CLOSE WINDOW

D3725
བོད་ཡིག

/[ ]@##/ /rgya gar skad du/ sarba sa ma ya saM gra hanA ma/ bod skad du/ dam tshig thams cad bsdus pa zhes bya ba/ bcom ldan 'das dpal rdo rje sems dpa' la phyag 'tshal lo//oM AHhUM/ rdo rje mi phyed gsum bdag nyid/ /dpal ldan bde chen rdo rje la/ /btud de gsang sngags theg pa'i gzhung / /rgyud las gsungs pa bri bar bya/ /byang chub sems dpa' gsang sngags kyi sgor zhugs pas 'di ltar shes par bya'o/ /theg pa chen po'i yang chen po 'di 'og ma rnams las khyad par du 'phags te/ji ltar zhe na/ 'di skad du 'phags pa klu sgrub kyi zhal snga nas thams cad chos kyi skur rtogs pas kun du bzang po'i rgyas thebs pa dang 'jig rten gyi lha chen po dam tshig can 'khor dang bcas pas bkur gnas byed pas byin gyis brlabs dang ldan pa dang /dus gsum gyi sangs rgyas sras dang bcas pas thugs la dgongs shing byin gyis brlabs pas dngos grub myur ba dang / bde bar gshegs pa rnams dang spyod yul gcig pas 'khor ba dang ngan song gi 'jigs pa dang bral zhing dbugs phyin pa dang /rdo rje byang chub kyi sems dang ldan zhing sku dang gsung dang thugs mi phyed pas bar du gcod pa gang yang med pa dang / phyi nang thams cad rang bzhin gyis rnam par dag par yid ches pas dam tshig nyams par mi 'gyur ba dang / gal te nyams na yang rang bzhin gyis skod par 'gyur ba'i khyad par ro zhes gsungs so//yang slob dpon chen po in+d+ra b+hU ti'i zhal snga nas bla ma'i khyad par dang snod kyi khyad par dang cho ga'i khyad par dang las kyi khyad par dang dam tshig gi khyad par dang / lta ba'i khyad par dang spyod pa'i khyad par te bdun gyis 'phags so zhes gsungs so//slob dpon chen po ye shes zhabs kyi zhal snga nas sngags kyi theg pa ni rnam pa gsum gyis thun mong ma yin te/ 'di ltar sgrub pa po dang lam dang 'bras bu gsum mo zhes gsungs so/ /slob dpon tri pi ta ka ma la'i zhal snga nas ni/don gcig na yang ma rmongs dang / /thabs mang dka' ba med pa dang / /dbang po rnon po'i dbang byas pas/ /sngags kyi theg pa khyad par 'phags/ /zhes gsungs so/ /slob dpon DoM bi he ru ka'i zhal nas kyang 'di ni snod kyi khyad par dang snod du byed pa'i cho ga dang gzhung dang /lam gyi khyad par dang 'bras bu'i khyad par gyis sngags kyi theg pa khyad par 'phags zhes gsungs pa dang / gzhan yang rdo rje dril bu pa'i zhal nas kyang gsang sngags kyi theg pa ni theg pa chen po'i yang chen po yin te/ 'di ltar rten gyi gang zag gi khyad par dang /'jug pa lam gyi khyad par dang / mthar thug pa 'dras bu'i khyad par dang / /mngon par 'byung ba'i khyad par ro zhes gsungs so/ /slob dpon rat+na A ka ra shAn+ti pa'i zhal snga nas 'dir/ dmigs pa rnam par dag pa dang / /grogs kyi mthu dang spyod pa yis//blo ldan rnams kyi theg pa 'di/ /chen po'i chen po nyid du bsgrags/ /zhes gsungs so/ /bdag gi bla ma rje btsun dam tshig rdo rje'i zhal nas ni pha rol phyin pa'i theg pa las theg pa 'di gong du gyur pa yin te bla ma dang dbang bskur ba dang dam tshig dang man ngag dang brtson 'grus kyis khyad par du 'phags so zhes gsungs so//de la 'dir dam tshig 'ba' zhig brjod par bya ste/ dam tshig ni sngags pa rnams kyi gnas su gyur pa