བོད་ཡིག |
244b1 @##/ /rgya gar skad du/ bim+bi sA ra pra t+yung+ga ma naM nA ma ma hA sU traM/ bod skad du/ mdo chen po gzugs can snying pos bsu ba zhes bya ba/ dkon mchog gsum la phyag 'tshal lo/ /'di skad bdag gis thos pa dus gcig na/ bcom ldan 'das dge slong stong gi dge
244b2 slong gi dge 'dun chen po thams cad kyang sngon ral pa can/thams cad kyang dgra bcom pa/ zag pa zad pa/ bya ba byas pa/ byed pa byas pa/ khur bor ba/ bdag gi don rjes su thob pa/ srid par kun du sbyor ba yongs su zad pa/ yang dag pa'i shes pas sems shin tu rnam par grol ba
244b3 sha stag dang thabs cig tu yul ma ga d+har yul rgyu zhing gshegs pa na/ma ga d+hA pa rnams kyi mchod rten rab brtan gyi smyig ma'i nags khrod ga la ba der gshegs te/ de na bcom ldan 'das rab brtan du byon nas ma ga d+ha pa rnams kyi mchod rten rab brtan gyi smyig ma'i nags khrod na
244b4 bzhugs so//yul ma ga d+hA'i rgyal po bzo sbyangs gzugs can snying pos bcom ldan 'das dge slong stong gi dge slong gi dge 'dun chen po thams cad kyang sngon ral pa can/ thams cad kyang dgra bcom pa/ zag pa zad pa/ bya ba byas pa/ byed pa byas pa/ khur bor ba/ bdag
244b5 gi don rjes su thob pa/srid par kun du sbyor ba yongs su zad pa/ yang dag pa'i shes pas sems shin tu rnam par grol ba sha stag dang thabs cig tu yul ma ga d+hAr yul rgyu zhing gshegs pa na/ ma ga d+hA pa rnams kyi mchod rten rab brtan gyi smyig ma'i nags khrod ga la ba der
244b6 gshegs te/de na bcom ldan 'das rab brtan du byon nas ma ga d+hA pa rnams kyi mchod rten rab brtan gyi smyig ma'i nags khrod na bzhugs so zhes thos so/ /thos nas kyang rgyal po'i 'byor pa chen po dang / rgyal po'i mthu chen pos shing rta khri nyis stong dang / rta'i khyu tshan khri brgyad
244b7 stong dang /yul ma ga d+hA'i bram ze dang khyim bdag 'bum phrag du ma dang lhan cig tu bcom ldan 'das la blta ba dang / bsnyen bkur la 'gro ba'i phyir rgyal po'i khab nas byung ste/ de bzhon pas bgrod pa'i sa ji srid pa de srid du bzhon pas song nas/ bzhon pa las babs te/ rkang pa
245a1 kho nas kun dga' ra bar zhugs nas/yul ma ga d+hA'i rgyal po bzo sbyangs gzugs can snying pos bar skabs gang nas bcom ldan 'das mthong ba'i bar skabs der/ rgyal po'i chos kyi mtshan ma lnga po cod pan dang / gdugs dang / ral gri dang / rnga yab
245a2 nor bu can dang /lham khra bo dag phud de bzhag go/ /de nas yul ma ga d+hA'i rgyal po bzo sbyangs gzugs can snying pos rgyal po'i chos kyi mtshan ma lnga po dag phud de bzhag nas/ bcom ldan 'das ga la ba der song ste phyin pa dang / bla gos phrag pa gcig tu gzar te/ pus mo g.yas
245a3 pa'i lha nga sa la btsugs nas/bcom ldan 'das ga la ba de logs su thal mo sbyar ba btud de/ btsun pa bdag ni yul ma ga d+hA'i rgyal po bzo sbyangs gzugs can snying po lags so/ /btsun pa bdag ni yul ma ga d+hA'i rgyal po bzo sbyangs gzugs can snying po lags so/ /rgyal
245a4 po lags so zhes lan gsum gyi bar du rang gi ming rjes su sgrogs so//bcom ldan 'das kyis bka' stsal pa/ rgyal po chen po de de bzhin no/ /de de bzhin te/ rgyal po chen po khyod ni yul ma ga d+hA'i rgyal po bzo sbyangs gzugs can snying po yin no/ /rgyal po chen po khyod
