CLOSE WINDOW

D2728
བོད་ཡིག

chos 'khor lo tsA bas bsgyur ba las/ slad kyis btsun pa rgya mtshos dag par bcos shing gtan la phab pa'o//[ ]@##/ /rgya gar skad du/ lo ke shwa ra sha ta ka sto tra/ bod skad du/ 'jig rten dbang phyug gi bstod pa brgya pa/ 'jig rten mgon po la phyag 'tshal lo/ / mtho ris mgon po'i yan lag mchog btud cod pan 'dzin la 'od dang ldan pa'i nor bu lta bu'i 'od/ /mtsho skyes stan ldan gus pas rab btud mgo bo la ni dzA ti'i me tog rgyas phreng 'od ltar te/ /bde 'byung dbu yi dbu rgyan ri dgas mtshan ldan dkar ser mi dman dman zhing nyams pa nyid bgyid pa//'jig rten dbang po'i zhabs sen dri med ri bong 'dzin pa'i mdzes pa zhi slad 'jig rten la gyur cig /ral khur 'dzin pa'i zla ba rab gsal ral pa dmar ser dang 'grogs lhan cig bkra ba'i zer rnams kyis/ /nges par mi brdzi 'phrog byed kyi ni dman pa min pa'i cod pan nor bu'i 'od rnams kyis kyang min//lha tshogs rnams kyi skra phreng mdzes pa nag po dag dang 'grogs pa las ni rnam par mi nyams pa/ /mi bzlogs 'jig rten dbang phyug zhabs sen 'od zer khyed rnams dag gi mun pa zhi ba'i slad gyur cig /yongs su rdzogs shing rgya che'i bang mdzod rab tu gsal zhing dpal 'byor phun sum tshogs pa rnams kyi rgyu//sdug pa dang ni ring du gyur pa'i skye bo rnams kyi mi bzad 'jigs pa'i dogs pa rnam par sel/ /sprin rnams kyis kyang bsgrib par mi nus mun can gdug pa'i gza' las byung ba'i 'jigs pa zhi gyur pa/ /'jig rten dbang po'i zhabs kyi sen mo bsil zer ldan pa'i sngon med zer gyis khyed rnams dag gyur cig /nyon mongs phung po'i bud shing dag ni lus pa med par sreg byed me chen mthon por gyur pa'i rtse/ /'jig rten gsum po dag tu rab dgar gsal zhing gti mug mun gnag dag gi smag rum thibs po sel/ /dmyal ba'i sa gzhir me yi phung po rnams la bdud rtsi'i chu bo rgya chen rgyun ni 'bras bcas pa//pad+mo 'dzin zhabs las 'khrungs sen tshogs 'od zer rnams kyis khyed kyi 'khor ba yang dag sel gyur cig /rang gi 'dun pas spyad pa'i 'dod pa sbyin la shin tu mkhas gyur yid bzhin nor bu bsam yas shing / /shin tu 'jigs pa'i dogs pas gdungs gyur zhi bar bgyid pa'i bsil ba'i 'od zer yid ni rab 'phrog la//yon tan du ma'i tshogs rnams 'dzin pa gsal bar gyur cing mdzes pa dang ldan me long dag gi gzugs/ /'jig rten dbang phyug zhabs las skyes pa'i sen mo des bskyed 'od zer mdzes pas khyed rnams skyong gyur cig /'od zer dpag med las 'khrungs che ba'i 'od zer rnams kyis mdzes pa dang ldan gtsug phud chen po ni/ /mdzes ldan mgon po'i rab tu mdzes zhabs sen mo'i 'od zer tshogs ni de la mchod mkhas lha rnams kyi/ /mgo yi rin chen mchog gi tshogs las nges par 'phros gyur shin tu rab bkra'i 'od zer tshogs rnams kyis//bde sogs dga' ba'i gzhu la nye bar spyod byed 'di dag gis ni khyed rnams yun ring dar gyur cig /mngon par 'dod pa'i yul rnams 'thob pa'i sbyin pa las ni dpal dang ldan pa'i longs spyod kyis mtho zhing / /kun tu rnam par mi g.yo'i 'od ni brten byed snod rnams dag gi mgu ba skyed par byed gyur la//dri ma dang bral mtshungs pa med pa'i gzugs ni ri bong can las lhag cing skyon gyi mun sel ba/ /nor bu'i 'od zer lta bu phyag na pad+ma'i zhabs kyis khyed rnams dag la tshim pa sbyin gyur cig /rab mdzes phyag na pad+ma'i zhabs kyi pad+ma las 'khrungs sen mo'i tshigs rnams dag gi 'od zer ni//rgyun chad med par snying rje'i chu yis nye bar bran pa de yi sku lus dag gi sa gzhi la/ /khyad 'phags ye shes sa bon btab pa las skyes mi chung dpag bsam shing gi myu gu'i tshogs rnams dang / /mtshungs pa gang yin 'di yis khyed kyi srid pa'i 'jigs pa rab mang mthu tshogs nyams par byed gyur cig /'jig rten dbang po'i zhabs pad las skyes sen mo'i 'od zer bdud dang dgra ste bdag la skrag ster zhing / /ut+pal dmar mdog dong par don yod mda' rnams mde'u rtse gyen du bstan bcug 'od zer ltar mdzes la//'jigs rung 'khor ba'i dong du rtag tu lhung ba'i skye bo 'dren byed sra mkhregs thag pa'i dpyangs thag 'dis/ /shin tu rnyed dka'i phun sum tshogs pa chen po mtho ba'i go 'phang dag la khyed rnams 'god gyur cig /'od dang ldan zhing nyon mongs las kyi rang dbang med dub 'gro ba'i sdug bsngal rnam par gcod la dpa'//skyon gyi dmigs pa las ring gsal zhing mkhas pa'i bla ma skye bo rnams kyi sgrol bar byed gyur la/ /kun du dga' ba rab sdug ster zhing ri bong 'dzin dpal mtha' dag 'dzin gyur dri ma dang bral ba/ /bsam yas phyag na pad+ma'i zhabs 'khrungs sen mo gang yin de yis khyed kyi bsam pa rgyal gyur cig /ci zhig bde 'byung gis 'di zla du ma rnams kyis mchod par bkod byas 'od dang ldan pa'i dum bu'am/ /yang na nges par khyed 'phags yid gyur byang chub dpal mos rin chen phreng ba bkod dam ci zhig yin/ /lha rnams kyis ni lha yi me tog rmad byung mtshungs pa med rnams phreng brgyus dpyangs pa min nam zhes//blo gros bskyed pa 'jig rten mgon po'i zhabs las 'khrungs pa sen mo'i phreng bas khyed rnams dgyes gyur cig /gang du 'di ni pad+mo las skyes phyag bgyid 'chi med mgo bor nor bu'i khri stan mthon po la/ /zhabs rdul dag ni rgyun du gzims shing gang du yang ni 'dzin byed gzhi la mgo 'chang rab 'dud pa//de ltar rab bskyed 'od zer tshogs kyi so ring gsal zhing bzhad gad bgyid 'dra 'jig rten dbang phyug gi/ /zhabs skyes sen mo gang yin de dag rnams ni khyed kyi mtha' bral mun pa gzhil ba'i slad gyur cig /tsha gdung sel byed dpa' bo dkar bsil mchog ldan bdud rtsi'i