dang theg pa chen po'i chos kyi lo tog skye ba'i sa gzhir gyur pa yin pas de bri bar bya'o/ /dam tshig rnams kyang gang zhe na/rten dang rgyu dang rtsa ba dang ngo bo dang nges pa'i tshig dang dbye ba dang ming gi rnam grangs dang rkang grangs dang brda dang bdud dang dgra dang nyams pa'i tshad dang skong ba dang / ma nyams pa'i rtags dang bskang ba dang bsngo bgrang bya ba dang bskangs pa dang bsdus pa'i dam tshig dang nyams pa'i nyes dmigs dang ma nyams pa'i phan yon dang 'bras bu rnams so//des na rten ni theg pa chen po'i rigs can skyabs su 'gro ba gnyis sngon du song ba bla na med pa byang chub kyi sems bskyed pa dkyil 'khor du zhugs shing dbang bskur ba thob pa'o/ /de la rgyu ni byang chub kyi sems so//rtsa ba ni snying rje'o/ /ngo bo ni ngo tsha shes pa dang khrel yod pa dang / snying rje dang shes rab mtshungs par ldan pa shes pa'i rgyun no/ /nges tshig ni rtogs pa'i phyir ram/ mnyam pa nyid du 'gro ba'i phyir ram/ thob cing mi 'da' ba'i phyir ro//de la dbye ba ni rtsa ba dang sbom po dang yan lag gi sgo nas dbye ba dang bsrung ba dang bsgrub pa'i sgo nas dbye ba dang spyod pa dang lta ba'i sgo nas dbye ba dang spyi dang khyad par dang lhag pa'i sgo nas dbye ba dang thun mong dang thun mong ma yin pa'i sgo nas dbye ba dang / rags pa dang phra ba'i sgo nas dbye ba dang /bsrung bar bya ba dang nyams su blang ba dang spyad par bya ba dang spyod lam dang thun mong ma yin pa'i sgo nas dbye ba'o/ /de la ming gi rnam grangs ni dam tshig dang sdom pa dang brtul zhugs dang spyod yul dang dka' spyad dang spyod pa dang shI la la sogs pa'o/ /de la rkang grangs ni thun mong gi rtsa ba'i ltung ba bzhi dang pha rol tu phyin pa'i rtsa ba'i ltung ba bcu gnyis dang kr-i ya'i rgyud kyi rtsa ba'i ltung ba bcu gsum dang /spyod pa'i rgyud kyi rtsa ba'i ltung ba bcu bzhi dang rnal 'byor gyi rgyud kyi rtsa ba'i ltung ba bcu bzhi dang / rnal 'byor chen po'i rgyud kyi rtsa ba'i ltung ba bcu bzhi dang /yang lnga dang yang bzhi dang / rtsa ba'i ltung ba bdun cu tham pa'o/ /de la yan lag gi dam tshig rnams ni 'di rnams so zhes bgrang bar mi nus te/ mdo sde dang mngon pa dang 'dul ba dang rgyud sde rnams su blta bar bya'o/ /de la dam tshig gi brda ni ji skad du/ mi shigs pa ni seng ge ste/ /gcan gzan rgyal po yin pas so/ /za ma tog ni rgyal mo'i mdzod/ /dug spyod pa ni der mi rigs/ /rat+na myu gu lcug phran dag /bregs te 'byung rgyun gcad mi bya/ /gangs kyi zhu chu phal ba yang / /mkhas pas btung bar mi bya'o/ /pad+ma'i ze'u 'bru kha ma bye//zla zer ma yin dbye mi bya/ /ma brtags bug rdol can snod du/ /bdud rtsi sman blugs zags par 'gyur/ /don med bcos pa'i tshul rtags can/ /bsrel zhing spyad par bya ba min/ /shel dkar rat+na sgo nga dang / /'dam rdzab khung du nub mi bya/ /seng ge dkar mo'i 'o ma dag /gser snod ma yin blugs mi bya/ /yid bzhin nor bu rin po che/ /bsreg par bya ba yong ma yin/ /khyung chen gshog pa gar brkyang ba/ /de dag bcag par bya ba min/ /gnam lcags me yi dur mo dag /brdab par bya ba ma yin no/ /rdo rje drag chen gtams pa'i gzhi//gzhig par bya ba gal yin/ /bud shing