CLOSE WINDOW

D3708
བོད་ཡིག

zhu chen gyi lo tsA ba dge slong rin chen bzang pos bsgyur cing zhus te gtan la phab pa'o//[ ]@##/ /rgya gar skad du/ tat+tA sid+d+hi nA ma pra ka ra Na/ bod skad du/ de kho na nyid grub pa zhes bya ba'i rab tu byed pa/ 'phags pa 'jam dpal gzhon nur gyur pa la phyag 'tshal lo//bde chen bde ba 'byung ba'i gnas/ /rdo rje theg la phyag 'tshal te/ /kun du rmongs las bzlog pa'i phyir/ /de nyid grub pa bshad par bya/ /'di na gang la la rdo rje'i theg pa chen po la dge ba'i rtsa ba'i bag chags kyi rgyud ma bstsags pa/ dngos por sgro btags pa la goms pa/rang gi rnam par rtog pa'i rlung gis blo phrogs pa/ /rtsod pa'i dus kyi rnyog pa'i 'dam gyi tshogs ma lus pa'i dri mas yid dri ma can du gyur pa/ 'khor ba'i rgya mtsho las sgrol ba'i thabs yang dag par mi shes pa/ rang bzo'i rnam par rtog pa mang pos blo gros bslad pa/nyam nga ba'i mdud pa'i gnas kyi ri sul du lhung ba/ rtogs par dka' ba'i gdon gyis zin pa'i dbang gis sems dkrugs pa/ slob dpon rnams nye bar ma brten pa/ don dam pa bsgom pa'i man ngag dang bral ba rnams ni dpal bde ba chen po rdo rje sems dpa' lam gzhan dag gis bskal pa du ma grangs med pas rtogs par bya ba/rdo rje theg pa'i thabs dang ldan pa rnams kyis tshe 'di nyid la dka' ba med par bsgrub par bya ba/ rgyu ba dang mi rgyu ba'i dngos po thams cad kyi ngo bo nyid thog ma dang tha ma med pa/ gnas med pa sems can ma lus pa'i rgyud la rang rig pa'i ngo bo nyid bsod nams chen po'i rgyu mngon par rtogs pa'i mtshan nyid can de'i thabs su gyur pa/rdo rje theg pa chen po ma lus pa'i dam pa'i dam par gyur pa'i lung gi mtshan nyid can rtogs par mi 'gyur ba de rnams kyi mi shes pa'i rab rib kyi ling tog rnam par bsal bar bya ba'i phyir lung dang rigs pa dag gis cung zad brjod par bya'o//de la gzugs la stsogs pa yul rnams ni thabs dang shes rab kyis rnam par zin par yongs su longs spyod pa'i ngo bor gyur pa ni 'bras bu khyad par can thob bar 'gyur ba yin no zhes rtog pa dang ldan pa rnams kyis nges pa kho nar khas blang bar bya ste/gang gis na khyad par can gyi tshogs pa rnams ni khyad par gyi 'bras bu nyid skyed par byed pa yin no zhes smra ba po thams cad la grags pa yin no/ /de yang dper na sa la stsogs pa las skyes pa'i skyu ru ra'i 'bras bu'i ro bska bar snang la/yang 'o mar spangs pa la stsogs pa'i lhag ma'i rgyu rnams dang phrad ba na de nyid mngar ba nyid du shes par 'gyur ro/ /de bas na ji ltar rgyu'i rnam pa gzhan gyis mngon par 'dus byas pa'i 'bras bu ni 'bras bu khyad par can 'byung bar byed pa nyid du mngon sum nyid na snang ba yin no//de bzhin du gzugs la stsogs pa'i yul rnams rnal 'byor pas phyag rgya chen por bskyed la/ sngags dang phyag rgyas byin gyis brlabs pa la ni shin tu khyad par can gyi 'bras bu skyed par byed pa yin no zhes dam pa rnams kyis khong du chud par bya'o/ /de yang gang gi phyir tshogs pa las byung ba yin gyi tshig rkyang pa las byung ba ni 'ga' yang med de/de bas na khyad par can gyi rgyu gzhan dag las 'bras bu khyad par can nyid 'byung bar 'gyur te/ thams cad mkhyen pa'i rgyu dang rkyen gyi nus pa ni bsam gyis mi khyab pa yin pa'i phyir ro/ /de la 'dir sbyor ba ni gang khyad par can gyi rgyus mngon par bsgrubs pa de ni 'bras bu khyad par can nyid 'byin par byed de/dper na 'o mar spangs pa'i skyu ru ra la stsogs pa ni 'bras bu mngar bar 'gyur te/ gzugs la stsogs pa yang rgyu khyad par can gyis mngon par bsgrubs pa yin no zhes bya ba ni rang bzhin gyi gtan tshigs yin te/de la 'dir khyad par can gyi rgyu gzhan gyis mngon par bsgrubs pa tsam dang / rjes su 'brel pa'i rang bzhin gyis 'bras bur mngon par 'dod pa'i dngos po khyab par byed pa'i rang bzhin mngon par 'dus byas pa ni khyab par bya ba yin no//de lta bas na gang dang gang khyad par can gyi rgyu gzhan gyis mngon par 'dus byas pa'i rang bzhin yin pa de dang de ni rgyu ma tshang ba med pa dang / gegs byed pa med pa yin na/ khyad par can gyi rgyu gzhan gyis mngon par 'dus byas pa las khyad par can gyi 'bras bu 'byung ste/ de tsam dang rjes su 'brel ba yin pa'i phyir ro/ /de bas na khyab par bya ba dang khyab par byed pa'i dngos po grub na khyab par byed pa bsgrub par bya ba la khyab par bya ba ni gtan tshigs yin no/ /dper na khyab bar byed pa shing la stsogs pa bsgrub bar bya ba la khyab par bya ba shing la stsogs pa ni gtan tshigs yin te/khyab par byed pa khyab par bya ba'i dngos po yin pa'i phyir ro/ /'dir yang khyab par bya ba dang / khyab par byed pa'i dngos po las rgyu gzhan ni med de/ de lta bur 'dir yang shes par bya'o/ /de nyid kyi phyir/ zla gsang thig le la sogs pa//rnal 'byor rgyud ni ma lus las/ /shes rab thabs ldan sems kyis ni/ /mi bya ba ni ci yang med/ /rtag tu dogs pa med gyur pas/ /'dod pa lnga ni spyad par bya/ /zhes bya ba dang / sman gyi phye ma'i sbyor ba yis/ /sbrul nyid 'ching bar 'gyur ba bzhin/ /'dod ldan rtag tu chags byed la//glu dang rol mo la dga' zhing / /'dod pa'i bde bas ngoms med pa/ /'grub 'gyur 'di la the tshom med/ /gang zhig byang chub sems brtan zhing / /blo gros chags pa med gyur pas/ /the tshom dag ni mi bya ste/ /de yis 'dir nges 'grub par 'gyur/ / zhes bya ba dang / legs brtags shin tu dpyad nas ni/ /mkhas pa rnams ni 'jug bya yi/ /gzhan du mer ni 'jug pa yis/ /bcu drug char yang mi phod do/ /de nyid de bzhin gyis shes na/ /gang zhig lha mo la brtan pa/ /de 'grub 'gyur gyi gzhan du ni/ / dmyal ba chen por ltung bar 'gyur/ /zhes gsungs pa yin no/ /ji ltar gzugs la stsogs pa'i yul rnams nyon mongs pa bskyed pa'i rgyur gyur pa nyid kyis na ngan 'gro'i rgyu yin no zhes brjod par nus pa yang ma yin te/ nyon mongs pa rnams ni bdag dang bdag gir 'dzin pa la mngon par zhen pa sngon du 'gro ba can yin pa'i phyir gzugs la sogs pa rgyu ma yin ta/gang gis na/ bdag yod la ni gzhan du 'du shes shing / /bdag gzhan cha las yongs su 'dzin dang sdang / /'di gnyis dang ni kun du 'brel pa las/ /nyes pa thams cad 'byung bar 'gyur ba yin//de bas na gang la bdag tu lta ba yod pa de la nyon mongs pa 'di dag 'byung bar 'gyur ro/ /gang yang bdag med pa la shin tu goms par byas pas bdag med pa'i