CLOSE WINDOW

D3136
བོད་ཡིག

@[ ]##/ /rgya gar skad du/ d+hA ra NI sarba maN+Da la bi d+hi nA ma/ bod skad du/ gzungs thams cad kyi dkyil 'khor gyi cho ga zhes bya ba/ sgo drug zhi khro'i lha tshogs la/ /sgo gsum dang bas phyag 'tshal lo/ /rgyal po tsany+tsa 'khor bcas kyis/ /gzungs rnams du mar brjod byas kyang / / nus pa rdzogs par ma thon te/ /de nus rdzogs par gdon pa'i phyir/ /rang lha yi ni bsten bzhin du/ /de cho ga nga yis bstan te bri/ /rgyal po la sogs pho brang du/ /sna tshogs gzungs brjod mjug thogs sam/ /yang na gzungs mchog sgrub dus sam/ /dbang bskur ba yi dus dag tu/ /dkyil 'khor chen po bsham par bya//gzungs sgrub cho ga byed 'gyur na/ /cho ga byed pa'i dus dang ni/ /rang nyid stan la 'dug sogs par/ /kun khyab gzungs chog nang na gsal/ /dbang bskur dus su rim lnga bzhin/ /du ma gzungs kyi mjug tu ni/ /de yi bya ba'i cho ga spyad/ /dkyil 'khor bri ba'i snga gong du//gzungs rnams ma lus thams cad kyi/ /sngags btus yungs kar la btab nas/ /bum pa rnams su blugs par bya/ /bsnyen pa skyel ba'i slob dpon gyis/ /de nas dkyil 'khor bri bar bya/ /thig dang rdul tshon rigs lnga bzhin/ /de nas rdul tshon dgye bar bya//dbus su 'khor lo rtsibs brgyad bri/ /'khor lo'i lte ba mthing ga'o/ /rtsibs rnams ser zhing mu khyud dkar/ /yang na 'dab brgyad ci mdzes so/ /'dab rtsibs lte ba rnams la ni/ /pad+ma 'dab brgyad ci mdzes bris/ /de steng gtso bo'i mdog dang bstun/ / 'khor lo pad+ma'i phyi nyid du/ /bcu drug 'dab ldan pad+ma ni/ /ci mdzes ba ru bri bar bya/ /pad+ma de yi phyi nyid du/ /sum cu rtsa gnyis rtsibs ldan pa/ /mtshon cha'i 'khor lo bri bar bya/ /lte ba mthing ga'i rtsibs rnams ni/ /ci mdzes par ni bri bar bya/ /rtsibs mchan rin chen 'bar ba bri/ / mu khyud dkar po de phyi khyams/ /sgo sogs rim pa lnga pa bzhin/ /de yi phyi yi rim pa ni/ /'khor ba'i mu khyud dgra bo bri/ /de yi phyi ni khyams su gnas/ /sgo ni gong dang mthun pa ste/ /sgo de yi ni phyi rol du/ /drug cu rtsa bzhi 'dab ldan ni/ /tshon sna lnga yis sdu gur bri/ /rdo rje me ri de bzhin bri//de nas lha ni dgod bya ba/ /sgrub pa'i thabs bzhin dgod par bya/ /dkyil 'khor gyi ni khyams rnams su/ /lha ming gsal ba'i gzungs rnams bri/ /snying po bris te khyams su gzug/ /dkyil 'khor rgyan bkod mchod rten ni/ /bshams te rang nyid stan la 'dug /rnal 'byor yan lag bskyed ldan pas//ye shes lha tshogs spyan drangs te/ /rang bzhin chos sku dbyer med kyang / /'gro ba'i don phyir yum gyi sku/ /yum chen pha rol phyin ma dang / /ye shes dbang bskur ldan pa dang / /rdo rje dbyings kyi dbang phyug ma/ /rdo rje mi pham so sor 'brang //sdig pa spong ba gdugs dkar mo/ /bdud 'joms sgo mtha' sgrub pa ste/ /de ltar 'gro mgon khyed rnams kyang / /rgyal po'i 'khor 'bangs bcas pa yi/ /lus srog bar chad bsal ba ltar/ /dpal dang bsod nams spel ba dang / /las ngan sdig pa sbyang ba'i phyir/ /sprul pa'i pho brang dam pa 'dir//mchod cing spyan 'dren gshegs su gsol/ /pad+ma'i gdan la bzhugs su gsol/ /de bzhin sbrel bar bya ba ni/ /gser 'od shAkya seng ge dang / /spyan ras gzigs dang byams pa dang / /nam mkha'i snying dang kun du bzang / /lag na rdo rje 'jam pa'i dpal//sgrib pa sel dang sa'i snying po/ /rig pa'i rgyal mo rma bya che/ /stong chen so sor 'brang ma dang / /bsil ba'i tshal dang gsang sngags 'dzin/ /yul 'khor srung dang 'phags skyes po/ /mig mi bzang dang rnam thos sras/ /mgon po bde gshegs tshe dpag med/ /bzang po mchog dang gzi brjid dpal//zla ba snyan pa dri med dang / /bzang po'i tog dang bkod pa che/ /spyan ras gzigs dang mthu chen thob/ /chos rnams thams cad yum dang ni/ /gdugs dkar rnam rgyal gtsug gi nor/ /'od zer can dang par+Na dang / /ri khrod lo gyon dpal lung bstan//bde gshegs tsan+dan yal ga dang / /blo yangs 'brug sgra sgrib pa sel/ /yon tan 'byung gnas 'od dpag med/ /kun nas spos mchog rgyal mtshan rtsal/ /nga rgyal gnon dang rgya mtsho dbyangs/ /bde bar gshegs pa sgron ma mchog /sems dpa' 'od chen 'od dpag med//mi pham pa dang 'jam dpal dang / /dri ma med dang rdo rje snying / /rgyal ba can dang mtshan mo bzang / /mkha' lding gser 'dab rdo rje mchu/ /sbas pa rdo rje kun 'bar glog /'bar ba gzi brjid gnam lcags mchu/ /khyab 'jug tshangs pa dbang phyug dang / /drang srong