bsregs pa'i sgron me de/ /'thor rlung drag pos bskyod mi bya/ /rdo rje tshig gi chu rgyun dag /'ol ka bkag par bya ba min/ /rgyal po bka' rtags phyag rgya dag /nam yang bshig par mi bya'o/ /gtsug gi yid bzhin nor bu de//rgyal mtshan rtse las dbrog mi bya/ /zhes gsungs pas/ /zla ba'i dam tshig kyang brdar gsungs te/ dpal dgyes pa rdo rje las tsa'u sa ma ya/ kaspur/ sih+la/ kab+pu ra/ bA la zhes pa dang / snyoms 'jug gi dam tshig kyang po la/ ka k+ko la/ kun du ru zhes gsungs so/ /rtsa ba'i ltung ba bcu bzhi yang brdar gsungs te/ dpal dus kyi 'khor lo las/ ri bong can dang mig dang yon tan rig byed dang / /mda' dang dbang po ri dang bkra shis gza' dang phyogs/ /drag po nyi ma yan lag sa rnams yin/ /zhes gsungs pa lta bu'o//de la dam tshig gi bdud ni rnam rtog 'khrig pa'i bdud dang / btang snyoms le lo'i bdud dang / longs spyod g.yeng ba'i bdud dang / tshig rtsub mtshon cha'i bdud dang / khro gtum 'khrug pa'i bdud de/ /de la dam tshig dgra ni gsang ba 'phel bas bcos dkar song ba'i dgra dang chos log par spyad pas bar chad 'ong ba'i dgra dang rtsa ba byung bas chad pa chen po 'byung ba'i dgra dang /sgrub pa mi brtson pas dge ba 'phrog pa'i dgra'o/ /de la dam tshig gi nyams pa'i tshad ni nyams pa che chung gi tshad dang dus kyi tshad do/ /de la nyams pa che chung gi tshad ni kun du nyams pa chen po dang rtsa ba nyams pa dang /yan lag nyams pa dang zlas nyams pa dang zhar la nyams pa'o/ /de la dang po bla ma'i dam tshig ni de bskrongs pa dang de la mtshon la sogs pas brgyab pa dang sku la smad pa dang 'khus pa dang brnyas pa dang 'khon pa dang bka' bcag pa dang ngan sems dang 'phya ba la sogs pa'o//rdo rje spun pho mo'i dam tshig ni de bsad pa dang 'khus pa dang brdegs pa dang nor rdzas dang chung ma la sogs pa phrogs pa dang / lkog kha dang ngor kha dang man dur dang brnyas pa dang mtshang 'dru ba dang ngan sems dang 'khon pa dang brtse gdung med pa la sogs pa'o//gzhan yang byang chub kyi sems gtan spangs pa ni kun du nyes pa chen po'o/ /de la rtsa ba'i ltung ba bdun cu las bla ma dang rdo rje spun dang byang chub kyi sems ma gtogs pa drug cu rtsa gsum nyams pa dang / gzhan yang rang gis dbang ma thob par gzhan la bskur ba dang mi shes par dkyil 'khor 'dri ba dang / rab gnas dang sbyin sreg dang tshogs kyi 'khor lor zhugs pa dang / gsang sngags rang shes su bla ma med par spyod pa dang thun mtshams kyi rnal 'byor chags pa dang lha dang bla ma la mchod pa dus su chags pa dang mi dge ba bcu dang mtshams med pa lnga dang nye ba'i mtshams med pa lnga dang /dam pa'i chos spong ba dang 'phags pa la skur pa 'debs pa dang rang gi gsang ba bzhi po bag med par gzhan la smra ba dang ngo tsha med pa dang khrel med pas sdig pa ci la yang mi 'dzem pa rnams ni rtsa ba'i ltung ba zhig ral du 'gyur ro//de la rtsa ba'i yan lag tu gyur pa yang lag gi ltung ba bdun dang bco lnga la sogs pa spyir bzhi/ bar skabs bzhi/ gsang ba nye bar gtad pa bzhi/ gsang bar 'os pa'o/ /sngags kyi rgyud la sogs pa nas gsungs pa ji snyed pa rnams dang /gzhan yang gzugs sku dang po ti dang rdo rje dril bu dang