ro yang dag par sgrub pa de la ni 'di dag de ltar mi 'gyur ro/ /yang gal te yul rnams rnam pa thams cad du 'dod chags kyi rgyu nyid yin na de'i tshe mi gtsang ba la stsogs pa'i rnam pa phyin ci log yin na yang goms pa'i stobs kyis shes pa skyed pa ji ltar byed/des na ji ltar sgro btags pa nyid las rnam par shes pa 'di dag nges par bskyed par 'gyur ba yin no/ /de ltar na khyad par can gyi sgro btags pa dang /khyad par can gyi yongs su gyur pa las khyad par can gyi 'bras bu skyed par byed pa'i rgyu'i ngo bo nyid yin par 'gyur bar ci'i phyir mi 'dod/ ji ltar/ bud med gcig gi lus la ni/ /rab tu byung dang 'dod ldan khyi/ /ro dang 'dod ldan bza' ba ste//de ltar rnam pa gsum du rtog /'di dag kyang khyad par gyi sgro btags pa dang / de bzhin du yongs su gyur pa las 'khor bar 'ching ba'i rgyur gyur pa ni ma yin te/ sbyin bar bya ba dang / sbyin pa po dang / len pa po mi dmigs pa nyid kyis 'khor gsum yongs su dag pa yin pa'i phyir ro//gang gi phyir 'khor gsum yongs su dag pas sngags dang phyag rgya'i rnam par 'gyur te/ de lta bas na sngags la stsogs pas mngon par sbyangs pa'i khyad par gyis gzugs la stsogs pa'i yul rnams bla na med pa'i 'bras bu nyid skyed par byed do/ /ji ltar dug la sogs pa sngags la stsogs pas mngon par sbyang ba la nye bar sbyar ba na bcud kyis len pa la stsogs pa'i 'bras bu gzhan dag 'byin par byed la/de byis pa gzhan rnams la ni nges par 'chi ba nyid du byed do/ /de bzhin du yul rnams kyang sngags dang phyag rgyas byin gyis brlabs pa ni shin tu khyad par can gyi 'bras bu nyid mngon du byed pa yin no zhes nges par khong du chud par bya'o//de yang dpal mchog dang po las/ /'dod chags zhe sdang gti mug ste/ /gsum po 'di nyid dug nyid 'gyur/ /mi mnyam pa yis bsten na ni/ /'di dag dug ni nyid du 'gyur/ /bdud rtsi nyid phyir bsten na ni//bdud rtsi nyid du 'gyur ba yin/ /zhes gsungs pa dang / dkon mchog brtsegs pa'i mdo las kyang / 'od srungs 'di lta ste dper na/ grong khyer chen po'i lud gang yin pa de ni bu ram shing gi zhing dag dang / rgun 'brum gyi zhing dag la phan par 'gyur ba yin no zhes gsungs pa dang /'od srung de bzhin du byang chub sems dpa'i nyon mongs pa'i lud gang yin pa de yang thams cad mkhyen pa nyid la phan par gyur pa yin no/ /'od srungs 'di lta ste dper na/ sngags dang sman gyis yongs su zin pa'i dug gis ni 'chi bar byed mi nus so/ /'od srungs de bzhin du shes rab dang thabs mkhas pas yongs su zin ba'i byang chub sems dpa'i nyon mongs pa'i dug gis kyang log par ltung bar byed mi nus so zhes gsungs pa dang /yang slob dpon nA gA rdzu na'i zhal snga nas kyis kyang / mgon po khyod kyi nyon mongs pa/ /bag chags rtsa ba'i mthar thug spangs//nyon mongs rang bzhin nyid las ni/ /khyod kyis bdud rtsi nye bar bsgrubs/ /zhes bshad pa dang / yang nye ba 'khor gyis zhus pa'i mdo las kyang / 'dod chags ni byang chub sems dpa' sems can gyi don chen po nyid kyis 'jug ste/ sems can la rjes su chags par byed pa'i phyir ro zhes gsungs pas/tshogs pa'i dbye ba las 'bras bu'i dbye bar snang ba dang / chos bdag med par rtogs pas de la mngon par zhen pa ci nas kyang 'byung bar mi 'gyur gyi/ bla na med pa'i bde ba chen po'i 'bras bu thob par bya ba la bsgrub pa gzhan med pas/de'i phyir zas dang spyod lam la stsogs pa'i bde ba nyid kyi 'bras bu de mngon sum du bya ste/ gang gi phyir 'byor pa de ci 'dra ba las de 'dra bar 'gyur gyi/ /gzhan las 'byung ba las de lta bur ji ltar 'gyur/ /de nyid kyi phyir mnyam sbyor las/ /bdag nyid sangs rgyas thams cad dang //dpa' bo thams cad nyid yin no/ /de bas bdag gis lhar sbyor bas/ /bdag nyid rab tu bsgrub par bya/ /gzugs brnyan lugs ma la stsogs la/ /rnal 'byor 'byung bar mi 'gyur gyis/ /byang chub sems la rab brtson na/ /de las rnal 'byor lhar 'gyur ro//bdag nyid yongs su spangs nas ni/ /dka' thub kyis kyang ma gdungs shig /ci bde bar ni bde bar bzung / /'di ni ma byon rdzogs sangs rgyas/ /'di la khrus dang sdom mi dgos/ /dka' thub dka' bar spyod mi dgos/ / dka' thub sdom pa med pa dang / /bde ba dang ni dga' bas 'grub/ /ces gsungs pa dang / ci ltar bcom ldan 'das kyis gzugs la stsogs pa dang / de las byung ba'i bde ba yongs su gyur pa ni/ 'bras bu bla na med pa'i rgyu yin par gsungs pa de ltar reg pa las byung ba'i bde ba yongs su gyur pa 'di yang de dang 'dra'o//'on te lung dang 'gal ba'i phyir mi 'gyur ro zhe na/ lung gi reg pa'i khyad par yang dag par bsten pa las 'bras bu de thob par 'gyur ba yin pa'i phyir ro/ /de cir yang 'gal ba ci zhig yod/ /de las bkag pa'i phyir ro zhe na ma yin te/dgag pa'i yul ni nges pa can yin pa'i phyir te/ gang zhig 'di thabs dang shes rab dang bral zhing bdag gir 'dzin pa la mngon par zhen pas yongs su gyur pa mi shes par reg pa'i khyad par kun du bsten pa mi rig pas yongs su gzung ba'i rang bzhin can de rnams kyi yul bsten pa de ni ngan 'gro'i rgyur 'gyur ro//de yang bcom ldan 'das kyis/ /gang zhig dge slong dngos gnas dang / /mi gang rtog la dga' ba dang / /gang yang rgan po'i dngos gnas pa/ /de la de nyid mi bsten to/ /zhes gsungs pas/ bcom ldan 'das kyis de dag las dgongs nas dgag pa gsungs pa yin no/ /dpal gsang ba 'dus pa las kyang / /dge ba bcu yi las kyi lam/ /ye shes spangs pa rnams 'dod do/ /zhes gsungs pa dang / de bzhin du rnam par snang mdzad mngon par byang chub pa las kyang /thabs dang mi ldan ye shes dang / /bslab pa dag kyang bshad pa ni/ /dpa' bo chen pos nyan thos rnams/ /de la gzung ba'i phyir bshad do/ /zhes gsungs pas/ /thabs dang shes rab kyis yongs su zin pa'i rang bzhin khyad par can gyi 'bras bu yongs su tshol ba rnams kyi yongs su gyur pa'i 'bras bu ni khyad par nyams su myong ba yin pas don dam pa'i chos kyi de kho na nyid rtogs pa de rnams kyis nyes pa chung ngu'i yang skal ba can du 'gyur ba ma yin no//'on kyang bsam pa'i khyad par dang ldan pa de las bla na med pa'i 'bras bu 'thob par 'gyur te/sems rnyog pa med pa'i phyir ro/ /de bas na bsam pa'i khyad par gyis bya ba las bsod nams dang bsod nams ma yin pa 'di nyid dbye ba nges par byas pa yin gyi dngos po ji lta ba bzhin gnas pa'i tshul gyis ni ma yin te/ 'phags