245a5 ni yul ma ga d+hA'i rgyal po bzo sbyangs gzugs can snying po yin no//rgyal po yin no/ /rgyal po chen po khyod rang gi stan gang yin pa la 'dug shig /de nas yul ma ga d+hA'i rgyal po bzo sbyangs gzugs can snying pos bcom ldan 'das kyi zhabs la mgo bos phyag 'tshal te/ phyogs
245a6 gcig tu 'dug go//yul ma ga d+hA'i bram ze dang / khyim bdag kha cig gis ni bcom ldan 'das kyi zhabs la mgo bos phyag 'tshal te phyogs gcig tu 'khod do/ /kha cig gis ni bcom ldan 'das la mngon sum du phan tshun kun dga' bar 'gyur ba dang / yang dag par dga'
245a7 bar 'gyur ba'i gtam sna tshogs dag gsol te phyogs gcig tu 'khod do//kha cig gis ni bcom ldan 'das ga la ba de logs su thal mo sbyar ba btud de phyogs gcig tu 'khod do/ /kha cig gis ni rgyang ring po kho na nas bcom ldan 'das mthong nas cang mi smra bar phyogs
245b1 gcig tu 'khod do//de'i tshe na ral pa can tshe dang ldan pa lteng rgyas 'od srung 'khor de nyid du 'dus te 'dug par gyur to/ /de nas yul ma ga d+hA'i bram ze dang / khyim bdag rnams 'di snyam du sems te ci dge sbyong chen po ral pa can lteng rgyas 'od srung gi drung na tshangs par spyad pa spyod dam/
245b2 'on te ral pa can lteng rgyas 'od srung nyid dge sbyong chen po'i spyan sngar tshangs par spyad pa spyod snyam mo/ /de nas bcom ldan 'das kyis yul ma ga d+hA'i bram ze dang / khyim bdag rnams kyi sems thugs kyis mkhyen nas tshe dang ldan pa lteng rgyas 'od srung la tshigs su bcad
245b3 pa'i dbyangs kyis dri ba dris pa/lteng rgyas gnas pas 'di la ci mthong na/ /khyod kyis me spangs brtul zhugs kho na spyod/ /khyod kyis ji ltar me yi sbyin sreg spangs/ /'od srung de yi don ni nga la smros/ /tshe dang ldan pa lteng rgyas 'od srung gis gsol pa/ 'di na kha cig
245b4 zas dang skom dag dang //ro dang 'dod pa bud med rjod bgyid pa/ /rdzas byung de dag dri mar rab mthong bas/ /de slad mchod sbyin sreg la bdag mi dga'/ /bcom ldan 'das kyis bka' stsal pa/ gal te khyod ni 'dod dang zas skom dang / /de bzhin ro rnams dag
245b5 la yid dgar mi bden//ji ltar lha mi'i 'jig rten dag la khyod kyi yid/ /dga' bar byed pa dris pa 'od srung smros/ /tshe dang ldan pa lteng rgyas 'od srung gis gsol pa/ go 'phang zhi mchog phung po ma mchis shing / /ci yang ma mchis 'dod srid ma chags la/ /mi 'gyur gzhan
245b6 gyis mi bkri mthong lags pas//de slad mchod sbyin sreg la bdag mi dga'/ /mi nyams go 'phang dam pa ma mthong tshe/ /mchod sbyin brtul zhugs rnams kyang zhugs kyis kyang / /grol bar 'gyur zhes bdag yid rmongs gyur cing / ldongs shing skye shi'i rjes su zhugs
245b7 par gyur//gau tam skye mang don du rnam 'dren pa/ /thub pa bden pa'i rtsal mnga' khyod byung zhing / /gtso mchog skyob pas legs bshad da ltar ni/ /go 'phang 'dus ma bgyis de bdag gis mthong / /bcom ldan 'das kyis bka' stsal pa/ rab tu rnam par phye ba'i chos
246a1 rnams las//dam pa gang yin de ni rtogs gyur pa/ /de ni khyod kyis nyes bsams ma yin te/ /khyod kyis nges pa legs par rtogs pa yin/ /'od srung 'khor rnams skyo ba ma bskyed cig /de nas tshe dang ldan pa lteng rgyas 'od srung bcom ldan 'das kyis skabs phye