thigs pa'i char gyi rgyun ni 'bebs mdzad cing //mi bzad mda' chen char gyi rgyun ni drag po rab 'grems bdud la gnod byed phyir ltar gyur pa/ /phyag na pad+ma'i zhabs kyi sen mo'i 'od zer dpal mdzad dag gis khyed kyi 'khor ba'i rnam pa yi//khongs chen btson rar rgya che'i sdug bsngal rnam mang 'jigs su rung rnams yang dag 'phrog par byed gyur cig /'jig rten dbang po'i zhabs las rab skyes sen mo'i gnas la snang ba dag ni shin tu bzlog dka' ba'i/ /bdud kyis kun nas rab 'phangs mda' yis khyab rnams sgrib par byed pa'i yol bar 'khrul pa skyed byed cing //kun nas nyon mongs dpung rnams brlag 'gyur gsal bar go 'byed mjug rings chen po'i tshogs su rtag bya ba/ /'jig rten gsum gyis mi nus nus pa srid pa gsum las rgyal ba'i ru mtshon chen pos rgyal gyur cig /yang dag rdzogs pa'i byang chub sems kyi zla ba kun nas mdzes ldan 'od kyi tshogs pa lta bu yis//nyon mongs nges bsregs thal ba'i tshogs rnams grol ba'i lam gyi rlung gis bdas nas bgrod pa lta bu dang / /mi bzad bdud rnams kyis ni rnam par mi byed mi chung rdo dkar glegs bu bkod pa lta bu yis//nye bar mtshon 'os phyag na pad+ma'i zhabs skyes sen mo'i 'od zer tshogs kyis khyed rnams srung gyur cig /mtshan mo'i mgon po nges pa kho nar phyogs la zad cing rang nyid dman pa skyengs par gyur pas ni/ /skad cig brtag par bya ba mtshungs med mun pa spong mkhas dri ma dang ni zad pa mi mnga' zhing //mi dman dgra yi srin po zad byed pha rol 'gro sbyong brdzi ba med pa'i brtul zhugs nyer mtshon pa/ /'jig rten dbang phyug zhabs sen gang de rnams kyis mi khom 'phen pa dag las khyed rnams srung gyur cig /phun tshogs dam pa'i sgrub byed rab tu stobs ldan pad+mo 'dzin pa'i zhabs kyi rdzod la gnas bcas shing //'jig rten gsum dpal rgyal bar bzhed pa sen mo'i 'od zer tshogs ni mtshungs med mngon par rab mtho ba/ /bshes gnyen 'char bas thob pa'i rab gsal rjes su 'grogs ldan shin tu phul byung 'phel ba rnyed gyur pa/ /rgud pa kun gyi dgrar gyur theg chen yang dag 'grub pa'i rgyu des khyed rnams phongs las srung gyur cig /gtsug phud la ni zla phyed rgyan 'dzin bzhed par gyur pa'i phyugs bdag 'di ni ngo tsha dang bral la/ /nub par mi 'gyur nor bus mngon par mdzes 'dod khyab 'jug dag kyang ji ltar mkhas pa lta bu yin/ / dbang po yi ni mgo bo che la nor bu 'di yang don yod min zhes bya ba phyag na pad zhabs kyi/ /sen mo'i tshogs 'di mthong gyur gang zhig mdzes pas sems zin 'jig rten gyis bsams de yis rgyal gyur cig /rgya khyon cher byas ring du steng du 'gro zhing 'og tu 'ang dmyal ba rnams kyi sgrol ba byed par gyur//bsil zer ldan pa 'char kar gyur ltar dkar zhing dgra rnams bzhin ni nag po nyid du 'gyur ba'i rgyu/ /nus mthu rnam par shes par bya ba dka' zhing ma lus 'gro bas mchog tu gsal bar mthong zhing snang / /dbu la sangs rgyas kyi ni zhabs pad la gnas sen mo'i 'od zer tshogs kyis khyed rnams srung gyur cig /lha dbang dgyes pa'i mchod pa la mkhas lha mos rab gtor ga pur phye ma kun nas 'thul ba yi/ /'od ltar snang zhing gus pa'i khur thogs 'phrog byed phyag 'tshal ral pa'i thal bar rnam par 'khrul pa'i sa/ /dpal mo mchod pa 'bul ba'i lag gi pad+ma'i ge sar rtse yi rdul phran zag pa ltar mdzes pa//phyag na pad+ma'i zhabs las skyes gyur sen mo'i 'od zer tshogs kyis khyed rnams phongs las srung gyur cig /lhun po'i 'od zer ser po min bgyid lha yi glang chen li khri'i tshon gyis gsal byas dmar po'i dpal/ / nyams par byed la dpa' zhing rta ljang can gyi rta yi mi dman ljang ba nyid kyi 'phrog bgyid la/ /sngon po'i snang ba nyams bgyid 'chi med bu mos 'o ma'i chu gter lud par rnam brtags skrag gyur pa/ /pad+mo 'dzin pa'i zhabs kyi pad+mo las 'khrungs sen mo'i 'od zer tshogs kyis khyed rnams srung gyur cig /lha rnams khyed kyi rnga yab bsil zer byed ltar dkar ba dag gis 'di la mdzes par mi 'os te/ /k+Sha ye ram b+he dgos pa med pa'i ga bur phye ma gus pa'i rtsom pas yongs su 'thor ba ci/ /bde sogs khyod kyi me tog dkar po rnams kyis rab tu gtor bas ci zhes mtho ris sa yi rje//mchod la bsngags mdzad phyag na chu skyes zhabs 'khrungs sen mo'i 'od zer tshogs kyis khyed rnams srung gyur cig /kai la sha ltar 'bigs byed mdzes skyes lha min las rgyal lus kyi nag po nyid ni nyams par bgyid/ /nag mo rtse 'jos mdzes ldan byugs shing nyi ma'i rta yi 'od zer ljang gu nyid kyang dkar por mdzad//mchod mkhas lha yi skye bos gtor ba'i kun+da'i zil las bsil zer can gyi dum bu ltar gyur rnams/ /ci zhig la dgos 'jig rten dbang po'i zhabs sen 'od zer che ba'i tshogs kyis khyed rnams srung gyur cig /'khor ba'i chu srin bdag po pha rol bgrod pa rnams la bsdams pa'i lam chen dag dang mtshungs 'gyur zhing //bzlog par dka' ba'i sdug bsngal me 'bar zhi bar mdzad pa bsod nams chen po'i tshogs kyi chu bo ni/ /dngas pa rang dga' dag tu 'bab pa lta bu dbu la sangs rgyas kyi ni zhabs las 'khrungs pa yi//'od zer mchog tu rnam par rgyal bar gyur rnams khyed kyi srid pa myur du sel bar mdzad gyur cig /nag mo dga' ba'i zla ba'i mdzes pa zil gyis non bgyid sa gzhi 'dzin pa kai la sha yi ni/ /snang ba rgyas pa gsal bar nyams shing dkar po nyid gyur kha ba can gyi dkar ba nyid kyang 'phrog / 'o ma'i rgya mtsho rgyas pa lud pa dang mtshungs phyugs rnams kyi yang lha yi glang chen so rnams ni/ /bcag pa'i dum bu ltar mdzes 'jig rten dbang phyug zhabs sen 'od zer rgyas pas khyed rnams