phur bu 'joms pa dang 'tshong ba dang 'gom pa dang mchog tu yi dam lha'i sku dang / glegs bam dang phyag rgya rnams sbyin pa dang 'tshong ba la sogs pa rnams ni yan lag gi ltung ba zhig ral du 'gyur ro/ / de la byang chub kyi sems gtan spangs te rtsa ba mang du byung ba ni kun du nyon mongs pa chen po'o/ /de ma shor yang rtsa ba'i nyes pa gcig gam 'ga' byung ba ni rtsa ba nyams pa'o/ /rtsa ba ma shor ba yang nyes pa gzhan byung ba ni yan lag nyams pa'o/ /bla ma ngan pa dang grogs ngan pas nyes pa byung na ni zlas nyams pa'o//mi shes pa dang ma gus pa dang bag med pa dang nyon mongs pa che bas nyes pa byung ba ni zhar la nyams pa'o/ /de la dus kyis nyams pa ni brtson pa rab kyi rab kyis ni nyes pa byung ba'i rjes nyid la ma bskangs na nyams so/ /rab kyi 'bring gis snga dro nyi ma phyed dang phyed kyi phyed dang dgongs ka dang de bzhin du dus su ma bskangs na nyams so//rab kyi tha mas ni nyin par nyes pa mtshan mo la/ mtshan mo'i nyes pa nyin par ma bskangs na nyams so/ /'bring gi rab dang 'bring gi 'bring dang 'bring gi tha ma ni zhag bdun dang dus khyad par can dang zhag nyi shu rtsa gcig tshun chad du ma bskangs na nyams so//tha ma'i rab dang tha ma'i 'bring dang tha ma'i tha mas ni zla ba gcig dang zla ba bdun dang zla ba bcu gnyis tshun chad du ma bskangs na nyams so/ /shin tu dman pas kyang skye ba 'di la nyams pa lus pa las 'chi kar skong na de bskangs pa las de ma bskangs na nyams so//de la dam tshig ma nyams pa'i rtags ni gdung sha rI ram dang khrel ma khrel dang rmi lam dang bar chad mang nyung las brtag par bya'o/ /de la dam tshig bskang ba ni so so dang thun mong gi'o/ /de la so sor bskang ba ni spyod pa rlabs po che tsha tsha dang sbyin sreg dang gtor ma dang yan lag bdun pa dang chos spyod bcu dang tshogs kyi tsakra dang nye'u 'don pa dang dge 'dun la chos ston yon dang bcas pa dang /sgrub pa chen po'i gzhi bzung ba dang gzugs khyad par can dang rang gi lha'i snying po bzlas brjod bya ba ni 'bum phrag lnga dang khri phrag gsum dang khri phrag lnga dang stong phrag gsum dang stod phrag lnga dang brgya phrag gsum dang brgya phrag lnga dang bcu phrag gsum dang bcu phrag lnga dang nyi shu rtsa gcig ste nyams pa chen po la sogs pa lnga dang rim pa bzhin du sbyar ro// gzhan yang rdo rje slob dpon gyi nyams na slar yang dkyil 'khor du 'jug par bya ba dang / rdo rje spun gyi dam tshig nyams pa na tshogs kyi tsakra la sogs pa ste nyes pa so sor bskang ba'i thabs so sor ji ltar bshad pa bzhin du bskang bar bya'o/ /de la thun mong gi bskang ba ni bshags pa dang sbyang ba dang slar blang ba'o//gzhan yang gong du bshad pa'i dge ba'i las kyis bskang ba dang rdzas kyis bskang ba dang don gyis bskang ba dang ting nge 'dzin gyis bskang ba dang gsang ba'i thabs kyis bskang ba'o/ /de la dang po gong du bshad do/ /gnyis pa ni bla ma spyan drangs nas rin po che dang rdzas khyad par can phul nas nyes pa bshags te/dkyil 'khor du zhugs nas rdzas de dag slar slu ba'i tshul du bla ma las dam tshig bslang bar bya'o/ /gsum pa ni chos thams cad nam mkha' ltar rnam par dag pas bsgom pa