CLOSE WINDOW

D3703
བོད་ཡིག

@##/ /rgya gar skad du/ sid+d+ha ga ru Da shAs+t+ra/ bod skad du/ mkha' lding grub pa'i bstan bcos/ dpal rdo rje mkha' lding la phyag 'tshal lo/ /kha sbyar mchu bar sbrul ni bsdams pa yis/ /gdengs ka'i nor bu mkha' lding me long ste/ /rang bzhin 'od gsal gnyug ma'i gzugs mthong ngo //khro ba spangs pa de ni rgyal gyur cig /mkha' lding bstan bcos skyed mos tshal nas ni/ /me tog rtsi yi sbrang rtsi de nyid ni/ /sems can don du sbrang rtsi byed pa yi/ /dpal ldan shang ku bdag gis 'dir de bsdu/ /gang zhig brtan pa'i sems kyis bla ma yi//rjes 'jug dag pa'i lam la yang dag gnas/ /mi de phrin las ma lus pa yi ni/ /dngos grub thams cad kyi ni snod du 'gyur/ /bzod dka'i dug las byung ba'i tshor ba yis/ /'khrugs pa'i 'gro ba'i srog ni 'dzin byed cing / /chos dang nor dang 'dod dang thar pa ni//bsod nams byas pa'i 'gro ba de yis 'thob/ /'gro ba'i don phyir mkha' lding bstan bcos ni/ /dam pa'i skye bo de yis bsngags par byed/ /'dod pa can ni nor gyis dga' ba ltar/ /sngags pas sbrul gdug mi bzad pa yis so//de nas gdengs ka can dang tsi ti rnams/ /rA yi dkyil 'khor can dang 'dren gzugs sogs/ /rlung gi yon tan dus dang dus min dang / /a ma rat+ta sbyor rlung bus pa'o/ /mkha' lding gis bshad sman gyi nus pa dang / /ji ltar dug 'joms pa yi rim pa dag /gus pas de ni rtse gcig sems kyis nyon//gzhan dag kyang ni thos pa las byung ba'i/ /mtshon pas so/ /tri na in+d+ra nI la lta bu'i lus/ /'dab brgya rgyas 'dra'i mtshan pa lhag ma can/ /nor rgyas lus ni kha dog dkar po la/ /mtshan pa pad+ma rgyas 'dra sngon po yin/ /shar thogs nyi ma'i 'od zer lta bu la//mgo la g.yung drung dung chen 'jog pa'o/ /karko Ta ni mun pa lta bu yi/ /ri mo gsum ni mgrin par yod pa yin/ /pad+ma'i lus ni kha dog ljang gu la/ /skar tshogs lta bu'i thig les gdengs ka mdzes/ /pad chen zla 'od bskus pa lta bu la/ /mdung rtse gsum pa lta bu gdengs ka yin//dung skyong ka ni ya ra'i me tog 'dra/ /mgrin par zla ba'i cha yis mtshan pa yin/ /rigs ldan gyi ni spyi bo'i gdengs ka dag /du ba lta bu'i zla ba phyed pa yin/ /dbyig pa yis ni brdegs pa mchog yin te/ /klu rnams bzung nas skrod pa de ltar min//sdang bas glags ni tshol bar byed pa na/ /sngags pa dag ni gang gis thar bar byed/ /sa 'og gnas na yongs su gnas pa yi/ /dbang chen 'og ni klu rnams shin tu dkon/ /gdengs ka'i nor bus mdzes par byas pa yi/ /khol po yang ni glog gi zer ma 'dra//lce gnyis gdengs can phud ces 'jigs pa'i sgra/ /rin po che ni med par gyur pa ste/ /khol po yi yang khol po'i gnas su ni/ /gus pa med pa'i lto 'phye dag yin no/ /a ku ba saM gnyis gnyis bram ze rgyal/ /me tog dang ni sA la'i dri yin no/ / de bzhin sta ma ka pa rje'u dang dmangs/ /mar dang nya yi dri ni bro ba yin/ /dung 'chang mche ba'i rtsa na legs gnas pa/ /sbrang rtsi'i me tog phreng ba lta bu yin/ /de ni 'gro ba rnams kyi rmongs byed kyi/ /dug ste yongs su 'dzag par gyur pas so/ /gdengs ka can ni rang gi ngo bo'o/ / gan+da ya na'i yin par gyur na ni/ /mgo mjug lus la ri mo kyog po yod/ /gdengs kas dman no 'jig rten gan+da ya/ /tsi ti zhes ni yongs su grags pa yin/ /de yis bzung na g.yo med skad cig gis/ /de ni 'gyur ba med pa'i rang bzhin yin/ /de nyid grub pa thob pas gal te na//sad par byed na dran pa 'byung bar 'gyur/ /tsi ti'i rang bzhin no/ /thig btab lta bu'i ri mo ring mo can/ /ban+da ya ru rnam par shes par bya/ /shing dang lcug 'khyil rtsas gtugs yod par ni/ /nges par shin tu legs gnas rA yil la/ /kha skom mig dmar zas dang stan mi 'dod//tsha dang 'khru ba yi ni rjes la brgyal/ /dkar dang dmar dang nag dang ljang gu yi/ /ri mo med pa yin no rA yil la/ /btso ma'i gser 'dra'i lus ldan de yis ni/ /'gro ba rnams kyi