pa'o/ /'ong ba med pa la sogs pa ni rigs pa dang ldan pa ma yin no snyam pa'i dogs pa de ci'i phyir zhe na zhes bya bas bsu nas/ rab 'byor gzugs kyi stong pa nyid gang yin pa de ni zhes bya ba la sogs pa gsungs pa yin te/stong pa nyid ni skye ba med pa'i ngo bo nyid do/ /gal te stong pa nyid de la 'gro ba dang 'ong ba med mod/ de lta na yang gzugs la sogs pa la ci ltar med snyam pa'i dogs pa/ de ci'i phyir zhe na zhes bya bas bsu nas/ /rab 'byor chos thams cad ni stong pa nyid kyi rten can te zhes bya ba la sogs pa gsungs te/chos thams cad skye ba med pa'i ngo bo nyid yin pas na stong pa nyid la sogs pa'i rang bzhin no/ /de la sgyu ma lta bu yin pa'i phyir stong pa nyid do/ /mtshan ma thams cad dang bral bas na mtshan ma med pa'o //don du gnyer ba'i yul las 'das pa'i phyir smon pa med pa'o/ /nam mkha' dang 'dra bar rang bzhin gyis 'od gsal ba nyid yin pa'i phyir mngon par 'du mi byed pa'o/ /rten de las mi 'da' ba'o zhes bya ba ni rang bzhin de mi 'dor ba'o/ /de lta bas na byang chub sems dpa' sems dpa' chen po bla na med pa yang dag par rdzogs pa'i byang chub tu mngon par rdzogs par sangs rgyas nas 'jig rten gyi rten can du 'gyur ro zhes bya ba 'chad bzhin pa'i 'gres kyi tha mar 'brel bar bya'o//thams cad shes pa nyid kyi skabs kyi phan pa la sogs pa nas lhun gyis grub par 'jug pa'i mthar thug pa'i byed pa thams cad ni mya ngan las 'da' ba yongs su ston pa'i don shes par bya'o//lam shes pa nyid kyi rnam pa'i chos ston par mdzad pa nyid kyis na theg pa ji lta ba bzhin du nges par 'byung ba de mngon sum du mi byed pas nye bar bsgrub pa'i phyir rten du 'gyur ba yin no/ /theg pa gsum gyi nges par 'byung ba de'i 'bras bu mngon sum du mi byed pa bstan pa ni/rab 'byor chos thams cad ni 'byung ba med pa zhes bya ba la sogs pa gsungs pa yin te/ de la kun brtags pa'i sdug bsngal dang bral bas 'byung ba med pa'i rten can no/ /rnam par brtags pa'i sdug bsngal dang bral bas skye ba med pa'i rten can no//chos nyid kyi sdug bsngal dang bral bas dngos po med pa'i rten can no/ /kun brtags pa'i kun 'byung ba med pas rmi lam lta bur so sor snang ba tsam du yod pa nyid kyis ni rmi lam gyi rten can no/ /tshad ma dang 'gal ba nyid yin pa'i phyir ji ltar bdag med pa de bzhin du rnam par brtags pa'i kun 'byung ba med pa'i phyir bdag gi rten can no//chos nyid kyi 'byung ba ni sgyu ma lta bu nyid kyis na yongs su chad pa ma yin pa'i phyir mu med pa'i rten can no/ /kun tu brtags pa la sogs pa dngos po rnam pa gsum 'gog pas/ go rims bzhin du zhi ba'i rten can dang mya ngan las 'das pa'i rten can dang /dbyung du med pa'i rten can no zhes gsum brjod par bya'o/ /de bzhin du kun brtags pa la sogs pa rnam pa gsum lam gyi rang bzhin yin pas na 'ong ba med pa'i rten can dang / 'gro ba med pa'i rten can dang / mi g.yo ba'i rten can te zhes bya ba yin no//'dir yang 'og nas gsungs pa'i tshig snga ma bzhin du 'gres kyi mthar sbyar ro/ /rten gyi byed pa bshad pa ni/ rab 'byor chos thams cad ni zhes bya ba gsungs pa yin te/ gzugs kyi rten ni chos nyid kyi bdag nyid can gzugs la sogs pa'i rang bzhin no/ / 'jig rten gyi rten du 'gyur ba yin no zhes bya ba ni/ rnam pa thams cad mkhyen pa nyid kyi dbang du byas pa'i chos thams cad ston par mdzad pa nyid kyis na byang chub sems dpa' 'jig rten du 'os par 'gyur ro/ /de ltar na ji skad du bshad pa'i byed pa'i mtshan nyid ni rnam pa bcu gcig gi bdag nyid can yin par khong du chud par bya'o//de skad du yang / phan dang bde dang skyob pa dang / /mi rnams kyi ni skyabs dag dang / /gnas dang dpung gnyen gling dang ni/ /yongs 'dren pa zhes bya ba dang / /lhun gyis grub dang theg gsum gyi/ /'bras bu mngon sum mi byed dag /tha ma rten gyi mdzad pa ste//'di ni byed pa'i mtshan nyid yin/ /zhes gsungs pa yin no/ /byed pa'i mtshan nyid kyi rnam par bcad pa rnams kyi ngo bo nyid ston pas/ sgrub pa po'i don ni bcom ldan 'das shes rab kyi pha rol tu phyin pa zab mo 'di su dag gis 'tshal bar 'gyur zhes gsol pa yin no/ /rang bzhin ston par byed pa ni/rab 'byor byang chub sems dpa' sems dpa' chen po zhes bya ba la sogs pa gsungs pa yin no/ /ngo bo nyid kyi mtshan nyid brjod pa'i don du zhus pa ni/ bcom ldan 'das zhes bya ba la sogs pa gsol pa yin te/ lan btab pa ni rab 'byor byang chub sems dpa' zhes bya ba la sogs pa gsungs pa yin no//'dul ba las byung ba dben pa'i rang bzhin can no zhes bya ba ni/ 'dis 'dul bas na 'dul ba ste/ chos kyi dbyings so/ /de las byung ba ni mi mthun pa'i phyogs las dben pa yin pas na/ dben pa'i rang bzhin gang yin pa de la de skad ces bya'o//de ltar na tshig 'di nyid kyis 'dod chags la sogs pa dben pa'i rang bzhin nyid kyis na nyon mongs pa rnams dben pa'i rang bzhin yin no/ /'dod chags la sogs pa'i rtags lus la sogs pa'i gnas ngan len dben pa'i rang bzhin nyid kyis na nyon mongs pa'i rtags dben pa'i rang bzhin no//'dod chags la sogs pa'i mtshan ma tshul bzhin ma yin pa yid la byed pa dben pa'i rang bzhin nyid kyis na nyon mongs pa'i mtshan ma dben pa'i rang bzhin no/ /'dod chags dang 'dod chags med pa dang zhe sdang dang zhe sdang med pa dang /gti mug dang gti mug med pa dben pa'i rang bzhin nyid kyis na mi mthun pa'i phyogs dang gnyen po dag dben pa'i rang bzhin no zhes bya ba ngo bo nyid rnam pa bzhi po thams cad mkhyen pa nyid kyi rten can yin pa nyid du lhag par mos par byed pa rnams kyi bsgom pa'i lam nye bar dgod pa'i don du bstan pa yin no//rten de nyid bstan pa ni bcom ldan 'das byang chub sems dpa' zhes bya ba la sogs pa yin no/ /de lta bu'i rten can zhes bya ba ni rnam pa thams cad mkhyen pa'i rten can no/ /legs par smras pa nyid du bstan pa ni/ /rab 'byor de de bzhin no zhes bya ba la sogs pa gsungs pa yin no//bya dka' ba'i ngo bo nyid bstan pa ni/ bcom ldan 'das sems can grangs ma mchis zhes bya ba la sogs pa gsol pa yin no/ /rab 'byor de de bzhin no zhes bya ba ni chos thams cad mtha' las 'das pas yod pa ma yin pa nyid kyis de dang 'brel pa med pa yin pa'i phyir sems can thams cad yongs su mya ngan 'da' ba'o zhes dka' ba'i go cha bgos pa nyid kyis na dka' ba byed pa'o//go cha'i rang gi ngo bo gsal bya ba ni yang rab 'byor byang chub sems dpa' zhes bya ba la sogs pa gsungs pa yin no/ /de la da ltar byung ba'i gzugs la sogs par mngon par zhen pa dang bral bas/gzugs la sogs pa dang 'brel pa ma yin no/ /ma 'ongs pa'i don du gnyer ba las phyir phyogs pa nyid yin pa'i phyir gzugs la sogs pa'i don du 'brel pa yang ma yin no/ /'di ni rigs pa dang ldan pa ma yin no snyam pa'i dogs pa de ci'i phyir zhe na zhes bya bas bsu nas rab 'byor zhes bya ba la sogs pa gsungs pa yin te//chos thams cad dang ma 'brel ba'o zhes bya ba ni de kho na nyid du na ma brtags na nyams dga' ba yin pa'i phyir ro zhes bya bar dgongs so/ /mtha' gcig tu nges pa'i ngo bo nyid bstan pa ni/bcom ldan 'das byang chub sems dpa' zhes bya ba la sogs pa gsol pa yin te/ de ltar go cha chen po bgos pa zhes bya ba ni mtha' gcig tu nges pa'i rang bzhin dang ldan pa'o/ /de la byang chub sems dpa' ni yang dag par zhugs pa yin pa'i phyir/ nyan thos kyi sa dang rang sangs rgyas kyi sa la re bar mi bya la/sangs rgyas kyi sa la yang mngon par 'dod pa'i bar gyis re ba mi bya'o/ /don 'di ji ltar rnyed ces gsungs pa ni/ rab 'byor khyod don gyi dbang ci zhig mthong na zhes bya ba la sogs pa'o/ /yum ni dmigs pa thams cad kyi gnyen po yin pa'i phyir ro zhes bya ba'i dgongs pas lan 'debs par mdzad pa ni/rab 'byor byang chub sems dpa' zhes bya ba la sogs pa gsungs so/ /de la rgyu ma tshang bas na/ gnas ma yin te mi srid pa yin la 'bras bu mi 'byung bas go skabs ma yin zhing skabs med pa'o/ / nyan thos la sogs pa'i sar ltung ba gnas ma yin zhing go skabs ma yin pa nyid kyis na mngon par zhen pa med pa'i tshul gyis mtha' gcig tu bsgom pa gsal bar bstan pa yin no/ /ched du bya ba'i ngo bo nyid bshad pa ni 'on kyang gang gis zhes bya ba la sogs pa gsungs pa yin te/ sangs rgyas kyi sa nyid la re bar bya'o zhes bya ba ni/ chos thams cad sgyu ma lta bur lhag par mos pas zhes bya bar dgongs te/ 'dis ni ched du bya ba bsgom pa ma 'khrul pa nyid yin par bstan to/ /mi dmigs pa'i ngo bo bstan pa ni bcom ldan 'das shes rab kyi pha rol tu phyin pa zab mo zhes bya ba la sogs pa gsol pa yin no//de ni sus kyang bsgom par bgyi ba ma lags zhes bya ba ni/ bsgom par bya ba dang sgom pa po dang sgom pa mi dmigs pa'i phyir ro/ /de nyid ni de ni zhes bya ba la sogs pa gsol pa yin no/ /snga ma bzhin du de ci'i slad du zhe na zhes dogs pa bsu nas/bcom ldan zhes bya ba la sogs pa gsol te/ chos gang yang yongs su grub pa ma mchis pa'i slad du'o zhes bya ba ni/ byed pa po dang / las dang bya ba la sogs pa'i mtshan nyid do/ /de lta na ji ltar bsgom zhe na/ bcom ldan 'das 'di lta ste zhes bya ba la sogs pa gsol te/nam mkha' bsgom pa lags so zhes bya ba ni de kho na nyid du sgyu ma dang 'dra bar bsgom pa'o/ /bsgom pa de nyid rnam pa thams cad mkhyen pa nyid la sogs pa'i dbye bas brjod pa ni/ 'di lta ste shes rab kyi pha rol tu phyin pa bsgom pa 'di ni zhes bya ba la sogs pa smos pa'o//de la rnam pa thams cad mkhyen pa nyid kyis mngon par rtogs pa thams cad skye ba med par sdud pas chos thams cad mi bsgom pa lags so/ /lam gyi rnam pa shes pa nyid kyis lam thams cad la mngon par zhen pa med par slob pas/ ma chags pa bsgom pa'o//thams cad shes pa nyid kyi dngos po ma lus par bsdus pas mtha' yas pa nyid bsgom pa'o/ /rnam pa thams cad mngon par rtogs pas khyad par gyi lam gyi ngo bor gyur pa yin pa'i phyir dngos po ma mchis pa bsgom pa'o/ /rtse mo'i mngon par rtogs pas mthar thug pa'i lam gyi mtshan nyid yin pa'i phyir yongs su gzung ba ma mchis pa bsgom pa'o//mngon par zhen pa med pa'i ngo bo nyid bstan pa ni/ rab 'byor de de bzhin no/ /de de bzhin te zhes bya ba rjes su sngon du 'gro bas/ rab 'byor de lta bas na zhes bya ba la sogs pa gsungs pa yin te/de lta bas na zhes bya ba ni 'og nas bshad pa'i rgyus zhes bya ba'i tha tshig go/ /rgyu nyid ni rab 'byor 'di ltar byang chub sems dpa' sems dpa' chen po zhes bya ba la sogs pa gsungs pa yin te/ 'di ltar zhes bya ba'i sgra ni gang gi phyir zhes bya ba'i don la 'jug go/ / mngon par chags par mi byed pa zhes bya ba ni dngos por 'dzin par mi byed pa'o/ /gzhan gyis smras pa dang gzhan gyis bgros pa dag la mngon par chags par mi byed pa zhes bya ba ni/ sde pa'i dge slong rnams kyis 'di ni sangs rgyas kyi bka' ma yin no zhes gsal por smra ba gang yin pa de ni gzhan gyis smra ba'o//gsang ste smras pa ni gzhan gyis bgros pa ste/ de dag nyan par mi byed pa'o/ /pha rol gyi dad pa'i phyir mi 'brang ba zhes bya ba ni bdag nyid yid ches pa'i dad pa thob pa'i phyir gzhan gyis bkrir mi btub pa'o/ /rtogs par byed ces bya ba ni gzhung la sogs pa khong du chud pa'i phyir ro/mos par byed ces bya ba ni don la dmigs pa'i phyir ro/ /de bzhin du de ci'i phyir zhe na zhes rtog pa la rab 'byor 'di ltar zhes bya ba la sogs pa gsungs te/ skye ba gzhan du bag chags bskyed pa med par mi skrag pa la sogs par mi 'gyur zhes bya bar dgongs so//mi skrag pa la sogs pa ni/ lam shes pa nyid kyi rnam pa bsgom pa bshad par gyur pa yin no/ /dmigs pa'i ngo bo nyid bstan pa ni/ bcom ldan 'das byang chub sems dpa' sems dpa' chen po gang zhes bya ba la sogs pa gsol pa yin te/ rnam pa gang gis zhes bya ba ni 'dzin pa'i rnam pas so//bye brag tu brtags pa zhes bya ba ni nges par brtags pa'o/ /thams cad mkhyen pa nyid la gzhol ba zhes bya ba ni/ sems kyi rgyun thams cad mkhyen pa nyid gsum gyi mthar thug par gzhol ba'o/ /'dis ni thams cad mkhyen pa nyid gsum bsgom pa bshad pa yin no/ / nges par shes pa rang gi ngo bo'i rgyun bye brag tu brtag pa la mkhas pa ni/ bcom ldan 'das ji ltar zhes bya ba la sogs pa gsol pa yin no/ /sbyor ba dang dngos gzhi dang mjug gi gnas skabs su chos thams cad sgyu ma 'dra bar bsgom pa'i bdag nyid can gyi sems kyi rgyun sngon du 'gro ba thams cad mkhyen pa nyid la gzhol ba'i sems kyi rgyun bye brag tu brtags pa yin no//zhes gsungs pa ni rab 'byor nam mkha' la gzhol ba'i zhes bya ba la sogs pa'i tshig gsum mo/ /'di ni bye brag tu brtags pa'o zhes bya ba ni ji skad du bshad pa'i rgyud nges par yang dag par bye brag tu brtags pa zhes bya ba'i tha tshig go//'di ni rigs pa dang ldan pa ma yin no snyam pa'i dogs pa de ci'i phyir zhe na zhes bya bas bsu nas/ rab 'byor thams cad mkhyen pa nyid ni zhes bya ba la sogs pa gsungs te/ gang gi phyir de kho na nyid du na tshad ma dang gzhal bya las 'das pa yin pas ci rigs par thams cad mkhyen pa nyid gzhal du med pa dang /tshad ma med pa yin pa de bas na sgyu ma lta bur bsgoms pas rgyud nges par bya ba ni bye brag tu brtags pa yang dag pa yin no zhes bya ba'i tha tshig go/ /gzhan du na gzhal bya la sogs pa yod pas dngos por 'dzin par 'gyur ro zhes bya ba ni ngag gi don yin no//don de nyid gsal bar bya ba ni/ rab 'byor gzhal du med pa zhes bya ba la sogs pa gsungs pa yin te/ de la thob pa ni so so'i skye bo'i tshul khrims la sogs pa'i rang bzhin tshogs kyi lam mo/ /mngon par rtogs pa ni tshogs yang dag par bsags pa'i nges par 'byed pa'i cha dang mthun pa'i bdag nyid can sbyor ba'i lam mo//khong du chud pa ni chos kyi dbyings kun tu 'gro ba so sor rtog pa'i mtshan nyid can gyi mthong ba'i lam mo/ /lam ni 'jig rten pa'i bsam gtan dang gzugs med pa la dmigs pa'i 'jig rten pa'i bsgom pa'i lam mo//lam gyi 'bras bu ni sdug bsngal gyi bden pa la sogs pa shes pa'i ngo bo 'jig rten las 'das pa'i bsgom pa'i lam mo/ /ye shes ni nyon mongs pa chen po'i chen po la sogs pa spong bar byed pa chung ngu'i chung ngu la sogs pa'i rang bzhin gyi lam chung ngu'o//rnam par shes pa ni nyon mongs pa 'bring gi chen po la sogs pa rnam par 'jig par byed pa chung ngu la sogs pa'i mtshan nyid can gyi lam 'bring ngo / /skye ba ni nyon mongs pa chung ngu'i chen po la sogs pa 'byin par byed pa chen po'i chung ngu la sogs pa'i rang bzhin can gyi lam chen po'o//'jig pa ni bsgom pa'i lam du nyon mongs pa spong ba'i 'bring gi thabs kyi sbyor ba'i lam mo/ /'byung ba ni nyon mongs pa spangs pa rnam par grol ba thob par byed pa yang dag pa'i bar chad med pa'i lam mo/ /'grib pa ni nyon mongs pa las dben pa'i ye shes mngon du byed pa'i rnam par grol ba'i lam mo//'gog pa ni kha cig na re nyon mongs pa'i rnam pa lhag ma'i yin te sbyor ba dang bar chad med pa dang / rnam par grol ba'i bdag nyid can khyad par gyi lam yin no zhes bshad do/ /gzhan dag ni yon tan khyad par can mngon par sgrub par byed pa'i khyad par gyi lam ni 'gog pa yin no zhes zer ro//sgom pa ni mi shigs pa'i sgrib pa thams cad 'jig par byed pa'i rdo rje lta bu'i ting nge 'dzin no/ /rnam par bsgom pa dang bral ba ni mthar thug pa'i lam ste/ zad pa dang mi skye ba shes pa'o/ / yul ni yul gyi spyi'o/ /phyogs ni yul gyi khyad par ro/ /sus kyang mngon par rdzogs par 'tshang rgya bar mi nus te zhes bya ba ni gzugs la sogs pa'i rnam par rtog pas mi nus pa'o/ /de nyid ni gzugs kyis ma yin zhes bya ba la sogs pa gsungs pa yin no/ /gal te de ltar yin na/dmigs pa chos rnams thams cad de/ /de yang dge la sogs pa yin/ /zhes bya ba la sogs pa gsungs pa ma yin nam/ de ji ltar rung snyam pa'i dogs pa de ci'i phyir zhe na zhes bya bas bsu nas/ rab 'byor gzugs nyid ces bya ba la sogs pa gsungs pa yin te/ gang gi phyir rnal 'byor pa'i kun rdzob tu gzugs la sogs pa nyid sgyu ma lta bu nyid du rtogs pa ni 'tshang rgya ba nyid yin no zhes bya ba'i tha tshig go/ /ji skad du yang / grags pa tsam gang ji bzhin don min te/ /de'i don rtogs pa brten pa'i 'bras bu yin/ /zhes bshad pa lta bu'o/ /sbyin pa'i pha rol tu phyin pa nyid dang zhes bya ba la sogs pa la/de la sbyin pa dang tshul khrims dang bzod pa'i pha rol tu phyin pa gsum dang / brtson 'grus dang bsam gtan gyi pha rol tu phyin pa'i phyogs gcig ni bsod nams kyi tshogs so/ /ye shes kyi tshogs ni shes rab kyi pha rol tu phyin pa dang brtson 'grus dang bsam gtan gyi pha rol tu phyin pa dag gi phyogs gcig ste/'di dag thams cad ni sgyu ma lta bu nyid du khyad par med pa'i phyir thams cad mkhyen pa nyid yin no/ /brgya byin la sogs pas yang dag pa'i chos rtogs pas dad pa phul du byung ba yang dag par skyes pa'i phyir bcom ldan 'das kyi zhabs la phyag 'tshal ba sngon du 'gro bas rgyal ba'i yum gyi bdag nyid che ba gsal bar ston pa ni de nas lha rnams kyi dbang po brgya byin zhes bya ba la sogs pa smos pa yin no//de la zab pa ni gzugs la sogs pa de bzhin nyid kyi rang bzhin yin pa'i phyir ro/ /thos pa dang bsam pa dang bsgom pa'i gnas skabs su sgyu ma lta bu nyid yin pa'i phyir go rims bzhin du gting dpag dka' ba dang /blta dka' ba dang rtogs par dka' ba'o/ /don gyi dbang 'di gzigs nas zhes bya ba las kyang zhes bya ba'i sgras gdul bya gzung du mi rung ba la sogs pa 'ba' zhig tu ma zad kyi 'on kyang chos zab mo 'di yang gzigs nas zhes bya ba'i tha tshig go//brtson pa chung ba la zhes bya ba ni/ bya ba nyung ba nyid la thugs gzhol bar mdzad de/ chos bstan pa la gzhol bar ma mdzad la/ de lta na yang tshangs pas gsol ba btab pas thugs rje chen pos chos kyi 'khor lo bskor ro zhes bya bar bsams pa'o//legs par smras pa nyid kyis rjes su gsung ba ni lha'i bu dag de de bzhin no zhes bya ba la sogs pa yin no/ /nye bar bsdu ba'i don ni lha'i bu dag kye ma zhes bya ba la sogs pa gsungs pa yin no//zab pa 'di dag gang yin zhe na/ gang du sus kyang zhes bya ba la sogs pa gsungs pa yin no/ /'jig rten thams cad dang mi mthun pa'i ngo bo nyid bstan pa ni/ nam mkha' zab pa'i phyir zhes bya ba la sogs pa gsungs pa yin te / ma brtags na gcig pu nyams dga' ba'i rgyu nyid kyis na nam mkha' zab pa'i phyir chos 'di zab bo//de kho na nyid du na sgyu ma lta bu'i rang bzhin yin pa'i phyir/ bdag zab pa'i phyir chos 'di zab po/ /skye ba med pas chos thams cad 'ong ba med pa'i phyir chos 'di zab po/ /'jig pa dang bral bas chos thams cad 'gro ba med pa'i phyir chos 'di zab po//'di skad du rgyu dang 'bras bu'i chos rnams rmi lam lta bur thugs su chud pa sngon du 'gro ba'i zad pa dang mi skye ba mkhyen pa'i ngo bo'i chos ngas mngon par sangs rgyas te bshad pa yin no zhes brjod pa yin no/ /ji skad du bshad pa'i ngo bo nyid gsal bar byed pa ni/ bcom ldan 'das ngo mtshar to zhes bya ba la sogs pa gsol pa yin te/rgyu khyad par du 'phags pas ngo mtshar to/ /'bras bu phul du byung bas rmad du byung ba'o/ /'jig rten thams cad phyin ci log nyid yin pas 'jig rten thams cad dang mi mthun pa'o/ /de nyid bstan pa ni bcom ldan 'das zhes bya ba la sogs pa gsol pa yin te/chos 'di zhes bya ba ni/ shes rab kyi pha rol tu phyin pa'i bdag nyid can no/ /shes rab kyi pha rol tu phyin pa'i bshad pa mngon par rtogs pa'i rgyan gyi snang ba las lha'i le'u zhes bya ste bco lnga pa'o// //thogs pa med pa'i ngo bo nyid bstan pa ni/de nas bcom ldan 'das zhes bya ba la sogs pa smos pa yin te/ chos 'di ni zhes bya ba ni thams cad mkhyen pa nyid kyi rnam pa gsum po shin tu rdzogs par rtogs pa nyid kyis na/ gzugs la sogs pa chos thams cad la shes pa'i rang bzhin thogs pa med pa'i phyir bstan pa ni chos 'di ni gang la yang thogs pa ma mchis so//gzhi med pa'i ngo bo nyid bstan pa ni/ kye ma bcom ldan 'das nam mkha' dang mtshungs pa zhes bya ba la sogs pa gsol to/ /gnas thams cad mi dmigs pa'i slad du zhes bya ba ni shes pa dang shes bya mnyam pa nyid kyis rten thams cad mi dmigs pa'i don gyis thogs pa ma mchis pa'i mtshan nyid de zil gyis mi non pa nyid do//gnyis su ma mchis pa'i slad du zhes bya ba ni/ gcig pu nyid yin pa'i phyir mtshungs pa ma mchis pa'i mtshan nyid de/ 'dra ba med pa'i mtshan nyid do/ /rgol ba ma mchis pa'i slad du zhes bya ba ni mi mthun pa'i phyogs thams cad las 'das pa'i phyir zla ma mchis pa'i mtshan nyid ni/ mi mthun pa'i phyogs med pa'i mtshan nyid do/ /mngon par grub pa ma mchis pa'i slad du zhes bya ba ni/ ma skyes pa yin pa'i phyir gnas ma mchis te rten med pa'i ngo bo nyid do//skye ba thams cad skye ba ma mchis pa'i slad du zhes bya ba ni lha la sogs pa'i 'gro ba thams cad yod pa ma yin pa'i ngo bo nyid yin pa'i phyir 'byung ba ma mchis pa ni skye ba med pa'o/ /lam thams cad mi dmigs pa'i slad du zhes bya ba ni/lam thams cad nyid dmigs su med pa'i phyir lam ma mchis pa ni lam med pa'o/ /sbyor ba dang mthong ba dang sgom pa khyad par dang mi slob pa'i lam rnams su gnas med pa zhes bya ba 'di khyad par du byed pa'i don du thogs pa ma mchis pa'i mtshan nyid do zhes bya ba la sogs pa tshig lnga smos pa yin no//'gro ba med pa'i ngo bo nyid bshad pa ni/ bcom ldan 'das bcom ldan 'das kyi nyan thos zhes bya ba la sogs pa gsol pa yin te/ de bzhin gshegs pa dang rjes su 'brel pa'i nyan thos 'di ni rjes su mthun pa phyis skyes pa lags pas/de bzhin gshegs pa dang 'dra bar rjes su skyes pa'o/ /nyan thos yin na yang ji ltar de bzhin gshegs pa dang 'dra bar rjes su mthun par skyes pa yin snyam pa'i dogs pa/ de ci'i slad du zhe na zhes bya bas bsu nas/ bcom ldan 'das de ni 'di ltar zhes bya ba la sogs pa gsol pa yin te/gang gi phyir chos thams cad rtogs pa'i don gyi yul ma yin du zin na yang / yang dag par stong pa nyid du ston pa de bas na de bzhin gshegs pa dang 'dra bar rjes su mthun par skyes pa yin no zhes bya ba'i tha tshig go/ /dngos po'i chos nyid kyi rjes su mthun par skyes par mi rung bar ston pa ni/lha'i bu dag gang 'di skad du zhes bya ba la sogs pa gsungs pa yin te/ ma skyes pa'i phyir zhes bya ba ni de kho na nyid du na ma skyes pa'i phyir ma skyes pa'o/ /de bzhin gshegs pa'i nyan thos gnas brtan rab 'byor ni de nyid kyi rjes su song bar gyur cing de'i bdag nyid du rjes su song ba yin no//de bzhin nyid ces bya ba ni slob dpon dbyig gnyen gyis de bzhin gshegs pa'i ngo bo ni de bzhin nyid kho na yin no zhes bstan to/ /ji ltar zhe na ji ltar de bzhin gshegs pa'i zhes bya ba la sogs pa gsungs so/ / de ltar na gnas brtan rab 'byor ni zhes bya ba ni/ gang gi phyir 'das ma thag par smras pa'i de bzhin gshegs pa'i de bzhin nyid kyi rjes su song ba yin te/ de bas na ma skyes pa'i phyir rjes su mthun par skyes so zhes snga ma dang sbyar bar bya'o/ /de bzhin du 'og ma rnams la yang shes par bya'o//bsgoms pa'i stobs kyis de bzhin gshegs pa nyid 'thob kyi/ dngos po'i chos kyis ma yin na ji ltar rjes su skyes pa yin zhe na/ gnas brtan rab 'byor ni zhes bya ba la sogs pa gsungs te/ dang po nyid nas zhes bya ba ni thog ma kho na nas zhes bya ba'i tha tshig go//'di ni rigs pa dang ldan pa ma yin no snyam pa'i dogs pa de ci'i phyir zhe na zhes bya bas bsu nas/ de bzhin gshegs pa'i de bzhin nyid ces bya ba la sogs pa gsungs te/ de ni chos thams cad kyi de bzhin nyid ces bya ba ni/ rdzas su mngon par 'dod pa gzugs la sogs pa'i spyi'i chos nyid ni skye ba med pa'o zhes bya ba'i don to//de ltar na de bzhin gshegs pa dang chos thams cad kyi de bzhin nyid ni phan tshun dbyer mi phyed pa nyid kyis/ de bzhin gshegs pa'i de bzhin nyid ni thams cad kyi yul can yin pa nyid du ston to/ /de bas na de nyid rab 'byor gyi yang yin pa ni/de bzhin gshegs pa'i de bzhin nyid gang yin pa dang zhes bya ba la sogs pa gsungs pa yin te/ de bas de bzhin gshegs pa'i rjes su skyes so zhes bya ba ni/ de bzhin nyid dang ldan pa'i tshul gyis rjes su skyes pa'o/ /de lta na ni de bzhin nyid rdzas su yod par 'gyur ro zhe na de bzhin nyid de yang zhes bya ba la sogs pa gsungs te/de bzhin nyid ma yin te zhes bya ba ni yul med pa la dgag pa mi 'thad pas/ de bzhin nyid kyang kun rdzob tu ni sgyu ma dang mtshungs pa yin no zhes bya ba'i don to/ /de bzhin gshegs pa'i rjes su skyes pa'o zhes bya ba ni/rjes su zhes bya ba'i sgra las kyi byed pa'i tshig yin pa las/ de bzhin gshegs pa'i zhes smos pa ni de dang 'brel pa yin par brjod par 'dod pa yin no/ /de kho na nyid du chos nyid kyi ngo bo nyid yin na ji ltar rjes su skyes pa yin zhe na/ de bzhin gshegs pa'i zhes bya ba la sogs pa gsungs te/gnas pa zhes bya ba ni kun rdzob tu rgyun gyi chos nyid kyis so/ /gal te de lta yin na gnas brtan rab 'byor ni 'gyur ba la sogs pa dang ldan par 'gyur ro zhe na/ ji ltar de bzhin gshegs pa'i de bzhin nyid ces bya ba la sogs pa gsungs te/de la lhag pa'i ngang ma tshang ba'i 'gyur ba med pa dang / rnam par 'gyur ba med pa yin no/ /rang dang gzhan gyi rnam par rtog pa dang bral bas rtog pa med pa dang / rnam par rtog pa med pa yin no/ /rab 'byor gyi de bzhin nyid de bzhin gshegs pa'i de bzhin nyid dang 'dra ba yin na/'gyur ba med pa la sogs pa'i rang bzhin ga las yin zhe na/ ji ltar de bzhin gshegs pa'i de bzhin nyid ces bya ba la sogs pa gsungs pa yin no/ /'di dag nyid ga la shes snyam pa'i dogs pa de ci'i phyir zhe na zhes bya bas bsu nas/de bzhin gshegs pa'i de bzhin nyid gang yin pa dang zhes bya ba la sogs pa gsungs so/ /'di ni gcig ste/ zhes bya ba ni tha mi dad pa ste/ gang gi phyir tha dad par byed pa las dang byed pa po dang / bya ba nye bar ma dmigs pas gnyis su med cing gnyis su byar med pas gnyis ma yin zhing /gnyis su med pa'i de bzhin nyid yin no zhes don gyi dbye bas brjod pa yin no/ /rnam pa thams cad du gzhi nyid dang bral bas gang du yang de bzhin nyid ma yin/ rgyu med pas gang las kyang ma yin/ 'brel pa med pas gang gi yang ma yin no//'brel pa yod pa la sogs pa ni dngos po nyid du 'gyur bas de bzhin nyid du mi 'gyur te/ de bas na gang gi phyir zhes bya ba la sogs pa gsungs so/ /de ltar na gnas brtan rab 'byor ni zhes bya ba ni/ de bzhin gshegs pa dang chos thams cad kyi de bzhin nyid dag de ltar ngo bo nyid gcig pa nyid yin pas na/de bzhin gshegs pa'i de bzhin nyid kyis bsdus pa nyid yin pa'i phyir/ rab 'byor gyi de bzhin nyid ni 'gyur ba med pa la sogs pa'i rang bzhin yin te/ de bas na ma byas pa'i de bzhin nyid kyi rjes su mthun par skyes so zhes bya ba'i tha tshig go//chos thams cad de lta bu'i tshul du rjes su skyes pa nyid yin pa'i phyir/ rab 'byor la khyad par du 'phags pa ci zhig yod ce na/ de ni bden mod kyi 'on kyang kho na rtsod pa'i gzhir gyur pa de kho na bstan par bya ba yin gyi/ gzhan du na nyan pa po 'byang ba med pa smra ba na ji ltar smyon par mi 'gyur/'di nyid kho na gsal bar byed pa ni ma byas pa'i de bzhin nyid gang yin pa zhes bya ba la sogs pa gsungs pa yin te/ de ni nam yang de bzhin nyid ma yin par mi 'gyur ro zhes bya ba ni rnam pa thams cad du de bzhin nyid kho na yin no zhes bya ba'i tha tshig go//nye bar bsdu ba ni ji ltar de bzhin gshegs pa'i de bzhin nyid thams cad du zhes bya ba la sogs pa gsungs te/ thams cad du zhes bya ba ni dus thams cad du'o/ /mngon par sprul pa ste zhes bya ba ni/ rab tu phye ba ste skyed pa'o/ /brjod ma thag pa gnyis po 'di ni rab tu bskal pa ma yin zhing zhes bya ba la bskal pa ni ma rtogs pa ste ma mthong ba'o//bskal pa ma yin pa'i rtogs pa ste mthong ba zhes bya ba'i don to/ /tha dad par byed pa mi dmigs pa'i phyir ro zhes bya ba ni/ rang bzhin gcig tu tshad mas 'thad pas na de bzhin nyid la tha dad par byed pa'i tshad mi dmigs pas tha mi dad pa dang /rab tu bskal pa ma yin pa yin no/ /de bzhin gshegs pa'i de bzhin nyid ni chos thams cad kyi de bzhin nyid kyi bdag nyid can yin la/ rab 'byor gyi de bzhin nyid ni de lta bu yang ma yin na/ de bzhin nyid gnyis po de ji ltar tha mi dad pa yin zhe na/ ji ltar de bzhin gshegs pa'i de bzhin nyid ni zhes bya ba la sogs pa gsungs pa yin te/ gzhan ma yin la zhes bya ba ni tshig gi phrad de/ byed pa'i tshig dang po la 'jug go/ /de ni 'di skad du ji ltar chos thams cad kyi de bzhin nyid las de bzhin gshegs pa'i de bzhin nyid gzhan ma yin te/'o na ci yin zhe na de'i bdag nyid can yin pa de bzhin du rab 'byor gyi de bzhin nyid kyang de'i bdag nyid can yin no zhes brjod par 'gyur ro/ /'di ni gang gi yang de bzhin nyid ma yin par ma gyur te zhes bya ba ni don thams cad de bzhin nyid yin no zhes bya ba'i tha tshig go zhes bya ba la sogs pa gsungs pa yin te/rab 'byor gyi de bzhin nyid gang yin pa de nyid chos thams cad kyi de bzhin nyid yin no zhes sbyar ro/ /gzhan ma yin pa'i de bzhin nyid kyi rjes su song zhes bya ba ni/ bdag nyid kyi rang bzhin gyi de bzhin nyid dang rjes su mthun pas de bzhin nyid de chos thams cad la rjes su sbyor bar gyur pa'o//de bzhin nyid kyi rang bzhin nyid yin na/ ji ltar rjes su song ba zhes bya zhe na/ 'dir 'ga' zhig ces bya ba la sogs pa gsungs te/ kun rdzob tu de ltar tha snyad du byas pa yin gyi/ don dam par ni sgyu ma lta bu nyid yin pas 'di las dngos po gang yang gang du yang rjes su 'gro bas mtshungs par gyur pa med pa'o//chos thams cad kyi de bzhin nyid dus gsum pa yin la/ de bzhin gshegs pa'i de bzhin nyid ni rang bzhin gyis 'od gsal ba nyid kyis skye ba dang bral ba yin pas de lta bu ma yin na/ de ji ltar na 'di dag gcig pa nyid yin zhe na/ji ltar de bzhin gshegs pa'i de bzhin nyid 'das pa yang ma yin zhes bya ba la sogs pa gsungs pa yin te/ de la skye ba sngon du 'gro ba can gyi 'jig pa med pas na 'das pa ma yin no/ /phyis 'byung ba'i skye ba dang bral bas ma 'ongs pa ma yin no/ /yod pa nyid thob par mi 'thad pas da ltar byung ba ma yin no//de bzhin du chos thams cad kyi de bzhin nyid kyang zhes bya ba ni sgyu ma lta bu nyid rab tu sgrub par byed pa'i tshad ma ni thams cad du mtshungs pa'i phyir ro zhes bya bar dgongs pa'o/ /yang na kun rdzob tu dngos po'i khyad par gyi dbye bas de la dus gsum par btags pa yin du chug pa/de lta na yang de bzhin gshegs pa dang / chos thams cad kyi de bzhin nyid dag tha dad pa ma yin pa nyid ni de bzhin gshegs pa'i de bzhin nyid kyis kyang zhes bya ba la sogs pa gsungs pa yin no/ /bdag nyid kyi de bzhin nyid 'ba' zhig tu ma zad de/'o na ji lta bu yin zhe na/ rab 'byor de ni de bzhin gshegs pa de bzhin nyid kyis kyang gang gi phyir de bzhin nyid kyi rjes su song bar gyur pa yin te/ de bzhin gshegs pa'i de bzhin nyid kyis 'das pa la sogs pa'i de bzhin nyid kyi rjes su song zhing 'das pa la sogs pa'i de bzhin nyid kyis kyang /de bzhin gshegs pa'i de bzhin nyid kyi rjes su song ba yin te/ rnam par grol ba la ni tha dad par gyur pa med do zhes bya bar dgongs so/ /'das pa la sogs pa re re dang spyir bsdus pa'i dbye bas 'gres bzhir 'gyur ba yin par shes par bya'o/ /nye bar bsdu ba ni de ltar na gnas brtan rab 'byor gyi de bzhin nyid dang zhes bya ba la sogs pa gsungs pa yin no//byang chub sems dpa' dang de bzhin gshegs pa'i gnas skabs dag ni 'di ltar re zhig tha dad pa'i ngo bo nyid yin pas de bzhin nyid dang chos thams cad tha mi dad pa'i ngo bo nyid yin par ga la rung zhes 'ga' zhig rtog pa la/bcom ldan 'das byang chub sems dpar gyur pa zhes bya ba la sogs pa gsungs te/ de bzhin nyid 'di yin no zhes bya ba ni/ rtag tu ngo bo nyid gcig nyid yin pa'i phyir de bzhin nyid 'di yin par rigs pa yin te gang gis glo bur ba'i dri ma dang bral bas mngon par byang chub pa'i phyir ro//gang dag gcig dang du ma'i rang bzhin ma yin pa de dag ni don dam pa'i rang bzhin du yod pa ma yin te sgyu ma la sogs pa'i ngo bo nyid lta bu'o/ /bdag dang gzhan gyis smras pa'i dngos po rnams kyang gcig dang du ma'i rang bzhin ma yin pas zhes bya ba ni khyab par byed pa mi dmigs pas de bzhin gshegs pa'i sgyu ma dang mtshungs so zhes bya ba'i tha tshig go//gtan tshigs 'di ma grub pa yang ma yin te/ gang gi phyir rtog pa dang ldan pa rnams kyi 'jug pa ni dgos pa dang ldan pas khyab pa yin pa'i phyir don dam par nus pa'i dngos po'i yul rnam par dpyad par bya'i/gzhan du na skyes bu don gyi byed pa don du gnyer ba dag don med pa'i dngos po la rnam par dpyad pa la dgos pa ci yang med pas don gyi bya ba byed pa'i dngos po khas blang bar bya'o/ /de yang phan tshun du rnam par gcod pa'i ngo bo nyid yin pas shes bya'i ngo bo nyid dam shes pa'i ngo bo nyid du 'gyur grang zhes brtag par bya'o//de la gal te phyogs dang po ltar na de'i tshe rdul phra rab rnams phan tshun 'byar ba'i rang bzhin du 'gyur ba 'am / rigs mthun pa mang po rnams kyi nus pas rnam par 'dzin cing ma 'byar ba'i tshul gyis bskor te bar mtshams yod pa'am/yang na bar mtshams med par bskor ba zhes bya ba ste phyogs gsum mo/ /de la phyogs dang po ltar na gal te gcig dang gzhan lhan cig phyogs gcig gis 'byar ba de'i tshe/ cha shas dang bcas pa nyid du thal bar 'gyur bas gcig pa nyid las nyams par 'gyur te/rdul phra rab kyi rang bzhin gzhan dang gzhan gyis gzhan dag dang 'byar ba yin pa'i phyir ro/ /bdag nyid thams cad kyis 'byar ba'i phyogs ltar na yang gang gi tshe shar phyogs kyi rdul phra rab rdul phra rab gzhan dang lhan cig bdag nyid thams cad kyis 'dres pa de'i tshe gzhan yang shar dang 'dres pa zhes bya ba der 'gyur ro//de bas na 'dres pa ni dngos po gnyi ga la rag las pa nyid kyis na/ gcig la gcig gi ngo bor rjes su zhugs pa yin pas rdul phra rab gang yang rang bzhin gcig pa nyid ma yin no/ /'di ltar shar gyi rdul phra rab nub kyi dang bdag nyid thams cad kyis 'dres pa'i phyir rang bzhin yongs su spangs te rnam pa thams cad du nub kyi ngo bo thob pas na 'dres bzhin pa de med pa yin no//de bzhin du nub kyi yang shar dang 'dres pas rang gi ngo bo spangs te rnam pa thams cad du shar gyi dngos por gyur pas de'i 'dres pa'i rten du gyur pa med pa'o//de bas na gcig la dus gcig tu phan tshun spangs te gnas pa'i mtshan nyid kyi bsgrub pa dang dgag pa mi rung bas ji ltar ngo bo nyid gcig pa yin/ gnyis pa yongs su bskor ba'i phyogs ltar na yang gal te rigs mthun pa rnams dang reg par mi 'dod du chug kyang bu ga ni snang ba dang mun pa'i ngo bo yin pas rigs mi mthun pa'i snang ba dang mun pa'i rdul phra rab rnams dang ni reg par 'dod pa nyid yin te/snang bas gnon pa'i mun pa dang bral ba nyid dam/ mun pas gnas su ma byas pa'i snang ba dang bral ba nyid ni rigs dang ldan pa ma yin te/de gnyis 'byung ba ni yul la sogs pa phan tshun bral ba tsam la rag las pa yin pa'i phyir ro/ /de lta na yang 'das ma thag pa'i bshad pa'i nyes par 'gyur ro/ /'on te rigs mi mthun pa rnams kyang rig par khas mi len na de'i tshe dbus na gnas pa'i rdul phra rab gang yin pa de rang bzhin gang gis rdul phra rab gcig la bltas te gnas pa de nyid kyis rdul phra rab gzhan la bltas sam/'on te gzhan gyis yin zhes rnam pa gnyis su brtag go/ /de la gal te phyogs dang po ltar na de'i tshe gang zhig rdul phra rab gcig gi ngo bo la bltas pa de ni phyogs gcig pa nyid yin te/'di ltar rdul phra rab de nyid kyi shar phyogs na gnas pa'i rdul phra rab lta bu'o/ /yongs su bskor ba'i rdul phra rab thams cad kyang rdul phra rab gcig la bltas pa'i rang bzhin no zhes bya ba ni rang bzhin gyi gtan tshigs so/ /rang bzhin de nyid kyis bltas par khas blangs pas grub pa nyid ni ma yin no//mthun pa'i phyogs la yod pa'i phyir 'gal ba yang ma yin no/ /yul tha dad pa na gnas pa yin na ni/ mngon par 'dod pa'i rdul phra rab gcig pu la bltas pa'i rang bzhin du mi 'gyur te rdul phra rab la rang bzhin gzhan dag med pa'i phyir te/ rang bzhin med na bltas pa yang mi rung ba'i phyir gtan tshigs ma nges pa nyid ma yin no//de'i phyir skor bar byed pa'i rdul phra rab rnams phyogs gcig pa nyid du thal bar 'gyur ba'i phyir bskor nas gnas pa med pas de kho nar bsags pa med pas na des bsgrub par bya ba'i don gyi bya ba nyid dang bral ba nyid kyis na rdul phra rab de dang rang bzhin gcig yin par khas len pa yang rigs pa ma yin no//phyogs gnyis pa ltar na yang rdul phra rab bzhin gzhan dang gzhan gyis gzhan dang gzhan la bltas pas cha shas dang bcas par thal bar 'gyur ba'i phyir rdul phra rab gcig pa nyid dang bral ba ni shin tu gsal ba kho na yin te/dngos po tha dad pa'i mtshan nyid ni rang bzhin tha dad pa yin pa'i phyir ro/ /gsum pa bar mtshams med pa'i phyogs kyang 'byar ba'i phyogs kho na'i khongs su 'dus te de'i rnam grangs nyid yin pa'i phyir ro/ /bar mtshams nyid kyi yul dang bral ba rnams la ni phan tshun 'byar ba ma gtogs par rnam pa gzhan yod pa ma yin no//don de nyid sgra gzhan gyis brjod kyang gzhan du 'gyur ba ma yin te shin tu thal bar 'gyur ba'i phyir ro/ /'on te rdul phra rab ma 'byar ba nyid phyogs kyi sgrar brjod pa shin tu nye ba na gnas pa'i rdul phra rab mang po rnams kyis bskor bar 'dod ce na/de mi rigs te tshu rol dang pha rol gyi cha dag med par tshig 'di don dang ldan par gnas pa ma yin no/ /de las gzhan la ltos nas gzhan gyi rang bzhin gang zhig nges par bzung ba de ni kho nar de la bden pa nyid ma yin te/ tshu rol dang pha rol la sogs pa'i dbye ba bzhin no zhes bya ba'i rigs pas yang dag pa'i don du cha shas dang bcas pa nyid ma yin no zhe na ma yin te tshu rol dang pha rol dag kyang phyi rol gyi don yod par smra bas ltos pa'i dbye bas pha dang bu la sogs pa dang 'dra bar ma 'chol ba'i phyir yang dag pa kho na'i rang bzhin du khas blang bar bya ste/gang la ltos te pha rol yin pa de ni de la ltos nas nam yang tshu rol ma yin te/de lta ma yin na tshu rol dang pha rol dag don dam pa nyid ma yin na tshu rol dang pha rol du mngon par brjod pa'i 'gram na gnas pa dag ji ltar ma 'chol ba nyid du gnas par 'gyur/ 'di ltar pha rol du mngon par 'dod pa las gzhan nyid ni tshu rol du brjod par 'dod pa'i tshu rol nyid yin par brjod do//de yang brtags pa nyid yin na ni de dag gcig tu thal la de lta na yang de la brten pa rnams ma 'chol bar gnas par mi 'gyur te/ rtog pas nye bar bkod pa'i tha dad pa ni don byed pa'i yan lag nyid yin no//ji ste myong ba'i stobs kyis yul gnas pa'i phyir dang nyams su ma myong ba nyid kyi don ni shin tu lkog tu gyur pa yin pa'i phyir dang / mtshungs pa de ma thag pa'i rkyen gyi stobs las so sor nges pa'i 'bras bu skye ba'i phyir na de las tha dad par brtag par mi nus pa nyid yin pa'i phyir rang gis rab tu grub pa'i rang bzhin nyid ni gnyis su med pa'i shes pa gcig gi ngo bo don dam par gzung ba dang 'dzin pa dang bral ba dang rgyu med pa nyid yin na rtag pa la sogs par thal ba'i phyir dang /rtag pa nyid na yang don byed pa la sogs pa mi 'thad pa'i phyir na rang gi rgyu dang 'brel par skye ba dang skyes ma thag tu 'jig pa yin te/'on kyang thogs pa med pa'i srid par 'byung ba can dngos po la mngon par zhen pa'i bag chags yongs su smin pa las byung ba'i rnam pa rnams de la snang ba yin no zhes shes pa'i bdag nyid kyi dngos po rnams rnal 'byor spyod pa rnams kyis khas len na/de la yang ci rnam pa rnams yang dag pa nyid yin nam/ 'on te gzugs brnyan la sogs pa dang 'dra bar brtags na gcig tu nyams dga' ba yin zhes bya ba ni rnam par rtog pa'o/ /gal te dang po ltar na de'i tshe yang dag pa'i rnam pa du ma dang de mi 'thad pas rnam pa'i ngo bo dang 'dra bar rnam par shes pa du ma nyid du thal bar 'gyur bas gcig pa nyid ga la yin/'on te cig car nyams su myong ba nyid kyis na rnam par shes pa gcig pa nyid du nges pa yin na/ de'i tshe shes pa gcig dang tha mi dad pas rnam par shes pa'i rang gi ngo bo dang 'dra bar rnam pa rnams gcig pa nyid du 'gyur ba ni bzlog par dka' ba'o //de lta yin du zad mod ce na de ni ma yin te/ 'di ltar gal te rnam pa gcig g.yo ba la sogs pa'i khyad par du snang ba de'i tshe rnam pa lhag ma rnams kyang rnam pa snga ma dang tha mi dad pa'i lus can gyi ngo bo nyid yin pa'i phyir de dang 'dra ba kho nar 'gyur bas rnam pa sna tshogs par nyams su myong ba dang 'gal bar 'gyur ro//de bas na rnam pa rnams ni gcig tu nges par sna tshogs pa nyid yin pas na gcig dang du ma phan tshun 'gal ba'i chos gnas pa dang ldan pa'i phyir don dam pa kho nar rnam pa dang rnam par shes pa dag tha dad par gnas pas gnyis med pa'i tshul du dam bcas pa nyams par 'gyur ro//'on te bde ba la sogs pa dang 'dra bar sngon po la sogs pa'i rnam pa rnams nyams su myong ba'i bdag nyid can yin pa'i phyir/ gcig la sna tshogs pa nyid du khas mi len pas ji skad du bshad pa'i nyes par thal bar mi 'gyur ro zhes de ltar shes nas rnam par shes pa ris mthun pa mang po rnams kyang ris mi mthun pa'i shes pa dang 'dra bar lhan cig skye bar 'gyur ro zhes zer na/de'i tshe 'di nyes pa gzhan yin te 'di ltar dbus mar 'dod pa'i rnam par shes pa gang yin pa de rdul phra rab dang 'dra bar yongs su bskor bar 'dod na de rang bzhin gang gis gcig la mngon par phyogs par gyur pa de nyid kyis ci gzhan la yang yin nam 'on te gzhan gyis yin zhes brtag go//de nyid kyis zhes pa'i phyogs ltar na yongs su bskor nas gnas pa med pas phyogs gzhan na gnas pa lhag ma rnams don ji lta ba bzhin du mi 'gyur ro//de bas na shar dang nub la sogs pa'i phyogs kyi char yod pa mi 'thad par sngon po la sogs pa'i dbyibs kyi bkod par snang bar mi 'gyur ro/ /gzhan gyis zhes bya ba'i phyogs ltar na dngos po'i dbye ba ni rang bzhin gyi dbye ba'i mtshan nyid yin pa'i phyir gcig pa nyid ga la yod ces rdul phra rab rnam par dpyad pa las gyur pa'i nyes pa dang 'dra bar ltung bar 'gyur ro//shes pa ni gzugs can ma yin pas phyogs kyis byas pa'i shar dang nub yod pa ma yin / rdul phra rab dang 'dra bar shes pa dbus na gnas par ji ltar 'gyur zhe na/ de ni bden mod kyi 'di ni de'i nyes pa gzhan yin te gang zhig phyogs rgyas par snang ba'i rnam pa rnams yod pa nyid du 'dod pa yul na gnas par gyur pa ma yin yang de dang 'dra bar yul rgyas par skye bar brtag par bya ba yin no//de lta ma yin na rnam par shes pa du ma skye bar brtags kyang de ltar yul khyab par skya bar snang ba log pa nyid du 'gyur bas de'i tshe rnam par shes pa du ma skye bar rtog pa don med par 'gyur ro//phyogs rgyas par gnas pa'i sngon po la sogs par snang ba las ma gtogs par gang zhig bden par gyur pa sngon po la sogs pa gzhan ni nyams su myong ba yod pa ma yin no//de brdzun pa nyid yin na bden par 'gyur ba gzhan ci zhig yod de 'di ni gyi na'o/ /de ltar yin na yang rdul phra rab ni gzugs can yin la rnam par shes pa ni gzugs can ma yin pa ma yin nam/ 'dir nyes pa de nyid yin no zhes bya ba de ji ltar yin zhe na/ nyes pa 'di ni med de 'di ltar sngon po la sogs pa'ang med par snang ba de nyid la kha cig ni rdul phra rab kyi bdag nyid du khas len la/gzhan ni rigs pa'i ngo bo nyid yin no zhes zer ba ni ming tsam tha dad pa 'ba' zhig tu zad kyi yul 'dab chags par gnas pa'i mtshan nyid can gyi don la ni tha dad pa med do//ming tsam 'jug pa'i sgor byas pa'i nyes pa mtshungs par sgrub pa ni ma yin gyi/ 'on kyang yul 'dab chags pas byas pa'i nyes pa mtshungs par byed la yang ming tsam tha dad pa yod kyang ji ltar nyes pa mtshungs par mi 'gyur/ 'on te de ltar yin yang shes pa dang shes bya dag kyang tshul mi mthun pa rnams shes byar gtogs pa'i nyes pa shes pa la yod par khas mi len na de'i tshe yang brjod par bya ste/shes pa du ma cig car skye ba na bum pa dang snam bu la sogs pa'i yul can gyi rnam par rtog par rim gyis skye bar gtogs par mi 'gyur ro/ /de nyams su myong ba nges pa'i sgo nas rnam par rtog pa rnams skye ba'i phyir/rnam par mi rtog pa'i shes pa nyid cig car skye'o zhes de skad du brjod par mi nus so/ /de bas na rnam par rtog pa 'di dag skye ba na rang nyid rig pa ma yin pa yang ma yin pa'i phyir cig car nyams su myong bar nges par thal ba'i phyir na rnam par rtog pa rim gyis 'byung bar nyams su myong bar mi 'gyur bas mngon sum dang 'gal lo//'on te nor bu gzir snang ba bzhin du shes pa gcig nyid kyis sna tshogs pa'i ngo bo blangs pa yin no zhes 'dod na de ni bden pa ma yin te/ 'di ltar gang zhig sna tshogs pa yin pa de ni gcig pa ma yin te/dper na rgyud sna tshogs pa la yod pa'i shes pa lta bu'o/ /rnam par shes pa 'di yang sna tshogs pa yin no zhes bya ba ni rang bzhin 'gal ba dmigs pa yin no/ /sna tshogs pa nyid du dmigs pas na gtan tshigs ma grub pa ma yin no/ /mthun pa'i phyogs la yod pa'i phyir 'gal ba yang ma yin no//yang sna tshogs pa nyid gang gis gcig pa nyid gsal bar gyur pa sna tshogs pa dang / gcig pa nyid 'gal ba ji ltar yin zhe na/ brjod par bya ste du ma'i rang bzhin las ma gtogs par sna tshogs pa'i sgras brjod par bya ba gzhan yod pa ma yin no/ /du ma dang gcig pa dag kyang rang gi ngo bo phan tshun rnam par bcad pa med na/med pa nyid yin pa'i phyir phan tshun spangs te gnas pa'i mtshan nyid kyi 'gal ba yin pas 'gal ba ma grub pa yin no/ /'gal ba gnyis kyi ngo bo gcig tu gyur na ni 'gro ba mtha' dag rdzas gcig tu 'gyur te/ de bas na lhan cig skyes pa dang 'jig pa la sogs par thal bar 'gyur ba de bzlog dka'o //gzhan du na gcig ces bya ba ni ming tsam du zad de ming de la ni brtsad du med pas gtan tshigs ma nges pa yang ma yin no/ /dper na nor bu gzir snang ba ni re zhig grub pa nyid do zhes kyang brjod par mi bya ste/ de yang rang bzhin gcig yin na du ma'i rang bzhin gyis ma khyab pas du ma'i rang bzhin nyid la sogs par snang bar mi 'thad de brgal zhing brtag pa mtshungs pa nyid yin pa'i phyir ro//'on te sngon po la sogs par snang ba'i yul dang dus gzhan na gnas pa'i dngos po las tha dad pa yin par mngon sum gyi shes par 'gyur ba ma yin te/gnyi ga snang ba ma yin pa'i phyir de las 'di ni tha dad pa yin no zhes mi 'dzin pa'i phyir ro/ /yul dang dus mtshungs pa na gnas par snang ba las kyang ma yin te 'di ni las tha dad pa yin no zhes rtog pa med pa'i mngon sum gyis mi 'dzin pa'i phyir ro/ /de'i phyir gzung ba dang 'dzin pa dag dang gzung bar bya ba rnams phan tshun tha dad par mi 'dzin pas sna tshogs pa nyid gnyis su med pa gcig gi ngo bo nyid mngon sum la snang ngo zhes zer ba de yang 'di nyid kyis lan btab pa yin te/gcig pa dang sna tshogs pa nyid ni 'gal ba yin pa'i phyir ro//'on te grub pa dang bde ba gcig pa nyid yin pa'i phyir sna tshogs pa yang gcig pa nyid yin no zhe na/ de ni mi rigs te phan tshun bzlog pa'i tshul nyid kyis 'di gcig pa nyid du 'gal ba'i phyir ro/ /'di 'di dang grub pa dang bde ba nyid gcig pa nyid yin par mngon sum gyis shes par 'gyur ba yang ma yin no//cig car du snang ba grub pa dang bde ba tha mi dad pa nyid yin na ni rang gi ngo bo las gzhan nyid kyang snang ba yin pas/ ji ltar tha dad par snang ba ma yin/ gal te yang tha dad par snang ba yang mi 'dzin pas gnyis su med par brtags na 'di ni 'di las tha mi dad pa yin no zhes de lta bu'i tshul du tha dad med par mi 'dzin pas gnyis su ci'i phyir mi brtag /'on te tha dad pa dang tha dad pa med pa las rnam par grol ba'i dngos po tsam 'dzin na de lta na ni sngon po la sogs pa sna tshogs pa nyid du ji ltar snang / gal te sna tshogs par snang bar 'dod na/ de nyid ni 'jig rten na yang tha dad par snang ba zhes brjod pa yin pas ji ltar na tha dad pa la bsnyon/'on te gal te gsal ba'i rnam pa 'di dag 'dir bden pa'i rang bzhin kho na yin na de'i tshe 'di thams cad 'gal ba zhig na/ 'on kyang rnam par shes pa de ni shel rdo dag pa lta bu gcig pu sngon po la sogs pa'i rnam pa'i khyad par du ma gyur pa yin la/rnam pa de lta bu la yang thog ma med pa'i dus can gyi phyin ci log gi bag chags yongs su smin pa'i mthu las/ 'jim dum la sogs pa dag la glang po dang rta la sogs par sngags la sogs pas mig bslad pa'i skyes bu la snang bar 'gyur ba bzhin du rnam pa rnams snang ba yin te/des na don dam par shes pa rang bzhin gcig kho na yin par khas len pa ni 'gal ba yod pa ma yin te brdzun pa'i phyir ro/ /'di ltar khyed kyis skyon brjod pas ni rnam pa rnams mi bden par bsgrub par bya ba yin na de ni kho bo cag gis kyang khas blangs pa yin no zhes 'dod na de ni ma yin te/'di ltar byis pa'i bar gyis shin tu gsal bar rtogs pa'i sngon po la sogs pa'i rnam pa'i rang bzhin nyams su myong ba gang yin pa de ni brdzun pa yin la/ gsal bar snang ba'i rnam pa las tha dad pa gnyis su med pa'i shes pa nyams su myong bar ma gyur pa gang yin pa de ni bden pa yin no zhes bya ba 'di las 'dir legs par smras pa gzhan ci zhig yod/shin tu gsal bar snang ba la mi 'thad pa ci zhig yod/ de kho na nyid du med pas so zhe na/ brjod pa gang zhig gang la med pa'i rang bzhin de ni de rig pa ma yin te/ dper na sdug bsngal la bde ba la sogs pa'i rang bzhin lta bu'o//sngon po la sogs pa'i rnam pa rnams kyang rnam par shes pa la yang dag par yod pa ma yin no zhes bya ba ni/ khyad par byed pa 'gal ba dmigs pa'o/ /rnam pa rnams brdzun pa nyid du nges pa'i phyir ma grub pa ma yin la/ mthun pa'i phyogs la yod pa nyid kyi phyir 'gal ba ma yin no//de la gal te spyir don dam par rig pa med par thal bar bsgrubs na de'i tshe/ bsgrub par bya ba'i chos las bzlog pa la sgrub par byed pa'i chos gnod par byed pa'i tshad ma med pa'i phyir mi mthun pa'i phyogs las gtan tshigs bzlog pa la the tsom za bar ji ltar mi 'gyur zhes kyang brjod par bya ba ma yin te/gang gi phyir 'dir ni spyi kho nar bsgrub par bya ba yin la 'di la ma nges pa nyid kyang yod pa ma yin no/ /'di ltar rig pa ni gnyis te gtso bo dang phal pa'o/ /de la gtso bo ni bems po ma yin pa'i rang bzhin gang yin pa ste/ de yang shes pa kho na'i thun mong ma yin pa'i rang gi bdag nyid du gyur pa'i chos yin pas med pa rnam pa yin par ci ltar 'gyur/ 'di ltar gang zhig shes pa'i rang bzhin ma yin pa de la gtso bo'i rig pa yod pa ma yin te/ dper na nam mkha'i pad+ma lta bu'o/ /med par khas blangs pa'i sngon po la sogs pa'i rnam pa rnams kyang shes pa'i rang bzhin ma yin no zhes bya ba ni khyab par byed pa 'gal ba dmigs pa yin no//phal pa yang mi srid de 'di ltar rang gi rnam par snang ba'i shes pa skyes pa nyid phal pa'i rig par brjod pa yin na/ de yang nus pa thams cad kyis stong pa'i rta'i rwa dang 'dra bar med pa la ni rigs pa ma yin te/med pa'i mtshan nyid ni nus pa thams cad kyis dben pa'i mtshan nyid can yin pa'i phyir/ 'di ltar gang zhig nus pa med pa de ni phal pa'i rig pa ma yin te dper na rta'i rwa lta bu'o/ /med par 'dod pa'i sngon po la sogs pa'i rnam pa rnams kyang nus pa med pa yin no zhes bya ba ni khyab par byed pa 'gal ba dmigs pa yin no/rnam pa rnams brdzun pa nyid kyi phyir gtan tshigs ma grub pa ma yin la/ mthun pa'i phyogs la yod pa'i phyir 'gal ba ma yin no/ /des na de ltar dngos dang nye bar brtags pa phan tshun spangs te gnas pa'i mtshan nyid dag gis rig pa la khyab pa nyid yin pa'i phyir khyab par byed pa de ldog pas/des khyab pa'i rig pa yang ldog pa kho na yin pas med pa'i phyir zhes bya ba'i gtan tshigs 'di rig pa la 'jug pa'i go skabs med pas ma nges pa nyid ma yin no/ /smig rgyu la sogs pa la chu la sogs pa'i rnam pa med kyang rig pa'i phyir ma nges pa nyid ma yin nam zhe na/ma yin te gal te de la yang chu la sogs pa'i rnam pa nang na med la phyi rol na yang med na de'i tshe/ shin tu med pa de ji ltar rig par 'gyur zhes brgal zhing brtag pa mtshungs so/ /'brel pa'i stobs kyis nyams su myong ba yin no zhes kyang brjod par mi bya ste/'di ltar shes pa'i ngo bo nyid ni rnam pa rnams kyi ma yin te/ shes pa dang 'dra bar yod par thal bar 'gyur ba'i phyir ro/ /'on te rnam pa'i ngo bo nyid ni shes pa'i yin no snyam du sems na de'i tshe rnam pa dang 'dra bar shes pa med par thal bar 'gyur ro//shes pa las rnam pa skye ba yang ma yin te rang bzhin med pa la bskyed par bya ba nyid mi srid pa'i phyir/ rnam pa rnams las shes pa skye ba yang ma yin te rnam pa rnams brdzun pa nyid yin pas don byed pa'i nus pa dang bral ba'i phyir ro/ /de'i bdag nyid dang de las byung ba dag las ma gtogs pa'i 'brel pa yang yod pa ma yin no//de bas na gang zhig gang dang lhan cig 'brel ba med pa de ni rig kyang nges par rig par 'gyur ba ma yin te/ dper na shes pa'i bdag nyid rig pa ni mo gsham gyi bu lta bu'o/ /med par 'dod pa'i rnam pa rnams kyang shes pa dang lhan cig de'i bdag nyid de las byung ba'i mtshan nyid kyi 'brel pa gnyi ga yang med do zhes bya ba ni khyab par byed pa mi dmigs pa yin no//'brel pa med par bsgrubs zin pa'i phyir ma grub pa ma yin la/ mthun pa'i phyogs la yod pa'i phyir na 'gal ba nyid ma yin no/ / thams cad rig par thal ba'i phyir gtan tshigs ma nges pa nyid kyang ma yin no/ /de bas na khyed kyis shes pa dang dus mnyam par 'byung ba nyid du yongs su brtags pa'i rnam pa gang yin pa de la rgyu med pa nyid yin na ltos pa med pa'i phyir res 'ga' ba nyid ji ltar yin zhes 'dir rgyu brjod dgos so//ji ltar khyed kyi ltar na brdzun pa nyid kyis kun rdzob tu shes pa dang shes bya dag snang bar 'dod pa de bzhin du nged kyi ltar na yang rnam pa med pa'i de kho na nyid du gyur pa'i shes pa la de dang ma 'brel ba kho nar ma rig pas mi bden pa yang kun rdzob tu gzhan nyid du snang ba yin no snyam du sems pa gang dag yin pa de dag kyang 'di nyid kyis bsal ba yin no//kho bo cag gi ltar na ni kun rdzob tu shes pa nyid shes bya'i rang bzhin no zhes 'brel pa khas blangs pas de dag snang ba la 'gal ba med do/ /ji ste nyes pa 'dir ma gyur cig snyam pas rgyu dang ldan par len na de'i tshe/ gzung ba dang 'dzin pa'i rnam pa dag rten cing 'brel par 'byung ba yin pa'i phyir brtags pa nyid ma yin pas gzhan gyi dbang gi ngo bo nyid du thal bar 'gyur te/ 'di ltar gzhan gyi dbang ni rten cing 'brel par 'byung ba las gzhan ma yin pas so/ /gal te de lta yin mod/ de lta na yang don dam par yod par ga la 'gyur snyam na brjod pa 'di ltar rnam par shes pa'i yod pa zhes bya ba yang rkyen las byung ba'i ngo bo las gzhan ma yin no//de bas na rten cing 'brel bar 'byung ba dang med na mi 'byung ba'i don dam par yod pa ni bzlog par dka' zhing / de las kyang snga ma dang phyi mar yod pa yin pa'i phyir cig car rig pa med par thal zhing rnam par brdzun par khas blangs pa nyams par yang 'gyur ro//'on te ji skad du brjod pa'i rnam pa yang khas mi len na de'i tshe dmigs pa'i rig byar gyur pa nyid kyis/ rnam pa med pa'i shes pa nyid srog chags thams cad kyis rtag tu rig go zhes bya bar 'gyur ro//'di snyam du rig pa kho na yin mod kyi 'on kyang nyams su myong ba ni na ba'i rnam pas bskyed pa'i 'khrul pa'i stobs kyis tshu rol mthong ba'i dmigs pa'i mtshan nyid du gyur pa ma yin pa'i phyir te de las nyams su myong bar nges pa'i dmigs pa tshang ba'i phyir de la dmigs pa yod pa ma yin te/skad cig ma nyid bzhin no zhes bya bar sems na de ni ma yin te/ 'di ltar gal te nang ngam phyi rol du rnam pa nyams su myong bas bskyed pa'i 'khrul pa'i stobs kyis rig bzhin pa'i rnam par shes pa yang mi nges pa zhes bya bar 'gyur ba zhig na gang gi tshe dag nang na med cing phyi rol na med pa de'i tshe/gang gis gnyis med pa nyams su myong yang ma nges pa zhes bya bar 'gyur ba gang zhig nyams su myong bas bslus par 'gyur/ 'on te brdzun pa'i rnam pa kun tu ston par byed pa gang yin pa de lta bu de ni 'khrul pa'i ngo bo nyid yin te/des na rnam pa med pa yang 'khrul pa'i dbang gis rig par 'gyur ba yin no zhes 'dod na/ de yang yang dag pa ma yin te/'di ltar 'khrul pa'i sgras 'khrul pa bskyed pa'i bag chags rgyur gyur pa'i shes pa'i gnas skabs sam yang na rnam pa de lta bu'i bag chags las byung ba'i 'khrul pa can gyi shes pa 'bras bu'i rang bzhin nyid brjod par 'gyur grang /de la phyogs dang po la ni rgyu dang rnam pa rnams ma 'brel ba'i phyir de'i stobs kyis de rnams myong ba ni rigs pa ma yin te ha cang thal bar 'gyur ba'i phyir ro/ /de las byung ba'i mchan gyi 'brel pa yod pa nyid yin no zhes bya ba yang rigs pa ma yin te/snga ma bzhin du gzhan gyi dbang nyid yin par thal bar 'gyur ba'i phyir ro/ /'on te yang phyogs gnyis pa yin na de la yang rnam pa rnams 'brel pa zhig yin na de'i bdag nyid kyi mtshan nyid du 'gyur gyi de las byung ba'i mtshan nyid ni ma yin te/de dang dus mnyam du nyams su myong ba nyid yin pa'i phyir dang / dus mnyam pa dag kyang rgyu dang 'bras bu'i mtshan nyid du mi rung ba'i phyir ro/ /de'i phyir 'khrul pa'i rang bzhin du de dang tha mi dad pa'i phyir gzhan gyi dbang nyid du thal bar 'gyur ba bzlog par dka' bas 'di ni gyi na'o//'di snyam gzung 'dzin gyi rnam par 'khrul pa med pa'i phyir na/ gnyid kyis log pa la sogs pa'i gnas skabs su rang rig pa'i rang bzhin gcig bden par 'gyur ro zhes sems na/ de ni ma yin te yid kyi rnam par shes pa ni chos kyi khams la dmigs pa nyid yin yang sems las byung ba 'ba' zhig mi 'dzin pa'i phyir tshogs pa yongs su gcod pas sna tshogs pa'i rang bzhin can yin pa'i phyir ro//'on te gzung ba dang 'dzin pa'i dngos po dang bral ba mtshungs par ldan pa dang bcas pa'i rnam par shes pa'i phung po'i rang bzhin nyid nges pa yin na/ de lta na yang sna tshogs pa nyid du mngon par rgyug go//'di ltar de la 'khrul pa'i bag chags yod do zhes khyed khas len tam 'on te ma yin zhes rtog pa gnyis so/ /gal te dang po yin na de'i tshe ni phyin ci log gi rnam par mngon par zhen pa'i bag chags nyid ni rig pa kho na yin la/ bag chags de yang nus pa zhes brjod do//nus pa yang rgyu'i shes pa'i bdag nyid du 'gyur ro/ /des na rgyur gyur pa'i ma rig bdag nyid kyi shes pa snga ma las phyin ci log tu mngon par zhen pa'i 'bras bu phyi ma phyi ma skye ba las ma rig pa'i dbang gis de ltar snang ba 'thad par 'gyur ba'i phyir na sna tshogs nyid nan gyis 'byung ba yin no//mtshungs pa de ma thag pa'i rkyen las nges pa ma yin no zhes kyang brjod par mi bya ste/ gang gi phyir ji skad du bshad pa'i shes pa nyid mtshungs pa de ma thag pa'i rkyen yin pas 'di ni gyi na'o/ /'on te der bag chags kyi bdag nyid can gyi nus pa dag ni tha dad pa yin no zhe na/ma yin te yang dag par na nus pa du ma tha mi dad pas nus pa'i ngo bo dang 'dra bar cig car rnam par shes pa du ma nyid du thal bar 'gyur zhing de la yang nyes pa brjod zin to/ /yang na de bzhin du shes pa gcig dang tha mi dad pas nus pa rnam par shes pa'i rang gi ngo bo dang 'dra bar gcig pa nyid du 'gyur ba ni bzlog par dka' bas de ma thag pa'i rkyen gyi dbye bar ji ltar 'gyur/'on te de ma yin no zhes phyogs gnyis pa ltar 'dod na de'i tshe 'bad pa med par lus can thams cad grol ba la sogs par thal ba bzlog du med do/ /'on te so so'i skye bo'i shes pa thams cad ni sngon po la sogs pa'i rnam pas nye bar bsgyur ba dang mi ldan par 'jug go//de la ni gcig nyid nyams par thal bar 'gyur ba yod pa ma yin te/ sna tshogs kyi rang bzhin can ma yin pa'i phyir ro/ /de'i sngon po la sogs pa'i rang bzhin rig pa nyid du rnam par gzhag pa gang yin pa de ni de myong bar byed pa'i rang bzhin yin pa'i phyir/sngon po la sogs pa'i rang bzhin du gyur pas ni ma yin no/ /'di ltar rnam pa ni dmigs pa 'dzin pa'i bye brag kho na yin gyi de'i rang bzhin can ni ma yin no/ /gzhan yang sngon po la sogs par phyi rol lta bur snang ba mtshon pa de ni shes pa'i rnam pa de nyid kyis ni ma yin te/'on kyang sngon po la sogs pa rig pa'i shes pa nyams su myong ba'i rtogs pa po rmongs pa las sngon po la sogs pa de ltar phyi rol gyi rang bzhin can ni ma yin no snyam na de yang log pa yin te/ 'di ltar gal te sngon po la sogs pa dang 'brel pa gang yang med na de'i tshe sngon po la sogs pa rig par byed par ji ltar 'gyur/gang gis de'i rang bzhin las tha dad par rnam par 'jog par 'gyur ba g.yo ba med pa'i shes pa la ni dmigs pa 'dzin pa'i bye brag gzhan ni yod pa ma yin te ha cang thal bar 'gyur ba'i phyir ro//'on kyang shes pa de'i rang bzhin can du skyes pa nyid byed pa dang bcas pa lta bur rtogs pas de'i dmigs pa 'dzin par byed pa'i bye brag ni de yin par brjod cing de la yang nyes pa brjod zin to/ /gal te sngon po la sogs pa ni rnam pa thams cad du med pa nyid yin no zhe na/ de lta ma yin te 'di ltar gal te sngon po la sogs pa phyi 'am nang na yang med na/ ji ltar rtog pa med pa'i sems la shin tu gsal bar nyams su myong ba 'di brjod dgos so/ /mi snang ba kho na'o zhes de skad du smra bar nus pa yang ma yin te / snang ba de ni thams cad kyi nyams su myong bar grub pa'i phyir ro//gang gis rmongs pa'i bdag nyid can gyis de ltar nges par byed pa yin no zhes brjod par 'gyur ba gsal bar snang ba ni rnam par rtog pa'i yul du 'thad pa yang ma yin no/ /'on te de lta yin yang rnam par rtog pas nges pa yin no zhes bya bar sems na/ de ni mi legs te gang gi phyir shes pa thams cad rnam pa med pa kho nar nyams su myong ba yin na/de'i tshe de'i rjes las byung ba'i rnam par rtog pas kyang sngon po la sogs pa'i rnam pa so sor nges pas lhag par zhen par yang rigs pa nyid yin te 'brel pa med pa yin pa'i phyir ro/ /'di lta bu 'di ni 'khrul pa'i rang bzhin no zhe na/'di la ni gzhan dbang nyid du thal bar 'gyur bas ji ltar 'khrul pa dang 'di 'brel pa yin zhes bshad zin to/ /de bas na 'brel pa med pas sngon po la sogs pa med pa ni rnam par rtog pa'i yul nyid du yang nyams su myong bar mi 'thad pa'i phyir 'di ni rigs pa ma yin no//gal te de lta ma yin / 'o na yongs su ma dag pa'i skabs na yod pa'i sna tshogs su snang ba'i shes pa ni brdzun pa kho na yin gyi/ yongs su dag pa'i skabs na ni 'khrul pa dang bral bas gnyis su med pa'i rang bzhin gcig kho nar 'gyur ba yin no zhe na/ brjod pa gal te/ ma dag pa'i skabs na ni 'khrul pa dang bral bas gnyis su med pa'i rang bzhin gcig kho nar 'gyur ba yin na ni/ de'i tshe dag pa'i gnas skabs kyi bden pa'i rang bzhin gyi ngo bo gang las skye bar brjod par bya ba brdzun pa las bden pa'i ngo bo skye bar yang mi dmigs te de la nus pa med pa'i phyir ro/ / nus pa yod na yang de brdzun par ji ltar 'gyur/ rnam pa de lta bu yang brdzun pa nyid yin na ni gzhan dag kyang bden pa nyid du ji ltar 'gyur/ de bas na 'di ni rgyu med pa kho nar 'gyur na de yang mi rigs te rtag tu yod pa la sogs par thal bar 'gyur ba'i phyir ro/ /'khrul pa dang bral bas zhes kyang brjod par mi bya ste/gal te dag pa'i gnas skabs na rnam pa thams cad ldog pa srid par gyur na ni de'i tshe 'di yang srid pa zhig na gang gi phyir 'khrul pa ldog kyang rnam pa rnams bzlog pa ni mi srid de/ der de rnams ci skad du bshad pa'i tshul gyis 'brel pa med pa'i phyir ro//ba lang dang rta bzhin du ma 'brel pa gcig log pas gzhan nges par ldog pa ma yin te ha cang thal bar 'gyur ba'i phyir ro/ /'on te yang 'ga' zhig gi shes pa gnyis med cing spros pa dang bral ba dang / rang bzhin gyis grub pa nyid ni gcig tu 'gyur ro snyam na de yang mi rigs te rang bzhin gyis grub pa nyid yin na ni so sor nges pa'i rten yongs su 'dzin pas rag las pa ma yin pa'i phyir rnam pa de lta bu'i yod pa ni 'ga' yang mi ldog par 'gyur te/de'i phyir grags pa la sogs pa dang 'gal bar gyur to / /'di snyam du gang gis gnyen po'i skad cig snga ma snga ma'i stobs las skyes pa'i phyir so sor nges pa'i rgyu las 'ga' zhig de'i rang bzhin du 'gyur ba zhes bya ba de 'dra ba de ni rgyu'i chos yin no zhes bya bar sems na de ni shin tu mdzes pa nyid ma yin te/ji skad du bshad pa'i sgrub pas thams cad dngos po med par bsgrubs pas don dam rgyu dang 'bras bu'i ngo bo mi 'thad pa'i phyir 'di ni gyi na'o//de bas na gang gi tshe dngos po rnams la rnam par dpyad pa na gcig dang bral ba nyid kyi rang bzhin 'ga' la yang ngo bo nyid grub pa med pa de'i tshe ji ltar du mar 'gyur te du ma ni gcig bsags pa'i bdag nyid can yin pa'i phyir ro//de bas na gtan tshigs ma grub pa ma yin no/ /gal te snang ba thams cad gcig dang du ma'i ngo bo dang bral ba nyid kyi dngos po med pa nyid yin na ni mngon sum du snang