dang chos zab mo nyan pa dang bsam pa dang bklag pa dang /kha ton bya ba de la brtag pa dang bri ba dang gzhan la sbyin par bya'o/ /de la bzhi pa ni sdig pa bkru ba dang sdig pa sreg pa dang sdig pa gtor ba dang dam tshig rdo rje bsgoms nas de'i ting nge 'dzin gyis bskang ba'o/ /de la lnga pa ni bla ma la rdzas dang rang gi chung ma phul te/gsang ba'i dbang dang shes rab ye shes kyi dbang dang bzhi pa'i dbang zhu bar bya'o/ /gzhan yang yi dam lha'i ting nge 'dzin dang bzlas pas shin tu yang bskang ngo / /khyad par du rdo rje byang chub kyi sems bsgoms nas bskang du mi btub pa yang bskang ste/ mdzod kyi mdo la sogs pa la blta bar bya'o/ /de la dam tshig rnams bsdo ba grang bya ba ni mdor bsdu na dran pa'i tshul gyis bsdo bgrang bya ba dang / kha thon dus gsum du bsdo bgrang bya ba dang / dus drug tu yi dam nar ma'i dus su bskang zhing bsdo bgrang bya ba dang / glegs bam bltas pas bsdo bgrang bya ba'o//de la dam tshig bskangs pa dang ma nyams pa'i rtags sngar bshad pa bzhin du shes par bya'o/ /de la dam tshig nyams pa'i nyes dmigs ni ji skad du dpal sangs rgyas mnyam sbyor gyi rgyud las/ dam tshig nyams pas dkyil 'khor du/ / dbang bskur dngos grub 'thob mi 'gyur/ /zhes gsungs pas dang po dkyil 'khor du zhugs shing dbang bskur ba thob nas dam tshig sdom pa mnos nas phyis ma bsrungs na 'jig rten dang 'jig rten las 'das pa'i dngos grub mi 'byung la/ mi 'dod pa sna tshogs pa 'byung bar 'gyur ro//yang / dam tshig med pa'i mi rnams la/ /sngags dang phyag rgya mi sbyin zhing / /de dang 'grogs par mi bya ste/ /snying rje bskyed la spang bar bya/ /zhes pa dang / dang por bla ma rje btsun las/ /dam tshig thob nas mi bsrung ba/ /mkha' 'gro srin pos bsad nas su//ngu 'bod la sogs dmyal bar 'gro/ /shes rab snying rje mi ldan pa/ /gsang sngags la ni 'jug mi bya/ /yan lag dam tshig nyams gyur na/ /rdo rje dmyal bar skye bar 'gyur/ /de bas dam nyams sdig can de'i/ /nyams pas grib ma 'go bas na/ /lhan cig gnas par mi bya zhing //de la snying rje bskyed par bya/ /zhes gsungs pa dang / dpal sangs rgyas thod pa las kyang / re zhig dam tshig nyams pa las/ /dngos grub thob pa lta zhog gi/ /mi yi skye ba'ang rnyed par dka'/ /gang yang bla ma brgyud pa yi/ /rims 'ongs de nyid man ngag ni//de yis ji ltar 'grub mnyam dgongs/ /zhes gsungs pa dang / gzhan yang rtsa ba'i dam tshig nyams na dper na shing chen po rtsa ba tshig pa'am skams pa'am bregs pa dang 'dra ste/ 'jig rten dang de las 'das pa'i dngos grub thams cad med par 'gyur ro/ /spom pa'i nyes pa ni sngar bshad pa bzhin du shing chen po'i sdong po dang 'dra ste/'jig rten gyi dngos grub chen po brgyad mi 'byung ngo / /yan lag gi ltung ba ni shing gi yal ga dang 'dra bar phrin las bzhi'i dngos grub kyi bar du gcod do/ /gzhan yang 'di la g.yel ba dang mchod pa dang gtor ma chags na byin rlabs chung ba dang rnal 'byor sdo skams so//bla ma'i thugs ma zin zhing bka' bcag na bgegs ldang ngo / /spyod pa rtsing ba dang / bag med na 'byor pa brlag par 'gyur ro/ /gal te dam tshig ma bsrungs kyang bkra shis pa 'dra na yang 'phral du tshe 'di la gnod pa