srung gyur cig /gang zhig yongs 'du'i me tog gis mchod mtsho skyes dpa' ni 'dzums shing bung ba'i tshogs rnams gar sgyur bgyid//gang la gnas bzhin bsnyen bkur la chags pad+ma cung zad zum zhing rang byung 'dug pa dka' bar gyur/ /gang gis lha yi chung ma gdung ba'i skyon sel nyin mo'i dpal ni nag mo min par mtshan mor gyur/ /phyag na pad+ma'i zhabs sen zla ba mdzes pa dang ldan zla ba'i 'od 'dis khyed rnams srung gyur cig /lha yi na chung skye bo mdzes ma rnams kyis 'dod 'os su 'khrul mig tshugs lta zhing mchod gyur la/ /sen mo'i 'od gsal dkar zhing mdzes par gyur pa pad+ma'i rtsa ba'i tshogs pa lta bu 'dzin mdzad cing / /mi chung 'dod pa rab rgyas 'dod ldan lta bur gzhan gyi dbang gyur ma yi spyod la rab tu 'jug /mi dman lha yi grong gi tsan+dan gyis byugs phyag na pad+ma'i zhabs kyis khyed rnams srung gyur cig /kun dga'i khur bu mi dman rab rgyas lha yi lag pas yongs 'du'i me tog rab tu gtor rnams la/ /bung ba'i don mthun nag po brtsegs pa shin tu gnag par gsal ba'i tshogs pa lta bu rab rgyas pa//phyag na pad+ma'i zhabs kyi mtsho skyes dag gi sen mo'i 'od ni dri med 'o ma'i chu gter gyi/ /dbus las 'khrungs pa'i dpal mo g.yo med dga' ba'i rgyu 'dis khyed kyi dge legs mchog tu sgrub gyur cig /re ba rnam chad skyo bas 'phel ba'i me yi rtse mo gcod pa'i chu chen rab tu rgyas gyur cig /pad+ma mdzes pa'i rjes mthun gyis drangs sbrang rtsi byed pa'i sgrib byed rnams kyis bsgribs par gyur pa'i dpal/ /sen mo'i 'od zer dkar zhing rags la stug por gyur pas rang dgar khyab cing nang ni khengs gyur pa/ /sor mo chu skyes dpal la reg pa'i zhabs kyis tshegs med ma chad khyed kyi 'dod pa sbyin gyur cig /'khor lo'i 'od ni rab tu mdzes dang ldan gyur dri med sen mos bskyed pa do zla med pa'i dpal/ /mtshungs med yon tan grangs med bsod nams rnams kyis 'thob pa'i mtshan gyi tshogs ni rnam par 'dzin gyur cing / /ma lus gling rnams gsal ba'i mthu ldan shin tu che bar phun sum tshogs pas sa yi bdag po rnams//phyag bgyid mgo yi 'khor los sgyur ba dbu la sangs rgyas zhabs kyis khyed rnams yun ring srung gyur cig /mtho ris gang gA'i gser gyi pad ljon me tog cung zad bye bas 'di la gtor ba'i yon tan ci//gsal ldan mtsho skyes su 'khrul bung ba'i phreng bas glu dbyangs nyid la glu rnams kyis ni ci zhig bya/ /rab mdzes sen mo 'di la nor bu'i phreng ba rnams kyis mdzes pa nyid du bgyi bar nus min zhes/ /gang zhig mchod la lha yi dbang pos gsungs gyur phyag na chu skyes bsdams pa'i zhabs des rgyal gyur cig /gang zhig mgon po kho na'i bde bar gshegs pa'i rgyur gyur 'ba' zhig ma yin skye ba'i snod kyi yang / /gang du pad+mo mngon 'dod sbrang rtsi 'thung ba'i tshogs nyid 'dab bskyod ma yin skye bo rnams kyi yang / /gang gis rab lci sa nyid shin tu bla mar gyur cing 'dud rnyed ma yin 'jig rten gsum po yang //dbu la bde gshegs ri bong 'dzin pa'i 'od kyis rnam par gsal ldan zhabs des 'jig rten srung gyur cig /gang zhig sten byed bung ba rnams la btud pa'i sbyin pas dga' mgu rangs pa'i tshogs ni skyed mdzad cing / /gang gi rtsa ba mi dman nges pa kho nar ljang gu nyid min mchog tu mdzes pa nyer 'dzin la//rdul gyi tshogs rnams 'chi med mgor nyal dpal ni gnas pa'i sar gyur sen mo'i 'od zer bzhad pa yi/ /ge sar dang ldan 'jig rten mgon po'i zhabs kyi pad+mas khyed la yun ring dge legs sbyin gyur cig /lus 'joms nyams byed 'jigs su rung ba'i dgra 'joms sgrub pa lus can rnams kyi mtshon te 'dod pa yi//dngos grub 'bod par byed cing kye ma shin tu cher bsags mi bzad sdig pa'i tshogs chen zad mdzad pa/ /nyon mongs bkod pa dgra yi bsam pa'i sreg blugs kyis bskyed sdug bsngal me chen gyis ni bsregs pa dag / sel ba'i chu klung phyag na pad+ma'i zhabs kyi 'od kyis khyed kyi zer la rnam mang phan pa sgrub gyur cig /dbu la sangs rgyas rgyan ldan zhabs kyi nye 'khor du rgyu tshad med pa yi pad+mor 'khrul ldan pa/ /bung ba'i phreng ba sgra snyan sgrogs pa rnams ni sems can bskyab sa'i bya ba gcig pur rab brtan la/ / yun ring bzhugs par brtan par bgyi slad stobs chen snying rje dag gis sbom zhing gnag pa lcags kyi ni/ /lcags sgrog bkod pa lta bus khyed rnams dag gi phun sum tshogs pa nges par g.yo med sgrub gyur cig /pad+ma'i nang gi 'dab ma'i phreng ba ltar mdzes 'jam zhing rdo rje lta bu sra la rnam par brtan//gdug pa'i dgra rnams kyis ni rab tu bsnun byas mtshon cha'i tshogs rnams rnam par nyams par 'gyur ba'i sa/ /dmar zhing chags pa nye bar zhi ba 'khor ba'i chu gter dag las sgrol bar bgyid pa'i byed pa po/ /shin tu stobs ldan bde bar gshegs pa'i ri bong can 'dzin zhabs kyis khyed kyi skyo ba sel gyur cig /dbang po'i chu skyes rab tu rgyas shing mdzes pa'i tshogs la bung ba g.yo ldan yin yang mi g.yo zhing / /kun du dga' ba'i kun+da 'phrog byed lag na gnas pa'i tshogs la sreg ldan yin yang mi sred de/ /mdun du khyab 'jug gis gtor mdzes ldan yongs 'du'i me tog dri bzangs ldan la'ang dga' ba mi skye bar//gang du bung ba'i phreng ba dgar 'gyur rgyal ba 'dzin pa'i zhabs kyi pad+ma des khyed srung gyur cig /'od zer rab tu mang ba'i tshogs las gyur pa'i ral pa g.yo zhing shin tu rab mdzes gsal ldan la/ /dmar zhing mdzes pas rtses 'brel rab tu mtho ba sen mo'i so gtsigs kun nas mdzes shing yid du 'ong //nyes par zhugs pa'i gnyis 'thung dgra bo skrag bgyid ring du g.yo ba'i spyan gyis kun tu gzigs gyur pa/ /pad skyes