CLOSE WINDOW

D3715
བོད་ཡིག

'gro ba'ang mtha' gnyis bral ba yi/ /lam du myur du 'jug par shog /rdo rje theg pa'i mtha' gnyis sel ba zhes bya ba slob dpon dz+nyA na shrIs bkod pa rdzogs so//[ ]@##/ /rgya gar skad du/ tat+t+wa mArgA daR+sha na nA ma/ bod skad du/ de nyid mthong ba'i lam zhes bya ba/spyan ras gzigs mgon de la phyag 'tshal lo/ /zhi zhing 'byor pa 'gro mgon thugs rje can/ /ri khrod zhabs la gus pas phyag 'tshal te/ /ston las rje yis byin brlabs rgyud kyi don/ /zhabs kyi rdul la ma reg chos 'di ni/ /dad brtson ldan dang bdag nyid brjed 'jigs pas//de nyid mthong ba'i lam 'di 'dir bshad bya/ /thams cad mkhyen pas 'di gsungs pa/ /gdul bya'i rim pas gzhag pa ste/ /dang por gso sbyong sbyin par bya/ /de rjes bslab pa'i gnas bcu nyid/ /de nas bye brag smra la bslab/ /mdo sde pa yang de nas bstan//rnal 'byor spyod pa de bzhin te/ /de nas dbu ma pa yang bstan/ /sngags kyi rim pa kun shes nas/ /dgyes pa'i rdo rje'i dbang bskur sbyin/ /dgyes rdor rgyud nas de bstan pas/ /gso sbyong gnas bcu bye brag dang / /chung ba'i mdo sde nyan thos lam/ /theg pa chen po'i mdo sde dang //rnal 'byor spyod dang dbu ma'i chos/ /sngags gzhan dgyes rdor brjod pa nyid/ /bde ba'i lam dang 'bras bur bsngags/ /de la dang po nyan thos dang rang sangs rgyas pa dbang po rnon pos/ mdo dang 'dul ba ltar yang shes par bya'o/ /'dir rgyud ltar skal ba dang ldan pas bla ma mnyes pas bsgrub ste/de yang dang po/ thabs 'di rdzogs pa'i sangs rgyas kyis/ /skas kyi rim pa lta bur gsungs/ /zhes pas theg pa gsum la bslabs par bya ste/ nyan thos dang / rang sangs rgyas gnyis la 'jug par 'dod pas dang po gso sbyong bya ba dang / gnyis pa bslab pa bsrung ba dang / gsum pa chos la bslab pa'o/ /de yang byams pas zhus pa'i mdo las/ dang po skyabs dang gso sbyong bya/ /gnyis pa bslab pa'i rim pa bzhin/ /gsum pa chos dag de la bstan/ /zhes pas so/ /skyabs la bdun te/ dang po dang / lus ngag yid kyi sbyor ba dang /rten dang / de la mchod pa dang / dus dang / yon tan dang / mi nyams par bya ba'o/ /dang po la gnyis te/ shes pa dag pa'i mkhan po dang / slob dpon no/ /sbyor ba ni lus gus pa dang / ngag 'jam pas brjod pa dang yid chos la dag pa dang gsum mo/ / rten mchog tu gyur pa ni dkon mchog go/ /rten la mchod pa ni ci 'byor pa'i mchod pas lus dbul ba'o/ /dus ni 'di nas zhes pa dang / ji srid 'tsho'i bar gnyis so/ /yon tan ni sngon gyi sdig pa thams cad 'byang zhing phyi ma'i sdug bsngal thams cad zad pa bde ba'o/ /mi nyams par bya ba la gsum ste/sangs rgyas la skyabs nas 'jig rten pa'i lha spangs pa dang / chos la skyabs nas srog mi gcod pa dang / dge 'dun la skyabs nas mu stegs dang mi 'grogs pa'o/ /bslab pa bsrung ba la gnyis te/ rten dang bslab pa dngos so/ /rten la gsum ste/gzhan las skye ba dang / rang las skye ba dang / gnyi ga las skye ba'o/ /gzhan las skye ba la gsum ste/ mkhan po dang slob dpon te/ dang po bar chad med pas tshul khrims thob pa dang / nus pa dang ldan pas sdom pa la gnas pa dang / bdag dang gzhan gyi nyes pa 'chos dgos pas mkhas pa ste/de gsum dang ldan pa las bslab pa skye'o/ /rang las skye ba la gnyis te/ spyi dang bye brag go/ /spyi la drug ste/ 'gro ba khyad par 'phags pa ni mi tsam ma yin te/ gling khyad par du 'phags pa'i gling 'di tsam yin te/ rigs khyad par du 'phags pa rgyal rigs dang /bram ze'i rigs dang / rje'u'i rigs so/ /rigs tsam ma yin te/ gzugs khyad par du 'phags pa skyes pa dang bud med tsam yin te/ lus khyad par 'phags pa dbang po tshang ba tsam gyis mi chog ste/ shes pa dang sems khyad par du 'phags pa rgan gzhon spangs nas lus dar ba'o//bye brag spyi dang ldan pa des nam blangs pa'i dus der skye'o/ /gnyi ga las skye ba la gsum ste/ mkhan slob la the tshom med pa dang / chos dang chos kyi yon tan la the tshom med pa dang / bslab pa bsrungs pa dang thob par the tshom med pas skye'o//bslab pa dngos la brgyad de/ rten gyi khyad par gyis bslab pa'i rim pa dang / bslab par bya ba'i ngo bo dang / nyes pa'i tshad dang / bcos pa'i thabs dang / nges pa skyes pa dang / dus ma nges par bslab pa dang / yon tan dang / thob pa'i dus bstan pa'o/ / bslab pa'i rim pa la so so thar pa rigs bdun gyi rim pas bslab pa ste/ sde pa'i 'dod pa mi mthun te/ yang 'dir bsnyen gnas dang / dge bsnyen la bzhi ste lnga dang / dge tshul dang / dge slong dang bdun gyis bslab pa'o/ /ngo bo la gnyis te spyi dang bye brag go/ /spyi la yang gnyis te rtsa ba'am rang bzhin gyi sdig pa sdom pa dang /yan lag gam bcas pa'i sdom pa'o/ /bye brag ni bsnyen gnas la rtsa ba bzhi ste brgyad do/ /sna 'ga' bsrung ba'i dge bsnyen la srog mi gcod pa dang / rtsa ba gzhan gang rung cig /phal cher bsrung ba la rtsa ba gsum/yongs su rdzogs pa la rtsa ba gsum dang 'dod log bsrung / tshangs par spyod pa'i dge bsnyen ni rtsa ba bzhi dang chang bsrung ba'o/ /dge tshul gyis rtsa ba bzhi yan lag bdun/ chang dang glu gar rtse 'jo dang / /rgyan dang kha dog 'chang ba dang / /mal stan chen po gser dngul gyi khri dang /khri stan mthon po khru gang pa yan chad spang ba dang / phyi dro kha zas dang / gser dngul 'chang ba spang ba'o/ /mkhan po las thob pa'i rtags gsum ste/ khyim pa'i rtags gtsug phud dang / gos dkar po spangs te/ rab tu byung ba'i rtags skra dang kha spu bregs nas gos ngur smrig gon pa'o//phyi rol mu stegs pa'i rtags stod gos g.yas la 'gel ba dang / smad gos dkris pa spangs nas nang ba sangs rgyas pa'i rtags stod gos g.yon du 'gel ba dang / smad gos che bas zur du spung ba'o/ /mi dge ba 'jig rten pa'i rtags de dag spangs nas dge ba dge 'dun gyi rtags gseg shang dang lhung bzed gri khab la sogs pa mkho ba'i rdzas bzung ba'o//dge slong gis shes rab can dang / dngos kyi rtsa ba bzhi dang / khu ba phyung ba la sogs pa lhag ma bcu gsum dben pa dang / skyabs ma nges pa gnyis dang 'chang ba 'bral ba la sogs spang ba'i ltung byed sum cu dang /ltung byed dgu bcu dang / grong du nyal ba la sogs pa so sor bshags pa bzhi dang / sham thabs la sogs pa bslab par bya ba brgyad cu rtsa gnyis dang / mngon sum du nga rgyal mi bya ba la sogs te nyis brgya lnga bcu rtsa gsum bka' lung nas shes par bya'o/ /'dir 'og nas ston pa'i lus ngag yid kyis mi bya ba dang bya ba rnams so//de nas bslab pa'i gnas bcu sbyin/ /zhes pas mi dge ba bcu spangs la dge ba bcu bsten pa'o/ /nyes pa'i tshad la gnyis te/ rtsa ba dang yan lag gi'o/ /rtsa ba la lnga/ rtsa ba dang 'dra bar sbyor ba dang / dngos dang mjug tshang na ltung ba chen pos nyams/dngos mjug gnyis byung na ltung ba sbom po ste nyams/ sbyor ba dang dngos byung na chung ngu na te nyams/ sbyor ba dang mjug byung na ltung ba phra mo ste nyams/ re re byung na ltung byed de nyams/ lhag ma dang ma nges pa la sogs pa'i yan lag rnams la yang lnga ste/sbyor ba dang / dngos dang mjug rdzogs na nyes pa chen po ste nyams/ dngos mjug gnyis byung na nyes pa sgom po ste nyams/ sbyor ba dang dngos byung na nyes pa chung ngu na te nyams/ sbyor ba dang mjug gnyis byung na nyes pa phra mo ste nyams/ re re byung na nyes pa med do/ /bcos pa'i thabs la gnyis te/thabs dngos dang dus so/ /thabs la bcu gcig ste rtsa ba dang yan lag gnyis yan chad dam/ bzhi man chad byung na 'gyod pas lan gsum du bskyar zhing blang / rtsa ba'i sbom po byung na sngon bzhin du blang / chung ngu na byung na slob dpon las de nyid blang / phra mo byung na slob dpon la bshags pas thub/ltung byed byung na 'gyod pa dang bsdams sems kyis thub/ nyes pa chen po byung ba sngon bzhin blang / nyes pa sbom po slob dpon las blang / nyes pa chung ngu na slob dpon la bshags/ nyes pa phra mo 'gyod pa dang bsdams sems kyis thub nyes med phyis ma byas pas thub/chang rtsa ba dang 'dra'o/ /rtsa ba dang yan lag ltar kun btang sems kyis btang na blang du med/ rgas pa dang na ba dang gzhan gyi dbang la nyes pa med/ dus la bzhi ste/ bsnyen gnas kyi skabs dang ldan te/ nyin skabs med na zla gcig gam phyed dam brgyad kyi dus de'o//dge bsnyen skabs dang ldan na thun gnyis pa la blang / skabs med na zhag lnga la blang / dge tshul skabs dang ldan na zhag lnga tshun chad la blang / mi ldan na zla ba gcig tshun chad na blang / dge slong skabs dang ldan na de nyid nas zhag bcu mi ldan na zla ba bdun tshun chad/nges bskyed pa dus de la rtsa ba dang / yan lag nyams pa/ thabs des bcos pas thar pa thob ste/ sgrung gi dpe re re bstan pa'o/ /de yang srog gcad pa las thar pa/ dge slong zla ba'i 'od bya ba rigs bram ze yin pas/ lo nyi shu rtsa gcig nas bzhi bcu'i bar nyi shur sdom pa bsrungs te/bzhi bcu lon nas pha kun du 'khor zhes bya bas snyan ngag yod pas rgyal po'i pho brang du snyan ngag bton pas/ rgyal po gzugs can snying po shin tu dga' nas/ go la bdun dang bcas pa byin nas bram ze gzhan cig gis gcig lam du khyer bas khros nas 'thabs pas kun du 'khor ba gsod do//bu dge slong sems 'khrugs te sbyor ba gsang bas las kyi spu gri khyer te/ bram ze khrus byed sar bsgugs te spu gri mngad nas bdar ba dang / bram ze khrus las byung ba dang spu gris ske bcad de bsad do/ /mjug 'gyod pa med par dga' bar gyur te/ ro yang gar dgar gzhag go/ /der kun gyis ro mthong nas 'di sus bsad snyam nas ngas pha'i mi shar bsad ces bsgrags so/ /der kun gyis kyang dpyas par gyur/ rtags kyang gzhag pa las/ yul der nad 'go ba byung ste/ kun ka na ba dang / dka' thub med pa de yang na ba dang nad drag pos gzir bas shin tu 'gyod pa'i sems skyes te/lung nas sangs rgyas 'od ma'i tshal na bzhugs pa la gong gi nyes pa rnams zhus pas sangs rgyas kyis gnad nas bslab pa bskyar te/ dge slong dri ma dang bral bar gyur te ma ltung ngo / /yul yangs pa can gyi grong na rje'u'i rigs dge slong rin chen srung zhes bya ba cig yod pa la bsod snyoms la phyin nas khyim bdag gi mdzod mthong ste/lha khang gi logs su sbyor ba la dong brkos te gnas de nas ma ga d+hAr sangs rgyas kyi spyan sngar 'gro zhes dge 'dun la bsgrags nas song ste/ de nub nam phyed na bang mdzod phug ste/be+e DUr+ya dang / pad+ma rA ga dang / gser dngul rkus nas da ci'i dong du sbas te/ mjug 'gyod pa med par dga' bar gyur te/ /de longs spyod spyod pa las nub mo rkun po rkun 'phyan gzhan dang phrad nas nor khyer ro/ /lus gtag pa las shin tu 'gyod nas sangs rgyas kyi spyan sngar phyin te/gong gi nyes pa bshags nas sdom pa blangs te sangs rgyas kyis gnang nas dge slong rin chen 'byung gnas su gyur te ltung ba med do/ /grong khyer ser skyar dge slong shes grags kyis bsod snyoms byed pa las/ re zhig na smad 'tshong ba 'byor pa rnyed bya ba'i sgor phyin te bslangs nas yon byin pas/smad 'tshong ma de shin tu legs par mthong ste/ chags pa'i sems kyis sbyor ba slar log nas ka bya ri'i ras g.yar nas gyon te/ 'gron bu ka ho na cig khyer nas srod la phyin te nga nyon byas pa las yar shog zer te phyin nas chags pa skye ba'i thabs sna tshogs byas dngos su nyon mongs pa la zhen nas bsrubs te khu ba phyung ngo //mjug bde bar tshor nas phyis kyang phrad do/ /ring zhig na ro mdze byung ste sdug bsngal bar gyur nas 'gyod de sangs rgyas kyi spyan sngar phyin nas sa la 'gyel te nyes pa rnams bshags nas bslab pa bskyar te/dge slong zhi ba'i ye shes su gyur te ltung ba med do/ /rgyal byed kyi tshal du dge slong byang chub 'byung gnas su grags pa rgyal rigs su gyur pa cig byung bas dad pa shin tu che nas khar+sa pa Nar phyin pas spyan ras gzigs mthong nas yul de la khar+sa pa Na zhes btags so/ / slar log nas ma ga d+hAr phyin te/ bstan bcos mang po byas nas de nas nga la sangs rgyas mang pos bstan zhes bsgrags pas/ slob ma mang po yod pa las/ sangs rgyas kyis mkhyen nas ma btang ba las nor sa 'og tu sbas nas phyin pa dang / sgyu ma byas pa'i sbyor ba mang po byas nas chos 'chad pa'i sbyor ba dang /dngos su kun bsrubs pa mang ba dang / mjug 'gyod pa med par dga' bas longs spyod spyod pa la rgyal po'i chad pa byung la khad pa dang tshor nas shin tu 'gyod pa skyes te/ sangs rgyas kyi spyan sngar phyin te nyes pa kun bshags te slar bslab pa gsos nas dge slong rdo rje snying por gyur te ltung ba med do//gzhan yang 'dul ba dang mdo nas 'gyod de/ slar gsos pas thar pa mang po dang / gtan gyi the tshom med par phyir bcos so/ /yan lag gi nyes pa tsho yang bcos pas yang bar shes par bya'o/ /chang rtsa ba ltar shes par bya'o//'dir theg pa chen po dang yang sbyar bar bya'o/ /dus ma nges pa la nyin gcig gam zhag gcig gam zhag bdun nas ji srid 'tsho'i bar du bsrung bar bya'o/ /yon tan la shes rab can gyis re re'i bye brag mdor blta'o/ /'dir spyi tsam bstan pa ni dge bsnyen la sogs kyi gzhi mi las thob pa dang /lam rten dang ldan nas bsrung ba/ 'bras bu dgra bcom pa thob pa'o/ /dge slong gi las la dge slong gi mdo dang 'dul bar blta'o/ /'dir gsum ste/ yon tan che ba dang / dus nges pa dang / yon tan nges pa'o/ /yon tan che ba la gnyis te/bdud kyis bar mi chod cing lam nye ba dang / 'bras bu nye ba'o/ /lam nye ba la yang gsum ste/ sangs rgyas la skyabs pas 'jig rten pa'i lha spangs pas/ phyi mar dga' ldan du byams pa dang mjal lo/ /chos la skyabs pas srog gcod pa spangs pas byams pa las chos nyan pa dang /dge 'dun la skyabs te mu stegs dang ma 'grogs pas byams pa'i 'khor gyi dge 'dun dang 'grogs pa'o/ /'bras bu la gsum ste/ so sor thar pa'i bslab pa rigs bdun rdzogs pas bdag nyid sangs rgyas su gyur pa dang /lus ngag yid kyis sangs rgyas kyi chos spyad pas bdag nyid sangs rgyas pas chos ston pa'o/ /dben par gcig pu bsten pas bdag sangs rgyas nas dge 'dun gyi 'khor phyug pa'o/ /dus skye ba bdun na dgra bcom pa thob nges so/ /yon tan nges pa la gnyis te/rgyu dang 'bras bu'o/ /rgyu skye ba bdun du rten khyad par du 'phags pa drug dang ldan nges la 'bras bu lhag bcas dang lhag med gnyis mthong nges pa'o/ /thob pa'i dus la gsum ste/ sbyor ba dang / blang ba dang / thob pa dngos so/ /sbyor ba la gnyis te/ gong gi dbang po la sogs pa'i skyabs su 'gro ba'i sbyor ba bdun pa dang /skyabs dngos so/ /dngos la slob dpon dgongs su gsol/ bdag ming 'di zhes bgyi ba dus 'di nas bzung nas/ ji srid 'tsho'i bar du rkang gnyis rnams kyi mchog /phyogs bcu'i sangs rgyas la skyabs su mchi'o//'dod chags dang bral ba rnams kyi mchog /phyogs bcu'i chos la skyabs su mchi'o/ /tshogs rnams kyi mchog /phyogs bcu'i dge 'dun la skyabs su mchi'o zhes lan gsum bskyar ro/ /de la yang dbang po dang / bskyab par bya ba dang / dus dang / skyob mkhan dang /grangs dang / dgos pa shugs kyis bstan pa ste drug go/ /blang ba dngos la skyabs pa'i yon tan shes pas blang ba las so sor thar pa'i bslab pa'i rigs bdun te/ bsnyen gnas blang ba la rang bzo min pa dang / blang ba gnyis rang bzo min pa la yang dbang po la sogs pa drug ste/slob dpon dgongs su gsol/ bdag ming 'di zhes bgyi bas dus 'di nas bzung nas/ ji srid 'tsho'i bar du sngon gyi dgra bcom pa rnams kyi bslab pa la rjes su slob bo/ /rjes su sgrub bo/ /rjes su bgyid do zhes lan gsum bskyar ro/ /blang ba la yang dbang po la sogs pa drug ste/slob dpon dgongs su gsol/ bdag ming 'di zhes bgyi bas dus 'di nas bzung nas ji srid dam/ lo'am zla ba sngon du bstan pa ltar ro/ /zla ba byung ngo cog gi ngo la stong ngam/ nya'am brgyad kyi bsnyen gnas srung bar 'tshal bas de'i nyin par dang mtshan mo rtsa ba'i dang po srog gcod pa spangs nas slar ldog par bgyid do zhes lan gsum brjod do//de bzhin du gcig gam gnyis sam gsum bsrung ba la rtsa ba nas re rer gsum mam yan lag tu bcas par/ slob dpon dgongs su gsol/ bdag ming 'di zhes bgyi bas dus 'di nas bzung nas ji srid 'tsho'i bar du zla ba byung ngo cog gi ngo la/nya'i bsnyen gnas bsrung bar 'tshal bas/ de'i nyin par dang mtshan mo rtsa ba'i dang po srog gcod pa dang / rtsa ba gnyis pa ma byin par len pa dang / rtsa ba gsum po mi tshangs par spyod pa dang / rtsa ba bzhi pa brdzun du smra ba dang / yan lag gi dang po 'bru'i chang dang / bcos pa'i chang dang / myos par 'gyur ba'i chang dang / yan lag gnyis pa glu gar rtsed 'jo rgyan kha dog 'chang ba dang / yan lag gsum pa mal stan dang / khri stan dang / yan lag bzhi pa phyi dro'i kha zas spangs nas slar ldog par bgyid do//sngon gyi dgra bcom pa kun gyi bslab pa la rjes su slob bo/ /rjes su sgrub bo/ /rjes su bgyid do/ /thabs yin no/ /legs so zhes so/ /bsnyen gnas kyi bslab pa la 'thob bo/ /slob dpon gyis bsnyen gnas su gzung du gsol lo/ /zhes lan gsum brjod nas phyag lan gsum bya'o//thob pa dngos la drug ste/ skyabs 'gro sbyor ba sngon du song ba dang / blang ba dang / slob dpon la the tshom ma zos pa dang / chos la the tshom ma zos pa dang / ma thob par the tshom ma zos pa dang / dus de nyid du thob pa'o/ /dge bsnyen la sogs pa drug po yang /don drug po de dang ldan nas thob ste/ 'dra bar shes par gyis shig /dge bsnyen gyi skyabs 'gro yang gong ltar blang ba/ slob dpon dgongs su gsol/ bdag ming 'di zhes bgyi ba dus 'di nas bzung nas ji srid 'tsho'i bar du sngon gyi dgra bcom pa rnams kyi bslab pa la rjes su slob bo//rjes su sgrub bo/ /rjes su bgyid do zhes lan gsum brjod de/ dang po la sogs pa drug gong bzhin ldan no/ /slob dpon dgongs su gsol/ bdag ming 'di zhes bgyi ba dus 'di nas bzung nas ji srid 'tsho'i bar du sna 'ga' bsrung ba'i dge bsnyen bgyid pas rtsa ba'i dang po srog gcod pa spangs nas srog gcod pa las slar ldog par bgyid do zhes lo zla ba'i grangs kyis gsum du brjod do//slob dpon dgongs su gsol/ /bdag ming 'di zhes bgyi ba dus 'di nas bzung nas ji srid 'tsho'i bar du sna 'ga' bsrung ba'i dge bsnyen bgyid pas rtsa ba gnyis ma byin par len pa spangs nas slar ldog par bgyid do//sngon gyi dgra bcom pa rnams kyi bslab pa la rjes su slob bo/ /rjes su sgrub bo/ /rjes su bgyid do/ /thabs yin no/ /legs so/ /sna 'ga' bsrung ba'i dge bsnyen du gyur/ slob dpon gyis sna 'ga' bsrung ba'i dge bsnyen du gzung du gsol zhes lan gsum brjod do//phyag gsum bya'o/ /phal cher bsrung ba'i dge bsnyen du gyur pa skyabs 'gro gong bzhin song ba dang / rang bzo med pa'i bslang ba yang 'dra bas song nas slob dpon dgongs su gsol/ /bdag ming 'di zhes bgyi ba dus 'di nas bzung nas ji srid 'tsho'i bar du phal cher bsrung ba'i dge bsnyen bgyid pas rtsa ba dang po srog gcod pa spangs nas slar ldog par bgyid do zhes lan gsum bzla'o//de bzhin du rtsa ba gnyis pa ma byin par len pa dang / gsum pa 'dod pas log par g.yem pa spangs nas slar ldog par bgyid do zhes lan gsum brjod nas/sngon gyi dgra bcom pa rnams kyi bslab pa la rjes su slob bo/ /rjes su sgrub bo/ /rjes su bgyid do/ /thabs yin no/ /legs so/ /phal cher bsrung ba'i dge bsnyen du gyur ro/ /slob dpon gyis phal cher bsrung ba'i dge bsnyen du gzung du gsol zhes brjod la phyag lan gsum bya'o//yongs su rdzogs pa'i dge bsnyen la gzhan sngon du song bas/ slob dpon dgongs su gsol/ bdag ming 'di zhes bgyi ba dus 'di nas bzung nas ji srid 'tsho'i bar du yongs su rdzogs pa'i dge bsnyen la gnas pas rtsa ba'i dang po srog gcod pa dang /gnyis pa ma byin par len pa dang / gsum pa 'dod pas log par g.yem pa dang / bzhi pa brdzun du smra ba spangs nas slar ldog par bgyid do zhes re re la gsum gsum brjod la/ sngon gyi dgra bcom pa rnams kyi rjes su slob bo/ /rjes su sgrub bo/ / rjes su bgyid do/ /thabs yin no/ /legs so/ /yongs su rdzogs pa'i dge bsnyen du 'gyur ro/ /slob dpon gyis yongs su rdzogs pa'i dge bsnyen du gzung du gsol zhes bya'o/ /tshangs par spyod pa'i dge bsnyen gyis kyang gzhan sngon du song bas/ slob dpon dgongs su gsol//bdag ming 'di zhes bgyi ba dus 'di nas bzung nas ji srid 'tsho'i bar du tshangs par spyod pa'i dge bsnyen la gnas pas rtsa ba'i dang po srog gcod pa dang / rtsa ba gnyis pa ma byin par len pa dang / gsum pa mi tshangs par spyod pa dang / bzhi pa brdzun du smra ba dang /yan lag gi dang po myos pa'i chang dang / bcos pa'i chang dang / 'bru'i chang dag spangs nas slar ldog par bgyid pa lags so zhes re re la gsum gsum brjod na/ sngon gyi dgra bcom pa rnams kyi bslab pa la rjes su slob bo/ /rjes su sgrub bo/ /rjes su bgyid do/ /thabs yin no//legs so/ /tshangs par spyod pa'i dge bsnyen du 'gyur ro/ /slob dpon gyis tshangs par spyod pa'i dge bsnyen du gzung du gsol/ /dge tshul gyis kyang gzhan gong ltar mkhan po slob dpon dad pa'i dge 'dun gyi spyan sngar slob dpon dgongs su gsol/ bdag ming 'di zhes bgyi ba dus 'di nas bzung nas ji srid 'tsho'i bar du dge tshul la gnas pas rtsa ba'i dang po srog gcod pa dang /gnyis pa ma byin par len pa dang / gsum pa mi tshangs par spyod pa dang / bzhi pa brdzun du smra ba dang / yan lag dang po 'bru'i chang dang / bcos pa'i chang dang myos par 'gyur ba dang /yan lag gnyis pa glu gar rtse 'jo dang / /yan lag gsum pa rgyan dang kha dog 'chang ba dang / bzhi pa mal stan mthon po dang / lnga pa khri stan chen po dang / drug pa phyi dro'i kha zas dang / bdun pa gser dngul 'chang ba spangs nas slar ldog par bgyid lags so zhes re re la gsum gsum brjod do//sngon gyi zhes pa la sogs pa gong ltar brjod do/ /dge slong dngos kyi las kyi cho gas blang / 'dir skyabs dang legs par brjod pa gong ltar gsum brjod pa dang / gong gi rtsa ba bzhi dang / lhag ma dang ma nges pa gnyis dang /spang ba'i ltung byed la sogs pa las ldog par brjod do/ /gso sbyong zhes bya ba lo'am/ zla ba'am nya stong gso zhing sbyong ba'o/ /nyams pa yang bcos su yod pas kyang gso sbyong ngo / /dus ma nges pa zla ba'am lo tsam srung ba la yang gso zhing sbyong ba legs so/ /'dir 'og gi theg pa gsum 'dod pas dus snying po byang chub la mchis kyi bar du brjod cing khas blang ngo //sems bskyed pa'i tshe 'og gi gdams ngag gis byang chub snying por shes par bstan par bya'o/ /mdo nas kyang nyes pa skye bas blta'o/ /gsum pa chos la bslab pa la bzhi ste/ spyod lam dang / lta ba dang / bsgom pa dang / skyon spang ba'o/ /spyod lam la bzhi ste/ bsnyen gnas pas spyad pa dang / dge bsnyen gyis spyad pa dang / dge tshul pas spyad pa dang / dge slong gis spyad pa'o/ /de la bsnyen gnas pas spyad pa ni kun du bzang po'i mdo las bsnyen gnas pa'i gang zag gis/de dus lus ngag yid kyis sgrim zhes pas lus kyis khrus dang phyag bya ba dang / ngag gis 'don pa dang / snying po bzlas pa dang / yid kyis nyes pa shes