246a2 bas/ji ltar sems mnyam par gzhag bzhin du bdag gi stan gyi steng na mi snang bar gyur pa de lta bu'i ting nge 'dzin la snyoms par zhugs nas shar phyogs kyi steng gi nam mkha' la mngon par 'phags te/ spyod lam rnam pa bzhi po 'di lta ste/ 'chag pa dang / 'greng ba dang / 'dug
246a3 pa dang /nyal ba dag byed do/ /me'i khams la yang snyoms par zhugs te/ tshe dang ldan pa lteng rgyas 'od srung me'i khams la snyoms par zhugs pa'i lus las 'od zer rnam pa sna tshogs 'di lta ste/ sngon po dag dang / ser po dag dang / dmar po dag dang / dkar po dag dang
246a4 btsod ka dag dang /shel gyi kha dog lta bu dag byung ngo / /cho 'phrul zung dag kyang rnam par bstan te/ lus kyi smad nas me 'bar la lus kyi stod nas chu grang mo'i rgyun 'bab pa dang / lus kyi stod nas me 'bar la lus kyi smad nas chu grang mo'i rgyun 'bab pa dag kyang rnam par bstan
246a5 to//shar phyogs su ji lta ba bzhin du lho dang / nub dang / byang phyogs kyi steng gi nam mkha' la yang mngon par 'phags te/ spyod lam rnam pa bzhi po 'di lta ste/ 'chag pa dang / 'greng ba dang / 'dug pa dang / nyal ba dag byed do/ /me'i khams la yang snyoms par zhugs
246a6 te/tshe dang ldan pa lteng rgyas 'od srung me'i khams la snyoms par zhugs pa'i lus las 'od zer rnam pa sna tshogs 'di lta ste/ sngon po dag dang / ser po dag dang / dmar po dag dang / dkar po dag dang / btsod ka dag dang / shel gyi kha dog lta bu dag byung ngo / /cho 'phrul zung
246a7 dag kyang rnam par bstan te/lus kyi smad nas me 'bar la lus kyi stod nas chu grang mo'i rgyun 'bab pa dang / lus kyi stod nas me 'bar la lus kyi smad nas chu grang mo'i rgyun 'bab pa dag kyang rnam par ston to/ /de ltar phyogs bzhir rdzu 'phrul gyi cho 'phrul rnam pa bzhi bstan nas rdzu
246b1 'phrul mngon par 'du bya ba de dag phyir bsdus te/bla gos phrag pa gcig tu gzar nas/ pus mo g.yas pa'i lha nga sa la btsugs te/ bcom ldan 'das ga la ba de logs su thal mo sbyar ba btud nas bcom ldan 'das la 'di skad ces gsol to/ /bcom ldan 'das ni
246b2 bdag gi ston pa lags so//bdag ni bcom ldan 'das kyi nyan thos lags so/ /bcom ldan 'das ni bdag gi ston pa lags so/ /ston pa lags so/ /bdag ni bcom ldan 'das kyi nyan thos lags so/ /nyan thos lags so/ /bcom ldan 'das kyis bka' stsal pa/ 'od
246b3 srung de de bzhin no//de de bzhin te/ 'od srung nga ni khyod kyi ston pa yin no/ /khyod ni nga'i nyan thos yin no/ /'od srung nga ni khyod kyi ston pa yin no/ /ston pa yin no/ /khyod ni nga'i nyan thos yin no/ /nyan thos yin no/ /'od srung khyod rang gi stan gang yin pa la 'dug shig /de nas
246b4 tshe dang ldan pa lteng rgyas 'od srung gis bcom ldan 'das kyi zhabs la mgo bos phyag 'tshal te/rang gi stan gang yin pa de la 'dug go/ /de nas yul ma ga d+hA'i bram ze dang / khyim bdag rnams 'di snyam du sems te/ dge sbyong chen po ni ral pa can lteng rgyas 'od srung gi drung na
246b5 tshangs par spyad pa spyod pa ma yin gyi/ral pa can lteng rgyas 'od srung nyid dge slong chen po'i spyan sngar tshangs par spyad pa spyod pa yin no/ /de nas bcom ldan 'das kyis yul ma ga d+hA'i rgyal po bzo sbyangs gzugs can snying po la bka' stsal pa/ rgyal po chen po gzugs ni skye ba