med kyang de nyid chad pa chen po 'byung ba'i rtags yin te/dper na rgyal po'i bka' chad byung na de la zan dang chang mang po blud nas bzhi bar byas na phyis gsod do/ /dam tshig kha cig legs par bsrungs pa las sdug bsngal dang bar chad mang ba ltar 'dug kyang de tshe rabs snga ma'i las kyi lhag ma lus pa yin pas des ni myur du phyag rgya chen po'i dngos grub thob par 'gyur ro//gzhan yang dam tshig nyams pa ni tshe 'dir yang bkra mi shis pa mang po 'byung la/ dus ma yin par 'chi ba brgyad dang / gshis ngan du 'chi ba bcu gnyis kyis 'chi bar 'gyur ro//de nas shi nas kyang rdo rje dmyal bar skyes nas de nas thon pa'i dus med do/ /de la dam tshig ma nyams pa'i phan yon ni/ tshe ring ba dang longs spyod che ba dang ci bsams pa 'grub pa dang / mthu dang byin rlabs che ba dang bkra shis par 'gyur ro//bsgom pa dang bzlas pa dang mchod pa la brtson pas rnal 'byor pa sngo ma skams par longs spyod che ba dang bla ma'i bka' ma bcag cing gus pas bar chad med pa dang rdo rje spun la brtse gdung byas pas mi ma yin rnams kyis bkur sti byed do/ /g.yo sgyu med pas mi dang mi ma yin pa rnams dga' bar 'gyur ro//gsang sngags 'chol bar ma spyad pas 'byor ba brtan pa dang bkra shis so/ /'chi ba'i dus su yang rdo rje mkha' 'gro ma rnams kyis bsu nas rig 'dzin gyi gnas su 'khrid do/ /gzhan yang des skye ba 'di dang phyi ma dang skye ba bdun dang skye ba bcu drug tshun chad kyis 'grub pa la the tshom med do//de la dam tshig thams cad bsdu na gnyis te/ snying rje rus pa'i gting nas skye ba dang shes rab tshig tsam ma yin pa gting nas go ba'o/ /'di gnyis rgyud la brten na dang po nyid nas nyes pa mi 'byung la gal te byung na yang myur du bskangs par 'gyur ro//gzhan yang dam tshig thams cad ni byang chub kyi sems su 'dus te de yang rnam pa bzhi'o/ /byang chub kyi sems dang bla na med pa byang chub kyi sems dang kun du bzang po'i sems dang rdo rje byang chub kyi sems so/ /de la so sor thar pa'i sdom pa ni las dge sdig gtsor ston to//mdo sde'i sdom pa ni snying rje gtsor ston to/ /gsang sngags kyi sdom pa ni sku gsung thugs kyi mi phyed pa gtsor ston to/ /de la so sor thar pa'i sdom pa ni mya ngan las 'das pa'i bsam pa brtan po las skye'o/ /byang chub sems dpa'i sdom pa ni lhag pa'i bsam pa bzang po las skye'o//gsang sngags kyi sdom pa ni rdo rje byang chub kyi sems las skye'o/ /de la so sor thar pa'i sdom pa ni spong pa bdun no/ /byang chub sems dpa'i sdom pa ni spong ba bcu'o/ /sngags kyi sdom pa ni spong ba gcig go/ /so sor thar pa'i gzhung du ni kha na ma tho ba gnyi ga brjod do//byang chub sems dpa'i gzhung du ni rang bzhin 'ba' zhig brjod do/ /sngags kyi gzhung du ni de gnyi ga'i tha snyad ma brjod do/ /yang so sor thar pa'i sdom pa ni rdzas kyi bdag nyid du yod par 'dod do/ /byang chub sems dpa'i sdom pa ni brtag pa tsam du yod bar 'dod do//sngags su ni de gnyi ga'i tha snyad ma brjod do/ /yang nyan thos kyi sdom pa la par chad kyi chos mang du yod do/ /byang chub sems dpa'i sdom pa la bar chad kyi chos nyung zad cig go/ /sngags kyi sdom pa la ni bar chad kyi chos bshad pa med do/ /yang sdom