ral pa'i nags nyal 'jig rten dbang po'i zhabs kyi seng ge khyed rnams zhi ba'i slad gyur cig /shin tu dri ma med kyang mi chung yang ba min yang myur du phyogs kyi sgo rnams 'god par bgyid//'jig rten gsum po kun du dga' bar bgyid kyang stobs ldan pha rol lus khyab yongs su gdung ba'i rgyu/ /mdzes sdug 'gyur byed byug par ldan yang phul byung yid 'ong rgyal ba'i 'od zer dag gis me tog ni//rnam rgyas phreng ba'i thod can zhabs kyi 'od zer khyed rnams phongs pa'i zug rngu 'gog par mdzad gyur cig /gang la rgyal po'i rgyal pos me tog rnams dang 'phrog byed kyis kyang yongs 'du'i ljon shing yid 'phrog rnams/ /zla bas kun dga' ldan par kun+da rnams dang nor lha'i rgyud kyis 'od ldan nor bu mang po'i tshogs//zhabs ldan dga' bas pA la sha ste de ltar lha yi skye bos mchod pa'i khyad par rab mang rnams/ /rjes su khrid pa'i snyan ngag lta bus mchod bgyid phyag na chu skyes zhabs des khyed rnams srung gyur cig /'od rnams rnam par gsal ba nyi mas bstod bgyis sen mo rnams la mtho ris mgon po yis//sor mo'i rtse mo'i tshogs la dbang phyug 'dren byed rnam par mi g.yo mdzes pa'i mtha' la mthar byed kyang / /lha yi 'jig rten rnams la gang gi thun mong min pa'i mdzes pa phul du byung ba'i yul rnams ni/ /ma lus mthong ba'i nus pa yod min mgo la sangs rgyas gzugs kyis mtshan ma'i zhabs des rgyal gyur cig /yang dag rdzogs pa'i sangs rgyas 'od kyis rab gsal ral pa'i tshogs kyi rtsi shing ldan pa che ba'i sku/ /'khor ba'i chu gter gting du 'jug byed skye bo'i tshogs kyi shin tu lci ba'i sa gzhi rab gnon zhing / /mtha' rnams dag las yang dag byung ba yid 'ong zab cing dmar ba'i khams chen ldan pa'i chu rnams 'bab//grub pa'i don mthun gyis bsten pad+mo 'dzin pa ri bo'i zhabs ni khyed kyi bzang po'i slad gyur cig /'khor ba'i lam la rab bgrod 'gro ba mtha' dag ngal zhing dub ldan zhi ba'i rgyu yi grib bsil can//rab tu mdzes pa'i yal ga rang gsal sen mo'i me tog 'dzin cing 'dod don 'bras bu dang ldan pa/ /lha yi skye bos rab btud mgo yi phreng bas bskyor ba'i rtsa bar nor bu'i bum pa gang ba yi/ /dri med 'od kyi chus bran 'jig rten dbang po'i zhabs kyi ljon shing tshogs kyis khyed rnams srung gyur cig /rtsa ba rab brtan nyon mongs tshogs pa'i dgra bo stobs ldan stobs rnams rtsad bcad rnyed pa chen po yis/ /rangs pa thob gyur rnam par sgeg ldan stobs ldan las rgyal mgo yi gnas la g.yo zhing rnam par rtse/ /chu skyes rgyas pa'i rgyun la chags shing kun du sred ldan dar der med po rab tu sgrogs pa yi//bung ba'i tshogs pa mi bzlogs mtshungs med dri bral pad+ma 'dzin pa'i zhabs kyis khyed la srung gyur cig /'jig rten gsum gyi dbang phyug dpal 'byor lag ldan chung ma g.yo ba'i sdom thag gdags sa'i dbyug pa ste/ /nyon mongs sdug bsngal sbrul gdug sos zin 'gyel ba'i 'gro ba mtha' dag skyong bar byed mkhas nam mkha' lding //mi chung dmyal ba'i grong khyer nang na bzlog dkar 'jug pa'i sgo sdom rab brtan srid pa'i chu gter ni/ /legs par rgal ba'i gdos pa gcig pu 'jig rten dbang po'i zhabs ni khyed rnams 'byor pa'i slad gyur cig / 'dun sa gang du lha yi rol mo mkhan rnams mdzes pas yid bzung mchod pa bgyid par mi nus te/ /gang rnams rnam pa las 'das sil snyan rig byed kha na ma tho med rnams de tshe rnam par nyams/ /dman pa min pa'i glu dbyangs mi len nyams rnams dag gis spras pa'i dngos po nyid min ngo bor gyur/ / de ltas brgya phyin nang du bzhad gyur lta bas mi ngoms gzugs can mtsho skyes can des rgyal gyur cig /dpal ldan par med rab tu mtshungs pa med cing cher gyur 'dod pa chen po'i khang pa mchog gi sar/ /lhag pa'i stobs ldan g.yon gyi rim par mi zad 'dus pa'i bdud kyi yid rnams rab tu 'joms mdzad cing //sems can dga' bde rab bzhed grags pa dang ni 'jam pa'i thugs ldan ngal bas skyo bar mi 'gyur ba/ /mgo la 'od dpag med pas khyed kyi gti mug gis bskrun rab 'joms rgya che'i 'jigs pa 'joms gyur cig /brtan pa'i ra ba 'jigs su rung bas bskor zhing sgra ldan bcing pas dam bcings ring por gsal ba'i sgra//drag po shin tu 'jigs rung dmyal ba'i grong khyer nyid kyi rnam par 'dzin pa'i dgra bo rnams dag ni/ /btson khang nang du gdung ba drag pos shin tu 'jigs par gyur rnams dran nas skyabs la rab gshegs shing / /bkur stir sgrub mdzad snying rje rab lci 'jig rten dbang phyug gang yin de yis khyed rnams srung gyur cig /bskal pa'i mtha' yis dba' rlabs ltar 'phyo g.yo ba'i rlung gi stobs kyis rab gtsubs dba' rlabs phreng ba rnams/ /sgra drag sgrogs shing thor thor dang ldan chu srin tshogs kyis gang ba 'jigs rung chu yi chu gter ni//gang zhig dmigs pa nyid na mthon mthing dri ma med pa'i tshogs chen bkram pa rtse dga' dag gi gnas/ /nyams rab dga' bar 'grub 'gyur pad+mo can de shin tu myur bar 'gro rnams srung ba'i slad gyur cig /du ba'i tshogs kyi 'ching bas bcings pas zla ba nyi ma'i 'od zer nyams shing 'bras bu med par byed//'gog pa bskyed pa'i bgegs la mkhas pa'i lha yi chung ma rnams kyang brten pa'i mthu rnams nyams 'gyur ba'i/ /du ba'i rgyal mtshan can yang gang gi ming brjod rgyun 'dzin 'dzin byed rnams la rab tu nyams 'gyur ba/ /sangs rgyas 'dzin pas khyed la nyams dgar rgyun chad med cing sgrub byed dang bcas legs pa sgrub gyur cig /khros pas rab bslang lag pa dus kyi mtshon cha dang 'dra 'jigs su rung ba'i phud ces sgrogs par byed/ /chang gis bsgos pa'i 'gram pa dag tu bung ba'i tshogs gtibs glo