CLOSE WINDOW

D2894
བོད་ཡིག

/thugs kyis brtse bar slar dgongs la/ /slar yang byon par mdzad du gsol/ /badzra muHyis gshegs su gsol/ /tshogs kyi 'khor lo'i cho ga grub pa thob pa'i slob dpon 'gro bzangs snying pos mdzad pa rdzogs so//[ ]@##/ /rgya gar skad du/ badzra pA Ni maN+Da la bi d+hi/ bod skad du/ phyag na rdo rje'i dkyil 'khor gyi cho ga /dpal phyag na rdo rje la phyag 'tshal lo/ /dpal ldan phyag na rdo rje dang / /bla ma la gus phyag 'tshal nas/ /sgrub pa po la phan pa'i phyir/ /de yi dkyil 'khor cho ga brtsam/ /dpal phyag na rdo rje bsgrub par 'dod pa'i don du/dkyil 'khor cho ga 'di bsdu bar bya'o/ /de la sngon du bsnyen pa bya ba ni/ sgrub pa'i thabs las 'byung ba bzhin du/ bdag nyid lhar bskyed nas/ snying po 'bum bzlas par bya ba'am/ yang na ji srid mtshan ma ma byung gi bar de srid kyi bar du bsgom pa dang bzlas pa bya'o//de ni sngon du bsnyen pa byed pa'i cho ga'o/ /de ltar sngon du bsnyen pa'i cho ga rdzogs nas/ sa'i cho ga bya ste/ gtsug lag khang ngam/ kun dga' ra ba'am/ nags tshal la sogs pa yid du 'ong ba'i gnas su sa bslang ba dang / sa sbyang ba dang / sa gzung ba dang / sa byin gyis brlab par bya ste/ tshad brtag pa dang / dbyibs brtag pa dang / kha dog brtag pa'o/ /de las bslang ba ni/ gnas kyi bdag po la bslang ba ni/ maN+Dal dang dri'i thig le dang me tog gi tshom bu byas te/ mchod pa dang / gtor ma bshams nas/ oM bi ti baM sa A kAR+Sha ya dzaHbya ba dang /rdo rje bsdams pa'i mdzub mo gnyis brkyang ba sa la reg par byas pas/ sa'i lha mo 'khor dang bcas pa spyan drangs pa/ sa'i lha mo la mchod pa dang / de'i 'khor la gtor ma byin la/ gsol ba gdab bar bya ste/ skyob pa sangs rgyas thams cad kyi//spyod pa'i tshul dang khyad par gyi/ /sa dang pha rol phyin pa la/ /lha mo khyod ni dpang du gyur/ /skyob pa shAkya seng ge yis/ /ji ltar bdud sde bcom pa ltar/ /de bzhin bdag gis bdud kyi sde/ /pham par byas te dkyil 'khor 'bri/ /zhes lan gsum gyi bar du brjod la/ byon par bsams te mchod la gshegs su gsol/ de nas sbyang ba'i phyir drag po dang zhi ba'i sbyin sreg dang / 'dom gang nye 'khor du lte ba nub tsam ma/ pus mo nub tsam brkos la gseg ma dang gyo mo dang / rus pa la sogs pa bsal te/ spos chus bran te/ sa de nyid kyis bkang nas sa'i ltas brtag par bya ste/sa bslang ba'i cho ga'o/ /de'i rjes la sa gzung ba ni/ gdugs dang rgyal mtshan dang / bla re la sogs pa bres la/ sku gzugs rnams bkram nas/ phyogs bzhir spos rgyun mi 'chad par btul bar bya'o/ /de nas lag pa g.yas pa der gtugs te/yi ge brgya pa lan bdun nam nyi shu rtsa gcig bzlas par bya'o/ /sa gzhi rdo rje'i rang bzhin du byin gyis brlab pa ni/ sa gzung ba dang byin gyis brlab pa ste/ sa'i cho ga'o/ de nas khrus bya zhing dris byugs la gos sngon po'i stod g.yogs bgos la rgyan gdags shing dang rdo rje dang dril bur ldan pas/gal te nus na smyung bar gnas pa dang / ma nus na zas dkar gsum bza' bar bya'o/ /de la re zhig dkyil 'khor gyi dbus su 'dug la/ tshogs bsags pa dang / srung ba'i 'khor lo dang / gzhal yas khang gdan dang bcas pa bsgom par bya'o//de la yi ge hUM yongs su gyur pa las/ rdo rje chen po nam mkha'i tshad dang mnyam pa'i khong stong bsam pa ni srung ba'i 'khor lo'o/ /de'i steng du b+h+rUM las gzhal yas khang gru bzhi ba rta babs dang bcas pa bskyed pa/ dbus su a las zla ba'i