pa'i lhas kyang /byang chub sems dpa' kun rtog las/ /dge ba'am yang na mi dge ba/ /thams cad dge ba nyid 'gyur te/ /gang phyir de yi dbang gyur yin/ /zhes bshad pa yin no/ /de bas na kun du rtog pas byas pa'i bsod nams dang bsod nams ma yin pa rnams la khyad par du byas pa'i kun du rtog pa'i khyad par las de gzugs la sogs pa rnams la bsam pa'i khyad par de las 'bras bu khyad par can nyid nges par 'thob par 'gyur bas gzhan dag mi 'dod du zin kyang khas blang bar bya'o//de nyid kyi phyir bcom ldan 'das kyis chos rnams sgyu ma dang 'dra ba la sogs par mos pa dang ldan pas longs spyod thams cad ni rung ba yin no zhes gsungs pa dang /yang dge slong dad pa med pa ni dad pas byin pa yongs su longs spyod pa'i 'os ma yin no zhes gsungs pa dang / yang mnyam sbyor gyi rgyud las/ thams cad nam mkha'i mtshan nyid de/ /nam mkha' la yang mtshan nyid med/ /khams gsum dag ni ma lus pa/ /thams cad sgyu ma lta bu ste/ /ji ltar sgyu ma thams cad du/ /mthong ba dang ni reg par 'gyur/ /dmigs su yod pa ma yin te/ /de bzhin 'gro ba kun gyi tshul/ / phyag rgya 'di yis rnal 'byor pas/ /sa gsum po ni sbyang bar bya/ /zhes gsungs pa dang / /lha thams cad 'dus pa'i rgyud las kyang / /thams cad rdzogs pa'i sbyor ba yis/ /gang gis blun po 'ching 'gyur ba/ /de yis 'di na mkhas pa che/ /sems ni rdzogs pa'i rnal 'byor pa/ /gzhan du mar me ltar 'grub po//zhes gsungs pa dang / /yang / 'jig rten 'das spyod gsang ba ni/ /rnam par mi rtog nyid du spyad/ /gzhan du bag med par gyur na/ /der ni rnam rtog 'phro bar 'gyur/ /rnam pa kun gyis thams cad du/ /rnam par mi rtog ngo bor ni/ /sems gzhag na ni dogs med pa//de tshe 'grub par the tshom med/ /gnas skabs kun du thams cad du/ /dogs pa med pa'i sems kyis ni/ /spyod pa kun la 'jug na yang / /'ching ba nyid du mi 'gyur ro/ /rnam par mi rtog sems kyis ni/ /spyod pa ma lus kun spyad cing / /dbang po kun la longs spyod pas//sems dpar gnas na 'ching mi 'gyur/ /zhes gsungs pa dang / yang / gzugs 'di thams cad stong pa ste/ /mig kyang stong pa'i rnam pa yis/ /mthong bzhin rnam par mi rtog pa'i/ /dam pa dogs pa med par 'gyur/ /yang de nyid las/ thams cad nam mkha'i rang bzhin te//sems kyang nam mkha'i rang bzhin du/ /brten na rnam rtog med nyid dang / /dogs pa med pa nyid rab skye/ /zhes gsungs pa dang / yang rnal 'byor pa rnams kyi brtul zhugs ji lta bu yin zhe na/ dogs pa med pa'i sems kyis ni/ /las rnams kun la thabs bcas par//gang tshe the tshom med spyod pa/ /brtul zhugs rnams [(]gyi [,]kyi [)]mchog gi mchog /dka' thub ci zhig yin zhe na/ /las rnams thams cad rnam kun du/ /rnam par mi rtog sems kyis ni/ /dogs pa med par kun spyod pa/ /dka' thub kun gyi mchog gi mchog /rnam rtog med pa'i sems kyis ni//yul rnams bsten par gyur pa na/ /smod par gyur pas mi gnod pa/ /dka' thub de ni 'da' bar dka'/ /gang zhig las rnams thams cad ni/ /shes rab kyis ni nges sbyor zhing / /de yang stong pa'i gnas su sbyar/ /bdag nyid chen po'i dka' thub 'di/ / shes rab 'pho ba'i ngo bos ni/ /rnam par rtog pa med sems kyis/ /dogs pa med par kun spyad spyod/ /bdag nyid tshe de'i dka' thub yin/ /gal te thabs dang shes rab las/ /sems ni gzhan du mi 'jug pa/ /nges par de ni byang chub che/ /rab tu sbyin byed yin par bsten/ /rnal 'byor ba ni mngon brtson pas//rnam par mi rtog rjes 'gro ba/ /de yi 'byor pa thams cad ni/ /longs spyod don du sprul pa yin/ /shes rab me long las 'phro na/ /'du byed de yi rnam pa yin/ /de'i dran shes rab kyis bskyed pa/ /rnam rtog med pa'i bdag nyid sems/ /me long gi ni gzugs brnyan dang //rmi lam sgyu ma chu bur dang / /mig 'phrul dang ni 'dra ba ru/ /gang gis mthong ste gtso bor bshad/ /'dus byas rnams kyi 'gyur ba ni/ /glog dang dri za'i grong khyer gyi/ /rnam pa ci 'drar mthong gyur pa/ /skye dgu de yi dbang gyur bshad/ /ces gsungs pa yin no//des na gang du mngon par zhen par 'gyur ba'i gnas ni gang yang yod pa ma yin no/ /gang gi tshe de lta bu'i sgyu ma lta bu'i dngos po khyad par can gyi longs spyod las yang dag par byung ba'i bde ba yongs su gyur pa las 'bras bu khyad par can cung zhig tsam thob pa de'i tshe ci'i phyir mi 'dod//'di dag ni ngo bo nyid kyis brten pa ma yin gyi 'on kyang snang ba tsam gyi mtshan nyid yin no/ /gal te 'di dag khyad par can gyi sgom pa goms pa'i stobs kyis bde ba dang / yid bde ba la sogs pa'i khyad par can gyi 'bras bu bskyed pa na bla na med pa thob pa'i rgyu'i ngo bor de'i tshe 'gyur ba la 'gal ba yang med do//de yang dpal mchog dang po las/ /bdag nyid sangs rgyas thams cad de/ /dpa' bo thams cad nyid kyang yin/ /rang gi lha yi sbyor ba yis/ /bde bas bdag nyid bsgrub par bya/ /dka' thub sdom pa mi bzad pas/ / lus can lus ni skams 'gyur la/ /sdug bsngal gyis ni sems g.yengs shing / /g.yengs pas dngos grub gzhan du 'gyur/ /yid kyi lus ni brtan pa'i phyir/ /bde ba thams cad brtan par 'gyur/ /sdug bsngal gyis ni g.yo 'gyur ba'am/ /'gog pa thob par 'gyur ba yin//zhes gsungs pa dang / yang 'jig rten pa dang 'jig rten las 'das pa'i rdo rje'i rgyud las/ bde bas dngos grub thob 'gyur gyi/ /lus kyi gdung bas 'grub mi 'gyur/ /gang phyir ting 'dzin las byung ba'i/ /bde ba kun la 'tshang rgya nyid/ /zas gcod la sogs drag po dang //de bzhin dka' thub gzhan sogs kyis/ /lus gdungs pa yis rnam par g.yeng / /g.yengs pas dngos grub gzhan du 'gyur/ /sems can dman pas mi 'grub ste/ /de bas dka' spyad min par bshad/ /ces gsungs pa dang /yang / dpal gsang ba 'dus pa las/ dka' thub sdom pa mi bzad pa/ /brten kyang 'grub par mi 'gyur gyi/ /'dod pa'i longs spyod thams cad la/ /brten na myur du 'grub par 'gyur/ /slong mo za zhing mi bzla ste/ /slong la dga' bar mi bya'o/ /'dod pa kun la longs spyod cing //sngags kyi yan lag ma nyams bzlas/ /lus dang ngag dang sems rnams ni/ /bde bar gnas na byang chub thob/ /gzhan du dus min 'chi ba dang / /dmyal bar nges par sreg par 'gyur/ /zhes gsungs pa yin no/ /de bas na gang nor bu chen po shel dang 'dra bar rang bzhin gyis 'od gsal ba yin la/gzugs la sogs pas mngon par 'dus byas pa'i khyad par las bde ba dang / yid bde ba'i mtshan nyid can gang yin pa de der thabs dang