bur gnag gyur dar zhing che ba'i lus/ /lag ldan dbang po 'ong ba gang gi mtshan gyi lcags kyu brnag dkas btab nas zhum zhing skrag 'gyur ba//'jig rten dbang po'i thugs rje rab 'dod yo byad de ni khyed kyi 'dod pa'i bya ba mdzad gyur cig /phud ces dbugs ni 'jigs rung khro ba'i rang gnas za bas sreg byed mi chung dug gi du bar ldan/ /so yi bza' ba mthong bas mgo bo shin tu rab tu gdengs gyur nyes byed so rtse ldan pa rnams//rang gi mtshan ni dug so dbang po'i dgrar gyur blo la rnam par bzhugs pas nus med nyams 'gyur ba/ /'jig rten dbang de kun gyi nyon mongs phung po shin tu mi bzad mngon gyur zhi ba'i slad gyur cig /spos dris rab tu bslang ba'i dregs pa che 'dzin glang chen tshogs rnams za bar sgrogs shing 'jigs pa'i shugs//khro bas rtse gcig tu 'gro mgrin pa'i phug zab dag nas drag po'i ngar sgra zab mo sgrogs byed pa'i/ /ri dgas dbang po 'khol byed kyis bkol 'os pa nyid du gang gi yon tan brjod pas ldan 'gyur ba/ /yan lag mchog 'thor bde gshegs gnas shing rnal 'byor ldan des khyed kyi ngan par 'brel pa sel gyur cig /rab mang gnod pas rjes su dpag bya brtse ba zad pa'i snying ldan 'jigs pa sgrub par byed gyur pa/ /mkha' la gnas shing ri yis nye bar gzhal bya bung ba ma he mngon 'gyur 'od lta'i lus kyi tshogs/ / sbyor thabs legs ldan sgyu ma'i rang bzhin lta bu gang zhabs brjod pas dman zhing brtson 'grus med pa dang / /rnam par nyams par bgyid ldan bde bar gshegs pa'i gnas des khyed rnams rnam par rgyal ba'i slad gyur cig /glang chen tshogs kyi chu srin rab rgyu ral gri mdung rings 'od dang ldan pa'i dba' rlabs 'khrug cing rgyug /rab bslang dkar zhing g.yo ba'i tog gi dbu ba legs par gsal ldan skrag pa'i gnas kyi sar gyur pa/ /mtshungs med sgra rnams yang dag sgrogs pa'i sde brtan chu bo dag ni gang zhig brtan pa legs pa'i grus/ /spro ba dang bcas yang dag rgal gyur mtsho skyes can des khyed kyi bde min bde bar sel gyur cig /sa 'dzin tshogs rnams 'byed pa'i mthu ldan 'od zer rab mang 'byor ba'i 'od la spyod cing 'jigs byed pa/ /rab tu bkra ba'i me 'od rnam 'dzin 'jigs pas zil gnon 'byung po rnams ni rmongs shing 'khrul bskyed pa/ /rdo rje 'jigs pa'i snod kyi mngon du lhung ba dag ni gang la gus pa'i mthu las myur nyid du//rnam par nyams pa'i sar 'gyur mdzes ldan mtsho skyes 'dzin pa de yis khyed kyi srid pa 'byed gyur cig /kun tu gzir bas brten nyams 'pho ba'i sgrub byed nye gyur lha ngan khros pas kha rje zhan gyur pa/ /zug gzer brnag dka' drag pos 'gog byed rnam pa sna tshogs mang po'i nad kyis rab tu gzir ba'i lus//gang gis bsam gtan nges brjod bdud rtsi 'dzin byed kyis bzung 'gro ba blo ldan zug rngus mi brdzi bar/ /lhag par dga' bskyed mgo la sangs rgyas de yis khyed rnams blo ni byang chub slad du srung gyur cig /ring nas 'khod bzhin gshegs pa'i sa bdag mtshungs med dgra rnams nyams shing rab tu gdung bar byed pa'i glu/ /drag tu len cing khrims lugs grags pa pha mes bdag po'i grags pa las rgyal khrims lugs dag dang ldan/ /'byor pa rnam kun brlag pa bskyed pa'i rgyur gyur khros pa'i blo can gang zhabs brjod pa'i nus pa yis//mchog tu mdza' bar 'gugs byed rgyal ba'i khyu mchog gnas des khyed kyi 'jigs pa yang dag 'phrog gyur cig /tshangs pa dman pa nyid gyur bla ma yang ni bla ma min dang ma nyams par brjod nyams pa nyid/ /khyab 'jug mi smra'i ngang tshul dbang phyug kyang ni tshig rnams rnam par 'god pa'i khengs pa med gyur la//tshim zhing gsal bar bstod 'dod rnams kyang de ltar lha rnams gang gi yon tan brjod la mkhas min te/ /rgyal ba'i thugs kyi spyod yul nang gi yon tan tshogs mnga' phyag na pad+ma dag gis rgyal gyur cig /yab kyis ya mtshan la ste lha dgra'i dgra yis spyod pa dang ni mig gsum ldan pas mig dag la//rigs kyi dgra yis rigs la bla ma yis kyang gshegs pa la ste mtshan mo'i bdag pos sku la'o/ /grogs po yis ni byams pa la ste a tra'i bu yis 'gro kun bu ltar gyur pa'i mnyes gshin la/ /'di bstod bstod pa'i snod gang mtha' yas sbyin mdzad phyag na chu skyes de yis khyed rnams srung gyur cig /gang la tshangs pas rang gi zhal rnams mang po nyid las mang po legs par bzhad dang ldan pas bstod/ /kun dgas khengs shing phung pos kyang ngo glu rnams dag gi mgon pos kyang ni spyi bos 'dud par bgyid//brgya byin 'dren byed brgya phrag bcu rnams bsngags pa bgyid cing gang la rnam gzigs rgyun chad med par ni/ /'dren byed dga' bas phyag 'tshal bstod pa'i snod gyur 'jig rten gnyen des 'jig rten gsum rnams srung gyur cig /pad+ma 'dzin pa'i gdung med rab gsal 'jig rten pa rnams snang ba'i don du yod pa min nam zhes//mkha' yi lam la nyi ma'i 'gron po 'di ni ngal zhing snang byed 'od zer 'bras bu med par gleng / /blo yi nor can blo ldan rnams kyis bstod pa bgyis pas 'dun sar rags pa'i snang ba sgrub byed la/ /gang gi bka' drin myur du dgra rnams nyams par byed pa de las 'gro ba dge legs ldan gyur cig /phyag 'os gang la phyag 'tshal bkod pa las kyang bsod nams snod rnams shin tu mtho ba nyid 'gyur la/ /thun mong min pa'i mchod 'os gcig pu mchod kyang gus pa'i snod rnams nye bar bsags pa shin tu mang / / gang gi bsam gtan gnas pa dran pa yis kyang 'byung po'i 'jigs pa dag ni 'phral la brjed 'gyur ba/ /mtha' yas bsam gyis mi khyab 'jig rten phan pa'i sgrub lam 'jig rten mgon des khyed rnams srung gyur cig /dbang po'i rdo rje brdzun te lha yi dgra rnams nyams par gang