pas bslab pa bsrung ba'i sems dang / yon tan shes pas yi dam gyi lha dran pa dang / lus ngag gis dge ba byas pa dang / bsrung ba'i nyi ma yid la bya ba'o/ /dge bsnyen gyis spyad pa la byams pas zhus pa'i mdo nas/ dge bsnyen dad dang ldan pa yis/ /las min spang zhing dge bcu bsnyen/ /zhes pas ba lang dang / bya phyag gso ba la sogs pa bcu mya ngan las 'das pa'i nang nas bstan pa ltar spang ba'o//dge ba bcu ni kun dga' bos zhus pa'i mdo nas bstan pa ltar spyad de/ srog bskyab pa dang / 'byor pa sbyin par gtang ba dag/ dkon mchog mchod pa dang / mchod rten dang / sku gzugs dang lha khang la sogs pa la na bzang dbul ba dang /bskor ba dang / phyag dang / kha ton klag pa gdang / snying po dang / bstod pa bya ba dang / zhig pa gso ba dang / sku dkar byug pa dang / nya mo btsun pa'i dge ba bya ba dang / 'os pa'i pha ma dang drin can la rim gro bya ba'o/ /dge tshul gyis spyad pa la dge tshul dngos kyi 'dul bar blta'o//'dir kA ri kA nas/ nam gyi cha smad mal langs nas/ /nam langs bar du kha ton bya/ /gdong dang so yi dri bkrus la/ /de bzhin gshegs la gus phyag 'tshal/ /zhes pas lus ngag yid kyis bya ba ste lus kyi nyes pa 'phel bar mi bya ba la bzhi ste/nyin par 'jig rten pa ma dad pa spang ba dang / mtshan mo phyi sgo phyin chad du mi nyal ba dang / 'gro ba'i tshe bslab pa dran pas bag ma ltar 'gro ba dang / za ba dang 'dug pa dag bag med par mi bya'o/ /dge ba 'phel bas tho rangs srod tsog tsog po dang / khrus dang rten la phyag dus dang skabs su bya'o//ngag gis mi smra ba drug ste/ mi shes pa dang / mi khro ba dang / mtshang mi 'dru ba dang / phyar ka mi gtang ba dang / rta gad mi bya ba dang / gtsug lag khang dang dge 'dun mang po'i gseb tu gcam bskyung ba'o/ /ngag gis brjod par bya ba kha don dang / klag pa dang / snying po brjod pa dang / bstod pas bstod pa dang / zhi bas blang ba dang / dang bas chos zhu ba dang drug go/ /yid la gnyis kyi nyes pa spang ba la yang gnyis te/ mchod rten dang / gtsug lag khang dang / dge 'dun gyi dkor la gnod sems dang / rku sems spang ba dang /bslab pa nyams pa'i nyes pa dran par byas la bslab pa bsrung ba'o/ /yon tan dran pas bsam pa lnga ste/ lus ngag gi dge ba'i yon tan dran par bya ba dang / 'khor ba sdug bsngal bar shes par bya ba dang / byas pa mi rtag pa dang / mya ngan las 'das pa zhi ba dang / stong pa bdag med par shes par bya ba'o//dge slong gi spyad pa la dge slong dngos dang / shes rab can gyis 'drul bar yang blta'o/ /'dir lha'i dbang pos zhus pa'i mdo las/ dge slong rnams kyis bya ba ni/ /mi dge bcu spang dge bcu bsgrub/ /de yang lus ngag yid kyis te/ /ma yengs spyod lam rnam bzhir spyod//ces pa dang / dgyes pa'i rdo rje nas/ de nas bslab pa'i gnas bcu po zhes pas/ dge ba bcu bsgrub ste/ de yang mi dge ba bcu mi 'phel bar bya ba'i phyir/ dga' bos zhus pa de nyid las mi dge ba bcu 'phel bas dge slong rnams nyes byed bcu spongs shig /bcu gang zhe na/ srog gcod pa'i nyes byed ma bsams par dge slong rnams lus kyi bya ba byed pa dang / ma byin par len pa'i nyes byed gzhan gyi gzugs kyi yul la reg pa dang / mi tshangs par spyod pa'i nyes byed bud med kyi yul lnga la spyod pa dang / brdzun gyi nyes byed ma bsams par smra ba dang /phra ma'i nyes byed mang bar smra ba dang / ngag 'khyal pa'i nyes byed bre mor smra ba dang / tshig rtsub mo'i nyes byed mi dga' bar smra ba dang / brnab sems kyi nyes byed bdag la dgos sems 'chang ba dang / gnod sems kyi nyes byed gzhan la log par spyod pa'o//log par lta ba'i nyes byed dngos po la chags pa rnams spongs shig ces bka' stsal pa'o/ /mi dge bcu 'gags pas mi dge ba dang bral nas dge bcur 'gyur ba'o/ /de ni bslab pa'i gnas bcu zhes pa'o/ /de nas bye brag pa la bslab ces pa la yang de nyid nas/ dge bcu rgyas phyir chos gnyis dang / /spyod lam bzhi ru dge slong spyod/ /ces pas/ de yang chos gnyis po nyes pa dang / mi dge ba spyod lam rnam bzhis mi byed pa dang / yon tan dge ba 'phel ba spyod lam bzhis bya ba ste/ de yang de nyid nas/ dge slong byang chub sems ldan pas//rtag tu dben par bsdad par bya/ /sems kyis bdag gzhan don byed la/ /dge slong zhes ni ngas brjod do/ /zhes pas de yang sems gnyis bskyed nas theg pa gsum dang ldan zhing dben par gnas nas mi dge ba mi 'byung zhing dge ba 'phel te/ gal te gzhan don sems kyis byed kyang dngos su mi nus pa dang /dben par mi gnas pas 'di ltar bya ste/ spyod lam bzhis mi bya ba la gnyis te/ yid kyis dran pa lus kyis mi bya ba dang / ngag gis mi bya ba dang / lus kyis gzhi la sdod pa dang / 'gro ba dang / zas za ba'i tshe dang / nyal ba'i dus so//sdod pa la nyes pa 'byung ba dang / nyes pa chen po 'byung nas bsdad pa gnyis kyi nyes pa 'byung bas mi bsdad pa la bcu gnyis te/ 'greng ba dang / lto rgyal dang / snyes pa dang / khyi tshugs dang / sa rko ba dang / rtswa gcod pa dang / chu dang / me dang / khyi dang / bu chung la rtse ba dang / 'jig rten dang bud med nang du sdod pa spang ba'o/ /nyes pa chen po 'byung bas mi bsdad pa la gnyis te/ bsdad sa min pa dang / rten no/ /rten la dgu/ mchod rten dang / lha khang dang / sku gzugs dang / glegs bam dang / mkhan po dang / slob dpon dang / dge 'dun dang / pha ma dang / rgyal po dang / rgan po'o/ /bsdad sa min pa la gnyis te/ g.yas dang mdun du mi bsdad pa'o/ /'gro ba la gnyis kyi nyes pa 'byung bas mi 'gro ba la bcu bdun te/ mu stegs dang 'grogs te mi 'gro/ rgyug cing rgyug cing mi 'gro/ mu stegs kyi nang du mi 'gro// sgyu ma mkhan dang mi 'grogs nang du mi 'gro// de bzhin du tshong pa dang mi 'grogs nang du mi 'gro// dmag dang mi 'grogs nang du mi 'gro// shan pa dang smad 'tshong ma dang mi 'grogs nang du mi 'gro// bud med dang mi 'grogs nang du mi 'gro/ /phyogs su lta ba dang yul yengs pas mi 'gro// gos med pa dang / stod gos med pa dang / gzhan yang rtsod pa'i sar mi 'gro ba dang / 'jigs pa dang / don med pa dang / yang ba dang mi 'grogs/ yang ba'i sar mi 'gro ba'o/ /nyes pa chen po 'byung bas mi bya ba gnyis te/ rten gong ltar dgu/ mi 'gro ba lnga/ dngos sam grib ma la mi 'gom/ g.yon bstan la mi 'gro// steng nas mi 'gro// mdun nas mi 'gro// rjes non pas mi 'gro ba'o/ /ngag la yid kyis zin par bya ste/ mi smra ba la bzhi ste/ sdod pa'i tshe mi smra ba la gnyis te/ nyes pa dang nyes pa chen po las mu stegs la sogs pa bden yang mi smra ba dang /'dri ba'i lan 'debs pa dang / zhi ba dang 'jam pa dang / ngal bas smra ba'o/ /nyes pa chen po 'byung bas mi smra ba la gsum ste/ 'greng ste sdod pa la sogs pas chos mi bshad pa dang / mchod rten la sogs pa la rgyu 'bras la skur pa dang /bre mo'i gtam mi bya'o/ /brdzun sogs gong du bkag pa rnams kyang smra bar mi bya'o/ /'gro ba la yang de bzhin te/ za ba dang nyal ba la yang de bzhin no/ /nyes pa dang / nyes pa chen po dag shes te smra ba'i tshod rig par bya'o/ /lus kyis zas za ba'i tshe na yang gnyis te/nyes pa nyi shu ste/ 'greng ba la sogs pa bcus mi bza' ba dang / 'gro zhing mi bza' ba dang / smra zhing dang / kham che ba dang / chung ba dang / 'gram pa g.yas g.yon spo ba dang / rgan smras dang / rings pas dang / 'phro gcod pa dang / ma 'grangs par dang /yang pa'i sar za ba spang ba'o/ /nyes pa chen po 'byung bas spang ba la lnga/ /dkon mchog la bsngos pa za ba dang / mkhan po dang slob dpon la dad pas bsngos pa za ba dang / pha dang ma la bsngos pa za ba dang / gtor ma dang byin gyis rlob pa za ba dang / rgyal po dang grong dpon la bsngos pa za ba spang ba'o//nyal ba'i tshe'i lus la yang gnyis te/ nyes pa la dgu ste/ gan rkyal du mi nyal/ kha bub dang / gos med pa dang / dbang po lag pas gzung ba dang / nub tu mgo bstan pa dang / 'jig rten pa'i grong dang / 'jig rten pa'i mi mang po nang dang / nad 'phel pa'i sa dang /grogs med par mi nyal ba'o/ /nyes pa chen po 'byung bas mi nyal ba la gsum ste/ gong gi lha khang la sogs pa'i rten du 'os pa'i steng dang / rkang pa bstan pa dang / rgyab bstan pas mi nyal ba'o/ /na'am sa ye ma rnyed dam/ srog gi bar chad du 'gyur ram dbang med na/mdo bzang po 'phel ba nas/ dang po pa yi chos rnams ni/ /bar chad med par shes byas la/ /gso sbyong bya zhing bslab pa bsrung / /rim gyis rim gyis goms te bla/ /zhes pa dang / gso sbyong bya zhing skabs dang sbyar ro/ /bye brag kho na dbang du byas nas 'dod pa dang /dus gnyis su bsdus te/ 'dod pa sangs rgyas dang / sdom pas rgan pa la phyag byed pa dang / lus ngag gi dge ba rang gi don du 'dod pa gnyis so/ /dus la gsum ste/ dus 'di ji srid 'tsho'i bar dang / lam skye ba bdun dang / 'bras bu bskal pa gcig nas chos ston pa'i dus so//'dir/ chos kyi dbyings la dbyer med phyir/ /theg pa gsum du dbyer med kyang / /gtso bos theg pa gsum bstan pa/ /nga yi thabs la mkhas pa'o/ /zhes pas theg pa gsum la gnas par bya zhing / sdom pa gsum dang ldan par byas pas yon tan dang dge ba 'phel ba'i phyir sbyor lam bzhis spyad par bya ba yang sdod pa la sogs pa thun bzhir bsgrub ste/snga dro'i thun la gsum ste/ ldang ba dang / khrus dang / chos spyad pa'o/ /dang ba la sbyor ba dang / dngos dang / mjug gsum ste/ sbyor ba yid ngag lus gsum ste/yod sngon yang le lo dang gnyid kho na la brten nas 'di 'dra'o zhes bsams te nam smad ldang ngo / /gang gi na/ na mo bud+d+hA ya/ na mo many+dzu shrI/ na mo badzra pA Ni/ na mo lo ke shwa rA ya/ na maHtA ra/ zhes rang gi yi dam gyi lha bskul lo/ /lus dal nas tsog tsog tu ldang ngo //dngos lus legs par langs la stod gos dang smad gos bgo ba dang / ngag snying po sgra dang bcas pas sprul dang sems can bskrad pa dang / yid dge ba bya ba'i phyir chos dran pa'o/ /mjug le lo dang the tshom med pa'o/ /khrus la yang sbyor ba dngos mjug gsum ste/sbyor ba bshang ba che chung dang / snabs lud sems can la gnod pa dang / sa min sar mi 'dor zhing legs par byas pa dang / chu srog chags dang dri ma med pas snod bkang ba dang / bkru sa yang mi gnod pa dang / sa ma yin par bkru ba dang / chu byin gyis brlab pa chu snod de'i chu la a dkar po bsams la//a'i 'od kyis 'phags pa spyan ras gzigs spyan drangs te/ mdun na gsal ba'i 'od kyis phyogs bcu'i sangs rgyas thams cad spyan drangs te/ spyan ras gzigs lta bur gyur pas nam mkha' khengs pa phyag mtshan kun de'i mthus sngar gyi chus bkang nas 'o ma ltar bdud rtsi'i chur gyur par bsams te bkru'o//bkru ba dngos ni oM ma Ni pad+me swa b+hA ba hUM/ zhes brjod cing kha dang lag pa dang / gdong bkru'o/ /yid kyis sgrib pa gnyis sangs rgyas kyi mthu dang / byin gyis brlabs pa'i chu dang /sngags kyi nus pas dag par bsam mo/ /mjug mdun gyis sangs rgyas rnams gzhan don la slar gshegs par bsam mo/ /rang nyes pa dang sgrib pa dag pas dge ba byas par gnas par bsam zhing don che bar bsam mo/ /chos spyad pa la bsam gtan dang / kha ton dang / chu sbyin dang / 'byung po la gtor ma gtang ba dang / maN+Dal bya ba dang lnga'o/ /bsam gtan la yang gsum ste/ sbyor ba lus cog cog gam skyil krung du bsdad/ ngag oM AHhUM zhes brjod/ yid oM gyi 'od kha dog lngas/ dngos po sangs rgyas kyi sku'i ngo bor byas/ aH'i 'od dkar pos sku'i ngo bo de sangs rgyas kyi gsung dang ldan par byas/hUM gi 'od nag po des sku gsung gi ngo bo de thugs dang ldan par byas te/ thams cad mnyam por bsgrubs pas gnas dang bdag dang ting nge 'dzin dag ste bsrung bar yang de 'gyur ro/ /de nas bsam gtan dngos rtogs pa dang man ngag dang yid mos pa la thun dang nus tshad du gnas par bya'o//kha don la lnga ste/ bar chad zhi bar bya ba'i phyir gtsug tor dang / rdo rje rnam par 'joms pa gdon/ sgrib pa bsal zhing dge ba bsdu ba'i phyir ltung bshags gdon/ dge ba rgyas par bya ba'i phyir byams pa dang spyan ras gzigs dang /bzang spyod kyi smon lam gdon/ dge ba mi nyams par bya ba'i phyir shes rab snying po gdon/ bstan pa rgyas par bya ba'i phyir 'jam dpal gyi mtshan brjod dang / mgon po nag po'i mdo gdon no/ /de yang gtsug tor rgyal ba'i mdo las/ bgegs rnams gtsug tor rdo rjes 'joms//kun du dge ba zhus pa yis/ /sgrib sel bsod nams sdud pa dang / /byams pa smon dang bzang por spyod/ /dge ba rgyas phyir nga yis bskul/ /shes rab pha rol phyin de dag /de rnams kun gyi snying po brjod/ /bstan pa rgyas byed 'jam dpal dang / /dal khas blangs mgon nag po//zhes so/ /de la yang sbyor ba lha rnams mdun du gsal ba dang / dag pa dang gsal ba dang bar ma chod par gdon pa dngos dang / yon tan la the tshom mi za ba dngos so/ /rgyas par bshad pa'i sbyor ba dngos mjug kyang shes par bya'o/ /chu sbyin ni rten snod du gzhag pa'am/ med na yang rang yi dam gyi lha gang yin pa der bsgoms la/ oM AHhUM brjod pas hUM gi 'od des snod kun stong par bsam/ stong pa las paM las pad+ma ser po 'dab ma brgyad pa/ de'i lte ba la a las zla ba rgyas pa 'od dang bcas pa/ de'i steng du dzaM ser 'od dang bcas pa/ dzaM de gyur pa las nor sbyin ser po pad+ma dang zla ba'i steng du g.yas brkyang ba'i 'og na yid bzhin gyi nor bu mnan pa/g.yon bkum pa'i pus mo'i 'og na rin po che sna tshogs kyi bum pa mnan pa/ mdog ser po gser bsregs pa 'dra ba/ ral pa gyen du brdzes nas rin po che'i ze prog can/ zhal rnam par snang mdzad ltar mdangs dang ldan pa/snyan cha mgul rgyan/ dbu rgyan phyag gdub/ zhabs gdub rin po che sna tshogs kyis byas pa gcig bsgoms la/ de'i thugs ka na pad+mo'i steng na zla ba/ de'i steng na dzaM ser po yod pa des rang bzhin gyi nor lha de nyid 'dra ba spyan drangs te dngos sam yid kyis mchod sbyin phul la bdag gzhan gyi 'dod pa skongs shig ces brjod de/de la bcug la gnyis med du gyur pa'i thugs ka'i zla ba'i jaM gis phyogs bcu'i sangs rgyas dang byang chub sems dpa' spyan drangs te mchod pa rnams kyis mchod nas dbang mnos rnam par snang mdzad kyi rgyan dang ldan pa'o//sbyor ba des nor sbyin bskyed nas chu snod chu dang bcas pa la sngon du bstan pa'i khrus kyi skabs ltar byin gyis brlabs la sbyor ba de dang ldan pas sbyin pa dngos g.yas pa'i sor mo las bdud rtsi'i rgyun gyis sbyin pa/ /oM dzaM b+ha la dza lan+d+ra ye swA hA/ zhes brgya rtsa brgyad sbyin no//mjug bdag gi 'dod pa skongs par gyis shig ces brjod la chu de gtsang sar bskyal lo/ /de yang sangs rgyas bya rgod phung po'i ri la bzhugs pa la/ lha sbyin gyis brag 'phangs pa la phyag na rdo rjes rdo rje 'phangs pas brag phyed mar chad pa las/ phyed kyis bcom ldan 'das kyi mthe bong la bzhar phyed kyis nor sbyin gyi mgo bkas pas sangs rgyas kyi 'khor thams cad byed pa la/sangs rgyas kyi zhal nas 'u cag gnyis la kho'i de tsam gyi lan chags pas mi dga' ma byed cig /khyod la ngas phan gdags so zhes brjod nas gong ltar bkrus pas sos te/'gro ba la phyin chad nor sbyin par byang chub tu sems bskyed nas phyi rabs kyi gang zag chos la mos pa dang ldan pa rnams kyis chu sbyin zhing / /nor sbyin gyis nor sbyin par sangs rgyas kyi spyan sngar dam bcas pa'o/ /'byung po la gtor ma sbyin pa la gtor snod gtsang mar zan dang chu gtsang mas bkang ba mdun du stegs la gzhag ste/rang yi dam gyi lhar gsal bas oM AHhUM brjod pas hUM gi 'od sngon pos stong par byas/ AH'i 'od dkar pos snod bcud du bcas pa rgya che zhing zab pa'i bdud rtsir gyur te/ oM gyi 'od lngas ye shes kyi bdud rtsir bsam pa dang /'byung po dang yi dags bza' btung gis phongs pa thams cad bkug ste bdud rtsi la zad pa med cing ro dang ldan pa la yi dags dga' nas longs spyod par bsam pa'o/ /btang ba dngos la lag pa g.yas pa'i sor mo lnga las kyang bdud rtsi dkar me re re 'bab par bsams la/namaHsa man+ta bud+d+hA nAM/ sarba ta thA ga ta a ba lo ki te oM saM b+ha ra b+ha ra hUM phaT swA hA/ zhes lan gsum brjod cing / g.yas pas se gol lan gsum brdabs la sbyin no/ /mjug gtsang sar bskyal ba dang / der tshogs pa'i 'byung po rnams 'grangs ngoms te chos la dad par bsam mo//de yang sangs rgyas rgyal byed kyi tshal na bzhugs pa la ma ga d+hAr khyim bdag phyug po dge zhes bya bas sangs rgyas 'khor bcas spyan drangs nas chos ston drangs te slar gshegs so/ /phyi de lo dus khyim bdag de ltogs par gyur te/ sangs rgyas kyi spyan sngar phyin te dris pa la/sangs rgyas kyi zhal nas 'phags pa spyan ras gzigs la zhus zhes bstan nas/ khyim bdag gis 'phags pa spyan ras gzigs la zhus pas/ /khyod kyis snga ma mchod pa'i yi dags dang 'byung po skal ba bcad pas nyes te/ da 'di bzhin du yi dgas sgo drung na yod pa dang /gzhan dag la yang gtor ma 'di ltar byin zhes gong gi de bstan bas de slar sngon bzhin 'byor pa dang ldan par gyur to/ /phyi rabs kyi gang zag chos la dad pa rnams kyang 'byung po'i gtor ma la brtson pas yi dags la phan pa dang / bdag gi 'byor pa mi nyams pa'o//maN+Dal la yang gsum ste/ yid du 'ong ba'i sa la khru gang las mi chung ba'i gru bzhi la sogs pa byas te/ sbyor ba chu gtsang ma dang me tog dang dris byug pa dang / oM AHbadzra b+hU mi hUM/ zhes brjod cing sa byugs pas/ rdo rje'i sa bzhir bsam pa dang / oM AHbadzra re khe hUM zhes brjod la/ re khA bskor bas rgya che ba'i gzhal yas su bsam pa dang / oM AHbadzra maN+Dal hUM zhes brjod la snyoms par byugs pas rdo rje'i dkyil 'khor du byugs par bsams la/ oM AHbadzra re khe hUM zhes brjod de bsrung ba gzhan pas rdo rje'i srung bas bgegs bskrad par bsam pa dang /lag pa bkru ba'o/ /dbul ba dngos la maN+Dal la dbul ba dang / maN+Dal dbul ba gnyis so/ /maN+Dal la dbul ba ni me tog tshom bu dgu dbus dang shar gyi rim pas phyogs dang mtshams su bkod la skad cig gam rim gyis mtsho las pad+ma 'dab ma stong dang ldan pa lte ba na zla ba'i gdan la lha so so'i dam tshig pa sa bon nam mngon byang lngas/sgrub thabs ltar bskyed la/ de'i 'od kyis ye shes sems dpa' bkug cing bstim la bsgom ste/ oM badzra puSh+pe AHhU~M phaT swA hA/ oM badzra dI pe AHhU~M phaT swA hA/oM badzra gan+d+he AHhU~M phaT swA hA/ oM badzra nai bi d+ye AHhU~X phaT swA hA/ oM badzra gan+d+ha le AHhUM phaT swA hA/ zhes brjod la gzugs la sogs pa dngos sam yid kyis mchod pa dang / phyag 'tshal ba dang / sdig pa bshags pa dang / 'jig rten gyi dge ba la yi rang ba dang /de'i dge ba bsngo ba dang / gsum la skyabs su 'gro ba dang / lus dbul ba dang / sems bskyed pa dang / bskul ba dang / gsol ba gdab pa dang / bdag gi dge ba'i las rnams 'di dag gis/ jig rten du ni myur du sangs rgyas shog /'gro la phan phyir chos rnams ston bgyid cing //sems can sdug bsngal mang pos gzir ba sgrol/ /zhes smon lam gdab pa ni mjug go/ /maN+Dal dbul ba la yang gnyis te/ dkon mchog spyi dang / bla ma la dbul ba'o/ /spyi la dbul ba ni ji ltar mdzes par bya ste/ dngos sam yid kyis dngos po gzugs la sogs pa lus dang bcas pa dbul ba dang /mjug bdun rnam par dag pa dang / smon lam gong ltar gdab bo/ /bla ma la dbul ba ni/ oM haM ma hA me re be na maH/ zhes brjod pas maN+Dal gyi dkyil du bzhag la ri rab tu bsam/ oM yaM pUrba bi de ha ya na maH/ zhes pas shar gyi gling du bsam/ /oM raM dzaM bu dwI pA ya na maHzhes brjod pas lho'i gling chags par bsam/ oM laM a ba ra dA nI yan maHzhes brjod pas nub kyi gling du chags par bsam/ oM baM ut+ta ra ku ra be+e na maHzhes brjod pas byang gi gling du chags pa'o/ /oM yaHu pa dwI pA ya na maH zhes pas shar lhor gzhag /oM raHu pa dwI pA ya na maH zhes pas lho nub tu gzhag /oM laHu pa dwI pA ya na maH zhes pas nub byang du gzhag /oM baHu pa dwI pA ya na maH zhes byang shar du gzhag /oM yaHa shwa rat+nAya na maHzhes pas shar gyi gling du rta rin po ches gang bar bsam/oM raHma Nirat+nA ya na maHzhes pas lhor nor bu rin po ches gang bar bsam/ oM laHha sti rat+nA yan maH/ zhes brjod pas byang du glang po ches gang bar bsam/ oM baHpu ru Sha rat+nA ya na maHzhes pas nub tu blon pos gang bar bsam/ oM yaHkhaD+ga rat+nA ya na maHzhes pas shar lhor dmag dpon gyis gang bar bsam/oM raHs+t+rI rat+nA ya na maHzhes pas lho nub tu btsun mos gang bar bsam/ oM laHtsakra rat+nA ya na maHzhes brjod pas nub byang du 'khor los gang bar bsam/ oM ba sarba ni d+hi b+h+yo na maHzhes pas byang shar du gzhag pas rin po che sna tshogs kyis gang bar bsam/oM haM a d+hi me ra be naHgu ru b+haD+TA ra kA ya i daM maN+Dal ma ni/ zhes brjod pas dbus su bskyar nas bzhag nas steng gi ri rab kyi khar pad+ma'i gdan la bla ma spyan drangs te mchod pa gzhan dang bcas pas dbul/ mjug gang 'dod smon lam gdab pa dang / maN+Dal bsdus pa'i me tog gtsang sar bskyal lo/ /dus kyi 'khor lo nas bstan pa'o/ /bla ma la dbul ba mu stegs dang thun mong ngo / mjug yon tan dran par bya ba ni dkyil 'khor chen po'i mdo nas/ lci ba chu bcas sbyin pa ste/ snyoms par byugs pa tshul khrims so/ /srog chags bsal ba bzod pa yin//maN+Dal nyid la brtson pa dang / /rtse gcig sems pa bsam gtan dang / /phyogs mtshams 'byed pa shes rab drug /sangs rgyas sogs la 'di dbul bas/ /pha rol phyin drug thob par 'gyur/ /nad kun las grol gser mdog 'gyur/ /lha dang mis mchod zla ba bzhin 'bar mdangs//nor dang gser dang dbang phyug rgyal por skye/ /sangs rgyas gyur nas yongs su zhing khams dag /ces brjod pa'i yon tan dran par bya'o/ /nyin gung gi thun gyi chos spyod la lnga ste/ glegs bam bklag pa dang / bskor ba bya ba dang / zan bza' ba dang / tsha tsha gdab pa dang /ngal gso ba'o/ /glegs bam klag pa gsum ste/ maN+Dal mdzes pa bya ba dang / mchod pa bshams pa dang / kha lag bkru ba'o/ /bklag pa dngos la ltung ba thams cad sel bas phung po gsum pa bklag pa dang / shes rab 'phel bas brgyad stong pa dang /sdud pa bklag pa'o/ /mjug bklags pa'i don dang / yon tan dran par bya ba'o/ /gong ltar bdag gi dge ba'i las kyang bsngo ba yang bya'o/ /bskor ba byed pa la yang gsum ste/ sbyor ba rten gyi rtsar phyin la shar nas phyag gsum bya/ rang yi dam gyi lhar mos pa byas nas/ oM AH hUM brjod pas hUM gis rten stong par sbyangs te/AH'i 'od kyis rang gi yi dam lha'i gdan pad+ma dang nyi zla gang yin pa'i khar sa bon gsal ba las sku mdog rgyan bzhugs tshul gsal bar bskyed la/ de nyid kyi thugs ka'i sa bon gyi 'od kyis ye shes sems dpa' dgug gzhug bya/ de'i snying po brjod cing snying po'i 'od kyis sangs rgyas dang byang chub sems dpa' thams cad rten de la 'dus nas yod pa la/bskor ba dngos ma yengs par snying po de zlos shing bskor te/ dngul byung na bzhag la mjug 'phro gcod kar spyan drangs pa rnams 'gro don la gshegs su gsol/ skyed pa de rang la bsdus te mchod