ba yin te de'i yul ni dngos po yin pa'i phyir ro/ / rjes su dpag pas 'dzin na thug pa med pa'i phyir rtogs pa med par 'gyur ba ma yin nam/ji ltar gtan tshigs grub pa yin zhe na ma yin te/ ji skad du brjod pa'i rjes su dpag pa'i bsgrub pa rnams kyi ngo bo nyid la ni gcig dang du ma dag gis khyab pa yin no zhes bsgrubs zin to/ /de rnams kyi nang nas rjes su dpag pa kha cig gi khyab pa ni mngon sum gyi khyab pa bzung ba can gyi rjes su dpag pas 'dzin pas na/rang gi tshad ma ci lta bas na nges pa dang phyogs kyi chos 'dzin pas thug pa med pa ga la yin/ mthun pa'i phyogs la yod pa'i phyir 'gal ba nyid kyang ma yin te/ 'di ltar gal te ji skad du bshad pa'i gtan tshigs bsgrub par bya ba phyin ci log tu sgrub /yang dag pa'i dngos po la 'jug na de'i tshe/ de'i bdag nyid dang de las byung ba dag gis der 'bral ba rnam par brtag cing dpyad pa mi bzod pa nyid kyis na/ yang dag par yod pa'i ngo bo dang bral ba sgyu ma la sogs pa'i ngo bo gzhan la ji ltar de 'jug par nus te/ dngos po'i chos nyid las nyams par thal bar 'gyur ba'i phyir ro/ /des na rab tu grags pa'i dpe la yod pa'i gtan tshigs ma nges / ji ltar 'gal ba nyid yin/ 'on te kho bo cag la chos gnyi ga dang rjes su 'brel ba'i dpe nyid mi 'grub ste/ sgyu ma la sogs pa rnam par shes pa'i rang bzhin nyid du dngos por yod pa nyid du khas len pa'i phyir ro//de bas na gtan tshigs ma nges pa yin par 'gyur ro zhes 'dod na de ni ma yin te/ 'di ltar dngos po'i ngo bo nyid du mngon par 'dod pa'i rnam par shes pa thams cad ni ji skad du bshad pa'i rjes su dpag pa'i sgrub pa rnams kyis dngos po med par bstan pa yin no//des na gang gis sgyu ma la sogs pa tshad mas gnod pa yang rnam par shes pa'i rang bzhin du grub pa'i phyir dpe ma grub par 'gyur ba/ dngos po rnams rang gi 'dod pa'i stobs kyis de lta bu'i ngo bor 'gyur bar mtshon pa ni med de des na 'di ni gyi na'o/ /'di snyam du phyogs dang mthun pa dag la yod par grub kyang gang gis ldog pa la the tshom za ba'i nyes pa can du mi 'gyur ba gtan tshigs mi mthun pa'i phyogs las ldog par ji ltar nges zhes bya bar sems na/brjod pa gang zhig yongs su gcod pa gang gi rang bzhin rnam par gcod pa med na med pa de ni phan tshun spangs te gnas pa'i mtshan nyid can yin te/dper na dngos po yongs su gcod pas ni dngos po med par rnam par gcad pa med na med pa lta bu'o/ /gcig pa nyid dang du ma nyid du yongs su gcod pa yang phan tshun gyi rang bzhin rnam par gcod pa med na med pa kho na yin pa de bas na phan tshun spangs te gnas pa'i mtshan nyid yin no//gang dag phan tshun spangs te gnas pa'i mtshan nyid yin pa de dag ni gcig bsgrub pa gzhan dgag pa med na med pa nyid kyi phyir phung po gzhan med go bar byed pa yin te/dper na dngos po dang dngos po med pa bzhin no/ /gcig dang du ma dag kyang phan tshun spangs par gnas pa'i mtshan nyid can yin te/des na phung po gsum pa med pa'i phyir na ngo bo nyid ni gcig dang du ma dag gis bsdus pa yin pa des na bsgrub par bya ba las bzlog pa la gtan tshigs kyi ldog pa grub pas ji skad du bshad pa'i nyes pa'i go skabs ga la yod/gal te 'dir dam bcas pa'i don gyi phyogs gcig nyid yin pa'i phyir gtan tshigs ma grub pa ma yin nam/ gang gi phyir gcig dang du ma dag ni ngo bo nyid kyi bye brag gi rang bzhin yin pa'i phyir de las bzlog pa bsgrub par bya ba dang sgrub par byed pa gnyis kyang tha mi dad pa kho na yin no//de bas na gal te bsgrub par bya ba ma grub na de dang tha mi dad pa'i rang bzhin nyid yin pa'i phyir gtan tshigs kyang ma grub pa nyid yin no/ /'on te gtan tshigs grub na ni de'i tshe dngos po rnams kyi ngo bo nyid med pa nyid kyang grub pa yin te/ gcig dang du ma nyid dang bral ba ri bong gi rwa la sogs pa la ni dngos po'i ngo bo nyid du su yang khas mi len pa'i phyir ro zhe na/ de ni bden pa ma yin te 'di ltar re zhig gtan tshigs ji ltar grub pa de ltar ni rgya cher bstan zin to/ /de grub kyang gal te ngo bo nyid med pa grub pa'i tshul gyis bsgrub par bya ba yin du chug pa de lta na yang dngos po la mngon par zhen pa spang bar dka' ba nyid kyis de kho na nyid du dngos po ma lus pa la khyab pa'i ngo bo nyid med pa la nges pa la sogs pa ma skyes pas rmongs pa rnams la dngos po thams cad la ngo bo nyid med pa'i tha snyad du rung ba nyid rab tu bsgrub pa'i phyir dam bcas pa'i don gyi phyogs gcig gtan tshigs ma yin te/dper na dmigs pa'i mtshan nyid du gyur pa ma dmigs pa la med do zhes bya ba lta bu yin pas brtsad par bya ba ma yin no/ /ji ste rmongs pa la ni tha snyad kyi don du rang bzhin med pa nyid re zhig bsgrub par bya ba nyid yin no zhes mngon par zhen par byed na/de la yang brjod pa gang gi tshe ngo bo nyid la khyab par byed pa'i gcig dang du ma nyid dag ldog pas shing log pas sha pa ldog pa dang 'dra bar de kho na nyid kyi ngo bo ldog pas bsgrub par bya ba de'i tshe gtan tshigs dam bcas pa'i don gyi phyogs gcig la yin/ khyab par bya ba dang khyab par byed pa ldog pa'i tshig rnam par gcod pa tha dad pa'i rang bzhin can gnyis ni rnam grangs nyid ma yin la/rnam grangs kyi ngo bo nyid ma yin na yang dam bcas pa'i don gyi phyogs gcig ma yin pas 'di ni gyi na'o/ /don dam par zhes bya ba'i khyad par don med pa ma yin nam/'di ltar mi slu bar byed pa'i rigs pa ni don dam pa yin no zhes tshul gsum pa'i rtags las skyes pa'i blo dam pa'i sgrar brjod pa de'i tshe ni de yang kun rdzob kyi ngo bo nyid yin pa'i phyir ci ltar don dam pa nyid yin/ gal te de'i dbang gis dngos po rnams ngo bo nyid med par rnam par 'jog na de yang gang gis gzhag par bya/de nyid kyis 'jog par yang rigs pa ma yin te bdag nyid la byed pa 'gal ba yin pa'i phyir ro/ /tshad ma gzhan gyis kyang ma yin te thug pa med par thal bar 'gyur ba'i phyir ro/ /'on te blo de gcig pu ma gtogs par byas nas rnam par 'jog na/de lta na ni yul thams cad bdag med par bsgrub par mi 'gyur ro zhe na/ de ni legs mod kyi 'on kyang spros pa ma lus pa dang bral ba'i don dam pa dang rjes su mthun pa nyid yin pa'i phyir ji skad du bshad pa'i blos ni don dam pa nyid yin no/ /ngo bo nyid med pa nyid kyang de nyid las yin zhing bdag nyid la byed pa 'gal ba yang ma yin te/spyi'i tshul gyi chos thams cad dngos po med par 'jog pa'i phyir dang / blo de'i rang gi ngo bo yang spyi'i mtshan nyid de nyid kyi khongs su gtogs pa'i phyir te/ dper na yod pa la sogs pa'i gtan tshigs dag las chos thams cad la mi rtag pa nyid kyi shes pa 'byung ba na bdag nyid ma gtogs pa ma yin pa lta bu ste/de ltar na brtsad du med do/ /yang dag pa'i skye ba la sogs pa sgro btags pa dang bral ba nyid kyis ma brtags na gcig tu nyams dga' ba'i dngos po'i ngo bo nyid kho na med pa'i sgrar brjod pa ma yin nam dngos po'i ngo bo de ni mngon sum nyid yin pa'i phyir de'i ngo bo nyid du gyur pa ngo bo nyid med pa nyid kyang mngon sum du gyur pa kho na yin te/dper na bum pas dben par gyur pa'i sa phyogs dmigs pa na de'i bdag nyid du gyur pa bum pas dben pa rtogs pa lta bu'o/ /gzhan du na grub pa dang bde ba tha mi dad pa nyid las nyams par 'gyur zhing de las kyang dngos po ni ngo bo nyid med par mi 'gyur te/ngo bo nyid med pa nyid dang 'brel pa med pa'i phyir ro/ /de las byung ba'i mtshan nyid kyi 'brel pa yang ma yin te/ de ni dngos po med pa nyid kyi 'bras bur mi rung ba nyid kyi phyir ro/ /de bas na de byis pa rnams kyis mngon sum du rtogs pa ma yin pas mngon sum gyis gnod do//de bzhin du dmigs pa'i mtshan nyid du gyur pa mi dmigs pas na bum pa bzhin du ngo bo nyid med pa ni med pa'i tha snyad du rung ba'i phyir med pa kho na ste des na rjes su dpag pas gnod do/ / ri bong can la zla ba nyid ma yin pa dang 'dra bar skye bo gnag rdzi mo yan chad la ngo bo nyid med pa nyid du rtogs pa med pas grags pas gnod pa yang bzlog par dka'o zhe na/ de ni bden pa ma yin te 'di ltar dngos po rnams kyi sgro btags pa'i rnam pas dben pa ni ngo bo nyid med par brjod la de yang dngos po'i rang gi ngo bo nyid 'dzin pas bzung ba yin na yang /skad cig ma dang 'dra bar 'khrul pas de kho na nyid kyi skye ba'i rnam par sgro btags pas bsgribs pa'i ngo bo nyid yin pa'i phyir byis pa rnams kyis nges par bya bar mi nus la nges pa ma skyes pa des na mngon sum nyid med pa'i phyir mngon sum gyis gnod pa ma yin no//de bzhin du bzung ba nyid yin na yang tha snyad bya bar mi rung ba'i phyir ma bzung ba'i dang 'dra ba nyid yin pas 'di ni dmigs pa'i mtshan nyid du gyur pa ma yin te/ de bas na rjes su dpag pas gnod pa ma yin no/ /don dam pa zhes bya bar khyad par du byas pas dngos por grags pa rnams la bsnyon pa ma yin pa nyid kyi phyir grags pas gnod pa yang med pa nyid yin te/de ltar na 'di ni gyi na'o/ /sa bon med par 'khrul pa mi rigs pas na des sgro btags pa'i rnam pa ci ltar yin zhes kyang brjod par mi bya ste/ gang gi phyir bden pa dang brdzun pa'i 'khrul pa lhan cig 'brel pa ci zhig yod/ re zhig de'i bdag nyid ni ma yin te/bden pa dang brdzun pa dag ni 'gal ba yin pa'i phyir ro/ /de las byung ba yang ma yin te brdzun pa ni 'bras bu ma yin pa'i phyir ro/ /de bas na 'di'i nye bar len pa ni kun rdzob pa snga ma kho na yin pas 'gal ba med la/ rgyu de'i rgyu yang kun rdzob pa snga ma kho na yin te/ rnam pa de lta bu'i rgyu brgyud pa ni thog ma med pa can yin pa'i phyir nye bar len pa med pa'i 'khrul pa ni 'ga' yang yod pa ma yin no/ /ji ltar so sor nges pa yin zhe na/ brjod pa dngos po yang dag pa'i ngo bo dang 'dra bar kun rdzob pa'i rang bzhin yang 'di nyid de/ kun rdzob pa'i rgyu gzhan la rag las nas so sor nges pa'i 'bras bu kun rdzob pa byed pa zhes pa gang yin pa'o//'o na ji ltar kun rdzob yin zhe na/ don gyi bya ba byed nus pa'i dngos po nyid rnam par dpyad pa'i spungs mi bzod pa nyid yin pa'i phyir kun rdzob ces bya'o/ /'di ltar yang dag pa dang yang dag pa ma yin pa dag gis dngos po thams cad la khyab pa yin la/de dag kyang phan tshun spangs te gnas pa'i mtshan nyid yin pa'i phyir bden pa'i ngo bo nyid bkag pa na shugs kyis cig shos su gnas pa 'thob ste/ de bas na rang bzhin 'di ni dngos po thams cad kyis rang gi bdag gis byas pa yin pas nyes pa med do/ /gtan tshigs med par 'dod pa'i don mi 'grub pas chos thams cad dngos po med pa nyid du bsgrub pa'i phyir gtan tshigs yongs su 'dzin par byed pas ni de yod pa nyid du khas blangs pa yin la/chos thams cad ngo bo nyid med par dam bcas pa ni med do zhes khas blangs pas phan tshun 'gal ba'i phyir rang gi ma mo gsham yin pa nyid du dam 'cha' ba dang 'dra bar rang gi tshig dang 'gal ba yin no/'di ltar bdag nyid la byed pa 'gal ba'i phyir gtan tshigs ni de nyid kyi dngos po med pa nyid ma yin la gzhan dag gis kyang ma yin te/ thug pa med par thal bar 'gyur zhe na/ ma yin te ngo bo nyid med pa nyid kyang de las yin zhing bdag nyid la byed pa 'gal ba yang ma yin te zhes bya ba la sogs pas lan smras zin pa'i phyir ro//de ltar ngo bo nyid med pa yin yang kun rdzob tu las dang 'bras bu'i 'brel pa rnam par 'jog pas lung dang 'gal ba med pa'i phyir de dang 'gal bar 'gyur bar yang mi brtag go/ /'on te dngos po med par smra ba rnams la don thams cad med pas gzhi ma grub pa la sogs pa'i nyes pa ni bzlog par dka' ba yin no snyam du sems na de ni bden pa ma yin te/'di ltar rjes su dpag pa dang rjes su dpag par bya ba'i tha snyad thams cad ni phan tshun 'gal ba'i grub pa'i mthas bzhag pa'i chos kyi dbye ba spangs nas/byis pa'i skye bo'i bar la grags pa'i chos can la brten nas 'jug pa yin la de dang 'brel ba'i gtan tshigs dang dpe yang de bzhin du grub pa yin no/ /gzhan du na gal te grub pa'i mtha' la brten pa'i gtan tshigs sam chos can nam dper 'gyur ba yin na de'i tshe grub pa'i mtha' gcig la grags pa'i khyad par gyis khyad par du byas pa'i chos can ni rtsod pa'i gzhir gyur pa yin pa'i phyir gzhan la ma grub pa yin no//de ltar na khyad par can gyi chos can ma grub pas gzhi ma grub pa'i gtan tshigs su 'gyur zhing / de bzhin du rang gi ngo bo ma grub pa la de'i chos can yang ma grub pa yin pas/du ba dang yod pa la sogs pa dag las me dang mi rtag pa nyid la sogs par shes pa med pa'i phyir bsgrub par bya ba dang sgrub pa'i tha snyad thams cad rgyun chad par 'gyur bas/ rnam par shes pa ma yin pa la sogs pa'i ngo bo nyid las ldog pa'i shes pa tsam la sogs pa 'ga' zhig grub pa'i phyir te de bas na 'di ni gyi na'o//'di snyam du gang zhig chos can snang bzhin pa la brten nas sgro btags pa'i rnam pa dgag pa'i phyir sgrub byed sbyor bar byed pa de la ni gzhi ma grub pa la sogs pa'i nyes pa'i glags mi rnyed pa yin na/ khyod kyis ni chos can snang bzhin pa nyid la 'gog par byed de de bas na khyod la ji ltar gzhi ma grub pa la sogs pa'i glags mi thod do zhe na/de lta ma yin te 'di ltar don dam pa zhes khyad par du byas pas chos can snang ba 'di la sgro btags pa bden par yod pa'i ngo bo nyid bkag pa bsgrub par bya ba yin gyi/ chos can gyi rang gi ngo bo ni 'gog pa ma yin pas mtshungs so//'on te don dam pa pa'i rang bzhin bkag na gang zhig snang bas chos can de'i rang bzhin du 'gyur ba lus pa gzhan ci zhig yod ces bya bar 'dod na de yang yang dag pa nyid ma yin te/ gang gis de log na ldog par 'gyur ba don dam pa pa'i rang bzhin gyi snang ba la khyab pa ni ma yin te/zla ba gnyis dang skra shad la sogs pa brdzun pa yang snang ba'i phyir ro/ /'di skad du gal te yang zla ba gnyis la sogs pa dag phyi rol gyi rang bzhin du brdzun pa yin mod/ shes pa'i rang bzhin gyis ni de dag don dam pa pa yin pa des na snang bar 'thad pa yin no zhes kyang brjod par mi nus te/de dag ni sna tshogs pa'i rang bzhin can dang yul ni gnas pa nyid du snang ba'i phyir ro/ /shes pa gcig ni sna tshogs par mi 'thad de gcig nyid nyams par thal ba'i phyir ro/ /shes pa du mar skye ba yang sngar bkag pa'i phyir ro//yul na gnas pa yang ma yin te lus can ma yin pa'i phyir ro/ /de bas na zla ba gnyis pa la sogs pa ni don dam pa ma yin mod kyi de lta na yang snang ba des don dam pa pa'i rang bzhin log kyang snang ba nyid ni 'gal ba yod pa ma yin pas de kho na nyid kyi dngos por khas blang bar mi bya'o//dngos po med par yang khas blang bar mi bya ste de ni dngos po ldog pa'i mtshan nyid can yin pa'i phyir/ dngos po ma grub na yul med pa'i dgag pa ni yod pa ma yin pas dgag par bya ba med na bkag pa mi 'jug pa'i phyir de sngon du 'gro ba can de yang ma grub po/ /mtha' gcig tu gyur pa dngos po dang dngos po med pa'i phyogs las byung ba'i nyes pas kho bo cag la mi gos pa des na phan tshun rnam par gcod pa'i rang bzhin yin pa'i phyir gcig bkag pa med na mi 'byung ba gzhan chos can sgrub pa can nan gyis grub pa yin no zhes brjod pa gang yin pa de ni ma 'brel te/de kho na nyid du na dngos po'i ngo bo rnam par bcad du med pa'i phyir ro/ /de ltar dngos po dang dngos po med pa'i ngo bo nyid med pa na yang mngon sum mam brgyud pas kyang shes pa dang shes bya dag 'brel bar 'jug pa nyid yin pa'i phyir/ de'i yul can gyi rnam par rtog pa dag rnam pa thams cad du de kho na nyid ma yin no zhes bya bar grub po//dngos po dang dngos po med pa'i ngo bo nyid med na yang thog ma med pa'i bag chags las byung ba de'i yul can gyi rnam par rtog pa ni ri bong gi rwa la sogs pa'i rnam par rtog pa dang 'dra bar skye'o zhes kyang bsam par mi bya ste/ 'di ltar gal te phyi rol gyi dngos po rnams dang 'brel pa med mod/de lta na yang de dang tha mi dad pa'i bag chags sad pa las skyes pa yin pa'i phyir sngon gyi shes pa la de las byung ba'i mtshan nyid kyi 'brel pa yod pa nyid yin la/ de bzhin du dus mnyam par byung ba'i shes pa de dang tha mi dad pa nyid la yang de'i bdag nyid kyi 'brel pa yod pa yin te/des na rnam par rtog pa la gnas pa'i gzugs brnyan la rnam pa 'ga' zhig gi bsgrub pa dang dgag pa dag gi tha snyad du byed pa yin no/ /des na ji skad du bshad pa'i tshul gyis bag chags las byung ba'i shes pa med na de'i gzugs brnyan dang bral ba'i phyir rnam par rtog pa ma skyes pas dngos po dang dngos po med pa'i rang gi ngo bo med par rnam par rtog pa zhes gang las brjod par bya/'dis ni kha cig na re rtog pa dang ldan pa'i tshad mas grub pa'i don la bden pa nyid dang / gzhan dag la ni brdzun pa nyid du mngon par zhen par rigs te gzhan du na rtog pa dang ldan pa nyid nyams par thal bar 'gyur ro//de bas na bden pa dang brdzun pa la mngon par zhen pa ni spang bar dka' ba yin pas phyin ci log thams cad ci ltar spang bar 'gyur zhes zer ba de'i yang lan btab pa yin te mngon par zhen pa ni shes pa dang tha mi dad pa'i ngo bo nyid yin pa'i phyir de med pa na/mngon par zhen pa yod par 'thad par ji ltar 'gyur/ des na de ltar dngos po dang dngos po med pa'i rtog pa dag gis rnam par rtog pa thams cad la khyab pa nyid yin pa'i phyir khyab par byed pa med na khyab par bya ba yang med pas de kho na nyid du na dngos po dang dngos po med par yongs su 'dzin pa dang bral ba/ma brtags na nyams dga' ba chu shing gi phung po dang 'dra bar phyi dang nang na snying po med pa nyid kyi dngos po rnams thams cad la/ de lta bu'i rnam pa thams cad mkhyen pa nyid la sogs pa mngon par rtogs pa brgyad kyi tshul du shes rab kyi mig gis nges par rtogs pa'i bsgom pa'i stobs rdzogs pa na 'ga' zhig gi nor bu dang dngul la sogs pa'i shes pa dang 'dra bar 'khrul pa'i mtshan ma ma lus par spangs pa nyid kyis rang bzhin tshad mar gyur pa na yang dag pa'i don ji lta ba bzhin du 'dzin pa'i phyir/sgyu ma lta bu'i gnyis su med pa'i ye shes bdag nyid nyams su myong ba rnam par dag pa'i kun rdzob pa'i rgyu las nges par skyes pa/ phyin ci log thams cad spangs pa'i phyir snying rje chen po dang shes rab kyi rang bzhin can gyi ye shes kyi snang ba kun rdzob pa ni rnam par rtog pa'i sa bon slar ji ltar 'byung bar mi 'gyur bar rten cing 'brel par 'byung ba'i chos nyid kyis skye bar 'gyur ro//de lta na yang kha cig gis ma rig pa ni rig pas zad par byed la rig pa yang don ji lta ba bzhin du shes pa yin no/ /gal te khyed cag gi ltar na de bzhin gshegs pa'i ye shes kyang kun rdzob pa yin na de las ma rig pa'i ngo bo nyid yin pa'i phyir rig pa skyes pa med pa na ma rig pa ji ltar ldog /ci srid du ma rig pa ma spangs pa de srid du yang grol bar ji ltar 'gyur zhes brjod pa gang yin pa de yang ma 'brel ba nyid do/ /'di ltar ma rig pa ni rtag pa nyid la sogs par sgro btags pa'i chos rtogs pa yin la de las bzlog pa tshad mas mi gnod pa'i chos rtogs pa ni rig pa yin te/des na de dag gi rnam par gzhag pa phyin ci log ma yin pa'i rgyu mtshan can ni shin tu grags pa yin no/ /de'i phyir kun rdzob pa nyid yin yang 'gal ba'i chos skyes pa yin pa'i phyir na don yang dag pa ji lta ba nyid kyi rjes su song bas phyin ci log ldog pa na gang gis de ma spangs pa thal bar mi 'thad par gyur pa/de'i rgyu mtshan can gyi rig pa nyid ga las yin te des na 'di ni gyi na'o/ /des na de ltar don dam pa pa'i ngo bo nyid mchog tu de kho na mthong bar 'dod pa yin gyi/ mig btsums pa dang dmus long la sogs pa dang 'dra bar rkyen ma tshang ba 'am yid la mi byed pas ma mthong ba ni ma yin no//de bas na dngos po la sogs par phyin ci log gi bag chags ma spangs pas 'du shes med pa'i snyoms par 'jug pa la sogs pa las ldang ba dang 'dra bar dngos po la sogs pa phyin ci log pa'i bag chags las byung ba'i nyon mongs pa dang shes bya'i sgrib pa skye ba'i phyir rnal 'byor pa ma grol ba nyid du 'gyur ro//gang gi phyir yang ji skad du bshad pa'i de kho na nyid shes pa kho na grol ba thob par byed pa yin gyi/ ha cang thal bar 'gyur bas rnam pa gzhan gyis ni ma yin pa de'i phyir sngar brjod pa nyid mchog tu de kho na nyid mthong ba yin par bzung ste/des nyes pa thams cad dang 'gal ba bdag med pa mthong ba mngon sum du byas par gyur pa na de dang 'gal ba'i phyir kun nas nyon mongs pa dang sgrib pa rnams spong bar byed do/ /de'i phyir gegs byed pas sprin la sogs pa sgrib g.yogs dang bral ba'i nam mkha' la nyi ma'i 'od bzhin du rten cing 'brel par 'byung ba'i dngos po de kho na skye ba la sogs par rtog pa dang bral ba thams cad la rnal 'byor pa'i mngon sum gyi ye shes kyi snang ba thogs pa med par 'jug go//'di ltar rnam par shes pa'i rang bzhin ni dngos po'i rang gi ngo bo gsal bar byed pa yin pa de ni gegs byed pa yod pa las dngos po nye bar yin yang gsal bar byed par mi 'gyur gyi gegs byed pa med par gyur na go shes bya bsam gyis mi khyab pa'i nus pa'i khyad par thob pa las dngos po mtha' dag gsal bar byed pa kho nar ji ltar mi 'gyur/de bas na kun rdzob dang don dam pa'i tshul gyi dngos po ma lus pa ji lta ba bzhin du yongs su mkhyen pa'i phyir rnam pa thams cad mkhyen pa nyid brnyes pa yin no//de'i phyir 'di nyid ni sgrib pa thams cad spangs pa dang rnam pa thams cad mkhyen pa nyid rtogs pa'i lam gyi dam pa yin no/ /so so'i skye bo rnams las rnal 'byor pa rnams kyi khyad par ni 'di yin te sgyu ma la de dag ni sgyu ma byed pa bzhin du grags pa tsam nyid dang bden pa nyid ma yin par ji lta ba bzhin du shes pa'i phyir na dngos po rnams la bden pa nyid du mngon par zhen par mi byed de de bas na de dag la rnal 'byor pa zhes brjod do//gang dag byis pa'i skye bo ltad mo ba sgyu ma la mngon par zhen pa de bzhin du dngos po la yang phyin ci log tu mngon par zhen pas de dag la byis pa zhes brjod de des na thams cad mi 'gal lo/ /de bas na lung dang rigs pa dag gis sgyu ma lta bur gnyis su med pa'i sems kyi de kho na nyid yongs su shes pa/de kho na nyid rtogs pa la mngon par brtson pa'i blo can rnams kyis gnyis su med pa sgyu ma lta bu'i sems yang dag pa'i kun rdzob kyi rang bzhin thos pa dang bsams pa las byung ba'i shes pas rnam par gzhag nas/ rten cing 'brel par 'byung ba'i chos nyid kyi rnam pa thams cad mkhyen pa nyid la sogs pa mngon par rtogs pa brgyad kyi rim par gus pa dang rgyun mi 'chad pa dang dus yun ring po'i khyad par can gyi bsgom pas sgom par byed pa'i rnal 'byor pa'i dbang phyug rnams ni rten cing 'brel bar 'byung ba'i chos nyid kyis rnam par rtog pa mtha' dag dang bral zhing srid pa ji srid par rjes su 'brel pa/rnam par shes pa tsam gyi rgyun sgyu ma lta bu thob par byed do/ /de nyid ni gnyen po'i gtso bo yin no/ /dang po sgyu ma lta bu zhes rnam par 'jog par byed pa mngon par brjod pa dang bcas pa ni de'i rjes su mthun pa yin gyi gnyen po nyid du gyur pa ni ma yin no/ / 'di ltar phyi'i don gyi tshul la gang zag la bdag med pa la sogs pa bsgoms pas kyang dngos po'i rang bzhin sems la 'jog par byed pa ni ma yin te/ dngos po ni rnam par rtog pa med pa'i sems kyis rtogs par bya ba yin pa'i phyir dang / de yang dang po med pa'i phyir te yod na bsgom pa don med par 'gyur ba'i phyir ro//de'i phyir der yang pha rol po 'di ming tsam dang rjes su 'brel ba'i rnam par rtog pa'i gzugs brnyan de kho na nyid la sems gtod pa dang rjes su mthun pa la brten pa/ dngos por lhag par zhen pa can gyis mgu ba yin na der ming gi rnam pa goms pa las brjod pa 'phel bar ci ltar mi 'gyur/nang gi bdag nyid g.yo ba med pa ni rim gyis rnam par rtog pa sdud do zhe na/ de ltar na gzhan la yang 'di mtshungs te shin tu spros pas chog go/ /de ltar na rnam pa thams cad du yid du 'ong ba'i de bzhin nyid de bstan pa'i phyir chos nyid kyi stobs kyis mtshan ma byung bar gyur to zhes gsungs pa ni/yang de bzhin gshegs pa'i de bzhin nyid 'di bstan pa de'i tshe zhes bya ba la sogs pa'o/ /rnam par 'gyur ba drug dang ltas chen po bco brgyad du zhes bya ba ni bya ba'i khyad par gyis gcig gi tshig go/ /de la rnam par 'gyur ba drug ni snod kyi 'jig rten la sa chen po mngon par 'dus byas pa dang mngon par 'dus ma byas pa'i dbang du byas nas go rims bzhin du g.yo ba dang mtho ba yin no//sems can gyi 'jig rten la ni sems can gyi ris rnam pa bzhi ste/ mi dge ba la spyod pa dang / lha sna tshogs pa la mos pa dang /nga rgyal can dang rig pa dang ldan pa'i dbang du byas nas go rims bzhin du smra ba dang steng du 'gro ba dang 'og tu 'gro ba dang sgra dpangs mtho bar sgrogs pa'o/ /ltas chen po bco brgyad kyang rnam par 'gyur ba drug po 'di rnams kyi bya ba chung ngu dang 'bring dang chen po'i dbye bas te/ 'gul ba nas kun tu rab tu 'ur 'ur zhes bya ba'i bar gyi don gyis bstan pa yin no//yang na dbus mtho na mtha' dma' zhes bya ba ni gcig go/ /'di las bzlog pa ni gnyis pa'o/ /de bzhin du shar phyogs mtho na nub phyogs dma' zhes bya ba ni gsum pa'o/ /'di nyid bzlog pa ni bzhi pa'o/ /de bzhin du lho phyogs mtho na byang phyogs dma' zhes bya ba ni lnga pa'o//'di nyid bzlog pa ni drug pa ste de ltar na rnam pa drug tu 'gyur ro/ /ltas chen po bco brgyad kyang de bzhin du shes par bya'o/ /nye bar bsdu ba ni de ltar gnas brtan rab 'byor ni zhes bya ba la sogs pa gsungs pa yin te/de bzhin gshegs pa'i rjes su skyes so zhes bya ba ni de ltar rnam pa thams cad mkhyen pa nyid kyi rnam pa'i rjes su skyes pa nyid kyi rjes su skyes pa yin no/ /ma skyes pa'i ngo bo nyid ston pa ni gzhan yang gnas brtan rab 'byor ni gzugs kyi rjes su ma skyes te zhes bya ba la sogs pa gsungs pa yin no//de kho na bzhin du ci'i phyir zhe na zhes bya bas dogs pa bsu nas/ 'di ltar gang gis zhes bya ba la sogs pa gsungs te go sla'o/ /de ltar na zhes bya ba ni de ltar sgyu ma lta bu nyid kyis lam shes pa nyid kyi rnam pa'i rjes su skyes pas na de bzhin gshegs pa'i rjes su skyes te zhes bya ba la sogs pa'o//de bzhin nyid mi dmigs pa'i ngo bo nyid ston pa ni bcom ldan 'das 'di lta ste zhes bya ba la sogs pa gsol pa yin no/ /rnam pa thams cad mkhyen pa nyid kyi rnam pa'i ngo bo nyid dmigs su med pas de bzhin nyid 'di ni spyod pa zab mo lags so/ /legs par smras pa nyid kyi rjes su brjod pa gsungs pa ni shA ri'i bu de de bzhin no zhes bya ba la sogs pa'o//bcom ldan 'das kyis chos bstan pa 'bras bu med pa ma yin pa ni de bzhin nyid bstan pa 'di bshad pa na yang zhes bya ba la sogs pa smos pa yin no/ /sngon yongs su sbyang ba byas pa dag gis zhes bya ba la/kha cig na re tshogs kyis la sogs par bsod nams dang ye shes kyi tshogs yang dag par bsags pa sngon yongs su sbyang ba byas shing bsgrubs pa de rnams kyis sgyu ma lta bu'i chos bsgom pa la bzod pa ste/ lhag par mos pa thob par gyur pa yin no zhes zer ro/ /gzhan dag na re chos kyi dbyings kun tu 'gro ba gtogs pas mi skye ba'i chos la bzod pa thob pa yin no zhes zer ro//rgyu gang gis theg pa chen po la zhugs pa rnams la theg pa dman pa'i skabs su zhes gsol pa ni bcom ldan 'das byang chub sems dpa' 'di rnams zhes bya ba la sogs pa'o/ /de la rgyu ni nye bar len pa'i rgyu'o//rkyen ni lhan cig byed pa'i rkyen no/ /shes rab dang thabs la mkhas pa dang bral ba rgyu yin no zhes gsungs pa ni shA ri'i bu byang chub sems dpa' 'di dag gis zhes bya ba la sogs pa'o/ /nye bar bsags pa'i don du shA ri'i bu 'di ltar yang byang chub sems dpa' zhes bya ba la sogs pa gsungs pa yin no//gsal bar bya ba'i phyir dpe bstan pa ni shA ri'i bu 'di lta ste dper na zhes bya ba la sogs pa gsungs so/ /'dab chags bya zhig ces bya ba ni 'di la gshog pa gnyis yod pas na 'dab chags so/ /mi la yang mdza' bo la sogs pa'i phyogs yod pas 'dab chags su gyur pa srid pas bya zhes smos pa yin no//shis pa la sogs pa la bya'i sgra yod pas 'dab chags zhes smos pa yin no/ /de ni ma lags so zhes bya ba la sogs pa'i tshig rigs pa dang mi ldan pa nyid yin no snyam pa'i dogs pa de ci'i slad du zhe na zhes bya bas bsu nas/ rdzas lci ba steng gi phyogs mthon po nas lhung na dngos po'i chos nyid kyis nges par bya ba'i phyir ro zhes brjod pa ni/bcom ldan 'das de ni 'di ltar lags te gang gis de'i lus kyang zhes bya ba la sogs pa'o/ /dpe can gyi don gsungs pa ni shA ri'i bu de de bzhin te zhes bya ba la sogs pa'o/ /ltung ngo zhes bya ba ni sbyin pa la sogs pa dang rab tu ldan pa yin na yang shes rab kyi pha rol tu phyin pa dang thabs la mkhas pa'i sbyor ba dang bral bas nyan thos kyi sar ltung bar 'gyur ba ste/'dis ni de gnyis ka ni mya ngan las 'das pa la gtso bor bstan pa yin no/ /de ltar na ji skad du bstan pa'i rnam pa bcu drug kho na ngo bo nyid kyi mtshan nyid yin par bzung ngo //de skad du yang / nyon mongs rtags dang mtshan ma dang / /mi mthun phyogs dang gnyen po dag /dben dang dka' dang nges pa dang / /ched du bya dang mi dmigs dang / /mngon par zhen pa bkag pa dang / /dmigs pa zhes bya gang yin dang //mi mthun thogs pa med dang de/ /gzhi med 'gro med skye med dang / /de bzhin nyid ni mi dmigs dang / /ngo bo nyid bcu drug bdag nyid/ /mtshon cha lta bur mtshon pas na/ /mtshan nyid bzhi par bzhed pa yin/ /zhes gsungs pa yin no/ /thar pa'i cha dang mthun pa'i dge ba'i rtsa ba dang ldan pa kho na la ji skad du bshad pa'i sbyor ba yongs su shes pa 'byung bas thar pa'i cha dang mthun pa bstan pa ni/gzhan yang shA ri'i bu byang chub sems dpa' 'das pa dang zhes bya ba la sogs pa gsungs pa yin no/ / de mtshan ma'i tshul gyis zhes bya ba ni mtha' gcig tu mngon par zhen pa'i sbyor bas so/ /sems shing zhes bya ba ni mngon du byed pas so/ /kun tu 'dzin pas zhes bya ba ni nges par gyur pas so/ /'jig rten dang 'jig rten las 'das pa'i shes pa dag gis ma rtogs pas mi shes mi mthong zhes bya bar sbyar ro//yongs su bsngo bar 'dod pa zhes bya ba ni stong pa nyid kho na bla na med pa yang dag par rdzogs pa'i byang chub yin no snyam pas yongs su bsngo ba'i phyir ro/ /snga ma bzhin du de ci'i phyir zhe na zhes bya bas dogs pa bsu nas/ shA ri'i bu gang zhes bya ba la sogs pa gsungs so//thar pa'i cha dang mthun pa bstan pa'i skabs yin pas ldog pa bstan pas na 'di skad du/ mtshan ma med par dmigs pa'i shes pa'i rnam pas sbyin pa la sogs pa'i sangs rgyas kyi chos rnams rang gi rgyud la skye bas yang dag par bsgrub par bya ba la mkhas pa'i shes rab kyi pha rol tu phyin pa dang /thabs kyi mtshan nyid gang yin pa de ni rnam pa kun mngon par rtogs pa 'di la thar pa'i cha dang mthun pa yin par 'dod do/ /'dir thar pa ni bral ba'i khyad par yin la de'i cha la phan pa nyid yin pas na thar pa'i cha dang mthun pa ste/ bstan pa la 'jug pa'i rgyur gyur pa thos pa dang bsam pa'i rang bzhin no//de bas na shes rab dang thabs la mkhas pa dang bral bas gnyis su lhung ba yin no zhes brjod pa yin no/ /de skad du yang / mtshan med rab tu sbyin la sogs/ /yang dag sgrub la mkhas pa ni/ /rnam pa thams cad rtogs 'di la/ / thar pa'i cha dang mthun par 'dod/ /ces gsungs pa yin no/ /mkhas pa nyid gsal bar byed pa ni bcom ldan 'das kyis ji ltar bshad pa'i don zhes bya ba la sogs pa gsol pa yin no/ /bshad pa zhes bya ba 'di ni nyan thos kyi sa 'am rang sangs rgyas kyi sa la gnas par 'gyur bar rig par bya'o zhes bya ba 'di'i don ji ltar bdag gis 'tshal ba de ltar yin na /bsod nams kyi tshogs shin tu mang po dang ldan pa la sogs pa la yang byang chub chen po rtogs shing thob pa la the tshom du 'gyur ro/ /'o na ji ltar 'thob par 'gyur zhe na/ bcom ldan 'das de lta bas na zhes bya ba la sogs pa gsol to//shes rab kyi pha rol tu phyin pa bsgom par bgyi/ thabs la mkhas pa la yang brtson par bgyi zhes bya ba de ni shes rab kyi pha rol tu phyin pa ni chos thams cad rnam pa thams cad du yongs su shes pa'o/ /thabs la mkhas pa ni sangs rgyas la sogs pa'i yul la dad pa dang sbyin pa la sogs pa dang /dge ba 'dod pa nyid la sogs pa dran pa dang / las dang byed pa po bya ba mi dmigs pa'i ting nge 'dzin to/ /des na de ltar dbang po'i don med pas na dbang po ma yin pa'i ngo bo dad pa dang brtson 'grus dang dran pa dang ting nge 'dzin dang shes rab kyi rang bzhin thar pa'i cha dang mthun pa'i dge ba'i rtsa ba rnam pa lnga nye bar bsgrub par bya ba yin no zhes brjod par 'gyur ro//de skad du yang / sangs rgyas sogs dmigs dad pa dang / /sbyin sogs spyod yul brtson 'grus dang / /bsam pa phun tshogs dran pa dang / /rnam par mi rtog ting 'dzin dang / /chos rnams rnam pa thams cad du//shes pa'i shes rab rnam pa lnga/ /zhes gsungs pa yin no/ /legs par smras pa nyid kyis ni rjes su brjod pa gsungs pa ni shA ri'i bu de de bzhin no zhes bya ba la sogs pa'o/ /de lta yin na yang dad pa la sogs pa thams cad kyis bla na med pa'i byang chub 'thob par mi 'gyur ba ni bcom ldan 'das shes rab kyi pha rol tu phyin pa 'di ni zab po zhes bya ba la sogs pa gsol pa yin no//dad pa la sogs 'bring gis thob par mi nus pa nyid kyis na 'byung bar dka' ba'o/ /de dag nyid chung ngus rtogs par mi nus pas na shin tu 'byung bar dka' ba'o/ /de bzhin du rjes su brjod pa gsungs pa ni lha'i bu dag de de bzhin no zhes bya ba la sogs pa'o//shes rab 'chal ba dang zhes bya ba la sogs pa la chos rnam pa thams cad yongs su shes pa dang bral bas na shes rab 'chal ba'o/ /sbyin pa la sogs pa'i yul la brtson pa med pas na brtson 'grus dman pa'o/ /rnam par mi rtog pa'i ting nge 'dzin thams cad dang bral bas na mos pa dman pa'o//sangs rgyas la sogs pa la dmigs pa'i dad pa med pas na thabs la mi mkhas pa'o/ /phan pa'i dngos po la sogs pa'i dran pa dang bral bas na sdig pa'i grogs po la brten pa'o/ / 'dis ni 'di skad du gang gi phyir dad pa la sogs pa chen pos ni yang dag par rdzogs pa'i byang chub rtogs par sla la/ de dag nyid chung ngus rtogs par dka'o zhes bya ba'i shugs kyis na 'bring ba rnams kyis ni rang sangs rgyas kyi byang chub rtogs pa yin la/ chung ngu rnams kyis ni nyan thos kyi byang chub rtogs so zhes bya ba 'di don gyis 'phangs pa yin no zhes bstan par 'gyur ro//de skad du yang / rdzogs pa'i byang chub rnon po yis/ /rtogs bla rtul pos rtogs dkar bzhed/ /ces gsungs pa yin no/ /don dam pa'i bden pa la brten nas 'byung bar dka' ba nyid rnam par bzlog pa ni gang bcom ldan 'das kyis 'di skad du zhes bya ba la sogs pa gsol pa yin te/'di ltar zhes bya ba ni spong ba ste ma lags so zhes bya ba'i tha tshig go/ /ji ltar na mngon par rdzogs par sangs rgyas par bya ba cung zad kyang med snyam pa'i dogs pa de ci'i slad du zhe na zhes bya bas bsu nas/bcom ldan 'das zhes bya ba la sogs pa gsol pa yin no/ /stong pa lags pa'i slad du zhes bya ba ni ma skyes pa lags pa'i phyir mngon par rdzogs par byang chub par bya ba'i chos ni ma mchis so zhes bya ba'i don to/ /'di nyid gsal bar bya ba'i phyir bcom ldan 'das 'di ltar zhes bya ba la sogs pa gsol to//spang bar bgyi ba'i slad du zhes bya ba ni nyon mongs pa rnams bar chad med pa'i lam gyis spang bar bya ba'i don du'o/ /mngon par rdzogs par 'tshang rgya ba dang mngon par rdzogs par 'tshang rgya bar bgyi ba zhes bya ba ni rnam par grol ba'i lam gyi gnas skabs su'o//'tshal ba dang 'tshal bar bgyi ba zhes bya ba ni khyad par gyi lam gyis so/ /rnam grangs 'dis kyang zhes bya ba ni byed pa po dang las dang bya ba dmigs su med pas kyang ngo / /stong pa nyid yin pa nyid kyis kyang sla bar mngon par byang chub pa nyid shin tu med pa ni/ rab 'byor 'byung ba med pa'i phyir zhes bya ba la sogs pa gsungs pa yin te/de la rgyu med pa nyid kyis na 'byung ba med pa'i phyir ro/ /'bras bu med pas na yang dag par 'gyur ba ma yin pa'i phyir ro/ /de bas na 'jig rten dang 'jig rten las 'das pa'i shes pa'i yul ma yin pa nyid kyis na go rims bzhin du rnam par mi rtogs pa'i phyir dang rnam par ma bsgrubs pa'i phyir zhes bya ba yin no//'di skad du chos rnams ma skyes pa nyid kyis na shes pa'i yul ma yin pa'i phyir ro/ /ji ltar bla na med pa yang dag par rdzogs pa'i byang chub 'byung sla bar 'gyur/ 'o na ji lta bu yin zhe na / rnal 'byor pa de lta bu'i chos la lhag par mos kyang kun rdzob tu sgyu ma'i skyes bus byed pa ltar bsod nams dang ye shes kyi tshogs bsgrubs nas rtogs par byed pa'i phyir 'byung bar dka' ba yin no zhes brjod par 'gyur ro//de nyid bstan par byed pas brjod pa ni tshe dang ldan pa rab 'byor stong pa zhes bya ba'i rnam grangs 'dis zhes bya ba la sogs pa'o//de kho na bzhin du de ci'i phyir zhe na zhes bya bas dogs pa bsu nas/ tshe dang ldan pa rab 'byor nam mkha' zhes bya ba la sogs pa smras pa yin no/ /mngon par rdzogs par 'tshang rgya bar bya'o snyam du mi sems te zhes bya ba ni stong pa nyid yin pas nam mkha'i rang bzhin can gyi byang chub sems dpa' ni bdag mngon par rdzogs par 'tshang rgya bar bya'o snyam du mi sems te zhes bya ba ni stong pa nyid yin pas nam mkha'i rang bzhin can gyi byang chub sems dpa' ni bdag mngon par rdzogs par 'tshang rgya bar bya'o snyam pa de lta bu'i sbyor ba med pa nyid kyis 'byung bar dka'o zhes bya ba'i tha tshig go//tshe dang ldan pa rab 'byor de bzhin kun rdzob tu yang mngon par rdzogs par 'tshang rgya bar shin tu 'byung bar sla ba dgag par bya ba'i phyir/ tshe dang ldan pa rab 'byor gal te zhes bya ba la sogs pa smras pa yin no/ /phyir mi ldog par 'gyur ba zhig na zhes bya ba ni mngon par 'dod pa yod pa nyid kyis ldog par mi 'gyur ro//ldog pa'i sgo nas bstan nas rjes su 'gro ba'i sgo nas ston pa ni tshe dang ldan pa rab 'byor zhes bya ba la sogs pa smras pa yin no/ /ldog pa mi srid pa des na de 'byung dka' bar ji ltar 'gyur zhes brjod pa ni/ tshe dang ldan pa shA ri'i bu yang ci zhig bya ba la sogs pa ste/ldog na gzugs la sogs pa chos can nam de las tha dad pa 'am/ de bzhin nyid kyi mtshan nyid kyi chos sam/ de las gzhan du gyur pa zhig ldog par 'gyur/ ci zhig bya ba thams cad du 'dri ba'o/ /chos nyid las bsams nas dris pa yin pa'i phyir/de lta ma yin no zhes bya ba'i tshig gi don no/ /rab tu dga' ba la sogs pa'i sa bdun la spyir ldog pa mi srid par bstan nas/ mi g.yo ba la sogs pa'i sa gsum la yang rtogs par byed pa dang / rtogs par bya ba'i chos kyi dbye bas brjod pa ni/ tshe dang ldan pa shA ri'i bu yang ci gzugs bla na med pa yang dag par rdzogs pa'i byang chub mngon par rdzogs par 'tshang rgya 'am zhes bya ba la sogs pa yin no//sangs rgyas kyi sa kun tu 'od kyi dbang du byas nas/ tshe dang ldan pa shA ri'i bu de ci snyam du sems zhes bya ba la sogs pa smras pa yin no/ /phyir ldog pa'i chos de gang yin zhes bya ba ni ldog pa med pa nyid kyi rgyu des na stong pa nyid kyi chos de la/rnam pa thams cad du mngon par ma zhen pa'i tshul gyis gnas pa las gang ldog par 'gyur ba'i chos de gang yin te gang ma yin no zhes bya ba'i tha tshig go/ /chos de yang gang yin zhes bya ba ni gang yang ma yin pa nyid do//ci zhes bya ba'i tshig gi phrad ni spong ba'i don la 'jug go/ /nye bar bsdu ba brjod pa ni tshe dang ldan pa shA ri'i bu de ltar zhes bya ba la sogs pa'o/ /bden pa nyid dang gnas pa nyid du chos thams cad dmigs su med pa la zhes bya ba ni kha cig na re don dam par bden pa nyid dang brtags par yang rnam par gnas par dmigs su med pa rnams la zhe'o//gzhan dag na re ni shes pa dang shes bya'i ngo bo nyid kyi de kho na nyid dang bral bas go rims bzhin du bden pa nyid dang gnas pa nyid du yin zhes 'dod do/ /kun rdzob kyi bden pa la brten nas 'byung bar sla ba nyid bkag pa na/ gal te don dam par sgrub par byed pa de'i tshe skabs su bab pa la nye bar mkho ba med do zhes brjod pa ni chos kyi tshul zhes bya ba la sogs pa'o//chos kyi tshul gyi rnam pa gang zhig ste chos rnams ma skyes pa'i rnam pa gang gis bshad pa de ltar na gang yang phyir ldog pa med kyi 'on kyang kun rdzob tu ni ldog go zhes 'dod do//kun rdzob tu yang med pa yin no zhe na/ de la mngon sum la sogs pa dang 'gal ba 'ba' zhig tu ma zad kyi/ 'on kyang rang gi khas blangs pa dang yang 'gal lo zhes bstan pa'i phyir gang yang tshe dang ldan pa rab 'byor ces bya ba la sogs pa smras so/ /rnam par gzhag pa yod par mi 'gyur gyi zhes bya ba ni gang gi chos thams cad skye ba med par bstan pa na/byang chub kyi bdag nyid can gyi sems dpa' ste sems gcig pu nyid de kho na bgrod par bya ba yin pa'i theg pa yin pas byang chub sems dpa'i theg pa ste/ de bzhin gshegs pa'i sas bsdus pa sangs rgyas kyi theg pa nyid yin pa de'i phyir/rgyu'i gnas skabs na nyan thos kyi theg pa la sogs pa gsum yin par mi 'thad pas na/ de'i theg pa pa'i byang chub sems dpa' gsum po rnams kyi rnam par gzhag pa med par 'gyur la gsum po gang dag yin pa 'di dag ni de bzhin gshegs pas gsungs pa yin na ji ltar tshe dang ldan pa rab 'byor gyis bstan pa ltar na ni rigs gsum po rnams kyi rnam par gzhag pa yod par mi 'gyur gyi theg pa gcig kho nar 'gyur te/de ltar na khas blangs pa dang 'gal ba yin no zhes bya bar bsams pa'o/ /chos thams cad skye ba med pa yin na yang byang chub yod pas byang chub sems dpa' gang yang rung ba zhig yod par khas blangs pa'i phyir/ci ltar byang chub sems dpa' gsum ka rnam par gzhag pa med par 'gyur zhes brjod pa ni/ tshe dang ldan pa shA ri'i bu ci yang zhes bya ba la sogs pa smras pa yin te/ gang gis theg pa gsum gyi gang zag med par rgol ba tshe dang ldan pa gnas brtan rab 'byor ci byang chub sems dpa' gcig kyang yod par khas mi len nam zhes bya ba'i tha tshig go/ /shes su zin kyang de'i tshig gis lan 'debs su gzhug pa'i phyir 'di rnams gsungs pa yin na ji ltar tshe dang ldan pa rab 'byor gyis bstan pa ltar na ni gsum po 'di rnams kyi rnam par gzhag pa yod par mi 'gyur gyi theg pa gcig kho nar 'gyur te/re zhig gnas brtan tshe dang ldan pa rab 'byor la dri bar bya ba yin no zhes smras pa yin no/ /de nyid 'dri bar byed pa ni rab 'byor yang ci khyod ces bya ba la sogs pa smras pa yin no//slar dris pas lan 'debs pa ni tshe dang ldan pa shA ri'i bu ci yang zhes bya ba la sogs pa smras so/ /de bzhin nyid kyi de bzhin nyid ces bya ba ni skye ba med pa yang de kho na nyid du yod pa ma yin pa nyid do/ /de ni ma yin te zhes bya bar rnam par 'byed pa ni de bzhin nyid kyang zhes bya ba la sogs pa smras pa yin te/rnam pa gsum du zhes bya ba ni nyan thos kyi theg pa la sogs pa'i rnam par ro/ /ngag ni rnam par gcod pa'i 'bras bu can yin pa'i phyir de gcig tu dmigs par 'gyur ro zhes brjod pa ni tshe dang ldan shA ri'i bu zhes bya ba la sogs pa'o//gcig tu yang zhes bya ba ni theg pa chen po'i bdag nyid can gyi rnam par yang ngo / /rigs pa mtshungs pa nyid kyi phyir de ni ma yin no zhes bya ba yin no/ /rten pa yang bsal bar bya ba'i phyir tshe dang ldan pa shA ri'i bu ci khyod kyis zhes bya ba la sogs pa smras pa yin te/ de ni ma yin no zhes bya ba'i don ni bshad zin to//dkyus ma'i don nye bar bsdu ba brjod pa ni tshe dang ldan pa shA ri'i bu de ltar zhes bya ba la sogs pa'o/ /ci'i phyir 'di snyam du zhes bya ba ni rnal 'byor pa'i kun rdzob tu bla na med pa'i byang chub yod pa'i phyir de'i stobs kyis don dam par byang chub sems dpa' yod pa nyid ni ma yin te /de bas na 'di ni nyan thos kyi theg pa can no zhes bya ba la sogs par khyed ci'i phyir de snyam du sems te/ 'on kyang de lta bu'i sems ni bskyed par mi bya'o zhes bya ba'i don to/ /rtsod pa gcig nas gcig tu brgyud pas zhar la 'ongs pa'i don nyid thar pa'i cha dang mthun pa'i rtogs pa nyid du sbyor ba ni shA ri'i bu de ltar na byang chub sems dpa' sems dpa' chen po zhes bya ba la sogs pa smras pa yin no//rab tu rnam par 'byed pa rnams zhes bya ba ni nges par rtogs pa na'o/ /de la khyad par med par zhes bya ba ni byang chub sems dpa' gsum gyi dbye ba mi dmigs pa'i phyir ro//bye brag med pa zhes bya ba ni de bzhin nyid gcig pa nyid du rtogs pa'i phyir ro/ /tha dad du bya ba med pa ni ji skad du bshad pa'i rnam pa dang tha dad pas logs shig tu bya bar mi nus pa'i phyir ro/ /thar pa'i cha dang mthun pa chung ngu dang 'bring dang chen po dang ldan pa'i phyir phyogs par mi 'gyur zhes bya ba'i tshig gsum dang go rims bzhin du sbyar ro//chos nyid dang mi 'gal ba'i don ston pas rab 'byor de de bzhin no zhes bya ba la sogs pa gsungs pa yin no/ /byang chub kyi dbye ba rnam pa du ma yin pas na bcom ldan 'das byang chub gang gis zhes bya ba la sogs pa gsol pa yin te go sla'o//thar pa'i cha dang mthun pa skyes pa'i spro ba can la nges par 'byed pa'i cha dang mthun pa'i don ni bcom ldan 'das byang chub sems dpa' sems dpa' chen po zhes bya ba la sogs pa gsol pa yin no/ /mnyam par gnas par bya zhes mdor bstan pa'i bshad pa ni sems can thams cad ces bya ba la sogs pa gsungs pa yin no//sems mnyam pa ni rjes su chags pa med pa'i phyir ro/ /mi mnyam pa med pa'i sems ni zhe sdang med pa'i phyir ro/ /byams pa'i sems kyis zhes bya ba ni da ltar gyi don sgrub pa'i sems kyis zhes bya ste da ltar gyi don sgrub pa'i sems kyis so//phan pa'i sems kyis zhes bya ba ni ma 'ongs pa ste ma 'ongs pa'i don sgrub pa'i sems kyis so/ /byams pa dang phan pa'i sems dag gi don nyid ni dge ba'i sems dang nga rgyal bcag pa'i sems kyis zhes gsungs pa yin no/ /khong khro ba med pa'i sems kyis zhes bya ba ni khong khro ba dang bral ba'i sems kyis so//de nyid ni 'tshe ba med pa'i sems kyis zhes bya'o/ /tho 'tshams pa med pa'i sems kyis zhes bya ba ni 'jigs pa skyed pa dang bral bas so/ /sems can thams cad la phar 'du shes pa dang zhes bya ba sogs pa ni go sla'o/ / 'on kyang nye bar mtshon pa 'di nyid kyis spun zla dang / sring mo dang / mdza' bshes dang / grogs dang / nye du dang / snag gi gnyen mtshams kyi 'du shes su bya bar yang shes par bya'o/ /de la pha dang ma la sogs pa gnyis gnyis gcig tu brjod pas rnam pa lngar brjod par bya'o/ /bdag sems can thams cad kyi mgon du gyur par gnas par bya'o zhes bya ba ni 'di skad ston pa yin te/mnyam pa dang byams pa dang phan pa dang khong khro ba med pa dang tho 'tshams pa med pa'i sems te rnam pa lnga dang / pha dang / ma dang / spun zla dang / sring mo dang / bu dang / bu mo dang / mdza' bo dang /grogs dang / nye du dang / snag gi gnyen mtshams kyi sems kyi rnam pas sems can thams cad la dmigs na drod du yang dag par rtogs pa'i dge ba'i rtsa ba 'thob pas sems can thams cad kyi skyabs zhes bya ba yin no/ /de skad du yang / dro ba rnams kyi dmigs pa 'dir//sems can thams cad yin par bsngags / /de dag nyid la sems mnyam sogs/ /rnam pa dag ni bcur bshad do/ /zhes gsungs pa yin no/ /rtse mo'i dbang du mdzad nas bdag nyid kyang zhes bya ba la sogs pa gsungs pa yin no/ /'di skad du bdag nyid sdig pa thams cad las ldog pa dang sbyin pa la sogs pa sgrub pa la gnas pas/de bzhin du gzhan rnams sdig pa las ldog pa la yang dag par bskul zhing dge ba la 'jug pa la yang dag par bskul ba dang bsngags pa brjod pa dang mthun pa dang dga' bar byed pa rnams kyis dmigs pa na rtse mor gtogs pa skye bar 'gyur ro zhes brjod pa yin no//de skad du yang / bdag nyid sdig pa las ldog cing / /sbyin la sogs pa gnas pas gzhan/ /de dag la ni 'god pa dang / /bsngags pa brjod dang mthun pa nyid/ /rtser gyur zhes gsungs pa yin no/ /bzod pa'i dbang du mdzad nas de bzhin du bden pa nas byang chub sems dpa'i skyon med par 'jug pa'i bar dang zhes bya ba la sogs pa gsungs pa yin te/ji ltar rtse mo'i gnas skabs su bdag dang gzhan la brten pa'i dmigs pa dang rnam pa'i dbye ba bshad pa de bzhin du/ sdug bsngal la sogs pa'i bden pa bzhi dang /'bras bu dang po la sogs pa dang rab tu dga' ba la sogs pa'i sa rang nyid kyis yongs su shes shing gzhan dag kyang de nyid la yang dag par bskul ba la sogs pa'i rnam pa rnams kyi dmigs pas bzod pa skye bar 'gyur ro/ /de skad du yang de bzhin bzod pa ni/ /rang gzhan rten can bden shes pa//zhes gsungs pa yin no/ /chos kyi mchog gi dbang du mdzad nas sems can yongs su smin pa la gnas pa nas zhes bya ba la sogs pa'i rnam pa rnams kyi dmigs pas chos kyi mchog tu 'gyur ro zhes brjod pa yin no/ /de skad du yang / chos mchog de bzhin sems can rnams/ /smin byed sogs kyis shes par bya//zhes gsungs pa yin no/ /nges par 'byed pa'i cha dang mthun pa 'di dag kyang chung ngu dang 'bring dang chen po'i dbye bas re re zhing rnam gsum du 'gyur ro/ /de la drod du gtogs pa chung ngu ni mnyam pa dang byams pa'i sems de dag gi tshe 'di nyid la gzhan la tho 'tshams pa med pa las so//'bring ni phan pa la sogs pa'i sems gsum gyis phyi ma la gzhan la phan pa'i bsam pa nyid las so/ /'bring ni phan pa la chen po ni phar 'du shes pa la sogs pa'i sems bskyed pas 'di dang phyi ma la gzhan rnams kyi mngon par 'dod pa nye bar sgrub par 'dod pa nyid las yin par bstan pa yin no//rtse mor gtogs pa chung ngu ni sdig pa las ldog pa la bdag dang gzhan sbyor bas gzhan rnams kyi sdug bsngal gyi rgyu las ldog par 'dod pa nyid las so/ /'bring ni sbyin pa la sogs pa la bdag dang gzhan 'jog pas gzhan rnams kyi bde ba'i rgyur yang dag par sbyor bar 'dod pa las so//chen po ni rten cing 'brel bar 'byung ba rnam pa gnyis su bsgom pa la bdag dang gzhan 'jug par byed pas gzhan rnams kyi bde ba dang sdug bsngal phyin ci log pa spong bar mngon par 'dod pa nyid la rten nas gsungs so/ /bzod pa chung ngu dang 'bring dang chen po ni go rims bzhin du de bzhin du bden pa nas byang chub sems dpa'i skyon med par 'jug pa'i bar zhes bya ba 'dis gzhan rnams 'phags pa'i lam dang 'bras bu dang po la sogs pa dang sangs rgyas nyid la nges par sbyor bar 'dod pa nyid la rten nas gsungs pa yin no//de lta mod kyi bzod pa chen po ni skad cig ma du ma yin par bzung ngo //chos kyi mchog gi chung ngu dang 'bring dang chen po ni go rims bzhin du gzhan rnams khyad par med par theg pa gsum du yongs su smin par bya ba'i phyir dang / khyad par du byang chub sems dpa'i lam la nges par sbyar ba'i phyir dang / phun sum tshogs pa thams cad kyi rab kyi mthar thug pa la rten par 'dod pa nyid yin pa'i phyir sems can yongs su smin pa dang /sgrib pa med pa'i tshul dang dam pa'i chos gnas pa zhes bya ba'i tha tshig gis gsungs pa yin no/ /chos mngon pa mdzod las/ ji ltar bzod chen skad cig ma/ /gcig yin de bzhin chos kyi mchog /ces gang bshad pa de ni rang gi don gyi dbang du byas pa yin pa'i phyir la/ 'dir ni gzhan gyi don la rten pa'i chung ngu dang 'bring dang chen po'i dbye bas bshad pa yin te/ gzhan gyi don la brtson pa la ni rab dang rab mchog la sogs pa'i gnas skabs srid pa'i phyir ro//des na de dang 'di la 'gal ba yod pa ma yin no/ /mngon par rtogs pa re re la nges par 'byed pa'i cha dang mthun pa la sogs pa ci'i phyir bshad ce na/ brjod pa rnam pa dang lam dang gzhi thams cad rnam par bsgom pa'i dbye bas go rims bzhin du rnam pa thams cad mkhyen pa nyid la sogs pa mngon par rtogs pa rnam pa gsum la 'jig rten pa'i nges par 'byed pa'i cha dang mthun pa sngon du 'gro bas 'jig rten las 'das pa'i mthong ba dang bsgom pa'i lam rtogs pa yin zhing /rnam pa kun mngon par rtogs pa la sogs pa gsum la ni bsgom pa gnas skabs gong nas gong gi khyad par gyis rnam pa thams cad du khyad par gyi lam gyis bsdus pa'i ye shes zag pa med pa chung ngu dang 'bring dang chen po rim gyis skye ba yin no//de la sgrib pa med pa'i tshul ni byang chub sems dpa'i mngon par zhen pa la sogs pa'o/ /dam pa'i chos la gnas pa ni 'tshang rgya ba nyid do//'di skad du bdag nyid sems can yongs su smin par bya ba la sogs pa la gnas nas/ gzhan rnams kyang de la yang dag par bskul ba la sogs pa'i rnam pa rnams kyis dmigs pas chos kyi skye ba yin pa des na/ cig car skye ba 'gag par bya ba'i phyir nges par 'byed pa'i cha la sogs pa'i tha snyad kyis bstan pa yin no zhes bya ba ni kha cig gi'o//shes rab kyi pha rol tu phyin pa'i bshad pa mngon par rtogs pa'i rgyan gyi snang ba las de bzhin nyid kyi le'u zhes bya ba ste bcu drug pa'o// //phyir mi ldog pa'i byang chub sems dpa'i dge 'dun la ji skad du bshad pa'i nges par 'byed pa'i cha dang mthun pa dang mthong ba'i lam la sogs pa gzhan yang 'byung bas phyir mi ldog pa'i byang chub sems dpa'i dge 'dun brjod par bya'o//de yang nges par 'byed pa'i cha dang mthun pa'i lam la gnas pa dang / de bzhin du bzod pa dang shes pas bsdus pa'i mthong ba'i lam la gnas pa dang / gzhan yang rgyu dang ldan pa'i bsgom pa'i lam la gnas pa ste gnas skabs gsum du 'gyur ro//de skad du yang / nges 'byed yan lag nas bzung ste/ /mthong dang bsgom pa'i lam dag la/ /byang chub sems dpa' gang dag gnas/ /de 'dir phyir mi ldog pa'i tshogs/ /zhes gsungs pa yin no/ / de la gzugs la sogs pa las ldog pa dang the tshom med pa la sogs pa'i rnam pa nyi shus nges par 'byed pa'i cha dang mthun pa la gnas pa rnams kyi phyir mi ldog pa'i mtshan nyid shes par bya ba yin no/ /de skad du yang / gzugs la sogs pas ldog sogs brtags/ /rnam pa nyi shu brjod pas 'di//nges 'byed yan lag la gnas pa'i/ /phyir mi ldog pa'i mtshan nyid yin/ /zhes gsungs pa yin no/ /de bzhin nyid kyi ngo bo nyid yin pa'i phyir re zhig gzugs la sogs pa las ldog pa bstan pa ni bcom ldan 'das phyir mi ldog pa'i byang chub sems dpa' sems dpa' chen po'i zhes bya ba la sogs pa gsol pa yin no//de la rnam pa ni gnyen po'i phyogs kyis bsdus pa rnams so/ /rtags ni rang la gnas pa'i mtshan ma rnams so/ /mtshan ma de'i longs spyod du mkho bar gtogs pa'o/ /yang na rnam pa ni lus kyi dga' ba'i khyad par te ba spu ldang ba dang mchi ma 'dzag pa la sogs pa'o//rtags ni ngag gi khyad par te dga' bas gsol ba 'debs pa la sogs pa'o/ /mtshan ma ni nyams su len pa'i khyad par te nyan pa dang 'dzin pa dang klog pa dang mchod pa la sogs pa'o/ /yang na tshig 'di dag ni snga ma snga ma'i bshad par gyur pa yin no//bcom ldan 'das ji ltar bdag gis phyir mi ldog pa'i byang chub sems dpa' sems dpa' chen po lags par 'tshal bar bgyi zhes bya ba 'dis ni ma 'dres par rtogs pa'i mtshan ma zhus pa yin no/ /lan btab pa ni rab 'byor so so'i skye bo'i sa gang yin pa dang zhes bya ba la sogs pa gsungs pa yin no//de bzhin nyid kyi sa zhes bya ba ste zhes bya ba ni sa thams cad sgyu ma lta bu yin pa'i phyir de nyid 'di dag thams cad ni zhes bya ba la sogs pas gsungs pa yin te/ rtog pa med pa rnam par rtog pa med pa'o zhes bya ba ni rigs pa dang lung dag gis nges par bya ba yin gyi gzhan du bya bar mi srid pa'i phyir go rims bzhin du sbyar ro//de las kyang zhes bya ba ni 'khor gyi dkyil 'khor las so/ /'di ni de bzhin no zhes bya ba ni gzugs la sogs pa las ldog pa nyid kyis 'di ni de bzhin yin pa'o/ /de kho na ltar bden pa yin gyi gzhan ni gti mug go zhes bsam pa dang mnyan pa'i dus su mos par byed cing khong du chud par byed de /dngos po 'dzin par mi ston pa ci thod thod smra bar mi 'gyur sgyu ma lta bu'i don rab tu ston pa nyid kyis na don dang ldan pa'i tshig tu smra ste don dang mi ldan pa ma yin no/ /chos nyid bsgom pa la mngon par brtson pa na/pha rol gyis byas pa dang ma byas pa'i bya ba la mi lta'o / /gzung bar bya'o zhes bya ba ni/ rgyu tshogs pa las 'bras skye bar/ /rjes su dpog pa gang yin pa/ /don gzhan nyid la mi ltos phyir/ /de ni rang bzhin yin par brjod/ /ces bya ba'i lung nyid kyis rjes su dpag pas nges par gzung bar bya'o//shes nas dad pa thob pas the tshom zad pa ston pa ni rab 'byor gzhan yang zhes bya ba la sogs pa gsungs pa yin no/ /ngor mi lta zhes bya ba ni shes par bya ba'i de kho na nyid yongs su shes pa la sogs pa srid pa'i bsam pas mgu bar byed pas gdong du mi lta ba'o //lha gzhan la mi rten no zhes bya ba ni skyabs pa la sogs pa'i ngo bor bdag gir mi byed pa'o/ /smon lam grub pas mi khom pa brgyad zad pa ni rab 'byor yang zhes bya ba la sogs pa gsungs pa yin te/ ngan song du mi skye zhing zhes bya ba la dmyal ba dang yi dags dang dud 'gror skye bar mi 'gyur ba ni dngos su gsungs pa yin no//'di ni nye bar mtshon pa yin pas log par lta ba dang sangs rgyas kyi bka' mi thos pa dang yul mtha' 'khob tu skye bar mi 'gyur ba bzung ngo / /bud med kyi dngos po yang yongs su mi 'dzin to zhes bya ba ni bud med kyi dngos po bkag par gsungs pas dbang po ma tshang ba dang glen pa dang lkugs pa'i dngos por mi 'gyur ba yin no zhes don gyis go bar bya'o//yang zhes bya ba'i sgras ni lha tshe ring po rnams su skye bar mi 'gyur ro zhes bya ba'i tha tshig go/ /snying rje dang ldan pa nyid kyis bdag dang gzhan dge ba'i chos la sbyor ba'i don ni rab 'byor gzhan yang zhes bya ba la sogs pa gsungs pa yin te/de la srog gcod pa ni gzhan gyi tshe zad par byed pa'o/ /ma byin par len pa ni rku ba'i tshul gyis gzhan gyi rdzas gnas las spo ba'o/ /'dod pas log par g.yem pa ni bud med la sogs pa'i yan lag ma yin pa la sogs la mngon par bgrod pa'o//'bru'i chang dang bcos pa'i chang bag med pa'i gnas ni/ la la shing shun bu ram bcas/ /gzhan dag sbrang rtsi las byas pa/ /phyer btags phabs chur sbyar ba gsum/ /mkhas pas chang du shes par bya/ /bu ram skyu ru da ta ki/ /chur sbyar bcos chang yin shes bya//zos dang 'thungs pas myos gyur gang / /de ni myos gyur zhes brjod do/ /gsum po 'di dag dkar po'i chos/ /kun gyi mi mthun phyogs yin phyir/ /bag med gnas zhes bshad pa ste/ /zhar las kyang ni 'ongs pa yin/ /brdzun du smra ba ni yang dag pa ma yin pa smra ba'i tshig go//phra ma zer ba ni gzhan 'byed pa'i tshig go/ /tshig rtsub po ni mi snyan par brjod pa'o/ /tshig 'khyal pa ni kun nas nyon mongs pa las bskyed pa'i ngag thams cad do/ /brnab sems ni gzhan gyi nor rdzas rnams la tshul dang mi mthun par re ba bskyed pa'o/ /gnod sems ni sems can la rnam par sdang ba'o//log par lta ba ni med par lta ba'o/ /thams cad kyis zhes bya ba ni sngags kyi sbyor ba la sogs pas so/ /thams cad la ni sems can gyi yul ma lus pa la'o/ /rnam pa thams cad du ni chung ngu la sogs pa'i dbye bas kyang ngo / /thams cad ni de'i sems kyang mi 'byung zhing mi 'byed do//bdag dang gzhan brje bar byed pa nyid kyis sems can thams cad kyi yul la yongs su bsngos pa'i sbyin pa la sogs pa'i don ni/ rab 'byor gzhan yang zhes bya ba la sogs pa gsungs pa yin te/ chos gang dang gang zhes bya ba ni mdo sde la sogs pa'o/ /kun chub par byed pa zhes bya ba ni bdag gir byed pa'o//sbyin par byed pa zhes bya ba ni 'bras bu dang bcas pa ster bar byed pa'o/ /chos yang dag par rtogs pas zab mo'i chos la som nyi mi byed pa'i don ni rab 'byor gzhan yang zhes bya ba la sogs pa gsungs pa yin te/ de la lam gzhan 'dod cing mthar thug pa med pa yin pa'i phyir nem nur ro//lam drang po las bzlog pa ni yid gnyis so/ /dge ba rnam pa sna tshogs 'phel bar 'gro ba med pas rigs kyi chos gso ba ma yin pas na the tshom ste gsor med pa'o/ /rnam pa thams cad du rtogs pa dang bral bas na rmongs pa nyid do//gzhan la phan pa nyid du zhugs pas byams pa'i lus dang ngag dang yid kyi las dang ldan pa'i don ni de phan pa'i tshig dang ldan par 'gyur zhes bya ba la sogs pa gsungs pa yin no/ /de la byams pa'i lus kyi las dang ldan pas ma 'ongs pa na phan par smra bas na phan pa'i tshig dang ldan pa'o//de bzhin du ngag gi las dam pa dang ldan pas tshig tshad yod par smra ba'i phyir tshig ran par smra ba'o/ /byams pas yongs su bsgos pa'i sems kyis kun nas bslang ba nyid kyis na rnar snyan pa la sogs par byed pa nyid yin pa'i phyir tshig 'jam par 'gyur ba'o/ /sbyor ba phun sum tshogs pas sgrib pa lnga po 'dod pa la 'dun pa dang /gnod sems dang / gnyid dang / rmugs pa dang / rgod pa dang / 'gyod pa dang / the tshom dag dang mi 'grogs pa'i don nye bar mtshon pa nyid du gsungs pa ni rmugs pa dang gnyid chung bar 'gyur ro zhes bya ba'o/ / gnyen po rnam par bsgoms pa nyid kyis ma rig pa la sogs pa'i bag la nyal thams cad 'joms pa'i don ni bag la nyal med par 'gyur zhes gsungs pa yin te/ de la ma rig pa dang lta ba'i zag pas bsdus pa'i bag la nyal ba med pa nyid yin gyi 'dod pa dang srid pa'i zag pas bsdus pa ni ma yin te/byang chub sems dpa' ni bsams bzhin du srid pa len pa yin pa'i phyir ro/ /rtag tu mnyam par gzhag pa nyid kyis na dran pa dang shes bzhin dang ldan pa'i don ni/ de 'ong ngam 'gro ba na zhes bya ba la sogs pa gsungs pa yin te/ de la 'ong ba ni mngon sum du 'ong ba'o/ /'gro ba ni phar 'gro ba'o//sems 'khrul pas 'gro ba'am 'ong ba ma yin pa ni shes bzhin dang ldan pa'i phyir ro/ /dran pa nye bar gzhag pa ni yang dag pa'i dran pa dang ldan pa'i phyir ro/ /spyod lam nyams pa yongs su spang ba'i don gyis na thogs par mi byed pa ste shin tu dal ba ma yin pa'o/ /bde ba nyid du zhes bya ba ni zhi ba'i rang bzhin du mngon par rtogs par brtson par byed pa nyid yin pa'i phyir ro//rkang pa gya tshom du sa las mi 'degs zhes bya ba ni rkang pa gcig legs par ma gzhag par rkang pa gnyis pa mi 'degs pa yin pa'i phyir ro/ /rkang pa gya tshom du sa la mi 'jog ces bya ba ni srog chags dang bcas pa'i sa phyogs spang ba'i don du'o//kun tu spyod pa gzob pa nyid kyis gos la sogs pa yongs su spyod pa gtsang ba zhes bya ba'i don ni yang rab 'byor zhes bya ba la sogs pa yin te/ gnod pa nyung bar 'gyur ba ni nad nyung ba'o/ /skyon nyung bar 'gyur ba ni gzhan gyi 'tshe ba nyung ba'o//de ltar na de dag ni dro bar gtogs pa'i gnas skabs kyi rnam pa bcu gcig tu 'gyur ba yin no/ /dge ba'i rtsa ba 'jig rten thams cad las mngon par 'phags pa nyid kyis na lus la srin bu'i rigs brgyad khri mi 'byung ba'i don ni sems can gzhan dag gis lus la zhes bya ba la sogs pa gsungs pa yin te/thams cad nas zhes bya ba ni phra rab tsam gyi tshul gyis kyang ngo / /thams cad ni srin bu'i rigs rnams so/ /rnam pa thams cad du ni kha dog la sogs pa'i rnam pas so/ /thams cad ni srin bu'i rigs brgyad khri grangs su bgrang bar mi 'byung ngo //de bzhin du ci'i phyir zhe na zhes bya bas dogs pa bsu nas/ rab 'byor 'di ltar zhes bya ba la sogs pa gsungs so/ /dge ba'i rtsa ba rnam par dag pas sems la gya gyu med pa'i don ci lta ci lta bur zhes bya ba la sogs pa gsungs pa yin te/ de la lus yongs su dag pa ni lus la mtshan la sogs pas yongs su brgyan pa nyid do//ngag yongs su dag pa ni tshangs pa'i dbyangs la sogs pa'i rang bzhin nyid do/ /gnyis po 'di dag ni sems yongs su dag pa'i 'bras bu nyid yin par bshad do/ /de nyid kyi phyir gtso bo yin pas sems yongs su dag pa rnam par 'byed pa'i don du bcom ldan 'das zhes bya ba la sogs pa gsol pa yin te/de la rnyed pa la sogs pa la ltos pa med pa'i phyir sems la bya ba nyung ba'o/ /yang dag pa'i skyon la yongs su sbed pa med pas na sems g.yo ba med pa'o/ /yang dag pa ma yin pa'i yon tan ston pa dang bral bas sems sgyu med pa'o//yang dag pa ci lta ba bzhin du smra ba nyid yin pas na sems la gya gyu med pa'o/ /ser sna la sogs pa dang bral ba nyid yin pa'i phyir sems yon po med pa'o/ /gang yin pa zhes bya ba ni theg pa chen po la gzhol bas so/ /rnyed pa dang bkur sti la sogs pa la mi lta ba nyid kyis sbyangs pa'i yon tan bcu gnyis yang dag par len pa'i don ni rab 'byor gzhan yang zhes bya ba la sogs pa gsungs pa yin te/de la rnyed pa ni rdzas thob pa'o/ /bkur sti ni gces spras byed pa nyid do/ /tshigs su bcad pa ni grags pa'o/ / lhur mi byed do zhes bya ba ni de la gzhol bar mi 'gyur ba'o/ /de la sbyangs pa'i yon tan bcu gnyis ni 'di dag yin te/ 'di lta ste phyag dar khrod pa nyid dang / chos gos gsum pa nyid dang / thams cad 'phying pa pa nyid dang / bsod nams pa nyid dang / stan gcig pa nyid dang / zas phyis mi len pa nyid dang / dgon pa nyid dang / shing drung pa nyid dang / bla gab med pa nyid dang / gcog pu pa nyid dang / gzhi ji bzhin pa nyid ces bya'o / /sbyin pa la sogs pa'i khyad par bsgrubs pas pha rol tu phyin pa de dag gi mi mthun pa'i phyogs ser sna la sogs pa'i sems mi bskyed pa'i don ni phrag dog dang ser sna mang ba ma yin no zhes gsungs pa yin no//nye bar mtshon pa nyid yin pas na/ pha rol tu phyin pa thams cad kyi mi mthun pa'i phyogs bzung ngo / /chos kyi dbyings kyis thams