ri byi chen po ste/ / mgon po spyan ras gzigs yum dang / /spyan ras gzigs dbang bcu gcig zhal/ /rin chen phreng dang stobs chen dang / /mdangs phyir 'phrog dang gser can dang / /rnam rgyal can dang 'gro lding dang / /stobs can dbyig dang ldan pa ste/ /rnam par gzigs dang thams cad skyob/ /log dad sel dang gser thub dang //'od srungs dang ni mar me mdzad/ /yongs grags dpal dang rin chen zla/ /gser bzangs dri med mya ngan med/ /chos bsgrags rgya mtsho chos rgya mtsho/ /bai DUr 'od kyi rgyal po ste/ /mi 'khrugs pa dang 'od stong 'bar/ /bde bar gshegs pa snang mtha' yas/ / lag na rdo rje rnam 'joms dang / /me ltar rmongs byed be con dang / /bsod nams rgyal mtshan me kha la/ /dpal ldan tshogs kyi bdag po ste/ /rnam rgyal dbyug pa sngon po dang / /gshin rje gshed dang mi g.yo mgon/ /rta mgrin gzhan gyis mi thub dang / /bdud rtsi 'khyil dang khams gsum rgyal//hUM ka ra dang stobs po che/ /rgyal ba khyu mchog 'brog gnas dang / /gangs gnas lngas rtsen nor bzangs dang / /gang ba bzang dang grags bzangs dang / /sa mdzes dang ni phreng mdzes dang / /nag po che dang lha mo nag /rdo rje gtum po rdo rje khro/ /rdo rje pho nya lu gu rgyud/ /rig sngags khro bo rgyal ba can//khro bo bar du gcod sbyong dang / /khro chen 'bar ba mi 'jigs sbyin/ /dzaHhUM baM hoHkun la sbyar/ /sna tshogs gzungs ni brjod pa yis/ /bde bar gshegs pa mtha' dag kyang / /bdag gis mtshan nas ma brjod kyang / /sngon gyi smon lam dbang gis ni/ /rang bzhin gnas pa mi mnga' yang //kun rdzob tsam du gnas pa ston/ /zhing khams pho brang la sogs nas/ /'gro ba'i nyon mongs sbyang ba dang / /bgegs rnams thams cad bzlog pa'i phyir/ /sprul pa'i pho brang dam pa 'dir/ /mchod sbyin spyan 'dren gshegs su gsol/ /lha rnams khyams la bzhugs su gsol/ / bde gshegs mchod dang sgo skyong ba'i/ /sgo bzhi'i lha mo khyed rnams kyang / /spyan 'dren mchod phyir gshegs su gsol/ /pho brang gru bzhir gshegs su gsol/ /sgo bzhi'i nang du gshegs su gsol/ /sna tshogs gzungs nas brjod pa yi/ /gza' dang rgyu skar gnod sbyin dang / /klu la sogs pa'i mthu chen sogs//spyan 'dren mchod kyis gshegs su gsol/ /khor yug le tshe gshegs su gsol/ /'jig rten khams su gshegs su gsol/ /sna tshogs gzungs nas brjod pa yi/ /kha 'bar la sogs snying rje'i tshogs/ /mchod gtor sbyin gyis 'dir shog cig /de nas phyag rgya 'di skad do/ /yum chen pha rol phyin ma dang / /ye shes dbang bskur dpal ldan ma/ /rdo rje dbyings [(]gyi [,]kyi [)]dbang phyug ma/ /rdo rje mi pham so sor 'brang / /sdig pa spong ba gdugs dkar mo/ /bdud 'joms sgo mtha' yas pa ste/ /de lta'i 'gro mgon khyed rnams la/ / rig pa'i slob dpon nga dang ni/ /gzungs 'dzin slob ma rnams kyi ni/ /bar chod bgegs rnams bzlog pa dang / /rnam smin sdig pa sbyong ba'i phyir/ /sgo gsum dang bas phyag 'tshal lo/ /spyan 'dren skabs su smos bzhin du/ /de bzhin kun la bsgre bar bya/ /de nas mchod pa 'di skad do/ /dag pa yi ni yon chab 'di//sna tshogs gzungs kyi lha la 'bul/ /sna tshogs gzungs kyi glegs bam la/ /bklags dang khab tu bzhugs pa dang / /rig pa'i slob dpon nga yis ni/ /sna tshogs gzungs chog byas pa yis/ /mi mthun par chod bzlog pa dang / /rnam smin sdig pa sbyang ba'i phyir/ / thugs rje'i dbang gis bzhes su gsol/ /mchod rdzas gzhan yang de bzhin sbrel/ /de nas bstod pa 'di skad do/ /yum chen pha rol phyin ma dang / /ye shes dbang bskur ldan ma dang / /rdo rje dbyings kyi dbang phyug ma/ /rdo rje mi pham so sor 'brang / /sdig pa spong ba gdugs dkar mo/ /bdud 'joms sgo mtha' sgrub pa ste//gzungs 'chang gzungs sngags bdag nyid can/ /so so rang gi gzungs sngags kyis/ /nus pa so sor 'don mdzad tshe/ /khyod kyi yon tan bskal par ni/ /brjod kyis lang bar mi 'gyur te/ /yon tan cha tsam zur gyis bstod/ /sku mchog khyod la phyag 'tshal bstod/ / de ltar sbrel bar bya ba ni/ /spyan 'dren skabs kyi mtshan smos bzhin/ /bde gshegs bya rgod ri bo yi/ /lho phyogs dge slong stong nyis brgya/ /lnga bcus yongs bskor ma ga d+hA'i/ /ma skyes dgra yis bsnyen bkur tshe/ /sa g.yos sprin 'dus glog byung ste/ /yangs pa'i mi bred sngangs thon skrag /de slad kun tshogs stong chen gsungs//stong chen glegs bam phyag 'tshal bstod/ /bde gshegs mnyan yod rgyal byed tshal/ /bzhugs tshe sa ri klus zin nas/ /sdug bsngal nyen pa kun dgas zhus/ /sangs rgyas gzungs gsung rma bya che/ /rma bya'i glegs bam phyag 'tshal bstod/ /bde gshegs lhun zom rdo khri na//sems dpa' bye ba khrag khrig brgya/ /stong phrag bdun cu rtsa bzhi dang / /nyan thos lta bu dbang phyug bskor/ /sems can kun la snying brtse'i phyir/ /ston pas gsungs pa'i so sor 'brang / /glegs bam so sor 'brang la bstod/ /bde gshegs dur khrod bsil tshal dang //'jigs rung skye bar dge slong ni/ /stong dang nyis brgya lnga bcu dang / /rgyal chen bzhi yi 'khor bzhi po/ /bsrung ba'i slad du yongs zhus pa/ /ston pas gsungs pa bsil ba'i tshal/ /glegs bam bsil ba'i tshal la bstod/ /bde gshegs mnyan yod rgyal byed tshal/ / bzhugs tshe tshangs pa sogs rnams kyis/ /stong gsum srung slad yongs zhus pa/ /cang mi gsung gi tshul gnang ba/ /gsang sngags rjes 'dzin ston pas gsungs/ /de yi glegs bam phyag 'tshal bstod/ /lha mo brgyad gzungs phyag rdor gyis/ /'jam dpal la ni gsungs pa yi//lha mo brgyad gzungs phyag 'tshal bstod/ /bcom ldan rgyal khab bya rgod kyi/ /phung rir dge slong stong bzhugs tshe/ /lag na rdo rjes zhus pa yi/ /kun tshogs rgyal ba can gyi gzungs/ /rgyal ba can gyi glegs bam bstod/ /bcom ldan rin chen khang brtsegs na/ /sems dpa' sum khri lnga stong dang //dge slong lnga brgya nyi khri stong / /bzhugs pa'i tshe na bcom ldan gyis/ /'byung po bskyab phyir gnang ba'i gzungs/ /rdo rje 'chang gis gsungs pa yi/ /me ltar rmongs byed gzungs la bstod/ /bcom ldan rgyal khab 'od ma'i tshal/ /bya ka lan+da ka gnas na//lha bu tsan+dan skyes nas ni/ /dge slong bcom ldan la zhus pa/ /de phyir bcom ldan gsungs pa yi/ /mtshan mo bzang mo'i gzungs la bstod/ /bcom ldan rgyal po'i khab na ni/ /dge slong lnga brgya nyi khri dang / /sems dpa'i lha dang thabs cig ste/ /spyan ras gzigs dang zla 'od dang //tsan+dan gyis ni yan lag gsungs/ /tsan+dan yan lag phyag 'tshal bstod/ /bcom ldan mnyan yod rgyal byed tshal/ /mgon med zas sbyin kun ra na/ /dge slong nyis brgya lnga bcu stong / /bcom ldan kun dga' bo la gsungs/ /gzungs chen mo la phyag 'tshal lo//bcom ldan lhas ma lta bu dang / /lag na rdo rje thabs cig tshe/ /brgya byin zhus te bcom ldan 'das/ /gser can gzungs la phyag 'tshal bstod/ /bcom ldan bya rgod spungs ri la/ /dge slong nyis brgya lnga bcu stong / /sgra gcan zin stong gsungs pa yi/ /be+e con gzungs la phyag 'tshal bstod//bcom ldan grong khyer yangs pa can/ /dge slong lnga brgya sems dpas bskor/ /bcom ldan gnang zhing sems dpa' ni/ /kun du bzang pos gsungs pa yi/ /spyan ras gzigs yum gzungs la bstod/ /bcom ldan rdo rje la zhugs te/ / lag na rdo rjes byin brlabs te/ /rdo rje snying pos gsungs pa ni/ /rnam 'joms gzungs la phyag 'tshal bstod/ /bcom ldan yul 'phags brag phug bzhugs/ /lha dbang tshe yi 'du byed 'jigs/ /bcom ldan de yi don gsungs pa/ /bar du gcod sbyong gzungs la bstod/ /bcom ldan chos dbye dgon pa na//sems dpa' bye ba khrag khrig dang / /'bum phrag du ma thabs cig tshe/ /bcom ldan sems dpa'i 'khor chen la/ /skye bo mang la phan phyir gsungs/ /sangs rgyas snying po'i gzungs la bstod/ /bcom ldan ma ga d+hA yul nas/ /lus 'phags brag phug gshegs bzhugs tshe//lha dbang der phyin lha min dang / /g.yul 'gyed phyir zhus bcom ldan gsungs/ /mi 'jigs sbyin pa'i gzungs la bstod/ /bcom ldan skyed tshal rgya mtsho'i 'gram/ /lha yi 'khor bskor chos ston tshe/ /gnas gtsang lha la bka' stsal pa'i/ / sangs rgyas snying po'i gzungs la bstod/ /bcom ldan mnyan yod rgyal byed tshal/ /dge slong brgya stong sems dpa'i tshogs/ /bskor tshe shA ri'i bu la gsungs/ /dbang bskur gzungs la phyag 'tshal bstod/ /bcom ldan rgyal khab bya rgod kyi/ /phung ri'i dge slong brgya stong dang / / sems dpa' bye ba khrag khrig 'bum/ /dgu bcu rtsa dgus gnas gtsang lhas/ /bskor tshe spyan ras gzigs gsungs pa'i/ /kun du bzang po'i gzungs la bstod/ /bcom ldan sum cu rtsa gsum gyi/ /lwa ba dkar po'i rdo leb bzhugs/ /lha dbang lha min las pham nas/ /bcom ldan 'das la zhus gsungs pa'i//rgyal mtshan rtse mo'i dpung rgyan gzungs/ /gzungs de la yang phyag 'tshal lo/ /bcom ldan tsam pa bskos rdzing 'gram/ /dge slong lnga brgya thabs cig tshe/ /bcom ldan dge slong rnams la bstod/ /'chi med rnga sgra phyag 'tshal bstod/ /bcom ldan nyid