rten nam tsha tsha'am/ glegs bam yin na de nyid du gyur nas gzhag go/ /bza' ba la gsum ste/ sbyor ba la lnga/ gang dang gang gis gang 'tsho ba/ /'tsho ba dag pa de btsal la/ /bkres dang skom sogs zhi bya'i phyir/ /sman bzhin du ni bsam par bya//zhes pas ci tsam dgos pa g.yo sgyus ma btsal zhing / lus gso bar byed pa'i phyir dgos pa dang / de la gtor ma gtang ba ni snod gtsang mar zan dang / tshod ma dang spags pa ci yod las gcod de chus bkang la mdun drang por stegs la bzhag la rang yi dam gyi lhar gsal bas oM AHhU~M brjod cing hU~M gis stong par bya/AH'i 'od kyis bdud rtsir gyur/ oM gyi 'od kyis ye shes kyi bdud rtsir gyur nas mgron bkug ste/ oM A kA ro mu khaM sarba d+harmA NAM Ad+ya nut+pan+na twA ta oM AHhU~M phaDa swA hA/ zhes lan gnyis brjod la gtang / smon lam gdab pa dang /oM sarba bud+ha bo d+hi sa twa b+h+yaH badzra nai bi d+ye hU~M/ zhes brjod la lha bshos dbul/ oM ha ri te pany+tsa ga ta pu tra ma hA yak+Sha ni ha ra ha ra sarba pA paM sarba a si ni a ti paN+Di kriM swA hA/ zhes brjod la/ 'phrog ma la chang bu sbyin pa dang / oM a gra paN+D-i a si b+h+yaHswA hA/ zhes brjod la phud kyi chang bu sbyin no/ /bza' ba dngos/ oM AHhU~M brjod pas dug thams cad dang bral te bdud rtsir bsam/ g.yas pa'i srin lag gis reg pas dug thams cad zhi bar bsam/ de nas ci rigs par bza'o/ /oM u tsiSh+Ta paN+Di a si b+h+yaHswA hA/ zhes pas lhag ma bcang la sbyin no//gzhan lhag med par bcang ngo / /mjug la gnyis te/ yon tan zla ba grags pa'i mdo nas/ gtor ma gtang zhing bshos gtsang phul/ /'phrog ma phud kyi chang bu dang / /lnga pa lhag ma'i chang bu yis/ /'bras bu longs spyod chen por 'gyur/ /zhes bstan pa dang /bdag la lan chags mi 'ong bar bya ba'i phyir kha bshal te/ gang gis sbyin dang gang la sbyin/ /sbyin pa ji ltar mi dmigs pa/ /sbyin pa dus gsum mnyam pa yis/ /sbyin bdag de la yongs rdzogs shog /ces smon lam gdab bo/ /de yang sangs rgyas la sgyu ma mkhan bzang pos chos ston drangs la sangs rgyas skyengs par bya bar 'dod pa la/sangs rgyas kyis byin gyis brlabs te/ dngos su 'khor gsum sbyin bdag zas len pa po gsum sgyu ma dang 'dra ste/ sgyu ma'i nus pa yod pas smon pa'o/ /tsha tsha la yang gsum ste/ sbyor ba ni dang po sa dang / chu dang / me tog dang / dri dag sbyar la/ ji tsam 'debs pa'i 'dag pa dris btab la/ mdun du khri la gzhag ste/ rang yi dam gyi lhar mos pas oM AHhU~M/ brjod pas stong par gyur/ de las b+h+rUM ser po/ de las 'khor lor gyur/ 'khor lo'i lte ba la a las zla ba/ zla ba'i steng na oM yod pa de'i 'od kyis snang khyab ste/sangs rgyas thams cad kyi thugs dam bskul/ sems can gyi sgrib pa sbyangs te slar 'dus nas oM shin tu gsal ba las rnam par snang mdzad byang chub mchog gi phyag rgya can/ 'khor lo dang zla ba'i gdan la skyil krung gis bzhugs pa/ rin po che'i rgyan gyis brgyan pa bskyed de gsal ba dang /de'i thugs ka'i pad+ma dang zla ba'i steng na oM las 'od zer 'phros pas phyogs bcu dus gsum gyi sangs rgyas thams cad bkug ste mdun gyi nam mkhar bzhugs pa la yon chab la sogs pas mchod nas bskyed pa dang / gnyis med du zhu nas/ sangs rgyas thams cad kyi sku gsung thugs kyi ngo bo bdud rtsi'i ngo bo dkar ba 'od dang bcas par gyur bar bsam mo/ /de nas na mo b+ha ga ba te/ bai ro tsa na pra b+ha rA dzA ya/ ta thA ga tA ya/ ar+ha te samya k+saM bud+d+hA ya/ tad+ya thA/ oM suk+Sh+mai su k+Sh+mai/ sems ma ye/ shAn+te/ dAn+te/ sa mo be/ a na laM b+he/ ta raM b+he/ ya sho ba ti/ ma hA te dze/ nir ku le/ nirbA Ni/ sarba ta thA ga hr-i da ya/ a d+hiSh+ThA na/ a d+hiSh+Tha te swAhA/ zhes nyi shu rtsa gcig pa bzlas la gdab ste/ lag pas len tsa na 'od kyi gong bu oM dang ldan pa blangs te sku bar du bcug la/ gong gi sngags kyis btab la rnam par snang mdzad du 'byung ngo //mjug /oM ye d+harmA he tu pra b+hA ba he tun+te ShAn+ta thA ga to h+ya ba data/ te ShAny+tsa yo ni ro d+ha e baM bA dI ma hA shra ma Na ye swAhA/ zhes lan bdun brjod pas rab gnas su 'gyur ro/ /me tog la bzlas te tsha tsha la gtor bas skad cig la rnam par snang mdzad grangs med du gyur/de'i 'od kyis phyogs bcu'i sangs rgyas thams cad bkug ste sngon bzhin dngos sam blos mchod nas tsha tshar gyur pa'o/ /gcig byas pas bye ba snyed kyi bsod nams 'thob bo/ /ngal ba gso ba la gsum ste/ sbyor ba lus dal bar bsdad/ /dngos chos spyod pa'i rgyal po dang /khyim bdag dang / mkhan po dang / slob dpon gyi che ba brjod pa dang / de dag dran par bya/ dge ba byas pa'i yon tan dran par bya/ mjug rgyu 'bras theg pa chen po'i mdo blta'o/ /phyi dro'i thun la gsum ste/ gong bzhin du thun glegs bam klag pa dang / bskor ba bya ba dang /gtsug tor la sogs pa'i mdo gdon pa'o/ /srod kyi thun la lnga ste/ gong bzhin du khrus bya ba dang / gtor ma gtang ba dang / maN+Dal dang mchod pa dbul ba dang / bsam gtan bya ba dang nyal ba'o/ /nyal ba la gsum ste/ sbyor ba khams dang sbyar la bsam gtan bsdu ba dang /glo g.yas phab la nyal ba dngos dang nang par snga bar ldang sems kyis gnyid kyi bsam gtan la 'jug pa'o/ /bye brag pa'i lta ba la yang gnyis te/ nub phyogs bye brag tu smra ba'i nyan thos tha ma dang / 'bring gnyis kyi lta ba chos kyi bdag dang / gang zag gnyis su 'dod de/ chos kyi bdag phyi'i yul dkar dmar/ snyan mi snyan/ zhim mi zhim/ kha mngar/ 'jam rtsub sna tshogs su snang ba 'di rdul phra rab 'dus pa'i ngo bo g.yag rnga dang ne gsing ltar 'dod cing / dge sdig gi rgyu 'bras kyang yul can rjes su 'dod la/ de yang rkyen gyis mi rtag skad cig mas rtag par snang ste/bum pa la sogs pa dbyug pas 'jig par dngos su snang ba dang / sdom rdzas can yul can yin pas nyams na rdza chag pa dang 'dra ba dang / ji srid 'tsho'i bar du yod pa dang / phyi mar 'phro 'dod pa dang / sdig pa yang de bzhin du 'dod pa'o/ /gang zag gi bdag phung po gsum par 'dod de/bdag btsal bas mgo nas rkang pa'i bar du med la/ bde sdug nyams su myong bas yod pa yang min med pa yang min par 'dod pa'o/ /bsgom pa la gsum ste/ bsgom pa'i skyon dang / bsgom pa'i thabs dang / bsgoms pa'i 'bras bu'o/ /skyon ni 'khor bar sdug bsngal ba'o//de yang bdag tu mthong bas 'gro ba bzang mo la chags pa nyes so/ /bsgom thabs bdag zhi bar mgo nas rkang pa'i bar bdag med par mi gtsang bar mthong / bsgoms pas 'bras bu sems de zhi nas dgra bcom par 'dod pa'o/ /skyon rtag pa dang chad par phyi nang 'dod pa dang /lus gtsang ba dang nyon mongs pa la chags na'o/ /nyan thos 'bring gi bsgom pa la yang gsum ste/ ma bsgoms par rtogs pas 'khor sdug bsngal lo/ /de yang rlung phyir shor bas rtog pa 'byung bas bdag tu brtags pas nyon mongs pa la chags pas nyes thabs rlung 'dzin pa ste gsum/bgrang ba rlung gcig nas bcu dang brgya dang / stong khri 'bum gyi bar du bgrangs te/ zhe sdang la sogs pa'i nyes pa dag par 'dod/ bsdams nas re re bgrangs pas bdag phung po gsum par 'dod pa dang / kha dog la slob pa dang / dkar sngo 'dra bar phyir 'byung nang du 'ong ba gnyis drag zhan blo'i gnas bzang nas 'bras bu lhag bcas lhag med de las 'byung bar 'dod do//dbyibs la slob pa rdo rje rtse gcig pa dang / gsum pa dang / pad+ma dang / ut+pa la ltar slob ste/ rtse gcig pa sna'i rtse mo nas sor bzhi nas/ dpag tshad tsam du phyir bsring zhing /sna'i tshang tshing nas lte bar bskyil ba'o/ /rtse gsum pa phar la snga sgo gnyis nas spro ba tshur la sna rtser bsdus te gong bzhin bsring / pad+ma dang / ut+pa la sna rtse nas 'phro la phar la yul gang ba dang / nang du bum par bkang bas lhag bcas lhag med kyi 'bras bu 'byung bar 'dod pa'o//skyon mi gtsang ba sgom pa dang / bum pa ltar 'gags nas sems med pa'o/ /nyan thos rab dang rang sangs rgyas/ kha che bye brag tu smra ba ste/ chos kyi bdag tha ma dang mthun no/ /gang zag gi bdag med par 'dod pa'o/ /des bsgom pa yang bden bzhi bsgom/de yang las kyi 'byung pa'i mdo las/ sdug bsngal 'di brgyad phung po la/ /phung por chags pas dug lnga yin/ /zhes pas rgyu kun 'byung dug lnga spong ba dang / 'bras bu sdug bsngal lus la gnod par shes pas las la mi chags shing bdag med pa dang / ye shes dang byams pa dang mi gtsang ba dang /bdag med du lhag gis mthong la/ bdag med pa'i stong pa de bsgom pa'o/ /de yang gong gi lus ngag yid kyi dge ba dang bsdoms pas sngon gyi sgrib pa 'dag la bdag med pa stong pa la bzhag pas dgra bcom pa thob pa'o/ /skyon gang zag gi bdag 'dod pa spang ba'o//theg pa chen po'i sdom pa la gnyis te/ byang chub sems dpa'i sdom pa dang / /sngags kyi dam tshig gnyis so/ /byang chub sems dpa'i sdom pa la bzhi ste/ spyod lam dang / lta ba dang / bsgom pa dang skyon no/ /spyod lam la gnyis te rten dang spyod lam dngos so//rten la lnga ste/ mdo sde pa dang / rnam bcas pa dang / rnam med pa dang / sgyu ma lta bu dang / rab tu mi gnas pa'o/ /spyod lam dngos la gsum ste/ sbyor ba dang / dngos dang mjug go/ /de yang spyod lam khyad par med par dus gsum du lnga char 'dod la lta ba la khyad yod de/sbyor dngos mjug gsum mdo sde pas rten 'brel du 'dod la/ rnam bcas sems kyi rnam par 'dod/ /rnam med pas bzang rtog tu 'dod la/ sgyu ma lta bus sgyu ma lta bur 'dod/ rab tu mi gnas pas kun rdzob ba yin gyi don dam ma yin te rmi lam lta bu mi bden par snang bar 'dod de/don dam la khas len med pa'o/ /gzhan don dam du 'dod pa'o/ /spyod lam dngos kyi sbyor ba la dgu ste/ mchod pa dang / bstod pa dang / phyag 'tshal ba dang / skyabs su 'gro ba dang / sdig pa bshags pa dang / yi rang ba dang / bskul ba dang / gsol ba gdab pa dang / bsngo ba'o/ /de yang / mchod dang bstod dang phyag 'tshal dang / /skyabs dang sdig bshags yi rang dang / /bskul dang gsol ba gdab pa dang / /bsngo dang dgu bo sbyor bar bstan/ /zhes dri ma med pa'i mdo nas bstan to/ /mchod pa la gsum ste gnas dang /rten dang mchod pa dngos so/ /gnas rang byung dang / byin gyis brlabs pa lha khang la sogs pa nyams dga' bar rten byang chub chen po dang / byang chub sems dpa' dang / mkhan po la mchod par bya'o/ /mchod pa dngos la gnyis te/ mchod par bya ba dang / mchod par byed pa'o/ /mchod pa bya ba la rten phyogs bcu'i sangs rgyas dang byang chub sems dpa' mchod pa'o/ /mchod byed pa dag dgos pa de rnams mnyes pa/ de la dgos pa mchod pa yin/ de'i dgos pa bdag gzhan don grub pa'o/ /mchod pa dang yon 'byor na dngos/ma 'byor na bskal bzang ltar me tog spor gang la brten te slob dpon dang / yid kyis gzhan na yod pa'i dngos po lus sems su bcas pa dbul te/ mchod pa rnam pa bdun gyis mchod de/ chu gtsang gis sku bsil zhing ras bzangs kyis sku byi dor bya ba dang / me tog man+dA ra la sogs pa'i phreng ba dang / sil snyen gyis mchod pa dang / tsan+dan dang / a ga ru dang / ga bur dang / gla rtsi dang / rgya spos la sogs pa'i dud pas mchod pa dang / rin po che 'bar ba dang / mar me'i phreng ba gcig gam/ bcu'am brgya stong dbul ba dang / tsan+dan la sogs pa'i dri'i byug pa bya ba dang /'bras chan dang / sran chan dang / gro chan dang / nas chan dang / zho dang / mar dang / sha skam dang / nya skam dang / nya btsos pa dang / na ri ke la dang / a mra dang / bil ba dang / nyo ti la sogs pa'i 'bras bu dang / gro ma dang / nyungs ma dang / la phug dang / be la sha la sogs pa'i rtsa ba dang / khur ba dang la du la sogs pas mchod pa dang / dung la sogs pa sil snyan dang dbyangs kyi rim pas mchod pa'o/ /yon la rin po che sna bdun dang / bkra shis kyi rdzas brgyad dang / chu mig dang / nags tshal dang / skyed mos tshal dang / spang ljongs dang / mtsho dang / lteng ka la sogs pa gzugs sgra'i bye brag ji snyed pa blo dang dngos su 'byor pa dbul lo/ /'brel ba nam mkha'i snying po'i mdo nas/ sems gnyis bskyed nas sangs rgyas mchod/ /mchod pa yon dang bcas pa yis/ /rgyal dang de yi sras mnyes nas//'gro ba'i don la reg par 'gyur/ /zhes bya'o/ /bstod pa yang rten gong ltar bstod byed dang / dgos pa mnyes pa dang de la dgos pa/ phyogs dus kun gyi sangs rgyas sras/ /gang dag 'jig rten khams bzhugs pa'i/ /'gro ba 'dren par gang bzhugs pa/ /sku yi mtshan ldan rnams la bstod//byams pa'i thugs ldan rnams la bstod/ /ces theg pa chen po'i mdo nas sangs rgyas dang / byang chub sems dpa' la bstod pa nyid kyis bstod do/ /'brel bas kun nas brjod pas so/ /phyag 'tshal ba la yang gong ltar drug gis theg pa chen po nas phyag 'tshal ba gsum mam/bdun nas stong dang khri'i bar du 'tshal ba'o/ /skyabs dngos dang dbye ba gnyis las/ dngos la gsum/ skyabs sngon gyi sbyor ba rnams shes nas/ slob dpon dgongs su gsol/ bdag ming 'di zhes bgyi ba dus 'di nas bzung nas snying po byang chub la mchis kyi bar du/de bzhin gshegs pa dgra bcom pa yang dag par rdzogs pa'i sangs rgyas bcom ldan 'das rnams la skyabs su mchi'o/ /zhi ba 'dod chags dang bral ba chen po'i chos la skyabs su mchi'o/ /kun la skyob par mdzad pa'i 'phags pa phyir mi ldog pa'i byang chub sems dpa'i dge 'dun rnams la skyabs su mchi'o//zhes lan gsum brjod do/ /dbye ba la brgyad/ dbang po dang / rten skyabs su mchi ba nyan thos ltar/ bdun la gzhan 'dra ste/ yid theg pa chen po'i chos dang gzhan dag la dad pa'o/ /sbyor ba lus ngag yid gong ltar dang / gzhan/ skyabs/ sems rten dang / sangs rgyas sprul skur shes pa/ chos shes rab kyi pha rol tu phyin pa dang / dge 'dun 'jam dpal la sogs par shes par bya'o/ /mchod pa ni gong gi'o/ /dus mtha' thug pa med pa'am/ byang chub bar du'o/ /yon tan 'khor ba las thar pa dang /gzhan don nus pa'o/ /spyod pa la 'jug pa nas khyed kyi thugs rjes su bzung bas na/ srid la mi 'jigs sems can phan pa bgyi/ /zhes pas so/ /mi nyams pa bya ba la gong ma'i 'jig rten gyi spangs pa'i steng du gzhan don bya ba dang / srog gcod pa spangs nas gzhan la mi 'tshe ba dang /mu stegs dang nyan thos dang rang sangs rgyas mi 'grogs pa'o/ /sdig pa bshags pa rten dang / mkhan po'i spyan sngar/ bdag ming 'di zhes bya ba yis/ /thog med dus nas 'khor bar 'khor/ /shin tu ma rig sdig pa'i las/ /sna tshogs bgyis dang bgyid du stsal/ / rjes su yi rang bgyis pa bshags/ /zhes pa dang / mdo gzhan nas bstan pa ltar bshags so/ /yi rang ba'i rim pa mdo gzhan ltar yang bya/ 'jig rten 'di dang gzhan dag na/ /skye bo rnams kyis dge spyad dang / /de yi stobs kyis bde 'gyur la'ang / /bdag ni shin tu yi rang ngo / / nyan thos rang rgyal dge ba dang / /byang chub sems dpa'i spyod pa la'ang / /nges par di ring yi rang ngo / /sangs rgyas mdzad pa gang byung dang / /sems can bde la yi rang ngo / /bskul ba/ sangs rgyas rnams dang byang chub sems/ /de dag tshogs la bdag bskul na/ /sems can rang dgar mi gtong bar//chos kyis rgyud 'byongs 'khor lo bskor/ /gsol ba gdab pa/ phyogs bcu'i sangs rgyas thams cad dang / /byang chub sems dpa' 'don mdzad la/ /sems can bde la ma bkod par/ /mya ngan mi 'da' bzhugs par gsol/ /de rnams kyi dge ba bsngo ba/ bdag gis de ltar dge spyad pas//nam mkha' khyab pa'i sems can rnams/ /dge ba 'di yi byin rlabs kyis/ /pha rol phyin drug mthar phyin nas/ /thams cad byang chub chen por shog /gal te byang chub ma thob par/ /theg chen chos la spyod pa dang / /'gro don mi 'dor 'khor ba las//'gro rnams myur du sgrol bar shog /mdo gzhan ltar yang gdab bo/ /dngos la gnyis te/ smon pa dang 'jug pa'o/ /smon pa ni slob dpon dgongs su gsol/ bdag ming 'di zhes bgyi ba dus 'di nas bzung nas snying po byang chub la mchis kyi bar du sngon gyi sangs rgyas bcom ldan 'das rnams dang byang chub sems dpa' rnams kyi bslab pa la rjes su slob bo//rjes su sgrub po/ /sngon gyi sangs rgyas dang byang chub sems dpa' 'gro ba rnams la ji ltar phan pa de ltar bdag kyang phan par bgyid do zhes lan gsum brjod do/ /dngos 'jug pa ni/slob dpon dgongs su gsol/ de bzhin gshegs pa dgra bcom pa yang dag par rdzogs pa'i sangs rgyas dang / byang chub sems dpa' thams cad kyi sbyin pa las byung ba'i dge ba dang / tshul khrims las byung ba'i dge ba dang / bzod pa las byung ba'i dge ba dang /brtson 'grus las byung ba'i dge ba dang / bsam gtan las byung ba'i dge ba dang / shes rab las byung ba'i dge ba'i rtsa ba ji snyed cig yod pa de snyed kyis sems can ma grol ba thams cad grol bar mdzad pa dang / ma bsgral ba thams cad bsgral bar mdzad pa dang / dbugs ma phyin pa thams cad dbugs phyin par mdzad pa dang / mya ngan las ma 'das pa thams cad mya ngan las 'da' bar mdzad pa de bzhin du/ bdag ming 'di zhes bgyi bas kyang dus 'di nas bzung nas/ nam snying po byang chub la mchis kyi bar du bdag gis sbyin pa las byung ba'i dge ba'i rtsa ba dang /tshul khrims las byung ba'i dge ba dang / bzod pa las byung ba'i dge ba dang / brtson 'grus las byung ba'i dge ba dang / bsam gtan las byung ba'i dge ba dang / shes rab las byung ba'i dge ba ji snyed bgyid pa de snyed kyis sems can ma grol ba thams cad dgrol bar bgyi'o//ma rgal ba thams cad bsgral bar bgyi'o/ /dbugs ma phyin pa thams cad dbugs dbyung bar bgyi'o/ /mya ngan las ma 'das pa thams cad mya ngan las bzla bar bgyi'o zhes lan gsum brjod par bya'o/ /slob dpon dgongs su gsol/ / gal te sdom pa las nyams na slar gso bas gnang du gsol zhes lan gsum brjod do/ /mjug gi don shes par bya ba la gsum ste/ dgos pa shes par bya ba dang / thob par shes pa dang / mjug mi nyams pa'o/ /dgos pa la gnyis te/ sbyor ba dang rten no/ /sbyor ba la mchod pa la sogs pa dgu las skye bas dgu dgos par shes pa dang /rten gzhan dang bdag nyid las/ gzhan la rten dbang dang po gnyis/ dbang po sdom pa la gnas pa mkhas pa'i slob dpon las skye bar shes pa dang / yi dam dang dbang po las skye ba'o/ /rten byang chub chen po la sogs pa'i mchog gsum las skye'o//bdag las skye ba gang gi nyan thos kyi ltar khyad par du 'phags pa drug dang / phan sems yod pa nus pa dang ldan pa las skye bar shes par bya'o/ /thob par shes pa la bcu ste/ rten dang / dbang po dang / sems can dang / sdug bsngal ba dang / sbyor ba dang / blangs pa dngos dang / sems can byang chub la dgod pa'i bsam pa dang / mi ldog pa'i bsam pa dang / blangs pa'i dus de nyid nas yid ches pas thob pa'o/ /mi nyams par bya ba la gsum ste/ shes par bya ba dang / shes pas spang ba dang /shes pas bsgrub pa'o/ /shes par bya ba la lnga ste/ sdom pa'i ngo bo dang / rten gyi khyad par gyis bslab pa'i rim pa dang / dus dang / rigs dang / sdom pa gsum ldan du shes par bya ba'o/ /ngo bo smon 'jug gnyis las smon pa'i ngo bo dang / grogs gnyis te/ de yang ngo tsha shes pa dang khrel yod pas ngo bo yang dag par blangs pa'i sems pa dge ba rgyun chags 'bras bu la dam 'cha' ba'o//de yang dad pa dang / snying rje dang / 'dod pa dang / khas blang ba bzhi las dang ba'i dad pa gzhan don gyis bdag grol bar shes pa dang / bden snyam pa dang / bdag la snying rje skyes pas gzhan don la mos pa'o//mos pa skyes nas rgyun sa bcu man chad du yin dgos pas smon pa'i dge ba'i rgyun sems can la sangs rgyas kyi bya bas smon pa sems can sangs rgyas su 'dod la/ khas len dam 'cha' ba'o/ /grogs la bdun te/ 'dun pa sa bdun 'jug pa'i gzhi byed pa dang /lhag pa'i bsam pa zla ba tshes pa lta bu dge ba 'phel ba dang / sbyor ba me lta bu dngos po thams cad bsreg pa dang / bsam pa bzang po gser lta bu sems mi nyams pa dang / skyob pa lta bu nyes pas mi gos pa dang / 'brel ba rgyu 'bras lta bu thams cad mkhyen pa 'byung ba dang /myur ba thog lta bu sa la spyod pa'o/ /'jug pa'i ngo bo de yang ngo tsha shes pa dang / khrel yod pas yang dag par blangs pa'i sems pa dge ba rgyun chags rgyu la dam 'cha' ba'i ngo bo ste/ de yang gong ltar bzhi/ yid ches pa'i dad pa sangs rgyas gzhan don las 'byung bas gzhan la snying rje skyes te/sangs ma rgyas bar du 'phro mi gcod pa dang / gzhan don byed pas gzhan don khas blangs pa dang / bdag gzhan sangs rgyas pa'i rgyu sdom pa'i tshul khrims kyi rang bzhin dang bcas pa'i sdig pa spong ba so sor thar pa'i bslab pa dge ba chos bsdus pas pha rol tu phyin pa drug spyod pa/sems can don byed de gnyis sems can don du spyod la stobs gar cher de yang 'byed pa dang phye zhing spyod pa'o/ /de yang sangs ma rgyas bar du sangs rgyas 'dod pa'i rgyu spyod par khas len pa'o/ /grogs la bzhi ste/ sems can thams cad sngon 'brel gyi bur shes nas byams par bya ba dang /ma chags pas 'dod pa chos nor sbyin pa dang / chos thams cad bdag med pas rang la 'dod pa med pa dang / sangs rgyas gzhan don las 'byung bas rgyu 'bras mi dgag pa'o/ /rten gyi khyad par gyis bslab pa'i rim pa shes par bya ba la gnyis te/rten dang bslab pa'i chos so/ /rten la yang gnyis te/ 'dod pa chung ba dang che ba'o/ /che ba la yang gnyis te/ las dang po pa dang / mthar phyin pa dag pa'o/ /bslab pa'i rim pa la gnyis te/ spyod pa dang 'jug pa'o/ /smon pa la yang gnyis te/ btags pa ni gong gi ming dang zhes pa'i rten tsam yang skye la/dngos thob nas ngo bo dang ldan par bsrung ba'i las dang po'o/ /'jug pa la gnyis/ btags pa ba las dang po pa de la yang yod de/ dngos po ba dag pa la yod pa'o/ /las dang po pa'i bslab bya la gsum/ gzhi la yang gsum ste/ sbyor ba sngon du song bas mos pa/smon pas gsum la skyabs pa dang / dbang po shes nas gnas tshol ba dang bsam pa'o/ /bsam pa bdag la sems pa dang / gzhan la sems pa'o/ /bdag la sems pa la bzhi ste/ bdag gi sdug bsngal zhi bar bya ba dang / dgos pa lus ngag gi dge ba byas dang /grogs lus dal/ ngag dben/ yid zhi ba dang / longs spyod kyis tshogs bsags pa'o/ /gzhan sems pa la gnyis te/ snying rje dang bzod pa'o/ /snying rje chos dmigs pa dang / gang zag la dmigs pa'o/ /bzod pa sdug bsngal dang du len pa dang / sdug bsngal la ji mi snyam pa'o/ /lam pha rol tu phyin pa drug smon nas spyod pa'o/ /'bras bu skye ba la dbang ba dang / nyon mongs pa dang / las dang / thabs dang / sems can gyi don byed pa la dbang ba lnga'o/ /shin tu rnam par dag pa'i las dang po'i bslab bya la yang gsum ste/ gzhi sbyor ba sngon du song bas skyabs pa dang /dbang po dang / bsam pa 'jug pa'i sems kyis gong bzhin 'dod pa'o/ /bsam pa gzhan la sems pa kho na ste/ snying rje dang bzod pa la gnyis te/ snying rje la yang gang zag la dmigs pa dang / chos la dmigs pa dang dmigs pa med pa gsum ste/ gang zag la dmigs pa ni mu stegs dang / nyan thos dang thun mong ste/ sems can rkyen gyis sdug bsngal ba la skye ba'o/ /chos la dmigs pa ni sems tsam ste/ chos nyid ma rtogs pas lon