cad yang dag par bsdus pa yin pa'i phyir chos nyid dang mi 'gal ba'i shes rab kyi pha rol tu phyin pa'i rnal 'byor rtogs pa'i don ni chos zab mo dag bshad pa na zhes bya ba la sogs pa gsungs pa yin te /bskyod par bya bar mi nus pas na blo brtan pa'o/ /phra ba'i don mthong bas na blo zab pa'o/ /sbyor bar byed do zhes bya ba ni yang dag par sbyor bar byed pa'o/ /sems can gyi khams bdag gir byas pa nyid kyis gzhan gyi don du dmyal ba 'dod pa'i don ni rab 'byor gzhan yang zhes bya ba la sogs pa gsungs pa yin te/phyir bshags par gyis shig ces bya ba ni byang chub kyi sems bzung ba yongs su 'dor bas so/ /so sor spongs shig ces bya ba ni phyis kyang mi bskyed pa'i phyir ro//sems mi 'khrugs pa ni 'dren ma med pa'i phyir ro/ /mi g.yo ba ni yongs su blangs pa mi 'dor ba'i phyir ro/ /de ltar na de dag gi rtse mor gtogs pa'i gnas skabs kyi rnam pa drug tu 'gyur ro/ /rtogs pa yid ches pa'i chos nyid kyi gzhan gyis bkrir mi btub pa'i don ni rab 'byor gzhan yang zhes bya ba la sogs pa gsungs pa yin te/chos nyid la ston te zhes bya ba la sogs pa tshig bzhi ni sdug bsngal la sogs pa'i bden pa sgyu ma lta bu nyid du rtogs pa'i phyir de skad smos pa yin no/ /gzhan gyis dad pa'i phyir mi 'gro ste zhes bya ba ni chos nyid mngon sum du byas pa'i phyir gzhan la yid ches pas rtogs pa ma yin pa'o//'di dag nyid dpes gsal bar bstan par bya ba'i phyir/ rab 'byor dper na zhes bya ba la sogs pa gsungs pa yin te/ bkrir mi btub pa'i phyir mi 'phrogs pa'o/ /slar ldog pa med pas na phyir mi ldog pa'i chos can no//mtha' gcig la gnas pa'i phyir thams cad mkhyen pa nyid du nges par 'gyur ba'o/ /'di dag nyid rgya cher bstan pa ni rdzogs pa'i byang chub la gzhol bar zhes bya ba la sogs pa gsungs pa yin no/ /sangs rgyas nyid kyi thabs shes pa la mkhas pa nyid kyis lam ltar bcos pa nye bar ston pa'i bdud la bdud nyid du rtogs pa'i don ni rab 'byor gzhan yang zhes bya ba la sogs pa yin no//byang chub sems dpa'i spyod pa 'di ni zhes bya ba ni shes rab kyi pha rol tu phyin pa la sogs pa'i spyod pa'o/ /'di nyid du zhes bya ba ni 'di nyid la'o/ /sdug bsngal mthar phyung zhes bya ba la 'phags pa'i bden pa bzhi bsgom pa la zhes bya ba ni lhag ma'o//kye ma ma la zhes bya ba la sogs pa la kye ma ma la sdug bsngal te gang gi tshe re zhig 'di nyid du khyod kyi phung po ni chos nyid rtogs pa dang bral bas na dus phyis yongs su rdzogs shing mngon par grub par mi 'gyur na de'i tshe ci'i phyir smon lam la sogs pa'i stobs kyis sems can gyi don du phung po gzhan bzung bar sems zhes bya ba'i don to//'di ni bdud yin no zhes lam gzhan nye bar ston pa rtogs nas phyir ldog pa yin te/ de ltar na 'di ni bzod par gtogs pa'i gnas skabs kyi rnam pa gnyis su 'gyur ro//'khor gsum rnam par dag pas spyod pa thams cad du sangs rgyas kyis rjes su yi rang ba'i sgrub pa'i don ni gal te byang chub sems dpa' sems dpa' chen po gzhan las zhes bya ba la sogs pa gsungs pa yin te/ 'brel bar byed pa'i tshig ces bya ba 'di ni sangs rgyas kyis gsungs pa ma yin no zhes bya ba la sogs pa'i tshig go//gzhan las thos nas zhes bya ba ni gzhan bdud las thos pa na'o/ /sems chos nyid las yongs su nyams par mi 'gyur zhes bya ba'i tha tshig go/ /sbyor ba dang dngos gzhi dang mjug gi gnas skabs su yongs su nyams par mi 'gyur phyir ldog par mi 'gyur de'i sems gzhan du mi 'gyur zhes go rims bzhin du sbyar bar bya'o//de ltar spyod cing zhes bya ba ni sangs rgyas kyis rjes su gnang ba'i spyod pas spyod ces bya ba'i tha tshig go/ /nye bar bsdu bar bya ba'i phyir gal te byang chub sems dpa' sems dpa' chen po de zhes bya ba la sogs pa gsungs so//de ltar na 'di ni chos kyi mchog tu gtogs pa'i gnas skabs kyi rnam pa gcig tu 'gyur ro/ /ji skad du bshad pa'i rnam pa rnams kyi ni nges par 'byed pa'i cha la gnas pa'i byang chub sems dpa' sems dpa' chen po bla na med pa yang dag par rdzogs pa'i byang chub las phyir mi ldog pa yin no zhes mtshon par bya ba yin no//de skad du yang / gzugs la sogs las ldog pa dang / /the tshom mi dal zad pa dang / /bdag nyid dge ba la gnas shing / /gzhan dag de la 'god pa dang / /gzhan gyi rten can sbyin sogs dang //zab mo'i don la'ang som nyi med/ /byams lus sogs dang sgrib pa ni/ /rnam pa lnga dang mi 'grogs dang / /bag la nyal kun 'joms pa dang / /dran pa dang ni shes bzhin dang / /gos la sogs pa gtsang ba dang / /lus la srin bu rnams mi 'byung / /gya gyu med sems sbyang ba ni/ / len dang ser sna med sogs dang / /chos nyid ldan par 'gro nyid dang / /sems can don du dmyal tshol dang / /gzhan gyis bkri bar mi btub dang / /lam gzhan nye bar ston bdud la/ /bdud ces bya bar rtogs pa dang / /sangs rgyas dgyes pa'i spyod pa ste/ /rtags ni nyi shu de dag gis/ / drod dang rtse mo bzod bcas dang / /chos mchog rnams la gnas pa ni/ /rdzogs pa'i byang chub las mi ldog /ces gsungs pa yin no/ /nges par 'byed pa'i cha dang mthun pa la gnas pa'i phyir mi ldog pa'i mtshan nyid kyi 'og tu mthong ba'i lam la gnas pa'i phyir mi ldog pa'i mtshan nyid ni/sdug bsngal la chos shes pa'i bzod pa la sogs pa skad cig ma bcu drug gis bshad par bya'o/ /de skad du yang / bzod dang shes pa'i skad cig ma/ /bcu drug rnams ni mthong lam gyi/ /byang chub sems dpa' mi ldog pa'i/ /mtshan nyid yin par shes par bya/ /zhes gsungs pa yin no//de la gzugs la sogs pa'i chos rtogs pa las ldog pas sdug bsngal la chos shes pa'i bzod pa yin no zhes ston pa ni rnal 'byor gzhan yang zhes bya ba la sogs pa gsungs pa yin te/ rnam par gnas pa la khyad par mi bskyed pas na mngon par 'du mi byed do/ / sngon ma byung ba mi byed pas mi bskyed do/ /snga ma bzhin du de ci'i phyir zhe na zhes bya bas dogs pa bsu nas/ 'di ltar zhes bya ba la sogs pa gsungs so/ /rang gi mtshan nyid kyis stong pas zhes bya ba ni ngo bo nyid kyis stong pa'i chos nyid kyis stong pa la sogs pa'i chos rtogs pa nye bar mi dmigs pas byang chub sems dpa'i skyon med pa sdug bsngal la chos shes pa'i bzod pa rtogs pa la 'jug cing rtogs la/chos de yang nye bar mi dmigs te gang gi phyir de mngon par 'du mi byed cing mi bskyed pas so zhes bya ba'i tha tshig go/ /mi skye ba'i chos la bzod pa thob pa zhes bya ba ni ji skad du bstan pa'i bzod pa thob pa'o//bla na med pa'i byang chub kyi sems bstan pa nyid kyis sdug bsngal la chos shes pa ni/ rab 'byor gzhan yang zhes bya ba la sogs pa gsungs pa yin te/ mthong ba dang bsgom pa dang khyad par gyi lam rnams su'am/ sbyor ba la sogs pa'i gnas skabs su med pa nyid du bstan par bya ba'i phyir thams cad mkhyen pa nyid de ni nam mkha' dang mtshungs so zhes bya ba tshig gsum pa smos pa yin no//de ltar shes par bya zhes bya ba la sogs pa ni thos pa dang bsam pa dang bsgom pa'i gnas skabs su sbyang bar bya'o/ /de la sems bstan pa ni bar chad med cing snying po dang bcas pas so/ / sems mi g.yo ba ni chos nyid mngon sum du byed pa nyid mngon sum du byed pa nyid kyis so/ /mi 'phrogs pa ni gzhan rnams kyi yul ma yin pa nyid kyis te/ yang dag par blangs pa dang sbyar ba dang ched du bya ba las ma nyams pa'i don gyis zhes sbyor bar bya'o/ /nyan thos dang rang sangs rgyas kyi theg pa las sems ldog pa las sdug bsngal la rjes su shes pa'i bzod pa yin no zhes gsungs pa ni/de ni nyan thos dang rang sangs rgyas kyi sa dag las ldog cing thams cad mkhyen pa nyid la 'jug pa yin no zhes bya ba'o/ /de la 'jug par 'gyur ba las ldog pa gang yin pa'am/ mi 'jug par 'gyur ba las 'jug par gyur pa de ni 'dir ldog pa dang /'jug pa tsam ni yin no/ /de dag ni yang dag pa'i don mi byed pa'i phyir ro/ /de bzhin du skad cig ma gsum pa la ni rjes su shes pa dang 'brel pas nyan thos la sogs pa'i sar ltung bar 'gyur ba dag srid pa yin te/ de ni khams gsum pa'i gnyen po thob pa nyid yin pa'i phyir ro//de bas na de las ldog pa'i rnam pa bshad pa yin no/ /chos rab tu rnam par 'byed pa'i mthus bsam gtan la sogs pa'i yan lag yang dag par yongs su zad pas sdug bsngal la rjes su shes pa ni de dag 'dod na zhes bya ba la sogs pa gsungs pa yin te/'dir bsam gtan ni mthar gyis gnas pa'i snyoms par 'jug pa dgu la sogs pa nye bar mtshon pa yin no/ /mthong ba'i chos la bde bar gnas pa'i don du mngon sum du byed pa yin pa'i phyir/ bsam gtan la gnas shing de'i 'bras bu mngon sum du mi byed pas bsam gtan la yongs su 'dris par yang byed do//de de'i yan lag spangs pas rjes su shes par rtogs pa ni gzugs dang gzugs med pa'i khams kyi gnyen por gyur pa nyid du shes par bya ba'i don du dmigs par byed pa'i phyir/ de bsam gtan dag la snyoms par 'jug kyang rjes su mthun pa'i bdag nyid kyi dngos po yongs su 'dzin pas bsam gtan gyi dbang gis kyang mi skye ba'o//sdug bsngal la rjes su shes pa'i gnas skabs su byang chub sems dpa' 'dod chags dang bral ba thob par byed pa mi 'thad pas/ de slar 'dod pa na spyod pa'i chos rnams la gnas par byed de zhes bya bar sbyar ro//mi dge ba dang bral ba nyid kyi lus dang sems spang ba'i phyir kun 'byung ba chos shes pa'i bzod pa'i yin no zhes gsungs pa ni rab 'byor gzhan yang zhes bya ba la sogs pa'o/ /mthong bas spang bar bya ba'i rnam par rtog pa bsal ba nyid kyis na/ lus dang sems yang ba bskyed pas ming la sogs pa la ched che bar byed pa ma yin no//phyi dang nang gi bdag nyid can gyi snyan pa'i dbye bas sgra dang tshigs su bcad pa zhes gnyis gsungs pa yin no/ /rang gi mtshan nyid stong pa nyid kyi chos rtogs pa'i phyir ming la sogs pa ma thob na yang yid mi bde ba med pas na sems mi 'khrugs pa yin no//sgyu ma lta bur bsgom pa'i thabs la mkhas pa'i mthus mngon par zhen pa med par 'dod pa la nye bar longs spyod pa'i phyir kun 'byung la chos shes pa yin pa ni gal te khyim na zhes bya ba la sogs pa gsungs pa yin te/ khyim ni yongs su 'dzin pa'i gnas pa'o / /'dod pa rnams thob pa la mngon par zhen pa'i 'dod pa la mngon par chags pa 'am/ma thob pa rnams la mngon par 'dod pa ste don du gnyer ba lhag par cher mi 'byung ngo / /sgyu ma lta bu'i mya ngan las 'das pa'i chos rtogs pas skyo bar 'du shes pa yin no/ /'di dag nyid dpes gsal bar bya ba'i phyir rab 'byor 'di lta ste dper na zhes bya ba la sogs pa gsungs pa yin te/srog gi dbang po la sogs pa 'gag pa'i 'jigs pa mthong bas skrag pa'i 'du shes so/ /'jigs pa dang bcas pa nyid yin pa'i de ltar 'du shes pas rings thabs su zhes smras so/ /don du mi gnyer ba nyid dang zhes bya ba la sogs pa la kha cig na re ma 'ongs pa la don du mi gnyer ba nyid dang /da ltar gyi la mi brkam pa nyid dang / 'das pa rnams la ma chags pa nyid du zhes 'dod do/ /gzhan dag ni sbyor ba la sogs pa la bya'o zhes zer ro/ /rab tu dga' ba dang bde ba bskyed pa nyid yin pa'i phyir dga' ba'i rang bzhin can dang bde ba'i rang bzhin can de la don du mi gnyer bar khyim na gnas par 'gyur ro zhes snga ma dang sbyar ro//yul gyi nyes dmigs mthong bas rtag tu tshangs par spyod pa nyid yin pa'i phyir/ kun 'byung la rjes su shes pa'i bzod pa yin pa ni de dag khyim na gnas na zhes bya ba la sogs pa gsungs pa yin te/mnyam pa dang mi mnyam pas zhes bya ba ni skyin po dang spel ba'i tshul gyis so/ /chos 'ba' zhig gis 'tsho bar zhes bya ba ni rig pa nye bar bsgrubs pa yin pa'i phyir ro/ / gzhan la gnod pa mi byed do zhes bya ba ni rgyud zhi gnas kyis brlan pa yin pa'i phyir nye bar 'tshe bar mi byed pa'o//de bzhin du de ci'i phyir zhe na zhes bya bas dogs pa bsu nas/ 'di ltar zhes bya ba la sogs pa gsungs so/ /skyes bu chen po zhes bya ba la sogs pa ni kha cig na re bstod pa'i tshig rnams yin no zhes zer ro/ /gzhan dag na re skyes bu dam pa zhes bya ba la sogs pa'i tshig bcu drug ni mthong ba'i lam gyi skad cig ma bcu drug thob pa dang go rims bzhin du sbyar ro zhes zer ro//skyes bu dam pa chos nyid kyis 'tsho ba'i yo byad yang dag par rnam par dag pa nyid yin pa'i phyir / kun 'byung la rjes su shes pa yin pa ni rab 'byor gzhan yang zhes bya ba la sogs pa gsungs pa yin te/gnod sbyin lag na rdo rje zhes bya ba ni gnod sbyin mchog tu phal du byung ba 'ga' zhig la ming 'di skad ces bya ba'o/ /lus dang ngag dang sems zil gyis mi non pa nyid kyis na go rims bzhin du thub par dka' zhing 'da' bar bya bar mi nus pa dang bsnyen par dka' bar 'gyur ro zhes bya ba'i tshig dang sbyar ro//skyes bu khyu mchog gi dbang po dang ldan par 'gyur te zhes bya ba ni mdoms kyi sba ba sbubs su nub pa yin pa'i phyir ro/ /bud med dag dbang du bya ba'i sngags kyi rigs dang zhes bya ba la sogs pa la/ kha cig na re 'phags ma sgrol ma la sogs pa'i sngags kyi rnam pa ni sngags kyi rigs so//zla ba dang nyi ma gzas zin pa'i tshe btus pa'i bing ga ra dza la sogs pa ni rtsi'o/ /sngags kyi rigs dang rtsi nyid ni rig pa'o/ /sman la sogs pa'i sgras ni sngags la sogs pa bsdu'o zhes zer ro/ /gzhan dag ni sngags kyi rigs ni 'jig rten las 'das pa'o/ / rtsi ni rdzas mang po bsdus pa las sbyar ba'i mtshan nyid do/ /rig pa ni 'jig rten pa'i'o/ /sman ni yan lag gcig pa la bya'o zhes zer ro/ /la la ni sngags kyi rigs ni lha pho dang 'brel pa'o/ /rtsi ni nad skyes pa gso bar byed pa'o/ /rig pa lha mo dang 'brel pa'o/ /sman ni glo bur du byung ba'i nad sel ba'i don yin no zhes 'dod do//rtsod pa dang rgol bar smra ba'i ngang tshul can du mi 'gyur zhes bya ba ni lus dang ngag gi 'thab rtsod med pa'i phyir ro/ /stong pa nyid la gnas pa nyid kyi phung po dang skye mched dang khams rnams la sbyor ba dang rjes su sbyor ba'i gnas pa so sor bkag pas 'gog pa la chos shes pa'i bzod pa ni rab 'byor gzhan yang zhes bya ba la sogs pa gsungs pa yin te/'phags pa rnam par grol ba'i sdes ni sbyor ba dang rjes su sbyor ba zhes smos pas/ sdug bsngal dang kun 'byung gi bden pa dag dang / 'gog pa dang lam gyi bden pa dag la go rims bzhin du sbyor ba dang rjes su sbyor ba sngon dang phyi mar shes par bya ba'i don yin no zhes bshad do//gzhan dag ni phung po la sogs pa la dang po mngon par zhen pa ni sbyor ba zhes bya ba la/ phyi nas shar mngon par zhen pa ni rjes su sbyor ba zhes zer ro/ /mi mthun pa'i phyogs bsal ba nyid kyi rtogs pa'i bar chad byed pa'i chos rnams la gtam gyi sbyor ba dang rjes su sbyor ba'i gnas pa so sor bkag pas 'gog pa la chos shes pa yin pa ni/de dag ni 'du 'dzi la dga' ba'i gtam gyi zhes bya ba la sogs pa gsungs pa yin te/ gtam smras pa ni dngos po'i rnam par rtog pa sdug bsngal dang kun 'byung gi shes pa'i dus nyid du gsal zin pa nyid yin pa'i phyir 'gog pa shes pa ni gtam tsam gyi rnam par rtog pa'i gnyen po'i phyogs yin par bstan pa yin no//de lta bu'i gnas skabs kyi dbang du byas nas/ 'di dag thams cad ming tsam ste/ /'du shes tsam du rab tu gnas/ / brjod bya yod pa ma yin no/ /zhes bshad pa yin no/ /rnam par rtog pa'i skyon yongs su shes pa nyid kyi byang chub kyi tshogs su gyur pa sbyin pa dang rjes su sbyor ba la gnas pa so sor bkag pas 'gog pa la rjes su shes pa'i bzod pa yin pa ni/ dmag gi gtam gyi zhes bya ba la sogs pa gsungs pa yin no//de la dmag ni byang chub kyi chos kyi tshogs te/ 'dis ni 'gog pa shes pa'i gnas skabs su yang dag par bsgrubs pa mang po dang nye bar ldan par ston pa yin no/ /de ltar yang stong phrag nyi shu lnga pa las de rang bzhin gyis stong pa nyid la gnas pas/ chos gang yang nyung ngu 'am mang po yang dag par rjes su mi mthong ngo zhes gsungs pa'i phyir ro zhes bya ba ni kha cig gi'o//gzung ba dang 'dzin pa dag spang bar bya ba nyid kyis mi mthun pa dang gnyen po phyogs gsad par bya ba dang gsod pa po g.yul 'gyed pa'i gtam gyi sbyor ba dang rjes su sbyor ba la gnas pa bkag pas 'gog pa la rjes su shes pa yin pa ni/'thab mo'i gtam gyi zhes bya ba la sogs pa gsungs pa yin no/ /'di lta bu'i gnas skabs su rang gi rang nyid kyis rnam par smin pa 'gog pa rnam pa bzhir 'gyur ba ni/ 'di lta ste dbang po'i grong 'gog pa ni dang po'o/ /de bzhin du dbang po'i rten 'byung ba dang 'byung ba las gyur pa'i grong khyer 'gog pa ni gnyis pa'o//de bzhin du dbang po'i yul gyi grong rdal 'gog pa ni gsum pa ste/ de ni grong dang zhes bya ba la sogs pa gang gsungs pa yin no/ /ljongs la sogs pa ni grong khyer gyi dbye ba yin no/ /bdag tu mngon par zhen pa 'gog pa ste bzhi pa ni bdag gi gtom gyis zhes bya ba la sogs pa smos pa yin no//bdag kho na la bdag gi dang 'brel pas rab tu phye ba'i don ni blon po chen po zhes bya ba la sogs pa smos pa yin no/ /rnam par smin pa 'gog pa rnam pa bzhi po de dag kyang re re zhing khams gsum pa yin par shes par bya'o//de la 'dod pa dang gzugs kyi khams dag na dbang po dang rten dang yul gyi 'gog pa yod pa ni shin tu grags pa yin no/ /gzugs med pa na yang btang snyoms dang srog dang yid ces bya ba'i dbang po yod pas dbang po 'gog pa yin no/ /gzugs med pa na yang btang snyoms dang srog dang yid ces bya ba'i dbang po yod pas dbang po'i rten pas dbang po 'gog pa yin no// rigs mthun pa dang srog la'ang 'dir/ /sems kyi rgyud ni brten pa yin/ /zhes bya ba yin pas dbang po'i rten 'gog pa'o/ /yid kyi yul chos yod pas dbang po'i yul 'gog pa yod pa yin no/ / bdag tu mngon par zhen pa ni thams cad na yod pa nyid yin pas de 'gog pa yang 'thad pa kho na yin no/ /sbyin pa la sogs pa'i khyad par rtogs pas ser sna dang 'chal ba'i tshul khrims la sogs pas sbyor ba dang rjes su sbyor ba'i gnas pa so sor bkag pa la chos shes pa'i bzod pa yin pa ni/chos dang 'gal ba'i gtam gyi zhes bya ba la sogs pa gsungs pa yin te/ chos dang 'gal ba'i gtam bkag pas ni bar chad med pa'i lam nyid yin pa'i phyir bzod pa nyon mongs pa dang bral ba'i rgyu nyid yin par bstan to/ /'thab mo ni lus dang ngag gi rtsom pa'o/ mtshang 'bru ba ni lus dang ngag dang yid kyi byas pa'i tshul dang mi mthun pa'o//rtsod pa dang grol ba ni bshad zin to/ /chos 'dod pa ni dge ba'i chos kyi rjes su 'jug pa yin pa'i phyir ro/ /bsgrub pa dang 'bras bu'i chos dag ni 'dus byas dang 'dus ma byas yin pa'i phyir go rims bzhin du spang ba dang blang bar bshad pas mi 'byed pa brjod pa smra ba'o//shin tu khyad par du 'phags pa'i gnas thob par 'dod pas mdza' bar 'dod pa'o/ /nyan thos la sogs pa dang thun mong ma yin pa'i chos ston pas chos smra ba'o/ /skye ba la dbang thob pas der skye ba yin no/ /ji skad du bshad pa'i bzod pa gsal bar bya ba'i phyir rab 'byor gzhan yang zhes bya ba la sogs pa gsungs te/mkhas pa zhes bya ba ni byang bar gyur pa'o/ /phal cher zhes bya ba ni mang du'o/ /chos thams cad rnam par thar pa'i sgo gsum gyi ngo bo nyid yin pas rtogs pa'i chos rdul tsam yang mi dmigs pa'i phyir lam la chos shes pa ni rab 'byor gzhan yang phyir mi ldog pa'i zhes bya ba la sogs pa gsungs pa yin te/chos thams cad sgyu ma lta bur rtogs pas chos rdul tsam du yang dmigs pa dang bral ba yin pas/ 'di snyam du bdag phyir ldog pa yin nam phyir mi ldog ma yin snyam du mi sems te/ sbyor ba la sogs pa'i gnas skabs su the tshom mi skyed som nyi mi byed yang dag par zhum par mi 'gyur ro zhes bya ba'i tshig dang sbyar te/the tshom la sogs pa med pa nyid kyis ni rnam par grol ba'i lam nyid yin nam shes pa bral ba thob pa'i rgyu nyid yin par ston to/ /de nyid dpe'i sngon du 'gro bas gsal bar byed pa ni rab 'byor 'di lta ste dper na zhes bya ba la sogs pa gsungs pa yin te/bdud kyi las khong du chud pa la sogs pas ni bral ba thob pa'i byed pa nyid ston pa yin no/ /gzhan yang dpes rgya cher ston pa ni rab 'byor 'di lta ste dper na skyes bu zhig gis zhes bya ba la sogs pa gsungs pa yin te/bsal ba ni rnam pa thams cad du med par bya ba'o/ /gnon pa ni dus cung zhig bzlog pa'o/ /bskyod pa 'am bsgul bar zhes bya ba ni rang gi gnas nas spo ba'am de nyid du mi brtan par bya bar mi nus pa zhes bya ba'i tha tshig go/ / lha dang bcas pa'i 'jig rten gyis bzlog par mi nus pa nyid 'dis ni lha dang bcas pa'i 'jig rten las 'das te skyon med par zhugs pa yin pa'i phyir lam la chos shes pa khams gsum pa'i gnyen po nyid yin par ston par 'gyur ro/ /tshe 'phos na yang zhes bya ba ni skye ba gzhan du brjes par gyur kyang ngo //nyan thos la sogs pa'i sems mi bskyed pas ni theg pa gzhan gyis nges par 'byung ba med pas sbyor ba mtha' gcig pa nyid yin par ston to/ /yid ches pa thob pas thams cad mkhyen pa nyid gsum gyi bdag nyid can gyi rang gi gsum la nges pa nyid du gnas pa'i phyir lam la rjes su shes pa'i bzod pa yin pa ni de tshe 'phos na yang 'di snyam du sems te bdag ni zhes bya ba la sogs pa gsungs so//rang gi sa la zhes bya ba ni thams cad mkhyen pa nyid gsum la'o/ /de bzhin du de ci'i phyir zhe na zhes bya bas dogs pa bsu nas/ de ni 'di ltar zhes bya ba la sogs pa gsungs so//sems dang zhes bya ba ni mngon par shes pa lnga rtogs pas so/ /ye shes kyis zhes bya ba ni bden pa mngon par rdzogs par byang chub pas so/ /de ni de bzhin te gzhan du ma yin no zhes bya ba ni bcom ldan 'das kyis byang chub sems dpa' dgra bcom pa nyid mngon sum mi bya'o zhes gsungs pa de ni/de kho na bzhin du yin gyi gzhan du ma yin no zhes bya ba'i tha tshig go/ /de 'di snyam du so sor rtog cing 'di snyam du sems te zhes bya ba ni/ mngon sum dang rjes su dpag pa dag gis nges par 'dzin pa'o/ /sangs rgyas su byin gyis brlabs te zhes bya ba ni sangs rgyas kyi skur ro//kye ma 'di ni gdon mi za bar zhes bya ba ni kye ma 'di ni nges par zhes bya bas dogs pa bsu nas/ de ni 'di ltar zhes bya ba la sogs pa gsungs so/ /mtha' gcig la brten pa nyid kyi rnam pa thams cad mkhyen pa nyid la sogs pa'i chos kyi don du srog gtong ba'i phyir lam la rjes su shes pa yin pa ni rab 'byor gzhan yang zhes bya ba la sogs pa gsungs pa yin te/de la bdag yongs su gtong ba ni lus yongs su gtong ba'o/ /srog yongs su gtong ba ni sems yongs su gtong ba'o/ /gzhan dag ni gnyi ga smos pa ni so so dang bsdus pa'i bdag yongs su gtong bar shes pa'i don yin no zhes 'dod do//dga' ba ni byams pa'o/ /gus pa ni gces par byed pa'o/ /'di dag ni bdag gi yang zhes bya ba 'dis ni bral ba thob pa dam pa'i chos yongs su bzung ba dang skal ba mnyam pa nyid du ston to/ /ji skad du bshad pa'i shes pa nyid rgya cher ston pa ni rab 'byor gzhan yang zhes bya ba la sogs pa gsungs pa yin no//de bzhin du de ci'i phyir zhe na zhes dogs pa bsu nas/ 'di ltar zhes bya ba la sogs pa gsungs pa yin no/ /thabs mkhas pa bsam gyis mi khyab pa dang ldan pa'i byang chub sems dpa'i mtshan nyid yin par gzung ngo / / de skad du yang / gzugs sogs 'du shes ldog pa dang / /sems brtan theg pa dman dag las/ /rnam log bsam gtan la sogs pa'i/ /yan lag yongs su zad pa dang / /lus sems yang ba nyid dang ni/ /'dod la spyod la thabs mkhas dang / /rtag tu tshangs par spyod nyid dang / / 'tsho ba rnam par dag nyid dang / /phung sogs bar chad byed rnams dang / /tshogs dang dbang sogs bcas pa yi/ /g.yul 'gyed ser sna la sogs la/ /sbyor dang rjes su sbyor ba yi/ /gnas pa so sor bkag pa dang / /chos ni rdul tsam mi dmigs nyid/ /rang gi sa la nges pa nyid/ / sa gsum la ni gnas pa dang / /chos kyi don du srog gtong ba/ /de 'dra'i skad cig bcu drug ni/ /blo ldan mthong ba'i lam gnas pa'i / /phyir mi ldog pa'i rtags dag yin/ /zhes gsungs pa yin no/ /ji ltar na rnal 'byor pa'i rgyud la yod pa so so rang gis rig pa'i skad cig ma rnams gzhan dag yid ches par byed pa'i mtshan nyid dag yin zhe na/brjod pa gang gi phyir bzod pa dang shes pa'i skad cig ma yang dag par rtogs pa rnams kyis ni/ gzung ba dang 'dzin par mngon par ma zhen pa'i rnam pa can dag la 'jig rten pa rjes kyi sems kyis bsdus pa gzugs la sogs pa'i 'du shes bzlog pa la sogs pa gzhan gyis rtogs pa'i yul rang dang rjes su mthun pa'i 'bras bu bskyed pa yin te/rnal 'byor pa rnams kyi tha snyad ni sems can gdul ba'i dgos pa'i dbang ma gtogs par thams cad du rtogs pa dang rjes su mthun pa kho na yin pa'i phyir ro//de bas na mtshan nyid 'di dag yin par 'gyur ro/ /shes rab kyi pha rol tu phyin pa'i bshad pa/ mngon par rtogs pa'i rgyan gyi snang ba las/ phyir mi ldog pa'i rnam pa dang rtags dang mtshan ma'i le'u zhes bya ba ste bcu bdun pa'o// //mthong ba'i lam dang 'brel pas bsgom pa'i lam la gnas pa'i phyir mi ldog pa'i mtshan nyid bstan pa'i don du skabs sbyor bar byed pa ni/de nas bcom ldan 'das zhes bya ba la sogs pa smos pa yin te/ yon tan chen po'i tshogs dang ldan pa zhes bya ba ni ji skad du bshad pa'i bzod pa thob pas mthong bas spang bar bya ba'i nyon mongs pa dang bral ba'i phyir ro//yon tan tshad ma mchis pa ldan pa zhes bya ba ni ji skad du bshad pa'i shes pa thob pas mthong bas spang bar bya ba'i nyon mongs pa slar mi skye ba'i phyir ro/ /yon tan dpag tu ma mchis pa dang ldan pa zhes bya ba ni/ de'i 'og tu rnam pa thams cad mkhyen pa nyid mngon par bsgrub pa'i ye shes thob pa yin pa'i phyir ro//ngo mtshar to zhes bya ba ni thun mong ma yin pa'i chos dang ldan pa'i phyir ro/ /legs par smras pa nyid kyis ni rab 'byor de de bzhin no de de bzhin te rjes su brjod pa gsungs pa yin no/ /rigs pa dang mi ldan pa nyid kyis na de ci'i phyir zhe na zhes dogs pa bsu nas/rab 'byor byang chub sems dpa' zhes bya ba la sogs pa gsungs te/ rnam pa mtha' yas pa'i phyir mtha' yas pa'o/ /thams cad du yul du ma yin pa nyid kyis na mu med pa'o/ /'jig rten thams cad kyis bskyed par mi nus pa nyid kyis na mi 'phrogs pa yin no//de ltar 'brel pa bsgrubs nas dkyus ma'i don ni bcom ldan 'das ni zhes bya ba la sogs pa gsol pa yin te/ gang gi phyir bcom ldan 'das ni rnam pa la sogs pa ston par spyod pa yin pa/ de nyid kyis na bcom ldan 'das kyis bsgom pa'i lam la gnas pa'i phyir mi ldog pa'i mtshan nyid kyi don gnas zab mo bstan par mdzod cig ces bya ba'i tha tshig go//gnas zhes bya ba ni gnas pa brjod pa ste/ byang chub sems dpa' bsgom pa'i lam gang la gnas nas/ dran pa nye bar gzhag pa bzhi nas sangs rgyas kyi chos ma 'dres pa bco brgyad kyi bar du yongs su rdzogs par 'gyur ba de mngon par grub pa ma lus pa'i rgyu yongs su rdzogs pa nyid du shes par bya ba'i sgo nas rgyun dang ldan pa nyid du bshad pa'i don yin no//zab mo zab mo zhes bzlas te brjod pa ni yang nas yang du goms par bya ba'i lam yin par shes par bya ba'i don yin no//khyad par ma bzung bar khyad par can gyi blo mi skye'o zhes bya ba'i tshul gyis bsgom pa'i lam gyi khyad par ni rab 'byor khyod ces bya ba la sogs pa gsungs pa yin te/ zab mo zhes bya ba ni bsgom pa'i lam zab mo zhes bya ba'i tha tshig go/ /shes par 'dod pa zhes bya ba ni rtogs par 'dod pa'o//yang 'di'i zab pa gang zhig yin zhe na/ rab 'byor zab ces bya ba de ni zhes bya ba la sogs pa gsungs te/ bstan pa 'di ni dngos po gtso bor bya ba yin te zab pa dang ldan pa zhes bya ba'i tha tshig go/ /de la 'dzin pa dang bral bas stong pa nyid dang / gzung bar bya ba med pas mtshan ma med pa'o//gzung ba dang 'dzin pa dang bral ba'i gnyis su med pa'i ye shes kyis rtogs par bya ba yang don dam par dngos po med pas smon pa med pa'o/ /skye bo la sogs pa'i mtshan nyid gsum dang bral ba'i phyir ram lhun gyis grub par 'jug pa nyid yin pa'i phyir mngon par 'du mi byed pa'o//rgyu med pa'i phyir ma byung ba'o/ /nying mtshams sbyor ba dang bral bas ma skyes pa'o/ /mthong ba'i lam gyi mi mthun pa'i phyogs dang bral bas dngos po med pa'o/ /bsgom pa'i lam gyi mi mthun pa'i phyogs dang bral bas 'dod chags dang bral ba'o/ /ma 'ongs pa'i sdug bsngal mi skyed pa'i chos can nyid yin pas 'gog pa'o//mtshan ma med pa dang zhi ba dang bde bar gnas pa nyid kyis na mya ngan las 'das pa'o/ /mthong ba'i chos la sdug bsngal mi rgyu ba'i 'bras bu can nyid yin pa'i phyir bral bar gyur pa zhes bya ste/ de ltar na stong pa nyid la sogs pa'i don gyi dbye bas brjod par bya'o zhes bya ba ni kha cig gi'o//tshig 'di dag thams cad ldog pa'i dbye bas chos kyi dbyings nyid yin par bstan to zhes gzung bar bya'o/ /stong pa nyid la sogs pa'i zab mo de dag kyang sgro btags pa dang skur ba'i mtha' gnyis dang bral ba yin no zhes bstan par bya ba'i phyir zur gyis dri ba ni/bcom ldan 'das zhes bya ba la sogs pa gsol pa yin no/ /bcom ldan 'das zhes bya ba'i rjes la ci zhes bya ba ni lhag ma'o/ /lan bstan par bya ba'i don du rab 'byor 'di ni zhes bya ba la sogs pa gsungs so/ / de bzhin du de ci'i phyir zhe na zhes dogs pa bsu nas/ rab 'byor gzugs ni zhes bya ba la sogs pa gsungs so/ /'di nyid ci'i phyir zhes 'dri bar mdzad pa ni/ rab 'byor gzugs ji ltar zab ces bya ba sogs pa gsungs pa yin no/ /lan ni rab 'byor de bzhin nyid ji lta ba bzhin du gzugs zab po zhes bya ba la sogs pa gsungs pa yin te/ji ltar stong pa nyid zab pa yin pa de bzhin du de kho na nyid du skye ba med pa nyid kyi gzugs la sogs pa yang zab po zhes bya ba'i tha tshig go/ /'dis kyang de bzhin nyid la ni gzugs la sogs pa yod pa ma yin no zhes sgro 'dogs pa'i mtha' bkag pa yin no//gzugs kyi de bzhin nyid ji lta ba bzhin du gzugs zab po zhes bya ba ni/ rten cing 'brel 'byung gang yin pa/ /de nyid khyod ni stong par bzhed/ /ces bshad pas/ gzugs la sogs pa'i de bzhin nyid kho na kun rdzob tu gzugs la sogs pa ma btags na nyams dga' ba yin no zhes bya ba'i don to//'dis kyang gzugs la sogs pa las de bzhin nyid gzhan ma yin no zhes skur pa 'debs pa'i spong ba'i mtha' spong ba yin no/ /nye bar bsdu ba ni rab 'byor gang la gzugs med pa zhes bya ba la sogs pa gsungs pa yin no/ /ji srid kyi tshig gis ni mngon par zhen pa dgag pa dang mngon par ma zhen pa bsgrub pa gzung ngo //thabs zhib mos zhes bya ba ni skrag pa med pa'i tshul gyis so / /gzugs las kyang bzlog la mya ngan las 'das pa yang bstan pa zhes bya ba ni de bzhin nyid la gzugs la sogs pa bkag pas gzugs la sogs pa la 'jug pa bsal ba'i don du bzlog pa yin la/de nyid la stong pa nyid du goms par byed pas mya ngan las 'das pa yang brjod par gyur pa yin no/ /de la bsdus pa'i don ni 'di yin te/ stong pa nyid la sogs pa la gzugs la sogs pa med cing / de las stong pa nyid la sogs pa gzhan ma yin zhes bya ba go rims bzhin du sgro btags pa dang skur ba'i mtha' las grol ba gang yin pa de ni/stong pa nyid la sogs pa'i zab mo nyid yin la/ de ltar stong pa nyid la sogs pa med cing / de las stong pa nyid la sogs pa zab mo dang ldan pa'i phyir bsgom pa'i lam zab pa yin no zhes pa'o//ngo mtshar to zhes bya ba ni gcig kho na cig car don gnyis brjod pa'i phyir ya mtshan pa'o/ /de skad du yang / bsgom pa'i lam ni zab pa ste/ /zab mo stong pa nyid la sogs/ /zab pa de ni sgro 'dogs dang / /skur ba'i mtha' las grol ba nyid/ / ces gsungs pa yin no/ /de ltar khyad par bstan nas khyad par dang ldan pa bsgom pa'i lam nyid gsungs pa ni rab 'byor shes rab kyi pha rol tu phyin pa zhes bya ba la sogs pa'o/ /sems par gyur zhes bya ba ni thos pa'i rang bzhin gyi shes rab kyis so/ /'jal bar 'gyur zhes bya ba ni bsam pa'i rang bzhin gyis so//nges par rtog par 'gyur zhes bya ba ni bsgom pa'i rang bzhin gyis so/ /yang na ting nge 'dzin gyi sbyor ba dang dngos gzhi dang rjes las byung ba'i shes rab kyis zhes go rims bzhin du sbyar ro/ /yang bsgom pa'i lam yul gang las yin zhe na/ bdag gis zhes bya ba la sogs pa gsungs te/de la bdag gis shes rab kyi pha rol tu phyin pa las nges par 'byed pa'i cha dang mthun pa'i dbang du mdzad nas/ ji ltar bsams pa de bzhin du gnas par bya'o/ /de bzhin du bdag gis shes rab kyi pha rol tu phyin pa las mthong ba'i lam gyi dbang du mdzad nas da ltar bshad pa de bzhin du bslab par bya'o//bdag gis shes rab kyi pha rol tu phyin pa las bsgom pa'i lam gyi dbang du mdzad nas ji ltar nye bar bstan pa de bzhin du bsgrub par bya'o zhes brjod par bya'o/ /de skad du yang / nges 'byed yan lag dang mthong ba'i/ /lam dang bsgom pa'i lam nyid la//yang dang yang du sems pa dang / /'jal dang nges rtog bsgom pa'i lam/ /zhes gsungs pa yin no/ /de nyid kyi phyir nges par 'byed pa'i cha bzhi po rnams dang mthong ba dang bsgom pa'i lam dag gi dbang du mdzad nas/ de bzhin du sgrub par byed pa dang /de bzhin du nye bar sems pa dang / de bzhin du nye bar rtogs pa dang / de bzhin du rab tu sbyor bar byed pa dang / de bzhin du rtsol ba dang / de bzhin du 'bad par byed pa zhes bya ba'i tshig drug smos pa yin no/ /de nyid bsgom pa'i lam gyi yul ji ltar yin zhe na/rgyun chags pa nyid yin pas snga ma ni phyi ma phyi ma'i yul yin pa'i phyir nyes pa med do/ /bsgom pa'i lam gyi phan yon gyi don zhus pa ni byang chub sems dpa' sems dpa' chen po des zhes bya ba la sogs pa gsungs te/ byang chub sems dpa' gang sems dpa' la sogs pa la sbyor zhing nyin gcig tsam yang bsgom pa'i lam 'di la yang dag par rnal 'byor du byed na/de nyi ma gcig po de las bsod nams ci tsam zhig byed par 'gyur zhe na zhes bya ba'o/ /lan btab pa'i don ni rab 'byor 'di lta ste zhes bya ba la sogs pa gsungs pa yin te/ 'dod chags la spyod pa zhes bya ba ni yul dman pa la yang chags pa lhag par skyed par byed pa'i phyir ro//rnam par rtog pa la spyod pa zhes bya ba ni 'dod chags kyi rnam par rtog pa mang ba'i phyir ro/ /bud med gzugs bzang zhing mdzes pa zhes bya ba ni lus kyi spyi dang cha shas mdzes pa'i phyir go rims bzhin du sbyar ro//blta na sdug pa zhes bya ba ni mthong na rjes su dga' ba'o/ /dus btab par gyur pa zhes bya ba ni khyed gnas che ge mo zhig tu shog [(]shig [,]cig [)]ces dus btab pa'o/ /dbang med na zhes bya ba la la la ni ma thob pa la bya'o zhes 'dod do/ /gzhan dag ni ma mthong ba la bya bar 'dod do/ / thog ma dang bar dang / tha mar bdag nyid mngon par 'dod pa'i rab tu dga' ba dang / rjes su mthun pa'i bya ba rdzogs par bya'o snyam pas go rims ji lta ba bzhin du 'di ltar dpyad par bya'o/ /'di ltar dga' bar bya'o/ /'di ltar rtse bar bya zhing zhes smos pa thams cad du ji ltar 'dod pa bzhin 'jug pas/'di ltar rnam par dpyad par bya'o zhes bya bar sbyar ro/ /de snyed du zhes bya ba ni 'dod chags la spyod pa'i skyes bu'i rnam par rtog pa'i grangs snyed du zhes bya ba'i tha tshig go/ /rgyab kyis phyogs pa ni rnam par gnon par byed pa'i phyir ro/ / mthar 'byin par byed do zhes bya ba ni sngon ma byung ba mi skyed pas 'khor bar skye ba'i rgyun dang bral bar byed pa'o//de ltar dge ba'i rtsa ba tshad med pa yongs su 'dzin pas bskal pa dpag tu med par 'khor ba la rgyab kyis phyogs shing / 'dor ba dang mthar 'byin par byed pa'i bdag nyid can phan yon rnam pa gsum ni bsgom pa'i lam gyi byed pa shes par bya ba'i phyir bstan par mdzad pa yin no//gang shes rab kyi pha rol tu phyin pa 'di la zhes bya ba la sogs pa la nges par 'byed pa'i cha dang mthun pa'i dbang du mdzad nas ji ltar gzhag pa bzhin du gnas pa dang / mthong ba'i lam gyi dbang du mdzad nas ji ltar bshad pa bzhin du slob pa dang /bsgom pa'i lam chung ngu dang 'bring dang chen po'i dbang du mdzad nas/ ji ltar nye bar bstan pa dang / ji ltar bstan pa dang / ji ltar nges par bstan pa bzhin du rtogs par byed pa dang / nye bar sems pa dang rnal 'byor du byed pa ni zhes bya bar sbyar ro//nye bar bsdu ba ni rab 'byor de ltar byang chub sems dpa' zhes bya ba la sogs pa gsungs pa yin no/ /nyin gcig la las de tsam byed pa zhes bya ba'i rjes thogs la bskal pa dpag tu med pa ji srid du skye ba rjes su 'brel pa 'dor ba zhes bya ba lhag ma'o/ / da ni bsgom pa'i rnam pa'i dbye ba yin par lta'o / /rtsa ba ni rnam pa gsum ste chung ngu dang 'bring dang chen po'o/ /de rnams la yang so sor chung ngu dang 'bring dang chen po'i dbye bas phye bar gyur na rnam pa dgur 'gyur ro/ /gnyen po la ji lta ba bzhin du mi mthun pa'i phyogs la yang rnam pa dgur shes par bya'o//de la yang chung ngu'i chung ngus rnam par rtog pa chen po'i chen po spong bas na/ lam chen pos rnam par rtog pa chung ngu'i chung ngu'i bar spong bar gzung bar bya ste/ thog ma kho nar lam chen po mi 'byung ba'i phyir ram lam chen po skyes pa la ni nyon mongs pa chen po yod mi srid pa'i phyir ro//dper na gos kyi dri ma chen po dang po bsal nas phra mo phyis dag par byed pa dang / de bzhin du mun pa chen po ni snang ba chung ngus 'joms la chung ngu ni chen pos 'joms pa bzhin no/ /dkar po'i chos ni stobs dang ldan pa yin la nag po ni nyam chung ba yin te 'phags pa'i lam gyi skad cig ma chung ngus kyang 'khor ba thog ma med pa nas gcig nas gcig tu brgyud brtas par byas pa'i nyon mongs pa chen po rnams rtsa ba nas 'byin pa yin pa'i phyir ro//slob dpon dbyig gnyen gyis kyang dus yun ring por bsags pa'i nad rnams dur byid zho gnyis kyis 'byin par byed pa dang /skad cig ma'i sgron ma chung ngus mun pa chen po 'joms pa dang 'dra'o zhes bshad do/ /de la don gzhan nye bar bstan pa'i sgo nas gong nas gong du bsod nams lhag par bstan pas na gnyen po'i phyogs kyi rab tu dbye ba dang bsod nams zil gyis gnon par gsungs pas ni/mi mthun pa'i phyogs kyi dbye ba ston par byed pa na byang chub sems dpa'i nyon mongs pa ni rnam par rtog pa yin no zhes bya ba'i tshul gyis rnam par rtog pa chen po'i chen po rnam par brjod pa'i don du gsungs pa ni byang chub sems dpa' gang shes rab kyi pha rol tu phyin pa dang bral bas zhes bya ba la sogs pa gsungs pa yin no// lam chung ngu'i chung ngu'i don ni 'di nyid khyad par du 'phags so zhes bya ba la sogs pa gsungs pa yin no/ /de bas zhes bya ba ni sbyin pa byin pa las so/ / khyad par du 'phags so zhes bya ba ni bsod nams grangs med pa dang gzhal du med pa dang tshad med pa yongs su 'dzin pas shin tu khyad par du 'phags so//rnam par rtog pa chen po'i 'bring bstan pa ni rab 'byor zhes bya ba la sogs pa gsungs pa yin te/ sbyin par byed rab tu 'jog par byed ces bya ba ni stobs par byed pa dang yun ring du gnas par byed pa zhes bya ba'i tha tshig go//lam chung ngu'i 'bring gi don ni byang chub sems dpa' sems dpa' chen po gang zhes bya ba la sogs pa gsungs pa yin te/ ches mang du zhes bya ba ni grangs med pa la sogs pa'i rang bzhin no/ / rnam par rtog pa chen po'i chung ngu'i don ni rab 'byor gzhan yang zhes bya ba la sogs pa gsungs pa yin te/ bar la zhes bya ba'i tshig gis ni phyir mi ldog pa la sogs pa gzung ngo / /kha na ma tho ba cung zad tsam la yang skrag pa nyid kyis na tshul khrims yongs su rdzogs par spyod pa yin no//lam chen po'i chung ngu'i don ni byang chub sems dpa' sems dpa' chen po zhes bya ba la sogs pa gsungs pa yin te/ yid la byed pa de las zhes bya ba ni shes rab kyi pha rol tu phyin pa bsgoms pa las so/ /rnam par rtog pa 'bring gi chen po bshad pa ni rab 'byor gzhan yang zhes bya ba la sogs pa gsungs so// brtson 'grus brtsams pa'o/ /lam 'bring gi don ni rab 'byor gzhan yang zhes bya ba la sogs pa gsungs pa yin te/ yongs su bsngo na zhes bya ba ni dmigs pa'i lta bas gtod par byed na'o/ /de nyid kyis na 'og nas shes rab kyi pha rol tu phyin pa las gsungs pa yin no//chos kyi sbyin pa sngon du 'gro ba dmigs pas yongs su bsngo ba 'di nyid ni 'og nas 'chad pa'i yongs su bsngo ba la ltos nas rnam par rtog pa 'bring gi chung ngur 'gyur ro/ /lam 'bring gi chen po'i don ni rab 'byor gzhan yang zhes bya ba la sogs pa gsungs pa yin te/shes rab kyi pha rol tu phyin pa las gsungs pa'i zhes bya ba ni 'og nas 'chad pa'i yongs su bsngo ba la ltos nas rnam par rtog pa 'bring gi chung ngur 'gyur ro/ /lam 'bring gi chen po'i don ni rab 'byor chos thams cad mi dmigs pa'i tshul gyis so//de bas na zhes bya ba ni dmigs pa'i sbyor bas yongs su sngo bar byed pa las so/ /rnam par rtog pa chung ngu'i chen po bstan pa ni rab 'byor gzhan yang zhes bya ba la sogs pa gsungs pa yin te/ nang du yang dag par 'jog la rnal 'byor du mi byed pa dang zhes bya ba ni yongs su bsngo ba'i dus kyi rjes la shes rab kyi pha rol tu phyin pa la gnas pa'i mnyam par 'jog pa nyid du mi byed pa'o//lam chen po'i chung ngu'i don ni rab 'byor gang yang zhes bya ba la sogs pa gsungs pa yin te/ nang du yang dag 'jog la rnal 'byor du mi byed la zhes bya ba ni yang nas yang yid la byed pa'o//de nyid kho na gsal bar byed pa ni nang du yang dag 'jog la rnal 'byor du byed na yang zhes bya ba la sogs pa gsungs pa yin no/ /rnam par rtog pa chung ngu'i 'bring bstan pa ni bcom ldan 'das gang gi tshe bcom ldan 'das kyis mngon par 'dus byas pa ni zhes bya ba la sogs pa gsungs pa yin te/gang gi tshe mngon par 'dus byas pa ni/ sems kyi rtsol ba yin pas phyin ci log gi rnam par rtog pa yin pa de'i tshe/ rnam par rtog pa'i sa bon gyi rjes su 'gro ba yin pa'i phyir yongs su bsngo ba'i dus na bsod nams ches mang du bskyed par ji ltar 'gyur zhe na/brjod pa rnam par rtog pa yang sgyu ma lta bur rjes su rtogs pa yin pa'i phyir na phyin ci ma log par 'jug pa nyid yin pas/ kun rdzob tu bsod nams ches mang du bskyed pa yin no zhes bya ba ni lan no/ /lam chen po'i 'bring gi don ni rab 'byor zhes bya ba la sogs pa gsungs pa yin te/de yang zhes bya ba ni mngon par 'du byed pa las byung ba'i bsod nams kyi phung po'o/ /da ltar zhes bya ba ni bsgom pa'i lam gyi rnam pa brgyad pa'i gnas skabs yin gyi snga ma ni ma yin no/ /de la mngon par 'dus byas pa ni phyin ci log las byung ba yin pa'i phyir nang dang phyi dang phyi nang stong pa nyid kyis stong pa kho nar snang ngo //stong pa nyid dang chen po dang don dam pa stong pa nyid kyi stobs kyi gsog nyid do/ /'dus byas dang 'dus ma byas dang mtha' las 'das pa dang thog ma dang tha ma med pa dang / dor ba med pa stong pa nyid kyi gsob nyid do//rang bzhin stong pa nyid la sogs pa rnam pa dgus snying po med pa nyid do/ /gzhan dag ni stong pa kho nar snang ngo zhes bya ba la sogs pa tshig bzhi ni go cha dang 'jug pa dang tshogs dang nges par 'byung ba'i bsgrub pa dang go rims bzhin du sbyar ro zhes zer ro/ /rnam par rtog pa chung ngu'i chung ngu ston pa ni/rab 'byor gzhan yang byang chub sems dpa' zhes bya ba la sogs pa gsungs pa yin te/ ji lta ji ltar zhes bya ba ni nang stong pa nyid la sogs pa rnam pa gang dang gang gis te/ byang chub sems dpa' sems dpa' chen po zhes bya ba ni rjes la grangs dang gzhal du yod pa la sogs pa rtogs pas bsdus pa zhes bya ba ni lhag ma'o//'di ltar chos thams cad la zhes bya ba ni sgyu ma lta bu la'o/ /lam chen po'i chen po'i don ni rab 'byor gzhan yang byang chub sems dpa' sems dpa' chen po zhes bya ba la sogs pa gsungs pa yin te/ rnam par rtog pa'i sa bon thams cad dang bral bas bsod nams gzhal du med grangs med pa bskyed do gzhal du med pa zhes bya ba ni 'dis ni tshad med pa nyid kyang 'phangs pa yin no//don gyi dbye ba gang zhig yin pa zhus pa ni bcom ldan 'das gzhal du ma mchis pa dang zhes bya ba la sogs pa gsol pa yin no//tha dad du bgyi ba ci mchis zhes bya ba ni nye bar mtshon pa ci zhig lags te spyi'i mtshan nyid ci lags zhes bya ba'i don to/ /bye brag ci mchis zhes bya ba ni ngo bo nyid kyi mtshan nyid ci lags te rang gi mtshan nyid ci lags zhes bya ba'i don to/ /spyi'i mtshan nyid kyi don ni rab 'byor gzhal du med pa zhes bya ba la sogs pa gsungs pa yin no//gang la tshad ma mi 'jug pa'o zhes bya ba ni mngon sum gyi yul du bya ba dang rjes su dpag pas gzhal bar mi nus pa nyid yin pa'i phyir bsod nams kyi yul gang la/ mngon sum dang rjes su dpag pa'i tshad ma mi 'jug pa de ni gzhal du med pa zhes tshad ma med pa'o//kha cig na re 'dis ni 'dus byas pa nyid dang khyab pa nyid rtogs par shes par byas pa yin no zhe'o/ /gang bgrang bas zad par mi nus pa ni zhes bya ba ni bsod nams de la grangs yod pa ma yin pas grangs kyis mthar gtugs par mi nus pa de ni grangs med pa'o//kha cig na re 'dis ni de'i mnyam pa nyid rtogs pa shes par bya ba yin no zhe'o/ /rang gi ngo bo'i mtshan nyid kyi don ni bcom ldan 'das gang gis gzugs kyang zhes bya ba la sogs pa gsungs pa yin no / /gang gis zhes bya ba ni tshig gi phrad yin pa'i phyir gang las zhes bya ba'i tha tshig go//gzhal du ma mchis pa zhes bya ba ni grangs med pa la sogs pa nye bar mtshon pa'o/ /rnam grangs zhes bya ba ni rab tu dbye ba'o/ /legs par smras pa nyid kyis na de'i tshig rjes su brjod par mdzad pa ni rab 'byor gang 'di skad du zhes bya ba la sogs pa'o/ / de ltar rjes su bzlas nas bstan pa ni rab 'byor rnam grangs gang gis zhes bya ba la sogs pa gsungs pa yin te/ gang gis zhes bya ba ni chos kyi dbyings kyi rang bzhin gyi bdag nyid can nyid kyis so/ /don dam par stong pa nyid kyi mtshan nyid yin du zin kyang /rnam par rtog pa dang gnyen po dag gis dbye bas mi lcogs pa med pa dang bsam gtan khyad par can la sogs pa dgu la 'am/ thabs mkhas pa chen po la sogs pa'i stobs kyis go rims bzhin du 'dod pa'i khams la sogs pa sa dgu dag tu ji skad du bshad pa'i rnam pa dgu po rgyun chags su 'byung ba ni bsgom pa'i lam yin par shes par bya'o//de skad du yang / de ni rgyun chags yin pa'i phyir/ /chung dang 'bring dang chen po rnams/ /chung ngu'i chung sogs dbye ba yis/ /rnam pas rnam pa dgur bzhed do/ /zhes gsungs pa yin no//rnam pa re re'i dbang du mdzad de 'bras bu rjod par byed pa don tha dad pa can bsod nams kyi 'bras bu grangs med pa dang gzhal du med pa dang tshad med pa skye bar gsungs pa'i phyir rgyu'i bye brag kyang rnam pa mang ba ma yin nam ji ltar na bsgom pa'i lam rnam pa dgu yin zhes bya ba'i bsam pa dang ldan pas/bcom ldan 'das gzhal du ma mchis pa zhes bgyi ba zhes bya ba la sogs pa gsol pa yin no/ /lan ni rab 'byor gzhal du med pa zhes bya ba la sogs pa gsungs pa yin te/ bsgom pa'i lam gyi rnam pa ni rnam par thar pa'i sgo gsum gyi rang bzhin yin no zhes bya ba'i tha tshig go//rab kyi mthar thug pa yin pa'i phyir rnam pa dgu pa nyid kyi tshig bla dgas yin no zhes rtogs nas/ bcom ldan 'das ci zhes bya ba la sogs pa gsol pa yin no/ /chos gzhan dag gis zhes bya ba ni rnam pa dang po la sogs pa chos gzhan thams cad kyi tshig bla dgas ma lags sam zhes bya'o//de'i tshig gi lan 'debs par mdzad pa ni rab 'byor 'di ji snyam du sems zhes bya ba la sogs pa gsungs pa yin no/ /chos thams cad ces bya ba ni dang po la sogs pa'i rnam pa rnams so/ /stong pa nyid do zhes bya ba ni thams cad la rigs pa mtshungs pa yin pa'i phyir rnam pa 'di dag thams cad rnam par thar pa'i sgo gsum gyi ngo bor de bzhin gshegs pas gsungs pa yin pa'o//rnam pa thams cad ni stong pa nyid kyi tshig bla dgas yin no zhes bstan nas/ rnam grangs kyi don gsungs pa ni rab 'byor stong pa gang yin pa de ni mi zad pa yang yin la zhes bya ba la sogs pa'o//stong pa nyid gang yin pa de ni gzhal du med pa yang de yin no zhes bya ba'i yang gi sgras ni grangs med pa la sogs pa'o/ /gang gi phyir grangs med pa dang gzhal du med pa la sogs pa ston pa'i tshig tu brjod pa'i ngo bo rnams ni ldog pa la ltos nas/nye bar bskyed pa'i sna tshogs kyi rang bzhin du don gcig la rab tu sbyar ba yin pa de bas na don dam par ji skad du bshad pa'i mtshan nyid can gyi bsgom pa'i lam tha dad du bya bar bzod pa ma yin no zhes gsungs pa ni/ rab 'byor de bas na zhes bya ba la sogs pa'o//'di dag ces bya ba ni grangs med pa la sogs pa'o/ /dmigs pa'i thugs rje chen po'i rang bzhin chos kyi dbyings kyi rgyu mthun du gyur pa bstan pa'i chos kyi ngo bo nyid de dag kun rdzob tu ji skad du bshad pa bzhin du bstan pa ni byis pa'i skye bo rnams la 'bras bu chen po 'byung ba ston pa yin par de bzhin gshegs pa bzhed do zhes gsungs pa ni rab 'byor de dag ni mngon par brjod pa'o zhes bya ba la sogs pa ste/de dag ni zhes bya ba ni grangs med pa la sogs pa'o/ /bstan pa mngon par bsgrub pa bshad par zhes bya ba ni bstan pa 'dis mngon par sgrub cing skyid pas na bstan pa mngon par bsgrub pa ni chos kyi sku yin te/brjod pa'i kun rdzob tu de bshad pa yin no zhes tshig rnam par sbyar ro/ /de skad du yang / grangs med la sogs bstan pa rnams/ /dam pa'i don du bzod ma yin/ /kun rdzob tu ni thugs brtse bas / /rgyu mthun de dag thub pa bzhed/ / ces gsungs pa yin no/ /de bzhin gshegs pa'i thugs rje'i rgyu mthun pa bstan pa yin pa'i phyir na/ 'di dag thams cad kyi yul can du 'gyur dgos so zhes brjod pa ni bcom ldan 'das de bzhin gshegs pa dgra bcom pa zhes bya ba la sogs pa'o/ /chos thams cad kyi zhes bya ba ni dang po la sogs pa rnam pa dgu'i'o//chos nyid ces bya ba ni mya ngan las 'das pa'i tshul lo/ /bar zhes smos pas ni gzhal du med pa la sogs pa gzung ngo / /brjod du ma mchis pa zhes bya ba ni yi ge dang don dag la dbye ba ma dmigs pa'i phyir ro/ / gsungs pa'i zhes bya ba ni 'das ma thag tu bstan pa'i'o/ /chos thams cad kyang de bzhin du zhes bya ba ni gzugs la sogs pa'o/ /legs par smras pa nyid kyis na de de bzhin no zhes bya ba la sogs pa rjes su brjod nas snga ma bzhin du/ de ci'i phyir zhe na zhes dogs pa bsu nas rab 'byor zhes bya ba la sogs pa gsungs te/chos thams cad kyi stong pa nyid ces bya ba ni shes bya nyid la sogs pa'i khyad par gzhan spangs nas stong pa nyid ces brjod pa yin te des na chos thams cad ni/ stong pa kho na yin pas brjod par nus pa ma yin no zhes bya ba'i don to//ngo bo nyid med pa nyid kyis na de nyid dang gzhan nyid du brjod par bya ba ma yin pa/ don dam par chos nyid kyi rang bzhin can mngon par 'dod pa'i lam gyi dngos po la rnam pa thams cad du khyad par bsgrub tu med pa'i phyir ro/ /mi mthun pa'i phyogs dang gnyen po'i phyogs dag rim pa ji lta ba bzhin 'bral ba dang skye bar mi 'thad par ma yin nam zhes gsol pa ni bcom ldan 'das ci zhes bya ba la sogs pa'o//de kho na nyid du gsungs pa ni rab 'byor de lta ma yin no zhes bya ba'o/ /gal te de lta na bsgom pa zhes bya ba'i lam gyi sa chen po'i chen po la sogs pa'i rnam par rtog pa'i ris rnam pa dgu spangs pa ci yang med cing /chung ngu'i chung ngu la sogs pa lam gyi rnam pa dgu po thob pa yang ci yang med pa de bas na dgos par mi bya ba nyid yin no zhes bya ba'i bsam pas mi 'dod pa nyid sgrub par byed pas bcom ldan 'das gal te zhes bya ba la sogs pa gsol pa yin no//brjod du ma mchis pa'i don la zhes bya ba ni bsgom pa'i lam la'o/ /de'i byed pa nyid yin pa'i phyir sbyin pa la sogs pa la yang 'phel ba dang 'bri ba med par 'gyur ro zhes gsol ba ni sbyin pa'i pha rol tu phyin pa la yang zhes bya ba la sogs pa'o/ /de ltar gyur mod nyes pa ci zhig yod snyam na/bcom ldan 'das gal te zhes bya ba la sogs pa gsol pa yin no/ /ji ltar zhes bya ba ni spong ba ste ma yin no zhes bya ba'i tha tshig go/ /bsags pa'i don du bcom ldan 'das pha rol tu phyin pa yongs su rdzogs par bgyis par ni zhes bya ba la sogs pa gsol to//de skad du yang / dngos po brjod du med pa la/ /nyams pa dang ni 'phel mi rung / /bsgom zhes bya ba'i lam gyis ni/ /ci zhig nyams shing ci zhig 'thob/ /ces gsungs pa yin no/ /don dam par mi 'dod pa bsgrub pa med do zhes gsungs pa ni/ rab 'byor de de bzhin no zhes bya ba la sogs pa'o//kun rdzob tu ni ji ltar bla na med pa yang dag par rdzogs pa'i byang chub ji lta ba de ltar bsgom pa'i lam gyi don gyi bya ba byed pa yin no zhes ston pas/ 'on kyang rab 'byor byang chub sems dpa' sems dpa' chen po zhes bya ba la sogs pa gsungs pa yin no zhes bya bar mi sems kyi zhes bya ba ni sbyin pa'i pha rol tu phyin pa rnam par 'phel ba'am yongs su 'dri ba po zhes dngos po la dmigs pa'i tshul gyis de lta bu'i sems mi bskyed pa'o//bla na med pa yang dag par rdzogs pa'i byang chub ji lta ba de bzhin du yongs su bsngo'o zhes bya ba ni/ ci ltar khyad par bsgrub tu med pa bla na med pa yang dag par rdzogs pa'i byang chub kyi dbang tsam gyis gdul bya'i skye bo rnams la bsod nams dang ye shes dang rjes su mthun pa khyad par can du snang ba'i sems bskyed pa'i sgo nas yongs su bsngo ba bsod nams 'phel bar byed pa'i phyir kun rdzob tu mngon par 'dod pa'i don sgrub par byed pa de bzhin du yongs su sngo bar byed do zhes bya ba'i tha tshig go//de bzhin du bsgoms pas glo bur ba'i dri ma dang bral ba'i sgo nas/ mngon sum du byas pa'i lam 'di sgyu ma lta bu'i mtshan nyid can yin pas/ khyad par bsgrub tu med pa yin yang ji ltar kun rdzob tu mi mthun pa'i phyogs dang gnyen po'i phyogs dag dang bral ba dang /skye ba'i rim gyis don gyi bya ba byed pa de ltar nye bar dgod par bya'o zhes bya bar 'dod do/ /de skad du yang / byang chub ji lta de bzhin du/ /'di ni 'dod pa'i don sgrub byed/ /ces gsungs pa yin no/ /don 'di nyid rgya cher ston par bya ba'i phyir rab 'byor gzhan yang zhes bya ba la sogs pa 'gres lnga smos pa yin no//byang chub kyi mtshan nyid ci zhig yin zhes gsol pa ni bcom ldan 'das bla na med pa yang dag par rdzogs pa'i byang chub ces bya ba 'di gang lags zhes bya ba la sogs pa'o //'di ni de bzhin nyid de zhes bya ba ni de bzhin nyid kyi rang gi ngo bo nyid yin no zhes bya bar dgongs so/ /de skad du yang / byang chub de bzhin nyid mtshan nyid/ /de yang de yi mtshan nyid bzhed/ /ces gsungs pa yin no/ /rab 'byor de bzhin nyid ni rnam par 'phel ba 'am 'grib pa med la byang chub dang lam yang de bzhin te de'i rang bzhin yin pa'i phyir ro zhes bya ba ni lhag ma'o//de ltar rgyu dang 'bras bu dag gam 'bras bu dang rgyu dag phan tshun rang bzhin rjes su byed pa'i phyir na rgyu 'bras kyi 'brel pa phyin ci log par brjod par 'gyur ro/ /yang kun rdzob tu lam gyi nus pa ston pas gsungs pa ni gal te byang chub sems dpa' zhes bya ba la sogs pa'o//de lta bu'i yid la byed pa dang ldan pas zhes bya ba ni bsgom pa'i lam du grags pa dang ngo / /rgyun mi chad par mang du gnas pa zhes bya ba ni sbyor ba dang mjug gi gnas skabs kyi dbye bas rnam pa gnyis smos pa yin te/dngos gzhi'i gnas skabs su ni de'i rang bzhin nyid yin pas gnas pa yin par mi 'thad pa'i phyir ro/ /de lta na zhes bya ba ni de lta bu'i tshul gyis so/ /nye bar bsdu ba ni rab 'byor de ltar byang chub sems dpa' zhes bya ba la sogs pa gsungs pa yin te/brjod du med pa'i don la zhes bya ba ni bsgom pa'i lam la'o/ /shes rab kyi pha rol tu phyin pa'i bshad pa/ mngon par rtogs pa'i rgyan gyi snang ba las/ stong pa nyid kyi le'u zhes bya ste bco brgyad pa'o// //kun rdzob tu yang khyad par can gyi snang ba'i sems bskyed pa'i sgo nas don byed par mi rung ngo snyam par dogs pa bsu ba ni bcom ldan 'das yang zhes bya ba la sogs pa gsol pa yin te/snga phyir gyur pa'i sems re re la sangs rgyas kyi byang chub sgrub par byed pa rnam pa thams cad mkhyen pa nyid la sogs pa'i don mtha' dag mi snang ba'i phyir sems dang po bskyed pa 'am/phyi ma re re zhig gis byang chub sems dpa' mngon par rdzogs par 'tshang rgya ba ma yin no zhes bya ba'i tha tshig go/ /sems can rnams ni rnam par shes pa'i rgyud re re ba yin no zhes bshad pas/ mi srid pa'i phyir na ci 'dod pa'i don sgrub par byed pa'i chos su snang ba'i sems kyi skad cig ma du mas byang chub mngon par rdzogs par 'tshang rgya'am zhes bya ba'i phyogs 'di yang rigs pa yin par bstan pa'i phyir gsol pa ni/bcom ldan 'das sems bskyed pa snga ma ni zhes bya ba la sogs pa'o/ /mi 'grogs zhes bya ba ni snga ma dang phyi ma dag ni rim pa ji lta ba bzhin rjes su 'gro ba med par 'jog pa dang skye bas na phan tshun 'grel pa med pas na 'phrad pa med pa'o//ji ltar zhes bya ba ni 'brel pa med pas na khyad par can gyi don du snang ba'i sems ma skyes pa'i phyir dge ba'i rtsa ba rnams nye bar sogs par mi 'gyur ba nyid de/de bas na bla na med pa yang dag par rdzogs pa'i byang chub tu mngon par rdzogs par 'tshang mi rgya'o zhes bya bar bsams pa'o/ /sngar bshad pa'i phyogs mngon par 'dod pa ma yin pa'i phyir phyogs phyi ma la rab tu grags pa'i dpe'i tshul gyis lan gdab pa'i phyir 'di ji snyam du sems zhes bya ba la sogs pa gsungs te/'bru mar gyi mar me zhes bya ba ni sgron ma'o/ /dang po phog pas zhes bya ba ni skad cig ma dang po dang phrad pas so/ /so sor nus pa med pa'i phyir de lta ma lags so zhes gsol to/ /de nyid gsal bar byed pas bcom ldan 'das me lce dang po zhes bya ba la sogs pa gsol to//me lce dang snying po phrad pa'i skad cig ma dang po la ni rang gi rgyu brgyud pa'i rim gyis 'ongs pa dag dus mnyam du phrad par skyes pa yin par khyad par med pa'i phyir na/ skad cig ma gnyis pa med par rgyu dang 'bras bu'i mtshan nyid bsreg par bya ba dang sreg par byed pa'i ngo bor mi 'thad pas/me lce dang po phog pas snying po de tshig pa ma yin no/ /'o na mar me'i skad cig ma phyi ma kho nas tshig pa yin no zhe na/ me lce dang po byung ba la ma brten par yang snying po de mi 'tshig ces bya ba gsol te/ 'on kyang mar me'i skad cig ma dang po la ltos nas me lce phyi mas snying po tshig pa yin te/skad cig ma snga ma med par skad cig phyi ma mi srid pa'i phyir ro/ / skad cig ma phyi ma'i tshul yang yin no zhes brjod pa ni bcom ldan 'das me lce slad ma zhes bya ba la sogs pa'o/ /khyad par can gyi me lce dang snying po dag skye ba'i skad cig ma gnyis pa la yang rtag tu yod pa la sogs par thal bar 'gyur bas skad cig ma snga ma med na kun rdzob tu yang 'byung ba med pa'i phyir rgyu dang 'bras bu'i mtshan nyid sreg par byed pa dang bsreg par bya ba'i mtshan nyid dang bral bas me lce phyi ma phog pas snying po de tshig pa ma yin no//'o na me lce dang po'i skad cig ma nyid kyis tshig pa yin no zhe na/ me lce slad ma phog pa la zhes bya ba la sogs pa gsol to/ /'on kyang mar me'i skad cig ma phyi ma la ltos nas me lce dang pos tshig pa yin te/ skad cig ma phyi ma med par skad cig ma snga mas sreg par nus pa ma yin pa'i phyir ro//so so 'dus pa med pa na gnyi ga'i nus pa don gyi khas blangs pa/ dngos su bstan pa'i don du yang 'dri bar mdzad pas gsungs pa ni rab 'byor 'di ji snyam du sems ci snying po de tshig gam zhes bya'o / /khas blangs pa'i don gzhan du bya bar mi nus pa nyid kyis na/bcom ldan 'das tshig lags so zhes bya ba gsol to/ /gal te snga ma dang phyi ma phyi ma'i skad cig ma dag rim pa bzhin du dus mnyam par rjes su 'gro ba med par zhig pa dang ma skyes pa'i phyir na phan tshun tshogs pa med pa de lta na yang gang gi tshe rkyen nyid 'di tsam gyi bdag nyid kyi rten cing 'brel par 'byung ba'i chos nyid kyis/tshogs pa'i khyad par can du skyes par gyur pa sgron ma dang sdong bu'i skad cig dang po la ltos nas/ ma spyad na gcig pu nyams dga' ba nyid kyis na rgyu 'bras kyi 'brel pa'i stobs kyi nus pa phul du byung bar bsgrubs pa nyid kyi khyad par can skad cig gnyis pa la sogs pa'i mar me dang [(]sdang [,]sdong [)]bu'i skad cig [(]du [,]tu [)]gyur pa de'i tshe rgyu med par zhig kyang rgyu dang 'bras bu dag gi mtshan nyid bsreg par bya ba dang sreg par byed pa'i dngos po yod pa'i phyir/dang po dang phyi ma'i skad cig dag las snying po tshig pa yin no zhes bya ba'i don to/ /'das ma thag pa'i don ni de skabs kyi don la sbyor bas gsungs pa ni/rab 'byor de bzhin du zhes bya ba la sogs pa ste rtogs par sla'o/ /dang po dang phyi ma'i gyur pa dag re res mngon par rdzogs par 'tshang mi rgya na 'o na cig car bdag gis mngon par byang chub par 'gyur ro zhe na/ sems bskyed pa de dag gis kyang ma yin zhes bya ba gsungs te/sems kyi skad cig ma mang po cig car skyes pa de dag gis kyang mngon par rdzogs par 'tshang rgya ba ma yin te/ sems can rnams ni rnam par shes pa'i rgyud re re ba'o zhes 'byung bas mi srid pa'i phyir zhes bya bar dgongs so//de lta na ni gzhan dag gis 'tshang rgya ba'o zhe na/ sems bskyed pa de dag las gzhan pas kyang mngon par rdzogs par 'tshang mi rgya'o zhes gsungs te/ ji skad du bshad pa'i sems las tha dad pa'i sems gzhan gyis kyang mngon par rdzogs par 'tshang rgya bar 'gyur ba ma yin te mi srid pa'i phyir ro//'o na rnam pa thams cad du byang chub pa mi srid par 'gyur ro zhe na/ byang chub sems dpa' sems dpa' chen po ni zhes bya ba la sogs pa gsungs te/ snga phyir gyur pa'i skad cig dag yul gcig la nye bar mkho ba ston pa lhur len pa mar me'i tshul gyis na snga ma bzhin du byang chub sgrub par byed pa'i don nyung zad cig tu snang ba'i rnam par shes pa dang po la brten nas/de la snang ba'i don las lhag par khyad par can gyi don du snang ba'i rnam par shes pa phyi ma skye ba'i phyir na sems bskyed pa gnyi gas byang chub sems dpa' bla na med pa yang dag par rdzogs pa'i byang chub tu mngon par rdzogs par 'tshang rgya'o zhes bya ba'i tha tshig go//ji skad du bshad pa'i mar me'i dpe kho nas zab mo'i chos nyid rnam pa brgyad kyang khong du chud par bya'o/ /de skad du yang / sems ni snga mas byang chub par/ /rigs mun phyi mas kyang ma yin/ / mar me'i dpe yi tshul gyis ni/ zab mo'i chos nyid rnam pa brgyad/ /ces gsungs pa yin no/ /zhar la 'ongs pa bshad zin nas/ da ni bsgom pa'i lam la gnas pa'i byang chub sems dpa'i phyir mi ldog pa'i mtshan nyid rnams bstan par bya ba'i phyir/ zab mo rnam pa brgyad yul gang la yod pa de bstan par bya ba yin pas re zhig skye ba zab pa bstan pa ni/rab 'byor bcom ldan 'das sems bskyed pa dang pos kyang zhes bya ba la sogs pas kun rdzob tu skad cig ma gnyis kyis byang chub rtogs par khas blangs pa de yang mi rigs so zhes gsungs pa ni/rab 'byor 'di ji snyam du sems zhes bya ba la sogs pa'o/ /gang las skad cig ma gnyis kyis byang chub par rig par 'gyur ba sems gang skad cig ma snga mar gnas te 'gags pa de kun rdzob tu slar skad cig gnyis pa la skye bar 'gyur ram rjes su 'gro ba med par zhig pa ni slar skye ba mi srid yang /bcom ldan 'das de lta ma lags so zhes gsol te / rgyu med par 'bras bu mi 'byung bas skad cig ma phyi ma'i bya ba la yang brgyud pas skad cig ma dang po'i bya ba nye bar gdags pa yin pa'i phyir skad cig ma gnyis kyis byang chub par rigs kyi/ kun rdzob tu yang skad cig ma dang po'i bya ba ni gtso bo ma yin no zhes bya ba'i tha tshig go//des kyang 'di skad du snga ma dang phyi ma'i skad cig dag gis ma yin zhing / de dag la ma brten par yang khyad par can gyi don mi skye ba zhes bya ba 'di ni skye ba zab pa yin no zhes brjod par 'gyur ro/ /'gag pa zab pa'i don ni rab 'byor 'di ji snyam du sems/sems gang 'byung ba de 'gag pa'i chos can yin nam zhes gsungs pa yin te/ de las byung ba ni 'das pa ste yod pa rnam pa zhig pa zhes bya ba'i don to/ /de kho na nyid du na 'gag pa'i rang bzhin yin pa'i phyir 'gag pa'i chos can zhes bya ba gsol te/ 'gog pa ni stong pa nyid yin la chos de nyid 'di la yod pas na 'gog pa'i chos can te/de bzhin nyid kyi bdag nyid can no zhes bya ba'i don to/ /ci de skad cig ma gnyis pa la 'gag gam zhes gsungs pa ni/ rab 'byor 'di ji snyam du sems gang 'gog pa'i chos can de 'gag par 'gyur ram zhes bya'o //de'i rang bzhin yin pa'i phyir na skyes pa tsam nyid na de 'gags pas zin par gyur pa yin pas yang ci zhig 'gag ces bya ba'i bsams pas/ bcom ldan 'das de lta ma lags so zhes gsol to/ /ci ma 'ongs pa 'gag pa'i chos dang ldan nam zhes gsungs pa ni rab 'byor 'di ji snyam du sems/sems gang ma byung ba de 'gag pa'i chos can du 'gyur ram zhes bya ba'o/ /ma lags so zhes bya ba ni 'jig pa ni dngos po ldog pa'i rang bzhin yin pa'i phyir ma skyes pa ni 'gag pa'i chos can ma yin pa nyid do/ /ci de la skad cig ma gzhan du 'gag pa yod dam zhes gsungs pa ni rab 'byor 'di ji snyam du sems/sems gang zhig 'gag pa'i chos can ma yin pa de 'gag par 'gyur ram zhes bya ba yin no/ /de ni ma lags so zhes bya ba ni skad cig ma dang po med pas skad cig ma gnyis par 'gags pa dang bral ba yin pa'i phyir skad cig ma gzhan du 'gag par 'gyur ba ma yin no//gal te de lta yin na 'o na da ltar byung ba 'gag par 'gyur ro zhe na/ rab 'byor 'di ji snyam du sems/ sems gang mi 'byung ma 'gags pa'i chos can de 'gag par 'gyur ram zhes bya ba gsungs te/ da ltar byung ba