srog ni 'phrog byed yin/ /rA yil gyis ni bzung na nges par ni/ /ril gyis khyab par skrangs pa kho nar 'gyur//gser mdog lus de rgyu ba'i tshe na ni/ /'bar ba'i me lce chad pas 'od ma bsreg /'od ma'i rang bzhin yang ni des bsreg na/ /de yis bzung na ji ltar 'tsho bar 'gyur/ /rA yil la'i rang bzhin no// //chu dang rlung me sa yi rang bzhin gyi//ko Ta rnams kyi gang zhig mtshan pa ni/ /go med sa rnams su ni shes par bya/ /dug chen skrangs 'bur yang dag skyed pa po/ /chu yi dkyil 'khor can ni dug 'dzin gyis/ /zin pa'i mtshan nyid lus ni 'drul ba yin/ /tsha dang 'dar dang skam dang skrang ba ni//rlung gi lus can gyis ni skyed par byed/ /lus kun gyi ni spu yi rtsa ba nas/ /se ba gnag 'dra'i brag gi thigs pa 'byung / /me yis reg pas kun nas skyed pa ni/ /thos dang gzugs dang mthong bas nyams pa yin/ /sa yi dkyil 'khor can gyis smras pa na/ / skrang dang tsha ba'i reg pas gdungs pa yin/ /gnyid dang stan dag la ni sdang bar 'gyur/ /skyes bu sems la zug gzer dag gis nyen/ /phung po la ni myur du snang gyur pa/ /ring po yi ni ring por skrang pa ste/ /nges pa nyid du mang pos mang po'o/ /thal ba dang ni rus pa bshang ba'am/ / gzhan yang lus las gang zhig byung ba yis/ /go med sa rnams kyis ni myur nyid du/ /'gro ba rnams kyi lus ni nyams par byed/ /gang zhig stobs can yang ni la la dag /mgo mjug tu yang mes mtshan med pa dang / /yud tsam gyis ni 'chi ba de yis 'dzin/ /des ni 'gro ba 'chi bar the tshom med//'dir ni mang du smras pa ci zhig dgos/ /des na snying po dang du blang bar bgyi/ /sngags dang sman dang sbyor ba gang yin pa/ /ji srid dbugs rgyu'i bar du bya ba yin/ /dkyil 'khor can gyi rang bzhin no// //gang zhig dran pa'i dug gis phye ba na/ /bram ze yin par gyur na de ni dkar//dmar po rgyal rigs ser po rje'u rigs yin/ /dmangs rigs nag po 'di de rnams la'o/ /gang zhig bya rog rkang 'dra'i mdud pa dang / /phye na ri mo 'khyog po snang ba la/ /mi mnyam thig les rnam par spras pa ni/ /nges par nag po brtsegs pa dag dang mtshungs//gzhan du bcud kyis len ni bsgrub pa la/ /bram ze 'am ni de bzhin rgyal rigs kyis/ /rje'u rigs kyi ni mdze nad gzhom pa la/ /gsod pa la ni dmangs rigs rung bar bya/ /'dren pa'i mtshan nyid do/ /smad 'tshong sems kyis dor thabs kyis sems bzhin//bdag rgyun mi 'chad rnal 'byor yang dag 'grub/ /mkhas pas de bzhin rlung gi yon tan gyis/ /dus ni nges par shes pa kho na yin/ /srog chags rnams ni gang gis 'tsho ba dang / /khyad can gang zhig nyams pas srog 'gro'o/ /don dam zhing brtson de la sems dang ni//bdag dang mchog dang de nyid du ni 'dod/ /'jug pa'i rang bzhin srog ni kha ba yi/ /'od la brten pas gsal por skyed par byed/ /bdag dang skyes bu'i rang bzhin de nyid ni/ /nyi ma'i zhing la brten na sdud par byed/ /snying stobs rdul dang mun par babs pa na//dug brgyal dge dang the tshom mi dge yi/ /ston par byed de rlung gi dbye ba dag/ /'jug dang gnas dang 'byung ba nyid na'o/ /gtso bor chos sems pa na snying stobs te/ /yul la chags na de bzhin rdul la srog /rmongs pa la zhen mun pas 'gog pa yis/ / gsal por cha ni shes par gyur pa yin/ /'byung ba na ni 'byung ba kho na ste/ /'jug pa na ni 'jug pa ston par byed/ /rang gi gnyug ma'i lus la de bzhin du/ /kun du grong khyer gzhan la'ang de bzhin no/ /zla ba dang ni nyi ma'i zhing du rlung / /rgyu ba'i phyogs su pho nya gnas na ni/ /dug gis brgyal ba de ni 'tsho bar 'gyur//de bzhin stong pa'i khyim la 'chi bar 'gyur/ /nyi ma'i zhing la rlung ni gnas pa na/ /gsal por pho nyas thad kar bltas pa dang / /skyes bu rgyab nas 'dug ste yin na ni/ /nges par zla ba'i khyim la bzang por gzung / /dug zhir 'gro dang bya ba gang la yang //zla ba'i srog gi zas 'khrig 'thab mo la/ /nyi ma'i srog