CLOSE WINDOW

D2696
བོད་ཡིག

rgya gar gyi mkhan po pradz+nyA barma dang / zhu chen gyi lo tsA ba ban+de ye shes sde la sogs pas bsgyur cing zhus te gtan la phab pa'o// //[ ]@#/ /rgya gar skad du/ Ar+ya a nan+ta mu kha nir+ha ra d+hA ra Ni TI kA/ bod skad du/ 'phags pa sgo mtha' yas pa sgrub pa'i gzungs kyi rgya cher 'grel pa/'jam dpal gzhon nur gyur pa la phyag 'tshal lo/ /rdzogs sangs rgyas dang chos dang ni/ /dge 'dun la yang phyag 'tshal nas/ /mtha' yas sgo sgrub gzungs kyi don/ /mdor bsdus rnam par dbye bar bya/ /rdzogs pa'i sangs rgyas sras dang bcas pa shes bya kun gyi yang dag thugs su chud gyur pa'i//spyod yul zab mo'i gzungs 'di ji ga bdag 'dra nyon mongs blo zhan pa yis ga la lcogs/ /de ni gnas ma yin par shin tu mngon bzhin 'on kyang gzungs don rnam par dbye bar bya/ /bdag ni dad pas gus par bskul la gzhan dbang blo can dag gis mi bya ci yang med//'jig rten ma lus yang dag 'dod pa'i dngos po sgrub pa yi/ /mthu dang ldan pa ma yin dman zhing don kyang ma byas pas/ /bdag ni tshe rabs phyi ma la yang skye bo 'di 'dra bar/ /'gyur du dogs phyir 'di lus rab tu dbye bar bya/ / gleng bslang ba dang gleng gzhi dang / /'dus pa dang ni dgos pa la/ /yang dag brtags nas don chen phyir/ /zhu ba la ni nan tan byas/ /don phye bas na thub pa la/ /rgya cher mkhyen par gsol ba dang / /thub la gsol ba 'debs pa dang / /dam bca' mngon du phyogs bya dang / / bsrung dang gzungs kyi ngo bo dang / /de la bstod dang phan yon dang / /'thob pa'i thabs dang phan yon dang / /de yi sngon byung brjod pa dang / /chos kyi rnam grangs che nyid dang / /ming zhus pa dang bya ba gnyis/ /yi rangs par yang bstan pa ste/ /'di la 'dir ni mdor bsdus pa'o/ /mdo 'dir don rnam pa bcu dgus bstan te de la yang dag par sdud par byed pas bdag nyid tshad ma nyid du brjod pas yang dag bsdu bar bya ba'i don phyin ci ma log par bstan pa'i phyir thog mar gleng bslang ba bstan te/phyin ci ma log par bstan pa de yang gdul bya'i skye bo the tshom med par 'di la gzung pa'i phyir ro//de'i 'og tu gleng gzhi ni bstan pa'i gzhir gyur pa'i phyir de bstan to/ /de nas bstan pa'i gnas de yin pa'i phyir dang / /de'i dgos pa yin pa'i phyir 'khor rnams 'dus pa bstan to/ /de nas 'khor 'dus pa mthong nas dgos pa la brtags pa'i zhu ba bya ba bstan to//de nas de ltar dgos pa la brtags te gzhag pa'i don bcom ldan 'das la mkhyen par gsol ba bstan to/ /de nas mkhyen par gsol ba'i don la dgos pa yod pa'i phyir des na de nyid kyi phyir bstan par dam bca' ba bstan to/ /de nas dris pa dang lan gdab pa'i che ba nyid brjod pa'i phyir 'dri ba po mngon du phyogs par bya ba bstan to//de nas bdud la sogs pas gnod pa byed pa bsal ba'i phyir kun nas bsrung ba bstan to/ /de nas bsrung ba rnyed pa la sems can rnams 'di la gus pa bskyed pa'i phyir dang / yon tan phun sum tshogs pa thams cad kyi rten yin pas 'dri ba po'i don 'dod pa bsgrub pa'i phyir che ba nyid brjod pa'i don du gzungs kyi ngo bo bstan to//de nas sems can rnams spro ba bskyed pa dang / lhag par gus pa bskyed pa'i phyir che ba nyid brjod pa'i don du gzungs kyi ngo bo nyid de la bstod pa bstan to//de nas 'bras bu yang dag par bstan pas kyang sems can rnams de la gzung ba'i phyir gzungs kyi ngo bo'i phan yon brjod do/ /de nas gzungs kyi 'bras bu thos nas mchog tu dga' ba dga' ston lta bu skyes pas thob par bya ba'i thabs tshol bas de'i 'og tu de thob par bya ba'i thabs bstan to//de nas de la gus par 'jug par bya ba'i phyir dang / gzungs kyi ngo bo'i che ba nyid brjod par bya ba'i phyir/ de thob par bya ba'i thabs la 'jug pa'i phan yon bstan to/ /de nas de'i 'og tu gzungs la sogs pa'i 'bras bu de la nges pa shin tu brtan pa bskyed pa'i phyir sngon byung ba bstan to//des 'dod pa'i don rab tu bsgrubs nas kyang brjod par bya ba dang brjod pa la gus pa bskyed pa'i phyir/ de'i 'og tu chos kyi rnam grangs kyi che ba nyid mjug sdud par byed do/ /de nas chos kyi rnam grangs kyi che ba nyid thob ste dga' ba skyes nas tha snyad du bya ba'i phyir ming zhu'o//de nas chos kyi rnam grangs kyi 'bras bu'i bye brag yang dag par bstan pa'i phyir ming 'dogs so/ /de nas mdo yongs su rdzogs pa na/ bcom ldan 'das chos ston pa don med pa ma yin par bstan pa'i phyir/ /thams cad kyang skal ba ji lta ba bzhin du 'bras bu thob par gyur to zhes rab tu bstan pa'i don du yi rang ba bstan te/don de dag gi sbyar ba ni de lta bu yin no/ /de la/ bsgrub bya sgrub pa'i bye brag gis/ /gleng bslang rnam pa brgyad du bstan/ /mdor na 'di la bsgrub bya gsum/ /sgrub pa rnam pa lngar 'dod do//'di ltar gleng bslang ba ni bsgrub par bya ba dang sgrub pa'i bye brag gis rnam pa gnyis su 'gyur te/ bsgrub par bya ba ni yang dag par sdud par byed pas bdag nyid tshad ma nyid du bya ba yin te/ de'i tshig gis chos kyi rnam grangs 'di la gzhan dag gis nges pa bskyed pa'i phyir dang /nges pa skyes nas mi rnams nan tan byed pa la gnas pas 'dod pa thob par 'gyur gyi/ de lta ma yin na mi 'thob par bstan pa'i phyir ro/ /tshad ma nyid du bya ba de yang yul dang / lus dang / rang gi ngo bo dang rnam pa gsum gyis bstan te/ de la yul ni mdo'i don 'og nas 'byung ba rnams so//lus ni bdag nyid de yang dag par sdud par byed pa'o/ /rang gi ngo bo ni rna ba'i rnam par shes pas nges par 'dzin pa ste/ 'di skad ces bya ba la sogs pa'i tshig gsum gyis de dag go rims bzhin du bstan to/ /sgrub pa ni rnam pa lngas bstan te/ dus kyi bye brag ni dus gcig na zhes bya ba ste/de yang gang gi tshe gong ma dang sbyar na de'i tshe 'khor rnams kyi nges pa bskyed pa'i phyir bdag nyid mang du thos par bstan te/ 'di ltar bdag gis dus gcig na 'di thos kyi dus gzhan na yang gzhan dag thos so/ /de bas na bdag ni mang du thos pa yin te/de'i bdag gi tshig ni yid ches par bya ba yin par bstan pa'i phyir ro/ /gang gi tshe 'og ma dang sbyar na de'i tshe dus gcig na bcom ldan 'das grong khyer yangs pa can na bzhugs kyi dus gzhan gyi tshe ni gud na yang bzhugs te/ de bas na yul de dag kyang legs pa 'dod pa rnams kyis bsten par bya ba yin par bstan to//byed pa po'i bye brag ni bcom ldan 'das zhes pa ste/ bdud bzhi bcom pa'am/ dbang phyug la sogs pa'i yon tan dang ldan pas byed pa po khyad par du 'phags te/ 'di ni 'di lta bu zhig gis bstan pa las ni phyin ci ma log pa yin no//sa gzhi 'di ni 'di lta bu zhig gnas pa las na bsod nams kyi khyas par dang ldan pa yin gyi the tshom ma byed cig par bstan pa'i phyir ro/ /bya ba'i bre brag ni bzhugs te zhes bya ba ste/ lha dang tshangs pa dang / sangs rgyas la sogs pa'i gnas pa rnams kyis gnas pa'o//yang na rdzu 'phrul la sogs pa rnam pa sna tshogs kyis gdul bya rnams kyi sems 'phrog pas gnas pa ste/ /'di gnyis kyis ni bcom ldan 'das tshul yongs su dag pa dang / gzhan la phan 'dogs pa'i bya ba la mkhas par yang bstan to/ /yul gyi bye brag ni yul yangs pa can na tshal chen po'i khang pa brtsegs pa'i khang bzangs na zhes bya ba ste/de yang rnam pa gsum ste/ longs spyod pa'i phyir nye ba dang rab tu nye ba dang shin tu nye bar bstan to/ /nye ba dang rab tu nye ba dang / shin tu nye ba dag gis ni 'jig rten gyi gus pa'i khyad par chung ngu dang /'bring dang chen po bskyed pas bsod nams kyi phung po'i khyad par chung ngu dang 'bring dang chen po bskyed par bya ba'i phyir ro/ /tha gru che ba'i phyir yangs pa'o/ /yang na bram ze dang khyim bdag rnams 'byor ba rgya chen pos de na gnas pa'i phyir yangs pa'o/ /zha 'bring ba'i bye brag ni bsod nams che bar bstan pa'i phyir ro//de yang rnam pa gnyis te/ zha 'bring ba nyan thos kyi bye brag dang / zha 'bring ba byang chub sems dpa'i bye brag go/ /de la zha 'bring ba nyan thos kyi bye brag ni rnam pa lngas bstan te/ yon tan ni chen po zhes bya ba ste/ byams pa la sogs pa'i yon tan gyi che ba nyid dang ldan pa'i phyir ro//nyon mongs pa spangs pa ni dge slong zhes bya ba ste/ nyon mongs pa bcom pas na dge slong yin pa'i phyir ro/ /de kho na shes pa bskyed pa ni dge 'dun zhes bya ba ste/ chos kyi de kho na nyid mngon sum du byed pas bdud la sogs pa dag gis phyed par dka' bas dge 'dun yin pa'i phyir ro//tshul khrims ni dge slong zhes bya ba ste/ so sor thar pa'i sdom pa thob pas dge slong yin pa'i phyir te/ de'i phyir don gyi bye brag gis dge slong lan gnyis su smos so/ /grangs ni brgyad stong zhes bya ba ste/ grangs brgyad stong du nges par chad pa'o//zha 'bring ba byang chub sems dpa'i bye brag ni rnam pa gsum du bstan te/ grangs ni rab tu mang po zhes bya ba ste/ zha 'bring ba nyan thos pas lhag pa'i phyir rab tu mang po yin no/ /shes rab dang thabs dang ldan pa ni/ byang chub sems dpa' zhes bya ba ste/ sgra 'di gnyis ni shes rab dang thabs la bya bar don yod zhags pa'i mdo las 'byung ba'i phyir ro/ /stong pa nyid la gnas pa dang ldan pa ni sems dpa' chen po zhes bya ba ste/ chos thams cad kyi ngo bo nyid med pa chen po la sems dpa'i phyir ro/ /yang na sems can gyi khams ma lus pa yongs su bskyab pa'i bsam pa dang ldan pa ste/bsam pa che ba'i phyir ro/ /yang na smon lam chen po dang ldan pa ste/ sngon byang chub tu smon lam btab pa'i phyir te/ de bas na de dag gi bsam pa che ba'i phyir sems dpa' chen po smos so/ /de ltar na rnam pa lngas bdag nyid tshad ma nyid du bsgrubs te/'di ltar 'jig rten na yang log par zhugs pa la/ dus dang yul dang bya ba la sogs pa dran par byed pas brda sprod pa snang ba'i phyir ro/ /ji skad bstan pa'i dgos pa yang zhar la 'grub ste/ chur ba la sogs pa'i don byed pa na zho la sogs pa yang 'grub pa bzhin no//da ni gleng gzhi brjod par bya ste/ gleng gzhi thub pas gsungs pa 'di/ /de yis gdul ba'i dbang mdzad nas/ /rnam pa lnga dang ldan pa ste/ /phongs pa rnam pa gsum du 'dod/ /gleng gzhi des gdul ba rnams la dgongs par mdzad nas/ bcom ldan 'das kyis gleng gzhi rnam pa dang ldan pa bka' stsal to//gleng gzhi de ni gzungs bstan pa'i phyir te/ 'di ltar bcom ldan 'das sku rus pa rdo rje ltar sra ba'i sku mnga' ba yang mi rtag par yang rtogs te/ lhag par ches skyo ba skyes nas gzungs mnyan pa'i snod du 'gyur zhing myur du bsgrub par yang 'gyur bas de'i phyir bcom ldan 'das kyis bstan to//'jig rten na yang 'chi ba'i tshe snod du gyur pa dag kho na la zhes pa ston par byed pas de'i phyir de dang 'dra bar chos kyi rnam grangs 'di nyid chos thams cad kyi nang na gces par ston cing gtso bo yin par yang ston to/ /rnam pa lnga dang ldan pa ni 'di lta ste/thugs rje chen po dang ldan pa ni/ de yang bcom ldan 'das kyis zhes bya bas bstan te/ 'di ltar dbang phyug la sogs pa'i yon tan dang ldan bzhin du/ sku tshe'i 'du byed dag 'dor bar mdzad pa ni thugs rje chen po med par mi rung ngo / /smon lam chen po dang ldan pa ni/de yang dran pa dang ldan zhing zhes pas bstan te/ sngon bcom ldan 'das kyis bdag gi srog yongs su btang bas kyang sems can gyi don bya'o zhes smon lam btab po/ /de'i phyir dran pa dang ldan bzhin du sku tshe'i 'du byed dag bor te/ sngon gyi smon lam dran pas bor ro zhes bya ba'i tha tshig go//shes rab dang ldan pa ni/ de yang mkhyen bzhin du zhes bya bas bstan te/ 'di ltar mkhyen bzhin du sku tshe'i 'du byed dag bor ro/ /de ni 'di skad du ci nas gzhan gyi don 'grub par 'gyur ba de ltar bor ro zhes bstan par 'gyur ro/ /phongs pa'i dngos po gtong ba dang ldan pa ni/tshe'i 'du byed dag gtang bar gyur to zhes bya bas bstan te/ de yang bcom ldan 'das kyis bdag cag gi phyir sku yongs su btang ba yang mdzad do snyam du 'dzin pa rnams bcom ldan 'das la gus pa bskyed pa'i phyir ro/ /phongs pa'i dngos po yang rnam pa gsum gyis bstan te/nang gi khyad par du 'phags pa dang / mang ba dang / yongs su gtong ba'i yul gyis bstan to/ /tshe rnams btang bar gyur to zhes bya bas kyang chog na/ 'du byed smos pa ni tshe'i rdzas gud na med par bstan pa'i phyir ro/ /dgos pa dang ldan pa ni/de yang 'di dag ces bya ba la sogs pas bstan te/ de yang bcom ldan 'das ni dgos pa mngon du gtong bar bstan pa yin no/ /dgos pa de yang rnam pa lngas bstan te/ nye ba mngon sum gyi dngos po bstan pa dang / grangs bstan pa dang / dus bstan pa 'di gsum ni/sangs rgyas kyis gdul ba'i sems can yongs su smin par mdzad pa'i dus 'dir zad do zhes bstan pa'i phyir ro/ /'das pa bstan pa dang / yongs su mya ngan las 'da' bar bstan pa 'di ni/ sangs rgyas kyis gdul ba'i sems can yongs su smin par mdzad pa'i dus med par 'gyur ba bstan pa'i phyir ro//gal te tshe'i 'du byed rnams btang bar gyur na/ 'di dag ces bya ba la sogs pa'i tshig ji lta bu zhe na/ smras pa/ 'di dag la sogs tshig gis ni/ /de dag byin gyis brlab par bstan/ /zla ba gsum po 'di dag 'das nas yongs su mya ngan 'da'o zhes bya ba'i tshig 'dis tshe'i 'du byed de dag byin gyis brlab par bcom ldan 'das kyis bstan to//de ni bdud gnyis bcom pa yis/ /gdul ba la ni thugs brtse phyir/ /'chi bdag dang phung po'i mtshan nyid kyi bdud gnyis bcom pas gdul ba gang yin pa de la thugs brtse ba'i phyir byin gyis brlab pa de mdzad de/'chi ba la dbang bar bstan pa'i phyir ni btang ngo / /phung po la dbang mnga' bar bstan pa'i phyir ni byin gyis brlabs te de ltar nges par gzung bar bya'o/ /yang na 'chi bdag dang phung po gnyis las bzlog ste shes par bya'o//yang na lhag pa rnams ni btang la/ zla ba gsum gyi dus tshun chad ni gzhag par khong du chud par bya'o/ /'di la yang bcom ldan 'das la bdud gnyis bcom pa mnga' ste sbyar bar bya'o/ /gdul ba'i bsam pa'i bye brag gis mya ngan las 'da' bar 'jug pa'i phyir/sprul pa'i skus ni mya ngan las/ /'da' bar 'dod kyi cig shos min/ /longs spyod rdzogs pa'i skus mya ngan las 'da' bar ni mi 'dod do/ /ci'i phyir zhe na/ gtan du gnas pa'i rgyu ldan pa/ /sangs rgyas rnams ni/ mya ngan 'da' bar yang mi rigs/gtan du gnas pa'i rgyu ni bsod nams dang ye shes kyi tshogs yin la/ de yang gus par bskal ba grangs med pa du mar rgyun du bsgrubs pa'i phyir phul du byung ba ste/ de bas na 'bras bu ni rgyu dang 'dra ba'i phyir/ de'i 'bras bu yang phul du byung ba yin pas longs spyod rdzogs pa'i skus mya ngan las 'da' bar ga la 'gyur/de lta ma yin du zin na chen po'i 'bras bu chung ngur gyur la/ chung ngu'i 'bras bu chen por 'gyur bas srog gcod pa spangs pa la sogs pa dang / tshe ring bar 'gyur ba la sogs pa dag rgyu dang 'bras bu'i dngos po nyid du mi 'gyur ba'i rigs so//gal te tshe dpag tu med pa zhig las bcom ldan 'das kyis sku tshe btang ba'i phyir mya ngan las 'das so zhe na ma yin te/ rdzu 'phrul gyi rkang pa bzhi po 'di dag ces bya ba la sogs pa gsungs pa'i phyir ro/ /yang zhes bya ba ni dam bcas pa ma rdzogs pa rnams mya ngan las 'da' bar mi rigs pa kho nar nges par gzung bar bya ste/dge ba gzhan yang dam bcas pa las 'gal bar mi byed na/ dge ba ma lus pa'i bla mar gyur pa/ sangs rgyas bcom ldan 'das rnams lta mdzad par ga la 'gyur ba de dag gis ni bdag cag gis sems can thams cad bla na med pa'i byang chub tu dgod par bya'o zhes bya ba la sogs par thugs dam bcas te/de bas na ji srid du gzung bar bya ba'i sems can gcig tsam yod pa de srid du de dag mya ngan las 'da' ba ni mi rigs pa dang / sangs rgyas kyis gdul ba'i sems can med du zin kyang brgya byin la sogs pa'i gzugs kyis gdul ba yod pa'i phyir ro//de bas na sprul pa'i sku kho nas mya ngan las 'da' bar 'dod de/ de ltar yang nges par gzung bar bya'o/ /sangs rgyas mya ngan yong mi 'da'/ /chos kyang nub par mi 'gyur te//sems can yongs su smin mdzad phyir/ /yongs su mya ngan 'da' ba ston/ /zhes bya ba la sogs pa gsungs pa'i phyir ro/ /da ni 'khor rnams bsdu ba bstan te/ /rdzogs sangs rgyas kyi mthus bstangs pas/ /ma bsgrims bsgrims dang bsgrims pa yis/ /'phyas su 'gyur ba bsal ba'i phyir//bsdu ba rnam pa gsum du gzhag /bcom ldan 'das kyis bsdu ba rnam pa gsum byed du bcug pa la/ ma bsgrims par bsdus pa ni maud gal gyi bu chen pos byas pa ste/ de bas na stong smos pa yin te/ 'jig rten gyi khams stong du ni nyan thos kyis kyang mngon par 'du bya mi dgos par byed nus so//bsgrims te bsdus pa ni shA ri'i bus byas pa ste/ de bas na der rdzu 'phrul mngon par bya bar smos so/ /bsgrims te bsdus pa cig shos ni/ byang chub sems dpa' chen po rnams kyis byas pa ste/ de bas na de bltas zhes smos te/ ting nge 'dzin gyi bye brag gis bskyed pa'i rtags kyis bye brag 'ga' la bltas zhes bya'o/ /'di dag thams cad kyang bcom ldan 'das kyis mdzad pa yin te/ dang po dang tha ma ni bkas mdzad do/ /bar ma ni mthus mdzad de/ bcom ldan 'das kyis gang gis ma mdzad pa'i rnam pa de med par bstan pa'i phyir ro//bsdu ba gsum po 'di lta bu bcom ldan 'das kyis mdzad pa 'di yang / la la 'di snyam du bcom ldan 'das ni gdul ba'i phrin las yongs su ma rdzogs par mya ngan las 'das so snyam du 'phya bar 'gyur ba bsal ba'i phyiro/ /de bas na nyan thos chen po la sogs pa smos so//de lta ma yin du zin na su yang rung ba la bcom ldan 'das kyis byin gyis brlabs na yang thams cad sdud nus pas nyan thos chen po la sogs pa smos ci dgos te/ smos pas na gang du bcom ldan 'das kyis 'di lta bu dag byin gyis brlabs te/ 'khor sdud pa der sangs rgyas kyis gdul ba'i sems can gang 'du bar mi 'gyur ba dang /yongs su smin par mi 'gyur ba su yang med do zhes ston to/ /de bas na gdul ba'i don yongs su rdzogs nas gdod bcom ldan 'das yongs su mya ngan las 'das so/ /btsun par mi 'gyur bsal ba'i phyir/ / thub pas mngon du ma mdzad de/ /gus pa bskyed par bya ba'i phyir/ /gzhan dag sdud par byed du bcug /bcom ldan 'das nyid kyi mdzad spyod mod kyi/ mi btsun par 'gyur ba bsal ba'i phyir gdul ba thams cad bdag nyid kyis bsdu ba ma mdzad do/ /de bas na gus pa bskyed pa'i phyir bcom ldan 'das kyis maud gal gyi bu chen po la sogs pa la sdud du bcug go//des 'dul dbang mdzad bcom ldan gyis/ /de gnyis mya ngan 'das par bstan/ /'dir ni de gnyis smos pa'i phyir/ /yang dag mya ngan 'das ma yin/ /'phags pa shA ri'i bu dang /maud gal gyi bu gnyis de'i snga rol du mya ngan las 'das pas gdul ba'i sems can rnams kyi dbang du mdzad nas bcom ldan 'das kyis de gnyis mya ngan las 'das par bstan pa yin gyi de gnyis la 'dir bskul ba mdzad pas yang dag pa'i don du de gnyis mya ngan las 'das pa ni ma yin no//bsdu ba gsum la sko ba dang / /bsko bar bya ba'i bya ba dang / /de yi 'bras bu go rims dag /bstan pa zad par 'dod pa yin/ /bsdu ba rnam pa gsum la yang mdor bsdu ba sko ba po'i bya ba dang / bsko bar bya ba'i bya ba dang / de'i 'bras bu dang / 'bras bu'i go rims bstan par khong du chud par bya'o//de la bsdu ba dang po la sko ba po'i bya ba ni mngon du phyogs par bya ba dang / bya ba la bsko ba'o/ /bya ba la bsko ba de la yang gtso bo ma yin pa'i bya ba dang / gtso bo'i bya ba dang rnam pa gnyis so/ /de yang song la zhes bya ba la sogs pas go rims bzhin bstan to//bsko bar bya ba'i bya ba ni bka' mnyan pa dang / de bzhin du sgrub pa ste/ de bzhin du bsgrub pa ni/ bcom ldan 'das kyis bka' stsal ma thag tu ri rab kyi rtse mo la 'dug ste/ skad cig gis go bar byas pa'o/ /skad cig de nyid la zhes bya ba ni bcom ldan 'das la gus par byed pa bstan pa'i phyir dang /gdul ba'i dus las yol ba bsal ba'i phyir dang / gdul ba'i bya ba dag la gus par byed pa bstan pa'i phyir ro/ /mngon par 'du byed pa med pa'i rdzu 'phrul dang ldan par bstan par yang mngon no/ /'di ni 'dug pa dang go bar byed pa gnyis ka la yang sbyar bar bya'o//rang gi rdzu 'phrul gyi stobs smos pa yang gnyis ka dang sbyar bar bya'o/ /ri rab kyi rtse mo smos pa dang / stong gi 'jig rten gyi khams su go bar byed pa 'di gnyis ni che ba nyid bstan pa'i phyir te/ 'dis ni gang na 'di lta bu'i sdud pa po yod pa der ni sangs rgyas kyis gdul ba su yang mi 'dul ba med par bstan to//go bar byed pa yang don rnam pa brgyad dang ldan te gus par nyams su len du gzhug pa'i phyir mngon du phyogs par bya ba'i don dang / rjes su chags pa la sogs pa med par shes par bya ba'i phyir mtha' dag gi don dang /bka' dang mthun pa'i don bsgrub pa'i phyir gzhi'i don dang / de kho na rtogs pa dag slob mar gyur te/ de lta bu dag la yang phan 'dogs pas chos kyi rnam grangs kyi che ba nyid bstan pa'i phyir chos kyi de kho na rtogs pa'i don dang / bskul ba la sogs pa'i ma longs pa med pa bstan pa'i phyir 'jug par bya ba'i don dang /de dag nyid la chos bstan pas phan 'dogs pa'i phyir chos 'dod pa'i don dang / rang gi don rab tu bstan pas de dag gi spro ba bskyed pa'i phyir 'bras bu nye bar bstan pa'i don dang / bsgrims pa med par 'dul bar bstan pa'i phyir rang dbang yod par bstan pa'i don to//de gnyis kyi 'bras bu yang rnam pa gsum gyis bstan te/ grangs dang / nyon mongs pa spangs pa dang ldan pa dang 'dus pa'o/ /de'i go rims kyang rnam pa bzhis bstan te/ mthong ba dang phyag 'tshal ba dang / bskor ba byed pa dang /'khod pa'o/ /de dag kyang dngos pos go rims su gyur par rig par bya ste/ lhags pa'i 'og tu thog ma kho nar mthong ngo / /de nas mthong bas lus tshim par gyur nas phyag 'tshal lo/ /de nas dad pa'i shugs mngon par 'phel nas bskor ba byed do/ /de nas go rims bzhin byas nas gong gi phyir lhags pa de'i phyir 'khod do//bsdu ba gnyis pa la sko ba po'i bya ba ni sangs rgyas kyi mthu ste/ mthu ni dbang yin no/ /bsko bar bya ba'i bya ba ni thabs dpyod pa dang / de'i 'bras bu dpyod pa dang / thabs sgrub pa dang / de'i 'bras bu bsgrub pa ste/ rtog pa mngon du gtong ba ni thabs dang de'i 'bras bu dpyad nas de bsgrubs pas 'bras bu 'grub par byed do//de bas na de dag go rims ni de lta bu yin no/ /'bras bu dpyod pa yang rnam pa lnga ste/ mtha' dag pa dag dang gzhi dang / gdul ba dang / de'i rab tu dbye ba dang / rang gi ngo bo ste/nyan thos kyi theg pa can la sogs pa smos pa'i phyir ro/ /byang chub mchog gi rigs yin la/ /blo zhan bshes gnyen dman bsten pas/ /gang dag dman pa'i lam bsten pa/ /de dag 'dir bkug shes par bya ste de lta ma yin na chos bstan pa 'di dag la phan med pas de dag bkug pas ci zhig bya ste/mdo rdzogs kyi bar du yang gzhan nas ji skad 'byung ba bzhin du/ nyan thos kyi theg pa can rnams kyis 'bras bu ni ci yang ma bstan la/ bcom ldan 'das kyis chos bstan pa ni 'bras bu med pa ma yin no/ /de lta bas na de dag la yang de'i tshe phyir mi ldog pa'i sa la 'god pa la sogs pa'i 'bras bu yod par nges par gzung bar bya'o//de bas na de dag ni sangs rgyas kyi rigs can kho na yin pa las/ ci zhig ltar gyur te/ theg pa gzhan la zhugs par shes par bya'o/ /'bras bu de'i go rims kyang rnam pa bzhi ste/ snga ma bzhin du nges par gzung ngo //bsdu ba gsum pa la sko ba po'i bya ba ni/ mngon du phyogs par bya ba dang / bya ba la sko ba'o/ /de dag rnam pa bzhi dag gis/ /mngon du phyogs par mdzad pa na/ /bsdu ba'i mtha' dag nyid dang ni/ /chen po nyid kyang rgyal bas bstan/ /mngon du phyogs par bya ba yang rnam pa bzhi ste/ting nge 'dzin thob pa ni/ mthong ba don yod ces bya ba'i ting nge 'dzin te/ de thob pa'i phyir byang chub sems dpa' yang mthong ba don yod ces gsungs pa dang / ting nge 'dzin de'i 'bras bu thob pa ni/ ting nge 'dzin 'ga' zhig 'bras bu mthong ba don yod pa nyid de/de thob pa'i phyir mthong ba don yod ces gsungs pa dang / smon lam gyi 'bras bu thob pa ni/ /sngon gyi smon lam gyi 'bras bu thob par bya ba'i phyir/ mthong ba don yod ces gsungs pa dang / yon tan bsgrubs pa'i 'bras bu thob pa des gang gis mthong ba don yod par gyur pa de lta bu'i yon tan bsgrubs pas na de'i phyir mthong ba don yod gsungs pa'o//de'i mthong ba don yod pa nyid ni/ de mthong ba 'bras bu med par mi 'gyur ba'i phyir ro/ /de bzhin du byang chub sems dpa' thams cad la yang sbyar bar bya'o/ /rnam pa 'di dag gis bsdu ba'i mtha' dag nyid dang /chen po nyid bstan te/ sdud pa po rnams che ba'i phyir ro/ /bya ba la bsko ba ni rnam pa gnyis te/ gtso bo ma yin pa'i bya ba dang / gtso bo'i bya ba'o/ /gtso bo ma yin pa'i bya ba yang rang gi ngo bo dang / yul gyis rnam pa gnyis su 'gyur te/ yul ni thams cad kyi zhes bya ba la sogs pa ste/ de phan chad nas sangs rgyas kyis gdul ba med pa'i phyir ro/ /gtso bo'i bya ba ni mtha' dag dang / gdul ba'i rang gi ngo bo dang / de'i dbye ba dang / gzhi dang / rang gi ngo bos bstan te/ de'i gdul ba'i rang gi ngo bo bstan pa ni/ nyan thos la sogs pa gzhan sangs rgyas kyis gdul ba med pa'i phyir ro/ de'i dbye ba bstan pa ni/ de snyed cig gi dbye bas tha dad pa'i byang chub sems dpa' rnams bkug pa'o/ /nyan thos la sogs pa gang yin pa de dag dgug pa la shin tu dka' ba ci zhig yod na ma bkug par zhe na/ de'i phyir de dag la des gdul ba med par bstan pa'i phyir ro//srid pa tha ma pa ni tshe 'di nyid la mngon par rdzogs par 'tshang rgya ba'o/ /skye ba gcig gis thogs pa ni tshe phyi ma la mngon par rdzogs par 'tshang rgya ba'o/ /phyir mi ldog pa ni sa brgyad pa thob pa rnams so/ /mi skye ba'i chos la bzod pa thob pa ni rab tu dga' ba la sogs pa'i sa thob pa rnams so//dad pas mos pa ni mos pas spyod pa'i sa thob pa rnams so/ /srid pa tha ma pa smos pa ni chos kyi rnam grangs kyi che ba nyid bstan pa'i phyir te/ bsod nams dang ye shes kyi tshogs yongs su rdzogs pa rnams la yang phan 'dogs pa yin pa'i phyir ro//bsdu ba zhes bya ba 'di ni gzhan yin la/ de yang bsdu bar bya ba'i bya ba brjod par 'dod na rung ste/ de lta na bsgrims te bsdu ba 'di ji ltar rung zhe na/ nyes pa med de 'di ltar gang zhig bsgrims te bsdu ba dang / gang yang bsgrims ni mi dgos pa/ / brjod par 'dod pa 'di la 'di/ /'jig rten spyod pa'i tshul gyis 'jug /bya ba ma sbyar du zin kyang nus pa la sogs pa mthong ba'i dbang gis sgra 'di 'jig rten na sbyor te/ tshong ba'i grong nan gyis sdus shig ces bya ba la sogs pa dang 'dra bas na nyes pa med do/ /bsko bar bya ba'i bya ba ni/bka' mnyan pa dang / de bzhin du bsgrub pa'o/ /de'i 'bras bu dang / de'i go rims kyi don ni phal cher gong du thal bas rnam par mi phye'o/ /legs so zhes bya ba'i sgra ni 'dir de ltar 'tshal lo zhes bya ba'o/ /brjod du med pa ni grangs kyi bye brag yin te/ des kyang brjod du med pa'o//yang na brjod du med pa'i yang / brjod du med pa nyid grangs kyi bye brag yin te/ brgya zhes bya ba la sogs pa bzhin no/ /de yang bye ba khrag khrig phrag 'bum gyi bye brag yin no/ /da ni dgos pa brtags nas phan pa che ba dang / gdul ba'i bye brag dang /gus pa'i bye brag dang / ston pa po'i bye brag dang / dgos pa'i bye brag dang / rnam pa lngas zhu ba bstan to/ /ston pa po ni bye brag rnam pa gsum gyis khyad par du 'phags te/ gang phyir de bzhin gshegs pa ni/ /skyon dang nyon mongs phung po bstsal/ /don kun yang dag mkhyen pa ste//de phyir rgyal la zhu bar 'os/ /gang gi phyir phyin ci ma log par gsungs pas na de bzhin gshegs pa ste/ de'i phyir zhu bar 'os te/ de yang nyon mongs pa dang shes bya'i sgrib pa spangs pa'i phyir ro/ /de'i de yang don thams cad yang dag par mkhyen pa'i phyir ro//yang na