shes rab kyis yongs su zin pa'i goms pa'i khyad par gyi stobs kyis rab kyi mthar thug pa'i ngo bo nyid thob par 'gyur ba yin no//de yang 'di ltar shes rab dang bzo dang sgyu rtsal la sogs pa dang 'dra bar gzugs la sogs pa'i yul nyams su myong ba las yang dag par byung ba'i 'dus byas pa'i khyad par las rnal 'byor pa'i shes pas rgyun du bsgom pa goms pa'i stobs kyis mchog tu rtag pa'i ngo bo nyid 'thob par 'gyur ba yin te/bsgom pa'i rab kyi mthar thug par son pa yin pa'i phyir rang gi grub pa'i mtha' las bde bar gshegs pa la sogs pa 'dra la/ 'jig rten na yang 'dod pa dang / mya ngan dang / 'jigs pa dang / smyos pa la sogs pa dang / 'dra bar reg pa las byung ba'i bde ba dang / yid bde ba la sogs pa yang goms pas yin no/ /de bas na de rnams kyang mchog tu khyad par du gyur pa dang ldan pa yin pas rang bzhin 'gal ba'i dmigs pa yin te/ 'dir yang sdug bsngal la sogs pa dang mi mthun pa dang bde ba dang yid bde ba la sogs pa'i mtshan nyid can ni 'bras bu yin la/de yang gang gi tshe goms pa'i stobs mngon sum du gyur pa thob pa dmigs par gyur pa de'i tshe de dang mi mthun pa'i sdug bsngal dang yid mi bde ba la sogs pa ldog par 'gyur zhing / rang gi yon tan gyi tshogs rnams kyang sdud par 'gyur ro//de bas na der goms par gyur pas gnas pa dang / de dang mi mthun pa'i sdug bsngal la sogs pa'i go skabs dbye ba 'gog par byed do/ /'di lta ste dper na/ grang ba la sogs pa dang mi mthun pa dro ba la sogs pa dang phrad par gyur pa na grang ba la sogs pa med pa skyed par byed do//gang gis gzhi gcig la phan tshun mi mthun pa gnyis yod par dmigs par mi 'gyur ro/ /de bzhin du bde ba dang sdug bsngal 'di gnyis kyang rgyud gcig gi bdag nyid du ji ltar yang 'byung mi srid de/ de ni de dang mi mthun pa yin pa'i phyir ro//de bas na bde ba dang yid bde ba la sogs pa goms par byed pa nyid ni sdug bsngal la sogs pa ji ltar yang 'byung bar 'gyur ba'i gnas rnyed par mi 'gyur ro zhes bya ba ni rigs par smras pa yin no/ /rang bzhin 'gal ba dmigs pa de'i ngo bo yang med pa go bar byed pa yin pas rab kyi mthar thug par 'gro ba'i yang rgyu ni goms par byed pa'i khyad par yin te/shes rab dang bzo dang / sgyu rtsal la sogs pa dang 'dra la/ de'i khyad par las 'gal ba dmigs pa yin par khong du chud par bya'o/ /'di ltar yang bsgom bzhin pa las gal te khyad par thob par gyur pa na yang slar ldog par 'dod na/de'i tshe zad par sa la sogs par yang bsgom pa'i rab kyi mthar thug pa la 'jug pa rnams de bzhin du ldog par 'gyur ba zhig na de ltar mi 'dod de/ gang gi phyir gang zhig rab kyi mthar phyin pa la 'jug pas rang gi bdag nyid kyi ngo bo nyid thob par gyur pa rnams ni de dag ldog par mi 'gyur te/dper na zad par sa la sogs pa dang 'dra'o/ /bdag nyid kyi ngo bo nyid thob par gyur pa ni khyad par gyi bde ba dang yid bde ba la sogs pa brten pa de las de yang ldog par mi 'gyur te/ ldog pa'i rgyu med pa'i phyir te/ gang yang nyes pa las ldog pa'i skal ba can yin pa de la de ltar 'di yod pa ma yin no//de'i rjes thogs la sdug bsngal 'byung bar 'gyur pa yang ma yin te/ rab kyi mthar thug par phyin par gyur pa la de mi srid do/ /gzhan du na thar pa'i rjes la yang 'khor bar 'gyur ro zhes bya bar ni 'dod pa'am rigs pa ma yin te/gang gis na thar pa thob pa rnams 'khor bar skye bar 'gyur ba ni mi 'dod pa kho na yin no/ /de yang de'i tshe ma rig pa'i bag chags las rnam par ldog pa'i phyir dang rgyu med pa'i phyir ro/ /gang gzhan gyi don du yang dag par skye ba ni 'khor ba ba ma yin te/sngon gyi smon lam la sogs pa'i shugs kyi stobs nyid kyis der 'jug pa yin pa'i phyir ro/ /bag chags kyi stobs kyis ni ma yin no/ /de bas na ji ltar thar pa'i rjes thogs la 'khor bar 'gyur ba ma yin pa de bzhin du bde ba rab kyi mthar thug pa'i rjes thogs la sdug bsngal gyi sems kyang skye bar mi 'gyur te/de ni nor bu tshon shel dang 'dra bar rang bzhin gyis yongs su dag pa yin pa'i phyir ro/ /gang dang gang la brten pa de dang der goms pa'i stobs kyis shin tu khyad par du 'phags pa'i ngo bo nyid gsal bar byed de/ slar yang mi ldog pa'i chos kyi mtshan nyid yin no/ /de bas na/ /dngos po gang dang gang gis ni/ /mi rnams yid ni dga' 'gyur ba/ /de dang de yi rang bzhin 'gyur/ /sna tshogs nor bu ji bzhin no/ /zhes bshad pa yin no/ /des na 'di dag thams cad ni khyad par can yongs su gyur pa'i phyir yongs su 'gyur bzhin pa las khyad par can gyi 'bras bu thob par byed pa yin no//de bas na yongs su gyur pa na log pa skyed par mi 'gyur zhing / sngon gyi las kyi 'phen pa'i shugs las de ltar mi 'gyur ba ni ci yang med de/ gzhan du khyad par can gyi yongs su gyur pa don med par 'gyur zhing thams cad du yid brtan du mi rung bar 'gyur ro//de yang rgyal ba'i yum las/ rab 'byor gzhan yang byang chub sems dpa' sems dpa' chen po de bzhin gshegs pa dang de bzhin gshegs pa'i mchod rten la lha'i dri 'bul zhing de 'di snyam du bdag gi dge ba 'dis bdag bla na med pa yang dag par rdzogs pa'i byang chub tu mngon par rdzogs par sangs rgyas pa'i sangs rgyas kyi zhing du sems can thams cad lha'i reg pa'i khyad par mngon du gyur cig ces bsngo la/gzhan yang rab 'byor 'dod pa tsam gyis 'dod pa'i yon tan lnga sangs rgyas bcom ldan 'das nyan thos kyi dge 'dun dang bcas pa dang /sems can thams cad la stobs shing / de ltar yang dag par shes pas 'di ltar bdag gi dge ba'i rtsa ba 'dis sangs rgyas kyi zhing du bla na med pa yang dag par rdzogs pa'i byang chub tu mngon par rdzogs par sangs rgyas nas nyan thos kyi dge 'dun dang bcas pa dang /sems can thams cad kyang 'dod pa tsam gyis yid bzhin du 'dod pa'i yon tan lnga 'byung bar gyur cig ces bsngo la/ gzhan yang rab 'byor byang chub sems dpa' sems dpa' chen po yang dag par rdzogs pa'i sangs rgyas dang nyan thos kyi dge 'dun dang sems can thams cad dang bcas pa la 'dod pa'i yon tan lnga stobs par byed cing zhes bya ba la sogs pa gsungs so//de ltar na bag chags kyi stobs las 'gyur te/ de ltar mthong ba'i 'bras bu la yang ji ltar 'jig rten na ma du lung ga la sogs pa'i 'bras bu rgya skyegs la sogs pas bsgos na de dang 'dra bar snang ngo //de bas na sems kyang phyi'i reg pa la sogs pa la brten