dkyil 'khor bsgom par bya'o//de nas bdag nyid lhar bskyed la/ ye shes sems dpa' gzhug pa dang / dbang bskur ba dang / yi ge gsum gyis gnas gsum du byin gyis brlabs pa'i bar du byas la lha mo mchod nas/ gsol ba gdab par bya'o/ /de nas sgrub pa'i grogs pos mtshan brgya rtsa brgyad pas bstod la gsol ba gdab ste/mig g.yas par ma las nyi ma/ g.yon par Ta dang a las zla ba/ rkang mthil du a las sna tshogs rdo rje bskyed nas langs te/ sangs rgyas thams cad la phyag byas nas/ bdag nyid lha'i nga rgyal gsal bar byas nas/ dbus kyi gtso bo nam mkhar bteg la khro bo'i bstod pa bya'o//de la bstod pa ni/ chos dbyings stong pa gnyis med ngang nyid las/ /'jig rten spyod pa'i tshul yang mi spong zhing / /thabs la mkhas pas 'jigs byed skur ston pa/ /khro chen 'bar ba'i tshogs la phyag 'tshal bstod/ /bskal pa me ltar 'bar ba'i klong dkyil nas//dpa' bo'i stang stabs brkyang bskum tshul du bzhugs/ /nyi zla 'bar ba'i spyan gyi sdang mig gis/ /bgegs dpung sreg par mdzad la phyag 'tshal bstod/ /ces brjod nas bka' bsgo bar bya ste/ dkyil 'khor chen po'i sa gzhi la gnas pa'i/ / lha la sogs pa'i bgegs tshogs kun nyon cig /da ni gnas 'dir dkyil 'khor chen po 'bri/ /bgegs kyi rigs tshogs gang yin 'byer bar gyis/ /ci ste da yi bka' las 'das gyur na/ /ye shes can gyi rdo rje 'bar ba 'dis/ /spyi bo tshal ba brgyar ni rab 'gems shing / /rnam par 'jig par 'gyur bar gdon mi za//zhes bya ba dang / deng rnal 'byor gyi dbang phyug che ge mo zhes bya bas/ slob ma che ge mo zhes bya ba/ rdzogs pa'i byang chub thob par bya ba'i phyir dang / sems can thams cad bla na med pa'i byang chub thob par bya ba'i phyir dpal phyag na rdo rje zhes bya ba'i dkyil 'khor chen po zhig rtsom gyis/gang su yang rung ba sa phyogs 'di na gnas pa'i lha dang lha ma yin dang gnod sbyin dang srin po dang / yi dags dang / sha za dang brjed byed dang 'byung po dang / nam mkha' lding dang mi'am ci dang / rig 'dzin la sogs pa rgan po dang / rgan mo g.yog dang 'khor du bcas pa rnams/'dir ma gnas par gzhan du dengs shig /de ltar phyag na rdo rje'i bka' thos pas myur ba nyid du dengs shig /gang dag mi 'gro ba de dag ni/ /de'i ye shes kyi rdo rje chen po kun du 'bar ba 'dis mgo bo tshal ba brgyar 'gas par 'gyur ro/ /hUM zhes lan gsum brjod de/rdo rje chen po'i gar dang / rdo rje'i 'gros kyis sa gzhi lan gsum bskor zhing / rang gi lus la khro bo'i tshogs phyung la/ sdang ba thams cad bskrad par bsam mo/ /de nas yi ge hUM gis srung ba'i 'khor lo byas la/ phur bu lnga stong phyag na rdo rje smad rdo rje rtse gcig pa lta bur bskyed nas/ /oM badzra kI li kI lA ya sarba bi g+hAM ban+d+ha hUM phaT/ces bya ba brgya rtsa brgyad bzlas la/ dbus dang grwa bzhir/ oM g+ha g+ha g+hA ta ya g+hA ta ya sarba duSh+TA na phaT/ kI lA ya kI lA ya sarba pA baM phaT/ hUM hUM hUM badzra kI li kI lA ya badzra d+ha ra A dz+nyA pa ya ti kA ya wAka tsit+ta badzra kI lA ya hUM phaT/ ces bya bas btab la/ oM badzra mung+gar A ko Ta ya hUM phaT/ces byas brdung bar bya'o/ /de nas srung skud bcing ba dang / gu gul gyis bdugs pa dang / me tog gi phreng ba gdags shing dri'i thig le byas nas/ byams pa'i go cha bskon par bya'o/ /de nas dkyil 'khor ba'i rnam lnga dang / snying po bzlas pa'i dri'i chus byugs la/dbus su dri'i thig le bya'o/ /me tog gi tshom bu bkram nas/ dzaHhUM