te rtogs par byed pa'o/ /dmigs pa med pa dbu ma ste/ sdug bsngal ba chos nyid ma rtogs pa la snying rje bskyed pa'i dus na rab tu mi gnas par shes pas gsum bsdus pa'o//bzod pa gzhan don du sdug bsngal phra mo la son zhing dang du len pa'o/ /goms nas che bas mi gnod la ji mi snyam pa dang / bzod pa de dang mi bzod pa rab tu mi gnas par brjod pa gsum ka bsgom pa'o/ / lam pha rol tu phyin pa drug gzhan don du rdzogs par byed pa'o/ /'bras bu re ba med pa dang / sku bzhi ngag gis 'byung ba'o/ /dus la 'dod pa chung ba'i mtha' med pa dang / chen po'i rgyu bskyed pa'i dus blangs ma thog dang / lam sgrub pa snying po byang chub thob pa dang / sangs rgyas pa'i dus bskal pa grangs med gsum pa'o/ /rigs la gnyis te/ zla ba yar ngo la sems bskyed thob pa rnams byams pa la sogs pa ltar bram ze las sangs rgyas pa dang / mar ngo las thob pa rnams shAkya thub pa la sogs pa ltar rgyal rigs las sangs rgyas pa'o/ / gsum dang ldan par shes par bya ba la gnyis te/ ldan lugs bstan pa dang / nges pa bskyed pa'o/ /ldan lugs la nam mkha'i snying po'i mdo nas/ chos dang gang zag gcig nyid sems/ /smon dang 'jug dang so sor thar/ /rig pa sbyor bas gzhan gyi don/ /nus na gong nas gong du 'gyur//zhes gsungs pa bzhin te/ gong gi so sor thar pa'i bslab pa rigs bdun gyi bye brag de rang gi sems yin pas 'og ma'i nyan thos ma spangs par theg pa chen po byang chub sems dpa'i sdom pa yang yin la/ de yang sems kyi snang ba phung po dang / khams dang / skye mched rgyud ltar lhar gnas pa'o//de yang sngags kyi dam tshig ni/ bdag dang dgos pa lhar gnas pa mthong bas lha dang / lha mi gnod pas nyan thos ltar nyes pa spong ba dang / lha ma yin gzhan gyis ma rtogs pas byang chub sems dpa' ltar phan 'dogs pa dang / de ltar sems su 'dus pa'i don la sems can rnams shin tu 'khrul nas sems rab tu mi gnas par ma shes shing bdag tu bzung ba la dmigs pa med pa'i snying rje skyes/so sor thar pa'i bslab pa dang / dam tshig spyod pa dag la dmigs pa med pas smon 'jug gzhan don du byed pa dang / de yang sngags kyis lhar snang ba thams cad sems kyi 'phrul par snang bas nyan thos bye brag tu spyod la/ bye brag ma 'gags na nus pa so sor 'byung bas byang chub sems dpa' ltar 'dogs pa dang / de ltar sems kyi rgyun la brten nas sku bzhi 'byung bas/ 'gro ba 'dren pa'i snang ba ltar so sor thar pa'i bslab pa dang /byang chub sems dpa'i sdom pa dang / sngags kyi dam tshig dang gsum ldan pa'o/ /sku bzhi nus pa so so nas snang zhing chos skur 'dus shing 'byung ba bzhin sdom pa yar ldan du 'gyur te/ so sor thar ba byang chub sems dpar 'gyur/ /de sngags su 'gyur/de so sor snang ba yang btub pa bzhin no/ /nges pa bskyed pa yang bzhi ste/ gzhi ma nyams pa dang / rgyu ma nyams pa dang / lam ma nyams pa dang / 'bras bu ma nyams pa'o/ /gzhi ma nyams pa slob dpon la la dag rten dang brten par sdom pa gsum min par 'dod/de mi bden te/ ka bas gdung dang 'og gis steng khang bteg pa ltar ma yin zer ba mi rigs te/ sdom pa yar ldan du gnas gyur pas sa bon gyi dus na sa bon ma nyams/ myu gu ma spangs/ 'bras bu'i dus na 'bras bu ma nyams la sa bon ma spangs te/ dam tshig gi dus na so sor thar par ma song ste/mi gnas med kyang nyes pa med do/ /nyams pa spang / slob dpon la la mi gcig gis mi mang po gsod na/ mi gcig po de ma bsad na byang chub sems dpa'i sdom pa nyams la/ bsad na so sor thar ba'i sdom pa nyams par 'gyur ba de bzhin du/ma shi na brdzun nam thabs kyi yan lag nyams zer te de yang mi bden te/ so sor thar ba'i ltung ba ni sbyor ba dang / dngos dang / mjug rdzogs pas 'ong ste/ sbyor ba dang / mjug med pa dang / dngos so sor thar pa bdag 'khor ba la 'jigs pa dang / byang chub sems dpa' sems can gyi don byed du dmyal ba la mi 'jigs par nyes pa len pa'o//de ltar srog mang bar bton pa dang / gcig la sdig pa gos par dang / bdag dmyal ba la mi 'jigs par rang yang thar pa'o/ /de bzhin du brdzun sogs yan lag dang bcas pa nyams pas so//lam ma nyams pa yang slob dpon la la dag /so sor thar pa'i bslab pa rten du dgos na/ so sor thar pa'i bslab pa gong gi rten khyad par du 'phags pa drug la skye'i/ byang chub kyi sems 'gro ba gzhan dang gling gzhan nas skye zer te/ de yang mi bden te/ de ltar mu stegs ltar rkyen med pas rgyu gtso bos las brdzun te/ 'gro drug so so bskyed la dge bas thar pa thob pa'i rgyu yin pa la/ dge bas ngan 'gror 'gro ba yang yod dgos pa la med pa des de ltar yin te/ sangs rgyas kyi thugs rjes sems can mir skyes la/ mi bsnyen gnas bsrungs pas nyan thos kyi rten bzang pa de goms pa las byang chub kyi sems su 'gyur bas thams cad mkhyen pa'o/ /rgyu rkyen ma song bar thams cad mkhyen pa 'byung na/ mu stegs dang nyan thos la thams cad mkhyen pa'i rigs na/ chos nyid stong pa shes rab kyi pha rol tu phyin pa rtogs bas 'thob zer na/chos nyid yod pas 'thob na sems can la cis med/ rtogs pas chog na rtogs tshad gang kho na/ rtogs tshad gang kho na tsam gyis chog na da lta ga re/ tshad bstan du yod na thams cad mkhyen te/ brtags dpyad rigs pa gzhi ci bya/ med na rtsod pa brjod pa la don med/ thob pas mkhyen na thob rgyu brtag ste/ des na lam sngon du ma song bar 'gro ba gzhan dang / mi gzhan dag la byang chub sems mi skye'o/ /'bras bu ma nyams par bya ba la slob dpon la la nyan thos kyi rigs dang / rang sangs rgyas dang / theg pa chen po dang /rigs nges pa dang / ma nges pa dang / chad pa drug yod la/ sangs rgyas kyang rim gyis dang / nyan thos las ldog pa dang / rang sangs rgyas las ldog pa dang / so sor yod pa mtshan nyid kyis sangs rgyas pa dang / sngags kyis dang / sangs rgyas so sor yod pa la/bstan pa yun ring thung dang / chos theg pa che chung ston la/ bram ze dang rgyal rigs so sor 'dod de/ de mi bden te/ gzhi don dam pa la yang sems can dang / sangs rgyas gnyis la khyad med par/ sangs rgyas la khyad yod de/ rgyu rig pa bzang rtog tu sbyor ba la yang 'dra snyam/lam sems gnyis dang phar phyin drug spyod pa yang 'dra snyam/ 'bras bu 'dod pa che chung bstan pa dang / chos rigs kyang gdul bya ste/ sku bzhi la bzang ngan med/ gal te yod na gong bzhin du dge bas ngan song dang / sdig pa dang thar pa dang / nyan thos kyis bcu bzhi pa'i sa dang /sngags dang nyan thos la sogs par 'gro ba'o/ /de nas sangs rgyas thams cad kyi thugs bde ba chen por gnas shing chos skur snang ba la/ gsung brjod du med par gnas te/ theg pa gsum dang theg pa'i dgos par yang gsung ngo / /sku bcu bzhi'i sa la bzhugs la rdo rje 'chang gi ngo bo gzugs skur ston to//yon tan spros pa dang bral la bzang ngan gyi rtog pa 'dod yon du snang 'grub pa'o/ /phrin las bya brtsal dang bral ba dgyes rdor ltar sems can thams cad rigs lnga dang / gsum dang gcig tu grub pa'o/ /de ltar shes pas sdom pa gsum rdzogs nas gsum ldan du bya'o//sngags kyi rgyas par 'og gi skabs su bstan pa nas dbang thob par shes par gyis shig /shes pas spangs pa la gnyis te/ nyes pa shes pa dang srung ba'o/ /nyes pa shes pa la smon 'jug gnyis te/ smon pa'i rtsa ba'i nyes pa gzhan don la smon pa bzhag nas nyan thos su 'gyur ba'o//yan lag la bzhi ste/ dkon mchog /mkhan po/ slob dpon/ rnal 'byor pa/ paN+Di ta/ dge 'dun chos skyong ba'i rgyal po/ pha ma/ mchod par 'os pa bslus pa dang / /byang chub sems dpa' sems bskyed pa mthong ba thos pa/ slob dpon gcig pa dus gcig tu bskyed pa la phrag dog gis bskyed pa dang /nyan thos dang rang sangs rgyas dang / byang chub sems dpa'i bye brag song nas gong du 'pho bar mi 'gyur bar de rnams kyi dge ba'i rgyu 'bras la skur nas 'gyod pa bskyed pa dang / sems can thams cad la bdag gi lus ngag gis gnod pa byed pa'o//'jug pa'i nyes pa la gnyis te/ rtsa ba pha rol phyin pa drug gzhan don bor nas rang don du bsngo ba dang / yan lag la yang bzhi ste/ zhe sdang gi bshags pas mi phan par gzhan 'tshog pa dang / chags pas ser sna dang ldan te/ chos nor dgos pa dang /'dod pa la mi ster ba dang / chos rnams bdag med par ma shes pa gzhan la 'gran sems kyis gnod pa dang / sangs rgyas gzhan don las mi 'dod par rgyu 'bras bkag nas smon 'jug spong ba'o/ /spang ba la yang gnyis te/ smon pa nyams par shes/ smon pa nyes pa spang / 'jug pa'i nyes pa 'jug pas spang pa'o/ /shes pas bsgrub pa la gnyis te/ yon tan du shes pa dang / yon tan du shes pa bsgrub bo/ yon tan la gsum ste/ sangs rgyas la skyabs pas sangs rgyas kyi zhal mthong ba dang / chos la skyabs pas sangs rgyas kyi chos nyan cing zhal mthong ba dang /byang chub sems dpa'i dge 'dun la skyabs pas grogs byang chub sems dpa' dang 'grogs pa'o/ /lam gyi yon tan mkhan po dang bla ma mchod pas da lta nyid sangs rgyas dang 'grogs pa dang / sems can slu ba dang 'gyod pa spangs nas pha rol tu phyin pa drug spyad pas da lta nyid theg pa chen po'i chos nyan pa dang /gzhan la gnod sems spangs nas phan sems dang ldan pas byang chub sems dpa' dang da lta 'grogs pa'o/ /'bras bu'i yon tan 'jug pas pha rol tu phyin pa drug spyod pas gdul bya la sprul sku dang / tshogs rdzogs pa'i snang ba la longs sku ste/da lta nyid sangs rgyas yin pa dang / gang 'dod gang phan spyod pas da lta nyid chos ston pa dang / bstan pa dang spyod pas phan pas da lta nyid du byang chub sems dpas bskor ba'o/ /bsgrub par bya ba la bzhi ste/ sdom pa gsum bsgrub pa dang / mi nyams par bya ba dang //rgyas par bya ba dang / nyes pa bcos thabs so/ /sdom pa gsum sgrub pa ni sdom pa dngos dang / rang bzhin dang bcas pa'i sdig spang ba dang / sems can rnams kyi dge ba bsgrub pa pha rol tu phyin pa drug ste/ sbyin pa chos dang skyabs dang / zang zing gi sbyin pa bdag gtong ba po dang /gzhan len pa po dang / sbyin par bya ba'i rgyu gsum sgyu mar shes pa'i gzhan don sgrub pa dang / dge ba chos sdud pa'i tshul khrims dang / sdom pa'i tshul khrims dang / sems can don byed kyi tshul khrims dang / sdug bsngal dang du len pa dang / sdug bsngal la ji mi snyam pa dang /zas mos pa dang / go cha'i brtson 'grus dang / sbyor ba dang / nges par spyod pa dang / mi 'gong ba'i dang / dpa' bo'i brtson 'grus dang / bsam gtan lus dal/ /ngag dben/ sems zhi ba dang / thos bsam bsgom pa'i shes rab rnams sgyu mar shes pas gzhan don bsgrub pa'o//sems can don byed kyi tshul khrims gzhan don du sbyin sogs stobs gar che rim pa dang / dam bcas pa med pas sgyu ma'i rnam pas sgyu ma shes pas bsgrub pa'o/ /mi nyams par bya ba la brgyad de/ sems can sngon las kyi 'bras bu yin pas dben par bsgrub pa dang / ma chags pas lus dang longs spyod dge ba sbyin pa dang /bdag med pas 'bras bu mi re ba dang / sangs rgyas gzhan las 'byung bas skyo ba mi bya ba dang / slob dpon sangs rgyas dang 'dra bas bsnyen pa dang / grogs po byang chub sems dpa' bsnyen pa dang / dge ba byed pa thams cad la yi rangs pa dang bskul ba dang /lus ngag yid kyis don las gzhan mi bya'o/ /rgyas par bya ba la gnyis te/ ma rgyas pa dang / de rgyas par bya ba'o/ /ma rgyas pa la rgyu 'bras gnyis te/ rgyu las bsngo ba ma shes pa/ bsngo ba lus pa/ bsngo ba log pa/ bsngo ba ma dag pa/ bsngo ba ma brgyas pa'o//bsngo ba ma shes pa ni sngon du sems can la khas blangs nas/ chos nor skyabs mi ster ba'o/ /mi 'dod mi dgos mi phan na nyes pa med do/ /bsngo ba ma lus pa ni sbyin par bsams nas ma byin pa'o/ /de yang mi 'dod/ mi dgos/ mi phan/ phan chung / gnod na nyes pa med do/ /bsngo ba log pa ni gcig la bsngos nas gzhan gcig la byin na'o//gcig stobs che la gcig mi 'dod sogs gong ltar na nyes pa med do/ /bsngo ba ma dag pa ni lan la re ba dang / drin brtsis pa dang / 'di'i phan la mi re ba'o/ /des chos 'phel zhing rang gi yid la tshe 'di'i 'dod pa med na nyes pa med do//bsngo ba ma rgyas pa ni grags pa dang / gzhan 'og tu gzhug pa ste/ des bstan pa la phan zhing yid la med na nyes pa med do/ /'bras bu la yang lnga ste/ bsngo ba lus pa ni pha rol tu phyin pa drug spyad kyang dge ba'i rtsa ba ma bsngos pa'o/ /bsngo ba ma shes pa ni sbyin pa la sogs pa'i rgyu las 'bras bu longs spyod che ba la sogs par re ba'o//bsngo ba log pa ni bdag don du bsngos pa'o/ /bsngo ba ma dag pa ni sems can sangs rgyas su mi smon pa'o/ /bsngo ba ma rgyas pa ni shes rab kyi pha rol tu phyin pa'i rgyas ma thebs pa'o/ /rgyas par bya ba de rnams las bzlog pa ste/shes pa/ ma lus pa/ ma log pa/ dag pa/ rgyas pa byang chub sems dpa' 'dod pa che bas sems can la bsngo ba ma lus pa la sogs pas sbyin no/ /rgyas pa la sogs pas bsngos pa sems can thams cad kyi don du bdag sku bzhi thob ste/sangs rgyas nas sems can thams cad sku bzhi la dgod par smon la/ gzhan yang mdo dang / slob dpon gzhan ltar smon no/ /'dod pa chung ba de dag rnams sems can thams cad sangs ma rgyas kyi bar du/ sems can gyi don byed cing 'grub par smon la/ mdo dang bstan bcos gzhan ltar yang smon no//rgyas pa chen por 'jig rten gyi dge ba'i rgyu 'bras la yi rang zhing bsngos par 'gyur ro/ /nyams pa bcos pa'i thabs la gsum ste/ nyams pa'i tshad dang / thabs dang / nyams pa bcos pa nyes par bstan pa'o/ /tshad ni rtsa ba'i pham pa bzhi las bdag nyid rnyed pa dang /bkur sti la rab tu zhen nas bdag la bstod la gzhan la smod na pham pa dang po byung ba'o/ /bdag la nor zas yod pa la sdug bsngal la mgon med pa bkres pa sogs slong ba la snying sran gyis mi ster ba dang / dad pa dang / gus pa dang legs pas chos 'dod pa la snying mi brtse bas chos mi ster ba ste gnyis pa byung ba'o//zhe sdang bdo nas gzhan la khros te 'thab mo stsogs kyis gzhan gyis bshags pa mi nyan par brdeg pa la sogs pa byed par zhe sdang pos 'chang na gsum pa byung ba'o/ /theg pa chen po'i sde snod 'gro ba skyob pa la skur pa 'debs shing gzhan gyis zhar la bcos pa'i chos ma yin pa la chos ltar ston tam nyan na/byang chub sems dpa' pham pa bzhi pa byung ba'o/ /yan lag sdom pa nyi shu pa ltar nyon mongs pa'i sems dang / nyon mongs pa med pa'i sems kyis dkon mchog gsum gyi mchod pa la sogs pa'i sdom pa rnams so//bcos pa'i thabs dngos ni rtsa ba bzhi gang byung yang / nyon mongs pa drag po byung nas nyams pa sngon bzhin 'gyod pas blang / nyon mongs pa 'bring na khrel yod pa ngo tsha shes nas/ mkhas par gnas pa gsum la bshags/des kyang 'gyod dam zhes dri/ 'gyod do zhes lan gsum brjod cing phyin chad bsdam/ nyon mongs pa chung na gcig po de'i drung du bshags so/ /'gyod dam zhes pa dang 'gyod de zhes lan gsum dri bar bya'o/ /yan lag rnams byung na'ang de bzhin du bshags te/nyes pa dang nyes pa med pa'i khyad par sdom pa nyi shu pa'i 'grel pa nas shes par bya'o/ /nges pa bskyed pa la bcos pa dang / byed pa spo ba gnyis sam/ bcos pas nges pa bskyed pa ni ma ga d+hAr shA ri'i bus sangs rgyas kyi spyan sngar sems bskyed nas bya rgod kyi phung po'i ri'i nub tu gsang ba gsum pa'i phug tu bsgoms pas bram ze gcig slong du byung ste/ci 'dod byas pas khyod kyi lag pa g.yas pa 'dod zer nas/ lag pa bcad nas g.yon pa'i khar bzhag nas byin pas ma 'dod nas/ ngas ni sems can gyi don mi 'ong ngo //blang zer nas byin pa yang mi 'dod pa snyam ste/ yi mug par gyur nas smon pa dang 'jug pa gnyis ka btang ba la/ sangs rgyas kyis nam mkha' nas tshigs su bcad pa gsungs te/ thabs dang ldan pa byang chub sems/ /thabs med pas na nyan thos te/ /khyod rang thabs la mi mkhas pas/g.yon pa mi 'dod mgos sbyin mod/ /ces brjod nas bram ze lag pa g.yon pa mi 'dod pa la g.yon pas ster ba rang gis nyes na ci la yi chad/ mgo thog tu bzhag la sbyin mod/ de yang thabs la mkhas pas sangs rgyas bsgrub par bya'o/ zhes gsungs pas slar 'gyod nas bslangs pas thob/ /rgyal po ma skyes dgras sems bskyed nas pha bsad de/ yang 'gyod nas slar blangs pas thob bo/ /mdo gzhan nas kyang blta ba ste/ byang chub sems dpa'i sdom pa gser dngul ltar bcos su btub pas nyams pa med de/ med pas spros pa la rgyu 'bras gnyis las//'bras bu'i yon tan dpag tu med cing rtags mang bas 'dir brjod pas mi zad pas ma bstan te/ mdo gzhan na blta bar bya zhing shes par bya'o/ /rgyu pha rol tu phyin pa drug la sogs pa'i 'bras bu gzhan la bsngos pas tshogs lam la sbyor ba dang / sbyor lam la sbyor ba'o/ /de'i rgyu 'bras chos thams cad rab tu mi gnas par shes pas mthong ba'i lam la sbyor ba'o/ /de rnams mi gnas par shes nas rgyun chad pa med pas bsgom pa'i lam la sbyor ba'o/ /de sems can gyi don du pha rol tu phyin pa drug spyod pa ltar snang yang 'bras bu la re ba med pas mthar phyin pa'i lam la sbyor ba'o//pha rol tu phyin pa drug spyod pa la chos nor la chags pa med na sa dang po la sbyor ro/ /drug dang chags pa med pa dang / nyon mongs pa med na sa gnyis pa la sbyor ro/ /drug dang ma chags pa dang / nyon mongs pa med nas zhe sdang med na sa gsum pa la sbyor ro//de ltar snyom las med na bzhi pa la sbyor ro/ /de ltar dang / dal ba/ dben pa/ zhi ba na lnga pa la sbyor ro/ /de ltar bcu gsum pa dang / 'khrul pa bcad na drug pa la sbyor ro/ /de'i steng du skyon med na bdun pa la sbyor ro/ /de'i steng du zhum pa med na brgyad pa la sbyor ro//de'i steng du the tshom med na dgu pa la sbyor ro/ /de'i steng du rmongs pa med na sa bcu pa la sbyor ro/ /'bras bu lam dang gnas pa dngos kyis mdo las blta bar gyis shig /de ltar spyod lam du bya ba sems bskyed nas mdo sde pa dang / dbu ma pa'i bar du spyad pa la med na 'dod pa la khyad med do//lta ba lnga ste/ lnga char la re re ste/ mdo sde pa rten 'brel du yod de/ dper na ras sngon po'i khar shel bzhag pa dang 'dra ste/ shes pa dang rnam pa rten 'brel yin/ ras kyis shel sngo ba sngo byed ras yin/ de bzhin du ma yin nas tha dad na/ bye brag pa'i dge bas sems la mi phan pa dang //sdig pas sems la mi gnod de/ bye brag ma yin pas rten 'brel yin te/ dge ba'i rnam par sems la phan la/ sems rten 'brel du ye yod pas gnod pa'i rnam pas skyed par byed pa'i rdul phra rab cha dang bcas pa skad cig gis ma rtogs pa'i sil bur 'dod la/pha rol tu phyin pa drug kyang de tsam du rtogs pa 'bras bu sku bzhir 'dod do/ /bsgom pa ni de ltar rtogs sam zhe na/ dngos po thams cad dang sems rten 'brel du ye yod pas pha rol tu phyin pa drug las 'bras bu 'byung ste/ de ltar de mi rtog pas de ltar rten 'brel sems yin par khad kyis khad kyis bsgom par 'dod la/de yang grub pa'i mtha' ma lus par ston pa theg pa chen po'i mdo nas/ rdo rje skyil krung bcas nas ni/ /skad cig skad cig la brten nas/ /sems ni sna rtser brtan byas la/ /khyim par gyur kyang bsgom par bya/ /zhes pas rten 'brel shes pa'i rnam par bsgom pa'o//skyon bsal ba la gsum las lta ba'i skyon bsal ba ni mu stegs rgyu gtso bor 'dod pa na re/ thams cad rgyu la rag las te/ /pad+ma la sogs me tog bzhin/ /'gro ba so so'i rgyu nyid las/ /thar pa dang ni thams cad mkhyen/ /zhes brjod de/ sangs rgyas pa'i rgyu sems gdod ma nas yod la/ gdod ma nas med na bsgrubs pas mi 'grub ste/ pad+ma rang la sngo dkar dmar po so so na yod la/ de bzhin du sems can la sangs rgyas pa'i rgyu yod pas sangs rgyas/ rgyu med na btsal bas mi phan/ yod pa la bsgrub mi dgos/ yod par shes pas chog zer ba de'i skyon ni 'dir ni rgyu la rtsol sgrub kyis 'dod pa'o/ /bsgoms pa'i skyon ni zhi ba dang / bye brag pa ste/ 'ong bar 'gyur ba'i bdag nyid ni/ /phyi yi spyod yul las 'gags nas/ /gnyis kyis bsgrubs pa'i zhi bar gnas/ /'bad de bdag gis bsgom par bya//zhes pas rnam pa la blo log ste/ rang gi sems zhi bar bying nas bde ba snyam byed pa dang / nyan thos bye brag tu smra ba min te/ mdo las/ rgyal byed tshal ni nyams dga' bar/ /bdag nyid gang gi gyur kyang bla'i/ /bye brag pa yi thar pa ni/ /nam yang go tam mi 'tshal lo/ / zhes pas ni gong du bstan pa'o/ /nyan thos mi gtsang ba dang / dbus dang / bden pa bzhis gnas pa'i sems de skyon no/ /'dir rten 'brel du pha rol tu phyin pa drug spyod cing gong ltar gsal la mi rtog pa'o/ /theg pa chen po'i skyon ni mdo las/ bye brag bdag chos phung po gsum/ / gzhan spangs rang gi sdug bsngal zhi/ /bde bar 'dod pa dman pas te/ /slar yang chung bas 'khor bar 'gyur/ /zhes pas yul bye brag tu 'dod cing / gang zag gi bdag yod pa yang min/ med pa yang min zhes phung po gsum par 'dod la/ rang 'khor ba las thar pa'i bde ba 'dod pas bskal pa gcig nas slar 'khor ba'o//'dir grub pa'i mtha' ma lus pa ston par byed pa'i theg pa chen po'i mdo nas/ pha rol phyin drug gzhan la bsngo/ /theg chen chos la rnam par spyod/ /dge ba sems dang 'brel par brjod/ /mdo sde de ni theg chen bshad//ces pas de ltar gsum dang gong gi bsgom pa skad cig zer bas nyan thos bye brag tu smra ba skad cig nas mi rtag pa shes pa dang / khyim par shes pa dang / sems tsam snang bar mi 'dod pas de bzhin theg pa chen po'o/ /sems tsam zhe na/ rnam pa sems kho nar mi 'dod rten 'brel du 'dod de/des spyod pa sgom pa so so'i rnam bcas kyi lta ba ni mdo sde pa ltar 'brel pa yin te/ thams cad sems yin la rnam pa yang sems kyi rnam par 'dod de/ lung las kyang / kye rgyal ba'i sras dag khams gsum po 'di ni sems tsam mo zhes pa dang / rigs pa yang nyi shu pa nas/ drug gis cig car sbyar ba na/ /phra rab rdul cha drug tu 'gyur/ /drug po dag kyang go gcig na/ /gong bu rdul phran tsam du 'gyur/ /zhes pas mdo sde pa'i phra rab bdun la rdul phran gcig yin pas phra rab drug car shar dang lho dang / nub dang byang dang / steng dang 'og gi cha des so sor dus gcig la phye zhing blang du btub na phra rab de la drug po'i sa nas yang drug blangs te phye bas phra rab med na/ shar phyogs gcig gi sa nas gcig len na ri'i gong bu 'di yang rdul phran du rigs te/ des na sems kho na ste/ pha rol tu phyin pa drug sems kyi rnam par gzhan don du spyad pas 'bras bu thams cad mkhyen pa'i sku bzhi don dam du 'dod pa'o//mdo sde pa dang nyan thos kyang kun rdzob tu mi 'gegs so/ /slob dpon shes rab 'byung gnas sbas pa mnyam gzhag na mi rtog /rjes la thams cad mkhyen par 'dod/ /sku gsum bdag po kar 'di 'khrul ba/sangs rgyas pas snod gzhal yas khang / bcud lha dang lha mor mi rtog snang bar 'dod do/ /ngag gi dbang phyug grags pa ni/ dgag sgrub gang yang med la mnyam gzhag dang rjes thob yang med par sna tshogs gnyis med du 'dod/ bsgom pa yang thams cad sems yin pas de la ngang gis 'jog pa'o//skyon la lta ba'i skyon rig byed ltar song ba bsgom pa'i skyon mdo sde pa'o/ /rig byed pa na re/ dngos po gang dang gang snang