pa na bde ba la sogs pa sbyang ba'i khyad par so sor rtogs pa bskyed pa'i gyis yang de nyid mngon du phyogs par 'gyur te/ sems de la rjes su chags pa'i phyir ro/ /der zhen pa ni de nyid la brtan par 'gyur ro/ /de yang ji ltar da du ra dang / ras bal gyi sa bon dang / se'u 'bras la sogs pa rgyu gzhan gyis bsgos pa'i khyad par las der bsgos pa'i dbang gis de dang 'dra ba'i 'bras bu 'byung ngo / /de bzhin du sems kyang reg pa la sogs pa las nges par 'byung ba'i bde ba dang /yid bde ba la sogs pa'i khyad par de las 'bras bu gong nas gong mar gyur pa'i khyad par can 'thob par 'gyur te/ de'i mi mthun pa'i phyogs la mngon par ma zhen pa'i phyir mi mthun pa'i phyogs 'byung bar mi 'gyur te de dang 'gal ba'i phyir dang /bde ba yin pa'i phyir ro/ /de bas na bcom ldan 'das kyis dpal mchog dang po la stsogs pa las sdug bsngal dang / yid mi bde ba la stsogs pa thams cad kyi go skabs dbye bar mi bya'o zhes gsungs pa dang / yang lha thams cad yang dag par 'dus pa'i rgyud las/lha dang lha min 'byung po rnams/ /so sor rtog pa yod min gyi/ /de yi yan lag bstan pa yis/ /dga' ba nye bar spyod bar 'gyur/ /mar me 'dra bar mya ngan 'das/ /de ni shin tu 'gro ba yin/ /mya ngan 'das me mi bzad pas/ / thal ba'ang lus pa med par 'gyur/ /de la lus ni yod min zhing / /dbang don ma yin khams rnams min/ /sems med sems las byung ba'ang med/ /nga rgyal blo ni yod min zhing / /sems can med cing shes rab med/ /sems ni ci yang yod ma yin/ /gnyid stug log gnas lta bur ni//rnam rtog med cing bdag med pa/ /'du shes med cing spyod pa med/ /gzugs med yon tan gang yang med/ /de ni mya ngan 'das par bstan/ /thar 'dod cha dang bral ba yin/ /'khor ba yin ni ngo bo nyid/ /rang bzhin dngos med shes byas la/ /gal te mya ngan 'das mi 'dod//de tshe sad par shes par bya/ /rang bzhin med pa'i ngo bo nyid/ /yang dag ngo bo'i rang bzhin shes/ /mya ngan 'das la gang bsgrub pa/ /brtson 'grus mi ldan dngos grub med/ /dman pa'i sems su gyur pa las/ /byas pa chud rab gson gzhan med/ /gang dag byang chub mchog bsgrub pas//ma grub par ni zhum 'gyur ba/ /bdag nyid 'phrog pa'i rkun po ni/ /de yis sdug pa ci ma byas/ /sangs rgyas bdag nyid can gyi lus/ /bde bas grub pa rgyas mi byed/ /de la brtson pa yod min zhing / /snying stobs la yang gnas pa min/ /byang chub mchog ni rab bsgrubs pa//mi 'grub mya ngan 'das par 'gro/ /rab dman de las gzhan med de/ /skye bo ngan pa'ang gzhan yod min/ /gang zhig byang chub mchog thob nas/ /rang gi lus ni spong byed pa/ /brtson pa de ni brtson 'grus kyi/ /rab tu sad par gnas pa yin/ /de bas dbang po thams cad la//nye longs spyod pas 'ching ma yin/ /zhes gsungs pa dang / yang yid gnyis yang dag par 'joms pa zhes bya ba'i rgyud las/ skyes bu de nyid brtul zhugs med/ /de las 'bras bu cher ldan pa/ /'ga' la sems ni mos gyur kyang / /bag chags ji ltar 'dor bar 'gyur//rnal 'byor rgyud kyi brtul zhugs la/ /gnas pa'i sems ni ma sbyangs pa/ /lta ba tha dad yin pa'i phyir/ /rab tu sad kyang brlag par 'gyur/ /gang zhig rab tu sad gyur mi/ /mar me lta bur mya ngan 'da'/ /shin tu byas chud gson gzhan med/ /dngos grub la ni der mi spyod//rang gi lus las byung ba yi/ /mngon sum 'dod pa dang bral zhing / /mya ngan 'das pa la zhugs pa/ /snying stobs zhan pa gzhan yod min/ /'di na rab tu sad rgyu las/ /mi gang mya ngan 'das 'gro ba/ /bde ba mtha' yas rab spangs nas/ /de tshe 'bras bu ci zhig 'grub//ces gsungs pa dang / dngul chu me dang phrad pa las/ dngos po ci 'drar song gyur dang / /tshig par mngon pa'ang med gyur cing / /du bar song ba'ang yod ma yin/ /lci ba'i gzhom pa'i sbyor ba yis/ /gang tshe slar yang sdud pa ltar/ /de bzhin ye shes phyag rgya che/ / 'dra ba ru ni shes par bya/ /zhes bshad pa yin no/ /sbyor ba yang rab kyi mthar thug pa gang dang gang thob pa de las ldog par mi 'gyur te/ dper na thar pa la stsogs pa dang 'dra'o/ /rab kyi mthar thug pa'i rgyu'i ngo bo ni bde ba dang / yid bde ba la stsogs pa yin no zhes bya ba ni rang bzhin gyi gtan tshigs so//gzhan yang gang zhig bsgoms par gyur pa'i bsgoms pa de goms pa'i stobs kyis rab kyi mthar thug pa la gnas pa 'thob par 'gyur ba yin te/ dper na shes rab dang / bzo dang / sgyu rtsal la sogs pa dang 'dra'o/ /bsgom par bya ba yang shes rab dang thabs kyis yongs su zin pa'i reg pa'i khyad par las byung ba'i bde ba dang yid bde ba yin no//de bas na de dag kyang rab kyi mthar thug par 'gro bar 'gyur ba yin pa ni rang bzhin gyi gtan tshigs nyid yin no/ /de la 'dir yang rab kyi mthar thug pa tsam dang rjes su 'brel pa goms par byas pa las goms pa'i khyad par de'i stobs kyis slar mi ldog pa'i chos nyid kho na thob par 'gyur ba yin te/de gzhan gang gis kyang ldog par mi 'gyur ba ni rang bzhin nyid thob par yin no/ /dper na shing la sogs pa la mes bsregs pa'i khyad par de las ldog par mi 'gyur te/bsregs pa la stsogs pa'i mtshan nyid de slar mi 'byung ba'i chos can yin pa'i phyir ro/ /de nyid kyi phyir/ dper na shing dang gser lta bur/ /bsregs pas slar yang mi 'gyur zhing / /'gyur ba gang yang mi byed la/ /kha cig ldog pa dag kyang yod//ces bshad pa yin te/ gser la stsogs pa la mes byas pa'i khyad par de'i rgyun las ldog cing de dang mi mthun pa'i rgyu de'i rang bzhin gyi dngos por skyed par byed de/ me dang chu la stsogs pa dang 'dra'o/ /gser 'di yang sra ba la stsogs pa'i rang bzhin gzhi'i khyad par du 'byung ste/rang bzhin gyis bsgoms pas khyad par gzhan skye bar 'gyur ro/ /de la 'dir sems yul la spyod pa las byung ba'i bdag nyid kyi khyad par de gong nas gong du 'gro ba'i rgyu la brten pas rab kyi mtha' thob par gyur pa las ldog par mi 'gyur te/ blo de'i phyogs su lhung ba'i phyir ro/ /blo gang gis de zhen par gyur pa'i yon tan de thob pa na rgyu de nyid nye bar blangs pas de dang mi mthun pa'i sgor nam yang ldog par mi 'gyur ro/ /de la gang dang gang gis rab kyi mthar thug par byin pa de dang de'i bdag nyid du 'gyur ba yin te/ dper na bram ze yang goms pa'i dbang gis gtsang sbra la stsogs pa med par 'gyur te/ 'di ltar bram ze brtul zhugs chen po 'dzin pa 'ga' zhig brtse ba med pa'i bsam pa la goms par byas na