246b6 yang ma yin/'jig pa yang ma yin te/ de'i skye ba dang 'jig pa yang rtogs par bya'o/ /rgyal po chen po tshor ba dang / 'du shes dang / 'du byed rnams dang / rnam par shes pa ni skye ba yang ma yin/ 'jig pa yang ma yin te/ de'i skye ba dang / 'jig pa yang rtogs par bya'o/ /
246b7 rgyal po chen po gzugs kyi skye ba dang / 'jig pa'i chos nyid rtogs pa'i rigs kyi bus ni gzugs de yongs su shes pa yin no/ /rgyal po chen po tshor ba dang / 'du shes dang / 'du byed rnams dang / rnam par shes pa'i skye ba dang / 'jig pa'i chos nyid rtogs pa'i rigs kyi bus ni
247a1 rnam par shes pa de yongs su shes pa yin no//rgyal po chen po gzugs yongs su shes pa'i rigs kyi bu ni bdag dang bdag gi zhes khas len par mi byed/ nye bar len par mi byed/ lhag pa'i chags par mi byed/ mngon par zhen par mi byed do/ /rgyal
247a2 po chen po tshor ba dang /'du shes dang / 'du byed rnams dang / rnam par shes pa yongs su shes pa'i rigs kyi bu ni bdag dang bdag gi zhes khas len par mi byed/ nye bar len par mi byed/ lhag par gnas par mi byed/ mngon par zhen par mi byed do/ /rgyal po chen po gzugs
247a3 bdag gir mi byed/khas len par mi byed/ nye bar len par mi byed/ lhag par gnas par mi byed/ mngon par zhen par mi byed pa'i rigs kyi bu ni tshad med pa dang / grangs med pa yin te/ mya ngan las 'das pa yin par nga smra'o/ /rgyal po chen po tshor ba dang / 'du shes dang /
247a4 'du byed rnams dang / rnam par shes pa bdag gir mi byed/ khas len par mi byed/ nye bar len par mi byed/ lhag par gnas par mi byed/ mngon par zhen par mi byed pa'i rigs kyi bu ni tshad med pa dang / grangs med pa yin te/ mya ngan las 'das pa yin par nga smra'o/ /de nas
247a5 yul ma ga d+hA'i bram ze dang /khyim bdag rnams 'di snyam du sems te/ gal te gzugs bdag ma yin zhing tshor ba dang / 'du shes dang / 'du byed rnams dang / rnam par shes pa yang bdag ma yin na/ 'o na ci gang nam yang byung bar ma gyur pa dang / 'byung bar mi 'gyur ba
247a6 dang /da ltar yang med pa yang ma yin zhing / gang de dang de dag tu dge ba dang / sdig pa'i las byas shing / byas pa dag gi rnam par smin pa so sor myong bar byed pa dang / gang phung po 'di 'dor zhing phung po gzhan dang nying mtshams sbyor bar 'gyur ba'i bdag gam/ sems can nam/
247a7 srog gam/ skye ba'am/ gso ba'am/ gang zag gam/ shed las skyes sam/ shed bu'am/ byed pa po'am/ byed du 'jug pa po'am/ skyed pa po'am/ kun nas skyed pa po'am/ slong ba po'am/ kun nas slong ba po'am/ smra ba po'am/ myong ba po'am/ so sor myong ba po de
247b1 gang zhig yin snyam mo//de nas bcom ldan 'das kyis yul ma ga d+hA'i bram ze dang / khyim bdag rnams kyi sems thugs kyis mkhyen nas dge slong rnams la bka' stsal pa/ dge slong dag byis pa so so'i skye bo thos pa dang mi ldan pa ni bdag bdag ces bya bar tha snyad 'dogs pa'i
247b2 rjes su lhung ste/de la ni bdag gam bdag gir bya ba med do/ /dge slong dag sdug bsngal 'di skye ba ni skye la/ sdug bsngal 'gags pa ni 'gag go/ /'du byed rnams skye ba ni skye la/ 'du byed rnams 'gags pa ni 'gag ste/ rgyu de dag dang / rkyen de dag la brten nas sems
247b3 can rnams kyi 'du byed kyi rgyun 'byung bar 'gyur te/dge slong dag de bzhin gshegs pa ni 'du byed kyi rgyun nying mtshams sbyor bar thugs su chud nas sems can rnams kyi 'chi 'pho dang / skye ba 'dogs par mdzad do/ /dge slong dag ngas lha'i spyan rnam par dag pa mi'i las shin tu 'das