gang gi phyir yang dag par rdzogs pa'i sangs rgyas yin pa de'i phyir zhu bar 'os te/ de'i de yang nyon mongs pa dang shes bya'i sgrib pa spangs pa'i phyir ro/ /de'i de yang de bzhin gshegs pa yin pa'i phyir te/ bde bar gshegs pa rnams kyis bgrod pa dang / rjes su bgrod pa'i lam du gshegs pa'i phyir ro zhes bya ba'i tha tshig go//dad pas mos pa la sogs pas/ /gong nas gong du 'thob pa'i phyir/ /gdul bya'i bsam pa'i bye brag gis/ /don ni rnam lngar bstan pa yin/ /dgos pa'i bye brag ni rnam pa lnga ste/ dad pas mos pa rnams kyis mi skye ba'i chos la bzod pa 'thob pa dang /mi skye ba'i chos la bzod pa thob pa rnams kyis phyir mi ldog pa'i sa 'thob pa dang / de rnams kyis skye ba gcig gis thogs pa nyid 'thob pa dang / de rnams kyis kyang srid pa tha ma pa nyid 'thob pa dang / srid pa tha ma ba rnams kyis kyang gzungs kyi sgor 'jug pa 'thob pa'o//sdug bsngal la sogs yul rnams la/ /[(]ner[,]nem [)]nur byed pa som nyir bstan/ /de spangs sa thob 'di yin par/ /'dir ni don gyis bstan pa yin/ /don gyis na sdug bsngal la sogs pa'i bden pa la dmigs pa'i the tshom spangs na/ dad pas mos pa rnams kyis sa thob par bstan to//som nyi spangs pas sdug bsngal la sogs pa'i bden pa mthong bas spang bar bya ba'i nyon mongs pa'i tshogs kyang spangs par khong du chud par bya ste/ de dag ni cig car spong bar 'gyur ba'i phyir ro/ /thams cad ces smos pa ni bden pa bzhi la dmigs pa'i som nyi bsdu ba'i phyir ram/chung ngu la sogs pa'i bye brag gis tha dad pa bsdu ba'i phyir ro/ /phyir mi ldog pa'i sa ni 'dir/ /rnam pa gnyis kyis 'thob par bstan/ /sa dang po thob pas mi skye ba'i chos la bzod pa thob pa rnams kyis ni rang gi stobs dang gzhan gyi stobs rnam pa gnyis kyis phyir mi ldog pa'i sa thob par bstan to//sgrib pa med pa ni nyon mongs pa dang shes bya'i sgrib pa spangs pa'i phyir te/ ye shes dang spobs pa gang la yod pa de'i ngo bo ni zhes bya bar tshig rnam par sbyar ro/ /yang na sgrib pa med pa ni thams cad mkhyen pa'i ye shes te/ 'dis snang bar byed pas de'i ngo bo nyid de yin pas yang nges par gzung bar bya'o//'dis mi g.yos pa'i sa bstan te/ de ni rang gi stobs yin no/ /gzhan gyi stobs ni rnam pa gsum gyis bstan te/ dge ba'i bshes gnyen du ma la brten pas/ thos pa las byung ba'i shes pa 'thob pa dang / bsams pa las byung ba'i shes pa 'thob pa dang /bsgoms pa las byung ba'i shes pa 'thob pa ste/ des dran pa brjed par mi 'gyur ro/ /yang na chos bstan pa nyan pa dang / de'i don 'dzin pa dang / dus gzhan na mi brjed pa dang / de ltar na dge ba'i bshes gnyen mchog la brten nas/ bla na med pa'i byang chub tu nges par gyur pas phyir mi ldog par bstan pa'i phyir/bar du zhes pa la sogs pa zhus so/ /skye ba gcig gis thogs rnams kyis/ /sa ni rten bzhis thob par 'gyur/ /phyir mi ldog pa rnams kyis ni rnam pa bzhis skye ba gcig gis thogs pa'i sa 'thob par 'gyur te/ spyod pa sbyin sogs pha rol phyin//tshogs kyis rnam pa gnyis su 'gyur/ /gsum ni bsod nams pha rol phyin/ /lhag ma ye shes cig shos gnyis/ /sbyin pa dang / tshul khrims dang / bzod pa'i pha rol tu phyin pa gsum ni bsod nams kyi tshogs so/ /bsam gtan dang / shes rab dang / thabs dang / smon lam dang / stobs dang / ye shes zhes bya ba ni ye shes kyi tshogs so/ /brtson 'grus ni gnyi ga ste/ gnyi gar bya ba byed pa'i phyir ro/ /spyod pa des thob par bya ba ni yongs su dag pa rnam pa bzhi ste/ des skye ba gcig gis thogs par 'gyur ro/ /des gdul phyir ni gnas pa dang //bstan pa don yod mtshungs pa med/ /smon lam 'bras bu 'grub pa dang / /dga' mgur zhing ni ston par byed/ /smon lam gyis bsgrubs pa'i bsod nams dang ye shes kyi tshogs kyi stobs kyis byang chub sems dpas gdul ba nyid du sems can rnams gnas pa ni sems can yongs su dag pa'o//mdo sde la sogs pa chos bstan pa don yod cing mtshungs pa med pa'i 'bras bu dang ldan pas na chos yongs su dag pa'o/ /smon lam ma lus par 'bras bur 'grub pas na smon lam yongs su dag pa'o/ /gdul ba'i bsam pa'i bye brag gis ci 'ga' 'gyur zhing kun du ston pas na zhing yongs su dag pa'o//yang na/ sems can la sogs rnam dag ni/ /sems can chos don gnyer dang zhing / /rang bzhin bdag med mthong ba yin/ /de ni 'dod pa'i don grub byed/ /'dis yongs su dag par 'gyur bas na yongs su dag pa ste yongs su dag pa bzhi ni/sems can la sogs pa bdag med par mthong ba nyid do/ /bdag med par mthong ba las byang chub sems dpas gdul ba nyid du sems can rnams gnas pa zhes bya ba la sogs pa lngar bstan pa'i 'dod pa thams cad 'grub par 'gyur ro//don du gnyer ba zhes bya ba ni smon lam mo/ /da ni skye ba gcig gis thogs rnams kyis/ /srid pa tha ma pa'i sa ni rten bzhis 'thob par 'gyur bar bshad ces bya ba tshig gi lhag ma'o/ /gdul ba rnams kyi bye brag gis/ /lus sogs yid du 'ong bar gnas/ /thams cad mkhyen pa'i yon tan gyis//tshogs kyi gzhi yang skye ba yin/ /lus dang ngag dang yid de dag ni gdul ba'i bsam pa'i bye brag gis dus gcig tu gnas na yang de dag yid du 'ong ste/ de dag rjes su mthun pa'i phyir ro/ /thams cad mkhyen pa'i yon tan rnams kyi rten du gyur pa'i phyir skye ba yid 'ong ngo //yang gi sgra ni/ bkag pa'i las lus la sogs pas mi spyod pa'i phyir dang / ma bkag pa kun du spyod pa'i phyir dang / skye ba 'jig rten thams cad kyi don du gnyer bar bya ba yin pa'i phyir/ lus la sogs pa yid du 'ong / /zhes bya ba'o zhes bsdu ba'i don to/ / da ni srid pa tha ma pa rnams kyis gzungs kyi sgor 'jug pa ji ltar 'thob par 'gyur ba bstan te/ gzungs ni rnam gsum gang gi phyir/ /tshig dang don dang gnyi ga'i gzungs/ /legs pa las ni nyams pa na/ /'dzin par byed pas de phyir gzungs/ /legs pa ni bdag dang gzhan gyi don phun sum tshogs pa'o//de yang phan pa dang phan pa ma yin pa 'thob pa dang / spang ba'i mtshan nyid de/ srog chags de las nyams pa na 'dzin par byed pas gzungs so/ /bdag dang gzhan gyi don 'grub phyir/ /gzungs nyid sgo mo sgo yin no/ /de la 'jug pa de shes pa/ /de yang rnam bzhir bstan pa yin//'di ltar grangs med pas sam/ dus mtha' yas pa nas zhugs pas mthu zad mi shes pa mi zad pa'i sgo thabs rnams kyis sems can yongs su smin par byed pa'am/ bdag dang gzhan gyi don phun sum tshogs pa sgrub pa ste/ de gzungs kyi sgor 'jug pa gang la yod pa zhes tshig rnam par sbyar nas/gzungs kyi sgor 'jug pa zhes pa'i sgras khyad par du tshig bsdu'o/ /dad pa la sogs pa'i dbang po rnams la mkhas pa gzungs kyi sgor 'jug pa gang la yod pa zhes tshig rnam par sbyar nas snga ma bzhin du khyad par du tshig bsdu'o/ / dbang po la mkhas pa ni chung ngu la sogs pa'i bye brag dang / yongs su smin pa'i dus la sogs pa'i bye brag la spyod pa'o/ /'di la 'du byed pa med pas na las dang rnam par smin pa la mkhas pa 'dus ma byas pa'o/ /'dus ma byas pa ni ma bsgrims par 'jug pa ste/ de gzungs kyi sgor 'jug pa gang la yod pa zhes tshig rnam par sbyar nas snga ma bzhin du khyad par du bsdu'o//yang na las dang rnam par smin pa la mkhas pa dang / 'dus ma byas gnyis la gzungs kyi sgor 'jug pa zhes bya bar rig par bya'o/ /de la 'dus ma byas pa ni stong pa nyid yin par gzung bar bya'o/ / las rnam par smin pa'i rang gi ngo bo dang / dus dang gnas skabs dang / yul la sogs pa'i bye brag las dpyod pa ni las dang rnam par smin pa la mkhas pa'o/ /chos zab mo la bzod pa'i gzungs kyi sgor 'jug pa gang la yod pa de zhes tshig rnam par sbyar nas/ snga ma bzhin du khyad par du tshig bsdu'o//sems can rnams zhes bya ba ni 'og ma gnyis dang yang 'brel par rig par bya'o/ /yang na/ zhu ba 'di ni mdor bsdu na/ /byang chub sems dpa' kun la yang / /gang la ji snyed 'os yin pa/ /de la de snyed 'gyur ba yin/ /'di ltar dad pas mos pa'i dbang du byas na ni/'di dag thams cad yod par blta bar bya'o/ /mi skye ba'i chos la bzod pa thob pa'i dbang du byas na ni som nyi thams cad spong ba ma gtogs par/ zhu ba lhag ma rnams yod par nges par gzung bar bya'o/ /de bzhin du byang chub sems dpa' gzhan dag la yang ci rigs par bya'o//da ni bcom ldan 'das la zhu ba mkhyen par gsol ba ston te/ zhu ba'i 'bras bu blo ldan gyis/ /zhu ba nyid du rab tu gsungs/ /yang na 'bras dang tha dad pas/ /sgro btags zhu ba nyid du gsungs/ /zhu ba zhes bya ba'i sgra ni 'phags pa shA ri'i bus zhu ba'i dngos po'i 'bras bu gang yin pa som nyi thams cad spong ba la sogs pa de yin par gsungs te/'bras bu la rgyu btags pa ste/ mjug gi 'bras bu'i tshig mi mngon par byas pa'i phyir ro/ /de lta ma yin du zin na zhu ba'i rang gi ngo bo nges par ma byas pa'i phyir/ de dag ces bya ba'i sgra dang sbyor bar byed pa mi rigs te/de ltar na zhu ba de dag la zhu ba'i 'bras bu de dag ces bya bar khong du chud par bya'o/ /ji skad smos pa zhes bya ba ni rang gi ngo bo yin no/ /gzung ba zhes bya ba la sogs pa'i tshig gsum ni/ tshig 'bru dang / don dang / gnyi ga'o/ /yang na nyan thos dang /rang sangs rgyas dang / theg pa chen po'i theg pa can rnams la phan gdags pa'i phyir ro/ /bdag dang gzhan dang gnyi ga'i don 'grub pa'i phyir yang brjod par shes par bya'o/ yang na rang gi ngo bo dang / rab tu dbye ba gnyis kyis ni gzung ngo / /so so rang gis rig par spyad pas ni yid la byas so//tshad ma thams cad kyis rnam par dag pas ni kun chub par byas so/ /rnam pa gzhan yang ji skad smos pa'i 'bras bu'i bye brag gis zhu ba'i rang gi ngo bo dmigs kyis ma phye ba dmigs kyis phye nas/ de dag ces bya ba la sogs pa brjod de/ ji skad smos pa'i 'bras bu zhes bya ba'i tha tshig go/ /gzung ba la sogs pa'i tshig gsum gyi bshad pa 'dir ni bshad pa bar ma gnyis la ltos par shes par bya'o/ /de ltar zhu ba mkhyen par gsol ba bstan nas/ de ni bcom ldan 'das la gsol ba 'debs te/ tshig dang don dang gnyi ga dang //thos sogs shes pa'i bye brag dang / /mngon sum rjes dpag rnam gnyis kyis/ /rnam par dag pa rnam gsum mo/ /gzung ba dang / yid la byas pa dang / kun chub par byas pa rnams ni/ tshig dang / don dang / gnyi ga'am/ thos pa dang / bsams pa dang /bsgoms pa'i shes pas/ yongs su bcad pa'am/ mngon sum dang / rjes su dpag pa dang / tshad ma gnyi gas rnam par dag pa las rnam pa gsum du go rims bzhin du shes par bya'o/ /de la bshad pa dang po la zhu ba'i 'bras bu ni zhu ba'i sgras brjod do zhes bstan te/ de ltar na 'di skad du gang gis zhu ba'i 'bras bu 'di 'grub par 'gyur ba dang / de las thos pa la sogs pa'i shes pas bsdus pas spyod pa yongs su dag par 'gyur ba de lta bu'i zhu ba bcom ldan 'das kyis bshad du gsol zhes bya ba'i tha tshig go/ /bshad pa gnyis pa la ji skad smos pa zhes bya ba ni ji skad smos pa zhes bya ba'i 'bras bu khong du chud par bya ste/de ltar na 'di skad du zhu ba gang las 'bras bu 'di 'grub par 'gyur ba dang / thos pa la sogs pa'i shes pas bsdus pas spyod pa ji ltar yongs su dag par 'gyur ba de lta bu'i zhu ba bcom ldan 'das kyis bshad du gsol zhes bya ba'i tha tshig go//de nas spyod pa de ni gang yin/ de'i rnam par dag pa ni ji lta bu/ de'i 'bras bu ni ci zhig 'thob par 'gyur zhe na/ smras pa/ spyod pa pha rol phyin pa bcu/ /yang na stong nyid de yi ni/ /rnam dag skyon med sa thob pas/ /thams cad mkhyen pa'i go 'phang 'thob//spyod pa ni sbyin pa la sogs pa pha rol tu phyin pa bcu ste/ spyad par bya ba yin pa'i phyir ro/ /yang na stong pa nyid de/ de rtogs na mi dmigs pa'i tshul gyis sbyin pa la sogs pa la spyod pa'i phyir ro/ /pha rol tu phyin pa rnams kyi skyon ni 'khor gsum dmigs pa dang /ser sna la sogs pa'i dri ma'o/ /stong pa nyid ni dngos po dang / dngos po med pa la sogs pa'i ngo bor mngon par zhen pa'o/ /de med pas skyon med pa nyid kyis mtshan nyid kyi dri ma med pa ni de dag gi rnam par dag pa'o/ /des rab tu dga' ba la sogs pa'i sa thob pas rnal 'byor can gyis thams cad mkhyen pa'i go 'phang 'thob par 'gyur te/'di ltar sbyin pa la sogs pa pha rol tu phyin pa rnams phul du phyin par rnam par dag pa la bstan nas/ go rims bzhin du sa bcur rnam par gzhag ste/ de'i 'og tu thams cad mkhyen pa'i go 'phang 'thob par 'gyur ro//stong pa nyid rnam par dag pa las kyang bstan te/ kun du 'gro don zhes bya ba la sogs pa ji skad bshad pa lta bu'o/ de ltar gsol ba btab nas/ da ni gus pa bskyed par bya ba'i phyir dang / che ba nyid bstan pa'i phyir gsol ba btab pa'i don la bcom ldan 'das kyis mngon du phyogs par mdzad nas/zhal gyis bzhes so/ /zhal gyis bzhes pa de yang nyan pa po'i bye brag dang / rang gi ngo bo rnam pa gnyis kyi phyir ro/ nyan pa po'i bye brag ni rnam pa bzhir gsungs te/ nyan pa dang / legs par nyan pa dang /rab tu nyan pa dang / yang dag par yid la byed pa ste/ snod ni khas phub rdol ba dang / /mi gtsang ba yi gnyen po'am/ /gzu bo la sogs yon tan ldan/ /khyod kyis nyon la gzhan du min/ /gang phyir tshad ma ldan pas na/ /thog ma bar dang tha mar dge/ / chung ngu 'bring dang chen po yi/ /nyes pa rnams ni zad byed dang / /tshig 'bru don dang gnyi ga shes/ /mngon sum la sogs mi 'gal ba/ /thos la sogs las blo bskyed dang / /bdag sogs 'byor ba'i rgyu yin phyir/ /char pa 'bab na bum pa khas phub pa'i nang du chu cung zad kyang mi 'gro ba de bzhin du/khyod snod khas phub pa lta bur nyan par ma byed cig bya ba'i phyir/ legs par zhes gsungs so/ /bum pa rdol ba'i nang du ni chu song du zin kyang gnas par mi 'gyur ba de bzhin du khyod nyan par ma byed par/ ci nas thos pa brtan par 'gyur ba de lta bur nyon cig ces bya ba'i phyir rab tu zhes gsungs so//bum pa mi gtsang ba'i nang du ni chu ci song ba de dag thams cad mi gtsang bar 'gyur te/ spyad du mi rung ba de bzhin du/ khyod kyis tshul bzhin ma yin pa yid la byed pa'i mi gtsang bar ma byed cig ces bya ba'i phyir/ tshul bzhin yid la zung shig ces gsungs so//yang na gzu bo lta bu dang / don du gnyer ba dang / rtog pa can du gyis la nyon cig ces gsungs te/ legs par zhes bya ba la sogs pa'i tshig dang go rims bzhin du sbyar ro/ /de ltar byas na khyod kyis mnyan pa 'bras bu yod par 'gyur gyi/de lta ma yin na mi 'gyur bar dgongs pa'o/ /yang na gang gi phyir thog ma nyid du tshad ma dang ldan pas dge ba de'i phyir legs par nyon zhes gsungs so/ /gang gi phyir tha mar yang dge ba de'i phyir rab tu nyon cig ces gsungs so/ /gang gi phyir tha mar yang dge ba de'i phyir tshul bzhin yid la byos shig ces gsungs so//yang na nyes pa chung ngu dang 'bring po dang / chen po rnams kyi gnyen po yin pa'i phyir legs par zhes bya ba la sogs pa'i tshig dang go rims bzhin du sbyar ro/ /yang na tshig 'bru dang / don dang / gnyi ga 'dzin du gzhug pa'i phyir/legs par zhes bya ba la sogs pa'i tshig dang go rims bzhin du sbyar ro/ /yang na mngon sum dang / rjes su dpag pa dang / tshad ma gnyi ga dang mi 'gal ba'i phyir/ legs par zhes bya ba la sogs pa'i tshig dang go rims bzhin du sbyar ro/ / yang na thos pa las byung ba las sogs pa'i shes rab rnam pa gsum gyi rgyu yin pa'i phyir/ legs par zhes bya ba la sogs pa'i tshig dang go rims bzhin du sbyar ro/ /yang na bdag dang / gzhan gyi don dang / gnyi ga'i don gyi rgyu yin pa'i phyir/ legs par zhes bya ba la sogs pa'i tshig dang go rims bzhin du sbyar ro//yang na mthong ba la sogs pa'i lam gsum gyi rgyu yin pa'i phyir/ legs par zhes bya ba la sogs pa'i tshig dang go rims bzhin du sbyar ro/ /don gsol zhal gyis bzhes pas na/ /de yis bdag nyid gsol bar phyogs/ /thub pa sems can don mkhyen phyir//'dir ni bsrung ba la sogs gsungs/ /de ltar 'tshal zhes bya ba la sogs pa ni/ mngon du phyogs par mdzad pa bstan to/ /da ni bsrung ba bstan te/ de yang rnam pa gnyis te/ bsam gtan gyi rnal 'byor dang / gsang sngags kyi yi ge'o/ / de la bsam gtan gyi rnal 'byor ni/ /yang dag tu na de chos kun/ /dngos po'i ngo bor khas mi len/ /rkyen la rag las 'byung phyir te/ /sgyu ma rmi lam smig rgyu bzhin/ /dgag par bya ba med pas na/ /yang dag tu na bdag med mngon/ /yang dag mkhyen te chos rnams kun//thams cad dngos por 'dzin mi mdzad/ /chos thams cad ni rkyen la rag las te 'byung ba'i phyir dang / sgyu ma la sogs pa bzhin du/ yang dag par na dngos po'i ngo bo nyid ma yin no/ /de bzhin du skyes pa la sogs pa'i ngo bo nyid kyang yang dag par med do zhes brjod par bya'o//de ltar gyur na chos thams cad yang dag par dngos po yod pa ma yin pa'i phyir/ yang dag par dgag pa dang 'brel pa ma yin te/ mo gsham gyi bu'i sngo bsangs la sogs pa bzhin te/ dgag par bya ba med pas dgag pa yang mi 'jug pa'i phyir ro/ /mi mthun pa rtag pa yin na ni/dgag pa yang de dang 'dra bar 'gyur te/ de ltar na chos thams cad don dam par dngos po med pa'i ngo bo nyid ma yin no/ /de bzhin du ma skyes pa la sogs pa'i ngo bo nyid kyang ma yin no zhes sbyar ro/ /yang na/ tshad ma ldan pa ma yin pas/ /yod med la sogs mtshan nyid du//de ni chos kun khas mi len/ /de phyir mkhas pa 'dzin mi byed/ /mngon par zhen par mi byed ces bya ba'i tha tshig go/ /tshad ma dang mi ldan pa'i ngo bo ni bshad zin to/ /de phyir de ni stong pa min/ /mi stong ma yin yod med min/ /mi skye ma yin skye min zhes/ /bya ba la sogs bcom ldan gsungs//bsam gtan gyi ni lam 'di yis/ /gsang sngags tshig rnams bsams na ni/ /'bras bu rdzogs par thob 'gyur gyi/ /'dod pa nyi tshes de lta min/ /rnal 'byor can bsam gtan gyi rnal 'byor 'di la gnas shing gsang sngags kyi yi ge rnams brjod na/yid la 'dod pa'i 'bras bu rdzogs par 'thob par 'gyur gyi/ sems phyi rol du bltas pas bton na ni gsang sngags rnams ngo bo nyid shin tu bsam gyis mi khyab pa dang ldan pas 'bras bu 'thob par lta 'gyur mod kyi rdzogs par ni ma yin no/ /tshig rnams re re'i rnal 'byor la//mngon du phyogs par byed bzhin du/ /gsang sngags ran par brjod bya ste/ /de phyir 'dir ni tshig smos so/ /myur ches pa dang / dal ches pa dang / mi gsal ba la sogs pa'i nyes pa dang bral ba ni ran pa nyid de gsang sngags kyi yi ge rnams la sems gtod pa'o//tshig re re'i rnal 'byor la mngon du phyogs par byed cing gsang sngags ran par brjod par bya ste/ de bas na tshig smos so/ /de lta ma yin na/ gzungs kyi gsang sngags gzung bar bya/ /zhes de skad 'byung ba'i rigs so/ /yi ge re re bsam pa yi//rnal 'byor sus kyang mi nus te/ /tshig re nas ni nges par yang / /brjod par bya bas de smos so/ /de smos zhes bya ba ni tshig smos pa'o/ /gal te yi ge re re la rnal 'byor du byed nus na lta rab tu legs pa yin no/ /gal te mi nus na tshig re re la ni bsgrims te yang bya dgos te/'di ltar/ rnal 'byor med pa'i gsang sngags 'di/ /de ltar 'bras bu ston mi 'gyur/ /gsang sngags tshig ni gsang sngags te/ /de phyir rnal 'byor med mi bya/ /'di'i don ni brda phrad par zad do/ /gzungs kyi don gyi gsang sngags kyi tshig rnams yin pas gzungs kyi gsang sngags kyi tshig rnams so//da ni gzungs kyi ngo bo brjod par bya ste/ gsungs pa'i ming ni 'dogs pa dang / /'thob pa'i thabs ni bstan pa dang / /des shes bya la sogs tshig gis/ gzungs ni 'og nas 'byung ba nyid/ /gang gi phyir bcom ldan 'das des/ /'di ni shA ri'i bu byang chub sems dpa' sems dpa' chen po'i chos thams cad mi 'dzin pa la 'jug pa zhes bya ba'i sangs rgyas rjes su dran pa zhes bya'o zhes bya ba la sogs pas sangs rgyas rjes su dran pa gsungs pa'i ming 'dogs par mdzad do/gang gi phyir de nas bcom ldan 'das kyis yang zhes bya ba la sogs pas ni 'thob pa'i thabs bstan to//gang gi phyir des sgo mtha' yas bsgrub pa'i gzung 'di bsgrubs te zhes gsungs pa de'i phyir/ bdag ni sangs rgyas rjes su dran pa 'og nas 'byung ba nyid gzungs yin par 'dzin to/ /de lta ma yin gyi gsang sngags kyi yi ge rnams gzungs nyid yin na ni/'di rigs pa dang ldan par mi 'gyur te/ skabs ma yin pa'i phyir te/ sangs rgyas rjes su dran pa bstan pa'i skabs kyis bar du chod pa'i phyir dang / gsang sngags kyi yi ge rnams ni yi ge'i 'bru dang / sgra'i bdag nyid yin pas mig dang rna ba'i rnam par shes pas nges par gzung ba yin pa'i phyir ro//de bas na/ 'di zhes gsungs pa brjod bya min/ /'og nas 'byung ba'i chings thugs la bzhag nas/ 'di zhes bya ba gsungs so/ /'dzin pa 'dir ni don las bzhed/ /rlom sems mngon par zhen pa ste//mi dmigs phyir na de med do/ /'dzin pa ni 'dir don la rtogs par bzhed kyi/ yi ge las ni ma yin te/ yi ge 'dzin pas ni phan yon 'di dag 'thob par mi 'gyur ro/ /rlom sems ni mngon par zhen pa yin pas de ltar na 'di ltar 'gyur ro/ /'dus byas dang 'dus ma byas kyi chos rnams la rlom sems su mi byed ces bya ba ni mngon par zhen par mi byed ces bya ba'i tha tshig go//ci'i phyir mngon par zhen par mi byed ce na/ de'i phyir dmigs par mi byed ces gsungs so/ /yang na ngo bo nyid med pa'i phyir 'dus byas dang 'dus ma byas kyi chos rnams la ngo bo nyid dang bcas par rlom sems su mi byed par nges par gzung bar bya'o//mi sdug gnyi ga ma yin sdug /sdug pa de yang rnam gnyis 'dod/ /chos rnams thams cad thub pa yis/ /rnam pa bzhir ni bsdu ba mdzad/ /chos rnam pa bzhi ni mi sdug pa'i ngo bo nyid dang / gnyi ga ma yin pa'i ngo bo nyid dang / sdug pa'i ngo bo nyid de/ de dag kyang zag pa dang bcas pa dang / zag pa med pa'i bye brag gis rnam pa gnyis te/ de bas na rnam pa bzhir 'gyur ro/ /ji ste ci'i phyir chos rnams rnam pa bzhir bstan par mdzad ce na/ smras pa/ gnod sems gti mug 'dod chags rnams//de yi sgo nas 'byung phyir ro/ /spang ba'i thabs ni bsgrub pa'i phyir/ /de dag dngos po med par bstan/ /zhe sdang ni me sdug pa las 'byung / gti mug ni dngos po rnam pa gsum char las 'byung / 'khor ba'i rtsa ba ni 'dod chags la sogs pa yin te/ de bas na de dag spang ba'i thabs bstan pa'i phyir/ dngos po rnam pa gsum po de dag ngo bo nyid med pa ston par mdzad de/ ji skad du/ des gang chags par byed pa'i chos de dag yang dag par rjes su mi mthong ngo zhes bya ba la sogs pa gsungs pa lta bu'o/ /gang gi phyir 'dus byas dang 'dus ma byas kyi chos rnams la rlom sems su mi byed pa de'i phyir/mi sdug pa rnams la smod pa mi byed de/ bshung bar mi byed ces bya ba'i tha tshig go/ /bar ma rnams la btang snyoms su mi byed de/ de dag gi rjes su chags pa dang / khro ba'i yul ma yin pa'i phyir/ btang snyoms su gzhag par bya ba rnams so//sdug pa rnams len par mi byed de/ srid pas bdag gir byed pa ni len pa yin pa'i phyir ro/ /sdug pa zag pa med pa la brtson par mi byed de/ de dag ni rab tu mngon par 'du byed pa chen pos bsgrub par bya bas brtsam par bya ba yin pa'i phyir ro/ /'di la thob bya rnam 'thob dang //de dag nyid ni bsgom pa dang / /spang bya rnams ni spang ba dang / /'phel ba thams cad yin par bzhed/ /'thob par bya bar 'os pa gang yin pa de dag ni 'thob par bya ba rnams so/ /de dag kyang zag pa med pa'i chos rnams dang / zag pa dang bcas pa'i chos rnams te/bsam gtan dang / gzugs med pa dang / mngon par shes pa dang / nam mkha' mdzod kyi ting nge 'dzin la sogs pa'o/ /bsgom par bya ba ni de dag nyid brtan par bya ba'i phyir yang dang yang du goms par bya ba'o/ /spang bar bya ba ni zag pa dang bcas pa rnams te de dag ni spang bar 'ong ba'am/spang bar 'os pa'i phyir ro/ /'thob par bya ba dang / bsgom par bya ba'i 'phel ba ni gong nas gong du khyad par 'thob pa'o/ /spang ba'i 'phel ba ni gong nas gong du nyon mongs pa spangs pa nges par 'thob par 'gyur ba'i phyir ro/ /gang gi phyir 'dus byas dang /'dus ma byas kyi chos rnams la rlom sems mi byed pa/ de'i phyir rnal 'byor can de ni/ /thos dang bsam la sogs byung ba'i/ /shes pa rnams kyis nam du yang / /'dus byas 'dus ma byas kyi chos/ /de dag 'thob sogs sbyor mi byed/ /'thob par bya ba'i phyir thos pa dang /bsam pa dang / bsgoms pa las byung ba'i shes pa rnams kyis go rims bzhin du sbyor bar mi byed pa'i phyir mi byed/ rnam par mi byed/ mngon par 'du mi byed ces gsungs te/ spang ba la sogs pa la yang de bzhin du brjod par bya'o/ / yang na chung 'bring chen po yi/ /sbyor ba rnams kyis sbyor mi byed/ /'thob par bya ba'i phyir go rims bzhin du mi byed ces bya ba la sogs pa gsungs te/ spang ba la sogs pa la yang de bzhin du brjod par bya'o/ /de bzhin zag bcas slob sogs kyi/ /lam rnams kyis kyang sbyor mi byed//rnal 'byor pa de 'thob pa la sogs pa la zhes bya bar snyegs te/ sogs pa smos pas ni mi slob pa'i lam bsdu'o/ /ci'i phyir 'dus byas dang / 'dus ma byas kyi chos rnams mi dmigs pas de'i phyir rlom sems su mi byed ce na/ de'i phyir mtshungs par ldan pa'i chos rnams zhes bya ba la sogs pa gsungs te/rgyu dang rkyen nam chags sogs kyi/ /bag nyal rnams dang ldan de dag /'dir ni mtshungs ldan shes bya ste/ /bzlog pa las ni ldan pa min/ /rgyu dang rkyen rnams dang ldan pas na mtshungs par ldan pa dag ste/ 'dus byas kyi chos mtha' dag go//de las bzlog pa ni ldan pa yin pa dag ste/ 'dus ma byas rnams so/ /yang na 'dod chags pa la sogs pa nyon mongs pa lta bar gyur pa dang ldan pa gang yin pa de dag ni mtshungs par ldan pa dag ste/ zag pa dang bcas pa'i chos rnams so/ /de las bzlog pa ni ldan pa ma yin pa dag ste/zag pa med pa rnams so/ /gang gi phyir mtshungs par ldan pa sdug pa la sogs pa'i bye brag gis tha dad pa'i chos rnams kyang mi mthong la/ ldan pa ma yin pa rnams kyang mi mthong ba de'i phyir mi dmigs so/ /gang gi phyir mi dmigs pa de'i phyir rlom sems su mi byed do//de ci'i phyir mi mthong zhe na smras pa/ rnam pa med pa'i shes pa yis/ /yul la 'dzin par mi rung ngo / /rnam pa tshad ma min phyir dang / /mi rung phyir na cig shos min/ /re zhig don bye brag tu yongs su gcod pa mi rung ba'i phyir ro/ /rnam pa med pa'i shes pas ni mi mthong ste/'brel ba'i rgyu med pa'i phyir ro/ /rnam pa tshad ma ma yin pa'i phyir/ rnam pa dang bcas kyang yul 'dzin par mi rung ste/ gang gi phyir myong ba'i tshe dngos po rig par 'gyur bas dngos pos rnam pa la ma khyab ste/ rmi lam la sogs pa na dngos po med bzhin du yang de yod pa'i phyir ro//rnam pa yang mi rung ste/ gzhan du na ni dngos po gcig /sna tshogs tshul du snang ba dag /de yi gcig pu nyams 'gyur phyir/ /rnam pa ji ltar bden par 'gyur/ /zhes bya ba la sogs pa 'byung ba'i phyir ro/ /rnam pa gzhan ni yod pa ma yin te/de lta bas na mngon sum gyis mi mthong ngo / /de nyid kyi phyir rtags la sogs pas yongs su ma bcad pas na rjes su dpag pas kyang mi mthong ngo / /gang gi phyir mtshungs par ldan pa'i chos rnams dang / ldan pa ma yin pa rnams de ltar mi mthong ba de'i phyir/ thob par bya ba'i chos rnams kyi skye ba yang mi mthong la spong bar bya ba rnams kyi 'gog pa yang mi mthong ngo //bsgom par bya ba'i dbang du mdzad de/ 'das pa'i chos rnams kyang mi mthong / /zhes bya ba la sogs pa gsungs so/ /lus dang lus med 'phel ba de/ /rdzas dang rdzas med rnam pa gnyis//ltos par gnas pa'i ngo bo'i phyir/ /mi mthun pa dang lhan cig bshad/ /lus med pa'i dngos po 'phel ba de'i dbang du mdzad nas/ lus med pa'i chos rnams kyi 'phel ba mi mthong zhes gsungs so/ /lus yod pa'i dngos po'i 'phel ba'i dbang du mdzad nas/lus yod pa'i chos gang yang sogs par mi byed ces gsungs so/ /'phel ba de rnam pa gnyis su bshad pa de bzhin du/ rdzas su