CLOSE WINDOW

D3787
བོད་ཡིག

@#/ /'phags pa shes rab kyi pha rol tu phyin pa stong phrag nyi shu lnga pa'i tshul gyi mngon par rtogs pa'i rgyan gyi 'grel pa bzhugs/ @##/ /rgya gar skad du/ pany+tsa biM sha ti sA ha sri ka Ar+ya pradz+nyA pA ra mi tA u pa de shA a b+hi sa ma ya a laM kA ra shAs+t+ra s+ya br-it+ti/ bod skad du/ 'phags pa shes rab kyi pha rol tu phyin pa stong phrag nyi shu lnga pa'i man ngag gi bstan bcos mngon par rtogs pa'i rgyan gyi 'grel pa/bcom ldan 'das yum shes rab kyi pha rol tu phyin ma la phyag 'tshal lo/ /byang chub sems dpa' sems dpa' chen po 'jam dpal gzhon nur gyur pa la phyag 'tshal lo/ /nyan thos zhi ba tshol rnams kun shes nyid kyis nyer zhir khrid mdzad gang yin dang //'gro la phan par byed rnams lam shes nyid kyis 'jig rten don sgrub mdzad pa gang / /gang dang yang dag ldan pas thub rnams rnam pa kun ldan sna tshogs 'di gsungs pa / /nyan thos byang chub sems dpa'i tshogs bcas sangs rgyas kyi ni yum de la phyag 'tshal//don gang zhig yin zhe na/ 'phags pa'i gang zag thams cad kyi dbang du mdzad nas thams cad mkhyen pa rnam pa gsum gyi thun mong ma yin pa'i yon tan nye bar dgod pa sngon du 'gro bas shes rab kyi pha rol tu phyin pa la phyag 'tshal lo/ /zhes brjod pa 'di ni de'i mngon par rtogs pa'i rgyan gyi man ngag bshad sbyar du bya'o snyam pas rnam par dgrol bar bya'o//zhes mngon par rtogs pa'i rgyan gyi bshad pa 'di sbyar bar dam bca' ba yin no/ /ci'i don du zhe na/ rnam pa thams cad mkhyen nyid lam/ /ston pas 'di rnams bshad pa gang //gzhan gyis myong ba ma yin de / /chos spyod bcu yi bdag nyid kyi/ /mdo don dran pa la gzhag nas/ /blo dang ldan pas mthong gyur phyir/ /bde blag tu ni rtogs pa zhes/ /bya ba brtsam pa'i dgos pa yin/ /zhes de ltar phyag 'tshal ba nye bar bkod pa'i tshigs su bcad pas yang dag par mtshon pa'i don 'di yod pa yin no//zhes gsungs pa yin no/ /ci mngon par rtogs pa'i rgyan 'di gzhi bsdus pas sam/ 'on te gnyen po bsdus pas sam/ de ste rnam pa bsdus pas rgyan du byed pa yin zhes bya ba 'di brjod par bya ba yin no//de las kyang cir 'gyur zhe na/ phyogs dang po ltar na ni 'bad pa don med pa yin te/ mdo sde 'di las mtshan nyid kyi bstan bcos dag las mi smos pa'i gzhi gang yin pa de bshad pa ni med do/ /gnyis pa ltar na rnam par byang ba'i dngos po bsdus pa'i phyir kun nas nyon mongs pa'i dngos po ma bsdus pas 'di gang gi gnyen po yin pa rtogs par mi 'gyur ro//gsum pa ltar na yang rnam pa gzhi med pa tsam zhig bsdus pa'i phyir/ don rtogs pa med pas cung zad kyang ma bshad pa yin no zhe na/ phyogs gsum car gyis kyang bsdus pa yin no/ /zhes gsungs pa yin no/ /ci'i phyir zhe na/ nyan thos dang / rang sangs rgyas dang / byang chub sems dpa' dang / sangs rgyas rnams kyi rim pa ji lta ba bzhin thams cad shes pa nyid dang / lam shes pa nyid dang /rnam pa thams cad mkhyen pa nyid kyis mngon par rtogs pa mtha' dag bsdus pa'i phyir ro/ /ji skad du bcom ldan 'das kyis rab 'byor thams cad shes pa nyid ni nyan thos dang rang sangs rgyas rnams kyi yin no/ /lam shes pa nyid ni byang chub sems dpa' rnams kyi yin no//rnam pa thams cad mkhyen pa nyid ni de bzhin gshegs pa dgra bcom pa yang dag par rdzogs pa'i sangs rgyas rnams kyi yin no/ /bcom ldan 'das ci'i slad du thams cad 'tshal ba nyid nyan thos dang rang sangs rgyas rnams kyi lags/ rab 'byor thams cad ni phyi dang nang gi chos rnams ji snyed pa 'di tsam yin la de dag nyan thos dang /rang sangs rgyas rnams kyis shes kyi/ lam thams cad kyis kyang ma yin la/ rnam pa thams cad du'ang ma yin pas de'i phyir nyan thos dang rang sangs rgyas rnams kyi ni thams cad shes pa nyid ces bya'o//bcom ldan 'das ci'i slad du lam gyi rnam pa 'tshal ba nyid byang chub sems dpa' rnams kyi lags/ rab 'byor byang chub sems dpa' rnams kyi ni nyan thos kyi lam gang yin pa dang / rang sangs rgyas kyi lam gang yin pa dang / sangs rgyas kyi lam gang yin pa'i lam thams cad bskyed par bya zhing lam thams cad shes par bya la de dag kyang yongs su rdzogs par bya zhing de dag gis lam gyi bya ba yang bya ste/smon lam yongs su rdzogs par ma byas pa dang / sems can rnams yongs su smin par ma byas pa dang / sangs rgyas kyi zhing yongs su ma sbyangs par de dag gis yang dag pa'i mtha' mngon sum du mi bya'o/ /de'i phyir byang chub sems dpa' rnams kyi ni lam gyi rnam pa shes pa nyid ces bya'o/ /bcom ldan 'das ci'i slad du rnam pa thams cad mkhyen pa nyid de bzhin gshegs pa dgra bcom pa yang dag par rdzogs pa'i sangs rgyas rnams kyi lags/rab 'byor rnam pa gang dag dang / rtags gang dag dang / mtshan ma gang dag gis chos rnam par rab tu mtshon pa'i rnam pa de dag dang / rtags de dag dang / mtshan ma de dag de bzhin gshegs pas thugs su chud de de'i phyir de bzhin gshegs pa dgra bcom pa yang dag par rdzogs pa'i sangs rgyas kyi ni rnam pa thams cad mkhyen pa nyid ces bya'o//zhes gsungs pa yin no/ /de la thams cad shes pa nyid ni chos la 'bad pa'i rten can/ 'bras bu bdag tu rmongs pa spangs pa can yin no//lam shes pa nyid ni theg pa ji lta ba bzhin du nges par 'byung ba dang / de kho na nyid mngon du mi byed pa'i rten can/ sems can ma bsdus pa sdud pa dang / sems can yongs su ma smin pa yongs su smin par byed pa dang /sems can yongs su smin pa rnam par grol bar byed pa'i 'bras bu can yin no/ /rnam pa thams cad mkhyen pa nyid ni nam mkha'i khams kyi mthas gtugs par sems can gyi don rgyun mi 'chad pa dang / yang dag pa'i mtha' rtogs pa dang / bag chags kyis mtshams sbyor ba spangs pa'i 'bras bu can yin no//de lta bas na mngon par rtogs pa'i rgyan ni gzhi dang gnyen po dang rnam pa rnams bsdus pas mngon par rtogs pa yongs su rdzogs pa mtha' dag bstan pa yin no/ /zhes bya ba 'di 'thad pa yin no/ /shes rab kyi pha rol tu phyin pa de gang yin zhes bya ba 'di ni brjod par bya'o zhe na/bshad pa/ shes rab pha rol phyin pa ni/ /dngos po brgyad kyis yang dag bshad/ /rnam kun mkhyen nyid lam shes nyid/ /de nas thams cad shes pa nyid/ /rnam kun mngon rdzogs rtogs pa dang //rtse mor phyin dang mthar gyis pa/ /skad cig gcig mngon rdzogs byang chub/ /chos kyi sku dang de rnams brgyad/ /sems bskyed pa dang gdams ngag dang / /nges 'byed yan lag rnam bzhi dang / /sgrub pa yi ni rten gyur pa/ / chos kyi dbyings kyi rang bzhin dang / /dmigs pa dag dang ched dang ni/ /go cha 'jug pa'i bya ba dang / /tshogs ni nges par 'byung bcas rnams/ /thub pa'i rnam kun mkhyen pa nyid/ /mog mog por byed la sogs dang / /slob ma bse ru'i lam gang dang / / 'di dang gzhan pa'i yon tan gyis/ /phan yon che ba mthong ba'i lam/ /byed pa dang ni mos pa dang / /bstod dang bkur dang bsngags pa dang / /bsngo dang rjes su yi rang ba/ /yid la byed pa bla med dag /sgrub dang shin tu dag pa zhes/ /bya ba 'di ni bsgom pa'i lam//byang chub sems dpa' mkhas rnams kyis / /lam shes nyid ni de 'drar bshad/ /shes pas srid la mi gnas shing / /snying rjes zhi la mi gnas dang / /thabs ma yin pas ring ba dang / /thabs kyis ring ba ma yin nyid/ /mi mthun gnyen po'i phyogs dag dang //sbyor dang de yi mnyam nyid dang / /nyan thos la sogs mthong ba'i lam/ /de 'dra kun shes nyid du 'dod/ /rnam pa sbyor bar bcas rnams dang / /yon tan skyon ni mtshan nyid bcas/ /thar dang nges 'byed cha mthun dang / /slob pa phyir mi ldog pa'i tshogs//srid dang zhi ba mnyam nyid dang / /zhing dag bla na med pa ni/ /rnam kun mngon rdzogs rtogs pa ste/ /'di ni thabs mkhas bcas pa yin/ /de yi rtags dang rnam 'phel dang / /brtan dang sems kun gnas pa dang / /mthong zhes bya dang sgom pa zhes//bya ba'i lam ni so so la/ /rnam par rtog pa rnam bzhi yi/ /gnyen po rnam pa bzhi dang ni/ /bar chad med pa'i ting nge 'dzin/ /log par sgrub dang bcas pa ni/ /rtse mo'i mngon rtogs mthar gyis pa/ /rnam gsum rnam bcu skad cig ma/ /gcig gis mngon rdzogs byang chub pa//mtshan nyid kyis ni rnam pa bzhi/ /ngo bo nyid longs rdzogs bcas dang / /de bzhin gzhan pa sprul pa ni/ /chos sku mdzad pa dang bcas pa/ /rnam pa bzhir ni yang dag brjod/ /ces bya ba yin no/ /tshig le'ur byas pa bco lngas mdor bsdus pa dang rgyas par bstan pas shes rab kyi pha rol tu phyin pa'i don bsdus par rig par bya'o//ji ltar zhe na/ shes rab pha rol phyin pa ni/ /dngos po brgyad kyis yang dag bshad/ /ces bya ba nas/ chos kyi sku dang de rnams brgyad/ /ces bya ba'i bar gyi tshig le'ur byas pa gnyis po 'di dag gis ni mdor bsdus pa yin no//de la dngos po brgyad ni 'di yin no/ /'di lta ste/ rnam pa thams cad mkhyen pa nyid dang / lam shes pa nyid dang / thams cad shes pa nyid dang / rnam pa kun mngon par rdzogs par rtogs pa dang /rtse mo'i mngon par rtogs pa dang / mthar gyis pa'i mngon par rtogs pa dang / sems kyi skad cig ma gcig gis mngon par rtogs pa dang / chos kyi sku'o/ /sems bskyed pa dang / gdams ngag dang / nges 'byed yan lag rnam bzhi dang //zhes bya ba nas brtsams te/ chos sku mdzad pa dang bcas pa/ /rnam pa bzhir ni yang dag brjod/ /ces bya ba'i bar gyi tshig le'ur byas pa bcu gsum gyis ni rnam pa thams cad mkhyen pa nyid la sogs pa don brgyad po de rnams kyi dngos po bsdus te bstan pas rgyas par bshad pa yin te/de ltar na mdor bsdus pa dang rgyas par bshad pa'i phyir legs par bshad pa yin no/ /don gyi lus rnam par bzhag pa brjod zin to/ /'di phan chad ni don gang la khyad par can gyi rnam pa gang gi rab tu dbye ba'i chos gang dag bstan pa de dag gi go rims bsdu ba 'ba' zhig brjod par bya'o//de la re zhig /sems bskyed pa ni gzhan don phyir/ /yang dag rdzogs pa'i byang chub 'dod/ /'on te 'dod pa zhes bya ba 'di ci yin zhe na/ 'di 'dod pa dang de 'dod pas/ /byang chub sems dpas shes rab kyi pha rol tu phyin pa la brtson par bya'o zhes mdo nas bshad pa gang dag yin pa 'di yin no//'di mtshan nyid ci yin zhes bya ba de nyid mi shes te don de gang yin zhe na/ 'di ni stong phrag nyi shu lnga pa 'di nyid las don du gnyer ba yin no zhes gsungs te 'di ltar sems bskyed pa'i dus na byang chub sems dpa' ci nas bdag bla na med pa yang dag par rdzogs pa'i byang chub tu mngon par rdzogs par 'tshang rgya ba dang gzhan gyi don bsgrub par bya'o zhes de ltar don du gnyer bar byed pa yin no//'o na ni de sems bskyed par mi 'gyur te/sems ni yul so sor rig pa'i mtshan nyid can yin la/ don du gnyer ba zhes bya ba ni sred pa yin pas so zhe na de ni de ltar bden mod kyi 'on kyang dge ba'i chos la 'dun pa'i mtshan nyid don du gnyer ba yod na sangs rgyas nyid kyi don du sems skyed par byed pas na 'dir rgyu 'bras bus bstan pa yin te/de ltar na 'dun cing don du gnyer ba'i dge ba'i chos rnams thams cad ces bya ba rjes su mthun par 'phel bar 'gyur ro/ /yang na don du gnyer ba zhes bya ba ni smon lam yin no/ /sems bskyed pa'i gnas skabs ni don du gnyer ba gtsor gyur pa yin pas na de dang lhan cig spyod pa'i sems bskyed pa la don du gnyer ba bstan pa yin te/de lta na yang byang chub sems dpa' rnams smon lam dang ldan pa'i sems bskyed par 'gyur ba zhes bya ba 'thad par 'gyur ba yin no//yang dag par rdzogs pa'i byang chub dang gzhan gyi don de yang gang yin zhe na/ de dang de ni mdo bzhin du/ /bsdus dang rgyas pa'i sgo nas brjod/ /ces bya ba gsungs te/ de dang zhes bya ba yang dag par rdzogs pa'i byang chub dang de ni zhes bya ba gzhan gyi don to/ / de la de'i bsdus te bstan pa 'di yin te/ shA ri'i bu 'di la byang chub sems dpa' chen po chos thams cad rnam pa thams cad du mngon par 'tshang rgya bar 'dod pas shes rab kyi pha rol tu phyin pa la brtson par bya'o zhes gang gsungs pa yin no/ /de la de'i rgyas par bstan pa ni 'di yin te/shA ri'i bu 'di la byang chub sems dpa' sems dpa' chen po mi gnas pa'i tshul gyis shes rab kyi pha rol tu phyin pa la gnas te/ sbyin pa dang / sbyin par bya ba dang / len pa po mi dmigs pa'i phyir yongs su btang ba med pa'i tshul gyis sbyin pa'i pha rol tu phyin pa yongs su rdzogs par bya'o zhes bya ba la sogs pa gang gsungs pa yin no//de la gzhan gyi don gyis bsdus te bstan pa ni 'di yin te/ byang chub sems dpa' sems dpa' chen po'i phyogs bcu re re zhing gang+gA'i klung gi bye ma snyed kyi 'jig rten gyi khams na sems can gang zhig yod pa de dag thams cad phung po lhag ma med pa'i mya ngan las 'das pa'i dbyings su yongs su mya ngan las 'da' bar 'dod pas shes rab kyi pha rol tu phyin pa la bslab par bya'o zhes gsungs pa yin no//de la de'i rgyas par bstan pa ni 'di yin te/sems can ser sna can rnams ni sbyin pa la/ tshul khrims 'chal pa rnams ni tshul khrims la rab tu dgod par 'dod pa'i byang chub sems dpa' sems dpa' chen pos shes rab kyi pha rol tu phyin pa la bslab par bya'o zhes gang gsungs pa'o //de ltar sems bskyed pa'i mtshan nyid dmigs pa dang bcas pa dang ched du bya ba dang bcas pa brjod nas/ da ni de'i rab tu dbye ba'i mtshan nyid rnam pa nyi shu rtsa gnyis kyi dbang du mdzad pa ni/ de yang sa gser zla ba me/ /gter dang rin chen 'byung gnas mtsho//rdo rje ri sman bshes gnyen dang / /yid bzhin nor bu nyi ma glu/ /rgyal po mdzod dang lam po che/ /bzhon pa bkod ma'i chu dang ni/ /sgra bsnyan chu bo sprin rnams kyis/ /rnam pa nyi shu rtsa gnyis so/ /zhes bya ba gsungs pa yin no/ / de la byang chub sems dpa' rnams kyi sems bskyed pa dang po 'dun pa dang ldan pa ni sa lta bu'o/ /shA ri'i bu 'di la byang chub sems dpa' sems dpa' chen po chos thams cad rnam pa thams cad du mngon par rdzogs par 'tshang rgya bar 'dod pas shes rab kyi pha rol tu phyin pa la brtson par bya'o zhes gsungs pa yin te/chos thams cad rnam pa thams cad du mngon par rdzogs par byang chub par 'dod pa ni sangs rgyas kyi chos thams cad dang de'i tshogs bskyed pa'i gzhir gyur pa'i phyir ro/ /gnyis pa bsam pa dang ldan pa ni gser bzang po lta bu'o//shA ri'i bu 'di la byang chub sems dpa' sems dpa' chen pos gnas pa med pa'i tshul du shes rab kyi pha rol tu phyin pa la gnas te/ sbyin pa dang gtong ba dang yongs su len pa mi dmigs pa'i phyir/ yongs su btang ba med pa'i tshul gyis sbyin pa'i pha rol tu phyin pa yongs su rdzogs par bya'o zhes bya ba nas/de bzhin du chos thams cad mi dmigs pa'i phyir shes rab kyi pha rol tu phyin pa yongs su rdzogs par bya'o zhes bya ba'i bar du gsungs pa ste/ pha rol tu phyin pa drug gis bsdu ba'i phan pa dang bde ba'i bsam pa ni yang dag par rdzogs pa'i byang chub kyi bar du gnas pas na bsam pa yin pa'i phyir ma 'ongs pa dang 'di la rnam par 'gyur ba mi bsten pa'i phyir ro//gsum pa lhag pa'i bsam pa dang ldan pa ni yar ngo'i zla ba tshes pa lta bu'o//des shes rab kyi pha rol tu phyin pa la gnas te byang chub kyi phyogs kyi chos sum cu rtsa bdun bsgom par bya'o zhes bya ba nas/ mi gtsang ba'i 'du shes dgu bsgom par bya ba'i bar dang / skyes bu chen po'i rnam par rtog pa brgyad bsgom par bya ba'i bar dang / sangs rgyas kyi chos ma 'dres pa bco brgyad bsgom par bya'o zhes bya ba'i bar du gsungs pa ste/ dge ba'i chos thams cad rnam par 'phel bar 'gyur bar bsam pa lhag pa yin pa'i phyir lhag pa'i bsam pa zhes bya bas so/ /bzhi pa sbyor ba dang ldan pa ni me lta bu'o/ thams cad shes pa nyid la shes pa dang mthong bas bltas nas 'da' bar 'dod pa dang / phyir mi ldog pa'i sa la gnas par 'dod pa dang / lam shes pa nyid yongs su rdzogs par 'dod pa dang rnam pa thams cad mkhyen pa nyid rjes su 'thob par 'dod pa'i byang chub sems dpa' chen pos shes rab kyi pha rol tu phyin pa la bslab par bya'o zhes gang gsungs pa ste/thams cad mkhyen pa nyid gsum gyi sbyor ba ni mchog tu gyur pa'i sbyor ba rab tu sbyor ba yin pas na bud shing gi khyad par gyis me bzhin du gong nas gong du khyad par du 'gro ba'i phyir ro//lnga pa sbyin pa'i pha rol tu phyin pa dang ldan pa ni gter chen po lta bu'o/ /sems can ser sna can rnams sbyin pa la 'jog par 'dod pa dang / nyan thos dang rang sangs rgyas kyi sbyin pa rnams sems bskyed pa gcig gi zil gyis mnan par 'dod pa'i byang chub sems dpa' chen pos zhes gang gsungs pa ste/zang zing gi longs spyod kyis sems can tshad med pa tshim par byed kyang yongs su gtugs pa med pa'i phyir ro/ /drug pa tshul khrims kyi pha rol tu phyin pa dang ldan pa ni rin po che'i 'byung gnas lta bu'o//tshul khrims 'chal pa rnams tshul khrims la 'jog par 'dod pa dang / nyan thos dang / rang sangs rgyas kyi tshul khrims rnams rjes su yi rang ba dang ldan pa'i sems bskyed pa gcig gi zil gyis mnan par 'dod pa'i byang chub sems dpa' chen pos shes rab kyi pha rol tu phyin pa la bslab par bya'o zhes gang gsungs pa ste/yon tan rin po che mtha' yas pa thams cad ni de las 'byung ba'i phyir ro/ /bdun pa bzod pa'i pha rol tu phyin pa dang ldan pa ni rgya mtsho chen po lta bu'o/ /gnod sems dang ldan pa rnams bzod pa la 'jog par 'dod pa dang /nyan thos dang / rang sangs rgyas kyi bzod pa rjes su yi rang ba dang ldan pa'i sems bskyed pa gcig gi zil gyis mnan par 'dod pa'i byang chub sems dpa' chen pos shes rab kyi pha rol tu phyin pa la bslab par bya'o zhes gsungs pa ste/mi 'dod pa thog tu babs pa thams cad kyis 'khrug par mi nus pa'i phyir ro/ /brgyad pa brtson 'grus kyi pha rol tu phyin pa dang ldan pa ni rdo rje lta bu'o/ /le lo can dag brtson 'grus la 'jog par 'dod pa dang / nyan thos dang / rang sangs rgyas kyi brtson 'grus rjes su yi rang ba dang ldan pa'i sems bskyed pa gcig gi zil gyis mnan par 'dod pa'i byang chub sems dpa' chen pos shes rab kyi pha rol tu phyin pa la bslab par bya'o zhes gang gsungs pa ste/de ni yid brtan pas mi [(]phyad [,]phyed [)]pa'i phyir ro/ / dgu pa bsam gtan gyi pha rol tu phyin pa dang ldan pa ni ri'i rgyal po lta bu'o/ /sems rnam par g.yengs pa rnams bsam gtan la 'jog par 'dod pa dang / nyan thos dang / rang sangs rgyas kyi bsam gtan rjes su yi rang ba dang ldan pa'i sems bskyed pa gcig gi zil gyis mnan par 'dod pa'i byang chub sems dpa' chen pos shes rab kyi pha rol tu phyin pa la bslab par bya'o zhes gang gsungs pa ste/de ni dmigs pa'i rnam par g.yeng bas mi bskyod pa'i phyir ro/ /bcu pa shes rab kyi pha rol tu phyin pa dang ldan pa ni sman lta bu'o//sems can shes rab 'chal pa rnams shes rab la rab tu 'jog par 'dod pa dang / nyan thos dang / rang sangs rgyas kyi shes rab rnams rjes su yi rang ba dang ldan pa'i sems bskyed pa gcig gi zil gyis mnan par 'dod pa'i byang chub sems dpa' chen pos shes rab kyi pha rol tu phyin pa la bslab par bya'o zhes gsungs pa ste/de ni nyon mongs pa dang shes bya'i sgrib pa'i nad thams cad rab tu zhi bar byed pa yin pa'i phyir ro/ /bcu gcig pa thabs mkhas pa'i pha rol tu phyin pa dang ldan pa ni dge ba'i bshes gnyen lta bu'o/ / dge ba'i sems bskyed pa gcig tsam yang thams cad mkhyen par yongs su bsngos pas mi zad par byed par 'dod pa dang / sems can thams cad kyi don gyi phyir dmyal ba dang dud 'gro'i skye gnas dang gshin rje'i 'jig rten gyi sdug bsngal bzod par 'dod pa dang / bskal pa brgya stong du yang dag par bsags pa'i tshul khrims kyang sems can la ltos nas 'dor bar 'dod pa dang /sangs rgyas kyi rigs su skye bar 'dod pa'i byang chub sems dpa' chen pos zhes gang gsungs pa ste/ de ni gnas skabs thams cad du sems can gyi don yongs su mi gtong ba yin pa'i phyir ro//'dir kha cig na re bden pa dang gtong ba dang shes rab nye bar zhi ba la brten pa rnams ni sangs rgyas kyi rigs yin no zhes zer ro/ /gzhan dag ni mthong ba'i lam gyis bsdus pa sa la 'jug pa'i sems yin te/ 'di ltar mdo las gang gi tshe sems bskyed pa dang lhan cig skyes pa na byang chub sems dpa'i rigs su 'gyur ba ni de bzhin gshegs pa'i rigs yin no zhes gsungs pa yin pa'i phyir ro zhes zer ro//gzhan dag ni da ltar byung ba'i sangs rgyas thams cad mngon du phyogs par gnas pa'i ting nge 'dzin dang snying rje chen po gnyis ni sangs rgyas kyi rigs yin no zhes 'dod do//la la dag ni sangs rgyas kyis bcas pa'i bslab pa la bya bar 'dod do/ /kha cig ni pha rol tu phyin pa drug la bya'o zhes zer ro/ /gzhan ni byang chub sems dpa' rnams kyi yum ni shes rab kyi pha rol tu phyin pa yin no //yab ni thabs mkhas pa yin pas/ de dag ni sangs rgyas kyi rigs yin no zhes 'dod do/ /bcu gnyis pa smon lam gyi pha rol tu phyin pa dang ldan pa ni yid bzhin gyi nor bu lta bu'o/ /sangs rgyas kyi sku yongs su sgrub par 'dod pa dang /phyogs bcu re re zhing 'jig rten gyi khams mtha' yas par chos ston pas go bar byed par 'dod pa dang / sangs rgyas kyi rigs rgyun mi 'chad par 'dod pa'i byang chub sems dpa' zhes gang gsungs pa ste/ de ni ji ltar smon pa'i 'bras bu 'grub pa yin pa'i phyir ro//bcu gsum pa stobs kyi pha rol tu phyin pa dang ldan pa ni nyi ma lta bu'o/ /byang chub sems dpa' sems dpa' chen po sems can thams cad kyi bsam pa yongs su rdzogs par 'dod pas zhes bya ba la sogs pa gang gsungs pa yin te / de ni gdul bya'i sems can yongs su smin par byed pa'i phyir ro/ /bcu bzhi pa ye shes kyi pha rol tu phyin pa dang ldan pa sgra dbyangs snyan pa lta bu'o/ /stong gsum gyi stong chen po'i 'byung ba chen po bzhi'i rdul phra rab kyi tshad shes par 'dod pa dang /de bzhin du sbyin pa 'di ltar byin pa ni 'bras bu chen por 'gyur ba dang / sbyin pa 'di ltar byin pas ni rgyal rigs shing sA la chen po lta bu la sogs par skye ba nas/ de ltar mi dmigs pa'i tshul gyis sbyin pa 'di ltar byin na ni shes rab kyi pha rol tu phyin pa yongs su rdzogs par byed do zhes shes par 'dod pa'i byang chub sems dpa' chen po zhes bya ba'i bar du gang gsungs pa ste/de ni gdul bya 'dun par byed pa'i ston par byed pa yin pa'i phyir ro/ /de la sA la chen po zhes bya ba ni mngon par mtshon par bya ba'i dbang phyug dang ldan pa'i phyir ro//bco lnga pa mngon par shes pa dang ldan pa ni rgyal po lta bu'o/ /sems bskyed pa gcig gis phyogs bcu re rer 'jig rten gyi khams mtha' yas pa las yang dag par 'da' bar 'dod pa dang / stong gsum gyi stong chen po'i 'jig rten gyi khams kyi chu'i phung po chen po de thams cad lan brgyar skra'i rtse mos thams cad gtor bar 'dod cing yang de na gnas pa'i srog chags rnams la mi gnod par 'dod pa dang /bskal pa sreg pa'i me la kha'i dbugs gcig gis zhi bar bya bar 'dod pa dang / rnam par 'thor ba chen po'i rlung gi dkyil 'khor sor mo gcig gi rtse mos yongs su khebs par bya bar 'dod pa dang /nam mkha'i khams ji tsam pa de thams cad skyil mo krung gcig gis rgyas par yang dag par 'dod pa dang / ri'i rgyal po ri rab la sogs pa'i ri rnams skra nyag ma gcig gis sbams te gyen du bteg nas 'jig rten gyi khams gzhal du med par 'phang bar 'dod pa dang /phyogs bcu re re'i sangs rgyas kyi zhing thams cad kyi sangs rgyas bcom ldan 'das lha'i mig gis lta bar 'dod pa dang / de rnams las kyang chos bstan pa lha'i rna bas mnyan par 'dod pa dang /sems can thams cad kyi sems kyi spyod pa shes par 'dod pa dang / de rnams kyi 'ang sngon gyi gnas rjes su dran par 'dod pa dang / zag pa zad pa shes pa'i mngon par shes pa sgrub par 'dod cing yang dag pa'i mtha' mngon du mi byed par 'dod pa'i byang chub sems dpa' zhes gsungs pa ste/de ni mthu thogs pa med par gzhan gyi don sgrub pa yin pa'i phyir ro/ /ri'i rgyal po ri rab la sogs pa skra nyag ma gcig gis bcings te 'jig rten gyi khams mtha' yas par 'phen pa la ni ma dad par mi bya ste/bsam gtan pa rnams kyi dbang 'byor pa ston pa 'di ni bsam gyis mi khyab pa'i chos yin pa'i phyir ro/ /bcu drug pa bsod nams dang ye shes dang ldan pa ni bang mdzod lta bu'o/ /sangs rgyas tshad med pa nyan thos kyi dge 'dun dang bcas pa ji snyed bzhugs pa de dag thams cad bsod snyoms gcig gis khyed par bya bar 'dod pa dang /bden pa mthong ba rnams rgyun tu zhugs pa'i 'bras bu nas/ bla na med pa yang dag par rdzogs pa'i byang chub kyi bar la 'jog par 'dod pa'i byang chub sems dpa' chen pos zhes gang gsungs pa yin te/de ni bsod nams dang ye shes kyi tshogs mang po'i bang mdzod lta bu yin pa'i phyir ro/ /bcu bdun pa byang chub kyi phyogs dang mthun pa'i chos dang ldan pa ni lam po che lta bu'o/ /sangs rgyas bcom ldan 'das 'das pa dang / ma 'ongs pa dang / da ltar byung ba'i sangs rgyas kyi yon tan thams cad rjes su 'thob par 'dod pa dang / chos 'dus byas dang 'dus ma byas rnams kyi pha rol tu phyin par 'dod pa'i byang chub sems dpa' zhes gang gsungs pa ste/ de ni 'phags pa'i gang zag thams cad gshegs shing rjes su gshegs pa yin pa'i phyir ro//bco brgyad pa zhi gnas dang lhag mthong dang ldan pa ni bzhon pa lta bu'o/ /nyan thos dang rang sangs rgyas thams cad kyi sngon du 'gro bar 'dod pa dang / sangs rgyas bcom ldan 'das thams cad kyi nang gi 'khor du 'gyur 'dod pa dang /byang chub sems dpa' chen po'i 'khor 'thob par 'dod pa dang / yon tan rnam par sbyar bar 'dod pa dang / sbyin pa dang / tshul khrims dang / bsgom pa las byung ba'i bya ba dang / bkur sti dang rdzas las byung ba dang ldan pa'i bsod nams bya ba'i dngos po la sems can rnams dgod par 'dod pa'i byang chub sems dpa' zhes gang gsungs pa yin te/de ni zung du 'jug pa yin pa'i phyir 'khor ba dang mya ngan las 'das pa gang du 'ang mi ltung bas bde blag tu khyer bar byed pa'i phyir ro//de la nang gi 'khor zhes bya ba ni gang sangs rgyas bcom ldan 'das kyi gsang bar 'jug pa'i ye shes phra bar 'jug pa'i ye shes la rjes su zhugs par gyur pa'o/ /bcu dgu pa gzungs dang spobs pa dang ldan pa ni bkod ma'i chu lta bu'o//phyogs bcu'i sangs rgyas bcom ldan 'das rnams kyis gsungs pa dang gsung bar 'gyur ba 'di lta ste/ mdo dang dbyangs kyis bsnyad pa dang lung bstan pa nas/ shin tu rgyas pa dang rmad du byung ba'i bar gang cung zad bstan pa de thams cad thos par 'dod pa dang /gzung bar 'dod pa dang / yongs su chub par bya bar 'dod pa dang / de bzhin nyid du sgrub par 'dod pa dang / gzhan dag la yang rgya cher ston par 'dod pa'i byang chub sems dpa' zhes bya ba ste/ de ni chu 'dzin pa dang mi zad par 'byin pa dang chos mthun par thos pa dang ma thos pa'i chos 'dzin pa dang /bstan pa mthar thug pa med pa 'byin pa'i phyir ro / /nyi shu pa chos kyi dga' ston dang ldan pa ni sgra snyan pa lta bu'o/ /phyogs bcu re re zhing 'jig rten gyi bar yun ring por mun pa mun nag tu gyur pa lus kyi 'od kyis snang bar byas nas der skyes pa'i sems can la sangs rgyas kyi sgra dang /chos kyi sgra dang / dge 'dun gyi sgra thos par bya bar 'dod pa dang / de dag yang dag pa'i lta ba la dgod par 'dod pa'i byang chub sems dpa' zhes gang gsungs pa yin te/ des ni thar pa 'dod pa'i gdul bya rnams la snyan pa sgrogs pa yin pa'i phyir/ chos kyi dga' ston yang rnam pa bzhi ste/ 'du byed thams cad mi rtag par so sor rtog pa dang / zag pa dang bcas pa'i chos thams cad sdug bsngal bar so sor rtog pa dang / chos thams cad bdag med par so sor rtog pa dang / mya ngan las 'das pa ni zhi bar so sor rtog pa'o/ /nyi shu gcig pa bgrod pa gcig pa'i lam dang ldan pa ni chu bo'i rgyun lta bu'o/ /phyogs bcu re re mtha' yas pa'i 'jig rten gyi khams rnams kyi sems can long ba dang /'on pa dang / smyon pa dang / gcer bu dang / bkres pa dang / skom pa la sogs pa dang / ngan song du ltung ba rnams sdug bsngal de dang de las thar bar byas te mi'i lus 'thob par 'dod pa dang / de rnams kyang tshul khrims dang /ting nge 'dzin dang / shes rab dang / rnam par grol ba dang / rnam par grol ba'i ye shes mthong ba'i phung po la dgod par 'dod pa'i byang chub sems dpa' zhes gang gsungs pa yin te/ de ni mi skye ba'i chos la bzod pa thob pas rang gi ngang gis 'jug pa'i phyir dang /bgrod pa gcig pa nyid ni sa der gtogs pa'i byang chub sems dpa' rnams gzhan gyi don gyi bya ba tha mi dad pa'i phyir ro/ /nyi shu gnyis pa chos kyi sku dang ldan pa ni sprin lta bu'o/ /de bzhin gshegs pa'i spyod lam bstan par 'dod pa dang /glang po che'i lta stangs kyis lta bar 'dod pa'i byang chub sems dpa' zhes rgya cher yang gsungs pa ste/ dga' ldan gyi gnas na bzhugs pa kun du ston pas sems can gyi don bya ba rnam pa thams cad de la rag las pa'i phyir ro/ /sems bskyed pa gsum par mi gtsang ba'i 'du shes dgu bsgom par bya'o zhes gang gsungs pa de ni rnam par bam pa'i 'du shes dang /rnam par 'bus gzhigs pa'i 'du shes dang / rnam par gnag pa'i 'du shes dang / rnam par dmar ba'i 'du shes dang / rnam par bsngos pa'i 'du shes dang /rnam par zos pa'i 'du shes dang / rnam par 'thor ba'i 'du shes dang / rus pa'i 'du shes dang / rnam par tshig pa'i 'du shes so/ /de la 'tsho ba mthar thug pa'i 'og tu go rims bzhin du sbud pa rlung gis khengs pa ltar mtho bar skrangs shing rbobs par gyur pa'i phyir rnam par bam pa'o//rnam par bam pa nyid ni rnam par bam pa pa'o / /yang na mi mthun pa'i phyir btsog cing rnam par bam pas na A byA b+h+yA ta ka zhes bye brag rtog byed du byung d+h+ma ta kA te rnam par bam pa pa'o//'di ni de lta bu'i rang bzhin can ro'i lus kyi tshig bla dgas yin no/ /de bzhin du gzhan du yang bshad pa ni ming la stsogs pa'i don dag la brjod par bya ba yin no/ /de ni dbyibs la chags pa rnams la lus de'i dbyibs kyi rgyud pa ston pa'i phyir 'di bsgom par bya ba yin no//'bu rnam pa sna tshogs pa rnams kyis nang du bskyod pas na bi d+hu bi pa tu ma ka ta kA zhes bya ba rnam par 'bus gzhigs pa pa ste/ de ni lus kyi mkhregs pa'i dngos po la chags pa la khong stong gi dngos po nyid bstan pa'i phyir ro/ /gnas tha dad pa nas rnag 'dzag pa ni rnam par gnag pa ste/de ni phreng ba dang dri la sogs pa'i dbang las byung ba'i lus kyi dri la chags pa rnams la lus kyi rma dang 'brel pa'i dri nga ba nyid bstan pa'i phyir ro/ /'di dang de nas khrag 'gyed cing rnam par 'phro la rab tu 'dzag pas na rnam par dmar ba pa ste/de ni rgyan gyis byas pa'i mdzes pa la chags pa la khrag gis sbags pa'i mi mthun pa nyid bstan pa'i phyir yin no/ /rnam par gsal bar sngo bas na rnam par bsngos pa pa ste/ de ni lus kyi kha dog la chags pa la pags pa'i 'dod chags kyi rgud pa bstan pa'i phyir yin no//khyi dang ce spyang la sogs pas phan tshun du rnam pa sna tshogs par zos pa ni rnam par zos pa pa ste/ de ni nu ma la sogs pa'i sha rgyas pa la chags pa la sha rgyas pa rnam par 'jig par bstan pa'i phyir yin no/ /lag pa gnyis kyang gzhan du/rkang pa gnyis kyang gzhan du/ mgo bo yang gzhan du/ sna tshogs par 'thor bas na rnam par 'thor ba pa ste/ de ni yan lag dang nying lag gi sgeg pa la chags pa la yan lag dang nying lag rnam par 'thor bar bstan pa'i phyir ro/ /rus pa nyid ni rus pa pa ste/'di ni rus pa sbrel ma dang rus pa gcig gi'ang tshig bla dgas te / de ni so la sogs pa'i rus pa'i 'byor pa la chags pa la lus kyi rus pa'i mi mthun pa'i dngos po ston pa'i phyir ro/ /rnam par zhu zhing tshig pas rnam par tshig pa pa ste/ de ni kha dog dang dbyibs la chags pa la pags pa dang dbyibs kun du 'khums pa ston pa yin pa'i phyir 'di bsgom par bya ba yin no//skyes bu chen po'i rnam par rtog pa brgyad bsgom par bya'o zhes bya ba ni 'di lta ste/ chos 'di ni 'dod pa chung ba rnams kyi yin gyi/ 'dod pa che ba rnams ma yin pa dang /chog shes pa dang / rab tu dben pa dang / brtson 'grus brtsams pa dang / dran pa nye bar bzhag pa dang / mnyam par gzhag pa dang / shes rab dang ldan pa rnams kyi yin gyi/ shes rab 'chal pa rnams kyi ni ma yin pa ste/ skyes bu chen po'i rnam par rtog pa bdun po 'di dag gis gnas brtan maud gal gyi bu chen po gnas par gyur to//bcom ldan 'das kyis kyang maud gal gyi bu chen po khyod kyis skyes bu chen po'i rnam par rtog pa brgyad po 'di dag la yang rnam par rtogs shig /chos 'di ni spros pa med pa spros pa med pa la kun dga' ba/spros pa med pa la kun dga' ba'i sbyor ba la rjes su brtson pa yin no zhes gsungs so/ /de la 'dod pa chung bas chos bzhi spong ste/ 'di ltar tshul 'chos pa dang / kha gsag dang / gzhogs slong dang / thob kyis 'jal ba'o//de la tshul 'chos zhes bya ba 'di na kha cig rnyed pa don du gnyer zhing rnyed pa dang bkur sti dang tshigs su bcad pa 'dod pa sems ltos pa dang bcas pa dang 'brel pas dgon pa pa'am/ phyag dar khrod pa'am/ stan gcig pa nas sbyangs pa'i yon tan gzhan gang yang rung ba la nye bar bsten te gnas par gyur pa na/de 'di snyam du bdag la gzhan dag gis bsnyen bkur byed/ bla mar byed/ mchod par byed/ rjed par byed na ci ma rung bdag gis kyang rnyed pa dang / bkur sti dang / tshigs su bcad pa grub par bya na ci ma rung snyam du sems shing /de rnyed pa dang bkur sti don du gnyer zhing rnyed pa la sogs pa 'dod pa de tshul de lta bu'i rang bzhin gyi spyod lam byed pa gang yin pa 'di ni tshul 'chos pa zhes bya'o/ /kha gsag ces bya ba ni 'di na kha cig rnyed pa dang bkur sti la ltos pa dang bcas pas gzhan dag la 'di skad du khyod ni bdag gi ma ji lta ba de 'dra ba dang /pha ji lta ba dang / spun zla ji lta ba dang / nye du gang yang rung ba dang / snag gi gnyen mtshams ji lta ba de 'dra ba yin te/ nga la yang sbyin par bya ste nged kyis kyang khyed la sbyin no//nga'i bya ba bgyis te nged kyis kyang khyed kyi bya'o/ /kho bo ni thag ring po nas kyang khyed kyi thad du 'ong zhing kho bo 'dir gnas pa gang yin pa'ang khyed cag nyid kyi don du yin no zhes smra ste/ de rnams la gces par 'gyur ro/ /rnyed pa don du gnyer zhing rnyed pa la sogs pa 'dod pa ltos pa dang bcas pa sems 'brel pa de gzhan dag la tshul de lta bur kha gsag kun du smra ba dang /yongs su smra ba dang / don du gnyer ba dang / kha zhu 'brel par bcas pa dang / gcam gsag gi las byed pa gang yin pa 'di ni kha gsag ces bya'o//gzhogs slong zhes bya ba ni 'di na kha cig so sor brtags shing rnyed pa la brten nas dngos po dang de'i rgyu mtshan du las byed pa ste/ khyod kyi lhung bzed 'di ni mdzes so zhe'am/ chos gos sam/ snam sbyar ram/ mal stan nam/ lde mig kyog po'am/ khyod kyi yo byad 'di dang 'di ni bzang ngo / /gal te kho bos 'di lta bu zhig rnyed na bcang ba bya ba na/ sbyin pa po 'ang rnyed pa dka'o zhes bya ba dang / gang yang rung ba'i khyim du 'ang song nas der 'di skad ces kyang smra ste/ khyed kyi 'bras chan 'di ni bzang po yin no//sran tshod bzang ngo / /bla gos bzang ngo / /gos bzang ngo / /khyed kyi bca' bar bya ba'am/ bza' bar bya ba 'di ni bzang po yin no/ /sngon chad kyang bdag cag la khyed kyis sbyin par bya ba dang bsgrub par bya bar gyur pa yin la/ kho bo cag khyed kyis byin pa dang bsgrubs pas dga' bar gyur pa yin na/ da ltar ni khyed cag bdag cag la sbyin par bya ba'am/ bsgrub par bya bar mi sems so zhes smra ba lta bu ste/ de'i so sor brtags nas brkam pa las byung ba'i gzhogs slong gi las dngos po de dang de nyid kyi rgyu mtshan du brjod pa gang yin pa 'di ni gzhogs slong zhes bya'o//nges par ston pa zhes bya ba ni 'di na kha cig rnyed pa don du gnyer ba rnyed pa la sogs pa 'dod pa ltos pa dang bcas pa sems 'brel pas gzhan dag la 'di skad ces khyed kyis ma la yang sbyin par mi bya/pha la yang ma yin/ sring mo la yang ma yin/ nye du dang snag gi gnyen mtshams gang yang rung ba gzhan dag la yang sbyin par mi bya bar khyed kyis gang zhig la sbyin par bya ba 'am bya ba bsgrub pa yin zhes smra zhing / khyim 'ga' zhig tu song nas der yang 'di skad ces khyed kyi khyim du dgra bcom pa zhugs shing khyed dang dgra bcom pa lhan cig tu phrad pa dang /lhan cig tu 'dug pa dang / gtam smra bar 'gyur ba ni khyed rnyed pa dang ldan pa'o/ /khyed kyis rnyed pa legs par rnyed do/ /khyed kyis 'byor pa legs par thob bo//mir rnyed pa'ang don yod pa yin no zhes smra zhing / de dag 'di snyam du bdag cag gi khyim du 'phags pa 'di las ma gtogs par dge sbyong ngam bram ze gzhan ni su 'ang ma zhugs pas nges par 'phags pa 'di ni dgra bcom pa zhes bya ba yin no zhes bya bar sems na ci ma rung zhes sems pa ste/rnyed pa don du gnyer ba rnyed pa 'dod pa ltos pa dang bcas pa sems 'brel pa de'i de lta bu'i tshul du gzhan rnams la nges par sgrogs pa gang yin pa 'di ni nges par ston pa zhes bya'o/ /chog shes pa ni rnyed pas rnyed pa 'dod pa spong bar byed pa yin no//de la rnyed pas rnyed pa tshol ba zhes bya ba ni 'di na kha cig rgyal po'am/ rgyal po'i blon po'am/ bram ze'am/ khyim bdag gam/ mchog tu gyur pa gzhan gang yang rung bar gyur pas lhung bzed dam/ chos gos sam/snam sbyar ram/ lde mig kyog po'am/ stan nam/ yo byad gzhan yang rung ba byin pa yongs su blangs so zhes gzhan dag la ston pa dang / 'di ni bdag la rgyal po che ge mo zhes bya ba'am dam par gyur pa gzhan zhig gis byin no zhes smra zhing de 'di snyam du 'di rnams 'di ltar de dag kyang re zhig de 'dra bar 'phags pa la sbyin par bya ba'am/bya ba bsgrub par bya bar sems na/ kho bo cag kyang 'phags pa la sbyin par bya ba'am bya ba bsgrub par ci'i phyir mi sems zhes sems na ci ma rung snyam du sems pas/ de'i rnyed pa gzhan gyi rnyed pa gzhan 'dod cing tshol ba gang yin pa 'di ni rnyed pas rnyed pa tshol ba zhes bya'o//sems bskyed pa'i skabs su mi gtsang ba la sogs pa ci zhig 'brel zhe na/ sems bskyed pa yongs su mi nyams pa'i chos can nyid shes par bya ba'i don du yin no//de yongs su nyams pa'i rkyen ni rnam pa dgu ste/ 'khrig pa'i 'dod chags dang / 'dod pa che ba dang / chog mi shes pa dang / 'du 'dzi la mngon par dga' ba dang / le lo dang / brjed ngas pa dang / rnam par g.yeng ba dang / shes rab 'chal ba dang /spros pa la mngon par dga' ba rnams te/ de'i gnyen po'i don du mi gtsang ba la sogs pa bstan pa yin no/ /de bzhin du dbugs 'byung ba dang rngub pa'i 'du shes la sogs pa gzhan dag la ci rigs par brjod par bya'o/ /sems bskyed pa bzhi par thams cad shes pa nyid la mthong bas bltas nas 'da' bar 'dod pa dang /lam shes pa nyid yongs su rdzogs par bya bar 'dod pa dang / rnam pa thams cad mkhyen pa nyid rjes su 'thob par 'dod pa'i byang chub sems dpa' chen po zhes gang gsungs pa de la ye shes mthong ba ni byang chub sems dpa'i mngon par rtogs pa gang yin pa'o//sa dang po la mthong ba'i lam gyis bsdus pa ni byang chub sems dpa'i skyon med pa la 'jug par 'dod pas zhes gsungs pa gang yin pa'o/ /lam shes pa'i sa phyir mi ldog pa'i sa la gnas pa ni phyir mi ldog pa'i sa la gnas par 'dod pas zhes gang gsungs pa yin no//phyir mi ldog pa'i sa 'ang byang chub sems dpa'i sa brgyad pa yin te/ 'di ltar de nyid las ye shes phyir mi ldog pa'i sa zhes brjod do zhes gsungs pa yin no/ / de nyid la yang byang chub sems dpa' gnas par bya ba yin no zhes gsungs pa ni gzhon nu'i sa las 'das par 'dod pa zhes bya ba yin no/ /gzhon nu'i sa yang de nyid yin te/ 'di ltar de nyid las kha na ma tho ba med pa'i phyir gzhon nu'i sa zhes brjod do zhes gsungs so/ / de las 'da' ba ni sangs rgyas rnams kyis yang dag par bskul ba de'i bya ba lhag ma mngon par 'du bya ba'i phyir ro/ /'da' ba ni rnam pa gnyis te/ mthong nas 'da' ba ni nyan thos dang rang sangs rgyas kyis ste de la byang chub sems dpa'i bsgom pa'i lam med pa'i phyir ro//gnas nas 'da' ba ni phyir mi ldog pa'i sa ste/ bsgom pa'i lam rgyun chags pa'i mtshan nyid yin pa'i phyir ro/ /'o na rin chen zla bas zhus pa'i mdo'i rjes su 'brangs nas gsungs pa 'di dang / rin chen phreng ba las bcom ldan 'das dpal bzangs dpal bzangs zhes bya ba dang /tsan+dan dpal tsan+dan dpal zhes bya ba dang / gang yang dag par rdzogs pa'i sangs rgyas mtha' yas par snang ba zhes grags shing mtha' yas par snang ba zhes bya ba dang / tog gi dbal tog gi dbal zhes bya ba dang / mya ngan med pa'i dpal thams cad kyi tshe mya ngan med pa'i dpal zhes bya ba dang /rin po ches mchod pa dang / rin po che'i dpal zhes bya ba dang / rin chen mchod sdong dang bcas pa dang / rin po che'i mchod sdong zhes bya ba dang / de bzhin gshegs pa me tog dpal zhes bya ba dang /gsung rnam par gnon pa zhes grags shing gsung rnam par gnon pa zhes grags pa dang / rgyal ba skar ma'i dpal skar ma'i dpal zhes bya ba dang / yon tan rgya che ba'i dpal zhes bya ba dang / bcom ldan 'das yon tan dpal zhes bya ba phyogs bcu na bzhugs pa'i de bzhin gshegs pa gang yin pa'i bcom ldan 'das de rnams kyi mtshan gzung ba byas na phyir mi ldog par 'gyur ro zhes bya ba dang /de bzhin du sems can ji snyed kyis bcom ldan 'das shAkya thub pa'i mtshan thos pa de thams cad phyir mi ldog par 'gyur ro zhes bya ba la sogs pa gsungs pa de ji lta bu yin zhe na/'dir shes rab kyi pha rol tu phyin pa la sbyor ba nyid phyir mi ldog pa'i sa la gnas pa'i rgyu'i dngos po yin par ldog pa las mthong ngo / /bstan pa sgra ji bzhin pa 'di ni dgongs pa can yin te/ji skad du mtshan thos pa las rigs kyi bu dag la phyir mi ldog pa'i sa bon skyes par gyur pa yin pas/ sems can de dag de bzhin gshegs pas gzigs nas phyir mi ldog par yang bstan pa yin gyi/ de rnams mtshan thos pa'i mod la phyir mi ldog par gyur pa ni ma yin no//zhes 'dir sa bon rjes thogs nyid la skyes pa dper brjod do/ /de'i phyir shes rab kyi pha rol tu phyin pa la brtson pa nyid phyir mi ldog pa'i sa'i rgyu nyid yin par 'thad pa yin no/ /sems bskyed pa bcu gcig par dge ba'i sems bskyed pa gcig kyang mi zad par bya bar 'dod pas zhes gang gsungs pa ni byang chub chen por yongs su bsngos pa'i dge ba'i rtsa ba chung ngu yang rgya mtsho chen por chu'i thigs pa gcig bor ba'i dpes yang dag par rdzogs pa'i byang chub kyi bar du zad pa med par 'gyur ba'i phyir ro//sems bskyed pa bcu bzhi par chos thams cad kyi de bzhin nyid rjes su rtogs par 'dod pas zhes gang gsungs pa de la/ chos thams cad kyi de bzhin nyid mi mthun pa'i phyogs dang / gnyen po'i phyogs la sogs pas bsdus pa'i chos rnams kyi spyi'i chos nyid do//chos kyi dbyings kyi de bzhin nyid rjes su rtogs par 'dod pas zhes bya ba ni khyad par gang gis rigs zhes 'chad par 'gyur ba de'i chos nyid gang yin pa'o/ /yang dag pa'i mtha' thams cad kyi de bzhin nyid rjes su rtogs par 'dod pas zhes bya ba ni yang dag pa'i mtha'i ye shes thams cad kyi phyin ci log pa'i chos nyid gang yin pa'o//thams cad kyi zhes bya ba ni thams cad mkhyen pa nyid gsum gyis bsdus pa'i 'o/ /rjes su rtogs par 'dod pas zhes bya ba la rjes su smos pa ni rnam pa thams cad mkhyen pa nyid dang rjes su mthun pa'i rtogs pa shes par bya ba'i phyir ro//de la thams cad shes pa nyid kyis nyon mongs pa can gyi ma rig pa tsam sel bar byed do/ /lam shes pa nyid kyis ni gnyen po ma lus par yang dag par 'grub par byed do/ /de la rnam pa thams cad mkhyen pa nyid kyis ni nyon mongs pa can ma yin pa'i mi shes pa spong ba yin no//bcom ldan 'das thams cad mkhyen pa gsum po 'di rnams la spang bar bya ba la brten pa'i bye brag ci zhig mchis/ rab 'byor gang yang med mod kyi/ de bzhin gshegs pa la ni bag chags kyis mtshams sbyor ba spangs pa yod pa yin no//de ltar na khyad par yod do zhe na/ rab 'byor bag chags kyis mtshams sbyor ba ni nyon mongs pa ma yin no/ /'on kyang nyan thos rnams la 'dod chags dang / zhe sdang dang / gti mug spangs pa yod mod kyi/ lus dang ngag gi rnam par 'gyur ba ni byis pa so so'i skye bo rnams bzhin du 'phags pa rnams la rab tu shes pa yin na / de dag de bzhin gshegs pa la ni mi mnga'o zhes gsungs te/ 'dir dgra bcom pa dge slong mchongs pa can dper brjod do//sems bskyed pa bcu bdun par 'dus byas dang 'dus ma byas kyi chos rnams kyi pha rol du 'gro bar 'dod pas zhes gsungs pa ni 'khor ba dang mya ngan las 'das pa mnyam pa nyid du rtogs pa yin pa'i phyir ro/ /dus gsum gyi sangs rgyas thams cad kyi de bzhin nyid rjes su rtogs par 'dod pas zhes bya ba ni de rnams kyi chos kyi sku'i mtshan nyid la khyad par med pa yin pa'i phyir ro//sems bskyed pa nyi shu rtsa gnyis par lha'i ris thams cad dang byang chub sems dpa'i tshogs chen pos yongs su bskor zhing mdun du bdar nas byang chub kyi snying po gang na ba der 'gro bar bya snyam pa'i byang chub sems dpas shes rab kyi pha rol tu phyin pa la bslab par bya'o zhes gang gsungs pa de la/kun nas bskor ba ni yongs su bskor ba'o/ /mchod par bya ba nyid kyis mdun phyogs su byas pa ni mdun du bdar ba'o//phyogs yongs su chad pa'i mdun du byas pa yin na ni/ snga ma dang phyi ma 'gal bar 'gyur ro/ /'di thams cad byas nas te mdor na sems bskyed pa'i byang chub sems dpas rdzogs par mi 'gyur ba'i dge ba'i chos gang yin pa de ni 'ga' yang med do//de nyid kyi phyir stong gsum gyi stong chen po'i 'jig rten gyi khams na rgyal po chen po bzhi'i ris nas 'og min gyi bar gyi lha yod par gyur pa gang dag yin pa de dag de ltar sems par byed pa ni 'jig rten skyong ba'i dbang du byas pas sangs rgyas byung bar gyur na 'jig rten gyi mngon par mtho ba dang nges par legs pa 'thob par bstan pa'i phyir dang /rang gi tshogs yongs su rdzogs par 'dod pa'i phyir dang / yon tan gyi tshogs su lhung bar gyur pa'i phyir ro zhes brjod par bya'o//de la rgyal chen bzhi'i ris ni lhung bzed kyi dbang du byas pa yin te/ de rnams la kham gyi zas mchog tu ro zhim pa'i yon tan dang ldan pa mang ba'i phyir te/ 'dir gzugs can snying pos zhus pa dper brjod do/ /sum cu rtsa gsum pa la sogs pa ni rim gro'i dbang du byas pa yin te/de rnams sgyu rtsal ma lus pa la mkhas pa ni 'dod pa tsam la rag las pas 'jug pa'i phyir ro/ /tshangs ris la sogs pa ni gsol ba 'debs pa'i dbang du byas pa yin te/ de rnams ni 'jig rten pa dang 'jig rten las 'das pa'i 'dod chags dang bral bar skal ba mnyam pas gzhan rnams de la mngon par dga' ba'i phyir ro//de la 'jig rten pa'i 'dod chags dang bral ba tshangs pa la sogs pa'o/ /'jig rten las 'das pa'i 'dod chags dang bral ba ni gnas gtsang ma pa rnams so//'di ni phal che bas bstan pa yin te / tshangs pa la sogs pa rnams kyi 'og na yang 'jig rten las 'das pa'i 'dod chags dang bral ba med pa ni ma yin no/ /dbang du byas pa gsum po 'di rtogs pa mngon du byed pa su zhig gis byas she na/ sus kyang ma yin mod kyi/'on kyang 'di ni dge ba'i rtsa ba yongs su gyur pa'i chos nyid yin te/ rnam par bsgrub pa nye bar gnas pa'i mtshan nyid can gyi chos rnams kyi rten cing 'brel par 'byung ba'i chos nyid tshad mar bya'o/ /de la rgyal po bzhi po 'di rnams kyi bdag po yin pas na rgyal chen bzhi'i ris so//legs par spyod pa lhan cig spyad pa sum cu rtsa gsum der skyes pas na sum cu rtsa gsum mo/ /sdug bsngal las spong zhing spangs pas na 'thab bral lo/ /dga' ba dang ldan zhing thob par gnas pas dga' ldan te/ mgu ba dang ldan pa zhes bya ba'i don to//rang gis sprul zhing byas pa'i longs spyod rnams kyis dga' zhing rol pas na 'di ni 'phrul dga'o/ /gzhan gyis sprul pa'i longs spyod rnams la dbang byed pas gzhan 'phrul dbang byed do/ /tshangs pa chen po'i 'khor yin pas na tshangs 'khor te/tshangs pa chen po de rnams kyis bsnyen bkur ba'o/ /gzhan ni 'di'i mdun na 'don gyi gnas na gnas pa'i phyir tshangs pa'i mdun na 'don no/ /tshe dang kha dog la sogs pa'i khyad par rnams kyis tshangs pa chen po'i 'khor yin pas tshangs chen no/ /tshangs pa gzhan rnams las 'di 'od chung ba yin pas na 'od chung ngo //'di la tshad med cing che ba'i 'od yod pas na tshad med 'od do/ /'di dag gi dga' ba dang bcas pa'i bsam gtan las grub pa'i phung po'i rgyun las sprin las glog 'byung ba bzhin du 'di dang de nas 'od 'phro zhing 'byung bas na A b+ha swa ra ste 'od 'phro'o//yang na de lta bu'i rang bzhin gyis 'od kyis snang bar byed pas na 'od gsal lo/ /dge ba zhes bya ba ni lus kyi 'od gcig tu 'dug cing mi 'gyur ba la bya bar bshad la/ de ni de'i gong gi tshangs pa rnams las 'di 'od chung ba yin pa'i phyir dge chung ngo //'di dag gi 'od che zhing tshad med pa'i phyir tshad med dge'o/ /'di dag gi 'od kyi tshogs dge bas rgyas pa'i phyir dge rgyas so/ /rgyas pa zhes bya ba ni dga' ba med pa'i bsam gtan las grub pa'i bdag gi lus thams cad bkang nas gnas pa ste/de rnams ni dper na rin po che'i za ma tog gi nang na gnas pa'i mar me ni rin po che'i 'od dang 'dres pa'i rang gi 'od rnams dang 'od kyi tshogs gcig tu gyur nas gnas pa de bzhin du 'bar ba'i lus kyis rnam par gnas pa yin no/ / 'du shes la 'dod chags dang bral ba bsgoms pas mngon par grub pa'i gzugs kyi phung po tsam yod kyi 'di la 'du shes yod pa ma yin pas na 'du shes med pa'o/ /sprin med dang bsod nams skyes ni go bar sla'o/ /'di rnams la bsam gtan gyi mthu las grub pa'i 'bras bu chen po yod pas na 'bras bu che'o//so so'i skye bo'i mthar thug par rnam par gnas pa'i phung po lnga dang ldan pas gegs cung zad kyang mi byed la dus cung zad kyis bdag gi gnas spong bar yang mi byed pas a b+hi ha ste mi spong ba'o/ /gzhan dag ni a smri ha zhes bya ba yin par sems so//de dag gi lugs kyis ni de dag la 'og mar 'dod pa med pas na mi 'dod pa zhes bya ba yin no/ /su la yang gdung bar mi byed pas mi gdung ba'o/ /shin tu yid 'phrog par byed pa'i phyir na tshegs med pa'i bde bar mthong ba'i phyir su dra sha ste legs par mthong ngo //gzhan ni su daR+sha na ste legs par lta zhes so/ /de dag gi lugs kyis ni byed pa por blta bar bya'o/ /lta ba yongs su dag pa'i phyir mchog tu lta ba'i phyir su daR+sha ster ba lta'o/ /phun sum tshogs pa'i mchog tu gyur pa'i phyir ram 'di rnams 'og ma ma yin pa'i phyir 'og ma yin no zhes bya ba ni btsun pa zangs mdog gi'o//gzhan dag ni sdig mtha' zhes zer te/ sdig pa zhes bya ba ni bsags par gnas pa'i rang bzhin yin la/ de ni der shin tu bcom pa'i phyir ro/ /sems bskyed pa zhes bya ba la/sems ni rnam par shes pa ste rnam par rig pa'o/ /rnam par shes pa gang yin zhe na/ yid kyi rnam par shes pa ste dkar po'i chos thams cad la dmigs pa ni de la srid pa'i phyir ro/ /bskyed pa zhes smos pas ni ma skyes pa skyed par shes par byed pa yin pa'i phyir na sems kyi rtog pa'i chos la dang po'i mtshams kyi dngos po bstan pa'i don du'o//sems bskyed pa bshad zin to/ /da ni gdams ngag brjod par bya'o/ /'di gang las she na/ bcom ldan 'das ji ltar byang chub sems dpa' sems dpa' chen pos shes rab kyi pha rol tu phyin pa la spyad par bgyi zhes gsungs pa las so//don ci yin zhe na/ de ltar sems bskyed pa'i byang chub sems dpas sems bskyed par bshad pa'i chos rnams rdzogs par bya ba'i don du ji ltar bsgrub par bya zhes bya ba'i don to/ / skabs kyi mthar yang 'di ni byang chub sems dpa' sems dpa' chen po la shes rab kyi pha rol tu phyin par gdams pa ste 'di ni rjes su bstan pa yin no zhes 'chad par 'gyur ro/ /de la don du gnyer ba'i don thob pa'i bya ba nye bar ston pa ni gdams pa dang rjes su bstan pa yin te/ thob zin pa'i yon tan yongs su skyong ba'i don gyis mi nyams par byed pa ni gdams ngag yin la/ de'i 'og tu ma thob pa'i yon tan thob par byed pa'i phyir na rjes su bstan pa yin no/ /gdams ngag de yang rnam pa bcur 'gyur ba yin te/ de'i phyir/ sgrub dang bden pa rnams dang ni//sangs rgyas la sogs dkon mchog gsum/ /ma zhen yongs su mi ngal dang / /lam ni yongs su 'dzin pa dang / /spyan lnga dang ni mngon shes kyi/ /yon tan drug dang mthong lam dang / /bsgom zhes bya la gdams ngag ni/ /bcu yi bdag nyid shes par bya//zhes gsungs pa yin no/ /de la sgrub pa la gdams pa ni shA ri'i bu 'di la byang chub sems dpa' chen po shes rab kyi pha rol tu phyin pa la spyod pas ni byang chub sems dpa' yang dag par rjes su mi mthong ngo zhes bya ba nas brtsams pa'o//mi dmigs pa'i rnam par sgrub pa nas sgrub pa/ de nyan thos la sogs pa dang thun mong ma yin pa nyid kyis 'dzam bu'i gling 'di dag dge slong sha ra dwa ti'i bu dang / maud gal gyi bu lta bu sha stag gis 'dam bu'i tshal la sogs pa lta bur yongs su gang ba dper brjod pa nas brtsams te/phyogs bcu re re zhing 'jig rten gyi khams gang+gA'i klung gi bye ma snyed des yongs su gang ba'i dge slong rnams kyi shes rab pas/ byang chub sems dpa' chen po'i shes rab nyi ma gcig tu bsgoms pa khyad par du 'phags par bstan pa ni/ shA ri'i bu gal te 'dzam bu'i gling 'di dge slong shA ri'i bu dang / maud gal gyi bu sha stag gis 'di lta ste dper na/ 'dam bu'i tshal lam/ 'od ma'i tshal lam/ bu ram shing gi tshal lam/ smyig ma'i tshal lam / 'bras kyi tshal lam/ til gyi tshal ltar yongs su gang bar gyur kyang zhes bya ba la sogs pa gang gsungs pa yin no//'phags pa'i gang zag thams cad ni 'dus ma byas kyis rab tu phye ba yin pa'i phyir shes rab tha mi dad pa ma yin nam snyam pas de khyad par med par zhus pa ni/ bcom ldan 'das rgyun du zhugs pa dang zhes bya ba la sogs pa'o//shA ri'i bu 'di ji snyam du sems/ byang chub sems dpa'i shes rab nyin gcig tu bsgoms pa 'bras bu gang gi don du nye bar gnas pa zhes bya ba nas brtsams te/ sems can thams cad yongs su mya ngan las 'da' ba dang /pha rol tu phyin pa drug yongs su rdzogs par bya ba dang / chos kyi sku thob pa'i mtshan nyid ched du bya ba dang sbyor ba dang rtogs pa rnams yang dag par thob pas dge ba bcu'i las kyi lam dang / rgyal rigs sA la chen po lta bu la sogs pa dang / lha'i ris thams cad dang /rgyun tu zhugs pa la sogs pa dang / yang dag par rdzogs pa'i sangs rgyas kyi shes rab byang chub sems dpa' med na mi 'byung bar bstan pas sbyin gnas su gyur pa sgrub par byed pa'i khyad par ldan pa'i don gyis lan btab pa yin no/ /de la nges par 'byed pa'i cha dang mthun pa bzhi po rnams dang mthong ba dang bsgom pa'i lam dag la go rims bzhin du 'dam bu ltar las dang nyon mongs pa'i gnod pa chung ngu mi bzod pa dang /'od ma la me dang mtshon dag gis bzhin du las dang nyon mongs pa drag po'i gnod byed dang phrad kyang dge ba'i rtsa ba mi 'chad pa dang bu ram shing dang 'dra bar gnas skabs gzhan thob kyang ngan song chad pa'i phyir bde 'gro'i skye ba rnams su rgyun mi 'chad pa'i sbyor bas chos sgom pa'i mngar ba las mi 'da' ba nyid dang /smyig ma dang 'dra bar myur du mngon par rtogs pa'i phyir mthong ba'i lam rtogs par byed pa nyid dang /'bras dang 'dra bar 'phags pa'i gang zag rnams kyi rtogs pa'i 'bras bu mchog nyid yin pa dang / ji ltar mthong ba la mngon du phyogs par byed pa'i phyir til dang 'dra bar me tog la sogs pa'i dngos po tha mi dad du zin kyang /dus gzhan du bsgom pa la spangs pa'i khyad par mthong ba'i dbang du byas nas dpe drug po rnams yin par shes par bya'o/ /tshal smos pa'i don ci yin zhe na/ gang zag gi khyad par rnams kyi dbang po'i khyad par la sogs pa tha dad pa yin yang dro bar gyur pa la sogs pa rnams kyi rigs tha mi dad par shes par bya ba'i don du yin te/don mang po brtag pa na yang dpe gcig gis chog par 'gyur ro/ /re zhig lam zhes bya ba'i sgra snga ma snga ma smos pa dpe phyi ma phyi ma drang bar bya ba'i don yin no/ /'on te tha mar lam smos pa 'di ci'i don du yin zhe na/'phags pa'i gang zag de rnams kyi mthong ba'i chos la bde bar gnas pa shes par byed pa'i dpe gzhan drang bar bya ba'i don du yin no/ /'o na dpe gzhan ci ste ma brjod ce na/ mthong ba'i chos la bde bar gnas pa rnams ni rang bzhin sna tshogs pa nyid kyis rigs bsdus pa'i ngo bo shes par bya ba'i don yin te/so sor dper brjod pa btags na ni dpe ji snyed cig brjod par bya zhing nye bar bshad pa la mi mkhas pa nyid du 'gyur te 'dir ngag gi don ni 'di yin no/ /dge slong shA ri'i bu dang maud gal gyi bu dang 'dra bar sha stag gis zhes gang gsungs pa 'dis ni ji skad gsungs pa'i rtogs pa dang mthun pa rnams kyi zhes bya bar sbyar ro//brgya'i char yang nye bar mi 'gro'o zhes bya ba la sogs pa rgya cher gsungs pa'i don ci zhig yin zhe na/ 'dis ni nyin gcig bsgoms pa'i byang chub sems dpa'i shes rab kyi grangs kyi khyad par dang /mthu'i khyad par dang / rigs kyi khyad par dang / rgyu'i khyad par dang / dpe las 'das pa nyid bstan pa yin no/ /de la brgya'i char yang nye bar mi 'gro zhes bya ba nas grangs dang zhes bya ba'i bar ni grangs kyi khyad par ro//khyad par med par grangs gzung ba ni de las gzhan pa'i grangs gzung bar shes par bya ba'i don du ste/ brgya la sogs pa smos pa khyad par can du gyur pa na khyad par med par grangs smos pa ni grangs khong du chud pa'i rgyu'i khyad par tsam yin no zhes shes par bya ba'i don du'o//bye ba la sogs pa smos pa ni shes rab mang po'i go rims shes par bya ba'i don du yin no/ /char yang zhes bya ba ni mthu'i khyad par ro/ /bgrang bar yang zhes bya ba ni rigs kyi khyad par te/ byang chub sems dpa'i shes rab kyi rigs la de bgrang du med pa'i phyir ro//rgyur yang zhes bya ba ni bya ba'i khyad par te/ shes rab de ni 'di'i rgyu tsam du yang mi 'gyur ro/ /dper yang nye bar mi 'gro zhes bya ba ni dpe las 'das pa'o/ /yang 'dir byang chub sems dpa' gang gi dbang du byas pa yin zhe na/ gang gi shes rab nyin gcig tu bsgoms pa la 'di lta bur yon tan yod pa de'i'o//ci dang po sems bskyed pa'am/ spyod pa la zhugs pa'am/ phyir mi ldog pa'am/ skye ba gcig gis thogs pa yin/ re zhig bzhi pa ni ma yin te/ sa bcu pa la ni de bzhin gshegs pa nyid yin zhes bshad pa'i phyir ro//don ci zhig yin zhe na/ de bzhin gshegs pa'i mdzad pas nye bar gnas pa yin pa'i phyir/ de nyid de bzhin gshegs pa zhes brjod kyi/ de bzhin gshegs pa'i thugs su chud pas ni ma yin no/ /gsum pa yang ma yin te/sa brgyad pa la ni dgongs pa can gyi mya ngan las 'das pa bkag pas nyan thos thams cad las shes pa khyad par du 'phags pa yin pa'i phyir te/ kye rgyal ba'i sras khyed mos par bya/ khyed khong du chud par bya ste/ gal te sangs rgyas bcom ldan 'das de dag gis byang chub sems dpa' de mngon par sgrub pa'i sgo la bcug par ma gyur pa na ni/'di de'i tshe nyid yongs su mya ngan las 'da' bar 'gyur ro zhes gang gsungs pa yin no/ /yang de'i mya ngan las 'das pa gang zhig yin/ gal te nyan thos kyi yongs su mya ngan las 'das pa yin na/de ni re zhig mi rigs te/ nyan thos kyi mya ngan las 'das pa 'dod pa'i yid la byed pa ni sems bskyed pa nas brtsams te ring du yongs su spangs pa yin pa'i phyir ro/ /'on te sangs rgyas kyi mya ngan las 'das pa yin na bsgom pas spang ba de yang mi rigs so zhe na/'di brjod par bya'o/ /bstan pa 'di la yongs su mya ngan las 'das pa rnam pa mang po rnam par gzhag ste/ 'di ltar rtse mo thob pa rnams kyi ni dge ba'i rtsa ba 'chad pa yongs su mya ngan las 'das pa yin no/ /bzod pa thob pa rnams ni ngan 'gro yongs su mya ngan las 'das pa yin no//bsam gtan thob pa rnams kyi ni de'i yan lag dag yongs su mya ngan las 'das pa yin no/ /rgyun du zhugs pa rnams kyi ni srid pa brgyad pa yongs su mya ngan las 'das pa yin no/ /lan cig phyir 'ong ba rnams kyi ni 'dir srid pa gnyis pa yongs su mya ngan las 'das pa yin no//phyir mi 'ong ba rnams kyi ni 'dod pa'i khams yongs su mya ngan las 'das pa yin no/ /dgra bcom pa rnams kyi ni phung po lhag ma med pa'i mya ngan las 'das pa yin no/ /'dir yang dam pa'i chos pad+ma dkar po'i mdo tshad mar byas nas/ji ltar 'phags pa shA ri'i bu la sogs pa'i byang chub sems dpa' chen po rnams la nyan thos kyi yongs su mya ngan las 'das pa'i rnam par gzhag pa gsungs pa de bzhin du dgongs pa can gyi mya ngan las 'das pa yin par shes par bya ste/dus de srid du 'gro ba'i don rgyun chad pa'i phyir ro/ /de nyid kyi phyir sems can thams cad kyi bya ba rgyun bcad pa'i phyir de nyid 'di'i yongs su mya ngan las 'das pa yin no zhes bshad do/ /gnyis pa yang ma yin te/ de yang de rnams las rtogs pa khyad par du 'phags pa'i phyir te/ de ltar yang rgyun du zhugs pa nas rang sangs rgyas kyi bar gyi shes pa dang spangs pa gang yin pa de ni byang chub sems dpa'i bzod pa yin no zhes 'chad par 'gyur ba yin no zhe na/ de bas na yongs su mi nyams pa'i chos can brda las byung ba'i sems kyis dang po sems bskyed pa'i byang chub sems dpa' skabs dang por sems bskyed par bstan pa gang yin pa de nyid 'dir mngon par bzhed par mngon no//gal te de ltar yin na / shA ri'i bu 'di ji snyam du sems/byang chub sems dpa'i nyin gcig bsgoms pa'i shes rab 'bras bu gang gi don du nye bar gnas pa zhes bya ba nas brtsams te/ sems can thams cad yongs su mya ngan las 'da' ba dang / pha rol tu phyin pa drug yongs su rdzogs pa dang / chos kyi sku thob pas bsdus pa ched du bya ba dang sbyor ba dang rtogs pa rnams yang dag par thob pas zhes bya ba 'dir mi 'gyur te/'di dag ni nyin gcig bsgoms pa'i shes rab kyi 'bras bu ma yin gyi/ bskal pa grangs med pa mang po'i shes rab kyi 'bras bu yin pa'i phyir ro zhe na/'dir yang mar me'i snying po tshig pa'i dpes sems bskyed pa dang po dang phyi ma'i 'bras bu yin pa ni lam yin no/ /sgrub pa la gdams pa bshad zin to// //bden pa la gdams pa gang zhe na/ 'phags pa'i bden pa bzhi la gdams pa gang yin pa'o/ / de la sdug bsngal gyi bden pa'i dbang du mdzad nas/ shA ri'i bu 'di la byang chub sems dpa' sems dpa' chen po gzugs stong pa nyid la brtson na brtson zhes bya'o zhes bya ba la sogs pa gang gsungs pa yin no/ /kun 'byung gi bden pa'i dbang du mdzad nas/ gal te gzugs skye ba'i chos can nam 'gag pa'i chos can du yang dag par rjes su mi mthong /gzugs kun nas nyon mongs pa'i chos can nam rnam par byang ba'i chos can du yang dag par rjes su mi mthong / gzugs ni tshor bar yang dag par 'du ba yin no/ /zhes bya bar yang dag par rjes su mi mthong zhes bya ba la sogs pa nas/de ci'i phyir zhe na/ shA ri'i bu 'di ltar gzugs kyi stong pa nyid gang yin pa de ni gzugs ma yin no zhes bya ba la sogs pa dang / de ci'i phyir zhe na/ shA ri'i bu 'di ltar gzugs gzhan ma yin la stong pa nyid kyang gzhan ma yin te/gzugs stong pa nyid yin la stong pa nyid ni gzugs so zhes bya ba la sogs pa gsungs pa yin te/ 'dis ni sgro 'dogs pa dang skur ba 'debs pa'i mtha' gnyis sel bar byed do/ /'gog pa'i bden pa'i dbang du mdzad nas gsungs pa ni/shA ri'i bu stong pa nyid de ni mi skye mi 'gag cing kun nas nyon mongs pa ma yin/ rnam par byang ba ma yin/ 'grib pa ma yin 'phel ba ma yin/ 'das pa yang ma yin/ ma 'ongs pa yang ma yin/ da ltar byung ba yang ma yin no/ /gang yang 'di 'dra ba de la ni gzugs med do//tshor ba med do zhes bya ba nas ma rig pa skye ba med do/ /ma rig pa 'gag pa yang med do zhes bya ba'i bar dang / rgyun du zhugs pa med do/ /rgyun du zhugs pa'i 'bras bu med do zhes bya ba nas sangs rgyas med do/ /byang chub sems dpa' med do zhes bya ba'i bar yin no//lam gyi bden pa'i dbang du mdzad nas gsungs pa ni/ de shes rab kyi pha rol tu phyin pa la spyod pa na bdag nyid la sbyin pa'i pha rol tu phyin pa la brtson zhes bya la'am mi brtson zhes bya bar yang dag par rjes su mi mthong ngo zhes bya ba la sogs pa yin no//pha rol tu phyin pa drug la lam du grags pa yin pa'i phyir lam yin no/ /yang rnam par thar pa'i sgo gsum gyis yang dag par bsdus pa'i rnam pa rnams la lam yin no zhes gsungs pa ni/ de stong pa nyid la stong pa nyid kyis sbyor bar mi byed de/stong pa nyid kyi rnal 'byor la ma yin no/ /mtshan ma med pa la mtshan ma med pas sbyor bar mi byed de/ mtshan ma med pa'i rnal 'byor la ma yin no/ /smon pa med pa la smon pa med pas sbyor bar mi byed de/ smon pa med pa'i rnal 'byor la ma yin no zhes bya ba la sogs pa yin te/'dis ni lam gyi bden pa rnam par mi rtog pa yin par bstan to/ /de la gzugs la sngon gyi mthas sbyor bar mi byed de/ zhes bya ba la sogs pa dang / de ci'i phyir zhe na/ shA ri'i bu 'di ltar byang chub sems dpas sngon gyi mtha' nyid kyang yang dag par rjes su mi mthong ngo zhes bya ba nas/de sngon gyi mtha' la phyi ma'i mthas sbyor bar mi byed de/ phyi ma'i mtha' la sngon gyi mthas sbyor bar mi byed do zhes bya ba nas/ de ci'i phyir zhe na/ dus gsum mnyam pa nyid kyi phyir ro zhes bya ba ste/'dis ni lam gyi nges par 'byin pa ston par byed do/ /nges par 'byung bar bya ba yang gang yin zhe na/ rnam pa thams cad mkhyen pa nyid de/ gang gi phyir de rnam pa thams cad mkhyen pa nyid las 'das pas sbyor bar mi byed de/ 'di ltar 'das pa nyid yang dag par rjes su mi mthong ngo zhes bya ba la sogs pa gsungs pa yin no//bden pa la gdams pa bshad zin to// //dkon mchog gsum la gdams pa gang zhig yin zhe na/ de ni dkon mchog gsum la gdams pa yin par shes par bya'o//de la sangs rgyas su byed pa'i chos rnams ni sangs rgyas te/ de yang rnam pa thams cad mkhyen pa nyid kyis yang dag par bsdus pa yin no zhes gsungs pa ni/ de shes rab kyi pha rol tu phyin pa la spyod pa'i tshe/ gzugs la rnam pa thams cad mkhyen pa nyid kyis sbyor bar mi byed de/de ci'i slad du zhe na/ gzugs nyid kyang stong pa nyid/ stong pa nyid kyang gzugs so/ /zhes bya bas chos rnams dang / de'i stong pa nyid phan tshun gyi rang bzhin gcig tu 'dod pas gsungs pa yin no/ /de la sngags ni rtag pa'i mtha' bkag la cig shos kyis ni chad pa'i mtha' bkag pa yin no//bden pa bzhi'i dbang du mdzad nas sdug bsngal gyi bden pa'i skabs su gnas pa med pa'i dmigs pa'i khyad par ni bcom ldan 'das gzhan yang byang chub sems dpa' sems dpa' chen po shes rab kyi pha rol tu phyin pa la spyod pa'i tshe/des gzugs la mi rtag ces gnas mi bgyi'o/ /zhes bya ba nas gzugs la zhi ba'o/ /zhes bgyi bar gnas par mi bgyi'o/ /zhes bya ba'i bar du rgyas par te/ de ci'i slad du zhe na/ bcom ldan 'das de ni 'di ltar gzugs mi rtag pa ni gzugs mi rtag pa nyid kyis stong ste/zhes gsungs pa yin no/ /de la gnas pa ni dngos po la dmigs pa'i sems kyi rten pa'o/ /'dir spyad par bya ste/ gal te re zhig gnas pa med pa tsam gnas par mi bya ba yin na ni med pa'i phyir gnyen po mi rigs so//'on te gang gnas pa yin pa ma yin na/ de lta na ni thal ches pa yin no zhe na/ mngon par zhen pa med pa la tshul ji ltar bshad pa de ltar 'di la yang blta bar bya'o/ /rnam pa'i khyad par ni/ bcom ldan 'das gzugs mi rtag pa nyid kyi stong pa nyid gang lags pa de'ang mi rtag pa nyid ma lags mi rtag pa nyid las gud na yang stong pa nyid ma mchis te zhes bya bas mi rtag pa nyid la sogs pa rnams dang /de'i stong pa nyid phan tshun de'i bdag nyid kyi rnam pa'i khyad par can dang / de ni 'di ltar gzugs nyid yang dag par rjes su mi mthong ngo zhes bya ba nas sangs rgyas la rnam pa thams cad mkhyen pa nyid kyis sbyor bar mi byed de/de ni 'di ltar sangs rgyas nyid kyang yang dag par rjes su mi mthong ngo / /de ci'i phyir zhe na/ sangs rgyas nyid rnam pa thams cad mkhyen pa/ rnam pa thams cad mkhyen pa nyid kyang sangs rgyas nyid yin no//byang chub nyid rnam pa thams cad mkhyen pa/ rnam pa thams cad mkhyen pa nyid kyang byang chub po zhes bya ba ste/ 'dis ni dmigs par bya ba dang / dmigs pa po mnyam pa nyid kyi ye shes ni sangs rgyas yin no zhes yongs su bstan to//chos dkon mchog gi dbang du byas nas gsungs pa ni/ de shes rab kyi pha rol tu phyin pa la spyod pa'i tshe/ gzugs dngos po yod ces bya bar mi sbyor ro/ /gzugs dngos po med ces bya bar mi sbyor ro//gzugs rtag ces bya ba dang mi rtag ces bya bar mi sbyor ro/ /zhes bya ba la sogs pa yin no/ /chos ni 'dod chags dang bral ba yin pa'i phyir thams cad du 'dod chags dang bral ba yin par bstan pa'i don du gsungs pa ni/ byang chub sems dpa' sbyin pa'i pha rol tu phyin pa'i don du shes rab kyi pha rol tu phyin pa la mi spyod do zhes bya ba nas brtsams te/pha rol tu phyin pa thams cad kyi don du shes rab kyi pha rol tu phyin pa la spyod pa bkag pa dang / de bzhin du phyir mi ldog pa'i sa la sems can yongs su smin par bya ba'i don dang / sangs rgyas kyi zhing yongs su dag par bya ba'i don dang /stobs rnams dang / mi 'jigs pa rnams dang / so so yang dag par rig pa dang / sangs rgyas kyi chos ma 'dres pa rnams dang / nang stong pa nyid nas dngos po med pa'i ngo bo nyid stong pa nyid kyi bar dang / de bzhin nyid dang /chos kyi dbyings dang / yang dag pa'i mtha' dang / lha'i mig yul dang bcas pa dang / de'i yul phyogs bcu re re zhing gang+gA'i klung gi bye ma snyed kyi 'jig rten gyi khams rnams na sems can rnams kyi 'chi 'pho ba dang skye ba lha'i mig gis mthong bar bya'o zhes bya ba'o //lha'i rna ba yul dang bcas pa dang / de'i yul ni bshad ma thag pa'i sems can gyi sgras bsdus pa'o/ /gzhan gyi sems shes pa yul dang bcas pa dang / de'i yul ni bshad ma thag pa'i sems can rnams kyi sems kyis bsdus pa'o//sngon gyi gnas rjes su dran pa dang bcas pa de'i yul ni bshad ma thag pa'i sems can rnams kyi sngon gyi gnas kyis bsdus pa'o/ /rdzu 'phrul gyi yul shes pa yul dang bcas pa'i don du shes rab kyi pha rol tu phyin pa la spyod pa bkag pa ste/de'i yul ni bshad ma thag pa'i sems can rnams kyi gzhi'i yul du 'gro bas yang dag par bsdus pa'o/ /de ltar spyod pa ni sems can gyi khams gzhal du med pa yongs su mya ngan las 'da' ba dang / bdud kyis glags mi rnyed pa dang / 'jig rten pa'i nyon mongs pa bsal ba dang /phyogs bcu'i 'jig rten gyi khams so so rnams su da ltar bzhugs pa'i sangs rgyas dang nyan thos dang rang sangs rgyas lha'i rigs rnams srung bar byed pa dang / mthong ba'i chos nyid la byams pa'i rgyu can gyis las kyi sgrib pa rnam par dag pa dang / tshegs chung ngus gzungs dang ting nge 'dzin gyi sgo mngon du gyur pa dang /byang chub kyi snying po'i bar du skye ba thams cad du sangs rgyas rnams mnyes par byed pa dang / chos thams cad nye bar mi dmigs pas phrad pa dang bral ba bkag pa dang / chos kyi dbyings rjes su mi dmigs pa'i phyir de dag gis myur du mngon par byang chub pa bkag pa dang /sna tshogs par byed pa mi byed pa'i phyir rtogs par bya ba dang rtogs pa po'i chos nye bar mi dmigs pa dang / chos kyi dbyings la stong pa dang mi stong par sbyor ba bkag pa dang / mig la sogs pa'i khams bco brgyad la stong pa nyid kyis sam/ de la de dag gis sbyor ba bkag pa dang / nyan thos la sogs pa'i sa las 'da' ba dang / sangs rgyas kyi zhing yongs su dag pa dang / sems can yongs su smin par byed pa dang / myur du bla na med pa yang dag par rdzogs par byang chub pa'i rgyu yin pa'i phyir stong pa nyid kyi rnal 'byor mchog tu brjod pa dang /rtogs pa thams cad la nga rgyal bkag pa dang / stong pa nyid kyi rnal 'byor la gnas nas snying rje chen po dang byams pa chen po mngon par bsgrub pa dang ldan pas pha rol tu phyin pa drug gi mi mthun pa'i phyogs ser sna la sogs pa'i sems mi skyed pas zhes bya'o //'jig rten pa'i nyon mongs pa bsal ba dang zhes brjod pa de la 'jig rten pa'i nyon mongs pa ni ma rig pa dang / lta ba dang / zag pa dang bcas pas bsdus pa ste/ byang chub sems dpa' ni de dag rtsa ba nas shin tu gzhol ba'i phyir rnal 'byor rtsom par byed pa'o / /'dod pa'i zag pa yongs su shes bzhin du yang sems can yongs su smin par bya ba'i phyir bsams bzhin du 'dod pa'i khams su skye ba len par byed do//srid pa'i zag pa yongs su shes bzhin du bsams bzhin du srid pa'i zag pa yongs su 'dzin to/ /yang byang chub sems dpa' ni nyon mongs pa dang nyon mongs pa med par brjod par mi bya'o/ /de ci'i phyir zhe na/ nyon mongs pa rnams kun du mi spyod pas nyon mongs pa dang bcas pa zhes brjod par mi bya la/ de bzhin gshegs pa'i ye shes mngon par 'dod pa dang bsam pa yongs su ma rdzogs pa'i phyir nyon mongs pa med pa zhes brjod par mi bya'o zhes bshad do/ /de la dge 'dun dkon mchog ni 'dir phyir mi ldog pa'i byang chub sems dpa'i dge 'dun yin par shes par bya'o//de dag kyang zhugs pa dang 'bras bu la gnas pa'i dbye bas skyes bu zung bzhir 'gyur ro/ /de bsdus pa yang gang zag brgyad pa la sogs pa yin te/ gang gi phyir brgyad pa'i dbang du mdzad nas gsungs pa ni bcom ldan 'das gang zhig shes rab kyi pha rol tu phyin pa'i gnas pa 'dis gnas pa'i byang chub sems dpa' de gang nas shi 'phos nas 'dir skyes pa lags/ 'di nas shi 'phos nas ni dbang po rnon po gang du skye bar 'gyur zhes bya'o//de la gang lam shes pa nyid la mthong ba'i lam skad cig ma bcu drug 'chad par 'gyur ba gang yin pa'i skad cig ma bcu drug po de rnams la byang chub sems dpa' dbang po rtul por gyur pa gang yin pa de ni dad pas rjes su 'brang ba zhes brjod de /dad pas lam de'i rjes su 'brang ba'i phyir dbang po rnon po gang yin pa de ni chos kyis rjes su 'brang ba yin te/ shes rab kyis lam de'i rjes su 'brang ba'i phyir ro/ /gang gi phyir dad pas rjes su 'brang ba'i dbang du mdzad nas gsungs pa ni/ de la shA ri'i bu byang chub sems dpa' sems dpa' chen po gang mi'i nang nas shi 'phos nas mi rnams dang skal ba mnyam pa nyid du skyes pa de ni phyir mi ldog pa'i byang chub sems dpa' chen po ma gtogs par dbang po rtul po yin te//zhes bya ba la sogs pa yin no/ / phyir mi ldog pa'i byang chub sems dpa' bkol ba ni dbang po rnon po'i lam gyis sa de thob pa yin pa'i phyir ro/ /chos kyis rjes su 'brang ba'i dbang du mdzad nas gsungs pa ni shA ri'i bu de la byang chub sems dpa' chen pos sangs rgyas kyi zhing gzhan nam/ dga' ldan gyi ris nas shi 'phos nas 'dir skyes pa de ni dbang po rnon por 'gyur zhing zhes bya ba la sogs pa yin no//de la lam shes pa nyid las dgu po rnams kyi nyon mongs pa chen po'i chen po la sogs pa spang ba'i don du chung ngu'i chung ngu la sogs pa'i dbye bas sgom pa'i lam rnam pa dgu 'chad par 'gyur ba gang yin pa de las dad pa dang chos kyis rjes su 'brang ba gang yin pa'i gang zag dag gis gal te rnam pa drug pa'am/bdun pa dang brgyad pa sngar spangs par gyur na ni de las de dag 'bras bu gnyis pa la zhugs par 'gyur ro/ /gal te rnam pa dgu yang spang ba'i phyir 'dod pa'i khams sam gong ma ci yang med pa'i skye mched kyi bar las 'dod chags dang bral bar gyur na ni de las 'bras bu gsum pa la zhugs pa yin no//skad cig ma bcu drug pa la ni de gnyis phyir mi 'ong ba'i 'bras bu la gnas par 'gyur gyi/ dgra bcom pa'i 'bras bu la ni ma yin te/ de ci'i phyir zhe na/ mthong ba'i lam gyi bsgom pas spang bar bya ba mi spong ba'i phyir te/ sngar yang srid pa'i rtse mo'i 'dod chags dang bral ba mi srid pa'i phyir ro/ /de'i tshe yang sngar dbang po rtul po dad pas rjes su 'brang ba gang yin pa de ni dad pas lhag par mos pa zhes brjod de/dad pa lhag pa nyid kyis na lhag par mos pas rab tu mos pa rab tu phye ba yin pa'i phyir ro/ /dbang po rnon po sngar chos kyis rjes su 'brang bar gyur pa gang yin pa de ni mthong bas thob pa zhes brjod de/shes rab lhag pa nyid kyis na mthong bas rab tu phye ba yin pa'i phyir ro/ /'di ltar 'bras bu gnyis pa dang gsum pa la zhugs pa dad pas lhag par mos pa'i dbang du mdzad nas gsungs pa ni/ shA ri'i bu byang chub sems dpa' thabs la mi mkhas pa gang dag bsam gtan bzhi po rnams sgrub par byed/pha rol tu phyin pa drug la yang spyod par byed cing bsam gtan thob pa des kyang lha tshe ring po'i gnas su skyes te/ de nas shi 'phos nas de gal te 'dod pa'i khams su lha dang mi rnams kyi nang du skye na de dag gi dbang po rnams rtul por 'gyur ba dag kyang yod do zhes bya ba'o//'bras bu gnyis pa dang gsum pa la zhugs pa'i mthong bas thob pa'i dbang du mdzad nas gsungs pa ni/ shA ri'i bu byang chub sems dpa' thabs la mkhas pa gang dag bsam gtan dang gzugs med pa'i snyoms par 'jug pa rnams la snyoms par zhugs shing byang chub kyi phyogs kyi chos sum cu rtsa bdun po rnams la yang snyoms par 'jug la/bsam gtan la sogs pa'i dbang gis ni ma yin te/ 'on kyang thabs la mkhas pas gang dang gang na sangs rgyas bcom ldan 'das mnyes par byed pa de dang de dag tu sbyor bar 'gyur ba dag yod de/de dag ni shes rab kyi pha rol tu phyin pa'i rnal 'byor dang ma bral bas bsam pa bzang po 'di nyid la bla na med pa yang dag par rdzogs pa'i byang chub tu mngon par 'tshang rgya'o zhes bya ba yin no//lan cig phyir 'ong ba'i dbang du mdzad nas gsungs pa ni/ shA ri'i bu byang chub sems dpa' shes rab kyi pha rol tu phyin pa la spyod pa gang dag thabs la mkhas pas bsam gtan dang gzugs med pa'i snyoms par zhugs pa zhes bya ba nas rgya cher dga' ldan gyi gnas su ji srid kyi bar du gnas nas shi 'phos nas 'dir skye ba yang dag par bstan te/sangs rgyas kyi zhing sna tshogs pa rnams su bla na med pa yang dag par rdzogs pa'i byang chub tu mngon par rdzogs par 'tshang rgya ba yang yod do zhes bya ba'i bar te/de rnams ni 'jig rten 'dir lan cig 'ongs te gzhan du yongs su mya ngan las 'da' ba'i phyir ro/ /phyir mi 'ong ba'i dbang du mdzad nas gsungs pa ni/ shA ri'i bu 'di ltar yang byang chub sems dpa' mngon par shes pa drug po thob pa gang dag 'dod pa'i khams dang gzugs kyi khams dang gzugs med pa'i khams su mi skye /'on kyang sangs rgyas kyi zhing nas sangs rgyas kyi zhing du 'dong ba nas brtsams te/ gang dang gang na sangs rgyas bcom ldan 'das rnams bzhugs pa de dang der skye bar 'gyur bar byed pa dag kyang yod do zhes bya ba yin no//phyir mi 'ong ba ni nam yang skye mched de nyid du skye ba gnyis pa mngon par sgrub par mi byed de khyad par du 'gro ba'i phyir ro/ /de ltar na 'di phyir mi 'ong ba nyid yongs su rdzogs par 'gyur ba yin te/ gang dang gang du skyes pa de dang der gtan mi 'ong ba'i phyir ro//rgyun tu zhugs pa'i zhes bshad pa gang yin pa rigs nas rigs su skye ba de nyid rnam pa gnyis su shes par bya ste/ mi'i rigs nas rigs su skye ba dang / lha'i rigs nas rigs su skye ba'o/ /de la dang po ni/ shA ri'i bu byang chub sems dpa' gang dag bsam gtan dang gzugs med pa'i snyoms par 'jug pa bskyed nas thabs la mkhas pas mi'i rigs rnams su rgyal rigs shing sA la chen po lta bu'am/ bram ze'i rigs shing sA la chen po lta bu'am/ khyim bdag gi rigs shing sA la chen po lta bu'i rigs su skye bar 'gyur ba dag yod do zhes gang gsungs pa ste/de ni nyon mongs pa rnam pa gsum pa dang bzhi pa spangs pa dang / de'i gnyen po zag pa med pa'i dbang po thob pa dang / skye ba gnyis sam gsum lhag pas na rgyun tu zhugs pa las khyad par du 'phags pa yin pa'i phyir ro//gnyis pa la ni/ shA ri'i bu byang chub sems dpa' bsam gtan la sogs pa thob pa gang dag thabs la mkhas pas rgyal chen bzhi'i ris nas gzhan 'phrul dbang byed kyi lha rnams kyi bar du skyes te zhes bya ba nas/der sangs rgyas bcom ldan 'das rnams kyang mnyes par byed pa dag yod do zhes bya ba'i bar du gang gsungs pa yin no/ /lan cig phyir 'ong ba zhes gang gsungs pa de nyid bar chad gcig pa yin pa ni/ shA ri'i bu byang chub sems dpa' gang dag bsam gtan bzhi nas 'phags pa'i bden pa bzhi'i bar du thob kyang de dag mngon du mi byed pa dag yod de/de dag ni tshe gcig gis thogs par shes par bya'o zhes gang gsungs pa yin no/ /de ni nyon mongs pa'i rnam pa bdun dang brgyad spangs shing de'i gnyen po zag pa med pa'i dbang po thob pa dang skye ba'i lhag ma gcig lus pas lan cig phyir 'ong ba las khyad par du 'phags pa yin pa'i phyir bar chad gcig pa'o//nyon mongs pa dgu spangs pa'i phyir na phyir mi ldog pa'i sa bshad pa gang yin pa de ni rnam pa lngar shes par bya'o//'di lta ste/ bar ma dor yongs su mya ngan las 'da' ba ni/ shA ri'i bu byang chub sems dpa' bsam gtan la sogs pa thob pa gang dag thabs la mkhas pas tshangs ris kyi lha rnams nas 'og min gyi lha rnams kyi bar du skye bar 'gyur ba dag yod de zhes bya ba la sogs pa gang gsungs pa yin te/de ni tshangs ris nas brtsams te 'og min gyi bar gyi lha'i ris gang yang rung bar mngon par sangs rgyas nas 'dir mngon par byang chub pa la sogs pa ston pa yin pa'i phyir ro/ /skyes nas yongs su mya ngan las 'da' ba ni/ shA ri'i bu byang chub sems dpa' gang dag dang po sems bskyed pa nyid kyis bla na med pa yang dag par rdzogs pa'i byang chub tu mngon par rdzogs par 'tshang rgya zhing zhes bya ba nas/de dag yongs su mya ngan las 'das nas dam pa'i chos bskal pa'am/ bskal pa las lhag par gnas pa dag yod ces gang gsungs pa ste/de ni mngon par brtson pas lam la 'jug pa yin pa'i phyir ro/ /mngon par 'du byas pas mya ngan las 'da' ba ni/ shA ri'i bu byang chub sems dpa' pha rol tu phyin pa drug la spyod pa gang dag 'jig rten gyi khams nas 'jig rten gyi khams su 'dong zhing de dag sems can rnams kyi don la rtag tu brtson te zhes bya ba nas bskal pa grangs med tshad med pa rnams kyis bla na med pa yang dag par rdzogs pa'i byang chub tu mngon par 'tshang rgya ba dag yod do zhes bya ba'i bar gang gsungs pa yin te/de ni mngon par brtson pas lam la 'jug pa'i phyir ro/ /mngon par 'du byed pa med pas yongs su mya ngan las 'da' ba ni/ shA ri'i bu byang chub sems dpa' gang dag dang po sems bskyed pa nyid kyis byang chub sems dpa'i skyon med pa las 'da' zhing zhes bya ba nas/ sangs rgyas kyi zhing gzhan dang gzhan du bla na med pa yang dag par rdzogs pa'i byang chub mngon par 'tshang rgya ba dag yod do/ /zhes bya ba'i bar du gang gsungs pa yin te/ de ni mngon par 'du byed pa med par lam du 'jug pa'i phyir ro/ /gong du 'pho ba ni lnga pa yin te/gang zhig gong du 'gro'i/ gang du skyes pa de nyid du ni yongs su mya ngan las mi 'da' ba ste/ 'pho ba zhes bya ba ni 'gro ba zhes bya ba'i don to/ /de yang rnam pa gnyis te 'og min gyi mthar thug pa dang / srid pa'i rtse mo'i mthar thug pa'o/ /de la 'og min gyi mthar thug par 'gro ba ni/shA ri'i bu byang chub sems dpa' pha rol tu phyin pa drug la spyod pa gang dag 'khor los sgyur ba'i rgyal por gyur nas sems can rnams la bde ba'i yo byad thams cad nye bar sgrub cing zas 'dod pa rnams la zas zhes bya ba nas brtsams te/ sems can rnams dge ba bcu'i las kyi lam la bzhag nas tshangs ris kyi lha rnams nas 'og min gyi bar du skyes te/ sangs rgyas kyi zhing sna tshogs pa rnams su bla na med pa yang dag par rdzogs pa'i byang chub tu mngon par 'tshang rgya ba dag yod do zhes bya ba'i bar du gang gsungs pa yin no//'og min gyi mthar thug par 'gro ba'i gong du 'gro ba gang yin pa 'di ni rnam pa gsum du 'gyur te/ 'phar ba dang phyed du 'phar ba dang gnas thams cad du 'chi 'pho ba'o/ /de la 'phar ba zhes pa ni bsam gtan gsum las yongs su nyams pa gang yin pa de bsam gtan dang po bsgrubs te tshangs ris su skyes nas sngar goms pa'i dbang gis bsam gtan bzhi pa dang spel te de las shi 'phos nas 'og min gyi lha rnams su skye ba ste/de ni bar ma dor ba yin pas na 'phar ba zhes brjod do//ji skad du/ shA ri'i bu byang chub sems dpa' chen po gang dag bsam gtan bzhi rdzogs par byas nas/ bsam gtan las yongs su nyams nas bsam gtan dang po bsgrubs te tshangs ris kyi lha rnams su skye zhing de dag yang bsam gtan bsgrubs nas 'og min gyi lha rnams su skyes te sangs rgyas kyi zhing sna tshogs pa rnams su bla na med pa yang dag par rdzogs pa'i byang chub tu mngon par 'tshang rgya ba dag yod do zhes gang gsungs pa yin no//phyed du 'phar ba zhes bya ba ni gang dag tshangs ris nas shi 'phos te gnas gtsang ma rnams su skyes nas bar gyi gnas gzhan gcig las kyang brgal te 'og min du skyes nas sangs rgyas kyi zhing sna tshogs pa rnams su zhes bya ba la sogs pa gsungs pa yin no//gnas thams cad du 'chi 'pho ba zhes bya ba ni gang zhig gnas gzhan thams cad du brgyus nas 'og min du 'jug pa ste/ji skad du/ shA ri'i bu byang chub sems dpa' chen po gang dag dga' ldan gyi gnas sbyangs nas tshangs ris nas 'og min gyi bar du skyes te thabs mkhas pas dmyal ba pa dang dud 'gro'i skye gnas pa dang /gshin rje'i 'jig rten pa'i sems can rnams la chos ston par byed pa dag phyogs bcu rnams su sangs rgyas kyi zhing nas sangs rgyas kyi zhing du 'gro zhing sangs rgyas bcom ldan 'das rnams la bsnyen bkur byed pa dang / sems can rnams yongs su smin par byed pa dang /bla na med pa'i sangs rgyas kyi zhing rnams kyang yongs su sgrub cing zhes bya ba la sogs pa gsungs pa yin no/ /srid pa'i rtse mo'i mthar thug par 'gro ba ni snyoms par 'jug pa'i khyad par gzhan rnams sgrub par byed cing gnas gzhan thams cad du skyes nas gnas gtsang mar ma zhugs pa kho nar gzugs med par rim gyis skye bas srid pa'i rtse mor song nas sangs rgyas kyi zhing sna tshogs pa rnams su mngon par 'tshang rgya ba gang yin pa ste/ji skad du/ shA ri'i bu byang chub sems dpa' chen po gang dag bsam gtan dang gzugs med pa'i snyoms par 'jug pa sgrub par byed pa dag tshangs ris nas dge rgyas kyi bar gyi lha rnams su skye bar 'gyur zhing de nas nam mkha' mtha' yas skye mched nas srid pa'i rtse mo'i bar du skye bar 'gyur la/de nas sangs rgyas kyi zhing sna tshogs pa rnams su zhes gsungs pa yin no//gzugs kyi 'dod chags dang bral ba'i phyir mi ldog pa gang yin pa de ni 'di nas shi 'phos nas gzugs med par skye bar 'gyur ba ni/ ji skad du/ shA ri'i bu byang chub sems dpa' chen po gang dag bsam gtan dang gzugs med pa'i snyoms par 'jug pa thob par 'gyur ba de dag nam mkha' mtha' yas skye mched nas srid pa'i rtse mo'i bar du skye bar 'gyur zhing /de nas sangs rgyas kyi zhing sna tshogs pa zhes bya ba la sogs pa gsungs pa yin no/ /de ltar na phyir mi ldog pa drug yin no/ /bdun pa mthong ba'i chos la mya ngan las 'da' ba ni/ji skad du/ shA ri'i bu byang chub sems dpa' chen po gang dag lus la skyes bu chen po'i mtshan sum cu rtsa gnyis kyis brgyan zhing dbang po yongs su dag pa bla na med pa rnams dang ldan te/ nam yang ngan song ngan 'gro log par ltung bar skye bar mi 'gyur ba dang /bdag nyid stod par mi byed/ gzhan la smod par mi byed de/ de dag la 'gro ba mang po byams shing yid du 'ong ste/ sems can gang dag gis byang chub sems dpa' de dag mthong ba de dag kyang sems rab tu dang ba de nyid kyis rim gyis theg pa gsum gyis yongs su mya ngan las 'da' bar byed pa dang /byang chub sems dpa' de dag tshe dpag tu med pa dang ldan zhing 'khor los sgyur ba'i rgyal srid brgya stong du ma yongs su 'dzin te de dag la gnas nas kyang sangs rgyas bye ba khrag khrig brgya stong du ma la bkur stir byas/bla mar byas/ mchod par byas/ rjed par byas nas phyis 'di nyid du bla na med pa yang dag par rdzogs pa'i byang chub tu mngon par 'tshang rgya ba dag yod do zhes gsungs pa yin no/ /'gog pa'i snyoms par 'jug pa thob pa'i phyir mi ldog pa gang yin pa de ni mya ngan las 'das pa dang 'dra ba'i chos lus kyis mngon sum du byed pa'i phyir lus kyis mngon sum du byed pa zhes bshad do//yang ji ltar na lus kyis mngon sum du byed ce na/ sems med pas lus la brten te de bskyed pa'i phyir ro//ji skad du/ shA ri'i bu byang chub sems dpa' chen po gang dag shes rab kyi pha rol tu phyin pa la spyod pa dang / bsam gtan dang / tshad med pa dang gzugs med pa'i snyoms par 'jug pa rnams kyis rnam par rtse zhing / de dag bsam gtan dang po la snyoms par 'jug go//de las langs nas 'gog pa'i snyoms par 'jug pa la'o/ /de las langs nas bsam gtan gnyis pa la snyoms par 'jug go/ /zhes bya ba nas rgya cher te/ shA ri'i bu de ltar byang chub sems dpa' chen po shes rab kyi pha rol tu phyin pa la spyod pa thabs la mkhas pas thod rgal gyi ting nge 'dzin la snyoms par zhugs nas sangs rgyas kyi zhing sna tshogs su zhes bya ba la sogs pa'i bar du gsungs pa yin no//phyir mi 'ong ba zhes brjod pa gang yin pa de gal te srid pa'i rtse mo'i nyon mongs pa rnam pa brgyad spangs par gyur na ni de las 'dir dgra bcom pa'i 'bras bu la zhugs pa zhes bshad de/ji skad du/ shA ri'i bu byang chub sems dpa' chen po gang dag pha rol tu phyin pa drug la gnas nas sems can rnams la sangs rgyas kyi chos rnams snang bar byed cing bdag nyid kyang nam bla na med pa yang dag par rdzogs pa'i byang chub mngon par rdzogs par sangs rgyas kyi bar du sangs rgyas kyi chos kyi snang ba dang bral bar mi byed pa dag yod do zhes gang gsungs pa yin no//de nyid kyi dbang du mdzad nas sa bcu pa la gnas pa'i byang chub sems dpa' ni de bzhin gshegs pa nyid du brjod par bya'o zhes 'chad par 'gyur ro//de ci'i phyir zhe na/ de ni sems can rnams la de bzhin gshegs pa'i mdzad pas nye bar gnas pa'i phyir ro/ /dgra bcom pa ni yang dag par rdzogs pa'i sangs rgyas yin la/de la yang sangs rgyas dkon mchog la gdams par bstan pas 'dir yang ma smos so/ /byang chub sems dpa' rang sangs rgyas kyi dbang du mdzad nas gsungs pa ni/ shA ri'i bu byang chub sems dpa' chen po gang dag sangs rgyas mi bzhugs shing nyan thos med pa'i 'jig rten gyi khams rnams su rang byang chub tu mngon par rdzogs par 'tshang rgya ba dag yod de de dag thabs la mkhas pas srog chags bye ba brgya stong mang po theg pa gsum po rnams su yongs su smin par byas nas bla na med pa yang dag par rdzogs pa'i byang chub mngon par rdzogs par 'tshang rgya'o zhes bya ba yin no//'dir yang gsungs pa/ dbang po rtul dang rnon po dag /dad dang mthong thob rigs nas rigs/ /bar chad gcig par skyes nas dang / /byed dang byed min 'og min 'gro//'phar gsum srid rtse'i mthar thug 'gro/ /gzugs kyi chags bcom mthong ba yi/ /chos la zhi lus mngon sum byed/ /bse ru dang ni nyi shu'o/ /re zhig byang chub sems dpa' dad pa'i rjes su 'brang ba nas brtsams nas byang chub sems dpa' rang sangs rgyas kyi bar yin no//zhes zhugs pa dang 'bras bu la gnas pa'i gang zag sangs rgyas kyi lam gyis rnam par bzhag par zad kyi/ nyan thos kyi lam gyis thob par bya ba'i rgyun tu zhugs pa la sogs pa gang yin pa dang / rang sangs rgyas kyi lam gyis thob par bya ba rang sangs rgyas nyid gang yin pa de dag ni byang chub sems dpa'i lam de dang des re zhig thob par mi byed do//de lta na yang sems can rnams rgyun tu zhugs pa'i 'bras bu nas rang byang chub kyi bar la 'jog pa yin no/ / ji skad du/ shA ri'i bu byang chub sems dpa' chen po gang dag dran pa nye bar gzhag pa dang / yang dag par spong ba dang / rdzu 'phrul gyi rkang pa dang / dbang po dang / stobs dang / byang chub kyi yan lag dang / lam gyi yan lag thob pa ni rgyun tu zhugs pa'i 'bras bu nas rang sangs rgyas nyid kyi bar thob par mi byed kyang /de dag la sems can rnams 'jog par byed do zhes gsungs pa yin no/ /yang ji ltar na rang nyid kyis ma thob pa'i chos la gzhan dag 'jog par 'thad snyam na/ shA ri'i bu nyan thos dang rang sangs rgyas rnams kyi shes pa dang spong ba gang yin pa de ni byang chub sems dpa' chen po mi skye ba'i chos la bzod pa thob pa'i bzod pa zhes gsungs pa yin no//de yang sdug bsngal la chos shes pa'i bzod pa yin no/ /nyan thos dang rang sangs rgyas kyi sa la byang chub sems dpa'i shes pa dang mthong bas bltas nas 'da' ba yin no//zhes kyang 'chad par 'gyur te/ byang chub sems dpa'i mthong ba'i lam nyid du nyan thos dang rang sangs rgyas kyi rtogs pa thams cad yongs su rdzogs pa yin no zhes bya ba'i tha tshig go//'di ni phyir mi ldog pa'i byang chub sems dpa'i dge 'dun yin par yongs su gsal bar bstan pa'i don du/ shA ri'i bu 'di ni sangs rgyas kyi chos rnams kyi mngon par rtogs pa 'di dag gang la yod pa'i phyir mi ldog pa'i byang chub sems dpa' yin par shes par bya'o zhes gsungs pa yin no//rtogs pa'i chos thams cad kyi gnas su gyur pa ni gnyis te/ mi dge ba'i chos rnams spong ba dang dge ba'i chos rnams kyang yang dag par len pa'o/ /ji skad du/ shA ri'i bu byang chub sems dpa' chen pos lus dang ngag dang yid kyi lus kha na ma tho ba dang bcas pa'i go skabs dbye bar mi bya zhing /lus dang ngag dang yid kyi las rnam par dag pa la bslab par bya'o zhes gsungs pa yin no/ /phyir mi ldog pa'i 'khor lo'i mdo las kyang byang chub sems dpa' dad pa'i rjes su 'brang ba nas brtsams te/byang chub sems dpa' rang sangs rgyas zhes bya ba'i bar gyi gang zag rnam par gzhag pa ches 'gal bar bya ba'i don du bcom ldan 'das nyid kyis gsungs pa yin pas der blta bar bya'i/ 'di ni kho bo cag gis nye bar dgod par ma byas te/btags zin pa 'thag pas ci zhig bya/ dkon mchog gsum la gdams pa bshad zin to// //ma zhen pa la gdams pa'i dbang du mdzad nas gsungs pa ni/ bcom ldan 'das byang chub sems dpa' chen po'i lus kyi las kha na ma tho ba dang bcas pa dang zhes bya ba nas brtsams te/lus la sogs pa mi dmigs pas pha rol tu phyin pa'i mi mthun pa'i phyogs ser sna la sogs pa'i sems ma bskyed pas lus la sogs pa mi dmigs pa ni byang chub sems dpa'i lam nyid yin par gsungs so //yongs su mi ngal ba la gdams pa'i dbang du mdzad nas/ gzugs la rlom sems med pa dang / tshor ba dang / 'du shes dang / 'du byed dang / rnam par shes pa nas yang dag par rdzogs pa'i byang chub kyi bar la rlom sems med pa ste/ de ltar spyod na smad par 'gyur ba'i lus yongs su zin par mi 'gyur te zhes gsungs pa yin te/rlom sems par gyur na yongs su skyo bar 'gyur ba yin pa'i phyir ro/ /lam yongs su zin pa la gdams pa'i dbang du mdzad nas/ shA ri'i bu byang chub sems dpa' chen po ye shes gang dang ldan pas shar phyogs kyi 'jig rten gyi khams gang+gA'i klung gi bye ma snyed kyi de bzhin gshegs pa dgra bcom pa yang dag par rdzogs pa'i sangs rgyas gang+gA'i klung gi bye ma snyed dag kyang mthong ngo //de rnams las chos bstan pa yang nyan to/ /de bzhin du lho dang nub dang zhes bya ba la sogs pa gsungs pa yin no//de la ma zhen pas ni yongs su nyams par mi 'gyur ro/ /mi ngal bas ni bgrod par bya ba ji srid par 'gro bar 'gyur ro/ /ye shes yongs su gzung bas ni lam gzhan du 'gro bar mi 'gyur ro//spyan lnga la gdams pa la/ sha'i spyan gyi dbang du mdzad nas/ shA ri'i bu byang chub sems dpa' chen po'i sha'i mig gis dpag tshad brgya mthong ba yod do zhes bya ba nas brtsams te/ gang stong gsum gyi stong chen po'i 'jig rten gyi khams mthong ba yod do zhes bya ba'i bar du gang gsungs pa yin te/de ni rnam par smin pa las byung ba nyid kyis yul so sor nges pa nyid yin pa'i phyir ram/ sha'i mig ni bdag po'i 'bras bu'i yul can yin la/ de yang stong gsum gyi stong chen po'i 'jig rten gyi khams kyis bsdus pa yin pa'i phyir ro//lha'i spyan ni/ shA ri'i bu rgyal po chen po bzhi'i ris nas 'og min gyi bar gyi lha rnams kyi lha'i mig gang yin pa de ni byang chub sems dpas rab tu shes kyi/ byang chub sems dpa' chen po'i lha'i mig gang yin pa de ni rgyal po chen po bzhi'i ris nas 'og min gyi lha rnams kyis mi shes so zhes gang gsungs pa ste/ci'i phyir zhe na/ byang chub sems dpa'i lha'i mig gi yul ni phyogs bcu'i sems can thams cad kyi 'chi 'pho ba dang skye ba yin pa'i phyir ro/ /shes rab kyi spyan ni byang chub sems dpa' chen po shes rab kyi mig gang dang ldan pas 'dus byas sam 'dus ma byas kyi chos ci yang mi shes pa med de zhes bya ba la sogs pa gang gsungs pa ste/shes rab kyi spyan ni chos thams cad la rnam par rtog pa dang bral ba'i phyir ro/ / chos kyi spyan ni/ shA ri'i bu byang chub sems dpa' chen po'i chos kyi mig gis gang zag 'di ni dad pa'i rjes su 'brang ba'o/ /gang zag 'di ni chos kyi rjes su 'brang ba'o/ /zhes bya ba nas/ 'di ni bla na med pa yang dag par rdzogs pa'i byang chub tu mngon par sangs rgyas kyi bar du phyir ldog par mi 'gyur ro zhes bya ba'i bar du gang gsungs pa ste/chos kyi spyan gyi yul ni 'phags pa'i gang zag thams cad kyi rtogs pa yin pa'i phyir ro/ /sangs rgyas kyi spyan gyi dbang du mdzad nas gsungs pa ni/ shA ri'i bu byang chub sems dpa' chen po sems bskyed pa'i rjes la rdo rje lta bu'i ting nge 'dzin la mnyam par bzhag nas sems kyi skad cig gcig dang ldan pa'i shes rab kyis rnam pa thams cad mkhyen pa nyid thob par byed pa gang yin pa zhes bya ba la sogs pa ste/sangs rgyas kyi spyan gyi yul ni chos thams cad rnam pa thams cad du mngon par rdzogs par byang chub pa yin pa'i phyir ro//spyan lnga la gdams pa bshad zin to// //mngon par shes pa drug la gdams pa las rdzu 'phrul gyi mngon par shes pa'i dbang du mdzad nas/ de ni sa chen po 'di yang rab tu g.yo bar byed do//gcig tu gyur nas mang por 'gyur ro zhes bya ba nas/ rdzu 'phrul gyi rnam pa mngon du bya ba'i mngon par shes pa'i ye shes mngon par sgrub pa yin no zhes bya ba'i bar du gsungs pa yin no/ /lha'i rna ba ni de lha'i rna ba'i khams rnam par dag pa mi las 'das pas lha dang mi gnyis ka'i sgra thos te zhes bya ba la sogs pa gang gsungs pa yin no//gzhan gyi sems shes pa ni des sems can pha rol dang gang zag pha rol gyi sems kyis yang dag pa ji lta ba bzhin du rab tu shes so/ /'dod chags dang ldan pa'i sems la 'dod chags dang ldan pa'i sems zhes bya bar yang dag pa ji lta ba bzhin du rab tu shes so zhes bya ba la sogs pa gang gsungs pa yin no//sngon gyi gnas rjes su dran pa ni de sngon gyi gnas rjes su dran pa mngon du bya ba'i mngon par shes pas skye ba gcig