ba/ /bya bral sems nyid chos skur snang / /sems las gzhan yod ma yin la/ /gsal la mi rtog gnas bde ba//tshangs pa la yang tshangs de nyid/ /bdag gi ye shes tshangs pa'i mchog/ /ces pa'i snang bas dngos po ci snang sems yin la/ /de yang ye nas yin pas/ bya ba rtsal dang rtog pa dang / the tshom med la de yang chos sku snang yang sems nyid yin la mi rtog par gnas pas bde ste/gsal la mi rtog pa 'di ni lha tshangs pa zhes bya/ /chos sku zhes bya/ /sangs rgyas zhes bya ste/ de las don lhag pa gzhan med la/ /de rtogs pas bdag lhun gyis grub cing sangs rgyas dang 'dra bar 'dod pa'o/ /mdo sde pa'i bsgom pa brtan par bya ba dang / sna rtser sems 'dzin pa'o//'di ltar lta skad cig gis mi rtag pas khyad par ro/ /bsgom pa la sems yin pas mnyam gzhag rjes thob med la ye nas rang rig yin pas goms su med pa'o/ /rnam pa med pa'i lta ba ni rnam pa dang bcas pa ma yin te/ rnam pa 'khrul pa'i shes pa yin la/ don dam du rnam pa med pa'o/ /lung las/ bag chags kyis ni dkrugs pa'i sems/ /gong du snang ba rab tu 'jug /ces pas rlung gis dkrugs pa chu las chab rom 'byung ste/ de chu yin rlung gis lan/ de bzhin du bag chags kyis dkrugs nas dngos por zhen pas snang ba sems kyis rnam par mthong ste/sems rnam pa med pa yin te/ rigs pa rnam pa sems yin na/ tha dad pa yin nam cig car yin/ tha dad na bye brag pa dang 'dra la 'dre ba yang med/ sems rnam pa yin nam/ gnyis kar yin/ rnam pa sems su yin na ma bcad pa'i yul mi shes pa ci sems rnam par yin na bems por 'gyur/gnyis kar yin na 'dus pas yin nam/ ma 'dus pas yin/ 'dus pas yin na mi 'du ba'i rgyu mtshan yod dam med/ med na sngon du'am da ltar yang snang ba sems su stong par ram/ sems snang bar cis ma song / yul dbang po yul du cis ma song /yod na gar 'dus ma 'dus pa yin par gnyis so so na sems la rnam pa gang yod ces so/ /gzhan yang slob dpon gzhan gyi 'dod pa dbu ma'i rigs pa bzhis kyang khebs so/ /slob dpon ngag gi dbang phyug grags pa'i sna tshogs gnyis med du 'dod pa ni rnam pa sna tshogs sems su gnyis med ces 'dod pa gong ma dang /'dis kyang 'gegs pa'o/ /rnam pa de dkar dmar dang rtog gam mi rtog /mi rtog na rnam pa dang sems gnyis med du cis shes/ /de mig rgyang ring po bltas pas sna tshogs yod de/ sems su gnyis med ma rtogs pas man ngag tu 'dod do//sna tshogs su shes pas mngon sum gyis da lta shes zhes te/ de la skyon mang ste/ de gdod nas sam da ltar gdod nas na sngon du ma shes pa ci/ shes kyang ma phan na dgos pa med/ shes kyang dgos na thug pa med nas ma shes na rang rig nyams/ da lta na sngon du med phyis med pas chad par thal/yang na gnyis med de gnyis med du gang gis shes/ gzhan gyis shes sam de nyid kyis shes/ gzhan gyis shes na rang rig nyams/ de nyid kyis de nyid shes sam/ de las 'byung bas shes/ de nyid kyis de nyid shes na/ rtag nas sam mi rtag nas/ rtag na mi rtag par thal/mi rtag na shes rgyu med/ sngon du ma shes pa ci/ rkyen dgos na gong ltar de nyid du na dus sam rigs yin na de la rnam pa ci phan/ yang na de las byung bas phan na shes bya'am shes byed/ /shes bya shes byed gang / shes bya gnyis med byung na shes byed med par shes bya gang yin shes/ shes byed byung na shes bya med par shes byed kyis ci byed/ dus gcig tu skad cig la gnyis 'ong ba mi rigs so/ /des na shes bya med par shes byed du mi shes/ shes byed med par shes bya mi shes/ des na gnyi ga mi 'byung na gcig gis ni mi shes so/ /des na rnam pa med pa'i rang rig pa spros pa med pa bsam du med pa skad cig mas mi rtag /rgyun du gnas pa don dam mo/ /shAn+ti pa rjes thob la sprul skur 'dod/ gzhan mi rtog pa las so/ /bsgom pa yang de'i ngang la blo 'jog pa'o/ /skyon la lta ba'i dang / /sgom pa'i gnyis las lta ba'i sems tsam rnam pa dang bcas pa de'o/ / bsgom pa'i nyi ma dang mthun te/ mu stegs nyi ma pa'i rgyud nas/ rtog pa'i rgya mtsho dang ba la/ chu bur dba' rlabs sogs 'byung yang / shar ba dang ni nub pa dag /chu bo de ru ro mnyam gcig /ces pas dper na 'og gi rgya mtsho nas chu bur dang / dba' rlabs dang / gzhan yang rnyog ma dang / chu gzhan der 'bab kyang rgya mtsho'i ngang du gcig pa ltar/rang gi sems nyid rnam pa med pa/ spros pa med pa/ mtha' dang mu med pa bsam du med pa/ thams cad rtag pa de rtogs na dngos po cir snang / rtog pa ci byung yang sems nyid las kyang tshangs pa/ chos nyid sangs rgyas yin no zhes 'dod do/ /'dir skad cig mas mi rtag la/rgyun gyis rtag par 'dod pa'o/ /sgyu ma lta bu'i lta ba ni de gnyis mi bden te/ rnam pa sgyu ma skad cig gis mi rtag la rgyun du gnas par 'dod do/ /lung gis kyang / gzugs las kyang stong pa nyid gzhan ma yin/ stong pa nyid las gzugs gzhan ma yin zhes gsungs la/rigs pas kyang rnam pa sems su bden/ sems rnam pa yin na dpyad pas ma grub ste/ skyon med na bde sdug nyams su myong ba yang brdzun la/ pha rol tu phyin pa drug bsags pa la dgos pa med/ sku bzhi med pa des na sgyu ma bden te don dam du 'dod pa'o/ /sangs rgyas gsang ba gzugs sku yang rigs pas sgyu ma bag chags ltar 'dod do//ka ma la rak+Shi ta mnyam gzhag dang rjes thob tu 'dod do/ /gzhan mi rtog par gzugs sku sems can gyi snang bar 'dod do/ /rnam pa med pa dang / rig par 'dod pa dang / rig pa rnam pa med pa gnyis 'gal bas skyon gong bzhin no//bsgom pa yang sgyu mar shes pa'i ngang la blo 'jog go/ /skyon lta ba dang sgom pa gnyis te/ lta ba dang / bsgom pa 'dra ste/ mu stegs grangs can pa ni lung las/ de tsam nyi shu lnga shes na/ /ral pa spyi bor bcings pa'ang 'grol/ /ci dga' spyod pa byed pa dag /bdag ni de las nyams pa yin//zhes pas phung po lnga/ 'byung ba lnga/ phyogs lngar 'dod de/ rtsa ba'i nyi shu rtsa lnga yang lnga ste/ thams cad so so'o/ /sems 'dod chags zhe sdang gti mug gsum cha mnyam pa las snang ba bden rtag par 'dod pa'o/ /de yang sems su bden pas dpyod pa dang / rtog pa dang bya ba thabs nyes pa med 'dod pa'o//'di skad cig mas mi rtag pa rgyun du gnas pa'o/ /rab tu mi gnas pa'i lta ba ni de thams cad bden pa ma yin te/ kun rdzob yin la don dam pa la rnam gcod dang yongs gcod med/ rnam gcod yongs gcod med zer ba rang kun rdzob bo//lung las kyang bden pa gnyis kyi mdo nas/ don dam pa'i bden pa sangs rgyas 'das pa dang / ma byon pa dang / da ltar byung ba phyogs bcu na bzhugs pa thams cad kyis mthong ba dang / thos pa dang shes pa'ang med na/ rigs kyi bu thob pa'am nyams su myong du lta ga la yod ces dang /slob dpon klu sgrub kyi zhal snga nas kyang / khyod kyi don dam gang yin pa/ /de ni nga yi kun rdzob yin/ /zhes gsungs la/ slob dpon blo gros mi zad pa'i zhal snga nas kyang / don dam blo sgra'i spyod yul min/ /blo dang sgra ni kun rdzob yin/ /zhes gsungs so/ /rigs pa yang gtan tshigs chen po bzhi ste/'dir gtan tshigs bzhi yang gzhan ltar gsum dang / shes bya shes byed ma grub pa bzhi'o/ /de yang rgyu man chad du 'dod pa la rten cing 'brel 'byung gis don dam pa de gang dngos po rnams rnam pa med pa'i rigs sgyu ma de rnams kyang sems nyid stong pa nyid shes rab kyi pha rol tu phyin pa chos sku yang rten 'brel kun rdzob bo//de yang rtog pa snang ba pha rol tu phyin pa lnga/ gzugs sku la ltos nas chos skur btags te/ de yang de rnams stong pa la sogs par mthong ba/ chos sku la chos skur 'dod pa de rnams med na med pa'o/ /des na rdo dkar po zhes pa don dam du med kyang mi dge ba kun rdzob tu/rdo dang dkar po dang sra ba lci ba kun la grags pas yod pa'o/ /des na rnam bcas rnam med sgyu ma rten 'brel tsam kun rdzob sgyu ma tsam du yod pa'o/ /don dam par med pas chos skur yang med do/ /mu bzhi skye 'gog ni don dam par 'dod pa ni yod nas 'dod dam med nas 'dod/yod nas 'dod na yod pa ni med pa la ltos nas shes te/ med pa ma grub par yod pa ga na grub/ med pa grub na yod pa 'gag pa'o/ /med nas 'dod na yang med pa yod pa la ltos nas shes te/ yod pa grub par med pa ga na grub/ yod pa ma grub na med pa 'gag pa'o//gnyi ga 'dod nas/ yod na med pa 'gags la med na yod pa 'gags pas so/ /phung po gsum yang mi rigs la/ gnyi ga med pa yang mi rigs te/ gnyis sngon du ma grub par ro/ /grub nas gnyis med na bden te/ des na kun rdzob sgyu ma tsam mo//rdo rje gzegs ma thogs pa med pa yang don dam de bdag las sam gzhan las skye/ yod na bdag grub pa las sam/ ma grub pa las/ grub pa las sgrub na sangs rgyas kyang sgrub dgos pas thug pa med/ yang na phan gnod med de/ grub kyang sgrub dgos pa'i phyir ro/ / ma grub pa sgrub na nam mkha'i me tog dang ri bong gi rwa yang sgrub par 'gyur ro/ /mi sgrub na sgrub pa la dgos pa ci/ gzhan las skye na rtag pa las sam/ mi rtag pa las/ rtag pa las skye na rim gyis sam/ cig car/ rim gyis skye na rtag pa nyams te sa bon las myu gu ltar 'gyur ro//cig car skye na de nyid 'gyur nas sam ma 'gyur nas 'gyur na mi rtag /ma 'gyur na gcig skye ba'am/ du ma skye/ gcig skye na du ma ma grub par gcig mi 'grub/ gnyis ka yang go rims bzhin du mi rigs so/ /mi rtag pa las skye na yang de bzhin du gcig las sam/ du ma las kyang mi rigs te/ skad cig ma snga phyi yang snga ma 'das/ phyi ma ma skyes/ de lta ba la yang 'das pa dang / da ltar ma 'ongs pa gsum ma grub pa'o/ /des na sgyu ma kun rdzob tsam mo/ /shes bya shes byed ma grub kyang nga rgyal gyis 'dod na yang don dam pa de shes bya ba'am/ shes byed dam/ gnyi ga shes bya gang gi shes/ shes byed yin na gang shes/ shes bya yod na shes byed nyams/ gnyis ka na shes bya sngon du skye'am/ shes byed sngon du skye shes bya sngon du skye na shes byed ci dgos/ shes byed sngon du skye na shes byar gang gis shes/ lhan cig par ni shes pa skad cig ma la yang rigs so//de ltar re re ma grub par gnyis kyang mi 'grub/ shes rab le'ur slob dpon blo gros mi zad pas bstan pa'o/ /des na sgyu ma kun rdzob tsam du mi 'gag ste/ kun rdzob sgyu ma yin na sangs rgyas bsgrubs pa la phan med/ kun rdzob yin pas zer na don dam pa 'dod thog /kun rdzob la khyab pa ma grub ste/ kun rdzob sgyu mar 'dra ba la/ chu dang me'i las tha dad/ bde sdug tshor ba tha dad/ de bzhin du 'khor ba dang mya ngan las 'das pa yang ngo / /des na 'dir chos sku dang / ngo bo nyid kyi sku dang / gzugs sku gnyis char yang kun rdzob bo//sgrub pa yang kun rdzob thob pa yang kun rdzob kun rdzob tu rgyun chad par sku bzhi skad cig mar mi rtag par 'gyur ba'o/ /kho na re khyod la shes byed yod dam med zer na don dam pa la'am/ kun rdzob la/ don dam pa la khas len med par shes ci dgos/ kun rdzob la skad cig gi bye brag gi rgyun la gnyis ka yang mi sto/shes bya shes byed med pas chad pa'o zer na khas mi len par skyon ci gnod de/ nam mkha' la skyon ci la gdags/ yang khyod la rnam gcod yongs gcod med na/ rgyu man chad la skyon de tsam rnam par bcad pas rnam gcad des yongs su gcod pa'i sgrub pa yang yod pas khyod la yang yod la/yang don dam dpyad pas yod zer na/ nga la don dam rnam gcod yongs gcod med na khas len med de/ khyed don dam du yongs su gcad nas 'dod pa la da'i kun rdzob kyi spyad pa'i skyon yod pa mthong nas/ rnam par gcod la/ kun rdzob kyis dpyad pas don dam pa grub pa med par yongs su grub kyi/khyed de ltar don dam la don du 'dod pa med do/ /yang kho na re 'o na khyod kun rdzob kyi yongs gcod kun rdzob tu grub pa man zhe na grub ste/ 'o na grub pa med pa de rnam gcod yongs gcod kyis grub na nga dang 'dra la/ rnam gcod yongs gcod sel na ni sgrub byed gang gis byed la/sgrub byed med na ci 'grub ces 'dri na/ khyed don dam du 'dod pa rnam par gcod cing / kun rdzob tu gcad pas ma grub pa de nyid kun rdzob tu grub la/ rnam gcod yongs gcod kun rdzob la rang bzhi nas/ don dam la sel byed mi 'dod la/ mi 'dod zer ba dang / don dam zer ba yang de tsam du brjod par zad kyi mi brjod du ma btub pa las kun rdzob bo/ /ci 'grub zer ba don dam la 'dod thog /dam bca' mthun pa'o/ /kun rdzob tu ci yang ma yin pa de la skad cig gis snga ma rgyun ma chad pa chu bo ltar yin 'jig pa'o/ /yang kho na re/ rnam gcod bdag la mthong ba de rang zhi la/yongs gcod khyod rang yon tan du mthong ba'i khas len med pa de/ rnam gcod nas sam/ mchod nas/ mchod na gnyis sam/ phung po gsum pa'i skyon yod/ chod na gcod byed gzhan nas 'byung ngam/ de las yin/ gcod byed shes pa gzhan nas 'byung ba mi rigs te/sangs rgyas lung rigs kun gyis rang la 'byung gis gzhan gyis mi byed/ byed na sangs rgyas gcig gis sems can sangs rgyas la 'god par rigs so/ /de las byung nas rnam par gcod na de gcad pa'i shes pa de la yang gcod byed cig dgos pas thug pa med pa'am/ phan ma btags pa'i skyon yod do zhe na/de ni dper na gzugs sam sgra'i yul yod pas/ mthong ba dang thos pa yod la/ yul med na dbang pos mthong thos med pa la rkyen med du rang zhi la shing ma zad kyi bar la me 'bar la/ shing zad nas me rang zhi ba la rkyen med do/ /de bzhin du rnam gcod med pas rang gis rab tu mi gnas so//sgom pa de ltar kun rdzob rnam gcod yongs gcod med pa de la ngang gis kun rdzob tu gnas so/ /kun rdzob la yang gnyis te/ dge sdig gnyis kyi rgyu 'bras kyi snang ba'o/ /spyod 'jug nas/ de la kun rdzob rnam pa gnyis mthong / rnal 'byor pa yang de bzhin phal zhes pa'o//'jig rten pa'i sdig pa'i rgyu 'bras snang ba la dbye na yang mang la/ rnal 'byor pa'i dge ba'i rgyu 'bras snang ba yang mu stegs dang / nang pa la yang mdor dbye ba theg pa gsum dang / bye brag tu smra ba la sogs pa'i lta ba drug gi rim pas rgyu pha rol tu phyin pa drug / 'bras bu sku bzhi/ de yang mtshan nyid kyi lugs kyis pha rol tu phyin pa drug bskal pa grangs med gsum du sbyangs pas sku bzhi thob la/ de yang gong bzhin sems bskyed nas spyad pas sbyin pa dang / tshul khrims la brtson 'grus kyis grogs byas nas gzhan don du bsngo ba bsngos pas sprul sku 'byung la/bzod pa brtson 'grus kyis grogs byas pas longs sku/ bsam gtan la grogs byas pas ngo bo nyid kyi skur rgyun du rang sems gnas/ de rnams thams cad gdod nas rab tu mi gnas pa'i shes rab la brtson pas chos sku'o/ /de yang byams pas zhus pa'i mdo nas/sbyin dang tshul khrims bzod pa dag /brtson pas gzugs sku 'byung ba'o/ /bsam gtan shes rab ngo bo chos/ /sku de brtson 'grus kyis 'byung ngo / /zhes bstan to/ /sngags kyi lugs la slob dpon la la dag /lam bde ba yin gyi nyes pa yin te/dper na rdo rje gdan du 'gro ba la rta rkang 'grogs pa nyin gcig gis mi sleb pas rta pa de mi chad rkang thang chad de phyin pa 'dra ba bzhin du/ sngags dang mtshan nyid sangs rgyas pa'i dus dang rtsol sgrub 'dra ste/ sngags pa thabs dang bsam pa dang lus mtshan nyid pa bzhin mi sgrub pa'i longs spyod dang 'dod yon gyis sgrub ces 'dod do//'dir lam bde ba dang lam nye bar 'dod do/ thabs dang bsam pa gtso bos nyan thos pas mtshan nyid theg pa chen po nye la/ de bas sngags nye ba'o/ /sku bzhi'i rgyu yang dam tshig gi phyag rgya las sprul sku dang / longs sku las kyi phyag rgya las 'byung / chos kyi phyag rgyas bde ba chen po'i sku 'byung / phyag rgya chen po rtsol sgrub med pa de ye nas gnas pas chos sku'o/ /lam du bsgom thabs la sogs pa rgyas par 'og nas sngags kyi skabs su ston no/ /slob dpon la la'i kun rdzob yang dag pa zla ba gcig gam chu dngos bya ba nus pa yin la/log pa'i kun rdzob smig rgyu'i chu dang / zla ba gnyis par mthong ba ni 'khrul te mi bden par snang zer ba 'dir mi 'dod de/ 'dir kun rdzob smig rgyu dang / chos sku 'dra bar mi bden par snang la 'khrul pa'i snang ba'o/ /de yang 'khrul pa'i smig rgyu'i chu dang zla ba gnyis 'khrul pa la snang ba tsam las med de/ma 'khrul pa chu ngos dang / zla ba gcig byang chub sems dpa' la snang ba tsam las dngos su med pas byang chub sems dpa'i snang ba tsam po de sangs rgyas kyi ngo bo nyid dang / bde ba chen po la med/ bya ba de don dam la med pas de kun log par song zhing ma shes pa'o//snga ma ltar snang ba tsam po phye na dge sdig gnyis grangs med par bden pa'o/ /rigs pas gnod kyang kun rdzob tu bden pa tsam de nyid bden par brjod pa'o/ /skyon ni mu stegs bram ze de nyid de/ kho'i rgyus nas/ tshangs pa gdong bzhi kun du bzang //sems nyid don dam par shes shing / /snang ba thams cad kun rdzob ste/ /de ltar rtogs nas phan gnod med/ /ces pas rang gi sems 'di tsam las mgo nas rkang pa'i bar du mig dang rna ba dang ba spu la sogs pa yang med la/ phyi na yang gzugs sgra la sogs pa gang yang med cing ma rnyed pa de kho na rnyed pa ste/de nyid nam mkha' ltar brjod pa dang / bsam pa dang bral zhing mtha' dang bar mtshams dang mu med pa de nyid la rtogs pa zhes bya/ chos sku zhes bya/ tshangs pa zhes bya/ de kho na nyid ces bya/ kun du bzang po zhes bya ste/ sangs rgyas yin la/de la dge bas phan 'dogs ma myong / mi 'dogs la/ sdig pas gnod ma myong mi gnod kyi/ gzhan sangs rgyas pa dang / mu stegs rtsol sgrub la re ba rnams snying re rje/ don dam pa de la rtsol ba med pas 'grub pas so zhes zer ro/ /de yang 'dir skyon yin te/de nyid der rtogs pas chog pa de rtogs par gang gis shes/ de las byung ba zhig shes sam/ gzhan gyis shes/ gzhan gyis shes na khyed kyis bdag kyang rtogs su chug /nga sangs rgyas su chug /yang na rang la sangs rgyas yod pa dang / yin zer ba dang nyams/de nyid las byung na de kho na 'dra ba cig byung nas shes sam/ mi 'dra ba cig byung nas shes/ ming 'dra bas 'dra bar mi shes te/ mi 'dra ba de 'dra ba min te/ min pas yin par shes pa ga la yod/ rten long ba la sogs pas mthong ba la sogs pa yod na ston/ des na mi 'dra ba cig byung bas kyang mi shes pas sangs ji ltar rgya/de kho na 'dra ba cig byung nas shes na/ de sngon nas yod nas shes sam zhar la byung / sngon nas yod nas shes sam/ da lta shes/ sngon nas yod nas sngon rang du shes na shes pa la phan med cing / sngon nas shes pas da lta sems can du 'dug pa la phan te/sangs rgyas kyang sems can du yod pas so/ /yang na thug pa med de/ sngon nas yod kyang da lta yang shes dgos pas so/ /sangs rgyas la yang thug pa med do/ /yang na rigs pa yod dgos na/ la las sangs rgyas dge ba ma byas kyang 'gro ba'am sdig pa ma byas kyang ngan song du 'gro ba la sogs pa'o//yang na dus rgyur lta ba bzhin du dus yod dgos te mi rigs so/ /zhar la byung bas shes na de nyid gnyis su song ba'am/ mang po'i skyon dang rgyu rkyen mi dgos na sngon du yang 'byung bar rigs/ dgos na de kho na 'dra ba 'byung na thug pa med pa dang /phan med na dang / phan pa'i skyon dang / mi 'dra na 'gyur mi rtag pa dang / gong ltar rang rig dang kun sangs rgyas su bya bar rigs so/ /des na phyi rol mu stegs pa dang / nang pa sangs rgyas pa thams cad don dam du khas len pa dang / sangs rgyas 'dod pa skyon no//de yang skad cig ma dang / rgyu med par rtag pa dang / ther zug pa'o/ /skad cig dang rgyun ma shes na sems tsam rnam bcas rnam med sgyu ma pa dang rab tu mi gnas par 'dod kyang mu stegs su 'gro'o/ /mtshan nyid kyi de nyid mthong ba'i lam gyi rim pa'i le'u ste dang po'o// //gnyis pa sngags kyi rim pa bshad pa la gnyis te/ snod du bya ba dang bcud du bya ba'o/ /snod du bya ba la dbang bzhi ste/ bum pa'i dbang dang gsang ba'i dbang dang / shes rab ye shes kyi dbang dang bzhi pa'o/ /bcud la phyag rgya bzhi'o/ /bum pa'i dbang la gnyis te/slob ma'i bya ba dang / slob dpon gyi las so/ /slob ma'i bya ba la gsum ste/ bsnyen pa'i bya ba dang / sta gon gyi bya ba dang / zhag gi bya ba'o/ /bsnyen pa'i bya ba la lnga ste/ slob dpon gyi mtshan nyid brtag pa dang / zhu dbul ba dang / rdzas bsags pa dang / bsnyen pa zhu ba dang /sdom pa gzung ba'o/ /mtshan nyid brtag pa la bzhi ste/ brgyud pa dang ldan zhing don dam mi gnas par rtogs pa dang / dam tshig dang zhing byin rlabs 'byung ba dang / rgyud de shes shing dkyil 'khor la mkhas pa dang / gzhan don la brtson zhing chags pa med pa'o/ /zhu dbul ba ni bdag yang dag par rdzogs pa'i sangs rgyas thob par bya ba'i don du zhi ba la sogs thun mong gis gzhan don dang /mchog gis 'gro ba thams cad sangs rgyas la bkod pa'i don gyi phyir slob dpon bdag la bum pa'i dbang zhu 'tshal zhes brjod cing / maN+Dal dang me tog gi phreng ba dag dbul lo//rdzas bsag pa ni rgyud kun nas/ /rin chen gser dngul mu tig dang / /me tog la sogs rgyal srid bcas/ /gtor ma shing rtas bskyal ba dang / /dpa' bo'i ston mos dga' ston bya/ /zhes pas 'khor lo mchod pa la chu gtsang brgyad stong khri 'bum gyi bar du dgram/ de bzhin du me tog spos/ mar me dri'i bye brag dpag tu med pa dang / zhal zas dpag tu med pa dang / sil snyan dpag tu med pa bsag go/ /rgyal srid rin po che sna bdun/ bkra shis kyi rdzas brgyad/ gzugs sgra'i bye brag dbul ba dang / sha lnga dang / bdud rtsi lnga dang / rdo rje'i glu gar dang /nang gi mchod pa dang / bcu gnyis bcu drug nyi shus mdzad pa de kho na'i mchod pa des kho na'i mchod pa bsag /bla ma mchod pa la yang de ltar mchod pa gsum dang / rgyun gyi bye brag bsag pa dang / chos skyong mchod pa'i yo byad 'bras chan la sogs pa tshan gyi rigs ji snyed yod pa dang /sha dang nya'i rigs dang / tig tas bran pa'i tshod ma la sogs pa'i rigs dang / zho la sogs pa'i dkar gyi rigs dang / la du la sogs pa khur ba'i rigs dang / gur kum la sogs pa sman gyi rigs dang / na ri ke la sogs pa'i 'bras bu'i rigs dang / pog phran la sogs pa la du'i rigs dang /ka ra la sogs pa mngar gyi rigs dang / la phug la sogs pa rtsa ba'i rigs dang / gzhan yang bca' ba dang / tsha ba dang / kha ba dang / skyur ba'i rigs kyi mchod pa'o/ /rdzas bsag pa dang / dga' ston bya ba yang rgyud nas/ /mchod 'os ma gyur gtor ma dbang //sde dang rigs rnams dga' bar bya/ /zhes pas dbang thon nas yo byad lhag pa la rnal 'byor pa dang / ku su lu'i tshogs dang / paN+Di ta dang / slob ma'i 'khor dang / dge 'dun dang / dge bsnyen gyi g.yog dang / rgyal po dang / rgyal rigs dang / bram ze dang / rig byed kyi sde dang /rje'u rigs dang / gtsang ma rnams dang / dmangs rigs dang / rigs ngan rnams la ci rigs pas mchod pa dang / sbyin pa bya ba'i phyir bsag go/ /bsnyen pa zhu ba ni de ltar rdzas tshogs nas slob dpon bdag gi bsam pa sgrub par zhu zhes lan gsum brjod cing maN+Dal dang me tog gi phreng ba dbul lo//sdom pa gzung ba ni bsnyen pa'i dus te 'og nas ston to/ /slob dpon gyis las la shes pa dang dbang bskur ba ste/ shes pa la bzhi ste/ brgyad pa dang ldan pas sangs rgyas nas bar ma chad pa/ don dam rtog pa rab tu mi gnas pa'i lta ba 'dod