yod pa'i 'phel ba de'i dbang du mdzad pa ni snga ma yin la/ btags par yod pa'i 'phel ba de'i dbang du mdzad pa ni phyi ma yin pas/ 'phel ba 'di yang rnam pa gnyis su bshad de/ de yang mdor bsdu na rnam pa bzhir bshad do/ /'phel ba de yang nyung ngu las ltos nas/ pha rol dang tshu rol bzhin du btags pa'i yod pa yin te/ de bas na mi mthun pa'i phyogs 'bri ba dang 'grib pa lhan cig tu bshad do/ /yang dag tu na sku gnyis kyi//rang bzhin ma mthong gang yin pa/ /de nyid sangs rgyas rjes dran te/ /rtog pa thams cad sel ba yin/ /rkyen la rag las 'byung ba'i phyir/ /sgyu ma bzhin du gang ma skyes/ /bden par bsams na gzugs la sogs/ /de ni de bzhin gshegs ma yin//dgag par bya ba med pas na/ /yang dag tu na dgag med mngon/ /de phyir brtags na gzugs med sogs/ /de ni de bzhin gshegs ma yin/ /sku gnyis ni longs spyod rdzogs pa dang sprul pa'o/ /rtogs pa thams cad sel ba ni rtog pa thams cad kyi gnyen por gyur pa'i phyir ro//gzugs la sogs pa ni yang dag par na ma skyes pa'i ngo bo nyid de/ rkyen gyi dbang gis 'byung ba'i phyir/ sgyu ma la sogs pa bzhin no/ /sogs pa smos pas ni mtshan la sogs pa bsdu'o/ /longs spyod rdzogs pa dang sprul pa'i sku'i mtshan nyid ma skyes pa gang yin pa de ni bden par na de bzhin gshegs pa ma yin te/sgyu ma la sogs pa bzhin no/ /gzugs med pa la sogs pa yang dgag par bya ba med pa'i phyir bden par med de/ dgag par bya ba med na dgag pa yod par mi rung ste/ mo gsham gyi bu'i sngo bsangs la sogs pa dgag pa bzhin no//de bas na gzugs med pa la sogs pa'i ngo bo nyid kyang bden par na longs spyod rdzogs pa dang / sprul pa'i sku'i mtshan nyid kyi de bzhin gshegs pa ma yin no/ /sogs pa smos pa ni mtshan ma med pa la sogs pa bsdu'o/ /des na gnyi ga ma yin dang / /cig shos de dag bkag shes bya//de yi phyir na de gnyis ni/ /so sor dgag pa ma mdzad do/ /gal te de bzhin gshegs pa gzugs yod pa yang ma yin/ gzugs med pa la sogs pa yang ma yin na/ 'o na gnyi ga'i ngo bo'am/ gnyi ga'i yin pa'i ngo bor 'gyur ro zhe na/ de ni med de/ gnyi ga'i phyogs dgag pas ni/ gnyi ga'i ngo bo de bzhin gshegs pa yin pa yang bkag pa kho nar 'gyur ro/ /gnyi ga ma yin pa'i ngo bo ni med pa nyid de/ gzugs dang gzugs med pa gnyis ni phan tshun rnam par gcod par gnas pa'i ngo bo can yin pas gzugs dang gzugs med pa'i ngo bo nyid du 'gyur ba'i phyir ro//de ltar rnam rtog med gyur na/ /chos kyi sku ni mthong ba ste/ /sangs rgyas rjes dran kun mkhyen gyi/ /yon tan phun sum tshogs pa'i gzhi/ /de ltar ji skad bstan pa'i rnam pas rnam par rtog pa med par gyur na chos kyi sku mthong ba yin te/ de ni rtog pa thams cad dang bral ba'i ngo bo nyid yin pa'i phyir ro//mthong ba de ni sangs rgyas rjes su dran pa yin te/ thams cad mkhyen pa'i stobs bcu dang / mi 'jigs pa la sogs pa yon tan rnams kyi gzhi yin na/ gzhan dag gi lta ci smos/ da ni sangs rgyas rjes su dran pa'i lus rnam par dbye ba brjod par bya ste/longs spyod rdzogs par mdzad pa'i sku/ /rnam pa nyi shus bshad pa yin/ /cig shos bco brgyad shes par bya/ /'dir ni de gnyis phrin las bzhi/ /de yi mdzad pa'i 'bras bu drug /de dngos rnam gnyis rgyu rnam bdun/ /mnyam pa nyid la gnas bzhin du//de dag la ni bsgom par bya/ /longs spyod rdzogs pa'i sku ni rnam pa nyi shus bshad de/ gzugs su ma yin zhes bya ba nas bzung ste/ rnam par grol ba'i ye shes mthong ba med pa ma yin zhes bya ba yan chad do/ /gzugs ni spyi yin la/ mtshan dang dpe byad bzang po gnyis ni bye brag yin pa'i phyir bye brag tu phye ste bstan to//rnam par shes pa smos pas ni/ lhan cig spyod pa'i tshor ba la sogs pa yang bsdu ste/ des ni rnam par smin pa'i phung po lnga po 'di bstan to/ /de'i rgyu ni nyon mongs pa'o/ /nyon mongs pa yang dka' ba spyod pa dang / sbyin pa la sogs pa'i mtshan nyid do//zag pa med pa'i phung po lnga'i rgyu yang de nyid de/ des na bar du bstan no/ /tshul khrims ni rnam pa gsum ste/ sdom pa'i tshul khrims dang / sems can gyi don byed pa'i tshul khrims dang / dge ba'i chos sdud pa'i tshul khrims so/ /ting nge 'dzin ni zag pa dang /zag pa med pa dang / ro myang bar byed pa dang ldan pa'i bye brag gis rnam pa gsum yod mod kyi/ 'dir ni zag pa med pa gzung ngo / /shes rab ni rab tu dga' ba la sogs pa'i sas bsdus pa'o/ /rnam par grol ba ni nyon mongs pa dang / shes bya'i sgrib pa spangs pa'o/ / rnam par grol ba'i ye shes mthong ba ni sgrib pa gnyis las nges par grol ba'i thams cad mkhyen pa'i ye shes gang yin pa'o/ /yang na ye shes ni ye shes nyid do/ /mthong ba ni mngon par shes pa rnams so/ /skye bar ma yin zhes bya ba nas bzung ste/ phung po dang khams dang skye mched med par ma yin zhes bya ba'i bar rnams ni/ rnam pa bco brgyad kyis sprul pa'i sku bstan par shes par bya ste/ skye ba ni mngal na gnas pa bzung ngo / /rigs ni shAkya'i rigs la sogs pa'o/ /rus ni gau ta ma la sogs pa'o/ /'khor ni nyan thos dang byang chub sems dpa' dang /rgyal po la sogs pa'o/ /gnas pa ni byams pa la sogs pa dang / sangs rgyas kyi gnas pa la sogs pa'o/ /thob pa ni thams cad mkhyen pa'i ye shes thob par bya ba'i lam thob pa'o/ /mngon par rtogs pa ni thams cad mkhyen pa'i ye shes te/gang gi phyir 'dir gtso bor kun nas khong du chud pa mngon par rtogs pa yin pa'i phyir ro/ /nyon mongs pa ni 'dod chags la sogs pa'o/ /phung po la sogs pa ni zag pa dang bcas pa dang / zag pa med pa rnam pa gnyis te/ mthun mthun du gzung bar bya'o/ /de dag thams cad kyang bcom ldan 'das kyis gdul ba'i bsam pa'i bye brag gis bstan to//longs spyod rdzogs pa dang / sprul pa'i sku de gnyis kyi phrin las ni rnam pa bzhir gsungs par rig par bya ste/ shes par ma yin zhes bya ba nas bzung ste/ chos mi ston par ma yin zhes bya ba yan chad do//de la gdul ba rnams kyi khams dang / bsam pa dang / dbang po dang / spyod pa la sogs pa la lta ba ni shes pa'o/ /khams la sogs pa la gzigs nas nyon mongs pa spang ba'i thabs ston pa ni chos ston pa'o/ /longs spyod rdzogs pa dang sprul pa'i sku de gnyis kyis mdzad pa'i 'bras bu ni rnam pa drug tu gsungs par shes par bya ste/bdag rnam par dag par ma yin zhes bya ba nas bzung ste/ gzhan gyi don du ma yin zhes bya ba yan chad do/ /bdag rnam par dag par bya ba ni nyan thos rnams kyi'o/ /gzhan rnam par dag par bya ba ni byang chub sems dpa' rnams kyi'o//sems can rnam par dag par bya ba ni gang zag la mngon par zhen pa rnams kyi'o/ /sems can med pa rnam par dag par bya ba ni bdag med pa mthong ba rnams kyi'o/ /bdag gi don ni nyan thos la sogs pa rnams kyi'o/ /gzhan gyi don ni byang chub sems dpa' rnams kyi'o/ / de'i dngos po rnam pa gnyis ni phrin las tha ma'i ngo bo rnam pa gnyis su gsungs par shes par bya ste/ chos su ma yin/ 'dul ba ma yin zhes bya ba ste/ chos ni mdo sde la sogs pa'o/ /'dul ba ni byang chub sems dpa'i 'dul ba'i sde snod dang / nyan thos kyi 'dul ba'i sde snod do/ / mdzad pa'i 'bras bu rgyu gang gis 'grub par 'gyur ba'i rgyu de ni rnam pa bdun du gsungs te/ lus rnam par dag par ma yin zhes bya ba nas bzung ste/ da ltar byung ba'i spyod pa rnam par dag par ma yin zhes bya ba yan chad do/ /lus rnam par dag pa ni lus kyi las rnam pa gsum yongs su dag pa'o//ngag rnam par dag pa ni ngag gi las rnam pa bzhi yongs su dag pa'o/ /yid rnam par dag pa ni yid kyi las rnam pa gsum yongs su dag pa ste/ thabs 'dis ni nyan thos la sogs pa'i bya ba'i 'bras bu 'grub bo/ /byang chub sems dpa' rnams kyi 'bras bu ni spyod pa rnam par dag pas 'grub ste/spyod pa ni pha rol tu phyin pa bcu'o/ /shin tu myur na bskal pa grangs med pa gsum gyis sangs rgyas su 'gyur te/ de'i phyir spyod pa 'di ni yun ring mo zhig gis rnam par dag par 'gyur bas sngon gyi mtha' la sogs pa smos so/ /bdag gi rnam par ma yin/ gzhan gyi rnam par ma yin zhes bya ba ni sangs rgyas rjes su dran pa de rnal 'byor can gyis mnyam pa nyid la gnas nas bsgom par bya'i/ de ma yin par mi bya bar bstan to/ /bdag ces smos pa ni sgom pa po bstan to/ /gzhan zhes smos pa ni bsgom par bya ba dang / bsgom pa'i rnam pa bstan to//mnyam pa nyid ni bsgom par bya ba de bzhin gshegs pa dang / sgom pa po rnal 'byor can dang / gzugs la sogs pa rnam pa gang gis bsgom par bya ba ste/ de yang de bzhin nyid du ro gcig pa'i phyir te/ de ltar na sangs rgyas rjes su dran pa 'khor gsum yongs su dag par bsgom pa yin no//de ltar ma byas na ni dmigs pa kho nar ltung bar 'gyur ro/ /rnam pa gzhan yang / yang na longs spyod rdzogs pa'i sku/ /rgyu dang bcas dang 'bras bur bcas/ /yang dag tu na gang ma mthong / /de ni sangs rgyas rjes su dran/ /longs spyod rdzogs pa nyi shu ste//snga ma bzhin no/ /nyon mongs zhes pa ni/ bshad pa 'di'i skabs su nyon mongs pa rnam pa gnyis la bya'o/ /'bras bu nyi shu gnyis su bzhed/ /skye bar ma yin zhes bya ba nas bzung ste/ chos mi ston par ma yin zhes bya ba yan chad do/ /sprul pa'i sku de'i 'bras bu yin no//de'i rgyu ni bco lnga ste/ longs spyod rdzogs pa'i sku de'i rgyu'i grangs ni bco lnga'o zhes bya ba'i tha tshig go/ /bdag rnam par dag par bya bar ma yin zhes bya ba nas bzung ste/ da ltar byung ba'i spyod pa rnam par dag par ma yin zhes bya ba yan chad do/ ci'i phyir rnam pa bco lnga zhe na/smras pa/ gang gi phyir ni nan tan byed/ /ji ltar gang la bye brag gis/ /ci'i phyir nan tan byed ce na/ bdag rnam par dag par bya ba'i phyir dang / gzhan rnam par dag par bya ba'i phyir dang / sems can rnam par dag par bya ba'i phyir dang / bdag gi don dang gzhan gyi don gyi phyir ro//de la bdag rnam par dag par bya ba ni gzhan rnam par dag par bya ba'i thabs su gyur pa yin pa'i phyir sngar bshad de/ byang chub sems dpa' rnams kyi ni gzhan rnam par dag pa gtso bo yin pa'i phyir ro/ /rnam par dag pa 'di gnyis ni nyon mongs pa dang / shes bya'i sgrib pa spong ba'i mtshan nyid de/bdag dang gzhan dang mthun mthun du sbyar ro/ /rnam par dag pa de gnyis ka yang sems yin pa'i phyir de'i 'og tu sems can rnam par dag par bya ba bstan te/ sems can ni sems yin no/ /yang na rnam par dag pa 'di gnyis la brten nas/ sems rnam par dag pa thob pa'i phyir/sems can rnam par dag par bya bar bstan to/ /bdag nyid stobs bcu dang mi 'jigs pa la sogs pa yon tan rnams kyi snod du 'gyur bar bya ba ni bdag gi don to/ /gzhan dag theg pa gsum la gnas pa'i yon tan rnams dang / bde 'gro'i snod du 'gyur bar bya ba ni gzhan gyi don te/de gnyis kyi sngon du dag pa 'gro bas de'i phyir phyis bstan to/ /ji ltar na nan tan byed ce na/ chos dang 'dul bas so/ /gang la nan tan byed ce na/ de ni/ zag bcas cig shos bye brag gis/ /bya ba rnam gnyis shes par bya/ /cig shos zhes bya ba zag pa med pa'o//zag pa dang bcas pa'i lus rnam par dag pa la sogs pa bstan to/ /zag pa med pa ni spyod pa rnam par dag pa'o/ /spyod pa rnam par dag pa ni sbyin pa la sogs pa'i pha rol tu phyin pa rnams te/ /de yang 'dir sas bsdus pa gzung bar bya'o/ /lus rnam par dag pa la sogs pa ni spyod pa rnam par dag pa'i sngon du 'gro ba'i phyir phyis bstan to//lhag ma dag ni sngar bshad bzhin/ /ma lus par bzung ngo zhes bya ba'i tshig gi lhag ma'o/ /da ni sangs rgyas rjes su dran pa de nyid kyi rnam grangs brjod pas bstod par mdzad de/ sar pa 'jug pa'i rgyu nyid yin//gang tshe de las ma 'thob pa/ /sangs rgyas nyid du gcig tu ngos/ /sangs rgyas nyid kyi sa 'thob la/ /gnas skabs dag ni thams cad du/ /bdud kyi las ni rnam spong na/ /gzungs kyis 'thob par mi 'gyur gang / /thob bya gzhan ni ci zhig yod/ /shes pa gang gis chos thams cad kyi dngos po yod pa dang /dngos po med pa la sogs pa'i ngo bor mi 'dzin pa de ni/ chos thams cad mi 'dzin par mos pas spyod pa'i sa chen po'i chen pos bsdus pa'i shes pa ste/ de 'dis 'jug par byed pas na/ chos thams cad mi 'dzin pa la 'jug pa zhes bya ba'i sangs rgyas rjes su dran pa ste/'dis ni gzungs mos pas spyod pa'i sa chen po'i chen po la 'jug pa'i rgyu nyid du bstan to/ /chos thams cad yang dag par 'du ba ni stong pa nyid de/ der chos thams cad de'i bdag nyid du 'du ba'o/ /de la mi 'jigs pa ni mi skrag pa'o/ /mi skrag pa ni sa dang po ste/ de rtogs pas de la mi 'jigs so/ /de gzungs 'dis 'thob par 'gyur bas na/ chos thams cad yang dag par 'du ba la mi 'jigs pa 'thob pa zhes bya ba'i gzungs so/ /de'i ci'i phyir zhe na/ de'i phyir don dam pa sgrub pas zhes gsungs so/ /don dam pa ni chos kyi sku ste/ don dam pa sgrub pa des ni gzungs 'di sa dang po la sogs pa'i rgyur bstan to/ /gzungs 'dis gcig tu nges par sangs rgyas su 'gyur te/ 'di ltar gcig tu nges pa ni sangs rgyas nyid gdon mi za ba ste/ de 'thob pa'o/ /de bas na gcig tu nges pa 'thob pa'i phyir bsam pa thams cad yongs su rdzogs par byed pa zhes bya ba'i ting nge 'dzin to//'dis ni sa brgyad pa la sogs pa 'thob par bstan te/ sa brgyad pa la ni gcig tu nges pa 'thob po/ /sangs rgyas kyi sa yang gzungs 'di nyid kyis 'thob par 'gyur te/ 'di ltar 'jig rten pa dang /'jig rten las 'das pa'i dge ba thams cad gang gi rtsa ba rgyu yin pa de ni dge ba thams cad kyi rtsa ba can no/ /de ni dge ba thams cad kyi rtsa ba can yang yin la/ gzhan la rag ma las pa'i ye shes kyang yin te/ gzhan la rag ma las pa'i ye shes ni rang byung gi yin no/ / yang na dge ba'i rtsa ba thams cad la gzhan la rag ma las pa'i ye shes zhes bya bar rtogs par bya'o/ /de rtogs pa ni 'dis rtogs par byed pas na gzungs 'di nyid yin no/ /de lta bas na dge ba'i rtsa ba thams cad la gzhan la rag ma las pa'i ye shes rtogs pa'i phyir/ chos kyi gter gyi rigs las byung ba'i mtshan dang /dpe byad bzang pos gnas pa zil gyis mi non pa zhes bya ba'i gzungs te/ 'jig rten pa dang / 'jig rten las 'das pa'i chos rnams kyi gter ni sangs rgyas bcom ldan 'das so/ /de nyid rigs yin te/ mtshan dang / dpe byad bzang po de dag gi skye ba'i gnas so//chos kyi gter gyi rigs las byung ba'i mtshan dang dpe byad bzang po byed par gyur pa de dag gis na/ /gzhan su dag gis kyang gzungs 'di'i gnas pa zil gyis mi non zhes tshig rnam par sbyar ro/ /'di las mos pas spyod pa'i sa la sogs pa'i gnas skabs thams cad la gnas pa'i rnal 'byor can gyis bdud kyi las rnam par spong ba yang 'thob par 'gyur ro//ci'i phyir zhe na/ /de phyir dam pa zhes gsungs te/ sangs rgyas nyid do/ /'dis kun nas sngon du tshol bas na/ dam pa yongs su tshol ba ni stong pa nyid de/ de la mkhas pa'o/ /de lta bas na dam pa yongs su tshol ba la mkhas pa'i phyir/bdud kyi las thams cad yang dag par 'da' ba zhes bya ba'i gzungs te/ rnam grangs de dag gis gzungs ni don thams cad 'thob pa'i rgyu yin pa'i phyir don che ba nyid du bstan pa yin no/ /rnam pa gzhan yang / yang na dad pas mos la sogs//dbang du mdzad de go rims bzhin/ /ming rnam lnga po 'di dag ni/ /don dang mthun par gsungs pa yin/ /'di ltar dad pas mos pa rnams kyi dbang du mdzad nas ming dang po gsungs te/ de dag chos thams cad mi 'dzin pa la 'jug pa'i phyir ro/ / mi skye ba'i chos la bzod pa thob pa rnams kyi dbang du mdzad nas ming gnyis pa gsungs te/ de dag gis chos thams cad yang dag par 'du ba la mi 'jigs pa 'thob pa'i phyir ro/ /phyir mi ldog pa rnams kyi dbang du mdzad nas ming gsum pa gsungs te/ de dag gis gcig tu nges pa 'thob pa'i phyir ro//skye ba gcig gis thogs pa'i dbang du mdzad nas ming bzhi pa gsungs te/ de dag dge ba'i rtsa ba thams cad la gzhan la rag ma lus pa'i ye shes rtogs pas/ ji skad gsungs pa thams cad 'grub bo/ /yang na dngos po thams cad rtogs pa na dge ba'i rtsa ba bsod nams dang ye shes kyi tshogs kyi mtshan nyid de dag thams cad sgrub pa'i phyir/gzhan la rag las pa med pa'i ye shes sgrub po/ /sgrub pa zhes bya ba ni nan tan byed pa ste/ de las ji skad gsungs pa thams cad 'grub par 'gyur ro/ /srid pa tha ma pa rnams kyi dbang du mdzad nas ming lnga pa gsungs te/de dag byang chub kyi shing drung kho nar byang chub 'thob pa'i tshe/ stong pa nyid la goms pas bdud kyi las thams cad las yang dag par 'da' bar 'gyur ro/ /da ni shA ri'i bu byang chub sems dpa' gang dag ces bya ba la sogs pas phan yon bstan te/'bras bu yang dag bstan pas kyang / /gdul ba rnams ni 'jug 'gyur te/ /de yi phyir na thub pa yis/ /thugs rjes phan yon yang dag gsungs/ /chos dang dad pas rjes 'brang ba'i/ /dbang mdzad 'di yi phan yon gnyis/ /rgyal bas gsungs te snga ma snga//phyi ma po ni phyi ma yin/ /gdul ba'i rnam pa gnyis yin te/ /chos kyi rjes su 'brang ba dang / /dad pas rjes su 'brang ba'o/ /de la snga ma chos kyi rjes su 'brang ba'i dbang du mdzad nas phan yon snga ma ste/ 'thad pa dang bcas pa bstan pa'o/ / phyi ma dad pas rjes su 'brang ba'i dbang du mdzad nas phan yon phyi ma ste/ tshigs su bcad pa rnams kyis bstan to/ /yang na phan yon gnyis ka yang / /chos dang dad pas rjes 'brang ba'i/ /phyi ma snga ma'i btags pa yin/ /phyi ma yi ni gnyi ga dngos/ /yang na phan yon snga ma ni 'thad pa dang bcas pa'i phyir/snga ma chos kyi rjes su 'brang ba'i dngos yin la/ phan yon phyi ma ni btags pa yin te/ de dag kyang de la shas kyis phan 'dogs pa'i phyir ro/ phyi ma dad pas rjes su 'brang ba la ni phan yon gnyi gas lhur phan 'dogs pa'i phyir dngos yin no/ / stobs dang pha rol phyin sa dang / /mi 'jigs yon tan la sogs pa/ rnam thar sgo dang mngon shes dang / ting 'dzin gzungs sgo mtha' yas pa'am/ /de dag mtha' yas thabs rnams kyi/ sgrub par byed pa gang yin pa/ /de phyir mtha' yas sgos bsgrub pa'i/ / gzungs zhes bya bar bsgrags pa yin/ /stobs ni gnas dang gnas ma yin pa mkhyen pa'i stobs la sogs pa bcu'o/ /pha rol tu phyin pa ni sbyin pa la sogs pa bcu'o/ /sa ni mos pas spyod pa'i sa yan chad/ sangs rgyas kyi sa kun du 'od man chad sa bcu gnyis so/ /mi 'jigs pa ni sa bcu'o//sogs pa'i sgras ni/ dran pa nye bar gzhag pa gsum dang / thugs rje chen po dang / sangs rgyas kyi chos ma 'dres pa bco brgyad dang / byams pa la sogs pa'i yon tan rnams bsdu'o/ /rnam par thar pa'i sgo rnams ni thugs rje chen po dang / bshol ba med pa la sogs pa'o//mngon par shes pa rnams ni lha'i mig la sogs pa lnga'o/ /ting nge 'dzin rnams ni nam mkha'i mdzod la sogs pa'o/ /gzungs kyi sgo ni chos zab mo la bzod pa'i gzungs kyi sgo la sogs pa ste/ gang gi phyir mtha' yas pa 'di dag thams cad sgrub cing rdzogs par byed pa de'i phyir/sgo mtha' yas pa sgrub pa'i gzungs zhes bsgrags so/ /yang na gang gi phyir ji skad bstan pa 'di dag thams cad mtha' yas sgrub pa de'i phyir/ sgo mtha' yas pas sgrub pa zhes bsgrags so/ /'dir ni don gyi gzungs yin pa'am/ / yang na gzungs don ston pa yi/ /yi ge'i tshogs ni 'di nyid la/ /gzungs zhes bya bar dgongs pa yin/ /thos sogs las byung shes pa rnams/ /chung dang 'bring la sogs ldan pas/ /gzungs kyi don ni thob gyur nas/ /byang chub sems dpar 'gyur ba gang / /de dag phyir mi ldog nyid du//mtshungs te dus ni tha dad do/ /byang chub myur ba nyid gsungs gang / /de ni gzhan la ltos te dgongs/ /gang gi tshe sgo mtha' yas pas bsgrub pa'i gzungs zhes bya ba/ 'dir gzungs nyid sangs rgyas rjes su dran pa'i mtshan nyid du bzung ba de'i tshe ni/ don thob pa zhes bya ba 'di la don gyi sgra ni ngo bo nyid du bstan pa yin te/ngo bo nyid de yang 'dir sangs rgyas rjes su dran pa nyid la bya'o/ /gang gi tshe gzungs kyi don ston pa'i yi ge'i tshogs la 'dir gzungs zhes bya bar gzung ba de'i tshe ni/ sgo mtha' yas pas bsgrub pa'i gzungs 'di'i don gang rjod par byed pa'i ngo bor gnas pa la bya ba ste/de yang sangs rgyas rjes su dran pa nyid de/ de thob pa ni thos pa las byung ba'i shes pa'am/ bsams pa las byung ba'am/ bsgoms pa las byung ba chung ngu'am/ 'bring ngam/ chen po'am/ gcig pu'am/ gnyis sam/ mtha' dag gis thob pa'i byang chub sems dpar gyur pa gang dag yin pa'o/ /sems can rnams la byang chub kyi rnam par bsgom pas na/ byang chub sems dpa' rnams te/ de dag ni gzungs thob pas sems can thams cad la stong pa nyid kyi rnam par sgom par byed do/ /yang na sems dpa'i sgra ni dngos por bstan par blta bar bya ste/'di dag thams cad ni phyir mi ldog par mtshungs so/ /phyir ldog pa ni phyir nur ba ste/ 'khor ba dang / nyan thos la sogs pa'i byang chub tu ltung ba'o/ /de yod pa dag ni phyir ldog pa'o/ /phyir ldog pa ma yin pa dag ni/phyir mi ldog pa dag ste/ bla na med pa yang dag par rdzogs pa'i byang chub tu nges par gyur pa zhes bya ba'i tha tshig go/ /de dag ni bla na med pa yang dag par rdzogs pa'i byang chub 'thob pa'i dus la ni bye brag yod de/ 'di ltar gang dag thos pa las byung ba'i shes pa chen pos gzungs kyi don thob pa de dag gi byang chub 'thob pa'i dus ni ring ba'o//'bring gis thob pa gang yin pa de dag ni shin tu ring ba'o/ /chung ngus thob pa gang yin pa de dag ni ches shin tu ring ba'o/ /de bzhin du bsams pa las byung ba la sogs pa la yang mthun mthun du sbyar bar bya'o//myur ba'i tshig gsungs pa gang yin pa de ni/ byang chub sems dpa' gzungs kyi don thob pa dag las gzhan pa'i byang chub sems dpa' gang yin pa de dag gis byang chub 'thob pa'i dus la ltos par rig par bya'o/ /de ci'i phyir zhe na zhes bya ba des ni gtan tshigs dri ba bstan te/gtan tshigs shA ri'i bu 'dir zhes bka' stsal pa ni dmigs pa med pa'i spyod pa dang ldan pa'i gzungs zhes bya ba dang sbyar ba'o/ dmigs pa thams cad yod min pa/ /'dir ni dmigs pa med par bsgrags/ /dmigs pa yod pa ma yin phyir/ / dmigs pa med pa'ang rigs ldan min/ /dngos po dmigs pa med pa dag la dmigs pa ni dmigs pa thams cad de/ de med pa gang yin pa de la ni 'dir bcom ldan 'das kyis dmigs pa med pa zhes bstan te/ dmigs par bya ba med pa'i phyir/ dmigs pa med pa tsam du zad pa ni ma yin gyi/ dmigs pa med pa'i phyir/ dmigs pa med pa yang / yang dag par na mi dmigs pa kho na ste/ dgag par bya ba med pa'i phyir ro/ /gang tshe 'di la dmigs med pa'i/ /spyod pa chen po yod gyur na/ /de nyid yang dag shes de'i phyir/ /de la mi 'grub ci zhig yod/ /spyod pa ni sngar bstan pa'i dmigs pa med pas so//chen po ni yon tan rnam pa sna tshogs mtha' yas pa sdud pa yin pa'i phyir ro/ /de nyid mi slu ba yin pa'i phyir yang dag pa'i shes pa yin te/ gang gi tshe 'di la yod pa de ni dmigs pa med pa'i spyod pa dang ldan pa'o/ /de lta bu'i gzungs de las ci zhig 'grub par mi 'gyur te/thams cad kyang 'grub par 'gyur ro zhes bya ba'i tha tshig go/ /khyod kyis nyes pa ma lus pa/ /spang ba sangs rgyas rjes dran nyid/ /de yi gnyen po yin pas na/ /de phyir ci bder sgoms par gyis/ /de phyir 'dir sangs rgyas kyi chos dang yon tan thams cad kyi gter nges pa ste/sangs rgyas kyi chos ni thun mong ma yin pa rnams so/ /sangs rgyas kyi yon tan rnams ni nyan thos la sogs pa dang thun mong ba'am/ sangs rgyas kyi chos rnams kho na'o/ /gnas dang gnas ma yin pa mkhyen pa'i stobs la sogs pa ni yon tan rnams te/goms par bya ba yin pa'i phyir ro/ /de dag gi gter ni rgyu ste nges pa'o/ /yang de na sangs rgyas kyi chos dang yon tan thams cad yod pas na sangs rgyas kyi chos dang yon tan thams cad kyi gter te/ thams cad mkhyen pa'i ye shes so/ /de nges pa ni sangs rgyas kyi chos dang yon tan thams cad kyi gter nges pa'o//gang gi phyir chos kyi nyes pa ma lus pa spong ba ni de'i gnyen por gyur pa'i sangs rgyas rjes su dran pa kho na yin pa de'i phyir/ khyod kyis ci bder sgoms shig ces bya bar bcom ldan 'das kyis dgongs te/ 'di ltar 'dod chags la sogs pa nyon mongs pa'i sgrib pa ni dngos po la mngon par zhen pa sngon du 'gro ba can la/ dngos po la mngon par zhen pa yang shes bya'i sgrib pa yin te/ sangs rgyas rjes su dran pa ni chos thams cad kyi ngo bo nyid kyi sgo nas de spong bar byed pa yin no/ /de'i phyir sangs rgyas rjes su dran pa yid la goms pa'i mi la ni nyon mongs pa dang shes bya'i sgrib pa rnam pa gnyis ka yang mi gnas so//'di ltar gang la gang gi mi mthun pa'i phyogs zil gyis gnon pa'i shas che ba yod pa de la de med de/ ji ltar rgya mtsho na me lce'i tshogs med pa de bzhin du/ sangs rgyas rjes su dran pa yid la goms pa'i nyon mongs pa dang / shes bya'i sgrib pa mi mthun pa'i phyogs zil gyis gnon pa'i shas che ba yod do/ /rigs par rjes su sgrub pas myur du bla na med pa yang dag par rdzogs pa'i byang chub mngon par rdzogs par 'tshang rgya bar 'gyur ba 'ba' zhig tu yang ma zad de/'di ni rgyu nye bar gnas pas kyang khong du chud par bya ba'i phyir 'di nyid las byang chub sems dpa'i spyod pa thams cad kyi bye brag mchog 'thob pa'i phyir ro zhes gsungs so/ /bye brag phul du phyin pa ni bye brag mchog ste/ 'di ltar 'khor gsum rnam par dag pa'i phyir//sbyin pa la sogs mchog dang ldan/ /yang dag rdzogs pa'i byang chub rgyu'i/ /khyad par 'di las 'thob par 'gyur/ /sbyin par bya ba dang / sbyin pa po dang / len pa po la sogs pa mi dmigs pas/ sbyin pa la sogs pa rnam par dag pa ni de yin te/de'i mi mthun pa'i phyogs kyi dri ma med pa'i phyir ro/ /des shin tu khyad par du 'phags pa'i sbyin pa la sogs pa spyod pa'i mtshan nyid bla na med pa'i byang chub kyi byed rgyu 'di nyid las thob par 'gyur ro/ /de ltar 'thad pa dang bcas pa'i phan yon bstan nas/phan yon gzhan yang gsungs te/ 'dir ni thub pa'i dbang po yis/ /yi ge'i don dang gnyi ga yi/ /gzungs kyi phan yon bka' stsal te/ /ci rigs par ni sbyar bar zad/ /yang na phan yon thams cad kyang / /gzungs rnams kun la bshad bya ste/ /kha cig dag ni dus gzhan las//dgongs pa tsam du zad pa yin/ /yi ge'i gzungs ni gzungs kyi don ston pa'i yi ge ste/ khar ba bsad pa la sogs pa bzhin no/ /don gyi gzungs ni sangs rgyas rjes su dran pa'o/ /gnyi ga'i gzungs ni gnyis po de nyid do/ /gzungs rnam pa gsum po 'di dag gi phan yon ni/'dir bcom ldan 'das kyis spyir bka' stsal to/ /skyes bu shes pa dang ldan pas ci rigs par sbyar bar bya ba 'ba' zhig tu zad do/ yang na phan yon thams cad kyang gzungs thams cad kyi yin par gsungs so/ /bye brag ni 'di yod de/ kha cig tu ni dus gzhan la dgongs par bshad par bya ste/'di ltar/ mnyam nyid ces bya dus dang don/ gang zag gzhan zhes bya ba yi/ dgongs pa rnams kyis thub pa'i gsung / /ci rigs par ni rtogs par bya/ /bcom ldan 'das kyi dgongs pa ni rnam pa bzhir khong du chud par bya ste/mnyam pa nyid la dgongs pa zhes bya ba ni/ ji skad du bcom ldan 'das kyis nga nyid yang dag par rdzogs pa'i byang chub las phyir mi ldog par 'gyur ro zhes gsungs pa la sogs pa lta bu'o/ /don gzhan la dgongs pa zhes bya ba ni/ ji skad du bcom ldan 'das kyis sangs rgyas bcom ldan 'das gang+gA'i klung gi bye ma snyed la bsnyen bkur byas nas gdod theg pa chen po ston pa'i mchog tu zab mo'i don rtogs par 'gyur ro zhes bya ba la sogs pa lta bu'o//gang zag gzhan la dgongs pa zhes bya ba ni/ ji skad du bcom ldan 'das kyis/ sbyin pa yis ni dga' bar 'gyur//zhes bya ba la sogs pa gsungs pas/ sbyin pa la sogs pa'i bsngags pa brjod par mdzad nas/ yang gang zag kha cig la brten te/ sbyin pa sbyin pas phan tshun dag tu brten de dag /gzhan dang gzhan la gus par mi 'gyur bas/ /sangs rgyas mkhas pa bag