kyang rjes su dran no//skye ba brgya'i bar du yang rjes su dran no zhes bya ba la sogs pa gang gsungs pa yin no/ /lha'i mig gi mngon par shes pa ni de lha'i mig rnam par dag pa mi las 'das pas sems can gyi 'chi 'pho ba dang skye ba ji lta ba bzhin du rab tu shes te/sems can 'di dag ni lus kyi ngan du spyod pa dang ldan pa zhes bya ba la sogs pa gang gsungs pa yin no/ /mig 'di gnyis kyi khyad par ni 'di yin te/ spyan lngas bsdus pa'i lha'i spyan gang yin pa ni rnam par smin pa las byung ba 'di yin la/mngon par shes pas bsdus pa 'di ni bsam gtan mngon par 'dus byas pa las byung ba yin no/ /zag pa zad pa shes pa'i mngon par shes pa'i dbang du mdzad nas/ skye ba mngon du bya ba'i mngon par shes pa'i ye shes mngon par bsgrubs kyang nyan thos kyi sa'am rang sangs rgyas kyi sar mi ltung ngo //zhes bya ba la sogs pa gang gsungs pa yin te/ de yang rnam pa thams cad mkhyen pa nyid dang rab tu ldan pa'i yid la byed pa nyid kyis de la dmigs pa'i rlom sems thams cad bkag pa'i phyir ro//yang rgyu ci'i phyir mngon par shes pa la gdams par mdzad snyam na/ shA ri'i bu mngon par shes pa yongs su dag pas ni rnam pa thams cad mkhyen pa nyid gtong bar byed pa yin no zhes bya ba dang / yang pha rol tu phyin pa'i gnas skabs re re zhing mngon par shes pas yongs su zin pa ni rnam pa thams cad mkhyen pa'i lam sbyong bar byed pa nyid yin pas dang /sbyin pa la sogs pa gnyen po'i phyogs ni mi mthun pa'i phyogs bsal ba'i don du rab tu bzhag pa yin pas dang / de lta bu'i shes rab kyi pha rol tu phyin pa ni yon tan thams cad 'thob pa'i rgyu nyid yin pas so zhes gsungs so//mngon par shes pa'i phan yon gyi dbang du mdzad nas/ sems can rnams chos mnyam pa nyid la rab tu dgod pa dang / 'phags pa'i skye bo thams cad byams pa nyid dang /yid du 'ong ba la sogs pa'i yul gyi dngos po dang phrad pa dang / byang chub sems dpa' ni lha'i ris thams cad kyis phyag bya bar 'os pa nyid dang / kun dga' bo dge slong sum brgya po 'di rnams zhes bya ba nas brtsams te/ dge slong mang po zhig sangs rgyas su lung bstan pa dang /phyogs bcu re re zhing gang+gA'i klung gi bye ma snyed dang mnyam pa'i 'jig rten gyi khams snang bar mdzad pa'i ljags kyi dbang po bkram pa'i mtshan mas yang dag par bskul ba 'jig rten gyi khams gzhan nas 'ongs pa'i byang chub sems dpa' dang ldan pa'i tshogs thams cad dang bcas pa lung bstan pa ni/de'i dus su bstan pa'i gdams ngag gi 'bras bu dus gzhan du thob par bstan pa'i don gyis gsungs pa yin no/ /mngon par shes pa drug la gdams pa bshad zin to// // mthong ba'i lam la gdams pa'i dbang du mdzad nas/ rab 'byor khyod byang chub sems dpa' chen po rnams la shes rab kyi pha rol tu phyin pa las brtsams te spobs pa skyed cig ces bya ba nas/ shA ri'i bu 'di ni de bzhin gshegs pa nyid byang chub sems dpa' chen po rnams la shes rab kyi pha rol tu phyin pa thabs kyis ston pa yin te/shes rab kyi pha rol tu phyin pa bstan pa ni nyan thos dang / rang sangs rgyas thams cad kyi yul ma yin no zhes bya ba la sogs pa'i bar du gsungs pa yin no/ /ci'i phyir bcom ldan 'das gzhan gyi kha nas ston par mdzad ce na/gzhan dag kyang don de thob par mdzad spyod pa nyid kyis na bdag nyid la gzung bar 'os pa ma yin pa nyid kyis nyes pa spang bar bya ba'i don du'o/ /ci'i phyir nyan thos kyi kha nas ston par mdzad ce na/ byin gyis brlabs pa la mnga' brnyes pa shes par bya ba'i don du'o//ci'i phyir gnas brtan rab 'byor gyi kha nyid nas ston par mdzad ce na/ de ni nyon mongs pa med par gnas pa'i mchog tu gyur pa nyid kyis nyon mongs pa dang bral ba'i skal ba mnyam pa lhag pa'i phyir mthong ba'i lam dang rjes su mthun pa'i stong pa nyid yin pa'i phyir ro//de ltar byas na tshe dang ldan pa rab 'byor legs so legs so/ /nyan thos nyon mongs pa med par gnas pa rnams kyi mchog tu bcom ldan 'das kyis gsungs te bstan pa 'di yang de'i tshul dang 'dra'o zhes 'og nas gsungs pa yin no//de la mthong ba'i lam skad cig ma bcu drug las sdug bsngal la chos shes pa'i bzod pa'i skad cig ma'i dbang du mdzad nas gsungs pa ni/ rab 'byor 'di lta ste/ shes rab kyi pha rol tu phyin pa dang / byang chub sems dpa' dang /de'i ming du bya ba de dag ni btags pa tsam mo/ /rab 'byor 'di lta ste/ sems can sems can zhes bya bar ming du btags pa tsam ste/ btags pa'i chos gang yin pa de la ni ming dang brda tsam du tha snyad kyis gdags pa ma gtogs par skye ba'am 'gag pa med do zhes bya ba la sogs pa yin no//sdug bsngal la chos shes pa ni btags pa'i chos gang yin pa de la ming dang brda tsam du tha snyad kyis gdags pa ma rtogs par skye ba'am 'gag pa med do zhes gang gsungs pa yin no/ /sdug bsngal la rjes su shes pa'i bzod pa ni/rab 'byor byang chub sems dpa' chen po shes rab kyi pha rol tu phyin pa la spyod pas gzugs rtag ces bya ba'am mi rtag ces bya bar yang dag par rjes su mi mthong ngo zhes bya ba nas 'khor ba zhes bya ba'am mya ngan las 'das pa zhes bya bar yang dag par rjes su mi mthong ngo zhes gang gsungs pa yin no//sdug bsngal la rjes su shes pa ni/ de ci'i phyir zhe na/ rab 'byor 'di ltar byang chub sems dpa' chen po de ni chos de dag thams cad la mi rtog rnam par mi rtog pa ste zhes bya ba la sogs pa gang gsungs pa yin no//kun 'byung la chos shes pa'i bzod pa ni/ des shes rab kyi pha rol tu phyin pa la spyod pa'i chos kyi mtshan nyid shin tu rtogs pa yin te/ chos kyi mtshan nyid gang yin pa de ni kun nas nyon mongs par mi 'gyur rnam par byang bar mi 'gyur ro zhes gang gsungs pa yin no//kun 'byung la chos shes pa ni des ming dang brda las byung ba'i chos btags par khong du chud pas gzugs la mngon par zhen par 'gyur ba med do/ /tshor ba la mngon par zhen par 'gyur ba med do zhes bya ba la sogs pa gang gsungs pa yin no//kun 'byung la rjes su shes pa'i bzod pa ni de sbyin pa'i pha rol tu phyin pa la mngon par zhen par 'gyur ba med do/ /tshul khrims kyi pha rol tu phyin pa la yang zhes bya ba nas thabs la mkhas pa la mngon par zhen par 'gyur ba med do/ / de ci'i phyir zhe na/ de ni 'di ltar gang mngon par zhen pa'am gang gis mngon par zhen pa'am/ gang la mngon par zhen pa'i chos de rnams ni yod pa ma yin pa'i phyir ro zhes bya ba'i bar du gang gsungs pa yin no/ /kun 'byung la rjes su shes pa ni de ltar spyod pa de ltar sbyin pa'i pha rol tu phyin pas rnam par 'phel lo zhes bya ba nas byang chub sems dpa'i skyon med pa la yang dag par 'jug par 'gyur ro zhes bya ba'i bar du gang gsungs pa yin no//'gog pa la chos shes pa'i bzod pa ni de ltar spyod pa de phyir mi ldog pa'i sa non par 'gyur ro zhes gang gsungs pa yin te/de byang chub sems dpa'i sa brgyad pa yin par rig par bya'o/ /'gog pa la chos shes pa ni de ltar spyod pa'i byang chub sems dpa' chen po ni mngon par shes pa rnams yongs su rdzogs par byed de/ sangs rgyas bcom ldan 'das de dag la mchod pa dang /de dag gi thad du 'gro ba dang de dag las chos kyang thos par 'gyur te zhes gang gsungs pa yin no/ /'gog pa la rjes su shes pa'i bzod pa ni rab 'byor de ji snyam du sems/ byang chub sems dpa' zhes gang brjod pa de gzugs byang chub sems dpa' yin snyam mam/gzugs ma yin pa gzhan zhig byang chub sems dpa' yin snyam mam/ byang chub sems dpa' la gzugs yod snyam mam/ gzugs la byang chub sems dpa' yod snyam mam/ gzugs med pa byang chub sems dpa' yin snyam mam/zhes bya ba la sogs pa gang gsungs pa yin te/ rnam grangs gzhan las mi len pas na gzugs la sogs pa rnams byang chub sems dpa'i dngos po yin pa bkag pa'i phyir ro/ /'gog pa la rjes su shes pa ni rab 'byor de ji snyam du sems/gzugs kyi de bzhin nyid gang yin pa de byang chub sems dpa' yin snyam mam/ gzugs kyi de bzhin nyid ma yin pa gzhan zhig byang chub sems dpa' yin snyam mam/ zhes bya ba la sogs pa snga ma bzhin du gang gsungs pa'o//lam la chos shes pa'i bzod pa ni rab 'byor de ji snyam du sems/ byang chub sems dpa' zhes bya ba 'di gzugs kyi tshig bla dgas yin snyam mam/ de bzhin du gzugs rtag pa nyid dang / mi rtag pa nyid dang / gzugs bde ba nyid dang / gzugs sdug bsngal ba nyid dang zhes bya ba nas byang chub sems dpa' zhes bya ba 'di gzugs smon pa nyid dang gzugs smon pa med pa nyid kyi tshig bla dgas yin snyam mam zhes bya ba'i bar du gang gsungs pa yin no//lam la chos shes pa ni rab 'byor chos kyis chos kyi dbyings yang dag par rjes su mi mthong ngo //chos kyi dbyings kyis chos yang dag par rjes su mi mthong ngo zhes gang gsungs pa yin no / /de la dang po ni sgrub pa'i chos te lam mo/ /gnyis pa ni 'bras bu'i chos te mya ngan las 'das pa'o/ /de gnyis kyang gcig gis gcig mthong ba bkag pa yin te/rang bzhin gyis bems po yin pa'i phyir ro/ /lam la rjes su shes pa'i bzod pa ni rab 'byor gzugs kyi dbyings kyis chos kyi dbyings yang dag par rjes su mi mthong ngo / /chos kyi dbyings kyis gzugs kyi dbyings yang dag par rjes su mi mthong ngo //de bzhin du tshor ba'i dbyings dang chos kyi dbyings nas rnam par shes pa'i dbyings dang chos kyi dbyings dag gi bar dang / de bzhin du mig gi dbyings dang chos kyi dbyings nas/ yid kyi dbyings dang chos kyi dbyings dag phan tshun mthong ba bkag pa gang gsungs pa yin no//snga ma ni sgrub pa'i mdor bsdus pa brjod par 'dod pa yin la/ da lta ni so so ba yin no/ /lam la rjes su shes pa ni rab 'byor 'dus byas kyi dbyings kyis 'dus ma byas kyi dbyings yang dag par rjes su mi mthong ngo / /'dus ma byas kyi chos kyi dbyings kyis 'dus byas kyi dbyings yang dag par rjes su mi mthong ngo zhes gang gsungs pa ste/'di ltar 'dus byas dang 'dus ma byas kyi khams 'khor ba dang mya ngan las 'das par bshad pa dag gcig gis gcig mthong ba dag bkag pa lam la rjes su shes pa 'khor ba dang mya ngan las 'das pa mnyam pa nyid kyi yul can du ston pa yin no//mthong ba'i lam la gdams pa bshad zin to// //sgom pa'i lam la gdams pa'i dbang du mdzad nas/ rab 'byor 'dus byas kyi dbyings med par 'dus ma byas kyi dbyings gdags par mi nus so//'dus ma byas kyi dbyings med par yang 'dus byas kyi dbyings gdags par mi nus so/ /zhes gang gsungs pa yin te/ de la 'dus byas ni lam mo/ /'dus ma byas ni spangs pa ste/ de gnyis phan tshun tha dad par gdags par mi nus pa nyid kyis na sgom pa'i lam rnam par gzhag pa ni btags pa yin gyi/mtshan nyid pa ni ma yin te/ ji ltar mthong ba'i dngos po la mngon par phyogs par byed pas dngos po tha dad pa med pa'i phyir ro zhes ston pa yin no/ /de ltar byas na shes rab kyi pha rol tu phyin pa sgrub pa gang yin pa mi dmigs pa'i rnam pa dang /dmigs pa gang yin pa 'phags pa'i bden pa bzhi dang / rten gang yin pa skyabs gsum dang / khyad par du 'gro ba'i rgyu gang yin pa ma chags pa dang / mi ldog par 'gro ba'i rgyu gang yin pa yongs su mi ngal ba dang / theg pa gzhan gyis mi 'gro ba'i rgyu gang yin pa lam yongs su 'dzin pa dang /gzhan gyi dring mi 'jog par 'gro ba'i rgyu gang yin pa spyan lnga dang / rnam pa thams cad mkhyen pa nyid yongs su rdzogs pa'i rgyu gang yin pa mngon par shes pa drug dang / sgrub pa mthar thug pa'i rgyu gang yin pa mthong ba dang sgom pa'i lam dag ste de dag thams cad gdams ngag gi gnas su bstan par rig par bya'o//de nas 'di ni byang chub sems dpa' chen po la shes rab kyi pha rol tu phyin par gdams pa ste/ 'di ni rjes su bstan pa yin no/ /zhes gsungs pa yin no//gdams ngag bshad zin to// //nges par 'byed pa'i cha dang mthun pa rnams brjod par bya'o/ /'di dag la brjod par bya ba ci yod ce na/ nyan thos la sogs pa las khyad par rnam pa bzhi brjod par bya ba yin te/ dmigs pa'i khyad par dang /rnam pa'i khyad par dang / rgyu'i khyad par dang / yongs su 'dzin pa'i khyad par ro/ /'chad par 'gyur ba gzung ba dang 'dzin pa'i rnam par rtog pa mthong ba'i lam gyi spang bar bya ba bzhi rnams kyis rnam par rtog pa dang yang dag par lhag pa yang brjod par bya ba yin no//nges par 'byed pa'i cha dang mthun pa gang la rnam par rtog pa gang rnam par gzhag par bya ba dang / 'di dag gi chung ngu dang 'bring dang chen po'i dbye ba yang so sor brjod dgos so zhe na/ de'i phyir tshigs su bcad pa gnyis po 'di nye bar bkod de/dmigs pa dang ni rnam pa dang / /rgyu dang yongs su 'dzin pa yis/ /byang chub sems dpa' skyob pa yi/ /drod sogs bdag nyid ji bzhin du/ /rnam rtog bzhi po ldan bsten pa/ /chung dang 'bring dang chen po rnams/ /nyan thos bse ru lta bu dang / bcas pa dag las khyad par 'phags/ /zhes bya ba'o/ /de ltar gdams ngag dang rjes su bstan pa'i sbyor ba dang ldan pa'i thos pa dang bsam pa goms pas dad pa la sogs pa'i mtshan nyid thar pa'i cha dang mthun pa'i dge ba'i rtsa ba phul du phyin pa thob pa las dro bar gyur pa zhes bya ba las byung ba nges par 'byed pa'i cha dang mthun pa'i dge ba'i rtsa ba skye ste/rnam par mi rtog pa'i me'i sngon du 'gro ba'i rang bzhin yin pa'i phyir dro bar gyur pa dang 'dra bas dro bar gyur pa yin no/ /de las ni rtse mor gyur pa'o/ /de las ni bzod par gyur pa'o//de las ni 'jig rten pa'i chos kyi mchog go/ /gang gi phyir dro bar gyur pa chung ngu'i dbang du mdzad nas dmigs pa'i khyad par ni 'phags pa'i bden pa bzhi po rnams mi rtag pa la sogs pa'i rnam pa la dmigs pa'i phyir ro/ /rnam pa'i khyad par ni sdug bsngal dang kun 'byung gi bden pa gang gi mngon par ma zhen pa la sogs pa'i rnam pa can yin pa'i phyir ro//'di'i mdo ni/ shA ri'i bu byang chub sems dpa' chen po'i gzugs mi rtag ces bya ba dang / gzugs sdug bsngal zhes bya ba dang / gzugs stong zhes bya ba dang /gzugs bdag med ces bya ba dang / yang gzugs stong zhes bya ba dang / gzugs smon pa med ces bya bar mngon par zhen pa dang / lhag par gnas pa dang / kun shes pa 'di ni/ shA ri'i bu byang chub sems dpa' chen po'i mthun pa'i chos la sred pas te skyon du gyur pa'o zhes bya ba la sogs pa gang gsungs pa yin no//'di ni re zhig sdug bsngal gyi bden par gtogs pa'i dmigs pa dang rnam pa'i khyad par ro/ /kun 'byung gi bden par gtogs pa'i dmigs pa dang rnam pa'i khyad par ni/ de bzhin du gzugs 'di spang bar bya'o zhes 'dis gzugs spang bar bya'o zhes mngon par zhen pa dang zhes bya ba la sogs pa gang gsungs pa yin no//de la sdug bsngal dang kun 'byung gi bden pa la mi rtag pa la sogs pa nyid du dmigs shing mngon par zhen pa med pa la sogs pa rnams kyi rnam par byed do//ci zhig brjod par 'gyur zhe na/ nyan thos rnams ni gzugs la sogs pa'i mtshan nyid kyis dngos po la dmigs shing mi rtag pa la sogs pa rnam par 'gyur te/ bdag tu lta ba'i gnyen po yin pa'i phyir ro/ / byang chub sems dpa' rnams ni mi rtag pa la sogs pa'i mtshan nyid kyi dngos po la dmigs shing de'i mngon par zhen pa med pa la sogs pa'i rnam par 'gyur te/ chos su lta ba'i gnyen po yin pa'i phyir/ 'dir mtshan ma med pa ma smos pa ni 'jug pa'i phyogs kyi dbang du byas nas bden pa gnyis brjod par 'dod pa'i phyir ro//mtshan ma med pa'i theg pa chen po la 'gog pa dang / lam gyi bden pa'i rnam pa yin pa'i phyir te/ mtshan ma med pa gang yin pa dang / lam gang gis rnam par rtog pa'i mtshan ma sel ba zhes bya bas so//zhi ba'i rnam pa rnams kyis mtshan ma med pa'o zhes gsungs pa gang yin pa de ni dngos po'i mtshan ma dang rjes su 'brel ba nyan thos kyi lam gyi dbang du byas pa yin pa'i phyir de dang 'gal ba med do/ /rnam pa mngon par zhen pa med pa la sogs pa yin no zhes gang gsungs pa yin/'di dpyad par bya ste/ gal te re zhig mngon par zhen pa med pa tsam mngon par zhen pa med pa yin na/ de lta ni med pa'i phyir gnyen por mi rigs so/ /'on te gang mngon par zhen pa ma yin pa yin na ni mig la sogs pa yin par thal bar 'gyur ro zhe na/ji ltar mi mthun pa yin pa de ltar ni mngon par zhen pa yin la/ ji ltar gnyen po yin pa de ltar ni mngon par zhen pa ma yin pa yin no/ /yang ji ltar na mi mthun pa yin zhe na/ ji ltar mi bden pa'i rtog pas kun du bslang ba'i yod pa dang med par 'dzin pa'o//ji ltar na gnyen po yin zhe na/ ji ltar de dag med pa'o/ /yang ji ltar na de dag med pa yin zhe na/ ji ltar de ma thag tu 'chad par 'gyur ba bzhin te/ tshe dang ldan pa shA ri'i bu gal te sems med pa de la yod pa nyid dam med pa nyid med pa'am mi dmigs pa yin na/'o na sems med pa'i sems gang yin pa de yod dam zhes brgal ba de rigs par 'gyur ram zhes bya'o/ /'dis ni lhag par mi gnas pa dang kun du mi shes pa zhes bya ba la yang brjod pa yin no//'gog pa dang lam gyi bden pa dag gi dbang du byas nas dro bar gyur pa'i dmigs pa dang rnam pa'i khyad par dag gi dbang du byas te gsungs pa ni 'gog pa 'di ltar mngon du bya'o/ /'dis 'gog pa mngon du bya'o/ /lam 'di ltar bsgom par bya'o/ / zhes mngon par zhen pa med cing zhes bya ba la sogs pa'o/ /de la 'di ltar zhes bya bas ni bden pa bzhi la de'i rnam pa bzhi bzhi gsungs pa yin la/ 'dis zhes bya ba ni de'i tshogs su gyur pa byang chub kyi phyogs rnams gsungs pa yin no/ /'dir 'gog pa dang lam dag ni rnam par thar pa'i sgo mtshan ma med pa yin par brjod de /mtshan ma rnam pa gsum ste/ kun nas nyon mongs pa dang rnam par byang ba'i chos rnams la brten par bya ba dang / brten par bya ba ma yin par mngon par zhen pa'i mtshan ma dang / spyad par bya ba dang spyad par bya ba ma yin pa rnams la slob pa dang mi slob pa'i gzhi lhag par gnas pa'i mtshan ma dang /sbyin pa la sogs pa pha rol tu phyin pa rnams dang / de pha rol tu phyin pa ma yin pa la sogs pa rnams la thabs la mkhas pa dang thabs la mkhas pa ma yin pa kun shes pa'i mtshan ma'o//'di dag las bzlog pa mtshan ma med pa bstan pa'i don du gsungs pa ni/ 'di ni kun nas nyon mongs pa'o/ /'di ni rnam par byang ba'o/ /chos 'di dag ni bsten par bya ba'o/ /chos 'di dag ni bsten par mi bya'o zhes bya ba nas 'di ni thabs la mkhas pa'o//'di ni thabs la mkhas pa ma yin pa'o/ /zhes mngon par zhen pa dang lhag par gnas pa dang kun shes pa 'di ni byang chub sems dpa' chen po'i rjes su mthun pa'i chos la sred pa ste skyon du 'gyur ba'o zhes bya ba la sogs pa'i bar yin no/ /rjes su mthun pa nyid rtogs pa'i chos la sred pa yin no/rjes su mthun pa zhes bya ba lugs su 'jug pa'i chos la srid pa'o/ skyon zhes bya ba ni nyon mongs pa zhes bya ba'i tha tshig go/ /rtogs pa'i chos kyi rjes su mthun pa'i sred pa gang yin pa de ni byang chub sems dpa'i rtse mo'i skyon chen po yin par brjod de/de'i dbang du mdzad nas/ tshe dang ldan pa shA ri'i bu byang chub sems dpa' chen po thabs mi mkhas pas pha rol tu phyin pa drug la spyod cing rnam par thar pa'i sgo gsum la brten nas/ nyan thos dang / rang sangs rgyas kyi sar yang mi ltung la byang chub sems dpa'i skyon med pa la yang mi 'jug pa 'di ni byang chub sems dpa'i rtse mo'i skyon chen po yin no zhes gang gsungs pa yin no//yang byang chub sems dpa'i skyon med pa gang yin snyam na/ phyi stong pa nyid la nang stong pa nyid du mi mthong zhes bya ba nas brtsams te/de rnams so so la stong pa nyid rnam pa thams cad du mthong ba phan tshun bkag pas gsungs pa yin te/ 'dis ni rang gi ngo bo'i mtshan ma nub pa'i phyir 'gog pa mtshan ma med par ston pa yin no/ / 'dir lam yang mtshan ma med pa yin no/ /zhes gsungs pa ni de ltar slob pas ni gzugs shes par bya ste/ des kyang rlom sems su mi bya'o zhes bya ba nas/ sangs rgyas kyi chos ma 'dres pa bco brgyad shes par bya ste/ des kyang rlom sems su mi bya'o zhes bya ba'i bar dang byang chub kyi sems shes par bya ste/des kyang rlom sems su mi bya'o zhes bya ba'i bar yin no/ /'dis ni rlom pa'i mtshan ma med pas mtshan ma med pa'i lam yin no zhes lam gyi bden pa'i dmigs pa'i khyad par bstan pa yin no/ /gzings lta bu yin pa'i phyir de yang dor bar bya ba ma yin nam zhe na/de ci'i phyir zhe na/ 'di ltar sems de ni sems ma yin te/ sems kyi rang bzhin ni 'od gsal ba'i phyir ro zhes gsungs pa yin no/ /sems kyi rang bzhin 'od gsal ba 'di gang zhig yin zhe na/ tshe dang ldan pa shA ri'i bu sems gang 'dod chags dang zhes bya ba nas/nyan thos dang / rang sangs rgyas kyi sems dang ldan pa dang bral ba ma yin pa de ni zhes bya ba la sogs pa gsungs pa yin no/ /yod pa tsam dang rjes su 'brel bar bsams nas smras pa ni/ tshe dang ldan pa rab 'byor sems gang zhig sems ma yin pa zhes bya ba'i sems de yod dam zhes bya ba yin no//yod pa tsam du btags pa'ang mi bzod pas smras pa ni/ tshe dang ldan pa shA ri'i bu sems med pa gang yin pa de la yod pa nyid dam/ med pa nyid yod pa'am/ dmigs par 'gyur ram zhes bya ba ste/de'i brgal ba mi rigs pa nyid kyis so/ /'o na sems med pa de gang yin zhe na/ tshe dang ldan pa shA ri'i bu sems med pa ni 'gyur ba med pa rnam par rtog pa med pa'o zhes bya ba nas brtsams te/ chos thams cad 'gyur ba med pa rnam par rtog pa med pa nyid kyis sems med pa'i chos nyid rnam grangs bstan pa'i don du gsungs pa yin no//bden pa bzhi'i dmigs pa dang rnam pa'i khyad par bshad zin to// //drod kyi rgyu'i khyad par gyi dbang du mdzad nas/ de ci'i phyir zhe na/ zhes bya ba la sogs pa gsungs pa yin no/ /de lta bu'i mtshan nyid can gyi dro bar gyur pa gang gi rgyur gyur pa yin zhe na/ 'di ltar shes rab kyi pha rol tu phyin pa 'di las gang la byang chub sems dpa' chen po rnams dang / nyan thos dang rang sangs rgyas rnams kyis rtag tu rgyun mi 'chad par bslab par bya ba'i theg pa gsum rgya cher bstan to zhes bya bas de lta bu'i mtshan nyid can gyi drod theg pa gsum ka rtogs pa'i rgyu yin par gsungs pa yin no//yongs su 'dzin pa'i khyad par ni thabs mkhas pa dang dge ba'i bshes gnyen gyi mtshan nyid yin no//rnam par rtog pa dang yang dag par ldan pa ni phyis 'chad par 'gyur te/ 'di ni re zhig dro bar gyur pa chung ngu yin no/ /'bring ni bcom ldan 'das bdag gis gzugs kyi 'phel ba dang 'grib pa ma dmigs yang dag par rjes su ma mthong zhes bya ba nas brtsams te/sangs rgyas thams cad dang chos thams cad kyi de bzhin nyid kyi 'phel ba dang 'grib pa ma dmigs yang dag par rjes su ma mthong na zhes bya ba'i bar gyis ni dmigs pa'i khyad par gsungs pa yin no/ /ming thams cad med pa nyid kyis gnas nyid dang gnas pa dang bral ba med pas zhes bya ba ni rnam pa'i khyad par ro//de la nyon mongs pa dang bral bas rnam par dben pa'o/ /dngos po 'gag pas na zhi ba'o/ /rang nyid ma skyes pa nyid kyis na skye ba med pa'o/ /pha rol gyi mu med pa nyid kyis na rtogs par dka' ba'i phyir 'byung ba med pa'o//'phags pa'i gang zag rnams kyi sngon ldan par gyur pa'i ma byang ba dang bral ba'i phyir kun nas nyon mongs pa med pa'o/ /sems can dmigs su med pas na rnam par byang ba med pa'o/ /'phags pa'i chos rnams kyi rgyur gyur pas chos kyi dbyings so//gzhan du 'gyur ba nyid med pas de bzhin nyid de / phyin ci ma log pa'i mthar thug pas na yang dag pa'i mtha'o/ /'phags pa thams cad kyis ma mdzad pas na chos gnas pa nyid de/ de rnams kyi 'phel ba dang 'grib pa'o//de la 'phel ba ni skye ba'o/ /'grib pa ni 'gag pa'o/ /mi dmigs yang dag par rjes su mi mthong zhes bya ba'i tshig gnyis ni dmigs su med pa'i rnam par bsgom pa lhag par mos pa dmigs pa'i yid la byed pa dang / de kho na nyid mthong ba'i yid la byed pa'i dbang du mdzad pa yin par shes par bya'o//gang yang bcom ldan 'das de'i ming de'ang gnas pa ma mchis/ gnas pa dang bral ba ma mchis lags so/ /de ci'i slad du zhe na/ ming de ma mchis pas zhes bya ba de la gnas pa ni rgyun 'dra ba'o//gnas pa dang bral ba ni rgyun mi 'dra ba'o/ /chen po bcom ldan 'das 'di lta ste/ byang chub sems dpa' zhes chos kyi brdar btags pa dang / chos su gdags pa gang lags pa de'ang zhes bya ba nas/ rgya cher sangs rgyas zhes bgyi ba'i ming dang sangs rgyas kyi chos rnams zhes bgyi ba'i ming de yang dge ba'am mi dge ba 'am zhes pa nas dngos po 'am dngos po med pa gang gis kyang brjod du ma mchis so//'di lta ste/ dper na/ rmi lam zhes bgyi ba nas sprul pa zhes bgyi ba'i bar gyi ming ni gang gis kyang brjod du ma mchis so zhes bya ba nas byang chub sems dpa' chen po de ltar spyod pa ni sems zhum par mi 'gyur 'gyod pa ma mchis la/mi 'jigs mi dngang skrag par mi 'gyur na rnam pa thams cad mkhyen pa nyid du nges par 'byung ba lags so zhes bya ba'i bar rgyas par gsungs pa yin no//thar pa'i cha dang mthun pa las 'di khyad ci yod ce na/ bar chad med na mthong ba'i lam dang shin tu nye ba nyid do/ /dro bar gyur pa zhes gyur pa brjod pa ni chung ngu dang 'bring dang chen po'i rigs shes par bya ba'i don nam/ yang na dbang po rtul po la sogs pa'i gang zag gi dbye ba yang 'di'i dmigs pa la sogs pa rnams kyi khyad par shes par bya ba'i don to//rtse mor gyur pa la yang de bzhin du brjod par bya'o/ /dro bar gyur pa ni bden pa bzhi la dmigs pa rnam pa bcu drug dang ldan pa yin la/ drod las ni rtse mor yin zhing de dag kyang de 'dra bar 'gyur ba yin no zhes bya ba la sogs pa bshad pa gang yin pa de ji ltar yin zhe na/do shal gtsug lag khang dang mtshan nyid 'dra'am 'di ni 'jug pa gzhan kho na yin no/ /dro bar gyur pa bshad zin to// //rtse mo bshad par bya ste/de rnams kyi rgyu nyid dang / yongs su 'dzin pa'i khyad par dang / rnam par rtog pa dang yang dag par ldan pa yang snga ma bzhin du shes par bya'o/ /rtse mo rnams la ji lta ba de bzhin du bzod pa rnams dang 'jig rten pa'i chos kyi mchog rnams la yang yin no/ /de la rtse mo'i dmigs pa'i khyad par gyi dbang du mdzad nas/bcom ldan 'das gzhan yang byang chub sems dpa' chen po shes rab kyi pha rol tu phyin pa la spyod pa'i tshe/ des gzugs la gnas par mi bgyi'o zhes bya ba nas brtsams te/ chos thams cad la gnas pa bkag pa dang /de ci'i slad du zhe na/ bcom ldan 'das de ni 'di ltar gzugs gzugs kyis stong ste zhes bya ba nas brtsams te/ chos rnams kyi de'i dngos po bkag pas gsungs pa yin no/ /rnam pa'i khyad par gyi dbang du mdzad nas gzugs kyi stong pa nyid gang lags pa de yang gzugs ma lags/stong pa nyid las gzhan na'ang gzugs ma mchis zhes bya ba chos rnams dang de'i stong pa nyid phan tshun de'i bdag nyid kyi rnam pa'i khyad par can dang / de ci'i slad du zhe na/ gzugs nyid kyang stong pa nyid stong pa nyid kyang gzugs so zhes bya bas chos rnams dang de'i stong pa nyid phan tshun gyi rang bzhin du 'dod pas gsungs pa yin te/de la snga mas ni rtag pa'i mtha' bkag pa yin la/ cig shos kyis ni chad pa'i mtha' bkag pa yin no/ /bden pa bzhi'i dbang du mdzad nas sdug bsngal gyi bden pa'i skabs su gnas pa med pa'i dmigs pa'i khyad par ni/bcom ldan 'das gzhan yang byang chub sems dpa' chen po shes rab kyi pha rol tu phyin pa la spyod pa'i tshe/ des gzugs la mi rtag ces bgyi bar gnas par mi bgyi'o zhes bya ba nas/ gzugs la zhi ba'o zhes bgyi bar gnas par mi bgyi'o zhes bya ba'i bar du rgyas par te/de ci'i slad du zhe na/ bcom ldan 'das de ni 'di ltar gzugs mi rtag pa ni gzugs mi rtag pa nyid kyis stong ste zhes gsungs pa yin no/ /de la gnas pa ni dngos po la dmigs pa'i sems kyis brten pa'o//'dir spyad par bya ste/ gal te re zhig gnas med pa tsam gnas par mi bya ba yin na ni med pa yin pa'i phyir gnyen por mi rigs so/ /'on te gang gnas ma yin pa yin na de lta ni thal ches pa yin no zhe na/ mngon par zhen pa med pa la tshul ji ltar bshad pa de ltar 'di yang blta bar bya'o//rnam pa'i khyad par ni bcom ldan 'das mi rtag pa nyid kyi stong pa nyid gang lags pa de'ang mi rtag pa nyid ma lags/ mi rtag pa las gud na yang stong pa nyid ma mchis te/ zhes bya bas mi rtag pa nyid la sogs pa rnams dang de'i stong pa nyid phan tshun de'i bdag nyid kyi rnam pa'i khyad par can dang /de ci'i slad du zhe na/ bcom ldan 'das de ni 'di ltar mi rtag pa nyid kyang stong pa nyid stong pa nyid kyang mi rtag pa nyid do zhes bya bas de dag phan tshun rang bzhin gcig 'dod pas gang gsungs pa yin no//de la mi rtag pa'i don ni med pa'i don dang sdug bsngal ba'i don ni ma skyes pa'i don yin pa des na mi rtag pa nyid dang sdug bsngal ba nyid dang stong pa nyid ni phan tshun gyi rang bzhin can yin no/ /de lta ma yin na ni/ 'dus byas kyi chos kyi spyi'i mtshan nyid ni mi rtag pa nyid yin la/zag pa dang bcas pa spyi'i mtshan nyid ni sdug bsngal ba nyid yin pa des na chos thams cad kyi spyi'i mtshan nyid de gnyis dang stong pa nyid phan tshun khyab par gsal bar 'gyur ro/ /yang na mi rtag pa nyid kun brtags pa'i dngos po ni mi rtag pa kho na yin la sdug bsngal ba nyid kyang sdug bsngal ba kho na yin te/dngos po dang stong pa nyid gnyis kyang phan tshun khyab par 'dod pa nyid yin pas nyes pa med do/ /de bzhin du kun 'byung gi bden pa'i dbang du byas nas de'i rnam pa rgyu dang / kun 'byung ba dang / rab tu skye ba dang / rkyen la brten pa'i dmigs pa dang rnam pa'i khyad par dag brjod par bya'o/ /'gog pa'i bden pa'i dbang du byas nas dmigs pa'i khyad par de bzhin nyid la sogs pa la mi gnas pa ni shes rab kyi pha rol tu phyin pa la spyod pa des de bzhin nyid la gnas par mi bgyi ste zhes bya ba nas yang dag pa'i mtha' la gnas par mi bgyi ste/de ci'i slad du zhe na/ bcom ldan 'das de ni 'di ltar de bzhin nyid ni de bzhin nyid kyi ngo bo nyid kyis stong ste zhes bya ba la sogs pa gang gsungs pa yin no/ /de la dngos po dang bral ba'i de bzhin nyid la bsams nas ngo bo nyid kyis stong pa yin par shes par bya ste/dngos po yod na der btags pa'i phyir ro/ /rnam pa'i khyad par ni bcom ldan 'das de bzhin nyid kyi stong pa nyid gang lags pa de'ang de bzhin nyid ma lags so zhes bya ba la sogs pa dang / de ci'i slad du zhe na/ bcom ldan 'das 'di ltar de bzhin nyid stong pa nyid dang stong pa nyid de bzhin nyid do zhes bya ba la sogs pa gang gsungs pa yin no//de la de bzhin nyid kyi stong pa nyid gang yin pa de ni de bzhin nyid ma yin no zhes bya ba ni bral ba'i de bzhin nyid ni brtags pa nyid yin pa'i phyir ro/ /de bzhin nyid las gzhan na'ang stong pa nyid ma mchis te zhes bya ba ni btags pa don dam par stong pa nyid yin pa'i phyir ro//de la gzhan du mi 'gyur ba'i don gyis na de bzhin nyid do/ /de lta bas byas pa'i gnyen po'i don gyis na stong pa nyid do/ /dbyer mi phyed pa'i don gyis na chos nyid do//chos kyi dbyings ni snga ma dang 'dra'o/ /gcig tu nges par 'byung ba'i don gyis na chos nges pa nyid do/ /yang dag pa'i mtha' ni snga ma bzhin no/ /lam gyi bden pa'i dbang du mdzad nas gnas pa med pa dang mngon par 'du bya ba med pa'i don gyis dmigs pa'i khyad par ni bcom ldan 'das gal te gzugs la gnas na de gzugs mngon par 'du bgyi ba la spyod kyi/shes rab kyi pha rol tu phyin pa la mi spyod do zhes bya ba nas brtsams te/ de ci'i slad du zhe na/ mngon par 'du bgyi ba la spyod pa'i byang chub sems dpa' chen po ni shes rab kyi pha rol tu phyin pas yongs su zin par mi 'gyur zhes bya ba la sogs pa gang gsungs pa yin no//rnam pa'i khyad par ni/ de ci'i slad du zhe na/ bcom ldan 'das 'di ltar gzugs ni yongs su gzung ba ma mchis pa ste/ gzugs kyi yongs su gzung ba ma mchis pa gang lags pa de 'ang rang bzhin gyis stong pa'i slad du gzugs ma lags zhes zhes bya bas gzugs la sogs pa yongs su ma bzung ba la de'i ngo bo bkag pas gang gsungs pa yin no//'di ni byang chub sems dpa' chen po'i ting nge 'dzin gyi dkyil 'khor chos thams cad yongs su ma bzung ba zhes bgyi ba ste zhes bya ba ni rtse mor gyur pa'o//de'ang ting nge 'dzin gyi tshogs gzhan dang gzhan thob par byed pas dkyil 'khor yangs pa zhes bya ba ni chos kyi dbyings yangs pa'o/ /mdun du byas pas zhes bya ba ni dmigs pa dang rnam pa'i khyad par dag gis mdun du gnas par 'gyur ro//tshad med par nges pa zhes bya ba ni rnam pa thams cad mkhyen pa nyid du so sor nges pa'i phyir ro/ /nyan thos dang rang sangs rgyas thams cad kyis mi 'phrogs pa zhes bya ba ni ji skad du bshad pa'i dmigs pa dang / rnam pa dang / rgyu dang / yongs su 'dzin pa'i khyad par gyis so/ /chos thams cad yongs su ma bzung ba zhes bya ba ni bcom ldan 'das rnam pa thams cad mkhyen pa nyid de'ang nang stong pa nyid la sogs pa'i slad du yongs su gzung ba ma mchis pa'o zhes de ma thag tu ji skad gsungs pa yin no//de ni re zhig rtse mor gyur pa chung ngu yin no/ /'bring po ni de ci'i slad du zhe na/ bcom ldan 'das 'di ltar rnam pa thams cad mkhyen pa nyid mtshan ma gzung bar bgyi ba ma lags te/ mtshan ma las ni nyon mongs pa 'byung ngo / /mtshan ma de dag kyang gang zhe na/gzugs ni mtshan ma'o/ /tshor ba ni mtshan ma'o zhes bya ba la sogs pa gang gsungs pa yin no/ /de la gzugs kyi mtshan nyid gzugs kyi mtshan ma zhes bya ste/ de'ang mi rtag pa nyid la sogs pa'o/ /'di gang la zhe na/ gang gi phyir gang gi tshe mi rtag pa'am rtag pa zhes gzugs kyi mtshan ma la spyod pa na/shes rab kyi pha rol tu phyin pa la spyod pa ma lags so zhes 'chad par 'gyur ba'i phyir ro/ /mtshan ma ni byang chub sems dpa' rnams kyi nyon mongs pa yin pas mtshan ma med pa ni dmigs pa'i khyad par yin te/gal te yang shes rab kyi pha rol tu phyin pa mtshan mar gzung ba zhig lags na ni kun tu rgyu phreng ba can bstan pa 'di la dad pa thob par mi 'gyur ro zhes bya ba nas brtsams te/ des chos 'ga' yang yongs su ma bzung ste mtshan ma med pa yid la byed pa'i slad du'o zhes bya ba'i bar du gang gsungs pa yin no//rnam pa'i khyad par ni 'di ltar des ye shes de rtogs pa dang thob par bgyi ba'i tshul gyis nang du yang dag par rjes su ma mthong zhes bya ba nas brtsams te/ nang la sogs pa la ye shes de mthong ba bkag pa'i rnam grangs gzhan 'dod pa'i rnam pa'i khyad par dang //de ci'i slad du zhe na/ chos thams cad gzung du ma mchis pa dang btang du ma mchis pa gang lags pa de ni shes rab kyi pha rol tu phyin pa lags so zhes bya ba'i 'thad pas gang gsungs pa yin no/ /de la phreng ba can dper byas pa ni de mu stegs pa dang 'brel pas na ma dad pa yin yang rtogs pa'i stobs 'ba' zhig kho nas don de mngon du byas pa la dbang nyid du shes par bya ba'i don du'o//chen po ni bcom ldan 'das gzhan yang byang chub sems dpa' chen po shes rab kyi pha rol tu phyin pa la spyod pa des 'di ltar shes rab kyi pha rol tu phyin pa 'dis ci zhig ste/gzugs la sogs pa'i phung po dang khams dang skye mched rnams kyi zhes bya ba'i don to/ /shes rab kyi pha rol tu phyin pa 'di gang gi ste/ bdag gam chos kyi yin zhes bya ba'i don to/ /shes rab kyi pha rol tu phyin pa 'di ni gang gi yin te/rdzas sam yon tan ni bya ba'am rigs yin zhes bya ba'i don te/ de ltar shes rab kyi pha rol tu phyin pa la yongs su brtag par bgyi ste zhes bya ba dang / ci chos gang zhig yod pa ma yin zhing mi dmigs pa de shes rab kyi pha rol tu phyin pa yin nam zhes bya ba nas brtsams te/thams cad mi dmigs par de'i rang bzhin nye bar brtag pa'i khyad par can dmigs pa nyid du gsungs pa yin no/ /rnam pa'i khyad par ni/ tshe dang ldan pa shA ri'i bu nang stong pa nyid la sogs pa nyid kyi phyir gzugs med cing mi dmigs so zhes bya ba nas brtsams te/nang stong pa nyid la sogs pa'i phyir rnam pa thams cad mkhyen pa nyid kyi bar du med cing mi dmigs so/ /byang chub sems dpa' chen po ni 'di ltar rtog cing sems pa'i tshe/ sems zhum pa med cing mi 'jigs mi dngang skrag par mi 'gyur na/shes rab kyi pha rol tu phyin pa dang ma bral bar shes par bya'o zhes gsungs pa yin no/ /dge ba'i rtsa ba g.yo ba'i rtse mor phyin pas na rtse mo'o/ /rtse mor gyur pa bshad zin to// //chos thams cad ngo bo nyid med pa la dmigs pa nyid kyis bzod pa'i dmigs pa'i khyad par ni/tshe dang ldan pa shA ri'i bu gzugs ni gzugs kyi rang bzhin dang bral ba ste zhes bya ba nas brtsams te/ de ci'i slad du zhe na/ tshe dang ldan pa shA ri'i bu gzugs kyi rang bzhin ni dngos po med pa'o//zhes bya ba la sogs pa'i bar du gang gsungs pa yin no/ /mtshan nyid kyi rang bzhin dang rang bzhin gyi mtshan nyid dag ni phan tshun de'i bdag nyid du gyur pa nyid kyis rnam pa'i khyad par ni/ tshe dang ldan pa shA ri'i bu mtshan nyid la'ang mtshan nyid kyis rang bzhin med/mtshan nyid kyi rang bzhin la'ang mtshan nyid med do zhes gsungs pa yin te/ de la mtshan nyid ni spyi yin la/ rang bzhin ni khyad par gzhan yin te/ de dag ngo bo nyid phan tshun ldog par gyur na ni 'brel pa med pa'i phyir 'ga' 'ang 'ga' zhig gi mtshan nyid du mi 'gyur ro/ / phan tshun rjes su zhugs pa yin na ni btags pa'i mtshan nyid gzhi dang mtshan nyid rnam par gzhag pa 'thad pa yin no/ /'di ni re zhig bzod pa chung ngu'o/ /'bring gi dmigs pa'i khyad par ni chos thams cad skye ba med pa dang / nges par 'byung ba med pa ni ci'i phyir zhe na/tshe dang ldan pa shA ri'i bu de ni 'di ltar chos thams cad skye ba med pa dang nges par 'byung ba med pa'i phyir ro zhes bya ba dang / gzugs gzugs kyis stong ste/ de la skye ba yang mi dmigs/ nges par 'byung ba yang mi dmigs so zhes bya ba la sogs pa gang gsungs pa yin no//rnam par smin pa las byung ba'i rnam par dag pa thob pa nyid yin pas na rnam pa'i khyad par ni byang chub sems dpa' chen po de 'dod chags dang ldan pa'i sems mi bskyed do zhes bya ba nas brtsams te/ nyon mongs pa thams cad dang ldan pa'i sems mi bskyed pa'i phyir lus la sogs pa yongs su dag pa thob pa dang /rdzus te skya zhing gzhan du 'gro ba dang / de yongs su skye ba dang / sems can yongs su smin par byed pas yang dag par rdzogs pa'i byang chub kyi bar du sangs rgyas dang mi 'bral ba nyid kyis gang gsungs pa yin no/ / rnam par dag pa de yang yang dag par 'da' bas bsdus pa rnam pa gsum ste/ rnam par smin pa las yang dag par 'da' ba ni de ji lta ji ltar rnam pa thams cad mkhyen pa nyid du nye bar gyur pa de lta de ltar lus yongs su dag pa dang / ngag yongs su dag pa dang / sems yongs su dag pa dang /mtshan yongs su dag pa thob par 'gyur ro zhes gsungs pa yin no/ ngan 'gro'i rgyu las yang dag par 'da' ba ni 'dod chags dang ldan pa'i sems mi bskyed do zhes bya ba la sogs pa gang gsungs pa yin no/ /yongs su nyams pa las yang dag par 'da' ba ni nam yang ma'i mngal du skye bar mi 'gyur te/rtag tu rgyun mi 'chad par rdzus te skye bar 'gyur zhes bya ba la sogs pa yin no/ /chen po'i dmigs pa'i khyad par chos thams cad mtshan ma med pa la sbyor ba ni/ gal te gzugs rtag ces bya bar spyod na mtshan ma nyid la spyod kyi zhes bya ba nas brtsams te/'di snyam du bdag ni shes rab kyi pha rol tu phyin pa la spyod do zhes bgyi bar spyod na dmigs pa la spyod pa ste/ de ni byang chub sems dpa' chen po'i thabs mi mkhas par rig par bgyi'o zhes gang gsungs pa yin no//chos thams cad la gnas pa med pa dang lhag par mos pa med pa dang / 'du shes med pa'i rnam pa nyid kyis rnam pa'i khyad par ni/ de shes rab kyi pha rol tu phyin pa la spyod pa na gzugs la gnas pa med pa dang / lhag par mos pa med pa dang / 'du shes med na zhes bya ba nas brtsams te/de ci'i phyir zhe na/ thabs la mkhas pa yongs su zin pas gzugs kyi stong pa nyid gang yin pa de yang gzugs ma yin/ stong pa nyid las gzhan na'ang gzugs med/ gzugs las gzhan na'ang stong pa nyid med de zhes bya ba nas/ gzugs dang de'i stong pa nyid phan tshun gyi rang bzhin can nyid du khas len pa gang 'khor ba dang mya ngan las 'das pa la mi gnas par ston par byed pa'i don gyi bar gyis gsungs pa dang / de shes rab kyi pha rol tu phyin pa la spyod pa na/ gal te chos 'ga' zhig nye bar rtogs na shes rab kyi pha rol tu phyin pa la mi spyod do//nye bar rtogs pa dang nye bar ma rtogs pa dang / nye bar rtogs pa yang ma yin la/ nye bar ma rtogs pa yang ma yin pa dang / nye bar rtogs pa yang ma yin ma rtogs pa yang ma yin na shes rab kyi pha rol tu phyin pa la mi spyod do zhes bya ba nas/de ci'i phyir zhe na/ 'di ltar shes rab kyi pha rol tu phyin pa ni dngos po med pa'i rang bzhin te/ zhes bya ba'i bar dang / de ltar spyod pa'i byang chub sems dpa' ni rnam pa thams cad mkhyen pa nyid dang nye bar gyur pa yin no zhes bya ba'i bar du gang gsungs pa yin no//chos chen po la bzod pas na bzod pa rnams so/ /bzod pa bshad zin to// //chos thams cad skye ba med pa dang dpa' bar 'gro ba dang rin chen phyag rgya la sogs pa myur du bla na med pa yang dag par rdzogs par byang chub pa'i rgyu'i ting nge 'dzin la dmigs pa nyid kyis chos kyi mchog gi dmigs pa'i khyad par ni chos thams cad skye ba med pa zhes bya ba'i ting nge 'dzin zhes bya ba nas brtsams te/ting nge 'dzin brgya lhag dang bcas pa la sogs pa'i ting nge 'dzin dpag tu med pa bstan pas gang gsungs pa yin no/ /ting nge 'dzin gyi byed pa rnam pa yin pa nyid kyis na rnam pa'i khyad par ni de la dpa' bar 'gro ba zhes bya ba'i ting nge 'dzin gang zhe na/ting nge 'dzin gang gis ting nge 'dzin thams cad kyi spyod yul ston pa ste zhes bya ba nas brtsams te/ ting nge 'dzin thams cad kyi bdag nyid ji lta ba'i byed pa de bstan pas gang gsungs pa yin no//'di ni re zhig 'jig rten pa'i chos kyi mchog chung ngu yin no/ /'bring gi dmigs pa'i khyad par lung bstan pa thob pa ni/ tshe dang ldan pa shA ri'i bu byang chub sems dpa' chen po gang ting nge 'dzin de dag gis rnam par spyod pa ni sngon gyi de bzhin gshegs pa dgra bcom pa yang dag par rdzogs pa'i sangs rgyas rnams kyis bla na med pa yang dag par rdzogs pa'i byang chub tu lung bstan to zhes bya ba la sogs pa gang gsungs pa yin no//ting nge 'dzin la sogs par rnam par mi rtog pa rnam pa yin pa nyid kyis na rnam pa'i khyad par ni/bdag ni mnyam par bzhag pa'o zhes bya bar ting nge 'dzin des rlom sems su 'gyur ba med do/ /bdag ni snyoms par zhugs par 'gyur ro/ /bdag ni snyoms par zhugs par gyur to/ /bdag ni ting nge 'dzin la snyoms par zhugs pa'o zhes rlom sems su 'gyur ba med do zhes bya bar de la rnam par rtog pa de dag thams cad med cing mi dmigs so zhes gang gsungs pa yin no//chen po'i dmigs pa'i khyad par shes rab kyi pha rol tu phyin pa la sogs pa rnams phan tshun de'i bdag nyid yin pa ni/ tshe dang ldan pa shA ri'i bu 'di ltar shes rab kyi pha rol tu phyin pa yang gzhan la/ting nge 'dzin kyang gzhan/ byang chub sems dpa' yang gzhan/ zhes bya ba med kyi zhes bya ba la sogs pa gang gsungs pa yin no/ /ting nge 'dzin du 'du shes med pa la sogs pa nyid kyis rnam pa'i khyad par ni/ tshe dang ldan pa shA ri'i bu rigs kyi bu de ting nge 'dzin de la 'du shes su byed pa med do/ /ji ltar de la 'du shes su byed par mi 'gyur zhe na/ ji ltar yang rtog pa med pa'i phyir ro/ /ji ltar na rtog pa med pa yin zhe na/ chos thams cad med pa nyid kyis so zhes gang gsungs pa yin no//de ni 'jig rten pa yang yin la zag pa med pa'i chos rnams thob par byed pa nyid kyi mchog kyang yin pas na 'jig rten chos mchog go/ /'di ni nges par 'byung bar 'gyur mi 'bral bar 'gyur nye bar 'gyur mngon par shes pa dang / ting nge 'dzin myur du thob par 'gyur zhes bya ba'i bstan pa'i tshig bzhis nges par 'byed pa'i cha bzhi'i don rim bzhin ston pa yin par shes par bya'o/ /'di'i dmigs pa'i khyad par la sogs pa rgyas par bstan pa'i bsdus pa ni tshig le'ur byas pa bdun pa yin no// // dmigs pa mi rtag pa la sogs / /bden pa'i brten can de yi ni/ /rnam pa mngon zhen la sogs 'gog /theg pa gsum char thob pa'i rgyu/ /gzugs sogs 'phel 'grib gnas bral dang / /gnas dang btags dang brjod du med/ /gzugs sogs mi gnas de dag ni//de yi ngo bor rang bzhin med/ /de dag gcig gi rang bzhin gcig /de mi rtag sogs par mi gnas/ /de rnams de yi ngo bos stong / /de dag gcig gi rang bzhin gcig /chos rnams mi 'dzin gang yin dang / /de dag mtshan mar mi mthong phyir//thams cad dmigs su med pa ni/ /shes rab kyis ni yongs rtogs par/ /gzugs sogs ngo bo nyid med nyid/ /de med pa yi ngo bo nyid/ /de dag skye med nges 'byung med/ /dag dang de dag mtshan nyid med/ /de yi mtshan mar mi brten pas/ / mos min 'du shes med pa yin/ /ting 'dzin de yi byed pa nyid/ /lung bstan pa dang rlom pa zad/ /gsum po gcig gi ngo bo gcig /ting 'dzin rnam par mi rtog pa/ /de ltar nges 'byed cha mthun ni/ /chung dang 'bring dang chen po yin/ /nges par 'byed pa'i cha dang / mthun pa rnams kyi dmigs pa dang / rnam pa dang / rgyu nyid kyi khyad par dang / chung dang / 'bring dang / chen po'i bye brag bshad zin to// //yongs su 'dzin pa ni 'chad par 'gyur ba'i phyir ro/ /da ni rnam par rtog pa dang yang dag par ldan pa bshad par bya'o//de la mthong ba'i lam gyi mi mthun pa'i phyogs ni rnam par rtog pa rnam pa bzhi ste/ ji ltar zhe na/ gzung ba'i rnam par rtog pa rnam pa gnyis te/ dngos po tsam la brten pa dang / gnyen po'i phyogs la brten pa'o/ /tsam smos pa ni khyad par gsal ba'i don du yin no//'dzin pa'i rnam par rtog pa rnam pa gnyis te/ gang zag rdzas su yod pa'i rten can dang / skyes bu btags par yod pa'i rten can no/ /de la nges par 'byed pa'i cha dang mthun pa dang po dang gnyis pa dag ni go rims bzhin du gzung ba'i rnam par rtog pa gnyis su gyur pa yin la/gsum dang bzhi pa dag kyang 'dzin pa'i rnam par rtog pa gnyis yin no/ /gang gi phyir rnam par rtog pa'i mtshan nyid kyi dbang du mdzad pa'i don du gsungs pa ni/ rab 'byor ji ltar ngas khyod la nyon mongs pa med pa la gnas pa rnams kyi mchog tu bstan pa ltar ston pa ni legs so legs so zhes bya ba yin te/de la nyon mongs pa med par gnas pa nyid kyi yon tan brjod pa ni bdag dang gzhan la gnas pa'i rnam par rtog pa skyes pa 'gog pa la mkhas pas na gsal bar byed de dbang du byas pa nyid du shes pa'i don du'o//de la dang po gzung ba'i rnam pa'i rnam par rtog pa'i rnam pa dgur 'gyur ba las/ ma rig pa'i rnam par rtog pa ni ma rig pa'i stobs kyis ji lta ba ma yin par mngon par zhen pa ste/ de ni shA ri'i bu chos 'di dag ni byis pa so so'i skye bo rnams kyis ji ltar mngon par zhen pa de ltar yod pa ma yin no //ji ltar med pa de ltar yod pa yin te/ de ltar yod pa ma yin pa de'i phyir ma rig pa zhes bya'o zhes gang gsungs pa yin no/ /gzugs la sogs pa'i phung po'i rnam par rtog pa ni/ shA ri'i bu gzugs nang stong pa nyid kyi phyir yod pa ma yin no zhes bya ba la sogs pa gang gsungs pa yin no//ming dang gzugs la mngon par zhen pa'i rnam par rtog pa ni/ de la byis pa so so'i skye bo rnams ma rig pa dang sred pa dag gis mngon par zhen te/ ji lta ba bzhin yod pa ma yin pa'i chos rnams mi shes mi mthong ste/de dag chos rnams su btags nas mngon par zhen te zhes gang gsungs pa yin no/ /mtha' gnyis la chags pa'i rnam par rtog pa ni/ de dag chos rnams la mngon par zhen pas yod pa ma yin pa'i mtha' gnyis su rtog par byed do/ / de dag ni gzugs mi shes mi mthong ba zhes bya ba nas/ des na byis pa zhes bya ba'i grangs su 'gro'o zhes gang gsungs pa yin no/ /kun nas nyon mongs pa dang rnam par byang ba mi shes pa'i rnam par rtog pa ni/ de dag gi ma rig pa dang sred pa'i rkyen mi shes mi mthong ngo / / ci zhig mi shes mi mthong zhe na/ gzugs kun nas nyon mongs pa'o zhes mi shes mi mthong ngo / /de bzhin du gzugs rnam par byang ba'o zhes bya ba'i bar mi shes mi mthong ngo zhes bya ba dang / de dag 'dod pa'i khams nas 'byung ba ma yin pa nas/ nyan thos dang / rang sangs rgyas kyi chos rnams las 'byung ba ma yin no zhes bya ba'i bar du gang gsungs pa yin no//'phags pa'i lam la mi gnas pa'i rnam par rtog pa ni/ de dag ni yid mi ches pa ste/ gzugs ni gzugs kyis stong ngo zhes bya bar yid mi ches so zhes bya ba nas/ byang chub byang chub kyis stong ngo zhes bya bar yid mi ches so zhes bya ba'i bar dang /de dag ni sbyin pa'i pha rol tu phyin pa la gnas pa ma yin zhes bya ba nas/ sangs rgyas kyi chos ma 'dres pa rnams kyi bar la gnas pa ma yin no zhes gang gsungs pa yin no/ /dmigs pa'i rnam par rtog pa ni/ shA ri'i bu gang gi tshe byang chub sems dpa' chen po shes rab kyi pha rol tu phyin pa la spyod pa'i tshe/ shes rab kyi pha rol tu phyin pa mi dmigs yang dag par rjes su mi mthong ngo / /de ltar slob na rnam pa thams cad mkhyen pa nyid mi dmigs pa'i tshul gyis 'byung ba yin no zhes bya ba la sogs pa gang gsungs pa yin no//bdag la sogs pa'i rnam par rtog pa ni/ shA ri'i bu bdag mi dmigs yang dag par rjes su mi mthong ste/ shin tu rnam par dag pa'i phyir ro zhes bya ba nas/ de bzhin du rnam pa thams cad mkhyen pa nyid ces bya ba la sogs pa'i bar du gang gsungs pa yin no//rnam par dag pa skye ba la sogs pa'i rnam par rtog pa ni/ shA ri'i bu rnam par dag pa ni skye ba med pa ma byung ba mngon par 'du byed pa med pa'o zhes gang gsungs pa yin no/ /gzung ba'i rnam par rtog pa dang po bshad zin to// //gnyis pa rnam par byang ba tsam gyi yul can brjod par bya ste/ de yang rnam par byang ba'i char gtogs pa'i phung po dang / khams dang / skye mched dang / rten cing 'brel bar 'byung ba la sogs pa'i dbye bas rnam pa dgur 'gyur ro/ /de la phung po'i don gyi rnam par rtog pa ni/de thabs mi mkhas pas gzugs la rtog cing mngon par zhen pa yin zhes bya ba nas/ rnam par shes pa'i bar la rtog cing mngon par zhen pa yin zhes gang gsungs pa yin no/ /phung po'i don ni spungs pa yin pa'i phyir ro/ /skye ba'i sgo'i don gyi rnam par rtog pa ni mig la rtog cing mngon par zhen pa yin zhes bya ba nas/yid kyi bar dang /[ (]zugs [,]gzugs [)]la rtog cing mngon par zhen pa yin zhes bya ba nas/ de bzhin du chos la rtog cing mngon par zhen pa yin zhes bya ba'i bar du gang gsungs pa yin no/ /skye ba'i sgo'i don ni skye mched kyi don yin pa'i phyir ro//rigs kyi don gyi rnam par rtog pa ni/ mig dang gzugs dang mig gi rnam par shes pa'i khams su rtog cing mngon par zhen pa yin zhes bya ba la sogs pa gang gsungs pa yin te/ sa bon gyi don gyis khams kyi don yin no/ / skye ba'i don gyi rnam par rtog pa ni ma rig par rtog cing mngon par zhen pa yin zhes bya ba nas de bzhin du zhes bya ba'i bar du gang gsungs pa yin te/ ma byung ba las byung ba'i don ni skye ba'i don yin no/ /stong pa nyid kyi don gyi rnam par rtog pa ni de nang stong pa nyid nas dngos po med pa'i ngo bo nyid stong pa nyid kyi bar la rtog cing mngon par zhen pa yin zhes bya ba'i bar du gang gsungs pa yin te/med pa tsam ni lta bas byas pa'i gnyen por 'gyur bas 'os pa ma yin pa'i phyir ro/ /pha rol tu phyin pa'i don gyi rnam par rtog pa ni pha rol tu phyin pa drug la rtog cing mngon par zhen pa yin zhes gang gsungs pa yin te/dngos po med pa tsam ni bdag dang gzhan gyi don phun sum tshogs pa'i pha rol tu phyin par byed pa ma yin pa'i phyir ro/ /mthong ba'i lam gyi rnam par rtog pa ni/ byang chub kyi phyogs kyi chos sum cu rtsa bdun la rtog cing mngon par zhen pa yin zhes gang gsungs pa yin te/yod pa'i bzod pa dang shes pa'i skad cig ma rnams ni bral ba la nus par 'gyur ba'i phyir ro/ /bsgom pa'i lam gyi rnam par rtog pa ni/ de bsam gtan rnams dang / mngon par shes pa rnams dang / tshad med pa rnams dang / gzugs med pa'i snyoms par 'jug pa rnams la rtog cing mngon par zhen pa yin zhes gang gsungs pa yin te/ yod pa la gnas pas bsam gtan gyi yan lag las yang dag par 'da' ba dang / gzugs med pa'i snyoms par 'jug pa la dmigs pas yang dag par 'da' bar bya ba yin pa'i phyir ro//mi slob pa'i lam gyi rnam par rtog pa ni/ de bzhin gshegs pa'i stobs bcu nas rnam pa thams cad mkhyen pa nyid kyi bar la rtog cing mngon par zhen pa yin zhes bya ba'i bar du gang gsungs pa yin te/don byas pa de nyid kyi rten gyi bslab pa yongs su rdzogs pa'i mtshams su bya ba yin pa'i phyir ro/ /gzung ba'i rnam par rtog pa gnyis pa bshad zin to// //gang zag rdzas su yod pa'i rten nam 'jig pa'i rnam par rtog pa dang po bshad par bya'o//de ni rnam pa dgur 'gyur te/ bdag dang dbang can gyi rnam par rtog pa ni/ shA ri'i bu bdag nye bar mi dmigs/ sems can dang / srog dang / gang zag nye bar mi dmigs so zhes bya ba la sogs pa dang / de ci'i phyir zhe na/ shin tu rnam par dag pa'i phyir bdag med cing mi dmigs so zhes gang gsungs pa yin te/tshad ma'i brtag pa ni de'i gnyen po yin pa'i phyir ro/ /bdag gcig pur rtog pa'i rnam par rtog pa ni/ shA ri'i bu gzugs nya bar mi dmigs zhes bya ba nas/ rnam par shes pa nye bar mi dmigs zhes bya ba'i bar du gang gsungs pa yin te/phung po'i don ni gnyen po'i phyogs yin pa'i phyir ro/ /bdag rgyu nyid kyi rnam par rtog pa ni/ shA ri'i bu mig mi dmigs so/ /zhes bya ba nas/ de bzhin du yid kyi bar dang / gzugs mi dmigs pa nas/chos kyi bar mi dmigs so zhes gang gsungs pa yin no/ /skye mched kyi don ni de'i gnyen po yin pa'i phyir ro/ /lta ba po la sogs pa'i bdag tu rnam par rtog pa ni/ shA ri'i bu mig dang gzugs dang mig gi rnam par shes pa mi dmigs so zhes bya ba nas/ yid dang chos dang yid kyi rnam par shes pa'i bar mi dmigs so zhes gang gsungs pa yin te/ khams kyi don ni de'i gnyen po'i phyogs yin pa'i phyir ro/ /kun nas nyon mongs pa'i rten gyi bdag tu rnam par rtog pa ni/ shA ri'i bu rten cing 'brel bar 'byung ba mi dmigs so zhes bya ba nas/gzugs med pa'i khams mi dmigs so zhes bya ba'i bar du gsungs pa yin no / /rten cing 'brel bar 'byung ba'i don ni de'i gnyen po yin pa'i phyir ro/ /'dod chags dang bral ba'i rten gyi bdag tu rnam par rtog pa ni/ bsam gtan dang po mi dmigs so zhes bya ba nas/gzugs med pa'i snyoms par 'jug pa mi dmigs so zhes bya ba'i bar du gang gsungs pa yin no / /bsam gtan dang gzugs med pa rnams kyi yan lag la dmigs pa las yang dag par 'da' ba'i 'dod chags dang bral ba'i don ni de'i gnyen po yin pa'i phyir ro//mthong ba'i rten gyi bdag tu rnam par rtog pa ni/ 'phags pa'i bden pa rnams mi dmigs so zhes gang gsungs pa yin te/ bden pa mthong ba'i don ni de'i gnyen po yin pa'i phyir ro/ /sgom pa'i rten gyi bdag tu rnam par rtog pa ni/ rnam par thar pa brgyad dang /mthar gyis gnas pa'i snyoms par 'jug pa dgu mi dmigs so zhes gang gsungs pa yin te/ lus kyis mngon sum du byed pa'i sgom pa'i don ni de'i gnyen po yin pa'i phyir ro/ /don byas pa'i rten gyi bdag tu rnam par rtog pa ni/stobs bcu mi dmigs so zhes bya ba nas rnam pa thams cad mkhyen pa nyid mi dmigs so/ /ji ltar mi dmigs she na/ bdag nyid du'o/ /de ci'i phyir zhe na/ bdag shin tu rnam par dag pa'i phyir ro zhes gang gsungs pa ste/ thams cad la brjod par bya'o//gang zag rdzas su yod pa la brten pa 'dzin pa'i rnam par rtog pa dang po bshad zin to// // skyes bur btags pa yod pa'i rten can 'dzin par rtog pa gnyis pa brjod par bya ba yin pas de nye bar dgod par bya ba'i phyir/ bcom ldan 'das la la zhig 'di skad du ci sgyu ma'i skyes bu shes rab kyi pha rol tu phyin pa la bslabs shing rnam pa thams cad mkhyen pa nyid du 'byung bar 'gyur ram/rnam pa thams cad mkhyen pa nyid thob par 'gyur ram/ zhes 'dri na zhes bya ba la sogs pa'i bar du gang gsungs pa yin no/ /de ni rnam pa dgur 'gyur bas phung po btags par yod pa'i rnam par rtog pa ni/rab 'byor de ji snyam du sems/ gzugs kyang gzhan la sgyu ma yang zhes bya ba nas rnam par shes pa'ang gzhan la sgyu ma yang gzhan zhig yin snyam mam/ gsol pa/ bcom ldan 'das de lta ma lags so//zhes bya ba'i bar gang gsungs pa yin te/ gzugs la sogs pa ni rdzas su med pa nyid kyis ni spangs pa'i don med pa'i phyir ro/ /skye mched btags par yod pa'i rnam par rtog pa ni/ rab 'byor de ji snyam du sems/ mig kyang gzhan la sgyu ma'ang gzhan zhig yin snyam mam zhes bya ba nas/de bzhin du yid kyang gzhan la sgyu ma yang gzhan zhig yin snyam mam/ gsol pa/ bcom ldan 'das de lta ma lags so zhes gang gsungs pa yin te/ mig la sogs pa ni rdzas su med pa nyid kyis ni / skye ba'i sgo'i don med pa yin pa'i phyir ro//khams btags par yod pa'i rnam par rtog pa ni/ rab 'byor de ji snyam du sems/ mig dang gzugs dang mig gi rnam par shes pa yang gzhan la sgyu ma yang gzhan zhig yin snyam mam zhes bya ba la sogs pa gang gsungs pa yin te/ de rnams rdzas su med pa nyid kyis rigs kyi don med pa'i phyir ro//rten cing 'brel par 'byung ba btags par yod pa'i rnam par rtog pa ni/ rab 'byor de ji snyam du sems/ rten cing 'brel bar 'byung ba yang gzhan la sgyu ma yang gzhan zhig yin snyam mam zhes bya ba la sogs pa gang gsungs pa yin te/ngo bo nyid stong pa nyid kyi ma rig pa la sogs pa rkyen so so ba dang tshogs rnams la skye ba'i don med pa'i phyir ro/ /rnam par byang ba btags pa yin pa'i rnam par rtog pa ni/ rab 'byor de ji snyam du sems/ byang chub kyi phyogs kyi chos sum cu rtsa bdun yang gzhan la sgyu ma yang gzhan zhig yin snyam mam zhes bya ba la sogs pa gang gsungs pa yin te/de rnams ni gzings dang 'dra ba nyid kyis gtan du ma yin pa'i phyir ro/ /mthong ba'i lam btags pa yin pa'i rnam par rtog pa ni/ rab 'byor de ji snyam du sems/ stong pa nyid dang / mtshan ma med pa dang / smon pa med pa'ang gzhan la sgyu ma yang gzhan zhig yin snyam mam/ zhes gang gsungs pa ste/ de rnams ni mi mthun pa'i phyogs dang gnyen po'i phyogs tshogs pa tsam yin pa nyid kyis ngo bo nyid du yongs su ma grub pa'i phyir ro/ / bsgom pa'i lam la btags pa'i rnam par rtog pa ni/ rab 'byor de ji snyam du sems/ bsam gtan dang / gzugs med pa'i snyoms par 'jug pa yang gzhan la sgyu ma yang gzhan zhig yin snyam mam zhes bya ba la sogs pa gang gsungs pa yin te/ de rnams ni yan lag dang dmigs pas yang dag par 'da' bas rdzas su med pa'i phyir ro//khyad par gyi lam btags pa yin pa'i rnam par rtog pa ni/ rab 'byor de ji snyam du sems/ stong pa nyid thams cad kyang gzhan la sgyu ma yang gzhan zhig yin snyam mam zhes gang gsungs pa yin te/de rnams ni stong pa nyid du kun btags pas stong pa yin pa'i phyir ro/ /mi slob pa'i lam btags pa yin pa'i rnam par rtog pa gang gsungs pa ni/ rab 'byor de ji snyam du sems/ stobs bcu yang gzhan la zhes bya ba nas/rnam pa thams cad mkhyen pa nyid kyang gzhan la sgyu ma yang gzhan zhig yin snyam mam zhes bya ba'i bar gyis de rnams ni sgyu ma'i rang bzhin nyid yin pas skyes bur btags pa'i rgyu mtshan med pa'i phyir ro zhes bya ba dang / phung po la sogs pa rnams dang sgyu ma yang phan tshun de'i rang bzhin du 'dod pa dang /sgyu ma la yang skye ba dang 'gag pa la sogs pa bkag pa'i sgo nas rnam pa thams cad mkhyen pa nyid du nges par 'byung ba dmigs pa'i tshul gyis nges par 'byung ba 'ga' yang khas mi len pa dang / rab 'byor de ji snyam du sems/ 'di lta ste/ nye bar len pa'i phung po lnga po 'di rnams la byang chub sems dpa' zhes bya bar 'du shes pa dang / kun shes pa dang / btags pa dang / tha snyad du 'gyur ram zhes bya ba dang / sgyu ma'i skyes bu lta bu kho nar bslab par bya'o zhes nges par gzung bar shes par byed pa dang /bcom ldan 'das 'di ltar sgyu ma'i skyes bu de nyid ces bya ba phung po la sogs pa rnams la byang chub sems dpa' btags pa 'gog pa dang / bcom ldan 'das 'di ltar sgyu ma lta bu'i gzugs la zhes bya ba nas brtsams te/ nang stong pa nyid la phung po la sogs pa mi dmigs pas dpe'i don du mi 'thad pas phung po la sogs pa rnams rmi lam dang /sgra brnyan dang / mig yor dang / gzugs brnyan dang / sprul pa'i dpe rnams kyis dngos po med pa'i rang bzhin yin pas dpe'i don yin pa la gnod pa nyid kyis sems mi zhum pa nyid dang mi dngang ba la sogs pas thams cad shes pa nyid du nges par 'byung ba dang /lam gyi rnam pa shes pa nyid du nges par 'byung ba dang / rnam pa thams cad mkhyen pa nyid thob par 'gyur ro zhes bya ba yin no/ /de la dngos po mtshan mar 'dzin pa ni 'du shes so//dngos po dang lhan cig tu bdag ces bya ba ni kun shes pa ste/ dper na bdag gi mig gi gzugs rnams blta bar bya'o zhes bya ba la sogs pa'o/ /shes pa dang / shes bya dag gzung ba dang 'dzin pa'i rnam par mngon par zhen pa'i rnam par shes pa ni gdags pa'o//gzhan zin pa dang ma zin pa'i dngos po rnam pa sna tshogs brjod pa ni tha snyad de/ dper na 'jig rten na 'di ni nas so/ /'di ni chu'o/ /'di ni dri ma'o/ / 'dra ba'o zhes bya ba lta bu'o/ /mi zhum mi 'gong 'gyod par mi 'gyur zhes bya ba tshig gsum po 'di rnams kyi nges par bstan pa ni rim pa ji lta ba bzhin mi dngang mi skrag skrag par mi 'gyur zhes bya ba'i tshig gsum por shes par bya'o//de la gnas ma yin pa la 'jigs pa ni dngang ba ste/ lam log pa dang 'dra'o/ /de med pas na mi zhum pa'o/ /rgyun du 'jigs pa ni skrag pa ste/'jigs pa skyes pa slar ma log pas so/ /de med pa ni mi 'gong ba'o/ /'jigs pa nges par gyur pa ni skrag par 'gyur ba ste/ de med pa'i phyir 'gyod par mi 'gyur ba'o/ /de la gzung ba'i rnam par rtog pa dang po ni dngos po thams cad pa kho na yin la/gnyis pa ni rnam par byang ba'i dngos po kho na yin te/ 'di ni gzung ba'i rnam par rtog pa 'di dag gi khyad par yin no/ /de ltar byas nas brjod pa gzung ba'i rnam par rtog pa dang po gang yin pa de ni gnyis pa yang yin no zhes bya ba ni tshig snga ma dang sbyar ro/ /re zhig dang po ni gnyis pa yang yin pa ni dper na/gzung ba'i rnam par rtog pa dang por gyur pa dngos po thams cad pa bzhin no/ /gnyis pa kho na yin gyi/ dang po ma yin pa ni gzung ba'i rnam par rtog pa gnyis pa rnam par byang ba'i dngos po la brten pa bzhin no/ /yang dag par ldan pa'i khyad par bshad zin to// //ji skad du bshad pa'i rnam par rtog pa'i dbye ba bar skabs kyi tshigs su bcad pa ni/ gzhi dang de yi gnyen po yis/ /gzung bar rtog pa rnam pa gnyis/ /rmongs dang phung sogs bye brag gis/ /de ni so so rnam pa dgu//rdzas dang btags pa'i rten can gyi/ /'dzin pa'ang rnam pa gnyis su 'dod/ /rang dbang bdag sogs ngo bo dang / /phung sogs rten las de bzhin no/ /zhes bya ba yin no/ /thabs mkhas pa dang dge ba'i bshes gnyen ni byang chub sems dpa'i yongs su 'dzin pa yin no//zhes gsungs pa de la thabs mkhas pa'i dbang du mdzad nas sems mi zhum pa nyid dang mi dngang ba la sogs pa'i rgyu las brtsams nas/ rnam pa thams cad mkhyen pa nyid dang ldan pa'i yid la byed pas gzugs la sogs pa'i phung po rnams la so sor mi rtag pa dang /sdug bsngal ba dang / stong pa dang / bdag med pa dang / zhi ba dang / dben pa rnams su mi rtog pas so sor rtog pa dang / de dag nyid kyi mi dmigs pa dang ldan zhing rnam pa thams cad mkhyen pa nyid dang ldan pa'i yid la byed pas de dag nyid la mi rtag pa la sogs pa'i chos ston pa sbyin pa'i pha rol tu phyin pa yin pa nyid dang /de dag nyid la mi rtag pa la sogs par yid la byed pas mchog tu 'dzin pa med pa tshul khrims kyi pha rol tu phyin pa nyid dang / de bzhin du sa'i khams la sogs pa drug po rnams la mi rtag pa la sogs pa bzod cing 'dod la so sor rtog pa bzod pa'i pha rol tu phyin pa yin pa nyid dang /phung po la sogs pa rnams la mi rtag pa la sogs par so sor rtog cing mi dmigs pa dang ldan pas rnam pa thams cad mkhyen pa nyid dang ldan pa'i yid la byed pa mi 'dor ba brtson 'grus kyi pha rol tu phyin pa yin pa nyid dang /theg pa dman pa dang ldan pa'i yid la byed pa'i skabs mi 'byed pas bsam gtan gyi pha rol tu phyin pa yin pa nyid dang / phung po la sogs pa sangs rgyas kyi chos ma 'dres pa'i bar rnams de'i stong pa nyid kyis stong pa nyid yin pa bkag pa dang /de rnams dang de'i stong pa nyid dag phan tshun de'i rang bzhin du rjes su shes pa shes rab kyi pha rol tu phyin pa yin pa nyid dang / rnam pa thams cad mkhyen pa nyid dang ldan pa'i yid la byed pa dang bral bas pha rol tu phyin pa nas/sangs rgyas kyi chos ma 'dres pa'i bar rnams sgom par byed cing der dmigs te rlom pas ni dngang ba la sogs pa rnams 'gyur bas na thabs la mkhas pa yin par thabs la mkhas pa'i khyad par gyi don du bstan pas gsungs pa yin no/ /thabs la mkhas pa bshad zin to// //dge ba'i bshes gnyen gyis yongs su 'dzin pa ni phung po la sogs pa nas ma 'dres pa'i chos kyi bar rnams mi rtag pa la sogs pa rnams su mi dmigs par ston zhing dge ba'i rtsa ba bla na med pa yang dag par rdzogs pa'i byang chub tu yongs su bsngor 'jug pa rnams dge ba'i bshes gnyen yin pa nyid dang /pha rol tu phyin pa rnams dang bral bar bya ba'i don du snyan dngags mkhan gyi rang bzor byas pa'i snyan dngags su rjod par byed pa 'di dang / sangs rgyas kyi cha byad du 'ongs nas khyod la shes rab kyi pha rol tu phyin pas ci zhig bya zhes bya ba la sogs pa'i rang gi las dang /nyan thos dang / rang sangs rgyas dang ldan pa'i mdo la sogs pa rnams dang / khyod la ni byang chub kyi sems cung zad kyang med do zhes bya ba la sogs pa slu ba nye bar ston pa dang / mig la sogs pa'i skye mched rnams nas/sangs rgyas kyi chos ma 'dres pa'i bar rnams bdag dang bdag bdag gis stong pa yin na/ bla na med pa yang dag par rdzogs pa'i byang chub tu mngon par rdzogs par sangs rgyas pas ci zhig bya zhes zer ba dang / de bzhin du rang sangs rgyas dang / nyan thos dang / mkhan po dang / slob dpon dang / tshangs pa mtshungs par spyod pa'i cha lugs la sogs par 'ongs pa'i bar la yang brjod par bya ste/ de ltar nye bar ston pa po bdud kyi chos slu ba nye bar ston pa la/ 'di dag ni bdud kyi las yin no zhes byang chub sems dpa' la mi ston pa 'di ni sdig pa'i grogs po yin no zhes rig par byas nas/de yongs su spang bar bya'o zhes dge ba'i bshes gnyen gyi khyad par gyi don du mi dge ba'i bshes gnyen gyi mtshan nyid bstan pas gsungs pa yin no/ /yongs su 'dzin pa'i bar skabs kyi tshigs su bcad pa ni/ /sems mi 'gong ba nyid la sogs/ /ngo bo nyid med sogs ston byed/ /de yi mi mthun phyogs bor ba/ rnam pa kun du yongs 'dzin yin/ /zhes bya ba gsungs pa yin no/ /nges par 'byed pa'i cha dang mthun pa rnams zhes bya ba la 'byed pa ni rnam par 'byed pa yin pas rnam par mi rtog par 'byed pa ni nges par 'byed pa ste/gzung ba dang 'dzin pa'i rnam par rtog pa bzhi po rnams kyi gnyen po mthong ba'i lam mo/ /de'i cha ste phyogs gcig la skyed par byed pa nyid kyis phan pa'i phyir mthun pa ni nges par 'byed pa'i cha dang mthun pa rnams yin no//nges par 'byed pa'i cha dang mthun pa rnams bshad zin to// //sgrub pa'i rten brjod par bya ste/ rigs zhes bya ba'i don to/ /de ni sgrub pa'i chos kyi gnas skabs tha dad pa'i dbye bas rnam pa bcu gsum du 'gyur ro//ji ltar zhe na/ rtogs pa yi ni chos drug dang / /zhes gsungs so/ /de dag gi ci yin zhe na/ rten la rigs zhes brjod ces mthar 'chad par 'gyur ro/ /'di lta ste/ nges par 'byed pa'i cha dang mthun pa bzhi dang / mthong ba dang / bsgom pa'i lam dag go//gang gi phyir sems bskyed pa nas brtsams te/ nges par 'byed pa'i cha dang mthun pa rnams dang / mthong ba'i lam dang bsgom pa'i lam de dang der byang chub sems dpa' zhes brjod pa/ bcom ldan 'das byang chub sems dpa' zhes bya ba'i tshig gi don ci lags/ zhes gsungs pa yin te/ rtogs pa'i chos de dang de'i rten gang yin pa'o zhes gsungs pa ni/ rab 'byor byang chub sems dpa'i tshig gi don ni tshig gi don med pa ste/ de ci'i phyir zhe na/ byang chub la ni skye ba'am yod pa nyid yod pa 'am/ dmigs par ma yin no/ zhes bya ba yin no/ /'dis ni rten byang chub rdzas su med pa'i 'thad pas skye mched drug gi chos nyid kyi mtshan nyid kyi rigs ni byang chub sems dpa'i sgra 'jug pa'i rgyu yin gyi/ dngos por gyur pa'i tshig gi don ni ma yin no zhes bya bar ston to/ /de la dro bar gyur pa'i rten ni/rab 'byor 'di lta ste dper na/ nam mkha' la bya'i rjes med ces bya ba dang / rmi lam dang / sgyu ma dang / smig rgyu dang / sgra brnyan dang / mig yor dang / gzugs brnyan dang / dri za'i grong khyer dang / sprul pa la gnas med cing / dmigs su med pa'i dpes gsungs pa yin no//dpe dgu po de dag gi don bstan pa ni/ nges par 'byed pa'i cha dang mthun pa dang po dang yang dag par ldan pa gzung ba'i rnam par rtog pa dang po rnam pa dgur brjod pa gang yin pa de'i dbye ba dang bstun par bya ste/ gzhung mangs pa spangs pa'i don du kho bo cag gis ni rnam par ma spros so//de bzhin du nges par 'byed pa'i cha dang mthun pa gzhan dang / mthong ba dang / bsgom pa'i lam dag la yang bdag nyid ji lta ba bzhin du rnam par rtog pa dang / dpe'i don gyi khyad par rnams tshul bstun pa brjod par bya'o/ / rtse mor gyur pa'i rten ni yang dag pa'i mtha' dang / de bzhin nyid dang / ma nor ba de bzhin nyid dang / gzhan ma yin pa de bzhin nyid dang / chos nyid dang / chos kyi dbyings dang / chos kyi gnas nyid dang / chos nges pa nyid dang / bden pa nyid kyi gnas med pa nyid dang /dmigs su med pa nyid kyi dpes gsungs pa yin no/ /bzod par gyur pa'i rten ni sgyu ma'i skyes bu'i gzugs dang / tshor ba dang / 'du shes dang / 'du byed dang / rnam par shes pa'i gnas dang / de nyid kyi mig la sogs pa'i tshig gi don dang / de nyid kyi gzugs la sogs pa'i tshig gi don dang /de nyid kyi mig dang gzugs la sogs pa'i tshig gi don med cing mi dmigs pa'i dpes gsungs pa yin no/ /chos kyi mig gi rten ni sgyu ma'i skyes bu'i nang stong pa nyid la sogs pa dang / de nyid kyi pha rol tu phyin pa rnams dang / de nyid kyi byang chub kyi phyogs kyi chos rnams dang / de nyid kyi stobs la sogs pa rnams dang / de nyid kyi phung po rnams dang / de nyid kyi khams rnams dang / de nyid kyi skye mched rnams dang / de nyid kyi rten cing 'brel bar 'byung ba rnams dang / de nyid kyi bsam gtan dang / gzugs med pa'i snyoms par 'jug pa rnams la spyod pa'i tshig gi don med cing mi dmigs pa'i dpes gsungs pa yin no/ /mthong ba'i lam gyi rten ni de bzhin gshegs pa dgra bcom pa yang dag par rdzogs pa'i sangs rgyas kyi gzugs la sogs pa'i phung po'i tshig gi don dang /de nyid mig nas yid kyi bar gyi tshig gi don dang / de nyid kyi nang la sogs pa'i stong pa nyid rnams nas stobs la sogs pa'i bar gyi tshig gi don dang / 'dus ma byas kyi dbyings la 'dus byas kyi khams kyi gnas dang / 'dus byas kyi khams la 'dus ma byas kyi dbyings kyi gnas med cing rjes su mi dmigs pa'i dpes gsungs pa yin no//bsgom pa'i lam gyi rten ni skye ba med pa dang / 'gag pa med pa dang / kun nas nyon mongs pa med pa dang / rnam par byang ba med pa dang / mngon par 'du bya ba med pa dang / 'byung ba med pa dang / dmigs pa med pa'i tshig gi don med cing mi dmigs pa'i dpe dang / de ci'i phyir zhe na/ rab 'byor gzugs kyi skye ba la tshig gi don med do zhes bya ba nas brtsams te/ sangs rgyas kyi chos ma 'dres pa rnams kyi skye ba dang / 'gag pa dang / mngon par 'du byed pa dang /'byung ba dang / dmigs pa dang / kun nas nyon mongs pa dang / rnam par byang ba'i tshig gi don dang / de dag nyid dben pa nyid dang / mtshan ma med pa'i gnas dang / yang byang chub kyi phyogs dang bdag dang srog la sogs pa rnams shin tu rnam par dag pa'i gnas med pa dang /shin tu rnam par dag pa'i rnam pa gsum po sgom pa yang nas yang du goms pa nyid shes par bya ba'i don du gsungs pa yin no/ /gnyen po dang ni spong ba dang / /zhes bya ba de la/ gnyen po dang spang ba gnyis kyi rten gang yin zhe na/ rigs yin no zhes bya ba skabs su bab pa yin no//de la gnyen po'i rten ni nyi ma'i dkyil 'khor shar ba'i 'od la gnas med cing mi dmigs pa'i dpes gsungs pa yin no/ /mi mthun pa'i phyogs spong ba'i rten ni bskal pa'i me 'bar ba'i tshe 'du byed kyi gnas med cing rjes su mi dmigs pa nyid kyi dpes bag chags kyi mtshams sbyor ba spang ba'i don gyis gsungs pa yin no//de dag yongs su gtugs pa dang / /zhes bya ba de la/ gnyen po dang mi mthun pa'i phyogs spong ba gang dag yin pa de dag yongs su gtugs pa'i rten zhes rjes su 'jug go//de la gnyen po dang mi mthun pa'i phyogs kyi rnam par rtog pa spang ba'i rten ni 'di yin te/ de bzhin gshegs pa dgra bcom pa yang dag par rdzogs pa'i sangs rgyas kyi tshul khrims dang / ting nge 'dzin dang / shes rab dang / rnam par grol ba dang / rnam par grol ba'i ye shes gzigs pa'i phung po rnams la de dang de'i mi mthun pa'i phyogs kyi gnas med cing nye bar mi dmigs pa nyid kyi dpes shes bya'i sgrib pa spang ba'i don gyis gsungs pa gang yin pa'o/ /shes rab snying brtser bcas pa dang / /zhes bya ba de la/ shes rab dang snying brtse'i rten ni 'di yin te/shes rab dang snying brtse 'bar ba dang 'dod pa dag gis 'khor ba ji srid bar yongs su mya ngan las 'da' ba'i chos nyid du gnas pa nyid kyis gnyi gar mi gnas par shes par bya ba'i don gyis gsungs pa gang yin pa'o/ /slob ma thun mong min nyid dang //zhes bya ba de la/ thun mong ma yin pa'i yon tan gyi rten ni 'di yin te/ nyan thos la sogs pa gza' dang / nor bu rin po che dang / skar ma'i ye shes rnams dang / thun mong ma yin pa mtha' yas pa'i 'jig rten gzhan du 'phro ba'i ye shes kyi snang ba nyid kyis gsungs pa gang yin pa'o//gzhan gyi don gyi go rims dang / /zhes bya ba de la/ gzhan gyi don gyi go rims kyi rten ni 'di yin te/ lha'i ris su rnam par gzhag pa dang 'dra bar 'jig rten gyi dge legs gong nas gong du khyad par du 'gro ba'i rgyu yin pa nyid kyis gsungs pa gang yin pa'o//ye shes rtsol ba mi mnga' bar/ /'jug pa'o/ /de ci yin zhe na/ mthar go bar byed pa ni/ rten la rigs zhes brjod ces bya ba'o/ /de la ye shes lhun gyis grub par 'jug pa'i rten ni 'di yin te/ sems can thams cad kyi don dang mthong ba'i chos la bde bar gnas pa'i ye shes lhun gyis grub pa ni 'di ltar de bzhin gshegs pa dgra bcom pa yang dag par rdzogs pa'i sangs rgyas zhes bya'o zhes gsungs pa gang yin pa'o//rab 'byor 'di lta ste/ de bzhin gshegs pa dgra bcom pa yang dag par rdzogs pa'i sangs rgyas kyi 'od la gnas med cing mi dmigs so zhes bya ba la sogs pa gsungs pa gang yin pa de la gnas ni rten gyi dngos po'o//med cing mi dmigs so zhes bya ba la med pa las bzlog pa 'di yod pa'i don yin pa'i phyir med pas mi dmigs pa stong pa yin no//de ci'i phyir zhe na/ rab 'byor 'di ltar byang chub gang gis byang chub sems dpa' yin pa dang / gang byang chub sems dpa' yin pa'i tshig gi don gyi chos 'di dag thams cad ni ldan pa yang ma yin mi ldan pa yang ma yin/ gzugs med pa bstan du med pa/ thogs pa med pa/ mtshan nyid gcig pas te/ 'di lta ste/ mtshan nyid med pa'o zhes bya ba'i tshig ni nges par 'byed pa'i cha dang mthun pa bzhi dang / mthong ba dang bsgom pa'i lam gzhir byas nas bkod pa yin te/ de ni khyad par rtogs par byed pa dang /ma mthong ba mthong ba dang / mthong ba la mngon du phyogs par byed pa'i gnas skabs rnams su rim pa ji lta ba bzhin dngos po dang dngos po med pa'i gnas skabs ldan pa dang mi ldan pa dag dang / blta bar bya ba dang / mthong ba dang / phan tshun 'brel ba snga na med pa skyes pa dag dang /de yod pas gzhan mi 'jug pa'i rang bzhin dang / tha dad pa med pa'i dbang du byas nas 'di lta ste/ ngo bo nyid med pa'i phyir ro zhes bya ba yin te/ tshig gnyis dang / gsum dang / gcig dang / gcig yin par shes par bya'o//'o na sgrub pa'i rten gyi mtshan nyid gang yin snyam na/ rab 'byor byang chub sems dpa' chen pos chos thams cad kyi chags pa med pa nyid dang yod par ma gyur pa nyid la bslab par bya ste/ rtog pa med pa dang rnam par rtog pa med pas so zhes gsungs so/ /de la rtog pa dang rnam par rtog pa ni dngos po dang de'i mtshan ma la mngon par zhen pa ste/de med pa'i phyir chags pa med pa nyid du rig par bya'o/ /yod par ma gyur pa nyid ni chos thams cad kyi de bzhin nyid do/ /des na 'dis ni chos kyi dbyings nyid 'phags pa'i chos rnams kyi rgyu yin pa'i phyir rang bzhin du gnas pa'i rigs sgrub pa'i rten yin no zhes ston par byed do//gal te rang bzhin du gnas pa'i rigs 'ga' zhig yod na ci'i phyir thog ma dang bral ba'i 'khor bar gang+gA'i klung gi bye ma dang mnyam pa'i sangs rgyas rnams mya ngan las 'das kyang da dung du yang rang bzhin du gnas pa'i rigs dang ldan pa'i srog chags rnams mya ngan las 'das she na/de ni nyes dmigs rnam pa bzhi dang ldan pa'i phyir te/ nyon mongs pa dang / grogs ngan pa dang / phongs pa dang / gzhan gyi dbang rnams ni de'i nyes pa yin no zhes gang gsungs pa yin no//'dir ni bar chad med pa nyid la rang bzhin du gnas pa'i rigs su mngon par 'dod do/ /gzhan dag ni rigs ni skye mched drug gi khyad par yin no/ /de yang rnam pa gnyis te/ rkyen gyis yang dag par blangs pa dang / rang bzhin du gnas pa'o zhes zer ro//de dag gis ni rang bzhin du gnas pa'i rigs la rang bzhin du brjod pa'i don brjod dgos so/ /rgyu'i rnam grangs yin no zhe na/ rkyen gyis yang dag par blangs pa yang de yin pa des na don gyi khyad par ci yod/ chos nyid kyi rnam grangs yin pa la ni nyes pa 'di med do//yang na de dag gi rigs ni btags pa yin la/ 'di ni mtshan nyid pa yin te/ des na de dang 'di dang 'grigs pa ma yin no/ /gal te chos kyi dbyings rigs nyid yin na thams cad rigs la gnas par 'gyur te/ de ni spyir gnas pa yin pa'i phyir ro zhe na/ji ltar dmigs pa na 'phags pa'i chos rnams kyi rgyur 'gyur ba de ltar rigs yin par brjod pa de na 'dir ha cang thal ba ji ste tshol bar byed/ de lta na'ang chos kyi dbyings la dbyer med phyir/ 'di ni nyan thos kyi rigs so/ /'di ni rang sangs rgyas kyi rigs so/ / sangs rgyas kyi rigs so zhes/ rigs ni tha dad rung ma yin/ /ji skad du/ 'jam dpal gal te chos kyi dbyings gcig dang / de bzhin nyid gcig dang / yang dag pa'i mtha' gcig yin na de la ji ltar snod dang snod ma yin par gdags zhes gsungs pa bzhin no zhe na/de ni bden te/ de lta na yang 'jim pa'i rdzas gcig las mngon par grub cing me gcig gis so btang ba ni sbrang rtsi dang li kha ra la sogs pa'i snod tha dad pa yin pa'i dpes/ brten pa'i chos kyi bye brag gis/ /de yi dbye bar rab tu brjod/ / ji skad du/ gang la 'du byed cung zad kyang med pa de ni 'dus ma byas pa yin la/ 'dus ma byas pa gang yin pa de ni 'phags pa rnams kyi rigs yin te/ rigs de ni nam mkha' dang mnyam pa nyid kyis khyad par med pa'o/ /rigs de ni thams cad kyi tshe chos kyi de bzhin nyid yin pas chos kyi ro gcig tu gyur pa nyid kyis rtag pa'o zhes bya ba la sogs pa gsungs so//nges pa'i tshig ni yon tan sgrol ba'i don gyis na rigs te/ de las yon tan de dang de dag skye zhing 'byung ba zhes bya ba'i don to/ /de'i phyir 'phags pa'i gang zag thams cad ni 'dus ma byas kyis rab tu phye ba yin no zhes brjod do//yang gzhan dag na re go zhes bya ba ni sa yin la sa'ang gnas yin te/ lhan cig spyod pas gnas pa srog chags rnams la go'i sgrar nye bar 'dogs so/ /de bas na sas bsdus pa rnams skyob par byed pas rigs so//yang na phyogs rnams go yin pa'i phyir phyogs na gnas pa'i srog chags rnams la go zhes gdags te/ des na gang skyob par byed pas rigs yin no zhes zer ro/ /sems bskyed pa dang thar pa dang nges par 'byed pa'i cha dang mthun pa rnams de sngon du 'gro ba can yin pa'i phyir dang po kho nar rigs bshad par bya ba ma yin zhe na/de ni don gyi go rims yin la 'bras bus rgyu rtogs par byed pa yin pa 'di ni rtogs pa'i go rims yin no/ /'di ltar rigs nges par 'byed pa'i cha dang mthun pa rnams la 'khrul par mthong ba yin no//ji skad du/ mtshan nyid pa dag gis/ gnyis slob rigs las bzlog nas ni/ /sangs rgyas su 'gyur gzhan gsum yang / /zhes bshad pa yin no/ /sgrub pa'i rten bshad zin to// //sgrub pa'i dmigs pa bshad par bya ba yin pas/ dmigs pa chos rnams thams cad de//zhes gsungs pa yin no/ /de dag kyang gang yin zhe na/ de yang dge la sogs pa yin/ /zhes bya ba gsungs pa yin te/ sogs pa zhes bya ba smos pas ni mi dge ba dang lung du ma bstan pa dag bsdu'o/ /ci de dag kho na tsam du zad dam zhe na/ 'jig rten pa yi rtog pa dang / /gang dag 'jig rten 'das 'dod dang / /zag bcas zag pa med chos dang / /gang dag 'dus byas 'dus ma byas/ /slob ma thun mong chos rnams dang / /gang dag thub pa'i thun mong min/ /zhes bya ba gsungs so/ /de la dge ba'i chos ni 'di dag yin te/mar 'dzin pa dang / phar 'dzin pa dang / dge sbyong du 'dzin pa zhes bya ba la sogs rgya cher gang gsungs pa yin te/ dge sbyong nyid la dge sbyong du 'dzin pas so/ /mi dge ba'i chos ni mi dge ba'i las kyi lam bcu ni 'di lta ste/ srog gcod pa dang / ma byin par len pa dang zhes bya ba la sogs pa gsungs pa yin te/ srog gcod pa la sogs pa rnams ni mi dge ba kho na yin pas so/ /lung du ma bstan pa'i chos rnams ni/ lus dang ngag dang yid kyi las lung du ma bstan pa zhes bya ba la sogs pa gang gsungs pa yin te/lung du ma bstan pa nyid ces nges par gzung bar shes pa'i phyir te/ gzhan du na lus la sogs pa'i las dge ba 'am mi dge bar yang mi 'gyur ro/ /'jig rten pa'i chos ni phung po lnga dang / skye mched dang / khams dang / dge ba bcu'i las kyi lam dang / bsam gtan dang / tshad med pa dang / gzugs med pa'i snyoms par 'jug pa zhes gang gsungs pa yin te/ 'di dag ni 'jig rten pa nyid yin pas so/ /'jig rten las 'das pa'i chos ni bsam gtan bzhi dang zhes bya ba nas brtsams te/ sangs rgyas kyi chos ma 'dres pa bcwa brgyad ces bya ba'i bar du rgya cher gsungs pa yin te/'phags pa'i lam gyis bsdus pas na / 'jig rten las 'das pa nyid yin pas so/ /zag pa dang bcas pa'i chos ni/ nye bar len pa'i phung po lnga dang zhes bya ba nas/gzugs med pa'i snyoms par 'jug pa bzhi dang / mngon par shes pa drug dag ste/ zhes bya ba'i bar du gang gsungs pa yin te/ de dag ni bdag tu lta ba'i gnyen po ma yin pa nyid yin pa'i phyir zag pa dang bcas pa'i chos kho na yin pas so/ /zag pa med pa'i chos rnams ni//dran pa nye bar gzhag pa bzhi dang zhes bya ba nas/ sangs rgyas kyi chos ma 'dres pa bcwa brgyad dag ste zhes bya ba'i bar du gang gsungs pa yin te/ 'di dag ni bdag tu lta ba'i gnyen po yin pas zag pa med pa nyid yin pas so/ /'dus byas kyi chos ni/'dod pa'i khams dang / gzugs dang / gzugs med pa'i khams dang / khams gsum par ma gtogs pa'i chos rnams dang / byang chub kyi phyogs la sogs pa'i zhes bya ba gang gsungs pa yin te/ 'di dag ni rkyen rnams tshogs shing 'dus nas byas pa yin pa'i phyir 'dus byas nyid yin pas so//'dus ma byas kyi chos ni/ gang la skye ba med cing 'jig pa med pa dang / gnas pa las gzhan du 'gyur ba nyid du mi mngon pas te/ 'di lta ste/ 'dod chags la sogs pa zad pa zhes bya ba la sogs pa gang gsungs pa yin te/'di dag ni rgyu dang rkyen rnams la ltos pa med pa nyid kyis na 'dus ma byas pa kho na yin pa'i phyir ro/ /thun mong gi chos ni/ bsam gtan bzhi dang zhes bya ba la sogs pa gang gsungs pa yin te/ 'di dag ni rgyud gzhan la yang 'byung ba nyid kyis na thun mong gi chos nyid kyis so//thun mong ma yin pa'i chos ni byang chub kyi phyogs kyi chos sum cu rtsa bdun dang / de bzhin gshegs pa'i stobs bcu dang zhes bya ba la sogs pa gang gsungs pa yin te/ 'di dag ni yang dag par rdzogs pa'i sangs rgyas kyi rgyud la 'byung ba nyid kyis na thun mong ma yin pa nyid yin pas so//gang dag chos kyi dbyings nyid dmigs pa yin no snyam du sems pa de dag gis dmigs pa'i dag pa gong nas gong du khyad par du 'gro ba ji ltar yin zhes bya ba brjod dgos so/ /chu khams gser dang nam mkha' rnams/ / dag pa bzhin du dag par 'dod/ /ces bya ba yin no zhe na/ de lta na ni mi mthun pa dang gnyen po'i phyogs kyi rnam par rtog pa spong ba med pas dag pa phyogs gcig par thal bar 'gyur ro/ /rab 'byor rnam pa thams cad mkhyen pa nyid la ni dmigs pa med do zhes 'byung bas khyed kyi phyogs la yang dmigs pa dag pa'i mthar thug par mi 'gyur ba ma yin nam/de ci'i phyir zhe na/ chos rnams 'khrul pa tsam nyid yin pa'i phyir te/ rab 'byor gnyis ni dngos po'o/ /gnyis su med pa ni dngos po med pa'o/ /zhes 'chad par 'gyur la/gnyis kyang 'khrul pa las gzhan ci zhig yin par 'gyur zhe na/ mngon par zhen pa ni gnyis kyi mtshan nyid yin gyi/ 'khrul pa ma yin te/ de la gzung ba dang 'dzin pa'i rang bzhin du mi brjod pa'i phyir ro/ /des na 'di la khyed 'khrul par zad do/ /de ltar na rang bzhin gtsor gyur pa ni rigs yin la rnam 'gyur gtsor gyur pa ni dmigs pa yin te/gnyi ga'ang gnyi gar ma bkag pa des na rten dang dmigs pa dag gi mtshan nyid kyi dbye ba dang dmigs pa dag pa'i mthar thug par 'gro ba'ang 'thad par 'gyur ro/ /de nyid kyi phyir/ rab 'byor byang chub sems dpas chos thams cad kyi ma chags pa nyid dang / yod par gyur pa ma yin pa nyid la bslab par bya'o zhes gsungs so/ /don gang zhe na/ rang bzhin dang rjes su 'brel pa'i rnam 'gyur ni dmigs pa yin gyi rnam par 'gyur ba tsam ni ma yin no zhes bya ba yin no//rtog pa med pa dang rnam par rtog pa med pa nyid kyi phyir gnyis su med pa'i tshul du chos thams cad khong du chud par bya'o zhes bya ba de la gnyis ni gzung ba dang 'dzin pa dag go/ /dmigs pa rnam par dag pa la brjod par bya ba mang du yod de/ de ltar spros pas chog go//sgrub pa'i dmigs pa bshad zin to// //sgrub pa'i ched du bya ba brjod par bya ba yin pas/ sems can kun mchog nyid sems dang / spong dang rtogs dang gsum po la/ /chen po gsum gyi rang byung gi/ /ched du bya ba 'di zhes bya//zhes bya ba gsungs so/ /de la sgrub pa'i ched du bya ba 'di ni rnam pa gsum ste/ 'di lta ste/ mchog nyid chen po nyid dang / spong ba chen po nyid dang / rtogs pa chen po nyid do/ /gang gi phyir mchog nyid chen po nyid kyi dbang du mdzad nas/ bcom ldan 'das byang chub sems dpa' sems dpa' chen po zhes bgyi ba ci'i slad du/byang chub sems dpa' sems dpa' chen po zhes bgyi zhes gsol pa dang / byang chub sems dpa' sems dpa' chen po zhes bya ba'i sgra 'jug pa'i rgyu las brtsams te/ sems can gyi phung po chen po dang sems can gyi sde chen po brgyad pa la sogs pa nas/phyir mi ldog pa'i bar gyi mchog nyid du byed pas so zhes bya ba yin no/ /de la sems can gyi phung po chen po zhes bya ba ni sems can gyi tshogs rnams so/ /chen po zhes bya ba ni dpag tu med pa'o/ /gcig kyang 'khor ba thog ma med par 'jug pa na chen po nyid du 'gyur bas phung po zhes smos so//sems can gyi sde zhes bya ba ni zhugs pa dang lam gyi 'bras bu la gnas pa'i sde'i dbye bas so/ /gang dag gis sems can thams cad kyi mchog nyid du byed par 'gyur ba'i chos de dag kyang gang yin zhe na/de la rab 'byor byang chub sems dpa' chen pos rdo rje lta bu'i sems bskyed de/ sems can thams cad kyi mchog tu 'gyur bar bya'o zhes bya ba yin no/ / de la rdo rje lta bu'i sems bskyed pa ni 'di yin te/ gang 'di snyam du bdag gis sems can thams cad kyi don du 'khor ba dpag tu med par go cha bgo bar bya'o snyam pas 'khor ba dpag tu med pa yongs su 'dzin pa dang /bdog pa thams cad yongs su gtong ba ste/ bdag gis bdog pa thams cad yongs su gtong bar bya'o zhes gang gsungs pa yin no/ /sems can thams cad la sems mnyam pa nyid dang de dag theg pa gsum gyis yongs su mya ngan las 'das kyang gang yongs su mya ngan las 'das pa med pa ste/de ci'i phyir zhe na/ chos thams cad skye ba med pa dang 'gag pa med par rtogs pa nyid kyis dang / rnam pa thams cad mkhyen pa nyid kyi sems ma 'dres pas pha rol tu phyin pa drug la spyad par bya ba nyid kyis te /ma 'dres pa zhes bya ba ni nyan thos kyi theg pa la sogs pa 'dod pa'i sems dang ma 'dres pas zhes bya ba'i tha tshig go/ /thams cad rjes su spong bar rtogs pa yongs su grub pa la bslab par bya ba nyid kyis dang /chos thams cad tshul gcig tu mngon par sgrub pa rtogs par bya ba nyid kyis dang / sems can ngan 'gror skyes pa thams cad las/ sems can re re'i don gyi phyir de rnams yongs su mya ngan las ma 'das kyi bar du rang nyid kyis de'i sdug bsngal rnams nyams su myong bar bya'o zhes khas blangs pas phyis rang gi tshogs yongs su rdzogs par bya ste/bla na med pa yang dag par rdzogs pa'i byang chub 'dod pa nyid kyis so/ /sems dang po bskyed phyin chad 'dod chags la sogs pa dang / nyan thos la sogs pa'i sems mi skyed pas sems rlabs po che dang /rnam pa thams cad mkhyen pa nyid dang ldan pa'i yid la byed pa'i sems la rlom pa med pas mi sgul ba dang / sems can thams cad skyob cing yongs su mi gtong ba dag dang / des rlom sems su yang mi byed pas na phan pa dang bde ba'i sems kyis so//chos zhes bya ba ni chos thams cad dbyer med pa gang yin pa'o/ /de la dga' zhing mngon par dga' ba gang yin pa de ni chos la dga' ba'o/ /de la sgom zhing mang du byed pa gang yin pa de ni chos la kun du dga' ba yin te/ chos la dga' ba dang / kun dga' ba dang / kun dga' ba'i rnal 'byor la brtson pa dang / stong pa nyid thams cad dang / byang chub kyi phyogs kyi chos rnams nas sangs rgyas kyi chos ma 'dres pa bcwa brgyad kyi bar dang / rdo rje lta bu'i ting nge 'dzin dang / nam mkha' ltar chags pa med pas rnam par grol zhing gos pa med pa'i ting nge 'dzin gyi bar thams cad la mi dmigs pa'i tshul gyis gnas nas sems can gyi mchog nyid du byed pas te/de ni rab 'byor shes rab kyi pha rol tu phyin pa la gnas pa'i byang chub sems dpa' gang dag la gnas nas sems can gyi tshogs chen po dang /sems can gyi sde chen po'i mchog tu bya ba'i chos ni de dag yin te/ des na byang chub sems dpa' sems dpa' chen po zhes brjod do zhes gsungs pa yin no/ /spong ba chen po nyid kyi dbang du mdzad nas/ gnas brtan shA ri'i bu spobs pa ston pa gsungs pa ni/bcom ldan 'das bdag tu lta ba dang / sems can du lta ba dang zhes bya ba nas brtsams te/ chad pa dang rtag par lta ba dang / yod pa dang med par lta ba dang / phung por lta ba dang zhes bya ba nas/ sangs rgyas kyi chos ma 'dres pa bcwa brgyad dang sems can yongs su smin pa dang /sangs rgyas kyi zhing yongs su sbyong ba dang / byang chub rnam par rtogs pa dang / chos kyi 'khor lo bskor ba'i bar gyi lta ba rnams spang bar bya ba'i phyir mi dmigs pa'i tshul gyis chos ston pa nyid kyis dang / thabs la mi mkhas pa dang ldan pa ni ji skad du bshad pa'i lta ba'i tshogs bskyed pa'i rgyur 'gyur ba nyid kyis bshad ma thag pa mi dmigs pa'i thabs la mkhas pa khyad par du byed pa 'di nyid kyis so//de la nga rgyal bskyed pa'i don gyis na bdag ste/ 'di las nga rgyal skye ba yin pa'i phyir ro/ /zhum pa'i bdag nyid can yin pas na sems can no//srog gi dbang po'i dbang gis skal ba mnyam pa'i ris yongs su rdzogs kyi bar du gnas pas na srog go/ /las dang nyon mongs pa'i dbang gis skye zhing mi rtag pa nyid kyis skye bar byed pas na skye ba pa'o / /kham du byas pa la sogs pa'i zas kyis rgyas par byed pas na gso ba'o//bu ni lus la bya bar bshad la de la brten pas na pu ru Sha ste skyes bu'o/ /gzhan dag ni skyes pa'i dbang po dang ldan pas skyes bu yin no zhes zer te/ de dag gi ltar na gzugs mkhas pa rnams skyes bu ma yin par 'gyur bas mi rigs so//'gro ba rnams su yang dang yang du brten pas na gang zag go/ /gtsor yid kyi las las skyes pa nyid yin pa'i phyir yid las skyes so/ /nga rgyal srung bar byed pa yin pas na shed bdag go/ /dge ba la sogs pa'i las la brten pa nyid kyis na byed pa po'o/ / de'i rnam par smin pas so sor kun du myong bas na tshor ba po'o/ /yid kyi rnam par shes pa'i rten yin pa'i phyir shes pa po'o/ /mig la sogs pa rnam par shes pa lnga'i rten du gyur pa'i phyir mthong ba po'o/ /sngon byung ba da ltar med pas na chad pa'o/ /rang bzhin gyis yod pa gang yin pa de ni med pa ma yin pas na rtag pa'o//yod pa gang yin pa de ni rtag tu yod pa nyid yin la/ med pa gang yin pa de ni shin tu med pa nyid yin no zhes bya ba ni yod pa dang med pa'i lta ba ste/ dper na ser skya ba lta bu'o/ /lta ba lhag ma ni go sla bas ma bshad do/ /rtogs pa chen po nyid kyi dbang du mdzad nas/gnas brtan rab 'byor gyi spobs pa ston pas/ bcom ldan 'das byang chub kyi sems/ mi mnyam pa dang mnyam pa'i sems/ nyan thos dang / rang sangs rgyas thams cad dang thun mong ma lags pa'i sems/ zag pa ma mchis shing khams gsum du ma gtogs pa'i sems gang lags pa de yang rang bzhin gyis stong pa nyid kyi slad du chags pa ma mchis te/de'i phyir byang chub sems dpa' sems dpa' chen po zhes bgyi ba'i grangs su mchi'o zhes bya ba la sogs pa gang gsungs pa yin no/ /de la byang chub pa'i don gyi sems ni/byang chub kyi sems so/ /mi mnyam pa zhes bya ba ni sangs rgyas rnams yin la/ de rnams dang mnyam pas na mi mnyam pa dang mnyam pa'o/ /de ci'i phyir zhe na/ 'di ltar sems de ni sems ma yin te/ des na de de la chags pa med do/ /yang mnyam pa gang gis sems de mi mnyam pa'i sangs rgyas dang mnyam zhe na/shA ri'i bu 'di la byang chub sems dpa' chos 'ga' yang skye ba'am 'gag par yang dag par rjes su mi mthong ngo zhes bya ba nas brtsams te/ skye ba la sogs pa las rnam par grol ba thun mong ma yin pa'i sems kyi mtshan nyid kyis gsungs pa yin no//de la sems dang po bskyed pa nas bzung ste zhes bya ba ni brda las byung ba nas so/ /chos gang la'ang skye ba'am 'gag pa yang dag par rjes su mi mthong ngo zhes bya ba ni drod kyi dus su snga ma dang phyi ma'i gnas skabs dang 'gag pa dang skye ba dmigs pa'i tshul du mi mthong ba'o//'grib pa dang 'phel ba mi mthong zhes bya ba ni/ rtse mo'i dus su sngon dang phyi ma'i gnas skabs dag zad pa dang khyad par du 'gro ba dmigs pa'i tshul gyis mi mthong ba'o/ /'ong ba dang 'gro ba mi mthong zhes bya ba ni bzod pa'i dus su rtogs pa'i chos kyi nye ba dang ring ba dmigs pa'i tshul gyis mi mthong ba'o//kun nas nyon mongs pa dang / rnam par byang ba yang dag par rjes su mi mthong zhes bya ba ni 'jig rten pa'i chos kyi mchog gi dus su mi mthun pa dang / gnyen po'i phyogs dmigs pa'i tshul gyis mi mthong ba'o//gang la zhes bya ba ni mthong ba'i lam gang gis mi mthong ba'o/ /kun nas nyon mongs pa med pa dang / rnam par byang ba med pa zhes bya ba ni lugs las bzlog pa'i rim pas bsgom pa'i lam ston pa yin te/ ji ltar mthong ba la mngon du phyogs par byed pa yin pa'i phyir ro//de la nyan thos kyi sems med do/ /rang sangs rgyas kyi sems med do zhes bya ba ni sems bskyed pa'i thun mong ma yin pa nyid gsal bar byed do/ /tshe dang ldan pa rab 'byor rang bzhin gyis stong pa nyid kyi phyir gzugs kyang chags pa med pa yin nam zhes bya ba nas brtsams te/chos thams cad chags pa med pa nyid du khas blangs pas ni rtogs pa'i yul ston pa yin no/ /tshe dang ldan pa rab 'byor gzugs med pa'ang gzugs la chags pa med dam zhes bya ba nas brtsams te/ sangs rgyas kyi chos ma 'dres pa rnams kyi bar du med pa'ang sangs rgyas kyi chos la chags pa med pa nyid du khas blangs pas sems de la mngon par zhen pa dang rlom sems bkag cing shes bya dang shes pa gnyis mi dmigs pa'i sbyor bas rtogs pa la brten pa'i chags pa bsal bar ston pa yin no//de la gzugs ni gzugs kyi chos nyid do//de la ma chags pa ni gzugs kyi rang bzhin du 'khrul pa rnam par dpyad pa'i phyir ro/ /des na de ltar spangs pa dang rtogs pa'i khyad par can gyi tshogs chen po dang / sems can gyi sde chen po'i mchog tu byed pa'i mtshan nyid ni ma rgyal ba la rgyal ba'i ched du bya ba dang chos mthun par byang chub sems dpa'i khyad par can nyid sgrub pa'i ched du bya ba yin par rig par bya'o//dmigs pa dang ched du bya ba la khyad par ci yod ce na/ dmigs pa ni de'i che ba yin la/ ched du bya ba ni ma 'ongs pa skal ba yin te/ mda' ltong sbyor ba dang 'bem la phog pa dang chos mtshungs so//sgrub pa'i rten dang / dmigs pa dang / ched du bya ba bshad zin to// //da ni sgrub pa brjod par bya'o/ /de la thams cad mkhyen pa nyid gsum gyi yul la ni spyir dkar po'i chos kyi rten can gyi bya ba ni sgrub pa yin la/ rnam pa thams cad mngon par rdzogs par rtogs pa la sogs pa mngon par rtogs pa rnam pa bzhi la ni mngon par rtogs pa so so la pha rol tu phyin pa drug po dag gis thogs pa med pa dang /'dzin pa med pa gang yin pa de ni sgrub pa yin no zhes bya ba'i don to/ /gnas brtan gang po'i spobs pa gsal bar byed pas sgrub pa'i don gsungs pa ni/bcom ldan 'das sems can de ni go cha chen po bgos pa lags so zhes bya ba nas brtsams pas 'di tsam zhes tshad yongs sum bcad pa'i sems can gyi khams kyi don du sbyin pa la sogs pa'i pha rol tu phyin pa rnams la spyod pa'i go cha sgrub pa dang rjes su mthun pa'i bya ba shes pa'i don dang /de nyid yongs su mya ngan las 'das pa dang yang dag par rdzogs pa'i byang chub la bkod pas sgrub pa gzhan gyi don gtsor gyur pa yin pa'i khyad par shes par bya ba'i don gyis gang gsungs pa yin no//de la sgrub pa ni rnam pa bzhi ste/ go cha'i sgrub pa dang / 'jug pa'i sgrub pa dang / tshogs kyi sgrub pa dang / nges par 'byung ba'i sgrub pa'o/ /de la go cha'i sgrub pa rnam pa drug gi dbang du mdzad nas/ gsungs pa ni/ de dag so sor sbyin pa sogs/ /rnam pa drug tu bsdus pa yis//go cha'i sgrub pa gang yin te/ /drug tshan drug gis ji bzhin bshad/ /ces bya ba yin no/ /ji ltar na drug tshan drug gis yin zhe na/ byang chub sems dpa' chen po shes rab kyi pha rol tu phyin