CLOSE WINDOW

D3724
བོད་ཡིག

/[ ]@##/ /rgya gar skad du/ shI la sam+ba ra sa ma ya a bi ru d+d+ha nA ma/ bod skad du/ tshul khrims dang sdom pa dang dam tshig mi 'gal ba zhes bya ba/ sangs rgyas dang byang chub sems dpa' thams cad la phyag 'tshal lo/ /dpal tshogs kun mkhyen dam pa'i dbang phyug snying rje'i mchog gi bdud rtsis brlan pa'i blo gros can//gzhan don yon tan dri med bden pa'i rin chen rin thang med pa mang po 'thob pa'i mchog /'gro ba nyon mongs ha la ha la'i dug zos rnams la chos kyi bdud rtsi'i char pa yis//mya ngan 'das pa dam pa'i don byed pa yi dpal ldan gang yin khyed kyis rtag tu srungs/ /dge ba'i bshes gnyen dang bral zhing / /bde gshegs byin rlabs med pa dang / /mang du thos pa dang bral zhing / /thos pa nyung ngus chog shes pa/ /mkhas pa nyid du rlom byed rnams//rgyud dang sngags dang phyag rgya sogs/ /sbyin la sogs dang sangs rgyas yum/ /lung nod ji bzhin ma rtogs pas/ /dpal ldan sangs rgyas kyis bstan pa'i/ /byang chub sems dpa' rnams kyi sdom/ /dang por bzung nas de 'og tu/ / rab tu byung nas dge slong ngam/ /dang por rab tu byung brtan nas/ /sngags dang pha rol phyin lam nas/ /phyi nas de rnams rmongs sogs kyis/ /'dul ba yi ni bstan bcos las/ /nyan thos la sogs sdom gnas pa/ /so sor thar dang lo drir gnas/ /der bstan pa yi bslab pa rnams//phal cher bsrung bar ma nus pas/ /byang chub sems dpa'i sdom pa dang / /'gal ba nyid du gnas bzung nas/ /de ltar de spangs rnam par gnas/ /de dag mi shes bsal phyir dang / /bstan pa 'khrul pa bzlog pa'i phyir/ /rig 'dzin gyi ni dam tshig rnams//byang chub sems dpa'i bslab pa dang / /so sor thar gsungs sdom pa ni/ /rgyu 'bras ltos 'brel grub rnams la/ /mi 'gal 'brel pa gsal bar bya/ /sgrub pa lung bzhin bya ba ni/ /dpal ldan bla ma'i zhal snga nas/ /yang dag shes rab pha rol phyin//mngon par rtogs pa brgyad rnams dang / /dam tshig dbang bskur thob pa yis/ /shin tu man ngag dang ldan pas/ /dpal ldan 'dus sogs rgyud kyi don/ /rim pa gnyis ni rnam dbye ba/ /thob pa nges bsam snying rje yis/ /bdag dang gzhan gyi byang chub phyir//byang chub tu ni sems bskyed de/ /kun las phyir mi ldog brtan bya/ /thabs kyi rang bzhin bya ba 'am/ /bsgom pa yi ni lam dag ste/ /sbyin la sogs pa'i bslab pa la/ /yang na sngags spyod rim pa las/ /rtag tu dge ba'i bshes gnyen ni/ / bsten pa yongs su gtang mi bya/ /mdo sde chos mngon 'dul ba yi/ /gtsug lag gi ni bstan bcos dang / /gtsug lag ma yin lo dri sogs/ /slob dang rang sangs rgyas rnams dang / /byang chub sems dpa' thams cad kyi/ /so sor thar sogs sdom pa ni/ /dge slong blo dang ldan pa yis//byang chub sems dpa' yang dag bsten/ /bdag dang gzhan gyi byang chub dang / /dpal ldan 'chi bdag las rgyal ba'i/ /bstan pa yang ni bsrung phyir dang / /de bzhin 'jig rten gsum gnas pa'i/ /mi dang lha sogs 'jig rten rnams/ / sems sun 'byin pa gzhom phyir ro/ /sdom pa'i rnam par dbye ba ni/ /dpal ldan rgyal bas gang gsungs pa/ /phan tshun 'gal ba dag tu ni/ /gang yang nam du'ang gnas ma yin/ /chos 'dul las ni bcom ldan gyis/ /so sor thar pa'i sdom pa ni/ /rnam pa brgyad gsungs 'di lta ste//dge slong dang ni dge slong ma/ /dge slob dge tshul dge tshul ma/ /de bzhin dge bsnyen dge bsnyen ma/ /bsnyen gnas la ni gnas pa'o/ /de rnams bslab pa'ang rnam dbye ba/ /dpal ldan thub pa'i dbang chen po/ /snying rje ldan pas gsungs pa ni//dge bsnyen pho mo dag gi sdom/ /rnam pa lnga ru rab bstan te/ /'di ltar srog gcod spong ba nas/ /myos 'gyur chang mi 'thung