pa rtog pas sku bzhi man ngag gis sgrub pa'i don shes pa dang /byin rlabs dam tshig las 'byung bas dam tshig shes nas bsrung ba dang / rgyud dang dkyil 'khor gyi cho ga la mkhas pas ma tshang ba brgyad kyis kha skong ba dang / slob ma yongs su skyob pa dang / gzhan don la brtson zhing ma chags pas bsnyen pa dang ldan zhing 'byor pa la phan pa'o/ /cho ga la gsum ste/ bsnyen pa'i cho ga dang / dkyil 'khor gyi cho ga dang / dbang bskur ba'i cho ga'o/ /bsnyen pa la slob ma'i bsnyen pa dang / lha'i bsnyen pa gnyis las slob ma'i bsnyen pa la yang sdom pa sbyin pa dang bsrung ba gnyis so//sdom pa sbyin pa la slob dpon rim gyis bstan pa slob ma srung du gzhug pa gnyis las/ slob ma srung du gzhug pa'i sdom pa la yang chung ba dang / che ba gnyis las chung ba ni sngon du bstan pa'i skyabs su gsol ba'i bye brag bdun dang /rten dang bslab pa'i bye brag rnams rim pas bstan la srung du gzhug pa'o/ /theg pa chen po'i yang de bzhin du gong du bstan pa bzhin du srung du gzhug pa'o/ /bsrung ba la yang gnyis te/ mkha' gsang du rnam par snang mdzad du bya ste/ phyogs bcu'i sangs rgyas thams cad kyis byin gyis brlabs nas gdon pa dang /rgyu gong bsnyen gyi bsrung ba sngags zlos su gzhug pa'o/ /lha'i bsnyen pa la bsnyen thabs dang / brtag gnyis las/ lha'i bsnyen pa'i thabs la rdzas kyis bsnyen pa dang / ting nge 'dzin dang / sngags kyis bsnyen pa dang gsum mo//rdzas la maN+Dal phul bas 'khor bas 'khor lo bsnyen pa dang / gtor mas chos skyong bsnyen pa'o/ /ting nge 'dzin la rnal 'byor bzhis 'khor lo bsnyen pa dang dgug gzhug bskyed pas chos skyong bsnyen pa'o/ /sngags la gtso 'khor gnyis bsnyen pa dang / yi ge brgya mtshams sbyar ba'o//rtags la mngon sum dang / mtshan ma dang / grangs su bskyal ba'o/ /dkyil 'khor gyi cho ga la yang bzhi ste/ dkyil 'khor rgyu'i bya ba dang / lhag gnas dang / dkyil 'khor gyi ngo bo dang / cho ga dngos so/ /rgyu'i bya ba la bdun te/ sa btsal ba dang / brtag pa dang / bslang ba dang / gzung ba dang / gcad pa dang / sbyang ba dang / brtsig pa'o/ /lha gnas la bzhi ste/ sa'i lha mo dang / 'khor lo dang / bum pa dang / slob ma lhag par gnas pa'o/ /ngo bo la thig gdab pa dang / tshon dgye ba dang / rgyan dgod pa'o/ /sa btsal ba la ting nge 'dzin sogs kyis lus lha/yid gang 'dod kyi 'gro don la dmigs pa dang / ngag snying po'i sbyor ba dang / btsal ba dngos la las dang sbyar la phyogs btsal ba dang / rgyud ltar dben pa'am mi 'jigs pa'i sa btsal ba'o/ /brtag pa la yang sbyor ba dngos su song ba las dang sbyar ba kha dog dbyibs brtag pa dang /rgyud ltar bum pa la sogs pa'i mtshan nyid brtag pa'o/ /bslang ba la yang bdag po dngos por snang ba las bslang ba dang / dngos po med pa las bslang ba'o/ /gzung ba la yang rnal 'byor bzhis gzung ba dang / sa'i lha mo dpang bas gzung ba'o//gcad pa la yang ji tsam 'dod pa de sa'i lha mo mkha' la bteg la yid kyis gcad pa dang / khro bo'i phur bus phyogs ma nor bar gcad pa'o/ /sbyang ba la rdzas dang / lus dang / ngag dang / yid kyis sbyang ba lnga las/ rdzas la sa ro mang na legs par bsal/gzhan gyis dgang ba dang / rin po che'i bum pa bcud can sba ba dang / gtor ma gtang ba'o/ /lus rkang pa rdo rje brkyang bskum gyis bgegs bsal ba'o/ /ngag slob mas/ de bzhin gshegs kun zhi ba dang / /zhes pa la sogs pa dang / yak+Sha zhes brjod pas bgegs bsal ba'o//yid dra ba dang / gur dang / gdod nas dag pa dang / rdo rje'i gdan ltar mi 'gyur bar bsam mo/ /rtsig pa la dri dang ba'i rnam pa lnga bsres la tshad dang ldan par brtsig pa dang / dri dang spos byug pa'o/ /sa'i lha mo lhag par gnas pa las bskyed pa dang / nam mkha'i spyan drang ba dang /mchod pa dang / gnyis med byas la bstim pa'o/ /'khor lo lhag gnas las me tog dgod pa dang / lha bskyed pa dang / gsol ba gdab pa gsum pa las/ me tog dgod pa la rdo rje slob dpon gyis lha'i gnas su mtshan ma gdab pa dang / las kyi slob dpon gyis me tog dgod pa'o//lha bskyed pa ni sbyor ba gsum gyi rnal 'byor bzhi sgrub thabs kyi 'dod pas bskyed pa'o/ /gsol ba gdab pa la lnga ste/ slob dpon phyir byung la shar nas yid kyis blta ba dang / 'khor lo'i lha la gsol ba gdab pa dang / sangs rgyas dang byang chub sems dpa' spyi la gsol ba gdab pa dang /chos skyong la gsol ba gdab pa dang / gsol ba btab la mkha' la gshegs pa'o/ /bum pa'i lhag gnas la mtshan nyid dang / phyi'i bya ba dang / nang gi bya ba gsum mo/ /mtshan nyid la grangs lha dang sbyor ba dang / rgyu rin po che'am sa las byas pa dang /mu stegs kyi ma yin pa bre gang las mi chung / bre gsum las mi che ba/ rtsa ba med cing mi gnag pa'o/ /phyi'i bya ba la yang mtshan ma gdab pa dang / kha rgyan mgul rgyan gyis brgyan pa dang / gdan la gzhag pa'o/ /nang gi bya ba bcud la drug ste/ bcud blugs pa dang /gzhal yas khang dang lhar bskyed pa dang / ye shes kyi lha dgug pa dang / mchod pa dang / sngags bzlas pa dang / bzhu bas bkang la gnas su gzhag pa'o/ /slob ma'i lhag gnas la slob dpon dang / slob ma 'brel ba'i bya ba bdun te/ spro ba bskyed pa dang / gnang ba sbyin pa dang /sdom pa sbyin pa dang / bsrung ba dang / so shing dor ba dang / ku sha'i sngas dang stan sbyin pa dang / gzengs bstod la nyal du gzhug pa'o/ /spro ba bskyed pa la gsum/ slob mas khrus byas la maN+Dal dbul ba dang / slob dpon gyis sngags kyi dngos grub ces pa'i chos bstan pa dang / slob mas pha rol la dmigs te rgya che bar shes par bya'o/ /gnang ba sbyin pa la nod pa dang / sbyin pa gnyis las/ dga' chen zhes spro bas nod pa dang / bu tshur zhes brtse bas sbyin pa'o/ /spro ba la gsum ste/ sangs rgyas zhes skyabs su gzhug pa dang / skyabs pa'i yon tan sangs rgyas longs sku/chos bde bas bsgrub pa dang / dge 'dun gtso bo'i ngo bo bstan pa dang / sdom pa dang ldan pas slob dpon de gsum dang ldan pa dang / khyod kyi dbang thob nas yin par 'gyur ro/ /sdom pa dngos la gnyis te/ mtshan nyid kyi dang sngags kyi'o/ /mtshan nyid la bdun sngon du song ba'o//sngags la gnyis te/ slob dpon gyi dang rigs lnga'i sdom pa 'dzin du gzhug pa/ 'di ni sangs rgyas zhes pas gzhug pa'o/ /bsrung ba la 'byor bas bsrung ba dang / gdams pas bsrung ba'o/ /'byor ba la zhi sogs kyi sbyin sreg bya'o/ /gdams pas bsrung ba la slob ma dang slob dpon gyi bya ba gnyis las/slob mas bsrung ba la/ lus gus pas rkang pa g.yas pa'i pus mo sa la btsugs la bsdad pa dang / yid bya ba dran par bya'o/ /slob dpon gyis bsrung ba la ting nge 'dzin dang / mchod pa dang rdzas gsum gyis bsrung ba'o/ /ting nge 'dzin mkha' gsang du slob ma rnam par snang mdzad du byin gyis brlabs la gdon pa dang /sangs rgyas thams cad lus la gzhug pa'o/ /mchod pa la gnas gsum du dris mtshan ma bya ba dang / lha bskyed pa dang / phyi nang gi mchod pas dngos su mchod pa'o/ /rdzas la skud pa dang / gtor ma gnyis las/ skud pa'i rgyu dang / ting nge 'dzin dang / sngags dang / gdags sa bzhi las/ rgyu ras sam bal lam ring thung sum bsgril mdud ma bdun nam lnga gsum du bya'o/ /ting nge 'dzin la bdud rtsi 'khyil ba la sogs par bskyed/ ye shes dgug mchod/ gnyis med du byas te/ sngags de brgya stong du bzlas te go char bsam pa'o//gdags sa skyes pa'i g.yon/ bud med kyi g.yas su'o/ /gtor ma la rgyu byin gyis brlabs pa/ mgron bsngo ba'o/ /rgyu snod ka pA la dang / rin po che'am/ de med na shing dang rdo kyong yang bzang / byin gyis brlab pa snod dang bcud las/ snod rlung me bskyed pa ka pA lar ro//bcud bdud rtsi lnga dang sha lnga'o/ /mgron la gnas dang / lha gnyis la/ gnas chos 'byung pad+ma dang / lha la bskyed pa dang / dgug pa las/ bskyed pa bar du chos skyong / steng du lha chen po/ 'og tu klu ste gzhan ltar ro/ /so shing dor ba la bdun te/ so shing gi mtshan nyid dang /dor sa dang / slob ma'i kha lta phyogs dang / dor ba'i thabs dang / dgos pa dang / de la dgos pa dang / ltas brtag pa'o/ /ku sha'i sngas dang / stan sbyin pa la ku sha bsangs la gtso bo'i sngags kyis sngags su sbyin pa dang / las bum gyis bsangs la las kyi sngags kyis stan du sbyin pa'o//gzengs bstod nas nyal du gzhug pa la/ gzengs bstod pa dang / nyal ba la gnyis te/ slob dpon gyis/ 'jig rten du ni kun mkhyen dag /ces nges par bstan pa dang / slob mas spro bas yid ches pas mnyan nas dga' bar bya'o//nyal ba la sbyor ba dang / rmi lam brtags pa dang bzla ba'o/ /sbyor ba la lus seng ge'i nyal stabs kyis dkyil 'khor dang slob dpon la sngags bstan la nyal ba dang / ngag bsnyen pa'i dus kyi snying po bzlas pa dang / yid 'gro ba dang bdag gi don 'dod pas tha mal la ma yengs pas nyal ba'o//rmi lam brtag pa ni bdag gi so shing gi ltas dang mthun pa'i thun mong dang mchog gi ltas shog cig /ston cig ces brjod do/ /rmi lam bzla ba la bzla ba dang brtag pa'o/ /bzla ba bla ma la maN+Dal phul nas dang po'am tha ma gang gsal bzla'o/ / brtag pa ni rmi lam bzang ba la sogs pa dang / ngan pa mar nag gis lus byugs sam/ spre'u dang 'bu sbrang dang / sdig sbrul gyi sos btab pa rmis na zhi sogs man ngag gis sbyin sreg bya/ gzhan yang chus khyer ba la sogs pa rmis na sngags mang du bzla/ gzhan gyis bdag gi nor sogs khyer na bzang ba'o//gzhan yang bzang ba mang / ngan yang sgyu mar shes na zlogs so/ /thig la rgyu dang / byin gyis brlab pa dang gdab pa'o/ /rgyu dkar po la sogs pa lnga'o/ /byin gyis brlab pa thig skud 'khal ba bdag lha gtso bo'i ngo bor gsal/ 'khal mkhan shar gyi lhar gsal/nag po dkar po ser dmar ljang gu gtso bo'i 'od kyis ltar gsal/ 'od kyis rigs kyi thugs dam bskul sa sbyang ba dang snod du lha bskyed pa dang / ye shes kyi lha dgug /mchod bsgril/ gnyis med thig tu gyur pa'o/ /gdab pa ye shes kyi mkha' la gdab pa dang / dam tshig gi skud pas dkyil 'khor dngos la gdab pa dang / ye shes kyi skud pas bsre ba'o/ /tshon la rgyu dang byin gyis brlab pa dang dgye ba'o/ /rgyu rin po che'am 'bru'am dur khrod kyi rdzas sam/ sa dngos dang lnga'o/ /byin gyis brlabs pa lha'i kha dog gis phyogs ma nor bar snod du yi ge bris la gzhag pa dang /ye shes pa dgug pa dang / mchod pa dang / mchod pa dang / gnyis med tshon du gyur pa'o/ /dgye ba la bsrung ba dang / dgye ba dngos so/ /bsrung ba byang shar du gtso bo'i rim pas sor bzhi dgye ba dang / lha lnga bskyed pa dang / ye shes dgug pa dang / mchod pa dang /gnyis med du gyur nas bgegs mthar byed kyis bsrungs te ka pA la bkang la gzhag go/ /dgye ba tshon phyogs dang sa la ma nor bar dgye ba dang / tshon pra brtag pa'o/ /rtsig pa lnga nas re khA bar ma chod par phyogs nas bris te sngon gyis bsrung ba nas bar tshad dam de bas sboms sam/phras sam phyi nang du yo na slob dpon 'chi ba dang / nad dang / nor nyams pa dang / cho ga 'khrugs pa la sogs pa rim pa bzhin 'ong bar shes par bya'o/ /de las log pa bzang ba'o/ /rtog pa med pa'am mi shes pas bris na nyes pa med/ rgyan dgram pa ni bla bre la sogs pas dkyil 'khor gyi nam mkha' brgyan pa dang /phyi nang gi mchod pas dkyil 'khor sa gzhi brgyan pa'o/ /cho ga dngos dbang bskur ba la bzhi las/ bum pa'i dbang la/ bum pa la bsgrub pa dang / bskur ba dngos gnyis las/ bsgrub pa la rnal 'byor gsum bzhi'o/ bskur ba dngos la slob dpon gyis blang ba dang / slob ma la bskur ba gnyis las/ slob dpon gyis blang ba la dkyil 'khor du 'jug pa dang dbang dngos gnyis kyi dkyil 'khor du 'jug pa la zhugs pa dang / zhugs nas phyir shar sgor byung ba dang / phyogs bcu'i sangs rgyas dang /bla ma de'i sa bon gyi 'od kyis spyan drangs te/ de nyid la gzhag pa dang / bdag gi sa bon las spros la phyi nang de nyid kyi mchod pa dbul ba dang / dga' chen zhes gsol ba gdab pa dang / bdud rtsi btung ba dang / mkhyen par gsol ba dang / khyod su zhes dris nas/ slob dpon dang mi bskyod pa spyi bo na yod pa'i ngo bos bskul nas shar gyi sgo bas nang du bcug pa dang /sdom pa sbyin pa dang / bdag gis kyang sangs rgyas chos dang zhes khas blang ba dang / phyogs bcu nas yang ngo bos bskul/ shar sgor bkug mchod nas bdag la phyogs bcu'i sangs rgyas thams cad 'khor lor gyur nas bcug pa dang /mchog gi ye shes byin nas thun mong du las rnams kyang 'grub par lung bstan pa dang / sku'i rdo rje bkug nas bcug pa dang / thugs rdo rje bcug pa dang / gsung rdo rje bkug nas bcug pa dang / de thams cad slob dpon las byung bas mnyan par shes pa dang / sku gsung thugs kyi ye shes man ngag ltar dbab pa dang / de nas bskor ba bya ba dang / phyag bya ba dang / de nas yi dam gyi lha ngo shes pa dang / lha de rnams ngo bo gcig pas tha dad pa ma yin par kun shes pa dang / bdag la de rnams legs pa brjod pa'o/ /dbang la byang chub ces zhu ba dang / bskur ba gnyis las/ bskur ba la bgegs khro bos bskrad pa dang / bdag la pad sogs gdan dang / gdugs sogs rgyan dang / bskur ba ste gsum mo/ /bskur ba dngos la bum sogs slob mas blang ba dang /rdo rje'i de nyid dang / dril bu'i de nyid dang / phyag rgya'i de nyid bskur ba ltar man ngag gis byin gyis brlabs la dbang blang ngo / /gsang dbang man ngag bzhin byin gyis brlab/ gtang / blang ngo / /shes rab ye shes kyang de bzhin no/ /bzhi pa yang de bzhin no/ /slob ma la dbang bskur ba yang de'i rim pas te/de yang dkyil 'khor du gzhug pa dang dbang bskur ba'o/ /gzhug pa la nang du gzhug pa dang / gsang ba bsgo ba dang / dkyil 'khor du gzhug pa'o/ /nang du gzhug pa ni las bum chus bsangs pa'i mig ras A khaM gis byin gyis brlabs la bcing ba dang / A khaM zlos su gzhug pa dang / dga' chen zhes gsol ba gdab pa dang / las kyi slob dpon gyis rdo rje dang me tog su ra ta s+t+waM/ zhes snying gar sbyin/ A khaM gis nang du gzhug /gang yin zhes dri/ nang du gzhug pa'o/ /gsang ba bsgo ba la gsum ste/ rgyud sbyang ba/ bsgo ba dngos dang ye shes dbab pa'o//rgyud sbyang ba la lnga ste/ thog ma zhes pa sdig pa sbyang ba dang / ut+pA da yas sems bskyed pa dang / sdom pa 'dzin du gzhug pa dang / mkha' gsang nas dbyung ba dang / bgegs bsal ba'o/ /bsgo ba dngos la bdun te/ 'dod chags chen po las byung ba'i//'khor lo'i de nyid gzugs brnyan bzhin/ /zhes byin gyis brlab cing gnang ba nod pa dang / sangs rgyas thams cad kyi byin gyi rlabs kyis brlabs pas smrar mi gzhug pa dang / mchog gi dngos grub thob pa dang / 'di ni khyod kyi dam tshig gi rdo rje zhes rdo rjer byin gyis brlabs pa dang / rdo rje sems dpa' zhes thugs rdo rje dang / 'di ni khyod kyi dmyal ba'i zhes gsung rdo rjer byin gyis brlabs la smrar mi rung bar bsgo ba dang / de rnams slob dpon las byung bas brnyas pa ma byed par bsgo ba'o/ /ye shes dbab pa la slob mas ye shes zhu ba dang / slob ma'i ye shes dbab pa dang / babs na zhes lus ngag yid brtag pa'o/ /dkyil 'khor du gzhug pa la dgu ste/ snying po'i zhes dam bcas pa dang / 'khor lo bskor ba dang / pra ti zhes me tog dor ba dang / snang ba dri ba dang / gtsug tor la sogs pa dngos grub rab 'bring brtag pa dang / stobs po che zhes me tog mgor bcing ba dang /oM rdo rje sems dpa' zhes mig dbye ba dang / ltos shig ces dkyil 'khor bstan pa dang / shar sgo nas dbus kyi bar du lha bstan pa'o/ /la la de kho na nyid 'dir ston te de ni ma yin te/ saM gra ha nas dbang bskur nas ni de nyid bstan/ gzhan du na ni dngos grub dag/ shin tu ring bar 'gyur ro zhes/ /rdo rje 'dzin pas yang dag gsungs/ /zhes pas dbang rdzogs nas 'khor lo de nyid bstan par bya'o/ /dbang bskur ba la slob dpon mnyes par bya ba dang bskur ba gnyis so/ /mnyes pa la phyi nang de nyid gsum mchod pa las phyi'i mchod pa yon du lus ngag yid gsum dang bcas pa dbul ba man ngag gis so//nang sha lnga bdud rtsi lnga'am byin gyis brlabs la nang gi sbyin sreg tu bya'o/ /de kho na nyid ni dbang gi ye shes pas ga bur ma nyams pa'o/ /bskul ba la bum pa la sogs pa bzhi las bum pa la sbyor ba dang /dngos gnyis las sbyor ba rdo rje zhes nod pa dang / gdan bsham pa dang / rin po che la sogs pa'i rgyan gyis brgyan pa dang / gdugs la sogs pa bkra shis kyi rdzas dang / mchod pa bsham pa dang / til la sogs pas bgegs bskrad pa dang / phyogs bcu'i sangs rgyas thams cad spyan drangs te bcug nas mchod pa dang / phun sum zhes bkra shis brjod pa'o/ /dngos la phyi nang gsang ba gsum gyis 'khor lo mchod lha mo lnga dang rigs lngar gyur te/ sangs rgyas spyan gyis las bum gyis phyi ltar zhes bkrus pas dri ma rkang par bud par bsam pa dang /he ru ka dang rnam par snang mdzad kyis phyogs bcu'i sangs rgyas thams cad kyis gsang ba gsum zhes pas gtso bo dang / shar bum bskur bas sku'i rigs thams cad dang bcas pas lus la bcug nas bdud rtsis lus rgyas te dpral bar rnam snang byon pa'o//de nas chus bsangs te cod pan dang / thor tshugs la rin chen 'byung ldan bskyed de/ ye shes kyi 'khor lo bkug mchod bstims nas thor tshugs su gyur/ mA ma kI sa ji ltar zhes bskrus pas dri ma dang sgrib pa rkang par bud par bsam pa dang / he ru ka ra rin chen 'byung ldan gyis/phyogs bcu'i sangs rgyas thams cad kyi/ /gsang ba gsum las byung ba yis/ /zhes gtso bo dang lha mo'i bum pa thogs nas bskur bas yon tan gyi rigs thams cad dang bcas pa lus la bcud pas bdud rtsis lus brgyan te rna ltag g.yas su rin chen 'byung ldan du gyur pa'o//de bzhin du rdo rje dang bdag po dang / ming rnams la yang go bar bya'o/ /rdo rje slob dpon gyi dbang ni slob dpon kha cig 'dir 'dod mod kyi/ rje ri khrod zhabs kyis 'dir bzhi pa yan chad bskur nas so/ /de la 'dir rdo rje'i de nyid sbyin pa ni/ rdo rje la gong ltar byin gyis brlabs pa rdo rjer gyur pa de tshigs bcad dang sngags kyis sbyin te/slob ma'i lag pa g.yas su ma las nyi ma hUM gser gyi rdo rjer gyur par bsgom du bcug la de gnyis med du gzung zhes pas sbyin pa'o/ /dril bu'i de nyid kyang de bzhin nyid du byas la/ lag pa g.yon par a dang khaM las zla ba dang dril bur gyur pa dang gnyis med du sbyin no//thog mtha' med ces pa dang / 'di ni sangs rgyas zhes pas gsor ba dang dkrol ba gsum gsum byed du gzhug go/ /phyag rgya'i de nyid dngos sam bskyed pa yang dam tshig dang ye shes pa mchod pa dang gnyis med du gyur nas sbyin no//rigs gang yin pa bsgom du yang gzhug go/ /de nas phyi nang de nyid kyis mchod do/ /de nas gsang dbang dang shes rab ye shes dang / bzhi pa brgyud pa'i man ngag las blang ba'o/ /de nas rjes gnang rigs lnga sbyin de nas lung bstan te/ slob dpon sku cha lugs phyag rgya sngags des sangs rgyas thams cad kyis byin gyis brlab cing lung ston pa'o//de nas gsang ba bsgrag /de nas dbugs dbyung ba dang / de nas de nyid bstan pa'o/ /bcud du bya ba la phyag rgya bzhi'i don shes par bya ba dang / bsgom par bya ba dang / bsrung bar bya ba dang / spyad par bya ba dang bzhi'o/ /phyag rgya bzhi'i don shes par bya ba dang / dbang gi dgos pa shes par bya ba dang / rgyud kyi don dang dkyil 'khor gyi cho ga shes par bya ba'o/ /dbang gi dgos pa la bzhi/ bum pa'i dbang brtags pa/ rig pa'i lha mos bkrus pa dang / ma rig pa byang nas ye shes lnga skyes pa dang /phung po la lha lngar rig pa'o/ /bum pa zlum pas dbye ba med pa chos sku 'byung ba dang / chu 'dzin pas bde ba chen po'i sku 'byung ba dang / kha khyer che bas longs sku 'byung ba dang / dri ma med pas sprul sku 'byung ba dang / bcud mgul rgyan mtshan ma gsum rigs gsum gyi bdag nyid 'byung ba dang /kha rgyan gzungs thag gnyis med kyis 'gro ba 'dren pa dang / thor tshugs rigs lnga byung nas las lnga byed pa dang / cod pan gyis ngo bo gcig cing rtog pa med pa'o/ /rdo rje dril bu dang / bdag po dang ming ni dbang nas shes par bya'o/ / de nyid gsum yang tshig gi don ltar nyid do/ /des lus kyi nyes pa dag sprul sku thob pa'i rten byed pa'o/ /gsang dbang gis ngag gi nyes pa dag /sangs rgyas nas brgyud pas longs sku'i rten byed pa'o/ /shes rab ye shes kyis yid kyi nyes pa dag /shes rab la brten pas bde chen sku'i rten byed pa'o//bzhi pas lus ngag yid gsum gyi sgrib pa dag /chos sku'i ngo bo rtogs brdas bstan te bla ma las byung bas so/ /rgyud don shes par bya ba ni lta ba ste/ 'di rab tu mi gnas pa yin te/ sems tsam du 'dod pa dang / sgyu mar 'dod pa yang nyes pa med par brjod do//de la rgal ba bye brag tu smra ba dang / gzhan don byed ma btub na mdo sde pa theg pa chen por 'dod la sngags su cis ma btub ce na/ yul sems so sor 'dod pas zhe'o/ /'o na zla ba grags pas sgron gsal du gnyis bshad pa zhe na/ de kun rdzob tu bstan zhe'o//'o na dngos por 'dzin pa skyon nam don dam skyon rnam pa bcas kyang zhe na/ de rnams sems su 'dod pas zhes so/ /'o na mdo sde pa rnams dang / sems tsam pa rten 'brel zer ba zhe na/ rten 'brel du 'dod pa tha dad ces so/ /rgyud kyi rgyu mtshan gzhan ltar yang shes par bya ba/'dir rgyu'i rgyud sems can/ thabs kyi rgyud rgyud sde bzhi/ 'bras bu'i rgyud sku bzhi'o/ /de yang brgyud pas rgyud de/ sems can las brgyud pas sku bzhi/ 'brel pas rgyud/ thabs rgyu des 'brel nas ma nor bas rgyud sku bzhi 'dod pa 'byung la/ / de ltar rgyu thabs dang 'bras bur brgyud nas 'brel zhing ma nor bar 'dus pas rgyud du gdags so/ /'dus pa las 'bras bu 'dus pa ni 'di lta ste/ rdo rje mkha' 'gro nas/ rgyud kyi don ni gnyis yin te/ /don dam pa dang kun rdzob bden/ /don dam brjod du mi nus te/ /kun rdzob chu yi zla ltar bstan//zhes pas don dam la brjod du med do/ /kun rdzob la kun rdzob dngos dang / don dam la spyang du med pa'o/ /kun rdzob dngos la gnyis te/ kun rdzob la gong bzhin gnyis/ rnal 'byor pa'i yang sngags dang mtshan nyid gnyis/ sngags la yang gzugs sku dang /chos sku gnyis/ chos sku la yang bde ba chen po dang / stong pa gnyis so/ /de yang kun spyod nas/ 'gro ba 'di kun sangs rgyas lnga bdag nyid/ /gar mkhan dag dang ri mo bzang ltar snang / /gang du bde chen zhes pa gcig po nyid/ /gcig po nyams ni du mas gar mdzad do//zhes pas so/ /des don dam brjod du med kyang / kun rdzob tu bde ba chen po'i ngo bo kho na yin la/ chos thams cad gsang sngags yin la/ gsang sngags kyis 'tshang rgya ba'o/ /de ltar na shAkya thub pa dang / de bzhin gshegs pa gzhan yang sangs rgyas pa sngags kyis yin par bstan la/bskal pa grangs med gsum du pha rol tu phyin pa drug ston pas sangs rgyas so zhe na/ kun spyod nas/ rgyud rnams kun du gsang ba yang / /rgyud 'di yis ni rnal 'byor pa/ /bden pa gnyis la yang dag bsten/ /sprul pa dngos la de nyid bstan/ / zhes pas bde ba chen po brjod du med pa mu bzhi dang bral te/ phyi rabs la bden gnyis zhes