247b4 pas sems can 'chi 'pho ba dag dang /skye ba dag dang / mdog bzang ba dag dang / mdog ngan pa dag dang / ngan pa dag dang / bzang po dag dang / bde 'gror 'gro ba dag dang / ngan 'gror 'gro ba dag kyang gzigs la/ sems can shes pa dang ldan pa 'di dag ni lus kyis
247b5 nyes par spyod pa dang ldan pa/ngag dang yid kyis nyes par spyod pa dang ldan pa/ 'phags pa rnams la skur pa 'debs pa/ log par lta ba dag ste/ log par lta ba'i las dang / chos yang dag par blangs pa'i rgyus lus zhig ste shi ba'i 'og tu rgyu de dang rkyen des ngan song ngan 'gro
247b6 log par ltung ba sems can dmyal ba rnams kyi nang du skye bar 'gyur ba dang /sems can shes pa dang ldan pa 'di dag ni lus kyis legs par spyod pa dang ldan pa/ ngag dang yid kyis legs par spyod pa dang ldan pa/ 'phags pa rnams la skur pa mi 'debs pa/ yang dag par lta
247b7 ba dag ste/yang dag par lta ba'i las dang / chos yang dag par blangs pa'i rgyus lus zhig ste shi ba'i 'og tu rgyu de dang / rkyen des bde 'gro mtho ris kyi 'jig rten du lha rnams kyi nang du skye bar 'gyur ro zhes sems can rnams las ji lta ba bzhin du nye bar 'gro ba dag kyang yang dag pa
248a1 ji lta ba bzhin du rab tu mkhyen to//dge slong dag ngas de ltar mkhyen cing de ltar gzigs pas na/ nga ni gang nam yang byung bar ma gyur pa dang / 'byung bar mi 'gyur ba dang / da ltar yang med pa'ang ma yin zhing / gang de dang de dag tu dge ba dang / sdig pa'i las byas shing byas pa dag gi
248a2 rnam par smin pa so sor myong bar byed pa dang /gang phung po 'di 'dor zhing phung po gzhan dang nying mtshams sbyor ba de chos kyi brda ma gtogs par bdag gam/ sems can nam/ srog gam/ skye ba'am/ gso ba'am/ gang zag gam/ shed las skyes sam/ shed bu'am/ byed pa po'am/ byed du
248a3 'jug pa po'am/skyed pa po'am/ kun nas skyed pa po'am/ slong ba po'am/ kun nas slong ba po'am/ smra ba po'am/ myong ba po'am/ so sor myong ba po yin no zhes mi smra'o/ /de la chos kyi brda ni 'di yin te/ 'di lta ste/ 'di yod pa'i phyir 'di 'byung la/ 'di skyes pa'i phyir 'di skye ba ste/ 'di lta ste/
248a4 ma rig pa'i rkyen gyis 'du byed rnams 'du byed kyi rkyen gyis rnam par shes pa/ rnam par shes pa'i rkyen gyis ming dang gzugs/ ming dang gzugs kyi rkyen gyis skye mched drug /skye mched drug gi rkyen gyis reg pa/ reg pa'i rkyen gyis tshor ba/ tshor ba'i rkyen gyis sred pa/ sred pa'i rkyen gyis len
248a5 pa/len pa'i rkyen gyis srid pa/ srid pa'i rkyen gyis skye ba/ skye ba'i rkyen gyis rga shi dang / mya ngan dang / smre sngags 'don pa dang / sdug bsngal ba dang / yid mi bde ba dang / 'khrug pa rnams 'byung bar 'gyur te/ de ltar na sdug bsngal gyi phung po chen po 'ba' zhig po 'di 'byung bar 'gyur
248a6 ro//'di lta ste/ 'di med pas 'di mi 'byung la/ 'di 'gags pas 'di 'gag pa ste/ 'di lta ste/ ma rig pa 'gags pas 'du byed 'gag /'du byed 'gags pas rnam par shes pa 'gag /rnam par shes pa 'gags pas ming dang gzugs 'gag /ming dang gzugs 'gags pas skye