chags spangs rnams ni//de 'drar brten pa de dag bsngags mi mdzad/ /ces bya ba la sogs pas sbyin pa la sogs pa de dag nyid smod par mdzad pa lta bu'o/ /dgongs pa bzhi po 'di dag gis thub pa'i dbang po'i gsung rab kyi mdud pa'i gnad rnams bshad par bya'o//dgongs pa bstan pa'i dgos pa ni yi ge mangs su dogs pas ma bshad do/ /skabs 'dir kha cig tu ni dus gzhan la dgongs te phan yon bstan to/ /gang zag gzhan la dgongs pas kyang bstan te/ de ni gsal ba'i phyir bdag gis ma sbyar ro/ /gzungs zhes bya 'dir kha cig tu//mgon po thugs rje can gyis ni/ /gzungs zhes pa ni chen po yi/ /chen po'ang yin par bka' stsal to/ /gzungs la dmigs pa shes rab kyi mtha' la gnas pa la gzungs zhes bya bar/ sems can gyi don la mkhas pa bcom ldan 'das kyis kha cig tu gsungs te/mi sdug pa bzhin no/ /de ltar don bsdus pa bstan nas/ da ni de'i phan yon gyi tshigs su bcad pa so sor brtag par bya ste/ ci 'di dag stong pa nyid yin nam 'on te ma yin snyam du/ chos rnams stong par dogs med cing / mdo sde 'di thos nas stong pa kho na'o snyam du sems te/'di ni the tshom med pa'i phan yon bstan to/ /chos rnams stong pa la/ /byang chub ched du spros mi byed/ /chos rnams dang byang chub kyi rang bzhin med pa'i phyir ro/ /'di dag ni byang chub 'thob po snyam du dmigs pa ni spros pa'o/ / 'dis ni dmigs pa med pa'i phan yon bstan to/ /chos dbyings 'khrug par mi byed na/ /chos kyi dbyings 'khrug pa ni phyin ci log tu mngon par zhen pa ste/ 'di ltar chos kyi dbyings ni yang dag par stong pa'ang ma yin/ mi stong pa'ang ma yin na/ de la stong pa nyid la sogs pa'i ngo bo nyid du 'dzin pa ni 'khrug pa'o//'dis ni chos kyi dbyings kyi ngo bo nyid yang dag par khong du chud pa'i phan yon bstan to/ /de phyir gzungs ni 'thob par 'gyur/ /zhes bya ba 'di ni don gyi gzungs te/ 'di ni yi ge'i gzungs kyi phan yon dngos dang brgyad pa'i bye brag gis bstan to//yang na phan yon 'di ni gzungs rnam pa gsum char la yang mthun mthun du sbyar bar bya ste/ gang gi tshe don gyi gzungs kyi phan yon du bstan pa de'i tshe ni gzungs smos pas rab kyi mtha' la gnas pa'i gzungs kyi ye shes gzung ngo / /mdo sde 'di ni mnyan par bya ba zhes bya ba 'dis ni yi ge'i gzungs kyi phan yon rnam pa gsum dus gzhan la dgongs pa'i sgo nas bstan to//gzungs 'thob pa dang / ye shes 'byor pa 'thob pa dang byang chub 'thob pa'o/ /yang na gang gi tshe/ 'di la gzungs ni zad pa med/ /ces brjod par bya zhes bya ba lhag ma yin pa de'i che na gzungs smos pa mngon sum gyi phan yon yin la/gzhan gnyis po ni dus gzhan dgongs pa'o/ /yang na gzungs rnam pa gsum char gyi phan yon yin te/ yi ge'i gzungs kyi phan yon ni rnam pa gsum mo/ /don gyi gzungs kyi ni rnam gnyis so/ / ye shes kyi gzungs kyi ni gcig tu bstan to/ /yon tan zad pa med pa'i phyir mi zad pa'o/ /gzungs zhes bya ba la sogs pas ni/ yi ge'i gzungs kyi phan yon dus gzhan la dgongs pa'i sgo nas rnam pa gnyis su bstan te/ stong pa nyid dang / 'tsho ba med pa dang / tshigs su bcad pa med pa la sogs pa'i 'jigs pa ma lus pa dang bral ba'i phyir 'jigs pa med pa dang /phyogs bcur rnam par bzhugs pa'i sangs rgyas rnams kyi chos bstan pa thos pa'o/ /gzung ba ni ma brjed pa'o/ /don gyi gzungs kyi ni phan yon de gnyi ga mngon sum kho na'i yin te/ gzung ba ni bsgom pa'o/ /mchog gi chos zhes bya ba 'dis ni dus gzhan la dgongs pa'i sgo nas yi ge'i gzungs kyi phan yon du bstan to/ /cig shos kyis ni mngon sum gyi phan yon du bstan to/ /'dis ni so so yang dag par rig pa rnam pa bzhi thob par bstan te/ de la mchog gi chos zhes bya ba 'dis ni/chos so so yang dag par rig pa bstan to/ /don thams cad ces smos pas ni don so so yang dag par rig pa bstan to/ /tshig 'bru thams cad ces smos pas ni nges pa'i tshig so so yang dag par rig pa bstan to/ /nyi ma'i 'od zer ji snyed pa/ /zhes bya ba la sogs pa smos pas ni/spobs pa so so yang dag par rig pa bstan te/ mchog smos pa ni sangs rgyas kyi rigs can gyi so so yang dag par rig pa yin par bstan pa'i phyir ro/ /don dang tshig 'brus bskyod kun gyi/ /zhes bya ba'i tshig ni/ de dag gis chos so so yang dag par rig par 'jug pa'i phyir ro//nyi ma'i 'od zer gyi dpe ni mtha' yas pa nyid du bstan pa'i phyir ro/ /tshig smos pa ni tshig dang tshig gi don gzung ba'i phyir ro/ /yang na mchog gi chos stong pa nyid kyi chos rnam par shes so/ /don thams cad ni stong pa nyid de/ de ni dngos po thams cad kyi ngo bo nyid yin pa'i phyir ro//de tshig gang dag gis gsal bar byed pa de dag gis bskyod de/ 'jug par byed ces bya ba'i tha tshig go/ /tshig 'bru smos pas ni tshig rnams bstan to/ /'di'i rgyu bstan pa ni ji snyed ces bya ba la sogs pa'o/ /yang na mchog gi chos ni 'jig rten las 'das pa'i chos rnams te/tshig 'bru gang dag la mchog gi chos dang don thams cad yod pa de dag gis bskyod de 'jug par byed ces bya ba'i tha tshig go/ /lhag ma ni snga ma bzhin te/ 'dis kyang so so yang dag par rig pa rnams 'thob par bstan to/ /gang dag chos kyi mchog 'gyur ba/ de dag gang zhe na/bka' stsal pa/ rlabs chen gzungs kyi sgo rnams te/ /gang zhig mdo 'di 'dzin de la/ /thams cad rtag tu mngon du 'gyur/ /zhes bya ba ste/ dus gzhan la dgongs pa'i sgo nas de skad ces gsungs so/ /gal te sems can thams cad kyis/ /zhes bya ba la sogs pas ni phan yon 'di dngos dang brgyud pa'i sgo nas gzungs rnam pa gsum char gyi yang yin par gsungs so//de yi ye shes mi zad do/ /zhes bya ba 'di rgyu'i tshig go/ /bskal pa smos pa ni nye bar mtshon pa'i phyir te/ bskal pa grangs med pa dag kyang gzung bar bya'o/ /mdo sde 'di la su dga' ba//zhes bya ba ni/ de la dad pa la sogs pa dang ldan pa'i phyir ro/ /'dis ni yi ge'i gzungs kyi phan yon dus gzhan la dgongs pa'i sgo nas bstan to/ /don gyi gzungs kyi ni mngon sum du byas pas mdo sde la dga' bar 'gyur bas de'i phyir don gyi gzungs kyi yang 'dir bstan par rig par bya'o//de ni chos kyi rgyal po'i sras/ /zhes bya ba ni sa dang po thob pa'i phyir te/ de'i tshe de bzhin gshegs pa'i rigs su skyes pa yin no/ /byang chub mchog la nye ba yin/ /zhes bya ba ni phyir mi ldog pa la sogs pa'i sa thob pa'i phyir ro/ /yid brtan pa ni de kho na'i ye shes skyes pas mi slu ba yin pa'i phyir ro//chos kyang 'dzin zhes bya ba ni legs pa'i blo gros la sogs pa'i sa thob pas de bzhin gshegs pa'i chos ma lus par 'dzin pa'i phyir ro/ /de la sems can thams cad dga'/ /zhes bya ba 'dis kyang gzungs rnam pa gsum char gyi phan yon bstan par rig par bya'o//sangs rgyas rnams kyang de la dgyes/ /zhes bya ba ni/ de nged cag gis gces pa 'dzin par 'gyur ro snyam du dgongs pa'i phyir ro/ /ci'i phyir/ de ni 'chi ba'i dus byed tshe/ /sangs rgyas bye ba brgyad cu mthong zhe na/ gsang sngags kyi tshig brgyad cu yod pa'i phyir te/gsang sngags kyi tshig re re zhing yang sangs rgyas bye ba bye bas byin gyis brlabs pa'i phyir ro/ /yang na gzungs kyi mthu nyid 'di 'dra ste/ des 'chi ba'i dus kyi tshe sangs rgyas bye ba brgyad cu mthong ngo / /lag pa de la nye bar 'jog /ces bya ba ni/ rigs kyi bu ma 'jigs shig ces bya ba'am/yang na nged kyi thad du shog ces bya ba'i phyir ro/ /su zhig mdo sde 'di 'dzin pa/ /zhes bya ba 'dis ni phan yon 'di yi ge'i gzungs kyi yin no bstan te/ shugs kyis na phan yon 'di don gyi gzungs kyi yang yin par nges par gzung bar bya'o/ / bskal pa bye ba stong rnams su/ /zhes bya ba 'dis ni phan yon 'di gzungs gsum char gyi yang yin par rig par bya ste/ sgron mas skad cig gcig gis kyang dus ring po nas bsags pa'i mun pa sel bar mthong ba'i phyir bskal pa bye ba stong du bsags pa'i sdig pa zla ba gcig gis ji ltar 'byang bar 'gyur snyam du 'khrul pa bskyed par mi bya'o//byang chub sems dpas bsod nams gang / /zhes bya ba la sogs pas ni phan yon 'di don gyi gzungs kyi yin par bstan to/ /yi ge'i gzungs kyi ni ma yin te/ 'di ltar zla ba gcig smos pas na phan yon 'di dus gzhan la dgongs pa'i sgo nas kyang de yin par mi srid do//bsod nams ni gzungs 'dis kun nas bslang ba las gzhan pa gzung ngo / /'dzin pa gzungs mngon sum du bya ba'o/ /khams gsum sems can ji snyed pa/ /zhes bya ba la sogs pas ni phan yon 'di yi ge'i gzungs kyi yin par dus gzhan la dgongs par bstan to//phan yon 'di don gyi gzungs kyi yin par ni don gyis bstan to/ /yi ge'i gzungs kyi phan yon 'di yang don gyi gzungs kyi sgo kho na las byung ba'i phyir ro/ /byang chub tu 'tshang rgya ba'i bar du de dran pa dang ldan par 'gyur zhes bya bar sbyar te/blo gros rtogs ldan 'gyur zhes bya ba la sogs pa yang de bzhin sbyar bar bya'o/ /gzungs kyi dam pa gang yin pa ni dam pa'i don ston pa'i yi ge'i gzungs yin te/ de yi lce yi rtse mor gnas/ /zhes bya ba la sogs par sbyar bar bya ste/ 'di yang yi ge dang don gyi gzungs gnyi ga'i phan yon du shes par bya'o//blo gros ni mnyam par bzhag pa ma yin pa'i shes rab bo/ /rtogs pa ni mnyam par gzhag pa'i shes rab bo/ /yang na rtogs pa ni thams cad du thogs pa med par 'jug pa nyid do/ /ji ltar mdo sde bstan 'di la/ /gzungs don gyi gzungs kyi phyir so sor nges pa bzhin/yang na gzungs ni gzungs zhes pa ste/ de bzhin du mdo sde bstan pa 'di las thams cad mkhyen pa nyid bstan pa nges par 'thob par 'gyur zhes bya bar sbyar ro/ /de bzhin du 'di las byang chub nges par 'thob par 'gyur zhes bya bar yang gzung bar bya ste/phan yon 'di ni mngon sum dang / dus gzhan la dgongs pa'i sgo nas yi ge'i gzungs kyi yin par rig par bya'o/ /don gyi gzungs kyi ni snga ma bzhin du shugs kyis khong du chud par bya'o/ /thams cad mkhyen pa nyid ni shes bya'i sgrib pa spangs pa las 'gyur ro//byang chub ni nyon mongs pa'i sgrib pa spangs pa las so/ /yang na thams cad mkhyen pa nyid ni thams cad mkhyen pa'i ye shes so/ /byang chub ni nyon mongs pa dang shes bya'i sgrib pa spangs pa'o/ / yang na rgyu dang rgyu can gyi tshul du gnyi ga rtogs par bya'o/ /'di las byang chub 'thob par 'gyur/ /zhes bya ba 'di ni/ bdag nyid dper bstan pas brda' sprad pa'i phyir/ gzugs 'di thos ma thag tu yang / /zhes bya ba la sogs pa gsungs te/ de bzhin gshegs pa mar me zhes bya ba ni bcom ldan 'das mar me mdzad yin no//bdag cag gis gzungs thos kyang lung yang ma bstan la/ sangs rgyas rnams kyang mi mthong ba ma yin nam/ ci'i phyir de skad gsungs/ thos ma thag tu zhes gsungs pa'i phyir dang / skad cig de la zhes gsungs pa'i phyir/'dir dus gzhan la dgongs pa yang ma yin no/ /zhe na nyes pa med de/ 'di ltar 'dis ni bcom ldan 'das kyi tshe rabs gzhan du/ bcom ldan 'das ma 'di la goms na/ ji lta ba bzhin du nges pa kho nar tshe 'di la khyad par 'di sgrub par byed do zhes bya ba ste ston par mdzad pa yin te/de bas na gal te de bzhin du/ gzhan tshe rabs gzhan na goms pa gang yin pa de yang gzungs thos ma thag tu nges par lung bstan par 'gyur zhing / /skad cig de nyid la sangs rgyas rnams mthong bar 'gyur te/ 'di la 'khrul pa bskyed par mi bya'o//'dis ni phan yon 'di yi ge dang don gyi gzungs kyi yin par bstan to/ /gzungs 'di'i phan yon sangs rgyas thams cad kyi chos kyi tshul 'dzin pa yin par bstan pa'i phyir/ gang zhig ces bya ba la sogs pa gsungs te/ ston pa'i gsung rab yan lag bcu gnyis so//sangs rgyas thams cad kyis bstan pa shes par bya ba'i thabs gzhan yang yod mod kyi/ 'di myur bas na myur ba'i tshig gis ston par mdzad de/ phan yon 'di ni yi ge'i gzungs kyi yin par dus gzhan la dgongs pa'i sgo nas bstan pa'o/ / don gyi gzungs kyi ni don gyis bstan pa yin par rig par bya'o/ /sangs rgyas zhing ni rnam dag dang / /zhes bya ba la sogs pas ni phan yon gzhan ston te/ 'di ni yi ge'i gzungs kyi phan yon dus gzhan la dgongs pa bstan te/ byed par 'gyur zhes 'byung ba'i phyir ro/ / don gyi gzungs kyi ni don gyi dngos dang brgyud par ci rigs par rig par bya ste/ 'di'i phan yon gsum po 'di la the tshom mi bya bar 'di na de kho na bzhin no snyam du gzung bar bya'o/ /gal te khyod la the tshom yod na/ de'i tshe zhag bdun tsam gyi bar du 'di soms shig dang / des na khyod bdag nyid kyis tshe 'di la yid ches pa'i rtags mthong bar 'gyur ro bya ba'i don du/de bas bag ni yod gyur la/ /zhes bya ba la sogs pa gsungs te/ gsang sngags tshig ni snga ma yis/ /bsrung ba'i cho ga 'di byas la/ /gtsang mas 'du dang 'brel spang zhing / /lus kyi 'du 'dzi spang bya ste/ / des ni rtog pa'i dra ba yi/ /rgyun rnams ma lus spangs na ni/ bag med pa'i rnam pa gnyis te/ /gzhan las byung ba dang / bdag las byung ba'o/ /gzhan las byung ba yang rnam pa gnyis te/ gnam babs pa dang / rtsal las byung ba'o/ /bdag las byung ba ni rnam pa gsum ste/ 'du ba las byung ba dang / lus kyi 'du 'dzi las byung ba dang / log par rnam par brtags pa las byung ba'o/ /de dag med pas bag yod par gyur nas/ las ngan pa ma lus par yongs su spangs te/ sangs rgyas rjes su dran pa tsam/ /rab tu bsgoms pa gus byas la/ /sems ni rtse gcig byas nas su//sangs rgyas rjes su dran byed pa/ /de ni cho ga bzhin du bsgom/ /bsam gtan gyi tsher ma ni sgra yin pa'i phyir/ sgra med pa'i sa phyogs su skyil mo krung bcas nas/ dbugs rngub pa dang / 'byung ba dag bstud par mi bya bar/ lus drang por bsrang la/ha cang ma rengs par bya ste/ sems kyi tshogs phyi rol du 'phro ba bzlog pa'i phyir/ sems sna'i rtse mo la gtad de ci nus kyis bsgom par bya'o/ /de nas/ skyo bar gyur na blo can gyis/ /der gnas sems kyis dus bstud do/ /ha cang bsgom drags pas rnal 'byor pa sems skyo bar gyur na/bsgom pa de las langs la klog 'don bya ba'am/ 'greng ba'am/ 'gro ba'am/ zan za ba'am/ bya ba gzhan ci yang rung ba byed cing skyo ba med par ma gyur gyi bar du sangs rgyas rjes su dran pa la gnas pa'i sems kyis dus bstud par bya ste/ skyo ba med par gyur nas kyang bsgom par bya'o//blo ldan de ltar sgom byed pa/ /de ltar zhag bdun tha mar ni/ /sangs rgyas bye ba brgyad cu rnams/ /de yi 'og tu gzungs sbyin mdzad/ /ci'i phyir sangs rgyas bcom ldan 'das de snyed kyis de la gzungs sbyin par mdzad ce na/ smras pa/ gsang sngags tshig ni re re zhing //sangs rgyas bye bas byin brlabs la/ /des kyang sngar ni de dag gis/ /bzlas bsrung la sogs phun tshogs byas/ /'di ltar gsang sngags kyi tshig brgyad cu po rnams sangs rgyas bye ba phrag brgyad cus byin gyis brlabs la/ gsang sngags kyi tshig de dag gis kyang rnal 'byor pa des bzlas brjod byed par gyur pas/bsrung ba dang / mdangs dang / stobs dang / nad med pa la sogs pa phun sum tshogs par byas pa'i phyir te/ bsgom pa'i snga rol du bzlas brjod bya ba'i sgo nas ci nus su gsang sngags kyi tshig rnams brjod la/ de'i 'og tu bsgom par bya'o//gang gi phyir de lta yin pa/ /de'i phyir sangs rgyas bye ba ni/ /brgyad cus de la gzungs sbyin mdzad/ /yang na dgu bcu las thos ltar/ /bsgoms mthu de ni 'di 'dra'o/ /yang na sangs rgyas rjes su dran pa bsgom pa'i mthu nyid 'di 'dra ste/ des sangs rgyas bye ba phrag brgyad cus de la gzungs sbyin par mdzad do//dper na 'di nyid las sangs rgyas bye ba phrag dgu bcu las chos bstan pa thos so zhes yang dang yang du gsungs pa lta bu'o/ /gzungs de rnam pa ji lta bur bsams na thob par 'gyur zhe na/ smras pa/ gzugs sogs bsam pa bsam bya yin//gzugs med sogs pa bsam bya min/ /yang na sprul pa bsam bya yin/ /longs spyod rdzogs pa bsam bya min/ /yang na bsam bya bsam bya min/ /bya bsam bya min dngos bsam bya/ /gzod nas ma skyes pas med phyir/ /bsam pa de dag bsam mi bya//gzugs la sogs pa la bsam pa ni bsam bya min pa ste/ de ni dngos po med pa'i ngo bo yin pas don gyi bya ba mi byed pa'i phyir/ bsam par bya ba'i 'os ma yin pa'i phyir ro/ /sogs pa smos pas ni mtshan la sogs pa sngar bstan pa rnams nyid gzung ngo / /yang na sprul pa'i sku la bsam pa gang yin pa de ni bsam par bya ba yin te/de ni skye ba la sogs pa'i bye brag gis bsam par bya bar nus pa'i phyir ro/ /longs spyod rdzogs pa'i sku la bsam pa gang yin pa de ni bsam par bya ba ma yin pa ste/ de ni skye ba la sogs pa'i bye brag gis bsam par mi nus pa'i phyir ro//rnam pa gzhan yang bsam par bya ba bsam par nus pa'i dngos po la bsam pa gang yin pa de ni bsam par bya ba yin no/ /bsam par bya ba ma yin pa sangs rgyas kyi chos la sogs pa dag la bsam pa yin pa de ni bsam par bya ba ma yin pa'o/ /gzod ma nas ma skyes pas gzugs la sogs pa med pa'i phyir/bsam pa de dag ni bsam par mi bya'o/ /ji ltar chos thams cad gzod ma nas ma skyes pa de lta na sngar bstan zin to/ /'o na ci zhig soms shig ce na/ smras pa chos kyi dbyings soms shig /de la yang log par bsam par mi bya'o/ / chos kyi dbyings ji ltar bsam zhe na/ ji ltar yang 'gal bar yang ma sems shig /ci'i phyir de lta zhe na/ 'di ltar rnam pa gang dang gang gis chos kyi dbyings sems par byed pa rnams de dang de med pa'i phyir ro/ /stong pa dang / rang bzhin gyis skye ba med pa la sogs pa ni/ don dam par na dgag par bya ba med pa la dgag pa mi 'jug pa'i phyir med pa kho na ste/de lta bas na chos kyi dbyings de la yang bsam par mi bya ste/ log par bsam par mi bya'o zhes bya ba'i tha tshig go/ /'gal bar sems pa ni skye ba med pa la sogs pa'i rnam pa dang / dngos po la sogs pa'i rnam pa dang / dngos po tha dad pa nyid dang / gcig pa ma yin pa'i mtshan nyid la sogs pa rnam par sems pa ste/ gang gi dbang du mdzad nas/ gang stong pa nyid du lta ba ni zhes bya ba la sogs pa gsungs pa lta bu'o/ /rnal 'byor pas ji skad bstan pa'i rnam pa kho nas/de ltar zhag bdun sems na ni/ /de yi 'og tu gzungs thob 'gyur/ /bcom ldan 'das kyis yang yang du bshad pas ci zhig bya snyam du dgongs nas/ dper na zhes bya ba la sogs pa gsungs te/ phan yon 'di ni gzungs rnam pa gsum char gyi yin no/ /bde ba ni nges par legs pa dang mngon par mtho ba'i bde ba'o//som nyi ni the tshom za zhes bya ba'i tha tshig go/ /de ltar phan yon rnam pa du ma bstan nas/ 'bras bu nye ba gtso bo bstan pas 'dul ba'i 'jig rten gzungs 'di la 'jug cing mjug sdud par mdzad de/ 'di las rdzogs pa'i byang chub nye//de bas 'di la sbyor bar gyis/ /thos pa la sogs pa'am/ lus la sogs pa'am/ 'og nas bzhi tshan bstan pa rnams kyis sbyar bar bya ste/ 'dis ni rang gi don phun sum tshogs pa ye shes phun sum tshogs pa dang / spangs pa phun sum tshogs pa rnam pa gnyis bstan te/byang chub ni ye shes dang spangs pa'i mtshan nyid yin pa'i phyir ro/ /ye shes phun sum tshogs pa ni rnam pa bzhi ste/ thams cad mkhyen pa dang / rnam pa thams cad mkhyen pa nyid dang / ma 'bad par mkhyen pa dang / ma bstan par mkhyen pa'o/ /spangs pa yang rnam pa bzhi ste/nyon mongs pa dang / shes bya'i sgrib pa spangs pa dang / gtan du spangs pa dang / bag chags dang bcas par spangs pa dang / ting nge 'dzin dang snyoms par 'jug pa'i sgrib pa thams cad spangs pa ste/ de dag kyang rdzogs pa'i byang chub smos pas bstan to/ / khyed/ zhi ba'i gnas ni thob gyur nas/ /rdzogs pa'i byang chub thob byed 'gyur/ /'jig rten no snyam du dgongs pa ste/ 'dis ni gzhan gyi don phun sum tshogs pa bstan par rig par bya'o/ /zhi ba'i gnas ni nyon mongs pa dang shes bya'i sgrib pa zhi bar 'gyur ba'i phyir ram/ me gsum zhi bar 'gyur ba'i phyir/ mi gnas pa'i mya ngan las 'das pa'o/ /rdzogs pa'i byang chub ni rnam pa gsum po ste/ 'dis ni byang chub gsum la 'god pa'i gzhan gyi don phun sum tshogs pa bstan to/ /ngan song gsum las nges par thar pa dang / mtho ris su 'god pa dang /'khor ba'i sdug bsngal las gtan du rnam par thar pa ni shugs kyis bstan par shes par bya'o/ /yang na ci'i phyir/ 'di las rdzogs pa'i byang chub nye zhe na/ 'di ltar khyed/ zhi ba'i gnas ni thob gyur nas/ /rdzogs pa'i byang chub thob par 'gyur/ / zhes bya ba 'dis nye ste/ tshigs su bcad pa ril po 'dis ni rang gi don phun sum tshogs pa bstan to/ /da ni de nas bcom ldan 'das kyis zhes bya ba la sogs pa gzungs 'di 'thob pa'i thabs bstan te/ blo ldan ci 'dra gang du dang / /ji ltar gnas dang gang bsgoms dang / / gang byas pas ni 'thob 'gyur ba/ /de ni bzhi tshan rnams kyis bstan/ /rnal 'byor pa ji lta bus gzungs 'di thob par 'gyur ba de ni bzhi tshan dang pos bstan to/ /gang du gnas pa dang / ji ltar gnas pa de gnyis ni gnyis pas bstan to/ /gang sgom pa dang / gang bya ba de gnyis ni gsum pas bstan to//rnal 'byor pa ji lta bus gzungs 'di thob par 'gyur zhe na/ smras pa/ khrims ldan de yi mi mthun phyogs/ /gnyis grol de yi 'phel byed ldan/ /nyes pa dang ni phan yon rnams/ /bstan pas de la 'dzud par byed/ /'dod pa rnams la lhag par chags pa med pa zhes bya bas ni tshul khrims dang ldan par bstan te/tshul khrims ni yon tan thams cad kyi gzhi yin no/ /'dod pa lnga'i yon tan rnams lhag par chags pa med na/ srog gcod pa la sogs pa mi byed do/ /de lta bas na de spangs pa'i mtshan nyid kyi tshul khrims kyang thob pa nyid pas logs shig tu ma bstan to//tshul khrims kyi mi mthun pa'i phyogs phrag dog dang ser sna las grol ba ni/ sems can thams cad la phrag dog med pa dang / bdog pa thams cad yongs su gtong zhing 'gyod pa med pa yin zhes bya ba 'dis bstan to//phrag dog dang ser sna dag ni tshul khrims kyi mi mthun pa'i phyogs rnams yin te/ 'di ltar 'dod pa rnams la lhag par chags na phrag dog byed pa dang / ser sna byed par 'gyur ro/ /sems can thams cad la zhes smos pa ni/ dgra bo dang mdza' bo dang tha mal pa yongs su gzung ba'i phyir ro//bdog pa thams cad ces smos pa ni phyi rol dang nang gi bsdu ba'i phyir ro/ /'gyod pa med pa zhes smos pa ni sems la 'dzin pa med pa nyid du bstan pa'i phyir te/ tshig 'di gsum gyis ni tshul khrims shin tu rnam par dag pa bstan to/ /'gyod pa med par sbyin pa'i tshul can ni yid la gcags pa med par sbyin zhes bya ba'i tha tshig go//nyin mtshan du chos 'dod cing chos kyi kun dga' la dga' ba yin te zhes bya ba 'dis ni tshul khrims 'phel bar byed pa gang dag dang ldan pa nyid bstan to/ /chos la sred pa'i phyir chos 'dod par 'gyur ro//nan tan byed pas ni chos la dga'o/ /yang na chos rnams la 'jug phyir chos 'dod do/ /goms pa'i phyir chos la dga'o/ /yang na nam gyi cha stod dang nam gyi cha smad la sogs par brtson pa'i phyir chos 'dod par 'gyur ro/ /stong pa nyid la sogs pa'i chos bsgom pa'i phyir chos la dga'o//yang na gnyis su nges par gzung ba'i phyir gsungs te/ 'dis ni rtog pa ngan pa med pa'i phyir don gyis na/ 'khrig pa'i sbyor ba bdun dang bral ba'i tshul khrims bstan to/ /nyes pa dang phan yon bstan pa'i rgyus tshul khrims la sogs pa de dag la 'dzud de/ gdul ba zhes bya ba'i tshig lhag ma'o//de yang tshigs su bcad pa rnams kyis bstan to/ /de la rnam pa lngas tshul khrims la 'dzud de/ 'dod pa rnams kyi nyes pa bstan pa'i phyir gsungs pa la/ dri nga ba ni 'chal ba'i tshul khrims kyi dri dang ldan pa'i phyir ro/ /yang na 'dod pa'i rtsa ba lus kyi mi gtsang ba'i dri dang ldan pa'i phyir ro//ngan pa ni thams cad kyi tha chad du gyur pa'i phyir dang / sems can ngan pas bsten pa'i phyir dang / dam pa rnams kyis smad pa'i phyir dang / bum pa mi gtsang ba can la sogs pa dang 'dra ba'i phyir dang / 'bras bu ngan pa 'grub pa'i phyir ro/ / bdud kyi spyod yul ni bdud kyi yul las ma 'das pa'i phyir ro/ /bdud ni lha'i bu'am/ 'dod chags la sogs pa nyon mongs pa'am/ gnyis ka'o/ /sems can dmyal ba'i rkyen ni de 'grub par byed pa dang / de 'grub par 'gyur ba'i las kyis sems can dmyal bar 'gro bar 'gyur ba'i phyir ro//sems can dmyal ba smos pa ni gtso bo yin pa'i phyir te/ dud 'gro dang yi dags gnyis kyi rkyen yang 'dod pa rnams yin pa'i phyir ro/ /ngan song gi rgyu ni ma rungs par 'gyur ba'i rgyu yin pa'i phyir te/ 'dod phyir 'jig rten bcing dang bsad par 'gyur/ /zhes bya ba la sogs pa 'byung ba lta bu'o//yang na ngan song gi rgyu ni ngan song gsum gyi rgyu yin pa'i phyir ro/ /sems can dmyal ba smos pa ni gtso bor bstan pa'i phyir ro/ /de'i mi mthun pa'i phyogs phrag dog spong ba la 'dzud pa ni/ phan yon bstan pa'i phyir rnam pa lngas bstan te/ spang bar bya ba'i rang bzhin bstan pa dang /spang bar bya ba'i yul bstan pa dang / spang bar bya ba'i rgyu bstan pa la/ rgyu de yang shes kyi khe dang rnyed pa dang grags pa'i bye brag las rnam pa gsum du bstan to/ /shes kyi khe ni kun du bstan pas 'du bar 'gyur ro/ /de'i rang bzhin bstan pa ni/ dga' ba'i mig ni dga' bas lta ba ste/khro ba la sogs pa'i nyes pa dang bral ba'i phyir ro/ /de spang ba'i phan yon bstan pa de yang rnam pa gnyis te mthu che ba thob pa/ nor dang 'khor la sogs 'byor ba 'thob pa'i phyir dang / gzugs mdzes pa 'thob pa yan lag dang nying lag gi gzugs mdzes pa 'thob pa'i phyir ro//de'i mi mthun pa'i phyogs ser sna spang ba la 'jug pa ni/ nyes pa dang phan yon bstan phyir rnam pa bzhis bstan te/ nyes dmigs bstan pa ni rtsod pa ste lus la sogs pa'i bya ba gnod pa dang ldan pa'o/ /de'i rgyu bstan pa ni yongs su 'dzin pa ste/ bdag dang bdag gir mngon par zhen pas dngos por 'dzin pa'o/ /gzhi rtsa smos pas ni dngos dang brgyud pa'i rgyu'i rang bzhin bstan pa'i don te/ 'di yang yongs su 'dzin pa 'di ni rnam pa thams cad du gnod pa'i rgyu yin par bstan pas gdul ba rnams de las 'dun pa bzlog pa'i phyir ro//sred pa'i yul yongs su spang ba ni spang ba ste/ de la lhag par chags pa spang ba'i phyir ro/ /de'i phan yon bstan pa ni/ gzungs zhes bya ba ste/ gzungs 'di nyid yin no/ /de yang dus gzhan la dgongs te gsungs so/ /de 'phel bar byed pa la 'jug pa ni/ phan yon bstan pa'i phyir rnam pa lngas bstan te/ chos tshol ba ni chos ni stong pa nyid dang / de ston pa'i yi ge'o/ /de 'dri ba ni 'dri ba la sogs pa'i rim pa ste/ de'i phyir/ yi ge 'dri mchod sbyin pa dang / /klog dang nyan dang 'dzin pa dang / /ston dang kha ton byed pa dang / /sems dang bsgom pa gang yin pa//zhes bya ba la sogs pa gsungs so/ /rgyun mi chad par tshol ba ni las ngan pa yongs su spang ba'i phyir ro/ /gzhan mi sems par tshol ba ni log par rnam par rtog pa yongs su spang ba dang / mtho ris la sogs pa'i 'bras bu 'thob pa rnam par rtog pa yongs su spong ba'i phyir ro//byang chub 'dod cing tshol ba ni de byang chub kyi rgyu yin par bstan pa'i phyir byang chub kyi rgyu gzungs yin pa'i phyir ro/ /chos tshig ni stong pa nyid dang / /de ston pa'i mdo sde la sogs pa'o/ /tshigs su bcad pa dang po las ni mi mthun pa'i phyogs kyi nyes pa 'ba' zhig bstan la/gnyen po'i yon tan ni ma bstan/ gnyis pa dang tha ma las ni gnyen po'i yon tan 'ba' zhig bstan la/ mi mthun pa'i phyogs kyi nyes pa ma bstan/ gsum pa las ni mi mthun pa'i phyogs dang / gnyen po gnyi ga'i yon tan dang skyon bstan pa ma yin nam/ci'i phyir de ltar bstan zhe na/ de ni gnyen po dang mi mthun pa'i phyogs gnyis kyi yon tan dang nyes pa bstan pa gud du gces pa yod do/ /de'i phyir tshigs su bcad pa dang po la ni/ 'dod pa'i gnyen po'i tshul khrims dri zhim po bsten par bya'o zhes bya ba la sogs pas yon tan yang blta bar bya'o//tshigs su bcad pa gnyis pa dang / bzhi pa dag la yang de'i mi mthun pa'i phyogs kyi nyes pa yang blta bar bya'o/ /sngar bstan pa yi don