la ni skye ba gzhan don med pas mi 'byung ba'i chos can yin la/yod pa'i dus su 'jig pa med pas ma 'gags pa'i chos can no/ /de lta ma lags so zhes bya ba ni gcig dang du ma'i rang bzhin dang bral ba'i phyir ro zhes bya bar 'dod do/ /gal te de lta na 'o na med la 'gag par 'gyur ro snyam na/rab 'byor 'di ji snyam du sems/ chos gang rang bzhin gyi ngo bo nyid 'gag pa nyid kyi chos de 'gag par 'gyur ro zhes gsungs te/ dngos po med pa'i ming can gyi chos gang zhig rang gi rang bzhin gyi ngo bo nyid 'gags pa ste/ gzugs la sogs pa'i ngo bo nyid dang bral ba'i chos nyid 'gag par 'gyur ram ci zhes bya ba'o//de lta ma lags so zhes bya ba ni 'das ma thag tu dus gsum pa'i dngos po 'gag pa bsal bas na yod pa ma yin pa nyid kyis na dngos po med pa nyid 'gag par 'gyur ba ma yin pa nyid do/ /'o na sgyu ma lta bu nyid 'gag pa yin no zhe na/ rab 'byor 'di ji snyam du sems/chos rnams kyi chos nyid gang yin pa de 'gag par 'gyur ram zhes gsungs pa yin no/ /bcom ldan 'das de lta ma lags so zhes bya ba ni chos nyid ni ma brtags na gcig pu nyams dga' ba nyid kyis brdzun pa'i ngo bo nyid yin pa'i phyir de kho na nyid du 'gag par mi 'gyur gyi/'on kyang skye ba'i dngos po rang bzhin gyis sgyu ma'i rang bzhin can du gyur pa thams cad kyi kun rdzob tu 'gag pa la 'gag pa zab pa zhes brjod do/ /de bzhin nyid zab pa'i don ni rab 'byor 'di ji snyam du sems/ de bzhin nyid ji lta ba de kho na bzhin du gnas par 'gyur ram zhes gsungs te/byang chub sems dpa' zhes bya ba ni lhag ma'o/ /rnam par mi rtog pa'i ye shes kyi yul dang ldan pa nyid yin pa'i phyir bcom ldan 'das de bzhin nyid ji lta ba de kho na bzhin du gnas par 'gyur ro zhes gsol pa yin no/ /dus gsum pa'i byang chub sems dpa' rnams de bzhin nyid dang 'dra bar gnas par 'gyur na rtag tu de bzhin nyid du 'gyur ro zhe na/rab 'byor 'di ji snyam du sems/ gal te de bzhin nyid ji lta ba de kho na bzhin du gnas na ni ther zug ma yin par mi 'gyur ram zhes gsungs pa yin te/ yi ge a khong nas phyung ba'i phyir mi rtag pa ther zug ma yin par 'gyur gyi 'on kyang rtag pa ther zug tu gnas pa'i de bzhin nyid yin no zhes bya bar sems sam ci zhes pa'o//rten cing 'brel 'byung gang yin pa/ /de nyid khyod ni stong par bzhed/ /ces 'byung bas kun rdzob pa'i dngos po'i don skad cig ma'i ngo bo nyid yin pa'i phyir de lta ma lags so zhes gsol to//'o na ni don gyi ngo bo nyid yin pa'i phyir zab mo ma yin pa kho na'o zhe na/ rab 'byor 'di ji snyam du sems/ de bzhin nyid zab pa ma yin nam zhes gsungs pa yin no/ /bcom ldan 'das zab po zhes bya ba ni gzugs la sogs pa'i dngos po'i don rtogs kyang de dang tha mi dad pa mngon sum du bya bar mi nus pa yin pa'i phyir de bzhin nyid zab pas rtogs par dka'o zhes bya ba'i don to//shes bya zab pa nyid kyi don ni rab 'byor 'di ji snyam du sems/ de bzhin nyid la sems yod dam zhes gsungs so//de bzhin nyid la gzhi'i ngo bo nyid yod pa ma yin pa'i phyir na de lta ma lags so zhes gsol to/ /'o na de bzhin nyid dang sems tha mi dad par 'gyur ro zhe na/ rab 'byor 'di ji snyam du sems/ de bzhin nyid la sems yod dam zhes gsungs so/ /de bzhin nyid la gzhi'i ngo bo nyid yod pa ma yin pa'i phyir na de lta ma lags so zhes gsol to//'o na de bzhin nyid dang sems tha mi dad par 'gyur ro zhe na/ rab 'byor 'di ji snyam du sems/ de de bzhin nyid yin nam zhes gsungs pa yin no/ /de lta ma lags so zhes bya ba ni kun rdzob dang don dam pa dag phan tshun spangs pa yin pa'i phyir na/sems ni de bzhin nyid kho na'o/ /don gyis na de bzhin nyid las sems gzhan du 'gyur ro zhe na/ rab 'byor 'di ji snyam du sems/ de bzhin las gzhan na sems yod dam zhes gsungs pa yin no/ /chos kyi dbyings las ma gtogs pa'i//gang phyir chos yod ma yin te/ /zhes bya ba'i bsam pas de lta ma lags so zhes bya ba ni de bzhin nyid kyi ngo bo yin pa'i phyir de kho na nyid du de bzhin nyid ma mthong zhing ma mthong ba yin pa ni shes pa zab pa yin par 'dod do/ /spyod pa zab pa'i don ni rab 'byor 'di ji snyam du sems/ gang de ltar spyod dam zhes gsungs pa yin te/de ltar zhes bya ba ni de bzhin nyid kyi rang bzhin du'o/ /de kho na nyid du gang du yang spyod pa med pa kho na'o zhes gsol pa ni/ bcom ldan 'das gang de ltar spyod pa de ci la yang mi spyod do zhes bya ba'o/ /'di nyid gsal bar byed pas de ci'i slad du zhe na zhes dogs pa bsu nas 'di ltar de la zhes bya ba la sogs pa gsol pa yin no//'di skad du gang gi phyir de bzhin nyid la gnas pa de la ni nyams su len pa'i khyad par gyi kun tu spyod pa/ de dag de kho nar gyur pa'i rgyu 'bras med pas rim pa bzhin mi 'jug cing kun tu mi spyod pa yin pa de'i phyir rgyu bar 'gyur ba ma mchis so//de bas na chos nyid kyis thams cad spyod pa yin no zhes bya ba 'di ni spyod pa zab pa zhes brjod par 'gyur ro/ /gnyis su med pa zab pa'i don ni rab 'byor byang chub sems dpa' sems dpa' chen po gang zhes bya ba la sogs pa gsungs pa yin te/ ci la spyod ces bya ba ni yul gang zhig rjes su gnas zhes bya ba'o//don dam pa la spyod do zhes bya ba ni mtshan ma med pa'i spyod pa gnyis med pa'i phyir chos kyi dbyings la spyod pa nyid ni gnyis su med pa'i zab par 'gyur ro zhes bya bar dgongs so/ /'di nyid gsal bar mdzad pa ni rab 'byor 'di ji snyam du sems/ byang chub sems dpa' sems dpa' chen po gang don dam pa la spyod pa de mtshan ma la spyod dam zhes gsungs pa yin no/ /de lta ma lags so zhes bya ba ni mtshan ma dang mtshan ma med pa'i 'du shes bkag pas dngos po dang dngos po med pa la mngon par zhen pa'i mtshan nyid can gyi mtshan ma la mi spyod pa nyid do//thabs la mkhas pa zab pa'i don ni/ rab 'byor 'di ji snyam du sems/ ci des mtshan ma de rnam par ma bshig gam zhes gsungs so/ /rnam par ma bshig gam zhes bya ba'i don ni ma spangs shing ma dor ram zhes bya ba'i don to//de lta ma lags so zhes bya ba ni chos thams cad dmigs su med pa'i stobs kyis ma gsal ba'o / /mtshan ma ni yod pa ma yin pas so/ /gal te de lta yin na 'o na mtshan ma dang bral ba yin no zhe na/ rab 'byor 'di ji snyam du sems/ ci byang chub sems dpa' sems dpa' chen po shes rab kyi pha rol tu phyin pa la spyod pas mtshan ma rnam par bshig par 'gyur zhes gsungs pa yin no//spong ba'i 'bad pa med pas mtshan ma spangs pa med pa ni bcom ldan 'das zhes bya ba la sogs pa gsol pa yin te/ byang chub sems dpa'i spyad pa spyod pa na da ltar gyi skye ba tshe 'di nyid la bdag gis ji ltar mtshan ma spong ba 'thob par 'gyur zhes/byang chub sems dpa' de snyam du mi sbyor mi rtsol zhes bya ba'i don to/ /de spangs nas nyes pa cir 'gyur zhe na/ gal te zhes bya ba la sogs pa gsol to/ /ci ltar gcig cig spangs pa dang ma spangs pa yin zhe na/bcom ldan 'das 'di ltar zhes bya ba la sogs pa gsol to/ /'di skad du kun rdzob tu gzugs la sogs pa sgyu ma lta bu'i mtshan nyid gang yin pa ste/ ngo bo nyid gang yin pa dang mtshan ma gang yin pa ste rgyu gang yin pa de yang shes la/ de kho na nyid du na ma skyes pa yin pa'i phyir mtshan ma med pa'i chos kyi dbyings la yang yongs su 'dris par byed pa de ltar na/don dam par spang ba dang kun rdzob tu ma spangs pa 'di ni thabs la mkhas pa'i zab pa yin no zhes brjod pa yin no/ /des na de ltar rnam par thar pa'i sgo bsam gyis mi khyab pa thob pa'i phyir na phan tshun 'gal ba'i don rjes su bsgrubs pas skye ba la sogs pa zab pa brgyad rtogs pa dang /rjes su mthun pa'i tha snyad la 'jug pa'i phyir skad cig ma bcu drug dang 'dra bar bsgom pa'i lam la gnas pa'i phyir mi ldog pa'i mtshan nyid yin par gzung bar bya'o/ /de skad du yang / skye ba dang ni 'gag pa dang //de bzhin nyid dang shes bya dang / /shes dang spyod dang gnyis med dang / /thabs la mkhas pa zab pa nyid/ /ces gsungs pa yin no/ /phyir mi ldog pa'i mtshan nyid bstan pas slob pa'i byang chub sems dpa'i dge 'dun bshad pa yin la/ de'i 'og tu kun nas nyon mongs pa dang rnam par byang ba'i rnam par rtog pa spangs pas de gnyi ga mnyam pa nyid du rtogs pa'i phyir mi slob pa nyid du gyur pa yin te/de phan chad bslab par bya ba med pa'i phyir ro/ /de bas na mi slob pa'i dge 'dun gyi mtshan nyid gsal bar bstan pa'i phyir 'khor ba dang mya ngan las 'das pa mnyam pa nyid bshad par bya ba yin pas tshe dang ldan pa rab 'byor byang chub sems dpa' sems dpa' chen po gang zhes bya ba la sogs pa gsungs pa yin te/ci zhes bya ba'i sgra'i don 'dri ba la 'jug pas shes rab kyi pha rol tu phyin pa rnam par 'phel zhing nye bar 'phel bar 'gyur ram zhes bya ba'i tha tshig go//mi 'phel ba kho na'o zhes brjod pa ni gal te nyin par zhes bya ba la sogs pa'o/ /'dir 'khor ba dang rnam par mi rtog pa'i ye shes ni go rims bzhin du rmi lam dang nyin mos bsten par 'dod nas smras pa yin no/ / bsam pa ni 'di ltar shes par bya ste mi mthun pa'i phyogs dang gnyen po'i rnam par rtog pa spang ba'i dbang du byas nas/ gang gi tshe de gnyi ga mnyam pa nyid du rtogs pa las gal te nyin mor gyur pa'i bsgom pa rnam par 'phel na ni de'i tshe rmi lam rmis pa'i nang du gtogs pa'i yang rnam par 'phel ba zhig na 'on kyang ji ltar nyin par mi 'phel ba de bzhin du rmi lam du yang yin no zhes bya bar ro//'di dag nyid gsal bar bya ba'i phyir de ci'i phyir zhe na zhes bya bas dogs pa bsu nas rmi lam dang nyin par ni zhes bya ba la sogs pa smos pa ste gal te nyin par spyod pas shes rab kyi pha rol tu phyin pa 'phel na ni/de'i tshe goms pa'i stobs kyis rmi lam du yang rgyas par 'gyur na de lta ni ma yin te/ gang gi phyir 'khor ba dang rnam par byang ba'i chos rnams ni snang ba tsam gyi rang bzhin rmi lam dang 'dra ba nyid du rtogs pa'i phyir rmi lam dang nyin par gyi rang bzhin can/'khor ba dang mya ngan las 'das pa dag mi mthun pa'i phyogs dang gnyen po'i rnam par rtog pa dag gis tha dad par rnam par brtag par mi nus pa'i phyir rmi lam dang nyin par ni rnam par mi rtog cing mnyam pa nyid yin no zhes bcom ldan 'das kyis gsungs pa zhes bya ba'i don to//de skad du yang / chos rnams rmi lam 'dra ba'i phyir/ /srid dang zhi bar mi rtog pa/ /zhes gsungs pa yin no/ /chos thams cad rmi lam lta bu nyid yin na ni rmi lam gyi gnas skabs dang 'dra bar sad pa'i gnas skabs su yang mi dge ba bcu la sogs pa med par 'gyur ro zhes smras pa ni tshe dang ldan pa rab 'byor gang yang skyes pa 'am zhes bya ba la sogs pa'o//ci zhes bya ba ni spong ba brjod pa yin pa'i phyir med pa nyid do zhes bya ba'i don to/ /sogs pa zhes bya ba'i don rang gi ngo bo nye bar sogs pa'i phyir ro/ /nye bar sogs pa zhes bya ba ni 'bras bu skyed pa'i nus pa dang ldan pa'i phyir ro//de bzhin du rmi lam lta bu yin pa nyid kyis na sbyor ba la sogs pa med pa'i phyir nyin par yang dge ba dang mi dge ba'i las med par 'gyur ro zhes bsams pa'o/ /don dam par sogs pa 'am nye bar sogs pa med do zhes smras pa ni ci ltar bcom ldan 'das kyis zhes bya ba la sogs pa'o//kun rdzob tu ni las dang 'bras bu 'brel pa 'dod pa'i phyir/ rmi lam sems ni gnyid kyis nyams/ /des na rmi dang 'bras mi tshugs / /zhes bya bas dpe ma grub par 'gyur ro zhes brjod pa ni tshe dang ldan pa shA ri'i bu de ste skyes bu de zhes bya ba la sogs pa bya'o//las de zhes bya ba ni rmi lam gyi gnas skabs su 'byung ba'o/ /'di nyid gsal bar byed pas smras pa ni shA ri'i bu ci ltar zhes bya ba la sogs pa'o/ /de la sbyor ba la sogs pas rdzogs par byas pa'am/ lus dang ngag dang sems nye bar bcom pas a la la bsad do//legs par bsad do/ /shin tu bsad do zhes bya ba dang / thams cad du bdag nyid kyis bya ba la dmigs pas ngas bsad do zhes don gyi dbye bas brjod par bya'o/ /'di skad du ji ltar phyi rol gyi don yod par smra ba'i lugs la skad cig ma nyid kyis rgyu med par 'jig pa yin pa dang /grub pa'i mtha' las kyang / las las 'jig rten sna tshogs skyes/ /zhes 'byung ba'i phyir don dam par sus kyang su yang bsad pa med la/ sus kyang su'i nor blangs pa yang med ces bya ba la sogs pa khas blangs pa na rgyun 'jug pa dang 'gal ba'i dngos po bskyed pa las gsod pa la sogs par lhag par zhen pa'i sgo nas tshul bzhin ma yin pa'i yid la byed pa la sogs pa dang ldan pa la/mi dge ba la sogs pa bzhin du srog bcad pa la sogs pa rnam par 'jog pa de bzhin / rmi lam du nye bar bsags pa yang dge ba dang mi dge ba sad pa'i gnas skabs su/a la la bsad do zhes bya ba la sogs pa'i rnam par rtog pas sbyor ba la sogs pa'i gnas skabs kyi mngon par zhen pa rgyas pas yongs su rgyas par gyur pa na/ phyi'i don yod par smra ba'i lugs la yang rmi lam gyi gnas skabs dang 'dra'o zhes bya ba'i dpe ma grub po//de bas na dbu ma pa'i lugs kyis gnyid ma log pa'i gnas skabs su yang rmi lam dang 'dra ba'i dngos po rnams la de dang rjes su mthun pa la sogs pa'i don yod pa la sogs par mngon par zhen pas phyin ci log gi 'ching ba mtha' dag ma spangs pa rnams la/dge ba la sogs par rnam par gzhag go/ /'on kyang gnyid ni sems 'khrul pa'i rgyu bla lhag pa yin pa nyid kyis na mi gsal ba dang 'chol bar rtogs pas rmi lam du ni dman pa yin la/ gnyid kyis ma log pa'i gnas skabs su gnyid la sogs pa 'khrul pa'i rgyu dang bral bas zhing ma phog 'chol bar snang ba nyid kyis na 'bras bu lhag ma yin no//rmi lam la sogs pa'i gnas skabs su yang las dang 'bras bu yod par 'dod pa yin pa'i phyir dge slong ma yin pa la sogs pa nyes yod par mi brjod de/ bslab pa byin pa dang 'dra bar sdom pa dang sdom pa ma yin pa ni bcom ldan 'das kyis bslab pa bcas pa'i dbang las rnam par gzhag pa yin pa'i phyir ro zhes brjod pa yin no//gal te rnam par rtog pa'i stobs kyis las rnams gsos btab pa yin no/ /de'i tshe gnyen po'i phyogs sad pa yin yang rnam par rtog pa rjes su 'jug pas na de bzhin gshegs pa la yang 'gyur ro zhes brjod pa ni/tshe dang ldan pa rab 'byor gal te zhes bya ba la sogs pa'o/ /rnam par rtog pa ni zad pa'i 'du shes skyed par mdzad pas zhes bya ba ni bdag gi 'khor ba'i phung po zad do zhes bya ba la sogs pa'i 'du shes su mdzad pa'o//de'i yang las zhes bya ba ni nyon mongs pa spong bar mdzad pa'i yid la byed pa'i phrin las so/ /rang gi ngo bo nye bar bsags pas na sogs pa dang / 'bras bu bskyed par nus pa nyid kyis na nye bar sogs par 'gyur la/ de las kyang las nye bar sogs pa la 'bras bu'i khyad par yod pas de bzhin gshegs pa ni ma rdzogs pa nyid du 'gyur ro zhes bya ba'o sems pa'o//gdul bya'i skye bo'i don de bzhin gshegs pa la nga'i skye ba zad do/ /zhes bya ba la sogs pa'i rnam par rtog pa gzhag pa yin gyi yang dag par ni ma yin no/ /zhes smras pa ni de lta ma yin no zhes bya ba'o//'di nyid gzhung gzugs pa'i don du de ci'i phyir zhe na zhes dogs pa bsu nas de bzhin gshegs pa ni rtog pa dang rnam par rtog pa thams cad dang bral ba yin te zhes bya ba la sogs pa smras so/ /rtog pa ni gzugs la sogs pa rang dang spyi'i mtshan nyid kyi bdag nyid can rnam par rtog pa med pa dang /rnam par rtog pa dang bcas pa'i dmigs pa'i gnas su gyur pa yin la/ de rnams la rnam par rtog pa ni de la dmigs pa'o/ /de dang bral ba ni rnam par mi rtog pa'i chos nyid thugs su chud pa'i phyir spangs pa zhes bya ba'i tha tshig go/ /dmigs pa la nye bar dmigs pa med par gzhan dag gi yid kyi las dang sems pa ci'i phyir mi 'jug ce na/tshe dang ldan pa shA ri'i bu de bzhin du dmigs pa med par zhes bya ba la sogs pa smras so/ /rten cing 'brel par 'byung ba'i chos nyid kyi chos nyid ni 'di yin te/ gang gi phyir dmigs pa med par las dang sems pa mi skye ba 'di ni chos nyid yin pa de bas na dmigs pa dang bcas pa kho nar skye ba yin no//'di dag nyid gsal bar byed pas na tshe dang ldan pa shA ri'i bu de bzhin du dmigs pa med par zhes bya ba la sogs pa smras so/ /de la/ de dang de min rang bzhin can/ / de de min dngos rgyu las skyes/ /zhes bya ba'i tshul gyis blo la la ni kun nas nyon mongs pa la dmigs pas kun nas nyon mongs pa yongs su 'dzin la/ blo la la ni rnam par byang ba la dmigs pas na rnam par byang ba yongs su 'dzin to/ /sems pa zhes bya ba ni kha cig na re blo yin no zhes zer ro//gzhan dag na re/ sems pa yid kyi las yin te/ /zhes bshad pa'i phyir las nyid kyi rnam grangs su brjod pa yin no zhes zer ro/ /nye bar bsdu ba ni shA ri'i bu de lta bas na zhes bya ba la sogs pa smos pa yin no/ /'das pa dang ma 'ongs pa ni med pa nyid kyis dmigs pa'i ngo bor mi 'thad pa'i phyir la/da ltar byung ba'i don yang rnam pa dang bcas pa la sogs pa'i shes pas gzung bar mi nus pa nyid kyis na thams cad na dmigs pas stong pa nyid yin na dmigs pa dang bcas pa'i sems kyang ji ltar skye zhes smras pa ni/ tshe dang ldan pa rab 'byor gang gi tshe zhes bya ba la sogs pa'o//dben pas zhes bya ba ni dmigs pa'i dngos po dang bral ba nyid kyis na stong pa nyid du'o/ /kun rdzob tu yang dag pa ma yin pa'i kun tu rtog pa la dmigs nas skye ba yin no zhes smras pa ni/ tshe dang ldan pa shA ri'i bu mtshan mar byas nas zhes bya ba la sogs pa ste/ gzugs la sogs par gtogs pa'i mtshan ma thun mong ma yin pas de kho nar mtshan ma med pa yin na yang /ji ltar mthong ba bzhin mtshan mar byas shing sgro btags nas zhes bya ba'i don to/ /bar du yang zhes bya ba 'dis ni rnam par shes pa'i rkyen gyis ming dang gzugs zhes bya ba la sogs pa bsdu'o/ /'jig rten gyi tha snyad la brten nas zhes bya ba ni kun rdzob kyi dbang du byas nas so//skye bo zhes bya ba'i rjes thogs la brjod do zhes bya ba ni lhag ma'o/ /rmi lam na yang las dang 'bras bu'i 'brel pa yod do zhes bstan bzhin du yang skye bo dmigs pa can gyi dbang du byas nas dogs pa bsu ba ni/ tshe dang ldan pa rab 'byor gang gi tshe byang chub sems dpa' zhes bya ba la sogs pa smras pa yin no//lan btab zin pa'i don la yang dogs par byed na mtha' yas pas sems rnal du gnas pa su zhig lan 'debs par byed ces bya ba'i bsam pas/ tshe dang ldan pa shA ri'i bu byang chub sems dpa' sems dpa' chen po byams pa zhes bya ba la sogs pa smras pa yin no//don 'di zhes bya ba ni rmi lam du yongs su bsngos pa ni ci sbyin pa de yongs su bsngos pa zhes brjod par bya ba'am zhes dris pa'o/ /lus kyi mngon sum du byed pa zhes bya ba ni/ dgra bcom pa'i rgyu la zhugs pa'i phyir mi 'ong ba'i 'gog pa thob pa ni mngon sum du byed pa yin la/de bzhin du 'phags pa byams pa ni 'tshang rgya ba nyid la zhugs pa yin pa'i phyir lus kyi mngon sum du byed pa zhes bya'o/ /rab 'byor gyi tshig nyid kyis 'phags pa byams pa la bos te smras pa ni/ de nas tshe dang ldan pa shA ri'i bu zhes bya ba la sogs pa'o//gdul bya so so'i bye brag gis bstan zin pa'i don la yang dogs pa yang nas yang du byung ba la yang nas yang lan brjod pa yin yang skal ba dang ldan pa rnams kho na'i don byed pa yin pa'i phyir sangs rgyas gcig byung ba'i dus kho nar thams cad kyis phyin ci log spang bar bya bar mi nus so zhes bya /dri ba 'di'i lan btab pa'i skabs nyid kyis bstan te/ ma 'ongs pa'i sangs rgyas gzhan dang gzhan 'byung bar 'gyur ba yin pa'i phyir na dri ba 'di yongs su rdzogs pa med pa yin te/ de yongs su rdzogs pa yin na ni bya ba med pa'i phyir ma 'ongs pa'i sangs rgyas 'byung ba don med par yang 'gyur ba'i phyir ro snyam pa'i bsam pa dang ldan par lan ldon par 'dod nas brjod pa ni/tshe dang ldan pa rab 'byor gang 'di skad du zhes bya ba la sogs pa'o/ /srid pa'i dbang du byas nas rnam par rtog par byed pa ni tshe dang ldan pa rab 'byor ci byams pa zhes bya ba'i ming zhes bya ba la sogs pa smras pa'o//de la re zhig stong pa nyid ni lan mi ldon no zhes brjod pa ni de ste gzugs kyi stong pa nyid ces bya ba la sogs pa'o/ /de ni lan ldon mi nus so zhes bya ba ni yod bzhin pa ma yin pa'i phyir mthu med pa'o/ /gzugs la sogs pas kyang mi nus so zhes brjod pa ni tshe dang ldan pa rab 'byor chos gang zhes bya ba la sogs pa byed pa po dang las dang bya ba dmigs su med pa'i dbye bas chos gang lan ldon pa dang /chos gang la lan blan par bya ba dang chos gang gis lan blan par bya ba zhes bya ba smos pa yin no/ /chos gang lung bstan pa zhes bya ba ni bdag nyid yul du byas nas brjod pa'o//chos thams cad dmigs pa yin par mi 'thad do zhes brjod pa ni tshe dang ldan pa byams pa chos 'di dag gang ci ltar zhes bya ba la sogs pa'o/ /'di skad du/ gal te ji ltar chos 'di dag gis brjod pa bzhin du khyod kyi gzugs la sogs pa'i chos 'di dag de ltar mngon sum du byas na ni de'i tshe lan 'debs pa po'i ngo bos rnam par rtog pa'i don nye bar dmigs pas na/chos thams cad mi dmigs par ji ltar 'gyur zhes brjod pa yin no/ /de ltar rtogs pa med pa nyid do zhes brjod pa ni tshe dang ldan pa shA ri'i bu 'di dag ji ltar tshig gis bstan pa zhes bya ba la sogs pa'o//sbyor ba la sogs pa'i gnas skabs su mi shes zhes bya ba la sogs par sbyar ro/ /'o na ji ltar yin zhe na/ 'on kyang zhes bya ba la sogs pa yin no/ /'di skad du/ chos thams cad kyi sgyu ma lta bu nyid kyis ngo bo nyid med pa yin pa'i phyir rtogs pa'i gnas skabs su rnam par rtog pa rgyu ba med pa'i phyir ji ltar lus kyis reg tu med pa dang /tshig gis smrar med pa dang sems kyis bsam du med pa de lta bu'i ngo bo yin par chos thams cad mi dmigs pa'i rang bzhin rnam par mi rtog pa'i ye shes kyi mngon sum du byas te gang gi phyir rnam par rtog pa rjes su 'jug pa yin na ni phyin ci log yod pas rtogs pa med par gyur pas so//de las kyang rtogs pa las dus phyis brjod pa'i kun rdzob tu tha snyad byed pa yin no zhes brjod pa yin no/ /rnam par mi rtog pa'i ye shes rtogs pa ni nyan thos kyi yul ma yin no zhes smras pa ni/ e ma'o byang chub sems dpa' zhes bya ba la sogs pa'o//nyan thos rnams la 'di 'dra ba'i rtogs pa yod pa nyid do zhes gsungs pa ni/ shA ri'i bu khyod ci'i phyir zhes bya ba la sogs pa ste/ rnam par mi rtog pa'i ye shes tsam du rtogs pa mtshungs pa nyid yin pa'i phyir 'di ni shes rab zab ste zhes bya ba'i sems bskyed par mi bya'o zhes bya ba'i tha tshig go//mtshungs pa nyid bstan pa'i don du gsungs pa ni shA ri'i bu khyod chos gang dang ldan pas zhes bya ba la sogs pa'o/ /dgra bcom pa nyid du rnam par mi rtog pa'i shes pas rtogs pa'i dus su zad pa mi skye ba shes pa'i mtshan nyid kyi chos de ci'i phyir khyod kyis yang dag par rjes su mthong ngam ste nye bar dmigs sam zhes bya ba'i don to//phyin ci log nyid yin pa'i phyir rtogs pa dang 'gal ba nyid kyis na de lta ma yin no zhes gsol pa ni/ de lta ma lags so zhes bya ba'o/ /rtogs pa'i dus byang chub sems dpa' rnams kyi tshul yang 'di 'dra ba nyid yin no zhes gsungs pa ni shA ri'i bu de bzhin du zhes bya ba la sogs pa'o//de ltar na las med pa la sogs par dris pa rnams kyi lan ni ji skad du gsungs pa nyid yin par gzung bar bya'o/ /de skad du yang / las med la sogs klan ka yi/ /lan ni ji skad bshad par zad //ces gsungs pa yin no/ /'khor ba dang mya ngan las 'das pa mnyam pa nyid nye bar bsdu ba'i don du tshe 'di'i de bstan pa'i dgos pa'i dbang du mdzad nas/ de spyod pa na mi dang zhes bya ba la sogs pa gsungs so/ /dmigs su med pa'i spyod pa la nus pa thob pa nyid yin pa'i phyir nga mngon par rdzogs par 'tshang mi rgya bar mi 'gyur gyi gzhan du na nges par mngon par rdzogs par 'tshang rgya bar bya'o snyam du de ltar de rnal 'byor du byed do//gnyi ga mnyam pa nyid du rnam par bsgoms pas ni rang gi sangs rgyas kyi zhing du sangs rgyas su 'gyur ro/ /des na de'i 'og tu sems can dang snod kyi 'jig rten gyi dbye bas sangs rgyas kyi zhing rnam par dag pa gnyis po ston pa ni gzhan yang shA ri'i bu zhes bya ba la sogs pa gsungs so//de la sems can gyi 'jig rten ma dag pa bkres pa la sogs pa gang yin pa de'i gnyen por lha'i longs spyod la sogs pa dag pa nye bar bsgrub pa dang /de bzhin du snod kyi 'jig rten gyi ma dag pa sdong dum dang tsher ma la sogs pa gang yin pa de'i gnyen por lag mthil ltar mnyam pa la sogs pa'i dag pa nye bar sgrub pa na go rims bzhin du sangs rgyas kyi gnyis po rnam par dag pa yin no zhes bya ba ni mdor bsdus pa yin no//de skad du yang / sems can 'jig rten de bzhin du/ /snod kyi 'jig rten ma dag pa/ /de la dag pa sgrub pa yis/ /sangs rgyas zhing ni dag pa nyid/ /ces gsungs pa yin no/ /rgya cher mdo las ji skad bstan pa ni go sla'o/ /de las cung zad tsam cig brjod par bya ste/ de bzhin du de ci'i phyir zhe na zhes bya bas dogs pa bsu nas 'di ltar des sems can thams cad kyi don du thams cad yongs su gtong ba yin no zhes bya ba la sogs pa gsungs pa yin no/ /'di dag nyid gsal bar byed pas des sems 'di ltar bskyed par bya ste zhes bya ba la sogs pa gsungs so/ / de la thams cad nas zhes bya ba ni kha dog dang dbyibs kyi dngos po'i rang bzhin nas/ thams cad ni de rigs kyi dbye bas phye ba'i dngos po rnams so/ /rnam pa thams cad kyi zhes bya ba ni de re re'i rigs kyi rnam pa'i dbye bas so/ /thams cad du zhes bya ba ni ji ltar srid pa'i rnam par ro/ /med par 'gyur zhing zhes bya ba ni rang bzhin dang bral bas so//shes par mi 'gyur zhes bya ba ni des byas pa'i mtshan ma med pas so/ /de bzhin du de ci'i phyir zhe na zhes dogs pa bsu nas bdog pa thams cad yongs su gtong ba'i dge ba'i rtsa ba la mngon par dga' ba yin te zhes bya ba la sogs pa gsungs so//'di dag nyid rgyas par ston pa ni des sems 'di ltar bskyed de zhes bya ba la sogs pa gsungs pa yin no/ /gnod sems dang / khro ba dang zhe sdang zhes bya ba gnod sems ni sems can la sdang ba'o/ /khro ba ni sems can dang sems can ma yin pa la kun nas mnar sems pa'o/ / zhe sdang ni dgrar rjes su 'brel pa'o/ /de ltar bya zhing zhes bya ba ni sems kyi khyad par bskyed pa yin pa'i phyir ro/ /de ltar sgrub po zhes bya ba ni sgrub pas rdzogs par byed pa'i phyir ro/ /'bad do zhes bya ba ni brtson 'grus phul du byung bar byed pas so/ /chus dgon par gyur pa ni chu med par gyur pa ste de'i 'jig pa yod pa'o//de bzhin du de ci'i phyir zhe na zhes dogs pa bsu nas byang chub sems dpa' zhes bya ba la sogs pa gsungs so/ /dri zhim mngar dang bsil ba dang / / 'thungs na lto dang mgrin pa la/ /mi gnod yan lag brgyad ldan chu/ /zhes bya ba'i chu rnyed pa'i phyir na yan lag brgyad dang ldan pa'i chu rnyed par 'gyur ba'o//chung ngu dang 'bring dang chen po'i dbye bas skyid pa dang bde ba dang bde ba thams cad dang phrad par 'gyur ba zhes bya ba ni mthong ba'i lam 'thob par 'gyur ba nyid kyis na'o/ /'byung bar 'gyur ba ni nye bar longs spyad par byar rung bas so//'tsho ba'i yo byad ces bya ba ni zas la sogs pa ste gnas pa'i rgyu nyid yin pa'i phyir ro/ /yun ring mo zhig na zhes bya ba ni dus ring mo zhig na'o/ /snga ma bzhin du de ci'i phyir zhe na zhes dogs pa bsu nas/ sems kyi skad cig ma 'di tsam gang yin pa zhes bya ba la sogs pa gsungs te/gang gi phyir sems kyi skad cig ma de kho na nyid du ma skyes pa kun rdzob tu de tsam gyi dus ring po dang ldan pa de ni dang po'i rgyu dang bral ba'i phyir thog ma med pas sngon med pa'i mtha' ma ste mur thug pa'i 'tshang rgya ba'i gnas skabs yin zhing stong pa nyid kyi rang bzhin yin pa'i phyir na/ 'di lta ste mtha' med pa nyid yin pa de'i phyir yun ring mo zhig na'o / /mngon par rdzogs par 'tshang rgya bas skrag pa la sogs par mi bya zhing / dka' ba'i 'du shes kyang bskyed par mi bya'o zhes bya ba'i don to/ /'jigs pa mi bzad pa zhes bya ba la phyi rol gyi gcan gzan gdug pa la sogs pa ni 'jigs pa'o//nang gi bdag nyid can gyi rims la sogs pa ni mi bzad pa'o/ /nyams su blangs par mi nus pa nyid kyis na ji skad du brjod pa'i sangs rgyas kyi zhing yongs su sbyang ba la ni su yang 'jug par 'gyur ba med do snyam pa la/ de nas 'khor der zhes bya ba la sogs pa smra ba yin te/ gnas 'di la zhes bya ba ni bstan zin pa'i sangs rgyas kyi zhing yongs su sbyong ba la ste/ goms pa'i sbyor bas nus pa yin pa'i phyir ro/ /de'i bsam pa phun sum tshogs pa'i stobs kyis lung bstan pa'i ltas 'byung ngo zhes brjod pa ni/ de nas de'i tshe bcom ldan 'das kyis zhes bya ba la sogs pa'o//dbu'i gtsug tu mi snang bar gyur to zhes bya ba ni gang gi tshe de bzhin gshegs pa nyid du lung bstan par bya ba yin pa de'i tshe spyi gtsug gi mtshams su 'od zer nub par gyur pa 'di ni chos nyid yin no/ mtshan ma mthong bas 'phags ma gang gA'i lha mo bsam pa phul du byung ba yang dag par skyes pas mchod par byed pa ni/bcom ldan 'das kyis 'dzum pa mdzad ma thag tu zhes bya ba la sogs pa smos pa gsungs pa yin no/ /'brel pa mang du mthong bas 'od zer 'byin par mdzad pa'i dgos pa zhus pa ni/ tshe dang ldan pa kun dga' bo zhes bya ba la sogs pa smos pa yin no//rang gi ngo bo nyid ston par mdzad pa ni kun dga' bo sring mo gang gA'i zhes bya ba la sogs pa gsungs pa yin no/ /yang dag par rdzogs pa'i byang chub mngon par 'tshang rgya bar 'gyur ro zhes bya ba ni kha cig na re lung bstan pas 'khor rnams la 'di lta bu'i sangs rgyas kyi zhing yongs su dag pa 'thob pa yin par yid ches pa'i dbang por gyur pa ston pa yin no zhes 'dod do//mngon par rdzogs par byang chub pa'i skabs las sngar gyi yang lung ston par mdzad pa ni/ kun dga' bo gang gA'i lha mo 'di ni zhes bya ba la sogs pa yin no/ /lung bstan pa rnams kho na [(]dar skya [,]der skye [)] bas ngo mtshar du gyur pa yin no zhes brjod pa ni de nas tshe dang ldan pa kun dga' bo 'di snyam du sems te zhes bya ba la sogs pa'o//legs par smras pa nyid kyis na kun dga' bo de bzhin no zhes bya ba la sogs pa gsungs pa yin no/ /de la nyon mongs pa'i sgrib pa dang bral bas na 'dam las rgal ba'o//rtse mo mngon par rtogs pa la gnas pa nyid yin pas na byang chub yongs su grub pa nye bar son pa'o/ /nyan thos kyi dge 'dun yang lung ston par mdzad pa ni/ yang kun dga' bo zhes bya ba la sogs pa gsungs pa yin no/ /de bzhin du de ci'i phyir zhe na zhes dogs pa bsu nas kun dga' bo gang dag la zhes bya ba bsod nams bsags pa'i bsam pa las smon lam yongs su rdzogs pa nyid kyis na/kun dga' bo de'i tshe de'i dus na zhes bya ba la sogs pa gsungs pa yin no/ /nye bar bsdu ba ni yang kun dga' bo zhes bya ba la sogs pa gsungs pa yin no/ /shin tu ngo mtshar ba ma thos pas sngon byung ba'i sbyor ba zhus pa ni/sring mo gang gA'i lha mo 'dis zhes bya ba la sogs pa yin no/ /rang gi ngo bo ston par mdzad pa ni kun dga' bo sring mo gang gA'i lha mo 'dis ni zhes bya ba la sogs pa gsungs pa yin no/ /lung bstan pa'i rnam pa 'di thams cad ni smon lam dang rjes su mthun pa nyid yin no zhes ston pa ni bcom ldan 'das e ma zhes bya ba la sogs pa gsungs pa yin no//de la yongs su sbyar ba bgyis shing zhes bya ba ni mthong ba'i lam thob pa nyid yin pa'i phyir ro/ /mthar phyin par bgyis pa zhes bya ba ni bsgom pa'i lam rtogs pa'i ngo bo nyid yin pa'i phyir ro//de bzhin du rjes su snang bar mdzad pa ni de de bzhin no zhes bya ba la sogs pa gsungs pa yin no/ /shes rab kyi pha rol tu phyin pa'i bshad pa mngon par rtogs pa'i rgyan gyi snang ba las sring mo gang gA'i lha mo'i le'u zhes bya ba ste bcu dgu pa'o// // sangs rgyas kyi zhing rnam par dag pa bsgrubs pa ni thabs la mkhas pas tshogs yongs su rdzogs par byas nas phyis skal ba ji lta ba bzhin du rang gi sangs rgyas kyi zhing du sangs rgyas kyi mdzad pa dag bya dgos pas thabs la mkhas par brjod par bya'o/ /de la 'di'i yul bstan par bya ba'i phyir zhus pa ni/bcom ldan 'das byang chub sems dpa' sems dpa' chen po zhes bya ba la sogs pa gsol pa yin no/ /lan btab pa'i don ni rab 'byor 'di la zhes bya ba la sogs pa gsungs so / /chos nyid de la chos nyid kyi rang bzhin yod pa ma yin no zhes bya ba ni/ so sor rtog pa ni ji ltar chos nyid stong pa nyid de la chos nyid kyis te/stong pa nyid kyi rang bzhin yod pa yin no zhes yang dag par rjes su mi mthong ba de ltar te/ stong pa nyid la stong pa nyid kyi rang bzhin du yod do zhes bya ba ji ltar yang dag par rjes su mi mthong ba de ltar so sor brtag par bya'o zhes bya ba'i don to//'di skad du stong pa nyid la sogs pa sgyu ma lta bu yin na ni thabs mkhas pa'i yul yin no/ /yang ji ltar na goms par byas kyang rtogs pa ma yin zhes gsol pa ni/ bcom ldan 'das kyis gang 'di skad du zhes bya ba la sogs pa'o/ /'di'i lan du thabs mkhas pa'i sbyor ba ston pa ni rab 'byor 'di ltar zhes bya ba la sogs pa gsungs pa thams cad kyi mchog dang ldan pa zhes bya ba ni sbyin pa la sogs pa ma tshang ba med pa'o//bdag gis shes rab kyi pha rol tu phyin pa yongs su gzung bar yang 'gyur la zhes bya ba la sogs pa la/ bdag gis shes rab kyi pha rol tu phyin pa thabs mkhas pas yongs su gzung bar yang 'gyur la/stong pa nyid mngon sum du yang mi bya'o snyam pa'i bsam pas de'i mthar thug pa ma yin pa kho nar stong pa nyid kyi ting nge 'dzin la sems 'dzin par byed de bar skabs der rgyal ba'i yum gyi mthus byang chub kyi phyogs kyi chos rnams las nyams par mi 'gyur la/ ched du bsams nas sems can gyi don du skye ba yongs su gzung ba yin pa'i phyir na/zag pa zad par te 'dod pa'i dang srid pa'i zag pa rab tu spong bar byed cing stong pa nyid kyi ting nge 'dzin la dmigs pa'i phyir/ zag pa zad pa de la yongs su 'dris par yang byed do zhes bya ba'i don to/ /'di nyid gsal bar byed pas gsungs pa ni gang gi tshe byang chub sems dpa' zhes bya ba la sogs pa'o//goms par byas su zin kyang ji ltar mngon sum du bya ba ma yin snyam pa'i dogs pa de ci'i phyir zhe na zhes bya bas bsu nas/ de ltar dge ba'i rtsa ba bstan pa zhes bya ba la sogs la gsungs so/ / yang dag pa'i mtha' yang mngon sum du mi byed do zhes bya ba ni 'di skad du rnam pa thams cad du bsgom pa la 'dris par byed cing so sor rtog pa ni/ mngon sum du byed pa dang byed pa'i dus ma yin pa shes pa'i sbyor ba'i stobs kyis ting nge 'dzin de la gnas kyang stong pa nyid thob par byed pa ni ma yin no zhes brjod pa yin no//de la thabs kyang rnam pa bcur 'gyur ba las re zhig [(]gags [,]gegs [)]byed pa'i chos la yang dag par rgol bas bar chad byed pa'i chos las yang dag par 'das pa'i thabs kyi don ni/ rab 'byor 'di lta ste dper na zhes bya ba la sogs pa gsungs pa yin no/ /de la dpa' ba dang gzugs dang yon tan chung ngu dang 'bring dang chen po rnams go rims bzhin du ldan pa'i phyir rab tu dpa' bar 'gyur zhing zhes bya ba la sogs pa'i tshig dgu dang sbyar bar bya'o//gzhung dang don 'dzin pa'i nus pa yod pa nyid yin pa'i phyir yid gzhungs pa'o/ /byed pa gsal ba'i phyir smra nus pa'o/ /dris pa'i lan 'debs pa la mkhas pas na lan ldon nus pa'o//rengs shing zhum pa nyid med pas spobs pa phun sum tshogs pa'o/ /dam bcas pa'i don rdzogs par byed pas na sgrub pa phun sum tshogs pa'o/ /dus la sogs pa spang bar bya ba dang blang bar bya ba nyid du yongs su shes par bya ba'i phyir dus shes pa dang yul shes pa dang gnas pa'o//gtso cher 'phong rtsal la shin tu byang ba nyid kyis na 'phong skyen pa'i mthar phyin pa'o/ /mtshon cha mang ba dang sra ba bzlog pa'i phyir rim bzhin du mtshon cha mang po zlog par byed pa dang mtshon cha sra ba zlog par byed pa'o/ /lus la sogs pa'i rnam par 'gyur ba ni sgyu rtsal lo//ri mo'i las la sogs pa ni bzo'i gnas so/ /dran pa dang ldan pa zhes bya ba la sogs pa ni go sla'o/ /mthar phyin par byed nus pa'i phyir sgrol nus pa'o/ /rgyu'i tshogs pa 'ga' zhig dang ldan pa las dgra bo la sogs pa nye bar lhags pas sems dang ngag dang lus kyi rnam par 'gyur ba bskyed pa yin pa'i phyir go rims bzhin du 'jigs pa chen po sdigs mor rung ba spu zing zhes byed ces smos so //'tsho ba thams cad dang bral ba nyid kyis zhi ba'i phyir nye zho med par bsgral ba'o/ /lus bde bar gnas pas rgyas pa'i phyir bde legs su bsgral ba'o/ /rdzas gcig la mngon par 'dod pas dgra bor 'brel pas na phyir rgol ba'o//mdza' bo ma yin pa'i phyogs su ltung bas mi mdza' ba'o/ /snying rje dang ldan pas na shin tu mnyes gshin pa'o/ /bshes gnyen dang ldan pas na mdzangs pa'o/ /de bzhin du de ci'i phyir zhe na zhes dogs pa bsu nas/ bcom ldan 'das 'di ltar zhes bya ba la sogs pa gsol to//lus dang sems kyi gnas kyi gnod pa dang bral bas ma snad ma smas par zhes pa'o/ /dpe nyid bstan nas dpes bstan pa'i don ni rab 'byor de bzhin du zhes bya ba la sogs pa gsungs so/ /de la sems can rnams la bde ba dang phrad pa dang / sdug bsngal dang bral ba dang /bde ba dang mi 'bral ba dang phan pa byed pa'i bsam pa 'khor dang bcas pa'i ting nge 'dzin 'byor pa ni go rims bzhin du byams pa dang snying rje dang dga' ba dang btang snyoms la gnas pa yin no/ /de bzhin du de ci'i phyir zhe na zhes dogs pa bsu nas/ 'di ltar zhes bya ba la sogs pa gsungs so//'di nyid gsal bar byed pa ni rab 'byor gang gi tshe zhes bya ba la sogs pa gsungs so/ /bdud kyi phyogs las shin tu 'das shing zhes bya ba 'dis ni bar chad kyi chos las yang dag par 'das pa'i thabs ston pa yin no/ /nye bar bsdu ba ni rab 'byor gang gi tshe zhes bya ba la sogs pa gsungs pa yin no//chos thams cad mnyam pa nyid du rnam par bsgoms pas/ mi gnas par gnas pa'i thabs la mkhas pa ston pas gsungs pa ni/ rab 'byor 'di lta ste dper na 'dab chags bya ni zhes bya ba la sogs pa'o/ /de la yang mi rten mi gnas so zhes bya ba ni nam mkha' ni med pa yin pa'i phyir de la blos mi rten cing lus kyis mi gnas pa yin no//de lta mod kyi 'on kyang de nyid du gnas pa yin no zhes mi gnas par gnas pa'i thabs bstan pa yin no/ /dpes bstan pa'i don ni rab 'byor de bzhin du byang chub sems dpa' gsungs pa yin no/ /smon lam grub pas sngon gyi smon lam gyi rjes su 'jug pa'i thabs ston pas gsungs pa ni/rab 'byor 'di lta ste dper na 'phong gi slob dpon zhes bya ba la sogs pa'o/ /'dod pa ma grub pa de srid du zhes bya ba 'dis ni smon lam gyis 'phangs pa'i rjes su 'jug pa'i thabs bstan pa yin no/ /dkyus ma'i don byang chub sems dpa' dang sbyar ba ni de bzhin du rab 'byor zhes bya ba la sogs pa gsungs pa yin no//bsgom pa'i lam dang khyad par gyi lam dag gis go rims bzhin du yongs su smin pa dang shin tu yongs su smin pa yin no/ /nye bar bsdu ba ni rab 'byor de lta bas na zhes bya ba la sogs pa gsungs pa yin no/ / dka' bar spyod pa thams cad shin tu goms pa nyid kyis thun mong ma yin pa'i thabs ston pa ni/ bcom ldan 'das byang chub sems dpa' zhes bya ba la sogs pa gsol pa yin no/ /legs par smras pa nyid kyis na rjes su zlos par mdzad pa ni rab 'byor de de bzhin no zhes bya ba la sogs pa gsungs pa yin no//thos pa dang bsam pa dang bsgom pa la sogs pa la go rims bzhin du stong pa nyid la spyod cing zhes bya ba la sogs par sbyar ro/ /de bzhin du de ci'i phyir zhe na zhes dogs pa bsu nas/ 'di ltar zhes bya ba la sogs pa gsungs pa yin no/ /don 'di nyid gzhung 'dzugs pa ni gang gi tshe byang chub sems dpa' sems dpa' chen po 'di ltar zhes bya ba la sogs pa gsungs pa yin no//snga ma bzhin du de ci'i phyir zhe na zhes dogs pa bsu nas gsungs pa ni/ 'di ltar gang de ni thabs la mkhas pa zhes bya ba la sogs pa gsungs pa yin no/ /des sems can thams cad ces bya ba la sogs pa nas mngon sum du mi byed pa'o zhes bya ba'i bar gyis ni/sems can thams cad yongs su mi gtong ba'i bsam pa'i mthus yang dag pa'i mtha' rtogs par mi byed pas thun mong ma yin pa'i thabs bstan pa yin no/ /chos thams cad dmigs su med pas ma chags pa'i thabs ston pa ni/ rab 'byor gzhan yang byang chub sems dpa' zhes bya ba la sogs pa gsungs so//sems can 'du shes pa zhes bya ba ni dngos po la mngon par zhen pas so/ /nyams par mi 'gyur zhes bya ba ni ro myang ba la ni dmigs pas nyams par 'gyur ba srid pa'i phyir/ byams pa la sogs pa dge ba'i chos thams cad las nyams par mi 'gyur ba'i tshig gis ro myang ba med pa'i thabs mtshon par byed pa yin no//de bzhin du de ci'i phyir zhe na zhes dogs pa bsu nas/ thabs mkhas pas yongs su gzung bas zhes bya ba la sogs pa gsungs pa yin no/ /rnam par thar pa'i sgo stong pa nyid kyis mi dmigs pa'i thabs kyi don ston pas gsungs pa ni/rab 'byor gzhan yang byang chub sems dpa' sems dpa' chen po 'di snyam du sems can 'di dag ni yun ring por chos su 'du shes pas dmigs pa la spyod cing zhes bya ba la sogs pa'o/ /stong pa nyid kyi rnam par thar pa'i sgo'i ting nge 'dzin la mnyam par 'jog cing zhes bya ba ni stong pa nyid kyi rnam par thar pa'i sgo'i ting nge 'dzin bsgom pa yongs su rdzogs par gyur pas mi dmigs pa'i thabs gsal bar bstan pa yin no//mtshan ma dmigs su med pa nyid kyis mtshan ma med pa'i thabs kyi don bstan pa ni/ rab 'byor gzhan yang byang chub sems dpa' chen po de 'di snyam du sems te/sems can 'di dag ni yun ring por mtshan ma'i 'du shes kyi zhes bya ba la sogs pa gsungs pa yin no/ /mtshan ma med pa'i rnam par thar pa'i sgo'i ting nge 'dzin la snyoms par zhugs te zhes bya ba ni/ rnam par thar pa'i sgo mtshan ma med pa'i ting nge 'dzin bsgom pa yongs su rdzogs pa rtogs pas mtshan ma med pa'i thabs bstan pa yin no//smon lam dmigs su med pas smon pa med pa'i thabs kyi don bstan pa ni/ rab 'byor gzhan yang byang chub sems dpa' sems dpa' chen po 'di snyam du sems te/ sems can 'di dag yun ring mor rtag par 'du shes pas zhes bya ba la sogs pa yin no/ / rnam par thar pa'i sgo smon pa med pa'i ting nge 'dzin la zhes bya ba ni rnam par thar pa'i sgo smon pa med pa'i ting nge 'dzin bsgom pa yongs su rdzogs par gyur pas smon pa med pa'i thabs bstan pa yin no/ /stong pa nyid la sogs pa ni nyan thos la sogs pa dang thun mong yin yang de thabs kyi khyad par du 'phags pa'i don ni/rab 'byor byang chub sems dpa' sems dpa' chen po gang la la zhes bya ba la sogs pa gsungs pa yin no/ /de la stong pa nyid la sogs pa rnam par thar pa'i sgo gsum las bzlog pa nyid kyis na dmigs pa la nye bar spyad par gyur cing zhes bya ba la sogs pa rnam pa gsum gsungs pa yin la/ril por 'du shes pa zhes bya ba la sogs pa ni go rims ji lta ba bzhin du 'di nyid bshad par mdzad pa yin no/ /stong pa nyid dam zhes bya ba la sogs pa ni bdun pa'i mtha' can yin no/ /'di skad du snying rje la sogs pa dang ldan pa'i phyir byang chub sems dpa' de lta bu'i ye shes kyi chos dang ldan pa stong pa nyid la sogs par lhung ba 'di ni gnas ma yin no zhes brjod pa yin no//dri ba mngon du btang ba can phyir mi ldog pa'i chos brjod pas phyir mi ldog pa'i rtags kyi don la dri ba ni rab 'byor byang chub sems dpa' chen po bla na med pa yang dag par rdzogs pa'i byang chub mngon par rdzogs par 'tshang rgya bar 'dod pas zhes bya ba la sogs pa gsungs so//ldog pa'i sgo nas ston pa ni/ gal te zhes bya ba la sogs pa gsungs so/ /de bzhin du de ci'i phyir zhe na zhes bya bas dogs pa bsu nas phyir mi ldog pa'i zhes bya ba la sogs pa gsungs pa yin te/ de la ma 'dres pa'i chos ni sems can thams cad yongs su mi gtong ba'o/ / thos pa dang bsam pa dang bsgom pa'i rang bzhin gyis shes pa bskyed par bya ba'i phyir go rims bzhin du lan mi ldon/ rab tu mi 'byed lung mi 'bogs pa yin te/ gang gi phyir rab tu mi shes dris kyang lung mi ston [(]len [,]lan [)]mi ldon zhing zhes bya ba dang go rims bzhin du sbyar bar bya'o/ /sa gang yin pa zhes bya ba ni thabs mkhas pa'o//rjes su 'gro ba'i sgo nas bstan par bya ba'i phyir zur gyis 'dri ba ni/ bcom ldan 'das byang chub sems dpa' zhes bya ba la sogs pa gsol pa yin no/ /de bzhin du lan 'debs par mdzad pa ni rab 'byor rnam grangs gang gis zhes bya ba la sogs pa gsungs pa yin no/ /de ltar shes shing zhes bya ba ni thabs mkhas pa dang sems can thams cad yongs su ni gtong ba la bslab par bya'o zhes rtogs pa'o//de ltar lan ldon ni zhes bya ba ni gzhan gyis dris pa la phyir mi ldog pa rtogs pa dang rjes su mthun par lung bstan pa dang / lung ma bstan pa dag gis phyir mi ldog pa yin pa dang phyir mi ldog pa ma yin pa nyid du nges par gzung bas phyir mi ldog pa'i rtags kyi thabs bstan par 'gyur ba yin no//yul thams cad shes pa nyid kyi yul tshad med pa la mkhas pa'i thabs kyi don ston pa ni bcom ldan 'das de'i slad du zhes bya ba la sogs pa gsol pa yin no/ /mi 'phrogs pa'o zhes bya ba ni byang chub sems dpa' de rnams mi 'phrogs pa nyid kyis na thabs kyi yul tshad med pa nyid du bstan par gyur pa yin no//des na de ltar yul dang sbyor ba dag dang ldan pa'i thabs la mkhas pa ni ji skad du brjod pa rnam pa bcu po nyid yin par gzung ngo / /de skad du yang / yul dang sbyor ba can 'di ni//dgra rnams las ni 'das pa dang / /mi shes ji bzhin shugs dang ni/ /thun mong ma yin mtshan nyid dang / /ma chags pa dang mi dmigs dang / /mtshan ma smon lam zad pa dang / /de yi rtags dang tshad med pa/ /thabs la mkhas pa rnam pa bcu/ /zhes gsungs pa yin no/ /yang thams cad mkhyen pa nyid gsum dang /rnam pa kun mngon par rdzogs pa rtogs pa'i khyad par gang zhig yin zhe na/ kha cig na re thams cad mkhyen pa nyid gsum ni ji skad bshad pa'i rnam pas rnam pa'i yul so sor nges pa yin la/ rnam pa kun mngon par rdzogs par rtogs pa ni rnam pa ma lus pa'i yul can yin no zhes 'dod do//gzhan dag ni thams cad mkhyen pa nyid gsum ni mtshan nyid pa nyid du rnam par bzhag la/ rnam pa kun mngon par rdzogs par rtogs pa ni sbyor ba pa yin no zhes zer ro/ /la la ni rnam pa kun mngon par rdzogs par rtogs pa ni mi mthun pa'i phyogs dang gnyen por bzhag pas rab tu phye ba yin la/ thams cad mkhyen pa nyid gsum ni rang bzhin gyis zhi ba'i rnam pa nyid yin pa'i phyir de lta bu ma yin no zhes 'chad do/ / shes rab kyi pha rol tu phyin pa'i bshad pa mngon par rtogs pa rgyan gyi snang ba las rnam pa kun mngon par rdzogs par rtogs pa rdzogs so // //rnam pa kun mngon par rdzogs par rtogs pa thob pa ni rtogs pa rab kyi mthar 'gro ba yin pa des na de ni rtse mo'i mngon par rtogs pa brjod par bya'o//de la re zhig gang gis 'di mtshon par 'gyur ba 'di'i rtags brjod par bya ba yin te/ de bas na shin tu goms pa'i phyir rmi lam gyi gnas skabs na yang chos thams cad rmi lam dang 'dra ba la sogs par blta ba'i rtags dang po bstan pa'i don du/yang rab 'byor gal te byang chub sems dpa' sems dpa' chen po rmi lam gyi nang na yang zhes bya ba la sogs pa gsungs so/ /'di skad du byang chub sems dpa'i rnal 'byor gyi chos de lta bu'i thabs dang shes rab kyis yongs su zin pa bsgom pa rtse mor gyur pa gang yin pa rmi lam gyi nang du yang 'di'i rnal 'byor dang lhag mthong yid la byed pa ni/de lta bur gyur pa mngon sum du mi byed pa sems can gyi khams la ltos nas 'jug pa yin no zhes brjod pa yin no/ /gnyis pa nyan thos la sogs pa'i sa la 'dod pa'i sems mi bskyed pa'i rtags kyi don ni/ rab 'byor gzhan yang byang chub sems dpa' zhes bya ba la sogs pa gsungs pa yin te/de la sngon med pa thob par mngon par 'dod pa ni 'dod pa'o/ /thob pa dang ma bral ba 'dod pa ni phan yon gyi sems bskyed pa'o/ /gsum pa de bzhin gshegs pa mthong ba la sogs pa'i rtags kyi don ni/ 'khor brgya stong phrag du ma dang zhes bya ba la sogs pa gsungs pa yin no//bzhi pa sangs rgyas kyi rdzu 'phrul gyi rnam par 'phrul ba dmigs pa'i rtags kyi don ni bdag nyid nam mkha' la mngon par 'phags te zhes bya ba la sogs pa yin no/ /lnga pa rmi lam lta bu'i rtags kyi don ni rmi lam na yang mi skrag mi dngang zhes bya ba la sogs pa gsungs pa yin no//drug pa rang gi sangs rgyas kyi zhing du ngan song spong ba rjes su dran pa'i rtags kyi don ni rmi lam nang na dmyal ba'i sems can rnams mthong ba na zhes bya ba la sogs pa gsungs so/ /ngan song rnam par dag pa'i mtshan nyid ces bya ba 'di ci zhig yin zhes 'dri ba ni/ rab 'byor de la byang chub sems dpa' zhes bya ba la sogs pa gsungs pa yin no//lan btab pa ni/ rab 'byor gal te byang chub sems dpa' zhes bya ba la sogs pa gsungs pa yin no/ /bdun pa grong khyer la sogs pa tshig pa rab tu zhi bar byed pa'i byin gyi rlabs grub pa'i rtags kyi don rjes su 'gro ba'i sgo nas ston pa ni/ rmi lam na grong khyer tshig par gyur pa las zhes bya ba la sogs pa gsungs pa yin te/chung ngu dang 'bring dang chen po'i dbye bas bsal bar bya ba'i phyir go rims bzhin du zhi bar gyur cig med par gyur cig bsil bar gyur cig ces bya bar sbyar ro/ /ldog pa'i sgo nas kyang bstan pa ni gal te nye bar ma zhi zhing zhes bya ba la sogs pa gsungs pa yin no//gnyi ga ltar nges par bstan pa ni rab 'byor gal te mes tshig pa de zhes bya ba la sogs pa gsungs pa yin te/ las rnam par smin par 'gyur te zhes bya ba ni dam pa'i chos spong ba mthong ba'i chos la myong bar 'gyur ba dang rjes su mthun pa'i las nyid kyi bden pa'i byin gyi rlabs ma grub pas yid mi bde ba la sogs pa nyams su myong ba yin no//de nyid las zhes bya ba ni skye ba gzhan gyis bsdus pa las so/ /brgyad pa gnod sbyin la sogs pa mi ma yin pa med par byed pa'i bden pa'i tshig grub par byed pa'i rtags kyi don ldog pa'i sgo nas bstan pa ni rab 'byor gzhan yang rnam pa gang dag dang zhes bya ba la sogs pa gsungs pa yin te/de la zin par gyur pa ni rang nyid zhugs pa yin pa'i phyir ro/ /babs par gyur na zhes bya ba ni nus pa'i shugs kyis lus la sogs pa'i 'gyur ba bskyed pa yin pa'i phyir ro/ /rnam pa kun mngon par rdzogs par rtogs pa la sogs pa mngon par rtogs pa rnam pa lngas/dngos po'i don thams cad thugs su chud pa yin pa'i phyir go rims bzhin du ma mkhyen pa 'am zhes bya ba la sogs pa tshig lnga po med do zhes bya ba dang sbyar ba rnams yin no/ /rjes su 'gro ba'i sgo nas kyang ston pa ni rab 'byor yang gal te byang chub sems dpa' sems dpa' chen pos zhes bya ba la sogs pa gsungs pa yin no// shes rab kyi pha rol tu phyin pa mngon par rtogs pa rgyan gyi snang ba las/ thabs mkhas pa la spyad pa'i le'u zhes bya ste nyi shu pa'o// //bdud kyi byin gyi rlabs kyis song ba yin na ni 'di rtags brgyad pa ma yin no zhes gsungs pa ni rab 'byor gzhan yang de la zhes bya ba la sogs pa'o//de kho na bzhin du de ci'i phyir zhe na zhes dogs pa bsu nas der byang chub sems dpa' zhes bya ba la sogs pa gsungs pa yin no/ /theg pa la zhugs nas ring po ma lon pa de'i gam na shin tu stobs dang ldan pa shin tu gzi brjid dang ldan pa'i bdud sdig can zhes bya ba la/ring po ma lon pa ni rtse mo'i mngon par rtogs pa la 'phral du zhugs pa'o/ /shin tu mthu dang ldan pa dang zhes bya ba ni rang gi ngo bo che ba nyid yin pa'i phyir ro/ /shin tu gzi brjid dang ldan pa zhes bya ba ni 'bras bu rdzogs par byed pa'i phyir ro/ / brnyas par byed de zhes bya ba ni gus par mi byed pa'i phyir ro/ /rngan can byed ces bya ba ni bzhad gad kyi gnas su byed pa'i phyir ro/ /bsting bar byed pa zhes bya ba ni lhag par smra zhing brjod pa'i phyir ro/ /'phya bar byed ces bya ba ni smod pa'i phyir ro/ /smod par byed ces bya ba ni tshul dang mi mthun pa brjod pa'i phyir ro//nga rgyal skyed par 'gyur nga rgyal yang dag par skyed par 'gyur zhes bya ba ni/ nga rgyal skyed pa dang / khyad par du sgrub par byed pa yin pa'i phyir ro/ /che ba'i nga rgyal dang / nga rgyal las kyang nga rgyal dang / mngon pa'i nga rgyal la de kho na bzhin gnyis su phye bas nga rgyal 'phel bar byed par 'gyur/ nga rgyal yang dag par 'phel bar byed par 'gyur/ nga rgyal ston par byed par 'gyur/ nga rgyal nye bar ston par byed par 'gyur/ nga rgyal rgyas par byed par 'gyur/ nga rgyal nye bar rgyas par byed par 'gyur zhes bya ba'i tshig drug dang rim pa bzhin sbyar bar bya'o/ /nga rgyal 'byung bar byed par 'gyur ro zhes bya ba ni log pa'i nga rgyal byed pa'i phyir ro//de la nga rgyal dang zhes bya ba la sogs pa chung ngu bas bdag che ba'am/ mtshungs pa dang mtshungs so snyam du sems khengs pa ni nga rgyal lo/ /mtshungs pa bas kyang bdag che ba'am che ba dang mtshungs so snyam pa mi che ba'i nga rgyal lo/ /che ba bas bdag che'o snyam pa'i nga rgyal las kyang nga rgyal lo//rtogs pa ma thob pa la thob par mngon par sems pa ni mngon pa'i nga rgyal lo/ /yon tan dang ldan pa ma yin na yang nga ni yon tan dang ldan no snyam pa ni log pa'i nga rgyal lo/ /thams cad mkhyen pa nyid rgyang ring du byed par 'gyur zhes bya ba la sogs pas ni 'di skad du/ nga rgyal gyis ni kun mkhyen gsum gyi bdag nyid can thams cad mkhyen pa nyid rgyang ring du byed par 'gyur/ lhag pa'i nga rgyal dang nga rgyal las kyang nga rgyal dang mngon pa'i nga rgyal gyis ni rim pa bzhin du sangs rgyas kyi ye shes bla na med pa rnam pa kun mngon par rdzogs par rtogs pa dang / rang 'byung gi ye shes rtse mo'i mngon par rtogs pa dang /thams cad mkhyen pa'i ye shes bla na med pa mthar gyis pa'i mngon par rtogs pa rgyang ring por byed par 'gyur la/ log pa'i nga rgyal gyis ni bla na med pa yang dag par rdzogs par byed pa'i byang chub skad cig ma gcig la mngon par rdzogs par byang chub pa sngon du 'gro ba can chos sku'i mngon par rtogs pa rgyang ring du byed par 'gyur zhes brjod pa yin no//mi bsnyen zhes bya ba la sogs pa tshig gsum ni thos pa la sogs pa'i shes pa bskyed pa'i phyir ram/ kun brtags dang gzhan dbang dang yongs su grub pa'i rang gi ngo bo yongs su shes par bya ba'i don du go rims bzhin du sbyar bar bya'o//zhar la bdud kyi las kyi dbye ba ston pa las bdud kyi las chung ngu'i don ni/ rab 'byor gzhan yang zhes bya ba la sogs pa gsungs pa yin te/ ming ston pa dang zhes bya ba ni de'i ming brjod pas so/ /ming byin gyis brlabs pas kyang zhes bya ba ni ma la sogs pa'i ming ston pas so//de bzhin du de ci'i phyir zhe na zhes dogs pa bsu nas/ khyod kyi ming ni 'di zhes bya zhes bya ba la sogs pa gsungs so/ /de la grong las rgyang grags tsam gyis yongs su bcad par gnas pas na dgon pa'o/ /bsod snyoms len par dam bcas pa nyid kyis na bsod snyoms pa'o//srang bar gyi ras kyi dum bu las gos su byed pa nyid kyis na phyag dar khrod pa'o/ /'bras chan la sogs pa'i zas ma lus par blangs nas zas la longs spyod pas na zas phyis mi len pa'o/ /stan gcig la 'dug nas ji ltar dga' bar yongs su longs spyod pas na stan gcig pa'o/ / ji ltar bting ba'i stan la sogs pa la nyal bas na gzhi ji bzhin pa'o/ /snam sbyar la sogs pa chos gos gsum tsam zhig 'chang ba nyid kyis na chos gos gsum pa'o/ /dur khrod du gnas pa nyid kyis na dur khrod pa'o/ /shing drung pa yang de bzhin no/ /mtshan mo 'dug pas gnas pas na cog pu pa'o//steng g.yogs med par gnas pas na bla gab med pa'o/ /bal gyi gos la sogs pa 'chang bas na phying pa pa'o/ /lhag par mngon par 'dod pa med pas na 'dod pa chung ba'o/ /nyung zad tsam gyis mgu bas na chog shes pa'o/ /ltung ba med pa nyid kyis na rab tu dben pa'o/ /'dod pa chung ba nyid kyis na rkang pa dang bral ba'o//snga ma bzhin du de ci'i phyir zhe na zhes dogs pa bsu nas/ /'di ltar zhes bya ba la sogs pa gsungs so/ /bdud kyi las 'bring gi don ni de la bdud sdig can 'di skad du zhes bya ba la sogs pa gsungs so/ /de bzhin du de ci'i phyir zhe na zhes dogs pa bsu nas/'di ltar khyod la yon tan 'di lta bu dag yod do zhes bya ba la sogs pa gsungs so/ /bdud kyi las chen po'i don ni rab 'byor de yang bdud sdig can res 'ga' ni zhes bya ba la sogs pa gsungs pa yin no/ /snga ma bzhin du de ci'i phyir zhe na zhes dogs pa bsu nas/ 'di ltar khyod la phyir mi ldog pa'i zhes bya ba la sogs pa gsungs pa yin no/ /yang dag pa nyid yin na ni ltar yang 'dir bdud kyi las yin zhe na zhes rtogs pa la/ rab 'byor yang ngas phyir mi ldog pa'i zhes bya ba la sogs pa gsungs pa yin no/ /de bzhin du de ci'i phyir zhe na zhes dogs pa bsu nas/phyir mi ldog pa'i zhes bya ba la sogs pa gsungs pa yin no/ /gtso bo sangs rgyas nyid kyi gnas skabs kyi ming lung bstan pas bdud kyi las su 'gyur ba'i don ni rab 'byor gzhan yang zhes bya ba la sogs pa gsungs pa yin no/ /de la sbyor ba la sogs pa'i gnas skabs su go rims bzhin du rjes su 'brangs la/rjes su brtags shing rjes su dpyad pa zhes bya ba dang sbyar ro/ /kha cig ni thos pa la sogs pa'i shes rab nyid kyis so zhes zer ro/ /de gnyi ga la brtags nas zhes bya ba ni des bsams pa gang yin pa dang / bdud kyis bstan pa gang yin pa gnyis mi mtshungs shing mi mnyam mo zhes brtags nas/nges par sems par 'gyur ro zhes bya bar sbyar ro/ /de bzhin du bden pa nyid yin na ji ltar bdud kyi las yin zhes rtog pa dang / rab 'byor ngas phyir mi ldog pa'i zhes bya ba la sogs pa gsungs so/ /de ltar ming bstan pas byang chub sems dpa' rnams la brnyas par byed pas byang chub rnyed par dka' ba ni/yang gal te de yun ring zhing shin tu yun ring bar zhes bya ba la sogs pa gsungs so/ /sbyangs shing dul bar gyur nas zhes bya ba ni/ sdig pa bshags pas bdag nyid dri ma med par byas shing nga rgyal med par gyur nas zhes bya ba'i tha tshig go/ / 'di nyid gsal bar byed pa ni gal te de dge ba'i bshes gnyen dag la brten cing zhes bya ba la sogs pa gsungs pa yin no/ /de la rnam par sun 'byin pa'i gnyen pos rnam par smod par 'gyur ba'o/ /kun tu spyod pa'i gnyen pos byang bar byed par 'gyur ba'o//rang dang gzhan la ltos pa'i ngo tsha bas gnod par 'gyur ba'o/ / sor chud par byed pa'i stobs kyis ni so sor 'chags par 'gyur ba'o/ /dus yun ring pos thob par bya ba nyid kyis na rnyed par dka' bar 'gyur ba'o/ /de bzhin du de ci'i phyir zhe na zhes dogs pa bsu nas/ rab 'byor byang chub sems dpa' sems dpa' chen po'i zhes bya ba la sogs pa gsungs so//gang gi phyir rlom sems kyi ltung ba'i gnas ni gzhan la brnyas pas kun nas bslang ba yin pas na/ gang gis byang chub rnyed dka' bar gyur pa de tsam du lci ba yin gyi gtan med pa ni ma yin no zhes bya ba'i don to//'di ltar gang dag gnyen po'i phyogs nye ba na 'grib pa'i chos can yin zhes pa ni stobs dang ldan pa'i gnyen pos gtan zad par srid pa zin te/ dper na gser gyi g.ya' la sogs pa bzhin no/ /dam pa'i chos kyi sgrib pa la sogs pa thams cad kyang ji skad du bshad pa'i chos can yin no zhes bya ba'i rigs pas rlom sems kyi ltung ba'i gnas ni ma lus pas zad par 'gyur ba yin no//gang yang / las rnams bskal pa brgyar yang ni/ /zhes bya ba la sogs pa gsungs pa de ni/ gnyen po'i phyogs bsgom pa med na zhes bya bar shes par bya ste/ de lta ma yin na rigs pa dang 'gal ba dang /mdo sde mang po dang 'gal bar 'gyur ro/ /nges par myong bar gsungs pa yang 'di nyid kyis bshad pa yin no/ /ma nges par gsungs pa ni gnyen po'i phyogs ma bsgoms su zin kyang 'bras bu res 'ga' ba nyid las yin par nges par bya'o/ /rlom sems kyi ltung ba'i gnas ni lci ba nyid yin par dpes gsal bar byed pa ni/rab 'byor 'di lta ste dper na zhes bya ba la sogs pa gsungs pa yin te/ rtsa ba'i ltung ba bzhi ni zhes bya ba gsod pa dang / rku ba dang / 'khrig par spyod pa dang / brdzun du smra ba'i ming can ltung ba'i gtso bo dag yin no/ /dge slong gi sdom pa las nyams pas na dge slong ma yin pa'o//dge sbyong nyid med par gyur pa nyid kyis na dge sbyong ma yin pa'o/ /dge bsnyen gyi dngos po dang bral bas na shAkya'i sras po ma yin no/ /skye ba gzhan dag tu yang rtogs pa'i skal ba can ma yin pa nyid kyis na nga rgyal gyis sems bskyed pa'i ltung ba 'di ni chos lci ba yin no//shin tu lci ba nyid kyi phyir gsungs pa ni 'di lta ste zhes bya ba la sogs pa'o/ /lnga po de dag pas kyang zhes bya ba ni de bzhin gshegs pa la ngan sems kyis khrag phyung ba la sogs pa las so/ /ches lci ste zhes bya ba ni nga rgyal dang mtshungs par ldan pa'i sems bskyed pa'i grangs snyed du dmyal bar gnas pa nyams su myong ba'i phyir ro//de ltar ming ston pa'i bdud kyi las bstan nas dben pa'i yon tan gyis kyang bdud kyi las chung ngur gyur pa'i don ni/ rab 'byor gzhan yang bdud sdig can zhes bya ba la sogs pa gsungs so/ / de la nags 'dabs ni nags kyi khyad par ro/ /phyis 'gyod pa nyid kyis na/ ji tsam na ting nge 'dzin ma gtogs pas lus dang ngag dang yid kyi las 'bring gi don ni rab 'byor gzhan yang zhes bya ba la sogs pa gsungs pa yin te/ dben pa 'di zhes bya ba ni shes rab kyi pha rol tu phyin pa dang thabs la mkhas pa ni bdag nyid can no//rten pa dang zhes bya ba la sogs pa ni 'dzin pa chung ngu dang 'bring dang chen po'i dbye bas dben pa dang dgon pa la sogs pa der go rims bzhin du bsten pa dang zhen pa dang chags pa ste/ de nyid kyis bdag la bstod pas nga rgyal du 'gyur ba yin no/ /snga ma bzhin du de ci'i phyir zhe na zhes dogs pa bsu nas/rab 'byor zhes bya ba la sogs pa gsungs so/ /dben pa 'dis zhes bya ba ni dgon par 'dug pa la sogs pa'i dben pa des gnas pa ni byang chub sems dpa'i dben pa thabs la mkhas pa chen po la sogs pa de la mi snang ngo / /bdud kyi las chen po'i don ni de ltar bdud sdig can de 'ongs nas zhes bya ba la sogs pa gsungs so//'dres par gnas pa zhes bya ba ni nyan thos la sogs pa'i yid la byed pa dang ldan pa'i phyir ro/ /kun tu 'dres par gnas pa zhes bya ba ni theg pa chen po las phyi rol du gnas nyid yin pa'i phyir ro//byang chub sems dpa' gzhan dag gis reg par bya ba ma yin pa'i phyir byang chub sems dpa' gdol ba'o/ /rang dang gzhan gyi byang chub kyi sems sun 'byin pa yin pas na byang chub sems dpa' sun 'byin pa'o/ /tshig tsam gyis byang chub sems dpa' nyid du khas 'che bar byed pas na byang chub sems dpa'i gzugs brnyan no//byang chub sems dpa'i chos dang bral bas na byang chub sems dpa' bcos bu'o/ /byang chub sems dpa'i dge 'dun nye bar 'joms pas na byang chub sems dpa'i sred pa'o/ /rung ba ma yin pa la nye bar longs spyod pas na byang chub sems dpa' rkun pa'o //de bzhin du de ci'i phyir zhe na zhes dogs pa bsu nas/ gang zag de lta bu ni zhes bya ba la sogs pa gsungs so/ /sdig pa'i chos dang ldan pas na rnam par ma dag pa'i chos can no/ /dge ba'i bshes gnyen dang bral bas na slob dpon med pa'o/ /gzhan du smra ba nyid yin pa'i phyir 'phags pa'i chos dang mi ldan pa'o//dgu pa rang gi mngon par shes pas pha rol gnon pa dge ba'i bshes gnyen bsten pa'i rtags kyi don ni/ yang rab 'byor zhes bya ba la sogs pa gsungs pa yin no/ / shes rab kyi pha rol tu phyin pa'i bshad pa mngon par rtogs pa'i rgyan gyi snang ba las/bdud kyi las kyi le'u zhes bya ste nyi shu rtsa gcig pa'o// // rtags dgu pa nyid ston pa ni de nas yang bcom ldan 'das kyis zhes bya ba la sogs pa gsungs pa yin no/ /de la pha rol tu phyin pa drug ni ston pa'o zhes bya ba ni 'bras bu'i gnas skabs su ni pha rol tu phyin pa drug ston pa'o//rtogs pa'i lam dang dang po yang dag par ston pa yin pa'i phyir snang ba thob pa'i gnas skabs su ni lam mo/ /snang ba lhag pa'i ngo bo nyid yin pa'i phyir snang ba mched pa'i gnas skabs su ni snang ba'o/ /gzung ba dang 'dzin pa med pa'i de kho na nyid kyi phyogs gcig la zhugs pa'i phyir de kho na nyid kyi phyogs gcig la khyab pa'i gnas skabs su ni sgron ma'o//bar chad med pa'i de kho na nyid kyi ye shes skyes pas bar chad med pa'i ting nge 'dzin gyi gnas skabs ni 'od do/ /nye bar 'tshe ba thams cad bzlog pa yin pa'i phyir sa dang po la ni skyob pa'o/ /de'i tshe bsam pa dang sbyor ba don yod pa nyid kyis gzhi la gnas pas na gnyis pa la ni skyabs so//kha na ma tho ba med pa'i dga' ba'i gzhi nyid yin pa'i phyir gsum pa la ni gnas so/ /'phags pa'i mchog nyid du 'gro ba'i gzhi la gnas pa yin pas na bzhi pa la ni dpung gnyen no/ /khams gsum las yongs su chad pa nyid yin pa'i phyir lnga pa la ni gling ngo //shes rab kyi pha rol tu phyin pa'i ngo bo nyid can yin pa'i phyir dgu pa la ni rtogs pa'i phyir gnas pa'o/ /ye shes kyi pha rol tu phyin pa la lhag par spyod pa nyid kyis na bcu pa la ni bla na med pa yang dag par rdzogs pa'i byang chub thob par bya ba'i phyir gnas par 'gyur ba'o zhes bya ba ni don gyi dbye ba yin no//mi 'da' ba'i rgyu longs spyod dang khyim la chags pa'i gnyen por ni go rims ji lta ba bzhin du sbyin pa dang tshul khrims kyi pha rol tu phyin pa yin no/ /'khor ba pa'i sems can rnams kyi log par bsgrub pa las skyes pa'i sdug bsngal dang dge ba'i phyogs la yun ring por sbyor ba dag gis yongs su skyo ba'i gnyen por ni grangs ji lta ba bzhin du bzod pa dang