pa la spyod cing rnam pa thams cad mkhyen pa nyid dang ldan pa'i yid la byed pas sbyin pa gtong ba ni sbyin pa'i pha rol tu phyin pa'i go cha nyid dang /de nyid kyi nyan thos la sogs pa'i yid la byed pa dang bral ba ni tshul khrims kyi pha rol tu phyin pa'i go cha nyid dang / de nyid kyi rnam pa thams cad mkhyen pa nyid kyi chos rnams la bzod pa dang 'dod pa dang nye bar rtog pa nyid bzod pa'i pha rol tu phyin pa'i go cha nyid dang /de la dang por nye bar gnas pa la ni bzod pa'o/ /skad cig gnyis pa la sogs pa rnams su ni 'dod pa'o/ /rnam pa du mar nye bar rtog pa ni nye bar rtog pa'o/ /de nyid kyi dge ba'i rtsa ba de bla na med pa yang dag par rdzogs pa'i byang chub tu yongs su bsngo ba ni brtson 'grus kyi pha rol tu phyin pa'i go cha nyid dang /de nyid kyi theg pa gzhan gyi sems dang ma 'dres pa'i rtse gcig pa nyid kyis dge ba'i rtsa ba bla na med pa yang dag par rdzogs pa'i byang chub tu yongs su bsngo ba ni bsam gtan gyi pha rol tu phyin pa'i go cha nyid dang /de nyid kyi sgyu mar byas pa'i 'du shes nye bar gnas pas sbyin par bya ba dang gtong ba po dang len pa po mi dmigs pa ni shes rab kyi pha rol tu phyin pa'i go cha yin pa nyid kyis gsungs pa yin te/ 'di ni go cha'i sgrub pa las sbyin pa'i go cha ste drug tshan dang po'o// // de nyid kyi tshul khrims kyi pha rol tu phyin pa la de bzhin du spyod pa ni gnyis pa'o/ /bzod pa'i pha rol tu phyin pa la spyod pa ni gsum pa'o/ /brtson 'grus kyi pha rol tu phyin pa la spyod pa ni bzhi pa'o/ bsam gtan gyi pha rol tu phyin pa la spyod pa ni lnga pa'o//de nyid kyi shes rab kyi pha rol tu phyin pa la spyod pa ni drug pa'o/ /de ltar na 'di dag drug tshan drug tu 'gyur yang go cha rnam pa drug tu chos mthun pa'i phyir dang / sbyin pa la sogs par chos mthun pa'i phyir go cha'i sgrub pa drug bshad pa yin no// // rnam pa thams cad mkhyen pa nyid dang ldan pa'i sems kyis pha rol tu phyin pa rnams mtshan ma med par byed pa'i mi dmigs pa ni go cha sgrub pa'i rang gi ngo bo chen po nyid shes par byed pa'i don can go cha chen po nyid dang / de bsam gtan la sogs pa la snyoms par 'jug pa yang byed cing de dag gi ro myang bar yang mi byed/de dag gis 'phrog par yang mi 'gyur/ de dag gi dbang gis skye ba'ang ma yin pa dang / bsam gtan la sogs pa dang / stong pa nyid dang / mtshan ma med pa dang / smon pa med pa mthong bas gnas kyang yang dag pa'i mtha' mngon du byed pa yang ma yin pa zhes bya bas go cha'i sgrub pa'i yongs su 'dzin pas thabs mkhas pa chen po nyid yin par shes par byed pa'i don can thabs la mkhas pa dang ldan pa shes rab kyi pha rol tu phyin pa'i go cha chen po nyid dang /go cha'i sgrub pa'i yongs su 'dzin pa'i dge ba'i bshes gnyen chen po nyid du shes par byed pa'i don can phyogs bcu'i 'jig rten gyi khams kyi sangs rgyas rnams bsngags pa la sogs pas gsungs pas de ltar go cha'i sgrub pa yin no//go cha'i sgrub pa bshad zin to// //'jug pa'i sgrub pa brjod par bya ba yin pa las de ni rnam pa gnyis te/'di lta ste/ theg pa chen po la 'jug pa dang de la 'dzeg pa'o/ /de lta bas na mdo las kyang / tshe dang ldan pa gang po ji tsam gyis na byang chub sems dpa' chen po theg pa chen po la 'jug pa dang theg pa chen po la 'dzeg par 'gyur ba yin zhes gsungs pa yin no//de'ang don gcig pa nyid kyis 'jug pa ni 'dzeg pa yin la/ 'dzeg pa'ang 'jug pa yin no zhes ming gcig nyid du rnam par gzhag pas rnam pa dgur 'gyur ba ni 'di lta ste/ bsam gtan dang gzugs med pa'i snyoms par 'jug pa dang ldan pa'i 'jug pa dang /pha rol tu phyin pa drug gi 'jug pa dang / 'phags pa'i lam gyi 'jug pa dang / tshad med pa'i 'jug pa dang / mi dmigs pa dang ldan pa'i 'jug pa dang / 'khor gsum yongs su dag pa'i 'jug pa dang / ched du bya ba'i 'jug pa dang / mngon par shes pa'i 'jug pa dang / rnam pa thams cad mkhyen pa nyid kyi 'jug pa'o/ /des na/ bsam gtan gzugs med sbyin sogs dang / /lam dang byams la sogs pa dang / /dmigs pa med dang ldan pa dang / /'khor gsum rnam par dag pa dang //ched du bya dang mngon shes drug /rnam kun mkhyen pa'i tshul la ni/ /'jug pa'i sgrub pa theg chen la/ /'dzeg pa yin pa shes par bya/ /zhes bya ba yin no/ /de la bsam gtan dang gzugs med pa'i snyoms par 'jug pa dang ldan pa'i 'jug pa ni/ byang chub sems dpa' chen po sbyin pa'i pha rol tu phyin pa la spyod pa nam mkha'i rnam pa dang rtags dang mtshan ma rnams kyis bsam gtan dang gzugs med pa'i snyoms par 'jug pa la 'jug cing ldang ba na dge ba'i rtsa ba de dag bla na med pa yang dag par rdzogs pa'i byang chub tu yongs su bsngo ba theg pa chen po yin pa nyid kyis gang gsungs pa yin no//nam mkha'i rnam pa dang rtags dang mtshan ma rnams kyis zhes bya ba ni chos thams cad nam mkha' dang 'dra bar dmigs su med pa'i rnam pa can gyi lam yongs su 'dzin pas rnam pa med pa dang rtags med pa dang mtshan ma med pa zhes bya ba'i tha tshig go//de la rnam pa ni/ 'dod pa dag las dben pa sdig pa mi dge ba'i chos kyis dben pa zhes bya ba yin no/ /rtags ni rtog pa dang bcas pa dpyod pa dang bcas pa zhes bya ba la sogs pa'o/ /mtshan ma ni/ dben pa las skyes pa'i dga' ba dang zhes bya ba la sogs pa'o//yang na sa 'og ma dang gong ma'i dbye bas rags pa dang zhi ba la sogs pa ni rnam pa'o/ /sa gang la tshor ba gang zhig yod pa de ni rtags so/ /snyoms par 'jug pa'i dben pa'i ro myang ba ni mtshan ma'o/ /pha rol tu phyin pa drug gi 'jug pa ni rnam pa thams cad mkhyen pa nyid dang ldan pa'i yid la byed pas sems can rnams kyi nyon mongs pa rab tu spang ba'i phyir chos ston pa ni sbyin pa'i pha rol tu phyin pa'i theg pa chen po nyid dang /de nyid kyi theg pa dman pa'i sems kyi go skabs mi 'byed pa ni tshul khrims kyi pha rol tu phyin pa'i theg pa chen po nyid dang /de nyid kyi sems can rnams kyi nyon mongs pa zad par bya ba'i phyir chos bstan to snyam pa'i yid la byed pa de dag la bzod pa dang / 'dod pa dang / yongs su rtogs par byed pa dang / khong du chud par byed pa dang / nges par nye bar sems pa rnams ni bzod pa'i pha rol tu phyin pa'i theg pa chen po nyid dang /de la yongs su brtags nas gzung ba'i don yongs su bskyang bar bya ba'i phyir de yongs su nyams par byed pa'i rkyen shes par byed pa ni khong du chud par byed pa'o/ /don de nye bar gnas par bzung nas blo ma lus par 'god par byed pa ni sems pa'o//de nyid kyi brtson 'grus mi gtong ba ni brtson 'grus kyi pha rol tu phyin pa'i theg pa chen po nyid dang / de nyid kyi bsam gtan dang / gzugs med pa'i snyoms par 'jug pa rnams la dmigs su med pa'i rnam par snyoms par 'jug pa ni bsam gtan gyi pha rol tu phyin pa'i theg pa chen po nyid dang /de nyid kyi bsam gtan dang po la sogs pa'i yan lag rnams la mi rtag pa dang / sdug bsngal ba dang / bdag med pa dang / zhi ba dang / stong pa dang / mtshan ma med pa dang / smon pa med pa'i rnam par so sor rtog pa ni/ shes rab kyi pha rol tu phyin pa'i theg pa chen po yin pa nyid kyis gang gsungs pa yin no//'phags pa'i lam la 'jug pa ni/ byang chub sems dpa' chen po'i theg pa chen po ni rnam pa thams cad du byang chub kyi phyogs kyi chos sum cu rtsa bdun sgom pa dang zhes bya ba la sogs pa gang gsungs pa yin te/rnam pa thams cad du zhes bya ba ni thams cad shes pa nyid gsum gyis bsdus pa ni rnam par sgom pa'i dbang du byas pa yin no/ /tshad med pa bzhi la 'jug pa ni/ yang tshad med pa la spyod pa'i rnam pa thams cad mkhyen pa nyid la bzod pa ni bzod pa'i pha rol tu phyin pa'i theg pa chen po nyid dang /theg pa dman pa'i sems dang ma 'dres pa ni brtson 'grus kyi pha rol tu phyin pa'i theg pa chen po nyid dang / bsam gtan gyi ro myang ba ni shes rab kyi pha rol tu phyin pa'i theg pa chen po nyid dang / tshad med pa bzhi la snyoms par 'jug pa ni bsam gtan gyi pha rol tu phyin pa'i theg pa chen po nyid dang /sems can rnams la zag pa zad pa stobs par byed pa ni sbyin pa'i pha rol tu phyin pa'i theg pa chen po nyid dang / tshad med pa bzhi la snyoms par 'jug pa ni bsam gtan gyi pha rol tu phyin pa'i theg pa chen po nyid dang /tshul khrims kyi pha rol tu phyin pa'i theg pa chen po yin pa nyid kyis gang gsungs pa yin no/ /pha rol tu phyin pa rnams kyi rim pa'i bye brag 'di ni tshad med pa bzhi la gnas pa'i gang zag gi dbang du byas par rig par bya ste/ de nyid la srid pa'i phyir ro/ /yang tshad med pa dag ni rnam pa bzhi ste/'di lta ste/ byams pa dang / snying rje dang / dga' ba dang / btang snyoms te/ byams pa dang ldan pa'i sems zhes bya ba la sogs pa rgya cher gang gsungs pa yin no/ /de dag re re zhing rnam pa gsum ste/ sems can la dmigs pa dang / chos la dmigs pa dang /dmigs pa med pa'o/ /de la sems can la dmigs pa ni/ rgyu rnam pa bzhis rnam par bzhag ste/ nye bar sgrub pa nyid dang / mi mthun pa'i phyogs kyi gnyen po nyid dang / rnam par dag pa nyid dang / 'bras bu yongs su 'dzin pa nyid kyis so//nye bar sgrub pas ji ltar zhe na/ bde ba gsum nye bar sgrub pa'i phyir te/ de byams pa dang ldan pa'i sems zhes bya ba ni phan pa dang bde ba nye bar sgrub par nye bar gnas pas so/ /yangs pa zhes bya ba ni 'dod pa na bde ba nye bar sgrub pa'i phyir ro/ /rgya chen por gyur pa zhes bya ba ni dga' ba dang bcas pa'i bsam gtan dang po dang gnyis pa'i sa zhes bya ba'i don te/de gnyis la ni dga' ba yod pa'i phyir ro/ /mi gnyis pa zhes bya ba ni dga' ba med pa'i bsam gtan gsum pa'i sa zhes bya ba'i tha tshig ste/ de ni sdug bsngal dang dga' ba dang bral ba nyid yin pa'i phyir ro// mi gnyis pa yin no/ /tshad med pa zhes bya ba ni 'bras bu tshad med pa'i phyir na chu bo chen po bzhi'i chu 'dus pa dang 'dra bar/ de nyid tshad med par shes par bya ste/ ji skad du bshad pa'i bde ba la sogs pa dang ldan pa'i phyir ro/ /de ltar na re zhig nye bar sgrub pa yin no//mi mthun pa'i phyogs kyi gnyen po las ji ltar zhe na 'khon med pa zhes bya ba ste/ mi 'dod pa nye bar sgrub pa dang / 'dod pa nye bar sgrub pa'i gegs byed pa'i gnod byed kyi gnyen po yin pas so/ /rnam par dag pas ji lta bu yin zhe na/ 'gran zla med pas sgrib pa med pa zhes bya ba ste/rim pa ji lta ba bzhin gnyid dang / rmugs pa dang / rgod pa dang / 'gyod pa'i sgrib pa dag zhi bar byed pa yin pa'i phyir dang / legs par mnyam par gzhag pa yin pa'i phyir ro/ /'bras bu yongs su 'dzin pas ji lta bu zhe na/ gnod pa med pa zhes bya ba ste/ gzugs dang 'dod pa'i khams kyi rnam par smin pa dang rgyu mthun pa'i 'bras bu gnod pa med pa nyid ci rigs par yongs su 'dzin pa yin no/ /de ltar re zhig sems can la dmigs pa rgyu rnam pa bzhis rnam par bzhag pa yin no/ /chos la dmigs pa ni thams cad du rjes su song ba zhes bya ba gcig gis yin te/thams cad rjes su song ba nyid kyis 'dod pa dang gzugs dang gzugs med pa na spyod pa'i so so'i skye bo dang slob pa'i chos ji snyed pa ste/ gang dag la sems can du gdags par byed pa de la dmigs pa'i phyir ro//shin tu bsgoms pas zhes bya ba ni shin tu goms par byas pa yin pa'i phyir ro/ /dmigs pa med pa ni rgyu rnam pa gnyis kyis te/ 'jig rten gyi chos kyi dbyings kyis klas pa zhes bya ba ni chos bdag med pa gtsor gyur pa'i 'jig rten gyi mtshan nyid la dmigs pa nyid do//nam mkha'i khams kyi mthas gtugs pa zhes bya ba ni mtha' yongs su chad pa med pa nyid kyang yin pa ste/ de ltar na dmigs pa med pa yin no/ /yang byams pa dang ldan pa la sogs pa'i sems des ci zhig byed ce na/ de'i phyir thams cad dang ldan pa'i 'jig rten khyab par byas shing nye bar bsgrubs nas rnam par gnas pa zhes gsungs te/thams cad dang ldan pa'i 'jig rten gyi khams lhag pa'i bsam pa'i lhag par mos pas khyab par byang chub par byas nas zhes bya ba'i don to/ /ldan pa zhes bya ba ni mang po'i don la yin par shes par byas te /sems can la sogs pa'i don la mtha' yas pa'i phyir ro/ /ring po ni pad+mA wa ti zhes bya ba bzhin no/ /nye bar bsgrubs nas rnam par gnas pa zhes bya ba ni blo de dang nye bar yang dag par spong nas de'i nye bar 'tshe ba gtan nas spong bzhes bya ba'i don nye bar bsgyur ba dang /khams rnams kyi don ni 'di nyid yin pa'i phyir ro/ /snying rje la sogs pa'ang de bzhin du brjod par bya'o/ /mi dmigs pa dang ldan pa'i 'jug pa ni/ tshe dang ldan pa shA ri'i bu gzhan yang byang chub sems dpa' sems dpa' chen po'i theg pa chen po ni nang la sogs pa stong pa nyid kyi bar du shes kyang dmigs pa'i tshul gyis ma yin pas te zhes bya ba nas brtsams te/chos thams cad la sems rnam par g.yeng ba med par mnyam par gzhag pa'i shes pa dang / rtag pa dang / bde ba dang / bdag dang / zhi ba ma yin pa dang /stong pa ma yin pa dang / mtshan ma dang / smon pa bzlog zla dang bcas pa rnams la shes pa mi 'jug pa dang / dus gsum po rnams dang / khams gsum pa dang / 'jig rten pa dang / zag pa dang bcas pa dang / 'dus byas kyi chos bzlog zla dang bcas pa rnams la mi dmigs pa dang ldan pa'i theg pa chen po yin pa nyid dang /de la zhugs pa nyid kyis gang gsungs pa yin no/ /'khor gsum rnam par dag pa'i 'jug pa ni/ de shes rab kyi pha rol tu phyin pa la spyod pa'i tshe/ sbyin pa'i pha rol tu phyin pa la yang dag par gnas kyang des sbyin pa'ang mi dmigs /len pa po 'ang mi dmigs zhes bya ba la sogs pa gang gsungs pa yin no/ ched du bya ba'i 'jug pa ni/ de rnam pa thams cad mkhyen pa nyid dang ldan pa'i sems ma 'dres pas bsgom pa gzhig pa'i don du stong pa nyid dang / byang chub kyi phyogs kyi chos rnams nas sangs rgyas kyi chos ma 'dres pa bcwa brgyad kyi bar du sgom pa dang /de dag ming tsam du shes par bya ba'i phyir theg pa chen po yin pa dang / de la zhugs pa nyid kyis gang gsungs pa yin no/ /bsgom pa gzhig pa'i don du zhes bya ba ni bsgom pa'i don gzhig pa'i ched du yin gyi byang chub kyi phyogs la sogs pa'i don du ni ma yin pa'o//sgom pa'i don yang gang yin zhe na/ dngos po med pa'i don ni sgom pa'i don te/ gang gi phyir sgom pa med pa zhes bya ba'i dngos po ni cung zad kyang yod pa ma yin no/ /de lta yin kyang byang chub kyi phyogs la sogs pa yang ngo //mngon par shes pa drug la 'jug pa ni/ de sems dang po bskyed pa nas bzung ste/ snying po byang chub la 'dug gi bar du mngon par shes pa yongs su rdzogs pa'i phyir sems can yongs su smin par byed do/ /sangs rgyas kyi zhing nas sangs rgyas kyi zhing du 'gro zhes bya ba nas brtsams te/de gnyis su med pa'i sa la gnas te theg pa de dang nam yang mi 'bral ba'i lus yongs su 'dzin to zhes bya ba'i bar gang gsungs pa yin no/ /rnam pa thams cad mkhyen pa nyid la 'jug pa ni/ de rnam pa thams cad mkhyen pa nyid kyi ye shes thob nas kyang sngon chad ma bskor ba'i chos kyi 'khor lo rab tu bskor ba dang /phyogs bcu'i 'jig rten gyi khams kyi sangs rgyas gang yin pa rnams kyi 'jig rten gyi khams thams cad du de'i ming smos pa mdzad cing de rnam pa thams cad mkhyen pa nyid thob nas kyang chos kyi 'khor lo skor bar byed do zhes grags pa sgrogs shing dbyangs brjod pa mdzad pa dang /theg pa chen po la yang dag par gnas pa nyid kyis gang gsungs pa yin no/ /'jug pa'i sgrub pa bshad zin to// //tshogs kyi sgrub pa bshad par bya ste/de ni snying rje chen po la sogs pa'i tshogs kyi dbye bas rnam pa bcu bdun du 'gyur ro zhes gsungs pa ni/ brtse dang sbyin la sogs pa drug /zhi gnas lhag mthong bcas pa dang / /zung du 'brel ba'i lam gang dang / /thabs la mkhas pa gang yin dang //ye shes dang ni bsod nams dang / /lam dang gzugs dang sa bcu dang / /gnyen po tshogs kyi sgrub pa yi/ /rim pa yin par shes par bya/ /zhes bya ba yin no/ /de la tshogs kyi sgrub pa rnam pa bcu bdun ni 'di dag yin te/ 'di lta ste/ snying rje chen po'i tshogs dang /sbyin pa'i tshogs dang / tshul khrims kyi tshogs dang / bzod pa'i tshogs dang / brtson 'grus kyi tshogs dang / bsam gtan gyi tshogs dang / shes rab kyi tshogs dang / zhi gnas kyi tshogs dang / lhag mthong gi tshogs dang / zung du 'brel ba'i lam gyi tshogs dang / thabs la mkhas pa'i tshogs dang / ye shes kyi tshogs dang / bsod nams kyi tshogs dang / lam gyi tshogs dang / gzungs kyi tshogs dang / sa'i tshogs dang / gnyen po'i tshogs so/ /de la snying rje chen po'i tshogs ni/ bcom ldan 'das go cha chen po bgos pa/ go cha chen po bgos pa zhes bgyi ba ji tsam gyis na byang chub sems dpa' chen po go cha chen po bgos zhes bgyi ba lags zhes bya ba la sgra de 'jug pa'i rgyu bstan pa'i sgo nas tshogs kyi sgrub pa'i dbang du mdzad de/ phyogs bcu re re zhing 'jig rten gyi khams gang+gA'i klung gi bye ma snyed kyi sems can dmyal ba dang /byol song gi skye gnas dang / gshin rje'i 'jig rten gyi sems can rnams rang gi lus kyi 'od kyis snang bar byas nas sdug bsngal de dang de zhi bar byas te/ sangs rgyas la sogs pa la phyag 'tshal ba thob nas/rkyen des de rnams ngan song de rnams las langs par gyur nas byang chub pa'i bar du sangs rgyas mnyes pa dang rjes su mthun pa'i skye ba yang dag par 'dzin pas gang gsungs pa yin te/ sdug bsngal dang bral ba'i rnam pa can ni thugs rje yin pa'i phyir ro/ / sbyin pa'i tshogs ni zas la sogs pa'i yo byad de dang de 'dod pa'i sems can de snyed nyid la zas la sogs pa'i yo byad de dang de byin nas chos bstan pas byang chub kyi bar du pha rol tu phyin pa drug dang mi 'bral bar byed pa nyid kyis gang gsungs pa yin no/ /tshul khrims kyi tshogs ni sems can de snyed kho na dge ba bcu'i las kyi lam dang bsam gtan la sogs pa nas/sangs rgyas kyi chos ma 'dres pa bcwa brgyad kyi bar la rab tu 'god de/ sems can de dag kyang rdzogs par byang chub kyi bar du chos bstan pa de dang mi 'bral ba nyid kyis gang gsungs pa yin no//bzod pa'i tshogs ni/ gal te sems can thams cad kyis bdag la rdo dang / dbyug pa dang / bong ba dang / khu tshur dang / lag chas brdeg cing mtshon gyis 'debs kyang de la bdag gis 'khrug pa dang ldan pa'i sems 'ga' tsam yang bskyed par mi bya'o snyam zhing rang gi bzod pa la rab tu 'god pa gang gsungs pa yin no//brtson 'grus kyi tshogs ni/ sems can de tsam pa nyid rnam pa thams cad mkhyen pa nyid dang ldan pa'i sems bskyed pas lus dang sems kyi brtson 'grus la len du 'jug cing 'dzud de rab tu 'god do zhes bya ba yang dag par nges par sbyor ba dang /rab tu 'jog pa dang / ma tshang ba med pa'i don brjod pa rnams kyis gang gsungs pa yin no/ /bsam gtan gyi tshogs ni/ sems can de snyed kho na rang nyid la gnas nas chos 'ga' yang rnam par g.yeng ba dang rnam par g.yeng ba med par ma mthong bar rdzogs par byang chub kyi bar du de nyid la 'dzin du 'jug cing 'dzud de 'god pa dag gis gang gsungs pa yin no//shes rab kyi tshogs ni/ ji ltar rang nyid chos gang la'ang tshu rol dang pha rol mi dmigs pa de bzhin du de rnams kyang de la yang dag par 'dzin du 'jug cing 'dzud de 'god pa rnams kyis gang gsungs pa yin no//de la tshu rol ni 'khor ba ste/ 'di tsam du byis pa rnams nyams dga' ba yin pa'i phyir ro/ /pha rol ni mya ngan las 'das pa ste/ rang gi don lhur len pa rnams sbyor ba'i brtson 'grus kyi pha rol tu phyin pa nyid du nyams dga' ba nyid kyis so//zhi gnas kyi tshogs ni/ yang bdag nyid pha rol tu phyin pa la gnas pa bzhin du sems can de snyed kho na pha rol tu phyin pa drug dang / byang chub kyi phyogs kyi chos rnams dang / rgyun du zhugs pa'i 'bras bu la sogs pa nas sangs rgyas kyi chos ma 'dres pa bcwa brgyad kyi bar dang /sangs rgyas nyid la yang dag par len du 'jug cing 'dzud de 'god pa sems can gyi khams 'di tsam zhes yongs su ma chad pa la dmigs pa rnams dang / de'i tshe bde ba nye bar sgrub pa sbyin pa'i pha rol tu phyin pa dang / ma 'ongs pa'i bde ba nye bar sgrub pa tshul khrims kyi pha rol tu phyin pa dang / bzod pa can spro ba dang ldan pa rtse gcig tu gtod pas ni gcig tu nges pa'i 'bras bu thob pa'i phyir na gcig tu nges pa'i bde ba nye bar sgrub pa bzod pa dang / brtson 'grus dang / bsam gtan gyi pha rol tu phyin pa dang /gtan du ba'i bde ba nye bar sgrub pa shes rab kyi pha rol tu phyin pas gang gsungs pa yin no/ /lhag mthong gi tshogs gsungs pa ni/ sgyu ma'i mkhan po'am sgyu ma'i mkhan po'i mtshan bu mkhas pa zhig gis zhes bya ba'i tshig gnyis pas sgyu ma'i rang bzhin ni gzhan gyi rkyen can ma yin pa 'ga' zhig yin no zhes rang gi ngo bo yod par dogs pa 'gog par byed de de ni snang ba tsam du zad pa'i phyir ro//de nyid kyi phyir/ de ci'i phyir zhe na/ rab 'byor 'di ltar sgyu ma'i chos nyid nye bar bzung nas chos rnams kyi chos nyid 'di yin pa'i phyir zhes gang gsungs pa yin te/rtog ge'i yongs su g.yo bas sun phyung ba'i 'jig rten pa thams cad ni snang ba tsam du rtogs pa'i phyir ro zhes bya ba'i don to/ /de nyid kyi phyir/ bcom ldan 'das bdag gis ji ltar bcom ldan 'das kyis gsungs pa'i don 'tshal ba ltar na sgyu ma'i chos rang gi mtshan nyid kyis stong pa nyid nye bar bzung na/byang chub sems dpa' chen pos ni rang gi mtshan nyid stong pa nyid kyi slad du go cha ma mchis pa'i go cha bgos par rig par bya'o zhes bya bas/ gnas brtan rab 'byor gyi don shes pa gsal bar bya ba nas brtsams te/de ci'i slad du zhe na/ gzugs la sogs pa'i phung po la sogs pa rnams dang / pha rol tu phyin pa rnams dang / stong pa nyid thams cad dang / byang chub kyi phyogs rnams nas sangs rgyas kyi chos ma 'dres pa bcwa brgyad kyi bar dang / byang chub sems dpa' dang / theg pa chen po'i go cha rnams gzugs la sogs pa nas theg pa chen po'i go cha'i bar rnams kyis stong pa nyid kyi rnam grangs kyis med pa'i go cha bgos pa nyid du rjes su shes pa dang /de ci'i phyir zhe na/ byed pa po nye bar mi dmigs pa'i phyir rnam pa thams cad mkhyen pa nyid dang go cha'i ched du bya ba sems can ma byas rnam par ma byas mngon par 'dus ma byas pa zhes bya ba byed pa'i yul 'gog pa dang /phung po la sogs pa rnams dang / bdag dang sems can la sogs pa rnams dang / rmi lam dang / sgra brnyan la sogs pa nas de bzhin nyid dang / ma nor ba de bzhin nyid la sogs pa dang /byang chub dang / rnam pa thams cad mkhyen pa nyid kyang shin tu mi dmigs pa'i phyir byed pa dang / rnam par byed pa dang / mngon par 'du byed pa 'gog par byed pa'i rten du 'gyur ba'i byed pa po rang dbang can gcig 'gog pa'i don gyis gang gsungs pa yin no//de la mi byed/ rnam par mi byed/ mngon par 'du mi byed ces bya ba'i tshig gsum ni rim pa bzhin du go cha dang / 'jug pa dang / tshogs kyi sgrub pa rnams su ma byung ba las byung ba dang / de khyad par du 'gro ba dang / 'bras bu thob pa la mngon du phyogs par byed pa'i dbang du mdzad nas yin par rig par bya ste/'di ltar bcom ldan 'das byang chub sems dpa' de ni go cha ma mchis pa'i go cha 'tshal bar rig par bgyi'o zhes de dag tu gsungs pa yin no/ /zung du 'brel ba'i lam gyi tshogs ni/ bdag gis bcom ldan 'das kyis gsungs pa ni mi byed rnam par mi byed/mngon par 'du mi byed de/ de ci'i phyir zhe na/ de shin tu mi dmigs pa'i phyir ro/ /zhes bgyi ba 'di'i don 'tshal ba ltar na zhes bya ba nas brtsams te/ med pa dang / dben pa dang / ma skyes pa dang / zhi ba dang / stong pa dang / mtshan ma med pa dang / smon pa med pa dang / mngon par 'du ma byas pa dang / ma skyes pa nyid de shin tu mi dmigs pa'i rnam pa can rnams kyis phung po la sogs pa nas/ rnam pa thams cad mkhyen pa nyid kyi bar dang / sangs rgyas kyi zhing yongs su sbyong ba nas sems can rnams theg pa gsum gyis yongs su mya ngan las 'das pa dang /byang chub sems dpa' ma bcings ma grol ba nyid bya ba'i rang gi ngo bo bkag pa'i don gyis gang gsungs pa yin no/ /de la yongs su 'dzin pa shes rab dang snying rje dag gis go rims bzhin du byang chub sems dpa' rnams ma bcings ma grol bar shes par bya ba na 'di ni gnas nyid du gsungs pa yin te/byang chub sems dpa'i snying rjes ni srid pa ji srid du sems can la phan 'dogs la/ shes rab kyis ni der gnas su zin kyang 'khor bar chags par mi byed do//blo yis der ni gnas pa yang / /brkam pa rjes su 'brel ma yin/ /dran pa yis ni bcings pa'i sems/ /phyi rol du ni 'jug mi 'gyur/ /so sor rtog la yang dag reg /sa ni gnas su 'dren par byed/ /skyes pa'i sems la brten pa dang / / 'ga' zhig mya ngan 'da' bar 'dod/ /'jig rten legs pa la brten pa/ /'ga' zhig 'khor bar 'khor bar 'dod/ /ces so/ /shes rab snying rje'i sbyor ba dang / /de dag phan tshun tha mi dad pa dang / mi mthun pa'i phyogs las 'das pa dang / sbyor ba shin tu sbyangs pa dang /rtogs pa po'i dbang du mdzad nas sbyor ba gang gis ji ltar gang nas gang du gang zhig nges par 'byung zhes bya ba'i dri ba lnga gang zhes bya bar nye bar ston pa'i sgo nas zhus pa ni/ bcom ldan 'das byang chub sems dpa' chen po'i theg pa chen po ni gang lags/ ji tsam gyis na theg pa chen po la yang dag par zhugs pa lags/gang nas gang byung ba lags/ gang du gnas par gyur pa lags/ theg pa de ni gang zhig 'byung bar 'gyur zhes bya ba yin no/ /de la dri ba dang po nas brtsams te/ thabs la mkhas pa'i tshogs ni byang chub sems dpa' chen po rnam pa thams cad mkhyen pa nyid dang ldan pa'i yid la byed pas pha rol tu phyin pa rnams so so la bdag nyid mi dmigs pa'i tshul gyis gnas shing gzhan dag la yang dag par len du 'jug pa theg pa chen po yin pa nyid kyis gang gsungs pa yin no//ye shes kyi tshogs kyang stong pa nyid kyi ye shes rnam pa nyi shu'i mtshan nyid du shes par bya'o//de la stong pa nyid rnam pa nyi shu ni 'di yin te/ mig la sogs pa nang gi chos rnams ther zug tu gnas pa med pa dang 'jig pa med pa'i rang bzhin yin pa'i phyir nang stong pa nyid do zhes gang gsungs pa yin no//de la ku Ta ni tshogs pa ste/ de la yod pa'i rang bzhin mi dmigs pa'i phyir a ku Ta s+tha ste/ tshogs par gnas pa med pa'o/ /de lta bur gyur pa de ci zhig 'jig par 'gyur te/ des na 'jig pa med pa yin te/ skye ba med pa dang 'gag pa med pa'i chos nyid de nyid ni 'di'i rang bzhin yin no//phyi'i chos gzugs la sogs pa rnam pa de lta bu'i rang bzhin yin pa'i phyir phyi stong pa nyid do/ /phyi nang gi chos skye mched rnams de lta bu'i rang bzhin yin pa'i phyir phyi nang stong pa nyid do/ /de la nang gi skye mched ni dbang po drug gi rang bzhin gyis bsdus pa gang yin pa'o//phyi ni yul gyi rang bzhin gyis bsdus pa gang yin pa'o/ /phyi nang gi dbang po'i rten gyis bsdus pa gang yin pa ste/ de ni sems kyis zin pa'i phyir nang yin la/ dbang pos ma bsdus pa'i phyir na phyi rol yang yin no/ / chos kyi skye mched la ni rnam par rtog pa 'di dag gsum car yang srid pa des na 'di'i nang la sogs pa ni ji ltar srid pa bzhin rig par bya'o/ /chos thams cad stong pa nyid kyis stong pa nyid yin pas stong pa nyid stong pa nyid de/ chos thams cad stong pa nyid du shes pa ni 'dir chos thams cad stong pa nyid yin la/des kyang stong pa nyid stong pa nyid de/ der 'dzin pa'i rnam par rtog pa spang ba'i phyir ro/ /phyogs bcu pa ni phyogs kyis stong pa nyid kyis na chen po stong pa nyid de/ de rnams ni dbyibs shin tu che ba yin pa'i phyir ro/ /don dam pa mya ngan las 'das pa ni mya ngan las 'das pa'i don gyi rang bzhin gyis stong pa yin pas na don dam pa stong pa nyid de/de ni bral ba tsam yin pa'i phyir ro/ /'dus byas dang khams gsum po ni 'dod pa'i khams la sogs pa stong pa nyid kyis 'dus byas stong pa nyid de/ de ni yongs su ma grub pa'i ngo bo nyid yin pa nyid kyis na gnyen por nus pa'i phyir ro//'dus ma byas skye ba med pa dang / 'gag pa med pa dang / gnas pa las gzhan du 'gyur ba med pa'i don ni de nyid kyis stong pa'i phyir 'dus ma byas stong pa ste/ skye ba med pa la sogs pa rnams kyis gdags pa'i rgyu mtshan bzlog zla skye ba la sogs pa med pa'i phyir ro//mtha' ni mthas stong pa nyid yin pa'i phyir mtha' las 'das pa nyid kyis na mtha' las 'das pa stong pa nyid do/ /mtha' ni cha ste/ de la de dag tshar rnam par gcod pa'i rgyu mtshan gang gis rgyu mtshan gyi dngos por rnam par gzhag pa de ni rtag pa dang chad pa'i mtha' dag gis dbus na cung zad kyang med do//thog ma dang bar ma dang tha ma rnams ni des stong pa nyid yin pas thog ma dang tha ma med pa stong pa nyid de/ thog ma la sogs pa ni chos nyid kyi rjes su skyes pa nyid kyis gtan du ba yin pa'i phyir ro//dor ba dang spangs pa btang ba'i mtshan nyid can dor ba las bzlog pa ni dor ba med pa yin la/ de ni des stong pa'i phyir dor ba med pa stong pa ste/ dor ba'i bya ba rang bzhin ma yin pa nyid kyis na dor ba med pa gdags pa'i rgyu mtshan du mi 'thad pa'i phyir ro//'phags pa thams cad kyis ma byas pas ni rang bzhin yin la de ni des stong pa'i phyir rang bzhin stong pa ste/ de la ni 'dus byas dang 'dus ma byas rnam par 'gyur ba dang rnam par mi 'gyur ba'i gnod pas nyes pa med pa'i phyir ro/ /chos ni chos kyis stong pa yin pa'i phyir chos thams cad stong pa nyid de/'dus byas dang 'dus ma byas kyi chos kyi tshogs thams cad ni phan tshun ltos pa can nyid yin pas na rang bzhin gyis yongs su grub pa med pa'i phyir ro/ /gzugs la sogs pa'i mtshan nyid gzugs su rung ba la sogs pa ni des stong pa nyid yin pas na rang gi mtshan nyid stong pa nyid de/mtshan nyid du rnam par gzhag pa'i spyi dang khyad par ni btags pa tsam nyid yin pa'i phyir ro/ /'das pa la sogs pa'i chos rnams ni 'das pa la sogs pa'i dus rnams la phan tshun bzlog par mi dmigs pa nyid kyis na mi dmigs pa stong pa nyid de/dus gsum gyi ngo bo ni btags pa tsam nyid yin pa'i phyir ro/ /sbyor ba las byung ba'i chos ni ngo bo nyid yod pa ma yin te/ rten cing 'brel bar 'byung ba'i phyir ro zhes bya bas sbyor ba ni des stong pa yin pa'i phyir dngos po med pa'i ngo bo nyid stong pa nyid de/ tshogs pa tsam gyi ngo bo yin pa'i phyir ro//nye bar len pa'i mtshan nyid kyi dngos po ni des stong pa'i phyir dngos po stong pa nyid de/ phung po'i don ni spungs pa'i don yin la/ spungs pa'i don ni med pa yin pa'i phyir nye bar len pa'i mtshan nyid can gyi dngos por 'gyur bar mi 'os pas so/ /dngos po med pa 'dus ma byas nam mkha' la sogs pa ni des stong pa'i phyir dngos po med pa stong pa nyid de/dngos po'i chos sgrib par byed pa la sogs pa la de btags pa yin pa'i phyir ro/ /rang bzhin stong pa zhes bya ba la/ 'phags pa rnams kyi shes pa dang mthong bas ma byas pa nyid kyis na rang gi ngo bo nyid stong pa nyid de/shes pa dang mthong ba ni yang dag pa'i don ji lta ba gsal bar byed pa nyid yin pa'i phyir ro/ /de bzhin gshegs pa rnams byung yang rung ma byung yang rung ste/ chos rnams kyi chos nyid 'di ni gnas pa zhes bya bas byed pa po gzhan gyis stong pa nyid yin pa'i phyir gzhan gyi dngos po stong pa nyid de/stong pa nyid la brten pa'i skyes bu'i byed pa ni 'phong ba 'ba' zhig tu zad do zhes bya bas so/ /phyogs 'dis ni skabs go rims ma tshang ba rnams kyi skabs kyi don la yang brjod par bya'o/ /de dag ni gzhan dgag pa'i sgo nas stong pa nyid 'ba' zhig kho na rjod par byed pa yin gyi/'di dag la mngon par rtogs pa'i go rims 'ga' yang yod pa ma yin no zhes zer ba de dag gi ltar na ni skabs kyi don kho na brjod par bya ba yin gyi/ gtso bo bstan bcos kyi don ni ma yin par 'gyur ba des na stong pa nyid kyi skabs rnams spong ba dang 'gro bar bya ba'i go rims dang bral ba'i phyir ched du bya ba nyams pa'i ngo bor ston pa yin no//rnam par mi rtog pa'i ye shes kyi dmigs pa de ci zhig yin zhe na/ chos thams cad stong pa nyid do zhes brjod do/ /gal te gang zhig dmigs par bya ba de ni med pa yin te/ dper na mo gsham gyi bu bzhin no//stong pa nyid 'di'ang rnam par mi rtog pa'i ye shes kyi dmigs par bya ba yin pas med pa yin no/ /des na chos thams cad yod pa nyid du 'gyur ro zhe na/ des na 'dir cung zad dpyad par bya'o/ /dmigs pa thams cad dang bral ba'i phyir 'di ni rnam par mi rtog pa'i ye shes tsam yin te/stong pa nyid ces bya ba ni 'ga' yang yod pa ma yin no zhes kha cig zer ro/ /kha cig ni gzung ba dang 'dzin pa'i cha gnyis la gnas pa nyid kyis na cha gcig la dmigs pa ni ma yin no/ /zhes 'dod do/ /la la na re de ni chos thams cad ngo bo nyid kyis stong pa nyid la dmigs pa yin no zhes zer ro//'di nyid ni rigs te/ gang zhig chos thams cad rang bzhin gyis stong pa la dmigs pa der ni 'gyur ba yin te/ dper na rmi lam du shes pa rta la sogs pa rang bzhin gyis stong pa la dmigs par 'gyur ba bzhin no//snga ma'i phyogs dag la ni ye shes dngos po med pa'i spyod yul can du 'gyur zhing stong pa nyid kyang 'dus byas nyid du thal bar 'gyur ro/ /phyogs gsum pa la nyes pa brjod zin pa ma yin nam zhe na/ nyes pa yod pa ma yin te/ gang gi phyir gsod pa po bsad na lhas byin slar 'byung bar 'gyur ba ni ma yin no//me long lta bu'i ye shes la sogs pa'i dbye bas ni brjod par bya ba mang du yang yod mod kyi / ye shes kyi tshogs rnam par gzhag pa 'di ni phyogs tsam yin no/ /bsod nams kyi tshogs ni/ rab 'byor gzhan yang byang chub sems dpa'i theg pa chen po 'di lta ste/dpa' bar 'gro ba'i ting nge 'dzin dang zhes bya ba nas nam mkha' ltar chags pa med pas rnam par grol zhing gos pa med pa zhes bya ba'i ting nge 'dzin to zhes bya ba dang / de la dpa' bar 'gro ba zhes bya ba'i ting nge 'dzin gang zhe na/ting nge 'dzin gang gis ting nge 'dzin thams cad kyi spyod yul nyams su myong bar byed pa ste/ 'di ni dpa' bar 'gro ba zhes bya ba'i ting nge 'dzin to zhes bya ba'i bar ting nge 'dzin brgya rtsa gcig bstan pas gang gsungs pa yin te/ ting nge 'dzin ni mos pa la sogs pa yid la byed pa'i rnam pa gsum rab kyi mthar thug par 'gyur ba'i rten yin pas na bsod nams mang po skye ba'i rgyu yin pa'i phyir ro//lam gyi tshogs gsungs pa ni/ rab 'byor gzhan yang byang chub sems dpa'i theg pa chen po ni 'di lta ste/ dran pa nye bar gzhag pa bzhi ste zhes bya ba nas brtsams te/bslab pa las 'da' ba'i g.yeng ba'i gnyen por gnas pa dang 'dug pa la sogs pa'i spyod lam rnams dang / 'gro ba dang / 'ong ba dang / kun du lta ba dang / rnam par lta ba'i bya ba rnams la shes bzhin du spyod pa dang / dbugs 'byung ba dang rngub pa dag la rdza mkhan gyi dpes ring pa dang thung bar rab tu shes pa dang /ril po'i 'du shes kyi gnyen por ba lang gsod pa'i dpes khams rnams la so sor rtog pa dang / gtsang bar phyin ci log pa'i gnyen por zhing pa'i sbyang gi dpes mi gtsang ba nyid du nang la mi dmigs pa'i tshul gyis so sor rtog pa dang /de bzhin du phyi rol dang phyi dang nang gi lus la lus kyi rjes su lta bas dran pa nye bar 'jog pa dang / de lus dang ldan pa'i rnam par rtog pa rnams la yang rnam par mi rtog go zhes bya ba dngos po dang de'i mtshan mar rnam par rtog pa bkag pa yin no/ /dur khrod du zhes bya ba ni ro bor ba'i gnas su'o//lus 'di nyid ces bya ba ni skye ba 'di nyid pa'o/ /tshul de dang sbyar ro zhes bya ba ni/ shi ba'i ro dang ngo / /ji ltar nye bar sbyor zhe na/ lus 'di'ang 'di lta bu'i chos can dang 'di lta bu'i rang bzhin can te zhes bya ba ste/ khu ba dang khrag gi gnas skabs nas gnas skabs de dang de shi ba'i lus sbyar nas de mi rtag pa'i chos nyid rtogs pa nyid du nges par byed pas tshig gnyis pa yin par rig par bya'o//gang yang me la sogs pa mthar thug par byas pa de 'ang gtan du ba ma yin pa'i chos nyid 'di las ma 'da' ba'o zhes tshig gsum pa yin no//rtun pa ni gdung bas na rtun pa ste gdung ba dang kun du gdung ba dang mi mthun par gyur pa sdug bsngal ba'o/ /rtun pa'i sbyor ba de 'di la yod pas na rtun pa dang ldan pa'o/ /shes bzhin zhes bya ba ni yang dag par shin tu rig pas so/ /dran pa dang ldan pa zhes bya ba ni dmigs pa ma brjed pa'o//rnam par bsal nas zhes bya ba ni phyir bzlog nas so/ /ci zhe na/ 'jig rten la chags sems dang yid mi bde ba dag go/ /de la nga dang nga'i zhes bya bar mngon du phyogs nas lus la sogs pa ni chags sems so/ /mi 'dod pa rig pa dang mtshungs par ldan pa'i sems zhum pa nyid ni yid mi bde ba'o//de bzhin du bde bar phyin ci log pa'i gnyen por tshor ba dran pa nye bar gzhag pa dang / rtag par phyin ci log pa'i gnyen por sems dran pa nye bar gzhag pa dang / bdag tu phyin ci log pa'i gnyen por chos dran pa nye bar 'jog pa yin te/dran pa med pa dang yid la byed pa med pa'i mtshan nyid can don dam pa mi dran pa rnams 'di dag gis nye bar 'jog par byed pas na dran pa nye bar 'jog pa'o/ /sdig to mi dge ba'i chos ma skyes pa dang skyes pa rnams mi skyed pa dang spang ba'i phyir dang / dge ba'i chos ma skyes pa dang skyes pa rnams bskyed pa dang /gnas pa dang phyir 'byung bar bya ba'i phyir yang dag par spong ba rnams kyis yang dag cing phyin ci ma log par 'di dag spong ba yin pa'i phyir ro/ /de la 'dun pa bskyed do/ /'bad do/ /brtson 'grus rtsom mo/ /sems rab tu 'dzin to//yang dag par rab tu 'jog go zhes bya ba ni tshul bzhin yid la byed pa dang / de mi spong ba dang tshul bzhin du so sor rtog pa'i dbang du mdzad nas tshig gcig dang gnyis dang gnyis yin par rig par bya'o/ /'dun pa dang / brtson 'grus dang / sems dang / spyod pa'i ting nge 'dzin spong ba'i 'du byed dang ldan pa'i rdzu 'phrul gyi rkang pa bzhi rnams te/'di dag ni yon tan rnam pa sna tshogs pa 'grub pa'i rkang pa ste yan lag yin pas rdzu 'phrul gyi rkang pa'o/ /de la 'dun pa ni byed par 'dod pa nyid [(]da[,]do[)]/ /ting nge 'dzin ni sems rtse gcig pa'o/ / des nyon mongs pa spang bar bya ba'i phyir mngon par 'du byed pas na de'i 'du byed do/ /de ni rnam pa brgyad de/ 'di lta ste/ 'dun pa dang / rtsol ba dang / dad pa dang / shin tu sbyangs pa dang / dran pa dang / shes bzhin dang / sems pa dang / btang snyoms so/ /de dang ldan pa ni de dang lhan cig ldan pa'o//de gang yin zhe na/ rdzu 'phrul gyi rkang pa ste yan lag ces bya ba'i tha tshig go/ /sgom par byed ces bya ba ni sgom pa goms par byed pa ste/ sbyor ba rgyas par byed pa'o/ /de la sbyor ba las su rung ba nyid dam/ sbyor ba brtan par gyur pa'am/ mi dge ba'i tshogs dang ma 'dres pa yin no//chos mngon pa ba rnams kyi ltar na sgom pa'ang rnam pa bzhi ste/ chung ngu dang / 'bring dang / chen po rnam pa gsum dang / bcos bu ma yin pa bral ba'i 'bras bu can don rdzogs pa'o/ /de nyid ni mthong ba'i chos la bde bar gnas pa'i 'bras bu can te/de ltar rnam pa bzhi'o zhes bya ba ni gzhan gyi'o/ /rnam par sgom pa ni sgom pas te lus yongs su sbyong ba'o/ /sgom pa ni tshul khrims nges par sbyong ba'o/ /sgom pa ni sems kyi gnod pa sel ba'o/ /sgom pa ni shes rab brten par byed pa yin no/ /bden pa la gnas pa zhes bya ba ni bsam gtan dang po dang ldan pa ste/de ni 'dod pa la sogs pa las rnam par dben pa nyid yin pa'i phyir ro/ /'dod chags dang bral ba la gnas pa zhes bya ba ni bsam gtan gnyis pa dang ldan pa ste/ de ni rnam par rtog pa la sogs pa'i 'dod chags dang bral ba nyid yin pa'i phyir ro//'gog pa la gnas pa zhes bya ba ni bsam gtan gsum pa dang ldan pa ste/ dga' ba la 'dod chags dang bral ba gang yin pa de ni der 'gog pa yin pas so/ /rnam par spong ba yongs su bsgyur ba zhes bya ba ni bsam gtan bzhi dang gzugs med pa dang ldan pa ste/ji ltar srid pa ma spangs pa'i shes pa gsal ba sngon du 'gro ba'i 'dor ba ni rnam par spong ba yin pas so/ /gzhan yang bag la nyal yang dag par bcom pa ni dben pa'o/ /kun nas ldang ba dang bral ba ni 'dod chags dang bral ba'o/ /kun du sbyor ba yang dag par bcad pa ni 'gog pa'o//nye bar len pa thams cad yongs su spangs pa ni rnam par song ba'o/ /yang chos mngon pa ba rnams na re dben pas ni khams las dben pa'o/ /'dod chags dang bral bas ni nyon mongs pa'i 'dod chags dang bral ba'o/ /'gog pas ni las 'gog pa'o/ / rnam par spong bas ni dngos po rnams spong ba ste/ tshig thams cad kyis mya ngan las 'das pa nyid brjod pa yin no zhes 'chad do/ /gzhan yang gzung ba dang 'dzin pa'i rnam par rtog pa rnam pa bzhi'i gnyen po gang yin pa mthong ba'i lam rnam pa bzhi po de la rim pa bzhin dben pa la gnas pa zhes bya ba la sogs pa'i tshig bzhi yin par rig par bya'o//de la gzung ba'i rnam par rtog pa dang po'i gnyen po ni dben pa ste/ des rnam par byang ba'i phyogs las kun nas nyon mongs pa'i phyogs spang bas dben pa'i phyir ro/ /gzung ba'i rnam par rtog pa gnyis pa'i gnyen po 'dod chags dang bral ba ste/des dge ba'i chos la 'dun pa las 'dod chags dang bral ba nyid yin pa'i phyir ro/ /'dzin pa'i rnam par rtog pa dang po'i gnyen po ni 'gog pa ste/ des bdag rang dbang can la sogs par 'dzin pa ma lus par 'gog pa'i phyir te spong ba'i phyir ro zhes bya ba'i tha tshig go//'dzin pa'i rnam par rtog pa gnyis pa'i gnyen po ni rnam par spong ba ste/ des phung po la sogs pa bdag tu btags pa'i rgyu mtshan sna tshogs pa yang dag pa ji lta ba bzhin nyid yongs su shes pa spang ba'i phyir ro//dmigs pa dang rten stobs bskyed pa ni gnas so/ /rnam par spong ba ni 'dor ba'o/ /yongs su bsgyur ba ni mthar thug cing mur thug pa'o/ /dad pa dang / brtson 'grus dang / dran pa dang / ting nge 'dzin dang / shes rab ni dbang byed pa'i don gyis na dbang po rnams so//de dag nyid ni mi thub pa'i don gyis na stobs rnams so/ /dran pa dang chos rnam par 'byed pa dang / brtson 'grus dang / dga' ba dang / shin tu sbyangs pa dang / ting nge 'dzin dang / btang snyoms ni mthong ba'i lam gyi yan lag gi don gyis na rdzogs pa'i byang chub kyi yan lag tu gyur pa rnams so//yang dag pa'i lta ba dang / rtog pa dang / ngag dang / las kyi mtha' dang / 'tsho ba dang / rtsol ba dang / dran pa dang / yang dag pa'i ting nge 'dzin ni mya ngan las 'das pa'i grong khyer du phyin par byed pa'i don gyis ni 'phags pa'i lam yan lag brgyad pa rnams so//stong pa nyid dang / mtshan ma med pa dang / smon pa med pa ni 'phags pa'i bden pa bzhi bsdu ba'i don gyis ni rnam par thar pa'i sgo rnams so/ /sdug bsngal dang / kun 'byung dang / 'gog pa dang / lam dang / zad pa dang / mi skye ba dang / chos dang /rjes su rtogs pa dang / kun rdzob dang / yongs su 'dris pa dang / sgra ji bzhin pa'i shes pa ni shes bya ma lus pa khyab pa'i don gyis na shes pa rnams yin no/ /mi shes pa kun shes par bya'o zhes bya ba dang / kun shes pa dang / kun shes pa srung ba'i dbang po rnams ni mthong ba dang sgom pa dang mi slob pa'i lam bsdus pa'i don gyis so//rtog pa dang bcas shing dpyod pa dang bcas pa dang / rtog pa med pa la dpyod pa tsam dang / rtog pa med cing dpyod pa med pa'i ting nge 'dzin rnams ni yan lag las 'da' bar byed pa'i don gyis so/ / sangs rgyas dang / chos dang / dge 'dun dang / tshul khrims dang / gtong ba dang / lha dang / skyo ba dang / 'chi ba dang / lus kyi rnam pa dang / dbugs rngub pa dang / 'byung ba dran pa rnams ni ldog pa'i phyogs kyi rten dang / gzhi dang / dbang po dang / yid mi rton pa dang /nang gi bdag nyid kyi dmigs pa ma brjed pa'i don gyis so/ /de la rten ni dkon mchog gsum mo/ /gzhi ni tshul khrims dang / gtong ba gnyis so/ /dbang po ni lha rnams so/ /yid mi rton pa rnams ni skyo ba dang 'chi ba gnyis kyis so/ /nang gi bdag nyid mi brjed pa ni lus kyi rnam pa dang /dbugs phyi nang du rgyu ba dran pa gnyis so/ /bsam gtan dang / tshad med pa dang / gzugs med pa'i snyoms par 'jug pa rnams ni yan lag dang dmigs pa la 'da' ba'i don gyis so/ /rnam par thar pa brgyad po rnams ni gnyis dang gcig dang bzhi dang gcig gi go rims bzhin du sprul pa'i sgrib pa'i gnyen po'i don dang /sprul pa la kun nas nyon mongs pa'i gnyen po'i don dang / thar pa dang rjes su mthun par gnas pa'i don dang / zhi bar gnas pa'i don gyi dbang du mdzad nas rnam par thar pa brgyad bstan pa'i phyir ro//mthar gyis gnas pa'i snyoms par 'jug pa dgu po rnams ni 'jig rten las 'das pa'i lam du rung ba'i don gyis te/ 'gog pa'i snyoms par 'jug pas de thob par byed pa nyid yin pa'i phyir ro/ /gnas dang gnas ma yin pa mkhyen pa'i stobs dang / las kyi rnam par smin pa dang /khams sna tshogs dang / mos pa sna tshogs dang / dbang po mchog dang / mchog ma yin pa dang / kun du 'gro ba'i lam dang / bsam gtan dang / rnam par thar pa dang / ting nge 'dzin dang / snyoms par 'jug pa dang / kun nas nyon mongs pa dang /rnam par byang ba dang / ldang ba dang / sngon gyi gnas rjes su dran pa dang / 'chi 'pho ba dang / skye ba dang / zag pa zad pa mkhyen pa'i stobs bcu po rnams ni chos thams cad kyi rnam pa dang chos nyid thob pa'i don gyis so/ /mi 'jigs pa bzhi po rnams ni ma shes pa nyid la ma zhum pa'i don gyis so//so so yang dag par rig pa bzhi po rnams kyi so so yang dag par rig pa yul thams cad la ye shes thogs pa med pa'i don gyis so/ /sangs rgyas kyi chos ma 'dres pa bcwa brgyad po rnams ni thun mong ma yin pa'i don gyis yin te/ de lta na dran pa nye bar gzhag pa nas brtsams te/ sangs rgyas kyi chos ma 'dres pa bcwa brgyad kyi bar de dag gis ni mthong ba la sogs pa'i lam bsdus pa yin pa'i phyir lam gyi tshogs yin no zhes brjod do/ /[(]gzugs [,]gzungs [)]kyi tshogs ni/ rab 'byor gzhan yang byang chub sems dpa'i theg pa chen po ni 'di lta ste/ gzungs kyi sgo rnams te/de 'ang a zhes bya ba ni ma skyes pa'i phyir chos thams cad kyi sgo'o/ /ra zhes bya ba ni rdul dang bral ba'i phyir chos thams cad kyi sgo'o/ /pa zhes bya ba ni don dam pa ston pa'i phyir chos thams cad kyi sgo'o/ /zhes bya ba la sogs pa rgya cher gang gsungs pa yin te/yi ge mtshan mar byed pa de dang des bskal pa mang por chos ston pa'i rgyu'i dran pa gtugs pa med par 'gyur ba'i phyir dang / dran pa'ang yi ge dang don 'dzin pa nyid kyis gzungs yin pas so/ /sa'i tshogs ni byang chub sems dpa'i sa bcu po rnams so sor bdag nyid kyis yongs su sbyong ba'i dbye bas rnam pa bcur 'gyur ro//gang gi phyir dris pa gnyis pa'i dbang du mdzad nas/ rab 'byor gang yang khyod 'di skad du ji ltar byang chub sems dpa' theg pa chen po la yang dag par zhugs pa yin zhes bya ba nas brtsams te/ pha rol tu phyin pa drug po dag la spyod pa sa nas ji ltar 'phar zhe na/'di lta ste/ chos thams cad 'pho ba med pas so/ /de ci'i phyir zhe na/ chos gang yang zhes bya ba la sogs pas chos thams cad kyi 'ong ba dang 'gro ba la sogs pa bkag pas bstan pa yin no/ /yang sa gang gis yongs su sbyong bar gyur pa'i chos gang yin zhe na/brjod pa ni/ yongs su sbyong ba rnam bcu yis/ /sa ni dang po 'thob 'gyur te/ /bsam pa phan pa'i dngos nyid dang / /sems can rnams la sems mnyam nyid/ /gtong dang bshes gnyen bsten pa dang / /dam chos dmigs pa tshol ba dang / / rtag tu nges 'byung sems nyid dang / /sangs rgyas skur 'dod dga' ba dang / /chos ston pa dang dben pa yi/ /tshig ni bcu pa yin par 'dod/ /'di dag rang bzhin mi dmigs pas/ /yongs su sbyong bar shes par bya/ /zhes bya ba ste/ lhag pa'i bsam pa yongs su sbyong ba mi dmigs pa'i tshul gyis zhes bya ba la sogs pa gang gsungs pa yin no//tshul khrims byas pa gzo dang bzod/ /rab tu dga' dang snying brtse che/ /bkur sti bla ma la gus nyan/ /brgyad pa sbyin la sogs pa brtson/ /zhes bya ba ni/ sa gnyis pa la gnas pa'i byang chub sems dpa' chos brgyad yid la byed de/'di lta ste/ tshul khrims yongs su dag pa dang / byas pa gzo zhing byas pa shes pa nyid dang zhes bya ba la sogs pa gang gsungs pa yin no/ /de la byas pa shes pa ni gang gis byas pa shes pa'o/ /drin du gzo ba ni gang gis cung zad cig byas pa'ang chungs par mi rtsi zhing brnyas par mi byed pa'o//bla ma la gus nyan zhes bya ba ni bla mas rjes su bstan pa sngon du 'gro bas de byed par 'dod pa yin gyi/ tshig tsam zhig thos par 'dod pa ma yin no/ /thos pas mi ngoms nyid dang ni/ /zang zing med par chos sbyin dang //sangs rgyas zhing kun sbyong ba dang / /'khor bas yongs su mi skyo dang / /ngo tsha khrel yod ces bya ba/ /rlom sems bdag nyid de rnams lnga/ /zhes bya ba ni/ byang chub sems dpa' chen po'i sa gsum pa la gnas pas chos lnga la gnas par bya ste/ lnga gang zhe na/'di lta ste/ mang du thos pas mi ngoms shing de la'ang yi ger mngon par zhen pa dang zhes bya ba la sogs pa gang gsungs pa yin no/ /nags gnas 'dod chung chog shes dang / /sbyangs pa yang dag sdom bstan dang / /bslab pa yongs su mi gtong dang //'dod pa rnams la smod pa dang / /mya ngan 'das dang bdog kun gtong / /mi zhum pa dang lta ba med/ /ces bya ba ni/ byang chub sems dpa' chen pos bzhi pa la gnas pas chos bcu po 'di dag yongs su gtang bar mi bya'o/ /bcu gang zhe na/ 'di lta ste/ dgon pa la gnas pa dang /'dod pa chung ba dang zhes bya ba la sogs pa gang gsungs pa yin no/ /de la 'dod pa chung ba ni gang gis rnyed pa rnyed par mi 'dod pa'o/ /chog shes pa ni gang gis ji ltar rnyed pa las lhag par mi 'dod pa'o/ /mtshan nyid nges par bstan pa ni/ byang chub sems dpa' chen po gang byang chub la'ang 'dod pa mi bskyed pa 'di ni 'dod pa chung ba'o zhes 'chad par 'gyur ro//'di'i dgongs pa ni rang gi don lhur len pas zhes bya ba yin te/ de ni gzhan gyi don phal che ba'i yan lag yin pas nye bar len pa'i phyir ro/ /'dris dang khyim la 'khren pa dang //'du 'dzir 'gyur ba'i gnas dang ni/ /bdag bstod gzhan la brnyas pa dang / /mi dge'i las kyi lam bcu dang / /rlom pas khengs dang phyin ci log /yid gnyis dang ni nyon mongs bzod/ /bcu po 'di ni rnam spangs na/ /sa lnga pa ni yang dag 'thob//ces bya ba ni byang chub sems dpa' chen po sa lnga pa la gnas pas chos bcu spang bar bya ste/ 'di ltar khyim pa dang rab tu byung ba dang bsten pa yongs su spang bar bya ba dang zhes bya ba la sogs pa ji skad gsungs pa yin no/ /sbyin dang tshul khrims bzod brtson 'grus/ / bsam gtan shes rab rab rdzogs pas/ /slob ma dang ni bse ru la/ /dga' dang skrag pa'i sems spangs dang / /bslangs nas mi zhum bdog pa kun/ /btang yang mi dga' med pa dang / /dbul yang slong ba mi spong bas/ /sa ni drug pa yang dag 'thob/ /ces bya ba ni/ byang chub sems dpa' chen po sa drug pa la gnas pas chos drug yongs su rdzogs par bya ste/'di lta ste/ pha rol tu phyin pa drug go/ /gzhan yang chos drug yongs su spang bar bya ste/ drug gang zhe na/ nyan thos kyi sems yongs su spang bar bya'o zhes bya ba la sogs pa gang gsungs pa yin no//bdag dang sems can 'dzin pa dang / /srog dang gang zag chad rtag dang / /mtshan ma rgyu dang phung po dang / /khams dang skye mched dag dang ni/ /khams gsum pa la gnas dang chags/ /sems ni kun du zhum pa dang / /dkon mchog gsum dang tshul khrims la//der lta ba yi mngon zhen dang / /stong pa nyid la brtson pa dang / /de dang 'gal ba'i nyes pa ni/ /nyi shu gang la rnam chad pa/ /de yis sa ni bdun pa 'thob/ /ces bya ba ni/ byang chub sems dpa' chen pos bdun pa la gnas pa la chos nyi shu mi 'byung ste/ nyi shu gang zhe na/ 'di lta ste/ bdag tu 'dzin pa dang / sems can du 'dzin pa dang / srog tu 'dzin pa dang zhes bya ba la sogs pa gang gsungs pa yin no/ /rnam thar sgo gsum shes pa dang / /'khor gsum rnam par dag nyid dang / /snying rje dang ni rlom med dang / /chos mnyam nyid dang tshul gcig shes//mi skye ba dang bzod shes dang / /chos rnams rnam pa gcig tu ston/ /rtog pa kun du 'joms pa dang / /'du shes lta dang nyon mongs spong / /zhi gnas nges par sems pa dang / /lhag mthong la ni mkhas pa dang / /sems dul ba dang thams cad la//thogs pa med pa'i ye shes dang / /chags pa'i sa min gar 'dod par/ /zhing gzhan du ni mnyam 'gro dang / /kun du bdag gi ngo bo ni/ /ston pa nyid dang nyi shu'o/ /zhes bya ba ni/ byang chub sems dpa' chen po sa bdun pa la gnas pas chos nyi shu po 'di nyid yongs su rdzogs par byed de/nyi shu gang zhe na/ stong pa nyid yongs su rdzogs par bya ba dang / mtshan ma med pa sngon du bya ba dang / smon pa med pa shes par bya ba dang / 'khor gsum yongs su dag pa dang / sems can thams cad la snying rje zhing brtse ba dang zhes bya ba la sogs pa gang gsungs pa yin no//de la 'khor gsum yongs su dag pa ni ji skad du/ dge ba bcu'i las kyi lam yongs su rdzogs pa 'di ni byang chub sems dpa' chen po 'khor gsum yongs su dag pa'o zhes 'chad par 'gyur ba yin no/ /rnam pa thams cad du sgom pa yongs su rdzogs pa la dgongs pa yin te/ji skad du/ dge ba bcu'i las kyi lam 'di dag nyid rnam pa thams cad du yongs su rdzogs pa'i phyir sangs rgyas kyi chos thams cad yang dag par 'grub pa'i don du gnas pa yin no zhes gsungs pa yin no/ / sems can kun yid shes pa dang / /mngon par shes pas brtse ba dang / /sangs rgyas zhing bzang sgrub pa dang / /yongs su brtag phyir sangs rgyas bsten/ /dbang po shes dang rgyal ba yi/ /zhing sbyong sgyu ma ltar gnas dang / /bsams bzhin srid pa len pa dang / /las ni rnam pa 'di brgyad bshad//ces bya ba ni/ byang chub sems dpa' chen po sa brgyad pa la gnas pas chos bzhi po 'di dag yongs su rdzogs par bya ste/ bzhi gang zhe na/ 'di lta ste/ sems can thams cad kyi sems khong du chud par bya ba dang zhes bya ba la sogs pa dang / gzhan yang chos bzhi yongs su rdzogs par bya ste zhes bya ba la sogs pa gang gsungs pa yin no//bzhi phrag gnyis so sor byas pa ni gang yang rung ba'ang sa de'i yongs su sbyong ba nyid yin par shes par bya ba'i don du yin no/ /de la dang po'i sangs rgyas kyi zhing ni snod kyi 'jig rten yin te/ gang gi phyir sangs rgyas kyi zhing thams cad yang dag par blta bar bya zhing ji ltar mthong ba bzhin du sangs rgyas kyi zhing sgrub par 'gyur ro zhes 'chad par 'gyur ba yin no/ /gnyis pa ni sems can gyi 'jig rten te/ ji skad du/ byang chub sems dpa' chen po'i sangs rgyas kyi zhing yongs su sbyong ba gang zhe na/mi dmigs pa'i tshul gyis sems can thams cad kyi sems yongs su sbyong ba gang yin pa de ni byang chub sems dpa' chen po'i sangs rgyas kyi zhing yongs su sbyang ba'o zhes 'chad par 'gyur ba lta bu'o/ /de la sgyu ma lta bu'i ting nge 'dzin ni ji skad du byang chub sems dpa' chen po'i rnam par smin pa las skyes pa'i ting nge 'dzin gang yin pa ste/ting nge 'dzin de la yang dang yang du snyoms par 'jug go zhes 'chad par 'gyur ba dang / ting nge 'dzin gang zhig mi 'phro zhing nyams pa med pa de ni zhes kyang de dang de nas gsungs pa yin no//smon lam dang ni mtha' yas dang / /lha la sogs pa'i skad shes dang / /spobs pa chu bo lta bu dang / /mngal du 'jug pa mchog dang ni/ /rigs dang rus dang cho 'brang dang / /'khor dang skye ba dag dang ni/ /nges 'byung byang chub shing rnams dang //yon tan phun sum tshogs pa yin/ /zhes bya ba la/ byang chub sems dpa' chen po sa dgu pa la gnas pas chos bcu gnyis yongs su rdzogs par bya ste/ bcu gnyis gang zhe na/ 'di ltar smon lam mtha' yas pa yongs su gzung ba dang / lha la sogs pa'i skad shes pa dang zhes bya ba la sogs pa gang gsungs pa yin no//cho 'brang phun sum tshogs pa ni ji skad du cho 'brang gang las sngon gyi byang chub sems dpa' chen po rnams byung bar gyur pa 'di ni cho 'brang phun sum tshogs pa yin no zhes 'chad par 'gyur ba dang / 'phags pa blo gros rgya mtshos zhus pa'i mdo las rigs las yongs su 'das pa'o zhes bshad pa yin no//rab 'byor byang chub sems dpa' chen po sa bcu pa la gnas pa ni de bzhin gshegs pa nyid du brjod do zhes bya ba ni yang dag par rdzogs pa'i sangs rgyas kyis brnyes pa'i stobs la sogs pa sangs rgyas kyi chos thams cad yongs su ma rdzogs pa la dgongs pa yin no//sde pa gzhan dag las kyang de bzhin gshegs pa zhes brjod par bya'i/ yang dag par rdzogs pa'i sangs rgyas zhes ni brjod par mi bya'o zhes bshad do/ /sa bcu pa yang / sa dgu 'das nas ye shes ni//gang gis sangs rgyas sar gnas pa/ /de ni byang chub sems dpa'i sa/ /bcu pa yin par shes par bya/ /zhes bya ba la/ sa dgu po de dag kyang 'di dag yin te/ 'di lta ste/ nyan thos la sogs pa'i mtshan nyid ni rigs kyi sa'o/ /'bras bu dang po la zhugs pa ni brgyad pa'i sa'o//rgyun du zhugs pa ni mthong ba'i sa'o/ /lan cig phyir 'ong ba ni bsrabs pa'i sa'o/ /phyir mi 'ong ba ni 'dod chags dang bral ba'i sa'o/ /dgra bcom pa nyid ni byas pa rtog pa'i sa'o/ /nyan thos kyi sa ni theg pa gsum gsal bar rnam par gzhag pa la dgongs te/ji skad du/ nyan thos dang / rang sangs rgyas kyi sa zhes bya ba 'di ni sa rnam par gzhag pa'i tshig bla dgas so/ /zhes gsungs pa yin no/ /rang sangs rgyas kyi sa ni bse ru lta bu dang / tshogs na spyod pa'i rang sangs rgyas rnams so//byang chub sems dpa'i sa ni ji skad du bshad pa rnam pa dgu po nyid do/ /des na rab 'byor gang gi tshe byang chub sems dpa' chen po thabs la mkhas pas pha rol tu phyin pa rnams la spyod pa dang zhes bya ba nas/ sangs rgyas kyi chos ma 'dres pa bcwa brgyad la spyod pa'i tshe/rigs kyi sa dang zhes bya ba nas/ byang chub sems dpa'i sa las yang dag par 'das nas sangs rgyas kyi sa la gnas pa ste/ rab 'byor 'di ni byang chub sems dpa' sems dpa' chen po'i sa bcu pa'o zhes gsungs pa yin no/ /sa 'di rnams yongs su sbyang bar byed pa'i chos bsam pa la sogs pa ji skad bstan pa rnams kyi rang gi mtshan nyid bstan pa ni mdo nyid la yod pas ma smras so//de ltar byas na/ gnas brtan rab 'byor gyis gsol pa/ bcom ldan 'das byang chub sems dpa' chen po'i lhag pa'i bsam pa yongs su sbyong ba gang lags zhes bya ba la sogs pa yin no//sa'i tshogs bshad zin to// //gnyen po'i tshogs brjod par bya ba yin pas na/ mthong dang goms pa'i lam dag la/ /gzung dang 'dzin pa'i rnam rtog rnams/ /nye bar zhi bar bya ba'i phyir/ /gnyen po rnam pa brgyad ces bya//zhes bya ba gsungs so/ /de la rnam par rtog pa brgyad ni 'di dag yin te/ re zhig mthong ba'i lam gyi mi mthun pa'i phyogs kyi rnam par rtog pa ni bzhi pa'o/ /de la gzung ba'i rnam par rtog pa ni rnam pa gnyis te/ dngos po tsam la brten pa dang /gnyen po la brten pa'o/ /'dzin pa'i rnam par rtog pa ni gnyis te/ gang zag rdzas su yod pa la brten pa dang / skyes bu btags pa'i rten can no/ /bsgom pa'i lam gyi mi mthun pa'i phyogs kyang rnam pa bzhi po nyid yin te/ dngos po tsam gyi rnam pa la brten pa dang /gnyen po'i rnam pa la brten pa zhes bya ba gzung ba'i rnam par rtog pa rnam pa gnyis dang / 'phags pa'i gang zag thams cad du btags pa la brten pa dang / btags pa de'i rgyu mtshan ma la brten pas 'dzin pa'o/ / rnam par rtog pa'ang rnam pa gnyis te/ de ltar na khams gsum pa'i rnam par rtog pa ni rnam pa 'di brgyad yin no//de bas na dris pa gsum pa'i dbang du mdzad nas/ rab 'byor khyod kyis gang yang 'di skad du theg pa de gang nas 'byung bar 'gyur zhes smras pa ni de dmigs pa'i tshul gyis khams gsum nas 'byung bar 'gyur zhing /gnyis su med pa'i tshul gyis rnam pa thams cad mkhyen pa nyid gang na ba der gnas par 'gyur ro/ /de ci'i phyir zhe na/ 'di ltar theg pa chen po gang yin pa dang / rnam pa thams cad mkhyen pa nyid gang yin pa'i chos de gnyis ka ldan pa'ang ma yin mi ldan pa'ang ma yin pa nyid kyi phyir ro zhes bya ba la sogs pa gsungs pa yin no//de la mthong ba'i lam gyi gzung ba'i rnam par rtog pa dang po'i gnyen po'i dbang du mdzad nas/ chos kyi dbyings dang / de bzhin nyid dang / yang dag pa'i mtha' rnams dang / nam mkha' dang / spangs pa dang /'dod chags dang bral ba'i dbyings rnams dang / skye ba med pa dang / 'gag pa med pa dag dang / phung po dang / khams dang / skye mched la sogs pa rnams la nges par 'byung ba mi 'thad pa nyid kyis mtshan nyid med pa'i chos rnams la nges par 'byung ba 'dod pa bkag pa nyid dang /de ci'i phyir zhe na/ gzugs la sogs pa'i phung po rnams ni de rnams kyis stong pa nyid yin pa dang / de ci'i phyir zhe na/ de rnams kyi stong pa nyid la khams gsum nas nges par 'byung zhing rnam pa thams cad mkhyen pa nyid la gnas pa bkag pa dang / rmi lam dang /smig rgyu dang / sgyu ma dang / sgra brnyan dang / mig yor dang / gzugs brnyan dang / sprul pa rnams snga ma bzhin yin pa dang / de ci'i phyir zhe na/ de rnams kyi rang bzhin la khams gsum nas 'byung zhing rnam pa thams cad mkhyen pa nyid du gnas pa bkag pa dang /de ci'i phyir zhe na/ de rnams kyi ngo bo nyid ni de rnams kyis stong pa yin pa'i phyir zhes bya bas gsungs pa yin no/ /mthong ba'i lam gyi gzung ba'i rnam par rtog pa gnyis pa'i gnyen po'i dbang du mdzad nas/ pha rol tu phyin pa rnams ni snga ma dang 'dra ba dang /de ci'i phyir zhe na/ de rnams kyi ngo bo nyid ni snga ma bzhin yin pa dang / de ci'i phyir zhe na/ de rnams kyi ngo bo nyid ni des stong pa yin pa dang / stong pa nyid thams cad dang / byang chub kyi phyogs kyi chos rnams dang / stobs rnams nas sangs rgyas kyi chos ma 'dres pa bco brgyad kyi bar ni snga ma bzhin te/de ci'i phyir zhe na/ de rnams kyi ngo bo nyid snga ma bzhin dang / de ci'i phyir zhe na/ de rnams kyi ngo bo nyid ni des stong pa yin pa'i phyir ro zhes bya bas gang gsungs pa yin no/ /mthong ba'i lam gyi 'dzin pa'i rnam par rtog pa dang po'i gnyen po'i dbang du mdzad nas/dgra bcom pa dang / rang sangs rgyas dang / byang chub sems dpa' dang / yang dag par rdzogs pa'i sangs rgyas rnams ni snga ma bzhin pa dang / de ci'i phyir zhe na/ de rnams ni de rnams kyis stong pa yin pa'i phyir ro zhes bya ba dang / de ci'i phyir zhe na/ de rnams kyi stong pa nyid la snga ma bzhin pa dang / de ci'i phyir zhe na/ de rnams kyi ngo bo nyid ni stong pa nyid yin pa'i phyir ro zhes bya ba dang / de bzhin du rgyun du zhugs pa la sogs pa'i 'bras bu rnams dang / rang byang chub dang / rnam pa thams cad mkhyen pa nyid kyi ngo bo nyid ni des stong pa yin pa'i phyir ro zhes bya bas gang gsungs pa yin no//mthong ba'i lam gyi 'dzin pa'i rnam par rtog pa gnyis pa'i gnyen po'i dbang du mdzad nas/ ming dang / mtshan ma dang / brda dang / tha snyad kyis gdags pa rnams ni snga ma bzhin dang / de ci'i phyir zhe na/ de rnams ni de rnams kyis stong pa nyid yin pa'i phyir ro zhes bya ba dang /de ci'i phyir zhe na/ de rnams kyi stong pa nyid la snga ma bzhin dang / de ci'i phyir zhe na/ de rnams kyi ngo bo nyid ni des stong pa nyid yin pa dang / de bzhin du skye ba med pa dang / 'gag pa med pa dang / kun nas nyon mongs pa med pa dang /rnam par byang ba med pa dang / mngon par 'du bya ba med pa rnams kyi ngo bo nyid ni des stong pa nyid yin pa'i phyir ro zhes bya bas gang gsungs pa yin no/ /de la ming gi gdags pa ni 'du shes dang / gzugs dang / tshor ba zhes bya ba la sogs pa'o/ / mtshan ma'i gdags pa ni gzugs su rung ba'i dngos po ni gzugs so zhes bya ba la sogs pa'o/ /brda'i gdags pa ni khams dang / 'gro ba dang / skye gnas dang / skye ba'i dbye bas sems can rnams kyi sgra ji lta ba bzhin brdar grags pa'o/ /rnam pa gsum po 'di thams cad kyang tha snyad kyis gdags pa yin te/de lta bu ni 'dir tha snyad tsam yin pas don dam par stong pa'i phyir ro/ /bsgom pa'i lam gyi gzung ba'i rnam par rtog pa dang po'i gnyen po'i dbang du mdzad nas/ dris pa bzhi pa'i dbang du mdzad de/ rab 'byor gzhan yang khyod kyis gang 'di skad du theg pa de gang du gnas pa 'gyur/zhes zer ba ni/ theg pa de gang du gnas par 'gyur ba med de/ de ci'i phyir zhe na/ 'di ltar chos thams cad gnas pa med pa'i phyir ro/ /rab 'byor 'on kyang theg pa de ni mi gnas pa'i tshul gyis gnas par 'gyur ro zhes bya ba nas brtsams te/chos kyi dbyings dang / skye ba med pa dang / 'gag pa med pa dang / kun nas nyon mongs pa med pa dang / rnam par byang ba med pa dang / mngon par 'du bya ba med pa de bzhin du theg pa chen po la yang gnas pa dang mi gnas pa bkag pa dang /de ci'i phyir zhe na/ de rnams ni de rnams kyis stong pa nyid yin pa'i phyir ro zhes bya ba dang / de ci'i phyir zhe na/ de rnams kyi stong pa nyid la gnas pa dang mi gnas pa bkag pa dang / de ci'i phyir zhe na/ de rnams kyi ngo bo nyid ni des stong pa nyid yin pa'i phyir ro zhes bya bas gang gsungs pa yin no//de la 'di'i rten gnas yod pa ma yin pas na gnas pa med pa ste chos kyi dbyings so/ /de la gnas pa dang ldan pa med pas na mi gnas pa'i tshul gyis gnas par 'gyur ba yin no/ /bsgom pa'i lam gyi gzung ba'i rnam par rtog pa gnyis pa'i gnyen po'i dbang du mdzad nas dris pa lnga pa'i dbang du byas te/rab 'byor gang yang khyod kyis 'di skad du theg pa des su zhig nges par 'byung bar 'gyur zhes zer ba ni theg pa des su 'ang 'byung bar 'gyur ba med do/ /de ci'i phyir zhe na/ rab 'byor de ni 'di ltar theg pa de gang yin pa dang /gang nges par 'byung bar 'gyur ba dang / gang gis nges par 'byung bar 'gyur ba dang / gang nas nges par 'byung bar 'gyur ba'i chos de dag thams cad med cing mi dmigs pa'i phyir te/ de ltar chos thams cad med cing mi dmigs pa la chos gang zhig chos gang gis nges par 'byung bar 'gyur zhes bya ba nas brtsams te/de ci'i phyir zhe na/ 'di ltar bdag dang / sems can dang / srog la sogs pa shin tu rnam par dag pa'i phyir mi dmigs pa dang / 'dir shin tu rnam par dag pa smos pa ni bsgom pa'i lam la yang phyis bya ba'i mtshan ma med pa nyid shes par bya ba'i don du yin no//de bzhin du chos kyi dbyings la sogs pa dang / phung po la sogs pa nas sangs rgyas kyi chos ma 'dres pa bco brgyad kyi bar du mi dmigs pa nyid ces bya ba dang / gang zhig dmigs su med pas thams cad mi dmigs she na/rang rang gi ngo bo dmigs su med pa ste/ de ci'i phyir zhe na/ rab 'byor chos kyi dbyings dmigs su med pas zhes bya ba nas sangs rgyas kyi chos ma 'dres pa bco brgyad kyi bar thams cad der dmigs su med pas mi dmigs pa nyid ces bya ba gang gsungs pa yin no//bsgom pa'i lam gyi 'dzin pa'i rnam par rtog pa dang po'i gnyen po'i dbang du mdzad nas shin tu rnam par dag pa'i phyir rgyun du zhugs pa la sogs pa nas/ yang dag par rdzogs pa'i sangs rgyas kyi bar du mi dmigs zhes bya ba dang / gang zhig dmigs su med pas mi dmigs sha na/ rang rang gi rang bzhin dmigs su med pa ste/ de ci'i phyir zhe na/ rab 'byor rgyun du zhugs pa dmigs su med pas zhes bya ba nas/ yang dag par rdzogs pa'i sangs rgyas kyi bar thams cad dmigs su med pas mi dmigs so zhes bya bas gang gsungs pa yin no//don ci zhig yin zhe na/ shes bya'i rang gi ngo bo ni shes pa'i dbang gis yongs su gcod pa yin la/ sangs rgyas la sogs pa'i rang bzhin du gyur pa'i rgyud kyang ji lta ba bzhin du gyur pa'i shes pa dmigs pa'i spyod yul du gyur pa yin pa des na de rnams mi dmigs pa nyid yin no//de lta ma yin na ni mi dmigs pa nyid kyis med pa'i phyir ro zhes gsung bar 'gyur ro/ /bsgom pa'i lam gyi 'dzin pa'i rnam par rtog pa gnyis pa'i gnyen po'i dbang du mdzad nas/ rgyun du zhugs pa la sogs pa'i 'bras bu rnams dang /rab tu dga' ba la sogs pa'i sa bcu dang / dkar po rnam par mthong ba dang / rigs dang / brgyad pa dang / mthong ba dang / bsrabs pa dang / 'dod chags dang bral ba dang / byas pa rtogs pa dang / rang sangs rgyas kyi lam dang /'bras bur gyur pa dang / 'bras bu dang lam du gyur pa 'phags pa'i gang zag thams cad rab tu gdags pa'i rgyu mtshan du gyur pa rnams mi dmigs pa nyid ces bya bas gang gsungs pa yin no/ /snying rje la sogs pa chos 'di dag ni rdzogs pa'i byang chub yang dag par 'grub par byed pa'i ngo bo'i don gyis na tshogs zhes brjod do//tshogs kyi sgrub pa bshad zin to// //nges par 'byung ba'i sgrub pa bshad par bya ste/ de'ang ched du bya ba'i nges par 'byung ba nas brtsams te/ lam gyi nges par 'byung ba'i bar du rnam pa brgyad du 'gyur ba yin no//de bas na/ ched du bya dang mnyam nyid dang / /sems can don dang 'bad med dang / /mtha' 'das nges par 'byung ba dang / /thob pa'i mtshan nyid nges 'byung dang / /rnam pa kun mkhyen nyid du dang / /nges 'byung lam gyi yul can te/ / rnam pa brgyad kyi bdag nyid 'di/ /nges 'byung sgrub pa yin zhes bya/ /zhes gsungs pa yin no/ /de la ched du bya ba'i nges par 'byung ba ni gsum ste/ mchog nyid kyi nges par 'byung ba dang / spangs pa'i nges par 'byung ba dang / rtogs pa'i nges par 'byung ba'o//gang gi phyir mchog nyid kyi nges par 'byung ba'i dbang du mdzad nas gsungs pa ni/ gang gi phyir 'di ltar de dang de zhes bya ba nas brtsams te/ sems can de ni go cha chen po bgos pa lags so zhes bya bas go cha'i sgrub pa'i chen po nyid dang / theg pa chen po la yang dag par zhugs pa theg pa chen po la yang dag par gnas pa zhes bya bas 'jug pa'i sgrub pa'i chen po nyid dang /ci'i phyir go cha chen po bgos pa zhes brjod ces bya bas tshogs kyi sgrub pa'i chen po nyid de/ 'di'i chen po nyid rnam pa gsum po 'di dang 'di yin pa de bas na 'di ni nges par 'byung ba'i sgrub pa las brtsams par 'thad pa yin no//bcom ldan 'das theg pa chen po theg pa chen po zhes bgyi ba ni lha dang mi dang lha ma yin du bcas pa'i 'jig rten zil gyis mnan nas 'byung bar 'gyur zhes gnas brtan rab 'byor gyis nges par 'byung ba'i sgrub pa bstan pa dang /bstan pa de la/ rab 'byor 'di ni byang chub sems dpa' sems dpa' chen po'i theg pa chen po yin no zhes bya bas pha rol tu phyin pa drug dang / gzungs kyi sgo rnams dang / ting nge 'dzin gyi sgo dang / stong pa nyid thams cad dang / byang chub kyi phyogs kyi chos rnams nas/sangs rgyas kyi chos ma 'dres pa bco brgyad kyi bar rnams ched du bya ba ji lta ba bzhin nges par 'byin pa'i theg pa chen po yin par zhal gyis bzhes nas brtsams te/ rab 'byor gang yang khyod kyis 'di skad du theg pa chen po de ni lha dang mi dang lha ma yin du bcas pa'i 'jig rten zil gyis mnan te 'byung bar 'gyur ro zhes smras pa ni/rab 'byor gal te 'dod pa'i khams de bzhin/ ma nor ba de bzhin/ gzhan ma yin pa de bzhin/ phyin ci ma log pa dang / de kho na bden pa dang / yang dag pa dang / ji lta ba bzhin dang / rtag pa dang / brtan pa dang /ther zug dang / mi 'gyur ba'i chos can gyi dngos po zhig yin te/ dngos po med pa ma yin na ni theg pa chen po 'dis kyang lha dang mi dang lha ma yin du bcas pa'i 'jig rten zil gyis mnan zhing 'byung bar mi 'gyur ba zhig na zhes bya ba ste/ de la dmigs par bya ba dang / dmigs pa po dang gnyis ka'i dbang du mdzad nas/ tshig dang po dang bzhi pa dang bdun pa rnams yin la/ dang po dang gnyis pa'i nges par bstan pa ni tshig gnyis gnyis yin zhing / de nas yang gsum po de rnams nyid kyi dbang du byas nas tshig gsum yin no/ /de ltar dmigs pa la sogs pa de rnams nyid kyi mnyam pa nyid du nges par 'byung ba las mi 'gyur ba'i chos nyid la ni tshig bcu gcig pa yin par shes par bya'o//gang gi phyir rab 'byor 'dod pa'i khams rnam par btags pa zhes bya ba ni yang dag pa ma yin par kun du rtog pa'i ma rig pas so/ /rnam par bsgrub pa zhes bya ba ni de'i rkyen du gyur pa'i 'du byed rnams kyis so//bstan pa zhes bya ba ni sred pa dang len pa dang srid pa'i stobs kyis byung ba yin pa de bas na theg pa chen po 'dis lha dang mi dang lha ma yin du bcas pa'i 'jig rten zil gyis mnan nas nges par 'byung bar 'gyur ro//don ci yin zhe na/ theg pa chen po ni 'jig rten na grags pa tsam gyi don ji lta ba nyid yang dag par rtogs pa'i 'bras bu can yin te/ del mngon par zhen pa ni 'ching ba yin pa'i phyir ro/ /gzhan du na theg pa chen po gnyen por sgom pa don med par 'gyur ro zhes bya ba yin no//de bzhin du gzugs dang gzugs med pa'i khams dag dang / phung po la sogs pa rnams dang / chos kyi dbyings dang / yang dag pa'i mtha' dag dang / pha rol tu phyin pa la sogs pa nas/ sangs rgyas kyi chos ma 'dres pa bco brgyad kyi bar du dngos po dang dngos po med pa bkag par gsungs pa ni theg pa chen po'i nges par 'byung ba yin te/phyi ma dag tu 'ang khas blang bar bya ba yin no/ /spangs pa'i nges par 'byung ba'i dbang du mdzad nas gsungs pa ni/ rigs kyi sa'i chos dang / brgyad pa'i sa'i chos nas sangs rgyas kyi chos rnams kyi bar dang /rigs kyi sa'i gang zag nas yang dag par rdzogs pa'i sangs rgyas kyi bar dang / lha dang mi dang lha ma yin du bcas pa'i 'jig rten dngos po yin te zhes bya ba snga ma bzhin sbyar bas yin no/ /rtog pa'i nges par 'byung ba'i dbang du mdzad nas gsungs pa ni/sems dang po bskyed pa nas bzung ste/ byang chub kyi snying po la 'dug gi bar du sems bskyed pa ji snyed cig 'byung ba gang yin pa de dag snga ma bzhin pa dang / rdo rje lta bu'i ye shes snga ma bzhin pa dang / bag chags kyi mtshams sbyar ba'i nyon mongs pa thams cad spangs pa dang /rnam pa thams cad mkhyen pa nyid thob pa theg pa chen po'i nges par 'byung ba nyid dang / skyes bu chen po'i mtshan sum cu rtsa gnyis snga ma bzhin te/ lha dang mi dang lha ma yin du bcas pa'i 'jig rten sangs rgyas kyi gzi brjid dang dpal gyi zil gyis mnan te mdzes pa nyid dang /de bzhin gshegs pa dgra bcom pa yang dag par rdzogs pa'i sangs rgyas kyi 'od snga ma bzhin te/ sangs rgyas kyis 'jig rten gyi khams gang+gA'i klung gi bye ma snyed dag rang gi sku'i 'od kyis rgyas par 'gengs par mdzad pa dang / gsung yan lag drug cu dang ldan pa'ang snga ma bzhin te/sangs rgyas kyi phyogs bcu re re zhing tshad med cing grangs med pa'i 'jig rten gyi khams gsung gis go bar mdzad pas so/ /de la gsung gi yan lag drug cu dang ldan pa ni sangs rgyas kyi gsung yin no/ /de dag kyang gang zhe na/ 'di lta ste/ sems can gyi khams kyi dge ba'i rtsa ba nye bar ston par mdzad pa'i phyir gnyen po'o//mthong ba'i chos nyid la bde ba la reg pa'i phyir 'jom pa'o/ /don bzang ba'i phyir yid du 'ong ba'o/ /yi ge bzang ba'i phyir yid du 'thad pa'o/ /'jig rten las 'das pa bla na med pa'i rjes las thob pa yin pa'i phyir dag pa'o//nyon mongs pa'i bag la nyal gyi bag chags thams cad dang bral ba'i phyir dri ma med pa'o/ /tshig dang yi ge rab tu grags pa'i phyir rab tu gsal ba'o/ /mu stegs can blo ngan pa thams cad kyi lta ba rnam par 'joms pa'i stobs kyi yon tan dang ldan pa'i phyir snyan zhing 'jebs pa'o//sgrub pas nges par 'byung ba dang ldan pa'i phyir na nyan par 'os pa'o/ /pha rol gyi rgol ba thams cad kyis mi brdzi ba'i phyir mi tshugs pa'o/ /thams cad dga' bar byed pa'i phyir snyan pa'o/ /'dod chags la sogs pa'i gnyen po yin pa'i phyir dul ba'o//bslab pa bcas pa'i thabs bde ba'i phyir mi rtsub pa'o/ /de las 'das na nges par 'byung ba'i thabs yang dag par ston par mdzad pa'i phyir mi brlang ba'o/ /theg pa gsum char gyi 'dul ba ston pa'i phyir rab tu dul ba'o/ /rnam par g.yeng ba'i gnyen po yin pa'i phyir rnar snyan pa'o//ting nge 'dzin bskyed pa'i phyir lus tshim par byed pa'o/ /lhag mthong gis rab tu dga' ba bskyed par mdzad pa'i phyir sems tshim par byed pa'o/ /the tshom gcod par mdzad pa'i phyir snying dga' bar byed pa'o/ /log pa dang ma nges pa sel ba'i phyir dga' ba dang bde ba bskyed pa'o//sgrub pa la 'gyod pa med pa'i phyir yongs su gdung ba med pa'o/ /thos pa las byung ba'i shes pa phun sum tshogs pa'i rten yin pa'i phyir kun shes par bya ba'o/ /bsam pa las byung ba'i shes pa phun sum tshogs pa'i rten yin pa'i phyir rnam par rig par bya ba'o//slob dpon gyi dpe mkhyud mi mnga' bar chos ston par mdzad pa'i phyir rnam par gsal ba'o/ /rang gi don rjes su thob pa rnams dga' bar byed pa'i phyir dga' bar byed pa'o/ /rang gi don ma thob pa rnams kyis dga' bar bya ba'i phyir mngon par dga' bar bya ba'o / /bsam gyis mi khyab pa'i chos yang dag par ston par mdzad pa'i phyir kun shes par byed pa'o//bsam gyis mi khyab pa'i chos rnams yang dag par ston par mdzad pa'i phyir rnam par rig par bya'o/ /tshad ma dang mi 'gal ba'i phyir rigs pa'o/ /gdul bya rnams la ji ltar rigs par ston par mdzad pa'i phyir 'brel pa'o//don med par mi gsung ba'i phyir zlos pa'i skyon med pa'o/ /mu stegs byed kyi tshogs thams cad skrag par mdzad pa'i phyir seng ge'i sgra'i shugs so/ /gsung rgya che ba nyid kyi phyir glang po che'i sgra skad do/ /zab pa nyid kyi phyir 'brug gi sgra dbyangs so//gzung bar 'os pa'i phyir klu'i dbang po'i sgra'o/ /sgra dbyangs shin tu snyan pa'i phyir dri za'i glu dbyangs so/ /rno ba dang 'jebs pa'i phyir ka la ping ka'i sgra dbyangs so/ /thag ring du grags pa'i phyir tshangs pa'i sgra dbyangs bsgrags pa'o/ / grub pa thams cad kyi sngon du 'gro bar shes pa'i phyir shang shang te'u'i sgra dbyangs su grags pa'o/ /de la sgra smos pa ni don ston pa'i mtshan nyid kyi sgra yin par go bar bya ba'i don to/ /dbyangs smos pa ni de dang de'i brda go bar bya ba'i don to/ /grags pa smos pa ni sgra de dang de'i brda rjes su sgrogs par byed pa'i don yin no//'da' bar bya ba ma yin pa'i phyir lha'i dbang po'i dbyangs ltar snyan pa'o/ /bdud dang phyir rgol ba thams cad las rnam par rgyal ba'i sngon du 'gro ba'i phyir rnga'i sgra'o/ /bstod pas kun nas nyon mongs pa mi mnga' ba'i phyir ma khengs pa'o//smad pas zhum pa mi mnga' ba'i phyir mi dma' ba'o/ /sgra'i bstan bcos thams cad la rnam pa thams cad kyi mtshan nyid kyi rjes su zhugs pa nyid yin pa'i phyir sgra thams cad kyi rjes su zhugs pa'o/ /bsnyel te gsung ba mi mnga' ba'i phyir tshig zur chags pa med do//gdul bya rnams kyi bya ba la dus thams cad du nye bar gnas par mdzad pa'i phyir ma tshang ba med pa'o/ /rnyed pa dang bkur sti la mi brtan pa'i phyir ma zhum pa'o/ /bsnyengs pa dang bral ba'i phyir mi zhan pa'o/ /skyo ba med pa'i phyir rab tu dga' ba'o//rig pa'i gnas thams cad la mkhas pa dang ldan pa'i phyir khyab pa'o/ /sems can rnams kyi don de dag thams cad rdzogs par mdzad pa'i phyir tha ba med pa'o/ /rgyun chad pa med pa'i phyir rgyun chags pa'o/ /rnam pa sna tshogs su nya bar gnas pa'i phyir brjid pa'o//gsung gcig la sgra'i rnam pa du mar gnas pa'i phyir sgra thams cad rdzogs par byed pa'o/ /gcig las don du ma'i rnam par rig par nye bar gnas pa'i phyir dbang po thams cad tshim par byed pa'o/ /ji ltar dam bcas pa bzhin du mdzad pa'i phyir ma smad pa'o/ /thob pa'i dus su rab tu sbyor ba'i phyir mi 'gyur ba'o//rtab rtab por mi gsung ba'i phyir ma brtabs pa'o/ /'khor thag ring ba dang nye bar mtshungs par thos pa'i phyir 'khor kun tu grags pa'o/ /'jig rten pa'i don thams cad dpe'i chos su sgyur ba'i phyir rnam pa thams cad kyi mchog dang ldan pa'o zhes 'phags pa thogs med gsung ngo //lan gsum du bzlas pa rnam pa bcu gnyis dang ldan pa'i chos kyi 'khor lo dang dngos po dang dngos po med pa bkag pa gsungs pa'i phyir na/ de bzhin gshegs pas sngar ma bskor ba'i chos kyi 'khor lo bskor bas so//de la lan gsum du bzlas pa ni sdug bsngal 'phags pa'i bden pa'o/ /yongs su shes par bya ba'o/ /yongs su shes so zhes bya ba la sogs pa yin no/ /'di rnams re re la mig dang / shes pa dang / rig pa dang / blo skyes so zhes bya ba ni rnam pa bcu gnyis yin no//de ltar bden pa so sor gsum dang bcu gnyis su chos mthun pas na lan gsum du bzlas pa rnam pa bcu gnyis dang ldan pa zhes gsungs pa yin no/ /de la mig ni sangs rgyas kyi spyan gyis bsdus pa'o/ /shes pa ni rnam par mi rtog pa'i ye shes kyis bsdus pa'o//rig pa ni mi slob pa'i rig pas bsdus pa nyid do/ /blo ni rnam pa thams cad mkhyen pa nyid kyis bsdus pa nyid do/ /sems can gang gi don du de bskor ba ni de rnams dngos po dang dngos po med pa dgag pa rjes su shes pa las sems can rnams dus gsum du phung po lhag ma med pa'i yongs su mya ngan las 'das pa zhes bya ba yin te/bcom ldan 'das dngos po ni gang zhig lags/ dngos po med pa ni gang zhig lags/ rab 'byor gnyis ni dngos po'o/ /gnyis med pa ni dngos po med pa'o zhes gsungs pa yin no//mnyam pa nyid kyis nges par 'byung ba'i dbang du mdzad nas gsungs pa ni/ rab 'byor gang yang khyod kyis 'di skad du theg pa de ni nam mkha' dang mnyam pa'o zhes smras pa ni zhes bya ba yin te/ nam mkha' dper byas pas ni de khyab pa nyid kyis phyogs su btags pa'i rgyu mtshan mu mtshams kyi dngos po dang bral ba'i phyir/theg pa chen po la phyogs su 'dod pa bkag pa dang / de gzugs can ma yin pa'i phyir ring po dang thung ngu la sogs pa'i dbyibs dang sngon po dang ser po la sogs pa'i kha dog gi gzugs dang dus gsum bkag pa dang /de la mtshan nyid gzhan du 'gyur ba med pa'i phyir 'grib pa dang 'phel ba bkag pa dang / de rang bzhin gyis rnam par dag pa'i mtshan nyid yin pa'i phyir/ kun nas nyon mongs pa dang / rnam par byang bdag dang /skye ba dang / 'gag pa dang / gnas pa dang / gnas pa dang bral ba dang / gnas pa las gzhan du 'gyur ba bkag pa ste/ de la med pa las byung ba ni skye ba'o/ /byung nas med pa ni 'gag pa'o/ /rgyun 'dra ba ni gnas pa'o/ /mi 'dra ba ni gnas pa dang bral ba'o//rgyun gzhan du gyur pa ni gnas pa las gzhan du 'gyur ba'o/ /de'i ngo bo dang kun nas bslang ba dang / mtshungs par ldan pa ma yin pa'i phyir dge ba dang mi dge ba dang lung du ma bstan pa bkag pa dang / de dbang po'i yul las 'das pa'i phyir mthong ba dang / thos pa dang /dran pa dang / rig pa dang / rnam par shes pa rnams dang / shes par bya ba dang / kun shes par bya ba dang / yongs su shes par bya ba rnams bkag pa ste/ de la shes par bya ba ni thams cad shes pa nyid de/ de ni shes pa dang mthong bas bltas nas 'da' bar bya ba yin pa'i phyir ro//kun shes par bya ba ni lam shes pa nyid de/ de ni sangs rgyas pa nyid kyi bar du kun shes par bya ba yin pa'i phyir ro/ /yongs su shes par bya ba ni rnam pa thams cad mkhyen pa nyid de/ de ni thams cad nas shes par bya ba yin pa'i phyir te/theg pa chen po la tshar gcad pa med pa'i phyir ro/ /de 'jug pa dang ldog pa'i rnam par rtog pa dang bral ba'i phyir/ yongs su shes par bya ba dang / spang bar bya ba dang / mngon sum du bya ba dang / bsgom par bya ba rnams bkag pa dang / de la rgyu 'bras kyi 'brel pa 'gal ba'i phyir/rnam par smin pa dang / de'i chos can dag bkag pa dang / de khams gsum pa dang mi ldan pa'i phyir/ 'dod pa la sogs pa'i khams su rtog pa yin pa nyid bkag pa dang / de rnam par rig pa'i mtshan nyid ma yin pa'i phyir/ nam mkha' bzhin du theg pa chen po la/sems dang po bskyed pa nas/ sems bskyed pa bcu pa'i bar bkag pa dang / de bzhin du rten gyi mtshan nyid ma yin pa'i phyir/ dkar po rnam par mthong ba la sogs pa'i sa nas/ byas pa rtogs pa'i sa'i bar rnams bkag pa dang / de brten pa'i mtshan nyid ma yin pa'i phyir/rgyun du zhugs pa la sogs pa'i 'bras bu rnams dang / nyan thos dang / rang sangs rgyas dang / sangs rgyas kyi sa rnams bkag pa dang / de bzlog zla'i rnam par rtog pa med pa med pa'i phyir/ theg pa chen po la bzlog zla dang bcas pa'i gzugs can dang /bstan du yod pa dang / thogs pa dang bcas pa dang / ldan pa rnams dang / rtag pa dang / bde ba dang / bdag dang / zhi ba rnams dang / mi stong pa dang / mtshan ma yod pa dang / smon pa yod pa rnams dang / bzlog zla dang bcas pa'i dben pa dang /snang ba dag dang / de la dngos po dang / khyad par du mngon par zhen pa med pa'i phyir/ rim pa ji lta ba bzhin thob pa dang / nye bar dmigs pa dag dang / de la rang gzhan gyi rnam par rtog pa med pa'i phyir brjod pa dang / rab tu brjod pa dag bkag pas bstan pa yin no//de la brjod pa ni rang nyid khong du chud pa'i rgyu shes pa ste/ 'dis rjod par byed pa nyid yin pa'i phyir ro/ /rab tu brjod pa ni gzhan go bar byed pa'i rgyu'i tshig ste/ gzhan la brjod pa ni rab tu brjod pa yin pas so/ /sems can gyi don gyi nges par 'byung ba'i dbang du mdzad nas gsungs pa ni/rab 'byor gang yang khyod kyis 'di skad du dper na/ nam mkha' sems can gzhal du ma mchis grangs ma mchis tshad ma mchis pa rnams kyi go 'byed pa de bzhin du/ theg pa chen po de'ang sems can gzhal du ma mchis grangs ma mchis tshad ma mchis pa rnams kyi go skabs 'byed pa lags te/de'i slad du theg pa chen po zhes bgyi'o zhes smras pa de ni zhes bya bas sems can dang / nam mkha' dang / theg pa chen po med pa nyid kyis theg pa chen po ni sems can gzhal du med pa dang grangs med pa dang tshad med pa'i go skabs 'byed pa yin pa dang /de ci'i phyir zhe na/ sems can dang nam mkha' dang theg pa chen po mi dmigs pa'i phyir ro zhes bya ba ste/ 'dis ni dmigs pa med pa'i rnam pas bsdus pa'i lam ni sems can gyi don gyi nges par 'byung ba'i rgyu yin no zhes bstan to//lam yang byang chub sems dpa'i sa rnam pa bcus bsdus pa yin te/ gang gi phyir sems can dang nam mkha' dang theg pa chen po med pas gzhal du med pas na theg pa chen po la sngar bshad pa'i sems can gyi go skabs yod pa yin te/de ci'i phyir zhe na/ sems can la sogs pa ni dmigs su med pa yin pa'i phyir te/ sa dang po la sogs pa'i rnam par rtog pa mthong ba'i lam gyi yul ma yin pa'i phyir ro zhes bya ba dang / yang sems can dang nam mkha' dang / theg pa chen po med pas grangs med pas na de nyid la sngar brjod pa'i sems can gyi go skabs 'byed pa yin te/de ci'i phyir zhe na/ de rnams ni dmigs su med pa nyid yin pa'i phyir te/ gnyis par lam chung ngu'i chung ngus rnam par rtog pa chen po'i chen po spangs pa na sems can la sogs pa dmigs su med pa'i phyir ro zhes bya ba dang /yang sems can gyi khams dang chos kyi dbyings dang nam mkha' dang theg pa chen po rnams med pas na tshad med pas de nyid la sngar brjod pa'i sems can rnams kyi go skabs yod pa yin te/ de ci'i phyir zhe na/ de dag thams cad kyang dmigs su med pa'i phyir te/gsum pa la rnam par rtog pa chen po'i 'bring gi gnyen po lam chung ngu'i 'bring ni de rnams spong bar byed pa yin pa'i phyir ro/ /yang sems can dang de bzhin nyid dang nam mkha' dang theg pa chen po dang 'dus ma byas kyi gzhal du med pa dang grangs med pa dang tshad ma mchis pa rnams med pa rnams kyi chos thams cad med pas na de nyid la snga ma bzhin no//de ci'i phyir zhe na/ snga ma bzhin te/ bzhi pa la rnam par rtog pa chen po'i chung ngu'i gnyen po lam chung ngu'i chen pos de rnams mi mthong ba'i phyir ro//yang bdag dang sems can dang srog la sogs pa dang / yang dag pa'i mtha' dang nam mkha' dang theg pa chen po dang gzhal du med pa dang / grangs med pa dang / tshad med pa rnams med pa nyid kyis chos thams cad med pas na de nyid la zhes bya ba thams cad sbyar ro//de ci'i phyir zhe na/ snga ma bzhin te/ lnga pa la rnam par rtog pa 'bring gi chen po'i gnyen po lam 'bring gi chung ngus de rnams mi dmigs pa'i phyir ro/ /zhes bya ba dang / gzhan yang bdag la sogs pa rnams dang / bsam gyis mi khyab pa'i dbyings dang / gzugs la sogs pa'i phung po la sogs pa dang /nam mkha' dang / theg pa chen po dang / gzhal du med pa dang / grangs med pa dang / tshad med pa rnams med pa nyid kyis de nyid la zhes thams cad sbyar te/ de ci'i phyir zhe na/ snga ma bzhin te/ drug pa la rnam par rtog pa 'bring po'i 'bring gi gnyen po lam 'bring po'i 'bring gis de rnams dmigs su med pa nyid yin pa'i phyir ro zhes bya ba dang /gzhan yang bdag la sogs pa dang / mig la sogs pa dang / nam mkha' dang / theg pa chen po dang / gzhal du med pa dang / grangs med pa dang / tshad med pa dang /chos thams cad med pa nyid kyis de la zhes thams cad sbyar te/ de ci'i phyir zhe na/ snga ma bzhin te/ bdun pa la rnam par rtog pa 'bring gi chung ngu'i gnyen po lam 'bring gi chen pos de rnams dmigs su med pa nyid yin pa'i phyir ro zhes bya ba dang / gzhan yang bdag la sogs pa dang /sbyin pa la sogs pa'i pha rol tu phyin pa rnams dang / nam mkha' dang / theg pa chen po dang / gzhal du med pa dang / grangs med pa dang / tshad med pa dang / chos thams cad med pa nyid kyi phyir de nyid la zhes thams cad la sbyar te/ de ci'i phyir zhe na/ snga ma bzhin te/ brgyad pa la rnam par rtog pa chung ngu'i chen po'i gnyen po lam chen po'i chung ngus de rnams dmigs su med pa'i phyir zhes bya ba dang /gzhan yang bdag la sogs pa dang / stong pa nyid thams cad dang / byang chub kyi phyogs kyi chos rnams nas sangs rgyas kyi chos ma 'dres pa'i bar dang /rigs la sogs pa'i sa rnams dang / rgyun du zhugs pa la sogs pa dang / nyan thos dang / rang sangs rgyas kyi theg pa dag dang / de bzhin gshegs pa dang / rnam pa thams cad mkhyen pa nyid med pa'i phyir/ nam mkha' dang / theg pa chen po dang /chos thams cad med pas na de nyid la zhes thams cad snga ma bzhin te/ de ci'i phyir zhe na/ snga ma bzhin te/ dgu pa la rnam par rtog pa chung ngu'i 'bring gi gnyen po lam chen po'i 'bring gis de rnams mi dmigs pa'i phyir ro zhes bya ba dang / gzhan yang mya ngan las 'das pa ji lta ba dang /nam mkha' ji lta ba bzhin du theg pa chen po la sngar brjod pa'i sems can gyi go skabs yod pa zhes bya ba ste/ sa bcu pa la rnam par rtog pa chung ngu'i chung ngu'i gnyen po lam chen po'i chen po ni nam mkha' bzhin du shes bya'i sgrib pa dang bral ba tsam du gnas par bya ba yin pa'i phyir ro//rnam pa 'di lta bu ni mdo gzhan las kyang gsungs te/ zhi ba'i blo gros ji lta ji ltar bla na med pa yang dag par rdzogs pa'i byang chub tu nye bar gyur pa de lta de ltar sems can tshad med pa dang / grangs med pa dang / dpag tu med pa yongs su smin par byed do zhes so//lhun gyis grub pa'i nges par 'byung ba'i dbang du mdzad nas/ rab 'byor gang yang khyod kyis 'di skad du theg pa chen po de la 'gro ba'am/ 'ong ba mi dmigs/ gnas pa mi dmigs so zhes smras pa de ni zhes bya bas 'gro ba dang 'ong ba dang gnas pa med pa lhun gyis grub pa'i nges par 'byung ba zhal gyis bzhes pa dang /de ci'i phyir zhe na/ chos thams cad g.yo ba med pa nyid yin pa'i phyir te/ de ci'i phyir zhe na/ gzugs la sogs pa'i phung po rnams dang / mig la sogs pa dang / sa la sogs pa'i khams drug dang / chos kyi dbyings dang /de bzhin nyid dang / yang dag pa'i mtha' dang / bsam gyis mi khyab pa'i dbyings dang / pha rol tu phyin pa rnams dang / byang chub kyi phyogs kyi chos rnams dang / stobs la sogs pa nas sangs rgyas kyi chos ma 'dres pa'i bar dang / yang dag par rdzogs pa'i byang chub dang /'dus ma byas rnams kyi rang bzhin dang / de bzhin nyid dang / ngo bo nyid dang / mtshan nyid rnams la 'gro ba dang / 'ong ba dang gnas pa bkag pa lhun gyis grub pa'i nges par 'byung ba shes par byed pa'i don gyis so/ /mtha' las 'das pa'i nges par 'byung ba'i dbang du mdzad nas gsungs pa ni/rab 'byor gang yang khyod kyis 'di skad du theg pa chen po de la sngon gyi mtha' mi dmigs/ phyi ma'i mtha' mi dmigs/ dbus kyang mi dmigs te/ theg pa de ni dus gsum mnyam pa nyid lags te/ de'i slad du theg pa chen po zhes bya'o//zhes bya bas gang smras pa ni dus gsum mnyam pa nyid mtha' las 'das pa'i nges par 'byung ba yin par zhal gyis bzhes pa dang / de ci'i phyir zhe na/ dus gsum po rnams dang / de'i mnyam pa nyid dang / theg pa chen po dang / byang chub sems dpa' rnams ni de dang de'i bdag nyid kyis stong pa nyid dang /stong pa nyid la'ang gcig nas bcu'i bar gyi grangs bkag pas theg pa chen po la mnyam pa dang mi mnyam pa dang / 'dod chags dang / 'dod chags dang bral ba dang / zhe sdang dang zhe sdang med pa dang / gti mug dang gti mug med pa dang /ming dang ming med pa dang / dge ba dang mi dge ba dang / zag pa dang bcas pa dang zag pa med pa dang / kha na ma tho ba dang bcas pa dang kha na ma tho ba med pa dang / nyon mongs pa dang nyon mongs pa med pa dang / 'jig rten pa dang 'jig rten las 'das pa dang /kun nas nyon mongs pa dang / rnam par byang ba dang / 'khor ba dang mya ngan las 'das pa dang / rtag pa dang / bde ba dang / bdag dang / zhi ba dang / de dag las bzlog pa dang / 'dod pa la sogs pa'i khams rnams dang / de las yang dag par 'das pa'ang mi dmigs pa nyid dang /de ci'i phyir zhe na/ 'di dag thams cad ni ngo bo nyid kyis mi dmigs pa'i phyir ro zhes bya ba dang / 'das pa la sogs pa'i gzugs la sogs pa ni 'das pa la sogs pa'i gzugs la sogs pas stong pa nyid yin pa dang / de ci'i phyir zhe na/ stong pa nyid la stong pa nyid mi dmigs pa'i phyir na 'das pa la sogs pa'i gzugs la sogs pa dmigs pa mi srid pa dang / dus gsum mnyam pa nyid kyis sngon gyi mtha' la sogs pa nas/ pha rol tu phyin pa thams cad kyi bar mi dmigs pa dang / de ci'i phyir zhe na/mnyam pa nyid la mnyam pa nyid mi dmigs pa nyid kyis na 'das pa la sogs pa dang pha rol tu phyin pa dmigs pa mi srid pa nyid kyi phyir te/ dran pa nye bar bzhag pa nas/ sangs rgyas kyi chos ma 'dres pa bco brgyad kyi bar la yang de bzhin du brjod par bya'o/ /de bzhin du so so'i skye bo nas de bzhin gshegs pa'i bar du sngon gyi mtha' la sogs par mi dmigs pa dang /de ci'i phyir zhe na/ sems can dmigs su med pa'i phyir ro zhes bya ba dang / rab 'byor 'di ni byang chub sems dpa' sems dpa' chen po'i theg pa chen po dus gsum mnyam pa nyid ces bya ba yin te/de la gnas nas byang chub sems dpa' sems dpa' chen pos lha dang mi dang lha ma yin du bcas pa'i 'jig rten zil gyis mnan te/ rnam pa thams cad mkhyen pa nyid du nges par 'byung ngo zhes bya ba yin no/ /thob pa'i mtshan nyid kyi nges par 'byung ba'i dbang du mdzad nas/bcom ldan 'das 'das pa dang / ma 'ongs pa dang / da ltar byung ba'i byang chub sems dpa' sems dpa' chen po rnams kyi theg pa chen po 'di la bslabs nas rnam pa thams cad mkhyen pa nyid thob par gyur to/ /thob bo/ /'thob par 'gyur ro zhes bya ba thob pa'i nges par 'byung ba nye bar 'god pa dang /shes rab kyi pha rol tu phyin pa 'phags pa'i gang zag thams cad kyi rtogs pa thob pa'i rgyu nyid dang rjes su mthun par theg pa chen po bstan pa zhes bya ba thob pas khyab pa shes par byed pa'i don can nyid dang / shes rab kyi pha rol tu phyin par chos thams cad 'dus shing gzhol ba'i thabs bstan pa zhes bya ba thob pa ma tshang ba med pa shes par byed pa'i don can dang /de ci'i phyir zhe na/ theg pa chen por pha rol tu phyin pa la sogs pa dang / gzugs la sogs pa'i phung po rnams dang / byang chub kyi phyogs kyi chos rnams nas sangs rgyas kyi chos ma 'dres pa'i bar dang /mya ngan las 'das pa'i dbyings zhes bya ba'i bar gyi chos de dag thams cad ni ldan pa yang ma yin/ mi ldan pa yang ma yin te/ gzugs med pa/ bstan du med pa/ thogs pa med pa/ 'di ltar mtshan nyid med par mtshan nyid gcig pa nyid de zhes bya ba rtogs pa thob pa'i [(]ngas [,]nges [)]par 'byung ba'i rnam grangs ji skad du bshad pa ste/shes rab kyi pha rol tu phyin pa dang mthun par theg pa chen po bstan pa dang / shes rab kyi pha rol tu phyin pa la sgrub pa theg pa chen po'i nang du 'du bar dgongs pas thob pa gtan du ba nyid shes par byed pa'i don can dang /de ci'i phyir zhe na/ theg pa chen po dang shes rab kyi pha rol tu phyin pa la sogs pa nas/ chos thams cad kyi bar du gnyis su med cing gnyis su byar med pa thob pa'i rnam grangs kyis theg pa chen po rjes su mthun pas bstan pas zhes gsungs so//de la thob pa'i nges par 'byung ba ni don rnam pa gsum dgag pa'i mtshan nyid can yin par shes par bya'o/ /rnam pa gsum dgag pa'ang 'di lta ste/ thob par bya ba dgag pa dang / thob pa po dgag pa dang / de gnyis kyi 'brel pa dgag pa ste/tshe dang ldan pa rab 'byor ci'i phyir na 'di skad du byang chub sems dpa' chen po sngon gyi mthar dmigs su med pa yin zhes bya ba dang / ci'i phyir na gzugs kun du mtha' yas pa'i phyir byang chub sems dpa' kun du mtha' yas pa zhes bya ba dang / ci'i phyir na gzugs byang chub sems dpa' zhes bya ba de lta bu yang med ces bya ba dang /de skad du ci'i phyir na de ltar bdag gis byang chub sems dpa' thams cad nas thams cad rnam pa thams cad du yang dag par rjes su ma mthong na byang chub sems dpa' gang zhig shes rab kyi pha rol tu phyin pa gang la gdams shing rjes su bstan par bgyi zhes smra zhes bya ba dang /ci'i phyir na byang chub sems dpa' zhes bya ba 'di ni ming tsam du bas so zhes bya ba dang / ci'i phyir na gang zhig mngon par ma grub pa'i gzugs de gang yin/ gang mngon par ma grub pa de ni gzugs ma lags so zhes bya ba dang /mngon par ma grub pas mngon par ma grub pa'i shes rab kyi pha rol tu phyin pa la gdams shing rjes su bstan par bgyi 'am zhes smra/ de skad du mngon par ma grub pa las gud na'ang byang chub sems dpa' chen po zhes bgyi ba dmigs su ma mchis so zhes smra/ci'i phyir na 'di skad ces gal te de ltar bstan pa'i tshe zhes bya ba la sogs pa smra zhes gsungs pa yin no/ /de la dris pa dang po nges par bstan pa las brtsams te thob par bya ba dgag pa'i dbang du mdzad nas/ sems can med pa dang / stong pa dang /dben pa dang / rang bzhin med pas sngon gyi mtha' dang phyi ma'i mtha' dang dbus rnams su byang chub sems dpar khas blangs pa'i thob pa bkag pa dus gsum pa'i thob par bya ba'i don med par shes par byed pa'i don can dang / de bzhin du phung po la sogs pa dang / pha rol tu phyin pa rnams dang / byang chub kyi phyogs kyi chos rnams nas sangs rgyas kyi