CLOSE WINDOW

D2959
བོད་ཡིག

/[ ]@##/ /bcom ldan 'das dpal phyag na rdo rje la phyag 'tshal lo/ /don rnams ma lus sgrub byed pa'i/ /don grub rdo rje rnam 'joms kyi/ sgrub pa'i thabs ni bshad par bya/ /'byung po ro langs sha za dang / /mkha' 'gro ma dang brjed byed ma//smyo byed srin po la sogs pa'i/ /mi ma yin gyi sprul pa las/ /rnam par thar par byed pa yi/ /gzungs kyi cho ga legs pa ni/ /rgyud la brten nas bshad par bya/ /'dir 'phags pa rdo rje rnam par 'joms pa la brten pa'i rang rtags kyi las bdun gyi cho ga dang por bshad par bya'o//rnal 'byor pa dam tshig dang ldan pas sngon du phyag na rdo rje'am/ 'di nyid kyi snying po rgyas bsdus la bsnyen pa tshad du phyin pas gnas khang yid dang mthun par 'byung la sogs pas chag chag legs par byas la srog chags med pa'i me tog sngon po'i gcal legs par bkram la rin po che'i maN+Dal gyi steng du/mchod pa lnga dbul bar bya'o/ /de nas rang gi bla ma dang yi dam la sogs pa'i sangs rgyas dang byang chub sems dpa' rnams mdun gyi nam mkha' la spyan drangs la/ skyabs 'gro sems bskyed dang bdun rnam par dag pa bya'o//de nas bdag nyid stong pa'i nga rgyal du bya ste/ srung ba'i 'khor lo bsgom pa dang / bgegs rnams la bka' sgo ba la sogs pa bya ste/ hUM zhes mig byin gyis brlab pa la sogs pa bya'o/ /de nas bsrung ba chen po'i sngags lan bcur brjod la phyogs bcing ba la sogs pa bya'o//de'i rjes la bdag dang dngos po thams cad stong par mos par bya/ de nas sgrub pa po khrus sngon du song bas/ nye reg dang 'thor 'thung la sogs pa byas la tshad med pa bzhi bsgom/ de rjes stong pa'i ngang las hUM las byung ba'i nyi ma'i dkyil 'khor/ de'i steng du hUM las byung ba'i sna tshogs rdo rje//de'i lte ba la b+h+rUM las rin po che'i gzhal yas khang rab tu rgya che zhing kha dog gsal ba rgyan sna tshogs kyis brgyan pa/ ye shes bzhi 'bar bar byed pa'i sa gzhi dang bcas pa'o/ /de'i dbus ma dang a las byung ba'i nyi ma dang zla ba'i dkyil 'khor de nyid kyi steng du hUM las byung ba'i rdo rje sngon po/nas tsam kha gyes la de nyid 'phros 'dus pa las badzra hUM zhes pas lan bdun brjod pas hUM las byung ba'i stobs po che sku mdog mthing ga zhal gcig phyag bzhi pa dpal rdo rje rnam par 'joms pas dbu brgyan pa/ tho ba dang zhags pa dang thod pa dang /sdigs mdzub me 'bar ba dang ldan pa'i phyag rgya dang ldan pa rnam par bsgom mo/ /de nas ye shes sems dpa' gzhug pa dang gnyis su med par brtan par bya ba dang / mchod pa lnga dbul/ rdo rje rnam par 'joms pa la bstod pa/ bdag nyid tha mal pa'i lus su slar langs la/'dod pa'i don yid la byas te/ ye shes kyi 'khor lo las bdud rtsi'i chu rgyun phab ste/ bdag nyid lus mgo mjug tu bstims pas las dang nyon mongs pa'i dri ma rnam par dag par byas la/ de'i rjes la bdag dang gang bsrung ba'i lus dang yan lag thams cad rdo rje mi chod pa'i go cha dang ldan par bya'o//de nas maN+Dal gyi steng du snying po lnga dang ldan pa'i bum pa'i nang du chu gtsang ma srog chags med pas bkang / dri dang 'bru la sogs pa bum pa la shis pa'i rdzas rnams kyis legs par bltams la/ kha rgyan dang mgul chings la sogs pa'i bum pa'i rgyan rnams kyis mdzes par byas la rab tu dri zhim pa dang ldan pa'i snying po bris la hUM yongs su gyur pa las/stobs po cher rnam par blta'o/ /gzhan gyis longs ma spyad pa'i kham phor kha sbyar yungs kar gyis bkang la bsgrub bya'i ming rus gro ga la bris la gi wang gis dril la gzhag go//de nas bdag nyid kyi srin lag g.yon pa la gzungs thag btags te/ kha bshal zhing khrus dang gtsang sbra la gnas par byas la/ bzlas pa bya ste/ sgrub pa po'i lce'i steng du rdo rje sngon po nas tsam gyi sbubs ma nas sngags kyi rang sgra rdzogs par byas la snang ba rnams kyang rdo rje lta bur gsang sngags kyi rang sgra dang ldan par dmigs la bdag dang stobs po che gnyis su med par byas la/oM sarba bad+yI badzra badzra da ra da ra badzra hUM hUM phaT phaT swA hA zhes brgya rtsa brgyad mngon par bsngags la/ bsgrub bya'i ming rus la gu gul gyi chus bkru zhing nges par blos byas pas/ji ltar 'dod pa bzhin du 'grub par 'gyur te/ sngags kyi rjes la bdag la nad dang dug dang mtshon la sogs pa rnams kyis mi chod par mdzad du gsol zhes gro ga la 'khor lo bris te mgul du yungs kar dang btags na mtshon la sogs pa rnams las rnam par rgyal bar 'gyur ro//sdig pa dag par 'dod na chu gtsang ma la bsngags te ltor btang na bskal ba bdun gyi sdig ba ma lus pa zad par byed do/ /de ltar 'dir byung ba'i cho ga las lan gsum gsum gyis nyi ma re re la rdzogs par byas nas/sdig pa mi dge ba thams cad las thar bar nges so/ /de bzhin du sbrul gyis zin pa dang rma dang 'bras la sogs pa la ba ser mo'i 'o mas sbrus pa'i 'jim pa la nyin mtshan gsum du bzlas te phyugs na de nyid las grol bar 'gyur ro/ /de ltar na rlung dang chu chen po dang ser ba drag po 'bab cing gzhan gyis chod par dka' ba rnams la yungs kar la bsngags nas gtor na gzhan gyis mi chod pa rnams kyang chod par 'gyur ro//gzhan yang bdag nyid kyi rig sngags kyi las ma grub pa rnams kyang 'di nyid kyi cho ga zhag bdun 'bad na gzhan gyis spyad par dka' ba'i las 'grub par nges so//spyir gzhan la gnod par byed pa'i gsang sngags dang rig sngags thams cad las gzungs sngags kyi las thams cad la 'di nyid la sngon du rdzogs par byas nas rang gi las la sbyar ba gang yin pa sbyar na 'grub par 'gyur ba la the tshom med par gzhan gyis spyad par dka' ba'i las 'grub par nges so//sgrub pa po'i lus dang ngag dang sems yongs su dag par bya ba ni rab tu gtso ba'o/ /mi chod pa zhes bya ba'i rgyud kyi tshig sgrub thabs su phyung ba slob dpon ye shes rdo rjes mdzad pa dpal rdo rje rnam par 'joms pa'i las la sbyar ba 'grub par nges pa'i cho ga rdzogs so/