gis byas shing stobs ldan 'phrog byed ni//shin tu rno zhing yid 'phrog mngon par me tog mnga' can dag la me tog can ni 'bras bu med/ /khyab 'jug 'khor lo la ni 'khor lo don yod min zhes skye bo'i tshogs kyis nges par brjod ces nas/ /mtshon tshogs bzung ba med par dgra yi skye bo dga' bas bcom pa mtsho skyes ldan pas rgyal gyur cig /'jig rten 'das pa'i bde ba 'dzin par gyur kyang 'gro ba'i sdug bsngal drag po dag gis sdug bsngal ldan/ /rtag tu rjes su chags pa btang bar gyur kyang skyabs med sdug pa'i srog chags gtong ba dag las grol/ /'jig rten gsum gyi mgon po nyid du gyur kyang mi mnyams sreng ldan 'gro la brten zhing 'dud pa bgyid//mtshungs bral bsam yas spyod pa sgrub mdzad mgo la sangs rgyas gang des khyed rnams yun ring srung gyur cig /rgyun mi 'chad par 'jig rten gsum du dpe med mnyes gshin snum blugs sbyor ba dag las zhi bar ni/ /gang zhig mi gshegs stobs ldan mi chung mu stegs rlung 'tshubs dag gis rab tu rnam par mi g.yo zhing //gzhan phan rgyu la brtson pa rab brtan sdong bu mi nyams 'od zer dang ldan srid pa'i khang par ni/ /gti mug mun nag rab tu 'thibs pa sel byed 'jig rten dbang po'i sgron ma de yis rgyal gyur cig /gang du 'di ni kun la byams ldan mi bzad mang por gyur pa'i nyon mongs dgra rnams ci la bsreg /gang du grol bar nus pa'i mthu ldan snying rje'i zhags pa brtan pos g.yo ba med par ci la 'ching / /gang du btang snyoms phyogs nyid la brten gzhan la phan par bgyid slad ci la 'khrug ste de yi phyir/ /rnam bkra ngo mtshar phyag na pad+ma'i spyod pa 'gro las 'das pas khyed rnams dman las rgyal gyur cig /kun la phan zhing kun gyi rang bzhin du gsal rgya che tshul ldan dus kun du ni kun gyi mgon/ /kun gyi don chen thams cad sgrub slad gang zhig 'dul ba'i sgrub byed rnam pa kun ni ster bar bgyi/ /bla mar gyur cing che ba'i yon tan kun gyis kun las 'das shing khengs pa kun ni zhum par bgyid//kun ni kun la rab sbyin mgo la kun mkhyen des ni srid chen khyed rnams 'bras dang bcas gyur cig /dbang po rje bo skye dgu rnams bdag 'chi med bla ma 'jig rten skyong ba dag dang dbang po che/ /'od ldan dang ni dgra thul dbyug pa gzhan las rgyal ba'i stobs ldan las rgyal nor sbyin rgyal ba'i zhabs//don ldan ming gi snod ni rgyal ba nyid ces khong bshad kyis khengs 'khor gyi skye bos smras pa las/ /lha mi skye bo ngo mtshar gyur rnams gang la phyag bgyid phyag na chu skyes de yis rgyal gyur cig /gtso bo 'phags pa rnams kyi mchog gyur bsdoms pa dag ni pha rol phongs pa rab tu sel ba'i mchog /rab tu mang ba'i mchog sbyin rgya che'i tshogs kyi chu yi char drag gsal zhing che ba'i rgyun tshogs kyi/ /sbyin pa mi dman rgyun 'dzin gyur cing bzlog dkar rab brten bdud kyi dgra yi dpa' bos mi thul ba/ /dpag med 'od zer 'dzin pa'i dpa' bo yis ni khyed rnams dag gi dpa' bos dgra rnams bzlog gyur cig /gang du phyag na pad+mo mdzes ldan nus pa mchog gyur mthu dang ldan zhing rtag tu sbyor ba la/ /'khor ba'i chu bdag lam zhugs 'jig rten mgon po mtha' dag mgon dang bcas zhes rnam par bsams nas ni/ /sangs rgyas snying rje mi chung kun gyi sgron mar gyur par don dang ldan pa dam bca'i khur po dag /rnam par dor nas yang zhing mya ngan 'das pa 'thob par dgyes 'phel de yis khyed rnams srung gyur cig /'gro ba'i bya ba'i tshogs kyi khur ni bla mar gyur pa'i bde gshegs bzhin du gtsug gis legs par blangs//bsngags par 'os pa pad+mo'i rgyan ni gus pa'i snod la rang nyid bzhin du lag tu legs par gtod/ /sems can tshogs kyis zhi ba dag ni dmyal me bzhin du yun ring 'thob par bgyid/ /gang gi nyon mongs rab 'ching rnams ni shin tu mi bzad 'gro ba bzhin du zhi mdzad des khyed srungs//gang zhig sgyu can min yang rang bzhin sna tshogs mtha' yas ston byed gsal bar grags pa'i rgyu dang ldan/ /'jigs kun yang dag zhi yang shin tu snying rje ldan pa nyid kyis 'jigs par gyur pa'i kun spyod mdzad/ /khro dang bral ba yin yang gdug pa'i bsam pa 'dul la mkhas pa'i khro ba rtag tu rjes su 'brel//bsam gyis khyab pa min yang chen pos bsam bya mgo la rdzogs sangs rgyas mdzes ldan des rgyal gyur cig /yan lag dam pa kho na ma lags sku lus mchog kyang dpag med 'od kyis mngon par dga' ba 'dzin/ /gang gi pad+mo kho na ma lags dgra sde dag kyang ci 'jigs bzod par dka' ba dag kyang san+nA lam//gang gis ral pa kho na ma lags nus pa dag kyang 'gro ba'i dgra 'joms byed par chas shing bsdangs/ /mkhas pa 'jig rten mgon 'dis gshin rje khros pa'i bzhin ni snang ba dag las khyed rnams srung gyur cig / ma lus sems can don gyi bya ba bgyi slad nus pa dag ni kun nas rab tu bstar byas shing / /chas kyis bsdams pa gang gi tshe na srid pa'i chu gter dag ni skams kyi dogs nas 'dar byed cing / /nyon mongs don mthun rab 'bros byang chub sems dpa' ngal so thub pa rnams kyang mya ngan 'das pa la//dge zhes bsngags shing gzhol byed mgo la bde gshegs gnas des khyed kyi rab 'dod dri ma zhi gyur cing / /bgegs kyi tshogs rnams gnod pa dag gis rnam par 'joms pa mi bzad yid kyi'ang spyod yul min pa'i las/ /gcig tu nges par bde ba gcod pa'i 'gro ba'i dgra bo bcad pa'i slad du phyag na pad+mo ni//dbang med myos bzhin shin tu 'jigs ldan rnam par mi 'gyur gang gis sko byed mgon po dag gi yang / /lci bar 'gyur ba'i jo bo brtse ba des ni khyed rnams brtse med mthar byed dag las srung gyur cig /zil gyis mnan pa'i sa nyid ma yin shin tu 'jam pa yin