ni mdzes so bi su la/ /bab na rdul gyis char ni gzung bar bya/ /grub pa gzhan dag gsungs pa gnyis ka yang / /zhing du srog gi rlung ni legs par gnas/ /dbye ba rnam pa bzhir ni yod pa la/ /de la sems can ngo mtshar yod pa la//khyab dang steng 'og dbus su rlung dang ni/ /yon tan zhi dang lha yi bdag po na/ /don med 'khyam dang 'thab dang 'chi ba ni/ /dri khur de yis de rnams byed pa yin/ /skom dang bkres dang skyo ba dag dang ni/ /'dod pa'i dgos pa nyams pa rtse gsum gyi/ / 'gro ba rnams la rgyal ba'i dge bskyed pa/ /mi 'chi med na de byed yin ma yin/ /gzhan don byed na dka' ba med par ni/ /bder gnas bde skyed yid ni tshim par byed/ /dri med dri zhim la ni mngon 'dod bzhin/ /gzugs bzang lha yi bdag po de yis byed/ /yi dwags mi dang rig 'dzin sgo dang ni//gnod sbyin sgo gang lag pa gnyis kyis sdom/ /don dam thig le gang yin de dag ni/ /zla cha rtse sprod dbus gnas mtshon par byed/ /nag dang li khri dung dang gser sbyangs mdog/ /don gang yin pa de ni thob par 'gyur/ /gang dag brjod pas dri khur rab dbye las/ /mnyan pa de dag rab tu thob par byed//mig dang kha sbyor ji lta bzhin du smra/ /dbugs 'jug 'byung ba kun nas ma nyams na/ /snying stobs la ni bab pa'i mtshan nyid de/ /rnam 'gyur med pas 'tsho bar 'gyur ba yin/ /mig gi sbubs ni cung zad phye ba dang / /rma can cung zad so yi phreng ba rnams//rmi lam bzhin du dug gi reg pa yis/ /g.yengs pas 'gags pa de ni rdul la yin/ /rma can gyi ni kha gdangs mig kyang bgrad/ /gsus pa 'jigs su rung ba sbos pa dang / /sen mo so dang mig rnams mdog 'gyur ba/ /gsar po ra ti mi yi mdog gi nyal/ /gang dag la ni lag pas drangs tsam gyis//rtsa nas bud do mgo la skyes pa'i dgra/ /'byung po'i pha ni gang yin de song la/ /de la the tshom yang ni dgos sam ci/ /'thungs pa de yi mod la ldog byed de/ /sman dang chu ni ming dag gang yin la/ /srog de'i mdun du rgyug par byed pa ste/ / g.yog 'khor gyi ni skyes bu ji bzhin no/ /so rtsa'i bdud rtsi zhim po ma yin dang / /rna ba'i sgra med mig gi glog kyang med/ /skyes bu gang gi spyi bo'i du ba ni/ /mi mthong ba ni de nas bskyod pa yin/ /nyin mtshan mtshams kyi rtags ni go bya ba/ /tshis por byas nas bor ba de yi ni/ / dkar nag dang ni gser gyi mdog can te/ /rman can gyi ni zla dang nyi mig go/ /zla dang nyi ma'i mig gi snying por ni/ /go bu'i gzugs brnyan snang bar mi 'gyur zhing / /so rtsa'i bdud rtsi dag ni mi 'dzag na/ /phung po'i zhing las rlung de bskyod pa yin/ /sna ni rang gi gnas nas g.yogs pa dang //mig ni mchi mas dkrugs dang shes pa g.yengs/ /kha yi rlung ni chu la bab pa dang / /sna skad du ni smra ba gang yin pa'o/ /rlung gi yon tan gyi rab tu dbye ba'o/ /lus kyi cha ni gang la rma mthong ba/ /de 'dra de ru 'pho bar byed pa ste/ /mi bzad dus kyi dbang du byas pa yin//rna ba'i rgyab tu ri mo dma' ba snang / /rmas pa'i sa ru sbal rgyab ltar mtho yis/ /dug gis zin pa de ni mi 'tsho'o/ /khrag ni sna tshogs mdog tu 'dzag byed cing / /de ni bya rog rkang 'dra'i gzugs su snang / /mgrin pa 'phongs tshos gsang ba dang ni gnad//mig dang rna ba lag sor rnams kyi rtse/ /lte ba bshang lam phrag pa rked par ni/ /zin pa bsod nams kyis ni 'tsho ba yin/ /rma'i mtshan nyid do/ /gang gi khyim gyi tha snyad ma he dang / /bong bu dang ni rnga mo zhon pa yi/ /pho nya ltas ngan yin zhes su zhig smra/ /su la'ang de yis ltas ngan bskyed ma yin//ltas ngan bden par brjod pa 'di dag ste/ /yun rings shugs ni 'byin par byed pa dang / /de bzhin du ni rdul dag 'byung ba dang / /pho nya rigs gzhan dag ni yin pa dag /phal cher bsngags pa ma yin kho na ste/ /yan lag nyams dang thod pa can gyi gzugs//gos nag ngur smrig gyon pa nye bar na/ /pho nya'i mgo la mar nag byugs pa'am/ /yin na