nyid ni/ /chos kyi rjes 'brang ched du ste/ /rigs pa phan yon bye brag gis/ /tshigs bcad rnams kyis yang bstan to/ / rnam pa gzhan yang sngar bstan pa'i don nyid chos kyi rjes su 'brang ba dang / zhar la dad pas rjes su 'brang ba'i dbang du yang mdzad de/ rigs pa dang phan yon gyi bye brag gi rgyus/ yang tshigs su bcad pa dag gis bstan te/ 'di ltar 'dod pa rnams spang ba'i phyir ni dri nga ba la sogs pa'i rigs pa gsungs so//phrag dog mi bya ba'i phyir ni mthu che ba la sogs pa thob pa'i phan yon gsungs la/ de mi bya ba'i phyir 'bras bu khyad par can 'thob po zhes rgyu yang gsungs so/ /ser sna'i rgyu sred pa'i yul yongs su spang ba'i phyir ni rgyu rtsod pa gsungs so/ /rtsa ba bzhi pas ni phan yon bstan to//tshul khrims 'phel bar byed pa'i chos bstan pa'i phyir ni 'bras bu khyad par can 'thob po zhes rgyu smos la/ phan yon ni dngos su bstan pa nyid do/ /da ni gang du gnas pa dang / ji ltar gnas pa de bstan pa'i phyir/ gzhan yang zhes bya ba la sogs pa gsungs te/dgon sogs gnas shing zab mo yi/ /chos rnams la ni legs par spyod/ /rnyed dang bkur sti tshigs bcad la/ /lhag par chags med brtul zhugs can/ /rtag tu sdug pa'i dngos po kun/ /'bras bu la ni mi lta ba'am/ /'dzin med sems kyis gtong byed pas/ / gzungs 'di 'thob par 'gyur ba yin/ /gong du gnas pa zhes bya ba de/ dgon pa dang / g.ye'i tshig gis bstan te/ lus kyi 'du 'dzi yongs su spangs pas 'du ba'i nyes pa yongs su spang ba'i phyir ro/ /dgon pa ni grong nas 'dom lnga brgya phan chad do/ /g.ye ni de bas kyang ring ba'o/ / sogs pa smos pa ni dbye bsdu'o/ /ji ltar gnas pa de ni log par rnam par rtog pa'i nyes pa dang / 'du 'dzi yongs su spang pa'i phyir/ rnam pa gsum gyis bstan te/ des ni lus dang sems ngag gis bsrings na chos gang bskyed mi nus pa de 'ga' yang med do snyam du dgongs pa'o/ / chos zab mo la spyod pa ni chos zab mo la bzod pa'i stobs bskyed pa nyid ces gsungs pa gang yin pa ste/ chos zab mo dag la bzod pa ni 'dod pa'o/ /de'i stobs bskyed pa ni chen po la sogs pa'i rim pa bskyed pa'o/ /de'i dngos po ni chos zab mo la bzod pa'i stobs bskyed pa de nyid do//yang na chos la bzod pa zab mo zhes bya bar shes par bya ste/ yul zab pa'i phyir de yang zab pa'o/ /rnyed pa dang bkur sti dang tshigs su bcad pa dag la lhag par chags pa med pa ni/ rnyed pa dang bkur sti dang tshigs su bcad pa dag la lhag par chags pa med ces gsungs pa gang yin pa ste/tshigs su bcad pa ni grags pa'o/ /lhag par chags pa med pa ni mngon par zhen pa med pa'o/ /rtag tu sdug pa'i dngos po thams cad mi lta ba yongs su gtong ba ni sdug pa'i dngos po thams cad la mi lta bar yongs su gtong zhes gsungs pa gang yin pa ste/thams cad smos pa ni phyi nang gi dngos po yongs su bsdu ba'i phyir ro/ /mi lta bar gtong ba ni mtho ris dang / lan du phan 'dogs pa la sogs pa'i 'bras bu la mi lta bar yongs su gtong ba'i phyir ram/ 'dzin pa med pa'i sems kyis yongs su gtong bas na sdug pa'i dngos po thams cad la mi lta bar yongs su gtong ba zhes bya ste/btang ngam mi btang snyam pa la sogs pa'i nem nur dang / le lo la sogs pa'i 'dzin pa med pa'i phyir ro/ /cher na lus dang srog kyang zhes bya ba ni/ bu la sogs pa 'ba' zhig tu ma zad kyi snyam du dgongs pa'o/ /lus dang srog gtong ba ni nang gi yin pas dka' ba'i phyir de gnyis smos so//bu la sogs pa gtong ba ni phyi rol gyi yin pa'i phyir sla'o/ /lus gtong ba ni lag pa dang rkang pa la sogs pa gtong ba'i phyir ro/ /lus thams cad gtong na srog gtong ba yin no/ /dang po gnas yin de nas las/ /de nas rnyed sogs tshol ba spong //der yang ma zad thams cad la/ /mi lta ba yang gtong bar byed/ /bzhi tshan 'di'i don go rims bzhin du bstan par bya ste/ gnas med par bsgom du mi rung ba'i phyir/ re zhig thog mar dgon pa la sogs pa gnas gsungs so/ /der gnas nas kyang zhing la sogs pa'i las ni mi bya'o//las 'di lta bu bya'o zhes bstan pa'i phyir/ gnas kyi 'og tu chos zab mo la bzod pa'i stobs bskyed pa gsungs so/ /gnas dang las de dag gis rnyed pa la sogs pa btsal ba spang bar bya'o/ /de lta ma yin na dgon par gnas pa dang / chos zab mo la bzod pa'i stobs bskyed pa don med par 'gyur ba bstan pa'i phyir/las kyi 'og tu rnyed pa dang bkur sti dang tshigs su bcad pa dag la lhag par chags pa med pa gsungs so/ /phyi rol gyi yan lag rnyed pa la sogs pa dag la lhag par chags par mi bya bar yang ma zad kyi/sdug pa'i dngos po thams cad la yang mi lta bar spang ngo zhes bstan pa'i phyir/ de'i 'og tu sdug pa'i dngos po thams cad la mi lta bar yongs su gtong ba zhes gsungs so/ /sngar bstan pa'i don nyid chos kyi rjes su 'brang ba'i ched du gtan tshigs dang phan yon gyi bye brag gis/tshigs su bcad pa rnams kyis yang gsungs te/ rgyal bas bsngags pa'i zhes bya ba ni gtan tshigs bstan pa'o/ /dgon par gnas par gyis zhes bya ba ni dam bca' ba'o/ /bcom ldan 'das ni nyes pa dang bdud kyi dgra thams cad las rgyal bas na rgyal ba'o/ /des bsngags pa ni 'du 'dzi la sogs pa'i nyes pa yongs su spong ba'i phyir dang /yon tan skye ba'i rgyu'i phyir ro/ /bsgrub par bya ba dang / sgrub pa'i dbang gis dpe brtag par bya'o/ /bdag ni dgon pa na gnas pa'o snyam pa la sogs pas mngon pa'i nga rgyal byed pas/ de na gnas pas gzhan la brnyas mi bya/de lta na dgon pa de rgyal bas bsngags pa yin gyi/ de lta ma yin na ni de rgyal bas smad pa kho na yin no/ /'di ltar/ rgyal bas bsngags pa'i dgon par gnas par gyis/ /zhes bya ba ni gtan tshigs so/ /de na gnas pas gzhan la brnyas mi bya ba ni dam bca' ba'o//zab mo'i chos zhes bya ba ni rgyal bas bsngags pa zhes bya bar sbyar te/ rgyal bas bsngags pa nyid ni ji skad du bstan pa'i chos zab mo la bzod pa'i phyir ro/ /de lta ma yin na ni log par lta ba kho nar 'gyur ro/ /de ltar na chos zab mo la bzod pa la 'dun pa bskyed pa ni dam bca' ba'o//bde bar gshegs pas bsngags pa ni gtan tshigs so/ /zab mo la bzod pa de la 'dun pa bskyed nas ci zhig bya zhe na/ bag yod mgo la 'bar bzhin gnas par gyis/ /zhes gsungs pa ste/ mgo la 'bar ba bzhin zhes smos pa ni 'bad pa dang ldan pa nye bar mtshon pa'i phyir te/dper na mgo la me 'bar na 'bad pa chen pos mgo las me sel ba de bzhin du 'bad pa dang ldan par bya'o zhes bya ba'i tha tshig go/ /bag yod ces bya ba 'dis ni 'di ston par byed do/ /chags pa dang / zhe sdang dang / gti mug dang / le lo rnams spangs te/ma chags pa dang / zhe sdang med pa dang / gti mug med pa dang / brtson 'grus dang ldan par gnas par gyis shig ces bya ba'i tha tshig ste/ chos bzhi po 'di dag la bag yod pa zhes ming du 'dogs pa'i phyir ro/ /'di ltar tshul 'chos byed kyi gzhi yin pa/ /zhes bya ba ni gtan tshigs so//shes khe rnyed pa rnams la gnas ma byed/ /ces bya ba ni dam bca' ba ste/ rnyed pa smos pas ni rdzas dang bkur sti dang / tshigs su bcad pa dang / 'tsho ba log pa la sogs pa'i rnyed pa bsdu'o/ /tshul 'chos pa smos pa ni nye bar mtshon pa'i don te/ kha gsag la sogs pa yang bsdu'o//gnas pa ni lhag par chags pa'o/ /'o na ji ltar 'tsho bar bya zhe na/ ngan ngon dag gis chog bya ste/ /zhes bya ba gsungs te/ rtswa dang / lo ma dang / chu la sogs pa ci yang rung ci rnyed pas chog par bya'o zhes bya ba'i tha tshig go/ /de lta bus ji ltar 'tsho bar nus she na/ bya dang 'dra bar zhes gsungs so//de lta bu'i brtul zhugs drag pos yon tan ci zhig 'thob par 'gyur zhe na/ mir gyur pa yi 'bras bu yod par byos/ /zhes gsungs pa ste/ des ni phan yon bstan to/ /phan pa rnyed pa dang / gnod pa spangs pas mir gyur pa'i 'bras bu yod par bya ba'i phyir/kye ma sangs rgyas bstan pa legs par rnyed/ /ces gsungs te/ des ni phan pa rnyed par bstan to/ /sdug bsngal mang po'i rtsa ba khyim yang spongs/ /zhes bya ba 'dis ni gnod pa spang bar bstan to/ /kye ma zhes bya ba 'di ya mtshan la bya ste/ legs par rnyed ces bya ba de dang sbyar bar bya ste/'khor ba na 'dris pa ma yin pa'i chos yid bzhin gyi nor bu dang 'dra ba rnyed pa ni shin tu rnyed par dka' ba'i phyir/ kye ma legs par rnyed do zhes gsungs so/ /thog ma med pa'i 'khor ba nas bskyed pa'i chags pa spang bar dka' ba'i phyir yang / kye ma spangs so zhes gsungs so//sangs rgyas kyi bstan pa 'di rab tu 'byung ba'o/ /legs par rnyed pa ni mdzes par rnyed pa ste/ yon tan phun sum tshogs pa thams cad kyi rgyu yin pa'i phyir dang / mngon par mtho ba dang / nges par legs par 'dren pa'i phyir dang / 'khor ba na 'dris pa ma yin pa'i phyir ro/ /yang na phyir mi ldog pa rnyed pa ni legs par rnyed pa ste/tshe rabs gzhan du yang phyir mi bzlog pa'i phyir te/ mya ngan las 'das pa la gzhol ba'i phyir ro/ /yang na shin tu yongs su rdzogs par rnyed pas na legs par rnyed pa ste/ 'dod pa la kun tu rtog pa la sogs pas nyams par ma byas pa'i phyir ro//sdug bsngal mang po'i rtsa ba ni/ bsgrub pa dang / bsrung ba dang / sdug pa dang bral ba dang / mi sdug pa dang phrad pa la sogs pa'i sdug bsngal gyi rtsa ba yin pa'i phyir ro/ /sangs rgyas kyi bstan pa legs par rnyed pa'i rgyu ni khyim spangs pa'o/ /khyim pa'i tshig ni dgon pa na gnas pa nye bar mtshon pa'i don te/gtsug lag khang la sogs pa na yang khyim gyi nyes pa srid pa'i phyir ro/ /khyim spang pa'i rgyu ni sdug bsngal mang po'i rtsa ba nyid do/ /gang gi phyir sangs rgyas kyi bstan par legs par rnyed pa dang / sdug bsngal mang po'i rtsa ba khyim spangs pa de'i phyir/lus dang ngag dang yid kyang yongs dag pas/ /khyed sangs rgyas dang ni chos la gus par gyis/ /ngag dag pa ni ngag gi las dge ba rnam pa bzhi'o/ /lus dag pa ni lus kyi las dag pa rnam pa gsum mo/ /yid dag pa ni brnab sems med pa la sogs pa yid kyi las rnam pa gsum po nyid do//'dis ni dge ba bcu'i las kyi lam dag la gnas pa bstan to/ /sangs rgyas la gus par bya ba ni lam bzang po ston pas mchog tu phan 'dogs pa'i phyir ro/ /chos la gus par bya ba ni mya ngan las 'das pa la sogs pa'i yon tan phun sum tshogs pa 'thob par byed pa'i phyir ro//yang na sangs rgyas dang chos la gus par bya ba ni/ nan tan gyis bsgrub pa'i phyir te/ sangs rgyas bla mar gyis shig /chos bla mar gyis shig ces bya ba la sogs pa gsungs pa lta bu'o/ /de ltar phan pa rnyed pa la sogs pas mir gyur pa 'bras bu yod par byed pas/rnyed pa'i nyes dmigs bstan pas rdzas la sogs pa'i rnyed pa gzhan spang bar bya'o zhes brjod pa'i phyir/ rnyed 'dod ces bya ba la sogs pa gsungs te/ rnyed pa 'dod pa ni dran pa la sogs pa med par 'gyur ba re re'i rgyu yin par khong du chud par bya ste/ 'di ltar rnyed pa 'dod pas sems g.yengs nas phan tshun 'gro ba la ni dran pa la sogs pa med par 'gyur zhing byang chub kyang ring bar 'gyur ro/ /dran pa la sogs pa med pa yang re re nas rnyed pa yongs su spang ba'i rgyu yin no/ /yang na rnyed pa 'dod pa ni dran pa med pa kho na'i rgyu'o/ /de yang shes rab med pa'i rgyu yin te/de bzhin du snga ma snga ma med pa ni phyi ma phyi ma med pa'i rgyu yin par khong du chud par bya ste/ byang chub ring bar 'gyur ba rnyed pa yongs su spang ba'i rgyu yin pa'i bar du'o/ /yang na rnam pa gzhan yang rnyed pa 'dod pa ni dran pa med pa'i rgyu'o/ /de gnyis kyang shes rab med pa'i rgyu ste/de bzhin du gong nas gong du lnga'i bar gyis bskyed pa ni byang chub las ring ba'i rgyu yin no/ /nyes dmigs rab 'byams 'di thams cad kyi rtsa ba ni rnyed pa 'dod pa yin pas/ de ltas rnyed pa yongs su spang bar bya/ /zhes gsungs so/ /de ni gang bsgom pa dang / gang bya ba zhes bstan pa gang yin pa de bshad par bya ste/don gcig rtogs nas kun shes na/ /brgyad ces bya bas ci zhig bya/ /yi ge so so'i don shes na/ /'di yang ha cang nyungs pa yin/ /rnal 'byor pas zhes bya ba'am/ gzhan yang rung ste/ yi ge gcig gi don khong du chud pas thams cad rtogs na ci'i phyir yi ge 'bru brgyad ces bstan/'on te yi ge so so'i don shes par bsgrub pa yin na ni/ de ltar na 'jig rten na a zhes bya ba la sogs pa yi ge ches mang po zhig yod pas/ yi ge 'bru brgyad ces bya ba 'di yang ha cang nyungs so zhe na/ nyes pa med pa de 'di ltar/ bstan bya ston pa nyes pa yi//ngo bo de nyid rnam gsum bstan/ /bstan par bya ba ni chos thams cad do/ /ston pa po ni longs spyod rdzogs pa dang sprul pa'i sku'o/ /nyan pa ni gdul bya'i skye bo ste/ de yang byis pa dang / mkhas pa'i bye brag gis rnam pa gnyis so/ /de dag gi ngo bo'i de kho na ni phyin ci ma log pa'i ngo bo nyid de/de yang rgyu las rnam gsum du bstan te/ rgyu de yang gang zhe na/ rnam par rtog pa rnam pa gsum spong ba ste/ rnam par rtog pa rnam pa gsum ni bstan par bya ba dang / ston pa po dang / nyan pa por rnam par rtog pa ste/ de spangs na sangs rgyas rjes su dran pa rtogs pa med pa'i phyir ro//bstan bya gang yin de/ rnam gnyis 'jig rten 'di na 'dris pa dang / ma 'dris pa tha dad pa'i phyir ro/ /ci'i phyir bstan par bya ba de rnam pa gnyis su mdzad ce na/ rgyu las mdzad de/ rgyu de yang gang zhe na/ mngon par 'du bya ba chen pos bsgrub pa'i chos gzungs la sogs pa rnams kyang ngo bo nyid med pa yin na/skye ba la sogs pa gzhan lta ci smos zhes bstan pa'i phyir/ bstan par bya ba nyid dbye bar mdzad de khyab pa'i phyir ro/ /'jig rten na 'dris pa'i bstan par bya ba yang / mtshan nyid dang mtshan gzhi'i bye brag gis rnam pa gnyis te rgyu las so//rgyu de yang gang zhe na/ gang la mtshan nyid yod pa dang rgyus bskyed pa'i ngo bo de ji ltar med snyam du rtog pa spang ba'i phyir ro/ /rnam par smin pa smos pas ni bdag po'i 'bras bu yang mtshon te/ de yang smin pa'i ngo bo yin pa'i phyir ro/ /'jig rten na ma 'dris pa'i bstan par bya ba yang /lam dang lam ma yin pa'i bye brag gis rnam pa gnyis te/ rgyu las mdzad do/ /rgyu de yang gang zhe na/ chos de gnyi ga yang rnam par rtog pa spang bar 'gyur te/ de dag ji ltar med snyam du rnam par rtog pa de spang ba'i phyir ro/ /yang thams cad rnam pa gcig tu mdzad de rgyu las so//rgyu de yang gang zhe na/ bstan par bya ba la sogs par rnam par rtog pa spong ba ste/ de ni mdor bsdus pa la dga' ba'i sems can la phan 'dogs pa'i phyir bstan to/ /yang na/ yi ge 'bru brgyad 'di dag ni/ /byang chub sems dpa' mkhas ldan pa/ / brgyad po dag gi ting 'dzin rnams/ /smos pa yin par thub pas gsungs/ /de yi don ni bsgoms pa la/ /de kun mngon du phyogs par gnas/ /gzungs ni thob par bya ba'i phyir/ /kun du brtson par rab tu byed/ /yi ge 'bru brgyad po 'di dag ni rnam par snang byed la sogs pa 'og nas 'byung ba byang chub sems dpa' brgyad po dag gis ting nge 'dzin gang dag yin pa'i ting nge 'dzin de dag smos par byed pa yin par go rims bzhin du bcom ldan 'das kyis gsungs te/yi ge de dag ting nge 'dzin gyi don bsgoms pa la/ byang chub sems dpa' de dag thams cad mngon du phyogs par 'gyur ro//de nas mngon du phyogs par gyur nas sgom pa de gzungs thob par bya ba'i phyir brtson par byed de/ 'di ltar 'og nas byang chub sems dpa' chen po brgyad po de dag des gzungs thob par bya ba'i phyir mngon par brtson par 'gyur ro zhes 'byung ste/ de lta bas na yi ge 'bru brgyad po 'di dag gsungs te/ nyung ngu yang ma gsungs la/ dgos pa med pa'i phyir lhag par yang ma gsungs so/ /byang chub sems dpa' rnams dang ni/ /sangs rgyas rnams dang gnod sbyin rnams/ /rim bzhin dgod pa'i dkyil 'khor 'di/ /rmi lam du ni bstan pa yin//pad+ma'i rgyal po dkar po zhig /'dab ma brgyad pa yid du 'ong / /de dbus thub pa mtshungs med pa/ /bum pa dang ni bcas par gzhag /'dab brgyad dag la thub pa'i sras/ /rnam par snang byed sogs brgyad kun/ /thub pa dang ni rang rang gi/ /yi ge'i sa bon ldan par dgod//'dab ma rnams kyi bar dag tu/ /gnod sbyin brgyad gzhag cho ga gcig /cho ga gzhan yang de bzhin du/ /tshon phye sna lngas gru bzhir bri/ /mkhas pas de'i dbus thub pa ni/ /pad+ma dkar po 'dab brgyad la/ /bum pa chus bkang ldan par gzhag /de bzhin thub sras de dag kyang //pad+ma'i gdan bcas chu bum bcas/ /phyogs bzhi dag tu gnyis gnyis dgod/ /phyogs kun byang chub sems dpa' yi/ /bar du gnod sbyin de dag dgod/ /slob ma gtsang ma yon tan can/ /gzungs bsgom rnal 'byor grub 'dod pa/ /dkar po'i stan la 'dug pa la//bum pa de dag gis dbang bskur/ /de ltar rmi lam bstan pa yi/ /cho ga bdag gis gsal brjod pa/ /bdag nyid legs dran bya phyir gyis/ /mngon pa'i nga rgyal cung zad med/ /de ltar spyir yi ge 'bru brgyad po rnams kyi rang bzhin bsdu ba byas nas/ da ni so so'i don de la 'jug pa bshad par bya ste/don dam par stong pa dang stong pa ma yin pa'i chos thams cad ji ltar ngo bo nyid med pa de ltar ni dang pos bstan to/ /sogs pa smos pas ni skye ba dang skye ba med pa la sogs pa bsdu'o/ /de rnam par shes pa ni gang gis chos de dag bdag med pa la 'jug par 'gyur ba'o//de khong du chud pa ni mngon sum du bya ba'o/ /de lta bas na/ /dam pa'i don du stong pa dang / /stong min la sogs chos rnams kun/ /ngo bo nyid med rnam shes pa/ /khong du chud phyir dang por bzhed/ /pa zhes bya ba'i don khong du chud pa ste/ de ni thog mar gsungs pa'i phyir dang po'o//de bstan pa 'di lta ste zhes bya ba la sogs pa ste/ 'di lta ste zhes bya ba'i sgra ni ngo bstan pa'i don to/ /pa zhes bya ba'i don khong du chud pa zhes bya ba ni khong du chud pas zhes bya bar rnam par dbye ba bsgyur bar bya ste/ gang gis she na/ bka' stsal pa/ don dam par stong pa dang stong pa ma yin pa la sogs pa chos thams cad ni bdag med pa'o//de la 'jug pa ni rtogs pa ste/ 'dis 'jug pa'i phyir ro/ /de khong du chud pa ni chos thams cad bdag med pa la 'jug pa khong du chud pa des so/ /longs spyod rdzogs pa'i sku dang ni/ /sprul pa'i sku gnyis las skur bstan//de gnyis 'jig rten don 'byor pa/ /ma lus par ni mdzad phyir ro/ /longs spyod rdzogs pa dang sprul pa'i sku de gnyis 'jig rten gyi don phun sum tshogs pa ma lus pa mdzad pa'i phyir/ bcom ldan 'das kyis las kyi skur gsungs te/ las la dang /las kyi phyir dang / las kyi sku yin pa'i phyir ro/ /kun rdzob tu dang don dam par/ /mtshan dang mtshan med sogs pa'i rgyus/ /sku gnyis rnam par shes pa ni/ /khong du chud phyir gzhan du bzhed/ /la zhes bya ba ni khong du chud pa zhes bya ba'i tha tshig go/ /phrin las kyi sku longs spyod rdzogs pa dang sprul pa dang gnyis kyi rang bzhin de yang /kun rdzob tu ni mtshan dang ldan no/ /don dam par ni mtshan med do/ /sogs pa smos pas ni/ mdo las dpe byad bzang po dang dpe byad bzang po med par zhes smos pa bsdu ste/ de yang nye bar mtshon pa'i don yin pa'i phyir/stong pa ma yin pa dang / stong pa la sogs pa yang bsdu'o/ /de bstan pa la zhes bya ba'i don khong du chud pa zhes bya ba dang sbyar te/ ji ltar de bzhin gshegs pa'i las kyi sku la 'jug pa khong du chud pa zhes bya ba gsungs pa'o/ /rnam pa ji lta bur khong du chud ce na/ mtshan dang dpe byad bzang po dang /mtshan dang dpe byad bzang po med par zhes gsungs pa'o/ /kha cig las ni de bzhin gshegs pa'i chos kyi sku la 'jug pa khong du chud pa zhes kyang 'byung ste/ de'i tshe na don yin te/ mtshan dang dpe byad bzang po gang yin pa de chos kyi sku 'di la mtshan dang dpe byad bzang po med de/des na mtshan dang dpe byad bzang po dang / mtshan dang dpe byad bzang po med par zhes bya ba ni/ chos kyi sku 'di la chos thams cad ci yang med pa'i don to/ /mtshan la sogs smos pa ni/ mtshon pa'i phyir ram/ chos kyi sku la 'jug pa khong du chud pa'i sgo bstan pa'i phyir te/ de bzhin gshegs pa smos pa yang de dang 'dra bar bshad par bya'o//chos kyi sku la ni 'di ni de bzhin gshegs pa'i chos kyi sku'o/ /'di ni de bzhin gshegs pa'i chos kyi sku ma yin no zhes dbyer med de/ dbyer yod du zin na chos kyi sku nyid nyams pa'i phyir ro/ /yang na don khong du chud pa zhes bya ba 'di sangs rgyas rjes su dran pa'i ngo bo yin pa'i phyir gnyis gsungs so//byis pa dang ni mkhas pa'i chos/ /dri ma can dang dri ma med/ /mi stong min sogs stong min sogs/ /ji bzhin gnyis ni bstan pa yin/ /gang dag la dri ma can gyi rang bzhin yod pa de dag ni byis pa'i chos rnams so/ /gang dag la dri ma med pa'i rang bzhin yod pa de dag ni mkhas pa'i chos rnams te/zag pa dang bcas pa dang / zag pa med pa zhes bya ba'i tha tshig go/ /de dag ni stong pa yin pa la sogs pa dang / stong pa ma yin pa la sogs pa ji lta ba bzhin gnyis bstan te/ tshad ma dang ldan pa'i phyir phyin ci ma log pa gnyis zhes bya ba'i tha tshig go//kha cig las ni gnyis su med par 'byung ste/ de'i tshe na ni/ mi stong min sogs stong min sogs/ /gnyis med ji bzhin shes par bya/ /zhes brjod par bya ste/ de lta na ni byis pa dang / mkhas pa'i chos gnyi ga yang ngo bo nyid gcig tu bstan pa yin no//de'i 'jug pa ni byis pa dang mkhas pa'i chos gnyis sam gnyis su med par ji lta ba bzhin gyi'o/ /rnam par shes pa ste 'dis 'jug pa'i phyir ro/ /khong du chud pa mngon sum byed/ /rtogs zhes bya ba'i tha tshig go/ /gsum pa 'di ni mkhas pa yis/ /de lta bur ni shes par bya//ba zhes bya ba'i don khong du chud ces bya ba'i tha tshig ste/ de bstan pa/ ba zhes bya ba'i don khong du chud pa zhes bya ba dang sbyar te/ ji ltar zhe na byis pa'i chos rnams zhes bya ba la sogs pa gsungs pa'o/ /skye sogs skye ba med sogs kyis/ /'jug pa skye ba med pa dang / 'gag med shes pa gang yin de/ /khong du chud phyir gzhan du bzhed/ /sogs pa smos pas ni rga shi med pa bsdu'o/ /de las don 'di 'byung ste/ skye ba la sogs pa dang / skye ba med pa la sogs pa'i 'jug pa gang yin pa'i 'jug pa de'i skye ba med pa dang / 'gag pa med pa gang dag yin pa de sde tshan de gnyis ngo bo nyid kyis stong pas na/'jug pa yang de dang 'dra ba'i phyir ro/ /skye ba med pa dang 'gag pa med pa de gnyis shes pa gang yin pa'i shes pa de khong du chud pa'i phyir gzhan du bzhed de/ bzhi pa dza zhes bya ba'i don khong du chud pa zhes bya ba'i tha tshig go//de bstan pa dza zhes bya ba'i don khong du chud pa zhes bya ba dang sbyar te/ ji lta zhe na/ skye ba dang / rga ba dang / 'chi ba dang / skye ba dang / rga ba dang / 'chi ba med pa rnams kyi 'gro ba dang 'jug pa gang yin pa de'i/ mi skye mi 'gag pa gang yin pa de dag la 'jug pa de khong du chud pa ste/des zhes bya ba'i tha tshig go/ /snga ma ji ltar snang bar te/ /phyi ma dam pa'i don du yin/ /de ltar yang dag don shes pa/ /khong du chud phyir lnga par bzhed/ /las dang rnam par smin pa dag ni ji ltar snang ba bzhin yin pa'i phyir ro/ /las dang rnam par smin pa med pa ni don dam pa ste/de ltar kun rdzob dang don dam pa'i bden pa gnyis la brten nas las dang rnam par smin pa dang / las dang rnam par smin pa med pa dag gi de kho na shes pa de khong du chud pa'i phyir lnga par bzhed de/ ka zhes bya ba'i don khong du chud ces bya ba'i tha tshig go/ /las dang rnam par smin pa med pa smos pa yang 'jig rten las 'das pa'i kun rdzob kyi bden pa la brten nas gsungs te/yang dag par na dgag par bya ba med pas/ dgag pa mi 'jug pa'i phyir de ni med pa kho na'o/ /yang na yang dag mi snang phyir/ /de gnyis ngo bo nyid med nyid/ /de ltar yang dag don shes pa//khong du chud phyir lnga par bzhed/ /yang na gang gi phyir las dang rnam par smin pa dang las dang rnam par smin pa med pa gnyis yang dag par mi snang bas na/ ngo bo nyid med pa kho na yin pa de'i phyir/ ngo bo nyid med pa'o zhes de kho na nyid kyi don shes pa khong du chud pa'i phyir lnga par bzhed do//de bstan pa ka zhes bya ba'i don khong du chud pa zhes bya ba dang sbyar te/ ji lta zhe na/ las dang rnam par smin pa dang / las dang rnam par smin pa med pa la 'jug pa khong du chud pa zhes gsungs pa'o/ /gzungs kyi chos kyi rnam grangs kyis/ /stong pa nyid la sogs pa yi/ /chos kyi dbyings ni 'di shes pa//rtogs phyir drug pa 'dir bzhed do/ /chos kyi dbyings 'di ni gzungs kyi chos kyi rnam grangs kyi stong pa nyid la sogs pa gang dag yin pa de dag gi yin no snyam du shes pa gang yin pa de khong du chud pa'i phyir/ drug par bzhed de/ d+ha zhes bya ba'i don khong du chud ces bya ba'i tha tshig go//stong pa nyid la sogs pa yang / yang dag par dpyad na dgag par bya ba med pa'i phyir ngo bo nyid stong pa kho na'o/ /yang na gzungs chos rnam grangs kyis/ /stong pa nyid la sogs pa nyid/ /chos dbyings yin par rnam shes pa/ /khong du chud phyir drug par bzhed/ /yang na gzungs kyi chos kyi rnam grangs kyi stong pa nyid dang /mtshan ma med pa dang / smon pa med pa gang yin pa de nyid chos kyi dbyings yin par shes pa gang yin pa de khong du chud pa'i phyir drug par bzhed do/ /stong pa nyid la sogs pa yang ngo bo nyid kyis stong pa kho na yin mod kyi/ 'on kyang ngo bo nyid la sogs pa la rnam par rtog pa spangs pa'i thabs bstan pa'i phyir/yang dag pa'i kun rdzob la brten nas chos kyi dbyings zhes gsungs so/ /ngo bo nyid sogs rnam rtog pa/ /spangs pa'i thabs ni gdul rnams la/ /bstan par bya phyir mgon rnams kyis/ /stong nyid la sogs bstan pa mdzad//rnam par rtog pa ni rnam pa gsum ste/ ngo bo nyid la rnam par rtog pa dang / mtshan ma la rnam par rtog pa dang / smon pa la rnam par rtog pa'o/ /de la ngo bo nyid la rnam par rtog pa ni gzhan gnyis kyi sngon du 'gro ba'o/ /mtshan ma la rnam par rtog pa ni smon pa la rnam par rtog pa'i sngon du 'gro ba ste/de ltar 'di ni de'i gnyen po de dag gi go rims bstan pa yin te/ de bstan pa/ d+ha zhes bya ba'i don du khong du chud pa zhes pa dang sbyar te/ ji lta zhe na/ gzungs kyi chos kyi rnam grangs kyi/ /zhes bya ba la sogs pa gsungs pa'o/ /zhi gnas la sogs nyid yin zhes/ /chos rnams thams cad mdor sdud de//de dag de bzhin nyid shes pa/ /khong du chud phyir bdun par bzhed/ /zhi gnas ni ting nge 'dzin to/ /sogs pa smos pas ni lhag mthong la sogs pa bsdu'o/ /lhag mthong ni shes rab ste/ chos thams cad ni zhi gnas dang lhag mthong dang / zhi gnas dang lhag mthong ma yin pa nyid dam de dang ldan pa nyid do//de dag gi de bzhin nyid ni re zhig zhi gnas dang lhag mthong dag gi de bzhin nyid yin te gzod ma nas ma skyes pa'i phyir ro/ /dgag par bya ba med na dgag pa mi 'jug pa'i phyir/ zhi gnas dang lhag mthong ma yin pa dag kyang de dang 'dra'o//de bzhin nyid de shes pa gang yin pa khong du chud pa'i phyir bdun par bzhed de/ sha zhes bya ba'i don khong du chud ces bya ba'i tha tshig go/ /de bstan pa/ sha zhes bya ba'i don khong du chud pa zhes bya ba dang sbyar ro/ /ji lta bu'i tshul du zhe na/ zhi gnas zhes bya ba la sogs pa gsungs pa'o//kun rdzob tu ni chos rnams kun/ /skad cig gang yin de dag ni/ /gzod nas zhi phyir don dam du/ /zad med la sogs bye brag bstan/ /ji ltar grags pa'i skad cig pa'i chos gang dag yin pa de dag rim pas dpyad na skad cig ma'i mi rtag pa'i phyir zad pa med pa'o/ /rgyun gyi mi rtag pa med pa'i phyir 'jig pa med pa'o//rgyud kyi mi rtag pa med pa'i phyir rgyu ba med pa ste/ gang dag la 'gro ba med pa de dag ni rgyu ba med pa'o/ /'dir rgyun ni tshe gcig gi rgyun no/ /rgyud ni tshe du ma'i yin par bzhed do/ /ci'i phyir de dag rig pas dpyad na/ zad pa med pa la sogs pa'i ngo bo yin zhe na/gzod ma nas zhi ba'i phyir zhes gsungs te/ chos