ba'i bar/ /dge tshul pho mo'i sdom dag ni/ /mgon pos rnam pa bcur gsungs te/ /srog gcod pa la sogs pa nas//ji srid gser dngul la sogs pa/ /len pa spong ba'i bar du'o/ /de bzhin gzhan ni bar slob ma'i/ /'dul las bcu gnyis nyid yin te/ /chos dang rjes su mthun pa rnams/ /thar pa'i lam ni dag phyir gsungs/ /thub pa thugs rje chen po yis//spang bya thams cad spangs pa ni/ /dge slong dge slong ma rnams kyi/ /sdom pa yin par gsungs pa yin/ /thub pa thugs rje chen po yis/ /glu dang gar sogs phreng ba sogs/ /gcig byas phyed dang dus min zas/ /bar gyi spang bya brgyad spangs pa//bsnyen gnas kyi ni sdom par gsungs/ /sbyin la sogs pa'i sangs rgyas chos/ /bya ba thabs kyi bdag nyid gnas/ /shes rab pha rol phyin pa ru/ /bstan pa rgyal ba'i dbang po yis/ /byang chub sems dpa' thams cad kyi/ /sdom pa nyid du gsungs pa yin/ / phyag rgya sngags sogs rnal 'byor gyi/ /rim pa gnyis la brten pa las/ /rdo rje ye shes lus ngag gi /lha yi rnam pa rab bsgoms pa/ /thabs dang ldan par sgrub pa ni/ /byang chub sems dpa'i bslab 'grub pas/ /so sor thar sdom gyis de 'grub/ /gsang sngags sbyin sogs dbye ba las//rgyu dang 'bras bu'i dbye ba yis/ /dge slong la sogs dbye bya ste/ /dge slong sogs sdom dbye ba med/ /dge slong nyid sdom gcig yin te/ /de bzhin len dang bsgrub pa'ang gcig /rab byung sdom pa btang nas ni/ /sngags kyi sdom dang sbyin sogs kyi//sdom pa yang ni gzung mi bya/ /gsang sngags kyi ni sdom pa dang / /sbyin sogs sdom pas bsdams pa dang / /rnyed dang bkur sti'i rgyu yis sam/ /gnas kyi 'tsho ba 'grub don du/ /rab byung sdom pa len 'dod na/ /dge slong min pas sdom mi bya//gsang sngags sbyin sogs ldan pa ni/ /rab byung sdom pa bsgrub pa'o/ /'phags pa mgon po byams pa yis/ /'di ltar mkhyen te gsungs pa ni/ /rab tu byung ba'i phyogs dag ni/ /yon tan tshad med rnams dang ldan/ /de ltar sdom brtson khyim pa yi//byang chub sems las khyad par 'phags/ /gsang sogs lam dang sbyin sogs kyi/ /lam nyid dag ni dge slong gis/ /dge slong mkhas las blang bya yi/ /gzhan nyid las ni ma yin no/ /sngags dang sbyin sogs la gnas pa'i/ /byang chub sems dpa'i sdom pa ni//tshul khrims pha rol phyin rnam gsum/ /dang po sdom pa'i tshul khrims dang / /dge ba chos sdud tshul khrims dang / /sems can don byed tshul khrims te/ /des bsgrubs 'di 'grub nges pa yin/ /rgyal bas 'dul ba'i sde snod las/ /dge slong sdom gang gsungs de ni//dge slong byang chub sems dpa' yis/ /tshul khrims sdom pa'i cha ru 'gyur/ /dpal ldan de bzhin gshegs pa dang / /dpal ldan rdo rje sems dpa' yi/ /dbugs dbyung dag la brten nas ni/ /rdo rje'i lam ni gnyis su gnas/ /de la bde gshegs dbugs dbyung ba//dge slong rnams la zhi sems kyis/ /ma lus spros pa dang bral ba/ /gsungs pa dbang spyod sogs rim bya/ /phyi rol shes rab spangs nas ni/ /rtag tu rang snang shes rab ldan/ /de la 'dul las gsungs pa yi/ /sdom pa yis ni byang chub sgrub//rdo rje'i bdag nyid thob pa yi/ /rdo rje sems dpa'i rol pa ni/ /dge slong bdag nyid gyur pa yi/ /dpal ldan rnam par snang mdzad sogs/ /gos dkar sogs dang snyoms 'jug pa/ /do shal dpung rgyan gdu bu yis/ /rnam par brgyan cing gos dag ni//shin tu bzang po bsnams pa ru/ /dpal ldan 'dus sogs las byung bas/ /sems can kun gyi don 'gyur ro/ /rdo rje sems dpa'i dbugs dbyung ba/ /rtag tu khyim pa sbyang bya'i phyir/ /dbang bskur la sogs rim pa ni/ /spros dang bcas pa de la gsungs//sems sogs 'os su gyur pa la/ /phyi rol rig ma'i dbang bskur bya/ /spros pa med pas rab byung