de'i rang bzhin du 'gyur ro/ /gang yang rang rig pa'i bde ba dang yid bde ba la stsogs pa thams cad kyi rgyud la gnas pa rang rig pa'i mngon sum du grub pa de yang de nyid bsgom pa goms pa'i stobs kyis rgyun mi 'chad par 'jug pas gnas te/rgyun 'chad pa'i rgyun med pa'i phyir sdug bsngal la stsogs pa'i rgyun 'chad par byed pa'i rgyu yod pa ma yin no//rtog pa dang ldan pa kha cig ni sdug bsngal la stsogs pa la mi phan pa'i rang bzhin can du shes nas 'dor bar 'gyur ba yin la/ yang de skyed pa'i rgyu tshol bar mi byed de/ gzhan du na de rtog pa dang ldan pa ma yin te/ de las gzhan pa ni smyon pa dang 'dra'o/ /de nas re zhig mthar thug par phyin pa lta zhog gi /'on kyang cung zad tsam bsten pa yang blos de la phan pa dang rjes su 'brel pa nyid kyis de dang mi mthun pa'i rgyu'i 'dod pa ni ci nas kyang skyed par mi byed de/ su yang shes bzhin du sprul dang tsher ma la stsogs pa len par mi byed do/ /des na de'i 'bras bu thob pa nyid dngos po la bslabs pa'i khyad par gyi stobs kyis goms par 'gyur ba thob pa na de nyid la blos spang bar bya ba'i tshul du thog ma kho nar zlog par byed de/des ni de'i rgyun gcod pa de ni de yin pas rang bzhin gyi gtan tshigs kyis de'i rang bzhin sgrub par byed pa yin no//gtan tshigs ma grub pa yang ma yin te/ bsgom pa'i khyad par gyis khyad par thob pa'i phyir dang / des shes rab la stsogs pa goms pa'i phyir/ gtan tshigs ma grub pa yod pa ma yin no/ /ma nges pa'ang ma yin te/ gang gis bde ba dang yid bde ba la sogs pa la goms par byed pa na mi mthun pa'i sdug bsngal la sogs pa la 'jug pa ma yin no//'gal ba yang ma yin te/ gang gi phyir bsgrub par bya ba dang mi mthun pa'i sdug bsngal 'grub pa ma yin no/ /dpe'i chos kyang smra ba po thams cad la grags pa yin te/ gang 'di shes rab la stsogs pa skyes bu so so la bslabs pa'i dbye bas khyad par tha dad pa bsgrub par gyur pa snang ba yin no//gang yang 'dod chags kyi gnyen por mi gtsang ba dang / zhe sdang gi gnyen por byams pa dang / gti mug gi gnyen por rten cing 'brel par 'byung ba yin no zhes gsungs pas de la chags pa ni chags pa dang bral bas rnam par ldog ste/de dang mi mthun par gyur pa yin pa'i phyir ro zhe na/ gal te de ltar chags pa la goms par byas pas kyang chags pa dang bral bar 'gyur te/ de nyid kyi phyir rtsa ba'i rgyud las/ 'dod chags sangs rgyas thams cad kyi/ /chags pa'i ye shes rnyog med yin//'dod chags dang ni chags bral bcom/ /de ni bde ba thams cad bskyed/ /ces gsungs pa yin no/ /'dod chags la stsogs pa rang bzhin gyi kha na ma tho ba dang bcas pa nyid ni ma yin te/ gzhan du na rgyun du zhugs pa'i lam thob par mi 'gyur te/de ni 'dod chags la stsogs pa ma spangs pas 'jug pa yin pa'i phyir ro/ /gzhan yang bcom ldan 'das kyis tshul khrims kyi le'u las/ byang chub sems dpa' dge ba bcu las kyang nyams par bya ste/ ji ltar 'dod pa don du gnyer ba'i bud med la byang chub sems dpa'i phyir/srog 'dor bar byed na de la 'dod pa bsten pa la stsogs pas srog gzung bar bya'o/ /de bzhin du sdig pa chen po byed pa mthong na srog dang bral bar byed pa yang de ngan 'gror 'gro bar mi byed kyi bsod nams mang po skye bar 'gyur ro zhes gsungs so//de bas na 'dod chags la stsogs pa rang bzhin gyi kha na ma tho ba dang bcas pa yin na de'i tshe ngan 'gro'i rgyur ji ltar mi 'gyur/ bsod nams shin tu mang po skye bar yang ji ltar gsungs/ de nas de rnams rang bzhin gyi kha na ma tho ba dang bcas pa ni ma yin mod kyi 'on kyang gang zag gi rgyud kyi khyad par las yon tan gyi khyad par skyed par byed par 'gyur te/dper na ke ta ka'i me tog spos kyi glang po ches zos na zhu ba na gla rtsi lta bu nyid du 'gyur la/ glang po che gzhan gyis zos na zhu ba na mi gtsang ba'i rang bzhin du 'gyur ro/ /des na de me tog ke ta ka'i nyes pa ni ma yin no//de bzhin du 'dod chags la stsogs pa yang bsam pa'i khyad par gyi dbang gis rgyud rnam par dag pa la gnas pa rnams la ni khyad par can gyi 'bras bu nyid skyed par byed do/ /dper na 'o ma sprul la stsogs pas 'thungs na zhu ba'i tshe dug la stsogs pa'i rang bzhin du 'gyur la/skyes bu gzhan gyis 'thungs na ni bdud rtsi'i rang bzhin du 'gyur ro/ /de bzhin du 'dod chags la stsogs pa yang bsam pa'i khyad par la brten pas khyad par can gyi 'bras bu nyid skyes par byed de/ rang bzhin gyi kha na ma tho ba nyid ma yin ba'i phyir ro/ / gtan tshigs kyi sbyor ba ni khyad par can rgyud gang dang gang la brten pa de dang de ni khyad par can gyi 'bras bu nyid skyed de dper na ke ta ka la sogs pa bzhin no/ /khyad par 'phags pa'i rgyud la gnas pa'i 'dod chags la stsogs pa yin pa'i phyir ro zhes bya ba ni rang bzhin gyi gtan tshigs yin no//'dir yang khyad par can gyi rgyud kyi nye bar longs spyod pa yongs su gyur pa tsam dang rjes su 'brel pa ni khyad par can gyi 'bras bu thob pa tsam nyid skyed par byed pa yin te/ rgyu'i tshogs pa tha ma bzhin no/ /gang zhig gang gi rang bzhin pa de tsam la rjes su 'brel pa ni des de byed pa yin te/gegs pa byed pa med pa'i phyir ro/ /gegs byed pa yod na ni yid brtan du mi rung ngo / /de la 'dir khyad par can gyi yongs su gyur pa ni gzhan la ltos pa yod pa ma yin pas de tsam du rjes su 'brel ba yod pa yin la/ de yang sdod pa med pa gegs yod pa ma yin te/sdod pa med pa'i tha ma ni/ /sdod pa med pa gzhan la ltos pa med pa'i phyir ro/ /de ltar na de tsam dang rjes su 'brel pa'i nges pas rang bzhin gyi gtan tshigs su bshad pa yin no/ /ji ltar bcud kyis len par byed pa yang bcud kyis len gyi sman pa bcud kyi mthu goms par gyur pa na khyad par du 'phags pa nyid kyi gzugs gzhan skye bar 'gyur ro//de bzhin du zangs ma la stsogs pa dngul chu la stsogs pa'i bcud kyi shugs brtan par byas pa'i mthus don gyi rnam pa gzhan skyed par byed pa ni nyes pa med cing slar mi ldog pa'i chos can yin te/de bzhin du 'dir yang shes par bya'o/ /gzhan du na zangs ma la stsogs pa dngul chu la stsogs pas bsgyur ba nyid du mi 'gyur ro/ /de ltar nus pa de mthong bas yod pa nyid du gsal ba kho nar rtogs te/ gzhan du na gang du yang nus pa yod par mi 'gyur ro/ /de yang /gser 'gyur rtsi yi rnam pa mchog lta bur/ /mi gtsang lus 'di blangs nas rgyal ba'i sku/ /rin chen rin thang med par bsgyur bas na/ /byang chub sems zhes bya ba rab brtan zung / /bsod nams kyis ni lus bde la/ /mkhas pa yis ni sems bde na/ /gzhan don 'khor bar gnas kyang ni//snying rje can dag ji ltar skyo/ /zhes bshad pa yin no/ /gzhan yang ji ltar bcud kyis len grub pa'i skyes bu la la zhig sman khyad par can gyi sbyor bas de'i yon tan gyi che ba'i bdag nyid thob cing / de la mngon par shes ba lnga yang 'byung bar 'gyur zhing /'di ltar 'khor ba ji srid par gnas pa'i yon tan dag kyang byed do/ /de bzhin du khyad par can gyi yul la yongs su longs spyod pa las yang dag par byung ba'i bcud kyis len ni 'khor ba ji srid par smon lam gyi bya ba byas shing gzhan gyi don la brtson pa'i yon tan gyi tshogs yang dag par bsgrubs pa byang chub sems kyi bcud kyis len gyis bsgyur ba yod par ci'i phyir mi 'dod/gzhan yang / 'gro ba drug dang nyon mongs bsal bas byang chub mchog thob ma mchis la/ /nyon mongs 'phyos pas rang la sman par bgyid pa'ang 'thob par 'gyur ma lags//de slad khyod kyis byang chub brnyes slad brtson 'grus brtan pa mdzad pa la/ /nyon mongs nges par ma bsregs ran gyi dum bu bzhin du spang bar mdzad/ /khyed kyi nyon mongs dran dang mkhyen pas gzung bas yon tan sna tshogs 'grub/ /nyon mongs pa dag spang bar gyur pa byang chub rgyur yang nye bar 'gyur lags te//'di ltar de yis khyod blo shul gol yul can du yang ma bgyis la/ /'gro ba rnams su skye ba brgyud pa'ang yon tan rnams kyi zhing du mdzad/ /gzhan yang thams cad mkhyen pa'i ye shes bsgom pa rab kyi mthar thug par gnas pa de ji ltar rnam par rtog pa dang bcas pa nyid las yin nam 'on te rnam par mi rtog pa nyid las yin/de las gal te re zhig rnam par mi rtog pa nyid las yin par 'dod na de'i tshe bsgom pa'i rnam par rtog pa'i nus pa las nges par skyes pa ci ltar na rnam par mi rtog pa nyid yin/rnam par rtog pa dang bcas pa las rnam par mi rtog pa'i ye shes 'byung ba ji ltar yang srid pa ma yin no/ /'on te nyon mongs pa dang nye ba'i nyon mongs pa'i bag chags rnams ldog pa las rnam par mi rtog pa nyid yin na de ni mi rigs te/ gang gi phyir nyon mongs pa dang nye ba'i nyon mongs pa'i bag chags ldog pa na gang zhig rnam par mi rtog par gyur pa gzhan ci zhig yod de/de las log pa'i gzhan la tshad ma med pa'i phyir ro/ /de la yang tshad mas grub pa 'ga' yang yod pa ma yin no/ /de yod par mngon sum yang yod pa ma yin te/ de ni dbang po dang /snang pa dang / yid la byed pa dang / yul gyi nus pa las nges par skyes pa yin pa'i phyir ro/ /gzung ba dang / 'dzin pa dang / 'dzin pa'i rnam pa dang bral ba'i shes pa ston par byed pa nyid kyang yod pa ma yin te/ de ni de las go bzlog pa yin pa'i phyir ro/ /rjes su dpag pas kyang ma yin te/de yang rtags dang rtags can gyi 'brel pa 'dzin pa sngon du 'gro ba yin pa'i phyir ro/ /gzung ba dang 'dzin pa gnyi ga las grol ba'i rnam par shes pa de med na mi 'byung ba 'bras bu zhes bya ba'am/ rang bzhin zhes bya ba'i rtags ni nye bar dmigs par mi 'gyur ro//mi dmigs pa'i gtan tshigs kyang de rtogs par byed par gyur pa ma yin te/ de dgag pa yul nyid yin pa'i phyir ro/ /de la re zhig 'bras bu'i gtan tshigs grub pa ma yin te/ rgyu dang 'bras bu'i dngos po nyid du mi 'thad pa'i phyir te/ gang gi phyir rgyu nyams pa las 'bras bu skyes pa yang ma yin te/de ni med pa nyid kyis na skyed pa po ma yin pa'i phyir ro/ /ma nyams pa las kyang ma yin te/ skye ba'i bya ba la mngon du phyogs pa'i dus la sdod pa na skad cig mas 'jigs pa med par thal bar 'gyur ro/ /bya ba med na ni nam mkha'i me tog dang 'dra bar skyed par byed pa ga la yin/de nyid kyi phyir/ sa bon nyams par gyur pa las/ /myu gu 'byung bar 'gyur ma yin/ /skye ba sgyu ma skye 'dra bar/ /'di dag thams cad khyed kyis gsungs/ /skye dang 'byung dang 'jig tshogs dang / /sems can srog stsogs ston mdzad pa/ /mgon po khyod kyis de drang don//gsungs pa de ni kun rdzob yin/ /zhes bshad pa yin no/ /des na don gyis bskyed par bya ba dang / skyed pa po mi 'thad pas 'dis na rgyu dang 'bras bur yod pa ma yin no/ /rang bzhin gyi gtan tshigs kyang rang bzhin gyis lkog tu gyur pa nyid yin pa'i phyir ci ltar yang yod pa ma yin zhing de tsam gyi rjes su 'brel par ma grub pa yin pa'i phyir ro//mi dmigs pa yang dag par bsgrub pa nyid yin pa'i phyir 'dir skabs ma yin no/ /gtan tshigs sam tshad ma gzhan dag kyang 'dod pa yin na ye shes rnam par mi rtog pa yin par nges so zhes brjod pa ga la yod/de yang / dngos rnams rang las mi skye zhing / /gzhan dang gnyis ka las kyang min/ /yod min med min yong med min/ /gang zhig gang las de ltar 'byung / /zhes bshad pa yin no/ /des na don dam par rnam par shes pa de mi 'thad pa yin na rnam par mi rtog pa can du ji ltar 'gyur/nam mkha'i pad+ma la sogs pa ni rnam par rtog pa dang bcas pa dang / rnam par rtog pa med pa nyid du 'dod pa ma yin zhing / de la yang dpyod pa 'di 'jug pa ma yin te/ skyes bu'i don la dgos pa med pa nyid yin pas/ nam mkha'i pad+ma dang 'dra la de khas blangs na yang dgos pa ci yang yod pa ma yin no//de ngo bo nyid med pas de ni ci yang bsgrub par rigs pa ma yin la/ bsgrub par bya ba mi byed pa yang der bsgrub pa yin par ma bshad do/ /de bas na ye shes 'di dag thams cad ni rten cing 'brel pa las byung ba/gzung ba dang 'dzin pa'i rnam pa'i ngo bo nyid kyis rab tu phye bas 'jug pa na/ rnam par rtog pa dang bcas pa yin par shes so/ /gang gis na khams gsum pa rnams ni gzung ba dang 'dzin pa'i rnam par shes pa'i rkyen gyis brtags pa'o zhes bshad pa yin no/ /de nyid kyi phyir lang kar gshegs pa'i mdo las/'phags pas 'khrul pa mi gzigs te/ /yang dag pa yang skabs der min/ /'khrul pa nyid 'gyur yang dag par/ /gang phyir skabs der yang dag na/ /nor pa yang dag nyid du 'gyur/ /nor pa thams cad spangs nas kyang / / gal te mtshan ma skyer zin na/ /de nyid de yi nor pa ste/ /rab rib yongs su ma dag bzhin/ /zhes gsungs pa yin no/ /de la phyin ci log tu dngos por sgro btags pa 'ba' zhig ldog pa na khyad par can gyi dngos po'i don bsgom pa'i rab kyi mthar thug par 'gro bas 'bras bu khyad par can nyid 'byung bar 'gyur ba yin te/bar dang bcas pa dang bar gyi ngo bo med