yang ji snyed 'jig rten mkhas mtha' yas//brtson 'grus shin tu bzlog bya ma yin dus gcig la yang rab tu snang ba dag gis khyab par byed/ /ma lus shin tu gsal ba ma yin gzi ldan gzi yang me khyer 'od kyi cha shas rjes mthun pa/ /'jig rten dbang phyug gzi brjid de yis 'jigs pa zhi slad khyed kyi gti mug mun chen 'phrog gyur cig /ma lus nam mkha'i khams ni skye bo bzhin du kun nas yongs su rdzogs par byas gyur re ba'i phyogs/ /ltung ba'i phung po thams cad snang ba bzhin du rnam par nyams par rab brtson phul byung med par bgyid/ /gang gi rdzu 'phrul che ldan yid kyi bdud ni mun pa'i tshogs dang lhan cig zhi bar 'gro bgyid pa//mtsho skyes ldan pa'i snang ba de ni khyed rnams dag gi rab mang 'byor ba 'phel ba'i slad gyur cig /gzhan gyi 'od rnams nyams byed dbang phyug cig shos 'od kyis mtshungs dka' mun pa'i phung po'i stobs 'bigs shing //sems can 'tshe ba'i bsam pa can rnams khyad par du ni gdung byed bkra ba'i 'od zer mi nyams pa/ /sna tshogs mtha' yas g.yo med la sogs bsgribs pa'i yul rnams dag ni gsal bar byed pa'i nus pa 'dzin/ /'jig rten dbang po'i snang ba gcig kyang 'chi med tshogs mtshungs de ni khyed kyi 'jigs sel slad gyur cig /gang du sems can ma lus rab mang 'dod pa'i chu la rgyu ba'i bde ba rnyed dka' phun tshogs shing / /don med mu stegs ngan pa'i skye bo ri bo lta bu rgal bar dka' ba'i gting du 'gro byed la/ /bzlog dka' kun nas rab rgyas 'gro ba'i srid pa nyams par byed pa'i rlabs phreng rab tu 'phel ldan pa//phyag na pad+ma'i 'od zer chu gter khyed kyi nags me'i 'jigs pa zhi slad rnam par 'phel gyur cig /chos kyi bdud rtsi'i chu bo gdul bya la yod gal te dmyal ba'i me rnams zhi ba 'di ni ci/ /bcing bar byas pa ral pa'i phung po la yod gal te dgra yi tshogs rnams 'gro ba bral ba ci//spyi bo'i khang par rgyal ba rab lci gnas gyur gal te mgon po 'jig rten gsum rnams dud pa ci/ /de ltar 'jig rten gnyen gyis rnam par bkra ba'i tha snyad dag gis khyed kyi dgra rnams 'joms gyur cig /mngon par dga' bas rgyas pa gcig pu nyid kyang sems can bsam pa'i dbang byas rnam pa tha dad pa//dbye dka' yang dag min pa'i rtog pa g.yo med mi g.yo dag la rtsom pa chen po rdo rje'i rtse/ /dam pa'i blo gros ku mu ti la zla ba'i 'od zer mu stegs don med can brjod mun pa la/ /nyams par byed pa'i nyi ma 'jig rten dbang pos gsungs pa'i bstan pa khyed kyi srid 'byed slad gyur cig /sna tshogs rnam par rtsod pa'i gnas kyi 'dun sar 'dus pa rgya cher dregs pa'i cha las smra ba po/ /bzlog dkar rab gyur bsnyon pa'i sgra chen ldan pa rkang mig la sogs dman pa dang bcas zhum gyur cing / /bag med myos pa'i skye bo rnams kyis rnam par ltung ba rab sel mkhas pa rnams kyi dga' skyed pa//mgo la rgyal ba'i sku lus 'od zer phun tshogs dag gi dngos po skye med gsung des rgyal gyur cig /dgra rnams dbang 'gyur rgyal ldan mtshon gang 'od zer tshogs ni rab tu mdzes shing 'gro ba dag gis bstod/ /mya ngan dmyal ba'i gnas rnams dag la rgya cher gdung ba rab tu 'joms byed rnam par rgyas pa'i chu//dgra yis 'phangs pa'i mtshon phreng dag la stobs ldan rdo rje srid gsum mtha' dag 'jigs par gyur pa rnams/ /nyams par bgyid pa la bsngags phyag na pad+ma'i phyag ni khyed rnams chags nyams med pa'i slad gyur cig /'jig pa'i 'thor rlung dag gis rab tu dkrugs ltar yul gyi ri bo rab mthor ljon pa'i phreng ba'i rtsa ba rnams/ /rtsad nas 'byin pa'i stobs dang ldan zhing dgra yi glang chen dregs pa mi chud nyams pa nyid du bgyid/ /slong ba'i sbrang rtsi byed 'gugs sbyin pa'i rgyun 'bebs 'jig rten dbang phyug phyag gi sdong po la dga' ba//bzang po dag ni khyed kyi dgra yi grong khyer srid pa 'joms pa'i slad du brtun te 'jug gyur cig /dam pa'i khongs ni gang zhig nor la sred ldan skye bo'i tshogs kyi re ba mi 'chad grub pa'i gter/ /gang zhig yu ba dag ni rdo rje'i rjes mthun dgra rnams skrag bgyid 'dab ma dam par gyur pa'i tshe//yang dag rdzogs zer pags pa'i byang chub dpal mos gnas bgyis yon tan bsngags par 'os ldan rnam par ma btang ba/ /'jig rten mgon po'i phyag gi yongs rdzogs pad+ma de ni khyed rnams dag gi grol ba'i rgyur gyur cig /rtag tu sred pa rnam par 'phel zhing mgrin pa'i phugs skams dman par gyur pa'i yi dags phung po rnams//kun tu dga' ba skyed byed dam pa'i bcud ldan mchog tu byang chub dpal mo lhag par gnas pa can/ /'byor 'dod yid dang ldan pa rnams kyis legs par bsten gnas dam pa'i pad+ma gsal zhing mdzes pa yi/ /tshogs kyis rab sbras ze ba dang ldan 'jig rten dbang po'i chu skyes gang des khyed rnams srung gyur cig /nyon mongs nyi ma sdug bsngal tshogs kyi 'od zer chung ba ma yin stug por gyur pa'i tsha gdung gis/ /gdung zhing dman pa'i skye bo gang dag rnams la tshad pa'i gdugs dang mtshungs par rjes su grub byed cing / /mi dman gdung bar mi 'gyur ma lus 'jig rten dag la ma tshang med 'od steng gi bla rer bris//'jig rten dbang po'i phyag na 'byor pa'i dri med pad+mos khyed kyi sdig pa nyams par 'gro gyur cig /stobs rnams kyi gnas bdag nyid che rnams che bar dar ba'i gzhi dang 'od zer grags pa dag gi khyim/ /dgra rnams skrag par 'gyur ba'i gnas dang brnag par dka' ba'i 'jigs pa 'joms pa'i sa gzhi nyid gyur pa//sdug cing mdzes pa'i bsti gnas dang ni 'gro las 'das pa'i brtson 'grus phung po rgya cher gyur pa'i gnas/ /'jig rten dbang po'i dpung pa 'gro ba rnams kyi dgra mang tshar gcod gtum po'i dbyug