248a7 mched drug 'gag /skye mched drug 'gags pas reg pa 'gag /reg pa 'gags pas tshor ba 'gag /tshor ba 'gags pas sred pa 'gag /sred pa 'gags pas len pa 'gag /len pa 'gags pas srid pa 'gag /srid pa 'gags pas skye ba 'gag /skye ba 'gags pas rga
248b1 shi dang /mya ngan dang / smre sngags 'don pa dang / sdug bsngal ba dang / yid mi bde ba dang / 'khrug pa rnams 'gag par 'gyur te/ de ltar na sdug bsngal gyi phung po chen po 'ba' zhig po 'di 'gag par 'gyur ro/ /dge slong dag de ltar na 'du byed rnams ni sdug bsngal ba yin la/ mya ngan las 'das
248b2 pa ni zhi ba yin te/rgyu kun 'byung ba las sdug bsngal kun 'byung bar 'gyur la/ rgyu 'gags pa las sdug bsngal 'gag pa dang / lam gyi rgyun 'chad pa dang / mi 'byung ba dang / nying mtshams sbyor ba med cing 'gag par 'gyur te/ sdug bsngal gyi mtha' ni de lta bu kho na yin no/ /dge slong dag de la
248b3 sdug bsngal gang yin pa de 'gag pa dang /de nye bar zhi ba dang / de bsil bar gyur pa dang / de nub par gyur pa ma gtogs par su zhig yongs su mya ngan las 'das te/ dge slong dag 'di lta ste/ phung po kun spangs pa/ sred pa zad pa/ 'dod chags dang bral ba/ 'gog pa mya ngan las
248b4 'das pa'i go 'phang 'di ni zhi ba yin no//de nas bcom ldan 'das kyis yang lan gnyis su yul ma ga d+hA'i rgyal po bzo sbyangs gzugs can snying po la bka' stsal pa/ rgyal po chen po ji snyam du sems/ gzugs rtag pa zhig gam/ mi rtag pa zhig yin snyam/ rgyal pos gsol pa/
248b5 btsun pa de ni mi rtag pa lags so/ /bcom ldan 'das kyis bka' stsal pa/ rgyal po chen po gang mi rtag pa de sdug bsngal ba zhig gam/ sdug bsngal ba ma yin/ rgyal pos gsol pa/ btsun pa de ni sdug bsngal ba lags so/ /bcom ldan 'das kyis bka' stsal pa/ rgyal po
248b6 chen po 'o na gang mi rtag pa dang /sdug bsngal ba dang / rnam par 'gyur ba'i chos can de la/ 'phags pa nyan thos thos pa dang ldan pa dag 'di ni bdag gi'o/ /'di ni bdag go/ /'di ni bdag gi bdag go zhes bdag tu khas len par byed dam/ rgyal pos gsol pa/ btsun pa mi bgyid
248b7 lags so//bcom ldan 'das kyis bka' stsal pa/ rgyal po chen po de ji snyam du sems/ tshor ba dang / 'du shes dang / 'du byed rnams dang / rnam par shes pa rtag pa zhig gam/ mi rtag pa zhig yin snyam mam/ rgyal pos gsol pa/ btsun pa de ni mi rtag pa lags so/ /bcom
249a1 ldan 'das kyis bka' stsal pa/rgyal po chen po gang mi rtag pa de sdug bsngal ba zhig gam/ sdug bsngal ba ma yin/ rgyal pos gsol pa/ btsun pa de ni sdug bsngal ba lags so/ /bcom ldan 'das kyis bka' stsal pa/ rgyal po chen po 'o na gang mi rtag pa dang / sdug bsngal
249a2 ba dang /rnam par 'gyur ba'i chos can de la 'phags pa nyan thos thos pa dang ldan pa dag /'di ni bdag gi'o/ /'di ni bdag go/ /'di ni bdag gi bdag go zhes bdag tu khas len par byed dam/ rgyal pos gsol pa/ btsun pa mi bgyid lags so/ /bcom ldan 'das kyis bka' stsal
249a3 pa/rgyal po chen po de lta bas na gzugs gang ci yang rung ba 'das pa dang / ma 'ongs pa'am/ da ltar byung ba'am/ nang gi'am/ phyi rol gyi'am/ rags pa'am/ phra ba'am/ bzang po'am/ ngan pa'am/ gang rgyang ring ba'am/ gang thag nye ba de dag thams cad la yang dag pa'i