kyis bka' stsal pa'i//rten 'brel gzungs la phyag 'tshal bstod/ /bcom ldan nyid kyis bka' stsal pa'i/ /rims zhi gzungs la phyag 'tshal bstod/ /bcom ldan rgya mtsho ma dros na/ /dge slong lnga brgya thabs cig ste/ /sems dpa' stong dang de nang nas/ /seng ge rnam rtses rgyan nas gsungs//me tog brtsegs gzungs phyag 'tshal bstod/ /bcom ldan bram ze yangs dbang gnas/ /bzhugs tshe bram zes sa dbang zhus/ /sa dbang gzungs la phyag 'tshal bstod/ /bcom ldan mnyan yod mig mangs khyams/ /bzhugs tshe ston pas 'khor la gsungs//kun tshogs 'gro lding rig sngags bstod/ /bcom ldan rgyal khab bya rgod kyi/ /phung rir dge slong nyi khri stong / /lnga brgya sems dpa' khrag khrig 'bum/ /du ma brgya byin lha tshogs bskor/ /de tshe ston pas bcom ldan la/ /spyan ras gzigs zhus gsungs pa yi/ / yi ge nyung la phyag 'tshal bstod/ /bcom ldan dge slong rnams la gsungs/ /lha mo 'od zer can gzungs bstod/ /bcom ldan kun dga' bo la gsungs/ /nyid rgyud tshogs bdag gzungs la bstod/ /bcom ldan legs par gnas la gsungs/ /dbyig dang ldan pa'i gzungs la bstod//bcom ldan kun dga' bo la gsungs/ /yi ge drug pa'i gzungs la bstod/ /bcom ldan nyid gsungs pha rol sgo/ /nyi shu rtsa lnga'i gzungs la bstod/ /bcom ldan shAkya bde ldan don/ /gsungs pa rnam sbyor gzungs la bstod/ /bcom ldan kun dga' bo la gsungs/ /lag na rdo rje bcu gzungs bstod//bcom ldan nyid kyis gsungs pa yi/ /mdangs phyir 'phrog pa'i rig sngags bstod/ /bcom ldan gzi can la gsungs pa'i/ /gzi can zhus pa'i gzungs la bstod/ /kun nas de ni tshogs pa yi/ /sangs rgyas yan lag gzungs la bstod/ / kun dgas bcom ldan la zhus pa'i/ /gzhang 'brum sel ba'i gzungs la bstod/ /bcom ldan khyim bdag la gsungs pa'i/ /bu mang rton pa'i gzungs la bstod/ /bcom ldan dge slong rnams la gsungs/ /nad rnams zhi ba'i gzungs la bstod/ /bcom ldan nyid kyis gsungs pa yi/ / dug sel rig sngags phyag 'tshal bstod/ /bcom ldan kun dga' bo la gsungs/ /mi rgod 'jigs pa'i gzungs la bstod/ /de dag kun nas tshogs pa yi/ /rgyal ba can gyi rig sngags bstod/ /lha bu rab brtan don gsungs pa'i/ /gtsug tor rnam rgyal gzungs la bstod/ /spyan ras gzigs kyis gsungs pa yi//bcu gcig zhal gyi gzungs la bstod/ /spyan ras gzigs kyis gsungs pa yi/ /snying rje mi shol gzungs la bstod/ /bcom ldan nyid kyis gsungs pa yi/ /phyir log rnam par rgyal gzungs bstod/ /bcom ldan dbang la gsungs pa yi/ /gtsug gi nor bu'i gzungs la bstod//bcom ldan nyid kyis gsungs pa yi/ /rin chen phreng ba'i gzungs la bstod/ /bcom ldan 'jam dpal la gsungs pa'i/ /tshe dpag med pa'i gzungs la bstod/ /bcom ldan kun dga' la gsungs pa'i/ /me kha la yi gzungs la bstod/ /bcom ldan sems dpa' rnams la gsungs//sgo drug pa yi gzungs la bstod/ /bcom ldan dge slong rnams la gsungs/ /chos rgya mtsho yi gzungs la bstod/ /bcom ldan me mig bu la gsungs/ /sgo mtha' yas kyi gzungs la bstod/ /bcom ldan 'das gsungs pha rol phyin/ /tshul brgya lnga bcu'i gzungs la bstod//bcom ldan sum brtsegs bsrung slad du/ /gdugs dkar gzungs la phyag 'tshal bstod/ /bcom ldan nyid kyis gsungs pa yi/ /lus dbyibs mdzes gzungs phyag 'tshal bstod/ /gzhan gzungs bcom ldan byin rlabs pa'i/ /dbugs chen gzungs la phyag 'tshal bstod//bcom ldan 'das kyis gsungs pa yi/ /nag po chen po'i gzungs la bstod/ /bcom ldan nyid kyis gsungs pa yi/ /gos sngon gzungs la phyag 'tshal bstod/ /bcom ldan 'das kyis gsungs pa yi/ /mi 'jigs gzungs la phyag 'tshal bstod/ / bcom ldan phyag rdor la gsungs pa'i/ /gza' yum gzungs la phyag 'tshal bstod/ /gzhan gsungs bcom ldan byin rlabs pa/ /gnam lcags gzungs la phyag 'tshal bstod/ /kun tshogs rdo rje mchu yi gzungs/ /rdo rje mchu yi gzungs la bstod/ /kun tshogs ri rab khang pa brtsegs//rdo rje khang brtsegs gzungs la bstod/ /sangs rgyas kyi ni 'khor brgyad po/ /sde tshan brgya ni rtsa brgyad dang / /gzungs sngags bcas la phyag 'tshal bstod/ /kun nas tshogs pa stobs po che/ /stobs po che yi gzungs la bstod/ /nor bu dri med don gsungs pa'i/ / gtsug tor dri med gzungs la bstod/ /bcom ldan nam mkha'i snying la gsungs/ /sangs rgyas bdun pa'i gzungs la bstod/ /bcom ldan nyid kyis gsungs pa yi/ /sgrol mchog gi ni gzungs la bstod/ /ston pas kun dga' la gsungs pa/ /yangs pa'i grong khyer gzungs la bstod//khyim bdag zla ba la