brtson 'grus kyi pha rol tu phyin pa dag go//chud za ba'i rgyu rnam par mi g.yeng ba dang shes rab 'chal ba'i gnyen po ni go rims bzhin du bsam gtan dang shes rab kyi pha rol tu phyin pa yin te/de ltar na mi mthun pa'i phyogs dang gnyen po rnam par gzhag pas grangs drug tu gzhag pa yin no/ /de bzhin du rnam par g.yeng ba'i rgyu pha rol tu phyin pa gcig grub la mi g.yeng ba gang yin pa la brten nas chos kyi de kho na nyid ji lta ba bzhin du rtogs pa'i phyir sangs rgyas kyi chos rnams yang dag par 'grub ste/de ltar sangs rgyas kyi chos thams cad yang dag par 'grub pa'i gzhi'i gnas kyi grangs su rnam par gzhag pa yin no/ /de bzhin du sbyin pa'i pha rol tu phyin pas sems can rnams la phan 'dogs pa dang tshul khrims kyi pha rol tu phyin pas gnod pa mi byed pa dang bzod pa'i pha rol tu phyin pas gnod pa byed pa la bzod pa dang brtson 'grus kyi pha rol tu phyin pas bya ba byed de 'go ba'i phyir sems can yongs su smin par rung bar byas nas bsam gtan gyi pha rol tu phyin pas ni sems g.yeng ba rnams mnyam par gzhag pa'i phyir dang /shes rab kyi pha rol tu phyin pas ni mnyam par gzhag pas rnam par grol bar bya ba'i phyir gdams pa las yongs su smin par 'gyur ba yin te/ de ltar na sems can yongs su smin pa dang rjes su mthun pa las kyang grangs 'di ltar rnam par gzhag par blta bar bya'o//de bzhin du de ci'i phyir zhe na zhes dogs pa bsu nas rab 'byor shes rab kyi pha rol tu phyin pa ni zhes bya ba la sogs pa gsungs so/ /dge ba'i bshes gnyen gyi don nyid gsal bar byed par rab 'byor 'das pa'i dus kyi zhes bya ba la sogs pa gsungs pa yin no/ /snga ma bzhin du de ci'i phyir zhe na zhes dogs pa bsu nas rab 'byor pha rol tu phyin pa zhes bya ba la sogs pa gsungs so//sangs rgyas kyi chos ji snyed yod pa ste zhes bya ba 'di rnam pa thams cad mkhyen pa nyid la sogs pa mngon par rtogs pa brgyad kyi rim pas rnam par dbye bar bya ba'i phyir sangs rgyas kyi ye shes dang zhes bya ba la sogs pa tshig brgyad smos pa yin no//nye bar bsdu ba ni rab 'byor de lta bas na zhes bya ba la sogs pa gsungs pa yin no/ /bcu pa rnam pa thams cad du shes rab kyi pha rol tu phyin pa la slob pa'i rtags kyi don ni rab 'byor pha rol tu phyin pa drug po 'di dag la slob par 'dod pa'i zhes bya ba la sogs pa gsungs pa yin no//de bzhin du de ci'i phyir zhe na zhes dogs pa bsu nas shes rab kyi pha rol tu phyin pa 'di ni zhes bya ba la sogs pa gsungs te mthong ba dang bsgom pa dang khyad par dang mi slob pa'i lam thob par byed pa yin pas go rims bzhin du 'dren pa'o zhes bya ba la sogs pa tshig bzhi smos pa yin no//dang por bskyed pa'o/ /phyis yang dag par 'phel bar byed pa yin pas na ma ma'o/ /snga ma bzhin du ci'i phyir zhe na zhes dogs pa bsu nas shes rab kyi pha rol tu phyin pa dang bral na zhes bya ba la sogs pa gsungs so/ /bcu gcig pa thams cad la mngon par zhen pa med pa'i rtags kyi don ni bcom ldan 'das zhes bya ba la sogs pa gsol pa yin no//chags pa med pa'i mtshan nyid do zhes bya ba ni mngon par zhen pa med pa'i ngo bo nyid do/ /tshig lhur len pa nyid kyis na bcom ldan 'das chags pa ma mchis pa'i mtshan nyid gang gis zhes bya ba la sogs pa gsol pa yin no//rigs pa mtshungs pa nyid yin pa'i phyir rab 'byor de de bzhin no zhes bya ba la sogs pa gsungs so/ /de bzhin du de ci'i phyir zhe na zhes dogs pa bsu nas rab 'byor chos thams cad ni zhes bya ba la sogs pa gsungs te/ de rgyu dang 'bras bu'i ngo bo dang bral ba'i ngo bo nyid yin pa'i phyir go rims bzhin du dben pa dang stong pa'o zhes kha cig gis bshad do//stong pa nyid yin na kun nas nyon mongs pa dang rnam par byang ba med par 'gyur ro zhes gsol pa ni bcom ldan 'das gal te zhes bya ba la sogs pa'o/ /chos de dmigs su ma mchis na zhes bya ba ni stong pa nyid yin pa'i phyir ro zhes bsams pa'o//bshad pa 'di'i don zhes bya ba ni kun nas nyon mongs pa la sogs pa yod par mi 'thad pa'i phyir na dben pa dang stong par bshad pa'i don to/ /slar dris pas lan btab pa'i don du rab 'byor 'di ji snyam du sems zhes bya ba la sogs pa gsungs so//kun nas nyon mongs pa dang / rnam par byang ba rab tu shes so zhes bya ba ni 'di skad du chos thams cad stong pa nyid yin du zin kyang kun rdzob tu las dang 'bras bu 'brel par yod pa nyid yin pa'i phyir ji ltar mngon par zhen pa de ltar kun nas nyon mongs par 'gyur zhing ji ltar mngon par zhen pa med pa de ltar rnam par byang ba yang snang zhing shes so zhes brjod pa yin no//bcu gnyis pa sangs rgyas kyi byang chub la nye bar gyur pa zhes bya ba'i rtags kyi don ni bcom ldan 'das byang chub sems dpa' sems dpa' chen po de ltar spyod na zhes bya ba la sogs pa gsungs pa yin no//de bzhin du de ci'i slad du zhe na zhes dogs pa bsu nas bcom ldan 'das sangs rgyas nyid dang zhes bya ba la sogs pa gsungs te me long lta bu la sogs pa'i ye shes bzhi'i dbye bas sangs rgyas nyid dang zhes bya ba la sogs pa'i tshig bzhi smos pa yin no/ / de kho na bzhin du rjes su brjod zhes pa ni/ rab 'byor de de bzhin no zhes bya ba la sogs pa'o/ /rtse mo mngon par rtogs pa'i rtags ni 'di dag tsam kho nar shes par bya'o/ /de skad du yang / rmi lam na yang chos rnams kun/ /rmi lam lta bur lta la sogs/ /rtse mor phyin par sbyor ba'i rtags//rnam pa bcu gnyis dag tu bzhed/ /ces gsungs pa yin no/ /de ltar rtags kyis mtshon pa'i rnam par 'phel ba rnam pa du zhig yod ce na/ dang por 'dzam bu'i gling pa la sogs pa'i sems can rnams de bzhin gshegs pa la mchod pa la sogs pa'i bsod nams pas lhag pa'i rnam par 'phel ba ston pa ni rab 'byor yang gal te 'dzam bu'i gling na zhes bya ba la sogs pa gsungs pa yin te/'dzam bu'i gling smos pa ni nye bar mtshon pa tsam du zad de/ stong gsum gyi stong chen po'i 'jig rten gyi khams kyi sems can rnams kyang 'dir gzung ste/stong phrag nyi shu lnga pa las de skad du smos pa'i phyir/ de bzhin du de ci'i phyir zhe na zhes dogs pa bsu nas rab 'byor ji lta ji ltar zhes bya ba la sogs pa gsungs so/ /sbyin pa'i gnas su 'gyur ro zhes bya ba ni bsod nams kyi zhing nyid du 'gyur ba'o/ /'di dag nyid ga las snyam pa'i dogs pa de ci'i phyir zhe na zhes bsu nas de ni 'di ltar zhes bya ba la sogs pa gsungs pa ste/ma gtogs par zhes bya ba ni yongs su dor ba'o/ /snga ma bzhin du de ci'i phyir zhe na zhes dogs pa bsu nas de bzhin gshegs pa ni zhes bya ba la sogs pa gsungs te/ gang zag zla med pa'o zhes bya ba la sogs pa'i tshig gsum ni mngon sum dang rjes su dpag pa dang lung gi don thugs su chud pa yin pa'i phyir ro/ /gzhan dag ni tshad ma gsum gyis ston par mdzad pa'i phyir ro zhes zer ro/ /rnam pa gzhan dag gis kyang bsod nams kyi phung po zil gyis gnon pa ston pa ni rab 'byor ji ltar na zhes bya ba la sogs pa gsungs so//gsad par bya ba lta bur zhes bya ba ni gsad par 'os pa lta bur ro/ /dal ba chud gzon pa zhes bya ba ni sdig pa la spyod pas mi nyid la sogs pa'i dngos po las nyams par byed pa'o/ /sbyin pa po zhes bya ba ni mngon sum du ster bar byed pa'o//sbyin pa'i bdag po rnams zhes bya ba ni yang dag par sbyin pa la 'dzud par byed pa'o/ /rnam par sbyong zhing zhes bya ba ni yang dag pa'i 'bras bu dang ldan par byed do zhes bya ba'i tha tshig go/ /yid la byed pa 'dis zhes bya ba ni sems can rnams la lam ston par 'dod pa la sogs pa'i ngo bo nyid kyis so//de bzhin du de ci'i phyir zhe na zhes dogs pa bsu nas gang zhig 'di dag shes par bya ba zhes bya ba la sogs pa gsungs te de nyid ces bya ba ni thabs la mkhas pa chen pos yum la dmigs pa de nyid sems can la phan pa'i yid la byed pa yin no/ /ji ltar 'di zhes bya ba ni byams pa la sogs pa'i rang bzhin can gyi yid la byed pas so//zad par 'gyur ba ni 'da' bar 'gyur ba'o/ /gnyis pa khyad par du shes rab kyi pha rol tu phyin pa yid la byed pa'i rang bzhin gyi rnam par 'phel ba'i don ni rab 'byor 'di lta ste dper na nor bu rin po che shes pa la gnas pa'i zhes bya ba la sogs pa gsungs te/rin po che yongs su brtag pa'i bstan bcos la mkhas pa'i phyir de shes pa la gnas pa yin no/ /nor bu rin po che'i rigs shes pas zhes bya ba ni mtshon cha la yongs su byang ba'o/ /de 'am de ma yin pa gzhan rnyed par 'gyur gyi bar du zhes bya ba la de 'am de zhes bya ba ni shes rab kyi pha rol tu phyin pa'o//de ma yin pa gzhan zhes bya ba ni ting nge 'dzin gyi rgyal po'i mdo la sogs pa'i chos nyid thob par gyur pa'o/ /la la ni glegs bam la ltos te de 'am gzhan zhes bya ba yin no zhes zer ro/ /stong pa nyid yin pa'i phyir ma bral ba nyid du mi 'thad do zhes gsol pa ni bcom ldan 'das 'di ltar zhes bya ba la sogs pa'o//lan ni rab 'byor gal te zhes bya ba la sogs pa gsungs pa yin no/ /de bzhin du de ci'i phyir zhe na zhes dogs pa bsu nas rab 'byor zhes bya ba la sogs pa gsungs so/ /'di skad du gang gi phyir shes rab kyi pha rol tu phyin pa ni stong pa nyid yin te de kho na nyid du rnam par 'phel ba dang 'grib pa dang bral ba yin pa de bas na chos thams cad ni stong pa'o zhes dmigs pa'i yid la byed pa yang stong pa nyid du lhag par mos par gyur pa na phyin ci ma log pa nyid yin pa'i phyir shes rab kyi pha rol tu phyin pa yid la byed pa dang ma bral ba yin no zhes brjod par 'gyur ro//gsum pa khyad par du 'phags pa mi skye ba'i chos la bzod pa thob pa'i rang bzhin gyi rnam par 'phel ba'i don du zhu bar byed pas bcom ldan 'das gal te zhes bya ba la sogs pa gsol pa yin no/ /lan ni rab 'byor gzhan yang byang chub sems dpa' zhes bya ba la sogs pa gsungs pa yin no//byang chub kyi phyir yang dag par sgrub cing zhes bya ba ni 'di skad du/ gang phyir shes rab kyi pha rol tu phyin pa la 'phel ba dang 'grib pa bkag pa ste / de bzhin du byang chub sems dpa' pa la don dam par 'phel ba dang 'grib pa bkag pa de bas na sgyu ma lta bur bsgoms pas kun rdzob tu bsod nams dang ye shes kyi tshogs yang dag par sogs par byed pa dang /bla na med pa yang dag par rdzogs pa'i byang chub tu mngon par rdzogs par 'tshang rgya ba yin te/ de lta ma yin te 'phel ba dang 'grib pa yod na ni phyin ci log kho na yin pas de ltar mi 'gyur ro zhes brjod pa yin no//'di nyid kho nar de kho na nyid yin no zhes gsungs pa ni rab 'byor gal te de skad du bshad pa la zhes bya ba la sogs pa'o/ /byang chub sems dpa' sems dpa' chen po de shes rab kyi pha rol tu phyin pa la spyod par rig par bya'o zhes bya ba 'dis ni de kho na nyid kyi chos 'ga' zhig 'phangs pa yin no zhes bya ba'i bsam pas gsol pa ni bcom ldan 'das ci shes rab kyi pha rol tu phyin pa zhes bya ba la sogs pa'o//bcom ldan 'das 'o na ji ltar zhes bya ba la sogs pa ni gal te 'di skad du brjod pa'i rnam pa bkag pa'i sgo nas thams cad du de ni ma yin no zhes bcom ldan 'das kyis gsungs pa yin na gang gis na de shes rab kyi pha rol tu phyin pa la spyod par rig par bya'o zhes sngar gsungs pa rnam pa gzhan gyis ji ltar spyod par 'gyur zhes bya ba'i don to//kun rdzob tu de ltar gsungs pa yin no zhes bya ba ni rab 'byor yang ci zhes bya ba la sogs pa gsungs pa yin te/rjes su mthong ngam zhes bya ba ni yang dag pa nyid du na zhes bya bar dgongs so/ /nye bar bsdu ba ni rab 'byor de ltar na zhes bya ba la sogs pa gsungs pa yin te/ chos thams cad dmigs su med pa yin pa'i phyir de ltar don dam par spyod pa yod par mi 'thad la/kun rdzob tu ni sgyu ma lta bu bsgoms pas spyod pa'i phyir ma skyes pa'i chos la khyad par can gyi lhag par mos par 'gyur ba yin no/ /mi 'jigs pa'i lam 'di bsgrubs nas zhes bya ba ni nye bar dmigs pa'i 'jigs pa thams cad med pas 'jigs pa dang bral ba'i lam mo//de ltar spyod cing zhes bya ba'i tshig gsum ni thos pa'i rang bzhin la sogs pa'i shes pa skyed pa yin pa'i phyir de shes pa skyed pa'i phyir smos pa yin no/ /sangs rgyas kyi ye shes bla na med pa dang zhes bya ba la sogs pa tshig bzhi ni me long lta bu'i ye shes la sogs pa'i dbye bas brjod pa yin no//bzhi pa byang chub par bya ba dang byang chub par byed pa'i chos mi dmigs pa'i mtshan nyid kyi rnam par 'phel ba'i don ni bcom ldan 'das chos thams cad kyi zhes bya ba la sogs pa gsol pa yin no/ /slar dri bar mdzad pas kun rdzob tu lung bstan pa yin no zhes gsungs pa ni rab 'byor khyod kyis zhes bya ba la sogs pa'o//de bzhin du de ci'i slad du zhe na zhes dogs pa bsu nas chos thams cad ces bya ba la sogs pa gsungs so/ /me sems pa'i slad du'o zhes bya ba 'dis ni rtse mo'i mngon par rtogs pa'i shes rab kyi pha rol tu phyin pa ni rnam par mi rtog pa yin pa'i phyir byang chub sems dpa' la 'di lta bu'i rnam par rtog pa med do zhes rang la tha snyad btags nas brjod pa yin no// shes rab kyi pha rol tu phyin pa'i bshad pa mngon par rtogs pa'i rgyan gyi snang ba las dge ba'i bshes gnyen gyi le'u zhes bya ba ste nyi shu rtsa gnyis pa'o// //lnga pa khyad par can gyi dge ba'i rtsa ba dang ldan pa'i bdag nyid kyi rnam par 'phel ba'i don ni yang de'i tshe lha rnams kyi dbang po brgya byin zhes bya ba la sogs pa smos pa yin te/byis pa'i skye bo rnams skrag par byed pa nyid kyis na nam mkha' ltar zab pa nyid yin pas zab po/ /rgyu dang 'bras bu'i ngo bo nyid dang bral ba nyid kyis na go rims bzhin du rnam par dben pa nyid yin pa'i phyir blta dka' ba dang stong pa nyid yin pas rtogs par dka' ba'o//mthong ba dang bsgom pa dang khyad par gyi lam skyed pa'i don du go rims ji lta bar slob pa dang sgrub pa dang rnal 'byor du byed pa zhes bya bar sbyor ro/ /kha cig na re sdom pa dang sems can gyi don bya ba dang dge ba'i chos sdud pa de tshul khrims kyi phung po gsum gyi mi mthun pa'i phyogs kyi chos dang bral ba'i phyir ma nyams pa la sogs pa'i tshig gsum smos pa yin /de rnams nyid kyi rjes su mthun pa'i chos dang ldan pa'i phyir yongs su rdzogs pa la sogs pa'i tshig gzhan gsum smos pa yin no zhes 'dod do//gzhan dag ni lus dang ngag dang yid kyi kha na ma tho ba med pas tshul khrims kyi phung po ma nyams pa dang skyon med pa dang 'dren mar ma gyur pa yin la/ thos pa dang bsam pa dang bsgom pa'i shes pa phun sum tshogs pa nyid yin pa'i phyir yongs su rdzogs pa dang yongs su dag pa lhad ma zhugs pa yin no zhes 'thad do//bzod pa phun sum tshogs pa zhes bya ba la sogs pa'i tshig gsum ni sdug bsngal dang du len pa la sogs pa'i bzod pa gsum gyi dbye bas gsungs pa yin no/ /brtson 'grus brtsams pa zhes bya ba la sogs pa'i tshig bzhi ni rtsom pa dang yongs su sbyong ba dang so sor rtog pa dang sgrub pa'i brtson 'grus kyi dbye bas gsungs pa yin no//bsam gtan la dga' zhing zhes bya ba la sogs pa'i tshig drug ni mi lcogs pa med pa dang bsam gtan khyad par can dang bsam gtan dang po dang gnyis pa dang gsum pa dang bzhi pa rtogs pa dang ldan pa'i phyir ro//snga ma bzhin du de ci'i phyir zhe na zhes dogs pa bsu nas byang chub sems dpa' sems dpa' chen po gang zhes bya ba la sogs pa gsungs pa yin no/ /drug pa lha'i rigs thams cad du nye bar 'gro ba'i rang bzhin gyi rnam par 'phel ba'i don ni byang chub sems dpa' sems dpa' chen po 'di zhes bya ba la sogs pa gsungs pa yin no//bdag kyang zhes bya ba ni brgya byin no/ /'byung bar mi 'gyur te zhes bya ba ni de bzhin gshegs pa'i byin gyi rlabs kyis zhes bya bar dgongs so/ /shes rab kyi pha rol tu phyin pa'i bshad pa mngon par rtogs pa'i rgyan gyi snang ba las brgya byin gyi le'u zhes bya ba ste nyi shu rtsa gsum pa'o// //bdun pa bdud thams cad zil gyis gnon pa'i rang gi ngo bo rnam par 'phel ba'i don ni de nas bcom ldan 'das kyis zhes bya ba la sogs pa smos pa yin no/ /bslab pa dang zhes bya ba la sogs pa tshig gsum ni sbyor ba dang bar chad med pa dang rnam par grol ba'i lam gyi dbye bas gsungs pa yin no//mya ngan gyi zug rngus zug par 'gyur ro zhes bya ba ni rang gi spyod yul las 'das pas yid mi bde ba thob pa'o/ /spyod cing zhes bya ba ni mnyam par ma bzhag pa'i sems kyis so//rnal 'byor du byed pas zhes bya ba ni mnyam par bzhag pa'i sems kyis so/ /'dir brtson par byas pa ni ma yin te zhes bya ba ni ji ltar mdo sde gzhan las gsungs pa de ltar 'dir sbyar ba na ni dngos po ma bstan te/ de bas na bshad pa 'di ni thos pa dang bsam pa'i rang bzhin gyi shes pas rtogs par mi nus pa'i phyir go rims bzhin du 'di'i gting mi rnyed ro mi myong ngo zhes bya ba'i tha tshig go//bde ba chung ngu dang 'bring dang chen po skyes pas na dga' mgu yid rangs par gyur cing zhes bya ba'o/ /de bzhin du yid bde ba rnam pa gsum skyes pas rab tu dga' ba dang rangs pa dang yid bde ba skyes te zhes bya ba'o//sbyor ba la sogs pa rnams la bgegs bya bar nus pas kun tu tshim pa skyes shing sems tshim par 'gyur ba rab tu dga' ba skye bar 'gyur ro zhes bya'o/ /de bzhin du de ci'i phyir zhe na zhes dogs pa bsu nas 'di ni bla na med pa zhes bya ba la sogs pa gsungs so/ /zhig par mi 'gyur ba la sogs pa ni de la rang gi gnas su ngag rtsub pa'o //rtsom pa byed pa ni 'thad par byed pa'o/ /rgyal po'i pho brang la sogs par rtsod pas rnam par byed pa'o/ /dbyug pa la sogs pa thogs pas 'gyed par byed pa'o/ /'thab par bya ba'i phyir 'bod pas na gshe zhing ngo / /ngan du brjod pa la sogs pas nges par mtshang 'dru bas na spyo bar byed pa'o//rnam par sdang bas nye bar 'joms pas na gnod par sems shing ngo / /khro ba skyed par byed pas na zhe sdang bskyed na zhes bya'o/ /go cha bgo dgos so zhes bya ba ni gal te thams cad mkhyen pa nyid yongs su ma btang na de'i tshe 'thab par byed pa la sogs pas kun nas bslang ba'i sdig pa bsal bar bya ba'i phyir sems bskyed pa'i grangs kyi chod pa rnyed kyis bskal pa'i tshad du brtson 'grus brtsam par bya zhing bya ba'i tha tshig go//sdig pa ni shin tu lci ba yin pas nges par 'byung ba med par zhus pa'i don ni bcom ldan 'das sems bskyed pa de dag la zhes bya ba la sogs pa gsol pa yin no//gnyen po yod pa nyid kyis na las thams cad nges par 'byung ba dang bcas pa nyid yin no zhes khyab pa bstan par bya ba'i phyir kun dga' bo gang zag nyan thos kyi theg pa can dang zhes bya ba la sogs pa gsungs pa yin no/ /'di skad du nyan thos kyi theg pa la sogs pa la rang gi theg par dge 'dun lhag ma la sogs pa'i ltung ba rnams slar gso bar bstan pas nges par 'byung ba dang bcas par chos bstan pa de bzhin du theg pa chen po pa rnams la byang chub sems dpa'i sde snod la sogs pa bstan pa yin no zhes brjod pa yin no//gtsor byang chub sems dpa' las brtsams te gsal bar byed pa ni de la kun dga' bo gang zag ces bya ba la sogs pa gsungs te so sor bshags pa mi byed ces bya ba ni sdig pa byas pa la bshags pas 'chags par mi byed pa'o/ /phyis sdom pa mi 'dzin zhes bya ba ni mi byed pa'i sdom pa 'dzin par mi byed pa'o//rtsod pa gcad par bya ba yin zhes bya ba la sogs pa'i tshig gsum ni rtsod pa chung ngu dang 'bring dang chen po las bzlog pa yin pa'i phyir ro/ /ngan pa rnyed de zhes bya ba ni gzhan smra ba la yang bdag slar smra zhing 'thab pa la sogs pa byed pa 'di ni bsngags pa ma yin pa nyid kyis na rnyed pa ngan pa rnyed pa yin gyi rnyed pa legs pa ma rnyed do zhes de ltar sems bskyed par bya'o zhes bya ba'i tha tshig go//tshig drag tu smra ba'am tshig rtsub pos zhes bya ba ni mnyan na mi bde ba bskyed pas tshig drag tu smra ba'o/ /yid mi bde bar byed pas na rtsub pa'o/ /ngan du smras pa zhes bya ba la sogs pa ni phra ma dang tshig rtsub po dang ngag kyal pa'i dbye bas gsungs pa yin no//de bzhin du de ci'i phyir zhe na zhes dogs pa bsu nas bdag gis lhag pa'i bsam pa zhes bya ba la sogs pa gsungs te/ 'khrugs pa ni kun tu rnam par 'khrugs pa'o/ /khro gnyer ni dpral bar bsdus pa'o/ / sems can thams cad kyi drung du gnas par bya'o zhes bya ba ni ji skad du bshad pa'i rim gyis bdud kyi las rnams zil gyis gnon pas sems kyi yul la gnas par bya'o/ /brgyad pa ston pa dang 'dra bar skye bo la mtshungs par gnas pa'i mtshan nyid kyi rnam par 'phel ba'i don ni kun dga' bo byang chub sems dpa' sems dpa' chen pos zhes bya ba la sogs pa gsungs pa yin te/de la theg pa gcig la zhugs pa zhes bya ba ni go cha'i sgrub pa mtshungs pa'o/ /lam gcig tu zhugs pa zhes bya ba ni 'jug pa'i sgrub pa mtshungs pa'o/ /bsam pa mthun pa zhes bya ba ni tshogs kyi sgrub pa gcig pa nyid kyis so/ / theg pa mthun pa la yang dag par zhugs so zhes bya ba ni nges par 'byung ba'i sgrub pa mtshungs pa nyid kyis so/ /gang la zhes bya ba ni sbyin pa la sogs pa la'o/ /ji ltar zhes bya ba ni mi dmigs pa'i sbyar bas so/ /shes rab kyi pha rol tu phyin pa'i bshad pa mngon par rtogs pa'i rgyan gyi snang ba las mngon pa'i nga rgyal gyi le'u zhes bya ba ste nyi shu rtsa bzhi pa'o// //dgu pa rnam pa thams cad thabs la mkhas pa la bslab pa yongs su dag pa'i rang gi ngo bo rnam par 'phel ba'i don zhus pa ni bcom ldan 'das [(]yang [,]kyang [)]zhes bya ba la sogs pa gsol pa yin no/ /zas la sogs pa slob pa na sangs rgyas nyid la slob pa yin no zhes bstan par bya ba'i phyir gal te byang chub sems dpa' zhes bya ba la sogs pa gsungs pa yin te/de bzhin nyid kho na ldog pa'i dbye bas ji ltar zad pa dang mi 'byung ba la sogs pa bstan pas de ltar bshad pa yin no/ /ji ltar gzhan la slob pa na gzhan dag la slob par byed ces 'dri ba ni bcom ldan 'das ci'i slad du zhes bya ba la sogs pa gsol pa yin no//rab 'byor gang 'di skad du zhes bya ba la sogs pas de'i tshig bzlas nas slar 'dri ba'i sgo nas lan btab pa ni rab 'byor de ji snyam du sems zhes bya ba la sogs pa gsungs pa yin no/ /de bzhin nyid ces bya ba ni thams cad mkhyen pa nyid dang sangs rgyas nyid ces bya ba'i don to//de bzhin du de ci'i slad du zhe na zhes dogs pa bsu nas bcom ldan 'das zad pa ni zad par mi 'gyur te zhes bya ba gsol te/ 'dir rnam par rtog pa thams cad zad pas na 'tshang rgya ba nyid ni zad pa'o/ /chos kyi dbyings zad pa dang bral ba nyid yin pa'i phyir mi zad pa zhes bya ste de'i bdag nyid du 'brel pas zad pa la sogs pa'i rang bzhin ni thams cad mkhyen pa nyid do zhes bya ba'i tha tshig go//'byung bar 'gyur ram zhes bya ba la sogs pa ni 'byung bar mi 'gyur ro zhes bya ba la sogs pa las bzlog pa las shes par bya'o//yongs su dag pa la bslabs pa nyid kyi phan yon bstan pa ni rab 'byor de'i phyir zhes bya ba la sogs pa gsungs pa yin no/ /snga ma bzhin du de ci'i slad du zhe na zhes dogs pa bsu nas rab 'byor gang 'di la slob pa de dag ni zhes bya ba la sogs pa gsungs pa yin no/ /de la bya ba'i rigs zhes bya ba ni 'dab chags gsod pa rnams so//rngon pa ni ri dgas la sogs pa gsod pa rnams so/ /nya pa ni nya gsod pa rnams so/ /shan pa ni sha 'tshong bar byed pa rnams so/ /long ba dang 'on pa ni mig dang rna ba'i rnam par shes pa dang bral ba'o/ / zhar ba ni mig gcig dang bral ba'o/ /rdum po ni lag pa la sogs pa bcad pa'o/ /sgur po ni rgyab yo ba yin pa'i phyir ro/ /[(]'thing [,]'theng [)]po ni byin pa mi mnyam pa yin no/ /zha bo ni gru mo'i tshigs kyi gong thung ba'o/ /grum po ni 'khyor zhing 'gro ba'o/ /lkugs pa ni mod la smra mi nus pa'o//glegs bam la la las ni blun po zhes zer te/ der yang don ni 'di nyid yin no zhes kha cig zer ro/ /dig pa zhes bya ba ni tshig smra ba thogs shing ye shes la 'thug por smra ba'i phyir ro/ /rna ba mi gsang ba ni sgra gsang chen pos thos pa'o/ /yan lag nyams pa ni lag pa dang rkang pa la sogs pa tshad las chung ba nyid do//yan lag ma tshang ba ni yan lag lhag pa'am ma tshang ba'o/ /mdog mi sdug pa ni yan lag rnams mi sdug pa'o/ /de bzhin du de ci'i phyir zhe na zhes dogs pa bsu nas de la byang chub sems dpa' zhes bya ba la sogs pa gsungs so/ /rang bzhin gyi yongs su dag pa nyid kyis stobs la sogs pa yongs su dag par mi 'thad pa ni bcom ldan 'das gang gi tshe chos thams cad ces bya ba la sogs pa gsungs pa yin no//kun rdzob tu rtogs pa ni rab 'byor de de bzhin no zhes bya ba la sogs pa gsungs so/ /snga ma bzhin du de ci'i phyir zhe na zhes dogs pa bsu nas rab 'byor chos thams cad ni zhes bya ba la sogs pa gsungs so//'di skad du chos thams cad rang bzhin gyis rnam par dag pa nyid yin yang ngo bo nyid kyi dag pa'i chos yongs su mi shes pa dang ldan pa'i sems can rnams la de lta bu'i ye shes bskyed par bya ba'i phyir sgyu ma lta bu'i chos bsgom pa la mi zhum pa nyid kyis na kun rdzob tu stobs la sogs pa yongs su dag pa 'thob par 'gyur ro zhes brjod pa yin no//bcu pa sangs rgyas kyi rigs can du 'gyur ba'i mtshan nyid kyi rnam par 'phel ba'i don ni rab 'byor 'di lta ste dper na sa chen po'i phyogs gang na zhes bya ba la sogs pa gsungs pa yin te ba tsha can ni lan tshwa mang ba'o//gram sa ni sa phyogs rtsub pa nyid kyis so/ /byang chub sems dpa' ni nyung ngo zhes bya ba 'dis ni sangs rgyas kyi rigs rnams las rtse mo mngon par rtogs pa rnam par 'phel ba thob par 'os pa rnams ni nyung ba nyid du ston pa yin no/ /bcu gcig pa 'bras bu sangs rgyas nyid thob pa'i rgyu mtshan gyi bdag nyid can gyi rnam par 'phel ba'i don chung ngu dang 'bring dang chen po'i dpe'i dbye bas 'gres gsum bstan pa ni rab 'byor gzhan yang 'di lta ste dper na sems can gyi ris ni zhes bya ba la sogs pa gsungs pa yin te shes rab kyi pha rol tu phyin pa'i lam zhes bya ba ni de bzhin gshegs pa thob pa'i rgyu rnam par 'phel ba bcu gcig pa zhes bya ba'i tha tshig go//bcu gnyis pa pha rol tu phyin pa'i mi mthun pa'i phyogs kyi sems mi skye ba'i rang bzhin gyi rnam par 'phel ba'i don ni rab 'byor gzhan yang byang chub sems dpa' zhes bya ba la sogs pa gsungs pa yin te/de la tha ba zhes bya ba ni dge ba'i lo tog mi skye ba'i don gyis de 'dod chags la sogs pa'i nyon mongs pa rnams so/ /bcu gsum pa gzugs la sogs pa dang ldan par rtogs pa'i sems mi skye ba'i rang gi ngo bo'i rnam par 'phel ba'i don ni rab 'byor de ltar byang chub sems dpa' zhes bya ba la sogs pa gsungs te/de la kun brtags dang gzhan dbang dang yongs su grub pa'i dngos po la mngon par zhen pas go rims bzhin du yang dag par gzung ba dang yongs su gzung ba dang mchog tu gzung bar 'gyur ro zhes smos pa yin no/ /phyin ci log dang bral ba nyid kyis na rtogs pa'i phyir rjes su song bar 'gyur ro zhes gsungs pa yin no//bcu bzhi pa pha rol tu phyin pa thams cad bsdus pa shes pa'i mtshan nyid kyi rnam par 'phel ba'i don ni rab 'byor 'di lta ste dper na 'jig tshogs la lta ba'i nang du zhes bya ba la sogs pa gsungs pa yin te / lta ba drug cu rtsa gnyis ni tshangs pa'i dra bas zhus pa la sogs par blta bar bya ste/'dir gzhung mangs kyi dogs nas ma bris so/ /ji skad du bshad pa'i rnam par 'phel ba nyid gsal bar byed pa ni rab 'byor 'di lta ste dper na skyes bu'i srog gi dbang po'i nang du zhes bya ba la sogs pa gsungs pa yin no/ / bco lnga pa phun sum tshogs pa thams cad 'thob pa'i rang bzhin gyi rnam par 'phel ba'i don ni rab 'byor de bas na byang chub sems dpa' sems dpa' chen po zhes bya ba la sogs pa gsungs pa yin no/ /de bzhin du de ci'i phyir zhe na zhes dogs pa bsu nas bsod nams kyi mchog nyid yin pa'i phyir ro zhes gsungs pa yin no//don nyid rgya cher bstan pa'i phyir dri bar mdzad pa ni rab 'byor de ji snyam du sems zhes bya ba la sogs pa gsungs pa yin no/ /snga ma bzhin du de ci'i phyir zhe na zhes dogs pa bsu nas rab 'byor byang chub sems dpa' zhes bya ba la sogs pa gsungs te/de la mthong ba la sogs pa'i lam bzhi rtogs pa yin pas na bla na med par 'gyur bar 'dod pa la sogs pa'i tshig bzhi smos pa yin no/ /chos dang longs spyod rdzogs pa dang sprul pa'i sku gsum thob par byed pa yin pas na sangs rgyas kyi rnam rol pas zhes bya ba la sogs tshig gsum smos pa yin no//phun sum tshogs pa thams cad thob pa na nyan thos su yang 'gyur ro zhes dogs pa la bcom ldan 'das ci nyan thos kyi zhes bya ba la sogs pa gsol pa yin no/ /gzhan gyi don nyid du slob pas nyan thos ma yin no zhes gsungs pa ni rab 'byor nyan thos kyi phun sum tshogs pa yang zhes bya ba la sogs pa'o//bcu drug pa yang dag par rdzogs pa'i byang chub la nye bar gyur pa'i rang gi rnam par 'phel ba'i don ni rab 'byor byang chub sems dpa' sems dpa' chen po da ltar na zhes bya ba la sogs pa gsungs pa yin no/ /de la yang mngon par zhen pa 'ching ba yin pa ni yang gal te byang chub sems dpa' de 'di ji snyam du zhes bya ba la sogs pa gsungs pa yin no//mi spyod de zhes bya ba ni dngos po la nye bar dmigs pa ni phyin ci log yin zhes bya bar dgongs so/ /mngon par zhen pa med pa nyid de kho na nyid yin pa ni de ste zhes bya ba la sogs pa gsungs pa yin no/ /de ltar ji skad du bshad pa nyid ni rnam par 'phel ba yin par gzung ngo //de skad du yang / 'dzam bu gling sogs skye bo snyed/ /sangs rgyas mchod pa'i dge la sogs/ /rnam mang du ni dper mdzad nas/ /rnam 'phel bcu drug bdag nyid do/ /zhes gsungs pa yin no/ /shes rab kyi pha rol tu phyin pa'i bshad pa mngon par rtogs pa'i rgyan gyi snang ba las bslab pa'i le'u zhes bya ba ste nyi shu rtsa lnga pa'o// //de ltar rnam par 'phel bas rnam par spel ba'i rtse mo'i mngon par rtogs pa bdag nyid du gyur par son pa mthar phyin pa'i mtshan nyid nges par bstan pa'i don du bsngags par byed pa ni byang chub sems dpa' sems dpa' chen po'i spyod pa nyid kyis kyang zhes bya ba la sogs pa smos pa yin no//de dag ni 'dod par bya'o zhes bya ba 'dis ni rtse mo'i mngon par rtogs pa thob pa rnyed par dka' ba nyid du ston to/ /dad pa phul du byung ba yang dag par skyes pa nyid kyis 'dod pa la smod par byed pas de nges par ston par byed pa ni byang chub sems dpa'i theg pa'i gang zag dag gis zhes bya ba la sogs pa smos pa yin no//khyer bar gyur pa zhes bya ba ni ded par gyur pa'o/ /mi mnyam pa'i nyes pa thams cad med pa'i phyir pha rol gyi 'gram mnyam pa ni mya ngan las 'das pa ste sangs rgyas nyid ces bya ba'i don to/ / kha cig ni rang dang gzhan dang gnyi ga'i don gyi phun sum tshogs pa rdzogs par byed pa nyid kyis na go rims bzhin du de dag gi 'tshal ba dang yongs su bsams pa dang yongs su bzung ba'i zhes bya'o zhes 'dod do/ /gzhan dag ni thams cad mkhyen pa nyid gsum rdzogs par byed pa nyid kyis na de skad ces bya'o zhes 'chad do//sangs rgyas kyi chos de dag ces bya ba ni bstan pa'i tshig go/ /thams cad mkhyen pa nyid dang ldan pa'i chos de dag dang rang byung gi chos de dag dang zhes bya ba ni mi 'phrogs pa'i chos de dag dang zhes bya ba ni rnam pa thams cad mkhyen pa nyid la sogs pa thams cad mkhyen pa nyid gsum gyi dbye bas bshad pa yin no//des na de ltar thams cad mkhyen pa nyid gsum gyi chos bla na med pa yongs su rdzogs par brjod pa yin no/ /de yang sems can gyi don yongs su btang ba'i nges pa yin zhes gsol pa ni bcom ldan 'das bdag ni zhes bya ba la sogs pa'o/ /snying rje chen po dang ldan pa zhes bya ba ni de lta bu rtogs pa'i gnas skabs na yang mya ngan las 'das par ltung ba spang ba'i don du snying rje chen po mngon du byed pa'i phyir sems can gyi don la 'jug pa la sogs pa'i sems bskyed pas snying rje chen po dang ldan pa yin no//de bzhin du de ci'i slad du zhe na zhes dogs pa bsu nas gsol ba ni gang dag sems bskyed pa 'di lta bu zhes bya ba la sogs pa'o//mthong ba dang bsgom pa dang khyad par dang mi slob pa'i lam rtogs pa'i dbye bas go rims bzhin du bdag brgal bas zhes bya ba la sogs pa'i tshig bzhi smos pa yin no/ /'di skad ces yang dag pa'i thabs la mkhas pa'i stobs kyis de ltar na rnam par mi rtog pa'i gnas skabs su snying rje chen po la sogs pa mngon du byed pa'i ngo bos sems can gyi don yongs su mi gtong ba'i mtshan nyid rnam pa thams cad mkhyen pa nyid la sogs pa ji skad bshad pa'i thams cad mkhyen pa nyid gsum gyi chos sems bskyed pa la sogs pa gong du smos pa rnams yongs su rdzogs pa bla na med pa ni nges pa zhes bya ba yin no zhes brjod pa yin no//de skad du yang / kun mkhyen nyid gsum chos rnams kyi/ /yongs su rdzogs pa bla med pa/ /sems can don yongs mi gtong ba/ /bstan pa zhes ni mngon par brjod//ces gsungs pa yin no/ /de ltar bstan pas nges par gyur pa'i dngos po'i mtshan nyid ni sems kun tu gnas pa yin pas de bstan pa'i phyir zhus pa ni bcom ldan 'das byang chub sems dpa' zhes bya ba la sogs pa gsol pa yin te/ gang rjes su yi rang bar bgyid pa de dag bsod nams ji tsam zhig skye bar 'gyur zhes bya bar 'brel to//theg pa la dang por zhugs pa dang / dpyod pa la zhugs pa dang / phyir mi ldog pa dang skye ba gcig gis thogs pa zhes bya ba 'dis ni kha cig na re ci rigs par sngar bshad pa'i mthong ba dang bsgom pa'i lam dag gis rnam par rtog pa bzhi'i gnyen po rtogs pa rnam pa bzhi bstan pas rnam pa bzhir bshad pa yin no zhes 'dod do//gzhan dag ni rtags dang / rnam par 'phel ba dang / brtan pa dang / sems kun tu gnas pa'i rang gi ngo bo rtogs pa'i dbye bas bshad pa yin no zhes 'dod do/ /de la theg pa dang po la zhugs pa ni mos pas spyod pa'i sa'o//spyod pa la zhugs pa ni rab tu dga' ba la sogs pa sa bdun pa la gnas pa'o/ /phyir mi ldog pa ni mi g.yo ba la sogs pa sa gsum la gnas pa'o/ /skye ba gcig gis thogs pa ni sa bcu pa'o zhes gzhan dag 'chad do/ /sems kun tu gnas pa ston pas zhus pa'i lan gyi don gsungs pa ni kau shi ka yang ri rab ri'i rgyal po yang zhes bya ba la sogs pa'o//srang grangs su zhes bya ba ni srang gi tshad kyis so/ /'di skad du tshad dang ldan pa'i dngos po ni rnal 'byor pa rnams kyis srang tshad 'di tsam zhig go zhes tshad gzhal bar nus so zhes bya ba'i tshul gyis gling bzhi pa la stong gsum pa'i 'jig rten gyi khams kyi tshad ni gzung du rung gi rjes su yi rang ba'i bsod nams kyi tshad ni de lta ma yin no zhes don gyi thabs kyis bsod nams tshad las 'das pa'i rang bzhin gyi ting nge 'dzin gyi mtshan nyid ni sems kun tu gnas pa yin no zhes brjod pa yin no//de skad du yang / gling bzhi pa dang stong dag dang //stong gnyis gsum dag dper mdzad nas/ /bsod nams mang po nyid kyis ni/ /ting 'dzin yongs su bsgrags pa yin/ /zhes gsungs pa yin no/ /rtags la sogs pa de dag ni go rims bzhin du rtse mo'i mngon par rtogs pa la dro ba la sogs pa nges par 'byed pa'i cha dang mthun pa bzhi'i ngo bo nyid yin par khong du chud par bya'o//nges par 'byed pa'i cha dang mthun pa'i 'og tu mthong ba'i lam yin te des de na mi mthun pa'i phyogs gzung ba dang 'dzin pa'i rnam par rtog pa bzhi po gnyen po dang bcas pa brjod par bya ba yin pas re zhig thog mar 'jug pa'i phyogs ma lus pa la brten pa gzung ba'i rnam par rtog pa dang po ston pa ni bcom ldan 'das sems can gang dag zhes bya ba la sogs pa gsungs pa yin no//bdud kyis byin gyis brlabs pa bdud kyi phyogs su gyur pa bdud kyi gnas nas shi 'phos pa zhes bya ba ni smod par brjod pa chung ngu dang 'bring dang chen po'i dbye bas tshig gsum smos pa yin no//de bzhin du de ci'i slad du zhe na zhes dogs pa bsu nas gsol pa ni bcom ldan 'das gang gis sems bskyed pa 'di dag mngon par bsgrub pa dang zhes bya ba la sogs pa'o/ /ldog pa'i sgo nas bstan nas rjes su 'gro ba'i sgo nas rnam par rtog pa de nyid ston pa ni bcom ldan 'das byang chub sems dpa' sems dpa' chen po gang dag gis zhes bya ba la sogs pa gsol pa yin te/sgyu ma lta bur bsgoms pas gnyis dang gnyis su med pa'i 'du shes dang bral ba'i byang chub sems dpa' rnams kyis de lta bu'i sems bskyed pa dang rjes su yi rang ba la sogs pa la 'jug par bya'o zhes bya ba'i tha tshig go//legs par smras pa nyid kyis na rjes su gsung bar mdzad pa ni kau shi ka de de bzhin no zhes bya ba la sogs pa gsungs pa yin no/ /ldog pa'i phyogs la brten pa'i gzung ba'i rnam par rtog pa gnyis pa ston pa ni kau shi ka rigs kyi bu bu'am zhes bya ba la sogs pa gsungs pa yin no//mi mnyes par byed par mi 'gyur zhes bya ba ni spang bar bya ba'i dngos po gzung ba'i rnam par rtog pa las ldog pa'i stobs kyis zhes bya bar dgongs so/ /de bzhin du phyin ci ma log pa yin pa nyid kyis na bsngags par byed pa ni bcom ldan 'das de de bzhin no zhes bya ba la sogs pa gsol pa yin no//'di skad du 'jug pa dang ldog pa mi dmigs pa dang mi dmigs pa'i ngo bo nyid kyi phyogs dag la go rims bzhin du len pa dang 'dor ba'i rnam pas gzung bar bya ba yin no snyam pa ni 'jug pa dang ldog pa'i phyogs la brten pa'i gzung ba'i rnam par rtog pa dag ni dngos po dang ma 'brel par 'jug pa nyid kyis na log par snang ba nyid yin pa'i phyir yul ji lta ba bzhin ma yin par rang bzhin can 'chad par 'gyur ba'i yul gyi dbye bas so sor rnam pa dgur gyur pa rnam pa ni gegs su gyur pa yin pa'i phyir nyon mongs pa dang 'dra bar de dag ni mi mthun pa'i phyogs yin par shes par bya'o zhes brjod pa yin no//de skad du yang / 'jug pa dang ni ldog pa la/ /gzung ba'i rnam rtog so sor de / /dgu yi bdag nyid ji bzhin yul/ /min pa'i bdag nyid dag shes bya/ /zhes gsungs pa yin no/ /de ltar gzung ba'i rnam par rtog pa gnyis bstan nas 'dzin pa'i rnam par rtog pa gnyis bshad par bya ba yin pas so so'i skye bo'i skyes bu rdzas su yod pa'i rten can gyi 'dzin pa'i rnam par rtog pa dang po bstan pa ni de ltar rjes su yi rang ba dang ldan pa'i sems bskyed pa'i zhes bya ba la sogs pa gsungs pa yin no//de bzhin du de ci'i phyir zhe na zhes dogs pa bsu nas gsol ba ni 'di ltar rigs kyi bu 'am zhes bya ba la sogs pa'o//gang gi phyir so so'i skye bo rnams kyi ni bdag rdzas su yod pa kho na la 'dzin par byed pa yin no snyam pa'i rnam par rtog pas mngon par zhen nas dge ba la rjes su yi rang bar byed pa de'i phyir 'bras bu bkur stir byas par 'gyur ba la sogs pa brjod kyi gzhan sangs rgyas nyid la sogs pa ni ma yin no zhes bya ba'i don to//so so'i skye bo rnams kyis kyang chos thams cad bdag med pa'o zhes shes pa ma yin nam 'dzin pa'i rnam par rtog par gzhag pa dang po ni ma khyab pa yin no zhe na/de rnams kyi de ni lhag par mos pa yid la byed pa yin la 'dir ni de kho na nyid yid la byed pa yin par bzhed pas mi mtshungs so/ /'phags pa'i gang zag gis btags pa tsam du yod pa'i rten can gyi 'dzin pa'i rnam par rtog pa gnyis pa bstan pa ni bcom ldan 'das gang gis 'dun pa bskyed de zhes bya ba la sogs pa gsol pa yin no//yang dag par rdzogs pa'i byang chub thob par bgyid par 'gyur ro zhes bya ba ni bdag btags par yod pa nyid 'dzin pa po yin no zhes bya ba'i rnam par rtog pa'i mngon par zhen pas 'phags pa rnams rjes su yi rang bar byed pa'i sems bskyed pa rnam par 'phel bar byed pa ni gtsor bla na med pa'i byang chub yang dag par skyed par byed pa yin par 'gyur ro zhes bya ba'i tha tshig go//chos nyid dang mi 'gal ba nyid yin pa'i phyir rjes su brjod pa gsungs pa ni kau shi ka de bzhin gshegs pa'i mthus zhes bya ba la sogs pa'o/ /chung ngu dang 'bring dang chen po'i dbye bas rjes su yi rang bar 'gyur ro zhes bya ba la sogs pa tshig gsum smos pa yin no//'phags pa la yang 'di lta bu dag mnga' ste dge slong dag ngas mtshan mo 'das na nang par gyi dus su srog chags ce spyang gi skad 'byin pa'i sgra thos so zhes bya ba dang / de bzhin du nga de'i tshe de'i dus na ri dgas kyi rgyal po seng ge yan lag ma smad pa zhes bya bar gyur to zhes gsungs pa yin nam 'dzin pa'i rnam par rtog pa gnyis pa 'di ni ma khyab pa yin no zhe na/'phags pa rnams de skad gsungs pa ni tha snyad pa yin gyi don dam pa ma yin pas yang dag pa ma yin no/ /'di skad du so so'i skye bo dang 'phags pa'i gang zag dag la go rims bzhin du skyes bu rdzas dang btags par yod pa'i rten can gyi 'dzin pa'i rnam par rtog pa gnyis yod pas 'dzin pa'i rnam par rtog pa gnyis po 'di dag gang gi tshe de dag gi yul gyi dngos por gyur pa gzung ba'i don dag gzung ba'i ngo bor de bzhin du yod pa ma yin pa de'i tshe gang gi yang 'dzin pa ma yin te/de'i phyir de dag 'dzin pa'i ngo bos dben pa'i rang bzhin yin pas phyin ci log tu snang ba'i phyir yul ji lta ba bzhin ma yin pa'i rang gi ngo bo can 'chad par 'gyur ba'i yul gyi dbye bas rnam pa dgur 'gyur ba ni gegs su gyur pa'i phyir mi mthun pa'i phyogs yin no zhes brjod pa yin no//de skad du yang / so so'i skye bo 'phags dbye bas/ /sems can rdzas dang btags yod par/ /rnam rtog 'dzin pa dag tu 'dod/ /so sor de dag dgu bdag nyid/ /gal te gzung don de bzhin med//de dag gang gi 'dzin par 'dod/ /de ltar de dag 'dzin pa yi/ /ngo bos stong pa'i mtshan nyid do/ /zhes gsungs pa yin no/ /de la yul gyi dbye bas gzung ba'i rnam par rtog pa dang po ji ltar na rnam pa dgu yin zhe na/ 'jug pa'i rnam par rtog pa'i don ston pas bcom ldan 'das sems sgyu ma lta bu zhes bya ba la sogs pa gsol pa yin no//ji ltar zhes pa ni rnam pa gang gis so/ /de kho na nyid du ni rnam pa 'ga' zhig ltar mngon par rdzogs par 'tshang rgya bar 'gyur ba ni sems sgyu ma lta bu ma yin la sgyu ma nyid ma yin zhing de las gzhan pa'i chos kyang ma yin no zhes slar dris pa'i sgo nas ston pas rab 'byor 'di ji snyam du sems zhes bya ba la sogs pa gsungs pa yin no//chos gang shin tu dben pa de ni zhes bya ba ni chos gang ngo bo nyid kyis stong pa de ni ma skyes pa yin pa'i phyir yod pa nyid du shes par mi 'gyur la/ yul med pa la dgag pa yi/ /sbyor ba legs pa yod ma yin//rnam par rtog la brten na yang / /kun rdzob par 'gyur yang dag min/ /zhes bya ba'i rigs pas med pa nyid du mi 'thad do zhes bya ba'i tha tshig go/ /snga ma bzhin du de ci'i slad du zhe na zhes dogs pa bsu nas bcom ldan 'das chos ma mchis pa ni zhes bya ba la sogs pa gsol to//chos thams cad dben pa nyid kyis na rgyu dang 'bras bu'i dngos por med pa ni chos gang shin tu dben pa'i chos de ni zhes bya ba la sogs pa gsol pa yin no/ /thob par bgyid pa 'am spong bar bgyid pa zhes bya ba ni skyed par byed pa'am 'jig par byed pa zhes bya ba'i tha tshig go/ / don 'di nyid rgya cher ston pa ni bcom ldan 'das ji ltar zhes bya ba la sogs pa gsol pa yin no/ /de kho na nyid du rtogs par bya ba dang rtogs pa po med pa nyid do zhes nye bar sdud pas gsol pa ni bcom ldan 'das gang gi tshe zhes bya ba la sogs pa'o/ /legs par smras pa nyid kyis na rjes su snang bar mdzad pa ni rab 'byor legs so legs so zhes bya ba la sogs pa gsungs pa yin no//'on kyang kun rdzob tu rgyu shin tu rnam par dag pa las 'bras bu rnam par dag par 'gyur ro zhes gsungs pa ni rab 'byor gang gi phyir zhes bya ba la sogs pa ste rgyu dang 'bras bu dag sgyu ma lta bu nyid kyis phyin ci ma log pa'i phyir ro zhes dgongs pa'o//dben pa zhes bya bar yang mngon par zhen par bya ba ma yin no zhes gsungs pa ni rab 'byor gal te byang chub sems dpa' zhes bya ba la sogs pa'o/ /rgyal bas stong nyid lta kun yang / /nges par 'byin pa yin par gsungs//gang dag stong pa nyid lta ba/ /de dag sgrub tu med par gsungs/ /zhes bya ba'i tshul gyis dben pa la mngon par zhen pa yang phyin ci log gi ngo bo nyid yin pas shes rab kyi pha rol tu phyin pa ma yin no/ /de la yin na ni de rtogs nas ji ltar mngon par rdzogs par 'tshang rgya zhe na/rab 'byor de ltar byang chub sems dpa' zhes bya ba la sogs pa gsungs te/ de ltar ma brtags na gcig pu nyams dga' ba nyid kyis kun rdzob kyi rang bzhin du yin no zhes bya ba'i don to/ /de nyid kyis na don dam pa'i dbang du mdzad nas gsungs pa ni rab 'byor shes rab kyi pha rol tu phyin pa la brten nas zhes bya ba la sogs pa'o//kun rdzob tu nye bar bsdu ba ni byang chub sems dpa' sems dpa' chen po bla na med pa yang dag par rdzogs pa'i zhes bya ba la sogs pa gsungs pa yin no/ /bka' stsal pa'i don zhes bya ba ni mngon par rdzogs par 'tshang mi rgya mod kyi mngon par rdzogs par 'tshang rgya ste zhes bya ba 'di'o//de bzhin du rjes su gsung bar mdzad pa ni rab 'byor de de bzhin no zhes bya ba la sogs pa gsungs pa yin no/ /dka' ba byed pa yin no zhes bya ba ni kun rdzob kyi bden pa la brten nas zhes bya bar dgongs so/ /de nyid kyis na don dam pa'i bden pa'i dbang du byas pa ni bcom ldan 'das ji ltar zhes bya ba la sogs pa gsol pa yin te/bka' stsal pa'i zhes bya ba ni dka' ba byed pa 'di yin zhes bya ba 'di'o/ /de bzhin du de ci'i slad du zhe na zhes dogs pa bsu nas bcom ldan 'das 'di ltar zhes bya ba la sogs pa gsol to//byed pa po dang las dang bya ba mi dmigs par bstan pa la mi zhum pa la sogs pas rang bzhin gyis rnam par rtog pa dang bral ba'i phyir yang dag par zhugs pa nyid kyis na rgyal ba'i yum la spyod pa yin par gsol pa ni bcom ldan 'das gal te 'di skad bshad pa la zhes bya ba la sogs pa'o/ / rnam par rtog pa gnyis pa'i don ni bcom ldan 'das 'di lta ste dper na zhes bya ba la sogs pa gsol pa yin no/ /rnam par rtog pa ma mchis pa'i slad du zhes bya ba 'dis ni rigs kyi rnam par rtog pa bsal bar bstan pa yin no/ /rnam par rtog pa gsum pa'i don ni bcom ldan 'das 'di lta ste dper na sgyu ma'i skyes bu ni zhes bya ba la sogs pa gsol pa yin no//'di snyam du bdag ni bla na med pa yang dag par rdzogs pa'i byang chub dang nye bar gyur te zhes bya ba 'dis ni yang dag par 'grub pa'i rnam par rtog pa sel bar byed pa yin no/ /rnam par rtog pa bzhi pa'i don ni bcom ldan 'das 'di lta ste dper na gzugs brnyan ni zhes bya ba la sogs pa gsungs pa yin te/gzugs brnyan gyi dpes ni dmigs pa'i rnam par rtog pa bsal bar ston to/ /rnam par rtog pa lnga pa'i don ni bcom ldan 'das 'di lta ste dper na de bzhin gshegs pa ni su la yang zhes bya ba la sogs pa gsol pa yin no//de bzhin gshegs pas rtogs pa dang rnam par rtog pa thams cad spangs so zhes bya ba 'dis ni de bzhin gshegs pa la sdug pa dang mi sdug mi mnga' ba'i dpes byang chub sems dpa' yang gnyen po dang mi mthun pa'i phyogs kyi rnam par rtog pa bsal bar ston to/ /rnam par rtog pa drug pa'i don ni bcom ldan 'das ji ltar de bzhin gshegs pas zhes bya ba la sogs pa gsol pa yin te/rtogs pa dang rnam par rtog pa thams cad spangs pa zhes bya ba ni rang gi rtogs pa'i rnam par rtog pa mi dmigs par ston to/ /rnam par rtog pa bdun pa'i don ni bcom ldan 'das 'di lta ste dper na de bzhin gshegs pa dgra bcom pa zhes bya ba la sogs pa gsol pa yin te/de bzhin gshegs pa'i sprul pa'i dpes ni sprul pa dang 'brel pa'i byed pa po'i rnam par rtog pa med par ston to/ /rnam par rtog pa brgyad pa'i don ni bcom ldan 'das 'di lta ste dper na sprul pa de zhes bya ba la sogs pa gsol pa yin te/dpe 'dis kyang byed pa'i rnam par rtog pa las dben pa nyid du ston to/ /rnam par rtog pa dgu pa'i don ni bcom ldan 'das 'di lta ste dper na shing mkhan mkhas pa 'am zhes bya ba la sogs pa gsol pa yin no/ /shing gi tshogs de ni rnam par rtog pa ma mchis so zhes bya ba 'bras bu dang bcas pa'i rnam par rtog pa bsal ba yin no//'di skad du dben pas dben pa ma rtogs pa'i tshul du/ sa mi g.yo ba la sogs pa la 'jug pas sangs rgyas kyi rigs su nges pa dang / sgyu ma lta bur rtogs pas mthong ba la sogs pa'i lam yang dag par 'grub pa dang /snang brnyan tsam du zad pas shes pa'i dmigs pa ma 'khrul pa dang / yon tan dang skyon mthong ba sngon du 'gro ba'i blang bar bya ba dang dor bar bya ba nyid kyis gnyen po dang mi mthun pa'i phyogs dang / thams cad du 'gro ba la sogs pa nyid kyis rang gi rtogs pa dang /dman zhing gya nom pa ma yin pa nyid kyis nyan thos la sogs pa'i sa thag sring bar byed pa nyid dang / bsam pa ji lta ba dang mthun pas sprul pas sems can gyi don bya ba dang / yang dag pa'i thabs la mkhas pa'i stobs kyis skye bo thams cad mya ngan las 'das pa la dgod pa'i 'bras bu la skyon med pa nyid kyis ni rnam pa thams cad du gzung bar bya ba nyid du 'jug par bya'o zhes bya ba de lta bu gzung ba'i rnam par rtog pa dang po 'jug pa'i phyogs kyi rten can rnam pa dgu ni rtse mo mngon par rtogs pa mthong ba'i lam gyi sbyor ba'i gnas skabs su byang chub sems dpa' rnams kyis spang bar bya ba yin pas de'i gnyen po'i gnas skabs bstan pas ldog pa'i sgo nas bstan pa yin no zhes brjod pa yin no//de skad du yang / ngo bo nyid dang rigs pa dang / /lam ni yang dag 'grub pa dang / /shes pa'i dmigs pa ma 'khrul dang / /mi mthun phyogs dang gnyen po dang //rang gis rtogs dang byed pa dang / /de las bya ba'i 'bras bu la/ /'jug pa'i phyogs kyi rten can gyi/ /rnam rtog de ni rnam dgur 'dod/ /ces gsungs pa yin no/ /shes rab kyi pha rol tu phyin pa'i bshad pa mngon par rtogs pa'i rgyan gyi snang ba las sgyu ma lta bu'i le'u zhes bya ba ste nyi shu rtsa drug pa'o// //ldog pa'i rten can gyi gzung ba'i rnam par rtog pa gnyis pa ji ltar na rnam pa dgu yin zhe na/ de la rnam par rtog pa dang po'i don brjod pa ni/ tshe dang ldan pa rab 'byor kye ma zhes bya ba la sogs pa pa'o//shes rab dang ni thabs dag ni/ 'khor ba dang mya ngan las 'das par mi ltung bar byed pa nyid kyis na/ rtog pa mtha' dag gi bdag po yin pa'i phyir/ gang shes rab kyi pha rol tu phyin pa la spyod pa de ni snying po gtso bo la spyod pa yin no zhes bya ba ste 'dis ni rtogs pa dman pa nyid kyis rnam par rtog pa bkag pa yin no//'on kyang de la yang snying po nyid du mngon par zhen par mi bya'o zhes bya ba ni/ tshe dang ldan pa shA ri'i bu kye ma zhes bya ba la sogs pa smras pa yin te/ snying po ni stong pa de nyid du 'dzin pa med pas na snying po ma yin pa'o/ /rnam par rtog pa gnyis pa'i don brjod pa ni/gang dag bla na med pa yang dag par rdzogs pa'i zhes bya ba la sogs pa'o/ /gang dge ba'i bshes gnyen la sogs pa yongs su 'dzin pa dang ldan zhing shes rab kyi pha rol tu phyin pa la spyod pa de ni phyag bya ba yin no zhes bya ba ste 'dis ni yongs su 'dzin pa med pa'i rnam par rtog pa bsal ba yin no//rnam par rtog pa gsum pa'i don brjod pa ni gang dag shes rab kyi pha rol tu phyin pa zab mo 'di la spyod cing zhes bya ba la sogs pa'o/ /chos nyid de mngon sum du mi byed pa zhes bya ba 'dis ni bsgrub pa'i khyad par shes pas bsgrub pa ma tshang ba'i rnam par rtog pa med par bstan to/ / rnam par rtog pa bzhi pa'i don ni/ de nas tshe dang ldan pa rab 'byor gyis zhes bya ba la sogs pa smos pa yin no/ /mngon sum du mi byed pas zhes bya ba ni/ byang chub sems dpa' gang yang dag pa'i mtha' mngon sum du mi byed pa 'di ni dka' ba byed pa ma yin te/ rang dbang thob pa'i phyir ro zhes bya bar dgongs so//de bas na gzhan gyi rkyen gyis 'gro ba nyid kyi rnam par rtog pa bsal ba yin no/ /rnam par rtog pa lnga pa'i don ni/ lha'i bu rnams gang gi tshe zhes bya ba la sogs pa smras pa yin no/ /sems can rnams gdul bar bya'o snyam du zhes bya ba ni/ chos thams cad sgyu ma lta bu nyid yin du zin kyang /sems can rnams gdul bar bya ba'i phyir phyir mi ldog par 'gro ba'i sbyor ba dang / theg pa gzhan gyis 'gro ba med pas / bla na med pa'i byang chub rtogs pa la 'jug pa'i phyir/ rnam pa thams cad mkhyen pa'i ched du bya ba las nyams pas na ched du bya ba la sogs pa'i rnam par rtog pa bsal ba ston pa yin no//rnam par rtog pa drug pa'i don brjod pa ni/ lha'i bu gang dag sems can gdul bar bya'o snyam du zhes bya ba la sogs pa yin no/ /de bzhin du de ci'i phyir zhe na zhes dogs pa bsu nas smras pa ni lha'i bu dag nam mkha' dben pa'i phyir zhes bya ba la sogs pa'o//sems can rnams kyi phyir go cha bgo bar bya'o zhes bya ba ni/ nam mkha' dang 'dra ba'i sems can gyi khams ma lus pa gdul bar bya ba'i don du go cha bgos pas nyi tshe ba ma yin pa'i lam gyi bya ba ston pa'i phyir nyi tshe ba'i bya ba'i rnam par rtog pa dang bral bar don gyis ston pa yin no//rnam par rtog pa bdun pa'i don ni nam mkha' dang lhan cig ces bya ba la sogs pa smras pa yin te/ sems can rnams nam mkha' dang 'dra bar khas blangs pa shes pas so/ /'dis ni rtogs pa tha dad pa nyid kyi rnam par rtog pa med par bstan to//rnam par rtog pa brgyad pa'i don ni/ byang chub sems dpa' sems dpa' chen pos zhes bya ba la sogs pa smras pa yin te/ sems can rnams kyi don gyi phyir go cha bgos pas rtogs pa sngon du 'gro ba can yin pa'i phyir gnas pa dang / 'gro ba mi shes pa'i rnam par rtog pa dang bral bar bstan pa yin no//rnam par rtog pa dgu pa'i don ni/ de yang sems can de dag kyang shin tu dmigs su med pa zhes bya ba la sogs pa smras pa yin no/ /de bzhin du de ci'i phyir zhe na zhes dogs pa bsu nas/ sems can dben pa'i phyir zhes bya ba la sogs pa smras pa yin te/gzugs la sogs pa ni don dam par rdzas su dmigs su med pas sgyu ma lta bu nyid du shes par bya'o/ /bar du zhes bya ba 'dis ni skye mched bcu gnyis la sogs pa gzung ngo / /de bzhin gshegs pa la sogs pas thugs su chud pa'i chos rnams kyang stong pa nyid yin no//nye bar bsdu ba ni lha'i bu dag de ltar na chos thams cad dben pa nyid du blta'o zhes smras pa yin no/ /de ltar mi dmigs par bstan pa la zhum pa med par spyad par bya'o zhes smras pa ni/ lha'i bu dag gal te de ltar chos thams cad dben pa nyid du bshad pa la zhes bya ba la sogs pa'o//skrag par mi byed pa'i rgyu ci zhig yin zhes gsungs pa ni/ rab 'byor ci'i phyir zhes bya ba la sogs pa'o/ /'jigs pa po dang 'jigs pa dang 'jigs par bya ba ma dmigs par len zhus pa ni/ bcom ldan 'das dben pa'i slad du zhes bya ba la sogs pa gsol pa yin no//nye bar bsdu ba ni bcom ldan 'das rgyu 'dis zhes bya ba la sogs pa gsol pa yin no/ /'di skad du gang gi phyir stong pa nyid yin pa'i phyir skrag par byed pa dang / skrag pa dang / skrag par bya ba med pas zhum par 'gyur ba med pa dang / de bas na gtsor nges par 'byung ba'i rang bzhin gyi shes rab kyi pha rol tu phyin pa la spyod pa yin no zhes brjod pa yin te /de ltar na rjes la 'gro ba'i rnam par rtog pa bsal ba bstan pa yin no/ /'di skad du 'khor ba dang / mya ngan las 'das pa gang yang rung ba zhig tu ltung ba nyid kyis rtogs pa dman pa nyid dang /dge ba'i bshes gnyen dang / thabs mkhas pa dang bral ba nyid kyis yongs su 'dzin pa med pa dang / shes bya'i sgrib pa mtha' dag gi gnyen po ma yin pa nyid kyis lam ma tshang ba dang / de bzhin gshegs pa la sogs pa'i gdams ngag la ltos pa dang bcas pa nyid kyis gzhan gyi rkyen gyis 'gro ba nyid dang /sems can thams cad kyi mchog nyid la sogs pa la mi 'jug pa nyid kyi ched du bya ba las ldog pa dang / nyon mongs pa'i sgrib pa'i gnyen po yin pas/ nyi tshe ba'i lam gyi byed pa dang / dmigs pa dang bcas pa nyid kyis 'bras bu dang po la sogs pa mthong ba sna tshogs pa nyid dang /ma rig pa'i bag la nyal thams cad ma spangs pa nyid kyis gnas pa dang 'gro ba mi shes pa dang / theg pa chen po thams cad sdud par byed pa nyid kyis rnam pa thams cad mkhyen pa nyid mya ngan las 'das pa thams cad kyi mjug tu 'gro ba la nyes pa dang bcas pa nyid kyis gzung bar bya ba ma yin pa nyid yin pas ldog par bya ba bzung ba'i rnam par rtog pa gnyis pa ldog par bya ba'i phyogs kyi rten can nyan thos dang rang sangs rgyas kyi rgyud la blang bar bya ba nyid du byung ba ni/byang chub sems dpa' rnams kyi mthong ba'i lam gyi sems dang sems las byung ba 'jug pa'i gnas skabs kyi spang bar bya ba yin par de'i gnyen po'i gnas skabs bstan pas/ldog pa'i sgo nas bstan pa yin no zhes brjod pa yin no/ /de skad du yang / srid dang zhi bar ltung ba'i phyir/ /rtogs pa dman pa nyid dang ni//yongs su 'dzin pa med pa dang / lam gyi rnam pa ma tshang dang / /gzhan gyi rkyen gyis 'gro ba dang / /ched du bya ba log pa dang / /nyi tshe ba dang sna tshogs nyid/ /gnas dang 'jug la rmongs pa dang / /rjes la 'gro zhes bya ba la/ /rnam rtog dgu yi bdag nyid 'di/ / ldog pa'i phyogs kyi rten can te/ /nyan thos la sogs yid la 'byung / /zhes gsungs pa yin no/ /'dzin pa'i rnam par rtog pa dang po skyes bu rdzas su yod pa so so'i skye bo'i rten can ji ltar rnam pa dgu yin zhe na/ rtog pa dang po'i don ni / bcom ldan 'das chos gang la yang zhum par 'gyur ba ma mchis so zhes bya ba la sogs pa gsol pa yin te 'dzin pa dang gtang ba'i rnam par rtog pa med pa'i phyir ro zhes bya bar dgongs so//de nyid gsal bar bya ba'i phyir de ci'i slad du zhe na zhes bya ba la sogs pa gsol pa yin no/ /rnam par rtog pa gnyis pa'i don ni/ rab 'byor 'on kyang gal te zhes bya ba la sogs pa gsol pa yin no//de ltar spyod na shes rab kyi pha rol tu phyin pa la spyod pa'o zhes bya ba ni chos thams cad dmigs su med par bstan pa la de ltar zhum par mi 'gyur ba la sogs pa gang spyod pa de ni yid la byed pa'i rnam par rtog pa med pas rgyal ba'i yum la yang dag par spyod pa yin no zhes bya ba'i tha tshig go//rnam par rtog pa gsum pa'i don ni/ de ltar spyod pa'i byang chub sems dpa' sems dpa' chen po zhes bya ba la sogs pa gsungs pa yin no/ /de ltar spyod pa la phyag 'tshal bar 'gyur ro zhes bya ba ni khams gsum char dang 'brel ba'i rnam par rtog pa dang bral bar mthu chen po nyid thob pa'i phyir phyag 'tshal ba yin no//rnam par rtog pa bzhi pa'i don ni/ rab 'byor 'jig rten gyi khams gzhal du med grangs med pa dag na zhes bya ba la sogs pa gsungs so/ / sangs rgyas kyi spyan gyis gzigs te zhes bya ba ni gnas pa'i rnam par rtog pa dang bral bas khyad par can gyi don bskyed par bya bas dgongs pas rtog par mdzad pa'o/ /phan 'dogs pa ni bya ba yongs su rdzogs par mdzad pas rjes su 'dzin par mdzad pa'o/ /dgongs par mdzad pa ni skal ba dang ldan pa'i rang bzhin du nges par 'dzin par mdzad pa'i phyir ro//de bzhin gshegs pas phan 'dogs par mdzad pa nyid kyis bsngags pa ni rab 'byor gang yang byang chub sems dpa' zhes bya ba la sogs pa gsungs pa yin no/ /snga ma bzhin du de ci'i phyir zhe na zhes dogs pa bsu nas rab 'byor stong gsum gyi stong chen po zhes bya ba la sogs pa gsungs so//'di nyid rgya cher ston pa ni rab 'byor stong gsum gyi zhes bya ba la sogs pa gsungs so/ /rnam par rtog pa lnga pa'i don ni/ rab 'byor byang chub sems dpa' sems dpa' chen po chos dang ldan pa zhes bya ba la sogs pa gsungs pa yin no//sems can thams cad yongs su ma btang ba yin no zhes bya ba 'dis ni dngos po med pa la mngon par zhen pa'i rnam par rtog pa bkag pa yin no/ /chos thams cad stong par brtag pa yin te zhes bya ba 'dis dngos po la mngon par zhen pa'i rnam par rtog pa bsal ba yin no//rnam par rtog pa drug pa'i don ni rab 'byor byang chub sems dpa' sems dpa' chen po chos gnyis po gzhan dang ldan na zhes bya ba la sogs pa gsungs pa yin te/ ji skad smras pa bzhin byed pa yin zhes bya ba ni chos kyi dngos por brtags pa'i rnam par rtog pa ngas rab tu spang bar bya'o zhes smras pa'i don yongs su rdzogs par byed pa'i phyir ro//de nyid kyis na sangs rgyas kyis dgongs pa yin no/ /rnam par rtog pa bdun pa'i don ni rab 'byor de ltar spyod pa'i zhes bya ba la sogs pa gsungs pa yin no/ /'di lta ste shes rab kyi pha rol tu phyin pa'i gnas pa 'di nyid kyis zhes bya ba ni gnas pa 'di ni chags pa'i rnam par rtog pa spong bar byed pa'i phyir ro zhes bya bar dgongs pa'o//de nyid gsal bar bya ba'i don du de ci'i phyir zhe na zhes bya ba la sogs pa gsungs so/ /de nyid kyis gnas shing de ltar spyod na zhes bya ba ni mnyam par bzhag pa dang mnyam par ma bzhag pa'i dbye bas de skad smos pa shes par bya'o//sems can mgon med pa rnams kyi mgon du gyur zhes bya ba la sogs pa tshig bcu gcig ni rab tu dga' ba nas brtsams te sangs rgyas kyi kun tu 'od kyi rab tu rtogs pa thob pa dang go rims bzhin du sbyar bar bya'o//nye bar bsdu ba ni lha'i bu dag de ltar zhes bya ba la sogs pa gsungs pa yin no/ /de bzhin du de ci'i phyir zhe na zhes dogs pa bsu nas rab 'byor zhes bya ba la sogs pa gsungs te gang gi phyir byang chub sems dpa' ji skad bshad pa'i gnas pas gnas pa la sangs rgyas bcom ldan 'das ming la sogs pa yongs su brjod par mdzad cing chos ston pa sngon du 'gro bar ched du brjod pa yang [(]chad [,]ched [)]du brjod par mdzad pa de bas na spro ba 'phel bar byed par 'gyur ro zhes bya ba'i tha tshig go//'di nyid dpes gsal bar mdzad pa ni rab 'byor 'di lta ste dper na zhes bya ba la sogs pa gsungs so//byang chub sems dpa' thams cad kyi ming ni mtha' yas pa nyid kyis gzung bar mi nus pa nyid yin pas bsgre bar mdzad pa ni byang chub sems dpa' sems dpa' chen po gzhan gang dag ces bya ba la sogs pa gsungs pa yin no/ /de bzhin gshegs pa shAkya thub pa'i sangs rgyas kyi zhing na bsngags par 'os pa'i byang chub sems dpa' med do zhe na/de bzhin du rab 'byor zhes bya ba la sogs pa gsungs so/ /'di skad du ji ltar rang rang gi sangs rgyas kyi zhing na gnas pa'i byang chub sems dpa' rnams spro ba bskyed pa'i phyir de bzhin gshegs pa gzhan gyi sangs rgyas kyi zhing na gnas pa'i byang chub sems dpa' rnams kyi ming la sogs pa brjod pa la brtson zhing chos ston par mdzad pa de bzhin du mi bskyod pa la sogs pa rnams kyang nga'i sangs rgyas kyi zhing na gnas pa'i byang chub sems dpa' rnams kyi ming la sogs pa brjod pa la brtson pas chos ston to zhes brjod pa yin no//rnam par rtog pa brgyad pa'i don ni sangs rgyas bcom ldan 'das de dag ces bya ba la sogs pa gsol pa yin no/ /de ni ma yin te zhes bya ba'i lan gyi tshig rnam par 'byed pa ni rab 'byor sangs rgyas bcom ldan 'das de dag ces bya ba la sogs pa gsungs pa yin no//rab 'byor 'on kyang sangs rgyas bcom ldan 'das de dag ni phyir mi ldog pa'i zhes bya ba ni gnyen po'i rnam par rtog pa dang bral ba'i phyir sa brgyad pa la sogs pa la gnas pa ni nges par phyir mi ldog pa thob pa yin no zhes bya ba'i tha tshig go/ /rnam par rtog pa dgu pa'i don ni bcom ldan 'das sangs rgyas bcom ldan 'das kyis zhes bya ba la sogs pa gsol pa yin no//yod pa ni rab 'byor byang chub sems dpa' zhes bya ba la sogs pa gsungs pa yin no/ /de dag nyid kyang gang zhig yin zhes dogs pa bsu nas ston pa ni gang da ltar zhes bya ba la sogs pa gsungs pa yin te/mi bskyod pa'i zhes gsungs pa ni de'i sangs rgyas kyi zhing du rgyud yongs su dag pa mang du skye ba yin pa'i phyir ro/ /gzhan dag la yang bsgri ba ni rab 'byor gang yang zhes bya ba la sogs pa gsungs pa yin no/ /byang chub sems dpa' rin po che tog smos pa ni de dang rigs mthun pa'i byang chub sems dpa' rnams nye bar mtshon pa yin par shes par bya'o//khyad par du 'phags pa'i dge ba'i bshes gnyen la sogs pas yongs su bzung ba'i stobs kyis sa mi g.yo ba las kyang sngar ci zhig ji ltar 'dod pa bzhin du 'gro ba thogs pa'i rnam par rtog pa dang bral bas rdzu 'phrul la dbang thob pa'i byang chub sems dpa' gang mi bskyod pa la sogs pa'i sangs rgyas kyi zhing na gnas pa de ni phyir mi ldog pa rnams ma gtogs par ming la sogs pa brjod pa'i yul du gyur pa yod pa yin no zhes bya ba'i tha tshig go//'di skad du kun rdzob tu ji lta ba bzhin du 'dzin pa dang 'dor bar byed pa dang /yang dag pa nyid du yid la mi byed par yid la mi byed pa dang / chos nyid kyi khams gsum char dang nye bar 'brel pa dang / stong pa nyid du mi gnas pas gnas pa dang / dngos po la mngon par ma zhen pas thams cad la mngon par zhen pa dang /rdzas su yod pa med pas chos thams cad btags pa dang / de kho na nyid shes pa'i ma chags pas mngon par zhen pa sngon du 'gro ba'i chags pa dang / mnyam pa nyid bsgom pa'i gnyen po nyid kyis gnyen po dang / shes rab kyi pha rol tu phyin pa yang dag par ma shes pa nyid kyis ji ltar 'dod pa bzhin du 'gro ba la thogs pa la don dam pa'i dngos por mngon par zhen pas 'dzin pa 'jug pa ni bdag rdzas su yod pa nyid yin no zhes de ltar so so'i skye bo dang 'brel pa'i 'dzin pa'i rnam par rtog pa dang po rnam pa dgu ni byang chub sems dpa' rnams kyi mthong ba'i lam gyi sbyor ba'i gnas skabs su spang bar bya ba yin par de dang de'i gnyen po'i gnas skabs bstan pas ldog pa'i sgo nas bstan pa yin no//de skad du yang / 'dzin pa dang ni 'dor ba dang / /yid la byed dang khams rnams ni/ /gsum char nye bar 'brel pa dang / /gnas dang mngon par zhen pa dang //chos kyi dngos po brtags pa dang / /chags pa dang ni gnyen po dang / /ji ltar 'dod bzhin 'gro nyams la/ /'dzin pa dang por shes par bya/ /zhes gsungs pa yin no/ /'dzin pa'i rnam par rtog pa gnyis pa skyes bu btags par yod pa'i rten