chos ma 'dres pa bco brgyad kyi bar du med pa dang / stong pa dang / dben pa dang / rang bzhin med pa dang / sngon gyi mtha' la sogs pa rnams su byang chub sems dpa' khas len pa'i thob pa bkag pa dang /de ci'i phyir zhe na/ med pa nyid la sogs pa rnams la sngon gyi mtha' la sogs pa mi dmigs pa nyid dang / med pa nyid la sogs pa dang / pha rol tu phyin pa la sogs pa rnam grangs gzhan du khas mi len pa ste/ ji skad du mdo las/ stong pa nyid gzhan ma yin/ sbyin pa'i pha rol tu phyin pa gzhan ma yin zhes bya ba la sogs pa gsungs pa dang /de bzhin du/ ting nge 'dzin dang / gzungs kyi sgo rnams dang / chos kyi dbyings dang / de bzhin nyid dang / yang dag pa'i mtha' rnams la yang brjod par bya ba dang / gzhan yang nyan thos la sogs pa 'phags pa'i gang zag rnams med pa nyid la sogs pa dang /sngon gyi mtha' la sogs par byang chub sems dpa' khas blang ba'i thob pa bkag pa dang / de ci'i phyir zhe na/ med pa nyid nas brtsams te/ sangs rgyas zhes bya ba'i bar du de dag thams cad kyang gnyis su med de gnyis su byar med do zhes bya bas gsungs pa yin no//thob pa po dgag pa'i dbang du mdzad nas gsungs pa ni gzugs kun du mtha' yas pa'i phyir zhes bya ba nas brtsams te/ gzugs la sogs pa'i phung po la sogs pa nas sangs rgyas kyi chos ma 'dres pa'i bar la sngon gyi mtha' la sogs pa mi dmigs pa nyid dang /de ci'i phyir zhe na/ stong pa nyid kyi phyir zhes bya ba dang / gzugs byang chub sems dpa' zhes bya ba med cing mi dmigs so zhes bya ba nas brtsams te/ de ci'i phyir zhe na/ gzugs la sogs pa nas de bzhin gshegs pa'i bar du des stong pa nyid yin pa'i phyir ro zhes bya ba dang /byang chub sems dpa' chen po thams cad du thams cad rnam pa thams cad du thams cad ma dmigs na zhes bya ba nas brtsams te/ gzugs la sogs pa'i phung po la sogs pa nas sangs rgyas kyi chos ma 'dres pa bco brgyad kyi bar dang / sangs rgyas sangs rgyas nyid du mi dmigs pa nyid yin pa'i bar gyis bstan pa yin no//de la thams cad du zhes bya ba ni phung po la sogs pa'i dngos po'i mtshan nyid thams cad du'o thams cad ces bya ba ni phung po la sogs pa bsdus pa dang so so'i rang bzhin gyi byang chub sems dpa'o/ / rnam pa thams cad du zhes bya ba ni nang stong pa nyid la sogs pa'i rnam pa'i khyad par rnams su'o/ /yang thams cad ces bya ba ni rnam pa bsdus pa dang so so so so'i mtshan nyid do/ /thams cad nyid 'di ni gnyis te/ dngos po thams cad dang / rnam pa thams cad nyid yin pa'i phyir ro/ / thob par bya ba dang thob pa po'i 'brel pa dgag pa'i dbang du mdzad nas gsungs pa ni/ gang yang 'di skad du byang chub sems dpa' zhes bya ba 'di ni glo bur du ming du btags pa ste zhes bya ba nas brtsams te/ chos thams cad ming tsam yin pa nyid kyis na med cing mi dmigs pa yin pa'i phyir mngon par grub pa bkag cing tha snyad tsam du khas blangs pa dang /shin tu mngon par ma grub pa dag gis te/ de la glo bur gyi don ni de'i ngo bo nyid ma yin pa'i don la btags pa'i don sgro 'dogs pa'i don yin no/ /bdag bdag ces brjod kyang bdag gtan du mngon par ma grub pa de bzhin du chos thams cad ces gang gsungs pa yin no//yang chos thams cad sbyor ba las byung ba'i ngo bo nyid bkag pas dngos po med pa'i rang bzhin nyid dang / chos thams cad mi rtag pa nyid gang dang yang bral bas ma yin pa nyid dang / de bzhin du de dag nyid kyi dge ba dang kha na ma tho ba med pa la sogs pa rnams gang dang yang bral bas ma yin pas na ngo bo nyid med pa'i bar dang /gzhan yang chos thams cad ther zug tu gnas pa dang 'jig pa nyid ma yin pa dang / de ci'i phyir zhe na/ de'i rang bzhin de yin pa dang / gzhan yang chos thams cad mngon par 'dus ma byas pa'i phyir mngon par grub pa bkag pa dang /ci'i phyir na mngon par 'du byed pa dmigs su med pa nyid dang / chos thams cad rang bzhin gyis stong pa yin pa'i phyir skye ba dang 'gag pa dang gnas pa las gzhan du 'gyur ba bkag pa dang / mngon par ma grub pa nyid dang / shes rab kyi pha rol tu phyin pa dang mngon par ma grub pa dag gnyis su med cing gnyis su byar med pa dang / chos rnams thams cad dang mngon par ma grub pa gnyis su med cing gnyis su byar med pa dang / chos thams cad g.yo ba med pa dang rmi lam dang sgyu ma dang 'dra ba la sogs par mthong bas byang chub sems dpa'i sems mi 'jigs mi dngang skrag par mi 'gyur ba dang /chos de dag la 'di ltar yongs su rtog pa'i tshe/ gzugs khas mi len zhing mi 'dzin la gnas par mi bgyid de/ mngon par zhen par mi bgyid la 'dogs par mi bgyid do zhes bya bas chos su khas mi len pa la sogs pa bkag pas te/de la gzugs la mi dmigs te khas len pa dang / de thob pa bdag gir byed pa dang / de la dmigs pa'i ye shes bskyed pa dang / de rjes nyid du srid pas mngon du byed pa dang / de nye bar rtog pas brtags pa'i dbang du mdzad nas/gzugs khas len pa la sogs pa'i tshig lnga go rims bzhin du sbyar bar shes par bya'o/ /de ci'i slad du zhe na/ chos thams cad ma skyes pa dang / chos thams cad ngo bo nyid med pa nyid kyis na dmigs su med pa yin pa'i phyir ro zhes bya ba dang / de ci'i phyir zhe na/ chos rnams dang de'i stong pa nyid la sogs pa ni gnyis su med cing gnyis su byar med pa dang / de bzhin du chos rnams kyi 'grib pa gang yin pa de'ang chos ma lags so/ /de ci'i slad du zhe na/ chos rnams dang 'grib pa ni gnyis su ma mchis shing gnyis su dbyer ma mchis pa'i slad du'o zhes bya ba dang /gzugs nas rnam pa thams cad mkhyen pa nyid ces bya ba'i bar 'di ni gnyis su ma mchis pa'i grangs su bgyis pa'o zhes gang gsungs pas thob par bya ba dang thob pa po gnyis bkag pas bstan pa yin no/ /rnam pa thams cad mkhyen pa nyid du nges par 'byung ba'i dbang du mdzad nas gsungs pa ni/byang chub des kyang chos thams cad kyi rnam pa shes te zhes bya ba nas brtsams te/ gzugs la sogs pa'i phung po la sogs pa nas sangs rgyas kyi chos ma 'dres pa bco brgyad kyi bar gyi rnam pa shes pa de la mngon par chags pas 'jug pa bkag pa dang /chos rnams kyi rnam pa dang rtags dang mtshan ma gang gis chos rnams 'dzin pas so zhes bya ba dang / 'di chos thams cad la ring du song ba des na shes rab kyi pha rol tu phyin pa zhes bya'o zhes bya ba la rang bzhin gyis 'od gsal ba'i mthar thug par de rnams las song zhing rnam par bsrings pas te/de la mngon par zhen pa med pa'i tshul gyis zhes bya ba'i don to/ /kun dga' bo des na 'di ni shes rab kyi pha rol tu phyin pa zhes brjod de/ sems bskyed pa'i mthar thug par rang gi don de la dga' bas kun dga' bas te/ nyan thos la sogs pa'i lam mo/ /de las song zhing 'das pa zhes bya ba'i don te/ de ni rnam pa thams cad mkhyen pa nyid kyi rgyu yin pa'i phyir ro/ /gzugs la sogs pa nas chos thams cad kyi bar du re re zhing rtag ces bya ba dang zhes bya ba nas/ dben zhes bya ba dang / mi dben zhes bya bar mi rtog pa'i chos yongs su rtog pa'i rnam pa bsdus par shes par byed pa'i don dang /chos thams cad kyi stong pa nyid la skye ba med pa nas rnam pa thams cad mkhyen pa nyid kyi stong pa nyid la de'i ngo bo nyid bkag pa'i bar dang / 'grib pa gang yin pa dang /rnam pa thams cad mkhyen pa nyid gang yin pa dang / gnyis su med pa gang yin pa'i chos de dag thams cad kyang ldan pa yang ma yin/ mi ldan pa'ang ma yin/ gzugs med pa/ bstan du med pa/ thogs pa med pa ste / 'di ltar mtshan nyid med par mtshan nyid gcig pa'o zhes bya ba'i mngon par rtogs pa dang /chos rnams kyi skye ba med pa dang / chos rnams phan tshun tha dad pa med pa nye bar bzung nas gnyis su med par bgrangs pa dang / chos thams cad nas sangs rgyas kyi bar du shin tu rnam par dag pa nyid kyis skye ba med par mthong ba shes rab kyi pha rol tu phyin pa la nye bar rtog pa yin pa dang /de lta yin na byang chub sems dpa'i 'gro ba lnga'i bye brag med pa dang / rgyun du zhugs pa la sogs pa lnga thob pa dang / de'i lam bsgom pa med pa dang / dka' ba spyod pa'ang mi 'thad pas de bzhin gshegs pa bla na med pa yang dag par rdzogs pa'i byang chub tu mngon par rdzogs par sangs rgyas pa dang /chos kyi 'khor lo bskor ba 'ang med par 'gyur ro zhes bya ba dang / rab 'byor gyis smras pa/ tshe dang ldan pa shA ri'i bu kho bo ni chos ma skyes pa la thob pa dang mngon par rtogs pa yod par bya ba mi 'dod do/ /ma skyes pa la rgyun du zhugs pa yod par mi 'dod do//rgyun du zhugs pa'i 'bras bu yod par mi 'dod do zhes bya ba nas brtsams te/ chos thams cad la khas len pa 'thad pa ma yin par bstan pa dang / chos ma skyes pa dang skyes pa dag gis thob par bya/ skyes pa dang ma skyes pa 'thob pa dris pa dang / de gnyi ga'i dngos po mi 'dod par bstan pa dang /chos ma skyes pa dang skyes pa dag gis thob par 'dod pa dris pa dang / de gnyi ga'i dngos po 'dod pa dris pa dang / thob pa dang / mngon par rtogs pa med pa nyid du dris pa dang / de gnyis ka yod par khas blangs pa dang / mngon par rtogs pa brjod pa'i rigs pa bzhin du de gnyi ga 'jig rten gyi tha snyad du khas blangs pa dang /de nyid kyi phyir ma skyes pa skyes pa bkag pa dang / skye ba med pa brjod par mi spobs pa dang / de ci'i phyir zhe na/ skye ba med pa dang / spobs pa dang / brjod pa dang / mi skye ba rnams ni mngon par rtogs pa brjod pa'i rigs pas mtshan nyid med pa'i phyir zhes bya ba dang / de ci'i phyir zhe na/chos thams cad skye ba med pa'i phyir ro zhes bya ba dang / de la spobs pa ni rjod byed do/ /rjod pa ni brjod par bya ba yin pas na brjod pa ste don no/ /de lta yin dang 'gro ba lnga'i bye brag dang / thob pa dang / mngon par rtogs pa dang / skye ba ni tha snyad du yin no/ /de ci'i phyir zhe na/ don dam pa ni las dang /rnam par smin pa dang / skye ba dang / 'gag pa dang / kun nas nyon mongs pa dang / rnam par byang ba'i mtshan nyid dang bral ba yin pa'i phyir ro zhes bya ba dang / chos ma skyes pa dang skyes pa skye bar dris pa dang / de gnyi ga skye bar 'dod pa bkag pa ste/ de yod du chug kyang zhes bya bar bsams pa dang /ma skyes pa'i chos skye bar mi 'dod pa de dag gang yin zhes dris pa dang / gzugs nas brtsams te chos thams cad kyi bar ma skyes pa'i chos rnams skye bar mi 'dod pa'i rnam grangs kyis brjod pa dang spobs pa skye ba med pa dang / dris pa thams cad kyi lan gyi nges par 'byung bas na mi gnas pa nyid nye bar bzung nas gnas brtan rab 'byor mchog tu bzhag pa shes rab kyi pha rol tu phyin pa'i ston pa po'i 'os su shes par byed pa'i don can dang /gzugs la sogs pa'i phung po rnams nas chos thams cad kyi bar rnams rang bzhin gyis stong pa nyid yin pa'i phyir/ nang la sogs pa la brten par mi dmigs pa nyid ston pa po mi gnas par rtogs par byed pa'i don can gyis te/'di'i mdo ni/ tshe dang ldan pa shA ri'i bu gzugs ni rang bzhin gyis stong pa ste/ de ni nang na yang mi gnas phyi rol na'ang mi gnas gnyi ga med par yang mi dmigs so zhes bya ba la sogs pa yin no / /lam gyi nges par 'byung ba'i dbang du mdzad nas gsungs pa ni/tshe dang ldan pa shA ri'i bu sbyin pa'i pha rol tu phyin pa ni/ 'jig rten pa dang 'jig rten las 'das pa'ang yod ces bya bas rnam pa thams cad mkhyen pa nyid thob par byed pa'i lam nye bar 'god pa na/ sbyin par bya ba dang / sbyin pa po dang /len pa por dmigs pas 'jig rten las mi g.yo mi 'phag mi 'da' ba de'i phyir 'jig rten pa'i pha rol tu phyin pa nyid yin pa dang / 'khor gsum yongs su dag pa'i sbyin pa yang dag par rdzogs pa'i byang chub tu bsngos pas ni/ 'jig rten las sgrol bar byed pa dang /g.yo zhing 'phags la 'da' bar byed pa de'i phyir 'jig rten las 'das pa'i sbyin pa'i pha rol tu phyin pa yin pa nyid dang / de bzhin du shes rab kyi pha rol tu phyin pa'i bar la'ang brjod par bya'o/ /de la 'jig rten las 'das pa'i lam gyi nges par rnyed pas na 'jig rten las g.yo ba'o//de thob pa'i thabs nye bar tshol bas na 'phags pa'o/ /de'i bar chad kyi chos yongs su spong bas na 'da' ba'o/ /yang na g.yo ba ni sems bskyed pa'i dus so/ /'phags pa ni nges par 'byed pa'i cha'i dus so/ /'da' ba ni sdug bsngal la chos shes pa'i dus su'o zhes bya ba ni rnam grangs gzhan yin no//'di las bzlog pas na mi g.yo mi 'phag mi 'da' ba yin par shes par bya'o/ /gang zhig 'jig rten mngon par gsal bar gyur pa yin pa'am/ gang zhig mngon par 'grub par byed pa'am/ gang zhig 'jig rten gyis te 'jig rten par mnyam pa'am/ gang zhig 'jig rten gyi phyir mngon par 'byin pa'am/gang 'jig rten las nges par mi 'byung ba'am/ gang 'jig rten gyi yin pa'am/ gang 'jig rten du skyed par byed pa de dag ni 'jig rten pa'i pha rol tu phyin pa nyid ces bya ba dang / gang dag gi 'jig rten sgrol pa yin pa'am/ gang gis 'jig rten las sgrol ba'am/ gang dag gis 'jig rten la rgal bar byed pa'am/ gang zhig 'jig rten gyi don du mi 'gyur ba'am/ gang zhig 'jig rten las nges par 'byin par byed pa'am/ gang zhig 'jig rten gyi sgrol byed yin pa'am/ gang zhig 'jig rten na sgrol byed yin pa de dag ni 'jig rten las 'das pa'i pha rol tu phyin pa nyid ces bya ba dang /'das pa la sogs pa'i 'phags pa'i gang zag thams cad kyi rtogs pa'i rgyu nyid yin pa'i phyir byang chub kyi phyogs kyi chos sum cu rtsa bdun byang chub kyi lam yin pa nyid dang / 'phags pa rnams 'jig rten las 'das pa'i lam las nges par skyes pa nyid du shes par byed pa shes rab kyi pha rol tu phyin pa skyed byed yin pa nyid dang /sems mi zhum pa dang mi skrag pa la sogs pa rnams kyis yid la byed pa dang ma bral ba nyid dang / de lta yin na ha cang thal ches par brjod pa dang / de ni yang dag pa'i tshig brjod pa yin te/ de ci'i phyir zhe na/ sems can med pa nyid dang /rang bzhin med pa nyid dang / stong pa nyid dang / dben pa nyid dang / mngon par rdzogs par 'tshang mi rgya ba nyid dang / de bzhin du gzugs la sogs pa'i chos thams cad nas rnam pa thams cad mkhyen pa nyid kyi bar la de bzhin du sbyar ba nas/ de ltar na byang chub sems dpa' chen po gnas pa 'di dang yid la byed pa 'di dang ma bral lo zhes kho bo smra'o zhes bya ba'i bar gyis yin te/de ltar nges par 'byung ba brgyad po 'di dag gi nges par 'byung ba'i sgrub pa yin par shes par bya'o/ /go cha'i sgrub pa la sogs pa 'di rnams kyi go rims kyi tshul 'di ni rigs pa nyid yin te/ go bgos pa ni 'jug go//zhugs pa ni dpung gi tshogs sog go/ /dpung gi tshogs bsags pa ni ma rgyal ba las rgyal ba thob pas nges par 'byung ba yin pa'i phyir ro/ /de ltar byas na/ sems bskyed pa dang gdams ngag dang / /nges 'byed yan lag rnam bzhi dang / /sgrub pa yi ni rten gyur pa/ /chos kyi dbyings kyi rang bzhin dang //dmigs pa dag dang ched dang ni/ /go cha 'jug pa'i bya ba dang / /tshogs ni nges par 'byung bcas rnams/ /thub pa rnam kun mkhyen pa nyid/ /ces gsungs pa de ni 'dir rjes su 'das pa'i 'brel pa yin par blta bar bya'o/ /sems bskyed pa la sogs pa'i don 'di rnams kyi go rims kyi tshul 'di ni rigs pa yin te/byang chub tu sems bskyed pa'i don du gnyer ba ni gdams ngag tshol ba'i phyir dang / phyin ci ma log pa'i gdams ngag la gnas pa la ni nges par 'byed pa'i cha dang mthun pa skye ba'i phyir dang / de nas sgrub pa'i chos gang la brten pa dang / gang la dmigs pa dang / ched du bya ba gang yin pa dang / sgrub pa nyid gang yin pa ste rnam pa bzhi yin no/ /shes rab kyi pha rol tu phyin pa'i man ngag gi bstan bcos mngon par rtogs pa'i rgyan las rnam pa thams cad mkhyen pa nyid kyi dbang du byas pa rab 'byor gyi le'u ste dang po'o/ / rnam pa thams cad mkhyen pa nyid bshad zin to// // da ni lam shes pa nyid brjod par bya ba yin te/ de la re zhig /lha rnams rung bar bya ba'i phyir/ /'od kyis mog mog por mdzad dang / /yul nges pa dang khyab pa dang / /rang bzhin dang ni de yi las/ /brjod par bya'o zhes bya ba ni lhag ma'o/ / de la lha rnams mog mog por mdzad pa nyid ni lha'i ris thams cad kyi 'od de bzhin gshegs pa'i rang bzhin gyi 'od kyis mog mog por mdzad pa gsungs pa gang yin pa ste/ lha rnams kyi 'jig rten skyong ba nyid la sogs pa dang / bsam gtan la sogs pa thob par mngon par rlom pa bsal ba'i don yin no//de bsal ba'ang de rnams rung bar bya ba'i don du yin te/ ji skad du de rnams nyid las/ byang chub sems dpa' sems dpa' chen pos ji ltar shes rab kyi pha rol tu phyin pa la gnas par bya/ byang chub sems dpa' sems dpa' chen po'i lam shes pa nyid kyi skabs kyi shes rab kyi pha rol tu phyin pa gang yin zhes gnas brtan rab 'byor gyis bstan pa nyan pa'i don du smras pa yin no//de la rang bzhin gyi 'od ni rnam par smin pa las byung ba'o/ /yul so sor nges pa ni/ ji skad du/ byang chub tu sems ma bskyed pa la ni shes rab kyi pha rol tu phyin pa la gnas pa dang /bstan pa'i skal ba med pa nyid kyis na lam shes pa nyid ni byang chub sems dpa' kho na'i yin gyi/ nyan thos la sogs pa'i ni ma yin no/ /zhes yul so sor nges pa'i don du gang gsungs pa yin no//khyab pa ni lam shes pa nyid kyi dbang du byas te/ sems bskyed pa nas brtsams pas shes rab kyi pha rol tu phyin pa ni phyogs gcig pa ma yin no zhes khyab pa'i don dang / go rims dang ldan pa'i gang zag gi khyad par gyi don gyis gsungs pa gang yin pa'o/ /de lta yin na /'on kyang gal te de dag kyang bla na med pa yang dag par rdzogs pa'i byang chub tu sems bskyed na de dag la rjes su yi rang ste zhes bya ba la sogs pa 'di sngar 'dod chags dang bral ba'i dbang du khyad par 'thad pa yin te/ 'dis ni theg pa gsum rnam par gzhag pa'i dgongs pa can yin gyi/mtshan nyid pa ni ma yin no zhes brjod pa yin no/ /rang bzhin ni ji ltar nyan thos la sogs pa'i lam rnams 'bras bu dang lam gyi rtogs pa so sor nges pa de ltar byang chub sems dpa'i lam shes pa ni ma yin te/ rnam pa thams cad du nyon mongs pa spong ba yin pa'i phyir ro zhes rang gi ngo bo khyad par du 'phags pa gang gsungs pa yin no//byed pa ni ji ltar nyan thos la sogs pa'i lam rnams kyi 'bras bu ni spangs pas rab tu phye ba dang yang dag pa'i mtha' mngon du byed pa de bzhin du byang chub sems dpa'i de rtogs pa ma yin gyi/'on kyang 'di'i lam shes pa nyid ni sems can yongs su smin pa la sogs pas rab tu phye ba yin no zhes de'i byed pa'i 'bras bu nyid khyad par du 'phags pa'i don gyis gsungs pa gang yin pa'o/ /mog mog por byed pa la sogs pa bshad zin to// //da ni nyan thos kyi lam brjod par bya ba yin pa'i phyir/ lam shes nyid kyi tshul la ni/ /'phags pa'i bden pa bzhi dag gi /rnam pa mi dmigs sgo nas ni/ /nyan thos lam 'di shes par bya/ /zhes bya ba gsungs pa yin no/ /ji ltar zhe na/gzugs la sogs pa'i phung po rnams dang / bu ga nam mkha' zhes byar brjod/ /ces bya ba la sogs pa'i khams drug dang / rten cing 'brel par 'byung ba'i yan lag rnams rnam pa thams cad mkhyen pa nyid dang ldan par yid la byed pa nyan thos la sogs pa'i theg pa 'dod pa dang ma 'dres pa'i don gyis mi rtag pa nyid dang /sdug bsngal ba nyid dang / bdag med pa nyid dang / zhi ba nyid dang / nad nyid dang / 'bras nyid dang / zug rngu nyid dang / sdig pa nyid dang / pha rol nyid dang / 'jig pa'i chos can nyid dang / g.yo ba nyid dang /rab tu 'jig pa nyid dang / 'go nad nyid dang / 'tshe ba nyid ces bya ba ni sdug bsngal dang kun 'byung gi bden pa'i rnam pa rnams mi dmigs pa'i tshul gyis yid la byed pa'o/ /de la mi rtag pa nyid nas zhi ba nyid ces bya ba'i bar ni sdug bsngal gyi bden pa'i rnam pa'o//nad nyid ces bya ba nas sdig pa nyid ces bya ba'i bar ni kun 'byung gi bden pa'i rnam pa'o/ /pha rol nyid dang 'jig pa'i chos can nyid ces bya ba ni de dag nyid so so la yang byung ba'i rnam pa'o/ /g.yo ba nyid dang rab tu 'jig pa nyid ces bya ba ni de dag nyid so so la 'dod chags dang bral ba'i rnam pa'o//'jig pa nyid dang 'go nad nyid dang 'tshe ba nyid ces bya ba ni de dag nyid so so la 'gog pa'i rnam pa'o/ /de ltar byas na 'phags pa nyan thos rnams yid byung ba dang 'dod chags dang bral ba dang 'gog pa'i phyir zhugs pa yin no zhes bya ba'i lung ji lta ba bzhin no//de la mi rtag pa nyid ces bya ba ni skye ba dang 'jig pa'i chos can nyid yin pa'i phyir ro/ /sdug bsngal ba nyid ces bya ba ni zag pa dang bcas pa'i dngos po rnams rjes su mi mthun pa nyid yin pa'i phyir ro/ /de lta yin dang 'phags pa'i lam ni mi rtag pa yin yang zag pa med pa nyid kyis 'phags pa rnams dang mi mthun pa yin pa'i phyir 'di sdug bsngal nyid du thal bar mi 'gyur ro//bdag med pa nyid ces bya ba ni bdag gzhan gyis stong pa'i phyir ro/ /zhi ba nyid ces bya ba ni rang nyid bdag ma yin pa'i phyir ro//nad nyid ces bya ba ni 'bras bu'i sa bon dang 'dra bar rgyu'i rtsa bar 'gyur ba nyid yin pa'i phyir ro/ /'bras nyid ces bya ba ni sdug bsngal kun 'byung ba nyid yin pa'i phyir ro/ /zug rngu nyid ces bya ba ni sdug bsngal gyi rkyen nyid yin pa'i phyir ro/ / sdig pa nyid ces bya ba ni sdug bsngal brgyud pa rab tu byung ba nyid kyis shin tu 'joms pa nyid yin pa'i phyir ro/ /pha rol nyid ces bya ba ni phyir rgol bar gyur pa nyid yin pa'i phyir ro/ /'jig pa'i chos can nyid ces bya ba ni 'di la gnod par byed pa yod na 'jig pa'i chos can nyid yin pa'i phyir te/yid byung ba'i dmigs par yang 'gyur ro zhes bya ba'i tha tshig go/ /g.yo ba nyid ces bya ba ni rang gi ngo bor gnas pa med pa nyid kyi phyir ro/ /rab tu 'jig pa nyid ces bya ba ni rgyu la ltos pa med par rang bzhin gyis 'jig pa nyid yin pa'i phyir te/ 'dod chags dang bral ba'i dmigs par yang 'gyur ro zhes bya ba yin no/ /'jig pa nyid ces bya ba ni 'di dang gzhan gyi gnod pa'i gnas su gyur pa nyid yin pa'i phyir ro/ /'go ba'i nad nyid ces bya ba ni srin po la sogs pa'i gnod pas glags thob pa nyid kyis so/ / 'tshe ba nyid ces bya ba ni 'byung ba chen po 'khrugs pa dang thog 'bab pa la sogs pa'i gnod pa'i gnas su gyur pa nyid yin pa'i phyir te/ 'gog pa'i dmigs par yang 'thad pa yin no zhes bya ba'o/ /yid la byed pa de rnams nyid kyis ma rig pa 'gog pa la bdag med pa nyid dang /zhi ba nyid dang / dben pa nyid ces bya bar yid la byed pa gsum ni 'gog pa'i bden pa'i rnam pa'o/ /nges par 'byung ba'i rnam pa bzhi ni gang gi phyir stong pa nyid dang / mtshan ma med pa nyid dang / smon pa med pa nyid dang / mngon par 'du byed pa med pa nyid du mi dmigs pa'i tshul gyis yid la byed do zhes gsungs te/ji ltar nges par 'byung ba rnam par thar pa'i sgo gsum dang / gang nges par 'byung ba mngon par 'du byed pa med pa yin pas so/ /de rnams nyid kyis byang chub kyi phyogs kyi chos rnams sgom pa zhes bya ba ni lam gyi rnam pa ste/de rnams ni mya ngan las 'das pa'i grong khyer thob par byed pa'i don gyis so/ /de dag nyid kyis mi dmigs pa'i tshul du sbyin pa la sogs pa'i pha rol tu phyin pa la spyod pa zhes bya ba ni rigs pa'i rnam pa ste/ ma lus par rtogs pa ni rigs pa yin pas so//gzhan yang shes rab kyi pha rol tu phyin pa la spyod pa nas bdag gi dang bral bar chos las so sor rtog par byed do/ /de ci'i phyir zhe na/ dge ba'i rtsa ba'i sems ni byang chub kyi sems dang mi 'grogs pa dang / yongs su bsngo ba'i sems kyang byang chub kyi sems dang dge ba'i rtsa ba'i sems dag dang mi 'grogs pa dang /byang chub kyi sems ni yongs su bsngo ba'i sems dang mi 'grogs pa nyid kyis te/ de ci'i phyir zhe na/ byang chub kyi sems dang yongs su bsngo ba'i sems dag ni phan tshun med cing mi dmigs pa nyid kyis so zhes bya ba ni sgrub pa'i rnam pa ste/rtogs par byed pas na sgrub pa yin pas so/ /de ci'i phyir zhe na/ byang chub kyi sems dang yongs su bsngo ba'i sems dag ni sems ma yin pa nyid kyis dang / sems ma yin pa'ang sems ma yin par yongs su bsngo ba ni mi 'thad pa nyid dang /'di ltar sems ma yin pa gang yin pa de ni bsam gyis mi khyab pa yin la/ bsam gyis mi khyab pa gang yin pa de'ang sems ma yin te/ de ltar so sor rtog pa mngon par zhen pa med pa'i shes rab kyi pha rol tu phyin pa nyid yin no zhes bya ba ni nges par 'byin pa'i rnam pa ste/mngon par zhen pa med par 'gro ba ni nges par 'byin pas so/ /nyan thos kyi lam gyi bden pa bzhi la dmigs pa'i rnam pa bcu drug gi rnam par gzhag pa bshad zin to// //de dag sngon du 'gro ba can yin pa'i nges par 'byed pa'i cha dang mthun pa de dag brjod par bya ba yin pa des na/'phags pa nyan thos lam la ni/ /gzugs sogs phung po stong pa'i phyir/ /stong pa nyid rnams dbyer med pas/ /dro ba zhes bya ba gsungs te/ drod ni kau shi ka gzugs ni gzugs kyis stong ngo //de bzhin du tshor ba la sogs pa dang / gzugs kyi stong pa nyid gang yin pa dang / tshor ba la sogs pa'i stong pa nyid gang yin pa de ni gnyis su med cing gnyis su byar med de zhes bya ba la sogs pa gang gsungs pa yin no/ / de dag mi dmigs pas/ rtse mor gyur pa dag tu 'dod/ /ces bya ba ni kau shi ka 'di la byang chub sems dpa' sems dpa' chen pos dmigs pa'i tshul gyis gzugs la gnas par mi bya'o/ /de bzhin du tshor ba la sogs pa la gnas par mi bya'o zhes bya ba la sogs pa gang gsungs pa yin no//de la rtag la sogs tshul gyis/ /gnas pa bkag pas bzod pa rnams/ /zhes bya ba ni dmigs pa'i tshul gyis gzugs rtag ces bya ba dang mi rtag ces bya bar gnas par mi bya'o/ /gzugs bde zhes bya ba nas smon pa med ces bya ba'i bar du gnas par mi bya'o zhes bya ba la sogs pas gang gsungs pa yin no//sa bcu dag la brtsams nas ni/ /mi gnas rgyas par bstan pa yis/ /chos kyi mchog tu 'gyur bshad de/ /zhes bya ba ni byang chub sems dpa' chen pos sa dang po la dmigs pa'i tshul gyis gnas par mi bya'o zhes bya ba nas/bdag gis sangs rgyas kyi zhing der sangs rgyas kyi sgra'ang 'byung bar mi 'gyur ro/ /zhes dmigs pa'i tshul gyis gnas par mi bya'o/ /zhes bya ba'i bar du gsungs pa yin no/ /gnas par mi bya'o zhes bya ba ste/ ci'i phyir zhe na sangs rgyas kyis/ /mkhyen nas chos rnams ma gzigs phyir/ /zhes bya ba ste/ 'di ltar de bzhin gshegs pa dgra bcom pa yang dag par rdzogs pa'i sangs rgyas kyis bla na med pa yang dag par rdzogs pa'i byang chub tu mngon par rdzogs par sangs rgyas nas chos thams cad ma dmigs pa'i phyir te/zhes bya ba la sogs pa gang gsungs pa yin no/ /nyan thos kyi lam bshad zin to// // rang sangs rgyas kyi lam brjod par bya ste/ de la re zhig /rang byung bdag nyid rtogs pa'i phyir/ / gzhan gyis bstan yang mi dgos la/ /bse ru lta bu'i ye shes ni/ /zab pa nyid du mngon par brjod/ /ces bya ba ste/ rang sangs rgyas rnams kyi zhes bya ba'i tha tshig go/ /de la gzhan gyis bstan ma dgos pa ni 'di yin te/ ji skad du/ gnod sbyin gyi skad la sogs pa ni shes par rung gi gnas brtan rab 'byor gyis bshad pa'i don ni shes par mi rung ngo zhes gsungs pa yin no//gnod sbyin rnams kyi gnod sbyin gyi skad dang / gnod sbyin gyi tshig dang / gnod sbyin gyis smras pa dang / gnod sbyin gyis rab tu bsnyad pa gang yin pa de dag ni zhes bya ba [(]ya [,]la [)]sogs pa gsungs pa gang yin pa de la gnod sbyin gyi skad ces bya ba de dag gi rang gi brdas rtogs par byed pa'o//tshig ces bya ba ni skad kyi tshogs so/ /smras pa zhes bya ba ni ji srid kyis brjod par 'dod pa'i don yongs su rdzogs par 'gyur ba'i ngag ces bya ba'i don to//rab tu bsnyad pa zhes bya ba ni gtam gyi lan de dang de dag tu dris pa dang lan btab pa'o/ /gang yin pa de dag ni zhes bya ba ni sngon nye bar thob pa rnams so/ /de ni shes par rung gi/ /gnas brtan 'phags pa rab 'byor shes rab kyi pha rol tu phyin pa 'chad pa dang /rab tu brjod pa dang / ston pa dang / nye bar ston pa zhes bya ba de la gsol ba btab nas ston pa ni 'chad pa'o/ /dris nas lan du smra ba ni rab tu brjod pa'o/ /gnyis po de nyid gdul bya rmongs pa rnams kyi dbang du byas nas 'chad pa ni ston pa'o//bag med pa rnams kyi dbang du byas nas ni nye bar 'ongs nas ston pa nyid kyis nye bar ston pa yin no/ /lha'i bu dag 'di ltar 'dir yi ge gcig kyang ma brjod de zhes bya ba nas brtsams pas rab tu ston pa dang nyan pa bkag pa'i phyir te/ shes rab kyi pha rol tu phyin pa dang yang dag par rdzogs pa'i byang chub dag ni sprul pa dang /rmi lam dang / sgra brnyan dang / sgyu ma'i dpe rnams kyis yi ge med pa yin pa'i phyir rab tu brjod pa dang nyan pa med pas so zhes bya'o/ /ji ltar na chos ston pa zhes bya ba yang yin la rab tu mi brjod pa'ang yin zhe na/chos ston pa'i 'bras bu thob pa'i rgyu nyid yin pa'i phyir ro/ /sangs rgyas kyi smon lam grub pa'i yang phyir te/ chos ston pa ni brjod pa'i rang bzhin yin pas rnam par g.yeng ba chen por 'gyur ba yin la/ rnam par g.yeng ba'ang rgyud mi zad par 'khrug par byed pa yin par dgongs nas sangs rgyas bcom ldan 'das sngon byang chub sems dpar gyur pas bdag gis sangs rgyas nyid thob nas yid bzhin gyi nor bu lta bu brjod pa med par yang sems can gyi don byed nus par gyur cig ces de ltar smon lam btab pa yin no//tshig tu smra ba med par don ston pa'ang rung ba yin no/ /zhes bstan pa'i phyir/ gang gang don ni gang gang la/ /ji lta ji ltar nyan 'dod pa/ /de de la don de dang de/ /sgra med kyang de de ltar snang / /zhes gsungs so/ /de la ye shes zab mo ni 'di yin te/ kye ma gnas brtan rab 'byor 'di ni gsal bar byed pa ste/zab pa bas kyang shin tu zab pa ston pa phra ba bas kyang shin tu phra ba la 'jug pa'o zhes gang gsungs pa yin no/ /de la gnas brtan rab 'byor gyis nye bar bstan pa'i don mi rig pa ni shes pa zab pa yin la/ yi ge gcig kyang ma brjod pa ni brjod pa zab pa yin no//mdo sde gzhan las kyang dge ba bcu'i las kyi lam 'di dag nyid rang nyid kyis mngon par rdzogs par rtogs pa dang / rkyen nyid 'di la zab mo rjes su rtogs pas rang sangs rgyas kyi theg pa sgrub par byed pa yin no zhes gsungs so//bdag nyid gcig pu'i don te/ rgyu mtshan du gyur par byas nas rang nyid sangs rgyas pas rang sangs rgyas so/ /nyan thos la'ang thal ba ma yin te/ de ni gzhan gyis nye bar bstan pa la ltos pa yin pa'i phyir ro/ /yang dag par rdzogs pa'i sangs rgyas la thal ba'ang ma yin te/de ni rnam pa thams cad mkhyen pa nyid kyi sems can thams cad kyi don ched du mdzad pas de rnams las khyad par du 'phags pa nyid yin pa'i phyir ro/ /rang sangs rgyas rnams ni rtogs pa tsam gang yin pa dang / ji tsam pha yin pa dag gis rang gis kyang rdzogs par byang chub pa yin no//de rnams kyi rtogs pa tsam yang gang zhig dang ji tsam zhig yin zhe na/ gzung don rtog pa spang phyir dang / /'dzin pa ma spangs phyir dang ni/ /rten gyi bse ru lta bu'i lam/ /yang dag bsdus pa shes par bya//zhes bya ba gsungs te/ gang gi phyir de rnams kyi gzung ba'i rnam par rtog pa spangs pa'i dbang du mdzad nas phung po khams dang skye mched la sogs pa nas rgya cher rnam pa thams cad mkhyen pa nyid kyi bar gyi rang bzhin zab pa dang phra ba nyid 'gog pa/ rang sangs rgyas rnams shes bya'i sgrib pa'i phyogs gcig spangs par ston pa/nyan thos rnams las de rnams kyi rtogs pa khyad par du byed pas gsungs pa yin no/ /chos bstan pa 'di la zhes bya ba ni rang sangs rgyas kyi dbang du byas pa la'o/ /gzugs su btags pa'ang med dam zhes bya ba nas byang chub tu btags pa'ang med dam zhes bya ba'i bar ni de dag gi gzung ba'i rnam par rtog pa spangs pa'i phyir ro//yi ge rnams su btags pa'ang med dam zhes bya ba ni rang nyid mngon par rdzogs par byang chub pa yin pa'i phyir ro/ /gang dag rgyun tu zhugs pa'i 'bras bu la gnas par 'dod pa nas rang sangs rgyas nyid thob par 'dod pas bzod pa 'di la mi brten du mi rung ngo zhes bya ba'i bar gyis ni lam shes pa nyid lam thams cad kyi yul can du brjod pa yin no//de rnams kyi 'dzin pa po'i rnam par rtog pa spangs pa med pa'i dbang du mdzad nas gsungs pa ni/sems can de dag ni sgyu ma lta bu ste chos nyan pa de dag sgyu ma lta bu'o zhes bya ba dang / rang sangs rgyas rnams ni 'dzin pa po dngos po med par rtogs pa ma yin pa'i phyir sngar rnam pa thams cad mkhyen pa'i gnas skabs su sgyu ma'i skyes bu ltar bslab par bya'o zhes gsungs pa de dang 'di'am 'di dang yang de mi 'gal bar ston pa las brtsams te/phung po la sogs pa nas mya ngan las 'das pa'i bar du'ang rmi lam lta bu dang sgyu ma lta bur brjod pa dang / de ci'i phyir zhe na/ sgyu ma dang mya ngan las 'das pa la sogs pa de ni gnyis su med cing gnyis su byar med do zhes bya bas gsungs pa yin no//rtogs pa'i rten rigs kyi dbang du mdzad nas gsungs pa ni phyir mi ldog pa'i byang chub sems dpa' chen po la sogs pa shes rab kyi pha rol tu phyin pa len par byed par bstan pa rang sangs rgyas bstan pa'i don can dang /de rnams kyi gzugs la sogs pa dang de'i stong pa nyid gnyis phan tshun du rtog pa bkag pa nas/ de ci'i phyir zhe na/ de ni 'di ltar chos gang yang ma brjod ma bstan pa'i phyir te/ ji ltar chos 'ga' ma brjod ma bstan pa de ltar 'dir te rang sangs rgyas kyi skabs su len par byed pa su yang med do zhes bya ba'i bar gyis rten gyi sbyor ba'i gnas su byang chub sems dpa' zhes bya ba'i tshig gi don med cing mi dmigs so zhes ji skad du brjod pa de gsal bar byed do//tshe dang ldan pa rab 'byor shes rab kyi pha rol tu phyin pa 'di las theg pa gsum po 'di lta ste/nyan thos kyi theg pa dang / rang sangs rgyas kyi theg pa dang / yang dag par rdzogs pa'i sangs rgyas kyi theg pa rgya cher bstan zhing zhes bya ba nas brtsams te/ mi 'dod par thal ba rnam pa mang po byas pa dang / tshe dang ldan pa shA ri'i bu de de bzhin te zhes bya ba nas brtsams te/ byang chub sems dpa' chen po 'jig rten thams cad las mngon par 'phags shing khyad zhugs pa'i spobs pa dang ldan pa'i bar dag kyang bstan te de'ang mi dmigs pa'i tshul gyis so zhes bya ba'i bar gyis mngon par 'dod pa'i don yang dag par grub pas dngos por gyur pa'i rten med par rtogs pa'i chos thob par ston par byed pa dang /sprul pa'i me tog gi rnam pa nye bar 'god pa dang / me tog de dag kyang nges par ma skyes pa me tog ma yin pa nyid dang / gzugs nas brtsams pa'i chos thams cad nas/yang dag par rdzogs pa'i sangs rgyas kyi bar du nges par ma skyes pa yang dag par rdzogs pa'i sangs rgyas ma yin pa'i bar dang de nas brtsams te zhes bya ba'i bar skabs kyi 'brel par byas pas ni rang sangs rgyas kyi lam gyi rtogs pa'i rten yin no//de la gzung ba'i rnam par rtog pa spangs pas ni rang sangs rgyas kyi rtogs pa nyan thos rnams las khyad par du byed do/ /'dzin pa'i rnam par rtog pa spangs pa med pas ni rang sangs rgyas rnams las sangs rgyas kyi rtogs pa khyad par du byed do/ /rigs kyis ni rtogs pa'i rgyu khyad par du byed pa yin no//da ni rang sangs rgyas kyi lam gyi nges par 'byed pa'i cha'i dbang du mdzad nas gsungs pa ni/ btags pa'i chos nyid mi 'gal bar/ /ston pa'i rnam pa dro gyur pa/ /zhes bya ba yin te/ kye ma gnas brtan rab 'byor 'di de ltar btags pa dang yang mi 'gal la chos nyid zab mo ston pa ni shes rab zab po zhes bya ba dang /kau shi ka gzugs ni btags pa tsam mo/ /btags pa tsam gang yin pa de ni chos nyid yin pas de ni gnas brtan rab 'byor gyis mi 'gal bar bstan to zhes bya ba la sogs pa gang gsungs pa yin no//rtse mor gyur pa gzugs la sogs/ /'grib pa med la sogs pas phye/ /zhes bya ba ni gzugs nas rnam pa thams cad mkhyen pa nyid kyi bar du 'phel bar bya ba dang 'grib par bya ba'i phyir mi slob bo/ / yongs su gzung bar bya ba dang / med par bya ba'i phyir mi slob po zhes bya ba la sogs pa gang gsungs pa yin no/ /bzod pa ni/ nang stong nyid la sogs pa yis/ /gzugs sogs mi 'dzin phyir bzod pa/ /zhes bya ba yin te/ gzugs nas rnam pa thams cad mkhyen pa nyid kyi bar du nang stong pa nyid nas/dngos po med pa'i ngo bo nyid stong pa nyid kyi bar gyi phyir yongs su gzung ba med pa nyid kyis gang gsungs pa yin no/ /gzugs sogs skye ba med sogs kyi/ /rnam pa can ni chos kyi mchog/ /ces bya ba la/ gzugs kyi skye ba mi mthong /'gag pa dang / blang ba dang / dor ba dang / kun nas nyon mongs pa dang / rnam par byang ba dang / stsogs pa dang / 'bri ba dang / 'grib pa dang / 'phel ba mi mthong ste zhes bya ba la sogs pa gang gsungs pa yin no/ /rang sangs rgyas kyi lam bshad zin to// mthong ba'i lam phan yon dang bcas pa'i dbang du mdzad nas gsungs pa ni/ bden dang bden la bzod pa dang / /shes pa'i skad cig rnam bzhi yis/ /lam shes nyid la mthong ba'i lam/ /phan yon bcas pa 'di bshad do//zhes bya ba yin no/ /de la sdug bsngal la chos shes pa'i bzod pa ni de bzhin nyid dang de bzhin gshegs pa dag phan tshun gyi ngo bo yin pa dgag pa'i don du rnam grangs gzhan khas mi len pas gsungs pa gang yin pa ste/ kau shi ka gzugs kyi de bzhin nyid la yang de bzhin gshegs pa mi dmigs so//de bzhin gshegs pa la'ang gzugs kyi de bzhin nyid mi dmigs so zhes bya ba la sogs pa gang gsungs pa yin no/ /sdug bsngal la chos shes pa ni/ kau shi ka gzugs chen po nyid yin pa'i phyir byang chub sems dpa' rnams kyi pha rol tu phyin pa 'di chen po nyid de/de ci'i phyir zhe na/ kau shi ka de ni 'di ltar gzugs kyi sngon gyi mtha' mi dmigs/ phyi ma'i mtha' mi dmigs/ dbus mi dmigs so zhes bya ba la sogs pa gang gsungs pa yin no/ /sdug bsngal la rjes su shes pa'i bzod pa ni/kau shi ka gzugs tshad med pa'i phyir pha rol tu phyin pa 'di ni tshad med pa ste/ de ci'i phyir zhe na/ kau shi ka de ni 'di ltar gzugs kyi tshad ma ni dmigs su med do zhes bya ba la sogs pa gang gsungs pa yin no/ /tshad ma zhes bya ba ni gang gis rnam par 'gyur ba'i mtshan nyid kyi gzugs 'jal ba'o//sdug bsngal la rjes su shes pa ni/ kau shi ka gzugs tshad med pa'i phyir pha rol tu phyin pa 'di ni tshad med pa'o/ /kau shi ka 'di lta ste dper na/ nam mkha'i tshad ni dmigs su med do zhes bya ba la sogs pa gang gsungs pa yin no//tshad ces bya ba ni rdul phra rab kyi mthar thug pa la rten pa'i dbyibs la brjod de/ gzugs can ma yin pa rnams la ni tshad kyi mtshan nyid yod pa ma yin no/ /kun 'byung la chos shes pa'i bzod pa ni/ kau shi ka gzugs mtha' yas pa'i phyir byang chub sems dpa' chen po rnams kyi pha rol tu phyin pa 'di ni mtha' yas so//de ci'i phyir zhe na/ kau shi ka de ni 'di ltar gzugs kyi mtha' dang dbus mi dmigs so zhes bya ba la sogs pa gang gsungs pa yin te/ 'dis ni rgyu bkag pa yin no/ /rnam pa thams cad mkhyen pa nyid dmigs pa mtha' yas pa'i phyir pha rol tu phyin pa mtha' yas pa nyid kyis ni kun 'byung ba bkag pa yin no//chos kyi dbyings mtha' yas pa'i phyir pha rol tu phyin pa mtha' yas pa nyid kyis ni rab tu skye ba bkag pa yin no/ /de bzhin nyid mtha' yas pa'i phyir pha rol tu phyin pa mtha' yas pa nyid kyis ni rkyen bkag pa yin no//sems can mtha' yas pa'i phyir pha rol tu phyin pa mtha' yas pa nyid kyis ni kun 'byung la chos shes pa'i bzod pa sems can gyi khams kyi ched nyid du ston par byed pa yin no/ /kun 'byung la chos shes pa ni/shes rab kyi pha rol tu phyin pa yid la byed pa dang ma bral ba rnams ni de bzhin gshegs pa nyid du gzung bar bgyi'o zhes gang gsungs pa yin no/ /kun 'byung la rjes su shes pa'i bzod pa ni/ bcom ldan 'das byang chub sems dpa' sems dpa' chen po rnams kyi shes rab kyi pha rol tu phyin pa 'di rnam pa thams cad mkhyen pa nyid kyi bar du mi len mi 'dor ba'i tshul gyis zhes bya ba nas/rnam pa thams cad mkhyen pa nyid dang mthun par yongs su 'dzin pa ngo mtshar che'o zhes bya ba'i bar dang /bar chad byed pa thams cad kyis glags rnyed par mi 'gyur bar yongs su gzung ba'i don gyis shes rab kyi pha rol tu phyin pa 'di 'dzin pa dang / 'chang ba dang / klog pa dang / kun chub par byed pa dang / bsgom pa dang / gzhan la rgya cher 'chad pa dang / tshul bzhin du yid la byed cing rnam pa thams cad mkhyen pa nyid kyi sems dang yang mi 'bral ba de dag ni bdud sdig can la sogs pa thams cad kyis glags rnyed par mi 'gyur ro zhes phan yon bstan pa dang / de ci'i phyir zhe na/ de dag gis gzugs stong pa nyid la legs par gnas par gyur pas zhes bya ba dang /de ci'i phyir zhe na/ de ni 'di ltar stong pa nyid la glags mi rnyed de/ mtshan ma med pa dang / smon pa med pa'ang de bzhin no/ /de ci'i phyir zhe na/ de ni 'di ltar gang gis gang la'ang glags rnyed par 'gyur ba de dag gi ngo bo nyid med do zhes gang gsungs pa yin no//kun 'byung la rjes su shes pa ni/ gzhan yang sems can thams cad la mi dmigs pa'i tshul gyis byams pa dang / snying rje dang / dga' ba dang / btang snyoms shin tu bsgom pa'i phyir de rnams la mi dang mi ma yin pa la sogs pas glags rnyed par mi 'gyur ba dang ste/mthong ba'i lam gyi skad cig ma brgyad pa la ni byang chub sems dpa' rnams la tshad med pa rnams dgos pa yin te/ de lta yin na skad cig ma dgu pa la sems can gyi khams la ltos pa med pas 'gog par ltung bar 'gyur bas so//yang sbyin pa'i pha rol tu phyin pas sems can rnams la yang dag par bsten zhing bsnyen bkur byas pa'i phyir/ de rnams ya nga ba spangs pas dus byed par mi 'gyur ro zhes bya ba la sogs pa gang gsungs pa yin no/ /'gog pa la chos shes pa'i bzod pa ni/gzhan yang stong pa nyid thams cad shin tu bsgoms pa nyid yin pa'i phyir de dag la 'jigs pa dang rengs par gyur pa la sogs pa med par gang gsungs pa yin no/ /de la mi 'dod pa thog tu bab kyis dogs pa ni 'jigs pa'o//de bsal ba'i thabs mi sgrub pa ni rengs pa'o/ /'gog pa la chos shes pa ni/ bcom ldan 'das de ltar byang chub sems dpa' chen po shes rab kyi pha rol tu phyin pa 'dzin pa dang zhes bya ba nas brtsams te/ theg pa gsum la sems can 'dul ba ni ngo mtshar che'o zhes gsungs pa yin te/shes rab kyi pha rol tu phyin pa 'dzin pa la sogs pa rnams kyi 'bras bu ni sangs rgyas nyid yin pa'i phyir ro zhes bya ba yin no/ /'gog pa la rjes su shes pa'i bzod pa ni/ bcom ldan 'das de ltar shes rab kyi pha rol tu phyin pa 'di yongs su bzung bas na zhes bya ba nas brtsams te/rnam pa thams cad mkhyen pa nyid kyi bar du yongs su gzung bar 'gyur ba ni ngo mtshar che'o zhes bya ba'i bar du gang gsungs pa dang / shes rab kyi pha rol tu phyin pas rnam par byang ba'i phyogs thams cad bsdus pa nyid la sogs par gsungs pa yin no//'gog pa la rjes su shes pa ni/ yang rtsi ma gi'i dpe bstan pas shes rab kyi pha rol tu phyin pa ni nye bar 'tshe ba thams cad rab tu zhi bar byed pa'i mdangs dang stobs dang ldan pa nyid du gang gsungs pa yin no//lam la chos shes pa'i bzod pa ni/ de ci'i phyir zhe na/ shes rab kyi pha rol tu phyin pa ni 'di lta ste/ 'dod chags dang / zhe sdang dang / gti mug la sogs pa'i nyes pa nas mya ngan las 'das par 'dzin pa'i bar du nye bar zhi bar byed pa yin gyi/ rnam par 'phel bar byed pa ni ma yin no zhes gang gsungs pa yin no/ /lam la chos shes pa ni/ phyogs bcu'i 'jig rten gyi khams kyi sangs rgyas rnams kyis lhas byas pa dang / 'byung ba las gyur pa dang / nang gi bar chad kyi dbang du mdzad nas/ bsrung ba dang / bskyab pa dang / sba bar mdzad pa dang ldan pa dang / mi dmigs pa'i tshul gyis sbyin pa'i pha rol tu phyin pa la sogs pa nas/ rnam pa thams cad mkhyen pa nyid kyi bar dge ba'i chos rnams kyis rnam par 'phel bar 'gyur ro/ /zhes bya ba la sogs pa gang gsungs pa yin no//lam la rjes su shes pa'i brjod pa ni/ bdag kyang srog gcod pa spong bar 'gyur zhes bya ba nas brtsams te/ bdag kyang rnam pa thams cad mkhyen pa nyid la rab tu gnas par 'gyur ba nas/ gzhan gang dag rnam pa thams cad mkhyen pa nyid la gnas pa de dag gi bsngags pa brjod cing rjes su dga' bar 'gyur ro//zhes bya ba'i bar gyis gang gsungs pa yin no/ /lam la rjes su shes pa ni/ pha rol tu phyin pa drug la spyod pa'i tshe/ sbyin pa la sogs pa sems can thams cad thun mong du byas shing mi dmigs pa'i tshul gyis bla na med pa yang dag par rdzogs pa'i byang chub tu yongs su bsngo bar 'gyur ro zhes bya ba la sogs pa gang gsungs pa yin no//mdo'i tshig lhug pa 'di tshigs bcad du byas pa ni rnam pa 'di lta bu yin te/ de bzhin nyid dang sangs rgyas dag /phan tshun brten pa rten med phyir//rnam grangs khas mi len pa dang / /chen po tshad ma med bcas dang / /tshad med pa dang mtha' med dang / /der gnas gzugs la sogs pa la/ /sangs rgyas nyid du nges 'dzin dang / /blang med dor ba med sogs dang / /byams la sogs dang stong nyid dang //sangs rgyas nyid ni 'thob pa dang / /rnam par byang ba yongs bsdus dang / /nyam nga ba dang nad kun sel/ /mya ngan 'das 'dzin zhi nyid dang / /sangs rgyas rnams kyis srung la sogs/ /srog mi gcod pa la sogs pa/ /rnam pa kun mkhyen tshul la ni/ / bdag nyid gnas te sems can dag /'god dang sbyin pa la sogs pa/ /rdzogs pa'i byang chub tu bsngo ba/ /lam shes nyid kyi skad cig ma/ /mthong ba'i lam bshad zin to// // da ni bsgom pa'i lam bshad par bya ba yin pas re zhig 'di'i byed pa brjod la/ de nas 'di brjod par bya ba yin no/ /'di'i byed pa de'ang rnam pa drug tu rig par bya'o/ /ji lta zhe na/ kun nas dul dang thams cad nas/ /bdud dang nyon mongs las rgyal dang / /gnod pas brdzi ba med nyid dang / /byang chub dang ni rten mchod nyid/ /ces bya ba gsungs pa yin te/gang gi phyir rnam pa thams cad du dul bar byed pa'i dbang du mdzad nas gsungs pa ni/ bcom ldan 'das shes rab kyi pha rol tu phyin pa 'di de ltar byang chub sems dpa' sems dpa' chen po rnams yongs su dul ba dang / nga rgyal ma mchis par 'gyur ba'i don du nye bar gnas pa ngo mtshar che'o zhes bya ba yin no//rnam pa thams cad du 'dud pa'i byed pa ni rtog pa'i rnam pa thams cad la'ang ngar rlom pa bkag pa'i phyir thams cad la 'dud pa'i don gyis na yongs su 'dud pa'i slad du nye bar gnas so zhes bya ba la sogs pa gang gsungs pa yin no//nyon mongs pa las nges par rgyal bar byed pa ni g.yul gyi nang du zhugs pa'i mi'i dpes 'dod chags la sogs pa'i tshogs ma lus pa las rgyal zhing brdzi ba med pa nyid kyis nyon mongs pa thams cad kyi bar las nges par rgyal bas bsgom pa'i lam la slar bya ba med pa nyid du shes par byed pa nyid kyis gang gsungs pa yin no//gnod pas brdzi ba med pa'i byed pa ni kA khor ta dang / /me dang / mtshon dang / chu la sogs pa'i gnod pas mi brdzi ba nyid la sogs pas gang gsungs pa yin no/ / kA khor ta ni byang shar phyogs kyi mi ma yin pa'i rigs so/ /yang dag par rdzogs pa'i byang chub kyi byed pa ni/ chos thams cad mi dmigs pa dang / bla na med pa yang dag par rdzogs pa'i byang chub thob cing sems can thams cad kyi sems la rnam par blta bar 'gyur ro zhes bya ba la sogs pa gang gsungs pa yin no//shes rab kyi pha rol tu phyin pa'i rten gyi yul mchod par bya ba nyid kyi byed pa ni/ yang snying po byang chub kyi sems shes rab kyi pha rol tu phyin pa'i rnal 'byor gyi rten gyi yul bar chad med pa nyid yin no//de ci'i phyir zhe na/ lha'i ris thams cad kyis bsrung ba dang bskyab pa la sogs pa gang gsungs pa yin no/ /byed pa bshad zin to// //bsgom pa'i lam la yang rnam pa gnyis te/ zag pa dang bcas pa dang / zag pa med pa'o/ /de la zag pa dang bcas pa ni mos pa dang /bsngo ba dang / rjes su yi rang ba'i yid la byed pa zhes bya'o/ /zag pa med pa'ang mngon par bsgrub pa'i mtshan nyid dang / shin tu rnam par dag pa'i mtshan nyid do/ /gang gi phyir mos pa yid la byed pa'i dbang du mdzad pa ni/ mos pa rang gi don dang ni//rang gzhan don dang gzhan don dang / /rnam gsum shes bya/ zhes gsungs pa yin te/ rang gi don 'gog pa ni ma yin te/ gzhan gyi don dang mi 'gal ba nyid kyis de rdzogs pa yin no/ /de yang ni/ chung dang 'bring dang chen po ste/ /so sor rnam pa gsum du 'dod//rang gi don gyi mos pa ni chung ngu dang / 'bring dang / chen po ste gsum mo/ /de bzhin du gzhan du gzhan dag la'ang brjod par bya'o/ /de la rang gi don la mos pa chung ngu dang / 'bring dang / chen po ni gang yin/ de bzhin du gzhan gyi don la mos pa'i bar yang gang dag yin zhe na/chung ngu'i chung sogs dbye ba yis/ /de yang rnam gsum/ zhes bya ba gsungs te/ so sor zhes dkyus ma dang sbyar ro/ /rang gi don la sogs pa la chung ngu la sogs pa rnam pa gsum du shes par bya'o zhes bya ba'i tha tshig go/ / de ltar nang gi don la sogs pa 'di ni rnam pa dgur 'gyur te/ 'di lta ste/ chung ngu'i chung ngu dang / chung ngu'i 'bring dang / chung ngu'i chen po dang / 'bring gi chung ngu dang / 'bring gi 'bring dang / 'bring gi chen po dang / chen po'i chung ngu dang / chen po'i 'bring dang / chen po'i chen po'o/ /de bzhin du rang gzhan gyi don du mos pa dang / gzhan gyi don du mos pa'i rnam pa'i dbye ba la'ang brjod par bya'o/ /de bas na/ de ltar na/ rnam pa nyi shu bdun du 'dod/ /ces gsungs pa yin no/ /mos pa zhes bya ba ni dkyus ma nyid yin no/ / de la rang gi don la mos pa chung ngu'i chung ngu'i rnam pa ni/ shes rab kyi pha rol tu phyin pa zab mo 'di bris shing glegs bam du bgyis te bcangs la mchod pa bgyis pa dang / sangs rgyas yongs su mya ngan las 'das pa'i sku gdung rnams rin po che sna bdun gyi mchod rten du bcug ste mchod par byas na/shes rab kyi pha rol tu phyin pa ni rnam pa thams cad mkhyen pa nyid kyi rgyur gyur pa nyid yin pa'i phyir dang / de rten du gyur pas sangs rgyas kyi sku mchod pa brnyes pa'i phyir dang po ches bsod nams mang du 'phel ba'i rgyu nyid kyis gang gsungs pa yin no//chung ngu'i 'bring ni/ kau shi ka de ji snyam du sems/ 'dzam bu'i gling gi mi de dag gang dag las sangs rgyas la shes nas rab tu dang ba dang ldan pa dang / de bzhin du chos dang / dge 'dun la rab tu dang ba dang / shin tu ston pa de lta bu ni nyung ngo zhes bya ba nas brtsams te/ tshogs re re zhing phra ba bstan pa nas/ kau shi ka ngas 'di nas sangs rgyas kyi spyan sgrib pa med pas phyogs bcu'i 'jig rten gyi khams gang+gA'i klung gi bye ma snyed dag na/ sems can tshad med grangs med pa yang dag par rdzogs pa'i byang chub tu sems bskyed de/ byang chub tu spyod kyang shes rab kyi pha rol tu phyin pa'i thabs mkhas pa dang mi ldan pas de las gcig gam gnyis zhig phyir mi ldog pa'i sa la gnas par 'gyur gyi/phal cher thabs mkhas pa dang bral bas nyan thos kyi sa dang rang sangs rgyas kyi sa la gnas pa dag mthong ngo / /de ci'i phyir zhe na/le lo can la sogs pas byang chub sgrub dka' ba nyid yin pa'i phyir ro/ /zhes gang gsungs pa yin no/ /de la yon tan srid par rtogs pa sngon du 'gro ba'i dad pa ni shes nas rab tu dang ba ste/ the tshom spangs pa'i phyir ro/ /nges pa'i mthar thug pa thob pas na shin tu ston pa'o//chung ngu'i chen po ni/ myur ba dang bde bar bla na med pa yang dag par rdzogs pa'i byang chub mngon par rdzogs par 'tshang rgya bar 'dod pas zhes bya ba nas brtsams te/ de bzhin gshegs pa bzhugs kyang rung / yongs su mya ngan las 'das kyang rung ste/ 'di ni bdag cag gi ston pa'o zhes bya bas shes rab kyi pha rol tu phyin pa ni sangs rgyas kyi chos kyi yon tan thams cad thob pa'i rgyur gyur pa nyid kyis mos pa gsum pa'i rnam pa yongs su gsal bar bya ba'i don du gang gsungs pa yin no//'bring gi chung ngu ni/ de bzhin du rin po che sna bdun gyi mchod rten byas te/ de la mchod pa'i bsod nams pas shes rab kyi pha rol tu phyin pa la mchod pa bsod nams ches mang du 'phel lo zhes bya bas gang gsungs pa yin no/ /'bring gi 'bring ni/de bzhin du 'dzam bu'i gling rin po che sna bdun las byas pa'i mchod rten gyis bkang ba'i dpes gang gsungs pa yin no/ /'bring gi chen po ni/ de bzhin du gling chen po bzhi pa'i 'jig rten gyi khams 'di rin po che sna bdun las byas pa'i mchod rten zhes bya ba la sogs pa gang gsungs pa yin no//chen po'i chung ngu ni/ de bzhin du stong gi 'jig rten gyi khams zhes bya ba la sogs pa gang gsungs pa yin no/ /chen po'i 'bring ni/ de bzhin du stong gnyis pa bar ma'i 'jig rten gyi khams zhes bya ba la sogs pa gang gsungs pa yin no//chen po'i chen po ni/ de bzhin du stong gsum gyi 'jig rten gyi khams zhes bya ba la sogs pa gang gsungs pa yin no/ /rang gi don la mos pa rnam pa dgu bshad zin to// //rang dang gzhan gyi don la mos pa dgu brjod par bya'o/ / de la re zhig chung ngu'i chung ngu'i rnam pa ni/ stong gsum gyi stong chen po'i 'jig rten gyi khams na sems can ji snyed yod pa de dag las sems can re res rin po che sna bdun las byas pa'i mchod rten byas te mchod pa'i bsod nams pas shes rab kyi pha rol tu phyin pa 'di la brtson pa bsod nams ches shin tu mang du skye ba nyid la sogs pa gang gsungs pa yin no//chung ngu'i 'bring ni/ kau shi ka khyod kyis shes rab kyi pha rol tu phyin pa 'di zung shig ces bya ba nas brtsams te/ mthong ba'i chos kyi phan yon la sogs pa rgya cher gang gsungs pa yin no//chung ngu'i chen po ni/ kun dga' bo 'di ji snyam du sems/ rnam pa thams cad mkhyen pa nyid du yongs su ma bsngos pa'i sbyin pas sbyin pa'i pha rol tu phyin pa'i ming thob bam zhes bya ba nas brtsams te/ gnyis su byar med pas chos thams cad de rnams kyis stong pa nyid yin pa'i phyir gnyis su med par yongs su bsngo ba'i tshul gyis pha rol tu phyin pa thams cad kyi sngon du shes rab kyi pha rol tu phyin pa 'gro ba nyid dang /shes rab kyi pha rol tu phyin pa 'di 'dzin pa la sogs pa ni rnam par byang ba'i phyogs thams cad rab tu shes pa'i rgyu nyid yin pa nyid ces bya ba/rang dang gzhan gyi don mos pa rnam pa gsum pa yongs su gsal bar byed pa'i don gyis gang gsungs pa yin no/ /'bring gi chung ngu ni/ shes rab kyi pha rol tu phyin pa 'di 'dzin pa la sogs pa dang rab tu ldan pa nyid nyan thos dang rang sangs rgyas kyi tshul khrims la sogs pa'i phung po rnams las tshul khrims la sogs pa'i phung po tshad med pa dang ldan pa nyid la sogs pa gang gsungs pa yin no//'bring gi 'bring ni/ shes rab kyi pha rol tu phyin pa dang ldan pa'i chos bstan pa de dag ni lha'i bu de dag spobs pa nye bar bsgrub par sems so zhes bya ba la sogs pa gang gsungs pa yin no//'bring gi chen po ni/ yang pha dang ma la sogs pa nas mi slob pa'i bar thams cad kyis kyang byams shing yid du 'ong bar bya ba yin zhes bya ba la sogs pa gang gsungs pa yin no//chen po'i chung ngu ni/ yang spobs pa mi chod par 'gyur ba nas brtsams te/ rnam pa thams cad mkhyen pa nyid la 'jug pa mi chod pa dang ldan par 'gyur ba zhes bya ba bsgom pa'i lam rnam pa bdun pa'i gnas skabs rnam par chad pa med par shes par byed pa'i don gyis gang gsungs pa yin no//chen po'i 'bring ni/ phyogs bcu'i 'jig rten gyi khams kyi lha'i ris thams cad kyang glegs bam gyi yul du 'ongs nas/ bklags pa dang / gzung ba dang / bcang ba dang / kun chub par bya ba la sogs pa dang /de dag la chos kyi sbyin pa 'di byin par gyur cig ces sems bskyed par bya ste/ zhes bya ba la sogs pa gang gsungs pa yin no/ /chen po'i chen po ni/ lha'i tshogs thams cad 'ongs pas mos pa rgya chen po dang ldan par 'gyur ba dang /lus dang sems las su rung ba thob nas chos gos la sogs pa la shas cher chags pa bkag pa zhes bya ba mos pa rnam pa dgu po'i don gsal bar byed pa gang gsungs pa yin no/ /rang dang gzhan gyi don la mos pa rnam pa dgu bshad zin to// // gzhan gyi don la mos pa dgu brjod par bya'o/ /de la re zhig chung ngu'i chung ngu'i rnam pa ni glegs bam du bris te 'chang ba dang / mchod pa 'ba' zhig tsam byed kyi/ 'dzin pa nas gzhan la rgya cher ston par mi byed pa ma tshang bar byed pa bas yongs su rdzogs par byed pa bsod nams ches mang du bskyed par gang gsungs pa yin no//chung ngu'i 'bring ni/ yang kau shi ka khyod kyis 'dzam bu'i gling de bzhin gshegs pa'i sku gdung gis byur bur bkang ba byas te zhes bya ba nas brtsams te/ cha bzhag pa 'di gnyis las shes rab kyi pha rol tu phyin pa 'tshal lags so zhes bya ba la sogs pa gang gsungs pa yin no//chung ngu'i chen po ni/ 'di la sbyor ba dang ldan pa 'di ni nam bla na med pa yang dag par rdzogs pa'i sangs rgyas kyi bar du nyan thos la sogs pa'i sa'i dogs pa med pa nyid ces bya ba gzhan gyi don la mos pa rnam pa gsum pa gsal bar byed pa'i don gyis gang gsungs pa yin no//'bring gi chung ngu ni/ stong gsum gyi stong chen po'i 'jig rten gyi khams 'di de bzhin gshegs pa'i sku gdung gis byur bur bltams pa zhig dang / shes rab kyi pha rol tu phyin pa'i cha gnyis las gang yang rung ba zhig 'dam du stsal na 'di nyid mchog yin pa nyid la sogs pa gang gsungs pa yin no//'bring gi 'bring ni/ phyogs bcu'i 'jig rten gyi khams kyi sangs rgyas rnams mdo la sogs pa gsung rab yan lag bcu gnyis kyi chos ston par mdzad pa dang /chos smra ba shes rab kyi pha rol tu phyin pa ston pa ni 'di las byung ba yin pa'i phyir de gnyis kyang mi 'dra ba ma mchis so zhes bya ba la sogs pas gang gsungs pa yin no/ /'bring gi chen po ni/ 'di la rab tu sbyor ba ni rgyal po la brten pa'i skyes bu'i dpes gang gis kyang 'jigs par mi 'gyur ba dang /mchod pa brnyes pa la sogs pas gang gsungs pa yin no/ /chen po'i chung ngu ni/ phyogs bcu'i 'jig rten gyi khams gang+gA'i klung gi bye ma snyed cig de bzhin gshegs pa'i sku gdung gis byur bur bltams pa dang / shes rab kyi pha rol tu phyin pa nyid char byas te/gcig 'dam du bcug na 'di nyid len pa mchog yin pa la sogs pa gang gsungs pa yin no/ /chen po'i 'bring ni/ phyogs bcu'i 'jig rten gyi khams kyi 'phags pa'i gang zag thams cad kyi thugs su chud pa'i rgyu ni shes rab kyi pha rol tu phyin pa nyid yin no zhes bya ba la sogs pa gang gsungs pa yin no//chen po'i chen po ni/ bcom ldan 'das shes rab kyi pha rol tu phyin pa 'di ni pha rol tu phyin pa chen po ste zhes bya ba nas brtsams te/ shing rnams lo ma dang / me tog dang / 'bras bu dang / dbyibs dang / chu zheng sna tshogs kyi grib ma'i dpes pha rol tu phyin pa thams cad mi dmigs pas shes rab kyi pha rol tu phyin par ro gcig pa nyid ces bya ba gzhan gyi don gyi mos pa rnam pa dgu pa yongs su gsal bar byed pa'i don gyis gang gsungs pa yin no/ /mos pa'i rnam pa thams cad la chung ngu'i chung ngu la sogs pa dpe gong nas gong du gyur pas gang dang gang bstan pa de dang de'i rjes su 'brangs nas/chen po'i chen po la sogs pa bzlog pa mi mthun pa'i phyogs su shes par bya'o/ /de la rang gi don la mos pa ni gzhan gyi don du ched du bya bar 'gyur la/gnyis pa la ni sbyor ba bar chad dang bcas pa/ gsum pa la ni sbyor ba bar chad med pa yin no/ /mos pa yid la byed pa bshad zin to// //da ni 'di'i bstod pa la sogs pa brjod dgos pa de'i phyir/ shes rab pha rol phyin pa la //mos pa'i gnas skabs rnams la ni/ /dgu tshan gsum gyis bstod pa dang / /bkur ba dang ni bsngags par 'dod/ /ces bya ba gsungs pa yin no/ /de la bstod pa'i cha dang po ni 'di yin te/ 'jig rten gyi khams gang+gA'i klung gi bye ma snyed de bzhin gshegs pa'i sku gdung gis bkang ba gang yin pa dang /shes rab kyi pha rol tu phyin pa'i cha gnyis las gang yang rung ba 'dam du stsal na 'di nyid len te zhes bya ba dang / gang la la zhig gis shes rab kyi pha rol tu phyin pa bris shing glegs bam du bgyis te gzhan la stsal na zhes bya ba nas brtsams te/sbyin pa po bsod nams ches mang du 'phel ba nyid kyis gang gsungs pa yin no/ /gnyis pa ni de bzhin du gzhan gyi drung du song ste/ bshad cing bstan na bsod nams shas cher 'phel te/ de ni ston pa yin par bsam mo zhes bya ba la sogs pa gang gsungs pa yin no//gsum pa ni sems can gcig gcig rgyun tu zhugs pa'i 'bras bu la 'jog par byed pa ni 'dzam bu gling gi sems can de dag dge ba bcu'i las kyi lam la bkod pa'i bsod nams pas bsod nams mang du 'phel te/ rnam par grol ba dang rnam par grol ba'i phyir ro zhes bya bas gang gsungs pa yin no//bzhi pa ni sems can gcig gcig lan cig phyir 'ong ba'i 'bras bu la zhes gang gsungs pa yin no/ /lnga pa ni de bzhin du sems can gcig gcig phyir mi 'ong ba'i 'bras bu la zhes gang gsungs pa yin no//drug pa ni de bzhin du sems can gcig gcig dgra bcom pa nyid la bkod na zhes gang gsungs pa yin no/ /bdun pa ni de bzhin du sems can gcig gcig rang byang chub la bzhag na zhes gang gsungs pa yin no/ /brgyad pa ni 'dzam bu gling gi sems can rgyun tu zhugs pa'i 'bras bu la bkod pa bas sems can gcig gcig bla na med pa yang dag par rdzogs pa'i byang chub la bzhag na de bsod nams ches mang du 'phel lo//de ci'i phyir zhe na/ de ni sangs rgyas kyi tshul rgyun mi 'chad pa'i don du zhugs pa yin no// de la sangs rgyas kyi tshul ni sangs rgyas kyi rigs so/ /bstod pa cha dgu ni de bzhin du 'dzam bu gling gi sems can thams cad lan cig phyir 'ong ba'i 'bras bu la bzhag pa bas zhes gang gsungs pa yin no/ /'di ni re zhig bstod pa'i cha dgu pa yin no/ /bkur ba yang cha dgur shes par bya'o//de la bkur ba dang po ni 'di yin te/ de bzhin du 'dzam bu gling gi sems can thams cad phyir mi 'ong ba'i 'bras bu la bzhag pa bas zhes gang gsungs pa yin no/ /gnyis pa ni de bzhin du dgra bcom pa nyid la bzhag pa bas zhes gang gsungs pa yin no//gsum pa ni de bzhin du rang byang chub la bzhag pa bas zhes gang gsungs pa yin no/ /bzhi pa ni gzhan yang 'dzam bu gling gi sems can thams cad dge ba bcu'i las kyi lam la bkod par gyur pa'i bsod nams pas glegs bam la bris nas gzhan la byin pa dang /tshul bzhin du yid la byed pa bsod nams mang du 'phel ba nyid du gang gsungs pa yin no/ /de la tshul bzhin du yid la byed pa ni 'di yin te/ byang chub la gnyis su spyod pa yang ma yin/ mi gnyis par spyod pa yang ma yin pa'i blos shes rab kyi pha rol tu phyin pa 'di 'dzin pa dang 'chang ba dang zhes bya ba la sogs pa gang gsungs pa yin no//lnga pa ni yang gnyis su med pa'i don gyis na don de ston pas bsod nams mang du 'phel ba nyid gang gsungs pa yin no/ /drug pa ni yang don dang ldan yi ge dang ldan par bstan pa las yongs su rdzogs par byed pa bsod nams ches 'phel ba nyid du gang gsungs pa yin no//bdun pa ni yang phyogs bcu'i 'jig rten gyi khams kyi sangs rgyas rnams la nam 'tsho'i bar du bde ba'i yo byad thams cad kyis rim gror byas pa bas/ 'di nyid don dang /yi ge ma nor bar 'chad cing ston par byed pa bsod nams ches mang du 'phel te/ de ci'i phyir zhe na/ sangs rgyas de rnams ni 'di las nges par 'khrungs pa nyid kyis so zhes gang gsungs pa yin no/ /brgyad pa ni yang bskal pa grangs med gzhal du med par sbyin pa la sogs pa spyod pa'i byang chub sems dpa' bas ltar bcos pa las bzlog pa'i tshul gyis shes rab kyi pha rol tu phyin pa mi dmigs pa'i tshul du phyin ci ma log par ston par byed pa bsod nams ches mang du bskyed par 'gyur ro zhes bya ba la sogs pa gang gsungs pa yin no//bkur ba'i cha dgu pa ni yang 'dzam bu'i gling gi sems can nas brtsams te/ phyogs bcu'i phyogs re re'i zhing gang+gA'i klung gi bye ma snyed kyi 'jig rten gyi khams kyi sems can ji snyed yod pa rgyun tu zhugs pa'i 'bras bu la bkod pa bas/sems can gcig gcig bla na med pa yang dag par rdzogs pa'i byang chub tu 'dzin du bcug cing phyir mi ldog pa'i sa la bzhag pa ni bsod nams ches mang du 'phel ba nyid du gang gsungs pa yin no/ /bkur ba'i cha rnam pa dgu po bshad zin to// //da ni bsngags pa'i cha rnam pa dgu po brjod par bya'o de la bsngags pa'i cha dang po ni 'di yin te/ de bzhin du sems can de snyed cig kho na lan cig phyir 'ong ba'i 'bras bu la bkod pa bas zhes gang gsungs pa yin no/ /gnyis pa ni de bzhin du sems can de snyed cig kho na phyir mi 'ong ba'i 'bras bu la bkod pa bas zhes gang gsungs pa yin no//gsum pa ni sems can de snyed cig kho na dgra bcom pa nyid du zhes gang gsungs pa yin no/ /bzhi pa ni de bzhin du sems can de snyed kho na rang byang chub la bkod pa bas zhes gang gsungs pa yin no//lnga pa ni yang 'dzam bu'i gling gi sems can bla na med pa yang dag par rdzogs pa'i byang chub la yang dag par bkod pa bas/ sems can gcig gcig phyir mi ldog pa'i sa la bkod pa bsod nams ches mang du 'phel ba nyid du gang gsungs pa yin no/ / drug pa ni de bzhin du gling bzhi pa'i sems can de nyid la bkod pa bas zhes gang gsungs pa yin no/ /bdun pa ni de bzhin du stong gi 'jig rten gyi khams kyi sems can de nyid la bkod pa bas zhes gang gsungs pa yin no/ /brgyad pa ni de bzhin du stong gnyis pa dang / stong gsum pa dang / phyogs bcu'i 'jig rten gyi khams kyi sems can rnams de nyid la yang dag par bkod pa bas zhes gang gsungs pa yin no/ /bsngags pa'i cha dgu pa ni/ yang 'dzam bu'i gling nas brtsams te/ phyogs bcu'i phyogs re re zhing gang+gA'i klung gi bye ma snyed kyi 'jig rten gyi khams kyi sems can de dag thams cad phyir mi ldog pa'i sa la bkod pa zhes bya ba nas/phyir mi ldog pa de rnams las byang chub sems dpa' sems dpa' chen po gang yang rung ba mngon par shes pa myur ba la shes rab kyi pha rol tu phyin pa phyin ci ma log par ston pa'i bsod nams ches mang du 'phel lo zhes bya ba la sogs pa gang gsungs pa yin no//byang chub sems dpa' spro ba bskyed pa rnams la legs so legs so bsngags pa'i don yongs su gsal bar byed pa yin no/ /de ltar na bstod pa la sogs pa 'di dag ni don yang dag pa ji lta ba nyid du rtogs pa'i cha'i mtshan nyid yin gyi/rig byed shes pa rnams kyis don brjod pa ni bstod pa yin no zhes smras pa ltar don brjod pa'i mtshan nyid ni ma yin no/ /yang kha cig na re chad phyed dang bzhi pa'i oM ni bkur ba yin no/ /zhes brjod pa de dag gi ltar na ni sgra'i tshangs pa ni dam pa yin no zhes bya ba de lta bu bkur ba yin par 'gyur na/'dir ni ji skad du brjod pa'i rtogs pa'i cha mtshan nyid yin no/ /bsngags pa'i dbang du byas nas snyan tshig gi rig byed pa yin par nga smra ste/ mar lta bu'i tshig rjes su brjod pa gang yin pa de dag gi bsngags pa yin no zhes brjod pa gang yin pa de dag gi ltar na yang sgrar gtogs pa kho nar 'gyur na/'dir ni cha dgu pa'i rtogs pa'i mtshan nyid bsngags pa yin no/ /cha ni yan lag ste cha shas zhes bya ba'i don to/ /de ltar byas na mdo gzhan gyi gleng gzhi de dang de dag las/bcom ldan 'das byang chub sems dpa' sems dpa' chen po sangs rgyas thams cad kyis bstod cing bkur la bsngags pa thams cad dang thabs cig tu bzhugs so zhes gang gsungs pa de 'thad par 'gyur ba nyid yin no//mos pa yid la byed pa dang / bstod pa dang bkur ba dang / bsngags pa bshad zin to// //da ni yongs su bsngo ba yid la byed pa zhes bya ba yin pas na/ yongs su bsngo ba khyad par can/ /de yi byed pa'i mchog yin no/ /de ni dmigs med rnam pa can//phyin ci ma log mtshan nyid do/ /dben dang sangs rgyas bsod nams tshogs/ /rang bzhin dran pa'i spyod yul can/ /thabs bcas mtshan ma med pa dang / /sangs rgyas rjes su yi rang dang / /khams gsum gtogs pa ma yin dang / /chung dang 'bring dang chen po yi//bsngo ba gzhan ni rnam pa gsum/ /bsod nams che 'byung bdag nyid do/ /zhes gsungs pa yin no/ /de la bsngo ba'i khyad par ni 'di yin te/ nyan thos dang / rang sangs rgyas thams cad kyi sbyin pa la sogs pa'i bsod nams bya ba'i dngos po rnams las byang chub sems dpa' sems dpa' chen po'i bla na med pa yang dag par rdzogs pa'i byang chub tu mi dmigs pa'i tshul gyis yongs su bsngos pa 'di nyid rab ces bya'o//dam pa zhes bya'o/ /gtso bo zhes bya'o zhes bya ba la sogs pa gang gsungs pa yin no/ /de la rab ces bya ba ni rab rnam pa gnyis te/bstun pa dang ldan pa nyid kyi dam par gyur pa nyid dang / gnyis pa med pa nyid kyis na gnyis pa dang bral ba gtso bor gyur pa nyid do/ /de la dam par gyur par rab nyid ni rnam pa gnyis te/ thabs la mkhas pa'i mchog nyid dang / shes rab kyi pha rol tu phyin pa nyid kyis rab mchog yin no //gtso bo nyid kyang rnam pa gnyis te/ mnyam pa med pa nyid kyis phul du phyin pa dang / lhag pa med pas gong na med pa ste / tshig bdun gyis de'i khyad par gyi mtshan nyid bstan pas so/ /yongs su bsngo ba'i byed pa ni yang sems can rnams la theg pa gsum gyis nges par 'byung ba'i lam ston par byed pas rgyur gyur pas na mnyam pa med pa zhes bya'o//mi mnyam pa'i sangs rgyas dang mnyam pa thob pa'i rgyur gyur pas na mi mnyam pa dang mnyam pa zhes bya'o/ /de ci'i phyir zhe na/ nyan thos la sogs pa dang byang chub sems dpa'i rang dang gzhan gyis gang gsungs pa yin no//mi dmigs pa'i rnam pa can gyi yongs su bsngo ba ni/ phyogs bcu'i sangs rgyas thams cad kyi thugs dang po bskyed pa nas brtsams te/ dam pa'i chos gnas pa'i bar gyi tshul khrims la sogs pa'i phung po rnams dang /de yongs su bsdus pa dang / theg pa gsum gyis yongs su smin par byas pa dang / rnam par grol bar byas pa'i sems can rnams kyi dge ba'i rtsa ba thams cad gcig tu bsdus te/ rjes su yi rang zhing yongs su bsngos nas dngos po gang zhig yin zhes bya ba nas brtsams te/dngos po dang / dmigs pa dang / byang chub kyi sems dang dge ba'i rtsa ba dang rjes su yi rang ba dang ldan pa'i bsod nams bya ba'i dngos po ni gang yin zhes bya ba dang sems ni zad cing 'gags la bral zhing rnam par gyur pa nyid ces bya ba nas/ chos thams cad dngos po med pa'i rjes su 'gro ba mi dmigs pa'i rnam par yongs su bsngos pa legs pa nyid kyis zhes bya ba la sogs pa gang gsungs pa yin no/ /de la dngos po ni rigs so/ /dmigs pa ni chos thams cad do/ /byang chub kyi ched du bya ba'i sems ni 'dzin par byed pa'i rnam par rtog pa'o//dge ba'i rtsa ba ni ma chags pa la sogs pa'o/ /bsod nams bya ba'i dngos po ni sems pa'o/ /zad pa ni bsags pa rnam par 'jig pas so/ /'gags pa ni rgyun gyis 'jig pas so/ /bral ba ni rang bzhin gyis 'jig pas so//rnam par gyur pa ni rnam par 'gyur ba'i rnam par 'jig pas so/ /phyin ci ma log pa'i mtshan nyid kyi yongs su bsngo ba ni/ sems gang gis yongs su bsngo ba'i sems de nyid kyi chos nyid kyang de yin no/ /de ci'i phyir zhe na/ de ni 'di ltar chos thams cad rang bzhin gyis stong ngo zhes gang gsungs pa bzhin no//dben pa'i gnas su bsngo ba ni/ gal te byang chub sems dpa' chen pos bsod nams bya ba'i dngos po mngon par 'du bya ba de phung po la sogs pas dben par shes te/ zhes bya ba nas brtsams te/sangs rgyas kyi chos thams cad de nyid kyi ngo bos dben par shes te zhes bya ba'i bar du gang gsungs pa yin no/ /sangs rgyas kyi chos dge ba'i rtsa ba'i rigs su gtogs pa'i rang bzhin dran pa'i yongs su bsngo ba ni/ sangs rgyas kyi dge ba'i rtsa ba rnams rigs gang dag yin pa dang /rang bzhin gang yin pa de bzhin du bsod nams bya ba'i dngos po de yongs su bsngo bar byed pa zhes gang gsungs pa yin no/ /thabs la mkhas pa'i yongs su bsngo ba ni/ 'dir byang chub sems dpa' chen pos thabs la mkhas pa de dag la bslab par bya ba la sogs pa gang gsungs pa yin no//mtshan ma med pa'i yongs su bsngo ba ni/ kha zas dug dang bcas pa'i dpes mtshan ma'i 'du shes can gyis yongs su bsngo ba ni/ dug can zug rngu can te zhes bya ba la sogs pa gang gsungs pa yin no/ /sangs rgyas kyis rjes su gnang ba'i bsngo ba ni/ji ltar sangs rgyas bcom ldan 'das de dag gis sangs rgyas kyi ye shes bla na med pas mkhyen pa de bzhin du yongs su bsngo'o zhes bya ba la sogs pa gang gsungs pa yin no/ /khams gsum du gtogs pa ma yin pa'i yongs su bsngo ba ni/gzhan yang dge ba'i rtsa ba de dag 'di ltar yongs su bsngo bar bya ste/ ji ltar gzugs khams gsum gyi khongs su chud pa ma yin te zhes bya ba la sogs pa gang gsungs pa yin no/ /bsod nams chen po 'byung ba'i bsngo ba yang chung ngu dang 'bring dang chen po'i dbye bas rnam pa gsum yin no//de la chung ngu ni dge ba bcu'i las kyi lam nas brtsams te/ mngon par shes pa lnga zhes bya ba'i bar dang / 'jig rten pa'i rtogs pa la gnas pa/ stong gsum gyi stong chen po'i 'jig rten gyi khams kyi sems can gyi dpes yongs su bsngo ba 'di bsod nams ches mang du 'phel lo zhes bya ba'i bar du gang gsungs pa'o//'bring ni yang de [(]snyad [,]snyed [)]cig kho na rgyun tu zhugs pa nas/ dgra bcom par gyur pa la bkur sti dang / mchod pa la sogs pa byas pa'i bsod nams kyi dpes/bsod nams 'di snga ma bzhin du gang gsungs pa yin no/ /chen po ni sems can de snyed kho na bla na med pa yang dag par rdzogs pa'i byang chub la gnas pa la phyogs bcu'i 'jig rten gyi khams kyi sems can rnams re res mchod pa'i bsod nams kyi dpes mi dmigs par yongs su bsngo ba'i bsod nams snga ma bzhin te/de ci'i phyir zhe na/ de dag thams cad ni mi dmigs pa nyid kyis so zhes bya ba la sogs pa gang gsungs pa yin no/ /yongs su bsngo ba'i yid la byed pa bshad zin to// //rjes su yi rang ba yid la byed pa'i dbang du mdzad nas/thabs dang mi dmigs pa dag gis/ /dge ba'i rtsa la yi rang ba/ /rjes su yi rang yid byed pa/ /sgom pa yin pa 'dir brjod do/ /zhes bya ba gsungs pa yin te / bcom ldan 'das ji ltar na rjes su yi rang ba rab tu 'gyur zhes bya ba nas brtsams te/thabs la mkhas pas mi dmigs pa'i tshul du dge ba'i rtsa ba de dag bla na med pa yang dag par rdzogs pa'i byang chub tu yongs su bsngo bar bya'o zhes bya ba'i bar du gang gsungs pa yin no/ /de la mos pa yid la byed pas ni 'byung khungs dag nas gser gyi gar bu bzhin du bsod nams mngon par 'du byed do//yongs su bsngo ba'i yid la byed pas ni gser mgar gyi rgyan bzhin du yang dag par rdzogs pa'i byang chub kyi yan lag tu byed do/ /rjes su yi rang ba yid la byed pas ni rang dang gzhan gyi bsod nams bya ba mnyam pa nyid 'thob bo//zag pa dang bcas pa'i bsgom pa'i lam bshad zin to// //zag pa med pa brjod par bya ste/ de las kyang mngon par bsgrub pa'i mtshan nyid kyi sbyor ba'i dbang du mdzad nas/ de yi ngo bo nyid mchog nyid/ /kun la mngon par 'du mi byed/ / chos rnams dmigs pa med par ni/ /gtod par byed pa don chen nyid/ /ces gsungs pa yin no/ /de la ngo bo nyid ni/ bcom ldan 'das shes rab kyi pha rol tu phyin pa ni shin tu rnam par dag pas na snang bar bgyid pa'o/ /zhes bya ba nas brtsams te/chos thams cad kyi ngo bo nyid yang dag par ston par byed pa legs so zhes bya ba'i bar du gang gsungs pa yin te/ sbyor ba de ni ye shes kyi ngo bo nyid yin par gsal bar byed pa yin pas so/ /mchog nyid ni dmus long mang po'i dpes pha rol tu phyin pa lnga ni shes rab kyi pha rol tu phyin pa med par lam shes pa nyid la 'jug pa dang /rnam pa thams cad mkhyen pa nyid kyi grong khyer chen por 'gro ba'i nus pa bkag pa nyid kyis gang gsungs pa yin no/ /chos thams cad la mngon par 'du byed pa med pa ni/ gzugs mngon par sgrub pa med pa'i phyir zhes bya ba nas brtsams te/chos thams cad mngon par 'du byed pa med pas shes rab kyi pha rol tu phyin pa mngon par bsgrub par bya'o zhes bya ba'i bar du gang gsungs pa yin no/ /chos thams cad dmigs pa med pas mngon par rtogs pa gtod par byed pa ni/dge ba'i chos mya ngan las 'das pa'i bar rnams gang yang gtod par mi byed pa'i phyir shes rab kyi pha rol tu phyin pa'i grangs su 'gro ba'i bar dang / de ci'i phyir zhe na/ de ni chos thams cad dmigs su med pa'i rnam par nye bar gnas pa nyid kyis ming ji lta ba dang mtshan ma ji lta ba de ltar gtod par byed pa nyid yin pa'i phyir ro zhes gang gsungs pa yin no//de la ming ni ming du btags pa'o/ /mtshan ma ni de 'jug par byed pa'i rgyu'o/ /gtod pa ni gtod pa med pa nyid kyis gnyis kyi 'du shes de las ring du byed pa nyid yin pa'i phyir gzugs nas rnam pa thams cad mkhyen pa nyid kyi bar du mi dmigs pas des so sor thob par byed pa nyid kyis so//don chen po nyid ni/ gzugs nas rnam pa thams cad mkhyen pa nyid kyi bar du che ba dang chung bar byed pa bkag pa nas brtsams te/ sangs rgyas stobs dang ldan pa nyid kyis shes rab kyi pha rol tu phyin pa stobs dang ldan par rig par bya'o zhes bya ba dang / sangs rgyas nyid kyi don chen po sgrub par byed pa'i phyir pha rol tu phyin pa chen po yin pa nyid kyis gang gsungs pa yin no/ /mngon par sgrub pa bshad zin to// //da ni shin tu rnam par dag pa brjod par bya ste/ re zhig 'di'i rgyu ni rnam pa gsum du brjod la/ bzlog pa'i rgyu'ang rnam pa bzhir brjod par 'gyur te/ 'di ltar/ sangs rgyas bsten dang sbyin sogs dang / /thabs la mkhas pa gang yin pa//'di la sogs pa'i rgyu dag yin/ /chos kyis phongs pa'i rgyu dag ni/ /bdud kyi thibs kyis non pa dang / /zab pa'i chos la ma mos dang / /phung po la sogs mngon zhen dang / /sdig pa'i grogs pos yongs zin pa'o/ /zhes gsungs pa yin no/ /de la sangs rgyas la bsten pa 'di yin te/shA ri'i bu byang chub sems dpa' chen po phyogs bcu'i 'jig rten gyi khams kyi de bzhin gshegs pa dgra bcom pa yang dag par rdzogs pa'i sangs rgyas tshad med grangs med pa bsnyen bkur byas nas 'dir 'ongs shing zhes bya ba la sogs pa gang gsungs pa yin no//sbyin pa la sogs pa pha rol tu phyin pa yang dag par sgrub par byed pa ni/ byang chub sems dpa' chen po 'di bskal pa bye ba khrag khrig grangs med tshad med dpag tu med par sbyin pa'i pha rol tu phyin pa la spyad pa'o zhes bya ba la sogs pa gang gsungs pa yin no//thabs la mkhas pa ni/ rab 'byor 'di ni rnam par phye nas lung bstan par bya ba yin te zhes bya ba nas brtsams te/ thabs la mkhas pa ni shes rab kyi pha rol tu phyin pa la sbyor ba'i rgyu yin pa nyid kyi bar gyis gang gsungs pa yin no/ /chos kyis phongs par 'gyur ba dang rgyu mthun pa'i las ni/rab 'byor gzhan yang byang chub sems dpa'i theg pa pa'i rigs kyi bu 'am rigs kyi bu mo gang dag gis ji srid du/ shes rab kyi pha rol tu phyin pa bsgoms la/ de'ang dmigs pa'i tshul gyis bsgoms pa dag kyang yod do zhes bya ba nas brtsams te/drag pa dang / rgyun mi 'chad pa dang / dus ring por bdag nyid kyi lus chen po la rnam par smin pa sdug bsngal bar 'gyur ba'i las kyi sgrib pa nye bar bstan pas gang gsungs pa yin no/ /de la drag pa ni lhag pa nyid kyis so//rgyun mi 'chad pa ni rtag tu ba nyid kyis so/ /sdug bsngal ba ni mi mthun pa nyid kyis te/ de nye bar bstan pa ni sems can rnams de las bzlog par bya ba'i don du yin no/ /yang las kyi sgrib pa 'di'i rgyu rnam pa bzhi'i dbang du mdzad nas/ bdud kyi byin gyis brlabs pa dang / chos zab mo la mos pa dang / phung po la sogs pa la mngon par zhen pa dang / sdig pa'i grogs pos yongs su zin pa ni de'i rgyu yin no/ /zhes gsungs pa yin no/ /shin tu rnam par dag pa thob pa'i rgyu gsum dang bzlog pa'i rgyu bshad zin to// //de las kyang re zhig rnam par dag pa spyir brjod de/ de nas khyad par gyi don 'chad par 'gyur ro/ /de la rnam par dag pa'i spyi ni 'di yin no/ /'bras bu dag pa gzugs la sogs/ /dag pa nyid de gang gi phyir/ /de gnyis tha dad ma yin zhing //gcad du med pas dag par brjod/ /ces gsungs pa yin te/ rab 'byor gzugs rnam par dag pa gang yin pa de ni 'bras bu rnam par dag pa nyid do zhes bya ba nas de dag gnyis su byar med pa nyid kyis dbyer med gcad du med do zhes bya ba la sogs pa gang gsungs pa yin no//de la gzugs rnam par dag pa gang yin pa de ni 'bras bu rnam par dag pa nyid do zhes bya ba ni 'phags pa'i gang zag gang yin pa'i dge sbyong gi 'bras bu de ni gzugs la sogs pa la bdag tu mngon par zhen pa la sogs pa dang bral bas rab tu phye ba nyid yin pa'i phyir ro//gnyis su med cing gnyis su byar med pa nyid kyis zhes bya ba la/ gnyis su med pa'i don gzung ba dang 'dzin pa gnyis su med pa'i phyir ro/ /gnyis su byar med ces bya ba ni ldem por dgongs pa gnyis su byar mi nus pa nyid yin pa'i phyir ro/ / dbyer med gcad du med pa'i phyir ro zhes bya ba la/ dbye ba ni mtshan nyid sna tshogs pa nyid do/ /gcad pa ni so so tha dad par yan lag so sor byed pa'o/ /de ltar rnam par dag pa'i spyi bshad zin nas khyad par brjod pa ni/ nyon mongs shes bya lam gsum gyi/ /nyams phyir slob ma bse ru dang //rgyal sras rnams kyi dag pa ste/ /sangs rgyas rnam kun shin tu ba/ /zhes bya ba gsungs pa yin te/ de la nyan thos kyi nyon mongs pa'i sgrib pa rnam par dag pa ni/ 'dod chags dang / zhe sdang dang / gti mug rnam par dag pa dang / gzugs la sogs pa rnam par dag pa 'di dag gnyis su med cing gnyis su byar med pa nyid kyis dbyer med gcad du med do zhes bya ba dang / de bzhin du bdag dang / sems can dang / srog la sogs pa rnam par dag pa dang / gzugs la sogs pa rnam par dag pa zhes bya ba la sogs pa gang gsungs pa yin no//rang sangs rgyas kyi shes bya'i sgrib pa'i phyogs gcig rnam par dag pa ni/ rab 'byor gzhan yang gzugs rnam par dag pa gang yin pa de ni 'bras bu rnam par dag pa'o/ /'bras bu rnam par dag pa gang yin pa de ni shes rab kyi pha rol tu phyin pa rnam par dag pa'o zhes bya ba nas brtsams te/ma rig pa rnam par dag pas 'du byed rnam par dag pa zhes bya ba la sogs pa gang gsungs pa yin no/ /byang chub sems dpa'i theg pa gsum gyi lam rnam par dag pa ni/ rab 'byor gzhan yang sbyin pa'i pha rol tu phyin pa rnam par dag pas tshul khrims kyi pha rol tu phyin pa zhes bya ba nas brtsams te/sangs rgyas kyi chos rnam par dag pa dang / rnam pa thams cad mkhyen pa nyid rnam par dag pa 'di dag gnyis su med cing zhes bya ba la sogs pa gang gsungs pa yin no//shin tu rnam par dag pa ni yang dag par rdzogs pa'i sangs rgyas kyi yin te/ de la mtha' ni cha'o/ /de ni rnam pa gnyis te/ dngos po'i mtha' dang / dus kyi mtha'o/ /de la shes bya'i sgrib pa spangs pa'i tshul gyis dngos po'i mtha' las 'das pa'i phyir dang /rtag tu chos kyi sku brnyes pas dus kyi mtha' las 'das pa yin pa'i phyir te/ mtha' las brgal ba dang mtha' las shin tu song ba zhes bya bas so/ /mtha' las 'das pa ni chos kyi dbyings la brjod la/ de la yod pas na shin tu ba'o//de'ang 'dod pa'i khams dang / gzugs kyi khams dang / gzugs med pa'i khams kyis bsdus pa'i sa dgu po rnams la so sor rnam par rtog pa'i rnam pa chen po'i chen po la sogs pa dgu'i gnyen po bsgom pa'i lam chung ngu'i chung ngu la sogs pa rnam pa dgur phye ba yin no//de nyid kyi phyir ji lta ba dang ji snyed pa bsgoms pa nyid kyis bsgom pa'i lam la yang byar med pa nyid kyi rgyu nye bar bstan pa'i don du shin tu zhes smos te/ 'di ltar/ sa dgu la ni chen po yi/ /chen po la sogs dri ma yi/ /gnyen po chung ngu'i chung ngu la//sogs pa'i lam ni dag pa yin/ /zhes bya ba gsungs te/ de la lam chung ngu'i chung ngu'i rnam pa ni/ rab 'byor gzhan yang shes rab kyi pha rol tu phyin pa rnam par dag pa gang yin pa de ni gzugs rnam par dag pa/ gzugs rnam par dag pa gang yin pa de ni zhes bya ba nas/rnam pa thams cad mkhyen pa nyid rnam par dag pa zhes bya ba dang / de bzhin du bsam gtan gyi pha rol tu phyin pa rnam par dag pa gang yin pa de ni zhes bya ba la sogs pa gang gsungs pa yin no/ /chung ngu'i 'bring ni/ rab 'byor nang stong pa nyid rnam par dag pa gang yin pa de ni/gzugs rnam par dag pa zhes bya ba la sogs pa gang gsungs pa yin no/ /chung ngu'i chen po ni/ rab 'byor gzhan yang 'dus byas rnam par dag pa gang yin pa de ni 'dus ma byas rnam par dag pa'o/ / 'dus ma byas rnam par dag pa gang yin pa de ni/'das pa rnam par dag pa'o zhes bya ba la sogs pa gang gsungs pa yin no/ /'bring gi chung ngu ni/ bcom ldan 'das rnam par dag pa 'di ni zab bo zhes bya ba dang / shA ri'i bu gzugs rnam par dag pa'i phyir/ rnam par dag pa zab bo zhes bya ba la sogs pa gang gsungs pa yin no//'bring gi 'bring ni/ bcom ldan 'das rnam par dag pa ni snang bar gyur pa'o zhes bya ba dang / shA ri'i bu shin tu rnam par dag pa'i phyir ro/ /rnam par dag pa snang ba'o zhes bya ba la sogs pa gang gsungs pa yin no/ / 'bring gi chen po ni/ bcom ldan 'das rnam par dag pa ni nying mtshams sbyor ba ma mchis pa'o zhes bya ba dang / shA ri'i bu gzugs la 'pho ba med cing nying mtshams sbyor ba med pa ni rnam par dag pa'o zhes bya ba la sogs pa gang gsungs pa yin no/ /chen po'i chung ngu ni/bcom ldan 'das rnam par dag pa ni/ kun nas nyon mongs pa ma mchis pa'o zhes bya ba dang / shA ri'i bu shin tu kun nas nyon mongs pa med pa'i phyir ro zhes bya ba dang / gzugs dang tshor ba la sogs pa gang gsungs pa yin no/ /chen po'i 'bring ni/bcom ldan 'das rnam par dag pa ni/ thob pa dang mngon par rtogs pa ma mchis pa'o zhes bya ba dang / shA ri'i bu thob pa dang mngon par rtogs pa shin tu med pa'i phyir ro zhes bya ba gang gsungs pa dang / gzugs dang tshor ba zhes bya ba la sogs pa gang gsungs pa yin no//lam gyi rnam pa chen po'i chen po ni/ bcom ldan 'das rnam par dag pa ni/ mngon par ma grub pa'o zhes bya ba dang / shA ri'i bu shin tu mngon par ma grub pa'i phyir ro zhes bya ba dang / gzugs dang tshor ba zhes bya ba la sogs pa gang gsungs pa yin no//khams gsum pa'i gnyen po nyid kyi bsgom pa'i lam gyi dbang du byas nas/ bcom ldan 'das rnam par dag pa ni 'dod pa dang / gzugs dang / gzugs med pa'i khams su skye ba ma lags so zhes bya ba dang / shA ri'i bu khams gsum po'i rang bzhin mi dmigs pa'i phyir rnam par dag pa mi skye'o zhes gang gsungs pa yin no//'jal byed dang gzhal bya mnyam pa nyid kyi dbang du mdzad nas/ bcom ldan 'das rnam par dag pa ni 'tshal ba ma mchis pa lags so zhes bya ba dang / shA ri'i bu chos rnams bems po nyid yin pa'i phyir zhes bya ba dang /gzugs dang tshor ba mi shes so zhes bya ba la sogs pa dang / de ci'i phyir zhe na/ chos rnams rang bzhin gyis stong pa'i phyir ro zhes gang gsungs pa yin no/ de la klan ka spangs bya bas/ / lam ni 'jal dang gzhal bya dag /mnyam pa nyid kyi khams gsum gyi/ / gnyen po nyid du 'dod pa yin/ /zhes bya ba ni gal te gnyis su kun tu rtog pas mi mthun pa'i phyogs chen po'i chen po la sogs pa dang gnyen po ni chung ngu'i chung ngu la sogs pa zhes bya bar 'gyur ba ma yin nam zhe na/shes rab kyi pha rol tu phyin pa ni rnam pa thams cad mkhyen pa nyid la sman par yang mi bgyid pa lags so zhes bya ba dang / shA ri'i bu chos kyi dbyings gnas pa nyid kyi phyir ro zhes gsungs pa yin no/ /'o na tshogs la 'bad pas ci zhig bskyed snyam na/bcom ldan 'das shes rab kyi pha rol tu phyin pa rnam par dag pa ni chos 'ga' yongs su 'dzin par mi bgyid lags so zhes bya ba dang / shA ri'i bu chos kyi dbyings yongs su gzung ba med pa nyid kyi phyir ro zhes gsungs pa yin no/ /thob pa'am rtogs pa zhes bya ba 'ga' yang med par 'gyur ro snyam na/bcom ldan 'das gnyis rnam par dag pa la thob pa ma mchis mngon par rtogs pa ma mchis pa'o zhes bya ba dang / kun nas nyon mongs pa dang rnam par byang ba med pa'i phyir ro zhes bya ba dang / lam gyi rnam pa shes pa nyid nye bar gzung nas/rab 'byor byang chub sems dpa'i shes rab kyi pha rol tu phyin pa zhes bya bas skabs yongs su rdzogs par ston par byed pa yin no/ /de ltar byas na/ mog mog por byed la sogs dang / /slob ma bse ru'i lam dag dang / /'di dang gzhan gyi yon tan gyis//phan yon che ba mthong ba'i lam/ /byed pa dang ni mos pa dang / /bstod dang bkur dang bsngags pa dang / bsngo dang rjes su yi rang ba/ /yid la byed pa bla med dag /sgrub dang shin tu dag pa zhes/ /bya ba 'di ni bsgom pa'i lam/ /byang chub sems dpa' mkhas rnams kyi//lam shes nyid ni de 'drar bshad/ /ces gang gsungs pa de ni 'dir 'das zin pa'i 'brel pa yin par blta bar bya'o/ /rnam grangs kyi tshig rnams kyi bshad pa ni/ nyan thos kyi lam gyi dbang du byas nas bden pa bzhi'i dmigs pa la rnam pa bcu drug tu rnam par bzhag par/bcom ldan 'das bdag cag gis kyang byang chub sems dpa' rnams pha rol tu phyin pa drug la gdams par bgyi'o/ /rjes su bstan par bgyi'o/ /len du gzhug par bgyi'o/ /yang dag par bstan par bgyi'o/ / gzengs bstod par bgyi'o/ /yang dag par dga' bar bgyi'o/ /nges par gzhug par bgyi'o/ /rab tu gnas par bgyi'o zhes gsungs pa gang yin pa de la dang po 'di ltar bya ba yin no/ /zhes bya bar nye bar ston pa dang / de nyid la yang nas yang du goms par byed pa dang /bag med pa rnams chos 'di la mos par byed pa dang / rmongs pa rnams rtogs par byed pa dang / brtson pa zhan pa rnams spro bar byed pa dang / zhan pa rnams yang dag par mgu bar byed pa dang / lam la nges par sbyor ba dang / de nyid du nges par byed pa'i dbang du byas nas tshig brgyad rim pa bzhin du rig par bya'o//rang sangs rgyas kyi dbang du byas nas de dag gi 'dzin pa'i rnam par rtog pa ma spangs par rnam par bzhag par/ btsun pa rab 'byor 'di ltar zab pa/ 'di ltar brtag par bya ba ma yin pa/'di ltar rtog ge'i spyod yul ma yin pa/ 'di ltar phra ba/ 'di ltar zhib pa/ 'di ltar blta dka' ba/ 'di ltar rjes su rtogs par dka' ba/ 'di ltar gya nom pa/ 'di ltar 'phags pa la nus pa yod pa/ 'di ltar mkhas shing mdzangs pas rig par bya ba'i shes rab kyi pha rol tu phyin pa 'di len par byed pa su dag 'byung bar 'gyur zhes gang brjod pa de la sgro skur las grol ba nyid dang /sems dang rnam par rtog pa'i yul ma yin pa nyid dang / rnal 'byor gyi chos kyis nges par bya ba nyid kyis rtog ge las 'das pa nyid dang /rang bzhin gyi ngo bo phra ba nyid dang / rigs nas brtsams te chos kyi sku thob kyi bar du lam bar chad med pa dang / blta bar bya ba dang / mthong bar byed pa'i rnam par rtog pa med pa dang / mthong ba'i tshig gis kyang don de thob par mi nus pa nyid dang /rnam pa thams cad mkhyen pa nyid 'bras bu can nyid dang / 'phags pa'i gang zag thams cad kyis rtogs pa'i rgyu yin pa'i dbang du byas nas tshig dgu po rnams go rims bzhin du rig par bya'o/ /tshig bcu pa ni khyad par gyi mtshan nyid du bshad par bya'o//'di ltar 'dir ji ltar chos 'ga' yang ma bshad ma bstan ma brjod pa de kho na 'dir len par byed pa su'ang mi 'byung ngo zhes bya ba ni rang gi ngo bo dang / 'brel pa dang / de gnyi ga las tshig gsum po rnams yin no/ /bkur ba'i cha lnga pa'i dbang du byas nas/ kau shi ka shes rab kyi pha rol tu phyin pa'i don ston pa dang / 'chad pa dang / rnam par 'byed pa dang / gsal bar byed pa zhes bya ba ni rang gi mtshan nyid dang / rab tu dbye ba'i mtshan nyid dang / de dag nyid kyi bstan pa gdul bya ji lta ba bzhin rnam par 'byed pa dang / de'i khar 'jug pa la mkhas pa'i sgo nas tshig bzhi po rnams rim pa ji lta ba bzhin rig par bya'o/ /de la shes rab kyi pha rol tu phyin pa'i don ni 'di yin te/ 'di lta ste/ de gang gis gnyis su med par mthong gi/ gnyis su ni ma yin pa gang yin pa ste/ mtshan mar ma yin mtshan ma med par yang ma yin/'ong bar ma yin 'gro bar ma yin pa dang / bsal bar ma yin bzhag par ma yin pa dang / kun nas nyon mongs par ma yin/ rnam par byang bar ma yin pa dang / skye bar ma yin 'gag par ma yin pa dang / len par ma yin 'dor bar ma yin pa dang / gnas par ma yin mi gnas par ma yin pa dang / yang dag par ma yin yang dag pa ma yin par ma yin pa dang / ldan par ma yin mi ldan par ma yin pa dang / bag tsam ma yin bag tsam ma yin par ma yin pa dang / cha so so ma yin cha so so ma yin par ma yin pa dang / chos nyid ma yin chos nyid ma yin par ma yin pa dang / de bzhin nyid ma yin de bzhin nyid ma yin par ma yin pa dang / yang dag pa'i mtha' ma yin yang dag pa'i mtha' ma yin pa ma yin par mthong ba'o zhes bya ba ni/byed pa po dang thob par byed pa'i rgyu bkag pa rjes su shes pa dang / 'gro ba dang 'ong ba bkag pa dang / mi mthun pa'i phyogs dang gnyen po dag sel ba dang / len pa dang / kun nas nyon mongs pa dang rnam par byang ba dag phan tshun gyi rang bzhin nyid dang / chos nyid la skye ba dang 'gag pa med pa dang / lta bas byas pa'i len pa dang / de'i ngo bo nyid kyis dor ba med pa dang / rigs kyi rten gyi gnas dngos po ma yin pa nyid kyis gnas pa dang mi gnas pa'i rnam par rtog pa med pa dang / gsung rab kyi chos bden pa dang brdzun pa ma yin pa dang /tshogs pa'i ldan pa dang ldan pa med pa las 'das pa dang / chos kyi dbyings la nyan thos rnams dang rang sangs rgyas rnams kyis phyogs gcig dang thams cad tshang bar nges par 'byung ba med pa dang / rigs so so'i rang bzhin gyis chos kyi dbyings char byar med pa dang /lam gyi chos 'phags pa'i gang zag gi dbye bas phan tshun lam dang lam ma yin par mi 'gyur ba dang / de kho na bzhin du phyin ci ma log pa'i chos kyi dbyings la dbye ba med pa dang / yang dag pa ji lta ba bzhin rab tu gyur pa'i chos nyid ro gcig pa nyid kyis mtha' khyad par med pa'i dbang du byas nas/rim pa ji lta ba bzhin du mtshan mar ma yin mtshan ma med par ma yin zhes bya ba la sogs pa'i tshig zung bcu bzhi po rnams kyis nges par bstan pa brjod par bya'o/ /de bzhin du rnam grangs kyi tshig bshad pa ma byas pa gzhan rnams kyi don zung gi rjes su 'brangs nas ji ltar rigs par mkhas pa rnams kyis bshad par 'os te/kho bo cag gis ni gzhung lci ba'i skyon spangs pa'i don du thams cad nye bar bstan par spungs ma bskyed do/ / shes rab kyi pha rol tu phyin pa'i man ngag gi bstan bcos mngon par rtogs pa'i rgyan las/ lam shes pa'i skabs mtha' gnyis rnam par dag pa'i le'u ste gnyis pa'o/ / lam gyi rnam pa shes pa nyid bshad zin to// //da ni thams cad shes pa nyid bshad par bya'o//de la re zhig 'khor ba dang mya ngan las 'das pa la mi gnas pa'i dbang du mdzad nas/ tshu rol pha rol mtha' la min/ /de dag bar na mi gnas pa/ /zhes bya ba gsungs te/ bcom ldan 'das byang chub sems dpa'i shes rab kyi pha rol tu phyin pa ni tshu rol gyi mtha' ma lags gnyis ka las gzhan du'ang mi dmigs te zhes bya ba dang /shin tu rnam par dag pa'i phyir ro zhes bya ba la sogs pas 'khor ba dang mya ngan las 'das pa'i 'du shes dang dmigs pa bkag pas gang gsungs pa yin no/ / de la mi dmigs pa'ang gang gi phyir/ dus rnams mnyam pa nyid shes phyir/ /shes rab pha rol phyin par 'dod/ /ces bya ba yin te/ dus gsum pa'i chos rnams mnyam pa nyid kyi phyir ro/ /zhes bya ba'i 'thad pas gang gsungs pa yin no/ /thabs ma yin pas ring ba ste//zhes bya ba ni/ bcom ldan 'das gal te byang chub sems dpa'i theg pa pa'i rigs kyi bu'am rigs kyi bu mo thabs mi mkhas pas shes rab kyi pha rol tu phyin pa 'di la dmigs pa'i tshul gyis shes par bgyid na/ shes rab kyi pha rol tu phyin pa 'di 'dor bar 'gyur/ring du byed par 'gyur ro zhes gang gsungs pa yin te/ de'i tshe dang phyi ma'i tshe la ltos nas tshig gnyis so/ /thabs ma yin pa'ang gang zhe na/ de ni mtshan mar dmigs sgo nas/ /zhes bya ba smos te/ rab 'byor ming las kyang chags so/ / rab 'byor mtshan las kyang chags so/ /de ci'i phyir zhe na/ rab 'byor chos thams cad ni mtshan ma med pa ming med pa'o zhes gang gsungs pa yin no/ /de ni thabs la mkhas pa yis/ /yang dag dge ba nyid du bshad/ /ces bya ba ni/ bcom ldan 'das shes rab kyi pha rol tu phyin pa 'di legs par bshad pa dang /legs par mthar phyung ba'i bar ni ngo mtshar ro zhes bya bas/ nyan thos la sogs pa'i rtogs pa nyi tshe ba dang bzlog pas mthar thug par song ba de la legs par bshad pa dang legs par mthar phyung bar gang gsungs pa yin no//mi mthun pa'i phyogs ni/ gzugs sogs phung po stong nyid dang / /dus gsum gtogs pa'i chos rnams dang / /sbyin sogs byang chub phyogs rnams la/ /spyod pa'i 'du shes mi mthun phyogs/ /zhes gang gsungs pa la/ thabs mi mkhas pas de gzugs stong zhes bya bar zhes bya ba nas brtsams te/gzugs la sogs pa'i stong pa nyid dang / 'das pa la sogs pa'i chos rnams dang / pha rol tu phyin pa rnams nas rnam pa thams cad mkhyen pa nyid kyi bar la spyod pa'i 'du shes ni chags pa'o zhes gsungs pa yin no//gnyen po ni/ sbyin la sogs la ngar 'dzin med/ /ces gang gsungs pa yin te/ shA ri'i bu thabs mkhas pa'i byang chub sems dpa' ni 'di snyam du gzugs la gzugs zhes shes par mi 'gyur ro zhes bya ba nas brtsams te/ bdag gis ni rnam pa thams cad mkhyen pa nyid thob par bya'o snyam du sems pa med de zhes bya ba dang /'di lta ste/ thams cad stong pa nyid kyi phyir ro zhes bya ba'i 'thad pas gang gsungs pa yin no/ /yang mi mthun pa'i phyogs gsungs pa ni/ kau shi ka 'di la byang chub sems dpa'i theg pa pa'i rigs kyi bu'am rigs kyi bu mo sems su shes pa dang zhes bya ba nas brtsams te/chags pa de dag la chags par gyur na chags pa med pa'i shes rab kyi pha rol tu phyin pa ni spyod par mi nus so/ /de ci'i phyir zhe na/ gzugs nas rnam pa thams cad mkhyen pa nyid kyi bar gyi rang bzhin yongs su bsngo bar mi nus so //gnyen po ni/ gzhan dag de la sbyor byed pa/ /de ni chags pa'i mtha' 'gog pas/ /zhes gang gsungs pa yin te/ de nyid la nga rgyal bkag pa ston pa la sogs pas gzhan rnams kyi chags pa'i thams cad spong bar byed pas gang gsungs pa yin no//de la kun tu rmongs pa dang / bag med pa dang / kun tu zhum pa dang / yang dag par zhugs pa rnams la yang dag par ston pa dang / yang dag par lan du 'jug pa dang / yang dag par gzengs bstod pa dang / yang dag par dga' bar byed pa rnams go rims bzhin sbyar bar bya'o/ /gzhan yang / rgyal la sogs pa chags pa phra/ /zhes bya ba ni/ rab 'byor 'di la byang chub sems dpa' de bzhin gshegs pa mtshan mar yid la byed na zhes bya ba nas brtsams pas de bzhin gshegs pa dang /de'i dge ba'i rtsa ba dang yongs su bsngo ba rnams ni chags pa phra mo nyid du gang gsungs pa yin no/ /'di dag chags pa nyid yin pa ni gang gi phyir/ chos