gsungs pa'i/ /nor gyi rgyun gyi gzungs la bstod/ /bcom ldan byams pa la gsungs pa'i/ /sangs rgyas bcu gnyis gzungs la bstod/ /lag na rdo rje la gsungs pa'i/ /sgo bzangs gzungs la phyag 'tshal bstod/ /blo gros rnam dag la gsungs pa'i//dri ma med pa'i gzungs la bstod/ /'jam dbyangs gzhon nus gsungs pa yi/ /khyad par can gyi gzungs la bstod/ /phyag stong spyan stong gsungs pa yi/ /rgyal chen thogs med gzungs la bstod/ /bcom ldan nyid kyis gsungs pa yi/ /sman bla mched bdun gzungs la bstod//ston pa nyid kyis gsungs pa yi/ /lha mo par+Na'i gzungs la bstod/ /ston pa nyid kyis gsungs pa yi/ /ri khrod lo gyon gzungs la bstod/ /bcom ldan nyid kyis gsungs pa yi/ /dpal lha lung bstan gzungs la bstod/ /bde gshegs sku bsdu bsod nams ldan/ / uSh+NI Sha yi gzungs la bstod/ /kun tshogs dkon mchog ta la ste/ /dkon mchog ta la'i gzungs la bstod/ /'jigs byed rang gis gsungs pa yi/ /'jigs byed kyi ni gzungs la bstod/ /spyan ras gzigs kyis gsungs pa yi/ /don yod zhags pa phyag 'tshal bstod//bcom ldan nyid kyis gsungs pa yi/ /stobs chen gzungs la phyag 'tshal bstod/ /bcom ldan nyid kyis gsungs pa yi/ /dkyil 'khor brgyad kyi gzungs la bstod/ /bcom ldan nyid kyis gsungs pa yi/ /sprin chen nyid kyi gzungs la bstod/ /ston pa nyid kyis gsungs pa yi//sprin chen rlung 'khor gzungs la bstod/ /bcom ldan nyid kyis gsungs pa yi/ /snang mtha' gzungs la phyag 'tshal bstod/ /gzhan yang bde gshegs gsungs pa yi/ /bde gshegs byin rlabs gzhan gsungs dang / /gzhan gsungs bde gshegs byin rlabs dang //sa thob sems dpas gsungs pa dang / /de dag kun dang tshogs pa ste/ /sangs rgyas zhing rnams thams cad nas/ /gzungs kyi glegs bam ji snyed bzhugs/ /de dag mtshan nas ma smos kyang / /sgo gsum dang ba yis ni bstod/ /sgo drug zhi khro'i lha tshogs dang //de yi gsung gi rgyud drug dang / /de 'dzin sgrub pa phyir mi ldog /yul gsum gyi ni spyan sngar ni/ /rig pa'i slob dpon nga dang ni/ /gzungs 'dzin slob ma rnams kyi ni/ /mtshams med lnga dang mi dge bcu/ /sdig pa'i las ni ci spyad pa/ /mthol lo bshags so yul gsum la//de nas glegs bam zhal phye ste/ /rim pa bzhin du 'di skad do/ /stong chen mo yi glegs bam la/ /gzungs ni 'dzin slob rnams kyis ni/ /bklags dang bklag tu gsol ba dang / /rim pa'i cho ga spyad pa yis/ /stong chen mo yi glegs bam 'di/ /lus la 'chang ngo sems la gnas//ngag gis brjod dang phud du khur/ /spyi bor len no gzungs 'di'o/ /de bsgres rim pas spyi bor blangs/ /rig pa gtad pa'i cho ga ni/ /rdzas lngar lhar bskyed mchod bstod bya/ /de nas 'dod pa'i lha gcig ni/ /slob ma'i mig la phab nas ni/ /'di skad du ni brjod par bya/ /gzungs 'dzin pa yi bu khyod ni//rig pa'i slob dpon nga la nyon/ /rang 'dod lha la lta bar gyis/ /lha 'di yid la bsgom par gyis/ /dang po mos yul byed pa yin/ /gnyis pa gsal bar byed pa yin/ /gsum pa sku rdzogs dngos su mthong / /bzhi pa lung bstan thob gyur nas/ /rgyud rnams kun la longs spyod de/ /rgyud don thams cad khyod kyis khrol//'dod lha 'di la mos sems 'byung / /khyod kyi skye ba snga rol gyi/ /las 'phro 'dir ni sad pa yin/ /sgrubs shig sgrubs shig rim gyis 'byung / /sku yi rig pa de gtad do/ /de ba ka sa oM/ /de nas brjod pa'i tshig de ni/ /slob ma'i lce thog bzhag nas ni/ / 'di skad du ni brjod par bya/ /gzungs 'dzin pa yi bu khyod ni/ /rig pa'i slob dpon nga la nyon/ /brjod pa gsung gi sngags 'di ni/ /sngags ma yin pa'i tshig dang ni/ /nam yang bsre bar ma byed cig /bla ma yis ni ma gsungs pa/ /de la bdag par ma byed cig /gsung gi rig pa da gtad de/ /phreng ba snying ga la gtad nas//'di skad du ni brjod par bya/ /gzungs 'dzin pa yi bu khyod ni/ /rig pa'i slob dpon nga la nyon/ /rig pa grangs su 'dzin byed cing / /sbyin dang ldan pa'i bgrang 'phreng 'di/ /brgyan phyir 'chang bar ma byed cig /'gom zhing smad par ma byed cig /sdig can lag tu ma gtad cig / thugs kyi rig pa da gtad do/ /de ba tsin+ta hUM/ /glegs bam spyi bo'i steng bzhag ste/ /'di skad du ni brjod par bya/ /gzungs 'dzin pa yi bu khyod ni/ /rig pa'i slob dpon nga la nyon/ /gsang sngags chos 'di rtogs dka' ste/ /mi shes rmongs pa ma byed cig /yid gnyis the tshom ma 'cha' cig /log pa yi ni shes rab kyis//mkhyen chos rig pa ma gzung cig /bla ma bsten cing spros pa chod/ /gsang