can ji ltar rnam pa dgu yin zhe na/rtog pa dang po'i don ni rab 'byor gzhan yang byang chub sems dpa' sems dpa' chen po zhes bya ba la sogs pa gsungs pa yin te/ mos la zhes bya ba ni sems can thams cad kyi mchog nyid la sogs pa ched du bya bar 'gro ba'i bsam pas skye ba med pa'o zhes bya ba'am zhi ba'o zhes chos thams cad yid la byed cing da dung mi skye ba'i chos la bzod pa phul du byung ba dang ldan pa'am phyir mi ldog pa'i dbang thob pa rtogs par yang mi byed pa zhes pa ste de ltar na ched du bya bar nges par mi 'byung ba'i rnam par rtog pa med par bstan pa yin no//rnam par rtog pa gnyis pa'i don ni rab 'byor yang sangs rgyas bcom ldan 'das de dag gis zhes bya ba la sogs pa gsungs pa yin te/de dag ni nyan thos kyi sa rang sangs rgyas kyi sa spangs pa yin zhing zhes bya ba ni 'dis ni lam nges par 'dzin pa'i rnam par rtog pa med par gsungs pa yin no//de dag gis ni sangs rgyas nyid la re bar bya ste zhes bya ba 'dis kyang rang gi lam nges par 'dzin pa'i rnam par rtog pa dang bral bar ston te/ gzhan du na phyin ci log tu 'gyur bas sangs rgyas kyi sa mi srid par 'gyur ba'i phyir ro/ /rnam par rtog pa gsum pa'i don ni de dag kyang bla na med pa yang dag par rdzogs pa'i zhes bya ba la sogs pa gsungs pa yin no//snga ma bzhin du de ci'i phyir zhe na zhes dogs pa bsu nas rab 'byor sangs rgyas bcom ldan 'das de dag gis zhes bya ba la sogs pa gsungs so/ /de ltar shes rab kyi pha rol tu phyin pa la spyod pa zhes bya ba ni skye ba dang 'gag pa'i rnam par rtog pa las dben pas rjes su gnas pa zhes bya ba'i tha tshig go//rnam par rtog pa bzhi pa'i don ni/ rab 'byor gzhan yang zhes bya ba la sogs pa gsungs pa yin no/ /phyir mi ldog pa nyid la gnas par 'gyur ro zhes bya ba ni byang chub sems dpa' gang dag rmongs pa la sogs par mi 'gyur ba nyid kyis rgya cher nyan pa la sogs pa byed cing /de rnams kyi thad du tshangs par spyod pa la sogs pa nyams su len pa de dag kyang ldan pa dang mi ldan pa'i rnam par rtog pa dang bral bas phyir mi ldog pa nyid la gnas par 'gyur zhes bya ba'i don no/ / rnam par rtog pa lnga pa'i don ni rab 'byor de ltar shes rab kyi pha rol tu phyin pa thos pa yang zhes bya ba la sogs pa gsungs pa yin no/ /smos kyang ci dgos zhes bya ba ni gzugs la sogs pa la gnas pa'i rnam par rtog pa dmigs su med pas mos pa gang yin pa dang / shes rab kyi pha rol tu phyin pa la de bzhin du gnas pa gang yin pa dang /'tshang rgya ba nyid kyi rgyur sems can rnams la chos ston par 'gyur ba de ni shin tu phyir mi ldog pa nyid la gnas par 'gyur ro zhes snga ma dang sbyar ro/ /rnam par rtog pa drug pa'i don ni bcom ldan 'das gang gi tshe de bzhin nyid ces bya ba la sogs pa gsungs pa yin no//rab 'byor gang 'di skad du zhes bya ba la sogs pas de'i tshig bzlas nas lan btab pa ni rab 'byor de bzhin nyid ma gtogs par zhes bya ba la sogs pa gsungs pa yin te/ chos thams cad ni chos kyi dbyings kyi rang bzhin yin pa'i phyir de bzhin nyid las ma gtogs pa'i chos gzhan dmigs su med pas don dam par gang yang de bzhin nyid la gnas par 'gyur ba med kyi yang kun rdzob tu ni rigs rnam par 'jig pa'i rnam par rtog pa dang bral bas gnas par 'gyur ro zhes bya bar dgongs so//don dam pa nyid kyi dbang du mdzad nas gsal bar bstan pa ni rab 'byor re zhig de bzhin nyid de nyid dmigs su med na zhes bya ba la sogs pa gsungs pa yin no//rnam par rtog pa bdun pa'i don ni rab 'byor de bzhin nyid ces bya ba la sogs pa gsungs pa yin te/ de kho na nyid du na de bzhin nyid dam de las gzhan pa'i chos byang chub mngon par rdzogs par 'tshang mi rgya'i 'on kyang kun rdzob tu don du gnyer ba med pa'i rnam par rtog pa dang bral bas don du gnyer bar bya ba'i dngos po la dmigs nas mngon par 'tshang rgya'o zhes bya bar 'dod do//rnam par rtog pa brgyad pa'i don ni rab 'byor de bzhin nyid ni chos mi ston to zhes gsungs pa yin te/de kho na nyid du na de bzhin nyid du chos mi ston gyi 'on kyang kun rdzob tu rgyu med pa'i rnam par rtog pa dang bral bas rgyu yod pa nyid kyi chos ston to zhes bya bar dgongs so/ /rnam par rtog pa dgu pa'i don ni rab 'byor chos gang bstan par bya ba'i chos de yang dmigs su med do zhes gsungs pa yin te/phyir rgol ba'i chos la dmigs pa'i rnam par rtog pa med pas bstan bzhin pa'i chos dmigs su med do zhes bya ba'i tha tshig go/ /'di skad du nyan thos la sogs pa'i nges par 'byung ba nyid ji skad du bshad pa'i ched du bya bar nges par mi 'byung ba dang / phan pa dang mi phan pa 'thob pa dang spangs pa nyid kyis lam dang lam ma yin pa nges par 'dzin pa dang / rgyu dang 'bras bu kun rdzob kyi ngo bo nyid skye ba dang 'gag pa dang / bar chad med pa dang cig shos su snang ba nyid kyi dngos po mtha' dag dang ldan pa dang mi ldan pa dang / nam mkha' la gnas pa'i bya dang 'dra ba nyid kyi gzugs la sogs pa la gnas pa dang /byang chub tu sems bskyed pa la sogs pa'i sgo nas nyan thos la sogs pa'i rigs 'jig pa dang / de bzhin nyid las khyad par du 'phags pa'i chos med pas 'dod pa med pa dang / don dam pa'i bden pa la brten pas rgyu med pa dang /ser sna shin tu goms par byas pa'i chos nyid kyis bdud la sogs pa'i phyir rgol ba'i dngos po dmigs pa la de kho na'i dngos por mngon par zhen pas 'dzin par byed pa 'jug pa ni bdag btags pa nyid yin no zhes de ltar 'phags pa rnams dang 'brel pa'i 'dzin pa'i rnam par rtog pa gnyis pa rnam pa dgu byang chub sems dpa' dag gi mthong ba'i lam gyi sems dang sems las byung ba 'jug pa'i gnas skabs kyis spang bar bya ba yin par de dang de'i gnyen po'i gnas skabs bstan pas ldog pa'i sgo nas brjod pa yin zhes bstan pa yin no//de skad du yang /ched bzhin nges par mi 'byung dang / /lam la lam min nges 'dzin dang / /'gag dang bcas pa'i skye ba dang / /dngos po ldan dang mi ldan dang / /gnas dang rigs ni 'jig pa dang / /don dang gnyer dang rgyu med dang / /phyir rgol ba ni dmigs pa la/ /'dzin pa'i rnam rtog gzhan yin no//zhes gsungs pa yin no/ /gzung ba'i rnam par rtog pa ma yin pa zhes pa'i mu bzhi ste/ de la mu dang po ni yul drug tu snang ba'i gzung ba'i rnam pa can gyi rnam par rig pa'o/ /gnyis pa ni skad cig ma gcig pa'i 'dzin pa'i rnam pa can no/ /gsum pa ni de nyid kyi skad cig gzhan du'o//bzhi pa ni rnam pa de dang bral ba'i shes rab kyi pha rol tu phyin pa'o/ /rigs nyid yin gyi rigs kyi rnam par rtog pa ma yin par 'gyur ram zhes bya ba ni tshig phyi ma dang ldan pa'o/ /re zhig rigs kyi rnam par rtog pa gang yin pa de ni rigs kyang yin te/ dper na gnyen po yang dag par 'grub pa'i dus kyi rigs bzhin no//rigs nyid yin gyi rigs kyi rnam par rtog pa ma yin par 'gyur ram zhes bya ba ni tshig snga ma dang ldan pa'o/ /re zhig yang dag par 'grub pa'i rnam par rtog pa gang yin pa de ni dmigs pa'i rnam par rtog pa yang yin te/ dper na yang dag par rtogs pa'i yang dag pa'i dmigs pa la sbyor ba bzhin no//dmigs pa'i rnam par rtog pa nyid yin gyi yang dag par 'grub pa'i rnam par rtog pa ma yin pa de ni dper na dmigs pa yongs su ma rdzogs pa lta bu'o/ /phyogs 'dis lhag ma rnams kyang rjes su dpag par bya'o/ / de ltar mthong ba'i lam la mi mthun pa'i phyogs gnyen po dang bcas pa bstan nas/ byang chub chen po 'grub par bya ba'i phyir da ni mthong ba'i lam rgyu rnam pa gsum po gang dang bcas par bzhed pa de brjod par bya ba yin pas mthong ba la sogs pa'i lam yang dag par ston pas byang chub chen po la gzhan 'god pa'i rgyu dang po bstan pa'i don du gsol pa ni bcom ldan 'das shes rab kyi pha rol tu phyin pa ni zab po zhes bya ba la sogs pa gsungs pa'o//snga ma bzhin du de ci'i slad du zhe na zhes dogs pa bsu nas bcom ldan 'das de bzhin nyid la zhes bya ba la sogs pa gsol te/ chos thams cad skye ba med pa yin na yang kun tu zhum pa la sogs pa ma byas par bla na med pa'i byang chub kun rdzob tu rtogs par 'dod pa gang yin pa de ni dka' ba byed pa yin no zhes spro ba bskyed pa ston pas byang chub la mthong ba'i lam la sogs pa ston pas gzhan dag rtogs par byas pa yin no//don dam pa la brten nas ni dka' ba ci yang med do zhes bya ba ni kau shi ka gang 'di skad du zhes bya ba la sogs pa smras pa yin no//legs par smras pa nyid kyis na bsngags par byed pa ni 'phags pa rab 'byor gyis gang dang gang bshad pa zhes bya ba la sogs pa smras pa yin no/ /ci la yang thogs pa med do zhes bya ba ni gang la yang mngon par zhen pa med pa'o//rang gis smras pa'i don bstan par byed pa ni bcom ldan 'das bdag gis gnas brtan rab 'byor las brtsams te zhes bya ba la sogs pa gsol pa yin no/ /chos dang rjes su mthun pa'i chos zhes bya ba ni ji ltar smos pa'i stong pa nyid kyi chos rtogs pa'o//legs par smras so zhes gsungs pa ni kau shi ka khyod kyi zhes bya ba la sogs pa'o/ /de bzhin du de ci'i phyir zhe na zhes dogs pa bsu nas kau shi ka gnas brtan rab 'byor zhes bya ba la sogs pa gsungs so/ /'di nyid ci'i phyir snyam pa'i dogs pa de ci'i phyir zhe na zhes dogs pa bsu nas kau shi ka gnas brtan rab 'byor ni zhes bya ba la sogs pa gsungs so//'dod pa la sogs pa khams gsum pa so so'i nyon mongs pa chung ngu dang 'bring dang chen po spong bar byed pa'i mthong ba'i lam gyi stong pa nyid kyi rang bzhin du mthong ba'i phyir go rims bzhin shes rab kyi pha rol tu phyin pa yang dag par rjes su mi mthong zhing mi dmigs na zhes bya ba nas brtsams te/chos nyid kyang mi dmigs na zhes bya ba'i bar gyi tshig dgu po rnams yin no/ /spyir chos thams cad kyi rgyu dang 'bras bu dag dmigs su med pa'i phyir grangs ji lta ba bzhin chos thams cad dben par gnas pa dang chos thams cad mi dmigs par gnas par gzung bar bya'o//gal te de lta yin na byang chub sems dpa' rnams kyis nyan thos rnams dang mtshungs pa kho nar gnas par bya'o zhe na/ kau shi ka yang zhes bya ba la sogs pa gsungs so/ /gnas pa de dag thams cad pas zhes bya ba ni de bzhin gshegs pa'i gnas pa ma gtogs par gzhan rnam pas so//gnas pa 'dis gnas par bya'o zhes bya ba ni byang chub sems dpa'i gnas pa'i phan yon bstan pa nyid kyis byang chub chen po'i phyir mthong ba'i lam la sogs pa gzhan dag la yang dag par bstan par mjug bsdus pa yin no//shes kyi pha rol tu phyin pa'i bshad pa mngon par rtogs pa'i rgyan gyi snang ba las snying po'i le'u zhes bya ste nyi shu rtsa bdun pa'o// //ji skad du bshad pa'i byang chub kyi mthong ba'i lam la sogs pa yang dag par bstan pas mthong ba'i lam rtogs pa'i phyir rgyu phun sum tshogs pa'i dge slong rnams kyi mchod pa byas so zhes smras pa ni de nas de'i tshe lha'i bu zhes bya ba la sogs pa'o//lha'i bu rnams man dA ra ba'i me tog thogs nas 'khor der 'dus pa ni dge slong rnams kyi smon lam gyi stobs kyis me tog rnyed pa'i rgyu yin par shes par bya'o/ /rtogs pa yid ches pa bas gong nas gong du mngon par 'phel bar bya ba'i phyir smon lam yang byas par 'gyur zhes brjod pa ni tshig 'di skad ces kyang gsol te zhes bya ba la sogs pa'o//de nas bcom ldan 'das de'i tshe zhes bya ba la sogs pa ni bshad zin to/ /bskal pa stong phrag nyi shur zhes bya ba ni mi rnams kyi tshe lo dpag tu med pa nas brtsams te lo bcu'i bar du 'grib pa 'di ni mtshon dang nad dang mu ge rnams kyis mthar phyin par byas pas 'grib pa'i bar gyi bskal pa dang po'o//tshe lo bcu pa de las kyang 'phel bar 'gyur zhing tshe lo brgyad khri par gyur cing yang de bzhin du 'grib par gyur pa na tshe lo bcu par 'gyur ba ste/de ltar 'phel ba dang 'grib pa'i dbye bas bar gyi bskal pa bco brgyad yin no/ /tshe lo bcu pa de nyid las kyang 'phel bar gyur cing tshe lo brgyad khri par gyur pa 'di ni 'phel ba'i bar gyi bskal pa nyi shu yin no/ /de bzhin du gzhan rnams kyi 'phel ba dang 'grib pa'i dus ji srid yin pa bar gyi bskal pa dang po 'grib pa'i dus dang phyi ma 'phel ba'i dus kyang de srid yin pas thams cad dus mnyam pa yin no//de ltar na bar gyi bskal pa gcig gis ni snod kyi 'jig rten 'jig pa'i phyir dang bcu dgus ni stongs par byed pa'i phyir bar gyi bskal pa nyi shur ni 'jig rten 'jig pa yin no//bar gyi bskal pa nyi shur zhig nas 'dug go/ /de bzhin du bar gyi bskal pa gcig gis ni snod kyi 'jig rten mngon par 'grub par byed pa'i phyir dang / bcu dgus ni chags par byed pa'i phyir la/ bar gyi bskal pa nyi shur chags nas gnas pa yin te/ de ltar bar gyi bskal pa brgyad cu'i grangs kyis chad pa ni bskal pa chen po ste 'di ni bskal pa bzang po la sogs pa yin no/ /bskal pa skar ma lta bu ni de lta bu ma yin te smon lam dang dge ba'i rtsa ba'i dbang gis shin tu ring ba yin pa'i phyir ro/ /de bas na 'grib pa'i dus na ji skad du bshad pa'i bar kyi bskal pa'i tshad kyi dus yongs su chad pa yin pas bskal pa stong phrag nyi shur zhes gsungs pa yin no//byang chub kyi rgyu mtshan gyi don nyid du gzhan dag la tshig dang don yang dag pa la sogs pa'i sgo nas shes rab kyi pha rol tu phyin pa so sor gtong ba ste rgyu gnyis pa bshad pa'i gleng bslang ba ni kun dga' bo byang chub sems dpa' sems dpa' chen po gang su dag zhes bya ba la sogs pa gsungs pa yin no//de bzhin du de ci'i phyir zhe na zhes dogs pa bsu nas 'di ltar mi rnams dang zhes bya ba la sogs pa gsungs so/ /smod par mi byed ces bya ba la sogs pa'i tshig bdun ni rim pa ji lta ba bzhin du rnam pa thams cad mkhyen pa la sogs pa'i mngon par rtogs pa bdun dang mi mthun pa'i phyir ro zhes brjod par bya'o//smon pa slu bar mi 'gyur ba zhes bya ba ni bla na med pa'i byang chub kyi yul la 'jug pa'i smon lam la gal te gzhan du smon pas slu bar mi 'gyur ba de ltar na dge ba'i rtsa ba de nyan thos dang rang sangs rgyas kyi don du rnam par smin pa sbyin par mi byed do zhes bya ba'i tha tshig go//gleng bslang ba byas nas da ni de bzhin gshegs pa dang 'brel ba'i yongs su gtad pa chung ngu'i don ni kun dga' bo de lta bas na zhes bya ba la sogs pa gsungs pa yin te/gtad do zhes bya ba ni rab tu gtod pa'o/ /rjes su gtad do zhes bya ba ni slar yang gtod par mdzad pa'o/ /kha cig ni 'dzin pa'i don du gtad pa nyid yin pas 'phags pa kun dga' bo ni rgyal ba'i yum gyi sdud pa po yin no zhes zer ro/ /gzhan dag ni 'chang ba la sogs pa'i don nyid du gtad pa yin pas sdud pa po ni rdo rje 'dzin chen po nyid yin no zhes 'dod do//de la rnam par chud gsan pa ni gzhan du byed pa'o/ /gtang ba ni rnam pa thams cad du spangs pa'o/ /brjed pa ni yid la ma byas pa'o/ /tshig gi yan lag ni tshig gi phyogs gcig go/ /sku gsum thob par byed pa yin pas na go rims bzhin du yum ste bskyed pa 'byin pa zhes bya bar sbyar ro//de nyid kyi phyir thams cad mkhyen pa nyid yang dag par bskyed pa yin pas thob par byed pa'o/ /yongs su gtad pa 'bring gi don ni kun dga' bo shes rab kyi pha rol tu phyin pa 'di gzung bar bya'o zhes bya ba la sogs pa gsungs pa yin no//yongs su gtad pa chen po'i don ni kun dga' bo da ltar bzhugs shing 'tsho ba dang zhes bya ba la sogs pa gsungs so/ /de dang des zhes bya ba ni byed pa dang zhes bya ba dang sbyar ro/ /phan par sems pa de dang zhes bya ba ni de bzhin gshegs pa la phan par 'dod pas so/ / byang chub sems dpa' dang 'brel pa'i yang yongs su gtad pa chung ngu'i don ni kun dga' bo gang dag 'das pa'i dus su byung bar gyur pa'i zhes bya ba la sogs pa gsungs pa yin no/ /yongs su gtad pa 'bring gi don ni kun dga' bo byang chub sems dpa' gang dag ces bya ba la sogs pa gsungs pa yin no//chen po'i don ni kun dga' bo 'di lta ste shes rab kyi pha rol tu phyin pa 'di ni zhes bya ba la sogs pa gsungs pa yin no/ /shes rab kyi pha rol tu phyin pa rang nyid sgom pa la sogs pa las ches mang ba'i bsod nams kyi mtshan nyid can byang chub thob pa'i bar ma chod pa'i rgyu gsum pa ston pas kun dga' bo gal te khyod kyis gang zag nyan thos kyi theg pa pa rnams la zhes bya ba la sogs pa gsungs so//skad cig dang thang cig dang yud tsam yang zhes bya ba skad cig la sogs pa smos pa ni go rims bzhin du gang zag dbang po rnon po dang 'bring dang rtul po shes par bya ba'i don yin no//de la dus kyi mtha' ni skad cig ma'o/ /yang skad cig ma brgya nyi shu la de'i skad cig ma'o/ /de skad cig ma drug cu la ni thang cig go/ /thang cig sum cu la ni yud tsam mo/ /yi ge'i bdag nyid kun mthar yang / /mig btsums tshad du gnas pa can/ /zhes bya ba'i tshul gyi skad cig ma gcig gis chos ston par ji ltar rung zhe na brjod pa ston pa po'i byang chub sems dpa'i dbang gis nyan pa po rnams la skad cig ma gcig gis bstan pa'i chos snang ba dang ldan pa'i shes pa bskyed pas des de la chos bstan pa na yin no zhes tha snyad 'dogs so// de ltar ji skad bshad pa gsum ni yang dag par rdzogs pa'i byang chub thob par byed pa'i rgyu yin par shes par bya'o/ /de skad du yang / byang chub la gzhan ston pa dang / /de yi rgyu ni yongs gtong dang / /de thob bar chad med pa'i rgyu/ /bsod nams mang po'i mtshan nyid do/ /zhes gsungs pa yin no//rgyu dang bcas pa mthong ba'i lam ji skad du bshad pa ni rnam par rtog pa mi snang ba la mthu yod pa yin no zhes bstan pa'i phyir de bzhin gshegs pa mi bskyod pa mthong ba dang mi snang bar gyur pa'i dpe ston pas de nas bcom ldan 'das kyis de'i tshe zhes bya ba la sogs pa smos pa yin no//de la bdud kyi yul thams cad las yang dag par 'das pa'i phyir mi bskyod pa'o/ /yon tan thams cad kyi 'byung gnas su gyur pa'i phyir rgya mtsho lta bu'o/ /zab mo'i chos khong du chud pa'i phyir zab mo'o/ /dpes bstan pa'i don bshad pa ni kun dga' bo de ltar chos thams cad ni zhes bya ba la sogs pa gsungs pa yin ta mag lam du yang snang bar yang mi 'gyur te zhes bya ba la sogs pa'i tshig bzhi ni gzung ba dang 'dzin pa'i rnam par rtog pa bzhi po mthong ba'i lam na mi snang bar bstan pa'i don du smos pa yin no//don 'di nyid nges par bya ba'i phyir de ci'i phyir zhe na zhes bya bas bsu nas kun dga' bo nam mkha' byed pa med pa'i phyir zhes bya ba la sogs pa gsungs pa yin no//de skad du kun brtags pa'i chos thams cad ni shes pa po ma yin te gang gi phyir nam mkha' byed pa med pa'i phyir ro/ /de bzhin du gzhan gyi dbang ni mthong ba po ma yin te gang gi phyir sgyu ma'i skyes bu dang 'dra ba nyid kyis bsam gyis mi khyab pa yin pa'i phyir ro//yongs su grub pa yang dgos pa byed nus pa ma yin te gang gi phyir chos thams cad ni dngos po med pa'i phyir tshor ba po ma yin pas so zhes brjod pa yin no/ /nye bar bsdu ba ni kun dga' bo byang chub sems dpa' sems dpa' chen po de ltar spyod na zhes bya ba la sogs pa gsungs pa yin no//gang gi don du ji skad bshad pa'i mthong ba'i lam rgyu dang bcas par 'dod pa'i byang chub chen po de yang gang yin zhe na/ byang chub chen po bshad pa'i don du gleng slong ba gsungs pa ni bslab pa thams cad kyi dam pa'i pha rol tu phyin pa'i byang chub chen po zhes bya ba la sogs pa'o//de bzhin du de ci'i phyir zhe na zhes dogs pa bsu nas kun dga' bo bslab pa 'di ni zhes bya ba la sogs pa gsungs pa yin no/ /mthe bong gcig gis bteg ste slar gzhag kyang zhes bya ba ni gyen du bteg nas slar yang dbab par byas kyang zhes bya ba'i tha tshig go//sangs rgyas bcom ldan 'das de dag 'di snyam du zhes bya ba la sogs pa ni gdul bya'i skye bo rnams la snang ba la ltos nas brjod pa yin gyi/ bcom ldan 'das rnams la ni rnam par rtog pa'i kun tu rgyu ba yod pa ma yin pa'o/ /de bzhin du de ci'i phyir zhe na zhes dogs pa bsu nas shes rab kyi pha rol tu phyin pa ni gzhal du med cing zhes bya ba la sogs pa gsungs pa yin te/rnam par mi rtog pa'i phyir ro zhes bya bar dgongs so/ /sbyin pa la sogs pa'i bslab pa gzhan dag kyang yod pa ma yin nam ci'i phyir shes rab kyi pha rol tu phyin pa la slob par byed snyam pa la kun dga' bo 'das pa dang ma 'ongs pa dang zhes bya ba la sogs pa yin no//spyir gleng slong bar mdzad nas da ni byang chub chen po'i rang gi ngo bo bstan pa'i phyir kun dga' bo shes rab kyi pha rol tu phyin pa ni tshad ma med pa'o zhes bya ba la sogs pa gsungs so/ /mi zad pa'o zhes bya ba ni zad pa med pa'i phyir mi zad pa'i ye shes kyi rang bzhin gyi byang chub chen po ni shes rab kyi pha rol tu phyin pa yin no//'di nyid brjod pa'i don du de ci'i phyir zhe na zhes dogs pa bsu nas shes rab kyi pha rol tu phyin pa med pa'i phyir ro zhes gsungs te zad pa med pa'i phyir ro zhes bya ba'i tha tshig go//'di nyid rgya cher ston pa ni kun dga' bo gang zhes bya ba la sogs pa gsungs pa yin te de la mngon sum gyi rang gi ngo bo yongs su gcod pa ni tshad ma'o/ /rjes su dpag pas dben pa nyid du rtogs pa ni zad pa'o/ /de gnyi gas sam lung gis 'di tsam zhig go zhes nges par gzung ba ni tha ma'o//dgongs pa ni ji ltar nam mkha' rdzas su med pa tsam gyi ngo bo nyid yin pa'i phyir tshad ma la sogs pa gzung bar mi nus pa de bzhin du yul yang yin no zhes bya ba 'di yin no/ /'di nyid gsal bar byed pas de ci'i phyir zhe na zhes bya ba la sogs pa gsungs so/ /gzhung gi tshad bshad pas tshad ma la sogs pa brjod pa yin no zhe na/kun dga' bo ngas zhes bya ba la sogs pa gsungs te/ de kho na'i rang bzhin gyi shes rab kyi pha rol tu phyin pa zhes bya bar dgongs so/ /de lta na 'o na tshad la sogs pa gang gi yin par 'gyur zhe na/ ming gi tshogs dang zhes bya ba la sogs pa gsungs te de la chos rnams kyi ngo bo'i tshig bla dgas ni ming gi tshogs so//de rnams nyid kyi khyad par gyi tshig bla dgas ni tshig gi tshogs so/ /de gnyi ga'i rten yi ge'i tshogs so/ /tshad dang 'brel pa'i shes rab kyi pha rol tu phyin pa ni ming la sogs pa'i rang bzhin la de yang gtso bo'i shes rab kyi pha rol tu phyin pa ni ma yin no zhes bya ba'i don to//de nyid gsal bar ston pa'i don du de ci'i phyir zhe na zhes bya ba la sogs pa gsungs pa yin no/ /'di skad du don dam par de bzhin gshegs pa'i ye shes nyid shes rab kyi pha rol tu phyin pa yin la de ston par byed pas nye bar gdags pa'i tshul gyis gzhung gi bdag nyid can la shes rab kyi pha rol tu phyin pa zhes bya ba'i yang dag pa ni ma yin no zhes brjod pa yin no//de nyid kyi phyir de kho na nyid kyi dbang du mdzad nas kun dga' bo shes rab kyi pha rol tu phyin pa ni tshad ma dang ldan pa ma yin no zhes bya ba la sogs pa gsungs so//de kho na nyid kyi tshul du tshad ma ma gsungs pa'i rgyu zhus pa ni bcom ldan 'das ci'i slad du gsol pa zhes bya ba la sogs pa gsol pa yin no/ /lan btab pa'i phyir kun dga' bo shes rab kyi pha rol tu phyin pa mi zad pa'i phyir zhes bya ba la sogs pa gsungs pa yin no//dben pa'i phyir zhes bya ba ni skye ba med pas skyes pa'i ye shes kyi ngo bo nyid yin pa'i phyir zhes bya ba'i tha tshig go/ /dben pa'i chos la zhes bya ba ni dngos po skye ba med pa la stong pa nyid dmigs su med de chos can med pa'i phyir ro zhes bya bar dgongs so/ /gzhal du med pa'i phyir zhes bya ba ni zad pa dang skye ba med pas ma skyes pa'i ye shes kyi ngo bo nyid yin pa'i phyir ro//dus gsum gyi de bzhin gshegs pa rnams zad pa dang mi skye ba'i ye shes kyis rab tu phye ba yin no zhes gsungs pa ni kun dga' bo 'das pa'i dus na zhes bya ba la sogs pa'o/ /de la skad cig ma'i mi rtag pa nyid kyis na zad pa'o//rgyun gyi mi rtag pa nyid kyis na yongs su zad pa'o/ /nye bar bsdu ba ni kun dga' bo de lta bas na zhes bya ba la sogs pa gsungs pa yin no/ /'di skad du nyon mongs pa dang shes bya'i sgrib pa dri ma skyes pa dang ma skyes pa nyid du brtags pa rnams ni/ chos kyi dbyings las ma gtogs pa//gang phyir chos yod ma yin te/ /zhes bya bas chos kyi dbyings kyi ngo bo nyid nam mkha' bzhin du 'gag pa dang skye ba med pa'i phyir ram gcig dang du ma'i ngo bo nyid dang rgyu dang 'bras bu rnam par spyod pa'i tshad ma la sogs pas 'thad pa'i dngos po med pas nam mkha'i pad ma bzhin du 'gag pa dang skye ba med pa'i phyir go rims bzhin du dri ma rnams zad pa dang mi skye ba med pas zad pa dang mi skye ba shes pa'i bdag nyid can gyi chos thams cad phyin ci ma log par rtogs pa'i mtshan nyid chos kyi sku shes rab kyi pha rol tu phyin pa ji lta ba'i bdag nyid ni byang chub chen po yin par brjod par bya'o zhes bstan pa yin no//de skad du yang / dri ma zad dang mi skye ba'i/ /ye shes byang chub ces brjod de/ /zad med skye med phyir de dag /go rims bzhin du shes par bya/ /zhes gsungs pa yin no/ /de ltar de kho na nyid bstan pa na dngos po la shin tu shas cher mngon par zhen pas la la zhig dngos po 'jig pa'i bsam pas zad pa la zad do snyam pa'i shes pa dang /ma 'ongs pa'i dngos po mi skye ba'i bsam pas mi skye ba la mi skye bar shes pa yin par brjod pa des na byang chub chen po rang gi ngo bo la log par bsgrub pa'i gnas nyid yin par dngos su bstan pa'i don du de nas tshe dang ldan pa rab 'byor zhes bya ba la sogs pa smos pa yin no//de bzhin du rjes su gsung bar mdzad pa ni rab 'byor shes rab kyi pha rol tu phyin pa ni zhes bya ba la sogs pa gsungs so/ /nam mkha' mi zad pa'i phyir chos thams cad skye ba med pa'o zhes bya ba ni nam mkha' dang 'dra bar zad pa med pa'i phyir dang chos rnams kyi skye ba med pas zad pa dang mi skye ba shes pa'i bdag nyid can byang chub chen po ni zad pa med pa'o zhes bya ba'i tha tshig go//las dang po pa'i gnas skabs su dmigs pa la mngon par zhen pas bsgom pa na 'di lta bu'i shes rab kyi pha rol tu phyin pa ji ltar rtogs par 'gyur zhes gsol pa ni bcom ldan 'das byang chub sems dpa' zhes bya ba la sogs pa'o//nyes pa 'di ni med de gang gi phyir sbyor ba'i dus nyid nas brtsams te chos thams cad sgyu ma dang 'dra zhing skye ba dang 'jig pa dang bral bas chos thams cad sgyu ma lta bur sgom par byed do zhes gsungs pa ni rab 'byor byang chub sems dpa' sems dpa' chen po gzugs zad pa med pa nyid kyi zhes bya ba la sogs pa'o//rnam pa gzhan gyis kyang gsal bar byed pa ni rab 'byor byang chub sems dpa' sems dpa' chen po ma rig pa zhes bya ba la sogs pa gsungs pa yin te/ de la skye ba snga ma'i nyon mongs pa'i gnas skabs ni 'dir ma rig pa'o//de bzhin du bsod nams la sogs pa'i gnas skabs ni 'du byed do/ /de bzhin du skye ba 'dir nying mtshams sbyor ba'i skad cig ma'i phung po lnga ni rnam par shes pa'o/ /nying mtshams sbyor ba phan chad kyi skye mched drug ma dod pa'i bar du ming dang gzugs so/ /de nas ji srid dbang po dang yul dang rnam par shes pa gsum 'dus par ma gyur pa de srid ni skye mched drug go//ji srid du tshor ba gsum gyi rgyu yongs su gcod pa'i don du mi 'gyur ba de srid kyi bar du ni reg pa'o/ /'khrig pa'i 'dod chags kyi sngon du bde ba nyams su myong ba'i gnas skabs ni tshor ba'o//yul tshor ba'i gnas skabs kyi sngon du 'dod pa'i yon tan dang 'khrig pa'i 'dod chags la kun tu spyod pa'i gnas skabs su ni sred pa'o/ /yul tshor ba'i gnas skabs ni len pa'o/ /yul thob pa'i rgyur yongs su rgyug pas yang srid pa'i las nye bar bsags pa ni srid pa'o//las des ma 'ongs pa na yang nying mtshams sbyor ba ni skye ba'o/ /de phan chad nas ji srid tshor ba'i gnas skabs kyi bar gyi gnas skabs de ni rga shi'o/ /de ltar na sngon dang phyi ma'i mthar gnyis gnyis dang bar du brgyad ni rten cing 'brel par 'byung ba yan lag bcu gnyis dum bu gsum yin no//mi zad par zhes bya ba ni zad pa med pa de snga ma bzhin no/ /mtha' gnyis spangs pa'o zhes bya ba ni rtag pa dang chad pa dang bral ba nyid yin pa'i phyir ro/ /rten cing 'brel par 'byung ba mtha' dang dbus med par lta ste zhes bya ba ni rten cing 'brel par 'byung ba de ni sgyu ma lta bu yin pa nyid kyis na skye ba dang 'jig pa dang gnas pa dang bral ba yin no zhes blta'o//'di lta bu nyid ni rten cing 'brel par 'byung ba yin par gzung bar bya'o zhes gsungs pa ni rab 'byor de ltar rnam par blta ba'i byang chub sems dpa' sems dpa' chen po ni zhes bya ba la sogs pa'o//de ltar yid la byed pa ni mi zad pa la mngon par bsgrub pa'o/ /thabs la mkhas pa ni rten cing 'brel par 'byung ba la spyod pa'o/ /de nyid ston pa ni ji ltar byang chub sems dpa' zhes bya ba la sogs pa gsungs pa yin no/ /de ltar na kun rdzob tu chad par 'gyur ro zhe na/rab 'byor gzhan yang byang chub sems dpa' sems dpa' chen po de ltar rten cing 'brel par 'byung ba la rnam par blta bas zhes bya ba la sogs pa gsungs so/ /rgyu med par zhes bya ba ni kun rdzob tu rgyu yod pa nyid yin pa'i phyir ro/ /rtag pa zhes bya ba la sogs pa de la skye ba'i rgyu med pas na rtag pa'o//skyes pa la 'jig pa med pas na brtan pa'o/ /mngon par gsal ba dang yongs su gyur pa'i rang bzhin du mi 'jug pas na ther zug pa'o/ /gnas skabs gzhan thob pa dang bral bas na rnam par 'gyur ba med pa'i chos can no/ /gzugs la sogs pa nye bar dmigs bzhin du ji ltar mi zad pa'i rnam pas mngon du bya zhe na/rab 'byor gang gi tshe zhes bya ba la sogs pa gsungs te gzugs la sogs pa'i chos thams cad mi dmigs pas bdag dang chos su 'dzin pa thams cad spangs pas mthong ba'i lam gyi bya ba ston pa yin no/ /gang gi phyir de ltar chos thams cad ma mthong ba yin pa'i phyir gang dag dngos po 'jig pa'i bsam pas zad pa la zad do snyam pa'i shes pa dang dngos po mi skye ba'i bsam pas mi skye ba la mi skye'o snyam pa'i shes pa ni zad pa dang mi skye ba'i shes pa yin par brjod pa de dag gi ltar na zad pa dang mi skye ba dang bral bas shes pa 'di mi rung ngo //'di ltar skyes pa dang ma skyes pa dag gi go rims bzhin du zad pa dang skye ba'i [(]gags [,]gegs [)]byed pa'i mtshan nyid kyis 'gog pas 'gog pa med pa don dam par de bzhin nyid kyi ngo bo rang bzhin du gyur pa la dngos po la log par mngon par zhen pa'i rgol ba khyed kyi mthong ba'i lam gyi stobs kyis rnam par rtog pa la sogs pa'i ngo bo skyes pa zad pa ci zhig dang ma skyes pa'i mi skye ba'i chos ci zhig 'thob ste/'on kyang cung zad kyang ma yin pa kho na'o/ /de'i phyir zad pa dang mi skye ba'i shes pa ni ji skad du bshad pa nyid yin par shes par bya'o/ /de skad du yang / 'gog pa med pa'i rang bzhin la//mthong zhes bya ba'i lam gyis ni/ /rnam par rtog rigs ci zhig zad / /skye med rnam pa ci zhig thob/ /ces gsungs pa yin no/ /de lta ma yin te chos yang dag par yod par khas len na bcom ldan 'das kyis nyon mongs pa dang / shes bya'i sgrib pa'i rnam par rtog pa thams cad du spangs par 'thad pa shin tu dka' bar 'gyur ro//'di ltar skye ba dang 'jig pa stong pa yin pa'i phyir bdag med do snyam du bsgom zhing bdag tu mngon par zhen pa yongs su dor te des dben pa'i ngo bo phung po la sogs pa rten cing 'brel par 'byung ba skye ba dang 'jig pa'i chos can la yang dag par dmigs nas/dngos po dang de'i blo dag lhan cig dmigs pa nges pa'i phyir 'di dag ni sems tsam kho na yin gyi phyi rol gyi don ni med do zhes bya bar yid la byed cing 'dzin pa'i rnam pa can gyi sems la mngon par zhen pa yongs su ma spangs pas phyi rol gyi don du mngon par zhen pa spangs te/gzung ba med na 'dzin pa med do snyam du nges par sems pa na 'dzin pa'i rnam pa'i mtshan nyid rnam par rig pa tsam de yang rnam par bsal te gnyis su med pa'i ye shes 'ba' zhig yang dag par yod pa'i ngo bo nyid yin no snyam du nges par byas nas/de yang rten cing 'brel par 'byung ba yin pa'i phyir sgyu ma bzhin du ngo bo nyid med pa yin te/ yang dag par na gcig tu dngos po dang dngos po med pa la sogs pa brtags pa'i ngo bo dang bral ba yin no snyam du sgom par byed pa'i bsgom pa'i stobs rdzogs pa na 'ga' zhig gi nor bu dang dngul la sogs pa'i shes pa bzhin du 'khrul pa'i mtshan ma mtha' dag spangs pa sgyu ma lta bu'i bdag nyid du snang ba'i blo rnam par mi rtog pa so sor rang gis rig par bya ba ci zhig ltar yang dag par skyes pas na rnal 'byor pas shes bya'i sgrib pa yang dag par spong ngo //de lta ma yin na dus thams cad du nam mkha' rdzas med pa tsam gyi ngo bo 'dzin pa bzhin du bskyed du med pa dang spang du med pa'i rang gi ngo bo 'dzin pa'i phyir skad cig ma'i chos shes pa tsam gyi ngo bo nyid dang shes bya'i mtshan nyid rnams gal te don dam par yod pa nyid gcig tu gyur na de'i tshe gnyen po bsgoms pas nam mkha' bzhin du de dag la cung zad kyang mi byed de /de'i phyir dngos po la mngon par zhen pa'i phyin ci log mi ldog pas na gzhan dag gis bcom ldan 'das kyis shes bya'i sgrib pa rnam pa thams cad du spangs pa gang yin pa dang / chos rnams kyang yod par khas len pa gang yin pa de ni phan tshun 'gal ba'i don khas len pa yin pas kho bos ngo mtshar gyi gnas su gyur par brtsis so//de skad du yang / gzhan gyi chos rnams kyang yod la/ /shes bya la yang ston pa yi/ /sgrib pa zad par brjod pa gang / /de la kho bos mtshar du brtsis/ /zhes gsungs pa yin no/ /gang gi phyir de ltar dngos po la mngon par zhen pa las grol bar mi 'thad pa de phyir skur pa 'debs pa dang sgro 'dogs pa'i ngo bo chos 'ga' yang bsal ba dang gzhag pa ma byas par gzugs la sogs pa rten cing 'brel par 'byung ba kun rdzob tu yang dag pa'i ngo bor gyur pa 'di nyid la rang bzhin med pa la sogs pa'i ngo bor brtag par bya ste/de ltar sgyu ma'i rgyal pos sgyu ma'i rgyal po gzhan zhig pham par byas pa dang 'dra bar phyin ci log ldog pas de kho na nyid mthong na rnam par grol bar 'gyur ro zhes khong du chud par bya'o/ /de skad du yang / 'di la bsal bya ci yang med/ /gzhag par bya ba cung zad med//yang dag nyid la yang dag lta / /yang dag mthong nas rnam par grol/ /zhes gsungs pa yin no/ /ji skad bshad pa'i phyin ci ma log pa'i de kho na nyid bsgoms pas mi mthun pa'i phyogs kyi chos ma lus pa las 'das pa'i phyir bdud rnams yid mi bde bar gyur pa bstan pa ni rab 'byor gang gi tshe zhes bya ba la sogs pa gsungs pa yin no//snga ma bzhin du de ci'i phyir zhe na zhes dogs pa bsu nas byang chub sems dpa' sems dpa' chen po zhes bya ba la sogs pa gsungs pa yin no/ /nye bar bsdu ba ni rab 'byor de lta bas na zhes bya ba la sogs pa gsungs pa yin no//gtsor mthong ba'i lam byang chub chen po'i rgyu nyid yin pa'i phyir ji ltar shes rab kyi pha rol tu phyin pa la spyad par bya bar brjod snyam pa'i dogs pa de ci'i phyir zhe na zhes bya bas bsu nas dkyus ma mthong ba'i lam nyid rgya cher ston pa ni rab 'byor byang chub sems dpa' sems dpa' chen po zhes bya ba la sogs pa gsungs so//de ltar re re nas bstan nas spyir bsdus te brjod pa'i don du rab 'byor byang chub sems dpa' sems dpa' chen po shes rab kyi pha rol tu phyin pa la spyod pa la ni pha rol tu phyin pa drug po thams cad ces bya ba la sogs pa gsungs so/ /'di lta ste shes rab kyi pha rol tu phyin pa 'di ni pha rol tu phyin pa drug yongs su rdzogs pa'i tshig bla dgas so zhes sngar gsungs pas na shes rab kyi pha rol tu phyin pa la spyod pa nyid kyis pha rol tu phyin pa drug bsgom pa yongs su rdzogs par 'gyur ba yin no zhes bya ba'i tha tshig go//'dir ni gzhung mdor bsdus te brjod par bzhed pa yin pa'i phyir nye bar mtshon pa nyid kyi sbyin pa la sogs pa'i pha rol tu phyin pa re re'i spyad pas kyang pha rol tu phyin pa drug gi bsgom pa yongs su rdzogs par byed pa yin no zhes khong du chud par bya'o//de yang stong phrag nyi shu lnga pa las rab 'byor 'di la byang chub sems dpa' sbyin pa yongs su gtong ba'i tshe sems can rnams la byams pa'i lus kyi las dang ngag gi las dang yid kyi las kyis nye bar gnas par 'gyur ba ni de'i tshul khrims kyi pha rol tu phyin pa'o//de nyid kyi len pa po rnams gshe zhing 'khyal bar smra ba la sogs pa bzod pa ni de bzhin du bzod pa'i pha rol tu phyin pa'o//de nyid kyi slong mo pa'i khro zhing mtshang 'bru bar yongs su smra ba la sogs pas sbyin pa la spro ba mi 'dor ba ni brtson 'grus kyi pha rol tu phyin pa'o/ /de nyid kyi sbyin pa de rnam pa thams cad mkhyen pa nyid du yongs su bsngo zhing nyan thos dang rang sangs rgyas kyi sa'i rnam par g.yeng ba'i sems med pa ni bsam gtan gyi pha rol tu phyin pa'o//de nyid kyi sbyin pa byin pa na sgyu ma'i blos nye bar gnas pas gang la yang phan pa'am gnod par 'gyur ba ma mthong ba ni shes rab kyi pha rol tu phyin pa'o/ /de bzhin du tshul khrims bsrung ba nas shes rab bsgom pa'i bar du re re zhing pha rol tu phyin pa drug yongs su rdzogs pas bsdus pa ni mdo las ji skad gsungs pa bzhin du brjod par bya'o//de bas na 'di skad du sbyin pa la sogs pa'i pha rol tu phyin pa drug po rnams kyi sbyin pa la sogs pa so sor re re'o/ / ngo bor pha rol tu phyin pa thams cad phan tshun bsdus pa gang yin pa skad cig ma gcig pa sdug bsngal la chos shes pa'i bzod pa bsdus pa 'khor gsum rnam par dag pas rab tu phye ba rnam pa sum cu rtsa drug gis rnam par skyes pa de ni rtse mo'i mngon par rtogs pa 'dir mthong ba'i lam yin par shes par bya'o zhes brjod pa yin no//de skad du yang / sbyin pa la sogs re rer yang //de dag phan tshun bsdus pa gang / /skad cig gcig pa'i bzod pa yis / /bsdus pa de 'dir mthong ba'i lam/ /zhes gsungs pa yin no/ /rnam pa de lta bu'i rnam par rtog pa rnams ni sngon nyid spangs par gyur pas ji ltar rab kyi mthar thug par rtogs pa'i gnas skabs 'di la spong bar bstan zhe na de ni nyes pa med de gang gi phyir dgongs pa nges par 'grel pa la sogs pa'i mdo las gsang ba phra mo la rjes su 'jug pa dang mngon par shes pa chen po la gags byed pa'i kun du rmongs pa dag dang de'i sa bon ni sa bcu pa la spong ngo zhes gsungs pa de bas na ji skad du bshad pa'i kun du rmongs pa'i bag chags kyi rgyu yang dag par bcad pas rgyu can gzung ba dang 'dzin pa'i rnam par rtog pa bzhi po rnam pa de lta bu rnams ni rab kyi mthar thug par rtogs pa'i ngo bo yin pas na sa bcu pa dang 'brel pa'i rtse mo'i mngon par rtogs pa la nges par spong bar byed pa yin la gzhan dag tu ni res 'ga' ba'i spong ba yin no zhes sngon gyi slob dpon rnams 'chad do//skye bo blo dman pa rnams kyis rtogs par bya ba'i phyir rjes su brtse ba'i bsam pas ji skad bshad pa'i rnam par rtog pa rnams yul gyi dbye bas re re zhing rnam pa dgur dbye ba byas pa yin la shes rab rno ba rnams kyis brnyas pa spang ba'i phyir shin tu phye ba ma yin te/gnyen po'i phyogs rnams kyang de bzhin du shes par bya'o/ /'dir bsdus pa'i don ni ji skad du bshad pa'i gzung ba dang 'dzin pa'i rnam par rtog pa thams cad ni phyin ci log gis kun nas bslang ba yin la phyin ci log de yang thog ma med pa nas dngos po la mngon par zhen pa'i mtshan nyid do//de bas na de las bzlog pa'i dmigs pa dang rnam pa can nyid kyis de 'gog pa ngo bo nyid med pa'i shes pas de spong ba nyid yin no/ /de spangs pa na de'i rtsa ba can gzung ba dang 'dzin pa'i rnam par rtog pa la sogs pa gnas pa ji ltar thob par 'gyur zhes bya ba 'di yin no//mthong ba'i lam 'di yang dag par skyes pa na 'dod pa dang gzugs dang gzugs med pa'i khams kyi dbye bas rnam par rtog pa bzhi po so sor rnam pa dgu'i rang bzhin gzung ba dang 'dzin pa'i rnam par rtog pa brgya rtsa brgyad spangs pas de dag gis bsdus pa'i rnam par rtog pa skyed par byed pa'i bag chags kyi nyon mongs pa brgya rtsa brgyad spangs pa rten cing 'brel par 'byung ba'i chos nyid kyis thob nas de dbang du bya ba'i phyir de nyid yang dang yang du bsgom par bya'o zhes gsungs pa ni thabs la mkhas pa thams cad bsgom pa yongs su rdzogs par 'gyur te zhes bya ba la sogs pa'o//mthong ba'i lam thob pa'i rnal 'byor pa de nyon mongs pa dang shes bya'i sgrib pa'i 'jigs pa med pa'i phyir ting nge 'dzin seng ge rnam par bsgyings pa zhes bya ba la snyoms par zhugs nas dus phyis rten cing 'brel par 'byung ba lam rig pa'i rkyen gyis 'du byed rnams so zhes bya ba la sogs pa lugs dang mthun pa dang skye ba 'gags pas rga shi 'gag go zhes bya ba la sogs pa lugs dang mi mthun par yang dag par rtog pa 'di ni 'dir thabs mkhas pa yin par shes par bya'o//de skad du yang / seng+ge rnam bsgyings ting 'dzin la//snyoms par zhugs nas de nas ni/ /rten cing 'brel 'byung lugs mthun dang / /lugs mi mthun la rtog par byed/ /ces gsungs pa yin no/ /de ltar mthong ba'i lam brjod nas mi mthun pa'i phyogs spong ba la sogs pa rten rtogs pa sngon du btang ba yin na go sla bas rten bsgom pa'i lam bstan pa'i don du rab 'byor thabs la mkhas pa thams cad yongs su gzung bar 'dod pa zhes bya ba la sogs pa gsungs so//thabs la mkhas pa thams cad ni 'dir bsgom pa'i lam yin no/ /de yang mthar gyis gnas pa'i snyoms par 'jug pa dgus bsdus pa yin la de yang thod rgal gyi snyoms par 'jug pas bsdus pa yin par shes par bya'o//de bas na 'di skad du byang chub sems dpa' rnams ni bsam gtan dang po nas brtsams nas 'gog pa'i bar du song ste de'i 'og tu 'gog pa nas brtsams te bsam gtan dang po'i bar du 'ongs pas de ltar lugs dang mthun pa dang mi mthun pa'i rim pa gnyis kyis bsam gtan bzhi dang gzugs med pa bzhi dang 'gog pa'i mtshan nyid kyi snyoms par 'jug pa dgur song zhing 'ongs nas yang bsam gtan dang po la snyoms par zhugs te de las langs nas 'gog pa la zhes bya ba nas de bzhin du 'du shes med 'du shes med min gyi skye mched kyi bar la 'gog pa la snyoms par zhugs te/de las langs nas de ma thag pa'i snyoms par 'jug pa la dmigs te/ 'dod pa na spyod pa'i rnam par shes pa mtshams kyi ngo bor bzhag nas thabs mkhas pa'i stobs kyis langs te rnam par shes pa mnyam par ma bzhag pa de lta bu de mngon sum du byas nas de'i 'og tu 'gog pa la'o//de nas mnyam par ma bzhag pa la'o/ /de'i 'og tu 'gog pa gcig pu bor la 'du shes med 'du shes med min skye mched du'o/ /de nas mnyam par ma bzhag pa la'o/ /de nas gnyis bor la ci yang med pa'i skye mched du'o//de nas mnyam par ma bzhag pa la'o/ /de bzhin du ji srid brgyad bor nas bsam gtan dang po'i bar la'o/ /de nas mnyam par ma bzhag pa'i bar la ste de ltar gcig la sogs pa bor bas 'gog pa'i snyoms par 'jug pa la thug pa'i bar du mi 'dra ba'i sgo nas 'gro bas na mi 'dra bar 'gro bas thod rgal gyis snyoms par 'jug pa la dbang ba nyid kyis mtshan nyid bsgom pa'i lam gyi ngo bo'i thabs la mkhas pa thams cad du yongs su gzung bar 'dod pa'i byang chub sems dpa' sems dpa' chen pos shes rab kyi pha rol tu phyin pa la spyad par bya'o zhes bya ba yin no//de skad du yang / 'gog dang bcas pa'i snyoms 'jug dgur/ /rnam pa gnyis su song 'ongs nas/ /'dod par rtog pa'i rnam par shes / /mnyam gzhag min pa'i mtshams bzung ste/ /thod rgal du ni snyoms 'jug pa/ /gcig dang gnyis gsum bzhi dang lnga/ /drug dang bdun dang brgyad rgal nas//'gog pa'i bar du mi 'drar 'gro/ /zhes gsungs pa yin no/ /stong phrag nyi shu lnga pa las don 'di nyid kyi dbang du mdzad nas rgya cher bstan pa ni rab 'byor 'di la byang chub sems dpa' sems dpa' chen po 'dod pas dben pa sdig to mi dge ba'i chos kyis dben pa dang rtog pa dang bcas dpyod pa dang bcas pa dben pa las skyes pa'i dga' ba dang bde ba can bsam gtan dang po la nye bar bsgrubs te gnas so zhes bya ba la sogs pa gsungs pa yin pas som nyi mi bya'o//gang yang / sa brgyad rnam gnyis 'brel pa dang / /gcig rgal song zhing 'ongs nas ni/ / rigs mi mthun pa gsum par 'gro/ /thod rgal gyi ni snyoms 'jug yin/ /zhes bshad pas na de ltar thod rgal gyi ting nge 'dzin ji ltar yin zhe na/ ci bya rog dang 'o thug mtshan nyid 'dra ba yin nam/ 'jug tshul 'di nyid gzhan nyid yin te gang gi phyir de lta bu'i thabs mkhas pa thob pa'i byang chub sems dpa' ni bskal pa grangs med pa bye ba khrag khrig brgya stong phrag brgya snyed du 'jug cing sangs rgyas dpag tu med pa la bsnyen bkur byas pas rgyu che ba nyid kyis bsgom pa'i lam ni mchog tu khyad par 'phags pa nyid yin pa'i phyir nyes pa med do//de bzhin gshegs pa rjes su dran pa sngon du 'gro ba'i bsgom pa'i lam rnam par spyad par bya'o zhes gsungs pa ni rab 'byor gang gi tshe byang chub sems dpa' sems dpa' chen po zhes bya ba la sogs pa'o//nyin zhag 'das kyi bar la zhes bya ba ni nyin zhag gcig mthar thug pa'i bar la yang tha na se gol gtogs pa tsam zhig ces bya ba'i tha tshig go//bsgom pa'i lam la yang dag par goms pa'i phan yon mang po rnam pa sna tshogs bstan pa'i phyir rab 'byor gang yang dmigs pa dang bcas pa'i zhes bya ba la sogs pa gsungs pa yin no/ /shes rab kyi pha rol tu phyin pa mngon par bsgrubs na zhes bya ba ni bsgom pa'i lam bskyed pas so//'gro ba dris pa'i lan gyi dbye bas slar yang phan yon ston pa gsungs pa ni rab 'byor byang chub sems dpa' sems dpa' chen po de bzhin gshegs pas dgongs pas zhes bya ba la sogs pa'o/ /'gro ba gang zhig la zhes bya ba ni ji lta bu'i skal ba mnyam pa nyid la'o//'gro ba gzhan du dogs par mi bya ba'o zhes bya ba ni 'on kyang yang dag par rdzogs pa'i byang chub tu 'gro ba'o/ /rab 'byor yon tan 'di dag dang phan yon 'di dag yin na zhes bya ba ni bsod nams mang po skye ba la sogs pa'i yon tan dang de bzhin gshegs pas dgongs pa la sogs pa'i phan yon no//shes rab kyi pha rol tu phyin pa'i bshad pa mngon par rtogs pa'i rgyan gyi snang ba las me tog bkram pa'i le'u zhes bya ba ste nyi shu rtsa brgyad pa'o// //de ltar bsgom pa'i lam brjod nas des spang bar bya ba'i mi mthun pa'i phyogs gzung ba dang 'dzin pa'i rnam par rtog pa bzhi po'i gnyen po brjod pa'i sgo nas brjod par bya ba yin pa des na gleng slong bas rab 'byor gzhan yang byang chub sems dpa' zhes bya ba la sogs pa gsungs so//de la dang po gzung ba'i rnam par rtog pa yul gyi dbye bas rnam pa dgu yin pa las rnam par rtog pa dang po'i don ni chos thams cad chags pa med pa'i phyir shes rab kyi pha rol tu phyin par rjes su rig par bya'o zhes gsungs so//chos bsdus pa'i rnam par rtog pa spang ba'i don du chos thams cad la mngon par ma zhen pas bsgom pa'i lam la bsgom par bya'o/ /de bzhin du rnam par rtog pa'i dbang du byas pa phyi mar yang shes rab kyi pha rol tu phyin pa'i don ni bsgom pa'i lam gyi don yin par shes par bya'o//rnam par rtog pa gnyis pa'i don ni chos thams cad dbyer mi phyed pa'i phyir zhes gsungs pa yin te/ chos rgyas pa'i rnam par rtog pa spang ba'i don du chos thams cad chos kyi dbyings kyi tshul gyis dbyer mi phyed cing tshul gcig pa nyid yin pa'i phyir ro//rnam par rtog pa gsum pa'i don ni chos thams cad 'byung ba med pa'i phyir zhes gsungs pa yin te/ de bzhin gshegs pas bstang ba med pa'i rnam par rtog pa spangs pa'i don du ni chos thams cad de kho na nyid du ma skyes pa yin pa'i phyir ro//rnam par rtog pa bzhi pa'i don ni chos thams cad 'gyur ba med par mnyam pa'i phyir zhes gsungs pa yin te/ sbyor ba'i lam gyi yon tan med pa'i rnam par rtog pa spang ba'i chos thams cad ni chos kyi dbyings kyis rnam par 'gyur ba med par mtshungs pa nyid yin pa'i phyir ro/ /rnam par rtog pa lnga pa'i don ni chos thams cad bdag med pa dang rnam par rig pa med par shes rab kyis rtogs pas zhes gsungs pa yin te/mthong ba'i lam gyi yon tan med pa'i rnam par rtog pa spang bar bya ba'i don du chos thams cad bdag med pa'i tshul gyis rnam par rig pa med pa'o zhes shes rab kyis rtogs pa'i phyir ro//rnam par rtog pa drug gi don ni chos thams cad ming tsam dang tha snyad gdags pa tsam gyis brjod pa'i phyir zhes gsungs pa yin te bsgom pa'i lam gyi yon tan med pa'i rnam par rtog pa spang bar bya ba'i don du yid kyi brjod pa dang phyi rol gyi brjod pa tsam gyis chos thams cad kun rdzob tu brjod pa yin pa'i phyir ro//phyi rol gyi brjod pa la ni 'ga' zhig mngon par zhen pas tha snyad gdags pa yang zhes bya ba la sogs pa gsungs pa yin no/ /rnam par rtog pa bdun pa'i don ni chos thams cad tha snyad med pa zhes bya ba la sogs pa gsungs pa yin ste/ sbyor ba'i lam gyi rnam par rtog pa spang ba'i don du chos thams cad sgyu ma dang 'dra ba nyid kyis na thos pa dang bsam pa dang 'jig rten dang 'jig rten las 'das pa'i shes pas brjod par mi nus pa'i phyir go rims bzhin du tha snyad med pa brjod du med pa smrar med pa tshig med pa zhes bya bar sbyar ro//rnam par rtog pa brgyad pa'i don ni chos thams cad tshad ma med pa'i phyir zhes gsungs pa yin te/mthong ba'i lam gyi rnam par rtog pa spang bar bya ba'i don du chos kyi dbyings kyi tshul gyis chos thams cad la tshad ma med pa'i phyir ro/ /de nyid gsal bar byed pa ni gzugs mtshan ma med pa'i phyir zhes bya ba la sogs pa gsungs pa yin no//rnam par rtog pa dgu pa'i don ni chos thams cad mtshan ma med pa'i phyir gsungs pa yin te/ bsgom pa'i lam gyi rnam par rtog pa spang ba'i don du chos thams cad stong pa nyid yin pas na mtshan ma med pa'i phyir ro/ /'di skad du mdor bsdus pa la dga' ba'i sems can rnams la phan 'dogs pas chos mdor bsdus pa dang rgyas pa la dga' ba'i sems can rnams la rjes su brtse bas chos rgyas pa dang ji skad bshad pa'i don la nan tan mi byed pas sangs rgyas kyi mgon dang bcas pas yongs su ma bzung ba dang /byung ba 'gags pa nyid kyis sbyor ba'i lam gyi yon tan med pa dang /yang dag par skye ba'i rgyu dang bral bas mthong ba'i lam gyi yon tan med pa dang / ma 'ongs pa med pa nyid kyis bsgom pa'i lam gyi yon tan med pa dang / zhi ba la sogs pa nyid kyis mya ngan las 'das par sbyor ba'i lam dang / stong pa nyid mngon par bsgrub pa nyid kyis mthong ba'i lam dang /rang bzhin med pa'i ngo bo nyid du sgom par byed pa nyid kyis bsgom pa'i lam la sgyu ma lta bur bdag gis 'jug par bya'o zhes de ltar 'jug pa'i phyogs la brten pa'i gzung ba'i rnam par rtog pa dang po rnam pa dgu byang chub sems dpa' rnams kyis bsgom pa'i lam gyi sbyor ba'i gnas skabs su spang bar bya ba nyid yin par de dang de'i gnyen po'i phyogs bstan pas ldog pa'i sgo nas gsungs pa yin no zhes brjod pa yin no//de skad du yang / mdor bsdus rgyas dang sangs rgyas kyis/ /bstang bas yongs su ma bzung dang / /dus gsum yon tan med pa dang //legs pa'i lam ni rnam gsum la/ /gzung ba'i rnam rtog 'di gcig ste/ /sbyor ba'i rnam pa'i spyod yul can/ /zhes gsungs pa yin no/ /de ltar dang po bstan nas gzung ba'i rnam par rtog pa gnyis pa rnam pa dag brjod par bya ba yin pa las rnam par rtog pa dang po'i don ni chos thams cad nges par 'byed pa'i phyir zhes bya ba gsungs pa yin te byang chub kyi sems mi skye ba'i rnam par rtog pa bsal ba'i don du chos thams cad chos kyi dbyings kyi tshul gyis rtogs pa yin pa'i phyir ro//rnam par rtog pa gnyis pa'i don ni chos thams cad rang bzhin gyis yongs su dag pa'i phyir zhes bya ba gsungs pa yin te/byang chub kyi snying po yid la mi byed pa'i rnam par rtog pa bsal ba'i don du chos thams cad rang bzhin gyis rnam par dag pa yongs su shes pa yin pa'i phyir ro/ /rnam par rtog pa gsum pa'i don ni chos thams cad tshig med pa'i phyir zhes gsungs pa yin te/nyan thos kyi theg pa yid la byed pa'i rnam par rtog pa bsal ba'i don du chos thams cad tshig gi lam las 'das pa nyid yin pa'i phyir ro/ /rnam par rtog pa bzhi pa'i don ni chos thams cad 'gog pa med pas spong ba mnyam pa'i phyir zhes gsungs pa yin te/rang sangs rgyas kyi theg pa yid la byed pa'i rnam par rtog pa bsal ba'i don du chos thams cad skye ba med pas spong ba mtshungs pas 'gog pa med pa'i phyir ro/ /rnam par rtog pa lnga pa'i don ni chos thams cad mya ngan las 'das pa 'thob cing de bzhin nyid dang mnyam pa'i phyir zhes gsungs pa yin te/yang dag par rdzogs pa'i byang chub yid la mi byed pa'i rnam par rtog pa bsal ba'i don du chos thams cad de bzhin nyid dang mnyam pa rang bzhin gyis mya ngan las 'das par rtogs pa'i phyir ro/ /rnam par rtog pa drug pa'i don ni chos thams cad mi 'ong mi 'gro mi shes mi skye shin tu mi skye ba'i phyir zhes gsungs pa yin te bsgom pa'i rnam par rtog pa bsal ba'i don du 'das pa dang ma 'ongs pa'i dus med pa'i phyir go rims bzhin du mi 'ong mi 'gro'o//de bas na yod pa'i chos rnams mi shes shing da ltar byung ba mi skye la chos kyi dbyings dang 'dra bar shin tu ma skyes pa yin pa'i phyir ro//rnam par rtog pa bdun pa'i don ni bdag dang gzhan du mi lta ba'i phyir zhes gsungs pa yin te/ bsgom pa med pa'i rnam par rtog pa bsal ba'i don du rang dang gzhan nye bar mi dmigs pa'i phyir ro/ /rnam par rtog pa brgyad pa'i don ni chos thams cad 'phags pa dgra bcom pa zhes bya ba la sogs pa gsungs pa yin te/bsgom pa med cing mi bsgom pa yang med pa'i rnam par rtog pa bsal ba'i don du skye ba la sogs pa'i nyes pa med pas na chos thams cad 'phags pa'o/ /bsgom par 'os pa yin pas na dgra bcom pa ste/gang gi phyir sgyu ma lta bu nyid kyis rang bzhin gyis rnam par dag pa yin pa'i phyir ro/ /rnam par rtog pa dgu pa'i don ni chos thams cad khur bor zhing khur mi khyer ba'i phyir zhes gsungs pa yin te/ don ji lta ba ma yin par rnam par rtog pa bsal ba'i don du nyon mongs pa dang shes bya'i sgrib pa'i khur med pa na khur bor ba nyid yin pa'i phyir ro//'di skad du dge ba'i bshes gnyen la sogs pa dang bral bas byang chub kyi sems mi skye ba dang / sangs rgyas la dmigs pa'i bsod nams khyad par du 'phags pa med pas byang chub kyi snying po yid la mi byed pa dang /nyan thos kyi rigs can nyid yin pa'i phyir de'i theg pa yid la mi byed pa dang / rang sangs rgyas kyi rigs can nyid yin pa'i phyir de'i theg pa la mngon du phyogs par byed pa dang / shes rab kyi pha rol tu phyin pa bsgrub pa dang bral bas yang dag par rdzogs pa'i byang chub yid la mi byed pa dang /dmigs pa dang bcas pa nyid kyis bsgom pa dang / dmigs pa med pa nyid kyis bsgom pa med pa dang / dmigs pa yang med mi dmigs pa yang med pas bsgom pa yang med bsgom pa med pa yang ma yin pa dang / phyin ci log tu mngon par zhen pas don ji lta ba bzhin ma yin pa nyid la dngos po la sogs par mngon par zhen pas ma rung bar gyur pa nyid kyi bdag gis ldog par bya'o zhes de ltar bzlog pa'i phyogs la brten pa'i gzung ba'i rnam par rtog pa gnyis pa rnam pa dgu byang chub sems dpa' rnams kyi bsgom pa'i lam gyi sems dang sems las byung ba 'jug pa'i gnas skabs su spang bar bya ba nyid yin par de dang de'i gnyen po'i gnas skabs bstan pas ldog pa'i sgo nas gsungs so zhes brjod pa yin no//de skad du yang / gnyis pa sems dang sems byung rnams/ /'jug pa'i yul can yin bzhed de//sems mi skye dang byang chub kyi/ /snying po yid la mi byed dang / /theg pa dman pa yid byed dang / /rdzogs pa'i byang chub yid mi byed/ /bsgom dang sgom pa med pa dang / /de dag las ni bzlog nyid dang / /ji bzhin don min rnam rtog pa/ /bsgom pa'i lam la shes par bya//zhes gsungs pa yin no/ /de ltar gzung ba'i rnam par rtog pa gnyis bstan nas 'dzin pa'i rnam par rtog pa dang po rnam pa dgu brjod par bya ba yin te/ de bas na rnam par rtog pa dang po'i don ni chos thams cad yul med cing phyogs med pa'i phyir zhes bya ba la sogs pa gsungs pa yin te/sems can du gdags pa'i rnam par rtog pa spang bar bya ba'i don du chos thams cad kyi rang bzhin chos kyi dbyings kyi ngo bo nyid yin pas spyi dang khyad par gyi yul dang bral ba nyid yin pa'i phyir ro/ /de nyid gsal bar bya ba'i phyir/ /de ci'i phyir zhe na zhes dogs pa bsu nas rab 'byor gzugs ni zhes bya ba la sogs pa gsungs so//rang bzhin gyi ngo bo nyid kyi zhes bya ba ni/ stong pa nyid kyi rang bzhin gyi ngo bo nyid kyi spyi dang khyad par gyi yul dang bral ba'i ngo bo nyid yin pa'i phyir ro/ /rnam par rtog pa gnyis pa'i don ni chos thams cad 'gog pa rab tu sim par byed pa'i phyir zhes bya ba gsungs pa yin te/chos su btags pa'i rnam par rtog pa spang ba'i don du chos thams cad 'gog pa'i stong pa nyid dang / snying rje chen po la sogs pa'i yon tan tshad med pa'i snying po dang ldan pa nyid kyi dga' bar byed pa'i phyir ro/ /rnam par rtog pa gsum pa'i don ni dga' ba med cing dga' ba dang bral ba med pa'i phyir zhes gsungs pa yin te/stong pa ma yin pa nyid kyi rnam par rtog pa spang ba'i don du chos thams cad sgyu ma dang 'dra ba nyid kyis na mngon par zhen pa dang mngon par ma zhen pa dang bral ba'i phyir ro/ /rnam par rtog pa bzhi pa'i don ni 'dod chags med cing 'dod chags dang bral ba med pa'i phyir zhes gsungs pa yin te chags pa'i rnam par rtog pa spang ba'i don du chos thams cad chos kyi dbyings kyi ngo bo nyid yin pas 'dod chags dang 'dod chags med pas dben pa'i phyir ro//de nyid bstan par bya ba'i phyir de ci'i phyir zhe na zhes dogs pa bsu nas rab 'byor gzugs ni zhes bya ba la sogs pa gsungs so//de kho na dang bcas pa zhes bya ba ni de kho na nyid kyi rnam grangs nyid la de kho na dang bcas pa'i sgrar blta bar bya'o/ /rnam par rtog pa lnga pa'i don ni rang bzhin gyis yongs su dag pa'i phyir zhes gsungs pa yin te/chos rab tu 'byed pa rnam par rtog pa spang ba'i don du chags pa dang ma chags pa dang bral bas chos thams cad la thams cad kyi rang bzhin skye ba med pa nyid kyis na yongs su dag pa yin pa'i phyir ro/ /rnam par rtog pa drug pa'i don ni chos thams cad chags pa dang ma chags pa'i zhen pa dang bral ba'i phyir zhes gsungs pa yin te/dngos po'i ched du byed pa'i rnam par rtog pa spang ba'i don du sgyu ma lta bu nyid kyis chags pa dang ma chags pa dang bral bas chos thams cad la zhen pa med pa nyid yin pa'i phyir ro/ /rnam par rtog pa bdun pa'i don ni sangs rgyas kyi ye shes zhes bya ba la sogs pa gsungs pa yin te/theg pa gsum gyi nges par 'byung ba'i rnam par rtog pa spang ba'i don du gang gi phyir/ chos kyi dbyings las ma gtogs pa/ /'di ltar chos yod pa ma yin te zhes bya ba sangs rgyas kyi ye shes khong du chud pas chos thams cad byang chub kyi ngo bo nyid yin pa'i phyir ro//rnam par rtog pa brgyad pa'i don ni chos thams cad stong pa nyid dang zhes bya ba la sogs pa gsungs pa yin te/ yon ma dag pa'i rnam par rtog pa spang ba'i don du chos thams cad ni rnam par thar pa sgo gsum gyi ngo bo nyid yin pa nyid kyis so//rnam par rtog pa dgu pa'i don ni byams pa chen po sngon du 'gro bas zhes bya ba la sogs pa gsungs te spyod pa rnam par 'khrugs pa'i rnam par rtog pa spang ba'i don du byams pa'i rang bzhin gyi zhe sdang ba la sogs pa'i nyes pa rab tu zhi bar byed pas chos thams cad sman lta bu'i ngo bo nyid yin pa'i phyir ro//'di skad du rdzas su yod par mi 'thad pas sems can du btags pa dang / snang ba tsam du zad pa'i phyir chos su btags pa dang / thams cad du 'gro ba'i phyir rnam pa thams cad mkhyen pa nyid la sogs pa'i chos stong pa ma yin pa nyid dang / rnam pa thams cad du mngon par zhen pa ma spangs pas chos la chags pa dang ngo bo nyid med par rtogs pas chos rab tu rnam par 'byed pa dang /ched du bya ba mi byed pas dngos po'i ched du bya ba byed pa dang / gzugs la sogs pa dmigs pa'i phyir theg pa gsum gyi nges par 'byung ba dang / yang dag par rab tu ma zhugs pa nyid kyi yon ma dag pa dang /sbyin pa la sogs par dmigs te bsgrub pas spyod pa rnam par 'khrugs pa la bdag rdzas su yod pa nyid 'dzin par byed pa yin no zhes de ltar skyes bu rdzas su yod pa la brten pa'i byang chub sems dpa' rnams kyis 'dzin pa'i rnam par rtog pa dang po rnam pa dgu ni bsgom pa'i lam gyi sbyor ba'i lam gyi gnas skabs su spang bar bya ba yin par de dang de'i gnyen po'i gnas skabs bstan pas ldog pa'i sgo nas gsungs so zhes brjod pa yin no zhes/de skad du yang / sems can btags pa'i spyod yul dang / /chos btags pa dang stong min nyid//chags dang rab 'byed bdag nyid dang / /dngos por byed dang theg gsum dang / /yon ni dag pa ma yin dang / /spyod pa rnam par 'khrugs pa la/ /'dzin par byed pa dang por te / /shes par bya ba bsgrags pa yin/ /zhes gsungs pa yin no/ /de ltar 'dzin pa'i rnam par rtog pa dang po bstan nas/'dzin pa'i rnam par rtog pa gnyis pa rnam pa dgu brjod par bya ba yin pas rnam par rtog pa dang po'i don ni chos thams cad byams pa la gnas pa dang zhes bya ba la sogs pa gsungs pa yin te/ rnam pa thams cad mkhyen pa nyid kyi sgrib pa la kun tu rmongs pa'i rnam par rtog pa bsal ba'i don du/chos thams cad tshangs pa'i gnas pa bzhi'i ngo bo nyid yin pa'i phyir ro/ /rnam par rtog pa gnyis pa'i don ni chos thams cad tshangs par gyur pas zhes bya ba la sogs pa gsungs pa yin te/ lam shes pa nyid kyi sgrib pa la kun tu rmongs pa'i rnam par rtog pa bsal ba'i don du nyes pa thams cad kyi rgyu med pa nyid kyis mi bskyed pa'i phyir na chos thams cad mya ngan las 'das pa'i ngo bo nyid yin pa nyid kyis so//rnam par rtog pa gsum pa'i don ni chos thams cad smon pa med pa'i phyir dang khong khro ba med pa'i phyir zhes bya ba la sogs pa gsungs te/thams cad shes pa nyid kyi sgrib pa la kun tu rmongs pa'i rnam par rtog pa bsal ba'i don du chos thams cad la don du gnyer ba dang khong khro ba dang bral ba nyid yin pa'i phyir ro/ /rnam par rtog pa bzhi pa'i don ni rgya mtsho mu med pa'i phyir zhes gsungs pa yin te thams cad zhi ba'i lam la kun tu rmongs pa'i rnam par rtog pa bsal ba'i don du chos thams cad stobs bcu la sogs pa'i yon tan rin po che'i rgyur gyur pa nyid yin pa'i phyir rgya mtsho dang mnyam pas rgya mtsho mu med pa nyid yin pa'i phyir ro//rnam par rtog pa lnga'i don ni nam mkha' mu med pa'i phyir zhes gsungs pa yin te/de bzhin nyid la sogs pa dang mtshungs par ldan pa dang mi ldan pa la kun tu rmongs pa'i rnam par rtog pa bsal ba'i don du chos thams cad stong pa nyid kyi nam mkha' dang mnyam pas nam mkha' mu med pa'i phyir ro/ /rnam par rtog pa drug pa'i don ni ri rab sna tshogs pa'i phyir zhes gsungs pa yin te/mi mnyam pa nyid la rmongs pa'i rnam par rtog pa bsal ba'i don du mi 'dod pa thog tu bab pa thams cad kyis bsgul bar mi nus pa nyid kyis na ri rab dang 'dra ba nyid yin pa'i phyir/ chos thams cad ri rab sna tshogs pa nyid kyis so//rnam par rtog pa bdun pa'i don ni gzugs mu med pa'i phyir zhes bya ba la sogs pa gsungs pa yin te/ sdug bsngal ba la sogs pa'i bden pa la kun tu rmongs pa'i rnam par rtog pa bsal ba'i don du gzugs la sogs pa ni chos kyi dbyings kyi rang bzhin nyid yin pas mthar thug pa nyid med pa'i phyir ro//rnam par rtog pa brgyad pa'i don ni nyi ma'i 'od zer gyi zhes bya ba la sogs pa gsungs pa yin te/ nyon mongs pa'i rang bzhin la kun tu rmongs pa'i rnam par rtog pa bsal ba'i don du chos thams cad rang bzhin gyi 'od gsal ba nyid kyis na nyi ma'i dkyil 'khor gyi 'od zer 'byung ba dang 'dra bas nyi ma'i 'od zer gyi dkyil 'khor mu med par snang ba'i phyir ro//rnam par rtog pa dgu pa'i don ni sgra thams cad mu med pa'i phyir zhes gsungs pa yin te/ gnyis su med pa la kun tu rmongs pa'i rnam par rtog pa bsal ba'i don du chos thams cad ming tsam gyi ngo bo nyid yin pas sgra thams cad mthar thug pa med pa dang mnyam pa nyid kyis na sgra thams cad med pa'i phyir shes rab kyi pha rol tu phyin pa mu med par rjes su rig par bya'o//'di skad du rnam pa thams cad yongs su ma shes pa rnam pa thams cad mkhyen pa nyid la sgrib pa'i kun tu rmongs pa dang /lam thams cad yongs su ma shes pas lam shes pa nyid la sgrib pa'i kun tu rmongs pa dang / gzhi thams cad yongs su ma shes pas thams cad shes pa nyid la sgrib pa'i kun tu rmongs pa dang / shes rab kyi pha rol tu phyin pa yongs su ma shes pas thams cad zhi ba'i lam la kun tu rmongs pa dang /gzugs la sogs pa shes bya'i de bzhin nyid du yongs su ma shes pas de bzhin nyid la sogs pa la ldan pa dang mi ldan pa'i kun tu rmongs pa dang / bdud la sogs pa'i rang gi ngo bo yongs su ma shes pas mi mnyam pa nyid la kun tu rmongs pa dang don la sgra ji bzhin du 'dzin pa nyid kyi sdug bsngal la sogs pa'i bden pa la kun tu rmongs pa dang /'dod chags la sogs pa'i ngo bo nyid yongs su ma shes pas nyon mongs pa'i rang bzhin la kun tu rmongs pa dang / gzung ba dang 'dzin pa'i mtshan nyid yongs su ma shes pas gnyis su med pa la kun tu rmongs pa la sems can du btags pa dang /de rnam par 'jog pa'i rgyu snang ba tsam gyi yul can bdag btags par yod pa nyid du 'dzin par byed pa yin no zhes skyes bu btags par yod pa la brten pa'i 'dzin pa'i rnam par rtog pa gnyis pa bsgom pa'i lam gyi sems dang sems las byung ba 'jug pa'i gnas skabs kyi yul can rnam pa dgu byang chub sems