kyi lam ni rang bzhin gyis/ /dben pa'i phyir na de zab nyid//ces bya ba gsungs pa yin te/ bcom ldan 'das shes rab kyi pha rol tu phyin pa zab bo zhes bya ba dang / rab 'byor chos thams cad rang bzhin gyis dben pa'i phyir ro/ /zhes bya ba la sogs pa gang gsungs pa yin no/ /yang ji ltar na chags pa thams cad spong ba yin zhe na/chos rnams rang bzhin gcig par ni/ /shes pas chags pa spong ba yin/ /zhes gsungs pa yin te/ rab 'byor 'di ltar chos kyi rang bzhin ni gnyis ma yin te/ chos kyi rang bzhin ni gcig tu zad do/ /chos kyi rang bzhin gang yin pa de ni rang bzhin ma yin pa'o zhes bya ba la sogs pa shes bya dang shes pa nyid du yongs su ston pa chags pa'i mtha' thams cad yongs su spong ba'i don can gyi gang gsungs pa yin no//zad pa nyid ni gang gi phyir/ /mthong ba la sogs bkag pa yis//de ni rtogs par dka' bar bshad/ /ces bya ba gsungs te/ mthong ba dang / thos pa dang / nges pa dang / rnam par shes pa bkag pas na de gzugs la sogs par mngon par rtogs par dka' ba shes pa dang shes bya mnyam pa nyid du sngon du ston par byed pas gang gsungs pa yin no//yang shes rab kyi pha rol tu phyin pa de ltar rtogs par dka' ba'i rgyu ni ci zhig yin zhe na/ gang gi phyir/ gzugs la sogs par mi shes phyir/ /de ni bsam mi khyab par 'dod/ /ces bya ba gsungs te/ gzugs nas sangs rgyas kyi chos ma 'dres pa bco brgyad kyi bar du mi shes pa'i phyir 'di'i bsam gyis mi khyab pa nyid shes pa mnyam pa nyid du ston par gang gsungs pa yin no//de ltar byas na/ de ltar kun shes nyid lugs la/ /mi mthun phyogs dang gnyen po dag /rnam par phye ba ma lus pa//ji skad bshad pa 'dir shes bya/ /zhes gsungs pa yin no/ /da ni sbyor ba brjod par bya'o/ /de'ang rnam pa bcur 'gyur bas de'i phyir/ gzugs sogs de mi rtag sogs dang / /de ma rdzogs dang rab rdzogs dang / /de la chags pa med nyid la/ /spyod pa bkag pas sbyor ba dang //mi 'gyur byed po min nyid dang / /sbyor ba bkag pa rnam gsum dang / /skal ba ji bzhin 'bras thob pas/ /'bras yod 'dod pa'i de dang ni/ /gzhan la rag las min gang dang / /snang ba rnam bdun shes byed do/ /zhes bya ba gsungs pa yin te/de la gzugs la sogs pa'i sbyor ba ni/ gal te gzugs la spyod na/ shes rab kyi pha rol tu phyin pa la spyod do zhes bya ba nas/ de bzhin du rnam pa thams cad mkhyen pa nyid kyi bar la spyod pa bkag pa dang / spyod pa de rjes su gnang bas gang gsungs pa yin no//gzugs la sogs pa mi rtag pa la sogs pa'i sbyor ba ni phung po rnams nas rnam pa thams cad mkhyen pa nyid kyi bar du rtag pa dang mi rtag pa la sogs pa'i spyod pa bkag pas snga ma bzhin te/ de ci'i phyir zhe na/ gzugs la sogs pa ni de bzhin du med pa nyid kyis so zhes gang gsungs pa yin no//gzugs la sogs pa rdzogs pa dang ma rdzogs pa'i sbyor ba ni/ gzhan yang gzugs la sogs pa yongs su ma rdzogs pa dang yongs su rdzogs pa'i spyod pa bkag pa ni snga ma bzhin te/ de ci'i phyir zhe na/ 'di rnams kyi yongs su ma rdzogs pa nyid la de ni kho bo bkag pa nyid kyis gang gsungs pa yin no//gzugs la sogs pa la chags pa med pa'i sbyor ba ni/ yang de rnams la ma chags pa nyid kyi spyod pa ni snga ma bzhin du gang gsungs pa yin no/ /gzhan du mi 'gyur ba'i sbyor ba ni/sbyor ba de nam mkha'i bsngags pa 'am bsngags pa ma yin pa brjod pa dang 'dra ba chos zab mo 'di bstan pa dang ma bstan pa dag gis 'phel ba dang 'grib pa med par gang gsungs pa yin te/ don ci zhig yin zhe na/ shes rab kyi pha rol tu phyin pa ni tshig gi yul ma yin pa'i phyir bstan pa nyid der 'phel ba'am yongs su 'grib pa yin gyi shes rab kyi pha rol tu phyin pa ni ma yin pa'o//byed pa po'i sbyor ba ni/ sbyor ba de ni sgyu ma'i skyes bu bsngags pa'am bsngags pa ma yin pa brjod pa dag gis rjes su chags pa dang khong khro ba med pa dang 'dra bar de bstan pa dang ma bstan pa dag gis 'phel ba dang yongs su 'grib pa med par gang gsungs pa yin no//bya dka' ba'i sbyor ba ni bya dka' ba rnam pa gsum nyid do/ /ched du dka' ba nyid ni rnam pa thams cad mkhyen pa nyid de/ de nyid kyi phyir gang dag de la sbyor bar 'dod pa de dag ni nam mkha' yongs su grol bar 'dod pa yin no//sbyor ba bya dka' ba nyid ni lam shes pa nyid de/ gang dag de la 'bad par 'dod pa de dag ni nam mkha' bar snang la 'degs par 'dod pa yin no/ /las bya dka' ba nyid ni thams cad shes pa nyid de gang dag de la rtsol bar 'dod pa de dag ni brtson 'grus kyi pha rol tu phyin pa thob pa nyid do//de ci'i phyir zhe na/ phyogs bcu'i 'jig rten gyi khams kyi de bzhin gshegs pa thams cad kyis sems can tshad med pa yongs su mya ngan las 'da' bar mdzad kyang sems can gyi khams la 'grib pa'am gang ba med do zhes gang gsungs pa yin no//'bras bu yod pa'i sbyor ba ni/ gang yang rung ba zhig la dge slong gcig ces ming du ma bstan pa'i rjes su mthun pa'i rtogs pa nye bar bkod pas 'khor gzhan gang yin pa dag gis kyang skal ba ji lta ba bzhin du rtogs pa thob par ston pas gang gsungs pa yin no//gzhan gyi rkyen gyis mi 'gro ba'i sbyor ba ni/ brgya byin gyis bsrung ba dang / bskyab par khas blangs pa ni/ sgyu ma dang / smig rgyu la sogs pa dang 'dra bar shes rab kyi pha rol tu phyin pa la gnas pa'i byang chub sems dpa' dang /rigs kyi bu'am rigs kyi bu mo srung ba la sogs pa byed par sems pa de ni bsams pa ltar mi 'grub cing dub pa'i skal ba can du 'gyur ro zhes gang gsungs pa yin no/ /rnam pa bdun du snang ba'i shes pa'i sbyor ba ni yongs su 'gyur ba dang /mnyan du tshogs pa dang / 'gal ba dang / rkyen dang / mi 'pho brten med pa dang / byed pa po ma yin par snang ba rnams kyis chos rnams rmi lam lta bu la sogs par dris pa thams cad shes pa la nyan thos la sogs pa'i dbang du byas nas dpe'i don 'thad par byas pas gang gsungs pa yin no//sbyor ba bshad zin to// //da ni mnyam pa nyid brjod par bya ba yin pas/ gzugs la sogs pa rlom med pa/ /rnam bzhi de yi mnyam pa nyid/ /ces gsungs pa yin no/ /ji ltar na rnam pa bzhi yin zhe na/gzugs rlom sems su mi byed/ gzugs kyis rlom sems su mi byed/ gzugs bdag gis zhes bya bar rlom sems su mi byed/ gzugs la rlom sems su mi byed ces gang gsungs pa dang / rnam pa thams cad mkhyen pa nyid kyi bar la yang de bzhin du brjod par bya ba yin no//da ni mthong ba'i lam brjod par bya ba yin pas na de'i phyir/ sangs rgyas kyi mthus lha'i rigs thams cad kyis phyogs bcu'i phyogs re re zhing sangs rgyas stong dang / 'phags pa byams pa la sogs pa bskal pa bzang po'i sangs rgyas rnam pa 'di lta bur chad pa dang lhag pa med par shes rab kyi pha rol tu phyin pa bstan pa rnams sems kyis mthong bar gyur pas gang gsungs pas ni mthong ba'i lam gyi skad cig ma bcu drug las gtogs pa skad cig ma gzhan med par shes par byed pa la dbang por dgod pa'i phyir yin no//de la 'das pa'i sangs rgyas ma brjod pa de ni de'i bstan pa mthar thug pa shes par bya ba'i don du yin no/ /ma 'ongs pa brjod pa ni ma 'ongs pa'i sems can rnams kyi don gyi dgos pa bstan par bya ba'i don du yin no/ / grangs stong gi nges pa ni 'jig rten gyi khams mi mjed du bskal pa bzang po grangs stong du grags pa nyid kyi thabs la mkhas pas gzhan sgrub pa dang dag pa med par shes par bya ba'i don du yin no/ /mthong ba'i lam gyi skad cig ma bcu drug gang yin zhe na/ sdug bsngal la sogs bden pa rnams //chos shes rjes su shes pa dang / /shes pa'i skad cig bdag nyid 'di/ /kun shes tshul la mthong ba'i lam/ /zhes bya ba gsungs pa yin no/ /de la sdug bsngal la chos shes pa'i bzod pa ni 'di yin te/ gzugs rtag ces bya ba dang mi rtag ces bya bar chos ston par mi 'gyur ro zhes bya ba nas brtsams te/rnam pa thams cad mkhyen pa nyid 'das zhes bya ba'am ma 'ongs zhes bya ba'am da ltar byung zhes bya bar chos ston par mi 'gyur ro zhes pa'i bar gnyen po dang mi mthun pa'i phyogs kyi rnam par rtog pa phyin ci log gi rnam pa can bkag pas gang gsungs pa yin no//sdug bsngal la chos shes pa ni/ gzugs shin tu rnam par dag go zhes shin tu rnam par dag pa'i chos ston par 'gyur ro zhes bya ba nas brtsams te/ rnam pa thams cad mkhyen pa nyid kyi bar du shin tu rnam par dag go zhes shin tu rnam par dag pa'i chos ston par 'gyur ro zhes ji skad du brjod pa'i rnam par rtog pa gnyis po med pa phyin ci ma log pa'i rnam par chos ston par rjes su gnang ba nyid kyis gang gsungs pa yin no//sdug bsngal la rjes su shes pa'i bzod pa ni/ gzugs la sogs pa nas rnam pa thams cad mkhyen pa nyid kyi bar yongs su dag pa'i phyir shes rab kyi pha rol tu phyin pa yongs su dag pa nyid du gang gsungs pa yin no//sdug bsngal la rjes su shes pa ni/ de ci'i phyir zhe na/ rab 'byor gzugs la skye ba med pa dang / 'gag pa med pa zhes bya ba nas brtsams te/rnam pa thams cad mkhyen pa nyid kyi bar la skye ba dang 'gag pa dang kun nas nyon mongs pa dang rnam par byang ba bkag pa'i yongs su dag pa nyid kyis gang gsungs pa yin no/ /kun 'byung la chos shes pa'i bzod pa ni/ bcom ldan 'das ji ltar na nam mkha' yongs su dag pa'i slad du shes rab kyi pha rol tu phyin pa yongs su dag pa lags zhes bya ba nas brtsams te/rnam pa thams cad mkhyen pa nyid kyi bar du ji skad du bshad pa'i rnam pa bkag pa'i yongs su dag pa ni/ yongs su dag pa yin pa nyid kyis gang gsungs pa yin no//kun 'byung la chos shes pa ni/ nam mkha' dang 'dra bar gzugs nas rnam pa thams cad mkhyen pa nyid kyi bar du gos pa med pa'i phyir 'di gos pa med pa'i rnam par gang gsungs pa yin no/ /kun 'byung la rjes su shes pa'i bzod pa ni nam mkha' dang 'dra bar gzugs nas rnam pa thams cad mkhyen pa nyid kyi bar du gzung du med pa'i rnam par gang gsungs pa yin no//kun 'byung la rjes su shes pa ni/ sgra brnyan gnyis kyi dpes nam mkha' dang 'dra bar gzugs nas rnam pa thams cad mkhyen pa nyid kyi bar du tha snyad med pa'i phyir de la tha snyad med pa'i rnam pa tha snyad kyi ngo bo bkag pa'i don gyis gang gsungs pa yin no//sgra gnyis dper brjod pa nyan pa po dang 'chad pa po dag gis 'dri ba dang lan 'debs pa'i tha snyad gnyis dang tshul bstun pa'i don du yin no/ /'gog pa la chos shes pa'i bzod pa ni/nam mkha' dang 'dra bar gzugs nas rnam pa thams cad mkhyen pa nyid kyi bar du brjod du med pa'i phyir de rab tu brjod pa'i rnam par rgyud gzhan la don de thob par byed pa bkag pas gang gsungs pa yin te/ gzhan la brjod pa ni rab tu brjod pa yin pas so//'gog pa la chos shes pa ni nam mkha' dang 'dra bar gzugs nas rnam pa thams cad mkhyen pa nyid kyi bar du dmigs su med pa'i phyir/ de dmigs su med pa'i rnam par gang gsungs pa yin no/ /'gog pa la rjes su shes pa'i bzod pa ni/ nam mkha' dang 'dra bar gzugs nas rnam pa thams cad mkhyen pa nyid kyi bar du shin tu rnam par dag pa nyid kyis skye ba dang 'gag pa med pa dang kun nas nyon mongs pa dang rnam par byang ba med pa'i phyir de shin tu rnam par dag pa'i rnam par gang gsungs pa yin no//'gog pa la rjes su shes pa ni/ de 'dzin pa dang / 'chang ba dang / klog pa dang / tshul bzhin du yid la byed pa de mig gi nad la sogs pa 'byung bar mi 'gyur ba dang / lha rnams kyang de'i phyi bzhin 'brang bar gyur pa dang / 'di ston pa der yang tshes brgyad dang /bcu bzhi dang / bco lnga dag la bstan pa la bsod nams mang po 'phel ba nyid kyis de dag tu lha rnams mchod pa dang rnam par lta ba nye bar gnas pa'i 'thad pa gang gsungs pa yin no/ /lam la chos shes pa'i bzod pa ni/ rab 'byor de la shes rab kyi pha rol tu phyin pa rin po che ni 'di yin te/zhes bya ba nas brtsams pas thams cad shes pa nyid kyi dbang du byas nas de ngan song thams cad rab tu zhi ba dang rnam par byang ba'i phyogs thams cad rab tu shes pa'i rgyu nyid yin pa'i phyir dga' ba rgyas par byed pas na rin po che yin pa nyid kyis gang gsungs pa yin no//lam la chos shes pa ni/ yang lam shes pa nyid kyi skabs kyis/ pha rol tu phyin pa rin po che de la ni chos gang yang skye ba'am/ 'gag pa'am/ kun nas nyon mongs pa'am/ rnam par byang ba'am/ zhes bya ba nas brtsams te/ dge ba'am/ mi dge ba'am / 'dus byas sam/ 'dus ma byas kyi chos gang yang dmigs su med do/ /de ci'i phyir zhe na/ chos de lta bu med pa'i phyir ro zhes chos thams cad la rnam par rtog pa med pas rnam par mi rtog pa'i dge ba ni rang bzhin gyis rin po che yin pa'i don gyis gang gsungs pa yin no//lam la rjes su shes pa'i bzod pa ni/ rab 'byor pha rol tu phyin pa rin po che la ni chos gang gis kyang gos pa med do zhes gang gsungs pa yin no / /chos thams cad kyi rnam pa dang / rtags dang / mtshan ma rab tu shes so / /rnam pa thams cad mkhyen pa nyid kyi dbang du byas nas chos thams cad rnam pa thams cad du stobs su zin kyang chos la sogs pa'i rnam par rtog pa dang ma 'brel pas ma gos pa'i rin po che'i don gyis gang gsungs pa yin no/ /lam la rjes su shes pa ni gal te rin po che rnam pa gsum gyi don de'ang rnam par mi shes zhes bya ba ni dngos po shes pas so//rnam par rtog par mi byed ces bya ba ni de'i rgyu mtshan gyi rnam par rtogs pas so/ /mi dmigs zhes bya ba ni gnyis su dmigs pas so/ /de ltar spyod na shes rab kyi pha rol tu phyin pa yin te thams cad shes pa nyid thob par 'gyur ro zhes gang gsungs pa yin no//mdo'i tshig le'ur byas pa bzhi yin te/ gzugs rtag ma yin mi rtag min/ /mtha' las 'das dang rnam dag dang / /ma skyes ma 'gag la sogs dang / /mkha' 'dra chags pa spangs pa dang //yongs su 'dzin las grol ba dang / /ngo bo nyid kyi brjod med dang / /gang phyir 'di don brjod pa yis/ /gzhan la sbyin du med pa dang / /dmigs pa med par byed pa dang / /shin tu rnam dag nad mi 'byung / /ngan song chad dang 'bras bu ni//mngon du bya la mi rtog nyid/ /mtshan ma dag dang ma 'brel dang / /dngos dang ming dang gnyis po la/ /shes pa skye ba med pa ni/ /kun shes nyid kyi skad cig ma/ /zhes bya ba gsungs pa yin no/ /de ltar 'di dang yang 'di dang / /yang 'di yin te rnam gsum mo//'dis ni gnas skabs gsum po dag /rdzogs par yongs su bstan pa yin/ /zhes bya ba'i 'di dang zhes bya ba la/ rab 'byor shes rab kyi pha rol tu phyin pa 'di ni chos gang yang thob par byed pa ma yin/ ston par byed pa ma yin zhes bya ba nas brtsams te/ 'das pa ma yin/ ma 'ongs pa ma yin/ da ltar byung ba ma yin zhes bya ba rnam pa'i tshig bcu dgus lugs las bzlog pa'i rim pa dang po shes pa nyid kyi skabs yongs su rdzogs par ston pa yin te/ de ni gzhi thams cad pa nyid kyi chos thams cad la zla dang ldan pa dang / bzlog [)]pa'i zla dang ldan pa'i rnam pa can gyi rnam par rtog pa bkag pa'i phyir ro/ /yang 'di dang zhes bya ba la/ rab 'byor de ltar shes rab kyi pha rol tu phyin pa khams gsum las 'da' bar byed pa ma yin/ thams cad mya ngan las 'das pa'i dbyings la gnas par byed pa ma yin/sbyin pa'i pha rol tu phyin pa sbyin par byed pa ma yin/ ser sna 'dor bar byed pa ma yin zhes bya ba nas rnam pa thams cad mkhyen pa nyid ster bar byed pa ma yin/ nyan thos dang rang sangs rgyas kyis 'dor bar byed pa ma yin no/ /zhes gang gsungs pa ni de kho na bzhin du gnyis pa lam shes pa nyid kyi skabs yongs su rdzogs par ston pa yin te/de ni 'khor ba dang mya ngan las 'das pas bsdus pa mi mthun pa dang gnyen po'i rnam par rtog pa dag gtan kun tu spyod pa med pa'i phyir ro/ /yang 'di yin te zhes bya ba la/rab 'byor shes rab kyi pha rol tu phyin pa ni sangs rgyas kyi chos rnams dang / so so'i skye bo'i chos rnams dang / nyan thos dang / rang sangs rgyas kyi chos rnams so sor ster bar byed pa ma yin/ 'dor bar byed pa ma yin/ 'dus byas kyi khams dang 'dus ma byas kyi khams ster bar byed pa ma yin/'dor bar byed pa ma yin no/ /de ci'i phyir zhe na/ rab 'byor de bzhin gshegs pa rnams byung yang rung ma byung yang rung ste chos kyi dbyings 'di gnas pa nyid dang / chos nges pa ni gnas pa yin te/ de bzhin gshegs pas mngon par rdzogs par sangs rgyas la mngon par rtogs so//mngon par rdzogs par sangs rgyas shing mngon par rtogs nas kyang gsungs par mdzad/ ston par mdzad/ rnam par 'grel par mdzad/ rnam par 'byed par mdzad/ gsal bar mdzad/ yang dag par 'chad par mdzad do zhes gang gsungs pa ni/de kho na bzhin du gsum pa rnam pa thams cad mkhyen pa nyid kyi skabs yongs su rdzogs par ston pa yin te/ rang dang gzhan gyi don gyis bsdus pa rnam pa thams cad rtogs pa dang bshad pa'i chos dag gi rgyu de yin par brjod pa'i phyir ro//de ltar na/ de ltar shes rab kyi pha rol tu phyin pa ston pa dang / 'chad pa dang / brjod pa dang / 'dogs pa dang / rnam par 'grel pa dang / rnam par 'byed pa dang / smos pa dang / gsal bar byed pa dang / yang dag par rab tu ston pa gang lags pa 'di ni shes rab kyi pha rol tu phyin pa yongs su dag par bstan pa lags so zhes bya ba bstan pa'i tshig rnams kyi don ni chos rnams kyi rang gi mtshan nyid dang /rab tu dbye ba'i mtshan nyid dang / ming gi tshogs bstan pa dang / tshig dang ngag rnam par gzhag pa dang / don de gzhan gyi rgyud la nye bar byed pa dang / gdul bya rnams chos 'di la mos par bya ba'i phyir don du nye bar byed pa dang / de dag nyid sbyin pa la sogs pa'i bsdu ba'i dngos po mngon par zhen par bya ba dang / brtson 'grus zhan pa rnams la bslab pa thams cad bsdus nas ston pa dang /brtson pa bar ma rnams la smos pa'i chos nyid gsal bar byed pa dang / brtson 'grus lhag pa rnams la chos mtha' dag yang dag par 'chad pa'i dbang du byas nas rim pa ji lta ba bzhin du brjod par bya'o/ /yang ci'i don gyis lam shes pa nyid bzhin du thams cad shes pa nyid la bsgom pa'i lam logs shig pa med ce na/nyan thos dang rang sangs rgyas kyi phun sum tshogs pa ni/ byang chub sems dpa'i shes pa dang mthong bas bltas nas 'da'o zhes gsungs pas na 'di ni gzhan gtsor byed pa'i phyir ro zhes bya bar dgongs pa yin no//gzhan yang rgyun tu zhugs pa nas rang sangs rgyas kyi bar gyi shes pa dang spong ba gang yin pa de ni mi skye ba'i chos la bzod pa yin no zhes gang gsungs pa yin no/ /bzod pa gang zhe na/ sdug bsngal la chos shes pa'i bzod pa'o/ /'di ga las shes she na/lam gzhan khyad par yod pa ma yin / rigs dang dbang po dang tshogs khyad zhugs par 'gyur ba'i phyir ro/ /byang chub sems dpa'i bzod pa'i byed par gzhan rnams kyis rtogs pa'i byed pa ma lus pa 'dus par 'gyur ba'i phyir/ de dag gi shes pa dang spangs pa gang yin pa de de'i bzod pa yin gyi/rtogs pa'i tshad 'di tsam ma yin no/ /zhes bya ba ni rnam grangs gzhan yin no / /de ltar byas na/ shes pas srid la mi gnas shing / /snying rjes zhi la mi gnas dang / /thabs ma yin pas ring ba dang //thabs kyis ring ba ma yin nyid/ /mi mthun gnyen po'i phyogs dag dang / /sbyor dang de yi mnyam nyid dang / /nyan thos la sogs mthong ba'i lam/ /de 'dra kun shes nyid du 'dod/ /ces gang gsungs pa de ni/ 'dir rjes su 'das pa'i 'brel pa yin par blta'o//shes rab kyi pha rol tu phyin pa'i man ngag gi bstan bcos mngon par rtogs pa'i rgyan las thams cad shes pa'i skabs spyod pa'i khyad par gyi le'u ste gsum pa'o/ / thams cad shes pa nyid bshad zin to// // da ni rnam pa kun mngon par rdzogs pa rtogs pa brjod par bya ba yin pas/gzhi shes pa yi bye brag rnams/ /rnam pa zhes bya mtshan nyid de/ /zhes bya ba gsungs so/ /dngos po la dmigs pa ni gzhi shes pa'o/ /bye brag ni mi mthun pa'i phyogs gang gi gnyen po'i mtshan nyid gang yin pa ste/dper na rtag par 'dzin pa la mi rtag pa la sogs pa bzhin no/ /gnyen po'i phyogs kyang thams cad mkhyen pa nyid gsum gyis bsdus pa yin pas/ kun mkhyen nyid ni rnam gsum phyir/ /de ni rnam pa gsum du 'dod/ /ces gsungs te/ rnam pa zhes bya ba'i tshig go//de la 'phags pa'i bden pa bzhi rten du byas te/ thams cad shes pa nyid gsum gyi skabs kyi bden pa gang la rnam pa ji snyed yod pa de ston pas re zhig thams cad shes pa nyid kyi dbang du mdzad nas/ med pa'i rnam pa nas bzung ste/ /mi g.yo ba yi rnam pa'i bar//bden pa so so la bzhi dang / /lam la de ni bco lngar bshad/ /ces gsungs pa yin no/ /de la sdug bsngal gyi bden pa'i rnam pa bzhi'i dbang du mdzad nas gsungs pa ni/ bcom ldan 'das 'di lta ste/ shes rab kyi pha rol tu phyin pa 'di ni ma mchis pa'i pha rol tu phyin pa'o//rab 'byor nam mkha' med pa'i phyir ro zhes bya ba ste/ mi rtog don ni don med don/ /zhes bya ba'i tshul gyis so/ /shes rab kyi pha rol tu phyin pa 'di ni mnyam pa nyid kyi pha rol tu phyin pa'o/ /chos thams cad mi dmigs pa mnyam pa nyid kyi phyir ro zhes bya ba ni sdug bsngal ba'i mi skye ba'i don zhes bya ba'i tshul gyis so//shes rab kyi pha rol tu phyin pa 'di ni dben pa'i pha rol tu phyin pa'o/ /mtha' las 'das pa stong pa nyid kyi phyir ro zhes bya ba ni stong pa'i don ni dngos po med pa'i don to zhes bya ba'i tshul gyis so//brdzi bar bya ba ma yin pa'i rnam pa nyid kyis chos mi dmigs pa'i phyir ro zhes bya ba ni bdag med pa'i rnam pa yin te/ de ni mu stegs thams cad dang thun mong ma yin pa'i phyir ro/ /kun 'byung gi bden pa'i rnam pa'i dbang du byas nas gsungs pa la/gzhi med pa'i rnam pas ming dang lus med pa'i phyir ro zhes bya ba ni rab tu bskyed pa'i don gyis gzhi ni rgyu la brjod do/ /de la ming ni gzugs can ma yin pa'i phung po bzhi'o/ /lus ni gzugs kyi phung po ste/ de gnyi ga'i rgyu 'di yin pa'i phyir ro//nam mkha'i rnam pas dbugs phyi nang du rgyu ba med pa'i phyir ro zhes bya ba ni/ kun 'byung gi rnam pas te/ 'dod chags la sogs pa kun 'byung ba ni sngon dang phyi ma'i skad cig ma lhan cig gnas pa med pa'i phyir dang / da ltar gyi'ang 'gags pas zin pa nyid kyis dbugs phyi nang du rgyu ba dag dang 'dra bar nam mkha' dang mtshungs pa'i chos nyid kyis mtshon pa'i phyir ro//brjod du med pa'i rnam pas rnam par rtog pa dang rnam par dpyod pas dmigs su med pa'i phyir ro zhes bya ba ni rab tu skye ba'i rnam pas te/ rtog pa dang rnam par dpyod pa ni las 'byung ba'i rgyu yin pa'i phyir ro//ming med pa'i rnam pas tshor ba la sogs pa'i phung po dmigs su med pa'i phyir ro zhes bya ba ni rkyen gyi rnam pa ste/ gtso cher tshor ba nyams su myong ba ni yang srid pa 'byung ba'i rkyen nyid yin pa'i phyir ro/ /'gog pa'i bden pa'i rnam pa'i dbang du mdzad nas gsungs pa ni/'gro ba med pa'i rnam pas/ chos thams cad 'gro ba med pa'i phyir ro zhes bya ba ni 'gog pa'i rnam pas te/ de ni lus kyi mngon sum du bya ba yin gyi/ song nas thob par bya ba ma yin te/ gang 'gags pa de ni gang du'ang song ba med pa'i phyir ro/ /mi 'phrogs pa'i rnam pas chos thams cad gzung du med pa'i phyir ro zhes bya ba ni zhi ba'i rnam pa ste/ yul gyi ngo bo ni gzung bar bya bar rtogs pa zhes bya ba'i tshul gyis so/ /mi zad pa'i rnam pas chos thams cad shin tu zad cing 'gags pa'i phyir ro zhes bya ba ni gya nom pa'i rnam pa ste/chos thams cad ni shin tu zad pa dang ldan pa ma yin te/ de'i rang bzhin ma yin pa'i phyir ro zhes bya ba'i tshul gyis so/ /skye ba med pa'i rnam pas chos thams cad skye ba med pa dang 'gag pa med pa'i phyir ro zhes bya ba ni nges par 'byung ba'i rnam pa ste/ji ltar yongs su brtags pa'i chos yod pa ma yin pa'i phyir su zhig skye ba 'am 'gag par 'gyur zhes pa'i tshul gyis so/ /lam gyi bden pa'i rnam pa ni bco lnga las bzhi ni nyon mongs pa'i sgrib pa'i gnyen por gyur pa yin la/lhag ma ni shes bya'i sgrib pa'i gnyen po yin no/ /gang gi phyir snga ma'i dbang du byas nas gsungs pa la/ byed pa po med pa'i rnam pas/ byed pa po mi dmigs pa'i phyir ro zhes bya ba ni lam gyi rnam pa ste/ de ni byed pa po ma yin pa nyid kyis byed pa po 'dzin pa'i gnyen po yin pa'i phyir ro//shes pa po med pa'i rnam pas/ shes pa po dmigs su med pa'i phyir ro/ /zhes bya ba ni rigs pa'i rnam pa ste/ ma lus par rtogs pa ni rigs pa ste/ lam ni shes pa po'i rnam par rtogs pa'i gnyen po yin pa'i phyir ro//'phro ba med pa'i rnam pas/ 'chi ba dang skye ba dmigs su med pa'i phyir ro zhes bya ba ni sgrub pa'i rnam pa ste/ lam ni dman pa dang khyad par du 'phags pa'i gnas skabs dag spong ba dang len pa'i gnyen po yin pa'i phyir te/ so sor rtogs pa ni sgrub pa yin no zhes bya ba'i tshul gyis so//'dul ba med pa'i rnam pas/ chos thams cad rang bzhin gyis gdul ba med pa'i phyir ro zhes bya ba ni nges par 'byin pa'i rnam pa ste/ chos thams cad rang bzhin gyis stong pa gang yin pa ni nyon mongs pa 'dul bar nges par 'byung ba ma yin pa'i phyir ro zhes bya bas so//shes bya'i sgrib pa'i gnyen po lam ni rnam pa gnyis te/ bsgom pa'i lam zag pa dang bcas pa dang / mthong ba'i lam zag pa med pa'o/ /gang gi phyir bsgom pa'i lam ni rnam pa lnga'i dbang du mdzad nas gsungs pa ni/rmi lam gyi rnam pas rmi lam mthong ba dmigs su med pa'i phyir ro/ /sgra brnyan gyi rnam pas sgra brnyan brjod pa dmigs su med pa'i phyir ro/ /mig yor gyi rnam pas gzugs brnyan dmigs su med pa'i phyir ro/ /smig rgyu'i rnam pas chu 'bab pa dmigs su med pa'i phyir ro//sgyu ma'i rnam pas mtshan ma dmigs su med pa'i phyir ro/ /zhes bya ba yin te/ de ltar go rims bzhin du chos thams cad ngo bo nyid med pa dang / ma skyes pa dang / ma 'gag pa dang / gzod ma nas zhi ba dang / rang bzhin gyis mya ngan las 'das pa zhes bya ba zag pa dang bcas pa'i bsgom pa'i lam gyi gnas skabs lnga po 'di dag rmi lam la sogs pa'i dpe dang tshul bstun pa yin no//shes bya'i sgrib pa'i gnyen po'i [(]mthang [,,]mthong [)]ba'i lam ni rnam par rtog pa drug spong bas rab tu phye ba yin no/ /rnam pa drug gang zhe na/kun nas nyon mongs pa'i rnam par rtog pa spong bas gang gsungs pa ni/ kun nas nyon mongs pa med pa'i rnam pas/ kun nas nyon mongs pa med pa dmigs su med pa'i phyir ro/ /zhes bya ba yin no/ /rnam par byang ba'i rnam par rtog pa spong bas gang gsungs pa ni rnam par byang ba med pa'i rnam pas nyon mongs pa'i sems can med pa'i phyir ro zhes bya ba yin no//nyon mongs pa'i bag chags kyi rnam par rtog pa spong bas gang gsungs pa ni/ gos pa med pa'i rnam pas nam mkha' dmigs pa'i phyir ro zhes bya ba yin no/ /gzugs la sogs pa'i 'du shes pa'i mtshan nyid can gyi spros pa yongs su spong bas gang gsungs pa ni/spros pa med pa'i rnam pas spros pa thams cad yang dag par bcom pa'i phyir ro/ /zhes bya ba yin no/ /rang gi rtogs pa la ro myong bar byed pa'i mtshan nyid can gyi rlom pa spong bas gang gsungs pa ni/rlom sems med pa'i rnam pas rlom sems thams cad yang dag par bcom pa'i phyir ro zhes bya ba yin no/ /yongs su nyams pa'i rnam par rtog pa spong bas gang gsungs pa ni/ mi g.yo ba'i rnam pas rab 'byor chos kyi dbyings gnas pa nyid kyi phyir ro zhes bya ba yin no//thams cad shes pa nyid kyi rnam pa bshad zin to// //lam shes pa'i rnam pa brjod par bya ste/ de la bden pa rnams kyi go rims ni don ji lta ba bzhin du blta bar bya'o/ /don ji lta bu zhe na/ kun nas nyon mongs pa dang rnam par byang ba'i phyogs kyi dbang du byas nas/kun 'byung dang lam gyi bden pa dag ni rgyu yin la/ sdug bsngal dang 'gog pa'i bden pa dag ni 'bras bu yin te/ gang gi phyir/ rgyu dang lam dang sdug bsngal dang / /'gog pa la ni go rims bzhin//de dag brgyad dang bdun dang ni/ /lnga dang bcu drug ces bsgrags so/ /zhes bya ba gsungs te/ rnam pa zhes bya ba ni dkyus ma yin no/ /de la rgyu ni 'dun pa dang / 'dod chags dang / dga' ba dang ldan pa sred pa yang 'byung ba can yin te/ gang gi phyir 'dun pa'i gnyen por gang gsungs pa ni/'dod chags dang bral ba'i rnam pas 'dod chags dmigs su med pa'i phyir ro zhes bya ba yin te/ byed 'dod pa'i dngos po'i bsam pa ni bsam pa yin pas na/ 'dun pa'i skabs su 'dod chags gtso bo yin pa'i phyir de med na cig shos kyang med par bstan to//'dod chags kyi gnyen por gang gsungs pa ni/ gnas med pa'i rnam pas chos thams cad rnam par rtog pa med pa'i phyir ro zhes bya ba yin te/ chos rnams la chags pa med pa nyid la dgongs nas 'dod chags kyi skabs su dngos su 'jug pa'i rgyu nyid yin pas 'dun pa gtso bo yin pa'i phyir de med na cig shos kyang med par bstan to//'di dag ni dngos po phan tshun rjes su byed pa yin te/ mtshungs par ldan pa yin pa'i phyir ro/ /sred pa'i gnyen por gang gsungs pa ni/ zhi ba'i rnam pas chos thams cad phyin ci ma log pa de bzhin du mngon par rdzogs par byang chub pa'i phyir ro//zhes bya ba yin te/ sred pa ni gtsor nye bar zhi ba yin pa zhes bya ba'i tshul gyis so/ /kun 'byung ba ni 'dod chags dang / zhe sdang dang / gti mug kun 'byung ba'i dbye bas rnam pa gsum yin no//de'i gnyen por gang gsungs pa ni/ 'dod chags med pa'i rnam pas 'dod chags dmigs su med pa'i phyir ro/ /zhe sdang med pa'i rnam pas zhe sdang yod pa ma yin pa'i phyir ro/ /gti mug med pa'i rnam pas mi shes pa'i mun pa thams cad sel ba'i phyir zhes gsungs pa yin no//rab tu skye ba ni kun tu rtog pa yin te/ de las 'dod chags la sogs pa 'byung ba'i phyir ro/ /de'i gnyen por gang gsungs pa ni/ nyon mongs pa med pa'i rnam pas yongs su rtog pa med pa'i phyir ro/ /zhes bya ba yin no//rkyen ni sems can du mngon par zhen pa 'jig tshogs su lta ba yin te/ don med pa thams cad kyi rkyen yin pa'i phyir ro/ / gnyen por gsungs pa ni sems can med pa'i rnam pas sems can dmigs su med pa'i phyir ro zhes bya ba ni / de ltar 'dod chags dang bral ba'i rnam pa nas brtsams te/sems can med pa'i rnam pa'i bar ni go rims bzhin du rgyu gang yin pa 'dun pa dang / 'dod chags dang / dga' ba dang / dun 'byung gang yin pa 'dod chags dang / zhe sdang dang / gti mug dang / rab tu skye pa gang yin pa kun tu rtog pa dang /rkyen gang yin pa sems can du mngon par zhen pa ste/ gsum dang / gsum dang / gcig dang / gcig ste/ rnam pa brgyad ni kun 'byung ba'i bden pa la brten par bshad pa yin no/ /lam gyi bden pa'i rnam pa bdun gyi dbang du mdzad nas gsungs pa ni/tshad med pa'i rnam pas chos thams cad kun nas ldang ba med pa'i phyir ro zhes bya ba ni lam gyi rnam pa yin te/ de ni ldog pa'i phyogs thob par byed pa yin pa nyid kyis na/ sems can tshad med pa'i go skabs 'byed pa nyid yin pa'i phyir ro//go skabs 'byed pa de ni 'khor ba dang mya ngan las 'das pa'i mtha' gnyis yod pa yin pas/ mtha' gnyis dang 'brel ba'i rnam pas 'khor ba dang mya ngan las 'das pa'i mtha' gnyis dmigs su med pa'i phyir ro zhes gang gsungs pa yin no/ /rigs ni tha mi dad pa'i rnam pas chos thams cad tha dad pa med pa'i phyir ro zhes gang gsungs pa yin no//tha dad pa med pa ni yang mchog tu 'dzin pa med pa'i rnam pas nyan thos dang rang sangs rgyas kyi sa las 'da' bar byed pa'i phyir ro zhes gang gsungs pa yin te/ bzlog na ni/ phyogs gcig par 'gyur ba'i phyir tha dad par 'gyur bas ma lus par gtogs pa'i rigs par mi 'gyur ro//sgrub pa ni rnam par mi rtog pa'i rnam pas rnam par rtog pa thams cad dmigs su med pa'i phyir ro zhes gsungs pa yin no/ /bya ba'i rnam par rtog pa med pa'i dbang du byas nas/rtogs par bya ba rtogs pa'i yul rtog par byed pas na sgrub pa yin pa zhes bya ba'i tshul gyis so/ /yang ji ltar na de la bya ba'i rnam par rtog pa med ce na/ gzhal du med pa'i rnam pas chos thams cad kyi tshad ma dmigs su med pa'i phyir ro zhes gsungs pa yin no//thob pa yongs su yang ba dang ma thob pa la dman pa dang mchog tu gyur pa rnam par rtog pa med pa sngon du 'gro ba'i nges par 'gyur ba ni/ chags pa med pa'i rnam pas chos thams cad nam mkha'i rang bzhin yin pa'i phyir ro zhes gang gsungs pa ste/ rtogs pa de dang de la nam mkha' ltar ma chags pa'i chos nyid nges par 'byin pa'i dbang du byas nas yin no//des na tshad med pa'i rnam pa nas brtsams te/ chags pa med pa'i bar 'di rnams ni go rims bzhin du sems can thams cad la go skabs 'byed par byed pa'i lam gang yin pa dang / ji ltar sems can thams cad la go skabs 'byed par byed pa dang / rigs pa gang yin pa dang / ji ltar rigs pa yin pa dang / sgrub pa gang yin pa dang / ji ltar sgrub pa yin pa dang / nges par 'byung ba gang yin pa ste/ de rnams kyi ngo bo nyid gnyis dang / gnyis dang /gnyis dang / gcig dang / gcig ste/ de ltar na lam gyi bden pa bstan pa rnam pa bdun du bshad pa yin no/ /sdug bsngal gyi bden pa'i rnam pa lnga'i dbang du mdzad nas gsungs pa yin / mi rtag pa'i rnam pas chos thams cad 'jig pa dang mi ldan pa'i phyir ro zhes bya ba yin te/'dus byas rnams ni 'jig pa'i ngo bo nyid yin pas ldan pa'i don med pa'i phyir ro/ /sdug bsngal gyi rnam pas chos thams cad lhag par chags pa med pa'i phyir ro zhes bya ba yin no/ /de rnams la ni bde bar phyin ci log pa'i mtshan ma med pa'i phyir ro//stong pa nyid kyi rnam pas chos thams cad mngon par zhen pa med pa'i phyir ro zhes bya ba ni rten par byed pa'i bdag dang rjes su 'brel pa'i dri tsam yang med ces bya ba'i tha tshig go/ /bdag med pa'i rnam pas chos thams cad mngon par zhen pa med pa'i phyir ro zhes bya ba ni de rnams ni rang nyid bdag ma yin pas so//zhes bya ba'i don to/ /bdag med pa de nyid ni mtshan nyid med pa'i rnam pas chos thams cad mtshan ma med pa'i phyir ro zhes gang gsungs pa yin no/ /de rnams ni 'gog pa'i mtshan nyid bdun du byas pa yin pas mi rtag pa la sogs pa gang dag yin pa rnam pa bzhi dang de rnams kyang gang gi ngo bo nyid yin pa ste/de dag ni sdug bsngal gyi bden pa la brten pa'i rnam pa lnga brjod pa yin no/ /'gog pa'i bden pa'i rnam pa bcu drug brjod par bya'o/ /de la 'gog pa lnga las gang gi phyir nang gi bdag nyid can la sogs pa'i dngos po'i dbye bas/dngos po 'gog pa rnam pa gsum gsungs pa ni/ nang stong pa nyid kyi rnam pas nang gi chos thams cad dmigs su med pa'i phyir ro/ /phyi stong pa nyid kyi rnam pas phyi'i chos dmigs su med pa'i phyir ro/ /phyi nang stong pa nyid kyi rnam pas phyi nang gi chos dmigs su med pa'i phyir ro zhes gsungs pa yin no//mngon par zhen pa rnam pa brgyad kyi gnyen por btags pa 'gog pa ni rnam pa brgyad do/ /de la stong pa nyid la mngon par zhen pa 'gog pa ni/ stong pa nyid stong pa nyid kyi rnam pas stong pa nyid stong pa nyid dmigs su med pa'i phyir ro zhes gang gsungs pa yin te/lta ba'i gnyen por ni stong pa nyid yin pa'i phyir ro/ /snod kyi 'jig rten gyi dbyibs la mngon par zhen pa 'gog pa ni/ chen po stong pa nyid kyi rnam pas chen po stong pa nyid dmigs su med pa'i phyir ro zhes gang gsungs pa yin te/'di'i dbyibs su bkod pa dngos po med pa'i phyir ro/ /don dam pa la mngon par zhen pa 'gog pa ni/ don dam pa stong pa nyid kyi rnam pas don dam pa stong pa nyid dmigs su med pa'i phyir ro zhes gang gsungs pa yin te/don dam par ni gnyen po yongs su grub pa med pa'i don gyis so/ /'dus byas la mngon par zhen pa 'gog pa ni/ 'dus byas stong pa nyid kyi rnam pas 'dus byas stong pa nyid dmigs su med pa'i phyir ro zhes gang gsungs pa ste / 'dus byas ni bzlog zla la ltos pa dang bcas pa yin pa'i phyir ro//'dus ma byas la mngon par zhen pa 'gog pa ni/ 'dus ma byas stong pa nyid kyi rnam pas 'dus ma byas stong pa nyid dmigs su med pa'i phyir zhes gang gsungs pa yin te/ 'dus ma byas la bzlog zla la ltos pa dang bcas pa yin pa'i phyir ro//rtag pa dang chad pa'i mtha' la mngon par zhen pa 'gog pa ni/ mtha' las 'das pa stong pa nyid kyi rnam pas mtha' las 'das pa stong pa nyid dmigs su med pa'i phyir ro zhes gang gsungs pa yin te/ chos nyid ro gcig pa nyid kyis na mtha' gnyis kyi rnam par dbye ba'i rgyu mtshan med pa'i phyir ro//thog ma dang tha ma dang 'dra bar 'khor bar mngon par zhen pa 'gog pa ni/ thog ma dang tha ma med pa stong pa nyid kyi rnam pas thog ma dang tha ma med pa stong pa nyid dmigs su med pa'i phyir ro zhes gang gsungs pa yin te/ thog ma dang tha ma med pa dang 'dra bar dbus kyang chos nyid kyi rang bzhin gyi rjes su skyes pa yin pa'i phyir ro/ /rtogs pa la mang du byed pa byang chub kyi phyogs kyi chos rnams la yongs su 'dor ba med pa'i mtshan nyid can dor ba med par mngon par zhen pa de 'gog pa yang dor ba med pa stong pa nyid kyi rnam pas/dor ba med pa stong pa nyid dmigs su med pa'i phyir ro zhes gang gsungs pa yin te/ de rnams ni gzings dang 'dra ba nyid kyis spang bar bya ba'i phyir ro/ /byed pa po'i 'gog pa ni/ rang bzhin stong pa nyid kyi rnam pas/ 'dus byas dang 'dus ma byas kyi chos dmigs su med pa'i phyir ro zhes gang gsungs pa yin te/rang bzhin ni 'phags pa thams cad kyis ma mdzad pa'i phyir ro/ /yul du 'khrul pa 'gog pa ni rnam pa gsum las btags par 'khrul pa 'gog pa ni chos thams cad stong pa nyid kyi rnam pas chos rnams dmigs su med pa'i phyir ro zhes gang gsungs pa yin te/chos thams cad 'khrul pa tsam yin pa'i phyir ro/ /mtshan nyid 'khrul pa 'gog pa ni rang gi mtshan nyid stong pa nyid kyi rnam pas rang gi mtshan nyid dben pa'i phyir ro zhes gang gsungs pa yin te/ gzugs ni gzugs su rung ba'i mtshan nyid kyis dben pa yin te/ de ni 'dus pa'i chos yin pa'i phyir ro/ /dus su 'khrul pa 'gog pa yang mi dmigs pa stong pa nyid kyi rnam pas dus gsum la dus gsum po dmigs su med pa'i phyir ro zhes gang gsungs pa yin te/dus zhes bya ba 'di ni 'dus byas kyi tshig bla dgas yin pa'i phyir ro/ /lnga pa rang gi ngo bo nyid 'gog pa ni/ dngos po med pa'i ngo bo nyid kyi rnam pas rab 'byor dngos po med pa'i ngo bo nyid dmigs su med pa'i phyir ro zhes gang gsungs pa yin te/ dngos po dang dngos po med pa dang rang gi ngo bo nyid dang gzhan gyi dngos po rnams shin tu ma grub pa yin pa'i phyir ro//'di dag ni 'gog pa'i rnam pa dang / zhi ba'i rnam pa dang / gya nom pa'i rnam pa dang / nges par 'byung ba'i rnam pa'i dbang du byas nas/ 'gog pa gang yin pa nang la sogs pa'i dngos po dang /ji ltar zhi ba yin pa mngon par zhen pa rnam pa brgyad dang bral bas dang / ji ltar gya nom pa yin par bzhin gyis dang / ji ltar nges par 'byung ba 'khrul pa rnam pa gsum bsal bas dang / nges par 'byung ba gang yin pa dngos po med pa'i ngo bo nyid de/de ltar rim pa ji lta ba bzhin du gsum dang / brgyad dang / gcig dang / gsum dang gcig ste/ 'gog pa'i bden pa la brten pa'i rnam pa bcu drug bshad par gyur pa yin te / lam shes pa nyid kyi rnam pa bshad zin to// //rnam pa thams cad mkhyen pa'i rnam pa brjod par bya'o/ /de la 'phags pa'i gang zag thams cad kyi dbang du mdzad nas thams cad mkhyen pa rnam pa gsum gyis rnam pa bsdus par 'gyur ba yin te/ de bas na/ kun mkhyen nyid gsum bye brag gi//lam gyi bden pa dang mthun pa/ / dran pa nyer gzhag nas gzung ste/ /tha ma sangs rgyas rnam pa'i bar/ /slob ma byang chub sems dpa' dang / /sangs rgyas rnams la rim bzhin te/ /sum cu bdun dang sum cu bzhi/ /sum cu rtsa dgu dag tu bzhed/ /ces bya ba gsungs pa yin no//ji ltar zhe na/ lam gyi bden pa'i rjes mthun par/ /kun mkhyen gsum du phye bas na/ /zhes bya ba gsungs so/ /de la lam gyi bden pa dang rjes su mthun pa ni 'di yin no/ /lam ni gsum ste/ thams cad shes pa nyid kyi lam dang / lam shes pa nyid kyi lam dang / rnam pa thams cad mkhyen pa nyid kyi lam dang / de la thams cad shes pa nyid kyi lam rnam pa bdun las dngos po yongs su rtog pa'i lam dran pa nye bar gzhag pa ni/ dran pa nye bar gzhag pa'i rnam pas/ lus dang / tshor ba dang / sems dang / chos dmigs su med pa'i phyir ro zhes gang gsungs pa yin te/ des lus la sogs pa'i dngos po rnam pa bzhi yongs su rtog pa'i phyir ro/ /rtsol ba'i lam yang dag par spong ba bzhi ni/ yang dag par spong ba'i rnam pas dge ba dang / mi dge ba'i chos dmigs su med pa'i phyir ro zhes gang gsungs pa yin te/de ltar dngos po yongs su brtags nas des brtson 'grus rtsom pa'i phyir ro/ /ting nge 'dzin yongs su sbyong ba'i lam rdzu 'phrul gyi rkang pa ni/ rdzu 'phrul gyi rkang pa'i rnam pas 'dun pa yang brtson 'grus dang sems dang dpyod pa dmigs su med pa'i phyir ro zhes gang gsungs pa yin te/de ltar sgrib pa yongs su sbyangs pa ni 'dun pa la sogs pa'i sgo nas des sems las su rung ba nyid rdzogs par byed pa'i phyir ro/ /mngon par rtogs par sbyor bar byed pa'i lam dbang po rnams ni/dbang po'i rnam pas dad pa la sogs pa dmigs su med pa'i phyir ro zhes bya ba gang gsungs pa yin te/ de ltar ting nge 'dzin yongs su sbyang ba byas pa na des 'phags pa'i lam yang dag par 'grub pa la bdag por gyur pa dro bar gyur pa dang rtse mo la sbyor ba'i phyir ro//mngon par rtogs pa dang / 'brel ba'i lam stobs rnams ni/ stobs kyi rnam pas stobs lnga dmigs su med pa'i phyir ro zhes gang gsungs pa yin te/ de ltar dbang thob pa ni des de ma thag tu bden pa rtogs par bya ba'i phyir ma dad pa la sogs pa mi mthun pa'i phyogs zil gyis gnon pa bzod pa dang chos kyi mchog la rab tu sbyor ba'i phyir ro//mngon par rtogs pa'i lam byang chub kyi yan lag rnams ni/ byang chub kyi yan lag gi rnam pas byang chub kyi yan lag bdun dmigs su med pa'i phyir ro zhes gang gsungs pa yin te/des dang por de kho na so sor rtog pa'i phyir ro/ /rnam par dag par nges par 'byin pa'i 'phags pa'i lam yan lag brgyad ni/ lam gyi rnam pas rab 'byor 'phags pa'i lam yan lag brgyad dmigs su med pa'i phyir ro zhes gang gsungs pa yin te/ de'i gong du des bsgoms pas spang bar bya ba'i nyon mongs pa rnam par dag par bya ba'i phyir nges par 'byung ba'i phyir ro//de nyid kyi phyir byang chub kyi phyogs kyi chos 'di rnams kyi go rims ni 'di yin no/ /de de ltar byas na dngos po yongs su rtog pa'i lam dang / rtsol ba'i lam dang / ting nge 'dzin yongs su sbyong ba'i lam dang / mngon par rtogs par sbyor ba'i lam dang / mngon par rtogs pa dang 'brel pa'i lam dang / mngon par rtogs pa'i lam dang / rnam par dag par nges par 'byin pa'i lam gyi dbang du mdzad nas go rims ji lta ba bzhin du/bzhi dang bzhi dang lnga dang lnga dang bdun dang brgyad de/ thams cad shes pa nyid la brten pa'i rnam pa sum cu rtsa bdun du bshad pa yin no/ /de la lam shes pa nyid kyi lam rnam pa drug las gnyen po'i lam rnam pa gsum ste/ lta bas byas pa'i gnyen po'i stong pa nyid ni/stong pa nyid kyi rnam pas lta bas byas pa dmigs su med pa'i phyir ro zhes gang gsungs pa yin no/ /lta ba'i rgyu mtshan gyi rnam par rtog pa'i gnyen po mtshan ma med pa ni/ mtshan ma med pa'i rnam pas rtog pa dmigs su med pa'i phyir ro zhes gang gsungs pa yin no//khams gsum pa la smon pa'i gnyen po smon pa med pa ni smon pa med pa'i rnam pas bsgom lam dmigs su med pa'i phyir ro zhes gang gsungs pa yin no/ /de la stong pa dang bdag med pa'i rnam pa gnyis kyis rnam par thar pa'i sgo stong pa nyid do//mi rtag pa dang sdug bsngal ba'i rnam pa gnyis dang / kun 'byung gi bden pa'i rnam pa bzhi po rnams kyis ni rnam par thar pa'i sgo smon pa med pa'o/ /'gog pa dang lam gyi rnam pa rnams kyis ni rnam par thar pa'i sgo mtshan ma med pa yin te/ mtshan ma med pa gang yin pa 'gog pa dang /mtshan ma'i rnam par rtog pa gang gis bsal ba ni lam yin pa'i phyir ro/ /mtshan med zhi ba'i rnam pa yis/ /zhes gang gsungs pa ni/ dngos po'i mtshan ma dang rjes su 'brel pa nyan thos kyi lam gyi dbang du mdzad pa yin pa'i phyir de dang 'di la 'gal ba med do//sprul pa'i lam rnam pa gnyis las gzugs kyi 'du shes rnam par ma bshig pa ni bdag nyid so sor bsam gtan nam gzugs med pa'i snyoms par 'jug pa la brten nas/ gzugs kyi 'du shes mngon du byed pa ste/ gang gis gzugs can gzugs kha dog bzang po dang kha dog ngan pa rnams la zhes bshad pa'o//gzugs kyi 'du shes rnam par bshig pa ni bdag nyid so sor de bzhin du phyi rol gyi gzugs kyi 'du shes mngon du byed pa ste/ gang gis nang gzugs med par 'du shes shing phyi rol gyi gzugs rnams la blta'o zhes gsungs pa yin te/'di dag ni sprul pa'i sgrib pa'i gnyen por gyur pa'i rnam par thar pa gnyis yin par shes par bya'o/ /sprul pa la kun nas nyon mongs pa ni rnam pa gnyis te/ sdug pa'i gzugs sprul pa la 'bad pa dang /mi sdug pa'i gzugs sprul pa mi mthun pa'o/ /de'i gnyen por sdug pa'i rnam par thar pa lus kyi mngon sum du byas nas rdzogs par byas te gnas so zhes gsungs pa yin te/ bdag gnyis so sor sdug pa'i gzugs rnams la phan tshun ltos pa'i 'du shes dang phan tshun 'brel pa'i 'du shes la brten nas phan tshun ro gcig pa'i 'du shes thob pas ji ltar 'dod par gzugs la lhag par mos pa la dbang thob pa'i phyir ro//mthong ba'i chos la bde bar gnas pa'i lam rnam pa gnyis las thar pa dang mthun par gnas pa'i lam ni gzugs med pa'i snyoms par 'jug pa rnam pa bzhi'o//zhi bar gnas pa'i lam ni 'du shes dang / tshor ba 'gog pa zhes bya'o/ /gzhan gyi don gyi nges par 'byung ba'i dbang du byas nas gsum dang / gzhan gyi don gyi ched du bya ba can rang gi don mthong ba'i chos la bde bar gnas pa'i dbang du byas nas lnga ste brgyad du 'gyur ro//des na 'di rnam par thar pa brgyad kyi rnam pas rnam par thar pa brgyad dmigs su med pa'i phyir ro zhes gang gsungs pa yin no/ /'jig rten las 'das pa'i lam mthar gyis gnas pa'i snyoms par 'jug pa dgu ni mthar gyis gnas pa'i snyoms par 'jug pa dgu'i rnam pas/mthar gyis gnas pa'i snyoms par 'jug pa dgu dmigs su med pa'i phyir ro zhes gang gsungs pa yin te/ 'gog pa'i snyoms par 'jug pa dgu ni 'jig rten las 'das pa'i lam gyis thob pa'i phyir ro//spong ba'i bar chad med pa'i lam bden pa rnam pa bzhi la brten pa ni bden pa bzhi'i rnam pas/ kun 'byung dang 'gog pa dmigs su med pa'i phyir ro zhes gang gsungs pa yin te/ kun 'byung ni 'dir nyon mongs pa kun 'byung ba'o//'gog pa ni de dang bral ba'o/ /sangs rgyas kyi lam du gyur pa'i lam pha rol tu phyin pa bcu ni/ bcom ldan 'das 'di lta ste/ shes rab kyi pha rol tu phyin pa'o zhes bya ba nas/ bcom ldan 'das 'di lta ste/ shes rab kyi pha rol tu phyin pa 'di ni ye shes kyi pha rol tu phyin pa'o//zhes bya ba'i bar dang / rab 'byor ser sna la sogs pa pha rol tu phyin pa'i mi mthun pa'i phyogs rnam pa bcu dmigs su med pa'i phyir ro zhes gang gsungs pa yin te/ pha rol tu phyin pa yongs su rdzogs nas dus phyis mi mthun pa'i phyogs kun tu spyod par mi 'gyur ba'i phyir ro//'di rnams gnyen po'i lam dang / sprul pa'i lam dang / mthong ba'i chos la bde bar gnas pa'i lam dang / 'jig rten las 'das pa'i lam dang / spong ba'i lam dang / sangs rgyas kyi lam gyi dbang du mdzad nas go rims bzhin du gsum dang gsum dang lnga dang dgu dang bzhi dang bcu ste/lam shes pa'i lam la brten pa'i rnam pa sum cu rtsa bzhi gsungs pa ni yin no/ /de la rnam pa thams cad mkhyen pa nyid kyi lam ni shin tu phul du byung ba yin pa'i phyir gcig pu kho na yin mod kyi/'on kyang stobs dang mi 'jigs pa la sogs pa'i dbye bas lam 'di'i khyad par gyi mtshan nyid thun mong ma yin pa'i rnam pas dbye ba brjod par bya ba yin pas/ stobs bcu'i rnam pas chos thams cad dmigs su med pa'i phyir ro zhes gsungs te/de'i gnas skabs su chos rnams rnam pa med pa'i chos nyid thob pa yin pa'i phyir ro/ /mi 'jigs pa'i rnam pas lam gyi rnam pa shes pa nyid kyi ye shes zhum pa'i phyir ro zhes bya ba ni lam dang mngon par shes pa thams cad thob pa'i phyir ro/ /so so yang dag par rig pa bzhi'i rnam pas thams cad la ye shes chags pa med pa thogs pa med pa'i phyir ro zhes bya ba ni rnam grangs dang /chos kyi mtshan nyid dang / yul gyi skad rnams dang / chos rab tu dbye ba'i yul la go rims bzhin du yang dag pa'i ye shes kyi rtogs pa'i ro myong bar mi byed pas na chags pa med pa'i phyir dang shes bya'i sgrib pa spangs pas thogs pa med pa'i phyir ro zhes bya ba'i tha tshig go//sangs rgyas kyi chos ma 'dres pa'i rnam pas/ nyan thos dang rang sangs rgyas kyi chos thams cad las yang dag par 'das pa'i phyir ro zhes bya ba chos ma 'dres pa de dang de mi mthun pa'i chos gang dang gang yin pa de dang de las yang dag par 'da' ba'i dbang du mdzad pa yin te/mdo las ji skad du/ dge slong dgra bcom pa zag pa zad pa grong du bsod snyoms la rgyu ba na/ res 'ga' glang po che gtum po'am rta mi srun pa'am/ ba lang mi srun pa dang /khyi mi srun pa dang lhan cig 'gro ba dang / tshang tshing dang tsher ma'i 'obs su 'gro ba'am/ sbrul nag po rkang pa gnyis kyis brdzis pa'am/ de lta bu'i tshul gyis gang na bud med kyi tshogs kyis rigs pa ma yin pas bskyed pas mgron du bos pas khyim du 'jug pa dang /dgon pa'am yang na lam drang po nas lam gol bar 'gro ba'am/ rkun po'am chom po pa dang / seng ge dang / stag dang / gzhan gyi chung ma dang lhan cig 'gro ba ste/ dgra bcom pa'i 'khrul pa de lta bu'i cha dang mthun pa de dag ni de bzhin gshegs pa la rnam pa thams cad kyi thams cad du mi mnga'o//gzhan yang dgra bcom pa res 'ga' dgon par nags khrod stug por rgyu ba na lam las nyams nas khang pa stong par sgra 'byin cing dbyangs rjes su sgrogs la sgra chen pos 'bod pa'am/ bag chags kyi nyes pa la brten nas nyon mongs pa'i rta gad chen po dgod pa dang /so 'tshigs byed pa'am/ steg pa'i tshul yang nye bar ston par byed de/ de lta bu'i cha dang mthun par dgra bcom pa'i ca co de dag ni de bzhin gshegs pa la rnam pa thams cad kyi thams cad du mi mnga'o/ / de bzhin gshegs pa la ni dran pa nyams pa mi mnga' ste/ nyon mongs pa ma yin pa'i thugs kyi mdzad pa dang / gsungs pa rjes su dran pa'i phyir ro/ /gzhan yang dgra bcom pa ni phung po la mtha' gcig tu mi mthun pa'i 'du shes su 'gyur zhing phung po med pa'i mya ngan las 'das pa la ni zhi ba'i 'du shes su 'gyur gyi/de bzhin gshegs pa la ni tha dad pa'i 'du shes mi mnga' ste/ mchog tu btang snyoms pas bzhugs pa'i phyir ro/ /gzhan yang dgra bcom pa ni snyoms par zhugs pa na mnyam par bzhag pa yin gyi ldang ba ni mnyam par gzhag pa ma yin no//de bzhin gshegs pa la ni gnas skabs thams cad du thugs mnyam par ma gzhag pa mi mnga'o/ gzhan yang dgra bcom pa ni so sor ma brtags par sems can gyi don bya ba la btang snyoms su byed pa yin gyi/ de bzhin gshegs pa la 'di lta bu'i cha dang mthun pa so sor ma brtags pa'i btang snyoms mi mnga'o//gzhan yang dgra bcom pa ni shes bya'i sgrib pa rnam par dag pa las brtsams te ma thob pa'i yongs su nyams pas 'dun pa las kyang nyams shing / brtson 'grus dang / dran pa dang / ting nge 'dzin dang / shes rab dang / rnam par grol ba las nyams pa yin gyi/ nyams pa'i rnam pa 'di drug de bzhin gshegs pa la mi mnga'o/ /gzhan yang dgra bcom pa ni lan 'ga' lus kyi las dge ba la 'jug la/ lan 'ga' ni lung du ma bstan pa la'o/ / ngag dang yid kyi las la yang de bzhin no/ /de bzhin gshegs pa la ni las gsum char la yang ye shes sngon du 'gro ba nyid dang ye shes rjes su 'gro ba nyid kyis lung du ma bstan pa'i las mi mnga'o/ /de la ye shes kyi kun nas bslang ba yin pa'i phyir ye shes sngon du 'gro ba'o//ye shes dang lhan cig spyod pa'i phyir rjes su 'brang ba'o/ /gzhan yang dgra bcom pa ni gang gis 'di'i ye shes kyi mthong ba chags pa med par 'gyur ba/ dus gsum pa'i dngos po btsal ba tsam las rtogs par mi 'gyur la/ gang gis 'di'i ye shes kyi mthong ba thogs pa med par 'gyur ba thams cad rtogs pa'ang ma yin no//de bzhin gshegs pa ni btsal ba tsam gyis dus gsum pa'i shes bya'i dngos po thams cad rtogs pa yin te/ de bas na bco brgyad po 'di dag la sangs rgyas kyi chos ma 'dres pa zhes gsungs te/ de bzhin nyid kyi rnam pas/ sangs rgyas thams cad kyis gsungs pa'i de bzhin nyid kyi phyir ro zhes bya ba ni sangs rgyas thams cad kyis gsungs pa'i mtshan nyid kyi don ni 'gyur ba med pa'i phyir ro/ /rang byung gi rnam pas chos thams cad la dbang bsgyur ba'i phyir ro zhes bya ba ni de'i thugs su chud pa gzhan gyi rkyen las byung ba ma yin pa'i phyir ro//sangs rgyas nyid kyi rnam pa ni/ /bcom ldan 'das shes rab kyi pha rol tu phyin pa 'di ni sangs rgyas kyi pha rol tu phyin pa'o/ /rab 'byor thams cad kyi rnam pa thams cad mngon par rdzogs par sangs rgyas pa'i phyir ro zhes gang gsungs pa yin te/de mngon par rdzogs par sangs rgyas pa ni sangs rgyas nyid yin pa'i phyir ro/ /de de ltar byas pas stobs la sogs pa rnams kyis rnam pa rnams ji ltar rab tu dbye ba dang / 'di rnams kyi ngo bo nyid gang yin pa de bzhin nyid dang / chos de rnams la mnga' bsgyur ba gang yin pa rang byung dang / chos thams cad kyi rnam pa thams cad mngon par rdzogs par byang chub pa gang gi don du ste/ de ltar na go rims bzhin du bcu dang bzhi dang bzhi dang bco brgyad dang gcig dang gcig dang gcig ste/ rnam pa thams cad mkhyen pa'i lam la brten pa'i rnam pa sum cu rtsa dgur bshad pa ni yin no//de dag thams cad gcig tu bsdus na rnam pa brgya bdun cu rtsa gsum du 'gyur ro/ /bcu drug las gzhan dri med pa'i/ /rnam pa gzhan med ces gang gsungs pa de ni nyon mongs pa'i sgrib pa tsam gyi gnyen po'i rnam pa la dgongs pa yin pas na de dang 'di la 'gal ba med do//rnam pa zhes bya ba 'di chos gang zhig yin zhe na/ gzhi shes pa yi bye brag rnams/ /rnam pa zhes bya mtshan nyid de / /zhes bya ba dang po rtsom pa nyid na mtshan nyid brjod zin ma yin nam/ dngos por/ rnam par gnas pa'i dmigs pa yang / /dmigs pa chos rnams thams cad de/ /de yang dge la sogs pa yin/ /'jig rten pa yi rtog pa dang / /zhes bya ba la sogs pas brjod zin pa des na 'dir rnam pa gzhi med par 'gyur ba'i skyon yang 'jug par mi 'gyur ro//de la thams cad shes pa nyid kyi rnam pa ni nyan thos dang byang chub sems dpa'i dbye bas zag pa med pa dang zag pa dang bcas pa'o/ /lam gyi rnam pa shes pa nyid kyi rnam pa ni rnam grangs kyi zag pa dang bcas pas zag pa dang bcas pa yin te/byang chub sems dpa' rnams ni nyon mongs pa shin tu yangs pa ma yin pa'i phyir ro/ /rnam pa thams cad mkhyen pa'i rnam pa ni zag pa med pa kho na yin te/ yang dag par rdzogs pa'i sangs rgyas ni chos thams cad rnam pa thams cad mkhyen pa yin pa'i phyir ro/ / rnam pa rnams bshad zin to// //da ni sbyor ba brjod par bya ste/ de la re zhig sbyor ba'i rten sbyor ba po brjod nas de'i 'og tu 'di brjod par bya'o/ /de la sbyor ba po na rnam pa bzhi ste/ gang zhe na/ sangs rgyas rnams la bkur sti byas/ /de la dge ba'i rtsa ba bskrun/ dge ba'i bshes kyi mgon bcas pa/ /'di mnyan pa yi snod yin no/ /zhes gsungs pa ji skad du/ sngon gyi rgyal ba la bsnyen bkur byas pa dang / de bzhin gshegs pa la dge ba'i rtsa ba bskyed pa dang dge ba'i bshes gnyen gyis yongs su bzung ba rnams ni shes rab kyi pha rol tu phyin pa nyan pa'i snod yin no zhes gsungs pa bzhin no/len pa dang / 'dzin pa dang / klog pa dang / kun chub par byed pa dang / tshul bzhin du yid la byed pa dang / de la mi dad pa la sogs pa'i sbyor ba'i rten gyi dbang du byas nas gsungs pa ni/ sangs rgyas brten dang kun 'dri dang / /sbyin dang tshul khrims sogs spyod pa/ len dang 'dzin la sogs pa yi/ /snod du dam pa rnams bzhed do/ /zhes bya ba ste/ sangs rgyas mang po la bsnyen bkur byas pa dang / yongs su zhu ba byas pa dang / pha rol tu phyin pa drug gi spyod pa dang ldan pa ni len pa po la sogs pa'i snod nyid du gang gsungs pa yin no//ji skad du gsungs pa'i rgyu las bzlog pa mi mos pa dang yong bar byed pa'i rgyu ni/ btsun pa shA ri'i bu shes rab kyi pha rol tu phyin pa 'di ni shin tu zab po zhes gang gsungs pa yin te/ de la zab pa ni mos pa tsam med pa'i rgyu yin pa nyid dang / de yong ba ni sems can la log par byed pa'i nyes pa'i rgyu nyid du shes par byed pa'i don gyis so/ /rnam pa thams cad mkhyen pa nyid dang / shes rab kyi pha rol tu phyin pa dag gis phan tshun nges par skyes pa dang rab tu phye ba dag gis ni thams cad shes pa nyid las 'da' bar 'dod pa dang /lam shes pa nyid la gnas par 'dod pa dang / rnam pa thams cad mkhyen pa nyid bskyed par 'dod pas rnam pa thams cad du de la sbyor ba sgrub par nye bar bstan pas sbyor ba bstan pa nye bar dgod pa'i don du yin no//de la rnam pa thams cad mkhyen pa nyid ni shes rab kyi pha rol tu phyin pa las nges par skyes pa yin te/ de las mngon par grub pa'i phyir ro/ /shes rab kyi pha rol tu phyin pa yang rnam pa thams cad mkhyen pa nyid kyis rab tu phye ba yin te/ de las de'i rgyu'i dngos po gsal ba'i phyir ro//de nyid kyi phyir bdag nyid ji lta ba bzhin du de dag nges par skyes pa dang rab tu phye bar smos pa yin no/ /nyan pa po'i rnam par g.yeng ba'i nyes pa dang / shes rab kyi nyes pa dang / 'dun pa zhan pa'i nyes pa bsal ba'i phyir legs par rab tu nyon la yid la zung shig ces pa gsungs pa yin no//sbyor ba yang rnam pa nyi shur 'gyur te/ gang gi phyir/ gzugs la sogs pa mi gnas phyir/ /de la sbyor ba bkag pa'i phyir/ /de yi de bzhin nyid zab phyir/ /de rnams gting dpag dka' ba'i phyir//de dag tshad ni med phyir dang / /tshegs chen yun ring rtogs pa'i phyir/ /lung bstan phyir mi ldog nyid dang / /nges 'byung bar chad med bcas dang / /byang chub nye dang myur ba dang / /gzhan don 'phel med 'grib med phyir/ /chos dang chos min sogs mi mthong //gzugs sogs bsam mi khyab mi mthong / /gzugs sogs de yi mtshan ma dang / /de yi ngo bor rnam mi rtog /'bras bu rin chen sbyin byed dang / /de ni dag pa mtshams dang bcas/ /zhes bya ba gsungs te sbyor ba zhes bya ba'i tha tshig go//de la gzugs la sogs pa la mi gnas pa'i sbyor ba ni gang gi tshe gzugs la mi gnas pa de'i tshe gzugs la sbyor bar byed pa yin no/ /zhes bya ba nas brtsams te sangs rgyas kyi chos ma 'dres pa bco brgyad kyi bar la gnas pa bkag pas de la sbyor bar byed pa rjes su gnas pa dang /de ci'i phyir zhe na/ gang la gnas par bya ba dang gang la sbyar bar bya ba de lta bu'i gzugs la sogs pa mi dmigs so zhes bya ba'i bar du gang gsungs pa yin no/ /mi sbyor ba nyid sbyor ba yin pa ni/ yang gzugs la sbyor bar mi byed de/ gang gi tshe gzugs la mi sbyor ba de'i tshe gzugs la sbyor bar byed pa yin no zhes bya ba nas rnam pa thams cad mkhyen pa nyid la mi sbyor ba de'i tshe de la sbyor bar byed pa yin no zhes bya ba dang /de ci'i phyir zhe na/ gzugs la sogs pa'i sngon gyi mtha' mi dmigs so zhes gang gsungs pa yin no//zab pa'i sbyor ba ni gzugs la sogs pa'i de bzhin nyid zab pa nyid kyi gnas pa mi dmigs pa'i don gyis thams cad shes pa nyid kyi skabs kyi shes rab kyi pha rol tu phyin pa zab pa nyid du gang gsungs pa yin no/ /gting dpag dka' ba'i sbyor ba ni gzugs la sogs pa gting dpag dka' ba nyid kyi rang bzhin gyis rnyog pa med pa'i don gyis lam shes pa nyid kyi skabs kyis gting dpag dka' ba nyid du gang gsungs pa yin no//tshad med pa'i sbyor ba ni gzugs la sogs pa tshad med pa nyid kyis mtha' dmigs su med pa'i don gyis rnam pa thams cad mkhyen pa nyid kyi skabs kyi de tshad med pa nyid du gang gsungs pa yin no//de'i 'ang chung ngu dang 'bring dang chen pos go rims bzhin du sbyor ba rnam pa gsum yin no zhes gsungs pa ni/ gal te gzugs zab po zhes bya ba dang / gzugs gting dpag dka'o zhes bya ba dang / gzugs tshad med do zhes bya bar mi spyod na/shes rab kyi pha rol tu phyin pa la spyod do zhes bya ba nas brtsams te/ sangs rgyas kyi chos ma 'dres pa bco brgyad kyi bar gyi spyod pa gsum po bkag pas de'i spyod pa rjes su gnang ba dang / de ci'i phyir zhe na/ gzugs kyi zab pa nyid gang yin pa dang /gting dpag dka' ba nyid gang yin pa dang / tshad med pa nyid gang yin pa de ni gzugs ma yin pa nas sangs rgyas kyi chos rnams kyi bar du ma yin no zhes bya ba nas gzugs la sogs pa rnams de'i rnam pa'i bdag nyid can ma yin pa nyid du bstan pas yin no/ /yang zab mor mngon par byang chub pa dang /thun mong ma yin par byang chub pa dang / bla na med pa mngon par byang chub pa'i dbang du mdzad nas zab pa la sogs pa'i sbyor ba gsum yin par shes par bya'o/ /tshogs chen po skyo bas mngon par rdzogs par byang chub pa'i sbyor ba gsungs pa ni las dang po pa dag ni zab pa nyid kyis na dngang bar 'gyur te/dang por skrag pa skye bas so/ /gting dpag dka' ba nyid kyis na kun tu skrag par 'gyur te/ de lhag par gnas pa'i phyir ro/ /tshad med pa nyid kyis na kun tu skrag pas zin par 'gyur te/ der nges par ma rtogs pa'i chos kyi snod ma yin par gyur pa'i phyir ro//des ni phyir mi ldog pa'i mdun du de brjod par rjes su gnang ba zhes bya bas yin no/ /lung bstan pa thob pa'i sbyor ba ni de la mi dngang ba la sogs pa'i sbyor ba dang ldan pa rmi lam gyi nang na yang pha rol tu phyin pa drug yid la byed pa rnams ni de bzhin gshegs pa gcig gam gnyis las mi 'da' bar lung bstan par 'gyur ro zhes bya bas gang gsungs pa yin no//phyir mi ldog pa'i sbyor ba ni rang nyid byung ba de 'dzin pa la sogs pa rnams kyis phyir mi ldog pa nyid du zhes gang gsungs pa yin no//nges par 'byung ba'i sbyor ba ni skyes bu 'brog dgon pa dpag tshad brgya phrag mang po zhig na gnas pa'i dpes bar chad byed pa'i chos las 'das par bstan pa nyid kyis gang gsungs pa yin no/ /bar chad med pa'i sbyor ba ni skyes bu rgya mtsho chen por 'gro ba'i dpes nye bar gyur na rtag tu mtshan ma'i dngos po yang dag par mthong ba'i don gyis gang gsungs pa yin no//mngon par rdzogs par byang chub pa dang nye bar sbyor ba ni rtsi shing gi lo ma dang 'dab ma lhags pa'i dpes rten zag pa med pa'i chos gser gyi gzhi'i dngos por bstan pas gsungs pa yin no//myur du mngon par rdzogs par byang chub pa'i sbyor ba ni bud med sbrum ma btsar nye ba'i dpes rten pa sgrub pa'i chos kyi 'bras bu chos kyi sku myur du mngon par 'grub par ston pa'i don gyis gang gsungs pa yin no/ /gzhan gyi don gyi sbyor ba ni/'dir byang chub sems dpa' dag ni skye bo mang po la phan pa dang / skye bo mang po la bde ba'i phyir zhugs pa yin no zhes bya ba nas brtsams te/ bdag nyid kyang chos kyi 'khor la bskor la gzhan yang chos kyi 'khor lo bskor ba la yang dag par bskul lo zhes bya ba'i bar du gang gsungs pa yin te/de rnams ni gnyi ga'i don byed pa nyid kyis na/ de bzhin gshegs pas sgrub pa la legs par yongs su gtad pa yin no/ /'phel ba dang 'grib pa med pa'i sbyor ba ni ji ltar shes rab kyi pha rol tu phyin pa'i bsgom pa yongs su rdzogs par 'gyur ba lags zhes bya ba nas brtsams te/gzugs nas rnam pa thams cad mkhyen pa nyid kyi bar du 'phel ba dang / 'grib par mthong ba bkag pas des bsgom pa yongs su rdzogs par 'gyur ba rjes su gnang bas gsungs pa yin no/ /chos dang chos ma yin pa mi dmigs pa'i sbyor ba ni/yang chos dang chos ma yin pa dang / 'das pa dang / ma 'ongs pa dang / da ltar byung ba dang / dge ba dang / mi dge ba la sogs pa dang / 'dus byas dang / 'dus ma byas dag dang / 'dod pa la sogs pa'i khams rnams dang / pha rol tu phyin pa rnams nas/rnam pa thams cad mkhyen pa nyid kyi bar du rjes su mthong ba bkag pas snga ma bzhin te/ de ci'i phyir zhe na/ 'di ltar chos rnams kyi chos kyi mtshan nyid ni nges par grub pa med pa'i phyir ro zhes gang gsungs pa yin no/ /bsam gyis mi khyab pa'i rnam pa'i 'du shes 'gog pa'i sbyor ba ni gzugs la sogs pa nas/rnam pa thams cad mkhyen pa nyid kyi mthar thug bsam gyis mi khyab pa'i rnam par 'du shes pa bkag pas snga ma bzhin du gang gsungs pa yin no/ /rnam par mi rtog pa'i sbyor ba ni gzugs dang gzugs kyi mtshan ma dang /gzugs kyi rang bzhin du mi rtog pa nas/ rnam pa thams cad mkhyen pa nyid kyi bar du de'i mtshan ma dang de'i rang bzhin du mi rtog rnam par mi rtog pa'i don can dang / de ci'i phyir zhe na/ gzugs la sogs pa bsam gyis mi khyab pa nyid yin par mi rtog par rjes su 'thad par gang gsungs pa yin no//'bras bu rin po che sbyin pa'i sbyor ba ni/ rgyun tu zhugs pa nas bla na med pa yang dag par rdzogs pa'i byang chub kyi bar ni rin po che ster bar byed pa nyid yin pas shes rab kyi pha rol tu phyin pa ni rin po che'i phung po'o / /chos rin po che'i phung po rnams sgrub par gang gsungs pa yin no//rnam par dag pa'i sbyor ba ni/ gzugs la sogs pa rnam par dag pa'i slad du shes rab kyi pha rol tu phyin pa ni dag pa'i phung po'i zhes gang gsungs pa yin no/ /sa mtshams kyi sbyor ba ni rin po che chen po dang 'dra bar/bar chad mang ba nyid yin pas lo'i par gyis bri ba la sogs pa la mngon par brtson pa mi gtang bar bya bar gang gsungs pa yin no/ /lo smos pa ni de tsam gyis dus tshigs la sogs pas rkyen tshogs pa'i phyir ro/ /de ltar byas na mchod sbyin shing shun dang /shed can dang / brjod 'gyur te mang du thos pa rnams kyis lor dpyod par bya ste/ lo las lhag pa'i dus ni med pa'i phyir ro/ /zhes bya ba dang / de bzhin du/ gang gis lo ni mthong gyur pa/ /zhes bya ba la sogs pa brjod pa yin no/ / sbyor ba nyi shu po 'di dag gi go rims 'di ni rigs pa'i tshul nyid yin te/ chos thams cad la mngon par zhen par gnas pa dang / de la mi sbyor ba ni de dag gi zab pa dang gting dpag dka' ba dang tshad med par rtogs par 'gyur ro/ /sbyor ba ma yin pa byed pa nyid kyis ni las dang po pa tshegs chen po pa dang /de las gzhan pa ni bde blag tu lung bstan pa dang phyir mi ldog pa'i sa thob nas nges par 'byung ba dang mi 'bral bar 'gyur ba dang / mngon par rdzogs par byang chub par nye bar 'gyur ba dang / lam myur du mngon par rdzogs par byang chub par 'gyur ro//de nas ni gzhan gyi don byed cing 'phel ba dang 'grib pa med pa dang / chos sam chos ma yin pa la sogs pa'i 'du shes thams cad dang bral bas rnam par rtog pa dang / 'bras bu rin po che sbyin pas mchog tu rnam par dag pa'i mthar thug pa thob pa ni sngon nyid du lo'i bar du mngon par brtson pas sems kyi rlung yongs su sbyangs pa yin no//sbyor ba bshad zin to// //de'i phan yon brjod par bya ba yin pas/ bdud kyi mthu bcom la sogs pas / /yon tan rnam pa bcu bzhi'o//zhes bya ba gsungs te/ de la bdud kyi mthu bcom pa'i yon tan ni bdud bar chad byed pa la zhugs su zin kyang phyogs bcu'i 'jig rten gyi khams kyi sangs rgyas kyis dgongs shing yongs su gzung ba ni bdud kyi mthu bcom pa'i rgyu yin pa dang / de ci'i phyir zhe na/shA ri'i bu 'di ni chos nyid yin no/ /zhes de la dgongs pa'i 'thad pas gang gsungs pa yin no/ /sangs rgyas kyis dgongs shing mkhyen pa'i yon tan ni byang chub sems dpa' de dag la dgongs shing yongs su 'dzin pa mdzad de zhes bya ba nas de dag thams cad kyang sangs rgyas kyis gzung bar rig par bya'o zhes bya ba'i bar gyis chos smra ba des dgongs shing mkhyen pas lhag par mos pa bstan pa skyes pa las dogs pa med par gyur pa'i phyir bdud 'jug pa'i skabs mi rnyed par shes par byed pa'i don gyis gang gsungs pa yin no//sangs rgyas kyis mngon du mdzad pa'i yon tan ni/ de dag ni ye shes kyis mkhyen zhing de dag ni sha'i spyan gyis gzigs pa yin no zhes gang gsungs pa yin no/ /yang dag par rdzogs pa'i byang chub dang nye bar gyur pa'i yon tan ni/ theg pa chen po pa de dag ni 'di ltar bdag cag ni bla na med pa yang dag par rdzogs pa'i byang chub tu nye bar gyur to zhes bya bar rig par bya'o zhes bya bas gang gsungs pa yin no//don che ba la sogs pa'i yon tan ni/ glegs bam du bris pa 'chang ba tsam yang don che ba dang / phan yon che ba dang / 'bras bu che ba dang / rnam par smin pa che bar 'gyur te zhes bya bas gang gsungs pa yin te/ sangs rgyas dang mi 'bral ba nyid dang / bde 'gror gzhol bar gyur pa nyid dang / yang dag par rdzogs par 'tshang rgya ba nyid dang / mya ngan las 'das pa'i rjes su la yang gzhan gyi don la 'jug pa'i dbang du mdzad nas go rims bzhin du tshig bzhi yin par bshad par bya ste/'dir thag ring bar smin pa yin pas na rnam par smin pa zhes bya bar blta bar bya'o yul dpyad pa'i yon tan ni/ lho phyogs kyi rgyud nas bar ta ni dang byang phyogs kyi rgyud du spyad par 'gyur ba la sogs pa smos pa yul la sogs pa dpyad pas chos smra ba la sangs rgyas kyi dgongs pa la dogs pa bsal ba'i don gyis gang gsungs pa yin no//zag pa med pa'i yon tan thams cad rdzogs pa'i yon tan ni mi dngang ba la sogs pa dang ldan pa rnams pha rol tu phyin pa drug la sogs pa'i dkar po'i chos thams cad yongs su rdzogs par byed pa nyid kyis gang gsungs pa yin no//smra ba'i skyes bu yon tan ni/ yang nga dang sangs rgyas thams cad kyis kyang de dag la rnam pa thams cad mkhyen pa nyid dang ldan pa'i gtam brjod de zhes bya bas sngon du gtam smra ba'i skyes bu nyid du gang gsungs pa yin no//mi phyed pa'i yon tan ni yang bstan pa nyid yin pa'i phyir na bdud dang bdud kyi ris kyi lha rnams kyis kyang byang chub las bzlog par mi nus pa nyid du gang gsungs pa yin no//dge ba'i rtsa ba thun mong ma yin pa skye ba'i yon tan ni yang dga' ba dang / dang ba dang / rab tu mgu brgya chen po thob pa de ni skye bo mang po dge ba'i rtsa ba skye ba'i rgyu nyid gang gsungs pa yin no/ /de la dga' ba ni 'jig rten las 'das pa'i chos chol ba gang yin pa'o//dang ba ni sangs rgyas dang chos dang dge 'dun la brten pa gang yin pa'o/ /mgu ba ni dge ba la sems 'jug pa gang yin pa'o zhes bya ba ni gtsug lag yin no/ /dam bcas pa'i don ji lta ba bzhin du sgrub pa'i yon tan ni sangs rgyas thams cad kyi spyan sngar bdag srog chags brgya phrag mang po byang chub la rab tu bkod par bgyi'o zhes sangs rgyas nas rjes su dgyes pa'i tshig smras pa gang yin pa de don ji lta ba bzhin du rdzogs par byed par shes pa nyid kyis gang gsungs pa yin no//'bras bu rgya chen po yongs su 'dzin pa'i yon tan ni de dag mos pa rlabs po che nyid kyis las kyi 'bras bu rgya chen po yongs su 'dzin par 'gyur bar gang gsungs pa yin no/ /sems can gyi don sgrub pa'i yon tan ni phyi nang gi de'i 'bras bu sems can thams cad la ster ba'i phyir dang sangs rgyas sngon du gyur pa'i zhing gzhan dag tu lhag par bsten pa'i phyir gong nas gong du sems can gyi don rjes su sgrub par gang gsungs pa yin no//shes rab kyi pha rol tu phyin pa ma rnyed pa dang ma tshang ba rnyed pa las bzlog pas tshang rnyed pa'i yon tan ni tshol bar byed pa rnams las kyang 'ga' zhig gis 'thob pa dang mi 'thob pa dang ma tshang bar thob pas dang /shA ri'i bu de ni 'di ltar 'gyur ba yin te/ zhes bya ba chos nyid kyi rigs pas bar chad med par rab tu sbyor ba rnams kyis ni skye ba rjes su zin kyang gdon mi za bar de rnyed par 'gyur ba'i phyir bla na med pa yang dag par rdzogs pa'i byang chub tu mngon par rdzogs par 'tshang rgya bar gang gsungs pa yin no//sbyor ba'i phan yon bshad zin to// //de'i bar chad brjod par bya ba des na/ skyon ni bcu tshan bzhir bcas pa/ / drug tu nges par rtogs par bya/ /zhes bya ba gsungs te/ bzhi bcu rtsa drug ces bya ba'i tha tshig go/ /de dag las kyang tshegs chen pos 'thob pa ni pha rol tu phyin pa yongs su rdzogs par byed pa'i rgyu tshegs chen po dang / yun ring pos spobs pa skyes pas gang gsungs pa yin no//spobs pa shin tu myur ches pa nyid ni sngon pha rol tu phyin pa la spyod pa'i gnas skabs su ha cang myur bar spobs pa skyes pas brjod pa'i bar chad du 'gyur ro zhes gang gsungs pa yin no/ /lus kyi gnas ngan len gyi rnam par 'gyur ba rnam pa gsum ni yang glal ba dang /rgod pa dang / phan tshun steg cing 'dri na lus rnam par 'gyur ba'i bar chad nyid yin par gang gsungs pa ste/ steg pa zhes bya ba ni rang gi lus sam lus dang 'brel pas gzhan gyi lus la ku re byed pa'o/ /sems kyi gnas ngan len ni gsum ste/sems g.yeng ba dang phan tshun rnam par shes pa dang ldan pas 'dri zhing nyan pa dang / bdag gis 'di'i ro myang ba ma rnyed do snyam du sems bskyed nas langs te 'gro ba ni sems kyi bar chad byed pa nyid yin par gang gsungs pa'o/ /phan tshun rnam par shes pa dang ldan pa ni phan tshun la brten nas dga' bar 'gyur ba'i dngos po rnam par shes pa'o//rigs pa ma yin pas bskyed pa'i kha ton la sogs pa byed pa ni yang lus kyi rnam par 'gyur ba de rnams nyid kyis 'chad pa dang yang sems kyi rnam par 'gyur ba de rnams nyid kyis 'dzin pa la sogs pa byed pa ni bar du gcod pa nyid yin par gang gsungs pa'o//phyir phyogs pa'i rgyu mtshan 'dzin pa nyid ni nges par ma zhugs pa ni lung mi ston par 'thad pas na/ bdag 'dir lung ma bstan to/ /zhes bya ba dang / lung ma bstan pa'i mi bstan pa la sogs pas nges par brtag pa med pa'i 'thad pas rang gi ming yongs su ma brjod pa las dang ba ma thob par gsungs pa yin no/ /rgyu nyams pa ni rtsa ba bor nas lo 'dab dang yal ga 'dzin pa'i dpes rgyu yongs su nyams pa'i don dang /de ci'i phyir zhe na/ 'jig rten pa dang 'jig rten pa las 'das pa'i chos rtogs pa ni shes rab kyi pha rol tu phyin pa las nges par skyes par gang gsungs pa yin no/ /gya nom pa'i ro myang ba las nyams pa ni khyi'i dpes gya nom pa'i ro myang ba las nyams pa'i don gyis gang gsungs pa'o//theg pa mchog las nyams pa ni yang glang po che don du gnyer bas de rnyed bzhin du de'i rjes su tshol ba'i dpes theg pa chen po yongs su nyams pa'i don gyis gang gsungs pa yin no/ /ched du bya ba nyams pa ni/ yang rgya mtsho chen po dang ba lang gi rjes snyoms pa'i dpes ched du bya ba yongs su nyams pa'i don gyis gang gsungs pa'o/ /rgyu dang 'bras bu 'brel pa nyams pa ni yang phya mkhan nyi ma'i gzhal med khang gi tshad kyis rnam par rgyal ba'i khang bzang byad 'dod pa'i dpes rgyu 'bras rjes su mthun pa las phyin ci log tu bstan pa'i phyir de'i go rims nyams pa'i don gyis gang gsungs pa yin no//gong na med pa'i gnas las nyams pa ni yang 'khor los sgyur ba'i rgyal phran snyoms pa'i dpes chos kyi sku'i gnas las yongs su nyams pa'i don gyis bar du gcod pa'i bdud kyi las nyid yin par gang gsungs pa'o//yul la rnam par rtog pa'i spobs pa 'byung ba ni chos de dang de dag ni shes rab kyi pha rol tu phyin pa la med cing mi dmigs pa dang / chos de dang de'i yul can gyi spobs pa mang po 'byung bar 'gyur bar gang gsungs pa yin no//yi ge 'dri ba la mngon par zhen pa dang / dngos po med pa la mngon par zhen pa dang / bris pa'i yi ge la shes rab kyi pha rol tu phyin pa mngon par zhen pa dang / 'di la yi ge med par mngon par zhen pa dang / yul la sogs pa yid la byed pa dang /rnyed pa dang / bkur sti dang / tshigs su bcad pa'i ro myang ba dang / lam ma yin pas thabs la mkhas pa tshol ba zhes bya ba ste bar chad rnam pa bdun ni chos thams cad kyi ngo bo nyid yod pa ma yin pas dngos po med pas dngos po med pa bri bar mi nus pa nyid kyis dang /dngos po med pa la mngon par zhen pa dang / bris pa'i yi ge la de yin par mngon par zhen pa dang / de la yi ge med par mngon par zhen pa dang / yul la sogs pa yid la byed pa dang / rnyed pa dang / bkur sti dang / tshigs su bcad pa'i ro myong bar byed pa dang / shes rab kyi pha rol tu phyin pa bor te bdud kyis nye bar gtad pa'i mdo sde rnams las thabs mkhas pa tshol ba ni bdud kyi las nyid du gang gsungs pa yin no/ /'dun pa dang / snyom las kyis bral ba ni yang nyan pa po dang /ston pa po dang / mngon par 'brel pas phan tshun 'dun pa can dang / snyom las can nyid du gang gsungs pa yin no/ /'dun pa'i yul tha dad pas bral ba ni yang de dag nyid phan tshun gyi 'dun pa can yul gzhan du 'gro bar 'dod pa nyid du gang gsungs pa'o//rnyed pa gtsor byed pa dang / 'dod chen chung ba gnyis kyis bral ba ni yang de dag nyid phan tshun rnyed pa la sogs pa gtsor byed pa dang 'dod pa chung ba la sogs pa dang ldan par gsungs pa yin no/ /de bzhin du sbyangs pa'i yon tan dang ldan pa dang / mi ldan pa dag dang /dge ba dang mi dge ba ma yin pa'i chos can dang / gtong ba dang / ser sna byed pa dang / ster ba dang / mi len pa dang / mgo smos pa dang / rnam par spros pas go ba nyid dang / mdo la sogs pa'i chos mngon par shes pa dang / mi shes pa nyid dang /pha rol tu phyin pa drug dang ldan pa dang / mi ldan pa dang / thabs la mkhas pa dang / mi mkhas pa dang / gzungs thob pa dang / ma thob pa dang / yi ger 'dri bar 'dod pa dang / mi 'dod pa dang / 'dod pa la sogs pa'i 'dun pa dang bral ba dang /ma bral ba nyid ces bya ba ni go rims bzhin du nyan pa po dang / ston pa po dang / mngon par 'brel pas na bral ba rnam pa bcu gcig po bar chad rnam pa bcu gcig tu brjod par bya ste/ ji skad du/ gzhan yang de dag nyid sbyangs pa'i yon tan dang ldan pa dang /mi ldan pa zhes bya ba nas brtsams te yang de dag nyid phan tshun 'dod pa la sogs pa'i 'dun pa dang / bral ba dang ma bral ba nyid kyi tshogs pa dang mi ldan pa las bdud kyi las su rig par bya'o zhes bya ba'i bar du gang gsungs pa yin no/ /ngan 'gro'i 'gro ba las phyir phyogs pa ni/gzhan 'ga' zhig 'ongs te dmyal ba la sogs pa'i mi bsngags pa brjod na zhes bya ba la sogs pa gang gsungs pa yin no/ /bde 'gror 'gro ba la legs par phyogs pa ni/ de bzhin du rgyal chen bzhi'i lha rnams kyi bsngags pa brjod na zhes bya ba la sogs pa gang gsungs pa yin no//'di ni snga ma nyan pa po dang / phyi ma 'chad pa po la nges par byas te bral ba bshad pa yin no/ /da ni snga ma 'chad pa po dang / phyi ma nyan pa po las nges par bral ba rnam pa bdun brjod par bya'o//de ci'i phyir zhe na/ de ltar nyan pa po dang ston pa po dag gi phan tshun 'dod pa la sogs pa'i 'dun pa dang bral ba dang ma bral ba nyid kyis kyang [(]chogs [,]tshogs [)]pa dang bral bas bdud kyi las nyid yin pas na/ ston pa po dang nyan pa po dag snga ma dang phyi mar rnam par bzhag pas kyang bar chad rnams 'jig pa yin no//zhes nyan pa po dang 'chad pa po gnyi ga snga ma dang phyi ma gnyi gar gnas pa nyid du shes par bya ba'i don du yin no/ /de la ston pa po dang / nyan pa po dang / mngon par 'brel pa rnam pa bdun ni 'di lta ste/gcig pu nyid dang / 'khor la dga' ba nyid dang / rjes su 'brel par 'dod pa dang / go skabs mi 'byed pa nyid dang / zang zing cung zad tsam 'dod pa dang / sbyin par mi 'dod pa nyid dang / srog gi bar chad du 'gyur ba dang / mi 'gyur ba'i phyogs su 'gro ba dang /mi 'gro ba dang / de bzhin du lo legs pa dang / mu ge byung ba la sogs pa'i phyogs su 'gro ba dang / mi 'gro ba dang / chom rkun la sogs pa'i rgyus dkrugs pa'i phyogs su 'gro ba dang / mi 'gro ba dang / khyim la blta bas nyan pa po 'dor bar byed pa ni rab 'byor gzhan yang ston pa po dang dag ces bya ba nas brtsams nas/zas ster ba'i khyim la blta bas de yong bar byed pa zhes bya ba'i bar du gang gsungs pa yin no/ /bdud sdig can gyis 'byed pa'i sbyor ba ni/ gzhan yang bdud sdig to can 'di skad du nged kyi mdo sder ji ltar byung ba de yin gyi/shes rab kyi pha rol tu phyin pa 'di ni ma yin no/ /zhes bya ba dang / yang 'byed pa'i sbyor bas de nyid shes rab kyi pha rol tu phyin pa la spyod pa de ni yang dag pa'i mtha' mngon du byed par 'gyur ro zhes bya ba la sogs pa tshogs pa dang bral ba'i sbyor ba gang gsungs pa yin no//bcos ma nye bar sgrub pa ni shes rab kyi pha rol tu phyin pa'i gzugs brnyan ni bdud dang rab tu ldan pa bdud kyis gtad pa la de'i las su yongs su spong bar gang gsungs pa yin no/ /yul ji lta ba bzhin ma yin pa la sogs par dga' ba bskyed pa ni gzhan yang bdud sangs rgyas kyi cha byad 'dzin pa mthong nas 'dod pa skye ba dang /bdud kyis sprul pa'i byang chub sems dpa' mthong ba la 'dod pa bskyed pas ni rnam pa thams cad mkhyen pa nyid las yongs su nyams pa'i phyir te/ de ci'i phyir zhe na/shes rab kyi pha rol tu phyin pa la chos thams cad spyod pa ma yin pa nyid kyis so/ /de ci'i phyir zhe na/ chos rnams ngo bo nyid stong pa nyid yin pa'i phyir ro zhes gang gsungs pa yin no/ /'dzam bu'i gling gi rin po che chen po'i dpes ni de la de lta bu'i bar chad mang po yod du zin kyang bar chad ni chos bsal bar byas pa'i phyir na dkar po'i phyogs ma lus pa yongs su rdzogs pa ni sangs rgyas kyi mthu'i rgyu nyid dang /de ci'i phyir zhe na/ bu mang po yod pa'i ma'i dpes de la phyogs bcu'i 'jig rten gyi khams kyi sangs rgyas dang byang chub sems dpa' la sogs pa 'phags pa'i gang zag thams cad dgongs pas de la brtson pa rnams kyis srung ba la sogs pa mdzad pa nyid dang /de ci'i phyir zhe na/ de ni sangs rgyas rnams bskyed pa dang / 'jig rten ston par byed pa'i phyir ro zhes bya ba yin no/ /sbyor ba'i bar chad rnams bshad zin to// //de'i mtshan nyid brjod par bya dgos pa'i phyir/ gang gis mtshon te mtshan nyid du/ /shes bya de yi rnam pa gsum/ /shes pa khyad par byed pa ste/ /ngo bo nyid gang mtshon bya yang / /zhes gsungs pa yin te/ de ltar na mtshan nyid rnam pa bzhir 'gyur ba yin no//de la shes pa'i mtshan nyid ni re zhig thams cad shes pa nyid kyis dbang du byas nas rnam pa bcu drug tu shes par bya'o/ /ji ltar zhe na/ de bzhin gshegs pa 'byung ba dang / /'jig rten 'jig med bdag nyid dang //sems can sems kyi spyod pa dang / /de bsdus pa dang phyir bltas dang / /mi zad pa yi rnam pa dang / /chags bcas sogs dang rgya che dang / /chen por gyur dang tshad med dang / /rnam shes bstan du med pa dang / /sems ltar med dang shes pa ste//g.yo ba la sogs shes bya dang / /de las gzhan yang de dag ni/ /de bzhin nyid kyi rnam par shes/ /thub pas de bzhin nyid rtogs te/ /gzhan la bstan pa zhes bya 'di/ /thams cad shes pa nyid skabs kyi/ /shes pa'i mtshan nyid bsdus pa yin//zhes bya ba gsungs pa yin no/ /de la de bzhin gshegs pa 'byung ba zhes pa ni stobs la sogs pa rnam pa thams cad mtshan nyid kyi bar sangs rgyas su byed pa'i chos rnams bskyed pa yin pas shes rab kyi pha rol tu phyin pa ni de bzhin gshegs pa rnams bskyed pa nyid du gang gsungs pa yin no//'jig rten 'jig pa med pa zhes pa ni stong pa nyid la sogs pa ni 'jig pa ma yin pa'i don gyis na phung po la sogs pa rnams kyis 'jig pa ma yin rab tu 'jig pa ma yin pa la sogs pa'i chos nyid nges par ston par byed pa nyid kyis 'jig rten stong pa nyid do zhes gang gsungs pa yin no//sems can gyi sems kyi spyod pa shes pa ni sems can thams cad kyi spyod pa mkhyen pa ni shes rab kyi pha rol tu phyin pa la rag las pa'i phyir dang / de la sems can dang der gdags pa'i rgyu phung po la sogs pa nas/ rnam pa thams cad mkhyen pa nyid kyi bar du dmigs su med pa nyid kyis 'jig rten stong pa nyid dang / de ci'i phyir zhe na/ de la re zhig shes rab kyi pha rol tu phyin pa nyid kyang dmigs su med pa ni yin na/ rnam pa thams cad mkhyen pa nyid kyi bar du lta ga la yod ces bya ba'i 'thad pas gang gsungs pa yin no//sems can bsdus pa shes pa dang de dag nyid g.yengs pa shes pa ni gang la re zhig chos rnams kyi chos nyid ma dmigs pa des sems can thams cad kyi sems bsdus pa dang / spros pa yang dag pa ji lta ba bzhin du rab tu mkhyen pa gsungs pa yin no//sems mi zad pa'i rnam pa ni yang de rnams kyi 'dod chags dang bral ba dang / 'gog pa dang / spong ba rnams kyi mi zad pa'i rnam pa rab tu mkhyen par gang gsungs pa yin no/ /sems dang 'dod chags dang bcas pa la sogs pa shes pa dang /sems 'dod chags dang bral ba la sogs pa shes pa ni/ sems 'dod chags dang bcas pa gang yin pa de ni sems kyi yang dag pa ji lta ba nyid ma yin no/ /de ci'i phyir zhe na/ rab 'byor yang dag pa ji lta ba bzhin du gyur pa'i sems ni dmigs su med cing sems las byung ba'i chos rnams kyang dmigs su med do zhes bya bas 'dod chags dang bcas pa la sogs pa'i sems yang dag pa ji lta ba bzhin du rab tu shes par gang gsungs pa yin no//sems rgya chen po shes pa ni sems kyi ngo bo nyid dmigs su med pas rgya cher mi byed pa'i phyir sems rgya che ba yang dag pa ji lta ba bzhin du rab tu mkhyen par gang gsungs pa yin no//sems chen por gyur pa shes pa ni/ de bzhin du sems chen por gyur pa'o zhes bya bar yang dag pa ji lta ba bzhin du rab tu mkhyen to zhes gang gsungs pa'o/ / sems tshad med pa shes pa ni/ sems kyi rgyun ni rten med cing tshad med pa ste/ gang la gnas par 'gyur ba de rnams la de rnams kyi rten yod pa ma yin no zhes snga ma bzhin du gang gsungs pa yin no/ /sems bstan du med par shes pa ni/ rang gi mtshan nyid stong pa nyid kyi phyir mtshan nyid med pa zhes bya ba la sogs pa gang gsungs pa yin no//sems bltar med pa shes pa ni/ de bzhin gshegs pa'i spyan lnga la sems de dag snang bar mi 'gyur te zhes bya ba snga ma bzhin du gang gsungs pa yin no/ /sems g.yo ba la sogs pa shes pa ni sems 'phro ba dang 'du ba la sogs pa phung po lnga la brten pas skye zhing 'byung bar 'gyur ba nyid du snga ma bzhin du gang gsungs pa yin no//de la sgrub pa'i sgo nas g.yo ba la sogs pa ni/ bdag gang dang 'jig rten rtag ces bya ba de nyid bden gyi gzhan ni gti mug pa'o//zhes bya ba nas brtsams te srog gang yin pa 'di ni lus so zhes bya ba 'di ni rnam par shes pa la brten pa'o zhes bya ba'i bar du gang gsungs pa yin te/ rang gi yul la sems 'jug pa gang yin pa de ni g.yo ba zhes bya'o/ /btsum pa la sogs pa bkag pa'i sgo nas sems yul gzhan du mi 'jug pa ni/bdag dang 'jig rten mi rten ces bya ba nas brtsams te/ srog kyang gzhan la lus kyang gzhan no zhes bya ba 'di ni rnam par shes pa la brten pa'o zhes bya ba'i bar du gang gsungs pa yin no/ / de bzhin nyid kyi rnam par shes pa ni yang de bzhin nyid ji lta ba bzhin du phung po lnga mkhyen pas g.yo ba la sogs pa yongs su mkhyen pa nyid du gang gsungs pa'o/ /yang dag par rdzogs pa'i sangs rgyas kyi de bzhin nyid thugs su chud pa de gzhan la yang dag par ston zhing 'dogs pa shes pa ni/rab 'byor de ltar na sems 'phro ba la sogs pa'i de bzhin nyid gang yin pas zhes bya ba nas brtsams te/ chos thams cad de bzhin nyid kyis shes rab kyi pha rol tu phyin pa 'di la brten te de bzhin gshegs pas mngon par rdzogs par sangs rgyas nas bshad pa yin no zhes gang gsungs pa yin no//da ni ji ltar lam shes pa nyid kyi shes pa rnam pa bcu drug gis de bzhin gshegs pa bskyed pa gang yin pa de'i dbang du mdzad nas/ stong nyid mtshan ma med bcas dang / /smon pa rnam par spangs pa dang / /skye med 'gag pa med sogs dang //chos nyid rnam par 'khrug med dang / /'du mi byed dang rnam mi rtog /rab dbye mtshan nyid med nyid la/ /lam shes nyid kyi skabs kyis ni/ /zhes pa'i mtshan nyid yin par bzhed/ /ces bya ba gsungs so/ /de la stong pa nyid dang /mtshan ma med pa dang / smon pa med pa shes pa ni/ de la stong pa nyid la sogs pa'i mtshan nyid du gang gsungs pa yin no/ /skye ba med pa dang / 'gag pa med pa la sogs pa shes pa ni de la skye ba med pa dang / 'gag pa med pa la sogs pa'i mtshan nyid du gang gsungs pa yin no//sogs pa smos pa ni kun nas nyon mongs pa med pa dang rnam par byang ba med pa shes pa dang / dngos po med pa dang / ngo bo nyid shes pa dang / rten med pa shes pa dang / nam mkha'i mtshan nyid shes pa bsdu ste/ ji skad du/ de la kun nas nyon mongs pa dang rnam par byang ba la sogs pa'i mtshan nyid med do zhes bya bar gang gsungs pa yin no//chos nyid rnam par 'khrugs pa med pa shes pa ni/ lha dang mi dang lha ma yin du bcas pa'i 'jig rten gyi mtshan nyid de yin pa'i phyir des mtshan nyid de dor ba mi nus pa nyid du gang gsungs pa yin no//mngon par 'du mi byed pa shes pa ni/ gzugs nas rnam pa thams cad mkhyen pa nyid kyi bar gyi mtshan nyid de mngon par 'dus byas pa ma yin pa nyid du gang gsungs pa yin no/ /rnam par mi rtog pa shes pa ni de dag gis mtshan nyid zag pa dang bcas pa dang /'jig rten pa dang 'dus byas kyi dngos po bzlog zla dang bcas pa bkag pas nam mkha'i dpes lam shes pa'i dbang du byas pa yang dag par ston par byed pas gang gsungs pa yin no/ /rab tu dbye ba shes pa ni de bzhin gshegs pa byung yang rung zhes bya ba nas brtsams te gang la dpyad pas de bzhin gshegs pas mngon par rdzogs par sangs rgyas te/mtshan nyid thams cad kyi rab tu dbye ba mdzad pa ngo mtshar che'o zhes bya ba'i bar du bstan pas rnam par 'gyur ba med par sems can gyi don byed pa'i 'bras bu ston pa'i don gyis gang gsungs pa yin no//mtshan nyid med par shes pa yang / gzugs la sogs pa'i mtshan nyid gzugs su rung ba la sogs pa dang / sbyin pa la sogs pa'i pha rol tu phyin pa rnams kyi mtshan nyid yongs su gtong ba la sogs pa dang /bsam gtan dang / tshad med pa dang / gzugs med pa'i snyoms par 'jug pa'i mtshan nyid mi 'khrugs pa dang / byang chub kyi phyogs rnams kyi mtshan nyid kyi nges par 'byin par byed pa zhes bya ba nas/ rnam pa thams cad mkhyen pa nyid kyi mtshan nyid mngon sum du byed pa rnams de bzhin gshegs pas mtshan nyid med par mngon par rdzogs par sangs rgyas so zhes bya ba'i bar du gang gsungs pa yin no//de la bsam gtan dang gzugs med pa'i snyoms par 'jug pa de dag la brten nas 'phags pa'i lam bskyed pa'i phyir na de rnams ni 'khrugs pa med pa'i mtshan nyid can du shes par bya'o//'di phan chad ni ji ltar rnam pa thams cad mkhyen pa nyid kyi shes pa rnam pa bcu drug gis de bzhin gshegs pa bskyed pa de las brtsams pa ni/ de ni nyid kyi chos brten nas//gnas dang gus par bya ba dang / /bla ma nyid dang mnyes pa dang / /de la mchod dang byed med dang / /kun 'jug mkhyen pa gang yin dang / /ma mthong ston par mdzad pa dang / /'jig rten stong nyid rnam pa dang / /brjod dang shes mdzad mngon sum mdzad//bsam mi khyab dang zhi nyid ston/ /'jig rten 'du shes 'gog pa la/ /rnam pa kun mkhyen tshul la ni/ /shes pa'i mtshan nyid ces bshad do/ /zhes bya ba gsungs pa yin no/ /de la yang dag par rdzogs pa'i sangs rgyas de nyid kyi chos la brten nas gnas pa shes pa ni/rab 'byor gang gis de ltar bskyed pa dang / ston pa nyid yin pa'i rgyu des na yang dag par rdzogs pa'i sangs rgyas ni chos 'di la brten cing gnas so zhes gang gsungs pa yin no/ /de la gus par bya ba dang / bla mar bya ba dang / mnyes par bya ba dang /mchod par shes pa dang / chos de la rim gror mdzad pa dang / bkur stir mdzad pa dang / bsti stang mdzad pa dang / mchod pa mdzad pa ni byas pa mkhyen zhing byas pa tshor ba nyid du gang gsungs pa yin no/ /[(]byid [,]byed [)]pa med pa nyid shes pa ni/ byed pa po med pa'i phyir chos thams cad ma byas par mngon par rdzogs par sangs rgyas so zhes gang gsungs pa yin no//thams cad du 'gro ba shes pa ni/ yang ye shes byas pa med pa chos thams cad la 'jug pa med pa'i brdas 'jug ste zhes gang gsungs pa yin no/ /ma mthong ba'i don ston pa ni/gzugs la dmigs pa nas rnam pa thams cad mkhyen pa nyid la dmigs pa'i bar gyi rnam par shes pa ma skyes pa'i don gyis ma mthong ba'i gzugs mthong ba'i phyir de ni 'jig rten ston pa nyid du gang gsungs pa yin no/ /stong pa nyid kyi rnam pa brjod pa dang /shes par mdzad pa dang / mthong bar mdzad pa shes pa ni go rims bzhin du yang dag par bsdus pa dang / yongs su smin par gyur pa dang / rnam par grol bar 'gyur ba'i gdul bya rnams la yin te/ ji skad du de ni 'jig rten stong pa nyid do zhes bya bar brjod pa dang /shes par mdzad pa dang / ston par mdzad pa nyid du gang gsungs pa yin no/ /de la thams cad mkhyen pa nyid gsum la dgongs nas 'phags pa'i gang zag rnam pa gsum gyi dbang du mdzad de/ go rims bzhin du phyogs gcig tu 'jug pa dang / ched du bya ba'i 'jug pa dang / mngon sum du byed pa'i 'jug pa'i dbang du mdzad nas shes pa gsum yin par shes par bya'o/ /bsam gyis mi khyab pa dang zhi ba shes pa ni/ gzhan yang bsam gyis mi khyab ces bya bar ston to zhes gsungs pa yin no/ /'jig rten 'gog pa shes pa ni yang chos rnams med pa nyid kyis ci nas kyang 'jig rten 'di dang 'jig rten pha rol gyi 'du shes kyang mi 'byung ba de ltar ston pas shes rab kyi pha rol tu phyin pa ni de bzhin gshegs pa bskyed pa nyid du gang gsungs pa yin no//shes pa'i mtshan nyid bshad zin to// //khyad par gyi mtshan nyid brjod par bya ba yin pas/ bsam mi khyab sogs khyad par gyis/ /khyad zhugs bden pa'i spyod yul can/ /skad cig ma ni bcu drug gis/ /khyad par mtshan nyid bshad pa yin/ /zhes bya ba gsungs te/ bden pa'i spyod yul can zhes bya ba ni 'phags pa'i bden pa bzhi'i yul gyis so//khyad zhugs pa zhes bya ba ni nyan thos la sogs pa las khyad par du 'phags pa'o/ /skad cig ma ni bcu drug gis zhes bya ba ni bden pa re re zhing chos dang rjes su shes pa'i bzod pa dang shes pas bsdus pas so//ji ltar zhe na/ bsam gyis mi khyab pa'i khyad par sdug bsngal gyi skad cig ma dang pos bsdus pa ni/ de bzhin gshegs pa'i chos bsam gyis mi khyab pa/ zhes bya ba bsam pa las yang dag par 'da' ba'i don gyis dang /rab 'byor gzugs kyang bsam gyis mi khyab ces bya ba la sogs pa mngon par brjod pas yul bsam gyis mi khyab pa nyid du shes par byed pa'i don gyis gang gsungs pa yin no/ /de ltar byas pas rgyun tu zhugs pa nas rang sangs rgyas kyi bar gyi shes pa dang spangs pa gang yin pa ni byang chub sems dpa'i bzod pa zhes 'chad par 'gyur ro//mi mnyam pa nyid kyi khyad par skad cig ma gnyis pas bsdus pa ni/ mi mnyam pa zhes bya ba mnyam pa las yang dag par 'das pa'i don gyis dang / rab 'byor gzugs kyang mi mnyam pa'o//zhes bya ba la sogs pa gang gsungs pa yin no/ /gzhal du med pa nyid kyi khyad par skad cig ma gsum pas bsdus pa ni/ gzhal du med pa zhes bya ba tshad ma la yang dag par 'das pa'i don gyis dang / rab 'byor gzugs kyang gzhal du med pa'o zhes bya ba la sogs pa gang gsungs pa yin no//grangs med pa nyid kyi khyad par sdug bsngal gyi skad cig ma bzhi pas bsdus pa ni/ grangs med pa zhes bya ba grangs las yang dag par 'das pa'i don gyis dang / rab 'byor gzugs kyang grangs med pa zhes bya ba la sogs pa gang gsungs pa yin no//de bzhin gshegs pa'i chos rnams ni mi mnyam pa dang mnyam pa zhes bya ba mi mnyam pa dang mnyam pa nyid kyi khyad par ched du byed par gyur pa'i phyir na thams cad rgyu'i khyad par gyi sgo nas nye bar dgongs pa yin par bya ba'am/chos dang rjes su shes pa khyad par gyi mthar thug pa la brten pa 'di dag nyid kyis mi mnyam pa'i sangs rgyas rnams dang mnyam par 'gyur ro zhes gang gsungs pa ni mnyam pa las yang dag par 'da' ba'i don gyis na / rab 'byor gzugs kyang mi mnyam pa dang mnyam pa'o//de ltar na shes rab kyi pha rol tu phyin pa ni de bzhin gshegs pa la mi mnyam pa dang mnyam pa'i bya bas nye bar gnas pa'o zhes gang gsungs pa yin no/ /'phags pa'i gang zag thams cad sdud par byed pa'i khyad par kun 'byung gi skad cig ma dang pos bsdus pa ni/ blon po'i dpes 'phags pa'i chos thams cad shes rab kyi pha rol tu phyin pa dang yang dag par ldan pa nyid kyis 'di ni bya ba chen po la sogs pas nye bar gnas pa nyid dang / de ci'i phyir zhe na/ chos thams cad yongs su 'dzin pa med pa dang mngon par zhen pa med pa nyid du gsungs pa yin no//ji skad du/ gzugs la yongs su 'dzin pa med pa dang / mngon par zhen pa med par nye bar gnas pa nas/ rnam pa thams cad mkhyen pa nyid dang de bzhin gshegs pa nyid las yongs su gzung bar mi bya/ mngon par zhen par mi bya zhes gsungs pa ni sangs rgyas kyi thugs su chud pa thun mong ma yin pa'i 'thad pa yin no//skyes bu'i khyad par gyis rig par bya ba nyid kyi khyad par skad cig ma gnyis pas bsdus pa ni/ de ni phra ba mdzangs pa mkhas pa rnam par shes pas rig par bya ba nyid do zhes gsungs pa yin no//de la phra ba ni de kho na nyid kyi don la 'jug pa'i phyir ro/ /mdzangs pa ni ma nus pa'i don la 'jug pa'i phyir te/ ji lta ba dang ji snyed pa nye bar gzung ba yin no/ /de dag kyang rnam pa gnyis te/ gang dag sngar blo yongs su smin par byas pa so so'i skye bo skye bas 'thob pa'i shes rab don de dag gnyi ga la 'jug par nus pa dang ldan pa mkhas pa dang bden pa mthong bas rnam par shes pa ste/de dag ni don de gnyi ga la zhugs pa'i shes pa dang ldan pa'i phyir ro/ /thun mong ma yin pa nyid kyi khyad par skad cig ma gsum pas bsdus pa ni stong gsum gyi stong chen po'i 'jig rten gyi khams kyi sems can gyi grangs snyed dad pas rjes su 'brang ba nas/rang sangs rgyas kyi bar du gyur pa'i shes pa dang spangs pas 'di nyid la mos pa la sogs pa mchog nyid du gang gsungs pa yin no/ /mngon par shes pa myur ba'i khyad par kun 'byung gi skad cig ma bzhi pas bsdus pa ni 'di ni phul du byung ba'i chos rgya cher 'chad pa yin pas theg pa gzhan pas 'di la mngon par brtson pa rnams myur du mya ngan las 'da' ba nyid du gang gsungs pa yin no//'grib pa dang 'phel ba med pa'i khyad par 'gog pa'i skad cig ma dang pos bsdus pa ni/sems can thams cad bla na med pa yang dag par rdzogs pa'i byang chub tu yongs su mya ngan las 'da' bar 'gyur du zin kyang 'di la 'grib pa'am 'phel ba med pa'i che ba nyid kyis gang gsungs pa yin no//drag tu yang dag par sgrub pa'i khyad par skad cig ma gnyis pas bsdus pa ni/ ba drus ma be'u gzhon nu mi 'dor ba'i dpes mos pa la sogs pa dang lhan cig ldan pa'i thos pa dang ldan pa ni sngon gyi thos pa la sogs pa la 'jug pa nyid du gang gsungs pa yin no//yang dag par 'grub pa'i khyad par skad cig ma gsum pas bsdus pa ni yang de nyid sangs rgyas mang po la brten pas dga' ldan nas shi 'phos nas 'dir skyes pa nyid dang bzlog pas 'phags pa'i sa gzhan gnyis por lhung ba nyid du gang gsungs pa yin no//dmigs pa'i