par rang bzhin gcig pa bde ba la sogs pa bsgom pa la goms pa'i khyad par nyid brten pa yin pa'i phyir de'i rnam pa yang dag par rig pa dang 'dra la/ de dang rigs mthun pa'i rgyun du 'jug pa gzung ba dang 'dzin pa'i rnam pa yang dag par rig pa'i dbye ba dang ldan pa rang gi ngo bo rgyun mi 'chad pa'i chos can rang gi sems la dbang thob pa ni rnam par rtog pa dang bcas pa yin na yang ji ltar gnas pa'i dngos po'i don ma lus pa yongs su gcod pa'i shes rab dang thabs kyis yongs su zin pa'i rang bzhin can yin pa'i phyir ro//de nyid kyi phyir yang lang kar gshegs pa'i mdo las/ theg chen pa yi theg pa nga'i/ /yi ge med cing sgra yang med/ /bsam gtan ma yin rnam thar min/ /snang med spyod yul ma yin no/ /'on kyang theg chen theg pa ste/ /ting nge 'dzin la dbang byed pa//yid kyi lus kyi bdag nyid mchog /dbang gi me tog rnams kyis brgyan/ /zhes gsungs pa yin no/ /de bas na rgyu'i khyad par las 'bras bu'i khyad par rtogs par bshad do/ /'on kyang ming dang rigs la sogs pas brtags pa'i don gyis rjes su 'gro ba dang ldog pa dang mthun pa'i rnam par rtog pa dang bcas pa'i shes pa mi gsal ba dang mngon par ldan pa yin te/slob dpon chos kyi grags pa'i zhal snga nas kyis kyang 'jig rten pa'i tshad ma brtag par gang de gzung ba dang 'dzin pa'i dbye bas kun du bskyed pa gsal bar snang ste/'di ltar ming dang rigs la sogs par brtags pa dang bral ba nyid kyi shes pa ni gsal bar snang bar gyur pa yin no/ /gzung ba dang 'dzin pa'i rtog pa'i dbye bas phye ba yin la/ de bas na ming dang rigs la sogs par brtags pa la brten te/ slob dpon gyis mi gsal ba nyid du bstan te/gzung ba dang 'dzin pa yang dag par rig pa'i dbye ba la brten pa ni ma yin no/ /de bas na yul gyi rnam pa nyams su myong ba las byung ba'i khyad par ni de dag rigs mthun pa la mngon par zhen pa med de/ de goms par gyur pa gsal bar snang ba nyid la gnod par byed pa med cing /sgrub par byed pa ni yang yod de goms par gyur pa snyoms par 'jug pa'i mtshan nyid yin te/ 'dod pa dang / mya ngan dang / 'jigs pa dang / smyo ba la sogs pa bzhin no zhes sngar bshad pa yin no/ /'on te gzung ba dang 'dzin pa yang dag par rig pa'i rnam pa nyid du snang bzhin pa'i ye shes mthar thug par gyur pa na thams cad thugs su chud pa nyid du 'dod na/de ltar ni ma yin te rtog pa'i dra bas bsgrubs pa yin pa'i phyir ro/ /'o na rnam pa ma lus pas stong pa yang dag par rig pa tsam ste/ ji ltar na shes bya ma lus pa yongs su gcod pa nyid yin/snang ba med pa'i ye shes la ji ltar yongs su gcod pa nyid yod/ 'di ni rigs pa dang 'gal ba yin te/ cha shas med pa'i rang bzhin gcig la rtogs par bya ba dang / rtogs pa po dang / rtogs pa'i dbye bas ngo bo nyid gsum du mi 'thad pa'i phyir ro/ /'on te rab kyi mthar thug par byin pa na de'i rang bzhin ni 'di nyid yin pas thams cad thugs su chud pa yin na rang bzhin de ni bdag cag gi phyogs dang 'dra ste/de ltar gzung ba dang / 'dzin pa'i rnam pa yang dag par rtogs pa'i dbye ba yod pas yang rab kyi mthar thug par 'gro ba na de 'di ltar khyad par gyi ngo bo nyid du skyel/gang dngos po'i rigs ma lus pa ji ltar gnas pa nyid du thugs su chud pa yin na/ de'i nus mthu 'di bya rog rnams kyis zos pa ni ma yin no/ /gzhan yang rtog pa'i tshogs ma lus pas stong pa de yod do zhes gnas gdab par gyis shig /rnam par rtog pa dang bcas pa'i shes pa sems can thams cad kyi mthar rgyud la yod pa mngon sum la sogs pa'i tshad mas rab tu grub pa bsgom pa'i stobs goms pa yang dag par thob pa na thams cad rtogs par 'gyur ba nyid yin no//de yang 'di ltar gang dang gang bsgoms pa de dang de nyid bsgom pa'i rab kyi mthar thug par gyur pa na de goms pa klong du gyur pa yin te/'di ltar gtsang sbra can dag brtul zhugs chen po la sogs ba gtsang sme med par 'gyur ba bzhin du bsgom bzhin pa na khams gsum de'i longs spyod du 'gyur ba ni rang bzhin gyi gtan tshigs yin no/ /'di nyid kyis na mnyam sbyor gyi rgyud las/rnal 'byor thams cad bcom ldan 'das/ /rdo rje sems dpa'i de bzhin gshegs/ /de yi nye bar longs spyod gang / /khams gsum pa ni thams cad do/ /zhes gsungs pa dang / yang lha thams cad 'dus pa'i rgyud las/ 'byung ba bzhi gang yin pa dang / /'gro bar gtogs pa gang yang rung //rnal 'byor pa ni sems dag pa'i/ /thams cad longs spyod yin par bshad/ /phyag rgya chen por mnyam bzhag la/ /de nyid chen po zlos byed cing / /tshig rer thams cad bdag yin par/ /de nyid sbyor bas bsgom par bya/ /zhes gsungs te/de ltar de dag la sogs pa bsgom pa'i rab kyi mthar thug par 'gro ba tsam dang / 'brel pa goms par gyur pa'i rang bzhin de gang dang gang du 'byung ba de dang der goms par gyur pa thob pa ni rnam pa thams cad bsgoms pa na der khams gsum pa'i khongs su gtogs pa'i dngos po rnams bde ba dang yid bde ba la sogs pa bsgrub pa nyid du gnas so//de nyid kyi phyir mnyam sbyor gyi rgyud las/ dbang po gang dang gang lam gyur/ /de dang de yi ngo bor bya/ /mnyam par ma bzhag sbyor ba yis/ /thams cad sangs rgyas mnyam sbyor zhing / /zhes gsungs pa dang / yang rtog pa thams cad bsdus pa'i rgyud las/ sangs rgyas thams cad mdor bsdu na/ /'dod pa'i yon tan lnga ru bshad/ /ces gsungs pa dang / yang dpal gsang ba 'dus pa'i rgyud las/ gzugs sgra la sogs dngos po rnams/ /lha nyid du ni rab tu brtag /ces gsungs pa yin no//de bas na de rnams kyang der bsgom pa rab kyi mthar thug pas de goms par 'gyur gyi de rnams spyod yul ma yin par 'gyur ba ni ma yin no/ /de bas na rnam par rtog pa dang bcas pa'i ye shes kyang bsgom pa'i stobs las nges par skyes pa/ khyad par gyi rang bzhin la brten pa/yon tan ma lus pa yi gnas/ /dngos grub 'bras bu thams cad stsol/ /de yang sna tshogs thams cad byed/ /'khor ba ji srid bzhugs pa'i rgyu/ /sems can kun gyi don mdzad yin/ /'bad pas nga rgyal spangs nas ni/ /de ni 'bad de shes par bya/ /'di shes gyur na shes bya yi//de nyid thams cad rtogs par 'gyur/ /de kho na nyid grub pa zhes bya ba'i rab tu byed pa slob dpon zhi ba 'tsho'i zhal snga nas kyis mdzad pa rdzogs so// //rgya gar gyi mkhan po dI paM ka ra shrI dz+nyA na dang / zhu chen gyi lo tsA ba dge slong rin chen bzang pos bsgyur cing zhus te gtan la phab pa/