pa dang po la ni pham ba byung na phyis blang ba'i skal pa med do//bar ma la ni pham pa byung na phyis blang ba'i skal ba yod do/ /tha ma ni rdo rje byang chub kyi sems dang ldan na nyams pa med do/ /de la sdom pa dang po la ni mkhan po dang slob dpon dgos so/ /bar ma'i sdom pa la ni bla ma gcig pu'am yang na med pa'o//tha ma de la ni bzhi ste/ bla ma'i zhal nas byung ba'i dbang dang / ye shes lha'i phyin gyi rlabs kyi dbang dang / rdo rje mkha' 'gro mas lung bstan pa'i dbang dang / rang nyid kyi sems kyi rtsal gyis thob pa'i dbang dang ngo / /yang snga ma ni gzhan la gnod pa byed pa las ldog go//bar ma ni de'i steng du gzhan la phan 'dogs pa'o/ /phyi ma ni de'i steng du sangs rgyas kyi mdzad spyod nyams su len pa'o/ /yang dang po'i sdom pa ni dgra bcom pa rnams kyi rjes su slob pa'o/ /bar ma'i sdom pa ni sngon gyi byang chub sems dpa' rnams kyi rjes su slob pa'o//sngags kyi sdom pa ni sangs rgyas rnams kyi rjes su slob pa'o/ /yang dang po'i sdom pa ni bdag 'ba' zhig gi don to/ /bar ma'i sdom pa ni gzhan 'ba' zhig gi don to/ /phyi ma'i sdom pa ni gnyi ga'i don to/ /yang dang po'i sdom pa ni ji srid 'tsho'i bar du mnos so//bar ma'i sdom pa ni snying po byang chub kyi bar du'o/ /phyi ma'i sdom pa ni nam mkha' ji srid gnas kyi bar du'o/ /sdom pa dang po'i 'bras bu ni mya ngan las 'das pa gnyis so/ /bar ma'i 'bras bu ni sa bcu 'am sa bcu gcig pa'o/ / tha ma'i 'bras bu ni sa bcu gnyis pa'o/ /gzhan yang sgom sgrub dang chos spyod yi dam gyi lhas ma khrel ba dang / dad pa dang bsnyen bkur bla mas ma khrel ba dang / dam tshig dang sdom pa rdo rje mkha' 'gro ma rnams kyis ma khrel ba dang / brtse gdung phan gnod rdo rje spun pho mos ma khrel ba dang /bzlas brjod dang gtor ma dang cho ga'i nus pa dang byin rlabs mtshan mo rgyu ba'i 'byung po'i tshogs kyis ma khrel ba dang / rdo rje bla ma'i man ngag zab mi zab rang gi slob mas ma khrel ba dang / lta ba zab mi zab mkhas pa rnams kyis ma khrel ba dang / ji ltar dam bcas pa'i don rang gi sems kyis ma khrel ba dang /spyod pa bzang ngan grogs pos ma khrel ba dang / gtong phod dang / gsal gshog dang / ro tshod dang / zhi des dang / mthun 'jug 'jig rten gyi mi rnams kyis ma khrel pa'o/ /mnyam par gzhag pa'i rnal 'byor ni//bskyed dang rdzogs pa'i ting 'dzin bsgom/ /spyod lam rnal 'byor dus su ni/ /phyi nang thams cad gzhan min te/ /sems nyid lha nyid sgyu ma nyid/ /'od gsal yin te mnyam nyid gzhi/ /dag pa bzhi yang de nyid yin/ /nyin dang mtshan mo rtag par ni/ /sems kyi skad cig re re la//de ltar mos pa yang yang bya/ /rdo rje shugs dang mi ldan yang / /snang ba byin gyis brlabs pa yin/ /de lta bu yi sngags pa ni/ /dam tshig nyams pa'i dogs pa med/ /b+haM ga lar skyes dge slong ni/ /mar me mdzad dpal ye shes kyis/ /gzhung dang bla ma'i man ngag gis//dam tshig thams cad bsdus nas bris/ /dam tshig thams cad bsdus pa zhes bya ba mkhas pa chen po dIM pa ka ra shrI dz+nyA nas mdzad pa rdzogs so// //rje btsun bla ma chen po de nyid kyi zhal snga nas dang / lo rtsA ba dge slong tshul khrims rgyal bas bsgyur cing zhus te gtan la phab pa'o/