khyad par 'gog pa'i skad cig ma bzhi pas bsdus pa ni yang rgya mtshor gru zhig pa'i dpes bar chad dang bcas pa dang bar chad med par byed pa dag ni rnam pa thams cad mkhyen pa nyid thob par byed pa'i mtshan ma la gnas pa'i dbang du byas te/'khor ba'i rgya mtsho las brgal ba'i don gyis gang gsungs pa yin no/ /rten gyi khyad par lam gyi skad cig ma dang pos bsdus pa ni yang bum pa so ma btang ba dang btang ba'i dpes sgrub pa'i chos kyi rten ma yin pa dang rten yin pa'i ngo bor bstan pa'i don gyis gang gsungs pa yin no//ma tshang ba med pa'i khyad par skad cig ma gnyis pas bsdus pa ni/ yang rgya mtsho'i gru zag lhan ma byas pa dang byas pa'i dpes sgrub pa ma tshang ba dang tshang ba dang ston pa'i don gyis gang gsungs pa yin no/ /yongs su 'dzin pa'i khyad par skad cig ma gsum pas bsdus pa ni/yang skyes bu rgas shing nyam chung ba'i dpes lhan cig byed pa'i rgyu shes rab kyi pha rol tu phyin pa dang thabs la mkhas pas yongs su bzung ba dang yongs su ma bzung bar bstan pas 'khor ba dang mya ngan las 'das pa'i mtha' gcig tu ltung ba dang mi ltung bar ston pa'i don la sogs pa gang gsungs pa yin no//ro myang ba med pa'i khyad par lam gyi skad cig ma bzhi pas bsdus pa ni yang chos thams cad ngo bo nyid med pa'i phyir chos thams cad la mchog tu 'dzin pa med pa dang / 'dod pa med pa nyid kyis dge ba'i rtsa ba bla na med pa yang dag par rdzogs pa'i byang chub tu sngo bar byed pa brten par bya ba la sogs pa nyid du gang gsungs pa yin no//bshad ma thag pa'i tshig lhug pas gsungs pa'i don gang yin pa de tshigs su bcad pas bsdus pa ni 'di yin te/ bsam mi khyab dang mi mnyam dang //gzhal dang bgrang las yang dag 'das/ /'phags pa kun sdud mkhas pa yis/ /rig bya thun mong min shes nyid/ /shes myur bri dang gang med dang / /sgrub dang yang dag 'grub pa dang / /dmigs pa rten dang bcas pa dang / /mtha' dag pa dang yongs 'dzin dang //ro myang med dang khyad par ni/ /bcu drug bdag nyid ces bya ste/ /gang gis lam 'di gzhan dag las/ /khyad du 'phags pas khyad par lam/ /zhes bya'o / /khyad par gyi mtshan nyid bshad zin to// //byed pa'i mtshan nyid brjod par bya ba yin pas/phan dang bde dang skyob pa dang / /mi rnams kyi ni skyabs dag dang / /gnas dang dpung gnyen gling dang ni/ /yongs 'dren pa zhes bya ba dang / /lhun gyis grub dang theg gsum gyi/ /'bras bu mngon du mi byed bdag /tha ma rten gyi mdzad pa ste//'di ni byed pa'i mtshan nyid yin/ /zhes bya ba gsungs pa yin no/ /de la phan pa'i byed pa ni sems can rnams 'gro ba rgyud lnga las yongs su bton cing mya ngan las 'das pa la rab tu 'god pa'i phyir 'jig rten la phan par zhugs pas ma 'ongs pa'i phan pas bsdus pa'i don gyis gang gsungs pa yin no//bde ba'i byed pa ni sems can rnams sdug bsngal ba dang yid mi bde ba dang 'khrug pa rnams las yongs su bkrol zhing mya ngan las 'das pa la rab tu 'god pa'i phyir 'jig rten la bde bar yang dag par zhugs pas tshe 'di'i bde bas bsdus pa'i don gyis gang gsungs pa yin no//skyob pa'i byed pa ni byang chub sems dpa' 'khor ba na yod pa'i sdug bsngal gang ci yang rung ba las skyob cing yang mi skye bar byed pa'i chos ston pa'i phyir 'jig rten gyi skyob pa yin pa nyid kyis rnam par smin pa med pa'i chos la 'jog pa'i don gyis gang gsungs pa yin no//skyabs kyi byed pa ni sems can skye ba la sogs pa'i chos can rnams phung po ma lus pa'i mya ngan las 'das pa'i dbyings su rab tu 'god pa'i phyir 'jig rten gyi skyabs su gyur pa nyid kyis gtan du phan pa la zhugs pa'i don gyis gang gsungs pa yin no//gnas kyi byed pa ni chos thams cad 'dre ba med pa dang / 'brel pa med pa dang / skye ba med pa dang / 'gag pa med par ston pa'i phyir gnas su gyur pa nyid kyis sdug bsngal gyi rgyu las bzlog pa'i don gyis gang gsungs pa yin no//dpung gnyen gyi byed pa ni gang chos thams cad kyi pha rol gang yin pa de ni chos thams cad ma yin no/ /de ci'i phyir zhe na/ gzugs la sogs pa'i pha rol na gzugs la sogs pa'i rnam par rtog pa gang yang med do zhes chos ston pa'i phyir/dpung gnyen du gyur pa nyid kyis 'khor ba dang mya ngan las 'das pa mnyam pa nyid du rtogs pa nye bar bsgrub pa'i don gyis gang gsungs pa yin no/ /gling gi byed pa ni gzugs la sogs pa'i sngon gyi mtha' dang phyi ma'i mtha' yongs su chad pas chus yongs su bskor ba'i skams dang chos mthun par sred pa zad pa dang /'dod chags dang bral ba dang / 'gog pa dang / mya ngan las 'das pa ston pa'i phyir gling du gyur pa nyid kyis rang dang gzhan gyi don rtogs pa'i rten gyi ngo bor gyur pa nye bar bsgrub pa'i don gyis gang gsungs pa yin no//yongs su 'dren pa'i byed pa ni gzugs la sogs pa'i chos thams cad skye ba med pa dang / 'gag pa med pa dang / kun nas nyon mongs pa med pa dang / rnam par byang ba med pa'i phyir chos yang dag par ston pa las yongs su 'dren par gyur pa nyid kyis gzhan gyi don sgrub pa la 'jug pa'i don gyis gang gsungs pa yin no//lhun gyis grub pa'i byed pa ni/ rab 'byor gzugs ni nam mkha'i ngang tshul can zhes bya ba la sogs pa dang / gzugs kyi stong pa nyid ni 'gro ba med pa ste/ de ni mi 'gro mi 'ong ngo zhes bya ba nas brtsams te/rab 'byor chos thams cad ni mngon par 'du byed pa med pa'i ngang tshul can te/ de dag ni ngang tshul de las mi 'da' zhes bya ba'i bar gyis thams cad shes pa'i dbang du mdzad nas chos ston par mdzad pa nyid kyis kyang sems can gyi don la lhun gyis grub par 'jug pa nye bar bsgrub pa'i don gyis gang gsungs pa yin no //thams cad shes pa'i dbang du mdzad pa'i byed pa thams cad mya ngan las 'das par ston pa'i don gyis gang gsungs pa yin par shes par bya'o/ /theg pa gsum gyi nges par 'byung zhing de'i 'bras bu mngon du mi byed pa ni/rab 'byor chos thams cad mi skye mi 'gag pa dang / kun nas nyon mongs pa med pa dang / rnam par byang ba med pa'i ngang tshul can zhes bya ba nas brtsams te/ rab 'byor chos thams cad mi g.yo ba'i ngang tshul can te zhes bya ba'i bar gyis lam shes pa'i chos ston pa nyid kyis theg pa ji lta ba bzhin nges par 'byung ba dang de mngon du mi byed pa nye bar bsgrub pa'i don gyis gang gsungs pa yin no//rten gyi byed pa ni/ rab 'byor chos thams cad ni gzugs kyi ngang tshul can te zhes bya ba nas brtsams te/rab 'byor chos thams cad ni bla na med pa yang dag par rdzogs pa'i byang chub kyi ngang tshul can zhes bya ba chos thams cad rnam pa thams cad mkhyen pa nyid du ston pa nyid kyis byang chub sems dpa' 'jig rten gyi don du gang gsungs pa yin no//byed pa'i mtshan nyid bshad zin to// //ngo bo nyid kyi mtshan nyid brjod par bya ba yin pas/ nyon mongs rtags dang mtshan ma dang / /mi mthun phyogs dang gnyen po dag /dben dang dka' dang nges pa dang / /ched du bya dang mi dmigs dang / / mngon par zhen pa bkag pa dang / /dmigs pa zhes bya gang yin dang / /mi mthun thogs pa med dang de/ /gzhi med 'gro med skye med dang / /de bzhin nyid ni mi dmigs dang / /ngo bo nyid bcu drug bdag nyid/ /mtshon bya lta bur mtshon pas na/ /mtshan nyid bzhi par bzhed pa yin//zhes bya ba gsungs pa yin no/ /bcu drug gi bdag nyid yin zhes ji ltar brjod ce na/ nyon mongs pa las dben pa'i ngo bo nyid ni/ 'dod chags dang / zhe sdang dang / gti mug rnam par bsal bas dben pa'i rang bzhin du gyur pa nyid du gang gsungs pa yin no//de'i rtags kyis dben pa'i ngo bo nyid ni 'dod chags la sogs pa'i rtags kyis dben par gang gsungs pa yin no/ /de'i mtshan mas dben pa'i ngo bo nyid ni nyon mongs pa'i mtshan mas dben pa'i rang bzhin du gang gsungs pa yin no/ /de la rtags ni lus la sogs pa'i gnas ngan len no //mtshan ma ni tshul bzhin ma yin pa'i yid la byed pa'o/ /mi mthun pa dang gnyen po'i phyogs dag gis dben pa'i ngo bo nyid ni/ de bzhin du 'dod chags dang / 'dod chags med pa dang / zhe sdang dang / zhe sdang med pa dang / gti mug dang / gti mug med pas dben pa'i ngo bo nyid ces bya bas rnam pa thams cad mkhyen pa nyid kyi ngang tshul can nyid dang / lhag par mos par byed pa rnams la bsgom pa'i lam nye bar bkod pas gang gsungs pa yin no/ /bya dka' ba nyid kyi ngo bo nyid ni/ chos thams cad shin tu med pa'i phyir de dang 'brel pa med pa nyid nye bar bzung nas sems can thams cad yongs su mya ngan las 'das pa'i go cha bya dka' ba nyid kyis shes rab kyi pha rol tu phyin pa'i sgom pa bya dka' ba'i don du ston pas gang gsungs pa yin no//nges pa'i ngo bo nyid ni de ltar go cha bgos pa ni nyan thos la sogs par lhung ba'i gnas kyi go skabs med pa nyid kyis sgom pa mtha' gcig tu nges par ston pa'i don du gang gsungs pa yin no//ched du bya ba'i don ngo bo nyid ni sems can thams cad kyi rnam pa thams cad mkhyen pa'i ya shes kyi don du byang chub sems dpa'i go cha bgos pas ni ched du bya ba la mi 'khrul bar bstan pa'i don gyis gang gsungs pa yin no//mi dmigs pa'i ngo bo nyid ni/ bcom ldan 'das shes rab kyi pha rol tu phyin pa 'di ni shin tu zab ste/ de ni sus kyang bsgom par bgyi ba ma lags so zhes bya bas bsgom par bya ba dang /sgom pa po dang / bsgom pa mi dmigs pa'i rnam par bsgom pa nas brtsams te/ bcom ldan 'das rnam pa thams cad mkhyen pa nyid bsgom pa 'di ni shes rab kyi pha rol tu phyin pa sgom pa rnam par bsgom pa ma lags so zhes bya bas thams cad shes pa nyid kyi rnam par bsgom pa nyid du gang gsungs pa yin no//mngon par zhen pa med pa'i ngo bo nyid ni/ rab 'byor shes rab kyi pha rol tu phyin pa zab mo 'di la phyir mi ldog pa'i byang chub sems dpa' sems dpa' chen pos yongs su brtag par bya'o zhes bya bas shes rab kyi pha rol tu phyin pa la mngon par ma zhen par yongs su rtog pa nas brtsams te/'di bshad pa la mi dngang ba la sogs pa rnams kyis lam shes pa'i rnam pa bsgom pa nyid du gang gsungs pa yin no/ /dmigs pa'i ngo bo nyid ni/ bcom ldan 'das ji ltar na rnam pa thams cad mkhyen pa nyid la gzhol ba'i bsam pas byang chub sems dpa' sems dpa' chen po shes rab kyi pha rol tu phyin pa la rtog pa lags zhes bya ba nas brtsams te/rab 'byor rmi lam dang sprul pa la gzhol ba'i bsam pas byang chub sems dpa' sems dpa' chen po shes rab kyi pha rol tu phyin pa zab mo 'di la rtog pa yin no zhes bya ba'i bar gyis rnam pa thams cad mkhyen pa'i rnam par bsgom pa nye bar dgod pa dang /gzugs nas rnam pa thams cad mkhyen pa nyid kyi bar la yang rtog par byed dam zhes bya ba thams cad shes pa nyid dang /lam gyi rnam pa shes pa nyid kyi skabs su gsungs pa'i dmigs pa bsgom pa'i khyad par gyi zhar la rnam pa thams cad mkhyen pa'i dmigs pa'i khyad par bsgom pa'i don dris pa dang / rab 'byor byang chub sems dpa' sems dpa' chen po ni gzugs nas rnam pa thams cad mkhyen pa nyid kyi bar la rtog pa ma yin no zhes bya ba nas brtsams te/rnam pa thams cad mkhyen pa nyid kyi de bzhin nyid gang yin pa de ni sangs rgyas kyi chos rnams kyi de bzhin nyid do zhes bya ba rnam pa thams cad mkhyen pa nyid kyi de bzhin nyid la dmigs pa'i khyad par shes par byed pa'i don gyis lan bstan pas gang gsungs pa yin no//de la rtog pa ni lhag mthong gi ye shes so/ /'o na/ dmigs pa chos rnams thams cad de/ /de yang dge la sogs pa yin/ /zhes bya ba la sogs pa gang yin pa de ji ltar yin zhe na/gzugs nyid rnam pa thams cad mkhyen pa nyid do/ /rnam pa thams cad mkhyen pa nyid gzugs so zhes bya bas de dag phan tshun gyi ngo bo'i zab pa nyid dang / de ci'i phyir zhe na/ de dag gi de bzhin nyid dag gnyis su byar med pa nyid du gang gsungs pa yin no//gal te de lta yin na/ 'o na chos kyi 'khor lo bskor ba ji ltar 'thad ce na/ sangs rgyas dang rnam pa thams cad mkhyen pa nyid kyi de bzhin nyid dag gnyis su med cing gnyis su byar med pa nyid kyis chos kyi 'khor lo bskor ba'i don du thugs las chung ba nyid kyi rgyu nyid yin par gsungs te dmigs par bya ba dang /dmigs par byed pa'i dbye ba med pa nyid yin no zhes bya ba'i tha tshig go/ /'jig rten thams cad dang mi mthun pa'i ngo bo nyid ni/ lha'i bu dag nam mkha' zab pa'i phyir chos 'di zab po zhes bya ba nas brtsams te/rnam pa thams cad mkhyen pa nyid kyi bar du bzung ba'i slad du bstan pa ma lags/ mi bzung ba'i slad du bstan pa ma lags so/ /bcom ldan 'das 'jig rten ni 'dzin pa la spyod do zhes bya bas 'jig rten thams cad dang mi mthun pa nyid kyis ni 'dzin pa la spyod pa ni shes rab kyi pha rol tu phyin pa'i snod ma yin pa nyid du gang gsungs pa yin no//thogs pa med pa'i ngo bo nyid ni de ltar thams cad mkhyen pa rnam pa gsum gyi rnam pa legs par rdzogs pa'i mngon par rtogs pa nyid dang rjes su mthun pa'i phyir gzugs la sogs pa thams cad la ye shes kyi chos thogs pa med pa nyid du gang gsungs pa yin no//gzhi med pa'i ngo bo nyid ni gzugs la sogs pa'i rten mi dmigs pa nas brtsams te/ shes pa dang shes bya mnyam pa nyid kyi don gyis gang gsungs pa yin no/ /'gro ba med pa'i ngo bo nyid ni/thams cad mkhyen pa gsum po mtha' dag kyang skyed par byed pa'i dbang du byas te/ shes rab kyi pha rol tu phyin pa bsgom pa las gnas brtan rab 'byor dper byas te / ji ltar de bzhin gshegs pa'i de bzhin nyid gang yin pa de ni ma 'ongs ma song ba de bzhin du gnas brtan rab 'byor gyi de bzhin nyid kyang ma 'ongs ma song bas na/gnas brtan rab 'byor ni de bzhin gshegs pa'i rjes su skyes so zhes bya ba la sogs pa gang gsungs pa yin no/ /chos rnams kyi de bzhin nyid kyang de bzhin no zhes bya ba ni rdzas su 'dod pa gzugs la sogs pa rnams kyi spyi'i chos nyid do//gnas pa'i de bzhin nyid ces bya ba ni rgyun gyi chos nyid do/ /mi 'gyur zhing rnam par rtog pa med pa'i de bzhin nyid ces bya ba ni sgrub pa'i chos khyad par du 'gro ba dang de la rnam par rtog pa med pa'i chos nyid do//dbyer med pa'i de bzhin nyid ces bya ba ni theg pa gsum gyi dbye ba dmigs su med pa'i chos nyid do/ /gzhan ma yin pa de bzhin nyid ces bya ba ni theg pa gsum las de bzhin nyid du tshol ba med pa'i chos nyid do/ /dus gsum mnyam pa nyid kyi de bzhin nyid ni rang bzhin gyis mya ngan las 'das pa'o//de bzhin du phung po rnams kyi de bzhin nyid dang / khams dang / skye mched dang / rten cing 'brel par 'byung ba la sogs pa'i de bzhin nyid dang sbyin pa'i pha rol tu phyin pa la sogs pa'i de bzhin nyid nas rnam pa thams cad mkhyen pa nyid kyi bar gyi de bzhin nyid dang /de bzhin gshegs pa'i de bzhin nyid de la gnyis su med de gnyis su byar med pa nyid du rtogs pas de bzhin gshegs pa zhes bya ba'i ming thob par gyur pa dang ming de'i mtshan ma dbang por gyur pas stong gsum gyi stong chen po'i 'jig rten gyi khams su gtogs pa mtho ba dang dma' bar gyur pa yin pas/mdo las de'i tshe stong gsum gyi stong chen po'i 'jig rten gyi khams rnam par 'gyur ba drug dang mtshan ma chen po bco brgyad du g.yos so/ /rab tu g.yos so/ /kun tu rab tu g.yos so/ /'gul lo//rab tu 'gul lo/ /kun tu rab tu 'gul lo/ /ldeg go/ /rab tu ldeg go/ /kun tu rab tu ldeg go/ /chem chem/ rab tu chem chem/ kun tu rab tu chem chem mo/ /'khrugs rab tu 'khrugs/ /kun tu rab tu 'khrug go / /'ur 'ur rab tu 'ur 'ur/ kun tu rab tu 'ur 'ur ro zhes gang gsungs pa yin no//de la rnam pa drug ni g.yo ba dang / mtho ba dang / dma' ba dang / steng du 'gro ba dang / 'og tu 'gro ba dang / sgra rjes su sgrogs pa'o/ /ltas chen po bco brgyad ni g.yo ba la sogs pa'i 'gyur ba rnam pa drug po de rnams nyid go rims bzhin du chung ngu dang 'bring dang chen po nyid kyis shes par bya'o//snod kyi 'jig rten gyis mngon par 'dus byas pa dang 'dus ma byas pa'i dbang du byas pa dang 'jig rten thams cad na sems can gyi ris bzhi po mi dge ba la spyod pa dang lha sna tshogs la mos pa dang / nga rgyal can dang /rigs pa dang ldan pa'i dbang du byas te/ bya ba chung ngu dang 'bring dang chen po'i dbye bas g.yos so zhes bya ba nas kun tu rab tu 'ur 'ur ro zhes bya ba'i bar tshig bco brgyad kyi don bstan pa yin par shes par bya'o/ /de ltar na rnam pa thams cad mkhyen pa nyid kyi rjes su skyes pa nyid kyis gang gsungs pa yin no//skye ba med pa'i ngo bo nyid ni/ de ltar na lha'i bu dag gnas brtan rab 'byor gzugs kyi rjes su ma skyes/ gzugs kyi de bzhin nyid kyi rjes su ma skyes so/ /zhes bya ba nas brtsams te/ gang zhig gang rjes su skye bar 'gyur ba'i chos de dag thams cad med cing mi dmigs so zhes bya ba'i bar gyis/de ltar lam shes pa nyid kyi rnam pa'i rjes su skyes pa nyid kyis gang gsungs pa yin no/ /de bzhin nyid mi dmigs pa'i ngo bo nyid kyang bcom ldan 'das de bzhin nyid 'di ni zab po zhes bya ba la sogs pa ste/rtag tu de bzhin du gnas pa'i phyir de bzhin nyid ces bya ba dang / phyin ci ma log pa'i don gyis ma nor ba de bzhin nyid ces bya ba dang / chos rnams nyid las chos nyid btsal ba'i don gyis gzhan ma yin pa de bzhin nyid ces bya ba dang / dbye ba med pa'i mtshan nyid kyi don gyis chos nyid ces bya ba dang /'phags pa'i chos rnams kyi rgyu yin pa'i phyir don gyi chos kyi dbyings zhes bya ba dang / sangs rgyas thams cad kyis mdzad pa'i don gyis chos gnas pa nyid ces bya ba dang / rgyu dang rkyen mi 'khrul ba'i chos nges pa nyid ces bya ba dang /phyin ci ma log pa'i mthar thug pa'i don gyis na yang dag pa'i mtha' zhes bya ba nas/ re zhig rnam pa thams cad mkhyen pa nyid kyang dmigs su med na/ de'i de bzhin nyid dmigs par lta ga la 'gyur / 'dab chags bya lus chen por gyur pa'i dpes sbyin pa la sogs pa dang rab tu ldan du zin kyang shes rab kyi pha rol tu phyin pa dang bral zhing thabs mkhas pas yongs su ma bzung na nyan thos la sogs pa'i sar ltung ba'i don gyis de'i tshe mang po zhig bstan pa rtogs pa nyid kyis gang gsungs pa yin no//ngo bo nyid kyi mtshan nyid bshad zin to// // thar pa'i cha dang mthun pa brjod par bya ba yin pas/ mtshan med rab tu sbyin la sogs/ /yang dag sgrub la mkhas pa ni/ /rnam pa thams cad rtogs 'di la/ /thar pa'i cha dang mthun par 'dod/ /ces bya ba gsungs pa yin te/ thog mar sems bskyed pa nas nye bar bzung ste/thabs mkhas pa dang ma bral bar sbyin pa gtong ba mtshan mar mi 'dzin zhes bya ba nas brtsams te/ rnam pa thams cad mkhyen pa nyid bsgom zhing mtshan mar mi 'dzin zhes bya ba'i bar du gang gsungs pa yin no/ /de'ang dad pa dang / brtson 'grus dang /dran pa dang / ting nge 'dzin dang / shes rab kyi bdag nyid can gyis rnam pa lnga'o/ /de la/ sangs rgyas sogs dmigs dad pa dang / /zhes bya ba ni/ dus gsum gyi sangs rgyas dang / de rnams kyi tshul khrims la sogs pa'i phung po rnams dang mtshan ma med pa dang /smon pa med pa'i ting nge 'dzin yid la sems kyang mtshan mar mi byed de/ byang chub sems dpa' 'di ni ma snad cing ma smas par bla na med pa yang dag par rdzogs pa'i byang chub tu mngon par rdzogs par sangs rgyas par 'gyur ro zhes gang gsungs pa yin no/ /de la smad pa ni nyan thos la sogs par ltung ba'o//smas pa ni byang chub chen po la nyams pa'o/ /sbyin sogs spyod yul brtson 'grus dang / /zhes bya ba ni/ de ltar na/ byang chub sems dpa' [(]das [,]des [)]thog mar sems bskyed pa nas nye bar bzung ste/ sbyin pa byin pa na / shes rab sgom pa'i bar du mtshan mar mi 'dzin zhes bya ba la sogs pa gang gsungs pa yin no//bsam pa phun tshogs dran pa dang / /zhes bya ba ni/ shes rab kyi pha rol tu phyin pa dang thabs mkhas pa dang ma bral ba'i bsam pa can gang yin pa de'i bla na med pa yang dag par rdzogs pa'i byang chub ni the tshom ma mchis so zhes gang gsungs pa yin no//rnam par mi rtog ting 'dzin dang / /zhes bya ba ni/ byang chub sems dpa' chen po des/ gang gis mngon par rdzogs par 'tshang rgya ba dang / gang mngon par rdzogs par 'tshang rgya bar bgyi ba'i gzugs sam tshor ba'am zhes bya ba la sogs pa gang gsungs pa yin no//chos rnams rnam pa thams cad du/ /shes pa'i shes rab/ ces bya ba ni/ byang chub sems dpa' chen po chos thams cad rnam pa thams cad du rtogs par yang bya ba dang / chos de dag kyang ma mchis shing mi dmigs pas bla na med pa yang dag par rdzogs pa'i byang chub ni 'byung bar dka'o zhes bya ba la sogs pa gsungs pa yin no//de rnam lnga/ zhes bya ba ni thar pa'i cha dang mthun pa'i dge ba'i rtsa ba 'di de ltar rnam pa lngar 'gyur ba'o/ /dad pa la sogs pa 'di dag la dbang por brjod par mi bya ste/dbang po'i don med pa'i phyir ro/ /dad pa la sogs pa de dag nyid chung ngu dang 'bring dang chen po'i dbye bas rnam pa gsum yin te/ gang gi phyir/ rdzogs pa'i byang chub rnon po yis/ /rtogs sla/ zhes bya ba gsungs te/chen pos zhes bya ba'i tha tshig go/ /de'ang bcom ldan 'das chos thams cad stong pa la ni gang mngon par rdzogs par 'tshang rgya ba la sogs pa'i chos de lta bu ma mchis te/ de ni 'di ltar chos thams cad ni stong pa ste/ chos gang 'phel bar bgyi ba'am yongs su 'grib par bgyi ba'i zhes bya ba la sogs pa gang gsungs pa yin no//rtul pos rtogs dkar bzhed/ ces bya ba ni/ byang chub sems dpa' gang gA'i klung gi bye ma snyed bla na med pa yang dag par rdzogs pa'i byang chub las phyir mi ldog par bstan pas de mngon par 'tshang rgya bar dka' ba yin pa dang /gzugs la sogs pa dang / de las gzhan pa dang / de'i de bzhin nyid dang / de las gzhan pa zhes bya ba rnam pa bzhir ldog pa'i chos kyi mtshan ma nye bar mi dmigs pas mtshan ma med pa'i 'du shes can mngon par byang chub par bstan pa yin no//de lta na 'on nyan thos kyi theg pa la sogs pa byang chub sems dpa' rnam pa gsum med pa nyid kyis mi 'dod pa byang chub sems dpa' gcig tu thal bar 'gyur bas/ khyod byang chub sems dpa' gcig 'dod dam zhes bya ba nas brtsams te/ bden pa dang gnas pas byang chub sems dpa' gcig dang du mar khas mi len pa'i cha dang 'thad pas 'bring yin par bshad par 'gyur ro/ /de la bden pas zhes bya ba ni don dam pa'i bden pas so/ /gnas pa zhes bya ba ni btags pa'i gnas skabs su rnam par gnas pa'o/ / gang gis de mtshon par byed pa thar pa'i cha dang mthun pa 'di'i rtags rnam pa gsum ste/ 'di lta ste/ sems mi zhum pa mi dngang ba'i mtshan nyid dang / mi 'gong ba mi skrag pa'i mtshan nyid dang / yid la 'gyod pa med pa skrag par mi 'gyur ba'i mtshan nyid ni gang gi phyir de ltar byang chub sems dpa' chen po rnam pa thams cad mkhyen pa nyid kyi rab tu phye ba rnams la bye brag med par byang chub sems dpa'i rnam par rtog pa rnam pa gsum mi dmigs pas gal te byang chub sems dpa' chen po'i sems mi zhum mi 'gong yid phyir phyogs par mi 'gyur na byang chub sems dpa' chen po de ni bla na med pa yang dag par rdzogs pa'i byang chub tu nges par 'byung bar 'gyur ro zhes gang gsungs pa yin no//de la sbyin pa la sogs pa mtshan mar mi byed par yang dag par bsgrub pas ni chung ngu gsungs pa yin no//chos thams cad stong pa'i rnam par bslab par bya'o zhes bya ba la sogs pas ni 'bring gsungs pa yin no/ /gzugs la sogs pa rnams dang / de rnams las gzhan du dang / de'i de bzhin nyid dang / de las gzhan du zhes bya ba la sogs pas ni chen po gsungs pa yin no//'di dag thams cad kyang thos pa dang bsam pa'i rang bzhin can yin par shes par bya ste/ de thog ma kho nar bstan pa la 'jug pa'i rgyu nyid yin pa'i phyir ro/ /'dir thar pa ni bral ba'i khyad par yin la/ de'i cha la phan pas na thar pa'i cha dang mthun pa yin no/ / thar pa'i cha dang mthun pa bshad zin to// //nges par 'byed pa'i cha dang mthun pa brjod par bya ba yin pas/ dro ba rnams kyi dmigs pa 'dir/ /sems can thams cad yin par brjod/ /de dag nyid la sems mnyam sogs/ /rnam pa dag ni bcur bshad do/ / zhes bya ba gsungs pa yin te/ 'dir zhes bya ba ni sbyor ba'i lam gyi dbang du byas pa yin no/ /de ci'i phyir zhe na/ ci nas rnam pa thams cad mkhyen pa nyid kyi skabs su brjod pa'i nges par 'byed pa'i cha dang mthun pa las khyad par du rtogs par bya ba'i don du yin te/ de ni mngon par rtogs pa dang ldan pa yin la 'di sbyor ba dang ldan pa yin no//gang gi phyir sems can thams cad la sems mnyam pa nyid bskyed pa dang / de la dmigs pas gnas pa nyid du gang gsungs pa yin no/ /de bzhin du byams pa'i sems bskyed pa dang de la dmigs pa nyid dang / nga rgyal bcom pa bskyed cing g.yo ba med pa la dmigs pa nyid dang / de bzhin du phan pa'i sems bskyed pa nyid dang / gnod pa med pa'i sems bskyed pa nyid dang / mi 'tshe ba'i sems bskyed pa yang brjod par bya'o/ /de bzhin du ma dang / pha dang / spun dang / sring mo dang /bu dang / bu mo dang / grogs po dang / yid brtan pa dang / gnyen dang / snag gi gnyen mtshams kyi sems bskyed pa nyid dang / de la dmigs pa nyid kyis so/ /de la ma dang pha la sogs pa gnyis gnyis gcig tu byas nas rnam pa bcur 'gyur ro/ / bdag nyid sdig pa las ldog cing / /sbyin la sogs la gnas pa gzhan/ /de dag la ni 'god pa dang / /bsngags pa brjod dang mthun pa nyid/ /rtser gyur/ zhes bya ba la/ de dag la ni zhes bya ba sdig pa las ldog pa dang sbyin pa la sogs pa la gnas pa dag dang / bdag kyang srog gcod pa las ldog par bya zhes bya ba nas brtsams te/ bdag kyang rten cing 'brel bar 'byung ba lugs dang lugs ma yin pa la mnyam par gzhag par bya ba dang / de la gzhan yang dag par bskul ba dang de'i bsngags pa brjod pa dang / de la snyoms par 'jug pa gzhan dag la mthun par dga' bar bya ba nyid kyis de'i dmigs pa dang /rnam pa'i khyad par shes par byed pa'i don gyis gang gsungs pa yin no/ /de bzhin bzod pa ni/ rang bzhin rten can bden shes pa/ /zhes bya ba la/ de bzhin zhes bya ba ni ji ltar rtse mo rnams su rang bzhin la brten pa'i dbye bas dmigs pa dang rnam pa'i dbye ba brjod pa bzhin du ste/ji skad du/ bdag gis kyang sdug bsngal yongs su shes par bya zhes bya ba nas brtsams te/ bdag nyid kyang skyon med pa la 'jug cing de la gzhan 'god pa la sogs pa rnams kyis gsungs pa yin no/ / chos mchog de bzhin sems can rnams/ /smin byed sogs kyis shes par bya/ /zhes bya ba la/ de bzhin zhes bya ba ni/ rang dang gzhan la brten pa nyid kyis so/ /'di dag gi dmigs pa dang rnam pa'i khyad par ni sems can rnams smin par byed pa la sogs pa ste/ji skad du bdag gis kyang sems can yongs su smin par bya ba nas brtsams te/ de ltar slob pa de ni gzugs nas dam pa'i chos gnas pa'i bar la sgrib pa med par 'gyur ro/ /de ci'i phyir zhe na/ des sngon kho nar gzugs la sogs pa yongs su ma bzung ba'i phyir ro//de ci'i phyir zhe na/ de yongs su gzung du med pa ni de'i ngo bo nyid dgag par 'thad pa nyid kyis te/ 'di ltar gzugs yongs su gzung du med pa de ni gzugs ma yin zhes bya ba nas/ rnam pa thams cad mkhyen pa nyid kyi bar du yongs su gzung du med pa de ni rnam pa thams cad mkhyen pa nyid ma yin na zhes bya ba'i bar du gang gsungs pa bzhin no//nges par 'byed pa'i cha dang mthun pa 'di dag kyang chung ngu dang 'bring dang chen po'i rigs kyi dbye bas re re zhing gsum gsum du 'gyur ro/ /de la dro bar gtogs pa chung ngu ni/ sems can thams cad la sems mnyam pa nyid bskyed pa dang de la dmigs par gnas pa zhes bya ba la sogs pa gang gsungs pa ste/de'i tshe na gzhan la mi 'tshe ba nyid yin pa'i phyir ro/ /'bring ni sems can thams cad la phan pa'i sems bskyed pa dang de la sogs pas gang gsungs pa yin te/phyi ma la gzhan la phan pa'i bsam pa nyid yin pa'i phyir ro/ /chen po ni/ ma dang / pha dang / sring mo la sogs pa'i sems bskyed pa dang de la dmigs pa nyid kyis gang gsungs pa yin te/ de'i tshe dang phyi ma la gzhan la 'dod pa sgrub par 'dod pa nyid yin pa'i phyir ro//rtse mor gtogs pa chung ngu ni bdag nyid kyang srog gcod pa las ldog par zhes bya ba la sogs pa gang gsungs pa yin te/ gzhan sdug bsngal gyi rgyu las bzlog par 'dod pa nyid yin pa'i phyir ro/ /'bring ni bdag gis kyang sbyin pa'i pha rol tu phyin pa yongs su rdzogs par bya zhes bya ba la sogs pa gsungs pa yin te/gzhan bde ba'i rgyu la yang dag par sbyor bar 'dod pa nyid yin pa'i phyir ro/ /chen po ni bdag gis kyang nang stong pa nyid bsgom par bya zhes bya ba la sogs pa gang gsungs pa yin te/ gzhan dag sdug bsngal dang bde bar phyin ci log pa spong bar 'dod pa nyid yin pa'i phyir ro//bzod pa chung ngu ni bdag gis kyang sdug bsngal yongs su shes par bya zhes bya ba la sogs pa gang gsungs pa yin te/ gzhan dag 'phags pa'i lam la nges par sbyor bar 'dod pa nyid yin pa'i phyir ro//'bring ni bdag gis kyang rgyun tu zhugs pa'i 'bras bu shes pa mngon du bya ba'i phyir shes pa bskyed de yang dag pa'i mtha' yang mngon du mi bya'o zhes bya ba la sogs pa gang gsungs pa yin te/ gzhan dag 'bras bu le nges par sbyor bar 'dod pa nyid yin pa'i phyir ro//chen po ni bdag gis kyang byang chub sems dpa'i skyon med par byang chub par bya zhes bya ba la sogs pa gang gsungs pa yin te/ gzhan dag sangs rgyas nyid las yang dag par sbyor bar 'dod pa nyid yin pa'i phyir ro/ /'di ni skad cig ma gcig pa'i bzod pa yin par shes par bya'o//chos kyi mchog chung ngu ni/ bdag gis kyang sems can yongs su smin par bya ba la sogs pa gang gsungs pa yin te/ khyad par med par theg pa gsum gyis de yongs su smin par 'dod pa nyid yin pa'i phyir ro/ /'bring ni/ bdag gis kyang byang chub sems dpa' mngon par shes pa bskyed par bya zhes bya ba la sogs pa gang gsungs pa yin no //sems can rnams khyad par du byang chub sems dpa'i lam la nges par sbyor bar 'dod pa nyid yin pa'i phyir ro/ /chen po ni/ bdag gis kyang rnam pa thams cad mkhyen pa'i ye shes bskyed par bya zhes bya ba gang gsungs pa yin te/gzhan dag phun sum tshogs pa thams cad kyi rab kyi mthar thug pa la 'jog par 'dod pa nyid yin pa'i phyir ro/ /ji ltar bzod pa chen pa skad cig ma gcig yin pa de bzhin du chos kyi mchog yin no zhes gsungs pa de ni rang gi don gyi dbang du byas pa yin la/'di ni gzhan la brten pa'i chung ngu dang 'bring dang chen po 'di dbye ba bshad pa yin te/ gzhan gyi don la ni rim gyis gnas skabs yod pa yin pas de dang 'di la 'gal ba med do/ /sbyor ba'i lam gyi nges par 'byed pa'i cha dang mthun pa rnams bshad zin to// // ci ste 'di nyan thos kyi dag 'dun nam byang chub sems dpa'i dag 'dun gang yin pa brjod par bya'o/ /de la nyan thos kyi dag 'dun ni lam gyi 'bras bu dang 'bras bu'i lam gyi dbye bas skyes bu zung bzhi yin par shes par zad do/ / byang chub sems dpa'i dge 'dun brjod par bya ba ni gnas skabs gsum du 'gyur te/ nges par 'byed pa'i cha dang mthun pas bsdus pa sbyor ba'i lam gyi gnas skabs dang / bzod pa dang shes pas bsdus pa mthong ba'i lam gyi gnas skabs dang / rgyun dang ldan pa bsgom pa'i lam gnas skabs de gang gi phyir/nges 'byed yan lag nas bzung ste/ /mthong dang goms pa'i lam dag lags / /byang chub sems dpa'i gang dag gnas/ /de 'dir phyir mi ldog pa'i tshogs/ /zhes bya ba gsungs te/ dag 'dun zhes bya ba'i tha tshig go/ / nyan thos la sogs pa las de'i khyad par brjod par bya ba yin pas/ gzugs la sogs las ldog sogs rtags/ /rnam pa nyi shur brjod pa yis/ /nges 'byed yan lag la gnas pa'i/ /phyir mi ldog pa'i mtshan nyid 'di/ /zhes bya ba gsungs so/ /de la gzugs la sogs pa las ldog pa ni/rab 'byor chos thams cad ni rnam pa med pa/ rtags med pa/ mtshan ma med pa zhes bya ba rig par bya ba dang / rig pa po'i 'brel pa bkag pas gzugs nas yang dag par rdzogs pa'i byang chub kyi bar las phyir ldog pa 'di ni byang chub sems dpa' phyir ldog pa nyid yin pa dang /de ci'i phyir zhe na/ gzugs la sogs pa la ngo bo nyid med pa nyid kyis gang gsungs pa yin no/ /de la rnam pa ni gnyen po'i phyogs kyis bsdus pa'o/ /rtags ni rang la brten pa'i mtshan mas bsdus pa'o/ / mtshan ma ni de yongs su longs spyod pa'i rkyen du rtogs pa yin no/ /yang the tshom med pa nyid kyis lha gzhan la phyag mi 'tshal zhing me tog la sogs pa sbyin par mi byed pa dang / yang mi khom pa brgyad dang bud med kyi dngos po yongs su mi 'dzin pa dang ste/ de la mi kho ma pa brgyad ni 'di yin te/log par lta ba dang / dmyal ba dang / dud 'gro'i skye gnas dang / gshin rje'i 'jig rten du skye ba dang / sangs rgyas kyi bka' mi thos pa dang / yul mtha' 'khob tu skye ba dang / dbang po rnams blun zhing lkugs pa nyid dang / lha tshe ring por skye ba'o//yang dag nyid dge ba bcu'i las kyi lam la gnas te/ de nyid la gzhan yang dag par bskul ba dang / de'i bsngags pa brjod pa dang / de la mthun pas dga' ba nyid dang / sems can thams cad la mi dmigs te pha rol tu phyin pa drug sgom zhing mdo la sogs pa sbyin pas sems can thams cad kyi bsam pa yongs su rdzogs par byed pa dang /bla na med pa yang dag par rdzogs pa'i byang chub tu yongs su bsngo ba dang / chos thams cad mthong ba med pas chos zab mo la dogs pa dang / yid gnyis dang / the tshom med pa dang ste/de la lam gzhan 'dod pa ni yongs su ma rdzogs pa'i phyir dogs pa'o/ /lam drang po dang mi mthun pa ni yid gnyis so/ /rigs kyi chos la dge ba rnam pa sna tshogs la 'phel bar 'gro ba med pas na gsor mi rung ba'i phyir the tshom mo/ /byams pa'i lus kyi las dang ngag dang yid kyi las dang ldan pa dang /sgrib pa lnga dang lhan cig mi gnas pa dang ste/ de la sgrib pa lnga ni 'dod pa la 'dun pa dang / gnod sems dang / rmugs pa dang / gnyid dang / rgod pa dang / 'gyod pa dang / the tshom mo/ /bag la nyal ba thams cad nas thams cad du med pa ni ma rig pa dang lta ba'i zag pas bsdus pa'i bag la nyal yin gyi/byang chub sems dpa' ni bsams bzhin du srid pa len pa'i phyir 'dod pa dang srid pa'i zag pas bsdus pa ni ma yin no/ /'gro ba'am 'ong ba la sogs pa'i spyod lam la dran pa nye bar 'jog pa nyid dang /gtsang sbra'i kun du spyod pa dang ldan zhing nad nyung ba nyid kyis chos gos dang longs spyod smad du byed pa nyid ces bya bas ni drod du gyur pa'i gnas skabs yin no/ /dge ba'i rtsa ba 'jig rten thams cad las mngon par 'phags pa nyid yin pas lus la srin bu'i rigs stong phrag brgyad cu med pa nyid dang /dge ba'i rtsa ba rnam par dag pas sems gya gyu dang bral bas nyan thos la sogs pa'i sa las 'das nas gong nas gong du lus dang sems yongs su dag pa 'dzin pa'i rgyu nyid du gyur pa dang / rnyed pa dang / bkur sti la sogs pa lhur len pa ma yin pas sbyangs pa'i yon tan bcu gnyis yang dag par blangs te spyod pa dang ste/ de la sbyangs pa'i yon tan bcu gnyis ni 'di yin te/ 'di lta ste/ phyag dar khrod pa nyid dang / chos gos gsum pa nyid dang / phying pa pa nyid dang / bsod snyoms pa nyid dang / stan gcig pa nyid dang / zas phyir mi len pa nyid dang / dgon pa pa nyid dang / shing drung pa nyid dang / bla gab med pa nyid dang / dur khrod pa nyid dang / cog pu pa nyid dang / gzhi ji bzhin pa nyid do/ /pha rol tu phyin pa'i mi mthun pa'i phyogs ser sna la sogs pa'i sems mi bskyed pa dang /blo brtan pa yin zhing zab pas gzhan la chos mnyan pa nyid dang sbyor ba'i phyir shes rab kyi pha rol tu phyin pa'i rnal 'byor yang dag par sgrub pa dang / yang bdud sdig can gyi sprul pa sems can dmyal ba chen po brgyad du ltung zhing sdug bsngal drag pa dang /bar chad med pa myong bas dbang du byas pa phyir mi ldog pa'i sar lung bstan pa'i byang chub sems dpa' chen po tshad med pa bstan pas cher zin kyang 'khrug pa med par 'gro ba yongs su skyob cing bla na med pa yang dag par rdzogs pa'i byang chub las sems mi ldog pa nyid kyis ni rtse mor gtogs pa'i gnas skabs yin no//yang byang chub sems dpa' chen po'i drung du bdud sdig can dag sbyong gi cha byad du 'ongs te 'di skad du zhes bya ba nas brtsams te/ lam gzhan ston du zin kyang dge slong dgra bcom pa'i dpes gzhan gyi rkyen gyis mi 'gro ba nyid dang /de ci'i phyir zhe na/ 'di ltar des gang la dad pas 'gro ba'i chos gang yang yang dag par rjes su mi mthong ba'i phyir ro/ /zhes bya ba'i 'thad pas/ gzhan yang bdud 'jig rten pa'i rnam pa rus par 'du shes pa la sogs pa lam gyi gzugs brnyan ston pa la 'di ni bdud yin no zhes khong du chud pas sems can thams cad yongs su mi gtong bas ni bzod par gtogs pa'i gnas skabs yin no//shes rab kyi pha rol tu phyin pa yid la byed pa dang ma bral ba ni de bzhin gshegs pas yang dag par gsungs pa'i spyod pa dang rjes su mthun par gnas shing sbyin pa'i pha rol tu phyin pa la sogs pa nas rnam pa thams cad mkhyen pa nyid kyi bar las yongs su mi nyams pa'i bsam pas zhes bya ba ni chos kyi mchog gi gnas skabs so//mdo'i don tshig lhug pas rgya cher gsungs pa'i tshig le'ur byas pa ni drug yin te/gzugs la sogs pa ldog pa dang / /the tshom mi ngal zad pa dang / /bdag nyid dge ba la gnas shing / /gzhan dag de la 'god pa dang / /gzhan gyi rten can sbyin sogs dang / /zab mo'i don la'ang som nyi med//byams lus sogs dang sgrib pa ni/ /rnam pa lnga dang mi 'grogs dang / /bag la nyal kun 'joms pa dang / /dran pa dang ni shes bzhin dang / /gos la sogs pa gtsang ba dang / /lus la srin bu rnams mi 'byung / /gya gyu med sems sbyangs pa ni//len dang ser sna med sogs dang / /chos nyid ldan pa 'gro nyid dang / /sems can don du dmyal tshol dang / /gzhan gyis bkri bar mi btub dang / /lam gzhan nye bar ston bdud la/ /bdud ces bya bar rtogs pa dang / /sangs rgyas dgyes pa'i spyod pa ste/ / rtags ni nyi shu de dag gis/ /drod dang rtse mo bzod bcas dang / /chos mchog rnams la gnas pa ni/ /rdzogs pa'i byang chub las mi ldog /nges par 'byed pa'i cha dang mthun pa'i gnas skabs kyi phyir mi ldog pa'i byang chub sems dpa'i mtshan nyid bshad zin to// // da ni mthong ba'i lam gyi gnas skabs kyi brjod par bya ste/ de'ang gang gi phyir/ mthong ba'i lam la bzod pa dang / /shes pa'i skad cig bcu drug ni/ /byang chub sems dpa' mi ldog pa'i/ /mtshan nyid yin par shes par bya/ /zhes bya ba gsungs pa yin no//bcu drug gang zhe na/ 'di lta ste/ sdug bsngal la chos shes pa'i bzod pa ni gzugs la sogs pa'i 'du shes las phyir ldog pa nyid kyis phyir mi ldog pa nyid yin pa dang / de ci'i phyir zhe na/ de ni 'di ltar phyir mi ldog pa'i byang chub sems dpa' sems dpa' chen po ni chos thams cad rang gi mtshan nyid kyis stong pas byang chub sems dpa'i skyon med par 'jug go//des chos de'ang mi dmigs te des na mngon par 'du mi byed cing des na skye bar mi byed pa des ni phyir mi ldog pa'i byang chub sems dpa' sems dpa' chen po mi skye ba la bzod pa dang ldan pa yin no zhes 'du shes dang /mngon par 'du byed pa las ldog pa ni phyir mi ldog pa'i mtshan nyid yin pa'i 'thad pas gang gsungs pa yin no/ /sdug bsngal la chos shes pa yang / bdud nye bar 'ongs te/ mos pa bzlog cing rnam pa thams cad mkhyen pa nyid 'di ni nam mkha' dang mtshungs pa dngos po med pa'i ngo bo nyid de rang gi mtshan nyid kyis stong pa'o zhes bya ba nas brtsams te/rtogs pa po dang rtogs pa dang rtogs par bya ba mi dmigs pas rjes kyi chos la 'dun pa zlog par byed pa khong du chud pa'i phyir sems brtan pa dang mi g.yo ba dang mi 'phrogs pa nyid kyis yang dag par blangs pa'i sbyor bas ched du bya ba las mi nyams pa'i don gyis gang gsungs pa yin no//de la sems brtan pa ni rgyun mi 'chad pas so/ /mi g.yo ba ni mngon sum du byed pas so/ /mi 'phrogs pas ni gzhan rnams kyi yul ma yin pa nyid kyis so//sdug bsngal la rjes su shes pa'i bzod pa ni nyan thos dang rang sangs rgyas kyi sa dag dang rnam pa thams cad mkhyen pa nyid las bzlog pa dang mi ldog pa nyid kyis phyir mi ldog pa dang bzlog pa gnyi ga la brten pa'i byang chub sems dpa' brtan pas gang gsungs pa yin no//de la bden pa la zhugs pa na ldog pa gang yin pa dang bden pa la ma zhugs pa na/ 'jug pa gang yin pa de dag ni 'dir ldog pa'am mi ldog par sbyar gyi bzlog pa tsam ma 'jug pa tsam ni ma yin no/ /skad cig ma gsum pa la ni rjes su shes pa dang 'brel pas nyan thos la sogs pa'i sar ltung bar 'gyur ba dag srid de de ni khams gsum pa'i gnyen po 'jug par byed pa nyid yin pa'i phyir ro//sdug bsngal la rjes su shes pa ni yang yan lag zad pa dang ldan pa spong ba la kun tu dga' ba'i byang chub sems dpa'i dbang du byas nas/mthar gyis gnas pa'i snyoms par 'jug pa dgu dang / byang chub kyi phyogs kyi chos sum cu rtsa bdun dang / rnam par thar pa'i sgo gsum gyi ting nge 'dzin la snyoms par 'jug cing de'i 'bras bu thob par mi byed pas yan lag zad par bya ba'i phyir sems can rnams dang rjes su mthun pa'i bdag nyid kyi dngos po yongs su 'dzin par byed pa zhes bya bas gang gsungs pa yin no//yan lag zad pa dang ldan pa zhes bya ba ni bsam gtan nam snyoms par 'jug pa gang la yan lag gang dag yod pa de spong ba lhur len pa zhes bya ba'i tha tshig ste/dper na bsam gtan dang po la yan lag lnga ste zhes bya ba la sogs pa lta bu'o/ /yan lag zad pa dang ldan par brjod pa ni rjes su shes pa gzugs dang gzugs med pa'i gnyen po nyid yin par shes par bya ba'i phyir yin no/ /rjes su mthun pa'i bdag nyid kyi dngos po yongs su 'dzin pas zhes bya ba ni sdug bsngal rjes su shes pa'i gnas skabs su byang chub sems dpa' 'dod chags dang bral ba thob pa nyid 'dor bar byed pa yin no//kun 'byung la chos shes pa'i bzod pa ni/ yang byang chub sems dpa' chen po byang chub yid la byed pa dang ldan te/byang chub kyi sems dang mi 'bral ba ni mthong bas spang bar bya ba'i rnam par rtog par brtags pas bsal ba nyid kyis lus dang sems yang ba nyid bskyed pas gzugs lhur len pa ma yin zhes bya ba nas/ sangs rgyas lta ba dang dge ba'i rtsa ba bskyed pa lhur len pa nyid kyi bar du rgya cher bkag pa nyid dang /de ci'i phyir zhe na/ de ni 'di ltar de'i chos thams cad nam mkha' dang mnyam zhing dngos po med pa'i ngo bo nyid rang gi mtshan nyid kyis stong pa'i phyir zhes bya ba'i 'thad pa dang / de ltar yid la byed pa na'ang spyod lam thams cad du 'khrul pa med pa'i sems kyis byed pa nyid du gang gsungs pa yin no//kun 'byung la chos shes pa ni khyim gyi nang na gnas kyang thabs mkhas pas 'dod pa'i yon tan lnga nye bar ston pa dang / zas la sogs pa'i yo byad mang zhing sna tshogs ster bas bdag nyid sbyin pa'i pha rol tu phyin pa la gnas pa dang /gzhan yang dag par bskul ba dang / de'i bsngags pa brjod cing mthun pas dga' bar byed pa nyid kyis gang gsungs pa yin no/ /kun 'byung la rjes su shes pa'i bzod pa ni/ rtag tu tshangs par spyod pa dang /gzhan mi dga' bar 'gyur ba'i gnod pa mi bskyed pa zhes bya ba ste/ rtag tu tshangs par spyod pa nyid kyis 'di'i 'khrig pa'i 'dod chags spong ba dang / gzhan la gnod pa mi bskyed pas 'di'i rgyud zhi gnas kyis brlan par ston pa dang / 'dzam bu'i gling nas brtsams te/stong gsum gyi stong chen po'i 'jig rten gyi khams kyi bar du rin po che sna bdun gyis yongs su bkang ba sbyin par gtong ba dang / lag na rdo rje'i rigs pa rjes su 'brang bas de bdud la sogs pas mi brdzi ba nyid du gang gsungs pa yin no/ /kun 'byung la rjes su shes pa ni sems mi g.yeng ba thob pa'i phyir dang dad pa la sogs pa'i dbang po ma tshang ba med pa'i phyir byang chub kyi sems mi rjed pa la dbang thob pa'i don gyis skyes bu dam par gyur pa nyid dang /bud med dbang du 'gyur ba'i sngags dang / rigs pa dang / sman dang /rtsi la sogs pa dang / bud med dang / skyes pa la sogs pa ze slong ba la sogs pa'i sbyor ba mi byed pa dang / de ci'i phyir zhe na/ chos thams cad la mtshan mar mi mthong ba dang 'tsho ba yongs su dag pas gnas pa nyid kyis so/ /zhes gang gsungs pa yin no/ /de la yan lag tshogs pa'i mtshan nyid ni sman no//yan lag gcig pa ni rtsi'o/ /yang nad skyes pa rnams gso bar byed pa'i don gyis sman / ma 'ongs pa ma bskyed pa'i gnyen pa rtsi'o/ /yang 'tsham pa'i lus kyi gnas skabs thob par byed pa ni sman no/ /mi 'tsham pa'i khyad par thob par byed pa ni rtsi'o zhes bya ba ni rnam grangs gzhan no//'gog pa la chos shes pa'i bzod pa ni/ rab 'byor 'di la byang chub sems dpa' sems dpa' chen po shes rab kyi pha rol tu phyin pa la spyod pa'i tshe byang chub yid la byed pa dang mi 'bral ba yin te/ zhes bya ba nas brtsams te/ phung po khams dang skye mched rnams la sbyor ba dang rjes su sbyor bar gnas pa bkag pas nyan thos la sogs pa las bzlog par shes par bya ba'i don te/ sbyor ba dang rjes su sbyor ba smos pas sdug bsngal dang / kun 'byung gi bden pa dang / 'gog pa dang / lam gyi bden pa dag la go rims ji lta ba bzhin du sbyor ba dang rjes su sbyor ba sngon dang phyi mar shes par byed pa'i don dang / de ci'i phyir zhe na/ 'di ltar stong pa nyid la gnas pas des chos gang la yang dman pa dang mchog tu gyur par yang dag par rjes su mi mthong ngo zhes phyin ci log tu shes par byed pa'i 'thad pas gang gsungs pa yin no//'gog pa la chos shes pa ni rtogs pa'i rgyu dang dag ba'i phyogs dag gi bar chad kyi gtam la sbyor ba dang rjes su sbyor bas gnas pa bkag pas 'gog pa'i shes pa la de rnams shin tu so sor nub pa nyid du ston pa'i don dang /de ci'i phyir zhe na/ de ni 'di ltar rang gi mtshan nyid kyis stong pa'i chos rnams la chos gang yang khyer ba'am dbrog pa yang dag par rjes su mi mthong ba'i phyir ro zhes bya ba'i 'thad pas gang gsungs pa yin no/ /gtam smos pa'i dngos po'i rnam par rtog pa ni sdug bsngal dang kun 'byung gi shes pa'i dus nyid na bcom pa'i phyir/'gog pa'i shes pa ni gtam tsam gyis rnam par rtog pa'i gnyen por shes par bya ba'i don du yin no/ /'di lta bu'i gnas skabs kyi dbang du byas nas 'di dag thams cad ming tsam ste/'du shes tsam la rab tu gnas/ /rjod par byed las ma gtogs pa/ /brjod par bya ba yod ma yin/ /zhes bya ba bshad pa yin no/ /'gog pa la rjes su shes pa'i bzod pa ni byang chub kyi tshogs su gyur pa ni sbyin pa la sogs pa'i gtam rab tu mang po sna tshogs pa chos kyi dmag gi gtam la snga ma bzhin te/'gog pa'i shes pa'i gnas skabs su yang dag par 'grub pa mang po la nye bar mkho ba'i don ston par byed pa dang / de ci'i phyir zhe na/ de ni 'di ltar de rang bzhin gyis stong pa nyid la gnas pas chos gang yang nyung ngu 'am mang por yang dag par rjes su mi mthong ngo zhes bya ba'i 'thad pas gang gsungs pa yin no//'gog pa la rjes su shes pa ni gnyen po dang mi mthong ba'i phyogs dag ni gnod par bya ba dang / gnod par byed pa g.yul gyi gtam la snga ma bzhin dang /de ci'i phyir zhe na/ lam gyi de bzhin nyid la gnas pas chos gang la yang rjes su chags pa'am khong khro bar yang dag par rjes su mi mthong ba nyid du gang gsungs pa yin no/ /de lta bur gyur pa'i gnas skabs ni rang gi dang kho nas rnam par smin pa 'gog pa rnam pa bzhi yin te/'di lta ste/ dbang po'i grong 'gog pa ni de phan chad ni rnam par smin pa tsam gyi lhag mar gyur pa dbang po'i grong gi gtam la snga ma bzhin dang / de ci'i phyir zhe na/ chos thams cad stong pa nyid la gnas pas chos gang yang tshogs sam tshogs ma yin par yang dag par rjes su mi mthong ba nyid kyis gang gsungs pa yin no//dbang po'i rten 'byung ba chen po la sogs pa'i grong khyer 'gog pa ni de nas dbang po'i rten du gyur pa 'byung ba dang 'byung ba las gyur pa'i grong khyer gyi gtam gyi sbyor ba la snga ma bzhin pa dang /de ci'i phyir zhe na/ nam mkha' stong pa nyid la gnas pas chos gang la yang bsdu ba'am mi bsdu bar yang dag par rjes su mi mthong ba nyid kyis gang gsungs pa yin no/ /dbang po'i yul grong rdal 'gog pa ni de nas gzugs la sogs pa'i yul gyi grong rdal gyi gtam gyi sbyor ba la snga ma bzhin pa dang /de ci'i phyir zhe na/ yang dag pa'i mtha' la gnas pas chos gang la yang 'phel ba'am 'bri bar yang dag par rjes su mi mthong ba nyid kyis gang gsungs pa yin no/ /bdag tu mngon par zhen pa 'gog pa ni de nas rnam pa thams cad du rnam par dag pa'i chos kyi dbyings bsgoms pas de'i bdag nyid can du gnas yongs su gyur pa yin pa'i phyir bdag gi gtam la sogs pa la snga ma bzhin pa dang /de ci'i phyir zhe na/ rnam pa thams cad mkhyen pa nyid dang ldan pa'i yid la byed pa ni shes rab kyi pha rol tu phyin pa'i gtam la sbyor ba dang rjes su sbyor bar gnas pa'i 'thad pas gang gsungs pa yin no//rnam par smin pa rnam pa bzhi po 'di'ang khams gsum la so sor shes par bya'o/ /ji ltar zhe na/ re zhig dbang po 'gog pa ni bsam gtan dang / gzugs med pa gang la dbang po gang zhig yod pa ste/ji skad du/ skye ba'i bsam gtan dag na ni/ /yid bde ba dang btang snyoms dang / /btang snyoms yid bde bde ba dang / /btang snyoms btang snyoms tshor ba yod/ /gzugs med rnams la btang snyoms dang / /srog dang yid kyi dbang po yin//zhes gsungs pa bzhin no/ /ji ltar na de'i dbang po'i rten 'gog pa yin zhe na/ der ni ris dang srog la yang / /sems kyi rgyud ni rten pa yin/ /zhes bshad pa yin pa'i phyir ro/ /dbang po'i yul grong rdal 'gog pa yang / de la yid kyi yul ni chos rnams yin no//bdag tu mngon par zhen pa ni thams cad na yod pa nyid yin pas de 'gog pa yang 'thad pa yin no/ /lam la chos shes pa'i bzod pa ni pha rol tu phyin pa drug la spyod cing ser sna la sogs pa'i sbyor ba dang rjes su sbyor bas gnas pa bkag pa'i don dang / bzod pa ni bar chad med pa'i lam yin pa nyid kyis nyon mongs pa dang bral ba'i rgyu nyid yin par shes par byed pa'i don dang chos thams cad stong pa nyid la gnas shing chos 'dod pa nyid kyis dge ba'i chos la 'dun pa'i rjes su 'jug par shes par byed pa'i don dang / chos kyi dbyings la spyod cing chos thams cad mi dad par brjod pa nyid kyis sgrub pa dang 'bras bu'i chos dag la 'dus byas pa dang 'dus ma byas pa med pa nyid kyi phyir go rims bzhin du dor ba dang blang bar shes par bya ba'i don dang /sangs rgyas dang / byang chub sems dpa'i thad du bshes gnyen du 'dod pa nyid kyis shin tu khyad par can gyi gnas skabs thob pa'i rgyu shes par byed pa'i don dang nyan thos la sogs pa'i theg pa rnams bla na med pa yang dag par rdzogs pa'i byang chub tu yang dag par bskul ba dang /'dzud pa dang / rab tu 'jog pa dang / rtogs pa'i khyad par thob par byed pa'i tshogs 'dod na sangs rgyas mngon du gyur pa skye zhing skye ba la dbang ba shes par byed pa'i don gyis gang gsungs pa yin no//lam la chos shes pa ni/ rgyun tu zhugs pa la sogs pa'i dpes chos phra rab tsam yang rjes su ma dmigs pas nang stong pa nyid nas rnam par thar pa'i sgo smon pa med pa'i bar la gnas pa ni rang gi sa la dogs pa med pa nyid dang /rnam par grol ba'i lam yin pa'i phyir shes pa bral ba thob pa'i rgyu yin par shes par byed pa'i don gyis phyir mi ldog pa'i sa la gnas pa ni sangs rgyas kyi zhing yongs su sbyangs pa dang /sems can rnams yongs su smin pa dang / bdud kyi las shes pa dang / rnam par 'joms pa dang / srab mor byed pas bral ba thob pa'i byed pa'i don dang / mtshams med pa'i las byed pa'i skyes bu'i dpes yang dag pa la gnas shing rnam par mi rtog pa phyir mi ldog pa'i sems ni lha dang bcas pa'i 'jig rten gyis phyir ldog par mi nus pa nyid dang /de ci'i phyir zhe na/ lha dang bcas pa'i 'jig rten las 'das te skyon med par zhugs pa nyid kyis lam la chos shes pa ni khams gsum pa'i gnyen po yin par shes par byed pa'i don dang / mngon par shes pa rnams thob nas sangs rgyas rnams la lta ba la sogs pa'i phyir sangs rgyas kyi zhing nas sangs rgyas kyi zhing du 'gro zhing khyad par can gyi yon tan rnams mngon par sgrub pa rgyun mi 'chad pa nyid du shes par byed pa'i don dang / bdud kyi las rnams thabs la mkhas pas yang dag pa'i mtha' la sbyor bar byed pas rang gi sa la nem nur med pa nyid dang /sbyor ba 'dren ma ma yin zhing rnam par dag pa shes pa'i phyir mi ldog par shes par byed pa'i don dang / de ci'i phyir zhe na/ de ni 'di ltar yang dag pa'i mtha' la nem nur med par yang dag pa'i mtha' la gcig gam gnyis su yang dag par rjes su mi mthong bas skye ba rjes su zin kyang nyan thos la sogs pa'i sems mi skye ba'i sbyor ba theg pa gzhan du nges par 'byung ba med pas gcig tu nges pa nyid shes par byed pa'i don dang /de ci'i phyir zhe na/ chos thams cad rang gi mtshan nyid kyis stong pa'i phyir skye ba'am 'gag pa la sogs pa rjes su mi mthong bas nyan thos la sogs pa'i sa las bzlog par shes pa'i 'thad pas gang gsungs pa yin no//lam la rjes su shes pa'i bzod pa ni/ bdag ni bla na med pa yang dag par rdzogs pa'i byang chub tu mngon par rdzogs par 'tshang rgya bar 'gyur ro snyam pa'i nges pa'i rnyed pas mngon par byang mi chub pa dang ma bral bar shes par byed pa'i don dang /de ci'i phyir zhe na/ bla na med pa yang dag par rdzogs pa'i byang chub ni rang gi mtshan nyid kyis stong pa nyid yin pa'i phyir ro/ /de ltar gnas pa ni sa de la gzhan gyi dring mi 'jog par gnas yin no//rang gi sa la brdzi ba med pa yin no zhes bya ba dang ste/ rang gi sa zhes bya ba ni go rims bzhin du thams cad mkhyen pa gsum ni rang gi sa yin par shes par bya'o/ /de ci'i phyir zhe na/ de ltar gnas pa ni mi 'phrogs pa'i ye shes dang ldan pa nyid kyis so//yang bral ba dang bral ba thob pa dang / rnam pa thams cad mkhyen pa nyid thun mong ma yin pa nyid sa gsum du bstan to zhes bya ba ni rnam grangs gzhan yin no/ /khyod kyis 'di nyid du dgra bcom pa thob par gyis shig /khyod ni bla na med pa yang dag par rdzogs pa'i byang chub tu lung ma bstan to//gang gis khyod lung bstan par 'gyur ba mi skye ba'i chos la bzod pa yang khyod kyis ma thob bo zhes bya ba la sogs pa bdud kyi 'dun pa bzlog pa'i tshig thos pas na byang chub sems dpa' chen po'i sems mi zhum mi 'gong ba la sogs pa ni lung bstan par nges pa zhes bya ba dang ste/'di la gnas pa ni rtog pa'i chos kyi skad cig ma gcig lus pa yin pa'i phyir ltung ba'am khyad par du 'gro bar 'gyur ro/ /de ci'i phyir zhe na/ lung bstan par 'gyur ba'i rgyu mtshan gyi chos de la yod pa nyid du gang gsungs pa yin te/skyon med par zhugs pa ni lung bstan pa'i rgyu mtshan yin pa'i phyir ro/ /lam la rjes su shes pa ni yang bdud kyis khyod la bla na med pa yang dag par rdzogs pa'i byang chub kyis ci zhig bya/ gang la khyod spyod pa'i mdo sde 'di dag ni bdud kyis bshad pa yin no zhes zer zhing rnam par 'byed pa ni/kye ma 'di ni bdud yin no snyam du rtogs pas mngon par byang chub pa dang ldan pa'i rnyed pa thob pa shes par byed pa'i don dang chos thams cad stong pa nyid ces rdzogs pa'i sangs rgyas kyis bstan pa'i dam pa'i chos yongs su bzung ba'i phyir bdag dang srog kyang yongs su gtong ba zhes bya ba dang ste/gnyi ga smos pa ni phyogs gcig dang ma lus pa'i bdag yongs su gtong ba shes par bya ba'i don du'o/ /sangs rgyas thams cad dang bdag gis 'di nyid yin no zhes don gyis dbang 'di mthong nas bral ba thob pa ni dam pa'i chos yongs su gtong ba'i skal ba mnyam par shes par byed pa'i don dang /yang gzhung 'dzin pa'i gzungs thob pas sangs rgyas kyis gsungs pa 'dzin pa dang / chud mi gzon pas de'i khyad par gyis yon tan mngon par sgrub pa shes par byed pa'i don dang / yang gzungs thob pa'i rgyu nyid kyis nyan thos dang lha la sogs pa'i skad dang brda la sogs pa la nges pa rnyed pa nyid kyis de'i sems can thams cad smin pa'i thabs kyis byed pa nyid dang /yon tan chen po dang ldan pa'o/ /yon tan gzhal du ma mchis pa dang ldan pa'o/ /yon tan dpag tu ma mchis pa dang ldan pa'o zhes bya ba'i tshig gsum po go rims bzhin du bzod pa dang shes pa rnams dang /rnam pa thams cad mkhyen pa nyid kyi dbang du byas te shes par bya ba rnams dang / de ci'i phyir zhe na/ de ni 'di ltar des nyan thos dang rang sangs rgyas thams cad dang thun mong ma yin pa'i ye shes mtha' yas mu med pas rab tu thob pa'i phyir zhes gang gsungs pa yin no//de la mtha' yas pa ni rnam pa mtha' yas pa nyid kyis so/ /mu med pa ni thams cad du yul ma yin pa nyid kyis so/ /mdo'i don rgyas pa 'di'i tshig le'ur byas pa ni lnga yin te/ gzugs sogs 'du shes ldog pa dang //sems brten theg pa dman dag las/ /rnam log bsam gtan la sogs pa'i/ /yan lag yongs su zad pa dang / /lus sems yang ba nyid dang ni/ /'dod la spyod pa thabs mkhas dang / /rtag tu tshangs par spyod nyid dang / /tshor ba rnam par dag nyid dang //phung sogs bar chad byed rnams dang / /tshogs dang dbang sogs bcas pa yin / /g.yul 'gyed ser sna la sogs la/ /sbyor dang rjes su sbyor ba yi/ /gnas pa so sor bkag pa dang / /chos ni rdul tsam mi dmigs nyid/ /rang gi sa la nges pa ni//sa gsum la ni gnas pa dang / /chos kyi don du srog gtong ba/ /de 'dra'i skad cig bcu drug ni/ /blo ldan mthong ba'i lam gnas kyi/ /phyir mi ldog pa'i rtags dag yin/ /mthong ba'i lam la gnas pa'i phyir mi ldog pa'i byang chub sems dpa'i dge 'dun gyi rtags kyi mtshan nyid bshad zin to// //da ni sgom pa'i lam la gnas pa'i rtags brjod par bya ba yin pas de'i phyir/ sgom pa'i lam ni zab pa ste/ /zhes bya ba gsungs te/ ji skad du bcom ldan 'das gnas zab mo zab mo rnams legs par bstan du gsol zhes bya ba gsungs te/bzlas te brjod pa ni sgom pa yang nas yang du goms par byed pa'i don yin no/ /gnas zhes bya ba gnas par brjod pas ni de rgyun dang ldan par bstan pa'i don to/ /gang la gnas shing byang chub sems dpa' chen pos dran pa nye bar gzhag pa bzhi nas/sangs rgyas kyi chos ma 'dres pa bco brgyad kyi bar du yongs su rdzogs par bgyid pa zhes bya ba ni de rtogs pa ma lus pa yongs su rdzogs pa'i rgyu nyid du shes par byed pa'i don to/ /yang 'di'i zab pa gang yin zhe na/ zab mo stong pa nyid la sogs/ /zhes gsungs te/de ni stong pa nyid dang / mtshan ma med pa dang / smon pa med pa dang / mngon par 'du bya ba med pa dang / skye ba med pa dang / 'dod chags dang bral ba dang / 'gog pa dang / zhi ba dang / de bzhin nyid dang / yang dag pa'i mtha' rnams ni zab mo'i gnas nyid yin par gang gsungs pa yin no//ci'i phyir stong pa nyid la sogs pa zab mo yin zhe na/ zab mo de ni sgro 'dogs dang / /skur pa'i mtha' las grol ba nyid/ /ces gsungs so/ /de la sgro btags pa'i mtha' las grol ba ni 'di yin te/ gzugs las kyang bzlog ces bya ba dang /de bzhin nyid la ni gzugs med pa zhes gang gsungs pa yin no/ /de la skur pa'i mtha' las grol ba ni 'di yin te/ mya ngan las 'das pa yang bstan zhes bya ba dang / gzugs las gud na yang de bzhin nyid med do zhes bya bas gang gsungs pa yin no //de ltar chos thams cad las bzlog pa dang / mya ngan las 'das pa yang dag par ston pas gzugs la sogs pa rnams kyi gnas zab mo nyid bstan pa yin no/ /yang sgom pa'i lam gang zhig yin zhe na/ nges 'byed yan lag dang mthong ba'i/ /lam dang sgom pa'i lam nyid la// yang dang yang du sems pa dang / /'jal dang nges rtogs sgom pa'i lam/ /zhes gsungs pa yin te/ gang gi tshe yang shes rab kyi pha rol tu phyin pa dang ldan pa'i gnas zab mo 'di dag la nye bar mkho ba bzlog pa'i don du bstan pas gang gsungs pa yin no//sems par byed cing bya ba ni thos pa'i rang bzhin gyi shes rab kyis so/ /'jal bar byed ces bya ba ni bsam pa'i rang bzhin gyi shes rab kyis so/ /nges par rtog par byed ces bya ba ni sgom pa'i rang bzhin gyi shes rab kyis so/ /yang sgom pa'i lam yul gang la yin zhe na/nges 'byed yan lag dang mthong ba'i/ /lam dang sgom pa'i lam nyid la/ /zhes bya ba gsungs te/ bdag gis 'di ltar gnas par bya'o zhes gang gsungs pa ni nges par 'byed pa'i yan lag gi dbang du mdzad nas shes rab kyi pha rol tu phyin pa las ji skad du bstan pa bzhin du'o//bdag gis 'di ltar bslab par bya'o zhes bya ba ni mthong ba'i lam gyi dbang du mdzad nas shes rab kyi pha rol tu phyin pa las ji skad brjod pa bzhin du'o/ /bdag gis 'di ltar bsgrub par bya'o zhes bya ba ni sgom pa'i lam gyi dbang du mdzad nas shes rab kyi pha rol tu phyin pa las ji skad du brjod pa bzhin no//de nyid kyi phyir nges par 'byed pa'i yan lag bzhi dang mthong ba'i lam dang sgom pa'i lam gyi dbang du mdzad nas de bzhin du sgrub pa dang / de bzhin du nges par rtogs pa dang / de bzhin du nye bar rtogs pa dang / de bzhin du rtsol ba dang /de bzhin du sbyor ba dang / de bzhin du 'bad pa zhes bya ba'i tshig drug gsungs pa yin no/ /sgom pa'i lam la gnas pa de nyid ji ltar yul yin zhe na/ rgyun chags pa yin pa'i phyir phyi ma phyi ma'i yul snga ma'i yin pas nyes pa med do/ /sgom pa'i lam gyi phan yon rnam pa gsum ni tshad med pa'i dge ba'i rtsa ba yongs su 'dzin pa las ni gzhan gyi bud med dang btus pa'i brdar byas pa'i skyes bu'i rtog pa mang po'i dpes bsod nams tshad med pa skye bas bskal pa dpag tu med par 'khor ba spong ba dang /rgyab kyis bltas pa dang /mthar byed par 'gyur ba zhes bya bas zad pa dang rnam par gnon pa dang sngar ma skyes pa mi bskyed par brjod pa rnams kyis sgom pa'i lam gyi byed pa yin par shes par byed pa'i don gyis gang gsungs pa yin no/ /de rnam pa du zhig yin zhe na/ de ni rgyun chags yin pa'i phyir//chung dang 'bring dang chen po rnams/ /chung ngu'i chung sogs dbye ba yi/ /rnam pas rnam pa dgur 'dod do/ /zhes gsungs so/ /mi mthun pa dang gnyen po'i phyogs la zhes bya bar sbyar ro/ /chung dang 'bring dang chen po gsum ni rtsa ba'i rnam pa yin la/ yang de rnams re re zhing chung ngu dang 'bring dang chen po'i dbye bar byas na rnam pa dgur 'gyur te/ 'di lta ste/ chung ngu'i chung ngu dang / chung ngu'i 'bring dang / chung ngu'i chen po dang / 'bring gi chung ngu dang / 'bring gi 'bring dang / 'bring gi chen po dang / chen po'i chung ngu dang / chen po'i 'bring dang /chen po'i chen po'o/ /gnyen po'i phyogs la ji lta ba bzhin du mi mthun pa'i phyogs la yang shes par bya'o/ /de la lam chung ngu'i chung ngus rnam par rtog pa chen po'i chen po spong ba nas/ chen po'i chen pos chung ngu'i chung ngu spong ba'i bar du yin te/thog ma kho nar lam chen po mi srid pa'am/ lam chen po skyes pa na nyon mongs pa chen po yod mi srid pa'i phyir te/ gos kyi dri ma chen po dang por bsal nas phyis ni phra mo dag par byed pa dang / mun pa chen po ni snang ba chung ngus sel la chung ngu ni chen pos [(]sal [,]sel [)]ba zhes bya ba'i dpes 'di 'dir 'byor pa yin no//dkar po'i chos ni stobs dang ldan pa yin la nag po ni nyam chung ba yin pas 'phags pa'i lam gyi skad cig ma chung ngus kyang 'khor ba med pa nas gcig nas gcig tu brgyud de brtan pa'i nyon mongs pa chen po rtsa ba nas 'byin pa yin pa'i phyir ro//slob dpon dbyig gnyen gyis kyang dus mang por bsags pa'i nad rnams dur byid kyis khrus byas pa dang 'dra bar sel ba dang skad cig ma'i sgron ma chung ngus mun pa chen po 'joms pa dang 'dra'o zhes bshad do/ /de la rnam par rtog pa'i rnam pa chen po'i chen po ni/ shes rab kyi pha rol tu phyin pa dang bral bas bskal pa gang+gA'i klung gi bye ma snyed dkon mchog gsum la zang zing gi sbyin pa byin pa bas zhes bya ba la sogs pa gang gsungs pa yin no/ /'di spong bas lam gyi rnam pa chung ngu ni shes rab kyi pha rol tu phyin pa nyan pa la sogs pa la brtson par byed pa de bsod nams ches mang du 'phel ba nyid dang /de ci'i phyir zhe na/ gang gis bla na med pa yang dag par rdzogs pa'i byang chub tu mngon par rdzogs par 'tshang rgya ba byang chub sems dpa' chen po rnams kyi lam ni 'di yin pas zhes bya ba'i 'thad pas gang gsungs pa yin no/ / rnam par rtog pa chen po'i 'bring ni de nyid kyis bskal pa de nyid du rgyun tu zhugs pa nas/ de bzhin gshegs pa dgra bcom pa yang dag par rdzogs pa'i sangs rgyas kyi bar rnams la zang zing gi yon phul ba bas zhes gang gsungs pa yin te/ de nyid kyis zhes bya ba ni shes rab kyi pha rol tu phyin pa dang bral bas te/de bzhin du 'og ma rnams la yang sbyar bar bya'o/ /'di spong bas lam chung ngu'i 'bring ni/ shes rab kyi pha rol tu phyin pa la brtson par byed na de ches bsod nams mang du 'phel ba nyid dang / de ci'i phyir zhe na/ nyan thos la sogs pa'i sa las 'das nas bla na med pa yang dag par rdzogs pa'i byang chub tu mngon par rdzogs par 'tshang rgya bar 'gyur ro zhes bya ba'i 'thad pas gang gsungs pa yin no//rnam par rtog pa chen po'i chung ngu ni yang de nyid bskal pa de snyed du gnas shing sbyin pa dang / tshul khrims dang / bzod pa dang /brtson 'grus dang / bsam gtan dang / shes rab sgom pa bas zhes gang gsungs pa yin no/ /'di spong bas lam chung ngu'i chen po ni cig shos nyin gcig cig sbyin pa la sogs pa dang ldan pa bsod nams ches mang du 'phel ba nyid dang / de ci'i phyir zhe na/ 'di la gnas na chos thams cad yongs su rdzogs par byed pas shes rab kyi pha rol tu phyin pa ni byang chub sems dpa' chen po rnams kyis bskyed pa'o zhes bya ba'i 'thad pas gang gsungs pa yin no/ /cig shos zhes bya ba ni shes rab kyi pha rol tu phyin pa la brtson pa dang ldan pa ste/de bzhin du 'og ma rnams la yang sbyar ro/ /rnam par rtog pa 'bring gi chen po ni/ yang de nyid bskal pa de nyid du sems can rnams las chos sbyin pa bas zhes bya ba gang gsungs pa yin no/ /'di spong bas lam 'bring gi chung ngu ni cig shos kyi nyin gcig gis chos kyi sbyin pa de bsod nams ches mang du 'phel ba nyid dang /de ci'i phyir zhe na/ gang shes rab kyi pha rol tu phyin pa dang ma bral ba dang bral ba dag ni rnam pa thams cad mkhyen pa nyid dang ma bral ba dang bral ba nyid kyi 'thad pas gang gsungs pa yin no/ /rnam par rtog pa 'bring ni yang de nyid bskal pa de snyed du bsam gtan bzhi dang dran pa nye bar gzhag pa rnams nas/sangs rgyas kyi chos ma 'dres pa bco brgyad kyi bar la brtson par byas pa bas zhes gang gsungs pa yin no/ /'di spong bas lam 'bring gi 'bring ni cig shos de rnams la nyin zhag gcig mngon par brtson par byas na de bsod nams mang du 'phel ba nyid dang /de ci'i phyir zhe na/ shes rab kyi pha rol tu phyin pa dang ma bral ba dang bral ba dag ni rnam pa thams cad mkhyen pa nyid las phyir mi ldog pa dang / ldog pa'i gnas med pa dang yod pa nyid kyis mtha' gcig tu nges par 'byung ba'i 'thad pas gang gsungs pa yin no//rnam par rtog pa 'bring gi chung ngu ni yang de nyid bskal pa de snyed du zang zing gi sbyin pa dang nang du yang dag 'jog pa dang ldan pa'i yid la byed pa dang ldan pa de dag bla na med pa yang dag par rdzogs pa'i byang chub tu yongs su bsngos pa bas zhes gang gsungs pa yin no//'di spong bas lam 'bring gi chen po ni cig shos nyi ma gcig zang zing sbyin pa de bsod nams ches mang du 'phel ba nyid dang / de ci'i phyir zhe na/ shes rab kyi pha rol tu phyin pa'i yongs su bsngo ba ni dam pa nyid du brjod pas gang gsungs pa yin no//rnam par rtog pa chung ngu'i chen po ni yang de nyid bskal pa de snyed du 'das pa dang / ma byon pa dang / da ltar byung ba'i sangs rgyas bcom ldan 'das nyan thos kyi dge 'dun dang bcas pa rnams kyi dge ba'i rtsa ba gang ci yod pa de dag thams cad la rjes su yi rang na bla na med pa yang dag par rdzogs pa'i byang chub tu yongs su bsngos pa bas zhes gang gsungs pa yin no//'di spong bas lam chen po'i chung ngu ni cig shos kyis nyi ma gcig cig dge ba'i rtsa ba la rjes su yi rang ba de bla na med pa yang dag par rdzogs pa'i byang chub tu yongs su bsngos na bsod nams ches mang du 'phel ba nyid dang /de ci'i phyir zhe na/ shes rab kyi pha rol tu phyin pa'i rjes su yi rang ba'i bsngo ba ni dam pa nyid yin pa'i 'thad pas gsungs pa yin no/ /rnam par rtog pa chung ngu'i 'bring ni mngon par 'dus byas pa ni brtags pa nyid kyis bsod nams mang du bskyed pa nyid dang mngon par 'dus byas pas yang dag pa'i lta ba la bskyed pa'i skyon med par 'dug pa dang /bla na med pa yang dag par rdzogs pa'i byang chub tu mngon par rdzogs par 'tshang rgya bar mi nus pas mi 'dod par thal ba nyid du gang gsungs pa yin no//'di spong bas lam chen po 'bring ni/ rab 'byor mngon par byas pa de'ang stong pa nyid du snang ngo / /gsog nyid dang / gsob nyid dang / snying po med pa nyid du snang ngo zhes bya bas snga ma ni sgom pa'i lam rnam pa brgyad pa'i skabs kyi ma yin no zhes bsams pa'i don gyis lan brjod pas gang gsungs pa yin no//de la nang stong pa nyid dang / phyi stong pa nyid dang / phyi nang stong pa nyid kyis ni/ mngon par 'dus byas pa stong pa nyid du snang bar bshad do/ /stong pa nyid stong pa nyid dang /chen po stong pa nyid dang / don dam pa stong pa nyid kyis mngon par 'dus byas pa gsog nyid du snang bar bshad do/ /'dus byas dang 'dus ma byas dang / mtha' las 'das pa dang / thog ma dang tha ma med pa dang / dor ba med pa stong pa nyid kyis ni de gsob nyid du snang bar bshad do//rang bzhin stong pa nyid dang / chos thams cad stong pa nyid dang / rang gi mtshan nyid stong pa nyid dang / /mi dmigs pa stong pa nyid dang / dngos po med pa'i ngo bo nyid stong pa nyid kyis ni de snying po med pa nyid du snang bar bshad pa yin no/ /de nyid kyi phyir ci'i phyir zhe na/rab 'byor 'di ltar byang chub sems dpa' chen po ni nang stong pa nyid nas dngos po med pa'i ngo bo nyid stong pa nyid kyi bar la shin tu bslabs pa'o zhes bya ba'i 'thad pas gang gsungs pa yin no/ /yang mngon par 'dus byas pa ni go rims bzhin du go cha dang 'jug pa dang tshogs dang nges par 'byung ba'i bsgrub pa'i dbang du mdzad nas stong pa nyid du snang ba la sogs pa rnam pa bzhir brjod pa yin no//'di ltar de rnams la bcom ldan 'das kyis bka' stsal pa'i don bdag gis 'tshal ba ltar na byang chub sems dpa' sems dpa' chen po 'di dag go cha chen po bgos pa lags par rig par bgyi ste/gang 'di ltar rang gi mtshan nyid stong pa nyid ni sgyu ma'i chos nyid lags pa'i slad du'o zhes bshad pa yin no/ /rnam par rtog pa chung ngu'i chung ngu ni grangs yod pa dang / gzhal du yod pa dang / tshad yod pa rtogs pas bsdus pas sgom pa'i lam gyi dbang du byas nas sa dgu pa la de'i gnyen po lam gyi rnam pa chen po'i chen por ji ltar 'gyur ba gang gsungs pa ni ji skad du/stong pa nyid la gnas pa zhes bya ba/ sgom pa'i lam rnam pa dgus bsdus pa'i shes rab kyi pha rol tu phyin pa dang ma bral ba la/bsod nams grangs med pa dang gzhal du med pa dang tshad med pas bsdus pas/ dpe rnam pa gsum mthar phyin par byed pa'i don gyis yin no/ /grangs med pa la sogs pa la khyad par ni ci zhig mchis/ tha dad du bgyi ba ni ci zhig mchis zhes bya ba ni rang gi mtshan nyid nye bar mtshon pa'i don du yongs su dris pa yin no//grangs yod pa dang / grangs med pa'i khams 'khor ba dang / mya ngan las 'das pa'i mtshan nyid dag la grangs yod pa ma yin pa nyid dang grangs med pa nyid kyis de mnyam pa nyid du rtogs par shes par byed pa'i don gyis na rnam grangs med pa yin no//dus rnams la ni tshad mi dmigs pa'i phyir tshad med pa nyid kyis de rtogs na 'dus ma byas nyid du shes par byed pa'i don gyis tshad med pa yin no/ /gzhal bar mi nus pa'i phyir tshad med pa nyid kyis rnam pa thams cad mkhyen pa nyid kyi yul la dbang thob par shes par byed pa'i don gyis tshad med pa yin no//grangs med pa la sogs pa rnams kyi mtshan nyid kyi ngo bo nyid kyi mtshan nyid 'di'i dbang du byas nas/ chos rnams thams cad stong pa nyid kyis na grangs med pa dang /gzhal du med pa dang / tshad med pa nyid yin no zhes gsungs pa yin no/ /gal te de ltar yin na/ grangs med la sogs bstan pa rnams/ /dam pa'i don du bzod ma yin/ /stong pa nyid kyi mtshan nyid don dam pa ni mngon par brjod pa tha dad pas kyang tha mi dad pa yin no zhes bya ba ni 'di'i bsam pa yin no//kun rdzob tu ni thugs brtse ba'i/ /rgyu mthun de dag thub pa bzhed/ /ji skad du/ yi ge dang don dag la tha dad du bya ba mi dmigs pa'i phyir na mngon par brjod par bya ba ma yin zhing bgrang bar bya ba ma yin no zhes bya ba nas/ mya ngan las 'das pa zhes bya ba'i bar 'di ni de bzhin gshegs pa'i thugs rje'i rgyu mthun pa bstan pa yin no zhes gsungs pa yin no//gal te 'di dag de bzhin gshegs pa'i thugs rje'i rgyu mthun pa bstan pa yin na ni/ 'di dag thams cad kyi yul can du 'gyur dgos so zhe na/gsol ba ni/ ji ltar bdag gis bcom ldan 'das kyis gsungs pa'i don 'di dag de bzhin gshegs pa'i thugs rje'i rgyu mthun pa bstan pa yin pa'i don 'tshal ba ltar na de bzhin gshegs pas chos thams cad rnam pa thams cad du mngon par rdzogs par sangs rgyas pa'i dbang du byas nas/chos thams cad brjod du ma mchis pa lags so zhes bya ba yin no/ /ji ltar zhe na/ de rnams kyi stong pa nyid ni brjod par mi nus so zhes gsungs so/ /dngos po brjod du med pa la/ /nyams pa dang ni 'phel mi rung / /sgom zhes bya ba'i lam gyis ni//ci zhig nyams shing ci zhig 'thob/ /ji skad brjod pa'i rnam par rtog pa chen po'i chen po la sogs pa rnam pa dgu ni ci zhig nyams shing ji skad brjod pa chung ngu'i chung ngu la sogs pa lam gyi rnam pa dgu ni/ ci zhig 'thob ces bya ba brtson pa yin te/ji skad du brjod du med pa'i don la nyams pa dang 'phel ba bkag pa'i phyir na/ pha rol tu phyin pa rnams nas/ sangs rgyas kyi chos ma 'dres pa rnams kyi bar la nyams pa dang 'phel ba bkag pas rnam pa thams cad mkhyen pa nyid la yang dag par 'tshang rgya ba'i skal ba dang mi ldan par 'gyur bar gsungs pa yin no//'di'i lan brjod pa ni/ byang chub ji lta de bzhin du/ /'di ni 'dod pa'i don sgrub byed/ /ces bya ba ste/ sgom pa'i lam zhes bya ba'i tha tshig go/ /ji skad du rtogs pa'i chos thams cad la ngar 'dzin pa rnam par 'phel ba bkag pas bla na med pa yang dag par rdzogs pa'i byang chub ji lta ba de bzhin du yid la byed pa la sogs pa yongs su bsngo ba dang ldan pa de skal ba dang ldan pa nyid du gsungs pa yin no//byang chub kyang ji lta bu yin zhe na/ byang chub de bzhin nyid mtshan nyid/ /de yang de yi mtshan nyid bzhed//ces bya ba gsungs pa yin te/ gzugs kyi de bzhin nyid nas mya ngan las 'das pa'i bar gyi de bzhin nyid gang yin pa ste bla na med pa yang dag par rdzogs pa'i byang chub yin pa'i phyir de ltar shes rab kyi pha rol tu phyin pa la spyod pa'i nyams pa dang 'phel ba bkag pas rjes su gnang ba nyid kyis gang gsungs pa yin te/de ltar na rgyu dang 'bras bu dag gam 'bras bu dang rgyu dag phan tshun rang bzhin rjes su byed pa'i phyir rgyu dang 'bras bu'i 'brel pa phyin ci ma log par brjod pa yin no/ /de ltar byas na yang /sems ni snga mas byang chub par/ /rigs min phyi mas kyang ma yin/ /ji skad du sems bskyed pa dang po dang phyi ma dag phan tshun phrad pa med pa'i phyir bskal pa grangs med pa gsum du yang dag par bsgrubs pa'i dge ba'i rtsa ba bsags pa med pas na bla na med pa yang dag par rdzogs pa'i byang chub tu 'tshang rgya bar 'gyur ba'i sems bskyed pa gang zhig lags zhes zhus pas gsungs pa yin no//da ni ji ltar 'byung bar 'gyur zhe na/ 'jig rten na grags pa/ mar me'i dpe yi tshul gyis ni/ /zhes bya ba ste/ ji skad du mar me'i snying po tshig pa'i dpes sems bskyed pa gnyis ka 'bras bu bcas par shes par byed pas sems bskyed pa de'i yul du gyur pas sa bcu la slob pas bla na med pa yang dag par rdzogs pa'i byang chub thob par shes par byed pa nyid kyis sems bskyed pa dang po dang phyi ma dag gis kyang ma yin la/de dag la ma brten par yang mngon par rdzogs par byang chub pa ma yin no zhes gsungs pa yin no/ /'di ji ltar rnam par shes par bya ba yin zhe na/ zab mo'i chos nyid rnam par brgyad/ /ces bya ba gsungs te/ skabs 'di'i rjes su 'brang bar bya'o zhes bya bar sbyar ro //ji ltar rnam pa brgyad yin zhe na/ zab mo rnam pa brgyad do/ /gang zhe na/ skye ba dang ni 'gag pa dang / /de bzhin nyid dang shes bya dang / /shes dang spyod dang gnyis med dang / /thabs la mkhas pa zab pa nyid/ /ces gsungs so/ /de la skye ba zab pa ni de dag gis kyang ma yin de dag la ma brten par yang mngon par rdzogs par byang chub pa med pa'i phyir rten cing 'brel bar 'byung ba zab pa nyid dang /'gag pa'i sems skye ba bkag pa nyid kyis gang gsungs pa yin te/ ji skad du rab 'byor de ji snyam du sems/ sems gang 'gag pa de phyir skye bar 'gyur ram/bcom ldan 'das de ni ma lags so zhes gang gsungs pa yin no/ /'gag pa zab pa ni sems skyes pa ni 'gag pa'i chos nyid kyis na de'i chos can la 'gag pa bkag pa nyid kyis gang gsungs pa yin no / /ji skad du/ rab 'byor 'di ji snyam du sems/ sems gang skyes pa de 'gag pa'i chos can yin snyam mam/ bcom ldan 'das 'gag pa'i chos can lags so/ /'di ji snyam du sems/ 'gag pa'i chos can de 'gag par 'gyur snyam mam/ bcom ldan 'das de ni ma lags so zhes gsungs pa yin no//don ci zhig yin zhe na/ skyes pa tsam nyid na de 'gag pa la mngon par phyogs pa yin pa'i phyir na 'gag pas zin pa ni de'i rang bzhin yin pas yang ci zhig 'gog tu yod ces bya ba yin no/ /de bzhin nyid zab pa ni de bzhin nyid ji lta ba de bzhin du de dag gnas pas rnam par mi rtog pa'i yul yin par dgongs nas yang dag pa'i mtha'i ngo bo nyid du 'gyur bar gang gsungs pa yin no//shes bya zab pa ni de bzhin nyid las sems gzhan ma yin pa nyid du gang gsungs pa yin no/ /shes pa zab pa ni/ de bzhin nyid kyis de bzhin nyid mi mthong ba nyid du gang gsungs pa yin no//ji skad du/ de bzhin nyid kyis de bzhin nyid mi mthong ngo zhes gsungs pa yin no/ /spyod pa zab pa ni de ltar spyod pa de ni gang la yang mi spyod pa'i phyir shes rab kyi pha rol tu phyin pa zab mo la spyod pa rjes su gnang ba nyid dang /de ci'i slad du zhe na/ de bzhin nyid la gnas pa la ni lung bstan pa la sogs pa kun tu spyod pa med pa nyid kyis gang gsungs pa yin no/ /gnyis su med pa zab pa ni don dam pa'i spyod pa la ni gnyis su kun tu spyod pa med pa dang / byang chub sems dpa' la mtshan ma dang mtshan ma med pa'i 'du shes kyi sbyor ba med pa nyid du gang gsungs pa yin no//thabs la mkhas pa zab pa ni stobs bcu la sogs pa nas/ sangs rgyas kyi chos ma 'dres pa bco brgyad kyi bar du yongs su rdzogs par ma byas par bla na med pa yang dag par rdzogs pa'i byang chub tu 'tshang rgya ba bkag pa'i thabs mkhas pa nyid kyis chos gang yang dngos po dang dngos po med par bya ba bkag pa nyid dang /de ci'i slad du zhe na/ zhes bya ba la sogs pas chos thams cad kyi rang gi mtshan nyid stong pa nyid du shes pa la gnas pa ni mi mthun pa'i phyogs de dang de la spyod pa'i sems can rnams de dang de'i gnyen po la 'god pas sems can yongs su smin pa la mkhas pa nyid du gang gsungs pa yin no//mthong ba dang sgom pa'i lam la gnas pa'i byang chub sems dpa' slob pa phyir mi ldog pa'i dge 'dun bshad zin to// //da ni mi slob pa'i dge 'dun gyi mtshan nyid bstan par bya ba'i phyir 'khor ba dang mya ngan las 'das pa mnyam pa nyid brjod par bya'o/ /bslab par bya ba ni 'di tsam du zad de/ 'di lta ste/ kun nas nyon mongs pa'i rnam par rtog pa spang bar bya ba dang /rnam par byang ba'i rnam par rtog pa spang bar bya ba'i phyir ro/ /de gnyi ga mnyam pa nyid du rtogs pas ni mi slob par 'gyur te/ de phan chad bslab par bya ba med pa'i phyir ro/ /de'i phyir/ chos rnams rmi lam 'dra ba'i phyir/ /srid dang zhi bar mi rtog pa//zhes bya ba gsungs so/ /'di phan chad mi mthun pa dang gnyen po'i rnam par rtog pa'i gnas skabs yongs su gtugs pa'i dbang du mdzad nas gnyi ga mnyam pa nyid du rtogs pa'i phyir 'khor ba rmi lam dang 'dra bar dgongs pas rnam par mi rtog pa'i ye shes nyin mo sgom pa rnam par 'phel ba bkag pas ni rmi lam du rtog pa sgom pa rnam par 'phel ba bkag pa dang /de ci'i phyir zhe na/ tshe dang ldan pa shA ri'i bu rmi lam dang nyin par ni rnam par rtog pa med pa'i phyir ro zhes mi mthun pa'i phyogs dang gnyen po rnam par rtog pa yin pa'i 'thad pas gang gsungs pa yin no//las med la sogs glan ka yi/ /lan ni ji skad bshad par zad/ /de la las med par brtsad pa ni 'di yin te/ rmi lam dang 'dra ba'i chos can yin na rmi lam dang 'dra bar dngos gzhi dang mjug gis bsdus pa'i nyams pa dang 'phel ba med par thal ba nyid du gang gsungs pa yin no//'di'i lan ni/ 'on te sad nas yongs su shes pa phyi mas rnam par rtog par byed kyi/ rnam par rtog par mi byed pa ni ma yin na zhes bya bas las dang 'bras bu 'brel pa brda las byung ba nyid du nye bar bkod pas gang gsungs pa yin no//nyin par srog gcod pa byas pa gang yin pa dang rmi lam gyi nang du srog gcod pa zhes bya ba ni rab tu grags pa'i mtshan mo dang nyin mo nyid mngon par brjod par ro/ /nang na smos pas ni 'khor ba'i rmi lam khyad par du bya ba'i don du'o/ /tshe dang ldan pa shA ri'i bu las de la khyod ji skad smra zhes bya ba ni yang dag pa ma yin pa'i rang bzhin yongs su dris pas gnyen po 'gal ba yin yang rnam par rtog pa rjes su 'jug par thal bas de don dam pa nyid du yang dag par ston pa'i don gyis de ltar brtsad pa yin no//'di'i lan ni/ dmigs pa dang bcas pa las las skye bar khas blangs pa'i phyir dang /dmigs pa med pa'i las skye ba bkag pa'i phyir na slar de brda las byung ba nyid du gang gsungs pa yin no/ /sems dpa' thams cad dben pa yin pa'i phyir na de'i dmigs pa'i dngos po med pa nyid kyis so zhes bya ba ni brtsad pa yin no//'di'i lan ni/ tshe dang ldan pa shA ri'i bu mtshan mar byas nas zhes gang gsungs pa yin no/ /yongs su brtags pa'i dmigs pa'i dngos por khas blangs pa na rmi lam gyi nang gi sbyin pa la sogs pa'i dge ba'i rtsa ba bla na med pa yang dag par rdzogs pa'i byang chub tu yongs su bsngos na yang dag pa'am yang dag pa ma yin par bsngos pa yin zhes dris pa ni brtsad pa yin no//'di'i lan ni/ 'phags pa byams pa 'di ni thams cad mkhyen pa nyid gsum gyi mngon par rtogs pa mngon du byas pa yin pa'i phyir skye ba gcig gis thogs pa 'di nyid kyis dri ba 'di'i lan ldon pa dbang du gyur pa yin no zhes gang gsungs pa yin no//don ci yin zhe na/ dri ba 'di'i dbang du byas pa nyid kyis ma 'ongs pa'i sangs rgyas brgyud mar 'byung ba des na dri ba 'di ni yongs su ma rdzogs par bstan pa yin te/de yongs su rdzogs pa yin na ni ma 'ongs pa'i sangs rgyas 'byung ba don med par thal lo zhes bya ba yin no/ /ji ltar na yongs su ma rdzogs par bstan pa yin zhe na/ ming nas brtsams te chos thams cad lan ldon par byed pa'i dngos por dmigs su med pas so//de lta na yang 'di dag rang nyid kyis mngon du ma byas par gnas pa yin no/ /de mngon sum du ma byas par dam bcas pa ni mngon du byas pa'i don la dri ba de'i lan btab pa yongs su rdzogs pa'i nyes pa yang spang ba'i don du yin te/ ma 'ongs pa'i sangs rgyas kyi tshul yang dag par chad pa med par 'dod pa'i phyir ro//de nyid kyi phyir pha rol tu phyin pa drug la mi dmigs par spyod pa'i 'phags pa byams pa ni shes rab zab pa nyid kyis ma 'ongs pa na 'khor ba dang mya ngan las 'das pa'i rab tu dbye ba ston pa'i mtshan ma rtogs pa dang ldan pa nyid du bstan pa'i don gyis gang gsungs pa yin no//'khor ba dang mya ngan las 'das pa mnyam pa nyid du bstan pa de'i tshe dgongs pa'i dbang du mdzad nas/ mi dmigs pa'i spyod pa la mi skrag pa la sogs pa de dag gis rdzogs par byang chub par nges pa nyid kyis gang gsungs pa yin no//'khor ba dang mya ngan las 'das pa mnyam pa nyid bshad zin to// //da ni sems can gyi 'jig rten dang snod kyi 'jig rten gyi dbye bas sangs rgyas kyi zhing yongs su dag pa rnam pa gnyis brjod par bya ba yin pa des na/ sems can 'jig rten de bzhin du//snod kyi 'jig rten ma dag pa/ /de la dag par bsgrub pa yis/ /sangs rgyas zhing ni dag pa nyid/ /ces bya ba gsungs te/ sems can gyi 'jig rten gyi ma dag pa bkres pa la sogs pa gang yin pa de'i gnyen por de la lha rdzas kyi nye bar spyad pa la sogs pa sgrub pa dang /snod kyi 'jig rten gyi ma dag pa/ sdong dum dang / tsher ma la sogs pa gang yin pa de'i gnyen por de lag mthil ltar mnyam pa la sogs pa bsgrubs pas sangs rgyas kyi zhing yongs su dag pa yin te/ 'di ni mdor bsdus pa yin no/ / rgyas par ni mdo ji lta ba bzhin te/ sems can bkres pa la sogs pa mthong nas rang gi sangs rgyas kyi zhing du lha ris drug gi nye bar spyad pa dang yongs su spyod pa bsgrubs pas pha rol tu phyin pa la spyod pa dang / de bzhin du srog gcod pa la sogs pa dang de'i 'bras bu las bzlog pa sgrub pa dang /gnod sems la sogs pa las bzlog pa dang / le lo la sogs pa las bzlog pa dang / sgrib pa lnga dang / bsam gtan dang po la sogs pa ma thob pa las bzlog pa dang / shes rab 'chal pa las bzlog pa nye bar bsgrub pa'i pha rol tu phyin pa'i spyad pas go rims bzhin du sbyin pa la sogs pa'i pha rol tu phyin pa yongs su rdzogs pa dang /thams cad mkhyen pa nyid dang nye bar 'gyur ba dang / yang rang gi sangs rgyas kyi zhing du sems can nges pa dang / ma nges pa dang / log par nges pa ste/phung po gsum la gnas pa dang / ngan song rnams dang / sdong dum dang / tsher ma la sogs pa yod pa dang / sa 'jim las grub pa'i sa chen po dang / nga'i bar byed pa'i sems can yongs su 'dzin pa dang / rigs bzhi po rnams las bzlog pa nye bar bsgrubs pas so//de la de las bzlog pa ni 'di yin te/ ci nas kyang bdag sangs rgyas pa'i sangs rgyas kyi zhing de na chung ngu na rigs bzhi'i sgra yang mi srid pa zhes gang gsungs pa yin te/ 'dis ni rigs kyi don bkag pa'i phyir na bram ze zhes bya ba 'di ni sgra tsam du zad do zhes bya ba la sogs par bstan pa dang /sems can rab dang / 'bring dang / tha ma dang / kha dog bzang po dang / kha dog ngan pa dang / chos kyi rgyal po'i bdag po las ma gtogs pa'i bdag po dang / dran po nye bar gzhag pa la sogs pa las gcig pa nyid kyis 'gro ba tha dad pa dang /rdzus te skye ba ma gtogs pa'i skye gnas gsum po dang / mngon par shes pa dang bral ba dang / bshang gci la sogs pa 'dzag pa dang / 'od dang mi ldan pa dang / nyin mo dang / mtshan mo dang / zla ba la sogs pa dang / tshe thung ba dang / skyes bu chen po'i mtshan sum cu rtsa gnyis dang bral ba dang / sangs rgyas la bsnyen bkur byed par nus pa'i dge ba'i rtsa ba dang mi ldan pa dang / khams mi mnyam pas kun nas bslang ba'i nad rnams las bzlog pa nye bar bsgrubs pas so / /de las bzlog pa ni 'di yin te/rlung dang / mkhris pa dang / bad kan dang 'dus pas kun nas bslang ba'i nad skyes pa dang ma skyes pa dag la go rims bzhin du bsal ba dang / mi skye ba dang rjes su mthun pa'i rkyen nye bar sgrub pa gang yin pa dang / 'dod chags la sogs pa dang / nyan thos la sogs pa'i theg pa la mos pa dang /mngon pa'i nga rgyal can las bzlog nas ji ltar srid par rang gi sangs rgyas kyi zhing du phun sum tshogs pa'i rnam pa de dang de dag bsgrubs pas pha rol tu phyin pa yongs su rdzogs par byed cing rnam pa thams cad mkhyen pa nyid dang nye bar 'gyur ba dang /tshe dang / 'od dang / dge slong gi dge 'dun tshad yod pa las bzlog pas/ de dag tshad med par gyur pas na bdag nyid mngon par 'tshang rgya bar sems bskyed pa dang / gang+gA'i klung gi bye ma snyed kyi sangs rgyas kyi zhing ji snyed bzung ba de snyed kyi 'jig rten gyi khams thams cad zhing gcig tu gyur pa ni de bla na med pa yang dag par rdzogs pa'i byang chub tu mngon par rdzogs par 'tshang rgya ba thob par byed pa nyid dang /nam mkha' ltar mu med pa'i sems can gyi khams rnams la 'khor ba dang mya ngan las 'das pa gang yang med par yongs su rtogs pa'i yid la byed pas pha rol tu phyin pa drug yongs su rdzogs pa dang rnam pa thams cad mkhyen pa nyid dang yang nye bar gyur pa nyid dang /sring mo gang+gA'i lha mos de lta bur sangs rgyas kyi zhing yongs su sbyangs par khas blangs pa'i dge ba'i rtsa ba'i rgyus bla na med pa yang dag par rdzogs pa'i byang chub tu lung bstan pa dang /'khor rnams ji skad du bshad pa'i sangs rgyas kyi zhing yongs su sbyangs pa thob par yid ches pas dbang du gyur pa'i don gyis gang gsungs pa yin no/ /sangs rgyas kyi zhing yongs su dag pa bshad zin to// //thabs la mkhas pa brjod par bya'o//de la re zhig /yul dang sbyor ba can de ni/ /ci zhig yin par brjod par bya/ /zhes 'brel to/ /de la thabs mkhas pa'i yul ni/ bcom ldan 'das shes rab kyi pha rol tu phyin pa la spyod pa'i byang chub sems dpa' sems dpa' chen pos ji ltar stong pa nyid la yongs su 'dris par bgyi zhes bya ba nas brtsams te/byang chub kyi phyogs kyi chos rnams la yongs su 'dris pa dang / de la snyoms par 'jug pa'i sgom pa zhugs pas thabs la mkhas pa'i yul nye bar bkod pa'i don gyis gang gsungs pa yin no/ /thabs la mkhas pa'i sbyor ba ni/rab 'byor gang gi tshe byang chub sems dpa' rnam pa thams cad kyi mchog dang ldan pa'i stong pa nyid la so sor rtog pa zhes bya ba nas brtsams te/ yongs su 'dris par bsgom pa mngon du byed pa'i dus dang dus ma yin pa shes pa nyid kyi bar gyis gang gsungs pa yin no//yang thabs ni rnam pa bcur 'gyur bas de'i phyir/ dgra rnams las ni 'das pa dang / /mi gnas ji bzhin shugs dang ni/ /thun mong ma yin mtshan nyid dang / /ma chags pa dang mi dmigs dang / /mtshan ma smon lam zad pa dang / /de yi rtags dang tshad med dang //thabs la mkhas pa rnam pa bcu/ /zhes bya ba gsungs so/ /de la bar chad kyi chos las yang dag par 'da' ba'i thabs la mkhas pa 'di yin te/ skyes bu sgyu rtsal ma lus pa la byang ba zhig 'brog dgon par chas pa'i dpes yongs su bzung ba'i sems can gyi khams phyir rgol ba'i chos las yang dag par 'da' ba'i thabs mkhas pa shes par byed pa'i don gyis gang gsungs pa yin no//mi gnas pa gnas pa'i thabs la mkhas pa ni 'dab chags bya bar snang la rgyu zhing sa la mi ltung ba'i dpes mi gnas par gnas pa'i thabs shes par byed pa'i don gyis gang gsungs pa yin no//smon lam gyi shugs kyis 'phangs pa'i thabs la mkhas pa ni yang skyes bu 'phong la shin tu mkhas shing stobs dang ldan pas mda' brgyud mar 'phangs pa'i dpes smon lam gyi shugs kyis thabs la rjes su 'jug pa shes par byed pa'i don gyis gang gsungs pa yin no//thun mong ma yin pa'i thabs la mkhas pa ni sems can thams cad yongs su ma btang ba'i bsam pas 'di ltar dka' ba'i gnas la sbyor ba na thun mong ma yin pa'i thabs shes par byed pa'i don gyis gang gsungs pa yin no//ma chags pa'i thabs la mkhas pa ni yang rgyun tu zhugs pa la sogs pa'i 'bras bu ma thob par bsam gtan la sogs pa dge ba'i chos thams cad las yongs su ma nyams shing mngon par 'phel bar brjod pas ro myang ba med pa'i thabs shes par byed pa'i don gyis gang gsungs pa yin no//mi dmigs pa'i thabs la mkhas pa ni yang stong pa nyid kyi ting nge 'dzin gyis rnam par thar pa'i sgo sgom pa yongs su rdzogs par gyur pas mi dmigs pa'i thabs shes par byed pa'i don gyis gang gsungs pa yin no/ /mtshan ma med pa'i thabs la mkhas pa ni yang mtshan ma med pa'i ting nge 'dzin gyi rnam par thar pa'i sgo sgom pa yongs su rdzogs par gyur pas mtshan ma med pa'i thabs shes par byed pa'i don gyis gang gsungs pa yin no//smon pa med pa'i thabs la mkhas pa ni yang smon pa med pa'i ting nge 'dzin gyi rnam par thar pa'i sgo sgom pa yongs su rdzogs par 'gyur bas smon pa med pa'i thabs la mkhas pa shes par byed pa'i don gyis gang gsungs pa yin no//stong pa nyid la sogs pa ni nyan thos la sogs pa dang thun mong ba yin du zin kyang de la thabs kyi khyad par yod pa'i don no //de ltar spyod pa ni mngon par 'du bya ba med par ltung ba dang khams gsum pa dang lhan cig gnas pa med pa nyid du gang gsungs pa yin no/ /phyir mi ldog pa'i rtags kyi thabs la mkhas pa ni gzhan gyis dris pa na phyir mi ldog pa'i rtogs pa dang rjes su mthun par lung ston pa dang lung mi ston pas phyir mi ldog pa nyid du nges par bzung bas thabs ni de'i rtags su shes par byed pa'i don gyis gang gsungs pa yin no//yul tshad med pa'i thabs la mkhas pa ni gang rnam pa de ltar lan ldon pa de dag ni mi 'phrogs pa nyid kyis thabs kyi tshad med pa nyid du shes par byed pa'i don gyis gang gsungs pa yin no//de de ltar byas na rnam pa dang / bcas pa dang / sbyor ba dang bcas pa dang / phan yon dang bcas pa dang / bar chad dang bcas pa dang / yul dang bcas pa dang / khyad par dang bcas pa dang / byed pa dang bcas pa dang /ngo bo nyid dang bcas pa dang / 'jug pa dang bcas pa dang / yongs su smin pa dang bcas pa dang / rten dang bcas pa dang / yan lag dang bcas pa dang / nye ba'i yan lag dang bcas pa dang / yongs su 'dzin pa dang bcas pa ni rnam pa thams cad mngon par rdzogs par rtogs par bstan pa yin no//de la yul ni shes pa'i mtshan nyid kyi yul gang yin pa de yin par shes par bya'o/ /'jug pa ni thar pa'i cha dang mthun pa rnams yin te/ de rnams kyis bstan pa la 'jug pa'i phyir ro/ /yongs su smin pa ni nges par 'byed pa'i cha dang mthun pa rnams te de rnams kyi rgyud yongs su smin par 'gyur ba'i phyir ro//rten ni phyir mi ldog pa'i byang chub sems dpa'i dge 'dun no/ /yan lag ni 'khor ba dang mya ngan las 'das pa mnyam pa nyid do/ /nye ba'i yan lag ni sangs rgyas kyi zhing yongs su dag pa'o//lhag ma ni go bar sla bas rnam par mi phye'o/ /yang rnam pa thams cad mkhyen pa nyid dang rnam pa thams cad mngon par rdzogs par rtogs pa la khyad par ci zhig yod ce na/ thams cad mkhyen pa nyid gsum ni rnam pa so sor nges pa'i yul can yin te/ rnam pa so sor nges par ji skad bshad pas so/ / rnam pa thams cad mngon par rdzogs par rtogs pa ni rnam pa ma lus pa'i yul can yin no/ /zhes bya ba 'di ni khyad par ro/ /yang na thams cad mkhyen pa nyid gsum du rnam par gzhag pa ni mtshan nyid pa yin la/ rnam pa thams cad mngon par rdzogs par rtogs pa ni sbyor ba yin no/ /yang na rnam pa thams cad mngon par rdzogs par rtogs pa ni mi mthun pa dang gnyen pos rnam par gnas pas rab tu phye ba yin la/ rnam pa thams cad mkhyen pa nyid ni de lta ma yin te/ rang bzhin gyis zhi ba'i rnam pa nyid yin pa'i phyir ro zhes bya ba 'di ni khyad par gzhan yin no//de de ltar byas na/ rnam par sbyor ba dang bcas pa/ /yon tan skyon ni mtshan nyid bcas/ /thar dang nges 'byed cha mthun dang / /slob pa phyir mi ldog pa'i tshogs/ /srid dang zhi ba mnyam nyid dang //zhing dag bla na med pa ni/ /rnam kun mngon rdzogs rtogs pa ste/ /'di ni thabs mkhas bcas pa yin/ /zhes gang brjod pa de ni 'dir bshad zin pa'i 'brel bas yin par blta bar bya'o/ / shes rab kyi pha rol tu phyin pa'i man ngag gi bstan bcos mngon par rtogs pa'i rgyan las/rnam pa thams cad mngon par rdzogs par rtogs pa'i skabs de bzhin nyid kyi le'u ste bzhi pa'o/ / rnam pa thams cad mngon par rdzogs par rtogs pa bshad zin to// //da ni rtse mo'i mngon par rtogs pa bshad par bya'o/ /de la re zhig gang gis 'di mtshon par 'gyur ba 'di'i rtags brjod par bya ba yin la de'ang rnam pa bcu gnyis su 'gyur bas de'i phyir/rmi lam na yang chos rnams kun/ /rmi lam lta bur lta la sogs/ /rtse mor phyin pa'i sbyor ba'i rtags/ /rnam pa bcu gnyis dag tu 'dod/ /ces gsungs pa yin no//de la rtags dang po ni 'di yin no/ /rab 'byor gal te byang chub sems dpa'i chen po rmi lam gyi nang na 'ang chos thams cad rmi lam dang 'dra ba nyid du lta ba dang / de bzhin du sgra brnyan dang / gzugs brnyan dang / smig rgyu dang / sprul pa dang / sgyu ma dang / dri za'i grong khyer dang 'dra ba nyid du chos thams cad la lta zhing mngon du mi byed na 'di ni phyir mi ldog pa'i rtse mo las phyir mi ldog pa'i mtshan nyid du rig par bya'o zhes gang gsungs pa yin no/ /don ci yin zhe na/ de ltar shes rab dang thabs kyis yongs su zin pa'i byang chub sems dpas rnal 'byor gyi chos sgom pa'i rtse mo thob pa gang yin pa ni rmi lam gyi nang na yang 'di'i rnal 'byor dang lhag mthong yid la byed pas sems can gyi khams la ltos pa dang bcas pa nyid du gnas pa zhes bya ba yin no//gnyis pa ni de nyid nyan thos la sogs pa'i sa dang khams gsum pa dag la 'dod pa dang phan yon gyi sems mi bskyed par gang gsungs pa yin no//gsum pa ni de nyid kyis de bzhin gshegs pa 'khor chen pos bskor ba mthong zhing / de dam pa'i chos ston pa dang rjes su mthun pa'i chos thob pa zhes bya bar gang gsungs pa yin no//bzhi pa ni yang de nyid kyis sangs rgyas kyi rdzu 'phrul gyi rnam par 'phrul pa mthong ba nyid du gang gsungs pa yin no/ /lnga pa ni yang de nyid 'jig pa'i gnas thams cad la khams gsum pa rmi lam dang 'dra bar chos ston pa nye bar bsgrub pa'i sems bskyed pa nyid kyis gang gsungs pa yin no//drug pa ni yang de nyid sems can dmyal ba la sogs pa mthong nas rang gi sangs rgyas kyi zhing du ngan song spang ba rjes su dran pa thob pa dang / de ci'i phyir zhe na/ rtse mo'i mngon par rtogs pa la 'khor ba'i rmi lam dang rmi lam gyi mtha' gang yin pa de dag gnyis su med de gnyis su byar med pa nyid do//zhes bya ba gang gsungs pa yin no/ /da la gnyis su med pa ni don to/ /gnyis su byar med pa ni ldem por dgongs pas gnyis su byar mi nus pa nyid kyis so/ /bdun pa ni rmi lam dang sad pa'i gnas skabs dag tu grong khyer la sogs pa tshig pa zhi bar byed pa'i bden pa'i byin gyi brlabs grub pas phyir mi ldog pa nyid yin pa dang /de'i phyogs gcig grub pas ni sems can rnams kyi chos spang bar 'gyur ba'i las bsags pa nyid dang / bar dang bcas pa dang bar med par grub pas ni sems can rnams kyi mthong ba'i chos kyi las kyi rnam par smin pa nyid du