pha rol tu phyin par sprul skur bstan yang / sprul sku nyid sems can la sngags dang / pha rol tu phyin par snang ste/ sprul sku nyid bde ba chen po nyid do/ /snang ba de sngon du rgyu dang / rkyen song bas 'byung ste/ tsa ri ka pa bzhin mkha' ltar yas phub ces rgyu med min no/ /des na bde ba chen po yin yang sems can gyi don du pha rol tu phyin pa bstan nas bde ba chen po thob nas tshogs chung zhing sangs rgyas pa'o/ /thams cad gsang ba'i rgyud nas/ dper na sgra yi mkhan po dag /sgra yi skyon med don tshol te//ma shes pa la ka kA dang / /ki kI dbyangs yig ston par byed/ /ces pas 'dir yang sangs rgyas thams cad bde ba chen por gnas la 'gro ba'i khyad par gyi theg pa'i rim par bstan pa'o/ /lam 'dus par bstan pa'o/ /chos kyi phung por 'dus pa yang / /chos kyi phung po brgyad khri dang //bzhi stong gi ni grangs snyed kun/ /yi ge gnyis su de bzhin 'dus/ /zhes pas gsang sngags kyang thabs gzugs sku bskyed rim dam tshig gi phyag rgya dang / las kyi phyag rgyar 'dus la/ shes rab chos sku dang bde ba chen por 'byung bas phyag rgya chen por 'dus pas so/ / de yang e waM ma yA shru ta me ka smin/ zhes pa dang / 'di skad bdag gis thos pa'i dus gcig na/ zhes rgyud sde bzhi/ phyag rgya bzhi sku bzhi'o/ /de yang e las kyi phyag rgya/ 'di skad ces dngos min te las kyi phyag rgyas dpe mtshon pa'o/ /baM chos kyi phyag rgya 'di lta ste/ don chos kyi phyag rgya rnyed pa'o//ma phyag rgya chen po skad ces pas brdas mtshon pa'o/ /rigs pas mi rnyed pa'o/ /yA dam tshig gi phyag rgyas 'di skad ces pas sprul pa sgyu mar snang ba'o/ /de bzhin dang sgra'i stobs kyis/ shrU ta me ka smin bdag gis thos pa'i dus gcig la sbyar nas d+harma kA ya/saM b+ho ga kA ya/ nir ma Na kA ya/ ma hA su kha kA ya ni rim pa ltar chos dang / longs spyod rdzogs pa dang / sprul pa dang / bde ba chen po'i skur 'byung ba'o/ /rgyu 'dus pas sems can gyi bsam pas 'dul ba dang / theg pa chung ba kr-i yog tu 'dus la/ mngon pa dang theg pa chen po nang par 'dus so//rdo rje phreng ba nas/ thabs chung bya mang don ring bas/ /phyi pa kr-i yog spyod lam ste/ /thabs che bya nyung don nye bas/ /de phyir nang ste bla na med/ /ces so/ /de yang drang don nges don du 'dus te/ 'jam dpal gyis zhus pa'i mdo nas/ 'og ma gong du 'gro bas drang ba ste//ma nor de nyid 'byung bas nges pa yin/ /zhes pas de yang mtshan nyid thams cad drang don/ sangs rgyas bde ba chen por 'gro bas gsang sngags thams cad nges don/ sangs rgyas thams cad bde ba chen por gnas pas 'dul ba dang / theg pa chung ngu'i mdo drang don chen po dang mngon par 'gro bas mngon pa dang /theg pa chen po'i mdo thams cad nges don/ 'gro don du nges pas 'dul ba drang don/ chung ba'i mdo sde nges don/ rgyu las dang 'bras bu ston pas pha rol tu phyin pa lnga gong du 'gro bas theg pa chen po'i drang don/ rgyu de rnams shes rab kyi pha rol tu phyin par nges don no//rgyu las dang 'bras bur 'dod pas kr-i yog drang don/ ma nor ba'i 'bras bu nyid la spyod pas nang pa nges don/ thabs la brten nas 'gro bas pha rgyud drang don/ shes rab rgyud la gtogs pas ma rgyud nges don/ de rnams rim par brgyud pas rgyud rnams drang don/rgyud don sku bzhir nges pas nges don te/ sku bzhi sgyu ma kun rdzob yin pas drang ba'i don/ /don dam mtshon du med pas nges par shes par gyis/ /zhes mtshon pas grub med nyams dga' tsam sku bzhi 'grub par rig par bya'o/ /dkyil 'khor gyi cho ga shes par bya ba la sgra don gnyis las/sgra la bsnyen pa dang / dkyil 'khor gyi cho ga dang / dbang bskur gyi cho ga dang / dbang bskur ba gong ltar ram/ gzhan ltar shes par bya'o/ /don gyi khyad par la nges don dang drang don du shes par bya ba dang / drang don nges don du sgrub pa la gnyis las nges don dang drang don du shes par bya ba la gnyis te/nges don ni dkyil zhes bya/ dbu ma zhes bya ba dang / ma d+h+ya ma ste/ dbu ma mu bzhi dang bral ba la/ gang mu bzhi dang bral na 'khor zhes bya/ g.yog ces bya'o/ /ka bya d+ha ra ste/ dngos por 'dzin pa mu bzhi dang bral la/ che ge zhes bya/ sgrub pa zhes bya'o/ /sA d+ha sa ha dza ste/lhan cig gdod nas gnyis med du yod par shes pa'o/ /drang don du snod du bya ba shes pa dang / bcud du bya ba la yang bsnyen pa dang dkyil 'khor cho ga dang / dbang bskur ba shes par bya'o/ /nges don dang drang don du shes par bya ba de yang dgyes pa'i rdo rje nas/ ston pa po nga chos kyang nga //nyan pa'i tshogs ldan zhu ba nga / /zhes pas de dag thams cad nges par bcom ldan 'das nyid sems can drang ba'i don du mdzad pa ste/ nyan thos dang / so so'i skye bo dang mu stegs pa rnams la ni mdo dang 'dul ba ltar yang snang ste/ byang chub sems dpa' rnams la gong ltar sdom pa gsum ldan de snang ba'o//bsnyen pa'i dus na slob dpon gyi mtshan nyid bzhir brtag ces pa sku bzhi dang ldan pa'o/ /brgyud pa dang ldan zhes pa chos skur gnas pa'o/ /dam tshig ces pa bde ba chen po'i skur gnas pa'o/ /rgyud sde zhes pa longs skur gnas pa'o/ /gzhan don zhes pa sprul skur ston pa'o//zhu 'bul zhes pa byang chub mchog tu sems bskyed pa'o/ /'og min du longs sku la zhu ba phul ba bum pa'i dbang bskur ba'i snang ba de rgyal po zas gtsang gi sras btsas nas khrus gsol ba na bla ma la me tog ces pa ni chos sku bde ba chen po las ma g.yos par sprul sku ston pa'o//rdzas byams pa'i stobs phan chad kyis bsags te spos kyi glang po la sogs pa skor mang ba la phyogs bcu'i sangs rgyas dang / byang chub sems dpa' dang / chos skyong thams cad kyis mchod nas 'dzam bu'i gling du lung bstan pa de phyi'i mchod pa'o/ /yab yum gyi gnas su bcas nas yi ge lnga las mngon byang lngar nyams su myong ba de nang mchod do//de'i dus na yum gyi lhums na bzhugs pa de de kho na'i mchod pa'o/ /yab yum gyi skor spos kyi glang po la sogs par snang ba de chos skyong la gtor ma ster ba'o/ /rigs bzhi la nor zas kyi sbyin pa gtong bar snang ba de slob ma yongs su skyob pa yin la/dmangs la nye ring med par pha rol tu phyin pa drug tu spyod par snang ba de dang gzhan rjes su smon pa de gnyis ka slob dpon las sdom pa len pa'o/ /sku skyo nas grong khyer du 'chag pa la skye rga la sogs pa'i snang ba mthong ba la de 'khor ba la yi mug par ston pa de so so thar pa'i bslab pa srung ba'o//de'i dus su rgyal bu ming sring phan chad sbyin pa byas pa'i snang ba de theg pa chen po'i sdom pa srung ba'o/ /yum las bltams par snang ba de mkha' gsang byin gyis brlab pa'o/ /rgyal rigs dang bram ze'i rigs che bas bstod pa'i snang ba de rgyu gang bsnyen gyi sngags zlo ba'o//rdzas kyi bye brag la ma chags pa'i snang ba de/ dpa' bo dga' ston byed pa'o/ /de nas khyim spong zhes yab yum la zhu ba'i snang ba de sangs rgyas 'das pa la zhu ba'o/ /maN+Dal gong ltar ro/ /longs sku la zhu ba'i snang ba de slob dpon/shes pa la zhu ba de 'das pa'i sangs rgyas so/ /brgyud pa zhes pa 'das pa'i sangs rgyas de yang sku bzhi dang ldan pa'o/ /der rgyal srid gzung ba'i snang ba de rdzas kyis lha bsnyen pa'o/ /rgyal po chen po bzhis bteg pa'i snang ba de rnal 'byor bzhis lha bsnyen pa'o//dpal lha las babs pa'i rtser phyin pa'i snang ba de chos skyong bsnyen pa'o/ /mchod rten la mkhan po byas pa dang / bcom ldan 'das nyid las med la/ sdom pa len pa'i rjod byed gtso bo dang 'khor la bsnyen pa'o/ /dbu skra nyid kyis bzhar ba'i snang ba de yi ge brgya pas mtshams sbyar ba'o//der chos gos dang khyim pa'i rtags spangs shing sdom pa dang ldan pa'i snang ba de bsnyen pa'i rtags/ mtshan ma grangs kyi bsnyen pa sngon du skyel ba'o/ /de nas shar du ma ga d+hAr byon pa'i snang ba de dkyil 'khor gyi sa bslang ba'o/ /de yang mis ma mthong bar nyid snang ba la 'khor gyis bskor zhes grags pa ting nge 'dzin dang ldan pa'o//shar du gzigs nas byon pa'i snang ba de sangs rgyas zhi bas sgrub pa'o/ /thams cad spangs par snang ba de dben pa btsal ba'o/ /phi li par pa tar bzhugs pa'i snang ba de phyi rabs la brtags pa dgos par bstan pa'o//bram ze mo bzang ldan la dris nas bram ze ga ya las g.yar ba de bdag po la bslang ba'o/ /lha ma yin gyis bar chod byed par bsgrags pa de bdag po dngos snang ba med pa la bslang ba'o/ /bar ma chod par snang ba de rnal 'byor ba zhis gzung ba'o/ /sa'i lha mo sku stod bton pa de dpang du gsol ba'o//der 'gyur ba mang du snang ba de ji tsam 'dod pa thugs kyis bcad pa'o/ /de'i zur bzhir rdo rje phur pa bzhi btab ste khro bos mtshams bsrung ba'o/ /lhung bzed bsgyur bas sa la thim pa'i snang ba des gtar bcug pa'o/ /klu u bi ka gnyid sad pa la lhung bzed du shes nas nyal ba'i snang ba de/sa bdag ma dga' nas sa gta' ma chags pa'o/ /bdud rnams kyi mda' mtshon me tog tu song ba'i snang ba de gtor mas lan chags 'jal zhing bar chad zlog pa'o/ /rgyal po bzhis bzhengs par bskul ba'i snang ba de slob ma rigs bzhis bskul ba'o//bzhengs nas spyan bltas pas bdud mo rnams 'dod pas steg par mthong ste/ spyan g.yas pa bstan nas se gol gtogs pas rgan mor song ba'i snang ba de spyan g.yas pa'i Ta las nyi ma bskal ba'i me ltar sreg pa'o/ /'gyod nas bdud mos gus pa phul bas sngar bzhin song ba'i snang ba de spyan g.yon pa a las zla ba'i 'od kyis snying rjes nyams pa gsos pa'o//de nas dbang ldan nas phur pa'i mtshams nas phyogs bzhir g.yas skor du byang chub shing la dbyangs dang ldan pas lan gsum bskor bas rdo rje la sogs pa bzhi zhabs rjes la byung ba'i snang ba de/rdo rje brkyang bskum gyi dra gur du byas pa'o/ /dbyangs rak+Sha ste/ rdo rje'i mda'i dra bar gyur pa'o/ /rdo rje'i gdan mi 'gyur zhes grags pa de/ de ltar bsrung ba'i byin rlabs dang bsam pa'o/ /sa yul de phyogs gzhan pas mtho bar grags pa de tshad ldan du brtsigs pa la sogs pa'o//shin tu dri zhim zhing nyams dga' ba de dri dang ba'i rnam lngas byug pa'o/ /sa'i lha mo de nyid du thim pa'i snang ba de sa'i lha mo lhag par gnas pa'o/ /byang chub kyi shing de sangs rgyas thams cad kyi rten yin pa'i snang ba de me tog bkod pa'o/ /'das pa dang ma 'ongs pa kun gyi yang rten pa'i yang rten zhes grags pa'i snang ba de lha grangs kyi me tog bkod pa'o//byang chub kyi shing las 'od zer byung nas sangs rgyas thams cad kyis byin gyis brlabs par grags pa de maN+Dal bkod pa la rnal 'byor bzhis bskyed pa'o/ /de la sangs rgyas kyi tshigs bcad bzhi 'don pa'i snang ba de 'khor lo dang /gzhan la gsol ba gdab pa'o/ /des 'khor gyi mu stegs kun dga' nas yi rang ba de chos kyis skyong ba gsol ba gdab pa'o/ /'od zer de sangs rgyas pa'i snang ba de 'khor lo mkhan la brten pa'o/ /phyogs skyong bzhis bum pa phul ba'i snang ba de bum pa sta gon no//bum pa gcig tu byin gyis brlabs pa'i snang ba de dkar pos byugs pa'o/ /khong rang gis so sor mthong la gzhan gyis gcig tu mthong ba'i snang ba de rin po che dang sa las byas pa'o/ /byin gyis brlabs pas mdzes shing che ba'i snang ba de mu stegs kyis spangs pa'o/ / tshangs pa la sogs pas rang rang gi nor gyis dogs pas mtshan ma btab pa de mtshan ma btab pa'o/ /phyi dro gsol du ma rung nas ras bkang nas ku sha'i khar gzhag pa'i snang ba de mgul chings dang gdan la gzhag pa'o/ /khyim bdag gi bu mos 'o ma drangs pa yang der blugs pa'i snang ba de bcud blugs pa'o//de blugs pas byang chub kyi shing gi gzugs der shar ba'i snang ba de lha bskyed pa'o/ /de las blangs pa byung nas/ byang chub kyi shing la phog pas 'dab ma gcig der lhung ba'i snang ba de ye shes kyi lha spyan drangs pa'o/ /de la kun ngo mtshar skyes nas mchod pa'i snang ba de spyan drangs pa de la mchod pa'o//bcom ldan 'das kyis na mo bud+hA ya/ zhes brjod nas shing lo der bcug nas thams cad 'o mar gyur te gzhag pa'i snang ba de lha mchod bsnyen bsgrub tu zhu ba'o/ /de la kun dga' nas spro la sangs rgyas nyid kyang dgyes pa'i snang ba de sta gon la 'jug pas dga' ba'o//bcom ldan 'das kyis bkyed nas shing la gzigs pa'i snang ba de dga' chen zhus pa'o/ /shing las yang 'od zer byung bas bcom ldan 'das dang bum pa la phog pa'i snang ba de bu tshur zhes pa dang / bum pa sngags kyi gzungs thag gdags pa'o/ /sangs rgyas kyis na mo bud+hA ya/ na mo d+harmA ya/ na maHsaM g+hA ya/ zhes brjod pas phyogs skyong la sogs pas phyag byas pa dang / nerany+dza na'i nya che chung dang phrad cing mu stegs rnams 'khor du gyur pa'i snang ba des sangs rgyas sprul pa'i sku ste/ de ltar snang ba dang / rgyal po'i khab bya rgod phung po'i ri la shes rab kyi pha rol tu phyin pa gsung pa dang /shrI da na pha rgyud gsungs pa la sogs pa gcig yin pas sangs rgyas rdo rje sems dpa'i rnam 'phrul rgyud re re nyid la chos rgyud ltar la de ltar yo gsungs pa yo rgyud do/ /dge 'dun 'khor de yo 'khor lo'i lhar ston pa nyid do/ /gong na ston pa po zhes pas so/ /de ltar yang ldan sngags su shes pas thams cad sangs rgyas 'jig rten na bzhugs pa dang /thams cad chos ltar gyur pas srog mi gcod pa dang / thams cad grogs dang dge 'dun yin pas phyir mi ldog pa'i yon tan ston pa'o/ /de nas sangs rgyas 'khor rnam bzhi la rang rang gi spyod lam gyis chos ston pa rigs kyi sdom pa 'dzin pa'o//klu kha la me 'bar gyis sangs rgyas bsdigs pas sangs rgyas kyi sku las me dpung dpag tu med pas klu byed pa de zhi sogs kyi sbyin sreg byed pa'o/ /rtswa ku sha la mnyel bso ba de mkha' gsang byin gyis brlabs pa'o/ /tshangs pas me tog gtor ba dang /mchod pa'i snang ba de mchod pa'i gnas su mdzad pa'o/ /pad+ma'i skud pa g.yas kyi dpung pa la bcings pas rlung zhi ba dang / khyim bdag gi bu mo'i g.yon la btags pas rlung zhi ba'i snang ba de srung skud g.yon du btags pa'o/ /khyim bdag gi bu mos 'o thug gi lhung bzed blangs nas drangs pas gsol ba'i lhag ma 'khor la byin pa'i snang ba de gtor ma gtong ba'o//zhal du tshems shing gis dri ma phyis nas dor bas n+ya gro d+har gyur pa de so shing dor ba'o/ /ku sha sngon du bor bas snga phyir byin gyis brlabs nas/ stan byas pa'i snang ba de ku sha'i sngas la gtso bo'i sngags btab pa dang /stan la sngags kyis btab pa gding ba'o/ /yo bskrad nas byang chub kyi shing la dbu gtad nas g.yas sa la phab nas gzims par snang ba de lus ngag yid tha mal min pas 'khor lo mgo gtad seng ge'i nyal stabs su gzims pa'o/ /srod la bdud kyis sprul pa byas pa las/'od zer sku las byung ba'i snang ba de rmi lam ngan pa bzlog pa'o/ /lha mo rnams kyi mchod pa bzhes nas mnyes pa'i snang ba de rmi lam bzang nas mnyes pa'o/ /de nas shing drung du gshegs pas sku las 'od lnga byung ba'i snang ba de thig skud lnga bkal ba'o//'od tshur 'dus byang chub shing las 'od lnga byung ba ni thig skud snod du bcug nas lha lnga bskyed pa'o/ /'od des phyogs bcur khyab nas sangs rgyas thams cad bkug pa'i snang ba de ye shes kyi lha bkug pa'o/ /phyogs bcu'i sangs rgyas byon nas nam mkha'i mdun na bzhugs pa la mchod nas shing la bzhugs pa'i snang ba de thig skud kyi lha mchod nas thig skud du byas pa'o//shin tu bsal nas sangs rgyas gnas su gshegs pa'i snang ba de thig btab nas skud pa bsal ba'o/ /tshon yang de bzhin du 'od lnga po phyogs kyi snang ba tshig lnga'i rgyu 'od lnga phyogs nas spros/phyogs phyogs su thim/ phyogs phyogs su gsal/ rigs lngar grags pa dang / bcom ldan 'das nyid dbus na gnas pa'i snang ba de lha bskyed bkug mchod bsams bkye gsal bdag gi ting nge 'dzin gyis gtso bor gsal bas bsrung ba'o//'od zer gyi snang ba la 'khor gyi rtogs tshad ni pra brtags pa'o/ /byang chub kyi shing gi shar nas gzigs pa'i zhabs rjes yod pa de dkyil 'khor du bcug pa'i bye brag /lho phyogs su ku sha'i stan la bzhugs pa dang / shar gyi zhabs rjes la bkra shis rdzas brgyad mnga' ba'i snang ba de dbang stegs la gdugs stsogs kyis mchod pa'o//sku la me dpung phyung bas bdud dang mu stegs byed bros pa'i snang ba de bgegs bskrad phyir sbyin sreg dang til bsngags pa'o/ /byang phyogs su gshegs pas pad+ma bcu gsum byung ba de dbang la bum pa dang /cod pan dang / rdo rje dang / bdag po dang / ming dang / de nyid dang / gsang dbang dang / shes rab ye shes dang / bzhi pa dang / rjes su gnang ba dang / lung bstan pa dang / gsang ba bsgrags pa dang / dbugs dbyung bar bskur ba'o/ /byang chub kyi shing la zla ba gcig tu gzigs pa'i snang ba de dkyil 'khor dang /lha'i de kho na nyid lta ba'o/ /nub nas shar du gzigs nas 'od zer bkye ba'i snang ba de dbang rdzogs pas 'gro don byed par shes pa'o/ /lha'i dbang pos ze'u lnga pa phul bas dbu la gsol ba'i snang ba de rig pa'i dbang lnga thob pa'o/ / tshangs pas gseg shang dang par bu phul ba phyag g.yas g.yon du gzung ba'i snang ba de rdo rje dang dril bu'i de nyid thob pa'i rtags/ sgrol mas chos gos gsol ba'i snang ba de phyag rgya'i de nyid thob pa'i rtags/ legs skyes mas 'o thug drangs pa gsol nas sku gser du gyur pa de gsang dbang thob pa'i rtags/legs skyes mas sbyin len nor la ston pas gsungs pa de shes rab ye shes thob pa'i rtags/ me long sgra sogs phul ba la ltas sogs byas nas slar gtad pa de bzhi pa thob pa'i rtags/ lha tshangs pas gser gyi 'khor lo phul ba de rjes gnang thob pa'i rtags/de ltar phul yang chos ma gsungs pas nam mkha' la sangs rgyas thams cad mngon sum du mthong nas khyod mngon par rdzogs nas sangs rgyas pas chos ston zhes pa de lung bstan to/ /mya ngan las 'das par bzhed pa la/ tshangs pas zhus pa de gsang ba bsgrags pa'i rtags/de nas shAkya'i rigs shing gi lho phyogs su rab tu byung ba'i snang ba de dbugs phyin pa'i rtags/ de nas bya ba gtong gsungs pa de dkyil 'khor gyi de nyid go ba'i rtags/ bcud du bya ba la phyag rgya bzhi nges don dang drang don du shes par bya ba la yang bzhi ste/ dam tshig gi phyag rgya shes par bya ba dang /sangs rgyas de chos gos la sogs par btang ba 'byor pa'i tshogs sogs pa'o/ /po ka rir sku khrus mdzad nas mya ngan las 'da' bar bzhed pa la tshangs pas gsol ba yan chad gdams pas tshogs bsag pa'o/ /rgyal po bzhis chos ston drangs pa bzhes nas gcig tu byas tshogs pa la bkye bas tshad med bzhi bstan/thams cad bzhag nas shing drung du gshegs nas bdud skyes pas bsrung ba'i grwa gur yan chad bstan to/ /shing la sku brten nas zhal shar du gzigs pas mngon byang lnga las rgyu'i rdo rje 'chang sbyor dang po'i rnal 'byor ro//sku de las 'od phyogs bzhir spros slar 'dus te shing gi zil pa dbu gtsug la phog pas thugs mnyam par gnas pa de rgyu'i rdo rje 'chang zhu ba go la/ sgrol ma la sogs pa lha mo bzhis bskul bas de las bzhengs nas sgrol ma la sogs pa la bltas te/ lha mo bzhis bskul nas rdo rje 'chang bzhengs pa go ste rjes kyi rnal 'byor ro//sku las 'od byung phyogs bcur spros pas sangs rgyas thams cad mdun du snang bar gyur nas/ bcom ldan 'das kyi sku la thim pa de 'khor lo rdzogs par bskyed pa ste/ rdzogs pa'i rnal 'byor ram/ dkyil 'khor rgyal mchog tu go ba'o//de nas thugs ka nas 'od 'phros nas snang bas khyab nas slar thim pa de ye shes sems dpa' bcug pa'o/ /de nas dbang po rnams nas 'od byung snang bar byas slar 'dus skye mched byin gyis brlabs pa'o/ /yang mdzod spu dang / ljags dang / thugs ka nas de bzhin du rim gyis 'od 'phros slar bsdus pa de sku gsung thugs byin gyis brlabs pa'o//gtsug nas 'od byung nas snang ba ni dbang bskur ba'o/ /khyim bdag gi bu mos yang 'o thug drangs pa ma gsol bar mdun du gzhag pas sku gsal bar gyur pa de bdud rtsi myang ba'o/ / 'on kyang thugs ka nas 'phros 'dus lha mi'i tshogs kyis mchod pa byed de phyi nang gsang ba'i mchod par go la/ de nas tshangs pa la sogs pas bstod par go ba'o/ /de nas 'od zer de thams cad sku la thim nas gnas pa bskyed pa rdzogs par go'o/ /de ltar mnyam par gnas pa de dam tshig gi phyag rgyar bsgom par go//las kyi phyag rgya nges don dang drang don du shes par bya ba ni de ltar gnas pa shing la sku rgyab gtad par a wa d+hU tre+e la dbugs yod la sa la ba na yod pa'o/ /rtsa ba me rlung la zug pa yang / rtsa de'i zhabs go ba'o/ /rtse mo lho nub tu 'ong zhing zil pa 'bab pa de bdud rtsir sa nA g.yas nas 'bab pa'o//yan lag byang chub na yar 'ong ba la la nA'o/ /yal ga phra la mang ba de rtsa phran mang po'o/ /dud de lo ma brje ba de nyon mongs ye shes su song ba'o/ /me tog nub mo gsal ba kun la gsang ba'o/ /'bras bu phra zhing shing la thang chu med pa ni ro nyams su myong zhing nyon mongs pa med pa'o//sku de grib ma la zhugs bde mi spong ba'o/ /chos kyi phyag rgya'i nges don dang drang don du shes par bya ba ni sku drang por zhal shar du gzigs nas bzhugs pa de brgyud pa'i man ngag yod cing nyams su lon pa'o/ /phyag gnyis sa gnon dang mnyam pa nyid ni rten 'brel thabs shes rab mnyam gzhag dang rjes thob tu bsgom pa'o//spyan sna rtser gtad pa de dpes don mtshon cing rnyed pa'o/ /zhabs rdo rje skyil krung du bzhugs pa de ye shes go zhing gdeng dang ldan pa'o/ /phyag rgya chen po sku mi snang bar mdzad nas 'od dang sprul pas kun du khyab pa'o//de yang dam tshig gi phyag rgya ci dgos she na/ 'byor pa dang / gdams pas bsod nams kyi tshogs bsag pa ni rgyu las 'bras bu 'byung bas sangs rgyas ltar sprul sku 'byung ngo / /de yang tshad med bzhi dang ye shes kyi tshogs sogs pas ma nyams shing 'byung ba'o/ / de gnyis rgyu bsod nams med na mi 'byung bas de'i rgyu'i dus so/ /'bras bu rten dang brten pa sangs rgyas re re'i snang ba de bsrungs pas bdud med pa'o/ /de yang stong pas 'chi bdag bcom/ /mes nyon mongs bcom/ dra gur gyis phung po bcom/ khro bos lha'i bu'i bdud bcom/de ltar bdud med pas gzhal yas khang ji tsam 'dod par rang rang gis bstan pa'o/ /mngon byang lnga las sku bzhengs pa sprul sku/ pha dang ma'i si la dang ga pur zla nyi hUM zlum po/ 'phro 'du'i tshogs kyi rgyu mthun de las sku bzhengs pa sngon stong pa yi ge lngar byas pa 'og min las chad pa mi 'dod pa thams cad rang gi sems su 'dod pas 'jig rten pa'i snang ba la pha ma las rang gi mngon byang lnga las sku byung ba'o//zhu nas bskul bas bskyed pas 'dod chags 'dul ba dang bskul nas yab yum bzhengs pa/ zhu bar gyur pa mi rtog pa/ bzhengs pa 'gro ba gdul byar bya ba gzhan mdzad pa'o//dkyil 'khor rdzogs pa sras bltams pa'o/ /ye shes sems dpa' bkug bcug gnyis med dgyes pa/ bdag dang sangs rgyas thams cad ngo bo gcig pa/ dus mi nyams pas bkug pa/ tha dad med pas bcug la/mi rtog pas gnyis med byas pa'o/ /'gro don nus pas mnyes pa'o/ /skye mched la mngon shes 'byung ba'o/ /rigs gsum 'dus na 'dul bas sku gsum byin gyis brlab pa'o/ /sangs