rdul gyi skabs la babs pa yin/ /rkang pa g.yas brkyang pa na 'tsho ba ste/ /phal cher bud med la ni mtshon pa'o/ /rkang pa g.yon pa brkyang bas skyes pa dag/ /srog ni 'gro ba yin par mtshon pa yin//rjes kyi dbyangs med de dang sbyar ba'am/ /yi ge phan tshun sbyar dang dang po ka/ /dris tshe nyon mongs tshig ni brjod pa na/ /rma can de ni the tshom med par 'chi/ /nyi mas rang gi gnas zhig bsregs nas ni/ /'od zer rnon pos bsreg bzhin pa yis gnas//de bzhin mdun na mo la dud par 'thul/ /ltag ma rnams ni dge ba'i rnam pa yin/ /dgos pa la ni 'gro ched nyams pa dang / /nyams bzhin pa dang nyams par 'gyur ba yi/ /phyogs gsum ma yin phyogs gzhan rnams su 'grub/ /sbrid pa bya rog kA rA yi dang ce spyang gnyis//zangs dung la sogs sgra yi dus dang 'dzom pa na/ /nyon mongs srog ni 'gro tshe phyogs nas sgrogs/ /dri khur rjes 'brang rtog mkhas pho nya yi/ /gnyis ni bzang ngan dge dang mi dge dag /dug 'joms the tshom nyon mongs 'gro ba yi/ /bden pa 'di ni nges par mkhyen pa yin//pho nya'i mtshan nyid do/ /ma mo'i khyim mam pad+ma can gyi mtsho/ /shing 'dzeg phug pa grog mkhar dag nas sam/ /khang rul dur khrod kyi ni lto 'phye rnams/ /chu'am bzhi mdo yi ni gdug pa can/ /drag po'i gza' la lto 'phye'i dug gis ni/ /'dzin na bzhi'am bcu bzhi yin na 'jig//de bzhin cha ni rab nyams gnam stong dang / /tshes brgyad la ni babs par gyur na'o/ /karti ka dang mar+g+ha a tra dang / /bA ra Ni dang mU la bi sA kha/ /sle sha 'phur gsum gal te tshes dang gza'/ /rgyu skar la zin nges par brlag par 'gyur/ /bad mkhris rlung ni gtso bo mi dang ni//lto 'phye'i khams ni 'dra bar gyur pa na/ /de ltar shes na chos mi mthun pa dang / /chos mthun pa yi dka' ba med la'ang yod/ /gnas dang tshes grangs dang gza' dang rgyu skar dang chos mthun pa dang mi mthun pa'o/ /nyin mtshan thun phyed dag la klu rnams ni/ /gza' yi dbang gyur dag ni longs spyod de//nyin mo gang la de yi dus nyid de/ /mtshan mo sgo ni rnam pa gzhan du 'gyur/ /'byung po phyogs dus me dang ri bo dang / /dus dang thar pa nyin mo'i dus su bsgreng / /ro dus mig dang thub pa dang ni mda'/ /me dang zla ba mtshan mo dag tu shes/ /spen pa'i dus phyed snga ma bla ma yi//dang po 'das par dgos pa'i sa yin te/ /nyin mtshan 'pho ba'i mtshams ni gang yin pa/ /bcu drug po de rigs ldan dus yin no/ /gnyug ma'i lus la lta na nyi zla ste/ /lag pa rna ba la reg sa skyes yin/ /sna la lag pas reg na gza' lag go/ /mgrin pa la reg lha'i bla ma'o//dbugs ni drug tu 'byin pa bsangs/ /dgod pa na yang sben pa ru ni shes/ /sa la stan sgra gcan nyid yin no/ /dus dang dgos pa'i dbye ba dang rags pa dang stong pa ste/ dug zin gyi mtshon byed do/ /nyi zla sa sras gza' lag phur bu dang / /ba ba sangs dang sben pas bskyed pa na//tshogs mig rgya mtsho ro dang bcu drug dang / /sum cu gnyis dang lnga bcu tham pa ste/ /'gro bas rang dbang can gyi lto 'phye'o/ /the tshom med pa de yang shes par bya/ /dgos pa dang ni bcas pa'i dug dag kyang / /stong dang stong pa ma yin dbus su yang / /srog rdul snying gi dbus su dal ba yis/ rnam par gsal ba yis ni legs gnas na/ /gnas na gnas pas de ma thag tu ni/ /yun ring brgyal ba la yang mtshon par bya/ /gnyis pa'i phyogs rtsa bstan pa'o/ /spyi bo dag ni nag po rlung yin te/ /mgrin pa lte bar me yi 'bar bas dkrigs/ /de nas dbang chen sor mo mkha' lding gi/ / pus mo nas brtsams chu ni dkar po yin/ /brgya byin gyis ni bdud rtsi phrogs nas kyang / /rdo rje'i mtshon chas dgra med dga' ba yis/ /mkha' lding dgra ni reng par 'gyur ba dang / /yid 'phrog thob pa de ni rgyal gyur cig/ /gar gyi dpal brjid gshog pas bskyod pa yi/ /rlung gi rigs kyi ri rnams bskyod byed pa//mkha' lding du ni yongs su bsgom bya ste/ /ma lus dug