CLOSE WINDOW

D3721
བོད་ཡིག

/[ ]@##/ /rgya gar skad du/ gu ru pany+tsa biM shi ka /bod skad du/ bla ma lnga bcu pa/ bcom ldan 'das rdo rje sems dpa' la phyag 'tshal lo/ /dpal ldan rdo rje sems dpa'i gnas thob rgyur gyur pa/ /bla ma'i zhabs kyi pad+mar ji bzhin btud byas te//de bstan pa ni dri med rgyud mang las gsungs pa/ /mdor bsdus bshad pa 'di ni gus pas mnyan par gyis/ /dbang bskur mchog thob rdo rje yi/ /slob dpon la ni de bzhin gshegs/ /phyogs bcu'i 'jig rten khams bzhugs pas/ /dus gsum du ni mngon phyag 'tshal//mchog tu dad pas dus gsum du/ /dkyil 'khor me tog bcas thal mos/ /ston pa bla ma bsnyen bkur zhing / /zhabs la spyi bos phyag bya'o/ /khyim pa'am ni gsar bu la/ /'jig rten smod pa spang ba'i phyir/ /dam chos la sogs mdun bdar te//brtul zhugs 'dzin pas blos phyag bya/ /gdan bstabs pa dang ldang ba dang / /don gyi bya ba sogs bsnyen bkur/ /brtul zhugs can gyis kun bya ste/ /phyag bya dam pa min las spang / /bla ma dang ni slob ma dag /mtshungs par dam tshig nyams 'gyur bas/ / dpa' bos dang por slob dpon dang / /slob ma'i 'brel pa brtag par bya/ /blo ldan slob mas bla mar ni/ /snying rje med cing khro la gdug /khengs shing chags la ma bsdams dang / /spyoms dang bcas par mi bya'o/ /brtan zhing dul la blo gros ldan/ /bzod ldan drang la g.yo sgyu med//sngags dang rgyud kyi sbyor ba shes/ /snying brtser ldan zhing bstan bcos mkhas/ /de nyid bcu ni yongs su shes/ /dkyil 'khor 'dri ba'i las la mkhas/ /sngags bshad pa yi sbyor ba shes/ /rab tu zhi zhing dbang po dul/ /de 'dra'i mgon la bsams byas nas//slob mar gyur nas brnyas na ni/ /sangs rgyas thams cad brnyas pas na/ /des ni rtag tu sdug bsngal 'thob/ /slob dpon la ni smod pa de/ /yams dang 'tshe ba'i nad rnams dang / /gdon dang rims dang dug rnams kyis/ /rmongs chen de ni 'chi bar 'gyur/ / rgyal po me dang sbrul gdug dang / /chu dang mkha' 'gro rkun po dang / /gdon dang log 'dren rnams kyis kyang / /bsad nas sems can dmyal bar 'gro/ /nam yang slob dpon dag gi ni/ /kun du sems dkrugs mi bya ste/ /gal te rmongs pas byas gyur na/ /dmyal bar nges par 'tshed par 'gyur//mnar med la sogs 'jigs rung ba'i/ /dmyal ba bstan pa gang yin pa/ /slob dpon la ni smod pa rnams/ /der ni gnas par yang dag bshad/ /de bas 'bad pa thams cad kyis/ /rdo rje slob dpon blo gros che/ /dge ba rab tu mi spyoms pa//nam yang smad par mi bya'o/ /bla ma la ni gus bcas yon/ /rjes su mthun par sbyin par bya/ /des ni rims sogs gnod pa rnams/ /phyir zhing 'byung bar mi 'gyur ro/ /rang gi dam tshig slob dpon ni/ /sbyin min bu dang chung ma dang / /rang srog gis kyang brten bya na//longs spyod g.yo ba smos ci dgos/ /gang phyir bskal pa bye ba ni/ /grangs med par yang rnyed dka' ba'i/ /sangs rgyas nyid kyang brtson ldan la/ /tshe 'di nyid la ster bar byed/ /rtag tu rang gi dam tshig bsrung / /rtag tu de bzhin gshegs pa mchod/ / rtag tu bla ma la yang 'bul/ /'di ni sangs rgyas kun dang 'dra/ /mi zad de ni 'dod pa yis/ /cung zad yid 'ong gang dang gang / /shin tu khyad par gyur pa nyid/ /de dang de ni bla mar sbyin/ /de byin sangs rgyas thams cad la/ /rtag tu byin pa nyid du 'gyur/ /de byin bsod nams tshogs yin te//tshogs las dngos grub mchog tu 'gyur/ /de bas slob ma snying rje gtong / /tshul khrims bzod pa'i yon tan ldan/ /slob dpon dang ni rdo rje 'dzin/ /tha dad par ni mi brtag go/ /mchod rten bshigs 'dra'i sdig 'jigs pas/ /grib ma'ang bgom par mi bya na//lham dang stan dang bzhon pa sogs/ /bgom mi bya ba smos ci dgos/ /blo gros chen po dga' sems kyis/ /bla ma'i bka' ni 'bad de mnyan/ /rigs pa yis ni mi nus pa/ /mi nus de la tshig gis sbyang / /bla ma las ni dngos grub dang / / mtho ris dang ni bde ba 'thob/ /de bas 'bad