CLOSE WINDOW

D2722
བོད་ཡིག

/rgyud lnga'i 'gro bas nyes pa kun spangs nas/ /mgon po 'od dpag med pa'i gnas thob shog /'phags pa don yod zhags pa'i dkyil 'khor gyi lha bcu bdun la don rtogs kyi sgo nas bstod pa dri ma med pa'i 'od ces bya ba rdzogs so//[ ]@##/ /rgya gar skad du/ pA pa bi dA ra Na ma na ha ra na nA ma lo ka nA tha sto tra/ bod skad du/ /'jig rten mgon po'i bstod pa yid 'phrog sdig 'joms zhes bya ba/ thugs rje chen po la phyag 'tshal lo/ /lha dang lha min mi yis zhabs la phyag byas shing / /skye rga na 'chi ma lus rab tu 'joms pa'i sku/ /'jig rten dbang phyug thugs rje ldan pa khyod kyis ni//mgon med bdag la bsrung mdzad thugs rje mdzad du gsol/ /'khor ba'i rgya mtsho'i klong dkyil du ni nub gyur te/ /nyon mongs dba' rlabs kyis ni yang dag nyams nyes shing / /tsho nges 'debs pa bdag la btang snyoms ma mdzad par/ /khyod la bstod bgyid thugs rje chen pos bsrung du gsol//srid pa'i rab rib kyis ni blo mig nyer gtses shing / /'chi ba'i 'jigs pa yis ni lus sems g.yengs gyur pa/ /ji srid mi bzad mnar med gnas su ma lhung ba/ /bcom ldan spyan ras gzigs kyis bdag la bskyab tu gsol/ /rmongs pas rgyun du gzhan gyi bud med bsten bgyis dang //srog chags stong phrag srog dang bral ba la sogs pa/ /mgon po bdag gis sdug bsngal rgyu ni tshang bar bgyis/ /lus kyi nyes pa de dag yang dag sbyang du gsol/ /gang zhig bkur sti'i ched dang 'tsho ba'i ched du ni/ /'jig rten mi bden brdzun tshig brlang po la sogs pa//'jig rten dbang phyug ngag gi nyes pa'i kun sbyor yang / /dmyal ba'i rgyu de yun rings ma lus goms par bgyis/ /sems can rnams la rang gis gnod pa gang bgyis dang / /gzhan gyis bgyis pa la ni rjes su yi rang ba'i/ /bdag gis yid kyi sdig de dag ni smre sngags su//'don zhing mchis pas bsal du gsol dang mgon po kye/ /lha dang mi dang lha min skye ba rnams dang ni/ /dud 'gro dang ni dmyal ba yi dags rnams su yang / /sdug bsngal dang bcas 'gro ba gang gnas de dag la/ /bsrung ba mdzad ces khyod kyi lo rgyus bdag la khums/ /des na bdag la thugs rje yang dag mdzad du gsol//g.yar lus dar la bab pa yal bar nyams la khad/ /de phyir ji srid dmyal ba'i gnas su ma zhugs par/ /bcom ldan khyod ni bdag gis zhu ba gsan par mdzod/ /gzhan yang gzhan don la ni rang nyid gshegs mdzad na/ /bsod nams ma bsags bdag ni spyan sngar mchis kyang spong //khyod kyi thugs rje bsod nams dag la ltos sam ci/ /sdug bsngal med la snying rje bya bar su lags na/ /dran pa tsam gyis khyod ni yongs su mnyes nas su/ /sdig zad mdzad ces bdag gis ma khums lags sam ci/ /de phyir bcom ldan gzhan phan mdzad la phul du byung //bdag 'dir ma dor bsrung dang bskyab pa mdzad du gsol/ /glang chen dag dang nor bu sras bcas btsun mo dang / /gnod med rgyal srid khang bzangs rnam par bkra ba dang / /sha dang rus pa dbu ni sku mtshal mthar thug btang / /grub pa'i mig sman rkang pa byug pa dag dang ni//grub pa'i gnod sbyin dang ni gnod sbyin mo dag kyang / /'jig rten mnga' bdag khyod ni mnyes par gang su dag /don gnyer rnams la mthar thug ma mchis sbyin par mdzad/ /gang dag