rnams zhi don gnyer bas so/ /rlung du bstan pas sems ni phur bus 'debs/ /'bar ba yis ni spel bar byed pa yin/ /brgya byin gyis ni gsal por rengs par byed/ /chu zil 'bab pas dug ni brlag par byed/ / mkha' lding bye brag re re yis kyang ni/ /sel la nges par bsgom pa dang ldan na/ /bi med nga yi sa bzhin gnas su na/ /ma lus dug ni tshar gcod byed pa yin/ /a sti bi ShaM brjod na dug yod de/ /na a sti bi ShaM sa stengs kun na med/ /bsod nams yang dag bsags la mchog gi ni/ /de nyid 'di de skye ba kho nar 'gyur//lta byed mig gsum 'bar bas bstan pa yi/ /dug mchog thal ba ru ni brlag nas kyang / /la la dag la gal te 'di skad du/ /mgrin sngon khyed brjod byin par gyur na ni/ /skyes bu de yi lus la ji srid ni/ /'tsho ba'i bar du dug ni mi 'pho ste/ /ri bong mgo la rwa ni skye ba dag//nam du yang ni srid par 'gyur ram ci/ /gal te 'phrog byed kha sna bkag go myur bar ni/ /dga' ba'i mthar zhugs srog lung 'gro bzhin pa/ /re zhig gsal bar 'gul bar gyur na ni/ /rmas pa de ni 'tsho bar shes par bya/ /'byung ba'i rlung ni nang du rngubs nas su//'phrog byed kyi ni kha drung ji bzhin lta/ /skye bo'i dgra ni dben pa'i gnas su ni/ /sbas pa'i yul la yang ni shes par bya/ /the tshom mam ni dge dang mi dge ba/ /'dri mi 'dra lhag dug gis brgyal ba la/ /phyis na pho nya'i gos ni phrogs byed ni/ / khru yis bcal ba la ni snang bar 'gyur/ /mkha' lding gshog tshogs gar dang ldan pa yis/ /klu gzugs de la rnam par gnon pa na/ /de ltar gang gson skad cig tsam gyis ni/ /gsal por smra ba dang ni bskyod par 'gyur/ /kha dang sna rlung rgyu ba bkag nas ni/ /skad cig tsam gyis de ni khyad par du/ / gdengs ka can gyis bzung nas brgyal ba ni/ /nges pa nyid du tshor ba dang bcas 'gyur/ /dug 'joms byed pa pad+ma rgyas par yang / /srog gi rlung gis kyang ni byed pa ste/ /yang dag 'gag pa'i 'gro ba'i snying po ni/ /slob dpon gyis ni sgom par byed pa yin/ /dug gi skyon ni med pa kho nar yang / / gang dag gis ni rgyu mtshan 'ga' zhig gis/ /brgyal bar byas la mkhas pas sen mtshams su/ /sen mo yis ni song bar byed pa yin/ /dug zin gyis ni bsod nams sbyor ba yi/ /gang la thig le dkar po byung gyur na/ /de la gang dang gang gis brjod byas pa/ /de dang de ni sngags su 'gyur ba yin//lus kyi yan lag dag ni dkar po la/ /gang gi gnas der me ni 'bar ba dag /drag po yi ni rlung gis bskyod pa na/ /rmas pa de ma thag tu 'gyel bar 'gyur/ /lhag ma nor bu'i gdengs ka'i 'dab ma'i rtsar/ /sred med bu bzhin rma can bde bar nyal/ / 'o ma'i mtsho yi bdud rtsi dkar po yis/ /bsgos pas dug ni 'joms par 'gyur ba yin/ /gang gi lus ni dkar por sgyur byed pa'i/ /thig le dkar po dag ni lta byed na/ /stong pa de yi dug ni stong par ni/ /bsgom pas kyang ni zhi bar shes par bya/ /'phrog byed mig gi me ni 'bar ba dag /rang gis bskyod pa gang gi snying la ni//rab tu 'bar bas rma ni rnying pa la/ /yud tsam gyis ni de la rgyas par bskyed/ /rigs ldan nor gyis 'byor dang yon tan can/ /dka' thub snying stobs can dang rgan po dang / /bud med mngal ni rab tu rgyas pa dang / /bram ze dang ni byis la bskyed mi bya/ /mkha' lding ser pos dug zin dag la ni//thig le yis ni gal te mnan pa dang / /bum pa can gyi nyin zhag mang por yang / /ri rab kyis ni mnan bzhin g.yo ba med/ /dug gis zin pa nor rgyas dkar po yis/ /mjug mas mgul bar bcings te mi lhung ba/ /de yi mgo las gal te bzung na ni//shang shang nam mkha' la ni 'gro na yang / /zla ba'i zhing du son pa'i nus pa ni/ /snying ga'i pad+ma phug nas pad skud 'dra'i/ /'dzag pa gang la zag med bltas nas ni/ /de yi lus la dug ni gang la ste/ /gang phyir ga ma'i lus las nus pa ni/ / 'dzags pa yis ni rgyang ring gnas pa yis/ /ma lus dug kyang phig nas nges par ni/ /zhi bar byed pa kho