rgyas la dbye ba med cing mi rtog pas dbang ngo / /bde ba chen por gnas pas bdud rtsi myang ba'o//'jig rten pa thams cad kyis shAkya thub pa la sogs pa mchod pa'o/ /sems can 'dren pas bstod pa'o/ /mi rtog pa'i rang bzhin gyi ngo bos rdzogs rim mo/ /yang na de ltar byas pas ye shes sems dpa' la sogs pa la sems can gyi snang bas rdo rje gdan du 'od la sogs pa gong bzhin shes par bya'o//gsang sngags bzhin byas pas sgyu ma sogs kyis da ltar bsgom pa de ltar bskyed par shes par bya'o/ /'dir rab tu mi gnas pas byang chub sems dpa'i snang ba la brten nas brten pa'i rnal 'byor par snang ba sems la rdo rje gdan ltar snang ba'o//de yang las kyi phyag rgya'i rtsa yod pas sangs rgyas thams cad kyi lam rgyab na gnas pas sangs rgyas thams cad kyis brten pa/ me rlung yod pas thabs dgos pa la la nA dang ra sa nA sangs rgyas/ dgos pa spyi bo nas 'bab pa sangs rgyas rgyud pa'i gsung gi ye shes thob pa dang nyams su myong ba'o//rtsa bran dang nyon mongs pa med pa la sogs pa longs spyod rdzogs pa'i sku byung ba dngos/ chos kyi phyag rgya'i bde ba chen po gnas pa la sku gnyis 'byung ba dang / pha rol tu phyin pa'i lugs gong gi ltar rdo rje gdan du byung ba'o//phyag rgya chen pos sku gdod nas mu bzhi dang bral ba de rnams 'byung zhing de nyid yin par pha rol tu phyin pa'i gong ltar mi snang ba 'od du gyur pa'o/ /de yang sprul sku shAkya thub pa dang / he ru ka sems can gyi snang ba longs skur byang chub sems dpa'i snang ba/ bde ba chen po rang gi bde ba myong ba chos kun la khyab pa'o/ /drang don dang nges don du bsgrub pa la snod bsgrub pa dang bcud bsgrub pa'o/ /snod bsgrub pa ni rdo rje mkha' 'gro nas/ /lus nyid dkyil 'khor dag tu bsgrub/ /'bras bu de las 'byung ba'o/ /bsnyen pa gong 'og ltar bsgrubs te//zhes 'byung ba dkyil 'khor cho ga las btsal ba bsod nams kyi tshogs sogs pa/ brtag pa ye shes kyi tshogs bsags pa/ bslang ba gzhal yas khang dang rgyu bskyed pa/ 'bras bu rdzogs pa ye shes bcug pa'o/ /gzung ba skye mched nas bstod pa yan chad do//bcad pa phung po khams dang skye mched la sogs pa gang 'dod gdod nas yod pa'o/ /sbyang ba rnam dag shes pa'o/ /rtsig pa lus gru bzhir byung bas phung por chags pa'o/ /thig 'khor lo bzhi la sogs pa'i rtsa/ tshon ga pur snang bas khrag 'bab pa'o/ /rkyen gnas snying dbus na/ming yang a wa d+hU tI gzugs yi ge hUM/ lha gtso bo/ dbyibs thig le/ ngo bo khu ba/ las can gyi rgyu sems kyi 'phrul pa/ bde ba'i rang bzhin mi rtog pa/ nyams stong pa'i ngang / rtogs pa dang ldan pas phun sum tshogs pa lnga dang / sku bzhi de las 'byung bas gnas brgyan la/mi rtag pa'i 'khor ba de las so/ /byang chub kyi phyogs kyi chos sum cu rtsa bdun/ pha rol tu phyin pa drug/ /stong pa bco brgyad yin la/ mngon byang lnga las 'khor lo byung ba'o/ /ma rtogs pa 'khor ba'i gzugs sogs dang / khrag dang khu ba la sogs pa sems can gyi lus 'byung ba'o//dbang bsgrub pa rgyud ltar man ngag gi rtsa dang rlung dang me bsgom pa dkyil 'khor gyi sta gon no/ /nyams su myong ba'i sgrub pa'o/ /rang las byung ba'i dkyil 'khor du bcug pa mthong ba'o/ /lus rgya nas 'byung bas mi gnod pa bum dbang thob lus kyi nyes pa dag pa'o//spyi bo nas babs pas gsang dbang thob ngag gi nyes pa dag pa'o/ /yid mnyam par gzhag pas dbang gsum pa thob yid kyi nyes pa dag pa'o/ /thams cad de ltar rtogs pas lus ngag gi nyes pa zhi dbang bzhi thob pa'o/ /bcud bsgrub pa la phyag rgya bzhi'i tshul dang / drang don nges don du bsgrub pa la theg pa che chung gnyis/ chung ba'i skyabs dkon mchog gsum zhes pa gong du bstan pa'i he ru ka phyi nang yor snang ba de dang / rgyud 'khor lor gyur pas so/ /mchod pa dngos po thams cad lhar shes pa'o/ /dus shes pa de nyid do/ /yon tan de ltar gnas pas so//thams cad lhar gsal bas dge 'dun dang 'grogs/ /lha la lhas srog mi gcod pa bdag nyid lha yin na phyag gang la 'tshal te mi nyams pa'o/ /rten gzhan slob dpon yi dam lha spyi khyad par 'phags pa drug 'gro drug dang bye brag bdun las byung ba'o/ /slob dpon pas lhag pa med/sngags las lhag pa'i chos med/ /rigs lnga'i sdom pa las lhag pa med pas 'grub pa'o/ /so so thar pa'i ris bdun dag pa'o/ /rtsa ba tshad med pa bzhi/ rang bzhin ye shes kyi tshogs/ yan lag rnam par snang mdzad gzhal yas khang rten dang bcas pa lha gtso bor brten pa'o//rtsa ba bzhi dang yan lag bzhi ste/ brgyad gzhal yas khang dur khrod brgyad dang bcas pa'o/ /srog mi gcod pa dang / rtsa ba gsum sa bon phyag 'tshal 'phros 'dus gcig tu gyur pas yongs su rdzogs pa'i sku bzhengs pa'o/ /chang dang lha bsrung ba mngon byang lnga las grub pa'o//khyim pa'i rtags spangs pas sangs rgyas kyi sku gsal bar bsgom pa/ rab tu byung ba'i rtags rdo rje pad+ma byin gyis brlabs pa/ mu stegs kyi rtags spangs pa ye shes kyi 'khor lo gzhug pa/ sangs rgyas pa'i rtags bsgrubs pa bdud rtsi zhal du zhugs pa/ dge ba'i rtags spangs pa bsgrub pa dge ba'i rtags 'khor lo lngar gyur pa'o//rtsa ba bzhi dang yan lag bdun sngon du tshad med bzhi bdun dag pa bsags pas lha mo bzhi 'byung ba'o/ /chang glu zhes pa glus bskul ba'o/ /dge slong gi rtsa ba bzhi blangs pa'o/ /lhag ma bcu gsum gyis yab yum gyi sku rdzogs par bsgom pa'o/ /ma nges pa la sogs pa'i sdom pa drug yab kyi thugs kyi sa bon dang /yum gyi thugs ka'i sa bon gsal ba dang / sa bon de spro ba dang / rigs kyi thugs dam bskul ba dang / las sbyang ba dang / gnyis med du spyan drang ba dang / yi ge lnga dang 'dres nas zhu ba dang / zhal du zhugs pa dang / rtsa rnams nas babs pa dang /bsrubs pa dang / gzhal yas khang bskyed pa dang / gtso bo la sogs pa'i gdan bskyed pa dang / gtso bo dang / 'khor bskyed pa dang / gtso bo dang rigs lnga'i las byas nas gzhag pa'o/ /rtsa ba lnga zhes pa 'khor lo rdzogs par bsgom pa rgyu 'bras mngon byang lnga las bskyed pa'o//rtsa ba'i sbyor ba dbang ma bskur ba/ dngos ma mnyan pa/ mjug ma bsgoms pa'o/ /de gsum ka med pa las nyan thos kyi sdom pa med na nyams pa chen po'o/ /ma mnyam pa sgom na nyams pa sbom po'o/ /dbang med par nyams pa chung ngu'o/ /ma mnyan na nyams pa sgom po'o//dbang dang bsgom pa med na phra mo'o/ /gcig las med na ltung byed do/ /yan lag bsod nams kyi tshogs dang rnal 'byor bzhi rdzogs rim sbyor ba dngos mjug go/ /de'i nyes pa yang gong bzhin no/ /rtsa ba'i nyes pa dbang sdom pa dang / bslab pa gsum char blangs na sbom po//mnyan la bsgoms nas chung ngu byung ba dbang bskur ba ma nyan/ phra mo dang dbang bskur la bsgom/ ltung byed re re med pa blang / /nyes pa la sogs gang spyad de bslang pa'o/ /de yang dbang dang slob dpon la tshogs dbul ba dang / maN+Dal gyis bshags/ /phyin mi byed par bsdams pas thub pa'o//chang zhes pa bdud rtsi myang ba dang / ga bur ma shor ba'o/ /gtang sems zhes pa sngags gzhag pa'o/ /rgas zhes pa ma nus pa'o/ /bsnyen gnas zhes pa ye shes sems dpa' gzhug pa dang / skye mched dang sku gsung thugs byin gyis brlab pa dang / dbang bdud rtsi bzhi dang /dge bsnyen bzhi dang / dge tshul dang dge slong chos bstod pa ste/ skabs zhes pa long yod na legs par bcos/ med na bsgom bya'o/ /bcos thabs nges par bskyed ces pa/ de ltar shes pa'i sngags pa la 'dul ba'i rtsa ba yan lag re re mi gnod/ thabs des slar gsos pas thob bo/ / sngon yang sangs rgyas kyang he ru ka dang / rgyud ston par 'khor la snang la/ 'khor yang sdom pa gsum dang ldan pa'o/ /des nyams pa bcos su btub sngags gtso bo'o/ /des na sngags sgrub pa la blo skyed cing brtson par bya'o/ /dus nges zhes sngags las/ in+d+ra b+hU ti dang / Dom+bi la sogs pa ltar phrad ma thog dang /rang zhig dang / nges pa med par thob la/ ma grub bar du ngan 'gror mi skye bas ji srid do/ /yon tan yang yi dags ston pa'i rgyud nas/ dam tshig phyag rgya legs bsgoms na/ /rnal 'byor pa yis gzugs gnyis 'thob/ /ces pas mi'i nang nas bram zer skye la/ngo tsha shes pa dang khrel yod pas sdom pa gsum yang des thub cing sku bzhi yang de las byung ba'o/ /yon tan che ba la sogs pa de ltar gnas pa'o/ /thob nas dbang thob mnyan bsgoms bsod nams kyi tshogs bsags rnal 'byor bzhi rdzogs rim zhes bsgoms pas de nyid na'o//de ltar yon tan shes na gsum la skyabs su 'gro ba dang / lus ngag yid kyi sdig pa bshags la/ chos 'gro ba'i don du sna tshogs spyod kyang rang nyid sngags don shes pas gzhan du byed pa'o/ /sangs rgyas dang byang chub sems dpa' rnams kyang nyid la rtog pa med par gzhan la don mdzad pa'o//gso sbyong zhes pa gong ltar sbyor ba dngos mjug la dus thams cad dam dus khyad par can rgyud nas don bstan pa la spyod pa'o/ /dus mchog dang thun mong zhag zla ba na yang 'ong ba'o/ /chos zhes pa bdag gis gong ltar nyes pas 'gro don du lus ngag yid kyis de rnams su ha cang ches te/'byor nus yod na lha khang la sogs pa bzhengs shing gso ba dang / rgyud dang mdo dang / 'dul ba dang / mngon pa dang / bstan bcos bri ba dang / mchod par bya'o/ /ma 'byor na yang yid kyis spyod lam bzhi la mi dog pas thun bzhir nyams su blang bar bya'o/ /theg pa chen po'i yang skyabs pa'i yon tan gong ltar sangs rgyas sprul sku de he ru ka'i bzhu btul spro bsdu yod pa yin zhing chos kyang sems las shes pas shes rab kyi pha rol tu phyin pa yin la/dge 'dun yang rang la yod pas 'khor lo/ /de ltar shes pas thams cad rang bzhin gyis don sangs rgyas kyi las yin na/sbyor dngos mjug gong ltar dang / de ltar yang mthar thug dpung bzang ngo / /shes rab dang / las dang / smon lam dang / sngon gyi skal ba la ma rmongs pas de ltar spyad pa shes par bya'o/ /blo de ltar med pa la sogs pas re re 'dra bas spyad de/ phan sems dang dam tshig thub na byang chub kyi phyogs dang sngags 'grub bo//phyag rgya bzhi'i tshul du drang don dang / nges don du bsgrub pa la yang bzhi ste/ dam tshig gi phyag rgya bsgrub pa'i yon tan de ltar shes pas spyad dgos pa dang / zhen pa rnams snying rje bar mthong zhing bya ba btang ba 'byor ba'i tshogs yin la/dge ba ci byas pa thams cad sems can gyi ched du sangs rgyas su bsngo zhing / bdun dag pa yid kyis byed pa bsod nams kyi tshogs dang / bdag don la mi re gzhan la mi spyod pa nyid tshad med pa bzhi dang / thams cad sems stong par shes pa ye shes kyi tshogs dang /de ltar shes pas gzhan med pas bsrung pa dang / de ltar sems gtso bas gzhal yas khang / shes rab skye bas rgyu'i rdo rje 'chang yin pa sems su dran pas/ sems la spros pa ye shes sems dpa' bstim pa'o/ /de'i dus dbang po yul du snang bas skye mched kyi lha dang /de yang bdag gzhan gnyis su med par byas pas sku gsum dang / des 'gro don nus pas dbang dang / nyams su myong bas bdud rtsi myang ba dang / bkag pa med pas mchod pa dang / ngo mtshar che bas bstod par shes pa'o/ /thams cad gsang ba'i rgyud nas/ de las byung ba de nyid pa//zhes pas de la zhes pas dam tshig gi phyag rgya bsgom pa'o/ /de yang sku las 'byung zhing rtog pa med pa ma zad pa'o/ /brgyud nas 'gro don snang bas dam tshig yin la/ zad pa med pas phyag rgya'o/ /las kyi phyag rgya yang de ltar du shes pas bde ba la bdag gzhan gnyis las 'byung bas rtsol ba'i las dang /bden pa'i phyag rgya'o/ /thams cad gsang ba'i rgyud nas/ las ni bdag gzhan bya ba ste/ /nyams med gnas pa rgya ru bshad/ /ces pa'o/ /chos kyi phyag rgya yang de las shes pas thams cad chos su gyur pa re dogs med pas ma yengs pa'o/ / rgyud las/ chos las sems 'byung 'khrul pa tshad mnyam mam langs kyang mi g.yo ba/ zhes pas so/ /phyag rgya chen po yang de ltar gsum po shes pas bdag la dus dang ris med par sku bzhi 'byung ba'i phyag rgya bzhi la gnas pa'o/ /rgyud las/ phyag rgya chen po mchog chen po/ /dus gsum mi mnyam chos kyi sku//zhes so/ /de shes pas mi phan pas bsgom par bya'o/ /yi dags ston pa'i rgyud nas/ sku bzhi 'dod pas phyag rgya bzhi/ /ma bsgrubs thob pa ma yin te/ /rgyu rkyen med par sa bcus kyang / /rgyu med byang chub sprul mi nus/ /zhes pas so/ /las kyi phyag rgya rtsa dang rlung dang ngag gis bsgom pa'o//chos kyi sku ma yengs par bsgom pa'o/ /phyag rgya chen po mi 'dzin par bsgom pa'o/ /de yang slob dpon gzhan dag dkyil 'khor 'khor lo rdzogs nas lha bsdus nas nA da dang / phra mo thig le bsgom zhing mi rtog par 'dod la/ rjes thob med par phyag rgya chen por 'dod de/de yang ma yin te/ rim gyis 'og ma 'gags te dgos pa med pa'i skyon ni la la mi dgos brtan byed du 'dod de/ yang mi bden te/ gsum la slob pa bas gcig nyid la brten na skyed par nges te/ 'dir dbang bzhi sngon du song nas lam phyag rgya bzhi ka dgos la skad cig la bsgoms te 'bras bu yang sku bzhi 'byung bas bla ma brgyud pa yang dbang bzhi bskur nas shes par bya/bstan par bya ste/ de nyid nas bzhi ka dgos par dam tshig phyag rgya gcig bsgoms na/ rnal 'byor pa de gzugs gnyis 'thob/ /las kyi phyag rgya gcig bsgoms na/ / rnal 'byor pa de 'dod khams skye/ /chos kyi phyag rgya gcig bsgoms na/ /rnal 'byor pa de gzugs khams skye/ /phyag rgya chen po gcig bsgoms na/ /rnal 'byor pa de gzugs med khams/ /de bas sngags dang phyag rgya bzhi/ /lam bzhi sku bzhi bcu gnyis zangs/ /zhes pas man ngag las nges par 'byung bar bsgom mo//de ltar bsgrubs pa'i 'bras bu la gnyis te/ mthar phyin na sku bzhi 'byung ba la lam ma nor ba bzhi ste/ bum pa'i dbang thob/ lus kyi nyes pa dag /rig pa'i dbang thob/ lha lngar gyur pas dam tshig gi phyag rgya bsgom du rung ste/ de ltar skur shes shing / bsgoms pas sha thams cad sgyu mar snang bas me long lta bu'i ye shes rig ste/ sa'i khams dngos po med de/ sangs rgyas spyan ltar mthong bas sangs rgyas spyan gyis sgrub pa'i grogs dang / grub nas sems can gyi snang ba la sa'i khams sangs rgyas spyan du 'byung ba'o/ /sgyu ma'i snang bas 'gro don ma 'gags par mdzad la/gzugs tsam por shes pas gzugs rnam par snang mdzad kyis sgrub pa'i grogs byed la/ grub nas sems can gyi snang ba la gzugs rnam par snang mdzad du byung / khrag gis lus khyab cing sdud la rnam pa de thams cad la stong pa'i rgyas thebs pas mnyam pa nyid kyi ye shes rig pa ste/chu'i khams sdud pas mA ma kI dang lha ltar za mnyam ste/ mA ma kIs sgrub pa'i grogs dang / grub nas sems can gyi snang ba la chu'i khams mA ma kIr 'byung ngo / /skye med du mnyam par 'gro don rtog med du byed pas tshor ba la khyad med dgos pa 'byung bas rin chen 'byung ldan du grub la grub nas sems can gyi snang ba la tshor ba rin chen 'byung ldan du snang ba'o//mes dngos po bsreg cing rnam pa de rnams ma 'dres par shes pas so sor rtog pa'i ye shes rig ste/ mes thams cad gsal bas/ gos dkar mo sgrub pa'i grogs dang / grub nas sems can gyi snang ba la gos dkar mor byung ba'o//'du shes tshad med cing 'gro don mi 'chad pas 'du shes snang ba mtha' yas su grub cing grub nas sems can gyi snang ba la 'du shes snang ba mtha' yas su byung ba'o/ /rlung gi gnas su skyel ba de thams cad spyad pas bya ba nan tan gyi ye shes rig ste/ rlung gi khams bskyod pas sgrol mar gyur te/sgrub pa'i grogs dang grub nas rlung gi khams sgrol mar 'byung ba'o/ /'gro ba yang ye shes gong nas gong du 'dus byas yod pas don yod grub pa'i grogs su 'du byed cing grub nas 'du byed kyi phung po don yod grub par 'byung ba'o/ /nam mkha'i khams rgya chad pas dngos por snang ba thams cad stong zhing bdag med pas chos kyi dbyings kyi ye shes rig ste/nam mkha'i khams kyis khyab pa reg bya rdo rje mar gyur te sgrub pa'i grogs nam mkha'i khams reg bya rdo rjes byed la grub nas nam mkha'i khams reg bya rdo rjer 'byung ba'o/ /thams cad rang gi sems yin zhing stong par rig pas 'byung la de ltar gsal bas rnam par shes pa des grogs byas nas rdo rje sems dpar sgrub la grub nas sems can gyi snang ba la rnam par shes pa'i phung po rdo rje sems dpar 'byung ba'o//de ltar shes tsam na yul thams cad longs spyad du btub pas mchod pa'i lha mo dang ye shes su 'gyur bas man ngag gis de lha dang bde ba dang mi rtog pa'i ngang stong par yul rnams song bas skye mched lhar 'gyur ba'o//de yang dngos po gsal ba myong ba bde ba gnyis med mi rtog pas sku gsung thugs su 'gyur ba'o/ /bdag tu gnas pa mi bskyod pa dbang du gyur pa'o//nyams su myong ba rdo rje 'dzin pa snang ba mtha' yas bdud rtsir gyur pa'o/ /de bzhin longs spyod ngo mtshar ba rin chen 'byung ldan dang don yod grub pa mchod bstod du gyur pa'o/ /de ltar gcig nyid rnam shes lnga phung po lnga rgyu khams lnga dang de bzhin brgya stong khri 'bum du grub nas sems can gyi snang ba la byung ba'o//de ltar lus kyi nyes pa dag rig pa'i lha mos bkrus lha lngar gyur pas dam tshig gi phyag rgya mthar phyin pa'o/ /gsang dbang thob pas ngag gi nyes pa dag la shes rab ye shes kyi dbang thob longs spyod las kyi phyag rgya bsgom du rung ste/ sangs rgyas kyi ye shes byang chub sems dpas gtor ma byin te lce la gzhag pas a wa d+hU tIr phyin 'khor lo rgyas te/sangs rgyas kyis byin gyis brlabs pas ngag gi nyes pa dag la/ ye shes nyams su myong zhing 'dod yon spyad pas ye shes thob la/ longs skur gyur nas las kyi phyag rgya mthar phyin pa'o/ /de bzhin du klu sgrub nas brgyud pas/de ltar dag thob gyur nas mthar phyin pa'o/ /gzhan nas brgyud pa yang de bzhin no/ /shes rab ye shes kyi dbang thob nas yid kyi nyes pa dag /shes rab kyi dbang gis mi rtog par gyur nas chos kyi phyag rgya bsgom du rung ste/ sems nyid shes pa de las 'byung zhing smrar med pas gong ma rnams der bsdu 'dus pas mthar phyin pa'o//bzhi pas lus dang / ngag dang yid kyi sgrib pa dag /tshig gi dbang brjod du med pa brdar bsgom du rung ste/ de ltar de bzhin bzhi pa'o/ /zhes gsungs pas der bzhi'o/ /rgyas par man ngag las shes par bya'o/ / snang ba'i chos thams cad kyi spyi'i mtshan nyid kyang de ltar shes pa tsam na phyogs kha dog rten dang / phra rab tu snang ba gzugs la sogs sa sogs man ngag la brten pa dang / 'gro ba re re la yang de bzhin gnas shing snang ba 'byung ba'o/ /de bzhin du bzhi pa dkyil 'khor gyi cho ga dang bstan pa dbang bcu bzhir shes par bya'o//bsrung bar bya ba la yang rtsa ba dang yan lag ste/ gshin rje'i rgyud nas bstan pa'i rtsa ba bcu bzhi bsrung ste/ slob dpon dbang bskur ba dang / chos ston pa gnyis dang / dbang la las kyi dang / rdo rje slob dpon dang / gsang ba la sogs pa lnga'o//bsrung bya khyod kyi chos de mi byed khyed rang khyer/ de nas khyod kyi slob ma nga min zhes pa dang / bstan pa mi nyan par sdig las byed pa dang / 'byor pa la gnod pa dang / rku ba dang / btsun mo la spyod pa dang / brnyas sems dang / nyes pa brjod pa dang / mang po'i gseb tu mi mdzes pa'o//bka' ni sangs rgyas kyis gsungs pa ste/ bsrung ba bka' ltar mi byed pa dang / ma mnyan par rang dgar 'chad pa'o/ /rdo rje spun ni dbang dang rgyud dang man ngag slob dpon gcig pa'am/ dus gcig pa'o/ /bsrung bya zhe sdang gis nyes pa brjod cing nyes pa bsgrags na rung sems so//byang chub sems ni gong ltar sems can thams cad la bskyed pa dang / kun rdzob lus la bskyed pa'o/ /bsrung ba ni de dag don du sems pa dang / ting nge 'dzin nyams par byed pa'o/ /sems can rnams zhes pa 'gro drug /byams sems spong zhes pa phan mi 'dogs pa dang /bdag med pa dang / dge ba mi bsngo ba dang / sems can gyi sdug bsngal ma shes pas rang 'dod byed pa'o/ /ma smin zhes pa dbang ma thob pa dang / mi go ba la bsrung bya sngags dang / gdams ngag zab mo ston pa'o/ /rang ngam zhes pa sangs rgyas pa dang / mu stegs dang gnyis/bsrung bya dang po mi smad par mnyan rab tu lam yin min gyis grub mtha' bcad de/ rab tu mi gnas pas mi smad do/ /tha ma phyag rgya bzhir rang gi snang ba med pas mi smad do/ /sangs rgyas zhes pas gong ltar sgrub shes tsam na'o/ /bsgrub bya sangs rgyas su mi bsgrub pa dang / srog btang ba dang / sdig pa'i las kyis lus sdug bsngal bar spyod pa'o/ /rang bzhin dag pa zhes pa chos thams cad rab tu mi gnas pa/ bsrung bya rtag pa'am chad pa'am/ phung po gsum pa'am/ rten 'brel lam/ rnam pa dang bcas pa'am/ rnam med dam sgyu ma don dam du 'dod pa'o/ / gdug la zhes pa bstan pa dang / bla ma la sdang ba dang / bdag grogs po la byams ldan zhes pa/ bsrung bya tshar mi gcod pa ni byams pa dang / shes par dga' zhing kha spyang gis grogs byed pa'o/ /ming sogs zhes pa dang / bdud rtsi sogs/ bsrung bya der zhes pa mi gtsang ba dang /don yod pa mi shes pa'o/ /dad ldan zhes pa phyir mi ldog pa sems su zhes pa bsrung bya ste/ blo chos dang ma sbyar ba gong 'og la sun 'byin par byed pa dang / sngags la dad pa'i rigs ngan dang / btsun pa dang bud med mi 'jug pa'o/ /ji bzhin rnyed ces pa ni rdo rje'i rigs la sogs pa'o//mi sten zhes pa bsrung bya 'dod ngo la gzhan dbang spyod pa dang grogs su gyur pa'o/ /bud med ces thams cad bsrung bya mi lus rten bzang ba la ma brten pa dang / ye shes kyi rten yin pa dang / sprul sku lhu mas su bltams pa dang / mngon byang lnga las byung ba dang / longs sku de las byung ba'i ye shes kyi snang ba yin la/ bde chen gnas pa zhes pa ni smad pa tsam mo/ /rtsa ba dang / yan lag dang / bla ma lnga bcu pa yang blta zhing bsrung ngo / /nyams na skyon te/ rtsa ba nyams na dbang bskur ba dang / tshogs 'khor bya zhing de nyid bslang / /yan lag nyams na bshags pa dang //maN+Dal 'byor pas bla ma dang / /yi dam mchod cing de nyid bsrung / /rtsa bar shes dang bsgom dang bsrung / /spyad par bya ba bzhi po 'di/ /ma yengs gus par bya ba dang / /gzhan don gtang bar mi bya'o/ /spyad par bya ba la gong ma ltar shes pas/ snod dang / gnas dang / rgyal po dang /dus dang ldan zhing bla ma la mi gnod pa dang / bstan pa la mi gnod pa dang / rang la mi gnod pas zhi sogs dang / dbang dang chos dang / gtor ma dang / sbyin sreg dag bdag gi tshe 'di dang / phyi ma'i don min par gzhan sgrol ba'i bsam pas sbyin pa dang / spyod pa dang / 'gro ba 'dul bas 'dul ba dang //'gro ba sbyor bas byang chub sems/ /rigs la sbyor bas dam tshig ni/ /ma yengs spyod lam bzhis spyad bya'o/ /bdag blo rmongs pas gus pa yis/ /yun rings mgon po bsnyen pa las/ /brgyud pa'i rgyud don nyams myong nas/ /byams pa'i sems kyis nan tan byas//yi ges gsol btab dpal mo yis/ /de nyid mthong ba'i lam 'di byas/ /'di las bsod nams ci thob des// 'gro bas sku bzhi myur thob shog /de nyid mthong ba'i lam dpal ye shes rdo rjes mdzad pa rdzogs so// //rgya gar gyi mkhan po dpal de nyid dang / lo tsA ba rngog bud+d+ha pA las bsgyur te gtan la phab pa'o/