gang gsungs pa yin no//brgyad pa ni yang mi ma yin pas byin gyis brlabs pa rnams la phyir mi ldog pa'i bden pa'i byin gyi brlabs grub pas de 'gro ba dang / bdud kyi byin gyi brlabs kyis song ba na rang nyid mngon pa'i nga rgyal skyes pas byang chub sems dpa' gzhan la brnyas par byed pa de'i mtshan nyid yin pa dang /de ci'i phyir zhe na/ thabs la mkhas pas yongs su ma bzung ba nyid kyi phyir dang / yang bdud kyis de'i ming dang rigs la sogs pa 'brel pa rnam pa mang po bstan pa la slu bar byed pa nyid du ma rtogs pa dang /yang bdud kyis rang gis btags pa'i ming la sogs pas slu ba nye bar bstan pa la bdag gir byed pa dang / rtsa ba'i ltung ba bzhi dang mtshams med pa lnga pas kyang ming nye bar bstan pas mngon par rlom pa ches lci ba nyid dang /yang bdud kyis dben pa'i yon tan nye bar ston pa dang / bcom ldan 'das kyi nyan thos la sogs pa'i sems kyis dben pa rjes su gnang ba zhes bya bas gang gsungs pa yin no/ /dgu pa ni lhag pa'i nga rgyal can gyi gang zag spang ba dang / rang gi don la sogs pa'i sbyor ba la rjes su brtson pa ni rang nyid mngon par shes pas pha rol gnon pa nyid dang / de rnams dge ba'i chos thams cad thob pa'i rgyu yin par shes par byed pa'i don gyis dge ba'i bshes gnyen rnams la brten par bya ba nyid dang / de rnams dge ba'i chos thob par byed pa'i lam du shes par 'dod pa'i don gyis pha rol tu phyin pa rnams dang /byang chub kyi phyogs la sogs pa'i dge ba'i bshes gnyen yin pa nyid du gang gsungs pa yin no/ /bcu pa ni bsam pa thams cad yongs su rdzogs par 'dod pas shes rab kyi pha rol tu phyin pa 'di nyid la bslab par bya ste/'di las bslab par bya ba'i chos thams cad rgya cher bstan pa'i phyir ro/ /zhes gang gsungs pa yin no/ /bcu gcig pa ni shes rab kyi pha rol tu phyin pa ni nam mkha' ltar chags pa med pa'i don gyi mtshan nyid yin pas/ gzung ba dang 'dzin pa'i rnam par rtog pa'i chags pa med par shes par byed pa'i don dang / go rims bzhin du bar chad med pa'i lam dang rnam par grol ba'i lam dag dben pa dang stong pa'i mtshan nyid yin pa'i phyir chos thams cad ni shes rab kyi pha rol tu phyin pa'i mtshan nyid du yod pa nyid dang /de lta na ni kun nas nyon mongs pa dang rnam par byang ba med par thal bar 'gyur ba dang / rab 'byor 'di ji snyam du sems/ sems can rnams yun ring po nas bdag dang bdag gi zhes bya ba la spyod dam zhes bya bas de grub pa yin no/ /zhes gang gsungs pa yin no//bcu gnyis pa ni de ltar spyod pa ni zil gyis mi non par rnam pa thams cad mkhyen pa nyid dang nye bar gyur pa nyid du gang gsungs pa yin no/ /rtse mo'i mngon par rtogs pa ni gang gis mtshon par 'gyur ba'i rtags bshad zin to// // da ni de'i rnam par 'phel ba gang zhig yin zhe na/ 'dzam bu'i gling gi skye bo snyed/ /sangs rgyas mchod pa'i dge la sogs/ /rnam mang du ni dper mdzad nas/ /rnam 'phel bcu drug bdag nyid do/ /zhes bya ba gsungs so/ /de la rnam par 'phel ba dang po ni 'di yin te/'dzam bu'i gling gi sems can gyi grangs kyi de bzhin gshegs pa la rim gror bya ba la sogs pa mchod pa byas te dge ba'i rtsa ba de bla na med pa yang dag par rdzogs pa'i byang chub tu sngo bar byed pa bas shes rab kyi pha rol tu phyin pa 'di gzhan dag la ston pa shes rab kyi pha rol tu phyin pa dang ldan pa'i yid la byed pa dang ma bral ba de bsod nams ches mang du 'phel ba nyid dang /de bzhin du stong gsum gyi stong chen po'i 'jig rten gyi khams kyi sems can ji snyed pa de dag thams cad bla na med pa yang dag par rdzogs pa'i byang chub la rab tu bkod pa nas/dge ba'i rtsa ba de bla na med pa yang dag par rdzogs pa'i byang chub tu yongs su sngo bar byed pa'i bar bas cig shos kyi bsod nams ches mang du 'phel ba nyid dang / de ci'i phyir zhe na/ de bzhin gshegs pa de'i 'og tu byams pa dang / snying rje dang / dga' ba dang / btang snyoms la gnas pa nyid yin pas so zhes bya ba la sogs pa gang gsungs pa yin no/ /gnyis pa ni/ skyes bu zhig gi sa nor bu rin po che chen po rnyed ma myong ba zhig rnyed pa las yang stor bar gyur pa'i dpes shes rab kyi pha rol tu phyin pa la gcig tu gtod pa'i yid la byed pa nyid dang /yid la byed pa thams cad rang bzhin gyis stong pa yin pa'i phyir de dag dang ma bral ba nyid med par thal bar 'gyur ba dang / gal te chos thams cad de lta bu'i rang bzhin can dang ma bral ba yin te zhes bya ba nas brtsams te/shes rab kyi pha rol tu phyin pa la 'phel ba dang yongs su 'grib pa bkag pas mi 'bral ba nyid du bsgrubs pas gang gsungs pa yin no/ /gsum pa ni/ rab 'byor byang chub sems dpa' sems dpa' chen po ni shes rab kyi pha rol tu phyin pa la spyod pa na 'phel ba'am yongs su 'grib pa med da zhes bya ba nas brtsams te/rab 'byor de ni byang chub sems dpa' sems dpa' chen po rnams kyi mi skye ba'i chos la bzod pa thob pa ste/ rab 'byor bzod pa de lta bu dang ldan pa'i byang chub sems dpa' sems dpa' chen po ni bla na med pa yang dag par rdzogs pa'i sangs rgyas kyi ye shes dang ye shes chen po dang /rnam pa thams cad mkhyen pa'i ye shes thob par mi 'gyur ba de ni gnas med do/ /de ci'i phyir zhe na/ de ni 'di ltar bla na med pa yang dag par rdzogs pa'i byang chub tu mngon par rdzogs par sangs rgyas pa'i bar du de la gzhol bar 'gyur ba'i phyir ro zhes gang gsungs pa yin no//bzhi pa ni/ bcom ldan 'das chos thams cad mi skye ba'i slad du byang chub sems dpa' sems dpa' chen po de bla na med pa yang dag par rdzogs pa'i byang chub tu lung bstan par 'gyur ram ci lags/ rab 'byor de ni ma yin no zhes bya ba nas brtsams te/ rtogs par bya ba dang rtogs par byed pa'i chos nye bar mi dmigs pa dang / de ci'i phyir zhe na/ 'di la spyod pa'i byang chub sems dpa' la rnam par rtog pa de lta bu thams cad med pa'i phyir ro/ /de ci'i phyir zhe na/ rtse mo'i mngon par rtogs pa ni shes rab kyi pha rol tu phyin pa la ni rnam par rtog pa med pa'i phyir ro zhes gang gsungs pa yin no//lnga pa ni shes rab kyi pha rol tu phyin pa la mngon par brtson pa rnams dge ba'i rtsa ba ngan ngon dang ldan pa bkag pas de la slob pa'i bsod nams mang po nye bar dgod pa'i don dang 'dzam bu'i gling gi sems can rnams dge ba bcu'i las kyi lam dang /bsam gtan dang / gzugs med pa'i snyoms par 'jug pa thob pa bas chos 'di la mngon par brtson pa dang ldan pa bsod nams ches mang du 'phel ba nyid dang / de ci'i phyir zhe na/ de 'jig rten thams cad na nyan thos la sogs pa dang / byang chub sems dpa' thabs la mi mkhas pa thams cad zil gyis mnan te nges par 'byung ba nyid du gang gsungs pa yin no/ /drug pa ni de ltar spyod pa la lha'i tshogs thams cad nye bar 'dod par sems par 'gyur ba dang /gzhan gyi gnod pa byas pa rnams dang khams mi mnyam pas kun nas bslang ba'i nad la sogs pa bkag pa nyid kyis gang gsungs pa yin no/ /bdun pa ni slob pa'i dus su byang chub sems dpa' nyan thos la sogs pa'i sar ltung ba dang / bla na med pa yang dag par rdzogs pa'i byang chub tu mngon par rdzogs par 'tshang rgya ba las gang yang rung ba zhig thob par 'gyur ba la stong gsum gyi stong chen po'i 'jig rten gyi khams kyi bdud rnams the tshom du 'gyur ba dang /yang de rnams mya ngan gyi zug rngus zug par 'gyur ba dang / yang de rnams skar mda' ltung ba gtong ba la sogs pa ston pa dang /kun dga' bo byang chub sems dpa' thams cad kyi drung du bdud sdig can tho 'tshams pa'i bsam pas 'ong ba ma yin te/ zhes bya ba nas brtsams te/ sngon gyi tshe rabs su chos 'di la lhag par ma mos pa dang / de la the tshom za bar gyur pa dang / dge ba'i bshes gnyen dang bral ba dang / 'jig rten rgyang pan pa la sogs pa dam pa'i chos ma yin pa 'dzin par byed pa dang / de'i bsngags pa brjod pa dang / khyod kyis shes rab kyi pha rol tu phyin pa 'di thos pas ci zhig bya zhes zer zhing rnam par 'byed par byed pa dang /byang chub sems dpa' gzhan la brnyas pa dang / nyan thos dang byang chub sems dpa'i theg pa pa'i gang zag gzhan rnams dang lhan cig 'thab cing mtshang 'bru ba la sogs pa dang / lung ma bstan pa lung bstan pa la gnod par sems pa dang ldan pa la ni bdud kyis glags rnyed par 'gyur bas des rnam pa thams cad mkhyen pa nyid yongs su mi gtong na de snyed kyi bskal par dmyal bar gnas par go cha bgo bar khas blang ba nyid dang /sngar bstan pa'i ltung ba sdom pa dang ldan pa ni lus kyi sgrib pa de las ldang ba nyid du gang gsungs pa yin no//brgyad pa ni ston pa la ji lta ba bzhin du theg pa mtshungs pa rnams la gnas par byed pa'i phyir bslab pa mnyam pa nyid dang / nang stong pa nyid nas dngos po med pa'i ngo bo nyid stong pa nyid kyi bar dang / gzugs ni gzugs kyis stong ngo zhes bya ba nas/byang chub ni byang chub kyis stong ngo zhes bya ba'i bar gyis bslab pa mnyam pa nyid kyi yul nye bar dgod pas gang gsungs pa yin no/ /dgu pa ni/ bcom ldan 'das ci byang chub sems dpa' sems dpa' chen po gzugs bas par bgyi ba'i slad du slob na rnam pa thams cad mkhyen pa nyid du slob pa lags sam zhes bya ba nas brtsams te/de ci'i phyir zhe na/ gang gi bsam gtan la sogs pa la yang snyoms par 'jug la de dag gi dbang gis skye bar yang mi 'gyur ba'i thabs mkhas pa 'di la yod pa'i phyir ro/ /zhes bya bas yongs su dag pa'i bslab pa brjod pas bslab pa rnam par 'phel ba'i khyad par shes par byed pa'i don dang /chos thams cad rang bzhin gyis rnam par dag pa'i phyir de mi 'thad pa dang / so so'i skye bo rnams kyis de ltar ma shes pa'i phyir byang chub sems dpa' rnam pa thams cad mkhyen pa nyid la slob pa gang yin pa 'thad pas gang gsungs pa yin no//bcu pa ni/ gser sa le sbram 'byung ba'i gnas nyung ba'i dpes sangs rgyas kyi rigs rtse mo'i mngon par rtogs pa mngon par 'phel ba thob par nyung ba nyid yin par shes par byed pa'i don gyis gang gsungs pa yin no//bcu gcig pa ni/ 'khor los sgyur ba'i rgyal por 'gyur ba'i las yang dag par blangs te gnas pa'i sems can nyung ba'i dpes rtse mo'i mngon par rtogs pa'i 'bras bu sangs rgyas nyid thob pa rnyed pa ni ches nyung ba nyid du shes par byed pa'i don gyis gang gsungs pa yin no//bcu gnyis pa ni/ yang pha rol tu phyin pa drug gis mi mthun pa'i phyogs kyi sems mi skye ba nyid kyis gang gsungs pa yin no/ /bcu gsum pa ni/ yang gzugs la sogs pa dang ldan pa'i sems mi skyed pa dang / de ci'i phyir zhe na/ rtse mo'i mngon par rtogs pa'i mtshan nyid can gyi shes rab kyi pha rol tu phyin pa 'di la spyod pa'i byang chub sems dpa' sems dpa' chen pos chos thams cad la dmigs su med pa nyid du gang gsungs pa yin no//bcu bzhi pa ni/ 'jig tshogs la lta ba'i dpes/ shes rab kyi pha rol tu phyin par pha rol tu phyin pa thams cad 'dus pa nyid du gang gsungs pa yin no//bco lnga pa ni/ shes rab kyi pha rol tu phyin pa la slob pa ni phun sum tshogs pa thams cad thob pa'i rgyu nyid du gang gsungs pa yin no/ /gal te de lta yin na de nyan thos dang rang sangs rgyas su yang 'gyur ro zhe na/de'i phyir nyan thos dang rang sangs rgyas kyi phun sum tshogs pa ni shes pa dang / mthong bas rnam par bltas nas 'da' bar bya ste zhes gsungs te/ rjes su dpag pa'i shes pa bsal ba'i don du mthong ba zhes smos pa yin la/ 'khrul pa'i mthong ba bsal ba'i don du shes pa zhes smos pa yin te/shes pa dang mthong ba'i tshig gis ni nyan thos dang rang sangs rgyas kyi sa dag la ni byang chub sems dpa' sgom pa'i lam yod pa ma yin par shes par bya ba'i don to/ /yang rgyu ci zhig gi phyir de la 'di'i sgom pa'i lam bkag ce na/rgyun tu zhugs pa nas/ rang sangs rgyas kyi bar gyi shes pa dang spang ba gang yin pa de ni byang chub sems dpa'i bzod pa yin no zhes gsungs pa'i phyir te/ gzhan gtsor byed pa'i phyir ro zhes bya ba'i tha tshig go/ /'da' bar bya ba yang rnam pa thams cad mngon par rtogs pa la 'jug pa'o//rnam par 'phel ba bcu drug pa ni/ gal te yang 'di snyam du 'di ni shes rab kyi pha rol tu phyin pa'o zhes bya ba nas brtsams te/ de'i yul gyi rnam par rtog pa bkag pa la slob pa rjes su gnang bas bla na med pa yang dag par rdzogs pa'i byang chub dang nye bar gyur pa nyid du gang gsungs pa yin no//gang gis de rnam par 'phel bar 'gyur ba'i rtse mo'i mngon par rtogs pa'i rnam par 'phel ba bshad zin to// //da ni rang gi bdag nyid du gyur pa'i phyir na ji ltar 'di'i nges par bstan par 'gyur ba'i rnam pa brjod par bya ba yin te/des na/ kun mkhyen nyid gsum chos rnams kyi/ /yongs su rdzogs pa bla med pa/ /sems can don yongs mi gtong ba/ /bstan pa zhes ni mngon par brjod/ /ces bya ba gsungs te/ 'di la re zhig byang chub sems dpa' sems dpa' chen po sbyin pa'i pha rol tu phyin pa dang zhes bya ba nas sangs rgyas kyi chos ma 'dres pa bco brgyad la spyod pas kyang sems can thams cad zil gyis gnon na/bla na med pa yang dag par rdzogs pa'i byang chub tu mngon par rdzogs par sangs rgyas pas lta ci smos zhes bya ba nas/de dag ni 'dod par bya ba yin no zhes bya ba'i bar gyis rtse mo'i mngon par rtogs pa'i nges par bstan pa'i gnas skabs thob pa ni rnyed dka' bar shes par byed pa'i don gyis bstan pa dang / me tog man da ra ba nye bar gtor ba dang / mngon du phyogs te gtor ba dang /rab tu khyab par gtor ba las mchod pa'i dge ba'i rtsa ba byang chub sems dpa' rnams kyi sangs rgyas kyi chos rnams yongs su rdzogs par yongs su bsngo ba bstan pa'i tshig dang / rnam pa thams cad mkhyen pa nyid kyi chos rnams dang / rang byung gi chos rnams dang / zag pa med pa'i chos rnams yongs su rdzogs par gyur pa zhes bya ba thams cad mkhyen pa nyid gsum yongs su rdzogs par bsngo ba de bshad pas gang gsungs pa yin no/ /ji ltar na sems can gyi don yongs su mi gtong ba yin zhe na/ de lta bu'i rtogs pa dang ldan pa'i gnas skabs su mya ngan las 'da' bar ltung ba spang ba'i phyir/snying rje chen po la mngon du phyogs pa'i bsam pas sems can ma brgal ba bsgral ba la sogs pa'i sems bskyed pa dang / ji ltar srid par rnam par rtog pa rnam pa bzhi'i gnyen por mthong ba dang sgom pa'i lam dag gi rtogs pa po rnam pa bzhi bsnyad pa'i phyir na theg pa la gsar du zhugs pa dang /spyod pa la zhugs pa dang / phyir mi ldog pa dang / skye ba gcig gis thogs pa zhes bya ba rnam pa bzhi po de bstan pas gang gsungs pa yin no/ /da ni ting nge 'dzin rnams bshad par bya ba yin pas/gling bzhi pa dang stong dag dang / /stong gnyis gsum dag dper mdzad nas/ /bsod nams mang po nyid kyis ni/ /ting 'dzin yongs su bsgrags pa yin/ /zhes bya ba gsungs te/ rjes su yi rang ba'i bsod nams mang po las brtsams te gling chen po bzhi pa'i 'jig rten gyi khams dang /de bzhin du stong dang stong gnyis pa srang la gzhal bas tshad bzung ba'i dpe dang / de bzhin du stong gsum gyi stong chen po'i 'jig rten gyi khams kyi rgya mtsho chen po'i chu'i phung po ji snyed yod pa de dag skra'i rtse mo brgyar gshags pa'i cha gcig gis chu'i thigs pa blangs pa'i tshad bzung ba'i dpes/de dag gis rjes su yi rang ba dang ldan pa'i sems bskyed pa'i bsod nams mang ba nyid dang / sems bskyed pa 'di dag dang ldan pa dag ni gang dang gang du skye ba de dang de dag tu zhes bya ba nas brtsams te/ci nas kyang sems de la yang ma yin zhing sems gzhan la yang ma yin pa de ltar yongs su bsngo bar bya'o zhes bya ba'i bar phan yon rnam pa mang po ston pas gang gsungs pa yin no/ /rtags la sogs pa dag ni rim pa ji lta ba bzhin dro ba la sogs pa nges par 'byed pa'i cha dang mthun pa bzhi'i rang bzhin gyi mtshan nyid can yin par shes par bya'o// //da ni mthong ba'i lam gyi mi mthun pa'i phyogs gzung ba dang 'dzin pa'i rnam par rtog pa rnam pa bzhi po gnyen po dang bcas pa brjod par bya ba yin pa des na/ 'jug pa dang ni ldog pa la//gzung ba'i rnam rtog so sor deng / /dgu yi bdag nyid ji bzhin yul/ /min pa'i bdag nyid dag ces bya/ /zhes bya ba gsungs pa yin no/ /de la gzung ba'i rnam par rtog pa rnam pa gnyis las/ dang po 'jug pa'i phyogs kyi yul mtha' dag la brten pa ni gnyis dang gnyis ma yin pa'i 'du shes dang bral ba rnams kyi sems bskyed pa rnam pa de lta bu la rjes su yi rang zhing bla na med pa yang dag par rdzogs pa'i byang chub tu yongs su bsngo ba nges par sbyor bas gang gsungs pa yin no//gnyis pa ldog pa'i phyogs mtha' dag la brten pa ni/tshe dang ldan pa shA ri'i bu shes rab kyi pha rol tu phyin pa ni rnam par mi rtog pa'o zhes bya ba nas brtsams te/ rnam par mi rtog pa'i shes rab kyi pha rol tu phyin pa la spyod pas rnam par mi rtog pa'i chos mngon par rdzogs par 'tshang rgya'o zhes bya ba'i bar gyis rnam par byang ba'i yul gyi rnam par rtog pa bkag pas gang gsungs pa yin no//yang rgyu ci zhig gis na 'di dag la rnam par rtog pa zhes brjod ce na/ gang gi phyir yul ji lta ba ma yin pa'i bdag nyid can dag ni log pa'i rnam par rtog pa yin pas na rnam par rtog pa zhes bya ba yin pa'i phyir ro//'dzin pa'i rnam par rtog pa yang rnam pa gnyis yin pa des na/ so so'i skye bo 'phags dbye bas/ /sems can rdzas dang rtags yod par/ /rnam rtog 'dzin pa dag tu 'dod/ /de dag so sor dgu bdag nyid/ /ces gsungs so//de la so so'i skye bo rnam par rtog pa dang po skyes bu rdzas su yod pa la brten pa ni/ kye ma tshe dang ldan pa rab 'byor byang chub sems dpa' sems dpa' chen po gang shes rab kyi pha rol tu phyin pa la spyod pa ni snying po la spyod pa zhes bya ba nas brtsams te/ rnam pa thams cad mkhyen pa nyid kyi bar du dben pa'i phyir/de la mi skrag pa dang mi zhum pa la sogs pa rnams kyis skyes bu la brten pa'i rnam par rtog pa bkag pas gang gsungs pa yin no/ /chos thams cad bdag med pa yin no zhes chos de lta bu rnams so so'i skye bos kyang rtogs pa ma yin nam/des na 'dzin pa'i rnam par rtog pa dang po'i rnam par gzhag pa ni ma khyab par 'gyur ro zhe na/ de dag gi de ni mos pa yid la byed pa yin la/ 'dir ni de kho na yid la byed pa brjod par 'dod pa yin pas snying po med do/ /gnyis pa 'phags pa'i gang zag gi 'dzin pa'i rnam par rtog pa skyes bu btags par yod pa la brten pa ni sems mi zhum pa de'i rgyu dris pa na/bcom ldan 'das chos thams cad ma mchis pa'i slad du zhes bya ba nas brtsams te/ gang du skye ba dang / gnas pa dang / gnas pa las gzhan du 'gyur ba la sogs pa nye bar mi dmigs pa de la su zhig gnas par 'gyur ba'am/gnas nas kyang bla na med pa yang dag par rdzogs pa'i byang chub mngon par rdzogs par 'tshang rgya bar 'gyur ba'i chos ston par 'gyur zhes bya bas 'phags pa'i gang zag thams cad bkag pas gang gsungs pa yin no/ /'phags pa la yang 'di lta bu yod pa yin te/dge slong dag mtshan mo 'das nas nang par gyi dus su ngas srog chags ce spyang skad 'byin pa'i sgra thos so zhes bya ba dang / de bzhin du de'i tshe de'i dus su ri dgas kyi rgyal po seng ge yan lag ma smad pa zhes bya bar gyur to zhes gsungs pa ma yin nam/des na 'dzin pa'i rnam par rtog pa gnyis pa'i rnam par gzhag pa ma khyab par 'gyur ro zhe na/ de'i tshig de ni tha snyad pa yin gyi/ don dam pa ni ma yin pa des na snying po med do/ /yang ci'i phyir 'di dag la rnam par rtog pa zhes brjod ce na/ gang gi phyir/ gal te gzung don de bzhin med//de dag gang gi 'dzin par 'dod/ /de ltar de dag 'dzin pa yi/ /ngo bos stong pa'i mtshan nyid do/ /de ltar na rnam par rtog pa 'di bzhi char yang re re zhing rnam pa dgur shes par bya'o/ /de la gzung ba'i rnam par rtog pa dang po rnam pa dgu po gang yin zhe na/ ngo bo nyid dang rigs dang ni//lam ni yang dag 'grub pa dang / /shes pa'i dmigs pa ma 'khrul dang / /mi mthun phyogs dang gnyen po dang / /rang gi rtogs dang byed pa dang / /de yi las bya'i 'bras bu la/ /'jug pa'i phyogs kyi rten can gyi/ /rnam rtog de ni rnam dgur 'dod//ces bya ba gsungs so/ /de la ngo bo nyid kyi rnam par rtog pa ni/ rab 'byor 'di ji snyam du sems/ sgyu ma lta bu'i sems de khyod kyis yang dag par rjes su mthong ngam zhes bya ba nas brtsams te/ ji ltar na dben pas dben pa rjes su rtogs par 'gyur lags / zhes bya ba'i bar gyis 'tshang rgya ba mi 'thad pa dang /rab 'byor de de bzhin no/ /rab 'byor shes rab kyi pha rol tu phyin pa ni shin tu dben pa'o zhes bya ba nas brtsams te/ rab 'byor gal te shes rab kyi pha rol tu phyin pa nas/ rnam pa thams cad mkhyen pa nyid kyi bar du dben par ma gyur na/de ni shes rab kyi pha rol tu phyin par mi 'gyur la rnam pa thams cad mkhyen pa nyid kyi bar du mi 'gyur ro zhes bya ba'i bar gyis mngon par rdzogs par byang chub pa ni de'i mtshan nyid can yin par bstan pa'i phyir de ltar spyod pa ni don zab mo la spyod pa nyid du gang gsungs pa yin no//rigs kyi rnam par rtog pa ni yang nam mkha'i dpes rigs su rnam par rtog pa bsal bar shes par byed pa'i don gyis gang gsungs pa yin no/ /yang dag par 'grub pa'i rnam par rtog pa ni/ yang sgyu ma'i skyes bu'i dpes sgrub pa la yang dag par 'grub pa'i rnam par rtog pa bkag pa'i don gyis gang gsungs pa yin no//dmigs pa'i rnam par rtog pa ni yang mig yor gyi dpes dmigs pa'i rnam par rtog pa bsal ba'i don gyis gang gsungs pa yin no/ /mi mthun pa'i phyogs dang gnyen po'i rnam par rtog pa ni/yang dag par rdzogs pa'i sangs rgyas la rnam par rtog pa med pa'i dpes/ gnyen po dang mi mthun pa'i phyogs kyi rnam par rtog pa bsal ba'i don gyis gang gsungs pa yin no/ /rang gi rtogs pa'i rnam par rtog pa ni/ yang de'i dpes rang gi rtogs pa'i rnam par rtog pa bkag pa'i don gyis gang gsungs pa yin no//byed pa'i rnam par rtog pa ni yang de'i sprul pa'i dpes sprul pa'i rigs brgyud kyi byed pa por rnam par rtog pa bsal ba'i don gyis na/ nyan thos dang rang sangs rgyas kyi byang chub ring ba dang nye bar bkag pa'i don gyis gang gsungs pa yin no//las kyi rnam par rtog pa ni/ yang de bzhin gshegs pa'i sprul pa'i bya ba'i dpes las kyi rnam par rtog pa dag pa'i don gyis gang gsungs pa yin no/ /bya ba 'bras bu dang bcas pa'i rnam par rtog pa ni/ yang shing gi 'khrul 'khor gyi dpes bya ba 'bras bu dang bcas pa'i rnam par rtog pa bsal ba'i don gyis gang gsungs pa yin no//de la gzung ba'i rnam par rtog pa gnyis pa ji ltar rnam pa dgu yin zhe na/ srid dang zhi bar ltung ba'i phyir/ /rtog pa dman pa nyid dang ni/ /yongs su 'dzin pa med pa dang //lam gyi rnam pa ma tshang dang / /gzhan gyi rkyen gyis 'gro ba dang / /ched du bya ba log pa dang / /nyi tshe ba dang sna tshogs nyid/ /gnas dang 'jug la rmongs pa dang / /rjes su 'gro zhes bya ba la/ /rnam rtog dgu yi bdag nyid 'di/ /ldog pa'i phyogs kyi rten can te//nyan thos la sogs yid la 'byung / /zhes bya ba gsungs pa yin no/ / de la 'khor ba dang mya ngan las 'das pa gang yang rung ba zhig tu ltung ba nyid kyis rtogs pa dman pa'i rnam par rtog pa ni/ rab 'byor 'di lta ste dper na/ nyi ma dang zla ba'i dkyil 'khor ni gling bzhir las byed cing rjes su 'gro'o zhes bya bas shes rab kyi pha rol tu phyin pa ni shes rab dang snying rje dag gis pha rol tu phyin pa lnga po rnams la 'khor ba dang mya ngan las 'das pa gang yang rung bar mi ltung bar byed pa nyid dang /'khor los sgyur ba'i dpes rtog pa ma lus pa la dbang byed pa'i yul du shes par byed pa'i don gyis gang gsungs pa yin no//yongs su 'dzin pa med pa'i rnam par rtog pa ni yang gzhan gyis yongs su gzung ba'i bud med kyi dpes yongs su 'dzin pa'i khyad par shes par byed pa'i don gyis gang gsungs pa yin no//sgrub pa ma tshang ba'i rnam par rtog pa ni yang g.yul du zhugs pa'i mi dpa' bo'i dpes sgrub pa'i khyad par shes par byed pa'i don gyis gang gsungs pa yin no/ /gzhan gyi rkyen gyis 'gro ba nyid kyi rnam par rtog pa ni yang 'khor los sgyur ba'i rgyal po'i rjes su byed pa'i dpes rtogs pa la rang dbang du shes par byed pa'i don gyis gang gsungs pa yin no//ched du bya ba log pa'i rnam par rtog pa ni yang chu klung phra mo rnams gang+gA'i chu dang lhan cig rgya mtsho chen por 'gro ba'i dpes ded dpon gyi gtso bo dang lhan cig tu 'gro ba'i tshul gyis phyir mi ldog par 'gro ba ni theg pa gzhan gyis 'gro ba med pa'i phyir rnam pa thams cad mkhyen pa nyid kyi ched du bya ba las yongs su ma nyams pa'i don gyis gang gsungs pa yin no//nyi tshe ba byed pa'i rnam par rtog pa ni/ skyes bu'i lag pa g.yas pa dang g.yon pa'i dpes nyi tshe ba ma yin pa dang nyi tshe ba'i byed pa'i don gyis gang gsungs pa yin no//rtogs pa tha dad pa'i rnam par rtog pa ni/ yang chu klung phra mo dang chu klung chen po'i chu rnams rgya mtsho chen por phyin na ro gcig par gyur pa'i dpes pha rol tu phyin pa lnga de'i bdag nyid can du 'gyur bar shes par byed pa'i don gyis gang gsungs pa yin no//gnas pa dang 'jug pa mi shes pa'i rnam par rtog pa ni/ yang 'khor lo rin po che gnas pa dang 'gro ba'i dpes/ pha rol tu phyin pa'i lnga po rnams kyi gnas pa dang 'gro ba dag de'i rjes su byed pa shes par byed pa'i don gyis gang gsungs pa yin no//rjes la 'gro ba'i rnam par rtog pa ni/ yang de nyid dpung gi tshogs kyi mdun du 'gro ba'i dpes/ de'i rjes su 'brang bar shes par byed pa'i don gyis gang gsungs pa yin no/ / gal te de lta yin na chos thams cad ngo bo nyid kyi stong pa nyid yin pa'i phyir pha rol tu phyin pa drug po rnams kyis bla na med pa yang dag par rdzogs pa'i byang chub thob pa med par brtsad pa dang / rab 'byor 'di la byang chub sems dpa' sems dpa' chen po pha rol tu phyin pa drug la spyod pa'i tshe/'di snyam du kye ma 'jig rten gnas pa 'di ni sems phyin ci log tu gyur pa ste zhes bya ba nas brtsams te/ shes rab kyi pha rol tu phyin pa la ma zhugs par rnam pa gzhan gyis sems can yongs su smin par mi nus so zhes bya ba'i bar dang / don gyi dbang gis shes rab kyi pha rol tu phyin pa la spyod pa yin no zhes bya bas de spangs pa dang /thams cad tha dad du bya ba nyid med pas gcig gtso bor gyur pa med par brtsad pa dang / lus tha dad pa rnams ri'i rgyal po ri rab kyi drung du phyin pa'i dpes lnga po rnams dang de'ang mdog gcig pa nyid kyis der gyur pa gtso bor 'thad pas de spangs pa dang /yang ri'i rgyal po ri rab kyi dpe tshad ma yin par shes par byed pa'i don gyi rjes su zhugs pa la khyad par rab tu shes pa med pa'i phyir de gtso bor gyur pa med par brtsad pa ste/ don gyi rjes su zhugs pa la khyad par rab tu zhugs pa med pa'i phyir zhes bya ba ni don dam pa rtogs pa la khyad par gyi rnam par rtog pa med pa'i phyir ro zhes bya ba'i don dang /'jig rten gyi tha snyad dang brda tsam gyis zhes bya ba nas brtsams te/ bud med rin po che'i dpes dge ba'i chos thams cad bzung nas rnam pa thams cad mkhyen pa nyid gang na ba der mi gnas pa'i tshul gyis gnas par 'gyur ba'i bsam pas mchog nyid yin par 'thad pa'i lan gsungs pa yin no//da ni 'dzin pa'i rnam par rtog pa rnam pa gnyis po re re zhing dbye ba rnam pa dgur 'gyur ba brjod par bya'o//de la re zhig /'dzin pa dang ni 'dor ba dang / /yid la byed dang khams rnams ni/ /gsum pa nye bar 'brel pa dang / /gnas dang mngon par zhen pa dang / /chos kyi dngos por btags pa dang / /chags pa dang ni gnyen po dang / /ji ltar 'dod bzhin 'gro nyams la//'dzin pa dang por shes par bya/ /zhes bya ba la/ de la 'dzin pa dang 'dor ba'i rnam par rtog pa ni/ bcom ldan 'das ci shes rab kyi pha rol tu phyin pa'i chos gang yongs su 'dzin pa dang / gtong bar bgyid pa lags sam zhes bya ba gang gsungs pa yin no//yid la byed pa'i rnam par rtog pa ni/ gzugs nas rnam pa thams cad mkhyen pa nyid kyi bar du yid la mi byed pa'i phyir na yongs su ma bzung ba btang ba nyid kyis yid la mi byed pa'i dge ba'i rtsa ba rnams rnam par 'phel ba dang / pha rol tu phyin pa yongs su rdzogs pa dang / rnam pa thams cad mkhyen pa nyid thob pa med par thal bar 'gyur bar gang gsungs pa dang / rab 'byor gang gi tshe gzugs yid la byed par mi 'gyur zhes bya ba nas brtsams te/ de'i tshe byang chub sems dpa' chen po dge ba'i rtsa ba rnam par 'phel zhing rnam pa thams cad mkhyen pa nyid kyi bar rjes su 'thob par 'gyur ro//de ci'i phyir zhe na/ yid la mi byed pa ni bla na med pa yang dag par rdzogs pa'i byang chub tu mngon par rdzogs par 'tshang rgya'o zhes bya ba'i 'thad pa'i lan gyis gang gsungs pa yin no/ /khams gsum pa thams cad dang 'brel pa'i rnam par rtog pa ni/bcom ldan 'das ci'i slad du zhes bya bas yid la mi byed pa khams gsum dang ma 'brel pa'i rgyu nyid du gang gsungs pa yin no/ /gnas pa'i rnam par rtog pa ni de ltar spyod pa de ni rnam pa thams cad mkhyen pa nyid kyi bar la mi gnas par gang gsungs pa yin no//dngos po la mngon par zhen pa'i rnam par rtog pa ni/ bcom ldan 'das ci'i slad du zhes bya bas mngon par zhen pa med pa ni de la mi gnas pa'i rgyu nyid du gang gsungs pa yin no/ /dngos po brtags pa'i rnam par rtog pa ni/gal te byang chub sems dpa' chen po 'di snyam du gang de ltar sgom pa dang zhes bya ba nas brtsams te/ de ci'i phyir zhe na/ 'di ltar de bzhin gshegs pa ni mthong ba'i chos kyang 'dogs par mi mdzad na zhes bya ba'i bar du gang gsungs pa yin te/ de bzhin gshegs pas thugs su chud pa ni rjod pa dang brjod par bya bar btags pas rab tu phye ba ma yin no zhes bya ba'i tha tshig go//yang ci'i phyir chos 'ga' zhig mngon par rdzogs par sangs rgyas pa med ce na/ gang dngos por gyur pa zhes bya ba'i don te/ de ltar mngon par zhen pa spyod pa ring du byed cing nyams par gsungs pas mngon par zhen pa med pa gtso bor shes par byed pa'i don gyis yin no//chags pa'i rnam par rtog pa ni bcom ldan 'das ji ltar na byang chub sems dpa' chen po shes rab kyi pha rol tu phyin pa la spyod pa ni sbyin pa la sogs pa'i skyon 'di dag ma mchis par 'gyur ba lags zhes bya ba dang /rab 'byor gang gi tshe chos thams cad ni chags pa med pa dang yongs su gzung ba med pa ste zhes bya ba la sogs pa gang gsungs pa yin no/ /gnyen po'i rnam par rtog pa ni gnyen po dang ldan pa'i chos dang de'i dmigs pa mnyam pa nyid kyi dbang du byas nas shes rab kyi pha rol tu phyin pa de dang ma bral ba nyid nas/rnam pa thams cad mkhyen pa nyid kyi bar rnams de dang ma bral ba nyid kyis gang gsungs pa yin no/ /ji ltar 'dod pa bzhin du 'gro ba nyams pa'i rnam par rtog pa ni dmigs par bya ba dang dmigs pa po dag tha dad pa med pa yin na mngon par rtogs pa mngon par sgrub pa med par thal ba dang /rab 'byor 'di la byang chub sems dpa' sems dpa' chen po gzugs zhes bya ba'am/ 'di ni gzugs so/ /'di'i gzugs so zhes mngon par chags pa med do zhes bya ba nas brtsams te/'khor los sgyur ba'i rgyal po ji ltar 'dod par 'gro ba'i dpes pha rol tu phyin pa lnga po ni nyan thos la sogs pa'i lam du ji ltar 'dod pa bzhin du 'gro ba ma yin pa ni shes rab kyi pha rol tu phyin pa'i rjes su 'brang bas gzhan gyi dbang yin pa'i don gyis gang gsungs pa yin no//da ni 'dzin pa'i rnam par rtog pa rnam pa dgu po gnyis pa brjod par bya ba yin te/ des na/ ched bzhin nges par mi 'byung dang / lam dang lam min nges 'dzin dang / 'gag dang bcas pa'i skye ba dang / /dngos po ldan dang mi ldan dang //gnas dang rigs ni 'dzin pa dang / /don du gnyer dang rgyu med dang / /phyir rgol ba ni dmigs pa dang / /'dzin pa'i rnam rtog gzhan yin no/ /zhes gsungs pa yin no/ /de la ched du bya ba ji lta ba bzhin du nges par mi 'byung ba'i rnam par rtog pa ni 'khor los sgyur ba'i dpes de rnams rnam pa thams cad mkhyen pa nyid kyi lam mnyam par 'gro ba'i don du de'i gzhan gyi dbang yin par gsungs pa yin no//lam dang lam ma yin pa'i nges par 'dzin pa'i rnam par rtog pa ni nyan thos la sogs pa dang / rnam pa thams cad mkhyen pa nyid kyi lam dag la byang chub sems dpa'i lam ma yin pa dang /lam yin pa nyid kyis gang gsungs pa yin no/ /skye ba dang 'gag pa'i rnam par rtog pa ni/ /chos nyid tshad mar byas nas shes rab kyi pha rol tu phyin pa 'di ni don chen po'i slad du nye bar gnas so zhes bya ba nas brtsams te/chos gang yang skyed par byed pa'am 'gog par byed pa ma yin no zhes bya ba'i bar dang / de lta na ni pha rol tu phyin pa drug mi 'thad pa dang rnam pa thams cad mkhyen pa nyid dmigs par byas nas sems can thams cad dang thun mong du bla na med pa yang dag par rdzogs pa'i byang chub tu yongs su bsngo zhing 'khor gsum du mi dmigs pa'i rnam par bsgoms pas pha rol tu phyin pa drug la mngon par brtson pa dang yang dag par sbyor bas gang gsungs pa yin no//dngos po dang ldan pa dang mi ldan pa'i rnam par rtog pa ni/de'i rgyu yongs su zhus pa so sor bstan pa nas brtsams te/ gzugs nas rnam pa thams cad mkhyen pa nyid kyi bar la ldan pa dang mi ldan pa bkag pas mngon par brtson par byed par bstan pas gang gsungs pa yin no/ /gzugs la sogs pa la gnas pa'i rnam par rtog pa ni/yang gzugs nas rnam pa thams cad mkhyen pa nyid kyi bar la gnas par mi bya'o zhes brtson par bya ba nyid dang / de ci'i phyir zhe na/ gzugs nas rnam pa thams cad mkhyen pa nyid kyi bar dag ni thams cad mkhyen pa nyid gsum po rnams la cung zad mi gnas pa'i 'thad pas gang gsungs pa yin no//rigs rnam par 'jig pa'i rnam par rtog pa ni/ a mra la sogs pa'i 'bras bu'i dpes chos rnam par 'jig pa shes par byed pa'i don gyis gang gsungs pa yin no/ /don du gnyer ba med pa'i rnam par rtog pa ni/ji srid du chos thams cad la dbang ba rjes su thob par 'dod pas shes rab kyi pha rol tu phyin pa la bslab par bya ba nyid kyis gang gsungs pa yin no/ /rgyu med pa'i rnam par rtog pa ni/ de ci'i phyir zhe na/ rgya mtsho chen po ni 'dzam bu'i gling gi rin po che thams cad kyi rgyu yin pa'i dpes shes rab kyi pha rol tu phyin pa ni 'phags pa'i gang zag thams cad kyi rtogs pa'i rgyu nyid du 'thad pas gang gsungs pa yin no//phyir rgol ba'i chos la dmigs pa'i rnam par rtog pa ni/ yang 'phong gi slob dpon gyi dpes phyir rgol ba'i chos kyis thub par dka' ba nyid du ston pa dang /de ltar thams cad du mi dmigs pa la spyod pa'i byang chub sems dpa' la sangs rgyas thams cad kyi mi dmigs pa'i rnam par dgongs pa mdzad pas 'dzin pa'i rnam par rtog pa gnyis pa'i gnyen po shes par byed pa'i don gyis gang gsungs pa yin no//gzung ba'i rnam par rtog pa yin la 'dzin pa'i rnam par rtog pa ni ma yin no zhes bya ba mu bzhi ste/ mu dang po ni gzugs la sogs pa'i yul drug la 'jug go/ /gnyis pa ni skad cig gcig dang ldan pa'i rnam par rig pa'o/ /gsum pa ni skad cig ma gzhan gyi de nyid do//bzhi pa ni rnam pa de dag dang bral ba'i shes rab kyi pha rol tu phyin pa'o/ /rigs nyid yin gyi/ rigs kyi rnam par rtog pa ma yin pa zhes bya ba'i tshig phyi ma dang sbyar ba ste/ re zhig rigs kyi rnam par rtog pa gang yin pa de ni rigs kyang yin te/ dper na gnyen po kun tu spyod pa'i dus kyi rigs bzhin no//rigs nyid yin gyi rigs kyi rnam par rtog pa ma yin pa ni dper na yang dag par rtogs pa med pa'i rigs bzhin no/ /yang dag par rtogs pa'i rnam par rtog pa yin gyi dmigs pa'i rnam par rtog pa ma yin pa zhes bya ba ni tshig snga ma dang sbyar te /re zhig yang dag par rtogs pa'i rnam par rtog pa gang yin pa de ni dmigs pa'i rnam par rtog pa'ang yin te/ dper na yang dag par rtogs pa'i dmigs pa la sbyor ba bzhin no/ /yang dag par rtogs pa'i rnam par rtog pa nyid yin gyi dmigs pa'i rnam par rtog pa nyid ma yin pa nyid ni dper na dmigs pa yongs su ma rdzogs pa bzhin no//phyogs 'dis lhag ma yang dpag par bya'o/ /mthong ba'i lam gyi mi mthun pa'i phyogs bshad zin to// //yang ci'i phyir 'di la mthong ba'i lam du 'dod ce na/ byang chub chen po thob pa'i don du/de thob pa yang rgyu rnam pa gsum gyis yin te/ de dag kyang / byang chub la gzhan ston pa dang / /zhes bya ba ni/ bcom ldan 'das shes rab kyi pha rol tu phyin pa 'di ni zab pa ste/ byang chub sems dpa' de dag ni dka' ba bgyid pa'o zhes bya ba nas brtsams te/mthong ba'i lam thob pa'i dge slong drug stong lung bstan pa nyid kyis gang gsungs pa yin no/ /de yi rgyu ni yongs gtod dang / /zhes bya ba ni 'phags pa kun dga' bo la shes rab kyi pha rol tu phyin pa yongs su gtad pas gang gsungs pa yin no//de thob bar chad med pa'i rgyu/ /bsod nams mang po'i mtshan nyid do/ /zhes bya ba ni stong gsum gyi stong chen po'i 'jig rten gyi khams kyi sems can ji snyed pa dgra bcom pa'i 'bras bu thob par gyur pa de dag gi sbyin pa la sogs pa'i bsod nams bya ba'i dngos po dper bya ba nas brtsams te/rgya cher skad cig dang yud tsam dang thang cig shes rab kyi pha rol tu phyin pa'i chos ston par byed pa'i bsod nams ches mang du 'phel ba nyid kyis gang gsungs pa yin no/ /skad cig la sogs pa smos pa ni go rims bzhin gang zag dbang po rnon po dang / 'bring dang /tha ma shes par bya ba'i don to/ /'dir skad cig ni bya ba yongs su rdzogs pa'i mtshan nyid can du shes par bya ste/ gcig ni tha snyad du bya ba ma yin pa'i phyir ro/ /de bzhin gshegs pa mi bskyod pa bstan pa dang / mi snang bar gyur pa'i dpes ni rnam par rtog pa rnams mthong ba'i lam gyis shes pa'i yul ma yin par shes par byed pa'i don yin te/de ltar na yang dag par rdzogs pa'i byang chub thob pa'i rgyu ni gsum po de dag yin no/ /yang byang chub chen po zhes bya ba 'di gang zhig yin zhe na/ dri ma zad dang mi skye ba'i/ /ye shes byang chub ces brjod de//zhes bya ba gsungs so/ /yang zad pa shes pa ni gang zhig yin mi skye ba shes pa ni gang zhig yin zhe na/ zad med skye med phyir de dag /go rims bzhin du shes par bya/ /zhes gsungs pa yin te/ ji skad du/ kun dga' bo gang shes rab kyi pha rol tu phyin pa zad par 'dod pa de ni nam mkha' zad par 'dod du zad de zhes rgya cher zad pa shes pa brjod pa dang /chos de dag la ni skye ba med la zhes mi skye ba shes pa brjod pas yang dag par rdzogs pa'i byang chub nye bar bkod pas gang gsungs pa yin no/ /'di la ji ltar yid ches par bya zhe na/bden pa gsung bar 'os pa'i ljags rgya chen po bstan pa dang / 'phags pa kun dga' bo shes rab kyi pha rol tu phyin pa ston pa la sogs pa la nges par sbyor ba dang / de bzung bas ni gzungs dang ting nge 'dzin gyi sgo'i chos thams cad bzung ba nyid kyis gang gsungs pa yin no//yang ji ltar na zad pa shes pa mi zad pa'i rnam pa can yin gyi/ dngos po 'jig pa'i rnam pa can ma yin zhe na/ gang gi phyir sbyor ba'i dus su yang / rab 'byor gzugs mi zad pa'i phyir shes rab kyi pha rol tu phyin pa mngon par bsgrub par bya'o zhes bya ba nas brtsams te/snying po byang chub la 'dug gi bar ma 'dres pa'i chos dang ldan pa dang / rten cing 'brel par 'byung ba nam mkha' ltar zad mi shes pa'i mngon par bsgrub pa la rnam par lta ba la rnam pa thams cad mkhyen pa nyid kyi ye shes gtod pa nyid dang / de ltar lta ba ni bdag dang chos su 'dzin pa thams cad spangs pas mthong ba'i lam gsal bar byed pa'i don dang /byang chub sems dpa' de ltar spyod pa na pha dang ma shi ba'i skyes bu'i dpes bdud rnams rang gi spyod yul las 'das par sems pas mya ngan gyi zug rngu dang ldan pa nyid kyis gang gsungs pa yin no//gang gi phyir de ltar 'ga' zhig zad pa'am mi skye ba'i phyir zad pa dang mi skye ba shes pa ma yin pa des na/ 'gog pa med pa'i rang bzhin la/ /mthong zhes bya ba'i lam gyis ni/ /rnam par rtog rigs ci zhig zad/ /skye med rnam pa ci zhig 'thob/ /ces bya ba 'di smos pa yin te/gang dag dngos po 'jig pa'i bsam pas zad pa la zad do zhes bya bar shes pa ni zad pa shes pa yin pa dang / ma 'ongs pa'i dngos po mi skye ba'i bsam pas mi skye ba shes pa yin par rjod par byed pa de dag la 'dir dngos po'i ris ci zhig zad pa'am skye ba med par ci zhig 'thob ces 'dri bar byed pa yin no//de'i phyir 'di skad du/ gzhan gyi chos rnams kyang yod la/ /shes bya la yang ston pa yi/ /sgrib pa zad par brjod pa gang / de la kho bos mtshar du brtsis/ /zhes gsungs pa yin no/ /des na/ 'di la gsal bya cung zad med//bzhag par bya ba'ang cung zad med/ /yang dag nyid la yang dag lta/ /yang dag mthong na rnam par grol/ /zhes bya ba 'di nyid legs pa yin no/ /de 'ang skad cig gcig pa'i mthong ba'i lam 'di yin no zhes gsungs pa ni/ sbyin pa la sogs re re yang //de dag phan tshun bsdus pa gang / /skad cig gcig pa'i bzod pa yis/ /bsdus pa de 'dir mthong ba'i lam/ /zhes bya ba ste/ ji skad du rab 'byor 'di la byang chub sems dpa' sems dpa' chen po sbyin pa sbyin pa na rnam pa thams cad mkhyen pa nyid du yongs su bsngo zhing sbyin pa sbyin par byed de zhes bya ba nas brtsams te/shes rab kyi pha rol tu phyin pa la spyod pa'i bar gyis pha rol tu phyin pa drug yongs su rdzogs pa dang / de bzhin du sbyin pa'i pha rol tu phyin pa la gnas pa nas shes rab kyi pha rol tu phyin pa la gnas pa'i bar gyi drug po re re zhing drug tshan du gyur pa'i drug po rnam pa sum cu rtsa drug thams cad du 'khor gsum yongs su dag pa gtso bor gyur pas na thams cad phan tshun bsdus pas gsungs pa yin no//'di'i mdo ni/ rab 'byor 'di la byang chub sems dpa' sems dpa' chen po sbyin pa sbyin zhing sems can rnams la byams pa'i lus dang ngag dang yid kyi las nye bar gnas par 'gyur ba ni tshul khrims kyi pha rol tu phyin pa'o//de nyid len pa po rnams kyis gshe ba dang / spyo ba la sogs pa bzod pa ni bzod pa'i pha rol tu phyin pa'o/ /de nyid slong mo pa rnams kyis gshe ba dang / spyo ba la sogs pa rnams kyis sbyin pa la spro ba mi 'dor ba ni brtson 'grus kyi pha rol tu phyin pa'o//de nyid sbyin pa de rnam pa thams cad mkhyen pa nyid du yongs su bsngo zhing nyan thos dang rang sangs rgyas su rnam par g.yeng ba'i sems med pa ni bsam gtan gyi pha rol tu phyin pa'o/ / de nyid sbyin pa gtong ba na sgyu ma lta bu'i blo nye bar gnas pas phan pa dang gnod pa gang yang mi mthong ba ni shes rab kyi pha rol tu phyin pa'o zhes bya ba dang / de bzhin du tshul khrims srung bar byed pa nas/ shes rab bsgom pa'i bar so sor pha rol tu phyin pa drug yongs su rdzogs pas bsdus pa ni mdo ji lta ba bzhin du brjod par bya'o//'di dag ni drug tshan drug gis rnam pa sum cu rtsa drug tu 'gyur te/ de yang mthong ba'i lam gyi bzod pa skyes pa na 'dod pa dang / gzugs dang / gzugs med pa'i khams kyis bsdus pa mthong bas spang bar bya ba'i nyon mongs pa brgya rtsa brgyad po rnam par rtog pa bzhis bsdus pa rnams spong bar 'gyur ro//de la dbang du bya ba'i phyir ting nge 'dzin la snyoms par zhugs pa ni/ de nas seng ge rnam bsgyings pa'i/ /ting nge 'dzin la snyoms zhugs nas/ /rten cing 'brel 'byung lugs mthun dang //lugs mi mthun la rtog par byed/ /ces bya ba yin no/ /de la lugs dang mthun pa ni ma rig pa'i rkyen gyis 'du byed rnams zhes bya ba la sogs pa'o/ /lugs dang mi mthun pa ni de med na mya ngan dang smre sngags 'don pa la sogs pa mi 'byung ngo zhes bya ba la sogs pa'o/ / mthong ba'i lam bshad zin to// //da ni sgom pa'i lam gyi mi mthun pa'i phyogs rnam par rtog pa bzhi brjod par bya ste/ re zhig sgom pa'i lam brjod de/ de nas 'di brjod par bya'o/ /sgom pa'i lam yang mthar gyis gnas pa'i snyoms par 'jug pa dgus bsdus pa yin la/de dag kyang thod rgal gyi snyoms par 'jug pas bsdus pa yin te/ des na de nges par bstan pa'i sgo nas mdor bsdus te sgom pa'i lam gyi dbang du byas nas gsungs pa ni/ 'gog dang bcas pa'i snyoms 'jug dgur / /rnam pa gnyis su song 'ongs nas//'dod par rtog pa'i rnam par shes/ /mnyam gzhag min pa'i mtshams gzung ste/ /thod rgal du ni snyoms 'jug pa/ /gcig dang gnyis gsum bzhi dang lnga/ /drug dang bdun dang brgyad brgal nas/ /'gog pa'i bar du mi 'drar 'gro/ /zhes bya ba gsungs pa yin te/rnam pa gnyis su zhes bya ba ni lugs dang mthun pa dang / lugs dang mi mthun pa'o/ /ji skad du/ de nas seng ge rnam par bsgyings pa'i ting nge 'dzin la snyoms par zhugs te/ rten cing 'brel par 'byung ba la so sor rtog pa'i rjes la mthar gyis gnas pa'i snyoms par 'jug pa dgu dang mnyam par ma bzhag pa'i sems kyis lugs dang mthun pa dang /lugs dang mi mthun par/ gcig dang / gnyis dang / gsum dang / bzhi dang / lnga dang / drug dang / bdun dang / brgyad dang / dgur thod rgal du snyoms par 'jug pa mngon du byed pas ji ltar 'dod pa bzhin du mang du dbang thob par gsungs pa yin no//'di'i mdo ni/ rab 'byor 'di la byang chub sems dpa' sems dpa' chen po 'dod pa dag las dben pa/ sdig pa mi dge ba'i chos rnams las dben pa/ rtog pa dang bcas pa/ dpyod pa dang bcas pa/ dben pa las skyes pa'i dga' ba dang bde ba can bsam gtan dang po nye bar bsgrubs te gnas pa dang / de bzhin du 'du shes dang tshor ba 'gog pa'i snyoms par 'jug pa'i bar nye bar bsgrubs te gnas pa dang / de 'gog pa'i snyoms par 'jug pa las langs nas 'du shes med 'du shes [(]mad [,]med [)]min skye mched kyi snyoms par 'jug pa la snyoms par 'jug go//de las langs nas ci yang med pa'i skye mched kyi snyoms par 'jug pa la'o/ /de nas rnam shes mtha' yas skye mched kyi snyoms par 'jug pa la'o/ /de nas nam mkha' mtha' yas skye mched kyi snyoms par 'jug pa la'o//de nas ni bsam gtan bzhi pa la'o/ /de nas gsum pa la'o/ /de nas gnyis pa la'o/ /de nas bsam gtan dang po la snyoms par 'jug go/ /de seng ge rnam par bsgyings pa'i ting nge 'dzin de btang nas thod rgal gyi ting nge 'dzin la snyoms par 'jug go/ /rab 'byor byang chub sems dpa' sems dpa' chen po'i ting nge 'dzin thod rgal de gang zhe na/'di la byang chub sems dpa' bsam gtan dang po la snyoms par 'jug pa nas/ de bzhin du 'gog pa'i bar la snyoms par 'jug go/ /de las langs nas bsam gtan dang po nye bar bsgrubs te gnas so//de nas 'gog pa la'o/ /de nas ni bsam gtan gnyis pa la'o/ /de nas 'gog pa la'o/ /de nas gsum pa la'o/ /de nas 'gog pa la'o/ /de nas bsam gtan bzhi pa la'o/ /de nas 'gog pa la'o/ /de nas nam mkha' mtha' yas skye mched la'o//de nas 'gog pa la'o/ /de nas rnam shes mtha' yas skye mched la'o/ /de nas 'gog pa la'o/ /de nas ci yang med pa'i skye mched la'o/ /de nas 'gog pa la'o/ /de nas 'du shes med 'du shes med min skye mched la'o/ /de las langs nas 'gog pa'i snyoms par 'jug pa la snyoms par 'jug go//de las langs nas 'du shes med 'du shes med min skye mched kyi snyoms par 'jug pa la snyoms par 'jug go/ /de las langs nas 'dod pa na spyod pa'i mnyam par ma bzhag pa'i sems su byed do/ /mnyam par bzhag pa'i sems las 'gog par 'jug pa la snyoms par 'jug go//de las langs nas mnyam par ma bzhag pa'i sems la gnas so/ /de nas 'du shes med 'du shes med min skye mched la snyoms par 'jug go/ /de las langs nas mnyam par ma bzhag pa'i sems la gnas so//de nas cung zad med pa'i skye mched la'o/ /de nas ni mnyam par ma bzhag pa'i sems la gnas so/ /de bzhin du bsam gtan dang po las langs nas mnyam par ma bzhag pa'i sems la gnas so zhes bya ba'i bar du'o/ /gang yang / sa brgyad rnam pa gnyis 'brel dang //gcig brgal song zhing 'ongs nas ni/ /rigs mi mthun par gsum par 'gro/ /thod rgal gyi ni snyoms 'jug yin/ /zhes bshad pa de ji ltar yin zhe na/ ci bya rog dang 'o thug mtshan nyid 'dra ba yin nam/ 'di'i gnas skabs ni gzhan nyid yin te/ de lta bu'i thabs la mkhas pa thob pas bskal pa grangs med pa bye ba khrag khrig stong phrag brgya snyed du 'jug cing sangs rgyas dpag tu med pa la bsnyen bkur mdzad pa nyid kyis rgya che ba nyid yin par bstan pa'i phyir dang /sgom pa'i lam ni rgyun chad yin pa nyid du shes par 'dod pa'i don gyis gang gsungs pa yin no//sgom pa'i lam bshad zin to// //da ni de'i mi mthun pa'i phyogs rnam par rtog pa bzhi brjod par bya'o/ /de la re zhig mdor bsdus rgyas dang sangs rgyas kyis/ /bstang bas yongs su ma bzung dang / /dus gsum yon tan med pa dang //legs pa'i lam ni rnam gsum la/ /gzung ba'i rnam rtog 'di gcig ste/ /sbyor ba'i rnam pa'i spyod yul can/ /zhes bya ba yin te/ de la chos rnams kyi mdor bsdus pa mi shes pa'i rnam par rtog pa dang / de rgyas par mi shes pa'i rnam par rtog pa ni/bcom ldan 'das de bzhin gshegs pas chos 'di dag mdo dang rgyas par bstan pa gang lags pa de la byang chub sems dpa' sems dpa' chen pos pha rol tu phyin pa drug po 'di mdo dang rgyas par kun chub par bgyi'o zhes bya ba nas brtsams te/ thams cad mkhyen pa nyid gsum ka yang mngon par rtogs pa'i sgo nas bsdus te bstan zhing /yang mngon par rtogs pa re re'i sgo nas so sor bstan pa rnams de ltar rtse mo'i mngon par rtogs pa las bsdus pa dang / so so ba rnams kyi lam nye bar bkod pas de spang bar bya ba'i rnam par rtog pa spang bar shes par bya ba'i don dang /bcom ldan 'das ji ltar byang chub sems dpa' sems dpa' chen pos chos thams cad kyi mdo dang rgyas pa 'tshal bar 'gyur zhes bya ba'i dri ba dang / chos thams cad kyi de bzhin nyid shes pa ni mdo dang rgyas pa shes pa nyid dang / de la yang skye ba dang 'gag pa dang /gzhan du 'gyur ba bkag pa dang / de bzhin du yang dag pa'i mtha' shes pa dang ldan pa ma yin pa dang bral ba ma yin par shes pa ni mdor bsdus pa dang rgyas pa shes pa nyid dang / dbang po rnon po la sogs pa'i byang chub sems dpa' 'jug pa nyid kyis mdor bsdus pa dang rgyas pa mngon par brjod pa ni 'jug pa'i rgyu nyid du shes par byed pa'i don gyis gang gsungs pa yin no//sangs rgyas kyis bstang ba med pa'i rnam par rtog pa ni ji skad du bstan pa la slob pa ni rnam pa thams cad mkhyen pa nyid thob cing bdud kyi las skyes pa yongs su spong la sangs rgyas kyi dgongs pa dang /stong gsum gyi stong chen po'i 'jig rten gyi khams kyi sems can zang zing gi sbyin pas tshim par byed pa dang / tshul khrims la sogs pa'i phung po dang / rgyun du zhugs pa la sogs pa'i 'bras bu dang / rang sangs rgyas kyi byang chub la 'god par byed pa bas/se gol gtogs pa tsam du shes rab kyi pha rol tu phyin pa sgom par byed pa bsod nams mang du 'phel ba nyid kyis sangs rgyas kyi dgongs pa'i rgyu shes par bya ba'i don dang / de ci'i phyir zhe na/ chos thams cad du gtogs pa'i rgyur gyur pa'i sangs rgyas rnams 'di las skyes pa nyid du gang gsungs pa yin no//sbyor ba'i lam gyi yon tan med pa'i rnam par rtog pa ni ji skad du bshad pa la gnas pa ni phyir mi ldog pa sangs rgyas kyi dgongs pa de la bsnyen bkur byas pa/ dge ba'i bshes gnyen gyis yongs su zin pa/ pha rol tu phyin pa drug la sogs pa chos kyi rnam pa dpag tu med pa bsgom pa yin pa nas brtsams te/shes rab kyi pha rol tu phyin pa la spyod pa'i phan yon ni de dag yin par rig par bya ba'i zhes bya ba'i bar du gang gsungs pa ste/ sbyor ba'i lam gyi dus su yin no/ /mthong ba'i lam gyi yon tan med pa'i rnam par rtog pa ni/shes rab kyi pha rol tu phyin pa mngon par sgrub pa gang gsungs pa yin te/ mthong ba'i lam gyi dus so/ /sgom pa'i lam gyi yon tan med pa'i rnam par rtog pa ni/ shes rab kyi pha rol tu phyin pa la bsgom pa zhes bya bas sgom pa'i lam gyi dus su sems kyi phan yon mang po zhig ston pas gang gsungs pa yin no//sbyor ba'i lam gyi shes pa'i rnam par rtog pa ni/ gzugs la sogs pa zhi ba dang / ya ma brla dang / gsog dang / snying po med pas shes rab kyi pha rol tu phyin pa la spyod par bya ba nyid kyis sbyor ba'i bdag po nyid ji lta ba bzhin du shes par byed pa'i don gyis gang gsungs pa yin no//de la dngos po 'gog pas na zhi ba'o/ /rkyen gyi dbang yin pas na ya ma brla'o / /rang bzhin stong pa nyid yin pas na gsog go/ /rnam par dpyad mi bzod pas na snying po med pa'o/ /mthong ba'i lam mi shes pa'i rnam par rtog pa ni nam mkha' ltar stong pa nyid mngon par bsgrubs pas shes rab kyi pha rol tu phyin pa sgrub par byed pa nyid kyis mthong ba'i lam bdag nyid ji lta ba bzhin du shes par byed pa'i don gyis gang gsungs pa yin no//sgom pa'i lam gyi shes pa'i rnam par rtog pa ni/ nam mkha' ltar stong pa nyid bsgoms pas shes rab kyi pha rol tu phyin pa sgom pa nyid kyis sgom pa'i lam bdag nyid ji lta ba bzhin du shes par byed pa'i don gyis gang gsungs pa yin no//yang nam mkha' zhes smos pas ni sgom pa'i lam mthong ba'i lam las dngos po tha mi dad par shes par bya ba'i don yin no//de la nam mkha' ltar stong pa nyid mngon par sgrub pa zhes bya ba ni nam mkha' zhes smos pa gcig yin no/ /nam mkha' ltar stong pa nyid du bsgoms pas zhes bya ba ni gnyis pa yin no/ /da ni sgom pa'i lam gyi mi mthun pa'i phyogs gzung ba'i rnam par rtog pa gnyis pa brjod par bya ba yin pa des na/gnyis pa sems dang sems byung rnams/ /'jug pa'i yul gzhan yin bzhed de/ /zhes gsungs so/ /de'ang gang zhe na/ sems mi skye dang byang chub kyi/ /snying po yid la mi byed dang / /theg pa dman pa yid byed dang //rdzogs pa'i byang chub yid mi byed/ /bsgom dang sgom pa med pa dang / /de dag las ni bzlog nyid dang / /ji bzhin don min rnam rtog pa/ /sgom pa'i lam la shes par bya/ /zhes bya gsungs pa yin no/ /de la byang chub kyi sems mi skye ba'i rnam par rtog pa ni/ sems dang po bskyed pa nas nye bar bzung ste zhes gang gsungs pa yin no/ /byang chub kyi snying po yid la byed pa'i rnam par rtog pa ni/ byang chub kyi snying po yid la mi byed de zhes gang gsungs pa yin no/ /nyan thos dang rang sangs rgyas kyi theg pa yid la byed pa'i rnam par rtog pa ni/ / theg pa gzhan gyi sems kyi go skabs mi 'byed pas zhes gang gsungs pa yin no/ /yang dag par rdzogs pa'i byang chub yid la mi byed pa'i rnam par rtog pa ni/ rnam pa thams cad mkhyen pa nyid yid la bya ba mi 'dor bas shes rab kyi pha rol tu phyin pa la spyad par bya ba nyid dang / sems dang sems las byung ba'i chos mi rgyu bas mngon par sgrub pa dang /sgom pa rjes su gnang ba dang / de la spyod pa dang / mngon par sgrub pa dang / sgom pa rnams kyis rnam pa thams cad mkhyen pa nyid bkag pas theg pa chen po skad cig ma gcig la mngon par rtogs pa shes par byed pa'i don gyis gang gsungs pa yin no//sgom pa'i rnam par rtog pa ni de ltar sgom pa nyid kyis de'i rgyun chags pa yin par mi 'thad pas shes par byed pa'i don gyis gang gsungs pa yin no/ /sgom pa med pa'i rnam par rtog pa ni/ de ltar sgom pa med pa nyid kyis mi slob pa'i dus su de yongs su gtugs par shes par byed pa'i don gyis gang gsungs pa yin no//sgom pa ma yin sgom pa ma yin pa yang ma yin pa'i rnam par rtog pa ni/ sgom pa ma yin sgom pa ma yin pa ma yin pas rnam pa thams cad mkhyen pa nyid thob pa bkag pas bar chad dang bcas pa dang bar chad med par 'dren mar sgom pa de'i rgyu nyid du shes par don gyis gang gsungs pa yin no//don ji lta ba bzhin ma yin par rtog pa ni/ gang gi rnam par gzhag pa gzhan du mya ngan las 'da' ba la gzhan du thob par sems pa ste/ de'i dbang du mdzad nas de bzhin nyid ji lta ba bzhin du rnam pa thams cad mkhyen pa nyid thob par 'gyur ro zhes bya ba la sogs pa gang gsungs pa yin no//da ni sgom pa'i lam gyi mi mthun pa'i phyogs 'dzin pa'i rnam par rtog pa brjod par bya'o/ /de la re zhig /sems can btags pa'i spyod yul dang / / chos btags pa dang stong min nyid/ /chags dang rab 'byed bdag nyid dang / /dngos por byed dang theg gsum dang / /yon ni dag pa ma yin dang / /spyod pa rnam par 'khrugs pa la/ /'dzin par byed pa dang po ste/ /shes par bya ba bsgrags pa yin/ /de la sems can btags pa'i rnam par rtog pa ni/sems can la sogs pa mi dmigs pa nyid kyis sems can gyi khams su btags pa bkag pa dang / de lta yin na dmyal ba nas brtsams nas yang dag par rdzogs pa'i sangs rgyas kyi bar du btags pa med par thal ba dang / rab 'byor 'di ji snyam du sems/sems can du btags pa dmigs su yod dam zhes bya ba la sogs pas de spangs pas sems can du btags pa dngos po med pa nyid du shes par byed pa'i don gyis gang gsungs pa yin no/ /chos btags pa'i rnam par rtog pa ni/ chos btags pa la slob pa ni rnam pa thams cad mkhyen pa nyid thob par brjod pa dang /bcom ldan 'das 'o na byang chub sems dpa' sems dpa' chen po shes rab kyi pha rol tu phyin pa la spyod pas gzugs la bslab par mi bgyi'am zhes bya ba nye bar dmigs pa la bslab pa rnam pa thams cad mkhyen pas gang gsungs pa yin no//stong pa nyid ma yin pa'i rnam par rtog pa ni/ gzugs nas rnam pa thams cad mkhyen pa nyid kyi bar du bsal ba dang gzhag pa med par slob pa rjes su gnang ba dang / chos thams cad rang gi mtshan nyid stong pa nyid du mthong bas de la slob pa nyid dang /rang gi mtshan nyid stong pa nyid yin no/ /shes rab kyi pha rol tu phyin pa la spyod pa med par thal ba dang / rab 'byor spyod pa med pa ni/ shes rab kyi pha rol tu phyin pa la spyod pa'o zhes bya ba nas brtsams te/ rnam pa thams cad mkhyen pa nyid kyi bar du mi dmigs pa'i tshul gyis bsgom par bya'o zhes bya ba mi dmigs pa'i rnam par sgom pa'i lam gyis gnyis dang gnyis med pa dag dmigs pa nyid du gang gsungs pa yin no/ /chags pa'i rnam par rtog pa ni dmigs pa dang mi dmigs pa dag la chags pa bkag pa dang /de lta yin na sa gzhan du 'pho ba dang / de yongs su rdzogs pa med pa dang / dmigs par gnas pas de yongs su rdzogs par mi nus pa dang / de ci'i phyir zhe na/ shes rab kyi pha rol tu phyin pa yang dmigs su med pa zhes bya ba'i 'thad pas gang gsungs pa yin no//chos rab tu 'byed pa'i rnam par rtog pa ni/ de lta yin na chos rab tu rnam par 'byed pa med pa dang / ji ltar dmigs par 'gyur ba de ltar chos rnam par 'byed par mi byed do zhes bya bas mi dmigs par rab tu rnam par 'byed pa rjes su gnang bar gang gsungs pa yin no//dngos po'i ched du byed pa'i rnam par rtog pa ni/ de lta yin na sangs rgyas kyi mdzad pa mtha' dag mi 'thad pa dang / mdzad pa de gang gi yang ched du ma yin par gsungs pa dang / chos thams cad ma byas pa rnam par 'gyur ba med pa mngon par 'dus ma byas pa nyid du gang gsungs pa yin no//theg pa gsum gyis nges par 'byung ba'i rnam par rtog pa ni/ de lta yin na theg pa gsum rnam par gzhag pa med par 'gyur ba dang / gzugs la sogs pa la mngon par zhen pas de'i rlom sems dang / dmigs pa dang ldan pa la theg pa gsum gyi rnam par rtog pa rnam par gzhag pa dang /de ci'i phyir zhe na/ chos thams cad sangs rgyas kyi spyan lngas ma gzigs pa dang / de lta yin na bcom ldan 'das kyis sems can gyi phung po rnam pa gsum lung bstan par mdzad pa med pa dang / rdzas med pa la rdzas su 'du shes pa rnams la de bzlog pa'i don de ltar bstan pa dang /don dam pa dang rdzu 'phrul gyi rnam grangs la gnas nas bla na med pa yang dag par rdzogs par sangs rgyas pa bkag pa dang / de bzhin gshegs pa'i sprul pa'i dpes 'dus byas dang 'dus ma byas kyi dbyings la gnas pa bkag pas bla na med pa yang dag par rdzogs pa'i sangs rgyas kyi mdzad pa thams cad rjes su gnang ba dang /de lta yin na de bzhin gshegs pa dang sprul pa khyad par med par thal bar 'gyur bas byed pa po dang bcas pa'i sprul pa'i dgongs pa shes par byed pa'i don dang / de gnyi ga'i byed pa khyad par med pas rjes su gnang ba dang / de de bzhin gshegs pa'i smon lam gyi rjes su byed pa'i phyir de gnyis kyi khyad par brjod pa dang / sprul pa po de bzhin gshegs pa dang / sprul pa'i dpes byed pa po'i rnam par rtog pa bsal ba'i don du gang gsungs pa yin no//yon ma dag pa'i rnam par rtog pa ni/ de la yin na yon yongs su dag pa med pa dang / de bzhin gshegs pa dang sprul pa dag gi chos nyid la tha dad pa med pas khyad par 'phags pa'i yon gnas nyid dang / de bzhin gshegs pa la dmigs pa'i byams pa'i sems dang ldan pa rnams dang /de la yid la byed pas nam mkha' la me tog 'thor bar byed pa rnams dang / sangs rgyas la phyag 'tshal ba rnams yon des sdug bsngal mthar phyin par byed pa nyid du gang gsungs pa yin no/ /dag pa spyod pa rnam par 'khrugs pa'i rnam par rtog pa ni pha rol tu phyin pa drug po rnams la chos nyid rnam par mi 'khrugs pa'i spyod pa rjes su gnang ba dang /de lta yin na gzugs la sogs pa'i chos nges par dpyad par mdzad pa'i phyir de bzhin gshegs pa chos nyid rnam par 'khrug par mdzad par thal ba dang / gzhan rnams med pa de la 'jug par bya ba'i don du de bzhin gshegs pas chos rnams kyi ming dang mtshan ma bstan pas chos nyid 'khrug pa med pa nyid du gang gsungs pa yin no//rigs kyi bu'am rigs kyi bu mo'am zhes skyes pa dang / bud med kyi rtags smos pa ni za ma dang / ma ning dang /mchig pa ston pa la sogs pa'i bsal ba'i don yin no/ /rigs kyi khyad par khas blangs pa ni rigs bzhi rnam par dag pa shes par byed pa'i don to/ /bu dang bu mo brjod pa ni rab tu byung ba'i skye bo dang mthun pa'i brjod pa shes par byed pa'i don to/ /rigs smos pa ni rgyud phun sum tshogs pa dam pa'i chos la dbang du bya ba shes par byed pa'i don to//yang ngam smos pa ni skye gnas dang lan grangs gzhan la myong bar 'gyur ba'i las kyi nyes pas rigs dman pa yin yang skal ba dang ldan pa ni 'dir dbang du byas par shes par byed pa'i don yin no//da ni 'dzin pa'i rnam par rtog pa gnyis pa brjod par bya ba yin pas de'i phyir/ sems can btags dang de'i rgyu yi / /yul can de yis rnam 'joms pas/ /sgom pa'i lam dang 'brel pa yi/ /mi mthun phyogs gzhan rnam pa dgu/ /zhes gsungs pa yin te/ rab 'byor tha snyad dang ming dang mtshan ma dang mngon par zhen pa zhes bya ba nas brtsams te/ rnam pa thams cad mkhyen pa nyid thob pa'i bar bstan pas gang gsungs pa yin no/ /ji ltar rnam par rtog pa rnam pa dgu yin zhe na/ de'i phyir/ bdag nyid ji bzhin kun mkhyen ni/ / gsum gyi sgrib pa rnam gsum dang / /zhi lam de bzhin nyid sogs dang / /mtshungs par ldan dang mi ldan dang / /mi mnyam sdug bsngal la sogs dang / /nyon mongs rnams kyi rang bzhin dang / /gnyis su med la kun rmongs la/ /rnam par rtog pa tha mar bzhed/ /ces bya ba gang gsungs pa yin no//de la rnam pa thams cad mkhyen pa nyid la kun tu rmongs pa ni/ ci'i slad du de bzhin gshegs pa dgra bcom pa yang dag par rdzogs pa'i sangs rgyas rnams kyi ni rnam pa thams cad mkhyen pa nyid ces bgyi zhes bya ba nas brtsams te/ rnam pa gang dag dang /rtags gang dag dang / mtshan ma gang dag gis chos rnams rab tu brjod pa'i rnam pa de dag dang / rtags de dag dang / mtshan ma de dag de bzhin gshegs pas thugs su chud de de'i phyir rnam pa thams cad mkhyen pa nyid ces bya'o zhes gang gsungs pa yin no/ /lam shes pa nyid la kun du rmongs pa ni/rab 'byor byang chub sems dpa' sems dpa' chen pos lam thams cad bskyed par bya zhing zhes bya ba la sogs pa gang gsungs pa yin no/ /thams cad shes pa nyid la kun du rmongs pa ni/ rab 'byor thams cad ces bya ba ni phyi dang nang gi chos ji snyed pa de tsam yin la/de dag kyang nyan thos dang rang sangs rgyas rnams kyis shes te zhes bya ba la sogs pa gang gsungs pa yin no/ /lam la kun du rmongs pa ni/ lam la gnas te zhes bya ba nas brtsams te/ 'dis 'phags pa'i gang zag thams cad mya ngan las 'das pa mchog gi pha rol tu phyin par byed pas shes rab kyi pha rol tu phyin pa zhes gang gsungs pa yin no//de bzhin nyid dang yang dag pa'i mtha' la sogs pa la ldan pa dang mi ldan pa la kun du rmongs pa ni yang de bzhin nyid dang / yang dag pa'i mtha' dang chos kyi dbyings rnams 'di'i khong du chud pa'i don dang / chos gang dang yang ldan pa'i ma yin pa'i don gyis shes rab kyi pha rol tu phyin pa nyid du gang gsungs pa yin no//mi mnyam pa nyid de thun mong ma yin pa nyid la kun du rmongs pa ni/ yang phyir rgol ba dang / mu stegs dang / bdud dang / theg pa gzhan dang ldan pa rnams kyis mi chod pa dang mi 'phrogs pa'i don gyis shes rab kyi pha rol tu phyin pa nyid du gang gsungs pa yin no//sdug bsngal la sogs pa'i bden pa la kun tu rmongs pa ni/ yang sdug bsngal gyi don nas yang dag pa ji lta ba bzhin gyi don la spyad par bya ba nyid du gang gsungs pa yin no/ / nyon mongs pa'i rang bzhin la kun du rmongs pa ni/ yang 'dod chags dang / zhe sdang dang / gti mug la don dang / don ma yin pa nyid du spyad par mi bya ba nyid dang / de ci'i phyir zhe na/ 'dod chags dang / zhe sdang dang / gti mug gi de bzhin nyid ni 'ga' zhig la yang don nam don ma yin par byed pa ma yin par 'thad pa dang /de bzhin du chos thams cad la don dang don ma yin par byed pa'i spyod pa rnam par bkag pa dang / de ci'i phyir zhe na/ de bzhin gshegs pas mngon par rdzogs par sangs rgyas nas chos gang yang dmigs su med pa dang /'dus byas dang 'dus ma byas kyi chos rnams mi byed pa'i phyir shes rab kyi pha rol tu phyin pas don dang don ma yin par byed pa bkag pa dang / 'dus ma byas 'phags pa thams cad kyi don yin pa dang / nam mkha'i de bzhin nyid kyi dpes des 'di la phan 'dogs pa med pa nyid dang /don dang don ma yin pa gnyis med pa'i tshul gyis rnam pa thams cad mkhyen pa nyid thob par gang gsungs pa yin no/ /gnyis med pa ni gnyis ma yin pa'i don dam pa ste/ de la kun du rmongs pa ni gnyis su med pa'i chos kyis gnyis su med pa'i chos thob pa bkag pa dang /gnyis kyi chos kyis gnyis kyi chos thob pa bkag pa dang / gnyis dang gnyis med pa'i chos mi dmigs pa la thob par bsnyad pas gang gsungs pa yin no/ /gang gi phyir de ltar rnam par rtog pa rab tu dbye ba rgya cher ji skad du brjod pas mngon par zhen pa thams cad mi mthun pa'i phyogs yin pa des na/rab 'byor rnam pa thams cad mkhyen pa nyid la dmigs pa med do zhes gang gsungs pa yin te/ des na dngos po med pa la dmigs pa'i ye shes rnam pa gcig pa rab tu grub pa yin no/ /'dir mya ngan las 'das pa dang lam dag med pa nyid yin na 'phags pa'i gang zag thams cad med par 'gyur ro zhes bya bas brtsad pa dang /thams cad 'dus ma byas kyi rab tu phye ba nyid dang / 'dus ma byas 'byung ba med pa nyid kyis 'jig rten gyi tha snyad tshad mar byas pa yin no zhes bya ba ni lan yin zhing / de ci'i phyir zhe na/ don dam pa ni ngag gi lam gyis gdags par bya ba ma yin no zhes bya ba ni 'thad pa yin no//mtha' rnam par chad pa rnams la phyi ma'i mu rab tu shes pa zhes bya ba ni brtsad pa yin la/ rang gi mtshan nyid stong pa nyid kyis chos rnams la de'i mu rab tu mi shes pa dang / de mi shes pa dang ldan pa'ang de bstan to zhes bya ba ni lan yin te/de'i phyir dngos po med pa la dmigs pa'i ye shes ni 'thad pa yin no/ /de nyid kyi phyir/ bcom ldan 'das byang chub sems dpa' sems dpa' chen po gang dag sems can rnams kyi don du bla na med pa yang dag par rdzogs pa'i byang chub la gnas pa ni dka' ba bgyid pa lags te/sems can nam sems can du btags pa yang mi dmigs so zhes bya ba la sogs pa gsungs pa yin no/ /yams nad 'di rnams zad pa na/ /yun ring lon nas dbugs phyin ltar/ /rnam pa kun tu 'gro ba yi/ /bde sgrub yon tan phun tshogs kun//rgya mtsho che la chu bo bzhin/ /'bras bu mchog gis dpa' ba yi/ /sems dpa' chen po de la ni/ /rnam pa kun du rten par byed/ /ji skad du lo ma dang / me tog dang / 'bras bu phun sum tshogs pa'i ljang bu'i dpes byang chub sems dpa' rnams bsod nams kyi zhing yin pa'i phyir/'gro ba thams cad kyi bde ba'i longs spyod kyi mchog tu gyur cing mang ba sna tshogs pa'i don dang / 'bras bu 'dud pa nyid kyis de'i 'bras bu mchog gis dpa' ba nyid dang / de lta bur gyur pa ni de bzhin gshegs pa nyid du gzung ba dang / de ci'i phyir zhe na/chos thams cad kyi de bzhin nyid ni rnam pa thams cad mkhyen pa nyid rnam par dag pa thob par byed pa'i 'thad pa dang / de bzhin du de bzhin nyid kyi shes rab kyi pha rol tu phyin pa la slob pa ni dbang po yongs su rdzogs pa dang / las bdag gir byed pa dang / smon gnas shes pa dang /dus gsum gyi ye shes rnam par dag pa dang / sems can rnams kyi don dang / sangs rgyas kyi zhing yongs su dag pa dang / rnam pa thams cad mkhyen pa nyid thob pa dang / chos kyi 'khor lo bskor ba dang / sems can yongs su mya ngan las zlo ba'i phan yon thob par gsungs pa yin no//'di'i mdo ni/ rab 'byor 'di lta ste dper na/ skyes bu 'ga' zhig gis ljang bu 'dod pas sa bon btab la/ des kyang ljang bu de'i rtsa ba mi shes/ de'i lo 'dab mi shes/ me tog mi shes/ 'bras bu mi shes par de ljang bu de'i myu gu 'dzugs shing /dus dus su chus bran te/ de'i sdong bu de rim gyis yal ga dang lo ma dang / me tog dang 'bras bu phun sum tshogs par gyur pa dang / de de'i 'dab ma dang / me tog dang / 'bras bu la spyod do/ /rab 'byor de bzhin du byang chub sems dpa' chen po rnams kyang sems can gyi phyir bla na med pa yang dag par rdzogs pa'i byang chub tu yang dag par 'jug ste/de dag rim gyis pha rol tu phyin pa drug la spyod cing rnam pa thams cad mkhyen pa nyid rjes su thob nas lo ma dang / me tog dang / 'bras bu ltar sems can thams cad kyi nye bar 'tsho bar 'gyur ro//de la lo ma ni byang chub sems dpa' rnams gang la brten nas sems can rnams ngan song gsum las yongs su grol bar byed pa de yin no/ /me tog ni gang la brten nas rgyal rigs shing sA la chen po lta bu'i rigs nas/ 'du shes med 'du shes med min skye mched kyi bar gyi lha rnams su skye ba'o//de la 'bras bu ni 'di yin te/ byang chub sems dpa' chen po rnams gang la brten nas sems can rgyun du zhugs pa'i 'bras bu nas/ dgra bcom pa dang / rang byang chub dang / rnam pa thams cad mkhyen pa nyid kyi bar la rab tu 'god pa de yin no//rab 'byor de ltar spyod pa'i byang chub sems dpa' sems dpa' chen po ni sems can thams cad la 'bras bu mchog gis dpa' ba yin no zhes bya ba la sogs pa gang gsungs pa yin no/ /sgom pa'i lam gyi mi mthun pa'i phyogs kyi rnam par rtog pa bshad zin to// // da ni sangs rgyas nyid thob pa'i de ma thag pa snga ma bar chad med pa'i ting nge 'dzin brjod par bya ba yin pa des na/ stong gsum skye bo nyan thos dang / /bse ru'i rtogs pa phun tshogs dang / /byang chub sems dpa'i skyon med la/ /bkod pa'i dge rnams dper mdzad nas/ /bsod nams mang po nyid kyis ni//sangs rgyas nyid kyi bar med de/ /bar chad med pa'i ting nge 'dzin/ /ces gsungs so/ /ji skad du stong gsum gyi stong chen po'i 'jig rten gyi khams kyi sems can thams cad nyan thos dang rang sangs rgyas kyi sa la 'god par byed pa bas/ de rnams byang chub sems dpa' las nges par skyes pa nyid kyis sems can thams cad kyi ched du bla na med pa yang dag par rdzogs pa'i byang chub tu sems skyed par byed pa bsod nams ches mang du 'phel ba nyid dang /de bzhin du stong gsum gyi stong chen po'i 'jig rten gyi khams kyi sems can thams cad dkar po rnam par mthong ba'i sa dang /de bzhin du rigs kyis dang / de bzhin du brgyad pa'i sa dang / de bzhin du mthong ba'i sa dang / bsrabs pa'i sa dang / 'dod chags dang bral ba'i sa dang / byas pa rtogs pa'i sa dang / rang sangs rgyas kyi sa dang / byang chub sems dpa'i skyon med par zhugs pa la 'god par byed pas byang chub sems dpa' byang chub la zhugs pa'i bsod nams ches mang du bskyed pa nyid kyi bar chad med pa'i ting nge 'dzin sangs rgyas nyid kyi bar chad med pa'i rgyu nyid yin par shes par byed pa'i don gyis gang gsungs pa yin no//de la byang chub sems dpa' zhugs pa ni 'bras bu bzhi pa la zhugs pa'i don yin gyi brgyad pa'i don ni ma yin no//'di ji ltar rtogs par bya zhe na/ 'di ltar byang chub sems dpa' byang chub tu zhugs pa rnam pas/ de bzhin gshegs pa'i bsod nams ches mang du bskyed pa nyid bsdus pa zhes bya bas de ma thag pa de bzhin gshegs pa khyad par du byed par 'gyur ro//bar chad med pa'i ting nge 'dzin gang gis de ma thag pa'i rgyur 'gyur ba sangs rgyas nyid de'ang gang yin zhe na/ de ni rnam pa kun mkhyen nyid/ /ces gsungs te/ ji skad du gnas skabs de lta bur gyur pas rnam pa thams cad mkhyen pa nyid yid la bya bar gsungs pa yin no//'di yi dmigs pa dngos med de/ /bdag po dran pa yin par bzhed/ /rnam pa zhi nyid/ /ces bya ba ni de'i dmigs pa dang dbang dang rnam pa zhugs pa dang / de'i dmigs pa dngos po med pa nyid yin pa dang / bdag po dran pa nyid yin par gang gsungs pa yin no//'gog pa shes pa'ang zhi ba'i rnam pa yin no snyam na/ mtshan nyid ni mtshan nyid med pa yin te zhes gsungs te/ 'dis ni 'dir rang bzhin gyis zhi bar brjod par 'dod pa yin gyi/ dngos po 'gog pas zhi ba ni ma yin no zhes ston par byed pa yin no//da ni log par rtog pa brjod par bya ba yin pa des na/ 'di la ni/ rab tu smra rnams brgyud mar rgol/ /zhes bya ba gsungs te/ gnas 'di la rab tu smra bar log par zhugs la rnam pa gcig nas gcig tu brgyud pa'i rtsod pa sna tshogs kyi spros pa rnam par spel ba spyod pa sel ba tsam gyi smra ba spong ba/ngag gi brjod pa'i lam mthar thug pa med pa rgol ba brgyud ma chen po rtsom par byed do/ /ji ltar zhe na/ de'i phyir 'di brjod pa yin te/ dmigs pa 'thad dang de yi ni/ /ngo bo nyid nges gzung ba dang / /rnam kun mkhyen nyid ye shes dang / /dam pa'i don dang kun rdzob dang //sbyor dang dkon mchog gsum po dang / /thabs bcas thub pa'i rtogs pa dang / /phyin ci log ni lam bcas dang / /gnyen po mi mthun phyogs dag dang / /mtshan nyid dang ni sgom pa la/ /smra ba rnams kyi log rtog pa/ /rnam pa kun mkhyen nyid rten can/ / rnam pa bcu drug dag tu bzhed/ /ces gsungs te/ bcu dang drug ces bya ba'i don to/ /de la rnam pa thams cad mkhyen pa nyid la brten pa'i dmigs pa 'thad pa la log par rtog pa ni 'di yin te/ rnam pa thams cad mkhyen pa nyid kyi yul shes par bya ba'i don de nyid nas brtsams te/'dus byas dang 'dus ma byas kyi khams kyang dngos po med pa nyid dang / de ci'i phyir zhe na/ de la ngo bo nyid med pa nyid dang / dngos po med pa nyid kyis rigs pa bkod pa la gzhan gyis de dngos po med pa'i ngo bo nyid yin pa dris pas gang gsungs pa yin te/ ji skad du/ bcom ldan 'das ci'i slad du rnam pa thams cad mkhyen pa nyid dngos po ma mchis pa'i ngo bo nyid lags zhes bya ba dang /bcom ldan 'das kyis 'dus pa las byung ba'i ngo bo nyid med par bstan pa la brten nas/ chos thams cad ni dngos po med pa'i ngo bo nyid du gang gsungs pa yin no/ /dmigs pa'i ngo bo nyid la log par rtog pa ni yang de rnams de bzhin nyid la sogs pa ngo bos dngos po med pa nyid dang /de lta yin na byang chub sems dpa'i pha rol tu phyin pa'i spyod pa nas/ rnam pa thams cad mkhyen pa nyid thob pa'i bar med par zhus pa dang / rab 'byor dngos po med pa'i ngo bo nyid kyi chos thams cad la yongs su 'dris par byed pa gang yin pa 'di nyid byang chub sems dpa' sems dpa' chen po'i thabs la mkhas pa ste zhes bya bas de'i lan btab pa dang /yang shes rab kyi pha rol tu phyin pa la sogs pa rnams la stobs dang mi 'jigs pa la sogs pa dang ldan pas byang chub kyi lam la yongs su 'dris par byed pa'i de'i dus mtshams yang dag par shes pa'i don dang /des na pha rol tu phyin pa yongs su rdzogs par byas nas/ skad cig ma gcig dang yang dag par ldan pa'i shes rab kyi rnam pa thams cad mkhyen pa nyid thob pa dang /bag chags kyis mtshams sbyor ba'i nyon mongs pa thams cad mi skye bar spong ba nyid du gang gsungs pa yin no/ /rnam pa thams cad mkhyen pa nyid kyi ye shes la log par rtog pa ni des na des sangs rgyas kyi spyan gyis rnam par bltas pa na/ dngos po dang dngos po med pa dmigs pa dang /pha rol tu phyin pa la sogs pa la spyod pa dang / rnam pa thams cad mkhyen pa nyid kyi bar thob par byed pa dang ldan pa ni pha rol tu phyin pa la sogs pa dngos po med par yid la byed pa dang / de ci'i phyir zhe na/ chos thams cad kyi dngos po med pa'i ngo bo nyid ni 'phags pa'i gang zag thams cad kyis kyang ma byas pa nyid dang /chos rnams ni chos rnams nyid dang bral ba'i phyir na/ dngos po dang dngos po med pa'i bdag nyid kyi chos kyis dngos po dang dngos po med pa'i bdag nyid shes par mi 'thad pa'i mtha' bzhi pa nyid dang / 'jig rten gyi kun rdzob tu dngos po dang dngos po med par ston par rjes su gnang bas gang gsungs pa yin no//bden pa gnyis la log par rtog pa ni kun rdzob dang don dam pa dag gi de bzhin nyid mngon par ma shes pa rnams kyi phyir dngos po dang dngos po med par ston pas gang gsungs pa yin no/ /sbyor ba la log par rtog pa ni/ byang chub kyi phyir spyod pas te zhes bya bas gzugs la sogs pa rnams nas 'dus byas dang 'dus ma byas dag gi bar la spyod pa dang rjes su spyod pa dag gnyis su med cing gnyis su byar med pa ni byang chub kyi spyod pa nyid yin par gang gsungs pa yin no/ /sangs rgyas dkon mchog la log par rtog pa ni/sangs rgyas sangs rgyas zhes bya ba yang dag pa'i don brjod pa'i rgyu mtshan bstan pa dang / yang dag pa'i chos mngon par rdzogs par byang chub pa'i phyir dang / yang dag pa'i don rab tu rtogs pa'i phyir dang / chos thams cad ji lta ba bzhin du mngon par rtogs pa'i phyir go rims bzhin du/thams cad mkhyen pa nyid gsum gyi dbang du mdzad nas sangs rgyas su brjod pa 'jug pa'i rgyu mtshan bshad pas gang gsungs pa yin no/ /chos dkon mchog la log par rtog pa ni/ byang chub ces bya ba'i tshig bla dgas zhus pa dang /stong pa nyid la sogs pa byang chub kyi tshig bla dgas nyid yin pa dang / yang byang chub ni ming tsam yin pa nyid dang / yang mi phyed pa'i don ni byang chub kyi don yin pa nyid dang / yang de bzhin nyid la sogs pa byang chub yin pa dang / yang ming dang mtshan ma tsam byang chub yin pa dang /'di sangs rgyas rnams kyi yin pa'am/ sangs rgyas rnams kyis mngon par rdzogs par sangs rgyas pas na byang chub ces brjod pas gang gsungs pa yin no/ /dge 'dun dkon mchog la log par rtog pa ni/ shes rab kyi pha rol tu phyin pa la spyod pas byang chub kyi dmigs pa'i dngos po bkag pa dang /de lta yin na pha rol tu phyin pa la sogs pa yongs su 'dzin pa med pa dang / de nyid la gnyis kyi spyod pa spangs pa dang / de lta yin na dge ba'i rtsa ba rnam par mi 'phel ba'i don dang / gnyis la brten pa rnams la 'phel ba ma mthong ba'i phyir gnyis la spyod pa'i byang chub sems dpa' rnams la brdzi ba med pa'i dge ba'i rtsa ba rnam par 'phel ba spangs pa dang /phyir mi ldog pa'i dge 'dun bstan pa'i don du sangs rgyas la bsnyen bkur byas pa las gzungs rab tu thob cing sangs rgyas dang / byang chub sems dpa' dang mi 'bral ba rnams kyis rnam pa thams cad mkhyen pa nyid rjes su thob par brjod pas gang gsungs pa yin no//thabs la mkhas pa la log par rtog pa ni / de thob pa'i rgyu'i thabs la mkhas pa yongs su zhus pa na de nges par bstan pa nas brtsams te/ dang po sems bskyed pa nas nye bar bzung nas rnam pa thams cad mkhyen pa nyid dang ldan pa'i yid la byed pas sangs rgyas la sogs pa rnams la sbyin pa yongs su gtong ba na/sbyin par byed pa dang / gtong ba po dang / len pa po mi dmigs pa'i thabs la mkhas pas/ sems can yongs su skyob pa nyid dang / de bzhin du tshul khrims la sogs pa'i pha rol tu phyin pa'i thabs la mkhas par brjod pa rgya cher sbyar ba dang /de ltar thabs la mkhas pa rnams ni gzugs la sogs pa'i chos thams cad la rang bzhin med par dmigs pa nyid yin pa'i phyir/ rnam par smin pa yongs su mi 'dzin pas blo mchog dang ldan pa nyid dang /de ci'i phyir zhe na/ chos rnams kyi rang bzhin ni dngos po med pa nyid du gang gsungs pa yin no/ /mngon par rtogs pa la log par rtog pa ni/ dngos po med pas dngos po med pa mngon par byang chub par bya bar mi nus pa nyid dang / dngos pos dngos po med pa mngon par byang chub par mi nus pa dang dngos pos dngos po med par mngon par byang chub pa bkag pa dang /dngos po med pas dngos po med pa byang chub pa bkag pa dang / de lta yin na mngon par rtogs pa med par thal ba dang / mu bzhi las bzlog pas dngos po dang dngos po med pa mnyam pa nyid du mthong ba ni mngon par rtogs pa nyid yin par zhal gyis bzhes pas gang gsungs pa yin no//phyin ci log la log par rtog pa ni/ gzugs la sogs pa'i phung po rnams la rtag pa dang / mi rtag pa dang / bde ba dang sdug bsngal ba dang / bdag dang bdag med pa dang /zhi ba dang / ma zhi ba nyid du mngon par zhen pa ni spros pa yin pa nyid dang / de bzhin du yongs su shes par bya ba dang yongs su shes par ma byas pa yin pa nyid du mngon par zhen pa dang / de bzhin du skye mched dang khams la sogs pa nas brtsams te/ rnam par thar pa'i sgo gsum gyi bar du sgom pa la mngon par zhen pa dang /de bzhin du rnam par thar pa brgyad dang mthar gyis gnas pa'i snyoms par 'jug pa dgu sgom pa la mngon par zhen pa dang / rgyun tu zhugs pa'i 'bras bu nas brtsams te/ rang sangs rgyas kyi byang chub kyi bar las 'da' bar mngon par zhen pa dang /byang chub sems dpa'i sa bcu po yongs su rdzogs par mngon par zhen pa nas brtsams te/ skyon med par zhugs pa dang / sangs rgyas kyi zhing yongs su dag pa dang / sems can yongs su smin pa dang / pha rol tu phyin pa drug gi spyod pa dang /stong pa nyid thams cad sgom pa dang / stobs dang / mi 'jigs pa dang / sangs rgyas kyi chos ma 'dres pa bco brgyad bskyed pa dang / rnam pa thams cad mkhyen pa nyid rjes su thob pa dang / bag chags kyis mtshams sbyor ba'i nyon mongs pa thams cad spang bar mngon par zhen pa ni spros pa yin pa nyid du shes pas/byang chub sems dpa' la ji skad du bshad pa'i spros pa med pa nyid dang / de ci'i phyir zhe na/ ngo bo nyid kyis ngo bo nyid dam/ dngos po med pas dngos po med pa spros par mi byed do zhes bya ba'i 'thad pa dang / gzugs la sogs pa spros pa med pa nyid kyis shes rab kyi pha rol tu phyin pa la spros pa med pa'i spyod pa rjes su gnang ba dang /chos thams cad la spros pa med par rnam par lta ba nyid zhus pa dang / rab 'byor gzugs la sogs pa ngo bo nyid med do zhes bya ba nas brtsams te/ ngo bo nyid med pa nyid kyis nas spros pa med par rnam par lta ba'i rgya nyid yin pas skyon med pa la 'jug pa mngon par brjod pa dang /ngo bo med pa nyid yin na byang chub sems dpa'i skyon med pa la 'jug pa'i lam med pa dang / dgra bcom pas lam gyi 'bras bu mi skyed pa'i dpes lam shes pa nyid kyis byang chub sems dpa'i skyon med pa la 'jug pa'i 'bras bu thob par bstan pa dang /de nas rdo rje lta bu'i ting nge 'dzin gyi de ma thag tu skad cig ma gcig la rnam pa thams cad mkhyen pa nyid thob par gang gsungs pa yin no/ /'di'i mdo ni/ rab 'byor 'di lta ste dper na/ dgra bcom pa nyid lam thams cad la bslabs nas yang dag pa'i skyon med pa la 'jug mod kyi/ji srid du lam gyi 'bras bus ma bskyed pa de srid du 'bras bu thob par mi byed do/ /rab 'byor de bzhin du byang chub sems dpa' sems dpa' chen po yang lam thams cad bskyed nas byang chub sems dpa'i skyon med par 'jug mod kyi/ji srid du rdo rje lta bu'i ting nge 'dzin thob par ma gyur gyi bar du rnam pa thams cad mkhyen pa nyid thob par mi byed do zhes bya ba la sogs pa yin no/ /lam la rnam par rtog pas ni/ gal te lam shes pa nyid yongs su rdzogs par byas nas/byang chub sems dpa' skyon med pa la 'jug na brgyad pa la sogs pa'i lam rnam pa tha dad pa'i phyir lam de dang de rdzogs par byed pa na byang chub sems dpa' de dang de'i 'bras bu mngon sum du byed par 'gyur bas na/ brgyad pa dang rgyun du zhugs pa la sogs pa nyid du thal ba dang /sems dang po bskyed pa nas nye bar bzung ste/ pha rol tu phyin pa rnams la spyod pa na shes pa dang mthong ba dag gis/ dkar po rnam par mthong ba la sogs pa'i sa rnam pa brgyad las 'da' bas na/ lam shes pa nyid kyis byang chub sems dpa' skyon med pa la zhugs pa rnam pa thams cad mkhyen pa nyid thob par brjod pa dang /de ci'i phyir zhe na/ brgyad pa la sogs pa rang sangs rgyas kyi bar gyi shes pa dang spong ba dag ni/ byang chub sems dpa'i bzod pa'i mtshan nyid kyis dang po kho nar nyan thos kyi lam gyis de'i rtogs pa bsal bar byed pa'i don gyis lam shes pa nyid yongs su rdzogs par byed pa la sogs pa'i 'thad pa dang /rim pa 'dis mngon par rdzogs par sangs rgyas nas 'bras bu ltar sems can thams cad kyi nye bar 'tsho bar 'gyur ro zhes bya ba skal ba ji lta ba bzhin du sems can thams cad 'bras bu la nye bar spyod pa'i rgyu nyid ces bya ba'i don dang /nyan thos la sogs pa'i lam tha dad pa'i bsam pas lam shes pa'i lam yongs su zhus pa dang / lam thams cad kyi rnam pa dang rtags dang mtshan ma mngon par rdzogs par rtogs te/ de gzhan dag la brjod pa dang bstan pa la sogs pa rnams lam shes pa nyid kyi lam nyid yin pa dang /stong gsum gyi stong chen po'i 'jig rten gyi khams kyi sems can thams cad go bar 'gyur ba dang / rjes su mthun pa'i skad dang / brda dang / sgra dang sgra brnyan lta bur yang dag par rig pa'i shes pa bskyed pas gzhan gyi don gyi thabs phun sum tshogs pa shes par byed pa'i don dang /lam gyi rnam pa shes pa nyid yongs su rdzogs par byas nas sems can thams cad kyi bsam pa shes pas gzhan gyi don gyi sbyor ba don yod par shes par byed pa'i don dang /dmyal ba la sogs pa ngan song de dang de'i lam dang 'bras bu shes nas de'i rgyu dang 'bras bu las bzlog pa nas brtsams te/ 'du shes med 'du shes med min gyi skye mched kyi lha rnams kyi lam dang 'bras bu la sogs pa shes pa dang / byang chub kyi phyogs la sogs pa snying rje chen po'i bar du shes par bya ba dang sems can rnams lam ji lta ba bzhin du 'bras bu la 'god par byed pa dang /de ci'i phyir zhe na/ 'di ltar de ni skyes bu'i dbang po rnams shin tu rnam par byed pa yin no zhes bya ba'i 'thad pas te/ shin tu rnam par phyed pa zhes bya ba ni rigs kyi rnam par phye bas legs par shes pa zhes bya ba'i don to//skyes bu smos pas ni bud med kyang rtogs par 'gyur te/ skyes bu ni bud med dang bcas pa zhes bya ba ni sgra'i lugs yin no/ /dbang po de dag kyang dad pa la sogs pa yin te/ de dang byang chub dang de'i phyogs kyi chos rnams ldan pa yang ma yin mi ldan pa yang ma yin pa/gzugs med pa/ bstan du med pa/ thogs pa med pa/ mtshan nyid med par mtshan nyid gcig pa nyid kyis na byang chub sgrub par byed pa'i chos gang lags zhes zhus pa dang / de lta bu mi shes pa'i sems can gyi don nyid du bstan pa yin par gang gsungs pa yin no//mi mthun pa'i phyogs dang gnyen po la log par rtogs pa ni/ rab 'byor gzhan yang gzugs gang yin pa dang zhes bya ba nas brtsams te/ rnam pa thams cad mkhyen pa nyid ces bya ba'i bar gyi chos gang yin pa de dag thams cad ni 'phags pa'i chos 'dul ba 'di la ldan pa yang ma yin mi ldan pa yang ma yin pa nyid kyis sems can rnams gzung bar bya ba'i don du 'jig rten gyi tha snyad du de dag gdags pa dang /nyan thos la sogs pa'i sa dang / rnam pa thams cad mkhyen pa nyid dag shes pa dang /mthong ba dag gis mngon sum du rtogs par bya ba nyid dang / 'dod chags dang ldan pa yang ma yin mi ldan pa yang ma yin zhes bya ba nas brtsams te/ nyon mongs pa 'dul ba ni 'phags pa'i chos 'dul ba yin pa nyid dang / bsam gtan bzhi dang ldan pa yang ma yin mi ldan pa yang ma yin zhes bya ba nas brtsams te/rtogs pa'i chos thams cad ldan pa yang ma yin mi ldan pa yang ma yin pa nyid dang / de ci'i phyir zhe na/ 'di ltar chos de dag thams cad gzugs med pa/ bstan du med pa/ thogs pa med pa/ mtshan nyid med par mtshan nyid gcig pa ste/ 'di lta ste mtshan nyid med pa yin la/ gzugs med pa dang bstan du med pa la sogs pa ni gzugs med pa dang bstan du med pa la sogs pa dang lhan cig ldan pa yang ma yin mi ldan pa yang ma yin no zhes bya ba'i 'thad pas gang gsungs pa yin no//mtshan nyid log par rtog pa ni/ 'dir gzugs med pa/ bstan du med pa/ thogs pa med pa/ mtshan nyid med par mtshan nyid gcig pa'i pha rol tu phyin pa la bslabs pa rnams kyi chos thams cad kyi mtshan nyid mi dmigs par shes pa dang / chos thams cad kyi mtshan nyid med pa la bslab par bya ba yin na nyan thos la sogs pa'i sa las 'da' bar bya ba med par 'gyur ba dang /chos thams cad mtshan nyid med pa/ gzugs med pa/ bstan du med pa/ thogs pa med pa/ mtshan nyid med par mtshan nyid gcig pa nyid kyis mtshan nyid la slob pa med pa dang /de ci'i phyir zhe na/ gal te sngar mtshan nyid yod pa zhig yin na ni de phyis mtshan nyid med par 'gyur ba zhig na ces bya ba'i 'thad pa dang / mtshan nyid dang mtshan nyid med pa la slob pa bkag pa dang / de ci'i phyir zhe na/ de bzhin gshegs pa rnams byung yang rung de bzhin gshegs pa rnams ma byung yang rung ste/mtshan nyid med pa'i dbyings 'di ni gnas pa nyid do zhes bya ba'i 'thad pas gang gsungs pa yin no/ /sgom pa la log par rtog pa chos thams cad mtshan nyid med par mtshan nyid gcig pa yin na ni de bsgoms pas shes rab kyi pha rol tu phyin pa sgom par mi 'thad pas nyan thos la sogs pa'i sa las 'da' ba dang /byang chub sems dpa'i skyon med par 'jug pa la sogs pa med pa dang / de sgom pa la mtshan nyid gcig pa dang mtshan nyid tha dad pa nyid bkag pas mtshan nyid med pa nyid de sgom pa yin par rjes su gnang ba dang /ji ltar na zhes bya bas de yongs su zhus pa la/ gzugs sgom pa rnam par mi bsgom pa ni shes rab kyi pha rol tu phyin pa sgom pa nyid dang / de bzhin du tshor ba la sogs pa dang / mig la sogs pa dang / gzugs la sogs pa dang / mig gi rnam par shes pa la sogs pa dang /de'i 'dus te reg pa la sogs pa dang / /de'i rkyen gyi tshor ba la sogs pa dang / sa la sogs pa khams drug dang / rten cing 'brel par 'byung ba dang / de'i yan lag mya ngan la sogs pa dang / 'dzin pa dang / spong ba'i mtshan nyid blang ba dang dor ba dag dang /dang po la sogs pa'i bsam gtan rnams dang / byams pa dang / snying rje dang / dga' ba dang / btang snyoms dang / gzugs med pa'i snyoms par 'jug pa rnams dang / rjes su dran pa drug nas gzung ste/ rjes su dran pa rnams dang / mi rtag pa dang / sdug bsngal ba dang / bdag med pa'i 'du shes dang / bdag dang sems can la sogs pa'i 'du shes dang / rtag pa dang / mi rtag pa dang / bde ba dang / sdug bsngal ba dang / zhi ba dang / ma zhi ba'i 'du shes dang / dran pa nye bar gzhag pa la sogs pa byang chub kyi phyogs rnams dang /stong pa nyid dang / mtshan ma med pa dang / smon pa med pa dang / rnam par thar pa brgyad dang / mthar gyis gnas pa'i snyoms par 'jug pa dgu dang / rtog pa dang bcas shing dpyod pa dang bcas pa dang / rtog pa med pa dpyod pa tsam dang /rtog pa'ang med dpyod pa'ang med pa'i ting nge 'dzin rnams dang / 'phags pa'i bden pa rnams dang / sdug bsngal dang / kun 'byung dang / 'gog pa pa dang / lam dang / zad pa dang / mi skya ba dang / chos dang / rjes su 'gro ba dang / kun rdzob dang / yongs su 'dris pa dang / sgra ji bzhin shes pa rnams dang / pha rol tu phyin pa rnams dang / stong pa nyid thams cad dang / mngon par shes pa rnams dang / ting nge 'dzin dang / gzungs kyi sgo rnams dang / stobs dang / mi 'jigs pa dang / so so yang dag par rig pa dang /sangs rgyas kyi chos ma 'dres pa rnams dang / snying rje chen po dang / rgyun du zhugs pa la sogs pa'i 'bras bu dang / rang byang chub dang / rnam pa thams cad mkhyen pa nyid dang / bag chags kyis mtshams sbyor ba'i nyon mongs pa thams cad spangs pa sgom pa rnam par mi bsgom pa ni shes rab kyi pha rol tu phyin pa sgom pa nyid yin te /sgom pa smos pa ni thams cad mkhyen pa nyid gsum pa so so ba dang bsdus pa'i mngon par rtogs pa'i dbang du byas nas ji skad du bstan pa'i sgom pa'i lam shes pa'i don du'o/ /rnam par mi bsgom pa smos pa ni sgom pa'i lam gyi bdag nyid ji lta ba shes pa'i don du'o//rang dang spyi'i mtshan nyid rnam pa mang por phye ba'i gzugs la sogs pa'i chos mang po smos pa ni sngar gyi sgom pa'i lam gyi yul gyi shes pa'i don du ste/ de dang / ji ltar na zhes bya bas ji skad du gsungs pa rgyas par zhus pa la bshad pa'i gzugs la sogs pa rnams dang /rnam pa thams cad mkhyen pa nyid dang / de'i mi mthun pa'i phyogs bag la nyal ba la sogs pa rnams dngos po'i zhes sgom pa med pa rjes su gnang ba dang / de ci'i phyir zhe na/ rab 'byor dngos po'i 'du shes can la ni/ shes rab kyi pha rol tu phyin pa sgom pa med do zhes bya ba dang /de ci'i phyir zhe na/ dngos po la 'di ni nga'o zhes bya bar mtha' gnyis la chags pa la thar pa med pa'i 'thad pa dang / gnyen po'i chos thams cad sgom pa med pa dang / dngos po dang / dngos po med pa'i mtshan nyid zhus pa la de dag gi mtshan nyid gnyis dang /gnyis med pa yin par bstan pa dang / gnyis dang gnyis med pa yongs su zhus pa la/ gzugs kyi 'du shes nas/ 'dus ma byas dang 'dus byas kyi khams kyi 'du shes kyi bar dang / de bzhin du de dag gi 'du shes med pa rnams rim pa ji lta ba gnyis pa dang gnyis med par bstan pa dang /ji srid du gnyis yod pa de srid du dngos po'o/ /ji srid du dngos po yod pa de srid du 'du byed do/ /ji srid du 'du byed yod pa de srid du sems can rnams dge ba'i rtsa ba can gyi sdug bsngal las mi 'grol ba dang / gnyis kyi 'du shes can la sbyin pa la sogs pa rnam par byang ba'i chos thams cad med pa dang /gal te de lta yin na dngos po med pa'i 'du shes can la yang rnam par byang ba'i chos thams cad sgom pa med par thal ba dang / ji skad du smras pa de bzhin te/ zhes zhal gyis bzhes nas shes rab kyi pha rol tu phyin pa'i spyod pa byed pa'i byang chub sems dpa' la dngos po dang /dngos po med pa'i 'du shes thams cad bkag pas rjes su mthun pa'i bzod pa'i lam dang 'bras bu dag bstan pa dang / lam dang mngon par rtogs pa dag dngos po med pa nyid kyi rnam grangs kyi chos thams cad dngos po med pa'i ngo bo nyid yin pas mngon par rtogs pa'i ye shes kyi dmigs pa las tha dad pa'i chos med par shes par byed pa dang /gal te de lta yin na de bzhin gshegs pas chos thams cad mngon par rdzogs par sangs rgyas pa dang / de la mnga' bsgyur ba rnyed pa la sogs pa med par thal ba dang /nga sngon 'dod pa rnams las dben pa/ sdig pa mi dge ba'i chos rnams las dben pa/ rtog pa dang bcas pa/ dben pa las skyes pa'i dga' ba dang / bde ba can bsam gtan dang po la nye bar bsgrubs te gnas la zhes bya ba nas brtsams te/ sems can rnams phung po gsum du lung bstan to zhes bdag nyid dbang po nyid kyis dngos po med pa'i ngo bo nyid thugs su chud pa'i chos bstan pa dang /ji ltar zhes bya bas rnam pa de lta bu thugs su chud pa zhus pa la/ rab 'byor gal te 'dod pa rnams la rang gi ngo bo'am/ dngos po med pa zhig yin par gyur na ni zhes bya ba nas brtsams te/mngon par bzhed pa'i thugs su chud pa'i bstan pa dang ste/ de la rang gi ngo bo ni dngos po'o/ /ngo bo ni bya ba'o/ /dngos po med pa ni dngos po nye bar chad pa'o/ /de ltar na 'di dag ni rnam pa thams cad mkhyen pa nyid rten du byas nas rab tu smra ba rnams kyi rnam par nges pa dang bcas pa'i skabs rgya cher byas pas log par rtog pa'i gnas rnam pa bcu drug tu gyur pa yin no//de de ltar byas na/ de yi rtags dang rnam 'phel dang / / bstan dang sems kun gnas pa dang / /mthong zhes bya dang sgom pa zhes/ /bya ba'i lam ni so so la/ /rnam par rtog pa rnam bzhi yi//gnyen po rnam pa bzhi dang ni/ /bar chad med pa'i ting nge 'dzin/ /log par sgrub dang bcas pa ni/ /rtse mo'i mngon rtogs/ zhes gang bstan pa de bshad pa yin par shes par bya'o/ / shes rab kyi pha rol tu phyin pa'i man ngag gi bstan bcos mngon par rtogs pa'i rgyan zhes bya ba las rtse mo'i mngon par rtogs pa'i skabs bslab pa yongs su dag pa zhes bya ba'i le'u ste lnga pa'o// //da ni mthar gyis pa'i mngon par rtogs pa brjod par bya ba yin pas/ bcom ldan 'das gal te de ltar rtogs pa'i chos dngos po med pa'i ngo bo nyid lags na/byang chub sems dpa' sems dpa' chen po shes rab kyi pha rol tu phyin pa la spyod pa ni mthar gyis bgyi ba dang / mthar gyis bslab pa dang / mthar gyis sgrub par ji ltar gdags par 'gyur zhes bya ba'i dri bas mthar gyis pa'i mngon par rtogs pa nye bar dgod pa'i don te/bgyi ba smos pa ni sems bskyed pa bzung ba'i don du'o/ /bslab pa smos pa ni nges par 'byed pa'i cha dang mthun pa shes pa'i don du'o/ /sgrub pa smos pa ni mthong ba'i lam dang / sgom pa'i lam shes pa'i don du'o/ /gsum smos pa ni mngon par rtogs pa'i mthar gyis pa shes par bya ba'i don du yin no//de dang rab 'byor 'di la byang chub sems dpa' sems dpa' chen pos thog ma nyid do zhes bya ba nas skra'i rtse mo'i cha tsam yang med do zhes bya ba nas brtsams te/ gal te bdag mngon par rdzogs par sangs rgyas sam ma rgyas kyang rung ste/ chos thams cad dngos po med pa kho na'o/ /zhes nges par bzung nas dngos po'i 'du shes can rnams kyi 'du shes de bzlog pa'i don du rdzogs pa'i byang chub la 'jug pa dang / mthar gyis pa'i bya ba la sogs pa rtsom pa nye bar bstan pas mngon par rtogs pa'i go rims kyis gzhan gyi don khas blangs pa'i phyir brda las byung ba'i dngos po shes par byed pa'i don du gsungs pa yin no//mthar gyis pa'i mngon par rtogs pa 'di'ang rnam pa bcu gsum du shes par bya'o/ /ji ltar zhe na/ sbyin pa shes rab bar dag dang / /sangs rgyas la sogs dran dang chos//dngos med ngo bo nyid kyis de/ /mthar gyis pa yi bya bar bzhed/ /ces bya ba gsungs pa yin no/ /de la sbyin pa'i pha rol tu phyin pa'i mthar gyis pa'i mngon par rtogs pa ni/ bdag nyid kyang sbyin pa sbyin par byed la zhes bya ba nas brtsams te/ sbyin pas mthar gyis pa'i bya ba la sogs pa shes pa'i don du gang gsungs pa yin no/ /tshul