na yin pa'o/ /sbyor ba'o// //'dab ma dkar po rab rgyas rab 'dzag pa'i/ /kha ba'i 'od 'dra chu shel nor bu'i gzugs/ /mi bzad dug kyang dang po'i dbyangs kyis ni//bsgoms pas yang dang yang du 'joms par byed pa yin/ /lag pa g.yon du dbang phyug spyi bo'i rgyan/ /dbus gnas drug pa la ni thig les brgyan/ /dbyangs ni dug rnams sdud par byed pa ste/ /'phrog byed dkar po'i khu tshur bcangs pas so/ /sa 'og spyi bor zla ba'i dum bu ni//thig le dang bcas skra ris spyi nag stong / /u yig gi ni dbyangs la zhon pa ste/ /'phrog byed dkar po dug mthar byed pa yin/ /spong ba dang ni gos dag 'phrog pa dang / /dug bcings cho lo ston mo sa yi 'og /ji ltar nges par bsgoms pas byed pa na/ /de ltar dgod pa yang ni shes par gyis//'gro ba dug gis brgyal ba dag la yang / /snying gar yang ni mgo med dkar po ste/ /gzhan dag kyang ni brgyal bar byed pa na/ /drag po'i rlung gis bskyod me 'bar bas so/ /sa 'og gos gnas rlung gis drangs pa na/ /skad cig gis ni phyed tsam gyis kyang ni/ /myur du khros na 'phrog pa de la ni//gting bzhin 'brangs nas 'ded par byed pa yin/ /nyon mongs snying gar chud pa'i mi shigs pas/ /bkug pa'i dug gi gong bu nag po ni/ /kum pa dkar bcas gos ni bcings pa yis/ /nyin zhag mang por yang ni g.yo ba med/ /tshes bzhi sprin nag lha yi bla ma dang //zla nyi pa ba sangs ni chol shing ste/ /rtsis kyi ri mo glog ni 'gyu ba dang / /gang por cho lor skar ma'i tshogs su ste/ /chos skur lag pa dbang phyug bzhin pa'i mig /cho lo mkhan po gnyis skyes mchog gi tshogs/ /dug zin dug las yongs su thar nas ni/ /chol res la ni lag nas yongs su 'dzin//de yis dug gis bzung ba'i skyes bu ni/ /rnam par dag pas skad cig khyad par 'phags/ /bza' ba zos pa'i lhag ma'i dus su ni/ /chu snod bzung nas chu ni ster bar byed/ /gang zhig mthong dang thos dang gang zhig ni/ /nyams su myong ba'ang yul byas spyod pa ni//de kun sems kyis byed do gus par gyis/ /srid pa'i dngos po med pa 'byung ba yis/ /de bzhin du ni na ra yas smras pa/ /nus pa gang gis myur du thar skyed dang / /des ni dug dang 'byung po 'joms byed de/ /zla ba dang ni nyi mar zhugs pa na'o/ /'dus pa'i skye bo kha yi sbubs nas ni//nus pa ba mo lta bu bab pa yis/ /dgod pa'i sgra yis dug dag myur du ni/ /'joms par byed de bsgoms pa byas pas so/ /dug zin smra bas gal te yod pa na/ /rgyang ring na yang dug ni myur du sdud/ /snying gar ngang pa dkar po bsgom pa ni/ /bdud rtsi'i snying pos yongs su rgyas pa'o//brtan pa'i dug ni khur bu stong phrag kyang / /rlung gis bsdus pas dug med par ni byed/ /ngang pa'i bdud rtsi 'bab par gyur pa ni/ /zla ba'i zhing nas byung bas der 'gyur ro/ /lto ba spyi bo spyi gtsug go cha ni/ /mig dang lag pa lag sor sgra ldan pas//re re bor ba'i ring po tsheg drag kyang / /drug po yang ni blang bar bya ba yin/ /nyi ma'i grangs kyi dbyangs ni sbyar bya ste/ /sa mchog srid pa dmigs pa med pas 'god/ /de ni drag po dang mnyam tshig btsan zhing / /dug 'joms mi byed pa ni ma yin no/ /sa mchog ra la bskyon pa gug rings dang / zla phyed thig le yis ni mdzes par byas/ /mar gyi nying khus mdzes pa bsgoms nas ni/ /go na sa yi dug ni sel bar byed/ /gang zhig 'bum phrag bdun ni bzlas pa yis/ /bi Na ya yi bu bzhin sbrul dug bzod/ /mi bzlog snyan dngags mkhan gyi rgyal por ni/ /dbyangs can gyi ni nus pa bsgom pa na'o//de nyid tsheg drag dang bcas 'char ka yi/ /'od kyis dkrigs pa'i skyes bu gang zhig gis/ /sgom par byed na dug dang mkha' 'gro ma/ /gdengs ka can yang khro zhing 'khrugs par byed/ /snying la bsgoms pa yis ni 'gugs pa ste/ /dpral ba'i mthil du gnas pa dbang du sdud//yan lag mchog la btsud pas chang gi rgyun/ /dzu ba ti la 'bab pa kho nar 'gyur/ /kha yi sbubs su 'bar bas dkrigs pa yi/ /sum