sngags chos la thogs med spyod/ /rgyud nyan pa yi snod du rung / /rgyud don slob ma gsal bar gyis/ /yon tan ji snyed gdeng du ldan/ /yon tan rig pa da gtad do/ /rat+na sarba ma hA oM AHhUM/ /rdo rje dril bu lag gtad do//'di skad du ni bya ba yin/ /rdo rje dril bu rang bzhin gyis/ /thabs dang shes rab zung 'brel la/ /phrin las rnam pa bzhi'i sgo nas/ /'gro ba'i don la deng du bskul/ /phrin las rig pa da gtad do/ /de ba karma oM AHhUM/ /de nas phrin las 'di skad bcol/ /yum chen pha rol phyin ma dang //ye shes dbang bskur dpal ldan ma/ /rdo rje mi pham so sor 'brang / /sdig pa spong ba gdugs dkar mo/ /bdud 'joms sgo mtha' sgrub pa ste/ /de ltar 'gro mgon de rnams kyi/ /klu dang gnod sbyin mi min sogs/ /'byung po gdon tshogs bzlog pa dang / /'dod chags zhe sdang gti mug las//gyur na sdig pa sbyong du gsol/ /yul 'khor srung dang 'phags skyes po/ /rnam thos sras dang mig mi bzang / /phyogs skyong rgyal po khyed kyis kyang / /gzung 'dzin phyi bzhin 'brang ba dang / /bsrung ba dus su mdzad du gsol/ /tshangs pa dang ni dbang phyug dang //khyab 'jug dang ni drang srong dang / /gzung 'dzin phyi bzhin 'brang ba dang / /bsrung ba dus su mdzad du gsol/ /lha mo nag dang mgon pos kyang / /gzung 'dzin phyi bzhin 'brang ba dang / /bsrung ba dus su mdzad du gsol/ /de dag sems dpa' bde gshegs rnams/ / spyan 'dren skabs 'dres phrin las bcol/ /rma bya che dang bsil ba'i tshal/ /gsang sngags rjes su 'dzin ma ste/ /bgegs 'joms 'ba' zhig gzungs yin te/ /glegs bam de la bklag pa dang / /klog tu stsal dang cho ga brgyad/ /de lta bu yi mthu yis ni/ /gzungs dang mthun pa'i phan yon stsol//rdo rje mchu dang gnam lcags mchu/ /sprin chen rlung dkyil sprin chen mo/ /bgegs 'joms 'ba' zhig gzungs yin te/ /rgyal ba can dang be con che/ /bar du gcod sbyong 'gro lding ste/ /bgegs 'joms 'ba' zhig gzungs yin te/ /'od zer can dang yi ge drug /gzi can zhus dang mig rnams sbyong //bgegs 'joms 'ba' zhig gzungs yin te/ /lag na rdo rje bcu gzungs dang / /mdangs phyir 'phrog dang gzhang 'brum sel/ /bu ni mang po rton pa'i gzungs/ /bgegs 'joms 'ba' zhig gzungs yin te/ /stobs chen dang ni me kha la/ /dbugs chen gzugs dang gza' kun yum//bgegs 'joms 'ba' zhig gzungs yin te/ /rgyal mtshan dpung rgyan gzungs dang ni/ /gser can dang ni nor gyi gtsug /dgra 'joms pa yi gzungs yin te/ /tshe 'di la ni sman pa yi/ /ji snyed pa yi gzungs bzhugs pa/ /de dag mtshan nas ma smos kyang / / bgegs 'joms 'ba' zhig gzungs yin te/ /spyan ras gzigs yum me tog brtsegs/ /tsan+dan yan lag dbang bskur gzungs/ /tshogs spel 'ba' zhig gzungs yin te/ /yi ge nyung du sgo drug gzungs/ /las kyi sgrib pa sbyong gzungs dang / /snying rje mi bshol ba yi gzungs/ /phyi ma la ni sman pa yi//ji snyed pa yi gzungs bzhugs pa/ /de dag mtshan nas ma smos kyang / /tshogs spel 'ba' zhig gzungs yin te/ /gtsug tor gdugs dkar rin chen phreng / /rnam 'joms ri khrod lo ma gyon/ /bgegs 'joms gtso bo'i gzungs yin te/ /tshe 'di nyid la sman gtso ba/ / ji snyed pa yi gzungs bzhugs pa/ /de dag mtshan nas ma brjod kyang / /bgegs 'joms gtso bo'i gzungs yin te/ /sangs rgyas snying po sa dbang gzungs/ /sgo mtha' yas dang don yod zhags/ /tshogs spel gtso bo'i gzungs yin te/ /gtsug tor rnam rgyal dri ma med/ / sangs rgyas kyi ni 'khor brgyad kyi/ /mtshan ni brgya dang rtsa brgyad gzungs/ /tshogs spel gtso bo'i gzungs yin te/ /phyi ma'i tshogs su gtso bo yi/ /ji snyed pa yi gzungs bzhugs pa/ /de dag mtshan nas ma smos kyang / /tshogs spel gtso bo'i gzungs yin te/ /'chi med rnga sgra gzungs chen po//kun du bzang dang rten 'brel gzungs/ /cha snyoms pa yi gzungs yin te/ /sangs rgyas yan lag dbyig dang ldan/ /bcu gcig zhal gzungs lha mo lnga/ /cha snyoms pa yi gzungs yin te/ /lus kyi dbyibs mdzes chos rgya mtsho/ /tshe dpag med gzungs khyad par can//stobs po che yi gzungs dang ni/ /rdo rje ri rab khang brtsegs gzungs/ /cha mnyam pa yi gzungs yin te/ /'di dang phyi mar sman pa'i gzungs/ /ji snyed pa yi gzungs bzhugs pa/ /de dag mtshan nas ma smos kyang / /ma mnyam pa yi gzungs yin te//gong gi tshig gzhug kun la gdags/ /de nas rig pa'i slob dpon gyis/ /sgo yi them par rkang bzhag la/ /yangs pa'i grong khyer 'jug gzungs kyis/ /gsang sngags dang po