rkang pa lag pa mig dang bral rnams dang / /sna tshogs bro 'tshal gyis ni 'jigs pa dang bcas rnams//yon tan zab mo khyod mnyes pa yis de dag gi/ /yan lag sobs 'gyur bro 'tshal dag kyang zhi bar 'gyur/ /mkha' lding sbrul gdug gnod dang mkha' 'gro ma dang ni/ /rnal 'byor ma yi gnod kun rtag tu zhi mdzad cing / /rgyal ba khyod kyis gang la dgongs pa de la ni/ / gshin rje'i pho nya rmi lam du yang mthong mi 'gyur/ /mgon po bdag ni 'jigs pas rnam par g.yengs pa yis/ /nyin dang mtshan du lag pa gyen du brkyang ste ngu / /'jig rten dbang phyug des na bdag ni 'gums pa dang / /nye ba lags na bcom ldan skyabs med 'bor ram ci/ /yul dang dbang po gdul dka' sems kyang g.yo ba dang //mnyam par ma bzhag lus kyis sdig pa mang po bgyis/ /nyams pa bdag gi 'khor bzhin du ni skye ba 'dir/ /thams cad kyis ni sdig pa 'ba' zhig bsgrubs par zad/ /de phyir da ltar khyod la thal mo sbyar nas ni/ /'jig rten dbang phyug gang gis ngan song sdug bsngal dag /myong mi 'gyur bar khyod kyi spyan sngar bde 'gror ni/ /mchi bar bdag zhu 'di ni gnang bar mdzad du gsol/ /khyod ni 'dod chags zhe sdang rnam par 'joms pa'i sku/ /khyod ni 'khor ba'i mtsho chen gyi ni chu lon lags/ /khyod ni ltung bas skrag pa 'dren pa'i lag pa ste/ / khyod ni brjed bcas mi dge 'dzin pa'i sgra gcan lags/ /khyod ni bde gshegs bla med de nyid ston pa po/ /khyod ni sdug bsngal mang ldan 'gro ba'i skyob byed yin/ /khyod ni yid 'joms gdul dka'i bdud las nges brgal ba/ /khyod ni srid pa'i rgya mtsho'i pha rol brgal ba lags/ /khyod ni nad pa ma lus nad ni rgyun gcod sku//khyod kyi sku ni 'gro ba'i nang na mchog tu mdzes/ /khyod ni dpe med thugs rje'i rgya mtsho chen po ste/ /khyod ni rgyu med gnyen du 'gro ba rnams kyis rtogs/ /khyod kyis g.yo ba'i dbang po 'bad pa med par btul/ /khyod ni yul la chags pa yongs su bcom pa lags//khyod kyi thugs ni bsam gtan mchog la mnyam par bzhag /khyod kyi thugs ni slong ba kun la snyoms par mdzad/ /thugs rje ldan pa gzhan la phan par mdzad kyang ni/ /mi rig sbrul chen rgyab tu zhon nas yul rnams kyi/ /'dod pas dge ba nyams par gyur pa bdag la 'dir/ / khyod ni gang gis yongs su dgyes par mi mdzad lags/ /khyod kyi spyan sngar g.yar chab 'byin cing smre ba yi/ /sdig ldan bdag la gang gis bsrung ba mi mdzad na/ /mgon po 'gro ba kun rten thugs rje gang lags pa/ /de ci khyod kyis nyi tshe ba ru bskyed lags sam/ /mgon po khyod kyi thugs rjes nam mkha' khyab pa yi//sprin byung char pa'i rgyun ni chu dang skam dag dang / /mthon dman yul ni kun la 'bab cing sems can gyi/ /don du kun la nyin mtshan rgyun mi 'chad du 'jug /de ltar bcom ldan dran pa'i bdag gi bsod nams gang / /des ni 'gro ba'i sdug bsngal mang ldan de dag gis/ / 'gro nang mdzes pa rnam mang rnam par rol pa yi/ /po ta la yi ri rtser gnas pa thob par shog /'jig rten dbang phyug gi bstod pa yid 'phrog sdig 'joms zhes bya ba/ shar phyogs ba ren Da'i slob dpon mkhas pa chen po tsan+d+ra go mis mdzad pa rdzogs so// //rgya gar shar phyogs ba ren Da'i dzA ga ta la'i paN+Di ta chen po dA na shI las bsgyur ba/