thams cad skye ba med pa'i phyir zhes bya ba'i tha tshig go/ /skye ba ni 'jig pa'i thog mar 'byung ba ste/ de sngon du 'gro ba'i phyir ro/ /yang na gzod ma nas zhi ba'i phyir zhes bya ba ni ngo bo nyid kyis zhi ba'i phyir zhes bya ba'i tha tshig go/ / gzod ma ni ngo bo nyid la bya ste/ 'jig pa'i thog mar de 'gro ba'i phyir ro/ /ci'i phyir de dag zad pa med pa la sogs pa bye brag gis bstan zhe na/ smras pa/ mngon zhen rnam gsum spang ba'i phyir/ /zad med la sogs bye brag gam/ /yang na khams kyi bye brag gis/ /rnam pa gsum du gsungs pa yin//mi rtag pa la sogs pa la gdul ba'i skye bo'i mngon par zhen pa rnam pa gsum yod de/ skad cig pa'i mi rtag pa la mngon par zhen pa dang / dus gzhan gyi gnas skabs kyi mi rtag pa la mngon par zhen pa dang / 'khor ba ji srid du gnas pa mya ngan las 'das pa'i grong du 'jug pa la mngon par zhen pa'o//yang na khams gsum gyi bye brag la brten nas/ zad pa med pa la sogs pa'i bye brag go rims bzhin bstan te/ khams gsum pa la ma gtogs pa 'khor ba pa'i dngos po gzhan med la/ de yang tshul de lta bu yin pas de'i phyir de la mngon par zhen pa spong ba'i phyir zhes bstan pa'i phyir ro//yang na gang gi phyir skad cig pa'i chos thams cad la brtags na/ skad cig pa'i mi rtag pa med pa'i phyir zad pa med la/ rgyun gyi mi rtag pa med pa'i phyir 'jig pa de'i phyir rgyu ba med de nyon mongs pa med ces bya ba'i tha tshig go/ /de lta bu dag la nyon mongs pa rnams kyis gnas mi thong pa'i phyir ro//zad pa med pa la sogs pa de dag nyid ci'i phyir zhe na/ gzod ma nas zhi ba'i phyir zhes gsungs pa'o/ /chos kun mya ngan 'das pa gang / /de 'dir de bzhin nyid du bstan/ /'dir chos thams cad mi snang bar 'gyur ba'i tshul gyis mya ngan las 'das pa na/ chos thams cad mya ngan las 'das pa ni/ 'dir de bzhin nyid yin par gsungs so/ /de la 'jug pa rtogs pa ste/ /de rtogs phyir na brgyad par bzhed/ /chos thams cad mya ngan las 'das pa de la 'jug pa ni rtogs pa'o/ /de rtogs pa khong du chud cing mngon sum du bya ba'i phyir brgyad par bzhed de/k+Sha zhes bya ba'i don khong du chud ces bya ba'i tha tshig go/ /de bstan pa/ k+Sha zhes bya ba'i don du khong du chud pa zhes bya ba dang sbyar te ji lta zhe na/ skad cig pa zhes bya ba la sogs pa gsungs pa'o/ /'dis don rnams khong du chud par byed pas na don khong du chud pa ni rtogs pa'o/ / de rtogs par bya ba ni mngon sum du zhes bya ba'i tha tshig go/ /des ni bsod nams skyed pa na/ /gzungs sam yang na yi ge yi/ /don la gang gis 'jug 'gyur ba/ /don rtogs de ni gsum du bstan/ /rnal 'byor pa de bsod nams skyed par byed pa na/ sgo mtha' yas pas bsgrub pa'i gzungs sam/yi ge 'bru brgyad po 'di dag gi don la gzungs la sogs pa gang gis rtogs shing khong du chud par 'gyur ba gzungs la sogs pa'i don khong du chud pa de ni bcom ldan 'das kyis tshig gsum du bstan to/ /legs par bri ba ni rnam pa gsum gyis bstan te/ bsam pa dang / sbyor ba dang / sgrub pas so/ /bsam pa yang byang chub tu yongs su bsngo ba la sogs pa'i bsam pa'i bye brag gis rnam pa du ma yod do/ /sbyor ba yang bkur sti dang / kha zas dang / sa phyogs gtsang ma dang / nan tan du bya ba la sogs pa'i sbyor ba bye brag gis rnam pa du ma yod do//sgrub pa yang yi ge gsal ba dang / zur phyin pa la sogs par sgrub pa'i bye brag gis rnam pa du ma yod do/ /yang na legs par bri ba ni/ mdzes par bris pa ste/ byang chub yongs su bsngo ba la sogs pa'i bsam pas 'dri ba'i phyir ro/ /phyir mi ldog pa'i dge ba'i chos 'phel bar byed pa'i sbyor bas 'dri ba'i phyir ro//yongs su rdzogs par 'dri ba ste/ yi ge'i yon tan thams cad dang ldan par 'dri ba'i phyir ro/ /gzung ba ni rnam pa bzhi ste/ glegs bam dang / tshig dang / don dang / de gnyi ga'o/ /klog pa ni bsam pa dang / brjod pa'i sgo nas rnam pa gnyis so//de la bsam pa ni rnam pa gnyis te/ byang chub tu yongs su bsngo ba'i bsam pa dang / yi ge la sogs pa la gtad pa'i bsam pa'o/ /brjod pa ni zur chag pa la sogs pa'i nyes pa dang bral ba ste/ rnam pa du ma yod par rig par bya'o/ /rjes su dran par bya ba ni rnam pa gsum ste/bsam pas dang / yul gyis dang / rang gi ngo bos so/ /de la bsam pa ni rnam pa gnyis te/ byang chub tu yongs su bsngo ba'i bsam pa dang / yi ge dang / don dang / gnyi ga la sems pa'i bsam pas so/ /yul ni rnam pa gsum ste/ yi ge rjes su dran pa dang /don rjes su dran pa dang / gnyi ga rjes su dran pa'o/ /rang gi ngo bo ni rnam pa gnyis te/ bsam pa rjes su dran pa dang / sgom pa rjes su dran pa'o/ /thob par 'dod pas nyin re zhing / /klog dang rjes su dran par bya/ /gzungs 'di zhes bya ba'i tshig gi lhag ma'o/ /de ni de lta na rigs kyi//gzungs ni bsod nams chung ngu yis/ /shin tu thob par mi 'gyur ro/ /de lta bas na rtag tu bkur ster byas la yun ring por rgyun du goms par byas pa'i bsod nams kyi tshogs dang ldan pas gzungs thob par 'gyur ro/ /zla ba phyed phyed cing zhes bya ba'i tshig gis yin pa de ni bcom ldan 'das kyis bye brag tu bya ba'i phyir gsungs te/'di ltar zla ba phyed phyed cing gus par byas la shin tu bsgrims pa dang ldan zhing khrus la sogs pa sngar byas la/ legs par klog pa la sogs pa bya'o zhes gsungs pa yin te/ de de lta bu yin par shes par bya ba'i phyir smras pa/ bye brag la ni dgongs pa'i phyir//brtson pa yi ni tshig kyang gsungs/ /gang gi phyir brtson par bya zhes gsungs pa de'i phyir/ bye brag la dgongs par mngon no/ /brtson pa'i sgra ni gus pa la sogs pa'i sbyor ba nyid dang sbyar bar bya'o/ /gang gi phyir de lta yin pa/ /de'i phyir khrus sogs sngar byas la/ /bklag pa la sogs de dag bya/khrus bya ba dang / smyung ba bya ba dang / nges par gnas pa dang / dkyil 'khor dang / me tog dang / bdug pa dang / spos dang / bshos dang / gtor ma dang / mar me dbul ba dang / byang chub tu smon lam gdab pa dang / sdig pa bshags pa la sogs pa sngar byas nas/bklag pa la sogs pa bya'o/ /bklags pas skyo bar gyur na rjes su dran par bya'o/ /des skyo bar gyur na/ yang bklag par bya'o/ /de lta bus nyin mtshan de 'da' bar bya'o/ /sbyin la sogs la zhus la sogs/ /yang dag dga' bya la sogs de/ /rtag bya de gzungs bdag med la/ / sbyin pa la sogs pa pha rol tu phyin pa rnams dang / ting nge 'dzin dang / rnam par thar pa dang / gzungs kyi chos kyi rnam grangs la sogs pa'am/ dge ba'i chos gzhan dag legs par zhugs pa ni yang dag par dga' bar bya'o/ /ma zhugs pa ni yang dag par 'dzin du gzhug go/ / zhugs pa brtson 'grus chung ba phyir ldog par 'dod pa ni/ yang dag par gzengs bstod par bya'o/ /de ltar yang dag par dga' ba la sogs pa mthun mthun du byas nas rim gyis nong du gyur pa de/ bdag med pa gzung pa'i phyir brtson par bya'o/ /yang na de dag nyid la'o/ /yang na sbyin pa la sogs pa de dag la ma zhugs pa gzud par bya'o//yang na yang dag par dga' ba la sogs pa de dag la gzud pa zhes bya bar sbyar te/ /de ltar na yang dag par dga' bar bya ba la sogs pa la gzud pa zhes bya bar tshig bsdu'o/ /gal te de lta na sems can kyang 'di 'dzin gzhug par bya zhes pa la sogs pa yang ji ltar drang ste/'di ltar 'di zhes bya ba'i sgra ni/ sems pa dang / 'dri ba dang / gzung ba dang / klog pa'i skabs dang sbyar ba yin no/ /mtshon pa'i don yin pa'i phyir nyes pa med de/ sbyin pa la sogs pa gzhan yang bsdu'o/ /dper na 'di nyid las yang dag par 'dzin du gzhug pa mtshon pa'i don du gsungs te/des na yang dag par dga' ba la sogs pa gzhan yang bsdu ba lta bu dang / dper na/ bklag par bya bas rjes su dran pa bsdu ba bzhin no/ /yang na/ gzungs kyi chos kyi rnam grangs la/ /zhugs par gyur la sogs pa dag /yang dag dga' la sogs de bya//'dir gzungs kyi chos kyi rnam grangs smos pas ni yi ge dang don gzung ngo / /bshad pa snga ma la ni byang chub sems dpa' mngon par brtson pa'i bye brag bstan pa'i don du bshad par bya'o/ /'dir ni lan gnyis su 'dus pa la sogs pa'i rim pa la brten nas/ yang dag par dga' ba la sogs pa de'i yul bstan pa'i phyir yang yin par rig par bya'o/ /de la gzungs kyi chos kyi rnam grangs la legs par zhugs pa la sogs pa yang dag par dga' bar bya ba la sogs pa ni snga ma bzhin du sbyar bar bya'o/ /yang na gzungs la gzud par bya//yang na gzungs sangs rgyas rjes su dran pa'i mtshan nyid la gzud par shes par bya'o/ /don ni sngar yang bshad mod kyi/ /chos kyi rjes su 'brang ba'i phyir/ /rigs pa phan yon bye brag gis/ /tshigs su bcad pa gnyis kyis bstan/ /tshigs su bcad pa dang po ni rigs pa dang phan yon gyi yul bstan pa'i phyir don khong du chud pa sngar bstan pa rnams yang dag par bzlas pa gsungs so//gnyis pas ni khong du chud pa bzhi po rnams kyi phan yon bzhi go rims bzhin du bstan to/ /yang na don khong du chud pa re re phan yon bzhi dang / rigs pa bzhi smos pa yin te/ byang chub dang nye ba la byang chub ni bla na med pa'o//shes rab rgya che ba la rgya che ba ni rnam pa gsum gyis bstan te/ yul las ni yul mtha' dag la khyab pa'i phyir ro/ /'bras bu las ni bdag dang gzhan gyi don phun sum tshogs pa rgya chen po'i 'bras bu dang ldan pa'i phyir ro/ /ngo bo nyid las ni shes rab kyi yon tan ma lus pa dang ldan pa'i phyir ro//sangs rgyas thams cad mngon sum du mthong ba dang / sangs rgyas thams cad kyi rjes su slob par 'dod pas so/ /rigs pa rnam pa bzhi ji ltar smos she na/ 'di ltar don de dag ni byang chub dang nye ba'i rgyu yin pa dang / shes rab rgya chen po'i rgyu yin pa dang / sangs rgyas thams cad mngon sum du mthong ba'i rgyu yin pa dang / sangs rgyas thams cad kyi rjes su slob pa'i rgyu yin te/ 'di lta bu gang yin pa de dag ni/ nges par nan tan du bsgrub par bya ba yin te/ dper na sbyin pa la sogs pa lta bu yin la/ de dang 'dra bar don rnam pa bzhi po ji skad bstan pa 'di dag kyang de lta bu yin no//da ni gzungs kyi ngo bo 'thob par bya ba'i thabs la gnas pa'i phan yon bstan te/ bzhi tshan gsum gyis gzungs la ni/ /mngon par brtson pa'i rnal 'byor pas/ /thob bya ma thob par du yang / /phan yon rnam pa bzhi 'thob 'gyur/ /bzhi tshan gsum gyis bstan pa'i thabs gang yin pa de la ni bzhi tshan gsum zhes bya ste/bzhi tshan gsum bstan pa'i thabs des gzungs la mngon par brtson pa'i rnal 'byor pas/ thob par bya ba ma thob ste/ /gzungs ma thob pa'i bar skabs su phan yon rnam pa bzhir 'gyur ba la/ phyogs bcu na bzhugs pa'i sangs rgyas thams cad kyis dgongs par 'gyur te/dgongs pa yang mkhyen pa tsam du ni ma zad do/ /gal te mkhyen pa tsam du zad na ni phan yon du ma yang mi rung ste/ mtshams med pa lnga byed pa yang thams cad mkhyen pas dgongs pa'i phyir ro/ /de bas na dgongs pa ni phan gdags par bzhed pa'i phyir gzigs pa la bya ste/bdag dang gzhan gyi don bsgrub nus par nye bar bsgrub pa'i mtshan nyid do/ /de yang phan pa 'thob nus par nye bar bsgrub pa dang / gnod pa spong nus par nye bar bsgrub pa dang / rnam pa gnyis su shes par bya'o/ /bdud kyi las med par 'gyur te/bdud ni nyon mongs pa'i bdud dang / lha'i bu'i bdud dang / rnam pa gnyis so/ /de'i las ni phan pa dang / gnod pa/ 'thob par bya ba dang / spang bar bya ba la bar chad byed pa'o/ /de la snga ma med pa ni gzungs 'thob par bya ba'i thabs bsgoms pas nyon mongs pa'i bdud rnam par bsal ba'i phyir te/de nyid kyi phyir phyi ma shos kyang med par 'gyur ro/ /las kyi sgrib pa myur du 'byang ba ste/ las kyi sgrib pa ni mtshams med pa lnga la sogs pa ste/ de gzungs la sogs pa skye ba la sgrib pa'i phyir na sgrib pa zhes bya'o/ /de yang rnam pa bzhis yongs su zad par 'gyur te/rnam par sun 'byin pa kun spyod pa dang / gnyen po kun du spyod pa dang / sor chud par byed pa'i stobs dang / rten gyi stobs te/ de skad du chos bzhi pa'i mdo las 'byung ba'i phyir ro/ /de la rnam par sun 'byin pa kun du spyod pas ni las kyi sgrib pa de mjug 'joms par byed do//gnyen po kun du spyod pas ni de rnam par smin par byed pa'i mthu nyams smad par byed do/ /sor chud par byed pa'i stobs kyis ni de rnam par smin par byed pa'i mthu sel bar byed do/ /rten gyi stobs kyis ni sngar byung ba ni rgyang sring bar byed la/ sngar ma byung ba ni mi skye bar byed do/ /'di ltar rten gyi stobs ni dge ba'i gshes gnyen la brten pa dang /chos kyi de kho na la spyod pa ste/ de lta bas na rnam pa de dag gis las kyi sgrib pa byas shing bsags pa yang ma lus par 'byang bar 'gyur zhes bya ba ni rigs pa yin no/ /gzungs thob par bya ba'i thabs bstan pa ni rnam par sun 'byin pa kun du spyod pa la sogs pa de dag nges par bstan te/'di lta bus las kyi sgrib pa de dag ma lus par 'byang bar 'gyur ba'i phyir ro/ /'di lta ra 'grib pa dang 'phel ba can gang yin pa de ni/ mi mthun pa'i phyogs kyis zil gyis mnan pa 'phel na/ 'grib par 'gyur ba'i chos can yin te/dper na me 'bar ba la sogs pa bzhin no/ /de bzhin du las kyi sgrib pa yang 'grib pa dang 'phel ba can yin no/ /chud za bar mi 'gyur zhes bya ba la sogs pa gsungs pa gang yin pa de ni/ gnyen po bsgom pa med pa la bya bar shes par bya'o/ /de lta ma yin na ni rigs pa dang 'gal ba dang /mdo sde mang po dag dang 'gal bar 'gyur ro/ /nges pa zhes bya ba'i tshig kyang de nyid kyis bstan to/ /ma nges pa ni gnyen po bsgom pa med bzhin du yang ji ste na 'bras bur mi 'gyur ba'i phyir ro/ /spobs pa rgyun mi 'chad pa yang 'thob par 'gyur te/ spobs pa rgyun mi 'chad pa ni rnam pa gnyis te/mi mthun pa'i phyogs kyis zil gyis mi non pa dang / gong nas gong du spobs pa'i mthu dang ldan pa'o/ /gang gi phyir sangs rgyas thams cad kyis dgongs pa de'i phyir bdud kyi las med do/ /bdud kyi las las ring bar gyur na las kyi sgrib pa bde blag tu 'byang bar 'gyur ro//las kyi sgrib pa byang na spobs pa rgyun mi 'chad pa thob par 'gyur te/ 'di ni phan yon gyi rim pa yin no/ /don de yang tshigs su bcad pas gsungs te/ ci'i phyir bzlas te gsungs she na/ nges par gzung ba'i phyir te/ des ni 'di bstan te/ gzungs la mngon par brtson pa thams cad kyi phan yon 'di dag nges pa kho na 'thob pa la bya'i/kha cig la srid pa tsam gyi phyir phan yon du bstan pa ni ma yin no/ /yang na gang dag phan yon ston pa'i tshe ni ma 'dus la/ phyis lhags pa de dag gi ched du phan yon de tshigs su bcad pas brda sprad par mdzad de/ tshig dang yi ge'i 'bru de dag nyid kyis brda sprad du zin na/gdul ba snga ma rnams 'phya bar 'gyur ba'i phyir ro/ /yang na bdag nyid kyis so so yang dag par rig pa'i che ba nyid bstan pa'i phyir yang tshigs su bcad de phan yon gsungs so/ /yang na 'thad pa bstan pa'i phyir te/ 'di ltar spobs pa mtha' yas kyang thob par 'gyur zhes bya ba de'i 'thad pa ni/de'i las kyi sgrib pa myur du 'byang zhes bya ba yin no/ /de'i 'thad pa ni/ de la bdud kyis glags ni rnyed mi 'gyur/ /zhes bya ba yin no/ /de'i 'thad pa ni/ de ni sangs rgyas kun gyis yid la mdzad/ /ces bya ba yin no/ /de'i 'thad pa ni/ gzungs 'di la mngon par brtson pa zhes bya ba yin te/ de'i phyir de ltar gzungs la mngon par brtson pa de'i phan yon ni/ 'di ni sangs rgyas kun gyis yid la mdzad/ /ces bya ba 'di kho na yin no/ /gzhan ni brgyud par shes par bya'o/ /mtha' yas pa ni zad pa med pa'am/ yon tan mtha' yas pa dang ldan pa'i phyir ro//da ni sngon byung ba bsnyad pa brjod par bya ste/ sngon byung ba ni mdor bsdu na/ /rnam pa dgur ni bstan par mdzad/ /de yang so sor dbye ba ni/ /rnam pa mang po'i dbye ba yod/ /bsgrub par bya ba'i dngos po la nges pa bskyed pa'i phyir/ bcom ldan 'das kyis sngon byung ba bsnyad pa rnam pa dgu'i rim gyis ston par mdzad de/dgu gang zhe na/ 'di lta ste ston pa po bstan pa ni/ ston pa de 'dra ba las na/ gdon mi za bar 'bras bu de lta bu thob par 'gyur ro zhes the tshom mi bya bar bstan pa'i phyir ro/ /gzungs thob pa po'i rigs bstan pa dang / thob pa po bstan pa dang / thos nas thob par bya ba'i phyir mngon par brtson pa bstan pa dang /thob pa bstan pa dang / thob pa'i 'bras bu bstan pa ste/ 'di lta bu'i rigs su skyes la/ na tshod 'di tsam gyis brtson 'grus 'di lta bu byas te 'bras bu 'di lta bu thob nas/ gzhan la phan pa 'di lta bu byed na/ bdag cag gis kyang 'di lta bu ci'i phyir mi bya snyam du brtson 'grus chung ba rnams spro ba bskyed pa'i phyir ro//rjes su yi rang byed pa bstan pa ni rjes su yi rang ba tsam gyis kyang 'bras bu de lta bu 'thob na/ ji skad bstan pa'i spyod pa la nan tan du sgrub pas lta ci'i phyir thob par mi 'gyur snyam du nges pa bskyed pa'i phyir ro/ /de ji ltar mngon snyam pa'i the tshom bsal ba'i phyir rjes su yi rang ba'i 'bras bu bstan pa dang /bdag dang gzhan dag las dpe blangs nas/ rjes su yi rang ba'i 'bras bu brda sprad pa ste/ 'di ni mdor bstan pa'o/ /'di ltar sngon byung ba bsnyad pa de so sor dbye na ni rnam pa du mar dbye ba yod do//gang gi phyir ston pa po yang / dus dang mtshan dang yon tan dang / yongs su mya ngan las 'das pa rnam pa bzhir bstan pa'i phyir ro/ /de la dus ni sngon zhes bya ba la sogs pas bstan te/ chags bral slob dang mi slob dang / /bse ru la sogs rgyal ba'i sras/ /de dag gis shes lam las 'das//grangs med la sogs bstan pa yin/ /grangs med pa ni 'jig rten pa'i 'dod chags dang bral ba rnams kyi shes pa'i lam las 'das pa'o/ /ches grangs med pa ni slob pa 'dod chags dang bral ba rnams kyi shes pa'i lam las 'das pa'o/ /yangs pa ni mi slob pa rnams kyi shes pa'i lam las 'das pa'o//rgya cher gyur pa ni bse ru la sogs pa'i shes pa'i lam las 'das pa ste/ sogs pa smos pas ni/ rang sangs rgyas tshogs dang spyod pa rnams bsdu'o/ /tshad med pa las ni bde bar gshegs pa'i sras rnams kyi shes pa'i lam las 'das pa'o//yang na/ gzhal bya'i dngos po bye brag dag /go byed grangs dang bstod gzhal dang / /kun nas gzhal dang tshad ces bya/ /de dag med phyir de skad bstan/ /grangs med pa la sogs zhes bya ba'i tha tshig ste/ grangs med pa ni yongs su gcod par byed pa'i grangs med pa'i phyir ro//ches grangs med pa ni gnas drug cu par bab pa'i grangs la grangs med pa zhes bya ba yin par dogs pa bsal ba'i phyir grangs med pa'i bye brag smos par mdzad pa'o/ /yangs pa smos pa ni bstod de gzhal ba med pa'i phyir ro/ /kun nas gzhal ba ni kun tu gzhal ba yin pa'i phyir yongs su gzhal ba ste/de med pa'i rgya che bar gyur pa'o/ /tshad med pa ni tshad med pa'i phyir ro/ /de ltar na de la yongs su gcod par byed pa thams cad med par bstan pa'i phyir ro/ /snga ma snga ma sgrub pa yi/ /gtan tshigs phyi ma phyi ma yin/ /yang na grangs med pa la sogs pa snga ma snga ma bsgrub pa'i gtan tshigs ni/ches grangs med pa la sogs pa phyi ma phyi ma yin par shes par bya'o/ /yang na la la sngar ma thos/ /gang yang rung bas don de ston/ /yang gdul bya kha cig snga ma bstan pa'i tshe/ don de ma thos pa la phyis ches grangs med pa la sogs pa'i tshig gzhan gyis brda sprod par mdzad do/ / mtshan ni rin chen dpal gyi gzi brjid rgyal po zhes bya ba'o/ /yon tan ni de bzhin gshegs pa zhes bya ba la sogs pas bstan te/ gdul bya'i don ni rab bsgrub phyir/ /ye shes spangs pa'i rang bzhin nyid/ /ci 'dra de ni rgyu dang bcas/ /phun sum tshogs gnyis bstod pa gsungs/ /gdul ba bcom ldan 'das la mngon par ma dad pa rnams dad pa bskyed pa'i phyir dang /mngon par dad pa rnams dad pa 'phel bar bya ba'i phyir/ bdag dang gzhan gyi don phun sum tshogs pa rnam pa gnyis kyis bstod pa gsungs so/ /rang gi don phun sum tshogs pa sngar smos pa ni de zhar las byung ba yin yang /de cig shos kyi sngon du 'gro ba yin pa'i phyir ro/ /de la ye shes dang spangs pa phun sum tshogs pa'i rgyu mtshon pa ni/ de bzhin gshegs pa nyid kyis bstan te/ yang dag par rdzogs pa'i sangs rgyas snga ma rnams lam gang nas gshegs pa nyid nas gshegs pas na de bzhin gshegs pa zhes bya ba'i phyir ro//dgra rnams bcom pas na dgra bcom pa ste/ 'dis ni spangs pa phun sum tshogs pa bstan to/ /dgra dag ni 'dod chags la sogs pa nyon mongs pa rnams te/ dge ba'i chos thams cad la gnod pa byed pa'i phyir ro/ /spangs pa phun sum tshogs pa 'di sngar smos pa ni/ de la ye shes phun sum tshogs pa'i sngon du 'gro ba'i phyir ro//yang dag pa phyin ci ma log par kun nas sangs rgyas pas na yang dag par rdzogs pa'i sangs rgyas zhes bya'o/ /'dis ni ye shes phun sum tshogs pa bstan te/ thams cad mkhyen pa'i ye shes phyin ci ma log par bstan pa'i phyir ro/ /gal te thub pa snga ma rnams lam gang nas gshegs pa'i lam de nas 'di yang gshegs pa'i phyir/de bzhin gshegs pa zhes bya na/ lam de nyid gang yin zhe na/ rig pa dang zhabs su ldan pa ste/ 'dis ni 'phags pa'i lam yan lag brgyad pa bstan te/ rig pa ni yang dag pa'i lta ba'o/ /yang dag pa'i rtog pa la sogs pa yan lag bdun ni zhabs te/yang dag pa'i lta bas de kho na gzigs nas/ yang dag pa'i rtog pa la sogs pa zhabs su gyur pa rnams kyis gshegs pa'i phyir ro/ /yang na bslab pa gsum ni/ rig pa dang zhabs te/ lhag pa'i shes rab kyi bslab pa ni rig pa'o//lhag pa'i sems dang / lhag pa'i tshul khrims kyi bslab pa ni zhabs te/ shes rab kyi sngon du yongs su spyod par gyur pa ni zhabs te spyod pa yin pa'i phyir ro/ /rig pa sngar smos pa ni de yongs su dag pas tshul khrims dang ting nge 'dzin yongs su dag par 'gyur ba'i phyir ro/ / yang na sngon gyi gnas rjes su dran pa shes pa mngon sum du bya ba'i mngon par shes pa dang / 'chi 'pho dang / skye ba shes pa mngon sum du bya ba'i mngon par shes pa dang / zag pa zad pa mngon sum du bya ba'i mngon par shes pa dang / 'di gsum ni rig pa'o/ /zhabs ni tshul khrims phun sum tshogs pa dang /spyod pa phun sum tshogs pa dang / bzlog pa phun sum tshogs pa dang / lhag pa'i sems las byung ba tshe 'di la bde bar gnas pa bzhi po rnams te/ rig pa rnams kyi sngon du yongs su spyod par gyur pa'i phyir te/ sngar spyad pa yin pa'i phyir ro/ /de la tshul khrims phun sum tshogs pa ni rang bzhin dang bcas pa'i kha na ma tho ba spangs shing ma nyams pa la sogs pa'i yon tan dang ldan pa'o//spyod pa phun sum tshogs pa ni spyod lam thams cad shes bzhin du gnas pa'o/ /bzlog pa phun sum tshogs pa ni mig la sogs pa'i yul rnams la mtshan mar mi 'dzin pas/ dbang po bsdams pa'o//de ltar tshul khrims yongs su dag pa dang / shes bzhin du gnas pa dang / dbang po rnams kyi sgo bsrung ba ni/ lhag pa'i sems las byung ba/ tshe 'di la bde bar gnas pa bzhi sgrub par byed de/ de dag ni bsam gtan bzhi po rnams so/ /de'i phyir 'di ltar bcom ldan 'das de ni rig pa rnams dang /zhabs 'di rnams dang ldan pas/ rang gi don phun sum tshogs pa brnyes par gyur pa'i phyir/ rig pa dang zhabs su ldan pa ni rang gi don phun sum tshogs pa 'thob pa'i rgyur bstan pa yin no/ /rang gi don phun sum tshogs pa de ji lta bu yin pa de yang / bde bar gshegs pa zhes bya bas bstan te/'di ltar 'jig rten las 'das pa'i lam nas ye shes dang spangs pa phun sum tshogs par legs par gshegs pas na bde bar gshegs pa ste/ gzugs legs pa bzhin no/ /yang na phyir mi ldog par gshegs pas na bde bar gshegs pa ste/ rims nad legs par sos pa bzhin no//ma lus par gshegs pa'i phyir yang bde bar gshegs pa ste/ bum pa shin tu gang ba bzhin no/ /don 'di gsum yang phyi rol pa'i 'dod chags dang bral ba dang / slob pa dang / mi slob pa rnams las rang gi don phun sum tshogs pa bye brag tu bya ba'i phyir ro/ /'jig rten mkhyen pa ni skal ba dang ldan pa dang /skal ba dang ldan pa ma yin pa mkhyen pa'i phyir ro/ /'dis ni gzhan gyi don phun sum tshogs pa'i rgyu bstan to/ /skal ba dang ldan pa dang / skal ba dang ldan pa ma yin pa thugs su chud nas/ skal ba dang ldan pa rnams 'dul bar mdzad pas na/ skyes bu gdul ba'i kha lo sgyur ba bla na med pa zhes gsungs te/'dis ni gzhan gyi don phun sum tshogs pa bstan to/ /gdul bar 'os pa dang / gdul bar nus pa yin pa'i phyir/ gdul ba ste skyes bu nyid gdul ba yin pa'i phyir ro/ /skyes bu gdul ba'o/ /de dag gis kha lo sgyur ba ni lam ngan pa nas bzlog ste lam bzang por 'dzud pa'i phyir dang /yon tan gyi khyad par bskyed pa'i phyir te/ rta la sogs pa'i kha lo sgyur ba bzhin no/ /bla na med pa smos pa ni/ gdul dka' ba/ 'dod chags dang / zhe sdang dang / gti mug dang / nga rgyal shas che ba 'phags pa mdzes dga' dang / sor phreng dang / lteng rgyas 'od srungs dang /rgyal po chen po ka pi na la sogs pa gdul ba yang yin no zhes bstan pa'i don to/ /lha dang mi rnams kyi ston pa zhes bya ba 'dis ni gzhan gyi don phun sum tshogs pa ji lta bu yin pa bstan to/ /ston pa'i phyir ni ston pa ste/ bstan pa na 'phags pa'i bden pa bzhi khong du chud pa'o/ /de bas na lha dang mi smos te/de dag kho na khong du chud pa'i skal ba dang ldan pa'i phyir ro/ /lam bzang po ston pa la sogs pa'i rgyu nyid kyis ni thams cad kyi yang ston pa yin te/ de'i phyir sems can thams cad kyi ston pa zhes gsungs so/ /'phags pa'i bden pa rtogs pa des zhugs na/ theg pa ji lta ba bzhin du ye shes dang spangs pa phun sum tshogs par 'gyur ba'i phyir/ye shes dang spangs pa phun sum tshogs pa gzhan gyi don phun sum tshogs pa zhes bya'o/ /de ltar na bdag dang gzhan gyi don phun sum tshogs pa dang ldan pa de su yin zhe na/ sangs rgyas bcom ldan 'das rin chen dpal gyi gzi brjid rgyal po lta bu zhes bya ba zhes gsungs pa dang sbyar te/blo khyad par du 'phags pa 'di la yod pas na sangs rgyas zhes bya'o/ /blo khyad par du 'phags pa yang rnam pa dgu ste/ thams cad mkhyen pa dang / rnam pa thams cad mkhyen pa dang / bsgrim mi dgos par mkhyen pa dang / lung phog pa med par mkhyen pa dang /nyon mongs pa dang shes bya'i sgrib pa bag chags dang bcas pa spangs pa dang / rnam pa thams cad du sems can thams cad kyi don mdzad par spyod pa dang / thugs rje phun sum tshogs pa dang / zad mi shes pa phun sum tshogs pa dang / mtshungs pa med pa phun sum tshogs pas so//yang na dngos po thams cad rnam pa thams cad du thugs su chud pa'i phyir sangs rgyas zhes bya ste/ da ltar gyi dus la bya'o/ /ma 'ongs pa yang de de'i rang bzhin yin pa'i phyir/ sangs rgyas zhes bya ste/ 'o ma dang bud shing bzhin no/ /gal te de ltar na 'das pa na sangs rgyas ma yin par 'gyur ro zhe na mi 'gyur te/sangs rgyas 'das pa ni med pas yongs su mya ngan las 'das pa ni mi srid par bstan zin te/ 'khor ba ji srid yod kyi bar du skad cig re re la dngos po'i yul ma lus pa la mkhyen pa 'jug pa'i phyir ro/ /yang na rnam pa thams cad du lhag pa med pa'i yon tan thams cad dang ldan pa de la ni sangs rgyas zhes bya ste/de'i phyir 'di la nyes pa med do/ /yang na ston pa po bcom ldan 'das la dad pa'i khyad par bskyed pa'i phyir ro/ /stong pa nyid phun sum tshogs pa yon tan gyi che ba nyid bstan te/ ston pa rnam gnyis gang gis 'thob/ /ci 'dra de yi lam rnam gnyis/ /gang dag la ni de gnas dang //de dang ldan pa'ang ston par byed/ /de la ston pa nyid phun sum tshogs pa rnam pa gnyis ni/ gsungs pa nyid kyi mtshan nyid dang / bsgrub pa nyid kyi mtshan nyid do/ /de la gsungs pa nyid kyi mtshan nyid ni/ de bzhin gshegs pa zhes gsungs pa yin te chos rnams ji ltar gnas pa de kho na bzhin du gsungs pas na de bzhin gsungs pa zhes bya ba'i phyir ro//'dis ni phyin