sdom rab tu 'bar bas dug brgyal ba/ /'chi ba'am ni 'tsho ba yang ni rung / /bde bar gsal po nyid du de yis smra/ /de nyid d+ha yi nang du chud gyur cing //pad+ma'i lte bar gnas pa bsgoms na ni/ /bdud rtsi'i zil pa dal 'bab tsheg drag bcas/ /dug 'joms pa yi sa bon nyid yin no/ /de nyid me yi nang du bzhag nas ni/ /nyi ma 'char ka'i 'od 'dras mngon gsal dkrigs/ /nges par dug sel rims dang 'byung po dang / /dug gi khyad par yang ni sel bar byed//ka Sha sbyar ba dkar po thig ler bcas/ /ri dwags mtshan ma'i dbus su chud pa ni/ /snying la chud par byas pas dug rnams ni/ /myur du 'joms par byed pa kho na yin/ /dbyangs yig U ring yang dag ldan pa yi/ /yi ge de nyid mi yi seng ge'i steng / /'jigs dang sgra dang sdig dang dug dang ni//'byung po nad dang dbul po brlag par byed/ /yi ge hUM phaT me yi rang bzhin can/ /'bar ba'i phreng bas dkrigs pas gsal byas pa/ /gang gis mgrin par bris pa yin na ni/ /de yis gsal por don grub byed par 'gyur/ /la yig mchog ni zlum po'i thig ler bcas/ / gos gnas bdud rtsi dkar po rgyun 'dzag pa/ /dug gis zin la byab tu bcug na ni/ /nges par dug ni 'joms par byed pa yin/ /dri khur nag po'i dbus chud tha yig ni/ /sngags 'dis dug zin la ni byin brlabs na/ /bskyod dang smra dang gzer ba'i sgra dang ni/ /langs nas kun du lta bar the tshom med//gsum pa nye bar bstan pa'o// //dz+haM kA ri Ni ku ru kul+le dang / /be ruN+Na dang gser ri sa bon dag /gang du dug gis brgyal la byed pa yi/ /dbye ba der ni legs par mnyan par gyis/ /sad+do bA ma g+ho ra de skyes bu/ /lnga pa de ru yA ni dbang ldan du/ /dkar ser dmar ljang nam mkha' sor mor gnas//rgan lcugs gung mo gsum la dz+haM kA ri/ /yi ge rnam par spras pa dag yin no/ /bzhi pa lha ni Ni yig ces bya ba/ /ming med la ni gnas pa nyid yin no/ /mkhar gnas d+ha dang wa sbyar thig ler bcas/ /dug zin ming yig dang por bar du ste/ /rgan po'i sngags dang sbyar ba dag gis ni//dbang ldan de ni mnyes na ma lus pa'i/ /dug ni de yi mod la zhi bar 'gyur/ /de yi skyes bu dang ni sbyar ba na/ /'byung po'i gnod pa yod na mngon gsal 'gyur/ /'jigs pa'i g+ho ri dang ni sbyar ba na/ /dgra sbrul dman pa yang ni mod la bskyod/ /g.yon pa mnan pas rengs pa phongs pa dang //dgra dang ngag dang dug dang dpung dag go/ /lug g.yon zla ba'i dbus gnas tha yig chud/ /dz+haM mnyes dkar po 'dzag par byas nas ni/ /'od dang cha kun rdzogs pa de yis ni/ /dug dang lu ba rims 'bras mkha' 'gro ma/ /gdon dang 'byung po'i gnod dang tsha ba dang / nges par zhi byed yongs su bzlas pa'i chus/ /sngags pas 'gro ba rnams la de byed do/ /kha la dz+haM yig lkog mar kA yin no/ /lte bar ri yig gsang ni rkang gnyis d+h+waM/ /mda' dang nyungs kar rma bya'i sgro sogs kyis/ /'byung po la sogs gnod pa 'joms byed de/ /dung sogs sgra la'ang lan bdun bzlas pas so//'bum bzlas sbyin sreg khri yis mchod gtang dang / /tsan tis oM khi la la ku yin te/ /ru ni lkog mar ku ni nu brag tu/ /l+le ni gsang bar rkang gnyis swA hA'o/ /stong bzlas skud par btab pa rna bar btags/ /de ni nags su sbrul gyis mi 'jigs so/ /sa gar sogs bris khyim gzhag de mi 'ong //bi ri ma hA se na tsan ra dang / /tsan tis 'bum bdun re res dbang kun 'grub/ /oM su war+Na re khe kuk+ku ta bi kri ha rU pi Ni swA hA/ lag mthil pad dkar 'dab brgyad dbus su ni/ /yi ge 'dren pa gzhan la gnyis gnyis brtsegs/ / ba mo 'bab pas sman ma la bsangs na/ /ras bal 'dab ma rlung gis bskyod bzhin ldang / /o e ho mA ye/ /b+he ruN+De A I U bI dze/ /b+ha ri ya ka raN+De/ tat+ta man+ta A g+ho She/ hUM ka re bi Sha na se thA ba ra dzaM ga ma a ga dza kit+ta ma hA ra ta ra hUM phaT swA hA// //oM pak+ShiM swA hA/ Shi sid+d+ha nA thA di bA ka ri adz+nyA shrI shrIskaN+Tha shrI nI la kaN+Tha/ ShI bi