baM hoH'i sngags kyis bteg pa'i lha bzhugs su gsol la/ ye shes sems dpa' gzhug pa dang / dbang bskur ba dang / yi ge gsum gyis gnas gsum du byin gyis brlabs la mchod pa lnga dang /mchod pa rgyas pa dang / bstod pa byas nas snyan gsan dbab par bya'o/ /phyag na rdo rje bcom ldan 'das/ /rig sngags rgyal la phyag 'tshal lo/ /slob ma kun la brtse ba dang / /khyed rnams la yang mchod pa'i phyir/ /sang ni dkyil 'khor 'bri bar 'tshal/ / bcom ldan bdag ni gus pa la/ /de bas gnang ba mdzad par rigs/ /zhes lan gsum brjod par bya ste/ lha lhag par gnas pa'o/ /de nas 'byor pa yod na sbyin sreg gi mchod pa bya'o/ /de nas gtor ma'i cho ga nas 'byung ba bzhin du gtor ma btang nas/ slob ma lhag par gnas par bya ste/khrus byas la/ me tog lag na thogs te/ slob dpon gyi zhabs gnyis la phyag byas nas/ gsol ba btab ste rgyun bshags byas te/ de nas lhar bskyed nas mchod pa byas te/ so shing dor ba dang / ku sha sbyin pa dang / srung skud gdags pa dang / zab cing rgya che ba'i chos bshad par bya ste/rgyas par ni bzhi brgya lnga bcu pa'i cho ga las shes par bya'o/ /slob ma lhag par gnas pa'o// //de ltar lhag par gnas pa byas nas/ nang par nyi ma shar ba dang / mchod pa bshams la dkyil 'khor nam mkhar bteg ste/ sa gzhi ba'i rnam lnga dang / dris byugs nas/ thig byin gyis brlabs la cho ga bzhin du thig gdab par bya'o/ /de nas tshon dgye bar bya ste/ tshon byin gyis brlabs la dbus su pad+ma dang zla ba'i gdan la rdo rje rtse lnga pa bri ba dang / phyogs kyi rim par tshon dgye pa dang / rtsig pa la phyi rol dkar po dang / ser po dang / dmar po dang / /ljang gu dang / nag po dang / kha khyer dmar po rin po che pha gu ser po dang / dra ba dra phyed nag po/ rta babs ci mdzes par bri bar bya'o/ /de ltar dkyil 'khor bris nas/ dgongs ka'i dus su mchod pa'i rdzas rnams bsags nas stan bde ba la 'dug ste/ lha'i nga rgyal gyis dkyil 'khor bteg la yid kyis dkyil 'khor nang du zhugs te/lhag pa dang ma tshang ba'i nyes pa zhi bar bya ba'i phyir/ lan bdun bskor bar bya'o/ /de nas me tog gi phreng ba dor la slar rang gi mgo la bcing bar bya'o/ /de nas bdag nyid lhar bskyed la/ mdun gyi lha yang yi ge yongs su gyur pa las rdo rje/de la 'od zer spro bsdu byas nas/ lhar bskyed la ye shes sems dpa' gzhug pa la sogs pa rdzogs par byas nas mchod pa rgyas pa dbul bar bya'o/ /bstod pa byas nas bum pa bcug ste/ bzlas pa byas nas chur bzhu la sku khrus gsol bar bya'o/ /de nas sbyin sreg bya ba dang /gtor ma btang nas slob ma la dbang bskur ba'o/ /de la dang por gsol ba btab pa dang / gdong g.yogs bcing ba dang / rgyun bshags bya ba dang / sdom pa gzung ba dang / lhar bskyed cing las thams cad pa'i bum pas sku khrus gsol bar bya'o/ /dkyil 'khor du gzhug pa dang /lha'i dam tshig bsgrags pa dang / slob dpon gyi dam tshig bsgrags pa dang / ye shes dbab pa dang / phreng ba dor ba dang / gdong g.yogs dgrol ba dang / dkyil 'khor blta ba byas nas/ lhar bskyed nas/ chu dang cod pan dang / bdag po dang / ming gi dbang bskur bar bya'o/ / de nas sku gsung thugs kyi brtul zhugs dang / spangs pa dang / ye shes la sogs pa'i dbang dang / rjes su gnang ba dang / brtul zhugs kyi dbang la sogs pa bya'o// //dkyil 'khor cho ga sbyar ba 'di'i/ /dge ba gang des thob pa kun/ /phyag na rdo rje thob nas ni/ /'gro don du ma byed par shog /