dpa' spang bar bya ba yin par de dang de'i gnyen po'i gnas skabs bstan pas ldog pa'i sgo nas gsungs so zhes bstan pa yin no//de skad du yang / sems can btags dang de'i rgyu yi/ /yul can de yis rnam 'joms pa//bsgom pa'i lam dang 'brel pa yi / /mi mthun phyogs gzhan rnam pa dgu/ /bdag nyid ji bzhin kun mkhyen ni/ /gsum gyi sgrib pa rnam gsum dang / /zhi lam de bzhin nyid sogs dang / /mtshungs par ldan dang mi ldan la/ / mi mnyam sdug bsngal la sogs dang / /nyon mongs rnams kyi rang bzhin dang / /gnyis su med la kun rmongs la/ /rnam par rtog pa tha mar bzhed/ /ces gsungs pa yin no/ /de ltar ji skad bshad pa'i bsgom pa'i lam la mi mthun pa'i phyogs gnyen po dang bcas par bstan nas de rtogs pa nyid kyi rnam par rtog pa bzhi spangs pas yon tan thams cad phun sum tshogs par 'gyur ba ni sangs rgyas kyi chos thams cad yang dag par bsgrub pa mu med pa'i phyir zhes gsungs pa yin no//'di skad du bsgom pa'i lam la goms pas rnam par rtog pa'i rigs bzhi po 'tshe bar byed pa nyid kyis yams kyi nad du gyur pa 'di rnams zad par gyur na gags byed pa med pas dga' bas dbugs phyin pa thob pa bzhin du snying rje'i gzhan gyi dbang du gyur pas rnam pa thams cad du 'gro ba'i bde ba bskyed par mkhas pa'i yon tan phun sum tshogs pa theg pa gsum gyis bsdus pa thams cad rgya mtsho chen po la chu bo rnams bzhin du byang chub sems dpa'i bsgom pa'i lam la gnas pa 'bras bu rab kyi mthar phyin pa thob pa de dag gis mdzes par 'gyur ba la rnam pa thams cad du mngon du 'ong ba'i rnam pas rten par byed do zhes de ltar sangs rgyas kyi chos thams cad yang dag par grub pa mu med pa nyid kyi phan yon che ba'i ngo bos bsgom pa'i lam yin par shes par bya'o zhes brjod pa yin no//de skad du yang / yams nad 'di rnams zad nas ni/ /yun rings lon nas dbugs phyin ltar/ /rnam pa kun tu 'gro ba yi/ /bde bsgrub yon tan phun tshogs kun//rgya mtsho che la chu bo bzhin/ /'bras bu mchog gis spa ba yi / /sems dpa' chen po de la ni/ /rnam pa kun tu rten par byed/ /ces gsungs pa yin no/ /bsgom pa'i lam gyi rjes la bar chad med pa'i lam yin pas bar chad med pa'i ting nge 'dzin gyi don ni sems can gyi khams thams cad ces bya ba la sogs pa gsungs pa yin no//'di skad du 'ga' zhig gis stong gsum gyi stong chen po'i 'jig rten gyi khams kyi sems can rnams nyan thos dang rang sangs rgyas kyi sa dang byang chub sems dpa'i skyon med pa la bkod pa'i bsod nams bskyed pa gang yin pa de dper mdzad nas/de bas khyad par du 'phags pa bsod nams mang ba nyid kyis rnam pa thams cad mkhyen pa nyid gang yin pa de sangs rgyas nyid thob pa la bar chad med pa'i ting nge 'dzin de ma thag pa sngun ma gang yin pa de ni 'dir bar chad med pa'i ting nge 'dzin zhes bya'o/ /de ni 'di ltar sems can gyi khams thams cad kyi bsod nams dang ye shes kyi tshogs la rab tu khyad par 'phags pa nyid yin pa'i phyir mu med pas shes rab kyi pha rol tu phyin pa bsgom par bya'o zhes bstan to//de skad du yang / stong gsum skye bo nyan thos dang / /bse ru'i rtogs pa phun tshogs dang / / byang chub sems dpa'i skyon med la / /bkod pa'i dge rnams dper mdzad nas/ /bsod nams mang po nyid kyis ni/ /sangs rgyas nyid kyi bar med de/ /bar chad med pa'i ting nge 'dzin/ /de ni rnam pa kun mkhyen nyid/ /ces gsungs pa yin no/ /bar chad med pa'i ting nge 'dzin 'di'i dmigs pa'i rkyen ni chos thams cad dngos po med par dmigs pa yin no//bdag po'i rkyen ni dran pa yin no/ /rnam pa ni rang bzhin gyis zhi ba nyid yin par don gyis 'phangs par shes par bya ste/ gzhan du na bar chad pa'i ting nge 'dzin rtogs par mi nus pa nyid yin pa'i phyir ro/ / de skad du yang / 'di yi dmigs pa dngos med de/ /bdag po dran pa yin par bzhed/ /rnam pa zhi nyid 'di la ni/ /zhes gsungs pa yin no/ /gting dpag dka' ba'i phyir gnas 'di la rab tu smra ba thabs la mkhas pa ma rtogs pa rnams kyi klan ka'i rgol ba rnam pa sna tshogs brgyud mar 'byung bas/da ni log par rtogs pa bsal bar bya ba yin pas log par rtogs pa dang po'i don ni sa'i khams mu med pa'i phyir zhes gsungs pa yin no/ /'dus byas dang 'dus ma byas kyi khams dag dngos po med pa nyid kyis dmigs pa chos can 'thad pa la log par rtogs pa bsal ba'i phyir sgyu ma dang 'dra ba nyid kyis yon tan thams cad kyi rten du gyur pa yin pas sa dang 'dra ba nyid yin pa'i phyir kun rdzob tu chos thams cad kyi dmigs par gyur pas sa'i khams mu med pa nyid kyis bar chad med pa'i ting nge 'dzin rjes su rtogs par bya'o zhes bya ba'i tha tshig go//de bzhin du phyi ma rnams su yang shes rab kyi pha rol tu phyin pa'i don ni bar chad med pa'i ting nge 'dzin yin par rtogs par bya'o/ /thams cad du rang bzhin med pa'i phyir gnyis pa dmigs pa'i ngo bo nyid nges par 'dzin pa'i chos can log par rtogs pa sel ba'i don du chos thams cad rang bzhin gyis rnam par dag pa nyid yin pa'i phyir chu dang 'dra ba nyid kyis de kho na bzhin du dmigs pa'i ngo bor bzhag pas chu'i khams mu med pa'i phyir dang /dngos po dang dngos po med pa mi dmigs pas gsum pa rnam pa thams cad mkhyen pa nyid kyi ye shes la log par rtogs pa bsal bar 'dod pas thams cad rang bzhin gyis 'od gsal ba nyid kyis me dang 'dra ba nyid yin pa'i phyir snga ma bzhin du rnam pa thams cad mkhyen pa'i ye shes kyi ngo bor gyur pa nyid kyis na me'i khams mu med pa nyid yin pa'i phyir dang /de bzhin nyid kyi ngo bo nyid yin pas bzhi pa kun rdzob dang don dam pa'i bden pa gnyis la log par rtogs pa bsal bar bya ba'i phyir chos thams cad mi gnas par 'jug pa nyid kyis na rlung dang 'dra ba'i phyir kun rdzob tu bden pa gnyis kyi ngo bor nges pa'i rang bzhin yin pas rlung gi khams mu med pa'i phyir dang /sbyin pa la sogs pa mi dmigs pas lnga pa sbyor ba la log par rtogs pa sel ba'i don du chos thams cad btags par yod pa yin pas nam mkha' dang 'dra ba nyid kyis snga ma bzhin du sbyor ba'i rang bzhin nges par byas pas nam mkha'i khams mu med pa'i phyir dang /rtogs par bya ba med pas drug pa sangs rgyas dkon mchog la log par rtogs pa bsal bar 'dod pas rnam par shes pa tsam gyi bdag nyid can yin pa'i phyir chos thams cad rnam par shes pa dang mnyam pa nyid kyi de kho na bzhin du de bzhin gshegs pa'i ngo bo nyid yin pas rnam par shes pa mu med pa'i phyir shes rab kyi pha rol tu phyin par rjes su rig par bya'o zhes gsungs pa ni de bzhin du chu'i khams dang me'i khams dang zhes bya ba la sogs pa'o//log par rtogs pa bdun pa'i don ni dge ba dang mi dge ba'i chos zhes bya ba la sogs pa gsungs pa yin te/ming du btags pa tsam du zad pas chos dkon mchog la log par rtogs pa bsal bar bya ba'i phyir de kho na nyid du ma skyes pa nyid yin pas chos thams cad ni dge ba dang mi dge ba'i chos bsags pa dang bral ba nyid kyis na kun rdzob tu rnam par gzhag pa'i chos nyid yin pa'i phyir dge ba dang mi dge ba'i chos bsags pa tshad med pa'i phyir ro//log par rtogs pa brgyad pa'i don ni chos thams cad ces bya ba la sogs pa gsungs pa yin te/ gzugs la sogs par dmigs pa bkag pas dge 'dun dkon mchog la lag par rtogs pa bsal ba'i don du chos thams cad sgyu ma'i rang bzhin yin pas snga ma bzhin du chos thams cad dge 'dun gyi ngo bo nyid yin pas chos thams cad bsags pa tshad med pa'i phyir ro//log par rtogs pa dgu pa'i don ni chos thams cad ting nge 'dzin zhes bya ba la sogs pa gsungs pa yin te/ sbyin pa la sogs pa mi dmigs pas thabs la mkhas pa la log par rtogs pa bsal bar 'dod pas chos thams cad chos kyi dbyings kyi ngo bo nyid yin pa'i phyir chos thams cad ting nge 'dzin mu med pa nyid dang mnyam pa nyid kyi de bzhin du thabs la mkhas pa yod pas chos thams cad kyi ting nge 'dzin mu med pa thob pa'i phyir ro//log par rtogs pa bcu pa'i don ni sangs rgyas kyi chos thams cad ces bya ba la sogs pa gsungs pa yin te/ dngos po dang dngos po med pa'i ngo bo gnyi gar rtogs pa bkag pas de bzhin gshegs pa'i mngon par rtogs pa la log par rtogs pa bsal bar bya ba'i phyir de bzhin nyid kyi rang bzhin gyi sangs rgyas kyi chos kyi ngo bo nyid yin pa'i phyir chos thams cad rnal 'byor pa'i kun rdzob tu de bzhin gshegs pa mngon par rtogs pa gzhag pas sangs rgyas kyi chos thams cad mu med pa'i phyir ro//log par rtogs pa bcu gcig pa'i don ni chos thams cad mu med pa'i phyir zhes gsungs pa yin te/spros pa rnam par gzhag pa'i mi rtag pa nyid la sogs pa rtag pa la sogs par phyin ci log la log par rtogs pa bsal bar 'dod pas chos nyid kyi rang bzhin gyi chos thams cad mu med pa'i chos nyid kyi bdag nyid can yin pa'i phyir chos thams cad snga ma bzhin du rnam par gzhag pa'i mi rtag pa la sogs pa med pas chos thams cad mu med pa'i phyir ro//log par rtogs pa bcu gnyis pa'i don ni stong pa nyid mu med pa'i phyir zhes gsungs pa yin te/ lam rnam par bsgoms pa'i 'bras bu mngon sum du mi byed pas lam la log par rtogs pa bsal ba'i phyir sgyu ma dang 'dra ba nyid kyis chos thams cad stong pa nyid mu med pa'i phyir de kho na nyid du rtogs pa med pas stong pa nyid mu med pa'i phyir ro//log par rtogs pa bcu gsum pa dang bcu bzhi pa gnyis kyi don ni sems dang sems las byung ba mu med pa'i phyir zhes gsungs pa ste /blang ba dang dor ba med pas gnyen po dang mi mthun pa'i phyogs dag la log par rtogs pa bsal ba'i don du ma rig pa las byung ba'i snang ba sems dang sems las byung ba mu med pa nyid kyis na chos thams cad la kun rdzob tu rnam par gzhag pa'i mi mthun pa'i phyogs dang gnyen po med pas sems dang sems las byung ba mu med pa'i phyir ro//log par rtogs pa bco lnga pa'i don ni sems kyi spyod pa mu med pa'i phyir zhes gsungs pa yin te/ chos can med pas chos kyi mtshan nyid la log par rtogs pa bsal bar 'dod pa'i phyir snang ba'i rgyu mtshan can du dngos po rnams rnam par gnas pa chos thams cad sems kyi spyod pa las byung ba'i mtshan nyid yin pa nyid kyis de bzhin du gnas pa'i mtshan nyid med pas sems kyi spyod pa mu med pa'i phyir ro//log par rtogs pa bcu drug pa'i don ni dge ba dang mi dge ba'i tshad med pa'i phyir zhes gsungs pa yin te/rang dang spyi'i mtshan nyid mi 'thad pas bsgom pa la log par rtogs pa bsal bar bya ba'i phyir yang dag pa'i mtha'i rang bzhin gyi chos thams cad dge ba dang mi dge ba nye bar ma dmigs pa'i ngo bo nyid yin pa'i phyir dang / snga ma bzhin du bsgom pa med pas dge ba dang mi dge ba'i chos gzhal du med pa'i phyir shes rab kyi pha rol tu phyin par rjes su rig par bya'o/ /yul gyi dbye bas tha dad pa'i phyir log par rtogs pa mtha' yas na yang gdul bya'i skye bo nye ba na gnas pa'i log par rtogs pa bsal bar bzhed pas skye bo byang chub sems dpa'i thabs la mkhas pa mi shes pa'i rgol ba thams cad kyi log par rtogs pa phan tshun 'gal bar snang ba'i don bsgrubs pas mi 'thad pa nyid kyis the tshom gyi ngo bo ji skad du bshad pa'i yul can nyid kyis rnam pa thams cad mkhyen pa nyid kyi rten can bcu drug yin no//de bas na kun rdzob dang don dam pa'i sgo can gyi glan ka la go rims bzhin du don dam pa dang kun rdzob kyi sgo nas lan gdab dgos pas byang chub sems dpa' dge ba 'dod pa rnams kyis bden pa gnyis la brten pa'i thabs la mkhas pa rnam pa stong du bsal ba sngon du 'gro ba'i nges pa rnam pa thams cad du yang dag par skyed nas bar chad med pa'i ting nge 'dzin rtogs par bya'o zhes khong du chud par bya'o//de skad du yang / rab tu smra rnams brgyud mar rgol/ /dmigs pa 'thad dang de yi ni/ /ngo bo nyid nges gzung ba dang / /rnam kun mkhyen nyid ye shes dang / / dam pa'i don dang kun rdzob dang / /sbyor dang dkon mchog gsum po dang / /thabs bcas thub pa'i rtogs pa dang / /phyin ci log ni lam bcas dang / /gnyen po mi mthun phyogs dag dang / /mtshan nyid dang ni bsgom pa la/ /smra ba rnams kyis log rtogs pa/ /rnam pa kun mkhyen nyid rten can//rnam pa bcu drug dag tu bzhed/ /ces gsungs pa yin no/ /shes rab kyi pha rol tu phyin pa'i bshad pa mngon par rtogs pa'i rgyan gyi snang ba las rtse mo mngon par rtogs pa ste skabs lnga pa'o// //rtse mo mngon par rtogs pa thob pa ni so so dang bsdus pa nyid du rtogs pa'i don rnams rim pas bkod nas bstan par bya ba'i phyir bsgom pa yin pas na mthar gyis pa'i mngon par rtogs pa'i don ni seng ge'i sgra sgrogs pa'i phyir shes rab kyi pha rol tu phyin pa rjes su rig par bya'o zhes gsungs pa yin no//'di skad du 'khor gsum rnam par dag pas rab tu phye ba'i sbyin pa la sogs pa'i pha rol tu phyin pa drug rnam pa thams cad du yongs su rdzogs pas sa bcu yang dag par sgrub par byed pa dang /dran pa nye bar gzhag pa la sogs pa dang byang chub kyi yan lag bdun gyi rnam pa dang 'phags pa'i lam yan lag brgyad pa don dam par dran pa med pa'i mtshan nyid sangs rgyas rjes su dran pa rnam pa gsum po go rims bzhin du nges par 'byed pa'i cha dang mthun pa dang mthong ba dang bsgom pa'i lam ston par byed pa dang /de bzhin du dge ba dang mi dge ba dang lung du ma bstan pa'i chos rjes su dran pa dang /snga ma bzhin du 'phags pa phyir mi ldog pa'i byang chub sems dpa'i dge 'dun rjes su dran pa dang de bzhin du tshul khrims dang gtong ba dang lha rjes su dran pa dang / gzugs la sogs pa'i chos thams cad dngos po med pa'i ngo bo nyid du khong du chud pas rtogs pa gang yin pa de ni mthar gyis pa'i bya ba yin par bzhed pa yin no//de ltar phyin ci ma log pa'i don ston pas seng ge'i sgra dang mtshungs pa nyid kyi chos thams cad seng ge'i sgra sgrogs pa'i phyir mthar gyis pa'i mngon par rtogs pa yin par shes par bya'o/ /de skad du yang / sbyin pa shes rab bar dag dang / /sangs rgyas la sogs dran dang chos/ /dngos med ngo bo nyid kyis de/ /mthar gyis pa yi bya bar bzhed/ /ces gsungs pa yin no/ /shes rab kyi pha rol tu phyin pa'i bshad pa mngon par rtogs pa'i rgyan gyi snang ba las mthar gyis pa'i mngon par rtogs pa ste skabs drug pa'o// //mthar gyis pa'i mngon par rtogs pa rnam par bsgom pa ni de dag nyid shin tu goms par byas pa'i phyir de dag nyid skad cig ma gcig gis rtogs par byed pas skad cig ma gcig pa'i mngon par rdzogs par byang chub pa'i don ni chos thams cad 'khrug pa med pa'i phyir shes rab kyi pha rol tu phyin pa rjes su rig par bya'o zhes gsungs pa yin te/skad cig ma gcig pa'i mngon par rdzogs par byang chub pa la 'khrug cing gzhan pa nyid du bya bar mi nus pas 'khrug pa med pa'i phyir gzugs la sogs pa'i chos thams cad mi 'khrug pas shes rab kyi pha rol tu phyin par rjes su rig par bya'o zhes bya ba ni yan lag gi don te /spyi'i don yang brjod par bya ste/ skad cig ma gcig pa'i mngon par rdzogs par byang chub pa la mtshan nyid kyis rnam pa bzhi yod pas re zhig dang por/ dngos gcig dngos po kun gyi ngo bo nyid/ / gang gi dngos gcig de bzhin nyid mthong ba//de yin dngos kun de bzhin nyid du mthong / /zhes bya ba'i tshul gyis mang pos gcig bsdus pa 'ba' zhig tu ma zad kyi/ 'on kyang sbyin pa la sogs pa'i ye shes dmigs par bya ba'i skad cig ma gcig po dngos po so sor nges par 'dzin pa'i phyin ci log dang bral ba'i rang bzhin gyi zag pa med pa'i sbyin pa la sogs pa nas dpe byad bzang po brgyad cu'i bar gyi mtshan nyid kyi chos rnams bsdus pas byang chub sems dpas rtogs pa'i phyir rnam par smin pa ma yin pa'i zag pa med pa'i chos thams cad skad cig ma gcig pa'i mtshan nyid ni skad cig ma gcig pa'i mngon par rdzogs par byang chub pa dang po'o//de skad du yang / sbyin la sogs pa re res kyang / /zag med chos kun bsdus pa'i phyir/ /rtogs pa 'di ni thub pa yi/ /skad cig gcig pa yin zhes bya/ /zhes gsungs pa yin no/ /yang ji ltar na zag pa med pa'i ye shes gcig dmigs na zag pa med pa thams cad bsdus pa yin zhe na/de brjod par bya ste/ dper na skyes bus rdog pa'i thabs gcig gis bskyed na bzo bo mkhas pas mngon bzo legs par byas pa'i mthus zo chun gyi rgyud thams cad dus gcig tu 'gul ba yin no/ /de bzhin du sngon gyi smon lam gyi 'phen pa'i shugs dang chos kyi dbyings kyi mthus skad cig ma gcig kho na la zag pa med pa'i ye shes gcig dmigs na rgyu dang 'bras bu 'brel pa'i stobs kyis ris mthun pa thams cad mngon du byed do//de skad du yang / ji ltar skyes bus zo chun rgyud/ /rdog thabs gcig gis bskyod pa na/ /thams cad cig car 'gul ba ltar/ / skad cig gcig shes de bzhin no/ /zhes gsungs pa yin no/ /de'i rdzas la gang gi tshe byang chub sems dpa'i gnyen po bsgoms pas mi mthun pa'i phyogs thams cad bral bas rnam par byang ba'i phyogs rnam par smin pa'i chos nyid kyi gnas skabs dri ma'i nag nog thams cad dang bral bas ston ka'i zla ba'i 'od zer bzhin du dkar po'i ngo bo nyid thams cad skyes pa de'i tshe skad cig ma gcig kho na la rnam par smin pa'i gnas skabs su thob pa na chos thams cad rtogs pas shes pa ni shes rab kyi pha rol tu phyin pa yin te/de ltar rnam par smin pa'i chos nyid kyi gnas skabs su zag pa med pa'i chos thams cad skad cig ma gcig la rtogs pa'i mtshan nyid ni skad cig ma gcig la mngon par byang chub pa gnyis pa'o//de skad du yang / gang tshe chos dkar thams cad kyi/ /rang bzhin shes rab pha rol phyin/ / rnam smin chos nyid gnas skabs skyes / /de tshe skad cig gcig ye shes/ /zhes gsungs pa yin no/ /de'i 'og tu sngon chos thams cad rmi lam lta bur goms pas tshogs gnyis nyams su myong bar byas nas rtogs pa'i gnas skabs su nye bar len pa'i phung po lnga la sogs pa'i chos thams cad rmi lam lta bu la sbyin pa la sogs pa pha rol tu phyin pa drug bsgrubs pas gnas nas sbyin pa la sogs pa'i ngo bo nges par rtogs pa'i rnam pas skad cig ma gcig kho nar chos thams cad ni mtshan nyid med pa'o zhes kun nas nyon mongs pa dang rnam par byang ba'i chos rnams mtshan nyid med pa nyid du shes pa yin te/de ltar chos thams cad mtshan nyid med pa'i skad cig ma gcig pa'i mngon par rdzogs par byang chub pa gsum pa yin no/ /de skad du yang / sbyin la sogs pa'i spyod pa yis/ /chos kun rmi lam 'drar gnas nas/ /chos rnams mtshan nyid med pa nyid/ / skad cig ma ni gcig gis rtogs/ /zhes gsungs pa yin no/ /de'i 'og tu yun ring mo zhig nas bar chad med par gnyis su snang ba spang ba la goms pa ngang du gyur pas gnyis su snang ba'i bag chags drungs phyung ba'i byang chub sems dpa' gang gi tshe gzung ba dang 'dzin pa'i tshul du rmi lam la gzung ba dang rmi lam mthong ba la 'dzin par mi mthong ba de'i tshe chos thams cad kyang de lta bu'i chos nyid yin no zhes chos thams cad de kho na nyid du gnyis su med pa skad cig ma gcig kho nas rtogs pa yin te/de ltar gnyis su med pa'i mtshan nyid du chos thams cad skad cig ma gcig pa'i mtshan nyid du gyur pa ni skad cig ma gcig pa'i mngon par rdzogs par byang chub pa bzhi pa yin no//de skad du yang / rmi lam dang ni de mthong nyid/ /gnyis kyi tshul du mi mthong ltar/ /chos rnams gnyis su med pa yi/ /de nyid skad cig gcig gis mthong / /zhes gsungs pa yin no//kha cig ni skad cig ma gcig pa'i mngon par rdzogs par byang chub pa la rgyu dang 'bras bu'i dbye bas go rims bzhin du rnam par smin pa ma yin pa dang rnam par smin pa'i chos nyid kyi gnas skabs kyi zag pa med pa'i chos skad cig ma gcig la mngon par rdzogs par byang chub pa bzhi bstan nas/de ltar khyad par du 'phags pa rtogs pa'i skabs su chos rnams ro gcig pa nyid du bdag nyid kyis yang dag par rig pa'i phyir chos rnams rmi lam gyi ngo bo nyid du gyur par rtogs pa'i don du gsum pa mtshan nyid med par mngon par rtogs pa bstan te/ rmi lam gyi gnas skabs su yang gzung ba dang 'dzin pa dag de kho na nyid du ma dmigs pas gnyis su med par rtogs par bya ba'i don du chos thams cad gnyis su med pa'i mtshan nyid du skad cig ma gcig la rtogs pa bstan pa yin no zhes de ltar mtshan nyid kyis skad cig ma gcig pa'i mngon par byang chub pa nyid kyi mtshan nyid rnam pa bzhi ka yang rnal 'byor pa rnams kyis rtogs par bya'o zhes 'dod do//gzhan dag ni gal te gdul bya'i skye bo nye ba'i ngor ldog pa'i dbye bas rnam pa bzhir ji zhig ltar bstan par mdzad pa de ltar na yang rnal 'byor pa 'ga' zhig gis gang yang rung ba'i rnam pa gcig mngon sum du bya ba yin no zhes de snyam du sems so//de ltar na skad cig ma gcig la mngon par rdzogs par byang chub pa'i skabs te bdun pa yin no// //rgya mtsho mu med pa'i phyir shes rab kyi pha rol tu phyin pa mu med par rjes su rig par bya'o zhes bya ba la sogs pa ci'i phyir gsungs snyam pa'i dogs pa de ci'i phyir zhe na zhes bya bas bsu nas/rab 'byor gzugs ni rgya mtsho dang mtshungs pa'o zhes bya ba la sogs pa gsungs te/ chos mthun pa gang gis gzugs la sogs pa rgya mtsho dang mtshungs pa nyid yin pa de ltar ni rgya mtsho mu med pa'i phyir zhes bya ba la sogs pa tshig bshad pas snga ma kho nar bshad zin pa'i phyir yang ma bshad do//nye bar bsdu ba ni rab 'byor de ltar na zhes bya ba la sogs pa gsungs pa yin no/ / skad cig ma gcig pa'i mngon par rdzogs par byang chub pa rnam par bsgoms pas ni skad cig ma gnyis pa la chos kyi sku mngon par rdzogs par byang chub pa yin pas de'i don ni rab 'byor gang gi tshe byang chub sems dpa' sems dpa' chen po zhes bya ba la sogs pa gsungs pa yin te/gang gi tshe sgyu dang g.yo thams cad rnam par spangs pa la sogs pa'i yid la byed pa rnams kyis 'di skad du bshad pa'i rim gyis shes rab kyi pha rol tu phyin pa 'di la chos thams cad sgyu ma dang 'dra ba nyid du rnam pa thams cad mkhyen pa nyid kyi rjes su rig par byed pa dang /lam gyi rnam pa shes pa nyid kyi rnam par spyod pa dang / thams cad shes pa nyid kyi 'jug pa dang /rnam pa kun mngon par rdzogs par rtogs pas rtogs par byed pa dang / rtse mo'i mngon par rtogs pas sems pa dang / mthar gyis pa'i mngon par rtogs pas 'jal ba dang / skad cig ma gcig pa'i mngon par rtogs pas nye bar rtogs par 'gyur ba dang / chos kyi sku mngon par rdzogs par byang chub pas kyang bsgoms par gyur pa de'i tshe/ byang chub sems dpa' 'di la chos kyi sku'i rang bzhin gyi yon tan thams cad dang / longs spyod rdzogs pa'i sku'i mtshan nyid kyis sangs rgyas kyi zhing dang / sprul pa'i sku'i rang gi ngo bos sangs rgyas kyi chos bla na med pa phrin las dang byas pa yongs su rdzogs pa rnyed dka' bar mi 'gyur ro zhes bya ba ni tshig gi don yin no//spyi'i don kyang brjod par bya ste/ chos kyi sku mngon par rdzogs par byang chub pa de yang ngo bo nyid kyi sku la sogs pa'i dbye bas rnam pa bzhi yin no/ /de la dang po dran pa nye bar gzhag pa la sogs pa shes pa'i bdag nyid can 'jig rten las 'das pa chos kyi dbyings kyi rang bzhin yin pa'i phyir zag pa med pa dri ma rnams glo bur ba nyid kyi rnam pa thams cad du rnam par dag cing rang bzhin gyis dben pa'i mtshan nyid thob par gyur pa gang dag yin pa de dag gi gnyug mar gnas pa rang bzhin skye ba med pa'i ngo bo nyid 'di ni 'jig rten las 'das pa'i lam gyis thob pa yin gyi byas pa ni ma yin pas ma byas pa'i don gyi sgyu ma lta bu'i rnam par shes pas chos thams cad rtogs pas thob pa thub pa sangs rgyas bcom ldan 'das rnams kyi ngo bo nyid kyi sku yin no// sku lhag ma gsum po yang dag pa'i kun rdzob tu snang ba don dam par chos nyid kyi ngo bo la ji ltar mos pas rab tu phye ba ni sangs rgyas dang byang chub sems dpa' dang nyan thos la sogs pa'i chos nyid rnam par gzhag pa yin no zhes bstan pa'i phyir/ gang phyir dben pa dben gyur las/ /tha mi dad pa nyid du 'dod//ces bya ba'i tshul gyis de dang tha mi dad kyang tha dad du rnam par gzhag pa yin no zhes shes par bya'o/ /de skad du yang / thub pa'i ngo bo nyid sku ni/ /zag pa med pa'i chos gang dag /thob gyur rnam kun rnam dag pa/ /de dag rang bzhin mtshan nyid can/ zhes gsungs pa yin no//de'i 'og tu dran pa nye bar gzhag pa la sogs pa nas 'phags pa'i lam yan lag brgyad pa'i bar byang chub kyi phyogs kyi chos rnams dang / snga ma bzhin du byams pa la sogs pa tshad med pa tshangs pa'i gnas pa rnams dang / nang gzugs can dang gzugs can ma yin pas phyi rol gyi gzugs rnams la lta ba zhes bya ba gnyis dang /sdug pa'i rnam par thar pa lus kyi mngon sum du byas te rdzogs par byas nas gnas pa zhes bya ba gcig dang / nam mkha' dang / rnam par shes pa dang / ci yang med pa dang / 'du shes med 'du shes med min skye mched ces bya ba bzhi dang /'du shes dang tshor ba 'gog pa zhes bya ba gcig ste de ltar rnam par thar pa brgyad dang / gzugs kyi khams kyi bsam gtan bzhi dang / gzugs med pa'i snyoms par 'jug pa bzhi dang / 'gog pa'i snyoms par 'jug pa zhes bya ba snyoms par 'jug pa dgu dang / sa dang chu dang /me dang / rlung dang sngon po dang / ser po dang / dmar po dang / dkar po dang / nam mkha' dang / rnam par shes pa zhes bya ba zad par rnam pa bcu dang / nang gzugs dang gzugs med par 'du shes pa dag gis so sor chung ngu dang chen po'i rnam pa dag tu phyi rol gyi gzugs rnams la lta zhing de dag zil gyis mnan nas shes zhes bya ba bzhi dang /nang gzugs med par 'du shes pa dag kho na sngon po dang / ser po dang / dmar po dang / dkar po dag zil gyi mnan nas mthong zhes bya ba la sogs pa bzhi ste/ de ltar zil gyis gnon pa'i skye mched rnam pa brgyad dang /pha rol gyi rgyud du gtogs pa'i nyon mongs pa'i dgra'i rgyud drungs 'byin pa'i ting nge 'dzin zhes bya ba gang yin pa nyon mongs pa med pa dang / chags pa'i mtshan ma thams cad dang yang dag par bral zhing thogs pa med par the tshom sel bar mdzad pa'i smon lam grub pas 'khor ba ji srid par mnyam par ma bzhag pa'i gnas skabs su 'jug pa zhes bya ba smon nas mkhyen pa dang /sngar bshad pa'i mngon par shes pa drug dang / so so yang dag par rig pa bzhi dang / rten dang dmigs pa dang thugs dang ye shes yongs su dag pa zhes bya ba yongs su dag pa bzhi dang /tshe dang sems dang yo byad dang las dang skye ba dang mos pa dang smon lam dang rdzu 'phrul dang ye shes dang chos la dbang ba zhes bya ba dbang bcu dang / sngar bshad pa'i stobs bcu dang / mi 'jigs pa bzhi dang / de bzhin gshegs pa'i sku dang gsung dang thugs kyi spyod pa yongs su dag pa ste 'di ltar phyin ci log gi kun du spyod pa gzhan gyi yongs su shes pa'i bsnyengs pas bcab par bya'o snyam pa'i dgongs pa mi mnga' bas zhes bya ba srung ba med pa rnam pa gsum dang /chos ston pa na nyan par 'dod pa dang nyan par mi 'dod pa dang gnyi ga dag las go rims bzhin du rjes su chags pa dang khong khro ba dang gnyi gas dben pa kho nar dran pa dang ldan pas gnas so zhes bya ba dran pa nye bar gzhag pa rnam pa gsum dang /sems can gyi don mdzad pa'i dus la mi 'da' ba'i mtshan nyid ces bya ba bsnyel ba mi mnga' ba'i chos nyid dang /nyon mongs pa dang shes bya'i sgrib pa'i bag la nyal gyi ngo bo'i sa bon spangs pas bag chags yang dag par bcom pa dang skye bo mtha' dag la phan pa'i bsam pa nyid ces bya ba skye bo la thugs rje chen po nyid dang / sangs rgyas kyi chos ma 'dres pa bco brgyad dang /rnam pa thams cad mkhyen pa nyid dang / de bzhin du lam shes pa nyid la sogs pa dag kyang sngar bshad pa yin te/ byang chub kyi phyogs dang mthun pa la sogs pa spros pa med pa'i ye shes kyi bdag nyid gnas yongs su gyur pas gyur pa thams cad ni gnyis pa chos kyi skur mngon par brjod do zhes bya ba ni kha cig gi yin no//de skad du yang / byang chub phyogs mthun tshad med dang / /rnam par thar dang mthar gyis ni/ /snyoms 'jug dgu yi bdag nyid dang / /zad par bcu yi bdag nyid dang / zil gyis gnon pa'i skye mched ni/ /rab tu dbye bas rnam brgyad dang //nyon mongs med dang smon mkhyen dang / /mngon shes so so yang dag rig /rnam pa thams cad dag bzhi dang / /dbang bcu dang ni stobs bcu dang / /mi 'jigs pa ni bzhi dag dang / /srung ba med pa rnam gsum dang / /dran pa nye bar gzhag rnams dang / / bsnyel ba mi mnga'i chos nyid dang / /bag chags yang dag bcom pa dang / /skye la thugs rje chen po dang / /thub pa kho na'i ma 'dres chos/ /bco brgyad bshad pa gang yin dang / /rnam pa thams cad mkhyen nyid dang / /chos kyi sku zhes bya bar brjod/ /ces gsungs pa yin no//gzhan dag ni/ thub pa'i ngo bo nyid sku ni/ /zag pa med pa'i chos gang dag /thob gyur rnam kun rnam dag pa/ /de dag rang bzhin mtshan nyid can/ /zhes bya bar sgra ji bzhin du 'jig rten las 'das pa zag pa med pa'i chos rnams khas blangs nas ngo bo nyid kyi sku ni de dag gi rang bzhin skye ba med pa nyid gang yin pa de'i mtshan nyid can yin la/de nyid kyang chos nyid kyi sku yin pa las chos kyi sku'o zhes ngo bo nyid kyi rkyen mi mngon par byas nas bstan to zhes rnam par bshad nas/ gang dag gi rang bzhin gyi mtshan nyid chos kyi sku yin pa zag pa med pa'i chos de dag kyang gang dag cig yin zhes dogs pa bsu ste/byang chub phyogs mthun tshad med dang / /zhes bya ba la sogs pa'i tshig le'ur byas pa la 'jug par byed do/ /gzhan dag na re de dag gi ltar na rnal 'byor pa'i kun rdzob tu don khyad par can snang ba bskyed pa'i sgo nas gnas yongs su gyur pas gyur pa chos ston pa la sogs pa'i don gyi bya ba mdzad pa gnyis su med pa'i sems dang sems las byung ba gdon mi za bar khas blangs dgos pa rnams ji ltar bsdu zhes zer ro//rten cing 'brel 'byung gang yin pa/ /de nyid khyod ni stong par bzhed//ces bya ba'i tshul gyis chos nyid kyi bdag nyid can gyi sku bstan pa nyid gnyis su med pa'i ye shes kyi bdag nyid can gyi chos kyi sku bstan pa yin no zhe na/ de ltar yin na ni rigs pa mtshungs pa nyid kyis longs spyod rdzogs pa dang sprul pa'i sku nyid kyang bstan pa yin pas logs shig tu bstan par bya ba ma yin par 'gyur ro//'on te gsung rab las brjod pa'i phyir de dag ni rnal 'byor pa'i kun rdzob tu bstan to zhes 'dod na/ rigs pa 'di nyid kyis gnyis su med pa'i bdag nyid can chos kyi sku yang de bzhin du logs shig tu bstan par 'gyur ro/ / kha cig na re sku bzhi bshad pa la/ ngo bo nyid longs rdzogs byas dang / /de bzhin gzhan pa sprul pa ni/ /chos sku mdzad par bcas pa ste/ /rnam pa bzhir ni yang dag brjod/ /ces bya ba'i tshig le 'ur byas pa las ngo bo nyid ces bya ba'i sgra'i mjug thogs su chos kyi sku zhes bya ba'i sgra mi 'byung bas sku ni gsum kho na'o zhes zer ro//gzhan dag na re nye bar bstan zin pa'i dgos pa'i dbang gis dang tshig le'ur byas pa sbyar ba'i ngo bor byas pa dang ye shes kho na dang mdzad par sbyar ba'i phyir de skad gsungs pa yin/ de'i phyir phyogs gzhan nas sku bzhir gsungs pa thams cad dang mi 'gal bar 'gyur ro zhes zer ro//de ltar yin du chug na nyan thos la sogs pa'i nyon mongs pa med pa'i ting nge 'dzin dang de bzhin gshegs pa'i nyon mongs pa med pa'i ting nge 'dzin la khyad par ci yod ce na/ bdag mthong ba las 'ga' zhig gis nyon mongs skye bar gyur na mi rung ngo zhes mi'i nyon mongs pa skye ba yongs su spong ba nyid ni nyan thos la sogs pa'i nyon mongs pa med pa'i ting nge 'dzin yin no//de bzhin gshegs pa rnams kyi nyon mongs pa med pa'i ting nge 'dzin ni grong la sogs par skye bo mtha' dag gi nyon mongs pa'i rgyun drungs 'byin par mdzad pa yin no//de skad du yang / nyan thos nyon mongs med pa'i lta/ /mi yi nyon mongs yongs spong zhing / /grong sogs su de'i nyon mongs rnams/ /rgyun gcod rgyal ba'i nyon mongs med/ /ces gsungs pa yin no/ /nyan thos la sogs pa'i smos nas shes pa las de bzhin gshegs pa'i smon nas mkhyen pa'i khyad par ci zhig yod ce na/de brjod par bya ste/ de bzhin gshegs pa'i smon nas mkhyen pa ni mtshan ma med pa nyid du rang gi ngang gis 'jug pa dang / dngos po la mngon par ma zhen pas gzugs la sogs pa la chags pa dang bral ba dang /nyon mongs pa dang shes bya'i sgrib pa bag chags dang bcas par spangs pas shes bya thams cad la thogs pa med pa dang / 'khor ba ji srid par bzhugs pa'i phyir rtag tu gnas pa dang / so so yang dag par rig pa yang dag par brnyes pas 'dri ba'i lan 'debs par mdzad pa yin pas nyan thos la sogs pa'i smon nas shes pa las khyad par du 'phags par bzhed do//de skad du yang / sangs rgyas smon nas mkhyen pa ni/ /lhun gyis grub dang chags spangs dang / /thogs pa med dang rtag gnas dang / /'dri ba kun lan 'debs par bzhed/ / ces gsungs pa yin no/ /nyon mongs pa dang shes bya'i sgrib pa phra mo bag chags dang bcas pa'i kun du rmongs pa gnyis spangs pa'i khyad par nyid kyi de bzhin gshegs pa'i rgyud la mnga' ba'i byang chub kyi phyogs la sogs pa'i chos thams cad ni khyad par shin tu phul du byung ba dang ldan pas khyad par gnyis po de ma thag tu bshad pa de dag ni nye bar mtshon pa nyid yin par gzung ngo //de ltar yin du chug na rtag tu thugs rje chen po'i rang bzhin can chos kyi sku la bzhugs pa na rtag tu srog chags mtha' dag gi don ji ltar mi mdzad ce na/ dge ba'i bshes gnyen la sogs pa dang phrad pas sngon skyed pa'i dge ba'i sa bon sangs rgyas la sogs pa la dmigs pa'i rgyu yongs su brtas par gyur pa na sems can gang la dus gang gi tshe chos bstan pa la sogs pa mdzad pas yun du phan par 'gyur ba de'i tshe de'i don bya ba'i phyir sngon gyi smon lam grub pas bcom ldan 'das de dang der snang ba dang 'tsham par don gyi bya ba mdzad pa yin te/des na thugs rje chen po'i rang bzhin can chos kyi sku la bzhugs pas thams cad du yid bzhin gyi nor bu dang 'dra bar nye bar gnas kyang rang gi las kyi nyes pas bskyed pa la rgyu ma tshang bas 'bras bu smin par mdzad par mi snang ngo snyam du dgongs pa yin no//de bas na dper na lha'i rgyal pos char phab tu zin kyang til la sogs pa'i sa bon rul pa'i ngo bo la sogs pa sa bon du mi rung bar gyur pa mi skye ba de bzhin du sangs rgyas 'gro ba mtha' dag gi yid la re ba yongs su rdzogs par mdzad pa la mkhas pa rnams 'byung yang skal ba med pas dam pa'i chos nyan pa la sogs pa bzang po thob par mi 'gyur ro zhes khong du chud par bya'o//de skad du yang / rgyu ni yongs su smin gyur nas/ /gang dang gang la gang dang ni/ /gang tshe bya ba phan gyur pa/ /de dang de la der snang ngo / /lha yi rgyal pos char phab kyang //sa bon mi rung mi 'khrungs ltar/ /sangs rgyas rnams ni byung gyur kyang / /skal ba med pas bzang mi myong / /zhes gsungs pa yin no/ /de ltar ji skad du bshad pa'i tshul gyis thams cad du snang ba'i sgo nas don gyi mdzad pa rgya che ba'i phyir dang / rgyun chags su 'khor ba ji srid par bzhugs kyang bcom ldan 'das la zad pa mi mnga' ba'i phyir go rims bzhin du sangs rgyas khyab pa dang rtag pa zhes brjod do//de bas na ye shes kyi bdag nyid can gyi sku rnal 'byor pa so sor nges pa'i rgyud kyi rten la yod pa skad cig ma re re la 'byung ba ji ltar khyab pa dang rtag pa zhes bya zhes kyang bsam par mi bya'o//de skad du yang / de ltar mdzad pa rgya che'i phyir/ /sangs rgyas khyab par nges par brjod/ /de nyid zad pa med pa'i phyir/ /rtag pa zhes kyang brjod pa yin/ /zhes gsungs pa yin no/ /de'i 'og tu mtshan bzang po sum cu rtsa gnyis dang dpe byad bzang po brgyad cus sku rnam par mdzes pa 'di ni byang chub sems dpa' chen po sa bcu la bzhugs pa rnams dang lhan cig theg pa chen po'i chos kyi longs spyod kyi dga' ba dang bde ba shin tu kha na ma tho ba med pa nye bar longs spyod pa'i phyir gsum pa longs spyod rdzogs pa'i sku yin te/sangs rgyas bcom ldan 'das kyi gzugs kyi sku'i ngo bo nyid yin par gzung bar bya'o/ /de skad du yang / mtshan ni sum cu rtsa gnyis dang / /dpe byad brgyad cu'i bdag nyid 'di/ /theg chen nye bar longs spyod phyir/ /thub pa'i longs spyod rdzogs skur bzhed/ /ces gsungs pa yin no//yang mtshan sum cu rtsa gnyis po de dag gang yin zhe na/ 'di lta ste bla ma rnams la skyel ba dang bsu ba la sogs pas phyag dang zhabs 'khor lo'i mtshan dang ldan pa nyid dang / sdom pa yang dag par blangs pa brtan pa nyid kyis rus sbal bzhin du zhabs shin tu gnas pa nyid dang /bsdu ba'i dngos po bzhi bstan pas phyag dang zhabs kyi sor mo ngang pa'i rgyal po lta bur dra bas 'brel pa nyid dang / bza' ba dang bca' ba la sogs pa gya nom pa byin pas phyag dang zhabs 'jam zhing gzhon sha chags pa nyid dang / ldag pa la sogs pa shin tu gya nom pa byin pas phyag dang zhabs dang phrag par dang ltag pa'i phyogs mtho ba'i phyir bdun mtho ba nyid dang /gsad par bya ba las thar par byas pas sor mo ring ba nyid dang / 'tsho ba la phan gdags pa nyid kyis rting pa yangs pa nyid dang / srog gcod pa spangs pas sku che zhing drang ba nyid dang / dge ba'i chos yang dag par spangs pas zhabs 'bur mi mngon pa nyid dang /dge ba yang dag par blangs pa spel bas sku'i spu gyen du phyogs pa nyid dang / rig pa dang bzo la sogs pa gus par byas te byin pas byin pa ri dgas e na ya'i lta bu dang / nor bdog pa slong ba po'i skye bo phyir ma spangs pas phyag ring zhing mdzes pa nyid dang /skye bo thams cad tshangs par spyod pa yang dag par len du 'jug cing gsang ba'i tshig bsrungs pas mdoms kyi sba ba sbubs su nub pa nyid dang / gding ba gya nom pa byin pas mdog gser 'dra ba nyid dang / khang bzang sa la sogs pa dam pa byin pas pags pa 'jam pa nyid dang /'du 'dzi la sogs pa yongs su spangs pas spu re re nas g.yas phyogs su 'khyil ba nyid dang / skye bo bla ma thams cad gnas ji lta ba bzhin du bkod pas zhal mdzod spus brgyan pa nyid dang / rnam pa thams cad du kha drag gi tshig gis khyad du ma bsad pas ro stod seng ge 'dra ba nyid dang /snyan par smra ba dang legs par smra ba'i rjes su mthun par byas pas dpung mgo shin tu zlum pa nyid dang / sman la sogs pa byin pas phrag pa rgyas pa nyid dang / skye bo nad pa'i g.yog byas pas ro bro ba'i mchog mkhyen pa nyid dang / nags tshal dang kun dga'i ra ba la sogs pa byed pa yang dag par len du bcug pas shing n+ya gro d+ha ltar chu zheng gab pa nyid dang /gtsug lag khang la sogs pa lhag par byin pas dbu gtsug tor dang ldan pa nyid dang / 'jam po la sogs pa gsungs pas ljags ring ba nyid dang / 'jig rten gyi khams thams cad kyi sems can la dam pa'i chos go bar byas pas tshangs pa'i dbyangs nyid dang / tshig 'khyal ba spangs pas 'gram pa seng ge'i 'dra ba nyid dang / skye bo thams cad bkur ba la sogs pas tshems dkar ba nyid dang / 'tsho ba rnam par dag pa nyid kyis tshems mnyam pa nyid dang /bden pa'i tshig kun tu spyad pas tshems thags bzang ba nyid dang / phra ma'i tshig spangs pas tshems bzhi bcu mnga' ba nyid dang / sems can thams cad la bu gcig pa dang 'dra bar bltas par spyan mthon mthing nyid dang / khong khro ba la sogs pa med par bltas pas rdzi ma ba'i lta bu nyid do//de skad du yang / phyag zhabs 'khor lo'i mtshan dang rus sbal zhabs/ /phyag dang zhabs sor dra bas 'brel pa dang / /phyag dang zhabs bcas 'jam zhing gzhon sha chags/ /'di yi sku ni bdun dag mtho ba dang / /sor mo ring dang rting yangs sku che drang //zhabs 'bur mi mngon spu ni gyen du phyogs/ /byin pa e n+ya ya 'dra'i phyag ring mdzes/ /mdoms kyi sba ba sbubs su nub pa'i mchog /pags pa gser mdog pags pa srab pa dang / /spu ni re re nas g.yas legs 'khrungs dang / /zhal mdzod spus brgyan sku stod seng ge 'dra//'di yi dpung pa'i mgo zlum phrag pa rgyas/ /'di la ro mi zhim pa ro mchog snang / /sku ni n+ya gro d+ha ltar chu zheng gab/ /gtsug tor dbur ldan ljags ring mdzes pa dang / /tshangs dbyangs 'gram pa seng ge'i 'dra dang tshems/ shin tu dkar dang tshems mnyam thags bzang dang //grangs ni bzhi bcu tham par tshang ba dang / /spyan ni mthon mthing spyan rdzi ba mchog gi /'dra ba 'di dag sum cu rtsa gnyis mtshan/ /'di la mtshan ni gang gang gi /sgrub par byed pa'i rgyu gang yin/ /de dang de ni rab rdzogs pas/ /mtshan ni 'di dag yang dag 'grub//bla ma skyel la sogs pa dang / /yang dag blangs pa brtan pa dang / /bsdu ba bsten dang gya nom pa'i/ /dngos po sbyin dang gsad bya ba/ /thar bar byed dang dge ba ni/ /yang dag blangs pa spel la sogs/ /sgrub byed rgyu yi mtshan nyid de/ /mdo las ji skad 'byung ba bzhin/ / zhes gsungs pa yin no/ /yang dpe byad bzang po brgyad cu gang zhe na/ 'di lta ste/ 'du byed thams cad la 'dod chags dang bral ba nyid kyis sen mo zangs kyi mdog lta bu nyid dang / sems can thams cad la phan pa'i lhag pa'i bsam pa nyid kyis sen mo'i mdog snum pa nyid dang / rigs kyi mchog spel bas sen mo mtho ba nyid dang /tshul kha na ma tho ba nyid med pa nyid kyis sor mo rnams zlum pa nyid dang / dge ba'i rtsa ba bsags pa nyid kyis sor mo rnams rgyas pa nyid dang / yang dag par mthar gyis zhugs pa nyid kyis sor mo rnams byin gyis phra ba nyid dang / lus la sogs pa'i las dang 'tsho ba rab tu bsrungs pa nyid kyis rtsa mi mngon pa nyid dang /nyon mongs pa'i mdud pa bkrol ba nyid kyis rtsa mdud pa med pa nyid dang / shin tu sbas pa'i chos kyi blo gros can nyid kyis long bu mi mngon pa nyid dang / bgrod dka' ba'i gnas thams cad la skye bo sgrol bar mdzad pa nyid kyis zhabs mi mnyam pa med pa nyid dang /mi zil gyis gnon pa la mkhas pa nyid kyis seng ge'i stabs su gshegs pa nyid dang / klu zil gyis mnan pa la mkhas pa nyid kyis glang po che'i stabs su gshegs pa nyid dang / nam mkha' la gshegs par mkhas pa nyid kyis ngang pa'i stabs su gshegs pa nyid dang /skyes bu khyu mchog tu mkhas pa nyid kyis khyu mchog gi stabs su gshegs pa nyid dang / skor phyogs kyi lam dang mthun par gshegs pa nyid kyis g.yas phyogs su ldog cing gshegs pa nyid dang / mdzes par mkhas pa nyid kyis mdzes par gshegs pa nyid dang /rtag tu sems gya gyu mi mnga' ba nyid kyis ma yo bar gshegs pa nyid dang / yon tan yang dag par brjod pa mdzad pa nyid kyis sku 'khril bag chags pa nyid dang / sdig pa'i chos dang ma 'bags pa nyid kyis sku byi dor byas pa lta bu nyid dang / gdul bya dang 'tsham pa'i chos ston par mdzad pa nyid kyis sku rim par 'tsham pa nyid dang / sku la sogs pa'i kun du spyod pa gtsang ba'i phyir sku rnam par dag pa nyid dang / thugs thugs rje can nyid kyi phyir sku 'jam pa nyid dang / thugs rnam par dag pa'i phyir sku rnam par dag pa nyid dang / chos 'dul ba yongs su rdzogs pa'i phyir mtshan rdzogs pa nyid dang / yangs shing mdzes pa'i yon tan brjod pa'i phyir sku'i kho lag yangs shing bzang ba nyid dang / thams cad la thugs snyoms pa'i phyir gom pa snyoms pa nyid dang / rnam par dag pa'i chos ston pa'i phyir spyan rnam par dag pa gnyis dang /chos go sla ba ston pa'i phyir sku gzhon sha can nyid dang / thugs rtag tu ma zhum pa'i phyir sku zhum pa med pa nyid dang / dge ba'i rtsa ba yang dag par 'phags pa'i phyir sku rgyas pa nyid dang / yang srid pa zad pa nyid kyis sku shin tu grims pa nyid dang / rten cing 'brel par 'byung ba shin tu rnam par phye ba ston par mdzad pa nyid kyis yan lag dang nying lag shin tu rnam par 'byes pa nyid dang /tshig gi don shin tu rnam par dag pa ston pas rab tu gzigs pa rab rib med cing rnam par dag pa nyid dang / slob ma tshul khrims phun sum tshogs pa nyid du gyur pa nyid kyis dku zlum pa nyid dang /'khor ba'i skyon gyis ma sbags pa nyid kyis dku skabs phyed pa nyid dang / nga rgyal gyi 'gying ba bcom pa nyid kyis dku ma rnyongs pa nyid dang / chos zad pa rnam par zlog pa nyid kyis phyal phyang nge ba nyid dang / chos zab mo rtogs pa nyid kyis lte ba zab pa nyid dang / slob ma mthun pa zab pa nyid kyis lte ba g.yas phyogs su 'khyil ba nyid dang /'khor kun nas mdzes par 'gyur ba nyid kyis kun nas mdzes pa nyid dang / thugs gtsang ba nyid kyis kun du spyod pa gtsang ba nyid dang / dus ma yin pa'i chos 'dul ba dang bral ba nyid kyis sku la sme ba dang gnag bag med pa nyid dang /lus la sogs pa zo mdog bde ba 'thob pa'i chos ston par byed pa nyid kyis phyag shing bal ltar shin tu 'jam pa nyid dang / mdangs yod pa'i dge sbyong chen po rnyed pa nyid kyis phyag gi ri mo mdangs yod pa nyid dang / chos zab mo la gnas pa nyid kyis phyag gi ri mo zab pa nyid dang /phyis rjes su yang dag par yongs su dag pa'i chos ston par mdzad pa nyid kyis phyag gi ri mo ring ba nyid dang / bslab pa rab tu mang po kun ston par mdzad pa nyid kyis zhal ha cang mi ring ba nyid dang / 'jig rten thams cad gzugs brnyan dang 'dra bar rtogs pa nyid kyis mchu bim pa ltar dmar ba nyid dang /tshig 'jam pos 'dul ba nyid kyis ljags mnyen pa nyid dang / yon tan 'thad pa mnga' ba nyid kyis ljags srab pa nyid dang / chos 'dul ba byis pa'i skye bo chags pa can gyis gting dpag dka' ba nyid kyis ljags dmar ba nyid dang /bsnyengs pa thams cad mi mnga' ba nyid kyis 'brug gi sgra dang ldan pa nyid dang / snyan pa la sogs par gsungs pa nyid kyis gsung snyan cing mnyen la 'jam pa nyid dang / srid par kun tu sbyor ba bsdoms pa nyid kyis mche ba zlum pa nyid dang / skye bo gdul bar dka' ba 'dul ba nyid kyis mche ba rno ba nyid dang /chos 'dul ba shin tu dkar ba nyid kyis mche ba dkar ba nyid dang / mnyam pa'i sa la gnas pa nyid kyis mche ba mnyam pa nyid dang / mthar gyis mngon par rtogs pa yang dag par rab tu ston par mdzad pa nyid kyis mche ba byin gyis phra ba nyid dang /shes rab mchog la gnas pa nyid kyis shangs mtho ba nyid dang / skye bo gtsang ma phun sum tshogs pa nyid kyis shangs gtsang ba nyid dang / chos shin tu rgyas pa nyid kyis spyan yangs pa nyid dang / sems can gyi tshogs drangs pa nyid kyis rdzi ma stug pa nyid dang / 'gro ba gzhon nu ma thams cad mngon par mgu ba nyid kyis spyan dkar gnag 'byes shing pad ma'i 'dab ma rangs pa lta bu nyid dang / rtag tu phyis rjes su gzigs pa nyid kyis smin tshugs ring ba nyid dang / chos 'dul ba 'jam po la mkhas pa nyid kyis smin ma 'jam pa nyid dang / thugs kyi rgyud dge bas brlan pa nyid kyis smin ma snum pa nyid dang /kun tu skyon gzigs pa nyid kyis smin ma'i spu mnyam pa nyid dang / mchog tu gnod pa bzlog par mdzad pa nyid kyis phyag ring zhing rgyas pa nyid dang / 'dod chags la sogs pa'i g.yul las rnam par rgyal ba nyid kyis snyan mnyam pa nyid dang /sems can gyi rgyud ma nyams par mdzad pa nyid kyis snyan gyi dbang po ma nyams pa nyid dang / lta bas byas pa thams cad kyis gzhan du mi 'gyur ba nyid kyis 'phral ba legs par 'byes pa nyid dang / smra ba thams cad kyi thog mar gyur pa nyid kyis 'phral ba dbyes che ba nyid dang /smon lam gyi mchog yongs su rdzogs pa nyid kyis dbu shin tu rgyas pa nyid dang / yul gyi dga' ba rjes su bzlog par mdzad pa nyid kyis dbu skra bung ba ltar gnag pa nyid dang / mthong ba dang bsgom pas spang bar bya ba'i bag la nyal spangs pa nyid kyis dbu skra stug pa nyid dang /bstan pa blo 'jam pos yongs su shes pa nyid kyis dbu skra 'jam pa nyid dang / thugs 'dod chags la sogs pas ma 'khrugs pa nyid kyis dbu skra ma 'dzings pa nyid dang / rtag tu tshig mi rtsub pa nyid kyis dbu skra mi bshor ba nyid dang /byang chub kyi yan lag gi me tog bkram pa nyid kyis dbu skra dri zhim pa nyid dang / rnam pa thams cad du mdzes par gyur pa nyid kyis phyag dang zhabs dpal gyi be'u dang bkra shis pa dang g.yung drung 'khyil pas brgyan pa nyid yin no/ /de skad du yang / thub pa'i sen mo zangs mdog dang //mdog snum mtho dang sen mo rnams/ /zlum rgyas byin gyis phra ba dang / /rtsa mi mngon dang mdud pa med/ /long bu mi mngon zhabs mnyam dang / /seng ge glang chen bya dang ni/ /khyu mchog stabs gshegs g.yas phyogs dang / mdzes gshegs drang dang 'khril bag chags//byi dor byas 'dra rim par 'tsham/ /gtsang dang 'jam dang dag pa'i sku/ /mtshan ni yongs su rdzogs pa dang / /sku yi kho lag yangs shing bzang / /gom snyoms spyan ni dag pa dang / /shin tu gzhon mdog can nyid dang / /sku zhum med dang rgyas pa dang / / shin tu grims pa'i sku nyid dang / /yan lag shin tu rnam 'byes dang / /gzigs pa sgrib med dag pa dang / /dku zlum skabs phyin ma rnyongs dang / /phyang nge ba dang lte ba ni/ /zab dang g.yas phyogs 'khyil pa dang / /kun nas blta na sdug pa dang / /kun spyod gtsang dang sku la ni//sme ba gnag bag med pa dang / /phyag ni shing bal ltar 'jam dang / /phyag ris mdangs yod zab ring dang / /zhal ni ha cang mi ring dang / /mchu ni bim pa ltar dmar dang / /ljags mnyen pa dang srab pa dang / /dmar dang 'brug gi sgra nyid dang / /gsung mnyen 'jam dang mche ba zlum//rno dang dkar dang mnyam pa dang / /byin gyis phra dang shangs mtho dang / /mchog tu dag pa dag dang ni/ /spyan yangs pa dang rdzi ma stug /pad ma'i 'dab ma 'dra ba dang / /smin tshugs ring dang 'jam pa dang / /snum dang spu ni mnyam pa dang / /phyag ring rgyas dang snyan mnyam dang //nyams pa rnam par spangs pa dang / /'phral ba legs par 'byes pa dang / /dbyes che ba dang dbu rgyas dang / /dbu skra bung ba ltar gnag dang / /stug 'jam ma 'dzings ngo bo dang / /mi bshor skyes bu yid 'phrog dang / /dpal gyi be'u dang bkra shis ni//g.yung drung 'khyil pas brgyan pa ste/ / sangs rgyas dpe byad bzang por bzhed/ /ces gsungs pa yin no/ /de'i 'og tu de bzhin gshegs pa shAkya thub pa la sogs pa'i sku gang gis 'khor ba ji srid par 'jig rten gyi khams thams cad du sems can rnams kyi 'dod pa'i don mnyam pa nyid du mdzad pa'i sku de ni rgyun chags pa nyid kyis sangs rgyas bcom ldan 'das kyi sprul pa'i sku rgyun mi 'chad par byis pa'i skye bo thams cad dang thun mong du gyur pa bzhi pa yin par shes par bya'o//de skad du yang / gang gi srid pa ji srid par/ /'gro la phan pa sna tshogs dag /mnyam du mdzad pa'i sku de ni/ /thub pa'i sprul sku rgyun mi 'chad/ /ces gsungs pa yin no/ /de la dang por 'gro ba bzang po dang bzang po ma yin pa la mngon par zhen pas gnas pa med pa'i mtshan nyid 'gro ba rab tu zhi ba'i phrin las mdzad nas/ sbyin pa la sogs pa bsdu ba'i dngos po bzhi la bkod de/thos pa las byung ba la sogs pa'i shes pas mi mthun pa'i phyogs dang gnyen po dor ba dang blang bar bya ba'i sgo nas rtogs par mdzad nas sgyu ma mkhan bzhin du rjes su chags pa la sogs pas rnam par dben pa nyid kyis sems can gyi don de gzhan gyi don byas pa la sogs pa'i mtshan nyid ji lta ba'i bdag nyid la bkod de/de'i rjes la rang gi don 'khor gsum rnam par dag pas rab tu phye ba'i pha rol tu phyin pa drug goms pa la'o/ /de'i 'og tu rang dang gzhan gyi don gyi mtshan nyid sangs rgyas kyi lam ste dge ba bcu'i las kyi lam la'o//de nas chos thams cad rang bzhin gyis stong pa nyid goms pa la'o/ /de'i rjes la sbyin pa'i pha rol tu phyin pa la brten nas sa dang po chos kyi dbyings kun tu 'gro ba rtogs pa'i mtshan nyid gnyis su med pa'i chos la'o/ / de nas tshogs yongs su rdzogs pa'i rgyur gyur pas gnyis pa la sogs par tshul khrims la sogs pa'i pha rol tu phyin pa'i chos thams cad brdar btags pa'i shes pa la 'god do/ /de bzhin du rim gyis shes rab kyi pha rol tu phyin pa la brten nas sa drug pa shes pa dang shes bya'i dngos por mngon par ma zhen pa'i mtshan nyid chos thams cad dmigs su med pa la'o//de'i 'og tu sa bdun pa la thabs kyi pha rol tu phyin pa'i stobs kyis sems can yongs su smin par byed pa la'o/ /de nas stobs kyi pha rol tu phyin pa'i stobs kyis sa brgyad pa la nyan thos la sogs pa dang thun mong ma yin pa'i byang chub sems dpa'i lam la'o//de nas yang de nyid la chos thams cad la mngon par zhen pa spangs pa la'o/ /de'i rjes la sa dgu pa la smon lam gyi pha rol tu phyin pa'i mthus byang chub 'thob pa la'o/ /de'i 'og tu ye shes kyi pha rol tu phyin pa'i stobs kyis sa bcu pa sangs rgyas kyi zhing sna tshogs pa rnam par dag pa la bkod nas yang de nyid la skye ba gcig gis thogs pa'i rang gi ngo bo yang dag pa'i byang chub tu so sor nges pa dang /phyogs bcu'i 'jig rten gyi khams kyi sems can gyi don dang / 'jig rten gyi khams thams cad du sangs rgyas kyi drung du 'gro ba la sogs pa'i yon tan la bkod de/de lta bu'i rim pa yang de nyid la khyad par gyi lam gyi rang gi ngo bo byang chub mtha' dag 'dren par byed pa'i chos kyi mtshan nyid byang chub kyi yan lag dang / las dang 'bras bur 'brel pa chud mi za ba dang /dngos po thams cad yang dag pa ji lta ba bzhin rtogs pa dang / phyin ci log thams cad spangs pa dang / phyin ci log gi gzhi med pa spangs pa'i ye shes dang / rang bzhin gyis yongs su dag pa'i mtshan nyid byang chub sems dpa'i rnam par byang ba dang / dri ma thams cad dang bral ba'i rnam par byang ba'i rgyu'i tshogs dang / stong pa nyid kyi ngo bo nyid kyis 'dus byas dang 'dus ma byas tha mi dad par yongs su shes pa la bkod nas de bzhin gshegs pa'i sa la mya ngan las 'da' ba la 'god par mdzad pa yin no/ /de ltar kun rdzob tu longs spyod rdzogs pa la sogs pa'i sku la sogs par snang ba bskyed pa'i sgo nas don bya ba byed pas na de'i bdag po las gdul bya'i skye bo'i snang ba la brten pa 'di las rnam pa nyi shu rtsa bdun chos kyi sku bzhin du 'khor ba ji srid du 'byung bas na mdzad pa rnams chos kyi sku'i yin par bzhed do zhes khong du chud par bya'o//de skad du yang / de bzhin 'khor ba ji srid 'di'i/ /las ni rgyun mi 'chad par 'dod/ /'gro rnams zhi ba'i las dang ni/ /bsdu rnam bzhi la 'god pa dang / /kun nas nyon mongs bcas pa yi/ /rnam par byang ba rtogs pa dang / /sems can rnams don ji bzhin gyi/ /don dang pha rol phyin drug dang //sangs rgyas lam dang rang bzhin gyis/ /stong pa nyid dang gnyis zad dang / /brda dang dmigs pa med pa dang / /lus can rnams ni yongs smin dang / /byang chub sems dpa'i lam dang ni/ /mngon par zhen pa bzlog pa dang / /byang chub thob dang sangs rgyas zhing //rnam par dag dang nges pa dang / /sems can don dang tshad med dang / /sangs rgyas rten sogs yon tan dang / /byang chub yan lag las rnams ni/ /chud mi za dang bden mthong dang / /phyin ci log ni spangs pa dang / /de gzhi med pa'i tshul dang ni/ /rnam par byang dang tshogs dang ni//'dus byas 'dus ma byas pa la/ /tha dad yongs su mi shes dang / /mya ngan 'das la 'god pa ste/ /chos kyi sku yi phrin las ni/ /rnam pa nyi shu bdun du bzhed/ /ces gsungs pa yin no/ /de ltar rab tu byed pa'i bstan bcos tshad mar gyur pa nyid kyis dgongs pa rnams shugs kyi sbyor ba la sogs pa'i tshig la sogs pas mngon par rtogs pa'i rim pa dang /rjes su mthun par gzhung gi don brjod par bya ba yin no/ /de bas na kha cig mngon par rtogs pa'i rgyan gyi tshig le'ur byas pa las gsungs pa las phal cher gzhan du byas nas rab 'byor byang chub sems dpa'i shes rab kyi pha rol tu phyin pa las brtsams te/ci nas byang chub sems dpa' sems dpa' chen po rnams shes rab kyi pha rol tu phyin pa las nges par 'byung bar 'gyur ba de bzhin du khyod spobs par byos shig ces bya ba nas brtsams te yum 'di'i spyi dang yan lag gi don legs par ma 'brel par brjod pas bshad pa byas pa gang yin pa de ni dam pa rnams kho nas mkhyen par mdzad par rigs pa yin pas 'dir bdag gis sun dbyung ba'i nye bar dgod pa ma byas so/shes rab kyi pha rol tu phyin pa'i bshad pa mngon par rtogs pa'i rgyan gyi snang ba las rjes su rig par bya ba'i le'u zhes bya ste nyi shu rtsa dgu pa'o// //ji skad du bshad pa'i mngon par rtogs pa brgyad kyi rang bzhin gyis shes rab kyi pha rol tu phyin pa rtogs par bya ba'i phyir sngon gyi sbyor ba'i gtam gyi sgo nas las dang po pa'i gnas skabs nas brtsams te tshol ba'i rim pa ston pa ni rab 'byor gzhan yang zhes bya ba la sogs pa gsungs pa yin te /byang chub sems dpa' rtag tu ngu ni byang chub kyi sems yang dag par blangs pa dang sbyin pa la sogs pa'i dge ba bsags pa dang ldan pa yin te sgra'i rjes su 'gro ba nyid yin pa'i phyir dang /dmigs pa spong ba don du gnyer ba nyid yin pa'i phyir de'i tshe tshogs kyi sa la gnas pa yin pas de gong nas gong du nges par 'byed pa'i yan lag la sogs pa'i gdams ngag tshol ba la brtson pa yin par mngon la da ltar ni sa bcu pa'i dbang phyug nyid yin no//lus la ched cher mi byed ces bya ba ni rus pa dang rkang la sogs pa sbyin par sems pa'i phyir ro/ /srog la mi lta zhes bya ba ni snying sbyin par spro ba'i phyir ro/ /rnyed pa dang bkur sti dang tshigs su bcad pa dag la zhes bya ba de la rnyed pa ni nor phun sum tshogs pa'o//bkur sti ni mang du gces par byed pa nyid do/ /tshigs su bcad pa ni grags pas phyogs kun du khyab pa'o/ /tshogs kyi sa la dang por/ de tshe chos kyi rgyun la ni/ /sangs rgyas rnams las zhi gnas dang / /ye shes yangs pa thob bya'i phyir/ /gdams ngag rgya chen thob par 'gyur//zhes gsungs pas chos kyi rgyun gyi ting nge 'dzin ma thob pa nyid kyis na bar snang la sgra thos par gyur pa yin no/ /g.yon du ma lta bar zhes bya ba ni g.yon logs su'o/ /shar du ma yin zhes bya ba la sogs pa ni shar la sogs pa'i phyogs kyi char ma yin pa'o/ /ci nas bdag las ma g.yos shing 'jig tshogs las kyang ma yin pa dang zhes bya ba la sogs pa la/bdag la sogs pa mi snang ba rnams ni yod pa nyid du ma rtogs pa'i phyir ro/ /gzugs la sogs pa mthong ba'i lam du gnas pa bdag med pa rnams ni med pa nyid du rtogs pa'i phyir ci nas de rnams las ma g.yos pa de ltar song shig ces bya ba'i tha tshig go//nyams par 'gyur ro zhes bya ba ni ldog par 'gyur ba'o/ /ting nge 'dzin gyi gags byed pa lus kyi ngal dub la sogs pa bskyed pa 'gog pa 'di thams cad kyis ni nye bar mtshon pa'i sgo nas 'di skad du ting nge 'dzin nyid thams cad la le lo dang /dmigs pa brjed pa dang / /zhum pa dang / rgod pa dang / de bzhin du mi rtsol ba dang / yang rtsol ba zhes bya ba nyes pa drug po rnams kyi gnyen po spong ba'i 'du byed brgyad dang ldan pa'i ting nge 'dzin gyi shes rab kyi pha rol tu phyin pa yid la byed cing shar phyogs su song shig /de ltar na de thos par 'gyur ro zhes gdams ngag byin pa yin te/ 'di ltar ting nge 'dzin gyi yon tan la mngon par yid ches pa'i dad pas rnal 'byor pa'i 'dun pa bskyed par 'gyur ro/ /de nas 'dug pa'i stobs kyis brtson 'grus rtsom mo/ /de nas brtson 'grus kyi stobs kyis lus dang sems shin tu sbyangs pa bskyed do//de nas lus dang sems shin tu sbyangs pa las le lo ldog par 'gyur te/ de bas na dad pa la sogs pa bzhi ni le lo spong ba'i don du 'gyur ro/ /dran pa ni dmigs pa brjed pa'i gnyen po yin te des dmigs pa la yang dag par 'jog pa'i phyir ro//shes bzhin ni zhum pa dang rgod pa'i gnyen po yin te/ des rab tu dga' ba'i dngos po sangs rgyas la sogs pa'i yon tan yid la byed pas ni bying ba spong la/ skyo ba'i dngos po mi rtag pa la sogs pa yid la byed pas ni rgod pa spong bar byed pa'i phyir ro//zhum pa dang rgod pa rab tu ma zhi ba'i dus su ni mi rtsol ba nyes pa yin pas de'i gnyen por sems pa la goms par byed pa yin no/ /zhum pa dang rgod pa zhi bar gyur nas gang gi tshe sems dmigs pa las mi g.yo zhing mngon par 'du byed pa med par rang gi ngang gis 'jug par 'gyur ba de'i tshe yang rtsol ba nyes pa yin te//des sems rnam par g.yeng ba'i phyir ro/ /des na de'i gnyen por btang snyoms bsgom par bya'o zhes brjod pa yin no/ /gdams ngag yang dag par thob pas na khas blangs pa'i don du de bzhin du bya'o zhes smras so//khas len pa 'di ni rigs pa dang ni ldan pa nyid yin no snyom pa'i dogs pa de ci'i phyir zhe na zhes bya bas bsu nas/ nga ni sems can thams cad la snang bar byed 'dod pa dang zhes bya ba smras te go sla'o/ /gang zag la bdag med pa'i sgo nas rjes su bstan nas chos la bdag med pa'i sgo nas rjes su sten par byed pa ni rtag tu ngus sgra thos te zhes bya ba la sogs pa smos pa yin no//yongs su shes dang spong ba dang / /mngon sum du ni bya ba'i phyir/ /stong nyid la sogs ting 'dzin gyi/ /don rnams gsum du yongs su bsgrags/ /zhes gsungs pas rnam pa gang gis so sor snang ba bum pa la sogs pa'i brtags pa de yongs su shes par bya ba'i phyir stong pa nyid kyi ting nge 'dzin gsungs te/brtags pa ni ngo bo nyid yongs su shes par bya ba yin te/ 'khrul pa tsam yin pas med pa'i phyir ro/ /chos thams cad la mngon par zhen pas dben pa sgyu ma lta bu'i ye shes mngon sum du bya ba'i don du mtshan ma med pa'i ting nge 'dzin de/rnal 'byor pa'i kun rdzob tu yang dag pa'i rang bzhin can yongs su grub pa ni rtogs par bya ba'i ngo bo yin pa'i phyir ro/ /chos dang gang zag la mngon par zhen pa'i gzhan gyi dbang spang bar bya ba'i don du smon pa med pa'i ting nge 'dzin te gzung ba dang 'dzin pa la mngon par zhen pa ni phyin ci log tu 'byung ba nyid kyis na spang bar bya ba nyid yin pa'i phyir ro//kha cig ni thos pa dang bsam pa dang bsgom pa'i rang bzhin gyi shes pa bskyed pa'i dus su sgyu ma'i skyes bu dang 'dra bar spyad par bya'o zhes bstan par bya ba'i don du mtshan ma yongs su spang ba dang zhes bya ba la sogs pa'i tshig gsum smos pa yin no zhes zer ro//gzhan dag ni stong pa nyid la sogs pa'i ting nge 'dzin gyi sbyor ba dang dngos gzhi dang mjug gi gnas skabs yin no zhes 'dod do/ /dge ba'i bshes gnyen gyi mtshan nyid kyi don du dge ba'i bshes gnyen gang stong pa nyid dang zhes bya ba la sogs pa smos pa yin te/de la tshogs kyi sa la bsod nams kyi tshogs bsags pa'i phyir stong pa nyid dang / mtshan ma med pa dang / smon pa med pa dang / mos pas spyod pa'i sa la ye shes kyi tshogs kyi bdag nyid can nges par 'byed pa'i cha dang mthun pa bskyed par bya ba'i phyir go rims bzhin du ma byung ba dang /ma skyes pa dang / ma 'gags pa dang / dngos po med pa chos ston pa zhes bya ba'i tha tshig go/ /yongs su rtogs la zhes bya ba ni yongs su brtsis la'o/ / chos 'dod pa dang zhes bya ba ni ma 'ongs pa'i chos kyi dgos pa mthong bas so/ /chos la gus par bya bas zhes bya ba ni da ltar 'byung ba'i phan yon te nye bar dmigs pas so/ /'phags pa byang chub sems dpa' chos 'phags bud med drug khri brgyad stong dang lhan cig 'dod pa'i yon tan lnga dang ldan par mthong ba na sems rnam pa gzhan du mi bya'o zhes brjod pa ni rigs kyi bu khyod kyis bdud kyi las rnams kyang rtogs par bya ste zhes bya ba la sogs pa'o//de dag des zil gyis mnan nas zhes bya ba ni de'i dbang du gyur pa nyid med pas zil gyis mnan pa'o/ /thabs la mkhas pa nyid bstan pa ni 'di ni sems can gdul ba'i tshul gyis zhes bya ba la sogs pa gsungs pa yin no//kun rdzob kyi bden pa la brten pa'i thabs la mkhas pa bstan nas don dam pa'i bden pa la brten pa ni skad cig ma de nyid la rigs kyi bu khyod kyis zhes bya ba la sogs pa gsungs pa yin te/skad cig ma de nyid la zhes bya ba ni 'dod pa'i yon tan lnga la rtse bar byed pa mthong ba'i rjes thogs nyid la'o/ /de bzhin du de ci'i phyir zhe na zhes dogs pa bsu nas chos thams cad ni zhes bya ba la sogs pa gsungs pa yin te/ ngo bo nyid kyi stong pa'o zhes bya ba ni de kho na nyid du ma skyes pa'o//gzugs la sogs pa'i phung po lnga rnams bdag med pa nyid du bstan par bya ba'i phyir chos thams cad ni sems can med pa zhes bya ba la sogs pa'i tshig lnga smos pa yin no/ /sgyu ma lta bu zhes bya ba la sogs pa bzlas te bstan pa'i dgos pa ni sngar bshad zin to//byang chub sems dpa' 'phags pa chos 'phags lo bdun gyi bar du ting nge 'dzin gcig la snyoms par zhugs par shes nas brtson 'grus lhod par mi bya'o zhes gsungs pa ni rigs kyi bu gzhan yang zhes bya ba la sogs pa'o/ /phyir bsngo ba zhes bya ba ni mi mthun pa nyid du'o//bdag gi sgra de la ji srid du 'gro bar bya ba zhes bya ba ni tshogs kyi sa la/ bsam gtan la thob mngon par shes/ /mngon par sgrub pa'i sgo nas de/ sangs rgyas dpag tu med pa la/ /mchod pa'i phyir dang mnyan pa'i phyir/ /'jig rten khams ni rnams su 'gro//'dis ni sangs rgyas dpag med la/ /bskal dpag med 'gyur bsnyen bkur byas/ /de la bsnyen bkur byas pa'i phyir/ /sems ni las rung mchog tu 'gyur/ /zhes bshad pas mngon par shes pa yod du zin na yang 'phags pa chos 'phags kyi rnam par thar pa mthong ba'i nus pa dang bral ba'i phyir dang /de yongs su smin par byed pa'i thabs la mkhas pa phul du phyin pa la 'phags pa chos 'phags nyid kyis byin gyis brlabs pa'i phyir 'phags pa chos 'phags kyi rnam par thar pa las byung ba'i spos dang ldan pa'i grong khyer ma mthong bas bdag gi sgra de la ji srid du 'gro bar bya ba ma dris so zhes bya ba'i tha tshig go//de la kha cig na re ngu ba ni sgra gsang mthon pos so/ /cho