bi sa nas/ /nyin mtshan chos kyang spyod par shog /dngos su gsungs pa'i bka' tsho yi/ / gsang sngags tshigs bcad bcas pa yis/ /nang du kha bltas lan cig dang / /de bzhin phyi ru lan gnyis so/ /gdugs dkar rnam rgyal snying po yang / /gro gshog bu la bris la/ /gtor ma dang bcas sgo khar gzung / /de rtsar de ni tshar re gdon/ /de nas bsrung pa'i 'khor lo bri//dkyil 'khor pho brang 'dra ba bri/ /'khor lo pad+ma 'dra ba bri/ /de dag dgod pa'i yi ge ni/ /so so'i lha yi mtshan dang ni/ /de de so so'i snying po dang / /yang na de yi sngags bzhugs dang / /ming rus srungs shig bcas pa yi/ /ze 'bru la ni A li dang / / mu khyud la ni kA li'o/ /tha ma mi shigs me ri'o/ /de ni phyi yi srung 'khor ro/ /dgra 'joms pa yi srung 'khor ni/ /khor yug gsum pa bri bar bya/ /de ni mtshon cha sna tshogs kyi/ /kha phyir bstan pas mtha' skor bri/ /de la dgod pa'i sngags bri ba/ /dang po gser can snying po ni/ /gnyis pa rgyal mtshan rgyan yin no//gsum pa gtsug tor nor bu'o/ /phyir zlog 'khor lo bri bya ba/ /'khor lo lte rim bzhi pa la/ /bcu drug rtsibs ldan 'khor lo bri/ /dang po'i lte rim gdugs dkar ro/ /gnyis pa phyir zlog stobs can no/ /gsum pa phyir zlog rin chen phreng / /bzhi pa hUM gis bskor ba'o//rtsibs la yang ni hUM dgod do/ /de bzhin dpyad de mkhas pas kyang / /man ngag bzhin du dpyad de bri/ /bden tshig 'di dang bcas pa yis/ /de la bsrung ba'i 'khor lo gdags/ /na mo sangs rgyas kyi bka' bden pa dang / chos kyi bka' bden pa dang / dge 'dun gyi bka' bden pa dang / sgo drug zhi khro'i tshogs kyi bka' bden pa dang / brgyud pa'i bla ma mkha' 'gro gsang ba'i thod pa can gyi bka' bden pa dang / rig pa 'dzin pa bzhi yi bden pa yi/ /gzung 'dzin slob ma 'di la srungs shig /'byung po mi dang mi ma yin pas 'di la tho 'tshams par ma byed cig /sa yi dkyil 'khor 'di 'brub kyang srid/ nam mkha' ni lag pas mnan du btub kyang srid/ sems can gcig tu gyur yang srid/ nyi zla ni sa la ltung yang srid/ rlung ni zhags pas bcing du rung yang srid/ me ni chu ru 'gyur yang srid/'byung ba chen po bzhi gzhan du 'gyur yang srid de/ de bzhin gshegs pa'i bka' ni gzhan du 'gyur mi srid do/ /de bas na khyed kyis 'di la gnod pa ma byed cig /de nas smon lam 'di skad do/ /sna tshogs pa yi gzungs 'di la/ /rdo rje slob dpon nga yis ni/ /bklags dang bklag tu stsal ba dang //mchod bstod bkur sti bcas pa dang / /rig pa'i cho ga spyad pa yis/ /dge ba 'di yi stobs kyis ni/ /sna tshogs gzungs nas brjod pa yi/ /zhing 'dir bzhugs pa'i sangs rgyas dang / /zhing khams gzhan bzhugs sangs rgyas kyi/ /de dag spyan sngar skyes nas ni//sna tshogs gzungs la spyod par shog /bskyed rdzogs rnam gnyis sgom par shog /de bsgoms mngon par sangs rgyas shog /sngon tshe dge slong sa ri la/ /gdug pa klu yis gzir ba'i tshe/ /rig pa'i rgyal mo rma bya ches/ /bsrung zhing sbas pa byas pa ltar/ / gzung 'dzin slob ma 'di la yang / /sngon tshe dge slong sa ri bzhin/ /rig pa'i rgyal mo rma bya ches/ /bsrung zhing sba bar byed par shog /sngon tshe bram ze khyab 'jug ni/ /gdug pa klu yis gzir ba'i tshe/ /rig pa'i rgyal mo rma bya mchus/ /bsrung zhing sba bar byas pa ltar/ / gzung 'dzin slob ma 'di la yang / /sngon tshe khyab 'jug ji bzhin du/ /rig pa'i rgyal mo rdo rje mchus/ /bsrung zhing sba bar byed par shog /sngon tshe shAkya'i bu mo ni/ /sa 'tsho ma la sogs pa la/ /rig pa'i rgyal mo so sor 'brang / /bsrung zhing sba bar byed pa ltar/ /gzung 'dzin slob ma 'di la yang //sa 'tsho ma la sogs bzhin du/ /rig pa'i rgyal mo so sor 'brang / /bsrung zhing sba bar byed par shog /sngon tshe khyim bdag zla bzangs la/ /nor gyi rgyun gyi gzungs kyis ni/ /dbul po'i bro nad bsal ba ltar/ /gzung 'dzin slob ma 'di la yang / / khyim bdag zla ba bzang po bzhin/ /nor gyi rgyun gyi gzungs 'di ni/ /dbul dang bro nad sel bar shog /sngon tshe lha bu rab brtan la/ /rgyud bdun skye bo myong 'gyur ba/ /gtsug tor rnam rgyal zhi byas bzhin/ /gzung 'dzin slob ma 'di la yang / /lha bu rab tu brtan pa bzhin//gtsug tor rnam rgyal gzungs kyis ni/ /bsrung zhing sba bar byed par shog /sngon tshe lha dbang brgya byin la/ /lha ma yin gyis pha ma byas te/ /rig pa'i rgyal mo gser can gyis/ /g.yul bzlog bsrung ba byas pa bzhin/ /gzung 'dzin slob ma 'di la yang //lha dbang brgya byin bzhin du ni/ /rig pa'i rgyal mo gser can gyis/ /g.yul bzlog srung ba byed par shog /sna tshogs pa yi gzungs nang nas/ /gang zag gcig la phan btags dang / /sems can kun la phan btags gzungs/ /snying rje phan yon de dag kun/ / bdag dang khams gsum sems can la/ /'di dang phyi mar 'byung bar shog /sna tshogs pa yi gzungs la ni/ /phyin ci ma log spyod par shog /sna tshogs gzungs mchog spyad pa yi/ /nyon mongs dri ma dag par shog /ye shes gzungs don bsgoms pa yi/ /shes bya'i sgrib pa dag par shog /smon lam rgya chen btab pa yis/ /snying rje byang chub sems ldan shog /ye shes tshogs kyi rgyu mthun gyis/ /thugs gsang chos sku thob par shog /bsod nams tshogs kyi rgyu mthun gyis/ /gsung gsang longs sku thob par shog /smon lam snying rje'i rgyu mthun gyis//sku gsang sprul sku thob par shog /bdag dang khams gsum sems can rnams/ /sems can don ni thogs med du/ /byed pa'i rdzu 'phrul ma thob par/ /zhing gzhan dam par skye bar shog /don byed rdzu 'phrul thob nas kyang / / gdul dka'i sems can gang 'dul du/ /der skyes de rnams 'dul bar shog /rdzogs pa'i sangs rgyas bsam mi khyab/ /ma lus kun gyi zhal mthong shog /sangs rgyas zhing khams bsam mi khyab/ /thams cad khyab par 'gro bar shog /sangs rgyas chos kyang bsam mi khyab//bsam mi khyab la nyan par shog /gdul bya'i sems can bsam mi khyab/ /bsam mi khyab la 'dul bar shog /rtag tu tshe rabs gar skyes kyang / /rigs bzang dag tu skye bar shog /gzhon la rab tu 'byung bar shog /bud med tshogs ni thams cad la//mi gtsang phung por shes par shog /rtag tu tshangs par spyod par shog /snying rje tshul khrims rgyan ldan shog /bshes gnyen yon tan ldan pa la/ /rtag tu bsnyen bkur byed par shog /spyod pa yid 'ong grogs bzangs dang / /rtag tu rab tu 'grogs par shog /rtag tu nyon mongs chung bar shog /kun la mi phongs spyod par shog /kun gyis bzang por mthong bar shog /bud med tshogs ni yong med cing / /gos zas sems bskyed 'byung ba bzhin/ /nub phyogs bde ba can zhing du/ /rin chen pad+ma las skye shog /sna tshogs gzungs kyi dkyil 'khor gyi/ /gson la drug dang gshin la gnyis/ /rten la gcig dang gson gshin rten/ /gsum gyi las la 'bad par shog /dag cing gtsang la gzungs kyi chos/ /spyod lam mkhas pa slob dpon dang //rtag tu mi 'bral 'grogs par shog /dben pa'i nags khrod nyams dga' ru/ /gnyen 'dun 'byor pa kun bor te/ /'jig rten chos brgyad phyir spangs nas/ /thar pa'i yid ches ma gtogs pa/ /rnam rtog gzhan ni mi 'byung bar/ /ye shes gzungs don bsgom par shog /sna tshogs gzugs mchog spyod par shog /mngon shes rdzu 'phrul mthu thob shog /'jug pa byang chub sems kyi ni/ /gzhan don thogs med byed par shog /bgegs 'joms sna tshogs gzungs thob shog /bgegs 'joms sna tshogs gzungs thob nas//'jigs byed khro bo'i skur sprul te/ /'byung po thams cad 'dul bar shog /tshogs spel sna tshogs gzungs thob shog /tshogs spel sna tshogs gzungs thob nas/ /'phags pa'i sa la gnas nas ni/ /ye shes bsod nams tshogs thob shog /de dag spyi yi cho ga'o/ /bye brag cho ga byed gyur na/ /rgyud ni rnam pa gnyis su gnas/ /cho ga mngon rtogs la rgyud dang / /zin pa tsam du ston rgyud do/ /mngon rtogs gsal ba 'ga' mi snang / /cho ga gsal ba'i gzungs bzhin du/ /de nang bzhin du bsam par bya//sgrub pa'i thabs bzhin mngon rtogs bsgom/ /de yi snying po bzlas byas te/ /spyi yi cho ga 'di nang nas/ /dgos pa btus te 'di dang sbyar/ /bye brag cho ga ldan pa yin/ /zin pa tsam du ston rgyud kyi/ /rgyud kyi zin tshig la brten nas//tshad ldan bstan bcos rgyas par dgrol/ /de bkrol bzhin du cho ga bshad/ /sna tshogs pa yi gzungs 'di la/ /shes rab blo yi me long gis/ /rin chen grags pas mthong nas ni/ /sany+tsa klus zin don du ni/ /rang lha yis ni snang bzhin du/ / sna tshogs gzungs nas bsdus nas byas/ /'jig rten pa yi grags 'dod cing / /zang zing bsod nams phyir ma yin/ /snying rjes brlan sems bstan pa yin/ /de bstan dge ba ci thob cing / /kun gyi rnam smin dag pa dang / /'gro ba gnod las rgyal gyur cig /bdag gi bstan bcos rgyas gyur cig /kun don 'di yis grub par shog /slob dpon mkhas pa chen po rin chen grags pas mdzad pa/ gzungs spyi'i cho ga kun snang gsal ba zhes bya ba rdzogs so// //bal po ma hA pA na'i rang 'gyur ro/ /tsheg bar bdun pa'o/