pa thams cad kyis/ /bla ma'i bka' las 'da' mi bya/ /bla ma'i rdzas ni srog ji bzhin/ /bla ma'i sdug pa'ang bla ma bzhin/ /de yi 'khor ni gnyen bzhin du/ /mnyam par gzhag pas rtag tu bsam/ /mal stan 'dug dang sngon 'gro dang //gtsug tor dag dang dpyangs pa dang / /stan la rkang 'jog rked par ni/ /lag gzhag snye bar mi bya'o/ /bla ma dag ni langs pa na/ /nyal dang 'dug par mi bya'o/ /rtag tu de yi bya ba la/ /ldang mkhas phun sum tshogs par bya/ /mchil ma la sogs 'dor ba dang //stan la rkang 'jog rkyong ba ni/ /'chag dang rtsod par smra ba dag /bla ma'i mdun du mi bya'o/ /yan lag mnye dang gar dag dang / /glu dang rol mo mi bya zhing / /gtam gyi sbyor ba mang po rnams/ /thos pa'i nye 'khor du mi bya/ /btud de stan las ldang ba dang / /gus pa yis ni 'dug par bya//mtshan chu 'jigs bcas lam du ni/ /bsgo ba thob na mdun 'gro bya/ /slob dpon gyis ni mthong mdun du/ /blo dang ldan pas lus gcu dang / /ka ba la sogs brten mi bya/ /sor mo'i tshigs ni drang mi bya/ /rkang pa bkru dang lus bkru dang / /dril dang mnye ba la sogs pa//phyag ni sngon du 'gro bas bya/ /de bzhin mthar ni ci bder bya/ /de yi mtshan smos brjod na ni/ /ming mthar zhal sngar ldan pas bya/ /gzhan dag gus par bya ba'i phyir/ /khyad par gyi ni tshig kyang brjod/ /bla ma la ni bka' stsal zhu/ /bka' bzhin bgyid ces brjod byas la//thal mo sbyar zhing ma yengs par/ /bla mas bsgo ba mnyan par bya/ /dgod dang lud pa la sogs pa/ /lag pas kha ni dgab par bya/ /bya ba zin nas 'jam pa yi/ /tshig dag gis ni bzlas par bya/ /mdun du dul bar 'dug pa dang / / gos sogs tshul bzhin bsdams pa dang / /pus btsugs thal mo sbyar ba yis/ /mnyan sogs 'dod la gsol gsum gdab/ /bsnyen bkur spyod pa thams cad la/ /yid ni nga rgyal med par bya/ /ngo tsha 'jigs shing bsdams pa yis/ /bag ma gsar pa'i tshul gnas bya//sgeg pa la sogs bya ba kun/ /ston pa'i mdun du spang bar bya/ /gzhan yang de 'dra'i bya ba ni/ /rang gis brtags la dor bar bya/ /rab gnas dkyil 'khor sbyin sreg dang / /slob ma sdud dang 'chad pa rnams/ /yul der bla ma gnas pa na/ /rjes ma gnang bar mi bya'o//spyan 'bye sogs las ci thob pa/ /de kun bla ma rnams la dbul/ /de yis bstabs pa blangs nas ni/ /gzhan dag la ni ci bder bya/ /bla ma'i slob ma slob mar min/ /slob ma'ang bla ma'i mdun du min/ /bsnyen bkur dag dang ldang ba dang / /phyag sogs byed pa bzlog par bya//slob dpon la ni gang 'bul dang / /bla mas kyang ni gang stsal pa/ /de la btud de lag gnyis kyis/ /blo dang ldan pas blang bar bya/ /dran pa brjed med gyur pa dang / /rang gi kun spyod la brtson pas/ /spun gyi rang spyod las 'das pa/ /dga' bas phan tshun bzlog par bya//na bas bla ma'i bya ba la/ /btud de rjes ma gnang bar yang / /bkag pa rnams ni spyad byas kyang / /dge sems ldan la sdig mi 'gyur/ /'dir mang smra ba ci zhig dgos/ /bla ma dgyes byed gang yin bya/ /mi mnyes byed kun spang bar ni/ /de dang de la 'bad de spyad//dngos grub slob dpon rjes 'brang zhes/ /rdo rje 'dzin pa nyid gsung bar/ /shes nas dngos po thams cad kyis/ /bla ma yongs su mnyes par bya/ /bsam pa dag pa'i slob ma ni/ /dkon mchog gsum la skyabs song la/ /bla ma'i rjes su 'jug pa ni//kha ton bya bar sbyin par bya/ /de nas sngags sogs sbyin pa yis/ /dam chos snod du byas nas su/ /rtsa ba'i ltung ba bcu bzhi ni/ /klag dang 'dzin pa nyid du bya/ /de ltar bla ma'i rjes 'jug slob ma ni/ /ma lus phan bskyed skyon med 'di byas pa'i/ /dge ba mtha' yas bdag gis ci bsags pa//des ni 'gro kun myur du rgyal gyur cig /bla ma lnga bcu pa slob dpon chen po rta dbyangs kyis mdzad pa rdzogs so// //rgya gar gyi mkhan po pad+mA ka ra warma dang / zhu chen gyi lo tsA ba dge slong rin chen bzang pos bsgyur cing zhus te gtan la phab pa'o/