la/ /dge slong rnams kyis de sbyin te/ /'dul la sogs pa'i sdom pa ni/ /thams cad ldan pa'i slob ma la/ /rtag tu rang snang shes rab kyis//bsgom pa gsal bar bya phyir ro/ /sbyin sogs spyod dang sngags sogs spyod/ /rnal 'byor gnas pa'i bdag nyid dag /rdzogs pa'i byang chub sangs rgyas chos/ /rang dang gzhan la rab bsgrub par/ /rab tu 'jug pa'i dge slong gi/ /dngos gnas byang chub sems dpa' dang //bse ru nyan thos nyid gnas pa'i/ /zhi ba 'dod pa'i dge slong gis/ /'dul las gsungs pa'i sdom pa yang / /phra mo tsam yang gtang mi bya/ /khyim pa'i byang chub sems dpa' yang / /gang tshe tshangs spyod nyid bsrungs na/ /rab byung byang chub sems dpa' yis//rang gi tshul khrims ji ltar dor/ /dpal ldan mgon po byams pa yis/ /rtag tu tshangs par spyod nyid dang / /'tsho ba rnam par dag nyid do/ /byang chub sems dpa' la gsungs so/ /dge slong byang chub sems dpa' yis/ /sbyin sogs bya ba'i lam gyis sam//yang na sngags kyi sdom pa yis/ /gnas te de nyid sgrub byed pas/ /'dul las gsungs pa'i sdom pa ni/ /ji srid 'tsho yi bar du bsrung / /dpal ldan thub pa'i dbang po ni/ /thams cad mkhyen pa gang yin des/ /theg pa gsum gyis nges 'byung la//theg pa gcig gi 'bras bur gnas/ /zhes bya bar ni gsungs pa yin/ /sdom pa rnams ni sdom pa yin/ /gong nas gong du rjes 'jug ste/ /'di ltar dge bsnyen sdom pa ni/ /dge tshul gyi ni rjes su 'jug /gang de dge slong rjes su 'jug /gang dag nyan thos dge slong gi/ /sdom gsungs byang chub sems dpa' yi/ /rjes su 'jug ste kun ldan pas/ /dge slong shin tu khyad par 'phags/ /bya ba thabs kyi sbyor ba ni/ /byang chub sems dpa'i sdom pa ste/ /sngags pas sbyin la sogs pa ste//thams cad du ni 'jug par bya/ /gal te sdom pa 'gal gyur na/ /dge slong gis ni sdom pa rnams/ /phul bar gyur na dge tshul dang / /dge bsnyen yang ni mi gnas 'gyur/ /sems can don la ltos pa yis/ /so sor thar gsungs sdom gtong zhes/ /gal te de ltar rjod byed na//de dag nges par rmongs pa yin/ /blo ldan khyad par 'phags pa yi/ /dge slong byang chub sems dpa' ni/ /thabs la mkhas pas thams cad du/ /rmi lam du yang 'gal mi bsam/ /sbyin la sogs pa bya ba'am/ /yang na de nyid bsgom bya yin//dge slong sems can don bsgrub pa'am/ /byang chub sems dpa' snying rje che/ /gzhan don byed par 'dod rnams kyis/ /'dul la sogs pa'i dge slong gis/ /bya ba tshul khrims khyad 'phags phyir/ /tshul khrims lhag par bsten par bya/ /'dul ba las brjod tshul khrims ni//dge slong nyid du bsgrub bya'i phyir/ /ji srid 'tsho bar bsten bya ba/ /sems can don yin gtang mi bya/ /sngags sogs bsgom pa gnas pa dang / /sbyin pa sogs la gnas pa yi/ /dge slong byang chub sems dpa' yis/ /so sor thar gsungs bslab pa ni//nam yang gtang bar mi bya'o/ /btang na dmyal sogs 'gro bar 'gyur/ /de ltar ma gyur rnam nges na/ /yang dag byang chub bsgrub pa'i phyir/ /dge slong sdom pa yang dag pa/ /so sor thar la gnas par bya/ /rgyal dang rgyal ba'i sras rnams la//gus pas lung dang rigs pa yis/ /shin tu dri ma med cing mi 'gal sdom rnams byas pa las/ /bdag gis zla 'od lta bu'i dge ba bsags pa gang yin des/ /'jig rten ma lus dpal ldan rgyal ba'i dbang po myur 'grub shog /tshul khrims dang sdom pa dang dam tshig mi 'gal ba zhes bya ba/slob dpon mkhas pa chen po ye shes dpal bzang po'i zhal snga nas mdzad pa rdzogs so// //kha che'i mkhan po dz+nyA na shrI b+ha dra de nyid dang / zhu chen gyi lo tsA ba dge slong blo gros snying po dang / dge slong rab zhi bshes gnyen gyis bsgyur cing zhus te gtan la phab pa'o/