249a4 shes rab kyis 'di ni bdag gi ma yin no//'di ni bdag ma yin no/ /'di ni bdag gi bdag ma yin no zhes de ltar de dag la yang dag pa ji lta ba bzhin du blta bar bya'o/ /tshor ba dang / 'du shes dang / 'du byed gang ci yang rung ba dag dang / rnam par shes pa gang ci yang rung ba 'das pa'am/ ma
249a5 'ongs pa'am/da ltar byung ba'am/ nang gi'am/ phyi rol gyi'am/ rags pa'am/ phra ba'am/ bzang po'am/ ngan pa'am/ gang rgyang ring ba'am/ gang thag nye ba de dag thams cad la yang dag pa'i shes rab kyis 'di ni bdag gi ma yin no/ /'di ni bdag ma yin no/ /'di ni bdag gi bdag ma yin
249a6 no zhes de ltar de dag la yang dag pa ji lta ba bzhin du blta bar bya'o//rgyal po chen po de ltar lta ba'i 'phags pa nyan thos thos pa dang ldan pa ni gzugs la yang skyo bar 'gyur/ tshor ba dang / 'du shes dang / 'du byed rnams dang / rnam par shes pa la yang skyo bar 'gyur ro/ /skyo na 'dod chags dang bral
249a7 bar 'gyur ro//'dod chags dang bral na rnam par grol bar 'gyur ro/ /rnam par grol bas bdag ni skye ba zad de/ tshangs par spyod pa bsten to/ /bya ba byas so/ /srid pa 'di las gzhan mi shes so zhes rnam par grol ba shes shing mthong bar 'gyur ro/ /chos kyi rnam grangs 'di bshad pa na yul ga d+hA'i rgyal
249b1 po bzo sbyangs gzugs can snying po dang /lha brgyad khri dang / yul ma ga d+hA'i bram ze dang / khyim bdag 'bum phrag du ma dag chos rnams la chos kyi mig rdul med cing dri ma dang bral ba skyes so/ /de nas yul ma ga d+hA'i rgyal po bzo sbyangs gzugs can snying pos chos mthong zhing chos thob la/ chos rtogs shing
249b2 chos kyi gting slebs te/nem nur las rgal te/ the tsom las rgal cing gzhan gyi dring mi 'jog pa dang / gzhan gyis bkrir mi zug pa dang / ston pa'i bstan pa'i chos rnams la mi 'jigs pa thob nas stan las langs te/ bla gos phrag pa gcig tu byas nas pus mo g.yas pa'i lha nga sa la
249b3 btsugs te/bcom ldan 'das ga la ba de logs su thal mo sbyar ba btud nas bcom ldan 'das la 'di skad ces gsol to/ /btsun pa bdag ni mngon par zhugs pa lags so/ /bdag ni mngon par zhugs pa lags so/ /bdag bcom ldan 'das dang / chos dang / dge slong gi dge 'dun la
249b4 skyabs su mchi lags kyis/bdag deng slan chad ji srid 'tsho'i bar du srog gcod pa la sogs pa spangs pa/ skyabs su mchis pa/ mngon par dad par gyur pa'i dge bsnyen lags par gzung du gsol/ bdag gis ji srid 'tsho'i bar du bcom ldan 'das dge slong gi dge 'dun dang bcas pa la na bza'
249b5 dang /bsod snyoms dang / gzims cha dang / gdan dang / snyun gyi gsos sman yo byad dag gis bsnyen bkur bgyi bar 'tshal na/ bcom ldan 'das rgyal po'i khab tu gshegs par ci gnang / bcom ldan 'das kyis yul ma ga d+hA'i rgyal po bzo sbyangs gzugs can snying po la cang mi gsung bas gnang bar
249b6 mdzad do//de nas yul ma ga d+hA'i rgyal po bzo sbyangs gzugs can snying pos bcom ldan 'das kyis cang mi gsung bas gnang bar rig nas/ bcom ldan 'das kyis bka' stsal pa la mngon par bstod cing rjes su yi rangs nas/ bcom ldan 'das kyi zhabs la mgo bos phyag 'tshal te/
249b7 bcom ldan 'das kyi spyan snga nas phyir song ngo / /mdo chen po gzugs can snying pos bsu ba zhes bya ba rdzogs so// //rgya gar gyi mkhan po dzi na mi tra dang / pradz+nyA warma dang / zhu chen gyi lots+tsha ba ban de ye shes sde la sogs pas bsgyur cing zhus te gtan la phab pa// //
CLOSE WINDOW