ci ma log par chos ston pa po nyid yin par bstan to/ /sgrub pa nyid kyi mtshan nyid ni/ spangs pa dang ye shes phun sum tshogs pa'i ngo bo nyid rnam pa gnyis te go rims bzhin du dgra bcom pa yang dag par rdzogs pa'i sangs rgyas zhes gsungs pa yin no//de'i phyir de ltar phyin ci ma log par chos ston pa po nyid dang / nyon mongs pa thams cad spangs pa dang / rnam pa thams cad du chos thams cad thugs su chud pas bcom ldan 'das kyis ston pa nyid phun sum tshogs pa thun mong ma yin pa dang / yongs su rdzogs par bstan te/'di ltar phyi rol pa rnams la phyin ci ma log par chos ston pa po nyid med de/ nyon mongs pa thams cad ma spangs pa'i phyir ro/ /de nyid kyi phyir de dag yang dag pa'i ston pa ma yin no/ /nyan thos dang rang sangs rgyas rnams ni nyon mongs pa thams cad spangs pa yin pa'i phyir/ yang dag pa'i ston pa yin mod kyi/ rnam pa thams cad du chos thams cad khong du chud pa ma yin pas na/ rnam pa thams cad kyi ston pa ma yin no/ /bcom ldan 'das ni yang dag pa'i ston pa dang rnam pa thams cad kyi ston pa yin no/ /ston pa nyid phun sum tshogs pa de gang gis 'thob pa de ni rig pa dang zhabs su ldan pa zhes bya bas bstan to//ston pa nyid phun sum tshogs pa rnam pa gnyis pa de ci 'dra ba de yang / bde bar gshegs pa zhes bya bas bstan to/ /de yang legs par zhes bya ba la sogs pa don gsum smos pas ci rigs par bshad par bya'o/ /ston pa nyid phun sum tshogs pa de'i phrin las rnam pa gnyis la sems can skal ba dang ldan pa dang /skal ba dang ldan pa ma yin pa la gzigs pa'i phrin las gang yin pa de ni 'jig rten mkhyen pa zhes bya bas bstan to/ /skal ba dang ldan pa 'dul ba gang yin pa de ni skyes bu gdul ba'i kha lo sgyur ba bla na med pa zhes bya bas bstan to//skal ba dang ldan pa'i gdul ba'i phrin las gang dag la gnas pa de ni/ lha dang mi rnams kyi ston pa zhes bya bas bstan to/ /su ston pa phun sum tshogs pa de dang ldan pa de ni sangs rgyas bcom ldan 'das zhes bya bas bstan to/ /tshig gi don ni sngar bshad zin pas 'dir ni sbyar ba tsam du zad do/ / yongs su mya ngan las 'da' ba'i sgo nas ston pa po bstan pa ni/ shA ri'i bu zhes bya ba la sogs pas mtshan dang / yon tan dang / yongs su mya ngan las 'das pa'i dus nges pa rnam pa gsum du phye ste/ kye ma 'dir sangs rgyas bcom ldan 'das yon tan gyi gzhi 'di lta bu yang /mi rtag pa nyid kyi lam na 'dug na/ bdag cag lta smos kyang ci dgos snyam du sems te/ srog chags rnams kyis skyo ba'i bye brag bskyed pa'i phyir ro/ /tshe zhes bya ba ni nges pa'am/ yang na khong du chud pa la bya bar shes par bya'o/ /gal te yongs su mya ngan las 'da' ba'i dus la bab par nges na/des lo bdun khrir zhes bya ba la sogs pa'i tshig ji ltar skyon du mi 'gyur zhe na/ smras pa/ 'jig rten tshe ni dpag med tshe/ /thub pa chen po skyes pa de/ /yongs su mya ngan 'da' ba yi/ /dus bab pa ni de 'dra'o/ /'jig rten gyi tshe dpag tu med pa na bcom ldan 'das de bzhin gshegs pa rin chen dpal gyi gzi brjid rgyal po lta bu byung ste/de'i phyir dus de la ltos nas/ de'i yongs su mya ngan las 'da' ba'i dus la bab pa yang yun ring bar 'gyur te/ de lta bas na de lo bdun khrir zhes bya ba la sogs pa'i tshig la skyon med do/ /gzungs thob pa po'i rigs bstan pa ni rnam pa lngar mdzad do//ming dang / rgyal po dang / gling bzhi'i bdag po dang / dbang phyug dang / mi'i bdag po'o/ /snang ba 'dzin zhes bya ba ni gzhan yang yod pa'i phyir rgyal po smos so/ /rgyal po ni rgyal phran la yang bya ba'i phyir/ 'khor los sgyur ba smos so/ /'khor los sgyur ba zhes bya ba ni de bzhin gshegs pa la yang yod pa'i phyir rgyal po smos so//'khor los sgyur ba smos pas kyang rin po che sna bdun dang ldan par mngon mod kyi/ rin po che sna bdun dang ldan pa smos pa ni bye brag tu dbye ba'i don te/ des ni gling bzhi'i bdag po bsdu'o/ /rig sngags 'chang gi 'khor los sgyur ba yang yod pas na/mi'i dbang po smos so/ /thob pa po bstan pa ni rnam pa lngas mdzad de ming dang 'brel pa dang / na tshod dang / chos kyi rnam grangs thob pa dang / ston pa po dang 'brel pa'o/ /thos nas thob par bya ba'i phyir mngon par brtson pa bstan pa ni rnam pa gnyis te/ spyi dang bye brag go/ /bye brag kyang rnam pa brgyad de/dus dang rmugs pa dang gnyid med pa dang / dga' ba med pa dang / brtson 'grus dang / sems rtse gcig pa dang / de'i 'bras bu dang / de nyams su len pa dang / rab tu 'byung ba'o/ /de la dus ni lo bdun khri ste/ 'di ni rab tu ma byung ba'i snga rol gyi yin par shes par bya'o/ /de phyin chad lo dgu khri ni gzungs sgrub pa'i dus yin no//de'i rgyu ni spangs pa'i phyir/ /des ni rmugs gnyid de ma bsten/ /rmugs pa ni lus dang sems las su mi rung ba nyid do/ /gnyid ni sems mngon par sdud pa'o/ /de gnyis kyi rgyu ni ha cang mang du za ba dang / ha cang nyung ngu za ba ste/ de spangs pas rgyal po'i bu des rmugs dang gnyid ma bsten to//de gnyis ni sems rtse gcig tu bya ba la bgegs byed pa yin te/ de'i phyir 'bras bu tha mi dad pas mtshan gcig tu bsdu'o/ /dngos po'i ngo bo nyid shes pas/ /dga' ba rnam gsum spang bar bya/ /'du byed 'di dag mi rtag pa spong bar rtogs pas dga' ba rnam pa gsum mi byed de/'di ltar phyi rol dang / nang gi yul gyi bye brag gis dga' ba rnam pa gnyis yod la/ phyi rol gyi yul yang gtso bo dang / de'i yan lag dang rnam pa gnyis yod do/ /des na rnam pa gsum du 'gyur te/ gtso bo ni rgyal srid do/ /de'i yan lag ni nor yin te/de yang rin po che sna bdun la sogs pa'o/ /bdag gi lus dang / de'i yan lag la sogs pa la dga' ba ni bdag la dga' ba'o/ /rmugs pa dang gnyid la sogs pa dang / de gsum yongs su spangs nas brtson 'grus brtsams pa'i phyir/ de lo bdun khrir lan 'ga' yang sa la glos ma phab ste zhes gsungs so//de nas ting nge 'dzin bsgom pa'i phyir/ gcig tu nges par nang du yang dag 'jog la gnas so zhes gsungs te/ gnas so zhes bya ba'i tha tshig go/ /gcig tu nges pa'i skye bo med pa'i phyogs sam/ gcig tu nges par nang du yang dag 'jog pas rang bzhin gyis sems rtse gcig tu byed pa la ni/gcig tu nges par nang du yang dag 'jog la bya'o/ /ting nge 'dzin de'i 'og tu ting nge 'dzin gyi 'bras bu 'thob pa yin te/ lo dgu khri zhes gsungs so/ /'jig rten khams gzhan sangs rgyas rnams/ /bzhugs pa byang chub sems dpa' yon tan rin po che bsam gyis mi khyab pa'i dpal snang ba thob pa des mthong ste/'jig rten gyi khams gcig tu ma yin te/ de bzhin gshegs pa gnyis ni 'jig rten gyi khams gcig tu cig car 'byung ba 'gal ba'i phyir ro/ /de lta bas na sangs rgyas bye ba phrag dgu bcu las/chos bstan pa ni thos so zhes/ /byas pa'i tshig la nyes pa med/ /yang na blo bzang 'jig rten khams/ /'di gzhan sangs rgyas bzhugs pa mthong / /bstan pa 'byung la brten nas ni/ /cig car skye ba dgag pa yin/ /yang na byang chub sems dpa' blo bzang po des sangs rgyas 'jig rten gyi khams 'di na bzhugs pa rnams dang /'jig rten gyi khams gzhan na bzhugs pa rnams mthong ste/ de'i phyir sangs rgyas bye ba phrag dgu bcu zhes bya ba la sogs pa 'di spyir gsungs so/ /snga phyi med par de bzhin gshegs pa gnyis 'jig rten du mi 'byung zhes bya ba 'di ni/de'i bstan pa 'byung ba la dgongs nas cig car skye ba dgag pa yin no/ /de phyir de bzhin gshegs pa gnyis kyi bstan pa 'jig rten du cig car mi 'byung ste don du de la bya'o/ /de gnyis kyi skye ba de ni 'di ltar bstan pa 'byung ba la bya ste/sangs rgyas bcom ldan 'das rnams ni gzhan gyi don dang / gzhan gyi dbang gis skye bar zad pa'i phyir ro/ /yang na snga phyi med par mi 'byung zhes smos pas de dag rim gyis byung ba kho nar bka' stsal pa yin no/ /'byung ba de dag kyang yongs su mya ngan las mi 'da' ste/ longs spyod rdzogs pa'i sku'i tshul gyis bzhugs pa des na/bsod nams dang ldan pa ma yin pa rnams kyis mi mthong la/ bsod nams can rnams kyis ni bsod nams ji lta ba bzhin du nyung ngu'am/ mang po yang dag par dmigs pa tsam du zad pa'i phyir nyes pa med do/ /thos pa ni bstan pa thos par zad na/ bstan pa zhes smos ci dgos zhes de skad zer na ni/ don 'di yin te/ rdzogs pa'i sangs rgyas thams cad kyis/ /bstan te dgu bcu dag las thos/ /chos zhes bya ba lhag ma'o/ /de de lta na don ni 'di yin te/ sangs rgyas thams cad kyis chos bstan pa sangs rgyas bye ba phrag dgu bcu las thos so zhes bya ba'i tha tshig ste/des na chos kyi de kho na/ /bstan pa thabs dang bcas pa brjod/ /rgyu des brjod pa yin te/ chos kyi de kho na ni stong pa nyid do/ /thabs ni sbyin pa la sogs pa pha rol tu phyin pa zhes bya ste/ chos kyi de kho na thabs dang bcas pa 'di ni sangs rgyas thams cad kyis bstan pa dang /ston pa dang / ston par 'gyur ro/ /skyes pa'i rabs la sogs pa gang yin pa de dag la ni/ sangs rgyas thams cad kyis bstan pa tshangs par nges pa med de/ 'di las chos ni nan tan du/ /legs bsgrub nyams su len par bstan/ gsung rab 'di la las su byas pas stong pa nyid kyi chos yang dag par sgrub cing rtogs par bya ba dang /sbyin pa la sogs pa bsgrub pa 'di ni nyams su blang ba'o/ /yang na 'dzin pa la sogs pa/ /yon tan skyed par 'gyur ba yin/ /nyams su blang ba zhes bya ba snyegs te/ yang na 'dzin pa dang / sems pa dang / bsgom pa dang /gzhan la ston pa la sogs pa yon tan bskyed pa de phyin ci ma log pa'i phyir nyams su blang ba'o/ /yang na rjes su yi rang ba yang nyams su blang ba yin no/ /sangs rgyas gzhan dag ma yin zhes/ /de yi mtshan ni smos pa mdzad/ /sangs rgyas bye ba phrag dgu bcu po gang yang rung ba las rang byung bar 'dzin pa bsal ba'i phyir/rin chen dpal gyi gzi brjid rgyal po lta bu'i mtshan smos so/ /mtshan smos pa/ des na thub pa bzhugs pa ni/ /'jig rten phan phyir nyid du bstan/ /'di ltar yongs su mya ngan las 'da' ba'i dus dpags pa las kyang / bcom ldan 'das de de srid kyi bar du bzhugs pa ni rgyal po'i bu de des gdul ba yin pa'i phyir te/de'i phyir 'di dag gis ni sangs rgyas bcom ldan 'das rnams ni 'jig rten la phan pa kho na'i phyir dus mtha' yas par yang bzhugs par mdzad do zhes bstan to/ /sdom brtson tshul khrims ldan pa dang //brtson dang gzhan don gzhol ba yis/ /gzungs ni thob par thub pa des/ /rab byung la sogs tshig gis bstan/ /yon tan thams cad kyi gzhi ni tshul khrims yin pa'i phyir/ tshul khrims dang ldan pas gzungs 'di 'thob par 'gyur gyi gzhan gyis ma yin par bcom ldan 'das kyis rab tu byung ba'i tshig gis bstan te/'di rnams kyis ni/ thos nas thob par bya ba'i phyir mngon par brtson par bya ba bstan pa bsnyad do/ /brtson 'grus brtsams pas gzungs 'di thob par 'gyur gyi/ gzhan gyis ma yin par ni lo dgu khri zhes bya ba la sogs pas bstan te/'dis ni 'thob pa bstan pa bsnyad do/ /gzhan gyi don sgrub pa'i bsam pa can gyis/ gzungs 'di 'thob par 'gyur gyi/ gzhan gyis ma yin par ni bsgrubs nas kyang zhes bya ba la sogs pas bstan te/ 'dis ni thob pa'i 'bras bu bstan pa bsnyad de de kho na yin no zhes gzung bar bya'o//de lta ma yin na ni rab tu byung ba la sogs pa bstan pa yang don med par 'gyur ro/ /de la thob pa'i 'bras bu bstan pa ni rnam pa gnyis kyis bshad de/ yang dag par rab tu bstan pa dang / yang dag par rab tu bstan pa'i 'bras bu'o/ /yang dag par rab tu bstan pa yang /yang dag par sbyin pa dang / rgyas pa dang / rang gi ngo bo dang rnam pa gsum ste/ yang dag par sbyin pa ni sems can thams cad la'o/ /de dag kyang gzungs yang dag par rab tu bstan pas 'dul ba kho na yin par gzung bar bya ste/ thams cad kyi sgra ni brjod par 'dod pas ma lus pa la bya ba'i phyir ro//sems can thams cad kho na la bya ba ma yin te/ de dag la ni thams cad mkhyen pa ma yin pas yang dag par rab tu bstan par bya mi nus pa'i phyir ro/ /thams cad mkhyen pas de bstan du yang sems can thams cad yul du 'gyur mi srid de/ dgos pa med pa'i phyir mi rung ngo //rgyas pa zhes bya ba ni gzungs la sbyor ba dang / 'thob pa dang / 'bras bu dang / yon tan chung ngu dang / 'bring dang / chen po'i bye brag la sogs pa'i rang gi ngo bo tshad ma dang ldan pa'i phyir/ yang dag par phyin ci ma log pa dang / pho brang 'khor gyi skad la sogs pa'i yon tan yan lag bcu dang ldan pa'i tshig gis rab tu dang /pha rol rnams zil gyis mnan nas bstan pa'o/ /yang dag par rab tu bstan pa'i 'bras bu ni/ phyir mi ldog pa'i sa la 'god pa ste/ 'di ni shin tu khyad zhugs pa'i 'bras bur bstan to/ /lha dang / mir skye ba dang sa 'thob pa la sogs pa'i 'bras bu gzhan ni ma smos kyang 'grub pa'i phyir ma bstan to//nyan thos la sogs pa'i byang chub las phyir mi ldog pa'i sa yang yod pa'i phyir/ bla na med pa yang dag par rdzogs pa'i byang chub smos so/ /bla na med pa yang dag par rdzogs pa'i byang chub la yang phyir mi ldog pa'i sa yod pa'i phyir phyir mi ldog pa smos te/'dis ni gzungs 'thob pa rgyun gyis 'brel pa'i don du bstan to/ /de'i phyir de'i 'og tu shA ri'i bu 'khor de na zhes bya ba la sogs pa gsungs te/ gzungs thob pa rgyun gyis 'brel pas ni ji lta bur brtson par byed kyang rung ba gang dang gang yin pa de dang des ni/gzungs 'di nges pa kho nas 'thob par 'gyur te/ la las ma thob pa gang yin pa de ni bdag nyid kyi nyes pa la sogs pa las gyur par bstan to/ /rjes su yi rang bar byed pa bstan pa ni/ 'khor dang / 'brel pa dang / rigs dang / ming dang / dge ba'i bshes gnyen dang /'brel pa dang / rjes su yi rang ba'o/ /rjes su yi rang ba'i 'bras bu bstan pa dgu ste/ yang dag pa'i dge ba'i bshes gnyen rnyed pa dang / de las chos thos pa dang / de nyams su blangs pa dang / gzungs thob pa rnams kyi mchog dang / gzung ba'i tshig dang ldan pa rnams kyi mchog dang //spobs pa rgyun mi 'chad pa rnams kyi mchog dang / de dag mnyes par bya ba'i dus dang / mnyes par bya ba dang / bla na med pa'i byang chub mngon par rdzogs par 'tshang rgya'o/ /de la/ mdo la zhes bya de ma thag /yang na cig car 'byung ba yin/ /rjes su yi rang ba'i mdo la zhes bya ba ni 'di la mdo la zhes bya ba'i sgra smos pa de ni 'dir de ma thag tu byung ba la bya ste/dper na byams pa'i mdo las skyes pa dran pa yang dag byang chub kyi yan lag sgom par byed do zhes bya ba de bzhin du/ 'dir yang rjes su yi rang ma thag pa'o/ /skyes pa ni thob ces bya ba'i tha tshig go//yang na cig car 'byung ba la bya ste/ 'khor lo dang bcas par zung shig ces bya ba la sogs pa de bzhin du/ rjes su yi rang ba'i mod las skyes pa ni thob ste/ byung zhes bya ba'i tha tshig go/ /dgu bcu zhes bya la sogs tshig /des ni dus gzhan dgongs pa yin//dgu bcu zhes bya ba'i tshig gang yin pa des ni dus gzhan la dgongs te gsungs pa yin no/ /rjes su yi rang ba'i mdo kho na las skyes pa'i dge ba'i rtsa ba las de ma thag tu de lta bu'i 'bras bu thob pa ni ma yin te thal ches pa'i phyir ro/ /phul phyin yon tan ldan pa yi/ / phul du phyin pa chen po'i yang chen po'i mtshan nyid kyis dang / gzungs thob pa dang 'brel pa'i yon tan gyis so/ /yang na phul du phyin pa ma lus pa'i mtshan nyid dang ldan pa'i sgo mtha' yas sgrub pa'i gzungs ni thob par gyur pa'i phyir/ de'i rgyus/ bde bar gshegs pa'i sras po de/ / sangs rgyas bye ba phrag dgu bcu po de dag gi 'khor du gang dag gzungs thob par gyur pa/ gzungs thob rnams kyi mchog yin no/ /byang chub sems dpa' de dag gi mchog yin no/ /ye shes khyad 'phags 'brel ba dang / /yon tan phul phyin ldan pa'i phyir/ /de'i rgyus de dag gi 'khor du byang chub sems dpa'/de ni tshig gzungs ldan rnams kyi/ /byang chub sems dpa' rnams kyi nang na/ mchog tu rgyal ba rnams kyis bstan/ /ye shes khyad par du 'phags pa ni/ sa dang / gzungs dang / ye shes la sogs pa phul du phyin pa dang ldan pa'o/ /yon tan ni mngon par shes pa la sogs pa ste/gang gis sems can rnams kyi rang bzhin dang / bsam pa dang / bag la nyal la sogs pa rtogs na/ rdzu 'phrul la sogs pas 'dun par byed pa'o/ /spobs pa rgyun mi chad pa rnams/ /gang la bya zhe na/ gang dag so so yang dag rig thob rnams/ / de dag ni bzhi ste/ chos dang / don dang / nges pa'i tshig dang / spobs pa so so yang dag par rig pa'o/ /so so yang dag par rig pa/ /de dag phul phyin ldan pa'i phyir/ /de'i rgyus sangs rgyas de dag gi 'khor na byang chub sems dpa' spobs pa rgyun mi chad pa/ de nang rgyal sras de mchog go//byang chub sems dpa' smos pa ni/ /sangs rgyas bcom ldan 'das la mi bya bar dgar ba'i phyir ro/ /de dag gis gsungs tshul khrims ni/ /bsgrub pa mnyes byed yin par 'dod/ /sangs rgyas de dag gis gsungs pa'i tshul khrims/ sdom pa dang / sems can gyi don bya ba dang /dge ba'i chos sdud pa'i mtshan nyid/ /ma zhig ma ral ba la sogs pa'i yon tan dang ldan pa sgrub pa gang yin pa de ni mnyes par byed pa yin par 'dod do/ /bskal pa gsum du tshogs rnams ni/ /yongs su rdzogs byas byang chub thob/ /tshogs yongs su rdzogs pa ni mnyes par byas nas zhes bya ba 'dis bstan te/gal te tshogs rnams yongs su rdzogs par byed na de ltar de dag shin tu mnyes par byas pa yin no/ /ji ltar bskal pa gsum gyis tshogs yongs su rdzogs she na/ nyes pa med de/ gang gi phyir des sngon bskal pa grangs med du mar tshogs bsgrubs te/sangs rgyas bye ba phrag dgu bcu po rnams ni bskal pa gsum du mnyes par byas pas tshogs yongs su rdzogs nas byang chub thob par gyur pa'i phyir ro/ /mngon par rdzogs par sangs rgyas par yang ma zad kyi/ de bzhin gshegs pa mar me mdzad du gyur to zhes nges par bya ba'i phyir yang /tshong dpon gyi bu zhes bya ba la sogs pa gsungs so/ /rgyal po'i bu yon tan rin po che bsam gyis mi khyab pa'i dpal yang de bzhin gshegs pa tshe dpag med du gyur to zhes zhar la bstan te/ de'i phyir de ni phyis gsungs so/ /dngos po stong pas 'dod mi bya//tshad ma dang yang 'gal ba'i phyir/ /mi mthun blo ni mi bskyed cing / /cis kyang the tshom mi bya'o/ /tshong dpon gyi bu zla ba'i tog ces bya ba ni mar me mdzad las tha dad do snyam du som nyi 'dod pa'i mtshan nyid lta bu yang mi bya'o/ /de ni dngos po stong pa'i phyir te/ 'di ltar mar me mdzad nyid tshong dpon gyi bu zla ba'i tog yin pa'i phyir ro//khyod kyis mi 'dod pa'i phyir/ zla ba'i tog mar me mdzad ma yin par mi 'gyur te thal ches pa'i phyir ro/ /zla ba'i tog ni dngos po kho nar mar me mdzad ma yin no snyam du mi mthun pa'i blo yid gnyis de lta bu yang tshad ma dang 'gal ba'i phyir mi bya ste/'di ltar de bzhin gshegs pa thams cad kyis kyang mar me mdzad nyid zla ba'i tog yin par mngon sum du gzigs so/ /ci zla ba'i tog 'di de bzhin gshegs pa mar me mdzad yin nam/ 'on te ma yin snyam du the tshom de lta bu yang mi bya ste/ 'di ltar mar me mdzad nyid zla ba'i tog yin par sangs rgyas thams cad dang ngas kyang mkhyen to//thos pa la sogs shes pa'am/ /yang na tshad ma gsum po yis/ /yongs su bcad par mi rung phyir/ /som nyi la sogs tshig gsum smos/ /yang na som nyi dang the tshom rnams ni don gcig yin du zin kyang thos pa'i shes pa'i yongs su bcad du mi rung ba'i phyir ni som nyi'o//bsam pa yi ni yid gnyis so/ /bsgom pa yi ni the tshom ste/ de'i phyir ming gsum du gsungs so/ /yang na mngon sum gyis yongs su bcad du mi rung ba ni som nyi'o/ /rjes su dpag pa yi ni yid gnyis so//lung gi ni the tshom ste/ de'i phyir tshig gsum smos so/ /shA ri'i bu khyod kyis zhes bya ba la sogs pa bcom ldan 'das kyis gsungs pa 'di ni nged kyis kyang zla ba'i tog ni mar me mdzad kho na yin par mngon sum du yid ches kyis/ khyod kyang nged kyi tshig gis yid ches par byos la som nyi la sogs pa la gnas par ma byed cig ces bya ba'i tha tshig go//shA ri'i bu nga dang bskal pa bzang po'i zhes bya ba la sogs pa 'di ni spyir gsungs pa yin te/ de'i phyir/ spyir bstan pa ni yin mod kyi/ /'on kyang bdag gis 'bras bu bshad/ /bcom ldan 'das kyis bskal pa 'bum phrag bzhi khrir zhes bya ba la sogs pas/nyid kyi rjes su yi rang ba'i mod las skyes pa'i dge ba'i rtsa ba bshad kyi/ bskal pa bzang po pa rnams kyi ma yin te/ de'i phyir 'di ni mtshon pa kho na ste/ de dag gi rjes su yi rang ba'i mod las skyes pa'i dge ba'i rtsa ba'i 'bras bu yang yod mod kyi/mtshon pa'i phyir bdag nyid kyi 'bras bu bstan to/ /ci'i phyir de lta zhe na/ de lta bas na zhes bya ba la sogs pa'i mdo'i tshig gis mngon pa yin bsam pa la sogs pa'i stobs bskyed pa las/ kha cig ni bskal pa mang po zhig tu 'khor ba phyir bsnyil bar byed la/kha cig tu ni nyung ngu zhig tu byed par 'gyur ba tsam du zad do/ /sangs rgyas bye ba phrag dgu bcu zhes bya ba la sogs pa'i 'bras bu de ni thams cad kyi yin par 'dra ste/ de ltar na snga ma'i skabs su zla ba'i tog gi 'bras bu bstan pa yang mtshon pa'i phyir te/ gzungs bstan pas gdul ba thams cad kyi 'bras bu ni de yin par shes par bya'o//da ni bzhed pa'i don bsgrubs nas/ de lta bas na zhes bya ba la sogs pas mjug sdud par mdzad de/ de man chad ni chos kyi rnam grangs kyi che ba nyid bstan to/ /mjug bsdus pa de yang rnam pa gnyis te/ brjod zin pa'i don bsnyad pa dang / ma brjod pa'i don bsnyad pa'o//ma brjod pa'i don bsnyad pa yang rnam pa gsum ste/ gnod sbyin gyi phan yon bsnyad pa dang / byang chub sems dpa'i phan yon bsnyad pa dang / 'chad pa'i tshe'i phan yon bsnyad pa'o/ /brjod zin pa bsnyad pa yang rnam pa lngar mdzad de/ chos kyi rnam grangs la rjes su yi rang ba tsam gyis gzung ba bsnyad pa dang /de'i 'bras bu bsnyad pa dang / sbyor bas gzung ba bsnyad pa dang / de'i 'bras bu bsnyad pa dang / tshigs su bcad pa dag gis gsungs pa'i don bsnyad pa'o/ /rjes su yi rang ba tsam gyis bcom ldan 'das shAkya thub pas bskal pa bye ba 'bum phrag bzhi khrir 'khor ba phyir bsnyil to//de bzhin du gzhan yang bsam pa'i stobs kyis de las lhag par yang phyir bsnyil bar byed de/ de lta bas na myur du zhes bya ba gsungs so/ /de'i gtan tshigs bka' stsal pa/ de ni mi ldog sa yi dang / gang gi phyir rjes su yi rang ba tsam dang ldan pa de rgyur 'gyur ba de ni des tshe gcig po de nyid la zhes bya ba la sogs pa gsungs pa yin no//rdzogs pa'i sangs rgyas mnyes bya ba'i/ /rgyur 'gyur bas na rgyu gang gis 'gyur ba de ni des bskal pa gsum du zhes bya ba la sogs pa gsungs pa yin no/ /de'i phyir rgyu gnyis kyis/ de yis byang chub myur du 'thob/ /de thams cad myur du byang chub 'thob pa'i rgyu kho nar gnas pa yin no zhes bya ba'i tha tshig gis/ bla na med pa yang dag par rdzogs pa'i byang chub kyi ched du zhes bya ba 'di ni rgyu'i don to/ /chos smra ba rnams ni sangs rgyas bcom ldan 'das rnams so/ /sbyor bas gzud pa bsnyad pa ni yi ger 'dri ba la sogs pa rnam pa bdun gsungs pa yin no//don dang yi ge gnyi ga las/ /'dir ni kun chub byed par bstan/ /don dang yi ge gnyi ga'i sgo nas kun chub par byed pa ni/ kun chub par byed pa ste/ kun nas chub par byed pa'i phyir ro/ /yang na bsam pa la sogs thams cad dang /'dir yang kun chub par byed par bstan zhes bya ba dang sbyar ro/ /sogs pa smos pas ni bsgoms pa las byung ba'i shes pa bsdu'o/ /yang na yi ger 'dri sogs kun/ /'dir yang kun chub byed par bstan/ /zhes bya ba dang sbyar ro/ /sogs pa smos pas ni/lung nod pa dang / 'dzin pa dang / klog pa dang / tshul bzhin yid la byed pa la sogs pa bsdu'o/ /rigs pas 'gal ba ma yin dang / /yang na ji skad thos pa bzhin/ /yid la byed pa gang yin pa/ /de ni tshul bzhin yid byed yin/ /mngon sum la sogs pa'i tshad ma dang mi 'gal ba'i don yid la byed pa gang yin pa de ni tshul bzhin yid la byed pa zhes bya'o//yang na slob dpon gyi kha nas ji skad thos pa bzhin du yid la byed pa gang yin pa de ni tshul bzhin yid la byed pa ste/ slob dpon ni yang dag pa nyid kyi lung 'bogs pa la bya'o/ /don dang yi ge'i sgo nas ni/chos kyi rnam grangs 'di rgya cher yang dag par rab tu ston pa gang yin pa de rgya cher yang dag par ston par byed/ sbyor ba dang / 'grub pa dang / yongs su rdzogs pa chung ngu dang / 'bring dang / chen po la sogs pa'i bye brag gis so/ /yang na rnam pa thams cad du//gzungs 'di yang dag rab ston byed/ /de ni rgya cher yang dag par rab tu ston pa'o/ /de yi de ni bdag nyid kyis/ /tshad mas shes par mi nus la/ /bsod nams kyi phung po de'i tshad ni/ nyan pa po de'i bdag nyid dam/ ston pa pos kyang mngon sum la sogs pa'i tshad mas shes par mi nus la/ston pa po gzhan dag gis ni bstan na yang / nyan pa pos tshad de ni bsam par mi nus so/ /de ltar na bsod nams kyi phung po de'i tshad ni/ shes par byar med pa dang / bsam gyis mi khyab pa kho nar de gnyis las mngon no/ /shes bya ma lus mkhyen pa'i phyir/ /'dren pa rnams kyis de'i tshad de//mngon sum yongs su mkhyen pa dang / /dgongs par yang ni spyod pa yin/ /de bas na de bzhin gshegs pa ma gtogs par zhes gsungs pa'i lhag ma'o/ /blo rmongs rnams dang ma 'dus dang / /skye bo blo ni g.yengs rnams phyir/ /don de tshigs su bcad rnams kyis//thub pa yis ni bzlas te gsungs/ /gang dag gis don thos kyang blo rmongs pa'i phyir legs par khong du ma chud pa rnams dang / gang dag don de bstan pa'i dus na ma 'dus te phyis lhags pa rnams dang / gang dag der 'dus kyang blo rnam par g.yengs pa'i phyir don de ma thos pa dag yod de/de dag thams cad la phan gdags pa'i phyir dang / bdag nyid nges pa'i tshigs so so yang dag par rig pa thob pa yin par bstan pa'i phyir yang don de nyid tshigs su bcad pa dag gis bzlas te gsungs so/ /dgongs pa 'di ni gzhan dag tu tshigs su bcad de gsungs pa la yang de bzhin du shes par bya'o//tshigs su bcad pa rnams ni rnam pa drug gis bstan te/ bsod nams kyi phung po tshad med par bsnyad pa dang / de'i 'bras bu bsnyad pa dang / sngon byung ba bsnyad pa dang / tshegs chung ngus 'bras bu 'grub par bsnyad pa dang / dpe bstan pas bsod nams kyi phung po dpe med par bsnyad pa dang /smra bar 'dod pa'i don bsgrubs nas mjug bsdu ba bsnyad pa'o/ /bsod nams kyi phung po tshad med par bsnyad pa ni mdo sde thob dang zhes bya ba la sogs pa rnam pa lngas bstan to/ /de dag kyang mtshon pa yin te/ des na lung nod pa dang kun chub par byed pa dang tshul bzhin yid la byed pa dang /gzhan la ston pa yang bsdu'o/ /de'i 'bras bu bsnyad pa ni rnam pa bcu ste/ tshe rabs thams cad du sangs rgyas mthong ba dang / sangs rgyas de dag la dad pa bsam gyis mi khyab pa rnyed pa ste/ dad pa bsam gyis mi khyab pa ni 'bras bu bsam gyis mi khyab pa 'phen pa'i phyir dang chen po'i chen po yin pa'i phyir ro//mdo sde zab mo tshul shes pa ste/ mdo sde zab mo gang du skye ba med pa dang / 'gag pa med pa la sogs pa ston pa de dag gi tshul ni yang dag pa'i kun rdzob nye bar bzung ste de dag bstan pa dang / don dam par de dag bstan pa la sogs pa'i dgongs pa'o//bla na med pa yang dag par rdzogs pa'i byang chub ches myur du rtogs par 'gyur ba dang / ting nge 'dzin las nyams par mi 'gyur te/ ting nge 'dzin nam mkha'i mdzod la sogs pa'o/ /mngon par shes pa las nyams par mi 'gyur ba ste/ mngon par shes pa ni drug go//de la zag pa zad pa'i mngon par shes pa med pa nyid yin na/ de las nyams par mi 'gyur bar ji snyed du brjod/ de ni bden te/ thob pa yongs su nyams par 'gyur ba'i nyams pa ni med mod kyi/ ma thob pa'i yongs su nyams par 'gyur ba ni yod pa nyid de/ mi nyams pa ji lta bu zhe