nges 'debs pa ni de las bzlog pas so zhes zer ro/ /gzhan dag ngu ba ni mchi ma 'byin pa'o/ /cho nges 'debs pa ni de nyid sgra dang bcas pa yin no zhes 'dod do/ /mya ngan byed pa ni sems kyi gdung ba'o//smre sngags 'don pa ni kyi hud re sdug bslus so zhes bya ba la sogs pa'i tshig go/ /sngar bshad pa'i chos dang gang zag gi bdag med pa'i gdams ngag dang shes rab kyi pha rol tu phyin pa yid la byed pa shin tu brtsams pa las tshogs kyis nyid du sems las su rung bar gyur pa na gang zhig thob pas tshig dang don 'dzin par nus par 'gyur ba chos kyi rgyun zhes bya ba'i ting nge 'dzin 'thob la/ting nge 'dzin de thob pa na ting nge 'dzin dang shes rab dag mngon par 'phel bar bya ba'i don du sangs rgyas rnams la gdams ngag 'thob po zhes gsungs pa ni rab 'byor de nas byang chub sems dpa' sems dpa' chen po rtag tu ngu zhes bya ba la sogs pa'o//de ltar gdung zhing zhes bya ba ni de ltar mngon par 'dod pas yang dag par skye zhing ngo / /go cha dang dge ba dang sems can gyi dbye bas brtson 'grus 'di dang zhes bya ba la sogs pa tshig gsum smras pa yin no//'dod pa 'di lta bus zhes bya ba ni thob par 'dod pas so/ /rjes su 'brang zhing zhes bya ba ni bar du dor ba med pas rjes su 'brang bar gyis la'o / /de la nang gi nor rnams yod pas na 'byor pa'o/ /phyi'i nor rnams yod pas na rgyas pa'o/ /pha rol gyi dmag tshogs kyi 'tshe ba la sogs pa dang bral bas na bde ba'o//'bru la sogs pa mang bas na lo legs pa'o/ /rta dang glang po la sogs pa dang mi mang bas na skye bo mang po dang mis gang ba'o/ /bar bar gyi tshong khang gi phring ba ni tshong khang sgrigs pa'o/ /mtha' gcig nas brtsams te pha rol gyi mthar thug par sang bas na phigs par gyur pa'o//mnyam zhing mnyam la zhes bya ba ni kha cig na re tshad mnyam yin no zhes zer ro/ /gzhan dag na re bzlas nas lan gnyis brjod pa yin no zhes zer ro/ /skye bo dang khyogs kyi bzhon pa dang rkang gis 'gro ba'i gnas mdzer dog med par gnas pa zhes bya ba la/de la skye bo bzhon pa'i gnas ni glang po dang rta la sogs pa'i bzhon pa'i gnas su khyogs kyi bzhon pa'i gnas ni shi bi ka la sogs pa'i khyogs kyi bzhon pa'i gnas so/ /rkang gis 'gro ba'i gnas ni rkang gnyis pas 'gro ba'i gnas so//bar gyi tshong khang gi phreng ba lnga brgya po gang dag la skye bo dang khyogs kyi bzhon pa dang rkang gis 'gro ba'i gnas mdzer dog med par gnas pa yod pa de dag la de skad ces bya ste/ des na de dag gi legs par bsgrubs pa ste/ rdzogs par byas pa zhes bya ba'i don to/ /mda' yab rnams zhes bya ba ni mgo bo'i dbyibs can gyi phreng ba'o//g.yer ka'i dra ba zhes bya ba ni dril bu chung ngu'i tshogs kyis so/ /de la mdzes pa nyid yin pas na 'jam zhing ngo / /snying la 'bab pa nyid yin pas snyan pa'o/ /dga' bar byed pa nyid yin pas na yid du 'ong ba'o / /yan lag lnga dang ldan pa'i rol mo zhes bya ba ni pi wang dang gling bu la sogs pa dang ldan pa'i rol mo'i khyad par ro//chu rjes su mthun par 'bab pa zhes bya ba ni chu g.yas phyogs su bskor bas 'bab pa'o/ /ut+pal dang ku mu da dang / puN+Da rI ka dang / gzhan dag gis kyang zhes bya ba ni dri bzangs dang tsan dan dang ut+pa la sogs pas so//chu zheng du shing rta'i 'khor lo tsam ste zhes bya ba la chu zheng du 'khor yug dag tu'o/ /sngon po zhes bya ba la sogs pa la de la sngon po zhes bya ba ni mdor bstan pa'o/ /lhan cig skyes pa'i mdog sngon po dang ldan pas kha dog sngon po'o/ /bcos pa'i sngon po nyid yin pas sngon por ston pa'o//gnyi gar rab tu gsal bar snang bas sngon po'o / /ser po la sogs pa la yang de bzhin du shes par bya'o/ /sangs rgyas kyi tshul ni shes rab kyi pha rol tu phyin pa'o/ /de la gus par byed pa ni dad pa'o/ /de rjes su 'gro ba ni de dang ldan pa ste thos pa dang bsam pa'i rang bzhin gyi shes pa legs par rtogs pa gang yin pa de la de skad ces bya ste/de rnams kyi sngon gyi las kyi rnam par smin pa las grub pa zhes phyi ma dang sbyar ro/ /grong khyer spos dang ldan pa de dag gi dbus kyi zhes bya ba ni grong khyer dang ldan pas mngon par mtshon pa'i gnas kyi bzhi mdo'i dbus na zhes bya bar sbyar ro//longs spyod chung ngu dang 'bring dang chen po'i dbye bas longs spyod pa zhes bya ba la sogs pa'i tshig gsum smos pa yin no/ /karka ta na'i rang bzhin la zhes bya [(]bani [,]ba ni[)] karka ta na ni in+d+ra nI la'o/ /'dod pa'i yon tan lnga dang ldan zhing zhes bya ba ni lus kyi bde ba skyed pa'o//dbang du 'gyur te zhes bya ba ni sems la yid bde ba yang dag par skyed pa'o/ /'di ltar/ bdag yod na ni gzhan du 'du shes shing / /bdag gzhan cha las yongs su 'dzin dang sdang / /'di gnyis dang ni kun tu 'brel pa las/ / nyes pa thams cad 'byung bar 'gyur ba yin/ /zhes bya ba'i tshul gyis bdag dang bdag gir 'dzin pa'i mngon par zhen pa sngon du 'gro ba nyid kyis 'dod chags la sogs pa'i nyon mongs pa 'di thams cad sdug bsngal gyi rnam par smin pa'i rgyur 'gyur ba yin la/ chos thams cad sgyu ma lta bur bsgoms pas nyon mongs pa la dbang thob pa'i phyir sems can gdul ba'i phyir bsam pa'i khyad par gyis sgyu ma'i skyes bu ltar 'dod pa la yongs su spyod pa'i rgyal ba'i sras po rnams la ni nyes par 'gyur ba ma yin no//de bzhin du/ byang chub sems dpa' khyim pas ni/ /skye ba kun tu rtag par yang //'khor los sgyur bar gyur nas ni/ /sems can rnams kyi don byed do/ /thabs chen po dang ldan pa la/ /'khor ba zhi ba'i bdag nyid dang / /nyon mongs byang chub yan lag 'gyur/ /de phyir rgyal sras bsam mi khyab/ /ces bshad pas byang chub sems dpa' rnams kyis sems can gdul ba'i thabs su 'dod pa la yongs su longs spyod par ston pa la nyes pa med /sdom pa bzung ba nyid kyis 'dod pa la longs spyod pa ni nyams par 'gyur ba yin pa'i phyir ro/ /shing bal bting pa zhes bya ba la shing bal ni go bar zad do/ /stan bar tshangs can ni la ba'i rigs khyad par can no//snying po can ni stan nang tshangs can zlum po'o / /gos kyi bla re zhes bya ba ni gos las byas pa'i bla re'o/ /yod pa nyid yon tan dang ldan pa nyid dang nus pa yid ches pa dang dad pa dang mngon par 'dod pa'i rnam pa'i dad pa bstan pa'i don du chos rnams la brten pa dang zhes bya ba la sogs pa tshig gsum smos pa yin no//rgyun ma chad par zhes bya ba ni bar ma chad par ro/ /yun ring por don du gnyer ba'i don thob pa'i thabs thob pas bde ba chung ngu dang 'bring dang chen po thob pas go rims bzhin du dga' zhes bya ba la sogs pa tshig drug smos pa yin no//de bzhin gshegs pa'i gdams ngag gis bsam pa rnam par dag pa thob pas shes rab kyi pha rol tu phyin pa thos par gyur to zhes gsungs pa ni de nas byang chub sems dpa' sems dpa' chen po rtag tu ngu zhes bya ba la sogs pa'o//rgyu phun sum tshogs pa rnams kyi chos nyan pa 'bras bu dang bcas pa yin no zhes gsungs pa ni thos nas kyang zhes bya ba la sogs pa gsungs pa yin no/ /mi gnas pa'i 'du shes zhes bya ba ni sgyu ma lta bu'i 'du shes so/ /rtogs pa thams cad chos bdag med pas rab tu phye ba yin no zhes gsungs pa ni de'i ting nge 'dzin gyi sgo zhes bya ba la sogs pa gsungs pa yin no//ting nge 'dzin gang la rnam par gnas na chos thams cad kyi rang bzhin sgyu ma lta bu nyid la sogs par rnam par lta ba de ni chos thams cad kyi ngo bo nyid la rnam par lta ba zhes bya ba'i ting nge 'dzin zhes bya'o//chos thams cad kyi ngo bo nyid kyi mi dmigs pa'i ting nge 'dzin dang zhes bya ba la sogs pa la yang de bzhin du bshad par bya'o/ /de la nges par 'byed pa'i cha dang mthun pa bzhi rtogs pa chung ngu dang 'bring dang chen po'i dbye bas chos thams cad kyi ngo bo nyid la rnam par lta ba zhes bya ba la sogs pa'i ting nge 'dzin bcu gnyis so//yang de las nges par 'byung ba mos pas spyod pa'i sa nyid la sgyu ma rnam par spangs pa zhes bya ba la sogs pa'i ting nge 'dzin lnga bcu yin par shes par bya ste/ 'phags pa dkon mchog sprin gyi mdo las mos pas spyod pa'i sa 'di nyid la gnas pa'i byang chub sems dpa' so so'i skye bo yin na yang byis pa'i rgud pa thams cad las yang dag par 'das shing ting nge 'dzin dang /gzungs dang / rnam par thar pa dang / mngon par shes pa grangs med pa dang ldan par gsungs pa'i phyir ro/ /bsam pa rnam par dag pa'i stobs nyid kyis sa dang po rtogs pa'i don du mnyam par gzhag pa'i gnas skabs su de bzhin gshegs pa'i snang ba sngon du 'gro ba'i gdams ngag rgya cher thob po zhes gsungs pa ni ting nge 'dzin de dag la gnas pas zhes bya ba la sogs pa yin no//phyogs gzhan dag las sa dang po la sogs pa la sangs rgyas brgya la sogs pa mthong ngo zhes gsungs pa gang yin pa de ni gdon mi za bar 'gyur ba nyid du khong du chud par bya ste/gzhan la sgrub pa dag dgag pa med pa'i phyir ro/ /de bas na mos pas spyod pa'i sa la de bzhin gshegs pa grangs med pa nye bar dmigs par 'gyur ba yin no/ / 'jig rten gyi khams gcig tu de bzhin gshegs pa gnyis 'byung ba ni 'gal ba'i phyir ji ltar de ltar 'gyur zhe na/ kha cig na re 'jig rten gyi khams gzhan dag na bzhugs pa'i sangs rgyas bcom ldan 'das tshad med pa mthong ba yin no zhes zer ro/ /gzhan dag ni de bzhin gshegs pa gnyis snga phyi med par 'jig rten du 'byung bar mi 'gyur ro zhes lhan cig skye ba bkag pa gang yin pa de ni bstan pa 'jug pa la dgongs nas gsungs pa yin te/de bas na de bzhin gshegs pa gnyis kyi bstan pa 'jig rten du cig car mi 'byung ba zhes bya ba'i don 'di nyid der gnas pa yin no//'di ltar gzhan gyi don gyi dbang du gyur pa nyid kyis de dag gi 'byung ba ni 'di yin te/ 'di lta ste/ bstan pa 'jug pa'o/ /de ltar yin dang 'jig rten gyi khams 'di'i gnas nyid du yang dgongs pa mnyam pa nyid kyis dang / bstan pa'i rim pa gcig tu byas pa rnams rgyu ma tshang ba med pa'i phyir na de bzhin gshegs pa du ma rnams cig car 'byung ba mthong bar 'gyur ba yin no zhes zer ro//yang gzhan dag ni snga phyi med par ma yin no zhes gsungs pas de rnams ni rim gyis 'byung ba ni rjes su gnang ba nyid yin la/ byung ba de dag ni chos kyi sku dang longs spyod rdzogs pa'i sku dag gis yongs su mya ngan las 'das pa med par yod pa nyid yin gyi 'on kyang bsod nams dang mi ldan pa la mi snang bar zad do//bsod nams dang ldan pa rnams kyis ni bsod nams ji lta ba bzhin du nyung ngu'am mang po nye bar mthong ba yin no zhes 'chad do/ /la la ni de'i tshe der de bzhin gshegs pa gcig gi byin gyi rlabs sam 'phags pa chos 'phags kyi mthus cho 'phrul mdzad pa'i dus su so so'i skye bo rnams dang 'dra bar sprul pa'i de bzhin gshegs pa dpag tu med par yin no zhes zer ro//yang kha cig ni rnam par thar pa'i sgo bsam gyis mi khyab pa dang ldan pa'i bsgom pa'i stobs kyis las dang po pa dang 'dra bar rang gi sems de bzhin gshegs pa dpag tu med par snang bar rtogs pa nyid skyes pas de bzhin gshegs pa dpag tu med pa mthong ba yin no zhes 'dod do//mgo la thod bzhin du zhes bya ba ni mgo la gos dkris pa thogs pa bzhin du khyed kyis zung shig ces bya ba'i tha tshig go//de bzhin du de ci'i phyir zhe na zhes dogs pa bsu nas rigs kyi bu de'i mthus zhes bya ba la sogs pa gsungs pa yin te/ rab tu gdung zhing zhes bya ba ni yid mi bde ba'o/ /de'i rin gyi zhes bya ba ni ji srid 'tsho'i bar du bdag gi lus btsongs na ni gzhan gyi kha na las pas der 'gro bar 'gyur ba'i skabs med pa'i phyir mchod pa dang shin tu bral bar 'gyur bas dus re zhig tsam du bdag gi lus btsongs pa'i rin gyis so//tshogs kyi sa la yang mngon par shes pa'i stobs kyis lha'i mchod pa la sogs pa yod pa srid mod kyi/de'i rin 'dzin pa ni chos la gus par bya ba'i don du yin no zhes bya ba kha cig gi'o/ /gzhan dag ni chos mi nyan pa'i don du gnyer ba nyid kyis na rdzu 'phrul dang mngon par shes pa la rtsol ba'i dran pa dang bral ba yin no zhes zer ro/ /gzhan dag gi brtson 'grus zhan pa rnams chos tshol ba la spro ba bskyed pa bstan pa'i don du yin no zer ro//la la ni rim pa 'dis tshong dpon gyi bu mo la sogs pa'i don bya ba'i phyir yin no zhes 'chad do/ /zhig cing zhes bya ba la sogs pa'i tshig gsum ni rang dang gzhan dang gnyi ga'i 'tshe bas rnam par zhig pa'i phyir go rims bzhin du sbyar ro//'dod pa'i phyir dang 'dod pa'i rgyus zhes bya ba ni nyams su myong ba dang nyams su ma myong ba'i 'dod pa'i don du zhes bya ba'i tha tshig go/ /dga' ba chen po dang 'bring dang chung ngu thob pas sems dga' ba dang zhes bya ba la sogs pa tshig gsum smos pa yin no//gang 'dod pa sbyin no zhes bya ba la kha cig na re mngon par shes pa'i stobs kyis snying la sogs pa byin du zin kyang chos nyan pa'i bar chad du 'gyur bar ma mthong bas sbyin no zhes khas blangs pa yin no zhes 'dod do/ /la la ni chos la mchod pa'i don du gnyer ba nyid kyi bar chad du 'gyur ba yang ma rtsis pa yin no zhes 'chad do//bsam pa che ba nyid ni mchod pa chen po yin gyi rdzas mang po nyid ni ma yin no zhes bya ba'i bsam pas gang yongs su gtang ba de nga la byin cig ces smras pa yin no/ /na tsha dag byed ces bya ba ni gnod pa dag go/ /yon tan gyi rnam pa zhes bya ba ni yon tan gyi spyi'o//yon tan gyi khyad par zhes bya ba ni yon tan gyi rang gi mtshan nyid do/ /de la yid dang rjes su mthun pa nyid yin pas na 'dod pa'o/ /nyes pa mi bskyed pa yin pas na bzod pa'o/ /yul 'di la ni nga'i nus pa yod pa ma yin te zhes bya ba ni dbang du gyur pa'am bdag por gyur pa ma yin te nus pa dang ldan pa ma yin no zhes bya ba'i don to//skye bo dbang po rnon po dang 'bring dang rtul po la snang ba la ltos nas skad cig ces bya ba la sogs pa tshig gsum smos pa yin no/ /'phral du skyes pa'i nad med pas na nad med pa'o/ /phyis 'byung ba'i nad la ltos nas 'byung du rung ba nyid med pas na 'tshe ba med pa'o//tshur shog ces bya ba ni spyon cig pa'o/ /khyim zhes bya ba ni khang pa'o/ /dgyer gsol zhes bya ba ni thong cig pa'o/ /snga ma bzhin du de ci'i phyir zhe na zhes dogs pa bsu nas nga ni dbul te zhes bya ba la sogs pa smos so/ /mang zhing rgya che ba dag yod na zhes bya ba ni rdzas kyi dbye bas rnam pa dpag tu med pa ni mang po'o //rnam pa re re zhing mtha' yas pa ni rgya che ba'o/ /gnang bar mdzad du gsol lo zhes bya ba ni rjes su gnang ba stsol cig pa'o/ /rtag tu ngus rgyang ring mo zhig nas mthong ste zhes bya ba ni rtogs pa khyad par can thob pa'i phyir na chos 'phags kyi rnam par thar pa'i sgo mthong ba'i nus pa yod pas grong khyer spos ldan rgyang ring mo zhig nas mthong ngo //kau shi ka de gang na bzhugs zhes bya ba ni chos don du gnyer ba nyid kyi mngon par shes pa'i rtsol ba dang bral bas dris pa yin no/ /rgya rim pa bdun gyis btab nas zhes bya ba ni rnyed dka' zhing don che ba nyid kyis 'di la gus pa bskyed par bya ba'i don du sku regs bdun gyis shin tu dam par bcings nas mdud pa'i gnas bdun la rang gi ming gi rgya bdun gyis rgyas btab nas bzhag pa yin no zhes kha cig gis 'dod do/skal ba dang ldan pa nyid du mkhyen nas shin tu mgu bar bya ba'i phyir rdzu 'phrul gyi cho 'phrul mdzad pa ni de nas me tog de dag byang chub sems dpa' sems dpa' chen po chos 'phags kyi spyi bo'i steng na zhes bya ba la sogs pa smos pa yin no//de bzhin gshegs pa byon pa dang bzhud pa yongs su shes pa zhu bar bya ba'i phyir sngon byung ba'i tshul gsol ba ni rigs kyi bu bdag 'di na shes rab kyi pha rol tu phyin pa tshol zhing zhes bya ba la sogs pa smras pa yin no//shes rab kyi pha rol tu phyin pa'i bshad pa mngon par rtogs pa'i rgyan gyi snang ba las/ rtag tu ngu'i le'u zhes bya ste sum cu pa'o// // de bzhin gshegs pa rnams kyi byon pa dang bzhud pa bkag pas mthong ba'i lam bskyed par bya ba'i phyir chos thams cad bdag med par ston pas de skad ces smras pa dang / byang chub sems dpa' sems dpa' chen po chos 'phags kyi zhes bya ba la sogs pa gsungs so/ /kha cig na re de bzhin nyid dang /mi skye ba dang / yang dag pa'i mtha' dang / stong pa nyid dang / ji lta ba bzhin du / 'dod chags dang bral ba dang / 'gog pa dang / nam mkha'i khams kyi ngo bo nyid du bstan pas go rims bzhin du sangs rgyas bcom ldan 'das rnams ni sgyu ma lta bu rnam pa thams cad mkhyen pa nyid la sogs pa mngon par rtogs pa brgyad kyi rab tu phye ba nyid ston pa yin no zhes zer ro//de nyid kyi phyir rigs kyi bu chos de dag las zhes bya ba la sogs pa gsungs pa yin te/ chos de dag las zhes bya ba ni rnam pa thams cad mkhyen pa nyid la sogs pa'i chos rnams las de bzhin gshegs pa gzhan nyid kyi ma yin gyi/'on kyang 'di rnams kyi de bzhin nyid gang yin pa de ni de bzhin gshegs pa yin no zhes bya ba'i tha tshig go/ /gzhan dag ni gtan tshigs dang dpe lhag pa'i phyir na lhag pa tshar gcod pa'i gnas yin par rigs pa phra mo rnams kyis kyang brjod pa yin na de ji ltar rigs pa'i dbang phyug dam pa bcom ldan 'das dpe lhag par gsungs pa yin zhes rtsod pa bkod nas gang du rtogs par bya ba gcig kho na yin pa zhes bya ba der ni de la grags pa gcig kho na brjod par rigs pa yin no//'khor gyi dkyil 'khor der ni blo gros tha dad pa mang po 'dus pa yin pas de'i dbang du mdzad nas dpe mang po gsungs pa rigs pa yin no//dpe 'di dag kyang rnam par brtags pas yin gyi bsdu ba ni ma yin no zhes de ltar tshig lhag pa thams cad la rtsod pa spong ba rjod par byed do/ /de bzhin du dpe nyid brjod pa la rten cing 'brel par 'byung ba nyid la sogs pa'i gtan tshigs shes rab can rnams kyi dpog pa'i phyir ma gsungs so zhes so//de ltar de bzhin gshegs pa rnams kyi rang bzhin bstan nas brtags pa mngon par zhen pa dgag pa'i don du gsungs pa ni rigs kyi bu 'di lta ste dper na skyes bus zhes bya ba la sogs pa'o/ / smig rgyu zhes bya ba ni nyi ma'i 'od zer gyi khyad par can no/ /dngos po'i ngo bo nyid yongs su ma shes pa'i phyir na byis pa'i rang bzhin can no/ /phyin ci log tu rtogs pas na shes rab 'chal ba'o/ /de la chu ni rang bzhin gyis ma mchis so zhes bya ba ni smig rgyu'i chu'i rnam pa la 'od zer gyis gdungs pa'i mya ngan ni dmigs pa ma yin te/gzhan gyi rnam pa can gyi shes pa'i yul gzhan yin na ni ha cang thal bar 'gyur ba'i phyir ro/ /dngos po thams cad ni phan tshun ldog pa'i ngo bo nyid yin pas yang dag par na chu ni smig rgyu la sogs pa'i ngo bo nyid ma yin te/ de bas na de la dmigs pa'i shes pa ni yul med pa'i phyir 'khrul pa yin no zhes bya ba'i tha tshig go//snga ma bzhin du ci'i phyir zhe na zhes dogs pa bsu nas de bzhin gshegs pa ni gzugs kyi skur mi lta ste zhes bya ba gsungs te/ kun brtags pa ni gcig tu stong pa nyid yin pa'i phyir de bzhin gshegs pa ni gzugs kyi sku'i bdag nyid can ma yin no//gzhan gyi dbang du mngon par zhen pa dgag pa'i don du rigs kyi bu 'di lta ste dper na sgyu mas sprul pa'i zhes bya ba la sogs pa gsungs pa yin [(]na[,]no[)]/ /gzung ba dang 'dzin pa'i rnam pa ni brdzun pa nyid yin pas sprul pa la ni 'gro ba la sogs pa med do zhes bya ba'i tha tshig go//rigs kyi bu de bzhin du de bzhin gshegs pa'i sku la zhes bya ba ni gzhan gyi dbang gi bdag nyid can la'o/ /yongs su grub par mngon par zhen pa bsam par bya ba'i don du rigs kyi bu 'di lta ste dper na skyes bu gnyid kyis log pa'i rmi lam na zhes bya ba la sogs pa gsungs so//rmi lam ni brdzun pa yin pa'i phyir/ skye ba de dang gzhan na yang / /dus de dang ni dus gzhan na/ /thams cad du ni phyi rol dmigs/ /yul dang dus gzhan bdag nyid do/ /rmi lam shes pa'i spyod yul ni/ /yul de dang ni yul gzhan no/ /snyam na mi 'gyur te/rnam pa gzhan dang ldan pa'i shes pa rnam pa gzhan la dmigs na ni ha cang thal ches par 'gyur ba'i phyir ro/ /phyi rol gyi ngo bo yin par yang mi 'thad de/ /khang pa shin tu chung ngu'i nang du ri dang shing dang rgya mtsho la sogs pa thogs pa dang bcas pa dpag tshad mang po'i tshad tsam nye bar dmigs pa'i phyir ro//de bas na de lta bu'i shes pa skye ba ni 'khrul pa nyid yin pas rmi lam ni brdzun pa yin no/ /rigs kyi bu de de bzhin te chos thams cad ni de bzhin gshegs pas rmi lam lta bu'o zhes gsungs so zhes bya ba ni tshad mas 'thad pa'i skye ba dang bral ba nyid kyis na yongs su grub pa'i rang bzhin can gyi chos thams cad ni rmi lam dang 'dra ba yin no//chos nyid mi shes pas zhes bya ba ni skye ba med pa'i ngo bor mi rtogs pa'o/ /'gro ba drug po zhes bya ba ni lha la sogs pa'i 'gro ba lnga las lha ma yin gyi 'gro ba lnga las ni logs shig tu bzhag pa yin pa'i phyir ro//bcom ldan 'das kyi nyan thos de dag ni zhes bya ba ni/ tshul khrims las ni nyams bla yi/ /lta bas nams kyang ma yin te/ /tshul khrims kyis ni mtho ris 'thob/ /lta bas go 'phang mchog tu 'gro/ /zhes bya ba'i tshul gyis sgyu ma lta bu'i chos nyid kyis lhag par mos pa de dag kho na bcom ldan 'das kyi slob ma yin no//kun brtags pa la sogs pa'i don gsum de kho na'i rang bzhin yin pa bkag pa na skye bo blo dman pa dag de bzhin gshegs pa med pa nyid yin na zhes rtogs pa bsal ba'i phyir rten cing 'brel par 'byung ba'i de bzhin gshegs pa ni yod do zhes gsungs pa ni rigs kyi bu 'di lta ste dper na rgya mtsho chen po'i nang na zhes bya ba la sogs pa'o//sems can gang dag gi dge ba'i rtsa ba la brten nas bya ba ni / las las 'jig rten sna tshogs skyes/ /zhes bshad pas sems can rnams kyi thun mong gi dge ba'i las la brten nas kun rdzob tu dge ba'i rtsa ba'i rgyu can yin pa'i phyir de rnams rgyu med pa can ma yin no//rkyen de dag yod na ni zhes bya ba la shugs kyis zhes bya ba ni lhag ma'o/ /sangs rgyas bcom ldan 'das de dag gi sku rgyu med pa yang ma yin te zhes bya ba ni sangs rgyas kyis 'dul ba nyid kyi sems can rnams kyi dge ba'i rtsa ba'i stobs kyi skur yongs su grub pa yin pas rgyu med pa ma yin no//thun mong gi las las byung ba nyid du bstan nas/ da ni bcom ldan 'das thun mong ma yin pa'i las las nges par 'byung bar bstan par bya ba'i phyir sngon gyi spyod pas yongs su grub pa yin pas zhes bya ba la sogs pa gsungs pa yin te/de la kha cig na re mos pas spyod pa'i sas rab tu phye ba yin pa'i phyir sngon gyi spyod pas yongs su grub pa'o/ /rab tu dga' ba la sogs pa sbyor ba'i sa bdun gyi nye bar len pa las nges par skye ba nyid yin pas na rgyu la rag las pa'o/ / mi g.yo ba la sogs pa'i 'bras bu'i sa gsum gyi lhan cig byed pa'i rgyu las byung ba nyid kyis na rkyen la rag las pa'o/ /kun tu 'od kyi sas bsdus pa nyid yin pas sngon gyi las kyi rnam par smin pa las byung ba yin no zhes zer ro/ /de bas na ngo bo nyid kyi de bzhin gshegs pa ma yin no zhes gsungs pa ni phyogs bcu'i 'jig rten gyi khams gang na yang yod pa ma yin no zhes bya ba la sogs pa'o//don dam don byed nus pa gang / /de 'dir don dam yod pa yin/ /zhes bshad pas tshad mas 'chad pa'i rgyu dang 'bras bu 'brel pa'i stobs kyis rten cing 'brel par 'byung ba kho na yang dag pa'i de bzhin gshegs pa yin no zhes skye bo dmigs pa can gyi mngon par zhen pa dgag par bya ba'i phyir rigs kyi bu 'di lta ste pi wang gi sgra 'byung ba yang zhes bya ba la sogs pa gsungs pa yin te/de la shing bu la brten pa ni rgyud dkris pa yu ba'i rtse mo la gzhag pa'i shing la sogs pa'i dril shing ngo //rgyud la ni ngos na gnas pa'i rgyud kyi khyad par ro/ /sgra de yang pi wang gi khog pa las ma byung zhes bya ba la sogs pas ni skyed par byed pa cig med par ston to/ /de dag thams cad 'dus pa las sgrar gdags so zhes bya ba 'dis kyang sgrar btags pa yin par bstan pas tshogs pa ni yang dag par skyed pa po'i ngo bo yin pa bsal ba yin no//'di skad brjod pa yin te/ rgyu du mas 'bras bu gcig gam du ma zhig byed dam/ de bzhin du rgyu gcig kyang 'bras bu du ma 'am gcig byed do zhes rnam pa bzhir brtag go//de la gal te rgyu du mas 'bras bu gcig byed do zhes bya ba'i phyogs yin na / /de'i tshe mig dang gzugs dang snang ba dang yid la byed pas mig gi rnam par shes pa gcig pu skyed par khas len pa na rgyu tha dad kyang 'bras bu tha dad med pas rgyu tha dad pa ni 'bras bu tha dad par byed par mi 'gyur la de bzhin du rgyu tha mi dad pa med kyang 'bras bu tha mi dad pa bskyed pa'i phyir rgyu tha mi dad pa ni 'bras bu tha mi dad pa'i byed pa por mi 'gyur ro//de bas na rgyu'i tha dad pa dang tha mi dad pa rjes su 'gro ba dang ldog pa dag la ltos pa med pas 'bras bu'i tha dad pa dang tha dad pa med pa dag rgyu med pa can du 'gyur ro//de ltar yin no yang tha dad pa dang tha mi dad pa las gzhan med pa'i phyir sna tshogs pa ni rtag tu yod pa'am med par 'gyur te/ rgyu med pa ni ltos pa med pa'i phyir ro/ /gal te 'bras bu skyed par byed pa ni tshogs pa yin la/ de'i rjes su 'gro ba dang ldog pa'i rjes su byed pa nyid kyi 'bras bu tha dad pa dang tha mi dad pa 'di dag tha dad pa dang tha mi dad pa'i rjes su byed pa la bzo ba ma yin nam/des na ji ltar de dag rgyu med par 'gyur zhe na/ 'di ni snying po yod pa ma yin te/ 'di ltar tshogs pa zhes bya ba ni tshogs pa las gzhan ni 'ga' yang med kyi /'on kyang tshogs pa rnams kyi ngo bo nyid tshogs pa'i sgras brjod par bya ba yin la/ de rnams phan tshun ldog pa'i ngo bo mig la sogs pa tha dad par gyur pa yin no/ /gal te tha mi dad pa gcig nyid kyis 'bras bu mig gi rnam par shes pa skyed par nus na/ de'i tshe tshogs pa gzhan gyi nang du gtogs pa'i tshogs pa'i dngos po rnams kyis kyang mig gi rnam par shes pa ci ste skyed par mi byed/'on te mig la sogs pa las sa la sogs pa tha dad pa nyid yin pas skyed par mi byed do zhe na/ mig la sogs pa yang phan tshun rang bzhin tha dad pas ji ltar skyed par byed pa yin no zhes rjod par byed /gal te skyed par byed pa'i rang bzhin nyid yin pa'i phyir ro zhe na/ de ltar ni ma yin te/ gang gi phyir skyed par byed pa nyid las gzhan pa nyid ni skyed par byed pa ma yin pa nyid du rnam par gzhag pa yin te/ de bas na gcig gis skyed par byed pa'i ngo bo nyid gang yin pa de las gzhan dag ldog pa na skyed par byed par mi 'gyur te/skyed par byed pa las gzhan yin pa'i phyir dngos po gzhan bzhin no/ /'di snyam du gzhan la bskyed par bya ba'i ngo bo med do zhes ni mi smra'i/ 'on kyang gcig gis skyed par byed pa'i ngo bo gang yin pa de gzhan la med do/ /gzhan yang rang gi ngo bo kho nas skyed par byed pa yin gyi gzhan gyi ngo bos ni ma yin te/de'i ngo bo nyid ma yin pa'i phyir ro/ /skyed par byed pa'i rang bzhin las ldog par ma grub pa'i phyir bdag nyid ji lta ba bzhin du tha dad pa yang yin la/ rang gi ngo bos skyed par byed pa yang yin no zhes bya ba 'di la 'gal ba ci zhig yod/'di ltar skyed par byed pa gcig las ldog pa ni de'i ngo bor mi 'gyur gyi/ 'bras bu de dang mi ldan par ni ma yin te/ de kho nas 'bras bu de bya dgos so zhes bya ba 'di la rigs pa ci zhig yod snyam du sems na/ gal te de lta yin na gcig po de kho nas 'bras bu de byas pa yin pas 'bras bu de byed pa la gzhan dag dgos pa ci zhig yod/'di snyam du 'di gcig pus kyang nus na 'dir bdag cag rnams kyis ci zhig bya zhes gang las ldog par 'gyur ba/ dngos po rnams rtog pa sngon du btang nas byed pa ni 'ga' yang med kyi/ de dag ni sems pa med par byed pa can rang gi rgyu yongs su gyur pa la 'du ba'i chos can dag de byed pa na de ltar 'gyur ba la ni klan ka btsal bar 'os pa ma yin no zhes bya bar sems na de lta na ni 'o na rgyu gcig gis bskyed par bya ba'i 'bras bu'i rang bzhin gang yin pa de nyid gzhan gyis kyang byed par 'gyur ro//de lta yin na ni rgyu'i mtshan nyid tha dad pa las 'bras bu'i mtshan nyid tha dad par ma mthong bas/rgyu tha dad pa ni 'bras bu mi 'dra ba med pa tha mi dad pa skyed par byed pa nyid kyis tha dad pa byed pa por mi 'gyur ro/ /'on te phan tshun rnam par chad pa'i lus can yin yang mig la sogs pa nyid rang bzhin gyi khyad par 'ga' zhig gis mig gi rnam par shes pa skyed par nges pa yin te/gzhan zhing la sogs pa ni ma yin no/ /'di ltar rang bzhin gyi khyad par de ni mig la sogs pa de dag gi rang bzhin gyi khyad par 'di dag ga las yin zhes bya ba de tsam du ni 'gyur te/ rgyu med pa nyid yin na ltos pa med pas dog pa med par thal bas 'jigs pa'i phyir ro/ /de dag gi rang bzhin gyi khyad par de ni rang gi rgyud las yin no zhes brjod la/ de skyed pa'i bdag nyid kyang de las gzhan pa'i rgyu las yin pas rgyu brgyud pa thog ma med pa yin no/ /de bas na rnam pa 'di lta bu'i rgyu brgyud pa ni 'dod pa nyid kyis thug pa med pa yin yang skyon du 'gyur ba ma yin no//de ltar na rgyu'i tshogs mtshan nyid mi mthun pa las 'bras bu mtshan nyid mi mthun pa med pa skye ba yin te/ de bas na cha de tsam kho nas rgyu tha dad pa dang tha mi dad pa dag las 'bras bu tha dad pa dang /tha mi dad pa dag yin par brjod do snyam du sems na/ de ni snying po yod pa ma yin te/ gang gi phyir gang zhig gnyi ga la nges pa brjod pa de kho na sgrub pa'am sun 'byin pa yin no zhes bya ba'i rigs pas ji ltar rgyu'i chos kyi stobs kyis thams cad thams cad kyi sgrub byed ma yin pa de bzhin du tha dad par khyad par med kyang thams cad thams cad sgrub par byed pa ma yin no zhes de ltar rgyu 'bras ci 'brel pa khas len pa grangs can la sogs pa dag la brjod na mdzes par 'gyur ba zhig na/gang zhig de kho nar rgyu dang 'bras bu'i dngos po sel ba dbu ma de dag la ni de dag gi rang bzhin gyi khyad par ni rang gi rgyu las yin pa'i phyir ro zhes bya ba rgyu'i chos kyi mtshan nyid kyi gtan tshigs ma grub pa rang gi phyogs grub par bya ba'i don du grub pa lta bur ji ltar nye bar len/'on te rgyu'i chos kyi mthu khas mi len na mngon sum la sogs pa dang 'gal ba bzlog dka'o zhes 'dod na de ni ma yin te/de kho na nyid du zhes bya ba'i khyad par gyis ji ltar mthong ba mi 'gog pa'i phyir ro/ /'o na ji ltar mthong ba 'gog pa yin te/ des na 'dis ni bsal ba rus sbal gyi spu 'byid pa yin te/ ji ltar mthong ba ma yin pa'i rgyu dang 'bras bu'i dngos po ni khas mi len pa'i phyir ro zhe na/ de kho na nyid ni tshad ma dang ldan pa yin pa nyid kyis na tshad ma dang mi ldan pa'i rgyu dang 'bras bu'i dngos po khas mi len pa'i phyir na ji ltar mthong ba ma yin pa ji ltar khas ma blangs/'di ltar mngon sum la ni 'di tsam kho na snang ba yin te/ 'di lta ste/ 'di yod na 'di 'byung ba zhes bya ba yin na de yang kho bo cag gis ma bkag go//tshad mas 'thad pa'i rang bzhin gyi rgyu dang 'bras bu'i dngos po brjod pa gang yin pa de ni mngon sum gyis rtogs par bya ba ma yin te/ mngon sum ni rnam par rtog pa med pa nyid kyis tshad mas 'thad pa'i rang bzhin nyid nges par 'dzin pa'i nus pas stong pa'i phyir ro//dngos por snang ba nyid las de dang tha mi dad pa rnam pa de lta bu'i rang bzhin snang ba yin no zhes smras pa yang rigs pa ma yin te/ rnam pa de lta bu'i rang bzhin ma yin yang skra shad 'dzings pa la sogs pa snang ba'i phyir ro/ /snang ba 'di ni 'khrul pa yin no zhes bya ba yang log pa yin te/bden pa nyid du mngon par 'dod pa'i snang ba la yang bden pa nyid kyi rgyu mtshan med pa'i phyir ro/ /don bya ba byed pa nyid bden pa nyid kyi rgyu mtshan yin no zhe na/ de ni ma yin te gang gi phyir 'bras bu'i bya ba byed pa nyid kho na don gyi bya ba byed pa nyid yin na/ ji skad du bshad pa'i tshul gyi don dam par mi 'thad pa'i ngo bo ni kun rdzob tu khas blangs pa'i phyir de ni shes par byed pa ma yin no//thams cad brdzun pa nyid yin na yul dang dus la sogs pa nges pa med par 'gyur ro zhe na/ gal te rgyu med pa nyid du khas blangs na nyes pa 'dir 'gyur ba zhig na gang gi phyir rnam par dpyad pa'i brnag pa mi bzod pa nyid kyis ma brtags na gcig tu nyams dga' ba'i rang gi rgyu snga ma snga ma la brten nas dus dang yul la sogs pa so sor nges pa'i 'bras bu phyi ma phyi ma 'di lta bu 'byung ba yin no//de nyid kyis na kun rdzob tu rgyu med pas na ri bong gi ra la sogs pa ma skyes pa yin no//gal te rigs pa mtshungs pa nyid yin na ji ltar mthong ba yang ci'i phyir mi dgag ce na/ mngon sum la sogs pa dang 'gal bar 'gyur ba'i phyir ro/ /'o na ni 'di rigs pa nyid ma yin te gnod pa srid pa'i phyir ro zhe na/ de ni de lta ma yin te/ ji ltar rigs pa'i de kho na nyid de ltar gnod pa khas ma blangs pa'i phyir dang /ji ltar gnod pa mthong ba ji lta ba ma yin pa de ltar ni rigs pa yin pa'i phyir ro/ /'on te rgyu du ma nyid 'bras bu du ma byed do zhes bya ba'i phyogs gnyis pa khas len te/ rgyu rnams kyi ngo bo nyid kyi khyad par ni 'bras bu'i ngo bo nyid kyi khyad par la nye bar sbyor ba nyid kyis na rgyu byed pas bsgrubs pa'i 'bras bu'i rang gi ngo bo nyid kyi khyad par ma 'dres pa nyid yin pa'i phyir ro//'di ltar mtshungs pa de ma thag pa'i rkyen gyi rnam par shes pa las ni mig gi rnam par shes pa rtogs pa'i bdag nyid du 'gyur ro/ /mig gi dbang po las ni rtogs pa'i bdag nyid de nyid gzugs la 'dzin par rung ba nyid du so sor nges pa yin no//yul las ni de dang mtshungs pa'i ngo bo kho nar 'gyur ro/ /de ltar na dngos su na rnam par dbye ba med pa'i rang bzhin gyi 'bras bu tha dad ma yin yang rgyu rnams kyi ngo bo tha dad pa dag gis ngo bo nyid tha dad pa kho nar 'gyur te/ rgyu tha dad pa las de'i 'bras bu'i tha dad pa med pa ma yin no zhes 'dod na/de ni rigs pa ma yin te/ gang gi phyir rtogs pa'i bdag nyid la sogs pa rnams phan tshun tha dad pa khas len na ni rnam par shes pa de du mar 'gyur te/ rtogs pa'i bdag nyid la sogs pa las tha mi dad pa'i phyir rtogs pa'i bdag nyid la sogs pa'i rang gi bdag nyid bzhin no//'on te de rnams las tha mi dad pa ma grub pa de lta na ni rnam par shes pa du ma nyid du mi 'gyur ro zhe na/ de rnams las tha dad par khas blangs na rnam par shes pa rgyu med pa can nyid du 'gyur te/ rgyu'i byed pa rnam par shes pa las gzhan rtogs pa'i bdag nyid la sogs pa la nye bar sbyor ba'i phyir ro//de lta na ni/ rtag tu yod pa 'am med par 'gyur/ /zhes bya ba'i nyes par 'gyur ro/ /'on te ji skad bshad pa'i nyes pas 'jigs nas tha dad par khas mi len na de lta na ni rtogs pa'i bdag nyid la sogs pa phan tshun tha dad pa med par 'gyur te/ rnam par shes pa gcig las gzhan ma yin pa'i phyir rnam par shes pa'i rang gi bdag nyid bzhin no//de bas na rgyu'i byed pa'i yul tha dad par brtags pa don med pas rang bzhin tha dad pa'i mig la sogs pa las zhes sngar bshad pa'i nyes pas phog par 'gyur ro/ /'on te 'bras bu'i ngo bo nyid rtogs pa'i bdag nyid ma yin pa la sogs pa du ma las ldog pa dang ldan pa yang dag par skye ba mthong bas chos tha dad pa rtog pas bzhag nas rtogs pa'i bdag nyid yid la byed pa las ni rtogs pa'i ngo bo yin no zhes bya ba la sogs pas rgyu dang rjes su mthun par rtogs pa'i bdag nyid la sogs pa'i chos kyi dbye bas yul tha dad par rtog pas sgro btags pa yin no//de yang yod pa ma yin pa'i phyir na de rnams las tha mi dad pa'i phyir shes pa du ma nyid dang shes pa gcig las gzhan ma yin pa'i phyir de rnams tha mi dad pa yin no zhes bya ba'i sbyor ba gnyi ga la gtan tshigs su ma grub pa yin no zhes 'dod na/gal te de ltar na ni khyad par de rnams rtog pas sbyar ba nyid yin pas nam mkha'i ut+pal la sogs pa dang 'dra bar rgyu'i byed pa la ltos pa ma yin pa'i phyir rgyu'i rang bzhin tha dad pa rnams las khyad par tha dad pa kho nar 'gyur ro zhes brjod pa ni rigs pa ma yin no/ /'on te ltos pa yin no zhes mngon par zhen pa de ltar na yang rtog pas sbyar ba'i rtogs pa'i bdag nyid la sogs pa rgyu'i byed pa bzhag pas na brtags pa nyid yin gyi yang dag pa'i don du mi 'gyur ro//de lta na ni 'bras bu rgyu med pa can du 'gyur te/ rgyu'i byed pas brtags pa'i bdag nyid rnams la nye bar sbyor ba'i phyir ro//'on te brjod zin pa'i nyes pas 'jigs nas 'bras bu ni tha dad pa ma yin pa gcig pu yin la bye brag ni tha dad kyang 'bras bu las tha dad pa ni ma yin no zhes 'dod na/ de lta na ni 'o na tha dad pa dang tha mi dad pa'i chos dang ldan pas chos dang chos dag dngos su zla ba dang skar ma la sogs pa dang 'dra bar tha dad pa'i phyir na/spyi tha dad pa nyid nan gyis thog tu 'bab pa dang / phan tshun 'gal ba'i mtshan nyid dang ldan pa'i nyes pa 'ba' zhig tu yang ma zad do/ / 'on kyang rtogs pa'i rang bzhin las gzhan ma yin par khas len pa na gzugs las 'bras bu rnam par shes pa mi skye ste/rtogs pa'i ngo bo la gzhan ma yin pa'i phyir rtogs pa'i rang gi bdag nyid bzhin no/ /yul gyi rnam pa las gzhan ma yin pa'i phyir gzugs las kyang de skye bar 'gyur te/ yul gyi rnam pa'i rang gi bdag nyid bzhin no/ /de ltar na 'bras bu gcig las skye ba dang mi skye ba dang rgyu gcig la yang skyed par byed pa dag cig car de kho nar 'gal ba yin no//'di snyam du rnam pa de lta bu'i 'bras bu skye bzhin par mthong ba yin no snyam na/ de ni rigs pa ma yin te/ zla ba gnyis la sogs pa mthong ba yang tshad mar ma gyur cig snyam pas tshad mas gnod pa bzhin du yang mthong ba thams cad tshad mar 'gyur ba ni ma yin no//'on te rgyu gcig pu kho nas 'bras bu du ma byed do zhes bya ba'i phyogs gsum pa khas len to zhe na/ de ni rigs pa ma yin te/ gcig las 'bras bu du ma skyed na rgyu tha dad pa ni 'bras bu tha dad par byed par mi 'gyur ba'i phyir tha dad pa yang tha dad pa'i rgyu ma yin no//des na sna tshogs kyi tha dad pa dang tha mi dad pa dag rgyu med par 'gyur ro/ /gang gi rgyu gcig po yin na yang 'bras bu du ma byed pa de ni tha mi dad kyang bdag nyid kyi khyad par de 'dra ba yin no zhe na/ rgyu de bdag nyid kyi khyad par gang gi 'bras bu gcig skyed pa de nyid kyis ci gzhan yang yin nam/de nyid kyis so zhe na/ ji ltar 'bras bu tha dad pa yin/ 'on te gzhan gyis so zhe na/ 'o na ni rgyu tha mi dad pa rigs pa dang ldan pa ma yin te/ bdag nyid kyi khyad par la gzhan pa'i dngos po ni med pa'i phyir ro/ /'di snyam du gal te ji ltar grangs can pa'i ltar 'bras bu'i ngo bor gyur pa'i rgyus 'bras bu bskyed pa yin na /de'i tshe gcig ni du ma'i ngo bor 'gyur ba 'gal bas du ma skyed par rigs pa dang ldan pa ma yin par 'gyur na/ gang gi phyir tha dad pa dang tha dad pa ma yin par skyed par nges pa'i ngo bo nyid kyi rgyu nye ba tsam gyis 'bras bu tha dad pa med pa skyed pa na rtsod pa 'dis brdzi bar mi 'gyur ro//tha dad pa dang tha mi dad pa skyed par nges pa'i rang bzhin gyi rgyu las tha dad pa dang tha mi dad pa'i 'bras bu skye ba gang yin pa 'di nyid rgyu tha dad pa dang tha mi dad pa dag las 'bras bu tha dad pa dang tha mi dad pa 'byung ba yin no snyam na/ 'di yang log pa yin te/gang gi phyir 'di nyid du 'di ltar rnam par dpyad par bya ste mig gi ngo bo nyid gang gis mig gi skad cig ma skyed pa de nyid kyis mig gi rnam par shes pa yang skyed dam ci/ de nyid kyis so zhe na/ rnam par shes pa de yang mig kho nar 'gyur te mig bskyed pa'i ngo bo nyid kyi rgyus bskyed pa nyid yin pa'i phyir mig bzhin no//yang na ngo bo nyid gang gis rnam par shes pa skyed pa ni nyid kyis mig kyang yin na/ de lta na ni mig gi rnam par shes pa'i rgyus bskyed pa nyid yin pas mig kyang mig gi rnam par shes par 'gyur te/ mig gi rnam par shes pa bzhin no/ /yang na so sor mig dang mig ma yin pa'i ngo bo nyid kyi rgyus bskyed pa'i mig dang mig ma yin par 'gyur gyi/de bzhin du rnam par shes pa dang rnam par shes pa ma yin pa skyed par byed pa'i rang bzhin gyi rgyus bskyed pa'i phyir rnam par shes pa dang rnam par shes pa ma yin pa'i ngo bor 'gyur ro/ /'di ni de bzhin du yin no zhes khas len na yang khyed cag mngon sum la sogs pas gnod pas shin tu nye bar 'gyur ro//'on te mig gi ngo bo nyid gzhan gyi mig gi skad cig ma skyed la gzhan gyis ni mig gi rnam par shes pa yin no zhes 'dod na/ ngo bo nyid de dag ci mig las tha dad pa yin nam 'on te tha mi dad pa yin/ gal te tha dad pa yin na ni de'i tshe de dag nyid dngos su na don byed pa'i mtshan nyid yin pa'i phyir dngos su ni skyed par byed pa'i dngos por 'gyur la mig ni dngos po ma yin par 'gyur te/ci yang mi byed pa'i phyir ro/ /'on te tha mi dad pa yin na ni de'i tshe gcig pa nyid du mngon par 'dod pa'i mig kyang tha dad par 'gyur te/phan tshun tha dad pa'i ngo bo nyid dang tha mi dad pas rang bzhin gnyis bzhin no/ /de lta na yang gcig pa nyid nyams par 'gyur ro/ /yang na rang bzhin dag kyang gcig tu 'gyur te/ mig las tha mi dad pa'i phyir mig bzhin no/ /de la yang mig gi ngo bo nyid gang gis zhes bya ba la sogs pa'i nyes pa bshad zin to//'on te rang gi rgyu las gcig bskyed pa'i ngo bor skyes pa'i rgyu ni de bzhin du 'bras bu gcig skyed par byed la/ de bzhin du du ma skyed par byed pa yang rang gi rgyu nyid las skyes pa yin no zhes 'dod na/ de skad smra ba ni skabs nyid brjed pa yin te/ 'di ltar ji ltar gcig dang du ma skyed par byed pa yin pa 'gog par byed pa de bzhin du gcig skyed par byed pa yin pa yang 'gog par 'dod pas dbu ma pa la de skad ci ste brjod/dbu ma pa ma yin pa la yang don med de / de ni gcig dang du ma skyed par byed pa 'di 'dod pa'i phyir ro/ /gal te 'di snyam du tha dad pa skyed par nges pa'i rang bzhin las tha mi dad pa skye ba yin no snyam na/de ltar na 'o na 'bras bu rgyu'i ngo bo nyid kyi rjes su byed pa ma yin par 'gyur ba des na rgyu med pa nyid du thal bar 'gyur ro/ /gang gi phyir tha dad pa skyed par nges pa'i rang bzhin gyi mig las mig dang mig gi rnam par shes pa mig ma yin pa'i rang bzhin yang skye ba'i phyir tha dad pa med pa ji ltar skye/'di ltar rgyu ni 'bras bu so so la phan tshun mi mthun pa'i nus pa rnams dang rjes su 'brel ba'i phyir 'bras bu tha dad pa byed pa ni ma yin gyi/ 'on kyang rang gi ngo bo las so zhes bya ba yin na/ gang gis na sngar bshad pa'i 'gal ba yod kyang de khyad du bsad nas rang gi phyogs bsrung bar kun du spyod pas lan 'ga' sems dpa'i khur spangs nas khyed bde bar gnas pa rang gi ngo bo zhes bya ba rang bzhin sna tshogs can 'di ci zhig yin/rgyu'i chos kyi stobs yin no zhe na/ de lta ma yin te sngar bsal zin pa'i phyir ro/ /yongs su snang bzhin pa'i ngo bo nyid yin no zhes kyang brjod par mi bya ste/gang gi phyir gzugs la sogs pa nyams su myong ba dang ldan pa'i shes pa la snang bzhin pa ni bstan bcos la sogs pa la brten nas kun brtags pa'i de kho nar skye ba la sogs pa bkag pa yin pa'i phyir ro/ /blo gang zhig gi bsam blo gang zhig yod na de nyid sgrib par byed pa 'jig rten na grags pa de lta bu ni kun rdzob tu bzhed do//de na rtogs bzhin pa'i rang bzhin sna tshogs pa 'di dag thams cad bden pa yin la/ gzhan du na ni brdzun pa yin no/ /de bas na rgyu dang 'bras bu'i dngos po ji ltar mthong bzhin pa ni bzlog dka'o/ /de ltar yin dang kha cig gis 'di skad du kun rdzob ni dngos po med pa yin la skye ba dngos po yin pa'i phyir cig car don bya bar rung ba dang mi rung ba'i dngos po khas blangs pa yin no//'on te kun rdzob skye ba yin na de'i tshe kun rdzob tu skye'o zhes bya ba'i tshig 'di skye ba skye'o zhes khas len pa yin pas mi 'dod pa ci yang bsgrubs pa med do/ / de bzhin du skye ba med pa ni don dam pa yin no zhes bya ba dang / de bzhin du don dam par ma skyes pa zhes bya ba 'di'i don yang skye ba med pas skye ba med do zhes bya bar 'gyur la/ de lta na yang grub pa la sgrub pa yin no zhes bya ba la sogs pa sun 'byin pa gang yin pa de ni kun rdzob kyi mtshan nyid ma shes pas skabs kyi don la mi mkho bar ma 'brel pa 'ba' zhig mngon pa'i nga rgyal gyis smras par zad do//'on te rgyu gcig gis 'bras bu gcig kho na byed do zhes bya ba phyogs bzhi pa khas len na 'di shin tu mi mdzes te/ 'di ltar rang gi rigs kyi skad cig ma skyed par byed pa nyid kyis mig la sogs pa rnams la rang gi rnam par shes pa skyed par byed pa nyid med pas long ba nyid la sogs pa'i thal bar gsal bar thal lo//rang gi rnam par shes pa nyid skyed par byed pa nyid yin par khas len na yang mig la sogs pa'i rigs rgyun chad pas shes pa'i skad cig ma gcig gi rjes la mig la sogs pa med cing shes pa yang med pa des na 'gro ba rnams kyis long ba la sogs pa de nyid 'bad pa med par thob par 'gyur ro//de bas na gang dang gang rten cing 'brel par 'byung ba yin pa de ni don dam par ma brtags / gcig pur nyams dga' ba yin te/ dper na sgyu ma byed pa sprul pa'i glang po la sogs pa lta bu'o/ / gzugs la sogs pa'i dngos po 'di dag thams cad de dang 'dra'o zhes bya ba ni rang bzhin gyi gtan tshigs yin no/ /ji ltar mthong ba bzhin du rten cing 'brel bar 'byung ba mthong ba'i phyir gtan tshigs ma grub pa ma yin no/ /mthun pa'i phyogs la yod pa'i phyir 'gal ba yang ma yin no/ /snga ma'i tshul gyis mi mthun pa'i phyogs la gnod par byed pa'i tshad ma nye bar bstan pa'i phyir ma nges pa nyid du mi 'gyur ro//de ltar na rigs pa 'dis rkyen la rag las te 'jug pa nyid yin pa'i phyir ji ltar sgro btags pa yin pa de bzhin du bcom ldan 'das kyi sku yang rnam par gzhag pa yin te shin tu spros pas chog go//de la nye bar len pa'i rgyu la rag las pa nyid yin pas na rgyu la rag las pa'o/ /lhan cig byed pa'i rgyu las skyes pa nyid yin pas na rkyen la rag las pa'o/ /gdul bya rnams kyi dge ba'i rtsa ba'i stobs kyi snang ba'i yul du 'gyur bas na dge ba'i rtsa ba'i sbyor ba du mas yongs su grub pa yin no//ji skad du gsungs pa'i chos la so sor rtog pa'i dgos pa'i don ni rigs kyi bu khyod gang tshun chad ces bya ba la sogs pa gsungs so/ /gang gi phyir de ltar bshad ma thag pa'i rim pas ji ltar chos thams cad skye ba med pa dang 'gag pa med pa yin pa'i phyir ro/ / mthong ba'i lam rtogs pas khyod kyis yang dag par shes pa yin pas na/de bas na dngos po la mngon par zhen pa'i mtshan nyid kyis phyin ci log dang 'gal ba ngo bo nyid med par shes pas spangs te/ de'i rtsa ba can nyon mongs pa dang shes bya'i sgrib pa ma lus pa rim gyis bsal nas sa dang po la sogs par khyod bla na med pa yang dag par rdzogs pa'i byang chub tu nges par 'gyur ro zhes bya ba'i tha tshig go//gdul bya rnams la chos phyin ci ma log par bshad pa'i stobs kyis rtogs pa skyes par gyur to zhes ston pa ni yang de bzhin gshegs pa byon pa dang bzhud pa med pa 'di bshad pa'i tshe zhes bya ba la sogs pa yin no/ /slar the tshom mi 'jug go zhes bya ba ni grub pa dang bde ba gcig pa rnams kyi nang nas gang yang rung ba gcig pu zhig spangs pa med pa'i phyir chos bdag med pa bstan pa'i stobs kyis mthong ba'i lam rtogs pa'i mthu las the tshom spangs pas mthong bas spang bar bya ba'i nyon mongs pa'i tshogs spangs pa gsal bar byed pa des na bla na med pa'i byang chub la slar the tshom 'jug par mi 'gyur ro//dge ba'i rtsa ba yongs su bskang ba'i phyir zhes bya ba ni sa dang po'i dbang du byas na sbyin pa'i pha rol tu phyin pa la lhag par spyod pa nyid kyi phyir zhes bya ba'i tha tshig go/ /lo bdun gyi bar du zhes bya ba ni kha cig na re/ da ltar nga ni snying rje las/ /nyams min chos la'ang ser sna med//dpe mkhyud med cing mi nus min/ /nga ni sdug bsngal rang bzhin min/ /nga yi bstan pa ma zad la/ /khyed la re ba'ang yod min gyi / /gdul byas nga ni shes mi nus/ /gus dang bcas pa 'ang med pas na/ /des ni bstan par mi bya bar/ /mkhyen cing skom par bya ba'i phyir/ /zla ba phyed dang gsum dag tu//bcom ldan nang du yang dag 'jog /ces bya ba'i rigs pas 'phags pa rtag tu ngu'i bsam pa yongs su dag pa nyid zad par bya ba'i don du lo bdun gyi bar du snyoms par 'jug pa nyid kyis gnas pa yin no zhes 'dod do/ /gzhan dag ni mthong ba'i lam rtogs pa'i stobs kyis yang dag pa'i byang chub kyi yan lag bdun rtogs pa rnam pa thams cad du yongs su sbyang bar bya ba'i don yin no zhes 'chad do//bsam pa yongs su dag pas bsgoms pa'i stobs kyis phyin ci ma log pa'i ltas snang ba skyes par gsungs pa ni de nas byang chub sems dpa' sems dpa' chen po rtag tu ngus lha'i sgra thos te zhes bya bya ba la sogs pa'o//de ltar bsams nas zhes bya ba ni de ltar rnam par dpyad nas te mngon par shes pa drug yod du zin na yang des mchod par mi byed pa ni lus btsongs pa'i rin len pa dang 'dra bar bshad par bya'o/ /ji lta bu'i shes rab kyi pha rol tu phyin pa ston par 'gyur zhe na/ de la byang chub sems dpa' sems dpa' chen po chos 'phags shes rab kyi pha rol tu phyin pa ston pa ni 'di yin te zhes bya ba la sogs pa gsungs pa yin te/kha cig na re gal te yang chos thams cad mnyam pa nyid la sogs par ston pa'i rnam pa thams cad chos bdag med par ston pa nyid du mtshungs pa yin pa de lta na yang sgra 'di dag skyes bus byas pa yin pa'i phyir smra ba po'i mngon par 'dod pa'i 'bras bu ston pa yin te/de bas na man ngag gcig nas gcig tu brgyud pa nyid kyis mngon par 'dod pa ston pa yin pa'i phyir 'di rnams kyi don gyi dbye ba khong du chud par bya'o zhes 'dod do/ /de bas na de'i gzhung nyid bri bar bya ste/ de la dang por rnam pa thams cad mkhyen pa nyid la sogs pa mthar gyis pa'i mngon par rtogs pa'i mthar thug mngon par rtogs pa rnam pa drug gi rim pa so sor sbyor ba dang mthong ba dang bsgom pa'i lam gyi ngo bo nyid bstan par bya ba'i phyir chos thams cad mnyam pa nyid pas zhes bya ba la sogs pa tshig bco brgyad gsungs pa yin no//de'i 'og tu skad cig ma gcig la mngon par rtogs pa rnam pa bzhi'i don bstan pa'i phyir sa'i khams su med pas zhes bya ba la sogs pa tshig bzhi smos pa yin no/ /de'i 'og tu ni sku gsum pa stong pa nyid du ro gcig pa nyid du shes par bya ba'i phyir nam mkha'i khams mu med pas zhes bya ba'i tshig smos pa yin no//de'i 'og tu ni chos dang longs spyod rdzogs pa dang sprul pa'i sku gsum gyi rang bzhin gyi ngo bo nyid bstan pa'i phyir rnam par shes pa'i khams mu med pa nyid pas zhes bya ba la sogs pa tshig gsum smos so/ /de'i 'og tu yang tshogs dang mos pas spyod pa dang byang chub sems dpa' dang de bzhin gshegs pa'i sa rnams la gdul bya'i skye bo skal ba ji lta ba bzhin du rab tu 'jog par byed pa'i chos kyi sku'i phrin las yongs su bstan pa'i phyir chos thams cad dmigs su med pa nyid pas zhes bya ba la sogs pa'i tshig bzhi smos par shes par bya ste/'di ni ci'i don yin no//tshig gi don rnams ni phal cher rnam par phye zin pa kho na yin pas yang rnam par ma phye'o/ /'phags pa chos 'phags kyi byin gyi rlabs dang rang gi smon lam dang bsod nams dang ye shes kyi mthus thos pa dang bsam pa'i rang bzhin can gyi shes pa skyes pa'i rim gyis ji skad du bshad pa'i mngon par rtogs pa brgyad kyi ngo bor shes rab kyi pha rol tu phyin pa ston pa'i rnam pa'i ting nge 'dzin rnams kyi snang ba byang chub sems dpa' rtag tu ngu la rmi lam gyi gnas skabs dang 'dra bar dus de srid cig skyes so zhes gsungs pa ni byang chub sems dpa' sems dpa' chen po rtag tu ngu de ltar 'dug bzhin du zhes bya ba la sogs pa'o//ting nge 'dzin gang la gnas na chos thams cad mnyam pa nyid du rtogs par 'gyur ba de ni chos thams cad mnyam pa nyid ces bya ba'i ting nge 'dzin no / /chos thams cad dben pa zhes bya ba'i ting nge 'dzin zhes bya ba la sogs pa yang de bzhin du brjod par bya'o/ / rnam pa thams cad du ji skad du bshad pa'i shes rab kyi pha rol tu phyin pa la dmigs pa'i ting nge 'dzin rnams rtogs pa'i tshul gyis brtan par snang ba nyid yin na ni mdo dang 'gal lo/ /'di ltar bskal pa grangs med pa dang pos ni tshogs kyis nas brtsams te sa dang po'i bar du rdzogs par 'gyur ro/ / gnyis pas ni dri ma med pa'i sa nas bzung ste sa bdun pa'i bar du'o/ /yang bskal pa grangs med pa gsum pas ni sa mi g.yo ba nas bzung nas sangs rgyas kyi sa'i bar du'o/ /de ltar na bskal pa grangs med pa gsum gyis sangs rgyas nyid 'thob par 'gyur ba yin pas sgra ji bzhin pa nyid kyi mdo dang 'gal lo zhe na/gsum tshan du mtshungs pas na bskal pa grangs med pa gsum gyi zhes bya ba gsungs pa yin gyi/ don dam par ni ma yin no/ /des na de ltar drang ba'i don gyi mdor bshad pa na shin tu 'gal ba kho na'o/ /'di ltar slob dpon dbyig gnyen gyi zhal snga nas kyi tshogs kyis kun tu rdzogs par byed pa na bskal pa grangs med pa gcig 'da' bar byed pa'o//de'i 'og tu mos pas spyod pa'i sa rdzogs par byed pa na bskal pa grangs med pa gnyis 'da' bar byed do/ /de'i 'og tu rab tu dga' ba nas brtsams te byang chub sems dpa'i sa chos kyi sprin gyi bar la so so so sor bskal pa grangs med pa gsum gsum gyis byang chub sems dpa' rdzogs par byas nas sangs rgyas kyi sa kun tu 'od sgrub par byed pa yin te/de ltar na bskal pa grangs med pa sum cu rtsa gsum gyis sangs rgyas nyid 'thob pa yin no zhes bshad do/ /ji skad du bshad pa'i mngon par rtogs pa'i bdag nyid can gyi shes rab kyi pha rol tu phyin pa bstan pa la dmigs pa'i ting nge 'dzin gyi stobs kyi sa dang po kho na la ting nge 'dzin gyi sgo mang po rtogs so zhes gsungs pa ni de la sogs pa zhes bya ba la sogs pa'o//'dir ting nge 'dzin gyi mngon par bsgrub pa'i thabs kho na ting nge 'dzin gyi sgo zhes bya ba'i ting nge 'dzin rnams ma yin te sa bcu pa las rab tu dga' ba'i sa la ting nge 'dzin brgya 'thob pa zhes gsungs pa'i phyir ro//yang na ting nge 'dzin gyi rang bzhin kho na la ting nge 'dzin gyi sgo zhes bya'o/ /de la brgya smos pa ni nye bar mtshon pa tsam nyid yin no zhes khong du chud par bya'o/ /shes rab kyi pha rol tu phyin pa'i bshad pa mngon par rtogs pa'i rgyan gyi snang ba las chos 'phags kyi le'u zhes bya ste sum cu rtsa gcig pa'o// //ting nge 'dzin yang dag pa kho nar rtogs pa rnams kyi bya ba bstan pa'i phyir rab 'byor byang chub sems dpa' sems dpa' chen po rtag tu ngus zhes bya ba la sogs pa gsungs pa yin no/ /yang gzhan dag gus pa bskyed par bya ba'i phyir yongs su gtad pa'i don du gleng slong bar mdzad pa ni de nas yang bcom ldan 'das kyis tshe dang ldan pa kun dga' bo la bka' stsal pa zhes bya ba la sogs pa gsungs so//rnam grangs 'dis kyang zhes bya ba ni gang gi phyir 'phags pa rtag tu ngu nyid kyi don chen po byed pa yin pa de bas na sngar bshad pa'i rnam grangs 'ba' zhig tu ma zad kyi 'dis kyang zhes bya ba'i tha tshig go//de bzhin gshegs pa'i byin gyi rlabs kyis zhes bya ba ni phan yon che ba nyid kyis bar chad mang ba yin pa'i phyir glo bur du yi ger bri bar mi nus te/ des na de bzhin gshegs pa'i byin gyi rlabs kyis yin no/ /de ltar gleng bslang ba mdzad nas yongs su gtad pa ston par mdzad pa ni kun dga' bo de lta bas na zhes bya ba la sogs pa gsungs pa yin no//rgyu mtshan ci zhig gis 'di yongs su gtad par mdzad pa yin snyam pa'i dogs pa de ci'i phyir zhe na zhes bya bas bsu nas/ shes rab kyi pha rol tu phyin pa 'di las zhes bya ba la sogs pa gsungs so//de nyid gsal bar mdzad pa ni kun dga' bo 'di ji snyam du sems zhes bya ba la sogs pa gsungs pa yin no/ /de ltar mdor bsdus pa rgyas par bstan pa la dga' ba'i sems can la phan 'dogs pa rnam pa thams cad mkhyen pa nyid la sogs pa chos kyi sku mdzad pa dang bcas pa'i mthar thug pa'i don brgyad po thams cad nyid yang dag par bstan pa yin no//yang na dang por rnam pa thams cad mkhyen pa nyid la sogs pa thams cad mkhyen pa nyid gsum ni mngon par mtshon pa'i gnas nyid yin pas mtshan nyid do/ / de nas dbang du bya ba'i phyir 'dis thams cad mkhyen pa nyid gsum bsgom pa la sbyor bas rnam pa thams cad mngon par rdzogs par rtogs pa ni thams cad mkhyen pa nyid kyi sbyor ba'o/ /de nas shin tu goms pas rab tu 'gro ba'i phyir rtse mo'i mngon par rtogs pa ni mkhyen pa nyid gsum gyi rab kyi gnas skabs yin no//de nas rtogs pa'i dngos po nges par bya ba'i phyir so so ba dang bsdus pa dag tu bsgoms pa'i don gzhung srong bar byed pas mthar gyis pa'i mngon par rtogs pa ni thams cad mkhyen pa nyid gsum gyi go rims kyi gnas skabs yin no/ /de nas khyad par du 'gror med pa yang dag par skad cig ma gcig pa'i mngon par rdzogs par byang chub pa ni thams cad mkhyen pa nyid gsum gyi mthar thug pa'i gnas skabs so//de nas de'i 'bras bu yin pas chos kyi sku mdzad pa dang bcas pa ni thams cad mkhyen pa nyid gsum gyi rnam par smin pa yin no//de ltar na mdor bsdus pa 'bring du bstan pa la dga' ba la rjes su brtse bas don bsdus pa rnam pa drug po 'dis snga ma bzhin du rgyal ba'i yum 'di bshad par bya ba yin no/ /de skad du yang / mtshan nyid de yi sbyor ba dang / /de rab de yi go rims dang / /de mtha' de yi rnam smin ni//don bsdus gzhan de rnam pa drug /ces gsungs pa yin no/ /yang na dang por rnam pa thams cad mkhyen pa nyid gsum gyi ngo bo nyid ni 'jug pa'i spyod yul yin no/ /de ji ltar rab tu sbyor zhe na/ de'i 'og tu rnam pa thams cad mngon par rdzogs par rtogs pa la sogs pa mngon par rtogs pa rnam pa bzhi ni rgyu'i rang bzhin gyi sbyor ba yin no//sbyor ba dang de lta bu dang ldan pa'i yul de'i 'bras bu ci zhig yin zhe na/ de'i 'og tu chos kyi sku phrin las dang bcas pa ni 'bras bu yin te/ de ltar mngon sum du bsdus te mdor bsdus pa la dga' ba'i sems can rnams kyi dbang du mdzad nas de bzhin du yum 'di bshad par bya ba yin no//de skad du yang / yul ni rnam pa gsum po rgyu/ /sbyor ba bzhi yi bdag nyid dang / /chos sku phrin las 'bras bu ni/ /don bsdus gzhan te rnam pa gsum/ /zhes gsungs pa yin no/ / bcom ldan 'das dgyes shing de skad ces bka' stsal pa dang zhes bya ba la sogs pa dang /skyes bu de ni nyer gnas pa/ /tsam gyi yid bzhin nor bu bzhin/ /rtsig sogs las kyang chos ston pa/ /ji ltar 'dod pa bzhin du 'byung / /zhes bya ba'i tshul gyis bcom ldan 'das dgyes shing thugs dga' bas gdul bya'i skye bo skal ba dang ldan pa rnams kyis ston pa po nyid du lhag par zhen pas bshad ma thag pa shes rab kyi pha rol tu phyin pa'i mdo sde rin po che nyid ma lus pa de skad ces bka' stsal pa ste gsungs pa dang ngo //gal te 'phags pa rab 'byor la sogs pa gzhan dag gis kyang cung zad smras pa yod mod kyi de ni bcom ldan 'das kyi bdag po nyid las yin pas nyes pa med do//byang chub sems dpa' sems dpa' chen po 'phags pa byams pa la sogs pa de dag kyang dga' zhing bcom ldan 'das kyis gsungs pa la mngon par bstod do zhes 'brel te rnam par dbye ba sgyur nas 'brel pa yin pa'i phyir ro//dang zhes bya ba ni thams cad du 'og ma 'og ma la ltos te bsdu ba'i don yin te/ de bzhin du 'phags pa rab 'byor yang dga' zhing gsungs pa la mngon par bstod do zhes 'brel te brjod pa yongs su gyur pa dang 'brel pa'i phyir ro/ /de bzhin du 'phags pa shA ri'i bu la sogs pa la ltos te re re zhing sbyar ro//lha dang mi dang lha ma yin dang dri zar bcas pa dang lhan cig gnas pa yin pas na lha dang mi dang lha ma yin dang dri zar bcas pa'i 'jig rten zhes bya'o/ /de dang tha dad pa gzhan su zhig yod ce na de rnams dang bcas pa zhes brjod cing /tshogs pa dang tshogs pa can gyi dbye ba la ltos nas de skad brjod pas nyes pa med do/ /yang na mi 'am ci dang lto 'phye chen po dang nam mkha' lding la sogs pa gzhan dag kyang mang po yod pas de ltar brtsad par mi bya'o/ /'di dag thams cad kyis kyang dam pa'i chos mnyan pa las gzhan rang dang gzhan la ches mchog tu phan pa yod par nye bar ma dmigs te/de bas na rab tu dga' ba'i rgyu yod pas bcom ldan 'das kyis gsungs pa la rab tu dga' ba phul du byung ba yang dag par skyed de bcom ldan 'das chos kyi dbang phyug dam pa thugs rje chen po'i rang bzhin gyi sku can khyod kyis legs par gsungs pa'i gsung 'di ni legs so zhes bya ba la sogs pas mngon par bstod do zhes bya ba bstod par gyur to zhes bya ba'i don to//shes rab kyi pha rol tu phyin pa'i bshad pa mngon par rtogs pa'i rgyan gyi snang ba las yongs su gtad pa'i le'u zhes bya ste sum cu rtsa gnyis pa'o// //mdor bsdus la sogs tshig brjod la mkhas gsung rab kun la mnga' mdzad pa/ /'dren byed rnams kyi rtogs don de nyid lam kun gang phyir de lta bur/ /gsal bar mdzad pa de nyid las ni shes rab pha rol phyin pa yi/ / tshul la khyad par shes bya 'di ni gsung gi bdag nyid tsam du zad/ /'phags pa thogs med gzhung gi rjes 'brangs blo bzang ser sna med rnams dang / /mkhyen ldan mang du gsan pa dang ldan bla ma rnam par snang mdzad bzang po yi/ /mthu yis blo gsal cung zhig skyes pas seng ge bzang po zhes bya bas//'phags pa bcom ldan 'das yum 'di yi don gsal rnam pa kun tu gus pas byas/ /yang dag yang dag ma yin rnam dbye'i rigs bral shes pa skyes las kun rdzob tu/ /'khor ba'i rgya mtsho'i 'dam du yid bying skye bzhir 'gyur ba'i lus can 'di dag kun/ / yum gyi bshad sbyar byas pa las byung bdag gis thob pa'i dge ba'i sa bon las/ /rnam pa kun gyi mchog tu gyur pa'i sku ni gsum po nges par thob par shog /rdzogs sangs sras bcas rnams kyis legs par rnam phye yum 'di 'ang gang na bzhugs gyur la/ /blo nor phun tshogs yul min de bzhin tshig gi spyod yul min bdag gang na ste//bdag ni phyi nas skye ba gzhan du rtag tu rmongs pa nyid du ma gyur cig /snyam du bsams nas 'di byas pa las mkhas rnams kyis ni dpyad par rigs pa yin/ /phrag dog zug rngus gdungs pa'i yid can log pa'i nga rgyal stobs bsgrubs thos pa yis//shes rab ldan pa rnams kyi mdun du bshad par byed pa'i nus pa yod min te/ /dam min skye bo rnams dang dam pa'i bar ni sa 'og dang ni mkha' ltar ring / /de nyid phyir na rnam pa de 'dras bdag la gnod 'gyur phra mo 'ga' yang med//gang zhig sa stengs bsod nams grangs tshogs ldan par rab grags mkhas pa'i skye bos brgyan/ /yon tan kun gyi 'byung gnas dpal ldan TI ka du ka'i gtsug lag khang bzangs der/ /sbyin las 'byor pa chen po thob 'gyur chos kyi bdag nyid snying rje lha yi ni//mgon bcas bde ba'i rkyen gzhi mkhas pa'i gnas gyur khang pa dag tu gnas bcas nas/ /glang chen khros pa'i klad pa rnam par 'gems byed nus pa dang ldan bdag nyid can/ /bsod nams la sbyangs brtson pa las byung phun tshogs rnams ni kun tu sbyor gyur pa/ /rgyal po mchog brgyud rgyal rigs nas 'khrungs rgyal po dpal ldan chos skyong ring la ni//dka' 'grel bzang po de nyid snang ba zhes bya 'di ni bdag gis rnam par brtsams/ /mngon rtogs kyi ni rgyan gang yin/ /de gsal byed pa'i snang ba ni/ /shes rab pha rol phyin rnams bshad/ / dge 'byung de ni rdzogs pa yin/ /mkhas pa mkhas pa ma yin rnams/ /lhag chad dogs pa yod gyur na/ /gzhung 'di'i tshad kyi nges pa ni/ /yum 'di yi ni mtshan nyid yin/ / 'phags pa shes rab kyi pha rol tu phyin pa'i bshad pa mngon par rtogs pa'i rgyan gyi de kho na nyid snang ba zhes bya ba/mkhas pa chen po slob dpon seng ge bzang po'i zhal snga nas mdzad pa rdzogs so// //sngon gyi smon lam bsod nams tshogs bsags rgyus/ /lha rigs byang chub sems dpa'i rgyud du grags/ /sa stengs rgyal po'i rgyal po nyid gyur pa//dpal gyis brgyan cing skyon med gnas su 'khrungs/ /gang dag grags pa zla zer lta bu yis/ /sa stengs kun tu rnam par mdzes gyur cing / /mdzad spyod phun tshogs yon tan kun gyis brgyan/ /mi dbang sa yi bdag po lha lder grags/ /skyes chen des ni bod khams 'gro ba kun//sangs rgyas 'bras thob bar gyi phan bzhed de/ /rgyal yum don gsal bya phyir rab 'bad pas/ /yongs snyoms chos kyi sbyin bdag chen po mdzad/ /don 'di sgrub phyir dga' bas thag rings nas/ /gsol btab rgyu yis rgyal po'i rigs su grags//dga' byed rgyud byung legs bshad dpal zhes bya'i/ /thos mangs mkhas pa'i grags thob bdag gis bshad/ /sgra skad tha snyad la byang brtson par ldan/ /rin chen sgron 'dra'i rin chen bzang po yis/ /gtsang dge yon tan du ma'i 'byung gnas gyur/ rgyal sa'i dam pa pu rangs gnas su bsgyur/ /snying rjes gzhan la phan pa gtsor byas te/ /rtogs sla thun mong rang skad byas pa las/ /bsod nams rgya chen 'dir ni gang bsags des/ /'jig rten mtha' dag byang chub mchog thob shog / dbang phyug dam pa'i mnga' bdag bod kyi lha btsan po khri bkra shis lde btsan gyi bkas/rgya gar gyi mkhan po su b+hA Shi ta dang / sgra bsgyur gyi lo tsA ba chen po dge slong rin chen bzang pos bsgyur nas/ slad kyi rgya gar gyi mkhan po paN+Di ta chen po dI paM ka ra shrI dz+nyA na dang / zhu chen gyi lo tsA ba chen po dge slong rin chen bzang pos yul dbus kyi dpe dang yang gtugs nas bcos shing zhus te gtan la phab pa las/de nas dus phyis paN+Di ta chen po gzhung 'bum phrag gnyis kyis mgrin pa brgyan pa d+hi ra pA la zhes bya ba dang / lo tsA ba dge slong blo ldan shes rab kyis legs par bsgyur zhing bcos pa'o// //