khrims kyi pha rol tu phyin pa ni bdag nyid kyang tshul khrims kyi pha rol tu phyin pa la spyod cing zhes bya ba nas brtsams te/ tshul khrims kyi mthar gyis pa'i bya ba la sogs pa shes pa'i don du gang gsungs pa yin no//bzod pa'i pha rol tu phyin pa ni/ bdag nyid kyang bzod pa'i pha rol tu phyin pa la spyod cing zhes bya ba nas brtsams te/ bzod pas mthar gyis pa la sogs pa shes pa'i don dang / de bzhin du brtson 'grus dang / bsam gtan dang / shes rab kyi pha rol tu phyin pa'i spyod pa re re la mthar gyis pa rnam par 'phel ba'i bya ba re re mngon par brjod pas mthar gyis pa'i mngon par rtogs pa ston pas gang gsungs pa yin no//sangs rgyas rjes su dran pa'i mthar gyis pa'i mngon par rtogs pa ni/ yang de sems dang po bskyed pa nas nye bar bzung ste/rnam pa thams cad mkhyen pa nyid dang ldan pa'i yid la byed pa can chos thams cad dngos po med pa'i ngo bo nyid du lhag par mos pa dang ldan pa ni de bzhin gshegs pa la gzugs la sogs par yid la mi byed pas de rjes su dran pa ni sangs rgyas rjes su dran pa dang / de ci'i phyir zhe na/ gzugs la sogs pa la ngo bo nyid med pa'i phyir dngos po med pa nyid dang /de ci'i phyir zhe na/ sangs rgyas rjes su dran pa ni dran pa med cing yid la mi byed pa med pa nyid yin pa dang / de bzhin du re re zhing gtan tshigs kyi sbyor ba drug pa gnyis kyis de bstan pa yang mdzad nas/ yang mtshan dang dpe byad la sogs pa yid la mi byed pas sangs rgyas rjes su dran pa dang /de bzhin du tshul khrims kyi phung po la sogs par yid la mi byed pas de rjes su dran pa dang / de bzhin du stobs bcu la sogs par yid la mi byed pas de rjes su dran pa dang / rten cing 'brel par 'byung bar yid la mi byed pas de rjes su dran pa ste/de ltar sangs rgyas rjes su dran pa rnam pa lnga'o/ / de la dang pos ni sems bskyed pa'o/ /bzhi po rnams kyis ni nges par 'byed pa'i cha dang mthun pa bzhi'o/ /de ltar slob pa na dran pa nye bar gzhag pa la sogs pa byang chub kyi phyogs yongs su rdzogs pas ni mthong ba'i lam dang /rnam pa thams cad mkhyen pa nyid kyi ye shes yongs su rdzogs pa'i bar gyis ni sgom pa'i lam yin te/ de ltar dngos po med pa'i ngo bo nyid yin du zin kyang mthar gyis pa'i bya ba la sogs pa rab tu shes pa ni sangs rgyas rjes su dran pa sgom par rtogs par bya'o//de kho na bzhin du dge ba dang / mi dge ba dang / lung du ma bstan pa la sogs pa'i chos yid la mi byed pas chos rjes su dran pa dang / skyes bu zung bzhi po rnams dngos po med pa'i ngo bo nyid kyis rab tu phye ba'i phyir/ dngos po med pa nyid du yid la byed pas dran pa med cing yid la byed pa med pas dge 'dun rjes su dran pa dang /dang po sems bskyed pa nas nye bar bzung ste/ ma nyams pa/ skyon med pa/ ma 'dres pa/ nag nog med pa/ mchog tu 'dzin pa med pa/ dbang 'byor pa/ mkhas pas mngags pa shin tu rdzogs pa'i ting nge 'dzin sgrub par byed pa'i tshul khrims la gnas pas/tshul khrims de dngos po med pa'i ngo bo nyid du yid la byed pas dran pa med cing yid la byed pa'i tshul khrims rjes su dran pa dang ste/ de la tshul khrims ma nyams pa ni theg pa gzhan la mi brten pas so/ /skyon med pa ni nyam nga ba'i skye ba rnam par spangs pas so//ma 'dres pa ni skye bo ngan pa dang / nyon mongs pa dang ma 'dres pa nyid kyis so/ /nag nog med pa ni cha gcig tu dkar po'i chos rnam par 'phel ba nyid kyis so/ /mchog tu 'dzin pa med pa ni skye bar smon lam mi 'debs pa nyid kyis so//dbang 'byor pa ni ji ltar 'dod pa bzhin du bgrod pa nyid kyis so/ /mkhas pas bsngags pa ni mdzangs pa rnams kyis ma smad pa nyid kyis so/ /shin tu rdzogs pa ni dbang po rnams srung ba nyid kyis so/ /ting nge 'dzin sgrub par byed pa ni bsam gtan gyi yan lag gi tshogs nye bar sogs pa nyid kyis so//chos dang zang zing gi sbyin pa dag dngos po med pa'i ngo bo nyid du yid la byed pas dran pa med cing yid la myed pa med pa'i gtong ba rjes su dran pa dang / 'dod pa na spyod pa'i lha'i rigs drug tu skyes pa'i rgyun du zhugs pa rnams dang / gzugs dang /gzugs med pa na spyod pa'i phyir mi 'ong ba rnams dngos po med pa'i ngo bo nyid du yid la byed pas dran pa dang yid la byed pa med pa'i lha rjes su dran pas mthar gyis pa'i bya ba la sogs pa rab tu gdags par gang gsungs pa yin no/ /'o na mdo sde gzhan las 'di skad ces lha'i ris gnyis su dran par bya ste/dga' ldan dang / gnas gtsang ma ba'o zhes gsungs pa de ji ltar zhe na/ de ni ma 'dres pa'i gang zag la dgongs nas gsungs pa yin pas nyes pa med do/ /chos thams cad dngos po med pa'i ngo bo nyid du shes pas mthar gyis pa'i mngon par rtogs pa ni/de ltar dngos po med pa'i ngo bo nyid kyi tshul gyis stong pa nyid thams cad dang / byang chub kyi phyogs kyi chos rnams dang / 'phags pa'i bden pa dang / tshad med pa dang / bsam gtan dang / gzugs med pa'i snyoms par 'jug pa dang / rnam par thar pa dang / mthar gyis gnas pa'i snyoms par 'jug pa dang / ting nge 'dzin dang / gzungs kyi sgo dang / rnam par thar pa'i sgo gsum dang / stobs dang / mi 'jigs pa la sogs pa rnams dang / pha rol tu phyin pa bcu po rnams dang / snying rje chen po la slob pa ni dngos po med pa'i ngo bo nyid du rtogs pas mthar gyis pa'i bya ba la sogs pa yongs su shes pa zhes bya ba dang /chos thams cad dngos po med pa'i ngo bo nyid yin na thams cad med pa'i phyir mtha' gcig tu chad pa med par smra bar thal bar 'gyur ba dang / dngos po med pa'i ngo bo nyid yin na yod pa'am med pa mi dmigs pas de spangs pa dang /rang nyid la nem nur med kyang ma 'ongs pa'i skye bo la ltos nas gnas brtan rab 'byor gyis zhus pa yin pa dang / dngos po med pa'i ngo bo nyid yin na sems can la ltos nas bla na med pa yang dag par rdzogs pa'i byang chub tu 'jug pa med pa dang / de nyid kyis de yang dag par 'grub pa dang / de ci'i phyir zhe na/ dmigs pa'i 'du shes can la thob pa dang mngon par rtogs pa bkag pa dang / mi dmigs pa nyid chos kyi dbyings 'khrug pa med pa yin pas de thob pa dang mngon par rtogs pa min pa nyid dang / de yin nas bcu la sogs par rnam par gzhag pa med pa dang /de nyid kyi phyir mngon par 'dod pa yang dag par grub pa dang / mi dmigs pa dang sbyin pa la sogs pa rnams tha dad du bya ba bkag pa dang / de mi dmigs pa'i rnam par sgom par byed pa rnams la de'i khyad par zhal gyis bzhes pa dang / bla na med pa yang dag par rdzogs pa'i byang chub tu mngon par rdzogs par 'tshang rgya bar 'gyur ba nyid kyis gang gsungs pa yin no/ /de de ltar byas na mthar gyis pa rnam gsum rnam pa bcu zhes gang gsungs pa de yongs su rdzogs pa yin par shes pa'o/ / shes rab kyi pha rol tu phyin pa'i man ngag gi bstan bcos mngon par rtogs pa'i rgyan zhes bya ba las mthar gyis mngon par rtogs pa'i skabs rim gyis 'jug par bslab pa'i le'u ste drug pa'o// //da ni sems kyi skad cig ma gcig gis mngon par rtogs pa brjod par bya ba yin te/ des na bcom ldan 'das byang chub sems dpa' sems dpa' chen po shes rab kyi pha rol tu phyin pa la spyod pa na ji ltar sems kyi skad cig ma gcig gis pha rol tu phyin pa drug yongs su 'dzin par bgyid ces bya ba'i dri bar skad cig ma gcig gis mngon par rtogs pa nye bar dgod pa'i don du gsungs pa yin no//skad cig ma gcig gis mngon par rtogs pa 'di'ang rnam pa bzhir rig par bya ba las/ sbyin pa la sogs pa gang yang rung bas zag pa med pa'i chos thams cad skad cig ma gcig gis bsdus pa'i mtshan nyid ni gang gi dbang du mdzad nas/sbyin pa la sogs re res kyang / /zag med chos kun bsdus pa'i phyir/ /thub pa'i skad cig gcig pa'i phyir / /rtogs pa 'di ni shes par bya/ /zhes bya ba gsungs te/ ji skad du shes rab kyi pha rol tu phyin pa yongs su zin pa'i sbyin pa la sogs pa'i pha rol tu phyin pa nas dpe byad bzang po brgyad cu'i bar rnams yongs su zin pa dang /gnyis su med pa'i 'du shes ni skad cig ma gcig gis mngon par rtogs pa nyid kyi dkar po'i chos thams cad khongs su 'dus pa dang / zag pa med pa'i sems la gnas pa ni/ /gang la gang zhig gang gis sbyin/ / zhes bya bar de'i mtshan ma mi mthong bar sbyin pa byin pa ni chos thams cad mi dmigs pa'i rnam par skad cig ma gcig la mngon par rtogs pa yin pa nyid dang / de lta yin na mtshan ma med cing mngon par 'du bya ba med pa rnams la sbyin pa la sogs pa yongs su rdzogs pa med par thal ba dang /nye bar mkho ba med pa'i sbyin pa rgya chen po btang bas khyod la ci zhig bya zhes 'dun pa bzlog pa na/ mi dmigs pas yongs su bsngos pa'i sbyin pa la sogs pa las mi ldog pa dang / gzhan 'phrul dbang byed kyi lha'i dpes pha rol tu phyin pa la sogs pa rnam par byang ba thams cad yongs su rdzogs par brjod de spangs pas gsungs pa yin te/de bzhin du tshul khrims kyi pha rol tu phyin pa la sogs pa rgya cher mdo ji lta ba bzhin du brjod par bya'o/ /'di'i mdo ni/ rab 'byor 'di lta ste dper na/ gzhan 'phrul dbang byed kyi lha rnams kyi yo byad phun sum tshogs pa thams cad ni bsams pa tsam gyis 'byung ngo //rab 'byor de bzhin du byang chub sems dpa' sems dpa' chen po ni bsams pa tsam gyis pha rol tu phyin pa yongs su rdzogs par 'gyur ro zhes bya ba la sogs pa gang gsungs pa yin no/ /yang ji ltar na zag pa med pa'i chos gcig la dmigs pa'i sgom pa la zhugs pa na zag pa med pa'i chos thams cad sdud pa yin zhe na/re zhig don 'di la 'jig rten pa'i dpe cung zad kyang bstan par bya ba yin pa des na/ ji ltar skyes bus zo chun brgyud/ /rdog thabs gcig gis bskyod pa na/ /thams cad cig car 'gul ba ltar//skad cig gcig shes de bzhin no/ /zhes bya ba gsungs te/ 'di la sngon gyi 'phen pa'i shugs las shes par dgos pa yin no/ /rnam par smin pa'i chos nyid kyi gnas skabs kyi zag pa med pa'i chos thams cad skad cig ma gcig la mngon par rtogs pa ni gang gi dbang du mdzad nas/gang tshe chos dkar thams cad kyi/ /rang bzhin shes rab pha rol phyin/ /rnam smin chos nyid gnas skabs skyes/ /de tshe skad cig gcig ye shes/ /zhes bya ba gsungs te/ rab 'byor 'di la byang chub sems dpa' sems dpa' chen po shes rab kyi pha rol tu phyin pa la spyod pa'i tshe/'di la yang dag pa'am yongs su grub pa'i chos gang yang yang dag par rjes su mi mthong zhes bya ba nas brtsams te/ rgya cher rnam par byang ba'i phyogs thams cad rnam par smin pa'i gnas skabs su rnam par gzhag pa dang / mtshan ma med pa'i sbyor bas shes rab kyi pha rol tu phyin pa yongs su rdzogs nas skad cig ma gcig la mngon par rtogs pa nyid kyis rnam par smin pa cig car du skye ba dang 'gag par shes par byed pa'i don du gang gsungs pa yin no//mtshan nyid med pa'i chos thams cad skad cig ma gcig la mngon par rtogs pa ni gang gi dbang du mdzad nas/sbyin pa la sogs spyod pa yis / /chos kun rmi lam 'drar gnas nas/ /chos rnams mtshan nyid med pa nyid/ /skad cig ma ni gcig gis rtogs/ /zhes bya ba gsungs te/ ji skad du phan tshun shin tu tha dad pa'i chos kyi mtshan nyid chos gcig gi khongs su 'dus par mi 'thad pas/skad cig ma gcig la mngon par rtogs pa med par thal ba dang / rab 'byor 'di la byang chub sems dpa' sems dpa' chen po shes rab kyi pha rol tu phyin pa la spyod pa na rmi lam lta bu'i nye bar len pa'i phung po lnga gnas nas zhes bya ba nas brtsams te/rgya cher chos thams cad mtshan nyid med par shes so zhes bya ba'i bar gyis chos thams cad mtshan nyid med par skad cig ma gcig la mngon par rtogs pa nyid gsungs pa yin te/ rmi lam lta bu zhes bya ba ni rmi lam gyi rang bzhin can no//mtshan nyid med pa zhes bya ba ni ngo bo nyid med pa ste/ 'di ltar chos mthun pa'i dpe'i don gang yin pa de ni sbyin pa la sogs pa dus su bar chad dang bcas pa dang bar chad med pa stong pa nyid yid la byed pas lhag par spyod pa'i phyir dang / tshogs la nye bar mkho ba nyid du nyams su myong nas de rtogs pa'i gnas skabs su chos rnams ro gcig pa nyid kyi dbye ba med pa'i phyir ngo bo nyid kyi don yang dag par 'grub bo//ji skad du/ sring mo phung po ni rmi lam lta bu ste/ shin tu yongs su ma grub pa'o/ /byang chub kyang rmi lam gyi ngo bo nyid de/ de ltar na phung po dang byang chub sems dpa' 'di ni gnyis su med de gnyis su byar med do zhes bya ba la sogs pa gsungs so/ /de bzhin du rmi lam la sogs pa'i dpes tshul khrims la sogs pa'i pha rol tu phyin pa lnga po mdo ji lta ba bzhin du brjod par bya'o/ /gnyis su med pa'i mtshan nyid du chos thams cad skad cig ma gcig la mngon par rtogs pa ni/gang gi dbang du mdzad nas/ rmi lam dang ni de mthong nyid/ /gnyis kyi tshul du mi mthong ltar/ /chos rnams dmigs su med pa yi/ /de nyid skad cig gcig gis mthong / /zhes bya ba gsungs so/ / ji skad du/ rab 'byor 'di la byang chub sems dpa' sems dpa' chen po shes rab kyi pha rol tu phyin pa la spyod pa na rmi lam mi mthong / rmi lam mthong ba po mi mthong zhes bya ba nas brtsams nas/ de dag dang shes rab kyi pha rol tu phyin pa de ni gnyis su med de gnyis su byar med do zhes bya bas chos thams cad gnyis su med pa'i mtshan nyid skad cig ma gcig la mngon par rtogs pa nyid dang /chos thams cad dbyer med na dge ba dang mi dge ba la sogs pa'i chos bstan pa med par thal ba dang / der brjod pa yod par thal bas der mngon par brjod pa 'jug pa'i rgyu mtshan btsal ba'i don dang /chos thams cad kyi chos nyid la brjod du med pa nyid dang / de bzhin du chos thams cad kyi rang bzhin la mkhas pa ni chos kyi skur btags pa yang dag par 'grub par gsungs pa yin no/ /de ltar byas na skad cig ma gcig gis mngon par byang chub pa/ mtshan nyid kyis ni rnam pa bzhi//zhes gang gsungs pa de'i skabs kyi 'brel pa yin par blta bar bya'o/ /gang dag skad cig ma gcig la mngon par rtogs pa la ni/ 'phags pa nyan thos sdug bsngal la sdug bsngal bar yid la byed pa dang / kun 'byung la kun 'byung bar yid la byed pa dang / lam la lam gyi bar du yid la byed pas ni zag pa med pa yid la byed pas mtshungs par ldan pa'i chos rnams rnam par 'byed do zhes bya ba la sogs pa mdo dang 'gal ba yin no zhes zer ro //de ni 'phags pa nyan thos zhes gsungs pa'i phyir des mi gnod de/ 'di ni sangs rgyas kyi mngon par rtogs pa yin pa'i phyir ro//skad cig ma gcig la mngon par rtogs pa'i mtshan nyid kyi rjes su 'brang ba dang nye bar 'brel pa gang yin pa 'khor ba gcig nas gcig tu brgyud par goms pa rab tu brtan pas nges par sbyar ba/ dmigs pa'i dug gi sgregs pa rnam pa 'di lta bu rnams bzlog par bya ba'i don du 'di la mkhas pa rnams kyi brjod par bya ba rnam pa mang du yod do//mngon par rtogs pa zhes bya ba'i don ci zhig yin zhe na/ mngon pa ni mngon du phyogs pa'o/ /sam gyi sgra ni nges par mngon par brjod pa'o/ /a ya ni rtogs pa la'o/ /des na 'di skad du mngon du phyogs par yang dag par ji lta ba bzhin du nges par rtogs pa ste/shes pa'am khong du chud pa ni mngon par rtogs pa yin no zhes brjod pa yin no/ / shes rab kyi pha rol tu phyin pa'i man ngag gi bstan bcos mngon par rtogs pa'i rgyan ces bya ba las/ skad cig ma gcig la mngon par rtogs pa'i skabs bslab pa yongs su rdzogs pa'i le'u ste bdun pa'o// //da ni chos kyi sku brjod par bya ba yin la/ de ni rnam pa gsum du rig par bya ste/ ngo bo nyid kyi sku dang / longs spyod rdzogs pa'i sku dang / sprul pa'i sku'o/ /gang gi phyir ngo bo nyid kyi sku'i dbang du mdzad nas/ thub pa'i ngo bo nyid sku ni//zag pa med pa'i chos gang dag /thob gyur rnam kun rnam dag pa/ /de gang rang bzhin mtshan nyid can/ /zhes bya ba gsungs te/ chos kyi dbyings dang ldan par gyur pa zag pa med pa'i chos thams cad du rnam par dag pa'i rang bzhin te ngo bo nyid gang yin pa de ni bcos ma ma yin pa'i don gyis na/bcom ldan 'das kyi ngo bo nyid kyi sku yin par shes par bya ste/ ngo bo nyid ces bya ba ni bcos ma ma yin pa zhes bya ba ni 'jig rten na grags pa yin no/ /'jig rten las 'das pa'i lam ni de 'thob par byed pa yin gyi/ byed pa po ma yin no/ /gang dag gis rnam pa thams cad du shin tu rnam par dag pa'i ngo bo nyid chos kyi skur 'gyur ba zag pa med pa'i chos de rnams kyang gang zhig yin zhe na/ byang chub phyogs mthun tshad med dang / /rnam par thar dang mthar gyis ni/ /snyoms 'jug dgu yi bdag nyid dang //zad par bcu yi bdag nyid dang / /zil gyis gnon pa'i skye mched ni/ /rab tu dbye bas rnam brgyad dang / /nyon mongs med dang smon mkhyen dang / /mngon shes so so yang dag rig /rnam pa thams cad dag bzhi dang / /dbang bcu dang ni stobs bcu dang / /mi 'jigs pa ni bzhi dag dang //srung ba med pa rnam gsum dang / /dran pa nyer gzhag rnam gsum dang / /bsnyel ba mi mnga'i chos nyid dang / /bag chags yang dag bcom pa dang / /skye la thugs rje chen po dang / /thub pa kho na'i ma 'dres chos/ /bco brgyad bshad pa gang yin dang / /rnam pa thams cad mkhyen nyid dang //chos kyi sku zhes brjod pa yin/ /zhes smos pa yin te/ rkyen phyis pas chos nyid kyi sku zhes bya ste/ gzhan du chos rnams kyi sku ni chos kyi sku zhes bya ba yin pa'i phyir ngo bo nyid bkag par 'gyur ba dang / spyod pa'i don yin pa'i phyir 'dus byas su 'gyur ba'i nyes pa yod do//de la sku zhes brjod pa ni sngon gyi gnas skabs kyi rjes su 'brangs nas nye bar btags pa yin par bya'o/ /de la byang chub kyi phyogs dran pa nye bar gzhag pa la sogs pa bshad pa dang bcas pa'i skabs rgyas par lam gyi tshogs las ji skad bshad pa de bzhin du shes par bya'o//tshad med pa byams pa la sogs pa ni tshad med pa'i 'jug par ji skad bshad pa bzhin no/ /rnam par thar pa brgyad ni gzugs can gzugs rnams la blta ba 'di ni dang po'o/ /nang gzugs su 'du shes pas phyi rol gyi gzugs rnams la blta ba 'di ni gnyis pa'o//sdug pa'i rnam par thar pa lus kyi mngon sum du byas nas rdzogs par byas te gnas pa 'di ni gsum pa'o/ /nam mkha' mtha' yas dang / rnam shes mtha' yas dang / ci yang med pa dang / 'du shes med 'du shes med min skye mched ces bya ba'i rnam par thar pa bzhi dang /'du shes dang tshor ba 'gog pa zhes bya ba gcig ste/ de ltar brgyad du 'gyur ro/ /de la zad pa dang / yongs su chad pa dang / kun tu longs spyod pa 'di'i mtha' yod pa ma yin pas na mtha' yas so/ /nam mkha' mtha' med pa ni nam mkha' mtha' yas yin la/nam mkha' mtha' yas nyid ni nam mkha' mtha' yas par gyur pa yin no/ /'di ni rgyu mtshan nam mkha'i ming yin la/ rten gyi don gyis na/ bsam gtan 'di la nam mkha' mtha' yas par gyur pa de'i gnas yod pas nam mkha' mtha' yas kyi a ya ta na ste/ lha rnams kyi lha'i a ya ta na zhes bya ba bzhin te/a ya ta na ni gnas yin no/ /yongs su chod pa dang / kun du longs spyod pas 'di la mtha' med pas na mtha' yas so/ /rnam shes mtha' med pa ni rnam shes mtha' yas yin la/ rnam shes mtha' yas nyid ni rnam shes mtha' yas par gyur pa yin no//'di ni nam mkha' la 'jug pa'i rnam par shes pa'i ming yin la/ snga ma bzhin du bsam gtan 'di la rnam shes mtha' yas par gyur pa de'i gnas yod pas na rnam shes mtha' yas skye mched do/ /'di la yan lag tsam gyi lhag ma 'am cung zad lus pa med pas na cung zad med pa yin la/de'i dngos po ni cung zad med par gyur pa yin no/ /'di ni nam mkha' mtha' yas skye mched kyi rnam par shes pa dang bral ba'i ming yin la/ snga ma bzhin du bsam gtan 'di la ci yang med pa'i gnas yod pas na cung zad med pa'i skye mched do//'du shes rags pa med pa'i phyir dang / phra mo yod pa'i phyir na 'du shes yod pa'ang ma yin med pa'ang ma yin pa dang mtshungs par ldan pa'i bsam gtan ni/ 'du shes yod min med min no/ /de ni 'du shes yod min yang yin la/ de ni 'du shes med min yang yin no//yid kyi skye mched dang chos kyi skye mched kyi rnam grangs su gyur pa'i skye mched yin gyi/ de skye mched gzhan ni ma yin te/ des na yod min med min skye mched do/ /'di dag thams cad du yang dmigs pa las yang dag par 'da' ba nyid 'thob kyi yan lag 'da' ba ni ma yin no//dper na bsam gtan dang po la sogs pa rnams zad par sa la sogs pa dmigs pa gcig la dmigs pa ma spangs pa rtog pa la sogs pa'i yan lag las yang dag par 'da' bar 'gyur ba de ltar 'di rnams ni ma yin no/ /'di rnams la ni gzugs kyi mtshan ma las 'das pas dang po'o//nam mkha' las 'das pa ni gnyis pa'o/ /nam mkha' la 'jug pa'i rnam par shes pa las 'das pa ni gsum pa'o/ /nam mkha' la 'jug pa'i rnam par shes pa'i dngos po med pa las 'das pa ni bzhi pa yin te/ des na de ltar 'di dag thams cad du ni dmigs pa las yang dag par 'das pa nyid 'thob po//yan lag las yang dag par 'da' ba ni ma yin te/ btang snyoms dang sems rtse gcig pa'i dbang gis ni 'di dag thams cad yan lag gnyis dang ldan pa yin no/ /ji ltar sbom po dang phra ba dang shin tu phra ba dang ches phra ba'i dogs pa las btags pa'i ras yug chu zheng mnyam pa bzhi po rnams la tshad khyad par med kyang reg na bde ba dang srab pa'i ngo bo dang rin thang che ba nyid rnams kyis snga ma snga ma las phyi ma phyi ma ches shin tu gya nom par gyur pa de bzhin du 'di rnams yang yan lag gi khyad par med kyang phra ba dang zhi ba'i ngo bo nyid du gyur pa yin pa'i phyir snga ma las gzhan rnams gya nom pa dang /shin tu gya nom pa dang / ches shin tu gya nom pa nyid du rig par bya'o/ /rnam par thar pa'i bshad pa lhag ma ni rnam pa thams cad mngon par rdzogs par rtogs par ji skad bshad pa bzhin no//mthar gyis gnas pa'i snyoms par 'jug pa dgu ni bsam gtan bzhi dang / gzugs med pa'i snyoms par 'jug pa bzhi dang / 'gog pa'i snyoms par 'jug pa'o/ /zad par gyi skye mched bcu ni 'di lta ste/ sa dang / chu dang / me dang / rlung dang / sngon po dang / ser po dang / dmar po dang / dkar po ste zad par brgyad dang / zad par rnam par shes pa dang / zad par nam mkha'o/ /de la zad par sa ni rnal 'byor pa gang zhig goms pas dbang du gyur pa'i bsam gtan dang po'i ting nge 'dzin las langs nas snyoms par 'jug pa 'di ni nye bar gnas pa'i sgrib pa'i gnyen po yin zhing rtog pa rags pa nyid yin pa'i phyir/yan lag stobs chung ba yang yin no zhes bya bar de'i skyon mthong nas/ bsam gtan gnyis pa la zhi ba nyid du yid la byas te/ bsam gtan dang po la mtha' gcig tu yongs su ma bzung bar gnyis pa thob par bya ba'i don du yan lag rnams la rtog pa tsam rags pa yin zhing dpyod pa la sogs pa la zhi ba nyid du nye bar gnas pa yin no//'di rags pa'i yan lag spang bar bya ba'i phyir dang zhi ba'i yan lag thob par bya ba'i phyir de nyid rgyu mtshan du byed pa yang ma yin gyi/sa'o zhes yang dang yang du yid la byed pa ni zad par sar rnam par gzhag par bya ba yin no/ /de bzhin du zad par chu la sogs pa dgu po rnams la yang tshul 'di nyid yin par blta'o / /sngar sgom pa goms par byas pa la ni chu klung dang /lteng ka dang / rdzing bu la sogs pa rnams su ma byas pa kho nar zad par chu 'byung bar 'gyur ro/ /de bzhin du nags kyi me 'bar zhing du ba 'thul ba rnams su ni zad par me'o/ /rlung gis bskyod pa'i 'od ma dang 'khri shing gi lo ma la sogs pa rnams la rlung 'di ni gnas 'di rab tu rgyu ba yin no zhes kun tu lta ba ni rlung ngo /me tog dang / nor bu dang / gos la sogs pa sngon po bting ba la ni zad par sngon po'o/ /de dag nyid ser po dang / dmar po dang / dkar por gyur pa la ni zad par ser po la sogs pa'o/ /tshon mo ste sa dang / rlung dang / zla ba'i dkyil 'khor la sogs pa rnams la ni zad par dkar po'o/ /skar khung gi nang la sogs par zhugs pa'i zla ba dang nyi ma'i 'od rnams kyi rtsig pa dang sa'i phyogs su bskyed pa'i 'od kyi dkyil 'khor dang / shing gi lo ma'i tshogs kyi gseb nas byung ba rnams kho nas sa gzhi la bskyed pa zla ba'i 'od dang nyi ma'i 'od kyi thig le la rnam par lta ba ni zad par rnam par shes pa'o//skar khung gi nang dang / rtsig pa'i bu ga la sogs pa rnams su zad par nam mkha' skye bar 'gyur ro/ /gang zhig sngar bsgoms pa goms par ma byas pa las dang po pa'i sdom brtson la de ltar mi skye bas de'i yongs su sbyong ba'i khyad par shes par bya'o//des ni sngon po la sogs pa'i kha dog gi dbye ba dang bral ba'i chu dri ma med pa nam mkha' nas bab pa'am yongs su dag pa'i chu tshags las 'dzag pa rnams kyis lhung bzed dang khar gzhong la sogs pa'i snod gang yang rung ba bkang nas rjes su mthun pa'i gnas su 'dug cing bde bar gnas pas yid la byed pa brtsam par bya ste/'di ni zad par chu'i yongs su sbyong ba'o/ /snum zhing snying po dang bcas pa'i shing dum bur gtubs nas shing drung ngam 'gron khang yang rung ste rjes su mthun par rdza so gtong ba'i tshul du spungs te/mtho gang sor bzhi'i tshad kyi bu ga byas pa kun tu sbar nas pags pa'am re lde gang yang rung ba'i stan mdun du bting ba la bde bar gnas pas 'og tu shing dang rtswa dang steng du bya 'phur bar yid la bya zhing dbus su me 'bar ba mthug po'i phung po rgyu mtshan du gzung bar bya ste/'di ni zad par me'i yongs su sbyong ba'o/ /med na byas kyang rung ste rtsig pa'i bu ga'am/ de'i skar khung gi bu ga'am/ nye kor du 'dug ste/ yan lag gi phyogs gang la rlung gi reg pa der dran pa gtad par bya ste/'di ni zad par rlung gi yongs su sbyong ba'o/ /ut+pal sngon po dang gi ri kar ni ka la sogs pa yu ba dang / ge sar gsal ba dang / gos dang / snod dang / za ma tog sngon po la sogs pa rnams gang yang rung ba bkram pas kheng par byas pa'am/ de bzhin du ras sngon po rnga bo che'i mthil ltar brgyangs pa la ni la kang pa dang /pa la sha sngon po dang / mig sman sngon po la sogs pa gang yang rung ba'i tshon gyis 'pho ba dang / mi 'pho ba'i dkyil 'khor byas nas kha dog mi mthun pa gang yang rung bas yongs su bcad de/ de dang nye bar stan bde ba la 'dug nas yid la byed pa 'jug par bya ste/'di ni zad par sngon po yongs su sbyong ba'o/ /zad par ser po dang / dmar po dang / dkar po rnams la yang tshul 'di nyid yin te/ 'dir sngon po gang yin pa de ni de rnams su ser po la sogs pa'i kha dog yin par bzung ngo zhes bya ba 'di ni khyad par ro//yang bum pa'i nang du mar me sbar ba kha bcad nas de la bug pa ha cang mi che ba gtod de/ rtsig pa la mngon du phyogs pas bzhag pa de las byung ba'i mar me'i 'od kyis rtsig pa la bskyed pa'i snang ba'i dkyil 'khor yun ring du gnas par gyur pa de yid la bya ste/'di ni zad par rnam par shes pa'i yongs su sbyong ba'o/ /rtsig pa dang re lde dang snam bu rnams gang yang rung bas g.yogs pa'i gnas su mtho gang sor bzhi pa'i bu ga gtod nas yid la byed pa 'jug par bya ste/ yongs su bcad pa 'di ni zad par nam mkha'i yongs su sbyong ba'o//de lta bu ni re zhig 'di rnams kyi yongs su sbyong ba'i khyad par yin par shes par bya'o/ /byas pa'am ma byas pa'i zad par de rnam pa dgu char la yang 'dzin pa dang snang ba zhes bya ba'i mtshan ma gnyis skye'o/ /de la zad par chu'i 'dzin pa'i mtshan ma ni/dbu ba dang chu bur dang 'dres pa'i chu la g.yo ba'i rnam pa de 'dra bar gyur pa nyid du gyur nas nye bar gnas par 'gyur te/ de la 'bad pa byas na skyon de spong bar nus la/ ma byas na skyon no/ / ma byas na ni zad par gyi nyes par gdags so/ /snang ba'i mtshan ma ni nam mkha' la gnas pa'i nor bu'i rlung yab lta bu dang /nor bu'i rang bzhin gyi me long gi dkyil 'khor lta bu yongs su mi g.yo ba'i rnam pa can du gyur nas nye bar gnas pa yin no/ /zad par me'i 'dzin pa'i mtshan ma yang chad cing ltung ba lta bur g.yo ba nye bar gnas pa ste/ ma byas na ni 'dir zad par gyis nyes par gdags shing 'gal ba dang / sol ba dang / thal ba dang / du ba rnams la cung zad cung zad nye bar gnas so/ /snang ba'i mtshan ma ni nam mkha' la gnas pa'i lwa ba dmar po lta bu'am/ gser gyi rlung yab lta bu'am/gser gyi ka ba lta bur nye bar gnas pa yin no/ /zad par rlung gi 'dzin pa'i mtshan ma ni 'o ma bskol ba phog ma thag pa'i rlangs pa 'thul ba lta bur gyur nas nye bar gnas so / /snang ba'i mtshan ma ni 'dug pa lta bur mi g.yo bar gyur pa yin no/ /zad par sngon po la ni me tog ge sar dang sdong bu med pa lta bu ste/ge sar dang sdong bu rnams dang / cig shos 'dab ma gzhan du byas pa zhes bya ba 'di ni zad par gyi nyes par gdags so/ /snang ba'i mtshan ma ni zad par gyi dkyil 'khor las 'phags pas nor bu'i rlung yab lta bu nam mkha' la snang ba'o //zad par ser po la sogs pa rnams la yang tshul 'di nyid yin no/ /zad par rnam par shes pa'i 'dzin pa'i mtshan ma ni sa'am rtsig par skyes par gyur pa'i dkyil 'khor dang 'dra ba nyid du 'gyur ba'o/ /snang ba'i mtshan ma ni snang ba'i tshogs stug po rab tu dang ba dang 'dra ba'o/ / zad par nam mkha'i 'dzin pa'i mtshan ma ni/ rtsig pa'i mtha' la sogs pa dang bcas par bu ga dang 'dra ba nyid du 'gyur la bskyed kyang 'phel bar mi 'gyur ba dang / snang ba'i mtshan ma ni nam mkha'i dkyil lta bur gyur nas nye bar gnas shing bskyed na ni 'phel bar 'gyur ba'o/ / de ltar na 'dir byas pa'am ma byas pa'i zad par gyi 'dzin pa dang snang ba'i mtshan ma dag gi khyad par shes par bya'o/ /mtshan ma rnam pa 'di dgu char la yang bde bar 'dug nas kha dog la so sor rtog pa dang mtshan nyid yid la byed pa dag spangs te/ zad par sa la brjod pa'i tshul du btags pa tsam la sems bzhag nas chu chu me me zhes bya ba de dang de'i ming gsal ba'i dbang nyid kyis goms par bya ste/de rnams kyi de dang de la goms pa'i khyad par ni de lta bu yin par shes par bya'o/ /de ltar goms pa de rnams la snga ma kho na bzhin du yan lag dang bcas pa'i ting nge 'dzin de rnams 'byung bar 'gyur ro//zad par sa la dbang du gyur pa gang yin pa de ni mngon par shes pa dang ldan par gyur pa na/ gcig tu gyur nas mang por 'gyur ba zhes bya ba dang / snang bar gyur pa dang / nam mkha' 'am chu las sar sprul nas rkang pa gnyis kyis 'gro ba la sogs pa dang /g.yo bar byed pa la sogs pa'i khyad par 'di 'grub par 'gyur ro/ /zad par chu'i dbang gis ni sa la bye'u zul byed pa dang / steng du 'byung ba dang / chu'i char 'bebs pa dang / sa dang ri bo la sogs pa rnams chu bo dang rgya mtsho la sogs par sprul pa yang dag par 'grub po//zad par me'i dbang gis ni du ba 'thul ba'am me rab tu 'bar ba dang / me mdag gi char 'bebs pa dang / me kun du len pa dang / gang dang gang 'dod pa de dang de bsreg par nus pa nyid dang / lha'i mig gis yul gsal bar bya ba'i don du snang bar byed pa dang /yongs su mya ngan las 'das pa'i dus na me'i khams kyis lus bsreg pa la sogs pa 'grub par 'gyur ro/ /zad par rlung gi dbang gis ni rlung ltar mgyogs par 'gro ba dang rlung gi char rab tu 'bebs pa la sogs pa'o/ /zad par sngon po'i dbang gis ni gzugs sngon por sprul pa dang /mun par byed pa la sogs pa'o/ /zad par ser po'i dbang gis ni gzugs ser por sprul pa dang /[ (]gsar [,]gser [)]du rnam par 'gyur ba la sogs pa'o/ /zad par dmar po'i dbang gis ni gzugs dmar por sprul pa la sogs pa'o/ /zad par dkar po'i dbang gis ni gzugs dkar por sprul pa dang /rmugs pa dang / gnyid ring du byed pa dang / mun pa rnam par 'jig pa dang lha'i mig gis ni yul snang bar byed pa la sogs pa'o/ /zad par rnam par shes pa'i dbang gis ni gzugs gsal ba dang / rmugs pa dang / gnyid rgyang ring bar byed pa dang mig gis yul snang bar byed pa la sogs pa'o/ /zad par nam mkha'i dbang gis ni bsgribs pa rnams rnam par 'byed pa dang / sa dang ri bo la sogs pa rnams kyi nang na nam mkhar sprul nas spyod lam byed pa dang / rtsig pa la sogs pa la thad kar thogs pa med par 'gro ba la sogs pa 'grub par 'gyur ro//rgyun mi 'chad par khyab par spro ba na zad par gyi skye mched do/ /zil gyis gnon pa'i skye mched ni brgyad de/ nang gzugs su 'du shes pas phyi rol gyi gzugs kha dog bzang po dang / kha dog ngan pa rnams la blta zhing gzugs de dag zil gyis mnan nas shes/zil gyis mnan nas mthong ste/ de ltar 'du shes par gyur pa de ni zil gyis gnon pa'i skye mched dang po'o/ /phyi rol gyi gzugs chen por gyur pa la la yang de bzhin no/ /nang gzugs med par 'du shes pa nyid la de bzhin du sbyar ba bzhin dang /nang gzugs med par 'du shes pa nyid sngon po dang / ser po dang / dmar po dang / dkar po la blta ba ste/ de ltar brgyad du 'gyur ro/ /de la sngon po zhes bya ba ni bstan pa'i tshig go/ /kha dog sngon po zhes bya ba ni lhan cig bskyed pa'i sngon po nyid yin pa'i phyir ro//sngon po lta bur ston pa zhes bya ba ni sbyor ba las byung ba'i sngon po nyid yin pa'i phyir ro/ /'od sngon po 'byung ba zhes bya ba ni de gnyis 'od 'phro zhing mdangs gsal ba yin pa'i phyir ro/ /zil gyis mnan nas zhes bya ba ni dbang bsgyur bsaso/ / shes zhes bya ba ni zhi gnas kyi lam gyis so/ /zil gyis mnan nas mthong zhes bya ba ni lhag mthong gi lam gyis so/ /de ltar 'du shes par gyur pa zhes bya ba ni zil gyis mnan tam ma non kyang rung ste/ de la mngon pa'i nga rgyal gyi 'du shes med pa'i phyir ro/ /gcig la dpe gnyis bkod pa ni lhan cig skyes pa dang sbyor ba las byung ba'i kha dog bstan pa'i don du'o//dper na sngon po zhes bya ba ni me tog dang ras dag la thun mong du bstan pa'i tshig go/ /kha dog sngon po zhes bya ba ni me tog gi dbang du byas pa ste/ de ni lhan cig skyes pa'i sngon po nyid yin pa'i phyir ro//sngon po lta bur ston pa zhes bya ba ni ras kyi dbang du byas pa ste/ de ni sbyor ba las byung ba'i sngon po nyid yin pa'i phyir ro/ /'od sngon po 'byung ba zhes bya ba ni me tog dang ras gnyi ga'i dbang du byas pa ste/ mdangs gsal ba nyid gnyi ga la yod pa'i phyir ro/ / de ltar byas nas dper na zar ma'i me tog gam/ yul bA rA Na sI'i ras kha dog phun sum tshogs pa sngon po kha dog sngon po zhes dpe dang bcas par bstan pa ni rig pa yin te/ ser po la ni dong ka'i me tog /dmar po la ni ban du dzi ba ka'i me tog gam/ dkar po la ni skar ma pa ba sangs sam/ras kha dog phun sum tshogs pa'o/ /dmigs pa zil gyis gnon pas de la dbang bsgyur ba'i phyir/ zil gyis gnon pa'i skye mched do/ /nyon mongs pa gang zhe na/ bsam gtan la brten nas pha rol gyi nyon mongs pa skye ba rjes su bsrung bas gnas pa yang dag par grub pa na/shes rab dang ting nge 'dzin dang mtshungs par ldan pa'i sems dang sems las byung ba'i chos gang dag yin pas te/ gzhan gyi rgyud la yod pa'i 'dod chags la sogs pa'i nyon mongs pa mi skye bas na nyon mongs pa'o/ /de la nyan thos rnams la sangs rgyas kyi nyon mongs pa med pa'i khyad par ni 'di yin te/nyan thos nyon mongs med pa ni/ /mi yi nyon mongs yongs spangs nyid/ /grong sogs su de'i nyon mongs rnams/ /rgyun gcod rgyal ba'i nyon mongs med/ /ces gang gsungs pa yin te/ 'di ltar nyan thos rnams ni grong la sogs pa rnams su sems can gang gi nyon mongs pa spong bar 'dod pas de la lta bar mi 'dod do//sangs rgyas bcom ldan 'das rnams ni 'di nga la dmigs nas nyon mongs pa rgyun du gnas par ma gyur cig ces lhag par yang de nyid la gzigs par bzhed do//smon nas mkhyen pa gang zhe na/ bsam gtan la brten nas 'di shes par gyur cig snyam pa'i smon lam grub pa na snga ma ltar de thob pa ni khams gsum na gnas pa'i shes bya gang dang gang mkhyen par 'dod pa de dang de la 'di shes par bya'o snyam du yid la smon te bsam gtan la snyoms par zhugs nas de las langs pa na smon pa des shes bya de rig par bya'o//de la nyan thos la sogs pa rnams las sangs rgyas kyi smon gnas mkhyen pa'i khyad par ni 'di yin te/ sangs rgyas smon gnas mkhyen pa ni/ /lhun gyis grub dang chags spangs dang / /thogs pa med dang rtag gnas dang //'dri ba kun lan 'debs par byed / /ces gang gsungs pa yin no/ /de la lhun gyis grub pa zhes bya ba ni rang gi ngang gis 'jug pa'o/ /chags spangs zhes bya ba ni rgyun mi 'chad pa'o/ /thogs pa med pa zhes bya ba ni shes bya thams cad las 'jug pa'o//rtag gnas zhes bya ba ni thugs rtag tu mnyam par gzhag pas gnas pa'o/ /'dri ba kun lan 'debs par zhes bya ba ni zhus pa'i lan thams cad 'debs par mdzad pa'o/ /nyan thos rnams kyi smon gnas shes pa de las bzlog par nges par bya'o/ /mngon par shes pa drug gang zhe na/rdzu 'phrul gyi mngon par shes pa dang / lha'i mig dang / lha'i rna ba dang / pha rol gyi sems shes pa dang / sngon gyi gnas rjes su dran pa dang / zag pa zad pa shes pa mngon sum du byed pa'i mngon par shes pa'o/ /'di dag gi bshad pa ni gdams ngag gi skabs su ji skad bshad pa bzhin no//so so yang dag par rig pa bzhi la/ chos so so yang dag par rig pa ni bsam gtan la brten nas dper na ma rig pa las brtsams te mi shes pa dang mi mthong ba dang mngon par ma rtogs pa zhes bya ba la sogs pa'i rnam grangs la thogs pa med pa yang dag par grub pa na ting nge 'dzin gang yin pa'o zhes thams cad la sbyar ro//don so so yang dag par rig pa ni chos rnams kyi rang dang spyi'i mtshan nyid dang don gzhan la dgongs pa la sogs pa la thogs pa med par yang dag par grub pa zhes bya ba ste/ rgya cher ro/ /nges pa'i tshig so so yang dag par rig pa ni yul gyi skad yul so so la bdag nyid ji lta ba bzhin du phan tshun ming gzhan gyi tha snyad byed pa dang /dper na 'jig cing rab tu 'jig pa de'i phyir 'jig rten no zhes bya ba dang / gzugs su rung bas na gzugs so zhes bya ba de lta bu la sogs pa nges pa'i tshig la'o/ / spobs pa so so yang dag par rig pa ni chos kyi rab tu dbye ba rnams thogs pa med par yang dag par grub pa nas snga ma bzhin no/ /de la rab tu dbye ba ni rdzas su yod pa dang / btags par yod pa dang don dam par yod pa zhes bya ba de lta bu la sogs pa'o/ /rnam pa thams cad du yongs su dag pa bzhi gang zhe na/rten len pa dang gtong ba dang gnas pa rnams la 'dod pa bzhin spyod pa'i phyir rten yongs su dag pa dang / dmigs pa sprul pa dang sgyur ba dag la 'dod pa bzhin du spyod pa'i phyir dmigs pa yongs su dag pa dang / ting nge 'dzin la mnga' brnyes pa'i phyir thugs yongs su dag pa dang /ye shes la mnga' brnyes pa'i phyir ye shes yongs su dag pa'o/ /dbang bcu gang zhe na/ 'di lta ste/ tshe la dbang ba ni 'dod pa bzhin 'chi bas bsdus pa nyid dang / sbyin pa'i pha rol tu phyin pa yongs su rdzogs pas thob par bya ba yin no/ / de ci'i phyir zhe na/ longs spyod byin pas sems can rnams kyi che'i rgyur 'gyur ba'i phyir ro/ /sems la dbang ba ni mngon par 'dod pa ji lta ba bzhin du sems la 'jug pas bsdus pa de thob par bya ba nyid de/ longs spyod byin pas sems can rnams kyi bsam pa ji lta ba bzhin du sems kyi rjes su gtsor 'jug pa'i phyir ro//yo byad la dbang ba ni bsam pa ji lta ba bzhin du yo byad nye bar gnas par byed pas de thob par bya ba nyid de/ bsam pa ji lta ba bzhin du sems can rnams la yo byad rab tu sbyin pa'i phyir ro/ /las la dbang ba ni mngon par 'dod pa ji lta ba bzhin du lus dang ngag gi las nye bar bsdus pas gnas pa ste/tshul khrims kyi pha rol tu phyin pa yongs su rdzogs pas thob par bya ba yin no/ /de ci'i phyir zhe na/ sems can rnams lus kyi las dang ngag gi las kha na ma tho ba med pa la bsam pa ji lta ba bzhin du bskul ba'i phyir ro/ / skye ba la dbang ba ni ji ltar mngon par 'dod pa bzhin 'gro bar skye bas bsdus pa ste/ de thob par bya ba nyid do/ ci'i phyir zhe na/ tshul khrims dang ldan pa'i smon lam grub pa'i phyir ro/ /mos pa la dbang ba ni/ mos pa ji lta ba bzhin du/ sa la sogs pa rnams gser la sogs pa'i dngos por de'i mos pa'i rjes su byed pas bsdus pa ste/bzod pa'i pha rol tu phyin pa yongs su rdzogs pas thob par bya ba yin no/ / ci'i phyir zhe na/ sngon gyi tshe rabs rnams su bzod pa des sems can gyi mos pa'i rjes su zhugs pa'i phyir ro/ /smon lam la dbang ba ni ji ltar smon pa bzhin yang dag par 'grub pas bsdus pa ste/brtson 'grus kyi pha rol tu phyin pa yongs su rdzogs pas thob par bya ba yin no/ /de ci'i phyir zhe na/ sngon des sems can thams cad kyi don du brtson 'grus ma btang ba'i phyir ro/ /mngon par shes pa lngas bsdus pa'i rdzu 'phrul la dbang ba ni/bsam gtan gyi pha rol tu phyin pa yongs su rdzogs pas thob par bya ba yin te/ sngon sems can rnams kyi dgos pa ji lta ba bzhin bsam gtan la snyoms par zhugs pa'i phyir ro/ /ye shes la dbang ba ni ji ltar 'dod pa bzhin du ye shes mngon du byed pas bsdus pa shes rab kyi pha rol tu phyin pa yongs su rdzogs pas thob par bya ste/sngon sems can rnams kyi 'dod pa ji lta ba bzhin du mngon du byed pa la sbyar ba'i phyir ro/ /chos la dbang ba ni mdo dang dbyangs kyis bsnyad pa la sogs pa mngon par 'dod pa ji lta ba bzhin ston pas bsdus pa/shes rab kyi pha rol tu phyin pa yongs su rdzogs pas thob par bya ba nyid de/ sngon sems can rnams 'dod pa dang mthun par mdo la sogs pa'i chos la sbyar ba'i phyir ro/ /stobs bcu ni 'di lta ste/ gnas dang gnas ma yin pa mkhyen pa'i stobs dang /las kyi rnam par smin pa mkhyen pa'i stobs dang / bsam gtan dang / ting nge 'dzin dang snyoms par 'jug pa mkhyen pa'i stobs dang / dbang po mchog dang mchog ma yin pa mkhyen pa'i stobs dang / mos pa sna tshogs mkhyen pa'i stobs dang / khams sna tshogs mkhyen pa'i stobs dang / thams cad du 'gro ba'i lam mkhyen pa'i stobs dang / 'chi 'pho ba dang skye ba mkhyen pa'i stobs dang / sngon gyi gnas rjes su dran pa mkhyen pa'i stobs dang / zag pa zad pa mkhyen pa'i stobs so/ /'di rnams kyi don ni rgya cher gzungs kyi dbang phyug rgyal po la sogs pa'i mdo sde las gsungs par blta'o //mi 'jigs pa bzhi ni/ kye ma nga ni yang dag par rdzogs pa'i sangs rgyas so zhes dam bcas pa la khyod kyi chos 'di dag mngon par rdzogs par sangs ma rgyas so zhes bya bar/ der nga la 'ga' zhig gi rtsod pa'i rgyu mtshan yang dag par rjes su ma mthong ste/rgyu de ngas yang dag par rjes su ma mthong bas bde ba thob cing bag tsha ba med pa thob la mi 'jigs pas gnas pa 'di ni dang po'o/ /de bzhin du kye ma zag pa 'di dag zad do zhes dam bcas pa la khyod kyi zag pa 'di dag ma zad do zhes der nga la rtsod pa med do zhes bya ba snga ma bzhin te 'di ni gnyis pa'o//gang yang ngas nyan thos rnams la nges par 'byung ba'i lam bstan pa na de bsten kyang sdug bsngal yang dag par zad pa'i phyir na sdug bsal mthar bya ba'i phyir/ nges par 'byin pa ma yin no zhes 'di 'ga' zhig rgol ba'i rgyu mtshan yang dag par rjes su ma mthong ba zhes bya ba snga ma bzhin te/'di ni gsum pa'o/ /gang yang ngas nyan thos rnams la bar du gcod pa'i chos su bstan pa de bsten kyang bar du gcod par mi 'gyur ro zhes nga la 'ga' zhig rgol ba'i rgyu mtshan snga ma bzhin te/ 'di ni mi 'jigs pa bzhi pa'o//bsrung ba med pa gsum ni 'di lta ste/ de bzhin gshegs pa ni sku'i spyod pa yongs su dag pa ste/ gang zhig gzhan 'ga' zhig gis shes par [(]'ang [,]'ong [)]zhes de bzhin gshegs pa 'chab par dgongs pa de bzhin gshegs pa la sku'i spyod pa yongs su ma dag pa mi mnga' ba 'di ni bsrung ba med pa dang po'o//sku'i phrin las ji lta ba bzhin du gsung dang thugs kyi phrin las la yang brjod par bya'o/ /dran pa nye bar gzhag pa gsum ni 'di lta ste/ de bzhin gshegs pa chos ston par mdzad pa na kha cig gus par nyan zhing rna ba gtod la kun shes pa'i sems nye bar 'jog ste/chos dang rjes su mthun pa'i chos sgrub na/ des de bzhin gshegs pa dgyes par mi 'gyur/ yid bde bar mi 'gyur/ thugs yeng yeng por mi 'gyur ba nyid dang / gzhan gus par mi nyan zhes bya ba la sogs pa rgya cher bzlog pa na/ de de bzhin gshegs pa khong khro bar mi 'gyur/ mi bzod par mi 'gyur/ thugs mi ches par mi 'gyur ba nyid dang / kha cig gus par nyan zhing kha cig gus par mi nyan na/ de de bzhin gshegs pa dgyes pa'am khong khro ba gnyis su mi 'gyur te/ thams cad du dran pa dang shes bzhin dang ldan pas btang snyoms su gnas pa'o//bsnyel ba mi mnga' ba'i chos nyid ni/ sangs rgyas rnams kyi sems can thams cad kyi don mdzad pa dus la mi 'da' ba ste/ de nyid kyi phyir na de rnams kyi mdzad pa 'bras bu yod par 'thad pa yin no//bag chags yang dag par bcom pa ni/ nyon mongs pa ma spangs pa bzhin du spyod pa ni 'dir nyon mongs pa'i bag chags yin par brjod la/ sangs rgyas bcom ldan 'das la ni/ de'ang nub pa yin te/ des na de la nyon mongs pa'i bag chags yang dag par bcom pa zhes brjod do//thugs rje chen po ni phan par dgongs pa nyid de/ gang gis dus thams cad du nyin lan gsum mtshan lan gsum ste/ nyin zhag gcig la lan drug tu byas nas/ sangs rgyas bcom ldan 'das 'jig rten la so sor rtog pa yin no/ ji ltar rtog ce na/ su ni yongs su dge ba'i rtsa ba smin/ su ni dge ba'i rtsa ba yongs su ma smin/ su ni mngon par mtho ba bstan pa'i snod yin/ su ni nges par legs pa bstan pa'i snod yin/ su ni sangs rgyas kyi 'byor pa'i snod yin/ gang zhig la ci zhig bya zhes so sor rtog go//sangs rgyas kyi chos ma 'dres pa bco brgyad ni de bzhin gshegs pa la 'khrul pa mi mnga'o/ /ca co mi mnga'o/ /dgongs pa nyams pa mi mnga'o/ /thugs mnyam par ma bzhag pa mi mnga'o// 'du shes sna tshogs pa mi mnga'o/ /so sor ma brtags pa'i btang snyoms mi mnga'o//'dun pa nyams pa mi mnga'o/ /brtson 'grus nyams pa mi mnga'o/ /dran pa nyams pa mi mnga'o/ /ting nge 'dzin nyams pa mi mnga'o/ /shes rab nyams pa mi mnga'o/ /rnam par grol ba nyams pa mi mnga'o/ /'das pa la ma chags pa ma thogs pa'i ye shes 'jug go//da ltar dang / ma 'ongs pa la ma chags ma thogs pa'i ye shes 'jug go/ /sku'i phrin las thams cad ye shes sngon du 'gro zhing ye shes kyi rjes su 'brang ngo / /gsung gi phrin las thams cad ye shes sngon du 'gro zhing ye shes kyi rjes su 'brang ngo / / thugs kyi phrin las thams cad ye shes sngon du 'gro zhing ye shes kyi rjes su 'brang ba ste/ ma 'dres pa'i bshad pa ni rnam pa thams cad mngon par rdzogs par rtogs par ji skad du bshad pa bzhin no/ /rnam pa thams cad mkhyen pa nyid gang zhe na/ kha cig ni bden pa bzhi la dmigs pa'i shes pa rnam pa bcu drug gis bsdus pa yin no zhes zer ro//gzhan dag ni de'ang chos thams cad ngo bo med pa dang / ma skyes pa dang / ma 'gags pa dang / gzod ma nas zhi ba dang / rang bzhin gyis mya ngan las 'das pa'i rnam pa'i ye shes kyis bsdus pa yin no zhes zer ro//gzhan dag ni 'dir gnyen po'i phyogs kyis bsdus pa'i rnam pa brjod par mi 'dod kyi/ yid bzhin gyi nor bu ltar de las sems can gyi don du gnyer ba'i don kha na ma tho ba med pa 'grub par 'gyur ba yin no zhes zer ro/ /yang gzhan dag ni spangs pa'i rnam pa thams cad kyi gzhi yin pa'i phyir 'di ni rnam pa thams cad mkhyen pa nyid ces bya ste/de la ni nyon mongs pa'i sgrib pa dang shes bya'i sgrib pa dang bag chags kyi sgrib pa spangs pa ni rnam pa gsum char yang mnga' ba yin no/ /rnam pa thams cad mkhyen pa nyid rnam par 'grel pa 'di thams cad kyang legs na/slob dpon bzang skyong gis skabs su bab pa kun gzhi'i rnam par shes pa la sogs pa'i shes bya rnam pa bcus bsdus pa'i snying po yin pa'i phyir rnam pa thams cad mkhyen pa nyid do zhes bya ba 'di ni shin tu ches legs te/ yongs su grub pa la dmigs pas so//rnam pa thams cad mkhyen pa nyid kyi dbang du mdzad nas/ rab 'byor rnam pa thams cad mkhyen pa nyid kyi dmigs pa ni dngos po med pa'o/ /bdag po ni dran pa'o/ /rnam pa ni zhi ba ste mtshan nyid med pa'o zhes gsungs so/ /de la bdag po dran pa ni rnam pa thams cad mkhyen pa nyid dang ldan pa'i yid la byed pas zhes de dang der gsungs pa yin no//ngo bo nyid dang ldan pa'i chos kyi sku de'ang / rgyu ni yongs su smin gyur na/ /gang dang gang la gang dang ni/ /gang tshe bya ba phan gyur pa/ /de dang de la de snang ngo / /sprul pa snang ngo zhes bya ba ni 'di'i dgos pa yin no//de ltar byas na byang chub sems dpa' sems dpa' chen po nam mkha' mdzod la sogs pa sems can thams cad kyi dgos dgu sgrub pa'i tshul du gnas pa yin yang rang gi rgyu yongs su smin pa ma tshang ba'i phyir dpung yang skye ba'i rtsa ba can gyi sdug bsngal las rnam par ma grol ba ni 'thad pa yin no//'dir gsungs pa ni/ lha yi rgyal pos char phab kyang / /sa bon mi rung mi 'khrungs ltar/ /sangs rgyas rnams ni byung gyur kyang / /skal ba med pas bzang mi myong / /zhes bya ba'o/ /de ltar mdzad pa rgya che'i phyir//sangs rgyas khyab par nges par brjod/ /de nyid zad pa med pa'i phyir/ /rtag pa zhes kyang brjod pa yin/ /de ltar na dgos pa 'dis sangs rgyas thams cad du song ba dang / rtag pa yin par bshad pas bstan bcos dang 'gal ba med do/ / ngo bo nyid kyi sku bshad zin to// // da ni longs spyod rdzogs pa'i sku brjod par bya ba yin te/ des na/ mtshan ni sum cu rtsa gnyis dang / /dpe byad brgyad cu'i bdag nyid 'di/ /theg chen nye bar longs spyod phyir/ /thub pa'i longs spyod rdzogs skur bzhed/ / ces bya ba gsungs te/ sku des sangs rgyas bcom ldan 'das byang chub sems dpa' chen po sa chen po la zhugs pa rnams dang thabs cig tu kha na ma thob med pa theg pa chen po'i chos kyi longs spyod kyi dga' ba dang bde ba so sor myong bar mdzad pa yin no/ /skyes bu chen po'i mtshan sum cu rtsa gnyis kyang gang zhe na/phyag zhabs 'khor los mtshan dang rus sbal zhabs/ /phyag dang zhabs sor dra bas 'brel pa dang / /phyag ni zhabs bcas 'jam zhing gzhon sha chags/ /'di yi sku ni bdun dag mtho ba dang / /sor mo ring dang rting yangs sku che drang / / zhabs 'bur mi mngon spu ni gyen du phyogs/ /byin pa e ne ya 'dra phyag ring mdzes/ /mdoms kyi sba ba sbubs su nub pa'i mchog /pags pa gser mdog pags pa srab pa dang / /spu ni re re nas g.yas legs 'khrungs dang / /zhal mdzod spus brgyan ro stod seng ge 'dra/ 'di yi dpung pa'i mgo zlum phrag pa rgyas/ /'di la ro mi zhim pa 'ang ro mchog snang / /sku ni n+ya gro d+ha ltar chu zheng gab/ /gtsug tor dbur ldan ljags ring mdzes pa dang / /tshangs dbyangs 'gram pa seng ge 'dra dang tshems/ /shin tu dkar dang tshems mnyam thags bzang dang / / grangs ni bzhi bcu tham pa tshang ba dang / /spyan ni mthon mthing spyan rdzi ba mchog gi /'dra ba 'di dag sum cu rtsa gnyis mtshan/ /zhes bya ba gsungs so/ /de la phyag zhabs 'khor los mtshan dang zhes bya ba ni de bzhin gshegs pa'i phyag dang zhabs kyi mthil rnams la 'khor lo rtsibs stong dang ldan pa mu khyud dang lte ba dang bcas pa rnam pa thams cad yongs su rdzogs pa 'di lta ste dper na rus pa'am ba so la gzugs su brkos pa dang 'dra ba mnga' ba yin no//zhabs kyi mthil gnyis mnyam par sa la 'jog cing zhabs rnyongs pa med pas zhabs shin tu gnas pa dang /ngang pa'i rgyal po ltar phyag dang zhabs kyi sor mo dra bas 'brel pas phyag dang zhabs dra bas 'brel pa dang / phyag dang zhabs kyi mthil shing bal gyi 'dab ma ltar shin tu 'jam zhing gzhon sha chags pas phyag dang zhabs gzhon zhing 'jam pa dang / phyag dang zhabs dang phrag pa gnyis dang ltag pa'i phyogs mtho bas bdun mtho ba dang /phyag dang zhabs kyi ser mo ring bas sor mo ring ba dang / rting pa ring bas rting pa yangs pa dang / sku khru bdun tsam du 'phags shing ya yo med pas sku che zhing drang ba nyid dang / pus mo'i lha nga dang long bu mdzes par nub pas zhabs 'bar 'bur mi mngon pa dang /ba spu gyen du g.yas phyogs su 'khyil bas sku'i spu gyen du phyogs pa dang / byin pa ri dgas sha ra b+ha dang / e ne ya lta bu yin pa'i phyir yongs su ma nyams shing rim par 'tsham la rgyas shing zlum pas byin pa ri dgas e ne ya'i lta bu dang /zhabs dang phyag mnyam pa'i phyir ma btud par phyag gi mthil gnyis kyis pus mo'i lha nga la slebs pas phyag ring zhing mdzes pa nyid dang / glang po dang rta cang shes ltar gsang ba'i mtshan ma shin tu mdzes par sbubs su nub pas mdoms gyi sba ba sbubs su nub pa dang /shin tu sbyangs pa'i gser gyi kha dog lta bu dang ldan pas gser gyi kha dog 'dra ba nyid dang / dngul dang gser sa le sbram legs par yongs su sbyangs pa dang 'dra bar pags pa shin tu 'jam zhing snyoms pa'i phyir dang / sku la rdul gyis ma gos pas pags pa 'jam pa nyid dang /ba spu shin tu rnam par phye zhing re re nas gnyis pa med par skyes pas ba spu re re ba nyid dang / 'di'i zhal gyi smin ma'i bar kun da dang ba'i 'o ma dang kha ba ltar dkar zhing zla ba dang nyi ma bas lhag pa'i 'od dang ldan pa'i spus brgyan pas zhal mdzod spus mtshan pa nyid de/mdzod spu zhes bya ba ni spu dkar zhing 'jam pas g.yas su 'khyil bar gnas pa'o/ /sku'i stod 'phel ka che bas ro stod seng ge 'dra ba nyid dang / mgrin pa legs par 'brel zhing kun nas zlum pas dpung mgo shin du zlum pa nyid dang / gser gyi glegs ma shin tu phyis pa ltar thong ka rgyas pas phrag pa'i bar rgyas pa nyid dang /ljags rlung dang mkhris pa dang bad kan gyis ma nyams pa'i phyir dang ro bro ba so sor myong ba dang mthun pa'i rnam par shes pa mnga' bas ro bro ba mkhyen pa nyid dang / sku'i khyon dang 'dom gyi tshad du mnyam pas n+ya gro d+ha ltar chu zheng gab pa nyid dang /dbu'i gtsug tor zlum zhing kun nas mnyam pas g.yas su 'khyil ba dang ldan zhing dbu mnyam pa la legs par rgyas shing lta na sdug pa'i gtsug tor dang ldan pas dbu gtsug tor dang ldan pa nyid dang / ut+pal dmar po'i 'dab ma'i mdog 'dra zhing yangs pas ljags ring zhing srab pa nyid dang /dbyig gi snying po dang / bya ka la ping ka'i lta bu'i gsung mnga' bas tshangs pa'i dbyangs nyid dang / 'gram pa me long gi dkyil 'khor ltar legs par grub cing zlum la rgyas shing lta na sdug pas 'gram pa seng ge lta bu nyid dang / kun da dang dung bcag 'phro ltar shin tu dkar ba'i tshems mnga' bas tshems dkar ba nyid dang /tshems la mthon dman med pas tshems mnyam pa nyid dang / tshems la mtshams ma dod pas tshems thags bzang ba nyid dang / tshems bla 'og lhag chad med pas tshems bzhi bcu mnyam pa nyid dang / dkar nag gi cha ma 'dres shing shin tu rnam par dag pa'i phyir dang dmar po ra ri dang ma 'brel bas spyan mthon mthing nyid dang /'og na gnas pa dang steng na gnas pa'i rdzi ma rnams legs par gzhol ba'i phyir dang ma 'dres pas de bzhin gshegs pa'i rdzi ma ba'i rdzi ma lta bu nyid do/ /'di la mtshan ni gang gang gi//sgrub par byed pa'i rgyu gang yin/ /de dang de ni rab rdzogs pas/ /mtshan ni 'di dag yang dag 'grub/ /longs spyod rdzogs pa'i sku'i mtshan nyid 'di rnams kyang sngon gyi yongs su sbyong ba yongs su rdzogs pa'i mtshan nyid las grub par rig par bya'o/ /yang mtshan gang gi sngon gyi yongs su sbyong ba'i rgyu gang zhe na/bla ma skyel la sogs pa dang / /yang dag blang ba brtan pa dang / /bsdu ba bsten dang gya nom pa'i/ /dngos po sbyin dang gsad bya ba/ /thar bar byed dang dge ba ni/ /yang dag blangs pa spel la sogs/ /sgrub byed rgyu yi mtshan nyid dang //mdo las ji skad 'byung ba bzhin/ /zhes bya ba gsungs te/ ji skad du mdo las/ bla ma rnams la bsu ba dang / skyel ba dag dang / chos nyan pa dang / me tog gi phreng ba 'bul ba dang / gtsug lag khang dang mchod rten la sogs pa'i gan du 'gro ba dang / g.yog 'khor byin pas phyag dang zhabs 'khor lo'i mtshan dang ldan pa yin te/ de ni 'khor shin tu mang ba'i snga ltas so/ /yi dam la shin tu brtan pas na zhabs shin tu gnas pa ste/ de ni gang gis rang gi rtogs pa'i chos la gzhan gyis g.yo bar mi nus pa mi g.yo ba'i snga ltas so//bsdu ba'i dngos po bzhi bsten pas na phyag dang zhabs kyi sor mo dra bas 'brel pa ste/ de ni gang gis ma bsdus pa'i sems can rnams sdud par byed pa myur du sdud pa'i snga ltas so/ /bza' ba dang btung ba dang / bldag pa dang bca' ba gya nom pa rnams byin pas na phyag dang zhabs 'jam zhing gzhon sha chags pa dang /bdun mtho ba ste/ de gnyis ni bza' ba dang / btung ba dang / bldag pa dang / bca' ba gya nom pa 'thob pa'i snga ltas so/ /bcings pa thar bar bya ba'i phyir dang / srog bsrung ba'i phyir dang / srog gcod pa las slar ldog pa bsten pas na sor mo ring ba dang rting pa yangs pa dang sku che zhing drang ba ste/de ni tshe ring ba'i snga ltas so/ /dge ba'i chos yang dag par blangs shing gzung ba yang dag par spel ba'i phyir dang / nyams par ma byas pa na zhabs kyi 'bar 'bur mi mngon pa nyid dang / sku'i spu gyen du phyogs pa ste/ de ni yongs su mi nyams pa'i chos nyid dam gdul bya'i snga ltas te/ 'dir gdul bya ni yang dag par bsdus pa'i sems can gyi khams gang yin pa yongs su smin pa'o/ /gus par byas te rigs dang bzo'i las rnams nye bar byin pa'i phyir dang / l+h+wam byin pas na byin pa e ne ya'i lta bu ste/de ni gang gis bshad par bya ba dang dgongs pa drangs zin pa'i don 'dzin par byed pa myur du 'dzin pa'i snga ltas so/ /rang la bdog pa'i nor slangs na ster ba dang / med ces mi spyod pa'i phyir phyag ring zhing mdzes pa ste/ phyag drang zhing ring ba zhes bya ba'i don to//de la drang ba nyid ni bdog pa'i nor slangs pa mi sbed pa'i gya gyu med pa las yin la/ rang nyid ni slong mo pa ma spangs shing skabs phye ba las so/ /de ni dbang du gyur pa dang 'dul ba'i snga ltas te/ sems dbang du gyur pas ser sna'i gzhan gyi dbang du mi 'gyur ba'i phyir dang /nyon mongs pa 'dul bas thams cad kyi tshe mi mthun pa'i phyogs dang ma 'brel pa'i phyir ro/ /grogs po dang / rang gi skye bo dang 'brel pa dang / lhan cig 'grogs pa rnams phan tshun mi 'byed pa'i phyir dang / sems can bye ba rnams bsdums pa'i phyir dang /tshangs par spyod pa yang dag par blangs pa'i phyir dang / gsang ba'i gros bsrungs pa'i phyir mdoms kyi sba ba sbubs su nub pa ste/ de ni 'khor ba ji srid par sangs rgyas kyi gdung rgyun mi 'chad pa'i phyir sras mang ba'i snga ltas so/ /gding ba dang / dgab pa dang / gos dang /khang bzangs dang / gzhal yas khang dang / gnas khang gya nom pa rnams byin pas na mdog gser 'dra ba dang pags pa 'jam pas te/ de gnyis ni gding ba dang / dgab pa dang / gos dang / khang bzangs dang / gzhal yas khang dang / gnas khang gya nom pa rnams rnyed pa'i snga ltas so//'du 'dzi spangs pa'i phyir dang / mkhan po dang / slob dpon dang / ma dang / pha dang / spun zla dang / sring mo rnams dang / bla ma rnams ji lta ba bzhin rjes su mthun pa'i gnas su bkod pa'i phyir dang / de la bsnyen bkur byed pa'i rim gro pa byin pas na ba spu re re nas g.yas phyogs su 'khyil ba dang zhal mdzod spus brgyan pa ste/de ni do zla med pa'i snga ltas so/ /mu cor mi smra ba dang / gzhan la mi smod pa dang / snyan par smra ba dang / legs par bshad pa la rjes su mthun par byed pas na ro stod seng ge lta bu dang / dpung mgo legs par zlum pa ste/de ni thogs pa med pa'i snga ltas te/ ye shes dang mthu thams cad du thogs pa med pa'i phyir ro/ /nad pa rnams la sman dang rim gro pa dang sman pa dang phan pa'i zas byin pa dang rim gro byas pas na phrag pa'i bar rgyas pa ste/ 'di'i phrag pa gnyis kyi bar rnams shin tu rgyas pa'o //ro bro ba mkhyen pa zhes bya ba ni bcom ldan 'das kyi rnam par smin pas thob pa nyid kyis ljags kyi dbang po 'di 'dra bar gyur pa yin te/ dbang po dang ro ngan pa phrad du zin kyang de ro bro ba mchog nyid du yang dag par myong bar mdzad pa ste/ de ni gnod pa nyung ba'i snga ltas so//kun dga' ra ba dang / 'dun sa dang / bsil khang dang / khron pa dang / bgrod dka' bar zam pa btags pa dang / kha zas dang / me tog phreng ba dang / gtsug lag khang dang / 'dug gnas byed pa la sogs pa la thog mar 'gro zhing gzhan dag kyang spro ba bskyed pa'i phyir dang /snga ma rnams las lhag par byed pa'i phyir phyag gnyis brkyang ba'i zheng gi cha ji tsam yin pa 'og gi zhabs nas brtsams te spyi bo'i bar gyi khyon de srid yin pas na n+ya gro d+ha ltar chu zheng gab pa dang dbu gtsug tor dang ldan pa ste/ de ni mnga' brnyes pa'i snga ltas so/ /yun ring po nas 'jam zhing snyan la mnyen pa'i tshig brjod pas na/stong gsum gyi stong chen po'i 'jig rten gyi khams ji tsam bzhed pa'i bar du ljags kyis khebs par mdzad pa'i phyir dang / ngag gcig brjod pa rnam par rig pa du ma'i rgyu mtshan yin pa'i phyir ljags ring ba dang / 'jig rten gyi khams mang pos bar du chod pa dang /gam la gnas pa'i gdul bya rnams kyi rna ba'i dbang po'i yul du mtshungs par gyur pa'i gsung dbyangs mnga' ba'i phyir tshangs pa'i dbyangs te/ de rnams ni ngag gi lam yan lag lnga dang ldan pa'i gsung dbyangs thob pa'i snga ltas te/ngag gi lam yan lag lnga dang ldan pa'i gsung dbyangs ni/ kun shes par bya zhing rnam par shes par bya ba dang / mnyan par 'os shing mi mthun pa med pa dang / zab cing rjes su sgrogs pa dang / mi tshugs shing rnar snyan pa dang / rig cing khyab par byed pa'o/ / rig cing zhes bya ba ni rtogs par byed pa zhes brjod pa yin te/ de nyid kyis na khyab par byed pa zhes gsungs te/ gdul bya'i skye bo sna tshogs kyi rgyud rtogs par byed pa'i phyir ro/ /yun ring por tshig rkyal pa las log pa dang / dus su smra bas na 'gram pa seng ge 'dra ba ste/ de ni ngag btsun pa'i snga ltas so//rim gror byed pa dang / mi brnyas pa dag dang / 'tsho ba yongs su dag pas na tshems shin tu dkar ba tshems mnyam pa ste/ de ni 'khor snga nas bsags pa'i snga ltas so/ /yun ring po nas bden zhing phra ma med pa'i tshig kun tu spyad pas na tshems thags bzang ba dang bzhi bcu mnga' bas te /de ni 'khor mi phyed pa'i snga ltas so/ /'khyud par byed pa dang smod par byed pa la yang chags pa dang sdang ba med cing rmongs pa med pa'i spyan gyis gzigs pas na spyan mthon mthing dang rdzi ma ba'i lta bu ste/ de ni kun nas mdzes pa'i snga ltas te/ spyan phye ba'i rang bzhin can dang chos mtshungs so//skyes bu chen po'i mtshan sum cu rtsa gnyis bshad zin to// //dpe byad bzang po brgyad cu rnams brjod par bya ba yin te/ des na gsungs pa ni sangs rgyas bcom ldan 'das rnams ni 'du byed thams cad la chags pa dang bral bas na sen mo zangs kyi mdog lta bu dang //rang gi skye bo bzhin du sems can thams cad la phan pa dang / bde bar dgongs pa'i thugs mnga' bas na sen mo snum pa dang / rigs dang rgyud mthon por bltams pas na sen mo mtho ba dang / tshul kha na ma tho ba mi mnga' bas na sor mo rnams zlum pa dang / dge ba'i rtsa ba rgya chen po bsags pas na/ sor mo rnams rgyas pa dang / dge ba'i rtsa ba rnams rim gyis yang dag par bsags pas na/ sor mo rnams rim gyis phra ba dang / sku dang / gsung dang / thugs kyi phrin las kyi mtha' dang / 'tsho ba dag pa sbas pas rtsa mi mngon pa dang /nyon mongs pa'i mdud pa grol bar mdzad pas na/ rtsa la mdud pa med pa dang / shin tu legs par sbas pa'i chos nyid can yin pas na/ long bu mi mngon pa dang / nyam nga ba thams cad las nges par sgrol bar mdzad pas na/ zhabs mi mnyam pa med pa dang /mi'i seng ge yin pas na/ seng ge'i stabs su gshegs pa dang / mi'i glang po che yin pas na glang po'i stabs su gshegs pa dang / ngang pa'i rgyal po ltar nam mkha' la gshegs pas na ngang pa'i stabs su gshegs pa dang / skyes bu'i khyu mchog yin pas na khyu mchog gi stabs su gshegs pa dang /mthun pa'i lam mnga' bas na g.yas phyogs su gshegs pa dang / blta na mdzes pas na mdzes par gshegs pa dang / rtag tu thugs gya gyu mi mnga' bas na sku drang ba dang / shin tu rnam par dag pa'i yon tan ston par mdzad pas na sku 'khril bag chags pa dang /sdig pa'i chos rnams shin tu sbyangs pas na sku byi dor byas pa lta bu dang / chos rim gyis ston par mdzad pas na sku rim par 'tsham pa dang / sku dang gsung dang thugs gtsang ba dang ldan pas na sku gtsang ba dang / rang bzhin gyis thugs 'jam pas na sku 'jam pa dang /rang bzhin gyis thugs rnam par dag pas na sku rnam par dag pa dang / chos 'dul ba legs par yongs su rdzogs pas na mtshan yongs su rdzogs pa dang / yangs shing mdzes pa'i yon tan brjod par mdzad pas na sku'i kho lag yangs shing bzang ba dang / thams cad la thugs snyoms pas na gom pa snyoms pa dang /gzigs pa shin tu rnam par dag pas na spyan rnam par dag pa dang / shin tu 'jam pas chos ston par mdzad pas na sku shin tu gzhon sha can dang / rtag tu zhum pa med pa'i thugs mnga' bas na sku zhum pa med pa dang / mi dge ba'i rtsa ba rnams bcom pas na sku rgyas pa dang /yang srid pa dang rjes su 'brel pa zad pas na sku shin tu grims pa dang / rten cing 'brel par 'byung ba'i yan lag dang nying lag legs par ston par mdzad pas na yan lag dang nying lag shin tu rnam par [(]'byis [,]'byes [) ] pa dang /gzigs pa rnam par dag pas na gzigs pa rab rib med cing rnam par dag pa dang / tshul khrims phun sum tshogs pa'i slob ma mnga' bas na dku zlum pa dang / 'khor ba'i skyon rab tu sbyangs pas na dku skabs phyin pa dang / nga rgyal gyi dreg pa bcom pas na dku ma rnyongs pa dang /chos zad pa rnam par bzlog par mdzad pas na phyal phyang nge ba dang / chos zab mo mngon du mdzad pas na lte ba zab pa dang / mthun par 'dzin pa'i slob ma mnga' bas na lte ba g.yas su 'khyil ba dang / kun nas mdzes pa'i slob ma'i tshogs mnga' bas na kun nas mdzes pa dang /thugs mchog tu gtsang bas na kun du spyod pa gtsang ba dang / chos 'dul ba nag po ston pa dang bral bas na sku la sme ba dang gnag bag med pa dang / shing bal dang 'dra bar yang ba'i lus thob par byed pa'i chos ston par mdzad pas na phyag shing bal ltar 'jam pa dang /rang gi skye bo dang skye bo phal po che la snyoms par byas pas dge sbyong chen po brnyes pas na phyag gi ri mo mdangs yod pa dang / mchog tu zab cing brtan par gnas pas na phyag gi ri mo zab pa dang / rgya chen po la bzod pa'i chos ston par mdzad pas na phyag gi ri mo ring ba dang / shin tu rlabs po che ma yin pa'i bslab pa'i gzhi 'cha' bar mdzad pas na zhal ha cang mi ring ba dang / 'jig rten thams cad gzugs brnyan dang 'dra bar ston pas na zhal la gzugs kyi gzugs brnyan snang ba dang / 'jam pa sngon du btang nas 'dul bas na ljags mnyen pa dang / yon tan phra mo'i tshogs dang ldan pas na ljags srab pa dang / byis pa'i skye bo chags pa can rnams gting dpag dka' ba'i chos kyis 'dul bas na ljags dmar ba dang / glang po che'i nga ro dang / 'brug gi sgra rnams la bsnyems pa mi mnga' bas glang po che dang 'brug gi sgra dbyangs dang ldan pa dang /snyan zhing mnyen la 'jam pas smra ba'i slob ma mnga' bas na gsung snyan zhing mnyen la 'jam pa dang / srid pa kun tu sbyor ba bsdams pas na mche ba zlum pa dang / skye bo rnon pos 'dul ba la mkhas pas na mche ba rno ba dang / chos 'dul ba mchog tu dkar bas na mche ba dkar ba dang /sa'i cha mnyam pa la zhugs pas na mche ba mnyam pa dang / mngon par rtogs pa rim gyis ston par mdzad pas na mche ba byin gyis phra ba dang / shes rab kyi ri bo mthon po la bzhugs pas na shangs mtho ba dang / gdul bya'i skye bo gtsang ma yid ches pas na shangs gtsang ba dang /sangs rgyas kyi chos mchog tu yangs pa dang ldan pas na spyan yangs pa dang / sems can gyi tshogs bsags pas na rdzi ma stug pa dang / lha dang lha ma yin dang mi'i na chung ltar mig dkar nag 'byes shing pad+ma'i 'dab ma rangs pa lta bu dang ldan pas mchog rnams kyis mngon par bstod pas na spyan dkar nag 'byes shing pad+ma'i 'dab ma rangs pa lta bu dang /rtag tu yangs pa ston pas na smin tshugs ring ba dang / 'jam pos 'dul ba la mkhas pas na smin ma 'jam pa dang / skyon kun nas mkhyen pas na smin ma'i spu mnyam pa dang / dge ba'i rtsa ba nye bar snum pas rgyud snum par gyur pa'i skye bo rnams 'dul bas na smin ma snum pa dang / mchog tu rgyas shing ring ba'i phyag mnga' bas na phyag rgyas shing ring ba dang / nyon mongs pa'i g.yul las rnam par rgyal bas na snyan mnyam pa dang / ma nyams pa'i sems can gyi rgyud 'dul bar mdzad pas na snyan gyi dbang po ma nyams pa dang /blta bar bya ba thams cad rnam par spang bas na dpral ba legs par 'byes pa dang / dge sbyong dang bram ze dang phas kyi rgol ba rnams rab tu bcom pas na dpral ba'i dbyes che ba dang / smon lam gyi mchog tu yongs su rdzogs pas na yan lag gi mchog shin tu rgyas pa dang /yul gyi bung ba'i dga' ba rnam par bzlog pas na dbu skra bung ba ltar gnag pa dang / mthong ba dang sgom pas spang bar bya ba'i bag la nyal spangs pas na dbu skra stug pa dang / blo 'jam pos bstan pa'i snying po mngon par mkhyen pas na dbu skra 'jam pa dang /rtag tu ma 'khrugs pa'i thugs mnga' bas na dbu skra ma 'dzings pa dang / rtag tu ma brlang ba'i gsung mnga' bas na dbu skra mi bshor ba dang / byang chub kyi yan lag gi me tog dri zhim pos skye bo rnams mthun par bsgrubs pas na dbu skra dri zhim pa dang /phyag dang zhabs kyi mthil dpal be'u dang bkra shis dang g.yung drung 'khyil bas brgyan pa yin no/ /mdo'i tshig lhug pa bsdu bar bya ba'i don du tshig le'ur byas pa tshigs su bcad pa 'di yin te/ thub pa'i sen mo zangs mdog dang / /mdog snum mtho dang sor mo rnams//zlum rgyas byin gyis phra ba dang / /rtsa mi mngon pa mdud pa med/ /long bu mi mngon zhabs mnyam dang / /seng ge glang chen bya dang ni/ /khyu mchog stabs gshegs g.yas phyogs dang / /mdzes gshegs drang dang 'khril bag chags/ /byi dor byas 'dra rim par 'tsham//gtsang dang 'jam dang dag pa'i sku/ /mtshan ni yongs su rdzogs pa dang / /sku yi kho lag yangs shing bzang / /gom snyoms pa dang spyan gnyis ni/ /dag dang gzhon sha can nyid dang / /sku zhum med dang rgyas pa dang / /shin tu [(]grams [,]grims [) ] pa'i sku nyid dang //yan lag shin tu rnam 'byes dang / /gzigs pa sgrib med dag pa dang / /dku zlum skabs phyin ma rnyongs dang / /phyang nge ba dang lte ba ni/ /zab dang g.yas phyogs 'khyil ba dang / /kun nas lta na sdug pa dang / /kun spyod gtsang dang sku la ni/ /sme ba gnag bag med pa dang //phyag ni shing bal ltar 'jam dang / /phyag ris mdangs yod zab ring dang / /zhal ni ha cang mi ring dang / /mchu ni bim pa ltar dmar dang / /ljags mnyen pa dang srab pa dang / /dmar dang 'brug gi sgra nyid dang / /gsung mnyen 'jam dang mche ba zlum//rno dang dkar dang mnyam pa dang / /byin gyis phra dang shangs mtho dang / /mchog tu gtsang ba nyid dang ni/ /spyan yangs pa dang rdzi ma stug /pad+ma'i 'dab ma 'dra ba dang / /smin tshugs ring dang 'jam pa dang / /snum dang spu ni mnyam pa dang / /phyag ring rgyas dang snyan mnyam dang //nyams pa rnam par spangs pa dang / /dpral ba legs par 'byes pa dang / /dbyes che ba dang dbu rgyas dang / /dbu skra bung ba ltar gnag dang / /stug dang 'jam dang ma 'dzings dang / /mi bshor dri zhim skyes bu yi/ /yid ni 'phrog par byed pa dang / /dpal gyi be'u dang bkra shis ni//sangs rgyas dpe byad bzang por bzhed/ /longs spyod rdzogs pa'i sku bshad zin to// //'di gnyis kyi bshad pa ni sprul pa'i sku'i phrin las ston pa'i mdo las 'jig rten las 'das pa'i chos kyi sbyin pa'i bsdu ba'i dngos po nyid kyis ston par 'gyur te/des na dang por ma gsungs so/ /sprul pa'i sku gang zhe na/ gang gis srid pa ji srid par/ /'gro la phan pa sna tshogs dag /mnyam du mdzad pa'i sku de ni/ /thub pa'i sprul sku rgyun mi chad / /de bzhin 'gro la ji srid 'di'i/ /las kyang rgyun mi 'chad par 'dod//ces gsungs so/ /des na 'di phan chad ni 'bras bu'i gnas skabs rnam pa thams cad legs par yongs su rdzogs pa'i chos kyi sku thob pa ni 'khor ba ji srid par phyogs bcu'i 'jig rten gyi khams rnams su sprul pa rnams kyis lhun gyis grub cing rgyun mi 'chad par sems can gyi don sna tshogs pa 'jug par byed pa'i sgo nas gnas yongs su gyur pa'i phrin las kyi dbang du mdzad do//bcom ldan 'das rmi lam lta bu dngos po med pa dang / dngos po med pa'i ngo bo nyid dang / rang gi mtshan nyid kyi stong pa'i chos rnams la dge ba dang / mi dge ba dang / 'jig rten pa dang / 'jig rten las 'das pa zhes bya ba la sogs pa ji ltar gzhag ces bya ba'i dri ba de'i mdzad pa nye bar 'god pa'i don dang / rab 'byor 'di la byis pa so so skye bo thos pa dang ldan pas ni rmi lam yang mi dmigs so zhes bya ba nas brtsams pa 'khor ba'i rmi lam la dgongs pa dang /rmi lam mthong ba yang mi dmigs so zhes bya ba de las sad pa'i gang zag la dgongs pa dang / dgra bcom pa yang dag par rdzogs pa'i sangs rgyas dag la de mi mnga' bar gsungs pas dris pa'i lan bstan pas te/ rim pa ji lta ba bzhin du nyon mongs pa dang shes bya'i sgrib pa'i gnyen po nye bar mi dmigs pa shes par byed pa'i don can dang /dka' ba byed pa rnams kyi chos rnam par gzhag par bya dka' ba ngo mtshar che ba nyid du gang gsungs pa yin no/ /'di bzhin 'di yi las kyang ni//'khor ba ji srid mi 'chad do/ yang chos kyi sku'i phrin las rnam pa du zhig yin zhe na/ 'gro rnams zhi ba'i las dang ni/ /bsdu rnams bzhi la 'god pa dang / /kun nas nyon mongs bcas pa yi/ /rnam par byang ba rtogs pa dang / /bdag nyid ji bzhin sems can gyi//don dang pha rol phyin drug dang / /sangs rgyas lam dang rang bzhin gyis/ /stong pa nyid dang gnyis zad dang / /brda dang dmigs pa med pa dang / /lus can rnams ni yongs smin dang / /byang chub sems dpa'i lam dang ni/ / mngon par zhen pa bzlog pa dang / /byang chub thob dang rgyal ba'i zhing / /rnam par dag dang nges pa dang / /sems can don ni tshad med dang / /sangs rgyas bsten sogs yon tan dang / /byang chub yan lag las rnams ni/ /chud mi za dang bden mthong dang / /phyin ci log ni spang ba dang //de gzhi med pa'i tshul dang ni/ /rnam par byang dang tshogs dang ni/ /'dus byas 'dus ma byas pa la/ /tha dad yongs su mi shes dang / /mya ngan 'das la 'god pa ste/ /chos kyi sku yi phrin las 'di/ /rnam pa nyi shu bdun du bzhed/ / ces gsungs so/ /de la 'gro ba rnams zhi ba'i phrin las ni 'gro ba rnam pa lngas bsdus pa yin te/ gang gi phyir dmyal ba'i 'gro ba zhi ba'i phrin las kyi dbang du mdzad nas/ rab 'byor 'di la ngas sangs rgyas kyi spyan gyis gzigs na phyogs bcu'i 'jig rten gyi khams na byang chub sems dpa' sems dpa' chen po dag bsams bzhin du sems can dmyal ba chen po rnams su song ste zhes bya ba nas brtsams nas sems can de dag de nas thar te theg pa gsum po dag gis rim gyis sdug bsngal mthar 'byin pa mthong ngo zhes bya ba'i bar dang /phyogs bcu'i 'jig rten gyi khams kyi dud 'gro'i skye gnas kyi sems can rnams kyi don du bdag yongs su gtong ba la sogs pas dud 'gro'i skye gnas zhi ba'i phrin las dang /de bzhin du yi dags kyi yul gyi sdug bsngal rgyun gcod pas gshin rje'i 'jig rten gyi sdug bsngal zhi ba'i phrin las dang /'dod pa na spyod pa'i lha'i ris drug la chos bstan pa'i rim gyis theg pa gsum gyis yongs su mya ngan las 'das pa dang / tshangs pa rnams kyi lta ba'i rnam pa dang phral ba na lha'i 'gro ba zhi ba'i phrin las dang / rab 'byor 'di la ngas sangs rgyas kyi spyan gyis 'jig rten la gzigs na byang chub sems dpa' rnams ni mi rnams bsdu ba'i dngos po bzhis sdud par byed de zhes bya ba nas brtsams te/rgya cher sems can rnams kyi rnam pa thams cad mkhyen pa nyid thob par byed pa 'di ni 'phags pa'i chos rnams kyi 'bras bu yin par brjod do zhes bya ba'i bar 'dis ni mi'i 'gro ba zhi ba'i phrin las dang /gal te byang chub sems dpas kyang sems can rnams rnam pa thams cad mkhyen pa nyid thob par byed pa de lta yin na sangs rgyas dang byang chub sems dpa' la khyad par med par thal bas brtsad pa dang / gnyi ga'ang ched du bya ba gcig pa yin gyi/mngon du byed pa dang mi byed pas ni ma yin no zhes de ltar khyad par khas blangs pa'i lan btab pas gsungs pa yin no/ /bsdu ba'i dngos po bzhi la 'god pa ni/ phyogs bcu'i 'jig rten gyi khams kyi sems can rnams sbyin pa dang / snyan par smra ba dang /don spyod pa dang / don mthun pa rnams dang / stong pa nyid rnams kyi rjes su gzung ba rmad du byung ba'i chos nyid yin pa'i bar gyis gang gsungs pa yin no/ /kun nas nyon mongs pa dang rnam par byang ba rtogs pa la 'god pa ni/ rab 'byor gzhan yang byang chub sems dpa' chen pos byang chub sems dpa' chen po gzhan dag la 'di skad 'dom zhing 'di skad rjes su ston te zhes bya ba nas brtsams te/yi ge mngon par sgrub pa'i tshig la mkhas pa'i dbang du byas nas rtsod pa dang bcas pa'i lan rgyas pa dang / de bzhin gshegs pa'i sprul pa dper brjod pa dang bcas pas chos thams cad ma bcings ma grol ba nyid dang /mi gnas pa'i sbyor ba dang 'phags pa'i gang zag thams cad la mnyes par byas pa ma yin pa nas/ chos kyi dbyings dang de bzhin nyid dang yang dag pa'i mtha' las kyang phyir mi ldog pa yin no zhes bya ba'i bar gyis mi ldog pa mngon par brjod pa dang /de gzhan ma yin pa'i bsam pas gal te chos kyi dbyings la sogs pa las mi ldog na/ 'o na chos kyi dbyings gzhan la gzugs kyang gzhan nam ci zhes bya bas chos thams cad chos kyi dbyings la sogs pa las gzhan yin par dris pas gzugs la sogs pa rnams las kyang mi ldog par thal bar byed pa dang /kun nas nyon mongs pa dang rnam par byang ba'i bdag nyid can du ston par byed pa'i don dang / rab 'byor kun rdzob kyi bden pa tshad mar byas nas zhes bya bas de rnam par gzhag pa dang /gal te 'bras bu rnam par gzhag pa kun rdzob yin gyi/ don dam pa ma yin na byis pa so so'i skye bo thams cad rgyun du zhugs pa la sogs pa'i dngos por thal ba dang / de rnams kyi bden pa gnyis rab tu ma shes pa'i lan nas brtsams te/ 'dus byas dang 'dus ma byas kyi khams dag char rnam par bcad pas 'bras bu rnam par 'jog pa yin no zhes bya ba'i bar gyis kun nas nyon mongs pa dang rnam par byang ba rnam par gzhag pa dang /chos kyi dbyings char mi gcod pa yin na kun tu sbyor ba gsum spangs pas 'bras bu dang po yin pa dang / 'dod pa'i 'dod chags dang gnod sems bsrabs pa nyid lan cig phyir 'ong ba'i 'bras bu yin pa dang /'og ma'i cha dang mthun pa'i kun tu sbyor ba lnga spangs pa phyir mi 'ong ba'i 'bras bu yin pa dang / gong ma'i cha dang mthun pa'i kun tu sbyor ba lnga spangs pa dgra bcom pa'i 'bras bu yin par ji ltar 'gyur zhes bya ba nas rgya cher byang chub ces bya ba'i bar gyi 'bras bu char dbye ba med par 'gyur bas dris pa dang /dus gang gi tshe skad cig ma gcig gis chos thams cad rtogs pa zhes bya ba de bzhin gshegs pa'i sprul pa dper brjod pa dang bcas pa nas chos kyi mtshan nyid rtogs pa zhes bya ba'i bar gyis de'i lan btab pa dang /chos kyi mtshan nyid rtogs pa nyid zhus pa dang / de bzhin gshegs pa'i sprul pa dper brjod pas de'i lan btab pa dang / sprul pa kun nas nyon mongs pa dang rnam par byang ba med pa'i lam sgom pa bzhin du dngos po med pa'i chos legs par rtogs pa dang /chos thams cad sprul pa lta bu yin pas sgyu ma lta bu'i chos mthong ba byang chub sems dpa'i skyes bu'i byed pa yin pa nyid dang / de lta bu yin na sems can gyi don du 'jug pa don med par thal ba dang / sems can rnams rang nyid de ltar ma shes pas de 'bras bu dang bcas pa yin par gang gsungs pa yin no//de bzhin du phrin las 'og ma 'og ma rnams la yang brgal ba dang lan dang mtshams sbyar ba gcig nas gcig tu brgyud pa'i brjod pa'i gnas skabs rgya cher ni mdo ji lta ba bzhin du brjod par bya ste/ kho bos gzhung mangs pa'i nyes pa spang ba'i don du bsdu ba tsam byas pa yin no//bdag ji lta ba bzhin du sems can rnams kyi don la 'god pa ni sgyu ma mkhan gyi dpes sems bskyed pa dang sgrub pa dang thob pa'i mtshan nyid thog ma dang tha ma rnams su chos kyi dbyings mi 'gyur ba'i phyir sems can thams cad kyi don bdag nyid ji lta ba bzhin du rtogs pas na gzhan rnams yang dag pa'i mtha' la rab tu 'jog pa'i phrin las kyis gang gsungs pa yin no//pha rol tu phyin pa drug la 'god pa ni de'i rjes la pha rol tu phyin pa drug la rab tu 'jog pa'i phrin las kyis gang gsungs pa yin no/ /sangs rgyas kyi lam la 'god pa ni de'i 'og tu dge ba bcu'i las kyi lam nas brtsams te/yang dag par rdzogs pa'i byang chub kyi bar la rab tu 'jog pa'i phrin las kyis gang gsungs pa yin no/ /rang bzhin gyi stong pa nyid la 'god pa ni/ de'i 'og tu rang bzhin gyi stong pa nyid la rab tu 'jog pa'i phrin las rgyas par bstan pas gang gsungs pa yin no//gnyis su med pa'i chos la 'god pa de'i rjes la/ de bzhin gshegs pa'i sprul pa dang / dgra bcom pa'i rmi lam gyi dpe dag gis gnyis su med pa'i mngon par rtogs pa la 'jog pa'i phrin las kyis gang gsungs pa yin no//brda las byung ba shes pa 'gog pa ni/ de'i 'og tu gnas brtan rab 'byor bdag nyid dbang du byas pa'i dpes chos thams cad rab tu 'jog pa'i phrin las kyis gang gsungs pa yin no/ /dmigs su med pa'i ye shes la 'god pa ni de'i 'og tu pha rol tu phyin pa la sogs pa rnams la bsgom par bya ba dang sgom pa po dang /sgom pa dmigs su med pa'i ye shes la rab tu 'jog pa'i phrin las kyis gang gsungs pa yin no/ /sems can yongs su smin pa la 'god pa ni de'i 'og tu pha rol tu phyin pa drug po rnams kyis sems can yongs su smin pa la rab tu 'jog pa'i phrin las kyis gang gsungs pa yin no//byang chub sems dpa'i lam la 'god pa ni/ de'i 'og tu pha rol tu phyin pa la sogs pa byang chub sems dpa'i lam la rab tu 'jog pa'i phrin las kyis gang gsungs pa yin no//chos thams cad la mngon par zhen pa spangs pa la 'god pa ni/ de'i 'og tu chos thams cad la mngon par zhen pa med pa la rab tu 'jog pa'i phrin las kyis gang gsungs pa yin no/ /yang dag par rdzogs pa'i byang chub thob pa la 'god pa ni/de'i 'og tu byang chub thob pa la rab tu 'jog pa'i phrin las kyis gang gsungs pa yin no/ /sangs rgyas kyi zhing rnam par dag pa la 'god pa ni/ de'i 'og tu sangs rgyas kyi zhing rnam par dag pa la 'jog pa'i phrin las kyis gang gsungs pa yin no/ / yang dag par rdzogs pa'i byang chub par so sor nges pa la 'god pa ni/ de'i 'og tu/ sems dang po bskyed pa dang phyir mi ldog pa dang / srid pa tha ma pa so sor nges pa nyid la rab tu 'jog pa'i phrin las kyis gang gsungs pa yin no/ /sems can gyi don tshad med pa la 'god pa ni/de'i 'og tu/ phyogs bcu'i 'jig rten gyi khams kyi sems can tshad med pa'i don thob par mdzad pa'i phrin las kyis gang gsungs pa yin no/ /sangs rgyas kyi drung du nye bar 'gro ba dang bsnyen bkur bya ba la sogs pa la 'god pa ni de'i 'og tu 'jig rten gyi khams sna tshogs kyis sangs rgyas kyi zhing du nye bar 'gro ba dang bsnyen bkur byed pa nas brtsams te/mngon par shes pa mngon par sgrub pa'i sgo nas pha rol tu phyin pa drug gi mi mthun pa'i phyogs dang bral nas pha rol tu phyin pa rnams la sbyor bas phan 'dogs par byed pa'i phrin las kyis gang gsungs pa yin no//byang chub kyi yan lag la 'god pa ni/ de'i 'og tu/ byang chub kyi yan lag tu gyur pa'i sbyin pa la sogs pa'i dge ba'i chos rnams la rab tu 'jog pa'i phrin las kyis gang gsungs pa yin no//las dang 'bras bur 'brel pa chud mi za ba la 'god pa ni/ de'i 'og tu/ las dang 'bras bur 'brel pa'i tha dad dang ldan pa 'gro ba lnga'i 'khor ba chud mi za ba la rab tu 'jog pa'i phrin las kyis gang gsungs pa yin no/ /bden pa mthong ba la 'god pa ni/de'i 'og tu/ 'phags pa'i bden pa bzhi po mnyam pa nyid du rjes su rtogs pa la rab tu 'jog pa'i phrin las kyis gang gsungs pa yin no/ /phyin ci log spangs pa la 'god pa ni/ de'i 'og tu/ phyin ci log bzhi spang ba la rab tu 'jog pa'i phrin las kyis gang gsungs pa yin no//gzhi med pa'i phyin ci log shes pa la 'god pa ni/ de'i 'og tu/ skra'i rtse mo bye bar gshags pa'i tshad tsam gyi dngos po'ang bkag pa dang / rmi lam dang / gzugs brnyan dang / brag ca dang / smig rgyu dang / dri za'i grong khyer dang /sprul pa'i dpe rnams kyis gzhi med pa'i phyin ci log shes pa la rab tu 'god pa'i phrin las kyis gang gsungs pa yin no/ /rnam par byang ba la rab tu 'jog pa ni/ de'i 'og tu/ tha snyad la brten nas rnam par byang ba la rab tu 'jog pa'i phrin las kyis gang gsungs pa yin no//de'i tshogs la 'god pa ni/ de'i 'og tu tshogs yongs su rdzogs pa la rab tu 'jog pa nas brtsams te/ mtha' gnyis mnyam pa nyid du mngon par rtogs pa nyid la rab tu 'jog pa'i phrin las kyis gang gsungs pa yin no//'dus byas dang 'dus ma byas tha mi dad par yongs su shes pa la 'god pa ni/ 'dus byas dang 'dus ma byas kyi chos dag phan tshun tha dad par mi nus pa nyid dang / de ci'i phyir zhe na/ de dag mngon par rtogs pa'i dus su ldan pa yang ma yin/mi ldan pa yang ma yin pa nyid la sogs pa dang / mtshan nyid med par mtshan nyid gcig pa nyid dang / don dam par mngon par rtogs par 'du byed bkag pa'i rnam grangs gzhan rjes su gnang ba dang / stong pa nyid kyi chos nyid du cung zad kyang mi byed pa'i phyir/sems can rnams 'du shes thams cad dang bral bar byed pa'i phyir/ de bzhin gshegs pa skyes bu'i khyu mchog nyid du zhal gyis bzhes pas gang gsungs pa yin no/ /phrin las nyi shu rtsa bdun pa mya ngan las 'das pa la 'god pa ni/chos thams cad sprul pa lta bu yin pa nyid kyis skye ba dang 'gag pa las rnam par grol ba'i chos ma lus pa sprul pa nyid dang / ngo bo nyid stong pa nyid sprul pa ma yin pa nyid dang / ji ltar snyed pa'i shes rab kyi pha rol tu phyin pa'i gzhung yongs su rdzogs pa'i tshig gis/sems can thams cad mya ngan las 'das pa la rab tu 'jog pa'i phrin las kyis gang gsungs pa yin no/ /phrin las 'di rnams kyi go rims dang so so'i rang bzhin gyi khyad par ni de dang de'i phrin las kyi mtshan nyid kyi rjes su 'brangs te bltas la brjod par bya'o//don yongs su bsal bas kho bo cag gis ni rnam par ma phye ste/ btags pa la 'thag pas ci zhig bya/ de ltar byas na/ ngo bo nyid longs rdzogs bcas dang / /de bzhin gzhan pa sprul pa ni/ /zhes bya ba rnam pa gsum dang / chos kyi sku yi phrin las 'di/ /rnam pa nyi shu bdun du bzhed/ /ces bstan pa gang yin pa de bshad par rig par bya'o/ /shes rab kyi pha rol tu phyin pa'i man ngag gi bstan bcos mngon par rtogs pa'i rgyan las/ chos kyi sku'i skabs bslab pa'i 'bras bu'i le'u ste brgyad pa'o// //'on te gleng gzhi'i le'u las phyogs bcu'i 'jig rten gyi khams kyi de bzhin gshegs pa rnams kyis rin po che rnam pa sna tshogs pa'i pad+ma chen po ngo mtshar can gyi skyes bskur ba dang / gzhal du med pa'i byang chub sems dpa'i tshogs 'ongs pa de ci'i don du yin zhe na/sems bskyed pa la sogs pa shes rab kyi pha rol tu phyin pa'i bshad pa yongs su rdzogs kyi bar gyis 'jig rten gyi khams thams cad du byin gyis brlabs par shes par byed pa'i don dang / 'jig rten gyi khams sna tshogs pa'i sems can rnams yang dag par sdud pas sems can gyi khams brjod du med pa la dmigs te/byang chub kyi sems bskyed pa shes par bya ba'i don dang / 'jug pa dang / tshogs yongs su rdzogs pa mnyam pa'i byang chub sems dpa' rnams so so rang gi sangs rgyas kyi zhing du bla na med pa yang dag par rdzogs pa'i byang chub srid pa'i phyir sangs rgyas mang po nyid du shes par byed pa'i don dang /mngon par shes pas brtse ba'i byang chub sems dpa' rnams 'jig rten gyi khams phan tshun gyi sangs rgyas kyi drung du 'gro ba dang blta ba dang chos nyan pa dang mchod pa dang /bsnyen bkur byed pas sems can gyi khams yongs su smin par bya ba'i don dang / rang gi tshogs yongs su rdzogs par bya ba'i don dang / ji ltar mngon par 'dod pa'i sangs rgyas kyi zhing rnam par dag pa yongs su gzung ba'i don du yin no zhes bya ba la sogs pa brjod par bya'o//gang gi phyir gzhung stong phrag nyi shu rtsa lnga po 'di rnams kyi 'di skad ces bya ba la sogs pa skabs 'byed pa nas brtsams te/ yongs su rdzogs pa'i bar gyis dngos po rnams gcig tu bsdus na rnam pa thams cad mkhyen pa nyid la sogs pa chos kyi sku mdzad pa dang bcas pa'i mthar thug pa dngos po brgyad du 'gyur ro//des na/ shes rab pha rol phyin pa ni/ /dngos po brgyad kyis yang dag bshad/ /rnam kun mkhyen nyid lam shes nyid/ /de nas thams cad shes pa nyid/ /rnam kun mngon par rdzogs pa dang //rtse mor phyin dang mthar gyis pa/ /skad cig gcig mngon rdzogs byang chub/ /chos kyi sku dang de rnam brgyad/ /ces gang gsungs pa yin no/ /yang 'di nyid bshad pa ni thams cad mkhyen pa nyid gsum ni mtshan nyid pa'i shes rab kyi pha rol tu phyin pa'o//rnam pa thams cad mngon par rdzogs par rtogs pa ni sbyor ba'o/ /rtse mo'i mngon par rtogs pa ni rab tu gyur pa dang ldan pa'o/ /mthar gyis pa'i mngon par rtogs pa ni go rims dang ldan pa'o/ /skad cig ma gcig la mngon par rdzogs par byang chub pa ni mthar thug pa'o//chos kyi sku mdzad pa dang bcas pa ni rnam par smin pa ste/ de ltar 'di ni bshad pa'i rnam grangs gzhan yin no/ /des na 'di skad ces/ mtshan nyid de yi sbyor ba dang / /de yi rab de'i go rims dang //de'i mtha' de yi rnam smin ni/ /don bsdus gzhan de rnam pa drug /ces bya ba 'di gsungs pa yin no/ /yang thams cad mkhyen pa nyid gsum ni yul yin no/ /mngon par rtogs pa bzhi ni rgyu yin no/ /chos kyi sku rnam pa gsum ni de'i 'bras bu yin la/sems can gyi don rnam pa nyi shu rtsa bdun ni de'i phrin las yin no zhes bya ba 'di ni rnam grangs gzhan yin no/ /des na 'di skad ces/ yul ni rnam pa gsum po rgyu/ /sbyor ba bzhi yi bdag nyid dang / /chos sku phrin las 'bras bu ni/ /don bsdus gzhan te rnam pa gsum//zhes bya ba 'di gsungs pa yin no/ /'on te de dang der nges par 'byed pa'i cha dang mthun pa gsungs pa gang yin pa de rnams kyi so so'i khyad par gang yin zhe na/ re zhig rnam pa thams cad mkhyen pa nyid kyi dbang du byas nas byang chub sems dpa' rnams kyi nges par 'byed pa'i cha dang mthun pa gang yin pa de dag ni nyan thos la sogs pa'i nges par 'byed pa'i cha dang mthun pa rnams las khyad par rnam pa drug gis khyad par du 'phags pa yin te/dmigs pa'i khyad par gyis ni 'phags pa'i bden pa bzhi po rnams kyi rnam par mi rtog pa la sogs pa la dmigs pa'i phyir ro//rnam pa'i khyad par gyis ni/ mngon par zhen pa med pa la sogs pa rnams yin pa'i phyir ro/ /rgyu'i khyad par gyis ni theg pa gsum gyi rgyu yin pa'i phyir ro/ /yang dag par 'dzin pa'i khyad par gyis ni thabs mkhas pa dang dge ba'i bshes gnyen gyis yongs su 'dzin pa yin pa'i phyir ro//mtshungs par ldan pa'i khyad par gyis ni rnam par rtog pa rnam pa bzhi dang mtshungs par ldan pa'i phyir ro/ /rnam pa'i khyad par can gyis ni rnam pa chung ngu dang 'bring dang chen po yin te/ de ltar na cig shos kyi nges par 'byed pa'i cha dang mthun pa rnams las rang bzhin khyad par can yin te/ ji skad du de nyid las/ dmigs pa dang ni rnam pa dang / /rgyu dang yongs su 'dzin pa yis/ /zhes bya ba la sogs pa gsungs pa yin no/ /lam shes pa nyid kyi skabs su/nyan thos kyi lam gyi nges par 'byed pa'i cha dang mthun pa gsungs pa gang yin pa dang de dag kyang snga ma rnams las dmigs pa dang rnam pa dag gi khyad par can yin te/ dmigs pa'i khyad par gyis ni/ gzugs la sogs pa'i phung po stong pa nyid la dmigs pa'i phyir ro//rnam pa'i khyad par gyis ni gzugs la sogs pa'i stong pa nyid rnams gnyis su med cing gnyis su byar med pa rnam pa yin pa'i phyir te/ ji skad du de nyid las/ gzugs sogs phung po'i stong nyid phyir/ /stong pa nyid rnams dbyer med pas//zhes bya ba la sogs pa gsungs pa yin no/ /rang byang chub kyi lam du nges par 'byed pa'i cha dang mthun pa gsungs pa gang yin pa de dag kyang snga ma dag las dmigs pa dang / rnam pa'i khyad par dag gis khyad par du gyur pa yin te/ dmigs pa'i khyad par gyis ni/chos thams cad btags pa tsam la mi dmigs pa'i phyir ro/ /rnam pa'i khyad par gyis ni/ btags pa dang mi 'gal bar chos nyid ston pa rnam pa yin pa'i phyir te/ de nyid las ji skad du/ btags pa'i chos nyid mi 'gal bar/ /ston pa'i rnam pa dror gyur pa//zhes bya ba la sogs pa gsungs pa yin no/ /rnam pa thams cad mngon par rdzogs par rtogs par nges par 'byed pa'i cha dang mthun pa gsungs pa gang yin pa de dag ni/ sems can thams cad la brten pa'i sbyor ba'i lam gyis yin pas/ sems can thams cad la dmigs pa'i khyad par dang /de dag sems mnyam pa nyid la sogs pa'i rnam pa'i khyad par gyis bdag nyid ji lta ba bzhin du khyad par du gyur pa yin te/ de nyid las ji skad du/ dro ba rnams kyi dmigs pa 'dir/ /sems can thams cad yin par brjod/ /de dag nyid la sems mnyam sogs//rnam pa dag ni bcur bshad do/ /zhes bya ba la sogs pa gsungs pa yin no/ /'di ni re zhig nges par 'byed pa'i cha dang mthun pa rnams kyi khyad par gyi mtshan nyid yin no/ /'on te de dang der mthong ba'i lam mang po rnam pa mang pos bstan pa gang yin pa de'i so so'i khyad par ci zhig yin zhe na/re zhig lam shes pa nyid kyi mthong ba'i lam gang yin pa de ni/ 'khor ba dang mya ngan las 'das pa gang yang rung bar mi ltung ba'i phyir mi gnas pa'i lam yin no/ /'di ltar de nyid las/ rab 'byor byang chub sems dpas lam thams cad bskyed par bya ste/'dis yang dag pa'i mtha' ni mngon du mi bya'o zhes bya ba la sogs pa gsungs pa yin no/ /thams cad shes pa nyid kyi mthong ba'i lam gang yin pa de ni theg pa dman pa las yang dag par 'da' ba'i lam yin no/ /'di ltar de nyid las nyan thos dang rang sangs rgyas kyi phun sum tshogs pa ni/byang chub sems dpa'i shes pa dang mthong bas bltas nas 'da' bar bya'o zhes bya ba dang / yang rgyun du zhugs pa nas rang sangs rgyas kyi bar gyi shes pa dang spangs pa gang yin pa ni/ byang chub sems dpa'i bzod pa yin no zhes kyang gsungs pa yin no//rnam pa thams cad mngon par rdzogs par rtogs par khyad par gyi mtshan nyid kyi dbang du mdzad nas/ mthong ba'i lam gsungs pa gang yin pa de ni khyad par gyi lam yin te/ de nyid las ji skad du/ bsam mi khyab sogs khyad par gyi/ /khyad zhugs bden pa'i spyod yul can//skad cig ma ni bcu drug gis/ /khyad par mtshan nyid bshad pa yin/ /zhes bya ba gsungs pa yin no/ /phyir mi ldog pa'i byang chub sems dpa'i dge 'dun gyi dbang du mdzad nas de nyid du gsungs pa gang yin pa de ni slob pa'i lam yin te/ slob pa'i gnas skabs na yod pa yin pa'i phyir ro//de nyid las ji skad du/ mthong ba'i lam la bzod pa dang / /shes pa'i skad cig bcu drug ni/ /byang chub sems dpa' mi ldog pa'i/ /mtshan nyid yin par shes par bya/ /zhes gsungs pa yin no/ /thams cad du skad cig ni ji srid kyis zhes bya ba la/ shes pa skye ba 'bras bu yongs su rdzogs pa'i mtshan nyid du rig par bya'o//rtse mo'i mngon par rtogs pa'i mthong ba'i lam gsungs pa gang yin pa de ni gnyen po'i lam yin par shes par bya ste/ de nyid las ji skad du/ mthong zhes bya dang sgom pa zhes/ /bya ba'i lam ni so so la/ /rnam par rtog pa rnam bzhi yi//gnyen po rnam pa bzhi dang ni/ /zhes gsungs pa yin no/ /de ltar 'di rnams ni mthong ba'i lam rnams kyi khyad par gyi mtshan nyid du rig par bya'o/ /'di ni phyogs tsam yin te/ phyogs 'dis thams cad mkhyen pa nyid dang / rnam pa thams cad mngon par par rdzogs par rtogs par sgom pa'i lam gyi sbyor ba dang /rnam par rtog pa de dang de dag gi rab tu dbye ba'i khyad par gyi mtshan nyid bstan pa gang yin pa brtags shing bshad par bya'o/ / de ltar 'jig rten 'di ni song zhing rjes song lam la brten pa zhes bya dang / /gang phyir sangs rgyas lam gang yin par blos byas min yang mthong ba lkog gyur pa//des na kho bos 'gro ba rnams la phan phyir mi yis sngon chad ma myong 'di/ /shes rab pha rol phyin tshul mkhas pa rnams la phyogs tsam gsal bar byas pa yin/ /kye ma ma la mi shes rang bzhin sdig pa yis/ /gang phyir 'phags pa'i mig ni shin tu bkag gyur pa//des na skye dgu 'di dag rab tu gsal ba dang / /bsod nams dbang ldan rab tu 'jug pa mi 'dor mtshar/ /rtog ge'i 'thad las rab tu byung ba'i lam du ni/ /thar 'dod rnams kyi yid kyis gom 'dor mi nus pas/ /rab grags tsam gyi ji bzhin don nyid gang yin pa//de yi don du rdzogs sangs 'bras can bstan pa yin/ /de lta de ltar gzhan la brten pa'i 'gro ba 'di/ /song rjes 'gro bas glang chen phrug gu lta bu ste/ /gang zhig rang gi stobs kyis bgrod dka' 'jigs byed pa/ /glang chen de nyid la ni sde rnams sten par byed//tshigs su bcad pa 'di gsum ni/ kun tu rmongs pa dang / log par zhugs pa dang / yang dag par zhugs pa'i sems can gyi tshogs rnam pa gsum mo/ /go rims ji lta ba bzhin gzhug par 'dod pa dang / rab tu rtogs par 'dod pa dang /khyad par du 'gro bar 'dod pa nyid kyi dbang du byas par rig par bya'o/ /kye ma gzhung lugs sna tshogs kyis/ /dub pa dag gi ngal bso'i gnas/ /shes rab pha rol phyin pa'i lugs/ /ring mo zhig nas mthong ba yin/ /'phags pa shes rab kyi pha rol tu phyin pa stong phrag nyi shu lnga pa'i tshul gyi mngon par rtogs pa'i rgyan gyi man ngag gi bstan bcos kyi 'grel pa legs par spyad pa'i las can/theg pa chen po la yang dag par gnas pa/ 'phags pa mang pos bkur ba ku ru kul+le'i sde pa gtsug lag khang rgya chen po du ma'i bdag po/slob dpon sangs rgyas 'bangs kyi tsha bo/ shAkya'i dge slong 'phags pa rnam par grol ba'i sdes mdzad pa rdzogs so// //gang du dngos por dmigs pas dkrugs pa mang pos bkur ba bzhin du 'khrul gyur pas //shes rab pha rol phyin tshul gang zhig theg chen lam la gzhan gyis ma rtogs pa/ /des na 'phags pa gsal ba'i blo mnga' de yis rgyal la mngon sum nyid zhus nas/ /grangs don go rims ming dang dbye ba 'bras bu'i sgo nas 'di bshad ngo mtshar che// rgya gar gyi mkhan po shar phyogs kyi dge bsnyen chen po dpal go mi 'chi med dang / lo tsA ba chen po shAkya'i dge slong blo ldan shes rab kyis bsgyur cing zhus te legs par gtan la phab pa'o// //