pa nyid gyur cig /gang zhig rnam mdzes bdud rtsi'i rgyun gyi 'gyur bag ldan yang dgra bo rnams ni 'jigs pa kho nar bgyid/ /mthong ba rtsol bar bgyid pa min nyid de lta na yang lta byed rnams kyi dga' ba chung ba min/ /rgyan rnams kun gyis rab tu mdzes pa'i khang pa yin yang 'gro kun rgyan rnams mdzes dang bral bar bgyid//'od ldan chu skyes can gyi gos ni gcig pu de yis khyed kyi bde min bde bar sel gyur cig /gang zhig rab mdzes rgya mtshor gzugs kyi mngon pa'i nga rgyal nub cing bsod nams snod kyi lta byed rnams/ /'gro ba 'bras bu dang bcas sred pa skyes pa yang ni mi gnas rab tu g.yo bas 'joms 'gyur ba//mtshungs med rab tu mdzes ldan ri bong mtshan ma can sogs grangs med rnams ni gcig tu bgyis sam zhes/ /snyam par 'gyur zhes de yi pad+ma las kyang rgyal ldan phyag na pad+ma'i bzhin des rgyal gyur cig /gang zhig rgyun chad med par mdzes pa'i chu tshogs ldan pa'i sprin rnams kyis bsgribs dgra rnams snod la ni//shin tu rab gsal lan cig ma yin 'tshig pa ster ba'i yul ngan du gyur lus can rnams la yang / /shin tu rjes 'brel dri ma mang po'i snag tsha'i 'dam gyi tshogs kyis rab tu bsgos rnams 'khru bar bgyid/ /mgo la sangs rgyas khang ba'i bzhin ni shin tu bzhin bzangs khyed kyi rnam bkra'i bya ba mdzad gyur cig /phyag na bzhad pa'i chu skyes dag gis skyo ba med pa'i ral pa'i thor tshugs dag ni rab gsal zhing / /che bar brtsigs te bkod pa'i nang na rnam bzhugs gsal ba dang 'dres 'od dpag med kyi 'od gsal tshogs/ /tha dad du byas 'od ni gsal ldan gyen du brtsams shing bcings ba'i steng gi stug po bkod pa ni//mdzes pas tshim pa mi mthong drag rnams rab 'jigs gsal zhing sgra ldan go chas khyed rnams srung gyur cig /rgyun chad med par rnam 'phro shin tu kun dga'i rgyur gyur 'od dpag med 'od chu yi tshogs lta bus//bran pa las ni shin tu phul byung dag cing mdzes pa'i 'phel ba rnyed gyur lhag pa'i dri bzangs can/ /lha yi me tog rmad byung tshogs rnams rdzogs pa'i pad+mo 'dzin pa'i ral pa dag gi ni/ /dpag bsam 'khri shing tshogs ni khyed rnams dag gi bsam pa'i don rnams phun tshogs 'grub pa'i rgyur gyur cig /gang zhig bcings par gyur kyang rnam par grol par nges par bgrod byed gang zhig lus la lhag gnas pa/ /gzhan rnams nges par spangs kyang thun mong min par mgon po 'od dpag med kyis rnam par brgyan par mdzad/ /dri bzangs thams cad spangs kyang gang zhig mtshungs med dri bzangs mang pos ma lus phyogs rnams 'gengs gyur pa//'jig rten dbang po'i shin tu che ba'i ral pa de yis khyed kyi nges par thob bya'i 'ching ba 'phrog gyur cig /ral tshogs ma lags skye bo ma lus rnams kyi yid ni 'ching bar bgyid pa zhags pa'i phung po lags/ / mdzes sdug ma lags 'on kyang sdug bsngal me yis rnam bcom 'gro rnams gso byed bdud rtsi dag gi rgyun/ /pad+mo ma lags ma rungs mthar byed rta rgod 'dul lcag rgyal ba'i ri bong can sbyar skra yi dpal/ /khyed kyi nyon mongs skyon rnams shin tu 'joms shing mngon par 'dod pa'i dngos grub sbyin par mdzad gyur cig /ma lus phyogs rnams sreg byed lhag par kun tu dmar ser gzi brjid ldan pa rnam par bkod gyur pa/ /'jig rten gsum po rmongs shing 'jigs la skyabs med za ba'i tshogs 'bar bskal pa'i me ltar brtag bya ba/ /so bsdams sdang mig rab tu 'bar ba'i rta mgrin dag gis rjes su kun nas gtad de gzigs pa las//mtshungs med brtse ldan 'jig rten dbang phyug skad cig 'jigs pa'i gzigs stangs skyes pas khyed rnams srung gyur cig /'jig rten rnams ni brlag par rab gtong gsal ba ma lus sa 'dzin che rnams di ring myur bar ni/ /phye mar 'gyur bgyid 'dzin par byed pa yang ste mtha' med chu yi gter rnams skam pa nyid bgyid pa//de ltas gang zhig khro ba bzung ste khro gnyer rab rgyas bsdus gyur 'jigs su rung ba'i dpral ba las/ /nges 'thon lha mo mtshungs med dpung stobs can gyis mthong nas skrag 'gyur mtsho skyes can des rgyal gyur cig /bstod 'os rnams kyis bstod cing bla ma rnams kyi'ang 'gro ba'i bla ma phyag bya rnams kyis phyag byas pa/ /mi nyung bskal par bsgrubs pa'i zol med nus ldan mtha' dag 'gro ba'i skyabs gyur mtshungs pa med pa yis/ /brtse ba rang nyid lus can bzhin du 'jig rten sdug bsngal gzhil phyir pad+mo can las legs 'thon pa//sgrol ma yis ni khyed kyi 'khor ba'i btson ra'i nang du lci bar gyur pa'i gdung byed 'phrog gyur cig /tshig mtha' ldan pa'i tshogs kyis grangs ni bgrang bar lci zhing tshig bdag mchog gi tshig gi sde tshan yang / /rjes su gzung bar nus pa ma yin ngang pa'i 'gros dang drag po'i tshig rnams kyis kyang gsal bar ni//brjod par rtogs dka' brjod bya min pa'i tshogs ni cha shas chung ngus gus pas brjod de yongs rdzogs pa/ /bde gshegs tshig gis yang dag brjod bya chu skyes ldan pa'i yon tan tshogs kyis khyed rnams srung gyur cig skye ba'i skye ba rnams su spyan ras gzigs dbang gi//zhabs la gus shing rang bzhin shin tu drang ba dang / /blo gros mi g.yo gzhan phan bla ma'i bya ba dag /bya bar ldan zhing snyan ngag mkhan du'ang 'gyur bar shog /'jig rten dbang phyug gi bstod pa brgya pa/ snyan ngag mkhan chen po shrI badzra de ba zhes bya bas mdzad pa rdzogs so// //yon tan phul du byung ba dpag tu med pa dang ldan pa bla ma dam pa chos kyi rgyal po dang / mi'i dbang po dpon chen shAkya bzang po'i bka' lung gis/ rgya gar gyi mkhan po snyan ngag mkhan po ma hA paN+Di ta la k+sh+mI ka ra dang / bod kyi lo tsA ba dge slong shong ston gyis bsgyur ba'o/