ShaM kha la/ /ri mi dzI mi haM sa/ k+Shi pi k+Shi pi haM sa hUM haM sa/ dzaM haM sa nAt+ti bi Shi/ tri b+ha ba ne/ sa ya le/ 'brum bu gnyis dang dug zin la sogs pa/ /gso dang sngar gsungs bla ma'i man ngag bzhin/ / sngags chab ji tsam 'gro ba'i lam de na/ /dug sel byed par yid la gdon mi za/ /pad steng bum bca' sngags bdun bzlas klu mchod/ /oM pak+ShiM swA hA/ /zhes bya ba dang rig pa'i rgyal mo drug /sgra ris zla dkyil lag mthil bsam pas kyang / /dug sel bya rgod bshad pa mthong ba dang //skye bo'i skyid sdug bde ba'i sgra yis kyang / /tsha gsum po la'i sa bon sbrang rtsir sbyar/ /snar blugs lus skyes sogs kyi nad 'joms byed/ /tsher can shing sha'i rnga la ni/ /kha gnyis pags pas rnga g.yogs byas/ /sbrul dgra'i rkang gis brdungs nas ni/ / ji srid sgras khyab de dug 'joms/ /pha ni dza dang su daR+Sha na lus btags kyang / /She te pu nar na ba'i khu blud pas/ /ma ning ka ko ti yi tsa/ /ba mar dang 'thungs dug gsum sel/ /kan+ta shir sha'i rtsa shun 'bras bkrus chur/ /sbyar ba a sha ra yi nya dag la/ /'thungs na lo gcig dug ni thub pa yin//shu dag shing kun nim pa'i khu ba dag /snar blugs dug gis skra rtse slebs kyang sel/ /ka rany+dza yi tsher can nim+pa'i 'dab/ /mar sbrang yungs kar go nas yang sel/ /kha gnyis lus che ne'u le yi mig/ /sbrul dgra'i mkhris pa'i cha mnyam pa/ / khyim du gzhag pas kyang ni sbrul mgo 'gegs/ shrI bA sa/ bi rang+ga/ u shi ra/ sardza ra sa/ lAk+Sha b+ha lA lA ta ka/ kud tha/ tri pha la/ ardzu na/ ku su ma/ 'di dag cha mnyam du ba yis/ /lus skyes tse ri sbrang ma sogs/ /sbrul yang 'bros zhes klu sgrub gsung / / me tog grong khyer zhes bya ba/ /brgya byin pho brang dang mnyam par/ /zla cha zhes bya'i bram ze me'i/ /lo rgyus kyang ni lnga pa yin/ /dpal mkha' lding grub pa'i bstan bcos bram ze shang kus mdzad pa rdzogs so/ / gu Na sA ga ra/ 'dir ni bla ma dam pa'i rjes 'brangs te/ /dpal ldan shang ku bdag gis mdor bsdus bris/ /dge ba de yis srid gsum ma lus pa/ /dug med bdud rtsi'i go 'phang bsten par shog/ /rgya gar gyi mkhan po dpal bram ze a ba d+hU tI chen po dpe med kyi zhal sngar//lo tsA ba ban+de pradz+nyA kIrtis bsgyur ba'o// //dbang phyug chen pos mkha' lding du sprul nas/ mkha' lding rgya mtsho ba 'bum phrag bzhi bshad/ de bram ze sang kus dbang bskur gyi tshe klu bdud kyi dug yod pa la/'jog po'i dug kham phor du mar dang sbrang rtsi byin pa ma yog /bdun po kun gyi bu mo nu mo bkug nas chung mar byas/ 'jog po'i bu mo bkug pas mos phu byas dug gis zin nas shi la thug pas/ yul mi kun gyis khyed grongs na nged kyi dug sus gso byas pas/mchod sdong tshugs shig zer nas/ nam mkha' lding gi mchod sdong rdo rings steng du btsugs/ steng nas rdo'i gdugs phub pa cig byas/ khos 'khyud nas sngags bzlas te/ kun dug zhi bar byed do//de lta bu'i shang kus mdzad do// //dus dang dus ma yin pa la lnga ste/ rma'i mtshan nyid dang / pho nya'i mtshan nyid dang / gnas dang / tshes grangs dang / gza' dang / rgyu skar dang / chos mthun pa dang / mi mthun pa dang /dus dang / dgos pa'i dbye ba dang / rags pa dang / stong pa ste dug zin gyi mtshan nyid dang / dus ma yin par mi 'chi ba bstan pa'o/ /nying dgos la gsum/ phrin las thams cad kyi snod du 'gyur ba'i dgos pa dang / sems kyi srog 'dzin pa dang /phyogs thams cad du grags pas khyab pa'o// //mchod brjod dang / dgos 'brel dang / gzhung bshad pa gsum mo/ /gzhung la gnyis/ lus rnam gzhag dang / yan lag rgyas bshad do//oM tsa kra ra hi tsa kra b+hi da ni g+ha Na ti kA ri haM/ sa gzhi lci bas maN+Dal gru bzhi byug /dung dang bu tsha bkrus la thub pa dang kha byang du bstan/ rang yang kha byang du bltas la/ dung la gu gul bdug /g.yas g.yon gang du 'khor 'dod pa de ngos su dung bskor/