CLOSE WINDOW

D305
བོད་ཡིག

de dag der yang lha'i tshe dang / lha'i kha dog dang / lha'i stobs dang / lha'i bde ba dang / lha'i dbang phyug la dbang byed cing lha'i gzugs dang / sgra dang / dri dang / ro dang / reg bya dang / lha'i g.yog 'khor dang ldan par 'gyur ro/ / dge slong dag gzhan 'phrul dbang byed kyi lha rnams kyi lo stong phrag bcu drug gang yin pa de ni dmyal ba chen po tsha ba'i nyin zhag gcig go/ /nyin zhag de sum cu la zla ba gcig go/ /zla ba bcu gnyis la lo gcig tu brtsis pa'i lo khri drug stong ni dmyal ba chen po tsha ba'i tshe'i tshad do//dge slong dag pham par 'gyur ba'i chos bzhi po gang dag mi srung ba dang / mi sbed pa dang / yongs su mi skyong ba dang / de dag las 'da' bar byed pa dang / 'das pa de dag mi ston pa dang / rab tu mi ston pa de ni lus zhig nas shi ba'i 'og tu dmyal ba chen po tsha bar skye bar 'gyur te/de dag der yang sdug bsngal shin tu drag pa dang / rtsub pa dang / tsha ba dang / yid du mi 'ong ba'i tshor ba myong bar 'gyur ro/ /pham par 'gyur ba'i chos bzhi'i ltung ba brtag pa'o/ /dge slong dag de lta bas na/ gang de dag bstan bcos thos pa rnams kyis bdag la phan par bya ba dang /snying brtse ba dang / snying rje ba dang / don 'dod pa dang / phan pa tshol bas snying brtse ba 'dis khyed cag rnams kyis 'di ltar bya ste/ dge slong dag dgon pa dang / shing drung dang / khang stong dang / ri khrod dang / ri phug dang / pa la pun dzA b+h+ya ba ka sha dang /dur khrod dang / nags 'dab dang / bas mtha'i gnas mal du gnas te 'di dag nges par bsam par bya'o/ /dge slong dag bag yod par gyis shig /ci nas kyang phyis 'gyod par 'gyur ba de ltar ma byed cig /'di ni nga'i rjes su bstan pa'o/ /bcom ldan 'das kyis de skad ces bka' stsal nas/dge slong de dag yi rangs te/ bcom ldan 'das kyis gsungs pa la mngon par bstod do// //ltung ba sde lnga'i dge ba dang mi dge ba'i 'bras bu brtag pa'i mdo rdzogs so// //rgya gar gyi mkhan po A tsar+ya dz+nyA gtan la phab pa// //@##/ /bod skad du/ mchog tu gdags pa'i mdo/ sangs rgyas dang byang chub sems dpa' thams cad la phyag 'tshal lo/ /'di skad bdag gis thos pa dus gcig na/bcom ldan 'das nyan thos kyi dge 'dun dang bcas pa/ rgyal po'i khab na 'od ma'i tshal bya ka lan da ka gnas par dbyar gnas par dam bcas te bzhugs so/ /der bcom ldan 'das kyis dge slong rnams la bka' stsal pa/ dge slong dag 'di gsum na mchog tu gdags pa yin te/gsum gang zhe na/ sangs rgyas mchog tu gdags pa dang / chos mchog tu gdags pa dang / dge 'dun mchog tu gdags pa'o/ /de la sangs rgyas mchog tu gdags pa gang zhe na/ sems can rkang med rnams sam/rkang gnyis rnams sam/ rkang bzhi rnams sam/ rkang rnams sam/ gzugs can rnams sam/ gzugs can ma yin pa rnams sam/ 'du shes can rnams sam/ 'du shes can ma yin pa rnams sam/ 'du shes yod pa yang ma yin/ 'du shes med pa yang ma yin pa gang yang rung ste/ de dag gi nang na ni de bzhin gshegs pa dgra bcom pa yang dag par rdzogs pa'i sangs rgyas mchog yin par bstan to/ /sangs rgyas la mngon par dga' ba su yang rung ba de dag ni mchog la mngon par dga' ba yin te/mchog la mngon par dga' ba de dag ni rnam par smin pa yang lha rnams kyi nang du lhar gyur pa rnams sam/ mi rnams kyi nang du mir gyur pa rnams kyi mchog 'ba' zhig tu 'gyur bar shes par bya ste/ 'di ni sangs rgyas mchog tu gdags pa zhes bya'o//chos mchog tu gdags pa gang zhe na/ 'dus byas sam/ 'dus ma byas kyi chos rnams gang yang rung ste/ de dag gi nang na ni 'dod chags dang bral ba'i chos mchog yin par bstan to/ /chos la mngon par dga' ba su yang rung ba de dag ni/mchog la mngon par dga' ba yin te/ mchog la mngon par dga' ba de dag ni/ rnam par smin pa yang lha rnams kyi nang du lhar gyur pa rnams sam/ mi rnams kyi nang du mir gyur pa rnams kyi mchog 'ba' zhig tu 'gyur bar shes par bya ste/ 'di ni chos mchog tu gdags pa zhes bya'o//dge 'dun mchog tu gdags pa gang zhe na/ tshogs sam/ 'dus pa'am/ mang po'am/ 'khor gang yang rung ste/ de dag gi nang na ni de bzhin gshegs pa dgra bcom pa yang dag par rdzogs pa'i sangs rgyas rnams kyi nyan thos kyi dge 'dun mchog yin par bstan to/dge 'dun la mngon par dga' ba su yang rung ba de dag ni mchog la mngon par dga' ba yin te/ mchog la mngon par dga' ba de dag ni rnam par smin pa yang lha rnams kyi nang du lhar gyur pa rnams sam/ mi rnams kyi nang du mir gyur pa rnams kyi mchog 'ba' zhig tu 'gyur bar shes par bya ste/'di ni dge 'dun mchog tu gdags pa zhes bya'o/ /bcom ldan 'das kyis de skad ces bka' stsal nas/ dge slong de dag yi rangs te/ bcom ldan 'das kyis gsungs pa la mngon par bstod do// // mchog tu gdags pa'i mdo rdzogs so/

CLOSE WINDOW