na/ ma thob pa de bskyed par 'os pa'i bdag nyid du gnas pa'o/ /gzungs nyams par mi 'gyur ba ste/ gzungs ni sgo mtha' yas pas bsgrub pa la sogs pa'o/ /gzungs nyams par mi 'gyur ba ste gzungs ni skyes bu chen po'i mtshan sum cu rtsa gnyis la sogs pas brgyan pa'o//longs spyod rnams nyams par mi 'gyur ba ste/ longs spyod ni rdzas la sogs pa 'byor ba'o/ /sangs rgyas mthong ba las nyams par mi 'gyur ba ste/ mthong ba smos pas ni mtshon pa'i don de bsnyen bkur byed pa la sogs pa yang bsdu'o/ /bla na med pa'i byang chub la reg par ma gyur gyi bar du zhes 'byung na/ci byang chub thob zin pa la de dag nyams par 'gyur ba yod dam zhe na/ de ni med do/ /byang chub thob pa'i snga rol na yang nyams par 'gyur ba med na/ byang chub thob zin pa lta la ha cang yang ches med snyam du dgongs nas gsungs pa yin no//sngon byung ba bsnyad pa ni rnam pa gnyis te/ rjes su dran pa bsnyad pa ni/ rjes su dran pa bsnyad pa de yang / mngon sum mtshon pa'i don to/ /dran pa ni nyams su myong ba sngon du 'gro ba'i phyir ro/ /'dis ni 'di ni nga'i mngon sum du gyur pa yin te/ de bas na 'di la the tshom ma byed cig ces bya bar ston to//rjes su dran pa'i yul bsnyad pa de yang / dus dang rigs dang / thos pa dang / gzungs kyi khyad par gyi rgyu las byung ba la sogs pa'i yul gyi bye brag bstan par ches brtan por nges pa bskyed pa'i phyir ro/ /sangs rgyas bye ba phrag dgu bcu zhes gsungs sam//gang gA'i bye ma snyed ces ji skad du bya zhe na/ nyes pa med de/ de ni 'bras bu khyad par du 'phags pa thob par bsnyad pa'i phyir dus gzhan la dgongs nas gsungs te/ sngon rol du des sangs rgyas bcom ldan 'das gang gA'i bye ma snyed mthong ba'i phyir ro/ /'dod bzhin zhes gsungs pa ni/gzungs thob pa'i mthus nyon mongs pa med par byang chub thob par bsnyad pa'i phyir ro/ /'od zer mtha' yas pa smos pa ni zla ba'i tog mtshon pa'i phyir/ yang na shes pa'i bdag nyid dam/ lus dang 'brel ba'i 'od zer mtha' yas pa gang la yod pa ni 'od zer mtha' yas pa ste/de yang mar me mdzad dang / tshong dpon gyi bu la sogs pa thams cad kyi khyad par yin no/ /tshogs chung ngus 'bras bu 'grub par bsnyad pa ni rnam pa gsum gyis bstan te/ byang chub thob pa dang / bdud bcom pa ste/ bdud smos pas ni nyon mongs pa dang /lha'i bu dang / phung po dang / 'chi bdag gi bdud rnams bsdu'o/ /bsod nams brgyas mtshan 'grub pa ste/ skabs 'dir yang myur du zhes bya ba dang sbyar ro/ /bsod nams brgya'i tshad ni/ 'phags pa dkon mchog sprin la sogs pa'i mdo las shes par bya'o/ /byang chub la reg pa zhes bya ba la sogs pa rnams ni/gcig bstan pas gzhan gnyis kyang bstan pa kho nar 'gyur te/ 'khrul pa med na ci'i phyir gsum char gsungs she na/ 'bras bu'i rab tu dbye ba bsnyad pas/ gzungs la brtson pa la gus pa'i khyad par bskyed pa'i phyir ro/ / dpe bstan pas bsod nams kyi phung po dpe med pa bsnyad pa ni/ gang gA'i klung gi bye ma snyed ces bya ba la sogs pas bstan te/ gzhi dang mang dang rdzas bzang dang / /yongs su bkang ba'i bye brag gis/ /sbyin par bya ba'i khyad las 'dir/ /sbyin pa khyad par 'phags par bstan/ / sbyin pa'i khyad par ni 'dir sbyin par bya ba'i khyad par rnam pa bzhi las bstan te/ de la gzhi'i khyad par ni/ 'jig rten khams te/ de yang stong gsum gyi stong chen po'o/ /mang po'i khyad par ni/ gang gA'i klung gi bye ma snyed de/ des na gzhi tshad che ba dang / grangs mang bar de ltar bstan to//rdzas bzang ba'i khyad par ni/ rin chen rnams so/ /yongs su bkang ba'i khyad par ni byur bur bkang ba ste/ des na bcud kyi rigs che ba dang / grangs mang bar de ltar bstan to/ /bsod nams de lta bu yang yi ger bris pa tsam mam/ yang na bzung ba tsam gyis yin par shes par bya'i/gnyi ga'i ni ma yin no/ /'di yang mtshon pa yin te/ des na lung nod pa la sogs pa tsam gyis yang de bzhin du khong du chud par bya'o/ /smra bar 'dod pa'i don bsgrubs nas mjug bsdu ba bsnyad pa ni rnam pa gsum ste/ rgyu dang / sla ba dang 'bras bu'o/ /de la rgyu yang rnam pa brgyad de/gzungs nyan pa dang / sems gtod pa dang / dad pa dang / gzungs 'dzin pa ste/ de yang yi ge dang / don gnyi ga'i sgo nas ji lta ba bzhin du shes pa dang / tshul khrims dang ldan pa ste/ tshul khrims dang ldan pa nyid mkhas pa yin pa'i phyir ro/ / de yang dge slong dag /lnga po 'di dag mkhas pa rnams kyi mkhas pa'i mtshan nyid do zhes gsungs pa lta bu'o/ /byang chub tu smon lam 'debs pa dang / gzungs yi ger 'dri ba dang / glegs bam du byas te 'chang ba'o/ /sems pa ni phyin ci ma log pa'i tshul gyis so/ /'dir sems gtod pa dang /dad pa ni nyan pa dang 'dzin pa ji lta ba bzhin du shes pa dang / byang chub tu smon lam 'debs pa dang / yi ger 'dri ba 'chang ba 'am/ sems pa'i rgyur 'gyur bar sbyar ro/ /sla ba ni rnyed par dka' ba med ces bya ba 'dis bstan to/ /'bras bu ni bla na med pa'i byang chub po/ / da ni sgo mtha' yas pas bsgrub pa'i gzungs 'di la zhes bya ba la sogs pas gnod sbyin gyi phan yon bstan te/ gzungs kyi chos kyi rnam grangs la/ /mngon par brtson pa gang yin pa/ /de ni gzungs la brtson zhes bya/ /de ltar skabs kyis mngon pa yin/ /gzungs kyi chos kyi rnam grangs la mngon par brtson pa gang yin pa de ni/gzungs 'di la mngon par brtson pa zhes bya bar 'dod do/ /ji lta zhe na/ des sgo mtha' yas pas bsgrub pa'i gzungs kyi chos kyi rnam grangs 'di de bzhin gshegs pa de las thos te zhes bya ba la sogs pas gzungs kyi chos kyi rnam grangs thog ma kho nar dmigs kyis glengs pa'i phyir ro//phan yon bsnyad pa de yang rnam pa bdun gyis bsnyad de/ de la rigs ni grangs na gnas pa rnams rigs che bar bsnyad pa'i phyir dang / grangs ni yi ge 'bru brgyad bsgom pa'i mthu bstan pa'i phyir dang / gzi byin 'jug par byed pa dang / nyin mtshan du srung zhing skyob la sbed pa ste/ 'di gnyis ni chos kyi rnam grangs kyi che ba nyid shes par bya ba dang / bdag nyid bstan pa la phan 'dogs pa por shes par bya ba dang / bcom ldan 'das la bka' drin du gzo ba shes par bya ba'i phyir ro/ /lus dang ngag dang blo gros la/ /stobs dang gzi brjid rab rno ba//rim bzhin gzi brjid shes par bya/ /lus kyi sgra des lus gnas bsdu/ /lus kyi stobs gang yin pa dang / tshig gi gzi brjid gang yin pa dang / blo'i rno ba gang yin pa de gsum la gzi byin zhes bya'o/ /lus zhes bya ba'i sgra gang yin pa de ni gtso bo lus yin pa'i phyir ro//lus la gnas pa'i tshig dang blo gnyis ni yon tan gyi brdar rig par bya'o/ /lus ni rnam gsum bye brag gis/ srung skyob sbed gsungs yang na ni/ /gang phyir gnam bskos la sogs pa'i/ /bye brag gis ni gnod pa gsum/ /las mi dge ba rnam pa gsum yod de/ tshe 'di la myong bar 'gyur ba dang / skyes nas myong bar 'gyur ba dang / lan grangs gzhan la myong bar 'gyur ba ste/ de dag las gyur pa'i gnod pa'i gnyen por/ srung ba dang / skyob pa dang sbed pa rnams go rims bzhin du bcom ldan 'das kyis bka' stsal to/ /yang na gang gi phyir gnam gyis bskos pa la sogs pa'i bye brag gis gnod pa rnam pa gsum du 'gyur te/de'i phyir srung ba dang / skyob pa dang / sbed pa gsum go rims bzhin du gsungs te/ gnam gyis bskos pa'i gnod pa ni gong du mi dge ba kho nas byas par mngon gyi/ srog chags gzhan gyis byas pa ma yin pa ste/dper na mi ngas dang / mu ge dang / thog la sogs pa 'bab pa lta bu'o/ /mi las gyur pa'i gnod pa ni/ /gang du srog chags rnams kyis gnod par byas par mngon la/ gnam gyis bskos pa yod bzhin du mi mngon pa/ gang gi phyir las ma gtogs par 'bras bu ci yang med pa'i phyir te/dper na lo tog la sogs pa smin du zin kyang / pha rol gyi dmag tshogs kyis gnod par byas te mu ger gyur pa la sogs pa lta bu'o/ /gnam gyis bskos pa dang mi las gnod par gyur pa ni gang du gnyi gas byas par mngon pa'o/ / las ni gnam gyis bskos pa dang / mi las gyur pa kho nar zad de/ gnam gyis bskos pa dang / mi'i las kyis 'jig rten 'tsho bar byed do zhes zer ba lta bu'o/ /yang na bdag gzhan rkyen gyur las/ /gnod pa rnam gsum shes par bya/ /sems can sems can min bgrang ba'i//bye brag gis ni gzhan gnyis bstan/ /yang na gnod pa rnam pa gsum yod de/ rang gi rkyen las gyur pa dang / gzhan gyi rkyen las gyur pa'o/ /gzhan gyi rkyen las gyur pa 'ang rnam pa gnyis te/ sems can du mi bgrang ba'i rkyen las gyur pa dang / sems can du bgrang ba'i rkyen las gyur pa'o//de bsdus na rnam pa gsum du 'gyur te/ de'i gnyen por srung ba dang / skyob pa dang / sbed pa gsum po go rims bzhin du shes par bya'o/ /ming gi khyad par ni gdul ba rnams mngon par yid ches pa bskyed pa'i phyir ro/ /gnod sbyin rnams 'ong bar bya ba'i cho ga bstan pa ni/rnam pa lngar gsungs pa ste/ ji lta zhe na/ mngon du phyogs par bya ba gnyis/ /'ong bar bya ba'i phyir gsungs te/ /'ong bar bya ba'i phyir shin tu khrus bya ba dang / gos shin tu gtsang ma bgo bar byas na/ gnod sbyin de dag mngon du phyogs par byed de/ 'di ltar shin tu khrus bya ba yang rnam pa gnyis te/ phyi rol gyi cho ga dang sbyar te chus bkru ba dang / nang gi tshul khrims yongs su dag pas so/ /gos shin tu gtsang ma bgo ba yang rnam pa gnyis te/ phyi rol gyi bgo ba gtsang ma la sogs pas lus g.yogs pa dang / nang gi byams pa la sogs pas sems kyis lus dkri ba ste/pha rol dang nang rnam par dag pas mdzes pa mthong na gnod sbyin de dag 'ong bar spro bar 'gyur ba'i phyir te/ de ltar na 'ong ba'i phyir spro ba skyed par 'gyur ro/ /gcig gis spro bar bya ba bstan/ /'chag par 'gro ba zhes bya ba'i tshig gis bstan te/ gnod sbyin rnams ni 'dong bya'i phyir/ /'chag pa bsu ba'i bsam par bstan/ /de lta min du zin na ni/ /de yis lhag par ci zhig bstan/ /de ltar don du gnyer shes nas/ /'ong bar spro ba'i sems ldan rnams/ /spro ba'i mthu la dmigs nas ni/ /de dag nges par 'ong bar 'gyur/ /de dag ni brda phrad par sla bas ma bshad do//gnyis kyis de dag gus skyes/ /zhe 'gras pa med pa'i sems dang / chos kyi rnam grangs yid la byed pa gnyis ni gnod sbyin de dag gus pa skye bar 'gyur te/ 'di ltar zhe 'gras pa med pa'i sems kyis bsam pa dge bar gyur pa'i phyir/ /yon tan la gus pa skye ba dang /chos kyi rnam grangs yid la byed pas chos la gus pa skye bar 'gyur ro/ /de ltar 'ong 'dod pa'i spro ba skyes nas kyang / de dag gus par nges pa kho na bzhin ston par 'gyur ba'i phyir/ de la zhes bya ba la sogs pa gsungs so/ /gnod sbyin de dag lhags nas ni/ /brtan bzhin brtul zhugs spyod de la/myur du gzungs kyi sgo rnams ni/ /the tshom med par ston par byed/ /sgo zhes bya ba'i sgras ni sgo zad mi shes pa'i gzungs kyi sgo la sogs pa bsdu'o/ /tshigs su bcad pa'i don lhag ma ni ma bshad do/ /yang na/ yan lag kun gyi gtso bo bzhin/ /bsnyad pas de dag blo dga' bas//lhags pa yin te de dag las/ /'bras bur 'gyur bar the tshom med/ /dga' bar ma gyur na bzhin ston par mi byed do snyam du dgongs so/ /byang chub sems dpa'i phan yon bsnyad pa ni rnam pa drug ste/ grangs dang / rim pa dang / sems pa dang / ming dang gzungs thob par bya ba'i phyir mngon par brtson pa dang /gzungs la brtson pa la gzungs ston pa'o/ /yi ge brgyad po de dag ni/ /byang chub sems dpa' brgyad po yin/ /de'i phyir don de bsgom pa la/ /de dag thams cad phan 'dogs so/ /pa zhes bya ba la sogs pa'i yi ge brgyad po de dag ni/ /rnam par snang byed la sogs pa'i byang chub sems dpa' brgyad po dag gi yin te/de dag gi ting nge 'dzin ston pas na/ de'i phyir/ yi ge de dag ni don bsgom pa na de dag thams cad phan 'dogs par byed par 'os pa ste/ de'i phyir brgyad ces gsungs so/ /gzhan la phan 'dogs zhugs pa'i phyir/smon lam stobs kyis de dag rnams/ /de dang der ni skyed byed pa/ /gang yin de la the tshom med/ /gang gi phyir byang chub sems dpa' 'di dag ni blo snying rjes dbang du byas shing pha rol la phan par bya ba la gzhol bas/ 'dod pa na spyod pa'i lha rnams kyi nang du de dang der skye bar byed de/de'i phyir de dag kyang de la zhes bya ba la sogs pa 'di gsungs pa gang yin pa de la the tshom mi bya bar nges pa kho nar gzung bar bya ste/ 'di la 'khrul pa bskyed par mi bya'o zhes bya ba'i tha tshig go/ /gnod sbyin gyi rigs bsnyad pa na yang 'di nyid dgongs te/ de dag byang chub sems dpa' nyid yin la/mngon par shes pa chen po gnod sbyin gyis gdul pa rnams la phan gdags pa'i phyir/ /'phags pa lag na rdo rje bzhin du skyes pa yin te/ de lta bu yin gyi byang chub sems dpa' min na de lta ma yin na ni/ gnod sbyin de dag mthu med pa'i phyir/ gzungs la brtson pa 'jig rten gyi khams gzhan dag na 'khod pa rnams la phan 'dogs par mi byed pas/ gnod sbyin gyi phan yon bsnyad pa khyab pa ma yin par 'gyur ro/ /sems dpa' zhes ni gsungs pa 'di/ /sems ni snying rjes brlan rnams kyis/ /phan par bya ba 'dod pa'i blos//snying brtse nas ni bltas pa yin/ /tshigs su bcad pa 'di'i don ni gsal ba'i phyir ma bshad do/ /rgyal ba'i sras po de dag ni/ /phan pa nye bar bsgrub pa dang / /gnod pa med par spongs pa yis/ /gzungs thob bya phyir mngon par brtson/ /phan pa ni dge ba'i bshes gnyen la brten pa dang / bsod nams dang ye shes kyi tshogs bsgrub pa dang / mthu yod par bya ba la sogs pa'o/ /gnod pa ni sdig pa'i grogs po dang 'dre ba dag /rgod pa dang 'gyod pa la sogs pa'o/ /phan pa dang gnod pa de gnyis go rims bzhin du bya ba dang / gsal bas byang chub sems dpa' des gzungs thob par bya ba'i phyir/byang chub sems dpa' brgyad po de dag brtson par 'gyur ro/ /gzungs la brtson pa'i bya ba bstan pa yang rnam pa bdun du gsungs te/ dam bcas pa la brtan pa dang / byas pa gzo ba dang / byas pa tshor ba dang / chos 'dod pa dang / chos la dga' ba dang / zab mo'i chos la bzod pa la brtson pa dang /bgo bsha' byed pa'i ngang tshul can du bya ba'o/ /gzungs la brtson byed gang zhe na/ /gang zhig nyan sems rjes yi rang / /'di dang lung nod 'don la sogs/ /ston pa'i tshul gyis brtson byed pa'o/ /sogs pa smos pas ni 'dzin pa dang / kun chub par byed pa dang /tshul bzhin yid la byed pa la sogs pa bsdu'o/ /lhag ma'i don ni gsal bas ma bshad do/ /gzungs bskyed cho ga rgyal ba yis/ /bdag gzhan ltos la bzlas te gsungs/ /ston pa la sogs bye brag gis/ /gzhan ni rnam pa gsum du 'gyur/ /sngar yang bcom ldan 'das kyis gzungs bskyed pa'i cho ga gsungs mod kyi/da yang bdag dang gzhan la ltos pa'i sgo nas gsungs te/ de la bdag la ltos pa ni/ bden par dam bca' bar bya'o zhes bya bas bstan to/ /bden par dam bca' ba ni brtan por dam bca' ba'o/ /de 'dra ba de ni gzungs nges par skyed par byed de/'di ltar des gzungs bdag gis bskyed par bya'o zhes dam bcas na/ de ni de ma bskyed kyi bar du bar ma dor phyir mi ldog go/ /lhag ma rnams kyis ni gzhan la ltos pa'i sgo nas gzungs bskyed par bya ba'i cho ga bstan te/ gzhan po de yang / ston pa dang / chos dang / 'du ba'i bye brag gis rnam pa gsum du 'gyur te/ de la ston pa'i ltos pa ni/ byas pa gzo ba dang / byas pa tshor ba can zhes bya ba 'di gnyis kyis gzungs bskyed pa'i cho ga bstan te/ 'di ltar bcom ldan 'das dang / 'brel ba'i skyabs gsum thob pa la sogs pa bka' drin dran nas/des gsungs pa bzhin du nges pa kho nar sgrub par byed de / des gsungs pa'i gzungs ni don chen po yin pas na bskyed dgos so snyam pa'i phyir ro/ /sus byas pa tshor ba de yang nges pa kho nar gzungs skyed par byed de/ 'di ltar gzungs bsgrubs pas bcom ldan 'das kyi bka' drin tshor ba'i phyir ro//de byas pa tshor bar byed pa'i ngang tshul can yin pas na byas pa tshor ba can no/ /chos la ltos pa ni chos 'dod pa zhes bya ba la sogs pas gzungs bskyed pa'i cho ga bstan te/ gang gi phyir su chos la 'dod cing sred pa de ni nges par gzungs bskyed par 'gyur te/de ni chos kyi mchog yin pa'i phyir ro/ /chos la dga' ba ni/ gang chos la shin tu zhugs pa ste/ de lhur len pa'i phyir ro/ /de 'dra ba de ni gzungs ma bskyed par mi 'dug go/ /zab mo'i chos la bzod pa la brtson pa ni ga la zhig gzungs bskyed par mi byed de/ de ni mchog tu zab pa'i phyir ro/ /gzhan gyi don gyi phyir yang gzungs 'di bskyed par bya ba'i phyir/ byang chub sems dpa' sems dpa' chen po gzungs la brtson pas zhes bya ba la sogs pa gsungs te/ chos dang zang zing bye brag gis/ /bgo bsha' rnam pa gnyis su bstan//bgo bsha' ni rnam pa gnyis te/ chos kyi bgo bsha' dang / zang zing gi bgo bsha'o/ /dang tshul smos pas ni bgo bsha'i ngo bo nyid bstan te/ des na sems kyi shin tu 'dzin pa med par bstan to/ /chung dang nyung dang mang po ni/ /rdzas dang grangs dang gnyi gar bstan/ / chung ngu ni rdzas chung ba'i phyir ro/ /nyung ngu ni grangs nyung ba'i phyir ro/ /mang po ni rdzas dang grangs mang ba'i phyir ro/ /gzungs don bstan pa yin mod kyi/ /'on kyang spyir yang bstan pa mdzad/ /byas gzo la sogs gzhan du yang / /bya ba'i phyir na gsungs pa yin/ /gzungs kyi don bstan pa'i skabs yin mod kyi spyir bstan te gsungs pa'i byas pa gzo ba la sogs pa gang yin pa de ni gzhan du yang bya dgos pa'i phyir don de bstan pa'i tha tshig go//bshad pa'i tshe phan yon bsnyad pa ni rnam pa gnyis te/ phyir mi ldog pa'i sa 'thob pa dang / bla na med pa'i byang chub tu sems bskyed pa'o//de yang / 'dir ni gtso bor thub pa yis/ /'bras bu gnyis su bstan pa yin/ /ji lta zhe na/ smras pa/ mtho ris la sogs 'bras bu ni/ /gzhan bstan pa las rtogs par 'gyur/ /bcom ldan 'das kyis bstan pa ni thams cad kyang lha dang mi la sogs par skye ba dang / rgyal srid la sogs pa dang mi 'bral bar 'phen pa yin no/ /'bras bu 'di gnyis gtso bor bstan pa yang byang chub chen por nges par 'gyur ba'i rgyu yin pa'i phyir dang / gzhir gyur pa'i phyir ro/ /phyir mi ldog pa'i sa thob pa ni/ byang chub sems dpa' rnams kho na yin pa'i phyir/ snga ma'i skabs su byang chub sems dpa' smos so//bla na med pa yang dag par rdzogs pa'i byang chub tu sems bskyed pa ni byang chub sems dpa' ma yin pa kho na dag byed pa yin pas na/ phyi ma'i skabs su ni byang chub sems dpa' ma smos so/ /da ni ming zhus pa brjod par bya ste/ bdag dang gzhan don rim bzhin du//zhus pa dang ni dgos pa bstan/ /yang na don ni che ba'i phyir/ /tshig gnyis kyis ni bzlas te zhus/ /'di'i ming ci lags zhes bya bas ni ming zhus pa bstan to/ /ming zhus pa dgos pa med du dogs pa la/ 'di ji ltar gzung bar bgyi zhes bya bas dgos pa bstan te/ tha snyad gdags pa'i dus na 'di ji ltar gzung bar bgyi zhes bya ba'i tha tshig go//des na phyis tha snyad gdags pa'i bya ba zhus pa'i dgos pa yin par bstan pa yin no/ /yang na 'di'i ming ci lags zhes bya ba ni bdag gi don du zhu ba'o/ /'di ji ltar gzung bar bgyi zhes bya ba ni gzhan gyi don du zhu ba ste/ de dag kyang tha snyad gdags par bya ba'i phyir chos kyi rnam grangs kyi ming thos par 'dod na/ chos kyi rnam grangs 'di gzhan dag 'dzin na ji ltar 'dzin du gzhug par bgyi zhes bya ba'i tha tshig go/ /yang na chos kyi rnam grangs 'di don che ba'i phyir/ dad pas 'dun par byas pa'i sems kyis yang dang yang du ming zhu bar byed do//yang zhes bya ba ni ma smos pa bsdu ba'i don te/ de bas na tshig gnyis kyis bdag nyid kyi ming thos par 'dod pa bstan te/ 'di ltar spyir zhus mod kyi/ 'on kyang bdag nyid la bsdu ba'i phyir/ 'di ji ltar gzung bar bgyi zhes smras so/ /da ni ming 'dogs pa bstan te/'di ni go rims kho na bzhin/ /rgyu dang 'bras bu'i dngos po yis/ /ming ni rnam pa bzhir mdzad de/ /de phyir mi nyung lhag pa med/ /ming rnam pa bzhi po 'di ni chos kyi rnam grangs 'di'i brgyud pa'i 'bras bur 'gyur ba gang yin pa de'i rgyu dang 'bras bu'i dngos por 'dug pa'i phyir te/sa dang pha rol tu phyin pa dang / ting nge 'dzin dang / rnam par thar pa dang / mngon par shes pa la sogs pa'i yon tan rnams sgo mtha' yas pas bsgrub pa'i phyir na chos kyi rnam grangs 'di'i ming sgo mtha' yas pas bsgrub pa zhes bya'o/ /gang gi phyir 'di'i ming sgo mtha' yas pas bsgrub pa zhes bya ba de'i phyir/'di'i ming byang chub sems dpa' gcig tu nges par mngon par 'phags par byed pa zhes bya bar yang zung shig ces gsungs te/ gang gi phyir rgyu de lta bu las 'bras bu de lta bu nges par 'byung ba'i phyir ro/ /gcig tu nges par zhes bya ba ni ldan pa'i don te/'di las byang chub sems dpa' gcig tu nges par mngon par 'phags par 'gyur ro zhes bsdu bar bya'o/ /mngon du phyogs pas gong nas gong du khyad par 'thob pa'i phyir 'phags pa ni mngon par byed pa'o/ /gang gi phyir 'di'i ming byang chub sems dpa' thams cad gcig tu nges par mngon par 'phags par byed pa zhes bya ba de'i phyir/'di'i ming bdud thams cad rnam par 'jig par byed pa zhes bya bar yang zung shig ces gsungs te/ 'bras bu ni rgyu dang 'dra ba'i phyir ro/ /bdud smos pas ni nyon mongs dang / lha'i bu'i bdud bsdus te/'dis bdud thams cad rnam par 'jig pa'i phyir zhes tshig sbyar bar bya'o/ /gang gi phyir 'di'i ming bdud thams cad rnam par 'jig pa zhes bya ba'i phyir/ gcig tu nges par rnam pa thams cad mkhyen pa nyid thob par byed pa zhes bya bar yang zung shig ces gsungs te/de gcig tu yang nges pa yin la/ thams cad mkhyen pa nyid thob par byed pa yang yin no zhes tshig sbyar bar bya'o/ /yang na 'bru mang po ma yin par sbyar ro/ /gang gi phyir de lta yin pa de'i phyir 'bras bu gzhan yod pas na mi nyung ba yang ma yin la/ de yan chad 'bras bu med pa'i phyir lhag pa med do//lugs 'byung lugs 'byung ma yin las/ /sgrub dang bsgrub bya'i dngos po yis/ /ming ni rnam pa bzhir mdzad de/ /de phyir mi nyung lhag pa med/ /yang na lugs su 'byung ba'i tshul gyis snga ma snga ma ni rgyu yin la/ phyi ma phyi ma ni bsgrub par bya ba yin pa'i phyir ming rnam pa bzhir mdzad do//lugs su 'byung ba ma yin pa ni phyi ma phyi ma ni rgyu yin la/ snga ma snga ma ni bsgrub par bya ba yin pa'i phyir/ ming rnam pa bzhir mdzad de/ ltos pa dang bcas pa'i phyir/ nyung ba yang ma yin la/ sgrub pa po'i ltos pa med pas/ ming gzhan byar med pa'i phyir/lhag par yang ma mdzad do/ /bshad pa 'di'i skabs su bdud smos pas ni bdud thams cad bsdu'o/ /yang na yon tan thams cad dang / /ye shes phun sum spong phun sum/ /khyad par 'phags pa phun sum gyi/ /rten ni de nyid yin phyir ro/ /yang na chos kyi rnam grangs 'di ni/phun sum tshogs pa rnam pa bzhi'i rten yin te/ de'i phyir ming rnam pa bzhir mdzad do/ /phun sum tshogs pa rnam pa bzhi ni/ yon tan thams cad phun sum tshogs pa dang / ye shes phun sum tshogs pa dang / spang pa phun sum tshogs pa dang / khyad par 'phags pa phun sum tshogs pa ste/khyad par 'phags pa phun sum tshogs pa zhes bya ba ni gong nas gong du zhes bya ba bar gyi tshig mi mngon par byas nas bstan pa yin no/ /ye shes phun sum tshogs pa la sogs pa ni yon tan thams cad phun sum tshogs pa'i khongs su yang 'dus mod kyi gtso bor bstan pa'i phyir logs shig tu bstan to//phun sum tshogs pa ni gud na ci yang med pa'i phyir ming rnam pa bzhir mdzad de/ lhag pa yang med la nyung ba yang mi nyung ngo / /spang ba ni bdud thams cad 'jig pa ste/ de yang lha'i bu la sogs pa ni zil gyis gnon pa'o/ /'dod chags la sogs pa ni bag chags dang bcas pa rtsa nas 'don pa'o//sngar ni gzungs kyi ming du bstan par mdzad la/ da ni chos kyi rnam grangs kyi ming du bstan pas na zlos bur 'gyur bar dogs par mi bya'o/ /da ni yi rangs pa bstan te/ thub pa'i gsung las 'jig rten gyis/ /don chen skyes pa mthong gyur nas//sems ni rangs par gyur pa'i phyir/ /mkhas rnams mngon par bstod par byed/ /thub pa'i gsung las rkyen rkyen du/ /khyad par thob par gyur nas ni/ /yid kyang dga' bar gyur pa'i phyir/ /mkhas pas kha cig mngon par bstod/ /bcom ldan 'das kyis 'di bstan pas lha dang mi rnams kyis 'khor los sgyur ba'i rgyal srid la sogs pa dang /bla na med pa'i byang chub tu sems bskyed pa dang / phyir mi ldog pa'i sa dang / pha rol tu phyin pa yongs su rdzogs pa dang / ting nge 'dzin dang / rnam par thar pa dang / mngon par shes pa dang / gzungs dang gzungs kyi sgo dang / so so yang dag par rig pa thob pa la sogs pa skal pa ji lta ba bzhin du/ dngos dang / brgyud pa'i sgo nas 'jig rten gyi don chen po skyes pa mthong nas thub pa'i dbang pos gsungs pa la/ shA ri'i bu la sogs pa mkhas pa rnams yid yang dag par dga' bar gyur nas bstan pa de nyid kyi mod la mngon par bstod do//bcom ldan 'das kyis bstan pa 'di lta bur shin tu rmad du byung ba gang gis lhag pa med pa'i don 'di lta bu 'jig rten ma lus pa'i don byed la/ bstan pa des kyang de nyid kyi mod la/ mkhas pa kha cig rgyu ji lta ba bzhin du byang chub tu sems bskyed pa dang /rab tu dga' ba la sogs pa'i sa thob pa'i khyad par so so rang gis rig par byed pa na yid yang dag par dga' nas mngon par bstod do/ /kha cig ces smos pa ni/ don yod mthong ba la sogs pa byang chub sems dpa' chen po rnams la de med pa'i phyir ro//gal te bdag gis kyang lhag pa 'ga' zhig thob par gyur na ni/ phyir mi ldog pa'i sa thob pa bzhin du/ khyad par du 'phags pa'i phyir/ de yang bstan par 'gyur ba zhig na ma bstan pas de'i phyir tshogs yongs su rdzogs pa de dag gis ni lhag pa 'ga' yang thob pa med de/'on kyang de dag der 'dus pa yang don med par mi 'gyur la/ bcom ldan 'das kyis chos bstan pa yang don med par mi 'gyur te/ sa yongs su rdzogs par bya ba la sogs pa'i yon tan rnams brgyud pa'i tshul gyis yod pa'i phyir ro/ /'phags pa shA ri'i bu la sogs pa dag gi nang nas ni skal pa ji lta ba bzhin du/kha cig gis ni phyir mi ldog pa'i sa thob la/ kha cig gis ni byang chub tu sems bskyed de/ de dag ni byang chub chen po'i rigs dang ldan pa nyid yin pa las ji zhig ltar nyan thos kyi byang chub la zhugs nas nyon mongs pa spang par byas par zad do//byang chub chen po'i rigs de nyid la brten nas/ de dag thams cad bcom ldan 'das kyis 'phags pa dam pa'i chos pad+ma dkar po'i mdo las lung bstan te/ chos bcu pa'i mdo las kyang / de bzhin du dgongs pas bshad pa'i phyir ro/ /tshong dpon dang / ded dpon gyi dpe la sogs pa rnams kyang byang chub chen po'i rigs dang ldan pa de dag nyid kyi dbang du byas pa khong du chud par bya'o//nyon mongs pa'i bud shing thams cad ma lus par bsregs pa'i rgyud can nyan thos rnams/ ji ltar byang chub chen po'i tshogs yongs su rdzogs par byed par 'gyur snyam du yang yid la mi bya ste/de'i don ni mdo gzhan las rnam par phye ba'i phyir ro/ /'dir ni gtam de shin tu rgyas pa dang ldan pa yin pas/ yi ge mangs su dogs pa'i phyir ma bshad do/ /tshe dang ldan pa shA ri'i bu yi rangs te/ bcom ldan 'das kyis gsungs pa la mngon par bstod do zhes bya bar sbyar te/nyan thos chen po la sogs pa'i tshogs rnams dang / de bzhin du so sor tshig gi don bstan pa'i lugs dang sbyar bar bya'o/ /gsal zhing dri med yon tan ldan pa shin tu rab tu gting dpag dka' bas nyams dga' gzungs sngags 'di/ /bdag 'dra nyon mongs shin tu blo zhan bzhin du bdag gis che long che long rnam par phye ba yis//bsod nams phung po skye bo phal chen rnams la skye ba'i mthu can gang yin pa/ /de dag thams cad kyis ni 'gro ba 'di dag kun gyis ye shes snying po rtag tu 'chang bar shog /'phags pa sgo mtha' yas pas bsgrub pa'i gzungs rgya cher 'grel pa slob dpon ye shes snying pos mdzad pa rdzogs so/